རྒྱལ་བ་རྒོད་ཚང་པའི་རྣམ་ཐར་ཕྱོགས་བསྒྲིགས། སྟོད་ཆ།

གླེང་བརྗོད།

སའི་སྟེང་ན་གྲུབ་ཐོབ་ཆེན་པོའི་སྙན་པ་དང་གྲགས་པས་ཁྱབ་པའི། ཁམས་གསུམ་ཆོས་ཀྱི་རྒྱལ་པོ་རྒོད་ཚང་པ་མགོན་པོ་རྡོ་རྗེའི་སྐུའི་སྣང་བརྙན་ཀུན་གྱི་ཐོག་མ། རྒོང་ཚང་པ་ཉིད་ཀྱིས་བྱིན་གྱིས་བརླབས་པའི་ང་འདྲ་མ་མཐོང་བ་དོན་ལྡན། སྔ་དུས་སུ་རྒྱལ་ཕུ་བཀྲ་ཤིས་སྟེང་འགྲོ་དགོན་གྱི་རྟེན་གཙོར་བཞུགས་པ་འདི་ཉིད། བལ་ཡུལ་ཤེལ་དཀར་ཆོས་སྡེ་དགོན་དུ་བཅོལ་གཉེར་ཞུས་རྗེས་སུ། ༧སྐྱབས་རྗེ་སངས་བསྟན་སྤྲུལ་སྐུ་མཆོག་གི་དྲུང་།

ཨ་ཅག་ཆོས་འཛོམས་དང་། ཨ་ཅག་ཡེ་ཤེས་མཚོ་མོ། གཉའ་ནང་ཀོ་ཐང་གནས་མའི་ཇོ་ལགས་ནོར་བུ། བུ་ཆོས་དར། ཚེ་རིང་བདེ་སྐྱིད། གུས་པ་བཅས་ཆེད་བཅར་སྐབས། ཨ་ཅག་གཉིས་ནས་རིན་པོ་ཆེར་རྒྱལ་བ་རྒོད་ཚང་པའི་སྐུ་བརྙན་འདི་བཞིན་ཐོག་མ་བོད་ནས་ང་ཚོའི་པཱ་ལགས་དམ་པ་ཕན་ཐོགས་ནོར་རྒྱས་ཀྱིས་འགོ་ཁྲིད་དེ་ང་ཚོ་རྒྱལ་ནོར་བྲག་ནག་ཆུ་འཁོར་ར་ཁྱིམ་རྒྱུད་ཀྱིས་གདན་འདྲེན་ཞུས་པ་ཡིན། ང་ཚོ་སྐྱབས་བཅོལ་ལ་ཡོང་དུས་མཉམ་དུ་གདན་འདྲེན་ཞུ་དགོས་དོན་ཡང། སྐབས་དེར་བོད་ནང་དུས་ངན་ཟང་ཟིང་གི་སྐབས་ཡིན་པས་འཇོག་བློས་མ་བཟོད་པར་གདན་དྲངས་པ་རེད། ཐོག་མའི་དམིགས་ཡུལ་དང་པ་ལགས་ཀྱི་ཐུགས་འདུན་ལ། ནམ་ཞིག་བོད་ལ་དུས་བཟང་བྱུང་སྐབས་རྒོད་ཚང་པའི་སྐུ་བརྙན། ཉིད་ཀྱི་གདན་ས་བཀྲ་ཤིས་སྟེང་འགྲོ་རང་དུ་རང་འཇགས་གདན་འདྲེན་ཞུ་རྒྱུའི་འདུན་པ་ཡོད། འོན་ཀྱང་པཱ་ལགས་སྐུ་གཤེགས་པ་དང་། ད་དུས་ཀྱང་སྐལ་བཟང་གི་གོ་སྐབས་ཤིག་འབྱུང་དཀའ་བར་བརྟེན། ད་རེས་ང་ཚོས་པཱ་ལགས་ཀྱི་དགོངས་གཞི་དང་ཐོག་མའི་དམིགས་དོན་འགྲུབ་ཆེད་འདི་ག་བལ་ཡུལ་ཤེལ་དཀར་ཆོས་སྡེ་དགོན་དུ་བཅོལ་གཉེར་ཞུ་ཐུབ་པ་འདིས་པ་ལགས་ཀྱི་དགོངས་གཞི་ཅུང་ཟད་ཅིག་འགྲུབ་སོང་བས་ཧ་ཅང་དགའ་པོ་བྱུང་ཞུས་སོང་། རང་ཉིད་ནས་ཀྱང་ལོ་རྒྱུས་ཀྱི་བྱུང་རིམ་ཞིག་བྱུང་ན་སྙམ་པའི་བསམ་ཚུལ་ཞུས་པས། རིན་པོ་ཆེ་ནས་ལོ་རྒྱུས་ཀྱི་བྱུང་རིམ་ཧ་ཅང་གལ་ཆེན་པོ་རེད། དགེ་བཤེས་ཁྱེེད་རང་ལ་ལོ་རྒྱུས་ཀྱི་ཆ་རྒྱུས་ཡོད་སྟབས་བྲིས་ན་ཡག་པོ་འདུག་ཅེས་བཀའ་གནང་བྱུང་། དེ་བཞིན་ཨ་ཅག་ཡེ་ཤེས་མཚོ་མོ་དང་། ཆོས་འཛོམས་གཉིས་ནས་ཀྱང་རིན་པོ་ཆེ་ནས་དགེ་བཤེས་ལ་ལམ་སྟོན་བཀའ་སློབ་གནང་རོགས་ཞུས་གནང་སོང་།
དེར་བརྟེན་གུས་པ་རང་གིས་སྔ་མོ་ནས་རྒོད་ཚང་པའི་རྣམ་ཐར་མང་པོ་ཞིག་རྡ་ས་བོད་ཀྱི་དཔེ་མཛོད་ནས་གཡར་པོ་ཞུས་ཏེ་ཕྱོགས་བསྡུ་བྱས་ནས་ཡོད་པ་དེ། འདིར་འབྲེལ་བ་ཆགས་ཡོད་སྟབས་ཆོས་རྗེ་རྒོད་ཚང་པའི་རྣམ་ཐར་ཕྱོགས་བསྡུས་དང་། ཉིད་ཀྱི་གདན་ས་རྒྱལ་ཕུ་བཀྲ་ཤིས་སྟེང་འགྲོ་སོགས་ཀྱི་སྐོར་ལས་བརྩམས་པའི་དེབ་ཆུང་འདི་འབྲི་རྒྱུའི་འདུན་པ་སྐྱེད་ཁུལ་ཡིན།
དེ་ཡང་རྗེ་རྒོད་ཚང་པའི་རྣམ་ཐར་རང་དང་རང་མཉམ་གྱི་མཆེད་གྲོགས་ཚོས་ལྟ་བདེ་གོ་བདེའི་ཆེད་དགུང་ལོའི་ན་བབ་ནས་ན་བབ་ཀྱི་མཛད་འཕྲིན་བསྐྱངས་ཚུལ་དཀར་ཆག་གཙོར་འདོན་དུ་བཟུང་ནས་བསྒྲིགས་ཡོད། དེ་བཞིན་ཉིད་ཀྱི་གདན་ས་རྒྱལ་ཕུ་བཀྲ་ཤིས་སྟེང་འགྲོ་དགོན་པའི་བྱུང་རབས་འཕེལ་རིམ་དང་། དགོན་པའི་འདབས་རོལ་དུ་ཆགས་པའི་རྒྱལ་ཁྲོམ་མམ་རྒྱལ་ནོར་ཡུལ་སྤྱིའི་མིང་ཐོགས་ཚུལ། རྒྱ་ཁྱོན་གྱི་བཀོད་པ། ཡུལ་ལུང་འདི་ནས་བྱོན་པའི་སྐྱེས་བུ་དམ་པ་དང་། བྱས་པ་ཆེ་བའི་མི་སྣ། དེ་བཞིན་ཨ་ཅག་ཆོས་འཛོམས་ནས་བྲིས་པའི་ཁོང་གི་པཱ་ལགས་དམ་པ་ཕན་ཐོགས་ནོར་རྒྱས་ཀྱི་ལོ་རྒྱུས་སྙིང་བསྡུས་སོགས་ཁ་གསལ་གོ་བདེའི་ཚུལ་དུ་ནང་དོན་ཚང་མ་གང་ཞིག་གང་ནས་འབྱུང་སའི་གནས་ལུགས་ལ་གཞི་བཅོལ་ནས་གང་ཐུབ་འབད་བརྩོན་བྱས་ཁུལ་ཡིན། ཅི་སྟེ་ནོར་བའི་ཆ་མཆིས་ཚེ་རྒྱ་ཆེའི་ཀློག་པ་པོ་ལྷན་རྒྱས་ནས་དགོངས་འཆར་ཡོང་བའི་རེ་བ་ཆེ། མཐའ་དོན་<< རྒྱལ་བ་རྒོད་ཚང་པའི་ལོ་རྒྱུས་ཕྱོགས་བསྡུས་དང་། བཀྲ་ཤིས་སྟེང་འགྲོ་དགོན་གྱི་བྱུང་རབས་དཀར་ཆག་གསལ་བའི་མེ་ལོང་།>> འདི་བཞིན་ཨ་ཅག་ཡེ་ཤེས་མཚོ་མོ་ནང་མི་སྤུན་མཆེད་དང་། ཨ་ཅག་ཚོས་འཛོམས་ནང་མི་སྤུན་མཆེད་ལྷན་རྒྱས་ཀྱིས་༧སྐྱབས་མགོན་ཡིད་བཞིན་ནོར་བུ་མཆོག་དགུང་གྲངས་དགུ་བཅུར་ཕེབས་པའི་བཀྲ་ཤིས་གོ་སྟོན་ཉིན་མོའི་འཁྲུངས་སྐར་དང་སྟབས་བསྟུན་ནས་པར་དུ་བཏབ་པའི་དགེ་ཚོགས་ལས་༧སྐྱབས་མགོན་ཡིད་བཞིན་ནོར་བུ་མཆོག་སྐུ་ཚེ་རྒྱལ་བ་ཚེ་མཐའ་ཡས་པའི་ངོ་བོར་བརྟན་ཅིང་། གངས་ལྗོངས་ལྷ་ལྡན་ཞིང་དུ་ཞབས་སོར་བདེ་བར་འཁོད་པའི་སྨོན་ལམ་རླབས་པོ་ཆེའི་དགེ་ཚོགས་སུ་ཅིས་ཀྱང་ནས་འགྱུར་བར་སྨོན།། །།

 

 

རྒྱལ་བ་རྒོད་ཚང་པའི་རྣམ་ཐར་ཕྱོགས་བསྒྲིགས།
རྒྱལ་བ་རྒོད་ཚང་པ་མགོན་པོ་རྡོ་རྗེ་མཆོག།
( 1189–1258 )

བསྡུ་སྒྲིག་པ། དགེ་བཤེས་བློ་བཟང་རྒྱལ་བསྟན།

དཀར་ཆག

༡ ཞིང་གང་དུ་སྐུ་བལྟམས་ཚུལ་སྐོར།………………………………………4
༢ དགུང་ལོ་བཅུ་དགུ་ལ་མཚན་ལྡན་བླ་མ་རྣམས་མཇལ་ཚུལ་སྐོར།…………….12
༣ དགུང་ལོ་ཉི་ཤུ་རྩ་གཉིས་ལ་ལྷོ་བྲག་མཁར་ཆུར་སྒྲུབ་པ་ལ་བྱོན་པའི་སྐོར།……..16
༤ དགུང་ལོ་ཉེར་ལྔ་ལ་གངས་ཏེ་སེ་དང་ཛ་ལན་དྷ་ར་ལ་བྱོན་པའི་སྐོར། ………..17
༥ དགུང་ལོ་ཉི་ཤུ་རྩ་དགུ་ལ་ལྷ་ཁབ་མདོ་ལ་བྱོན་པའི་སྐོར། ………………….24
༦ དགུང་ལོ་སུམ་ཅུ་སོ་གཉིས་ལ་ཙ་རིར་བྱོན་པའི་སྐོར། …………………….26
༧ དགུང་ལོ་སུམ་ཅུ་སོ་ལྔ་པར་ལ་སྟོད་རྒྱལ་གྱི་ཤྲཱི་རི་ལ་བྱོན་པའི་སྐོར། …………29
༨ དགུང་ལོ་བཞི་བཅུ་ཞེ་ལྔ་ལ་རྒྱལ་ཕུ་སྟེང་འགྲོར་བྱོན་པའི་སྐོར། ……………..35
༩ དགུང་ལོ་ལྔ་བཅུ་ལྔ་བརྒྱད་ལ་གཉའ་ནང་བདེ་ཆེན་སྟེང་དུ་བྱོན་པའི་སྐོར། …….42
༡༠ དགུང་ལོ་དྲུག་ཅུ་རེ་བདུན་པར་སྦྱང་བུ་སེང་གེ་གླིང་དུ་བྱོན་པའི་སྐོར། ……….47
༡༡ དགུང་ལོ་དྲུག་ཅུ་རེ་བརྒྱད་ལ་བར་འབྲོག་རྡོར་གླིང་དུ་བྱོན་པའི་སྐོར། ……….49
༡༢ དགུང་ལོ་བདུན་ཅུ་ལོ་ལ་གཟུགས་སྐུ་ཆོས་དབྱིངས་སུ་ཐིམས་ཚུལ་སྐོར།…… ..53
༡༣ སྐལ་ལྡན་སློབ་མ་བྱོན་ཚུལ་སྐོར། ……………………………………..55

༡༤ གསུང་འབུམ་སྐོར།………………………………………………58
༡༥ ལ་དྭགས་སུ་ཕེབས་པའི་སྐོར། ………………………………………59
༡༦ ༸གོང་ས་མཆོག་ལ་ཞལ་གཟིགས་སྐོར། ………………………………60
༡༨ རྒྱལ་བ་རྒོད་ཚང་པའི་རྣམ་ཐར་ཁག་གི་སྐོར། ………………………….62
༡༩ རྒྱལ་བ་རྒོད་ཚང་པའི་རྣམ་ཐར་བསྡུས་ཏེ་བསྟན་པ།…………………..…64

ཨེ་མ་ཧོ། གངས་རིའི་ལྗོངས་ན་མཁས་གྲུབ་སྐར་ཚོགས་དབུས། །
ཡོངས་སུ་སྙན་པས་ཁྱབ་པ་རྒོད་ཚང་པའི། །
རྣམ་ཐར་རྒྱ་མཚོ་ལྟ་བུ་འཁྱིལ་བ་ལས། །
ཅུང་ཟད་བསྡུས་བསྒྲིགས་འཆད་ལ་གནང་བ་སྩོལ། །

ཞིང་གང་དུ་སྐུ་བལྟམས་ཚུལ་སྐོར།

ཆོས་རྗེ་རྒྱལ་བ་རྒོད་ཚང་པ་མགོན་པོ་རྡོ་རྗེ་ཞེས་བྱ་བའི་སྐུའི་སྐྱེ་བ་འདི་ཉིད་ཞིང་གང་དུ་བྱོན་པའི་གནས་ནི། སྤྱིར་མི་མཇེད་འཇིག་རྟེན་གྱི་ཞིང་ཁམས། དེ་ལ་ཡང་གླིང་བཞི་རིགས་མི་འདྲ་བ་མང་པོ་ཡོད་པའི་ནང་ནས་ཀྱང་ད་ལྟའི་གླིང་བཞི་པ་འདི། དེའི་ནང་ནས་ཀྱང་ལྷོ་འཛམ་བུ་གླིང་། དེའི་ནང་ནས་ཀྱང་ལྷོ་བོད་གཉིས་ཀྱི་ས་མཚམས་ལྷོ་བྲག་ཅེས་བྱ་བ། རྗེ་མར་པ་ལོ་ཙཱ་དང་སྣུབས་ནམ་མཁའི་སྙིང་པོ་ལ་སོགས་པ་མཁས་གྲུབ་མང་པོའི་སྐུ་འཁྲུངས་ས། སྒྲ་ཚད་ལ་སོགས་པའི་སྡེ་སྣོད་གསུམ། བྱ་སྤྱོད་ལ་སོགས་པ་རྒྱུད་སྡེ་བཞིའི་ཉན་བཤད་དར་བའི་ས་ཕྱོགས། དོལ་ཆུང་གྲོག་པོ་སྔོན་པོའི་ལུང་པ་ཁྲ་ཞེས་པ་དེ་ཉིད་དུ་བྱོན་པ་ལགས་སོ། །དེ་ལྟར་བྱོན་པའི་ཡབ་ནི། ཡུལ་དེ་ན་རུས་མི་གཅིག་པ་མང་དག་ཡོད་པའི་ནང་ནས་ཆུ་ཅལ་ཞེས་པའི་རིགས་ཡིན་ཅིང་། དེ་ལ་རིན་པོ་ཆེའི་མེས་པོ་ཆུ་ཅལ་བསོད་ནམས་གྲགས་བྱ་བ་ཡིན་ལ། དེའི་སྲས་པོ་རིན་པོ་ཆེའི་ཡབ་ཆུ་ཅལ་མོ་གྲགས་ཞེས་བྱ་བ་དང་། ཡུམ་ནི་གདུང་ཟུག་ཡིན་ལ་མཚན་དཔལ་ལྡན་རྒྱན་བྱ་བ་ཡིན། ཡབ་ཡུམ་དེ་གཉིས་འདུས་པ་ལས་རིན་པོ་ཆེའི་སྔོན་དུའང་སྲས་གཉིས་འཁྲུངས་ཏེ། དེ་གཉིས་ཆུང་དུས་ནས་གྲོངས། དེ་ནས་ཡུམ་དེའི་ལྷུམས་སུ་རིན་པོ་ཆེ་ཉིད་བྱོན་ཏེ། ཟླ་བ་དགུ་དང་ངོ་བཅུ་ནས།
༼སྤྱི་ལོ་1189 ལོར།༽བྱི་ལོ་སྟོན་ཟླ་བ་དང་པོའི་ཚེས་བཅུའི་ཉི་མ་དྲོས་པ་ལ་ཁྱིམ་ལ་འཇའ་ཟུག་པ་དང་། ཉི་ཁྱིམ་ཕུབ་པ་ལ་སོགས་པ་ངོ་མཚར་ཆེ་བའི་ལྟས་མང་པོ་དང་བཅས་སྐུ་བལྟམས་སོ། །སྲས་དེ་ཉིད་འཕྲོ་ངན་པ་སོང་བའི་སྟབས་ལ་བརྟེན་ནས། བཀའ་གདམས་པ་རིན་ཆེན་སྒང་པའི་སློབ་མ། སློབ་དཔོན་ཟུག་སྟོན་ཞེས་བྱ་བ་དེ་ཉིད་སྤྱན་རས་གཟིགས་དབང་ཕྱུག་དང་མགོན་པོ་བྱམས་པ་ལ་གསོལ་བ་བཏབ་པས་ཞལ་མངོན་གསུམ་དུ་གཟིགས་པའི་མཚན་ཉིད་དང་ལྡན་པའི་དགེ་བཤེས་ཤིག་གིས་སིའུ་གསོལ་ནས། མཚན་ཡང་མགོན་པོ་དཔལ་ཞེས་བྱ་བར་གསོལ་ཏེ། དེ་ལྟ་བུའི་སྲས་དེ་ཡང་ཡབ་ཡུམ་གཉིས་པོས་གཅེས་སྤྲས་སུ་མཛད་ཅིང་། སློབ་དཔོན་ཟུག་སྟོན་ཞེས་པ་དེ་ཉིད་ཀྱིས་ཀྱང་སྲིངས་ཤིང་སྲས་ཀྱི་རྩར་ཆོས་སྐྱོང་ལ་གཏོར་མ་གཏོང་བཞིན་བཞུགས་སོ། །

དེ་ནས་ཟླ་བ་དགུ་ནས་སྲས་དེ་འཕྲོ་ངན་པ་ལས་གྲོལ་ཏེ། ཡུམ་གྱིས་རིན་པོ་ཆེ་ཉིད་པང་དུ་བཟུང་ནས། སློབ་དཔོན་དེ་ལ་སྲིངས་རྫོང་སྣམ་བུ་མང་པོ་ཞིག་ཀ་བ་གཅིག་གི་རྩ་ན་འབུལ་ཞིང་འདུག་པ་དྲན་ཏེ། སློབ་དཔོན་དེའི་བྱིན་རླབས་ཀྱང་ཡིན་པ་འདྲ་གསུངས། ལར་ང་མ་ལས་སྐྱེས་ནས་ཞག་དགུ་མན་ཆད་ཀྱི་རྣམ་རྟོག་ཐམས་ཅད་གཅིག་ཀྱང་མ་རྗེད་པར་བཀྲ་ལམ་མེར་ཡོད་གསུངས། དེ་ནས་སྲས་དེ་ཉིད་དགུང་ལོ་གསུམ་བཞེས་པའི་དུས་སུ། ཡབ་དེ་ཉིད་བགྲེས་དྲགས་པ་དང་ལོངས་སྤྱོད་བག་ཙམ་ཟད་སྟབས་ཉིན་གཅིག་ཡུམ་གྱིས་གྲི་བཟང་པོ་ཞིག་མེད་པར་བཏང་བ་ལ་ཡབ་དང་ཁ་འཐབས་ཤོར་བས། ཡུམ་དེ་ཉིད་ཁྲོས་ཏེ་བུ་བསྐྱུར། ཡབ་བོར་མ་ཐབས་སུ་གྱེས་ནས། སྨན་པ་དཀོན་མཆོག་གྲགས་ཀྱི་ཆུང་མ་བྱས་སོ།  །དེ་ལ་ཡང་ལྕམ་སྲིང་གསུམ་བྱུང་སྟེ་གཅུང་རིན་པོ་ཆེ་སེང་གེ་དང་། ཉག་པོ་བྱ་སྟོན་ཡིན་ཞིང་དེ་མན་ཆད་ཡབ་སོ་སོར་ཡིན། ཡབ་སྲས་གཉིས་པོ་ཡུམ་གྱིས་བོར་ཏེ། ནང་གཡོས་བྱེད་མཁན་ཡང་མེད་པར་འོ་བརྒྱལ་བྱུང་། དེ་ཙ་ན་ཡབ་སྲས་གཉིས་ལ་ཕྱག་རྫས་སུ་ར་ལུག་སུམ་ཅུ་ཙམ་ཡོད་པ་དེ་ཚོ་འཚོ་མ་ཤེས་ནས་ཤེ་རུ་བཏང་བས་བེད་མ་ཆོད། ཞིང་དུམ་ཞིག་ཡོད་པ་ལ་སོ་ནམས་བྱས་པས་ལུད་མེད་པའི་སྟབས་ལ་བརྟེན་ནས་ལྗང་པ་སྤར་རེ་མ་གཏོགས་སྐྱེས་སུ་མ་འདོད། དེའི་དུས་སུ་ཡབ་ནི་བགྲེས་ཆེས། རྗེ་འདི་པ་ནི་ཆུང་། ཡུམ་གྱིས་ནི་བསྐྱུར། ནོར་ཟས་ནི་ཟད་ཅིང་དམ་དུམ་ཡོད་པ་རྣམས་ཀྱིས་ཀྱང་བེད་མ་ཆོད་པར་ཤིན་ཏུ་འོ་བརྒྱལ་བ་བྱུང་གསུངས། དགུང་ལོ་ལྔ་པ་བཞེས་པའི་དུས་ན་ཡབ་དེ་ལ་བད་ཀན་སྨུག་པོའི་ནད་ཅིག་ཡོད་པ་དེ་ལངས་ནས་ཁྲག་མང་དུ་སྐྱུགས་ཏེ་གྲོངས་ལ་ཁད་ཅིག་བྱུང་བའི་དུས་སུ། ཁུ་བོ་གཅིག་ན་རེ། ཁ་ཆེམས་མེད་དམ་ཕོག་ཟེར་བས། ཁ་ཆེམས་གཞན་ཅི་ཡང་མེད་དོ། ། །ང་ཤི་བས་མི་སྐྱོན་ཏེ་བུ་འདི་ཀ་སྙིང་རྗེ། ཆུང་ཆུང་ནས་མས་བོར། ད་ལྟ་མ་ཚར་བ་འདི་ལ་ང་ཤི་ན་ངའི་རོ་འདི་ལ་ཁ་ལྷན་ཏེ་འཆི་བར་འདུག་གསུངས་ནས་སྤྱན་ཆབ་ཉི་ལི་ལི་འདུག་སྐད།

དེ་ལྟ་བུའི་མཛད་སྤྱོད་དེ་ལ་ཕྱིས་ཀྱང་རིན་པོ་ཆེའི་ཞལ་ནས། ངའི་ཕ་དེ་སྡུག་པ་ཁོ་རང་ཤི་བ་བས་ང་མ་ཤི་བ་ངོས་ལ་སེམས་འཕྲེང་བ་དེ་ཙམ་བྱུང་གསུངས་ནས། ཐུགས་རྗེ་ཚད་མེད་པ་འཁྲུངས་ཤིང་། ཕ་དེའི་དྲིན་ལན་དུ་ཁོ་རྟག་ཏུ་འཁོར་བར་མི་འཁྱམས་པ་ཞིག་བྱེད་དགོས་གསུངས་ཏེ། རིན་པོ་ཆེ་པ་ཡང་བཤུམས་ཤིང་ལྷག་པར་ཐུགས་འཕྲེང་ཆེ་བར་མཛད་དོ། །དུས་ཕྱི་ཚུན་ཆད་ཀྱང་ཡབ་ལ་ཐུགས་འཕྲེང་ངེ་མཛད་པའི་རྒྱུ་མཚན་དེ་ཡིན་གསུངས།

དེ་ནས་དགུང་ལོ་དྲུག་བཞེས་པའི་དུས་སུ་ཕའི་ནད་དེ་ཡང་གྲོལ་རིན་པོ་ཆེའི་ཐུགས་དགོངས་ལ་ངའི་ཕ་འདིར་དྲིན་ལན་ཞིག་གླན་དགོངས་ཏེ། ཇི་ལྟར་བྱས་ན་དྲག་གམ་སྙམ་པ་ལ། ཀློག་ཅིག་བསླབས་པ་དྲན་པར་མཁྱེན་ནས། ཀ་ཁ་གུག་ཀྱེད་སྡེབ་སྦྱོར་ཀུན་ཡབ་ཀྱིས་ལན་གཅིག་བསྟན་པ་རང་ལ་ཤེས་གསུངས། དེ་ནས་ཡོན་ཏན་སློབ་པ་ལ་སྔ་བ་ལུང་བྱིལ་དུ་སློབ་དཔོན་བས་སྟོན་དང་། གནས་རྩེ་སར་སློབ་དཔོན་ཇོ་རོལ། འཕྲང་གི་གནས་སུ་སློབ་དཔོན་བྱང་དཔལ་གསུམ་ལ་ཀློག་དང་། སྨྲ་སྒོ་མཚོན་ཆ་རིག་པ་ཀློག་པ་སྒྲའི་བསྟན་བཅོས་ལ་སོགས་པའི་ཀློག་བྲིས་མང་དུ་བསླབས་པས་ཤིན་ཏུ་མཁས་པ་བྱུང་། དེ་ནས་ཡུལ་ཕྱོགས་དེར་གསུང་སྒྲོགས་ཤིན་ཏུ་དར་བས་སྐུ་ཆུང་ཆུང་དེ་ལ་ཀློག་བཟང་པོ་ཡོད་པར་བརྟེན་ཀློག་ལ་གདན་འདྲེན་པ་མང་དུ་བྱུང་ནས། ཡབ་དེ་ཉིད་ཀློག་ཡོན་དང་སྐུ་ཁྱོས་ཀྱིས་གསོས་ཤིང་། དུས་དེ་ཙ་ན་དགུང་ལོ་བརྒྱད་བཞེས་པ་ཡིན། དེ་ནས་ཡབ་སྲས་གཉིས་པོ་སྐྱིད་འབོལ་སོང་གསུངས།

དེ་ནས་དགུང་ལོ་བཅུ་བཞེས་པའི་དུས་སུ། ཡུམ་ན་རེ་ངའི་ཅན་དུ་ཉུག་པ་ཞིག་ཤོག་གསུང་བྱོན་པས། ཨ་མའི་སར་ཞང་པོ་ཡང་འདུག དེ་ཙ་ན་ཞང་པོ་ན་རེ། གྲོས་ཡག་པོ་ཐམས་ཅད་ལ་དགའ་བ་ཞིག་ཡོད་པས་ཉོན་ཅིག་ཟེར་བ་ལ། དེ་ཅི་འདྲ་ཞིག་ཡོད་བྱས་པས། ཡུམ་ན་རེ་ཁྱོད་མོན་གྲགས་ཀྱི་བུ་མིན། ལྷ་རྗེ་ཕྱུག་པོ་དཀོན་གྲགས་ཀྱི་བུ་ཡིན་པས། ད་དཀོན་གྲགས་རང་ལ་ཕྲོད་པ་བྱས་ཡོད། ངེད་མིང་སྲིང་ལ་ཡང་རྟ་དང་གཡུ་ལ་སོགས་པ་ནོར་ཆེན་པོ་སྟེར་བར་བྱས་ཡོད་ཅིང་། མོན་གྲགས་ལ་ཡང་ཁྱོད་གསོས་པའི་རིན་དུ་ཞིང་ཁལ་གཉིས་སྟེར་བར་བྱས་ཡོད་པས་ཁྱེད་རང་གཅེས་ཕྲུག་བྱེད། ངེད་ཚོ་ལའང་ཕན་པ་ཞིག་ཡོང་བར་འདུག་པས་གྲོས་བཟང་པོ་དེ་ལ་ཉོན་ཅིག་ཟེར་སྐད། དེར་རིན་པོ་ཆེའི་ཐུགས་དགོངས་ལ། ཕ་དག་ལྷ་རྗེ་དཀོན་གྲགས་ཡིན་སྲིད་དེ། མོན་གྲགས་རྒན་པོ་ཆུང་ངུ་ནས་དུས་ད་ལྟའི་བར་དུ་གཅིག་པོར་གསོས་ཤིང་གཅེས་སུ་བསྐྱངས་ནས་ཕ་བྱས་པ་ཡིན་ཞིང་། ཁོ་རང་འཆི་བ་ལས་ཀྱང་ང་ལ་སེམས་འཕྲེང་བར་བྱས་པས་ད་ཁོ་ལ་ཅི་ཕན་ཞིག་མ་བྱས་ན་ང་སྐྱིད་པའི་ཕན་པ་མེད་སྙམ་ནས། ཡུམ་ལ་འདི་སྐད་གསུངས་སོ། །དང་པོ་ཁྱེད་ཀྱིས་ཆུང་ངུ་ལ་བོར། ད་ཆེར་སོང་བ་དང་བཙོངས་ནས་ཟ་བར་འདུག་པ། ཕ་གཞན་གཅིག་གང་ན་ཡོད་པ་གསུང་བཤུམས་ཏེ། ས་གཏོར་རྡོ་གཏོར་བྱས་པས། ཡུམ་ན་རེ་ཁྱོད་མི་དགའ་ན་ཞོག་ལ་ཐོངས། མིས་གང་ལེགས་ལེགས་ཀྱིས་གྲོས་བསྟན་ཙ་ན་མི་ཉན་པ་འདུག་ཟེར། དེར་ཕ་ཡར་དེ་ན་རེ། ཀ་ཡེ་བྱིས་པ་གྲོས་དེ་ཐམས་ཅད་ལ་ཕན་པ་ཅིག་འདུག་པ་ཉོན། ཁྱོད་མོན་གྲགས་ལ་སེམས་འཕྲེང་བ་ཡིན་ཏེ། མོན་གྲགས་རྒད་པོ་མཇུག་ཏུ་གོ་རུ་སླངས་ནས་བསྲེལ་བས་ཆོག་པ་ཞིག་ཡོང་ཟེར་ཏེ་མ་ཉན། དུས་ཕྱིས་སུ་ཡང་རིན་པོ་ཆེའི་ཞལ་ནས་མའི་གྲོས་དེ་ཉན་ན་རྒན་པོ་མོན་གྲགས་ལྕེབས་པ་ཞིག་ཡོང་བར་འདུག མ་ལྕེབས་ཀྱང་སྡུག་བསྔལ་གྱིིས་འཆི་བ་ཞིག་ཡོང་བར་འདུག་རྒན་པོའི་དྲིན་ལན་དེ་གཅིག་པོའི་ཁྱེར་བ་ཡོད། ཡུམ་དེ་ལ་དུས་དེ་ནས་བཟུང་ད་དུང་འཕྲེང་རྒྱུ་རང་མི་འདུག་གསུངས། དེ་ནས་རིན་པོ་ཆེ་ཡབ་ཀྱི་དྲུང་དུ་གཤེགས་ནས་ཡབ་ལ་ཨ་མས་ང་ལ་ཤོག་ཟེར་ནས་ང་ལ་འདི་སྐད་ཟེར་བྱུང་གསུངས་ནས་གོང་གི་ལོ་རྒྱུས་རྣམས་བཤད་པས། ཡབ་ན་རེ། བུ་ཁྱོད་ཀྱིས་ང་མ་བོར་བ་གོ་བཅད་དོ། །ང་ལ་སྟོབས་ཤིག་ཡོད་པ་ཡིན་ན་མོ་ལ་གང་ཞིག་བྱ་དགོས་པ་ཡོད་ཟེར་ནས་སོ་ཁྲིག་ཁྲིག་འདུག

དུས་དེ་ནས་བཟུང་ནས་ཡུམ་གྱི་མིག་སྔར་མོན་གྲགས་ཀྱི་དྲིན་ལན་འཁོར་བར་བྱས་ནས། ཡབ་གང་དགའ་དགའ་མཛད་པ་ཡིན་གསུངས། སྤྱིར་བུ་ཚས་ཕ་མའི་དྲིན་ལན་འཇལ་བ་ལ་རིགས་གཉིས་ཏེ། ཕ་མ་ཅི་དགའ་བྱེད་པ་དང་། ཅི་ཕན་བྱེད་པ་གཉིས་ལས། དང་པོ་ནི་ཕ་མ་ཁྱིམ་ཐབས་གྱལ་གྱོལ་རེ་བྱས་ནས་དགའ་བ་འདུག་པས། ཁོ་རང་གང་ཟེར་ཉན་པས་ཀྱང་ཕ་མའི་དྲིན་ལན་ཁྱེར་བ་ཙམ་ཡིན་ཏེ། ཁོང་རང་དེ་ཀའི་ཡིད་ཚིམ་ཡོང་བ་ཡིན། ཕ་མ་ལ་ཅི་ཕན་བྱེད་པ་ནི། ཁོ་རང་མི་དགའ་ཡང་ཆེ་བཞག་ཆུང་བཞག་ནས་དམ་པའི་ཆོས་གཤའ་མ་རེ་བྱས་པ་ཡིན་ན། དེ་དྲིན་ཁྱེར་གཞན་གྱིས་མི་དོ། ཁོང་འཁོར་བ་ངན་སོང་ནས་ཐོན་ཡོང་བའི་ཕན་ཆེན་པོ་ཐོགས་པ་ཡིན། ཅི་དགའ་ཡང་འགྲུབ། དེ་ཡང་དང་པོར་ཁོ་རང་ན་རེ། ཁྱོད་ལ་ཆོས་ཤིག་བྱུང་ན་ང་དགའ་སྟེ་ཆོས་རང་ཡོང་བ་དགའ་བྱུང་ན་ལྟ་མི་གཅིག་པོ་ལ་ཆོས་པའི་འོས་བྱ་བ་ཡིན་ཏེ། ང་ལ་ཆུ་བླུད་དང་བསེལ་མཁན་མེད་ཀྱང་། ཁྱོད་ལ་ཆོས་ཤིག་འོང་ན་ཟེར། བར་དུ་ཆོས་བྱས་ནས་ཀྱང་ད་བླ་མའི་དྲུང་རང་དུ་བསྡོད་ལ་སློབ་གཉེར་བགྱིས། ལོ་རེ་ལ་ལན་རེ་ཙམ་ང་དང་འཕྲད་དུ་ཤོག དེ་མིན་ཆོས་པ་ཡུལ་དུ་བསྡོད་པ་བས་ལོད་པ་མེད་པས་དགོན་པ་རང་དུ་སྡོད་ཅིག་ཟེར། ཐ་མ་ཡང་ཏེ་སེ་ལ་བསྒོམ་དུ་འགྲོ་དུས་སུ། འགྲོ་སྙིང་ནི་འདོད། ཕ་རྒད་པོ་འཆི་ཁ་མ་འདི་བོར་ཕྱིན་ན་མིས་ཀྱང་འཕྱ་རུ་ཡོང་། འཆི་ཁར་ཆུ་བླུད་ཅིག་མེད་ན་ཁོ་ཡང་སྙིང་རྗེ་ཡོད་ཙ་ན། ཡབ་ན་རེ། ད་ཆོས་བྱས་ཀྱི་གཏིང་ལ་བསྒོམ་བསྒྲུབ་བྱ་དགོས་པས་ང་ལ་མ་ཆགས་པར་རྒྱུགས་ཤིག ཁྱོད་གྲུབ་པ་ཐོབ་པ་ཞིག་བྱས་ཏེ་ང་ཡང་འདྲེན་དགོས་པ་ཡིན་ནོ། །ཆོས་ཀྱང་ཡོང་ལས་ཆེ། ཁྱོད་སྙིང་རུས་ཆེ་བར་འདུག ངས་ཀྱང་ཁྱོད་ཆོས་བྱེད་པའི་གེགས་སྔ་ཕྱི་བར་གསུམ་དུ་མ་བྱས་པར་གྲོགས་བྱས་པས་དྲིན་ཆེ་བ་ཡིན་ནོ།།

