༄༅། །བོད་ཀྱི་སྐད་ལས་གསར་རྙིང་བརྡའི་ཁྱད་པར་སྟོན་པ་ལེགས་པར་བཤད་པ་ལི་ཤིའི་གུར་ཁང༌། སྐྱོགས་སྟོན་ལོ་ཙཱ་བ་ངག་དབང་རིན་ཆེན་བཀྲ་ཤིས།(?) ན་མོ་མ་མཉྫུ་ཤྲཱི་ཡེ། དེ་ཡང་འདིར་བརྡ་གསར་རྙིང་གི་ཐ་སྙད་བཤད་པ་ལ། ཐུ་མི་ས་འབོ་(ལྷོ་གཉལ་གྱི་ཐུ་མི་སྣང་གྲགས་ཀྱི་བུ་ཨ་ནུ་སྟེ། སམྦྷོཊ་དང༌། སམྦྷ་དྲ་སོགས་རྒྱ་སྐད་དུ་བཞེད་པ་བྱུང་ཡང༌། འདི་གཉལ་ན་ཡོད་པ་ས་འབུར་པོ་ཞིག་འདུག་པས། ས་འབོ་ར་ཡིན་པ་འདྲ། གང་ནའང་བོད་སྐད་དུ་སྣང་)ར་དང༌། བཙད་པོ་ཁྲི་སྲོང་ལྡེ་བཙན་གྱི་དུས་དང་པོར་བྱས་པའི་འགྱུར་རྣམས་ནི། དང་པོའི་བཀས་བཅད་ཀྱིས་བསྒྱུར་བ་སྟེ། སངས་རྒྱས་ཕལ་པོ་ཆེ་དང༌། ལུང་སྡེ་བཞི་དང༌། མདོ་སྡེ་ཁ་ཅིག་དང་ཤེར་ཕྱིན་གྱི་མདོ་ཁ་ཅིག་སྟེ། སྐད་གསར་བཅད་ཀྱིས་གཏན་ལ་མ་ཕབ་པ་རྣམས་སོ། ། དེ་ལ་ནི། གང་ལ་གག་དང༌། ཅི་ཕྱིར་ལ་ཇི་རོབ་དང༌། ཇི་སྙམ་ལ་ཇི་ལྟར་དང༌། རྩེ་མོ་ལ་སྤྱི་བོ་དང༌། ཤིན་ཏུའམ་རབ་ཏུ་ལ་ཏེ་པོར་དང༌། ཡང༌། ཝཱ་ཌྷཾ་ཞེས་པ་བསྒྱུར་བའི་ཏེ་པོར་ནི། དམ་པ་དང༌། སྲ་བ་དང༌། དྲག་པ་དང༌། ཚབས་ཆེ་བ་རྣམས་ལ་འཇུག་པ་དང༌། རྐྱེན་སྨན་ལ་རྐྱེན་རྩི་དང༌། ལྟག་པ་ལ་གླག་པ་དང༌། སྤོས་དང་སྤོས་ཕོར་ལ་པོག་དང་པོག་ཕོར་དང༌། བསལ་བ་ལ་བསྩལ་བ་དང༌། སོགས་པ་ལ་སྩོགས་པ་དང༌། བསུ་བ་ལ་བསྩུ་བ་དང༌། དྲི་བསུང་ལ་དྲི་བསྩུང་དང༌། བསངས་པ་ལ་བསྩངས་པ་དང༌། རྫོགས་སོ་ལ་རྫོགས་སྷོ། གཡོགས་པ་ལ་ཡོགས་པ་དང༌།…

