ལོ་ན་ཆུང་ཤོས་ཀྱི་གླིང་སྒྲུང་ཤོད་མཁན་ཞིག
ཉིན་ཤས་གོང་རྣམ་གླིང་རྫོང་སློབ་འབྲིང་གཉིས་པའི་སློབ་མ་ཞིག་གིས་གླིང་སྒྲུང་གི་ལོ་རྒྱུས་སྙན་ངག་ཤོད་པའི་བརྙན་ལམ་ཞིག་དྲ་བ་ཡོངས་སུ་སྐད་གྲགས་ཆོད་པ་དང་། བརྙན་ལམ་དེ་སྤེལ་མཁན་གྱིས་མཁོ་འདོན་བྱས་པའི་ཁུངས་སྣེ་གཞིར་བཟུང་།
གསར་འགོད་པས་འཕྲལ་དུ་གཞིས་རྩེ་གྲོང་ཁྱེར་རིག་གནས་ཅུས་མངོན་མིན་རིག་གནས་ཤུལ་བཞག་ལྟེ་གནས་དང་འབྲེལ་བ་བྱས་ཏེ་ཤེས་རྟོགས་བྱུང་བར་གཞིགས་ན། དྲ་ཐོག་ཏུ་སྤེལ་བའི་བརྙན་ལམ་དེ་གཞིས་རྩེ་གྲོང་ཁྱེར་མངོན་མིན་རིག་གནས་ཤུལ་བཞག་སྲུང་སྐྱོང་ལྟེ་གནས་ཀྱིས་རང་སྐྱོང་ལྗོངས་མངོན་མིན་རིག་གནས་ཤུལ་བཞག་སྲུང་སྐྱོང་ལྟེ་གནས་དང་མཉམ་དུ་ཟླ་ ༩ ཚེས་ ༢༠ ཉིན་རྣམ་གླིང་རྫོང་དང་། བསམ་གྲུབ་རྩེ་ཆུས་སུ་བསྐྱོད་ནས་མངོན་མིན་རིག་གནས་ཤུལ་བཞག་གི་ཡོངས་བཤེར་ལས་དོན་སྤེལ་སྐབས་བླངས་པའི་བརྙན་ལམ་ཞིག་ཡིན་པ་རེད།
གསར་འགོད་པས་བཅར་འདྲི་བྱེད་རིང་ཤེས་རྟོགས་བྱུང་བར། བརྙན་ལམ་ནང་གི་སློབ་མ་འཇིགས་མེད་རྡོ་རྗེ་ནི། གཞིས་རྩེ་གྲོང་ཁྱེར་རྣམ་གླིང་རྫོང་ལྷ་བུ་ཕུ་ཤང་གདོང་ཉ་གྲོང་ཚོ་ནས་ཡིན་པ་དང་། འདི་ལོ་ལོ་ན་ ༡༦ ལ་སླེབས་ཡོད། མིག་སྔར་དམའ་འབྲིང་གི་ལོ་རིམ་གསུམ་པ་འགྲིམ་བཞིན་ཡོད་པ་རེད། འཇིགས་མེད་རྡོ་རྗེ་ལོ་ན་ ༧ ལ་སོན་སྐབས་ནག་ཆུའི་སྒྲུང་པ་ཞིག་གིས་ཤང་དུ་གླིང་སྒྲུང་ཤོད་པ་མཐོང་འཕྲལ། ཁོང་གི་ཡིད་དབང་ཅིག་བཅར་དུ་འཕྲོག །དུས་དེ་ནས་བཟུང་གླིང་སྒྲུང་ཤོད་མཁན་གྱི་སྒྲུང་པ་ཞིག་བྱེད་པའི་འདུན་པ་དྲག་པོ་སྐྱེས། གཞན་ཡང་། འཇིགས་མེད་རྡོ་རྗེས་ཆུང་དུས་ནས་རླུང་འཕྲིན་དང་། བརྙན་འཕྲིན་ནས་གླིང་སྒྲུང་ཤོད་སྟངས་ལ་ལྟ་ཉན་བྱས་ཏེ་སློབ་སྦྱོང་བྱེད་ཀྱི་ཡོད། ལོ་ན་ ༡༣ ལ་སླེབས་པ་ནས་བཟུང་། འཇིགས་མེད་རྡོ་རྗེས་གླིང་སྒྲུང་ཤོད་འགོ་ཚུགས་པ་དང་། དགུང་གསེང་ཤར་རིམ་བཞིན་ཤང་ནང་གི་བྱེད་སྒོ་སྣ་ཚོགས་ལ་ཞུགས་ཏེ་གླིང་སྒྲུང་ཤོད་ཀྱི་ཡོད།
གཞིས་རྩེ་གྲོང་ཁྱེར་རིག་གནས་ཅུས་མངོན་མིན་རིག་གནས་ཤུལ་བཞག་ལྟེ་གནས་ཀྱིས་ངོ་སྤྲོད་བྱས་པར་གཞིགས་ན། མིག་སྔར་འཇིགས་མེད་རྡོ་རྗེས། ༡ འཇང་གླིང་གཡུལ་འགྱེད་དང་། ༢ སྟག་གཟིག་ནོར་རྫོང་། ༣ ཧོར་གླིང་གཡུལ་འགྱེད། ༤ སོག་སྟོད་ཅང་ཤེས་རྟ་རྫོང་། ༥ གྲུ་གུ་གོ་རྫོང་། ༦ མོན་གླིང་གཡུལ་འགྱེད་སོགས་ཤོད་ཐུབ་ཀྱི་ཡོད་པ་རེད། དབྱེ་ཞིབ་རགས་ཙམ་བྱས་པ་བརྒྱུད། འཇིགས་མེད་རྡོ་རྗེ་ནི་མིག་སྔར་རེ་བ་ཆེན་པོ་ལྡན་པའི་གླིང་སྒྲུངཤོད་མཁན་སྒྲུང་པ་ཞིག་ཡིན་པར་མ་ཟད། ལྗོངས་ཡོངས་ཀྱི་ལོ་ན་ཆུང་ཤོས་ཀྱི་གླིང་སྒྲུང་ཤོད་མཁན་སྒྲུང་པ་ཞིག་ཀྱང་ཡིན་པ་རེད།
གཞན་ནས་དྲངས།
