པད་མ་ཆོས་སྒྲོན། ལྷོ་ཁ།
འཛམ་གླིང་གཙུག་ཕུད་ཆེན་མོའི་གངས་ལྗོངས་ཕང་བའི།
བོད་མིའི་འབྱུང་ཁུངས་སྨྲ་བའི་ཡུལ་ཡར་མོ་ཀླུང་ཆེན།
རྟེན་གསུམ་གནས་གསུམ་ཆགས་ཡུལ་ལྷོ་གནས་སྐྱིད་མོ།
ཕ་སྤྲེལ་རྒན་དང་མ་བྲག་སྲིན་གཉིས་ཀྱི་གཏམ་རྒྱུད་གླེང་ས།
ཐུ་བྷོད་བཙན་པོའི་རྟ་ཕོའི་རྨིག་རྗེས་བཅག་པའི་ངའི་ཕ་ཡུལ།
ལོ་རྒྱུས་སྨྲ་བའི་མཆུ་རྩེར་བསྐོན་པའི་གནའ་བོའི་ཐུ་བྷོད་ས་མཐོ།
དག་ཞིང་དུ་སིམ་མེར་གནས་པའི་བཙན་པོའི་བརྗིད་རྔམ་གྱི་བང་སོ།
ཡུལ་བསྐོར་བའི་པར་ཆས་ལ་འཁུན་སྒྲ་དབེན་པའི་གནའ་བོའི་མཁར་གྲོང་།
དད་ལྡན་སེར་སྐྱའི་རེ་བ་དང་དད་པས་བསྒོམ་པའི་གནས་རྙིང་ཕོ་བྲང་།
བཙན་པོའི་དཔའ་མཛངས་རྟུལ་བཞུགས་ལས་རབ་ཏུ་བསྐྲུན་པའི་འཕྱིང་བ་སྟག་རྩེ།
ལོ་རྒྱུས་ཀྱི་གླེགས་བམ་ངོས་སུ་གསལ་ལེར་བཞུགས་པའི་རྗེ་བོའི་མཛད་རྣམ།
གང་ལྟར་ནའང་།
མཐའ་ཀླས་པའི་ས་ཆེན་འདིར་གྲགས་པས་ཕྱུག་པའི།
ངའི་ཐུ་བྷོད་ཀྱི་གནའ་གྲོང་འཕྱོངས་རྒྱས།
ཁྱེད་ལ་ཡབ་མེས་བཙན་པོའི་བཀའ་གདམ་ངོམས་སུ་ཆོག་པ་ཡོད།
དེ་བས།
དུས་རབས་ཀྱི་སྣེ་མོ་གང་ཞིག་ནས་ཀྱང་།
ལོ་རྒྱུས་ཀྱི་རྡོ་རིང་མི་འདྲ་བ་ཞིག་བཞེངས་ཡོད།
གནའ་གྲོང་ལགས།
ལོ་རྒྱུས་ཀྱི་ཤོག་ལྷེའི་ངོས་ཟུར་ཞིག་གི་ནང་དུ།
ཁྱེད་ནི་བཙན་པོའི་རྣམ་དཔྱོད་ཀྱི་དན་རྟགས་བཞིན་བཞུད་ཟིན་སོང་།
དེང་གི་འཕེལ་རྒྱས་རླུང་རླབས་གཡོ་བའི་བར་གསེང་ན།
ཁྱེད་ནི་སླར་ལྷོད་ཀྱིས་འགྱིང་ཞིང་རྔམ་པར་གནས།
གནའ་གྲོང་ལགས།
ཁྱེད་ནི་མེ་ལོང་བཞིན་དུ་སྣང་།
འཕུར་མཆོངས་ལས་འཕྱོངས་རྒྱས་ཀྱི་བྱད་བཞིན་གསལ་བོར་མངོན་བྱུང་།
དེ་རིང་འཕྱོངས་རྒྱས་ཀྱི་ནམ་མཁའ་ཤིན་ཏུ་དག་ཁར།
འཕྱོངས་རྒྱས་ཀྱི་ས་གཞི་ཡང་སྔར་བས་ཡངས།
དེ་བས།
འཕྱོངས་རྒྱས་ཀྱི་ཡུལ་མི་རྣམས་སྤྲོ་བས་མྱོས་ཏེ་འཚོ་བའི་གར་ལ་རྩེན་བཞིན་འདུག