རྩོམ་པ་པོའི་ལོ་རྒྱུས་མདོར་བསྡུས་ངོ་སྤྲོད།
རྩོམ་པ་པོ་བཙུན་མ་བློ་བཟང་བྱང་ཆུབ་བམ། དྲ་མིང་ཟླ་འོད་ལགས་ནི། ཕ་ཡུལ་གཙང་ལྗོངས་རིག་པའི་གནས་ཀྱི་ཆར་གཏོགས་ངམ་རིང་མདོག་གཞུང་གི་གྲོང་ཁུག་མདོག་ལྷོ་ཞེས་པའི་གྲོང་གསེབ་ཀྱི་ཞིང་ཁྱིམ་ཞིག་ཏུ་ཕ་དོན་གྲུབ་བཀྲ་ཤིས་དང་། མ་བློ་བཟང་གཉིས་ཀྱི་བུ་མོར་འཁྲུངས་ཤིང་། ཆུང་དུས་ཕ་མ་དང་ལྷན་དུ་ཞིང་ལས་སོགས་ཀྱིས་དུས་བཟང་འདས་པ་ལས། ཤེས་ཡོན་སློབ་སྦྱོང་གི་གོ་སྐལ་མ་ཐོབ། ཕྱི་ལོ་ ༢༠༠༡ ལོར་གཙང་གི་གདན་ས་ཆེན་པོ་བཀྲ་ཤིས་ལྷུན་པོའི་སྔགས་ཆེན་རིན་པོ་ཆེ་བློ་བཟང་ཆོས་གྲགས་མཆོག་གི་དྲུང་ནས་དགེ་ཚུལ་བསྒྲུབས། ཕ་མ་གཉིས་ཀྱི་དྲུང་ནས་དབུ་ཆེན་ཀློག་ལ་སྦྱངས་པ་གནང་བ་དང་། ཕྱི་ལོ་ ༢༠༠༡ ལོའི་ལོ་མཇུག་ཏུ་རྒྱ་གར་འཕགས་ཡུལ་དུ་བཙན་བྱོལ་གྱི་ལམ་བུར་ཞུགས་ཏེ་བཞུགས་སྒར་དྷ་རམ་ས་ལའི་བཙུན་དགོན་དགེ་ལྡན་ཆོས་གླིང་དུ་ཆོས་ཞུགས་ཀྱིས་བོད་ཀྱི་བརྡ་སྤྲོད་སུམ་རྟགས་དག་གསུམ་དང་། རིགས་ལམ། ཨིན་སྐད་སོགས་ལ་སློབ་གཉེར་གནང་།
ཕྱི་ལོ་ ༢༠༠༩ ལོར་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཡིག་རྒྱུགས་ཀྱི་ལམ་ནས་ཚུད་དེ་མཐོ་རིམ་རིག་གནས་རབ་འབྱམས་པའི་སློབ་མཐར་ཕྱིན། ས་རཱ་མཐོ་སློབ་ཏུ་སློབ་གཉེར་གནང་རིང་ཁོར་ཡུག་ཚོགས་པའི་ཁོངས་སུ་དང་བླང་གཙང་བཟོའི་ཕྱག་ལས་ལོ་གསུམ་གནང་བར་མ་ཟད། རིག་གནས་སྐབས་བཅུ་གཅིག་པའི་མཐར་ཕྱིན་འཛིན་གྲྭའི་རྒན་བདག་དང་། མཐར་ཕྱིན་ཆེད་དེབ། ཕྱིར་དྲན། ཞེས་པའི་རྩོམ་སྒྲིག་པའི་ཕྱག་ལས་ཀྱང་གནང་། སློབ་མཐར་ཕྱིན་མཚམས་ས་རཱ་མཐོ་སློབ་ཏུ་ལོ་གཅིག་རིང་དགེ་རྒན་ལས་རོགས་ཀྱི་ཞབས་ཞུ་བསྒྲུབས། བཙུན་དགོན་དགེ་ལྡན་ཆོས་གླིང་དུ་ཕེབས་རྗེས་སློབ་གཉེར་ལྷན་ཚོགས་ཀྱི་ཕྱག་ལས་ལོ་གཉིས་གནང་ཞིང་། ད་ལྟའི་ཆར་དགེ་བཤེས་མའི་ཡིག་རྒྱུགས་ལ་ཞུགས་མུས་བཅས་ཀྱི་ལོ་རྒྱུས་མདོར་བསྡུས་སོ།།
རྩོམ་པ་པོའི་ཐོག་མའི་གླེང་བརྗོད།
