བོད་ཡུལ་གྱི་བཤད་གྲྭའི་ཐོག་མ་གསང་ཕུའི་མིང་ཐོགས་ཚུལ།
སྒོ་མང་མཁན་ཟུར་ངག་དབང་ཉི་མའི་ (1907-1990) གསུང་ལོ་རྒྱུས་ཐོར་བུ་ལས[1]། དེ་ཡང་ལྔ་བརྒྱ་པ་རྣམས་ཀྱི་གཙུག་གི་ནོར་བུ་ལྷ་གཅིག་དཱི་པཾ་ཀ་ར་དེ་ཉིད་སྙེ་ཐང་དུ་བཞུགས་སྐབས་ཤིག་རྔོག་ལེགས་པའི་ཤེས་རབ་ལ་འདི་ལྟར་ལུང་བསྟན་མཛད་དེ། གསང་ཕུའི་ཕྱོགས་སུ་ཕྱག་མཛུབ་གཏད་ནས། ལེགས་པའི་ཤེས་རབ་ལུང་པ་འདིའི་ཕུ་ན་དུང་དཀར་པོ་གཡས་སུ་འཁྱིལ་བའི་རང་བྱོན་དང་། ནམ་མཁའ་ལ་ཡང་གསེར་གྱི་འཁོར་ལོ་རྩིབས་སྟོང་དང་ལྡན་པ་འཁོར་ཞིང་།
མཉམ་མེད་ཐུབ་པའི་དབང་པོ་དཔང་དུ་བཞུགས་ནས་རྒྱལ་སྲས་བྱམས་འཇམ་དབྱངས་གཉིས་ཟབ་པ་དང་རྒྱ་ཆེ་བའི་དྲང་ངེས་ཀྱི་ཆོས་ཀྱི་བགྲོ་བ་མཛད་པ་སོགས་ངོ་མཚར་ཤིན་ཏུ་ཆེ་བར་སྣང་བས། ཕྱོགས་དེར་ཁྱོད་ཀྱིས་གནས་གཞི་བཅས་ནས་འཆད་ཉན་རྒྱ་ཆེན་པོ་བྱས་ན་བསྟན་པ་རིན་པོ་ཆེ་དར་རྒྱས་ཤིན་ཏུ་ཆེ་བར་ལུང་བསྟན་པར་མཛད་པ་ན། རྔོག་ལེགས་པའི་ཤེས་རབ་ཀྱིས། འོ་ན་དེ་རེ་ཞིག་གསང་བར་ཞུ་ཞེས་ཞུས་ཤིང་། མི་རིང་བར་ཉེར་སྤྱད་ནེའུ་ལེས་འཁྱེར་ནས་གནས་དེར་བསྐྱལ་བས་གསང་ཕུ་ནེའུ་ཐོག་ཏུ་གྲགས། དེ་ལྟར་ཇོ་བོ་ཆེན་པོས་ལུང་བསྟན་པ་བཞིན་གསང་ཕུའི་བྲག་ཏུ་རབ་ཏུ་བྱུང་བ་ལྔ་བརྒྱ་ཙམ་ལ་འཆད་ཉན་རྒྱ་ཆེན་པོ་གནང་སྐབས་ཕྱོགས་དེའི་གཞི་བདག་ནེའུ་ཀླུ་བཙན་གྱིས་དངོས་སུ་འབྲོག་པའི་རིགས་འདྲ་བའི་རྣམ་པ་ཅན་དུ་སྤྲུལ་ནས་རྒྱུན་པར་སྲི་ཞུ་དང་གུས་འདུད་བླ་ན་མེད་པ་མཛད་དོ། །མཉམ་མེད་ཇོ་བོ་ཆེན་པོའི་བཀའ་བཞིན་གསང་ཕུ་ནེའུ་ཐོག་ཏུ་རྔོག་ལེགས་པའི་ཤེས་རབ་ཀྱིས་དགོན་པ་བཏབ། དེའི་དབོན་པོ་ལོ་ཙཱ་བ་བློ་ལྡན་ཤེས་རབ་ཀྱིས་བཤད་གྲྭ་བཙུགས་པ་བོད་ཡུལ་གྱི་བཤད་གྲྭའི་ཐོག་མ་ཡིན་པར་ཤེས་རབ་རྒྱ་མཚོས་གསུངས། ཞེས་གསལ་ལོ།།
Post Views: 48
