༄༅། །དང་པོའི་སངས་རྒྱས་དཔལ་དུས་ཀྱི་འཁོར་ལོའི་ལོ་རྒྱུས་དང་མིང་གི་རྣམ་གྲངས་བཞུགས་སོ།།
གང་ཐུགས་མི་འགྱུར་མཆོག་གི་བདེ་བ་ཆེ། །སྟོང་ཉིད་མཛེས་མའི་ལང་ཚོ་ལ་ཆགས་ཤིང་། །ཉིད་སྐུ་སྟོང་གཟུགས་ཕྱག་རྒྱའི་རྣམ་རོལ་གྱིས། །རྣམ་པར་སྒེག་ལྡན་དུས་འཁོར་ལ་ཕྱག་འཚལ། །རྒྱུད་རྒྱལ་སྡུད་མཛད་ཟླ་བ་བཟང་པོའི་ཞབས། །ལྷ་དབང་ལ་སོགས་སྤྲུལ་པའི་ཆོས་རྒྱལ་དྲུག །རྒྱལ་བ་ཉིད་ཀྱི་ལུང་བསྟན་བསྡུས་པའི་རྒྱུད། །ལེགས་པར་སྡུད་མཛད་འཇམ་དཔལ་གྲགས་པའི་ཞབས། །རྒྱས་འགྲེལ་མཛད་གང་པདྨ་དཀར་པོ་སོགས། །རིགས་ལྡན་ཉེར་ལྔ་དེ་ཡི་བྱིན་རླབས་པ། །ཚངས་དབང་ལྷ་དབང་འོད་སྲུང་ལ་སོགས་པ། །ཆོས་རྒྱལ་ཞེ་གསུམ་སྲས་ཡུམ་བཅས་ལ་འདུད། །
མདོ་རྒྱུད་གཞན་དང་བཤད་སྲོལ་མི་འདྲ་བ་དཔལ་དུས་ཀྱི་འཁོར་ལོའི་སྐབས་ཀྱི་ལོ་རྒྱུས་རགས་རིམ་ཞིག་བརྗོད་ན། དང་པོ་དུས་འཁོར་ནས་བཤད་པའི་རི་གླིང་མཚོ་གསུམ་དང་། བྱང་ཤམ་བྷ་ལའི་ཡུལ་གྱི་བཀོད་པ་དང་། ཕོ་བྲང་ཆེན་པོ་ཀ་ལཱ་པའི་རྒྱལ་པོ་ཞེ་གསུམ་གྱི་གདུང་རབས། དྲག་པོ་འཁོར་ལོ་ཅན་གྱི་བསྟན་པ་གསར་འཛུགས། བཞི་པ་ཕྱི་མའི་སངས་རྒྱས་ཀྱི་བསྟན་པའི་གནས་ཚད་བཤད་པ་དང་བཞིའོ། །
དང་པོ་ནི། རླུང་དཀྱིལ་དཔངས་སུ་དཔག་ཚད་སྟོང་ཕྲག་ལྔ་བཅུ་དང་། རྒྱར་འབུམ་ཕྲག་བཞི་སྟེ་ནང་དུ་རྡོ་རྗེའི་མེ་ལྕེ་དང་། མུན་པ་ཆེན་པོ་སྟེ་དམྱལ་བའི་གནས་གཉིས་ཡོད། དེའི་སྟེང་དུ་མེ་དཀྱིལ་དཔངས་སུ་དཔག་ཚད་སྟོང་ཕྲག་ལྔ་བཅུ་དང་། རྒྱར་འབུམ་ཕྲག་གསུམ། དེའི་ནང་དུ་མེའི་དམྱལ་བ་དང་དུ་བ་མི་ཟད་པ་གཉིས་ཡོད། དེའི་སྟེང་དུ་ཆུ་དཀྱིལ་དཔངས་སུ་དཔག་ཚད་སྟོང་ཕྲག་ལྔ་བཅུ་དང་། རྒྱར་འབུམ་ཕྲག་གཉིས། དེའི་ནང་དུ་འདམ་གྱི་དམྱལ་བ་དང་། བྱེ་མའི་ཆུའི་དམྱལ་བ་གཉིས་ཡོད། དེའི་སྟེང་དུ་ས་དཀྱིལ་དཔངས་སུ་སྟོང་ཕྲག་ལྔ་བཅུ་དང་། རྒྱར་འབུམ་ཕྲག་གཅིག །དེའི་ནང་དུ་གསེག་མའི་ཆུའི་དམྱལ་བ་དང་། སྟེང་དུ་གདེངས་ཅན་ཀླུ་དང་ལྷ་མ་ཡིན་གྱི་གནས་ཡིན། དཀྱིལ་འཁོར་བཞི་སྔ་མ་སྔ་མ་རྒྱ་ཆེ་ཞིང་། ཕྱི་མ་ཕྱི་མ་དཔག་ཚད་སྟོང་ཕྲག་ལྔ་བཅུ་རེ་ཆུང་བའོ། །དེའི་དབུས་སུ་རི་རབ་དཔག་ཚད་འབུམ་ཕྲག་གཅིག །དེ་སྟེང་རི་རབ་ཀྱི་མགྲིན་པ་ལ་དཔག་ཚད་སྟོང་ཕྲག་ཉི་ཤུ་རྩ་ལྔ། དེ་སྟེང་རི་རབ་ཀྱི་གདོང་ལ་དཔག་ཚད་སྟོང་ཕྲག་ལྔ་བཅུ། དེ་སྟེང་རི་རབ་ཀྱི་གཙུག་ཏོར་ལ་དཔག་ཚད་སྟོང་ཕྲག་ཉི་ཤུ་རྩ་ལྔ་སྟེ། དཔངས་སུ་དཔག་ཚད་འབུམ་ཕྲག་གཉིས་ཏེ། དཀྱིལ་འཁོར་བཞི་ལ་དཔག་ཚད་འབུམ་ཕྲག་བཞི་ཡིན་ནོ། །
རི་རབ་ཀྱི་མགྲིན་པ་དང་། རི་རབ་ཀྱི་གདོང་དང་། རི་རབ་ཀྱི་གཙུག་ཏོར་ཟེར་བ་རྣམས། རི་རབ་ཀྱི་སྟེང་གི་བར་སྣང་རྩི་བ་ཡིན་ནོ། །དེས་ན་ཕྱི་ལ་དཔག་ཚད་འབུམ་ཕྲག་བཞི་ཡོད་པ་བཞིན་དུ། ནང་སྐྱེས་བུའི་ལུས་ལ་ཁྲུ་བཞི་ཡོད་པ་ཡིན། རི་རབ་ཀྱི་སྟེང་དུ་རྒྱ་ཆེ་བ་ལ་ཤར་མཐའ་ནས་ནུབ་མཐའི་བར་དཔག་ཚད་སྟོང་ཕྲག་ལྔ་བཅུ་དང་། རི་རབ་ཀྱི་རྩ་བ་ཕྲ་བ་ལ་སྟོང་ཕྲག་བཅུ་དྲུག་ཡོད། དེའི་ཐད་མངོན་པ་མཛོད་ནས་གསེར་གྱི་རི་བདུན་རོལ་པའི་མཚོ་བདུན་གྱི་རི་རབ་ལ་ཁོར་ཡུག་ཏུ་བསྐོར་བ་བཤད་པ་ལྟར། འདིར་ཡང་དང་པོ་གླིང་བདུན། དེའི་མཐར་མཚོ་བདུན། དེའི་མཐར་རི་བདུན་གྱི་འཁོར་ཡུག་ཏུ་སྤེལ་མར་ཟླུམ་པོར་བསྐོར་བའོ། །
གླིང་བདུན་ནི། ཟླ་བའི་གླིང་། འོད་དཀར་གླིང་། རབ་མཆོག་ཀུ་ཤའི་གླིང་། མིའམ་ཅིའི་གླིང་། ཁྲུང་ཁྲུང་གླིང་། དྲག་པོའི་གླིང་། འཛམ་གླིང་ཆེན་པོ་དང་བདུན་ཡིན་ནོ། །མཚོ་བདུན་ནི། སྦྲང་རྩིའི་མཚོ། མར་གྱི་མཚོ། ཞོའི་མཚོ། འོ་མའི་མཚོ། ཆུའི་མཚོ། ཆང་གི་མཚོ། བ་ཚྭ་ཅན་གྱི་མཚོ་དང་བདུན་ཡིན་ནོ། །རི་བདུན་ནི། འོད་སྔོན་ཅན། མནྡཱ་ར། ནི་ཥུ། ནོར་བུའི་འོད། དྲོ་ཎ། བསིལ་རི། རྫས་ཀྱི་རྡོ་རྗེ་ཕ་ལམ་ལས་གྲུབ་པའི་ལྕགས་རི་ནག་པོ་སྟེ་བདུན་ཡིན་ནོ། །
རི་བདུན་གྱི་དྲུག་པ་བསིལ་རི་དང་། རི་རབ་ཀྱི་རྩེ་མོ་རྒྱ་ཤིན་ཏུ་ཆེ་བའི་མཐའ་སྐོར་གཉིས་མ་འབྲེལ་ཡང་སྟེང་འོག་ཐད་མཉམ་དུ་ཡོད་པས། གླིང་དྲུག་ནི། རི་རབ་ཀྱི་ཁ་འོག་ཏུ་ཚུད་པ་ལྟ་བུར་ཡོད་དོ། །འདིའི་རི་དྲུག་པ་བསིལ་རི་ནས། རི་བདུན་པ་ཕྱི་ལྕགས་རི་ནག་པོའི་བར་གྱི་རྒྱ་མཚོ་ཆེན་པོ་ནི་བ་ཚྭ་ཅན་གྱི་མཚོ་དང་། མཚོ་དེའི་ནང་མཐའི་ཕྱོགས་འཛམ་གླིང་ཆེན་པོས་རིའི་རྒྱལ་པོ་རི་རབ་ལ་འཁོར་ཡུག་ཏུ་བསྐོར་བ། དེ་ལ་ཕྱོགས་བཞིར་དུམ་བུ་གསུམ་གསུམ་གྱི་ཆ་ལ་སའི་གོ་ལའམ་ས་ཆེན་དུམ་བུ་བཅུ་གཉིས་ཏེ། བྱང་ཤམ་བྷ་ལའི་རྒྱལ་པོ་རིགས་ལྡན་ཉི་ཤུ་རྩ་ལྔའི་མཐའ་མ་དྲག་པོ་འཁོར་ལོ་ཅན་མ་གཏོགས། རིགས་ལྡན་གཞན་ཉི་ཤུ་རྩ་བཞིས་དབང་བསྒྱུར་མ་ནུས་པའི་འཛམ་གླིང་ཆེན་པོ་དེ་ཡིན།
དེ་འདྲ་བའི་འཛམ་གླིང་ཆེན་པོས་ཁོར་ཡུག་ཏུ་བསྐོར་བ་དེའི་ཤར་གླིང་ཟླ་བ་ཕྱེད་ལྟ་བུའི་སའི་དབྱིབས་ཡོད་ཅིང་། རླུང་ཁམས་གཙོ་ཆེ། ལྷོར་ཟུར་གསུམ། ནུབ་ཏུ་གྲུ་བཞི། བྱང་དུ་ཟླུམ་པོའི་དབྱིབས་ཡོད་པས་རིམ་པ་བཞིན། མེ་ཁམས། ས་ཁམས། ཆུ་ཁམས་གཙོ་ཆེ་བའོ། །དེ་བཞིན་དུ་སྐྱེས་བུའི་ལུས་ཀྱི་མདུན་ནས་དྲི་ཆུ་སྔོན་པོ། གཡས་ནས་ཁམས་དམར་པོ། རྒྱབ་ནས་དྲི་ཆེན་སེར་པོ། གཡོན་ནས་ཁམས་དཀར་པོ་འབབས་པ་ཡིན།
