སྣར་ཐང་ལོ་ཙཱ་བས་མཛད་པའི་སྔགས་ཀྱི་བཀླག་ཐབས།

   ཡི་གེའི་ངོ་བོ།

ངོ་བོ་ཨཱ་ལི་ཀཱ་ལི་སྟེ། །

ཕོ་མོ་མ་ནིང་གསུམ་དུ་གནས། །

ཁམས་གང་གིས་བསྡུས་ཤིང་སྐྱེ་གནས།

ཨ་ཀུ་ཧ་ྈྐ་ནམ་མཁའི་ཁམས། །

མགྲིན་པའི་གནས་ལས་སྐྱེ་བ་ཡིན། །

ཨི་ཙུ་ཡ་ཤ་རླུང་གི་ཁམས། །

ལྕེ་རྩེ་སོ་རྐན་དག་ལས་སྐྱེ། །

རྀ་ཊུ་ར་ཥ་མེ་ཡི་ཁམས། །

སྤྱི་བོ་དག་ལས་སྐྱེ་བ་ཡིན། །

ཨུ་པུ་ཝ་ྉྤ་ཆུ་ཡི་ཁམས། །

མཆུ་ཡི་གནས་ལས་སྐྱེ་བ་ཡིན། །

ལྀ་ཏུ་ལ་ས་ས་ཡི་ཁམས། །

ལྕེ་རྩེ་སོ་ལས་སྐྱེ་བ་ཡིན། །

འབྱུང་བ་ཆུང་བ་སྡེ་ལྔ་ནི། །

ཀ་ཙ་ཊ་ཏ་པ་རྣམས་ས། །

ཁ་སོགས་ཆུ་ཡིན་ག་སོགས་མེ། །

གྷ་སོགས་རླུང་ཡིན་ང་སོགས་མཁའ། །

ཨོཾ་དང་ན་མོ་ཏདྱ་ཐཱ། །

སྤངས་པའི་སྔགས་ཀྱི་ཐོག་མ་དང་། །

རང་གི་མིང་ཐོག་གཟུང་བར་བྱ། །

གསལ་བྱེད་བརྩེགས་སམ་འཕུལ་བཞག་ཡོད། །

དང་པོའི་ཡི་གེ་གཟུང་བར་བྱ། །

གསལ་བྱེད་དགྲར་གྱུར་ནད་མང་ཞིང་། །

དབྱངས་ཡིག་དགྲར་གྱུར་སྲོག་དང་འབྲལ། །

ཐ་མལ་གྱུར་ན་འབྲས་བུ་མེད། །

གྲོགས་སུ་གྱུར་ན་དངོས་གྲུབ་འབྱུང་། །

དེ་ཕྱིར་དགྲ་གྲོགས་བརྩི་བ་གཅེས། །

ས་དགྲ་མེ་ཡིན་མེ་དགྲ་ཆུ། །

ཆུ་དགྲ་རླུང་ཡིན་རླུང་དགྲ་ས། །

ས་ནི་མེ་ལ་ནུས་པ་མེད། །

མེ་ནི་ཆུ་ལ་ནུས་པ་མེད། །

ཆུ་ནི་རླུང་ལ་ནུས་པ་མེད། །

རླུང་ནི་ས་ལ་ནུས་པ་མེད། །

ས་ཆུ་ཕན་ཚུན་གྲོགས་པོ་སྟེ། །

མེ་རླུང་ཕན་ཚུན་གྲོགས་པོ་ཡིན། །

ནམ་མཁའ་ཀུན་གྱི་གྲོགས་ཡིན་ཏེ། །

ཀུན་ཀྱང་ནམ་མཁའི་གྲོགས་སུ་འགྱུར། །

དེ་ལྟར་དགྲ་དང་གྲོགས་ཤེས་པ། །

བཀླག་པའི་ཐབས།

སྔགས་ཀྱི་ཀློག་ཚུལ་འདི་ལྟ་སྟེ། །

ཡི་གེ་ཐུང་བ་གཅིག་ཡུན་བཀླག །

རིང་བ་གཉིས་ཀྱི་ཡུན་དུ་བཀླག །

ཤིན་ཏུ་རིང་བ་གསུམ་ཡུན་བཀླག །

པླུ་ཏ་ཡང་དེ་བཞིན་ནོ། །

འབྲེང་བུ་ན་རོ་ཡོད་གྱུར་ན། །

རིང་པོ་ཉིད་ཕྱིར་འ་འདོགས་འཁྲུལ། །

མིང་གི་ཐོག་མར་སྡེ་པ་ཡི། །

གསུམ་པ་འས་ཕུལ་བཞིན་དུ་བཀླག །

དབུས་མཐར་བྱུང་ན་བོད་དང་མཚུངས། །

བཞི་པ་རྣམས་ནི་གསུམ་པ་ལ། །

ར་མགོ་ཧ་སྒྲ་ལྡན་པར་བཀླག །

ཊ་སོགས་ལོགས་སྡེའི་བཀླག་ཚུལ་ནི། །

ལྕེ་རྩེ་རྐན་སྦྱར་སྟིབས་ཀྱིས་བསྒྱུར། །

