དབྱ༵ངས་ཅ༵ན་ངག་གི་དཔལ་ལ་དབང་འབྱོར་ཞིང་། ། གྲུ༵བ་པ༵འི་རྒྱལ་མཚན་འདེགས་ལ་ཟླ་དང་བྲལ། །
རྡོ༵་རྗེ༵འི་མཚན་གྱི་སྙན་པ་སྲིད་ན་འབར། །བརྡ་སྤྲོད་སྨྲ་བའི་ཉི་མ་གང་དེར་འདུད། །
གངས་ཅན་བརྡ་སྤྲོད་གཞུང་ལུགས་སྣ་ཚོགས་ལས། །ཁྱད་འཕགས་བསྟན་བཅོས་ཉི་ཟླ་ཟུང་འབྲེལ་ཏེ། །
ལེགས་བཤད་ལྗོན་དབང་དཀའ་གསལ་མེ་ལོང་གཉིས། །བརྩམས་པའི་ལོ་ཚིགས་ཇི་བཞིན་བརྗོད་པར་བྱ། །
ནང་དོན་གནད་བསྡུས།
དཔྱད་རྩོམ་འདིར་ལེགས་བཤད་ལྗོན་དབང་(༡༩༠༡)དང་དཀའ་གནད་གསལ་བའི་མེ་ལོང་(༡༩༠༣)ལ་བརྩམས་ཞེས་པའི་གཏམ་དེ་ནི་ཐོག་མར་ཚ་སྤྲུལ་སུམ་རྟགས་ལས་གསུངས་ཤིང་དེ་རྗེས་མ་དག་རྒྱུན་འབྱམས་སུ་གྱུར་བ་དང་། དེ་ནི་བསྟན་བཅོས་དེ་གཉིས་རྩོམ་པ་པོའི་འདས་ལོ་(༡༨༨༧)ལོར་ཡིན་པ་དང་འགལ་ཞིང་། དབྱངས་ཅན་གྲུབ་པའི་རྡོ་རྗེའི་འཁྲུངས་འདས་(༡༨༠༩—༡༨༨༧)ལ་ཡིན་པར་ཡོངས་སུ་གྲགས་པ་ལྟར་དོན་ལ་གནས་པ་ཡིན་པའི་སྒྲུབ་བྱེད་ཀྱི་ལུང་རིགས་བཀོད་དེ། ཚ་སྤྲུལ་སོགས་ཀྱི་གསུང་ཚུལ་དེ་མི་འཐད་པའི་ཚུལ་དང་། རང་ལུགས་ལ་བསྟན་བཅོས་དེ་གཉིས་སྤྱི་ལོ་(༡༨༤༤)ལོར་བརྩམས་པར་འདོད་པའི་རྒྱུ་མཚན་དང་བཅས་པ་བཤད་ཡོད།
བརྡ་ཆད་གཙོ་བོ། ལེགས་བཤད་ལྗོན་དབང་། དཀའ་གནད་གསལ་བའི་མེ་ལོང་། བརྩམས་པའི་ལོ་ཚིགས། རྩོམ་པ་པོའི་འཁྲུངས་འདས།
སྔོན་འགྲོའི་གཏམ།
ཁོ་བོས་ལོ་ངོ་ལྔ་ཙམ་གྱི་གོང་རོལ་དུ་ལེགས་བཤད་ལྗོན་དབང་དང་དཀའ་གནད་གསལ་བའི་མེ་ལོང་གཉིས་ནམ་ཞིག་ལ་མཛད་མིན་གྱི་སྐོར་ལ་རྩོམ་ཞིག་བྲིས་ཡོད་ཅིང་། དེའི་ནང་གཙོ་བོ་དབྱངས་ཅན་གྲུབ་པའི་རྡོ་རྗེ་སྐུ་མྱ་ངན་ལས་འདས་པའི་ལོ་ཚིགས་སྤྱི་ལོ་(༡༨༨༧)ལོར་ཡིན་པར་ཡོངས་སུ་གྲགས་པ་ལྟར་དོན་ལ་གནས་པ་ཡིན་ཚུལ་བཤད་དེ་ལེགས་ལྗོན་(༡༩༠༡)དང་དཀའ་གནད་གསལ་བའི་མེ་ལོང་(༡༩༠༣)ལ་བརྩམས་ཟེར་བ་ནི་ནོར་འཁྲུལ་ཡིན་པ་དང་། བསྟན་བཅོས་དེ་གཉིས་ཕལ་ཆེར་(༡༨༤༤) ལོར་བརྩམས་པ་མིན་ནམ་ཞེས་བཤད་པ་ལྟར། རྩ་བའི་ལྟ་ཚུལ་དེ་ད་ལྟ་ཡང་འགྲིག་འདུག་སྙམ་མོད། རང་ཉིད་ཐོས་རྒྱ་ཞན་པའི་དབང་གིས་རྩོམ་དེའི་ནང་དཔྱད་པ་ཞིབ་ཚགས་མ་བྱུང་བའི་སྐྱོན་མང་པོ་ཡོད་ལ་རྩོམ་དེ་དེ་སྔོན་ལུག་ཚང་དཔལ་ཡོན་ཞེས་པའི་འཕྲིན་སྟེགས་ཏུ་བཀོད་མོད་ད་ལྟ་ཀུན་གྱི་མཐོང་ལམ་ནས་ཡལ་ཟིན་འདུག དེར་མ་ཟད་ཕྱིས་སུ་བདག་གི་དགེ་བའི་བཤེས་གཉེན་བློ་བཟང་བསྟན་དར་ལགས་ནས་གསང་སྔགས་རྡོ་རྗེའི་ཤེས་རམས་པའི་སློབ་གནས་དཔྱད་རྩོམ་ལེགས་བཤད་ལྗོན་དབང་གི་བྱུང་འཕེལ་དང་ཁྱད་ཆོས་ལ་དཔྱད་པ་ཞེས་པའི་འཕྲུལ་དེབ་ཞིག་མཁོ་སྤྲོད་གནང་བ་དེ་ལས་བློ་བསྐྱེད་གསར་པ་མང་པོ་བྱུང་ལ། ཁོང་གི་དཔྱད་རྩོམ་དེ་སྤྱི་ལོ་(༢༠༡༨)ལོར་བྲིས་འདུག་པས་ལེགས་བཤད་ལྗོན་དབང་དང་དཀའ་གནད་གསལ་བའི་མེ་ལོང་གཉིས་ནམ་ཞིག་ལ་མཛད་མིན་གྱི་སྐོར་ལ་རྩོམ་འབྲི་མཁན་ཐོག་མ་དེ་རང་ཉིད་ཡིན་སྙམ་པའི་མངོན་པའི་ང་རྒྱལ་དེ་ཡང་དམིགས་མེད་དུ་བྱས་སོང་བས། འདིར་གནད་དོན་འདིའི་སྐོར་ལ་བསྐྱར་ཞིབ་བྱས་ཏེ་ཞིབ་ཚགས་ཞིག་བརྗོད་པར་འདོད་ནས་སླར་ཡང་རྩོམ་འདི་བྲིས་པ་ཡིན།
བརྗོད་བྱ་དངོས་བཤད་པ།
དང་པོ། ལེགས་ལྗོན་(༡༩༠༡)དང་དཀའ་གནད་གསལ་བའི་མེ་ལོང་(༡༩༠༣)ལ་བརྩམས་ཟེར་བའི་མ་དག་རྒྱུན་འབྱམས་གྱི་གཏམ་བྱུང་ཚུལ་བཤད་པ།
