༄༅། །ཀ་སོགས་སུམ་ཅུ་ལ་སྤེལ་བ་བཞུགས།།
༄༅། །ཨོཾ་སྭ་སྟི་སིདྡྷཾ། ན་མོ་མཉྫུ་གྷོ་ཥཱ་ཡ།
ཀ་ལ་པིངྐའི་དབྱངས་ལྟར་སྙན་གསུང་གིས། །
ཁ་ན་མ་ཐོའི་ཚོགས་འཇོམས་ཐར་པའི་གླིང༌། །
ག་ལ་བ་དེར་གདུལ་བྱ་འདྲེན་མཛད་ཅིང༌། །
ང་དང་ང་ཡིར་འཛིན་སྤངས་དེ་ལ་འདུད། །
ཅ་ཅོ་རྩོད་དང་རྣམ་པར་གཡེང་བ་ཀུན། །
ཆ་ཤས་ཀྱིས་ནི་རྣམ་པར་སྤང་བྱ་ཞིང༌། །
ཇ་སོགས་ཀུན་ལའང་མ་ཆགས་ཟླ་བ་ནི། །
ཉ་བ་ལྟ་བུར་ཞི་ཞིང་དེས་པ་བྱ། །
ཏ་ལའི་སྡོང་པོ་ཀུན་ནས་རྒྱས་པ་ལྟར། །
ཐ་དད་ཡོན་ཏན་ལོ་འདབ་དུ་མས་ཕྱུག །
ད་ལྟར་གནས་དང་མ་འོངས་འགྲོ་བ་ཀུན། །
ན་སོགས་གདུང་སྐྱོབ་བསིལ་གྲིབ་ལྡན་པར་བྱ། །
པ་ལ་ཤ་ཡི་མེ་ཏོག་རྒྱས་པ་ལྟར། །
ཕ་རོལ་ཕྱིན་དྲུག་ཡོངས་སུ་རྫོགས་བྱས་ཏེ། །
བ་མཆོག་དཔག་བསམ་ཤིང་དང་བུམ་བཟང་བཞིན། །
མ་ལུས་འགྲོ་བའི་རེ་བ་བསྐང་བར་བྱ། །
ཙ་ཀོར་ཀུ་མུད་ཀྱིས་ཚིམ་པད་མོའི་ཚལ། །
ཚ་ཟེར་གྱིས་རྒྱས་བྱེད་ལྟར་བློ་གསལ་སྐྱོངས། །
ཛ་མན་ཨ་ནེའི་བུ་ཡིས་རྒྱལ་ངན་ལྟར། །
ཝ་སྐྱེས་ལྟ་བུའི་ཕས་རྒོལ་གཞོམ་པར་བྱ། །
ཞ་ལོང་ལ་སོགས་འགྲོ་བ་དམན་པ་ལའང༌། །
ཟ་མ་ལོངས་སྤྱོད་དང་བཅས་ཅི་འབྱོར་སྦྱིན། །
འ་ཡིག་ལྟ་བུར་ཉི་འོག་མ་གྲགས་ཀྱང༌། །
ཡ་མཚན་ཆེ་བ་ལྟར་སྒྲོགས་གངས་རི་ཡི། །
ར་བས་བསྐོར་བའི་གནས་འདི་མི་དགེའི་བཤེས། །
ལ་ལས་སྦྱར་བའི་ལུགས་ངན་སྤང་བར་བྱ། །
ཤ་ཁྲག་མི་གཙང་རང་ལུས་མ་ཆགས་ཤིང༌། །
ས་ཆེན་ལྟ་བུར་གཞན་གྱི་རྟེན་བྱས་པས། །
ཧ་ཅང་ཕོངས་པའི་སྐྱེ་དགུ་བདེ་ཐོབ་ནས། །
ཨ་ལ་ལ་ཞེས་གད་མོའི་སྒྲ་སྒྲོགས་ཤོག །
དེ་ལྟར་ཡི་གེའི་མ་མོ་ལ་སྤེལ་ནས། །
ཚིགས་སུ་བཅད་པར་སྦྱར་འདི་འགྲོ་བ་ཡི། །
སྒྲོན་མའི་གསུང་གི་ཟེར་གྱིས་བློ་གསལ་བ། །
བློ་གྲོས་རྒྱལ་མཚན་དཔལ་གྱིས་སྦྱར་བ་ཡིན།། །།
བོད་ཀྱི་རྩོམ་རིག་ལོ་རྒྱུས་ཐོག་གི་ཀ་རྩོམ་ཐེངས་དང་པོ་མཛད་པ་པོ་ནི། འགྲོ་མགོན་ཆོས་རྒྱལ་འཕགས་པ་ (1235-1280) ཡིན། ཁོང་གིས་མཛད་པའི་ཀ་རྩོམ་འདི་ཉིད། ཁོང་གི་དཀའ་འབུམ་པོད་གསུམ་པའི་ནང་དུ་འཁོད་ཡོད། ས་སྐྱའི་བཀའ་འབུམ་པོད་བཅོ་ལྔ་ཡོད་པའི་ནང་གི་མཐའ་མ་བཅོ་ལྔ་པ་༼བ༽རྟགས་ཅན་དེ་ཡིན་ལ། པོད་བཅོ་ལྔ་ཆ་ཚང་ལ་ཆོས་ཚན་བསྡོམས་པས་ ༣༦༠ ཡོད་པ་ལས།་འདི་ཉིད་ཆོས་ཚན་༢༨༦ པ་དེ་ཡིན་ཞིང་། འདི་ནི་བོད་ཀྱི་རྩོམ་རིག་ལོ་རྒྱུས་ཐོག་གི་ཀ་རྩོམ་ཐེངས་དང་པོ་དེ་ཡིན་པར་གྲགས།