ཥ་ནི་ཁ་དང་ཆ་མཐུན་པར། །

རྐན་གྱི་ཕུགས་ནས་སྟོངས་ཀྱིས་འདོན། །

ཀྵ་ནི་ཁྱ་དང་ཆ་མཐུན་ཙམ། །

ཛ་ལ་ཉ་བཏགས་འགྱ་འམ་གཉའ། །

གསལ་བྱེད་མི་འདྲ་དུ་མ་བརྩེགས། །

རང་སྒྲ་ཐོན་ཙམ་མྱུར་བར་བཀླག །

དབྱངས་དང་ང་རོ་འོག་མ་དབང་། །

འདྲ་བའི་གསལ་བྱེད་བརྩེགས་གྱུར་ན། །

ཁ་ཁེངས་མཐོན་པོའི་གདངས་ཀྱིས་བཀླག །

བརྩེགས་པའི་ཐོག་མ་གོང་མ་དབང་། །

དེ་འོག་རྣམས་ནི་དཀྱུས་སུ་བཀླག །

ཉ་ཎ་ཡར་སྦྱར་ན་ལྟར་བཀླག །

ཤ་ཥ་ཡར་སྦྱར་ས་ལྟར་བཀླག །

ཀ་ནི་ག་དང་ཙ་ཛ་ཊ། །

ཌ་ཏ་རྣམས་ནི་ད་རུ་བཀླག །

པ་ཡིག་རྣམས་ནི་བ་རུ་བཀླག །

གྷ་ཛྷ་ཌྷ་དྷ་བྷ་རྣམས་ནི། །

ཡི་གེ་གཉིས་གཉིས་འདོད་པ་འཁྲུལ། །

དེ་བཞིན་དབྱངས་ཀྱི་རྀ་ལྀ་གཉིས། །

ར་དང་ལ་རུ་འདོད་པ་འཁྲུལ། །

རྣམ་བཅད་ས་རུ་བཀླག་པའམ། །

དྲག་པོར་བཅད་དེ་བཀླག་པར་བྱ། །

རྗེས་སུ་ང་རོ་སྡེ་པ་ལ། །

རང་རང་སྡེ་པའི་ལྔ་པར་བཀླག །

ཡ་སོགས་བརྒྱད་ལ་ང་རུ་བཀླག །

ཡང་ན་སྡེ་ལྔའི་ཟླ་ལ་སྦྱར། །

ཤད་ཀྱིས་ཆོད་ན་རང་ཉིད་བརྩི། །

ཤད་མེད་ན་ནི་འོག་མ་བརྩི། །

ཨོཾ་དང་ཧཱུཾ་གཉིས་མ་དང་ང་། །

ཚིག་གྲོགས་དག་ལ་བལྟོས་པ་མིན། །

ལྕེ་རྩ་ཅན་དང་མཆུ་ཅན་གཉིས། །

ཨ་ཀ་ཨ་པ་ཞེས་པའམ། །

ཀོ་ཝ་པོ་ཝ་ཞེས་པར་བཀླག །

ཡ་བཏགས་ཕལ་ཆེར་འགྲེང་བུ་ནི། །

ཡའི་སྒྲ་ཅུང་ཟད་ལྡན་པར་བཀླག །

ཡ་ལ་ཡ་བཏགས་ཡ་རང་ཉིད། །

ཀ་ཁའི་ཡ་བཏགས་བོད་བཞིན་བཀླག །

ར་ལ་ཡ་བཏགས་ར་ཡར་བཀླག །

ཝ་བཏགས་ཕལ་ཆེར་ན་རོ་སྟེ། །

ཝ་སྒྲ་ཅུང་ཞིག་ལྡན་པར་བཀླག །

ཀ་སོགས་སྲོག་ཏུ་རྀ་ལྀ་ཞུགས། །

གི་གུ་ཕྱིར་ནི་ལོག་གྱུར་ན། །

ཀི་རྀ་ཀི་ལྀ་ཞེས་མྱུར་བཀླག །

ཀ་སོགས་ར་དང་ལ་བཏགས་ནས། །

གི་གུ་ཕྱི་ནི་མ་ལོག་ན། །

ཀ་རི་ཀ་ལི་ཞེས་པར་བཀླག །

ཨཻ་དང་ཨཽ་ཡི་བཀླག་ཚུལ་ནི། །

ཨེ་ཨི་ཨོ་ཨུ་ཞེས་པར་བཀླག །

དེ་བཞིན་ཀ་སོགས་སྲོག་ཞུགས་ན། །

ཀེ་ཨི་ཀོ་ཨུ་སོགས་སུ་བཀླག །

རྒྱས་པར་སློབ་དཔོན་ངག་ལས་སློབས། །

མཛད་བྱང་།

མདོར་བསྡུས་ཙམ་འདི་སྐད་གཉིས་པ། །

སྣར་ཐང་ལོ་ཙཱ་གང་དེ་ལ། །

བཤེས་གཉེས་བློ་གྲོས་དཔལ་འབར་གྱིས། །

ཐང་པོ་ཆེ་རུ་བསྐུལ་ནས་སྦྱར། །