རྩོམ་པ་པོ། སྐྱུ་རའི་རླུང་བུ།
སྤྱིར་བོད་མཁས་པའི་རྣམ་ཐར་ཐམས་ཅད་ཚད་གཞི་ངེས་ཅན་ཞིག་གི་ཐོག་ནས་བོད་འདིར་བཀའ་དྲིན་མཚོན་ཡོད་རུང་། ཕྱོགས་གང་གིས་ཀྱང་གཞལ་དཀའ་བའི་ལོ་ཆེན་བཻ་རོ་ཙ་ནའི་བཀའ་དྲིན་ལྟ་བུ་ལྗོངས་འདིར་རྒྱུ་བ་གཅིག་མི་མཐོང་། དེ་ཡང་དུས་རབས་བརྒྱད་པའི་ནང་དུ་ཡབ་གན་ཆག་རྡོ་རྗེ་རྒྱལ་དང་ཡུམ་སྒྲོན་ས་སྒྲོན་སྐྱིད་གཉིས་ཀྱི་སྲས་སུ་སྙེ་མོ་བྱེད་ཀར་དུ་སྐུ་འཁྲུངས་པའི་གན་ཇག་ཐང་ཐའམ་བཻ་རོ་ཙ་ན་ནི། བོད་འདིའི་ལོ་ཙྭའི་ཐོག་མ་དེ་ཡིན་ཅིང་། སློབ་དཔོན་པདྨ་དང་བཙད་པོ་ཁྲི་སྲོང་ལྡེའུ་བཙན་གྱི་བཀའ་ལུང་ལྟར་དགུང་ལོ་བརྒྱད་ནས་ནང་ཆོས་བོད་ལ་བསྒྱུར་བའི་ཆེད་ཕ་མ་ཉེ་འབྲེལ་སོགས་ལོངས་སྤྱོད་རྣམས་རྒྱབ་ཏུ་བསྐྱུར་ནས་བསམ་ཡས་སུ་ཕེབས་ཏེ་མཁན་སློབ་གཉིས་ཀྱི་དྲུང་ནས་ལོ་དགུའི་རིང་ཤེས་རབ་བསྐྱེད་ཐབས་དང་བློ་འཕེལ་གཟུངས་སྒྲུབ་ཀྱིས་སྒོ་ནས་སྒྲ་རྣམས་མཁས་པར་བསླབས།
དེ་ནས་བསམ་ཡས་སྒྲ་བསྒྱུར་གླིང་དུ་ཕེབས་ཤིང་སློབ་དཔོན་གྱིས་གསུངས་པའི་གསང་སྔགས་ནང་པའི་ཆོས་བསྐོར་རྣམས་ཚེགས་མེད་དུ་བསྒྱུར་ནས་རྗེ་འབངས་རྣམས་ལ་གདམས་པ་རྫོགས་པར་གནང་། དེའི་ཚེ་སློབ་དཔོན་པདྨ་ལ་རྒྱུ་འབྲས་ལས་འདས་པའི་ཆོས་ཟབ་མོ་ཡོད་ཀྱང་བོད་འབངས་རྣམས་ཀྱིས་བློར་མི་ཤོང་བར་ཡོད་པས། རྒྱལ་པོའི་ཐུགས་ལ་བོད་འབངས་རྣམས་ཀྱི་ཁྲོད་ལས་བློ་རྣོ་བ་རེ་ཟུང་རྒྱ་གར་ལ་ལོ་ཙྭ་སློབ་པར་བརྫང་རྒྱུའི་ཐུགས་དགོངས་འཆར་ཏེ་སློབ་དཔོན་ལ་ཞུས། དེ་སྐབས་དགུང་ལོ་བཅོ་ལྔར་གསོན་པའི་བཻ་རོ་ཙ་ན་ཁྲོམ་ལས་ལངས་ཏེ་རྗེ་ཡིས་བཀའ་སྩོལ་དང་བདག་འགྲོའོ་ཞུས་ཏེ་ཕ་མ་ཡུལ་གཞིས་གཉེན་ཉེ་ལ་སོགས་པ་ཐམས་ཅད་སྤངས་ཏེ།
༡ མཐའི་ཡུལ་སྐད་མི་གཅིག་པ་གཅན་གཟན་གྱི་འགག་འཕྲང་ལ་སོགས་པ་འཇིགས་པ་ཤིན་ཏུ་ཆེ་བར་ཁས་ལེན་པ་ནི་ཤིན་ཏུ་དཀའ་བས་དཀའ་བ་དང་པོ་ཁས་བླངས།
༢ ཕ་ཨ་ཁུ་སོགས་ཀྱི་བཙན་པོར་རྒྱ་གར་ལ་འགྲོ་རྒྱུའི་བཀའ་གཅོག་པར་ཞུས་པ་སོགས་ཕ་མ་གཉེན་འབྲེལ་མང་པོའི་ཞུ་བ་དང་འདོད་དོན། ལོངས་སྤྱོད་མཐའ་དག་སྤངས་ཏེ་ཨརྱ་པ་ལོའི་གླིང་དུ་གྲོགས་པོ་ལེགས་གྲུབ་དང་མཉམ་དུ་བཤུལ་ཐག་རིང་ཞིང་སོ་འཕྲང་སྲུང་བ་ལ་སོགས་ཀྱི་བགྲོད་པར་དཀའ་བའི་སར། ལམ་འཚོལ་མཁན་པོ་མེད་པར་འགྲོ་བ་ཤིན་ཏུ་དཀའ་བའི་ལམ་ལ་ཆས་པས་དཀའ་བ་གཉིས་པ་དང་དུ་བླངས།
༣ བཤུལ་ལམ་དག་ཁ་བས་གཡོགས་ཏེ་གང་ནས་འགྲོ་དགོས་མིན་མ་ཤེས་པར་བཻ་རོ་ཙ་ན་ཉིད་ཀྱིས་རྟའི་མཐུར་ནས་བཟུང་སྟེ་ཁ་བ་བཤགས་ཏེ་ལམ་བཙལ་ཞིང་ལེགས་གྲུབ་ཀྱིས་རྟའི་མཇུག་མ་ནས་བཟུང་སྟེ་དྲུད་ནས་ཤི་མ་གསོན་གྱི་ངང་ནས་རྒྱང་གྲགས་གཅིག་གི་ལམ་ལ་ནམ་ལངས་ནས་ས་རུབ་པའི་བར་སོང་སྟེ་ཤི་ལ་ཤི་ཁད་བྱས་ནས་དཀའ་བ་གསུམ་པ་གཞལ་བར་བྱས།
༤ བལ་ཡུལ་ཚ་བ་རོང་ནས་འགྲོ་ས་མ་རྙེད་པར་ཞག་གཅིག་བསྡད་པར་གནོད་སྦྱིན་གདུག་པ་ཅན་མི་ཤ་རློན་པ་ཟ་བ་འགས་གདུག་པའི་ཆོ་འཕྲུལ་བསྟན་ནས་བར་གཅོད་བྱེད་དུ་བྱུང་བ་ལ་བཻ་རོས་རྫུ་འཕྲུལ་བསྟན་ནས་གནོད་སྦྱིན་དབང་དུ་བསྡུས། དམ་ལ་བཏགས་པ་སོགས་མི་མ་ཡིན་གྱི་བར་གཅོད་ལས་ཐར་བར་དཀའ་བ་སྟེ་དཀའ་ཆེན་བཞི་པ་གཞལ་བར་བྱས།
༥ བལ་ཡུལ་དུ་རྟ་དང་གསེར་ལ་ཇག་པ་བྱུང་བར་དོགས་ནས་མཚན་འགྲོས་བྱེད་པར་ཁ་བ་བབས་ཏེ་རྟའི་རྗེས་སྦ་བའི་ཕྱིར་བཻ་རོས་རྐང་ལག་བཞི་ལ་གཅན་གཟན་གྱི་སྡེར་མོའི་སྦར་ཁ་གོན་ནས་སྒུར་བཞིན་རྟ་ཁྲིད། ལེགས་གྲུབ་ཀྱིས་ཀྱང་དེ་ལྟར་བྱས་ཏེ་རྟའི་རྗེས་སུབ་ནས་ཕྱིན་པ་སོགས་བསུབ་པར་དཀའ་བའི་ཁ་བ་ལ་རྗེས་སྦས་ནས་ཇག་པ་ལས་ཐར་བ་དེ་དཀའ་བ་ལྔ་པ་གཞལ་བར་བྱས།
༦ བལ་པོ་དང་རྒྱའི་མཚམས་འགྲོ་སྐབས་རྐང་ཕྲན་མང་པོ་དང་གཅན་གཟན་གདུག་པ་ཅན་མང་པོ་འཚོགས་པས།མི་ཤ་དངོས་སུ་ཟ་བར་འོངས་པའི་གསེབ་ནས་ཐོན་པར་དཀའ་བ་དེ་དཀའ་བ་དྲུག་པ་གཞལ་བར་བྱས།
༧ རྒྱ་གར་དུ་སླེབས་ཏེ་ཆུ་འཕྲང་དང་ཤིང་འཕྲང་བཟུར་ཟ་མེད་པའི་འཕྲང་ལ་འཕྲང་སྲུང་གིས་བཟུང་ནས་མི་གསོད་ཅིང་། རྟ་དང་གསེར་ཕྲོག་ཏུ་བྱུང་བ་ལ་བཻ་རོས་རྫུ་འཕྲུལ་བསྟན་ཏེ་གསེར་ཕྱེ་རྔན་པ་སྦྱིན་པ་སོགས་བཟུར་ས་མེད་པའི་འཕྲང་སྲུང་དམ་པོ་ལས་ཐར་བ་དཀའ་བ་སྟེ་དཀའ་བ་བདུན་པ་གཞལ་བར་བྱས།
༨ རྔ་མོའི་གདོན་བགེགས་འཕྲང་ཆེན་པོའི་འཕྲང་སྲུང་གིས་རལ་གྲིས་སྐེ་ལ་བརྒྱབ་ཀྱང་མ་ཆོད་པར་རྫུ་འཕྲུལ་གྱིས་ཐར་བར་དཀའ་བ་དེ་དཀའ་བ་བརྒྱད་པ་གཞལ་བར་བྱས།
༩ དེ་ནས་ཆུ་འཕྲང་ཤིང་གི་བུང་བའི་སར།རྟ་མཚལ་ལུ་བྱ་གདོང་དེས་བཻ་རོ་དང་ལེགས་གྲུབ་ལ་བལྟ་བཞིན་མཆི་མ་ཕྱུང་ནས་ཤི ཁོང་གཉིས་ཀའང་མཆི་མ་ཕྱུང་ནས་ཚད་མེད་བཤུམས། རྟ་རོའི་དྲི་མ་ཅེ་སྤྱང་སོགས་མཆུ་རིང་མང་པོས་བཟོས་ཤིང་མི་ཡང་གསོད་དུ་འོང་བ་ལ་གསེར་ས་འོག་ཏུ་སྦས་ནས་བྲོས་པ་སོགས་དེ་ལྟ་བུའི་ཚེ་སྲོག་ཐར་བར་དཀའ་བ་དེ་དཀའ་བ་དགུ་པ་གཞལ་བར་བྱས།
༡༠ མ་གྷ་དྷར་འཇིགས་པའི་འཕྲང་ཆེན་པོ་བཟུར་ས་མེད་པ་ལ་མི་འགྲོ་བའི་དབང་མེད་པར་ཕྱིན་ནས་འཕྲང་སྲུང་དང་ཕྲད། གྱོན་གོས་རྣམས་བཤུས་ནས་གསེར་མེད་སྟབས་ཉྭ་སུལ་ཚོ་དཀྲོལ་ནས་གསེར་འཚོལ་དུ་བྱུང་བ་སོགས་ཟླ་བ་ཕྱེད་དུ་ཤི་ལ་ཤི་ཁད་བྱས་པ་སོགས་ཐར་བར་དཀའ་བ་དེ་དཀའ་བ་བཅུ་པ་གཞལ་བར་བྱས།
