འབྲོམ་སྟོན་པ་རྒྱལ་བའི་འབྱུང་གནས་ཀྱིས་ཡུལ་སྟོད་གུང་ཐང་དུ་སྐུ་བལྟམས་པའི་བཀའ་དྲིན་ཅན་གྱི་ལོ་ཙཱ་བ་ནག་ཚོ་ཚུལ་ཁྲིམས་རྒྱལ་བ་ལ། འགྲོ་ཆོས་སུ་མི་ཆོས་གནད་ཀྱི་ཕྲེང་བ་འདི་གདམས་པའོ། དེ་ལ་སྙེ་ཐང་འོར་ནས་གཞུ་འདོམ་ཉི་ཤུ་རྩ་ལྔའི་བར་སྐྱེལ་ཐུང་མཛད་དེ། གཅིག་གི་ཕྱག་ལ་གཅིག་འཇུས་ནས་འབྲལ་མི་ཕོད་པའི་ཚོད་ཙམ་དུ་སྙིང་གཏམ་སྒྲོས་སུ་གླེང་བ་ན། གུང་ཐང་པ་ན་རེ། ཁྱེད་སྙིང་གི་པདྨའི་ཟེའུ་འབྲུ་ལ་རྟག་ཏུ་འབྲལ་བ་མེད་ཀྱང་། བོད་མ་དག་པ་རྣམས་ཀྱི་བློ་ངོ་ལ་ཧ་ཅང་མཐུན་ཆེ་བར་བསྟན་མོད། འོན་ཀྱང་སྙིང་གཅིག་ཏུ་བཞུགས་པའི་བྱ་བ་ལ་ལས་ཐབས་བཟང་པོ་བྱས་པས་མི་འགྱོད།དུས་དེ་རིང་ཐག་རིང་བལ་པོའི་ཐང་ལ་འགྲོ་བར་ཆས་པ་ལ་སེམས་ལ་ཕན་པའི་འགྲོ་ཆོས་ཤིག་ཞུ་བར་འཚལ་ཏེ། དེ་ཡང་ཕྱི་མའི་ལག་ལེན་རྣམས་དེ་ཙམ་གྱིས་གོ གནས་སྐབས་ཚེ་འདིའི་འགྲོགས་ལུགས་འཇིག་རྟེན་མིའི་མཐུན་འཇུག འཕྱས་བཟླས་མཁན་རྣམས་ཀྱིས་སྨད་པར་མི་ནུས་པའི་ཆོས་ཤིག་སྙིང་ལ་གཟེར་བ་ཞུ། ཞེས་ཞུས་པ་དང་། འབྲོམ་རྗེ་ཞལ་འཛུམ་པའི་མདངས་དང་བཅས་ནས། དབུ་སྐྲ་ལྕང་ལོ་ཅན་དབུ་རང་གིས་སྤྲུགས་ཏེ་རྒྱབ་ཏུ་བསྐྱུར་ནས་བསླབ་བྱ་འདི་གསུངས་པར་གྲགས་སོ། །
རྩོམ་པ་པོ།
འབྲོམ་སྟོན་པ་རྒྱལ་བའི་འབྱུང་གནས།
ཁོ་བོས་བྱང་གི་ཕྱོགས་ནས་གཙོ་བོའི་བུ། །
ཁོ་བོས་ས་མཐའ་བསྐོར་བས་མཐོང་མ་མྱོང༌། །
གནའ་གཏམ་མང་དུ་ཐོས་པས་བཤད་པ་ཚང་། །
ཡིན་མིན་མགོ་ལྟག་ཕྱེད་པས་གྲུང་བོར་གྲགས། །
གནས་དང་ཕྱོགས་རྣམས་གང་དུ་འགྲོ་ཡང་རུང༌། །
གཞི་དང་གནས་མལ་གང་དུ་བྱེད་ཀྱང་རུང༌། །
གྲོགས་དང་འགྲོགས་ལུགས་སུ་ལ་འཚོལ་ཡང་རུང༌། །
