༄༅། །དཔལ་མར་མེ་མཛད་ཡེ་ཤེས་ཀྱི་རྣམ་པར་ཐར་པ་ལ་མདོ་ཙམ་དུ་བསྟོད་པ།[1]
༼༸རྒྱལ་བ་སྐུ་ཕྲེང་གཉིས་པ་དགེ་འདུན་རྒྱ་མཚོས་ (1476-1542) མཛད་པ།༽
དཔལ་མར་མེ་མཛད་ཡེ་ཤེས་ཡབ་སྲས་བརྒྱུད་པ་དང་བཅས་པ་ཐམས་ཅད་ལ་དུས་ཐམས་ཅད་དུ་གུས་པས་ཕྱག་འཚལ་ལོ། །སྣང་བ་མཐའ་ཡས་རྒྱལ་བ་ཀུན་གྱི་གཙོ། །སྙིགས་དུས་ལྔ་བརྒྱའི་གཙུག་རྒྱན་ཐམས་ཅད་མཁྱེན། །དཔལ་ལྡན་མར་མེ་མཛད་དཔལ་ཡེ་ཤེས་ཞེས། །ཕྱོགས་བཅུར་སྙན་པར་གྲགས་ལ་ཕྱག་འཚལ་ལོ། །ནོར་བུའི་བ་གམ་འོད་ཟེར་བཞད་པའི་གྲོང་། །གསེར་གྱི་རྒྱལ་མཚན་མངོན་མཐོའི་གཞལ་མེད་ཆེར། །དགེ་བའི་དཔལ་དང་འོད་ཟེར་ཅན་གཉིས་ཀྱི། །སྲས་སུ་བསམ་བཞིན་འཁྲུངས་ལ་ཕྱག་འཚལ་ལོ། །
མཆོད་སྦྱིན་བརྒྱ་པའི་ཕུན་ཚོགས་ལ་འཁུ་བ། །སྲིད་འབྱོར་མནར་མེད་དམྱལ་བའི་བྱིན་ཟ་ལྟར། །དགོངས་མ་ཐག་ཏུ་དེ་སྤངས་སྔགས་སྤྱོད་པའི། །བརྟུལ་ཞུགས་གྲུབ་པའི་དབང་པོ་ཁྱོད་ཕྱག་འཚལ། །བསླབ་གསུམ་སྦྲང་རྩིའི་རྒྱལ་མཚན་དཔལ་འབར་བ། །ཁོ་ནས་ཐུབ་བསྟན་དགའ་ཚལ་མཛེས་དགོངས་ཏེ། །དོན་ཀུན་གྲུབ་པ་གཞན་བཞིན་རབ་བྱུང་བས། །ཐུབ་དབང་གཉིས་པར་གྱུར་པ་ཁྱོད་ཕྱག་འཚལ། །མཁྱེན་པའི་ཆུ་འཛིན་བརྩེ་བའི་ཆུ་ཁུར་ཅན། །བརྒྱ་དང་ལྔ་བཅུའི་ཐུགས་བཅུད་བདུད་རྩིའི་ཆར། །དྲི་བྲལ་ཁྱོད་ཐུགས་ཤེལ་གྱི་བུམ་བཟང་དེར། །ནམ་ཡང་དོག་པ་སྤངས་ལ་ཕྱག་འཚལ་ལོ། །དངོས་སྟོབས་རིགས་པ་རྡོ་རྗེའི་མེ་ཆར་གྱིས། །ཕས་ཀྱི་རྒོལ་བའི་བྲག་རི་ཀུན་བསྙིལ་ཞིང་། །སྐལ་ལྡན་རྨ་བྱའི་རྣ་བར་ལེགས་བཤད་ཀྱི། །འབྲུག་སྒྲ་དལ་གྱིས་དགོད་ལ་ཕྱག་འཚལ་ལོ། །དཔལ་ལྡན་ཐུབ་པའི་བཀའ་