༡༽ ཀླུ་སྒྲུབ།   (མགོན་པོ་ཀླུ་སྒྲུབ།) སངས་རྒྱས་ཆོས་ལུགས་ཀྱི་ལོ་རྒྱུས་ཐོག་མཚན་སྙན་གྲགས་ཤིན་ཏུ་ཆེ་བའི་རྒྱ་གར་གྱི་སློབ་དཔོན། ཤིང་རྟའི་སྲོལ་འབྱེད་གཉིས་ཀྱི་ནང་ཚན་ཞིག སློབ་དཔོན་འདི་དུས་སྐབས་གང་འདྲ་ཞིག་ལ་བྱུང་བ་ནི། བོད་ཀྱི་ལོ་རྒྱུས་མཁས་པ་མང་པོ་ཞིག་གིས་གསུངས་པ་ལྟར་ན། སངས་རྒྱས་མྱ་ངན་ལས་འདས་ནས་ལོ་བཞི་བརྒྱ་ཙམ་སོང་བའི་དུས་སུ་བྱུང་བར་བཤད་ཅིང་། ཇོ་ནང་ཏཱ་ར་ནཱ་ཐས་བརྩམས་པའི་ <<རྒྱ་གར་ཆོས་འབྱུང་>> གི་ནང་མགོན་པོ་ཀླུ་སྒྲུབ་ཀྱི་ལོ་རྒྱུས་ཐད་དུ་བཤད་པར། སློབ་དཔོན་འདིའི་སྐུ་ཚེའི་སྨད་དུ་རྒྱ་གར་ལྷོ་ཕྱོགས་ཀྱི་རྒྱུད་དུ་བྱོན་ནས་སངས་རྒྱས་ཆོས་ལུགས་དར་སྤེལ་མཛད་པའི་དུས་སྐབས་སུ་ཐོ་གར་གྱི་ཡུལ་གྱི་རྒྱབ་ཤུ་ལི་ཀ་ཞེས་བྱ་བའི་ཡུལ་ (འདི་ཐུར་ཆིས་དང་ཐག་ཉེ་བའི་ཞུས་ལི་ཡ་ཟེར་བ་དེ་ཡིན་ནམ་བརྟག) དུ་སོང་ནས་ཀླ་ཀློའི་ཆོས་ལུགས་ཐོག་མར་བརྩམས་ནས། རྗེས་སུ་དེའི་སློབ་མ་བེ་ཁམས་པ་ཞེས་བྱ་བས་ཁོང་ལ་སློབ་སྦྱོང་བྱས་རྗེས་མ་ཁའི་ཡུལ་དུ་སོང་ (འདི་དབྱི་ཏཱ་ལིའི་རྒྱལ་ས་ལོ་མའི་མིང་ཡིན་ནམ་སྙམ།) ནས་ཀླ་ཀློ་སྟག་གཟིག་གི་ཆོས་ལུགས་དར་སྤེལ་གཏོང་འགོ་ཚུགས་ཞེས་བཤད་པ་དང་། སློབ་དཔོན་འདི་ཉིད་སྐུ་ཚེ་སྨད་དུ་རྒྱ་གར་ལྷོ་ཕྱོགས་སུ་བྱོན་པའི་དུས་སྤྱི་ལོའི་དུས་རབས་དང་པོའི་འགོ་ཚུགས་པ་ཡིན་ཚོད་འདུག་ཀྱང་། དེ་ལས་གསལ་བའི་ལོ་རྒྱུས་ཞིབ་ཆ་ད་ཕན་ཁོ་བོས་མ་མཐོང་ཞིང་། སློབ་དཔོན་འདི་ཉིད་རྒྱ་གར་ལྷོ་ཕྱོགས་བེདརྦྷ་༌ཞེས་བྱ་བའི་ཡུལ་དུ་བྲམ་ཟེ་འབྱོར་ལྡན་ཞིག་གི་ཁྱིམ་དུ་འཁྲུངས་ཤིང་། མཚན་མཁན་ལ་བསྟན་པས་ཚེ་རིང་ཤོས་ལ་ལོ་བདུན་ལས་མི་ཐུབ་ཟེར་བས། ཕ་མ་གཉིས་ཀྱིས་བུ་ཤི་བའི་རོ་མིག་གིས་མཐོང་མ་བཟོད་པར་གཡོག་དང་བཅས་ཡུལ་གཞན་དུ་འཁྱམ་དུ་བཏང་། རིམ་གྱིས་རྒྱ་གར་ཡུལ་དབུས་ཀྱི་དགོན་པ་ཆེ་ཤོས་ནཱ་ལེན་ཊར་ཕེབས་ཏེ་སློབ་དཔོན་བྲམ་ཟེ་ས་ར་ཧ་དང་མཇལ་ཏེ་ཚེ་དབང་ཞུས། གཞན་གསང་བ་འདུས་པ་ལ་སོགས་པའི་གསང་སྔགས་ཀྱི་ཆོས་མང་པོ་གསན། དགོན་པའི་མཁན་པོ་སྒྲ་གཅན་འཛིན་བཟང་པོའི་དྲུང་དུ་དགེ་སློང་གི་སྡོམ་པ་ཞུས་ཏེ་མཚན་དགེ་སློང་དཔལ་ལྡན་ཞེས་བཏགས།

རྩོམ་པ་པོ་པཎྜི་ཏ་རྡོ་རིང་བསྟན་འཛིན་དཔལ་འབྱོར། རྩོམ་པ་པོ་ངོ་སྤྲོད་མདོར་བསྡུས། རྡོ་རིང་བསྟན་འཛིན་དཔལ་འབྱོར་གྱི་མཚན་གཞན་ལ་དགའ་བཞི་བསྟན་འཛིན་དཔལ་འབྱོར་ཡང་ཞུ། རྡོ་རིང་ཞེས་པ་ནི་ཁོང་གི་ཁྱིམ་རྒྱུད་ཀྱི་ལྷ་སའི་སྡོད་ཤག་གི་མིང་དང་། དགའ་བཞི་པ་ཞེས་པ་ནི་གཙང་ཁུལ་དུ་ཡོད་པའི་ཁོང་ཚང་གི་གཞིས་ཀའི་མིང་ངོ་།། དེ་བས་ཁོང་གི་ཁྱིམ་རྒྱུད་ལ་དགའ་བཞི་པའི་ཁྱིམ་རྒྱུད་ཅེས་ཟེར། ཁོང་གི་མཚན་དངོས་ལ་བསོད་ནམས་བསྟན་འཛིན་དཔལ་འབྱོར་རྡོ་རྗེ༼ ༡༧༦༠- ༽ ཟེར། ཁོང་ནི་བཀའ་བློན་ཁང་ཆེན་པའི་ཡང་ཚ་རེད། ཁང་ཆེན་པ་གྲོངས་རྗེས། ཁང་ཆེན་པའི་ཚ་བོ་རྣམ་རྒྱལ་ཚེ་བརྟན་དང་མགོན་པོ་དངོས་གྲུབ་རབ་བརྟན་སྐུ་མཆེད་གཉིས་སྔ་གཞུག་ཏུ་བཀའ་བློན་ལ་བསྐོ་བཞག་མཛད། མགོན་པོ་དངོས་གྲུབ་རབ་བརྟན་༼ ༡༧༢༡-༡༧༩༢ ༽ལ་གུང་པཎ་ཌི་ཏ་ཞེས་ཆེ་བརྗོད་ཀྱི་མིང་ཐོགས། ལོ་ངོ་བཞི་བཅུ་ལྷག་ལ་བཀའ་བློན་གྱི་ཕྱག་ལས་གནང་། ཁོང་གིས་གཞུང་གི་ལས་ཀ་དགོངས་ཞུ་བྱས་ཏེ་ངལ་གསོ་བྱས་རྗེས། ཁོང་གི་སྲས་བསྟན་འཛིན་དཔལ་འབྱོར་གྱིས་བཀའ་བློན་གྱི་ལས་ཁུར་རྒྱུན་འཛིན་བྱས། བསྟན་འཛིན་དཔལ་འབྱོར་གོ་ས་ནས་ཕབ་རྗེས། སྲས་འགྱུར་མེད་བསོད་ནམས་བཀའ་བློན་དུ་བསྐོས། དུས་རབས་བཅོ་བརྒྱད་པའི་དུས་མགོ་ནས་བཅུ་དགུ་པའི་དུས་མགོའི་བར་གྱི་ལོ་ངོ་བརྒྱ་ལྷག་གི་དུས་ཡུན་དུ་ཁོང་ཚང་གིས་མི་རབས་བཞིར་བཀའ་བློན་དུ་བསྡད་པར་མ་ཟད། བཀའ་བློན་ཕོ་ལྷ་བ་དང་བཀའ་བློན་མདོ་མཁར་ཚེ་རིང་དབང་རྒྱལ་གཉིས་ཀྱི་ཁྱིམ་དང་ཡང་གཉེན་གྱི་འབྲེལ་བ་ཡོད་༼གུང་པཎ་ཌི་ཏའི་ཆུང་མ་ནི་ཕོ་ལྷ་བའི་བུ་མོ་ཡིན། བསྟན་འཛིན་དཔལ་འབྱོར་གྱི་མ་ནི་ཚེ་རིང་དབང་རྒྱལ་གྱི་བུ་མོ་ཡིན༽པས། ཁོང་ནི་སྐབས་དེའི་བོད་ཀྱི་དབང་ཤུགས་ཅུང་ཆེ་བའི་སྐུ་དྲག་གི་གྲས་རེད།

ཡོང་ཁུངས། བཙན་པོའི་ལོ་རྒྱུས་དྲྭ་བ།  

བོད་ཕྱི་ནང་ཀུན་ན་བཞུགས་པའི་རང་རིགས་སྤུན་ཟླ་ཕོ་མོ་རྣམས་དང་བོད་དང་བོད་ཀྱི་སྐད་ཡིག་ལ་དུང་བ་ཟབ་པའི་ལྷན་རྒྱས་ཡོངས་ལ་ཆེད་ཞུ། ད་ལམ་ངེད་དུང་དཀར་ཚིག་མཛོད་ཆེན་མོའི་མཉེན་ཆས་ལས་ཞུགས་པས་དུས་ཚོད་དང་ངལ་བ་རིང་དུ་སྤྱད་དེ་དུང་དཀར་ཚིག་མཛོད་ཆེན་མོ་ཁ་པར་གྱི་མཉེན་ཆས་སུ་འཇུག་རྒྱུའི་ལས་གཞི་ཞིག་མགོ་བཙུགས་ཏེ་ལྷན་རྒྱས་སུ་དུང་དཀར་ཚིག་མཛོད་བཏགས་མའི་འདྲ་བཤུས་ཤིག་སྤྱི་ཚོགས་དྲ་ལམ་ཁག་ནས་བསླངས་དོན་ལྟར་ཚིག་མཛོད་བཏགས་མ་མི་འདྲ་བ་གཉིས་ལག་སོན་བྱུང་ཡང་། བཏགས་མ་དེ་གཉིས་སུ་ཡིག་ནོར་དང་། དོན་ནོར། ཆད་སྐྱོན་བཅས་དུ་མ་འདུག་ཅིང་། ལས་རིགས་དེ་མཇུག་སྐྱོང་མཁན་ཡང་ཁོ་བོ་གཅིག་པུ་སོང་གཤིས་མི་ལོ་དུ་མ་ཞིག་འགོར་འགྱང་ཕྱིན་པར་དགོངས་སེལ་དང་སྦྲགས། ལྷན་རྒྱས་ཀྱི་སྤྱན་སྔར་དེ་སྔོན་ཉིན་ཤས་རིང་དུ་རྣམ་པ་ཚོའི་ཁ་པར་དུ་མངོན་ཙམ་བྱུང་བའི་ཚིག་མཛོད་མཉེན་ཆས་འདི་ཉིད་བསྐྱར་ཞིབ་དང་འབྲེལ་དེ་རིང་ལེགས་གྲུབ་ཟིན་པའི་གཏམ་བཟང་འབུལ་རྒྱུ་བྱུང་བ་ནི་ཁོ་བོ་སྤྲོ་བས་རབ་ཏུ་གཏམས་ཡོད།

