《འཇིག་རྟེན་ལུགས་ཀྱི་བསྟན་བཅོས》བསྒྱུར་བྱང་།
《འཇིག་རྟེན་ལུགས་ཀྱི་བསྟན་བཅོས》ཞེས་བྱ་བ་འདི་ནི་དུས་རབས་བཅུ་བདུན་པའི་ནང་གི་སི་ཕེན་རྒྱལ་ཁབ་ཀྱི་མཚན་ཉིད་རིག་པ་བ་དང་། བསམ་བློ་བ། ཡེ་ཤུ་ཚོགས་པའི་སློབ་དཔོན་བཅས་ཡིན་པའི་བྷལ་ཐ་སར·གྷོ་ར་སེ་ཨེན་གྱི་བརྩམས་ཆོས་སྐད་གྲགས་ཅན་ཞིག་ཡིན། ཁོང་སྤྱི་ལོ་1619ལོར་འཁྲུངས། 1637ལོར་ཁོང་གི་བརྩམས་ཆོས་ཐོག་མ《དཔའ་བོ》ཞེས་པ་དཔེ་སྐྲུན་བྱས་མ་ཐག་སྐད་གྲགས་ཆོད། 1640ལོར་གཙོ་འཛིན་གྱི་བྱང་ཚད་སྐོར་བྲིས་པའི་《ཆབ་སྲིད་མཁས་ཅན》ཞེས་པ་བཏོན་པ་དང་། 1647ལོར་གྲགས་རྩོམ《འཇིག་རྟེན་ལུགས་ཀྱི་བསྟན་བཅོས》ཞེས་བྱ་བ་བཏོན་ནས་དེའི་སྙན་གྲགས་ཀྱི་བ་དན་གང་སར་ཁྱབ་པས་ད་བར་འཛམ་གླིང་ཐོག་གི་སྐད་རིགས་སུམ་ཅུ་ལྷག་ལ་བསྒྱུར་ནས་སྐྱེ་བོ་དུ་མའི་འཇིག་རྟེན་མི་ཆོས་ཀྱི་བླང་དོར་གྱི་བློ་མིག་འབྱེད་པའི་གསར་ཐུར་དུ་གྱུར་ཡོད་ཅིང་། དབྱིན་ཡིག་གི་འགྱུར་མ་ཁོ་ན་ཁག་བདུན་ཡོད་པ་དང་། རྒྱ་ཡིག་གི་འགྱུར་མ་ཡང་ཁག་ཁ་ཤས་ཡོད་འདུག
གཅིག བསྟན་བཅོས་ཀྱི་ནང་དོན།
གཉིས། བོད་འགྱུར་གྱི་དགོས་པ།
གསུམ། ཡིག་སྒྱུར་གྱི་བརྗེད་བྱང་།
འཇིག་རྟེན་ལུགས་ཀྱི་བསྟན་བཅོས་འདི་བཞིན་ཁོ་བོས་བོད་ལྗོངས་སློབ་ཆེན་གྱི་ཡིག་སྒྱུར་ཞིབ་འཇུག་སློབ་མ་ཐོན་རིམ་པ་ཁག་གཅིག་ལ་ཡིག་སྒྱུར་ལག་ལེན་གྱི་སློབ་ཚན་འཁྲིད་པའི་བརྒྱུད་རིམ་ནང་དགེ་སློབ་མཉམ་ལས་ཀྱིས་འཛམ་གླིང་ཐོག་གི་གྲགས་རྩོམ་ཞིག་བོད་ཡིག་ལ་བསྒྱུར་ནས་གངས་ཅན་རིག་མཛོད་ཕུན་སུམ་ཚོགས་སུ་གཏོང་བར་ལག་རྗེས་ཕྲན་བུ་འཇོག་ཐུབ་རེ་དང་། སློབ་མ་ཚོར་ཡང་ལག་ལེན་གྱི་སྦྱོར་བརྡར་དང་ཡིག་སྒྱུར་གྱི་གྲུབ་འབྲས་ཕྲན་བུ་རེ་ཐོན་རེས་བསྐུལ་ནས་ལོ་ཤས་གོང་ནས་གྲོས་འགོ་བཏོན་ཀྱང་ཐོན་རིམ་མང་པོ་ཞིག་གིས་ལག་ལེན་ཐོག་མ་འཁྱོལ། འོན་ཀྱང་2018ལོར་ཐོན་གྱི་སློབ་མ་གཡང་ལགས（ལྷ་ས）དང་། གངས་ཅན་རིག་རྒྱལ（ཡུལ་ཤུལ）། གུ་རུ་འཚོ（ཨ་མདོ）བཅས་གསུམ་གྱིས་སློབ་འགོ་ཚུགས་མ་ཐག་ནས་ཁུར་དུ་བླངས་པ་མ་ཟད། དཀའ་སྤྱད་སྙིང་རུས་ཆེན་པོས་ལེགས་བཤད་༣༠༠ནང་ནས་མང་ཆེ་བ་ཡིག་སྒྱུར་གྱི་བྱ་བ་ལེགས་སྒྲུབ་བྱས་པས་ཁོ་བོ་ལ་ཡང་ཞུས་དག་གི་ངལ་བ་དང་དུ་བླངས་ནས་དཔེ་སྐྲུན་བྱ་རྒྱུའི་སེམས་ཤུགས་བརྙེས། ལོ་འདིའི་ནང་བར་གསེང་མང་ཆེ་བ་སྤྱད་དེ་