སྐྱབས་རྗེ་རྫ་རོང་ཞྭ་དེའུ་འཁྲུལ་ཞིག་རིན་པོ་ཆེས་ (1924-2011) མཛད་པའི་བོད་ཡུལ་ལ་སྟོད་དིང་རི་གླང་སྐོར་གྱི་ནང་རྟེན་བྱིན་ཅན་ཁག་གི་ལོ་རྒྱུས་དད་པའི་ས་བོན་ལས[1]། ནང་རྟེན་གཉིས་པ་དིང་རྡོ་སྨུག་པོ་ཞེས་པ་འདི་ནི། ཕ་དམ་པ་སངས་རྒྱས་སྐྱེ་བ་དཔག་མེད་ཀྱི་སྔོན་རོལ་དུ་སངས་རྒྱས་རབ་སྦྱངས་རྒྱལ་པོ་ཞེས་བ་ལ་དད་པ་ཐོབ་པས། སངས་རྒྱས་དེས་ཀྱང་མ་འོངས་པར་སངས་རྒྱས་ཤཱཀྱ་ཐུབ་པའི་འཁོར་དུ་ལུང་བསྟན་ཏེ་སྐྱེ་བ་བཞེས་པའི་དུས་དེར།
སངས་རྒྱས་ཤཱཀྱ་ཐུབ་པའི་དྲུང་དུ་བྱང་ཆུབ་མཆོག་ཏུ་ཐུགས་བསྐྱེད་ནས་བྱང་ཆུབ་སེམས་དཔའ་མི་ཕམ་མགོན་པོ་ཞེས་བྱ་བར་གསོལ་ཏེ། བོད་མཐའ་འཁོབ་ཀྱི་སེམས་ཅན་གདུལ་བར་ལུང་བསྟན་པ་ལ། རྡོ་མཐིང་རིལ་ནག་པོའམ། དིང་རྡོ་སྨུག་པོར་གྲགས་པ་འདི་བྱ་རྒོད་ཕུང་པོའི་རི་ནས་སངས་རྒྱས་ཀྱིས་བོད་མཐའ་འཁོབ་གདུལ་བྱའི་གནས་དེར་བབས་པར་འགྱུར་རོ། །ཞེས་འཕང་བར་མཛད་པས་དེ་མ་ཐག་ཏུ་དིང་ཞེས་སྒྲ་གྲགས་སྐད་ཀྱིས་སངས་རྒྱས་ཀྱིས་ཀྱང་ཁྱོད་ཀྱིས་འགྲོ་དོན་སྐྱོང་བའི་གནས་དེར་དིང་རི་བྱའོ་གསུངས་པར་གྲགས་པའི་རྒྱུ་མཚན་གྱིས་ཡུལ་གྱི་མིང་ལ་དིང་རི་ཞེས་ཐོག་པ་དང་། རྡོ་ལའང་དིང་རྡོ་སྨུག་པོ་ཞེས་གསོལ་བར་མཛད། འདི་ནི་ཕ་དམ་པ་སངས་རྒྱས་ཀྱི་ཐུགས་དམ་གྱི་རྟེན། མ་མཁའ་འགྲོ་རྒྱ་མཚོས་བྱིན་གྱིས་བརླབས་པའི་རྡོ་འདི་རྒྱ་གར་གྱི་ཡུལ་དུ་དམ་པ་སངས་རྒྱས་ཀྱིས་པཎྜི་ཏའི་སྐྱེ་བ་ལན་བདུན་བཞེས་ཏེ། དེ་དག་སོ་སོས་བོད་ཀྱི་ཡུལ་དུ་ལན་རེ་བྱོན་པ་ལས། དང་པོའི་སྐབས་སུ་བོད་རྩི་ཤིང་ནགས་ཚལ་གྱིས་གཏམས། གཉིས་པར་ཤ་རྐྱང་སྤྲ་སྤྲེ་སོགས་རི་དྭགས་ཀྱིས་གང་། གསུམ་པ་མི་མིན་འདྲེ་མིན་མ་སངས་ཀྱིས་དབང་། བཞི་པར་མི་གྲོང་ཅ་ལེ་བ་རྗེ་གཉའ་ཁྲི་བཙན་པོ་ལྷ་ཡུལ་ནས་བྱོན། ལྔ་པར་ཇོ་ཤཱཀ་རྣམ་གཉིས་བྱོན། དྲུག་པར་དཔལ་གྱི་བསམ་ཡས་བཞེངས། བདུན་པར་སྟོན་ཆེན་རྣམས་གྲུབ་མཐའ་ལ་རྩོད་པའི་སྐབས་སུ་རྒྱ་གར་ལྷོ་ཕྱོགས་ཀྱི་རྒྱུད་རྩ་ར་སིང་ངའི་གླིང་དུ་པཎྜི་ཏ་ཀ་མ་ལ་ཤཱི་ལའི་སྐུའི་སྐྱེ་བ་བཞེས་ཏེ། སྔོན་སངས་རྒྱས་ཀྱི་ལུང་བསྟན་པའི་རྡོ་འདི་འཚོལ་དུ་འཛམ་གླིང་གསུམ་གཉིས་ཞབས་ཀྱིས་བཅགས་ཏེ་ཕེབས་ཀྱང་མ་རྙེད། མཐར་ལ་སྟོད་རྒྱལ་གྱི་ཤྲིའམ། རྩིབས་རི་ཞེས་པའི་གནས་རིར་ཞབས་སྐོར་ལན་བདུན་མཛད་དེ། རྩིབས་རི་མཐོ་བ་རྣམ་གསུམ་ཞེས་པའི་གནས་སུ་བཞུགས་དུས་མཁའ་འགྲོ་ཉི་ཟླའི་གཤོག་པ་ཅན་གྱིས་བུ་ཁྱོད་ལ་སངས་རྒྱས་ཀྱིས་གནང་བའི་རྡོ་བྱིན་རླབས་ཅན་དེ། གཡས་རི་དར་དཀར་བརྐྱངས་པ་འདྲ། །གཡོན་རི་དར་སྨུག་འཁྱིལ་བ་འདྲ། །རྒྱབ་རི་སེང་ཆེན་འགྱིངས་པ་འདྲ། །མདུན་རི་མཎྜལ་ཕུལ་བ་འདྲ། །གཙང་ཆབ་སྔོན་མོ་ཡོན་ཆབ་ཕུལ་འདྲའི་གནས་ཀྱི་མདུན་ན་འདུག་ཅེས་ལུང་བསྟན་པ་དང་། དམ་པའི་གཟིགས་སྣང་ལ་གླང་སྐོར་གྱི་རི་དེ་ཡིན་པར་དགོངས་ནས་གླང་སྐོར་དུ་ཕེབས། ཞེས་སོགས་གསལ་བ་ལྟར་དིང་རི་གླང་སྐོར་དང་། རྨུག་པོ་སོགས་བྱུང་ཚུལ་སྐོར་དམིགས་བསལ་བ་ཞིག་གོ།
[1] སྤོ་རོང་གི་བྱུང་བ་བརྗོད་པ་དྭངས་གསལ་མེ་ལོང་། སྤོ་རོང་ཟླ་བ་དར་རྒྱས། དེབ་ཕྲེང་དང་པོ། ཨ་མྱེས་རྨ་ཆེན། ༢༠༠༩ ལོ། ཤོག་ ༤༡
