༄༅། །སྤུན་མཆེད་བར་གྱི་འཛེམ་བྱ།
ས་གོང་དབང་འདུས།
བོད་མིའི་ཡུལ་སྲོལ་གོམས་གཤིས་ལ་ཕ་དང་བུ་མོའི་དབར་དང་། གཅེན་པོ་དང་གཅུང་མོའི་དབར། གཅུང་པོ་དང་གཅེན་མོའི་དབར། ཨ་ཞང་དང་ཚ་མོའི་དབར། སྲུ་མོ་དང་ཚ་བོའི་དབར། ཨ་ཁུ་དང་དབོན་མོའི་དབར། ཨ་ནེ་དང་དབོན་པོའི་དབར་ལ་སོགས་སྤུན་མཆེད་ཕོ་མོ་ཕན་ཚུན་བར་ངོ་ཚ་སྲུང་ནས་གཙོག་གཏམ་ཙམ་ལ་ཡང་འཛེམ་པ་བྱ་དགོས་པ་མ་ཟད། ངོ་ཚ་བའི་ལྟད་མོ་ཡང་མཉམ་དུ་ལྟ་སྲོལ་མེད། དཔེར་ན་གཉེན་སྒྲིག་སྐོར་གྱི་གྲོས་མོལ་བྱེད་དགོས་ཚེ་ངེས་པར་དུ་ཕ་དང་བུའི་དབར་གྲོས་བསྡུར་བྱེད་པའམ་ཡང་ན་མ་དང་བུ་མོའི་དབར་གྲོས་བསྡུར་བྱེད་པ་ལས། མ་དང་བུའི་དབར་རམ་ཡང་ན་ཕ་དང་བུ་མོའི་དབར་གྲོས་བསྡུར་བྱེད་སྲོལ་མེད། དེ་ལྟར་འཛེམ་དགོས་པའི་རྒྱུ་མཚན་ནི་གཉེན་སྒྲིག་སོགས་འཇིག་རྟེན་ཆགས་བསྲེད་ཀྱི་བྱ་བ་དག་ཉོན་མོངས་པའི་ཀུན་སྤྱོད་ལ་བརྩི་བ་མ་ཟད། ཐ་ན་དེའི་ཐད་ཀྱི་སྐད་ཆའང་མི་དགེ་བར་བརྩི་བའི་རིང་ལུགས་ལས་བྱུང་བ་ཡིན་སྐད་འདུག