ཞུས་དག་དང་བཟོ་བཅོས་བགྱིས་པ་དང་། ལྷག་དོན་དུ་རྒྱལ་སྟོན་གྱི་ངལ་གསོའི་རིང་ཁང་ཁྱིམ་གྱི་སྒོ་མ་དོན་པར་མཐའ་ཞུས་བཏང་སྟེ་ད་ཆ་གཞི་ནས་དཔེ་སྐྲུན་ཁང་དུ་སྤྱན་ཞུར་འབུལ་ལོ་ཙམ་བྱུང་བ་མ་ཟད། བོད་ལྗོངས་མི་དམངས་དཔེ་སྐྲུན་ཁང་ནས་དཔེ་སྐྲུན་གྱི་མཐུན་རྐྱེན་གནང་ནས་ལོ་ཤས་ཀྱི་འབད་བརྩོན་ཡང་དོན་ཡོད་པར་གྱུར་བས། སྐབས་འདིར་དཔེ་དེབ་འདིའི་ཡིག་སྒྱུར་དང་དཔེ་སྐྲུན་ཐད་རྒྱབ་སྐྱོར་དང་མཐུན་རྐྱེན་སྩོལ་མཁན་རྣམས་ལ་སྙིང་ཐག་པ་ནས་ཐུགས་རྗེ་ཆེ་ཞུའོ།།
ཡིག་སྒྱུར་སྐབས་བདག་གི་སློབ་མ་ཚོས་འབད་པ་ལྷུར་ལེན་དང་རང་ནུས་གང་ཡོད་བཏོན་ནའང་གཅིག་ནས་ཡོ་རོབ་པའི་རྩོམ་གཤིས་ཁ་དམ་པ་དང་། གཉིས་ནས་མ་ཡིག་གི་ཚིག་སྦྱོར་བྱིན་ཆགས་པ། གསུམ་ནས་སློབ་མའི་འཇིག་རྟེན་འཚོ་བའི་ཉམས་མྱོང་དབེན་པ། བཞི་ནས་དུས་ཚོད་ཐུང་ལ་སློབ་སྦྱོང་དང་དཔྱད་རྩོམ་འབྲི་བའི་ལས་འགན་ལྕི་བ་བཅས་ཀྱི་དབང་གིས་འགྱུར་ཡིག་ཞུས་དག་གཏོང་སྐབས་ཁོ་བོ་ལ་དཀའ་ངལ་མི་ཉུང་བ་འཕྲད་པ་དང་། བཟོ་བཅོས་ཆེ་ཙམ་བྱེད་དགོས་བྱུང་ནའང་ལེ་ལོ་དང་སྐྱོ་ངལ་གྱི་དབང་དུ་མ་བཏང་བར་དཀའ་བ་ཁྱད་དུ་བསད་ནས་དོན་སྐྱོན་དང་ཚིག་སྐྱོན་གང་ཡོད་ནན་ཏུར་གྱིས་བཅོས་རྗེས་སློབ་མ་ཚོར་བཟོ་བཅོས་རྒྱག་རྒྱུར་སྤྲད་པ་དང་། ཁོང་ཚོས་བཟོ་བཅོས་བརྒྱབ་ཟིན་རྗེས་ཁོ་བོས་སླར་ཡང་མཐའ་ཞུས་ཐེངས་གཅིག་བཏང་སྟེ་སྤུས་ཚད་འགན་ལེན་གང་ཐུབ་བྱས་ཡོད། འོན་ཀྱང་སློབ་མ་ཚོའི་ཆུ་ཚད་དོ་མི་སྙོམས་པ་དང་། སློབ་མ་སོ་སོའི་རྩོམ་གཤིས་ཉམས་འགྱུར་མི་འདྲ་བ། ཐ་ན་མདོ་དབུས་ཁམས་གསུམ་གྱི་སློབ་མའི་ཚིག་སྦྱོར་སྤེལ་སྟངས་དང་ཐ་སྙད་སྦྱོར་སྟངས་ཡང་མི་འདྲ་བ་བཅས་ཀྱི་ཁར། ཁོ་བོའི་ཆུ་ཚད་ལ་ཚད་བཀག་ཡོད་པ་དང་། ཞུ་དག་གི་དུས་ཚོད་དཀོན་པ་བཅས་ཀྱི་དབང་གིས་ད་དུང་ཡང་དོན་སྐྱོན་དང་། ཚིག་སྐྱོན། ཉམས་འགྱུར་ཆ་མི་སྙོམས་པ་བཅས་ཀྱི་སྐྱོན་ཡོད་ངེས་ན་རྒྱ་ཆེའི་ཀློག་པ་པོ་རྣམས་ལ་བཟོད་གསོལ་ཞུ་བ་དང་། སླད་མར་མུ་མཐུད་ལེགས་བཅོས་ཀྱིས་མ་རྩོམ་ལ་ངོ་མི་གནོང་བའི་འགྱུར་མ་སྤུས་དག་ཅིག་ཏུ་བརྩོན་ལེན་བྱ་ཕྱིར་དགོངས་འཆར་ལྷུག་སྩོལ་ཡོད་པ་མཁྱེན། མཁྱེན། ཞེས་སྤྱི་ལོ་ 2017 ལོའི་ཟླ་12 པར་ལྷ་ལྡན་པའི་དག་པའི་ཞིང་གི་རང་སྤྱིལ་དགའ་བའི་ལྡིང་ཁང་ནས་སུག་བྲིས་སུ་བགྱིས་པ་དགེ།
