ལྷ་སའི་བར་སྐོར་གྱི་ཕྱོགས་བཞི་སོ་སོར་སྔར་ནས་ད་བར་འཛུགས་སྲོལ་ཡོད་པའི་གྲགས་ཅན་གྱི་དར་ཆེན་བཞི་ཡོད་པ་དེ་དག་གང་ཡིན་དང༌། སུ་ཞིག་གིས་དུས་ནམ་ཞིག་ལ་བཙུགས་པ། གང་གི་དོན་དུ་བཙུགས་པ་སོགས་ཀྱང་མཁྱེན་རྟོགས་དགོས་ངེས་ཡིན་ལ། ལྷ་སའི་བར་སྐོར་བྱང་ཆུབ་བྱོན་ལམ་གྱི་དར་པོ་ཆེ་བཞི་ནི། ཤར་སྐྱ་རེངས་དར་ཆེན་དང༌། ཇུས་ཡག་དར་ཆེན། དགའ་ལྡན་དར་ཆེན་དང༌། སྐལ་བཟང་དར་ཆེན་བཅས་བཞི་ལས།
ཀ༽ ཤར་སྐྱ་རེངས་དར་ཆེན་ནི། བར་སྐོར་ཤར་ལྷོའི་དུང་མཚོའི་ཟུར་དུ་ཡོད་ཅིང༌། དེ་ནི་རབ་བྱུང་བཅུ་བདུན་པའི་ས་གླང་སྤྱི་ལོ་ ༡༤༠༩ ལོར་རྗེ་ཙོང་ཁ་པ་ཆེན་པོས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་སྲོལ་བཟང་གསར་གཏོད་མཛད་པའི་རྗེས་དྲན་དུ་བཙུགས་གནང་མཛད་ཅིང༌། བོད་ཟླ་དང་པོའི་ཚེས་བཅོ་ལྔའི་ཞོགས་པ་སྐྱ་བརྡ་མ་བཏང་གོང་སྐུ་བཞེངས་གྲུབ་དགོས་པའི་ལམ་སྲོལ་ཡོད་རྐྱེན་ཤར་སྐྱ་རེངས་ཞེས་མིང་དེ་ངག་རྒྱུན་དུ་ཆགས་ཤིང༌། དོན་དུ་དར་ཆེན་དེ་ནི་རྗེ་ཙོང་ཁ་པ་ཆེན་པོས་ནང་པ་སངས་རྒྱས་པའི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་རྒྱས་ཡོང་བའི་ཐུགས་སྨོན་དང་བཅས་གསར་བཙུགས་གནང་བར་གྲགས་སོ།།
ཁ༽ ཇུས་ཡག་དར་ཆེན་ནི། ལྷ་ལྡན་གཙུག་ལག་ཁང་གི་མདུན་ངོས་གཡས་སུ་གནས་ཤིང༌། དར་ཆེན་དེ་ནི་བོད་རབ་བྱུང་བཅུ་གཅིག་པའི་ས་ཡོས་སྤྱི་ལོ་ ༡༦༣༩ ལོར་༸རྒྱལ་དབང་ལྔ་པ་ཆེན་པོའི་ཆོས་སྲིད་གཉིས་ལྡན་གྱི་དཔུང་རྒྱབ་སོག་པོ་གུ་ཤྲིའ་བསྟན་འཛིན་ཆོས་ཀྱི་རྒྱལ་པོས་མདོ་སྟོད་བེ་རི་རྒྱལ་པོ་ཆམ་ལ་ཕབ་ཅིང༌། སྡེ་དགེ་དང་སྨར་ཁམས་སོགས་ས་གནས་མང་པོ་ཚུར་བླངས་ཏེ་གཏམ་སྙན་ལྷ་སར་འབྱོར་སྐབས། ༸རྒྱལ་དབང་ལྔ་པ་ཆེན་པོའི་ཕྱག་མཚོད་སྡེ་སྲིད་བསོད་ནམས་ཆོས་འཕེལ་གྱིས་སངས་རྒྱས་བསྟན་པའི་ཇུས་ཡག་ལམ་དུ་ལྷོངས་སོ་ཟེར་བའི་དྲིལ་བསྒྲགས་དང་བཅས་ཇུས་ཡག་དར་ཆེན་བཙུགས་པར་གྲགས།།
