དཀར་ཆག
མཆོད་པར་བརྗོད་ཅིང་རྩོམ་པར་དམ་བཅའ་བ། སྟོན་པ་ཤཱཀྱ་ཐུབ་པའི་རྣམ་ཐར་ཕྱོགས་ཙམ་བརྗོད་པ། རྗེ་བཙུན་བྱམས་པ་མགོན་པོའི་རྣམ་ཐར། འཕགས་པ་ཐོགས་མེད་ཀྱི་རྣམ་ཐར། སློབ་དཔོན་དབྱིག་གཉེན་གྱི་རྣམ་ཐར། འཕགས་པ་རྣམ་གྲོལ་སྡེའི་རྣམ་ཐར། བཙུན་པ་རྣམ་གྲོལ་སྡེའི་རྣམ་ཐར། མཁས་མཆོག་མཆོག་གི་སྡེའི་རྣམ་ཐར། མཁས་མཆོག་དུལ་བའི་སྡེའི་རྣམ་ཐར། རྣམ་སྣང་མཛད་བཟང་པོའི་རྣམ་ཐར། སེང་གེ་བཟང་པོའི་རྣམ་ཐར། ཀུ་ས་ལིའི་རྣམ་ཐར། དགེ་བ་ཅན་གྱི་རྣམ་ཐར། གསེར་གླིང་པའི་རྣམ་ཐར། འཇམ་དཔལ་དབྱངས་ཀྱི་རྣམ་ཐར། ཀླུ་སྒྲུབ་ཀྱི་རྣམ་ཐར། ཟླ་བ་གྲགས་པའི་རྣམ་ཐར། རིག་པའི་ཁུ་བྱུག་ཆེ་བའི་རྣམ་ཐར། རིགས་པའི་ཁུ་བྱུག་ཆུང་བའི་རྣམ་ཐར།
དཔལ་ལྡན་ཨ་ཏི་ཤས་ལམ་རིམ་བརྒྱུད་རིམ་ལས་རླབས་ཆེན་སྤྱོད་རྒྱུད་ཀྱི་བླ་རྒྱུད་བཤད་པ། རྒྱལ་སྲས་ཞི་བ་ལྷའི་རྣམ་ཐར། སློབ་དཔོན་ཨེ་ལ་དྷ་རིའི་རྣམ་ཐར། སློབ་དཔོན་དཔའ་བོ་རྡོ་རྗེའི་རྣམ་ཐར། རིན་ཆེན་དཔལ་གྱི་རྣམ་ཐར། མར་མེ་མཛད་ཀྱི་རྣམ་ཐར། འབྲོམ་སྟོན་པ་རྒྱལ་བའི་འབྱུང་གནས་ཀྱི་རྣམ་ཐར། དཔལ་ལྡན་མགོན་པ་བའི་རྣམ་ཐར། ཡེ་ཤེས་འབར་བའི་རྣམ་ཐར། ཐག་མ་བའི་རྣམ་ཐར། ནམ་མཁའ་སེངྒེའི་རྣམ་ཐར། པོ་ཏོ་བའི་རྣམ་ཐར། ཤ་ར་བའི་རྣམ་ཐར། འཆད་ཁ་བའི་རྣམ་ཐར། སེ་སྤྱིལ་བུ་བའི་རྣམ་ཐར། ལྷ་ལུང་གི་དབང་ཕྱུག་གི་རྣམ་ཐར། ལྷ་འགྲོ་བའི་མགོན་པོའི་རྣམ་ཐར། དར་མ་བསོད་ནམས་ཀྱི་རྣམ་ཐར། མཚོ་སྣ་པའི་རྣམ་ཐར། ཚུལ་ཁྲིམས་བཀྲ་ཤིས་ཀྱི་རྣམ་ཐར། ཆོས་སྐྱབས་བཟང་པོའི་རྣམ་ཐར། སྤྱན་སྔ་ཚུལ་ཁྲིམས་འབར་གྱི་རྣམ་ཐར། གཞོན་ནུ་འོད་ཀྱི་རྣམ་ཐར། གཞོན་ནུ་གྲགས་པའི་རྣམ་ཐར། སངས་རྒྱས་དབོན་སྟོན་གྱི་རྣམ་ཐར། ནམ་མཁའ་རྒྱལ་པོའི་རྣམ་ཐར། སེངྒེ་བཟང་པོའི་རྣམ་ཐར། རྒྱལ་སྲས་བཟང་པོའི་རྣམ་ཐར། ནམ་མཁའ་རྒྱལ་མཚན་གྱི་རྣམ་ཐར། རྒྱལ་བ་ཙོང་ཁ་པ་ཆེན་པོའི་རྣམ་ཐར། རྒྱལ་ཚབ་དར་མ་རིན་ཆེན་གྱི་རྣམ་ཐར། བཀྲ་ཤིས་དཔལ་ལྡན་གྱི་རྣམ་ཐར། ཤཱཀྱ་ཡེ་ཤེས་ཀྱི་རྣམ་ཐར། འཇམ་དཔལ་རྒྱ་མཚོའི་རྣམ་ཐར། དགེ་ལེགས་དཔལ་བཟང་པོའི་རྣམ་ཐར། བ་སོ་ཆོས་ཀྱི་རྒྱལ་མཚན་གྱི་རྣམ་ཐར། གྲུབ་ཆེན་ཆོས་ཀྱི་རྡོ་རྗེའི་རྣམ་པར་ཐར། དབེན་ས་པ་བློ་བཟང་དོན་གྲུབ་ཀྱི་རྣམ་ཐར། སངས་རྒྱས་ཡེ་ཤེས་ཀྱི་རྣམ་ཐར། བློ་བཟང་ཆོས་ཀྱི་རྒྱལ་མཚན་གྱི་རྣམ་ཐར། བློ་བཟང་བརྩོན་འགྲུས་རྒྱལ་མཚན་གྱི་རྣམ་ཐར། དཀོན་མཆོག་རྒྱལ་མཚན་གྱི་རྣམ་ཐར། བློ་བཟང་ཡེ་ཤེས་ཀྱི་རྣམ་ཐར། འཇམ་དབྱངས་ཆོས་འཕེལ་གྱི་རྣམ་ཐར། བློ་བཟང་འཕྲིན་ལས་ཀྱི་རྣམ་ཐར། བློ་བཟང་རྣམ་རྒྱལ་གྱི་རྣམ་ཐར། བློ་བཟང་དམ་ཆོས་རྒྱལ་མཚན་གྱི་རྣམ་ཐར། དགེ་ལེགས་རྒྱ་མཚོའི་རྣམ་ཐར། བཟོད་པ་རྒྱ་མཚོའི་རྣམ་ཐར། རྗེ་བཙུན་བླ་མ་ངག་དབང་བྱམས་པའི་རྣམ་ཐར། བློ་བཟང་དཔལ་ལྡན་ཡེ་ཤེས་ཀྱི་རྣམ་ཐར། ཤེས་རབ་སེང་གེའི་རྣམ་ཐར། དགེ་འདུན་གྲུབ་པའི་རྣམ་ཐར། ནོར་བཟང་རྒྱ་མཚོའི་རྣམ་ཐར། དགེ་འདུན་རྒྱ་མཚོའི་རྣམ་ཐར། དགེ་ལེགས་དཔལ་བཟང་གི་རྣམ་ཐར། བསོད་ནམས་དཔལ་བཟང་པོའི་རྣམ་ཐར། བསོད་ནམས་རྒྱ་མཚོའི་རྣམ་ཐར། སྤྱན་སྔ་ཆོས་དཔལ་བཟང་པོའི་རྣམ་ཐར། འཁོན་སྟོན་དཔལ་འབྱོར་ལྷུན་གྲུབ་ཀྱི་རྣམ་ཐར། ཟུར་དཔལ་འབྱོར་འཕྲིན་ལས་རབ་རྒྱས་ཀྱི་རྣམ་ཐར། ངག་དབང་བློ་བཟང་རྒྱ་མཚོའི་རྣམ་ཐར། སྦྱིན་པ་རྒྱ་མཚོ་སྟེ་ངག་དབང་དཔལ་བཟང་གི་རྣམ་ཐར། བྱམས་པ་ཆོས་ལྡན་གྱི་རྣམ་ཐར། ངག་དབང་ཆོས་ལྡན་གི་རྣམ་ཐར། བློ་བཟང་བསྐལ་བཟང་རྒྱ་མཚོའི་རྣམ་ཐར། ཇོ་བོ་རྗེའི་ལམ་རིམ་མན་ངག་བརྒྱུད་པའི་ཆུ་བོ་གསུམ་འདྲེས་ལས་རླབས་ཆེན་སྤྱོད་རྒྱུད་ཀྱི་བརྒྱུད་རིམ། བདེ་བ་དཔལ་གྱི་རྣམ་ཐར། གྲགས་པ་གཞོན་ནུའི་རྣམ་ཐར། བསོད་ནམས་གྲགས་པའི་རྣམ་ཐར། ཐོགས་མེད་བཟང་པོ་དཔལ་གྱི་རྣམ་ཐར། རེད་མདའ་བ་གཞོན་ནུ་བློ་གྲོས་ཀྱི་རྣམ་ཐར། ཐུན་མོང་མ་ཡིན་པ་རྡོ་རྗེ་ཐེག་པའི་ལམ་གྱི་རིམ་པ་གསང་བདེ་འཇིགས་གསུམ་གྱི་ཆོས་སྐོར་བརྒྱུད་རིམ་གྱི་མཚན་བྱང། དཔལ་འཁོར་ལོ་སྡོམ་པའི་ཆོས་སྐོར་བརྒྱུད་རིམ། དཔལ་རྡོ་རྗེ་འཇིགས་བྱེད་ཆེན་པོའི་ཆོས་སྐོར་བརྒྱུད་རིམ། ཇོ་བོ་ཡབ་སྲས་ཀྱི་གསང་ཆོས་ཐུན་མོང་མ་ཡིན་པ་བཀའ་གདམས་ཐེག་ལེ་བཅུ་དྲུག་གི་བརྒྱུད་རིམ། མཇུག་བྱང། དཔར་བྱང་སྨོན་ཚིག།
༄༅། ། རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་ཐུབ་དབང་རྡོ་རྗེ་འཆང་དང་དབྱེར་མ་མཆིས་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། ། བརྩེ་བ་ཆེན་པོས་དུས་ཐམས་ཅད་དུ་རྗེས་སུ་གཟུང་དུ་གསོལ།
མཚན་ཙམ་ཐོས་པས་ངན་འགྲོའི་འཇིགས་ལས་སྐྱོབ། །
གསོལ་བ་བཏབ་ན་དངོས་གྲུབ་ཀུན་སྩོལ་ཞིང་། །
བཀའ་བཞིན་བསྒྲུབས་ན་སྐུ་གསུམ་ཐོབ་མཛད་པ། །
སྟོན་པ་ཐུབ་པའི་དབང་པོ་ལ་ཕྱག་འཚལ། །
རབ་འབྱམས་ཞིང་ཀུན་སྤྲུལ་པས་ལེགས་བཀང་སྟེ། །
རྒྱལ་བའི་མཛད་པ་མཐའ་དག་སྒྲུབ་མཛད་པ། །
རྒྱལ་ཚབ་མི་ཕམ་མགོན་དང་འཇམ་པའི་དབྱངས། །
བྱང་ཆུབ་སྙིང་པོའི་བར་དུ་གཙུག་གིས་མཆོད། །
རབ་བརྟན་བྱང་ཆུབ་སེམས་ཀྱི་སྡོང་པོ་ལ། །
རླབས་ཆེན་སྤྱོད་པའི་ཡལ་འདབ་རབ་ཏུ་རྒྱས། །
དོན་གཉིས་འབྲས་བུས་འགྲོ་ཀུན་ཚིམས་མཛད་པ། །
རྒྱ་ཆེན་སྤྱོད་རྒྱུད་བླ་མ་རྣམས་ལ་འདུད། །
ཟབ་ཞི་སྤྲོས་དང་བྲལ་བའི་མཁའ་དབྱིངས་དབུས། །
ཡེ་ཤེས་རྡོ་རྗེའི་ཉིན་བྱེད་འོད་སྣང་གིས། །
འགྲོ་བློའི་མ་རིག་མུན་པ་སེལ་མཛད་པ། །
ཟབ་མོ་ལྟ་རྒྱུད་བླ་མ་རྣམས་ལ་འདུད། །
ཟབ་དང་རྒྱ་ཆེའི་ལམ་གྱི་རིམ་པ་ཀུན། །
རབ་གསང་བྱིན་རླབས་རིན་ཆེན་འབྱུང་གནས་ཆེར། །
ཐབས་མཁས་གྲུ་ཡིས་མྱུར་དུ་བགྲོད་མཛད་པ། །
བྱིན་རླབས་ཉེ་རྒྱུད་བླ་མ་རྣམས་ལ་འདུད། །
བརྒྱུད་པ་གསུམ་ལྡན་མན་ངག་སྙིང་པོའི་བཅུད། །
རིན་ཆེན་བྱང་ཆུབ་སེམས་ཀྱི་བདུད་རྩི་ཡིས། །
བྱང་ཕྱོགས་དམུ་རྒོད་འགྲོ་རྣམས་འདུལ་མཛད་པ། །
མགོན་པོ་ཨ་ཏི་ཤ་ལ་གསོལ་བ་འདེབས། །
བློ་ཆེན་རྒྱལ་དང་རྒྱལ་སྲས་ཀུན་གྱི་མཛད་པ་འཕྲིན་ལས་བཟང་པོ་མ་ལུས་གང་གི་སྙིང་སྟོབས་ཡངས་པའི་གྲྭ་གཅིག་ན། ། ངལ་བསོ་བགྱིས་པས་རྒྱལ་བ་ཀུན་ལས་ལྷག་པའི་ཐུགས་རྗེ་ཅན་ཞེས་སྙན་པའི་གྲགས་པ་ཕྱོགས་ཀྱི་བུ་མོས་རབ་སྒྲོགས་པ། ། བྱང་ཕྱོགས་གངས་རིའི་ཁྲོད་ཀྱི་ཟས་གཙང་སྲས་པོ་འཇམ་མགོན་བླ་མ་བདག་གི་སྤྱི་གཙུག་མཛེས་པའི་རྒྱན་དུ་རྟག་བཞུགས་ལ། ། ཉིད་ཀྱི་ལེགས་བཤད་བདུད་རྩིའི་ཆུ་ཡིས་བདག་བློའི་འདབ་བརྒྱ་ཆ་ཚང་ལམ་གྱི་བདུད་རྩིའི་སྙིང་པོ་ཅན་དུ་མཛད་དུ་གསོལ། ། རབ་འབྱམས་རྒྱལ་བ་ཀུན་གྱི་ཐུགས་རྗེའི་གཟུགས། ། བདག་གི་དགེ་བའི་བཤེས་སུ་ལེགས་ཤར་བ། ། མ་ནོར་ལམ་སྟོན་དྲིན་ཅན་བླ་མ་ལ། ། སྙིང་ནས་འདུད་དོ་རེ་བ་འབྲས་ལྡན་མཛོད། ། ལྷ་བཅས་འགྲོ་བ་ཀུན་གྱི་ཕན་བདེའི་གཞི། ། རྒྱལ་བའི་གསུང་རབ་ཀུན་གྱི་སྙིང་པོའི་དོན། ། བྱང་ཆུབ་ལམ་རིམ་བླ་མ་བརྒྱུད་པ་ཡི། ། རྟོགས་པ་བརྗོད་ལ་བདག་བློ་སྤྲོ་བ་སྐྱེས། ། དེ་ལ་འདིར་མཁའ་ཁྱབ་ཀྱི་སེམས་ཅན་ཐམས་ཅད་ལ་ཕན་པ་དང་བདེ་བ་མ་ལུས་གང་ལས་འབྱུང་བའི་རྒྱུ་གཅིག་པུ་རྒྱལ་བས་གསུངས་པའི་ཆོས་ཕུང་བརྒྱད་ཁྲི་བཞི་སྟོང་གི་སྙིང་པོའི་དོན་ཐམས་ཅད་གང་ཟག་གཅིག་གི་ཉམས་ལེན་གྱི་རིམ་པར་ཧྲིལ་གྱིས་དྲིལ་བ་བྱང་ཆུབ་ལམ་གྱི་རིམ་པའི་མན་ངག་ལེགས་པར་སྟོན་པའི་རྩ་བརྒྱུད་ཀྱི་བླ་མ་རྣམས་ཀྱི་རྣམ་པར་ཐར་པ་ནི་གང་བཤད་པར་བྱ་བ་ལ།
༈ སྟོན་པ་ཐུབ་པའི་དབང་པོའི་མཛད་རྣམ་མདོར་བསྡུས།
དེ་ཡང་ཆུ་འགོ་གངས་ལ་ཐུག་པ་ཞིག་དགོས་པ་ལྟར་དམ་པའི་ཆོས་ཀྱི་བརྒྱུད་པའང་ཡང་དག་པར་རྫོགས་པའི་སངས་རྒྱས་ལ་ཐུག་པ་ཞིག་དགོས་པས་ཐོག་མར་བསྟན་པའི་བདག་པོ་སྟོན་པ་བཅོམ་ལྡན་འདས་ཤཱཀྱ་ཐུབ་པ་ཐུགས་རྗེ་ཅན་དེ་ཉིད་ཀྱི་རྣམ་པར་ཐར་པ་ཕྱོགས་ཙམ་ཞིག་བརྗོད་པར་བྱའོ། ། དེ་ལ་སངས་རྒྱས་འཇིག་རྟེན་དུ་འབྱོན་པ་ནི་བརྒྱ་ལམ་ན་ཨུ་དུམ་ཝ་རའི་མེ་ཏོག་ལྟར་ཤིན་ཏུ་དཀོན་པར་གསུངས་ལ། དེའི་རྒྱུ་མཚན་ཡང་སངས་རྒྱས་འཇིག་རྟེན་དུ་འབྱུང་བ་ལ་དང་པོར་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་པ་གསུམ་ལ་སོགས་པ་དུས་རིང་དཔག་ཏུ་མེད་པར་ཚོགས་གཉིས་རླབས་པོ་ཆེ་བསགས་ཏེ། སངས་རྒྱས་ཀྱི་ཞིང་ཡོངས་སུ་དག་པ་དང་། སྨོན་ལམ་ཡོངས་སུ་རྫོགས་པ་དང་། གདུལ་བྱ་རྣམས་རྒྱུད་ཡོངས་སུ་སྨིན་པ་སོགས་རྟེན་འབྲེལ་མཐའ་ཡས་པ་ཞིག་འགྲིག་པ་ན་སངས་རྒྱས་འཇིག་རྟེན་དུ་འབྱོན་པ་ཡིན་ལ། དེ་ལྟ་བུའི་རྟེན་འབྲེལ་འགྲིག་པ་ཤིན་ཏུ་དཀའ་བས་འཇིག་རྟེན་འདི་ཕལ་ཆེར་མུན་བསྐལ་ཤ་སྟག་ཏུ་གནས་ཤིང་། སངས་རྒྱས་འབྱོན་པའི་སྒྲོན་བསྐལ་ནི་བརྒྱ་ལམ་ན་སྲིད་པ་ཙམ་མོ། ། དེ་ཙམ་དུ་དཀོན་པ་ཅི་ཡིན་སྙམ་ན། སྤྱོད་འཇུག་ལས། ཇི་ལྟར་མཚན་མོ་མུན་ནག་སྤྲིན་རུམ་ན། ། གློག་འགྱུ་སྐད་ཅིག་རབ་སྣང་སྟོན་པ་ལྟར། ། དེ་བཞིན་སངས་རྒྱས་མཐུ་ཡིས་བརྒྱ་ལམ་ན། ། འཇིག་རྟེན་བསོད་ནམས་བློ་གྲོས་ཐང་འགའ་འབྱུང་། ། ཞེས་གསུངས་པ་ལྟར། ཁམས་གསུམ་གྱི་འཁོར་བའི་སེམས་ཅན་རྣམས་ལ་དགེ་སེམས་ཕྲ་མོ་རེ་སྐྱེ་བ་ཡང་ཤིན་ཏུ་དཀའ་ཞིང་། དགེ་སེམས་གང་སྐྱེ་བ་ཐམས་ཅད་སངས་རྒྱས་ཀྱི་མཐུ་ཁོ་ན་ལ་བལྟོས་ལ། སངས་རྒྱས་ལ་དད་པ་སོགས་དགེ་སེམས་ཕྲ་མོ་རེ་སྐྱེ་བ་ཡང་ཤིན་ཏུ་དཀོན་ན། དཀོན་མཆོག་གསུམ་ལ་དད་པ་རྙེད་ནས་ལས་དཀར་ནག་གི་སྤང་བླངས་ཚུལ་བཞིན་དུ་བྱེད་པ་དང་། སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་གིས་བསྐུལ་ནས་ཐར་པའི་ལམ་ལ་སློབ་པ་རྣམས་དཀོན་པ་ལྟ་ཅི་སྨོས། ངེས་འབྱུང་གི་བསམ་པས་ཀུན་ནས་བསླངས་ཏེ་ཐར་ལམ་ལ་སློབ་པའང་ཤིན་ཏུ་དཀོན་ན། བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེས་ཀུན་ནས་བསླངས་ཏེ་རྒྱལ་སྲས་ཀྱི་སྤྱོད་པ་རྒྱ་མཚོ་ལྟ་བུ་ལ་དུས་བསྐལ་པ་གྲངས་མེད་མང་པོར་བར་མ་ཆད་དུ་སློབ་པ་དང་བསླབས་པ་མཐར་ཕྱིན་པ་ཤིན་ཏུ་དཀོན་པ་ལྟ་སྨོས་ཀྱང་ཅི་དགོས། དེའི་ཕྱིར་སངས་རྒྱས་འཇིག་རྟེན་དུ་འབྱོན་པ་ཤིན་ཏུ་དཀོན་པར་དྲི་མ་མེད་པའི་རིགས་པས་ལེགས་པར་གྲུབ་བོ། ། དེ་ལྟར་སངས་རྒྱས་འབྱོན་དཀའ་བ་ལས་བསྐལ་པ་འདི་ལ་ནི་སངས་རྒྱས་སྟོང་འབྱོན་པས་བསྐལ་པ་བཟང་པོ་ཞེས་བརྗོད་པ་ཡིན་ཏེ། སྔོན་མི་མཇེད་ཀྱི་འཇིག་རྟེན་འདི་ཐོག་མར་ཆགས་པའི་དུས་ཆུའི་དཀྱིལ་འཁོར་ཆགས་པའི་ཚེ་མཚོ་ནང་ནས་པདྨ་སྟོང་འཐོན་པ། གནས་བཙང་མའི་ལྷ་རྣམས་ཀྱིས་མཐོང་ནས་འདི་གང་གི་ལྟས་ཡིན་སྙམ་དུ་བརྟགས་པ་ན་བསྐལ་པ་འདི་ལ་སངས་རྒྱས་སྟོང་འབྱུང་བའི་ལྟས་སུ་གོ་ནས། ཨེ་མ་བསྐལ་པ་འདི་ནི་བཟང་པོའོ་ཞེས་ཆེད་དུ་བརྗོད་པར་སྙིང་རྗེ་པདྨ་དཀར་པོ་ལས་བཤད་དོ། ། དེ་ལ་སྐྱེ་དགུ་རྣམས་ཀྱི་ཚེ་ལོ་བཞི་ཁྲི་པའི་དུས་སུ་སངས་རྒྱས་འཁོར་བ་འཇིག་བྱོན། ཚེ་ལོ་སུམ་ཁྲི་པའི་དུས་སུ་སངས་རྒྱས་གསེར་ཐུབ་བྱོན། ཚེ་ལོ་ཉི་ཁྲི་པའི་དུས་སུ་རྒྱལ་བ་འོད་སྲུངས་བྱོན། རྩོད་ལྡན་ཚེ་ལོ་བརྒྱ་བའི་དུས་སུ་སྟོན་པ་བཅོམ་ལྡན་འདས་ཤཱཀྱ་ཐུབ་པ་འདི་ཉིད་བྱོན་པ་ཡིན་ལ། སྟོན་པ་ཐུགས་རྗེ་ཅན་འདི་ཉིད་ཀྱིས་ཐོག་མར་ཐུགས་ཇི་ལྟར་བསྐྱེད་པའི་ཚུལ་ནི། མདོ་སྡེ་བསྐལ་བཟང་ལས། ང་ནི་སྔོན་ཚེ་དམན་པར་གྱུར་པའི་ཚེ། ། དེ་བཞིན་གཤེགས་པ་ཤཱཀྱ་ཐུབ་ཆེན་ལ། ། འཇམ་གང་ཞིག་གི་དབུལ་བ་བྱས་ནས་ཀྱང། ། དང་པོར་བྱང་ཆུབ་ཏུ་ནི་སེམས་བསྐྱེད་དོ། ། ཞེས་གསུངས་པ་ལྟར། རྫ་མཚན་གྱི་བུ་ཁྱེའུ་སྣང་བྱེད་དུ་སྐུ་འཁྲུངས་པའི་ཚེ། དེ་བཞིན་གཤེགས་པ་ཤཱཀྱ་ཐུབ་ཆེན་ཞེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ་རྫའི་བུམ་པ་འཇམ་གྱིས་བཀང་བ་མེ་ལོང་གིས་ཁ་བརྒྱན་པ་སོགས་མཆོད་པའི་ཡོ་བྱད་ཅི་ཡོད་ཕུལ་ཏེ། དེ་བཞིན་གཤེགས་པ་ཁྱེད་སྐུ་ཅི་འདྲ་དང། ། འཁོར་དང་སྐུ་ཚེའི་ཚད་དང་ཞིང་ཁམས་དང། ། ཁྱེད་ཀྱི་མཚན་མཆོག་བཟང་པོ་ཅི་འདྲ་བ། ། དེ་འདྲ་ཁོ་ནར་བདག་ཀྱང་འགྱུར་བར་ཤོག ། ཅེས་བརྗོད་ནས་བྱང་ཆུབ་ཏུ་ཐུགས་བསྐྱེད་པར་མཛད་དོ། ། གཞན་ཡང་སྟོན་པ་ཐུགས་རྗེ་ཅན་འདི་ཉིད་ཀྱིས་རང་ཅག་ཁམས་གསུམ་གྱི་འགྲོ་བ་འཁོར་བའི་གནས་ན་ཉོན་མོངས་ཤིང་སྡུག་བསྔལ་བརྒྱ་ཕྲག་དུ་མས་མནར་བ་རྣམས་ཐུགས་ཀྱིས་མ་བཟོད་ནས། དེ་བཞིན་གཤེགས་པ་བགྲང་བ་ལས་འདས་པ་དག་གི་སྤྱན་སྔར་ཐུགས་བསྐྱེད་ཅིང་སྨོན་ལམ་འདེབས་པར་མཛད་དེ། དེ་ཡང། སྟོན་པས་སྔོན་དེ་བཞིན་གཤེགས་པ་བགྲང་བ་ལས་འདས་པའི་སྤྱན་སྔར་ཐུགས་བསྐྱེད་མཛད་པ་ལས། འདིར་མདོ་སྡེ་ལས་འབྱུང་བ་ལྟར་གཙོ་ཆེ་བ་འགའ་ཞིག་སྨོས་ན། དྲིན་ལན་བསབ་པའི་མདོ་ལས་གསུངས་ཚུལ་ནི། སྟོན་པ་ཐུགས་རྗེ་ཅན་འདི་ཉིད་སྔོན་དམྱལ་བའི་ཤིང་རྟ་འདྲེན་པར་འཁྲུངས་པ་ན། གྲོགས་ཟླ་བོ་ཞིག་དང་གཉིས་ཀྱིས་ལྕགས་བསྲེགས་ཀྱི་ས་གཞིར་གཤིན་རྗེ་ཨ་གླང་གི་ཤིང་རྟ་འདྲེན་པ་ལས་ཟླ་བོ་དེ་ཉམ་ཆུང་བས་ཤིང་རྟ་འདྲེན་མ་ནུས་པ་ན། གཤིན་རྗེ་ཨ་གླང་གིས་ལྕགས་ཀྱི་མདུང་རྩེ་གསུམ་པ་བྲང་ལ་བསྣུན་པས་ཁྲག་གི་ཆར་བབ་ཅིང་སྡུག་བསྔལ་གྱིས་ཉམ་ཐག་ནས་སྨྲེ་སྔགས་འདོན་པ་ན། དེ་ལ་བཟོད་གླགས་མེད་པའི་སྙིང་རྗེ་འཁྲུངས་ནས་སེམས་ཅན་འདི་སྡུག་བསྔལ་ལས་ཐར་བར་བྱས་ཏེ་དམྱལ་བའི་སྡུག་བསྔལ་འདི་ང་གཅིག་པུས་བཟོད་པར་བྱའོ་སྙམ་དུ་ཐུགས་བསྐྱེད་ཅིང། སེམས་ཅན་དེས་མཚོན་ནས་ལས་ངན་པའི་དབང་གིས་དམྱལ་བར་ལྷུང་བ་དང་ལྟུང་བར་འགྱུར་བའི་སེམས་ཅན་ཐམས་ཅད་ལ་བཟོད་གླགས་མེད་པའི་སྙིང་རྗེ་སྐྱེས་ནས་བྱང་ཆུབ་ཏུ་ཐུགས་བསྐྱེད་དེ། གཤིན་རྗེ་ཨ་གླང་ལ་སེམས་ཅན་ཉམ་ཐག་འདི་ཐོངས་ལ་འདིའི་ཐག་པའང་ངའི་མགོ་ལ་སྐོན་ཅིག ། ང་གཅིག་པུས་དྲང་བར་བྱའོ་ཞེས་གསུངས་པ་ན། ཨ་གླང་ཁྲོས་ནས་ལྕགས་ཀྱི་མདུང་རྩེ་གསུམ་པ་བསྣུན་པས་བསྐལ་པ་བརྒྱར་བསགས་པའི་སྡིག་པ་དག་ཅིང། དེ་ནས་ཚེ་འཕོས་ཏེ་སུམ་ཅུ་རྩ་གསུམ་གྱི་ལྷར་སྐྱེས་པར་གསུངས་སོ། ། འདི་བཅོམ་ལྡན་འདས་ཀྱིས་བྱམས་པའི་ཐུགས་བསྐྱེད་པའི་ཐོག་མ་ཡིན་པ་དང། དེ་ནས་བཟུང་སྟེ་མངོན་པར་རྫོགས་པར་སངས་རྒྱས་པའི་བར་དུ་སེམས་ཅན་ཐམས་ཅད་ལ་བྱམས་པ་དང་སྙིང་རྗེའི་སེམས་རྒྱུན་མ་ཆད་པར་བསྐྱེད་པར་མཛངས་བླུན་ལས་གསུངས་སོ། ། ཐུགས་བསྐྱེད་ཚུལ་འདུལ་བ་ལུང་ལས་གསུངས་པ་ནི། ལུང་སྨན་གྱི་གཞི་ལས། སྟོན་པ་ལ་རྒྱལ་པོ་གསལ་རྒྱལ་གྱིས་སྟོན་པས་ཐོག་མར་གང་དུ་སེམས་བསྐྱེད་ལགས་ཞུས་པ་ན། སྟོན་པས་བཀའ་སྩལ་པ། སྔོན་རྒྱལ་པོ་འོད་ལྡན་ཞེས་བྱ་བའི་ཡུལ་དུ་གླང་པོ་རིན་པོ་ཆེ་མེ་ཏོག་ཀུ་མུ་དའི་མདོག་ལྟར་དཀར་བ། ཡན་ལག་བདུན་ཤིན་ཏུ་གནས་པ་ཞིག་བྱུང་སྟེ། དེ་རྒྱལ་པོ་འོད་ལྡན་གྱིས་མཐོང་ནས་གླང་པོ་འདུལ་མཁན་ལ་འདི་དུལ་བར་བྱོས་ལ་ང་ལ་ཕུལ་ཅིག་ཅེས་གསུངས་པས། གླང་པོ་འདུལ་མཁན་གྱིས་བཀའ་བཞིན་འཚལ་ཞེས་ཟེར་ཏེ། དེ་དུལ་བར་བྱས་ནས་རྒྱལ་པོ་ལ་ཕུལ་བ་དང། རྒྱལ་པོས་གླང་པོ་ལ་ཞོན་འདུལ་མཁན་ཡང་གོང་དུ་ཞོན་ཏེ་རི་དྭགས་གཤོར་དུ་སོང་བ་ན། གླང་པོ་ཆེ་དེས་གླང་མོའི་དྲི་ཚོར་ཏེ་རྗེས་བཞིན་དུ་བརྒྱུགས་ནས་རླུང་ལྟར་ཁྱེར་བ་དང། རྒྱལ་པོ་འོད་ལྡན་གྱིས་གླང་པོ་འདུལ་མཁན་ལ། ནམ་མཁའ་འགུལ་བ་འདྲ་ཞིང་ཕྱོགས་ཀུན་མྱུར་དུ་འགྲོ་བ་འདྲ་བ་འདི་བཟློག་ཅིག ། དེས་བཟློག་མ་ནུས་ཏེ་རྒྱལ་པོ་ལ་གླང་པོ་འདི་མི་ཐུབ་ཀྱིས་ཤིང་གི་ཡལ་ག་ལ་འཇུས་མཛོད་ཅིག་བྱས་པས། རྒྱལ་པོས་ཤིང་གི་ཡལ་ག་ལ་འཇུས་པས་སྲོག་གི་འཇིགས་པ་ལས་ཐར་རོ། ། དེ་ནས་རྒྱལ་པོས་གླང་པོ་འདུལ་མཁན་ལ་ཁྱོད་ཀྱིས་གླང་པོ་མ་ཐུལ་བར་ང་ལ་ཕུལ་ལོ། ། དེས་སྨྲས་པ། ལྷ། བདག་གིས་ཤིན་ཏུ་དུལ་མོད་ཀྱིས། གླང་མོའི་དྲི་ཚོར་ནས་ཉན་དུ་མ་བཏུབ་ལགས་སོ། ། འོན་ཀྱང་དཔྱད་དྲན་ཏེ་ལོག་ནས་མཆིའོ་ཞེས་ཞུས་སོ། ། དེ་ནས་གླང་པོ་དེ་མྱོས་པ་དང་བྲལ་ཏེ་ཞག་བདུན་ལོན་པ་དང། དཔྱད་དྲན་ཏེ་རང་གི་གནས་སུ་འོངས་སོ། ། དེ་ནས་འདུལ་མཁན་གྱིས་རྒྱལ་པོ་ལ་གླང་པོ་མཆིས་ལགས་སོ། ། རྒྱལ་པོས་སྨས་པ། ཁྱོད་ཀྱིས་འདི་མ་ཐུལ་ལོ། ། ལྷ། ཐུལ་ལོ། ། ཅིས་མངོན། ལྷའི་སྤྱན་སྔར་ཕབ་པར་བགྱིའོ་ཞེས་དེས་ལྕགས་ཀྱི་ཐུ་ལུམ་མེས་བསྲེགས་ཏེ་དཔྱད་ཀྱི་སར་ཁྱེར་ནས་ལེན་དུ་གཞུག་པར་བརྩམས་པས། བག་ཚ་བ་མེད་པར་ལེན་ནོ། ། དེ་མཐོང་ནས་གླང་རྫིས་རྒྱལ་བོ་ལ་གསོལ་པ། ལྷ། ལེན་དུ་ནི་བཏུབ་ཀྱང་འགུམ་ལགས་སོ། ། རྒྱལ་པོས་སྨྲས་པ། ཀྱེ་མཁས་པ། དེ་ལྟར་ཤིན་ཏུ་དུལ་བ་འདིས་བདག་ཅག་གཡེངས་པ་འདི་ལ་རྒྱུ་ཅི་ཞིག་ཡོད། གླང་རྫིས་གསོལ་པ། ལྷ། བདག་གིས་སྔར་ལུས་དུལ་གྱི་སེམས་མ་དུལ་ལོ་ཞེས་མ་གསོལ་ཏམ། བདག་ནི་ལུས་འདུལ་བ་ལགས་ཀྱི། སེམས་འདུལ་བ་ནི་མ་ལགས་སོ། ། རྒྱལ་པོས་སྨྲས་པ། སེམས་འདུལ་བ་འགའ་ཡོད་པ་ཐོས་སམ་ཞེས་དྲིས་པ་ན། གླང་པོ་ཆེ་འདུལ་མཁན་དེ་ལ་ཕྱོགས་བཅུའི་སངས་རྒྱས་རྣམས་ནི་བྱིན་རླབས་དང་ནུས་མཐུ་ཞུགས་ནས་དེས་སྨྲས་པ། ལྷ། ལུས་དང་སེམས་གཉིས་ཀ་འདུལ་བར་བྱེད་པ་སངས་རྒྱས་བཅོམ་ལྡན་འདས་མཆིས་སོ། ། རྒྱལ་པོ་ཆེན་པོ་སངས་རྒྱས་མཐུ་བོ་ཆེ། ། ཉོན་མོངས་སྤངས་པ་དཔའ་བོ་སྟོབས་ལྡན་པ། ། དེ་དང་གང་དག་དེ་ལྟར་རྗེས་འབྲང་བ། ། དེ་དབང་འདིར་ནི་གཟུགས་མེད་སེམས་འགྱུར་རོ། ། ཞེས་སོགས་སངས་རྒྱས་རྣམས་ཀྱི་ཡོན་ཏན་རྒྱ་ཆེར་བསྒྲགས་སོ། ། དེ་ནས་རྒྱལ་པོ་འོད་ལྡན་གྱིས་སངས་རྒྱས་བཅོམ་ལྡན་འདས་རྣམས་ཀྱི་བརྩོན་འགྲུས་དང་སྟོབས་ཐོས་ནས་ཤིན་ཏུ་དད་དེ་སྦྱིན་པ་དག་བྱིན། བསོད་ནམས་དག་བྱས་ཏེ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ། སྦྱིན་པ་རྒྱ་ཆེན་གྱུར་པ་འདི་ཡིས་སུ། ། འགྲོ་བར་རང་བྱུང་སངས་རྒྱས་གྱུར་ནས་ནི། ། སྔོན་གྱི་རྒྱལ་བ་རྣམས་ཀྱིས་མ་བསྒྲལ་བ། ། སྐྱེ་བོའི་ཚོགས་དག་བདག་གིས་བསྒྲལ་བར་བྱ། ། བདག་གིས་སྐྱེ་དགུ་ལེགས་བསྐྱངས་ལས་བྱུང་བའམ། ། བཏང་བ་ལས་བྱུང་བསོད་ནམས་ཡོད་པ་དང། ། དེས་ནི་སངས་རྒྱས་ཉིད་ཐོབ་འཇིག་རྟེན་དག ། འདོད་པའི་རིམས་ནད་ལས་ནི་ཐར་བར་བྱ། ། ཞེས་བྱང་ཆུབ་མཆོག་ཏུ་ཐུགས་བསྐྱེད་པར་གསུངས་སོ། ། མ་བསྐྱེད་དགྲའི་བགྱོད་པ་བསལ་བའི་མདོ་ལས་ཐུགས་བསྐྱེད་ཚུལ་གསུངས་པ་ནི། དེ་བཞིན་གཤེགས་པ་སྔོན་འདས་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པའི་སྔོན་རོལ་གྱི་ཡང་སྔོན་རོལ་ན་ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བར་འཁྲུངས་པའི་ཚེ། རྗེ་བཙུན་འཇག་དཔལ་དགེ་སློང་ཆོས་སྨྲ་བ་ཡེ་ཤེས་རྒྱལ་པོ་ཞེས་བྱ་བར་འཁྲུངས་པ་དེས་བསྐུལ་ནས་དེ་བཞིན་གཤེགས་པ་མི་ཐུབ་ཟླ་བའི་རྒྱལ་མཚན་གྱི་སྤྱན་སྔར་ཁྲིད་ནས་དེ་བཞིན་གཤེགས་པ་འཁོར་དང་བཅས་པ་ལ་བསོད་སྙོམས་འབུལ་དུ་བཅུག་པ་ན། ཚོང་དཔོན་གྱི་བུ་དྲི་མ་མེད་པའི་དཔུང་བ་ཞེས་བྱ་བ་དེས་ཀྱང་བསོད་སྙོམས་ཕུལ་ནས་བསོད་སྙོམས་གཅིག་ཕུལ་བས། དེ་བཞིན་གཤེགས་པ་མི་ཐུབ་ཟླ་བའི་རྒྱལ་མཚན་འཁོར་ཉན་ཐོས་བརྒྱད་ཁྲི་བཞི་སྟོང་དང་བྱང་ཆུབ་སེམས་དཔའ་ཁྲི་ཉིས་སྟོང་དང་བཅས་པ་ཁྱབ་ཅིང་ཐམས་ཅད་ཀྱིས་ཚིམ་པར་བཞེས་ཀྱང་བསོད་སྙོམས་དེ་ཟད་པར་མ་གྱུར་པ་ན་ཁྱེའུ་དེ་རབ་ཏུ་དགའ་ཞིང་དད་པ་ལྷག་པར་སྐྱེས་ནས་དེ་བཞིན་གཤེགས་པ་དེའི་སྤྱན་སྔར་འདུག་པ་དང། དེ་བཞིན་གཤེགས་པ་མི་ཐུབ་ཟླ་བའི་རྒྱལ་མཚན་གྱིས་ཁྱེའུ་དེ་ལ་བྱང་ཆུབ་ཀྱི་ལམ་བསྟན་པ་ན། ཚོང་དཔོན་གྱི་བུ་དྲི་མ་མེད་པའི་དཔུང་བས་ཕྱིར་མི་ལྡོག་པའི་དད་པ་ཆེན་པོས་སྐྱབས་སུ་སོང་ཞིང་བྱང་ཆུབ་ཏུ་ཐུགས་བསྐྱེད་པར་གསུངས་སོ། ། བྱང་ཆུབ་སེམས་དཔའི་སྡེ་སྣོད་ལས་སྟོན་པའི་སྔོན་ཐུགས་བསྐྱེད་ཚུལ་དང་ས་ལམ་རིམ་གྱིས་བགྲོད་ཚུལ་གསུངས་པ་ནི་མདོ་དེ་ཉིད་ལས། དེ་བཞིན་གཤེགས་པ་སྔོན་འདས་པའི་བསྐལ་པ་གྲངས་མེད་བསམ་གྱིས་མི་ཁྱབ་པའི་སྔོན་རོལ་ན། ཆོས་ཀྱི་རྒྱལ་པོ་ཚེ་རྣམ་པར་རྒྱལ་བ་ཞེས་བྱ་བའི་བུ་གཞོན་ནུ་བརྩོན་འགྲུས་སྤྱོད་པ་ཞེས་བྱ་བར་འཁྲུངས་པའི་ཚེ་དེ་བཞིན་གཤེགས་པ་ཕུང་པོ་ཆེན་པོ་ཞེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ། དེ་བཞིན་གཤེགས་པ་དེས་རྫུ་འཕྲུལ་གྱི་བཀོད་པ་བསམ་གྱིས་མི་ཁྱབ་པ་བསྟན་ནས་གཞོན་ནུ་བརྩོན་འགྲུས་སྤྱོད་པ་ཡིད་འདུན་པར་བྱས་ཏེ་བྱམས་སྙིང་རྗེ་བྱང་ཆུབ་ཀྱི་སེམས་བསྐྱེད་ཚུལ་དང། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་དང་བསྡུ་བའི་དངོས་པོ་བཞིས་བསྡུས་པའི་རྒྱལ་སྲས་ཀྱི་སྤྱོད་པ་རླབས་པོ་ཆེ་རྣམས་ལ་སློབ་ཚུལ་རྒྱས་པར་བསྟན་ཅིང། སྟོབས་བཅུ་དང་མི་འཇིགས་པ་བཞི་དང། མ་འདྲེས་པ་བཅོ་བརྒྱད་སོགས་སངས་རྒྱས་ཀྱི་ཡོན་ཏན་རྣམས་རྒྱ་ཆེར་བསྒྲགས་པ་ན། གཞོན་ནུ་བརྩོན་འགྲུས་སྤྱོད་པ་ཐེག་པ་ཆེན་པོའི་ལམ་ལ་ཕྱིར་མི་ལྡོག་པའི་ངེས་པ་བརྟན་པོ་ཐོབ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོ་ཉན་ཐོས་ཀྱི་དགེ་འདུན་དང་བཅས་པ་ལ་ལོ་བྱེ་བ་ཕྲག་དགུ་བཅུ་རྩ་དྲུག་ཏུ་མཆོད་པའི་དངོས་པོ་ཐམས་ཅད་ཀྱིས་མཆོད་ཅིང་བསྙེན་བཀུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་གསུངས་སོ། ། དེ་ནས་བསྐལ་པ་ཆེན་པོ་གྲངས་མེད་པ་གཅིག་འདས་པ་ན་ཚོང་དཔོན་ཤེས་རབ་བཟང་པོ་ཞེས་བྱ་བར་འཁྲུངས་པའི་ཚེ། དེ་བཞིན་གཤེགས་པ་དཀོན་མཆོག་ཡན་ལག་ཅེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ། དེ་བཞིན་གཤེགས་པ་དཀོན་མཆོག་ཡན་ལག་གིས་ཚོང་དཔོན་ཤེས་རབ་བཟང་པོ་ལ་བྱང་ཆུབ་ཀྱི་ལམ་རྒྱས་པར་བསྟན་ཅིང། རྫུ་འཕྲུལ་གྱི་བཀོད་པ་དུ་མའང་བསྟན་པས་དད་པ་དང་དགའ་བ་རྒྱ་ཆེན་པོ་དང་བྱང་ཆུབ་ཀྱི་ལམ་ལ་ཕྱིར་མི་ལྡོག་པའི་ངེས་པ་བརྟན་པར་གྱུར་ནས། ཚོང་དཔོན་ཤེས་རབ་བཟང་པོས་དེ་བཞིན་གཤེགས་པ་དཀོན་མཆོག་ཡན་ལག་ཉན་ཐོས་ཀྱི་དགེ་འདུན་དང་བཅས་པ་ལ་ལོ་སྟོང་དུ་མཆོད་ཅིང་བསྙེན་བཀུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་ཅིང་བྱང་ཆུབ་ཀྱི་ལམ་རྣམས་ཡོངས་སུ་བསྒྲུབ་བོ། ། དེ་ནས་བསྐལ་པ་གྲངས་མེད་པ་གཅིག་འདས་པ་ན་བྲམ་ཟེའི་ཁྱེའུ་གཞོན་ནུ་སྤྲིན་དུ་འཁྲུངས་པའི་ཚེ། དེ་བཞིན་གཤེགས་པ་མར་མེ་མཛད་འཇིག་རྟེན་དུ་བྱོན་པ་དང་མཇལ་ཏེ། དགའ་བ་དང། མགུ་བ་དང། དད་པ་རྒྱ་ཆེན་པོས་དེ་བཞིན་གཤེགས་པ་མར་མེ་མཛད་ཀྱི་སྤྱན་སྔར་ལོ་བཅུ་གཉིས་སུ་རལ་པ་གསེར་གྱི་མདོག་ཅན་བཏིང་ནས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མི་སྟོན་ན་བདག་འདི་ཉིད་དུ་ལུས་བསྐམ་པར་བྱའོ་ཞེས་ཡི་དམ་བཅས་སོ། ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀུན་ནས་སྤྱན་ཀུན་ནས་མཁྱེན་པ་དུས་གསུམ་གང་ཡང་མི་མཁྱེན་པ་ཅུང་ཟད་ཀྱང་མེད་པ་དེས་བྲམ་ཟེའི་ཁྱེའུ་སྤྲིན་གྱི་བསམ་པ་མཁྱེན་ནས། དེའི་རལ་པ་གསེར་གྱི་ཁ་དོག་ལྟ་བུ་ལ་ཞབས་བཞག་གོ ། དེ་ནས་བྲམ་ཟེའི་ཁྱེའུ་སྤྲིན་གྱིས་ལངས་ནས་དེ་བཞིན་གཤེགས་པ་མར་མེ་མཛད་ལ་ཨུཏྤ་ལས་སྙིམ་པ་བཀང་སྟེ་གཏོར་རོ། ། གཏོར་མ་ཐག་ཏུ་དེའི་ཚེ་དེ་བཞིན་གཤེགས་པའི་དབུའི་གཙུག་གི་སྟེང་གི་ཐད་དུ་ཨུཏྤལའི་ཁང་པ་བརྩེགས་པ་གྲྭ་བཞིར་ཀ་བ་བཞི་ཟུག་པ། ཆ་མཉམ་པ། ཤིན་ཏུ་རྣམ་པར་ཕྱེ་བ། ཉམས་དགའ་བ། ཡིད་དུ་འོང་བ་ཞིག་གནས་པར་གྱུར་ཏེ། ཁང་པ་བརྩེགས་པ་དེ་ནའང་དེ་བཞིན་གཤེགས་པའི་སྐུ་སྣང་ངོ་། ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་བྲམ་ཟེའི་ཁྱེའུ་སྤྲིན་ལ་འདི་སྐད་ཅེས་བཀའ་སྩལ་ཏོ། ། བྲམ་ཟེའི་ཁྱེའུ་ཁྱོད་དགེ་བའི་རྩ་བ་འདིས་མ་འོངས་པའི་དུས་བསྐལ་པ་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་འགྱུར་རོ། ། ཞེས་ལུང་བསྟན་ཏོ། ། དེ་ནས་བྲམ་ཟེའི་ཁྱེའུ་སྤྲིན་བདག་ཉིད་ལུང་བསྟན་པ་ཐོས་ནས་དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་དང་ཡིད་བདེ་བ་བསྐྱེད་ནས་དེའི་ཚེ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། ། དེ་བཟོད་པ་ཐོབ་ནས་སྟེང་གི་ནམ་མཁའ་ལ་ཏ་ལ་བདུན་སྲིད་དུ་འཕགས་ནས་ཏིང་ངེ་འཛིན་དྲུག་སྟོང་མངོན་དུ་གྱུར་ཅིང། དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་དག་ཀྱང་མངོན་དུ་གྱུར་ཏོ། ། ཞེས་གསུངས། ལྷག་པར་སྟོན་པ་ཐུགས་རྗེ་ཅན་འདིས་རང་ཅག་རྩོད་ལྡན་སྙིགས་མ་ལྔ་བདོའི་འགྲོ་བ་སངས་རྒྱས་དང་བྱང་ཆུབ་སེམས་དཔའ་གཞན་ཐམས་ཅད་ཀྱིས་འདུལ་མ་ནུས་པར་ཡལ་བར་བོར་བ་རྣམས་ཐུགས་རྗེས་མ་བཟོད་པར་བྲམ་ཟེ་རྒྱ་མཚོའི་རྡུལ་དུ་འཁྲུངས་པ་ན་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཔང་དུ་བཞག་སྟེ། སྤྱིར་ཕྱོགས་བཅུའི་སངས་རྒྱས་ཐམས་ཅད་ཀྱིས་འདུལ་མ་ནུས་པར་ལུས་ཤིང། ཁྱད་པར་བསྐལ་པ་བཟང་པོ་འདི་ལ་འབྱོན་པའི་སངས་རྒྱས་འཁོར་བ་འཇིག་ནས། ཐ་མ་མོས་པ་སྣང་མཛད་ལ་ཐུག་གི་བར་དགུ་བརྒྱ་དང་དགུ་བཅུ་རྩ་དགུ་པོ་དེ་དག་ཐམས་ཅད་ཀྱིས་རང་རང་གི་ཞིང་བཟུང་བ་ན་རྩོད་ལྡན་ཚེ་ལོ་བརྒྱ་བའི་དུས་འདི་ནི་ཇི་ལྟར་མེ་དཔུང་འབར་བའི་ནང་དུ་སུ་ཡང་འཇུག་པར་མི་སྤྲོ་བ་བཞིན་དུ་དགུ་བརྒྱ་དང་དགུ་བཅུ་རྩ་དགུ་པོ་དེ་དག་ཐམས་ཅད་ཀྱིས་སྙིགས་མ་ལྔ་བདོའི་སེམས་ཅན་མ་རུངས་པ་རྨུ་རྒོད་པ་གདུལ་དཀའ་བ་ཕ་ལ་ཕར་མི་འཛིན་པ་མ་ལ་མར་མི་འཛིན་པ་སློབ་དཔོན་ལ་སློབ་དཔོན་དུ་མི་འཛིན་པ་དྲིན་ལན་ལོག་པར་འཇལ་བ་མ་རུངས་པ་དེ་དག་གི་ནང་དུ་སུ་ཞིག་འཇུག་ཅེས་ཡལ་བར་བོར་བ་ན། བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་ཕྱོགས་བཅུའི་སངས་རྒྱས་ཐམས་ཅད་དཔང་དུ་བཞག་སྟེ་མཁྱེན་པར་གསོལ་ནས། རྩོད་ལྡན་ཚེ་ལོ་བརྒྱ་པའི་དུས་ཀྱི་སེམས་ཅན་དེ་དག་སྙིང་རེ་རྗེ། དེ་དག་ང་འབའ་ཞིག་གིས་གདུལ་བར་བྱའོ། ། དེའི་བར་དུ་འཚང་རྒྱ་བར་རང་དབང་ཡོད་ཀྱང་འཚང་མི་རྒྱ་བར་དེའི་དུས་ཁོ་ནར་ངེས་པར་འཚང་རྒྱ་བའི་མཛད་པ་བསྟན་པར་བྱའོ། ། ཞེས་དམ་བཅས་ཤིང་རང་ཅག་སྙིགས་མ་ལྔ་བདོའི་འགྲོ་བ་རྣམས་ཀྱི་དོན་དུ་སྨོན་ལམ་ཆེན་པོ་ལྔ་བརྒྱ་བཏབ་པ་ན་དེ་བཞིན་གཤེགས་པ་རིན་ཆེན་སྙིང་པོ་དང་ཕྱོགས་བཅུའི་སངས་རྒྱས་ཐམས་ཅད་ཀྱིས་མགྲིན་གཅིག་ཏུ་ལེགས་སོ་བརྗོད་ཅིང་མེ་ཏོག་གཏོར་ཏེ་བདག་ཉིད་ཆེན་པོ་ཁྱོད་ནི་བྱང་ཆུབ་སེམས་དཔའ་ཐམས་ཅད་ཀྱི་ནང་ན་ཟླ་མེད་པ་སྟེ་མེ་ཏོག་ཐམས་ཅད་ཀྱི་ནང་ན་མཚུངས་པ་མེད་པ་མེ་ཏོག་པདྨ་དཀར་པོ་ལྟ་བུའོ་ཞེས་རྒྱ་ཆེར་བསྔགས་སོ། ། སྟོན་པ་ཐུགས་རྗེ་ཅན་འདིའི་མཛད་པ་གཞན་ལྟ་ཞོག ། སྔོན་ཐུགས་བསྐྱེད་པའི་མཛད་པ་འདི་ཉིད་བསམས་ནས་ཀྱང་བཀའ་དྲིན་དང་ཐུགས་རྗེ་དྲན་པའི་དད་པ་ཆེན་པོའི་སྒོ་ནས་མཆོད་ཅིང་གསོལ་བ་འདེབས་པ་ལ་བརྩོན་པ་ལྷུར་བྱའོ། ། དེ་ལྟར་སྟོན་པས་ཐུགས་བསྐྱེད་ནས་བར་དུ་ཚོགས་བསགས་ཚུལ་ནི། མཛོད་ལས། རྣམ་གཟིགས་མར་མེ་རིན་ཆེན་གཙུག ། གྲངས་མེད་གསུམ་གྱི་ཐ་མར་བྱུང། ། དང་པོ་ཤཱཀྱ་ཐུབ་པ་ཡིན། ། ཞེས་གསུངས་པ་ལྟར། དེ་བཞིན་གཤེགས་པ་ཤཱཀྱ་ཐུབ་ཆེན་ནས་བཟུང་དེ་བཞིན་གཤེགས་པ་གཙུག་ཏོར་ཅན་འཇིག་རྟེན་དུ་བྱོན་པའི་བར་ལ་གྲངས་མེད་དང་པོ་དང། དེ་ནས་དེ་བཞིན་གཤེགས་པ་མར་མེ་མཛད་འཇིག་རྟེན་དུ་བྱོན་པའི་བར་ལ་གྲངས་མེད་གཉིས་པ་དང། དེ་ནས་དེ་བཞིན་གཤེགས་པ་རྣམ་གཟིགས་འཇིག་རྟེན་དུ་བྱོན་པའི་བར་ལ་གྲངས་མེད་གསུམ་པ་སྟེ་བསྐལ་ཆེན་གྲངས་མེད་གསུམ་དུ་ཚོགས་བསགས། དེ་ཡང་འདུལ་བ་ལུང་ལས། སངས་རྒྱས་ཤཱཀྱ་ཐུབ་པ་ནས། ། འདྲེན་པ་ཡུལ་འཁོར་སྐྱོང་གི་བར། ། བདུན་ཁྲི་ལྔ་སྟོང་ཚང་བ་ཡི། ། སངས་རྒྱས་རྣམས་ནི་ངས་མཆོད་དོ། ། སངས་རྒྱས་ལེགས་མཛད་ནས་བཟུང་སྟེ། ། དབང་པོ་རྒྱལ་མཚན་ཐུབ་པའི་བར། ། བདུན་ཁྲི་དྲུག་སྟོང་ཚང་བ་ཡི། ། སངས་རྒྱས་རྣམས་ནི་ངས་མཆོད་དོ། ། སངས་རྒྱས་མར་མེ་མཛད་ནས་ནི། ། སངས་རྒྱས་འོད་སྲུངས་བར་དག་ཏུ། ། བདུན་ཁྲི་བདུན་སྟོང་ཚང་བ་ཡི། ། སངས་རྒྱས་རྣམས་ནི་ངས་མཆོད་དོ། ། ཞེས་འབྱུང་བ་ལྟར། གྲངས་མེད་དང་པོ་ལ་དེ་བཞིན་གཤེགས་པ་ཤཱཀྱ་ཐུབ་ཆེན་ནས་བཟུང་དེ་བཞིན་གཤེགས་པ་ཡུལ་འཁོར་སྐྱོང་གི་བར་སངས་རྒྱས་བདུན་ཁྲི་ལྔ་སྟོང་དང། གྲངས་མེད་གཉིས་པ་ལ་དེ་བཞིན་གཤེགས་པ་ལེགས་མཛད་ནས་བཟུང་སྟེ་དེ་བཞིན་གཤེགས་པ་དབང་པོ་རྒྱལ་མཚན་གྱི་བར་སངས་རྒྱས་བདུན་ཁྲི་དྲུག་སྟོང་དང། གྲངས་མེད་གསུམ་པ་ལ་དེ་བཞིན་གཤེགས་པ་མར་མེ་མཛད་ནས་བཟུང་དེ་བཞིན་གཤེགས་པ་འོད་སྲུངས་ཀྱི་བར་སངས་རྒྱས་བདུན་ཁྲི་བདུན་སྟོང་ལ་བསྙེན་བཀུར་ཞིང་མཆོད་པས་མཉེས་པར་མཛད་ཅིང་ཚོགས་གཉིས་བར་མ་ཆད་དུ་བསགས་སོ། ། དེ་ལྟར་གྲངས་མེད་གསུམ་དུ་ཚོགས་བསགས་ཚུལ་དེ་ཡང་ཐེག་པ་ཐུན་མོང་བའི་དབང་དུ་བྱས་ནས་གསུངས་པ་ཡིན་གྱི། ཐེག་པ་ཆེན་པོའི་མདོ་ནས་གྲངས་མེད་གསུམ་དུ་ཚོགས་བསགས་ཚུལ་ཇི་ལྟར་གསུངས་པ་ནི་སྔར་བྱང་ཆུབ་སེམས་དཔའ་སྡེ་སྣོད་ལས་ཇི་ལྟར་གསུངས་ཚུལ་བཤད་པ་ལྟར་དང། མདོ་སྡེ་དཀོན་མཆོག་སྤྲིན་ལས། རིགས་ཀྱི་བུ་དེ་བཞིན་གཤེགས་པ་ནི་བསྐལ་པ་གྲངས་མེད་པ་དུ་མས་ཡང་དག་པར་གྲུབ་པ་ཡིན་ཏེ། རིགས་ཀྱི་བུ་དེ་བཞིན་གཤེགས་པ་ནི་དཔག་པ་དང། བསམ་པ་དང། བརྟག་པར་མི་ནུས་སོ། ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་གསོལ་བ། བཅོམ་ལྡན་འདས་བསྐལ་པ་གྲངས་མ་མཆིས་པ་གསུམ་གྱིས་དེ་བཞིན་གཤེགས་པ་རྣམས་ཡང་དག་པར་འགྲུབ་པ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེ་བཞིན་གཤེགས་པའི་ཡུལ་བསྒྲུབ་པར་བྱ་བ་ནི་བསམ་གྱིས་མི་ཁྱབ་སྟེ། དེ་ནི་བསྐལ་པ་གྲངས་མེད་པ་གསུམ་གྱིས་ཡང་དག་པར་བསྒྲུབ་པར་མི་ནུས་ཀྱི། ནམ་བྱང་ཆུབ་སེམས་དཔའ་ཆོས་མཉམ་པ་ཉིད་དུ་ཞུགས་པར་གྱུར་པ་དེའི་ཚེ་དེ་ནས་བརྩམས་ཏེ་བསྐལ་པ་བགྲང་བར་བྱ་ཡི། ཐོག་མའི་སེམས་ནས་བརྩམས་ཏེ་ནི་མ་ཡིན་ནོ། ། ཞེས་གསུངས། ཟླ་བ་སྒྲོན་མའི་མདོ་ལས། སངས་རྒྱས་དག་ནི་བྱེ་བ་ཁྲག་ཁྲིག་དང། ། དེ་ལས་ལྷག་པ་གངྒཱའི་བྱེ་མ་སྙེད། ། ཀུན་ཀྱང་བྱ་རྒོད་ཕུང་པོ་འདིར་བཞུགས་ཏེ། ། མི་དབང་དེ་ཀུན་ང་ཡིས་བཀུར་བསྟི་བྱས། ། ཞེས་སོགས་རྒྱ་ཆེར་གསུངས་པ་ལྟར། སྟོན་པས་སྔོན་སློབ་པ་ལམ་གྱི་གནས་སྐབས་སུ་སངས་རྒྱས་གྲངས་མེད་དཔག་ཏུ་མེད་པ་གངྒཱའི་ཀླུང་གི་བྱེ་མ་སྙེད་དག་ལ་བསྙེན་བཀུར་ཞིང་མཆོད་པར་མཛད་ནས་རྫོགས་སྨིན་སྦྱངས་གསུམ་གྱི་སྤྱོད་པ་མཐར་ཕྱིན་པར་མཛད་དེ་གཞི་དང་སྙིང་པོ་མེ་ཏོག་གིས་བརྒྱན་པ་ཞེས་བྱ་བའི་འོག་མིན་གྱི་ཞིང་དུ་ངེས་པ་ལྔ་ལྡན་ལོངས་སྤྱོད་རྫོགས་སྐུ་མངོན་དུ་མཛད་དེ། སྐུ་དེ་ལས་ནམ་ཡང་གཡོ་བ་མེད་བཞིན་དུ་མཁའ་ཁྱབ་ཀྱི་ཞིང་ཐམས་ཅད་དུ་གདུལ་བྱ་རང་རང་གི་དབང་པོ་དང་འཚམ་པའི་སྤྲུལ་པ་བསྟན་ནས་སེམས་ཅན་གྱི་དོན་མཛད་པ་ལས། སྔོན་གྱི་ཐུགས་བསྐྱེད་དང་སྨོན་ལམ་དུས་སུ་སྨིན་ཏེ་མི་མཇེད་འཇིག་རྟེན་གྱི་ཞིང་འདིར་མཆོག་གི་སྤྲུལ་སྐུའི་མཛད་པ་སྟོན་དུ་ཉེ་བ་ན། རྒྱལ་བ་འོད་སྲུངས་འཇིག་རྟེན་འདིར་བྱོན་པའི་ཚེ་སྟོན་པ་ཐུགས་རྗེ་ཅན་འདི་ཉིད་བྲམ་ཟེའི་ཁྱེའུ་བླ་མ་ཞེས་བྱ་བར་འཁྲུངས་ནས་རྒྱལ་བ་འོད་སྲུངས་ཀྱི་སྤྱན་སྔར་ཚངས་པར་སྤྱོད་ཅིང་བཞུགས་པ་ན་རྒྱལ་བ་འོད་སྲུངས་ཀྱིས་བྲམ་ཟེའི་ཁྱེའུ་བླ་མ་ཁྱོད་ནི་ང་མྱ་ངན་ལས་འདས་པའི་འོག་ཏུ་ཚེ་ལོ་བརྒྱ་པའི་དུས་སུ་མི་མཇེད་འཇིག་རྟེན་གྱི་ཁམས་འདིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་ཏེ། ལོ་བརྒྱད་ཅུའི་བར་དུ་ཆོས་ཀྱི་འཁོར་ལོ་བསྐོར་ནས་མྱ་ངན་ལས་འདས་པའི་འོག་ཏུའང་དམ་པའི་ཆོས་ཡུན་རིང་དུ་གནས་པར་འགྱུར་རོ། ། ཞེས་ལུང་བསྟན་ཏེ་ཕྱོགས་བཅུའི་ཞིང་ཁམས་ཐམས་ཅད་དུ་གྲགས་པར་མཛད་དོ། ། བྲམ་ཟེའི་ཁྱེའུ་བླ་མ་དེ་ནས་འཕོས་ཏེ་དགའ་ལྡན་དུ་ལྷའི་བུ་དམ་པ་ཏོག་དཀར་པོ་ཞེས་བྱ་བ་སྐྱེ་བ་གཅིག་ཐོགས་ཀྱི་བྱང་ཆུབ་སེམས་དཔའི་ཚུལ་བཟུང་སྟེ་དགའ་ལྡན་གྱི་ལྷ་རྣམས་ལ་ཆོས་སྟོན་ཅིང་ཞིང་འདིར་འབྱོན་པའི་བར་དུ་བཞུགས་སོ། ། དེ་ནས་བྱང་ཆུབ་སེམས་དཔའ་དམ་པ་ཏོག་དཀར་པོ་ཞིང་འདིར་འབྱོན་དུ་ཉེ་བ་ན། གང་དུ་བྱང་ཆུབ་སེམས་དཔའ་སྐུ་བལྟམས་པར་འགྱུར་བའི་ས་ལུམ་བི་ནའི་ཚལ་དུ་སྔ་ལྟས་བཅུ་བྱུང་སྟེ། ས་ཐམས་ཅད་ལག་མཐིལ་ལྟར་མཉམ། ས་གཞི་རྡོ་རྗེ་ལས་གྲུབ་ཅིང་རིན་པོ་ཆེས་གང། རིན་པོ་ཆེའི་ཤིང་གིས་འཁྲིགས། སྤོས་ཀྱི་མྱུ་གུ་དང་ཕྱེ་མའི་མཛོད་འཐོན་ཞིང་རྒྱལ་མཚན་གྱི་སྤྲིན་གཏིབས། ལྷ་རྫས་ཀྱི་མེ་ཏོག་དང་གོས་ཀྱི་མཛོད་རྒྱས། ལྗོན་ཤིང་ཐམས་ཅད་ལ་ནོར་བུ་རིན་པོ་ཆེའི་མཛོད་གྲུབ། ཆུ་ལས་འཕགས་པའི་པདྨས་གང། སྡེ་བརྒྱད་སོགས་འཇིག་རྟེན་གྱི་དབང་པོ་རྣམས་ཐལ་མོ་སྦྱར་ཏེ་འཁོད། སྡེ་བརྒྱད་ཀྱི་བུ་མོ་རྣམས་ཀྱིས་ལྗོན་པའི་རྒྱལ་པོ་པླཀྵའི་སྡོང་པོ་ལ་བལྟ་ཞིང་ཕྱོགས་བཅུའི་རྒྱལ་བ་ཐམས་ཅད་ཀྱི་སྐུའི་ལྟེ་བ་ནས་བཀྱེ་བའི་འོད་ཟེར་གྱིས་ཚལ་ཐམས་ཅད་སྣང་བར་བྱས་ཤིང་འོད་ཀྱི་དཀྱིལ་འཁོར་དུ་བྱང་ཆུབ་སེམས་དཔའ་སྐུ་བལྟམས་པའི་རྣམ་འཕྲུལ་གཟུགས་བརྙན་དུ་འཆར་ལ་སྐུ་བལྟམས་པའི་སྒྲ་གྲག་པ་རྣམས་བྱུང་ངོ་། ། ལུམ་བི་ནའི་ཚལ་ཞེས་བྱ་བ་ནི་གྲོང་ཁྱེར་སེར་སྐྱ་དང་ཉེ་བའི་ཕྱོགས་ན་སྔོན་ལྷ་རྣམས་ཀྱིས་འདིར་གྲོང་ཁྱེར་རྩིགས་ཤིག་ཅེས་བཀོད་པ་བྱས་པའི་ས་ལྷས་བསྟན་ཅེས་བྱ་བའི་གྲོང་ཁྱེར་ཆེན་པོ་ན་རྒྱལ་པོ་ལེགས་པར་རབ་སད་ཅེས་བྱ་བ་ཞིག་ཡོད་དེ། དེ་ལ་བཙུན་མོ་མཆོག་ལུམ་བི་ན་ཞེས་བྱ་བ་སྨོན་ལམ་གྱི་མཐུ་གྲུབ་པ་ཞིག་ཡོད་པ་དེ་ལ་བྱང་ཆུབ་སེམས་དཔའི་བྱིན་རླབས་ཞུགས་ཏེ། སེར་སྐྱ་དང་ལྷས་བསྟན་གྱི་བར་དུ་ཀུན་དགའ་ར་བ་ཞིག་ཡོད་པ་དེ་ངའི་སྐྱེད་ཚལ་དུ་བྱུང་ན་སྙམ་དུ་སྨོན་ཞིང་དེ་ལྟར་དུ་རྒྱལ་པོ་ལེགས་པར་རབ་སད་ལ་ཞུས་པ་ན། རྒྱལ་པོ་ལེགས་པར་རབ་སད་ཀྱིས་དེར་སྐྱེད་ཚལ་ཕུན་ཚོགས་པ་ཡོ་བྱད་ཐམས་ཅད་དང་ལྡན་པ་ཞིག་བཅོས་ཏེ་ལུམ་བི་ན་ལ་བྱིན་པས་ལུམ་བི་ནའི་ཚལ་ཞེས་གྲགས་སོ། ། དེ་ནས་བྱང་ཆུབ་སེམས་དཔའ་དམ་པ་ཏོག་དཀར་པོ་ནི་དགའ་ལྡན་གྱི་ལྷའི་གནས་ན། གཞལ་མེད་ཁང་སུམ་ཁྲི་ཉིས་སྟོང་རབ་ཏུ་གནས་པ་ལྷའི་གཞལ་མེད་ཁང་གི་ཡོན་ཏན་དང་རྒྱན་བཀོད་པ་ཕུན་སུམ་ཚོགས་པ་བྱེ་བས་རབ་ཏུ་ཕྱུག་ཅིང་དཔལ་དང་ལྡན་པ་དེ་ན་བདེ་བར་གནས་ཤིང། སིལ་སྙན་དང་གླུ་དབྱངས་བརྒྱད་ཁྲི་བཞི་སྟོང་གི་སྒྲ་སྒྲོག་པ་ལས། ཉིད་ཀྱི་བསོད་ནམས་ཀྱི་མཐུ་དང་སངས་རྒྱས་རྣམས་ཀྱི་བྱིན་རླབས་ཀྱིས་རོལ་མོའི་སྒྲ་དབྱངས་དེ་དག་ལས། བསོད་ནམས་རྒྱ་ཆེ་ཚོགས་མངའ་དྲན་རྟོགས་དང། ། བློ་གྲོས་མཐའ་ཡས་ཤེས་རབ་འོད་མཛད་པ། ། མཚུངས་མེད་སྟོབས་མངའ་སྒྱུ་རྩལ་རྒྱ་ཆེ་བ། ། མར་མེ་མཛད་ཀྱིས་ལུང་བསྟན་དགོངས་པར་མཛོད། ། སྐྱེས་མཆོག་ཁྱོད་ཀྱི་བསོད་ནམས་དཔལ་གྱིས་ནི། ། དགའ་ལྡན་ཕོ་བྲང་ཤིན་ཏུ་མཛེས་མོད་ཀྱི། ། འོན་ཀྱང་ཐུགས་རྗེའི་ཐུགས་དང་ལྡན་པས་ན། ། འཛམ་བུའི་རྒྱལ་མཚན་དུ་ནི་ཆར་པ་ཕོབ། ། ཅེས་པ་ནས། འདི་ནི་དུས་ལགས་བཏང་སྙོམས་མ་མཛད་ཅེས། ། སྙིང་རྗེའི་ཡིད་དང་ལྡན་ལ་སྐུལ་བར་བྱེད། ། ཅེས་པ་ལ་སོགས་པས་འཛམ་བུའི་གླིང་དུ་འབྱོན་པའི་དུས་ལ་བབ་པར་བསྐུལ་ཏེ། དེ་ཡང་སྔོན་བསྐལ་པ་བགྲང་བ་ལས་འདས་པ་ནས་རྩོད་ལྡན་ཚེ་ལོ་བརྒྱ་བའི་དུས་སུ་འཛམ་བུའི་གླིང་དུ་སངས་རྒྱས་ཀྱི་མཛད་པ་སྟོན་པར་ཐུགས་དམ་བཅས་ཤིང། རྒྱལ་བ་མར་མེ་མཛད་དང་རྒྱལ་བ་འོད་སྲུངས་ལ་སོགས་པ་སངས་རྒྱས་བགྲང་བ་ལས་འདས་པ་དག་གིས་ཀྱང་དེ་ལྟར་དུ་ལུང་བསྟན་པ་དེ་རྣམས་དགོངས་པར་མཛོད་ཅིག་ཅེས་རོལ་མོའི་སྒྲ་དག་ལས་ཡང་དང་ཡང་དུ་བསྐུལ་ལོ། ། དེའི་ཚེ་གནས་གཙང་མའི་ལྷའི་བུ་རྣམས་བྱང་ཆུབ་སེམས་དཔའ་མངལ་དུ་འཇུག་པའི་ལོ་བཅུ་གཉིས་ཀྱི་གོང་ནས་བྲམ་ཟེར་སྤྲུལ་ཏེ། འོག་ནས་འཆད་པའི་རྣམ་པས་མངལ་དུ་ཞུགས་པར་གྱུར་ན་མཚན་དཔེ་དང་ལྡན་ཏེ། འཁོར་ལོས་བསྒྱུར་རྒྱལ་ལམ། སངས་རྒྱས་སུ་འགྱུར་རོ་ཞེས་འདོན་དུ་འཇུག་ཅིང་རང་སངས་རྒྱས་རྣམས་ལ། ལོ་བཅུ་གཉིས་ན་བྱང་ཆུབ་སེམས་དཔའ་ལྷུམས་སུ་འཇུག་གིས་ཞིང་འདི་བོར་ཅིག་ཅེས་ཟེར་ཞིང། དེ་རྒྱལ་པོའི་ཁབ་ཀྱི་མཇུག་མ་སྒྱུར་བའི་རི་ལ་རང་རྒྱལ་གླང་པོ་ཞེས་པས་ཐོས་ཏེ། རྡོ་ལ་རྐང་རྗེས་བཞག་སྟེ་འདས་སོ། ། ཝཱ་ར་ཎཱ་སིར་རང་རྒྱལ་ལྔ་བརྒྱ་མེའི་ཁམས་ལ་ཞུགས་ཏེ་འདས་ནས་རིང་བསྲེལ་ལྷུང་བས་དྲང་སྲོང་ལྷུང་བར་གྲགས་སོ། ། དེ་ནས་བྱང་ཆུབ་སེམས་དཔའ་གཞལ་མེད་ཁང་ཆེན་པོ་དེ་ནས་བྱུང་སྟེ། ཆོས་ཀྱི་མཐོ་བའི་ཁང་བཟང་ལྷ་རྣམས་ལ་ཆོས་སྟོན་པའི་ས་དེར་ཞུགས་ནས་སེང་གེའི་ཁྲི་ཆོས་བཟང་པོ་ཞེས་བྱ་བ་ལ་བཞུགས་ཏེ། བྱང་ཆུབ་སེམས་དཔའ་བྱམས་པ་དང། ལྷའི་བུ་ཡོངས་སུ་དགའ་ལྡན་དང། གང་ཡང་བྱང་ཆུབ་སེམས་དཔའ་ཕྱོགས་ཀུན་ནས་འདུས་པ་རྣམས་ལ་ཆོས་རྒྱ་ཆེར་སྟོན་པར་མཛད་ཅིང། མྱུར་དུ་སངས་རྒྱས་ཀྱི་མཛད་པ་སྟོན་པར་བཞེད་ནས་གཟིགས་པ་ལྔ་ལ་གཟིགས་སོ། ། གཟིགས་པ་ལྔ་ནི། དུས་ལ་གཟིགས་པ། ཡུལ་ལ་གཟིགས་པ། རིགས་ལ་གཟིགས་པ། རུས་ལ་གཟིགས་པ། གང་གིས་ཡུམ་བྱེད་པར་ནུས་པའི་བུད་མེད་ལ་གཟིགས་པ་ལྔའོ། ། དེའི་དང་པོ་དུས་ལ་གཟིགས་པ་ནི། སྔོན་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་བྲམ་ཟེ་རྒྱ་མཚོའི་རྡུལ་གྱིས་རྩོད་ལྡན་ཚེ་ལོ་བརྒྱ་བའི་དུས་འདིར་སངས་རྒྱས་ཀྱི་མཛད་པ་སྟོན་པར་ཐུགས་དམ་བཅས་ཤིང། དེ་བཞིན་གཤེགས་པ་མར་མེ་མཛད་ནས་བཟུང་རྒྱལ་བ་འོད་སྲུངས་ཀྱི་བར་དུ་བྱོན་པའི་སངས་རྒྱས་རྣམས་ཀྱིས་ཀྱང་དེ་ལྟར་དུ་ལུང་བསྟན་པ་ལྟར་བྱང་ཆུབ་སེམས་དཔའ་དམ་པ་ཏོག་དཀར་པོས་དོན་དེ་ཐུགས་ལ་དགོངས་ཤིང། ཕྱོགས་བཅུའི་སངས་རྒྱས་རྣམས་ཀྱིས་ཀྱང་སྙིགས་མའི་འགྲོ་བ་མགོན་སྐྱབས་དང་བྲལ་བ་འདི་རྣམས་ཀྱི་མགོན་སྐྱབས་སུ་མྱུར་དུ་འབྱོན་དགོས་སོ་ཞེས་ཡང་ཡང་བསྐུལ་བ་ལྟར་འཛམ་བུའི་གླིང་དུ་འབྱོན་པའི་དུས་ལ་བབ་པར་གཟིགས་པའོ། ། ཡུལ་ལ་གཟིགས་པ་ནི། སངས་རྒྱས་འཇིག་རྟེན་དུ་འབྱོན་པ་ནི་གདུལ་བྱའི་དོན་ཁོ་ནར་འབྱོན་པ་ཡིན་ལ། གདུལ་བྱའི་གཙོ་བོ་ནི་ལྷ་དང་མི་གཉིས་ཏེ། དེ་ལ་ལྷ་ཡུལ་དུ་མཆོག་གི་སྤྲུལ་སྐུ་བྱོན་ན་ནི་མི་རྣམས་ལ་ལྷ་ཡུལ་དུ་བགྲོད་པའི་མཐུ་མེད་པས་དེ་དག་ལ་མི་ཕན་པ་དང། ལྷ་རྣམས་ཀྱང་འདོད་པས་གཡེངས་ཤིང་ངེས་འབྱུང་སྐྱེ་དཀའ་བས་སོ་ཐར་གྱི་སྡོམ་པའི་རྟེན་དུ་མི་རུང་བ་སོགས་ཀྱིས་ཕན་ཆུང་བ་དང། ལྷ་རྣམས་ཆོས་མཉན་པའི་ཕྱིར་འཛམ་བུའི་གླིང་དུ་བགྲོད་ནུས་པས་མིའི་ནང་ཁོ་ནར་མཆོག་གི་སྤྲུལ་སྐུའི་མཛད་པ་སྟོན་པ་ཡིན་ལ། མི་ལ་ཡང་གླིང་བཞི་ལས་གླིང་གཞན་གསུམ་ནི་ལོངས་སྤྱོད་ཕུན་སུམ་ཚོགས་པ་ཡོད་ཀྱང་དབང་པོ་རྟུལ་ཞིང་ངེས་འབྱུང་ཤུགས་དྲག་པོ་སྐྱེ་དཀའ་བ་དང། འཛམ་བུའི་གླིང་གི་མི་རྣམས་ནི་དབུལ་ཞིང་ཚེ་ཐུང་ཡང་དབང་པོ་ཤིན་ཏུ་རྣོ་བ་མང་བ་དང། ངེས་འབྱུང་ཤུགས་དྲག་པོ་སྐྱེ་སླ་བ་དང། ཚེ་སྟོད་ལ་བསགས་པའི་ལས་ཚེ་སྨད་ལ་སྨིན་ནུས་པའང་སྲིད་པ་དང། འཛམ་བུའི་གླིང་གི་ཤར་ཕྱོགས་ན་རྗེ་བཙུན་འཇམ་དཔལ་དབྱངས་ཀྱི་སྤྲུལ་པའི་ཞིང་ཁམས་རི་བོ་རྩེ་ལྔའི་གནས་དང། ལྷོ་ཕྱོགས་ན་ཐུགས་རྗེ་ཆེན་པོའི་ཞིང་ཁམས་པོ་ཏ་ལའི་གནས་དང། ནུབ་ཕྱོགས་ན་དཔའ་བོ་དང་རྣལ་འབྱོར་མ་རྣམས་ཀྱི་གནས་ཨཽ་ཌི་ཡཱ་ན་དང། བྱང་ཕྱོགས་ན་དཔལ་ཕྱག་ན་རྡོ་རྗེ་སོགས་ཉེ་བའི་སྲས་བརྒྱད་ཀྱིས་རྒྱལ་པོའི་ཚུལ་བཟུང་སྟེ་སེམས་ཅན་གྱི་དོན་བྱེད་པའི་གནས་ཤམ་བྷ་ལ་རྣམས་ཡོད་ཅིང། གཞན་ཡང་འཛམ་བུ་གླིང་གི་ཕྱོགས་དང་ཕྱོགས་མཚམས་རྣམས་ན་ཟུང་འཇུག་གྲུབ་པའི་དཔའ་བོ་དང་དཔའ་མོ་བཞུགས་པའི་གནས་མང་དུ་ཡོད་པས་འཛམ་བུའི་གླིང་འདིར་མདོ་དང་སྔགས་ཀྱི་བསྟན་པ་རྒྱས་པར་འགྱུར་བར་དགོངས་ནས་བྱང་ཆུབ་སེམས་དཔའ་དམ་པ་ཏོག་དཀར་པོ་འཛམ་བུའི་གླིང་འདིར་སངས་རྒྱས་ཀྱི་མཛད་པ་སྟོན་ཕྱིར་འབྱོན་བཞེད་པའོ། ། རིགས་ལ་གཟིགས་པ་ནི། རྒྱལ་བ་རྣམས་མཆོག་གི་སྤྲུལ་སྐུའི་མཛད་པ་སྟོན་པའི་ཚེ་རྒྱལ་རིགས་དང་བྲམ་ཟེའི་རིགས་གང་རུང་ཞིག་ཏུ་འཁྲུངས་ནས་སངས་རྒྱས་ཀྱི་མཛད་པ་མཛད་ཀྱི་དེ་གཉིས་ལས་རིགས་དམའ་བར་འཁྲུངས་པའི་མཛད་པ་མི་སྟོན་ནོ། ། དེ་ཡང་འཇིག་རྟེན་ན་རིགས་གཉིས་པོ་དེ་གང་བཙུན་པར་བྱེད་པ་དེར་འཁྲུངས་པར་མཛད་པས་དུས་འདིར་རྒྱལ་རིགས་བཙུན་པར་བྱེད་པས་ན་འཇིག་རྟེན་ཆགས་ཏེ་འཛམ་བུའི་གླིང་དུ་རྒྱལ་པོ་ཐོག་མར་བྱུང་བ་དེ་ནས་བཟུང་གདུང་རྒྱུན་མ་ཆད་པའི་རྒྱལ་རིགས་སུ་འཁྲུངས་པར་བཞེད་ནས་དེ་ལ་གཟིགས་ཏེ། དེ་ལྟ་བུའི་རྒྱལ་རིགས་ཀྱི་གདུང་དྲི་མ་མེད་པ་ནི་ཤཱཀྱའི་རྒྱལ་པོ་ཟས་གཙང་མ་ཡིན་པར་གཟིགས་སོ། ། དེའི་ཚུལ་ནི། འཇིག་རྟེན་ཐོག་མར་ཆགས་པ་ན་མི་རྣམས་འོད་གསལ་གྱི་ལྷ་ལས་འཕོས་ཏེ་བརྫུས་ཏེ་སྐྱེས་པ། ཁམས་ཟས་རགས་པ་ལ་མི་བལྟོས་པར་དགའ་པའི་ཟས་ཀྱིས་འཚོ་བ། ལུས་དྭངས་གསལ་འོད་ཀྱི་རང་བཞིན་ཅན། འཁྲུག་རྩོད་གང་ཡང་མེད་ཅིང་འཁྲིག་པའི་འདོད་ཆགས་ཀྱང་མེད་ལ། བརྫུན་དུ་སྨྲ་བའང་མེད་པར་རང་བཞིན་གྱིས་དག་པའི་ངང་དུ་གནས་པས་དུས་དེ་ལ་ནི་བསྐལ་པ་རྫོགས་ལྡན་གྱི་དུས་ཞེས་བྱའོ། ། དེ་ནས་བསྐལ་པ་བཟང་པོ་རིམ་གྱིས་བྲི་ནས་བདུད་རྩིའི་ཟས་ཀྱིས་འཚོ་བ་དང། མ་རྨོས་པའི་ལོ་ཏོག་གིས་འཚོ་བ་རྣམས་རིམ་གྱིས་བྱུང་སྟེ་མི་རྣམས་ཀྱི་ལུས་ཀྱི་འོད་ནུབ་ཅིང་ལུས་ལྕི་ལ་བཤང་གཅི་དང་ལྡན་པས་ཕོ་མོའི་དབང་པོ་དོད་དེ་འཁྲིག་པ་སྤྱོད་ཅིང། དེ་ནས་ཀྱང་བསྐལ་པ་བཟང་པོ་རིམ་གྱིས་བྲི་སྟེ་མ་རྨོས་པའི་ལོ་ཏོག་ཀྱང་མེད་པར་ས་ལ་ཞིང་རྨོས་ཏེ་འཚོ་བར་བྱེད་པ་ན། ངེད་ཀྱི་ཞིང་དང་ཁྱོད་ཀྱི་ཞིང་ཞེས་ཕན་ཚུན་འཁྲུག་རྩོད་དུ་གྱུར་ཅིང། མ་ཕྱིན་པར་ལེན་པ་དང། བརྫུན་དུ་སྨྲ་བས་ཕན་ཚུན་འཐབ་ཅིང་རྩོད་པར་གྱུར་པ་ན་འཛམ་བུའི་གླིང་གི་མི་ཐམས་ཅད་ཀྱིས་སྤྱི་མཐུན་དུ་རྒྱལ་པོ་བསྐོས་པ་ནི་མང་པོས་བཀུར་བའི་རྒྱལ་པོ་ཞེས་བྱ་བ་བྱུང་ངོ་། ། རྒྱལ་པོ་དེའི་བུ་འོད་མཛེས། དེའི་བུ་དགེ་བ། དེའི་བུ་དགེ་མཆོག་དེའི་བུ་གསོ་སྦྱོང་འཕགས། དེ་རྣམས་ལ་སྔོན་གྱི་རྒྱལ་པོ་ལྔ་ཟེར། གསོ་སྦྱོང་འཕགས་ཀྱི་སྤྱི་བོའི་ཤ་རྨེན་ལས་སྐྱེས་པ་ང་ལས་ནུ། དེ་ནས་མཛེས་པ། ཉེ་མཛེས། མཛེས་ལྡན། ཉེ་མཛེས་ལྡན། དེ་ལྔ་ནི་སུམ་ཅུ་རྩ་གསུམ་མན་དང། གླིང་བཞི་ནས་གཅིག་གི་བར་ལ་དབང་བའི་འཁོར་ལོས་བསྒྱུར་བའི་རྒྱལ་པོ་ལྔའོ། ། ཉེ་མཛེས་ལྡན་གྱི་བུ་བཟང་པོ་ནས་རྒྱལ་པོ་ས་ཡ་གཅིག་དང་བཞི་ཁྲི་དྲུག་སྟོང་སུམ་བརྒྱ་བདུན་ཅུ་རྩ་དགུ་འདས་པ་ན་རྒྱལ་པོ་ཀྲི་ཀྲི་བྱུང་སྟེ། རྒྱལ་པོ་ཀྲི་ཀྲིས་ནི་སངས་རྒྱས་འོད་སྲུངས་ལ་བསྙེན་བཀུར་ཞིང། སངས་རྒྱས་འོད་སྲུངས་མྱ་ངན་ལས་འདས་ནས་དེའི་སྐུ་གདུང་གི་མཆོད་རྟེན་ཡང་བྱས་སོ། ། རྒྱལ་པོ་ཀྲི་ཀྲིའི་བུ་ལེགས་སྐྱེས་ནས་རྒྱལ་པོ་བརྒྱ་འདས་པ་ན། གྲོང་ཁྱེར་གྲུ་འཛིན་དུ་རྒྱལ་པོ་རྣ་བ་ཅན་བྱུང་སྟེ། དེ་ལ་བུ་གཽ་ཏ་མ་ཞེས་པ་རིགས་མཆོག་དང། བྷ་ར་དཱ་ཛ་གཉིས་ལས། གཽ་ཏ་མ་དྲང་སྲོང་མདོག་ནག་ལས་རབ་ཏུ་བྱུང་ནས་གྲོང་འདབ་ཏུ་གནས་པས་བྷ་ར་དཱ་ཛས་རྒྱལ་སྲིད་བསྐྱངས་སོ། ། དེའི་ཚེ་གཽ་ཏ་མ་ཉེས་པ་མེད་པར་མི་གཡོན་ཅན་ཞིག་གི་གཡོ་ཐབས་ཀྱི་མཐུས་རྒྱལ་པོའི་ཁྲིམས་ཀྱིས་གསལ་ཤིང་ལ་བསྐྱོན་པ་དང། དྲང་སྲོང་མདོག་ནག་གཽ་ཏ་མའི་སྤྱིལ་བོར་དུས་དུས་སུ་འགྲོ་བས་ཕྱིན་པ་ན། དེ་མ་མཐོང་ནས་བཙལ་བ་དང་གཽ་ཏ་མ་གསལ་ཤིང་ལ་བསྐྱོན་པ་མཐོང་ནས། བུ། ཅི་ཡིན། རྨ་མ་བྱུང་ངམ། བདག་གི་སེམས་ཀྱིས་རྨ་མ་ཕྱུང་བའི་བདེན་པའི་ཚིག་གིས་མཁན་པོའི་པགས་པ་གསེར་མདོག་ཏུ་གྱུར་ཅིག་ཅེས་སྨྲས་མ་ཐག་གསེར་མདོག་ཏུ་གྱུར་ཏེ་ཡིད་ཆེས་སོ། ། དེ་ནས་དྲང་སྲོང་གསེར་མདོག་གིས་བསམས་པ། རྒྱལ་པོ་བྷ་ར་དྭ་ཛ་ལ་བུ་མི་འབྱུང་བས་གཽ་ཏ་མ་ཤི་ན་མང་པོས་བཀུར་བའི་རྒྱལ་རྒྱུད་ཆད་པར་འགྱུར་ལ། དེ་ཆད་ན་འཇིག་རྟེན་སྤྱི་ལ་མི་ལེགས་སོ་སྙམ་དུ་བསམས་ནས་གཽ་ཏ་མ་ལ་དྲིས་པ། ཁྱོད་ལ་བུ་བསྐྱེད་པའི་ནུས་པ་ཡོད་དམ། མཁན་པོ། བདག་གཞོན་ནུ་ནས་རབ་ཏུ་བྱུང་བས་བུད་མེད་ཀྱི་རྒྱུས་མ་འཚལ་ན་བུ་བསྐྱེད་པ་ལྟ་ག་ལ་མཆིས། བུ། སྔོན་སྤྱད་པའི་ཡུལ་དྲན་པར་གྱིས་ཤིག་མཁན་པོ། གནད་ཆད་པའི་ཚོར་བས་ཉེན་ན་ཡུལ་དྲན་པར་ག་ལ་འགྱུར། དེར་རྫུ་འཕྲུལ་གྱིས་རྫི་ཆར་ཆེན་པོ་ཕབ་སྟེ་ཆར་པའི་ཐིགས་པ་ལུས་ལ་ཕོག་ཅིང་རླུང་གྲང་མོས་རེག་པས་སྡུག་བསྔལ་མནན་ནས། སྔོན་གྱི་ཡུལ་དྲན་པར་བྱས་ཏེ་འཁྲིག་པའི་འདོད་ཆགས་དྲན་ནས་ཁུ་བ་ཁྲག་དང་འདྲེས་པ་གཉིས་ལྷུང་ངོ་། ། དེ་གཉིས་སྒོ་ང་གཉིས་སུ་གྱུར་ནས་ཉི་མའི་འོད་ཟེར་གྱིས་སྨིན་པ་རྡོལ་བ་དང་ཁྱེའུ་གཉིས་བྱུང་སྟེ་དེ་དང་ཉེ་བའི་བུ་རམ་ཤིང་གསེབ་ཏུ་ཞུགས་སོ། ། གཽ་ཏ་མ་ཉི་མའི་ཟེར་གྱིས་ཤིན་ཏུ་ཚ་ནས་ཤིའོ། ། དྲང་སྲོང་འོངས་ནས་ཉེ་འཁོར་དུ་བལྟས་པས་སྒོང་སྐོགས་མཐོང་སྟེ་བཙལ་བས་བུ་རམ་ཤིང་གི་ཚལ་ན་ཁྱེའུ་གཉིས་འདུག་པ་དེ་དེའི་བུར་ཤེས་ཏེ་གནས་སུ་ཁྲིད་ནས་མནུན་བསྙོད་དེ་གསོས་པ་ཉི་མའི་འོད་ཀྱིས་སྨིན་པར་བྱས་པས་ཉི་མའི་རིགས། གཽ་ཏ་མའི་བུ་ཡིན་པས་གཽ་ཏ་མ། བུ་རམ་ཤིང་གི་ཚལ་ནས་རྙེད་པས་བུ་རམ་ཤིང་པ་ཞེས་མིང་བཏགས་སོ། ། དེ་ནས་དུས་ནམ་ཞིག་ན་རྒྱལ་པོ་བྷ་ར་དཱ་ཛ་བུ་མེད་པར་ཤི་ནས་ཁྱེའུ་གཉིས་རྒྱལ་སར་བོས་ཏེ། ཕུ་བོ་རྒྱལ་སྲིད་ལ་བཞག་པ་ན་དེ་ལའང་བུ་མ་བྱུང་བས་ནུ་བོ་རྒྱལ་སྲིད་ལ་དབང་བསྐུར་བས། རྒྱལ་པོ་བུ་རམ་ཤིང་པ་ཞེས་བྱ་བར་གྱུར། དེའི་བུ་རྒྱུད་ལ་རྒྱལ་པོ་བུ་རམ་ཤིང་པ་བརྒྱ་ཐམ་པ་ཡུལ་གྲུ་འཛིན་དུ་བྱུང། དེའི་ཐ་མ་བུ་རམ་ཤིང་པ་འཕགས་སྐྱེས་པོ། དེའི་བུ་རྐང་གདུབ་ཅན། དེའི་བུ་གནས་འཇོག་སྟེ། རྒྱལ་པོ་གནས་འཇོག་འདི་ནི་ཤཱཀྱའི་རྒྱལ་རྒྱུད་ཀྱི་ཐོག་མ་ཡིན་ནོ། ། དེའི་བུ་ས་ཁྱིམ་སྟེ་དེ་སེར་སྐྱའི་རྒྱལ་སར་བཞག་སྟེ། སེར་སྐྱའི་རྒྱལ་པོ་ས་ཁྱིམ་འདི་ནི་སེར་སྐྱར་ཤཱཀྱའི་རྒྱལ་རྒྱུད་བྱུང་བའི་ཐོག་མ་ཡིན་ནོ། ། རྒྱལ་པོ་ས་ཁྱིམ་ནས་བརྒྱུད་པ་ཤཱཀྱའི་རྒྱལ་པོ་ལྔ་ཁྲི་ལྔ་སྟོང་བརྒྱ་བཅུ་གཉིས་སེར་སྐྱར་བྱུང་བའི་ཐ་མ་རྒྱལ་པོ་གཞུ་བརྟན། དེའི་བུ་སེང་གེ་འགྲམ། ཤཱཀྱའི་རྒྱལ་པོ་སེང་གེ་འགྲམ་ལ་བུ་བཞི་བྱུང་སྟེ། ཟས་གཙང། ཟས་དཀར། བྲེ་བོ་ཟས། བདུད་རྩི་ཟས་སོ། ། དེ་བཞི་ལས་རྒྱལ་པོ་ཟས་གཙང་ལ་བཙུན་མོ་བླངས་དེ་ཤཱཀྱའི་རྒྱལ་པོར་དབང་བསྐུར་རོ། ། རུས་ལ་གཟིགས་པ་ནི། ཡབ་ཡུམ་གཉིས་ཀ་བདུན་བརྒྱུད་ཚུན་ཆད་མ་ཉམས་པ་སྐྱོན་མེད་པ་ཞིག་ལ་གཟིགས་པ་སྟེ། ཡབ་ཟས་གཙང་དང། ཡུམ་སྒྱུ་མ་ལྷ་མཛེས་གཉིས་ཀྱི་སྲས་སུ་འཁྲུངས་བཞེད་པའོ། ། དེ་ལ་ཡབ་ཀྱི་གདུང་རྒྱུད་ནི་བརྗོད་ཟིན་ལ། ཡུམ་ནི་ལྷས་བསྟན་གྱི་རྒྱལ་པོ་ལེགས་པར་རབ་སད་དང་བཙུན་མོ་ལུམ་བི་ན་གཉིས་ལ་སྲས་གཅིག་དང་སྲས་མོ་གཉིས་བྱུང་སྟེ། སྲས་མོ་ཆེ་བ་ནི་སྒྱུ་འཕྲུལ་མ་སྟེ། སྒྱུ་འཕྲུལ་མ་འཁྲུངས་པའི་ཚེ་ལྟས་ཁྱད་པར་ཅན་བྱུང་ཞིང་མིའི་བུ་མོ་ལས་འདས་པ་ཤིན་ཏུ་གཟུགས་བཟང་ཞིང་བལྟ་ན་སྡུག་པ་ལྷའི་བཟོ་བོས་བཅོས་པ་ལྟ་བུ་ཞིག་བྱུང་བས་མིང་སྒྱུ་འཕྲུལ་མ་ཞེས་བཏགས། དེ་མཚན་མཁན་ལ་བསྟན་པས་མཚན་ཤིན་ཏུ་བཟང་ཞིང་འདི་ལ་བུ་སྟོབས་ཀྱི་འཁོར་ལོས་བསྒྱུར་བ་ཞིག་འབྱུང་བར་ལུང་བསྟན། དེའི་རྗེས་སུ་སྲས་མོ་ཆུང་བ་འཁྲུངས་པ་ན་འཇིག་རྟེན་ཐམས་ཅད་འོད་ཀྱིས་ཁྱབ་པ་དང། སངས་རྒྱས་ཀྱི་མཛད་པ་བཅུ་གཉིས་སྟོན་པའི་སྒྲ་གྲག་པ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ཞིང། སྲས་མོ་ཆེ་བ་ལས་ཀྱང་གཟུགས་བཟང་ཞིང་མཛེས་པ། ལྷའི་བུ་མོ་ཇི་ལྟ་བ་ཞིག་བྱུང་བས་མིང་སྒྱུ་འཕྲུལ་ཆེན་མོ་ཞེས་ཀྱང་བྱ། ལྷ་མོ་སྒྱུ་འཕྲུལ་མ་ཞེས་ཀྱང་བྱ། སྒྱུ་མ་ལྷ་མཛེས་ཞེས་ཀྱང་བྱ་བར་གྲགས་སོ། ། དེ་མཚན་མཁན་ལ་བསྟན་པས། འདི་ལ་བུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་འབྱུང། ཁྱིམ་དུ་བཞུགས་ན་འཁོར་ལོས་བསྒྱུར་རྒྱལ་དང། རབ་ཏུ་བྱུང་ན་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། ། དེ་ནས་རྒྱལ་པོ་ལེགས་པར་རབ་སད་ཀྱིས་ཤཱཀྱའི་རྒྱལ་པོ་སེང་གེ་འགྲམ་ལ་བདག་ལ་བུ་མོ་ཁྱད་པར་དུ་འཕགས་པ་གཉིས་ཤིག་བྱུང་ན་འདི་གཉིས་ལས་གཞོན་ནུ་ཟས་གཙང་གི་བཙུན་མོར་གང་འོས་པ་ཞིག་བཞེས་དགོས་ཞེས་བསྐུལ་བ་ན་རྒྱལ་པོ་སེང་གེ་འགྲམ་གྱིས་སྔོན་ལ་བུ་མོ་ཆུང་བ་སྒྱུ་མ་ལྷ་མཛེས་ཟས་གཙང་གི་བཙུན་མོར་བླངས་ཤིང། རྗེས་སུ་ཆེ་བ་སྒྱུ་འཕྲུལ་མ་ཡང་བླངས་སོ། ། དེ་ནི་མཚན་མཁན་དག་གིས་ཇི་ལྟར་བསྟན་པ་ལྟར། སྒྱུ་མ་ལྷ་མཛེས་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་བྱང་ཆུབ་སེམས་དཔའ་འཁྲུངས། ཆེ་བ་སྒྱུ་འཕྲུལ་མ་ལ་བུ་སྟོབས་ཀྱི་འཁོར་ལོས་བསྒྱུར་བའི་མཚན་རྟགས་དང་ལྡན་པ་དགའ་བོ་འཁྲུངས་སོ། ། གང་གིས་ཡུམ་བྱེད་བར་ནུས་པའི་བུད་མེད་ལ་གཟིགས་པ་ནི། སྔོན་ཡུན་རིང་པོ་ནས་དེ་བཞིན་གཤེགས་པ་འཇིག་རྟེན་འདིར་འབྱོན་པའི་ཚེ་ཡུམ་བྱེད་པར་སྨོན་ལམ་བཏབ་པ་ཡུམ་སྒྱུ་མ་ལྷ་མཛེས་ཀྱི་རུམ་དུ་སྐྱེ་བ་བཞེས་པར་བཞེད་པའོ། ། དེ་ལྟར་བྱང་ཆུབ་སེམས་དཔའ་དམ་པ་ཏོག་དཀར་པོས། དུས་དང། ཡུལ་དང། རིགས་དང། རུས་དང། ཡུམ་བུད་མེད་ལྔ་ལ་གཟིགས་ནས་དགའ་ལྡན་གྱི་གཞལ་མེད་ཁང་ཆུ་དང་རྒྱར་དཔག་ཚད་དྲུག་ཅུ་རྩ་བཞི་ཡོད་པ་དེ་ན་ཆོས་སྟོན་པའི་གནས་རྒྱལ་མཚན་མཐོན་པོ་ཞེས་བྱ་བ་ཡོད་པས། དེར་བྱོན་ནས་བསོད་ནམས་མཆོག་གི་སེང་གེའི་ཁྲི་ལ་བཞུགས་ཏེ། ལྷའི་འཁོར་རྣམས་ལ། གྲོགས་པོ་དག་ངའི་ལུས་བསོད་ནམས་བརྒྱའི་མཚན་གྱིས་བརྒྱན་པ་ལ་ལྟོས། ཕྱོགས་བཅུ་ན་བྱང་ཆུབ་སེམས་དཔའ་ང་དང་འདྲ་བ་བགྲང་བ་ལས་འདས་པ་ལ་ཡང་ལྟོས། ཞེས་གསུངས་པ་དང། འཁོར་དེ་དག་ཀྱང་དེའི་བྱིན་རླབས་ཀྱིས་ཕྱོགས་ཀུན་ན་བྱང་ཆུབ་སེམས་དཔའ་དགའ་ལྡན་གྱི་གནས་ན་འཁོད་པ་འདི་དང་འདྲ་བ་ཚད་མེད་པ་མཐོང་ནས་ཀྱང་ཆེད་དུ་བརྗོད་དོ། ། དེ་ནས་བྱང་ཆུབ་སེམས་དཔའ་དམ་པ་ཏོག་དཀར་པོས་རྗེ་བཙུན་བྱམས་པ་ལ་སོགས་པའི་དགའ་ལྡན་ན་གནས་པའི་ལྷ་རྣམས་ལ། གྲོགས་པོ་དག ། དད་པ་ནི་ཆོས་སྣང་བའི་སྒོ་སྟེ། བསམ་པ་མི་ཕྱེད་པར་འགྱུར་རོ། ། དང་བ་ནི་ཆོས་སྣང་བའི་སྒོ་སྟེ། སེམས་སྙོག་པ་ཅན་དང་བར་འགྱུར་རོ། ། ཞེས་པ་ནས། ཕྱིར་མི་ལྡོག་པའི་ས་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། ། ས་ནས་སར་འཕར་བའི་ཡེ་ཤེས་ནི་ཆོས་སྣང་བའི་སྒོ་སྟེ། ཐམས་ཅད་མཁྱེན་པའི་ཡེ་ཤེས་ཀྱི་དབང་བསྐུར་བར་འགྱུར་རོ། ། དབང་བསྐུར་བའི་ས་ནི་ཆོས་སྣང་བའི་སྒོ་སྟེ། མངལ་དུ་འཇུག་པ་དང། བཙས་པ་དང། མངོན་པར་འབྱུང་བ་དང། དཀའ་བ་སྤྱད་པ་དང། བྱང་ཆུབ་ཀྱི་སྙིང་པོར་འགྲོ་བ་དང། བདུད་འདུལ་བ་དང། བྱང་ཆུབ་མངོན་པར་འཚང་རྒྱ་བ་དང། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་སྟོན་པར་འགྱུར་རོ། ། ཞེས་ཆོས་སྣང་བའི་སྒོ་བརྒྱ་རྩ་བརྒྱད་རྒྱས་པར་བསྟན་ནས་རིན་པོ་ཆེའི་ཅོད་པན་མ་ཕམ་པའི་དབུ་ལ་བཅིངས་ནས། གྲོགས་པོ་དག་ཁོ་བོ་འཛམ་བུའི་གླིང་དུ་འཚང་རྒྱར་འགྲོ་སྟེ། ཁྱེད་ལ་མ་ཕམ་པས་ཆོས་སྟོན་ཏོ། ། ཞེས་བྱམས་མགོན་རྒྱལ་ཚབ་ཏུ་དབང་བསྐུར་ཏོ། ། དེ་ཚེ་རྒྱལ་པོ་ཟས་གཙང་གི་ཁྱིམ་དུ་སྔ་ལྟས་བརྒྱད་བྱུང་སྟེ། ས་གཞི་མཉམ་ཞིང་ཁྱིམ་དུ་རྡུལ་མེད་ལ་ཆག་ཆག་བཏབ་པ་སྦྲང་བུ་དང་ཕྱེ་མ་ལེབ་དང་སྡིག་སྦྲུལ་མེད་ཅིང་མེ་ཏོག་གིས་བཀྲམ་པ་དང། གངས་རིའི་བྱ་ཁུ་བྱུག་སོགས་ཁྱིམ་དེའི་སྟེགས་བུ་སོགས་སུ་འདུག་ནས་སྐད་སྙན་པ་སྒྲོགས་པ་དང། དེའི་ཀུན་དགའ་ར་བ་དང་སྐྱེད་མོས་ཚལ་གྱི་མེ་ཏོག་རྒྱས་པ་དང། དེའི་རྫིང་ལ་སོགས་པར་པདྨ་འདབ་མ་བྱེ་བ་ཁྲག་ཁྲིག་བརྒྱ་སྟོང་དང་ལྡན་པས་ཁེབས་པ་དང། མར་དང་སྦྲང་རྩི་སོགས་ལོངས་སྤྱོད་ཀྱང་ཟད་པར་མི་འགྱུར་བ་དང། རོལ་མོ་རྣམས་མ་བླངས་པར་འཁྲོལ་པ་དང། རིན་པོ་ཆེ་སྣ་བདུན་གྱི་སྣོད་རང་བྱེ་སྟེ་འབར་པ་དང། ཉི་ཟླའི་འོད་ཟིལ་གྱིས་གནོན་ཅིང་ལུས་སེམས་བདེ་བ་བསྐྱེད་པའི་འོད་སྣང་བ་རྣམས་བྱུང་ངོ། ། དེ་ནས་བྱང་ཆུབ་སེམས་དཔའ་རྒྱལ་མཚན་མཐོན་པོ་ནས་ཁང་པ་ཆེན་པོ་བསོད་ནམས་ཐམས་ཅད་ཀྱིས་ཡང་དག་པར་བྱུང་བ་ནོར་བུ་དང་དཔལ་གྱི་སྙིང་པོ་ལྷ་རྣམས་ཀྱིས་ཀུན་ནས་བལྟ་བའི་ཁང་བརྩེགས་གནས་ཀྱི་རྒྱན་དུ་བྱོན་ནས་དེར་བཞུགས་ཏེ། བྱང་ཆུབ་སེམས་དཔའ་དང་ལྷ་མང་པོས་བསྐོར་ཞིང་མདུན་དུ་བདར་ནས་བསྐྱོད་པར་བརྩམས་སོ། ། དེའི་ཚེ་བྱང་ཆུབ་སེམས་དཔས་བདེ་བའི་རྒྱན་ཞེས་བྱ་བའི་འོད་ཟེར་དགུ་ལ་སོགས་པ་འོད་ཟེར་གྲངས་མེད་པ་བརྒྱ་སྟོང་ཕྲག་བཅུ་བཀྱེ་བས། སྟོང་གསུམ་གྱི་མུན་པ་མུན་ནག་ཀུན་སྣང་བར་བྱས་ནས་ཉི་ཟླའི་འོད་ཟིལ་གྱིས་མནན་ཏེ། ངན་སོང་གི་སྡུག་བསྔལ་སྐད་ཅིག་དེ་ལ་ཞི་བ་དང། སེམས་ཅན་སུ་ལ་ཡང་ཉོན་མོངས་པས་མི་གནོད་པ་དང། སྣོད་མ་ཡིན་པ་དག་སེལ་བ་དང། ལག་ན་རྡོ་རྗེ་ཕྱི་བཞིན་དུ་འབྲང་བ་དང། འདུལ་བ་སྣ་ཚོགས་པ་དག་མཐོང་བ་སྣ་ཚོགས་པས་མཐོང་བཞིན་པའི་ལས་དེ་དག་ལ་སོགས་པ་དག་བྱེད་དོ། ། ཡུམ་ལ་ཁྱད་པར་དུ་བྱ་བའི་འོད། ཡུམ་གྱི་ཡོན་ཏན་གྱི་དཀྱིལ་འཁོར་ལས་བྱུང་བའི་སྣང་བ་ཞེས་བྱ་བའི་འོད་བ་སྤུའི་སྒོ་ཐམས་ཅད་ནས་བཀྱེ་བས། ལྷ་མོ་སྒྱུ་འཕྲུལ་གསོ་སྦྱོང་བླངས་པའི་ལུས་ལ་ཞུགས་མ་ཐག ། དེའི་ལུས་བདེ་ལ་འགྲོ་བ་ཐམས་ཅད་ཀྱི་ལུས་ལས་མངོན་པར་འཕགས་ཤིང་རུམ་ནམ་མཁའི་ཁྱོན་ལྟར་ཡངས་པར་གྱུར་ཀྱང་མིའི་ལུས་ལས་མ་འདས་ལ། ཡུམ་གྱི་གློ་གཡས་པར་བྱང་ཆུབ་སེམས་དཔའ་ཡོངས་སུ་སྤྱད་པ་རིན་པོ་ཆེ་བཀོད་པ་ཞེས་བྱ་བ། ཙན་དན་སྦྲུལ་གྱི་སྙིང་པོའི་ཁང་པ་བརྩེགས་པ་མཛེས་ཤིང་བལྟ་ན་སྡུག་པ། གྲུ་བཞི་ཀ་བ་བཞི་པ། སྟེང་ཁང་པ་བརྩེགས་པས་བརྒྱན་པ། འཕང་དུ་བྱིས་པ་བཙས་ནས་ཟླ་བ་དྲུག་ལོན་པའི་ཚད་ཙམ་པ། དེའི་ནང་ན་ཁང་པ་བརྩེགས་པ་གཉིས་པ་དང། དེ་བཞིན་དུ་གསུམ་པ་ཡང་དེ་དང་མ་རེག་པར་འདུག་པ་སྲ་ཞིང་བརྟན་ལ་མི་ཤིགས་པ་རེག་ན་བདེ་བ། སྔོན་པོ་མཆོག་གི་ཁ་དོག་ཅན། འདོད་ལྷའི་གནས་ཀྱི་བཀོད་པ་ཅི་སྲིད་པ་དེར་སྣང་བ། དེའི་ཕྱེ་མ་སྲང་ཕྱེད་ལ་སྟོང་གསུམ་འདི་རིན་པོ་ཆེས་བཀང་བས་རིན་དུ་མི་ཆོག་པ། དེའི་འཁོར་ས་ན་ལྷའི་མེ་ཏོག་ལས་འདས་པའི་མེ་ཏོག་སྐྱེ་ཞིང་འདོད་པའི་ཡོན་ཏན་ལྔས་འབྱོར་པ། ཁང་པ་བརྩེགས་པ་གསུམ་པའི་ནང་ན་བྱིས་པ་བཙས་ནས་ཟླ་བ་དྲུག་ལོན་པ་ལ་འཚམ་པའི་ཁྲི་ཟླུམ་པོ། ཚངས་པ་ཆེན་པོའི་གོས་ཀྱང་དེའི་འོད་ཀྱིས་མོག་མོག་པོར་བྱེད་པའི་སྟེང་ན་མཆོག་གི་གདན་ལ་གོས་སྟོང་ཕྲག་བརྒྱའི་རྒྱན་ཞེས་བྱ་བ་ཕྲུགས་གཅིག་ཀྱང་ཡོད་པ་ལོངས་སྤྱོད་ཀྱི་དོན་དུ་གྲུབ་བོ། ། བརྒྱ་བྱིན་གྱིས་ཀྱང་ཡུམ་གྱི་གཟི་བརྗིད་བསྒྲུབ་པ་དང། ལྷུམས་གཙང་མར་བྱེད་པ་ལ་འབད་དོ། ། དེ་ནས་བྱང་ཆུབ་སེམས་དཔའ་དམ་པ་ཏོག་དཀར་པོ་ལྷའི་འཁོར་གྲངས་མེད་པ་དང། མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་དགའ་ལྡན་ནས་རིམ་གྱིས་ཕེབས་ཏེ་གླང་པོ་ཆེའི་ཕྲུག་གུ་ཐལ་ཀར་མཆེ་བ་དྲུག་དང་ལྡན་པའི་གཟུགས་ཀྱིས་ནམ་གྱི་གུང་ཐུན་ལ་ཡུམ་གྱི་གློ་གཡས་པ་ནས་ཞུགས་ཏེ། ཞུགས་མ་ཐག་བྱིས་པ་བཙས་ནས་ཟླ་བ་དྲུག་ལོན་པའི་ཚད་ཙམ་མཚན་གྱིས་བརྒྱན་པར་གྱུར་ཏེ། ཡུམ་གྱི་གློ་གཡས་པའི་ཁང་པ་བརྩེགས་པའི་ནང་གི་ཁྲི་སྟན་ལ་སྐྱིལ་མོ་ཀྲུང་བཅས་ཏེ་ན་བཟའ་ཕྲུགས་དེ་ཡང་གསོལ་ནས་ཞིང་བཅུའི་རྡུལ་སྙེད་ཀྱི་བྱང་ཆུབ་སེམས་དཔའི་སྐལ་བ་མཉམ་པ་ཀླུའི་སྙིང་པོའི་ཁང་པ་བརྩེགས་པ་འཁོད་པ་དག་དང་ལྷན་ཅིག་ཡུམ་གྱི་རུམ་དུ་བཞུགས་སོ། ། བྱང་ཆུབ་སེམས་དཔའ་ཡུམ་གྱི་ལྷུམས་སུ་ཞུགས་པའི་ནུབ་མོ་སྔོན་ཞིང་དམ་པ་ལ་ཟས་ཀྱི་ཕུད་ཕུལ་བའི་རྣམ་སྨིན་ལས་བྱུང་བའི་པདྨ་ཆེན་པོས་རྒྱ་མཚོ་དང་ས་ཆེན་པོ་བརྟོལ་ཏེ་ཞག་བདུན་ལ་ཚངས་པའི་འཇིག་རྟེན་གྱི་བར་དུ་འཕགས་པ་སྐྱེས་སོ། ། སྟོང་གསུམ་གྱི་བཅུད་ཇི་སྙེད་པ་པདྨ་དེ་ལ་ཟིལ་དངར་གྱི་ཐིགས་པ་བཞིན་དུ་ཆགས་པ་དེ་ཚངས་པ་ཆེན་པོ་གཅིག་པུས་མཐོང་ནས་བཻ་ཌཱུརྱའི་སྣོད་བཟང་པོར་བླངས་ཏེ་ཕུལ་བ་བྱང་ཆུབ་སེམས་དཔས་བཞེས་ཏེ་སྐུ་ལུས་བརྟས་པར་བྱེད་དོ། ། དེ་འཇུ་བར་ནུས་པའི་སེམས་ཅན་ནི་གཞན་མེད་དོ། ། ཡུམ་གྱི་ལྷུམས་ན་བཞུགས་པའི་སྐུ་མེའི་ཕུང་པོ་ལྟ་བུ་འདུག་པའི་སྣང་བས་དཔག་ཚད་ལྔའི་བར་ཁྱབ་བོ། ། མི་རྣམས་བྱང་ཆུབ་སེམས་དཔའ་བལྟ་བར་འོངས་པ་དེ་དག་གིས་མེ་ལོང་གི་ནང་དུ་གཟུགས་བརྙན་མཐོང་བ་ལྟར། ཡུམ་གྱི་ལྷུམས་ན་ཁང་པ་བརྩེགས་པའི་ནང་ན་བྱང་ཆུབ་སེམས་དཔའ་བཞུགས་པ་མཐོང་བར་གྱུར་པ་ལ་ཐོག་མར་བྱང་ཆུབ་སེམས་དཔས་དགའ་བར་བྱེད་པའི་གསུང་སྩོལ་ལོ། ། དེ་ནས་ཡུམ་གྱིས་སྨྲའོ། ། བྱང་ཆུབ་སེམས་དཔའ་ལ་ཆོས་མཉན་པའི་ཕྱིར་རྒྱལ་པོ་ཆེན་པོ་བཞི་དང། གནོད་སྦྱིན་གྱི་སྡེ་དཔོན་རྣམས་སྔ་དྲོ་འོངས་པ་ལ་བྱང་ཆུབ་སེམས་དཔས་ཕྱག་གཡས་བརྐྱང་བའི་མཛུབ་མོ་བསྒྲེངས་ནས་སྟན་སྟོན་ཏོ། ། དེ་རྣམས་ཀྱང་སྟན་ལ་འཁོད་ནས་འདུག་པ་ལ་ཆོས་སྟོན་ཏེ། སླར་འགྲོ་བར་འདོད་པ་དང། ཕྱག་གཡས་པ་བརྐྱང་སྟེ་དེ་དག་འདོང་བའི་བརྡ་སྟོན་ནོ། ། དེ་བཞིན་དུ་ཉི་མའི་གུང་ལ་བརྒྱ་བྱིན་ལ་སོགས་པའི་ལྷ་རྣམས་བྱུང་བ་དང། ཕྱི་དྲོ་ཚངས་པས་ཟིལ་དངར་གྱི་ཐིགས་པ་འབུལ་བ་དང། ནུབ་ཐུན་དང་པོ་ལ་ཕྱོགས་བཅུའི་བྱང་ཆུབ་སེམས་དཔའ་རྣམས་འོངས་པ་ལ། སྐུ་ལས་བཀྱེ་བའི་འོད་རྣམས་སེང་གེའི་ཁྲིར་སྤྲུལ་པ་ལ་དེ་དག་འཁོད་དུ་བཅུག་སྟེ། སྔར་བཞིན་ཕྱག་བརྐྱང་བསྐུམ་མཛད་དེ་ཆོས་ཀྱི་བརྡའི་སྒོ་ཆེན་པོས་བགྲོ་བར་བྱེད་དོ། ། དེ་ལྟར་ཟླ་བ་བཅུའི་རིང་ལ་ཡུམ་གྱི་ལྷུམས་ཀྱི་གཞལ་མེད་ཁང་དུ་བཞུགས་ནས་ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་བགྲང་བ་ལས་འདས་པ་དག་དང། ཚངས་པ་དང་བརྒྱ་བྱིན་དང་འཇིག་རྟེན་སྐྱོང་བ་བཞི་ལ་སོགས་པ་དཀར་ཕྱོགས་ཀྱི་ལྷ་དང་ཀླུ་དང་གནོད་སྦྱིན་ལ་སོགས་པ་གདུལ་བྱ་བགྲང་བ་ལས་འདས་པ་ཞིག་སྨིན་གྲོལ་ལ་བཀོད་ནས། བལྟམ་པའི་དུས་ལ་བབ་པ་ན་རྒྱལ་པོ་ཟས་གཙང་མའི་སྐྱེད་མོས་ཚལ་དུ་སྔ་ལྟས་སུམ་ཅུ་རྩ་གཉིས་བྱུང་སྟེ། མེ་ཏོག་ཐམས་ཅད་དང། རྫིང་གི་མེ་ཏོག་དང། ཤིང་ལྗོན་པའི་མེ་ཏོག་ཁ་འབུས་ནས་རྒྱས་པར་གྱུར། རིན་པོ་ཆེའི་ཤིང་ལྗོན་པ་བརྒྱད་སྐྱེས། གཏེར་ཆེན་པོ་ཉི་ཁྲི་ཁ་འབུས། ཁྱིམ་གྱི་ནང་དུ་རིན་པོ་ཆེའི་མྱུ་གུ་འཐོན། སྤོས་ཆུའི་དཔལ་གྱི་ཝ་འབྲུ་མར་དྲི་ཞིམ་པོས་སྦགས་པ་འཛག ། གངས་རི་ལས་འོངས་པའི་སེང་གེའི་ཕྲུག་གུ་དག་སེར་སྐྱའི་གྲོང་ཁྱེར་ལ་བསྐོར་བ་བྱས་ནས་སྒོ་ན་གནས་ཀྱང་སེམས་ཅན་ལ་འཚེ་བ་མི་བྱེད། གླང་པོའི་ཕྲུག་གུ་ཐལ་ཀར་ལྔ་བརྒྱ་འོངས་ནས་རྒྱལ་པོའི་རྐང་པ་ལ་སྣའི་རྩེ་མོས་ཉུག ། རྒྱལ་པོ་ཟས་གཙང་མའི་བཙུན་མོའི་འཁོར་གྱི་ཕང་པ་ནས་ཕང་པ་དག་ཏུ་ལྷའི་བྱིས་པ་དག་འདྲེ་ལྡོག ། ཀླུའི་བུ་མོ་མཆོད་པའི་ཡོ་བྱད་ཐོགས་པ་ལུས་ཕྱེད་ཕྱུང་ནས་ནམ་མཁའ་ལ་རྒྱུ། རྨ་བྱའི་མདོངས་ཐོགས་པའི་ལྷའི་བུ་མོ་ཁྲི་ནམ་མཁའ་ལ་འཁོད། བུམ་པ་གང་བ་ཁྲི་ཡང་སེར་སྐྱ་ལ་སྐོར་བ་བྱེད། ལྷའི་བུ་མོ་སྤོས་ཆུའི་རིལ་བ་བྷྲྀང་ག་ར་ཀླད་ལ་ཐོགས་ནས་འཁོད། ལྷའི་བུ་མོ་ཁྲི་གདུགས་དང་བ་དན་ཐོགས་ནས་འཁོད། ལྷའི་བུ་མོ་བརྒྱ་སྟོང་མང་པོ་དུང་དང་རྔ་སོགས་མགུལ་ནས་དཔྱངས་ཏེ་སྡོད། རླུང་དང་རྡུལ་མི་ལྡང། ཆུ་ཐམས་ཅད་མ་འགུལ་ཞིང་མི་རྒྱུ། ཉི་ཟླ་དང་སྐར་མ་རྣམས་ནི་མི་རྒྱུ། སྐར་མ་རྒྱལ་དང་ཡང་ལྡན། ཟས་གཙང་གི་ཁྱིམ་རིན་པོ་ཆེའི་དྲ་བས་ཡོག ། མེ་ཡང་མི་འབར། ཁང་བརྩེགས་དང་རྒྱ་ཕུབ་དང་རྟ་བབས་དག་ལ་ནོར་བུ་དང་རིན་ཆེན་འབར་བ་འཕྱང། རས་བཅོས་བུ་དང་རིན་པོ་ཆེ་སྣ་ཚོགས་ཀྱིས་མཛོད་རྣམས་གང་ནས་སྒོ་བྱེ། འུག་པ་ལ་སོགས་པའི་སྐད་མེད། སྙན་པའི་སྒྲ་སྐད་གྲག་སྐྱེ་བོ་རྣམས་ཀྱི་ལས་ཀྱི་མཐའ་རྒྱུན་ཆད། ཕྱོགས་ཐམས་ཅད་མཉམ། ལམ་གྱི་བཞི་མདོ་དང་ཚོང་དུས་ཀྱི་གཞི་རྣམས་མེ་ཏོག་སིལ་མས་བཀྲམ། སྤྲུམ་མ་བདེ་བར་བཙའ་བར་གྱུར། སཱ་ལའི་ནགས་ཚལ་གྱི་ལྷ་རྣམས་ཤིང་གི་ལོ་མའི་ནང་ནས་ལུས་ཕྱེད་ཕྱུང་སྟེ་ཕྱག་འཚལ་ཞིང་གནས་པ་རྣམས་བྱུང་ངོ་། ། དེ་ལྟར་ལྷ་མོ་སྒྱུ་འཕྲུལ་མུམ་བི་ནའི་ཚལ་དུ་འབྱོན་བཞེད་པ་ན་རྒྱལ་པོ་ཟས་གཙང་དང། ལྷས་བསྟན་གྱི་རྒྱལ་པོ་ལེགས་པར་རབ་སད་གཉིས་ཀས་ལུམ་བི་ནའི་ཚལ་བྱི་དོར་བྱས་ཤིང། རྒྱན་གྱི་ཁྱད་པར་ཐམས་ཅད་དང། མཆོད་པའི་བྱེ་བྲག་བསམ་གྱིས་མི་ཁྱབ་པ་བྱས་སོ། ། དེའི་ཚེ་ཚལ་དེར་སྔ་ལྟས་ཀྱི་སྣང་བ་ཆེན་པོ་སའི་སྟེང་གི་རིན་པོ་ཆེའི་ཁང་བཟང་ཐམས་ཅད་དུ་སྣང་བ་བྱུང་བ་དང། རིན་པོ་ཆེའི་པདྨ་ཁ་བྱེ་བའི་འདབ་མ་ཐམས་ཅད་ལས་བལྟམ་མམ་ཞེས་པའི་སྒྲ་དང་བཅས་པའི་འོད་བྱུང་བས་ཁྱབ་པ་དང། ཕྱོགས་བཅུའི་རྒྱལ་སྲས་རྣམས་ཀྱིས་སེམས་བསྐྱེད་པ་ནས་བྱང་ཆུབ་པའི་བར་གྱི་སྣང་བ་སོགས་ཚལ་དེར་སྔ་ལྟས་བཅུ་བྱུང་ངོ་། ། དེ་ནས་རྒྱལ་པོ་ཟས་གཙང་མས་རང་གི་འཁོར་རྣམས་ལ་བཀའ་བསྒོས་ཏེ། སེར་སྐྱའི་ཕོ་བྲང་ནས་ལུམ་བི་ནའི་ཚལ་གྱི་བར་གྱི་ལམ་ཐམས་ཅད་བྱི་དོར་ལེགས་པར་བྱས་ཤིང་དྲི་བཟང་གི་ཆུས་ཆག་ཆག་གདབ་པ་དང། མེ་ཏོག་སྣ་ཚོགས་དགྲམ་པ་དང། བུད་མེད་ཁྲི་ཁྲག་མང་པོས་གླུ་དབྱངས་དང་རོལ་མོའི་བྱེ་བྲག་བསམ་གྱིས་མི་ཁྱབ་པའི་མཆོད་པ་དང། རིན་པོ་ཆེའི་ཤིང་རྟ་ཁྲི་ཁྲག་མང་པོ་བཤམས་པ་དང། བསྲུང་མར་བསྐོས་པའི་དཔའ་བོ་ཁྲི་ཁྲག་མང་པོ་ཕྱོགས་ཕྱོགས་སུ་འཁོད་པ་དང། ཤིང་རྟ་རྣམས་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་སོགས་བྱས་ནས་སྒྱུ་མ་ལྷ་མཛེས་སྤྱན་དྲངས་སོ། ། དེ་ནས་ཡུམ་སྒྱུ་མ་ལྷ་མཛེས་ཤིང་རྟའི་ནང་དུ་ཞུགས་ཏེ་ནོར་བུས་བརྒྱན་པའི་ཤིང་རྟ་འཇིག་རྟེན་སྐྱོང་བ་བཞིས་འདྲེན་ཞིང། ལྷའི་དབང་པོ་བརྒྱ་བྱིན་ནི་མདུན་དུ་ལམ་གྱི་བྱི་དོར་བྱེད། ཚངས་པ་ནི་སྣམ་ལོགས་ནས་བསིལ་ཡབ་གཡོབ་པར་བྱེད། དཀར་ཕྱོགས་ཀྱི་ལྷ་བགྲང་བ་ལས་འདས་པ་དག་ནི་ཡུམ་གྱི་རུམ་ན་བྱང་ཆུབ་སེམས་དཔའ་ཁང་པ་བརྩེགས་པའི་ནང་ན་བཞུགས་པ་ལ་མིག་མི་འཛུམ་པར་བལྟ་ཞིང་ཕྱག་འཚལ་བ་དང་སྨོན་ལམ་འདེབས་པར་བྱེད་ཅིང་སོང་ངོ་། ། དེ་ནས་ལྷ་མོ་སྒྱུ་འཕྲུལ་ལུམ་བི་ནའི་ཚལ་དུ་ཕྱིན་ནས་ཤིང་རྟ་ལས་བབས་ཏེ། ནགས་ཚལ་ནས་ནགས་ཚལ་དུ་འཆག ། ལྗོན་པ་ནས་ལྗོན་པ་ལ་བལྟ་ཞིང་རིམ་གྱིས་སོང་བ་དང། ས་ཕྱོགས་མཉམ་ལ་ཡངས་པ་རྩྭ་སྔོན་པོས་གང་ཞིང་རེག་ན་བདེ་བ་ན་སྔོན་གྱི་རྒྱལ་བའི་ཡུམ་གྱིས་བརྟེན་པ་གནས་གཙང་མའི་ལྷ་རྣམས་ཀྱིས་ཕྱག་བྱས་པའི་ཤིང་རིན་པོ་ཆེ་མཆོག་འོད་འབར་བ་རྩ་བ་དང་སྡོང་བུ་དང་ཡལ་ག་དང་ལོ་མ་རིན་པོ་ཆེས་བརྒྱན་པ། མི་དང་ལྷའི་མེ་ཏོག་སྣ་ཚོགས་རྒྱས་པ། སྤོས་མཆོག་གི་དྲི་དང་ལྡན་པ། གོས་ཁ་དོག་སྣ་ཚོགས་དཔྱངས་པའི་ལྗོན་པའི་རྒྱལ་པོ་པླཀྵ་ཞེས་བྱ་བའི་རིན་པོ་ཆེའི་ཤིང་གི་ཡལ་ག་ལ་ཕྱག་གཡས་པས་འཇུས་ནས་བྱ་རྨྱང་བྱེད་ཅིང་གནམ་དུ་གཟིགས་པ་ན། རྩིབ་ལོགས་གཡས་ནས་གསེར་གྱི་མཆོད་སྡོང་ཉི་མ་བྱེ་བའི་མདངས་དང་ལྡན་པ་གློ་བུར་དུ་འཐོན་པ་ལྟར་དུ་སྐུ་བལྟམས་སོ། ། དེའི་ཚེ་ནམ་མཁའ་ཐམས་ཅད་ལྷའི་མཆོད་རྫས་ཀྱིས་གང་ཞིང་། ཚངས་པ་དང་བརྒྱ་བྱིན་གཉིས་ཀྱིས་ལྷའི་གོས་ཀ་ཤི་ཀས་ལྕིབས་ཏེ་བླངས། ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱིས་བདུད་རྩིས་མཆོད། ལྷ་དང་ལྷ་མོ་བགྲང་བ་ལས་འདས་པས་སྤོས་ཆུའི་བུམ་པ་ཐོགས་ཏེ་སྐུ་ཁྲུས་གསོལ། དེའི་ཚེ་ཚངས་པ་དང་བརྒྱ་བྱིན་གཉིས་ཀྱིས་བྱང་ཆུབ་སེམས་དཔའི་སྐུ་ལུས་ནམ་མཁའ་ལ་བླངས་པ་ན་ང་ཐོངས་གསུངས་ཏེ་ས་ལ་ཞབས་བཞག་ནས་ཕྱོགས་བཞིར་གོམ་པ་བདུན་བདུན་པོར་ཏེ། འཇིག་རྟེན་འདི་ན་ང་ཉིད་མཆོག་གོ ། ཞེས་སོགས་སེང་གེའི་སྒྲ་དབྱངས་ཆེན་པོ་བསྒྲགས་སོ། ། བྱང་ཆུབ་སེམས་དཔའ་སྒྱུ་མ་ལྷ་མཛེས་ཀྱི་རྩིབ་ལོགས་གཡས་པ་ནས་ན་བཟའ་དང་བཅས་བཞིན་དུ་བལྟམས་པའི་ཚེ་ཉི་མ་སྟོང་དུས་གཅིག་ཏུ་ཤར་བ་ལས་ཀྱང་ཆེས་ཆེར་གསལ་བའི་སྐུའི་འོད་ཀྱིས་འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པར་མཛད་ཅིང། ས་འོག་གི་གཏིང་རྣམས་ཀྱང་སྣང་བས་ཁྱབ་ཅིང་འོད་ཀྱི་སྣང་བ་དེ་གང་ལ་རེག་པའི་སེམས་ཅན་ཐམས་ཅད་སྐད་ཅིག་དེ་ལ་སྡུག་བསྔལ་དང་ཉོན་མོངས་པ་ཐམས་ཅད་རྒྱུན་བཅད་ཅིང་བདེ་བས་ཁྱབ་པར་མཛད་དོ། ། བྱང་ཆུབ་སེམས་དཔའ་ཡུམ་གྱི་རུམ་ན་ཙན་དན་གྱི་ཁང་པ་བརྩེགས་པའི་ནང་ན་བཞུགས་པའི་ཁང་བརྩེགས་དེ་མི་མཇེད་ཀྱི་བདག་པོ་ཚངས་པས་ཚངས་གནས་སུ་ཁྱེར་ཏེ་ཚངས་རིས་ཀྱི་ལྷ་རྣམས་ཀྱི་ཕྱག་དང་མཆོད་པའི་གནས་སུ་བཞུགས་སོ། ། དེའི་ཚེ་ཤིང་ཐམས་ཅད་ཀྱི་མེ་ཏོག་རྒྱས་ཤིང་འབྲས་བུ་ཆགས། མེ་ཏོག་གི་ཆར་བབས། ངན་སོང་གསུམ་རྒྱུན་བཅད། སེམས་ཅན་ཀུན་ལ་ཉོན་མོངས་པས་མི་འཚེ། དབང་པོ་མེད་པ་རྣམས་དབང་པོ་དང་ལྡན། ས་གཡོས་སོ། ། བྱང་ཆུབ་སེམས་དཔའ་བལྟམས་པ་དེའི་སྐད་ཅིག་དེ་ལ་གྲོང་ཁྱེར་ཆེན་པོ་བཞིར་རྒྱལ་པོ་ཆེན་པོ་བཞི་ལ་ཡང་བུ་བཙས་ཏེ། མཉན་ཡོད་དུ་རྩིབས་ཀྱི་འཕུར་ཚངས་བྱིན་གྱི་བུ་བཙས་པ་ན་ཡུལ་པྲ་ཕབ་པ་གསལ་བ་བཞིན་དུ་སྣང་བས་དེའི་མིང་གསལ་རྒྱལ་ཞེས་དང། རྒྱལ་པོའི་ཁབ་ཏུ་པདྨ་ཆེན་པོའི་བུ་བཙས་པ་ན་ཉི་མའི་གཟུགས་ཤར་བ་ལྟར་སྣང་ཞིང་གཟུགས་ཅན་མའི་བུ་ཡིན་པས་གཟུགས་ཅན་སྙིང་པོ་ཞེས་དང། ཀཽ་ཤམ་བིར་དམག་བརྒྱ་པའི་བུ་བཙས་པ་ན་འཇིག་རྟེན་ཉི་མ་ཤར་བ་ལྟར་སྣང་བར་གྱུར་པས་ཤར་པ་ཞེས་དང། འཕགས་རྒྱལ་དུ་མུ་ཁྱུད་མཐའ་ཡས་ཀྱི་བུ་བཙས་པ་ན་འཇིག་རྟེན་སྒྲོན་མས་སྣང་བ་ལྟ་བུར་གྱུར་པས་རབ་སྣང་ཞེས་བྱ་བར་བཏགས་ཏེ། དེ་རྣམས་རང་རང་གི་བུའི་ཡོན་ཏན་དུ་རློམ་མོ། ། དེའི་ཚེ་ཤཱཀྱའི་གྲོང་དུ་བཟང་ལྡན་དགའ་བོ་སོགས་རབ་ལྔ་བརྒྱ་དང། ཤཱཀྱ་གཞན་འབུམ་ཕྲག་ལྔ་དང། འདུན་པ་ལ་སོགས་པ་འབངས་བརྒྱད་བརྒྱ་དང། གྲགས་འཛིན་མ་ལ་སོགས་པ་ཤཱཀྱའི་བུ་མོ་ཁྲི་དང། འདུན་མ་ལ་སོགས་པ་བྲན་མོ་བརྒྱད་བརྒྱ་དང། རྒྱལ་རིགས་དང་བྲམ་ཟེ་དང་ཁྱིམ་བདག་གི་བུ་མོ་ཉི་ཁྲི་དང། གསེར་གྱི་འོད་དང་ལྡན་ཞིང་མདོག་དཀར་བའི་ཆིབས་པ་བསྔགས་ལྡན་ལ་སོགས་པ་རྟེའུ་ཕོ་མོ་ཉི་ཁྲི་དང། གླང་པོ་ཆེ་མཆོག་ཁྲི་དང། བ་གླང་ཕོ་མོ་དྲུག་སྟོང་རྣམས་བཙས་སོ། ། གསེར་གྱིས་བརྒྱན་པའི་གླང་པོ་ཆེ་ཉི་ཁྲི་ནམ་མཁའ་ནས་སྒྲ་འབྱིན་ཅིང་སེར་སྐྱར་འོངས་ལ། ཟས་གཙང་གི་མདུན་ན་འདོན་འཆར་པོའི་བུ་འཆར་ཀ་ཡང་སྐྱེས་སོ། ། འཛམ་བུའི་གླིང་གི་དབུས་སུ་ཨ་ཤྭཏྠའི་སྡོང་པོ་དང། མ་དྲོས་པའི་འགྲམ་དུ་ཨུ་དུམྦ་རའི་མེ་ཏོག་དག་ཀྱང་ཁ་འབུས། གླིང་ཕྲ་མོ་རྣམས་སུ་ཙན་དན་གྱི་ཚལ་དང། རིའི་རྩེ་མོ་རྣམས་སུ་བྱུ་རུའི་མྱུ་གུ་དག་འཐོན་པར་གྱུར་རོ། ། འབབ་ཆུ་རོ་ཧི་ཏའི་འགྲམ་དུ་ཤིང་དགེ་བའི་སྙིང་པོ་ཞེས་བྱ་བ་ཉི་མ་གཅིག་བཞིན་ཁྲུ་བརྒྱ་སྐྱེ་བར་འགྱུར་བ། ཉི་མ་མ་ཤར་བ་དེ་སྲིད་དུ་སེན་མོས་ཀྱང་བཅད་དུ་རུང་བ། ཉི་མ་ཤར་ནས་མེས་ཀྱང་ཚིག་ཏུ་མི་རུང་བ་ཞིག་སྐྱེས་སོ། ། ལུམ་བི་ནའི་ཚལ་དུ་པདྨ་སྤུངས་པ་ལྟ་བུའི་མཆོད་རྟེན་བརྩིགས་ཏེ་སྐུ་བལྟམས་པའི་མཆོད་རྟེན་དུ་གྲགས་སོ། ། བྱང་ཆུབ་སེམས་དཔས་ལོངས་སྤྱོད་པའི་དོན་དུ་བཀོད་པ་དྲི་མ་མེད་པ་ལ་སོགས་པ་སྐྱེད་མོས་ཚལ་ལྔ་བརྒྱ་དང། གཏེར་ལྔ་བརྒྱ་ཡང་བྱུང་། ཁམས་ཀྱི་རྒྱལ་ཕྲན་ཉི་ཁྲི་ཡང་དཔྱ་འབུལ་ཞིང་འདུད་པར་གྱུར་ཏོ། ། དེ་ལྟར་གྱུར་པ་ན་རྒྱལ་པོ་ཟས་གཙང་མས་བུ་འདི་བཙས་མ་ཐག་བདག་གི་འདོད་པའི་དོན་ཐམས་ཅད་གྲུབ་པས་ན་འདིའི་མིང་དོན་ཐམས་ཅད་གྲུབ་པར་གདགས་སོ་སྙམ་དུ་བསམས་ནས་མཚན་དེ་ལྟར་དུ་བཏགས་སོ། ། དེ་ནས་ཡབ་ཡུམ་གཉིས་ཀྱིས་མཚན་མཁན་རྣམས་ལ་དྲིས་པ་དང་། དེ་དག་གིས་ལུང་བསྟན་པ་གངས་ཀྱི་ངོས་དང་ཉེ་བ་ཆུ་ཀླུང་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བར་ཤཱཀྱ་རྣམས་ཀྱི་གཞོན་ནུ་བྱུང་བ་ནི། གལ་ཏེ་ཕོ་བྲང་གི་ནང་དུ་བཞུགས་པར་གྱུར་ན་འཁོར་ལོས་བསྒྱུར་བའི་རྒྱལ་པོ་མཐའ་བཞི་ལས་རྣམ་པར་རྒྱལ་བ་རིན་པོ་ཆེ་སྣ་བདུན་དང་ལྡན་པར་འགྱུར་རོ། ། གལ་ཏེ་སྐྲ་དང་ཁ་སྤུ་བྲེགས་གོས་ངུར་སྨིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། ། དེ་ལྟར་བྱང་ཆུབ་སེམས་དཔའི་རྣམ་པར་འཕྲུལ་པ་བསམ་གྱིས་མི་ཁྱབ་པས་སེམས་ཅན་བགྲང་བ་ལས་འདས་པ་ཞིག་སྨིན་གྲོལ་ལ་བཀོད་ཅིང་། ལྷ་དང་མིའི་མཆོད་པའི་བྱེ་བྲག་ཚད་མེད་པས་མཆོད་ཅིང་ཞག་བདུན་ལུམ་བའི་ཚལ་དུ་བཞུགས་སོ། ། བྱང་ཆུབ་སེམས་དཔའ་སྐུ་བལྟམས་པའི་འོད་ཀྱིས་འཇིག་རྟེན་ཀུན་སྣང་བར་བྱས་པ་དེའི་ཚེ་གངས་རི་ཀུན་འཛིན་གྱི་ངོས་ལ་གནས་པའི་དྲང་སྲོང་ནག་པོ་ཉོན་མོངས་མེད་ལ་སོགས་པ་དྲང་སྲོང་མངོན་ཤེས་ལྔ་དང་ལྡན་པ་མང་པོས་འོད་དེ་མཐོང་ཞིང་དཀར་ཕྱོགས་ཀྱི་ལྷ་རྣམས་ནམ་མཁའ་ལ་དགའ་བའི་ཅ་ཅོ་སྒྲོག་ཅིང་བྱང་ཆུབ་སེམས་དཔའ་སྐུ་བལྟམས་ཏེ་མྱུར་དུ་སངས་རྒྱས་ནས་ཆོས་ཀྱི་འཁོར་ལོ་བསྐོར་བར་འགྱུར་རོ་ཞེས་དགའ་བའི་སྒྲ་རྒྱ་ཆེར་སྒྲོག་པའང་ཐོས་ནས་གཅིག་ལ་གཅིག་འདི་སྐད་དུ། བྱང་ཆུབ་སེམས་དཔའ་དེ་ལ་ཕྱག་བྱ་བའི་ཕྱིར་འདོང་ངོ་ཞེས་བགྲོས་པ་ན། དྲང་སྲོང་བློ་གྲོས་དང་ལྡན་པ་འགའ་ཞིག་གིས་ད་ལྟ་ནི་ཚངས་པ་དང་བརྒྱ་བྱིན་ལ་སོགས་པ་ལྷ་དབང་ཆེ་བར་གྲགས་པ་མང་པོས་མདུན་དུ་བདར་བས་བྱང་ཆུབ་སེམས་དཔའ་མཇལ་བའི་སྐབས་མི་རྙེད་ཀྱིས། བྱང་ཆུབ་སེམས་དཔའ་སེར་སྐྱའི་ཕོ་བྲང་དུ་ཕེབས་ནས་མཇལ་ལོ་ཞེས་བགྲོས་སོ། ། དེ་ནས་བྱང་ཆུབ་སེམས་དཔའ་ལྷ་དང་མིའི་མཆོད་པ་ཚད་མེད་པས་མཆོད་བཞིན་དུ་སེར་སྐྱའི་ཕོ་བྲང་དུ་སྤྱན་དྲངས་སོ། ། དེ་ནས་སྐྱེ་བོ་རྣམས་ཀྱི་ཡུལ་ཆོས་ཀྱིས་བྱིས་པ་སྐྱེས་ནས་རིང་པོ་མ་ལོན་པར་རང་རང་གི་ཡུལ་ལྷ་མཆོད་པར་བྱེད་པས། ཆོས་ཉིད་ཀྱིས་ཤཱཀྱ་རྣམས་ནི་ཤཱཀྱ་སུ་ཡང་རུང་བ་ལ་ཁྱེའུ་འམ་བུ་མོ་གང་བཙས་པ་དེ་གནོད་སྦྱིན་ཤཱཀྱ་འཕེལ་ཞེས་བྱ་བ་གཉུག་མར་གནས་པ་ལྷར་གྲགས་པ་ཞིག་ཡོད་དེ། དེའི་རྐང་པ་ལ་ཕྱག་འཚལ་བའི་ལྷ་ཁང་དུ་འཁྲིད་པ་ཡིན་པས་ཤཱཀྱ་རྒན་རབས་རྣམས་འདུས་ཏེ་རྒྱལ་པོ་ལ་གཞོན་ནུ་ལྷ་ཁང་དུ་བཀུར་དུ་གསོལ། རྒྱལ་པོས་གནང་སྟེ། གྲོང་ཁྱེར་ཐམས་ཅད་དགེ་མཚན་དང་བཀྲ་ཤིས་ཀྱིས་བརྒྱན་པར་བྱས་ནས། རྒྱལ་པོ་ཉིད་ཀྱིས་སྐྱེ་དགུའི་བདག་མོ་ལ་གཞོན་ནུ་ལྷ་ཁང་དུ་བཀུར་གྱི་རྒྱན་ཐོགས་ཤིག ། དེས་ཀྱང་བྱང་ཆུབ་སེམས་དཔའི་རྣ་བ་ཕུག་ནས་རྣ་རྒྱན་སེང་གེ་ཅན་བཏགས་ཏེ་ལྷ་ཁང་དུ་བཀུར་རོ་ཞེས་སྨྲས་པ་དང་། གཞོན་ནུས་སྨྲས་པ། ལྷ་རྣམས་ཀྱིས་བདག་གི་རྐང་པ་ལ་བཏུད་ན་སུ་ཞིག་བདག་གི་གོང་ན་འཕགས། འོན་ཀྱང་འཇིག་རྟེན་གྱི་རྗེས་སུ་སྙེག་པ་ཙམ་དང་། བདག་མཐོང་ན་སྐྱེ་བོ་རྣམས་དགའ་བར་འགྱུར་བས་མཆིའོ། ། ཞེས་སྨྲས་པ་དང་། རྒྱལ་པོས་གཞོན་ནུ་པང་དུ་བླངས་ཏེ་གླང་པོ་ཆེས་དྲངས་པའི་རིན་པོ་ཆེ་སྣ་བཞིས་བརྒྱན་པའི་ཤིང་རྟ་ལ་འཁོད་ནས་བཀོད་པ་ཆེན་པོས་བྱོན་པ་ན། ཤཱཀྱ་གཏུམ་པོ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་གཟི་བརྗིད་མ་བཟོད་པར་བག་འཁུམ་པར་གནས་ཤིང། སྲོག་ཆགས་གཏུམ་པོ་གཞན་དག་ཀྱང་ཅ་ཅོའི་སྒྲ་མེད་པར་བྱང་ཆུབ་སེམས་དཔའི་གདོང་ལ་གུས་པར་བལྟ་ཞིང་གནས་པས་ཤཱཀྱ་ཐུབ་པ་ཞེས་མཚན་བཏགས་སོ། ། དེ་ནས་བྱང་ཆུབ་སེམས་དཔའ་ལྷ་ཁང་དུ་འཇུག་པར་བརྩམ་པ་ན་གནོད་སྦྱིན་ཤཱཀྱ་འཕེལ་གྱིས་བྱང་ཆུབ་སེམས་དཔའ་རང་གི་གནས་དང་ཉེ་བར་བྱོན་པ་མཐོང་ནས་དེས་བསུ་བའི་ཕྱིར་ཕྱིར་བྱུང་སྟེ། བྱང་ཆུབ་སེམས་དཔའི་ཞབས་གཉིས་ལ་སྤྱི་བོས་གཏུགས་པ་དང་། ལྷ་ཁང་དེར་གཞོན་ནུའི་ཞབས་གཡས་པ་བཞག་མ་ཐག ། ཟླ་བ་དང། ཉི་མ་དང་། འཇིག་རྟེན་སྐྱོང་བ་བཞི་དང་། བརྒྱ་བྱིན་དང་། སྐེམ་བྱེད་དང་། དབང་ཕྱུག་ཆེན་པོ་དང་། ཚངས་པ་ལ་སོགས་པ་ལྷའི་གཟུགས་རྣམས་རང་རང་གི་གནས་ལས་ལངས་ཏེ་བྱང་ཆུབ་སེམས་དཔའི་ཞབས་ལ་ཕྱག་བྱས་པ་ན་ས་ཡང་གཡོས་སོ། ། དེ་ཟས་གཙང་ལ་སྨྲས་པ་དང་། རྒྱལ་པོས་ལྷས་ཀྱང་གཞོན་ནུའི་རྐང་པ་ལ་གཏུགས་པས་ལྷའི་ཡང་ལྷ་ཞེས་མཚན་བཏགས་སོ། ། དེ་ནས་དྲང་སྲོང་ཉོན་མོངས་མེད་འཁོར་དང་བཅས་པ་བྱང་ཆུབ་སེམས་དཔའི་ཞལ་བལྟ་བར་འོངས་པ་ན། དེའི་ཚེ་དྲང་སྲོང་དེ་དག་འགྲོ་བ་ཐམས་ཅད་ཀྱི་མཆོད་གནས་སུ་བཀུར་ཞིང་ནམ་མཁའ་ལས་འགྲོ་འོང་བྱེད་པ་ཡིན་ཡང་། སེར་སྐྱའི་གྲོང་མཐོང་བ་ན་བྱང་ཆུབ་སེམས་དཔའི་གཟི་བརྗིད་ཀྱི་མཐུས་དྲང་སྲོང་དེ་དག་གི་རྫུ་འཕྲུལ་ཉམས་ཏེ་རྐང་པས་འོངས་ནས་རྒྱལ་པོ་ཟས་གཙང་ལ་གཞོན་ནུ་མཇལ་བར་ཞུས་པ་ན་རྒྱལ་པོ་ཟས་གཙང་གིས་དྲང་སྲོང་དེ་དག་གུས་པས་མཆོད་དེ་སྟན་བཟང་པོ་ལ་བཞག་ནས་གཞོན་ནུའི་སྐུ་གཟུགས་བལྟར་བཅུག་གོ ། དེ་ནས་དྲང་སྲོང་དེ་དག་གིས་གཞོན་ནུའི་སྐུ་ལུས་ལ་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་སྤྲས་པར་མཐོང་ནས་དད་པ་ལྷག་པར་སྐྱེས་ཏེ། གཞོན་ནུ་འདིས་ནམ་ཞིག་ན་ཆོས་ཀྱི་འཁོར་ལོ་བསྐོར་སྙམ་དུ་མངོན་ཤེས་ཀྱིས་བརྟགས་པ་ན། ལོ་ཉི་ཤུ་རྩ་དགུ་ནིཁབ་ཏུ་བཞུགས། དེ་ནས་ལོ་དྲུག་ཏུ་དཀའ་བ་སྤྱད། དེ་ནས་དཀའ་སྤྱད་དེ་ལས་བཞེངས་ཏེ་འཚང་རྒྱ་བ་དང་། དེ་ནས་ཆོས་ཀྱི་འཁོར་ལོ་བསྐོར་བར་མཐོང་ལ། རང་ལ་དེའི་བར་དུ་སྡོད་པའི་ཚེ་མེད་པར་ཆོས་ཀྱི་བདུད་རྩི་མ་མྱོང་བར་འཆི་བར་མཐོང་ནས་སྡུག་བསྔལ་དང་མྱ་ངན་དྲག་པོས་ནོན་ཏེ་ངུས་སོ། ། དེ་ལ་རྒྱལ་པོ་ཟས་གཙང་མས་དྲང་སྲོང་ཆེན་པོ་ངུ་བ་ཅི་ཡིན། གཞོན་ནུ་འདི་ལ་མི་ལེགས་པའི་མཚན་མ་མ་མཐོང་ངམ་ཞེས་དྲིས་པ་ན། དྲང་སྲོང་དེ་དག་གིས་སྨྲས་པ། གཞོན་ནུ་ལ་མཚན་མ་ངན་པ་གང་ཡང་མེད་ཀྱི། འདི་ནི་ངེས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་ཏེ། རང་ལ་དེའི་བར་དུ་སྡོད་པའི་དབང་མེད་པར་འཆི་བར་རིག་ནས་རང་གི་ཉེས་པ་མཐོང་སྟེ་ངུ་བ་ཡིན་ནོ་ཞེས་ཟེར་རོ། ། དེ་ནས་དྲང་སྲོང་དེ་དག་གིས་བྱང་ཆུབ་སེམས་དཔའི་སྐུ་གཟུགས་ལ་སྨོན་ལམ་ལེགས་པར་བཏབ་སྟེ་རང་གནས་སུ་སོང་ངོ་། ། ཚུལ་འདི་དག་ལ་ལེགས་པར་དཔྱོད་ཤེས་ན་བྱང་ཆུབ་ལམ་གྱི་རིམ་པའི་ཉམས་ལེན་གྱི་གནད་ལ་ངེས་པ་ལྷག་པར་སྐྱེ་སྟེ། ཚངས་པ་དང་བརྒྱ་བྱིན་གྱི་དཔལ་ཐོབ་པ་དང། དྲང་སྲོང་མངོན་ཤེས་ལྔ་དང་ལྡན་པའི་གོ་འཕང་ཐོབ་པ་ལས་བྱང་ཆུབ་ལམ་གྱི་རིམ་པའི་ཆོས་ཐོས་པ་རྙེད་དཀའ་བར་གྲུབ་བོ། ། དེས་ན་བྱང་ཆུབ་ལམ་གྱི་རིམ་པ་ལ་ཉམས་ལེན་བྱ་རྒྱུ་ཡོད་པའི་སྐབས་འདིར་བསྐལ་མང་སྟོང་དུ་རྙེད་དཀའ་བ་ཤེས་པར་བྱས་ལ་ལན་ཅིག་རྙེད་པ་འདི་ཆུད་མ་ཟོས་པར་ལམ་གྱི་རིམ་པའི་དམིགས་རྣམ་བསྐྱང་བར་བྱའོ། ། དེ་ནས་བྱང་ཆུབ་སེམས་དཔའ་དགུང་ལོ་བདུན་ལ་བབ་པ་ན་གཙུག་ཕུད་བཞག་ཅིང་དེའི་དུས་སྟོན་ཡང་བྱས་ལ། སྐར་མ་རྒྱལ་ལ་བབ་པའི་དུས་སུ་རྒྱན་འདོགས་པར་བརྩམས་ཏེ། ཐོག་མར་ཤཱཀྱའི་རྒྱལ་པོ་བཟང་པོས་གཞོན་ནུའི་ཕྱིར་རྒྱན་ཇི་སྙེད་ཅིག་བྱས་པ་བྱང་ཆུབ་སེམས་དཔའི་ལུས་ལ་བཏགས་མ་ཐག་རྒྱན་རྣམས་མོག་མོག་བོར་གྱུར་ཏེ། ཚལ་དེའི་ལྷ་མོ་དྲི་མ་མེད་པ་ཞེས་བྱ་བས་རང་གི་ལུས་མངོན་སུམ་དུ་བསྟན་ཏེ་འདི་ལ་ནི་རང་བཞིན་གྱི་མཚན་གྱིས་སྤྲས་པའི་རྒྱན་མཛེས་ཀྱི། བཅོས་མའི་རྒྱན་མི་མཛེས་སོ་ཞེས་སྨྲས་ཏེ་མི་སྣང་བར་གྱུར་ཏོ། ། དེ་ནས་བྱང་ཆུབ་སེམས་དཔའ་བཟོ་རིག་པའི་སྒྱུ་རྩལ་གྱིས་སེམས་ཅན་གྱི་དོན་མཛད་པར་བཞེད་པ་ན་ཡབ་ཟས་གཙང་གིས་བསྐུལ་ནས་དང་པོར་ཡི་གེའི་གྲྭར་བྱོན་ཏེ་བཀོད་པ་ཆེན་པོ་བཤམས་ནས། བྱིས་པའི་སློབ་དཔོན་ཀུན་གྱི་གཤེས་གཉེན། མིང་གཞན་སྲིན་བུ་གོ་ཆར་གྲགས་པ་དེ་ཉིད་ཡི་གེའི་རིགས་ཐམས་ཅད་ལ་མཁས་པ་ཡིན་པས། དེའི་གན་དུ་བྱོན་པ་དང་བྱང་ཆུབ་སེམས་དཔའི་གཟི་བརྗིད་མ་བཟོད་ནས་ཁ་བུབ་ཏུ་འགྱེལ་ཏོ། ། དེ་ལྟར་འགྱེལ་བ་དགའ་ལྡན་གྱི་ལྷའི་བུ་ཡན་ལག་བཟང་པོས་བསླང་སྟེ། ཟས་གཙང་དང་སྐྱེ་བོའི་ཚོགས་ལ་བྱང་ཆུབ་སེམས་དཔའི་གོང་ན་སློབ་དཔོན་གཞན་མེད་མོད་ཀྱིས། སེམས་ཅན་སྨིན་པར་བྱ་ཕྱིར་ཡི་གེའི་གྲྭར་ཞུགས་སོ། ། ཞེས་སྨྲས་ནས་མི་སྣང་བར་གྱུར་ཏོ། ། དེ་ནས་ཟས་གཙང་དང་འཁོར་གཞན་རྣམས་ལོག་སྟེ་འཁོར་བྱིས་པ་ཁྲི་དང་དེའི་ནང་ནས་མཆོག་ཏུ་གྱུར་པ་ལྔ་བརྒྱ་དང་ལྷན་ཅིག་པར་ཡི་གེའི་གྲྭར་ཞུགས་ནས། ཙན་དན་སྦྲུལ་གྱི་སྙིང་པོ་ལས་བྱས་པའི་ཡི་གེའི་བྱང་ཤིང་ལྷའི་ཚོན་གྱིས་བྱུགས་པ་གསེར་གྱི་ཡང་མིག་གིས་བཏགས་པ་ཐ་མ་ནོར་བུ་རིན་པོ་ཆེས་བརྒྱན་པ་ཐོགས་སོ། ། སྲིན་བུ་གོ་ཆས་ཡི་གེ་གཅིག་ནས་ལྔ་བརྒྱའི་བར་བྲིས་པ་ཐོགས་པ་དང་། བྱང་ཆུབ་སེམས་དཔས་འདི་དག་ངས་ཤེས་ཀྱི་གཞན་སྨྲོས་ཤིག ། གསོལ་པ། འཇིག་རྟེན་ན་འདི་ཙམ་སྤྱོད་ཀྱི་གཞན་ནི་མ་འཚལ་ཏོ། ། ཞེས་བརྗོད་པ་ན། བྱང་ཆུབ་སེམས་དཔས་ཚངས་པའི་ཡི་གེ་ལ་སོགས་པ་ཡི་གེའི་རྣམ་གྲངས་སྔོན་སུས་ཀྱང་མ་ཐོས་པ་བགྲང་བ་ལས་འདས་པ་ཞིག་གསུངས་ཤིང། ཡི་གེའི་ཕྱི་མོ་སློབ་པ་ན་ཨ་ཞེས་བརྗོད་པའི་ཚེ་ཆོས་ཐམས་ཅད་སྟོང་པ་ཉིད་ལ་སོགས་པ་སྟོང་པ་དང་། བདག་མེད་པ་དང་། འདུ་བྱེད་ཐམས་ཅད་སྡུག་བསྔལ་གྱི་རང་བཞིན་ཅན་ལ་སོགས་པའི་ངེས་པར་འབྱུང་བའི་ཆོས་ཀྱི་སྒྲ་དབྱངས་དཔག་ཏུ་མེད་པ་བསྒྲགས་ཏེ་ཡི་གེའི་སློབ་དཔོན་དུ་བྱེད་པ་དེ་དང་། བྱིས་པ་ཁྲི་ཁྲག་མང་པོ་དང་སྲོག་ཆགས་གཞན་ཉི་ཁྲི་དང་ཉིས་སྟོང་བྱང་ཆུབ་ཏུ་སྨིན་པར་བྱས་སོ། ། དེ་བཞིན་དུ་རྩིས་པ་སྲིད་སྒྲུབ་ཀྱི་ཐད་དུ་རྩིས་སློབ་པའི་ཚུལ་བསྟན་པ་ན། བྱང་ཆུབ་སེམས་དཔས་རྩིས་ཀྱི་སློབ་དཔོན་སྲིད་སྒྲུབ་ཀྱིས་སྔོན་ཆད་མིང་ཙམ་ཡང་མ་ཐོས་པའི་རྩིས་ཀྱི་རྣམ་གྲངས་དག་གསུངས་ཤིང། རྡུལ་ཕྲ་རབ་ལ་འཇུག་པ་ཞེས་བྱ་བའི་རྩིས་བསྟན་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལ་རྡུལ་ཕྲ་མོའི་གྲངས་ཇི་ཙམ་ཡོད་པ་ཤེས་པར་ནུས་པའི་རྩིས་བསྟན་པ་ན་ལྷ་མི་ཐམས་ཅད་ངོ་མཚར་དུ་གྱུར་ཅིང་། སྲོག་ཆགས་གྲངས་མེད་པ་ཞིག་བྱང་ཆུབ་ཏུ་སྨིན་པར་མཛད་དོ། ། དེ་བཞིན་དུ་མདའ་འཕང་བ་དང་། མཆོང་བ་བྱེད་དང་། གྱད་ཀྱི་འཛིན་སྟངས་ལ་སོགས་པ་སྒྱུ་རྩལ་ཐམས་ཅད་རེ་རེ་ནས་སྔོན་ཆད་སུས་ཀྱང་མ་ནུས་པ་དག་བསྟན་དེ་ཐབས་མཁས་ཀྱི་འཕྲུལ་དེ་དང་དེས་ལྷ་མི་བགྲང་བ་ལས་འདས་པ་སྨིན་གྲོལ་ལ་བཀོད་དོ། ། དེ་ནས་གྲགས་འཛིན་མ་ལ་སོགས་པའི་བཙུན་མོ་དྲུག་ཁྲི་ཁབ་ཏུ་བཞེས་དེ་བྱང་ཆུབ་སེམས་དཔའ་རང་ཉིད་འདོད་ཆགས་ཀྱི་དབང་ཏུ་གྱུར་པ་མ་ཡིན་ཡང་། དཔའ་བར་འགྲོ་བའི་ཏིང་ངེ་འཛིན་གྱི་འཕྲུལ་གྱིས་བཙུན་མོ་དྲུག་ཁྲི་པོ་དེ་དག་ཐམས་ཅད་ལ་རང་རང་དང་མཉམ་དུ་བྱང་ཆུབ་སེམས་དཔའ་རེ་རེ་བཞུགས་པར་སྣང་ཞིང་། ཐབས་མཁས་ཀྱི་སྤྱོད་པ་དེས་བཙུན་མོ་དེ་དག་དང། གཞན་ཡང་སྲོག་ཆགས་བགྲང་བ་ལས་འདས་པ་ཞིག་སྨིན་ཅིང་གྲོལ་བར་མཛད་དོ། ། དེའི་ཚེ་བྱང་ཆུབ་སེམས་དཔའ་རང་ཉིད་སྔོན་བསྐལ་པ་གྲངས་མེད་པའི་སྔོན་རོལ་ནས་རྩོད་ལྡན་ཚེ་ལོ་བརྒྱ་པའི་དུས་ཀྱི་འགྲོ་བ་རྣམས་ཀྱི་མགོན་དུ་འབྱོན་པར་ཐུགས་བསྐྱེད་ཅིང། དོན་དེ་ཐུགས་ལ་བརྣགས་ནས་ནམ་ཞིག་འཚང་རྒྱ་བའི་དུས་ངེས་པར་མཁྱེན་པ་ཡིན་ཡང། ཕྱོགས་བཅུའི་སངས་རྒྱས་རྣམས་དང་དཀར་ཕྱོགས་ཀྱི་ལྷ་རྣམས་ཀྱིས་བྱང་ཆུབ་སེམས་དཔའ་བཙུན་མོའི་འཁོར་དུ་ཡུན་རིང་ན་གདུལ་བྱ་མང་པོ་ཞིག་དུས་ལས་ཡོལ་བར་འགྱུར་བས་ད་ནི་ཁབ་ནས་བྱུང་སྟེ་འཚང་རྒྱ་བའི་མཛད་པ་མྱུར་དུ་སྟོན་དགོས་སོ་ཞེས་ཡང་དང་ཡང་དུ་བསྐུལ་ཞིང། སངས་རྒྱས་རྣམས་ཀྱི་མཐུས་གླུ་དབྱངས་དང་སིལ་སྙན་གྱི་སྒྲ་ལས། སྡུག་བསྔལ་བརྒྱས་གང་སེམས་ཅན་མཐོང་ནས་ནི། ། འགྲོ་བའི་མགོན་དང་སྐྱབས་དང་གནས་གྱུར་ཅིང། ། ཕན་བྱེད་མགོན་དང་དཔུང་གཉེན་གྱུར་ཅིག་ཅེས། ། ཁྱོད་ཀྱིས་སྔོན་ནི་སྨོན་ལམ་དེ་སྐད་བཏབ། ། དགེ་བ་དཔའ་བོ་སྔོན་གྱི་སྤྱོད་པ་དང་། ། འགྲོ་ཕན་བྱ་ཞེས་སྨོན་ལམ་དྲན་པར་བྱོས། ། འདི་ནི་ཁྱོད་ཀྱི་དུས་དང་ཚོད་ཡིན་གྱིས། ། དྲང་སྲོང་མཆོག་རབ་ཁྱིམ་ནས་འབྱུང་བར་བྱོས། ། ཞེས་སོགས་ཀྱིས་བསྐུལ་ཞིང་། བཙུན་མོ་རྣམས་ཀྱི་རོལ་མོའི་སྒྲ་ལས་ཀྱང་སྔོན་གྱི་སྐྱེས་རབས་དག་གླེངས་ཏེ། སྲིད་གསུམ་རྒ་དང་ནད་ཀྱི་སྡུག་བསྔལ་འབར། ། འཆི་མེད་རབ་འབར་འདི་ནི་མགོན་མེད་པ། ། སྲིད་ལས་འབྱུང་ལ་འགྲོ་བ་རྟག་ཏུ་རྨོངས། ། བུམ་པར་ཆུད་པའི་བུང་བ་འཁོར་བ་བཞིན། ། སྲིད་གསུམ་མི་བརྟན་སྟོན་ཀའི་སྤྲིན་དང་འདྲ། ། འགྲོ་བའི་སྐྱེ་འཆི་གར་ལ་བལྟ་དང་མཚུངས། ། འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། ། རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། ། ཞེས་སོགས་ནས། སྔོན་གྱི་སྤྱོད་དེ་རྗེས་སུ་དྲན་གྱིས་ལ། ། གཏི་མུག་མ་རིག་མུན་པས་བསྒྲིབས་པ་ཡི། ། འགྲོ་ལ་ཤེས་རབ་དམ་པ་འོད་བཟང་བ། ། ཆོས་མིག་དྲི་མེད་ཉོན་མོངས་མེད་པ་བྱིན། ། ཞེས་སོགས་རྒྱ་ཆེར་བསྐུལ་བ་ན་བྱང་ཆུབ་སེམས་དཔའ་ཡང་མྱུར་དུ་རབ་ཏུ་འབྱུང་བའི་དུས་ལ་བབ་པར་དགོངས་སོ། ། དེ་ནས་བྱང་ཆུབ་སེམས་དཔའ་སྐྱེད་ཚལ་གཟིགས་པའི་ཕྱིར་ཤར་སྒོ་ནས་ཕེབས་པ་ན་གནས་གཙང་མའི་ལྷ་དག་གིས་སྤྲུལ་པའི་རྒན་པོ་རྒས་ཤིང་འཁོགས་པ། རྒས་པའི་སྡུག་བསྔལ་གྱིས་ཉེན་པ་གཟིགས་ཏེ། འདུན་པ་ལ། ཁ་ལོ་སྒྱུར་བ་མི་རིད་ཉམ་ཆུང་ཞིང་། ། ཤ་ཁྲག་བསྐམས་ལ་རྒྱུས་པགས་ཉི་ཚེས་དཀྲིས། ། མགོ་དཀར་སོ་རྒལ་ལུས་ནི་རབ་སྐེམ་ལ། ། འཁར་བ་བརྟེན་ཅིང་མི་བདེ་འཁྱོར་འགྲོ་སུ། ། དེས་སྨྲས་པ། ལྷ་ཅིག་མི་འདི་རྒ་བས་ཟིལ་གྱིས་ནོན། ། དབང་པོ་ཉམས་ཤིང་སྡུག་བསྔལ་བརྩོན་སྟོབས་ཉམས། ། གཉེན་གྱི་སྐྱེ་བོས་བརྙས་ཤིང་མགོན་མེད་གྱུར། ། དོན་བགྱིད་མི་ནུས་ནགས་ཁྲོད་ཤིང་ལྟར་བོར། ། བྱང་ཆུབ་སེམས་དཔས་སྨྲས་པ། འདི་ཡི་ཆོས་འདི་རིགས་ཀྱི་ཡིན་ནམ་འོན་ཏམ་ནི། ། འགྲོ་བ་འདི་ཀུན་ལ་ཡང་འདི་སྲིད་དེ་སྨྲོས་ཤིག ། ཚིག་འདི་ཡང་དག་ཇི་བཞིན་མྱུར་དུ་སྨྲོས་ཤིག་དང་། ། ཐོས་ནས་དེ་བཞིན་དོན་ལ་འདིར་ནི་ཚུལ་བཞིན་བསམ། ། དེས་སྨྲས་པ། ལྷ་འདི་རིགས་ཆོས་མ་ཡིན་ཡུལ་འཁོར་ཆོས་མ་ལགས། ། སྐྱེ་བོ་ཀུན་གྱི་དར་ལ་བབ་པ་རྒ་བས་འཇོམས། ། ཁྱོད་ཀྱི་ཡབ་དང་ཡུམ་དང་ཉེ་དུ་གཉེན་ཚོགས་ཀྱང། ། རྒ་ལས་མི་ཐར་འབྲོས་པའི་ཐབས་ནི་གཞན་མ་མཆིས། ། བྱང་ཆུབ་སེམས་དཔས་སྨྲས་པ། ཁ་ལོ་སྒྱུར་བ་བྱིས་པའི་སྐྱེ་བོ་མི་མཁས་པའི། ། བློ་ངན་གཞོན་པས་རྒྱགས་ཤིང་མྱོས་པས་རྒས་མ་མཐོང་། ། ང་ནི་སླར་འགྲོ་ང་ཡི་ཤིང་རྟ་མྱུར་དུ་སྒྱུར། ། ང་ཡང་རྒས་ལ་གནས་པས་རྩེ་དགས་ཅི་ཞིག་བྱ། ། ཞེས་གསུངས་ནས་ནང་དུ་ལོག་གོ ། ཡང་ལྷོ་སྒོར་ཕེབས་པས། ན་བ་གཟིགས་ཏེ་སྨྲས་པ། ཁ་ལོ་བསྒྱུར་བ་མི་རྩུབ་ལུས་ཀྱི་མདོག་ངན་ལ། ། དབང་པོ་ཐམས་ཅད་ཉམས་ཤིང་དབུགས་དབྱུང་རབ་ཏུ་དཀའ། ། ཡན་ལག་ཀུན་བསྐམས་ལྟོ་བས་དཀྲུགས་ཤིང་ཉམ་ཐག་གྱུར། ། རང་གི་གཅིན་རྟུག་སྨད་པའི་གནས་ན་འདུག་འདི་སུ། ། དེས་སྨྲས་པ། ལྷ་ཅིག་མི་འདི་ཤིན་ཏུ་ནད་ཀྱིས་བཏབ་པ་སྟེ། ། ནད་ཀྱི་འཇིགས་པ་ཉེ་བར་མཆིས་པས་འགུམ་ལ་ཐུག ། ནད་མེད་གཟི་བརྗིད་མ་མཆིས་སྟོབས་ཀྱང་རྣམ་པར་ཉམས། ། མགོན་དང་སྐྱབས་དང་གླིང་དང་དཔུང་གཉེན་མ་མཆིས་ལགས། ། བྱང་ཆུབ་སེམས་དཔས་སྨྲས་པ། ནད་མེད་པ་ཡང་རྨི་ལམ་ན་ནི་རྩེ་དང་མཚུངས། ། ནད་ཀྱི་འཇིགས་པ་འདི་ལྟར་ཤིན་ཏུ་མི་བཟད་པ། ། སྐྱེས་བུ་མཁས་པས་གནས་འདི་མཐོང་ནས་ཇི་ལྟ་བུར། ། རྩེ་ལ་དགའ་དང་སྡུག་པའི་འདུ་ཤེས་སྐྱེད་པར་འགྱུར། ། ཞེས་གསུངས་ནས་ནང་དུ་ལོག་གོ ། ཡང་ནུབ་ཏུ་ཤི་བ་གཟིགས་ཏེ་སྨྲས་པ། ཁ་ལོ་བསྒྱུར་བ་མི་འདི་ཁྱོགས་ལ་བླངས་ནས་ནི། ། འདི་དག་སྐྲ་བཤིག་མགོ་ལ་ས་ཡིས་འཐོར་བྱེད་ཅིང་། ། སྣ་ཚོགས་ངག་གི་ཚིག་ནི་བརྗོད་ལ་བྲང་བརྡུང་བས། ། ཀུན་ནས་བསྐོར་བ་བྱས་ཏེ་ཁྱེར་བ་སུ་ཞིག་ཡིན། ། དེས་སྨྲས་པ། ལྷ་ཅིག་མི་འདི་འཛམ་བུའི་གླིང་དུ་གུམ་པ་སྟེ། ། སླན་ཆད་ཕ་མ་མཆིས་བྲང་བུ་རྣམས་མཐོང་མི་འགྱུར། ། ལོངས་སྤྱོད་ཁྱིམ་དང་མཛའ་བཤེས་གཉེན་ཚོགས་སྤངས་ནས་ནི། ། འཇིག་རྟེན་ཕ་རོལ་མཆིས་ཏེ་སླན་ཆད་གཉེན་མི་མཐོང། ། བྱང་ཆུབ་སེམས་དཔས་སྨྲས་པ། རྒ་བས་གནོད་པར་འགྱུར་བའི་གཞོན་པ་ཅིར་མི་རུང་། ། སྣ་ཚོགས་ནད་ཀྱིས་གནོད་འགྱུར་ནད་མེད་ཅིར་མི་རུང་། ། རིང་དུ་མི་གནས་གསོན་པ་མཁས་ལ་ཅིར་མི་རུང་། ། དགའ་ལ་ཆགས་པ་སྐྱེས་བུ་མཁས་པ་ཅིར་མི་རུང་། ། གལ་ཏེ་རྒ་མེད་ན་མེད་འཆི་བ་མེད་གྱུར་ཀྱང་། ། འོན་ཀྱང་ཕུང་པོ་ལྔ་འཛིན་སྡུག་བསྔལ་ཆེ་ཡིན་ན། ། རྒ་ན་འཆི་བ་རྟག་ཏུ་འབྲང་བ་སྨོས་ཅི་དགོས། ། ལེགས་པར་སླར་ལོག་རབ་ཏུ་ཐར་བར་བྱ་བ་བསམ། ཞེས་གསུངས་ནས་ནང་དུ་ལོག་གོ ། ཡང་། བྱང་སྒོར་དགེ་སློང་གཟིགས་ཏེ་སྨྲས་པ། ཁ་ལོ་བསྒྱུར་བ་སྐྱེས་བུ་སེམས་ཞི་རབ་ཞི་ཞིང་། ། མིག་ཕབ་འགྲོ་ལ་གཉའ་ཤིང་གང་ཙམ་ལྟ་བྱེད་ཅིང་། ། ངུར་སྨྲིག་གོས་གྱོན་ཤིན་ཏུ་རབ་ཏུ་ཞི་བར་སྤྱོད། ། ལྷུང་བཟེད་ཐོགས་ནས་མི་རྒོད་མ་ཁེངས་སུ་ཞིག་ཡིན། ། དེས་སྨྲས་པ། ལྷ་ཅིག་མི་འདི་དགེ་སློང་ཞེས་ནི་བགྱི་བ་ལགས། ། འདོད་པའི་དགའ་བ་སྤངས་ཤིང་ཤིན་ཏུ་དུལ་བར་སྤྱོད། ། བདག་ཉིད་ཞི་བ་འཚོལ་ཞིང་རབ་ཏུ་བྱུང་བར་གྱུར། ། འདོད་ཆགས་ཞེ་སྡང་བྲལ་བ་བསོད་སྙོམས་སྤྱོད་ཅིང་རྒྱུ། ། བྱང་ཆུབ་སེམས་དཔས་སྨྲས་པ། འདི་ནི་དགེ་བར་ལེགས་སྨྲས་ང་ཡང་འདོད་པ་སྟེ། ། རབ་ཏུ་བྱུང་བ་མཁས་པ་རྣམས་ཀྱིས་རྟག་ཏུ་བསྔགས། ། དེ་ནི་བདག་ལ་ཕན་ཞིང་སེམས་ཅན་གཞན་ལའང་ཕན། ། འཚོ་བ་བདེ་ཞིང་ཉམས་མཐུན་འཆི་མེད་འབྲས་བུར་འགྱུར། ། ཞེས་གསུང་ཞིང་ཤིང་རྟ་ཁ་བསྒྱུར་ཏེ་ནང་དུ་བྱོན་ནོ། ། དེ་ནས་བྱང་ཆུབ་སེམས་དཔའ་དགུང་ལོ་ཉི་ཤུ་རྩ་དགུ་ལ་བབ་པ་ཀུན་འཛིན་ཅེས་པ་ས་ཕོ་བྱི་བའི་ལོ་སྟོན་ཟླ་ར་བའི་ཡར་ཚེས་བརྒྱད་ཀྱི་ཐོ་རངས་སྐར་མ་རྒྱལ་ཤར་བ་དང་དུས་མཉམ་དུ་ཁང་བཟང་གི་སྟེང་དུ་ཕེབས་ནས་ཕྱོགས་བཅུའི་སངས་རྒྱས་ཐམས་ཅད་ལ་ཕྱག་བཙལ་ཏེ་སྙིགས་མའི་འགྲོ་བ་རྣམས་ཀྱི་དོན་དུ་མྱུར་དུ་འཚང་རྒྱ་བར་ཐུགས་སྨོན་མཛད་པ་ན། ནམ་མཁའི་དབྱིངས་འདི་ཐམས་ཅད་བྱང་ཆུབ་སེམས་དཔའ་རྣམས་དང་། ཚངས་པ་དང་། བརྒྱ་བྱིན་དང་། འཇིག་རྟེན་སྐྱོང་བ་བཞི་ལ་སོགས་པ་དཀར་ཕྱོགས་ཀྱི་ལྷ་རྣམས་དང་། གཞན་ཡང་གནོད་སྦྱིན་དང་། དྲི་ཟ་དང་། ཀླུ་ལ་སོགས་པ་མཆོད་པའི་བྱེ་བྲག་སྣ་ཚོགས་ཐོགས་པས་ཡོངས་སུ་གང་ཞིང་། གསང་བའི་བདག་པོ་ཕྱག་ན་རྡོ་རྗེ་དང་སྡེ་དཔོན་ཆེན་པོ་རྣམ་ཐོས་སྲས་ཀྱིས་ལྔས་རྩེན་ལ་བཀའ་བསྒོས་ཏེ་རྒྱལ་པོའི་ཕོ་བྲང་གི་ཆབ་སྒོ་ཐམས་ཅད་བསྲུང་མ་གོ་མཚོན་ཐོགས་པ་བརྒྱ་ཕྲག་མང་པོས་བཀག་པས་ཁང་བཟང་གི་སྟེང་ནས་ཆིབས་པ་བསྔགས་ལྡན་གྱི་ཐད་དུ་ལྷའི་བཟོ་བོས་བཅོས་པའི་སྐས་ཚུགས་ཤིག་ཅེས་བཀའ་བསྒོས་པ་ན་ལྔས་རྩེན་གྱིས་དེ་མ་ཐག་སྐས་བཙུགས་སོ། ། དེ་ནས་བྱང་ཆུབ་སེམས་དཔའ་ལྷའི་སྐས་དེ་ལ་བབས་ནས་བསྔགས་ལྡན་ལ་ཆིབས་པ་ན། བརྒྱ་བྱིན་གྱིས་བཀྲ་ཤིས་ཀྱི་ཤར་སྒོ་ཕྱེ། ཚངས་རིས་ཀྱི་ལྷ་རྣམས་ཀྱིས་གཡས་ལོགས་ནས་བརྟེན། འདོད་པའི་ལྷ་རྣམས་ཀྱིས་གཡོན་ལོགས་ནས་བརྟེན། ཚངས་པ་དང་བརྒྱ་བྱིན་གཉིས་ཀྱིས་སྣ་དྲངས། ནམ་མཁའི་དབྱིངས་ཐམས་ཅད་མཆོད་པའི་བྱེ་བྲག་གིས་གང་། དཀར་ཕྱོགས་ཀྱི་ལྷ་མང་པོས་གོས་ཀྱི་གཡབ་མོ་གཡོབ་བཞིན་དུ་འཇིག་རྟེན་སྐྱོང་བ་བཞིས་བསྔགས་ལྡན་གྱི་སུག་པ་བཞི་ནས་བཏེག་སྟེ་མྱུར་བར་ཕེབས་ནས་ཤཱཀྱའི་ཡུལ་དང་། ཀེའུ་རྟའི་ཡུལ་དང་། གྱད་ཡུལ་རྣམས་འདས། མེ་ནེ་ཡའི་ཡུལ་གྱི་གྲོང་བརྡལ་ལས་ཀྱང་དཔག་ཚད་དྲུག་ཕྱིན་པ་ཡུལ་སྤོང་བྱེད་ཀྱི་གྲོང་གི་ཉེ་འདབས་ཆུ་ཀླུང་ཡིད་འོང་ལྡན་གྱི་འགྲམ་དུ་བྱོན་པ་ན་ནམ་ལངས་སོ། ། ཆོས་འབྱུང་འགའ་ཞིག་ལས་ཤཱཀྱའི་ཕོ་བྲང་ནས་མེ་ནེ་ཡའི་ཡུལ་གྱི་བར་ལ་དཔག་ཚད་དྲུག་ཡོད་ཅིང་ཡུལ་དེ་ནས་ཆུ་ཀླུང་ཡིད་འོང་ལྡན་གྱི་བར་ལ་དཔག་ཚད་དྲུག་ཡོད་པས་ཐོ་རངས་དེ་ལ་དཔག་ཚད་བཅུ་གཉིས་ཀྱི་བར་དུ་ཕེབས་པ་ཡིན་ཞེས་འབྱུང་ངོ་། ། གནས་དེ་ན་སྔོན་འདས་པའི་སངས་རྒྱས་གསུམ་གྱི་གཙུག་ཕུད་བྲེགས་པའི་མཆོད་རྟེན་རྣམ་དག་གསུམ་ཡོད་པར་བཤད་ཅིང་། མཆོད་རྟེན་རྣམ་དག་དེ་དག་གི་དྲུང་དུ་བྱང་ཆུབ་སེམས་དཔས་ཁ་ལོ་བསྒྱུར་བ་འདུན་པ་ལ་ངའི་རྒྱན་དང་བསྔགས་ལྡན་ཁྱེར་ལ་གཉེན་རྣམས་ཀྱི་དྲུང་དུ་སོངས་ཤིག་ཅེས་བཀའ་སྩལ་པ་ན་འདུན་པས་མཆི་མ་ཆར་བཞིན་དུ་ཕབ་སྟེ་ངུ་བཞིན་དུ་གཞོན་ནུ་རྒྱལ་པོའི་ཕོ་བྲང་ན་འཁོར་ཁྲི་ཕྲག་མང་པོ་དང་བཅས་བཞུགས་པ། ད་ནགས་ཁྲོད་དབེན་པར་གཅིག་པུར་ཇི་ལྟར་བཞུགས་ཞུས་པ་ན། བྱང་ཆུབ་སེམས་དཔས་བཀའ་སྩལ་པ། སྐྱེ་དགུ་འདི་ནི་སྐྱེ་ནའང་གཅིག་པུ་སྐྱེ། ། དེ་བཞིན་འཆི་ནའང་གཅིག་པུ་འཆི་བར་འགྱུར། ། འདི་ན་གཅིག་པུས་སྡུག་བསྔལ་མྱོང་འགྱུར་གྱི། ། འཁོར་བ་ལ་ནི་གྲོགས་ཡོད་མ་ཡིན་ནོ། ། ཞེས་གསུང་། དེ་ནས་བྱང་ཆུབ་སེམས་དཔས་རང་གི་དབུ་སྐྲ་རང་གིས་བཅད་དེ་གནམ་དུ་གཏོར་བ་ན། བརྒྱ་བྱིན་གྱིས་མཁའ་ལས་བླངས་ཏེ་སུམ་ཅུ་རྩ་གསུམ་དུ་ཁྱེར་ནས་ལྷ་རྣམས་ཀྱི་མཆོད་པའི་རྟེན་བྱེད་ཅིང་ལོ་རེ་བཞིན་གཙུག་ཕུད་ཀྱི་དུས་སྟོན་ཡང་བྱེད་ཅེས་གྲག་གོ ། དེ་ནས་བྱང་ཆུབ་སེམས་དཔས་ན་བཟའ་ཀ་ཤི་ཀའི་རས་ཁྱད་པར་ཅན་འདི་ལྟ་བུ་གྱོན་པ་རབ་ཏུ་བྱུང་བའི་ཚུལ་དང་མི་མཐུན་ནོ་སྙམ་དུ་དགོངས་ནས་ངུར་སྨྲིག་གི་གོས་གྱོན་པར་བཞེད་པ་ན་བརྒྱ་བྱིན་གྱིས་སྔོན་གྱི་དྲང་སྲོང་རྣམས་ཀྱིས་བྱང་ཆུབ་སེམས་དཔའི་ཆེད་དུ་སྨོན་ལམ་བཏབ་སྟེ་བཞག་པའི་ངུར་སྨྲིག་གི་གོས་བླངས་ཏེ་བྱང་ཆུབ་སེམས་དཔའ་ལ་ཕུལ། ཀ་ཤི་ཀའི་ན་བཟའ་རྣམས་བརྒྱ་བྱིན་གྱིས་བླངས་ཏེ་སྤྱི་བོར་ཁྱེར་ནས་སུམ་ཅུ་རྩ་གསུམ་དུ་མཆོད་པའི་རྟེན་དུ་བཞུགས་ཤིང་ལོ་རེ་བཞིན་ན་བཟའི་དུས་སྟོན་ཡང་བྱེད་ཅེས་གྲག་གོ ། གནས་དེར་གཙུག་ཕུད་དོར་བའི་མཆོད་རྟེན་དང་། ངུར་སྨྲིག་བླངས་པའི་མཆོད་རྟེན་དང་། འདུན་པ་ཕྱིར་ལོག་པའི་མཆོད་རྟེན་གསུམ་ཡོད་པར་གྲགས་སོ། ། དེ་ནས་བྱང་ཆུབ་སེམས་དཔས་ཤཱཀྱའི་གྲོང་ནས་དེའི་བར་ལ་དཔག་ཚད་བཅུ་གཉིས་ཡོད་མོད་ཀྱང་། ད་དུང་ཉེ་དུ་དང་ཐག་ཉེ་བ་ནི་མི་ལེགས་པར་དགོངས་ནས་ཆུ་བོ་གངྒཱ་བརྒལ་ཏེ་མ་ག་དྷར་བྱོན་ནོ། ། དེ་ལྟར་སྟོན་པས་འཁོར་ལོས་བསྒྱུར་བའི་དཔལ་ཐམས་ཅད་མཆིལ་མའི་ཐལ་བ་བཞིན་དུ་དོར་ཞིང་། སྐུའི་རྒྱན་དང་ན་བཟའ་ཚུན་ཆད་དོར་ཏེ་རབ་ཏུ་བྱུང་ནས་བསོད་སྙོམས་མཛད་པ་ནི་གདུལ་བྱ་རྣམས་ལ་འདི་ལྟར་བྱ་དགོས་སོ་ཞེས་འདོམས་པ་སྟེ། སྔོན་བྱུང་སྟོན་པའི་རྣམ་ཐར་རྗེས་འཇུག་གདུལ་བྱའི་ཉམས་ལེན་དུ་འཁྱེར་བར་བྱ་བ་ཡིན་པས་བྱང་ཆུབ་ལམ་གྱི་རིམ་པ་ལ་ཉམས་ལེན་སྙིང་པོར་བྱ་འདོད་པ་རྣམས་ཀྱིས་སྟོན་པ་ཐུགས་རྗེ་ཅན་གྱི་མཛད་པ་རྣམ་ཐར་འདི་དག་དྲན་པར་བྱས་ལ་ཐོག་མར་རང་ཡུལ་ཉེ་དུ་དང་བཅས་པ་གང་ལའང་མ་ཆགས་པར་དོར་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ། བྱ་དང་རི་དྭགས་བཞིན་དུ་གསོག་འཇོག་གང་ཡང་མི་བྱ་བར་འཚོ་བ་བསོད་སྙོམས་ཀྱིས་འཚོ་བར་བྱས་ཏེ་བྱང་ཆུབ་ལམ་རིམ་གྱི་ཉམས་ལེན་བྱ་དགོས་པ་ཡིན་པས་སྟོན་པ་ཐུགས་རྗེ་ཅན་གྱི་རྣམ་ཐར་བཟང་པོ་འདི་དག་ཡང་དང་ཡང་དུ་བསམས་ཏེ། རང་གི་ཉམས་ལེན་དུ་འཁྱེར་ཤེས་པ་ཞིག་བྱའོ། ། དེ་ནས་བྱང་ཆུབ་སེམས་དཔས་རྒྱལ་པོའི་ཁབ་ཏུ་བསོད་སྙོམས་ལ་བྱོན་པ་ན་རྒྱལ་པོ་གཟུགས་ཅན་སྙིང་པོ་འཁོར་བཅས་ཀྱིས་མཐོང་སྟེ་ངོ་མཚར་ནས་བྱང་ཆུབ་སེམས་དཔའི་དྲུང་དུ་ཕྱིན་ཏེ་བརྟགས་པ་ན་གཞོན་ནུ་དོན་ཐམས་ཅད་གྲུབ་པ་ཡིན་པར་ངོ་ཤེས་ནས་བློར་མ་ཤོང་བར་བརྒྱལ་ལོ། ། བརྒྱལ་བ་དེ་ལས་སངས་ནས་བྱང་ཆུབ་སེམས་དཔའ་ལ་ཕྱག་བཙལ་ཏེ་གསོལ་པ། ཁྱོད་ལ་རྒྱལ་སྲིད་ཀྱི་ཕྱེད་འབུལ་གྱི། བདག་གི་གྲོགས་མཛོད་ལ་ཕྱིན་ཆད་རིའི་སུལ་དང་རྩའི་གདིང་བ་ལ་མ་བཞུགས་ཤིག་ཅེས་ཞུས་པ་ན། ལན་གསུངས་པ། རྩེ་མོ་སྣ་ཚོགས་ཡངས་པར་གྱུར་པ་ཡི། ། ལྷུན་པོ་གངས་ཅན་རླུང་གིས་བསྐྱོད་སྲིད་ཀྱིས། ། ང་ཡི་བློ་ནི་ཐར་པ་ལ་བརྟེན་པ། ། འདོད་པའི་ཤུགས་ཀྱིས་བསྐྱོད་པར་མི་ནུས་སོ། ། ཞེས་གསུངས། དེ་ནས་བྱང་ཆུབ་སེམས་དཔས་དྲང་སྲོང་རྣམས་ཀྱི་ཁྲོད་དུ་བྱོན་ཏེ་དྲང་སྲོང་དཀའ་ཐུབ་སྤྱོད་པ་དེ་དག་གིས་དཀའ་ཐུབ་གང་དང་གང་སྤྱོད་པ་དེ་དང་དེ་ལས་ཉིས་འགྱུར་ཉིས་འགྱུར་དུ་མཛད་པ་ན་དྲང་སྲོང་དེ་དག་ངོ་མཚར་ཏེ་དགེ་སྦྱོང་འདི་ནི་ཆེན་པོ་ཞིག་གོ་ཞེས་བརྗོད་པས་དེ་ཕྱིན་ཆད་དགེ་སྦྱོང་ཆེན་པོ་ཞེས་མཚན་དུ་གྲགས་སོ། ། དེ་ནས་ཡབ་ཟས་གཙང་མས་བྱང་ཆུབ་སེམས་དཔའ་གཡོག་མེད་པར་འཁྱམ་མོ་ཞེས་ཐོས་ནས། རྒྱལ་པོ་ཟས་གཙང་མས་གཡོག་སུམ་བརྒྱ་དང་། སྲུ་སྐྱེ་དགུའི་བདག་མོས་ལྷས་བསྟན་ནས་མི་ཉིས་བརྒྱ་ཞབས་འབྲིང་དུ་བཏང་ངོ་། ། དེ་ནས་བྱང་ཆུབ་སེམས་དཔས་འཁོར་ལྔ་བརྒྱ་ཡོད་པ་དེ་དང་མཉམ་དུ་སྤྱོད་པ་ན་དབེན་པར་འཁོར་མང་པོ་བསྟེན་པ་འདི་མ་ལེགས་སོ་སྙམ་དུ་དགོངས་ནས་བྱིངས་རྣམས་ཕྱིར་སློག་ཅིང་། ཡབ་དང་སྲུའི་ཕྱོགས་ཀྱི་ངོ་བསྲུང་བ་དང་ལྔ་པོ་དེ་ལ་དགེ་བའི་རྩ་བ་ཡོད་པར་མཁྱེན་ནས་ཀོའུ་དི་ནྱ་ལ་སོགས་པ་མི་ལྔ་ཞབས་འབྲིང་དུ་བསྟེན་ནོ། ། དེ་ནས་བྱང་ཆུབ་སེམས་དཔས་ཆུ་ཀླུང་ནཻ་རཉྫ་ནའི་འགྲམ་གྱི་ཤིང་དྲུང་ཞིག་ཏུ་དཀའ་ཐུབ་ལ་བཞུགས་ཏེ་ཐོག་མར་འབྲས་འབྲུ་རེ་རེ་ཙམ་གསོལ་ཞིང་། དེ་ནས་རིམ་གྱིས་འབྲུ་རེ་རེ་གསོལ་བ་དེ་ཡང་སྤངས་ནས་ལོ་དྲུག་ཏུ་སྐྱིལ་མོ་ཀྲུང་བཅས་ནས་ཏིང་ངེ་འཛིན་ལ་བཞུགས་སོ། ། དེ་ལྟར་དཀའ་བ་སྤྱད་པའི་བརྟུལ་ཞུགས་ལོ་དྲུག་པོ་དེས་ལྷ་དང་མི་ཁྲག་ཁྲིག་ཕྲག་བཅུ་གཉིས་དང་། བྱེ་བ་ཕྲག་དྲུག་ཅུ་རྩ་བཞི་ཐེག་པ་གསུམ་ལ་སྨིན་པར་མཛད་དོ། ། དེའི་ཚེ་ལྷ་ནས་ལྟོ་འཕྱེའི་བར་སྡེ་བརྒྱད་རྣམས་ཀྱིས་ཉིན་མཚན་དུ་མཆོད་ཅིང་སྨོན་ལམ་འདེབས་སོ། ། ལྷ་དང་མི་གང་དག་རྒྱ་ཆེན་པོ་ལ་མོས་པ་དེ་དག་གིས་ནི་བྱང་ཆུབ་སེམས་དཔའ་རིན་པོ་ཆེའི་ཁང་པ་བརྩེགས་པ་ན་འདུག་ཅིང་། བདེ་བ་མྱོང་བར་མཐོང་ངོ་། ། ལྷ་དང་མི་ཆོས་བསྟན་པས་སྨིན་པར་མཛད་པ་རྣམས་ཀྱིས་ཆོས་འབའ་ཞིག་འཆད་པར་མཐོང་ངོ་། ། སེམས་ཅན་སྤྱི་མཐུན་གྱིས་ནི་དཀའ་བ་སྤྱོད་པ་སྔར་སྨོས་པ་བཞིན་དུ་མཐོང་ངོ་། ། དཀའ་སྤྱད་མཛད་པ་དེས་ཕྱི་རོལ་པའི་དྲང་སྲོང་ས་ཡ་ཕྲག་བཞི་དང་ཉིས་འབུམ་བཏུལ་ཏེ་བྱང་ཆུབ་ཏུ་སྨིན་པར་མཛད་དོ། ། དེ་ནས་བྱང་ཆུབ་སེམས་དཔས་འདི་སྙམ་དུ་དགོངས་ཏེ། དཀའ་ཐུབ་གཅིག་པོས་འཚང་རྒྱ་བར་མི་ནུས་ཀྱི་མཐའ་གཉིས་སྤངས་པའི་དབུ་མའི་ལམ་ལ་བརྟེན་ཏེ་འཚང་རྒྱ་བར་བྱའོ་སྙམ་དུ་དགོངས་ཤིང་། ཕྱོགས་བཅུའི་སངས་རྒྱས་རྣམས་ཀྱིས་ཀྱང་དཀའ་ཐུབ་ལས་བཞེངས་ཏེ་བྱང་ཆུབ་ཀྱི་སྙིང་པོར་འཚང་རྒྱ་བའི་མཛད་པ་སྟོན་དགོས་སོ་ཞེས་ཡང་དང་ཡང་དུ་བསྐུལ་བ་ལ་བརྟེན་ནས། དཀའ་ཐུབ་ལས་བཞེངས་ཏེ་དབུགས་འབྱུང་རྔུབ་ཅི་བདེར་མཛད་པ་དང་། ཞལ་ཟས་རགས་པ་གསོལ་ཏེ་སྐུ་ལུས་ཀྱི་སྟོབས་བསྐྱེད་དོ། ། དེ་ནས་ཆུ་ཀླུང་ནཻ་རཉྫ་ནར་སྐུ་ཁྲུས་མཛད་དེ་ཕྱག་དར་ཁྲོད་ཀྱི་གོས་གསོལ་ནས། སྔོན་ཡུན་རིང་པོ་ནས་སྨོན་ལམ་བཏབ་པ་གྲོང་པའི་བུ་མོ་ལེགས་སྐྱེས་མ་དང་དགའ་སྟོབས་མ་གཉིས་ཀྱི་ཚོགས་རྫོགས་པར་བྱ་བ་དང་། སྐུའི་གཟི་མདངས་བསྐྱེད་ནས་གདུལ་བྱ་རྣམས་ལ་མཚན་དཔེའི་སྐུ་གསལ་བར་བསྟན་པར་བྱ་བའི་ཕྱིར་བུ་མོ་དེ་གཉིས་ཀྱི་ཐད་དུ་བྱོན་ནས་བསོད་སྙོམས་མཛད་པ་ན། དཔྱིད་ཟླ་ཐ་ཆུང་ས་ག་ཟླ་བའི་ཚེས་བཅུ་བཞིའི་ཉིན་བུ་མོ་དེ་གཉིས་ཀྱིས་བ་མཆོག་སྟོང་གི་འོ་མ་ཉིང་ཁུར་བྱས་པ་གསེར་གྱི་གཞོང་པར་བླུགས་ཏེ་ཕུལ་བ་ན་དྲོའི་དུས་སུ་བུ་མོ་གཉིས་ཀྱི་བྱང་ཆུབ་ཀྱི་ཆོས་རྫོགས་པར་བྱ་བའི་ཕྱིར་འོ་ཐུག་དེ་ལྷག་མ་མ་ལུས་པར་གསོལ་ཏེ། ཡོལ་གོ་ནཻ་རཉྫ་ནར་བོར་བ་ཀླུའི་རྒྱལ་པོ་རྒྱ་མཚོས་མཆོད་པའི་ཕྱིར་ཁྱེར་བས། བརྒྱ་བྱིན་གྱིས་མཁའ་ལྡིང་དུ་སྤྲུལ་ནས་དེ་ཕྲོགས་ཏེ་རང་གི་གཟུགས་ཀྱིས་སུམ་ཅུ་རྩ་གསུམ་དུ་ཁྱེར་ནས་ཡོལ་གོའི་དུས་སྟོན་བཙུགས་སོ། ། སེང་གེའི་ཁྲི་ཡང་ཀླུའི་བུ་མོས་མཆོད་པའི་རྟེན་དུ་ཁྱེར་ཏོ། ། བུ་མོ་དེ་གཉིས་ཀྱིས་ཀྱང་བྱང་ཆུབ་སེམས་དཔའ་ཐོག་མ་ནས་དེའི་བར་ཇི་ལྟ་བར་མ་འཚལ་ཏོ། ། བྱང་ཆུབ་སེམས་དཔའི་བསོད་ནམས་དང་ཤེས་རབ་ཀྱི་སྟོབས་ཀྱིས་འོ་ཐུག་གསོལ་མ་ཐག་སྐུ་སྔ་ཁོ་ལྟར་ཁ་དོག་བཟང་པོ་རྒྱས་པ་དང་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་དང་འོད་འདོམ་གང་པ་རྣམས་ཀྱིས་བརྒྱན་པར་གྱུར་ཏོ། ། གཞན་ཡང་ལྷ་ནས་ལྟོ་འཕྱེའི་བར་གྱི་སྡེ་བརྒྱད་པོ་གང་དག་བྱེ་བ་ཕྲག་དྲུག་ཅུས་ཀྱང་རང་རང་གི་ཟས་ཐོགས་ཏེ་བྱང་ཆུབ་སེམས་དཔའ་ལ་ཕུལ་བ་དང་། བྱང་ཆུབ་སེམས་དཔས་དེ་དག་ཕན་ཚུན་གཅིག་གིས་གཅིག་མཐོང་བ་མེད་པར་བྱིན་གྱིས་བརླབས་ནས་གསོལ་ཏོ། ། རང་རང་གི་གང་ཕུལ་བ་དེ་གསོལ་བར་མཐོང་བའི་མོད་ལ་དེ་དག་ཐམས་ཅད་བྱང་ཆུབ་ཏུ་ཡོངས་སུ་སྨིན་པར་མཛད་དོ། ། དེ་ནས་བྱང་ཆུབ་སེམས་དཔས་གང་དུ་མངོན་པར་རྫོགས་པར་འཚང་རྒྱ་སྙམ་དུ་གནས་བརྟགས་པ་ན་དཀར་ཕྱོགས་ཀྱི་ལྷ་རྣམས་ཀྱིས་ཆུ་ཀླུང་ནཻ་རཉྫ་ན་བརྒལ་བའི་ནུབ་ཕྱོགས་ན་རྡོ་རྗེ་གདན་ཞེས་བྱ་བ་དུས་གསུམ་སངས་རྒྱས་ཐམས་ཅད་གང་དུ་མངོན་པར་རྫོགས་པར་འཚང་རྒྱ་བའི་གནས་མཆིས་པས་དེར་གཤེགས་སུ་གསོལ་ཞེས་ཞུས་ཤིང་། བྱང་ཆུབ་སེམས་དཔའ་རང་ཉིད་ཀྱང་དེ་ལྟར་དུ་དགོངས་ནས་བྱང་ཆུབ་ཀྱི་སྙིང་པོར་གཤེགས་སོ། ། དེའི་ཚེ་ལྷའི་བུ་ས་བཟང་སོགས་ས་ལ་སྤྱོད་པའི་ལྷ་རྣམས་ཀྱིས་ནི་སྟོང་ཆེན་པོ་ཕྱག་བདར་བྱེད་ཅིང་སྤོས་ཆུས་ཆག་ཆག་འདེབས་སོ། ། ལག་ན་གཞོང་ཐོགས་དང་། ཕྲེང་ཐོགས་ཀྱིས་ནི་མེ་ཏོག་གི་ཆར་འབེབས་སོ། ། འཇིག་རྟེན་སྐྱོང་བ་བཞིས་ནི་གསེར་གྱི་དྲ་བ་དང་། བརྒྱ་བྱིན་གྱིས་ནི་རྣམ་པར་རྒྱལ་བའི་ཁང་བཟང་དྲ་བས་མཛེས་པར་བརྒྱན་ཏོ། ། འཐབ་བྲལ་བས་ནི་བཻ་ཌཱུརྱའི་དྲ་བ་དང་། དགའ་ལྡན་པས་ནི་མུ་ཏིག་གི་དྲ་བ་དང་། འཕྲུལ་དགའ་བས་ནི་འཛམ་བུ་ཆུ་བོའི་གསེར་གྱི་དྲིལ་བུའི་དྲ་བ་དང་། དབང་བསྒྱུར་གྱིས་ནི་ལྷའི་རིན་པོ་ཆེའི་དྲ་བས་བཀབ་བོ། ། ཆུ་ཀླུང་ནཻ་རཉྫ་ན་དང་བྱང་ཆུབ་ཀྱི་སྙིང་པོའི་བར་གྱི་ལམ་རླུང་གི་ལྷ་རྣམས་དང་སྤྲིན་གྱི་ལྷ་རྣམས་ཀྱིས་ཕྱག་བདར་བྱས། སྤོས་ཆུས་ཆག་ཆག་བཏབ་བོ། ། སྟོང་ཆེན་འདིའི་ཤིང་ལྗོན་པ་དང་བྱིས་པ་བཙས་པ་ཇི་སྙེད་པ་རྣམས་བྱང་ཆུབ་ཀྱི་སྙིང་པོ་ལོགས་སུ་མགོ་བཏུད་དོ། ། འདོད་པའི་ལྷའི་བུ་རྣམས་ཀྱིས་ནི་དེའི་བར་རྒྱང་གྲགས་ཙམ་ཚུན་ཆད་ཀྱི་ལམ་མངོན་པར་བཀོད་དེ་ལམ་དེའི་འགྲམ་གཡས་གཡོན་དུ་རིན་པོ་ཆེ་སྣ་བདུན་གྱི་སྟེགས་བུ་འཕང་དུ་ཤིང་ཏ་ལ་བདུན་ཙམ་དུ་མཐོ་བ། སྟེང་དུ་རིན་པོ་ཆེའི་དྲ་བ་བྲེས་པ། ལྷའི་གདུགས་དང་རྒྱལ་མཚན་དང་བ་དན་གྱིས་ལེགས་པར་བརྒྱན་པ་སྤྲུལ་ཏོ། ། མདའ་རྒྱང་གང་ཙམ་དུ་ནི་རིན་པོ་ཆེ་སྣ་བདུན་གྱི་ཤིང་ཏ་ལ་སྟེགས་བུ་དེ་བས་མཐོ་བ་མངོན་པར་སྤྲུལ་ཏེ་ཤིང་ཏ་ལ་དེ་རྣམས་རིན་པོ་ཆེ་བརྒྱུས་པས་ཕན་ཚུན་དུ་འབྲེལ་བར་འདུག་གོ ། ཤིང་ཏ་ལ་གཉིས་གཉིས་ཀྱི་བར་དུ་རྫིང་སྤོས་ཆུས་ཡོངས་སུ་གང་བ་གསེར་གྱི་བྱེ་མ་བདལ་བ། ཨུཏྤལ་ལ་སོགས་པས་གང་བ། རིན་པོ་ཆེའི་སྟེགས་བུས་བསྐོར་བ། ནོར་བུ་རིན་པོ་ཆེ་བཻ་ཌཱུརྱས་ཐེམ་སྐས་བརྒྱན་པ། རྨ་བྱ་དང་ཆུ་བྱ་སྣ་ཚོགས་པ་སྒྲ་འབྱིན་པའི་རྫིང་དག་བྱས་སོ། ། ལམ་དེ་ན་ལྷའི་བུ་མོ་བརྒྱད་ཁྲི་བརྒྱད་ཁྲིས་སྤོས་ཆུས་གཏོར་ཞིང་མེ་ཏོག་གིས་བཀྲམ་མོ། ། ཏ་ལ་ཐམས་ཅད་ཀྱི་མདུན་དུ་རིན་པོ་ཆེའི་མཁའ་རྟེན་བཞག་པ་ལ་ཙན་དན་དང་ཨ་ཀ་རུའི་སྤོས་ཕོར་ཐོགས་པ་བརྒྱད་ཁྲི་དང་། གླུ་དབྱངས་ལེན་པའི་ལྷའི་བུ་མོ་ལྔ་ཁྲི་དག་འཁོད་དོ། ། དེ་ནས་མི་མཇེད་ཀྱི་བདག་པོ་ཚངས་པ་དབང་སྒྱུར་ཆེན་པོས་ཚངས་རིས་པ་རྣམས་ལ་བསྒོ་བ་གྲོགས་པོ་དག་སྐྱེས་བུ་ཆེན་པོ་འདི་ནི་སྔོན་གྱི་དམ་བཅས་པ་མཐར་ཕྱིན་པའི་ཕྱིར་བྱང་ཆུབ་ཀྱི་སྙིང་པོར་བཞུད་ཀྱི་ཁྱེད་རྣམས་ཀྱིས་མཆོད་པར་གྱིས་ཤིག ། འདོད་པའི་ལྷ་རྣམས་ཀྱིས་མཆོད་པས་སྟོང་ཆེན་བརྒྱན་པར་བྱས་པ་ལ་ལྟོས་ཞེས་བསྐུལ་བ་དང་། གཟུགས་ཀྱི་ལྷ་རྣམས་ཀྱིས་འཇིག་རྟེན་གྱི་ཁམས་འདི་རིན་པོ་ཆེའི་རང་བཞིན་ལ་གསེར་གྱི་པདྨ་བཀྲམ་པ་ཁ་ཁྱེར་རིམ་པ་བདུན་གྱིས་བསྐོར་བ་དང་། གཤེགས་ལམ་དུ་ཤིང་རྟ་བདུན་ཡང་སྤྲུལ་ཏོ། ། ལྷའི་བུ་མོ་བྱེ་བ་དྲུག་ཅུས་རྡོ་རྗེའི་གདན་རིན་པོ་ཆེས་བཀྲམ་པ་ལ་སོགས་བྱས་ཏེ་མཆོག་གི་བཀོད་པ་དང་ལྡན་པ་དགའ་ཚལ་ལྟ་བུར་བྱས་སོ། ། ཚངས་པ་རང་ཉིད་ཀྱང་སྐད་ཅིག་དེ་ལ་སྟོང་ཆེན་འདིར་ཕྱིན་ཏེ་ས་གཞི་མཉམ་པ་རིན་པོ་ཆེ་སྣ་བདུན་གྱིས་གང་བ་རེག་ན་བདེ་བར་བྱས་སོ། ། དེ་བཞིན་དུ་ཕྱོགས་བཅུའི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱིས་ཀྱང་ཞིང་འདི་སངས་རྒྱས་ཀྱི་ཞིང་བརྒྱ་སྟོང་གིས་བརྒྱན་ཏོ། ། བྱང་ཆུབ་སེམས་དཔའ་རྣམས་ཀྱིས་ཀྱང་བཀོད་པ་དཔག་ཏུ་མེད་པའི་སངས་རྒྱས་ཀྱི་ཞིང་བཀོད་པ་སྣ་ཚོགས་པས་ཞིང་འདི་གཅིག་པུ་བརྒྱན་པར་བྱས་སོ། ། བྱང་ཆུབ་ཀྱི་སྙིང་པོ་སྐྱོང་བར་བྱེད་པའི་ལྷའི་བུ་ཨུ་ཁ་ལི་ལ་སོགས་པ་ལྷའི་བུ་བཅུ་དྲུག་གིས་བྱང་ཆུབ་ཀྱི་ཤིང་དེ་ལ་དཔག་ཚད་བརྒྱད་ཅུའི་ཁོར་ཡུག་ཏུ་རིན་པོ་ཆེ་སྣ་བདུན་གྱི་སྟེགས་བུ་དང་། ཏ་ལའི་ཕྲེང་བ་དང་གཡེར་ཁའི་དྲ་བ་དང་། རིན་པོ་ཆེའི་ཕྲེང་བ་རྣམས་རིམ་པ་བདུན་བདུན་གྱིས་ལེགས་པར་བསྐོར་བ། གསེར་གྱི་གླེགས་མ་དང་ཚོང་ཚོང་དང་པདྨ་དག་གིས་ཁེབས་པར་བྱས་སོ། ། འོད་མ་ལ་སོགས་པ་བྱང་ཆུབ་ཀྱི་ཤིང་གི་ལྷ་མོ་བཞིས་ཀྱང་བྱང་ཆུབ་ཀྱི་ཤིང་དེ་མཛེས་ཤིང་བཀྲ་བ་དང་། ནང་རིམ་ལ་རིན་པོ་ཆེ་སྣ་བདུན་གྱི་སྟེགས་བུ་དང་། ཏ་ལ་དང་གཡེར་ཁ་དང་རིན་པོ་ཆེའི་ཕྲེང་བ་བདུན་བདུན་གྱིས་བསྐོར་ཏོ། ། དེ་ནས་ཉི་མ་དགུང་ཡོལ་གྱི་དུས་སུ་བྱང་ཆུབ་ཀྱི་སྙིང་པོར་གཤེགས་པ་ན། ཞབས་ཀྱི་མཐིལ་ལས་ངན་སོང་གསུམ་རྒྱུན་གཅོད་ཅིང་སེམས་ཅན་རྣམས་ཀྱི་སྡུག་བསྔལ་དང་ཉོན་མོངས་པ་བཅིལ་བ་བདེ་བ་དང་ལྡན་ཞིང་སངས་རྒྱས་ཀྱི་ཞིང་ཐམས་ཅད་སྣང་བར་བྱེད་པའི་འོད་བཀྱེ་སྟེ། སངས་རྒྱས་ཀྱི་ཞིང་རྣམས་ནི་རབ་ཏུ་བསྐྱོད། སིལ་སྙན་སྒྲོག ། མེ་ཏོག་གི་ཆར་འབེབས། ལམ་གྱི་བཀོད་པ་རྒྱ་ཆེན་པོས་བྱང་ཆུབ་ཀྱི་སྙིང་པོར་གཤེགས་པ་ན་གང་དང་གང་དུ་ཞབས་བཞག་པ་དེར་པདྨ་དག་བྱུང་སྟེ། ས་ཆེན་པོ་འདི་ཡང་ཁར་བའི་སྣོད་བཞིན་དུ་སྒྲ་འབྱིན་ཏོ། ། དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོར་གཤེགས་པ་ན། སྔོན་གྱི་སངས་རྒྱས་རྣམས་རྩྭའི་གདན་ལ་བཞུགས་པར་དགོངས་ཤིང་། གནས་གཙང་མའི་ལྷའི་བུ་རྣམས་ཀྱིས་ཀྱང་དེ་བཞིན་དུ་གསོལ་བ་དང་། ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་དགོངས་པ་ཤེས་ནས། རི་སྤོས་ངད་ལྡན་ལས་ཤིང་བལ་ལྟར་རེག་ན་བདེ་བའི་རྩྭ་ཁུར་གཅིག་བླངས་ནས་བདག་ཉིད་རྩྭ་འཚོང་བཀྲ་ཤིས་ཀྱི་གཟུགས་སུ་སྤྲུལ་ནས་ཕུལ་བས་རྩྭ་དེ་བྱང་ཆུབ་སེམས་དཔས་བཞེས་ཏེ། སླར་ཡང་རྩྭ་འཚོང་བཀྲ་ཤིས་ཀྱི་དགེ་བའི་རྩ་བ་རྫོགས་པར་བྱ་བའི་ཕྱིར་རྩྭ་འཚོང་བཀྲ་ཤིས་ལམ་གྱི་གཡས་རོལ་ན་རྩྭ་སྔོ་སེར་དག་བརྔ་བ་གཟིགས་ནས་དེ་ལ། བཀྲ་ཤིས་རྩྭ་དག་ང་ལ་མྱུར་དུ་བྱིན། ། དེ་རིང་ང་ལ་རྩྭ་ནི་དོན་ཆེན་འགྱུར། ། དཔུང་དང་བཅས་པའི་བདུད་ནི་བཅོམ་ནས་སུ། ། བྱང་ཆུབ་དམ་པ་ཞི་བ་རེག་པར་འགྱུར། ། ཞེས་གསུངས་པས། རྩྭ་འཚོང་བཀྲ་ཤིས་སྔོན་ཁྱིམ་བདག་བློ་གྲོས་ལྡན་དུ་གྱུར་པའི་ཚེ་སངས་རྒྱས་རྣམ་གཟིགས་ཀྱི་དྲུང་དུ་སྨོན་ལམ་བཏབ་པའི་མཐུས་རབ་ཏུ་དགའ་བས་རྩྭ་སྔོན་པོ་རྨ་བྱའི་མགྲིན་པ་ལྟར་གཡས་སུ་འཁྱིལ་བ་དྲི་ཞིམ་པ་རེག་ན་འཇམ་པ་སྤར་བ་གང་ཐོགས་ནས་བྱང་ཆུབ་སེམས་དཔའ་ལ་ཕུལ་ཏེ། རྩྭ་ཡིས་བྱང་ཆུབ་འཆི་མེད་པ། ། སྔོན་གྱི་རྒྱལ་བའི་ལམ་འཐོབ་ན། ། ཡོན་ཏན་རྒྱ་མཚོ་ཁྱོད་བཞེས་ཤིག ། བདག་ཀྱང་ཐོག་མར་འཚང་རྒྱ་བགྱི། ། ཞེས་གསོལ་ཏོ། ། དེ་ནས་བྱང་ཆུབ་སེམས་དཔས་བྱང་ཆུབ་ཀྱི་ཤིང་ལ་ལན་བདུན་དུ་བསྐོར་བ་མཛད་དེ་ཕྱག་བཙལ་ནས་སེམས་ཅན་དམན་པ་ལ་མོས་པ་རྣམས་ཀྱི་བློ་ཚིམ་པར་བྱ་བ་དང་། རྩྭའི་གདན་གྱིས་ཆོག་ཤེས་པར་བྱ་བའི་ཕྱིར་དང་། སྔོན་གྱི་རྒྱལ་བའི་རྗེས་སུ་བསླབ་པའི་ཕྱིར། རང་ཉིད་ཀྱིས་ཤིང་དེའི་དྲུང་དུ་རྩྭའི་རྩེ་མོ་ནང་དུ་བསྟན་ནས་རྩྭ་རྣམས་མ་འཁྲུགས་པ་དང་། སྟུག་སྲབ་མེད་པར་བཀྲམ་པས་བསྐོར་ཐབས་སུ་ལྷུང་བ་དང་། མཚན་མ་འདི་ལས་བདག་གདོན་མི་ཟ་བར་འཚང་རྒྱ་བར་འགྱུར་རོ་སྙམ་ནས་ཆེད་དུ་ཡང་བརྗོད་དོ། ། དེ་ལྟར་རྩྭའི་གདིང་བ་གཏིང་བའི་སྟེང་དུ་སྐྱིལ་མོ་ཀྲུང་བཅས་ནས་སྐུ་དྲང་པོར་བསྲང་སྟེ་དྲན་པ་མངོན་དུ་བཞག ། ཞལ་ཤར་ཕྱོགས་སུ་གཟིགས་ནས། ཇི་སྲིད་སྡུག་བསྔལ་ཀུན་གྱི་མཐའི། ། ཟག་ཟད་ཡང་དག་མ་ཐོབ་པར། ། དེ་སྲིད་སྲོག་གི་མཐར་གྱུར་ཀྱང་། ། སྐྱིལ་ཀྲུང་འདི་ནི་གཞིག་མི་བྱ། ། ཞེས་བྱ་བ་ལ་སོགས་པ་གསུངས་སོ། ། དེ་ནས་ཕྱོགས་བཅུའི་ཞིང་ནས་བྱང་ཆུབ་སེམས་དཔའ་བགྲང་བ་ལས་འདས་པ་འདུས་ཏེ། རྒྱལ་བའི་སྲས་པོ་མང་པོ་དེ་དག་རང་རང་གི་རྫུ་འཕྲུལ་གྱི་རྣམ་པར་འཕྲུལ་པ་ཐ་དད་པ་དག་བྱེད་དེ། མེ་ཏོག་གི་གཞལ་ཡས་ཁང་སྟོན་པ་དང་། ལུས་ལས་ཁ་དོག་སྟོང་འདོན་པ་དང་། ཉི་མ་ལྟ་བུར་འོད་འགྱེད་པ་དང་། ས་གཡོ་བ་དང་། རྒྱ་མཚོ་བཞི་མགོ་བོར་ཐོགས་ནས་ས་ལ་སྤོས་ཆུ་འདེབས་པ་དང་། རིན་པོ་ཆེའི་མཆོད་སྡོང་འབུལ་བ་དང་། བར་སྣང་ལ་གནས་ནས་ལུས་དོར་བ་མེ་ཏོག་གི་ཕྲེང་བར་གྱུར་པས་སྟོང་གསུམ་འགེངས་པ་དང་། བ་སྤུའི་ཁུང་ནས་མདོ་སྡེ་ཁྲག་ཁྲིག་བརྗོད་པ་དང་། ལུས་ཆེན་པོར་བསྒྱུར་བ་དང་། ལོ་མ་ལ་བྱང་ཆུབ་སེམས་དཔའ་ལུས་ཕྱེད་གནས་པའི་ལྗོན་པ་ཐོགས་པ་དང་། ལྷུན་པོ་ལག་ན་ཐོགས་པ་དང་། རྐང་གིས་ཆུའི་ཕུང་པོ་འབོག་པ་དང་། རྔ་བོ་ཆེ་བརྡུང་བའི་སྒྲས་ཕྱོགས་བཅུ་བྱེ་བའི་ཞིང་ཁྱབ་པར་དོ་མོད་བྱང་ཆུབ་སེམས་དཔའ་འཚང་རྒྱའོ་ཞེས་རྒྱ་ཆེར་སྒྲོག་པ་སོགས་ལྟགས་སོ། ། ཞིང་ཀུན་ན་བཞུགས་པའི་རྒྱལ་བ་ཐམས་ཅད་ཀྱིས་ཕྱག་གཡས་པ་བརྐྱངས་ཏེ། དེད་དཔོན་ཆེན་པོ་རྒྱལ་བར་གྱུར་ཅིག་ཅེས་གསུང་བརྗོད་དོ། ། དེ་ནས་བདུད་སྡིག་ཏོ་ཅན་གྱིས་བདུད་ཀྱི་དམག་བྱེ་བ་ཕྲག་དུང་ཕྱུར་བསྐུལ་ཏེ་བྱང་ཆུབ་སེམས་དཔའ་ལ་མཚོན་ཆའི་ཆར་འབེབས་པ་སོགས་བྱང་ཆུབ་ལས་གཡོ་བའི་ཕྱིར་བར་ཆད་བྱ་བར་བརྩམས་སོ། ། བྱང་ཆུབ་སེམས་དཔའ་ནི་ཐུགས་ཀ་དཔལ་གྱི་བེའུས་བརྒྱན་པ་སོགས་རྡོ་རྗེ་ལྟར་བརྟན་པའི་སྟོབས་མངའ་བ་དང་། ཆོས་ཀུན་སྒྱུ་མ་དང་མཚུངས་པར་གཟིགས་པས་བདུད་ཀྱི་དམག་དེ་རྣམས་ཀྱིས་བག་ཚ་བ་དང་གཡོ་བ་མེད་དོ། ། བདུད་ཀྱི་དཔུང་དེ་དག་མཐུ་ཆུང་བར་བྱ་བའི་ཕྱིར་བདུད་ཀྱི་དཔུང་ཞལ་གྱི་ནང་དུ་ཞུགས་པ་དེ་ལྟ་བུའི་མཐུ་བསྟན་པ་དང་བདུད་རྣམས་བྲོས་སོ། ། བྲོས་ནས་ཀྱང་ཅི་ཡང་མ་ཡིན་ནོ་སྙམ་ནས་སླར་ལོག་སྟེ་འཁོར་དང་བཅས་པས་མཚོན་ཆ་སྣ་ཚོགས་འཕངས་པ་མེ་ཏོག་གི་བླ་བྲེ་དང་གཞལ་མེད་ཁང་དུ་གྱུར་ཏོ། ། དབུགས་གདུག་པའི་མེ་ལྕེ་གཏོང་བ་དག་ཀྱང་འོད་ཀྱིས་པདྨ་འདབ་མ་བརྒྱ་པ་བཞིན་དུ་བསྐྱོད་དོ། ། དེ་ནས་བྱང་ཆུབ་སེམས་དཔས་ཕྱག་གཡས་པ་མགོ་ལ་བྱུགས་པ་དང་། བདུད་ཀྱིས་བྱང་ཆུབ་སེམས་དཔའི་ཕྱག་ན་རལ་གྲི་འབར་བ་ཐོགས་པར་མཐོང་ནས་ལྷོའི་ཕྱོགས་སུ་བྲོས་པ་དང་ཅི་ཡང་མ་ཡིན་ནོ་སྙམ་ནས་ཡང་སླར་ལོག་སྟེ་མཚོན་ཆ་རྣམས་དྲག་ཏུ་འཕངས་པ་དེ་དག་ཀྱང་མེ་ཏོག་གི་ཕྲེང་བར་གྱུར་ཏེ་བྱང་ཆུབ་ཀྱི་ཤིང་བརྒྱན་པར་བྱས་སོ། ། དེ་ལྟར་བྱང་ཆུབ་སེམས་དཔའི་ཡོན་ཏན་དེ་མཐོང་ནས་བདུད་སྡིག་ཅན་ཕྲག་དོག་དང་ཞེ་སྡང་གིས་རྒྱུད་འཁྲུགས་ཏེ། བྱང་ཆུབ་སེམས་དཔའ་ལ་སྨྲས་པ། ཁྱོད་ཅིའི་ཕྱིར་བྱང་ཆུབ་ཀྱི་སྙིང་པོ་ལ་འདུག ། བཀའ་སྩལ་པ། བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་རོ། ། བདུད་ཀྱིས་སྨྲས་པ། ཀྱེ་རྒྱལ་བུ་གཞོན་ནུ། བཞེངས་ལ་རྒྱལ་སྲིད་ལ་སྤྱོད་ཅིག ། ཁྱོད་ཀྱི་བསོད་ནམས་དེ་ཙམ་གྱིས་ཐར་པ་ག་ལ་ཐོབ། ཅེས་འཁོར་ལོའི་མཚོན་ཆ་འཕངས་པས་མེ་ཏོག་ཏུ་གྱུར་ཅིང་། འཁོར་རྣམས་ཀྱིས་རི་འཕངས་པས་མེ་ཏོག་གི་ཆུན་པོར་གྱུར་ཏོ། ། བཀའ་སྩལ་པ། སྡིག་ཅན། ཁྱོད་ཀྱིས་ནི་གཏན་པ་མེད་པའི་མཆོད་སྦྱིན་གཅིག་གིས་འདོད་པའི་དབང་ཕྱུག་ཐོབ་ཏུ་ཟད་ན། ངས་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་དུ་མས་གཏན་པ་མེད་པའི་མཆོད་སྦྱིན་བྱས་ཤིང་། སེམས་ཅན་རྣམས་ཀྱི་ཕྱིར་ཡོངས་སུ་གཏང་བར་དཀའ་བ་རྣམས་བཏང་བས་བླ་ན་མེད་པའི་ཡེ་ཤེས་ཐོབ་སྟེ་བླ་ན་མེད་པའི་ཡེ་ཤེས་ཐོབ་པར་མི་འགྱུར་བ་དེ་སྲིད་རེ་སྐན། དེ་སྐད་ཅེས་བཀའ་སྩལ་པ་དང་། བདུད་ཀྱིས་སྨྲས་པ། ཇི་ལྟར་བདག་གིས་མཆོད་སྦྱིན་གཅིག་གིས་འདོད་པའི་ཁམས་ཀྱི་དབང་ཕྱུག་ཐོབ་པར་གྱུར་པའི་དཔང་པོ་ནི་ཁྱོད་ཉིད་ཡིན་ན། ཇི་ལྟར་ཁྱོད་ཀྱིས་བླ་ན་མེད་པའི་ཡེ་ཤེས་ཐོབ་པའི་ཕྱིར་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱས་པའི་དཔང་པོ་སུ་ཡོད། ཅེས་སྒྲ་གསང་ཆེན་པོ་བསྒྲགས་སོ། ། དེ་ནས་བྱང་ཆུབ་སེམས་དཔའ་སྙིང་རྗེ་ཆེན་པོའི་ཐུགས་ཀྱིས་བག་ཚ་བ་མེད་པར་ཕྱག་གཡས་པ་འཁོར་ལོ་དང་གཡུང་དྲུང་གིས་མཚན་པས་སྐུ་ལུས་ཐམས་ཅད་ལ་བྱུགས་ནས། འཇིག་རྟེན་གྱི་ཁམས་ཐམས་ཅད་ཀྱི་སངས་རྒྱས་ཐམས་ཅད་མངོན་དུ་བྱས་ཏེ། ཚུལ་དུ་ཤིས་པར་ས་ཆེན་པོ་ལ་བརྡབས་ནས་ངའི་དཔང་དུ་ས་འདི་ཡོད་དོ། ། ས་འདི་འགྲོ་བ་ཀུན་གྱི་གནས་ཡིན་ཏེ། ། རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། ། འདི་ནི་བདག་གི་དཔང་སྟེ་བདག་རྫུན་མེད། ། འདི་ལ་ཁྱོད་ནི་བདག་གི་དཔང་བྱོས་ཤིག ། ཅེས་ས་ལ་ཕྱག་གཡས་པ་རེག་མ་ཐག་ཏུ་ས་ཆེན་པོ་རྣམ་པ་དྲུག་ཏུ་གཡོས་ཤིང་ལྟས་ཆེན་པོ་བཅོ་བརྒྱད་དག་ཀྱང་བྱུང་ངོ་། ། དེ་ནས་སའི་ལྷ་མོ་བསྟན་མ་སའི་ལྷ་མོའི་འཁོར་བྱེ་བ་ཕྲག་བརྒྱ་དང་ལྡན་པ་དེས་རིག་ནས་ས་བརྟོལ་ཏེ་ལུས་རྒྱན་གྱིས་བརྒྱན་པ། ལྟེ་བ་ཡན་ཕྱུང་ནས་བྱང་ཆུབ་སེམས་དཔའི་ལོགས་སུ་བཏུད་དེ་ཐལ་མོ་སྦྱར་ནས་གསོལ་པ། དེ་དེ་བཞིན་ནོ་སྐྱེས་བུ་དམ་པ། ཁྱོད་ཇི་སྐད་གསུངས་པ་བཞིན་ཏེ། འདི་ནི་བདག་ལ་མངོན་སུམ་མོ། ། དེ་ལྟ་ལགས་མོད། ཁྱོད་ཉིད་ལྷ་དང་བཅས་པའི་དཔང་དུ་གྱུར་པ་ཡིན་ནོ། ། བདུད་ལ་ཡང་སྨྲས་པ། སྡིག་ཅན། བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་ནོ། ། ཞེས་སྨྲས་ནས་དེ་ཉིད་དུ་མི་སྣང་བར་གྱུར་ཏོ། ། ཚུལ་དེས་བདུད་སྡིག་ཅན་ཞུམ་ཞིང་ཅང་མི་སྨྲ་ལ་སྤྱི་བོ་སྨད་ནས་སེམས་ཁོང་དུ་ཆུད་ནས་འདུག་གོ ། དེའི་ཚེ་བྱང་ཆུབ་སེམས་དཔའི་ཕྱག་གཡས་ས་ལ་བརྡབས་པའི་སྒྲ་དེ་ལས་ཐུག་བཅོམ་དང་འུར་སྒྲ་དང་། སོད་ཅིག་ཅེས་སྡིག་ཅན་རྣམས་ཀྱིས་ཐོས་སོ། ། འཁོར་དེ་ལས་བདུད་བྱེ་བ་ཁྲག་ཁྲིག་བརྒྱ་སྟོང་གིས་ནི་འདི་ལ་སྐྱབས་སུ་འགྲོ་བར་གྱིས་ཞེས་པ་ལ་སོགས་པའི་ཚིགས་སུ་བཅད་པ་ཐོས་ཏེ། ཁ་བུབ་ཏུ་འགྱེལ་ནས་སྐྱེས་བུ་དམ་པ་སྐྱབ་ཏུ་གསོལ་ཞེས་སྨྲས་སོ། ། བདུད་སྡིག་ཅན་དཔུང་དང་བཅས་པ་དེས་དངངས་ཤིང་འབྲོས་འདོད་ཀྱང་འབྲོས་མ་ནུས་ཏེ། བྱང་ཆུབ་སེམས་དཔས་འོད་ཕྱུང་ནས་དེ་འཇིགས་པ་ལས་བསྐྱབས་སོ། ། དེ་ནས་བདུད་ཀྱི་འཁོར་གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུས་བྱང་ཆུབ་ཏུ་སེམས་བསྐྱེད་དོ། ། སྔོན་སྦྱང་པ་བྱས་པའི་ལྷ་བརྒྱད་ཁྲི་བཞི་སྟོང་མི་སྐྱེ་བའི་ཆོས་ལ་བཟོད་པ་ཐོབ་བོ། ། དེའི་ཚེ་ས་ཆེན་པོ་འདི་རྣམ་པ་དྲུག་ཏུ་གཡོས་ཤིང་། འཇིག་རྟེན་དུ་སྣང་བ་ཆེན་པོས་ཁྱབ་པར་འགྱུར་བའི་འོད་སྐུ་ལས་སྤྲོས་ཏེ་ངན་སོང་གསུམ་གྱི་སྡུག་བསྔལ་ཞི་བར་མཛད། མི་ཁོམ་པ་རྒྱུན་བཅད། སེམས་ཅན་སུ་ལ་ཡང་ཐ་བ་དང་། རྒྱགས་པ་དང་། སྡང་བས་གནོད་པ་མེད་པར་མཛད་དོ། ། དེ་ལྟར་བཅོམ་ལྡན་འདས་ཀྱིས་ཐམས་ཅད་མཁྱེན་པ་ཉིད་ཐོབ་མ་ཐག་ཏུ་ཕྱག་ན་རྡོ་རྗེ་རང་གི་ཐུགས་ལ་བཞུགས་པ་ལ་མཚན་བརྒྱ་རྩ་བརྒྱད་པས་བསྟོད་དེ། ཕྱག་རྡོར་ལ་དེ་བཞིན་གཤེགས་པ་ཐམས་ཅད་ཀྱིས་ལེགས་སོ་ཞེས་བྱ་བ་བྱིན་ནོ། ། དེ་ནས་ལྷའི་བུ་རྣམས་ཀྱིས་སྨྲས་པ། གྲོགས་པོ་དག ། འདི་མངོན་པར་རྫོགས་པར་སངས་རྒྱས་ཀྱིས་མེ་ཏོག་འཐོར་ཅིག་ཅེས་སྨྲས་པ་དང་། སྔོན་གྱི་རྒྱུས་ཤེས་པའི་ལྷ་རྣམས་ཀྱིས་སྨྲས་པ། བརྡ་མ་མཛད་ཀྱི་བར་གཏོར་བར་མི་བྱའོ་ཞེས་སྨྲས་སོ། ། དེའི་ཚེ་ཕྱོགས་བཅུའི་སངས་རྒྱས་རྣམས་ཀྱིས་དེ་བཞིན་གཤེགས་པ་མངོན་པར་སངས་རྒྱས་པ་ལགས་སོ་ཞེས་ཕྱག་གཡས་པ་བརྐྱངས་ཏེ་སྐུ་མ་མཉེལ་ཏམ་ཞེས་སྙུན་གསོལ་ཏེ་མཉེལ་བ་མི་མངའ་བར་བྱང་ཆུབ་བམ། རང་བྱུང་དུ་ཆོས་ཐམས་ཅད་ལ་དབང་བསྒྱུར་རམ། ཞེས་འདྲི་ཞིང་བྱང་ཆུབ་སེམས་དཔའ་རྣམས་བཀྱེ་སྟེ་སྟོང་ཆེན་འདི་ཁེབས་པའི་རིན་པོ་ཆེའི་གདུགས་འོད་ཟེར་གྱི་དྲ་བ་སྣང་བ་ཆེན་པོ་དང་ལྡན་པ་དག་བསྐུར་རོ། ། བྱང་ཆུབ་སེམས་དཔའ་དེ་དག་གིས་ཀྱང་བཅོམ་ལྡན་འདས་ཤཱཀྱ་ཐུབ་པའི་ཞབས་ལ་ཕྱག་བཙལ་ནས་ཚུལ་དང་མཐུན་པར་ཕུལ་ལོ། ། དེ་ནས་བཅོམ་ལྡན་འདས་སྐྱིལ་ཀྲུང་དང་བཅས་བཞིན་པར་ཤིང་ཏ་ལ་བདུན་ཙམ་དུ་ནམ་མཁའ་ལ་འཕགས་ཏེ། ལམ་གྱི་རྒྱུན་ཆད་དོ། ། སྡུག་བསྔལ་ཉེ་བར་ཞིའོ། ། ཟག་པ་བསྐམས་སོ། ། ཞེས་ཆེད་དུ་བརྗོད་པས། ལྷའི་བུ་ཐམས་ཅད་ཀྱིས་མེ་ཏོག་གཏོར་རོ། ། དེ་ནས་གནས་གཙང་མའི་ལྷ་རྣམས་ཀྱིས་ཙན་དན་གྱི་ཕྱེ་མ་དང་འོད་གསལ་གྱི་ལྷ་རྣམས་ཀྱིས་གདུགས་དང་རྒྱལ་མཚན་དང་། ཚངས་རིས་པ་རྣམས་ཀྱིས་རིན་པོ་ཆེའི་དྲ་བ་དང་། བདུད་ཀྱི་བུ་དཀར་ཕྱོགས་པ་དག་གིས་རིན་པོ་ཆེའི་བླ་བྲེ་དང་། དབང་སྒྱུར་སོགས་ཀྱིས་གསེར་གྱི་པདྨ་དང་། འཕྲུལ་དགའ་བས་དར་གྱི་ལྡ་ལྡི་དང་། དགའ་ལྡན་པས་ལྷའི་གོས་ཀྱི་དྲ་བ་དང་། འཐབ་བྲལ་བས་སྤོས་ཕྲེང་དང་། བརྒྱ་བྱིན་གྱིས་བྱུག་པ་དང་། རྒྱལ་ཆེན་བཞིས་མེ་ཏོག་སྣ་ཚོགས་པ་དང་། བར་སྣང་གི་ལྷ་རྣམས་ཀྱིས་གཡེར་ཁའི་དྲ་བ་དང་། ས་བླའི་ལྷ་རྣམས་ཀྱིས་ས་གཞི་རྣམས་ལ་མེ་ཏོག་བཀྲམ་ནས་ཕུལ་ཞིང་བསྟོད་དེ་བྱང་ཆུབ་ཀྱི་སྙིང་པོ་ལེགས་པར་བརྒྱན་ཏོ། ། དེ་ལྟར་བྱང་ཆུབ་སེམས་དཔའ་ནམ་མཁའི་ཁམས་ཡོངས་སུ་གང་བ་དག་གིས་མཆོད་ཅིང་བསྟོད་ལ། རྒྱལ་བ་རང་ཉིད་ཀྱིས་ཀྱང་། བསོད་ནམས་རྣམ་སྨིན་བདེ་སྟེར་སྡུག་བསྔལ་ཐམས་ཅད་སེལ། ། བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། ། བདུད་བཅོམ་ནས་ནི་བྱང་ཆུབ་མྱུར་དུ་རེག་པར་གྱུར། ། མྱ་ངན་ལས་འདས་ཞི་བ་བསིལ་བའི་དངོས་པོ་ཐོབ། ། ཅེས་ཆེད་དུ་བརྗོད་དོ། ། དེ་ལྟར་འཚང་རྒྱ་བའི་མཛད་པ་བསྟན་པ་ནི་གདུལ་བྱའི་དོན་དུ་མཆོག་གི་སྤྲུལ་སྐུའི་མཛད་པ་ཡིན་གྱི། སྟོན་པ་འདི་ཉིད་སྔོན་བསྐལ་པ་བགྲང་བ་ལས་འདས་པའི་སྔ་རོལ་ཏུ་སངས་རྒྱས་པ་ཡིན་པ་ནི་སྔར་བརྗོད་ཟིན་ཅིང་། སྙིང་རྗེ་པད་དཀར་དུ་ཡང་། སྟོན་པ་འདི་ཉིད་སྔོན་བསྐལ་པ་བརྗོད་ཀྱིས་མི་ལང་བའི་སྔ་རོལ་ཏུ་རྒྱལ་བ་དབང་པོའི་ཏོག་ཏུ་སངས་རྒྱས་ཤིང་། ཞིང་འདིར་སྙིགས་མའི་འགྲོ་བ་རྣམས་ཀྱི་དོན་དུ་མཆོག་གི་སྤྲུལ་སྐུའི་མཛད་པ་བསྟན་པ་ཡིན་པ་དང་། ད་དུང་སེམས་ཅན་མ་ཟད་ཀྱི་བར་དུ་སྤྲུལ་པ་རྒྱུན་མི་འཆད་དུ་སྟོན་པར་གསུངས་སོ། ། སྔར་བཤད་པའི་འཚང་རྒྱ་ཚུལ་དེ་ནི་ཐུན་མོང་བའི་དབང་དུ་བྱས་པའི་འཚང་རྒྱ་ཚུལ་ཡིན་གྱི། སྔགས་ལམ་གྱིས་འཚང་རྒྱ་བའི་ཚུལ་ནི་ས་ག་ཟླ་བའི་ཚེས་བརྒྱད་ཀྱི་ཉིན་རྣམ་སྨིན་གྱི་ལུས་ཆུ་ཀླུང་ནཻ་རཉྫ་ནའི་འགྲམ་དུ་བཞག་ནས་ཡིད་ལུས་ཀྱིས་འོག་མིན་དུ་ཕེབས་ཏེ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་ཞུགས་ནས་མངོན་བྱང་ལྔའི་སྒོ་ནས་འཚང་རྒྱ་བའི་མཛད་པ་བསྟན་ཏེ་རྣལ་འབྱོར་རྒྱུད་གསུངས་པ་དང་། ཡང་གསང་བ་འདུས་པའི་དཀྱིལ་འཁོར་དུ་ཞུགས་ནས་བྱང་ཆུབ་རྡོ་རྗེས་ལྷན་ཅིག་སྐྱེས་པའི་ཡེ་ཤེས་མཚོན་པའི་དབང་བསྐུར་ཏེ་གཉིས་སྣང་ཕྲ་མོ་ཡང་དག་ནས་ཟུང་འཇུག་གི་སྐུར་བཞེངས་ཏེ་བླ་མེད་ཀྱི་རྒྱུད་གསུངས་པ་དང་། བདུད་འདུལ་བའི་ཚེ་གཤིན་རྗེའི་གཤེད་དམར་ནག་གི་སྐུར་བཞེངས་ནས་གཤིན་རྗེའི་གཤེད་ཀྱི་རྒྱུད་རྣམས་གསུངས་པའི་ཚུལ་ལ་སོགས་པ་གསང་བ་བསམ་གྱིས་མི་ཁྱབ་པའི་ཚུལ་མཐའ་ཡས་པ་ཡོད་དོ། ། དེ་ལྟར་དགུང་ལོ་སོ་ལྔ་ལ་བབ་པ་རྒྱལ་བ་ཞེས་པ་ཤིང་ཕོ་རྟའི་ལོ་ས་ག་ཟླ་བའི་ཚེས་བཅོ་ལྔའི་ཐོ་རངས་མངོན་པར་རྫོགས་པར་སངས་རྒྱས་པའི་ཚུལ་བསྟན་ནས་ཞག་བདུན་བྱང་ཆུབ་ཀྱི་ཤིང་ལ་བརྟེན་ཏེ་བཞུགས། བདུན་གཉིས་པ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་རྒྱང་རིང་དུ་འཆག་པར་མཛད། བདུན་གསུམ་པ་ལ་བྱང་ཆུབ་ཀྱི་ཤིང་ལ་སྤྱན་མི་འཛུམ་པར་གཟིགས་ཤིང་བཞུགས། བདུན་བཞི་པ་ལ་གླིང་བཞི་པའི་འཇིག་རྟེན་གྱི་ཤར་ནུབ་ཀྱི་རྒྱ་མཚོའི་བར་ལ་འཆག་ཅིང་བཞུགས། བདུན་ལྔ་པ་ལ་ཀླུའི་རྒྱལ་པོ་བཏང་བཟུང་གི་གནས་སུ་བཞུགས། བདུན་དྲུག་པ་ལ་ཤིང་ནེ་གྲོ་དྷ་ར་སྐྱོང་དུ་གཤེགས་ཏེ་ཀུན་ཏུ་རྒྱུ་མང་པོ་ཞིག་བྱང་ཆུབ་ཏུ་སྨིན་པར་མཛད། བདུན་ཕྲག་བདུན་པ་ལ་ཤིང་སྤྲུལ་རྒྱུའི་ཚལ་དུ་བཞུགས་ཏེ་ཚོང་དཔོན་ག་གོན་དང་བཟང་པོ་གཉིས་རྗེས་སུ་བཟུང་ནས་དེ་གཉིས་ཀྱིས་ཕུལ་བའི་ཞལ་ཟས་བཞེས་ཤིང་། དེའི་ཚེ་རྒྱལ་པོ་ཆེན་པོ་བཞིས་རྡོའི་ལྷུང་བཟེད་རེ་ཕུལ་བ་གཅིག་ཏུ་བྱིན་གྱིས་བརླབས་ཏེ། དེར་ཞལ་ཟས་བཞེས་སོ། ། དེ་ནས་ཚོང་དཔོན་ག་གོན་དང་བཟང་པོ་གཉིས་ཀྱི་དོན་དུ་བཀྲ་ཤིས་ཀྱི་ཚིགས་བཅད་མཛད་ནས་དེ་གཉིས་བྱང་ཆུབ་ཏུ་ལུང་བསྟན་ཏོ། ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་ཆོས་ཟབ་མོ་ཟབ་པར་སྣང་བ། ཁོང་དུ་ཆུད་པར་དཀའ་བ། རྟོག་གེ་པ་རྣམས་ཀྱིས་རྟོག་གེའི་སྤྱོད་ཡུལ་མ་ཡིན་པ། མཁས་པས་ཤེས་པ་འདི་རྟོགས་ན། གཞན་ལ་སྨྲས་ཀྱང་མི་ཤེས་པས་བདེ་བར་གནས་པའི་རྣལ་འབྱོར་ལ་རྗེས་སུ་བརྩོན་པར་གནས་པར་བྱའོ་ཞེས་དགོངས་ནས། ཟབ་ཞི་རྡུལ་བྲལ་འོད་གསལ་འདུས་མ་བྱས། ། བདུད་རྩི་ཆོས་འདི་བདག་གིས་ཐོབ་པར་གྱུར། ། བདག་གིས་བསྟན་ཀྱང་གཞན་གྱིས་མི་ཤེས་ཏེ། ། མི་སྨྲ་ནགས་འདབ་གནས་པར་བྱ་བ་བསྙམ། ། ཞེས་བྱ་བ་ལ་སོགས་པ་གསུངས་ཏེ་ཐུགས་ལས་ཆུང་ངུར་བཞུགས་པ་ན། ཕྱོགས་བཅུའི་ཞིང་ནས་ལྷགས་པའི་བྱང་ཆུབ་སེམས་དཔའ་བགྲང་བ་ལས་འདས་པ་དག་དང་། དཀར་ཕྱོགས་ཀྱི་ལྷ་བགྲང་བ་ལས་འདས་པ་དག་གིས་ཆོས་སྟོན་པར་གསོལ་བ་བཏབ་ཅིང་། ཁྱད་པར་སྟོང་གསུམ་མི་མཇེད་ཀྱི་བདག་པོ་ཚངས་པ་ཆེན་པོས་བཅོམ་ལྡན་འདས་ལ་ཆོས་གསུང་བར་གསོལ་བ་བཏབ་པས། ཅང་མི་གསུང་བས་གནང་བར་རིག་སྟེ་ཚངས་པ་རང་གི་གནས་སུ་སོང་ངོ་། ། དེ་ནས་བཅོམ་ལྡན་འདས་ཀྱིས་གཞན་དག་ཆོས་ལ་གུས་པ་བསྐྱེད་པར་འགྱུར་བ་དང་། ཚངས་པས་ཡང་ཡང་བསྐུལ་ན་དགེ་བ་དག་འཕེལ་བར་འགྱུར་བ་དང་། ཆོས་ཀྱང་ཟབ་པར་བསྟན་པའི་ཕྱིར་ཐུགས་ལས་ཆུང་ངུར་བཞུགས་སོ། ། དེ་ཚངས་པས་ཤེས་ནས་བརྒྱ་བྱིན་ལ་བསྐུལ་ཏེ། དབང་ཕྱུག་ཆེན་པོ་སོགས་འདོད་གཟུགས་ཀྱི་ལྷ་མང་པོ་དང་ལྷན་ཅིག་བཅོམ་ལྡན་འདས་ཀྱི་སྤྱན་སྔར་ཕྱིན་ནས་ཆོས་གསུང་བར་བསྐུལ་ལོ། ། དེ་ལྟ་ནའང་ཆོས་གསུང་བ་དཀའ་དཀའ་ལྟར་མཛད་ནས་ཆོས་སྟོན་པར་མ་མཛད་པ་ན་ཚངས་པ་གཙུག་ཕུད་ཅན་གྱིས་དེ་ཤེས་ནས་ནམ་སྲོད་ལ་ཚངས་པ་དྲུག་ཁྲི་བརྒྱད་སྟོང་གིས་བསྐོར་ནས། བཅོམ་ལྡན་འདས་ཀྱི་སྤྱན་སྔར་ཕྱིན་ཏེ་ཐལ་མོ་སྦྱར་ནས་གསོལ་པ། མ་ག་དྷར་ནི་སྔོན་ཆད་ཆོས་བྱུང་བ། ། དག་པ་མ་ལགས་དྲི་མར་བཅས་པས་རྟོགས། ། བདུད་རྩི་ཆོས་ཀྱི་སྒོ་ནི་ཕྱེ་མཛོད་ལ། ། དྲི་མ་མེད་པས་རྟོགས་པ་བཤད་པར་མཛོད། ། ཐུབ་པ་ཆོས་ཀྱི་སྒྲོན་མས་མུན་པ་སོལ། ། དེ་བཞིན་གཤེགས་པའི་རྒྱལ་མཚན་ཁྱོད་ཀྱིས་བསྒྲེང་། ། སྙན་པའི་གསུང་བརྗོད་པ་ཡི་དུས་ལ་བབ། ། རྔ་སྒྲ་རི་དྭགས་དབང་ལྟར་བསྒྲག་ཏུ་གསོལ། ། བཀའ་སྩལ་པ། ཚངས་པ་ངས་ནི་ཚེགས་ཆེན་གྱིས། ། སྐྱོན་རྣམས་བཅོམ་ནས་རྟོགས་གྱུར་པ། ། སྲིད་དང་ཆགས་པས་དཀྲིས་རྣམས་ཀྱིས། ། ཆོས་ནི་ལེགས་པར་རྟོགས་མི་འགྱུར། ། གསོལ་པ། འཇིག་རྟེན་ན་དབང་པོ་རྣོན་པོ་དང་འབྲིང་དང་རྟུལ་པོ་དང་། གདུལ་སླ་བའི་སེམས་ཅན་གང་དག་མཆིས་ཏེ། དེ་དག་གིས་ཆོས་མ་ཐོས་ན་ཉམས་པར་འགྱུར་བས་ཆོས་བཤད་དུ་གསོལ། ཞེས་དང་། སྔོན་ཆོས་འཚོལ་བའི་ཕྱིར་དབུ་སྟོང་ཙམ་ཡང་བཏང་ངོ་ཞེས་བསྟོད་དོ། ། དེ་ནས་ཚངས་རིས་ཀྱི་ལྷའི་བུ་དེ་རྣམས་ཀྱིས་ཀྱང་བཅོམ་ལྡན་འདས་སྔོན་ཁ་དོག་དམ་པ་ལ་སོགས་པ་རྒྱལ་པོ་ལྔ་དང་། དྲང་སྲོང་ཨུཏྤལར་གྱུར་པའི་ཚེ་དམ་པའི་ཆོས་ཀྱི་ཕྱིར་དཀའ་བ་དེ་ལྟ་བུ་སྤྱད་ན། ད་བཅོམ་ལྡན་འདས་ཆོས་ཀྱི་རྒྱ་མཚོ་ནི་རྫོགས། ཆོས་ཀྱི་སྒྲོན་མེ་ཡང་གསལ་བར་མཛད་ན། ཅིའི་སླད་དུ་ཆོས་མ་བསྟན་པར་མྱ་ངན་ལས་འདའ་བར་དགོངས། ཞེས་གསོལ་ཏོ། ། བཅོམ་ལྡན་འདས་ཀྱིས་བཀའ་སྩལ་པ། བདུད་རྩིའི་སྒོ་མོ་དག་ནི་དབྱེ་བར་བྱ། ། ཉན་པར་སུ་འདོད་སོམ་ཉི་གསོལ་ཅིག་དང་། ། ཚངས་པ་མི་རྣམས་ལ་ནི་གྱ་ནོམ་ཆོས། ། ཀླན་ཀ་མི་བཙལ་མདོ་ཙམ་བཤད་པར་བྱ། ། ཞེས་གསུངས་ནས་ཆོས་གསུང་བར་ཞལ་གྱིས་བཞེས་སོ། ། དེ་ནས་དེ་བཞིན་གཤེགས་པ་ཆོས་འཆད་པར་དགོངས་པ་དང་ལྷའི་བུ་རྣམས་ཀྱིས་དོ་མོད་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་གནང་སྟེ། དེས་ན་ཕན་པ་དང་བདེ་བར་འགྱུར་རོ། ། ཞེས་སྒྲ་བསྒྲགས་སོ། ། བྱང་ཆུབ་ཀྱི་ཤིང་གི་ལྷ་ཆོས་སྲེད་སོགས་བཞིས་བཅོམ་ལྡན་ལ་གསོལ་པ། ཆོས་ཀྱི་འཁོར་ལོ་གང་དུ་བསྐོར། ཝཱ་ར་ཎཱ་སིར་རོ། ། དེར་ནི་སྐྱེ་བོའི་ཚོགས་ཉུང་བས་གཞན་དུ་བསྐོར་དུ་གསོལ། ཞེས་ཞུས་པ་ན། སྟོན་པས་ཝཱ་ར་ཎཱ་སི་ནི་སྔོན་གྱི་དྲང་སྲོང་རྣམས་ཀྱི་གནས་ཡིན་ཞིང་དེར་མཆོད་སྦྱིན་བྱེ་བ་སྟོང་ཕྲག་དུ་མ་བྱས་པ་ཡིན་པས་དེར་ཆོས་ཀྱི་འཁོར་ལོ་བསྐོར་བར་བྱའོ་སྙམ་དུ་དགོངས་ནས་བྱོན་པ་དང་། ཀུན་ཏུ་རྒྱུ་ཉེར་འགྲོ་དང་མཇལ་ཏེ། དེས་བཅོམ་ལྡན་འདས་བཞིན་མདོག་ལེགས་པར་མཐོང་ནས། གཽའུ་ཏ་མ་ཁྱོད་ཀྱི་དབང་པོ་རྣམས་ནི་ཤིན་ཏུ་གསལ་ན་སུ་ལས་ཚངས་པར་སྤྱད་པ་སྤྱོད། བཀའ་སྩལ་པ། ང་ལ་སློབ་དཔོན་གང་ཡང་མེད། ། ང་དང་འདྲ་བ་ཡོད་མ་ཡིན། ། ང་ནི་གཅིག་པུ་རྫོགས་སངས་རྒྱས། ། བསིལ་གྱུར་ཟག་པ་མེད་པ་ཡིན། ། གསོལ་པ། གཽའུ་ཏ་མ་སངས་རྒྱས་སུ་ཞལ་གྱིས་འཆེས་སམ། དེ་བཞིན་ནོ། ། གང་བཞུད། ང་ནི་ཝཱ་ར་ཎཱ་སིར་འགྲོ། ། གྲོང་ཁྱེར་གསལ་ལྡན་སོང་ནས་ནི། ། ལོང་བ་ལྟ་བུའི་འཇིག་རྟེན་ལ། ། མཚུངས་པ་མེད་པའི་འོད་བྱའོ། ། ཞེས་གསུངས་སོ། ། དེ་ནས་བཅོམ་ལྡན་འདས་ཡུལ་ཀཱ་ཤིར་ལྗོངས་རྒྱུ་ཞིང་གྲོང་ཁྱེར་ཝཱ་ར་ཎཱ་སིར་གཤེགས་ནས་བསོད་སྙོམས་བཞེས་ཏེ་དྲང་སྲོང་ལྷུང་བ་རི་དྭགས་ཀྱི་ནགས་སུ་བྱོན་པ་ན་ལྔ་སྡེས་རྒྱང་རིང་པོ་ནས་གཤེགས་པ་མཐོང་སྟེ། དགེ་སྦྱོང་གཽ་ཏ་མ་མང་དུ་ཟ་བ་སྤོང་བ་ལས་ཉམས་པ་འདི་འོངས་ན་བདག་ཅག་རྣམས་ཀྱིས་འདི་ལ་སྨྲ་བར་མི་བྱ། ལྡང་བར་མི་བྱ། ཕྱག་མི་བྱ། སྟན་སྟོབ་པར་མི་བྱ། ཞེས་འོག་ཁྲིམས་བཅས་པ་ལ་ཀཽའུ་དེ་ནྱས་ནི་སེམས་ཀྱིས་ཁས་མ་བླངས་སོ། ། དེ་ནས་བཅོམ་ལྡན་འདས་འབབ་ཆུ་གནོད་པ་ཅན་གྱི་འགྲམ་གྱི་ལྔ་སྡེའི་གནས་སུ་བྱོན་མ་ཐག་བཅོམ་ལྡན་འདས་ཀྱི་དཔལ་དང་གཟི་བརྗིད་མ་བཟོད་ནས་སྟན་གྱི་སྟེང་ན་འདར་ཞིང་ཀུན་གྱིས་འོག་ཁྲིམས་དྲལ་ཏེ་སྟན་ལས་ལངས་ནས་ཀཽའུ་དི་ནྱས་རིམ་གྲོ་བྱེད། རྟ་ཐུལ་གྱིས་ནི་བསུས་ཏེ་ཆོས་གོས་དང་ལྷུང་བཟེད་བླངས། རླངས་པས་ནི་གདན་བཤམས། མིང་ཆེན་གྱིས་ནི་ཞབས་རྟེན་སྟོབ། བཟང་ལྡན་གྱིས་ནི་ཞབས་བསིལ་ཕུལ་ཏེ་ཚེ་དང་ལྡན་པ་གཽ་ཏ་མ་ཁྱོད་བྱོན་པ་ལེགས་སོ། ། གདན་བཤམས་པ་ལ་བཞུགས་ཤིག་ཅེས་གསོལ་ཏོ། ། དེ་ནས་བཅོམ་ལྡན་འདས་གདན་བཤམས་པ་ལ་བཞུགས་པ་ན་ལྔ་སྡེ་རྣམས་ཀྱིས་ལྷག་པར་ཡང་བཅོམ་ལྡན་འདས་ལ་མཚན་དང་གདུང་དང་ཚེ་དང་ལྡན་པས་བརྗོད་པ་ཀུན་ཏུ་བརྗོད་དོ། ། བཀའ་སྩལ་པ། ཁྱེད་རྣམས་དེ་བཞིན་གཤེགས་པ་ལ་དེ་ལྟ་བུའི་ཚུལ་གྱིས་ཀུན་ཏུ་བརྗོད་པར་མ་བྱེད་ཅིག། ཁྱེད་ལ་ཡུན་རིང་པོར་གནོད་པ་དང་སྡུག་བསྔལ་བར་འགྱུར་རོ། ། གཽ་ཏ་མ། ཁྱོད་ཀྱིས་སྔོན་གྱི་ཚུལ་དང་དཀའ་བ་སྤྱད་པ་དེས་མིའི་ཆོས་བླ་མ་འཕགས་པའི་ཆོས་མ་ཐོབ་ན་ད་སྤྱོད་ཚུལ་འདིས་མི་ཆོས་བླ་མ་འཕགས་པའི་ཆོས་ཐོབ་པར་ནུས་སམ་ཞེས་མ་རངས་པར་གསོལ་པས། བཀའ་སྩལ་པ། རབ་ཏུ་བྱུང་བས་མཐའ་འདི་གཉིས་ལ་བརྟེན་པར་མི་བྱ་སྟེ། གཉིས་གང་ཞེ་ན། འདོད་པ་རྣམས་ལ་འདོད་པའི་བསོད་ཉམས་ཀྱི་རྗེས་སུ་བརྩོན་པ་དམན་པ་ངན་པ་ཐ་ཆད་མ་རབས་གང་ཡིན་པ་དང་། བདག་ཉིད་དུབ་པ་ལ་རྗེས་སུ་བརྩོན་པའི་འཕགས་པའི་ལམ་ལ་གནོད་པ་དང་ལྡན་པ་གང་ཡིན་པའོ། ། ཁྱེད་ཀྱིས་མཐའ་འདི་གཉིས་ལ་མི་རྟེན་པར་དབུ་མའི་ལམ་མིག་དང་ཡེ་ཤེས་ཕྱེད་པ་ཉེ་བར་ཞི་བ་དང་། མངོན་པར་ཤེས་པ་དང་། རྫོགས་པར་བྱང་ཆུབ་པ་དང་། མྱ་ངན་ལས་འདའ་བར་འགྱུར་བ་ཡོད་དེ། དབུ་མའི་ལམ་གང་ཞེ་ན་འཔགས་པའི་ལམ་ཡན་ལག་བརྒྱད་པའོ། ། ཞེས་གསུངས་སོ། ། དེ་ནས་བཅོམ་ལྡན་འདས་ཀྱིས་དྲང་སྲོང་ལྷུང་བ་འདི་ཉིད་ཀྱི་སའི་ཕྱོགས་གང་དུ་ཆོས་ཀྱི་འཁོར་ལོ་བསྐོར་མཉམ་དུ་དགོངས་པ་ན། གང་དུ་སྔོན་གྱི་རྒྱལ་བ་རྣམས་ཀྱིས་ཆོས་ཀྱི་འཁོར་ལོ་བསྐོར་བའི་ས་ཕྱོགས་དེར་ནི་རིན་པོ་ཆེ་སྣ་བདུན་གྱི་ཁྲི་སྟོང་བྱུང་ཞིང་། ཚངས་པས་ཀྱང་སེངྒེའི་ཁྲི་འཕང་དུ་དཔག་ཚད་བཞི་ཁྲི་ཉིས་སྟོང་ཡོད་པ་བཤམས་སོ། ། དེ་བཞིན་དུ་ཚངས་པ་གཞན་དང་། བརྒྱ་བྱིན་དང་བྱང་ཆུབ་སེམས་དཔའ་བྱེ་བ་ཕྲག་བཅུ་བཅུས་ཀྱང་སེངྒེའི་ཁྲི་དེ་ལྟ་བུ་དག་བཤམས། ས་བླའི་ལྷ་རྣམས་ཀྱིས་ཆོས་ཀྱི་འཁོར་ལོ་བསྐོར་བའི་འཁོར་གྱི་ཁྱམས་ཆེན་པོ་བཀྲ་བ་བལྟ་ན་སྡུག་པ། རྒྱ་ཆེ་བ་ཆུ་ཞེང་དུ་དཔག་ཚད་བདུན་བརྒྱ་ཡོད་པ་སྤྲུལ་ཏེ། སྟེང་གི་ནམ་མཁའ་ལ་གདུགས་དང་བླ་བྲེ་ལ་སོགས་པས་བརྒྱན་ཅིང་འདོད་ལྷའི་བུ་རྣམས་ཀྱིས་སེངྒེའི་ཁྲི་བརྒྱད་སྟོང་ཕུལ་ནས་འདི་ལ་བཞུགས་ནས་འཁོར་ལོ་བསྐོར་དུ་གསོལ་ཞེས་གསོལ་ཏོ། ། དེ་ནས་བཅོམ་ལྡན་འདས་ཀྱིས་སྔོན་གྱི་རྒྱལ་བ་རྣམས་ལ་གུས་པར་མཛད་པའི་ཕྱིར་ཁྲི་གསུམ་ལ་བསྐོར་བ་མཛད་ནས་སེངྒེ་ལྟར་བག་ཚ་བ་མི་མངའ་བར་ཁྲི་བཞི་པ་ལ་སྐྱིལ་མོ་ཀྲུང་བཅས་ཏེ་བཞུགས་ཤིང་། ཚངས་པ་དང་། བརྒྱ་བྱིན་དང་། བྱང་ཆུབ་སེམས་དཔའ་རྣམས་ཀྱིས་སེངྒེའི་ཁྲི་ལ་ཡང་བཞུགས་པར་ཀུན་ཏུ་བསྟན་ཏོ། ། དགེ་སློང་ལྔ་པོས་ཀྱང་དེ་བཞིན་གཤེགས་པ་ལ་ཕྱག་བཙལ་ནས་དུལ་བའི་ཚུལ་གྱིས་འདུག་གོ ། དེའི་ཚེ་བཅོམ་ལྡན་འདས་ཀྱི་སྐུ་ལས་འོད་ཟེར་བཀྱེ་བས་རིགས་དྲུག་གི་སྡུག་བསྔལ་རྒྱུན་བཅད། ལྟས་ཆེན་པོ་བཅོ་བརྒྱད་བྱུང། མི་མཇེད་ཀྱི་ཞིང་མཉམ་ཞིང་སེམས་ཅན་ཀུན་བྱམས་པ་དང་ལྡན་པར་གྱུར་ཏོ། ། འོད་དེ་ལས། རྒྱལ་བས་བསྐལ་པ་ཁྲག་ཁྲིག་བསྒྲུབས། ། ཆོས་དེ་ཉན་པར་གང་འདོད་པ། ། དེ་ནི་རིངས་པར་ལ་གོར་དུ། ། ཆོས་མཉན་པ་ཡི་ཕྱིར་ཤོག་ཅིག ། ཅེས་བསྐུལ་བའི་ཚེ། ལྷ། ཀླུ། གནོད་སྦྱིན། དྲི་ཟ། ལྷ་མ་ཡིན། ནམ་མཁའ་ལྡིང་། མི་འམ་ཅི། ལྟོ་འཕྱེ་ཆེན་པོ་སྟེ། སྡེ་བརྒྱད་པོ་དག་གིས་ཀྱང་ཤེས་ཏེ་སྤྱན་སྔར་དོང་ངོ་། ། ཕྱོགས་བཅུའི་བྱང་ཆུབ་སེམས་དཔའ་གྲངས་མེད་པ་དག་ཀྱང་ལྷགས་ཏེ་མདོར་ན་སྟོང་ཆེན་འདི་སྐྲའི་རྩེ་མོའི་ཆ་ཤས་ཙམ་ཡང་མ་ཁྱབ་པ་མེད་དོ། ། དེ་ནས་བྱང་ཆུབ་སེམས་དཔའ་ཕྱོགས་བཅུ་ནས་ལྷགས་པ་དག་དང་། མི་མཇེད་འདིའི་ཚངས་པ་དང་བརྒྱ་བྱིན་ལ་སོགས་པ་དབང་ཆེ་བར་གྲགས་པ་རྣམས་ཀྱིས་བཅོམ་ལྡན་འདས་ཀྱི་ཞབས་ལ་གཏུགས་ཏེ་སྐྱེ་བོ་མང་པོ་ལ་སྨན་པའི་སླད་དུ་ཆོས་ཀྱི་འཁོར་ལོ་བསྐོར་དུ་གསོལ། ཞེས་དང་། ཚངས་པས། ཉོན་མོངས་ཚོགས་ཀྱི་ནད་བརྒྱས་གཙེས་པའི་སྐྱེ་བོ་འདི་དག་ལ། ། རྒྱལ་བ་སྨན་པ་འཁོར་ལོ་དམ་པ་བསྐོར་ཏེ་ཐར་མཛད་གསོལ། ། ནོར་བདུན་བགོ་བཤའ་མཛོད་ཅིག་འདྲེན་པ་འཁོར་ལོ་བསྐོར་བར་གསོལ། ། དགོངས་པ་ཡོངས་རྫོགས་རིམས་ནད་མ་མཆིས་འཁོར་ལོ་མཆོག་བསྐོར་གསོལ། ། ཞེས་ལྷའི་འཛམ་བུ་ཆུ་བོའི་གསེར་ལས་བྱས་པའི་འཁོར་ལོ་རྩིབས་སྟོང་པ། འོད་ཟེར་སྟོང་དང་ལྡན་པ་སྔོན་གྱི་རྒྱལ་བ་རྣམས་ཀྱིས་བཞེས་པ་དེ། བཅོམ་ལྡན་འདས་ཀྱི་དྲུང་དུ་ཕུལ་ཏེ་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་བོ། ། དེ་ནས་ནམ་མཁའི་དབྱིངས་ཐམས་ཅད་ཡོངས་སུ་ཁྱབ་པའི་བྱང་ཆུབ་སེམས་དཔའ་རྣམས་དང་། ལྷའི་སྲས་པོ་བརྒྱད་ཁྲིས་གཙོ་བྱས་པའི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་གྲུལ་བུམ་དང་མི་འམ་ཅི་དང་ལྟོ་འཕྱེ་ཆེན་པོ་དང་། ཀཽའུ་དི་ནྱ་ལ་སོགས་པའི་ལྔ་སྡེ་དང་། གཞན་ཡང་ཆོས་ཉན་པར་འདུས་པའི་འཁོར་དེ་དག་ཐ་ན་ལུད་པའི་སྒྲ་ཙམ་ཡང་མེད་པར་རྒྱལ་བའི་ཞལ་འབའ་ཞིག་ལ་བལྟའོ། ། དེ་ནས་བཅོམ་ལྡན་འདས་ཀྱིས་ནམ་གྱི་ཆ་སྨད་ཀྱི་ཐུན་ལ་ལྔ་སྡེ་བཟང་པོ་ལ་བོས་ཏེ། བདེན་པ་བཞི་པོ་དག་གི་མིང་དང་སྤང་བླང་དང་། དེ་དག་ཡོངས་སུ་ཤེས་སྤངས་མངོན་དུ་བྱས་བསྒོམས་པའི་གཤེགས་ཤུལ་ཡན་ལག་བརྒྱད་མཐའ་གཉིས་སྤངས་བའི་དབུ་མའི་ལམ་རྣམ་པ་བཅུ་གཉིས་སུ་བཟླས་ཏེ་ཆོས་ཀྱི་འཁོར་ལོ་བསྐོར། གསུང་གི་སྒྲ་དབྱངས་དེ་ལས་གང་དང་གང་གིས་འདུལ་བའི་སྒྲ་དེ་དང་དེ་ལ་འཚམ་པའི་གཏམ་སྣ་ཚོགས་པ་ཐེག་པ་གསུམ་པོ་སོ་སོ་དང་མཐུན་པའི་ཆོས་ཐོས་ཏེ་སྟོང་ཆེན་འདི་ན་བདེན་བཞིའི་མིང་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་བཞི་ཡོད་པ་ཐམས་ཅད་སོ་སོར་གོ་སྟེ་ཐམས་ཅད་ཀྱང་ཇི་ལྟ་བ་བཞིན་གྱི་བདེན་པར་འདུ་བའི་དགོངས་པས་ཆོས་བསྟན་པ་དེས་ཚེ་དང་ལྡན་པ་ཀཽའུ་དི་ནྱ་དང་། འབར་བའི་གཟི་བརྗིད་ལ་སོགས་པའི་ལྷ་བརྒྱད་ཁྲི་པོ་རྣམས་ལ་ཆོས་ཀྱི་མིག་དྲི་མ་དང་བྲལ་བ་སྐྱེས་སོ། ། དེ་ནས་བཅོམ་ལྡན་འདས་ཀྱིས་ཀཽའུ་དི་ནྱ་ལ་བཀའ་སྩལ་པ། ཁྱོད་ཀྱིས་ཆོས་ཀུན་ཤེས་སམ། གསོལ་པ། བཅོམ་ལྡན་འདས་ཀུན་འཚལ་ལགས་སོ། ། དེ་ནས་ཚེ་དང་ལྡན་པ་ཀཽའུ་དི་ནྱ་ལ་ཀུན་ཤེས་ཀཽའུ་དི་ནྱ་ཞེས་བྱ་བའི་མིང་ཆགས་པས། འཇིག་རྟེན་དུ་དཀོན་མཆོག་གསུམ་པོ་དག་ཀྱང་གྲུབ་ཅིང་ལྷ་རྣམས་ཀྱིས་ཀྱང་། གྲོགས་པོ་དག་བཅོམ་ལྡན་འདས་ཀྱིས་ཝཱ་ར་ཎཱ་སིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་ཀྱི་འཁོར་ལོ་ཆོས་དང་ལྡན་པ་སུས་ཀྱང་འཇིག་རྟེན་དུ་ཆོས་དང་མཐུན་པར་འགའ་ཡང་མ་བསྐོར་བ་ཞིག་བསྐོར་བས། ལྷའི་རིས་འཕེལ་ཞིང་ལྷ་མ་ཡིན་གྱིས་རིས་ནི་ཡོངས་སུ་ཉམས་སོ། ། ཞེས་བསྒྲགས་སོ། ། དེ་ནས་བཅོམ་ལྡན་འདས་ཀྱིས་ལན་གཉིས་སུ་ཡང་ལྔ་སྡེ་རྣམས་ལ་བདེན་པ་བཞི་བསྟན་པས། ཀུན་ཤེས་ཀཽའུ་དི་ནྱ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ཏེ་དགྲ་བཅོམ་པར་གྱུར་ཏོ། ། དེའི་ཚེ་འཇིག་རྟེན་ན་དགྲ་བཅོམ་པ་གཅིག་དང་། གཉིས་པ་ནི་བཅོམ་ལྡན་འདས་ཉིད་ཡིན་ནོ། ། དགེ་སློང་ལྷག་མ་བཞི་པོ་རྟ་ཐུལ་དང་། རླངས་པ་དང་། མིང་ཆེན་དང་། བཟང་ལྡན་རྣམས་ཀྱིས་བདེན་པ་མཐོང་ངོ་། ། དེ་ལྟར་ལྔ་སྡེས་ཡེ་ཤེས་ཁོང་དུ་ཆུད་མ་ཐག ། མུ་སྟེགས་ཀྱི་རྟགས་དང་རྒྱལ་མཚན་ཅི་ཡོད་པ་སྐད་ཅིག་ལ་ནུབ་ནས། སྐྲ་བྲེགས་ཆོས་གོས་གསུམ་དང་། ལྷུང་བཟེད་དང་ལྡན་ལ། བསྙེན་པར་རྫོགས་པ་དགེ་སློང་གི་དངོས་པོར་གྱུར་ཏེ། བཅོམ་ལྡན་འདས་ཀྱིས་ཀྱང་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ནི་ཀུན་ཤེས་ཀཽའུ་དི་ནྱ་འདི་ཡིན་ནོ་ཞེས་བསྔགས་སོ། ། དེ་ནས་བཅོམ་ལྡན་འདས་ཀྱིས་དགེ་སློང་ལྷག་མ་བཞི་པོ་ལ་གཟུགས་བདག་མ་ཡིན་པ་དང་། སྡུག་བསྔལ་བ་དང་། མི་རྟག་པ་ཡིན་པར་རྒྱ་ཆེར་བཀའ་སྩལ་པས་ལྷག་མ་བཞི་པོས་ཀྱང་དགྲ་བཅོམ་པ་མངོན་དུ་བྱས་ཏེ། འཇིག་རྟེན་ན་དགྲ་བཅོམ་པ་ལྔ་དང་དྲུག་པ་ནི་བཅོམ་ལྡན་འདས་ཉིད་དོ། ། དེ་ལྟར་བསྟན་པ་ལས་ལྷ་བྱེ་བ་ཕྲག་བརྒྱ་བཞི་བཅུ་དང་། མི་བརྒྱད་ཁྲི་བཞི་སྟོང་གིས་བདེན་པ་མཐོང་ངོ། ། དེ་ལྟར་བཅོམ་ལྡན་འདས་ཀྱི་ཚངས་པའི་དབྱངས་སྙན་པ་དེ་ཕྱོགས་བཅུའི་ཞིང་དག་ཏུ་གྲགས་པས། ཕྱོགས་བཅུའི་སངས་རྒྱས་བཅོམ་ལྡན་འདས་དེ་དག་ཅང་མི་གསུང་བར་བཞུགས་པ་ན། སོ་སོའི་རིམ་གྲོ་པ་རྣམས་ཀྱིས་ཅིའི་ཕྱིར་བཀའ་མཆིད་བཀུམ་ཞེས་ཞུས་པ་དང་། བཀའ་སྩལ་པ། བཅོམ་ལྡན་འདས་ཤཱཀྱ་ཐུབ་པ་བྱང་ཆུབ་བརྙེས་ཏེ་འཁོར་ལོ་བསྐོར་བར་མཛད་པས་དེའི་ཕྱིར་མི་སྨྲའོ། ། ཞེས་གསུངས་པས་སེམས་ཅན་བྱེ་བ་ཕྲག་བརྒྱ་བྱང་ཆུབ་ཏུ་སེམས་བསྐྱེད་དོ། ། སྟོན་པ་མངོན་པར་རྫོགས་པར་སངས་རྒྱས་ནས་ཆོས་གསུང་པ་དཀའ་དཀའ་ལྟར་མཛད་ནས་ཡང་དང་ཡང་དུ་གསོལ་བ་གདབ་དགོས་བྱུང་བ་དང་། ཆོས་སྟོན་པ་ལ་འཇུག་པའི་ཚེ་ཐོག་མ་ནས་ཟབ་མོ་སྟོང་པ་ཉིད་ལ་སོགས་པ་མ་བསྟན་པར་ཆོས་གོས་ཟླུམ་པོར་བགོ་བ་དང་། ཕྱི་དྲོའི་ཁ་ཟས་སྤོང་བ་དང་། ཟས་གོས་མཐའ་གཉིས་སུ་མ་ལྷུང་བར་བྱ་དགོས་པ་སོགས་འདུལ་བའི་བསླབ་བྱ་བསྟན་ནས་བདེན་པ་བཞི་སྟོན་པར་མཛད་ཅིང་བདེན་པ་བཞི་པོ་དེ་ལས་ཀྱང་ཐོག་མར་སྡུག་བསྔལ་བདེན་པ་སྟོན་པར་མཛད། སྡུག་བསྔལ་ལ་ཡང་རྣམ་པ་བཞི་ཡོད་པ་ལས། ཐོག་མར་མི་རྟག་པ་སྟོན་པར་མཛད་པའི་ཚུལ་འདི་དག་ལ་རྣམ་དཔྱོད་ཅན་གྱིས་ལེགས་པར་དཔྱོད་ཤེས་ན་བྱང་ཆུབ་ལམ་གྱི་རིམ་པའི་ཉམས་ལེན་ལ་ངེས་པ་བརྟན་པོ་རྙེད་པར་འགྱུར་ཏེ། ཐོག་མར་ལེགས་ཚོགས་ཐམས་ཅད་ཀྱི་རྩ་བ་དགེ་བའི་བཤེས་གཉེན་ཞིག་ལ་བརྟེན་དགོས་ཤིང་། དེ་ཡང་གང་བྱུང་གིས་མི་ཆོག་པར་སློབ་མས་ཀྱང་བླ་མ་མཚན་ཉིད་དང་ལྡན་མི་ལྡན་ལེགས་པར་བརྟགས་ནས་མཚན་ཉིད་དང་ལྡན་པ་ཞིག་ལ་བརྟེན་དགོས་པ་དང་། བླ་མས་ཀྱང་སློབ་མ་མ་བརྟགས་པར་སུ་རུང་རུང་ལ་ཆོས་བསྟན་མི་རུང་བས་སློབ་མ་སྣོད་དང་ལྡན་མི་ལྡན་ལེགས་པར་བརྟགས་ནས་བྱ་དགོས་པ་དང་། སློབ་མ་ལ་ཆོས་སྟོན་པའི་ཚེ་ནའང་མ་མཛངས་མས་བུ་ཆུང་གསོ་བ་དང་། སྨན་པ་མཁས་པས་ནད་པ་ལ་སྨན་སྟེར་བ་དང་འདྲ་བར་གདུལ་བྱའི་ཁམས་ལ་བརྟགས་ནས་རིམ་གྱིས་རྒྱུད་སྦྱོང་པར་བྱ་དགོས་པ་དང་། དཀར་ཆོས་ཐམས་ཅད་ཀྱི་གཞི་ཚུལ་ཁྲིམས་རྣམ་པར་དག་པ་ཞིག་ལ་ཐོག་མར་སྦྱར་དགོས་པ་དང་། དེ་ནས་ཀྱང་ཐོག་མར་ཚེ་འདི་ལས་བློ་ལོག་པ་ཞིག་དང་། འཁོར་བ་སྤྱི་ལས་བློ་ལོག་པ་ཞིག་གི་ཐབས་སུ་སྤྱིར་འདུས་བྱས་ཐམས་ཅད་མི་རྟག་པ་དང་། ཁྱད་པར་ཟག་བཅས་ཀྱི་ལུས་འདི་མི་རྟག་པར་བསྟན་ནས་ཚེ་འདི་ལ་མ་ཆགས་པར་འཇིག་རྟེན་ཕྱི་མ་དོན་གཉེར་གྱི་བསམ་པ་བསྐྱེད་པ་དང་། འཁོར་བ་མཐའ་དག་ལ་མ་ཆགས་པར་ཐར་པ་དོན་གཉེར་གྱི་བསམ་པ་བརྟན་པོ་བསྐྱེད་པ་དང་། བསམ་པ་དེ་ལྟ་བུ་ཞིག་སྐྱེས་པ་ན་འཁོར་བའི་རྩ་བ་ཀུན་འབྱུང་བདེན་པ་ངོ་སྤྲད་དེ་རིམ་གྱིས་ལམ་གོང་མ་ལ་ཁྲིད་དགོས་པའི་ཚུལ་རྣམས་ཤེས་ནས་སྟོན་པའི་རྣམ་ཐར་ཉམས་ལེན་དུ་འཁྱེར་ཤེས་པ་ཞིག་འོང་ངོ་། ། སྟོན་པས་ཆོས་ཀྱི་འཁོར་ལོ་བསྐོར་བའི་ས་ཝཱ་ར་ཎཱ་སི་དྲང་སྲོང་ལྷུང་བ་རི་དྭགས་ཀྱི་ནགས་སུ་ལྷ་དང་། ལྔ་སྡེ་བཟང་པོ་སོགས་མི་དད་པ་ཅན་དག་གིས་ཆོས་ཀྱི་འཁོར་ལོ་བསྐོར་བའི་མཆོད་རྟེན། དབྱིབས་གྲུ་བཞི་པ་བང་རིམ་བཞི་པ། བང་རིམ་རེ་རེ་ལ་ཕྱོགས་བཞིར་གློ་འབུར་དང་བཅས་པ་ལ་སྒོ་བཞིའམ་བརྒྱད་དམ་བཅུ་གཉིས་སམ་བཅུ་དྲུག་ཡོད་པ་བརྩིགས་སོ། ། དེ་ལ་ནི་ཀ་ཤིའི་ཡུལ་དུ་ཆོས་ཀྱི་འཁོར་ལོ་བསྐོར་བའི་མཆོད་རྟེན་ཞེས་སྔོན་གྱི་མཁས་པ་རྣམས་ལ་གཏམ་དུ་གྲགས་སོ། ། དེ་ནས་རིམ་གྱིས་ཡུལ་གཞན་དང་དུས་གཞན་དག་ཏུ་འདུལ་བ་ལུང་དང་། མདོ་སྡེ་དྲན་པ་ཉེར་བཞག་དང་། རྒྱ་ཆེར་རོལ་པའི་མདོ་དང་། མདོ་སྡེ་ལས་བརྒྱ་པ་དང་། རྟོགས་བརྗོད་བརྒྱ་པ་ལ་སོགས་པ་འཁོར་ལོ་དང་པོའི་སྡེར་གཏོགས་ཀྱི་མདོ་སྡེ་མཐའ་ཡས་པ་ཞིག་བཀའ་སྩལ་ཏོ། ། དེ་ལྟར་སྟོན་པ་མངོན་པར་རྫོགས་པར་སངས་རྒྱས་ནས་ཀཽའུ་དི་ནྱ་ལ་སོགས་པའི་ལྔ་སྡེ་དང་། གྲགས་པ་ལ་སོགས་པ་ཉེ་བའི་ལྔ་སྡེ་དང་། རྒྱལ་པོའི་ཁབ་ཏུ་ཕེབས་ནས་ཤཱ་རིའི་བུ་དང་མོའི་འགལ་གྱི་བུ་འཁོར་ལྔ་བརྒྱ་དང་བཅས་པ་དང་། འོད་སྲུངས་ཆེན་པོ་ལ་སོགས་པ་བདག་ཉིད་ཆེན་པོ་བགྲང་བ་ལས་འདས་པ་ཞིག་རྗེས་སུ་བཟུང་སྟེ་སྙན་པའི་གྲགས་པས་སའི་སྟེང་ཐམས་ཅད་ཁྱབ་པ་ན། རྒྱལ་པོ་ཟས་གཙང་མས་དེ་ཐོས་ཏེ་དགའ་ཞིང་མགུ་ལ་མཇལ་བར་འདོད་ནས་ཡང་དང་ཡང་དུ་ཕོ་ཉ་བཏང་སྟེ་སེར་སྐྱའི་ཡུལ་དུ་འབྱོན་དགོས་པར་གསོལ་བ་བཏབ་པ་ན་བཅོམ་ལྡན་འདས་ཀྱིས་ཡབ་ཟས་གཙང་མ་དང་། སྲུ་སྐྱེ་དགུའི་བདག་མོ་དང་། བདུད་རྩི་ཟས་དང་བྲེ་བོ་ཟས་དང་། སྒྲ་གཅན་འཛིན་དང་། ཀུན་དགའ་བོ་ལ་སོགས་པ་ཤཱཀྱ་བགྲང་བ་ལས་འདས་པ་དག་འདུལ་བའི་དགོས་པ་ཉེ་བར་གཟིགས་ནས་འཆར་ཀ་ཕོ་ཉར་འོངས་པ་ལ་འབྱོན་པར་ཞལ་གྱིས་བཞེས་ཏེ། དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་རྒྱལ་པོའི་ཕོ་བྲང་དུ་མི་བཞུགས་ཀྱི། གྲོང་ལས་འཕགས་པའི་གཙུག་ལག་ཁང་དུ་བཞུགས་སོ་ཞེས་འཕྲིན་དང་བཅས་བཏང་ངོ་། ། དེ་ནས་བཅོམ་ལྡན་འདས་ཀྱིས་མོའུ་འགལ་གྱི་བུ་ལ་བཀའ་སྩལ་པ། དགེ་སློང་རྣམས་ལ་བཅོམ་ལྡན་འདས་སེར་སྐྱའི་གཞིར་གཤེགས་ཏེ་ཡབ་སྲས་གདན་འཛོམ་ན། ཁྱེད་ཅག་ལས་ཡབ་སྲས་མཇལ་བ་སུ་བལྟ་བར་སྤྲོ་བ་དེ་དག་ཆོས་གོས་ལོངས་ཤིག ། དེས་ཀྱང་དེ་བཞིན་དུ་བྱས་ནས་བཅོམ་ལྡན་འདས་འཁོར་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ལྷན་ཅིག་འབབ་ཆུ་རོ་ཧི་ཀའི་འགྲམ་དུ་བྱོན་ཏེ། གྲོང་ཁྱེར་ཆེན་པོ་སེར་སྐྱ་དང་ཉེ་བར་བྱོན་པར་གྱུར་ཏོ། ། དེ་ལྟར་བྱོན་པ་རྒྱལ་པོ་ཟས་གཙང་མས་ཐོས་ནས་རྒྱལ་པོས་གང་ཡང་འབབ་ཆུ་རོ་ཧི་ཀ་ནས་ནྱ་གྲོ་དྷའི་ཀུན་དགའ་ར་བའི་བར་གྱི་ལམ་ཤིན་ཏུ་མཛེས་པར་བྱས་ཏེ། ས་ཕྱོགས་ཡངས་ཤིང་རྒྱ་ཆེ་བར་གདན་རྣམ་པར་བཀྲ་བ་དག་ཤོམ་དུ་བཅུག་གོ ། སེར་སྐྱའི་གཞིའི་རྡོ་བ་དང་། གྱོ་མོ་དང་། གསེག་མ་རྣམས་བསལ་ནས། ཙན་དན་གྱི་ཆུས་ཆག་ཆག་བཏབ། དྲི་ཞིམ་པོའི་སྤོས་ཕོར་ཉེ་བར་བཤམས། དར་གྱི་ཆུན་འཕྱང་མང་པོ་དཔྱངས་ཏེ། ཤཱཀྱ་རྣམས་ལ་བསྒོ་བ། ཁྱེད་ཀྱིས་བཞོན་པའི་མཆོག་རྣམས་སྟ་གོན་གྱིས་ཤིག ། དེ་ཅིའི་ཕྱིར་ཞེ་ན། དེ་རིང་བདག་ཅག་རྣམས་ཀྱིས་བཅོམ་ལྡན་འདས་མཆོག་ཏུ་བལྟ་ན་སྡུག་པ་དེ་བལྟ་ཞིང་འདོང་ངོ་། ། ལྷ། ལེགས་སོ་ཞེས་གསོལ་ནས་ཤཱཀྱ་རྣམས་ཀྱིས་ཐེག་པའི་མཆོག་རྣམས་མྱུར་དུ་སྟ་གོན་བྱས་སོ། ། དེ་ནས་རྒྱལ་པོས་སེར་སྐྱའི་གནས་དང་ནྱ་གྲོ་དྷའི་ཀུན་དགའ་ར་བའི་བར་དེ་དག་ཐམས་ཅད་རྒྱལ་པོའི་གཤེགས་ཤུལ་དུ་མཉམ་པར་བྱེད་དུ་བཅུག་ཅིང་བྱེ་མ་གཙང་མ་བདལ་བ་ལ་མེ་ཏོག་གིས་བཀྲམ། དར་གྱི་ལྡ་ལྡི་བྲེས། གར་མཁན་དང་། གླུ་མཁན་དང་། གྱད་དང་། བུམ་རྔ་ཐོགས་པ་དག་བཀོད་ནས། རྒྱལ་པོ་ཟས་གཙང་བཞོན་པ་ཞོན། ཤཱཀྱ་གཞོན་ནུ་བརྒྱད་ཁྲི་མང་པོས་བསྐོར་ཏེ། རྒྱལ་པོའི་དཔལ་ཆེན་པོ་དང་མཐུ་ཆེན་པོས་སོང་ངོ་། ། དེ་ལ་ཤཱཀྱ་ཁ་ཅིག་གིས་ཤིང་རྟ་ཡང་སྔོ་ལ་དེ་འདྲེན་པའི་རྟ་ཡང་སྔོ་བ་དང་། རྒྱན་རྣམས་དང་དྲིལ་བུ་གཡེར་ཁའི་དྲ་བ་ཡང་སྔོ་བ་དང་། འཁོར་རྒྱན་སྔོན་པོ་ཅན་གྱིས་བསྐོར་པ། གདུགས་དང་རལ་གྲི་དང་། ཐོད་དང་། ནོར་བུ་ཅན་གྱི་རྔ་ཡབ་དང་། ལྷམ་ཡང་སྔོན་པོ་དང་ལྡན་པ། ཁ་ཚར་མ་བཅད་པའི་རས་སྔོན་པོ་གྱོན་པ། རྒྱན་སྔོན་པོ་ཐོགས་པའི་ཞལ་ཏ་པ་རྣམས་ཞལ་ཏ་བྱེད་པ་རྒྱན་སྔོན་པོ་ཅན་གྱི་ལྕགས་ཐོགས་པའི་ཁྲིད་པ་དུ་མ་དང་ལྡན་པ། རྒྱལ་མཚན་སྔོན་པོ་བསྒྲེང་བ། ཤིང་རྟ་རེ་རེ་ཞིང་ཡང་རྒྱན་སྔོན་པོ་ཅན་གྱི་མི་བརྒྱ་ཕྲག་རེ་རེས་བསྐོར་བ་དག་དང་། དེ་བཞིན་དུ་ཁ་ཅིག་སེར་བ་དང་། ཁ་ཅིག་དམར་བ་དང་། ཁ་ཅིག་དཀར་བ་དང་། ཁ་ཅིག་ཁྲ་བོར་གྱུར་པ་ཤ་སྟག་གོ ། ཤིང་རྟ་དེ་དག་རེ་རེའི་ཕྱི་བཞིན་དུ་གླང་པོ་ཆེ་བརྒྱད་ཁྲི་གསེར་གྱི་རྒྱན་དང་གསེར་གྱི་རྒྱལ་མཚན་ཅན། གསེར་གྱི་དྲ་བས་གཡོགས་བའི་སྟེང་དུ་རིན་པོ་ཆེ་སྣ་བདུན་གྱི་ཁང་པ་བརྩེགས་པ་བརྒྱད་ཁྲི་བཞག་ནས་དོང་བར་གྱུར་ཏོ། ། དེའི་རྗེས་སུ་རྟ་གསེར་གྱི་རྒྱན་གྱིས་བརྒྱན་པ། གསེར་གྱི་དྲིལ་བུ་གཡེར་ཁ་བརྒྱུས་པ། རིན་པོ་ཆེ་སྣ་བདུན་གྱི་རྒྱན་དང་ལྡན་པ་བརྒྱད་ཁྲི་བཤམས་ནས་དོང་བར་གྱུར་ཏོ། ། དེ་ལྟར་རྒྱལ་པོ་ཟས་གཙང་ཤཱཀྱའི་ཚོགས་ཀྱིས་ཟླ་བ་ཁམས་པ་བཞིན་དུ་བསྐོར་ཏེ་བྱུང་བ་གཟིགས་ནས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཤཱཀྱ་རྣམས་སེར་སྐྱའི་གནས་ནས་བྱུང་བ་དེ་དག་ནི་སུམ་ཅུ་རྩ་གསུམ་གྱི་ལྷ་སྐྱེད་མོས་ཚལ་དུ་དོང་བ་དང་རྗེས་སུ་མཐུན་ནོ། ། དེ་ནས་བཅོམ་ལྡན་འདས་དགེ་སློང་གི་དགེ་འདུན་མཐུ་ཆེ་བ་ལྔ་སྡེ་བཟང་པོ་དང་། གྲགས་སྦྱིན་དང་། འཆར་ཀ་དང་། ལྟེང་རྒྱས་འོད་སྲུངས་དང་། ག་ཡ་འོད་སྲུངས་དང་། ཆུ་ཀླུང་འོད་སྲུངས་དང་། འོད་སྲུངས་ཆེན་པོ་དང་། ཤཱ་རིའི་བུ་དང་། མོའུ་འགལ་གྱི་བུ་ཆེན་པོ་ལ་སོགས་པ་དགེ་སློང་སྟོང་ཉིས་བརྒྱ་ལྔ་བཅུས་བསྐོར་ཞིང་། ལྷ་རྣམས་འདུ་བར་དགོངས་པ་ན་རྒྱལ་པོ་ཆེན་པོ་བཞི་དང་། ལྷ་མ་ཡིན་གྱི་དབང་པོ་ཐག་བཟང་རིས་དང་། མདོར་ན་འདོད་པ་དང་གཟུགས་ན་སྤྱོད་པའི་ལྷའི་བུ་མཐུ་ཆེ་བ་རྣམས་ཀྱང་དེར་འདུས་སོ། ། དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མ་ང་རྒྱལ་ཆེ་བར་མཁྱེན་ཅིང་། ཞབས་ཀྱིས་སེར་སྐྱའི་གཞིར་གཤེགས་ན་ཤཱཀྱ་རྣམས་ཀྱང་མི་གུས་པ་སྐྱེ་བར་དགོངས་ནས་ཕྱོགས་བཞིར་འབར་བ་དང་། འོད་འབྱིན་པ་དང་། ཆུའི་རྒྱུན་འབེབས་པ་ལ་སོགས་མཛད་ནས་རྫུ་འཕྲུལ་དེ་བཏུལ་ཏེ་བཅོམ་ལྡན་འདས་ཏ་ལ་བདུན་གྱི་སྲིད་ཙམ་ན་བཞུགས་སོ། ། དགེ་སློང་རྣམས་ཏ་ལ་དྲུག་གི་སྲིད་ཙམ་གྱི་བར་མཐོ་དམན་དུ་གྱུར་ནས་རྒྱལ་པོ་འདུས་པའི་ཁྱམས་དེར་གཤེགས་སོ། ། དེའི་མོད་ལ་བཅོམ་ལྡན་འདས་མི་གང་ལྷག་ཙམ་གྱི་སྟེང་གི་བར་སྣང་ལ་འཆག་པར་མཛད་པའི་གཡས་ཕྱོགས་ན་ཚངས་པ་འགྲོའོ། ། གཡོན་དུ་ནི་བརྒྱ་བྱིན་ནོ། ། ཞབས་འབྲིང་དུ་འདོད་ལྷ་རིས་བཞི་པོས་གདུགས་འཛིན་ཅིང་བསིལ་ཡབ་ཀྱིས་གཡོབ་བོ། ། རྒྱལ་པོ་ཆེན་པོ་བཞིས་ནི་ཤར་ནུབ་ཏུ་ཐལ་མོ་སྦྱར་ཏེ་འདུག་གོ ། ལྷ་རྣམས་ཀྱིས་རིན་པོ་ཆེའི་ཁང་པས་བར་སྣང་གང་བར་བྱས་ཤིང་། མེ་ཏོག་དང་སྤོས་ཀྱི་ཕྱེ་མས་མཆོད། གླུ་དབྱངས་དང་སིལ་སྙན་དག་སྒྲ་འབྱིན་ཅིང་། སྤོས་ཀྱི་ཆར་སྤྲིན་དག་ལས་སྤོས་ཀྱི་ཆར་ཟིམ་བུ་ཟིམ་བུ་དག་བབས་སོ། ། དེ་ནས་དགེ་སློང་རབ་ཏུ་མང་པོ་དང་། ཆོ་འཕྲུལ་དེ་ལྟ་བུ་དག་མཐོང་ནས། ཡབ་རྒྱལ་པོས་བཅོམ་ལྡན་འདས་གང་ཡིན་པ་མ་ཤེས་ཏེ་རྨོངས་པར་གྱུར་ནས་ནག་པོ་འཆར་ཀ་རྒྱལ་པོའི་ཞབས་འབྲིང་ན་གནས་པ་དེ་ལ་དྲིས་པ། ངུར་སྨྲིག་གྱོན་པའིི་རབ་ཏུ་བྱུང་བ་མང་པོ་ཞིག་ཡོད་ན་གཞོན་ནུ་གང་ཡིན། ནག་པོ་འཆར་ཀས་བཅོམ་ལྡན་འདས་བསྟན་ནས་སྨྲས་པ། འདི་ནི་བཅོམ་ལྡན་འདས་ལགས་མི་དབང་ད་གཟིགས་ཤིག ། དེ་ནས་བཅོམ་ལྡན་འདས་ཀྱི་མཐུས་ལྷ་དང་མི་དེ་དག་ཕན་ཚུན་དུ་ཡང་མཐོང་བར་གྱུར་ཅིང་རྒྱལ་པོས་ཀྱང་བཅོམ་ལྡན་འདས་དང་། བཅོམ་ལྡན་འདས་ལ་མཆོད་པ་བྱེད་པའི་ལྷ་རྣམས་དང་ལྷའི་རིན་པོ་ཆེ་སྣ་བདུན་གྱི་ཁང་པ་བརྩེགས་པས་བར་སྣང་གང་བ་མཐོང་ནས། བཅོམ་ལྡན་འདས་ཀྱིས་གསུངས་པ་དེ་ནི་ངོ་མཚར་ཆེ་སྟེ། འདི་གཞོན་ནུའི་དུས་སུ་ང་ནི་ཆོས་ཀྱི་དབང་ཕྱུག་ལ་དབང་བྱའོ་ཞེས་གསུང་ན་དེ་ནི་འདི་ཡིན་པ་ལྟ་སྟེ། བདག་ནི་མིའི་འཁོར་ཅན་དུ་ཟད་ན། བཅོམ་ལྡན་འདས་ནི་ལྷ་དང་མིའི་འཁོར་ཅན་དུ་གྱུར་ཏོ་སྙམ་མོ། ། སེར་སྐྱའི་གཞི་ན་གནས་པའི་ཤཱཀྱ་རྣམས་དགེ་བའི་རྩ་བས་བསྐུལ་ནས་ཐམས་ཅད་བྱུང་སྟེ། ཅི་ཡབ་སྲས་ལ་ཕྱག་བྱེད་དམ། འོན་ཏེ་སྲས་ཡབ་ཀྱི་ཞབས་ལ་ཕྱག་བྱེད་པ་བལྟའོ་སྙམ་ནས་ཐམས་ཅད་ཚོགས་པར་གྱུར་ཏོ། ། དེ་ནས་རྒྱལ་པོ་ཆེན་པོ་ཟས་གཙང་མས་བླ་གོས་རིན་ཐང་མ་མཆིས་པ་ཕྲག་པ་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ནས་རང་གི་ཐོར་ཙུགས་ནོར་བུ་དང་ཅོད་པན་གྱིས་བརྒྱན་པ་བཅོམ་ལྡན་འདས་ཀྱི་ཞབས་ལ་བཏུད་ནས་ཕྱག་བཙལ་ཏེ་ཚིགས་སུ་བཅད་པ། བློ་གྲོས་ཡངས་པ་ཁྱོད་ལ་འདི་དང་ནི། ། ཀུན་སྤྱད་ཞབས་ལ་ལན་གསུམ་ཕྱག་བགྱིས་ཏེ། ། བལྟམས་པའི་ཚེ་ན་ས་ནི་གཡོས་པ་དང་། ། འཛམ་བུའི་གྲིབ་མ་སྐུ་ལས་མ་འདས་པའོ། ། ཞེས་གསོལ་པ་དང་། དེ་ལྟར་ཡབ་ཀྱིས་སྲས་ཀྱི་ཞབས་ལ་ཕྱག་བྱས་པ་དེའི་ཚེ་ཤཱཀྱ་རྣམས་ཀྱིས་འདི་ཅིའི་ཐ་ཚིག་ཅེས་མ་དད་པ་དང་། རྒྱལ་པོ་ཟས་གཙང་མས་ཤཱཀྱ་དེ་རྣམས་ལ་སྨྲས་པ། ཤེས་ལྡན་དག་ད་གདོད་ཁོ་བོས་གཞོན་ནུའི་ཞབས་ལ་ཕྱག་བྱས་པ་མ་ཡིན་ཏེ། འདི་དང་ལན་གསུམ་དུ་ཕྱག་བགྱིས་སོ་ཞེས་གོ་བར་བྱས་སོ། ། དེ་ནས་བཅོམ་ལྡན་འདས་ཀྱིས་རྫུ་འཕྲུལ་དེ་བཏུལ་ནས། དགེ་སློང་གི་དགེ་འདུན་གྱི་དགུང་ལ་འདོད་པའི་ལྷའི་བུ་རྣམས་ཀྱིས་སེང་གེའི་ཁྲི་ལྷའི་རས་སྣ་ཚོགས་སུ་སྤེལ་ནས་བཤམས་པ་ལ་བཞུགས་ཏེ། འདོད་ལྷ་རྣམས་ཀྱིས་སྟེང་དུ་ལྷའི་བླ་བྲེ་བྲེས་ཤིང་། ཁྱམས་དེར་ཡང་ལྷའི་རས་བཅོས་བུ་བཏིང་ངོ་། ། དེ་ནས་རྒྱལ་པོ་ཟས་གཙང་སྐད་འཛེར་ཅིང་སྙིང་སྔངས་ལ་མིག་མཆི་མས་གང་བཞིན་དུ་ཚིགས་སུ་བཅད་པས་ཞུ་བ་ཞུས་པ། གཞལ་མེད་ཁང་གི་གནས་རྣམས་སུ། ། ཡབ་ཀྱི་ཁབ་ན་བཞུགས་པ་ལས། ། དགོན་པ་འཇིགས་དང་བཅས་རྣམས་སུ། ། ཇི་ལྟ་བུར་ནི་འབའ་ཞིག་བཞུགས། ། བཅོམ་ལྡན་འདས་ཀྱིས་བཀའ་སྩལ་པ། མི་ཡི་བདག་པོ་གང་དུ་ནི། ། ཁྱིམ་གྱི་འཆིང་བ་ལས་གྲོལ་བ། ། འཕགས་པ་ཡི་ནི་གནས་པ་བཅུས། ། ཐུབ་པ་རྣམས་ནི་གནས་པར་མཛད། ། ཅེས་སོགས་རྒྱ་ཆེར་ཡབ་དང་སྲས་གཉིས་དེ་ལྟ་བུའི་བཀའི་འབེལ་མཆིད་གླེང་བར་མཛད་དེ། དེས་རྒྱལ་པོ་ཟས་གཙང་དགའ་ནས་ཞབས་ལ་ཕྱག་བྱས་ཏེ། བདེ་བར་གཤེགས་པ་ལ་ཀུན་ནས་རྟོག་ཅིང་འདུག་གོ ། དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། གང་བདག་གི་བུས་འདི་ལྟ་བུའི་ཡོན་ཏན་ཐོབ་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་མོ། ། དེ་ནས་བཅོམ་ལྡན་འདས་ཀྱིས་ནྱ་གྲོ་དྷའི་ཀུན་དགའ་ར་བར་འཁོར་དེ་དང་མཐུན་པའི་ཆོས་བཤད་པས་ཟས་དཀར་ལ་སོགས་པ་ཤཱཀྱ་བདུན་ཁྲི་བདུན་སྟོང་གིས་བདེན་པ་མཐོང་ངོ་། ། དེའི་སང་ཚངས་པས་བསྐོར་བའི་སྐྱེད་མོས་ཚལ་དུ་གཤེགས་ཏེ་ཆོས་བསྟན་པས་བྲེ་བོ་ཟས་ལ་སོགས་པ་ཤཱཀྱ་བདུན་ཁྲི་དྲུག་སྟོང་གིས་བདེན་པ་མཐོང་ངོ་། ། ཤཱཀྱ་བདུད་རྩི་ཟས་ཀྱི་བུ་གཞོན་ནུ་ཀུན་དགའ་བོ་སྐྱེས་ནས་ལོ་དྲུག་ལོན་པ་བཅོམ་ལྡན་འདས་ཀྱི་རིམ་གྲོ་བགྱིད་པར་མཚན་མཁན་རྣམས་ཀྱིས་ལུང་བསྟན་པ་དེ། བདུད་རྩི་ཟས་ཀྱིས་ཅི་ནས་ཀྱང་བཅོམ་ལྡན་འདས་ཀྱི་སྤྱན་སྔར་མི་འབབ་པར་བྱའོ་སྙམ་སྟེ། ཡངས་པ་ཅན་དང་སེར་སྐྱའི་གྲོང་ཁྱེར་གཉིས་ཕན་ཚུན་དུ་སྐྱེལ་བ་དང་ལེན་པར་བྱེད་དོ། ། དེ་བཅོམ་ལྡན་འདས་ཀྱིས་དགོངས་ནས་སེར་སྐྱར་ཀུན་དགའ་བོའི་ཕྱིར་གཤེགས་པ་ན། བདུད་རྩི་ཟས་ཀྱིས་ཀུན་དགའ་བོ་ཁང་ཕྲན་དུ་སྦས་པ་དང་། བཅོམ་ལྡན་འདས་ཀྱི་མཐུས་སྒོ་དབྱེ་བས་ཀུན་དགའ་བོ་ཐལ་བྱུང་དུ་འོངས་ནས་བསིལ་ཡབ་ཐོགས་ཏེ་བཅོམ་ལྡན་འདས་ལ་གཡོབ་བོ། ། བཅོམ་ལྡན་འདས་གཤེགས་པ་ན་རྗེས་བཞིན་འབྲངས་ནས་སུས་ཀྱང་བཟློག་མ་ནུས་པས་བདུད་རྩི་ཟས་ཀྱིས་དུས་སྟོན་བྱས་ཏེ་ཀུན་དགའ་བོ་གླང་པོ་ཆེ་ལ་བསྐྱོན་ནས་ནྱ་གྲོ་དྷའི་ཀུན་དགའ་ར་བར་བཏང་བ་དང་གླང་པོ་ཆེས་ཨུཏྤལའི་ཆུན་པོ་ཟོས་པས་མཚན་མཁན་རྣམས་ཀྱིས་གཞོན་ནུ་འདི་ཐོས་པ་འཛིན་པའི་མཆོག་ཏུ་ལུང་བསྟན་ནས་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ། འོད་སྲུངས་སྟོབས་བཅུ་པ་ལས་རབ་ཏུ་བྱུང་དུ་བཅུག་གོ ། ཀུན་དགའ་བོ་ཡང་དེ་ཉིད་ནས་བཅོམ་ལྡན་འདས་ཀྱི་ཞབས་འབྲིང་དུ་འབྲང་ཞིང་འཛུམ་པ་ལུང་བསྟན་པ་ཡང་ཞུའོ། ། དེའི་སང་རོ་ཧ་ཏི་ཀའི་སྐྱེད་མོས་ཚལ་དུ་ཆོས་བཤད་པས་བདུད་རྩི་ཟས་ལ་སོགས་པ་བདུན་ཁྲི་ལྔ་སྟོང་གིས་འབྲས་བུ་ཐོབ་བོ། ། ལྷ་སྦྱིན་ནི་བཅོམ་ལྡན་འདས་ལ་མ་གུས་པས་ཁ་ཟེར་རོ། ། དེ་ནས་རྒྱལ་པོ་ཟས་གཙང་མས་བཅོམ་ལྡན་འདས་གདུགས་ཚོད་ལ་སྤྱན་དྲངས་ཏེ་གདུགས་ཚོད་གསོལ་ནས་རྒྱལ་པོས་གསེར་གྱི་བྱ་མ་བུམ་བླངས་ཏེ་ནྱ་གྲོ་དྷའི་ཀུན་དགའ་ར་བ་ཕུལ་ནས་བཅོམ་ལྡན་འདས་ཀྱིས་ཡོན་བསྔོ་བ་མཛད་དེ་གཤེགས་ནས་བཅོམ་ལྡན་འདས་ཤིང་ནྱ་གྲོ་དྷའི་ཀུན་དགའ་ར་བ་དེ་ཉིད་དུ་དབྱར་གནས་མཛད་དེ་རྒྱལ་པོ་ཟས་གཙང་ཤཱཀྱའི་ཚོགས་ཀྱིས་བསྐོར་ནས་དུས་གསུམ་དུ་བཅོམ་ལྡན་འདས་ཀྱི་སྤྱན་སྔར་ཆོས་ཉན་དུ་འགྲོའོ། ། དེའི་ཚེ་རྒྱལ་པོ་ཟས་གཙང་ནི་ཧ་ཅང་ཞུམ་པ་དང་ཤིན་ཏུ་དགའ་བའི་སེམས་དང་ལྡན་པས་འབྲས་བུ་མ་ཐོབ་སྟེ། དེ་ལ་བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་དགའ་བའི་སེམས་ངའི་བུ་འབའ་ཞིག་རྫུ་འཕྲུལ་ཆེའོ་སྙམ་པ་འདི་སྤང་བའི་ཕྱིར་མོའུ་འགལ་གྱི་བུ་ཆེན་པོ་ལ་བསྐུལ་བ་དང་། མོའུ་འགལ་གྱི་བུས་རྒྱལ་པོའི་ཕོ་བྲང་དུ་ཕྱིན་ནས་རྫུ་འཕྲུལ་གྱི་ཆོས་འཕྲུལ་བསྟན་ཏེ་གདན་བཤམས་པ་ལ་འདུག་གོ ། རྒྱལ་པོས་སྨྲས་པ། མོའུ་འགལ་གྱི་བུ། ཉན་ཐོས་རྫུ་འཕྲུལ་ཆེ་བ་གཞན་ཡང་མཆིས་སམ། སྨྲས་པ། གཞན་ཡང་རྫུ་འཕྲུལ་ཆེ་བ་མང་དུ་མཆིས་སོ། ། དེ་ནས་རྒྱལ་པོ་ཟས་གཙང་བདག་གི་བུ་འབའ་ཞིག་རྫུ་འཕྲུལ་ཆེ་བར་མ་ཟད་ཀྱི། རྫུ་འཕྲུལ་ཆེ་བ་གཞན་ཡང་ཡོད་དོ་སྙམ་ནས་ཤིན་ཏུ་དགའ་བའི་བློ་དང་བྲལ་ཏོ། ། དེ་ནས་རྒྱལ་པོ་ཟས་གཙང་གི་ཞུམ་པའི་བློ་སྔོན་བཅོམ་ལྡན་འདས་ལྷ་དང་མི་དང་ལྷ་མ་ཡིན་གྱིས་མཆོད་ན་ད་ལྟར་མི་འབའ་ཞིག་གིས་མཆོད་དོ་སྙམ་པ་དེ་སྤང་བའི་ཕྱིར་བཅོམ་ལྡན་འདས་ལྷའི་འཁོར་ལ་ཆོས་སྟོན་པར་བཞེད་དོ། ། དེ་བརྒྱ་བྱིན་གྱིས་ཤེས་ནས་ནྱ་གྲོ་དྷའི་ཀུན་དགའ་ར་བར་རིན་པོ་ཆེ་སྣ་བཞིའི་ཁང་པ་བརྩེགས་པ་གདན་སྣ་ཚོགས་བཤམས་པ་ཞིག་གྱིས་ཤིག་ཅེས་ལྷའི་བུ་བི་ཤྭ་ཀརྨ་ལ་བསྒོས་ནས་དེས་དེ་བཞིན་དུ་བྱས་སོ། ། སྒོ་བཞི་ན་ནི་རྒྱལ་པོ་ཆེན་པོ་བཞི་འདུག་གོ ། དེར་བཅོམ་ལྡན་འདས་སྤྱན་དྲངས་ཏེ་འདོད་གཟུགས་ཀྱི་ལྷའི་བུ་རྣམས་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་རྣམས་ཀྱིས་བསྐོར་ཞིང་ཉན་ཐོས་ཆེན་པོ་རྣམས་ཀྱང་འདུག་གོ ། ཕྱི་རོལ་ན་ནི་ཀུན་ཏུ་རྒྱུ་དྲུག་ཁྲི་འདུས་སོ། ། དེའི་ཚེ་བཅོམ་ལྡན་འདས་གདན་བཤམས་པ་རིན་པོ་ཆེ་སྣ་ཚོགས་ཀྱིས་བརྒྱན་པ་ལ་བཞུགས་ཏེ། ཡབ་དང་སྲས་མཇལ་བ་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ཉིད་ངེས་པར་བསྟན་པ་ཞེས་བྱ་བ་སྟོན་པར་བཞེད་དོ། ། དེ་ནས་ཚེ་དང་ལྡན་པ་མོའུ་འགལ་གྱི་བུས་ཀྱང་རྒྱལ་པོ་ཟས་གཙང་མ་ཁྲིད་དེ་གྲོང་ཁྱེར་སེར་སྐྱ་ནས་ལྷས་སྤྲུལ་པའི་གཞལ་མེད་ཁང་དེར་འོངས་སོ། ། མོའུ་འགལ་གྱི་བུ་ནང་དུ་ཞུགས་ཏེ་རྒྱལ་པོ་ཟས་གཙང་ནང་དུ་འཇུག་པར་བརྩམས་པའི་ཐོག་མ་ཤར་སྒོ་ནས་དོང་པ་དང་། རྒྱལ་པོ་ཡུལ་འཁོར་སྲུང་སྒོ་ན་འདུག་ནས་དེས་ནང་དུ་མ་འགྲོ་སྡོད་ཅིག་ཅེས་བཟློག་གོ ། དེ་ཅིའི་ཕྱིར་ཞེ་ན། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། ། བཞིན་བཟང་ཁྱོད་སུ་ཞིག ། རྒྱལ་པོ་ཆེན་པོ། བདག་ཡུལ་འཁོར་སྲུང་ངོ་། ། དེ་ནས་རྒྱལ་པོ་ཟས་གཙང་གིས་ལྷོ་དང་ནུབ་དང་། བྱང་དུ་ཞུགས་པ་དང་། རྒྱལ་པོ་ལྷག་མ་གསུམ་གྱིས་ཀྱང་དེ་བཞིན་དུ་བྱས་སོ། ། དེ་ནས་རྒྱལ་པོ་ཟས་གཙང་ཀྱེ་མའོ་བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་པ་དེ་བདག་གིས་བལྟའོ་སྙམ་པའི་འདོད་པ་སྐྱེས་ཏེ་ཞུམ་པའི་རྒྱུད་དེ་དང་བྲལ་ལོ། ། དེ་ནས་བཅོམ་ལྡན་འདས་ཀྱིས་དགོངས་པ་རྒྱལ་པོ་ཟས་གཙང་གིས་གལ་ཏེ་ང་མ་མཐོང་ན་ཁྲག་དྲོན་མོ་སྐྱུགས་ནས་འཆི་བར་འགྱུར་བའི་གནས་ཡོད་པར་དགོངས་ནས། རིན་པོ་ཆེའི་ཁང་པ་བརྩེགས་པ་དེ་ཤེལ་ལས་བྱས་པར་སྤྲུལ་པ་དང་། རྒྱལ་པོ་ཟས་གཙང་གིས་སངས་རྒྱས་ཀྱི་སྐུ་སྒྲིབ་པ་མེད་པ་མཐོང་ངོ་། ། མཐོང་ནས་ཀྱང་དགའ་པ་དང་མགུ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་བྱས་ཏེ་ཕྱོགས་གཅིག་ཏུ་འདུག་གོ ། དེ་ནས་བཅོམ་ལྡན་འདས་ཀྱིས་ལྷ་མ་ཡིན་གྱི་དབང་པོ་ཐགས་བཟང་རིས་མཆོད་པ་བྱེད་དུ་འཇུག་པའི་མཚན་མ་མཛད་དོ། ། དེ་ནས་ལྷ་མ་ཡིན་ཐགས་བཟང་རིས་དེ་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ནས་བཅོམ་ལྡན་འདས་ལ་མཆོད་པའི་ཕྱིར་ཤིང་རྟ་དང་རྟ་རིན་པོ་ཆེས་བརྒྱན་པ་ལ་ལྷ་མིན་གྱི་བུ་མོ་མང་པོ་འཁོད་དེ་མཆོད་པ་སྣ་ཚོགས་ཐོགས་པ་རིན་པོ་ཆེའི་ཕོ་བྲང་བཀྲ་བ་དག་བཤམས་ནས་ལྷག་པར་གུས་པས་བཅོམ་ལྡན་འདས་ལ་བསྟོད་ཅིང་ཕུལ་ལོ། ། དེ་བཞིན་དུ་ལྷ་མིན་དབང་པོ་སྟོབས་ལྡན་དང་། སྒྲ་གཅན་ལ་སོགས་པ་དང་། བྱའི་རྒྱལ་པོ་འདབ་བཟང་རྣམས་ཀྱིས་ཀྱང་མཆོད་དོ། ། དེ་ནས་ཀླུའི་བུ་མོ་རྣམས་ཀྱིས་རིན་པོ་ཆེའི་གདུགས་དག་དང། ཀླུའི་རྒྱལ་པོ་དགའ་བོ་དང་། ཉེ་དགའ་བོས་མུ་ཏིག་དམར་པོས་སྙིམ་པ་བཀང་ཞིང་རིན་པོ་ཆེ་སྣ་བདུན་གྱི་ཁང་བཟང་ན་ནོར་བུ་སྣ་ཚོགས་ལས་མེ་དང་ཆུ་འབར་འཛག་བྱེད་པ་དག་བྱས་སོ། ། གྲུལ་བུམ་རྣམས་དང་རྒྱལ་ཆེན་བཞིའི་ལྷས་རིན་པོ་ཆེའི་བླ་བྲེ་དག་དང་། དྲི་ཟ་རྣམས་ཀྱིས་ས་སྲུངས་ཀྱི་བུའི་སྟེང་དུ་རྫིང་བུ་པདྨས་གཏམས་པ་དག་དང་། མི་འམ་ཅིའི་རྒྱལ་པོ་ལྗོན་པས་རིན་པོ་ཆེ་སྣ་བདུན་གྱི་ཁང་པ་གདུགས་ཀྱིས་བརྒྱན་པ་དག་དང་། བརྒྱ་བྱིན་གྱིས་རིན་པོ་ཆེའི་ཁང་པ་དང་། ས་སྲུངས་ཀྱི་བུའི་སྟེང་དུ་རྫིང་ཡོད་པ་དག་དང་། གཞན་ཡང་འདོད་གཟུགས་ཀྱི་ལྷའི་བུ་ཐམས་ཅད་ཀྱིས་མཆོད་ཅིང་བསྟོད་པས། བཅོམ་ལྡན་འདས་འཛུམ་པ་མཛད་པ་ན་རྟ་ཐུལ་གྱིས་དེའི་རྒྱུ་ཞུས་པས་དེ་དག་བྱང་ཆུབ་ཏུ་ལུང་བསྟན་ཅིང་། ཀུན་ཏུ་རྒྱུ་རྣམས་ཀྱང་སོ་སོར་ལུང་བསྟན་ཏོ། ། དེའི་ཚེ་ཡང་རྒྱལ་པོ་ཟས་གཙང་མ་བུ་ལ་ཆགས་པས་ཀུན་ཏུ་དཀྲིས་པ་ན། བཅོམ་ལྡན་འདས་ཀྱིས་དེ་འདུལ་བའི་ཏིང་ངེ་འཛིན་ཡབ་སྲས་མཇལ་བའི་མདོ་བསྟན་པས་རྒྱལ་པོ་ཟས་གཙང་མ་ཐེག་པ་ཆེན་པོ་ལ་རྒྱུན་དུ་ཞུགས་པའི་འབྲས་བུ་ཐོབ་ནས་མཐར་གྱིས་ཤཱཀྱ་བདུན་ཁྲི་དང་ལྷན་ཅིག་མི་སྐྱེ་བའི་ཆོས་ལ་བཟོད་པ་ཐོབ་པ་དང་། བཅོམ་ལྡན་འདས་ཀྱིས་འཛུམ་པ་མཛད་པ་ན་རྟ་ཐུལ་གྱིས་དེའི་རྒྱུ་ཞུས་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་དང་ཤཱཀྱ་རྣམས་བྱང་ཆུབ་ཏུ་ལུང་བསྟན་ཅིང་ཤཱ་རིའི་བུ་ལ་མདོ་འདི་བསྒྲག་པར་བྱའོ་ཞེས་བཀའ་སྩལ་ཏོ། ། ཡབ་སྲས་མཇལ་བའི་ཚེ་ཇི་ལྟར་མཛད་པའི་རྣམ་ཐར་བཟང་པོ་འདི་དག་ལ་ལེགས་པར་དཔྱོད་ཤེས་ན་ཆོས་རྣམ་དག་ཅིག་བྱེད་པ་ལ་ཚེ་འདིའི་གཉེན་ཉེ་དུ་ལ་མ་ཆགས་པ་ཞིག་ངེས་པར་དགོས་པ་དང་། རང་གི་གཉེན་ཉེ་དུ་དང་གཡོག་འཁོར་དང་མཛའ་བཤེས་ཇི་ལྟ་བུ་ཞིག་ཡིན་ཡང་དེ་ལ་ཕན་པར་སེམས་ན་ཚེ་འདིའི་ཆེ་ཐབས་དང་། སྲིད་པའི་ཕུན་ཚོགས་ལ་མི་སྦྱོར་བར་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། ཚུལ་ཁྲིམས་རྣམ་པར་དག་པ་ལ་གནས་ནས་དབེན་པའི་གནས་སུ་ལམ་སྒྲུབ་པ་ལ་སྦྱོར་དགོས་པ་སོགས་བྱང་ཆུབ་ལམ་གྱི་རིམ་པའི་སྦྱོར་དངོས་རྗེས་གསུམ་གྱི་གནད་རྣམས་ལ་ངེས་པ་བརྟན་པོ་སྐྱེ་བར་འགྱུར་རོ། ། དེ་ནས་བཅོམ་ལྡན་འདས་དགུང་ལོ་བཞི་བཅུ་ཞེ་གཅིག་ཏུ་ཕེབས་པ་ལྕགས་ཕོ་བྱི་བའི་ལོར་སུམ་ཅུ་རྩ་གསུམ་དུ་ཕེབས་ནས་དབྱར་གནས་མཛད་དེ། དེ་ཡང་འདི་ལྟར། བཅོམ་ལྡན་འདས་ཡུམ་སྒྱུ་མ་ལྷ་མཛེས་སུམ་ཅུ་རྩ་གསུམ་དུ་སྐྱེ་བ་བཞེས་པ་དེ་རྗེས་སུ་གཟུང་བར་བཞེད་པ་དང་། གཞན་ཡང་ལྷ་བགྲང་བ་ལས་འདས་པ་ཞིག་ལ་དགེ་བའི་རྩ་བ་ཡོད་པར་གཟིགས་ནས་སུམ་ཅུ་རྩ་གསུམ་དུ་གཤེགས་ཏེ། ཆོས་བཟང་ལྷའི་མདུན་སར་བཞུགས་ནས། གདུགས་དཀར་མོ་ཅན་གྱི་གཟུངས་དབུའི་གཙུག་ཏོར་ནས་ཕྱུང་ངོ་། ། དེ་ནས་ལྷའི་དགའ་བའི་ཚལ་དུ་གཤེགས་ཏེ་བརྒྱ་བྱིན་དང་ཚངས་པ་སོགས་སྡེ་བརྒྱད་དང་། བློ་གྲོས་ཆེན་པོ་ལ་སོགས་པ་བྱང་ཆུབ་སེམས་དཔའ་མང་པོ་དང་ལྷན་ཅིག་གོ ། དེའི་ཚེ་འོད་བཀྱེ་བས་སྟོང་གསུམ་འདིའི་ངན་སོང་ཐམས་ཅད་སྡུག་བསྔལ་ལས་གྲོལ་བ་རྣམས་བཅོམ་ལྡན་འདས་ཀྱི་སྤྱན་སྔར་ནོར་བུའི་སྟེང་དུ་འཁོད་ནས་ཆེད་དུ་བརྗོད་པ་དང་། བརྒྱ་བྱིན་གྱིས་གསོལ་པ། ལྷའི་རིས་འདི་ནས་ལྷའི་བུ་ནོར་བུ་དྲི་མ་མེད་པའི་འོད་ཤི་འཕོས་ནས་དགུང་བདུན་ལོན་ལགས་ན་གང་དུ་སྐྱེས། བཀའ་སྩལ་པ། ལྷའི་དབང་པོ། དེ་ནི་མནར་མེད་པའི་དམྱལ་བར་སྐྱེས་སོ། ། བརྒྱ་བྱིན་གྱིས་དེ་ལ་བསྐྱབ་པར་ཞུས་པས་ངན་སོང་སྦྱོང་པའི་བརྟག་པ་གསུངས་ཏེ། བརྒྱ་བྱིན་ལ་ངན་སོང་སྦྱོང་བའི་ཆོ་ག་བསྟན། བརྒྱ་བྱིན་གྱིས་དེའི་ལུས་དཀྱིལ་འཁོར་དུ་བཅུག་ནས་དབང་བསྐུར་བས་དེ་སྐད་ཅིག་གིས་དམྱལ་བ་ལས་ཐར་ནས་དགའ་ལྡན་དུ་སྐྱེས་ཏེ་གཙང་མའི་རིས་ཀྱི་ལྷ་རྣམས་དང་ལྷན་ཅིག་དགའ་བའི་ཚལ་དེར་འོངས་ནས་བཅོམ་ལྡན་འདས་དང་བརྒྱ་བྱིན་ལ་ཆེད་དུ་བརྗོད་ཅིང་མཆོད་པའི་སྤྲིན་གྱིས་མཆོད་དོ། ། དེ་ནས་བཅོམ་ལྡན་འདས་ལྷའི་ཤིང་ཡོངས་འདུ་ས་བརྟོལ་གྱི་དྲུང་དུ་ཨར་མོ་ནིག་སྟེ་ལ་བ་དཀར་པོ་ལྟ་བུའི་རྡོ་ལེབ་ཀྱི་སྟེང་དུ་བཞུགས་ཏེ། ཤཱ་རིའི་བུ། འོད་སྲུངས་ཆེན་པོ། ཀཱ་ཏྱའི་བུ་ཆེན་པོ། གང་པོ། ནམ་གྲུ། རྟ་ཐུལ། ཀ་པི་ན། གསུས་པོ་ཆེ། རབ་འབྱོར་ལ་སོགས་པ་དགྲ་བཅོམ་པ་བརྒྱད་སྟོང་དང་། ཀུན་དགའ་བོ་དང་ཐབས་ཅིག་ཏུ་དབྱར་གནས་པ་མཛད། དེའི་ཚེ་བྱང་ཆུབ་སེམས་དཔའ་མང་པོ་ཡང་འདུས་ཤིང་ཡུམ་སྒྱུ་འཕྲུལ་ཆེན་མོ་ཡང་མཆོག་ཏུ་དགའ་བར་མཛད་ལ། རྒྱལ་བའི་སྲས་ལེགས་པར་གནས་ལ་དབྱིག་ལྡན་གྱི་གཟུངས་སྩལ་ཏོ། ། དེའི་ཚེ་ལྷ་རྣམས་ཐགས་བཟང་རིས་ཀྱི་དཔུང་དང་འཐབས་པས་ཕམ་ནས་བཅོམ་ལྡན་འདས་ཀྱི་དྲུང་དུ་བརྒྱ་བྱིན་སྐྲག་བཞིན་དུ་འོངས་ཏེ་ཞུས་པས་རྒྱལ་མཚན་རྩེ་མོའི་དཔུང་རྒྱན་གྱི་གཟུངས་སྩལ་ནས་དབུགས་ཕྱུང་ངོ་། ། སྤྱན་རས་གཟིགས་ཀྱིས་ལྷ་རྣམས་མཆོད་རྟེན་བགྱིད་པར་འཚལ་ན། དེའི་བསོད་ནམས་འཕེལ་བའི་ཐབས་ཞུས་པས། རྟེན་འབྲེལ་སྙིང་པོ་གསུངས་སོ། ། ལྷའི་བུ་ཤིན་ཏུ་བརྟན་པས་ཞག་བདུན་ནས་ཤི་སྟེ་དམྱལ་བར་སྐྱེའོ་ཞེས་པའི་སྒྲ་ཐོས་པ་བརྒྱ་བྱིན་ལ་སྨྲས་ཏེ། དེས་ཞུས་པས་གཙུག་ཏོར་རྣམ་པར་རྒྱལ་བ་ངན་འགྲོ་རྣམ་སྦྱོང་གསུངས་པས་ལྷའི་བུ་དེའི་སྡིག་པ་དག་ཅིང་ཚེ་སྲིངས་སོ། ། དེའི་ཚེ་ས་བཅུ་པ་འབའ་ཞིག་དང་ཐབས་ཅིག་ཏུ་བཞུགས་ཏེ། བྱམས་པས་འཛམ་བུ་གླིང་པ་རྣམས་ཀྱི་འཚེ་བ་ཞི་བར་གསོལ་པས། བཅོམ་ལྡན་འདས་ཀྱིས་ཞབས་ས་ལ་བརྡབས་ཤིང་། སྤྲུལ་པའི་ཁྲོ་བོ་སྤྲོས་ཏེ་གདུག་པ་ཅན་རྣམས་བཏུལ་ནས་མི་གཡོ་བའི་རྒྱུད་གསུངས་སོ། ། ལྷའི་བུ་ཞིག་ཤི་འཕོས་ནས་ཕག་ཏུ་སྐྱེ་བར་མཐོང་བས་སྐྲག་སྟེ་བྲང་བརྡུངས་པ་དང་། བཅོམ་ལྡན་འདས་དེར་གཤེགས་ཏེ་དཀོན་མཆོག་གསུམ་ལ་སྐྱབས་སུ་སོངས་ཤིག་གསུངས། དེས་དེ་ལྟར་བྱས་པས་ཡངས་པ་ཅན་དུ་ཚོང་དཔོན་ཞིག་གི་བུར་སྐྱེས་ཏེ་མིང་ཤེས་ལྡན་ཞེས་བཏགས་སོ། ། བཅོམ་ལྡན་འདས་སུམ་ཅུ་རྩ་གསུམ་དུ་བཞུགས་པའི་རིང་མོའུ་འགལ་གྱི་བུ་ཆེན་པོ་འཛམ་བུའི་གླིང་དུ་བསྟན་པ་སྐྱོང་ཕྱིར་བཞུགས། སྐྱེ་བོ་ཕལ་པ་སུས་ཀྱང་བཅོམ་ལྡན་འདས་གང་ན་བཞུགས་མ་ཤེས་པ་ན་རྒྱལ་པོ་གཟུགས་ཅན་སྙིང་པོ་དང་གསལ་རྒྱལ་དང་། འཁོར་རྣམ་བཞི་རྣམས་ཀྱིས་མོའུ་འགལ་གྱི་བུ་ཆེན་པོ་མཉན་ཡོད་ན་དབྱར་གནས་པ་ལ་དྲིས་པ། བཅོམ་ལྡན་འདས་གང་ན་བཞུགས། ལྷའི་གནས་ན་བཞུགས་སོ། ། དེ་རྣམས་དགའ་སྟེ་དབྱར་ཟླ་བ་གསུམ་རྫོགས་པ་དང་སླར་ཡང་མོའུ་འགལ་གྱི་བུའི་གན་དུ་སོང་ནས། ད་ནི་བཅོམ་ལྡན་འདས་མ་མཐོང་ནས་ཡུན་རིང་ཞིག་ལོན་པས། བདག་ཅག་གི་ཚིག་གིས་བཅོམ་ལྡན་འདས་སྤྱན་འདྲེན་དུ་གསོལ། མོའུ་འགལ་གྱི་བུས་སྐད་ཅིག་ལ་ལྷའི་ཡུལ་དུ་ཕྱིན་ཏེ། བཅོམ་ལྡན་འདས་ལ་འཁོར་བཞི་པོའི་ཚིག་གིས་བསྙུན་གསོལ་ནས། བཅོམ་ལྡན་འདས་འཛམ་བུ་གླིང་པ་རྣམས་ཀྱིས་ལྷའི་གནས་སུ་འཛེག་མི་ནུས་ཤིང་ལྷ་རྣམས་ལ་འཛམ་བུའི་གླིང་དུ་འབབ་པའི་མཐུ་མཆིས་པས། ད་ནི་འཛམ་བུ་གླིང་དུ་གཤེགས་སུ་གསོལ་ཞེས་དེ་དག་གི་མཆིད་གསོལ་པ་དང་། མོའུ་འགལ་གྱི་བུ་ཁྱོད་སོང་ལ་བཅོམ་ལྡན་འདས་དེང་ཞག་བདུན་ན་གྲོང་ཁྱེར་གསལ་ལྡན་གྱི་ཨ་པ་ཛ་རིའི་ནགས་ཤིང་ཨུ་དུམ་ཝ་རའི་དྲུང་དུ་གཤེགས་སོ་ཞེས་བསྒོ་ཞིག ། དེས་ཀྱང་སྐད་ཅིག་ལ་འཛམ་བུའི་གླིང་དུ་ཕྱིན་ནས་མི་རྣམས་ལ་གོ་བར་བྱས་ཏེ་སླར་མཉན་ཡོད་ནས་སུམ་ཅུ་རྩ་གསུམ་དུ་ཕྱིན་ཏོ། ། མ་འགགས་པས་རྒྱལ་པོ་ཨུ་ཏྲཱ་ཡཱ་ན་ལ་སྦྲན་པས་དེ་དགའ་སྟེ་གྲོང་ཁྱེར་གསལ་ལྡན་གཙང་མར་བྱས་ནས་མཆོད་པའི་ཡོ་བྱད་དག་བཤམས་ཤིང་། འཁོར་རྣམ་བཞིས་ཀྱང་ཕྱོགས་དེ་ལྷའི་དགའ་ཚལ་བཞིན་དུ་བྱས་སོ། ། དེ་ནས་སྟོན་ཟླ་འབྲིང་པོའི་ཚེས་ཉི་ཤུ་གཉིས་ལ་བཅོམ་ལྡན་འདས་འཛམ་བུའི་གླིང་དུ་ཞབས་ཀྱིས་གཤེགས་པར་བཞེད་པ་ན། བརྒྱ་བྱིན་གྱིས་བི་ཤྭ་ཀརྨ་ལ་བསྒོས་པས་དེས་ཐེམ་སྐད་གསུམ་སྤྲུལ་ཏེ། དབུས་མ་བཻ་ཌཱུརྱའི་ཐེམ་སྐས་ལ་བཅོམ་ལྡན་འདས་འཁོར་དང་བཅས་པ་གཤེགས་སོ། ། གཡས་པ་གསེར་གྱི་ཐེམ་སྐས་ལ་ཚངས་པ་གཟུགས་ཀྱི་ལྷས་བསྐོར་ཏེ་ནོར་བུའི་རྔ་ཡབ་ཀྱིས་བཅོམ་ལྡན་འདས་ལ་གཡོབ་ཅིང་སོང་ངོ་། ། གཡོན་པ་ཤེལ་གྱི་སྐས་ལ་བརྒྱ་བྱིན་འདོད་པའི་ལྷ་རྣམས་ཀྱིས་བསྐོར་ཏེ་གདུགས་ཐོགས་ནས་སོང་ངོ་། ། བཅོམ་ལྡན་འདས་ཀྱིས་བི་ཤྭ་ཀརྨའི་ཆེད་དུ་ཕྱེད་ནི་ཞབས་ཀྱིས་བྱོན་ལ། མ་དད་པ་བཟློག་པའི་ཕྱིར་དུ་ཕྱེད་ནི་རྫུ་འཕྲུལ་གྱིས་བྱོན་ཏེ། དཔག་ཚད་བཅུ་གཉིས་མན་ཆད་མིའི་དྲི་མནམ་པས་ལྷ་རྣམས་འོང་མི་བཟོད་པ་ལ་ཙན་དན་གྱི་དྲིས་ཁྱབ་པར་མཛད་ཅིང་། སྐྱེས་པས་ལྷའི་བུ་མོ་དང་བུད་མེད་ཀྱིས་ལྷའི་བུ་མཐོང་ན་འཆི་བར་འགྱུར་བས་སྐྱེས་པ་རྣམས་ཀྱིས་ལྷའི་བུ་མཐོང་ཞིང་བུད་མེད་རྣམས་ཀྱིས་ལྷའི་བུ་མོ་མཐོང་བར་མཛད་དེ་གྲོང་ཁྱེར་གསལ་ལྡན་དུ་གཤེགས་ནས་བརྒྱ་བྱིན་གྱིས་བཤམས་པའི་སེང་གེའི་ཁྲི་ལ་བཞུགས་སོ། ། དེའི་ཚེ་རྒྱལ་པོ་ཨུ་ཏྲཱ་ཡ་ན་དང་འཁོར་རྣམ་བཞིས་བསུས་ཤིང་དྲི་ཟ་ཆོས་ཀྱི་ཕྲེང་བས་པི་ཝང་བརྡུངས་པས་ཉན་ཐོས་ཆེན་པོ་རྣམས་ཀྱི་ལུས་ཀྱང་གཡོས་སོ། ། གནས་དེར་ལྷ་དང་མི་དད་པ་ཅན་གྱིས་ལྷ་ལས་བབས་པའི་མཆོད་རྟེན་བང་རིམ་བཞི་པའམ་བརྒྱད་པ་ངོས་རེར་གློ་འབུར་དང་བཅས་པའི་གློ་འབུར་གྱི་དབུས་ན་ཐེམ་སྐས་ཡོད་པ་བརྩིགས་སོ། ། དེ་ནས་བཅོམ་ལྡན་འདས་དགུང་ལོ་ང་བདུན་ལ་བབ་པ་མེ་ཕོ་འབྲུག་གི་ལོ་མཉན་ཡོད་དུ་ཆོ་འཕྲུལ་ཆེན་པོ་སྟོན་པར་མཛད་དེ། དེ་ཡང་འདི་ལྟར་སྟོན་པ་མངོན་པར་རྫོགས་པར་སངས་རྒྱས་ནས་ལྷ་མི་བགྲང་བ་ལས་འདས་པ་ཞིག་སྨིན་ཅིང་གྲོལ་བར་མཛད། འཛམ་བུའི་གླིང་གི་རྒྱལ་པོ་ཆེ་དགུ་ཐམས་ཅད་ཀྱིས་སྟོན་པ་ཉན་ཐོས་ཀྱི་དགེ་འདུན་དང་བཅས་པ་མཆོད་པ་ན་རྫོགས་བྱེད་ལ་སོགས་པའི་མུ་སྟེགས་ཀྱི་སྟོན་པ་དྲུག་པོ་ཕྲག་དོག་གིས་ཡིད་དཀྲུགས་ཏེ་སྟོན་པ་ལ་འགྲན་པར་འདོད་པ་ན་བདུད་སྡིག་ཏོ་ཅན་གྱིས་ཀྱང་མུ་སྟེགས་ཀྱི་སྟོན་པ་དྲུག་པོའི་རྒྱུད་བསྐུལ་ཏེ། སྟོན་པ་ལ་འགྲན་པའི་བསམ་པ་ཆེས་ཆེར་སྐྱེས་ནས་རྫོགས་བྱེད་ལ་སོགས་པ་མུ་སྟེགས་པ་དྲུག་པོ་དེས་རྒྱལ་པོ་གཟུགས་ཅན་སྙིང་པོའི་དྲུང་དུ་ཕྱིན་ཏེ། རྒྱལ་པོ་བདག་ཅག་དང་གཽ་ཏ་མ་གཉིས་ཀ་ཤེས་པར་སྨྲ་བ་ཡིན་ན་ལྷན་ཅིག་རྫུ་འཕྲུལ་འགྲན་དུ་གཞུག་པའི་རིགས་སོ། ། རྒྱལ་པོས་བགད་དེ་ཁྱེད་རྣམས་རེ་གླེན། སངས་རྒྱས་རྫུས་འཕྲུལ་ཆེན་པོ་དང་ལྡན་ན་ཇི་ལྟར་འགྲན། སྟོན་པ་དྲུག་གིས་སྨྲས་པ། བདག་ཅག་གཉིས་ཀྱིས་ཞག་བདུན་ན་རྫུ་འཕྲུལ་ཆེན་པོ་འགྲན་ན་མངོན་ཏེ། བསྒྲུན་པའི་འོག་ཏུ་གང་རྒྱལ་བ་གཟིགས་ཤིག་རྒྱལ་པོས་ཀྱང་བདག་གིས་དེ་བཞིན་བགྱི་ན་ཁྱེད་སྐྱེངས་ཀྱིས་དོགས་སོ། ། ཞེས་སྨྲས་ཏེ། རྒྱལ་པོས་བཅོམ་ལྡན་འདས་ལ་དོན་དེ་གསོལ་པ་དང་། ང་ཉིད་དུས་མཁྱེན་ནོ་ཞེས་གནང་ངོ་། ། རྒྱལ་པོས་ཆོ་འཕྲུལ་སྟོན་པའི་གནས་བྱེད་དུ་བཅུག་པ་ན། ཞག་བདུན་གྱི་ཉིན་པར་བཅོམ་ལྡན་འདས་དགེ་འདུན་དང་བཅས་པ་ཡངས་པ་ཅན་དུ་གཤེགས་སོ། ། སྟོན་པ་དྲུག་གིས་ཀྱང་གཽ་ཏ་མའི་ཆོ་འཕྲུལ་གྱིས་བདག་མི་ཐུབ་བོ་ཞེས་བྱས་ན་ཁྱེད་ཡིད་མི་ཆེས་ཀྱིས་ཆོ་འཕྲུལ་འགྲན་པའི་དུས་བྱས་པ་ལས་བྲོས་སོ་ཞེས་བསྒྲགས་ནས་ང་རྒྱལ་སྐྱེས་ཏེ་རྗེས་སུ་བསྙེགས་ཤིང་རྒྱལ་པོ་གཟུགས་ཅན་སྙིང་པོ་ཡང་བཅོམ་ལྡན་འདས་ཀྱི་རྗེས་སུ་ཡངས་པ་ཅན་དུ་དོང་ངོ་། ། ཡངས་པ་ཅན་པ་རྣམས་ཀྱིས་བཅོམ་ལྡན་འདས་བསུས་སོ། ། སྟོན་པ་དྲུག་གིས་ལི་ཙ་བྱི་རྣམས་ལ་གཽ་ཏ་མ་དང་ཆོ་འཕྲུལ་འགྲན་པར་གནང་ན་ཞག་བདུན་ན་འགྲན་ནོ། ། དེ་བཅོམ་ལྡན་འདས་ལ་གསོལ་པ་དང་། ང་ཉིད་ཀྱིས་དུས་མཁྱེན་ནོ། ། ཞེས་གསུངས་ནས། སང་འགྲན་པ་ལས་དེ་རིང་བཅོམ་ལྡན་འདས་ཡུལ་ཀཽ་ཤམྦིར་རྒྱལ་བོ་ཨུ་ཏྲ་ཡ་ན་ཅན་དུ་གཤེགས་སོ། ། དེར་ཡང་འགྲན་པར་ཞུས་པ་ལས་ཡུལ་ཝརྒར་རྒྱལ་པོ་ཤུན་ཙི་ད་ལ་ཅན་དུ་གཤེགས་སོ། ། དེར་ཡང་བགྲན་པར་ཞུས་པ་ལས། ཡུལ་ཙམྤར་རྒྱལ་པོ་ཨིནྡྲ་ཝརྨི་ཅན་དུ་གཤེགས་སོ། ། དེར་ཡང་འགྲན་པར་ཞུས་པ་ལས་ཝཱ་ར་ཎཱ་སིའི་རྒྱལ་པོ་ཚངས་བྱིན་ཅན་དུ་གཤེགས་སོ། ། དེར་ཡང་འགྲན་པར་ཞུས་པ་ལས། སེར་སྐྱར་ཤཱཀ་རིགས་ཅན་དུ་གཤེགས་སོ། ། སྟོན་པ་དྲུག་པོ་ཡང་ང་རྒྱལ་ལྷག་པར་སྐྱེས་ཏེ། རྒྱལ་པོ་གཟུགས་ཅན་སྙིང་པོ་ལ་གཽ་ཏ་མ་དང་རྫུ་འཕྲུལ་འགྲན་དུ་ཆུག་ཅིག་ཅེས་ཡང་ནས་ཡང་དུ་བསྐུལ་ལོ། ། རྒྱལ་པོས་གལ་ཏེ་ཁྱོད་དོན་འདི་ལན་གསུམ་གྱི་བར་དུ་ཟེར་ན་སྨྱུགས་ཏེ་བཏང་ངོ་། ། ཞེས་སྨྲས་པ་དང་། དེ་རྣམས་འདི་སྙམ་དུ་རྒྱལ་པོ་འདི་ནི་གཽ་ཏ་མའི་ཕྱོགས་བྱེད་ཀྱིས། རྒྱལ་པོ་གསལ་རྒྱལ་དེ་གཟུ་བོ་ཞིག་ཡོད་ཅེས་གྲག་གི། དེའི་གན་དུ་འགྲོའི་ཞེས་བཅོམ་ལྡན་འདས་ཀྱི་རྗེས་བཞིན་དུ་བསྙེགས་སོ། ། བཅོམ་ལྡན་འདས་ཀྱང་མཉན་ཡོད་དུ་བྱོན་ནས་རྒྱལ་བྱེད་ཚལ་དུ་བཞུགས་སོ། ། དེའི་ཚེ་རྒྱལ་པོ་གཟུགས་ཅན་སྙིང་པོ་བཞོན་པ་ལྔ་བརྒྱ་དང་འཁོར་འབུམ་བཞི་ཁྲི་དང་། ལི་ཙ་བྱི་བཞོན་པ་ལྔ་བརྒྱ་དང་། འཁོར་བདུན་ཁྲི་དང་། ཨུ་ཏྲ་ཡ་ན་འཁོར་སྟོང་ཕྲག་བརྒྱད་ཁྲི་དང་། ཤུན་ཙི་ད་ལ་འཁོར་ལྔ་ཁྲི་དང་། ཨིནྡྲ་ཝརྨི་དྲུག་ཁྲི་དང་། ཚངས་བྱིན་བརྒྱད་འབུམ་དང་། ཤཱཀ་རིགས་ཁྲི་ཁྲག་དགུ་པོ་དག་རྗེས་སུ་འབྲངས་ཏེ། མཉན་ཡོད་ཀྱི་ལྗོངས་ཡོངས་སུ་གང་བར་གྱུར་ཏོ། ། དེ་ནས་སྟོན་པ་དྲུག་གིས། རྒྱལ་པོ་གསལ་རྒྱལ་ལ་སྨྲས་པ། དགེ་སྦྱོང་གཽ་ཏ་མ་དང་བདག་ཅག་ཆོ་འཕྲུལ་འགྲན་པར་དུས་བྱས་པ་ལས། དུས་ལ་བབ་པ་དང་བྱོལ་ཞིང་བྲོས་ཏེ། ད་ནི་འཁོར་མང་པོ་ཡང་རྒྱལ་པོའི་ཡུལ་དུ་ཚོགས་ཀྱིས། རྒྱལ་པོ་ནི་ས་དང་འདྲ་བས་བྱམས་སྡང་མེད་པའི་ཞལ་ཆེ་གཅོད་པའི་རིགས་སོ། ། གཽ་ཏ་མ་རྒྱལ་ན་བདག་ཅག་དེའི་དབང་དུ་མཆི་ལ། བདག་ཅག་རྒྱལ་ན་བདག་ཅག་དབང་བར་མཛོད་ཅིག ། རྒྱལ་པོས་སྨྲས་པ། ཅིའི་ཕྱིར་ཁྱེད་ལྟ་བུའི་མ་རབས་ཅི་ཡང་མི་ཤེས་པས་ཆོས་ཀྱི་རྒྱལ་པོ་ཆེན་པོ་དང་ཆོ་འཕྲུལ་འགྲན་པར་བྱེད་ཁྱེད་ཕམ་གྱིས་དོགས་སོ། ། སྨྲས་པ་ཁྱོད་ཀྱང་གཽ་ཏ་མས་བླུས་ཟིན་ནམ་བསྒྲུན་ན་མངོན་པར་འགྱུར་རོ། ། རྒྱལ་པོས་སྨྲས་པ། གལ་ཏེ་དེ་ལྟ་ན་བདག་གིས་བཅོམ་ལྡན་འདས་ལ་ཞུའོ། ། དེ་ནས་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་ལན་གསུམ་གྱི་བར་དུ་གསོལ་བས། བཅོམ་ལྡན་འདས་ཀྱིས་མཉན་ཡོད་འདིར་སྔོན་གྱི་སངས་རྒྱས་རྣམས་ཀྱིས་ཆོ་འཕྲུལ་ཆེན་པོ་བསྟན་ཞིང་སྐྱེ་བོའི་ཚོགས་ཆེན་པོའང་ཞག་བདུན་ན་འདུ་བར་མཁྱེན་ནས། རྒྱལ་པོ་ཆེན་པོ་ཞག་བདུན་ན་དེ་བཞིན་བྱ་ཡི་ཁྱོད་སོངས་ལ་འདི་མ་ཡིན་པ་ཡངས་པ་དག་ཏུ་འདུན་ཁང་རྩིགས་ཤིག ། དེ་ནས་རྒྱལ་པོས་སྟོན་པ་དྲུག་ལ་དོན་དེ་སྨྲས་པ་དང་། དེ་རྣམས་བགྲོས་པ་གཽ་ཏ་མ་འབྲོས་པ་འམ་གྲོགས་ཚོལ་བ་གཉིས་ལས་གདོན་མི་ཟ་བར་གྲོགས་འཚོལ་བར་འགྱུར་བས། བདག་ཅག་གིས་ཀྱང་གྲོགས་བཙལ་ལོ་ཞེས། གྱད་ཡུལ་གྱི་ཀུན་ཏུ་རྒྱུ་རབ་བཟང་གི་དྲུང་དུ་སོང་སྟེ་བདག་ཅག་གི་གྲོགས་ཀྱིས་ལ་གཽ་ཏ་མ་དང་རྫུ་འཕྲུལ་འགྲན་པར་གྱིས་ཤིག་རབ་བཟང་གིས་སྨྲས་པ། ཁོ་བོ་ཉིན་མོ་དལ་འབབ་ཀྱི་མཚོ་འགྲམ་ན་གནས་ནས་བསོད་སྙོམས་བསླངས་པ་མ་དྲོས་པར་ཟ་བ་ན། ཤཱ་རིའི་བུའི་དགེ་ཚུལ་སྐུལ་བྱེད་ཀྱིས་ཕྱག་དར་ཁྲོད་པ་ཁྱེར་བ་མ་དྲོས་པའི་ལྷས་བཀྲུས་ནས་འབུལ་ཞིང་དེའི་ཆུ་བདག་གི་མགོར་འདེབས་པས། བདག་ཅག་དེའི་ཡང་སློབ་དང་ཡང་མི་མཉམ་ན། རྫུ་འཕྲུལ་ཆེན་པོ་དེ་ཁྱེད་ཀྱིས་རྫུ་འཕྲུལ་ལ་བོས་པ་མ་ལེགས་སོ། ། དེ་ནས་སྟོན་པ་དྲུག་གིས་དེ་བོར་ནས་གངས་རིའི་སུལ་ན་གནས་པའི་དྲང་སྲོང་ལྔ་བརྒྱ་ལ་ཚུལ་དེ་སྨྲས་པ་དང་། དེ་རྣམས་ཀྱིས་ཁས་བླངས་ཏེ་འོང་རན་པའི་ཚེ་མཚན་མ་སྟོན་ཅིག་ཅེས་སྨྲས་སོ། ། དེའི་ཚེ་བློན་པོས་དབྱེན་བྱས་པས་རྒྱལ་པོ་གསལ་རྒྱལ་གྱིས། མས་དབེན་གྱི་གཅུང་ནག་པོའི་ཡན་ལག་བཅད་དེ་སྲང་དུ་དོར་བ། དེའི་གཉེན་བཤེས་རྣམས་ཀྱིས་སྟོན་པ་དྲུག་ལ་འདི་སོས་པའི་བདེན་ཚིག་མཛོད་ཅིག་ཅེས་སྨྲས་པས་དེ་དག་སྤོབས་པ་མེད་ནས་ཅང་མི་ཟེར་རོ། ། ཕྱོགས་དེར་ཀུན་དགའ་བོ་འོངས་པ་ལ་དེ་བཞིན་དུ་སྨྲས་པ་དང་། དེས་བཅོམ་ལྡན་འདས་ལ་ཞུས་པས་བདེན་པའི་ཚིག་འདི་བྱོས་ཤིག་ཅེས་བཀའ་སྩལ་པ་བཞིན། ཀུན་དགའ་བོས་ཀྱང་དཀོན་མཆོག་གསུམ་མཆོག་ཡིན་པའི་བདེན་པས་འདིའི་ཡན་ལག་སྔར་བཞིན་དུ་གྱུར་ཅིག་ཅེས་སྨྲས་པ་དང་། ནག་པོའི་ཡན་ལག་སྔ་ཁོ་བཞིན་དུ་སོས་པས་སྐྱེ་བོའི་ཚོགས་ཀྱིས་ཀུན་དགའ་བོས་མུ་སྟེགས་པ་ཕམ་པར་བྱས་སོ་ཞེས་ཨ་ལ་ལའི་སྒྲ་བོ་ཆེ་བཏོན་ཏོ། ། ནག་པོ་ལ་བཅོམ་ལྡན་འདས་ཀྱིས་ཆོས་བསྟན་པས་ཕྱིར་མི་འོང་ཐོབ་ནས་རྒྱལ་པོ་གསལ་རྒྱལ་གྱིས་ཁྱིམ་དུ་བཀུག་ཀྱང་མ་ཉན་པར་དེས་ཀུན་དགའ་ར་བ་དེ་ཉིད་དུ་འཆགས་བྱས་པས་དུམ་བུའི་ཀུན་དགའ་ར་བར་མིང་ཆགས་ཏེ་བཅོམ་ལྡན་འདས་ལ་བསྙེན་བཀུར་ཞིང་རྫུ་འཕྲུལ་ཡང་གྲུབ་བོ། ། རྒྱལ་པོ་གསལ་རྒྱལ་གྱིས་མཉན་ཡོད་ནས་རྒྱལ་བྱེད་ཚལ་གྱི་བར་དུ་ཆོ་འཕྲུལ་ཆེན་པོའི་འདུན་ཁང་གོས་བརྒྱ་སྟོང་རི་བས་གཡོགས་པ་ཙན་དན་གྱི་ཆག་ཆག་བཏབ་པ། བ་དན་དང་རྒྱལ་མཚན་བསྒྲེང་བ། དར་གྱི་ཆུན་འཕྱང་དཔྱངས་པ། ལྷ་རྣམས་ཀྱི་དགའ་བའི་ཚལ་བཞིན་དུ་བྱས་ནས། དེར་བཅོམ་ལྡན་འདས་ཀྱི་བཞུགས་གདན་རིན་པོ་ཆེས་སྤྲས་པའི་གསེར་གྱི་སེང་གེའི་ཁྲི་ཡང་བཤམས་སོ། ། མུ་སྟེགས་ཅན་གྱི་དགེ་བསྙེན་རྣམས་ཀྱིས་ཀྱང་རང་གི་འབྱོར་པ་དང་བསྟུན་པའི་གོས་ཀྱིས་གཡོགས་པའི་འདུན་ཁང་དྲུག་དང་སྟན་དྲུག་ཀྱང་བཤམས་པ་ལ་སྟོན་པ་དྲུག་སྔར་འོངས་ཏེ་འདུག་ནས། ལྷ། བདག་ཅག་ནི་མཆིས་ལགས་ན་དགེ་སྦྱོང་གཽ་ཏ་མ་དགུག་ཏུ་གསོལ་ཞེས་ཕོ་ཉ་བཏང་ངོ་། ། རྒྱལ་པོ་འཁོར་དང་བཅས་པས་ཀྱང་དེ་ཐོས་ནས་ཆོ་འཕྲུལ་ཆེན་པོའི་འདུན་ཁང་དུ་སོང་ནས། བཅོམ་ལྡན་འདས་སྤྱན་འདྲེན་པར་བྲམ་ཟེའི་ཁྱེའུ་བླ་མ་བཏང་བས་དགུན་ཟླ་ཐ་ཆུང་གི་ཡར་ངོའི་ཚེས་གཅིག་གི་ཉིན་བཅོམ་ལྡན་འདས་ངང་པའི་རྒྱལ་པོ་ལྟར་ནམ་མཁའ་ལས་ཆོ་འཕྲུལ་ཆེན་པོའི་འདུན་ཁང་དུ་གཤེགས་སོ། ། དེ་མཐོང་ནས་རྒྱལ་པོ་གསལ་རྒྱལ་གྱིས་མུ་སྟེགས་ཅན་རྣམས་ལ་སྨྲས་པ། བཅོམ་ལྡན་འདས་ཀྱིས་ཆོ་འཕྲུལ་བསྟན་ཟིན་ན་ད་ནི་ཁྱེད་ཀྱི་རེས་ལ་བབ་ཀྱིས་སྟོན་ཅིག ། དེ་རྣམས་ཀྱིས་སྨྲས་པ། ལྷ། སྐྱེ་བོའི་ཚོགས་ཆེན་པོ་འདིར་འདུས་ལགས་ན། ཆོ་འཕྲུལ་ཆེན་པོ་འདི་ཅི་དགེ་སྦྱོང་གཽ་ཏ་མ་འམ་བདག་ཅག་གང་གི་ལགས་སུས་འཚལ། དེ་ནས་དུམ་བུའི་ཀུན་དགའ་ར་བ་བའི་རྫུ་འཕྲུལ་གྱིས་རི་སྤོས་ངད་ལྡང་ལས་ཤིང་ཨཱ་མྲཱ་འདབ་མ་དཀར་པོས་ཀླུབས་པ་བྱའི་ཚོགས་སྐད་འབྱིན་པ་བླངས་ནས་ཆོ་འཕྲུལ་ཆེན་པོའི་འདུན་ཁང་གི་བྱང་ཕྱོགས་སུ་བཞག་ཅིང་ཁྱིམ་བདག་ངན་པ་བཟང་སྦྱིན་གྱི་རྫུ་འཕྲུལ་གྱིས་ལྷའི་དཔག་བསམ་གྱི་ཤིང་བླངས་ནས། ལྷོ་ཕྱོགས་ངོསསུ་བཞག་པ་དང་། རྒྱལ་པོས་སྟོན་པ་དྲུག་ལ་སྨྲས་པ། བཅོམ་ལྡན་འདས་ཀྱིས་རྫུ་འཕྲུལ་བསྟན་ཟིན་ན་ད་ཁྱེད་ཀྱིས་སྟོན་ཅིག་སྨྲས་པ། ལྷ། ཆོ་འཕྲུལ་འདི་སུའི་ཡིན་པ་སུས་འཚལ། དེའི་ཚེ་ཆོ་འཕྲུལ་ཆེན་པོ་བལྟ་བར་སྤྲོ་བའི་སྲོག་ཆགས་གྲངས་མེད་པ་དང་། ནམ་མཁའ་ལ་ལྷ་བརྒྱ་སྟོང་དུ་མ་ཡང་འདུས་པ་ན། བཅོམ་ལྡན་འདས་གཙུག་ལག་ཁང་དུ་གཤེགས་ནས་སྒོ་འཕར་གྱི་གསེབ་ནས་འོད་ཟེར་ཕྱུང་བས་ཆོ་འཕྲུལ་ཆེན་པོའི་འདུན་ཁང་ཐམས་ཅད་བསྲེགས་པ་དང་། སྟོན་པ་དྲུག་གིས་སྨྲས་པ། ལྷ། ད་ནི་དགེ་སྦྱོང་གཽ་ཏ་མའི་འདུན་ཁང་ཚིག་ན་གལ་ཏེ་དེས་རྔོ་ཐོག་ན་འདིར་མཆིས་ལ་ཞི་བར་བགྱིད་གྲང་། དེས་རྒྱལ་པོ་དང་བཙུན་མོ་ཕྲེང་ལྡན་མ་དང་། དབྱར་ཚུལ་མ་དང་། བཙུན་མོའི་འཁོར་ཕྱ་མཁན་དྲང་སྲོང་བྱིན་དང་། སོ་ཕག་མཁན་མནའ་མི་དང་། མགོན་མེད་ཟས་སྦྱིན་དང་། ཙམྤ་མོ་སོགས་དད་པ་ཅན་མང་པོ་ཅང་མི་ཟེར་པར་སེམས་ཁོང་དུ་ཆུད་ནས་འདུག་ཅིང་། སྟོན་པ་དྲུག་དང་དེའི་སློབ་མ་རྣམས་ནི་རབ་ཏུ་དགའ་བར་གྱུར་ཏོ། ། སངས་རྒྱས་ཀྱི་མཐུས་མེ་དེས་ཆོ་འཕྲུལ་ཆེན་པོའི་འདུན་ཁང་གི་དྲི་མ་ཐམས་ཅད་བསྲེགས་ནས་རང་ཉིད་ཞི་སྟེ་འདུན་ཁང་མཛེས་པར་གྱུར་པ་དང་། རྒྱལ་པོ་དགའ་ནས་མུ་སྟེགས་ཅན་རྣམས་ལ་སྨྲས་པ། བཅོམ་ལྡན་འདས་ཀྱིས་ཆོ་འཕྲུལ་བསྟན་ཟིན་གྱིས་ད་ནི་ཁྱོད་ཀྱིས་སྟོན་ཅིག་དེ་དག་སྤོབས་པ་མེད་ནས་ཅང་མི་ཟེར་རོ། ། དེ་ནས་བཅོམ་ལྡན་འདས་ཆོ་འཕྲུལ་གྱི་འདུན་ཁང་དུ་བྱོན་པ་ལ་རྒྱལ་པོ་གསལ་རྒྱལ་གྱིས་ཐོག་མར་མཆོད་པའི་ཡོ་བྱད་དང་ཞལ་ཟས་བཤམས་ཏེ་བསྙེན་བཀུར་བ་ན། བཅོམ་ལྡན་འདས་ཀྱིས་ཚེམས་ཤིང་ས་ལ་བཙུགས་མ་ཐག་ཏུ་སྐྱེས་ནས་རིན་པོ་ཆེ་སྣ་བདུན་གྱི་ལྗོན་པ་ཆུ་ཞེང་དཔག་ཚད་ལྔ་བརྒྱ་པ། མེ་ཏོག་ཤིང་རྟའི་འཕང་ལོ་ཙམ་པ། འབྲས་བྲེ་ལྔ་ཤོང་བའི་བུམ་པ་ཙམ་གྱི་འབྲས་བུ་ཅན། དྲི་བསུང་དང་ལྡན་པ་ཆོས་ཀྱི་སྒྲ་འབྱུང་བ་ཉི་འོད་ཟིལ་གྱིས་གནོན་པ་ཞིག་སྤྲུལ་ཏོ། ། འདི་ནས་བརྩམས་ཏེ་ཟླ་བ་ཕྱེད་ཀྱི་བར་དུ་ཉིན་རེ་བཞིན་ཆོ་འཕྲུལ་རེ་མཐོང་བ་ཙམ་གྱིས་དད་པར་གྱུར་པའི་སྐྱེ་བོའི་ཚོགས་གྲངས་མེད་པ་ལ་ཆོས་བསྟན་པས་ལམ་གསུམ་ལ་སོ་སོར་ངེས་པར་མཛད་དོ། ། ཚེས་གཉིས་ལ་རྒྱལ་པོ་ཨུ་ཏྲ་ཡ་ནས་བསྙེན་བཀུར་བ་ན། བཅོམ་ལྡན་འདས་ཀྱི་སྐུའི་གཡས་གཡོན་དུ་རིན་པོ་ཆེའི་རི་གཉིས་ཤིན་ཏུ་མཐོ་བ་མཛེས་པ་ཁ་དོག་ལྔར་འཚེར་བ། མེ་ཏོག་དང་འབྲས་བུ་རབ་ཏུ་རྒྱས་པའི་ཤིང་སྣ་ཚོགས་སྐྱེས་པ་གཡས་ཀྱི་རི་ལ་འབྲས་རོ་བརྒྱ་དང་ལྡན་པ་སྐྱེས་པ་ལ་མི་མང་པོ་དག་ཡིད་བཞིན་དུ་ཚིམ་པར་ཟའོ། ། གཡོན་གྱི་རི་ལ་རྩྭ་བཟང་བ་སྐྱེས་པ་ལ་དུད་འགྲོའི་ཚོགས་ཟ་ཞིང་ཚིམ་པར་གྱུར་ཏོ། ། ཚེས་གསུམ་ལ་རྒྱལ་པོ་ཤུན་ཙི་ད་ལས་བསྙེན་བཀུར་བ་ན། བཅོམ་ལྡན་འདས་ཀྱིས་ཞལ་བསིལ་བའི་ཆུ་ས་ལ་དོར་བ་རིན་པོ་ཆེའི་རྫིང་བུ་དཔག་ཚད་ཉིས་བརྒྱ་པ་རིན་པོ་ཆེ་སྣ་བདུན་གྱིས་སྤྲས་ཤིང་པདྨ་ཁ་དོག་སྣ་ཚོགས་པས་གང་བ། དེ་དག་གི་ཁ་དོག་དང་རྗེས་སུ་མཐུན་པའི་འོད་ཟེར་གྱིས་གནམ་ས་ཀུན་སྣང་བར་བྱས་པས་འཁོར་ཐམས་ཅད་ཀྱིས་རྫིང་དེ་ལ་བལྟ་ཞིང་བསྟོད་དོ། ། ཚེས་བཞི་ལ་རྒྱལ་པོ་ཨིནྡྲ་ཝརྨིས་བསྙེན་བཀུར་བ་ན་རིན་པོ་ཆེའི་རྫིང་དེའི་ངོས་བཞིར་ཡུར་བ་ཆེན་པོ་བརྒྱད་བརྒྱད་ལ་ཆུ་འབབ་པ་ལས་ཆོས་ཀྱི་སྒྲ་འབྱུང་བ་ཕྱིར་ཡང་འཁོར་ཞིང་རྫིང་ཉིད་དུ་འབབ་པ་སྤྲུལ་ཏོ། ། ཚེས་ལྔ་ལ་རྒྱལ་པོ་ཚངས་བྱིན་གྱིས་བསྙེན་བཀུར་བ་ན། བཅོམ་ལྡན་འདས་ཀྱི་ཞལ་ནས་གསེར་གྱི་འོད་བཀྱེ་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བར་བྱས་ཏེ། འོད་དེས་རེག་པའི་སེམས་ཅན་ཀུན་སྡུག་བསྔལ་གསུམ་དང་སྒྲིབ་པ་ལྔ་དང་བྲལ་ནས་ལུས་དང་སེམས་རབ་ཏུ་བདེ་བར་གྱུར་ཏོ། ། ཚེས་དྲུག་ལ་ལི་ཙ་བྱི་རྣམས་ཀྱིས་བསྙེན་བཀུར་བ་ན་བཅོམ་ལྡན་འདས་ཀྱིས་འཁོར་མང་པོ་དག་གཅིག་གི་བསམ་པ་གཅིག་གིས་ཤེས་པ་དང་སོ་སོའི་དགེ་བ་དང་མི་དགེ་བའི་ལས་ཀྱང་རྟོགས་པར་མཛད་པས་ཐམས་ཅད་དགའ་སྟེ་བསྟོད་དོ། ། ཚེས་བདུན་ལ་ཤཱཀྱ་རྣམས་ཀྱིས་བསྙེན་བཀུར་བ་ན་འཁོར་དེ་དག་སོ་སོ་འཁོར་ལོས་བསྒྱུར་བའི་རྒྱལ་པོར་གྱུར་ཏེ་རིན་པོ་ཆེ་སྣ་བདུན་དང་བུ་སྟོང་དང་ལྡན་ཞིང་རྒྱལ་ཕྲན་དང་བློན་པོ་རྣམས་ཀྱིས་བསྟི་སྟང་བྱེད་པར་མཐོང་བས་སྤྲོ་བ་སྐྱེས་སོ། ། ཚེས་བརྒྱད་ལ་བརྒྱ་བྱིན་གྱིས་སྤྱན་དྲངས་ཏེ་བཅོམ་ལྡན་འདས་ཀྱིས་ཞབས་གཡས་པ་དྲི་གཙང་ཁང་གི་ནང་དུ་བསྣུན་མ་ཐག་ས་གཡོས་པས་སྟོན་པ་དྲུག་གིས་གྲོགས་སུ་ཤོག་ཅིག་བྱས་པའི་དྲང་སྲོང་ལྔ་བརྒྱ་པོས་བརྡ་བྱས་པའོ་སྙམ་ནས་དེར་དོང་པ་དང་། སྐུ་ལས་འོད་ཟེར་བཀྱེ་བས་དེ་རྣམས་ཀྱིས་བཅོམ་ལྡན་འདས་ཉི་མ་ལྟར་མཛེས་པ་མཐོང་ནས་དད་པས་རབ་ཏུ་བྱུང་ནས་དགྲ་བཅོམ་སྟེ། བཅོམ་ལྡན་འདས་དགྲ་བཅོམ་པ་ལྔ་བརྒྱ་དང་ལྷན་ཅིག་ཆོ་འཕྲུལ་ཆེན་པོའི་འདུན་ཁང་དུ་བྱོན་ནས་འཁོར་བརྒྱ་ཕྲག་དུ་མའི་གུང་ལ་བརྒྱ་བྱིན་གྱིས་བཤམས་པའི་སེང་གེའི་ཁྲི་ལ་བཞུགས་སོ། ། དེའི་ཚེ་མོའུ་འགལ་གྱི་བུ་ཆེན་པོས་བདག་གི་རྫུ་འཕྲུལ་གྱིས་མུ་སྟེགས་འདི་རྣམས་ཕམ་པར་བགྱིའོ། ། བཀའ་སྩལ་པ། མུ་སྟེགས་འདི་རྣམས་ང་རྫུ་འཕྲུལ་ལ་འབོད་པས་ང་ཉིད་ཀྱིས་རྫུ་འཕྲུལ་བསྟན་པར་བྱའོ། ། ཞེས་གསུངས་ནས་རྒྱལ་པོ་གསལ་རྒྱལ་ལ་བཀའ་སྩལ་པ། དེ་བཞིན་གཤེགས་པ་མུ་སྟེགས་ཅན་དང་ལྷན་ཅིག་ཏུ་རྫུ་འཕྲུལ་སྟོན་པར་གསོལ་བ་འདེབས་པ་སུ་ཡིན། རྒྱལ་པོ་སྟན་ལས་ལངས་ཏེ་ཐལ་མོ་སྦྱར་ནས། བཅོམ་ལྡན་འདས་ཅི་ནས་ཀྱང་རྫུ་འཕྲུལ་གྱི་ཆོ་འཕྲུལ་བསྟན་དུ་གསོལ། བཅོམ་ལྡན་འདས་ཉིད་ཀྱི་གདན་ལས་མི་སྣང་བར་གྱུར་ནས། ཕྱོགས་བཞིར་གཤེགས་པ་དང་། བཞེངས་པ་དང་། བཞུགས་པ་དང་། གཟིམས་པའི་སྤྱོད་ལམ་བཞི་མཛད་ཅིང་འོད་ཟེར་སྣ་ཚོགས་པ་འབྱིན། སྐུའི་སྨད་ནས་མེ་འབར་སྟོད་ནས་ཆུའི་རྒྱུན་འབེབས་པ་དང་། གོ་ཟློག་པ་དག་ཀྱང་མཛད་དེ། འདི་ནི་ཉན་ཐོས་དང་ཐུན་མོང་བའི་ཆོ་འཕྲུལ་ཡིན་ནོ་ཞེས་གསུངས་ནས་སེང་གེའི་ཁྲི་ལ་བཞུགས་པ་ལ། ཚངས་པ་དང་བརྒྱ་བྱིན་གྱིས་གཡས་གཡོན་ནས་མཆོད་དེ་བསྙེན་བཀུར་རོ། ། ཡང་བཀའ་སྩལ་པ། རྒྱལ་པོ་ཆེན་པོ། དེ་བཞིན་གཤེགས་པ་ལ་ཆོ་འཕྲུལ་སྟོན་པར་གསོལ་བ་འདེབས་པ་སུ་ཡིན། ། གསལ་རྒྱལ་གྱིས་ཀྱང་བདག་ལགས་སོ། ། ཞེས་གསོལ་ཏོ། ། དེ་ནས་བཅོམ་ལྡན་འདས་ཀྱིས་ཕྱག་ས་ལ་རེག་པས་ཀླུ་རྣམས་ཀྱིས་པདྨ་ཤིང་རྟའི་འཕང་ལོ་ཙམ་གསེར་གྱི་འདབ་མ་སྟོང་དང་ལྡན་པ་རྡོ་རྗེའི་ཟེ་བ་ཅན་ཕུལ་བ་ས་བརྟོལ་ནས་ཕྱུང་བ་དང་། བཅོམ་ལྡན་འདས་པདྨ་དེའི་སྙིང་པོ་ལ་བཞུགས་སོ། ། དེ་བཞིན་དུ་པདྨ་དེ་འདྲ་བ་རབ་ཏུ་མང་པོ་བྱུང་བ་རེ་རེ་ལ་སྤྲུལ་པའི་སངས་རྒྱས་མང་པོ་བཞུགས་པས་འོག་མིན་གྱི་བར་དུ་གང་ཞིང་སངས་རྒྱས་དེ་དག་ཁ་ཅིག་ནི་འབར། ཁ་ཅིག་ནི་གསལ་བར་མཛད། ཁ་ཅིག་ནི་ཆར་འབེབས། ཁ་ཅིག་ནི་གློག་འབྱིན། ཁ་ཅིག་ནི་ཀུན་ཤེས་པ་ལུང་སྟོན། ཁ་ཅིག་ནི་ཞུ་བ་ཞུ། ཁ་ཅིག་ནི་ལན་འདེབས། ཁ་ཅིག་ནི་འཆག་པར་མཛད། ཁ་ཅིག་ནི་བཞེས། ཁ་ཅིག་ནི་བཞེངས། ཁ་ཅིག་ནི་བཞུགས། ཁ་ཅིག་ནི་གཟིམས་ཏེ་ཇི་ལྟར་བྱིས་པ་རྣམས་ཀྱིས་ཀྱང་སྒྲིབ་པ་མེད་པར་སངས་རྒྱས་ཀྱི་སྐུ་མཐོང་བ་དེ་ལྟར་བྱིན་གྱིས་བརླབས་སོ། ། ཡུལ་སོ་སོ་ནས་ལྷགས་པའི་རྒྱལ་པོ་འཁོར་དང་བཅས་པ་དང་། ལྷ་དང་མི་འབུམ་ཕྲག་དུ་མ་ཆོ་འཕྲུལ་ལ་མིག་མི་འཛུམ་པར་བལྟ་ཞིང་རྒྱུན་མི་འཆད་པར་ཕྱག་འཚལ། དགའ་བ་སྐྱེས་ནས་མེ་ཏོག་དང་སྤོས་ཀྱི་ཕྱེ་མ་དག་གིས་གཏོར་ཏོ། ། སྤྲུལ་པའི་སངས་རྒྱས་རྣམས་ཀྱིས་ཀྱང་། བརྩམས་པར་བྱ་ཞིང་ཞེས་པ་ལ་སོགས་པ་ཚིགས་སུ་བཅད་པ་དག་གསུངས་ནས། བཅོམ་ལྡན་འདས་ཀྱིས་དགེ་སློང་དག་ཆོ་འཕྲུལ་ཆེན་པོ་མི་སྣང་བར་འགྱུར་གྱིས་མཚན་མ་ཟུངས་ཤིག ། ཅེས་གསུངས་པའི་མོད་ལ་མི་སྣང་བར་གྱུར་ཏོ། ། གསལ་རྒྱལ་གྱིས་སྟོན་པ་དྲུག་ལ་སྨྲས་པ། ཀྱེ་བཅོམ་ལྡན་འདས་ཀྱིས་ནི་ཆོ་འཕྲུལ་བསྟན་ཟིན་གྱིས། ཁྱེད་རྣམས་ཀྱི་རེས་ལ་བབ་པས་སྟོན་ཅིག ། དེའི་ཚེ་རྫོགས་བྱེད་ཅང་མི་སྨྲ་བར་གནག་ལྷས་ཀྱི་བུ་ལ་གྲུ་ཕུག་བྱས་པས། དེས་ཀྱང་ཡང་དག་རྒྱལ་བ་ཅན་ལ། དེས་ཀྱང་མི་ཕམ་པ་ལ། དེས་ཀྱང་ཀཱ་ཏྱའི་བུ་ནོག་ཅན་ལ། དེས་ཀྱང་གཉེན་གྱི་བུ་ལ། དེས་ཀྱང་རྫོགས་བྱེད་ལ་བྱས་སོ། ། རྒྱལ་པོས་ལན་གསུམ་གྱི་བར་དུ་སྨྲས་ཀྱང་ཅང་མི་ཟེར་བར་གཅིག་ལ་གཅིག་གྲུ་ཕུག་བྱེད་ཅིང་ཡུལ་ཡུལ་པོ་དང་ཞུམ་ཞུམ་པོར་གྱུར་ནས་མགོ་སྨད་ཅིང་སྤོབས་པ་མེད་དེ་སེམས་ཁོང་དུ་ཆུད་ནས་འདར་ཞིང་འདུག་གོ ། དེ་ནས་བཅོམ་ལྡན་འདས་ཀྱི་ཕྱག་གིས་སེང་གེའི་ཁྲི་མནན་པས་དེ་ལས་བ་ལང་གི་སྐད་ལྟ་བུའི་སྒྲ་ཆེན་པོ་གྲག་མ་ཐག་སྲིན་པོ་ཆེན་པོ་ལྔ་བྱུང་ནས་སྟོན་པ་དྲུག་གི་ཁྲི་བཤིག་གོ ། ཕྱག་ན་རྡོ་རྗེས་ནི་རྩེ་ལ་མེ་འབར་བའི་རྡོ་རྗེ་ཐོགས་ནས་སྟོན་པ་དྲུག་གི་མགོར་གཟས་ཤིང་རླུང་དམར་དང་ཆར་དྲག་པོ་བཏང་བས་སྟོན་པ་དྲུག་པོ་སྔངས་ཤིང་འཇིགས་སྐྲག་ནས་བྱེར་ཏེ། གནག་ལྷས་ཀྱི་བུ་རིའི་གསེབ་ཏུ་ཞུགས། ཡང་དག་རྒྱལ་བ་ཅན་ནི་རྩྭའི་ཚང་ཚིང་དུ། མི་ཕམ་སྐྲའི་ལ་བ་ཅན་ནགས་ཐིབས་པོར། ཀཱ་ཏྱའི་བུ་ནོག་ཅན་འདུན་ཁང་དུ། གཉེན་གྱི་བུ་ནི་ལྷ་ཁང་དུ་ཞུགས་སོ། ། རྫོགས་བྱེད་ནི་རྫིང་དུ་ལྕེབས་ཏེ་དམྱལ་བ་ཆེན་པོར་སོང་ངོ་། ། དེ་ནས་རྫོགས་བྱེད་དང་མིང་གཅིག་པའི་སློབ་མའི་གཙོ་བོ་ཞིག་ཚབ་ཏུ་བསྐོས་ཏེ། སྟོན་པ་དྲུག་པོ་བྲམ་ཟེའི་གྲོང་དུ་བྲོས་སོ། ། དེ་དག་གི་འཁོར་དགུ་ཁྲི་སངས་རྒྱས་ལ་དད་ནས་རབ་ཏུ་བྱུང་སྟེ་དགྲ་བཅོམ་ཐོབ་བོ། ། དེ་ནས་བཅོམ་ལྡན་འདས་ཀྱི་བ་སྤུའི་ཁུང་བུ་བརྒྱད་ཁྲི་ནས་འོད་བཀྱེ་སྟེ། འོད་རེ་རེ་ལ་པདྨའི་སྟེང་དུ་སྤྲུལ་པའི་སངས་རྒྱས་ཆོས་འཆད་པ་བཞུགས་པར་བསྟན་ཏོ། ། དེ་ནས་ཚེས་དགུ་ལ་ཚངས་པས་བསྙེན་བཀུར་བ་ན་བཅོམ་ལྡན་འདས་ཀྱི་སྐུ་ཚངས་གནས་ལ་ཐུག་གི་བར་དུ་མཐོ་བ་འོད་ཟེར་གྱིས་གནམ་ས་གསལ་བར་མཛད་དེ་ཆོས་བསྟན་ཏོ། ། ཚེས་བཅུ་ལ་རྒྱལ་ཆེན་བཞིས་བསྙེན་བཀུར་བ་ན་སྲིད་པའི་རྩེ་ལ་ཐུག་གི་བར་གྱི་སྐུ་ལས་འོད་ཟེར་འབར་བར་གྱུར་ཏོ། ། ཚེས་བཅུ་གཅིག་ལ་ཁྱིམ་བདག་མགོན་མེད་ཟས་སྦྱིན་གྱིས་བསྙེན་བཀུར་བ་ན་སེང་གེའི་ཁྲི་ལ་བཞུགས་བཞིན་དུ་སྐུ་མི་སྣང་བར་མཛད་ནས་འོད་བཀྱེ་སྟེ་ཆོས་བསྟན་ཏོ། ། ཚེས་བཅུ་གཉིས་ལ་ཁྱིམ་བདག་ཙི་ཏས་བསྙེན་བཀུར་བ་ན་བཅོམ་ལྡན་འདས་བྱམས་པའི་ཏིང་ངེ་འཛིན་ལ་བཞུགས་ནས་གསེར་གྱི་འོད་བཀྱེ་བས་དེས་རེག་པའི་སེམས་ཅན་ཀུན་བྱམས་པ་ལ་གནས་པར་མཛད་དོ། ། ཚེས་བཅུ་གསུམ་ལ་རྒྱལ་པོ་ཤུན་ཙི་ད་ལས་བསྙེན་བཀུར་བ་ན་སྟོན་པ་སེང་གེའི་ཁྲི་ལ་བཞུགས་པའི་སྐུའི་ལྟེ་བ་ནས་འོད་ཟེར་གཉིས་བྱུང་བ། སྐུ་ལས་འདོམ་བདུན་ཙམ་དུ་ནམ་མཁའ་ལ་འཕགས་ནས་འོད་ཟེར་གཉིས་པོ་དེའི་སྟེང་ནས་པདྨ་གཉིས་བྱུང་བ་ལ་སྤྲུལ་པའི་སངས་རྒྱས་གཉིས་བྱུང་ཞིང་། དེ་གཉིས་ཀྱི་ལྟེ་བ་ནས་ཀྱང་འོད་ཟེར་གཉིས་གཉིས་བྱུང་སྟེ་ཚུལ་དེ་འདྲ་བས་སྟོང་ཆེན་པོའི་འཇིག་རྟེན་གང་བར་སྤྲུལ་ཏོ། ། ཚེས་བཅུ་བཞི་ལ་རྒྱལ་པོ་ཨུ་ཏྲ་ཡ་ནས་བསྙེན་བཀུར་བ་ན་དེས་མེ་ཏོག་གཏོར་བ་དེ་དག་ཚངས་པའི་འཇིག་རྟེན་ལ་ཐུག་པའི་རིན་པོ་ཆེའི་ཤིང་རྟ་གསེར་ལྟར་འབར་བ་ནོར་བུ་རིན་པོ་ཆེས་སྤྲས་པ་སྟོང་ཉིས་བརྒྱ་ལྔ་བཅུར་གྱུར་ཅིང་། དེ་རེ་རེའི་སྟེང་དུ་སྤྲུལ་པའི་སངས་རྒྱས་རེ་རེ་བཞུགས་ཏེ་འོད་ཀྱིས་སྟོང་གསུམ་མཐོང་བར་མཛད་དོ། ། ཚེས་བཅོ་ལྔའི་ཉིན་རྒྱལ་པོ་གཟུགས་ཅན་སྙིང་པོས་བསྙེན་བཀུར་བ་ན་སྣོད་ཐམས་ཅད་ཟས་རོ་བརྒྱ་དང་ལྡན་པས་གང་སྟེ་ཆོ་འཕྲུལ་བལྟ་བའི་འཁོར་ཐམས་ཅད་ཚིམ་པ་དང་། བཅོམ་ལྡན་འདས་ཀྱིས་ཕྱག་ས་ལ་རེག་པས་དམྱལ་ཁམས་བཅོ་བརྒྱད་ཀྱི་སེམས་ཅན་སྡུག་བསྔལ་སྣ་ཚོགས་མྱོང་བ་མེ་འབར་བས་སྲེག་པ་སོགས་སྡུག་བསྔལ་གྱིས་མནར་བ་དག་བདག་ཅག་སྡུག་བསྔལ་འདི་ལྟ་བུ་མྱོང་ངོ་ཞེས་སྨྲ་བ་འཁོར་རྣམས་ཀྱིས་མཐོང་ཞིང་ཐོས་པས་སྐྲག་ཅིང་སྙིང་རྗེ་སྐྱེས་ལ། དམྱལ་བ་པ་རྣམས་ཀྱིས་ཀྱང་སངས་རྒྱས་མཐོང་ཞིང་སངས་རྒྱས་ཀྱི་ཕྱག་སོར་ལྔ་ལས་གསེར་བཙོ་མ་ལྟ་བུའི་འོད་ཟེར་ཐོན་ནས་འོད་དེས་དམྱལ་བ་པ་རྣམས་ཀྱི་ལུས་ལ་རེག་པ་ཙམ་གྱིས་སྡུག་བསྔལ་རྣམས་ཞི་ཞིང་ཆོས་ཐོས་མ་ཐག་མཐོ་རིས་སུ་སྐྱེས་སོ། ། དེ་ལྟར་སྟོན་པས་མཉན་ཡོད་དུ་ཆོ་འཕྲུལ་ཆེན་པོ་བསྟན་པ་ན་ལྷ་དང་མི་དད་པ་ཅན་དག་གིས་གནས་དེར་ཆོ་འཕྲུལ་བསྟན་པའི་མཆོད་རྟེན་དབྱིབས་གྲུ་བཞི་བང་རིམ་བཞི་པ་ཕྱོགས་རེར་གློ་འབུར་དང་བཅས་པ་བརྩིགས་སོ། ། དེ་ནས་རིམ་གྱིས་ལྷ་དང་མིའི་ཡུལ་སྣ་ཚོགས་སུ་ཆོས་ཀྱི་འཁོར་ལོ་མཐའ་ཡས་པ་བསྐོར། དེ་ནས་བྱ་རྒོད་ཕུང་པོའི་རིར་ཕྱོགས་བཅུའི་ཞིང་རབ་འབྱམས་ནས་འདུས་པའི་བྱང་ཆུབ་སེམས་དཔའ་བགྲང་བ་ལས་འདས་པ་དང་། ཉན་ཐོས་བགྲང་བ་ལས་འདས་པ་དང་ལྷ་དང་ཀླུ་ལ་སོགས་པའི་གདུལ་བྱ་བགྲང་བ་ལས་འདས་པ་ལ་ཤེར་ཕྱིན་གྱི་མདོ་སྡེ་རིན་པོ་ཆེ་བཀའ་སྩལ་ཏོ། ། དེ་ལ་བཀའ་བར་པ་མཚན་ཉིད་མེད་པའི་ཆོས་འཁོར་ཞེས་བརྗོད་དོ། ། དེ་ནས་ཡུལ་གཞན་དང་གཞན་དུ་ཏིང་ངེ་འཛིན་རྒྱལ་པོའི་མདོ་དང་། སངས་རྒྱས་ཕལ་པོ་ཆེ་དང་། འཕགས་པ་དཀོན་མཆོག་བརྩེགས་པ་ཆེན་པོ་སོགས་བཀའ་བར་པའི་སྡེར་གཏོགས་ཀྱི་མདོ་མཐའ་ཡས་པ་གསུངས། དེ་ནས་ཡངས་པ་ཅན་ལ་སོགས་པར་མདོ་སྡེ་དགོངས་འགྲེལ་སོགས་བཀའ་ཐ་མའི་སྡེར་གཏོགས་ཀྱི་མདོ་རྣམས་གསུངས། གསང་སྔགས་ཀྱི་ཆོས་འཁོར་བསྐོར་ཚུལ་ནི། བྱ་རྒོད་ཕུང་པོར་ཤེར་ཕྱིན་གྱི་མདོ་གསུང་བ་དང་དུས་མཉམ་དུ་དཔལ་ལྡན་འབྲས་སྤུངས་ཀྱི་མཆོད་རྟེན་དུ་དཔལ་དུས་ཀྱི་འཁོར་ལོ་སོགས་སྔགས་བླ་མེད་ཀྱི་ཆོས་མཐའ་ཡས་པ་གསུངས། དེ་བཞིན་དུ་རི་རབ་ཀྱི་རྩེ་དང་། སུམ་ཅུ་རྩ་གསུམ་གྱི་གནས་དང་། དགའ་ལྡན་གྱི་གནས་དང་། གནས་གཙང་མ་ལ་སོགས་པའི་ལྷ་གནས་མང་པོ་དང་། ཀླུའི་གནས་དང་། གནོད་སྦྱིན་གྱི་གནས་དང་། ཨཽ་ཌཱི་ཡ་ན་ལ་སོགས་པའི་འཛམ་བུའི་གླིང་གི་གནས་ཁྱད་པར་ཅན་མང་པོར་གསང་སྔགས་རྒྱུད་སྡེ་བཞིའི་ཆོས་མཐའ་ཡས་པ་གསུངས་སོ། ། དེ་ལས་བླུན་རྨོངས་འགའ་ཞིག་འདི་སྙམ་དུ་སྟོན་པ་ཐུབ་པའི་དབང་པོས་མདོ་ཕྱོགས་ཀྱི་ཆོས་རྣམས་གསུངས་པ་ཡིན་གྱི་སྔགས་ཀྱི་རྒྱུད་རྣམས་མ་གསུངས་སོ་སྙམ་དུ་སེམ་ཞིང་དེ་སྐད་དུ་སྨྲ་བ་ནི་རྣམ་པར་མི་འཚམ་པའི་བབ་ཅོལ་ཏེ། སྟོན་པས་སུམ་ཅུ་རྩ་གསུམ་དུ་དབྱར་གནས་མཛད་པའི་ཚེ་ཆོས་བཟང་ལྷའི་མདུན་སར་དབུའི་གཙུག་ཏོར་ནས་འཕགས་མ་གདུགས་དཀར་མོ་ཅན་གཞན་གྱིས་མི་ཐུབ་པ་མཆོག་ཏུ་གྲུབ་པའི་གཟུངས་བཀའ་སྩལ་ཏེ། དེ་ནས་བཟུང་སྟེ་བྱ་རྒྱུད་དེ་བཞིན་གཤེགས་པའི་རིགས་འཕགས་མ་གདུགས་དཀར་ཅན་གྱི་དབང་དང་གདམས་ངག་ད་ལྟའི་བར་དུ་རྒྱུན་མ་ཆད་པར་ཡོད་དོ། ། ཡང་བཅོམ་ལྡན་འདས་རི་བོ་པོ་ཏ་ལར་ཕེབས་པའི་ཚེ་ཐུགས་རྗེ་ཆེན་པོ་སེང་གེ་སྒྲའི་གཟུངས་གསུངས་ཤིང་གཞན་ཡང་ཐུགས་རྗེ་ཆེན་པོ་དོན་ཡོད་ཞགས་པའི་གཟུངས་དང་། ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་གཟུངས་སོགས་བྱ་བའི་རྒྱུད་མང་དུ་གསུངས་ཤིང་། བྱ་རྒྱུད་པདྨའི་རིགས་ཀྱི་དབང་དང་གདམས་ངག་ཀྱང་ད་ལྟའི་བར་དུ་རྒྱུན་མ་ཆད་པར་ཡོད་དོ། ། ཡང་སྟོན་པས་རྒྱལ་པོ་མ་སྐྱེས་དགྲའི་སྡིག་སྒྲིབ་སྦྱོང་བའི་ཆེད་དུ་བྱ་རྒྱུད་རྡོ་རྗེའི་རིགས་རྣམ་འཇོམས་ཀྱི་རྒྱུད་གསུངས་ཤིང་དེའི་གདམས་ངག་ཀྱང་རྒྱུན་མ་ཆད་པར་ཡོད་དོ། ། གཞན་ཡང་དམ་ཚིག་གསུམ་བཀོད་སོགས་བྱ་བའི་རྒྱུད་མཐའ་ཡས་པ་གསུངས་པ་ཡོངས་སུ་གྲགས་པ་ལྟར་དང་། སྤྱོད་རྒྱུད་རྣམ་སྣང་མངོན་བྱང་དང་ལག་ན་རྡོ་རྗེ་དབང་བསྐུར་བའི་རྒྱུད་སོགས་གསུངས་པ་དང་། རྣལ་འབྱོར་གྱི་རྒྱུད་རྡོ་རྗེ་དབྱིངས་ཀྱི་དཀྱིལ་འཁོར་དང་། དེ་ཉིད་བསྡུས་པ་སོགས་མངོན་པར་བྱང་ཆུབ་པའི་དུས་སུ་འོག་མིན་དུ་གསུངས་པ་དང་། སུམ་ཅུ་རྩ་གསུམ་དུ་དབྱར་གནས་མཛད་པའི་ཚེ་ལྷའི་བུ་ནོར་བུ་དྲི་མ་མེད་པ་ཤི་ནས་དམྱལ་བར་སྐྱེས་པ་བརྒྱ་བྱིན་གྱིས་མཐོང་ནས་བཅོམ་ལྡན་འདས་ལ་དེ་ངན་སོང་ལས་ཐར་བའི་ཐབས་ཞུས་པས། བཅོམ་ལྡན་འདས་ཀྱིས་ངན་སོང་ཡོངས་སུ་སྦྱོང་བའི་རྒྱུད་གསུངས་ནས་བརྒྱ་བྱིན་ལ་དེའི་གདམས་ངག་གནང་ནས་བརྒྱ་བྱིན་གྱིས་ངན་སོང་སྦྱོང་བའི་ཆོ་ག་བྱས་པས་ལྷའི་བུ་དེ་དེ་མ་ཐག་དམྱལ་བ་ནས་ཐར་ཏེ་ལྷ་གནས་གོང་མར་སྐྱེས་ནས་སྟོན་པ་ལ་བཀའ་དྲིན་དྲན་པའི་དད་གུས་ཆེན་པོས་ཕྱག་དང་མཆོད་པ་བྱས་ཏེ། ཨེ་མ་སངས་རྒྱས་རྣམས་ཀྱི་ནི། ། སྔགས་ཀྱི་བྱིན་རླབས་ཡ་མཚན་ཆེ། ། གང་ཕྱིར་མཚམས་མེད་ལྷུང་པ་ཡི། ། སེམས་ཅན་ལྷ་གནས་མྱུར་དུ་སྐྱེས། ། ཞེས་ཆེད་དུ་བརྗོད་པ་ཡོངས་སུ་གྲགས་པ་ལྟར་དང་། རྣལ་འབྱོར་བླ་ན་མེད་པའི་རྒྱུད་སྟོན་པས་གསུངས་པ་ནི། བཅོམ་ལྡན་འདས་ཀྱིས་ནག་པའི་ཉ་ལ་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར་ཤམ་བྷ་ལའི་རྒྱལ་པོ་ཟླ་བ་བཟང་པོས་གསོལ་བ་བཏབ་ནས་འཁོར་བྱེ་བ་ཕྲག་དུ་མ་ལ་དུས་འཁོར་གྱི་རྒྱུད་གསུངས་ཤིང་རྡོ་རྗེ་འཇིགས་བྱེད་ཆེན་པོའི་རྩ་བའི་རྒྱུད་ལ་སོགས་པ་བླ་མེད་ཀྱི་རྒྱུད་ཕལ་མོ་ཆེ་གསུངས་ནས་གསང་བའི་བདག་པོ་ཕྱག་ན་རྡོ་རྗེ་ལ་རྒྱུད་གཏད་པར་མཛད་པ་དང་། གཞན་ཡང་བླ་མེད་ཀྱི་རྒྱུད་ཐམས་ཅད་ཀྱི་རབ་དང་ཕུལ་དང་རྩ་མོར་གྱུར་པ་ནི་དཔལ་གསང་བ་འདུས་པའི་རྒྱུད་ཡིན་པར་གྲུབ་ཆེན་ཐམས་ཅད་མཐུན་པར་གསུངས་ལ། གསང་བ་འདུས་པའི་རྒྱུད་བཅོམ་ལྡན་འདས་ཀྱིས་གསུངས་པ་ནི་འདུས་པའི་གླེང་གཞིར། བཅོམ་ལྡན་འདས་རྡོ་རྗེ་བཙུན་མོའི་བྷ་གའི་དབྱིབས་ཅན་གྱི་ཆོས་འབྱུང་གི་ནང་གི་གཞལ་ཡས་ཁང་གི་དབུས་སུ་བཞུགས་ནས་ནམ་མཁའི་དབྱིངས་ཐམས་ཅད་ཡོངས་སུ་གང་བའི་འཁོར་གྱི་ཚོགས་ལ་འདུས་པའི་རྒྱུད་གསུངས་པར་བཤད་ཅིང་། རྩ་རྒྱུད་ལེའུ་བཅུ་བདུན་པར་རྗེ་བཙུན་བྱམས་པ་མགོན་པོ་དང་ཕྱག་ན་རྡོ་རྗེ་ལ་སོགས་པའི་འཁོར་རྣམས་ཀྱིས་བཅོམ་ལྡན་འདས་ལ་འདི་སྐད་གསོལ་ཏེ། བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བ་བསྐལ་པ་གྲངས་མེད་པ་འདས་པའི་སྔོན་རོལ་ཏུ་དེ་བཞིན་གཤེགས་པ་མར་མེ་མཛད་འདས་པ་ནས་བཟུང་འོད་སྲུངས་ཀྱི་བར་དུ་སངས་རྒྱས་རྣམས་ཀྱིས་བླ་མེད་ཀྱི་རྒྱུད་མ་གསུངས་པ་ལ་བཅོམ་ལྡན་འདས་ཉིད་ཀྱིས་གསུངས་པ་ལ་ངོ་མཚར་ཆེ་བའི་བསྔགས་པ་རྒྱ་ཆེར་བརྗོད་པ་ལྟར་དང་། བཅོམ་ལྡན་འདས་ཀྱིས་ཨོ་ཌཱི་ཡ་ནའི་ཡུལ་དུ་རྒྱལ་པོ་ཨིནྡྲ་བྷཱུ་ཏི་རྗེས་སུ་བཟུང་བའི་ཕྱིར་དུ་གསང་བ་འདུས་པའི་རྒྱུད་གསུངས་ཤིང་ཕྱག་རྡོར་ལ་རྒྱུད་བཏད་པར་མཛད། དེར་རྒྱལ་པོ་ཨིནྡྲ་བྷཱུ་ཏིས་ཀྱང་བསྒོམས་ནས་ཚེ་གཅིག་ཉིད་ལ་ཟུང་འཇུག་གྲུབ་པར་གྲུབ་ཆེན་ཐམས་ཅད་མཐུན་པར་གསུངས་པ་ལྟར་རོ། ། དེ་ལ་འདི་སྙམ་དུ་བླ་མེད་ཀྱི་རྒྱུད་ཕལ་ཆེར་དུ་རྡོ་རྗེ་འཆང་གིས་གསུངས་ཞེས་འབྱུང་གི། བཅོམ་ལྡན་འདས་ཤཱཀྱ་ཐུབ་པས་གསུངས་ཞེས་མི་འབྱུང་བས་བཅོམ་ལྡན་འདས་ཀྱིས་གསུངས་པ་མིན་ནོ་ཞེ་ན། དེ་ནི་རྣམ་པར་མ་བརྟགས་པའི་གཏམ་སྟེ། བཅོམ་ལྡན་འདས་ཀྱིས་ལོངས་སྐུའི་ཆ་ལུགས་ཀྱིས་དཀྱིལ་འཁོར་གྱི་གཙོ་བོར་བཞེངས་ནས་རྒྱུད་གསུངས་པ་རྣམས་བཅོམ་ལྡན་འདས་ཀྱིས་གསུངས་པ་མིན་ཞེས་ཇི་ལྟར་སྨྲ། བཅོམ་ལྡན་འདས་ཀྱིས་ཆ་ལུགས་བསྒྱུར་ནས་ཆོས་བསྟན་པ་འདུལ་བ་ལུང་ན་ཡང་སྣང་སྟེ། མཐའ་འཁོབ་ཀྱི་རྒྱལ་པོ་ཀ་པི་ནས་གྲོང་ཁྱེར་ཆེན་པོ་དྲུག་གི་རྒྱལ་པོ་ཐམས་ཅད་དང་། ཁྱད་པར་རྒྱལ་པོ་གསལ་རྒྱལ་ལ་ཆེད་དུ་དམིགས་པའི་ཕོ་ཉ་བཏང་བ། ཁྱེད་རྣམས་ཞག་བདུན་ན་ང་འཕྲད་པར་ཤོག་ཅིག ། དེ་ལྟར་མ་འོངས་ན་དམག་དྲངས་ཏེ་ཁྱེད་ཀྱི་ཡུལ་མེད་པར་བྱེད་དོ་ཞེས་སྤྲིངས་པ་དང་། ཕོ་ཉ་དེས་གྲོང་ཁྱེར་ལྔར་ཕྱིན་ཏེ་གཏམ་དེ་སྨྲས་པ་དང་། དེ་རྣམས་སྐྲག་ནས་མཉན་ཡོད་དུ་ལྷགས་ཏེ་རྒྱལ་པོ་གསལ་རྒྱལ་ལ་དོན་དེ་སྨྲས་པ་དང་། ཕན་ཚུན་བགྲོས་ཏེ་བཅོམ་ལྡན་འདས་ཀྱི་སྤྱན་སྔར་ཕྱིན་ནས་དོན་དེ་ཞུས་པ་ན་བཅོམ་ལྡན་འདས་ཀྱིས་ཕོ་ཉ་དེ་ངའི་གན་དུ་ཐོངས་ཤིག་ཅེས་གསུངས་པས་རྒྱལ་པོ་གསལ་རྒྱལ་སོགས་ཀྱིས་ཕོ་ཉ་ལ་ངེད་ལས་ལྷག་པའི་འཕྲུལ་གྱི་རྒྱལ་པོ་ཞིག་བཞུགས་པས་དེའི་གན་དུ་སོངས་ཤིག ། དེས་རྒྱལ་བྱེད་ཚལ་དུ་སོང་བ་དང་། བཅོམ་ལྡན་འདས་འཁོར་ལོས་སྒྱུར་བའི་ཆ་བྱད་དུ་བཞུགས་པ་ལ་ཕྲིན་ཡིག་དེ་ཕུལ་བ་དང་། འཕྲུལ་གྱི་རྒྱལ་པོས་ཡི་གེ་དེ་རྡོག་པས་མནན་ནས། ཕོ་ཉ་ལ་འདི་སྐད་ཅེས་བཀའ་སྩལ་ཏོ། ། ང་ནི་རྒྱལ་པོ་ཆེན་པོ་གླིང་བཞི་ལ་དབང་བ་ཡིན་ན་ཁྱོད་ཀྱི་རྒྱལ་པོ་གླེན་པ་དེ་ཅིའི་ཕྱིར་བཀའ་མི་ཉན། ཁྱོད་སོངས་ལ་ངས་འདི་སྐད་ཅེས་བཀའ་སྩལ་ཏོ། ། ཞེས་གྱིས་ཤིག ། ཁྱོད་ཞག་བདུན་ན་ངའི་གན་དུ་ཤོག་ཅིག ། དེ་མ་འོངས་ན་ཁྲིམས་ལ་སྦྱར་རོ། ། ཞེས་གྱིས་ཤིག ། ཅེས་བསྒོ་ནས་བཏང་བ་ན། རྒྱལ་པོ་ཀ་པི་ན་མཉན་ཡོད་དུ་ལྷགས་པ་ཉི་འོག་གི་རྒྱལ་པོ་རྣམས་ཀྱིས་ཀ་པི་ན་བསུས་ཏེ་རྒྱལ་བྱེད་ཚལ་དུ་ཕྱིན་པ་ན། དེའི་ཚེ་རྒྱལ་བྱེད་ཚལ་ལྷའི་གྲོང་ཁྱེར་བལྟ་ན་སྡུག་འདྲ་བར་སྤྲུལ་ཞིང་བཅོམ་ལྡན་འདས་ཀྱང་འཁོར་ལོས་སྒྱུར་བའི་ཆ་ལུགས་སུ་བཞུགས། མོའུ་འགལ་གྱི་བུ་ཆེན་པོ་ནི་བློན་པོ་རིན་པོ་ཆེར་སྤྲུལ་ཏོ། ། དེ་རྒྱལ་པོ་ཀ་པི་ན་ཆེན་པོས་མཐོང་བ་དང་། འདི་བདག་ལས་བྱད་གཟུགས་ནི་ལྷག་ན་སྟོབས་ནི་ཇི་འདྲ་བ་ཞིག་སྙམ་པ་དང་། བརྒྱ་བྱིན་གྱིས་དབང་པོའི་གཞུ་ཁྱེར་ཏེ་ཁ་ལོ་བའི་ཆས་སུ་བྱས་ནས་བློན་པོ་ཆེན་པོ་ལ་ཕུལ་ལོ། ། བློན་པོས་ཀྱང་རྒྱལ་པོའི་བཀས་གསེར་སའི་རྒྱལ་པོ་ལ་བྱིན་པ་དང་དེས་བླངས་ཀྱང་མ་ཐེག་གོ ། དེ་ནས་འཕྲུལ་གྱི་རྒྱལ་པོས་གཞུ་དེ་བླངས་ཏེ་མཐེ་ཆུང་གིས་བདུངས་ནས་ཀ་པི་ན་ལ་འགེངས་སུ་བཅུག་པ་དང་། དེས་བསྒུལ་བར་ཡང་མ་ནུས་ནས་འཕྲུལ་གྱི་རྒྱལ་པོ་བཅོམ་ལྡན་འདས་ཀྱིས་གནམ་རུ་དེའི་གཞུ་རྒྱུད་སྦྲེངས་པ་ཙམ་གྱིས་ས་གཡོས་མདའ་གཅིག་འཕངས་པས་ལྕགས་ཀྱི་རྔ་བོ་ཆེ་བདུན་ཐལ་ཕྱུང་དུ་སོང་ནས་མདའ་ལྔར་གྱུར་ཏེ། དེ་དག་གི་རྩེ་མོ་ལས་འོད་ཟེར་གྲངས་མེད་པ་བྱུང་ནས་འོད་ཟེར་རེའི་རྩེ་ལ་འཁོར་ལོས་སྒྱུར་བའི་རྒྱལ་པོ་རེ་རེ་བྱུང་ངོ་། ། འོད་ཟེར་དེ་དག་གིས་སེམས་ཅན་སོ་སོའི་དོན་བྱས་ཤིང་ཆེད་དུ་བརྗོད་པ་དང་ཆོས་སྟོན་པའི་སྒྲ་དག་ཀྱང་གྲག་གོ ། དེ་ནས་རྒྱལ་པོ་ཀ་པི་ན་སྟོབས་ཀྱི་དྲེགས་པ་ཞི་ནས་ཨེ་མ་འདི་ཅི་ཞིག་སྙམ་པ་དང་། བཅོམ་ལྡན་འདས་ཀྱིས་དེ་དང་མཐུན་པའི་ཆོས་བསྟན་པས་བདེན་པ་མཐོང་ངོ་། ། དེ་ནས་བཅོམ་ལྡན་འདས་རང་བཞིན་གྱི་སྐུར་མཛད་པ་དང་། རྒྱལ་པོ་ཀ་པི་ན་བློན་པོ་ཁྲི་བརྒྱད་སྟོང་དང་ལྷན་ཅིག་རབ་ཏུ་བྱུང་ནས་དགྲ་བཅོམ་པར་གྱུར་ཏེ། ཚེ་དང་ལྡན་པ་ཀ་པི་ན་ཆེན་པོར་གྲགས་སོ། ། དེ་ལ་རྒྱལ་པོ་ཀ་པི་ན་འཁོར་ལོས་བསྒྱུར་བའི་རྒྱལ་པོས་བཏུལ་བ་ཡིན་གྱི། བཅོམ་ལྡན་འདས་ཀྱིས་བཏུལ་བ་མིན་ཞེས་ཤེས་ལྡན་སུ་ཞིག་སྨྲ། བཅོམ་ལྡན་འདས་ཤཱཀྱ་ཐུབ་པས་གསུངས་ཞེས་པའང་བླ་མེད་ཀྱི་རྒྱུད་ལ་མང་དུ་སྣང་སྟེ། དུས་ཀྱི་འཁོར་ལོའི་རྒྱུད། བཅོམ་ལྡན་འདས་ཤཱཀྱ་ཐུབ་པས་གསུངས་པ་ནི་ཡོངས་སུ་གྲགས་པ་ལྟར་དང་། དུས་འཁོར་གྱི་རྒྱུད་ལ་སོགས་པ་བླ་མེད་ཀྱི་རྒྱུད་མང་པོ་ཞིག་གི་རྩ་བ་ནི་འཇམ་དཔལ་མཚན་བརྗོད་ཡིན་པར་གྲགས་ལ། མཚན་བརྗོད་ལས། དེ་ནས་བཅོམ་ལྡན་ཤཱཀྱ་ཐུབ། ། གསང་སྔགས་རིགས་ཆེན་ཐམས་ཅད་དང་། ། གསང་སྔགས་རིག་སྔགས་འཆང་བའི་རིགས། ། རིགས་གསུམ་ལ་ནི་རྣམ་པར་གཟིགས། ། འཇིག་རྟེན་འཇིག་རྟེན་འདས་པའི་རིགས། ། འཇིག་རྟེན་སྣང་བྱེད་རིགས་ཆེན་དང་། ། ཕྱག་རྒྱ་ཆེན་པོའི་རིགས་མཆོག་དང་། ། རིགས་ཆེན་གཙུག་ཏོར་ཆེར་གཟིགས་ནས། ། ཚིག་གི་བདག་པོས་ཚིགས་སུ་བཅད། ། གསང་སྔགས་རྒྱལ་པོ་དྲུག་ལྡན་ཞིང་། ། གཉིས་སུ་མེད་པར་འབྱུང་བ་དང་། ། མི་སྐྱེ་ཆོས་ཅན་འདི་གསུངས་པ། ། ཞེས་དང་། འཕགས་པ་འཇམ་དཔལ་གྱི་དོན་དམ་པའི་མཚན་ཡང་དག་པར་བརྗོད་པ། བཅོམ་ལྡན་འདས་ཤཱཀྱ་ཐུབ་པས་གསུངས་པ་རྫོགས་སོ། ། ཞེས་འབྱུང་བ་ལྟར་རོ། ། ཡང་བདེ་མཆོག་གི་རྒྱུད་ཀྱང་བཅོམ་ལྡན་འདས་ཤཱཀྱ་ཐུབ་པས་གསུངས་པ་ནི། བདེ་མཆོག་གི་བཤད་རྒྱུད་མཁའ་འགྲོ་རྒྱ་མཚོ་ལས། རྩོད་པའི་དུས་སུ་ཤཱཀྱ་སེང་གེས་གསུངས་པ་ཞེས་གསལ་བར་གསུངས་པ་ལྟར་རོ། ། དེས་ན་བྱང་ཆུབ་ལམ་གྱི་རིམ་པ་ལ་སྙིང་ནས་ཉམས་ལེན་བྱ་བར་འདོད་པ་དག་གིས་བླུན་པོའི་འཆལ་གཏམ་ལ་ཡིད་གཏད་པར་མི་བྱ་བར་ལམ་གྱི་རྩ་བ་བཤེས་གཉེན་བསྟེན་ཚུལ་ནས་བཟུང་། མཐར་སྔགས་ལམ་གྱི་འབྲས་བུ་མཐར་ཐུག་ཟུང་འཇུག་གྲུབ་པའི་བར་ཐམས་ཅད་སྟོན་པ་ཐུགས་རྗེ་ཅན་ཤཱཀྱའི་རྒྱལ་པོ་ཉིད་ཀྱིས་བསྟན་པ་ཡིན་པར་ངེས་པ་གཏིང་ནས་འདྲོངས་པར་བྱས་ལ། རྒྱལ་བའི་བཀའ་ལས་ལྷག་པའི་གདམས་ངག་མེད་པར་ཤེས་པར་བྱས་ལ་རྒྱལ་བའི་བཀའ་ཉིད་གདམས་པའི་མཆོག་ཏུ་ཡིད་ཆེས་པར་བྱའོ། ། དེ་ལྟར་སྟོན་པ་ཐུགས་རྗེ་ཅན་ཤཱཀྱའི་རྒྱལ་པོས་སྡེ་སྣོད་གསུམ་དང་། རྒྱུད་སྡེ་བཞིའི་ཆོས་མཐའ་ཡས་མུ་མེད་པ་ཞིག་བཀའ་སྩལ་པ་དེ་དག་ཀྱང་། ཇི་སྐད་དུ། ལྷ་ཡི་སྐད་དང་ཀླུ་དང་གནོད་སྦྱིན་སྐད། ། གྲུལ་བུམ་དག་དང་མི་ཡི་སྐད་རྣམས་དང་། ། འགྲོ་བ་ཀུན་གྱི་སྒྲ་རྣམས་ཇི་ཙམ་པ། ། ཐམས་ཅད་སྐད་དུ་བདག་གིས་ཆོས་བསྟན་ཏོ། ། ཞེས་གང་གསུངས་པ་ལྟར། ལྷ་དང་ཀླུ་ལ་སོགས་པ་འགྲོ་བ་རང་རང་གི་སྐད་དང་མཐུན་པར་སྟོན་པར་མཛད་ཅིང་གསུང་གཅིག་ཉིད་འགྲོ་བ་རང་རང་གི་སྐད་དང་མཐུན་པར་གོ་བ་དང་། རང་རང་གི་དབང་པོ་དང་བསམ་པ་དང་འཚམས་པའི་ཆོས་མཐའ་ཡས་པ་འབྱུང་བ་དང་། སྐུའི་བ་སྤུའི་ཁུང་བུ་རེ་རེ་ནས་ཀྱང་ཆོས་ཀྱི་རྣམ་གྲངས་མཐའ་ཡས་མུ་མེད་པ་རྒྱུན་དུ་འབྱུང་བས་རྒྱལ་བས་གསུངས་པའི་ཆོས་ཐམས་ཅད་ནི་རྒྱལ་བ་རང་ཉིད་མ་གཏོགས་སུས་ཀྱང་བརྗོད་པར་མི་ནུས་ལ། འོན་ཀྱང་གདུལ་བྱའི་ཉོན་མོངས་པའི་གཉེན་པོ་དང་མཐུན་པར་སྡོམ་གྱིས་བསྡུས་པ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བཀའ་སྩལ་ཅེས་འབྱུང་ངོ་། ། དེ་ལྟར་སྟོན་པ་ཐུགས་རྗེ་ཅན་དེ་ཉིད་ཀྱིས་ཐེག་པ་ཆེ་ཆུང་གི་ཆོས་ཀྱི་འཁོར་ལོ་མཐའ་ཡས་པ་ཞིག་བསྐོར་ཏེ་ལྷ་མི་བགྲང་བ་ལས་འདས་པ་སྨིན་ཅིང་གྲོལ་བར་མཛད་ནས། སྐུ་དངོས་ཀྱི་གདུལ་བྱ་ཀུན་ཏུ་རྒྱུ་རབ་བཟང་དང་། དྲི་ཟའི་རྒྱལ་པོ་རབ་དགའ་གཉིས་འདུལ་བའི་དུས་ལ་བབ་པ་ན་གྲོང་ཁྱེར་རྩ་ཅན་དུ་ཕེབས་ནས། སྟོན་པས་སྐུ་དངོས་ཀྱི་གདུལ་བྱ་རབ་བཟང་དང་། རབ་དགའ་གཉིས་ལུས་པ་ལ། རབ་དགའ་འདུལ་བའི་ཕྱིར་པི་ཝང་རྒྱུད་སྟོང་པ་ཁོག་པ་བཻ་ཌཱུརྱ་ལས་བྱས་པ་བསྣམས་ཏེ་དྲི་ཟར་སྤྲུལ་ནས་རབ་དགའི་སྒོ་དྲུང་དུ་ཕྱིན་པ་དང་། དེ་དང་གླུ་དབྱངས་འགྲན་ཞིང་རྒྱུད་རིམ་གྱིས་གཅིག་མ་གཏོགས་པ་བཅད་ཀྱང་སྒྲ་གདངས་ཁྱད་མེད་དོ། ། དེ་ནས་སྟོན་པས་རྒྱུད་གཅིག་ཀྱང་བཅད་དེ་ནམ་མཁའ་ཁོ་ན་ལས་སྒྲ་གདངས་སྔར་བཞིན་དུ་བྱུང་བ་དང་། རབ་དགའ་ང་རྒྱལ་ཆག་སྟེ་ངོ་མཚར་སྐྱེས་པ་དང་། སྟོན་པས་སྐུ་མངོན་སུམ་དུ་བསྟན་པས་དེ་ལ་རབ་དགའ་དད་ནས་ཕྱག་བྱས་ཏེ་ཆོས་ཉན་པའི་ཕྱིར་འདུག་པ་ལ་ཆོས་བསྟན་ཏེ་བདེན་པ་མཐོང་། ། དེ་ནས་རྫིང་བུ་དལ་འབབ་ཀྱི་འགྲམ་ན་ཀུན་ཏུ་རྒྱུ་རབ་བཟང་ལོ་བརྒྱ་ཉི་ཤུ་ལོན་པ་དགྲ་བཅོམ་པར་གྲགས་པ་ཞིག་ཡོད་པས། རྫིང་དལ་འབབ་ཀྱི་འགྲམ་ཨུ་དུམ་ཝཱ་རའི་ཚལ་གྱི་མེ་ཏོག་རྙིངས་པ་དང་སྟོན་པ་མྱ་ངན་ལས་འདའོ་ཞེས་ཐོས་པའི་རྒྱུས་བདག་གི་ཐེ་ཚོམ་སེལ་བར་འགྱུར་སྲིད་སྙམ་སྟེ་སོང་ནས་ཀུན་དགའ་བོ་ལ་ལན་གསུམ་ཞུས་པས་མ་གནང་བ་སྟོན་པས་མཁྱེན་ནས། ང་དང་མུ་སྟེགས་ཅན་གཏམ་གླེང་བའི་ཐ་མ་འདི་ཡིན་གྱིས་ཐོངས་གསུངས་ནས། རབ་བཟང་ལ་དགའ་བར་བྱ་བའི་གཏམ་མང་པོ་མཛད་ནས། རབ་བཟང་། ང་ནི་ན་ཚོད་ཉི་ཤུ་རྩ་དགུ་ལོན་ཏེ་རབ་ཏུ་བྱུང་ནས་ལོ་གྲངས་ལྔ་བཅུ་ལྷག་ཅིག་ཏུ་དགེ་བ་གང་ཡིན་ཅི་ཞེས་བྱས་གྱུར་ཅིང་། རབ་བཟང་ཆོས་འདུལ་བ་གང་ལ་འཕགས་ལམ་ཡན་ལག་བརྒྱད་མེད་པ་དེ་ལ་དགེ་སྦྱོང་གི་འབྲས་བུ་བཞི་མེད་ལ། ཡན་ལག་བརྒྱད་ཡོད་ན་ཡོད་དེ། འདི་ལས་ཕྱི་རོལ་ན་དགེ་སྦྱོང་མེད་ཅེས་སོགས་གསུངས་པས་བདེན་པ་མཐོང་། ཚུར་ཤོག་གིས་བསྙེན་པར་རྫོགས་པས་དགྲ་བཅོམ་ཐོབ་སྟེ། སྟོན་པ་མྱ་ངན་ལས་འདའ་བ་བལྟ་བར་མི་བཟོད་དོ་སྙམ་ནས་གནས་ལྔ་བྱིན་གྱིས་བརླབས་ནས་མྱ་ངན་ལས་འདས་སོ། ། དེ་ནས་སྟོན་པས་འཁོར་རྣམས་ལ་བཀའ་སྩལ་པ། འཁོར་རྣམ་བཞིས་ཕན་བདེར་འགྱུར་བའི་གསུང་རབ་ཡན་ལག་བཅུ་གཉིས་བཀླག ། སྟོན་པ་སོ་ཐར་ལ་གྱིས། རྒན་པས་གཞོན་པ་རྣམས་ཡོ་བྱད་ཀྱིས་བསྡུ། གཞོན་པས་རྒན་པའི་མིང་འབོད་མི་བྱ། དད་པ་ཅན་ལ་སྟོན་པ་འཁྲུངས་པ། སངས་རྒྱས་པ། ཆོས་གསུངས་པ། མྱ་ངན་ལས་འདས་པའི་ཕྱོགས་བཞི་བསྟན་པར་བྱའོ། ། དགེ་སློང་དག་དཀོན་མཆོག་གསུམ་དང་བདེན་པ་བཞི་ལ་ཐེ་ཚོམ་ཡོད་ན་ཞུས་ཤིག ། ཅེས་གསུངས་ནས་སྐུའི་སྟོད་གཡོགས་བསལ་ཏེ། དགེ་སློང་དག་དེ་བཞིན་གཤེགས་པ་བལྟ་བ་ནི་རྙེད་པར་དཀའ་ཡི་དེ་བཞིན་གཤེགས་པའི་སྐུ་ལ་ལྟོས་ཤིག ། དགེ་སློང་དག་རེ་ཤིག་ཅང་མ་སྨྲ་ཞིག་དང་། འདི་ལྟར་འདུས་བྱས་ཐམས་ཅད་ནི་འཇིག་པའི་ཆོས་ཅན་ཡིན་ཏེ། དེ་ལ་འདི་ནི་དེ་བཞིན་གཤེགས་པའི་གསུང་གི་ཐ་མ་ཡིན་ནོ། ། ཞེས་གསུངས་ནས་ཤིང་སཱ་ལ་ཟུང་གི་འགྲམ་དུ་མ་འོངས་པ་ན་བྱང་ཕྱོགས་གངས་རིའི་ལྗོངས་འདིར་རྒྱལ་བ་རང་ཉིད་ཀྱི་བསྟན་པ་ཡོངས་སུ་རྫོགས་པ་རྒྱ་ཆེར་དར་བར་འགྱུར་རོ་ཞེས་སྟོན་ཕྱིར་དབུ་བྱང་ཕྱོགས་སུ་བསྟན་ནས། དགུང་ལོ་བརྒྱད་ཅུ་སོང་ནས་གྱ་གཅིག་གི་ཐོག་ཏུ་ཕེབས་པ་རྣམ་གནོན་ཞེས་པ་ལྕགས་ཕོ་འབྲུག་གི་ལོ་ས་ག་ཟླ་བའི་ཚེས་བཅོ་ལྔའི་ཉིན་དོན་དམ་པར་ནམ་མཁའ་མ་ཟད་ཀྱི་བར་དུ་གཟུགས་སྐུའི་བཀོད་པ་དང་འཕྲིན་ལས་རྒྱུན་ཆད་པ་མེད་ཀྱང་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་བ་དང་། དེ་བཞིན་གཤེགས་པ་འཇིག་རྟེན་དུ་འབྱུང་བ་ཤིན་ཏུ་དཀོན་ཞིང་རྙེད་པར་དཀའོ་ཞེས་འདོམས་པ་དང་། སྔོན་གྱི་ཐུགས་བསྐྱེད་དང་སྨོན་ལམ་གྱི་དབང་སོགས་ཀྱིས་མྱ་ངན་ལས་འདའ་བའི་ཚུལ་བསྟན་ཏོ། ། དེ་ནས་རྒྱལ་བ་རང་ཉིད་མྱ་ངན་ལས་འདའ་བའི་ཚུལ་བསྟན་ཀྱང་སྔོན་གྱི་ཐུགས་བསྐྱེད་དང་སྨོན་ལམ་གྱི་དབང་གིས་བསྟན་པ་ལོ་ལྔ་སྟོང་དུ་གནས་པར་བྱིན་གྱིས་བརླབས་ཤིང་། སྐུ་གདུང་དང་རིང་བསྲེལ་མང་དུ་འཕེལ་ཏེ་འཛམ་བུའི་གླིང་ཐམས་ཅད་མཆོད་རྟེན་གྱིས་ཁྱབ་པར་བྱིན་གྱིས་བརླབས་སོ། ། སྟོན་པ་སྐུ་བལྟམས་པ། སངས་རྒྱས་པ། མྱ་ངན་ལས་འདས་པ། འདི་རྣམས་ཀྱི་ལོ་དུས་ལ་སྔོན་གྱི་མཁས་པ་རྣམས་ལ་བཞེད་ཚུལ་མི་འདྲ་བ་མང་དུ་བྱུང་སྟེ། མཁས་པ་འགའ་ཞིག་ནི་སྟོན་པ་ཤིང་ཕོ་བྱི་བའི་ལོ་ལྷུམས་སུ་ཞུགས། ཤིང་མོ་གླང་ལ་སྐུ་བལྟམས། ས་མོ་ཕག་ལ་སངས་རྒྱས། ཤིང་ཕོ་སྤྲེའུ་ལོར་མྱ་ངན་ལས་འདས་པར་བཞེད་པ་དང་། མཁས་པ་འགའ་ཞིག་ནི། མེ་མོ་ཡོས་ལ་ལྷུམས་སུ་ཞུགས། ས་ཕོ་འབྲུག་ལ་སྐུ་བལྟམས། ཆུ་ཕོ་སྟག་ལ་སངས་རྒྱས། མེ་མོ་ཕག་ལ་མྱ་ངན་ལས་འདས་པར་བཞེད་པ་དང་། ཡང་མཁས་པ་འགའ་ཞིག་དུས་འཁོར་གྱི་རྩིས་ཀྱི་སྟེང་ནས་རྣམ་དག་ཡར་ལོག་གི་རྩིས་བྱས་པ་ན་སྔར་གྱི་མཁས་པ་དེ་དག་གི་བཞེད་ཚུལ་དེ་དག་ལ། སྟོན་པ་སངས་རྒྱས་པའི་ས་ག་ཟླ་བའི་ཚེས་བཅོ་ལྔའི་ནུབ་མོ་དུས་མེའི་རི་མོ་ས་གའི་སྟེང་དུ་མི་འབབ་པས་སྟོན་པའི་འཁྲུངས་ལོ་སོགས་ལོ་ཁམས་དེ་དག་མི་འཐད་ཅེས་དེ་སུན་ཕྱུང་ནས་སྟོན་པ་སྐུ་བལྟམས་པ་སོགས་ཀྱི་ལོ་དུས་གཞན་དུ་འཆད་པ་དང་། མྱ་ངན་ལས་འདས་པའི་དུས་ཀྱང་ཕལ་མོ་ཆེར་ས་གའི་ཉ་ལ་བཞེད་ཅིང་། མཁས་པ་མང་པོ་ཞིག་སྟོན་ཟླ་ཐ་ཆུང་གི་ཡར་ངོའི་ཚེས་བརྒྱད་ལ་མྱ་ངན་ལས་འདས་པར་བཞེད་པ་སོགས་བཞེད་ཚུལ་མང་དུ་སྣང་ནའང་། འདིར་བརྗོད་པ་དེ་དག་ནི་མཁས་གྲུབ་ནོར་བཟང་རྒྱ་མཚོས་ཇི་ལྟར་གསུངས་པ་ལྟར་བརྗོད་པ་ཡིན་ལ། ཇི་ལྟར་ཡང་བྱང་ཆུབ་ལམ་རིམ་ལ་བློ་སྦྱོང་བ་རྣམས་ཀྱིས་སྟོན་པའི་འཁྲུངས་ལོ་སོགས་ལ་མཁས་པ་མང་པོ་བཞེད་པ་མི་མཐུན་པ་དེ་དག་ལ་བློ་མི་བདེ་བ་བྱ་མི་དགོས་ཏེ། སྟོན་པ་འཁྲུངས་པ་དང་སངས་རྒྱས་པ་སོགས་ལོ་དུས་གང་ལ་ཡིན་ཡང་རུང་། སྟོན་པ་ཐུགས་རྗེ་ཅན་དེ་ཉིད་ཀྱིས་བདག་ཅག་སྙིགས་མའི་འགྲོ་བ་ཉམ་ཐག་རྣམས་ཀྱི་དོན་དུ་དགའ་ལྡན་གྱི་གནས་ནས་ཞིང་འདིར་བྱོན་ཏེ་ལྷུམས་སུ་ཞུགས་པ་དང་། སྐུ་བལྟམས་པ་དང་། རོལ་རྩེད་མཛད་པ་དང་། ཁབ་ནས་བྱུང་སྟེ་དཀའ་བ་སྤྱད་པ་དང་། བྱང་ཆུབ་ཤིང་དྲུང་དུ་བདུད་བཏུལ་ནས་འཚང་རྒྱ་བའི་མཛད་པ་རྣམས་བསྟན་ཅིང་མཛད་པ་བཟང་པོ་དེ་དག་རེ་རེ་ནས་གདུལ་བྱ་བགྲང་བ་ལས་འདས་པ་ཞིག་སྨིན་གྲོལ་ལ་འགོད་པར་མཛད་པ་དང་། ལྷ་དང་མིའི་མཆོད་པ་ཚད་མེད་པས་མཆོད་པ་དང་། སྤྲུལ་པའི་བཀོད་པ་བསམ་གྱིས་མི་ཁྱབ་པ་དེ་ལྟ་བུ་སྟོན་པར་མཛད་དོ་སྙམ་དུ་དད་གུས་བསྒོམ་པར་བྱ་བ་དང་། ལྷག་པར། མཛད་པ་ཀུན་ལས་གསུང་གི་ནི། ། མཛད་པ་མཆོག་ཡིན་དེ་ཡང་ནི། ། འདི་ཉིད་ཡིན་ཕྱིར་མཁས་པ་ཡིས། ། འདི་ལས་སངས་རྒྱས་རྗེས་དྲན་བྱོས། ། ཞེས་གང་གསུངས་པ་ལྟར་ཆོས་ཀྱི་འཁོར་ལོ་བསྐོར་བའི་མཛད་པ་ཇི་སྙེད་ཅིག་མཛད་པ་དེ་ཐམས་ཅད་གདུལ་བྱ་འདུལ་བའི་དོན་ཁོ་ནར་མཛད་ཅིང་། དེ་ཡང་ཐོག་མར་ལྔ་སྡེ་ལ་སྟོད་གཡོགས་སྨད་གཡོགས་ཟླུམ་པོར་བགོ་བ་སོགས་འདུལ་བའི་བསླབ་བྱ་དང་བདེན་པ་བཞིའི་ཆོས་སྟོན་པར་མཛད་པ་དེ་ནས་བཟུང་། ཐ་མར་ཀུན་ཏུ་རྒྱུ་རབ་བཟང་དགྲ་བཅོམ་ལ་བཀོད་པ་དང་། འཁོར་རྣམས་ལ་མི་རྟག་པ་བསྟན་པའི་བར་ཆོས་ཇི་སྙེད་ཅིག་གསུངས་པ་དེ་ཐམས་ཅད་གདུལ་བྱ་རྣམས་ཐར་པ་དང་ཐམས་ཅད་མཁྱེན་པ་ཐོབ་པའི་ཐབས་ཤ་སྟག་ཏུ་གསུངས་པ་ཡིན་པས་ན། བྱང་ཆུབ་ལམ་རིམ་ལ་ཉམས་ལེན་སྙིང་པོར་བྱེད་པ་རྣམས་ཀྱིས་རྒྱལ་བས་གསུངས་པའི་མདོ་སྔགས་ཀྱི་ཆོས་ཇི་སྙེད་ཅིག་ཡོད་པ་དེ་ཐམས་ཅད་གང་ཟག་རང་ཉིད་འཚང་རྒྱ་བའི་ཐབས་ཤ་སྟག་ཏུ་གསུངས་པ་ཡིན་པར་ཤེས་པར་བྱས་ལ་སྟོན་པ་ཐུགས་རྗེ་ཅན་དེས་བདག་འཁོར་བ་དང་ངན་སོང་གི་སྡུག་བསྔལ་ལས་བསྒྲལ་ཏེ་སངས་རྒྱས་ཀྱི་ས་ལ་འགོད་པའི་ཆེད་དུ་ཆོས་འདི་སྙེད་ཅིག་གསུངས་སོ་སྙམ་དུ་སྟོན་པའི་ཡོན་ཏན་དང་བཀའ་དྲིན་དང་ཐུགས་རྗེ་དྲན་པའི་སྒོ་ནས་དད་ཅིང་གུས་པས་མཆོད་ཅིང་གསོལ་བ་གདབ་པ་ལྷུར་བྱའོ། ། སྟོན་པས་ཆོས་སྟོན་པའི་ཐོག་མར་ཡང་ལྔ་སྡེ་ལ་སྡུག་བསྔལ་བདེན་པའི་རྣམ་ལ་མི་རྟག་པ་ནས་བརྩམས་ཏེ་སྟོན་པར་མཛད། མཐར་མྱ་ངན་ལས་འདའ་བའི་ཚེ་འདུས་བྱས་ཐམས་ཅད་ནི་འཇིག་པའི་ཆོས་ཅན་ཡིན་ནོ་ཞེས་མི་རྟག་པ་སྟོན་པར་མཛད་པ་འདི་ལ་བློ་གྲོས་ཅན་རྣམས་ཀྱིས་ལེགས་པར་དཔྱོད་ཤེས་ན་བྱང་ཆུབ་ལམ་རིམ་ལ་ཉམས་ལེན་སྙིང་པོར་བྱ་འདོད་པ་རྣམས་ལ་ཉམས་ལེན་ལ་བསྐུལ་བའི་གནད་ཁྱད་པར་ཅན་ཞིག་ཡིན་པར་ཤེས་པར་ནུས་ཏེ། ཐོག་མར་ཆོས་ལ་བསྐུལ་བའི་ཚེ་ན་ཚེ་འདི་རིང་དུ་མི་གནས་པར་མྱུར་དུ་འཇིག་པའི་ངང་ཚུལ་བསམས་ནས་དེས་བསྐུལ་ཏེ་ཆོས་ལ་འཇུག་དགོས་པ་དང་། སྐྱེས་བུ་འབྲིང་གི་སྐབས་སུ་མི་རྟག་པའི་ཚུལ་བསམས་ནས་འཁོར་བའི་ཕུན་ཚོགས་གང་ལའང་ཡིད་བརྟན་མེད་པའི་ཚུལ་བསམས་ཏེ་དེས་བསྐུལ་ནས་ལམ་སྒོམ་པ་ལ་འཇུག་དགོས་པ་དང་། སྐྱེས་བུ་ཆེན་པོའི་སྐབས་སུའང་མི་རྟག་པ་བསམས་ཏེ་འཁོར་བ་ཐོག་མ་མེད་པ་ནས་སྐྱེ་བ་གཅིག་ནས་གཅིག་ཏུ་རིམ་གྱིས་བརྒྱུད་པའི་ངང་ཚུལ་བསམས་ལ་སེམས་ཅན་ཐམས་ཅད་རང་གི་མར་ཤེས་པ་སོགས་རྒྱུ་འབྲས་མན་ངག་བདུན་གྱི་སྒོ་ནས་བྱང་ཆུབ་ཀྱི་སེམས་སྦྱངས་ཏེ་རྒྱལ་སྲས་ཀྱི་སྤྱོད་པ་ལ་སློབ་པ་དང་། དབུ་མའི་ལྟ་བ་སྒོམ་པའི་ཚེ་ནའང་། དེ་ཕྱིར་མི་རྟག་ལས་སྡུག་བསྔལ། ། སྡུག་བསྔལ་ལས་ནི་བདག་མེད་གསུངས། ། ཞེས་གསུངས་པ་ལྟར། ཐོག་མར་མི་རྟག་པ་བསྒོམས་ནས་རྟག་གཅིག་རང་དབང་ཅན་དུ་འཛིན་པའི་བློ་བཟློག་པར་བྱས། དེས་རྒྱུད་སྦྱངས་ནས་མཐར་སྤྲོས་པའི་མཐའ་ཐམས་ཅད་དང་བྲལ་བའི་དབུ་མའི་ལྟ་བ་སྒོམ་པ་ལ་འཇུག་པ་དང་། ལམ་ཐུན་མོང་བས་རྒྱུད་སྦྱངས་ནས་སྔགས་ལམ་ལ་སློབ་པའི་ཚེ་ནའང་མི་རྟག་པ་དྲན་པས་རྒྱུད་བསྐུལ་ནས་ལམ་ལ་སློབ་དགོས་པ་ཡིན་པས་སྟོན་པའི་རྣམ་ཐར་གདུལ་བྱ་རང་ཉིད་ཀྱི་ཉམས་ལེན་དུ་འཁྱེར་བའི་ཚུལ་དེ་ལྟར་དུ་ཤེས་པར་བྱའོ། ། སྟོན་པ་ཐུབ་པའི་དབང་པོའི་རྣམ་པར་ཐར་པ་ནི་བསམ་གྱིས་མི་ཁྱབ་བརྗོད་ཀྱིས་མི་ལང་བ་སྟེ། ཁྱོད་ཀྱི་སྐུ་གསུང་ཐུགས་ཀྱི་གསང་བ་ཡི། ། ཚུལ་འདི་རྒྱལ་སྲས་རང་རྒྱལ་ཉན་ཐོས་ཀྱིས། ། ཇི་ཙམ་བརྟགས་ཀྱང་བློ་ཡི་ཡུལ་མིན་ན། ། ཚངས་དང་དབང་པོ་སོགས་ཀྱིས་སྨོས་ཅི་འཚལ། ། མཁའ་ལྡིང་དབང་པོས་མཁའ་ལ་བགྲོད་བགྲོད་ནས། ། ནམ་ཞིག་རང་སྟོབས་བྲི་བས་ལྡོག་འགྱུར་གྱི། ། ནམ་མཁའ་ཟད་པས་ལྡོག་པར་མི་འགྱུར་བཞིན། ། ཁྱོད་ཀྱི་ཡོན་ཏན་བརྗོད་པའང་དེ་ལྟར་ལགས། ། ཞེས་གསུངས་པ་ལྟར། སངས་རྒྱས་ཀྱི་གསང་བ་གསུམ་གྱི་རྣམ་ཐར་ནི་རྒྱལ་བ་ནང་ཕན་ཚུན་མ་གཏོགས་རྒྱལ་སྲས་བདག་ཉིད་ཆེན་པོ་རྣམས་དང་། རྣམ་ཐར་བརྒྱད་ལ་དབང་ཐོབ་བའི་དགྲ་བཅོམ་པ་རྣམས་དང་། ཚངས་པ་དང་བརྒྱ་བྱིན་ལ་སོགས་པ་མངོན་ཤེས་དང་ལྡན་པའི་ལྷ་མཐུ་བོ་ཆེ་རྣམས་ཀྱིས་ཇི་ཙམ་བརྟགས་ཀྱང་ཤེས་པར་ནུས་པ་མིན་ན་བློ་ཆུང་བདག་འདྲ་བས་ཕྱོགས་ཙམ་ཡང་ཤེས་པར་ག་ལ་ནུས། དེ་མ་ཟད་ཐུན་མོང་བའི་གདུལ་བྱ་རྣམས་ཀྱིས་ཤེས་པར་ནུས་པའི་མཛད་པ་རྣམ་ཐར་རྣམས་ཀྱང་བདག་འདྲ་བས་ཆ་ཙམ་ཞིག་ཀྱང་བརྗོད་པར་ག་ལ་ནུས། སྔར་བརྗོད་པ་དེ་དག་ནི་རྒྱལ་བ་ཉིད་ཀྱི་གསུང་ཚད་མ་དབང་པོར་བྱས་ཏེ། རྒྱ་ཆེར་རོལ་པའི་མདོ་དང་། སྙིང་རྗེ་པདྨ་དཀར་པོའི་མདོ་དང་། གཞན་ཡང་མདོ་མང་པོ་ལ་བརྟེན་ནས་མཛད་པ་བཅུ་གཉིས་ཀྱི་ཚུལ་ལས་བརྩམས་ཏེ་ཅུང་ཟད་ཅིག་བརྗོད་པ་ཡིན་ལ། སྟོན་པའི་ཡོན་ཏན་བསམ་པ་ནི་རང་གི་ཚོགས་གསོག་པ་དང་སྒྲིབ་པ་སྦྱོང་བའི་ཐབས་བླ་ན་མེད་པ་ཡིན་པ་དང་། ཐེག་པ་ཆེན་པོའི་ལམ་གྱི་རྩ་བ་དང་གཞུང་ཤིང་བྱང་ཆུབ་ཀྱི་སེམས་སྐྱེ་བ་ལ་སངས་རྒྱས་ཀྱི་ཡོན་ཏན་བསམས་ནས་དེ་ལ་ཐོབ་འདོད་བསྐྱེད་པ་ཞིག་ངེས་པར་དགོས་ཀྱི། སངས་རྒྱས་ཀྱི་ཡོན་ཏན་ལ་དད་པ་དང་ཐོབ་འདོད་མེད་ན་བྱང་ཆུབ་ཀྱི་སེམས་མཚན་ཉིད་ཚང་བ་མི་སྐྱེ་བར་རྗེ་བཙུན་བྱམས་པ་མགོན་པོས་གསུངས་པ་ལྟར་རོ། ། དེས་ན་ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་ཀྱི་སེམས་སྐྱེ་བ་ལ་སངས་རྒྱས་ཀྱི་ཡོན་ཏན་བསམས་ནས་དད་པ་ཐོབ་པ་ཞིག་མེད་མི་རུང་དུ་སྣང་བས་བྱང་ཆུབ་ལམ་རིམ་ལ་ཉམས་ལེན་སྙིང་པོར་བྱ་འདོད་པ་རྣམས་ལ་སངས་རྒྱས་ཀྱི་ཡོན་ཏན་མཐོང་བ་ཞིག་གལ་ཆེ་བར་བསམས་ནས་ཕྱོགས་ཙམ་ཞིག་བརྗོད་པ་ཡིན་ནོ། ། དེ་ལྟར་སྟོན་པ་མྱ་ངན་ལས་འདས་པའི་ཚུལ་བསྟན་པའི་དབྱར་དེ་རྒྱལ་པོ་མ་སྐྱེས་དགྲས་སྦྱིན་བདག་བྱས་ནས་རྒྱལ་པོའི་ཁབ་ཀྱི་བདེ་ཆེན་མའི་ཕུག་ཏུ་འོད་སྲུངས་ཆེན་པོ་ལ་སོགས་པའི་དགྲ་བཅོམ་པ་ལྔ་བརྒྱས་དབྱར་གནས་མཛད། དེའི་ཚེ་ཀུན་དགའ་བོ་ལ་མདོ་སྡེ་བསྡུ་བར་གསོལ་བ་བཏབ་པ་ན། དགྲ་བཅོམ་པ་ལྔ་བརྒྱའི་སྣམ་སྦྱར་རྣམས་བརྩེགས་པ་གདན་དུ་བཏིང་བའི་སྟེང་དུ་འཕགས་པ་ཀུན་དགའ་བོས་འཛེགས་ཏེ། ཞལ་མཉན་ཡོད་དུ་ཕྱོགས། ཕྱག་ཐལ་མོ་སྦྱར། གདོང་མཆི་མ་དང་བཅས་བཞིན་དུ་འདི་སྐད་བདག་གིས་ཐོས་པ་དུས་གཅིག་ན་ཞེས་བརྗོད་པ་ན། ལྷ་གྲངས་མེད་པ་ནམ་མཁའ་ལས་བབས་ཏེ་གུས་པར་ཉན་ཞིང་མདོ་སྡེའི་སྡེ་སྣོད་བསྡུས་སོ། ། དེ་ཡང་དང་པོ་བདེན་བཞིའི་ཆོས་འཁོར་ནས་བཟུང་ཐ་མ་ཀུན་ཏུ་རྒྱུ་རབ་བཟང་ལ་གསུངས་པ་དང་། འཁོར་རྣམས་ལ་གསུང་གི་ཐ་མ་མི་རྟག་པ་བསྟན་པ་ཡན་ཆད་མདོ་སྡེ་ཇི་སྙེད་ཅིག་གསུངས་པ་ཐམས་ཅད་ཚིག་གཅིག་ཀྱང་མ་ལུས་པར་བློ་ལས་བཏོན་པའོ། ། དེ་ལྟར་འཕགས་པ་ཀུན་དགའ་བོས་མདོ་སྡེ་བསྡུས་ནས་ཁྲི་ལས་བབས་ཏེ་འཁོད། དེ་ནས་འཕགས་པ་ཉེ་བར་འཁོར་ཁྲི་ལ་འཛེགས་ཏེ་འདུལ་བའི་སྡེ་སྣོད་རྣམས་བསྡུས། དེ་ནས་འོད་སྲུངས་ཆེན་པོ་ཁྲི་ལ་འཛེགས་ཏེ་མངོན་པའི་སྡེ་སྣོད་རྣམས་བསྡུས་སོ། ། དེ་ནས་འོད་སྲུངས་ཆེན་པོ་འདི་སྙམ་དུ་བདག་གིས་བསྟན་པའི་བྱ་བ་བྱས་ཟིན་གྱི། ད་ནི་མྱ་ངན་ལས་འདའོ་སྙམ་དུ་དགོངས་ནས་འཔགས་པ་ཀུན་དགའ་བོ་ལ་བསྟན་པ་གཏད་དེ། ཁྱོད་ཀྱིས་ཀྱང་བསྟན་པ་ཤ་ནའི་གོས་ཅན་ལ་གཏོད་ཅིག་ཅེས་གསུངས་ནས་དེ་བཞིན་གཤེགས་པའི་མཆོད་རྟེན་རྣམས་ལ་ཕྱག་བྱས་ཏེ་ལྷོ་ཕྱོགས་ཀྱི་རི་བྱ་རྐང་ཅན་ཞེས་བྱ་བའི་རི་བོ་གསུམ་འདུས་ཀྱི་དབུས་སུ་བྱོན་ནས་རྩྭའི་གདན་ལ་སྐྱིལ་མོ་ཀྲུང་བཅས། བཅོམ་ལྡན་འདས་ཀྱིས་གནང་བའི་སྣམ་སྦྱར་སྐུ་ལུས་ལ་བཀབ་སྟེ། ཇི་སྲིད་བྱམས་མགོན་མ་བྱོན་གྱི་བར་དུ་པུར་མི་ཉམས་པར་བྱིན་གྱིས་བརླབས་ནས་མྱ་ངན་ལས་འདས་སོ། ། དེ་ནས་འཕགས་པ་ཀུན་དགའ་བོས་འཁོར་རྣམ་བཞི་ལ་རྗེས་སུ་གདམས་ཤིང་། བསྟན་པ་ལོ་བཞི་བཅུ་ཙམ་གྱི་རིང་བསྐྱངས་ནས་ནམ་ཞིག་ན་བསྟན་པ་ཤ་ནའི་གོས་ཅན་ལ་གཏད་དེ། ཁྱོད་ཀྱིས་བསྟན་པ་ཉེར་སྦས་ལ་གཏོད་ཅིག་ཅེས་ལུང་བསྟན་ནས་མྱ་ངན་ལས་འདས་སོ། ། དེ་ནས་འཕགས་པ་ཤ་ནའི་གོས་ཅན་གྱིས་བསྟན་པའི་བྱ་བ་རྒྱ་ཆེར་མཛད་དེ་མཐར་བསྟན་པ་ཉེར་སྦས་ལ་གཏད། དེ་ནས་འཕགས་པ་ཉེར་སྦས་ཀྱིས་སངས་རྒྱས་གཉིས་པ་བཞིན་དུ་བསྟན་པའི་བྱ་བ་བསམ་གྱིས་མི་ཁྱབ་པ་མཛད་དེ། སློབ་མ་དགྲ་བཅོམ་ཐོབ་པའང་གྲངས་མེད་པ་བྱུང་སྟེ། དགྲ་བཅོམ་ཐོབ་པ་རེ་རེ་བྱུང་བ་ན་སོ་ཤིང་སོར་ལྔ་པ་རེ་རེ་དོར་བས་བྲག་ཕུག་འདོམ་ལྔ་བཅུ་ཡོད་པ་ཞིག་སོ་ཤིང་གིས་ཡོངས་སུ་གང་བར་གྱུར་ཏོ། ། འཕགས་པ་ཉེར་སྦས་ཀྱིས་བསྟན་པ་དྷི་དྷི་ཀ་ལ་གཏད། འཕགས་པ་དྷི་དྷི་ཀས་བསྟན་པ་འཕགས་པ་ནག་པོ་ལ་གཏད། དེས་ལེགས་མཐོང་ཆེན་པོ་ལ་བསྟན་པ་གཏད་དེ། དེ་དག་ལ་བསྟན་པའི་གཏད་རབས་བདུན་དུ་གྲགས་སོ། ། ཐུབ་པའི་བསྟན་པ་དུས་ཇི་ཙམ་གནས་པ་ནི། སྟོན་པ་ཐུབ་པའི་དབང་པོ་འདི་ཉིད་རྒྱལ་བ་གཞན་ལས་ཐུགས་རྗེ་ཆེས་ལྷག་པས་རྒྱལ་བ་རང་ཉིད་མྱ་ངན་ལས་འདས་ནས་ཀྱང་བསྟན་པ་ལོ་ལྔ་སྟོང་དུ་གནས་པར་བྱིན་གྱིས་བརླབས་ཤིང་། གནས་བརྟན་ཆེན་པོ་སྒྲ་གཅན་འཛིན་ལ་སོགས་པ་གནས་བརྟན་བཅུ་དྲུག་ལ་བསྟན་པའི་གནས་ཚད་མ་རྫོགས་ཀྱི་བར་དུ་མྱ་ངན་ལས་མི་འདའ་བར་བསྟན་པ་སྐྱོངས་ཤིག་ཅེས་བཀའ་བསྒོས། རྣམ་ཐོས་སྲས་ལ་སོགས་པ་འཇིག་རྟེན་སྐྱོང་བ་བཞི་ལ་བསྟན་པ་བསྟན་འཛིན་དང་བཅས་པ་བསྲུང་ཞིང་སྐྱོང་བར་བཀའ་བསྒོ་བར་མཛད་དོ། ། དེ་ལྟར་རྒྱལ་བའི་བསྟན་པ་ལོ་ལྔ་སྟོང་དུ་གནས་པ་ལས་ལོ་སྟོང་ཕྲག་རེ་རེ་ལ་ཕྱེད་ཕྱེད་དུ་བཅད་པས་ལྔ་བརྒྱ་པ་ཕྲག་བཅུ་ལ་ལེའུ་བཅུར་འགྱུར་ཏེ། དེ་ལ་ལྔ་བརྒྱ་དང་པོ་དང་། གཉིས་པ་དང་། གསུམ་པ་རྣམས་ལ་རིམ་པ་ལྟར། དགྲ་བཅོམ་པ་དང་། ཕྱིར་མི་འོང་བ་དང་། རྒྱུན་དུ་ཞུགས་པ་མང་དུ་འབྱུང་བས་དགྲ་བཅོམ་པའི་ལེའུ་དང་། ཕྱིར་མི་འོང་བའི་ལེའུ་དང་། རྒྱུན་དུ་ཞུགས་པའི་ལེའུ་ཞེས་བྱ་སྟེ། ཁོང་དུ་ཆུད་པའི་ལེའུ་གསུམ་དང་། དེ་ནས་ལྔ་བརྒྱ་བཞི་པ་དང་། ལྔ་པ་དང་། དྲུག་པ་རྣམས་ལ་གོ་རིམ་བཞིན་དུ། ལྷག་མཐོང་དང་། ཏིང་ངེ་འཛིན་དང་། ཚུལ་ཁྲིམས་དང་ལྡན་པ་མང་དུ་འབྱུང་བས་ལྷག་མཐོང་གི་ལེའུ་དང་། ཏིང་ངེ་འཛིན་གྱི་ལེའུ་དང་། ཚུལ་ཁྲིམས་ཀྱི་ལེའུ་ཞེས་བྱ་སྟེ་སྒྲུབ་པའི་ལེའུ་གསུམ་དང་། དེ་ནས་ལྔ་བརྒྱ་བདུན་པ་དང་། བརྒྱད་པ་དང་། དགུ་པ་ལ་རིམ་པ་ལྟར་ཆོས་མངོན་པ་དང་། མདོ་སྡེ་དང་། འདུལ་བ་སྟོན་པ་མང་དུ་འབྱུང་བས་མངོན་པའི་ལེའུ་དང་། མདོ་སྡེའི་ལེའུ་དང་། འདུལ་བའི་ལེའུ་སྟེ་ལུང་གི་ལེའུ་གསུམ་དང་། ལྔ་བརྒྱ་པ་བཅུ་པ་ལ་ནི། རབ་ཏུ་བྱུང་བའི་རྟགས་ཙམ་ལས་ལྟ་སྤྱོད་རྣལ་མ་དང་མི་ལྡན་པས་རྟགས་ཙམ་འཛིན་པའི་ལེའུ་སྟེ། འདི་ཉིད་ལ་ལྔ་བརྒྱ་ཐ་མ་ཞེས་བཤད་དོ། ། དེས་ན་བདག་ལེགས་སུ་འདོད་པ་དག་གིས་རྒྱལ་བའི་བསྟན་པ་དང་ལན་ཅིག་མཇལ་བའི་སྐབས་འདིར་རྒྱལ་བའི་བསྟན་པའི་སྙིང་པོ་ཚང་ལ་མ་ནོར་བ་བྱང་ཆུབ་ལམ་གྱི་རིམ་པ་ལ་བག་ཆགས་ཅི་ཐེབས་བྱའོ། ། ། །
༈ རྒྱལ་ཚབ་བྱམས་པ་མགོན་པོ་ནས། འཕགས་པ་ཐོགས་མེད་སོགས་
རྒྱ་ཆེན་སྤྱོད་རྒྱུད་ཀྱི་བླ་མ་རྣམས་ཀྱི་རྣམ་ཐར།
