དབོན་ཞང་རྡོ་རིང་ནི། ལྷ་ལྡན་གཙུག་ལག་ཁང་གི་རྒྱལ་སྒོའི་མདུན་ ༼དེ་སྔོན་ལྷ་སའི་དབུས་དང་ཕྱོགས་བཞིར་ཆོས་རྒྱལ་སྲོང་བཙན་སྒམ་པོ་དང༌། རྒྱ་བཟའ་ཀོང་ཇོ་རྣམ་གཉིས་ཀྱིས་བཙུགས་གནང་མཛད་པའི་གྲགས་ཅན་ཤིང་རྐང་ལྔ་ཞེས་ཤོད་སྲོལ་ཡོད་པ་ལས་དབུས་སུ་ཇོ་བོ་དབུ་སྐྲར་རྒྱ་ལྕང་རྐང་གཅིག་ཡོད་པའི་ཉེ་འཁྲིས། རྒྱ་ལྕང་དེ་རིག་གསར་སྐབས་གཅོད་བྲེག་གིས་སྡོང་སྐམ་སོང་བའི་ཉེ་འགྲམ་དུ་ལོ་བཅུ་ཕྲག་འགའ་སོང་བའི་ཤིང་སྡོང་ཞིག་ཡོད།༽
ཐད་ཉེ་འཁྲིས་སུ་བཙུགས་ཡོད། རྡོ་རིང་དེའི་མཐོ་ཚད་ལ་སྤྱི་ཁྲེ་ ༤་༧༨ དང༌། ཞེང་ཚད་ལ་སྤྱི་ཁྲེ་ ༠་༩༥ མཐུག་ཚད་ལ་སྤྱི་ཁྲེ་ ༠་༥༠ བཅས་ཡོད་ཅིང༌། རྡོ་རིང་གི་རྩེ་མོར་ཆར་ཁེབས་ཏོག་དང་ལྡན་ཞིང༌། ཞབས་འོག་རུས་སྦལ་གྱི་སྟེགས་བཅས་ཡོད། རྡོ་རིང་གི་ངོས་བཞིར་ཡི་གེ་བཀོད་པ་སྟེ། ཤར་ངོས་སུ་བོད་ཡིག་ཡིག་ཕྲེང་ ༧༡ བཀོད་ཡོད། ནང་དོན་ནི་རྒྱ་བོད་དབར་གྱི་འབྲེལ་བ་ཇི་ལྟར་ཡིན་དང༌། ས་མཚམས་སུ་དམག་འཁྲུག་ཐེངས་མང་བྱུང་བ་སོགས་མནའ་གཙིགས་འདིའི་ནང་དོན་དངོས་གཞི་རྣམས་བྲིས་ཡོད། ནུབ་ངོས་ཀྱི་གཡོན་དུ་བོད་ཡིག་ཡིག་ཕྲེང་ ༧༧ དང༌། གཡས་སུ་རྒྱ་ཡིག་ཡིག་ཕྲེང་ ༦ ཡོད། ནང་དོན་ནི་བཀའ་གཙིགས་འདིའི་མགོ་བརྗོད་ཀྱི་གླེང་གཞི་ཡིན། བྱང་ངོས་སུ་ཆིངས་འགྲིག་ལ་ཞུགས་མཁན་བོད་ཕྱོགས་ཀྱི་དཔོན་རིགས་ ༡༧ གྱི་མིང་རྒྱ་བོད་ཤན་སྦྱར། ལྷོ་ངོས་སུ་ཆིངས་འགྲིག་ལ་ཞུགས་མཁན་རྒྱ་ཕྱོགས་ཀྱི་དཔོན་རིགས་ ༡༨ ཀྱི་མིང་རྒྱ་བོད་ཤན་སྦྱར་བཅས་བཀོད་ཡོད། རྡོ་རིང་འདིའི་མཇུག་ཏུ་རྡོ་རིང་འདི་འདྲ་ཞིག་རྒྱལ་ས་ཀེང་ཤིར་ཡང་བཙུགས་ཡོད་པ་དང༌། མ་ཡིག་གི་ཟིན་བྲིས་ཀྱང་བོད་རྒྱ་གཉིས་ཀའི་ཡིག་ཚང་ནང་ཉར་ཚགས་བྱས་ཡོད་ཚུལ་གསལ་པོར་བཀོད་འདུག རྡོ་རིང་འདི་ནི་ད་ཕན་རྙེད་སོན་བྱུང་བའི་རྡོ་རིང་ནང་ནས་སྙན་གྲགས་ཆེ་ཤོས་དང་ནང་དོན་ཕུན་སུམ་ཚོགས་ཤོས་ཡིན་པས། ཞིབ་འཇུག་གི་རིན་ཐང་ཡང་ཧ་ཅང་ཆེན་པོ་ལྡན་ཡོད།
ལོ་རྒྱུས་སུ་འཁོད་པ་ལྟར་ན་བོད་རྒྱ་གཉིས་དབར་ཆིངས་འགྲིག་ཐེངས་མང་བྱས་ཀྱང་ཆིངས་ཡིག་ནང་དོན་ཡིག་ཐོག་ཏུ་འཁོད་པ་ཐེངས་གཉིས་ལས་བྱུང་མེད་ཅིང་འདི་ནི་ཐེངས་གཉིས་པ་དེ་ཡིན་ལ། རྡོ་རིང་འདི་ནི་ཐང་རྒྱལ་རབས་ཀྱི་ལོ་རྟགས་ཁྲང་ཆིང་ཁྲི་ལོ་དང་པོ་སྟེ་བོད་ལྕགས་གླང་སྤྱི་ལོ་ ༨༢༡ དགུན་ཟླ་ར་བའི་ ༼བོད་ཟླ་བཅུ་གཅིག་པ།༽ ཚེས་བཅུ་ཉིན་བོད་ཀྱི་བཙན་པོ་ཁྲི་རལ་པ་ཅན་ ༼བོད་ཀྱི་ཕོ་ཉ་ཞང་ཁྲི་ཐོགས་བྱ་བ་སྐྱེས་འབུལ་དུ་མངགས།༽ དང་ཐང་རྒྱལ་རབས་ཀྱི་གོང་མ་མུའུ་ཙུང་གཉིས་ཆབ་སྲིད་གཅིག་ཏུ་མོལ་ནས་རྒྱལ་ས་ཁྲང་ཨན་དུ་མནའ་ཆིངས་མཛད་ཅིང་ས་མཚམས་བཅད་དེ། གཙིགས་ཀྱི་ནང་དོན་རྣམས་རྡོ་རིང་ལ་བརྐོས་ཤིང་བཙུགས་པ་དང༌། སླར་བོད་ཆུ་སྟག་སྤྱི་ལོ་ ༨༢༢ ལོའི་དབྱར་ཟླ་འབྲིང་པོའི་ ༼བོད་ཟླ་དྲུག་པ།༽ ཚེས་དྲུག་གི་ཉིན་བོད་ཀྱི་རྒྱལ་ས་ལྷ་སའི་ཤར་ཕྱོགས་སྦྲ་སྟོད་ཚལ་དུ་བོད་ཐང་གཉིས་ཀྱི་ཞི་དྲག་བློན་ཆེན་རྣམས་འཚོགས་ནས་མཇལ་དུམ་གྲོས་མོལ་མཛད་དེ། མནའ་ཆིངས་གྲུབ་སྟེ་མངའ་བདག་ཁྲི་རལ་པ་ཅན་གྱི་ཁྲི་ལོ་དགུ་པ་བོད་ཆུ་ཡོས་སྤྱི་ལོ་ ༨༢༣ དཔྱིད་ཟླ་འབྲིང་བའི་ ༼བོད་ཟླ་གསུམ་པ།༽ ཚེས་བཅུ་བཞིའི་ཉིན་རྒྱ་བོད་མནའ་ཆིངས་ཀྱི་ནང་དོན་རྡོ་རིང་ལ་བརྐོས་ཤིང་བོད་ཀྱི་རྒྱལ་ས་ལྷ་སའི་གཙུག་ལག་ཁང་གི་མདུན་དུ་བཙུགས་ཤིང༌། དེ་མཚུངས་ཐང་གི་རྒྱལ་ས་ཁྲང་ཨན་དང༌། བོད་རྒྱའི་ས་མཚམས་རྒྱའི་མཆོད་རྟེན་དཀར་པོའམ་གུང་གུ་རྨེ་རུ་ ༼མཚོ་སྔོན་ཞིང་ཆེན་གྱི་ཁྲི་ཀ་དང༌། ལ་ལས་ཀན་སུའུ་ཞིང་ཆེན་གྱི་ཐའོ་མེན་དུ་བཞེད་ཅིང༌། འགའ་རེས་ཀན་སུའུ་ཞིང་ཆེན་གྱི་ཆེང་ཧྲུའེ་ཞན་སོགས་སུ་འདོད།༽ ཞེས་པའི་ས་གནས་སུ་རྡོ་རིང་གཅིག་བཅས་བཙུགས་པར་འཁོད་ཀྱང་ལོ་རྒྱུས་ཀྱི་འཕོ་རྒྱུར་ཁྲོད་རྒྱ་བོད་ཐ་དད་ཀྱི་དཔང་རྟགས་ཕལ་མོ་ཆེ་རྩ་མེད་དུ་སོང་བའི་ཁྲོད་རྡོ་རིང་ཕྱི་མ་གཉིས་ཀྱང་ཤུལ་མེད་དུ་སོང་སྟེ་ད་ལྟ་ཙམ་ལས་ལྷག་མེད།
སྔར་བཙན་པོ་སྲོང་བཙན་སྒམ་པོས་སྤྱི་ལོ་ ༦༤༡ ལོར་རྒྱ་བཟའ་ཝུན་ཤིང་ཀོང་ཇོ་ཁབ་ཏུ་བསུས་པ་དང༌། ཁྲི་ལྡེ་གཙུག་བཙན་གྱིས་སྤྱི་ལོ་ ༧༡༠ ལོར་རྒྱ་བཟའ་གྱིམ་ཤིང་ཀོང་ཇོ་བཙུན་མོར་བསུས་ནས་བོད་རྒྱ་གཉེན་དུ་འབྲེལ་ཏེ་དབོན་ཞང་དུ་གྱུར་པས་མིང་དེ་ལྟར་ཐོགས། དབོན་ཞང་རྡོ་རིང་འདིར་མིང་གི་རྣམ་གྲངས་བཞི་ཙམ་ཡོད་དེ། དབོན་ཞང་རྡོ་རིང་དང༌། ཁྲང་ཆིང་རྡོ་རིང༌། རྒྱ་བོད་མཐུན་འབྲེལ་རྡོ་རིང༌། ལྷ་ལྡན་གཙུག་ལག་ཁང་གི་མདུན་དུ་བཙུགས་པར་བརྟེན་ལྷ་སའི་རྡོ་རིང་ཞེས་ཀྱང་འབོད།
