ཡིན་པ་ལྟར་དུ་ད་ལྟའང་གཙང་གི་ས་སྐྱའི་ཆོས་སྡེ་ལྷོའི་ངོ་མཚར་སྤྲུལ་པའི་ལྷ་ཁང་ཆེན་མོའི་ཐོག་སྟེང་དུ་གསེར་ཟངས་ལས་གྲུབ་པའི་དགོན་རྟགས་རྨ་བྱ་ཁ་སྤྲོད་འདི་ཉིད་མཇལ་རྒྱུ་ཡོད་པ་ཡིན། དེས་ན་འདི་ལ་ད་ལྟའི་བར་དུ་མི་ལོ་བདུན་བརྒྱ་དང་ལྔ་བཅུ་ལ་ཉེ་བའི་ལོ་རྒྱུས་ཡོད་པ་ཡིན། འཇམ་མགོན་ས་སྐྱ་པཎྜི་ཏ་དབུས་ཕྱོགས་སུ་ཡུན་རིང་བཞུགས་སྐབས་རབ་བྱུང་བཞི་པའི་ཤིང་ལུག་1235ལོའི་བོད་ཟླ་གསུམ་པའི་ཚེས་དྲུག་ཉིན་ཆོས་ཀྱི་རྒྱལ་པོ་འཕགས་པ་རིན་པོ་ཆེ་ངམ་རིང་ཀླུ་ཁང་དུ་སྐུ་འཁྲུངས་པའི་གཏམ་སྙན་འབུལ་མཁན་བྱུང་དུས་ཆོས་རྗེ་བཞུགས་སའི་ལྷོ་ཁ་ཡར་ཀླུངས་ཁོག་ཕོ་བྲང་ཡུམ་བུ་བླ་མཁར་གྱི་དྲུང་དུ་དཔལ་ལྡན་ས་སྐྱ་པཎྜི་ཏའི་གཏམ་སྙན་བཞུགས་ཁྲིར་གྲགས་པ་རིག་གསར་སྐབས་གཏོར་བཤིགས་བཏང་བ་ཕྱིས་མེ་བྱི་1996ལོར་དཔལ་ནཱ་ལེནྡྲའི་མཁན་པོ་བྱམས་པ་ཚུལ་ཁྲིམས་རྒྱལ་མཚན་གྱིས་སྔར་བཞིན་བསྐྱར་བཞེངས་གནང་བའི་ཐོག་ཁ་ལ་ཡང་གྱོ་མོའི་རྒྱ་ཕིབས་དང་གསེར་ཟངས་ལས་གྲུབ་པའི་གཉྫི་ར་དང་རྨ་བྱ་ཁ་སྤྲོད་ཀྱིས་བརྒྱན་པ་ཞིག་བཞེངས་མཛད་ཡོད་པ་དང་། སྔོན་མར་ཚར་ལུགས་ཀྱི་གདན་ས་ཆེན་པོ་ཤྲཱི་ནཱ་ལེནྡྲ་སྟེ་དཔལ་རྒྱུན་གྱི་དབང་པོའི་ཆོས་གྲྭ་ཆེན་མོ་ན་བཞུགས་པའི་ཀུན་མཁྱེན་ཆོས་ཀྱི་རྒྱལ་པོ་རོང་སྟོན་སྨྲ་བའི་སེང་གེ་ཤཱཀྱ་རྒྱལ་མཚན་གྱི་ཆོས་ཁྲིའི་སྟེང་ཐོག་ཏུ་ཡང་གསེར་ཟངས་ཀྱི་གཉྫི་ར་དང་རྨ་བྱ་ཁ་སྤྲོད་ཅིག་ཡོད་དོ། །
རྨ་བྱ་གཉིས་ཀྱིས་གཉྫི་རའི་རྩེ་མོར་བློ་རྩེ་གཅིག་པས་བལྟ་བས་ནི། ཕྱི་ནང་གི་གྲུབ་མཐའ་འཛིན་པའི་གང་ཟག་སུ་འདྲ་ཞིག་ཡིན་ཡང་རུང་སྟེ། མཐར་ཐུག་བྱང་ཆུབ་ཆེན་པོ་ལ་དམིགས་པར་མཚོན་པའོ། །ཡང་མདོ་སྨད་ལུགས་བརྒྱའི་འབྱུང་གནས་དཔལ་སྡེ་དགེ་ལྷུན་འགྲུབ་སྟེང་གི་ཆོས་གྲྭ་ཆེན་པོ་ན་སྡེ་དགེའི་བུ་རིན་པོ་ཆེ་ཞེས་འབོད་པའི་སྡེ་དགེའི་ཁྲི་རབས་དྲུག་པ་རྒྱལ་བས་ལུང་གིས་བསྔགས་པའི་བསྟན་པའི་སྦྱིན་བདག་ཆེན་པོ་ཆོས་རྒྱལ་བསྟན་པ་ཚེ་རིང་མཆོག་གིས་རབ་བྱུང་བཅུ་གཉིས་པའི་ས་བྱ་1729ལོར་སྡེ་དགེའི་པར་ཁང་ཆོས་མཛོད་ཆེན་མོ་གསར་བཞེངས་གནང་སྐབས་ཐོག་ཁ་ལ་གསེར་ཟངས་ལས་གྲུབ་པའི་རྨ་བྱ་ཆོས་འཁོར་ཞིག་བཙུགས་ཡོད་ཅིང་། ཡང་