རྗེ་ཙོང་ཁ་པ་མཆོག་བཞད་དངུལ་ཆུའི་ཆོས་རྫོང་དུ་ཆིབས་བསྒྱུར་གནང་མྱོང་ཡོད་མིན་བཤད་པ།
མི་འཇིགས་གསུང་གི་ང་རོ་གཅིག་གིས་ཀྱང་། །སྨྲ་ངན་ཝ་སྐྱེས་སྙིང་རྩ་འདར་བྱེད་པ། །
འཇམ་མགོན་སྨྲ་བའི་སེངྒེ་གང་དེ་ཡི། །ངོ་མཚར་རྨད་བྱུང་རྣམ་ཐར་སླར་ཡང་དྲན། །
སྙན་སྙན་ཚིག་གི་སྦྱོར་བ་མི་ལྡན་ཞིང་། །ཟབ་ཟབ་གཞུང་གི་དཀའ་གནད་མ་མཆིས་མོད། །
འཁྲུལ་བ་རགས་པ་སེལ་བའི་འཁྲུལ་སེལ་གཏམ། །གཟུར་གནས་གྲོགས་ལ་གཟུ་བོའི་ལམ་ནས་སྨྲ། །
ནང་དོན་གནད་བསྡུས། འདིར་རྗེ་ཙོང་ཁ་པ་ཆེན་པོ་མཆོག་བཞད་དངུལ་ཆུའི་ཆོས་རྫོང་དུ་ཆིབས་བསྒྱུར་གནང་མྱོང་ཡོད་ཅེས་པའི་གཏམ་དེར་ཡིག་ཚང་གི་ཁུངས་མེད་པ་དང་། ཀུན་མཁྱེན་འཇམ་དབྱངས་བཞེད་པའི་གསུང་དེ་ནི་པཎྜི་ཏ་ཐུགས་མཉམ་པར་མ་གཞག་པའི་གཏམ་ཡིན་ཚུལ། དེ་ལས་གསུངས་པའི་དངུལ་ཆུའི་ཆོས་རྫོང་ཞེས་པ་དེ་ནི། སྙེ་ཐང་བདེ་བ་ཅན་གྱི་ཉེ་འདབས་ཀྱི་དབེན་གནས་ཆོས་རྫོང་ལ་གོ་དགོས་པ་ལས་བཞད་མཐོང་སྨོན་གྱི་དངུལ་ཆུ་ཆོས་རྫོང་ལ་ངོས་འཛིན་མི་རུང་བའི་རྒྱུ་མཚན་དང་བཅས་པ་བཤད་ཡོད།
བརྡ་ཆད་གཙོ་བོ། རྗེ་ཙོང་ཁ་པ། དངུལ་ཆུ་ཆོས་རྫོང་། དབེན་གནས་ཆོས་རྫོང་།
དེ་ཡང་འཇམ་མགོན་བླ་མ་ཙོང་ཁ་པ་ཆེན་པོ་མཆོག་བཞད་དངུལ་ཆུའི་ཆོས་རྫོང་དུ་ཆིབས་བསྒྱུར་གནང་མྱོང་ཡོད་པ་རྗེའི་རྣམ་ཐར་ལྡེབས་རིས་ནང་གསལ་གི་འདུག་ཅེས་པའི་གཏམ་ཞིག་སྔོན་ཆད་ཐོས་མྱོང་ཞིང་། ཕྱིས་སུ་སེར་བྱེས་ལྷ་རམས་པ་རྒན་བློ་བཟང་འབྲུག་གྲགས་མཆོག་བཞད་དངུལ་ཆུར་ཆིབས་བསྒྱུར་གནང་སྐབས། བདག་གིས་དེ་སྐད་ཐོས་སོ་ཞེས་ཀྱང་ཞུ་མྱོང་། སྐབས་དེར་རྒན་རིན་པོ་ཆེ་དང་མཉམ་དུ་ཕེབས་པའི་བཀྲིས་ལྷུན་སྐུ་ཞབས་ཞིག་ཡོད་པ་དེས་དེ་ནི་ཀུན་མཁྱེན་འཇམ་དབྱངས་བཞད་པས་ནོར་བ་རེད་ཅེས་གསུངས་སོང་། དེ་དུས་དེའི་སྐོར་ལ་ཇི་ལྟར་ཡིན་ནམ་སྙམ་པའི་ཐེ་ཚོམ་ཞིག་སྐྱེས་པ་ཙམ་ལས། དཔྱད་པ་བྱེད་རྒྱུ་མ་བྱུང་བར་འདི་ལྟར་ལོ་ངོ་དྲུག་ཙམ་ཕྱིན་ཟིན་འདུག