དེ་ཡང་ཚ་སྤྲུལ་ངག་དབང་བློ་བཟང་(༡༨༨༠—༡༩༥༧)མཆོག་གིས་མེ་སྤྲེལ་ཞེས་པ་(༡༩༥༦)ལོར་བརྩམས་གནང་བའི་སུམ་ཅུ་པའི་སྙིང་པོ་ལེགས་བཤད་ལྗོན་དབང་གི་འགྲེལ་བཤད་(༡)ལས། སྤྱི་ལོ་(༡༩༠༡)ལོར་ལེགས་བཤད་ལྗོན་དབང་བརྩམས་ནས་བོད་རབ་བྱུང་བཅུ་དྲུག་པའི་མེ་སྤྲེལ་ལོའི་བར་ལོ་(༥༥)དང་། སྤྱི་ལོ་(༡༩༠༣)ལོར་དཀའ་གནད་གསལ་བའི་མེ་ལོང་བརྩམས་ནས་བོད་མེ་སྤྲེལ་ལོའི་བར་ལོ་(༥༣)ཙམ་ཞིག་ཕྱིན་ཡོད་པ་རེད། ཅེས་གསུངས་ཤིང་། གཏམ་དེ་མ་དག་རྒྱུན་འབྱམས་སུ་གྱུར་ནས་ཕྱིས་སུ་མཁས་བླུན་ཀུན་ལ་གྲགས་པར་མངོན་ཏེ། ཐོན་མིའི་ཞལ་ལུང་(༢)ལས། དངུལ་ཆུའི་དབོན་པོ་དབྱངས་ཅན་གྲུབ་རྡོ་རྗེས་མཛད་པའི་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོ་དང་། རྟགས་འཇུག་གི་དཀའ་གནད་གསལ་བའི་མེ་ལོང་། (སྔ་མ་༡༩༠༡་ལོ་དང་། ཕྱི་མ་༡༩༠༣ལོར་བརྩམས།)ཞེས་དང་། བརྡ་སྤྲོད་དཔྱིད་ཀྱི་གྲུ་ཆར་(༣)ལས། བརྡ་སྤྲོད་པའི་བསྟན་བཅོས་དེ་གཉིས་ཀྱི་རྩོམ་པ་པོ་ནི་དངུལ་ཆུའི་བླ་ཐོག་བར་པ་དབྱངས་ཅན་གྲུབ་པའི་རྡོ་རྗེ་ཡིན་ཞིང་། ཁོང་གིས་གཙང་གཡས་རུ་བཞད་ཀྱི་བྱེ་བྲག་དངུལ་ཆུའི་རི་ཁྲོད་དུ་བརྩམས་གནང་བ་དང་། བརྩམས་པའི་དུས་ཚོད་ནི་ཡོངས་གྲགས་སུ་སྤྱི་ལོ་(༡༩༠༡)ལོར་ལེགས་བཤད་ལྗོན་དབང་དང་། སྤྱི་ལོ་(༡༩༠༣)ལོར་དཀའ་གནད་གསལ་བའི་མེ་ལོང་བརྩམས་ཞེས་གྲགས་མོད། འོན་ཀྱང་དངུལ་ཆུ་དབྱངས་ཅན་གྲུབ་པའི་རྡོ་རྗེའི་རྣམ་ཐར་ཁག་གི་ནང་གཅིག་མཐུན་དུ་ཁོང་སྤྱི་ལོ་(༡༨༨༧)ལོ་ལ་གཤེགས་ཞེས་འཁོད་འདུག་པས་དེ་གཉིས་དབར་འགལ་བ་ཆེན་པོ་འདུག་པས་དཔྱད་པར་འཚལ་ལོ་ཞེས་དང་། བརྡ་སྤྲོད་བློ་གསར་ཉེར་མཁོ་(༤)ལས། དངུལ་ཆུའི་དབོན་པོ་དབྱངས་ཅན་གྲུབ་པའི་རྡོ་རྗེས་སྔ་མ་སྤྱི་ལོ་(༡༩༠༡)དང་ཕྱི་མ་སྤྱི་ལོ་(༡༩༠༣)ལོར་བརྩམས་པར་གྲགས་སོ། (བརྩམས་ལོ་དེ་གཉིས་རྣམ་ཐར་དང་བསྡུར་ན་མི་མཐུན་པར་མངོན།）ཞེས་གསུངས་པ་ལྟ་བུའོ། །
འོ་ན། ཚ་སྤྲུལ་མཆོག་གིས་དེ་ལྟར་གསུངས་དགོས་པའི་འཁྲུལ་གཞི་གང་ཡིན་ཞེ་ན། དེ་ནི་ཇི་བཞིན་བརྗོད་པར་ཤིན་ཏུ་དཀའ་མོད། དེའི་རྒྱུ་མཚན་གྱི་ཆ་ཤས་ལྟ་བུ་ཞིག་ནི། རྟགས་འཇུག་དཀའ་གནད་སྙིང་པོ་རབ་གསལ་གྱི་འགྲེལ་པ་མཐའ་དཔྱོད་དྭངས་ཤེལ་མེ་ལོང་(༥)ལས། དེ་རྗེས་རབ་བྱུང་བཅོ་ལྔ་པའི་ནང་དུ་འཇམ་མགོན་དབྱངས་ཅན་གྲུབ་པའི་རྡོ་རྗེས་ལེགས་བཤད་ལྗོན་དབང་དང་། དཀའ་གནད་གསལ་སྒྲོན་མཛད་ཅེས་གསུངས་པ་དེ་ཡིན་ཆོག་སྙམ། ཡིན་ན་ཡང་དེ་ཙམ་ཁུངས་སུ་བྱས་ནས་དེ་ལྟར་བཤད་པ་མ་ཡིན་ཏེ། དཀར་ལེབས་ཀྱི་གསུང་དེའི་དངོས་ཤུགས་གང་ལ་ཡང་ལེགས་ལྗོན་(༡༩༠༡)དང་དཀའ་གནད་གསལ་བའི་མེ་ལོང་(༡༩༠༣)བརྩམས་པར་མ་གསུངས་པའི་ཕྱིར།
གཉིས་པ། དབྱངས་ཅན་གྲུབ་པའི་རྡོ་རྗེའི་འཁྲུངས་འདས་ཀྱི་ལོ་ཚིགས་ཡོངས་གྲགས་བཤད་ཚུལ་ལྟར་དོན་ལ་གནས་པར་གཏན་ལ་ཕབ་ཏེ་ཚ་སྤྲུལ་སོགས་ཀྱི་གསུང་ཚུལ་དེ་མི་འཐད་པར་བཤད་པ།