གུས་མོའི་ཆེད་དེབ་ཚོར་བ་རིས་སུ་ཕབ་པ། ཞེས་པ་འདི་ནི་སློབ་གཉེར་དང་ལས་ཀའི་ཞར་ཞོར་དུ་ཕྲད་པའི་སྤྱི་ཚོགས་འཚོ་བའི་ཁྲོད་ཀྱི་དགའ་སྡུག་གི་ཚོར་བ་ཐད་ཀར་བརྗོད་པ་ཤ་སྟག་ཡིན་པས། མིང་ཡང་ཚོར་བ་རིས་སུ་ཕབ་པ། ཞེས་དགའ་སྡུག་གི་ཚོར་བ་རི་མོར་བཀོད་པ་ལྟར་ལགས་ཤིང་། སྐབས་ལ་ལར་དགའ་སྐྱོའི་ཚོར་སྣང་མྱངས་པའི་མྱོང་བ་དངོས་དང་། ཡང་འགའ་ཞིག་ནི་ནང་ཆོས་ཀྱི་རྒྱབ་ལྗོངས་གསལ་བའི་རྩོམ་ཐུང་འགའ་ཡང་ཡིན་སྲིད། གང་ལྟར་མི་ལོ་བཞི་བཅུ་མ་ཟིན་ཙམ་གྱི་འཚོ་བའི་ནང་ཚེ་སྟོད་ཀྱི་བགྲང་བྱ་བཅོ་བརྒྱད་ནི་ཀ་ཁ་ངོ་མི་ཤེས་པའི་ཞིང་པའི་བུ་མོ་ཞིག་དང་། བར་གྱི་བགྲང་བྱ་བཅོ་བརྒྱད་ནི་མི་ཡུལ་ས་མཐར་གྱར་ཞིང་། ཡུལ་གྱར་གྱི་འཚོ་བའི་ཁྲོད་ནས་ཤེས་བྱ་རིག་པའི་གནས་འགའ་ཞིག་ལ་ཤི་འཐམ་རོ་འཐམ་བྱེད་བཞིན་པའི་བུ་མོ་ཞིག་ལ་མཚོན་ན། ཚོར་བ་རིས་སུ་ཕབ་པའི་དེབ་ཆུང་འདི་ནི་དཀའ་ཚེགས་དང་། སྡུག་རུས། གོ་སྐལ་བཟང་པོ་སོགས་བརྗེད་དཀའ་བའི་ལམ་འཕྲང་དུ་མ་བརྒྱུད་པའི་རྔུལ་ཆུའི་ཐིགས་པ་རེ་རེ་ཡིན་ཞེས་བརྗོད་ཆོག་ཅིང་། དེ་དག་ནི་བདག་གི་མི་ཚེ་འདི་དང་ཡང་ན་འབྱུང་འགྱུར་གྱི་ལོ་ཟླའི་ནང་དུ་བོར་བརླག་ཏུ་ཕྱིན་ན་ཧ་ཅང་ཕངས་བར་དོགས་ནས་གུས་མོས་བྲིས་པའི་རྩོམ་རྙོག་མང་པོའི་ཁྲོད་ནས་སྙན་རྩོམ་ཚོར་བའི་ཉིང་བཅུད་ནང་སྙན་རྩོམ་གྲངས་ ༡༠༩ དང་། ལྷུག་རྩོམ་ཚོར་བའི་སྣང་བརྙན་གྱི་ཁོངས་སུ་ལྷུག་རྩོམ་གྲངས་ ༢༣ བཅས་ཁྱོན་བསྡོམས་བཅད་ལྷུག་གཉིས་ཀྱི་རྩོམ་ཡིག་གྲངས་ ༡༣༢ དེབ་གཟུགས་སུ་བཀོད་པ་ཞིག་ཡིན།
ཞར་བྱུང་དུ་ཀློག་པ་པོ་རྣམས་ལ་དེབ་ཆུང་འདིས་དགའ་སྐྱོ་འདྲེས་མའི་ཚོར་སྣང་དང་། སེམས་གསོ་རེ་ཐོབ་ན་དེ་ནི་བདག་གིས་ཁྱེད་རྣམ་པར་ཕུལ་བའི་དྲན་རྟེན་ཡིན་པར་སྨོན། མཇུག་ཏུ། གུས་མོར་མི་ཚེའི་ཁ་ཕྱོགས་མ་ནོར་བར་སྟོན་པའི་ཕ་མ་གཉིས་དང་། ད་བར་ཤེས་རིག་གི་དཀྱིལ་འཁོར་ནས་མཇལ་བའི་དགེ་བའི་བཤེས་གཉེན་