འདི་ལ་རྡུལ་གྱིས་གོས་ན་མི་རུང་ཞེས། །པདྨ་བརྒྱུད་པ་སྟོང་དག་བྱུང་གྱུར་ཏེ། །ཟེའུ་འབྲུའི་རྐང་སྟེང་གསེར་གྱི་རྐང་པ་ཡི། །འཕུར་ལྡིང་མཛེས་པ་གསེར་གྱི་བུམ་པ་བཞིན། །འགྲོ་བའི་བླ་མ་ཡེ་ཤེས་འོད། །བསོད་ནམས་སྐས་ལས་ཐར་བར་གཤེགས། །ཐུགས་རྗེ་ཆེ་གང་བྱང་ཆུབ་འོད། །བློ་གྲོས་ཆེན་པོ་ཞི་བ་འོད། །རྒྱལ་བའི་ཟློས་གར་ཉི་བཞོན་ནི། །ཐུབ་བསྟན་ཤར་རིའི་དོ་རར་རོལ། །དེ་དག་དད་པ་གསེར་གྱི་ནི། །ལྕགས་ཀྱུས་དཔལ་ལྡན་མར་མེ་མཛད། །སངས་རྒྱས་གཉིས་པ་སྤྱན་དྲངས་ཏེ། །ཀེ་རི་ཟླ་བའི་འོད་ཀྱིས་འབར། །ཐུབ་བསྟན་ལོ་ནི་བཅུ་ཕྲག་དགུར། །ནད་མེད་མུ་གེ་མེད་པ་ཡིས། །དར་མཛད་རྐང་གཉིས་གཙོ་ཁྱོད་དང་། །སྤུ་ཧྲངས་བཞེས་ཝེར་ཞེས་བྱར་མཇལ། །ལྷན་ཅིག་སངས་རྒྱས་གཉིས་མིན་ཞེས། །སྨྲ་བ་རྫུན་གྱི་ཚིག་ཏུ་བྱས། །སྐྱེས་མཆོག་ཁྱོད་ཀྱིས་བདུད་རྩིའི་རོས། །ཡོངས་ཚིམ་འགྲོ་ལ་བ་ཚྭའི་ཆུ། །ང་ཡིས་ཅི་བྱ་ཅི་བྱ་ཞེས། །ངཱི་པམ་ཀ་རས་ཞུམ་ཚིག་གསུངས། །ཏིང་འཛིན་གང་ལ་ལོ་གཅིག་མཉམ་བཞག་ན། །རྨད་བྱུང་རྡོ་རྗེ་ལྟ་བུ་ཞེས་གྲགས་པ། །དཔལ་ལྡན་ས་བཅུའི་རྩེར་སོན་དེ་འགྲུབ་པར། །དགོངས་ཏེ་ཆུ་ཀླུང་ཆེན་པོ་པ་ཀྴུའི་འགྲམ། །བསམ་གཏན་ལ་འོས་བཞེར་རར་གཙུག་ལག་ཁང་། །བསྟན་མཛད་ནེ་རཉྫ་ནའི་རྒྱལ་སྲས་བཞིན། །རྒྱལ་རྣམས་ཞུམ་མཛད་ཐུགས་དམ་བཅའ་བ་གསུམ། །ནམ་ཡང་འགྱུར་མེད་རྡོ་རྗེའི་སྐུ་འདྲ་བ། །སྒོ་འཕར་ཕྱི་ནང་གཅིག་ངོས་དུང་དང་དངུལ། །གསེར་གྱི་ཡི་གེ་ངོ་མཚར་བྱེ་བ་འཛིན། །ཐེངས་གཅིག་ཙམ་ངས་མི་དགེའི་བློ་སྐྱེས་དང་། །རིན་ཆེན་སེམས་དང་ཡུད་ཙམ་བྲལ་བ་དང་། །ལུང་མ་བསྟན་བློ་སྐད་ཅིག་གཅིག་སྐྱེས་ན། །ཡན་ལག་མཆོག་གང་མཁའ་འགྲོས་ཁོས་ཤིག་ཅེས། །ལྷར་བཅས་བདུད་བཅས་སྐྱེ་རྒུའི་བདག་པོར་བཅས། །དགེ་སྦྱོང་གཉིས་སྐྱེས་དང་བཅས་འཇིག་རྟེན་ན། །སུས་ཀྱང་བགོམ་པར་མི་ནུས་མི་འཇིགས་བཞི། །བརྙེས་འདི་ངེས་པར་རྣམ་དག་སངས་རྒྱས་ཏེ། །རང་དོན་ལ་ཆགས་བདག་ཀྱང་གཞན་དོན་དུ། །ཁྱོད་ཀྱི་ཞབས་ལ་སྙིང་ནས་ཕྱག་འཚལ་ལོ། །ཁྱོད་ཀྱི་སློབ་མ་གྲུབ་པའི་དབང་ཕྱུག་ཚོགས། །མཁའ་ལ་འཕུར་ལྡིང་རྒྱུ་སྐར་གྲངས་མཚུངས་ཏེ། །འཛིན་མར་རབ་གནས་བསྟན་པ་འཛིན་པ་ནི། །གང་གཱའི་རྡུལ་གྲངས་ཉུང་ངུར་བྱེད་པ་ཉིད། །ཁྱོད་ལ་འགྲན་བཞིན་ཕུར་བུ་སྐྱེངས་བྱེད་བཞིན། །ཀུན་མཁྱེན་བཞིན་དུ་སྨྲ་བ་བྱང་ཤེ་དང་། །དགེ་བློ་སྨེ་དང་འཇང་བློ་རིན་གཞོན་རྣམས། །སོ་སོར་ཆོས་ཀྱི་ཁྲི་སྟན་ཆེ་ལ་བཀོད། །ཡུམ་གྱི་སྐྱེད་ཚལ་རིན་ཆེན་མྱུ་གུ་ནི། །སར་པས་རྣམ་མཛེས་དེ་ཚེ་ཡོན་ཏན་ཀུན། །གཙིག་ཕུད་ཅན་དང་ཁུ་བྱུག་སྨྲ་མཁས་ཀྱི། །གཟུགས་མཛེས་ཟོལ་གྱིས་འཇོ་སྒེག་རོལ་བ་འཛིན། །ཤཱཀྱ་སེང་གེའི་དྲུག་གཉིས་མཛད་པ་ལ། །འགྲན་པ་བཞིན་དུ་རྣམ་སྤྲུལ་འདི་གནས་དང་། །འཚོག་ཆས་ཚོགས་ལ་བདག་མེད་སྤོངས་ཤིག་ཅེས། །གྲུབ་པའི་སྐྱེ་བོས་སྙིང་ནས་འདོམས་པར་མཛད། །གཉིས་ཀྱིས་དམན་པ་བཅུ་ཕྲག་བཅུའི། །ལོ་ལ་ལང་ཚོ་གསར་བ་ནི། །ནམ་ཡང་རྒས་མེད་དེ་བརྙེས་ཚེ། །རླུང་གི་ཟས་ཅན་པགས་པ་བཞིན། །ཅ་ཡེ་བྲག་ཅེས་བྱ་བ་དང་། །གཡང་སྐྱུར་ཕུག་གི་གནས་དང་ནི། །གོ་ཁར་རེ་ཝིང་གོ་སོགས་ནས། །སྤྲུལ་པ་སོ་སོ་སོ་སོ་ཡི། །མངོན་སུམ་མྱ་ངན་འདས་གྱུར་ཏེ། །སྐུ་གདུང་འཛིན་བྱེད་བསྲེག་ཟ་ཡིས། །རིལ་མེད་ཉིད་བྱས་རིང་བསྲེལ་ནི། །གསུམ་ཞིག་ལྷག་མར་ལས་པ་ཡང་། །རྟག་ཏུ་མཉམ་འཇོག་སྐུ་བཞིན་དུ། །མཁའ་ཡི་དབྱིངས་སུ་མི་སྣང་གྱུར། །ཚུལ་འདིར་རང་སེམས་སྣང་བ་ཞེས། །མི་ཤེས་མི་དང་མི་མིན་དག །མིག་ཆུའི་རྒྱུན་དག་སྤྲོ་བྱེད་པ། །འཇིག་དུས་དག་བྱེད་ཕུང་པོ་བཞིན། །ཀ་ཡེ་གྲོགས་དག་འཁོར་བ་འདི་དང་མྱ་ངན་ལྷན་ཅིག་མྱུར་དུ་འོང་ཞིག་དགའ་བ་ཡི། །དགའ་སྟོན་རོར་ཆགས་དགའ་མ་འདི་ནི་བརྒྱ་ཕྲག་བཅུ་གཉིས་མཛེས་པ་ཡོངས་རྫོགས་རང་གི་གྲོགས། །སྲེད་ལྡན་འཁྱུད་པ་ནམ་ཡང་འདོར་མེད་དེ་ལྟ་ན་ཡང་ཁྱེད་ཅག་ལུས་སྲོག་གེ་སར་རྡུལ། །མི་རྟག་བུང་བས་ཁམ་ཟས་བྱེད་འདི་རྗེས་དཔག་བྱ་སླ་སྒྱུ་མ་འདི་བྱས་རྗེས་རིག་བྱ། །རིན་ཆེན་ཟ་མ་ཏོག་ལས་ནི། །རབ་འཐོན་རིན་ཆེན་བཟང་པོ་ཡིས། །དེ་གསུང་ཆོས་མཐོང་དེ་དག་གིས། །རྡུལ་མཉམ་མེ་ཏོག་ཆར་དག་སྤྲོས། །དེ་ལྟར་ལུང་བསྟན་དཔལ་ལྡན་མར་མེ་མཛད། །རིག་པ་འཛིན་པའི་འཕགས་ལམ་གྱིས་དྲངས་པའི། །མངོན་ཤེས་སྤྱན་ཡངས་ཅན་དེས་ཡང་གསུང་བ། །གྲུབ་པའི་ཕོ་ཉ་གསེར་གྱི་གོ་ཆ་སོགས། །མཁའ་འགྲོའི་ཚོགས་བཅས་འཇིག་རྟེན་འདྲེན་བྱེད་དེ། །མཁའ་སྤྱོད་གཤེགས་ཞེས་གྲགས་པ་དང་མཐུན་པར། །མཁའ་ལ་གོམ་པ་འདེགས་འཇོག་ཟུང་གཅིག་གིས། །རྨད་བྱུང་བདེ་བ་ཅན་གྱི་འཇིག་རྟེན་གཤེགས། །ཞིང་དེའི་མགོན་དང་གཉིས་སུ་མེད་པར་མཇལ། །ཆོས་ཀྱི་བགྲོ་བ་རྒྱ་ཆེའི་དགའ་བདེས་ཚིམ། །འདབ་བརྒྱའི་ཚལ་དུ་བུང་བ་རོལ་བ་བཞིན། །སླར་ཡང་ཞིང་དང་ཞིང་གཞན་ཀུན་ཏུ་གཤེགས། །སྐད་ཅིག་རེ་རེར་འགྲོ་བ་གྲངས་མེད་ནི། །གྲངས་མེད་སྨིན་ཅིང་གྲོལ་བར་མཛད་དོ་ཞེས། །ཅི་ཡང་དང་བའི་ཟླ་བ་ཤར་བ་དེས། །པཎ་ཆེན་དེ་ཡི་ཕྱག་པད་སྤྱི་བོར་ཟུམ། །ཁྱོད་ཉིད་གཅིག་པུས་བོད་ཡུལ་འདི། །སངས་རྒྱས་ཞིང་དང་འགྲོ་རྣམས་ཀྱང་། །རྒྱལ་དང་རྒྱལ་སྲས་ས་ལ་བཀོད། །མགོན་དེར་སླར་ཡང་ཕྱག་བགྱིད་དོ། །ཡང་ཡང་གོམས་མཛད་ལེགས་ལྡན་མཐའ་དག་རྒྱལ་རྣམས་ལྗགས་ཡངས་དབྱར་སྐྱེས་རྔ་གསང་གྲོགས་པོ་ལ་ནི་འཁུ་བ་