དགེ་ལྡན་བསྟན་པའི་ཉི་འོད་(༦)ལས། དེ་ནས་རྗེ་བཙུན་བླ་མ་རྡོ་རྗེ་འཆང་ཆེན་པོ་དགུང་གྲངས་བདུན་ཅུ་དོན་དགུར་ཕེབས་པ་ཐམས་ཅད་འདུལ་མེ་ཕག་ཟླ་བ་བཅུ་གཅིག་པའི་ཚེས་བཅུ་དྲུག་གི་ཉི་ཤར་ཁར་ལྗགས་དབུགས་ཀྱི་རྒྱུ་བ་ཅུང་ཟད་བྲེལ་བ་ཙམ་ཡང་མེད་པར་བདེ་བར་བསྡུས་ཏེ་སྟོང་པ་གསུམ་རིམ་གྱིས་ཐིམས་པས་མཐར་ཐམས་ཅད་སྟོང་པ་འོད་གསལ་ཆོས་ཀྱི་སྐུར་མངོན་པར་བྱང་ཆུབ་པའི་ཚུལ་བསྟན་ཏོ། ཞེས་གསུངས་པས་དབྱངས་ཅན་གྲུབ་པའི་རྡོ་རྗེ་མེ་ཕག་ལོར་སྐུ་འདས་པ་གསལ་པོ་རེད་ལ། གལ་ཏེ་ལེགས་ལྗོན་(༡༩༠༡)དང་དཀའ་གནད་གསལ་བའི་མེ་ལོང་(༡༩༠༣)ལ་བརྩམས་པ་ཡིན་ན་ཁོང་ཉིད་དུས་རབས་ཉི་ཤུ་པ་སྟེ་སྤྱི་ལོ་ཆིག་སྟོང་དགུ་བརྒྱའི་ནང་གི་མེ་ཕག་ལོར་སྐུ་འདས་དགོས་ལ། དེ་ལྟ་ན། སྤྱི་ལོ་(༡༩༤༧)ལོར་སྐུ་འདས་དགོས་ཏེ། དུས་རབས་ཉི་ཤུ་པའི་ནང་མེ་ཕག་དེ་ཁོ་ན་ལས་མེད་པའི་ཕྱིར། དེ་ལྟ་ན་འཁྲུངས་ལོ་(༡༨༦༩)ལ་ཡིན་དགོས། དེ་ལྟ་ན། ཁོང་གིས་རྗེ་བཙུན་དྷརྨ་བྷ་དྲའི་ཞལ་ཙམ་ཡང་མཇལ་མ་མྱོང་བར་ཐལ་ཏེ། རྗེ་བཙུན་དྷརྨ་བྷ་དྲ་ལྕགས་ཕག་ལོར་འདས་པ་ཁོང་ཉིད་ཀྱི་རྣམ་ཐར་ཞྭ་སེར་བསྟན་པའི་མཛེས་རྒྱན་(༧)ལས་གསུངས་ཤིང་། དེ་འདྲའི་ལྕགས་ཕག་དེ་(༡༨༥༡)ལོར་ཡིན་པ་དུང་དཀར་ཚིག་མཛོད་(༨)ལས་གསུངས་པ་ལྟར་རྩོད་མེད་ཡོངས་གྲགས་ཡིན་པའི་ཕྱིར།
གཞན་ཡང་། དབྱངས་ཅན་གྲུབ་པའི་རྡོ་རྗེའི་འཁྲུངས་འདས་(༡༨༠༩—༡༨༨༧)ལ་ཡིན་པར་ཁས་བླངས་ན། ཁོང་ཉིད་དགུང་གྲངས་རེ་བདུན་དུ་ཕེབས་པའི་ཤིང་ཕག་ལོ་སྟེ། སྤྱི་ལོ་(༡༨༧༥)ལོར་རྒྱལ་བ་སྐུ་ཕྲེང་བཅུ་གཉིས་པ་འཕྲིན་ལས་རྒྱ་མཚོ་སྐུ་མྱ་ངན་འདས་པ་དང་། ཁོང་ཉིད་གུང་གྲངས་དོན་བཞིར་ཕེབས་པའི་སྣ་ཚོགས་ཆུ་རྟ་ལོ་སྟེ། སྤྱི་ལོ་(༡༨༨༢)ལོར་པཎ་ཆེན་སྐུ་ཕྲེང་བརྒྱད་པ་བསྟན་པའི་དབང་ཕྱུག་མཆོག་སྐུ་མྱ་ངན་འདས་པར་ཁས་བླངས་ཆོག་ལ་དེ་ནི་དགེ་ལྡན་བསྟན་པའི་ཉི་འོད་(༩)ལས། རྗེ་བླ་མ་མཆོག་དགུང་གྲངས་རེ་བདུན་དུ་ཕེབས་པ་ན་ཚོད་ལྡན་ཤིང་ཕག་ཞེས་པ་ནས། ཟླ་བ་གསུམ་པའི་ནང་གོང་ས་སྐྱབས་མགོན་རྒྱལ་དབང་འཕྲིན་ལས་རྒྱ་མཚོ་དཔལ་བཟང་པོ་དགོངས་པ་ཞི་དབྱིངས་སུ་མནལ་བའི་དགོངས་རྫོགས་སུ་དངུལ་རི་དང་། པད་ཆོས་སུ་ཇ་ཐུག་དྲུག་རེ་དང་བརྒྱ་མཆོད་སྣ་ལྔ་བཅས་གནང་ཞེས་དང་། དེ་ཉིད་(༡༠)ལས། རྗེ་བླ་མ་མཆོག་དགུང་གྲངས་དོན་བཞིར་ཕེབས་པ་སྣ་ཚོགས་ཆུ་རྟ་ཟླ་བ་དང་པོའི་ཚེས་བདུན་ཞེས་པ་ནས། ཟླ་བདུན་པའི་ཚེས་བཅོ་ལྔའི་ཉིན་སྐྱབས་མགོན་པཎ་ཆེན་རིན་པོ་ཆེ་དེ་ཉིད་དགོངས་པ་ཞི་དབྱིངས་སུ་མནལ་བར་རྗེ་བླ་མ་མཆོག་ཀྱང་ཐུགས་གཡེང་ཆེ་བ་བཅས་དགོངས་རྫོགས་སུ་དམིགས་དངུལ་རིར་མང་ཇ་གཅིག་འགྱེད་ཊམ་ཕྱེད་རེ། རྒྱལ་སྲས་ལྷ་ཁང་དུ་བརྒྱ་མཆོད་སྣ་ལྔ་པད་ཆོས་སུ་བརྒྱ་མཆོད་སྣ་ལྔ་མང་ཇ་གཅིག་འགྱེད་ཊམ་ཕྱེད་རེ་སྩལ། ཞེས་གསུངས་པ་དང་ཡོངས་སུ་མཐུན་པ་ཡིན་ལ་དེ་ལས་ལྡོག་ཏེ་ཁས་བླངས་ན་ལོ་དེར་དགོངས་རྫོགས་མཆོད་འབུལ་མཛད་ཅེས་དམིགས་སུ་བཀར་ནས་གསལ་ཁ་མཛད་པ་ལ་དགོས་པ་མེད་པར་ཐལ་ལོ། །
གཞན་ཡང་། དབྱངས་ཅན་གྲུབ་པའི་རྡོ་རྗེའི་འཁྲུངས་འདས་(༡༨༠༩—༡༨༨༧)ལ་ཡིན་པར་ཁས་བླངས་ན། ཁོང་ཉིད་དགུང་གྲངས་ང་བཞིར་ཕེབས་པའི་སྐབས་སུ་གཟིམ་ཤག་བཤད་སྒྲའི་མི་དབང་བཀའ་གུང་ཆེན་པོ་སྲིད་སྐྱོང་གི་ཁྲིར་ཕེབས་པ་ལ་ལེགས་འབུལ་མཎྜལ་རྟེན་གསུམ་སོགས་ཟབ་པ་འབུལ་གནང་མཛད་ཅེས་གསུངས་(༡༡)པ་དང་ལོ་ཚིགས་ཡོངས་སུ་མཐུན་ལ་དེ་ལས་ལྡོག་ཏེ་བཤད་ཐབས་གཏན་ནས་མེད་དོ། །
