ཉེ་ལམ་ཤར་ཚའི《སྨུག་སྤྲིན་ཀློང་གི་མི་ཚེ》ཞེས་པའི་བརྩམས་སྒྲུང་རིས་གྲས་དེ་བོད་ལྗོངས་མི་དམངས་དཔེ་སྐྲུན་ཁང་ནས་པར་བསྐྲུན་བྱས་པ་དང་། བརྩམས་སྒྲུང་དེའི་ནང་བོད་ཀྱི་སློབ་མ་མང་པོའི་འདུས་གཟུགས་ལྟར་དུ་གྱུར་བའི་སྒྲོལ་དཀར་ནི་སློབ་ལ་མི་བརྩོན་པའི་ཁར་ཚུལ་འཆོས་དང་གཏམ་འདོད་སྒྱིད་ལུག་གི་གཞན་དབང་དུ་ཚུད་དེ། མཐར་མཐོ་འབྲིང་ལོ་རིམ་གསུམ་པའི་སྐབས་སློབ་ཆེན་ལ་རྒྱུགས་མ་འཕྲོད་པས་ཡུལ་མིའི་མི་ཁ་འགོག་པ་དང་རང་གི་ངོ་སོ་འདེགས་ཆེད། སློབ་ཚུད་བརྡ་ཐོ་རྫུན་མ་ཁྱེར་ནས་སྒེར་གཉེར་སློབ་གྲྭར་སོང་བ་དང་། སློབ་གྲྭ་དེར་སློབ་ཚན་ཉུང་བ་དང་སྒྲིག་འཛུགས་ཞན་པ། ཕ་ཡུལ་དང་ཁ་ཐག་རིང་བ། རང་ཉིད་ཁྱིམ་འཁོས་ཞན་ཁར་ཆུང་དུས་ནས་བག་མེད་ལོངས་སྤྱོད་ལ་གོམས་པ་སོགས་རྒྱུ་མཚན་དུ་བྱས་ནས་སློབ་གསེང་དུ་ཨར་ཁང་ནང་ཞོར་ལས་བྱེད་པར་སོང་བ་དང་། ཨར་ཁང་དུ་སྡོད་ཡུན་དུ་མི་མང་པོ་དང་འབྲེལ་བ་བྱུང་ནས་རིམ་གྱིས་དུག་འཐེན་རྒྱུ་གོམས་ལོབས་སུ་སོང་རྐྱེན། སྤྱི་བདེའི་མི་སྣས་བཀག་ཉར་བྱས་པ་མ་ཟད། སློབ་གྲྭ་ལས་ཕུད་པ་དང་། གནས་ཚུལ་དེ་ཕ་ཡུལ་དུ་ཡོད་པའི་མ་རྒན་གྱིས་ཤེས་ནས་ཨ་མ་རང་ཤི་རྒྱབ་པ་སོགས་ཡིན། རྩོམ་འདིའི་ནང་དུ་གཙོ་བོ་ད་ལྟའི་གཞོན་ནུ་ལོ་ཆུང་མང་པོའི་བསམ་བློའི་ཁྱེར་སོ་ནོར་འཁྲུལ་ཅན་ལས་བྱུང་བའི་ཆག་སྒོ་དང་། དེ་ཆགས་པའི་རྒྱུ་མཚན་ཡང་མ་དག་པའི་ཁྱིམ་ཚང་གི་སློབ་གསོ་དང་། དེ་བཞིན་ཁྲིམས་ལུགས་ཀྱི་འདུ་ཤེས་ཞན་པ་ལས་བྱུང་བའི་ཆག་སྒོ་སོགས་བརྗོད་ཡོད།
རྩོམ་པ་པོ་ངོ་སྤྲོད། དངོས་གྲུབ་རྡོ་རྗེ། སྨྱུག་མིང་ལ་ཤར་ཚ་དང་བུ་ཡུག་ཏུ་འབོད། 1986ལོར་འཕན་པོ་ལྷུན་གྲུབ་རྫོང་བྱང་ཁ་ཤང་དར་ཡུལ་གྲོང་ཚོར་སྐྱེས། 2009ལོར་བོད་ལྗོངས་སློབ་ཆེན་རིག་གཞུང་སློབ་གླིང་བོད་དགེ་འོས་ཆེད་ལས་ནས་སློབ་མཐར་ཕྱིན་རྗེས། ལྷ་ས་མཐོ་འབྲིང་བཞི་པར་དགེ་རྒན་གྱི་ལས་ཀར་ཞུགས། སྔ་ཕྱིར་དུས་དེབ་དང་ཚགས་པར་སོགས་སུ་སྙན་ངག་གཙོས་པའི་རྩོམ་ཡིག་བདུན་བཅུ་ལྷག་སྤེལ། 2017ལོར་སྙན་དེབ《མཚན་མོའི་འགྲེལ་པ》ཞེས་པ་དཔར་བསྐྲུན་བྱས། ད་ལྟ་བོད་ཀྱི་རྩོམ་པ་པོའི་མཐུན་ཚོགས་ཀྱི་ཁོངས་མི་དང་། བོད་ལྗོངས་སློབ་ཆེན་རིག་གཞུང་སློབ་གླིང་དུ་རྩོམ་རིག་ཆེད་ལས་ཀྱི་ཞིབ་འཇུག་སློབ་མའི་སློབ་གཉེར་བྱེད་བཞིན་ཡོད།
བོད་རྩོམ་རིག་ཆུ་སྐྱེས་དགའ་ཚལ་དུ།། སྒྲུང་རིང་མོའི་གསར་འཁྲུངས་མེ་ཏོག་སྟེ།། མཛེས<<སྨུག་སྤྲིན་ཀློང་གི་མི་ཚེ>>བཞད།། འདི་ཐོས་པས་བདག་སེམས་བུང་བ་མྱོས།། དབུས་ཀྱི་རྩོམ་གྲོགས་ཤར་ཚ་ལགས་ཀྱི་བརྩམས་སྒྲུང་རིང་མོ་མི་ཡུལ་དུ་བལྟམས་པར་རྟེན་འབྲེལ་སྙིང་ནས་ཞུ།
༢༠༡༩ ༣ ༡༢ཉིན་ཁང་གསར་ཚེ་དབང་རིག་འཛིན་གྱིས་གུས་ཕུལ།
བསྔགས་བརྗོད་ཡོད།
བསྔགས་བརྗོད་གནང་བར་བཀའ་དྲིན་ཆེ།