ཇ༽ བཙན་པོའི་གཟིགས་སྐྱོང་དང་། ལོ་ཙཱ་བའི་གསོལ་ཕོགས།
བཙན་པོ་ཁྲི་སྲོང་ལྡེའུ་བཙན་གྱི་སྐུ་དུས་སུ་ལོ་ཙཱ་བ་རྣམས་ཀྱི་འཚོ་བའི་ཐད་དམིགས་བསལ་གཟིགས་སྐྱོང་ཇི་ལྟར་གནང་ཡོད་ཅེ་ན། སྐབས་དེར་ལོ་ཙཱ་བའི་གསོལ་ཐང་ (ཕོགས་) ཞེས་འཚོ་བའི་ཐོབ་ཐང་བློན་ཆེན་དང་མཉམ་པ་ཡོད། དེ་ཡང་ཉང་ཉི་མ་འོད་ཟེར་གྱི་ཆོས་འབྱུང་ལས[1]། སྒྲ་སྒྱུར་གྱི་ལོ་ཙཱ་བ་དེ་ལ་གསོལ་ཐང་ནི། བློན་ཆེན་པོ་ཀུན་དང་མཉམ་མོ། །བློན་ཆེན་པོའི་ཟ་ཐང་ནི། རྒྱལ་པོས་གསོལ་བའི་གསུམ་ཆ་གཅིག་ཡིན་ནོ། །རྒྱལ་པོ་ཆེན་པོའི་གསོལ་ཐང་ནི། སྐུ་སྲུང་བརྒྱ་བརྒྱའི་ཆས་དང་བཅས་ན་མ་རེ་རེ་ལ་ཡོད་དོ། །ཞེས་གསལ་བ་ལྟར། སྐུ་སྲུང་དམག་མི་ ༡༠༠ ཐམ་པའི་ཕོགས་ཐོབ་དང་། རྒྱལ་པོའི་གསོལ་ཐང་མཉམ་པ་དང་། བློན་ཆེན་དང་། སྒྲ་སྒྱུར་ལོ་ཙཱ་བའི་གསོལ་ཐང་མཉམ་པས། དེའི་སུམ་ཆ་གཅིག་སྟེ་བརྒྱ་ཆ་ ༣༣༌༣༣ ཙམ་ཡིན་པས། མདོར་ན་སྐུ་སྲུང་དམག་མི་ ༣༣ ཙམ་གྱི་ཕོགས་ཐོབ་ལོ་ཙཱ་བར་གསོལ་སྩལ་གནང་བཞིན་ཡོད་ལ། མདོར་ན་རྒྱལ་པོའི་ཉིན་རེའི་གསོལ་ཟས་ཀྱི་འབྲུ་རིགས་དང་། གསོལ་མར། གསོལ་ཇ། བཞེས་སྣུམ། གསོལ་དཀྲུམ། ཤིང་ཏོག་སོགས་བསྡོམས་འབོར་གྱི་གསུམ་ཆ་གཅིག་གི་ཐོབ་ཐང་དང་མཉམ་པ་རྒྱལ་པོའི་བང་མཛོད་ནས་གནང་སྲོལ་ཡོད་པ་མ་ཟད། ལོ་ཙཱ་བ་སློབ་སྦྱོང་དུ་འགྲོ་མཁན་བོད་ཕྲུག་ཚང་མའི་འགྲོ་གྲོན་སློབ་ཡོན་དང་། ལམ་ཆས་སོགས་དང་། གསེར་ཕོན་ཆེན་དང་། ཚ་བའི་སྨན་སོགས་བཙན་པོ་རང་ཉིད་ཀྱི་མཛོད་ནས་སྩལ་ཏེ་རྒྱ་གར་འཕགས་ཡུལ་དང་། བལ་པོའི་རྒྱལ་པོར་ངོ་སྤྲོད་བཀའ་ཡིག་དང་། ཕྱག་རྟགས་བཅས་བསྐུར་ནས་བརྫངས་པ་གནང་ཡོད་ཚུལ་དུང་དཀར་རིན་པོ་ཆེའི་གསུང་འབུམ་དུ་གསལ་བ་ལྟར་རོ།།
[1] ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད། བོད་ལྗོངས་མི་དམངས་དཔེ་སྐྲུན་ཁང་། དེབ་གཟུགས། ༡༩༨༨ ཤོག་གྲངས། ༣༩༤