༄༅། །བོད་ཀྱི་བརྡའི་རྣམ་གཞག་ཉུང་ངུར་བསྡུས་པ་སྨྲ་བའི་སྒྲོན་མེ་ཞེས་བྱ་བ་བཞུགས་སོ།། བྲ་ཏི་རིན་ཆེན་དོན་གྲུབ།(?) ཐོག་མར་དགེ་བ་ཀླད་ཀྱི་དོན། ༄༅། །ཨོཾ་སྭསྟི་སིདྡྷཾ། བླ་མ་རྗེ་བཙུན་མཁྱེན་པའི་གཏེར་ལ་ཕྱག་འཚལ་ལོ། །སྨྲ་བ་ཀུན་ལས་རྣམ་རྒྱལ་བའི། །སྨྲ་མཆོག་གཙོ་ལ་ཕྱག་འཚལ་ཏེ། །སྨྲ་བའི་ལམ་ནི་གསལ་བྱེད་པའི། །སྨྲ་བའི་སྦྱོར་བ་འདིར་བཤད་བྱ། །རབ་འབྱམས་གཞུང་དོན་རྣམ་བཀྲའི་གཟུགས། །རབ་ཡངས་བློ་གྲོས་མིག་ཕྱེ་ནས། །རབ་ཏུ་གསལ་བར་བལྟ་འདོད་ན། །རབ་མཆོག་སྨྲ་བའི་ཐབས་འདི་ཉོན། །དམ་པ་རྣམས་ལ་ཉེར་བསྟེན་ནས། ། དམ་པའི་ཡོན་ཏན་ཐོབ་འདོད་ན། །དམ་པའི་ལུགས་བཟང་འཚོལ་བའི་སྒོ། །དམ་པ་འདི་ལས་གཞན་ཡོད་མིན། ། བར་དུ་དགེ་བ་གཞུང་གི་དོན། ངག་གི་རྩ་བ་ཡི་གེ་སྟེ། །དེ་ལ་དབྱངས་དང་གསལ་བྱེད་གཉིས། །དབྱངས་ཡིག་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ག་ད་བ་མ་འ་སྔོན་འཇུག །ད་ས་གཉིས་ནི་ཡང་འཇུག་གོ །ར་ལ་ས་ནི་མགོ་གསུམ་སྟེ། །འདོགས་ནི་ཡ་ར་ལ་ཝ་བཞི། །དེ་རྣམས་སྦྱར་བའི་རྣམ་འགྱུར་ལས། །མིང་དང་ཚིག་གི་ཚོགས་རྣམས་འབྱུང༌། །དོན་གྱི་ངོ་བོ་བརྗོད་པ་མིང༌། །ཁྱད་པར་བརྗོད་པ་ཚིག་ཡིན་ནོ། །དེ་ཡང་རྣམ་དབྱེ་ཚིག་འཕྲད་སོགས། །གཞན་སྦྱར་བ་ཡི་རྣམ་འགྱུར་གྱིས། །དོན་ཀུན་རབ་ཏུ་གསལ་བར་བྱེད། །དེ་ལ་མིང་གི་སྦྱོར་བ་ནི།…

༄༅། །བོད་ཀྱི་བརྡའི་བྱེ་བྲག་སོ་སོར་ཕྱེ་བ་དག་བྱེད་གསལ་བའི་མེ་ལོང༌། དངུལ་ཆུ་ངག་དབང་རྡོ་རྗེ།(༡༧༢༠-༡༨༠༣) ༄༅། །ན་མོ་གུ་རུ་མུ་ནི་ཨིན་དྲ་ཡ། ངག་གི་དབང་ཕྱུག་རྗེ་བཙུན་འཇམ་དཔལ་དབྱངས། །སྒྲ་དབྱངས་ལྷ་མོ་དབྱངས་ཅན་མ་ལ་འདུད། །བསྟན་པའི་ཆ་རྐྱེན་ཡི་གེའི་དག་བྱེད་གཞུང༌། །བློ་ལྡན་གཞོན་ནུ་དོན་གཉེར་ཅན་རྣམས་ལ། །ཕན་ཕྱིར་མཁས་པའི་ལེགས་བཤད་ལས་བཏུས་ནས། །མདོ་ཙམ་བཀོད་ལ་བདག་བློ་རྒྱས་པར་མཛོད། །གསུང་རབ་བརྡ་ལ་མ་སྦྱངས་ན། །རྗོད་བྱེད་ཚིག་གི་སྒྲ་འདྲ་ཡང༌། །བརྗོད་བྱ་དོན་ལ་ཁྱད་པར་ཡོད། །དེ་ཕྱིར་ཡི་གེའི་དག་བྱེད་དགོས། །དེ་ཡང་ཀ་སོགས་གསལ་བྱེད་ལ། །དབྱངས་ཨ་ཨི་ཨུ་ཨེ་ཨོ་དང༌། །ཡ་ར་ལ་ཝའི་སྨད་འདོགས་རྣམས། །གང་རུང་ཡོད་ཀྱང་འཕུལ་དང་མགོ ། མེད་ན་ཐམས་ཅད་རྐྱང་པ་ཡིན། །སྔོན་འཇུག་ག་ད་བ་མ་འ། །ཡོད་པ་ཐམས་ཅད་འཕུལ་ཅན་ཡིན། །ཐོད་དུ་ར་ལ་ས་གསུམ་པོ། །ཡོད་པ་ཐམས་ཅད་མགོ་ཅན་ཡིན། །དེ་དག་ངེས་པར་བྱས་པ་ལ། །རྐྱང་པ་འཕུལ་ཅན་མགོ་ཅན་གསུམ། །ཀ་ནས་རིམ་བཞིན་སྤྲོ་བར་བྱ། ། ཐོག་མར་ཀའི་བརྡ་བཤད་པ་ལ། དང་པོ་རྐྱང་པ་འདི་ལྟ་སྟེ། །ཀ་བ་ཀ་ཙ་ཀ་ར་དང༌། །ཀ་མ་ལ་དང་ཀ་པཱ་ལ། །ཀ་ཅ་ཀ་ཏན་ཀ་ཤི་ཀ།༑ཀོ་འུ་ཤི་ཀ་ཀེ་ལ་ཤ །རྩི་ཤིང་ཀ་ཤ་ཀུ་ཤ་དང༌། །ཀ་འུ་ཀུན་དོང་མང་ཚིག་ཀུན། །ཀ་ལ་པིངྐ་ཀྲོང་ཀྲོང་ལྟ༑ ༑བྱེ་འུ་ཅོག་ཀ་ཀྱུར་ཀྱུར་སྒྲོག །ཀེ་རེ་ལངས་དང་ཀུ་ཅོ་འདོན། །ཀྱལ་ཀ་ཀླན་ཀ་ཀུ་རེ་བྱེད།…

༄༅། །བོད་ཀྱི་བརྡ་སྤྲོད་པའི་སྔོན་འགྲོའི་ཡི་གེ་ཀློག་ཚུལ་གྱི་རྣམ་གཞག་ཤེས་བྱའི་སྒོ་འབྱེད་ཅེས་བྱ་བ་བཞུགས་སོ།། བདུད་འཇོམས་སྤྲུལ་སྐུ་འཇིགས་བྲལ་ཡེ་ཤེས་རྡོ་རྗེ།(༡༩༠༤-༡༩༨༥) ༄༅། །ཨོཾ་སྭསྟི། །ཀུན་མཁྱེན་ཡེ་ཤེས་རྒྱ་མཚོའི་མཛོད། །བླ་མ་འཇམ་དཔལ་དཔའ་བོ་ལ། །གུས་པས་བཏུད་ནས་གངས་ཅན་པའི། །ཡི་གེའི་ཀློག་ཚུལ་མདོ་ཙམ་དབྱེ། །གང་འདིར་སློབ་དཔོན་སོ་སོ་ཡི༑ ༑བཞེད་ཚུལ་དབྱེ་བ་མང་མཆིས་ཀྱང༌། །དངོས་དོན་གོ་སླ་འཛིན་བདེའི་ཕྱིར། །རྣམ་གྲངས་གསུམ་དུ་དྲིལ་ཏེ་འཆད། །དང་པོ་ཡི་གེའི་སྐྱེ་གནས་ལ། །མགྲིན་པའི་གནས་ལས་སྐྱེས་པ་ཡི། །གསལ་བྱེད་ཡི་གེ་འབྲུ་བདུན་ཏེ། །ཀ་ཁ་ག་ང་འ་ཧ་ཨ། །རྐན་ལས་སྐྱེས་པའི་ཡི་གེ་ནི། །གསལ་བྱེད་འབྲུ་བཅུ་དབྱངས་ཡིག་གཉིས། །ཅ་ཆ་ཇ་ཉ་ཙ་ཚ་ཛ། །ཞ་ཡ་ཤ་དང་ཨི་ཨེའོ། །སོ་ལས་སྐྱེས་པའི་ཡིག་འབྲུ་བདུན། །ཏ་ཐ་ད་ན་ཟ་ལ་ས། །མཆུ་ལས་སྐྱེས་པའི་ཡི་གེ་ལ། །གསལ་བྱེད་འབྲུ་ལྔ་དབྱངས་ཡིག་གཉིས། །པ་ཕ་བ་མ་ཝ་ཨུ་ཨོ། །སྤྱི་བོའམ་ལྕེ་རྩེའི་སྟེང་ཕྱོགས་ནས། །སྐྱེས་པའི་ཡིག་འབྲུ་གཅིག་སྟེ་རའོ། །དེ་ལས་ང་ཉ་བ་མ་བཞི། །རང་རང་སྐྱེ་གནས་ཙམ་མ་ཟད། །སྣ་སྒྲའང་ཅུང་ཟད་ལྡན་པ་ཡིན། །གཉིས་པ་ཡི་གེའི་བྱེད་པ་ནི།། མགྲིན་དང་མཆུ་ལས་སྐྱེས་པ་རྣམས། །རང་རང་གནས་ཀྱི་བྱེད་པ་ཅན། །རྐན་བྱུང་རྣམས་ནི་ལྕེ་དབུས་དང༌། །སོ་ལས་བྱུང་རྣམས་ལྕེ་ཡི་རྩེ། །ར་ནི་ལྕེ་རྩེར་ཉེ་བའོ། །གསུམ་པ་རྩོལ་བའམ་བརྗོད་ཚུལ་ལ། །ཕྱི་ཡི་རྩོལ་བ་ཅན་ཞེས་པ། །ཕྱི་རུ་སྒྲ་འབྱིན་བྱེད་རྩོལ་ཏེ།…

༄༅། །བོད་ཀྱི་བརྡ་ལ་བརྟེན་ནས་གསུང་རབ་ལ་འཇུག་པའི་སྒོ་ཤེས་བྱ་རབ་གསལ་ཞེས་བྱ་བ་བཞུགས་སོ།། དཔའ་རིས་འཇིགས་མེད་དམ་ཆོས། (དུས་རབས་༡༨) ༄༅། །ན་མོ་གུ་རུ། ཀུན་གཟིགས་བརྩེ་ཆེན་ཐབས་མཁས་པས། །མིང་བརྡ་ཐ་སྙད་སྣ་ཚོགས་ཀྱིས། །ཆོས་དང་ཆོས་མིན་རྣམ་ཕྱེ་སྟེ། །འདོམས་མཛད་འགྲོ་བའི་བླ་མར་འདུད། །བོད་ཀྱི་བརྡ་ལ་བརྟེན་ནས་ནི། །ཤེས་བྱའི་རྣམ་དབྱེ་རྟོགས་པའི་ཐབས། །ཀཱ་ལི་སུམ་ཅུ་རྐྱང་པ་དང༌། །ག་ང་ད་ན་བ་མ་འ། །ར་ལ་ས་ཡི་རྗེས་འཇུག་ཅན། །ག་ད་བ་མ་འ་ཡི་ནི། །སྔོན་འཇུག་ཅན་དང་ར་ལ་སའི། །མགོ་ཅན་ཡ་ར་ལ་ཝ་ཡི། །འདོགས་ཅན་རྣམས་ལ་ཨི་ཨུ་ཨེ། །ཨོ་བཅས་དབྱངས་ཡིག་བཞི་པོ་རྣམས། །ཇི་ལྟར་ཐོབ་པའི་གོ་རིམ་བཞིན། །མ་འཁྲུགས་གསལ་བར་འདིར་བཤད་བྱ། ། ༼ཀ༽ ཀ་བ་ཀ་ར་ཀ་ལིང་དང༌། །ཀ་ཅ་ཞེས་པ་དངོས་སྤྱད་དང༌། །ནོར་སྤྱིའི་མིང་ངོ་ཀུ་རེ་ནི། །ཀྱལ་ཀའོ་ཀུ་ཡ་ཀུ་ཅོ་དང༌། །ཀུ་བ་དང་ནི་མདོག་ཀ་རུ། །ད་ཀོ་ད་ནིའོ་ཀོ་ཅི་སྟེ། །འདི་ཀོ་འདི་ནིའོ་ཀོ་ལོང་དང༌། །ཀོ་ལྤགས་ཀོ་ཀྲད་དར་ཡ་ཀན། །བད་ཀན་ཁང་པའི་ལན་ཀན་དང༌། །གླང་ཆེན་ཐལ་ཀར་ཡུངས་ཀར་ཟ། །ཀེག་གིས་ལངས་དང་ཀོག་ནས་འགྲོ། །ཀོག་ཙེ་རྒྱའམ་རྙི་དང་རྙོང༌། །ཀེང་རུས་དང་ནི་མིག་ཀོང་མོ། །མར་མེ་འབུལ་བའི་ཀོང་བུ་དང༌། །ཀུན་ཏུ་བཟང་པོ་སྨན་ཤིང་ཀུན། །ཀུན་རྫོབ་ཀུན་སློང་མང་ཚིག་ཀུན།…

༄༅། །བོད་ཀྱི་བརྡ་དག་རིག་པའི་གནས་ལ་འཇུག་པའི་སྒོ་ཞེས་བྱ་བ་བཞུགས་སོ།། ཚེ་ཏན་ཞབས་དྲུང་དབྱངས་ལྡན་རིག་པའི་འདོད་འཇོ།(༡༩༡༠-༡༩༨༥) ༄༅། །བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཀ་ཁ་སུམ་ཅུ་ཚང་བའི་ཚིགས་བཅད། འཇི༷གས་མེ༷ད་ཡེ་ཤེས་གཏེར་མཛོད་ད༷མ་པའི་སྐུ། །ཆོ༷ས་ཕུང་སྣ་ཚོགས་ཁམས་བཞིན་གཟིགས་པའི་གསུང༌། །ཨེ་ཝཾ་མཉམ་སྦྱོར་བདེ་སྟོང་ཐུགས་དང་ལྡན། །ལུས་ཅན་རྒྱ༷་མཚོ༷འི་སྤྱི་གཙུག་རྒྱན་དུ་ལྷམ། །གངས་རིའི་ཕྲེང་བས་བསྐོར་བའི་འཇིག་རྟེན་དུ། །རྒྱལ་བསྟན་ཉིན་བྱེད་འཆར་བའི་སྐྱ་རེངས་ཀྱི། །ཡི་གེའི་སྲོལ་ཆེན་ཐོག་མར་འབྱེད་མཛད་པ། །འཇམ་དབྱངས་རྣམ་སྤྲུལ་ཐོན་མིའི་ཞབས་ལ་འདུད། །གསུང་རབ་རྒྱ་མཚོར་བགྲོད་པའི་གྲུ་བོ་ཆེ། །བརྡ་དག་གཞུང་ལུགས་རྒྱས་བསྡུས་མང་མཆིས་ཀྱང༌། །འདིར་ནི་གསར་སློབ་དཔྱོད་ལྡན་དོན་གཉེར་འགའི། །བློ་དང་འཚམ་ཕྱིར་གོ་སླའི་སྐད་ཀྱིས་བརྩམ། ། ༼ཀ༽ སྐར༷་མ་པ་སངས་དུང་གི་མདོག་ལྟར་དཀ༷ར། །སྐོ༷ར་ཚན་ཕྱེ་སྟེ་ཡུལ་གྲུའི་མཐའ་ལ་བསྐོ༷ར། །སྐུ༷་མཆོག་ཁྱོད་ཀྱི་ཕྱག་ནི་དཀུ༷་ལ་བརྟེན། །ཕག་ཏུ་བསྐུ༷ངས་ནས་རྐོ༷ང་བུའི་སྣོད་རྣམས་ཁྱེར། །ཐོབ་པའི་སྐལ༷་བ་བསྐལ༷་བའི་བར་དུ་བསགས། །སྲེད་པའི་བརྐ༷མ་པ་ཉི་མས་བསྐམ༷་མི་འགྱུར། །རྐ༷ན་གྱི་ངོས་སུ་ཚེར་མ་ཡོད་རེ་སྐ༷ན། །མ་འགྱངས་སྐྱེ༷ན་པར་མཁོ་བའི་མཐུན་རྐྱེ༷ན་སྒྲུབ། །འོ་ཞོ་དཀྲུ༷གས་པས་སྣོད་དུ་སྤྲིན་ལྟར་དཀྲི༷གས། །རྐྱ༷ང་གི་ཤ་ཡིས་བུ་དང་བུ་མོ་བསྐྱ༷ངས། །ཤ་མེད་ཀེ༷ང་རུས་དུར་གྱི་ཁྲོད་དུ་བཀ༷ང༌། ། ལྐོ༷ག་མའི་གནས་ན་ཤུན་པའི་སྐོ༷གས་པ་མང༌། ༼ཁ༽ ཁ༷ང་བརྩེགས་མཐོན་པོར་ང་རྒྱལ་དྲེགས་པས་ཁེ༷ངས། །ཁ༷མ་ཟས་ཟོས་པས་ལུས་ཀྱི་འབྱུང་ཁམ༷ས་རྒྱས། །ཁོ༷ར་ཡུག་ཀུན་ཏུ་འཁོ༷ར་ལོའི་བགྲོད་པ་མང༌། །སྨན་གྱི་མཁ༷ན་པ་ཁ༷ན་ལ་སུ་ཡིས་འཇོག །འདབ་ཆགས་ཁྲུ༷ང་ཁྲུང་སྒོ་ངའི་སྦུབས་ནས་འཁྲུ༷ངས། །ཁྱོ༷གས་ཀྱི་ཁང་བཟང་འཁྲི་ཤིང་འཁྱོ༷ག་པོས་འཁུར།…

༄༅། །བོད་ཀྱི་བརྡ་དག་བྱིས་པའི་ལམ་མཁན་ཞེས་བྱ་བ་བཞུགས་སོ།། བསྟན་འཛིན་རྣམ་རྒྱལ།(༡༩༣༣-༢༠༠༥) ༄༅། །རྒྱལ་བ་ཀུན་གྱི་མཁྱེན་རབ་ཀྱི། །རང་གཟུགས་རྗེ་བཙུན་མཁྱེན་པའི་གཏེར། །དྲན་པ་ཁོ་ནས་རྨོངས་པའི་དཔུང༌། །མཐར་བྱེད་འཇམ་དཔལ་དཔའ་བོས་སྐྱོངས། །ཤེས་བྱའི་མིང་ཚིག་མཐའ་ཡས་པས། །ཀུན་ཀྱང་བརྗོད་པར་མི་ནུས་མོད། །བྱིས་པའི་བློ་དང་འཚམས་པ་ཡི། །སྡེབ་སྦྱོར་ཉེར་མཁོ་བཤད་པར་བྱ། །བརྗོད་དོན་ཀཱ་ལི་སུམ་ཅུ་ལ། །རྐྱང་པ་འཕུལ་དང་མགོ་ཅན་དང༌། །དབྱངས་བཞི་ཡ་ར་ལ་ཝའི་འདོགས། །རྗེས་འཇུག་ལ་སོགས་རིམ་གྱིས་བསྟན། ། ༼ཀ༽ ཀ་བ་ཀ་རུ་ཀ་དག་སོགས། །ཀ་རྐྱང་ཡིན་པས་ཤེས་པར་བྱ། །རྒྱལ་བའི་བཀའ་ནི་བ་བཀའ་ལ། ། ངལ་བའི་དཀའ་བ་ད་དཀའ་ཡིན། །དུས་ཀྱི་སྐ་ཅིག་ས་སྐ་ལ། །ཆུ་ཡི་རྐ་ནི་ར་རྐ་ཡིན། །ལོ་སྐག་ས་སྐག་ཀག་ཀྱང་རུང༌། །ལམ་སོགས་བཀག་པ་བ་བཀག་ཡིན། །མདའ་སྣོད་བཀང་བ་བ་བཀང་ལ། །ཐུགས་དམ་བསྐང་བ་བ་སའི་བསྐང༌། །ལག་པ་བཀན་པ་བ་བཀན་ལ། །ཁ་དཀན་དཀན་གཟར་ད་དཀན་ཡིན། །མེ་ཉིར་བསྐམ་པ་བ་སའི་བསྐམ། །འདོད་ལ་བརྐམ་པ་བ་རའི་བརྐམ། །ཁ་ཡི་རྐན་ནི་ར་རྐན་ཀྱང༌། །བྱེད་རེ་སྐན་ལ་ས་སྐན་ནོ། །ཁ་དོག་དཀར་བ་ད་དཀར་ལ། །དམིགས་སུ་བཀར་བ་བ་བཀར་ཏེ། །གནམ་གྱི་སྐར་མ་ས་སྐར་རོ། །དཔྱ་སོགས་བཀལ་ནི་བ་བཀལ་ལ། །དུས་ཀྱི་བསྐལ་པ་བ་སའི་བསྐལ།…

༄༅། །བོད་ཀྱི་བརྡ་དག་ཀུན་ལས་བཏུས་པ་གང་འདོད་བཀླགས་པས་གྲུབ་པ་ཞེས་བྱ་བ་བཞུགས་སོ།། འབི་ལུང་བླ་མ་ངག་དབང་ཡོན་ཏན། ༼ཀ༽ ༄༅། །ན་མཿསམ་བྷོ་ཊ་ཡ། །དྲིན་ཅན་རྩ་བའི་བླ་མ་དང༌། །དབྱེར་མེད་ལྷག་པའི་ལྷར་བཏུད་ནས། །སྔོན་བྱུང་དག་ཡིག་ཐོར་བུའི་རིགས། །ཀུན་བཏུས་གསལ་པོར་འདིར་གཅིག་བྱ། །སྦྱོར་ཀློག་ཀློག་བྱེད་ཀློགས་ཤིག་དང༌། །ཀུན་མཁྱེན་ཤཱཀྱ་ཀརྨ་པ། །ཀ་དག་ཀློང་ཡངས་ཀློང་དུ་གྱུར། །ཐུགས་ཀ་སྟོན་ཀ་དཔྱིད་གཉིས་ཀ །ཡུངས་ཀར་ཐལ་ཀར་བེར་ཀས་བརྡུང༌། །ཀ་ཤི་ཀ་རས་ཤེལ་ཀ་ར། །ཉེན་སྟོད་གདུབ་པད་ཐན་འོད་ཀོར། །ཀུ་ཤུའི་ཀ་བ་ཀོ་བས་གཏུམ། །ཀ་ཏན་པདྨའི་ཀ་མ་ལ། །ནོར་གྱི་ཀ་ཅ་ཀ་པཱ་ལ། །ཀ་ལི་སྒོག་པའི་ཀེའུ་ཀུན་དོང༌། །ཀུནྡ་ཀུ་མུད་ཀེང་ཤུ་ཀ །ཀ་ར་བཱི་ར་ཀ་ཀོ་ལ། །གུར་གུམ་ནོར་བུ་ཀེ་ཏ་ཀ། །མཆོད་ཀོང་ཆུ་སྐྱར་ཀ་དམ་པ། །ཀེང་རུས་ཀླད་པ་ཨ་ཀྲད་ཟ། །གཞུའི་ཀྲད་ཀྲད་ཀོར་ཀུན་སློང་བཟང༌། །ཀ་རེ་ཀོར་རེའི་ཀོ་ལོང་སྤོངས། །པུ་ཤུའི་ལན་ཀན་མདོག་ཀ་རུ། །ཐོར་ཚུགས་དོ་ཀེར་ཐོད་ལེ་ཀོར། །མ་ལེའི་ཀོས་ཀོ་ཀོའུ་ཤི་ཀ། །ཤིང་ཀུན་ཨ་ཀྲོང་དར་ཡ་ཀན། །ཀ་པེད་ཀུ་བ་ཀིམ་པའི་འབྲས། །ཀ་ཏོ་ར་སྣོད་གཡའ་ཀྱི་མ། ཀེའུ་ཚང་ཀ་ཤ་རྩྭ་ཀུ་ཤ། །ལོ་ཀེག་གངས་རིའི་ཀེ་ལ་ཤ། །ཀི་ཀང་བུམ་པའི་ཀ་ལ་ཤ། །ཀར་ཀར་ཟུག་ལངས་བད་ཀན་ཆུའི། །ཀུ་ཡ་ཀན་འོག་རྩ་ཀྱལ་ཀྱལ། །ཀར་ཤ་པ་ཎ་ཀེ་ཀེ་རུ།…

