དག་ཡིག་ཉེར་མཁོ་བསྡུས་པ་ཤཱཀྱའི་དགེ་སློང་བློ་ལྡན་ཤེས་རབ་ཀྱིས་མཛད་པ་བཞུགས་སོ།།
༄༅། །དག་ཡིག་ཉེར་མཁོ་བསྡུས་པ་ཤཱཀྱའི་དགེ་སློང་བློ་ལྡན་ཤེས་རབ་ཀྱིས་མཛད་པ་བཞུགས་སོ།། རྔོག་ལོ་ཙཱ་བ་བློ་ལྡན་ཤེས་རབ།(༡༠༥༩-༡༡༠༩) ༄༅། །ན་མོ་གུ་རུ། དག་ཡིག་ཉེར་མཁོ་བསྡུས་པ་བཞུགས་ཞེས་བྱ་བ། འཇམ་པའི་དབྱངས་ལ་ཕྱག་འཚལ་ལོ། །འདིར་ཉེ་བར་མཁོ་བའི་ཡི་གེ་འདིའི་མིང་འདི་ཞེས་བྱ་ཞིང༌། དོན་འདི་བརྗོད་པ་ལ་ཚིག་འདི་དང་འདི་འཇུག་གོ་ཞེས་བདེ་བླག་ཏུ་རྟོགས་པར་བྱ་བའི་ཕྱིར་བསྟན་བཅོས་འདི་རྩོམ་མོ། ། དེ་ལ་བསྟན་བཅོས་འདིའི་སྡོམ་ཚིག་ནི། སྤྱིར་བསྟན་གྲངས་ངེས་ཚིག་ཕྲད་དང༌། །འཕུལ་དང་བརྟེན་པའི་སྤང་བླང་དང༌། །དམིགས་བསལ་སོ་སོར་དབྱེ་བ་སྟེ། །རྣམ་པ་ལྔ་ཡིས་བསྡུས་པ་ཡིན། ། ཞེས་བྱའོ། ། དེ་ལ་དང་པོ་ནི། ཡི་གེ་སུམ་ཅུ་བུ་ནི་བཞི། །ཡ་བཏགས་བདུན་དང་ར་བཏགས་བཅུ། །དེ་བཞིན་འོག་ཏུ་ལ་བཏགས་དྲུག །ཝ་བཏགས་རྣམ་པ་བཅུ་གཉིས་དང༌། །ར་ལ་བཏགས་པ་བཅུ་གསུམ་དང༌། ། ལ་ལ་བཏགས་པ་བཅུ་དང་ནི། །ས་ལ་བཏགས་པ་བཅུ་གཉིས་དང༌། །འཕུལ་ཡིག་ལྔ་དང་མཐའ་རྟེན་བཅུ། །སྟེང་འོག་ཡི་གེ་མུ་བཞི་སྟེ། །འཕུལ་དང་བརྟེན་ལ་མུ་གསུམ་ཡིན། །ཞེས་པ་ནི། བསྟན་བཅོས་འདིའི་བརྗོད་བྱ་གཙོ་ཆེ་བ་སྤྱིར་བསྟན་པའོ། ། ད་ནི་སྤྱིར་བསྟན་པ་དེ་དག་རིམ་པ་བཞིན་དུ་གྲངས་ངེས་པའི་ཚུལ་འདི་དག་ཡིན་ནོ། །ཞེས་བཤད་པར་བྱ་སྟེ། ཡི་གེ་སུམ་ཅུ་དཔེར་བརྗོད་ནི། ཨ་ཕ་ཁོ་ནི་ཇ་ཆང་ཤ །གཅིག་པུ་ཟ་འཛུ་དེ་ལ་ཧེ། །ཉེ་ཝ་ཚོ་ཡི་ཏི་ཀ་རེ། །ཐོབ་ཙམ་ཞུ་ཞེས་བྱ་བ་ཡིན།…