འོན་ཀྱང་ཉེ་ཆར་ཆོས་གྲོགས་ཞིག་གིས་སྐད་འཕྲིན་གྲོགས་ཚོམས་སུ། རྗེ་རིན་པོ་ཆེ་བཞད་དངུལ་ཆུར་ཕེབས་གནང་མྱོང་ཡོད་པ། ཀུན་མཁྱེན་འཇམ་དབྱངས་བཞད་པའི་འཇིགས་བྱེད་ཆོས་འབྱུང་ནང་གསུངས་ཡོད་ཟེར་བའི་ཡི་གེ་ཞིག་སྐུར་གནང་བ་དེས་རྐྱེན་བྱས་ཏེ། དེའི་སྐོར་ལ་དཔྱད་པ་དང་། རྩོད་གླེང་ཕྲན་བུ་བྱེད་རྒྱུ་བྱུང་བ་ལྟར། དེ་རིང་ཡང་བསྐྱར་དེའི་སྐོར་ལ་ཁ་གསལ་གོ་བདེ་ཐག་ཆོད་པ་ཞིག་ཞུ་རྒྱུ་ཡིན། དེ་ཡང་དྲང་པོར་ཞུས་ན། རྗེ་རིན་པོ་ཆེ་བཞད་དངུལ་ཆུར་ཕེབས་གནང་མྱོང་ཡོད་པ་ཀུན་མཁྱེན་འཇམ་དབྱངས་བཞད་པས་གསུངས་འདུག་ཅེས་པའི་གཏམ་དེ་ནི། ཚིག་ཙམ་ལ་འཁྲུལ་བའི་ལོང་གཏམ་འབའ་ཞིག་ཡིན་ཏེ། དེའི་འཁྲུལ་གཞི་ནི། ཀུན་མཁྱེན་འཇམ་དབྱངས་བཞད་པས་མཛད་པའི་འཇིགས་བྱེད་ཆོས་འབྱུང་ལས། དངུལ་ཆུ་ཆོས་རྫོང་དུ་འཇམ་དབྱངས་བདུན་པ་བླ་མ་དམ་པ་བསོད་ནམས་རྒྱལ་མཚན་ལ། ཨ་ར་པ་ཙ་ན། དྲིལ་བུ་ལུས་དཀྱིལ་གྱི་དབང་དང་། གུར་མགོན་གྱི་རྗེས་གནང་དང་། དབུའི་པཎ་ཞྭ་གནང་ནས་བུ་ལུགས་ཀྱི་བསྟན་པ་གཏད། ཅེས་དང་། དེ་ཉིད་ཀྱིས་མཛད་པའི་རྗེ་བཙུན་ཙོང་ཁ་པ་ཆེན་པོའ་ིརྣམ་ཐར་རས་བྲིས་ཀྱི་ཚུལ་བརྒྱ་ང་གསུམ་པ་ཙིནྟ་མ་ཎིའི་ཕྲེང་བ་ཐུབ་བསྟན་རྒྱས་བྱེད་ཕན་བདེའི་རོལ་མཚོ་ཆེན་པོ་ལས། དངུལ་ཆུ་ཆོས་རྫོང་དུ་འཇམ་དབྱངས་བདུན་པ་བླ་མ་དམ་པ་བསོད་ནམས་རྒྱལ་མཚན་ལ་ཨ་ར་པ་ཙ་ན། དྲིལ་བུ་ལུས་དཀྱིལ་དབང་། གུར་མགོན་རྗེས་གནང་དང་དབུའི་པཎ་ཞྭ་གཏད་དེ་བུ་ལུགས་ཀྱི་བསྟན་པ་གཏད།ཅེས་གསུངས་པའི་ལུང་དེ་གཉིས་ཡིན་ལ། དེའི་ནང་དངུལ་ཆུ་ཆོས་རྫོང་ཞེས་པའི་ཚིག་ཙམ་ཡོད་པ་ལ་བརྟེན་ནས། རྣམ་ཐར་གོང་འོག་ལ་བསམ་བློ་མ་བཏང་པར། དེ་ནི་བཞད་ཀྱི་དངུལ་ཆུ་ཆོས་རྫོང་ཡིན་ཤག་ཤག་བྱས་པ་རེད་འདུག་ ཡིན་ན་ཡང་། ཀུན་མཁྱེན་འཇམ་དབྱངས་བཞད་པའི་གསུང་དེ་གཉིས་ཀྱི་གོང་འོག་ཆ་ཚང་ལ་ཞིབ་ཏུ་གཟིགས་དང་། རྗེ་རིན་པོ་ཆེ་མཆོག་སྔོན་ལ་དངུལ་ཆུ་ཆོས་རྫོང་དུ་ཕེབས་ནས་བླ་མ་དམ་པ་བསོད་ནམས་རྒྱལ་མཚན་ལས་ཆོས་གསན། དེའི་རྗེས་སུ་གཙང་ལ་ཕེབས་ཡོད་པ་གསལ་ཐག་ཆོད་རེད་འདུག དེས་ན་ལུང་དེ་གཉིས་ལས་གསུང་རྒྱུའི་དངུལ་ཆུ་ཆོས་རྫོང་ཟེར་བ་དེ་བཞད་ཀྱི་དངུལ་ཆུ་ཆོས་རྫོང་མ་ཡིན་པ་གཏན་འཁེལ་ཡིན་ཏེ། གཙང་ལ་མ་ཕེབས་སྔོན་ལ་བཞད་དངུལ་ཆུར་ཕེབས་ཟེར་བ་ནི་བཞད་གད་སློང་བའི་གཏམ་ཡིན་པའི་ཕྱིར་རོ། །
དེར་མ་ཟད་དངུལ་ཆུ་ཞེས་པའི་ཚིག་ཡོད་མིན་ཙམ་དང་། དབུའི་པཎ་ཞྭ་གནང་ནས་བུ་ལུགས་ཀྱི་བསྟན་པ་གཏད་ཅེས་གསུངས་ཡོད་མིན་ཙམ་མ་གཏོགས། གསན་རྒྱུའི་ཆོས་དང་། གསན་ཡུལ་གྱི་བླ་མ། གསན་དུས་ཀྱི་ལོ་ཚིགས་གུང་བསྒྲིགས་ཚུལ་བཅས་གང་ལ་བསམ་བློ་བཏང་ན་ཡང་། གོང་དུ་དྲངས་པའི་ཀུན་མཁྱེན་ཚང་གི་ལུང་དེ་གཉིས་ནི། མཁས་གྲུབ་ཐམས་ཅད་མཁྱེན་པས་མཛད་པའི་རྗེའི་རྣམ་ཐར་དད་པའི་འཇུག་ངོགས་ལས། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་པ་དབེན་གནས་ཆོས་རྫོང་དུ་ཕྱག་ཕེབས་པའི་སྤྱན་སྔར་མཇལ། འཇམ་དབྱངས་ཨ་ར་པ་ཙ་ནའི་རྗེས་གནང༌། བདེ་མཆོག་དྲིལ་བུ་པའི་ལུས་དཀྱིལ་གྱི་དབང༌། གུར་གྱི་མགོན་པོའི་རྗེས་གནང་རྣམས་གསན་ནོ། ཞེས་གསུངས་པའི་ལུང་དེ་པར་བཤུས་བརྒྱབ་པ་ནང་བཞིན་ཡིན་པས། ཀུན་མཁྱེན་ཚང་གིས་གསུང་རྒྱུའི་དངུལ་ཆུ་ཆོས་རྫོང་ཞེས་པ་དེ་དང་། དད་པའི་འཇུག་ངོགས་ལས་གསུངས་པའི་དབེན་གནས་ཆོས་རྫོང་ཞེས་པ་དེ་གཉིས་དོན་གཅིག་ཏུ་ངེས་སོ།།
དད་པའི་འཇུག་ངོགས་ལས་གསུངས་པའི་དབེན་གནས་ཆོས་རྫོང་ཞེས་པ་དེ་ནི། སྙེ་ཐང་བདེ་བ་ཅན་ཏེ་ར་སྟོད་དགོན་པའི་ཉེ་འཁོར་ཞིག་ལ་ངོས་འཛིན་དགོས་པ་གསུང་དེ་ཉིད་ལས་ཤེས་ནུས་ཏེ། དེའི་ནང་དུ་རྗེ་ཙོང་པ་མཆོག་བདེ་བ་ཅན་ལ་ཐུགས་སྦྱོང་མཛད་པའི་སྐབས་ཤིག་ལ། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