༡༡ སྔར་གྱི་གསེར་སྦས་པ་ལས་བཏོན་ཏེ་ཀྲི་ཤའི་ཡུལ་དུ་ཕྱིན། ཡང་བསྐྱར་གསེར་ས་ལ་སྦས་ཏེ་གྲོང་དུ་ལམ་རྒྱགས་འཚོལ་བར་འགྲོ་སྐབས་མཐའི་ཡུལ་རྟོག་གིས་མི་སླེབས་སོང་ཟེར་ནས་བརྡུངས་བརྡེགས་བྱས་ཏེ། སྤྲུལ་དང་སྦལ་པའི་དོང་དུ་ཞག་བདུན་བསྐྱུར། དེར་ཞག་གཅིག་ལ་ཤི་བའི་རྒྱུ་ཡིན་ཀྱང་ཞག་བདུན་ལ་མ་ཤི་བས་ངོ་མཚར་ཆེ་ཟེར་ཏེ་བཏོན་པ་སོགས་དུག་སྤྲུལ་དང་སྦལ་དོང་དུ་མ་ཤི་བས་ཤིན་ཏུ་ཐར་བར་དཀའ་བ་དེ་དཀའ་བ་བཅུ་གཅིག་པ་གཞལ་བར་བྱས།
༡༢ དེ་ནས་སྟག་དང་དོམ་གཟིགས་སོགས་སྤྲུལ་གདུག་པ་ཅན་གྱི་གླིང་དུ་སོང་ནས་ཤི་ལ་ཤི་ཁད་བྱས་ནས་བྷི་བྷི་རའི་ཚལ་དུ་སླེབས། གསེར་སྤས་ནས་རྒྱལ་པོའི་གཙང་ཁང་དུ་ཟས་འཚོལ་བར་ཕྱིན་ནས་རྒྱལ་པོས་ཞག་དྲུག་དོང་དུ་བཅུག་སྟེ་ཁ་ཟས་མ་བྱིན་པར་རྒྱལ་པོའི་ཆད་པ་ལས་ཐར་བར་དཀའ་བ་སྟེ་དཀའ་བ་བཅུ་གཉིས་པ་གཞལ་བར་བྱས།
༡༣ མ་གྷ་དྷའི་ཡུལ་དུ་སླེབས་ཤིང་དེར་དུག་མཚོ་བརྒལ་དགོས་བྱུང་བས་གཞན་སྒྲོལ་མཁན་མེད་སྟབས་རས་དང་དབྱུག་པ་ལ་གྲུ་བྱས་ཏེ་ཤི་ལ་ཤི་ཁད་བྱས་ནས་དུག་མཚོ་བརྒལ་བར་དཀའ་བ་སྟེ་དཀའ་བ་བཅུ་གསུམ་པ་གཞལ་བར་བྱས།
༡༤ ཨ་བ་དྷུ་ཏིའི་གླིང་དུ་མཐའི་མོན་པ་འཇིགས་སུ་རུང་བ་མང་པོས་དབྱུག་པ་མ་ཆག་བར་དུ་བརྡུངས་ནས་ཤི་ལ་ཤི་ཁད་བྱས་ནས་ཐར་བར་དཀའ་བ་དེ་དཀའ་བ་བཅུ་བཞི་པ་གཞལ་བར་བྱས།
༡༥ ཀྲི་ལི་ཀྲ་ནའི་ཡུལ་དུ་འགྲོ་སྐབས་དུག་སྤྲུལ་མང་པོས་ལུས་ལ་འཁྲིལ་ཞིང་ལྡག་སྟེ་ཤིན་ཏུ་སྡུག་བསྔལ་ལ་ཉམ་ཐག་པའི་འཕྲང་ལས་མ་ཤི་བར་ཐར་དཀའ་བ་སྟེ་དཀའ་བ་བཅོ་ལྔ་པ་གཞལ་བར་བྱས།
