བྲག་སྒོ་ཀྐ་ཎིའི་མཆོད་རྟེན། དེ་ཡང་བྲག་སྒོ་ཞེས་པ་ཀུན་གྱིས་མཁྱེན་གསལ་ལྟར་བྲག་གི་སྒོ་དང༌། ཀྐཎི་ནི་ལེགས་སྦྱར་གྱི་སྐད་དེ་མཆོད་རྟེན་བང་རིམ་འོག་ནས་འགྲོ་ས་ཡོད་པའི་སྒོ་ཡི་དོན་ཡིན། བྲག་སྒོ་ཀྐ་ཎིའི་མཆོད་རྟེན་ནི་ལྷ་སའི་དམར་པོ་རི་དང་ལྕགས་པོ་རི་གཉིས་ཀྱི་བར་དུ་གནས་ཤིང༌། མཆོད་རྟེན་ཆེ་ཆུང་གསུམ་ཡོད་པ་ལས་མཆོད་རྟེན་ཆེ་བ་ཀྐཎི་ནི་ལམ་གྱི་དབུས་དང༌། གཞན་ཆུང་བ་གཉིས་དམར་པོ་རི་དང་ལྕགས་པོ་རི་གཉིས་ཀྱི་རི་སྣ་སོ་སོར་གནས་ཡོད།
བྲག་སྒོ་ཀྐཎི་ནི་ལོ་རྒྱུས་ཡུན་རིང་ལྡན་པ་དང་ལྷ་སར་སྐད་གྲགས་ཆེ་ཙམ་ཡོད་པའི་མཆོད་རྟེན་ཞིག་ཡིན། གནས་དེར་མཆོད་རྟེན་འདི་འདྲ་ཞིག་བཞེངས་པའི་དགོས་པ་ནི་སྔ་དུས་ལྕགས་པོ་རི་དང་དམར་པོ་རི་གཉིས་མུ་འབྲེལ་ནས་གླང་པོ་ཆེ་དང་སེངྒེའི་མཇུག་མ་སྦྲེལ་བ་ལྟ་བུ་ཡོད་པ་ནི་ས་དཔྱད་ཀྱི་དབང་དུ་ཧ་ཅང་དགེ་མཚན་ལྡན་པ་ཞིག་ཡིན་པ་སྟེ། རྒྱ་བཟས་བོད་དུ་བསྣམས་ཕེབས་པའི་ས་དཔྱད་ཡིག་རིགས་དང༌། རྒྱ་གར་གྱི་པཎྜི་ཏ་དུ་ཧར་ནག་པོས་བོད་དུ་བསྣམས་ཕེབས་པའི་ས་དཔྱད་ཡིག་རིགས་ནང༌། ཡུལ་གྲོང་དང་རྒྱལ་པོའི་ཕོ་བྲང་ཆགས་སའི་ཐང་དཀྱིལ་དུ་རི་ཆུང་གི་སྣེ་ཕན་ཚུན་སྦྲེལ་བ་ཡོད་ན་ཡུལ་སྡེ་དེའི་མི་བརྒྱུད་ནང་ཤེས་ཡོན་འཛོམས་ཤིང་འཇོན་ཐང་ལྡན་པའི་བརྒྱུད་པ་བར་མཚམས་མ་ཆད་པ་ཡོང་བ་དང༌། རི་སྣ་ཕན་ཚུན་ཆད་ན་དེ་ལས་ལྡོག་པའི་དམག་དང་མུ་གེ་སོགས་ཀྱི་སྐྱོན་ཆ་འབྱུང་ཚུལ་བཤད་ཡོད།