་པ་དབེན་གནས་ཆོས་རྫོང་དུ་ཕྱག་ཕེབས་པའི་སྤྱན་སྔར་མཇལ་བར་ཕེབས་ནས་ཆོས་ཞུས། དེ་རྗེས་དགུང་ལོ་བཅུ་དགུའི་སྟེང་དུ་གསང་ཕུ་དང་བདེ་བ་ཅན་ལ་གྲྭ་སྐོར་མཛད་ནས་གཙང་ལ་ཕེབས་པར་གསུངས་པའི་ཕྱིར་རོ། ཚུལ་འདི་ནི་ལྷ་བཙུན་ཡེ་ཤེས་དོན་གྲུབ་བསྟན་པའི་རྒྱལ་མཚན་གྱི་བཞེད་པར་ཡང་མངོན་ཏེ། དེ་ཉིད་ཀྱིས་མཛད་པའི་མཇམ་མགོན་བླ་མ་ཙོང་ཁ་པ་ཆེན་པོའི་རྣམ་ཐར་གྱི་འབྲུ་འབྲེལ་རྣམ་དཀར་དད་པ་རྒྱ་མཚོར་རོལ་བའི་འཇུག་ངོགས་ཞེས་པ་ལས། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་པ་དབེན་གནས་སྙེ་ཐང་གི་ཉེ་འདབ་ཆོས་རྫོང་དུ་ཕྱག་ཕེབས་པའི་སྤྱན་སྔར་མཇལ། ཞེས་སོགས་གསུངས་པའི་ཕྱིར་རོ། དེར་མ་ཟད་མཁས་པ་འདི་པས་ཀུན་མཁྱེན་འཇམ་དབྱངས་བཞེད་པས་གསུངས་པའི་དངུལ་ཆུ་ཆོས་རྫོང་ཞེས་པ་དེ་དང་། དད་པའི་འཇུག་ངོགས་ལས་གསུངས་པའི་དབེན་གནས་ཆོས་རྫོང་ཞེས་པ་དེ་གཉིས་དོན་གཅིག་ཏུ་བཞེད་པར་མངོན་ཏེ། དེ་ཉིད་ཀྱིས་དབེན་གནས་ཆོས་རྫོང་ཞེས་པ་སྙེ་ཐང་གི་ཉེ་འདབ་ཞིག་ན་ཡིན་པའི་གསལ་ཁ་མཛད་ནས། དེར་བླ་མ་སུ་ཞིག་མཇལ་བ་དང་ཆོས་གང་ཞིག་ཞུས་པ་སོགས་དད་པའི་འཇུག་ངོགས་ཀྱི་ཚིག་ཇི་བཞིན་བཀོད་ནས། དེའི་རྗེས་དེ་མ་ཐག་ཏུ་དེས་པཎ་ཞྭ་གནང་ནས་བུ་ལུགས་ཀྱི་བསྟན་པ་གཏད་པར་འཇམ་དབྱངས་བཞེད་པས་གསུངས་ཞེས་བརྗོད་གནང་འདུག་པ་ལས་དཔོག་ནུས་པའི་ཕྱིར་རོ། །
དེ་མིན་སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་ནས་བསྒྲིགས་པའི་རྗེའི་རྣམ་ཐར་ཕྱོགས་སྒྲིག་པོད་༼༢༽ནང་འཁོད་པའི་ཀུན་མཁྱེན་འཇམ་དབྱངས་བཞད་པས་མཛད་པའི་རྗེ་བཙུན་ཙོང་ཁ་པ་ཆེན་པོའ་ིརྣམ་ཐར་རས་བྲིས་ཀྱི་ཚུལ་བརྒྱ་ང་གསུམ་པ་ཙིནྟ་མ་ཎིའི་ཕྲེང་བ་ཐུབ་བསྟན་རྒྱས་བྱེད་ཕན་བདེའི་རོལ་མཚོ་ཆེན་པོ་ལས། དངུལ་གཞི་ཆོས་རྫོང་དུ་འཇམ་དབྱངས་བདུན་པ་བླ་མ་དམ་པ་བསོད་ནམས་རྒྱལ་མཚན་ལ་ཞེས་སོགས་འཁོད་འདུག་མོད། (དངུལ་གཞི་)ཞེས་པ་དེ་ནི་སེར་གཙུག་དཔར་མ་དེར་ཤོར་བའི་ཡིག་ནོར་ཡིན་ཏེ། དཔལ་ལྡན་འབྲས་སྤུངས་སྒོ་མང་དཔེ་མཛོད་ཁང་ནས་ཕྱོགས་བསྒྲིགས་མཛད་པའི་ཀུན་མཁྱེན་འཇམ་དབྱངས་བཞད་པའི་རྣམ་ཐར་པོད་༼༤༽པའི་ནང་འཁོད་པའི་རྗེ་བཙུན་ཙོང་ཁ་པ་ཆེན་པོའ་ིརྣམ་ཐར་རས་བྲིས་ཀྱི་ཚུལ་བརྒྱ་ང་གསུམ་པ་ཙིནྟ་མ་ཎིའི་ཕྲེང་བ་ཐུབ་བསྟན་རྒྱས་བྱེད་ཕན་བདེའི་རོལ་མཚོ་ཆེན་པོ་དང་། དེའི་པོད་༼༥༽པའི་ནང་འཁོད་པའི་འཇིགས་བྱེད་ཆོས་འབྱུང་། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་བསྐྲུན་པའི་འཇིགས་བྱེད་ཆོས་འབྱུང་བཅས་ཚང་མའི་ནང་དུ་དངུལ་ཆུ་ཆོས་རྫོང་ཞེས་འཁོད་ཡོད་པ་ལས་དངུལ་གཞི་ཆོས་རྫོང་ཞེས་འཁོད་མེད་པས་སོ། །
འོ་ན། ཀུན་མཁྱེན་འཇམ་དབྱངས་བཞེད་པས་དབེན་གནས་ཆོས་རྫོང་ལ་དངུལ་ཆུ་ཆོས་རྫོང་ཞེས་གསུངས་དགོས་དོན་ཅི་ཡིན་ནམ་ཞེ་ན། དེ་ནི་པཎྜི་ཏ་ཐུགས་མཉམ་པར་མ་གཞག་པའི་གཏམ་ཡིན་གྱི་དངུལ་ཆུ་ཆོས་རྫོང་ཞེས་པའི་མཚན་དེ་དབེན་གནས་ཆོས་རྫོང་གི་མཚན་གཞན་ཞིག་ཡིན་པར་ཡང་མི་སྣང་ཏེ། མཁས་གྲུབ་རྗེས་མཛད་པའི་རྗེ་ཙོང་ཁ་པའི་རྣམ་ཐར་དད་པའི་འཇུག་ངོགས་དང་། གནས་རྙིང་ཀུན་དགའ་བདེ་ལེགས་རིན་ཆེན་རྒྱལ་མཚན་གྱིས་མཛད་པའི་རྗེའི་རྣམ་ཐར། མཁས་གྲུབ་ནོར་བཟང་རྒྱ་མཚོས་མཛད་པའི་རྣམ་ཐར་སོགས། ཀུན་མཁྱེན་འཇམ་དབྱངས་བཞད་པ་མ་བྱོན་པའི་སྔོན་གྱི་མཁས་པས་བརྩམས་པའི་རྗེའི་རྣམ་ཐར་རྣམས་དང་། ཕྱིས་སུ་ཡང་ཆ་ཧར་དགེ་བཤེས་བློ་བཟང་ཚུལ་ཁྲིམས་ཀྱིས་བརྩམས་པའི་རྗེའི་རྣམ་ཐར་མ་གཏོགས་པ། ལྷ་བཙུན་ཡེ་ཤེས་དོན་གྲུབ་བསྟན་པའི་རྒྱལ་མཚན་གྱིས་བརྩམས་པའི་རྗེའི་རྣམ་ཐར་དང་། རྒྱལ་དབང་ཆོས་རྗེ་བློ་བཟང་འཕྲིན་ལས་རྣམ་རྒྱལ་གྱིས་བརྩམས་པའི་རྗེའི་རྣམ་ཐར། སྨོན་ལམ་ཚིག་མཛོད་དུ་འཁོད་པའི་བླ་མ་དམ་པ་བསོད་ནམས་རྒྱལ་མཚན་གྱི་རྣམ་ཐར་བཅས་ཚང་མའི་ནང་དུ་དབེན་གནས་ཆོས་རྫོང་ལ་དངུལ་ཆུ་ཆོས་རྫོང་ཞེས་པའི་མཚན་དེ་བེད་སྤྱོད་གཏོང་གནང་མི་འདུག་ཅིང་། དེ་ཙམ་མ་ཟད་དབེན་གནས་ཆོས་རྫོང་གི་ཉེ་འདབས་ར་སྟོད་དགོན་པའི་དགེ་འདུན་པ་འགའ་རེར་བཀའ་འདྲི་ཞུས་མོད་ཁོང་ཚོས་ཀྱང་དབེན་གནས་ཆོས་རྫོང་ལ་དངུལ་ཆུ་ཆོས་རྫོང་ཞེས་པའི་མཚན་གྱི་རྣམ་གྲངས་དེ་འདྲ་ཡོད་ས་མ་རེད་ཕལ་ཆེར་ཀུན་མཁྱེན་འཇམ་དབྱངས་བཞེད་པས་ནོར་བ་རེད་ཅེས་གསུངས་གི་འདུག་པས་སོ། །
དེས་ན་ཀུན་མཁྱེན་འཇམ་དབྱངས་བཞེད་པས་གསུངས་པའི་དངུལ་ཆུ་ཆོས་རྫོང་ཟེར་བ་དེ་ནི་དད་པའི་འཇུག་ངོགས་ལས་གསུངས་པའི་དབེན་གནས་ཆོས་རྫོང་སྟེ། སྙེ་ཐང་བདེ་བ་ཅན་གྱི་ཉེ་འདབས་ཀྱི་དབེན་གནས་ཆོས་རྫོང་ལ་ངོས་འཛིན་དགོས་པ་ལས། བཞད་མཐོང་སྨོན་གྱི་དངུལ་ཆུ་ཆོས་རྫོང་ལ་ངོས་འཛིན་མི་རུང་ཞིང་། རྗེ་ཙོང་ཁ་པ་མཆོག་བཞད་དངུལ་ཆུར་ཕེབས་པ་ལ་ཡིག་ཚང་གི་ཁུངས་ཡོད་མདོག་བསྟན་ནས། ཀུན་མཁྱེན་འཇམ་དབྱངས་བཞེད་པས་གསུངས་ཡོད། རྗེའི་རྣམ་ཐར་ལྡེབས་རིས་ནང་འཁོད་ཡོད་ཅེས་པའི་ལོང་གཏམ་དེ་དག་གིས་རྗེ་རིན་པོ་ཆེའི་བསྟན་པ་ལ་གནོད་མིན་མི་ཤེས་མོད། ལོ་རྒྱུས་ལ་ཅུང་ཟད་རྒྱུས་ཡོད་པ་རྣམས་ཀྱི་མདུན་དུ། རང་གི་སྔོ་ལོའི་རྒྱལ་མཚན་ལང་ནས་འཕྱར་བར་བྱེད་པའི་གཏམ་ཡིན་པས། ཕྱིན་ཆད་བག་ཡོད་པར་གྱིས་ཤིག་ཅེས་ཀྱང་གཟུ་བོར་གནས་པའི་ཀློག་པ་པོ་རྣམས་ལ་ཞུ་བའོ།།
སྨྲས་པ།
ཟབ་མོའི་བརྗོད་བྱ་མིན་པས་མཁས་པས་དོར།།
ལྟོ་གོས་གཏམ་ལ་མི་ཕན་བླུན་པོས་གཡུགས།།
མཁས་བླུན་གཉིས་ཀས་བསྐྱུར་བའི་གནས་ལུགས་འདི།།
མཁས་མིན་བླུན་མིན་ཁོ་བོས་གཏན་ལ་ཕབ།།
ཅེས་པ་འདི་ནི་དབུས་ཀྱི་གདན་ས་ཆེན་པོ་སེ་ར་ཐེག་ཆེན་གླིང་གི་རང་ཤག་དཔེ་མང་སྤུངས་པའི་དགའ་ཚལ་ནས་སྤྱི་ལོ་ ༢༠༢༥ ཟླ་བ་ ༡༢ ཚེས་ ༡༤ རབ་གནས་ཤིང་སྦྲུལ་ལོའི་དགའ་ལྡན་ལྔ་མཆོད་ཉིན་མཚོ་སྨད་པ་དབང་ཕྱུག་ཆོས་བཟང་དུ་འབོད་པས་རྫོགས་པར་བགྱིས་པ་དགེའོ།། །།