གཟིམ་ཤག་བཤད་སྒྲའི་མི་དབང་བཀའ་གུང་ཆེན་པོ་ཞེས་པ་ནི་བཤད་སྒྲ་དབང་ཕྱུག་རྒྱལ་པོ་སྟེ་ཁོང་གིས་སྡེ་སྲིད་ལོ་གསུམ་གནང་ཞིང་། དུང་དཀར་ཚིག་མཛོད་(༡༢)དང་སྨོན་ལམ་ཚིག་མཛོད་ལྟར་ན་(༡༨༦༢)ལོ་ནས་སྡེ་སྲིད་མཛད་པར་འདོད་ཅིང་། བོད་ཀྱི་ཉེ་རབས་སྒེར་པའི་ལོ་རྒྱུས་(༡༣)ལས་(༡༨༦༡)ལོར་སྡེ་སྲིད་མཛད་ཅེས་ཟེར་རོ། །
དེས་ན་ལེགས་ལྗོན་(༡༩༠༡)དང་དཀའ་གནད་གསལ་བའི་མེ་ལོང་(༡༩༠༣)ལ་བརྩམས་ཟེར་བ་ནི་དོན་ལ་མི་གནས་པའི་གཏམ་འབའ་ཞིག་ཡིན་ཏེ། དབྱངས་ཅན་གྲུབ་པའི་རྡོ་རྗེའི་འཁྲུངས་འདས་(༡༨༠༩—༡༨༨༧)ལ་ཡིན་པར་གཏན་ལ་ཕབ་ཟིན་པ་ལྟར་ཡིན་པའི་ཕྱིར།
གསུམ་པ། ལེགས་བཤད་ལྗོན་དབང་དང་དཀའ་གནད་གསལ་བའི་མེ་ལོང་གཉིས་བརྩམས་པའི་ལོ་ཚིགས་དངོས་བཤད་པ།
གོང་དུ་ལུང་དྲངས་ཟིན་པ་ལྟར་དཀར་ལེབས་དྲུང་ཡིག་པདྨ་རྡོ་རྗེའི་གསུང་ལས་ལེགས་བཤད་ལྗོན་དབང་དང་དཀའ་གནད་གསལ་བའི་མེ་ལོང་གཉིས་རབ་བྱུང་བཅོ་ལྔ་པའི་ནང་བརྩམས་པར་གསུངས་མོད། དེ་ནི་ཡིད་ཆེས་པའི་གནས་མ་ཡིན་ཏེ། ཁོང་གི་གསུང་ནང་སི་ཏུའི་ཞལ་ལུང་མཛད་དུས་ལ་རབ་བྱུང་གཅིག་གི་ནོར་འཁྲུལ་བྱུང་ཡོད་པ་བཞིན་ལེགས་བཤད་ལྗོན་དབང་དང་དཀའ་གནད་གསལ་བའི་མེ་ལོང་གཉིས་མཛད་དུས་ལ་ཡང་རབ་བྱུང་གཅིག་ཙམ་གྱི་ནོར་འཁྲུལ་ཡོད་ཆོག་ཆོག་ཡིན་པའི་ཕྱིར། དེ་ཡང་ཡིན་ཏེ། ཁོང་གི་གསུང་དེ་ཉིད་(༡༤)ལས། དེ་རྗེས་རབ་བྱུང་བཅུ་བཞི་པའི་ལྕགས་རྟ་ལོ་རྡོ་རིང་པཎྜི་ཏས་ཞ་ལུ་ལོ་ཆེན་གྱི་བཤད་ཁྲིད་རྗེས་འབྲངས་སུ་འགྲེལ་བ་ཨུཏྤ་ལའི་རྣ་རྒྱན་མཛད། རབ་བྱུང་དེའི་མེ་སྟག་ལོ་རྗེ་བཙུན་བླ་མ་དངུལ་ཆུ་དྷརྨ་བྷ་དྲས་འགྲེལ་པ་སི་ཏུའི་ཞལ་ལུང་མཛད། ཅེས་གསུངས་ལ། རབ་བྱུང་བཅུ་བཞི་པའི་མེ་སྟག་ལོ་ནི། སྤྱི་ལོ་(༡༨༦༦)ལོར་ཡིན་པས། དེ་ནི་དངུལ་ཆུ་དྷརྨ་བྷ་དྲ་(༡༨༥༡)ལོར་སྐུ་འདས་པ་དང་ཡོངས་སུ་འགལ་བའི་ཕྱིར། དེས་ན་སི་ཏུའི་ཞལ་ལུང་མཛད་དུས་ནི། རྩོམ་པ་པོ་དགུང་ལོ་སོ་ལྔར་ཕེབས་པའི་ལོར་ཡིན་པ་བསྟན་བཅོས་དེ་རང་གི་མཇུག་བྱང་(༡༥)དུ་གསལ་བ་ལྟར་སྟེ། རབ་བྱུང་བཅུ་གསུམ་པའི་མེ་སྟག་(༡༨༠༦)ལོར་ཡིན་པས། དཀར་ལེབས་དྲུང་ཡིག་པདྨ་རྡོ་རྗེའི་གསུང་དེར་རབ་བྱུང་གཅིག་གི་ནོར་འཁྲུལ་ཡོད་དོ། །
གཞན་ཡང་། བསྟན་བཅོས་དེ་གཉིས་རབ་བྱུང་བཅོ་ལྔ་པའི་ནང་མཛད་པ་ཡིན་ན། རྩོམ་པ་པོ་དགུང་ལོ་ལྔ་བཅུ་ང་དགུར་ཕེབས་པའི་རྗེས་སུ་རྩོམ་དགོས་པ་ཡིན་ཏེ། ཁོང་ཉིད་དགུང་གྲངས་ལྔ་བཅུ་ང་དགུར་ཕེབས་པའི་མེ་ཡོས་ལོ་སྟེ། སྤྱི་ལོ་(༡༨༦༧)ལོར་གཞི་ནས་རབ་བྱུང་བཅོ་ལྔ་པ་དབུ་ཚུགས་པས་སོ། ཡིན་ན་ཡང་། དགུང་གྲངས་ལྔ་བཅུ་ང་དགུ་ནས་སྐུ་མ་འདས་པའི་བར་གྱི་རྣམ་ཐར་རྣམས་སུ་དེ་གཉིས་བརྩམས་ཚུལ་ཟུར་ཙམ་ཡང་མེད་པས་དཀར་ལེབས་ཀྱི་གསུང་དེ་མི་འཐད་དོ། །
འོ་ན། བསྟན་བཅོས་དེ་གཉིས་ནམ་ཞིག་ལ་བརྩམས་པར་འདོད་དམ་ཞེ་ན། དབྱངས་ཅན་གྲུབ་པའི་རྡོ་རྗེ་ཉིད་དགུང་གྲངས་སོ་དྲུག་ཏུ་ཕེབས་པ་ཁྲོ་མོ་ཤིང་འབྲུག་སྤྱི་ལོ་(༡༨༤༤)ལོར་བརྩམས་པར་འདོད་དོ། དེའི་རྒྱུ་མཚན་ཡང་། གཅིག