བཤད་སྲོལ་ལ་རྒྱ་བཟའ་སྔ་ཕྱི་གཉིས་བྱུང་བ་ལས་རྒྱ་བཟའ་ཕྱི་མ་གྱིམ་ཤིང་ཀོང་ཇོ་བོད་དུ་ཕེབས་ནས་ལོ་ཤས་སོང་རྗེས་བཙུན་མོ་བགྲེས་པ་སྣ་ནམ་བཟའ་ལ་སྲས་ཁྲི་སྲོང་ལྡེའུ་བཙན་སྐུ་འཁྲུངས་སྐབས་དེར། རྒྱ་བཟའ་དང་སྣ་ནམ་བཟའ་གཉིས་ཀས་སྲས་ཁྲི་སྲོང་ལྡེའུ་བཙན་རང་ཉིད་ཀྱི་སྲས་ཡིན་པའི་རྩོད་གླེང་དང་ཕྲོགས་རེས་བྱུང་ཞིང༌། མཐའ་མའི་མཇུག་བསྡོམས་ཐད་བོད་ཀྱི་ལོ་རྒྱུས་སྔ་ཤོས་སུ་གྲགས་པ་རྦ་བཞེད་དང༌། ཉང་ཉི་མ་འོད་ཟེར་གྱིས་མཛད་པའི་ཆོས་འབྱུང་མེ་ཏོག་སྙིང་པོ་གཉིས་ནང་འཁོད་དོན་དུ། སྐབས་དེར་སྲས་ཁྲི་སྲོང་གི་ཡུམ་རྒྱ་བཟའ་དང༌། སྣ་ནམ་བཟའ་སུ་ཡིན་མིན་རྒྱལ་བློན་སུས་ཀྱང་ཐག་གཅོད་བྱ་ཐབས་མ་བྱུང་བར་སྣ་ནམ་བཟས་ཕྲོགས་པ་དང༌། དེ་ལ་བརྟེན་ནས་རྒྱ་བཟའ་ཧ་ཅང་འཁྲོས་ཏེ། སྟག་རི་དང་ ༼བར་མ་རི།༽ སེང་རི་ ༼ལྕགས་པོ་རི།༽ གཉིས་ཀྱི་མཇུག་མ་སྦྲེལ་བཅད་པ་དང༌། དེ་བཞིན་ལྷོ་ཁ་སོགས་ས་གནས་གཞན་ལ་ཡོད་པའི་རི་དཔྱད་བཟང་བ་ཚང་མ་རྒྱ་བཟས་མེད་པར་བཟོས་པ། སྲས་ཁྲི་སྲོང་ལྡེའུ་བཙན་དགུང་ལོ་ལྔ་ལས་ཕེབས་མེད་པ་དེས་རང་ཉིད་ཀྱི་ཡུམ་རྒྱ་བཟའ་ཡིན་པར་ངོས་འཛིན་གནང་བར་བརྟེན་རྒྱ་བཟའ་ཧ་ཅང་དགའ་ནས་རང་ཉིད་ཀྱིས་སྔར་མེད་པར་བཟོས་པའི་རི་དཔྱད་བཟང་པོ་དེ་དག་ཉམས་གསོ་བྱས་ཤིང༌། སྟག་རི་དང་སེང་རི་གཉིས་ཀྱི་མཇུག་མ་སྦྲེལ་བ་བཅད་པ་དེ་འབྲེལ་མཐུད་ཡོང་ཆེད་རི་སྣ་གཉིས་ལ་མཆོད་རྟེན་རེ་དང༌། དཀྱིལ་དུ་ཀྐ་ཎིའི་མཆོད་རྟེན་འོག་ཏུ་འགྲོ་ལམ་ཡོད་པ་བཟོས་པ་སོགས་ཀྱི་གཏམ་རྒྱུད་སྙན་ལ་བདེན་བདེན་འདྲ་ཞིང༌། ཞིབ་ཏུ་བརྟག་ན་གད་མོ་བྲོ་དགོས་པ་སྒྲོ་གཏགས་ཀྱི་གཏམ་རྒྱུད་མང་པོ་ཞིག་ཡོངས་གྲགས་སུ་བཤད་སྲོལ་རྒྱུན་འབྱམས་དེ་འདྲ་བཀོད་ཡོད་པ་དེ་ནི་སྐབས་དེའི་ཆབ་སྲིད་ཀྱི་དགོས་མཁོ་དང་བསྟུན་ནས་བྲིས་པ་ཞིག་ཡིན་པ་རྒྱ་བོད་གཉིས་ཀྱི་ལོ་རྒྱུས་ཡིག་ཆ་ཕན་ཚུན་བལྟ་བསྡུར་ཐོག་ནས་དབྱེ་ཞིབ་བྱེད་སྐབས་གསལ་པོར་ཤེས་ཐུབ་པ་ཞིག་ཡོད།