རྡོ་རིང་ཡི་གེའི་ནང་འཁོད་པར། བོད་རྒྱ་གཉིས། ད་ལྟར་དུ་མངའ་བའྀ་ཡུལ་དུ་མཚམས་སྲུང་ཞིང༌། དེའི་ཤར་ཕྱོགས་ཐམས་ཅད་ནྀ་རྒྱ་ཆེན་པོའི་ཡུལ། ནུབ་ཕྱོགས་ཐམས་ཅད་ནྀ་ཡང་དག་པར་བོད་ཆེན་པོའི་ཡུལ་ཏེ། དེ་ལས་ཕན་ཚུན་དགྲར་མྱྀ་འཐབ། དམག་མྱྀ་དྲང༌། ཡུལ་མྱྀ་མརྣམ་ཞེས་དང༌། སྐྱིད་པའི་བཀའ་དྲྀན་ནི་རབས་ཁྲིའི་བར་དུ་ཐོབ། །སྙན་པའྀ་སྒྲ་སྐད་ནྀ་གཉི་ཟླས་སླེབས་སོ་ཆོག་ཏུ་ཁྱབ་སྟེ། །བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད་པའྀ་སྲིད་ཆེན་པོ་སྦྱར་ནས་གཙྀགས་བཅས་པ་འདྀ། །ནམ་ཞར་མྱྀ་འགྱུར་བ། དཀོན་མཆོག་གསུམ་དང༌། འཕགས་པའྀ་རྣམས་དང་གཉི་ཟླ་དང་གཟའ་སྐར་ལ་ཡང་དཔང་དུ་གསོལ་ཏེ། ཐ་ཚྀག་གྀ་རྣམས་པས་ཀྱང་བཤད། སྲོག་ཆགས་བསད་དེ་མནའ་ཡང་བོར་ནས། གཙིགས་བཅས་སོ། །ཞེས་སོགས་འཁོད་ཡོད། ང་ཚོས་རྡོ་རིང་འདི་ལས་མཐོང་ཐུབ་པ་ནི། དུས་རབས་བདུན་པ་ནས་བཟུང་བོད་རྒྱའི་བར་ལ་ཡུལ་རྩོད་དམག་འཁྲུག་ཐེངས་མང་བྱུང་ཡང༌། ཕར་འགྲོ་ཚུར་འོང་གི་འབྲེལ་བ་རྒྱུན་མ་ཆད་པ་དང༌། ཕན་ཚུན་གྱི་དཔལ་འབྱོར་དང་རིག་གནས་སྤེལ་རེས་བྱས་པ་མ་ཟད། བྱུང་བའི་དམག་འཐབ་རྣམས་ཀྱང་ཐེངས་འགར་འདུམ་འགྲིག་མཛད་ཅིང༌། སོ་སོར་དབང་བའི་ས་མཚམས་དང་ཆུ་མཚམས་བཅད་དེ། བོད་ནི་བོད་ཀྱི་ས་ཆ་ན་སྐྱིད་པ་དང༌། རྒྱ་ནི་རྒྱའི་ས་ཆ་ན་སྐྱིད་པའི་འཚེ་མེད་ཞི་བདེའི་དགའ་སྟོན་གྱི་དཔལ་ལ་རོལ་མྱོང་བ་སོགས་བོད་རྒྱ་སྒོ་ཀུན་ནས་ཐ་དད་ཡིན་པའི་ལོ་རྒྱུས་ཀྱི་དཔང་རྟགས་གནད་ཆེན་ཞིག་ཡིན།
རྡོ་རིང་ཡི་གེའི་ནང་གི་གཉིས་པ་དང༌། སྐད་གྲགས་ཆེ་བའི་དབང་གིས་དང་པོར་བཞག་པའི་ཁྲང་ཆིང་མཐུན་འབྲེལ་རྡོ་རིང་ངམ་དབོན་ཞང་རྡོ་རིང་འདིས་གསལ་བཤད་བྱས་པའི་དོན་གནད་དགུ་སྟེ། ༡༽ ཐང་བོད་གཉིས་བར་དམག་འཁྲུག་ཐེངས་མང་བྱུང་བ་དང༌། ༢༽ སྐབས་དེའི་བོད་ཀྱི་རྒྱལ་བློན་ཚོའི་མནའ་བཞག་བྱེད་སྟངས། ༣༽ རྒྱ་བཟའ་འུན་ཁྲིན་ཀོང་ཇོ་དང་ཅིན་ཁྲིན་ ༼གྱིམ་ཤིང་༽ ཀོང་ཇོ་བོད་དུ་རྒྱལ་པོའི་བཙུན་མོར་བརྫངས་པའི་ལོ་གསལ་པོར་འཁོད་པ། ༤༽ རྒྱལ་པོ་ཁྲི་ལྡེ་སྲོང་བཙན་ ༼སད་ན་ལེགས་མཇིང་ཡོན།༽ གྱི་སྲས་རྒྱལ་པོ་ཁྲི་གཙུག་ལྡེ་བཙན་ ༼རལ་པ་ཅན་༽ ཡིན་པ། ༥༽ རྒྱལ་པོ་ཁྲི་ལྡེ་སྲོང་བཙན་གྱིས་སྲིད་དབང་བཟུང་རིང་ཐང་རྒྱལ་རབས་ཀྱི་གོང་མ་མི་རབས་གསུམ་བྱུང་བ་དང༌། ཕན་ཚུན་མཐུན་འབྲེལ་ལེགས་པོ་བྱུང་བའི་དབང་གིས་བཀའ་གཙིགས་བཞག་མ་ཐུབ་པར་ལུས་པ། ༦༽ ཐང་རྒྱལ་རབས་ཀྱི་ཁྲི་ལོ་དང༌། རྒྱལ་པོ་ཁྲི་གཙུག་ལྡེ་བཙན་གྱི་སྲིད་ལོ་ཤན་སྦྱར་ཁག་གསུམ་བཀོད་ཡོད་པ། ༧༽ སྐབས་དེའི་ཐང་བོད་རྒྱལ་པོའི་དབར་གྱི་འབྲེལ་བ་ངོ་མ་དེ་གང་ཡིན་གསལ་བཤད་བྱས་ཡོད་པ། ༨༽ མཐུན་འབྲེལ་ཆིངས་ཡིག་འཇོག་སྐབས་སུ་ཞུགས་པའི་ཐང་བོད་རྒྱལ་རབས་གཉིས་ཀའི་ཞི་དྲག་བློན་ཆེན་སོ་སོའི་གོ་གནས་ཀྱི་རིམ་པ་དང་མིང་བཅས་རྒྱ་བོད་ཤན་སྦྱར་དུ་བཀོད་པ། ༩༽ བོད་ཡིག་ཐོག་བཀོད་པའི་བཀའ་གཙིགས་ཀྱི་ནང་དོན་རྣམས་རྒྱ་ཡིག་ཐོག་ཏུ་ཡང་ཆ་ཚང་བར་བཀོད་ཡོད་པ་བཅས་སོ།།
དབོན་ཞང་རྡོ་རིང་གི་ལྷོ་ངོས་སུ་རྡོ་རིང་གཞན་གཉིས་ཡོད་པ་ལས་གཅིག་ནི་ཆན་ལུང་ཁྲི་ལོ་ ༥༩ སྤྱི་ལོ་ ༡༧༩༤ ལོར་བཞེངས་པ་ཞིག་དང༌། གཞན་ཡི་གེ་མེད་པ་དེ་ཧ་ལམ་མིང་རྒྱལ་རབས་སྐབས་སུ་བཞེངས་པ་ཙམ་ལས་ཞིབ་གསལ་གྱི་དཔྱད་གཞི་མ་རྙེད།
དབོན་ཞང་འདུམ་པའི་བཀའ་གཙིགས་ཀྱི་རྡོ་རིང་གི་ཡི་གེ་དངོས།
༼ནུབ་ངོས་གཡོན་དུ།༽
༡ ༄། །བོད་ཀྱི་རྒྱལ་པོ་ཆེན་པོ།
༢ འཕྲུལ་གྱྀ་ལྷ་བཙན་པོ་དང༌། །
༣ རྒྱའྀ་རྒྱལ་པོ་ཆེན་པོ་རྒྱ་རྗེ་ཧྭང་ཏེ།
༤ དབོན་ཞང་གཉྀས། །ཆབ་སྲིད་
༥ གཅྀག་ཏུ་མོལ་ནས། །མཇལ་དུམ་
༦ ཆེན་པོ་མཛད་དེ་གཙྀགས་བཅས་
༧ པ། །ནམ་ཞར་ཡང་མྱྀ་འགྱུར་པར།
༨ ལྷ་མྱྀ་ཀུན་གྱྀས་ཤེས་ཤིང་དཔང་བྱས་
༩ ཏེ་ཚེ་ཚེ་རབས་རབས་སུ་གཏམ་བརྗོད་
༡༠ དུ་ཡོད་པའྀ་ཕྱིར། །མཇལ་དུམ་གྱི་གཙིགས་
༡༡ ཀྱྀ་མདོ་རྡོ་རིངས་ལ་བྲིས་པའོ་
༡༢ ༄། །འཕྲུལ་གྱྀ་ལྷ་བཙན་པོ་ཁྲི་གཙུག་
༡༣ ལྡེ་བརྩན་གྱྀ་ཞ་སྔ་ནས་རྒྱ་རྗེ་
༡༤ བཱུན་བཱུ་ཧེའུ་ཏིག་ཧྭང་ཏེ་དང༌། དབོན་
༡༥ ཞང་གཉིས། །སྒམ་དཀྱེལ་ཆེན་པོས་
༡༦ ནི། །འཕྲལ་ཡུན་ཡུལ་གྱྀ་ལེགས་
༡༧ ཉེས་ཅྀ་ཡང་བསྲུང་སྟེ། །ཐུགས་རྗེ་ཆེན་
༡༨ པོས་ནྀ། །བཀའ་དྲྀན་གྱིས་དགབ་པ་
༡༩ ལ་ཕྱྀ་ནང་མྱེད་པར། །མང་པོ་ཀུན་བདེ་
༢༠ སྐྱིད་པར་བྱ་བ་ནྀ་དགོངས་པ་གཅྀག
༢༡ ཡུན་རྀང་པོར་ལེགས་པའྀ་དོན་ཆེན་པོ་
༢༢ ལ་ནི་བཀའ་གྲོས་མཐུན་ཏེ། །གཉེན་
༢༣ རྙིང་པའྀ་སྲི་ཞུ་ནྀ་དང་སྔའི་ཁྱྀམ་ཚེས་
༢༤ དགྱེས་པའི་ཚུལ་སླར་དུ་བརྩེགས་པར་
༢༥ མོལ་ནས། །མཇལ་དུམ་ཆེན་པོ་ནི་
༢༦ མཛད་དེ། །བོད་རྒྱ་གཉིས། །ད་ལྟར་
༢༧ དུ་མངའ་བའྀ་ཡུལ་དང་མཚམས་སྲུང་
༢༨ ཞིང༌། །དེའི་ཤར་ཕྱོགས་ཐམས་ཅད་ནྀ་
༢༩ རྒྱ་ཆེན་པོའི་ཡུལ། །ནུབ་ཕྱོགས་ཐམས་
༣༠ ཅད་ནྀ་ཡང་དག་པར་བོད་ཆེན་པོའི་
༣༡ ཡུལ་ཏེ། །དེ་ལས་ཕན་ཚུན་དགྲར་མྱྀ་
༣༢ འཐབ། །དམག་མྱྀ་དྲང༌། །ཡུལ་མྱྀ་
༣༣ མརྣམ། །ཡྀད་མ་ཆེས་པ་ཞྀག་ཡོད་
༣༤ ན། །མྱྀ་བཟུང་ཞིང་གཏམ་དྲྀས་ཏེ། །
༣༥ བརྫངས་ནས་ཕྱྀར་གཏང་ངོ༌། །
༣༦ ད་ཆབ་སྲྀད་གཅིག་ཅྀང༌། །མཇལ་
༣༧ དུམ་ཆེན་པོ་འདྀ་ལྟར་མཛད་པས། །
༣༨ དབོན་ཞང་དགྱེས་པའི་བཀའ་ཕྲིནད་
༣༩ སྙན་པས་ཀྱང་འདྲུལ་དགོས་ཏེ། །
༤༠ ཕན་ཚུན་གྱྀ་ཕོ་ཉ་འདོང་བ་ཡང༌། །ལམ་
༤༡ རྙིང་པར་བྱུང་ནས། །སྔ་ལུགས་བཞིན་
༤༢ བོད་རྒྱ་གཉིས་ཀྱྀ་བར། །ཙང་ཀུན་
༤༣ ཡོག་ཏུ་རྟ་བརྗེས་ལ། །སྩེ་ཞུང་ཆེག་དུ་
༤༤ རྒྱ་དང་ཕྲད་པ་མན་ཅད་ནྀ་ཕུ་དུད་
༤༥ བྱ། །ཙེང་ཤུ་ཧྱྭན་དུ་བོད་དང་ཕྲད་པ་
༤༦ ཡན་ཅད་ནྀ་བོད་ཀྱིས་ཕུ་དུད་བྱ་སྟེ། །
༤༧ དབོན་ཞང་ཉེ་ཞྀང་གཉེན་བའྀ་ཚུལ་བཞིན་
༤༨ དུ། །སྲྀ་ཞུ་དང་བཀུར་སྟྀའི་ལུགས་
༤༩ ཡོད་པར་སྦྱར་ཏེ། །ཡུལ་གཉིས་ཀྱི་
༥༠ བར་ན་དུད་རྡུལ་ནྀ་མྱི་སྣང༌། །གློ་བུར་
༥༡ དུ་སྡང་བ་དང་དགྲའི་མྱྀང་ནྀ་མྱི་གྲག་སྟེ་
༥༢ ས་མཚམས་སྲུང་བའྀ་མྱི་ཡན་ཅད་
༥༣ ཀྱང་དོགས་ཤིང་འཇིགས་པ་མྱེད་པར་
༥༤ ས་ས་མལ་མལ་ན་བག་བརྐྱང་སྟེ། །བདེ་
༥༥ བར་འཁོད་ཅྀང༌། །སྐྱིད་པའྀ་དྲྀན་
༥༦ ནི་རབས་ཁྲྀའི་བར་དུ་ཐོབ། །སྙན་པའྀ་
༥༧ སྒྲ་སྐད་ནྀ་གཉི་ཟླས་སླེབས་སོ་ཆོག་ཏུ་
༥༨ ཁྱབ་སྟེ། །བོད་བོད་ཡུལ་ན་སྐྱིད་
༥༩ རྒྱ་རྒྱ་ཡུལ་ན་སྐྱིད་པའྀ་སྲིད་ཆེན་པོ་
༦༠ སྦྱར་ནས་གཙིགས་བཅས་པ་འདྀ། །
༦༡ ནམ་ཞར་མྱྀ་འགྱུར་བར། །དཀོན་མཆོག་
༦༢ གསུམ་དང༌། །འཕགས་པའྀ་རྣམས་དང་
༦༣ གཉྀ་ཟླ་དང་གཟའ་སྐར་ལ་ཡང་དཔང་དུ་
༦༤ གསོལ་ཏེ། །ཐ་ཚྀག་གྀ་རྣམས་པས་ཀྱང་
༦༥ བཤད། །སྲོག་ཆགས་བསད་དེ་མནའ་
༦༦ ཡང་བོར་ནས། །གཙིགས་བཅས་སོ། །
༦༧ གཙིགས་འདྀ་བཞིན་དུ་མ་བྱས་སམ། །
༦༨ བཤྀག་ན། །བོད་རྒྱ་གཉིས་གང་གིས་སྔར་ཉེས་
༦༩ པ་ལ་སྡྀག་ཅིང༌། །ལན་དུ་དཀུ་སྒྱུ་ཅྀ་བྱས་ཀྱང་
