རྩོམ་པ་པོ། དྷཱིཿལྷ་ལྡན།      བོད་ཀྱི་སྔོན་བྱོན་ལོ་ཙཱ་བ་དེ་དག་གིས་རང་རེ་བོད་ཀྱི་ཡུལ་འདིར་རིག་གནས་ཀྱི་ཚེ་སྲོག་ཕྲ་མོ་ཞིག་གི་དབུགས་རྒྱུན་མཐུད་ཕྱིར་དང་། ཆོས་དང་རིག་གནས་ཀྱི་རྫོང་མཐུག་པོ་ཞིག་གི་རྨང་འཛུགས་སླད། མཐའ་མེད་པའི་ཏི་ར་ཧི་ཏའི་ཡུལ་གྱི་རི་ལུང་མང་པོར་གྲོགས་མེད་ཁེར་རྐྱང་དུ་ཕྱིན། ཧི་མ་ལ་ཡའི་རི་ཚོགས་ཀྱི་ཕྲེང་བ་མང་པོ་ཞབས་ཐང་དུ་བརྒལ། ཤི་སྐྱིད་ཇག་ཚོགས་སོགས་ཨར་ཇག་གི་འཚེ་བ་མང་པོ་གདོང་དུ་བསུས། སྟག་གཟིག་སྦྲུལ་དང་མ་ཧེ་སོགས་གཅན་གཟན་དང་དུག་སྦྲུལ་གྱི་འཇིགས་པ་མང་པོ་ཐོད་དུ་བླངས། ཚ་བ་དང་གངས་རླུང་སོགས་རང་བྱུང་གི་གནོད་འཚེ་མང་པོ་ཕྲག་ཏུ་ཁུར་ཏེ། ཨེ་ཤ་ཡའི་གླིང་གི་རིག་གནས་ཀྱི་ཕ་ཁྱིམ་ལྟ་བུའི་རྒྱ་གར་འཕགས་པའི་ཡུལ་ཏུ་ཕེབས་ཏེ། ཆོས་དང་རིག་གནས་ཀྱི་གླེགས་བམ་རི་བོའི་གཏོས་དང་མཉམ་པ་ཞིག་བོད་ཀྱི་སྐད་དུ་བསྒྱུར་ཅིང་གདན་དྲངས་བར་བྱས།  

ལོ་ཙཱ་བ་རིན་ཆེན་བཟང་པོ་ནི། བོད་ཀྱི་ལོ་རྒྱུས་ཐོག་བསྟན་པ་ཕྱི་དར་གྱི་དུས་སུ་བྱུང་བའི་གསང་སྔགས་གསར་མ་བསྒྱུར་མཁན་གྱི་ལོ་ཙཱ་བ་མཚན་སྙན་གྲགས་ཤིན་ཏུ་ཆེ་བ་ཞིག་ཡིན། རབ་བྱུང་དང་པོའི་གོང་གི་ལོ་དྲུག་ཅུ་རེ་དགུ་པ་ས་རྟ་ (༩༥༨) ལོར་སྟོད་མངའ་རིས་ཀྱི་གུ་གེའི་ས་ཆར་འཁྲུངས། དགུང་ལོ་ཆུང་དུས་ནས་སློབ་སྦྱོང་ལ་བརྩོན་འགྲུས་ཆེ་བས། མངའ་རིས་རྒྱལ་པོས་ཁོང་སོགས་མི་ཉི་ཤུ་རྩ་བདུན་ཁ་ཆེའི་ཡུལ་ (ཀསྨིར) དུ་མངགས་པ་ལྟར་བྱོན་ཏེ།