དེ་ཡང་རྒྱལ་རབས་རྦ་བཞེད་སོགས་ཀྱི་ནང་རྒྱ་བཟའ་གྱིམ་ཤིང་ཀོང་ཇོ་ཐང་གོང་མ་རང་ཉིད་ཀྱི་སྲས་མོ་ཡིན་པ་དང༌། དེ་ལ་སྲས་ཁྲི་སྲོང་ལྡེའུ་བཙན་འཁྲུངས་པ། དེ་སྣ་ནམ་བཟས་ཕྲོགས་པ་བཅས་ལོ་རྒྱུས་དངོས་གནས་ཡིན་ཚེ། རྒྱ་ཡིག་གི་ལོ་རྒྱུས་ཐང་དེབ་གསར་རྙིང་སོགས་སུ་ངེས་པར་བཀོད་དགོས་ལ་བཀོད་ངེས་ཀྱི་བཀྲ་ཤིས་པའི་གཏམ་བཟང་ཆབ་སྲིད་ཐོག་གལ་ཆེའི་དོན་སྙིང་ལྡན་པའི་ནང་དོན་ཞིག་ཡིན་བཞིན་དུ་དེ་ལྟར་བཀོད་མེད་པ་ནི་ལོ་རྒྱུས་དངོས་ཡོད་མིན་པའི་དབང་གིས་རེད།
ཡོངས་གྲགས་ཀྱི་ལོ་རྒྱུས་མང་པོའི་ནང་བཤད་སྲོལ་དུ། རྒྱ་བཟའ་གྱིམ་ཤིང་ཀོང་ཇོ་གོང་མའི་སྲས་མོ་ངོ་མ་ཡིན་པ་དང༌། ཐོག་མར་རྒྱལ་པོ་ཁྲི་ལྡེ་གཙུག་བརྟན་གྱི་སྲས་འཇང་ཚ་ལྷ་དབོན་གྱི་བཙུན་མོར་བླངས་པ་ཡིན་ཀྱང་ཀོང་ཇོ་བོད་དུ་མ་འབྱོར་གོང་དུ་སྲས་འཇང་ཚ་ལྷ་དབོན་རྟས་གཡུགས་ནས་གྲོངས་པར་བརྟེན། ཡབ་ཁྲི་ལྡེ་གཙུག་བརྟན་གྱི་བཙུན་མོར་བཞེས་ཤིང༌། དེ་ལ་སྲས་ཁྲི་སྲོང་ལྡེའུ་བཙན་འཁྲུངས་པ་དེ་བཙུན་མོ་ཆེ་བ་སྣ་ནམ་བཟས་འཕྲོག་ཚུལ་འཁོད་ཡོད།
ལོ་རྒྱུས་ཀྱི་བདེན་དོན་དངོས་ནི། ཏུན་ཧོང་ནས་ཐོན་པའི་ཡིག་རྙིང་དང༌། ཐང་དེབ་གསར་རྙིང་སོགས་ལོ་རྒྱུས་ཁུངས་ལྡན་རྣམས་སུ། རྒྱ་བཟའ་གྱིམ་ཤིང་ཀོང་ཇོ་གོང་མ་ཐང་ཀྲུང་ཙུང་གི་ཡང་ཚ་ཡིན་པ་ལས་སྲས་མོ་ངོ་མ་མིན་པ་དང༌། རྒྱ་བཟའ་གྱིམ་ཤིང་ཀོང་ཇོ་བོད་དུ་ཕེབས་སྐབས་རྒྱལ་པོ་ཁྲི་ལྡེ་གཙུག་བརྟན་དགུང་ལོ་བདུན་ལས་མ་ལོན་པའི་རྒྱལ་སྲས་ཤིག་ཡིན་པ་དང༌། སྲས་འཇང་ཚ་ལྷ་དབོན་དང༌། གྱིམ་ཤིང་ཀོང་ཇོ་གཉིས་ཀ་ལོ་གཅིག་གི་ནང་སྔ་རྗེས་སུ་འདས་པར་ཏུན་ཧོང་ཡིག་རྙིང་ནང་གསལ་པོར་འཁོད་ཡོད་པས། གྱིམ་ཤིང་ཀོང་ཇོ་བཙུན་མོར་བཞེས་མཁན་གྱི་རྒྱལ་པོ་ནི་འདུས་སྲོང་མང་པོ་རྗེ་ཡིན་པ་ལས་འཇང་ཚ་ལྷ་དབོན་དང༌། ཁྲི་ལྡེ་གཙུག་བརྟན་གཉིས་ཀ་མིན་པ་དང༌། རྒྱལ་པོ་ཁྲི་སྲོང་ལྡེའུ་བཙན་གྱི་མ་ཡུམ་ནི་སྣ་ནམ་བཟའ་ཡིན་པ་ལས་རྒྱ་བཟའ་གྱིམ་ཤིང་ཀོང་ཇོ་མིན་པ་ར་སྤྲོད་ཐུབ་པ་སོགས་ཀྱི་དངོས་ཡོད་ལོ་རྒྱུས་དེབ་ཐེར་མང་པོར་འཁོད་ཡོད།
ད་དུང་ཕྱོགས་གཞན་ཞིག་ནས་བོད་ཡིག་གི་ལོ་རྒྱུས་གོང་གསལ་དེར་སྟག་རི་དང༌། སེང་རིའི་མཇུག་མ་སྦྲེལ་བ་ཞེས་པའི་སྟག་རི་ནི་བར་མ་རི་སྟག་མོ་ཚང་དུ་འཛུལ་བ་ལྟ་བུར་ཡོད་པ་དེ་ཡིན་པ་དང༌། སེང་རི་ནི་ལྕགས་པོ་རི་སེང་གེ་གནམ་དུ་མཆོངས་པ་ལྟ་བུར་ཡོད་པ་དེ་ཡིན་པས། དེ་གཉིས་མཐུད་འབྲེལ་བྱ་དགོས་ན་བར་མ་རི་དང༌། ལྕགས་པོ་རིའི་རི་སྣེ་གཉིས་ལ་མཆོད་རྟེན་རེ་དང༌། དཀྱིལ་དུ་ཀྐ་ཎིའི་མཆོད་རྟེན་བཅས་བཞེངས་དགོས་ཀྱང༌། རི་སྣ་གཉིས་བཅད་པ་ནི་སྟག་རི་དང་སེང་རི་ཡིན་པའི་ཐོག དེར་མཆོད་རྟེན་མ་བརྩིག་པར་སེང་རི་ལྕགས་པོ་རི་དང༌། གླང་པོ་ཆེ་འཕྲེད་ལ་ཉལ་བ་ལྟ་བུའི་དམར་པོ་རི་གཉིས་ཀྱི་རི་སྣ་དེར་ཀྐ་ཎིའི་མཆོད་རྟེན་རྩིགས་ཡོད་པ་དེར་ཡང་ལོ་རྒྱུས་སྔ་ཕྱིའི་ཚིག་ལ་འགལ་བ་ལྟག་སྤྲོད་ཀྱི་སྐྱོན་ཆེན་པོ་ཡོད་ལ། ལོ་རྒྱུས་ཡིག་ཆ་ཁག་མང་པོའི་ནང༌། སྟག་རི་དང་སེང་རིའི་བར་ཀཀཎིས་སྦྲེལ་ཞེས་རི་སྣ་གཉིས་མཇུག་མ་སྦྲེལ་བ་བཅད་པའི་རི་ནི་སྟག་རི་སྟེ་ཡོངས་གྲགས་སུ་བར་མ་རིར་འབོད་པ་དེ་དང༌། སེང་རི་ནི་ལྕགས་པོ་རི་ཡིན་པར་གཅིག་མཐུན་བྱུང་བས་དཔྱད་གཞི་ཤིན་ཏུ་ཆེའོ།།