ཕ་མ་གཞན་གྱིས་གེགས་བྱས་པ་མང་པོ་འདུག་སྟེ། ང་ཁྱོད་ལ་ཆོས་རང་བྱུང་ན་དགའ་བས་སྒྲུབ་པ་གྱིས་ཤིག་ཟེར། དེ་ནས་ངས་སྒྲུབ་པ་ལ་ཕྱིན་པ་ཡིན་ཏེ། ངས་ཁོ་ལ་ཅི་ཕན་དང་ཅི་དགའ་གཉིས་ཀ་བྱས་པ་ཡིན་གསུངས། ཁོ་དེ་སྐད་ཟེར་བ་དེས་བསྒྲུབ་པ་བྱེད་པའི་སྙིང་རུས་ལ་ཡང་ཕན་པར་བྱུང་གསུངས། རིན་པོ་ཆེ་ཉིད་དང་པོ་རང་ནས་གླུ་གར་ལ་དགྱེས་པོ་ཡོད་ཅིང་དགུང་ལོ་བཅུ་གཅིག་ཙམ་ལ་ཀློག་ལ་འབོད་པ་མང་དུ་ཡོད་སྟེ། ཀློག་ལས་གླུ་བྲོ་ལ་གཤེགས་པ་དགའ་བ་བྱུང་བས། སྐབས་སུ་མདོ་རྒྱུད་མང་པོ་དང་རྒྱལ་བློན་བྱང་ཆུབ་སེམས་དཔའ་རྣམས་ཀྱི་བསྟན་བཅོས་ཐུགས་ལ་བཟུང་། མི་ཆོས་གནད་ཕྲེང་། སྐྱེ་བོོ་གསོ་ཐིགས་བསྟན་བཅོས། སྙན་ངག་ལ་སོགས་པ་ཚད་མེད་པ་ཐུགས་ལ་མངའ་བས་སྡེབ་སྦྱོར་འགྲིག་པོ་དུ་མ་ཡང་མཛད། སྐུ་མཚར་ལ་མཛེས་པ་བྲོ་གར་ལ་སོགས་པའི་རྣམ་འགྱུར་མཛད་པའི་དུས་སུ། ལྷ་དྲེ་མི་གསུམ་རང་དབང་མེད་པར་འདུས་ཏེ་གང་བྱོན་སར་ཁྲོམ་མང་པོ་ཚོགས་ཏེ་གླུ་གར་དང་རོལ་མོ་མཁས་པས་དགའ་ལྡན་ལྷ་ཚེ་འཕོས་པ་ཡིན་ཅེས་ཀྱང་གྲགས་སོ།།

འགའ་ཞིག་ཡུལ་སྤང་ནས་ཕྱག་ཕྱི་ལ་འབྲངས་ནས་འགྲོ་བ་ཡང་བྱུང་། མྱ་ངན་ཅན་རྣམས་ཀྱི་མྱ་ངན་དང་སྡུག་བསྔལ་སེལ་ནུས་པ་བྱུང་། དེའི་དུས་སུ་པག་ཤི་མཛད་ནས་ལྷ་སར་བསྐོར་བ་ལ་བྱོན་པས། གཞན་རྣམས་ནི་ཚེ་འདིའི་བུ་ནོར་ལ་སོགས་ཞུ་ཡི་འདུག རིན་པོ་ཆེ་ཇོ་བོ་ལ་དད་པ་དང་མོས་གུས་དཔག་ཏུ་མེད་པ་སྐྱེས་ནས་དཔྲལ་བ་ལ་ཤུར་འབུར་བྱུང་བྱུང་ཕྱག་འཚལ། བསྐོར་བ་ནུས་ཚད་དུ་བྱས། ཅིས་ཀྱང་ཆོས་རང་ཁོ་ན་ཡོོང་བའི་དངོས་གྲུབ་ཞུས་པས་དུས་དེ་ནས་དད་པ་ཅན་དུ་གྲགས་སོ། །ལར་རིན་པོ་ཆེ་བ་དགུང་ལོ་བཅུ་གཉིས་པ་ནས་བཅུ་དགུའི་བར་དུ་ལྷ་སའི་ཇོ་བོར་ལོ་རེ་ལ་ལན་གསུམ་གསུམ་བསྐོར་བ་བྱས་ནས། བྲོ་གར་གླུ་གསུམ་གྱིས་མཆོད་ཅིང་ཅིས་ཀྱང་ཆོས་ཤིག་ཡོང་བར་གསོལ་བ་བཏབ་པ་ཡིན་ཏེ། དེ་ཁོ་ན་ལྟར་བྱུང་གསུངས།

ལྷ་སའི་ཇོ་བོ་ལ་ཆོས་ལ་གཤེགས་པའི་བྲོ་དབྱངས་ཕུལ་བ་ཡང་། ཚེ་འདི་དར་ཙམ་ཡུད་ཙམ་ཡིན། །ཕྱི་མ་བྱ་བ་གཏན་གྱི་ཡུལ། །གཏན་ཡུལ་དེ་རུ་སླེབས་ཙ་ན། །སྐྱེས་པའི་ཕ་ཡུལ་བྱས་ཀྱང་བསླུ་བསླུ་འདྲ། པག་ཤི་ང་ནི་མི་སྡོད་ཆོས་ལ་འགྲོ །དོན་གྲུབ་སེང་གེ་མི་སྡོད་ཆོས་ལ་འགྲོ །ཞེས་སོགས་ཆོས་ལ་ཕེབས་པའི་སྨོན་ལམ་ཚིག་མགུར་མང་དུ་གསུངས་ཤིང་། དེ་དུས་བ་རང་རྡོ་རྗེ་འབུམ་བྱ་བ་བྱུང་ནས། པག་ཤི་ཇི་སྐད་བྱ་བ་ཡིན་ཟེར་བས། དོན་གྲུབ་སེང་གེ་བྱ་བ་ཡིན་གསུངས་པས། ཕྱིས་ཁོ་ན་རེ། དོན་གྲུབ་སེང་གེ་རང་ཞིག་བྱུང་འདུག་ཟེར་སྐད།

དགུང་ལོ་བཅུ་དྲུག་བཞེས་པའི་དུས་སུ། འཇིག་རྟེན་པའི་བྱ་བ་གང་དང་གང་ལ་མཁས་པར་གྱུར་ཀྱང་། འདོད་མ་རང་ནས་ཐུགས་ངེས་འབྱུང་ཆེ་ཞིང་འཁོར་བའི་སྡུག་བསྔལ་འདི་གཏིང་རང་ནས་སུན་ནས་ཆོས་ཤིག་ཅིས་ཀྱང་བྱ་དགོས་སྙམ་པ་དེ་རྒྱུན་མ་ཆད་པར་ཡོད་པས་ངེས་འབྱུང་གི་དད་པ་བརྟན་པོ་འདི་ཆོས་ཀྱི་གཞི་མ་ཡིན་ཏེ། ང་ལ་དད་པ་འདི་བྱིས་པའི་དུས་དུ་གཞན་བས་ཆེ་བ་ཞིག་ཡོད། སློབ་དཔོན་མཐོང་ཚད་ལ་ཆོས་ཉན་མོས་གུས་བྱས་བྱིན་རླབས་ཞུས། ཆོས་རང་ཡོང་བར་གསོལ་བ་བཏབ་གསུངས། དེ་ཡང་ཆོས་གསན་པ་ལ་སྔ་བ། མཁན་པོ་ཁྱེ་དགའ་བྱ་བ་ལ་བསྟན་རིམ་གསན་པས། སྣང་བ་འདི་སེམས་ཡིན་སེམས་སྟོང་པ་ཡིན་ཞེས་གསུངས་པས་དེ་རང་གཞན་དང་མི་འདྲ་བའི་གོ་རྟོགས་བཟང་པོ་ཞིག་བྱུང་སྟེ། ང་ལ་ཆོས་ཀྱི་ལན་ཕྲོ་ཞིག་ཡོད་པར་འདུག་གསུངས།

གཞན་ཡང་སློབ་དཔོན་ཞམ་ལས་ལམ་རིམ་གསན། སློབ་དཔོན་སྟོང་ལས་དབུ་མ་གསན། སློབ་དཔོན་ཡུ་བོ་ལས་སྤྱོད་འཇུག་གསན། སློབ་དཔོན་ཞང་ལ་འགྲེལ་ཆུང་དང་གཞན་ཡང་ཆོས་མང་དུ་གསན་ཏེ། དེ་ཐམས་ཅད་ཚེགས་མ་བྱུང་ལན་རེ་རང་ལ་ཤེས་པ་བྱུང་གསུངས། དེའི་དུས་སུ་ཆོས་རྗེ་རྒོད་ཚང་པའི་ཐུགས་དགོངས་ལ་མདོ་རྒྱུད་བསྟན་བཅོས་རྣམས་ལ་ཐོས་པ་བྱེད་པ་འདི་ཀ་ཡང་ཆོས་ཡིན་ཏེ་ཆོས་བྱེད་ལུགས་ཀྱང་དང་པོ་ཙ་ན་ལེགས་པར་གསུངས་པའི་ཆོས་འདུལ་བ་ནས་བཟུང་། སྡེ་སྣོད་མཐའ་དག་བསླབ་པར་དགོངས་པ་བྱུང་དེ་བས་ཀྱང་སེམས་ཉིད་གཉུག་མའི་དོན་ཞིག་མ་རྟོགས་ན། འཁོར་བ་ལས་ཐར་བའི་དུས་མི་འདུག་པས། སེམས་ཉིད་རྟོགས་པར་བྱེད་པའི་ཐབས་ལ་མཚད་ཉིད་ལྡན་པའི་བླ་མ་དམ་པ་ཞིག་དགོས་པ་བཤད་པས་དེ་ལ་བརྒྱུད་པ་ནི་གང་བཟང་། བླ་མ་མཚན་ཉིད་དང་ནི་གང་ལྡན་སྙམ་པའི་ཐུགས་དགོངས་བཏང་བ་ལས་བཀའ་གདམས། ཞི་བྱེད། དཱགས་པོ་བཀའ་བརྒྱུད་གསུམ་ལ་ལྷག་པར་མོས་པ་ཞིག་ཡོད་དེ། དེ་གསུམ་གང་བཟང་མ་ཤེས་གདམས་ཁ་ཡོད་ཙ་ན། ནུབ་ཅིག་གི་མཚན་ལམ་ན། བརྒྱུད་པ་བཟང་པོ་མང་ལགས་ཀྱང་། དྭགས་པོ་བཀའ་བརྒྱུད་གོང་ན་མེད། །གདམས་ངག་བཟང་པོ་མང་ལགས་ཀྱང་། བླ་མའི་མོས་གུས་གོང་ན་མེད། །ཅེས་པ་ལ་སོགས་རྨིས། དེ་ནས་དྭགས་པོ་བཀའ་བརྒྱུད་པའི་དགེ་བའི་བཤེས་གཉེན་གཅིག་གི་དྲུང་དུ་གཤེགས་པར་ཆས་པ་དང་། ཡུལ་བའི་ཉེ་འབྲེལ་བྱིས་པ་གཞོན་པ་རྣམས་ཀྱིས་ཤ་ཆང་མང་པོ་དྲངས། སྣམ་བུ་མང་པོ་ཕུལ་ནས་ཆོས་ལ་ཕྱི་བཤོལ་བྱས། དེ་ཙ་ན་ངེད་གྲོགས་མཆེད་གསུམ་གྱིས་མཚན་ཉིད་པའི་ཆོས་མ་ཡིན་པའི་སྒོམ་ཆོས་གཤའ་མ་རེ་བྱེད་པར་བྱས་ནས་གནའ་རྗེས་དཔང་པོ་བཙུག་བྱས་པ་ཡིན་ཏེ། ཁོང་གཉིས་པོ་ཆོས་ལ་མ་ཐོན། ངས་ཆོས་མ་བྱས་ན་ཡེ་ནས་འཁོར་བར་འཁྱམས་པ་ལས་མི་འདུག་པ་ལས་མནའ་ཟོས་ན་ངན་སོང་གི་སྡུག་བསྔལ་བཟོད་རེ་དགོངས་ནས་སྒོམ་ཆོས་གཤའ་མ་ཞིག་བྱས་པ་ཡིན་གསུངས།

དེ་ནས་དགུང་ལོ་བཅུ་དགུའི་བར་དུ་རིན་པོ་ཆེ་བས་ཆོས་ལ་འགྲོ་དགོངས་ནས་ལོ་རེ་ལ་འགྲོ་ཐབས་རེ་མཛད། ཁོང་ཚོོས་ལོ་རེ་ལ་གཤོལ་འདེབས་རེ་བྱས། དགུང་ལོ་བཅུ་དགུའི་བར་དུ་སྒོམ་ཆོས་ལ་མ་ཐོན། ལར་དང་པོ་ནས་མི་ཐམས་ཅད་ནས་བྱམས་པ་ཞིག་བྱུང་སྟེ། འཇིག་རྟེན་གྱི་མི་ཁ་བྱམས་པ་ལ་དགའ་རྒྱུ་མི་འདུག་ཆོས་ཀྱི་གེགས་ཆེ་བར་འདུག དེ་ཙམ་ལོ་རེ་ལ་མདོ་སྡེ་མ་ལུས་པ་ཚར་གཉིས་གཉིས་གཟིགས་པས་ཉིན་མོ་གཟིགས་པ་དེ་མཚན་མོ་ཐུགས་ལ་ཧྲོབ་སེ་བ་རེ་ཡོང་གི་འདུག དེས་ན་མདོ་སྡེ་མ་ལུས་པ་ལ་ད་ལྟ་མཁས་པའི་རྒྱུ་མཚན་དེ་ཡིན་གསུངས་སོ།  །

 

དགུང་ལོ་བཅུ་དགུ་ལ་མཚན་ལྡན་བླ་མ་རྣམས་མཇལ་ཚུལ་སྐོར།

དེ་ནས་རྗེ་རྒོད་ཚང་པ་ཉིད་དགུང་ལོ་བཅོ་བརྒྱད་པ་བཅུ་དགུ་ཁ་ཟློག་གི་ལྟས་ལོ་གསར་ལ། ཆོས་ལ་འགྲོ་བར་ཆས་པ་དང་། ཡང་ཉེ་འབྲེལ་དང་བྱིས་པ་རྣམས་ཀྱིས་ཤ་ཆང་མང་པོ་དྲངས། སྣམ་བུ་མང་པོ་ཕུལ་ནས་ཆོས་ལ་ཕྱི་གཤོལ་བྱེད་ཅིང་ཡོད་པའི་དུས་སུ། སྒོ་རྩ་ན་གཙང་པའི་གླུ་མཁན་བསྲུན་མོ་བྱེད་པ་ཞིག་ན་རེ།

འབྲུག་ར་ལུང་གི་ཆོས་རྗེ་རྒྱ་རས་ལ། །སངས་རྒྱས་ལག་གཏད་ཀྱི་གདམས་ངག་བདོག །
མི་འོ་སྐོལ་ཚོ་དེ་རུ་གཤེགས་སམ་ཀྱེ། །སྙིང་ནས་རང་དུ་ཆོས་ལ་གཤེགས། །
དགོན་པ་འབྲི་ཁུང་གི་ཆོས་རྗེ་ཀྱུ་རུ་ལ། །ཚེ་འདི་ཕྱི་གཉིས་ཀྱི་བདེ་ལེགས་ཡོད།།
མི་འོ་སྐོལ་ཚོ་དེ་རུ་གཤེགས་སམ་ཀྱེ། །སྙིང་ནས་རང་དུ་ཆོས་ལ་གཤེགས། །

ཞེས་པའི་གླུ་དེ་ཐོས་པས། དེ་ལྟ་བུའི་བླ་མ་དེ་གང་ན་བཞུགས་ཞེས་དྲིས་པས། དེ་འདི་དང་འདི་ལྟ་ན་བཞུགས་ཞེས་པའི་གླེང་མོལ་ཞིབ་མོ་གསན་པས། ཆོས་རྗེ་རས་པ་ལ་མོས་གུས་ཀྱི་གདུང་ཤུགས་དྲག་པོ་སྐྱེས་ཤིང་སྣང་བ་ཐམས་ཅད་བན་བུན་དུ་སོང་། མོས་གུས་དེ་ལས་ཆེར་མི་བཏུབ་པ་ཞིག་བྱུང་སྟེ། སྐྱེ་བ་སྔ་མའི་ལས་འཕྲོ་ཡོད་པ་ལ། སད་བྱེད་རྐྱེན་དེས་བྱས་པར་འདུག་གསུངས། དེ་ནས་སློབ་དཔོན་ཟུར་སྒོམ་བྱ་བ་ཆོས་རྗེའི་སློབ་མ་ཞིག་ལ་འདྲེན་པའི་བླ་མ་ཞུས་ནས། ཡབ་ལ་ཆོས་རྗེ་རས་པ་མཇལ་དུ་འགྲོ་བའི་གྲབས་ཞུས་པས། མི་གཅིག་པོ་ཆོས་བྱེད་པའི་འོས་ཡིན་ཟེར་དགའ་བཞིན་དུ་གནང་ནས་སྣམ་བུ་ལ་སོགས་པའི་ཀ་ཆ་མཚོན་པ་ཞིག་ཀྱང་བསྡོགས་ཤིང་ཡབ་དང་གྲོས་བྱས་ནས་འགྲོ་བའི་ནུབ་མོ། ཡབ་ན་རེ་རྨི་ལམ་ནི་བཟང་། ནམ་མཁའ་ན་ཡར་ལ་གསེར་གྱི་སྐས་ཤིག་བཙུགས་དེ་ལ་ཁྱོད་སོང་བ་རྨིས། ཆོས་འོང་བར་འདུག་གསུངས། ཕ་རྒན་པོ་རྨི་ལམ་དེ་རྟགས་ཅན་དུ་བྱུང་བ་ཡིན་གསུངས་ཤིང་། དུས་དེ་དང་མཚུངས་པར་ཡུམ་ལ་མཚན་ལམ་དུ་ཡང་ཁོ་ལུང་པ་ཞིག་གི་ཕུ་ན་མེ་ཏོག་གི་ཐང་ཆེན་པོ་ཞིག་ལ་བཞུགས་ཀྱིན་འདུག་པས། དེ་ན་སྐྱེས་པ་དང་བུད་མེད་མང་པོས་མེ་ཏོག་གཏོར་ཀྱིན་འདུག དེའི་ནང་ནས་ཀྱང་བུད་མེད་མང་བ་འདུག་གསུངས་སྐད་དོ། །དེ་ནས་སློབ་དཔོན་ཟུག་ལ་རོགས་བཅོལ་ནས། ར་ལུང་དུ་བྱོན་པས་སླེབ་ཐོག་རང་ལ་ཆོས་རྗེ་གཙང་པ་རྒྱ་རས་པ་ཡེ་ཤེས་རྡོ་རྗེ་མཇལ། དེ་ཙ་ན་ཚོགས་ཆོས་གསུང་གིན་འདུག་སྟེ། ཞལ་མཐོང་བ་ཙམ་ལ་མོས་གུས་ཚད་མེད་པ་བྱུང་། ང་ལ་བླ་མ་འདི་འདྲ་དང་མཇལ་སྙམ་པ་བྱུང་། དེའི་ནངས་པར་སྐུ་དྲུང་དུ་བྱོན་ཏེ་མཇལ་ཙམ་ལ་ཞལ་འཛུམ་མཛད་ནས། ཁྱེད་སླེབ་བམ་གསུངས་པས་དེ་ལ་སྐྱིད་ཟིང་བ་ཞིག་བྱུང་། ཆོས་རྗེ་བས་སྐྱེ་བ་སྔ་མོ་ནས་སྲས་སུ་མཁྱེན་པར་འདུག་དེ་ཀའི་ཉིན་གཏོར་དབང་ཞིག་གནང་། དེ་ནས་སྐྲ་བཅད་ཆོས་སྒོར་ཞུགས་པས་མཚན་ཡང་མགོན་པོ་རྡོ་རྗེ་ཞེས་གསོལ་ཏེ། དེ་དུས་མཁན་པོ་ལ་སྟོད་པ་དང་སློབ་དཔོན་བསམ་ཡས་པ་ལ་རབ་ཏུ་བྱུང་ནས་འདུལ་བ་མདོ་རྩ་གཉིས་འཁྲིད་གཅིག་ལ་མཁས་པ་བཤད་པས་ཆོག་པ་བྱུང་ཞིང་དེ་ལ་མཁན་པོ་ཤིན་ཏུ་མཉེས། དེ་ནས་སྔོན་འགྲོའི་གདམས་ངག་ཕོག་ནས་ཁྲིད་བསྐྱངས་པས་ཞག་ཉི་ཤུ་ལ་སེམས་ངོ་ལེགས་པར་ཤེས་པ་ཞིག་བྱུང་གསུངས། འབྲུག་ཏུ་བྱོན་ནས་ཟླ་བ་གསུམ་བླ་མ་བསྒྲུབ་པ་མཛད། བླ་མ་སངས་རྒྱས་ཀྱི་འདུ་ཤེས་བསྒོམ་དེའི་དུས་བརྒྱུད་པའི་གསོལ་འདེབས་ཡང་མཛད་དོ། །ཡང་ལན་ཅིག་ཙ་ན་ཆོས་རྗེའི་དྲུང་དུ་ཕྱིན་པས་སྤྱན་ཆེར་གཟིགས་ནས་འཛུམ་མཛད་དེ། ཁྱོད་འདིར་ཚོགས་པའི་བུ་སློབ་རྣམས་ཀྱི་ནང་ནས་མོས་གུས་ཆེ་བ་ཞིག་འདུག་གི་ཆོས་འདི་ལ་ཁྱོད་ཀྱི་ཆོས་སྐལ་གྱིས་ཤིག་གསུངས་ནས། གཏོར་དབང་གཅིག་དང་བཅས་བླ་མ་བསྒྲུབ་པའི་གདམས་ངག་ཞལ་གདམས་དང་བཅས་པ་ཤིན་ཏུ་ཟབ་པ་དེ་གནང་ནས། བུ་ཁྱོད་ལ་ཆོས་མང་པོ་མི་དགོས་འདི་གཅིག་པུར་ཆོས་སྐལ་གྱིས་ལ་འདི་ཁོ་ན་ཉམས་སུ་ལོངས་སངས་ཡང་འདིས་རྒྱ། བྱང་ཡང་འདིས་ཆུབ་པ་ཡིན་གསུངས། དེ་ནས་མོས་གུས་དཀར་པོ་ཆིག་ཐུབ་བྱ་བ་འདི་རྒོད་པོ་ངའི་ཆོས་སྐལ་ཡིན་དེ། ངས་ཚེ་གང་དུ་འདི་ཀ་ལ་འབད་པས་སྒྲོ་འདོགས་ཐམས་ཅད་ཀྱང་ཆོད། གེགས་ཀྱང་སེལ། བོགས་ཀྱང་ཐོན། ཡོན་ཏན་ཐམས་ཅད་འདི་ལས་སྐྱེས་པ་ཡིན་གསུངས། གཞན་ཡང་དེའི་དུས་ན་དབང་བྱིན་རླབས་རྩ་ལྟུང་དང་། བླ་མ་ལྔ་བཅུ་པ། སྒྲུབ་ཐབས་བཅུ་གསུམ་ཞལ་གདམས་གཉིས་དང་། གསང་སྤྱོད་རྣལ་འབྱོར་བ་བཞི། ཁྲིད་ཆེན་བརྒྱད། ཐབས་ལམ་རོ་སྙོམས། རྟེན་འབྲེལ་གསུམ་གྱི་སྐོར། ལས་ཕྲ་རྒྱས་ལ་སོགས་མདོར་ན་སྐྱབས་འགྲོ་ནས་ཕྱག་རྒྱ་ཆེན་པོའི་བར་གྱི་དབང་བྱིན་རླབས་གདམས་ངག་སྒྲུབ་ཐབས་ལ་སོགས་པ་ཐམས་ཅད་ཆོས་རྗེ་རང་ལ་ཚང་བར་ཞུས་པ་ཡིན།

དེ་དུས་དབུས་གཙང་ན་སྒྲ་ཚད་སྡེ་སྣོད་རྒྱུད་སྡེ་ལ་སོགས་པའི་ཉན་བཤད་ནམ་ལངས་ཉི་མ་ཤར་བ་ལྟ་བུ་ཡོད་པས། སྟོན་པ་ཐམས་ཅད་སོས་ཀར་སོང་བ་དང་། གྲྭ་ས་བསྐོར་བསྐོར་རེ་རེ་མཛད་ཅིང་། ར་ལུང་དུ་སྟོན་པ་རྣམས་དང་ཆོས་ཀྱི་བགྲོ་གླེང་མཛད་པས་སུས་ཀྱང་མ་ཐུབ་པར་ཤེས་རབ་ཆེ་བའི་གྲགས་པ་ཐོབ་གསུངས། ལར་ངའི་བླ་མ་ལོ་ངོ་གསུམ་བསྟེན་དུ་བྱུང་སྟེ། དེ་ཡང་ཟླ་བ་ཧྲིལ་་པོ་བཅོ་བརྒྱད་ལས་མ་བྱུང་། དེའི་བར་ལ་ཡང་ཆོས་རང་བར་མ་ཆད་པར་ཀྲིག་གེ་གསུངས་པ་ཟླ་བ་གསུམ་དུ་ལོངས་པ་མ་བྱུང་སྟེ། ང་རང་གིས་མོས་གུས་བྱས་པས་སྒྲོ་འདོགས་ཐམས་ཅད་ཆོད་པ་བྱུང། ལར་གསོལ་བ་རང་འདེབས་ཀྱིན་སེམས་ལ་མ་ཡེངས་པར་བལྟས་པས་སྒྲོ་འདོགས་ཐམས་ཅད་ནང་ནས་ཆོད་འོང་བར་གདའ་འོ་གསུངས་སོ། །
ཆོས་རྗེ་རྒྱ་རས་པ་སྐུ་ཁམས་ངན་པར་སོང་ནས་སྐུའི་རིམ་འགྲོ་མང་པོ་མཛད་གསུངས། དེ་ནས་སྐུ་ཁམས་དྭངས་ནས་རིན་པོ་ཆེ་ལ་འབྲི་ཁུང་གཟིགས་སུ་འགྲོ་བར་ཞུས་པས་གནང་སྟེ། དབུ་རུ་བྱང་གི་བླ་མ་བཟང་པོ་ཐམས་ཅད་ལ་ཆོས་འབྲེལ་ཞུས། མོས་པ་བྱུང་ན་དེར་བསྡོད་སྐྱེ་བ་སྔ་མའི་བླ་མ་ཡིན། སྡོད་སྙིང་མ་འདོད་ན་འདིར་ཤོག་གསུངས། དེ་ནས་འབྲི་ཁུང་དུ་བྱོན་ནས་རྗེ་འབྲི་ཁུང་དྲུང་ནས་ལྔ་ལྡན་སོགས་ཆོས་ཞུས། དེ་ནས་རྭ་སྒྲེང་། སྟག་ལུང་། ཚལ་པ་ལ་སོགས་པའི་དགོན་པ་ཆེ་དགུ་ཐམས་ཅད་གཟིགས་ཤིང་བླ་མ་བཟང་དགུ་ཐམས་ཅད་ལ་ཆོས་འབྲེལ་ཞུས་པས། སླར་ཆོས་རྗེ་རས་པ་ལ་མོས་གུས་ཆེ་རུ་སོང་ནས་སྤྱན་སྔར་བྱོན་པས། ཆོས་རྗེ་རས་པ་སྐུ་གཤེགས་ནས་གསུང་ཆེམས་ལ་ཚེ་འདི་ཐོང་ལ་གནས་རི་ཁྲོད་ཀྱི་དགོན་པ་འགྲིམས་ཤིག་བྱ་བའི་གསུང་ཆེམས་བཞག་འདུག

དེ་ནས་ཞག་དགའ་ནས་ཚོགས་པ་རྣམས་ལ་སྤུར་མཇལ་ཞིག་གཏོང་གི་འདུག་པར་སྤུར་ཞལ་མཇལ་བས་གདུང་བས་མོས་གུས་ཆེན་པོ་སྐྱེས་ཏེ། བླ་མའི་བསྐྱེད་རིམ་དེ་ལ་གནོད་པ་བྱུང་། དེར་ཞག་བདུན་ཙམ་བླ་མའི་བསྐྱེད་རིམ་གསལ་བཏབ་ཅིང་གདུང་བས་གསོལ་བ་བཏབ་པས་ཐུགས་ཀྱི་ཉམས་སྣང་ལ་ལྷོ་བྲག་མཁར་ཆུ་ལ་རྒྱུག་ཞེས་པའི་ལུང་བསྟན་ཞིག་བྱུང་སྟེ་འབྱོན་པར་ཐུགས་ཐག་བཅད། དེའི་སང་ཕོད་དགུན། ཆོས་འཁོར་ཆེན་མོ་ཡང་མཛད་པས་ཆོས་རྗེ་རང་གི་གྲྭ་པ་ཐམས་ཅད་ཚོགས་པ་ལ། གདུགས་ཐོགས་པའི་བུ་ཆེན་ལྔ་བརྒྱ། དགེ་འདུན་སྟོང་ཕྲག་བརྒྱད་དང་བརྒྱད་བརྒྱ་བྱུང་། དེ་དུས་ཆོས་རྗེ་དབོན་རས་པ་ལ་བདེ་མཆོག་གི་དབང་མོ་ཆེ་དང་། ཟབ་ཆོས་ཆ་སྙོམས་དབང་བཞི་ལ་སོགས་པ་ཡང་ཞུས། སྒྲུབ་ཐབས་དང་གདམས་ངག་གི་དཔེ་རྣམས་ཀྱང་ཐོབ། སྔར་ཆོས་མ་ཐོབ་པའི་དཔེ་ལུང་རྣམས་ཀྱང་གསན། གསན་པ་རྣམས་ཀྱི་སྒྲོ་འདོགས་ཐམས་ཅད་བཅད་པར་བྱས་པ་ཡིན་གསུངས་སོ།།

དགུང་ལོ་ཉི་ཤུ་རྩ་གཉིས་ལ་ལྷོ་བྲག་མཁར་ཆུར་སྒྲུབ་པ་ལ་བྱོན་པའི་སྐོར།

དེ་ནས་དགུང་ལོ་ཉི་ཤུ་རྩ་གཉིས་པ་ལ་བླ་མའི་ལུང་བསྟན་ལྟར་ལྷོ་བྲག་མཁར་ཆུ་ཞེས་བྱ་བ་དེར་བྱོན། ཡུལ་ཉི་ཤུ་རྩ་བཞིའི་ཐུགས་ཀྱི་འཁོར་ལོ་དེ་ཝ་ཀོ་ཌི་བྱ་བ་ལྷོ་བྲག་མཁར་ཆུ་ཞེས་གྲགས་པའི་སྣུབ་ནམ་མཁའི་སྙིང་པོ་དང་། ཆོས་རྗེ་རས་པའི་སྒྲུབ་གནས་དེར་བྱོན་ནས་ལོ་གསུམ་བསྒྲུབ་པ་མཛད་པས་གནས་དེ་རུ་ཉི་ཁར་རྐྱེན་གྱིས་མི་གནོད་པའི་དགེ་སྦྱོར་འཕེལ་ཞིང་འགྲིབས་པ་མེད་པ་དེ་རུ་བྱུང་བ་ཡིན་གསུངས། བླ་མའི་སྐུའི་མྱ་ངན་བྱ་ཕྱིར་ལོ་གསུམ་སྒྲུབ་པ་བྱས་ལ། དེ་ནས་སློབ་གཉེར་ཞིག་བྱས་ན་དགོངས་པ་ཞིག་བྱུང་ནས། སྒྲུབ་པའི་དམ་བཅའ་ཐོན་དུ་ཆ་ཡོད་པས། དེའི་ནུབ་མོ་རྨི་ལམ་དུ་ཆོས་རྗེ་གཙང་པ་གསལ་པོར་བྱོན་བྱུང་། དེའི་དུས་སུ་རྗེ་ལ་འཇུས་ནས་གསོལ་བ་བཏབ། བདག་གི་འདུན་མ་ཇི་ལྟར་བགྱི་ལགས་ཞེས་ཞུས་པས། ཆོས་རྗེའི་ཞལ་ནས་བུ་སྙིགས་མའི་དུས་འདིར་ཚེ་ལ་ལོངས་མེད་པས་སྒྲུབ་པ་བྱེད་པ་རང་གལ་ཆེ། ཆོས་བསླབས་ཀྱང་མ་བསྒོམ་ན་སངས་མི་རྒྱ་བས། སྒྲུབ་པ་ཁོ་ན་གྱིས་ལ། གངས་ཏི་སེ་ལ་རྒྱུག་རྗེ་བཙུན་མི་ལིའི་རྣམ་ཐར་སྐྱོང་། ཕར་འཆང་བའི་འགྲོ་དོན་གང་ཡང་མ་བྱེད། ཚུར་འདུས་པའི་གདུལ་བྱ་ཐམས་ཅད་རི་ཁྲོད་ནས་སྐྱོངས་གསུངས། དུས་དེ་ནས་བཟུང་སྟེ་སྐུ་ཚེ་གང་པོར་སྒྲུབ་པ་བྱེད་པར་ཡང་ཐུགས་ཐག་བཅད་པ་ཡིན་ནོ།།