གཞན་དང་བསྟུན་པ་མི་ཆོས་རྩ་བ་ཡིན། །
དེ་ཡི་སྟེང་ནས་འདུན་མ་བཤད་ཀྱི་ཉོན། །
བྱ་བྱེད་ཡོངས་ཀྱི་མགོ་ལྟག་ཕྱེ་ཡི་ཉོན། །
ལྷ་ཞི་ཀླུ་ཞིའི་གདམས་པ་བཤད་ཀྱི་ཉོན། །
ཆོས་ལ་མི་ཆོས་ཟབ་པ་འདི་ལྟར་ལེགས། །
སུ་ཡི་དོན་དུ་དཀའ་སྤྱད་བྱེད་ན་ཡང༌། །
བྱ་ཤེས་ཀོ་ལོང་སྡུག་ཡུས་ཆུང་བར་མཛོད། །
ལས་དང་བྱ་བ་ཇི་ལྟར་བྱེད་ན་ཡང༌། །
མཛད་སྤྱོད་ཐམས་ཅད་མི་དང་མཐུན་པར་མཛོད། །
རང་ལ་ཡོན་ཏན་ཇི་ཙམ་ཡོད་ན་ཡང༌། །
གཞན་ལ་ཁྱད་གསོད་བརྙས་པ་ཆུང་བར་མཛོད། །
རང་ཉིད་ནོར་ལ་ཆགས་ཞེན་ཆེ་ན་ཡང༌། །
གཞན་གྱི་ནོར་ལ་ཧབ་ཤ་ཆུང་བར་མཛོད། །
རང་ཉིད་ལས་ཐབས་འདུན་མ་མཁས་ན་ཡང༌། །
སྤྱི་ཡི་ཁྲིམས་ལ་ས་ཆོད་ཆུང་བར་མཛོད། །
རང་ཉིད་བསགས་པའི་ནོར་རྫས་ཡིན་ན་ཡང༌། །
མང་པོའི་གསེབ་ཏུ་ལྐོག་ནོར་ཆུང་བར་མཛོད། །
རང་ཉིད་ཀུན་གྱིས་ཚད་མར་ཁུར་ན་ཡང༌། །
ངའོ་སྙམ་པའི་ང་རྒྱལ་ཆུང་བར་མཛོད། །
རང་ཉིད་ཀུན་ལས་ཁྱད་པར་འཕགས་ན་ཡང༌། །
ཆེ་བའི་ང་རྒྱལ་ཅུང་ཟད་མེད་པར་མཛོད། །
རང་ཉིད་དགེ་བའི་བཤེས་སུ་གསོལ་ན་ཡང༌། །
མཁས་དམན་ཀུན་ལ་བརྙས་པ་ཆུང་བར་མཛོད། །
རང་གི་གོང་ན་ཆེ་བ་གཞན་མེད་ཀྱང༌། །
འོག་ཏུ་ཞུགས་ལ་འཇུག་པ་བདེ་བར་མཛོད། །
གཞན་གྱི་ཚོགས་དཔོན་ཇི་ལྟར་ངན་ན་ཡང༌། །
གུས་པའི་ཚུལ་གྱིས་ཕྱག་དང་ཕྱག་ལན་མཛོད། །
རང་དང་མཉམ་པའི་གང་ཟག་སུ་བྱུང་ཡང༌། །
མགོ་ཡང་མཐོ་བའི་བཀུར་སྟི་གུས་པར་མཛོད། །
མཛེ་སྤྲང་ལ་སོགས་སུ་ཡིས་ཆོས་ཞུས་ཀྱང༌། །
ཀུན་གྱི་དབུས་སུ་གདམས་ངག་ལྷུག་པར་སྟོན། །
གལ་ཏེ་མཐོ་འཚམས་ཁ་ཚོད་ལྟ་ན་ཡང༌། །
ཧ་ཅང་ཕུལ་དུ་ཕྱིན་པས་ལྷག་པར་སྟོན། །