འཛམ་གླིང་ཆེན་པོ་དུམ་བུ་བཅུ་གཉིས་ཀྱི་ལྷོ་ཕྱོགས་དུམ་བུ་གསུམ་དུ་བགོས་པའི་དུམ་བུ་གསུམ་ག་དང་། ཁྱད་པར་དབུས་མ་འཛམ་གླིང་ཆུང་ངུ་ཞེས་བྱ་བ། དུས་འཁོར་རང་ནས་ཚེ་གཅིག་ལུས་གཅིག་ལ་འཚང་རྒྱ་བའི་ལུས་རྟེན་ཡིན་ན། འཛམ་གླིང་ཆུང་ངུའི་ལུས་རྟེན་ཡིན་པས་ཁྱབ། ཅེས་གསུངས། འཛམ་གླིང་ཆུང་ངུ་ལས་ཀྱི་ས་པ་ཡུལ་ཉེར་བཞིའི་དཔའ་བོ་དང་མཁའ་འགྲོ་མ་རྣམས་གླིང་དེར་བཞུགས་ཤིང་། འཛམ་གླིང་ཆུང་ངུའི་དབུས་སུ་རྡོ་རྗེ་གདན་བསྐལ་བཟང་གི་སངས་རྒྱས་སྟོང་རྩ་གཉིས་བྱོན་པའི་གནས་དང་། ཤར་ན་རི་བོ་རྩེ་ལྔ་འཕགས་པ་འཇམ་དཔལ་དབྱངས་ཀྱི་གནས་དང་། ལྷོ་ན་རི་བོ་གྲུ་འཛིན་ནམ་པོ་ཏ་ལ་འཕགས་པ་སྤྱན་རས་གཟིགས་ཀྱི་གནས། ནུབ་ན་ཨོ་རྒྱན་མཁའ་འགྲོ་རིག་འཛིན་གྱི་གནས། བྱང་ན་ཤམ་བྷ་ལ་མིའི་རིག་འཛིན་གྱི་གནས་ཏེ་ཁྱད་ཆོས་ལྔས་ཁྱད་པར་འཕགས་པའི། འཛམ་གླིང་ཆུང་ངུ་དེའི་ལྷོ་ནས་རིམ་པ་བཞིན། ས་ཆེན་དུམ་བུ་དྲུག་ཡོད་པས། དང་པོ་རྒྱ་གར་འཕགས་ཡུལ། གཉིས་པ་བོད་ཡུལ། གསུམ་པ་ལི་ཡུལ། བཞི་པ་རྒྱ་ནག །ལྔ་པ་རྒྱ་ནག་ཆེན་པོ། དྲུག་པ་གངས་ལྡན་ཞེས་འགྲེལ་ཆེན་དྲི་མེད་འོད་ལས་འདི་ལྟར་བཤད་ཀྱང་། གཙང་ཆུང་ཆོས་གྲགས་རྒྱ་མཚོ་དང་། མཁས་གྲུབ་ནོར་བཟང་རྒྱ་མཚོ་དང་། ཕུག་པ་ལྷུན་གྲུབ་རྒྱ་མཚོ་སོགས་ཀྱིས་ལྔ་པ་ཤམ་བྷ་ལ་དང་། དྲུག་པ་གངས་ལྡན་ཟེར་བ་འདུག་པས་དཔྱད།
ཡང་དེ་གསུམ་གྱིས་འཛམ་གླིང་ཆུང་བ་ལྷོ་ནས་བྱང་དུ་དཔག་ཚད་སྟོང་ཕྲག་ཉེར་ལྔ་ཡོད་པ་དུམ་བུ་གསུམ་དུ་བགོས་པ་བྱང་གི་དུམ་བུ་གཅིག་ལ་ས་ཆེན་དུམ་བུ་དྲུག་ཏུ་བགོས་པ་ཡིན། དུམ་བུ་གཉིས་ས་སྟོང་མྱ་ངམ་གྱི་ཐང་ལ་རྒྱ་གར་ལི་བལ་རྒྱ་ནག་ཧོར་ཡུལ་བོད་ཡུལ་སོགས་ནས་ཆུ་བོ་ཆེན་པོ་ཇི་སྙེད་འབབས་པ་ཐམས་ཅད་རྒྱ་མཚོའི་ནང་དུ་འབབས་མི་ཐུབ་པར་སྐམ་འགྲོ་ཟེར་བ་སོགས་ལུགས་མང་ངོ་། །
གཉིས་པ་ཤམ་བྷ་ལའི་ཞིང་གི་བཀོད་པ་ནི། གངས་ལྡན་གྱི་དབུས་ནས་ཕྱེད་དུ་བགོས་པའི་ནུབ་ཕྱོགས་ཀྱི་ཕྱེད་ན་བྱང་ཤམ་བྷ་ལ་ཡིན། ཞིང་དེ་ནི་ཤིན་ཏུ་ཟླུམ་པོ་ལྟེ་བ་དང་བཅས་པའི་པདྨ་འདབ་མ་ཅན་གྱི་དབྱིབས་ཅན་དུ་ཡོད། ཟླུམ་པོ་ཆ་གསུམ་དུ་བྱས་པའི་ཆ་གཅིག་ལྟེ་བའི་ཚད་དང་། ཆ་གཉིས་འདབ་མའི་ཚད་ཡིན། ལྟེ་བ་ལ་དཔག་ཚད་སྟོང་། འདབ་མ་བརྒྱད་ཡོད་པའི་འདབ་མ་རེ་རེ་ལ་དཔག་ཚད་སྟོང་སྟོང་ཡོད། དབུས་ཀྱི་ལྟེ་བའི་མཐའ་ནས་གངས་རིའི་ཕྲེང་བས་རིམ་པ་གཅིག་བསྐོར་བ་དང་། འདབ་མ་བརྒྱད་ཀྱི་མཐའ་ནས་གངས་རིའི་ཕྲེང་བས་རིམ་པ་གཅིག་སྟེ། རིའི་རྩེ་མོ་ཐམས་ཅད་གངས་རི་དང་། གངས་རིས་རིམ་པ་གཉིས་སུ་བསྐོར་བའོ། །དེ་མཚམས་གཡའ་རི་དང་། དེ་ནས་རྫ་རི་དང་། དེ་ནས་སྤངས་རི་དང་། དེ་ནས་ནགས་རི་དང་། སྤོས་ཤིང་གི་རི་དང་། མེ་ཏོག་སྣ་ཚོགས་སྨན་སྣ་ཚོགས་ཀྱིས་བརྒྱན་ཅིང་། ལུང་པའི་གཞུང་ཐམས་ཅད་མཚོ་དང་། རྫིང་བུ་དང་། ནེའུ་སིང་དང་། ལྗོན་ཤིང་དང་། སྐྱེད་མོས་ཚལ་སྣ་ཚོགས་པས་གཞན་ལས་ཁྱད་པར་དུ་འཕགས་པའི་བཀོད་པ། རྒྱ་ཁྱོན་ཡངས་ཤིང་འདོད་དགུ་འཛོམ་པ། ཡིད་དུ་འོང་བ། བག་ཕེབས་པའི་འདབ་མ་ལས་ཅུང་ཟད་མཐོ་བའི་དབུས་ཀྱི་ལྟེ་བའི་སྟེང་དུ། རྒྱལ་པོའི་ཕོ་བྲང་ཀ་ལཱ་པ་རྒྱུ་རིན་པོ་ཆེ་སྣ་ལྔ་ལས་གྲུབ་པ་དཔག་ཚད་བཅུ་གཉིས་པ། ཕོ་བྲང་དེའི་དབུས་སུ་རིགས་ལྡན་རྒྱལ་པོ་བཞུགས་པའི་ཁང་པ་རྣམས་མརྒད་དང་། ཟླ་བ་ཆུ་ཤེལ་དང་རྡོ་རྗེ་ཕ་ལམ་ལས་བྱས་པའི་འོད་ཀྱི་ཚེས་བཅོ་ལྔའི་ཟླ་བའི་འོད་ཀྱང་ཟིལ་གྱིས་མནན་ནས་ཟླ་བ་ལ་བལྟས་ཚེ་སྐྱ་འཁྱིལ་བ་ཞིག་ལས་གཟི་བྱིན་འབྱིན་མི་ནུས་པ། ཁང་པའི་ལོགས་ལ་ཤེལ་སྒོ་སྣ་ཚོགས་ལས་གྲུབ་པའི་འོད་ཀྱིས་ཉིན་མཚན་བྱེ་བྲག་མི་ཕྱེད་ཅིང་། བཞུགས་ཁྲི་དེ་རྣམས་རིན་པོ་ཆེ་མཆོག་གི་ཕྲས་བཏབ་པའི་གསེར་དང་། འཛམ་བུ་ཆུ་བོའི་གསེར་ལས་གྲུབ་པ་དང་། རིན་པོ་ཆེ་དེ་དག་ཉིད་ལས་གྲུབ་པ་དེ་དག་གི་ངོས་ལ་དྭངས་ཤེལ་གྱི་མཆོག་མེ་ལོང་ལྟ་བུའི་གཞིར་ཐག་རིང་པོ་དཔག་ཚད་ལྔ་བཅུ་ཙམ་གྱི་སའི་ཁྱོན་གྱི་ཆུ་ནང་གི་སྲོག་ཆགས་ཚུན་ཆད་ཀྱི་གཟུགས་བརྙན་འཆར་བའི་ལྟད་མོ་མང་པོ་དང་། སྐར་ཁུང་གི་ངོས་དག་ལ་ཨ་མན་ཤེལ་གྱི་འཁོར་ལོ་ཡོད་པ་ལས་བལྟས་པའི་ཚེ་གཟའ་ཟླ་སྐར་གསུམ་གྱི་ཁང་བཟང་དང་། ལྷ་དང་སྐྱེད་མོས་ཚལ་དང་། རྒྱུ་བའི་ལམ་གྱི་གོ་ལ་དང་། ཁྱིམ་བཅུ་གཉིས་སོགས་མདུན་ན་གནས་པ་བཞིན་དུ་མཐོང་བ་དང་། བཞུགས་ཁྲིའི་མཐར་ཙན་དན་ས་མཆོག་གི་ཁྲ་བསྐྱོར་དྲི་བཟང་པོ་དཔག་ཚད་དུ་འཕྲོ་བ་དང། ཆེན་པོ་ལ་འོས་པའི་རས་དང་། གོས་སྲང་བྱེ་བ་སྟོང་རི་བ་དག་གི་སྟན་དང་སྟེ་འབོལ་སོགས་མཚོན་པ་ཙམ་སྨོས་པ་སྟེ། མདོར་ན་བཞུགས་པའི་གནས་རེ་རེའི་རིན་ཐང་ལ་གྲུ་གཟིངས་ཆེན་པོ་གསེར་གྱི་ཕྱུར་བུར་གང་བ་དག་རི་བར་འགྱུར་ན་གཞན་དག་ལྟ་སྨོས་ཀྱང་ཅི་དགོས་པ་སྟེ། རིགས་ལྡན་གྱི་སྐུའི་ཆ་བྱད་ནི་སེང་གེའི་སྐྲ་ཚོས་མ་ལས་གྲུབ་པའི་གཙུག་ཏོར་བཙོས་མ་དང་། འཛམ་བུ་ཆུ་བོའི་གསེར་ལས་བྱས་པའི་པྲོག་ཞུ་དང་། ཕྱག་ཞབས་ཀྱི་གདུ་བུ་ལ་རིན་པོ་ཆེ་རེ་རེའི་རིན་དུ་གསེར་སྲང་བྱེ་བ་རེ་རེ་རི་བའི་ཕྲ་བཏབ་པའི་འོད་དང་། རིགས་ལྡན་གྱི་སྐུ་དཀར་ལ་དམར་བའི་མདངས་ཆགས་པའི་འོད་འདྲེས་པ་ཁོར་ཡུག་ཏུ་ཁྱབ་པའི་དབང་གིས་གང་གིས་ཀྱང་གཟི་བརྗིད་བཟོད་པར་དཀའ་བ་དང་། འཁོར་གྱི་བློན་པོ་དང་། དམག་དཔོན་དང་། བཙུན་མོའི་འཁོར་རྒྱ་ཆེན་པོ་དང་། ཤ་ར་ཎ་དང་། གླང་པོ་དང་། གླང་པོ་གཤོག་པ་ཅན་དང་། རྟ་མཆོག་དེ་ལྟ་བུ་དང་། ཤིང་རྟ་དང་། ཁྱོགས་ལ་སོགས་པ་བཞོན་པའི་བཀོད་པ་མཐའ་ཡས་པ་དང་། རང་གཞན་གྱི་འབྱོར་པ་དང་། རིགས་སྔགས་ཀྱི་མཐུ་དང་། མངག་གཞུག་ཏུ་གྱུར་པའི་ཀླུ་དང་། ལྷ་མིན་དང་། མིའམ་ཅི་དག་གིས་ཕུལ་བའི་ལོངས་སྤྱོད་དང་། ཟས་ནོར་དང་། ཁ་ཟས་ཀྱི་ཁྱད་པར་ལ་ནི་ལྷའི་དབང་པོས་ཀྱང་འགྲན་ནུས་པ་མ་ཡིན་ནོ། །