དགུང་ལོ་ཉེར་ལྔ་ལ་གངས་ཏེ་སེ་དང་ཛ་ལན་དྷ་ར་ལ་བྱོན་པའི་སྐོར།

དེ་ནས་བླ་མའི་ལུང་བཞིན་དགུང་ལོ་ཉེར་ལྔ་ལ་གངས་ཏི་སེ་ལ་བྱོན་པར་དགོངས་ཏེ། དབུས་ཀྱི་གཞུང་ན་རིན་པོ་ཆེ་དབོན་རས་པ། བླ་མ་སྔོག་པ་ལ་དགྱེས་རྡོར་གྱི་དབང་ཞུ་གིན་འདུག་པ་དང་མཇལ་ནས་ཏི་སེ་ལ་འགྲོ་བའི་གནང་བ་ཞུས་པ་ཐོབ། དེ་ནས་ཕ་རྒད་པོ་ལ་སྟོད་ཛ་ལན་དྷ་ར་དང་ཏི་སེ་ལ་རོ་སྙོམས་ལ་འགྲོ་བར་ཞུས། ཡབ་ན་རེ་བུ་ཁྱོད་ཚེ་བློས་བཏང་གི་སྒྲུབ་པ་བྱེད་པ་ལ། ང་མི་དགའ་བ་མེད་ཀྱི་ང་ཤི་ཡང་འདྲ། ཁྱེད་རང་ང་ལ་མ་ཆགས་པར་དགེ་སྦྱོར་ལ་འབུངས་ཤིག་གསུངས། ཡབ་དང་གཉིས་གསུང་བགྲོས་ལ་སོགས་མཛད་ནས་རྐྱང་དཔལ་རྡོ་རྗེ་དང་གཉམ་དུ་ཁོང་གཉིས་པོ་ཏི་སེ་ལ་བྱོན་པ་ཡིན་གསུངས། དེ་ནས་ཡར་བྱོན་ནས་ཆུ་བོ་རིར་ཆོས་རྗེའི་བཞུགས་གནས་རྣམས་སུ་ཞག་རེ་བཞུགས་པས་དགེ་སྦྱོར་འཕེལ་བར་བྱུང་གསུངས། དེ་ནས་ལམ་ཁ་རག་གཙང་ནས་ཡར་ཐོན། ཡར་ལམ་ཚོང་འདུས་གོར་མོར་བྱོན་ནས་གྲུབ་ཐོབ་ཆད་ལ་མཇལ། བར་ཆད་མི་འོང་བར་བྱིན་རླབས་ཞུས་པས། ཚད་པའི་ནད་ཅིག་འོང་ཉེ་ཡོད། བར་ཆད་དུ་མི་གཅོད་གསུངས། དེ་ཡང་ཚོད་དུས་ནས་ལམ་ཐོན་ནས་ལ་སྟོད་ལྷོ་ན་ཡར་ཟངས་ཀྱི་བྱོན་པས་འཚོ་བ་ཤིན་ཏུ་དཀའ་བ་ཉུང་མ་འདྲ་བ་ལས་མ་རྙེད།

ལ་སྟོད་གྲུ་བཞི་སྨོན་མཁར་བྱ་བ་ན་དགེ་འདུན་སྟོང་ཕྲག་གཅིག་ཙམ་སྟོན་མོ་ལ་ཚོགས་ནས་འདུག ཆོས་ཀྱི་འགྲོ་གླེང་བྱེད་ཅིང་འདུག་པ་ལ། ཁམས་སྟོན་ཤེས་རྒྱལ་ཟེར་བ་དབུ་མ་རིགས་པའི་ཚོགས་དྲུག ཚད་མ་རྣམ་ངེས། རྣམ་འགྲེལ་བསྡུས་པ་གསུམ་ཐུགས་ལ་མངའ་བ། ཕ་རོལ་ཏུ་ཕྱིན་པ་འགྲེལ་ཆུང་ཡས་བླུག་མས་བརྩིགས་སུ་བཤད་པ་ཡིན་ཟེར་བ་ཞིག་དང་། རྗེ་རྒོད་ཚང་པས་བགྲོ་གླེང་མཛད་པས་ཁམས་སྟོན་དེ་ན་རེ། ད་ལྟ་བོད་ཁ་བ་ཅན་གྱི་ལྗོངས་ན། ང་བས་ཐོས་པ་ཆེ་བ་ནི་བསམ་གྱིས་མི་ཁྱབ་ཅིང་དཔག་མེད་དེ། ཤེས་རབ་ང་བས་ཆེ་བ་མེད་སྙམ་པའི་ང་རྒྱལ་ཡོད་པ་ལ། ངའི་ང་རྒྱལ་སྒོམ་ཆེན་གཞོན་ནུ་ཁྱོད་ཀྱིས་བཅག ཁྱོད་ལ་ཞྭ་འབུད་པ་ཡིན་གསུངས་སྐད།

དུས་ཕྱི་ཙ་ན་རྗེ་རྒོད་ཚང་པ་སྟེང་འགྲོ་ན་བཞུགས་དུས་ཁམས་སྟོན་དང་རྒོད་ཚང་པ་ཡང་ཆོས་ཀྱི་གཏམ་བྱས་པས་རྒོད་ཚང་པ་རྒྱལ། ཐར་ཁམས་སྟོན་མོས་གུས་སྐྱེས་ནས་རྒོད་ཚང་པ་ལ་ཆོས་འབྲེལ་ཞུས་སྐད། དེ་ནས་ཤཱི་ཁྱུང་དཀར་དུ་སོང་བས་དེའི་དགུན་ཁ་བཞུགས། ཤིག་ནད་སྡུག་པོ་ཅིག་ཀྱང་བྱུང་གསུངས། དཔྱིད་ཝོ་དཀར་བྲག་ལ་ཞག་ཤས་བཞུགས། དེ་ནས་ཡར་ལམ་གླང་འཁོར་གཟིགས་ནས་ས་ཀྱུར་བྱོན་ཟླ་ཕྱེད་བཞུགས། ས་ཀྱུར་ནས་ཐོན་ནས་ཡང་དགུང་ཐང་དུ་བྱོན་ནོ། །རྗེ་མི་ལའི་བཞུགས་གནས་ཟ་འོག་ཕུག་བྱ་བར་ཞག་ཤས་བསྡད་གསུངས། དེ་ནས་རོང་ན་མར་བྱོན། ལིང་པ་བྲག་དམར་དང་རྫོང་དྲུག་རྣམས་གཟིགས་གསུངས། དེ་ནས་སྐྱང་སྦལ་གནས་ནམ་མཁའི་རྫོང་དུ་ཞག་ཤས་ཞུགས། དེ་ནས་དམ་གཙང་དང་ཡོན་བཙུན་འབུམ་གཉིས་ཀྱང་སླེབ་བྱུང་། དེ་ནས་གྲོགས་མཆེད་བཞི་པོས་འབྱོན་ལམ་བྱང་ཐང་འབའ་ཞིག་ལ་མཛད་ནས་བྱོན་པས། ལམ་ན་ཡར་ལ་ཆུ་བོ་ཆེ་ལ་མང་བ་འདུག་པ་ལ་ལུས་སྟོབས་དང་རླུང་སྟོབས་ཟད་ནས་གྲོངས་ལ་ཁད་པ་རེ་བྱུང་། དེ་ནས་མ་ཕམ་གཡུ་མཚོའི་འགྲམ་དུ་ཕེབས་པ་དང་། རྗེ་རྒོད་ཚང་པས་ད་འདི་ཀར་ཆུ་འཐུང་ཞིང་སྡོད་གསུངས་པས། དམ་པ་གཙང་ན་རེ། ང་ལ་གསེར་ཞོ་གང་ཡོད་འདི་བཙོང་ནས་མཉམ་དུ་བཟའ་བས་སྤུ་རེངས་སུ་འགྲོ་དགོས་ཡང་ཡང་དུ་ཟེར་ནས་བྱོན་ཏེ། གསེར་ཞོ་གང་བཙོངས་པ་ལ་ཕྱེ་བྱས་པས་ཕྱེ་བྲེ་བཅོ་ལྔ་བྱུང་ཞིང་། དེ་ཚོ་ཁུར་ནས་ཏི་སེ་ལ་བྱོན།

དེ་ལ་གངས་ཏེི་སེ་ཞེས་བྱ་བ་དེ་གསང་སྔགས་ཀྱི་དབང་དུ་བྱས་ན་ཡུལ་ཉི་ཤུ་རྩ་བཞིའི་གནས་གསུང་གི་འཁོར་ལོ་ཧི་མ་ལ་ཡ་བྱ་བ་ཡིན་ཏེ། དེ་ཡང་ཕྱི་ཀྲི་ཡའི་ལྷ་ཚོགས་སུ་ཡོད་པ། ནང་གསང་སྔགས་ཀྱི་ལྷ་ཚོགས་སུ་ཡོད་ཅིང་། དེ་ཡང་བཅོམ་ལྡན་འདས་བདེ་མཆོག་གི་ལྷ་ཚོགས་རྣམས་བཞག་ཅིང་མ་བསྡུས་པར་བཞུགས་པར་གསུངས། ཆོས་རྗེ་རྒོད་ཚང་པས་གད་པ་གསེར་གྱི་བྱ་སྐྱིབས་ཅན་དུ་བཞུགས་ནས། ཆུ་དང་ཏེ་དུ་ཉག་ཅིག་གསོལ་ཅིང་སྒྲུབ་པ་མཛད། དབྱར་དེ་ལྷའི་ཕུ་རུ་དགོན་པ་བཏབ་ནས་བཞུགས། ཉིན་མཚན་འཁོར་ཡུག་ཏུ་འདྲེས་པའི་དགེ་སྦྱོར་དེ་ཏི་སེ་རུ་བྱུང་བ་ཡིན་གསུངས། དེ་ནས་དམ་པ་གཙང་དང་གཉིས་པོ་ཛ་ལན་དྷ་ར་ལ་གཤེགས་དགོངས་ནས། ཞང་གཞུང་གི་ཡུལ་ནས་ཕར་བྱོན་པས། ལམ་དེ་ན་གནས་ཆེན་སྤྲེ་ཏ་སྤུ་རི་བྱ་བ་ཡུལ་ཉི་ཤུ་རྩ་བཞིའི་ནང་ནས་སྐུའི་འཁོར་ལོ་སྟེ། དེ་ཡང་ལུང་གསུམ་འདུས་པའི་མདོ་ན་འདུག་ཅིང་། དེར་ཞག་ཤས་བཞུགས། དེ་བྱིན་རླབས་ཤིན་ཏུ་ཆེ་བ་ཞིག་འདུག་གསུངས།

དེ་ནས་མར་བྱོན་པ་ན་ཞང་ཞུང་གི་ཡུལ་གུ་གེ་མང་ནང་བྱ་བ་ན། ཇོ་བོ་ཨ་ཏི་ཤའི་བཞུགས་ནས་དངོས་གྲུབ་ཀྱི་ཆུ་མིག་སྟོན་པ་ཡང་འདུག་ཅིང། དེ་ནས་མར་འབྱོན་པས་ཞང་ཞུང་མཐོ་ལྡིང་གི་གཙུག་ལག་ཁང་ན་ལྷ་བཙུན་བྱང་ཆུབ་འོད་ཀྱི་བཞུགས་གནས་ལ་སོགས་པ་ཡང་མཐོང་ཞིང་། དེ་ནས་ཞང་ཞུང་གི་ཡུལ་བརྒལ་ནས་སྤི་ཏི་བི་ལྕོག་གི་སྟོད་ན་གྲུབ་ཐོབ་ཆེན་པོ་ཁ་རག་པ་བྱ་བ་མཇལ། རྣམ་ཐར་བསྡུས་པ་བསྟན་པའི་བྱུང་ཚུལ་ལས། པི་ཏི་སྤྱི་ཅོག ཅེས་གསུངས། དེ་ནས་ཡར་བྱོན་པ་ན། གྲུབ་ཐོབ་ཆེན་པོ་བྲག་སྨུག་པ་བྱ་བ་ཞིག་དང་མཇལ། དེ་ནས་གར་ཤར་བྱོན་པས་དེ་ན་རི་བོ་ག་དྷོ་ལ་བྱ་བ་ན། རི་དཔག་ཚད་ཅིག་ཡོད་པ་རི་དེའི་རྩེ་མོ་ན་དྷ་རྨ་མུ་ཏྲ་བྱ་བ་མཆོད་རྟེན་རང་བྱུང་ཞིག་བཞུགས་པ་གཟིགས། དེར་དགུན་གཅིག་བཞུགས་དགོངས་པ་ལ་གངས་ཆེན་པོ་བབས་པས་མ་བྱུང་། གར་ལོ་ཙཱ་བ་དྲུང་དུ་བྱོན་ནས་ཛ་ལན་དྷ་རར་བྱོན་པའི་ལོ་རྒྱུས་གསུངས། དེར་ཁོང་གིས་རྒྱགས་ཀྱང་བསྐུར། ལོ་ཙཱ་གཅིག་ཀྱང་བཏང་ནས། ཅམ་བྷེ་རྒྱལ་པོའི་བློན་པོ་སུ་ཏུ་བྱ་བ་ལ་སྦྲགས་ནས་སྒོམ་ཆེན་འདི་གཉིས་མགོ་ཐོན་ཅིག་གསུངས་ནས། བཀའ་བསྒོ་ལེགས་ལེགས་པར་མཛད་ནས་བྱོན་པ་ཡིན་གསུངས། དེ་ནས་གར་ཤ་ནས་ཞག་གསུམ་སོང་བ་ན། གངས་ལ་མཐོན་པོ་གཅིག་གི་རྩར་ཕེབས་པས་ལ་ཟུག་པོ་མེ་ལོང་འདྲ་བ། མཐོ་བ་ནམ་མཁར་སྙེག་པ་འདྲ་བ་འདུག་པས་འདི་ལ་ཇི་ཙུག་བྱས་འགྲོ་སྙམ་པ་བྱུང་། དེ་ནས་མོན་ཡུལ་ལ་ཉི་མ་བཅུ་གཅིག་བྱོན་པས། དེ་ནས་ཉི་མ་བཅུ་གཉིས་ནས་ཅམ་བྷེ་རྒྱ་སར་ཕེབས། དེ་ནས་མོན་ཡུལ་གྱི་རི་ཐམས་ཅད་ཟད་ནས་རྒྱ་གར་གྱི་ཐང་ལག་མཐིལ་ལྟར་སྙོམས་པར་འདུག ཅམ་བྷེ་ནས་ཉིན་མ་གསུམ་བྱོན་པས་ཛ་ལན་དྷ་རར་ཕེབས།

དེ་ཡང་ཛ་ལན་དྷ་ར་ཞེས་བྱ་བ་དེ་ཡུལ་ཉི་ཤུ་རྩ་བཞིའི་ཡ་གྱལ་ཡིན་ཞིང་། ཕྱི་རོལ་གྱི་ཡུལ་ཉི་ཤུ་རྩ་བཞི་ནི། འཛམ་བུ་གླིང་ན་གདུལ་བྱ་རགས་པ་ཉི་ཤུ་རྩ་བཞི་ལ། གདུལ་བྱེད་ཀྱི་སྤྲུལ་པ་ཧེ་རུ་ཀ་ཉི་ཤུ་རྩ་བཞི་ཡོད། གསང་བའི་ཡུལ་ཉི་ཤུ་རྩ་བཞི་ནི། རང་གི་ལུས་ལ་ཡོད་དེ། ལུས་ལ་སྦྱར་ན་སྤྱི་གཙུག་ཡིན་སྤྱི་གཙུག་ན་བྱང་ཆུབ་ཀྱི་ཐེག་ལེེ་གནས་པས།  དེ་ན་ཟག་མེད་ཀྱི་བདེ་བ་སྐྱེས། བདེ་བའི་དཔའ་བོ་མཁའ་འགྲོ་སྤྲིན་བཞིན་དུ་འདུ་བས། གནད་ཀ་དེ་ཡིན་ཛ་ལན་དྷ་ར་ན་དཔའ་བོ་མཁའ་འགྲོ་སྤྲིན་འཐིབས་པ་བཞིན་གནས་སོ། །དེ་ཡང་གནས་དེའི་བཀོད་པ་ནི། ཐང་ལག་མཐིལ་ལྟར་མཉམ་ཞིིང་བདེ་བ་ལ་གནས་པ། ཕྱི་རང་བཞིན་གྱི་གཞལ་ཡས་ཁང་དུ་ཡོད་པ། ནང་བཅུད་ལྷ་དང་ལྷ་མོ་གནས་པ། དེ་ཡང་གཡས་གཡོན་གཉིས་ནས་ཆུ་བོ་ཆེན་པོ་གཉིས་རྒྱུག་ཅིང་འདུས་པའི་གསུམ་མདོར། རི་དེའུ་ཆེན་པོ་གླང་པོ་ཉལ་བ་འདྲ་བ་ཞིག་གི་ཁལ་ཁུང་ན། ན་ག་ཀྲོ་ཏྲ་ཞེས་བྱ་བའི་གྲོང་ཁྱེར་སྟོང་ཚོ་ལྔ་ཡོད་ཅིང་། རི་བོ་དེའི་རྣ་ལ་ཛ་ལ་མུ་ཁི་ཞེས་བྱའི་གཙུག་ལག་ཁང་ཆེན་པོ་གཅིག་ཡོད། དེ་ལ་ཕྱི་ནང་གཉིས་ཀའི་མཆོད་པ་འབུལ་ཞིང་། ཛ་ལན་དྷ་ར་བྱ་བ་དེ་ཡུལ་ཆེན་པོ་གཅིག་གི་མིང་དུ་འདུག་པས། གྲོང་ཁྱེར་གྱི་གྲངས་མི་འདུག ན་ག་ཀྲོ་ཊི་ཞེས་པ་བོད་སྐད་དུ་ཀླུའི་མཁར་བྱ་བ་ཡིན། གནས་དེ་ཉིད་དུ་ཡོན་ཏན་གྱི་མངོན་རྟོགས་རྟགས་ཚད་མེད་པ་བྱུང་ཞིང་། འཁོར་ཡང་སྟོང་ཕྲག་བརྒྱད་འབྱུང་ཞེས་པའི་ལུང་བསྟན་ཡང་གནས་དེར་བྱུང་བ་ཡིན། དུར་ཁྲོད་ལྔ་དང་བཅས་གནས་དེར་ཟླ་བ་ལྔ་ཙམ་བཞུགས་པས་ཟས་བཅུད་ཆུང་བ་དང་། ཡང་ན་ནོམ་པ་གསོལ་རྒྱུ་མེད་པས་སྐུ་ལུས་ཤིན་ཏུ་ངན་པར་གྱུར།
༼ཛ་ལན་དྷ་ར་ནི། དེང་སྐབས་ཧི་མ་ཅལ་ཀང་ར་ལྷ་མོ་གནས་ས་འདི་ཡིན་པ། རྒྱ་གར་གནས་ཆེན་ཁག་ལ་བགྲོད་པའི་ལམ་ཡིག་ནང་མཁས་དབང་དགེ་ཆོས་ཀྱིས་ར་སྤྲོད་གནང་ཞིང་།  ཛ་ལ་མུ་ཁི་ནི་ཀང་ར་སྦ་སེ་འབབ་ཚུགས་ནས་ཆུ་ཚོད་གཅིག་གི་འགྲོ་ལམ་ན་ཡོད།༽

དེ་ནས་བོད་དུ་བྱོན་ཏེ། ཁ་སང་གི་ལམ་དེ་མ་ཡིན་པའི་ཉེ་ལམ་ཞིག་ནས་བྱོན་པས། གནས་ཆེན་ཀུ་ལུ་ཏ་ཞེས་བྱ་བ་གཟིགས་པར་བཞེད་ནས་ཉེ་ལམ་དེ་ལ་ཉི་མ་གཉིས་བྱོན་པའི་ས་ན། ཀི་རི་རམ་བྱ་བའི་གནས་ན་གྲུབ་ཐོབ་ཆེན་པོ་ཨ་ནུ་པ་མ་དང་མཇལ་ནས་ཆོས་འབྲེལ་ཞུས། དེ་ནས་ཉི་མ་ལྔ་དྲུག་བྱོན་པས་རྒྱལ་པོའི་མངའ་ཞབས་ཟད། རང་ག་མི་ཡུལ་དུ་སླེབ། དེ་ནས་ལ་བརྒལ་ནས་བྱོན་པ་དང་ཤི་སྐྱིད་ཀྱི་ཇག་པས་བཅོམ་ཏེ། དབྱུག་པ་ལ་སོགས་པའི་མཚོན་ཆ་སྣ་ཚོགས་ཀྱིས་འཇིགས་ཤིང་སྐྱི་གཡའ་བའི་སྡིགས་མོ་མང་པོ་བྱས་ཤིང་། གོས་ཐམས་ཅད་ཀྱང་བཤུས། བླ་མ་སྤྱི་བོར་བསྒོམ་པས་སྒོམ་ཞྭ་ལེགས་པོ་རེ་ཡོད་པ་དེ་ཁོ་པས་མ་མཐོང་འདུག་གསུངས་། གནས་ཁང་ནི་གཡར་དུ་མི་སྟེར་བས་ཕྱི་ངོས་དང་ཤིང་དྲུང་འབའ་ཞིག་ཏུ་ཉལ། སྐུ་ལ་མནམ་རྒྱུ་ནི་མེད། གསོལ་རྒྱུ་ནི་མེད། དུས་དེར་སྡང་བ་དགྲ་བོའི་མིག་ནས་ཀྱང་འཆི་མ་འཆོར་བ་འདྲ་བ་བྱུང་ཞིང་། དེ་ཡང་ཉིན་ཞག་བཞི་ཆར་བབས་ནས། ལྟོགས་ཉལ་དང་ཁྱག་ཉལ་བྱས་པས་ད་འཆི་འོང་སྙམ་ཙམ་ན། བླ་མ་དཀོན་མཆོག་གི་བཀའ་དྲིན་གྱིས་མ་ཤི་གསུངས། འགྲོ་རང་མི་ནུས་སམ་སྙམ་ཙ་ན་རླུང་སྐྱེས་ནས་ཤེས་པ་ཟི་ཐོམ་མེ་བྱས་ཁྱར་ཁྱོར་འགྲོ་ནུས་ཙམ་བྱུང་གསུངས། དེར་བསོད་སྙོམས་ཕལ་ཁོམ་བསླངས་པས་ཇེ་དྲགས་ལ་སོང་།

དེ་ནས་གནས་ཆེན་ཀུ་ལུ་ཏ་བྱ་བ་དེར་སླེབས་གསུངས། གནས་ཆེན་དེ་ཡུལ་ཉི་ཤུ་རྩ་བཞིའི་སྐུའི་འཁོར་ལོའི་ནང་ལུས་ལ་བཀོད་ན་པུས་མོ་ཡིན་ཞིང་། དེ་ཡང་གནས་ཀྱི་ངོ་བོ་སི་དྡྷི་བྱ་བ་མེ་ཏོག་ཀུ་མུ་ཏའི་ཚལ་ཆེན་པོ་ཡོད་ཅིང་། རྡོ་ལ་སངས་རྒྱས་ཀྱི་ཞབས་རྗེས་བཞུགས་པར་གསུངས། དེར་ཞག་འགའ་བཞུགས་པས་དགེ་སྦྱོར་འཕེལ་བར་བྱུང་གསུང་། གནས་དེར་བཙུན་པ་ཡོན་བདག་རྣམས་ཀྱིས་མཐུན་རྐྱེན་དང་། སྟོད་གོས་ཁྱི་ལྤགས་ཤིག་བྱིན་ཏེ། གོས་དེ་ཀུན་ད་ལྟའི་བཟང་པོ་ཕྲུགས་རེ་ལས་དྲིན་ཆེ་བར་བྱུང་གསུང་། དེ་ནས་གར་ཞར་ཕེབས་སོས་ཀ་དེར་གྷ་དྡྷོ་ལིའི་རི་ཁྲོད་དུ་བྱོན་ནས། དབྱར་དེ་རུ་བཞུགས་པས་དགེ་སྦྱོར་ལ་བོགས་ཤིན་ཏུ་ཆེ་བར་བྱུང་། དེ་ནས་སྟོན་སེར་སྤི་ཏི་རྩང་ཤོད་ལ་ཐོན་ཡོང་བས། ཆུ་ཆེན་པོ་ཞིག་ལ་མི་མང་པོ་བརྒལ་ཞིང་འདུག དེ་ན་རྨོ་རྒན་མོ་ཁུར་ཆེན་པོ་འཁུར་བ་ཞིག་འདུག་པ། དེ་ལ་བཙུན་པ་རྣམས་རེག་པ་བསྲུང་བ་ཡིན་ཟེར་ནས་ཆུ་ལ་སྒྲོལ་བ་མི་འདུག་སྟེ། རྗེ་རྒོད་ཚང་པས་ཐུགས་ལ་འདི་ལྟ་བུ་ལ་རེག་བསྲུང་བ་ལས་མི་བསྲུང་བ་ཁེ་ཆེ་དགོངས་ནས་མོན་མོ་དེའི་ཁུར་པོ་འཁུར། ལག་ནས་འཁྲིད་ནས་བསྒྲལ་ཏེ། དེ་ལྟ་བུ་ལ་རེེག་པ་བསྲུང་མི་དགོས་པ་ཡིན། ཆུ་ཁ་རུ་ངོ་ཚ་ཡང་བསྲུང་མི་དགོས་པ་ཡིན་གསུངས།

དེ་ནས་ཞང་ཞུང་ལ་ལམ་ཐོན་ཏེ། ཏི་སེར་བྱོན་ནས་ཞག་འགའ་བཞུགས་ཤིང་། ཏི་སེ་ནས་ཛ་ལན་དྷ་རའི་བར་ལ་ཟླ་བ་བསྒྱངས་པ་གཉིས་འདུག་སྟེ། ལམ་མ་ཆག་པའི་དབང་དུ་བྱས་པའོ། །དེ་ནས་རྫོང་དྲུག་ཏུ་བྱོན། དེ་ནས་ལ་སྟོད་ལྷོ་ལམ་ཐོན། འབྲོམ་ས་སྐྱར་བྱོན་ནས། སློབ་དཔོན་ཀུན་དགའ་གཞོན་ནུ་ལ་ས་སྐྱའི་ཆོས་སྐོར་ཡང་གསན་གསུང་། དེ་ནས་འབྲུག་ར་ལུང་དུ་བྱོན། ཏི་སེ་ནས་དབུས་བར་དེའི་ལམ་ཐག་ལ་ཡང་ཟླ་བ་བསྒྱངས་པ་གཉིས་ཡོད་གསུངས། ཛ་ལན་དྷ་ར་ནས་དབུས་སུ་ཟླ་བ་བསྒྱངས་པ་བཞི་ཡོད་གསུངས། རིན་པོ་ཆེ་སངས་རྒྱས་དབོན་དང་མཇལ་ལོ། །རིན་པོ་ཆེའི་ཞལ་ནས། ད་ཁྱེད་ཀྱི་མེ་ཏོག་ནི་འཁོར་བས་དགུན་འདིར་གདམས་ངག་ཐམས་ཅད་སྦྱིན་ནོ་གསུངས།
དགུང་ལོ་ཉི་ཤུ་རྩ་དགུ་ལ་ལྷ་ཁབ་མདོ་ལ་བྱོན་པའི་སྐོར།

རྗེ་རྒོད་ཚང་པས་དགུན་སྟོད་དེར་ཡུལ་དུ་བྱོན་པས། ཡབ་ནི་གྲོངས་ནས་མི་འདུག ཡབ་ཀྱི་ཞིང་ཁ་དེ་གཙོངས་པས་རིན་མང་པོ་བྱུང་བས། སྣམ་བུ་བཞི་བཅུ་ཙམ་རིན་པོ་ཆེ་དབོན་རས་པ་ལ་ཕུལ། ཡུམ་ལ་ཡང་བག་གཅིག་གནང་། རང་གི་ཀྱང་ནས་ཁལ་ལྔ་བཅུ་ཙམ་ཞིག་བྱས་གསུངས། དགུན་དེ་རིན་པོ་ཆེ་དབོན་རས་ཀྱི་སྤྱན་སྔར་བྱོན་ནས། གདམས་ངག་ལྷག་མ་རྣམས་ཀྱང་ཞུས། དེའི་དུས་ན་རིན་པོ་ཆེ་དབོན་རས་ཀྱི་ཞལ་ནས་ལྷ་ཁབ་ཀྱི་མདོ་ཕ་གི་ལ་བསྒོམ་ན་དགེ་སྦྱོར་འཕེལ་བ་ཡོད་གསུངས། རིན་པོ་ཆེ་ལ་ཡུལ་དུ་ཡབ་ཀྱི་མཆེད་པོ་ཞིག་འདས་ཟེར་བང་ཆེན་བྱུང་བས་ཡུལ་དུ་བྱོན་ནས་ཁོའི་ཞིང་ཁང་རྣམས་བཙོངས་ནས་ཀློག་འདོན་དང་བདུན་ཚིགས་བྱས་ཤིང་། དེ་མ་གཏོགས་པའི་ནོར་རྣམས་སྣམ་བུར་བྱས་ནས་ར་ལུང་དུ་སངས་རྒྱས་དབོན་ལ་ཕུལ་བ་ཡིན་གསུངས།

དེ་ནས་ཆོས་རྗེ་རྒོད་ཚང་པ་དགུང་ལོ་ཉེར་དགུ་ལོན་ནས་ལྷ་ཁབ་ཆུང་བའི་མདོ་ལ་བྱོན། དེ་ཡང་ཕོ་མ་ཐང་བྱ་བ་དེ། གཙང་དང། ཡར་འབྲོག་དང་། ལྷོ་བྲག་གསུམ་གྱི་ཚོམས་ལ་ཕོ་མ་སླ་ང་བཀལ་བ་ལྟར་ཡོད་ཅིང་། ལྷ་ཁབ་ཆེ་ཆུང་གཉིས་བྱེ་གླིང་དང་གསུམ་གསེར་གྱི་ཚོམ་བུ་བཀོད་པ་འདྲ་བ། འགྲོ་མགོན་པདྨ་འབྱུང་ནས་ཀྱི་ཞབས་ཀྱིས་བཅགས་ས། མཐོང་བ་ཙམ་གྱིས་དང་བ་འདྲེན་པ། ཉམས་རྟོགས་གོང་དུ་འཕེལ་བའི་གནས་ཡིན་གསུངས། དེར་ཕུག་པ་གཤའ་མ་མེད་པས། ཉ་པ་དང་ལུག་རྫི་སྡོད་སའི་ཕུག་མི་རེ་ཤོང་བ་གསུམ་ཙམ་འདུག དེར་གཅིག་ཏུ་བཞུགས་ས་བྱས། གཅིག་ཏུ་གཡོས་བྱས། གཅིག་ཏུ་ཕྱེ་བཞག། སྐབས་ཤིག་གསོལ་རྒྱགས་ཟད་ནས་ཕོ་རྐྱང་ཤི་བའི་ཤ་ཡང་བཞེས་དགོས་བྱུང་ཞིང་དངོས་གྲུབ་ཀྱི་རྫས་སུ་བྱིན་གྱིས་བརླབས་པ་ཡིན་པས་ཡུན་རིང་ཐུབ་གསུངས་སོ། །དེ་ནས་ཡང་དགུན་དར་ཆགས་པའི་དུས་སུ། ཇག་པ་མང་པོ་བྱུང་ནས། ཀ་ཅ་དང་སྒྲུབ་རྒྱག་ཐམས་ཅད་ཁྱེར་བས། བསྔོ་བ་དང་སྨོན་ལམ་གྱིས་རྒྱས་བཏབ་ནས་གནོད་པ་སྐྱེལ་བའི་ལན་དུ་ཕན་འདོགས་པའི་དམ་བཅའ་ལ་བརྟན་པ་ཐོབ་པ་ཡིན་གསུང་། དེ་ནས་རིན་པོ་ཆེ་ལ་གསོལ་རྒྱུ་ཙམ་མ་བྱུང་བར། ཆུ་མང་དག་གསོལ་བས། གྲང་བ་ལངས་ཏེ་སྐུ་ལུས་ལ་སྙུང་ཟུག་ཚན་ཆེ་བ་བྱུང་། དེར་ཐུགས་དགོངས་ལ་འདི་ལྟ་བུའི་ཆོས་བྱེད་པ་ལ། དང་པོ་ཙ་ན་ཆོས་རྒྱགས་མེད་པའི་དཀའ་ལས། དེ་ནས་མཁྲིས་ནད་དང་ཤིག་ནད་ཀྱི་སྡུག་ཐག ད་ལྟ་ཕོ་བ་དང་རུས་པ་ཀུན་འདི་འདྲའི་ཟུག་གམ། ད་ནི་ཆོས་ཀྱི་ཕྱིར་དུ་སྲོག་འགྲོ་ཡང་འགྲོ་བར་འདུག་སྟེ། གཏོང་ཡང་གཏོང་ངོ་དགོངས་ནས་དམ་བཅའ་འདི་ལྟ་བུ་ཡང་མཛད་དོ། །ལུས་ངག་ཡིད་གསུམ་དམ་བཅའ་ཧ་ཅང་མང་ཞིང་།

མདོར་ན་དུས་དང་རྣམ་པ་ཐམས་ཅད་དུ། རང་གི་བདེ་བ་དང་། གཞན་གྱི་སྡུག་བསྔལ་བརྗེ་བ་ལ་ཐོག་རྫི་དང་ཉམ་ང་བ་མེད་པར་བདེ་སྡུག་ལ་རོ་སྙོམས་མཛད་ཅིང་། གཞན་གྱི་ལུས་ངག་ཡིད་གསུམ་གྱི་འོག་ནས་རིན་པོ་ཆེ་རང་གི་སྐུ་གསུང་ཐུགས་ཀྱིས་འཛུལ་བའི་ཐུགས་དམ་ཡང་མཛད་གསུང་། དུས་ཕྱིས་གཉའ་ནང་བདེ་ཆེན་སྟེང་དུ་ཐུགས་དམ་དེ་ཉིད་ཆེས་ཡོངས་སུ་གསལ་བར་ཡང་མཛད་ཅིང་དེར་རྗེ་རྒོད་ཚང་པའི་ཞལ་ནས། ངས་ནི་ལུས་ངག་ཡིད་གསུམ་གྱིས་མཐོ་དམན་མེད་པའི་འོག་ནས་འཛུལ་ཞིང་། མཛད་སྤྱོད་ཐམས་ཅད་དེ་ལྟར་བྱས་པས། ཡོན་ཏན་ཐམས་ཅད་མི་འདོད་ཀྱང་སྤུངས་པ་བཞིན་དུ་བྱུང་བ་ཡིན། ཁྱེད་རྣམས་ནི་ཕ་ག་མའི་གྲལ་གྱི་འགོ་ལ་མ་ཐོན་གྱིས་དོགས། རང་ཉིད་གྲལ་མཇུག་ལུས་ཀྱི་དོགས། གཞན་ལ་བསྙེན་བཀུར་དང་འབུལ་འདེགས་བྱུང་གི་དོགས། རང་ལ་མ་བྱུང་དོགས། གཞན་ལ་བསྟོད་ར་དང་སྙན་པ་ཆེས་ཀྱི་དོགས། རང་ལ་སྨད་ར་དང་མི་སྙན་པ་བྱུང་དོགས། མདོར་ན་གཞན་ཡོན་ཏན་དང་ལྡན་པ་མཐོང་ན། བློ་སྐྱོག་དྲིལ་དྲིལ་ཡོང་བའི་མཛད་སྤྱོད་འདི་ལ་ཡོན་ཏན་རང་ཇི་ལྟར་སྐྱེའམ་གསུང་། གཞན་ཡང་ལྷ་ཁབ་ཀྱི་གནས་དེར་ཐུན་མོང་མ་ཡིན་པའི་དམ་བཅའ་གོ་ཆའི་ཐུགས་དམ་བདུན་ནམ་ཐུན་མོང་མ་ཡིན་པའི་ཐུགས་དམ་བདུན་མཛད་པ་ཡིན། དེ་ཚོ་ཆོས་མཛད་ཡོངས་ལ་ཁྱད་པར་དུ་འཕགས་པའི་རྣམ་ཐར་ཡིན་མདོར་ན་དེ་ལྟ་བུའི་སྒོ་ནས་ཁྱད་པར་དུ་འཕགས་པའི་རྣམ་ཐར་བདུན་ཐུགས་དམ་ལ་རྩེ་གཅིག་ཏུ་འབད་པ་དང་། དམ་བཅའ་རྣམས་མཐར་ཐོན་པར་མཛད་པ་ཡིན་གསུང་། ལྷ་ཁབ་མདོ་རུ་མགུར་ལ་སྔ་བ་སྐྱིད་པ་བརྒྱད་ཀྱི་མགུར་གསུངས། ལར་ལྷ་ཁབ་ཏུ་བླ་མ་ལོ་གསུམ་བསྒྲུབ་པས་མོས་གུས་མཐའ་དག་གི་གོ་བ་བྱུང་། སྣང་བ་ཡང་དག་པར་སོང་གསུང་།