ཡི་ཁུར་འཛིན་པ། །སྡེ་པ་བཅོ་བརྒྱད་ཀུན་གྱི་གཙུག་རྒྱན་དུ། །ཁྱོད་གྱུར་དེ་ཚེ་ལྔ་བརྒྱའི་གཙུག་རྒྱན་ཞེས། །བསྔགས་པ་དོན་དང་ལྡན་ལ་ཕྱག་འཚལ་ལོ། །གངས་ཅན་མགོན་པོ་རྒྱལ་བའི་འབྱུང་གནས་དང་། །ལེགས་སྤྱད་སྨོན་ལམ་སྟོང་གི་མཚམས་སྦྱོར་ལས། །སླར་ཡང་བོད་ཡུལ་མུན་པ་ཀུན་སེལ་བའི། །མར་མེ་མཛད་དཔལ་དོན་མཐུན་ཁྱོད་ཕྱག་འཚལ། །དེ་ཚེ་ཁ་བ་ཅན་གྱི་སྐྱེད་མོས་ཚལ། །བསླབ་གསུམ་སྦྲང་རྩིས་གཏམས་པའི་ཆུ་སྐྱེས་ཀྱིས། །ཡོངས་གང་འཕགས་ཡུལ་ཆོས་ཀྱི་དགའ་ཚལ་ཡང་། །ཀུན་ཏུ་ཕམ་པར་མཛད་ལ་ཕྱག་འཚལ་ལོ། །ཞིང་འདིའི་གདུལ་བྱ་འདུལ་བའི་དོན་མཛད་ནས། །དགའ་ལྡན་ལ་སོགས་གྲངས་མེད་གནས་མཆོག་ཏུ། །དཔག་མེད་སྤྲུལ་པས་མུ་མེད་འགྲོ་བའི་དོན། །བཞེད་དགུར་མཛད་པ་ཁྱོད་ལ་ཕྱག་འཚལ་ལོ། །སླར་ཡང་མི་རྟོག་ཆོས་སྐུའི་མཁའ་དབྱིངས་ལས། །ཁྱོད་ཀྱི་འཕྲིན་ལས་ཉི་ཟླའི་འགྲོས་ཆེན་པོས། །བདག་སོགས་རྨོངས་པའི་མུན་པ་ཀུན་སེལ་ཞིང་། །ཐུབ་བསྟན་འཛིན་མ་གོས་དཀར་ལྡན་གྱུར་ཅིག །བདག་གིས་མཆོག་ཏུ་དད་པས་མགོན་ཁྱོད་ཀྱི། །རྣམ་ཐར་ཚུལ་ལ་ཆ་ཙམ་བསྟོད་བགྱིས་པས། །འགྲོ་བ་ཀུན་ཀྱང་དཔལ་ལྡན་ཨ་ཏི་ཤའི། །རྣམ་ཐར་ཚུལ་ལ་འདོད་དགུར་སྤྱོད་གྱུར་ཅིག །ཅེས་དཔལ་མར་མེ་མཛད་ཡེ་ཤེས་ཀྱི་རྣམ་པར་ཐར་པ་ལ་མདོ་ཙམ་དུ་བསྟོད་པ་འདི་ནི། གངས་ཅན་ལྗོངས་ཀྱི་བཀའ་གདམས་པ་རྣམས་ཀྱི་ཐ་ཤལ་དུ་གཏོགས་པ་ཆོས་སྨྲ་བའི་བཙུན་པ་དགེ་འདུན་རྒྱ་མཚོའི་དཔལ་གྱིས་སྦྱར་བའོ།། །།
[1] ༸རྒྱལ་བ་དགེ་འདུན་རྒྱ་མཚོའི་གསུང་འབུམ། སྐུ་བཅར་རྣམ་རྒྱལ་གྲྭ་ཚང་། ༢༠༡༤ ལོ། ཤོག་ ༡༢༣ ནས་ ༡༢༤ བར།