རིགས་ལྡན་གྱི་རྒྱལ་པོ་བཙུན་མོའི་འཁོར་རྒྱ་ཆེ་བས་སྲས་ཕོ་མོ་མང་ཡང་སྲས་རྒན་གཞོན་གང་ཡིན་ཀྱང་སྐུ་བལྟམས་པའི་དུས་མེ་ཏོག་པདྨ་དཀར་པོའི་ཆར་འབེབས་པ་དང་། ཞག་བདུན་བར་དུ་ཁྱེའུ་སྐུ་མི་མཐོང་བ་ནོར་བུར་གྱུར་ལ། འོད་ཟེར་འཕྲོ་བ་ནི་རིགས་ལྡན་རྒྱལ་ཐོག་ཡིན་ཏེ། སློབ་དཔོན་དོན་ཡོད་ལྕགས་ཀྱུས། རྒྱལ་པོའི་བུ་ནི་གང་བཙས་པ། །ནོར་བུ་རིན་ཆེན་འོད་གྱུར་ལ། །ཞག་བདུན་འོད་ཟེར་འཕྲོ་བ་ནི། །དེ་ནི་རིགས་ལྡན་རྒྱལ་པོ་ཡིན། །ཞེས་གསུངས་སོ། །
བཙུན་མོ་མང་དུ་ཡོད་ཀྱང་། རིགས་ལྡན་འཁྲུངས་པ། ཤམ་བྷ་ལའི་མཐའ་སྐོར་གྱི་རྒྱལ་ཕྲན་དགུ་བཅུ་གོ་དྲུག་གང་རུང་གི་སྲས་མོ་སྐུ་འཁྲུངས་པའི་ཚེ་མེ་ཏོག་ཨུཏྤ་ལའི་ཆར་འབེབས་པ་དང་། བཙུན་མོ་དེ་འཁྲུངས་པའི་སྔ་ལྟས་སུ་ཁྱིམ་དེར་མེ་ཏོག་པདྨ་ངོ་མཚར་བ་སྔོན་ཆད་མ་མཐོང་བ་ཞིག་སྐྱེས་པ་དེ། སློབ་དཔོན་དོན་ཡོད་ལྕགས་ཀྱུས། གང་གི་སྔོན་ཆད་མ་མཐོང་བའི། །མེ་ཏོག་རབ་ཏུ་རྒྱས་པ་ཆེ། །གང་གི་ཁྱིམ་དུ་སྐྱེས་གྱུར་པ། །དེས་ནི་རྒྱལ་པོའི་བཙུན་མོ་འཁྲུངས། །ཞེས་གསུངས། རྒྱལ་པོ་བཙུན་མོ་བཅས་པ་ནི་དཔལ་ལྡན་ཚངས་པ་སྡེ་བཞིའི་བང་མཛོད་འཛིན་ཏེ། ཚངས་པ་སྡེ་བཞི་ནི། འདོད་པ་ལྔ་དང་། ནོར་དང་། ཆོས་དང་། ཐར་པ་བཞི་སྟེ། དོན་ཡོད་ལྕགས་ཀྱུས། རྒྱལ་པོ་བཙུན་མོ་བཅས་པ་ནི། །རྒས་པ་མེད་ཅིང་ན་བ་མེད། །རྟག་ཏུ་འདོད་ལ་དགའ་བར་སྤྱོད། །འོན་ཀྱང་དགེ་བ་ལས་མི་ཉམས། །ཞེས་གསུངས་སོ། །ཚངས་པ་སྡེ་བཞི་ནི་རིགས་སྔགས་གྲུབ་པའི་རྒྱལ་པོ་ཐམས་ཅད་ལ་འབྱུང་སྟེ། གསང་བ་འདུས་པ་རིན་ཆེན་འབྱུང་ལྡན་གྱི་དབང་གི་སྐབས་སུ། ཐར་པ་ཆོས་ནོར་འདོད་པ་གཏེར་མཛད་ཅེས་པ་བདག་གི་བླ་མ་བསྐལ་བཟང་རྒྱ་མཚོས་དེ་ལྟར་བཤད་དོ། །
རིགས་སྲས་བསྐྲུན་པ་གཅིག་གཉིས་ལས་མེད་ཀྱང་ལོ་ལྟར་ནག་ཟླའི་ཚེས་བཅོ་ལྔ་ལ་དབང་ཡོན་དུ་ཕུལ་བའི་རྡོ་རྗེ་བཙུན་མོ་མང་དུ་ཡོད་དེ། དོན་ཡོད་ལྕགས་ཀྱུས། ཀ་ལཱ་པ་ཡི་བྱང་ངོས་སུ། །མཁའ་ཁམས་རྡོ་རྗེ་ཀུན་ཏུ་གནས། །སྟོང་ཕྲག་བརྒྱད་ཀྱི་སྨན་མོ་དང་། །གཞན་ཡང་སྟོབས་ལྡན་སྲོག་ཆགས་མང་། །ཞེས་གསུངས། ཕོ་བྲང་དེ་ཡི་བྱང་ཕྱོགས་ཀྱི་མཐའ་སྐོར་དུ་གྲངས་བྱེ་བ་ཕྲག་གཅིག་མོ་བྲན་གྱི་ཚུལ་དུ་ཡོད་ཅིང་། དེའི་ཡང་རྒྱབ་རིང་བར་བྱང་ཕྱོགས་ལོགས་ལ་བྲག་རི་ཤེལ་འདྲ་བ་སྐུ་གཟུགས་ཀྱི་དབྱིབས་རྒྱང་ནས་བལྟས་ན་ཤིན་ཏུ་གསལ་ཞིང་། མདུན་དུ་སོང་ན་གང་ཡིན་མི་ཕྱེད་མཐོ་ཁྱད་ཤིན་ཏུ་ཆེ་བ། སྨད་ཤིང་ས་ལའམ་ཤུག་པའི་ལྗོན་པ་རབ་ཏུ་རྒྱས་པས་གཡོགས་པ། འགའ་ཞིག་སྐུའི་ལྟེ་བ་དང་། འགའ་ཞིག་སྐྱིལ་དཀྲུང་ལྟ་བུར་མངོན་པའི་བྱང་ཆུབ་སེམས་དཔའ་བཟང་སྐྱོང། བྱང་ཆུབ་སེམས་དཔའ་ལྷུན་པོ་རྩེ་འཛིན། བྱང་ཆུབ་སེམས་དཔའ་སའི་སྙིང་པོ། བྱང་ཆུབ་སེམས་དཔའ་འཇམ་དཔལ། སྤྱན་རས་གཟིགས་ཧ་ལ་ཧ་ལ། འཕགས་མ་སྒྲོལ་མ། གསང་བདག་ཕྱག་ན་རྡོ་རྗེ། ལྷ་མོ་སྐྲ་ཅན་མ། བྱང་ཆུབ་སེམས་དཔའ་དོན་དམ་ཡང་དག་འཕགས། བྱང་ཆུབ་སེམས་དཔའ་བྱམས་པ་སྟེ་བྱང་ཆུབ་སེམས་དཔའ་བྱང་སེམས་སྟོང་ཕྲག་བཅུ་བཅུས་བསྐོར་ནས་བཞུགས་པའི་རི་ངོ་མཚར་ཅན་ཡོད།
ཕོ་བྲང་དེ་ཡི་ལྷོ་ཕྱོགས་སུ་མ་ལ་ཡའི་སྐྱེད་མོས་ཚལ་ཆེན་པོ་དཔག་ཚད་བཅུ་གཉིས་པ། དབུས་སུ་དཔལ་དུས་ཀྱི་འཁོར་ལོའི་སྐུ་གསུང་ཐུགས་ཀྱི་དཀྱིལ་འཁོར་ཡོངས་སུ་རྫོགས་པ་རྒྱུ་རིན་པོ་ཆེ་སྣ་ལྔ་ལས་གྲུབ་པའི་བློས་བསླངས་ཕྱོགས་རེར་ཁྲུ་བཞི་བརྒྱ་དང་བཅུ་གཉིས་ཡོད་པ། རྒྱལ་པོ་ཟླ་བ་བཟང་པོས་བཞེངས་པ་དང་། དུས་ཕྱིས་སུ་རིགས་ལྡན་རྒྱལ་པོ་གཞན་གྱིས་བཞེངས་པ་རིན་པོ་ཆེ་འབའ་ཞིག་ལས་གྲུབ་པ་ངོ་མཚར་ཅན་གྱི་དཀྱིལ་འཁོར་ཡང་མང་དུ་བཞུགས། སྐྱེད་མོས་ཚལ་དེའི་ཤར་ན་ཉེ་བའི་ཡིད་ཀྱི་མཚོ་ཚེས་བརྒྱད་ཀྱི་ཟླ་བ་ལྟ་བུ་དཔག་ཚད་བཅུ་གཉིས་པ། ནུབ་ན་པདྨ་དཀར་པོའི་མཚོ་ཟླ་བ་ཕྱེད་པ་ལྟ་བུ་དཔག་ཚད་བཅུ་གཉིས་ཡོད་པ་མེ་ཏོག་པདྨ་དཀར་པོ་དང་། ཨུཏྤ་ལ་སོགས་ཀྱིས་ཁེབས་པ། རིན་པོ་ཆེའི་གྲུ་རྣམས་ཀྱི་མི་དང་ལྷ་ཀླུ་ཐམས་ཅད་དགའ་ཞིང་རྩེ་བ། དབུས་ཀྱི་གྲོང་ཁྱེར་ཀ་ལཱ་པ་དེའི་མཐའ་སྐོར་གྱི་གངས་རི་ནས་ཕྱིའི་གངས་རིའི་བར་ལ་དཔག་ཚད་ལྔ་བརྒྱ་ཡོད་པའི་ས་གཞིའི་ཁྱོན་པདྨ་འདབ་བརྒྱད་ཀྱི་རྣམ་པར་ཡོད་པ། འདབ་མ་རྣམས་ཀྱི་མཚམས་ཆུ་དང་གངས་ཀྱིས་ཕྱེ་བ། འདབ་མ་བརྒྱད་ཀྱི་དབྱིབས་སུ་ཡོད་པའི་འདབ་མ་རེ་རེ་ལ་གྲོང་ཁྱེར་བྱེ་བ་ཕྲག་བཅུ་གཉིས་བཅུ་གཉིས་ཡོད་པ་བསྡོམས་པས་གྲོང་ཁྱེར་བྱེ་བ་ཕྲག་དགུ་བཅུ་གོ་དྲུག །གྲོང་ཁྱེར་བྱེ་བ་ཕྲག་རེ་རེ་ལ་རྒྱལ་པོ་རེ་རེ་ཡོད་པས་ཁྱོན་བསྡོམས་ཆོས་རྒྱལ་དགུ་བཅུ་གོ་དྲུག །སངས་རྒྱས་ཤཱཀྱ་ཐུབ་པའི་བསྟན་པ་ལོ་བརྒྱ་ཕྲག་ལྔ་བཅུ་མ་རྫོགས་བར་དུ་རྒྱལ་བརྒྱུད་རིམ་པར་འབྱུང་བས་རྟག་ཏུ་དུས་ཀྱི་འཁོར་ལོའི་ཆོས་སྟོན་པ། ཕལ་ཆེར་གྲུབ་པ་བརྒྱད་དུ་གཏོགས་པའི་རིགས་སྔགས་གྲུབ་པ། རྒྱལ་ཕྲན་དགུ་བཅུ་གོ་དྲུག་པོ་རེ་རེ་ལ་དབྱུག་པ་ཡིད་ཀྱིས་ཤུགས་ཅན་ཟེར་བ་རེ་རེ་ཕྱག་ན་ཡོད་པས་ཕོ་ཉ་བཏང་བའི་ཚེ་དེ་ལག་ཏུ་གཏད་པས་ཡིད་ལ་གང་བསམ་གྱི་ཕྱོགས་དེར་སྐད་ཅིག་ལ་སླེབས་པ་ཡོད། ཆོས་པ་ཕལ་ཆེར་ལ་རིགས་སྔགས་ཀྱི་མཐུས་ཀླུའམ་ལྷ་མིན་ལ་སོགས་པའི་མངག་གཞུག་རེ་རེ་ཡང་འོང་བ་སྣང་། གྲོང་ཁྱེར་དེ་དག་གི་ཁང་པ་རྣམས་ཉིས་ཐོག་ཅན་སྤྱོད་ཡུལ་བདེ་བ་རྒྱ་གར་བའི་ཁང་པ་ལྟ་བུ། ཞིང་དེར་སྐྱེས་པའི་མི་རྣམས་ནི་གཟུགས་དང་ལང་ཚོ་ཤིན་ཏུ་བཟང་བ། བཟའ་བཏུང་རྒྱན་གོས་སོགས་འབྱོར་པ་རྒྱས་པ། འཇམ་པོའི་ཁྲིམས་ཀྱི་འཚོ་ཞིང་འཆིང་བ་དང་། བརྡེག་པ་སོགས་དང་ནད་མུག་སོགས་གཏན་ནས་མེད་པ། དབང་པོ་རྣོ་བ། དགེ་བ་ལ་ངང་གིས་གཞོལ་བ། རང་བཞིན་བཟང་བ། ཕལ་ཆེར་ཚེ་དེར་གསང་འདུས་བདེ་དགྱེས་དུས་འཁོར་སོགས་བླ་མེད་ཀྱི་རྒྱུད་སྡེ་གང་རུང་བའི་སྒོ་ནས་སངས་རྒྱ་མཁན་མང་ཞིང༌། ཤེར་ཕྱིན་གྱི་མདོ་ནས་གསུངས་པའི་ཏིང་ངེ་འཛིན་ལ་སོགས་པ་ཐོབ་པ་མང་བ། ཉམས་ལེན་མ་གྲུབ་པའི་ཁྱིམ་པའི་བྲན་གཡོག་རྣམས་ཀྱང་། འཆི་ཁར་འཕོ་བ་སྤར་ནས་དག་པའི་ཞིང་དུ་འགྲོ་བ་མ་གཏོགས། ངན་སོང་དུ་སྐྱེ་བ་ཡེ་ནས་མེད་པ་ཡིན། དེ་དག་གི་ཆོས་གོས་ནི་རྒྱལ་པོ་རྣམས་དབུ་སྐྲ་བསིལ་བུ་སྤྱི་བོར་བཅིངས་ཤིང་། རིགས་ལྔའི་རྟགས་ཀྱི་མཚན་པའི་རྒྱལ་པོའི་ཅོད་པན་འཆང་བ་འཁོར་ལོས་བསྒྱུར་བའི་རྒྱལ་པོའི་ཆ་ལུགས་ཅན། མཐོང་བ་ཙམ་དང་རེག་པ་ཙམ་གྱིས་སྐལ་ལྡན་རྣམས་ལམ་བཟང་ཐོབ་ནུས་པ། སྐྱེས་པ་རྣམས་རྦད་དང་རས་གོས་དཀར་པོའམ་དམར་པོ་ཁྱིམ་པའི་བླ་གོས་དང་བཅས་པ། མོ་རིགས་རྣམས་གོས་དཀར་པོའམ་སྔོན་པོ་རིན་པོ་ཆེའི་རི་མོ་ཐོར་རེ་བ་ཡོད་པ་གྱོན་པ། ལོངས་སྤྱོད་ཆུང་ངུ་དག་ལའང་རིན་པོ་ཆེའི་བང་བ་བརྒྱར་ཉེ་བ་ཡོད་ཅིང་། དགེ་འདུན་གྱི་སྡེ་དང་སྐུ་གསུང་ཐུགས་ཀྱི་རྟེན་ཁྱད་པར་ཅན་བཞུགས་པ་རྣམས་ལ་བསྙེན་བཀུར་དང་མཆོད་པ་ཚད་མེད་པ། རབ་ཏུ་བྱུང་བ་རྣམས་ནས་ཆོས་གོས་རྣམ་གསུམ་ལྷུང་བཟེད་འཁར་གསིལ་འཆང་བ་མ་གཏོགས་ཡོ་བྱད་ཆེར་མི་འཆང་བ་དབུ་རེག་ཞབས་རྗེན་ལ་གནས་ཤིང་། འདུལ་བའི་བཅས་མཚམས་རྣམས་ལ་ཤིན་ཏུ་གུས་པར་མཛད་པ་ཡིན། བྱེ་བྲག་སྨྲ་བ་སྡེ་པ་བཅོ་བརྒྱད་ཀྱི་ཕྱག་ལེན་རུང་ཆུ་འདེབས་པ་ནས། ཐེག་པ་ཆེན་པོ་རྒྱུད་སྡེ་བཞིའི་བཀའ་དང་བསྟན་བཅོས་ཚད་ལྡན་འཛམ་བུ་གླིང་ན་ཇི་སྙེད་ཡོད་པ་དང༌། ཁྱད་པར་དུ་དཔའ་བོ་མཁའ་འགྲོ་དང་རིགས་ལྡན་རྒྱལ་པོའི་རྫུ་འཕྲུལ་གྱི་སྟོབས་ཀྱིས་བླངས་ནས་རྒྱལ་བ་ཙོང་ཁ་པ་ཡབ་སྲས་རྣམས་ཀྱི་གསུང་རྣམས་ཀྱང་བོད་ལས་དེར་དར་ཆེ་བ་ཡོད། །
གསུམ་པ་རྒྱ་གར་རྡོ་རྗེ་གདན་དུ་དུས་འཁོར་རྩ་རྒྱུད་གསུངས་ཚུལ་དང་། དེ་ཉམས་སུ་ལེན་པའི་ཤཱཀྱའི་རིགས་ཀྱི་ཆོས་ཀྱི་རྒྱལ་པོ་བཞི་བཅུ་ཞེ་གསུམ་ཇི་ལྟར་བྱོན་པའི་ཚུལ་ནི། རྒྱ་གར་ཤར་ཕྱོགས་བྷངྒ་ལའི་ལྷོ་ཕྱོགས། རྒྱ་གར་རྒྱ་ནག་འདབ་འབྲེལ་བའི་རྒྱ་གར་ཕྱོགས་ཀྱི་རྒྱ་མཚོས་བཅད་པའི་གླིང་ཕྲན་ཨིསྟུ་ཀ་ཨ་ཕལ་སྐད་ལ་ཟེར་ཞིང་། གྲོང་ཁྱེར་དཔལ་ཡོན་ཅན་ཞེས་ཤིན་ཏུ་རྒྱ་ཆེ་བ། འགྲམ་ན་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོ་ནི། སྔོན་སངས་རྒྱས་གསེར་ཐུབ་འཇིག་རྟེན་དུ་བྱོན་པའི་དུས་སུ་མུ་གེས་ཉམ་ཐག་པའི་སེམས་ཅན་ལ་ཕན་ཕྱིར་ཉིན་ལམ་བཅུ་གཉིས་ཀྱི་སར་འབྲས་སོ་བའི་ཆར་པ་དགེ་སློང་ཞིག་གིས་ཕབ་ནས་སེམས་ཅན་ཚིམས་པར་བྱས། འབྲས་ལྷག་རྫུ་འཕྲུལ་གྱིས་བསྡུས་ཏེ། མཆོད་རྟེན་ཆེན་པོ་ཞིག་བཞེངས་པས་དཔལ་ལྡན་འབྲས་སྤུངས་ཀྱི་མཆོད་རྟེན་དཔལ་ཡོན་ཅན་ཟེར་ཡང༌། དེ་ཨརྒའི་ས་འདྲ་བ་ཤིན་ཏུ་མཁྲེག་པ། དེའི་ཕྱི་རོལ་ན་ལྕགས་རི་བྲག་རི་འདྲ་བ་རིམ་པ་གཉིས་ཡོད། ཉི་མ་གཅིག་ལ་སྐོར་བ་གཅིག་ཐེབས་ཚོད་ཡོད་པ་དེའི་མཆོད་རྟེན་གྱི་བུམ་པའི་ནང་དུ་སྟོན་པ་ཤཱཀྱ་ཐུབ་པས་རྒྱ་གར་རྡོ་རྗེ་གདན་དུ་སངས་རྒྱས་ནས། དེའི་ལོ་ཕྱི་མ་ཧོར་ཟླ་གསུམ་པའི་ཚེས་བཅོ་ལྔ་སྟེ་ནག་པ་ཟླ་བའི་ཉ་ལ་གསུངས་ཟེར་བ་དང་། བཅོམ་ལྡན་འདས་མྱ་ངན་ལས་འདའ་ཁ་མ་ཟླ་བ་གསུམ་པ་ནག་པའི་ཉ་ལ་རྩ་རྒྱུད་གསུངས། ཟླ་བ་ཕྱི་མ་བཞི་པ་ས་གའི་ཉ་ལ་སྐུ་མྱ་ངན་ལས་འདས་ཏེ། དུས་འཁོར་རྩ་རྒྱུད་གསུངས་ནས་སངས་རྒྱས་ཟླ་བ་གཅིག་ལས་མ་བཞུགས་ཟེར་བའི་ལུགས་གཉིས་གང་ལྟར་ཡང་། བྱང་ཤམ་བྷ་ལའི་རྒྱལ་པོ་ཉི་མའི་འོད་དང་། བཙུན་མོ་ལྷ་མོ་རྣམ་པར་རྒྱལ་བའི་སྲས་ཕྱག་ན་རྡོ་རྗེའི་སྤྲུལ་པ་རྒྱལ་པོ་ཟླ་བ་བཟང་པོ་དང་། ཡུལ་ཆེན་དགུ་བཅུ་གོ་དྲུག་གི་རྒྱལ་ཕྲན་དགུ་བཅུ་གོ་དྲུག་དང་བཅས་རྫུ་འཕྲུལ་གྱིས་ཀླུ་སྒྲུབ་བཞུགས་པའི་གནས་རྒྱ་གར་ལྷོ་ཕྱོགས་དཔལ་གྱི་རིར་ཉེ་བ་དཔལ་ལྡན་འབྲས་སྤུངས་ཀྱི་མཆོད་རྟེན་དེ་ཡི་ནང་དུ་འདུས་ནས་སྟོན་པ་སངས་རྒྱས་ལ་དུས་འཁོར་རྩ་རྒྱུད་ཤོ་ལོ་ཀ་སྟོང་ཕྲག་བཅུ་གཉིས་ཡོད་པ་ཞུས།