དེའི་འགྲམ་གྱི་ཁང་ཆེན་ ༼ལྷ་སའི་གཙུག་ལག་ཁང་ནས་རྩིས་པའི་ལྷོ་ནུབ་མཚམས་དེང་སང་ཐང་ཆེན་གྱི་ཟུར་ཅིག༽ དེར་དུས་རབས་བཅུ་བདུན་པའི་ནང་སྡེ་སྲིད་གཙང་པའི་དབང་བསྒྱུར་གཏོར་ཏེ་དགའ་ལྡན་ཕོ་བྲང་པའི་སྲིད་དབང་འཛུགས་ཕྱིར་སོག་པོའི་དཔུང་དམག་བོད་དུ་བསྐོང་རྒྱུའི་ཆེད་དགའ་ལྡན་ཕོ་བྲང་པའི་ཕྱག་མཛོད་བསོད་ནམས་རབ་བརྟན་དང༌། སྡེ་པ་སྐྱིད་ཤོད་པ་སོགས་འཚོགས་ནས་ཇུས་གཞི་བཏིངས་པས་ཕྱིས་གྲུབ་འབྲས་ཆེན་པོ་ཐོབ་སྟབས་ཁང་མིང་དུ་ཇུས་འདིང་གནས་སམ་ཇུས་འདིང་གླིང་ ༼ཁ་རྒྱུན་དུ་ཇི་སྡེ་གླིང་ཞེས་ཟེར།༽ ཞེས་མིང་ཐོགས་ཤིང༌། ད་ལྟའང་དེ་ལྟར་འབོད་བཞིན་ཡོད།
ག༽ དགའ་ལྡན་དར་ཆེན་ནི། བར་སྐོར་བྱང་ཆུབ་བྱོན་ལམ་གྱི་བྱང་ཤར་ཟུར་དུ་བདེ་ཆེན་རབ་བརྟན་ཞེས་པའི་གྲོང་ཁྱིམ་ཐོག་བརྩེགས་ཅན་དེའི་ཉེ་འགྲམ་དུ་གནས་ཤིང༌། བདེ་ཆེན་རབ་བརྟན་ནི་རྒྱལ་པོ་དགའ་ལྡན་ཚེ་དབང་གི་ཕོ་བྲང་ཡིན་ཞིང༌། དེའི་མདུན་དུ་དགའ་ལྡན་དར་ཆེན་དེ་བཙུགས་ཡོད། སྤྱི་ལོ་ ༡༦༨༡ ལོར་དགའ་ལྡན་ཚེ་དབང་དཔལ་བཟང་ཟེར་བའི་སོག་རིགས་ཀྱི་རྗེ་བོ་ད་ལ་ཧོ་ཐའི་ཇིའི་བུ་བཀྲས་ལྷུན་དགོན་དུ་ཆོས་སྒོར་ཞུགས་བཞིན་པའི་སྐབས་སུ་༸རྒྱལ་དབང་སྐུ་ཕྲེང་ལྔ་པ་ཆེན་པོས་བཀའ་ལུང་ཕེབས་པ་བཞིན། དམག་སྤྱིའི་ཐུགས་འགན་བཞེས་ཏེ་ཡན་ལག་དཔུང་ཚོགས་དང་བཅས་པ་ལ་དྭགས་རྒྱལ་པོ་སེང་གེ་རྣམ་རྒྱལ་ཟེར་བས་རང་རེའི་གངས་ཅན་མངའ་རིས་སྐོར་གསུམ་བཙན་བཟུང་བྱས་པར་དཔའ་ཞིང་བརྟུལ་ཕོད་པའི་ཕར་རྒོལ་འཐབ་ལག་ཤུགས་ཆེ་སྤྲད་པའི་མཐར་དགྲ་བོའི་གཡུལ་ལས་རྣམ་པར་རྒྱལ་བའི་དཔའ་ཉམས་རྟགས་སུ་ཐོག་མར་སྟོད་གངས་རིན་པོ་ཆེའི་མདུན་དུ་དགའ་ལྡན་དར་ཆེན་ཞེས་པ་ཞིག་བཙུགས་པ་དང༌། དེ་ནས་ཕྱི་ལོ་དེར་ལྷ་ལྡན་བར་སྐོར་དུ་དགའ་ལྡན་དར་ཆེན་དེ་ཉིད་བཙུགས་པ་དང༌། མིང་གཞན་དགའ་ལྡན་དར་སྨྱོན་ཞེས་ཀྱང་གྲགས་སོ།།