ལྟར་སྟོན་རང་གི་ཀུན་སྤྱོད་ནམ་ཡང་མ་རྫོགས་ངལ་བ་ཅན། །ལྷག་བསམ་ཁུར་དང་འཁོར་བའི་དཔལ་ལ་འདོད་ཆགས་བྲལ་གང་དུག་ཅན་མ་ཡིག་བདག་པོའི་མགོ་སྐྱེས་མལ་སྟན་ལ་ཆགས་རིན་ཐང་རྒྱ་ཆེ་འདི་ཡིས་གང་གི་མཚན་ཙམ་གྱི། །རྒྱ་ཡི་ཆར་ཡང་བཟོད་པ་མ་ཡིན་དེའི་དཔལ་རང་མཚུངས་བསྔགས་འོས་སྤྱོད་མཐའ་དབང་ཕྱུག་སྐྲ་ཕྲེང་དོག་པ་ཉིད་བྱེད་ཁ་བ་སར་བའི་སྤུ་ལོང་གོས་གྱོན་འཛིན་མ་ལ། །རྣམ་པར་བཀོད་པའི་ཆུ་མཚོ་ཆེ་ལས་སྔོན་མེད་སྙན་ངག་ཟླ་བའི་མདངས་འཕྲོག་སེན་མོའི་རྩེ་མོས་ཟེགས་མ་ཙམ་བླངས་མངོན་པར་འཐོར་བྱས་མཁས་རྣམས་དགྱེས་པས་ཡི་རངས་བྱོས། །མང་ཐོས་སྤོབས་པའི་མཐེབ་ལོང་འགྲོགས་པ་ལས། །སྙན་ངག་ཉག་ཕྲན་འབད་མེད་སྤྲོས་པ་ཡིས། །སྲིད་འགྲོར་འཇིགས་པས་ཉེན་རྣམས་དགྲ་ཡི་སྡེ། །ཉོན་མོངས་ཀུན་འཇོམས་དཔའ་བོར་བདག་གྱུར་ཅིག །ཅེས་བྱ་བ་ནི་བགྲང་བ་ལས་འདས་པའི་སྔོན་གྱི་སྐྱེ་བ་རྣམས་སུ་ཚོགས་གཉིས་རླབས་པོ་ཆེ་ཀུན་ཏུ་བསྟེན་ཅིང་མང་དུ་བསྟེན་ཅིང་མང་དུ་བསགས་པ་ཡོངས་སུ་སྨིན་པ་ཉིད་ལས། སྲིད་པ་ཐ་མ་པའི་སྐུའི་སྐྱེ་བ་འདིར་དབང་ཕྱུག་བརྒྱད་དང་ལྡན་པའི་བྱང་ཆུབ་སེམས་རྡོ་རྗེའི་ས་བརྙེས་པ། །སྐྱེ་མཆོག་རིན་ཆེན་བཟང་པོའི་རྣམ་པར་ཐར་པ་ལོ་ཙཱ་ཆེན་པོ་ཉིད་ཀྱི་སློབ་མ་ཀ་བཞི་དང་གདུང་བརྒྱད་དུ་གྲགས་པའི་ནང་ཚན་ཁྲི་ཏང་བ་ཛྙ་ན་ཤྲིས་བཀོད་པ་དེ་ཉིད་འདིར་ཚིགས་སུ་བཅད་པའི་དབྱངས་ཀྱིས་བསྟན་ཅིང་སོ་སོར་བསྟན་ལ་རྣམ་པར་རིག་པར་བྱས་པ་སྟེ། །རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུ་ཁོང་དུ་ཆུད་པའི་ཞང་ཞུང་པ་ཕྱོགས་ལས་རྣམ་རྒྱལ་ཆོས་དབང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའོ།། །།
ཡོང་ཁུངས། ལུགས་གཉིས་ཕོ་ཉའི་གླིང་།