༧༠ གཙིགས་བཤྀག་པ་ལ་མ་གཏོགས་སོ། །
༧༡ འདྀ་ལྟར་བོད་རྒྱ་གཉྀས་གྱྀ་རྗེ་བློན་གྱིས་ཞལ་
༧༢ གྱྀས་བཤགས་མནའ་བོར་ཏེ། །གཙྀགས་
༧༣ ཀྱྀ་ཡྀ་གེ་ཞྀབ་མོར་བྲིས་ནས། །རྒྱལ་པོ་ཆེན་
༧༤ པོ་གཉྀས་གྱྀ་ནི་ཕྱག་རྒྱས་བཏབ། །བློན་པོ་
༧༥ གཙྀགས་འཛིན་པ་ལ་གཏོགས་པ་རྣམས་
༧༦ ཀྱྀ་ནི་ལག་ཡྀག་ཏུ་བྲིས་ཏེ། གཙྀགས་ཀྱི་
༧༧ ཡྀ་གེ་ཡང་སོ་སོའྀ་ཕྱག་སྦལ་དུ་བཞག་གོ། །
༼ཤར་ངོས་སུ།༽
༡ ༄།འཕྲུལ་གྱྀ་ལྷ་བཙན་པོ་ཁྲི་གཙུག་ལྡེ་བརྩན་དང༌། ། རྒྱ་རྗེ་བཱུན་བཱུ་ཧེའུ་
༢ ཏིག་ཧྭང་ཏེ་གཉྀས། །ཆབ་སྲྀད་གཅྀག་ཏུ་མོལ་ཏེ་མཇལ་དུམ་མཛད་པའི་
༣ དབོན་ཞང་གཉྀས་ཀྱི་ཚུལ་ཅི་འདྲ་བ་དང༌། ། མཇལ་དུམ་མཛད་པའི་
༤ གཏན་ཚིགས་རྡོ་རིངས་ལ་བྲིས་པའོ། །
༥ ༄། འཕྲུལ་གྱྀ་ལྷ་བཙན་པོ་འོ་ལྡེ་སྤུ་རྒྱལ། །ཡུལ་བྱུང་ས་དོད་ཚུན་ཅད་
༦ འུང་ནས་མྱིའི་རྗེར། །བོད་ཀྱྀ་རྒྱལ་པོ་ཆེན་པོ་མཛད་པ་ཡང༌། །གངས་རི་
༧ མཐོན་པོའི་ནི་དབུས། །ཆུ་བོ་ཆེན་པོའི་ནི་མགོ། །ཡུལ་མཐོ་ས་གཙང་
༨ བ་ལ་གནམ་གྱྀ་ལྷ་ལས། །མྱྀའི་རྒྱལ་པོར་གཤེགས་ཏེ། །གཙུག་ལག་
༩ ཆེན་པོས་ནྀ་ཡུནད་ཀྱི་སྲིད་བཙུགས། །ཆོས་ཁྲིམས་བཟང་པོས་ནྀ་
༡༠ ཚུལ་གནང༌། །བྱམས་པའི་བཀའ་དྲིན་གྱྀས་ནྀ་ནང་གྀ་ཚིས་སྦྱརད། །
༡༡ དགྲ་ཐབས་མཁས་ནས། །ཕྱྀའི་དགྲ་བཏུལ་ཏེ། །ཆབ་སྲྀད་ནྀ་ཕྱིར་ཞིང་ཆེ་
༡༢ དབུ་རྨོག་ནྀ་སླར་ཞིང་བརྩན་པ་ནམ་ཞར་མྱི་འགྱུར། །བྱིན་མྱི་
༡༣ ཉམས་པའྀ་གཡུང་དྲུང་གི་རྒྱལ་པོ་ཆེན་པོ་ནྀ་ཆེ། །དེའྀ་ཕྱིར། །ལྷོ་ཕྱོགས་
༡༤ ཀྱྀ་མོན་རྒྱ་གར་དང༌། ནུབ་ཕྱོགས་ཀྱྀ་ཏ་ཟིག་དང༌། །བྱང་ཕྱོགས་ཀྱྀ་དྲུ་གུ་ནེ་
༡༥ སྨེལ་ལ་སྩོགས་པ། །གཡུག་་་་་རྒྱལ་པོ་སྡོམ་ན་་་་་ར་བྱ་བ་ཀུན་ཀྱི་
༡༦ འཕྲུལ་གྱྀ་ལྷ་བཙན་པོའི་དབུ་རྨོག་བརྩན་པོ་དང་་་་་ང་བོར་ནྀ་
༡༧ ཕྱོགས་མྱྀ་གུས་པ་མྱེད་དེ། །ཕན་ཚུན་དགྱེས་ཤིང་བཀའ་སྩལད་དོ་ཆོག་
༡༨ ཉན་པ་ཡིན། །ཤར་ཕྱོགས་ནྀ་རྒྱ་འདུག་པ། །མཚོ་ཆེན་པོའི་ཉྀ་མ་
༡༩ ཤར་པ་ལོགས་ཀྱྀ་རྒྱལ་པོ་སྟེ། །ལྷོ་བལ་གཞན་དང་མྱྀ་འདྲ་བངར་
༢༠ ཆོས་བཟང༌། །གཙུག་ལག་ཆེ་བས། །བོད་དང་ཡང༌། །འཐབ་ཀྱྀ་ཟླ་
༢༡ ཀྱྀ་དོ་སྟེ། །དང་པོ་རྒྱ་རྗེ་ལྀ་རྒྱལ་སར་ཞུགས་ནས། །དེའི་ཏང་གི་སྲིད་ལོ་ཉི་ཤུ་