ཚོགས་དང་བསྙེན་བཀུར་སོགས་ཀྱིས་མཆོད་འོས་ཀྱང༌། །
དེ་ལ་མ་ལྟ་ཀུན་ལ་ཐང་མོ་རྡོལ། །
ངེས་པར་གང་ལ་གསང་བར་འོས་པ་རྣམས། །
ལྐུགས་པའི་ཚུལ་གྱིས་ཁ་རོག་དབེན་སར་བཞུགས། །
དེ་ཡང་རགས་པ་སྤྱི་ཡི་རྣམ་གཞག་ཡིན། །
ད་དུང་སྙིང་གཏམ་ལགས་པས་གསན་མཛོད་དང༌། །
འགྲོགས་ལུགས་དགྲ་ལ་འཚོལ་དང་ཟབ་པ་ཡིན། །
སྙིང་གཏམ་བུ་ལ་གསོང་དང་བརྟན་པ་ཡིན། །
ཁ་འདོན་གྲེ་བར་བསྐྱིལ་དང་བཙུན་པ་ཡིན། །
མཚང་གཏམ་བར་དུ་གསོང་དང་མཁས་པ་ཡིན། །
གཞན་མཚང་ལྷོད་ལ་ཞོག་དང་དགེ་བ་ཡིན། །
བློ་གཏད་སྙིང་གིས་སྐྱོང་དང་ངོ་མཚར་ཆེ། །
སྙིང་གཏམ་ལགས་པས་ད་དུང་གསན་མཛོད་དང༌། །
འཕྲད་མ་ཐག་ཏུ་སྙིང་གཏམ་འཆད་པ་མཚང༌། །
མ་བརྟགས་པ་ལ་བློ་གཏད་བྱེད་པ་མཚང༌། །
བརྟགས་ནས་འཁྲུལ་ན་ད་རུང་བྱེད་པ་མཚང༌། །
བག་མེད་མི་ལ་བྱ་བྱེད་འཚོལ་བ་མཚང༌། །
ཤ་མི་ཚ་ལ་ཕུག་བསྲེ་ཆོལ་བ་མཚང༌། །
དད་པ་མེད་ལ་སློབ་མར་བསྟེན་པ་མཚང༌། །
སྙིང་རྗེ་མེད་ལ་བླ་མར་ཁུར་བ་མཚང༌། །
ཁྲེལ་གཞུང་མེད་ལ་གྲོགས་པོར་བསྟེན་པ་མཚང༌། །
མི་ཉན་པ་ལ་ཁ་ཏ་བྱེད་པ་མཚང༌། །
མི་ཤེས་པ་ལ་གྲོས་ཕུགས་འདྲི་བ་མཚང༌། །
མཚང་དུ་ཤེས་ནས་ད་རུང་མི་འདོར་ན། །
རང་ཉིད་སྨྱོན་པ་ཡིན་པར་ཤེས་པར་བྱ། །
སྙིང་གཏམ་ལགས་པས་ད་དུང་གསན་མཛོད་དང༌། །
བཟའ་བཏུང་ཟ་དུས་ཐམས་ཅད་བཀའ་སློབ་བདེ། །
ཞག་གསུམ་འགྲོགས་ནས་རང་མཚང་སྟོན་པ་མང༌། །
ཉེ་རིང་ཡོངས་ལ་ལོ་གཅིག་མ་བརྟེན་པར། །
བྱ་བྱེད་བཅོལ་ན་མྱུར་དུ་ནོངས་པར་འགྱུར། །
རང་ལ་བརྟེན་པའི་མཚང་གཏམ་ངན་པ་ཡིན། །
གཅིག་གི་སེམས་ལ་ཤར་ན་གཏོར་འགོང་ཡིན། །
གཏམ་དེ་གཉིས་ལ་གྲགས་ན་ཕུང་བྱེད་ཡིན། །