ཟླ་བ་བཟང་པོ་དེའི་སྲས་ས་སྙིང་སྤྲུལ་པ་རྒྱལ་པོ་ལྷ་དབང་། དེའི་སྲས་གཤིན་རྗེ་གཤེད་ཀྱི་སྤྲུལ་པ་རྒྱལ་པོ་གཟི་བརྗིད་ཅན། དེའི་སྲས་སྒྲིབ་སེལ་སྤྲུལ་པ་རྒྱལ་པོ་ཟླ་བས་བྱིན། སྲས་རྨུགས་བྱེད་སྤྲུལ་པ་རྒྱལ་པོ་ལྷའི་དབང་ཕྱུག །དེའི་སྲས་ཁེངས་བྱེད་སྤྲུལ་པ་རྒྱལ་པོ་སྣ་ཚོགས་གཟུགས། དེའི་སྲས་ནམ་སྙིང་སྤྲུལ་པ་རྒྱལ་པོ་ལྷའི་དབང་ལྡན། འདི་རྣམས་སྔོན་གྱི་ཆོས་རྒྱལ་བདུན་ཟེར། དེའི་བཙུན་མོ་སྣ་ཚོགས་ཡུམ་གྱི་སྲས། རིགས་ལྡན་ཉི་ཤུ་རྩ་ལྔའི་ཐོག་མ་འཇམ་དབྱངས་སྤྲུལ་པ་རིགས་ལྡན་དང་པོ་འཇམ་དཔལ་གྲགས་པ་དང་། དེའི་བཙུན་མོ་སྒྲོལ་མའི་སྲས་སྤྱན་རས་གཟིགས་ཀྱི་སྤྲུལ་པ་རིགས་ལྡན་པདྨ་དཀར་པོ་གཉིས་པ། གཤིན་རྗེ་མཐར་བྱེད་སྤྲུལ་པ་རིགས་ལྡན་བཟང་པོ་གསུམ་པ། ས་སྙིང་སྤྲུལ་པ་རིགས་ལྡན་རྣམ་རྒྱལ་བཞི་པ། རྨུགས་བྱེད་སྤྲུལ་པ་རིགས་ལྡན་བཤེས་གཉེན་བཟང་པོ་ལྔ་པ། སྒྲིབ་སེལ་སྤྲུལ་པ་རིགས་ལྡན་ཕྱག་དམར་བ་དྲུག་པ། ཁེངས་བྱེད་སྤྲུལ་པ་རིགས་ལྡན་ཁྱབ་འཇུག་སྦས་པ་བདུན་པ། ནམ་སྙིང་སྤྲུལ་པ་རིགས་ལྡན་ཉི་མ་གྲགས་པ་བརྒྱད་པ། བགེགས་དགྲའི་སྤྲུལ་པ་རིགས་ལྡན་ཤིན་ཏུ་བཟང་པོ་དགུ་པ། ཕྱག་རྡོར་སྤྲུལ་པ་རིགས་ལྡན་རྒྱ་མཚོ་རྣམ་རྒྱལ་བཅུ་པ། གཤིན་རྗེ་གཤེད་ཀྱི་སྤྲུལ་པ་རིགས་ལྡན་རྒྱལ་དཀའ་བཅུ་གཅིག་པ། ས་སྙིང་སྤྲུལ་པ་རིགས་ལྡན་ཉི་མ་བཅུ་གཉིས་པ། རྨུགས་བྱེད་སྤྲུལ་པ་རིགས་ལྡན་སྣ་ཚོགས་གཟུགས་བཅུ་གསུམ་པ། སྒྲིབ་སེལ་སྤྲུལ་པ་རིགས་ལྡན་ཟླ་བའི་འོད་བཅུ་བཞི་པ། ཁེངས་བྱེད་སྤྲུལ་པ་རིགས་ལྡན་མཐའ་ཡས་བཅོ་ལྔ་པ། ནམ་སྙིང་སྤྲུལ་པ་རིགས་ལྡན་ས་སྐྱོང་བཅུ་དྲུག་པ། བགེགས་དགྲའི་སྤྲུལ་པ་རིགས་ལྡན་དཔལ་སྐྱོང་བཅུ་བདུན་པ། ཕྱག་རྡོར་སྤྲུལ་པ་རིགས་ལྡན་སེང་གེ་བཅོ་བརྒྱད་པ། གཤིན་རྗེ་མཐར་བྱེད་སྤྲུལ་པ་རིགས་ལྡན་རྣམ་གནོན་བཅུ་དགུ་པ། ད་ལྟ་འདི་ཁྲི་ལ་ཕེབས་ནས་གདོང་ངན་ཞེས་པ་མེ་སྤྲེལ་ལོས་ཕུག་ལུགས་པའི་ལོ་ལྔ་བཅུ་སོང༌། རྒྱལ་བ་བསྐལ་བཟང་རྒྱ་མཚོའི་ཡང་སྲིད་རིན་པོ་ཆེ་༸རྒྱལ་བ་འཇམ་དཔལ་རྒྱ་མཚོ་ཁྲི་འདོན་བྱས་ནས་ལོ་བཅོ་ལྔ་སོང་བ་ཡིན། ས་སྙིང་སྤྲུལ་པ་རིགས་ལྡན་སྟོབས་པོ་ཆེ་ཉི་ཤུ་པ། རྨུགས་བྱེད་སྤྲུལ་པ་རིགས་ལྡན་མ་འགག་པ་ཉེར་གཅིག་པ། སྒྲིབ་སེལ་སྤྲུལ་པ་རིགས་ལྡན་མིའི་སེངྒེ་ཉེར་གཉིས་པ། ནམ་སྙིང་སྤྲུལ་པ་རིགས་ལྡན་དབང་ཕྱུག་ཆེན་པོ་ཉེར་གསུམ་པ། ཕྱག་རྡོར་སྤྲུལ་པ་རིགས་ལྡན་མཐའ་ཡས་རྣམ་རྒྱལ་ཉེར་བཞི་པ། འཇམ་དབྱངས་སྤྲུལ་པ་རིགས་ལྡན་དྲག་པོ་འཁོར་ལོ་ཅན་ཉེར་ལྔ་པའོ། །དེས་རིགས་ལྡན་ཉེར་ལྔ་རྫོགས་སོ། །
དེའི་སྲས་འཇམ་དབྱངས་སྤྲུལ་པ་ཚངས་དབང་། སྤྱན་རས་གཟིགས་ཀྱི་སྤྲུལ་པ་ལྷ་དབང་། (འདི་ཤམ་བྷ་ལའི་རྒྱལ་རབས་རྣམས་སུ་མི་བགྲང་། འདི་རྒྱལ་བ་རིན་པོ་ཆེའི་སྐུ་འཕྲེང་གི་རིམ་པར་གྲགས) ཚངས་སྲས་རྒྱལ་པོ་འོད་སྲུང་། འོད་སྲུང་གི་སྲས་ཉའི་མིང་ཅན་གྱི་རྒྱལ་པོ། དེའི་སྲས་རུས་སྦལ་མིང་ཅན་གྱི་རྒྱལ་པོ། དེའི་སྲས་ཕག་པའི་མིང་ཅན་གྱི་རྒྱལ་པོ། དེའི་སྲས་སེངྒེའི་མིང་ཅན་གྱི་རྒྱལ་པོ། དེའི་སྲས་མི་འུ་ཐུང་གི་མིང་ཅན་གྱི་རྒྱལ་པོ། དེའི་སྲས་དགའ་བྱེད་ར་མ་ཎའི་མིང་ཅན་གྱི་རྒྱལ་པོ། དེ་སྲས་ར་མ་ཎ་གཉིས་པའི་མིང་ཅན་གྱི་རྒྱལ་པོ། དེའི་སྲས་ནག་པོའི་མིང་ཅན་གྱི་རྒྱལ་པོ་རྣམས་སོ། །
མུ་སྟེགས་པའི་གཏམ་རྒྱུད་ལས་ཁྱབ་འཇུག་ལ་འཇུག་པ་བཅུ་ཡོད་དེ། ཉ་དང་རུས་སྦལ་ཕག་པ་དང་། །སེང་གེའི་མགོ་ཅན་མི་འུ་ཐུང་། །ར་མ་ར་མ་ནག་པོ་དང༌། །སངས་རྒྱས་ཀ་ལ་པི་ཅན་བཅུ་ཟེར་རོ། །དེ་ཡི་དང་པོ་བརྒྱད་མིང་ཅན་གྱི་རྒྱལ་པོ་བརྒྱད་འབྱུང་བ་རྩ་རྒྱུད་ལས་ལུང་བསྟན་པ་དེ་དག་གོ། །དགུ་པ་སངས་རྒྱས་ནི་ཤཱཀྱ་ཐུབ་པ། བཅུ་པ་ཀ་ལ་པི་ཅན་ནི་རིགས་ལྡན་དྲག་པོ་འཁོར་ལོ་ཅན་ཡིན་ཞེས་ཕྱི་རོལ་པའི་གཏམ་རྒྱུད་ལ་གྲགས་སོ། །རྒྱལ་པོ་དེ་དག་གི་སྐུ་ཚེའི་ཚད་ནི་རིགས་ལྡན་བཅུ་པ་བཅུ་གཅིག་པ་གཉིས་བྱང་ཤམ་བྷ་ལའི་ཁྲི་ལ་ལོ་བཞི་བརྒྱ་དང་གསུམ་བཞུགས་པ་མ་གཏོགས། རིགས་ལྡན་རྒྱལ་པོ་ཉེར་ལྔ་པ་ཡན་རྒྱལ་པོ་ཐམས་ཅད་རྒྱལ་པོའི་ཁྲི་ལ་ལོ་བརྒྱ་རེ་བཞུགས་ནས། དེ་ནས་རང་གི་སྲས་ཁྲི་ལ་མངའ་གསོལ་བ་ཡིན་པས་རྒྱལ་པོ་དེ་དག་གི་སྐུ་ཚེའི་ཚད་ནི་ངེས་པ་མེད་དོ། །ལོ་བརྒྱ་དང་བཞི་བཅུ་བརྒྱ་དང་དྲུག་ཅུ་ཅི་རིགས་ཐུབ་པ་ཡོད་ཅེས་འཇམ་དབྱངས་ཆོས་རྗེའི་སློབ་མ་གཙང་པ་ཀུན་དགའ་རྒྱལ་མཚན་གྱིས་གསུངས། རྒྱལ་པོ་ལྷ་དབང་། ཚངས་དབང་གཉིས་ཀྱི་སྐུ་ཚེའི་ཚད་ལོ་བརྒྱད་བརྒྱ་རེ་བཞུགས། རྒྱལ་པོ་འོད་སྲུང་ལོ་བཞི་བརྒྱ་བཞུགས། སྐྱེ་དགུའི་ཚེ་ཚད་ལོ་དགུ་བརྒྱ་རེ་ཐུབ་པ་ཡིན་། ས་བཅུའི་སེམས་དཔའ་བརྒྱད་པོ་ཉ་དང་རུས་སྦལ་དང་ཕག་དང་མིའི་སེངྒེ་རྣམས་ཀྱི་ཚེ་ཚད་ནི། དགུ་བརྒྱ་ནས་རིམ་བཞིན་བྲི་སྟེ། རྒྱལ་པོ་མིའི་སེངྒེའི་དུས་སུ་སྐྱེ་རྒུ་རྣམས་ལོ་སུམ་བརྒྱ་དང་དགུ་བཅུ་རེ་ཐུབ། རྒྱལ་པོ་མིའུ་ཐུང་དང་དགའ་བྱེད་ར་མ་ཎ་དང་ར་མ་ཎ་གཉིས་པ་དང་ནག་པོའི་མིང་ཅན་གྱི་སྐུ་ཚེའི་ཚད་ནི་སུམ་བརྒྱ་དང་དགུ་བཅུ་ནས་རིམ་བཞིན་བྲི་སྟེ། རྒྱལ་པོ་ནག་པོའི་མིང་ཅན་གྱིས་བྱང་ཤམ་བྷ་ལའི་ཁྲི་ལ་བཞུགས་ནས་ཆོས་སྟོན་པའི་ཚེ་སྐྱེ་རྒུ་རྣམས་ཀྱི་ཚེ་ཚད་མི་ལོ་བརྒྱ་རེ་ཡིན་ཞེས་དུས་འཁོར་བསྡུས་རྒྱུད་དང་ཊིཀ་ཆེན་ལས་བཤད།