༢༢ རྩ་གསུམ་ལོན། །རྒྱལ་རབས་གཅྀག་གི་འོག་ཏུ། །འཕྲུལ་གྱྀ་ལྷ་བཙན་པོ་
༢༣ ཁྲི་སྲོང་བརྩན་དང༌། རྒྱ་རྗེ་ཐེའེ་ཙོང་བཱུན་བུ་ཞེང་ཧྭང་ཏེ་གཉྀས། ཆབ་
༢༤ སྲིད་གཅྀག་ཏུ་མོལ་ནས། །ཅེང་ཀྭན་གྱྀ་ལོ་ལ། །མུན་ཤེང་ཀོང་ཅོ། །
༢༥ བཙན་པོའི་ཁབ་ཏུ་བླངས། །ཕྱིས་འཕྲུལ་གྱྀ་ལྷ་བཙན་པོ་ཁྲི་ལྡེ་གཙུག་
༢༦ བརྩན་དང་རྒྱ་རྗེ་སམ་ལང་ཁའེ་འགྭན་ཤེང་བཱུན་ཤྀན་བཱུ་ཧྭང་ཏེ་གཉྀས། །
༢༧ ཆབ་སྲིད་གཅྀག་ཏུ་མོལ་ཏེ། །གཉེན་བརྩེགས་ནས། །ཀེང་ལུང་གྀ་ལོ་ལ་
༢༨ ཀྀམ་ཤྀང་ཀོང་ཅོ། །བཙན་པོའི་ཁབ་ཏུ་བླངས་ནས། །དབོན་ཞང་དུ་འགྱུར་
༢༩ ཏེ་དགྱེས་པ་ལས། །བར་འགའ་ཕན་ཚུན་གྱྀ་སོའི་བློན་པོས་གནོད་པ་
༣༠ དག་རྡུལ་གྱྀས་ཀྱང༌། །གཉེན་པའྀ་ཚབ་གང་དུ་བྱ་བ་ཐུགས་བྲེལ་ཆེན་
༣༡ པོའི་དག་གྀ་ཚེ། །དམག་སྟོངས་ཀྱིས་ཕན་ཐོགས་པར་བྱས་པ་དང༌། །ཕན་ཚུན་
༣༢ ཐུགས་ནོངས་བྱུང་ངོ་ཆོག་ན། །དགྱེས་སྣང་དག་ཀྱང་མ་ཆད་པར་བསྲིས་ཏེ་
༣༣ འདྀ་ལྟར་ཉེ་ཞྀང་གཉེན་བ་ཡྀན་ན། །དབོན་ཞང་གྀ་ཚུལ་ཁོ་ན་ལྟར། །ཐུགས་
༣༤ ཡི་དམ་ཕབས་པ་ལས། །བཙན་པོ་ཡབ་ལྷ་འཕྲུལ་ཁྲི་ལྡེ་སྲོང་བརྩན་གྱི་ཞ་
༣༥ སྔ་ནས། །སྒམ་དཀྱེལ་ཆེན་པོས་ནྀ། །ཆོས་སྲིད་ཅི་ལ་ཡང་མཁས་ཤྀང་གསལ་
༣༦ བྱམས་པའི་བཀའ་དྲིན་གྱིས་ནྀ། །ཕྱི་ནང་མྱེད་པར། །ཕྱོགས་བརྒྱད་དུ་ཁྱབ་སྟེ་
༣༧ མཐའ་བཞྀ་རྒྱལ་པོ་ཀུན་དང་ཡང་མཇལད་ཅྀང་འདུམ་བར་མཛད་ན། །རྒྱ་དང་ལྟ་
༣༨ ཞིག། །གཉེན་རྩེག་མ། །ཡུལ་ཁྱྀམ་ཚེས་ཡིན་པས། །ལྷག་པར་ཆབ་སྲིད་
༣༩ གཅྀག་དུ་དགྱེས་ཏེ། །ཕན་ཚུན་དབོན་ཞང་དགོངས་པ་མཐུན་ནས། །རྒྱ་རྗེ་ཞེང་
༤༠ ཤྀན་བཱུན་བཱུ་ཧྭང་ཏེ་དང༌། མཇལ་དུམ་དུ་མོལ་ཏེ། །བཀའ་ཁོན་རྙིང་པ་ནི།
༤༡ སྤྱངས་ཤིང་གསལད། །དགྱེས་པ་གསར་ནྀ་བསླས་ཤྀང་བསྟུད་ནས། །དེ་ཚུན་
༤༢ ཆད། །བཙན་པོ་དབོན་ནྀ་སྐུ་ཚེ་གཅྀག། །རྒྱ་རྗེ་ཞང་ནྀ་གདུང་རབས་གསུམ་གྱྀ་
༤༣ བར་དུ། །བཀའ་ཁོན་གྱི་གཅུགས་ནྀ་མ་བྱུང༌། །དགྱེས་པའི་སྲི་ཞུ་ནྀ་ཕན་ཚུན་
༤༤ ཕྱང་དེ། །ཕོ་ཉ་གཅེས་པ་ལས། །བཀའ་ཕྲིན་སྙན་པ་དང༌། །དཀོར་ནོར་
༤༥ བཟང་པོས་ནྀ། །རྒྱུན་དུ་འདྲུལ་ན། །མཇལ་དུམ་གྱི་མདོ་ཆེན་པོ་གཙིགས་
༤༦ བཅའ་བ་ལྟ་བུ་ཡང་མ་གྲུབ། །དབོན་ཞང་མོལད་པའྀ་རྗེས་ཀྱང་ཚར་མ་ཕྱིན་པར་
