ལྷོ་ཁའི་ལྗོངས་རྒྱུ། བོད་ཀྱི་དཀར་ཡོལ་དང་པོ། དར་ཚེ།

འབྲིང་ནི་འཛེང་། ཐ་མ་རྡོ་དཀར་པོས་ཀྱང་རུང་ངོ་ཞེས་བཤད་པ་ལྟར་རྒྱུ་ཆ་སྣ་ཁ་གསུམ་གྲ་སྒྲིག་བྱས་ཏེ་ལག་རྩལ་པར་སྤྲད། དེ་ནས་ལག་རྩལ་པ་དེས་དཀར་ཡོལ་གྱི་བཟོ་ལྟ་དང་རི་མོ་སོགས་ཇི་འདྲ་ཞིག་བཟོ་དགོས་སམ་ཞེས་ཟེར་བར་བཙན་པོས་ངེས་པར་དུ་རྒྱ་ནག་ཏུའང་མེད་པའི་དཀར་ཡོལ་བོད་ཀྱི་ཁྱད་ཆོས་ལྡན་ཞིག་བཟོ་དགོས་ཏེ། བཟོ་ལྟ་ནི་ཁ་གཡེར་བ། སྲབ་པ། མདོག་དཀར་ལ་འཇམ་པ། སྔོ་ཞིང་དྭངས་པ་ཞིག་དགོས་པ་དང་། དེ་ནི་བོད་དུ་སྔར་མེད་པ་ཞིག་དར་བས་དར་ཞེས་དང་།

སྣོད་དེ་ལས་ཚེ་དང་དཔལ་འབྱོར་འཕེལ་བར་བྱེད་པས་ན་ཚེ་ཞེས་ཡིག་འབྲུ་གཉིས་ཟུང་འབྲེལ་གྱིས་དར་ཚེ་ཞེས་མིང་དུ་བརྗོད། གཞན་ཡང་དཀར་ཡོལ་གྱི་རི་མོ་ནི། བོད་ཀྱི་དཀར་ཡོལ་དེ་ཐོག་མར་འདབ་ཆགས་ཀྱིས་ཤིང་ལོ་འཁྱེར་ཡོང་བ་རྐྱེན་བྱས་པ་ཡིན་པས། དཀར་ཡོལ་རབ་དེའི་ནང་དུ་ཁ་ལ་ཤིང་ལོ་འཁྱེར་བའི་བྱ་རེ་དང་།

འབྲིང་ལ་ཆུ་ནང་ཉ་རྩེན་པ་རེ། ཐ་མ་ལ་སྤང་རི་དང་ཤ་བ་རེ་འབྲི་དགོས་ལ། ད་དུང་དཀར་ཡོལ་དཀྱུས་མ་རྣམས་ལ་ལག་རྩལ་པའི་འདོད་མོས་ལྟར་རི་མོ་བྲིས་ན་འགྲིག་གསུང་པ་ལྟར་ལག་རྩལ་པས་རྒྱུ་ཆ་བཟང་ངན་དང་དྭངས་སྙིགས་ཕྱེ་ནས། དར་ཚེ་རིགས་མི་འདྲ་བ་དྲུག་བཟོས་པའི་ནང་གི་བཙན་པོས་བཀའ་གནང་བ་གསུམ་པོ་ལ། ཤབ་ཚེ། ལན་ཚེ། ཤང་ཚེ་ཞེས་མིང་བཏགས་པ་དང་། དེ་མིན་དཀྱུས་མ་གསུམ་པོ་ལ། ཐེག་ཚེ། དེས་ཚེ། རྡོ་ཚེ་ཞེས་མིང་བཏགས།

དཀར་ཡོལ་དེ་རིགས་ནི་གྲངས་འབོར་ཉུང་ཞིང་། རྒྱུ་ཆ་ལེགས་ལ་བཟོ་སྤུས་གཙང་བས་རྒྱ་ནག་ཏུ་མེད་པའི་དཀར་ཡོལ་རྩ་ཆེན་ཞིག་ཡིན་ལ། དཀར་ཡོལ་བཟོ་ས་ནི་འཕྱོངས་རྒྱས་སོལ་ནག་ཐང་པོ་ཆེར་ཡིན་ཞིང་། ཡུལ་དེའི་མིང་ལ་སོལ་ནག་ཐང་པོ་ཆེ་ཟེར་དོན་ཡང་དཀར་ཡོལ་བཟོ་དུས་བསྲེགས་རྫས་ཀྱི་སོལ་ནག་ཕུང་པོ་གང་སར་སྤུངས་བཞག་ཡོད་སྟབས་སྔར་གྱི་ཡུལ་མིང་ཐང་པོ་ཆེ་ཞེས་པའི་ཐོག་མར་སོལ་ནག་ཅེས་བསྣན་པ་ཕ་གཏམ་བུ་འཇགས་སུ་གྱུར་རོ། །
ཡར་ཀླུང་སྤྲིན་ཆར་ལས་དྲངས།