 

དགུང་ལོ་སུམ་ཅུ་སོ་གཉིས་ལ་ཙ་རིར་བྱོན་པའི་སྐོར།

དེ་ནས་ལོ་གསུམ་གྱི་དམ་བཅའ་ཐོན་པ་དང་། སངས་རྒྱས་དབོན་རས་བསྟན་པ་རབ་དོན་མཛད་པའི་དགེ་སློང་མཛད་པ་ལ་འབོད་དུ་བྱུང་ནས། དགེ་སློང་སྒྲུབ་པ་མཛད། དེ་སྐབས་དགེ་སློང་བརྒྱ་དང་བདུན་བཅུ་བྱུང་གསུང་། དེ་ནས་སངས་རྒྱས་དབོན་གྱི་ཞལ་ནས་ཉིད་ཀྱི་སྔར་གནས་ཆེན་དང་རི་ཁྲོད་དུ་མང་དུ་གཤེགས་ད་འདི་ཕྱོགས་ངོས་སུ་བཞུགས་གསུང་། དེའི་ནུབ་མོ་ཐུགས་ཀྱི་ཉམས་སྣང་ལ་ཆོས་རྗེ་རས་པ་བྱོན་ནས། ད་དུང་ཙ་རི་ལ་རྒྱུག་བུ་ཁྱོད་ཀྱི་སྡོད་ས་གནས་ཆེན་དང་རི་ཁྲོད་ཡིན་གསུངས་པ་ཞིག་བྱུང་། དགུང་ལོ་སོ་གཉིས་ལོར་གནས་ཆེན་ཙ་རི་ལ་བྱོན་ནོ། །

དེ་ཡང་གནས་མཆོག་ཙ་རི་ཞེས་བྱ་བ་དེ་སྤྱིར་ཧེ་རུ་ཀའི་གནས་བཅུ་དང་། དུར་ཁྲོད་ཀྱི་གནས་ཐམས་ཅད་ལས་ཀྱང་ཁྱད་པར་དུ་གསང་སྔགས་ནང་གི་གནས་མཆོག་ཏུ་གྱུར་པ་ཡིན། དཔལ་ཧེ་རུ་ཀ་ཁྲག་འཐུང་ཀུན་དང་། མཁའ་འགྲོ་མ་ངེས་པར་འདུ་བའི་གནས་རིག་འཛིན་གྲུབ་པ་ཐོབ་པ་རྣམས་ཀྱི་བྱིན་གྱིས་བརླབས་ཤིང་། དངོས་གྲུབ་ཐོབ་པའི་གནས། ཡ་མཚན་ཞིང་ངོ་མཚར་ཆེ་བའི་ཡོན་ཏན་བསམ་གྱིས་མི་ཁྱབ་ཅིང་བརྗོད་ཀྱི་མི་ལང་བའི་གནས་མཆོག་དམ་པར་གྱུར་པ་ཙ་རི་ཞེས་བྱ་བ་དེར། རྗེ་རྒོད་ཚང་པས་དང་པོ་གྲོགས་མཐུ་སྒོམ་བྱ་བ་ཞིག་དང་མཉམ་དུ་རྒྱགས་ཟོང་བྲེ་གང་རེ་ལས་བསྣམས་རྒྱུ་མེད་པར་ཙ་རིའི་གནས་ཀྱི་ནང་དུ་ཕེབས། དབྱར་དེ་ཙ་རི་གནས་ནང་དུ་བཞུགས་ཤིང་། དེ་ནས་གནས་ནང་གི་སྒོམ་ཆེན་རྣམས་ཀྱི་ཆས་འདྲེན་པ་དང་ཆུ་མ་མཛད་ཅིང་། ཙ་རིའི་སྤྱི་ཁང་ཆེན་མོ་ཞིག་ཡོད་པ་དེར་བསགས་ཤིང་བཞག་པ་རྣམས་རིན་པོ་ཆེ་བ་གཅིག་པུས་ཕར་གཤེགས་ཚུར་གཤེགས་ལན་བརྒྱད་མཛད་ནས། ཆས་འདྲེན་པ་ལ་དཀའ་ལས་ཤིན་ཏུ་ཆེ་བས་ཡུལ་ཐག་ཉེ་བ་རྣམས་ཀྱང་ཉི་མ་བཞི་བཞི་ཡོད་ཅིང་། ལ་ནམ་མཁར་སྙེགས་པ་འདྲ་བ་བརྒལ་དགོས། དེ་ཡང་རྫ་རོང་དག་ན་རྫབ་དང་། ཤིང་ཚལ་གྱི་གསེབ་ཤིན་ཏུ་མི་བདེ་བ་ཡོད་པ་ལ། རྐང་ལག་སེར་ཁར་སོང་། རྒྱབ་ལ་རྒལ་བ་བྱུང་ཞིང་ཞབས་ཁྲག་ཏུ་སོང་བས་རྣག་ཁྲག་གིས་ན་བཟའ་འབྱར་ནས་མི་བྲལ་བ་ཡང་བྱུང་། ཙ་རི་པ་རྣམས་ཀྱིས་ཤིན་ཏུ་གླེན་པར་ཐག་བཅད།

དེ་དུས་རྗེ་རྒོད་ཚང་པ་ལ་གླེན་པ་མགོ་ལྟོ་བའམ། ཙ་རིའི་བོང་བུ་སེར་པོའམ། གླང་དམར་པོ་ཟེར་བར་གྲགས་ཤིང་། མདོར་ན་ཙ་རི་སྒོམ་ཆེན་པ་རྣམས་ཀྱི་ཞབས་ཏོག་བྱས་ནས་སྡིག་པ་དག་པ་ལ་སྡུག་བསྔལ་དང་ལེན་གྱི་བཟོད་པ་འདི་དང་། ཡི་གེ་བརྒྱ་པ་འདི་གང་གིས་ཀྱང་དོ་ཟླ་མི་འདུག་གསུངས་པར་གསལ། གསུང་འབུམ་ཞིག་ན། རྗེ་རྒོད་ཚང་པའི་ཞལ་ནས། སྒོམ་སྐྱེ་བ་ལ་སྒྲིབ་པ་འདག་དགོས་པར་འདུག་སྟེ། གོང་གི་ལོ་རྒྱུས་རྣམས་གསུངས་ཤིང་། ངས་ཙ་རིའི་གནས་ནང་དུ་སླེབ་ཙ་ན་སྡིག་པ་དག་པའི་རྟགས་རྨི་ལམ་བརྟག་དཔྱད་ཀྱི་རྟགས་མང་པོ་འོང་བ་དེ་ཁྲོད་ནས་ན་ཚ་སྡུག་བསྔལ་ལ་དགའ་བར་བསྒོམས་པས། སྡིག་པ་དག་པའི་རྟགས་མ་ལུས་པ་བྱུང་། ཡི་གེ་བརྒྱ་པ་འདྲེན་པ་ཀུན་སྒྱུ་མར་འདུག། མྱོང་བར་ངེས་པའི་ལས་མཛད་པ་ལ་སྡུག་བསྔལ་དང་ལེན་ལས་ཁྱད་ཆེ་མེད་གསུངས། ཡང་རྗེའི་ཞལ་ནས། སྡིག་པ་དག་པའི་རྟགས་འདི་འདྲ་ཞིག་ཀྱང་བྱུང་གསུང་། ངའི་ལུས་ཀྱི་ནང་ཁྲོལ་མ་ལུས་པ་ཕྱིར་ཐོན་ནས། ལུས་དར་དཀར་གྱི་ཡོལ་བ་བཞིན་ཕྱི་ནང་གསལ་འདུག གམ་ན་མི་དཀར་པོ་འདུག་པ་ལ། འདི་པ་ཅི་ཡིན་བྱས་པས། འདི་པ་ཁྱེད་ཀྱི་ཚེ་རབས་ཐོག་མ་མེད་པ་ནས་ཀྱི་སྡིག་སྒྲིབ་ཡིན་ཟེར་གྱིན་འདུག་ཞེ་མེར་བ་ཞིག་བྱུང།

རྗེའི་རྣམ་ཐར་གཞན་དུ་དེ་ལྟ་བུའི་དགེ་འདུན་ཞབས་ཏོག་བྱས་ན། སྡིག་སྦྱོང་ལ་སོགས་པ་ཡི་གེ་བརྒྱ་པའི་དོ་ཟླ་མིན་ཞེས་གསལ། རྗེ་རྒོད་ཚང་པས་ཙ་རི་བ་རྣམས་ཀྱི་ཞབས་ཕྱི་ཆུ་མ་ལོ་གསུམ་མཛད། དེ་ནས་ཚོགས་པའི་དྲུང་དུ་ཆུ་འཁུར་ནས་བྱོན། དེར་ཆུ་ས་ལ་བཞག་ནས། ཀྱེ་ཧོ། འདིར་ཚོགས་ཀྱི་གྲོགས་མཆེད་རྣམས་གསོན་དང་། བོང་རྒན་སེར་པོ་འདིས་ཁྱེད་ཀྱི་གཡོག་མི་ཡོང་བར་འདུག་གོ །མི་ཡོང་བའི་རྟགས་ཤིག་ཀྱང་འདིར་སྟོན་པ་ཡིན་ནོ་གསུངས་ནས། རྡོ་རྗེ་དྲིལ་བུ་ཕྱག་ཏུ་བསྣམས་ནས་གསིལ་ཏེ། བར་སྣང་ལ་བཞག་ཅིང་། བྲག་ལ་ཞབས་བཞག་པས་ཞབས་རྗེས་གསལ་པོ་ཞིག་ཀྱང་བྱུང་། དེ་དུས་ཙ་རིའི་གནས་ནང་བས་གྲོགས་མཆེད་རྣམས་འགྱོད་པ་ལ་སོགས་བྱུ་ཞིང་། དད་ཅིང་མོས་པའི་སྒོ་ནས་རྗེ་ཉིད་ཕུད་དུ་བཀུར་ཞིང་བཤགས་པ་ཡང་ཕུལ།

དགུང་ལོ་སུམ་ཅུ་སོ་ལྔ་པར་ལ་སྟོད་རྒྱལ་གྱི་ཤྲཱི་རི་ལ་བྱོན་པའི་སྐོར།

དེ་ནས་དམ་པ་གཙང་དང་གཉིས་པོ་ཙ་རི་གཡུ་མཚོ་སྐོར་དུ་བྱོན་དེ་ནས་ཙ་རིར་ལོ་གསུམ་བཞུགས་ནས། བླ་མའི་གདན་ས་ར་ལུང་དུ་ཕེབས། སངས་རྒྱས་དབོན་རིན་པོ་ཆེའི་དྲུང་དུ་བྱོན། ཡང་རྒྱལ་གྱི་ཤྲཱི་ལ་འགྲོ་བར་ཞུས་པས། སངས་རྒྱས་དབོན་གྱི་ཞལ་ནས་ད་ཉིད་ལ་སྒྲུབ་པ་བྱེད་མི་དགོས་གྲུབ་པ་ཐོབ་འདུག་པས། ཉིད་ཀྱིས་འན་བུའི་འཁོར་རྣམས་སྐྱོང་རོགས་གྱིས་གསུངས་པ་དང་མ་གནང་ངོ་། །ཚོགས་པས་ཀྱང་ང་ཉིད་ལ་སྟོད་དུ་གཤེགས་རྒྱུ་མི་ཡོང་འདིར་བཞུགས་དགོས་ཟེར། ང་གྲུབ་ཐོབ་ཏུ་འདུག་མི་འདུག་ད་རེས་ཤན་འབྱེད་པ་ཡིན་གསུངས་ནས་ལྐོག་ཏུ་མཎྜལ་ཕུལ་གསོལ་བ་བཏབ། རྟེན་འབྲེལ་བསྒྲིགས་ནས། བླ་མའི་དྲུང་དུ་ཡང་དུ་ཞུས་པས། དབོན་རས་ཀྱི་ཞལ་ནས་ཉིད་ལ་ངའི་ཚོགས་སྐྱོངས་རོགས་བཅོལ་བསམས་པ་ཡིན་ཏེ། ཉིད་ཡེ་མི་གསན་ན་གཏོང་བ་ལས་འོས་མེད་ཀྱི་སོང་ཞིག་གསུངས་ནས་བཀའ་གནང་སྟེ། ཉིད་ཀྱིས་ལ་སྟོད་དུ་རྗེ་བཙུན་མི་ལའི་འགྲོ་དོན་ལྟ་བུ་ཞིག་མཛོད་ཅིག་གསུངས།

དེ་ནས་དགུང་ལོ་སོ་ལྔ་པ་ལ། ལ་སྟོད་རྒྱལ་གྱི་ཤྲཱི་རི་དགོན་པ་རྣམས་ཡར་བྱོན་གསུང་། སྤྱིར་ལ་སྟོད་དེ་རི་མཐོ་ལ་ས་གཙང་། མ་བསྒོམ་ཡང་རིག་པ་དང་བའི་སའོ། །མི་ཐམས་ཅད་གཤིས་ཀྱི་དགེ་བ་བྱང་ཆུབ་སེམས་དཔའི་རིགས་སུ་འདུག་གསུངས། དགོས་ལ་སྟོད་རྒྱལ་གྱི་ཤྲཱི་དེ། རྒྱ་གར་གྱི་སྐད་དུ་ཤྲཱི། བོད་སྐད་དུ། བྱང་ཕྱོགས་དཔལ་གྱི་རི་བྱ་བ་ཡིན་གསུངས། དེ་ཡང་རི་དེའི་ལྷོ་ཕྱོགས་ནི་བཀྲ་ཤིས་སྒོ་མང་གི་ཚུལ་དུ་བཞུགས་པ། བྱང་ཕྱོགས་ནི་རྒྱབ་ཡོལ་དང་རྩ་བརྒྱད་ཀྱི་ཚུལ་དུ་བཞུགས་པ། བྲག་འཇམ་པོ་ཐམས་ཅད་ནི་ལྷ་ཞི་བའི་ཚུལ་དུ་བཞུགས་པ། རྩུབ་མོ་ཐམས་ཅད་ནི་ཁྲོ་བོའི་ཚུལ་དུ་བཞུགས་པ། རྡོ་ཕྲན་ལ་ལ་ནི་དུང་དང་དཔལ་བེའུ་དང་། འཁོར་ལོ་དང་པད་མ་དང་རིན་པོ་ཆེའི་ཚུལ་དུ་བཞུགས་པ། རི་གྲགས་པ་ཐོབ་པའི་ཤྲཱི་ཞེས་བྱ་བ་རྗེ་བཙུན་མི་ལ་དང་། དམ་པ་སངས་རྒྱས་ལ་སོགས་པ་གྲུབ་པ་ཐོབ་པ་བསམ་གྱིས་མི་ཁྱབ་པས་བཞུགས་ཤིང་། མཆོག་དང་ཐུན་མོང་གི་དངོས་གྲུབ་མ་ལུས་པ་ཐོབ་ཅིང་བརྙེས་པའི་གནས། དཔའ་བོ་དང་མཁའ་འགྲོ་སྤྲིན་བཞིན་ཐིབས་པས། དེ་ན་བཞུགས་པའི་བསྒྲུབ་པ་རྣམས་ལ་རྐྱེན་ཕྱི་ནང་གི་བར་ཆད་གང་ཡང་མི་འབྱུང་ཞིང་མཆོག་ཐུན་མོང་གི་དངོས་གྲུབ་མ་ལུས་པ་སྟེར་བའི་གནས་སོ། །མདུན་ན་རི་བྲན་མཆོད་པ་ཕུལ་བའི་གནས་དང་། ཡིད་བདེ་ཞིང་མྱ་ངན་མེད་པའི་ཐང་དང་། དངོས་གྲུབ་ཀྱི་ཆུ་བོ་རྒྱུན་མི་ཆད་པར་རྒྱ་གར་དུ་འགྲོ་བ་དང་། དེའི་ཕྱི་རྒྱབ་སྤང་རི་དངུལ་དཀར་གྱི་མེ་ལོང་ཕྱིས་པ་འདྲ་བས་བསྐོར་བས། དེའི་ཕྱི་ན་གཡའ་བེེཊཱུརྱ་འདྲ་བས་བསྐོར་བ། དེའི་ཕྱི་ན་ལྷ་བརྙན་གངས་དཀར་གྱི་ཡོལ་བ་བཅད་པ་འདྲ་བས་བསྐོར་བའི་གནས་དེ་མཐོང་བ་ཙམ་གྱི་ཉམས་འཕེལ་བ། བསྡད་ན་སེམས་ངལ་སོས་ཤིང་ཡིད་སྡུག་བསྔལ་ལས་སྐྱོབ་པར་བྱེད་པ། རྒྱ་བོད་གཉིས་ན་གྲགས་པའི་གནས་སོ། །དེ་ལྟ་བུའི་རི་དེ་ལ་དགོན་པ་བརྒྱ་རྩ་བརྒྱད་ཡོད་པ་ལས་ཀྱང་ཡོངས་སུ་གྲགས་པའི་ཁྱུང་དཀར་ཞེས་བྱ་བ་དེེར་ཕེབས་ཤིང་། དེ་ཡང་དང་པོ་བྱ་རོག་ཚང་དུ་བབས་ཏེ། ཕ་གྲུབ་པ་ཞིག་པོ་ལ་རྫོགས་ཆེན་ལ་སོགས་པའི་ཆོས་བག་ཙམ་ཞུས། དེ་ནས་ཁྱུང་དཀར་དུ་ཕེབས། ལོ་གསུམ་བསྒྲུབ་པ་མཛད་ཅིང་། དེ་དུས་ཡང་ནུབ་ཅིག་ཉམས་སྣང་ལ་བུད་མེད་མིག་ཆེན་པོ་ཞིག་གིས་པོ་ཏི་གཅིག་བྱིན་ནས་འདི་ཟོ་ཟེར་བ་ཞིག་བྱུང་ནས་དེར་ངས་པོ་ཏི་དེ་ཁྱུར་མིད་བྱས་པས། བུད་མེད་དེས་ད་ནས་ཁྱོད་ཀྱི་ཆོས་ཐམས་ཅད་ལ་མི་ཤེས་པ་ཅུང་ཙམ་ཡང་མེད་ཟེར་ཏེ། བུད་མེད་དེ་དེ་བཞིན་གཤེགས་པ་ཐམས་ཅད་ཀྱི་ཡུམ་རྡོ་རྗེ་རྣལ་འབྱོར་མ་ཡིན་པར་འདུག དེ་མན་ཆད་སངས་རྒྱས་ཀྱི་བཀའ་བསྟན་བཅོས་ཐམས་ཅད་ལ་མི་ཤེས་པའི་དྲི་མ་ཐམས་ཅད་བྲལ་བ་ཡིན་ཞིང་། གཞན་གྱིས་བློར་ཆུད་པ་དཀའ་གསུང་། དེ་ཡང་སྒྲུབ་པ་འབའ་ཞིག་ལ་བཞུགས་པའི་དུས་སུ་ན་བཟའ་རས་རྐྱང་རེ་མ་གཏོགས་པ་བླ་གོས་དང་གསོལ་ཞལ་ཐུར་མ་ཚུན་ཆད་སྤོང་ཐག་མཛད་ཅིང་།

ཉེ་གནས་ཀྱི་འཕྲལ་དགོས་ཀྱི་ཀ་ཅ་བག་རེ་བསྒྲུབ་ནས་སྤྱན་ལམ་དུ་ཕབ་པ་དང་། བདག་འཛིན་བྱེད་པའི་མི་ལས་སྡུག་པ་མེད་གསུངས་ནས་སྤོང་ཐག་མཛད། དེ་ནས་དབྱར་ཞིག་ཡང་དཀར་དུ་བཞུགས། དེ་ན་རྗེ་བཙུན་མི་ལིའི་ཞབས་རྗེས་ཀྱང་ཡོད། རྗེ་རྒོད་ཚང་པས་བྲག་ལ་ཞབས་རྗེས་ཀྱང་བཞག། དེ་ནས་རྒོད་ཚང་དུ་བྱོན་ནོ། །དེ་ཡང་ཤྲཱི་རྒོད་ཚང་ཞེས་བྱ་བ་རྒྱབ་རི་གནམ་དུ་སྙེགས་པ་འདྲ་བ། དགོན་པའི་ངོ་ཏི་དེ་བྲག་དམར་པོ་སེང་གེ་གནམ་དུ་འཕྱོང་བ་འདྲ་བའི་སྐེད་པ་ལ་མཁའ་འགྲོ་མས་སྦས་པའི་རང་བྱུང་གི་ཕུག་པ་དབེན་ཞིང་ཉམས་དགའ་བ། བཀྲ་ཤིས་ཤིང་དངོས་གྲུབ་ཀྱི་མཚན་དུ་མ་དང་ལྡན་པའི་གནས་དེར། རྗེ་ཡི་ཞལ་ནས་འུ་ཡི་བྲག་ཕུག་འདི་ཆུང་འདུག ཆེར་སྐྱེད་དགོས་པ་འདུག་པས་ཁྱེད་རང་ཚོ་རྡོ་ཐོན་ཅིག་ངས་སློག་གི་གསུངས་ནས། སྣང་བ་སྒྱུ་མར་རྟོགས་ནས། སྣང་བ་ཟང་ཐལ་མའི་དུས་སུ་མགུར་བཞེངས་པ་ནི། ཆོས་སྐུ་རྡོ་རྗེ་འཆང་ཆེན་ལ་གསོལ་བ་འདེབས། །ཕྱིའི་སྣང་བ་འདི་ཀུན་ཟང་ངེ་ཐལ་ལེ་རུ་འདུག ། འདུས་བྱས་འདི་ཀུན་མི་རྟག་འཇིག་པ་རུ་འདུག །ཅེས་གསུངས་ནས། བྲག་ལ་ཟན་གཅོད་གཅོད་མཛད་ནས་བྲག་ཕུག་ཆེར་སྐྱེད་པས། དེ་དུས་ཉེ་གནས་པས་ཆོས་རྗེ་བ་འདིར་ཕྱོགས་ལ་ནག་ཆང་མཛད་པར་ཞུ། འདིའི་ཕྱོགས་སུ་གཟིམས་ཁང་མཛད་པར་ཞུ་ཟེར་ཞིང་མཛུབ་རིས་བྱས་པས། རྗེ་ཡི་ཞལ་ནས་འོ་ད་ཆོག་པར་གྱིས་ཁྱེད་ཞེན་པ་སྐྱེ་བར་འདུག་ཞེན་པ་སྐྱེས་པའི་ཁང་པའི་དོན་མེད་གསུངས་ནས་ཕྱག་གཡས་བྲག་ལ་བརྒྱབ་པས། ཕྱག་གི་རྗེས་བྱུང་བ་དུས་ད་ལྟའི་བར་དུ་ཡང་ཡོད་དོ།།

དེར་ཡང་རྗེ་རྒོད་ཚང་པའི་ཞལ་ནས། རང་བྱུང་གི་ཕུག་པ་འདིར་རྡོག་པ་བརྒྱབ་ཚད་ངན་སོང་དུ་སོང་ན་ང་མགོན་པོ་རྡོ་རྗེ་མི་མིན་གསུངས་ཤིང་། དེས་ན་རྒོད་ཚང་སྐོར་ཚད་ངན་སོང་དུ་མི་འགྲོ་བར་རྗེ་རྒོད་ཚང་པས་ཞལ་གྱིས་བཞེས་འདུག་ཅིང་། སྒྲུབ་པ་བྱས་ན་ལྟ་ཅི་སྨོས་སོ། །འདི་ལྟ་བུའི་བླ་མ་སངས་རྒྱས་དངོས་དང་མཇལ་བ་རེ་དགའ་ཟེར་ཞིང་སྤྲོ་བར་གྱུར་ཏོ། །དེ་ནས་ལོ་དྲུག་ཏུ་འདག་སྦྱར་མཛད་ནས་མི་དང་མ་མཇལ་བར་སྒྲུབ་པ་མཛད་ཅིང་། རྟོགས་པ་རི་བོ་བཞིན་དུ་བརྟན་པ་ཐོབ། མཁྱེན་པ་ཉི་ཟླ་བཞིན་དུ་ཤར། སྙིང་རྗེ་མྱུ་གུ་བཞིན་དུ་སྐྱེས། སྐབས་ཤིག་ཙ་ན་ཇོ་མོ་རང་ཤེས་བྱ་བ་བུ་ཁྱོ་ཤི་བའི་སྡུ་བསྔལ་ཅན་ཞིག་བྱུང་བ་དང་། ཆོས་རྗེ་པའི་ཞལ་ནས། ང་ལ་དུས་རྟག་ཏུ་ཉམས་དགའ་ཡལ་ལེ་ཞིག་ཡོད་པ་དེ་ཁྱོད་ཁྱེར་ཅིག་གསུངས། ཁྱོད་ཀྱི་སྡུག་བསྔལ་དེ་ང་ལ་བོར་ཅིག་གསུངས་པས། མོས་སྡུག་བསྔལ་རང་སངས་ལ་སོང་། ཕྱིས་མོས་ཆོས་སྒོར་ཞུགས་ནས་བསྒོམས་པས། རང་གྲོལ་གྱི་རྣལ་འབྱོར་མ་ཞིག་བྱུང་བ་ཡིན་སྐད།

ཡང་རྗེས་ངས་ཕྱག་རྒྱ་ཆེན་པོའི་རྟོགས་པ་ཉིན་མཚན་མེད་པ་དང་མཉམ་རྗེས་མེད་པར་གང་ཤར་གང་སྣང་གིས་ཆོག་པའི་བརྟན་པ་ཤྲཱི་རིར་ཐོབ་པ་ཡིན་གསུངས། གདམས་ངག་ཐམས་ཅད་ལ་རང་གིས་སྒོམ་རྟགས་རེ་ཐོན་པར་བྱས་པ་ཡིན་པས། གཞན་ལ་ཉམས་མྱོང་མེད་པའི་ཆོས་ཚིག་བཞི་པ་ཞིག་ཀྱང་བཤད་པ་མེད་གསུངས། དེ་ཡང་རྣལ་འབྱོར་གྱི་དབང་ཕྱུག་རྒྱལ་བ་རྒོད་ཚང་པ་མགོན་པོ་རྡོ་རྗེ་ཞེས་བྱ་བ་དེ་ཉིད་ཀྱིས་ཉམས་དང་རྟོགས་པ་མཐར་ཕྱིན་ནས། འགྲོ་དོན་རླབས་ཆེན་མཛད་པ་ནི། ཐོག་མར་ལྷ་འདྲེ་དཔག་ཏུ་མེད་པ་ལ་ཆོས་གསུངས་ཤིང་། དེ་ནས་མིའི་འགྲོ་དོན་མཛད་པ་ནི། དེར་སློབ་མ་ལ་སྔ་པ་སློབ་དཔོན་བཀའ་གདམས་པ།  དེ་ནས་སྔ་བ་སློབ་དཔོན་བྱང་དཔལ་ཡིན་ཞིང་། དེ་ནས་སྟོན་པ་དཀོན་ཤེར། དེ་ནས་སློབ་དཔོན་སྟོན་གྲུབ། སྨར་འགོག་སྟོན་གཞོན་ནུ་སེང་གེ། ཕ་དྲུག་སློབ་དཔོན་ཞྭ་སྟོན། སློབ་དཔོན་པར་སྟོན། སློབ་དཔོན་དང་ཆེན་བྱ་བ་འཁོར་དུ་མ་དང་བཅས་པ་བྱོན། དེ་ནས་བྱང་སེམས་ཤེར་གཞོན་བྱ་བ་རིག་པའི་གནས་ལྔར་མཁས་པའི་པཎྜི་ཏ་ཆེན་པོ་དེ་བྱོན། གཞན་ཡང་སྟོན་པ་གྲགས་པ་བཀྲ་ཤིས། སྟོན་པ་ཤེར་བྱུང་། གནས་བརྟན་ཤེར་མཛེས། སྟོན་པ་གཡོ་མོ་ཆེ་དང་། སྟོན་པ་གྲུབ་སེང་། རྗེ་རང་གི་གྲོགས་མཆེད་ལྷོ་བྲག་པ་ཇོ་བཙུན་ཚུལ་རྡོར། ཉེ་གནས་ལ་སྔ་བ་རིན་རྒྱལ་སྔོན་མོ། སློབ་དཔོན་བསམ་གཏན་འོད། སྒོམ་པ་རྡོ་རྗེ་སེང་གེ་ལ་སོགས་པ་སྟོན་སྒོམ་བཅོ་བརྒྱད་ཙམ་ལ་བཅོམ་ལྡན་འདས་མ་རྗེ་བཙུན་མའི་བྱིན་རླབས་ཤིག་མཛད་པས། ནམ་མཁའ་ནས་མཁའ་འགྲོ་མ་ཌཱ་མ་རུ་འཁྲོལ་ཞིང་བྱུང་བ་ཐམས་ཅད་ཀྱིས་མཐོང་བ་ཚོགས་གྲལ་དུ་བྱོན་ནས། ཆོས་རྗེའི་དྲུང་དུ་དར་ཅིག་བཞུགས་པས། མི་ཐམས་ཅད་ཉམས་འུར་ནས་ཡེ་ཤེས་རང་བབས་སུ་བྱུང་སྟེ། དབང་གི་དོན་མངོན་དུ་བྱས་པ་ཡིན་གསུང་། གཞན་ཡང་དེ་རྣམས་ལ་ཕྱག་རྒྱ་ཆེན་པོའི་ཁྲིད་དང་རོ་སྙོམས་སྐོར་དྲུག། ནཱ་རོ་ཆོས་དྲུག་ལ་སོགས་པ་གསུངས་པས། སྟོན་སྒོམ་སོ་ཐར་གྱི་ཆ་ལུགས་ཅན་མཁས་ཤིང་གྲུབ་པ་བརྙེས་པ་འབའ་ཞིག་བྱུང་བ་ཡིན་ནོ། །

གཞན་ཡང་དེ་དུས་སྔགས་པའི་སློབ་མ་ལ་སྔ་བ། དགེ་བཤེས་རས་ཕུག་པའི་དབོན་སྲས་དང་། དགེ་བཤེས་བྱ་རོག་ཚང་པའི་ལྕམ་སྲས། ཟངས་མདོག་གི་དབོན་སྲས་ལ་སོགས་པ་ཡང་བྱོན་ཞིང་། གཞན་ཡང་དེ་དུས་ཆོས་རྗེ་རང་གི་གདུལ་བྱ་རྣམས་ཀྱི་མཆོག་ཏུ་གྱུར་པ་རྒྱལ་བའི་སྲས་པོ་དཔལ་ལྡན་ཡང་དགོན་པ་ཆེན་པོ་སྐུ་འཁོར་ལྔས་ཤྲཱི་དགོན་པ་རྣམས་གཟིགས་སུ་བྱོན། རྒོད་ཚང་དུ་ཕེབས། དེ་ཡང་ཆོས་ཀྱི་རྗེ་འགྲན་ཟླ་མེད་ཅིང་རྩོད་པ་དང་བྲལ་བ། སའི་སྟེང་འཛམ་བུའི་གླིང་ན་གྲུབ་ཐོབ་ཆེན་པོར་སྙན་པ་དང་གྲགས་པས་ཁྱབ་པའི་ཆོས་ཀྱི་རྒྱལ་པོ་རྒོད་ཚང་ན་སྒྲུབ་པ་མཛད་སྐབས་སུ། རྒོད་ཚང་དུ་མཇལ་བས། ཆོས་རྗེ་ཡང་དགོན་པས་ཆོས་འབྲེལ་ཞིག་ཞུ་ཞུས་པས། རྗེའི་ཞལ་ནས་ཆོས་ང་བས་ཁྱེད་རང་མཁས་པ་ཞིག་འདུག་སྟེ།

བཞེད་ན་བྱས་པའི་ཆོག་གསུངས་ནས། ཆོས་འབྲེལ་ཤིན་ཏུ་ཟབ་པ་ཞིག་གནང་བས་དེར་རྗེ་ཡང་དགོན་པའི་ཐུགས་དགོངས་ལ་དེ་ལ་འདི་འདྲ་ཞིག་ཡོང་ངམ་མི་ཡོང་དགོངས་པའི་ཐེ་ཚོམ་གྱི་རྟོག་པ་ཞིག་བྱུང་བས། དེ་རྗེ་རྒོད་ཚང་པའི་ཐུགས་ཀྱིས་མཁྱེན་ཏེ། ཐེ་ཚོམ་གྱི་རྟོག་པ་ཐམས་ཅད་འཕྲལ་ལ་བསལ་བས། བླ་མ་ལ་སྒྲིབ་པ་མི་མངའ་བས་མངོན་མཁྱེན་ཐོགས་མེད་མངའ་བ་ཞིག་འདུག་སྙམ། མོས་གུས་ཐུན་མོང་མ་ཡིན་པ་ཞིག་སྐྱེས་ཏེ། དེ་ནས་ཞལ་ཞིག་ཅིས་ཀྱང་བསྟན་པར་ཞུ་ཞུས་པས། ལྟ་རིན་ཆོག་པ་ནི་མེད། དགྱེས་ན་ཕར་ལྟ་ཚུར་ལྟ་བྱས་པས་ཆོག་གསུངས་ནས། སྐུ་ཡོལ་ཞིག་འདུག་པ་ཕྱག་གིས་བསལ་ནས་བསྟན་པས།