ནག་པོའི་མིང་ཅན་གྱི་རྒྱལ་པོ་མྱ་ངན་འདས་ཚུལ་སྟོན་པ་དང་། སྟོན་པ་ཤཱཀྱ་ཐུབ་པའི་བསྟན་པ་ལོ་བརྒྱ་ཕྲག་ལྔ་བཅུ་རྫོགས་པ་ཡིན་ཞེས། བུ་སྟོན་དང་མཁས་གྲུབ་རྗེ་པཎ་ཆེན་ཆོས་ཀྱི་རྒྱལ་མཚན་སོགས་ཀྱིས་བཞེད། ཕུག་ལུགས་པས་མདོའི་བསྟན་པ་རྫོགས་ཀྱང་སྔགས་ཀྱི་བསྟན་པ་ལོ་བརྒྱ་ཕྲག་གཅིག་དང་གསུམ་ཡོད་པ་སླད་ནས་འབྱུང་དགོས་ཟེར། གང་ལྟར་རྒྱལ་པོ་འདས་ནས་ཡུན་རིང་མ་སོང་བར་བྱང་ཤམ་བྷ་ལར་སླར་ཡང་ཀླ་ཀློ་འཇུག་ཀྱང༌། བྱང་ཤམ་བྷ་ལའི་ལྟེ་བ་ཕོ་བྲང་ཀ་ལཱ་པའི་ས་ཕྱོགས་གངས་རིས་ནོན་ཅིང་ཀླ་ཀློ་གནས་མི་ནུས་སོ། །དྲག་པོ་འཁོར་ལོ་ཅན་བསྟན་པ་གསར་འཛུགས་དུས་བཞི་རྫོགས་ལྡན། གསུམ་ལྡན། གཉིས་ལྡན། རྩོད་ལྡན་རེ་རེ་ལ་ལོ་བཞི་བརྒྱ་ལྔ་བཅུ་བ་རེ་རེ་ཡོད། རྩོད་ལྡན་གྱི་ལོ་བཞི་བརྒྱ་ལྔ་བཅུ་རྫོགས་པ་དང་ཆོས་རྒྱལ་ནག་པོའི་མིང་ཅན་སྐུ་མྱ་ངན་ལས་འདས་པ་མཉམ་པའོ། །
དེ་དག་ནི་རྫོགས་པའི་སངས་རྒྱས་ཀྱི་དུས་འཁོར་རྩ་རྒྱུད་ནས་ལུང་བསྟན་པའི་ཆོས་རྒྱལ་བཞི་བཅུ་ཞེ་གསུམ། རྒྱལ་རྒྱུད་བར་མ་ཆད་པ་རིམ་བཞིན་དུ་སྟོན་པ་ཤཱཀྱ་ཐུབ་པའི་བསྟན་པ་ལོ་བརྒྱ་ཕྲག་ལྔ་བཅུ་མ་རྫོགས་བར་དུ་བྱང་ཤམ་བྷ་ལ་རིག་སྔགས་གྲུབ་པ་རིག་འཛིན་གྱི་གནས་སུ་འབྱུང་བ་ཡིན་པས་རྒྱ་གར་རྒྱ་ནག་ལྟ་བུ་སྟོབས་ཤུགས་ཀྱིས་འཕྲོག་པ་དམུ་རྒོད་སེམས་ཅན་དེ་འདྲ་དེར་ལས་དབང་གིས་སྐྱེ་མི་སྲིད་དོ། །དེའི་རྒྱལ་རབས་དེ་ལ་སར་གནས་སེམས་དཔའ་ཤ་སྟག་ཏུ་ལུང་བསྟན་པ་ནི་རྩ་རྒྱུད་དང་རིགས་ལྡན་པདྨ་དཀར་པོའི་ལུང་གིས་ཟིན་པའི་ཤམ་བྷ་ལའི་ཆོས་རྒྱལ་སུམ་ཅུ་སོ་བཞི་ནི། ཟླ་བཟང་སོགས་ཕྱག་རྡོར་སྤྲུལ་པ་བཞི། ས་སྙིང་སྤྲུལ་པ་བཞི། ནམ་སྙིང་སྤྲུལ་པ་བཞི། སྒྲིབ་སེལ་སྤྲུལ་པ་བཞི། འཇམ་དབྱངས་སྤྲུལ་པ་རིགས་ལྡན་འཇམ་དཔལ་གྲགས་པ་དང་དྲག་པོ་འཁོར་ལོ་ཅན་ཡབ་སྲས་གཉིས་ཏེ་གསུམ། སྤྱན་རས་གཟིགས་ཀྱི་སྤྲུལ་པ་རིགས་ལྡན་པདྨ་དཀར་པོ་དང་། རིགས་ལྡན་དྲག་པོ་འཁོར་ལོ་ཅན་གྱི་སྲས་ཆུང་བ་ལྷ་དབང་གཉིས་ཏེ་བྱང་ཆུབ་སེམས་དཔའི་སྤྲུལ་པ་ཉེར་བཞི། གཤིན་རྗེ་མཐར་བྱེད་དེ་གཤིན་རྗེ་གཤེད་ཀྱི་སྤྲུལ་པ་བཞི། ཁེངས་བྱེད་དེ་པདྨ་མཐར་བྱེད་ཀྱི་སྤྲུལ་པ་བཞི། དེ་གཞན་གྱི་མི་ཐུབ་པའི་སྤྲུལ་པ་གསུམ། བགེགས་དགྲ་སྟེ་བགེགས་མཐར་བྱེད་ཀྱི་སྤྲུལ་པ་གཉིས་ཏེ་ཁྲོ་བོ་བཅུ་གསུམ་རྣམས་སོ། །
དུས་འཁོར་རྒྱུད་ཕྱི་མ་དང༌། མཁས་གྲུབ་རྗེས་དུས་འཁོར་ཊིཀ་ཆེན་སོགས་ལ་ས་བཅུའི་བྱང་ཆུབ་སེམས་དཔར་བཤད་ཀྱང་བྱང་སེམས་འདི་ཡིན་གྱི་ངོས་འཛིན་མ་བཤད་པ་ནི། རྒྱལ་བཞི་བཅུ་ཞེ་གསུམ་ནི། བྱང་ཤམ་བྷ་ལའི་ཆོས་རྒྱལ་པོ་ཟླ་བ་བཟང་པོ་སོགས་སྔོན་གྱི་ཆོས་རྒྱལ་བདུན། རིགས་ལྡན་ཉི་ཤུ་རྩ་ལྔ། དྲག་པོ་འཁོར་ལོ་ཅན་གྱི་སྲས་ཚངས་དབང་གི་བུ་རྒྱལ་པོ་འོད་སྲུང་དང༌། རིགས་ལྡན་དྲག་པོའི་སྲས་ཚངས་དབང་ལྷ་དབང་ཚ་བོ་འོད་སྲུང་སོགས་ནི་ལྷའི་སྐྱེ་གནས་ཅན་རྫུ་འཕྲུལ་དང་མངོན་ཤེས་སོགས་བསླབ་མི་དགོས་པར་སྐྱེས་སྟོབས་ཀྱིས་འབྱུང་བ། ཉའི་མིང་ཅན་རྒྱལ་པོ་མཐའ་མ་བརྒྱད་ནི། མི་བཞིན་དུ་ཡོན་ཏན་རིམ་བཞིན་བསླབ་དགོས་པ་མིའི་སྐྱེ་གནས་ཅན་ཏེ། སངས་རྒྱས་འཇིག་རྟེན་དུ་བྱོན་པ་ནས་བཟུང་། སངས་རྒྱས་ཤཱཀྱ་ཐུབ་པའི་བསྟན་པ་སྟོང་ཕྲག་ལྔ་མ་རྫོགས་བར་བྱང་ཤམ་བྷ་ལའི་རྒྱལ་རབས་སམ་ཤཱཀྱའི་རིགས་ཀྱི་རྒྱལ་རྒྱུད་བཞི་བཅུ་ཞེ་གསུམ་བར་མ་ཆད་པ་འབྱུང་བའོ། །
དེ་ལྟར་ཆོས་རྒྱལ་བདུན་དང༌། རིགས་ལྡན་ཉེར་ལྔ་དང་དྲག་པོ་འཁོར་ལོ་ཅན་གྱི་སྲས་ཚངས་དབང་ལྷ་དབང་སོགས་ཆོས་རྒྱལ་བཅུ་སྟེ་ཞེ་གསུམ་པོ་ཐམས་ཅད་དང་པོ་ཡུམ་ལས་སྐུ་བལྟམས་ཤིང་འཁྲུངས་པ་དང་རྒྱལ་སྲིད་བཟུང་། གསང་སྔགས་ཀྱི་ཆོས་འཁོར་བསྐོར་བའི་གནས་ནི་དབུས་ཀྱི་ཕོ་བྲང་ཀ་ལཱ་པ་དེར་ཡིན། རིགས་ལྡན་ཉེར་ལྔའི་ཐོག་མ་འཇམ་དཔལ་གྲགས་པ་དང་། མཐའ་མའི་དྲག་པོ་འཁོར་ལོ་ཅན་གཉིས། པཎ་ཆེན་སྐུ་ཕྲེང་རིམ་པར་བྱོན་པ་རྣམས་ཡིན་པར་གྲགས། རིགས་ལྡན་ཉེར་བཞི་པ་མཐའ་ཡས་རྣམ་རྒྱལ་གྱི་སྲས་རིགས་ལྡན་རྒྱལ་པོ་ཉེར་ལྔ་པ་དྲག་པོ་འཁོར་ལོ་ཅན་ཞེས་བརྗོད་པའི་རྒྱུ་མཚན་ཨང་རིགས་ལྡན་གང་ཡིན་ཐམས་ཅད་ལ་བཟོ་བོས་མ་བཅོས་པའི་ཕྱག་མཚན་རེ་ནམ་མཁའ་ནས་བབས་ཏེ་རྒྱལ་པོར་དབང་བསྐུར་བ་ཡོང་ཞིང་། རྒྱལ་པོ་འདི་ལ་ཡང་ལྕགས་ཀྱི་འཁོར་ལོ་ཞིག་ནམ་མཁའ་ནས་བབས་ཏེ། རྒྱོགས་ཐམས་ཅད་ལས་རྒྱལ་བའི་རྒྱལ་པོར་དབང་བསྐུར་བས་ན་དེ་ལྟར་བརྗོད། །
བཞི་པ་དུས་བཞི་སྔ་མ་དང་ཕྱི་མའི་བསྟན་པ་གནས་ཚད་ནི། སྟོན་པ་ཤཱཀྱ་ཐུབ་པའི་བསྟན་པ་སངས་རྒྱས་མྱ་ངན་ལས་འདས་ཚུལ་བསྟན་པ་ནས་འགོ་བཟུང་སྟེ། བསྟན་པ་ལོ་སྟོང་ཕྲག་ལྔའམ་ལྔ་བརྒྱ་ཕྲག་བཅུར་གནས་ཞེས་ད་ལྟ་གྲགས་ཆེ་བ་སྟོང་ཕྲག་གསུམ་དང་ལོ་ཉིས་བརྒྱ་ནི་དུས་བཞི་སྔ་མ་དང་སྟོང་དང་བརྒྱད་བརྒྱ་ནི་དུས་བཞི་ཕྱི་མ་ཟེར་རོ། །དུས་བཞི་སྔ་མ་ནི་རྒྱ་གར་ལྷོ་ཕྱོགས་མཆོད་རྟེན་དཔལ་ལྡན་འབྲས་སྤུངས་སུ་བཅོམ་ལྡན་འདས་ཀྱིས་དུས་འཁོར་རྩ་རྒྱུད་གསུངས་ནས། ཟླ་བཟང་སོགས་ཆོས་རྒྱལ་བདུན་དང༌། རྒྱལ་པོ་རིགས་ལྡན་ཉེར་ལྔའི་ཐོག་མ་འཇམ་དཔལ་གྲགས་པ་ནས། མཐའ་མའི་རྒྱལ་པོ་རིགས་ལྡན་དྲག་པོ་འཁོར་ལོ་ཅན་གྱིས་འཛམ་གླིང་ཆེན་པོ་དུམ་བུ་བཅུ་གཉིས་ལ་དབང་བསྒྱུར་བའི་འགོ་མ་བརྩམས་བར་དུ་སངས་རྒྱས་ཀྱི་བསྟན་པ་རྫོགས་ལྡན། གསུམ་ལྡན། གཉིས་ལྡན། རྩོད་ལྡན་གྱི་རིམ་པས་གནས་པ་ལ་ཟེར་རོ། །
ཕག་མོ་གྲུ་པས་མེ་ཏོག་ཚོམ་བུ་མདོའི་ལུང་དྲངས་པ། མར་མེ་འཆི་ཁར་གསལ་བ་ལྟར། །སངས་རྒྱས་བསྟན་པ་ནུབ་ཁར་འཕེལ། །ཞེས་གསུངས་པ་ལྟར། སྟོན་པ་ཤཱཀྱ་ཐུབ་པའི་བསྟན་པ་ལ་གསང་སྔགས་ཀྱི་བག་ཆགས་སད་རུང་ཇི་སྙེད་བྱུང་བ་ཐམས་ཅད། ཤཱཀྱ་ཐུབ་པའི་བསྟན་པའི་མཇུག་ཏུ་དྲག་པོ་འཁོར་ལོ་ཅན་གྱི་བསྟན་པ་དུས་བཞི་ཕྱི་མ་ལ་གསར་དུ་གཏོད་པ་དེར་མཆོག་འགྲུབ་དགོས་ངེས་པ་ཅན་ཡིན་པས་ཤཱཀྱ་ཐུབ་པའི་བསྟན་པ་ལོ་བརྒྱ་ཕྲག་ལྔ་བཅུ་རྫོགས་ཁར་དྲག་པོ་འཁོར་ལོ་ཅན་གྱིས་མདོ་སྔགས་གཉིས་ཀའི་བསྟན་པ་སྟོང་དང་བརྒྱད་བརྒྱ་གསལ་བར་མཛད་པའི་དུས་བཞི་ཕྱི་མ་ནི་རིགས་ལྡན་དྲག་པོ་འཁོར་ལོ་ཅན་མཁས་གྲུབ་རྗེའི་དགོངས་པ་ལྟར་ན་དགུང་ལོ་ལྔ་བཅུ་བཞེས་ཚེ། བྱང་ཤམ་བྷ་ལ་ནས་ལྷ་ཆེན་པོ་བཅུ་གཉིས་ལ་སོགས་པའི་དམག་དཔུང་གིས་མ་ཁ་ལ་སོགས་པའི་ཀླ་ཀློ་བཅོམས་ནས་འཛམ་གླིང་ཆུང་ངུ་འདིར་སངས་རྒྱས་ཀྱི་བསྟན་པའི་སྲོལ་གསར་དུ་འཛུགས་པ་སྟེ། བསྟན་པ་སྟོང་དང་བརྒྱད་བརྒྱ་ལ་རྫོགས་ལྡན། གསུམ་ལྡན། གཉིས་ལྡན། རྩོད་ལྡན་གྱི་རིམ་པས་གནས་པ་ལ་ཟེར་རོ། །དུས་བཞི་ཕྱི་མ་རྫོགས་པ་དང༌། ཤཱཀྱ་ཐུབ་པའི་བསྟན་པ་སྟོང་ཕྲག་ལྔའམ་བརྒྱ་ཕྲག་བཅུ་རྫོགས་པ་དུས་མཉམ་པའོ། །
འོ་ན་དྲག་པོ་འཁོར་ལོ་ཅན་གྱི་བསྟན་པ་འོག་མིན་པའི་དབུགས་གཅིག་སྟེ་མི་ལོ་ཉི་ཁྲི་ཆིག་སྟོང་དྲུག་བརྒྱ་གནས་ཞེས་བརྗོད་པ་ཇི་ལྟར་ཡིན་སྙམ་ན། ས་དུམ་བུ་བཅུ་གཉིས་ཀྱི་དུམ་བུ་རེ་རེའི་ནང་དུ་སྟོང་བརྒྱད་བརྒྱར་གནས་པས། སྟོང་བརྒྱད་བརྒྱ་ཕྲག་བཅུ་གཉིས་བསྡོམས་པས། སངས་རྒྱས་ཀྱི་བསྟན་པ་ལོ་ཉི་ཁྲི་ཆིག་སྟོང་དྲུག་བརྒྱ་གནས་པ་ལ་བྱའོ། །དུམ་བུ་བཅུ་གཉིས་ནི། ལྷོ་འཛམ་གླིང་གསུམ། ནུབ་གླིང་གསུམ། བྱང་གླིང་གསུམ། ཤར་གླིང་གསུམ་སྟེ། གླིང་བཞི་གླིང་ཕྲན་བརྒྱད་པོ་ཐམས་ཅད་ལ་འཛམ་གླིང་ཆེན་པོ་དང་། ལྷོ་གླིང་གསུམ་ལ་འཛམ་གླིང་ཆུང་ངུ་ཞེས་ཟེར་རོ། །
དུམ་བུ་བཅུ་གཉིས་པོ་ཐམས་ཅད་ཀྱི་རྫོགས་ལྡན་རྣམས་བསྡོམས་པས་བརྒྱ་ཕྲག་ལྔ་བཅུ་ང་བཞི། དེ་བཞིན་དུ་གསུམ་ལྡན་བརྒྱ་ཕྲག་ང་བཞི། དེ་བཞིན་དུ་གཉིས་ལྡན་བརྒྱ་ཕྲག་ང་བཞི། རྩོད་ལྡན་བརྒྱ་ཕྲག་ང་བཞི་རེ་ཐོབ་པ་བསྡོམས་པས་སངས་རྒྱས་ཀྱི་བསྟན་པ་འཁོར་ལོ་ཅན་གྱི་སྲོལ་གསར་དུ་བཙུགས་པ་ཉི་ཁྲི་ཆིག་སྟོང་དྲུག་བརྒྱའོ། །དེ་འདྲའི་བསྟན་པ་ལོ་ཇི་ཙམ་ན་འབྱུང་ཞེ་ན། ད་ལྟ་རྣམ་གནོན་གྱི་ཆོས་བསྟན་ནས་ལོ་གདོང་ངན་ཞེས་པ་སྤྲེའུའི་ལོས་ལྔ་བཅུ་སོང་། དེ་ནས་སྟོབས་པོ་ཆེ། མི་ཡི་སེངྒེ་། དབྱུག་ཆེན་པོ། མ་འགག་པ། མཐའ་ཡས་རྣམ་རྒྱལ་གྱི་ཆོས་བསྟན་པའི་མཐར་དྲག་པོ་འཁོར་ལོ་ཅན་སེངྒེའི་ཁྲི་ལ་མངོན་པར་བཞུགས་ནས་རེ་ཞིག་ཆོས་བསྟན་ཏེ། ཆུ་བོ་སི་ཏའི་ལྷོ་ཕྱོགས་ཀྱི་འཕགས་པའི་ཡུལ་གྱི་བྱེ་བྲག་མ་ཁ་ནས་བཟུང་ཡུལ་ཐམས་ཅད་ཆོས་མིན་ཀླ་ཀློ་ཆེས་ཆེར་དར་བས་ཤིན་ཏུ་མི་བསྲུན་པ་གཟིགས་ནས་འགྲེལ་ཆེན་གྱི་མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་གསུངས་པ་ལྟར། རི་བོ་བཞིན་དུ་འདར་བ་མེད་པར་གྱུར་ཏེ། རྟ་མཆོག་བཞིན་དུ་མ་སྤྲོས་པའི་ཏིང་ངེ་འཛིན་ལ་བཞུགས་ཏེ། དམག་དཔུང་ཆེན་པོ་ཁ་དོག་སྣ་ཚོགས་པ་བྱེ་བ་དགུ། གླང་ཆེན་མྱོས་པ་གཡུལ་དུ་དཔའ་བ་འབུམ་ཕྲག་བཞི་དང༌། ཡང་ཉི་ཁྲི་ཆིག་སྟོང་བརྒྱད་བརྒྱ་བདུན་ཅུ་ལ་ཚོ་རེ་རེ་བྱས་པའི་ཚོ་དྲུག །གསེར་གྱི་ཤིང་རྟ་འབུམ་ཕྲག་མང་པོ། རྡོའི་རྟ་རླུང་གི་ཤུགས་ཅན་ཞེས་ད་ལྟ་འཕགས་ཡུལ་བ་རྣམས་ཀྱི་རྡོར་ཡལ་གྷོ་ར་ཟེར་བ་རྒྱ་མཚོ་ལས་བྱུང་བའི་རྟ་མཆོག་ཅང་ཤེས་ཀློག་ལྟར་འཁྱུག་པ་ལ་བཞོན་པ། རྐང་ཐང་མཐའ་ཡས་པ་དང་བཅས་པའི་དཔུང་ཆེན་པོ་ཆུ་བོ་སི་ཏའི་ལྷོ་ཕྱོགས་སུ་བྱོན་ནས་ཀླ་ཀློ་རྣམས་རུམ་པ་ཆ་རྒྱལ་པོའི་ཡུལ་དུ་གཡུལ་ཆེན་པོ་བཀྱེ་སྟེ་ཀླ་ཀློའི་དམག་དཔོན་ཆེན་པོ་ཧ་ནུས་བློན་པོ་ཟླ་བའི་བུ་དང་། མཆོག་ཏུ་འཕོངས་རྐྱེན་པའི་དཔའ་བོ་རྣམས་ཀྱིས་ཀླ་ཀློའི་དཔུང་སྤྱི་དང༌། ས་སྐྱོང་བ་རྣམས་ཀྱིས་ས་སྐྱོང་དང༌། གླང་པོ་ཆེས་གླང་ཆེན་དང༌། རྟས་རྟ་རྣམས་དང་ལྷ་ཆེན་བཅུ་གཉིས་ཀྱིས་ཀླ་ཀློའི་སྐྱབས་མགོན་ནག་ཕྱོགས་ཀྱི་ལྷ་རྣམས་བཏུལ་ནས་ཀླ་ཀློའི་རྒྱུན་བཅད། སངས་རྒྱས་ཀྱི་བསྟན་པ་རྫོགས་ལྡན་དུ་དར་ཞིང་རྒྱས་པར་མཛད་དེ། དེའི་དུས་སུ་མི་རྣམས་ཀྱི་ཚེ་ལོ་བརྒྱ་ངེས་པར་ཐུབ་པ་དང་། འབྲུ་རྣམས་ཀྱང་མ་རྨོས་པར་འབྲོག་དགོན་པར་སྐྱེ་བར་འགྱུར་ཏེ། རྫོགས་ལྡན་གྱི་དུས་ལོ་བརྒྱར་འབྱུང་བར་འགྱུར་ཞིང༌། དེར་རིགས་ལྡན་དྲག་པོར་ཆོས་ཉན་པ་རྣམས་ཚེ་དེ་ཉིད་ལ་ངེས་པར་དུས་ཀྱི་འཁོར་ལོ་འགྲུབ་པར་གསུངས། སངས་རྒྱས་ཀྱི་བསྟན་པ་ཤིན་ཏུ་གསལ་བ་དང་དེ་བཞིན་དུ་དུམ་བུ་བཅུ་གཉིས་སུ་ཀླ་ཀློའི་རྒྱུན་ཆད་པ་སོགས་ངོ་མཚར་བའི་ཆོས་མཐའ་ཡས་པ་འབྱུང་སྟེ། གྲུབ་པའི་སྐྱེས་བུའང་ས་ཆེན་པོའི་རྡུལ་སྙེད་འབྱུང་ངོ་། །
