རུ་ཐོག་རྫོང་གི་དགོན་སྡེ་དང་། གྲགས་ཅན་མི་སྣ། གནའ་ཤུལ། དམངས་སྲོལ་བཅས་ཀྱི་སྐོར།

ལེ་ཚན་དྲུག་པ། དགོན་སྡེ་དང་། གྲགས་ཅན་མི་སྣ། གནའ་ཤུལ།

དང་པོ། དགོན་སྡེ།

གཉིས་པ། གྲགས་ཅན་མི་སྣ།

གསུམ་པ། གནའ་ཤུལ།

ལེ་ཚན་བདུན་པ། དམངས་སྲོལ།

དང་པོ། རུ་ཐོག་གི་གར་ཤོན།

ཤོན་ཞེས་པ་ནི་ཞང་ཞུང་གི་སྐད་དང་དོན་དུ་གླུ་གར་ལ་གོ་བ་གོང་དུ་ཞུས་པ་ལྟར་ཡིན་ལ། དེ་ཡང་གནའ་བོའི་བོད་ཀྱི་བུད་མེད་རྣམས་ཀྱིས་འཁྲབ་སྲོལ་ཆེ་བའི་གླུ་གར་གྱི་གྲས་ཤིག་ཡིན། རུ་ཐོག་རྫོང་གི་ཡུལ་མིའི་ཤོད་སྲོལ་ལྟར་ན་གར་ཤོན་དེའི་འཁྲབ་སྲོལ་ནི། གནའ་དུས་གླིང་རྗེ་གེ་སར་རྒྱལ་པོ་མངའ་རིས་ཁུལ་དུ་ཞབས་བཅགས་མྱོང་ཞིང་། དུས་སྐབས་དེ་ནས་བཟུང་གར་ཤོན་གྱི་འཁྲབ་སྲོལ་རིམ་བཞིན་དར་ཁྱབ་བྱུང་བར་བཤད། གར་ཤོན་ནི་རྒྱུན་གཏན་འཁྲབ་སྲོལ་ཆེར་མེད་ཅིང་། དེའི་འཁྲབ་སྟོན་གྱི་དུས་སྐབས་ནི་《མངའ་རིས་རོང་ཆུང་ཁུལ་གྱི་གླུ་གར་ཕྱོགས་བསྒྲིགས།》ལྟར་ན་བོད་ཟླ་ ༡ ཚེས་ ༣ དང་། བོད་ཟླ་ ༤ ཆོས་སྐོར་དུས་ཆེན་དང་། བོད་ཟླ་ ༡༡ ཚེས་ ༡༢།^[1] ཞེས་དང་།《བོད་ལྗོངས་སྟོད་མངའ་རིས་རུ་ཐོག་རྫོང་གི་སྔ་ཕྱིའི་ལོ་རྒྱུས།》ལས། བོད་ཟླ་ ༡༢ ཚེས་ ༨།^[2] ཅེས་དང་། 《མངའ་རིས་ཆོས་འབྱུང་།》ལས། སྟོན་དུས་དཀར་རྩི་དང་དབྱར་དུས་ཚེ་གཏོར་གྱི་སྐབས་དང་། སྤྱིར་བཏང་བོད་ཟླ་ ༡༢ ཚེས་ ༨ ཉིན་འཁྲབ།^[3] ཅེས་ཀྱང་གསལ།

གཞན་དག་རུ་ཐོག་ཏུ་ཕ་མེས་ནས་གསར་གཏོད་དང་དར་ཁྱབ་ཆེ་བའི་གླུ་གར་ཞབས་བྲོའི་རྣམ་གྲངས་སུའང་། ཕོ་གཞོན་གྲངས་བཅུ་གསུམ་དང་མོ་གཞོན་བཅུ་གསུམ་གྱིས་འཁྲབ་སྟོན་བྱེད་དགོས་པའི་ཕོ་གཞས་དགུ་དང་ཕོ་གཞས་བཅུ་ཞེས་པ་དང་། གཞུང་གླུ་བཀྲིས་བཅུ་གསུམ། སྐྱོག་གླུ་བཀྲིས་བཅོ་བརྒྱད། ཆང་གླུ། ཚིག་གླུ། ཁྲམ་གླུ། གངས་མཚོའི་བསྟོད་གླུ། ཆུ་བཞིའི་གླུ། མངའ་རིས་གྲྭ་རྒན་གྱི་གླུ། ཛུག་གུ་གྲུབ་པའི་གླུ། རུ་ཐོག་ཁྱུང་རྫོང་དཀར་མོའི་གཉའ་གླུ་གཞུང་ཆེན་བཅོ་བརྒྱད། ཆང་བཀའ་པའི་གླུ། ཚོང་གླུ། ཀོང་པོ་འབྲོག་སྐྱོང་། མགྲོན་གྲོལ་བའི་གླུ། འགྲོ་གླུ་གཉིས་པ། འགྲོ་གླུ་གསུམ་པ། འབྲོག་པའི་ལ་ཡུ་སོགས་དང་། ཞབས་བྲོ་ལའང་རུ་ཐོག་སྒོར་གཞས། འཁྲུག་གཞས། སུམ་རྒྱག་སོགས་ཞབས་བྲོའི་རྣམ་པ་མི་འདྲ་བ་སྣ་ཚོགས་དར་ཁྱབ་ཤིན་ཏུ་ཆེ། །