བྲག་སྒོ་ཀྐ་ཎིའི་མཆོད་རྟེན་གྱི་བྱུང་ཚུལ་དངོས་ནི། ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་དུས་སུ་ཆོས་འཁོར་རྣམ་གསུམ་སྟེ། ཁྲ་འབྲུག་དང༌། བསམ་ཡས། ལྷ་ལྡན་གཙུག་ལག་ཁང་བཅས་ཕན་ཚུན་བར་རྒྱུན་ལྡན་རྒྱལ་བློན་དང༌། མང་ཚོགས་སོགས་ཀྱི་འགྲིམ་འགྲུལ་བར་མ་ཆད་པར་ཡོད་པ་དང༌། ལྷོ་ཁ་ནས་ལྷ་ལྡན་བར་གྱི་འགྲིམ་འགྲུལ་ལྟེ་བའི་གཞུང་ལམ་ཆུ་ཤུར་ནས་གསང་ཕུ་མདའ་སྙེ་ཐང་དང༌། རྐྱང་ཐང་སྒང་བརྒྱུད་དུ་འཁེལ་བས། བར་མ་རི་དང༌། ལྕགས་པོ་རི། དམར་པོ་རི་བཅས་རི་སྣ་ཕན་ཚུན་སྦྲེལ་ནས་ཡོད་པ་དེས་ཤིང་རྟ་འཁོར་ལོའི་འགྲོ་ལམ་ལ་དཀའ་ངལ་ཤིན་ཏུ་ཆེ་བར་བརྟེན་རྒྱ་བཟའ་གྱིམ་ཤིང་ཀོང་ཇོས་རི་སྣ་ཁག་གཉིས་ཀྱི་སྦྲེལ་ལམ་བཅད་ནས་ཤིང་རྟ་འཁོར་ལོ་ཐད་ཀར་འགྲོ་བདེ་ཡོང་བ་བཟོས་པའི་ཐོག རི་སྣ་གཉིས་འབྲེལ་མཐུད་བྱས་ཏེ་ས་དཔྱད་མི་ཉམས་པ་གཉིས་ཀ་གོ་གཅིག་ཆོད་ཀྱིས་རི་སྣ་ཕན་ཚུན་གྱི་སྣེ་མོར་མཆོད་རྟེན་རེ་དང༌། དཀྱིལ་དུ་མཆོད་རྟེན་འོག་སྒོ་ཆེན་གཏོད་པའི་འགྲོ་ལམ་ཡོད་པ་བཟོས་པ་དེས། ལྷ་ས་གྲོང་ཁྱེར་གཞུང་སྒོ་ལྟ་བུར་མཛེས་ཤིང་བརྗིད་ཆགས་པ་ཞིག་ཏུ་གྱུར་བ་ཡིན།
དེ་ནས་གཙང་པ་རྒྱལ་པོ་ཀརྨ་བསྟན་སྐྱོང་དབང་པོས་བོད་ཁམས་ལ་མངའ་དབང་བསྒྱུར་བའི་སྐབས་སུ་པོ་ཏཱ་ལའི་འཕགས་པ་ལྷ་ཁང་གི་ཤར་ངོས་ནས་མཁར་རྫོང་གཞི་རྒྱ་ཆེ་ཙམ་ཞིག་རྒྱབ་ཚུལ་སྐྱིད་ཤོད་ཞབས་དྲུང་བསྟན་འཛིན་བློ་བཟང་རྒྱ་མཚོའི་རྣམ་ཐར་ནང་གསལ་བ་མ་ཟད། ༸རྒྱལ་དབང་ལྔ་པ་ཆེན་པོ་རང་ཉིད་ཀྱི་མཛད་པའི་རང་རྣམ་ལས། དམར་ལྕགས་གཉིས་ཀྱི་བར་རྒྱ་མོ་བཟའ་ཕྱི་མས་བཅད་པའི་ས་དགྲ་གསོ་བྱེད་མཆོད་རྟེན་དང་ཕན་ཚུན་དུ་ལྕགས་ཐག་རྔ་གདང་དྲིལ་བུས་སྦྲེལ་དགོས་པ་གཏེར་ལུང་མང་པོར་གསལ་བ་བརྟེན་གཙང་དུས་བཞེངས་པ། ཞེས་གསལ་བར་བརྟགས་ན། གཙང་པ་རྒྱལ་པོས་པོ་ཏཱ་ལར་མཁར་རྫོང་བཞེངས་པ་དང་ཆབས་ཅིག་བྲག་སྒོ་ཀྐ་ཎིའི་མཆོད་རྟེན་ལ་ཡང་ཉམས་གསོ་བྱས་པ་གསལ་པོར་ར་འཕྲོད་པ་ཡིན།
དེ་བཞིན་ཕྱི་ལོ་ ༡༦༣༧ ལོར་ཞིག་སྐྱོན་བྱུང་བར་བརྟེན་སྡེ་སྲིད་བསོད་ནམས་རབ་བརྟན་གྱིས་སྐབས་འཕྲལ་ཉམས་གསོ་གནང་ཡང་འགྱེལ་ཞིག་འགྲོ་ལ་ཉེ་བར། སླར་ཡང་ཕྱི་ལོ་ ༡༦༦༦ ལོར་སྡེ་སྲིད་འཕྲིན་ལས་རྒྱ་མཚོས་ཉམས་གསོ་རྒྱས་པར་མཛད་རྩིས་ཀྱིས་གསར་དུ་བཞེངས་ཀྱང༌། ཤིང་བཟོ་བ་གཙང་དུ་ལོག་རྒྱུར་བྲེལ་བ་བྱས་པའི་རྩིག་རྨང་བརྟན་པོ་མ་བྱུང་བར་བརྟེན་གས་སྐྱོན་ཆེན་པོ་ཐེབས་ནས་ཡང་བསྐྱར་རྗེས་ལོ་ཕྱི་ལོ་ ༡༦༦༧ ལོར་ཉམས་གསོ་མཛད་པ་དང༌། ༸རྒྱལ་དབང་ལྔ་པ་ཆེན་པོ་མཆོག་རང་ཉིད་ཀྱིས་བཀོད་སྒྲིག་དང་རབ་གནས་ཀྱང་གནང་ཡོད་ལ། ༸རྒྱལ་བ་སྐུ་ཕྲེང་བརྒྱད་པ་དང༌། སྐུ་ཕྲེང་བཅུ་གསུམ་པ་ཆེན་པོ་རྣམ་གཉིས་ཀྱི་སྐུ་དུས་སུའང་རྒྱ་ཆེ་བའི་ཉམས་གསོ་གནང་ཡོད།
སྔར་གྱི་ལོ་རྒྱུས་ཅན་གྱི་མཆོད་རྟེན་རྣམ་གསུམ་རིག་གསར་སྐབས་རྩ་གཏོར་སོང་ཡང༌། དེང་སྐབས་ས་ཞིང་བརྟན་ལ་བཟོ་བཀོད་བརྗིད་ཆགས་ཤིང་རྣམ་པར་བཀྲ་བའི་མཆོད་རྟེན་དེ་དག་ཉམས་གསོ་གནང་སྟེ་སྐྱེ་བོ་ཀུན་གྱི་མིག་ལམ་དུ་ཁྲ་ལྷམ་མེར་མཐོང་རྒྱུ་ཡོད་ལ། ལྷ་སའི་ནུབ་ཕྱོགས་ནས་ཡོང་མཁན་རྣམས་བྲག་སྒོ་ཀྐཎི་བརྒྱུད་ནས་ཡོང་གི་ཡོད་པས་དེ་ནི་ལྷ་སའི་ནུབ་ངོས་ཀྱི་གཞུང་སྒོ་ལྟ་བུ་ཞིག་ཡིན།