དགེ་ལྡན་བསྟན་པའི་ཉི་འོད་(༡༦)ལས། བདག་ཉིད་སྔར་ཕན་དགེ་འཕེལ་གྱི་ལས་ཚན་བབས་ལྕི་བ་དང་། ཁྱད་པར་དོན་གཉེར་གྱི་དབུལ་བས་དགེ་འཕེལ་རང་གི་འདོན་ཆོས་དང་ཐིག་མཚོན་སོགས་ཆོ་ག་ཕྱག་ལེན་བློ་ཡུལ་དུ་ངེས་པ་ཙམ་ལས་རིག་གནས་སོགས་ལ་སྦྱངས་པ་ཆེར་བྱ་རྒྱུ་མ་བྱུང་ཞེས་གསུངས་པ་ལྟར། དགུང་ལོ་ཉེར་དགུའི་བར་དུ་ཐུགས་གཉེར་རྒྱ་ཆེར་མཛད་པའི་གོ་སྐབས་ཐོབ་མེད་པས། དེའི་སྔ་རོལ་དུ་བསྟན་བཅོས་དེ་གཉིས་བརྩམས་གནང་བ་མིན་ངེས་རེད། གཉིས། དེ་ཉིད་(༡༧)ལས། རང་ལོ་སོ་བཞི་པ་དགེ་བྱེད་ཆུ་སྟག་ཟླ་བ་གཉིས་པའི་ནང་གོང་གསལ་སྒྲ་དབྱངས་ཅན་མར་ལེའུ་སུམ་ཅུ་རྩ་གཉིས་ཡོད་པ་ནས་ལེའུ་སོ་གཉིས་པ་མིང་ལས་ཚིག་ཏུ་སྒྲུབ་པ་ཀྲྀཏ྄་མ་གཏོགས་པའི་རི་མོ་དངོས་ཤུགས་ཀྱིས་བསྟན་པ་ཚང་མ་བློ་ཐོག་ནས་སྒྲ་དག་བགྲོད་གཙང་ཐག་ཐོགས་མེད་པ་རྒྱུགས་འབུལ་ཞུས་པས་ཟླ་བ་དེའི་ཚེས་ཉེར་གཉིས་ཉིན་སྐྱབས་མགོན་མཆོག་ནས་སྤྱིར་སྒྲ་འདི་ཉམས་ཚབ་ཆེ་ཞིང་། ཁྱད་པར་དབྱངས་ཅན་སྒྲ་མདོའི་ཀུན་བཤད་ཡོངས་རྫོགས་ལ་རི་མོ་མཐར་ཕྱིན་སོང་བ་ཤིན་ཏུ་དཀོན་ལ། དེང་སྐབས་ཁྱོད་ནས་ཀྲྀཏ྄་མ་གཏོགས་པའི་ལེའུ་སོ་གཅིག་གི་རི་མོ་མཐར་ཕྱིན་སོང་བ་བློ་ཐོག་ནས་རྒྱུགས་འབུལ་བྱུང་བའི་ལེགས་སོ་ཡིན་ཞེས་ལྷ་རྫས་ནང་མཛོད་དྲི་བྲལ་སྲིད་དུ་རིང་བ་མགུལ་པར་སྩལ་ཏེ་ཀུན་བཤད་ཀྱི་མིང་དབྱངས་ཅན་གྲུབ་པའི་རྡོ་རྗེ་ཞེས་འདོགས་པར་མཛད་ཅེས་གསུངས་པ་ལྟར། རྩོམ་པ་པོ་དགུང་ལོ་སོ་བཞིར་ཕེབས་པའི་ཆུ་སྟག་ཟླ་བ་གཉིས་པའི་ཚེས་ཉེར་གཉིས་ཉིན་དབྱངས་ཅན་གྲུབ་པའི་རྡོ་རྗེ་ཞེས་པའི་མཚན་དེ་ཐོགས་པར་སྣང་ལ། ལེགས་བཤད་ལྗོན་དབང་དང་དཀའ་གནད་གསལ་བའི་མེ་ལོང་གཉིས་ཀྱི་མཇུག་བྱང་དུ་མཚན་དེ་བེད་སྤྱོད་གནང་ཡོད་པས་བསྟན་བཅོས་དེ་གཉིས་དགུང་ལོ་སོ་བཞིར་ཕེབས་པའི་རྗེས་སུ་བརྩམས་པར་ཁས་ལེན་ཆོག་གོ་ ཡིན་ན་ཡང་། དེ་ལ་དོགས་པ་ཅུང་ཟད་ཞིག་བྱུང་སྲིད་དེ། རྣམ་ཐར་དེ་ཉིད་ལས་དགུང་ལོ་སོ་གཉིས་ཀྱི་སྐབས་སུ་གསུང་མགུར་གཉིས་མཛད་ཚུལ་གསུངས་ཡོད་ཅིང་། གསུང་མགུར་དེ་གཉིས་ཀྱི་ནང་དུ་དབྱངས་ཅན་གྲུབ་པའི་རྡོ་རྗེ་ཞེས་པའི་མཚན་དེ་ཐོན་(༡༨ )ཡོད་པས། དེ་དང་དགུང་ལོ་སོ་བཞིར་མཚན་དེ་ཐོགས་པར་གསུངས་པ་གཉིས་ལ་ནང་འགལ་ཕྲན་བུ་ཞིག་ཡོད་པས་སོ། ཁོ་བོའི་འདོད་ཚུལ་ལྟར་ན། མཚན་དེ་ཐོགས་པའི་ཚེས་གྲངས་དང་བཅས་པ་ཤིན་ཏུ་གསལ་པོ་འདུག་པས་དགུང་ལོ་སོ་བཞིར་མཚན་དེ་ཐོགས་པར་གསུངས་པ་ནོར་བ་མ་ཡིན་གྱི་གསུང་མགུར་གསུངས་པའི་དུས་ཚོད་དེ་ནོར་བའམ། ཡང་ན། དགུང་ལོ་སོ་གཉིས་ཀྱི་སྐབས་སུ་གསུང་མགུར་དེ་གཉིས་གསུངས་དུས་དབྱངས་ཅན་གྲུབ་པའི་རྡོ་རྗེ་ཞེས་པའི་མཚན་བེད་སྤྱོད་གནང་མེད་མོད། ཕྱིས་སུ་དགུང་ལོ་དོན་དགུར་ཕེབས་པའི་སྐབས་ཏེ། དགུང་གྲངས་ཞེ་བཞི་ཡན་གྱི་རང་རྣམ་རྩོམ་པའི་སྐབས་སུ་གསུང་མགུར་དེ་གཉིས་ནང་དུ་འཁོད་པའི་མཚན་ལ་འགྱུར་བ་ཕྱིན་པ་ཡང་ཡིན་སྲིད་དོ། གསུམ། རྒྱུ་མཚན་གཙོ་བོ་ནི། དགེ་ལྡན་བསྟན་པའི་ཉི་འོད་(༡༩)ལས། རང་ལོ་སོ་དྲུག་པ་ཁྲོ་མོ་ཤིང་འབྲུག་ཞེས་པ་ནས་འདི་དག་གི་སེང་བར་གང་བྱུང་ལ་བཏང་སྙོམས་སུ་མ་བསྡད་པར་སྐར་རྩིས་ཀྱི་མཇུག་སྐྱོང་དང་། ཀེག་རྩིས། མཐུན་སྦྱོར་རྩིས། ནད་རྩིས། གཤིན་རྩིས། གཏན་གྱི་རྩིས་སོགས་ནག་རྩིས་སྐོར་དང་། ཚེ་རྩིས་དུས་སྦྱོར་དུམ་ལྔ་སོགས་དབྱངས་འཆར་གྱི་སྐོར་རྣམས་ཀྱང་འགྲོ་ཕྱོགས་ཤེས་ཙམ་སྦྱོང་ཁུལ་དང་། ཁྱད་པར་སྒྲ་དབྱངས་ཅན་མའི་འཕྲོས་ལེའུ་རྗེས་མ་མིང་ལས་ཚིག་ཏུ་སྒྲུབ་པ་ཀྲྀཏ྄འི་ལེའུ་ཡང་རི་མོ་ཆེ་ཕྲ་བློ་ཐོག་ནས་བྱེད་ནུས་པའི་བར་སྦྱངས། དེ་མཚུངས་ཡུལ་གངས་ཅན་གྱི་བརྡ་སྤྲོད་པ་ཀུན་གྱི་རྩ་བ་དང་ཕྱི་མོར་གྱུར་བ་མཁས་མཆོག་ཐོན་མི་སམྦྷོ་ཊའི་ལེགས་བཤད་སུམ་ཅུ་པ་དང་རྟགས་ཀྱི་འཇུག་པའི་སྐོར་དང་། རྒྱ་བོད་ཀྱི་དོན་གཅིག་ལ་མིང་གི་རྣམ་གྲངས་མང་དུ་ཡོད་པ་དང་མིང་གཅིག་དོན་གྱི་རྣམ་གྲངས་མང་པོར་འཇུག་པ་མངོན་བརྗོད་ཀྱི་སྐོར། རིན་ཆེན་འབྱུང་གནས་ཞི་བས་མཛད་པའི་ཁྱད་ཆོས་ཆེན་པོ་བརྒྱད་ཀྱིས་གཞན་ལས་ཁྱད་པར་དུ་འཕགས་བའི་སྡེབ་སྦྱོར་ངོ་མཚར་རྟོགས་བྱེད་ཀྱི་རི་མོའི་རྣམ་གྲངས་བཅས་པ་རྣམས་ཐོབ་གྲངས་ཙམ་མ་ཡིན་པར་དཔྱིས་ཕྱིན་པར་སྦྱངས་ཤིང་། དེ་དག་གི་རྒྱ་བོད་ཀྱི་རྩ་འགྲེལ་མང་པོར་ཉིན་མཚན་འཁོར་མར་རང་བློས་གང་དཔོག་དཔྱད་པས་ཡང་དག་དང་ལྟར་སྣང་གི་དབྱེ་བ་ཕྲན་བུ་ཤེས་རྩིས་ཀྱིས་གསར་པའི་ལེགས་བཤད་ཡིན་ཁུལ་ཡང་ཕྲན་བུ་བྱས། ཞེས་གསུངས་པ་འདིའོ། དེ་ཡང་ཡིན་ཏེ། ལྗོན་དབང་དང་དེའི་རང་འགྲེལ། དཀའ་གནད་གསལ་བའི་མེ་ལོང་དང་བཅས་པའི་མཇུག་བྱང་དང་། རྣམ་ཐར་ཆེན་མོའི་གོང་འོག་གཞན་གང་དུ་ཡང་བསྟན་བཅོས་དེ་གཉིས་བརྩམས་པའི་ལོ་ཚིགས་ཟུར་ཙམ་གསུངས་མེད་མོད། དགུང་ལོ་སོ་དྲུག་གི་རྣམ་ཐར་འཆད་པའི་སྐབས་སུ་སུམ་རྟགས་སོགས་ལ་དཔྱིས་ཕྱིན་པར་སྦྱངས་ཏེ་གསར་པའི་ལེགས་བཤད་ཕྲན་བུ་བྱས་པར་གསུངས་ལ། དེ་འདྲ་བའི་གསར་པའི་ལེགས་བཤད་ནི། ལེགས་བཤད་ལྗོན་དབང་རང་འགྲེལ་དང་བཅས་པ་དང་། དཀའ་གནད་གསལ་བའི་མེ་ལོང་། མིང་གཅིག་དོན་མང་པོ་ལ་འཇུག་ཚུལ་བཤད་པ་བློ་གསལ་མགྲིན་རྒྱན། རྒྱ་ནག་ས་གླང་བརྟག་ཚུལ་ལེགས་བཤད་ཡོངས་འདུའི་ཤིང་དབང་། རྩིས་ཀྱི་འཁོར་ལོའི་གསལ་བྱེད་དང་ངོ་མཚར་རེའུ་མིག་བཅས་ལ་གོ་དགོས་པའི་ཕྱིར། དེའི་རྒྱུ་མཚན་ཡང་། གཅིག སུམ་རྟགས་སོགས་ལ་དཔྱིས་ཕྱིན་པར་སྦྱངས་ཏེ་གསར་པའི་ལེགས་བཤད་བྱས་པར་གསུངས་པས་གསར་པའི་ལེགས་བཤད་ཀྱི་ནང་ཚན་ལ་སུམ་རྟགས་སྐོར་གྱི་རྩོམ་ཞིག་ཡོད་དགོས་ལ། ཁོང་གི་བཀའ་རྩོམ་ཁྲོད་དུ་སུམ་རྟགས་ཀྱི་སྐོར་ནི། ལྗོན་དབང་དང་དེའི་རང་འགྲེལ། དཀའ་གནད་གསལ་བའི་མེ་ལོང་། བོད་ཡིག་གི་གནས་དང་བྱེད་རྩོལ་ངོས་འཛིན་ཚུལ་གསར་པའི་གཏམ་གྱི་མྱུ་གུ་བཅས་ལས་གཞན་མེད་ཅིང་། ཕྱི་མ་འདི་ནི། ཁྱུ་མཆོག་གི་ལོ་སྟེ་ལྕགས་མོ་སྦྲུལ་གྱི་ལོར་བརྩམས་པ་དེའི་མཇུག་བྱང་(༢༠)དུ་གསལ་བས། ཁྲོ་མོ་ཤིང་འབྲུག་ལོ་སྟེ་ཕྱི་ལོ་(༡༨༤༤)ལོར་བརྩམས་པ་མིན་ནོ། དེས་ན་རྩོམ་པ་པོ་དགུང་གྲངས་སོ་དྲུག་ཏུ་ཕེབས་པའི་ལོ་སྟེ་(1844) ལོར་གསར་པའི་ལེགས་བཤད་བྱས་ཞེས་པའི་གསར་པའི་ལེགས་བཤད་ཀྱི་ནང་ཚན་ལ་སུམ་རྟགས་ཀྱི་སྐོར་ཞིག་ཡོད་ན་ལྗོན་དབང་སོགས་ལ་མ་གཏོགས་ངོས་འཛིན་བྱེད་ས་མེད་དོ། གཉིས། དངུལ་ཆུ་དབྱངས་ཅན་གྲུབ་པའི་རྡོ་རྗེ་ལ་བཀའ་རྩོམ་པོད་གསུམ་ཡོད་པ་ལས་ཕལ་ཆེ་བ་ནི་གསང་སྔགས་གཙོ་བོར་མཛད་པའི་ནང་ཆོས་ཀྱི་སྐོར་ཡིན་ཞིང་། པོད་གསུམ་པའི་ནང་ཐ་སྙད་རིག་གནས་ཀྱི་སྐོར་འགའ་ཞིག་ཡོད་མོད། དེ་དག་ལས་བརྡ་སྤྲོད་པ་དབྱངས་ཅན་སྒྲ་མདོ་འཇམ་དབྱངས་བླ་མས་འགྱུར་བཅོས་མཛད་པ་ཞེས་པ་ནི་ཁོང་གི་འགྱུར་བཅོས་མཛད་པ་ཞིག་ཡིན་པ་ལས་གསར་རྩོམ་མ་