༡༦ ཨེ་དྷ་ཀོ་ཤའི་ཡུལ་དུ་འགྲོ་སྐབས་དེར་བརྡ་འཕྲོད་པར་དཀའ་བའི་བུད་མེད་མང་པོས་ཟས་ལ་དུག་སྦྱར་ནས་བྱིན་ཏེ། དུག་ནད་ཀྱི་ཟླ་བ་ཕྱེད་དུ་ཤི་ལ་ཤི་ཁད་བྱས་ནས་ཐར་དཀའ་བ་སྟེ་དཀའ་བ་བཅུ་དྲུག་པ་གཞལ་བར་བྱས་པ་སོགས་དཀའ་ཆེན་བཅུ་དྲུག་གིས་བོད་ཡུལ་མུན་པའི་གླིང་འདིར་ནང་ཆོས་ཀྱི་འོད་སྣང་དཔག་ཏུ་མེད་པ་སྦྱིན་ནོ།།
མདོར་ན་དེ་སྐབས་གཞན་རྣམས་དུག་སྤྲུལ་གྱི་ཚང་གཅན་གཟན་གྱི་འགག་འཕྲང་དེར་སྐྲག་ཅིང་། འགྲོ་རྒྱུའི་ཁས་ལེན་ལྟ་ཅི་མིང་ཙམ་གོ་བས་ཀྱང་དབུགས་རིང་ཤོར་བའི་བཤུལ་ལམ་དེར་བཻ་རོ་ཉིད་དང་གཙང་ལེགས་གྲུབ་གཉིས་ཀྱིས་ཐེ་ཚོམ་མེད་པར་ཆོས་སེམས་བརྟན་པོ་དཔང་དུ་བཞག་ནས་ལུས་སྲོག་ཡོངས་རྫོགས་མི་རིགས་འདི་དང་དེའི་བདེ་སྐྱིད་ཀྱི་མངའ་ཐང་ཞིག་ལ་བརྗེས་ནས་གཏོད་བཞག་པའི་གསུང་རབ་གླེག་བམ་རྣམས་ལ་མཚོན་ན། རིའི་རྒྱལ་པོ་རི་རབ་ཀྱི་དཔང་དང་མཉམ་པ་ཞིག་ཁ་བའི་ལྗོངས་འདིར་བསྐྲུན་ཡོད་ཀྱང་། དེ་དག་གི་ཁྲོད་ལས་ང་ཚོས་ད་ལྟ་ཅུང་ཟད་ཙམ་ཡང་ཁ་གདན་གྲུ་བཞིའི་སྟེང་ནས་ཀློག་འདོད་མེད་པ་དང་ཞིབ་དཔྱོད་བྱེད་རྒྱུའི་ངལ་བར་གྱུར་པ་ལས་དེ་སྐབས་ཀྱི་དཀའ་སྤྱད་རྣམས་ཚོར་མ་མྱོང་བ་ནི་གོར་མ་ཆག ད་དུང་སྐལ་ཐོག་དེའི་སྐབས་ཀྱི་རྗེ་འབངས་རྣམ་པའི་སྒྲིབ་བྲལ་གྱི་ལྷག་བསམ་ལ་དེ་བས་བརྩི་མཐོང་དང་རྗེས་དྲན་ཞུ་རྒྱུ་ནི་ལོ་རྒྱུས་ཀྱིས་ང་ཚོར་གནང་བཞག་པའི་འགན་འཁྲི་ཞིག་ཡིན་དུས། ད་ནས་བཟུང་བོད་བརྒྱུད་ནང་བསྟན་པའི་སེར་མོ་བ་གཙོ་བོར་གྱུར་པའི་མི་རིགས་འདིའི་སྐྱེས་ཕོ་མོ་ཡོངས་ཀྱིས་རང་གི་ཕ་གནས་བུ་བརྒྱུད་ཚང་མར་བཀའ་དྲིན་གཞལ་དཀའ་བའི་རང་རེ་གངས་ཅན་པའི་བྱས་པ་ཅན་ཁོང་རྣམ་པའི་དཀའ་སྤྱད་ལ་མནོ་བསམ་རེ་གཏོང་བཞིན་རྗེས་དྲན་གྱི་སྲོལ་བཟང་མི་ཆུང་བ་ཞུའོ།།