དེ་ནས་ཆུ་བོ་སི་ཏའི་ལྷོ་བྱང་དུ་ཚངས་པ་དང་ལྷ་དབང་ཁྲི་ལ་བཞག་ནས་ཟེར་བའི་ལྷོ་ནི་རྒྱ་གར་ཤར་ནུབ་བོད་རྒྱ་ཡུལ་སོགས་ལ་དབང་བསྒྱུར་བ་པོའི་རྒྱལ་བོ་ནི་དྲག་པོ་འཁོར་ལོ་ཅན་གྱི་སྲས་གཞོན་པ་ལྷ་དབང་ཡིན། བྱང་ཟེར་བ་ནི་བྱང་ཤམ་བྷ་ལའི་རྒྱལ་ས་འཛིན་པ་སྲས་རྒན་པ་ཚངས་དབང་ཟེར་རོ། །དྲག་པོ་སྟོན་པ་བྱིས་པའི་བློ་གྲོས་རིགས་ལྡན་རང་ཉིད་ཀྱིས་བཏུལ། འཁོར་ལོ་ཅན་རང་ཉིད་ལོངས་སྤྱོད་རྫོགས་པའི་གནས་སུ་གཤེགས་པ་སོགས་རྒྱས་པར་མཁས་གྲུབ་ཆོས་ཀྱི་རྒྱལ་པོའི་ཊིཀ་ཆེན་དུ་བལྟའོ། །
ཡུལ་འདི་ན་མདོ་རྒྱུད་དགོངས་འགྲེལ་དང་བཅས་པའི་བསྟན་བཅོས་དང་དེ་རྣམས་ཀྱི་འཆད་ཉན་དང་མི་རྣམས་རིག་པའི་གནས་བཅོ་བརྒྱད་བྱེ་བྲག་མང་པོ་དང་བཅས་པ་དང་། ཚན་པོ་ཆེའི་སྟོབས་དང་ལྡན་པས་ཉིན་རེ་དཔག་ཚད་བཅུར་དལ་བུས་ཕྱིན་པ་དང༌། རིགས་པ་དང་འཁྲུལ་འཁོར་གྱི་ཁྱད་པར་དག་ལ་ཤིན་ཏུ་མཁས་པ་ཡིན་ནོ། །ད་ནི་མཐའ་དཔྱད་པ་འདི་བརྗོད་དེ། བུ་སྟོན་ཐམས་ཅད་མཁྱེན་པ་དང་། མཁས་གྲུབ་ཆོས་རྗེ་དང་། པཎ་ཆེན་བློ་བཟང་ཆོས་ཀྱི་རྒྱལ་མཚན་སོགས་ཀྱིས་དྲག་པོ་འཁོར་ལོ་ཅན་དགུང་ལོ་ལྔ་བཅུར་སླེབས་དུས་རྒྱ་གར་མ་ཁའི་ཀླ་ཀློ་འཇོམས་པའི་དམག་གི་དཔུང་ཚོགས་ཡོང་གསུངས་ཤིང་། ཕུག་ལུགས་རྗེས་འབྲང་དང་བཅས་པས་དྲག་པོ་འཁོར་ལོ་ཅན་དགུང་ལོ་དགུ་བཅུ་གོ་བདུན་སླེབས་དུས་དམག་གི་དཔུང་ཚོགས་ཡོང་ཟེར། དེ་མི་མཐུན་པ་ནི་དུས་འཁོར་རྩ་རྒྱུད་གསུངས་པའི་ལོ་ཚིགས་འཇོག་ཚུལ་མི་འདྲ་བས་ཀླ་ཀློའི་བསྟན་པ་ལོ་སྟོང་དང་བརྒྱད་བརྒྱ་མ་རྫོགས་པས་དྲག་པོ་འཁོར་ལོ་ཅན་ཡོང་བའི་དུས་ཚོད་འབྱོར་མ་འབྱོར་ལས་བྱུང་བའོ། །
བུ་སྟོན་ལྟར་ན་རབ་བྱུང་བཅུ་གསུམ་པའི་ཤིང་བྱ་ལོ་འདི་ནས་བརྩིས་པའི་ལོ་དྲུག་བརྒྱ་དང་བཅུ་གཅིག་མ་སོང་བར་མ་ཁའི་ཀླ་ཀློ་འཇོམས་པའི་དུས་ལ་མ་བབས་པས། བྱང་ཤམ་བྷ་ལ་ནས་དྲག་པོ་འཁོར་ལོ་ཅན་ལྷ་ཆེན་བཅུ་གཉིས་སོགས་ཀྱི་ཡན་ལག་བཞི་པའི་དམག་དཔུང་རྒྱ་གར་འཕགས་ཡུལ་ཕྱོགས་སུ་མི་འདེག་ཅིང་ལོ་དྲུག་བརྒྱ་སོང་ཞིང་ཆོས་རྒྱལ་དགུང་ལོ་ལྔ་བཅུ་ལོན་པའི་ལོ་དེར་དྲག་པོ་འཁོར་ལོ་ཅན་རིམ་བཞིན་འཛམ་བུའི་གླིང་ཆུང་ངུ་གཡས་སྐོར་དུ་རྒྱུ་ཟེར།
ཡང་འགའ་ཞིག་གིས་དྲག་པོ་འཁོར་ལོ་ཅན་ཉི་མ་གཅིག་ལ་གླིང་བཞི་ག་བསྐོར་བ་ཡིན་ཞེས་པཎ་ཆེན་གྱིས་གསུངས་ཟེར། ཡང་འགའ་ཞིག་གིས་རང་འདྲ་བཅུ་གཉིས་ཀྱི་སྐུ་དངོས་སུ་བསྟན་ཅིང། འཛམ་གླིང་ཆེན་པོ་ས་དུམ་བུ་བཅུ་གཉིས་ཀྱི་དུམ་བུ་རེ་ལ་སྐུའི་བཀོད་པ་ཡན་ལག་བཞིའི་དམག་ཚོགས་དང་བཅས་པས་དབང་བསྒྱུར་ཟེར་ཞིང་ཀླ་ཀློའི་རྒྱལ་པོ་བྱིས་པའི་བློ་གྲོས། དེ་དྲག་པོ་འཁོར་ལོ་ཅན་གྱིས་བསྒྲལ། དེའི་བློན་པོ་རྟ་གནས་ཟླ་བ་ཆེན་པོའི་བུ་དྲག་པོ་འཁོར་ལོ་ཅན་གྱི་བློན་པོ་ཧ་ལུ་མན་ཐས་བསད་དེ། ཀླ་ཀློ་ཕྱི་རོལ་པ་ཐམས་ཅད་བཅོམས། རྒྱལ་པོ་འཁོར་བཅས་ཀྱིས་དགེ་འདུན་གྱི་སྡེ་མང་པོའི་བཀོད་པ་བསྟན་ནས་སངས་རྒྱས་ཀྱི་བསྟན་པ་ཉིན་མོ་ལྟར་གསལ་བར་མཛད། དེའི་ཚེ་མགོན་པོ་ཀླུ་སྒྲུབ་ཀྱང་རང་གི་སྐུ་ལུས་རྡོ་ལ་བསྒྱུར་བ་དེ་ལ་བཞུགས་ནས་རྒྱ་གང་དུ་བསྟན་འགྲོའི་དོན་བྱེད། རྒྱལ་བ་ཙོང་ཁ་པ་བློ་བཟང་གྲགས་པའི་དཔལ་ཡང་། རང་གི་སྔར་གྱི་ལུས་ད་ལྟ་དགའ་ལྡན་གསེར་གདུང་ནང་དུ་བཞུགས་པ། ཨ་ཙརྱ་རིན་ཆེན་ཆོས་རྒྱལ་ཟེར་བ་ཞིག་གིས་གདན་དྲངས་ནས་དེ་ལ་བཞུགས་ཏེ། གྲུབ་ཐོབ་ཚུལ་འཛིན་པ་ཞིག་གིས་བོད་དུ་བསྟན་པ་དང་འགྲོ་བའི་དོན་མཛད། མི་ལོ་སྟོང་བརྒྱད་བརྒྱ་བར་དུ་ས་ཆེན་པོ་དུམ་བུ་རེ་རེ་ལའང་། འགྲེལ་ཆེན་ལས། ཆོས། ནོར། འདོད་པ། ཐར་པ་བཞིའི་འབྱོར་པ་རྒྱས་པར་གསུངས་པ་ལྟར། ཆོས་ནི་གང་ཟག་རབ་ཚེ་གཅིག་ལ་མཆོག་འགྲུབ་པ་དང་། ནོར་ཕྱུག་པས་དབུལ་ཕོངས་མེད་པ་དང་། འདོད་ཡོན་སུམ་ཅུ་རྩ་གསུམ་པའི་ལྷ་བཞིན་དུ་ལོངས་སྤྱོད་པ་དང་། དེ་ཙམ་དུ་མ་ཟད་དེར་སྐྱེས་ཚད་ཐམས་ཅད་ཐར་པའི་ལམ་སྣ་ཟིན་པ་དང༌། ལམ་ཐུན་མོང་བ་བྱང་ཆུབ་ཀྱི་སེམས་ཀྱིས་རྒྱུད་སྦྱངས། དཔལ་དུས་ཀྱི་འཁོར་ལོ་དང་ཀྱཻ་རྡོར་གྱིས་གཙོ་བྱས་བདེ་གསང་འཇིགས་གསུམ་གྱི་རིམ་གཉིས་རྣལ་འབྱོར་ཉམས་སུ་བླངས་ཏེ་ཚེ་གཅིག་ལུས་གཅིག་ལ་སངས་རྒྱས་མཁན་མང་དུ་འབྱུང་བས། བདེ་བ་ཅན་གྱིས་བྱང་སེམས་རྣམས་ཀྱིས་འཛམ་བུ་གླིང་འདིར་སྐྱེ་བར་ཤོག་ཅིག །ཅེས་སྨོན་ལམ་འདེབས་པ་ཟེར་བ་ཡང་དེ་ལ་དགོངས་པའོ། །ཞེས་གསུངས་པས། བདག་ཅག་རྣམས་ཀྱང་དུས་དེར་དྲག་པོ་འཁོར་ལོ་ཅན་གྱི་འཁོར་དུ་གྱུར་ཏེ། ལམ་ཐུན་མོང་བས་རྒྱུད་སྦྱངས། ཆོས་རྒྱལ་དེ་ལས་དཔལ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་རྫོགས་ཀྱི་དབང་ཐོབ། དམ་ཚིག་དང་སྡོམ་པ་ཚུལ་བཞིན་དུ་བསྲུང་བ་དང་། དཔལ་དུས་ཀྱི་འཁོར་ལོའི་སྨིན་བྱེད་བསྐྱེད་རིམ། གྲོལ་བྱེད་རྫོགས་རིམ་ཡན་ལག་དྲུག་གི་ཐ་ན་ཡང་རྗེས་དྲན་གྱི་ཡན་ལག་ཐོབ་ཕྱིར་ད་ལྟ་ནས་ཡིད་ལ་ཡང་ཡང་བག་ཆགས་འཇོག་པ་ནི་དགོས་པའོ།། །།