གསུམ་ལ་གྲགས་ན་གཏམ་ངན་རླུང་ཁྱེར་ཡིན། །
མི་མངོན་དབྱིངས་སུ་ཡལ་ན་མཁས་པ་ཡིན། །
ངག་མཚང་ཐབས་ཀྱིས་ཤེས་ན་གད་མོ་འཆོར། །
དགོས་པ་རང་གིས་བསུས་ན་བདུད་རིགས་དགའ། །
ཕུང་བྱེད་གྲོགས་སུ་བསྒྱུར་ན་མཚང་རེ་ཆེ། །
སྙིང་གཏམ་ལགས་པས་ད་དུང་གསན་མཛོད་དང༌། །
ཟས་ལ་ཞེན་པ་མ་ཆེ་མི་ལ་བྱིན། །
ནོར་ལ་སེར་སྣ་མ་ཆེ་ཆོས་ལ་མཆོད། །
བཞིན་ལ་འགྱུར་ལྡོག་མ་མང་འཛུམ་གྱིས་བསུས། །
དགྲ་ཟུན་བཤའ་རལ་མ་མང་སྤྱི་སྙོམས་སྟེན། །
འཁོར་ལ་བསྟོད་ར་མ་མང་བློ་ཁོག་སྡོམས། །
མྱུར་དུ་སྨད་ར་མ་མང་ཐབས་ཀྱིས་སྤོང༌། །
སུ་ལ་ཁས་ལེན་མ་མང་ལག་ལེན་སྐྱོངས། །
གང་ལའང་ཉེས་ཁ་མ་འདིང་གྲོས་ཁ་སྐྱེད། །
ཉེས་ན་འགྱོད་ཐལ་མ་བྱེད་ཕྱིས་འབྱུང་སྡོམས། །
སྙིང་གཏམ་ལགས་པས་ད་དུང་གསན་མཛོད་དང༌། །
སྡུག་ཁ་དགྲ་ཡི་གཡབ་མོ་ལེགས་པར་ཆོད། །
བྱ་མང་བྱུར་གྱི་སྣ་འདྲེན་ལེགས་པར་ཆོད། །
བློ་མང་འདུན་མའི་དཀྲུག་ཤིང་ལེགས་པར་ཆོད། །
གཤིས་ངན་དགྲ་བོའི་ཚོགས་པ་ལེགས་པར་ཆོད། །
རྣམ་རྟོག་སྡུག་འདྲེའི་ཕོ་ཁྲོམ་ལེགས་པར་ཆོད། །
འཁོར་ངན་གཏམ་གྱི་གཞི་མ་ལེགས་པར་ཆོད། །
གྲོགས་ངན་འགྱོད་པའི་རྩ་བ་ལེགས་པར་ཆོད། །
ཡུལ་ངན་སྡུག་གི་འཁོར་བ་ལེགས་པར་ཆོད། །
མི་ཆོས་རྐང་བའི་ཐི་གུ་ལེགས་པར་ཆོད། །
སྙིང་གཏམ་ལགས་པས་ད་དུང་གསན་མཛོད་དང༌། །
དུས་ངན་སྙིགས་མ་ལྔ་རུ་བདོ་བའི་དུས། །
ཆོས་པ་ཡོངས་ཀྱི་བགེགས་འདྲེ་ཆགས་སྡང་གནོད། །
གང་དུ་ཕྱིན་ཀྱང་ཆགས་སྡང་ཆུང་བར་མཛོད། །
ཇི་ལྟར་བགྱིས་ཀྱང་དམན་ཆ་བླང་བར་འཚལ། །
ཐག་རིང་བལ་བོའི་ཐང་ནི་ཚད་པ་ཆེ། །
ཁ་སྐོམ་བཏུང་བའི་ཚོགས་ལ་གཟབ་པར་འཚལ། །
