བལ་བཟའ་ཁྲི་བཙུན་གྱིས་སྤྱི་ལོའི་དུས་རབས་བདུན་པའི་དུས་དཀྱིལ་སྤྱི་ལོ་ ༦༤༧ ལོར་སྟོན་པ་དགུང་ལོ་བརྒྱད་ཀྱི་སྐུ་ཚད་ཇོ་བོ་མི་བསྐྱོད་རྡོ་རྗེ་གངས་ལྗོངས་སུ་གདན་དྲངས་པའི་བཞུགས་གནས་སུ། ལྷ་ལྡན་སྤྲུལ་པའི་གཙུག་ལག་ཁང་བཞེངས་གནང་མཛད་པའི་ར་ས་འཕྲུལ་སྣང་གཙུག་ལག་ཁང་གི་ལྟེ་བའི་མཐའ་སྐོར་དུ་སྔོན་གྱི་ཞི་རྒྱས་དབང་དྲག་གི་ལས་ཁུངས་བཞི་སྟེ། ཤར་དུ་ཞི་བའི་ལས་ཁུངས་རྩིས་ཁང་ཕུན་ཚོགས་བཀོད་པ་དང༌། ལྷོར་རྒྱས་པའི་ལས་ཁུངས་སྤྱི་ཁྱབ་བཀའ་ཤག ནུབ་ཏུ་དབང་གི་ལས་ཁུངས་བླ་བྲང་ཕྱག་མཛོད་ཁང༌། བྱང་དུ་དྲག་པོའི་ལས་ཁུངས་བཤེར་ཁང་བདུད་སྡེ་ཚར་གཅོད་བཅས་བཞི་ཡོད།
ཀ༽ ཤར་དུ་ཞི་བ་མཐུན་གྱུར་གྱི་ལས་ཐབས་སུ་མངོན་པར་བརྩོན་པ་རྩིས་ཁང་ལས་ཁུངས་སྲིད་ཞི་ཕུན་ཚོགས་ནི་ལྷ་ལྡན་གཙུག་ལག་ཁང་གི་ཡང་སྟེང་ཤར་ངོས་སུ་གནས་ཤིང༌། འདི་ནི་༸རྒྱལ་དབང་བདུན་པ་ཆེན་པོའི་སྐུ་དུས་སུ་གསར་དུ་བཙུགས་པའི་གཞུང་གི་ཀ་བ་ལྟ་བུའི་ལས་ཁུངས་ཤིག་ཡིན་ལ། ཤོད་སྐོར་སྤྱི་ཁྱབ་ལས་ཁུངས་ཤིག་ཀྱང་ཡིན། ལས་ཁུངས་འདིའི་འགན་དབང་ནི། གཞུང་ཞབས་ཤོད་སྐོར་དྲུང་འཁོར་རྣམས་ཐོག་མར་རྩིས་ཕྲུག་པར་གསར་ཞུགས་རྒྱུགས་ལེན་སྦྱོང་བརྡར། ཤོད་སྐོར་དྲུང་འཁོར་རྣམས་ལ་སྒྲིག་ཁྲིམས་གནོན་སྡེམ་བྱེད་རྒྱུ། རྒྱ་ཁྱབ་རྫོང་གཞིས་ཁག་ལ་བཀར་རྒྱ་བ་དང༌། བཀར་འཇུག་པ། ཡོང་སྡུད་པ་ཞེས་པའི་ཁྲལ་བསྡུའི་མི་འགྲོ་འོས་སྒྲིག་སོགས་ཀྱི་འགན་དབང་འཁུར་དགོས་པ་སོགས་སོ།།
ཁ༽ ལྷོར་རྒྱས་ཐབས་ཆབ་སྲིད་འཕྲིན་ལས་ཀྱི་སྤྱི་ཁྱབ་གཙོ་འཛིན་ལས་ཁུངས་བཀའ་ཤག་གི་གནས་ཡུལ་གཙུག་ལག་ཁང་གི་ལྷོ་སྒོའི་ཡང་སྟེང་དུ་ཡོད་ཅིང༌། སྤྱི་ཁྱབ་བཀའ་ཤག་ལས་ཁུངས་ནི་ཐོག་མར་བཀའ་བློན་ཞེས་པ་ལས་བཀའ་ཤག་ལས་ཁུངས་མེད་ཅིང༌། བཀའ་ཤག་ལས་ཁུངས་ནི་ཕྱི་ལོ་ ༡༧༥༡ ལོར་༸རྒྱལ་དབང་བདུན་པ་ཆེན་པོས་གསར་འཛུགས་བསྐྱངས་ཤིང༌། རྟེན་གཙོར་རྗེ་ཙོང་ཁ་པ་ཆེན་པོའི་སྐུ་བརྙན་བཞུགས་སུ་གསོལ་ཐོག བཀའ་ཤག་གི་ཐམ་ཀ་སྲིད་ཞི་བདེ་སྐྱིད་མ་གསར་བསྐྲུན་མཛད་ཡོད་པ་དེ་ཉིད་ཕབ་རྒྱག་དབང་བསྒྱུར་བྱས་ཆོག་པའི་གཟེངས་བསྟོད་ཀྱང་མཛད། སྐབས་དེར་བཀའ་བློན་གྱི་དབུ་བཞུགས་བཀའ་བློན་ཁྲི་པ་རྡོ་རིང་གུང་པཎྜི་ཏ་དང༌། ལས་རོགས་སུ་མདོ་མཁར་ཞབས་དྲུང་ཚེ་རིང་དབང་རྒྱལ། ཐོན་པ་སྲི་གཅོད་ཚེ་བརྟན། བཀའ་བློན་སེར་མོ་བ་ཛ་སག་དར་ཧན་ཉི་མ་རྒྱལ་མཚན་བཅས་བཞི་དང༌། བཀའ་བློན་གྱི་འོག་ཏུ་བཀའ་དྲུང་གཉིས་དང༌། བཀའ་མགྲོན་གསུམ། བཀའ་བློན་རེར་འགག་པ་རེ་བཅས་ཡོད། བཀའ་ཤག་ནི་དེ་སྔ་བོད་རང་བཙན་གཙང་མའི་རྒྱལ་ཁབ་ཡིན་པའི་སྐབས། བོད་གཞུང་གི་སྲིད་འཛིན་དབང་ཆ་ཆ་ཚང་ཡོད་པའི་ལས་ཁུངས་མཐོ་ཤོས་དེ་ཡིན་ཅིང༌། དེར་ཆབ་སྲིད་དང༌། དཔལ་འབྱོར། རིག་གནས། དམག་དོན། འཕྲོད་བསྟེན། ཆོས་ལུགས། འགྲིམ་འགྲུལ། ཕྱི་འབྲེལ་ལ་སོགས་ཕྱི་ནང་གང་ཅིའི་སྟངས་འཛིན་འགན་དབང་ཆ་ཚང་ཡོད།
ག༽ ནུབ་ཏུ་འདོད་རྒུ་དཔལ་འབྱོར་གྱི་བང་མཛོད་ལ་མངའ་དབང་འབྱོར་བ་བླ་བྲང་འཕྲལ་བདེ་སྟེ་དབང་གི་ལས་ཁུངས་བླ་ཕྱག་ཞེས་པ་གནས་ཡུལ་ལྷ་ས་གཙུག་ལག་ཁང་གི་ཁྱམས་རའི་ཡང་སྟེང་དུ་ཡིན་ལ། ༸རྒྱལ་དབང་བདུན་པ་ཆེན་པོའི་སྐབས་གསར་དུ་བཙུགས་ཤིང༌། ལས་ཁུངས་འདིས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་གཏོང་སྒོའི་ལས་འགན་འཁུར་བས་སྨོན་ལམ་ཐོག་མར་གསར་འཛུགས་མཛད་མཁན་རྗེ་ཙོང་ཁ་པའི་བླ་བྲང་གི་མིང་དེ་ཆགས་པ་ཡིན། ལས་ཁུངས་འདིས་རྫོང་གཞིས་ཁག་གི་ལོ་འཁོར་ཡོང་འབབ་འབྲུ་རིགས་ཤ་མར་སོགས་བསྡུ་ལེན་དང༌། ཐེབས་སྦྱར་མ་དངུལ་སྐྱེད་གཏང་དང་སྐྱེད་འབབ་ཀྱིས་སྨོན་ལམ་དང་ཚོགས་མཆོད་སྐབས་སོ་སོར་དགེ་འདུན་པར་བསྙེན་བཀུར་སོགས་ཀྱི་འགན་དབང་བཞེས་ཀྱི་ཡོད།
ང༽ བྱང་དུ་དྲག་པོ་ཁྲིམས་ཀྱི་སྲོག་འཛིན་ལས་ཁུངས་བཤེར་ཁང་ནི་གནས་ཡུལ་གཙུག་ལག་ཁང་གི་བྱང་ངོས་སུ་གནས་ཤིང༌། ལས་ཁུངས་འདི་ཡང་༸རྒྱལ་མཆོག་སྐུ་ཕྲེང་བདུན་པ་ཆེན་པོའི་སྐུ་དུས་སུ་གསར་བཙུགས་བཀའ་དྲིན་བསྐྱངས་ཤིང༌། ལས་ཁུངས་འདི་གཞི་རྩའི་ཐོག་ཁྲིམས་ལུགས་ལས་ཁུངས་ཤིག་ཡིན་པས་ཁྲིམས་ཡིག་དེབ་གཞི་ཁག་བདག་གཉེར་རྩ་བཟུང་གིས་དབུས་གཙང་སོགས་རྒྱ་ཁྱབ་ཡོངས་ལ་མི་གསོད་གྱོད་གཞི་བྱུང་རིགས་ལ་ཞིབ་དཔྱད་ཐག་གཅོད་བྱེད་པའི་ལས་ཁུངས་ཤིག་དང༌། ལྷ་ལྡན་གཙུག་ལག་ཁང་གི་རྟེན་གསུམ་མཆོད་ཆས་ཚང་མའི་རྟེན་དེབ་བཤེར་ཁང་ནས་འགོད་ཉར་ཐོག་ལྷ་སའི་གཙུག་ལག་ཁང་གི་ཇོ་བོ་དང་ཐུགས་རྗེ་ཆེན་པོ་རང་བྱུང་ལྔ་ལྡན་གྱིས་གཙོས་པའི་ལྷའི་རྒྱན་ཆའི་རིགས་དཀོན་གཉེར་དཔོན་ལ་རྩིས་སྤྲོད་སོགས་ཀྱི་འགན་དབང་ཁུར་བཞིན་ཡོད་ལ། སྤྱི་ལོ་ ༡༩༥༦ ལོར་བཤེར་ཁང་ལས་ཁུངས་འདི་གྱོད་ཞིབ་ལས་ཁུངས་སུ་ཟླ་སྒྲིལ་བཏང་བས་གོང་གསལ་འགན་དབང་རྣམས་གྱོད་ཞིབ་ལས་ཁུངས་ནས་སྤྱོད་པ་ཡིན་ནོ།།
ལྷ་སའི་དངོས་བྱུང་བདེན་དཔང་ལས་བཏུས།