རྣམ་པ། པར་སྐྲུན་ཐོག་འགྲོ་གྲོན་གཏོང་མཁན་དབུས་གཙང་རིག་མཛོད། ལྷག་པར་དུ་སྔ་ཕྱི་བར་གསུམ་དུ་བཀའ་སློབ་ལམ་སྟོན་དང་དེབ་ཆུང་འདིའི་ཞུ་དག་དང་རྩོམ་སྒྲིག་གི་བྱ་བ་དེབ་གཟུགས་ཇུས་འགོོད་བཅས་གནང་མཁན་རྣམ་རྒྱལ་གྲྭ་ཚང་སློབ་གཉེར་ཁང་གི་སློབ་སྤྱི་རྒན་ཐུབ་བསྟན་ཡར་འཕེལ་མཆོག་ལ་སྒོ་གསུམ་གུས་པས་བཀའ་དྲིན་བླ་ལྷག་ཏུ་ཆེ་ཞེས་ཞུ་རྒྱུ་ཡིན། རྩོམ་པ་པོ་བཙུན་མ་བློ་བཟང་བྱང་ཆུབ་བམ་ཟླ་འོད་ཀྱིས་ཕྱི་ལོ་ ༢༠༡༩ ཟླ་ ༩ ཚེས་ ༡༩ ཉིན་བྲིས།
པར་སྐྲུན་གསལ་བཤད།
དེ་ཡང་རྩོམ་པ་པོ་བཙུན་མ་བློ་བཟང་བྱང་ཆུབ་བམ་ཟླ་འོད་ལགས་ཀྱིས་ཀློག་པ་ཐོས་བསམ་དང་། སྤོང་བ་བསམ་གཏན། བྱ་བ་ལས་ཀྱི་འཁོར་ལོ་དང་བཅས་པའི་ཞར་ཞོར་གྱི་དུས་ཚོད་ནམ་བྱུང་ལ་རྩོམ་འབྲི་གནང་བའི་དགའ་སྐྱོ་ཆགས་སྡང་དང་། བདེ་སྡུག་མངར་སྐྱུར་གྱིིི་ཚོར་བའི་སེམས་རིས་གསལ་བར་མཚོན་པའི་ཚོར་བ་རིས་སུ་ཕབ་པ་ཞེས་པའི་བཅད་ལྷུག་གཉིས་ཀྱི་རྩོམ་སྣ་བཅུ་ཕྲག་བཅུ་གསུམ་ལྷག་ཙམ་གྱིི་སྙན་རྩོམ་ཕྱོགས་བསྒྲིགས་འདི་ཉིད་པར་སྐྲུན་ཞུས་པའི་དགོས་དམིགས་གཙོ་བོ་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ལྡན་མི་སྣ་གསོ་སྐྱོང་བྱེད་དགོས་པའི་གལ་ཆེའི་བཀའ་སློབ་སྔ་ཕྱིར་ཕེབས་པའི་དགོངས་དོན་གྱི་ཆ་ཤས་སྒྲུབ་སླད་དང་གཅིག །གཉིས་ནས་འབྲེལ་ཡོད་རྩོམ་པ་པོས་དཀའ་བ་དང་བླང་དང་། ངལ་བ་ཁྱད་བསད་ཀྱིིས་རྩོམ་འབྲིའི་ལས་ལ་ཞུགས་པར་ལེགས་གསོལ་བསྔགས་བརྗོད་དང་། སླད་མར་ཡང་རྩོམ་འབྲིའི་ནུས་རྩལ་གོང་མཐོར་གཏོང་རྒྱུའི་སྐུལ་འདེད། གསུམ་ནས་རང་རིགས་ན་གཞོན་གཞན་རྣམས་ལའང་མིག་ལྟོས་བཟང་པོ་ཡོང་སླད་སོགས་སུ་དམིགས་ཏེ་དབུས་གཙང་རིག་མཛོད་ནས་པར་སྐྲུན་ཞུས་པ་ལགས་སོ།།
འདི་ནི་དབུས་གཙང་རིག་མཛོད་ནས་འདི་ལོར་པར་སྐྲུན་ཞུས་པའི་ཕྱག་དེབ་ཐོག་མ་དེ་ཡིན་ལ། ཕྱག་དེབ་ཐུགས་མཁོ་མཆིས་རིགས་རྣམས་ནས་རྩོམ་པ་པོར་འབྲེལ་བ་གནང་སྐྱོང་ཡོང་བ་ཞུ།