ཆོས་རྒྱལ་མཆོག་གིས་སྔོན་སྡེ་དགེའི་ཁྲི་རབས་དང་པོ་སྟོབས་ཀྱིས་འཁོར་ལོས་བསྒྱུར་བའི་བླ་ཆེན་བྱམས་པ་ཕུན་ཚོགས་ཀྱིས་རབ་བྱུང་བཅུ་པའི་མེ་འབྲུག་1616ལོར་གསར་དུ་བཞེངས་པའི་སྤྲུལ་པའི་ལྷ་ཁང་ཆེན་པོ་བསམ་འགྲུབ་མཐོང་གྲོལ་ཆེན་མོ་ལ་ཡང་གསེར་འཕྲུ་རྒྱ་ཕིབས་དང་གསེར་གྱི་རྨ་བྱ་ཆོས་འཁོར་བཅས་འཛུགས་པར་མཛད་ཅིང་། དེ་ལྟར་ན་རྨ་བྱས་ས་སྐྱའི་ཕ་ཆོས་གསུང་ངག་ལམ་འབྲས་མཚོན་ཚུལ་གོང་གསལ་ལྟར་ལ། ཆོས་འཁོར་གྱི་གྲུབ་ཆ་གཙོ་བོ་གསུམ་སྟེ། འཛིན་བྱེད་ཀྱི་ལྟེ་བ་དང་། གཅོད་བྱེད་ཀྱི་རྩིབས། སྡུད་བྱེད་ཀྱི་མུ་ཁྱུད་གསུམ་གྱིས་སྟོན་པ་སངས་རྒྱས་ཀྱིས་རིགས་ཅན་གསུམ་གྱི་གདུལ་བྱ་ལ་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བ་དང་གཞན་ཡང་བརྗོད་བྱ་ཚུལ་ཁྲིམས་ཏིང་འཛིན་ཤེས་རབ་བཅས་བསླབ་པ་རིན་པོ་ཆེ་རྣམ་པ་གསུམ་དང་། རྗོད་བྱེད་འདུལ་བ་མདོ་སྡེ་མངོན་པ་བཅས་སྡེ་སྣོད་རིན་པོ་ཆེ་རྣམ་པ་གསུམ་ཡང་མཚོན་པར་ཤེས་དགོས་སོ། །
རྨ་བྱ་ཁ་སྤྲོད་གནས་པས་ནི། །ཐབས་ཤེས་ཟུང་དུ་འཇུག་པ་ཡི། ལམ་མཆོག་འཁྲུལ་མེད་ལ་བརྟེན་ནས། མཆོག་གི་དངོས་གྲུབ་ཐོབ་པར་མཚོན། །གཡས་གཡོན་རྨ་བྱ་ཟུང་གཅིག་གིས། གཉྫིའི་རྩེ་མོར་བལྟ་བས་ནི། །གྲུབ་མཐའ་འཛིན་པ་སུ་ཡིན་རུང་། །མཐར་ཐུག་བྱང་ཆེན་དམིགས་པར་མཚོན། །མདོ་སྨད་སྡེ་དགེའི་རྒྱལ་ཁབ་ཏུ། ཆོས་རྒྱལ་བསྟན་པ་ཚེ་རིང་གིས། པར་ཁང་ཆོས་མཛོད་ཆེན་མོ་དང་། །སྡེ་དགེའི་བླ་ཆེན་གྱིས་བཞེངས་པའི། བསམ་འགྲུབ་མཐོང་གྲོལ་ཆེན་མོ་རུ། །རྨ་བྱ་ཆོས་འཁོར་འཛུགས་པར་མཛད། །འདི་ཡི་མཚོན་དོན་གཞན་འདྲ་ལ། །ཆོས་ཀྱི་འཁོར་ལོའི་གྲུབ་ཆས་ནི། །ས་གསུམ་ཟླ་མེད་སྟོན་པ་དེས། །རིགས་གསུམ་གདུལ་བྱའི་ཚོགས་རྣམས་ལ། བསླབ་གསུམ་རིན་ཆེན་བརྗོད་བྱ་དང་། །སྡེ་གསུམ་རྗོད་བྱེད་བྱས་པ་ཡི། །ཐེག་གསུམ་ཆོས་འཁོར་བསྐོར་བར་མཚོན། །ས་དགོན་སྤྱི་ཡི་མཚོན་རྟགས་འདི། །ས་སྐྱའི་དགོན་ཆེན་ཙམ་མིན་པར། །ས་དགོན་གཞན་དང་གཞན་དག་ལའང་། །ས་ཁྱབ་རྡོ་ཁྱབ་འགྱུར་བར་སྨོན། ཚུལ་འདི་མང་པོས་བསྐུལ་བ་བཞིན། །རབ་བརྟན་དགེ་ལེགས་ཕུན་ཚོགས་པས། །མེ་བྱ་ནག་ཟླའི་ཚེས་བཅུ་ལ། །ལྷུན་འགྲུབ་སྟེང་ནས་འཕྲལ་བྲིས་དགེ །