དེ་དུས་རྒོད་ཚང་པ་འཇིག་རྟེན་བློས་བཏང་གི་ཆས་སུ་མཛད་ནས། ན་བཟའ་ཕྲུགས་ཀྱི་རིང་འགག་རྙིང་ངེ་བ་ཞིག་ལ་སྐུ་རགས་སྐོར་གཅིག་མ་ཞིག་བཅིངས། སླེ་བོའི་ཕྱི་ལ་རས་སེར་ཐོར་རེ་བཏབ་པ་ཞིག་གསོལ། དབུ་སྐྲ་མཛུབ་རེ་ཙམ་བྱས་པ་ཞིག་བཞུགས་འདུག་པ་ལ། ཞལ་མཐོང་བ་ཙམ་གྱིས་ཐ་མལ་གྱི་ཤེས་པ་གཏིང་ནས་འགྱུར་ནས། ཉམས་བན་བུན་དུ་འགྲོ་བའི་བྱིན་རླབས་ཀྱི་ཚན་ཁ་ཅན་ཞིག་བཞུགས་ཤིང་འདུག་པས། དེར་རྗེ་ཡང་དགོན་པས། བདག་རེ་ཞིག་ནས་ཞབས་དྲུང་དུ་མཆི་བས་ཐུགས་ལ་འདོགས་པར་ཞུ་ཞུས་ནས་ཕེབས་སོང། ཕྱིས་ཞབས་དྲུང་དུ་བྱོན་ཏེ་ཁྲིད་དང་གདམས་ངག་རྫོགས་པར་གནང་ནས། ཐུགས་ཀྱི་སྲས་མཆོག་ཏུ་གྱུར་པ་ཞིག་བྱུང་བ་ལགས་སོ། །དེ་ནས་དབྱར་དེར་རྒོད་ཚང་དུ་ཕྱོགས་རིས་ཀྱི་མི་ཆེན་མང་པོ་དགེ་བའི་བཤེས་གཉེན་ཡོན་བདག་ཕོ་མོ་ལ་སོགས་པ་མང་པོར་ཁྲིད་བསྐྱངས་པས། གནས་ལུགས་ར་འཕྲོད་པ་ཡང་བྱུང་བ་ཡིན་ནོ་གསུང་། ཡང་སྐབས་ཤིག་ཏུ། རྗེ་རྒོད་ཚང་པ་བྲ་མ་ལུང་དུ་ཕེབས་ནས་ཤིན་ཏུ་དབེན་པ་མཛད་པའི་དུས་སུ། མགུར་འདི་གསུངས་སོ།།
རྗེ་སྐུ་ལྔའི་བདག་ཉིད་རིན་པོ་ཆེ། །མཁའ་མཉམ་སེམས་ཅན་བསྐྱབ་ཏུ་གསོལ།།
བླ་མེད་བྱང་ཆུབ་སྒྲུབ་པ་ལ། །བར་ཆད་མེད་པའི་དངོས་གྲུབ་ཞུ།
ཡུལ་པོ་བཟང་དགེ་གཙང་པ་ཡི། །ཉམས་དགའ་བོང་ཤོད་སྣར་མའི་ལྗོངས།།
མཚན་བཟང་ཕྱེའི་ལུང་པ་ཡི། །དཔལ་བྲ་མ་ལུང་གི་དགོན་པ་དེར། །
ཁོ་བོ་རྒྱལ་ཁམས་སྤྲང་པོ་འདི། །སྒྲུབ་པ་ཉམས་སུ་ལེན་དུས་སུ།།
སྐྱིད་པའི་རང་སྐད་འདི་སྐད་ལེན།།
ཞེས་སོགས་མང་དུ་གསུངས། ཡང་རྒོད་ཚང་དུ་ཆོས་རྗེའི་ཞལ་ནས། སྟག་ཚང་ནས་ཝ་མི་སྐྱེས། རྒོད་ཚང་ནས་རྒོད་ཕྲུག་འཚར་རམ་ལྟའི་གསུངས། རྒོད་ཚང་ནས་འཕུར་ནས་ཚང་མང་དུ་གཤེགས། ཚང་མང་ནས་འཕུར་ནས་རྒོད་ཚང་དུ་གཤེགས་པས། དེའི་དུས་སུ་འཁོར་རྣམས་ལ་ཡང་མཐོང་སྣང་མི་འདྲ་བ་མང་པོ་བྱུང་ཞིང་། དེའི་དུས་སུ་རིན་པོ་ཆེའི་སྤྱན་རྩ་དམར་རྫིག་གེར་མཛད་ནས་གཟིམས་ཁང་དུ་བྱོན་ནས། རྒོད་ཕྲུག་ཚར་ནས་ནམ་འཕང་གཅོད་པ་ཡིན། འོག་མིན་གནས་སུ་ནམ་འཕང་བཅད་པ་ཡིན། ངས་སྐྱེ་བ་དཔག་ཏུ་མེད་པར་ཆོས་ལ་དཀའ་བ་སྤྱད་པ་ཡིན། །ཞེས་སོགས་གསུངས། ཁྱུང་དཀར་དང་རྒོད་ཚང་དུ་མགུར་སུམ་ཅུ་སོ་ལྔ་གསུངས།

དགུང་ལོ་བཞི་བཅུ་ཞེ་ལྔ་ལ་རྒྱལ་ཕུ་སྟེང་འགྲོར་བྱོན་པའི་སྐོར།

དེ་ནས་ཡང་ཆོས་རྗེ་སྐུ་མཚམས་ཤིག་གྲོལ་བ་དང་། དེའི་དུས་སུ་ཁྲོམ་གྱི་ཡོན་བདག་ལ་སྔ་བ་བྱང་ངེ་བ་འོད་འབར་བཟའ་མིའི་ཐོག་དྲངས་མང་པོ་མཇལ་དུ་འོངས་ནས་ཞུས་པ། ཆོས་རྗེ་པས་རྟེན་འབྲེལ་ཆིག་ཆོག་མ་གནད་དུ་ཆུད་པས་མི་དང་མི་མ་ཡིན་པ་ཐམས་ཅད་དབང་དུ་འདུས་པས། བྱ་རྒོད་དང་རི་དྭགས་གནའ་བ་མི་ཐར་བའི་ས་ཕྱོགས་འདིར། བདག་ཅག་པས་མི་མང་པོ་གཡང་ལ་ལྷུང་བར་གདའ་བས།  བདག་ཅག་གི་ས་ཕྱོགས་ཕ་གི་ན་རི་ཁྲོད་ངོ་མཚར་ཅན་བདོག་པས་འབྱོན་པར་ཞུ་ཞུས་པས། ཆོས་རྗེའི་ཞལ་ནས་རི་ཁྲོད་ཇི་སྐད་བྱ་བ་ཡོད་གསུངས་པས། སྟེང་འགྲོ་བྱ་བ་ཡོད་ལགས་ཞུས་པས།

ཆོས་རྗེའི་ཞལ་ནས་རྟེན་འབྲེལ་བཟང་དེར་འགྲོ་བ་ཡིན་ནོ་གསུངས། དེ་ཡང་རྗེ་རྒོད་ཚང་པས་ཁྱུང་དཀར་དང་། ཡང་དཀར་དུ་ལོ་གསུམ། རྒོད་ཚང་དུ་ལོ་ངོ་བརྒྱད་དེ་འདྲིལ་བས་ཤྲཱི་རིར་ལོ་ངོ་བཅུ་གཅིག་བཞུགས། རྒོད་ཚང་པ་ཞེས་ས་གསུམ་དུ་གྲགས་པའི་མཚན་ཡང་ཤྲཱི་རྒོད་ཚང་དུ་ཐོགས། དགུང་ལོ་བཞི་བཅུ་ཞེ་ལྔ་པ་ལ་བཀྲ་ཤིས་སྟེང་འགྲོར་བྱོན་ཏེ། འགྲོ་དོན་གྱི་མགོ་ཡང་རྒོད་ཚང་ནས་བཙུགས་པ་ཡིན་གསུངས། དེ་ཡང་གནས་མཆོག་དམ་པ་བཀྲ་ཤིས་སྟེང་འགྲོ་ཞེས་བྱ་བ་དེར་ཕུ་ན་སེང་གེ་དཀར་མོ་གནམ་དུ་མཆོང་བ་ལྟ་བུ་གནས་བཟང་དཀར་མོ། མདའ་ན་གྲོང་ཁྱེར་བརྒྱ་ཞོ་མནན་པ་འདྲ་བ་ཡོད་པ། བར་ན་རིའི་རྒྱལ་པོ་གདན་ལ་ཞུགས་པ་འདྲ་བའི་ཁོངས་ན་དགོན་པ་བཏབ་པ་ཡིན་ཞིང་།

དེ་ཡང་ཆོས་རྗེའི་ཞལ་ནས། ཤྲཱི་ཡང་འདི་ནས་མཐོང་ཞིང་ཤྲཱི་དང་འདི་ལ་ཁྱད་པར་མི་འདུག་པས་གནས་ཆེན་བྱིན་རླབས་ཅན་མཆོག་ཏུ་གྱུར་པ་ཞིག་འདུག་གསུངས། དེ་ལྟ་བུའི་གནས་དེར་གཟིམས་ཁང་ཤིན་ཏུ་གྲང་བ་གཞན་བེར་ཐུལ་གོན་ཀྱང་མི་དྲོས་པའི་ས་དེར་རིན་པོ་ཆེ་བས་རས་རྐྱང་གསོལ། གཞན་ཅི་ཡང་མ་བཞེས་པར་ལོ་གསུམ་སྐུ་མཚམས་ལ་བཞུགས། སྐུ་མཚམས་གྲོལ་བ་དང་། རྗེའི་ཞལ་ནས། བྱང་ཆུབ་ཀྱི་སེམས་མ་ཉམས་པ་ལ། ངའི་ལུས་པོ་འདི་འདྲ་ཡོང་བ་ཡིན་གསུང་། སྐུ་ལུས་གསེར་ཟངས་ཕྱིས་པ་འདྲ་བ་བཀྲག་མདངས་གཟི་མདངས་བསམ་གྱིས་མི་ཁྱབ་པར་འདུག་ཅིང་། དེ་དུས་སྐུ་ཁམས་བཟང་ཞིང་སྐུ་ཚེ་ལ་ཡང་དམ་བྲེལ་མ་བྱུང་ན། དགུང་ལོ་བརྒྱད་ཅུ་བཞུགས་པར་གསུངས།

ཡང་དགུང་ལོ་བཞི་བཅུ་ཞེ་དགུ་ཡན་ཆད་སྒྲུབ་པ་མཛད། དེ་མན་ཆད་འགྲོ་དོན་མཛད་ཅེས་རྣམ་ཐར་ཁག་གཞན་དུ་གསུངས་པ་ལྟར་འགྲོ་དོན་འཕྲིན་ལས་བསམ་གྱིས་མི་ཁྱབ་པ་མཛད་ཅིང་། སྙན་པ་དང་གྲགས་པས་ཕྱོགས་ཐམས་ཅད་ཁྱབ་པར་གྱུར་ཏོ།། དུས་དེར་ཡང་ཉིན་ཞིག་ཨ་པོ་བྱང་དཔལ། ཉེ་གནས་རིན་རྒྱལ་ལ་སོགས་པའི་དག་པའི་འཁོར་འགའ་ཞིག ཆོས་རྗེའི་དྲུང་དུ་ཚོགས་འཁོར་ཞིག་མཛད་པ་ལ། ཆོས་རྗེ་པའི་སྐུའི་བཀོད་པ་འདི་ལྟར་བསྟན་ཏེ། དེ་ཡང་བཅོམ་ལྡན་འདས་རྒྱལ་བ་ཤཱཀྱ་ཐུབ་པའི་སྐུ་རུ་བསྟན་ནས་མཛད་པ་བཅུ་གཉིས་ཀྱི་ཆོས་གསུངས་སོ། །དེ་ཉིད་ཀྱང་བཅོམ་ལྡན་འདས་རྡོ་རྗེ་གཏུམ་པོའི་སྐུ་རུ་སྤྲུལ་ནས་དགྲ་བགེགས་འཇོམས་པའི་ཚུལ་བསྟན། ཡང་བཅོམ་ལྡན་འདས་བདེ་མཆོག་ལྷན་སྐྱེས་རྡོ་རྗེ་རྣལ་འབྱོར་མ། ཡེ་ཤེས་ཀྱི་མགོན་པོ་ཕྱག་བཞི་པ་སོགས་སུ་བསྟན་ནས་སྤྲུལ་པ་སྣ་ཚོགས་མཛད། གཞན་ཡང་བཅོམ་ལྡན་འདས་རྒྱལ་བ་རིགས་ལྔའི་སྐུར་རིམ་པ་བཞིན་དུ་སྤྲུལ་ནས། ཞིང་ཁམས་ལྔའི་བདག་པོ་མཛད་པ་ལ་སོགས་པའི་ཚུལ་སྣ་ཚོགས་བསྟན་ཏེ།  མདོར་ན་ཡི་དམ་གྱི་ལྷ་ཚོགས་མང་པོར་བསྐྱེད་ཅིང་སྤྲུལ་ནས། དེ་རྣམས་ཀྱང་སྐབས་སུ་མི་སྣང་བར་རྗེ་རང་ལ་བསྡུས་ནས་རྫོགས་རིམ་གྱིས་ངང་ལ་བཞུགས་ཤིང་། དེ་ལྟ་བུའི་བསྐྱེད་རྫོགས་གང་མཛད་ཐམས་ཅད་ལ་སྐུའི་སྒོ་ནས་རང་དབང་ཐོབ་པའི་ཚུལ་མཐའ་ཡས་པ་བསྟན་ཏོ།  །

དེ་ཡང་བྱ་སེམས་ཤེར་གཞོན་ལ་སོགས་པའི་སྣོད་ལྡན་རེ་རེ་ཙམ་ལ་གསང་བའི་རྣམ་ཐར་བཀའ་རྒྱ་མའི་མགུར་གསུངས། གཞན་ཡང་ཨ་པོ་བྱང་དཔལ་གྱིས་ཆོས་རྗེ་ལ་དགོན་པ་སྟེང་འགྲོ་འདི་གནས་ཆེན་ཞིག་ཡིན་པ་མི་གདའ་འམ་ཞུས་པས། ཆོས་རྗེའི་ཞལ་ནས། སྤྱིར་ངའི་སྡོད་ས་དེ་གནས་ཆེན་ཡིན་མོད་གསུངས། དེ་ནས་དེའི་དབྱར་དེ་བར་འབྲོག་ནེ་ལུང་དུ་ཡོན་བདག་དཔལ་རྩེས་སྤྱན་དྲངས་ནས་རི་ཁྲོད་མཛད་པ་དང་སྟབས་སུ་བྱོན་ནོ། །འགྲོ་དོན་ཟླ་བ་གཅིག་ལ་ཁེབས་ཆེ་བ་ཞིག་བྱུང་། འབྲོག་པ་ཐམས་ཅད་ཀྱི་ཚོགས་རྒྱ་ཆེན་པོ་བསགས། རི་དྭགས་ལ་རི་རྒྱ་བརྟན་པོ་བཙུགས། མཐའ་དང་ཀླུང་ཐམས་ཅད་བསྲུབས། དཔག་དང་གི་རྔོན་པ་ཐམས་ཅད་གདམས། སྒོམ་ཆེན་ཉིས་བརྒྱ་ཙམ་ལ་ཁྲིད་མཛད། སེམས་ཅན་གང་ལ་གང་གདོད་ཀྱི་དངོས་གྲུབ་གནང་ཞིང་ཐམས་ཅད་བདེ་བ་ལ་བཀོད་ནས་སྟེང་འགྲོར་བྱོན་པས། གནས་འདི་རང་བྱིན་རླབས་ཆེ་བར་འདུག་གསུངས་ནས་སྐུ་མཚམས་དམ་པོ་ལ་བཞུགས་སོ།།
ཡང་བར་འབྲོག་གི་ཡོན་བདག་སོགས་ཀྱིས་བར་འབྲོག་དགེ་སྨན་དུ་སྤྱན་དྲངས། དབྱར་ཞོད་ཀྱི་སྒང་ལ་བར་འབྲོག་ས་སྟོང་གཅིག་ཏུ་ཚོགས་པ་ལྔ་བརྒྱ་དྲུག་བརྒྱ་རེ་རྒྱུན་མ་ཆད། དགེ་བཤེས་འབུམ་རྩེ་སོགས་ཀྱིས་རྫ་སྟག་སྒོར་སྤྱན་དྲངས། དགེ་བཤེས་ཀྱི་སྟག་སྒོ་དགོན་པ་ཕུལ། རི་ཁྲོད་ཅིག་ལ་ཉམས་དགའ་བ། གངས་ཏི་སེ་ཆ་འདྲ་གདུག་གསུངས་ནས་ཤིན་ཏུ་དགྱེས། ཟླ་བ་གཉིས་རི་ཁྲོད་དང་འགྲོ་དོན་སྟབས་སུ་མཛད། དེ་ནས་ཡང་སྟེང་འགྲོར་བྱོན་ནས་དཔལ་ལྡན་ཡང་དགོན་པ་ཆེན་པོ། ཞིག་པོ་དཀོན་སེང་། དབང་ཕྱུག་རྒྱལ་མཚན། ཁྲི་སྟོན་མཁན་པོ་ཁུ་ལུང་པ་ལ་སོགས་པའི་ཕྱོགས་ཕྱོགས་ཀྱིས་མི་ཆེན་བླ་མ་དང་སློབ་དཔོན་དགེ་བཤེས་ལ་སོགས་པ་བཞི་བརྒྱ་ཙམ་འདུས་ནས་ཁྲིད་བསྐྱངས། དེ་ནས་ཤྲཱི་ཁྱུང་དཀར་དུ་བྱོན་ཞག་བཞུགས། ཕྱུག་པོ་ཆུ་མདོ་བས་ཆུ་མདོར་བྱོན་པར་ཞུ་བ་ཕུལ་བས། གྲོང་སྟག་ཏུ་བྱོན་ནས་འགྲོ་དོན་མཛད། དེ་ནས་ཆུ་མདོར་བྱོན་ནས་ཆོས་དང་ཟང་ཟིང་གི་ལས་འབྲེལ་བཞག ཆུ་མདོ་ནས་ཡོན་བདག་ཡན་ཐུབ་ཀྱིས་ཁང་དམར་དུ་སྤྱན་དྲངས་འཕྲིན་ལས་རྒྱ་ཆེར་མཛད་དོ།།

དེ་ནས་བྱང་པའི་ཡོན་སློབ་ཀྱིས་གདན་དྲངས་ནས། བྱང་དགྱེར་བུ་དང་། ཁྲི་བོ་མཁར་དང་། ཡུལ་བོ་ཆེ་དང་། སོལ་བ་དང་། ཟུག་ལ་སོགས་པ་ཅུང་པའི་ཡུལ་ཕྱོགས་རྣམས་སུ་བྱོན་ནས་འགྲོ་དོན་རྒྱ་ཆེན་མཛད་དོ། །དེའི་དབྱར་ཕྱེ་ཁུར་བཞུགས་ནས་འགྲོ་དོན་མཛད་ཆོས་དང་ཁྲིད་མང་དུ་གསུངས། སྟོན་འབྲོག་ཏུ་སྤྱན་དྲངས་ནས་ཟླ་བ་མང་པོར་ཆོས་གསུངས། དེར་དགེ་བཤེས་རྐོང་སྟོན་གྱིས་ཆོས་ཀྱི་དྲི་བ་ཡ་གིའི་རྫོགས་ཆེན་ནས་མ་གིའི་ཉན་རང་ཡན་ཆད་ལ་དྲི་བ་བརྒལ་རྟགས་དང་བཅས་པ་ཞུས་པར་རྗེ་རྒོད་ཚང་པས་ལན་བཏབ་པས། ཁོང་ན་རེ། སྔར་དགེ་བཤེས་བྱུང་ཚད་ལ་དྲིས་པས། དེ་འདྲ་མ་བྱུང་ཟེར་ནས་ཤིན་ཏུ་མོས་ནས་རྗེས་སུ་བཟུང་བས་མཆོག་ཏུ་གྱུར་པའི་སློབ་མ་ཞིག་བྱུང་བ་ཡིན་ནོ། །

དེ་ནས་ཕྱུག་མོ་ཆོས་ཉིད་ཀྱིས་གདན་དྲངས་ནས་ཤྲཱི་ཡར་བྱོན། དེ་ནས་ལྷ་གདོང་དུ་སྤྱན་དྲངས། བླ་མ་ཡང་དགོན་པ་ལ་སོགས་ཐམས་ཅད་ཀྱིས་འབུལ་བ་བསམ་གྱིས་མི་ཁྱབ་པ་མཛད། དེ་ནས་སློབ་དཔོན་ཞྭ་མ་བས་སྤྱན་དྲངས་ནས་གྲུ་བཞིར་བྱོན་ནས་ཁྲོམ་གྱི་འདུས་ཤིན་ཏུ་ཆེ་ཞིང་འགྲོ་དོན་ཆེན་པོ་བྱུང་ཟླ་བ་དགའ་བཞུགས། དེ་ནས་རྒྱལ་ཐང་གི་རི་ལ་བྱོན། དེ་ནས་བྲ་མ་ལུང་དུ་དགུན་དབེན་པ་ལ་བཞུགས་སོ། །

དཔྱིད་ཀ་ཡོན་བདག་པས་སྟེང་འགྲོར་གདན་དྲངས། སྟེང་འགྲོར་བསྒྲུབ་ཐབས་དང་གདམས་ངག་མང་པོ་གསུངས། དེ་ནས་བྱང་དུ་གདན་དྲངས་སྟག་རྩེ་ཚུན་ཆད་ཀྱིས་མཇལ་བ་བསམ་གྱིས་མི་ཁྱབ་པ་བྱུང་། གཞན་དོན་རྒྱ་ཆེན་པོ་འགྲུབ་ཅིང་། དེ་ལྟར་བྱི་ལོ་དང་གླང་གི་ལོ་གཉིས་པོར་ལ་སྟོད་ལྷོ་བྱང་ཐམས་ཅད་དུ་ལས་འབྲེལ་བཏགས་སོ། །དེ་ནས་བྱང་སྤྱིའི་ཕུ་ལྷོ་བྱང་གི་སོ་མཚམས་ཟུག་བཀྲ་ཤིས་སྟེང་གི་དགོན་པ་རྩ་ན་བ་རོང་དམ་པ་དབེན་ཞིང་ཉམས་དགའ་བ་དེར་བྱོན་ཏེ་སྒྲུབ་པ་འབའ་ཞིག་མཛད། ཡང་སྟེང་འགྲོར་བྱོན་ནས། ལོ་གཉིས་ཐུགས་དམ་ཤིན་ཏུ་དམ་པ་ལ་བཞུགས། ཡང་ཕྱུག་མོ་ལྷ་མོ་རྒྱན་གྱིས་སྦུ་ཏྲའི་རི་ལ་སྤྱན་དྲངས་སྦུ་ཏྲ་དགོན་པའི་མཚན་ཡང་བདེ་ཆེན་གླིང་བྱ་བར་བཏགས། གནས་དེར་ཐུགས་དམ་ཤིན་ཏུ་དམ་པ་ལ་བཞུགས་ཏེ་སྒྲུབ་པ་མཛད། རྒས་ཤིང་རི་ཁྲོད་ཇེ་མཐོ་ལ་འགྲོ་བ་ཡིན་གསུངས་ནས། རི་ཁྲོད་ཇེ་མཐོ་མའི་མགུར་གསུངས། གནས་དེར་ཟླ་བ་བརྒྱད་བཞུགས་དེ་ནས་སོས་ཀར་སོང་བ་དང་། བར་འབྲོག་གསང་གི་རི་ལ་བྱོན། གནས་དེར་ཐུགས་དམ་རྒྱུན་ཆད་མེད་པར་ཟླ་བ་ལྔ་བཞུགས་ཤིང་།

དེ་ནས་བུ་སློབ་རྣམས་ཀྱིས་སྤྱན་དྲངས་ནས་སྟེང་འགྲོར་བྱོན། དེར་མི་ཆེན་ལ་སོགས་པ་སུ་བྱོན་ཀྱང་མ་མཇལ་བར་སྐུ་མཚམས་དམ་པོ་ལ་བཞུགས། ཉེ་གནས་ལ་ཡང་གསུང་མ་གནང་བར་འཁོར་གཡོག་ཐམས་ཅད་ཀྱང་སྒྲུབ་པ་དམ་པོ་ལ་བཞུགས། དེ་ཙ་ན་མཚན་མོ་ཡང་མནལ་མི་མཛད་པར་གཟིམས་མལ་བཞི་བཞི་སྤོས་ནས་ཐུགས་དམ་མཛད་དེ། རྟོགས་པ་ནམ་མཁའ་ལྟ་བུའི་ངང་ནས་ཆོས་སྤྱོད་སྒྱུ་མ་ལྟ་བུ་བྱེད་པ་ཡིན་གསུངས། དེ་དུས་སུ་དབུ་ཆེ་དང་དགེ་འདུན་ཡོན་བདག་ལ་སོགས་པའི་ཚོགས་པ་སུམ་སྟོང་ཙམ་ཚོགས་ནས་འགྲོ་དོན་མཛད་པར་ཞུས་པས། གསུང་ཡི་གེར་བྱོན་པ། ཁྱེད་འདིར་བཞུགས་ཀྱི་སྐྱེས་བུ་དམ་པ་རྣམས་གསོན་དང་། ཁོ་བོ་སྤྲང་པོ་བདག་ལ་སྤྱིར་བསམ་རྒྱུ་མ་རྒན་སེམས་ཅན་ལས་མེད། སྒོས་རྗེས་འཇུག་རྣམས་ལ་ཡོན་ཏན་ཇི་ལྟར་བྱས་ན་སྐྱེ་སྙམ་ལས་མེད། དེ་ལ་རང་རྫོགས་པའི་སངས་རྒྱས་ཐོབ་དགོས། སངས་རྒྱས་ཐོབ་པར་བྱེད་པ་ལ་སྒྲུབ་པ་བྱེད་དགོས་པར་འདུག་པས། གནས་སྐབས་སུ་མངོན་ཤེས་དང་རྫུ་འཕྲུལ་དང་མཐར་ཐུག་རྫོགས་པའི་སངས་རྒྱས་མ་ཐོབ་ཀྱི་བར་དུ་སྒྲུབ་པ་བྱེད། སྒྲུབ་པ་བདུད་དངོས་གྲུབ་ཏུ་བརྫུས་པའི་འཁོར་སློབ་སྙན་གྲགས་བསོད་ཆུང་གི་དབང་དུ་མི་གཏོང། སྙིགས་མའི་དུས་སུ་སྒྲུབ་བརྒྱུད་ཀྱི་བསྟན་པ་སྤྱི་དར་བྱེད། ཁྱེད་རང་ཞལ་སློབ་རྣམ་པ་ཚོ་ཡང་གང་དགྱེས་པའི་རི་ལ་རྒྱུག་ལ་སྒྲུབ་པ་གྱིས་ཤིག། སྒྲུབ་པ་མ་བྱས་ན་མཉམ་ཉིད་ངང་དུ་འདུག་པར་མཆིའོ། །ཞེས་པའི་གསུང་བྱོན། ཡང་ངའི་གདམས་ངག་རྣམས་ལ་བསྒྲུབ་པ་བྱས་ཉམས་སུ་བླངས་ན་ཡོན་ཏན་ཐམས་ཅད་སྐྱེ་བ་ལ། དེ་ཉམས་སུ་ལེན་པ་མི་འདུག་ཉམས་སུ་མ་བླངས་ན་འགྲོ་དོན་བྱས། ཆོས་བཤད་ཀྱང་ཅི་ཕན། །ཞེས་གསལ་བའི་གསུང་བྱོན་ནོ།།

དེ་ཙ་ན་ཚོགས་པ་ལ་ལས་ལོ་གསུམ་ཙམ་གྱི་བར་དུ་ཞལ་མ་མཇལ་གསུང་མ་ཐོས་ཏེ། སླར་ཡང་ཞུ་བ་ནན་གྱིས་ཕུལ་བས། དེ་ཁྱེད་རྣམས་ཀྱང་བདེན་གསུངས་ནས་ཆོ་འཕྲུལ་ཆེན་པོའི་ཟླ་བ་ལ་ཞལ་མཇལ་གནང་བས། དེར་བུ་སློབ་ཡོན་བདག་ལ་སོགས་པའི་ཁྲོམ་མང་པོ་ཚོགས་ཏེ། ཆོས་རྗེ་བས་ཁྲི་ཁང་གི་སྟེང་དུ་བྱོན་ནས། སྐུ་ཡོངས་རྫོགས་བསྟན་པའི་དུས་ན། ཁྲོམ་ཐམས་ཅད་དུས་གཅིག་ལ་ཉམས་འུར་བློ་སྣ་ཐམས་ཅད་མོས་གུས་སུ་གྱུར་ཏེ། ཟང་ཟིང་གི་འབུལ་བ་བློར་མི་ཤོང་བ་ལྟ་བུ་བྱུང་། དེར་ཚོགས་པ་རྣམས་ཀྱིས་ཆོས་ཞུས། ཟབ་ལ་རྒྱ་ཆེ་གང་འདོད་ཀྱི་ཆོས་གནང་། གདམས་ངག་ཁྲིད་ཆེན་བརྒྱད་ཀྱི་ཁྲིད་རྣམས་རིམ་པར་བསྐྱངས། བྱིན་རླབས་དང་གདམས་ངག་གི་ཁྲིད་བཏབ་ཚད་ལ་ཕྱག་རྒྱ་ཆེན་པོའི་རྟོགས་པ་མ་སྐྱེས་པ་གཅིག་ཀྱང་མ་བྱུང་། དུས་དེར་ཡང་ཕྱོགས་རིས་ནས་བྱོན་པའི་མི་ཆེན་དགེ་འདུན་ལ་སོགས་པ་ཚོགས་པ་ཕྱེད་དང་ལྔ་བརྒྱ་ཙམ་རེ་ཚོགས་པ་ལ་སེམས་བསྐྱེད་ཆེན་པོ་མཛད།

དེ་དུས་ཡོན་ཏན་རྡོ་རྗེ་བྱ་བའི་བཙུན་ལོག་གཅིག་གི་རྐུན་མ་ཐབ་ཁར་བྱུང་བས། ཉེ་གནས་པས་སྒོ་ནས་ཟིན། བརྡུངས་པས། ཀུ་ཅོ་བྱུང་བ་ཆོས་རྗེའི་གསན་ནས། ཉེ་གནས་པ་ལ་བཀའ་བཀྱོན་ཆེན་པོ་བྱུང་ཁོ་ལ་ནོར་ཐེག་ཚད་བསྐུར་ཆོས་ཟབ་མོ་བསྟན་ནས་བུ་ལ་མི་དགེ་བའི་བསམ་པ་སྐད་ཅིག་ཀྱང་མི་སྐྱེ་བར་གྱུར་ཅིག་གསུངས། དེ་ནི་མཚོན་པ་ཙམ་ཡིན། དེ་ལྟ་བུའི་རྣམ་ཐར་ལ་ཟད་པ་མེད།

སྟེང་འགྲོར་སྒྲུབ་པ་ལ་བཞུགས་པའི་དུས་སུ་སྟོད་ཧོར་ཡོང་གིན་འདུག་པ་རྣམས་ཆོས་རྗེས་གཏོར་མོ་ཆེ་བཏང་ནས་ཆོས་སྐྱོང་ལ་བཀའ་བསྒོ་བ་མཛད་པས་ཧོར་དམག་རང་དབང་མེད་པར་ཟློག་སྟེ། དེའི་དུས་སུ་བོད་ཁམས་ཐམས་ཅད་འཁྲུག་པར་སོང། ཡང་ཧོར་དང་བེ་རི་གཉིས་ཀྱི་དམག་གིས་དཀྲུགས་ནས་དཀའ་བ་དཔག་ཏུ་མེད་པ་ལ། ཆོས་རྗེ་པ་རང་སྒྲུབ་པ་འབའ་ཞིག་མཛད་པས་བསྒྲུབ་པའི་བྱིན་རླབས་ཀྱིས་བར་ཆད་གང་ཡང་མེད་པར་འབྲུག་ར་ལུང་གི་མཆོད་གཉེར་ཚར་བ་ཡིན་ཞིང་བེ་རིའི་དམག་ཚོགས་མང་པོ་བྱུང་བ་ལ་ཆོས་རྗེའི་ཕྱག་གིས་སྡིག་མཛུབ་བགྲད་པས་དུས་མཐའི་རླུང་གིས་སྤྲིན་གཏོར་བ་བཞིན་སོང་། དེ་ལ་སོགས་པའི་རྫུ་འཕྲུལ་སྣ་ཚོགས་པས་སེམས་ཅན་གྱི་དོན་དཔག་མེད་མཛད་དོ།།

 

དགུང་ལོ་ལྔ་བཅུ་ལྔ་བརྒྱད་ལ་གཉའ་ནང་བདེ་ཆེན་སྟེང་དུ་བྱོན་པའི་སྐོར།

ཡང་ཆོས་རྗེ་རིན་པོ་ཆེ་ལ་དགོན་པ་སྟེང་འགྲོ་དང་གྲྭ་པ་རྣམས་ནས་མཁན་པོ་ཕུལ་བ་ལ། ཞུ་བ་ཕུལ་བས་འདིར་བྱོན་ནོ། །བདག་བཟུང་གི་དགོན་པར་ཆགས་སྡང་གི་ཚང་ང་མི་འཆའ་གསུངས། ཆོས་རྗེ་རྒྱལ་བ་རྒོད་ཚང་པ་རྒྱལ་ཕུ་སྟེང་འགྲོར་ལོ་བཅུ་གསུམ་བཞུགས་པའི་བར་ལ། ལ་སྟོད་ལྷོ་བྱང་གི་ཡུལ་གྲུ་མང་པོར་སྐབས་སྐབས་སུ་བྱོན་ནས་མགུར་གསུངས་ཤིང་། ཉམས་དང་རྟོགས་པ་གོང་འཕེལ་དུ་སོང་ནས་གཞན་དོན་རྒྱ་ཆེན་པོ་མཛད་པས་འཕྲིན་ལས་ནམ་མཁའ་དང་མཉམ་པར་གྱུར་ཅིང་། དེ་དུས་སྟེང་འགྲོར་ཚོགས་པ་སྟོང་ཕྲག་ཕྱེད་དང་བཞི་སྟོང་ཙམ་རེ་ཚོགས་པས། གནས་འདིར་རྒྱུན་རིང་ན་མཐའ་མི་ཀུན་བསྡུད་པར་དགོངས་པ་ལ། དེ་ཙ་ན་རྒྱ་ཁྲོམ་པའི་རྟ་པ་མང་པོས་དགོན་པའི་རྩ་ན་སྤང་དྲངས་པས། དབུས་ཆུང་བྱ་བ་ན་རེ། རྒྱ་ཁྲོམ་པའི་རྟ་པ་འདི་ཚོ་ཡིས་ངེད་ཀྱི་དགོན་པའི་སྤང་འཐུ་བ་ཞེས་སྨྲས་པ། ཆོས་རྗེའི་གཟིམས་ཁང་ནས་གསན་པས་སྤྲང་པོ་རྒོད་ཚང་པ་ལ་འདི་དགོས་པ་ཡིན། དབུལ་པོ་རྒན་པོ་ཅི་ཡང་མེད་པ་ཞིག་ཁོང་ཀུན་གྱི་ཡུལ་དུ་འོངས་ནས། ཁོང་ཀུན་རང་གི་རི་ལ་སྤང་འཐུ་བ་ལ་འདི་ལྟར་བཀག་པ། བདག་བཟུང་གི་དགོན་པ་འདིར་མི་སྡོད་འགྲོ་གསུངས་ནས།

དགོན་པ་བུ་སློབ་ཡོན་བདག་ལ་སོགས་པར་ཆགས་ཞེན་དང་བྲལ་བས་ཐམས་ཅད་བོར་ནས་དེ་ཁའི་ནུབ་མོ་ལ་སློབ་དཔོན་སྟོན་པ་འོད་ཅེས་བྱ་བའི་དབུ་མཛད་པའི་སྒོམ་ཆེན་པ་ལྔ་འཁྲིད་ནས་དགུང་ལོ་ལྔ་བཅུ་རྩ་བརྒྱད་པ་ལ། གནས་མཆོག་གཉའ་ནང་བདེ་ཆེན་སྟེང་དུ་བྱོན་པ་ཡིན་ཏེ། སྤྱང་ལུང་དུ་ཕེབས། སྦུ་ཏྲ་བདེ་ཆེན་གླིང་དང་། ཆེ་གླིང་གཉིས་སུ་ཟླ་རེ་བཞུགས། ལྷ་རྗེ་སྨོན་ལམ་སྒོམ་གྱིས་ཞབས་ཏོག་བཟང་པོ་བྱས། རིན་པོ་ཆེ་ཡིས་སྦུ་ཏྲ་ནས་གཉའ་ནང་མཚམས་ཁོང་དུ་བྱོན་དུས། གླང་འཁོར་དུ་སླེབ་དུས་ཆབ་དང་། ན་བུན་དང་། ཁ་བ་ཆེན་པོ་སྡོམ་པ་ཅིག་བྱུང་ནས་དིང་རི་ནས་མར་གསང་ནས་སོང་། གླང་འཁོར་བ་རྣམས་ན་རེ། རིན་པོ་ཆེ་བས་སྒྲིབས་ཤིང་མཛད་ཟེར། རིན་པོ་ཆེའི་ཞལ་ནས་ཇོ་བོ་སྦུ་ཏྲས་སྐྱེལ་ཐུང་བྱས་ནས་སོང་གསུངས།