༤༧ ཐུགས་ནོངས་ཀྱིས་བརྩལ་ཏེ། །བར་གྱི་གཅུགས་རྙིང་པ་ཕྲན་ཚེགས་ཀྱི་
༤༨ དོགས་ཕྲིག་གྀས། །ལེགས་པ་ཆེན་པོའི་སྐུ་དོན། །ཕྱི་ལྕིགས་ཤེ་དག་དུ་གྱུར་
༤༩ ནས། །དགྲ་ཆོས་ཀྱྀ་ཐབས་དང༌། །དམག་བརྩན་པོ་དག་ཀྱང་མྱྀ་རྡུལ་དུ་མ་
༥༠ རུང་སྟེ། །དགྲ་ཟུན་གྱི་ཚུལ་དུ་གྱུརད་གྱིས་ཀྱང༌། །ཡོང་ཉེ་ཞིང་གཉེན་ལ་
༥༡ འཕྲུལ་གྱྀ་ལྷ་བཙན་པོ་ཁྲི་གཙུག་ལྡེ་བརྩན་གྱི་ཞ་སྔ་ནས། །མཁྱེན་པ་ནི། །
༥༢ འཕྲུལ་གྱྀ་ཚུལ་ཆགས། །མཛད་པ་ནྀ་ལྷའི་ལུགས་དང་མཐུན་ཏེ། །བཀཱ་
༥༣ དྲིན་ཆེན་པོས། །ཕྱྀ་ནང་གཉིས་སུ་སྙོམས་ཤིང༌། །དབུ་རྨོག་བརྩན། བཀའ་
༥༤ ལུང་གཉན་ཏེ། །རྒྱ་རྗེ་བཱུན་བཱུ་ཧེའུ་ཏིག་ཧྭང་ཏེ་དང་དབོན་ཞང་གཉྀས་
༥༥ འཕྲུལ་གྱི་དགོངས་པ་ནྀ་མཐུན་ཏེ། །བོད་རྒྱའྀ་ཆབ་སྲིད་ནྀ་གཅྀག་སྟེ། །
༥༦ བོད་རྒྱ་གཉྀས། །རབས་ཁྲྀར་བདེ་སྐྱིད་པའྀ་མཇལ་དུམ་ཆེན་པོ་མཛད་ནས་
༥༧ རྒྱ་ཡུལ་དུ་ནྀ། །ཀེང་ཤྀའི་ནུབ་ཕྱོགས་ཤེག་སང་སྀའི་དྲུང་དུ། །བོད་ཆེན་
༥༨ པོའི་ལོའི་མྱིང་ནྀ་སྐྱིད་རྟག་ལོ་བདུན། །རྒྱ་ཆེན་པོའི་ལོའི་མྱིང་ནྀ། །
༥༩ ཅང་ཀེང་ལོ་དང་པོ་ལྕགས་མོ་གླང་གྀ་ལོའི་དགུན་སླ་ར་བ་ཚེས་བཅུ་ལ་
༦༠ དཀྱྀལ་འཁོར་ལ་འཛེགས་ནས། །རྒྱ་ཡིས་གཙྀགས་བཟུང་ངོ༌། །བོད་
༦༡ ཡུལ་དུ་ནྀ། །ཕོ་བྲང་ལྷ་སའྀ་ཤར་ཕྱོགས་སྦྲ་སྟོད་ཚལ་དུ། །བོད་ཆེན་པོའི་
༦༢ ལོའི་མྱྀང་སྐྱྀད་རྟག་ལོ་བརྒྱད། །རྒྱ་ཆེན་པོའི་ལོའི་མྱིང་ཅང་ཀེང་ལོ་
༦༣ གཉྀས། །ཆུ་ཕོ་སྟག་གྀ་ལོའི་དབྱར་སླ་འབྲྀང་པོ་ཚེས་དྲུག་ལ། །དཀྱྀལ་
༦༤ འཁོར་ལ་འཛེགས་ཏེ། །བོད་ཀྱྀས་གཙྀགས་བཟུང་ངོ༌། །གཙྀགས་ཀྱྀ་
༦༥ མདོ་རྡོ་རིངས་ལ་བྲིས་པ་འདི་ཡང༌། །བོད་ཆེན་པོའི་ལོའི་མྱིང་སྐྱིད་རྟག་
༦༦ ལོ་དགུ། །རྒྱ་ཆེན་པོའི་ལོའྀ་མྱིང་ཅང་ཀེང་ལོ་གསུམ། །ཆུ་མོ་ཡོས་
༦༧ བུ་ལོའི་དཔྱྀད་སླ་འབྲིང་པོ་ཚེས་བཅུ་བཞི་ལ། །རྡོ་རིངས་ལ་ཡི་གེ་བྲིས་སོ། །
༦༨ རྡོ་རིངས་འདི་འདྲྀ་བའྀ་སྤྱན་ཡང༌། །རྒྱའྀ་ཕོ་ཉ་ཐབས། །འགུ་
༦༩ ཤེའུ་ཞང་ཤིང་ཡོད་པ། དོ་ཙེའེ་དང༌། ཐབས་ཙན་ཤན་དེ་བཱུ་ཡོད་པ།
༧༠ ་་་་་་ཀཱུ་ལ་སྩོགས་པས་བྱས་སོ། །གཙིགས་གྱི་མདོ་རྡོ་རིངས་ལ་བྲིས་པ་འདྀ་
༧༡ དང་འདྲ་བ་གཅིག། །རྒྱའྀ་ཡུལ་ཀེང་ཤྀར་ཡང་གཙུགས་སོ། །