སྤྱི་ལོ་ ༡༩༦༦ ལོར་རིག་གནས་གསར་བརྗེ་ཆེན་པོ་ཞེས་པའི་ཟིང་འཚུབ་སྐབས་མཆོད་རྟེན་གསུམ་ཀ་གཏོར་བརླག་བཏང་མཐར། ཕྱི་ལོ་ ༡༩༨༦ ལོར་ལྷ་ལྡན་ཆོ་འཕྲུལ་སྨོན་ལམ་ཆེན་མོ་ཚོགས་སྐབས་བྲག་ལྷ་ཀླུ་སྒུག་དགོན་ནས་བྲག་སྒོ་ཀྐ་ཎིའི་མཆོད་རྟེན་གསར་བཞེངས་བྱ་རྒྱུའི་ཞལ་འདེབས་འདུ་སློང་བྱས་པར་དད་ལྡན་རྒྱ་ཆེའི་མང་ཚོགས་ནས་བྲག་སྒོ་ཀྐཎི་བསྐྱར་བཞེངས་ཉམས་གསོའི་ཞལ་འདེབས་སུ་དངུལ་འབོར་ཤུགས་ཆེ་ཕུལ་འབྱོར་བྱུང་བ་བཞིན་གོང་རིམ་ལ་ཉམས་གསོ་ཆོག་པའི་འགྲོ་ལུགས་ཀྱི་སྙན་ཞུ་རིམ་པར་ཕུལ་ཡང་དོན་མེད་བསྙད་འདོགས་སྣ་ཚོགས་ཀྱིས་ཆོག་མཆན་མ་ཐོབ་ཁར། མང་ཚོགས་ནས་དད་འབུལ་བྱུང་བའི་དངུལ་འབོར་ཡོངས་རྫོགས་གཞུང་བཞེས་བཏང་ཞིང༌། སྐབས་དེར་གཞས་མ་གྲགས་ཅན་ཟླ་སྒྲོན་ལགས་ནས།
པོ་ཏཱ་ལ་ནས་བལྟས་པས། །བྲག་སྒོ་ཀྐ་ཎི་དྲན་བྱུང༌། །
ལུང་པར་རྒྱལ་སྒོ་མེད་དུས། །ང་རང་སེམས་པ་སྐྱོ་བྱུང༌། །
མཆོད་རྟེན་བྲག་སྒོ་ཀྐ་ཎི། །ལྷ་ལྡན་མཛེས་པའི་རྒྱན་རེད། །
མཆོད་རྟེན་བཞེངས་རོགས་གནང་དང༌། །ཞལ་འདེབས་ང་རས་ཕུལ་ཆོག།
བར་མ་རི་ནས་བལྟས་པས། །བྲག་སྒོ་ཀྐ་ཎི་དྲན་བྱུང༌། །
དྲོ་སྐྱིད་ཉི་མའི་འོད་ཟེར། །དམངས་ཀྱི་སེམས་པ་མཚོན་ཡོད། །
མཆོད་རྟེན་བྲག་སྒོ་ཀྐ་ཎི། །ལྷ་ལྡན་མཛེས་པའི་རྒྱན་རེད། །
མཆོད་རྟེན་བཞེངས་རོགས་གནང་དང༌། །ཞལ་འདེབས་ང་རས་ཕུལ་ཆོག །
