(གཙང་པ་)ཧའོ་རིན་པོ་ཆེ་ཚེ་དབང་དོན་གྲུབ། མི་ང་རང་གི་སྙིང་གི་རེ་བ་དང་བསམ་ཚུལ་ནི། འདས་རྟགས་ལས་ཀྱང་གསོན་རྟགས་མང་བ་འཇོག་པ་དེ་ཡག་པར་བརྩི་བཞིན་ཡོད། དེང་སང་རྙིང་མ་བ་འདས་རྟགས་བཞག་པ་མང་པོ་བྱུང་འདུག །ཉམས་ལེན་ལ་གྲུབ་འབྲས་ཆེ་བ་མེད་པའི་ཆོས་པ་མང་པོ་ལས་འདས་རྟགས་གང་མང་ཐོན་པ་དེ་སྤྱིར་བཟང་མོད། ཡིན་ཡང་ང་རང་ཧང་སངས་མ་བྱུང་ལ་དགའ་ཚོར་ཡང་དེ་ཙམ་མ་བྱུང་། རྒྱུ་མཚན་གང་ཡིན་ནམ་ཞེ་ན་མང་པོ་བཤད་མི་དགོས། རྙིང་མའི་རྩ་རྒྱུད་ཀྱི་བླ་མ་སངས་རྒྱས་དངོས་བྱོན་རྣམས་ལ་གསོན་རྟགས་དགའ་མང་ཡག་གསུམ་ཡོད་པ་ལས། འདས་རྟགས་བཟང་མང་བཞག་པ་མེད་པ་དེ་ཡིན། འདས་རྟགས་ཆེར་མེད་པའི་རྒྱུ་མཚན་ཡང་། བསྟན་པའི་དོན་དུ་རྙོག་འཛིང་གི་ལམ་བུ་མང་པོར་དཀའ་ངལ་མང་པོ་ལ་གདོང་གཏད་ནས་བསྐྱོད་པས་ཡིན་པ་རེད། རྒྱུ་མཚན་གཞན་ཡང་། འདིར་ལྷག་པའི་རྒྱལ་བསྟན་རིན་པོ་ཆེ་དར་ཞིང་རྒྱས་པ་ནི་གསོན་རྟགས་འཇོག་པར་མཛད་མཁན་རྐྱང་པའི་མཛད་རྗེས་ཁོ་ན་ཡིན། དེར་བརྟེན་ངས་བསམ་ན་རྒྱུ་མཚན་གཉིས་པོ་དེ་རྒྱུ་མཚན་སྟོབས་ཆེན་ཡིན་བསམ་གྱི་ཡོད། ངས་ཀྱང་མང་པོ་གང་ཡང་བསམ་ཤེས་ཀྱི་མེད། བླ་མའི་མཛད་རྗེས་ལ་དཔེ་ལྟ་རྒྱུ་དང་། དེའི་རྗེས་སུ་མ་འཇོན་ན་མ་གཏོགས་སྒྲུབ་རྒྱུ་ནི་ངའི་ལས་ཀའི་བྱེད་ཕྱོགས་གཅིག་པུ་དེ་ཡིན། དེར་ཧ་ཅང་གིས་གཙིགས་ཆེན་བྱེད་ཀྱི་ཡོད། གསོན་རྟགས་ཞེས་པ་ནི་མཁས་བཙུན་བཟང་གསུམ་གྱི་སློབ་མ་དགའ་ལ་མང་བ་གསོ་སྐྱོང་ཐུབ་པ་བྱེད་རྒྱུ་དེ་གཙོ་བོ་ཡིན་པ་ལས། དེ་མིན་ས་རྡོ་དང་གསེར་དངུལ་ཟངས་ལྕགས་ཀྱིས་དངོས་པོ་སྣ་མང་བསྐྲུན་པར་གསོན་རྟགས་རེད་ཟེར་གྱི་མེད། ཚེ་དོན་ནས། ༢༠༡༩ ལོའི་བོད་ཟླ་ ༣ ཚེས་ ༢ ལའོ།།