གཉིས་པ། རུ་ཐོག་གི་དུས་སྟོན།

དེ་སྔ་རུ་ཐོག་རྫོང་ཁུལ་དུ་ལོ་གཅིག་ལ་ལོ་གསར་ཐེངས་གསུམ་སྲུང་བརྩི་ཞུ་སྲོལ་ཡོད་པ་ལས། བོད་ཟླ་ ༡༡ རོང་པའི་ལོ་གསར་ཞེས་ལ་དྭགས་པའི་ལོ་གསར་གཏོང་བ་དང་། བོད་ཟླ་ ༢༢ བྱང་ཐང་ལོ་གསར་དུ་འབོད་པའི་ལོ་གསར་དགའ་སྟོན་བྱེད། འོན་ཀྱང་། དེ་དག་ཡོངས་ལས་སྲུང་བརྩི་གཞི་རྒྱ་ཆེ་ཤོས་དང་དུས་ཡུན་རིང་ཤོས་ནི། བོད་ཟླ་ ༡ རྒྱལ་ལོ་ཆེན་པོའི་ལོ་གསར་ཡིན་ཅིང་། དུས་ཚོད་དེ་ནི་རུ་ཐོག་རྫོང་གི་ཞི་དྲག་དཔོན་རིགས་དང་ཞིང་འབྲོག་མི་སེར་ཙམ་དུ་མ་ཟད། ཕྱིའི་ཚོང་གཉེར་བ་དང་གནས་སྐོར་བ་སོགས་མི་སྣ་འདུ་འཛོམས་གྱི་འཁྲུག་ཆ་ཤིན་ཏུ་ཆེ་བར་གྲགས། ལོ་གསར་གྱི་རྟེན་འབྲེལ་བྱེད་སྒོ་ནི་བོད་ཁམས་སྤྱི་དང་ལྷག་པར་མངའ་རིས་སྐོར་གསུམ་གྱི་ལུགས་སྲོལ་ལས་ལོགས་སུ་མེད་ཀྱང་། དམིགས་བསལ་རུ་ཐོག་གི་ལོ་གསར་སྐབས་རྫོང་དུ་སྨོན་ལམ་དང་། དགོན་སྡེ་ཁག་ཏུ་གར་འཆམ། མི་སེར་ཁྲོད་རྟ་རྒྱུག་ཞབས་བྲོ་དང་ལྷ་མོ་སོགས་འཁྲབ་པ་བཅས་ལོ་གསར་བདུན་ཕྲག་གཅིག་ལྷག་བརྩི་སྲུང་བྱེད། དེ་མིན་རྫོང་དེར་ཆོས་ཕྱོགས་ཀྱི་དུས་སྟོན་བྱེད་སྒོར་མཚོན་ནའང་། བོད་ཟླ་ ༣ རུ་ཐོག་ལྷུན་གྲུབ་ཆོས་སྡེ་གྲྭ་ཚང་གི་ལྷ་གསོལ་ཆེན་མོར་སྐྱ་སེར་མི་མང་ཁྱོན་ཆེ་འདུ་འཛོམས་གྱིས་ལྷ་གསོལ་དར་ལྕོག་སྒྲེང་འཛུགས། བོད་ཟླ་ ༤ ས་ག་ཟླ་བར་གཞུང་སྒེར་ཆོས་གསུམ་འདུ་ཁོངས་ཡོད་ཚད་ཀྱིས་བཀའ་འགྱུར་ལྗགས་ཀློག་བྱེད་སྲོལ་དང་། ལོ་ལྟར་བོད་ཟླ་ ༧ ཚེས་ ༣ ལ་ཡུལ་ལྷ་གསོལ་མཆོད་ཀྱི་མཛད་སྒོ། བོད་ཟླ་ ༩ ཚེས་ ༢༩ དགུ་གཏོར་ཆེན་མོར་རྫོང་འོག་མི་སེར་ཙམ་དུ་མ་ཟད་ཉེ་འཁོར་ཆོས་མཇལ་བ་ཁྱོན་ཆེ་འདུ་འཛོམས་ཀྱིས་གླུ་གར་ཞབས་བྲོའི་འཁྲབ་སྟོན། བོད་ཟླ་ ༡༠ གཞུང་འབྲེལ་ལྔ་མཆོད་མཆོད་འབུལ་རྒྱ་ཆེར་བྱེད།

དཔྱད་གཞིའི་ལུང་ཁུངས་ཡིག་ཆ།

^[1].  ཀརྨ་མཁས་གྲུབ་སྲིད་སྒྲུབ། མངའ་རིས་རོང་ཆུང་ཁུལ་གྱི་གླུ་གར་ཕྱོགས་བསྒྲིགས། ཕྱི་ལོ་ ༡༩༩༨། ཤོག

^[2].  སྐོར་དཔོན་བློ་བཟང་མཁྱེན་རབ། བོད་ལྗོངས་སྟོད་མངའ་རིས་རུ་ཐོག་རྫོང་གི་སྔ་ཕྱིའི་ལོ་རྒྱུས། ཤོག་ ༩༤ ནས་ ༩༥།

^[3].  གུ་གེ་ཚེ་རིང་རྒྱལ་པོ། མངའ་རིས་ཆོས་འབྱུང་གངས་ལྗོངས་མཛེས་རྒྱན། བོད་ལྗོངས་མི་དམངས་དཔེ་སྐྲུན་ཁང་། ཕྱི་ལོ་ ༢༠༠༦། ཤོག ༣༤༣།

དབུས་གཙང་ལོ་རྒྱུས་ཆེན་མོ་ལས་བཏུས་པའོ།།