ཅེས་པའི་གླུ་གཞས་ཀྱང་བཏང་ཡོད་ལ། སྐབས་དེར་གླུ་གཞས་དེ་ཉིད་ཆབ་སྲིད་ཀྱི་ཐོག་ནས་གོ་རྒྱུ་ཆེན་པོ་ཡོད་པའི་གླུ་གཞས་གྲགས་ཅན་ཞིག་ཏུའང་གྱུར། མཐར་སྤྱི་ལོ་ ༡༩༩༥ ལོར་མཆོད་རྟེན་གསུམ་པོ་བསྐྱར་བཞེངས་ཀྱིས་གནའ་བོའི་བརྗིད་ཉམས་སླར་ཡང་མངོན་པར་བྱས་པ་ནི་དགའ་བསུ་བྱེད་འོས་པ་ཞིག་ཡིན། བྲག་སྒོ་ཀྐ་ཎིའི་མཆོད་རྟེན་གསུམ་ལས་དབུས་ཀྱི་མཆོད་རྟེན་ནི་ཆོ་འཕྲུལ་མཆོད་རྟེན་གྱི་བཟོ་དབྱིབས་དང༌། ལྕགས་པོ་རིའི་སྣེར་བསྐྲུན་པའི་མཆོད་རྟེན་ནི་བྱང་ཆུབ་མཆོད་རྟེན་ཡིན། དམར་པོ་རིའི་རི་སྣར་བསྐྲུན་པའི་མཆོད་རྟེན་ནི་རྣམ་རྒྱལ་མཆོད་རྟེན་བཅས་ཡིན།
༩ བྲག་སྒོ་རབ་འབྱམས་པའི་སྒྲུབ་ཁང་ནི། དམར་པོ་རིའི་སྣེར་བསྐྲུན་པའི་རྣམ་རྒྱལ་མཆོད་རྟེན་དང་ཉེ་བར་སྔོན་དུས་བྲག་སྒོ་རབ་འབྱམས་པའི་བཞུགས་གནས་སུ་གྲགས་པའི་སྒྲུབ་ཁང་ཆུང་ཆུང་ཞིག་ཡོད། དེ་ནི་༸རྒྱལ་དབང་ལྔ་པ་ཆེན་པོ་ངག་དབང་རྒྱ་མཚོས་བྲག་སྒོ་རབ་འབྱམས་པ་སྐུ་གཤེགས་པའི་རྗེས་དྲན་དུ་རབ་འབྱམས་པ་བྱ་བྲལ་གྱི་བརྟུལ་ཞུགས་འཛིན་ཏེ་བསྙེན་སྒྲུབ་མཛད་པའི་གནས་དང༌། དགོངས་པ་མྱ་ངན་ལས་འདས་པའི་ཤུལ་རྡོ་སྐྱོར་བསྐོང་བའི་ས་དེ་རང་ལ་སྒྲུབ་ཁང་ཞིག་བཞེངས་ཐོག་དེར་བྲག་སྒོ་རབ་འབྱམས་པའི་དབུ་ཐོད་ནང་རྟེན་དུ་བཞུགས་སུ་གསོལ་ཞིང༌། ༸རྒྱལ་དབང་ལྔ་པ་ཆེན་པོ་སྐུ་དངོས་ཀྱིས་རབ་གནས་མཛད་ཡོད་པར་གྲགས། བྲག་སྒོ་རབ་འབྱམས་པའི་སྒྲུབ་ཁང་དེ་ཉིད་རིག་གསར་སྐབས་རྩ་གཏོར་སོང་སྟེ་དེང་སྐབས་ཉམས་གསོ་ཞུ་ཐུབ་མེད་ལ། སྒྲུབ་ཁང་གནས་ཡུལ་དུ་དེང་ཡུལ་སྐོར་སྤྲོ་འཆམ་གྱི་ཚོང་ཟོག་ཚོང་ཁང་གསར་འཛུགས་བྱས་ཡོད་པ་བཅས་སོ།། །།
ལྷ་སའི་དངོས་བྱུང་་བདེན་དཔང་ལས་བཏུས།