དེ་ནས་མཐོང་ལ་ལ་ཁ་བ་མི་ཧྲེང་གིས་ཀྱང་མི་ཐར་བ་འདྲ་བ་ཡོད་པ་ལ། མཐོང་ལ་བྱོན་ནས་ཁྱེད་ལ་ལའི་སྣང་བ་བྱུང་ངམ་གསུངས། བྱུང་ལགས་ཞུས་པས། ངས་ཐང་ཞིག་ཏུ་བསྒོམས་པས་ལིང་སྣང་བ་ལས་མ་བྱུང་གསུངས། གཉའ་ནང་མཐོང་ལ་བརྒལ་བའི་དུས་སུ། ལ་ཕྱི་སྤྱི་པས། བླ་མ་ཀོ་བྲག་པ་དང་། བླ་མ་རྒོད་ཚང་པ་ལུང་པ་འདིར་ཡོང་དུ་མ་བཅུག་པ་དགའ་ཞེས་ཡོན་བདག་རྣམས་ལ་བྱས་པས། ཡོན་བདག་པ་ཉན་དུ་མ་འདོད། དེར་རིན་པོ་ཆེས་ལ་ཕྱི་སྤྱི་པ་ལ་ཆིབས་པ་ཕུལ། བུ་རམ་ལྟང་རྩེ་གསུམ་བྱས་པའི་ཏིང་གྲོ་དྲངས། ཤ་མར་མང་པོ་དང་ཇ་འདེབས་སྐོལ་ལ་སོགས་པ་བྱས་པས་སྤྱི་པ་དང་ཐུགས་ཡིད་གཅིག་ཏུ་འདྲེས། དཔོན་འབུམ་སྐྱབས་ན་རེ། ང་ཚོ་སྨད་ལ་གྲུབ་ཐོབ་དེ་འབྱོན་དུ་མི་འཇུག་ན་སྡིག་པ་ཞིག་བསགས་སྙམ་པ་ཡིན་ཏེ། གྲུབ་ཐོབ་ཁོང་རང་གིས་རྟེན་འབྲེལ་བསྒྲིགས་ནས་ཐུགས་མཐུན་པ་དེ་དགའ་ཟེར། ཡུལ་པ་ན་རེ། གྲུབ་ཐོབ་དེ་འབྱོན་དུ་མ་བཅུག་ན། ངེད་སྤྱི་པ་ལ་སྐུར་བ་འདེབས། བཏབ་ན་དམྱལ་བར་འགྲོ་བ་ལ། གྲུབ་ཐོབ་ཁོང་རང་གིས་མ་བཏང་ཟེར། ཡུལ་པའི་རྒད་པོ་ཚོ་ན་རེ། ལུང་པ་བཟང་པོ་འདིར་དགེ་བཤེས་མང་པོ་བྱོན་པ་ལ། ཕྱག་རྟེན་མི་ལེན་པ་ཁོང་ལས་མ་བྱུང་ཟེར། ཡུལ་པའི་ཆོས་པ་རྣམས་ན་རེ། ཁོང་གིས་སངས་རྒྱས་ཀྱི་མཛད་པ་དངོས་སུ་བྱུང། སངས་རྒྱས་ཀྱི་བསྟན་པ་གཙུགས། སྤྱི་པ་དང་ཐུགས་ཡིད་འདྲེས་པ་དེ་དགའ་ཟེར་རོ། །

དེ་ནས་བདེ་ཆེན་སྟེང་དུ་བྱོན་པས། ལུང་པའི་མདོ་ནས་དགོན་པ་གཅེར་གྱིས་གཟིགས་པ་དང་ཐུགས་ཧུར་གྱིས་སོང་། དེར་ས་ཕྱོགས་ཐམས་ཅད་ལ་གཟིགས་ནས་རྟེན་འབྲེལ་བརྟག་པས། གནས་འདི་ཤིན་ཏུ་བྱིན་རླབས་ཆེ་བ་ཞིག་འདུག རྩི་ཤིང་དང་ནགས་ཚལ་གྱིས་བརྒྱན་པ། མེ་ཏོག་དཀར་དམར་གྱི་གླིང་ཡོད་པ། ཤིང་ལྗོན་པ་སྣ་ཚོགས་སྐྱེ་བ། སྨན་དྲི་སྣ་ཚོགས་བྱུང་བ། མདོར་ན་དགེ་བལྟས་ཐམས་ཅད་ཚང་བ་ཡིན་ཞིང་། དག་པའི་སྣང་བ་ལ་བཅོམ་ལྡན་འདས་བདེ་མཆོག་གི་ལྷ་ཚོགས་སུ་ཡོད་པ་ལ་བལྟས་པ་ཙམ་གྱིས་ཏིང་འཛིན་རྒྱུད་ལ་སྐྱེ་བ། རྣམ་རྟོག་རང་ཤུགས་ཀྱིས་འགག་ཅིང་ཡིད་དུ་འོང་བ་བདེ་སྟོང་གི་ཉམས་རྒྱུན་དུ་འབྱུང་བ། སྐལ་བ་དང་ལྡན་པ་རྣམས་ལ་དངོས་གྲུབ་རྣམ་གཉིས་མྱུར་དུ་ཐོབ་པའི་གནས་མཆོག་དེ་ཉིད། རྒྱུད་ནས་གསུངས་པའི་གནས་ཆེན་ཞིག་དང་ཁྱད་པར་མེད་པས་ཆོས་རྗེ་པའི་ཞལ་ནས། ཁོ་བོ་གནས་ཆེན་མང་པོར་ཕྱིན་ཏེ། འདི་ལས་བྱིན་རླབས་ཆེ་བ་མི་འདུག་གསུངས། རྗེ་ཉིད་ཀྱིས་ཚེ་འདིའི་སྤྲོས་པ་ཐམས་ཅད་བཅད་ནས།ལོ་གསུམ་སྐུ་མཚམས་དམ་པོ་ལ་བཞུགས་སོ། །དགེ་སྦྱོར་ལ་བོགས་མ་ཐོན་ན་ལུང་སྟོང་དུ་སྐྱག་གོང་བསྐྱལ་བ་ལ་དགོས་པ་མེད་གསུངས། དེར་ཁ་བ་ཉིན་ཞག་དགུ་བཅུ་བབས་པས། འདབ་ཆགས་ཀྱི་བྱ་མ་གཏོགས་རྒྱུ་འགྲུལ་ཆད་ནས། རིག་པ་དྭངས་སྙིགས་ཕྱེད་ཅིང་། དགེ་སྦྱོར་ཤིན་ཏུ་ཕེལ་བར་བྱུང་ནས་གཞི་བདག་ལ་སྣེ་ལེན་གྱི་མགུར་གསུངས།

དེ་ནས་དཔྱིད་ཀར་སོང་བ་དང་། འཁོར་རྣམས་ཀྱིས་ལམ་བགྲོད་པར་དཀའ་ཡང་དྲུང་དུ་བསྙེགས་ནས་བྱོན་ཏེ །ཐམས་ཅད་ཀྱིས་འགྲོ་དོན་བྱེད་པར་ཞུས་པས། འགྲོ་དོན་ཟླ་བ་གཅིག་མཛད་དེ། དེ་དུས་མཁན་པོ་གོ་ཆར་བ། བླ་མ་བདེ་ལེགས་རྒྱལ་མཚན། བླ་མ་རི་བ། བླ་མ་ཆོས་སྡིང་པ། བླ་མ་བྱང་ཆུབ་གླིང་པ་ལ་སོགས་ཏེ། སྒོམ་ཆེན་ལྔ་བརྒྱ་ཙམ་ལ་ཕྱག་རྒྱ་ཆེན་པའི་ཁྲིད་མཛད། དེ་ཚར་བ་དང་སྟོན་སྒོམ་དང་དགེ་བཤེས་སྟོང་ཕྲག་ཙམ་ཚོགས་པ་ལ་སྤོང་ཐག་དང་སེམས་བསྐྱེད་ཆེན་པོ་མཛད། དེར་དགུན་སྐུ་མཚམས་མཛད་ནས་སུ་ལ་ཡང་མ་མཇལ། དགུན་སྨད་སྟོན་སྒོམ་རྣམས་ཀྱིས་ཆོས་ཞུས་པས་སྒྲུབ་པ་མི་འཚོལ་བ་གསུང་། བཀའ་ཀྱོན་ཆེན་པོ་བྱོན།

དེ་ནས་སོས་ཀར་སོང་བ་དང་ཆོས་རྗེ་ས་སྐྱ་པའི་སློབ་མ་ཇོ་བཙུན་གཞོན་སེང་བྱ་བ་དང་། འབྲི་གུང་པའི་སློབ་མ་ཇོ་བཙུན་མདོ་སྡེ་དཔལ་བྱ་བའི་འཁོར་སློབ་རྣམས་ཀྱིས་སྤྱང་ལུང་དུ་སྤྱན་དྲངས། གོ་ལུང་ཕུ་རུ་གདན་ཕེབས་པ་ལ་དེ་ནས་ཆོས་རྗེ་པས་དེ་རིང་ལས་ཅན་ཞིག་དང་འཕྲད་འོང་གསུངས་པའི་ལུང་བསྟན་མཛད་པ་བཞིན། གོ་ལུང་ཕུ་རུ་གདན་ཕེབས་པའི་ཚེ། དེར་ཆོས་རྗེ་པའི་སློབ་མ་རྣམས་ཀྱི་ནང་ནས་བརྟུལ་ཞུགས་རང་དང་མཉམ་པའི་ཨུ་རྒྱན་རྒྱལ་པོ་ཞེས་བྱ་བའི་གྲུབ་ཐོབ་དེས་ཐོག་མར་མཇལ་བ་ཡིན། དེ་ནས་སྦུ་ཏྲ་རི་ཁྲོད་དུ་བྱོན་ནས་བཞུགས་པས། དེ་དུས་མཁན་པོ་སྲིན་པོ་གདོང་པའམ་དགེ་བཤེས་བྱ་བྲལ་བའམ་མ་བདུན་པའམ་ལ་རྒྱུའི་འཕགས་པ་འོད་ལ་སོགས་པའི་སྟོན་སྒོམ་ཕྱེད་དང་ཉིས་བརྒྱ་ཙམ་ལ་སྒོམ་ཁྲིད་མཛད་ནས་ཚར་བ་དང་། བར་འབྲོག་ཆུ་བཟང་དུ་བྱོན། བར་འབྲོག་ཆུ་བཟང་གི་དགོན་པར་བཞུགས་པའི་དུས་སུ། ལ་སྟོད་བྱང་གི་དགེ་བཤེས་དང་གཙང་པ་ལ་སོགས་པའི་མི་མང་པོ་མཇལ་ཏེ་ཆོས་འབྲེལ་ཞུས།  དེ་ནས་བདེ་ཆེན་སྟེང་དུ་བྱོན་ནས་སྐུ་མཚམས་དམ་པོར་བཞུགས།

དེ་ནས་ཉེ་གནས་པ་འགའ་ཞིག་ཁྲིད་ནས་དགའ་ལྡན་གླིང་གི་དབེན་གནས་སུ་བྱོན་ནས་དབྱར་ཟླ་བཞི་ཙམ་སྒྲུབ་པ་ལ་བཞུགས། སློབ་མའི་ཚོགས་ལ་གདམས་ངག་མང་པོ་གནང་། དེའི་དུས་སུ་གཙང་གི་རྒྱལ་ཁམས་ཀྱི་བཀའ་གདམས་ངག་ཐམས་ཅད་ཀྱི་ཕྱི་མོ། ཆོས་རྗེ་ཁུ་ལུང་པ་ཞེས་བྱ་བའི་དབོན་པོ་མཁས་གྲུབ་ཆེན་པོ་དེ་དང་། དགེ་བཤེས་རྒྱན་དཀར་ཞེས་བྱ་བ་གཉིས་ཀྱི་གཙོ་བྱས་པས་སྟོན་སྒོམ་ཕྱེད་དང་ཉིས་བརྒྱ་ཙམ་ལ་ཕྱག་རྒྱ་ཆེན་པོའི་ཁྲིད་མཛད། དེ་ནས་ཡང་དཔལ་བདེ་ཆེན་སྟེང་དུ་སྤྱན་དྲངས་དེར་དགུན་འགྲོ་དོན་མཛད་པའི་དུས་ཨུ་རྒྱན་པ་རིན་ཆེན་དཔལ། མཁན་པོ་གསེར་ཕུག་པ། མཁན་པོ་ཆུང་དཔེ་བ། ཡང་ཟང་དབོན་པོ། ཞང་བསམ་གླིང་པ་ལ་སོགས་པའི་སྟོན་སྒོམ་བརྒྱད་བརྒྱ་ལ་ཕྱག་རྒྱ་ཆེན་པོའི་ཁྲིད། གྲུབ་ཐོབ་བརྒྱུད་པའི་རྣམ་ཐར་དང་། མགུར་འབུམ་རོ་སྙོམས་སོགས་གཞན་ཡང་ཟབ་ཆོས་མང་པོ་གསུངས། ཆོས་རྗེ་པའི་གདན་གྱི་བར་དུ་འབུ་མང་པོ་བྱུང་བས་ཆོས་རྗེའི་ཞལ་ནས། འདིའི་རྟེན་འབྲེལ་རང་གནས་འདིར་མ་སྡོད། འདི་ནས་གདན་ཐེགས་བྱ་བར་འདུག་གསུངས་ནས། ཆོས་རྗེ་གཙང་པ་རྒྱ་རས་པའི་འདས་མཆོད་མཛད་ནས། རས་ཁ་ཚར་གཅིག བུ་རམ་རྡོག་པོ་གཅིག་གཉའ་ནང་ནས་ཕྱི་རུ་སྔར་ཡང་མ་ཁྱེར། ད་ལྟ་ཡང་མི་འཁྱེར་བ་ཡིན་གསུངས་ནས། དབེན་ནས་དགའ་ལྡན་གླིང་དུ་བྱོན། དེར་འབྲི་གུང་པའི་སྒོམ་ཆེན། ལ་ཕྱི་ལ་བཞུགས་པ་རྣམས་ཀྱིས་ཚོར་ནས་བདག་ཅག་གི་ལ་ཕྱི་ལ་འབྱོན་པར་ཞུ་ཞེས་ཞུས་ནས། ལ་ཕྱི་བ་ཐམས་ཅད་ཀྱིས་སྤྱི་ཆོས་དང་། སྒོས་རང་རང་འདོད་ཆོས་ཞུས། བླ་མ་ཆོས་སྡིངས་པ་བྱོན་ནས། བདག་གི་ཡུལ་ཕྱོགས་ཕ་གི་ན་སེང་གེ་གླིང་བྱ་བའི་གནས་ངོ་མཚར་ཅན་བདོག་པས། དེར་འབྱོན་པར་ཞུ་ཞུས་པས། ཆོས་རྗེའི་ཞལ་ནས་དེ་ཙུག་བྱ། གཉའ་ནང་འདིར་ཡང་རྟེན་འབྲེལ་ངན། མི་སྡོད་པར་བྱོན་གསུངས་ནས་རྡོ་ལ་འཇིམ་པ་བརྫིས་པ་ལྟར་ཞབས་རྗེས་བཞག་སྟེ། དེ་ལ་གཉའ་ནང་པ་རྣམས་ཀྱི་མོས་པའི་རྟེན་གྱིས་གསུངས།

དགུང་ལོ་དྲུག་ཅུ་རེ་བདུན་པར་སྦྱང་བུ་སེང་གེ་གླིང་དུ་བྱོན་པའི་སྐོར།

དེ་ཡང་གཉའ་ནང་ལུང་པས་འབུལ་བ་བྱུང་ཚད་ལ་ཕྱི་པ་དང་། མཁན་པོ་ལ་ཤིང་པས་དབུ་མཛད་པའི་དགེ་བཤེས་རྣམས་ལ་ཕུལ། མདོར་ན་ཆོས་རྗེ་རྒྱལ་བ་རྒོད་ཚང་པས་གཉའ་ནང་བདེ་ཆེན་སྟེང་དང་དགའ་ལྡན་གླིང་གཉིས་སུ་ལོ་ངོ་བཅུ་བཞུགས་ཤིང་དགོན་པ་བཏབ་སྟེ་བསྟན་པ་དང་སེམས་ཅན་གྱི་དོན་རྒྱ་ཆེན་པོ་མཛད་ནས། དགུང་ལོ་དྲུག་ཅུ་རྩ་བདུན་པ་ལ་སྤང་ཕུ་སེང་གེ་གླིང་དུ་བྱོན་པ་ཡིན་གསུངས། དེ་ནས་ཐོ་དཀར་པོའི་ལམ་ལ་བྱོན་པས། ལུང་པ་དེ་སྔོ་ཆག་སོང་ང་ཡང་འདིར་མི་སྡོད་པར་འདུག ལུང་པར་ཡང་བཀྲ་མི་ཤིས་པ་འོང་བ་འདུག་གསུངས་སོ། །ཕྱིས་ས་ཡོམ་ཆེན་པོ་བྱུང་ནས། གཉའ་ནང་པས་ཁང་པ་ཐམས་ཅད་ཞིག མི་མང་པོ་གཏིབས་འོག་ཏུ་ཤོར། དཔལ་བདེ་ཆེན་སྟེང་གི་ལམ་ཆད་ནས་མཚོ་རུ་ཁྱིལ། དགོན་པ་ཐམས་ཅད་རུད་དང་རྦ་ཡིས་ཞིག་པ་དེ་མཁྱེན་པར་གདའ་འོ།  །

དེ་ནས་སེང་གེ་གླིང་དུ་གདན་ཕེབས་དབྱར་སྨད་འགྲོ་དོན་ཞུས་ནས། ཟླ་བ་གཅིག་མཇལ་ཁ་མཛད། མཁན་པོ་དང་སྟོན་སྒོམ་ཕྱེད་དང་ཉིས་སྟོང་ལ་ཕྱག་རྒྱ་ཆེན་པོ་དོ་ཧ་དང་། རང་རང་གང་མོས་ཀྱི་ཟབ་ཆོས་མང་པོ་གསུངས། དེ་དུས་ཉིན་ཞག་གཅིག་ལ་སྐྲ་གཅོད་པའི་བཙུན་གསར་ཕྱེད་དང་ཉིས་བརྒྱ་ལ་སྡོམ་པ་ཕོག་དེ་དུས་སྤྲུལ་པའི་སྐུ་ཡང་མགོན་པ་ལ་གསེར་ཕྲེང་གི་བསུ་བ་མཛད་པས། དགེ་བའི་བཤེས་གཉེན་ཆེན་པོ་སྟོང་ཕྱེད་དང་སུམ་བརྒྱ། བླ་མ་གདུགས་ཕུབ་པ་ཉིས་བརྒྱ། རབ་ཏུ་བྱུང་བ་ཁྲི་ཕྲག་གསུམ་དང་བརྒྱད་བརྒྱ་བྱུང་བ་ལ། ཉེ་གནས་པས་རྟ་མགྱོགས་པ་ཞིག་བཞོན་ནས་གྲལ་མཛད་པས་རྟ་ཆད་དེ། ཉི་མ་ལ་སྟོད་དུ་གསེར་ཕྲེང་དེ་བས་རིང་བ་མ་བྱུང་ཞེས་ཀྱང་གྲགས་སོ། །དེ་ནས་སྤྲུལ་སྐུ་ཡང་མགོན་པ་ཆེན་པོ་ལ་ཕག་ཏུ་རོ་སྙོམས་གསུངས་སོ། །

དུས་དེར་ཡང་དགེ་བཤེས་དང་མི་ཆེན་དཔག་ཏུ་མེད་པ་འདུས། སངས་རྒྱས་འཇིག་རྟེན་དུ་བྱོན་པ་དང་ཚུལ་མཚུངས་པར་མཛད་དོ། །དེ་ནས་སྔོན་གྱི་ཉེ་གནས་འགྲེས་པོ་སྟོན་པ་གཞོན་སེང་དང་ཤེར་བྱུང་གི་ཧ་དང་བྲག་བྱ་བའི་དགོན་པ་བྱིན་རླབས་ཆེ་ཞིང་ཉམས་དགའ་བ། དཔའ་བོ་དང་མཁའ་འགྲོ་འདུ་བའི་གནས་བཀྲ་ཤིས་པའི་མཚན་དུ་མ་དང་ལྡན་པ་དེར་སྤྱན་དྲངས་ནས་བཞུགས། དེར་སློབ་དཔོན་བསོད་ནམས་པ་ལ་སོགས་པ་ཅུང་པའི་གྲྭ་པ་དང་ཡོན་བདག་རྣམས་ཀྱིས་སྣེ་ལེན་བཟང་པོ་བྱས། དེ་དུས་སྟོན་པ་སུམ་ཅུ་ཙམ་ལ་ཕྱག་རྒྱ་ཆེན་པོའི་ཁྲིད་མཛད་པའི་དུས་སུ་བཙུན་གསར་མང་པོས་སྡོམ་པ་བླངས་པ་ཡིན་གསུངས། དེར་ཁྱེད་རང་ཉེ་གནས་རྣམས་ཕྱོགས་བཅུར་གྱེས་ཤིག་གསུངས་ནས། བསོད་ནམས་མགོན་བྱ་བའི་བཙུན་ཆུང་ཞིག་གིས་གསོལ་ཆུ་བསྐྱལ་ནས་སྒྲུབ་པ་ལ་བཞུགས། ཆོས་རྗེ་རྒོད་ཚང་པས་སྤྱང་ཕུ་སེང་གེའི་གླིང་དང་ཧ་བྲག་གཉིས་སུ་ལོ་གཅིག་བཞུགས་ནས་སངས་རྒྱས་འཇིག་རྟེན་དུ་བྱོན་པ་དང་ཚུལ་མཚུངས་པར་བསྟན་པ་དང་སེམས་ཅན་གྱི་དོན་རྒྱ་ཆེན་པོ་མཛད། རྣམ་ཐར་གཞན་ཞིག་དུ་སྤྱད་ལུགས་སེང་གེ་གླིང་དུ་དབྱར་ངོ་བཞུགས་ནས་ཚོགས་པ་ཁྲི་ཚོ་ལྷག་ཙམ་ལ་འགྲོ་དོན་རྒྱ་ཆེན་པོ་མཛད། སྟོན་དེ་རྫ་སྟག་སྒོ་དང་།  བྱང་ཅུང་པ་གྲོ་མ་ལུང་རྗེ་བཙུན་མི་ལའི་བཞུགས་གནས་རྒྱ་གར་བྲག་ཕུག་ཏུ་བཞུགས་ནས་བསྒྲུབ་པ་དང་འགྲོ་དོན་རྒྱ་ཆེན་པོ་མཛད། དེ་ནས་སོས་ཀར་བར་འབྲོག་ཏུ་གདན་གཏེགས་པའི་དུས་སུ། བྱང་པའི་ཡོན་སློབ་ཐམས་ཅད་དང་མཇལ། །ཞེས་གསལ།

དགུང་ལོ་དྲུག་ཅུ་རེ་བརྒྱད་ལ་བར་འབྲོག་རྡོར་གླིང་དུ་བྱོན་པའི་སྐོར།

མདོར་ན་དགུང་ལོ་དྲུག་ཅུ་རྩ་བརྒྱད་ལ་བར་འབྲོག་རྡོ་རྗེ་གླིང་དུ་ཕེབས་ནས་གནས་ཀྱི་མིང་རྡོ་རྗེ་གླིང་དུ་ཐོགས་ཤིག་གསུངས་པས་དེའི་མིང་རྡོ་རྗེ་གླིང་དུ་གྲགས། གཟིམས་ཁང་མ་ཚར་བར་དུ་གུར་དུ་ཐུགས་དམ་ལ་བཞུགས་སོ།  །གནས་མཆོག་དེ་ཡང་མེ་ཏོག་སྣ་ཚོགས་སྐྱེས་པས་རྒྱུད་ལ་ཡོན་ཏན་སྐྱེས་པ། སྐལ་ལྡན་དཔག་ཏུ་མེད་པ་སྨིན་ས། གྲུབ་ཐོབ་མང་པོ་འབྱུང་ས། དད་པ་ཅན་གྱིས་ཚོགས་གསོག་ས། མདོར་ན་དགེ་བའི་ལས་ཐམས་ཅད་མ་ལུས་པར་ཚང་བས་གནས་མཆོག་ཏུ་གྱུར་པ་གྲོང་ཁྱེར་རྩྭ་མཆོག་ལྟ་བུ་དེར་བཞུགས་ནས་མཁན་པོ་སློབ་དཔོན་དང་། དཔོན་སོགས་ཚོགས་པ་ཕྱེད་དང་ཉིས་བརྒྱ་སྟོང་ཙམ་ལ་ཕྱག་ཆེན་དང་ངོ་སྤྲོད་ཀྱི་ཆོས་མང་པོ་གསུངས།

ཆོས་རྗེའི་ཞལ་ནས། ཚེ་རིང་ན་དགའ་ཡང་མི་བྱེད་ཐུང་ན་དགའ་ཡང་མི་བྱེད། ཆོས་ཀྱང་མཐར་ཁྱོལ་བ་ཡིན་པས། སོ་མ་དང་ལྷུག་པར་འཇོག་པ་ཡིན། འོན་ཀྱང་སྒྲུབ་པ་ལ་བསྡད་ན་ཚེ་རིང་པོ་ཡོང་གསུངས་ནས། ལོ་ཅིག་སྒྲུབ་པ་དམ་པོ་ལ་བཞུགས། དེ་ནས་ལྷོ་བྱང་སྡེ་གསུམ། དབུས་གཙང་རུ་བཞི་སྟོད་སྨད་ཁམས་གསུམ་གྱི་དད་ལྡན་དང། ལ་སྟོད་ལྷོ་བྱང་གི་དགེ་བཤེས་དང་སྟོན་སྒོམ་སྡེ་གཙང་ལ་སོགས་པའི་མི་ཆེན་ཐམས་ཅད་འདུས་ཏེ། ཚོགས་པ་ཕྱེད་དང་སུམ་སྟོང་ཙམ་ལ་བཅོམ་ལྡན་འདས་བདེ་མཆོག་ལྷན་སྐྱེས་ཀྱི་དབང་མཛད། ད་མི་རྒན་ཡང་ན་སོ་རྒས་པས་ཡང་ཡང་ཆོས་འཆད་པ་མི་ཡོང་བ་ཡིན་གསུངས། གསར་བུ་རྣམས་ཀྱང་ཡིད་གཞུང་ལ་ཉོན། ཁྲིད་ཆེན་བརྒྱད་རྫོགས་པར་འཆད་པ་ཡིན་གསུངས་ནས་ཁྲིད་ཆེན་བརྒྱད་རྫོགས་པར་གནང་། གྲྭ་པ་རྙིང་པ་རྣམས་ལ་ཉམས་རྟོགས་སྙིང་རྗེ་ཟུང་འབྲེལ་གྱི་དྲི་བ་ལ་སོགས་བགྱིས་ཤིག་གསུངས་ནས། ཆོས་མ་ཐོས་པ་རྣམས་དང་དྲི་བ་ཐམས་ཅད་ཀྱི་ལན་གནང་།

ས་སྐྱ་པའི་དཔོན་ཆེན་ཤྭཀྱ་བཟང་པོ་ལ་སོགས་པའི་ཧོར་གསེར་ཡིག་པ་ཐམས་ཅད་ཀྱིས་གསེར་དངུལ་དང་དར་ཟབ་ལ་སོགས་པ་འབུལ་བ་བསམ་གྱིས་མི་ཁྱབ་པ་ཕུལ། ཆོས་རྗེ་རྒོད་ཚད་པས་སྔ་ཕྱི་གསུམ་དུ་གཞན་གྱི་འབུལ་རྫས་རྣམས་བླ་མའི་གདན་ས་ར་ལུང་དུ་ཕུལ། དེ་སྐབས་ཆོས་རྗེའི་ཞལ་ནས་གཞན་རྣམས་ཀྱི་ཆོས་ཕལ་ཆེ་བ་གོ་བ་དང་ཡིད་ཡུལ་དུ་ལུས་འདུག ངས་ཆོས་ཐམས་ཅད་ལག་ལེན་ལ་བཏབ་པས། ངའི་ཆོས་འདི་བྱིན་རླབས་ཆེ་བ་ཡིན། ཆོས་མཁས་པ་གཞན་མཁས་ཀྱང་ངའི་ཆོས་འདི་གཞན་པས་བློ་སྣ་ལ་རྡེག་པ་ཞིག་ཡོང་བ་ཡིན་གསུངས། ཡང་ང་ལ་བསྒོམས་པའི་ཉམས་མྱོང་ཡོད། བསྒྲུབས་པའི་རྟགས་ཡོད། མི་སླུ་བའི་གདེངས་ཡོད། མཐར་ཕྱིན་པའི་འབྲས་བུ་ཡོད། ཡིད་ཆེས་པའི་ཡོན་ཏན་ཡོད་གསུངས། དེ་དུས་བོད་གངས་ཅན་གྱི་ཁྲོད་ན་རྩོད་པ་མེད་པར་ནི་གྲགས། རྒྱ་བོད་ཧོར་གསུམ་གྱི་དད་པ་ཅན་ནི་ཚོགས། ཡ་གིའི་སྡེ་སྣོད་འཛིན་པ་ནས། མ་གིའི་བྱིས་པ་ཡན་ཆད་ཀྱིས་མ་དད་པའི་སྐུར་པ་འདེབས་པ་ནི་མེད། སློབ་དཔོན་གཞན་གྱི་རྩ་རུ་ལོ་མང་དུ་བསྡད་པ་བས། རྗེའི་ཞལ་མཐོང་བས་གྲོལ་འགྲོ་བ་ནི་མང་། སློབ་དཔོན་གཞན་ལ་ཆོས་མང་པོ་ཞུས་པ་བས་རྗེའི་གསུང་ཚིག་རེས་དོན་མང་པོ་ཁྲོལ་འགྲོ་བ་ལ་སོགས་ཏེ། དེ་ལྟ་བུའི་བསྟན་པ་དང་སེམས་ཅན་གྱི་དོན་རྒྱ་ཆེན་པོ་མཛད་ནས་དགུང་ལོ་བདུན་བཅུ་བཞེས་པ་རྟའི་ལོ་དཔྱིད་ཀར་སོང་བ་དང་། སྐུ་ཁམས་ཤིན་ཏུ་ལྕི་བར་གྱུར་པས། དེའི་དུས་ཆོས་རྗེའི་ཞལ་ནས་ད་ལོའི་ལོ་འདི་ལ་གཏམ་ཆེན་པོ་ཞིག་ཡོང་བ་འདུག་གསུངས། གཏམ་ཅི་འདྲ་ཞིག་མཆིས་ལགས་ཞུས་པས། གཏམ་ཁ་ཐམས་ཅད་བརྟུལ་བའི་གཏམ་ཞིག་ཡོང་བར་འདུག་གསུངས།

བླ་མ་བྱང་གླིང་པས། སྐུ་ཁམས་ཡེ་རང་མི་དྭངས་ན་སྐུའི་སྐྱེ་བ་ཕྱི་མ་ལ་གང་དུ་འཁྲུངས་ལགས་ཞུས་པས། ཆོས་རྗེ་རིན་པོ་ཆེའི་ཞལ་ནས། ང་སྐྱེ་བ་ཕྱི་མ་ལ་དབུས་གཙང་ཕྱོགས་སུ་སྔགས་པ་ཞིག་གི་བུར་སྐྱེས་ནས་བཀའ་བརྒྱུད་ཀྱི་རྗེས་སུ་འབྲངས་ཏེ། འགྲོ་བ་སེམས་ཅན་གྱི་དོན་ཚད་མེད་པ་ཞིག་ཡོང་གསུངས། འོ་ན་སྐུ་དེ་སྐྱེ་བ་ཕྱི་མ་ལ་སྐྱེ་བ་གང་དུ་བཞེས་ལགས་ཞུས་པས། དེ་དུས་ང་སྟེང་གི་ཕྱོགས་ཞིང་ཁམས་པད་མས་བརྒྱན་པ་ཞེས་བྱ་བར་བྱང་ཆུབ་སེམས་དཔའ་མ་ཆགས་པད་མ་ཅན་བྱ་བར་སྐྱེ་བར་བླངས་ནས་འབད་རྩོལ་མེད་པའི་འགྲོ་དོན་བྱེད་པ་ཞིག་ཡོང་བ་ཡིན་གསུངས། དེའི་རྗེས་ལ་ང་འཇིག་རྟེན་གྱི་ཁམས་རྡུལ་དང་བྲལ་བ་ཞེས་བྱ་བར་དེ་བཞིན་གཤེགས་པ་རྡུལ་སེལ་རྒྱལ་པོ་ཞེས་བྱ་བར་སངས་རྒྱ་བ་ཡིན་གསུངས། ད་ང་ལ་ཞལ་བཀོད་ཀྱང་ཚིག་གསུམ་ལས་མེད་དེ་ངའི་ཤུལ་དུ་གདན་ས་མ་བྱེད། རྟེན་མ་བཞེངས། སྒོམ་ཆེན་འདུས་པའི་སེར་ཆགས་མ་བྱེད། བཟང་ངན་འབྲིང་གསུམ་སྤྱི་བོར་འཁུར། མོས་གུས་སྲོལ་དུ་ཆུད། སྟོང་ཉིད་སྙིང་རྗེ་སྦྱོངས་པ་རྣམས་ཀྱིས་གདན་ས་བཟུང་ཞིང་བརྒྱུད་པ་འཛིན་པ་ཡིན་ནོ། །

དེ་ལྟར་མ་ཡིན་པ་རེ་འགས་འདིར་དཔོན་བྱས་ནས་འཁོར་འབུམ་ཚོ་གཅིག་བསྐྱངས་ཀྱང་ངའི་གདན་ས་བཟུང་བ་མེད་པས། མོས་གུས་སུ་ཆེ་བས་སྣ་དྲོངས་ལ། སྒྲུབ་པ་ལ་ཤེད་གྱིས་ལ་ཅིག་ཀྱང་མེད་པར་གྱིས་ཤིག སྒྲུབ་པ་བྱེད་པ་དེ་ལ་འཁོར་མཁན་མི་གཅིག་མེད་ཀྱང་། བླ་མའི་གདན་ས་བཟུང་བ་ཡིན་པས་ཐུགས་དགོངས་རྫོགས་སོ། །ཡང་ང་ལ་ཆོས་རྗེ་རས་པའི་ཞལ་ནས་རྗེ་བཙུན་མི་ལའི་རྣམ་ཐར་སྐྱོངས་ལ། ཤུལ་དུ་རྗེས་མེད་པ་གྱིས་ཤིག་གསུངས། ངས་ཀྱང་མི་ཚེ་དེ་གསུམ་ལ་འདུན་པ་བྱས་པ་ཡིན་པས། དེའི་ཐོག་ཏུ་འགྲོ་ཡང་འགྲོ། འགྲོ་དགོས་ཀྱང་ཡིན་གསུངས། དེ་ནས་ཞག་གསུམ་ཙམ་ནས་རིན་རྒྱལ་གྲོངས་ནས། ཆོས་རྗེའི་དྲུང་དུ་སྨོན་ལམ་ཞུས་པས། སློབ་དཔོན་དབུ་ཆེ་དྲུག བླ་མ་གཅུང་དང་བདུན་སྤྱན་སྔར་ཕྱོགས་པ་ལ། སྐུ་ཁམས་ཤིན་ཏུ་བཟང་བའི་རྣམ་འགྱུར་བསྟན་ནས། ཆོས་ཀྱི་གསུང་གླེང་མང་པོ་བྱོན་ཏེ། རིན་རྒྱལ་ཁོང་ངའི་སྔོན་ལ་འཆི་བའི་སྨོན་ལམ་བཏབ་པ་ཡིན་གསུངས། ཉེ་གནས་ལ་སྔ་བ་རིན་རྒྱལ་ཡིན། ལྷ་ཁབ་ཏུ་བཞུགས་པའི་དུས་ནས་ལ་སྟོད་དུ་འགྲོ་དོན་རྒྱ་ཆེན་པོ་མཛད་ཀྱི་བར་དུ་རིན་རྒྱལ་གྱིས་ཉེ་གནས་ལོ་བཅུ་གསུམ་བྱས། གོ་ཁོང་ལས་ཆོད་པ་མེད། དེ་ནས་ལུས་ཀྱི་མ་བྱུང་། ཁོང་གི་ཚབ་སྨོན་མཁར་བས་ལོ་གཅིག་བྱས། གཞོན་སེང་གིས་ལོ་གཉིས་བྱས ཨ་པོས་ཟླ་བ་བདུན་བྱས། ཐུགས་ཡིད་གཅིག་ཏུ་འདྲེས་པ་དེ་རིན་རྒྱལ་ཡིན་ནོ།  །

ཡང་ཆོས་རྗེས་ངའི་ཕུང་པོ་འདི་བསྲེགས་ལ་རུས་པ་དང་ཐལ་བ་ཆ་གསུམ་དུ་བགོས་ལ་ཆ་གཅིག་ཡས་རུ་གཙང་པོ་ལ་འཕོ། ཆུ་དེ་རྒྱ་ནག་བརྒྱུད་ནས་ཕྱིའི་རྒྱ་མཚོ་ལ་འགྲོ། ཆ་གཅིག་བོང་ཆུ་ལ་འཕོ། ཆུ་དེ་རྒྱ་གར་བརྒྱུད་ནས་ཕྱིའི་རྒྱ་མཚོ་ལ་འགྲོ ཆ་གཅིག་དང་ཞུན་གདུང་གང་ཐོན་རེ་བུ་སློབ་རྣམས་ལ་སྐྱེད་ལ་དེས་སེམས་ཅན་རྣམས་ལ་ཅི་ཁྱེད་གྱིས་ཤིག  ངའི་རུས་པ་དུམ་རེ་རི་ཁྲོད་དང་གནས་རྣམས་སུ་ཁྱེར་ནས་མོས་གུས་ཀྱི་གསོལ་བ་འདེབས་ཤིང་། ཚེ་འདི་རྒྱབ་ཏུ་བསྐྱུར་ནས་སྒྲུབ་པ་བྱེད་ན་ངའི་གདན་ས་བཟུང་བ་ཡིན་གསུངས། ཡང་སྤུར་ཞུགས་ས་འདིར་ས་རྡོ་ལ་སོགས་པ་འོ་མི་བརྒྱལ་བའི་ཕྱིར་ཚ་ཁང་ཆུང་ཆུང་ཞིག་བྱེད་པར་ཞུ། ཆེན་པོ་མི་བྱེད་ལགས་ཞུས་པས། ཆེན་པོ་མ་བྱེད་པར་ཆུང་ཆུང་ཞིག་བགྱིས་དང། དུས་ཕྱིས་ཙ་ན་འདིར་འོང་བ་ཀུན་ལ་མོས་གུས་ཀྱི་རྟེན་ཡོད་པ་ཡིན། ངས་ཀྱང་ཆུ་བར་ལ་བལྟ་རུ་ཕྱིན་ཙ་ན་རྗེ་བཙུན་མི་ལའི་གཤེགས་ཤུལ་དེ་ན་མཆོད་རྟེན་བང་རིམ་གསུམ་པ་ཆུང་ངུ་ཞིག་འདུག་པ་མཐོང་བ་ཙམ་ལ་མོས་གུས་ཚད་མེད་པ་བྱུང་བ་ཡིན་ཏེ་དེ་འདྲས་ཕན་པར་འདུག་གསུངས་སོ།
དགུང་ལོ་བདུན་ཅུ་ལ་གཟུགས་སྐུ་ཆོས་དབྱིངས་སུ་ཐིམས་པའི་སྐོར།

དེ་ནས་ཉི་མ་དམར་ཐག་ཆད་ཙ་ན་སྐུ་ཅུང་ཞིག་གཟིམས་ནས་བཞུགས་པས། འཁོར་སློབ་རྣམས་མྱ་ངན་གྱིས་གདུང་ནས་སྨྲེ་སྔགས་གཏོན་པས་སྐུ་ཡར་བཞེངས་ནས་ཁྱེད་རང་རྣམས་མྱ་ངན་མི་དགོས། མི་ཚེ་ཆོས་ལ་བསྐྱལ་བས་བྱ་བ་མཐོ་དམན་ཅི་བྱུང་ཡང་དུས་རྟག་ཏུ་ཉམས་དགའ་ཡ་ལེ་བྱེད་པ་ཡིན་གསུངས་ནས། སློབ་དཔོན་གཞོན་སེང་དང་། སློབ་དཔོན་དབང་ཕྱུག་རྒྱལ་མཚན། སློབ་དཔོན་རིས་ཕུག་པ་སོགས་བུ་ཆེན་མང་པོ་སྤྱན་སྔར་ཡོད་པ་རྣམས་ལ་ཆིག་ཐུབ་རྡོ་རྗེའི་མགུར་ཆུང་འདི་ལྟར།
ཁྱེད་འདིར་ཚོགས་སངས་རྒྱས་ཐོབ་འདོད་ཀུན། །ཐེག་པའི་མཐར་ཐུག་གསང་སྔགས་ཡིན།།
གསང་སྔགས་ཀྱི་སྙིང་པོ་མོས་གུས་ཡིན། །མོས་གུས་ལམ་གྱི་ཆིག་ཐུབ་ཡིན། །
མོས་གུས་ལམ་སྣ་མ་ཤོར་ན། །འདི་ཕྱི་གཉིས་ཀྱི་དོན་ཆེན་འགྲུབ། །
ཆིག་ཐུབ་རྡོ་རྗེའི་གླུ་ཆུང་འདི། །སྙིང་གཏམ་ལགས་པས་ཐུགས་ལ་ཞོག །
བདག་ཅག་ཕ་བུ་འབྲལ་མེད་དུ། ཕྱིས་ཡང་ཡང་མཇལ་བའི་སྨོན་ལམ་ཤོག །ཅེས་ཞལ་འཛུམ་པ་དང་བཅས་ཏེ། ནམ་མཁའ་ལྟ་བུའི་སེམས་ལ་སྐྱེ་འཆི་མེད། །ནམ་མཁའ་ལྟ་བུའི་སེམས་ལ་འཕོ་འགྱུར་མེད། །ནམ་མཁའ་ལྟ་བུའི་སེམས་ལ་མཐའ་དབུས་མེད། །ནམ་མཁའ་ལྟ་བུའི་སེམས་ལ་བཅིངས་གྲོལ་མེད། །ནམ་མཁའ་ལྟ་བུའི་སེམས་ལ་མཐོ་དམའ་མེད། །ཅེས་གསུངས་པའི་རྗེས་ལ་གསུང་མ་བྱུང་ནས། དེར་བུ་སློབ་རྣམས་ཀྱི་སྨྲེ་སྔགས་ཀྱིས་གསོལ་བ་དྲག་ཏུ་བཏབ་པས། དར་ཅིག་བཞུགས་ཏེ་ཆོས་ཀྱི་གསུང་གླེང་མང་པོ་མཛད་ནས་གཟུགས་སྐུ་ཆོས་དབྱིངས་སུ་ཐིམས་པའི་ཚུལ་བསྟན་ཏོ།། ༼སྤྱི་ལོ།1258 ལོའི་དབྱར་ཟླ་འབྲིང་པོའི་ཚེས་གསུམ་ལ་འོ།།༽

མདོར་ན་ངོ་མཚར་རྨད་དུ་བྱུང་བའི་ལྟས་འཇིག་རྟེན་པའི་བློ་ཡུལ་དུ་མི་གཤོང་བ་ལྟ་བུ་བྱུང་བ་རྒྱས་པ་སློབ་དཔོན་དབང་ཕྱུག་རྒྱལ་མཚན་གྱིས་མཛད་པའི་མྱ་ངན་འདས་ཆུང་དུ་གསལ། ཐུགས་སྲས་རྒྱལ་བ་ཡང་མགོན་པ་དགོངས་པ་རྫོགས་ནས། ཞག་བཅུ་གསུམ་ལས་མ་འགྱངས་པར་རྒྱལ་བ་རྒོད་ཚང་པ་ཡང་ཞིང་དུ་གཤེགས་སོོ། །ཆོས་རྗེ་རྒོད་ཚང་པ་བར་འབྲོག་རྡོ་རྗེ་གླིང་དུ་སྐུ་ཚེ་ཐ་མའི་སྐབས་སུ་ཐུགས་སྲས་རྒྱལ་བ་ཡང་དགོན་པ་སྤྲུལ་པ་བཞེས་ནས་བྱ་རྒོད་དུ་སྤྲུལ་ནས་རྒོད་ཚང་པ་མཇལ་དུ་ཕེབས། དེ་ནས་མྱ་ངན་ལས་མི་འདའ་བའི་བཀའ་གྲོས་མཛད་དུས། གཅིག་གིས་གཅིག་ལ་ཞུ་བ་འབུལ་བར་མཛད་དེ། ཆོས་རྗེ་རྒོད་ཚང་པའི་ཞལ་ནས། བདག་གིས་གདུལ་བྱ་ཡུན་རིང་དུ་བསྐྱངས་པས་མྱ་ངན་ལས་འདའ་གསུངས་པས། ཡང་དགོན་པའི་སྤྲུལ་པ་དེ་ན་རེ། བདག་གི་ལུས་འདིས་གདུལ་བའི་འགྲོ་བ་རྣམས་སྨིན་ཚར། ད་ལན་བདག་སྔོན་ཙམ་ལ་འགྲོ་བར་ཞུ་གསུངས་སྐད།།

 

སྐལ་ལྡན་སློབ་མ་བྱོན་ཚུལ་སྐོར།

 

དེ་ཡང་སྟོབས་བཅུའི་དབང་ཕྱུག་རྒྱལ་བ་རྒོད་ཚང་པ་མགོན་པོ་རྡོ་རྗེ་ཉིད་ཀྱིས་སྤྱིར་གདུལ་བྱ་སྨིན་ཅིང་གྲོལ་བའི་ལམ་ལ་བཀོད་པ་ནི། བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་ལ། བྱེ་བྲག་ཏུ་ཚུར་མཐོང་གི་བློ་ངོར་བུ་སློབ་བྱ་རྒོད་ཀྱི་ཉིན་ལམ་བཅོ་བརྒྱད་ཀྱི་བར་ཁྱབ་ཅེས་གྲགས་ཤིང་། མཁས་ཤིང་གྲུབ་པ་བརྙེས་པའི་དབུ་ཆེན་གདུགས་ཐོགས་སུམ་སྟོང་བརྒྱད་བརྒྱ་ཡོད་ཅེས་གྲགས་ལ། རྒྱལ་བ་རྒོད་པ་ཚང་ཉིད་ཀྱིས་མཐོང་ཐོས་དྲན་རེག་འབྲེལ་ཚད་དོན་དང་ལྡན་པའི་སྨིན་གྲོལ་ལ་བཀོད་པའི་བུ་སློབ་ནི་ཚད་མེད་དེ། རྗེའི་ཞལ་མངའ་ནས་ངའི་འགྲོ་དོན་འདི་སྐུ་གཤེགས་ནས་ཀྱང་ཅིར་འགྲོ་བ་ཡིན། ལུང་པ་ཕུ་ཐུང་ཙམ་རེ་ནས་སྐད་ལག་ངར་ཙམ་རེ་འདོན་པ་ཡང་མི་ཉུང་བ་ཞིག་ཡོང་བ་ཡིན་གསུངས་པ་དེ་ཁོ་ན་ལྟར་བྱུང་བ་ལགས་ཏེ། ཉམས་དང་རྟོགས་པ་མཐར་ཕྱིན་ཏེ་ལུང་རྟོགས་བསྟན་པ་འཛིན་པའི་སྲས་ཕ་ལས་ལྷག་པའི་བུ་གཅིག རང་མཉམ་པའི་བུ་ཆེན་བཅུ་གཉིས། མཆོག་གྱུར་བཀའ་བབ་བུ་ཆེན་བཞི། བུ་འདྲ་བརྒྱད། རྟོགས་ལྡན་དྲུག  ཁྱད་འཕགས་ཀྱི་རྟོགས་ལྡན་གཉིས། ཉེ་གནས་བརྒྱད་བཅས་ལས།

དང་པོ་ཕ་ལས་ལྷག་པའི་བུ་གཅིག་ནི། རྒྱལ་བ་ཡང་དགོན་པ་རྒྱལ་མཚན་དཔལ། ཕ་དང་མཉམ་པའི་བུ་ཆེན་བཅུ་གཉིས་ནི། རྒྱལ་བ་ཡང་དགོན་པ་ལྟ་བ་རང་དང་མཉམ་པ་ཡིན་ཞེས་པས། ཕ་དང་མཉམ་པའི་བུ་ཆེན་བཅུ་གཉིས་ཀྱི་ཡ་གྱལ་དུ་ཡང་བཞེད་དོ། །བརྟུལ་ཞུགས་རང་དང་མཉམ་པ་ཨོ་རྒྱན་པ་རིན་ཆེན་དཔལ། དག་སྣང་རང་དང་མཉམ་པ་ནེ་རིང་པ་བདེ་ལེགས་རྒྱལ་མཚན། རྟོགས་པ་རང་དང་མཉམ་པ་གཡའ་མདོ་རིང་གི་ཤཱཀྱ་རས་པ། དཀའ་སྤྱད་རང་དང་མཉམ་པ་ཕུ་རི་བ་དབང་ཕྱུག་རྒྱལ་མཚན། སྒྲུབ་ཚུལ་རང་དང་མཉམ་པ་ཕུ་རི་བ་ཞེད། སྤྱོད་པ་རང་དང་མཉམ་པ་བ་རི་སྤྱིལ་དཀར་བ། མོས་གུས་རང་དང་མཉམ་པ་བྱང་གླིང་པ་བསོད་ནམས་རྒྱལ་མཚན། སྙིང་རྗེ་རང་དང་མཉམ་པ་རྒྱལ་བ་མ་བདུན་པ་མཚན་མདོ་པོ་ཆེ་བ་རྣལ་འབྱོར་ཆོས་འཕེལ་ཞེས་པ། ཞེན་ལོག་རང་དང་མཉམ་པ་གངས་ཆེན་ཆོས་རྗེ་ཤཱཀྱ་བཤེས་གཉེན། བྱམས་པ་རང་དང་མཉམ་པ་བྱང་སེམས་ཤེར་གཞོན། མཁྱེན་པ་རང་དང་མཉམ་པ་ཆོས་སེང་། བརྩོན་འགྲུས་རང་དང་མཉམ་པ་བྱང་དཔལ། དེ་རྣམས་ལས་ཀྱང་མཆོག་ཏུ་གྱུར་པའི་བཀའ་བབ་ཀྱི་བུ་ཆེན་བཞི་ནི། །རྟོགས་པ་ནམ་མཁའ་ལ་དར་ཆེན་འཕྱར་འདྲ་ཡོད་པའི་བཀའ་བབ་པ་ཡང་དགོན་ཆོས་རྗེ། བརྟུལ་ཞུགས་རི་གཟར་གྱི་རྦ་ལྟ་བུ་ཡོད་པའི་བཀའ་བབ་ཨོ་རྒྱན་རྒྱལ་པོ། རྟེན་འབྲེལ་ནམ་མཁའ་ལ་ཟ་འོག་གི་གུར་བཀྲམ་པ་འདྲ་བ་ཡོད་པའི་བཀའ་བབ་པ་དཔལ་མགོན་ནེ་རིང་པ་བདེ་ལེགས་རྒྱལ་མཚན། །སྙིང་རྗེ་ཕྱོགས་རིས་མེད་པ་ནམ་མཁའ་ལྟ་བུའི་ཏིང་ངེ་འཛིན་སྤང་ལ་ཕུར་པ་བཏབ་པ་འདྲ་བ་ཡོད་པའི་ཕུ་རི་བ་དབང་ཕྱུག་རྒྱལ་མཚན་དང་བཞི། །བུ་འདྲ་བརྒྱད་ནི། དབུས་ཀྱི་རི་བོ་རྩེ་བརྒྱད་པ། ཐུགས་ཁར་འདྲེས་པའི་བསམ་གླིང་པ། ནུས་པ་མཐོན་པའི་རྫ་རི་བ། གྲུབ་པ་ཐོབ་པའི་ཤག་རས་པ། ཉི་མ་སེང་གེ ཆོས་ཀྱི་སེང་གེ དངོས་གྲུབ་འབྱུང་ནས། དབང་ཕྱུག་རྒྱལ་མཚན། ཞི་བྱེད་མགོན་པོ་རྣམས་སོ། །རྟོགས་ལྡན་དྲུག་ནི། ལ་ཡག་གོང་པ། །ལུང་དཀར་བ་ཤེས་རབ་རྡོ་རྗེ། གྲུབ་བཞི་པ་བྱང་སེམས་སྨོན་མཁར། ཆེ་བ་ཆོས་ལུང་པ། །ཞིག་པོ་དཀོན་སེང། ཟླ་བ་རས་པའོ། །ཁྱད་འཕགས་ཀྱི་རྟོགས་ལྡན་རྣམ་གཉིས་ནི། ཟླ་བ་རས་པ་དང་། ཤཱཀྱ་རས་པ་གཉིས་སོ། །
སློབ་མ་བྱོན་ཚུལ་འདྲེན་ཚུལ་ཞན་ཞིག། ཉེ་གནས་བརྒྱད་ནི། ཉེ་གནས་རིན་རྒྱལ། ཨ་བོ་བྱང་དཔལ། བྱང་སེམས་ཤེར་གཞོན། སློབ་དཔོན་བྱང་ཆུབ་འོད། ནག་པོ་བསམ་གཏན་འོད། སློབ་དཔོན་གཞོན་སེང་། ཕ་རྒན་ཞིག་པོ། ཉེ་གནས་བཀྲ་ཤིས་དཔལ་དང་བརྒྱད་བྱོན་ནོ། འགོས་ལོའི་དེབ་སྔོན་དུ། སྐུ་ཚེའི་སྨད་ལ་སྟེང་འགྲོ་དང་། སྤུ་ཏྲ་དང་། བྱང་གླིང་། བདེ་ཆེན་སྟེང་། བར་འབྲོག་རྡོ་རྗེ་གླིང་ལ་སོགས་པའི་དགོན་པ་མང་དུ་བཏབ། དགོན་པ་རེ་རེ་ནས་ཀྱང་དགེ་འདུན་སྒྲུབ་པ་པོ་སྟོང་ཚོ་མང་པོ་ཐོན་པ་བྱུང་གསུངས། སྤྱིར་སློབ་མ་ཚོགས་ཆེ་ཤོས་འདུས་པ་ནི་དགུང་ལོ་དྲུག་ཅུ་རྩ་བདུན་ལ་སེངྒེ་གླིང་དུ། དགེ་བའི་བཤེས་གཉེན་ཆེན་པོ་བརྒྱད་བརྒྱ། དབུ་ཆེན་གདུགས་ཕུབ་པ་ཉིས་བརྒྱ། རབ་ཏུ་བྱུང་བའི་དགེ་སློང་གི་དགེ་འདུན་ཆེན་པོ་ཁྲི་ཕྲག་གསུམ་དང་བརྒྱད་བརྒྱ་བྱུང་ཞིང་། ༼བསྡོམས།31800 བྱུང་།༽ གཞན་ཡང་མཁའ་འགྲོ་མ་འགྲོ་བ་བཟང་མོ། སྒྲུབ་པ་མོ་སྐལ་བཟང་། བྱང་སྐྱོང་སོགས་ཆོས་རྗེ་འདིའི་སྐུ་འཁོར་ན་སྒོམ་མ་བཞུགས་པ་རྣམས་ནི། ཐ་མལ་པ་སྐད་ཡིན་པར་བརྫུས་པ་མ་གཏོགས་མཁའ་འགྲོ་མ་འབའ་ཞིག་སྟེ། ངའི་སྒོམ་མ་སླེ་ཐུལ་ཅན་འདི་རྣམས་ཉིན་མོ་ང་ལ་ཆོས་ཉན། ནུབ་མོ་ནཱ་རོ་པའི་ཕྱི་རྟེན་བཀྲ་ཤིས་སྒོ་མང་ལ་སྐོར་བ་བསྐོར་ཏེ། ཨུ་རྒྱན་དུ་ཚོགས་ཀྱི་འཁོར་ལོ་ལ་འགྲོ་བ་ཡིན་གསུངས།
གྲུབ་ཆེན་ཨོ་རྒྱན་ཆེན་པོས་ཞལ་ནས། ང་ཡིས་ནུབ་ཕྱོགས་ཨུ་རྒྱན་ལ་ཕྱིན་ནས་སྐབས་ཤིག་ཏུ་རྒྱལ་པོ་ཨིནྡྲ་བོ་དྷིས་བཞེངས་པའི་གཙུག་ལག་ཁང་ཆེན་པོ་ཞིག་འདུག་པ་དེ་རུ་ཞག་འགའ་བཞུགས་པའི་དུས་སུ་ཨུ་རྒྱན་གྱི་མཁའ་འགྲོ་མ་ཕལ་ཆེ་བ་རྣམས། རྡོ་རྗེའི་གླིང་ན་ཆོས་རྗེ་རིན་པོ་ཆེ་རྒོད་ཚང་པ་ཆོས་གསུང་བ་ལ་སྔ་དྲོ་ཉན་དུ་ཕྱིན་ནས་དགོང་མོ་སླེབས་ཤིང་། ཆོས་རྗེ་རྒོད་ཚང་པ་དེ་ཆོས་འདི་འདྲ་གསུང་གི་འདུག་ཟེར་ཞིང་། ཆོས་ཀྱི་ཚིག་མང་པོ་ཁྱེར་འོང་ཞིང་འདུག་པས། ཨུ་རྒྱན་དེ་སྤྲུལ་པའི་ཞིང་ཁམས་རང་དུ་འདུག ཆོས་རྗེ་རིན་པོ་ཆེ་རྒྱལ་བ་རྒོད་ཚང་པས་སངས་རྒྱས་ཀྱི་ཞིང་ཁམས་ཐམས་ཅད་ཁྱབ་པའི་འཕྲིན་ལས་ལ་ཚད་བཟུང་དུ་མི་འདུག་ཅིང་། ཆོས་རྗེ་པའི་བཞུགས་ནས་དཔལ་བདེ་ཆེན་སྟེང་གི་སྒོམ་མ་སླེ་ཐུལ་ཅན་རྣམས་ནུབ་ཕྱོགས་ཨུ་རྒྱན་གྱི་མཁའ་འགྲོ་མར་འདུག་གསུངས་སོ། །
ཡང་མཁའ་འགྲོ་མ་འགྲོ་བ་བཟང་མོ་ནི། ཨོ་རྒྱན་གྱི་ཛོ་ཀི་ཆེན་མོ། བོད་དུ་ཆོས་རྗེ་རྒོད་ཚང་པ་ཡབ་སྲས་ཀྱི་འཕྲིན་ལས་སྒྲུབ་ཏུ་བྱོན་ནས། འདིས་ཞབས་བརྟན་དུ་ཕུལ་བར། ཤར་རྡོ་རྗེ་རིགས་ཀྱི་མཁའ་འགྲོ་མ་སོགས་ད་ལྟའང་ཡོད། རྗེ་རྒོད་ཚང་པ་གཤེགས་རྗེས་གྲུབ་ཐོབ་ཨུ་རྒྱན་པས་མཇལ། ཁྱེད་ཆོས་རྗེ་བུ་ཆེན་རྣམས་ཀྱི་སྐུ་ཚེ་དང་འཕྲིན་ལས་ངའི་ལག་ཏུ་ཡོད་པས། བཞུགས་ཞུ་མཛོད་གསུངས་པས། ཞུ་བ་མི་བྱེད། ནམ་འབྱོན་ཙ་ན་བྱོན་ཅིག་ཞུས་པས། དེ་མ་ཐག་ཏུ་སྤྲུལ་པའི་སྐུ་བསྡུས་ནས་གཤེགས། སླར་ཕྱག་འཚལ་ནས་བཞུགས་ཞུ་བྱས་ཀྱང་། ད་ཕྱིས་ངས་ལུས་ཤིག་བླངས་ཚར་སོང་གསུངས། དེ་སྐད་ལ་སྐུ་ཤ་འགྱུར་ཚར། དུས་ཕྱིས་རི་ཆུང་གི་ཀུན་ལྡན་རས་མ་དེ། ཨོ་རྒྱན་པས་འདིའི་སྐྱེ་བ་ཡིན་པར་གསུངས་སོ། །སྤྱིར་ཕ་ལས་ལྷག་པའི་བུའམ་ནང་གི་ཐུགས་སྲས་གཅིག་པོ་ཡང་དགོན་པ་ཡིན་པ་ཕལ་ཆེར་གཅིག་མཚུངས་ཡིན། ལ་ལས་གྲུབ་ཆེན་ཨོ་རྒྱན་པ་ཡིན་པར་ངེས་སོ་ཞེས་ཟེར་བར་ཡང་སྣང་།

མདོར་ན་སློབ་མ་རྟོགས་ལྡན་གྱི་རྣལ་འབྱོར་ཕོ་མོ་བསམ་གྱིས་མི་ཁྱབ་པ་སྟོད་འབྲུག་ནམ་མཁའི་སྐར་མ་ཞེས་རྒྱུ་སྐར་ལྟར་བྱོན་པས། ཀུན་མཁྱེན་པདྨ་དཀར་པོས། ཡང་དགོན་ཨུ་རྒྱན་ནེ་རིང་སྤྱི་དཀར་བ། །དེ་སོགས་གྲུབ་ཆེན་བརྙེས་པ་རྒྱུ་སྐར་ཙམ། །མོས་སྤྱོད་སར་བཞུགས་གངྒཱའི་རྡུལ་གྲངས་ལས། །བརྒལ་བའི་སློབ་མའི་གྲངས་ལྡན་དེ་ལ་འདུད། །ཅེས་བསྟོད་པར་མཛད་དོ།།

 

གསུང་འབུམ་སྐོར།

གསུང་འབུམ་ནི། ཆབ་ཤོག་མགུར་སྣ་ཚོགས། ལྟ་སྒོམ་ཉམས་ལེན་སྐོར་གྱི་མན་ངག་སྣ་ཚོགས་དང་བཅས་པ་བྲིས་མ་པོ་ཏི་གསུམ་བཞུགས་ཡོད་པ། བོད་ནང་གི་དཔེ་མཛོད་ཁང་ཞིག་གི་ནང་ལ་བཞུགས་པར་གསུངས། རྣམ་ཐར་བསྡུས་པ་བསྟན་པའི་བྱུང་ཚུལ་ནང་། ཆོས་ཀྱི་སྦྱིན་པ་ནི། གྲུབ་ཐོབ་ཆེན་པོའི་རྣམ་ཐར་ཆེན་མོ་བསྟན་པའི་བྱུང་ཚུལ། གྲུབ་ཐོོབ་བརྒྱུད་པའི་རྣམ་ཐར་མགུར་འབུམ་བླ་མའི་ངོ་སྤྲོད་དང་བཅས་པ་གནང་། ཏིང་ངེ་འཛིན་གྱི་དབང་བསྐུར་རྒྱས་བསྡུས། ཇོ་མོའི་བྱིན་རླབས། སྒྲུབ་སྐོར་ཤམ་བུ་ཅན་ལ་སོགས་པ་གནང་། བྱང་ཆུབ་མཆོག་ཏུ་སེམས་བསྐྱེད་པ་ཆེན་མོ། སྨོན་འཇུག་དོན་དམ་གསུམ། ཐུགས་རྗེ་ཆེན་པོའི་སྒྲུབ་སྐོར་བསྔོ་བ་སྨོན་ལམ་དང་བཅས་པ། སྡོང་པོ་གསུམ་དྲིལ། ཁྲིད་ཆེན་བརྒྱད། དགེ་སྦྱོར་བདུན་མ། ལས་སྤེལ་སྦྱང་ལ་སོགས་པའི་རྟེན་འབྲེལ་གྱི་སྐོར། མནོ་འཁོར་ཚོགས་ཆོས་ཀྱི་སྐོར། དྲི་བ་ཞུས་ལན་གྱི་སྐོར། ཞལ་ལྟ་སྤྲིང་ཡིག་གི་སྐོར། ནད་འདོན་དམིགས་པའི་སྐོར་སོགས་གསུང་སོ།།

 

རྒྱལ་བ་རྒོད་ཚང་པ་ལ་དྭགས་སུ་ཕེབས་པའི་སྐོར།

སྤྱིར་བཏང་རྒྱལ་བ་རྒོད་ཚང་པ་ལ་རྣམ་ཐར་ག་ཚོད་ཡོད་མེད་ཀྱང་བརྗོད་དཀའ་བས། རྣམ་ཐར་ཐུན་མོང་བ་དང་། ཐུན་མོང་མ་ཡིན་པའི་རྣམ་ཐར་ཡང་ཡོད་ཆོག སྤྱིར་བླ་མ་གང་དུ་ཕེབས་པ་དང་མཛད་འཕྲིན་ཆ་ཚང་རྣམ་ཐར་ནང་བཀོད་པའི་ངེས་བཟུང་ཡང་མ་མཆིས། དེར་བརྟེན་རྒྱལ་བ་རྒོད་ཚང་པས་ཕེབས་གནས་མང་པོ་ཞིག འཛམ་གླིང་ནང་ཧ་མ་གོ་བར་ལྷག་ཡོད་པ་གདོན་མི་ཟ། གང་ལགས་ཤེ་ན། རྒྱལ་བ་རྒོད་ཚང་པ་སྐུ་དངོས་ཀྱིས་གསུངས་པ། ངས་ཛ་ལན་དྷ་ར་ལ་སོགས་པའི་གནས་ཆེན་དུ་མ་ཞིག་ཏུ་ཕྱིན་ནས། འཛམ་བུ་གླིང་གསུམ་ཉིས་བསྐོར་བ་དེ་ཡང་། ལུས་སྟོབས་ཆེ་ནས་ལྟ་རུ་ཕྱིན་པ་མིན། །ཞེས་གསུངས་པས་ཀྱང་འགྲུབ། ལ་དྭགས་སུ་ཕེབས་ཚུལ་ཡང་། ཆོས་རྗེ་འགྲོ་བའི་མགོན་པོ་གཙང་པ་རྒྱ་རས་པའི་ལུང་བསྟན་ལས། ཧོར་བོད་གཉིས་ཀྱི་ས་མཚམས་ན་ནུབ་ར་བྱ་བའི་ཡུལ་སྲིན་མོ་གན་རྐྱལ་དུ་འགྱེལ་བ་འདྲ་བའི་གཡས་ཞོགས་ན་དཔལ་ཡེ་ཤེས་མགོན་པོའི་ཕོ་བྲང་ཡོད། དེའི་གནས་སྒོ་དབྱེ་བའི་སྐལ་བ་བུ་ཁྱེད་ལ་ཡོད་དོ།  །ཞེས་སྔགས་སྤྲུལ་མི་ཕམ་ཆོས་གྲུབ་མཐུ་སྟོབས་ཀྱིས་གསུངས་པ་ཁུངས་སུ་མཛད་པའི་ལོ་རྒྱུས་ཞིག་ལ་དྭགས་ནས་མཇལ་བྱུང་།

ལ་དྭགས་ནང་རྒོད་ཚང་ཕུག་ཅེས་དབེན་པའི་རི་ཁྲོད་ངོ་མཚར་ཉམས་དགའ་ཞིག་ན། རྒྱལ་བ་རྒོད་ཚང་པའི་བྲག་ཕུག་དང་། སྐུའི་རྗེས་དང་ཕྱག་རྗེས་སོགས་གསལ་པོ་མངོན་ཐུབ། རྒོད་ཚང་པའི་སྐུ་བརྙན། ལྷ་འདོང་རྒྱལ་བ་ཡང་དགོན་པའི་སྐུ་བརྙན། གྲུབ་ཐོབ་ཨུ་རྒྱན་པའི་སྐུ་བརྙན། ནེ་རིངས་པ་སྤྱིལ་དཀར་བའི་སྐུ་བརྙན་མཇལ་རྒྱུ་ཡོད་པ་མ་ཟད་རྒྱལ་བ་རྒོད་ཚང་པའི་སྒྲུབ་ཆུ་དང་། དེ་ནས་མར་ཅུང་ཞིག་བབས་ན་མཁའ་འགྲོའི་ཁྲུས་གཞོང་དང་། རྒོད་ཚང་པའི་ཞབས་རྗེས་སོགས་བཞུགས་འདུག དེ་བཞིན་ལ་དྭགས་ནུབ་ར་ཞེས་པའི་ལུང་པའི་སྨད། པ་ཀི་སི་ཐན་དང་ས་མཚམས་ན། ཡར་མ་ཞེས་པ་ན་མགོན་པོའི་གནས་ཁྱད་པར་ཅན་བྲག་རི་ངོ་མཚར་ཅན་མཇལ་རྒྱུ་དང་། དགོན་པའི་ནང་རྟེན་ལ་རྒྱལ་བ་རྒོད་ཚང་པའི་སྐུ་བརྙན། ཡང་དགོན་པ་སོགས་ཀྱི་སྐུ་བརྙན་མཇལ་རྒྱུ་འདུག འདོར་ན་ལ་དྭགས་སུ་རྒྱལ་བ་རྒོད་ཚང་པས། ལ་དྭགས་རྒྱལ་པོ་བཀྲིས་མགོན་གྱི་ཆབ་སྲིད་སྐྱོང་བའི་དུས་སུ། སྟོད་འབྲུག་རིང་ལུགས་ཐོག་མར་སྲོལ་གཏོད་གནང་།

 