ཡིན་པ་གསལ་པོ་རེད་ལ། རྗེ་བོད་མཁས་པའི་གབ་ཚིག་གི་དཔེར་བརྗོད་ལོགས་སུ་བཀོལ་ཏེ་བཤད་པ་མཁས་དབང་དགོངས་རྒྱན་པཎ་ཆེན་བླ་མའི་ཞལ་ལུང་ཞེས་པ་ནི། བཀའ་ཁྲིད་ཟིན་བྲིས་སུ་བཏབ་པ་ཞིག་ཡིན་པ་མཇུག་བྱང་(༢༡)དུ་གསལ་བ་ལྟར་ཡིན་པ་ལས་ཆེད་དུ་གསར་རྩོམ་མཛད་པ་ཞིག་མ་རེད། དགའ་ལྡན་རྩིས་གསར་ལས་ཉི་ཟླར་སྒྲ་གཅན་མཇུག་ཚུལ་གཟུར་གནས་མཁས་པ་དགྱེས་པའི་མཆོད་སྤྲིན། ཞེས་པ་དེ་ནི་དགུང་ལོ་སོ་གསུམ་ལོར་བརྩམས་པ་མཇུག་བྱང་(༢༢)དུ་གསལ་བར་འཁོད་ཡོད། བོད་ཀྱི་བརྡ་སྤྲོད་ཕྱོགས་བསྒྲིགས་པོད་ཉེར་ལྔ་པའི་དཀར་ཆག་ནང་། བརྡ་གསར་རྙིང་གི་ཁྱད་པར་བསྟན་པ་གསར་བུའི་བློ་གྲོས་སྐྱེད་བྱེད་ཅེས་པ་དབྱངས་ཅན་གྲུབ་པའི་རྡོ་རྗེས་མཛད་པ་ལྟ་བུར་བཤད་འདུག་མོད། དེ་ནི་ཕྱོགས་བསྒྲིགས་བྱེད་མཁན་རྣམས་ཀྱིས་ནོར་བར་ངེས་ཏེ། བསྟན་བཅོས་དེ་མཁས་གྲུབ་ངག་དབང་རྡོ་རྗེའི་གསུང་འབུམ་ནང་ཡོད་པ་ལས་དབྱངས་ཅན་གྲུབ་པའི་རྡོ་རྗེའི་གསུང་འབུམ་ནང་མེད་པའི་ཕྱིར་དང་། བསྟན་བཅོས་དེ་ཉིད་ཀྱི་མཇུག་བྱང་དུ་དགེ་སྦྱོང་གི་ཤ་ཚུགས་རྡོ་རྗེའི་མིང་ཅན་གྱིས་ཚིག་ཏུ་བསྒྲིགས་ཅེས་གསུངས་ཤིང་། མཁས་གྲུབ་ངག་དབང་རྡོ་རྗེའི་གསུང་རྩོམ་གཞན་གྱི་མཇུག་བྱང་དུ་ཡང་རྡོ་རྗེའི་མིང་ཅན་གྱིས་བཀོད་ཞེས་པ་ལྟ་བུ་གསུང་སྲོལ་འདུག་མོད། དབྱངས་ཅན་གྲུབ་པའི་རྡོ་རྗེའི་གསུང་རྩོམ་གྱི་མཇུག་བྱང་དུ་དེ་ལྟར་གསུང་སྲོལ་མེད་པའི་ཕྱིར། དེས་ན་གསར་པའི་ལེགས་བཤད་ཞེས་པ་ནི་གོང་དུ་བཤད་པ་དེ་དག་ལས་གཞན་ལ་འཛུབ་མོ་འཛུགས་ས་མེད་དོ། །
སྨྲས་པ།
མང་ཐོས་སྒྲུབ་ལ་བརྩོན་པའི་སྒོམ་པ་བ། །དྲན་དབང་དངུལ་ཆུ་ཡབ་སྲས་བྱིན་བརླབས་མཐུས། །
གངས་ལྗོངས་ཆོས་རིག་ཉི་ཟླའི་དཀྱིལ་འཁོར་ཆེ། །ལྷོ་གླིང་འཛིན་མའི་རྒྱན་དུ་མཛེས་གྱུར་ཅིག །
ཅེས་པ་འདི་ནི་དངུལ་ཆུ་ཡབ་སྲས་ཀྱི་གདན་ས་བཞད་བཀྲ་ཤིས་དགེ་འཕེལ་དགོན་གྱི་འདུས་མང་ཡོངས་ཀྱི་གྲལ་མཐར་འཁོད་པ་མཚོ་སྨད་པ་དབང་ཕྱུག་ཆོས་བཟང་དུ་འབོད་པ་དེས་སྤྱི་ལོ་༢༠༢༦.༡.༩ རབ་བྱུང་བཅུ་བདུན་པའི་སྣ་ཚོགས་ཞེས་པ་ཤིང་སྦྲུལ་ལོའི་བོད་ཟླ་བཅུ་གཅིག་པའི་ཚེས་ཉེར་གཅིག་ཉིན་སེ་ར་ཐེག་ཆེན་གླིང་གི་རང་ཤག་དཔེ་མང་སྤུངས་པའི་དགའ་ཚལ་ནས་རྫོགས་པར་བགྱིས་པ་དགེའོ།། །།
དཔྱད་གཞིའི་ཡིག་ཆ།
༡ སུམ་ཅུ་པའི་སྙིང་པོ་ལེགས་བཤད་ལྗོན་དབང་གི་འགྲེལ་བཤད། མཛད་པ་པོ། ཚ་སྤྲུལ་ངག་དབང་བློ་བཟང་མཆོག སི་ཁྲོན་བོད་ཡིག་དཔེ་རྙིང་བསྡུ་སྒྲིག་ཁང་གིས་བསྒྲིགས། བོད་ཀྱི་བརྡ་སྤྲོད་ཕྱོགས་བསྒྲིགས། པོད་༼ ༧ ༽ཤོག་གྲངས། (༣༡༢)
༢ ཐོན་མིའི་ཞལ་ལུང་། མཛད་པ་པོ། མཁས་དབང་ཚེ་ཏན་ཞབས་དྲུང་མཆོག མི་རིགས་དཔེ་སྐྲུན་ཁང་། གསུམ་འབུམ་པོད་༼ ༤ ༽ ཤོག་གྲངས། (༢༤༢)
༣ བརྡ་སྤྲོད་དཔྱིད་ཀྱི་གྲུ་ཆར། རྩོམ་པ་པོ། འཕྲིན་ལས་དཔལ་འབྱོར། བོད་ལྗོངས་མི་དམངས་དཔེ་སྐྲུན་ཁང་། ཤོག་གྲངས། (༡༥)
༤ བརྡ་སྤྲོད་བློ་གསར་ཉེར་མཁོ། རྩོམ་པ་པོ། པན་གཞུང་ནོར་བུ་བསམ་གྲུབ།
༥ རྟགས་འཇུག་དཀའ་གནད་སྙིང་པོ་རབ་གསལ་གྱི་འགྲེལ་པ་མཐའ་དཔྱོད་དྭངས་ཤེལ་མེ་ལོང་། མཛད་པ་པོ། དཀར་ལེབས་དྲུང་ཡིག་པདྨ་རྡོ་རྗེ། བོད་ཀྱི་བརྡ་སྤྲོད་ཕྱོགས་བསྒྲིགས། པོད་༼ ༡༢ ༽ ཤོག་གྲངས། (༣༦)
༦ རྗེ་བཙུན་བླ་མ་ཐམས་ཅད་མཁྱེན་པ་བློ་བཟང་ཆོས་འཕེལ་དཔལ་བཟང་པོའི་ཞལ་སྔ་ནས་ཀྱི་རྣམ་ཐར་དགེ་ལྡན་བསྟན་པའི་ཉི་འོད། མཛད་པ་པོ། དབྱངས་ཅན་དགྱེས་པའི་རྡོ་རྗེའམ་རྗེ་བློ་བཟང་འཇིགས་མེད་དབང་པོ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། པོད་༼ ཀ ༽ ཤོག་གྲངས། (༢༨༥)
༧ དུས་གསུམ་རྒྱལ་བ་ཀུན་གྱི་སྤྱི་གཟུགས་བཀའ་དྲིན་གསུམ་ལྡན་རྗེ་བཙུན་བླ་མ་ཐམས་ཅད་མཁྱེན་པ་དྷརྨ་བྷ་དྲ་དཔལ་བཟང་པོའི་རྣམ་པར་ཐར་པ་ཞྭ་སེར་བསྟན་པའི་མཛེས་རྒྱན། མཛད་པ་པོ། དབྱངས་ཅན་གྲུབ་པའི་རྡོ་རྗེ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། པོད་༼ ཀ ༽ཤོག་གྲངས། (༢༨༠)
༨ དུང་དཀར་ཚིག་མཛོད། མཛད་པ་པོ། དུང་དཀར་བློ་བཟང་འཕྲིན་ལས། ཀྲུང་གོའི་བོད་རིག་པ་དཔེ་བསྐྲུན་ཁང་། ཤོག་གྲངས། (༧༥༣)
༩ དགེ་ལྡན་བསྟན་པའི་ཉི་འོད། མཛད་པ་པོ། དབྱངས་ཅན་དགྱེས་པའི་རྡོ་རྗེའམ་རྗེ་བློ་བཟང་འཇིགས་མེད་དབང་པོ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། པོད་༼ ཀ ༽ ཤོག་གྲངས། (༢༢༩)
༡༠ གོང་མཚུངས། པོད་༼ ཀ ༽ ཤོག་གྲངས། (༢༥༠)
༡༡ གོང་མཚུངས། པོད་༼ ཀ ༽ ཤོག་གྲངས། (༡༩༢)
༡༢ དུང་དཀར་ཚིག་མཛོད། མཛད་པ་པོ། དུང་དཀར་བློ་བཟང་འཕྲིན་ལས། ཀྲུང་གོའི་བོད་རིག་པ་དཔེ་བསྐྲུན་ཁང་། ཤོག་གྲངས། (༦༨༨)
༡༣ བོད་ཀྱི་ཉེ་རབས་སྒེར་པའི་ལོ་རྒྱུས། རྩོམ་པ་པོ། པ་ཚབ་པ་སངས་དབང་འདུས། བོད་ལྗོངས་མི་དམངས་དཔེ་སྐྲུན་ཁང་། (༡༡༨)
༡༤ རྟགས་འཇུག་དཀའ་གནད་སྙིང་པོ་རབ་གསལ་གྱི་འགྲེལ་པ་མཐའ་དཔྱོད་དྭངས་ཤེལ་མེ་ལོང་། མཛད་པ་པོ། དཀར་ལེབས་དྲུང་ཡིག་པདྨ་རྡོ་རྗེ། བོད་ཀྱི་བརྡ་སྤྲོད་ཕྱོགས་བསྒྲིགས། པོད་༼ ༡༢༽ ཤོག་གྲངས། (༣༦)
༡༥ སི་ཏུའི་ཞལ་ལུང་། མཛད་པ་པོ། དངུལ་ཆུ་དྷརྨ་བྷ་དྲ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། གསུང་འབུམ་པོད་༼༥༽ཤོག་གྲངས། (༥༥)
༡༦ དགེ་ལྡན་བསྟན་པའི་ཉི་འོད། མཛད་པ་པོ། དབྱངས་ཅན་དགྱེས་པའི་རྡོ་རྗེའམ་རྗེ་བློ་བཟང་འཇིགས་མེད་དབང་པོ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། པོད་༼ ཀ ༽ ཤོག་གྲངས། (༩༠)
༡༧ གོང་མཚུངས། པོད་༼ ཀ ༽ ཤོག་གྲངས། (༡༠༢)
༡༨ གོང་མཚུངས། པོད་༼ ཀ ༽ ཤོག་གྲངས། (༩༤དང་༩༥)
༡༩ གོང་མཚུངས། པོད་༼ ཀ ༽ ཤོག་གྲངས། (༡༠༦)
༢༠ བོད་ཡིག་གི་གནས་དང་བྱེད་རྩོལ་ངོས་འཛིན་ཚུལ་གསར་པའི་གཏམ་གྱི་མྱུ་གུ། མཛད་པ་པོ། དབྱངས་ཅན་གྲུབ་པའི་རྡོ་རྗེ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། པོད་༼ ག ༽ཤོག་གྲངས། (༡༥༤)
༢༡ རྗེ་བོད་མཁས་པའི་གབ་ཚིག་གི་དཔེར་བརྗོད་ལོགས་སུ་བཀོལ་ཏེ་བཤད་པ་མཁས་དབང་དགོངས་རྒྱན་པཎ་ཆེན་བླ་མའི་ཞལ་ལུང་། མཛད་པ་པོ། དབྱངས་ཅན་གྲུབ་པའི་རྡོ་རྗེ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། པོད་༼ ག ༽ཤོག་གྲངས། (༡༧༥)
༢༢ དགའ་ལྡན་རྩིས་གསར་ལས་ཉི་ཟླར་སྒྲ་གཅན་མཇུག་ཚུལ་གཟུར་གནས་མཁས་པ་དགྱེས་པའི་མཆོད་སྤྲིན། མཛད་པ་པོ། དབྱངས་ཅན་གྲུབ་པའི་རྡོ་རྗེ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། པོད་༼ ག ༽ཤོག་གྲངས། (༤༡༧)
