ཡིག་མཁན་དགེ་བཤེས་ཁལ་ཁ་བློ་བཟང་རྒྱལ་མཚན་མཆོག་ཁོང་མཚམས་སྦྱོར་མདོར་བསྡུས།
གཙང་ལྗོངས་གདན་ས་ཆེན་པོ་བཀྲ་ཤིས་ལྷུན་པོ་དགོན་པའི་ཡིག་མཁན་དགེ་བཤེས་ཁལ་ཁ་བློ་བཟང་རྒྱལ་མཚན་མཆོག་ནི། ༡༩༩༠ ལོར་ཕ་ཡུལ་གཞིས་རྩེ་གྲོང་ཁྱེར་རྣམ་གླིང་རྫོང་ཨེ་མར་ཤང་ཉུག་ཁལ་ཁ་བླ་བྲང་དུ་རིགས་རུས་ཕུན་སུམ་ཚོགས་པའི་རྒྱུད་དུ་འཁྲུངས། ཆུང་དུས་ནས་ཕ་ཡུལ་གྱི་སློབ་གྲྭ་ཆུང་འབྲིང་ཁག་ནས་སློབ་ཐོན་བྱས། ༢༠༠༣ལོར་ཚེ་སྔོན་གྱི་ལས་སྨོན་རྟེན་འབྲེལ་བཟང་པོས་མཚམས་སྦྱར་ནས་གདན་ས་ཆེན་པོ་བཀྲིས་ལྷུན་པོར་གྲྭ་བཞུགས་གནང་། ཁོང་རང་གི་གཅེན་པོ་གཙང་བླ་བློ་བཟང་མཁས་གྲུབ་རྒྱ་མཚོ་མཆོག་ཤག་གི་དགེ་རྒན་དུ་བསྟེན་ནས་གདན་སའི་འདོན་གདངས་དབྱངས་ལ་སོགས་པའི་ཞལ་འདོན་ཆོས་སྤྱོད་ཀྱི་གསུངས་སྲོལ་རྣམས་དང་ལམ་རིམ་བློ་སྦྱོང་།
ལོ་རྒྱུས་སོགས་ཐུན་མོང་རིག་གནས་སྤྱི་དང་། གདན་སའི་མཚན་ཉིད་གྲྭ་ཚང་གི་དགེ་བའི་བཤེས་གཉེན་ཆེན་པོ་བཞད་པ་དཀའ་ཆེན་བློ་བཟང་ཐུབ་བསྟན་དབང་འདུས་མཆོག་གི་སྐུ་མདུན་ནས་བསྡུས་གྲྭ་དང་། རྣམ་འགྲེལ། ཕར་ཕྱིན། དབུ་མ་ལ་སོགས་པའི་གཞུང་ཆེན་བཀའ་པོད་རྣམས་ལྔར་ཐོས་བསམ་གནང་མུས་དང་། གསང་སྔགས་རྒྱུད་པ་གྲྭ་ཚང་གི་དུས་འཁོར་སློབ་དཔོན་ཆེན་པོ་བསྟན་འཛིན་འཕྲིན་ལས་ལགས་ཀྱི་སྐུ་མདུན་ནས་གསང་བདེ་འཇིགས་གྱི་གཙོས་རྒྱུད་སྡེ་བཞིའི་བསྐྱེད་རྫོགས་དང་། ཕྱག་བརྒྱ། དཀྱིལ་འཁོར་ཐིག་རྩ་ལ་སོགས་པ་གསན་སྦྱངས་དང་། བཀྲས་ལྷུན་དགོན་པའི་མཁན་ཆེན་རྡོ་རྗེ་འཆང་༧རྗེ་བཙུན་རྡོ་རྗེ་རྒྱལ་མཚན་དཔལ་བཟང་པོའི་སྐུ་མདུན་ནས་མདོ་སྔགས་ཀྱི་དབང་ལུང་མན་ངག་སོགས་པ་ལ་གསན་བསམ་དང་། བཀྲས་དགོན་རྩེ་སློབ་གྲྭའི་ཡིག་རྒྱུན་འཛིན་པ་རྒན་ལྷ་ཁང་བློ་བཟང་རྡོ་རྗེ་ལགས་ཀྱི་སྐུ་མདུན་ནས་ཚུགས་ཆེན། ཚུགས་ཆུང་། འཁྱུག་ཡིག་ལ་སོགས་པའི་རྩེ་སློབ་གྲྭའི་ཡིག་རྒྱུན་དང་སུམ་རྟགས་དག་གསུམ་སོགས་ལ་ལེགས་པར་སྦྱངས། གཞན་ཡང་ཁོང་རང་གི་ཕུལ་དུ་བྱུང་བའི་རྣམ་དཔྱོད་ལ་བརྟེན་ནས་ཨ་ལགས་ཚེ་བརྟན་ཞབས་དྲུང་ཚང་གི་ལན་ལྦར་དང་ཧོར་ཡིག་ དབྱངས་ལྡན་ཡིག་གསར། བློ་ལྡན་ཡིག་གསར་སོགས་དང་། དབུས་ཀྱི་ཡིག་མཁན་རྒན་བསྟན་འཛིན་ལགས་ཀྱི་འཁྱུག་ཡིག་དང་འདྲེན་འཁྱུག་གི་བྲིས་རྒྱུན་དང་། གཞན་ཡང་དབུ་ཅན་དང་འབྲུ་རྩ། དཔེ་ཚུགས། ལྡན་ཡིག ལྷ་འབབ་ཡེ་གེ་ སྨར་ཆེན་སྨར་ཆུང་ལ་སོགས་པའི་བོད་ཀྱི་ཡིག་རིགས་ལྔ་བཅུ་ལྷག་ལ་སྦྱངས་པ་དང་རྒྱ་ཡིག་ཡིག་གཟུགས་དང་ལྷ་སྐུ་ཐིག་རྩ་དང་སྣུམ་མཚོན་རི་མོ། ནག་བྲིས་སོགས་ལའང་སྦྱངས་པ་ཕུལ་ཕྱིན་གནང་། རྒྱལ་ནང་གི་ཧྲང་ཧེའེ་གྲོང་ཁྱེར་སོགས་ནས་གདན་ཞུ་བྱས་ནས་བོད་ཀྱི་རིག་གནས་སྤྱི་དང་ཡིག་གཟུགས། ནང་ཆོས་སོགས་ཀྱི་བསྐོར་ལ་གཏམ་བཤད་ཀྱང་གནང། ཁོང་གི་ཡིག་གཟུགས་བརྩམས་བྱ་ཀྲུང་གོ་རྟེན་རྫས་བཤམས་མཛོད་ཁང་དང་ཧྲང་ཧེའེ་བཤམས་མཛོད་ཁང་ལ་སོགས་པས་ཉར་ཚགས་དང་། ཁུལ་དང་གྲོང་ཁྱེར་རིམ་པའི་བྱ་དགའ་ཡང་གང་མང་ཐོབ། ཁོང་གི་མདོ་དབུས་ཁམས་གསུམ་གྱི་སྨྱུག་འཛིན་པ་དང་ཡིག་གཟུགས་དོན་གཉེར་ཅན་མང་པོ་ལ་དངོས་དང་དྲྭ་ལམ་ཅི་རིགས་བརྒྱུད་ནས་ཡིག་གཟུགས་ཀྱི་བཀའ་སློབ་འཛུབ་འཁྲིད་སོགས་གནང་ནས་༧ཀུན་གཟིགས་བཅུ་པ་ཆེན་པོའི་བཀའ་དགོངས་ལྟར་ལྷག་བསམ་རྣམ་དག་གི་བོད་ཀྱི་རིག་གནས་འཛིན་སྐྱོང་སྤེལ་བའི་མཛད་བཟང་བསྐྱངས། ད་ལྟ་ནི་གཙང་ལྗོངས་གདན་ས་ཆེན་པོ་བཀྲ་ཤིས་ལྷུན་པོའི་ཚོགས་ཆེན་དབུ་མཛད་ཀྱི་ཐུགས་འགན་བཞེས་ནས་བསྟན་པ་དང་མི་རིགས་ཀུན་ལ་རྨད་བྱུང་གི་མཛད་རྗེས་འཇོག་དང་འཇོག་མུས་སུ་མཆིས།།
ཅེས་རྒན་མཆོག་གི་སློབ་བུ་སྨྱུག་འཛིན་པ་ཨ་ནུ་ཚ་བོས།
གཤམ་དུ་ཡིག་མཁན་དགེ་བཤེས་ཁལ་ཁ་བློ་བཟང་རྒྱལ་མཚན་མཆོག་ཁོང་གི་ཕྱག་བྲིས་བརྩམས་ཆོས་ལ་གཟིགས་པ་ཞུ།
(དང་པོ་རྒན་ལགས་ཀྱི་མོའི་བརྩམས་ཆོས།)
(གཉིས་པ་རྒན་ལགས་ཀྱི་ཡིག་གཟུགས་བརྩམས་ཆོས།)