ལ་སྟོད་ལྷོ་ཡི་ཕྱོགས་ནི་དགྲ་འཇིགས་ཆེ། །
ཞེ་སྡང་ངན་སྔགས་ཚོགས་ལ་གཟབ་པར་འཚལ། །
ཉང་ཤབ་བྱང་གི་ཕྱོགས་ནི་སྨྲེ་མཆུ་མང༌། །
ལོང་གཏམ་ཚིག་གི་ཚོགས་ལ་གཟབ་པར་འཚལ། །
པུར་རྒྱལ་བོད་ཀྱི་ཡུལ་ནི་ཁྲེལ་གཞུང་ངན། །
ཡིད་འབྱུང་ཁོང་ཁྲོའི་ཚོགས་ལ་གཟབ་པར་འཚལ། །
དེང་དུས་སྐྱེ་བོའི་ཚོགས་ནི་གསར་འགྲོགས་ཆེ། །
བསླུ་བྲིད་འཁོར་གྱི་ཚོགས་ལ་གཟབ་པར་འཚལ། །
སྙིང་གཏམ་ལགས་པས་ད་དུང་གསན་མཛོད་དང༌། །
ཡི་དམ་ལྷ་ལ་རེ་ལྟོས་མ་ཤོར་བར། །
དུང་ངན་མི་ལ་རེ་ལྟོས་ཆུང་བར་མཛོད། །
འགྲོགས་པའི་མི་ལ་ཁྲེལ་གཞུང་མ་ཆུང་བར། །
ལེགས་ཉེས་གང་ལ་བཤད་གཞུང་ཉུང་བར་མཛོད། །
དཀར་པོ་ཆོས་ལ་ཕྱི་བཤོལ་མ་འདིང་པར། །
དམ་པའི་ཆོས་ལ་སྦྱོར་བ་ཐོབ་པར་མཛོད། །
འདུན་མ་ཡོངས་ལ་སྐྱིད་འདོད་མ་ཆེ་བར། །
བླ་མའི་ཕྱོགས་སུ་སྒོམ་གསུམ་གུས་པ་མཛོད། །
མདོར་ན་མཐོ་བ་ཐམས་ཅད་ཞྭ་བཞིན་ཁུར། །
དམའ་བ་རལ་གྲིའི་སོ་བཞིན་ཀུན་ནས་སྐྱོངས། །
མཉམ་པ་རྨོས་དོར་བཞིན་དུ་དགའ་བར་འགྲོགས། །
བྱ་བ་གང་ལའང་རང་འདོད་ཆུང་བར་མཛོད། །
འདུན་མ་ཡོངས་ལ་སྤྱི་སྙོམས་ཆེ་བར་མཛོད། །
འདི་ལྟར་ཁྱོད་ལ་བསླབ་བྱ་གདམས་པ་འདི། །
བྱིའུ་སྒོ་ངའི་འདུ་ཤེས་མ་ཤོར་བར། །
ལེགས་བཤད་འདི་དག་ལ་ཉྩའི་ཡི་གེར་བཀོད། །
དབེན་པའི་གནས་སུ་ལྟད་མོ་ཆེ་བར་ལྟོས། །
ཡུན་དུ་བསྲིངས་ན་ཤིན་ཏུ་འཕྲོད་པར་གདའ། །
འདི་ནས་བཟུང་སྟེ་སྐྱེ་བ་ཐམས་ཅད་དུ། །
འཕྲིན་ལས་མཉམ་དུ་འགྲོ་བ་འདྲེན་བྱེད་ཅིང། །
ཀུན་ཏུ་བཟང་བོའི་སྨོན་ལམ་ཇི་ལྟ་བ། །
དགའ་བའི་སྨོན་ལམ་གཅིག་ཏུ་གདབ་པར་བགྱི། །
ཞེས་གསུངས་སོ།། །།