 གཙང་པ་ཧའོ་རིན་པོ་ཆེ་མཆོག རྒྱུ་མཚན། སངས་རྒྱས་བསྟན་པ་ནི་དགོན་པ་མ་ཡིན། སངས་རྒྱས་བསྟན་པ་ནི་གར་འཆམ་མ་ཡིན། སངས་རྒྱས་བསྟན་པ་ནི་སྒོམ་མེད་ཀྱི་སྒྲུབ་པ་མ་ཡིན། སངས་རྒྱས་བསྟན་པ་ནི་ལྷ་ཁང་སྐུ་འདྲ་མ་ཡིན། སངས་རྒྱས་བསྟན་པ་ནི་བསྐྱེད་རྫོགས་མེད་པའི་འུར་འཆེམ་མིན། སངས་རྒྱས་བསྟན་པ་ནི་བཤད་སྒྲུབ་མེད་པའི་དམར་སེར་གྱི་ཚོགས་པ་མིན། སངས་རྒྱས་བསྟན་པ་ནི་བཤད་སྒྲུབ་རྐྱང་པ་རང་ཡིན། བཤད་སྒྲུབ་དེ་ཡང་བཤད་པ་ཨང་དང་པོ་ཡག་པོ་སོང་ཟིན་ནས་གཞི་ནས་སྒྲུབ་པ་ལ་འགྲོ་དགོས་པ་ཡིན། བཤད་པ་མེད་པའི་སྒྲུབ་པ་དེ་ནི་དམིགས་བསལ་ལམ་སྦྱང་སྔོན་དུ་སོང་བ་མིན་ན་ཧ་ཅང་དཀའ་བོ་ཡིན་འདུག འོན་ཀྱང་དེང་སང་གི་དགོན་སྡེའི་དབུ་འཛིན་ཚོ་ནི་བཤད་སྒྲུབ་ཟེར་ན་གོ་མཁན་ཡང་ཧ་ཅང་དཀོན། གོ་མྱོང་ཡོད་ཀྱང་ལག་ཏུ་ལེན་མཁན་ནི་ཤིན་ཏུ་དཀོན། རང་ཉིད་ཀྱི་གོ་མྱོང་ཐོབ་ཐང་བཤད་གྲྭ་ནས་གསོ་སྐྱོང་བྱས་ནས་བྱུང་ཡང་ད་དུང་བཤད་གྲྭར་རོགས་རམ་མེད། མ་ཟད་བཀག་རྡོ་ཏག་ཏག་བཟོ་མཁན་གྱི་ཁེངས་ཡོད། གཞན་ཡང་བཤད་གྲྭ་དང་བཤད་གྲྭའི་གྲྭ་བཙུན་གྱིས་ཅུང་ཙམ་མ་འགྲིག་ན་ལམ་སེང་ངར་ཤུགས་ཆེར་བསྐྱེད་ཀྱིས་བཤད་གྲྭ་བས་མི་ཉན་འདུག་ཟེར་ནས་བཤད་གྲྭ་བ་བཀག་གང་ཐུབ་བྱེད་པ་ཡང་ཧ་ཅང་མང་པོ་ཡོད། དེར་བརྟེན་བོད་ཡུལ་གྱི་ནང་བསྟན་གང་མགྱོགས་ལྗོངས་རྒྱུ་ལ་ཕེབས་རྒྱུ་ཡིན་པ་རེད། ངོ་མ་བསྟན་པ་ལ་བསམ་བློ་ཡོད་མཁན་ནི་ཉིན་སྐར་རེད་ཅེས་གསུངས་པ་བདེན་པ་རེད། དཀོན་མཆོག་གིས་ཐུགས་རྗེས་གཟིགས།