ང༽ སྐལ་བཟང་དར་ཆེན་ནི། བར་སྐོར་གྱི་ལྷོ་ངོས་གསུང་ཆོས་རྭ་བའི་མདུན་དུ་བཙུགས་ཡོད་ལ། དར་ཆེན་དེ་ནི་རབ་བྱུང་བཅུ་གཉིས་པའི་ལྕགས་བྱ་ལོ་སྟེ་སྤྱི་ལོ་ ༡༧༢༠ ལོར་༸རྒྱལ་མཆོག་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་གངས་ལྗོངས་ལྷ་ལྡན་དུ་གདན་དྲངས་ཤིང༌། ༸རྒྱལ་བའི་ཡབ་གཞིས་ཀྱི་བཞུགས་ཡུལ་བསམ་གྲུབ་ཕོ་བྲང་དུ་གནང་བ་དང༌། དེ་གའི་མདུན་དུ་མཆོག་སྤྲུལ་འཁྲུལ་བྲལ་ངེས་རྙེད་བདེ་ཕེབས་ཀྱིས་ཕོ་བྲང་པོ་ཏཱ་ལར་གསེར་ཁྲི་མངའ་གསོལ་གྱི་མཛད་སྒོ་བཤམས་པའི་ཉིན་དེར་༸རྒྱལ་དབང་བསྐལ་བཟང་རྒྱ་མཚོའི་མཚན་གྱི་ཟུར་ནས་འཆང་ཞིང༌། བསྐལ་པ་བཟང་པོ་རྟག་ཏུ་བརྟན་པའི་ཐུགས་སྨོན་དང༌། ཆོས་སྲིད་གཉིས་ཀྱི་མཛད་འཕྲིན་ཕྱོགས་ཐམས་ཅད་ལས་རྣམ་པར་རྒྱལ་བའི་མཚོན་རྟགས་སུ་བསྐལ་བཟང་དར་ཆེན་དེ་ཉིད་བཙུགས་པར་མཛད་དོ།།
གཞན་ཡང་བཀྲ་ཤིས་དར་ཆེན་ནི་ལྷ་ལྡན་གཙུག་ལག་ཁང་གི་མདུན་ངོས་གཡོན་ཕྱོགས་སུ་གནས་ལ། དེ་ནི་བོད་རབ་བྱུང་བཅུ་དྲུག་པའི་མེ་སྟག་སྤྱི་ལོ་ ༡༩༨༦ ལོར་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པ་པཎ་ཆེན་ཨེར་ཏི་ནི་ཆོས་ཀྱི་རྒྱལ་མཚན་མཆོག་ནས་མི་ལོ་ཉི་ཤུ་ལྷག་ཙམ་རིང་བར་ཆད་བྱུང་བའི་ལྷ་ལྡན་ཆོ་འཕྲུལ་སྨོན་ལམ་ཆེན་མོ་སླར་ཡང་བསྐྱར་གསོ་གནང་སྟེ་གདན་ས་སེ་འབྲས་དགའ་གསུམ་གྱིས་གཙོས་དགེ་འདུན་ཞལ་གྲངས་ཉིས་སྟོང་ཙམ་ལྷ་ལྡན་གཙུག་ལག་ཁང་དུ་འདུ་འཛོམས་ཀྱིས་ལྷ་ལྡན་ཆོ་འཕྲུལ་སྨོན་ལམ་ཆེན་མོ་རྒྱ་ཆེ་གཟབ་རྒྱས་ཤིག་འཚོགས་པ་དང་བསྟན་པ་ཡང་དར་མཚོན་བྱེད་དུ་བཀྲ་ཤིས་དར་ཆེན་ཞེས་པ་དེ་བཙུགས་གནང་མཛད་དོ།།
དེ་མིན་རྒྱ་སྟག་ར་མོ་ཆེ་གཙུག་ལག་ཁང་གི་མདུན་དུ་ཡོད་པའི་དར་ཆེན་དེ་ནི། ༸རྒྱལ་དབང་སྐུ་ཕྲེང་ལྔ་པའི་སྐུ་དུས་སུ་ཇོ་ནང་ཏཱ་ར་ན་ཐས་བཙུགས་གནང་མཛད་པར་གྲགས་པ་བཅས་སོ།།
ལྷ་སའི་དངོས་བྱུང་བདེན་དཔང་ལས་བཏུས།