༧གོང་ས་མཆོག་རྒྱལ་བ་རྒོོད་ཚང་པའི་ཞལ་སློབ་ཏུ་འཁྲུངས་པའི་སྐོར།

༸གོང་ས་མཆོག་རྒྱལ་བ་རྒོད་ཚང་པའི་ཞལ་སློབ་ཏུ་གྱུར་པའི་གསུང་སྒྲོས་དམིགས་བསལ་བ་ཞིག་ཡོད། དེ་ཇི་ལྟར་ཡིན་སྙམ་ན། སྤྱི་ལོ།1975 ཟླ་བ།9 པའི་ནང་གི་མཚན་མོ་ཞིག་ལ། ༸གོང་ས་མཆོག་ལ་མནལ་ལྟས་ཧ་ཅང་གསལ་པོ་ཞིག་བྱུང་། མནལ་ལམ་དེར་རྒྱལ་བ་རྒོད་ཚང་པ་(1189-1258)མཇལ་ཞིང་། མགོན་པོ་མཆོག་གི་སྐུ་སྐྱེ་སྔ་མ་ཞིག་དེའི་ཐུགས་སྲས་གཙོ་བོའི་གྲས་ཀྱི་གཅིག་ཡིན་པར་རྨིས། དེའི་ཕྱི་ཉིན་ཏེ་ཟླ་བ། 9 ཚེས། 24 ཉིན་གྱི་སྔ་དྲོའི་ཆུ་ཚོད། 6:30 སྟེང་བདེ་མཆོག་གི་གནས་རིར་གནས་གཟིགས་སུ་ཕེབས། དེའི་ཚུལ་སྤྱི་ལོ།1985 ལོར་༸གོང་ས་མཆོག་ནས་སྐབས་དེའི་བདེ་སྲུང་ལས་ཁུངས་ཀྱི་དྲུང་གཞོན་བློ་བཟང་སྦྱིན་པ་ལགས་ལ་དངོས་སུ་གསུངས། སྐུ་ངོ་བློ་བཟང་སྦྱིན་པ་ལགས་ཀྱིས་དེ་སྔོན་ལོ་མང་རིང་སྐུ་སྒེར་དྲུང་ཆེ་གནང་ཞིང་། ད་ལྟ་སླར་ཡང་དྲུང་ཆེའི་ཕྱག་ལས་གནང་བཞིན་པ་ཡིན། སྔར་དང་ད་ལྟ་གཉིས་ཀར་རྒྱལ་བ་རིན་པོ་ཆེའི་སྐུ་གམ་དུ་ཞབས་ཕྱི་ཞུ་མཁན་ཞིག་ཡིན་པས་་༸གོང་ས་མཆོག་གི་མནལ་ལམ་གྱི་ཐད་ལ་ཞལ་རྫུན་གསུངས་མི་སྲིད་པ་ཀུན་གྱིས་ཤེས། དེ་ལྟར་ན། ཡིད་ཆེས་པའི་གནས་ཏེ་འདི་ལྟར། 1985 ལོར་གུས་པ་བདེ་སྲུང་ལས་ཁུངས་ཀྱི་དྲུང་གཞོན་ཡིན་སྐབས་རྒྱ་གར་གྱི་ཧི་མ་ཅལ་མངའ་སྡེའི་ཁོངས་གར་ཤ་སྐྱིད་ལུང་དུ་༸ཞབས་སོར་འཁོད་པའི་ཕྱི་ཉིན་སྔ་དྲོ་སྟེ་ཕྱི་ཟླ།6 ཚེས། 11 ཉིན་གཟིམ་ཆུང་གི་དབུ་གཡབ་ཏུ་སྐུ་འཆམ་གནང་མུར་གུས་པར་བཀའ་ཕེབས་གསལ་ལ། གཙང་པོ་ཕར་ཕྱོགས་ཀྱི་རི་དེ་བདེ་མཆོག་དྲིལ་བུ་ལྷ་ལྔའི་གནས་ཆེན་རེད། རི་འདིའི་རྒྱབ་ཕྱོགས་སུ་གྲུབ་ཆེན་དྲིལ་བུ་པ་དང་རྒྱལ་བ་རྒོད་ཚང་པའི་སྒྲུབ་གནས་སུ་གྲགས་པའི་བྲག་ཕུག་ཅིག་ཡོད། དེ་སྔ་ས་གནས་འདིར་ཐེངས་དང་པོ་ཡོང་སྐབས་མཚན་མོ་རྨི་ལམ་དུ་འབྲུག་པ་བཀའ་བརྒྱུད་པའི་མཁས་གྲུབ་ཀྱི་སྐྱེས་ཆེན་རྒྱལ་བ་རྒོད་ཚང་པ་ཞལ་མཇལ་ཏེ་མགོན་པོ་མཆོག་གི་སྐུ་ཚེ་སྔོན་མ་ཞིག་ཏུ་རྒྱལ་བ་རྒོད་ཚང་པའི་ཐུགས་སྲས་གཙོ་བོ་ལྔ་ཡོད་པའི་གྲས་ནས་གཅིག་ཡིན་པ་གསལ་པོ་རྨིས་བྱུང་། དགའ་སྣང་དང་དད་པས་ཀུན་ནས་བསླངས་ཏེ་སེམས་ཤུགས་དང་བཅས་ཕྱི་ཉིན། (1975 ཟླ་བ། 9 ཚེས།24 སྔ་དྲོ་ཆུ་ཚོད་ 6 :30 ཐོག) བདེ་མཆོག་དྲིལ་བུ་ལྷ་ལྔའི་གནས་རིར་ཞབས་བསྐོར་ལ་ཕེབས་རྒྱུར་ཐུགས་ཐག་བཅད་དེ་ཕེབས་པ་ཡིན། རི་མཚམས་སུ་གར་ཤའི་གྲོང་གསེབ་པའི་རྨོ་མོ་ཞིག་གིས་ལག་པས་བསླས་པའི་ཨུ་སུ་མཐུག་པོ་ཞིག་ཕུལ་ཏེ་བཞེས་རོགས་ཞེས་ཨུ་ཚུགས་བྱེད་པ་དེ་རྨོ་མོ་ལགས་ཀྱི་འདོད་པ་སྐོང་ཆེད་བཞེས་པ་ཡིན། མར་ལམ་ཞབས་བརྡར་ནས་སྐུ་གཉེལ་པོ་བྱུང་ཞེས་བཀའ་ཕེབས་བྱུང་། འདི་ཉིན་རི་སྐོར་དུ་ཆིབས་བསྒྱུར་གནང་བ་མཐོང་ཐོས་བྱུང་བའི་ཡུལ་མི་སེར་སྐྱ་ལྔ་བརྒྱ་སྐོར་དད་ཤུགས་ཀྱིས་གཡོས་ཏེ་དབང་མེད་རི་སྐོར་དུ་ཕེབས་རྗེས་འབྲངས་འདུག དོན་སྙིང་རྒྱལ་བ་རྒོད་ཚང་པ་མགོན་པོ་རྡོ་རྗེ་མཆོག་གི་ཞལ་གཟིགས་དངོས་སུ་བྱུང་བ་ཡིན་འདུག

 

རྒྱལ་བ་རྒོད་ཚང་པའི་རྣམ་ཐར་ཁག་གི་སྐོར།

རྒྱལ་བ་རྒོད་ཚང་པ་མགོན་པོ་རྡོ་རྗེའི་རྣམ་ཐར་རྗེས་འཇུག་སློབ་མ་རྣམས་ཀྱིས་བརྩམས་པའི་ཚུར་མཐོང་གདུལ་བྱའི་སྣང་ངོར་གྲགས་པའི་རྣམ་ཐར་བྱིན་ཅན་མི་འདྲ་བ་དུ་མ་ཞིག་མཆིས་ཏེ། སློབ་མ་དང་ཡང་སློབ་རྣམས་ཀྱིས་མཛད་པའི་རྣམ་ཐར་གྲངས་ནི།  (1) སློབ་དཔོན་བྱང་དཔལ་གྱིས་མཛད་པའི་ཚག་བྲིས་ཆེན་མོ། (2) སློབ་དཔོན་དབང་ཕྱུག་རྒྱལ་མཚན་གྱིས་མཛད་པའི་གནད་བཏུས་སྒྲོན་མེ། (3) མྱ་ངན་འདས་ཆུང་། (4 ) སློབ་དཔོན་བྱང་ཆུབ་འོད་ཀྱིས་མཛད་པའི་བསམ་འཕེལ་ནོར་བུ་དགོས་འདོད་ཀུན་འབྱུང་། (5) བྱང་སེམས་ཤེར་གཞོན་གྱིས་མཛད་པའི་ཡོན་ཏན་སྒོ་འབྱེད། (6) ལྷ་བཙུན་པ་བསོད་ནམས་སྟོབས་ཀྱིས་མཛད་པའི་རྣམ་ཐར། (7) རྒྱལ་བ་ཨུ་རྒྱན་པས་མཛད་པའི་གནད་བསྡུས་པའི་སྒྲོན་མེ་རིན་པོ་ཆེའི་ཕྲེང་བ། ( 8) སྤྲུལ་སྐུ་མཁས་སྤྱོད་དབང་པོས་མཛད་པའི་རྣམ་ཐར། (9) རྩེ་བརྒྱད་པས་མཛད་པའི་རྣམ་ཐར། (10) རྒྱལ་ཐང་པ་བདེ་ཆེན་རྡོ་རྗེས་མཛད་པའི་རྣམ་ཐར། (11) མཉམ་མེད་རྒྱལ་བ་རྒོད་ཚང་པའི་རྣམ་ཐར་རིན་ཆེན་གཏེར་མཛོད། (12) མཉམ་མེད་རྒྱལ་བ་རྒོད་ཚང་པའི་རྣམ་ཐར་བསྡུས་པ་བསྟན་པའི་བྱུང་ཚུལ། (13) རྗེ་རྒོད་ཚང་པའི་གསང་བའི་རྣམ་ཐར་བཀའ་རྒྱ་མ། (14) རྒྱལ་བ་རྒོད་ཚང་པའི་མངོན་པར་རྫོགས་པ་སངས་རྒྱས་པའི་རྣམ་ཐར། (15) རྣལ་འབྱོར་པ་སངས་རྒྱས་དར་པོས་མཛད་པའི་རྒྱལ་བ་རྒོད་ཚང་པ་མགོན་པོ་རྡོ་རྗེའི་རྣམ་ཐར་ལེགས་བཤད་ནོར་བུའི་ཕྲེང་བ། (16) རྣམ་ཐར་ལེའུ་མ་བཅས་འདུག་ལ་དེ་དག་ནི་་རང་ཉིད་ཀྱི་ཧ་གོ་བ་རྣམས་ཡིན། ད་དུང་ག་ཚོད་ཡོད་མེད་མི་ཤེས་ལ། ཆོས་རྗེ་རྒྱལ་བ་རྒོད་ཚང་པ་ལ་རྣམ་ཐར་འདི་འདྲ་མང་པོ་ཡོད་སྟབས་ཡང་བསྐྱར་འབྲི་དགོས་དོན་མེད་པ་ཞིག་ཡིན་ཅིང་། སྔོན་བྱོན་རྣམ་ཐར་ལ་གསལ་བ་ལས་བརྗོད་བྱ་གསལ་བ་ཞིག་ག་ནས་ཡོང་སྟེ། འོན་ཀྱང་རྣམ་ཐར་ཁག་ནང་བརྗོད་བྱ་གཙོ་བོ་རྒོད་ཚང་པའི་རྣམ་ཐར་ཡིན་ལ། དེ་ཡང་བླ་མ་གཅིག་གི་ལོ་རྒྱུས་གཅིག་ཡིན་ཀྱང་འབྲི་སྲོལ་མི་འདྲ་བས་རྒྱས་བསྡུས་སྣ་ཚོགས་ཡོད། ཐུགས་དམ་བཅུ་གཉིས། གོ་ཆ་དང་བཅུ་གསུམ་གྱི་རྣམ་ཐར་གྱི་སྲོལ་གཏོད་པར་མཛད་པ་ལས་རྩོམ་གཞི་བྱས་པའི་རྣམ་ཐར་ཡང་འདུག

དེར་མ་ཟད། རྣལ་འབྱོར་པ་སངས་རྒྱས་དར་པོས་མཛད་པའི་རྒྱལ་བ་རྒོད་ཚང་པ་མགོན་པོ་རྡོ་རྗེའི་རྣམ་པར་ཐར་པ་མཐོང་བ་དོན་ལྡན་ནོར་བུའི་ཕྲེང་བ། ཞེས་པ་ནི་རྒོད་ཚང་པའི་རྣམ་ཐར་ཧ་ཅང་རྒྱས་པ་ཞིག་ཡིན། དེའི་ནང་རྒོད་ཚང་པ་ཙ་རི་ནས་ལོ་གསུམ་བཞུགས་ནས་ར་ལུང་དུ་ཕེབས་རྗེས་སུ་ལ་སྟོད་རྩིབས་རིར་འགྲོ་བར་ཞུས་ཚུལ་དང་ལ་སྟོད་དུ་ཕེབས་ཚུལ་སྐོར་མི་གསལ་ལ། ཡང་བྱང་སེམས་ཤེར་གཞོན་གྱིས་མཛད་པའི་ཡོན་ཏན་སྒོ་འབྱེད་ལས་དེའི་སྐོར་ཁ་གསལ་པོ་འདུག་དེ་བཞིན་རྣམ་ཐར་ཁག་ནས་གང་འདུས་ཐབས་བྱས་ཏེ། གནས་གང་དུ་ཕེབས་པ་དང་བཞུགས་པ་རྣམས་གོ་རིམ་ལྟར། ཁ་གསལ་དོན་བསྡུས་པ་དཀྱུས་ལ་འཇུག་པ་ཞིག་བྱས་ཁུལ་ཡིན།

ཆོས་ཀུན་མངོན་གཟིགས་རྒྱལ་བ་རྒོད་ཚང་པའི། །
རྣམ་ཐར་ཕྱོགས་བསྡུས་ཅུང་ཟད་བསྒྲིགས་པ་ལ།།
མ་རྟོགས་ལོག་རྟོག་འགལ་འཁྲུལ་ཅི་མཆིས་པ། །
ཆོས་ཀྱི་སྤྱན་ལྡན་རྣམས་ཀྱི་སྤྱན་སྔར་བཤགས། །

རྒྱལ་བ་རྒོད་ཚང་པའི་རྣམ་ཐར་བསྡུས་སྡོམ་ཡིད་བཞིན་དབང་གི་རྒྱལ་པོ།

ཁམས་གསུམ་ཆོས་ཀྱི་རྒྱལ་པོ་རྒྱལ་བ་རྒོད་ཚང་པ་ཆེན་པོ་ནི། ལྷོ་བོད་གཉིས་ཀྱི་ས་མཚམས་ལྷོ་བྲག་དོལ་ཆུང་གྲོག་པོ་སྔོན་པོའི་ལུང་པ་ཁྲ་ཞེས་པར་ཡབ་ཆུ་ཅལ་མོན་གྲགས་དང་། ཡུམ་དཔལ་ལྡན་རྒྱན་བྱ་བ་གཉིས་ཀྱི་སྲས་སུ་སྤྱི་ལོ།1189 ལོར་ངོ་མཚར་བའི་ལྟས་དང་བཅས་སྐུ་བལྟམས། དགུང་ལོ་གསུམ་པ་ལ་ཡུམ་གྱིས་བསྐྱུར་ནས་ཡབ་ཀྱིས་བསྐྱངས་ཤིང་ཡབ་སྲས་གཉིས་འོ་བརྒྱལ་ཆེན་པོ་བྱུང་། དགུང་ལོ་དྲུག་ནས་གསུང་སྒྲོགས་བསླབས་ནས་མཐར་ཕྱིན་ཏེ། གསུང་སྒྲོགས་སྐུ་ཡོན་གྱིས་ཡབ་ཀྱི་དྲི་ལན་མཇལ་བར་མཛད། དགུང་ལོ་བཅུ་པ་ནས་པག་ཤི་༼རྒྱ་སྐད་དམ་སོག་སྐད་ཀྱི་ཟུར་ཆག དོན་ནི་སྒྲུང་བཤད་མཁན། ༽མཛད་དེ་ཐུན་མོང་རིག་བྱེད་ལ་མཁས་པར་མཛད། ལྷ་ས་ལ་ལན་དུ་མ་བྱོན་གླུ་གར་བྲོ་གསུམ་གྱིས་སྣང་བ་རོལ་མོ་བརྒྱུད་ནས་མྱ་ངན་ཅན་རྣམས་ཀྱི་སྡུག་བསྔལ་བསལ་ཞིང་དགུང་ལོ་བཅུ་དགུའི་བར་དུ་ཡབ་ཀྱི་ཁབ་དུ་བཞུགས།
དགུང་ལོ་བཅུ་དགུར་གཙང་གི་ཡུལ་མྱང་སྟོད་རྒྱལ་རྩེའི་ཁོངས་ར་ལུང་དུ་ཕེབས་ནས་རབ་ཏུ་བྱུང་ཞིང་ཆོས་རྗེ་གཙང་པ་རྒྱ་རས་པ་ལ་སྙན་བརྒྱུད་གནད་ཀྱི་གདམས་པ་མ་ལུས་པ་ཞུས། འབྲི་གུང་། རྭ་སྒྲེང་། སྟག་ལུང་། ཚལ་པ་ལ་སོགས་པའི་དགོན་པ་ཆེ་དགུ་ཐམས་ཅད་གཟིགས་ཤིང་བླ་མ་བཟང་དགུ་ཐམས་ཅད་ལ་ཆོས་འབྲེལ་ཞུས། གདམས་པའི་ལྷག་མ་སངས་རྒྱས་དབོན་ལ་ཞུས། དགུང་ལོ་བཅུ་དགུ་ནས་ཉི་ཤུ་རྩ་གཅིག་གི་བར་ལོ་གསུམ་ར་ལུང་དུ་བཞུགས། དེ་ནས་དགུང་ལོ་ཉི་ཤུ་རྩ་གཉིས་པ་ལ་བླ་མའི་ལུང་བསྟན་ལྟར་ལྷོ་བྲག་མཁར་ཆུར་བྱོན་ལོ་གསུམ་དམ་བཅའ་བྱས་ནས་སྒྲུབ་པ་མཛད། དགུང་ལོ་ཉེར་ལྔ་ལ་ཏི་སེ་ལ་བྱོན་པར་དགོངས་ཏེ་ཁ་རག་གཙང་ནས་ཐོན་ཡར་ལམ་ཚོང་འདུས་གོར་མོར་བྱོན།

དེ་ནས་ལ་སྟོད་ལྷོ་དིང་རིར་ཡོད་པའི་རྒྱལ་གྱི་ཤྲཱི་ཁྱུང་དཀར་དང་གླང་འཁོར་བཅས་སུ་ཕེབས། དེ་ནས་གུང་ཐང་སྐྱིད་རོང་རྫོང་ཁོངས་རྗེ་བཙུན་མི་ལིའི་གནས་རྣམས་གཟིགས་ནས་བྱང་ལམ་བརྒྱུད་སྤུ་ཧྲེང་དང་གངས་ཏི་སེར་ཕེབས། དགོན་པ་བཏབ། སྒྲུབ་པ་འབའ་ཞིག་མཛད། དེ་ནས་ཞང་ཞུང་སྤྲེ་ཏ་སྤུ་རི་གུ་གེ་མཐོ་སྡིང་སོགས་བརྒྱུད་ནས་དེང་སྐབས་རྒྱ་གར་བྱང་ཕྱོགས་ཧི་མ་ཅཱལ་མངའ་སྡེའི་ཁུལ་པི་ཏི་སྤིལ་ཅོག་ཏུ་ཕེབས། པི་ཏི་རྒྱལ་ས་བཀའ་སྩལ་ཉེ་འཁོར་ལི་ཐང་གྲོང་སྡེ་མདོ་ན་ད་ལྟ་ཡང་རྒོད་ཚང་པའི་གནས་ཡིན་གསུངས་བཞིན་འདུག

དེ་ནས་གར་ཤ་མཁའ་འགྲོ་གླིང་ན་ཡོངས་གྲགས་སུ་དྲིལ་བུ་རི་ཞེས་པར་ཕེབས། དེ་ནས་ཕེབས་ལམ་ཅམ་པ་བརྒྱུད་ནས་ཉི་ཞག་བཅོ་རྒྱད་ནས་གནས་ཆེན་ཛ་ལན་དྷ་རར་ཕེབས། དེར་མཁའ་འགྲོ་མས་དངོས་སུ་བྱིན་གྱིས་བརླབས། ད་ལྟའི་དུས་སྐབས་རྡ་རམ་ས་ལའི་ཉེ་འགྲམ་རྒྱ་གར་ཧི་མ་ཅཱལ་མངའ་སྡེའི་ཁོངས་ཀཱང་ར་མན་དིར་ས་ཆ་འདི་ཛ་ལན་དྷ་རའི་ཡུལ་ཡིན་པ་དང་རྒོད་ཚང་པ་ཕེབས་པ་དགེ་འདུན་ཆོས་འཕེལ་གྱི་གནས་ཡིག་དུ་གསལ། ཀཱང་ར་མན་དིར། ཛ་ལ་མུ་ཁི། ཙཱ་མུཎྜཱི་བཅས་ད་ལྟའི་དུས་ནི་ཧི་རྡུ་ལྷ་ཁང་རང་གི་རྣམ་པར་འདུག ཛ་ལ་མུ་ཁི་ན་ས་ལ་མེ་འབར་དང་ཆུ་ལ་མེ་འབར་རྡོ་ལ་མེ་འབར་ད་ལྟ་དངོས་སུ་ཡོད་ལ་ཡ་མཚན་པོ་འདུག ཀཱང་ར་རྒྱལ་ཁང་རྙིང་པའི་ཤུལ་ལ་བལྟས་ན་རྒྱ་གར་ནང་པའི་གནས་ཆེན་ཁག་གི་ཤུལ་དང་ཆ་འདྲ་བར་སྣང་། རྒོད་ཚང་པས་གནས་འདིར་ལོ་ཕྱེད་ཙམ་བཞུགས་ཤིང་།

དེ་ནས་གནས་ཆེན་ཀུ་ལུ་ཏ་བྱ་བར་ཕེབས། གནས་ཀྱི་ངོ་བོ་སི་དྷི་བྱ་བ་མེ་ཏོག་ཀུ་མུ་ཏའི་ཚལ་ཆེན་པོ་ཡོད། རྡོ་ལ་སངས་རྒྱས་ཀྱི་ཞབས་རྗེས་བཞུགས་གསུངས། ད་ལྟ་སངས་རྒྱས་ཀྱི་ཞབས་རྗེས་བཙལ་ཀྱང་མཐོང་ཡུལ་ན་མི་སྣང་། གང་ལྟར་གནས་རི་རྩེ་ཤིན་ཏུ་མཐོ་ཞིང་མཐོང་ཡེར་ཆེ་ལ་ས་ཆ་གུ་ཡངས་པོ་ཕྱོགས་གང་དུ་བལྟས་ཀྱང་ལྟད་མོ་ཆེན་པོ་འདུག་ཅིང་རྒྱ་གར་བས་སྦི་ཅི་ལིང་མར་ཟེར། ས་ཕྱོགས་ནི་ཧི་མ་ཅལ་མངའ་ཁོངས་ཀུ་ལུ་རྒྱལ་སའི་འགྲམ་ལ་རེད། དེ་ནས་གར་ཞ་གྷན་དྡྷོ་ལིའི་རི་ཁྲོད་དུ་བྱོན། དེ་ནས་སྤི་ཏི་བརྒྱུད་ཞང་ཞུང་ལམ་ནས་ཐོན་ཏེ་གངས་ཏེ་སེར་བྱོན། དེ་ནས་རྫོང་དྲུག་དང་། ལ་སྟོད་ལྷོ་ལམ་ཐོན་ནས་ས་སྐྱར་བྱོན། དེ་ནས་གདན་ས་ར་ལུང་དུ་བྱོན་ནས་དབོན་རས་དར་མ་སེང་གེ་དང་མཇལ། དགུང་ལོ་ཉེར་ལྔ་པ་ལ་ཛ་ལན་དྷ་ར་དང་ཏེ་སེ་སོགས་སུ་བྱོན་ཏེ་ལོ་བཞི་འགོར།

དེ་ནས་དགུང་ལོ་ཉེར་དགུ་ལ་གཙང་དང་། ཡར་འབྲོག། ལྷོ་བྲག་གསུམ་གྱི་མཚམས་ལ་ཡོད་པའི་ལྷ་ཁབ་ཏུ་ཕེབས་ནས་ལོ་གསུམ་བླ་མ་སྒྲུབ་གནང་། དེ་ནས་དབོན་རས་ཀྱི་དྲུང་དུ་བྱོན་ཏེ་བསྙེན་པར་རྫོགས་པ་མཛད། དགུང་ལོ་སོ་གཉིས་ལ་ཙ་རིར་བྱོན། ཙ་རི་ན་བཞུགས་པ་རྣམས་ཀྱི་གཡོག་འབའ་ཞིག་མཛད། གཡུ་མཚོ་སྐོར་བར་བྱོན་ཙ་རི་ལ་ལོ་གསུམ་བཞུགས། སླར་ཡང་བླ་མའི་གདན་ས་ར་ལུང་དུ་ཕེབས། སངས་རྒྱས་དབོན་ལ་ཁོ་བོ་ལ་སྟོད་དུ་འགྲོ་འདོད་ཞུས། ད་འོ་ན་སོང་། བསྟན་པ་མེད་པའི་ས་ཕྱོགས་སུ་བླ་མའི་བསྟན་པ་དར་བར་བྱས། དེ་རང་ཞབས་ཏོག་ཏུ་ཆེ་གསུངས། དགུང་ལོ་སོ་ལྔ་པ་ལ་དིང་རིར་ཡོད་པའི་རྒྱལ་གྱི་ཤྲཱི་རིར་བྱོན། ཡོངས་གྲགས་སུ་རྩིབས་རི། ཡུལ་ཉི་ཤུ་རྩ་བཞིའི་རྩིབས་དང་ལྡན་པའི་རི། འཁོར་ལོ་སྡོམ་པའི་ཕོ་བྲང་གནས་རིའི་གཟུགས་སུ་སྒྲུབ་པའི་གནས་བྱིན་ཅན། རྒྱ་བོད་གཉིས་ན་གྲགས་པའི་ལུང་གིས་བསྟན་པའི་གནས་དེར་ཕེབས། ཁྱུང་དཀར་དུ་ལོ་གསུམ་བསྒྲུབ་པ་མཛད། དབྱར་ཞིག་ཡང་དཀར་དུ་བཞུགས།
དེ་ནས་བྱ་རྒོད་པོ་ཚང་འཆའ་ས་ཤིན་ཏུ་མཐོ་བ་མཐོང་དཀའ་བའི་དབེན་པའི་རིི་ཁྲོད་དུ་འདག་སྦྱར་མཛད་ནས། མི་ང་དང་གཅིག བྱ་ཁྱོད་དང་གཉིས། བྲག་འདི་དང་གསུམ། མིང་གཅིག་ཏུ་མ་སོང་ཚུན་མི་སྒྲུབ་རེ། ཞེས་དམ་བཅས་ཏེ་བསྒྲུབས་པས་རྒོད་ཚང་པ་ཞེས་མཚན་ཐོགས། རྒོད་ཚང་དུ་ལོ་ངོ་བརྒྱད། མདོར་ན། ཤྲཱི་རིར་ལོ་ངོ་བཅུ་གཅིག་བཞུགས། རྒོད་ཚང་སྒྲུབ་ཕུག་ནས་གཟིགས་ཚེ་ལྷོ་ངོས་ན་ཇོ་མོ་གླང་མའི་གཙོས་ཚེ་རིང་མཆེད་ལྔའི་གནས་རྟེན་སྲིད་པའི་གང་རི་ཤེལ་གྱི་མཆོད་རྟེན་ཡིད་དུ་འོང་བ་གྲལ་སྒྲིག་ནས་མཇལ། དིང་རིའི་དམངས་གཞས་སུ།
རྒོད་ཚང་མགོན་པོ་རྡོ་རྗེ།
མ་མོས་དྲགས་པ་མིན་ནོ།།
རྡོ་སྐས་སྔོ་མོའི་ཕྱོགས་སུ། །
འཇིགས་སུ་དྲགས་པ་ཡིན་ནོ།།
ཞེས་ལེན་སྲོལ་ཡོད། དགུང་ལོ་བཞི་བཅུ་ཞེ་ལྔ་པ་ལ་བཀྲ་ཤིས་སྟེང་འགྲོར་བྱོན། དེ་ཡང་བཀྲ་ཤིས་སྟེང་འགྲོ་ཞེས་པ་ནི་སྤྱིར་ཤྲཱི་ཁུལ་དང་། རྗེ་བཙུན་མི་ལའི་སློབ་མ་སྙིང་གི་ཚལ་པ་བརྒྱད་ཀྱི་ཡ་གྱལ་རས་པ་ཞི་བ་འོད་འཁྲུངས་སའི་ཡུལ་རྒྱལ་ཁྲོམ་ལུང་པའི་ཕུ་ན་ཡོད། དེར་ལོ་ངོ་བཅུ་གསུམ་བཞུགས་པའི་རིང་ལ་སྒྲུབ་པ་དང་སློབ་མ་སྟོང་ཚོ་མང་པོའི་འགྲོ་དོན་མཛད་ཅིང་། ལ་སྟོད་ལྷོ་བྱང་གི་ཡུལ་གྲུ་མང་པོར་ཕེབས་ནས་ལས་འབྲེལ་བཏགས་སོ། །དགུང་ལོ་ལྔ་བཅུ་རྩ་བརྒྱད་ལ་གཉའ་ནང་བདེ་ཆེན་སྟེང་དུ་བྱོན། བདེ་ཆེན་སྟེང་དུ་ཆོས་རྗེའི་ཞལ་ནས་མདོ་བརྒྱུད་ནས་གསུངས་པའི་སངས་རྒྱས་ཀྱི་ཡོན་ཏན་ད་དུང་ང་ལ་ཨེན་ཙམ་མ་རྫོགས་པ་འདུག་པས། དེ་ཚོ་ནམ་རྫོགས་བར་དུ་བསྒོམ་པ་ཡིན་གསུངས། གཉའ་ནང་བདེ་ཆེན་སྟེང་དང་དགའ་ལྡན་གླིང་གཉིས་སུ། ལོ་ངོ་བཅུ་བཞུགས་ཤིང་སྒྲུབ་པ་དང་འགྲོ་དོན་འབའ་ཞིག་མཛད། བདེ་ཆེན་སྟེང་དེང་སྐབས་གཉའ་ནང་ཚོང་འདུས་ནས་འགྲམ་ལ་འགྲོ་སའི་གཞུང་ལམ་ན་མཆོག་གཤམ་ཞེས་པའི་ཡུལ་སྡེ་ཡོད་ཅིང་དེའི་ཕུ་ན་ཡོད། དགུང་ལོ་དྲུག་ཅུ་རྩ་བདུན་པ་ལ་སྤང་ཕུ་སེང་གེ་གླིང་དུ་བྱོན། སེང་གེ་གླིང་ནི་ཕ་དམ་པ་སངས་རྒྱས་ཀྱི་གདན་ས་དིང་རི་གླང་འཁོར་དང་ཉེ་འགྲམ་ཤར་གཏོགས་སེང་གེ་སྡིངས་ཡིན། ལོ་རྒྱུས་དགའ་རེའི་ནང་སྦྱང་ཕུ་སེངྒེ་གླིང་ཞེས་གསལ།༼ཅུང་ཟད་དོགས། ༽ ༼སེང་བྲག་རིན་པོ་ཆེ་ཡང་ཐོག་མ་ཤར་གཏོགས་སེངྒེ་གླིང་གི་བླ་མ་ཡིན་པ་རྩིབས་རིའི་གནས་བཤད་དུ་གསལ།༽དེའི་དུས་སུ་རྒྱལ་བ་ཡང་དགོན་པ་རྩིབས་རི་གནམ་སྡིངས་ནས་ཤར་གཏོགས་སེངྒེ་སྡིངས་ལ་ཕེབས་པས་བསུ་བ་ལ་སེར་ཕྲེང་མཛད། དེ་སྐབས་སུ་ཚོགས་པ་ཁྲི་ཚོ་ལྷག་ཙམ་ལ་འགྲོ་དོན་རྒྱ་ཆེན་པོ་མཛད་ནས་སངས་རྒྱས་འཇིག་རྟེན་དུ་བྱོན་པ་དང་ཚུལ་མཚུངས་པར་བསྟན་པ་དང་སེམས་ཅན་གྱི་དོན་རྒྱ་ཆེར་མཛད། སྟོན་དེ་བྱང་ངམ་རིང་རྫོང་ཁོངས་བྱང་ཅུང་པ་གྲོ་མ་ལུང་རྗེ་བཙུན་མི་ལའི་བཞུགས་གནས། རྒྱ་གར་བྲག་ཕུག་གམ་མིང་གཞན་ཧ་དང་བྲག་བྱ་བའི་དགོན་པར་བཞུགས། སྒྲུབ་པ་དང་འགྲོ་དོན་རྒྱ་ཆེན་པོ་མཛད། མདོར་ན་ཤར་གཏོགས་སེངྒེ་སྡིངས་དང་བྱང་ཅུང་པ་གྲོ་མ་ལུང་དུ་ལོ་གཅིག་བཞུགས། དེ་ནས་དགུང་ལོ་དྲུག་ཅུ་རྩ་བརྒྱད་པར་དིང་རིའི་ས་ཁུལ་བར་འབྲོག་རྡོ་རྗེ་གླིང་དུ་ཕེབས། ལྷོ་བྱང་སྡེ་གསུམ་༼སྡེ་གསུམ་ནི། ལ་སྟོད་ལྷོ་བྱང་གཉིས། ལྷོར་དིང་རི་དང་གཉའ་ནང་གཉིས། བྱང་དུ་ལྷ་ངམ་ཕུན་གསུམ། མངའ་རི་ཡང་སྐྱིད་རོང་གཙོ་བོར་བྱས་པའི་ཡུལ་གྲུ་རྣམས་ལ་གོ། ཤེལ་དཀར་ཆོས་འབྱུང་དང་། གྲུབ་ཐོབ་ཐང་སྟོང་གི་རྣམ་ཐར་བཅས་སུ་ལྷོ་བྱང་མངའ་གསུམ་ཞེས་གསལ།༽དབུས་གཙང་རུ་བཞི། སྟོད་སྨད་ཁམས་གསུམ་གྱི་དད་ལྡན་ཐམས་ཅད་འདུས། དེ་ལྟ་བུའི་བསྟན་པ་དང་སེམས་ཅན་གྱི་དོན་རྒྱ་ཆེན་པོ་མཛད་ནས། དགུང་ལོ་བདུན་ཅུར་བཞེས་པ་རྟའི་ལོ་དབྱར་ཟླ་འབྲིང་པོའི་ཚེས་གསུམ། སྤྱི་ལོ།1258 ལོར་གཟུགས་སྐུ་ཆོས་དབྱིངས་སུ་ཐིམས་ཚུལ་བསྟན་ནོ། །མདོར་ན་ཆོས་རྗེ་རྒོད་ཚང་པས་ལ་སྟོད་ཡུལ་དུ་དགུང་ལོ་སོ་ལྔ་ནས་བདུན་ཅུ་བར་ལོ་སོ་ལྔ་བཞུགས། དེ་ཡང་དིང་རིའི་ཡུལ་དུ་ལོ་ཉི་ཤུ་རྩ་བཞི་དང་ཕྱེད། གཉའ་ནང་དུ་ལོ་བཅུ། ངམ་རིང་གི་ཁོངས་ཅུང་པ་རུ་ལོ་ཕྱེད་བཅས་སོ།།

གངས་ཅན་གྲུབ་པའི་ཁྱུ་མཆོག་རྒོད་ཚང་རྗེའི།།
མཛད་བཟང་རྣམ་ཐར་གངས་ཀྱི་རི་བོ་ལ།།
རང་ཤེད་ཐལ་བྲིས་སྐྱོན་རིགས་ཉེས་ཀུན་ཚོགས། །
སྙིང་ནས་བཤགས་ཤིང་འབད་ལས་བསོད་ནམས་ཚོགས།
རྒྱལ་བསྟན་ཡུན་གནས་འགྲོ་ཀུན་བདེ་བར་ཤོག།