༄༅། །བརྡ་ཡི་བྱེ་བྲག་གསལ་བྱེད་བཞུགས་སོ།། པཎ་ཆེན་ཤཱཀྱ་མཆོག་ལྡན།(༡༤༢༨-༡༥༠༧) ༄༅། །ན་མོ་ཝཱ་གཱི་ཤྭ་རཱ་ཡ། །བརྩེ་བས་འགྲོ་ལ་ཕན་འབའ་ཞིག །དེས་དགོངས་རྨོངས་པའི་མུན་ཆེན་པོ། །དྲུངས་ཕྱུང་རྟག་ཏུ་དམ་པའི་ཆོས། །གསུང་མཛད་ཁྱོད་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་གིས། །བྱིན་བརླབས་འཇིག་རྟེན་མིག་གྱུར་པས། །གངས་ཅན་ལྗོངས་སུ་ཆོས་བསྒྱུར་བའི། །བརྡའ་ཡི་བྱེ་བྲག་འགའ་ངེས་བྱ། །དཀོན་མཆོག་ཅེས་པ་སྐྱབས་གནས་དང༌། །རིན་ཆེན་གཉིས་ཀྱི་ཐུན་མོང་མིང༌། །དཀོར་ཞེས་བྱ་བ་ནོར་གྱི་ནི། །ཞེ་ས་ཉིད་ཡིན་གྲིབ་མ་ཡིན། །དཀུ་ཞེས་བྱ་བ་ལུས་ཀྱི་ནི། །སྟ་ཟུར་ཉིད་ཡིན་སྐུ་མ་ཡིན། །མི་ཞིམ་པ་ཡི་དྲི་ལ་ཡང༌། །དཀུ་ཞེས་འཆད་པ་སྐབས་ཀྱིས་དབྱེ། །དཀྱོར་འབྱིན་ཞེས་པ་གཡོ་སྒྱུ་ཡིས། །ཀུན་ནས་བསླང་བའི་ལས་ཀྱི་མིང༌། །རྐྱང་ནུལ་ཞལ་ཞལ་མིང་ཡིན་ནོ། །བཀའ་མཆིད་ཅེས་པ་གླེང་མོ་ཡི། །མིང་ཡིན་བཀའ་བློ་ཞེས་བྱ་བ། །སྒོ་གསུམ་ལས་ཀྱི་ཀུན་སློང་མིང༌། །བཀོལ་བ་ཞེས་བྱ་བཀར་བ་ཡི། །མིང་ཡིན་ལས་བཀོལ་སོགས་དང་ནི། །འབྱེད་པ་གྲོགས་དང་སྐབས་ཀྱི་ཤེས། །བཀད་ས་ཞེས་པ་ཟས་ཀྱི་ནི། །གཡོས་ཁང་མིང་ཡིན་བཀོན་པ་ནི། །ཞེ་སྡང་བ་ཡི་མིང་ཡིན་ནོ། །བརྒྱད་བཀག་ཅེས་པ་སྒོ་གསུམ་གྱིས། །སྤྱོ་བར་བྱེད་པའི་མིང་ཡིན་ཏེ། །བཀྲབས་པ་ཞེས་པ་མང་པོ་ཡི། །ནང་ནས་འདོམས་པར་བྱས་པའི་མིང༌། །སྤ་བཀོང་ཞེས་པ་རྐུན་པོ་སོགས། །ཞུམ་ཞིང་དངངས་པར་བྱེད་པའི་མིང༌། །ལག་པ་བཀན་དང་ལུས་བཀན་སོགས།…