མང་མཁར་ཐུབ་བསྟན་དགེ་འཕེལ་དགོན་གྱི་ལོ་རྒྱུས་རགས་བསྡུས།
༅། །དཔལ་ལྡན་ཚར་པའི་གདན་ས་ཐུབ་བསྟན་དགེ་འཕེལ་དགོན་ནི་བོད་ཀྱི་རྡོ་རྗེ་གདན་དཔལ་ལྡན་ས་སྐྱ་ནས་ནུབ་ཕྱོགས་སུ་ཞག་གཅིག་བགྲོད་པའི་ས་ན་དཔལ་ས་སྐྱའི་གསུང་ངག་ལམ་འབྲས་འཆད་སྤེལ་གནང་སའི་གནས་མུ་གུ་ལུང་དང་ཉེ་བ། སློབ་དཔོན་པདྨ་འབྱུང་གནས་ཞབས་ཀྱིས། ལུང་ལྔ་གླིང་གཅིག་ལྗོངས་གསུམ་གངས་ཉི་ཤུ༔ ཅེས་པ་སློབ་དཔོན་པདྨས་བྱིན་གྱིས་རླབས་པའི་གནས་གངས་ཉི་ཤུའི་ཡ་གྱལ་ལྷ་རྒོད་གངས་རིའི་འདབས་གཞོལ་རི་བོའི་སྤོར་ཆགས་ཡོད། དབེན་གནས་དམ་པ་འདི་ནི་ཐོག་མར་རྗེ་བཙུན་གོང་མ་རྣམ་ལྔའི་ཡ་གྱལ་ས་པཎ་ཀུན་དགའ་རྒྱལ་མཚན་དཔལ་བཟང་པོའི་ཡུམ་མ་གཅིག་གར་ཕུ་མ་ཉི་ཁྲི་ལྕམ་གྱི་གཟིམས་ཁང་ཡིན་ཅིང་། དེའི་རྗེས་སུ་ཀུན་མཁྱེན་གོ་རམ་པ་བསོད་ནམས་སེངྒེའི་ཞལ་སློབ་ཆོས་རྗེ་བསོད་ནམས་དཔལ་འབྱོར་གྱིས་རྒྱ་འགྱེད་གནང་བ་དང་ཚར་ཆེན་ཆོས་ཀྱི་རྒྱལ་པོས་ཆོས་འཁོར་རྒྱ་ཆེར་སྤེལ་ནས་འདུས་ཚོགས་ཡང་རྒྱ་ཆེར་སྤེལ་ད་བར་ལོ་ངོ་༨༠༠ལྷགས་ཙམ་གྱི་ལོ་རྒྱུས་ལྡན་ཡོད་ལ་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ལ་སོགས་པ་རྣམས་ཀྱི་ཚར་ཆེན་གྱི་གདན་ས་ཡིན་པར་ངོས་འཛིན་གནང་ཡོད།
