བྲག་ལྷ་ཀླུ་སྒུག་དགོན་ནི་ལྕགས་པོ་རིའི་ཤར་ངོས་རི་འདབས་སུ་གནས་ཤིང༌། སྔར་བཙན་པོ་སྲོང་བཙན་སྒམ་པོས་བལ་བཟའ་ཁྲི་བཙུན་བཙུན་མོར་བླངས་རྗེས་ཁྲི་བཙུན་གྱི་བཞུགས་གནས་སུ་བཞེངས་པའི་ཕོ་བྲང་བྲག་ལྷ་བཀྲ་ཤིས་གཞལ་ཡས་ཁང་ཡོད་ས་དེར་བྲག་ལྡེབས་བྲག་ཕུག་ནང་རྟེན་གཙོ་ཇོ་བོ་ཤཱཀྱ་མུ་ནེ་རྡོ་བརྐོས་རང་བྱོན་ཞལ་ཤར་གཟིགས་མ་དེའི་མཐའ་སྐོར་དུ་སྐོར་ལམ་དང༌།
བྲག་གི་ངོས་སུ་རྡོ་བརྐོས་སྐུ་བརྙན་རང་བྱོན་མང་པོ་དང༌། བྲག་ཕུག་དེའི་ལྷོ་ངོས་རི་ལྡེབས་སུ་རྟ་མགྲིན་སྒྲུབ་ཕུག་ཅེས་བྲག་ཕུག་ཆུང་བ་དེའི་ནང་རྟ་མགྲིན་རང་བྱོན་ཡོད་པ་རིག་གསར་སྐབས་གཏོར་བཤིག་སོང་ཞིང༌། ལྕགས་པོ་རིའི་ཤར་ཕྱོགས་ཀྱི་རི་སྣར་བྲག་ལྷ་བཙན་གདོང་ཞེས་བྲག་ལ་ཁྲོ་བོ་རྟ་མགྲིན་དང༌། བདུད་རྩི་འཁྱིལ་བ་འབུར་དོད་དུ་བརྐོས་པ་སོགས་རྡོ་བརྐོས་ངོ་མཚར་ཅན་ཡང་ཡོད།
ཡང་བཤད་སྲོལ་གཞན་ཞིག་ལ་བྲག་ལྷ་ཀླུ་སྒུག་ནི་བཙན་པོ་སྲོང་བཙན་གྱི་བཙུན་མོ་རུ་ཡོང་བཟའ་རྒྱལ་མོ་བཙུན་གྱིས་བཞེངས་ཚུལ་བཀའ་ཆེམས་སུ་གསལ་ཞིང༌། ངག་རྒྱུན་དུ་བྲག་ལྷ་སྒུག་ནི་སྲོང་བཙན་སྒམ་པོའི་བཙུན་མོ་སྟོད་ལུང་མོང་བཟའ་ཁྲི་ལྕམ་གྱིས་བཞེངས་ཚུལ་དང༌། ཆོས་རྒྱལ་སྲོང་བཙན་གྱི་སྲས་གུང་རི་གུང་བཙན་ཡང་གནས་འདིར་འཁྲུངས་པར་གྲགས།
ལྷ་སའི་དངོས་བྱུང་བདེན་དཔང་ལས་བཏུས།