༈ ཇོ་བོ་རྗེ་དཔའ་ལྡན་ཨ་ཏི་ཤས་བྱང་ཆུབ་ལམ་གྱི་རིམ་པ་སྟོན་པའི་བླ་མ་བརྒྱུད་པ་ལ་རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་གཉིས་སུ་མཛད་པའི་རྒྱ་ཆེན་སྤྱོད་རྒྱུད་ཀྱི་བླ་མ་རྣམས་ཀྱི་རྣམ་པར་ཐར་པ་སྟོན་པ་ལ་ཐོག་མར་རྗེ་བཙུན་བྱམས་པ་མགོན་པོའི་རྣམ་ཐར་ནི། འདྲེན་པ་མཉམ་མེད་སྟོན་པ་བཅོམ་ལྡན་འདས། ། རྒྱལ་ཚབ་དམ་པ་རྗེ་བཙུན་མི་ཕམ་མགོན། ། ཞེས་བསྔགས་པ། འདྲེན་པ་མཉམ་མེད་སྟོན་པ་ཐུབ་པའི་དབང་པོ་དགའ་ལྡན་དུ་སྐྱེ་བ་སྤྲུལ་སྐུའི་ཚུལ་བཟུང་སྟེ་རྒྱལ་བ་འོད་སྲུངས་ཀྱི་དུས་ནས་ཞིང་འདིར་འབྱོན་པ་ལ་ཉེ་བའི་བར་དགའ་ལྡན་གྱི་ལྷ་རྣམས་ལ་ཆོས་བསྟན་ནས་འཛམ་བུའི་གླིང་དུ་འབྱོན་པ་ལ་ཉེ་བར་ཕྱོགས་པའི་ཚེ། རྗེ་བཙུན་བྱམས་པ་མགོན་པོ་ལ་པྲོག་ཞུ་བསྐོན་ནས་རྒྱལ་ཚབ་ཏུ་དབང་བསྐུར་བས། དེ་ནས་བཟུང་རྒྱལ་ཚབ་བྱམས་པ་མགོན་པོ་ཞེས་གྲགས་པ་རྗེ་བཙུན་བྱམས་མགོན་འདི་ཉིད་སྔོན་ཐུགས་ཇི་ལྟར་བསྐྱེད་པའི་ཚུལ་ནི། མདོ་སྡེ་བསྐལ་བཟང་ལས། བྱང་ཆུབ་སེམས་དཔའ་བྱམས་པ་འཁོར་ལོས་སྒྱུར་བ་ཡི། ། རྒྱལ་པོ་རྣམ་པར་སྣང་བྱེད་ཅེས་བྱར་གྱུར་པ་ན། ། བདེ་གཤེགས་མཐུ་ཆེན་གདུགས་ཚོད་དག་ལ་སྤྱན་དྲངས་ནས། ། དང་པོར་བླ་མེད་བྱང་ཆུབ་ཏུ་ནི་སེམས་བསྐྱེད་དོ། ། ཞེས་གསུངས་པ་ལྟར་རྗེ་བཙུན་བྱམས་པ་མགོན་པོ་འདི་ཉིད་སྔོན་བསྐལ་པ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སྔོན་རོལ་ཏུ་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བྱེད་ཅེས་བྱ་བར་གྱུར་པའི་ཚེ་དེ་བཞིན་གཤེགས་པ་ཐུབ་པ་ཆེན་པོ་ཞེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ། དེ་བཞིན་གཤེགས་པ་དེ་ལ་གདུགས་ཚོད་ཕུལ་ནས་མཁའ་ཁྱབ་ཀྱི་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་ཆེན་པོས་གཟིགས་ནས་སེམས་ཅན་ཐམས་ཅད་འཁོར་བ་ལས་སྒྲོལ་བའི་ཕྱིར་དུ་བྱང་ཆུབ་མཆོག་ཏུ་ཐུགས་བསྐྱེད་པར་མཛད་དོ། ། ཡང་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཡུན་རིང་ཞིང་ཚད་མེད་བསམ་གྱིས་མི་ཁྱབ་པའི་སྔ་རོལ་ཏུ། རྗེ་བཙུན་བྱམས་པ་གླིང་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོ་གསེར་མདོག་ཅན་ཞེས་བྱ་བར་གྱུར་པའི་དུས་རྫོགས་པའི་སངས་རྒྱས་གསེར་ཟངས་འོད་བྱང་ཆུབ་སེམས་དཔའི་འཁོར་དཔག་ཏུ་མེད་པ་ཉན་ཐོས་ཀྱི་དགེ་འདུན་དང་བཅས་པ་ལ། རྒྱལ་པོའི་འབྱོར་པ་ཆེན་པོ་དང་བསོད་ནམས་ཀྱི་མཐུ་ཆེན་པོས་སུམ་ཅུ་རྩ་གསུམ་གྱི་ལྷ་རྣམས་ཀྱི་འབྱོར་པས་ཀྱང་བསྒྲུན་དུ་མེད་པའི་བཀོད་པ་དང་། མཆོད་པ་དང་། བསྙེན་བཀུར་བ་ཐམས་ཅད་ཀྱིས་ལོ་བྱེ་བ་ཕྲག་བརྒྱད་ཅུ་རྩ་བཞིར་བཀུར་སྟིར་བྱས་ཏེ་བླ་ན་མེད་པའི་བྱང་ཆུབ་ཏུ་ཐུགས་བསྐྱེད་པར་མཛད། ཡང་སྔོན་མི་མཇེད་འཇིག་རྟེན་གྱི་ཁམས་འདིའི་ཐད་དུ་བསྐལ་པ་འཛིན་པ་ཞེས་བྱ་བ་བྱུང་བ་ལ། བསྐལ་པ་ཆེན་པོ་དེ་ལ་གླིང་བཞི་པའི་སངས་རྒྱས་ཀྱི་ཞིང་འདིར་གླིང་བཞིར་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་བྱུང་ངོ་། ། རྒྱལ་པོ་རྩིབས་ཀྱི་མུ་ཁྱུད་དེ་ལ་མདུན་ན་འདོན་བྲམ་ཟེ་རྒྱ་མཚོའི་རྡུལ་ཞེས་བྱ་བ་ཞིག་ཡོད་དོ། ། དེ་ལ་བུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་ཅུས་ལུས་རྣམ་པར་མཛེས་ལ་བསོད་ནམས་བརྒྱའི་མཚན་དང་ལྡན་ཞིང་འོད་འདོམ་གང་པ་ཡོད་ལ་ཤིང་ནྱ་གྲོ་དྷ་ལྟར་ཆུ་ཞེང་གབ་ཅིང་བལྟ་བས་ཆོག་མི་ཤེས་པ་ཞིག་བཙས་སོ། ། དེ་བཙས་མ་ཐག་ཏུ་ལྷ་འབུམ་གྱིས་མཆོད་པ་བྱས་ནས་རྒྱ་མཚོའི་སྙིང་པོ་ཞེས་བྱ་བར་མིང་བཏགས་སོ། ། དེ་དུས་གཞན་ཞིག་ན་ངེས་པར་བྱུང་ནས་སྐྲ་དང་ཁ་སྤུ་བྲེག་ཏེ་གོས་ངུར་སྨྲིག་བགོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བར་གྱུར་ནས་བཅོམ་ལྡན་འདས་དེས་ཆོས་ཀྱི་འཁོར་ལོ་བསྐོར་ཏེ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་མཐོ་རིས་དང་ཐར་པའི་འབྲས་བུ་ལ་རབ་ཏུ་བཀོད་པར་གྱུར་ཏོ། ། དེ་ནས་བྲམ་ཟེ་རྒྱ་མཚོའི་རྡུལ་གྱིས་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་དང་རང་གི་སློབ་མ་བྲམ་ཟེ་རིག་བྱེད་ཀློག་པ་སྟོང་ལ་སོགས་པ་ལ་ཡང་དང་ཡང་དུ་བསྐུལ་ཏེ། དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་སེམས་བསྐྱེད་དུ་བཅུག་གོ ། དེའི་ཚེ་རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་སེམས་བསྐྱེད་དེ། བདེ་བ་ཅན་གྱི་ཞིང་གི་བཀོད་པ་བློ་ཡུལ་དུ་བཟུང་ནས་ཞིང་དེ་འགྲུབ་པའི་ཕྱིར་དུ་བསྐལ་པ་གྲངས་མེད་པར་རྫོགས་སྨིན་སྦྱང་གསུམ་གྱི་སྤྱོད་པ་སྤྱད་པ་མཐར་ཕྱིན་པར་མཛད་ནས་བདེ་བ་ཅན་གྱི་ཞིང་གྲུབ་སྟེ་ཞིང་དེར་མངོན་པར་རྫོགས་པར་སངས་རྒྱས་སོ། ། བྲམ་ཟེ་རྒྱ་མཚོའི་རྡུལ་གྱི་སློབ་མ་བྲམ་ཟེ་རིག་བྱེད་ཀློག་པ་སྟོང་པོ་དེས་ཀྱང་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་སེམས་བསྐྱེད་ཅིང་། དེ་བཞིན་གཤེགས་པ་རིན་ཆེན་སྙིང་པོས་དེ་དག་བསྐལ་པ་བཟང་པོ་འདི་ལ་འཚང་རྒྱ་བར་ལུང་བསྟན་ནས་དེ་དག་གིས་རང་རང་གི་ཞིང་བཟུང་བ་ན། དང་པོ་འཁོར་བ་འཇིག་ནས་ཐ་མ་མོས་པ་སྣང་མཛད་ཀྱི་བར་ཐམས་ཅད་ཀྱིས་རང་རང་གི་སངས་རྒྱས་ཀྱི་ཞིང་གདུལ་སླ་བ་དང་ཞིང་དག་པ་ཤ་སྟག་བཟུང་ནས། རྩོད་ལྡན་ཚེ་ལོ་བརྒྱ་པའི་དུས་འདི་དང་། མ་འོངས་པའི་ཚེ་ལོ་བརྒྱད་ཁྲི་པའི་དུས་གཉིས་པོ་འདི་ལུས་ཏེ། དེ་ཡང་རྩོད་ལྡན་ཚེ་ལོ་བརྒྱ་པའི་དུས་འདི་ནི་དུས་ཀྱི་སྙིགས་མར་གྱུར་པས་སེམས་ཅན་རྣམས་ཚེ་ཐུང་ཞིང་ལོངས་སྤྱོད་དབུལ་ལ་ནད་མང་ཞིང་ཕལ་ཆེར་དུས་མ་ཡིན་པའི་འཆི་རྐྱེན་གྱིས་འཆི་བར་འགྱུར་བ་མ་རུངས་པ་དམུ་རྒོད་པ། དྲིན་ལན་ལོག་པར་འཇལ་བས་གང་བ་འདི་ནི་རྒྱལ་བ་དེ་དག་ཐམས་ཅད་སྐྲག་ནས་འདི་ལྟ་བུའི་དུས་ངན་པ་མ་རུངས་པ་འདི་དག་གི་ཁྲོད་དུ་སུ་ཞིག་འཇུག་ཅེས་ཡལ་བར་བོར་བ་ན་བྲམ་ཟེ་རྒྱ་མཚོའི་རྡུལ་གྱིས་ཐུགས་རྗེས་མ་བཟོད་པར་དུས་འདིར་འབྱོན་པའི་ཐུགས་བསྐྱེད། མ་འོངས་པའི་ཚེ་ལོ་བརྒྱད་ཁྲི་པའི་དུས་དེ་ནི་སྣོད་བཅུད་ཐམས་ཅད་ཕུན་སུམ་ཚོགས་པས་གང་བ། སྣོད་རྣམས་ལྷའི་ཡུལ་དང་མཚུངས་པ། མི་རྣམས་ཚེ་རིང་ཞིང་གཟུགས་བཟང་བ་ལོངས་སྤྱོད་ཆེ་བ་ཕན་ཚུན་འཚེ་བ་གང་ཡང་མེད་ཅིང་རང་བཞིན་གྱིས་དགེ་བའི་ལམ་ལ་གནས་པ་ཤ་སྟག་འབྱུང་བས་འདི་དག་ནི་ཤིན་ཏུ་བཟང་ངོ་ཞེས་ཐམས་ཅད་ཀྱིས་བཏང་སྙོམས་སུ་བཞག་སྟེ་ལུས་པ་ན། རྗེ་བཙུན་བྱམས་མགོན་འདི་ཉིད་དེའི་ཚེ་རིག་བྱེད་ཀློག་པ་སྟོང་གི་ལྔ་པ་དྲི་མེད་འོད་ཅེས་བྱ་བར་གྱུར་པ་དེས་ཐུགས་རྗེས་མ་བཟོད་ནས་ཚེ་ལོ་བརྒྱད་ཁྲི་བའི་དུས་ཀྱི་འགྲོ་བ་འདི་རྣམས་དེ་བཞིན་གཤེགས་པ་ཐམས་ཅད་ཀྱིས་བཏང་སྙོམས་སུ་བཞག་པས། འདི་དག་ལ་ཆོས་སྟོན་པ་པོ་མེད་པས། འདི་དག་ལ་གནས་སྐབས་སུ་འཁོར་བའི་བདེ་འབྱོར་ཅུང་ཟད་ཡོད་ཀྱང་ལས་ཉོན་གྱིས་བཅིངས་པས་འཁོར་བ་ལས་མ་འདས་ཤིང་། སླར་ཡང་འཁོར་བ་མཐའ་མེད་དུ་འཁྱམས་ནས་སྡུག་བསྔལ་བརྒྱུད་མར་མྱོང་བར་འགྱུར་བ་འདི་རྣམས་སྙིང་རེ་རྗེ། འདི་རྣམས་ཀྱི་མགོན་དུ་ང་ཉིད་ཞིང་དེར་འཚང་རྒྱ་བར་བྱའོ་སྙམ་དུ་ཐུགས་བསྐྱེད་པ་ན་དེ་བཞིན་གཤེགས་པ་རིན་ཆེན་སྙིང་པོས་ཀྱང་། དེ་ལྟར་དུ་བསྐལ་བཟང་གི་སངས་རྒྱས་ལྔ་པར་འགྱུར་བར་ལུང་བསྟན་ཏོ། ། དོན་གྱི་དབང་འདི་གཟིགས་ནས་རྗེ་བདག་ཉིད་ཆེན་པོས་བྱམས་མགོན་ལ་བསྟོད་པ་མཛད་པ་ན། བདེ་གཤེགས་སྔ་མས་བཏང་སྙོམས་མཛད་པ་ཡི། ། གྲངས་མེད་འགྲོ་ལ་བརྩེ་བས་མ་བཟོད་ནས། ། ཞིང་འདིར་བྱང་ཆུབ་སྙིང་པོར་གཤེགས་འགྱུར་བ། ། མི་ཕམ་ཆོས་རྗེའི་ཞབས་ལ་གསོལ་བ་འདེབས། ། ཞེས་བསྔགས་པ་མཛད་དོ། ། ཡང་སྔོན་འདས་པའི་བསྐལ་པ་བརྗོད་ཀྱིས་མི་ལང་བའི་སྔོན་རོལ་ཏུ་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་སྐྱོང་ཞེས་བྱ་བ་བྱུང་སྟེ། དེ་ལ་བུ་སྟོང་ཡོད་དོ། ། དེའི་ཚེ་དེ་བཞིན་གཤེགས་པ་ཡོན་ཏན་མཐའ་ཡས་རིན་པོ་ཆེ་སྣ་ཚོགས་བཀོད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱོན་ཏེ། དེ་བཞིན་གཤེགས་པ་དེ་ལ་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་སྐྱོང་བུ་སྟོང་དང་བཅས་པས་དུས་ཡུན་རིང་པོར་མཆོད་ཅིང་བསྙེན་བཀུར་ནས་དེ་བཞིན་གཤེགས་པ་དེའི་སྤྱན་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ན་དེ་བཞིན་གཤེགས་པ་དེས་རྒྱལ་བུ་སྟོང་པོ་དེ་རྣམས་ཀྱི་མིང་བུམ་པར་བཅུག་ནས་རིམ་བཞིན་ལུང་བསྟན་པ་ན། རྗེ་བཙུན་བྱམས་མགོན་འདི་ཉིད་འཁོར་ལོས་བསྒྱུར་བའི་རྒྱལ་པོ་དེའི་བུ་སྟོང་གི་ནང་ནས་བཞི་པ་སྐ་རགས་ཅན་ཞེས་བྱ་བ་ཡིན་པས། དེ་བཞིན་གཤེགས་པ་དེས་བུ་སྟོང་པོ་དེ་རིམ་བཞིན་བསྐལ་པ་བཟང་པོ་འདི་ལ་འཚང་རྒྱ་བར་ལུང་བསྟན་ཏེ། དོན་འདི་ལ་དགོངས་ནས། མཐུན་པའི་སྨོན་ལམ་དགེ་ཚོགས་རྨད་བྱུང་ཞིང་། ། སྤྱད་པ་སྤྱོད་ཚེ་ན་ཡང་མཆེད་གྱུར་ལ། ། བསྐལ་བཟང་འདི་ལ་མཛད་པ་མཐར་ཕྱིན་པའི། ། རྫོགས་པའི་སངས་རྒྱས་སྟོང་ལ་ཕྱག་འཚལ་ལོ། ། ཞེས་བསྟོད་པ་མཛད་དོ། ། གཞན་ཡང་སངས་རྒྱས་མང་པོའི་སྤྱན་སྔར་ཐུགས་བསྐྱེད་པར་མཛད་ཅིང་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་བསྐལ་བཟང་གི་སངས་རྒྱས་གཞན་ཐམས་ཅད་ལས་བསྐལ་པ་བཞི་བཅུ་རྩ་གཉིས་ཀྱིས་ཐུགས་བསྐྱེད་པ་སྔ་བར་གསུངས་སོ། ། དེ་ལྟར་རྗེ་བཙུན་བྱམས་པ་མགོན་པོས་ཐུགས་བསྐྱེད་ནས་བསྐལ་པ་བགྲང་བ་ལས་འདས་པར་ཚོགས་གཉིས་བར་མ་ཆད་དུ་བསགས། བཅོམ་ལྡན་འདས་ཤཱཀྱ་ཐུབ་པས་མི་སྐྱེ་བའི་ཆོས་ལ་བཟོད་པ་བརྙེས་པ་ནས་བཟུང་བཅོམ་ལྡན་འདས་ཤཱཀྱ་ཐུབ་པ་ཉིད་ཡོངས་འཛིན་དུ་བསྟེན་ཏེ་དབུའི་གཙུག་ཏུ་འབྲལ་མེད་དུ་བསྒོམས་པས་གདུལ་བྱ་རྣམས་ཀྱིས་བྱམས་མགོན་གྱི་དབུའི་གཙུག་ན་བྱང་ཆུབ་མཆོད་རྟེན་ཡོད་པར་མཐོང་སྟེ། ད་ལྟ་བྱམས་མགོན་གྱི་སྐུ་ལ་དབུའི་གཙུག་ཏུ་བྱང་ཆུབ་མཆོད་རྟེན་རེ་བྱེད་སྲོལ་ཡོད་པ་འདི་ཡང་དེའི་རྒྱུ་མཚན་གྱིས་ཡིན་པར་གསུངས། དེ་ལྟར་རྗེ་བཙུན་བྱམས་པ་མགོན་པོས་བསྐལ་པ་གྲངས་མེད་མུ་མེད་པར་ཚོགས་གཉིས་བར་མ་ཆད་དུ་བསགས་ནས། དེ་བཞིན་གཤེགས་པ་རིན་ཆེན་གདུགས་ཞེས་བྱ་བ་འཇིག་རྟེན་དུ་བྱོན་པའི་ཚེ། བྱམས་མགོན་འདི་ཉིད་དགེ་སློང་བློ་གྲོས་བརྟན་པ་ཞེས་བྱ་བར་གྱུར་ནས་དེ་བཞིན་གཤེགས་པ་དེ་ཉིད་ལ་བསྙེན་བཀུར་ཞིང་ལོ་བརྒྱད་ཁྲི་བཞི་སྟོང་གི་བར་དུ་ཉིན་རེ་བཞིན་སེམས་ཅན་བརྒྱ་བརྒྱ་ཙམ་བསླབ་པའི་གཞི་ལྔ་ལ་མ་བཀོད་ཀྱི་བར་དུ་ཟས་མི་བཟའ། སྲོག་ཆགས་ཀྱི་དོན་དུ་འགྱུར་བ་མཐོང་ཚེ་ཞག་མང་པོའི་བར་དུ་ཟས་བཅད་ཀྱང་དེས་མི་སྐྱོ་བར་སེམས་ཅན་གྱི་དོན་ལ་བརྩོན་པར་མཛད་དེ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་བསླབ་པའི་གཞི་ལྔ་ལ་བཀོད་དོ། ། དེ་ལྟར་ལོ་བརྒྱད་ཁྲི་བཞི་སྟོང་གི་བར་དུ་སེམས་ཅན་གྱི་དོན་མཛད་ནས་སྲོག་ཆགས་བྱེ་བ་ཕྲག་གསུམ་ཐེག་པ་ཆེན་པོའི་ལམ་ལ་བཀོད། སྲོག་ཆགས་བགྲང་བ་ལས་འདས་པ་ཞིག་ཐེག་པ་དམན་པའི་ལམ་ལ་བཀོད། སྲོག་ཆགས་གྲངས་མེད་མུ་མེད་པ་ཞིག་ལ་བྱམས་པའི་ཏིང་ངེ་འཛིན་བསྐྱེད་པར་མཛད། ཐ་ན་གྲོང་དང་གྲོང་ཁྱེར་དང་ཚོང་དུས་དང་ཡུལ་འཁོར་ལ་སོགས་པ་གང་དང་གང་དུ་བྱོན་པའི་སེམས་ཅན་དེ་དང་དེ་དག་གིས་ཞལ་མཐོང་བ་དང་། གསུང་ཐོས་པ་དང་ཕྱག་གིས་རེག་པ་དང་གང་དུ་ཞབས་བཞག་པའི་ས་དེ་དང་དེ་དག་ན་གནས་པའི་སེམས་ཅན་དེ་དག་ཐམས་ཅད་ཀྱང་བྱམས་པའི་ཏིང་ངེ་འཛིན་ལ་བཀོད་པས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་ལེགས་སོའི་བསྔགས་པ་བརྗོད་ཅིང་། དཀར་ཕྱོགས་ཀྱི་ལྷ་ཐམས་ཅད་ཀྱིས་འདི་ལྟ་བུར་སེམས་ཅན་ཐམས་ཅད་བྱམས་པ་ལ་འགོད་པ་ངོ་མཚར་རོ། ། ཞེས་རྒྱ་ཆེར་བསྔགས་པས་ཕྱོགས་བཅུའི་ཞིང་ཐམས་ཅད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་མཚན་གྲགས་ཤིང་། དེའི་ཚེ་དེ་བཞིན་གཤེགས་པ་རིན་ཆེན་གདུགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ད་ནས་བཟུང་སྟེ་སྐྱེ་བ་ཐམས་ཅད་དུ་བྱམས་པའི་མཚན་དང་ལྡན་པར་འགྱུར་ཞིང་། མངོན་པར་རྫོགས་པར་སངས་རྒྱས་པའི་ཚེ་ཡང་དེ་བཞིན་གཤེགས་པ་བྱམས་པ་ཞེས་བྱ་བར་འཚང་རྒྱ་བར་འགྱུར་རོ། ། ཞེས་ལུང་བསྟན་ཏོ། ། དེ་ནས་རྗེ་བཙུན་བྱམས་པ་མགོན་པོས་ཚོགས་གཉིས་ཕལ་ཆེར་རྫོགས་ཏེ་ས་བཅུ་པ་ལ་གནས་པའི་ཚེ་འོད་ཟེར་ཆེན་པོའི་དབང་བསྐུར་པ་ཐོབ་སྟེ། དེའི་ཚུལ་རྒྱས་པར་བརྗོད་ན་ཡི་གེ་མང་དུ་དོགས་པས་རྗེ་བདག་ཉིད་ཆེན་པོས་ཚིགས་བཅད་དུ་བསྒྲིགས་ནས་གསུངས་པ་ནི། མ་ལུས་སེམས་ཅན་བདེ་ལ་འགོད་ཕྱིར་དུ། ། རབ་འབྱམས་ཞིང་གི་རྒྱལ་བ་ཐམས་ཅད་ཀྱིས། ། འོད་ཟེར་ཆེན་པོའི་དབང་གིས་མགོན་ཁྱོད་ལ། ། ཆོས་ཀྱི་རྒྱལ་སྲིད་གཏད་པ་དགོངས་པར་རིགས། ། གང་ཚེ་ཁྱོད་ཀྱིས་དབང་བསྐུར་ས་བརྙེས་ཚེ། ། གྲངས་མེད་འབུམ་ཕྲག་བཅུ་ཡི་ཏིང་འཛིན་དང་། ། ཀུན་མཁྱེན་ཡེ་ཤེས་ཉིད་དུ་དབང་བསྐུར་བའི། ། ཏིང་ངེ་འཛིན་རྣམས་མངོན་དུ་གྱུར་པའི་མཐར། ། སྟོང་གསུམ་འབུམ་ཕྲག་བཅུ་ཡི་རྡུལ་སྙེད་ཀྱི། ། པདྨོའི་འཁོར་གྱིས་བསྐོར་བའི་པདྨ་ནི། ། རྩ་བ་རིན་ཆེན་ལྟེ་བ་ཙན་དན་མཆོག ། ཟེའུ་འབྲུ་རྡོ་ཡི་སྙིང་པོ་ལོ་མ་ནི། ། འཛམ་བུ་ཆུ་བོའི་གསེར་ལྟར་ཀུན་ཏུ་སྣང་། ། རིན་ཆེན་ཀུན་གྱིས་རབ་སྤྲས་འདབ་བརྒྱ་འབྱེད། ། རིན་ཆེན་དྲ་བས་ཀུན་ནས་གཡོགས་པ་ལ། ། དེ་དང་འཚམ་པར་ཁྱོད་སྐུ་བཞུགས་པ་ནི། ། འཁོར་གྱི་པདྨར་དེ་སྙེད་རྒྱལ་བའི་སྲས། ། ཁྱོད་ཀྱི་ཞལ་དུ་ཕྱོགས་ནས་འཁོད་པ་རྣམས། ། འབུམ་ཕྲག་བཅུ་ཡི་ཏིང་ངེ་འཛིན་ལ་རོལ། ། དེ་ཚེ་ཁྱོད་ཀྱི་ཞབས་མཐིལ་པུས་མོ་དང་། ། ལྟེ་བ་རྩིབ་ལོགས་ཕྱག་གི་མཐིལ་གཉིས་ནས། ། གྲངས་མེད་འབུམ་ཕྲག་བཅུ་ཡི་འོད་ཕྱུང་ནས། ། ངན་སོང་གསུམ་དང་མི་དང་ལྷ་མིན་ལྷ། ། གནས་ཀུན་སྣང་བྱས་སྡུག་བསྔལ་ཞི་བར་མཛད། ། ཕྲག་པ་རྒྱབ་མགུལ་ཞལ་གྱི་སྒོ་རྣམས་ནས། ། སྔར་གྱི་འོད་ཀྱིས་ཉན་རང་ས་དགུའི་བར། ། བྱང་སེམས་གནས་རྣམས་སྣང་མཛད་རིམ་བཞིན་དུ། ། ཆོས་སྣང་ཏིང་འཛིན་ཐབས་ཤེས་ཚུལ་རྣམས་བསྒྲུབས། ། སྔར་བཞིན་མཛོད་སྤུ་ནས་ཕྱུང་འོད་ཟེར་གྱིས། ། ཕྱོགས་བཅུའི་བདུད་གནས་ཐམས་ཅད་ཟིལ་མནན་ནས། ། དབང་བསྐུར་བརྙེས་པའི་རྒྱལ་བའི་སྲས་རྣམས་ཀྱི། ། སྐུ་ཡི་དཀྱིལ་འཁོར་དག་ཏུ་ནུབ་པར་མཛད། ། ཡན་ལག་མཆོག་ལས་སྟོང་གསུམ་འབུམ་ཕྲག་བཅུའི། ། ཕྲ་རབ་རྡུལ་སྙེད་འོད་ཟེར་ཕྱུང་ནས་ཀྱང་། ། བདེ་གཤེགས་འཁོར་གྱི་དཀྱིལ་འཁོར་སྣང་བྱས་ཏེ། ། འཇིག་རྟེན་ལན་བཅུར་བསྐོར་ནས་བར་སྣང་ལ། ། འོད་ཀྱི་དྲ་བའི་དཀྱིལ་འཁོར་ཆེན་པོ་ཡིས། ། ཀུན་བཟང་མཆོད་སྤྲིན་རྒྱ་མཚོའི་ཆར་ཕབ་ནས། ། འཇིག་རྟེན་ལན་བཅུར་བསྐོར་ནས་རྒྱལ་རྣམས་ཀྱི། ། ཞབས་ཀྱི་མཐིལ་དུ་ཀུན་ནས་ནུབ་པར་གྱུར། ། དེ་ནས་སྲས་བཅས་རྒྱལ་བས་དཔའ་བོ་ཁྱོད། ། དབང་བསྐུར་དུས་ལ་བབ་པར་གཟིགས་གྱུར་ནས། ། དབང་བསྐུར་ཐོབ་པའི་རྒྱལ་བ་སྲས་བཅས་ཀྱི། ། རྡོ་རྗེ་དཔལ་བེའུ་བཀྲ་ཤིས་རི་མོ་ལས། ། གྲངས་མེད་འབུམ་ཕྲག་བཅུ་ཡི་འོད་ཟེར་གྱིས། ། འཁོར་བཅས་འོད་ཕྱུང་ཕྱོགས་ཀུན་སྣང་བྱས་ཏེ། ། མུ་མེད་ཆོ་འཕྲུལ་བསྟན་ནས་ཁྱོད་ཀྱི་ནི། ། རྡོ་རྗེ་དཔལ་བེའུ་བཀྲ་ཤིས་རྣམས་སུ་ནུབ། ། དེ་ནས་དེ་མ་ཐག་ཏུ་ཁྱོད་ཀྱི་སྟོབས། ། འབུམ་འགྱུར་ལས་ཀྱང་ལྷག་པར་འཕེལ་བའི་ཚེ། ། ཕྱོགས་བཅུའི་རྒྱལ་བ་རྣམས་ཀྱི་མཛོད་སྤུ་ནས། ། སྔར་བཞིན་འོད་ཀྱིས་ཞིང་ཀུན་སྣང་བྱས་ནས། ། འཇིག་རྟེན་ལན་བཅུ་བསྐོར་ཏེ་ཆོ་འཕྲུལ་བསྟན། ། བྱང་སེམས་བྱེ་བ་མང་བསྐུལ་ཞིང་ཀུན་བསྐྱོད། ། ངན་འགྲོ་ཞི་མཛད་བདུད་རྣམས་ཟིལ་མནན་ཏེ། ། བདེ་གཤེགས་རྣམས་ཀྱི་གདན་ཀུན་རབ་བསྟན་ནས། ། འོད་ཟེར་གཙོ་བོ་ཁྱོད་ཀྱི་སྤྱི་བོ་དང་། ། འཁོར་གྱི་འོད་ཟེར་འཁོར་གྱི་སྤྱི་བོར་ནུབ། ། དེ་ཚེ་བྱང་སེམས་རྣམས་ཀྱིས་སྔོན་མེད་པའི། ། སྟོང་ཕྲག་བཅུ་ཡི་ཏིང་འཛིན་ཐོབ་པར་གྱུར། ། དེ་ལྟར་གླང་པོ་རིན་ཆེན་གསེར་ཁྲི་ཡིས། ། བརྒྱན་པའི་སྟེང་དུ་འཁོར་ལོས་སྒྱུར་བའི་སྲས། ། རྒྱ་མཚོ་བཞི་ཡི་ཆུས་བཀང་གསེར་བུམ་གྱིས། ། སྤྱི་བོའི་གནས་ནས་རྒྱས་པར་དབང་བསྐུར་བ། ། དེ་བཞིན་ཐུབ་པའི་ཆོས་ཀྱི་རྒྱལ་ཚབ་ཏུ། ། མངོན་པར་དབང་བསྐུར་ཁྱོད་ཀྱིས་འཁོར་བ་རུ། ། ལས་ཀྱིས་ཀུན་ནས་མནར་བའི་སེམས་ཅན་ཀུན། ། ཟག་མེད་བདེ་བའི་དཔལ་ལ་འགོད་དུ་གསོལ། ། ཞེས་གསུངས་པ་ལྟར་རོ། །
མ་འོངས་པ་ན་རྗེ་བཙུན་བྱམས་པ་མགོན་པོ་ཞིང་འདིར་བྱོན་ནས་འཚང་རྒྱ་བའི་མཛད་པ་སྟོན་ཚུལ་ནི། ཐུབ་པའི་བསྟན་པ་ལོ་ལྔ་སྟོང་དུ་གནས་པ་རིམ་གྱིས་རྫོགས་ནས་མཐར་རྟགས་ཙམ་འཛིན་པ་ལོ་ལྔ་བརྒྱ་དང་། དེ་ནས་དེ་ཡང་ནུབ་སྟེ་སེམས་ཅན་རྣམས་རྨོངས་ཤིང་ཉོན་མོངས་པ་ཁོ་ནའི་དབང་དུ་སོང་སྟེ་ཕན་ཚུན་གཅིག་ལ་གཅིག་འཚེ་ཞིང་སྡིག་པ་ཁོ་ན་སྤྱོད་པས་བསོད་ནམས་ཇེ་དམན་ཇེ་དམན་ལ་སོང་སྟེ་ཚེ་ལོ་ཉི་ཤུ་དང་། དེ་ཡང་ཇེ་ཐུང་ཇེ་ཐུང་ལ་སོང་སྟེ་མཐར་ཚེ་ལོ་བཅུ་ལ་རིང་མཐའ་བྱེད་པའི་དུས་འབྱུང་ཞིང་། དེ་ནས་མུ་གེའི་བསྐལ་པ་དང་། ནད་ཀྱི་བསྐལ་པ་དང་། མཚོན་གྱི་བསྐལ་པ་རྣམས་རིམ་གྱིས་བྱུང་སྟེ་སེམས་ཅན་རྣམས་ཕན་ཚུན་འཐབ་རྩོད་ཀྱིས་སྡུག་བསྔལ་ཞིང་ཉམ་ཐག་པ་དམྱལ་བར་གནས་པ་ལྟ་བུར་འགྱུར་ལ། དེའི་དུས་སུ་རྗེ་བཙུན་བྱམས་པ་མགོན་པོའི་སྤྲུལ་པ་ཁྲུ་གང་པ་སྐུ་ལ་ཆོས་གོས་ངུར་སྨྲིག་གསོལ་བ། གཟི་བརྗིད་འབར་ཞིང་འོད་འཕྲོ་བ་ཞིག་བྱོན་པ་སེམས་ཅན་དེ་རྣམས་ཀྱིས་མཐོང་ནས་ངོ་མཚར་ཞིང་དད་པ་སྐྱེས་ཏེ་འདི་ལྟ་བུའི་སྐུ་གཟུགས་མཛེས་པ་ཅི་ལས་བྱུང་ཞེས་གསོལ་པས། སྤྲུལ་པའི་བྱམས་མགོན་དེས་ངས་བཟོད་པ་བསྒོམས་པས་འདི་ལྟར་བྱུང་བ་ཡིན། ཁྱེད་རྣམས་ཀྱང་འཐབ་རྩོད་སྤོངས་ལ་བཟོད་པ་སྒོམས་ཤིག ། དེ་ལྟར་བྱས་ན་ང་དང་འདྲ་བར་འགྱུར་རོ། ། ཞེས་གསུངས་པས། བྱམས་མགོན་གྱི་ཐུགས་བསྐྱེད་ཀྱི་མཐུས་སེམས་ཅན་དེ་དག་གིས་བཟོད་པ་བསྒོམས་པས་རིམ་གྱིས་བསོད་ནམས་རྒྱས་ནས་ཚེ་རིང་དུ་འཕེལ་ཏེ་ཚེ་ལོ་ཉི་ཤུ་པ་དང་། སུམ་ཅུ་པ་སོགས་ཚེ་ཇེ་རིང་ཇེ་རིང་དུ་གྱུར་ཅིང་བདེ་སྐྱིད་ཀྱང་ཇེ་འཕེལ་དུ་སོང་སྟེ་འཛམ་བུའི་གླིང་གི་ས་ཆེན་པོའི་ཁྱོན་འདི་ཐམས་ཅད་ལག་མཐིལ་ལྟར་མཉམ་ཞིང་ཡངས་པ། ངམ་གྲོག་དང་ཚེར་མ་དང་ལྗན་ལྗིན་དང་གྱོ་མོ་དང་གསེག་མ་ལ་སོགས་པ་མེད་ཅིང་། ནེའུ་གསིང་མཛེས་པས་ཁྱབ་པ། རྐང་པ་བཏེག་ན་སོར་བཞི་འཕར་ཞིང་མནན་ན་ནེམ་ཞེས་བྱེད་པ་ཤ་སྟག་སྟེ། ཤིང་བལ་ལྟར་འཇམ་པ། འབྲུ་དང་། ལོ་ཏོག་དང་། འཁྲི་ཤིང་གེལ་པ་ལ་སོགས་པས་གང་ཞིང། ཧ་ཅང་ཡང་མི་དྲོ་ཧ་ཅང་ཡང་མི་གྲང་བ་རླུང་ཤིན་ཏུ་ཆུང་བ། དུས་དང་ཚད་མཉམ་པར་ལྡང་ཞིང་དྲི་ཕུན་སུམ་ཚོགས་པ། མངར་ཞིང་ཞིམ་པའི་ས་ལུ་མ་རྨོས་པར་སྐྱེ་ཞིང་། ལྷའི་ཆར་བབས་པས་སའི་བཅུད་འཕེལ་བ། ཚོན་སྣ་ཚོགས་ཀྱིས་སྤྲས་པའི་གོས་ཀྱི་ལྗོན་ཤིང་མེ་ཏོག་དང་འབྲས་བུ་ཕུན་སུམ་ཚོགས་པ་འཕང་དུ་རྒྱང་གྲགས་ཀྱི་ཚད་ཙམ་ཡོད་པས་གང་བ། བར་བར་ན་ལྟེང་ཀ་དང་ཁྲུས་ཀྱི་རྫིང་བུ་དང་ལྡན་པ་སྟེ་ཡོན་ཏན་བརྗོད་ཀྱིས་མི་ལང་བ་ཞིག་འབྱུང་ངོ་། ། དེར་སྐྱེས་པའི་མི་རྣམས་ནི། ལུས་ལ་ཧ་རི་ཙན་དན་གྱི་དྲི་བྲོ་བ། ཀུ་ཤའི་གོས་ཁྱད་པར་དུ་འཕགས་པ་གྱོན་པ། ལྷའི་དཔལ་འབྱོར་ལ་ལོངས་སྤྱོད་ཅིང་ཚེ་ལོ་བརྒྱད་ཁྲི་ཐུབ་པ། ལུས་ངག་ཡིད་གསུམ་མི་དགེ་བ་དང་བྲལ་བ། ཁ་དོག་བཟང་ཞིང་ལུས་གཟུགས་ཆེ་བ། དེ་ལ་ད་ལྟའི་ཁྲུ་བརྒྱད་ཅུ་འམ་བརྒྱད་ཅུ་རྩ་བརྒྱད་པ། འདོམ་ཉི་ཤུ་རྩ་གཉིས་ཙམ་ཡོད་པ། ཀུན་ཀྱང་ཚན་པོ་ཆེའི་སྟོབས་དང་ལྡན་པ། མི་དེ་དག་ལ་འདོད་པ་དང་ཟ་བ་དང་རྒས་པ་སྟེ་དེ་ཙམ་མ་གཏོགས་ནད་ཀྱི་མིང་ཙམ་ཡང་མི་གྲག་པ་ལྷའི་ལུས་དང་ཁྱད་པར་མེད་པར་འགྱུར་རོ། ། སྟོན་པའི་བསྟན་པ་རྟགས་ཙམ་འཛིན་པ་འདི་ནུབ་པ་ཡན་ཆད་ཀྱིས་བསྐལ་པ་ཡ་ཐོག་རིང་མོ་རྫོགས་པ། དེ་ནས་རྗེ་བཙུན་བྱམས་པ་མགོན་པོ་མ་བྱོན་གྱི་བར་ལ་རང་སངས་རྒྱས་མང་དུ་འབྱུང་ཞིང་། བར་གྱི་ཁུག་པ་བཅོ་བརྒྱད་ཀྱི་འགོར་རྗེ་བཙུན་བྱམས་པ་མགོན་པོ་འབྱོན་པར་གསུངས་སོ། ། རྗེ་བཙུན་བྱམས་པ་མགོན་པོ་གང་དུ་འབྱོན་པའི་གནས་ནི་ཐུབ་པའི་དབང་པོ་མྱ་ངན་ལས་འདའ་ཚུལ་བསྟན་པའི་ས་གྲོང་ཁྱེར་རྩྭ་ཅན་དུ་ཏོག་གི་བློ་གྲོས་ཞེས་བྱ་བའི་རྒྱལ་པོའི་ཕོ་བྲང་འབྱུང་ལ། ཕོ་བྲང་དེའི་ཆུར་དཔག་ཚད་བཅུ་གཉིས། ཞེང་དུ་དཔག་ཚད་བདུན་ཡོད་པ། རིན་པོ་ཆེ་སྣ་བདུན་གྱི་སོ་ཕག་གི་རྩིག་པ་རིམ་པ་བདུན་དང་། འོབས་རིམ་པ་བདུན་དང་། རིན་པོ་ཆེ་ལས་གྲུབ་པའི་ཏ་ལའི་ཕྲེང་བ་རིམ་པ་བདུན་གྱིས་བསྐོར་ཞིང་དྲིལ་བུའི་དྲ་བས་མཛེས་པ། དེ་དག་རླུང་གིས་བསྐྱོད་པ་ན་སིལ་སྙན་ཡན་ལག་ལྔ་དང་ལྡན་པའི་སྒྲ་འབྱུང་སྟེ། སེམས་ཅན་རྣམས་དགའ་བར་བྱེད་པ། ལྷ་རྫས་ལས་གྲུབ་པའི་མེ་ཏོག་མནྡྷ་ར་དང་། ཀུ་མུད་ཏ་དང་། ཨུཏྤལ་དང་། མི་ཡུལ་ན་ཡོད་པའི་མེ་ཏོག་སྣ་ཚོགས་པའི་རྒྱན་བཀྲམ་པ། ཡན་ལག་བརྒྱད་དང་ལྡན་པའི་ཁྲུས་ཀྱི་རྫིང་བུ་དང་། མཚོ་པདྨས་བརྒྱན་པ་རྣམས་ལ་ཆུ་བྱ་མང་པོ་སྒྲ་སྙན་པ་སྣ་ཚོགས་སྒྲོག་པ། སྐྱེད་མོས་ཚལ་ཕུན་སུམ་ཚོགས་པ་མེ་ཏོག་གིས་གང་བ་ཡོད་པ། གྲོང་ཁྱེར་དེའི་ཕྱོགས་བཞི་དང་དབུས་ཀུན་ན་གཞན་ལས་ཁྱད་པར་དུ་འཕགས་པའི་རིན་པོ་ཆེའི་དཔག་བསམ་གྱི་ཤིང་རེ་བ་ཐམས་ཅད་སྐོང་བ་ཡོད་པས། དེས་ལྷའི་འབྱོར་བ་ཡང་ཟིལ་གྱིས་གནོན་པར་བྱེད་དོ། ། དེར་གླིང་བཞི་ལ་དབང་བའི་འཁོར་ལོས་བསྒྱུར་པའི་རྒྱལ་པོ་དཔུང་ཚོགས་ཡན་ལག་བརྒྱད་དང་ལྡན་པ། རིན་པོ་ཆེ་སྣ་བདུན་དང་། བུ་སྟོང་དང་ལྡན་པ། བཙུན་མོ་བརྒྱད་ཁྲི་དང་། ཁམས་ཀྱི་རྒྱལ་ཕྲན་བཞི་སྟོང་བརྒྱད་ཅུ་ལ་དབང་བསྒྱུར་པ་ཆོས་ཀྱི་སྲིད་སྐྱོང་བའི་རྒྱལ་པོ་དུང་ཞེས་བྱ་བ་འབྱུང་ཞིང་། དེའི་མདུན་ན་འདོན་ཆེན་པོ་བྲམ་ཟེ་ཚངས་རབ་ཅེས་པ་ཐོས་པ་མང་ཞིང་རིག་བྱེད་ཀུན་ལ་མཁས་པ། དེ་ལ་བཙུན་མོ་ཚངས་ལྡན་མ་ཞེས་བྱ་བ་སྒྱུ་རྩལ་གྱི་ཡོན་ཏན་ཡོངས་སུ་རྫོགས་ཤིང་མཛེས་པ་ཞིག་འབྱུང་སྟེ། བྲམ་ཟེ་ཡབ་ཡུམ་དེ་གཉིས་ཀྱི་སྲས་སུ་རྗེ་བཙུན་བྱམས་མགོན་འབྱོན་པར་འགྱུར་རོ། ། དེ་ཡང་རྗེ་བཙུན་བྱམས་པ་མགོན་པོས་དུས་དང་ཡུལ་དང་རིགས་དང་རུས་དང་ཡུམ་ལྔ་ལ་གཟིགས་ནས་དགའ་ལྡན་གྱི་གནས་ནས་བབས་ཏེ་འཛམ་བུའི་གླིང་དུ་འབྱོན་པ་ཡིན་ནོ། ། དེ་ཡང་དུས་ནི་ཚེ་ལོ་བརྒྱད་ཁྲི་པ་སྣོད་བཅུད་ཐམས་ཅད་ཕུན་སུམ་ཚོགས་པ་བྱམས་མགོན་རང་ཉིད་ཀྱི་འདུལ་བར་འོས་པའི་སེམས་ཅན་རྣམས་འདུལ་བའི་དུས་ལ་གཟིགས་པའོ། ། ཡུལ་ནི་འཛམ་བུའི་གླིང་ལ་གཟིགས་པའོ། ། རིགས་ནི་དེའི་དུས་ཀྱི་མི་རྣམས་བྲམ་ཟེའི་རིགས་མཆོག་ཏུ་བྱེད་པས་བྲམ་ཟེའི་རིགས་ལ་གཟིགས་པའོ། ། རུས་ནི་ཡབ་ཡུམ་གཉིས་ཀའི་རིགས་རྒྱུད་སྐྱོན་མེད་པ་ལ་གཟིགས་པའོ། ། ཡུམ་ནི་བྲམ་ཟེ་ཚངས་ལྡན་མ་ཡོན་ཏན་ཐམས་ཅད་དང་ལྡན་ཞིང་སྨོན་ལམ་གྱི་མཐུ་ཅན་དེ་ལ་གཟིགས་པའོ། ། དེ་ལྟར་གཟིགས་ནས་དུས་ལ་བབ་པ་ན་ལྷ་རྣམས་ཀྱིས་མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་དགའ་ལྡན་ནས་བབས་ཏེ་འཛམ་བུའི་གླིང་དུ་གཤེགས་ཏེ་ཡུམ་ཚངས་ལྡན་མའི་ལྷུམས་སུ་ཞུགས་སོ། ། དེ་ནས་ཟླ་བ་བཅུའི་རིང་ལ་དཀར་ཕྱོགས་ཀྱི་ལྷ་རྣམས་ལ་ནུབ་རེ་བཞིན་ཆོས་སྟོན་པ་སོགས་གདུལ་བྱའི་དོན་རྒྱ་ཆེར་མཛད་ནས་ཟླ་བ་བཅུ་སོང་བ་ན་ཡུམ་ཚངས་ལྡན་མ་སྐྱེད་མོས་ཚལ་མེ་ཏོག་བཟང་རྒྱས་ཞེས་བྱ་བར་བྱོན་ནས་ཕྱག་གཡས་པས་ཤིང་གི་ཡལ་ག་ལ་འཇུས་ཏེ་གནམ་དུ་གཟིགས་པ་ན་རྩིབ་ལོགས་གཡས་ནས་སྐུ་བལྟམས། དེའི་འོད་ཀྱིས་འཇིག་རྟེན་ཐམས་ཅད་བཀང་སྟེ་སྐད་ཅིག་དེ་ལ་སེམས་ཅན་རྣམས་ཀྱི་སྡུག་བསྔལ་རྒྱུན་བཅད་དེ་བདེ་བས་ཁྱབ་པར་བྱས། ལྷའི་དབང་པོ་བརྒྱ་བྱིན་གྱིས་བར་སྣང་ལས་བླངས། ཀླུའི་རྒྱལ་པོ་རྣམས་ཀྱིས་ནམ་མཁའ་ལས་བདུད་རྩིའི་ཁྲུས་གསོལ། དེ་ནས་ཕྱོགས་བཞིར་གོམ་པ་བདུན་བོར་བའི་ཤུལ་དུ་གཏེར་ཆེན་པོ་རེ་དང་པདྨ་རེ་བྱུང་ཞིང་། ཕྱོགས་བཞིར་གཟིགས་ཏེ། ང་ཡི་སྐྱེ་བའི་ཐ་མ་ནི། ། འདི་ཡིན་ཡང་སྲིད་ཡོད་མ་ཡིན། ། ཡང་དང་ཡང་དུ་ཕྱིར་མི་འོང་། ། ཟག་མེད་མྱ་ངན་འདས་པར་འགྲོ། ཞེས་གསུངས། དེའི་ཚེ་བྱམས་མགོན་སྐུ་བལྟམས་པ་དང་མཉམ་དུ་འཁོར་ལོས་བསྒྱུར་བའི་རྒྱལ་པོ་དུང་ལ་སྲས་སྟོང་དང་། གཞན་ཡང་འཇིག་རྟེན་ན་ཡ་རབས་ཀྱི་རིགས་མང་པོ་བཙའ་ཞིང་གཏེར་རྣམས་ཀྱང་ཁ་བྱེ། ལྷ་རྣམས་ཀྱིས་མེ་ཏོག་གི་ཆར་འབེབས། བྱམས་མགོན་གྱི་དབུ་ཐོག་ཏུ་གདུགས་དཀར་པོ་བཟུང་། ཕྱོགས་ཐམས་ཅད་རོལ་མོའི་སྒྲ་སོགས་མཆོད་པའི་བྱེ་བྲག་སྣ་ཚོགས་པས་ཁྱབ་པར་བྱེད་དོ། ། དེ་ནས་ཡབ་ཡུམ་གཉིས་ཀྱིས་གཞོན་ནུ་དེ་མཚན་མཁན་ལ་བསྟན་པ་ན་འདི་ནི་བྱང་ཆུབ་སེམས་དཔའ་བྱམས་པ་ཞེས་བྱ་བ་ཡིན་པས་མྱུར་དུ་འཚང་རྒྱ་བར་འགྱུར་རོ། ། ཞེས་ལུང་སྟོན། དེ་ནས་བྱམས་མགོན་གྱིས་སྒྱུ་རྩལ་སྟོན་པ་སོགས་གཞོན་ནུ་རོལ་རྩེད་མཛད་པས་སྲོག་ཆགས་གྲངས་མེད་པ་ཞིག་སྨིན་གྲོལ་ལ་འགོད་ཅིང་ལོ་ཉི་ཁྲིའི་བར་དུ་ཁྱིམ་དུ་བཞུགས། དེ་ནས་འཚང་རྒྱ་བའི་དུས་ལ་བབ་པ་ན། རྒྱལ་པོ་དུང་གིས་རིན་པོ་ཆེ་སྣ་ཚོགས་ཀྱིས་བརྒྱན་པའི་མཆོད་སྡོང་སྤོམས་སུ་འདོམ་དྲུག་ཅུ་རྩ་བཞི། འཕང་དུ་འདོམ་སྟོང་ཡོད་པ་ཞིག་བྱམས་པའི་ཡབ་ཚངས་རབས་ལ་ཕུལ་ལོ། ། ཚངས་རབས་ཀྱིས་བྲམ་ཟེ་རྣམས་ལ་བྱིན་ནོ། ། བྲམ་ཟེ་རྣམས་ཀྱིས་དེ་མ་ཐག་བགོས་སོ། ། རྗེ་བཙུན་བྱམས་པས་མཆོད་སྡོང་དེ་ཉིད་མི་རྟག་པར་དགོངས་ཏེ་ཡབ་ལ་གནང་བ་གསོལ་ནས་བྲམ་ཟེ་དང་རྒྱལ་བུ་བཞི་སྟོང་བརྒྱད་ཅུ་དང་བཅས་ཏེ་རབ་ཏུ་བྱུང་ནས་ཀླུ་ཤིང་ཞེས་པའི་བྱང་ཆུབ་ཀྱི་ཤིང་འཕང་དུ་དཔག་ཚད་ཙམ་དུ་འཕགས་ཤིང་། ལོ་འདབ་དང་འབྲས་བུས་མཛེས་པའི་ཡལ་གས་ཁོ་ར་ཁོར་ཡུག་ཏུ་རྒྱང་གྲགས་དྲུག་གི་བར་ཁེབས་པའི་དྲུང་དུ་འཁོད་དེ་རབ་ཏུ་བྱུང་བའི་ནུབ་མོ་ཉིད་ལ་མངོན་པར་རྫོགས་པར་སངས་རྒྱས་སོ། ། དེ་ནས། ད་ནི་གནས་བཟང་མཆོག་ཐོབ་པས། ། ད་བཟོད་གནས་གཞན་མི་འགྲོ་སྟེ། ། འཆི་བདག་ན་རྒ་ལས་གྲོལ་བས། ། ཟབ་མོ་བདུད་རྩིའི་སྒོ་འདི་རྙེད། ། ཅེས་གསུངས་ནས་ཞག་བདུན་དུ་ཆོས་མ་གསུངས་པ་ལས། ཚངས་པས་གདུགས་དཀར་པོ་གསེར་གྱི་རྩ་བ་ཅན་ཁ་དོག་སྣ་ལྔའི་མུ་ཏིག་དང་དྲིལ་བུའི་དྲ་བས་གཡོགས་པ་དཔག་ཚད་གསུམ་ཡོད་པ་འཛིན་ཅིང་། ལྷའི་རིན་པོ་ཆེས་བརྒྱན་པའི་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ཞིང་། མེ་ཏོག་དང་རིན་པོ་ཆེ་དང་སྤོས་ཀྱི་ཆར་རབ་ཏུ་ཕབ་སྟེ། རྗེ་བཙུན་བྱམས་པ་མགོན་པོ་ཁྱེད་ཉིད་ཀྱིས། ། ཆོས་ཀྱི་འཁོར་ལོ་བླ་མེད་བསྐོར་དུ་གསོལ། ། ཞེས་སོགས་ཀྱིས་གསོལ་བ་བཏབ་པས་ཅང་མི་གསུང་བས་གནང་སྟེ། མེ་ཏོག་མཛེས་པར་རྒྱས་པའི་སྐྱེད་མོས་ཚལ་དུ་གཤེགས་སོ། ། དེར་གཤེགས་པའི་རྫུ་འཕྲུལ་དང་ཆོ་འཕྲུལ་དག་མཐོང་བས་རྒྱལ་པོ་དུང་ཡང་བུ་དང་བཙུན་མོ་དང་བཅས་རྒྱལ་པོ་བཞི་སྟོང་བརྒྱད་ཅུ། ཚངས་རབས་སོགས་བྲམ་ཟེ་བཞི་སྟོང་བརྒྱད་ཅུ། སྲོག་ཆགས་སྟོང་ཕྲག་གྲངས་མེད་པ་དག་ཀྱང་འཁོར་དེར་འདུས་ཏེ་རབ་ཏུ་བྱུང་ངོ་། ། དེ་ནས་ཆོས་ཀྱི་འཁོར་ལོ་བསྐོར་བའི་འདུས་པ་དང་པོ་ལ་དགྲ་བཅོམ་པ་དུང་ཕྱུར་ཕྲག་དགུ་དང་བྱེ་བ་ཕྲག་དྲུག་གོ ། གཉིས་པ་ལ་དུང་ཕྱུར་ཕྲག་དགུ་དང་བྱེ་བ་ཕྲག་བཞིའོ། ། གསུམ་པ་ལ་དུང་ཕྱུར་ཕྲག་དགུ་དང་བྱེ་བ་ཕྲག་གཉིས་སོ། ། དེའི་ཚེ་རྒྱལ་བའི་འོད་ཟེར་གྱི་མཐུས་མུན་པའི་ཆ་ཤས་མ་མཆིས་ཤིང་ཉི་ཟླའི་འོད་ཀྱང་ཟིལ་གྱིས་མནན་པ་ལྟར་གྱུར་ནས། ཉིན་མཚན་གྱི་དབྱེ་བ་མེ་ཏོག་རྣམས་ཁ་བྱེ་བའི་ཚེ་ཉིན་མོ། ཟུམ་པའི་ཚེ་མཚན་མོའོ། ། ཡང་བྱ་རྣམས་སྒྲ་གྲག་པའི་ཚེ་ཉིན་མོ། མི་གྲག་པའི་ཚེ་མཚན་མོའོ། ། དེ་ཙམ་མ་གཏོགས་མཚན་མོའི་མུན་པ་མ་མཆིས་ཏེ་ཡུལ་འཁོར་ཀུན་རྩེ་ཞིང་དགའ་མགུར་སྤྱོད་ལ། ཐམས་ཅད་ཀྱང་བྱམས་མགོན་གྱི་མཐུས་ཕན་ཚུན་བྱམས་པ་ལ་གནས་ཤིང་ཆོས་བཞིན་སྤྱོད་པ་ཤ་སྟག་གོ ། དེ་ནས་རྒྱལ་བ་ཉན་ཐོས་རྣམས་དང་ཐབས་གཅིག་ཏུ་གྲོང་ཁྱེར་དུ་བསོད་སྙོམས་ལ་རྒྱུ་བ་ན། བརྒྱ་བྱིན་དང་ཚངས་པ་སོགས་ལྷ་ཐམས་ཅད་ཀྱིས་ལྷ་རྫས་ཀྱི་མེ་ཏོག་སྣ་ཚོགས་པ་དང་། ཕྲེང་བ་དང་མཆོད་པའི་བྲེ་བྲག་རྣམས་ཀྱི་ཆར་མངོན་པར་འབེབས་ལ། གང་དུ་བཞུགས་པའི་ས་དེར་རིན་པོ་ཆེའི་ཁྲི་དང་འཇམ་ཞིང་རེག་ན་བདེ་བའི་གདིང་བ་གྱ་ནོམ་པ་འདིང་བར་བྱེད་དོ། ། སྐྱེ་དགུ་ཀུན་ཡང་བསྟོད་པའི་དབྱངས་སྙན་པོ་སོགས་ཀྱིས་མཆོད་དོ། ། དེ་ལྟར་ལོ་དྲུག་ཁྲིའི་བར་དུ་སེམས་ཅན་གྲངས་མེད་དཔག་ཏུ་མེད་བརྗོད་དུ་མེད་པའི་དོན་མཛད་ཅིང་ཆོས་ཀྱི་འཁོར་ལོ་བསྐོར་ནས་ཡོངས་སུ་མྱ་ངན་ལས་འདའ་སྟེ། སྐུ་གདུང་ནི་རིལ་པོ་གཅིག་ཏུ་བཞུགས་སོ། ། རྗེ་བཙུན་བྱམས་པ་མགོན་པོ་མངོན་པར་རྫོགས་པར་འཚང་རྒྱ་བའི་ཚེ་ཡབ་ཡུམ་དང་། འཁོར་འདུས་པ་དང་སྐུ་ཚེའི་ཚད་ལ་སོགས་པ་ནི་མདོ་སྡེ་བསྐལ་བཟང་ལས། དེ་བཞིན་གཤེགས་པ་བྱམས་པ་སྐྱེ་བའི་ཡུལ་ནི་རྒྱལ་པོའི་ཕོ་བྲང་གྲོང་ཁྱེར་ཏོག་གི་བློ་གྲོས་ཞེས་བྱའོ། ། རིགས་ནི་བྲམ་ཟེའོ། ། འོད་ནི་དཔག་ཚད་གཅིག་གོ ། ཡབ་ནི་ཚངས་བཟང་ཞེས་བྱའོ། ། ཡུམ་ནི་ཚངས་བདག་མ་ཞེས་བྱའོ། ། སྲས་ནི་བསོད་ནམས་སྟོབས་ཆེན་ཞེས་བྱའོ། ། རིམ་གྲོ་པ་ནི་རྒྱ་མཚོ་ཞེས་བྱའོ། ། ཤེས་རབ་ཅན་རྣམས་ཀྱི་མཆོག་ནི་ཡེ་ཤེས་འོད་ཅེས་བྱའོ། ། རྫུ་འཕྲུལ་ཅན་རྣམས་ཀྱི་མཆོག་ནི་བརྩོན་འགྲུས་བརྟན་ཞེས་བྱའོ། ། འདུས་པ་དང་པོ་ལ་ནི་ཉན་ཐོས་དགྲ་བཅོམ་པ་དུང་ཕྱུར་ཕྲག་དགུ་དང་བྱེ་བ་ཕྲག་དྲུག་གོ ། གཉིས་པ་ལ་ནི་དུང་ཕྱུར་ཕྲག་དགུ་དང་བྱེ་བ་ཕྲག་བཞིའོ། ། གསུམ་པ་ལ་ནི་དུང་ཕྱུར་ཕྲག་དགུ་དང་བྱེ་བ་ཕྲག་གཉིས་སོ། ། སྐུ་ཚེའི་ཚད་ནི་ལོ་བརྒྱད་ཁྲི་བཞི་སྟོང་ངོ་། ། དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། ། སྐུ་གདུང་ནི་རིལ་པོ་གཅིག་ཏུ་འདུག་གོ ། མཆོད་རྟེན་ཡང་གཅིག་ཏུ་ཟད་དོ། ། ཞེས་གསུངས་པ་ལྟར་རོ། ། སྟོན་པ་ཤཱཀྱའི་རྒྱལ་པོ་འདིའི་བསྟན་པ་ལ་རབ་ཏུ་བྱུང་ནས་བསླབ་པའི་གཞི་རྣམས་ལེགས་པར་བསྲུང་ཞིང་ཐོས་བསམ་སྒོམ་གསུམ་ལ་འབད་ཀྱང་ཐེག་པ་གསུམ་གྱི་འབྲས་བུ་མ་ཐོབ་པ་རྣམས་རྗེ་བཙུན་བྱམས་པ་མགོན་པོ་ཞིང་འདིར་བྱོན་ནས་ཆོས་ཀྱི་འཁོར་ལོ་བསྐོར་བའི་ཚེ་རྗེས་སུ་འཛིན་པར་ཐུབ་པས་གསུངས་ཤིང་བྱམས་མགོན་ཉིད་ཀྱིས་ཀྱང་ཞལ་གྱིས་བཞེས་ཏེ། བྱམས་པ་ལུང་བསྟན་པའི་མདོ་ལས། ཤཱཀྱ་སེང་གེའི་བསྟན་པ་ལ། ། བསླབ་གཞི་ཡང་དག་བླངས་ནསནི། ། ཇི་ལྟར་གསུངས་བཞིན་རབ་བསྒྲུབས་ན། ། ང་ཡི་བསྟན་ལ་ལྷགས་པ་ཡིན། ། དགེ་འདུན་ལ་ཡང་ཆོས་གོས་དང་། ། ཞལ་ཟས་དང་ནི་བཏུང་བ་དང་། ། བསྙུན་གསོས་སྣ་ཚོགས་སྦྱིན་པ་རྣམས། ། ཕུལ་ན་ང་ཡི་བསྟན་ལ་ལྷགས། ། བཅུ་བཞི་དང་ནི་བཅོ་ལྔ་དང་། ། དེ་བཞིན་ཟླ་ཕྱེད་ཚེས་བརྒྱད་དང་། ། ཆོ་འཕྲུལ་གྱི་ནི་ཟླ་བ་ལ། ། བསྙེན་གནས་ཡན་ལག་བརྒྱད་བསྲུངས་ཤིང་། ། མཆོད་དང་གསོ་སྦྱོང་ལེགས་བྱས་ན། ། ང་ཡི་བསྟན་ལ་ལྷགས་པ་ཡིན། ། ཞེས་གསུངས་པ་ལྟར་རོ། ། དགའ་ལྡན་དུ་རྗེ་བཙུན་བྱམས་པ་མགོན་པོའི་ཞབས་དྲུང་དུ་སྐྱེས་ནས་བྱམས་མགོན་ལས་བྱང་ཆུབ་ལམ་གྱི་རིམ་པའི་གནད་རྣམས་ཐོས་པར་འདོད་པ་རྣམས་ཀྱིས་རྗེ་བཙུན་བྱམས་པ་མགོན་པོའི་སྐུ་ཡིད་ལ་བྱས་ཏེ་ཡན་ལག་བདུན་པ་མཎྜལ་དང་བཅས་པ་ཡང་དང་ཡང་དུ་འབུལ་བ་དང་། ཁས་བླངས་པའི་བསླབ་ཁྲིམས་དག་པར་བསྲུང་བ་དང་། སྟོན་པ་ཐུབ་པའི་དབང་པོ་དང་མགོན་པོ་བྱམས་པ་གཉིས་ཀ་ལ་གསོལ་བ་བཏབ་ན་ཇི་ལྟར་སྨོན་པ་དེ་བཞིན་དུ་འགྲུབ་པར་མདོ་ལས་གསུངས། བྱམས་པས་དམ་བཅས་པའི་གཟུངས་ཁ་ཏོན་དུ་བྱས་ནའང་དགའ་ལྡན་དུ་སྐྱེ་བ་དང་། བྱམས་པ་མགོན་པོས་ངེས་པར་རྗེས་སུ་འཛིན་པར་ཞལ་གྱིས་བཞེས་ཤིང། སྔོན་གྱི་དམ་པ་མང་པོས་ཞིང་གཤེགས་ཁར་དགའ་ལྡན་དུ་ཕེབས་བཞེད་ནས་བྱམས་པས་དམ་བཅས་པའི་གཟུངས་ཁ་ཏོན་དུ་མཛད་པ་དང་། བྱམས་པའི་སྐུ་བཞེངས་པ་དང་། བྱམས་པའི་སྨོན་ལམ་འདོན་ཞིང་གཞན་ལའང་རྒྱ་ཆེར་སྤེལ་བར་མཛད་པའི་རྣམ་ཐར་མང་དུ་སྣང་ངོ་། ། བྱང་ཆུབ་ལམ་གྱི་རིམ་པའི་གདམས་ངག་གི་གཞུང་རྩ་བ་མཐར་ཐུག་པ་ནི་ཤེར་ཕྱིན་གྱི་མདོ་སྡེ་རིན་པོ་ཆེ་ཡིན་ལ། ཤེར་ཕྱིན་གྱི་མདོ་སྡེ་རིན་པོ་ཆེའི་དོན་རྣམས་བྱང་ཆུབ་ལམ་གྱི་རིམ་པའི་མན་ངག་ཏུ་སྦྱར་ཏེ་སྟོན་པའི་གཞུང་ནི་རྗེ་བཙུན་བྱམས་མགོན་གྱིས་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་མངོན་པར་རྟོགས་པའི་རྒྱན་ཡིན་ཏེ། མངོན་རྟོགས་རྒྱན་གྱིས་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་ཐམས་ཅད་བརྗོད་བྱ་དངོས་པོ་བརྒྱད། དེ་ལ་ནང་གསེས་ཀྱིས་ཕྱེ་བས་དོན་བདུན་ཅུར་གཏན་ལ་ཕབ། དེའི་དང་པོ་སེམས་བསྐྱེད་ནས་ཐ་མ་འཕྲིན་ལས་ཀྱི་བར་ཐམས་ཅད་གང་ཟག་གཅིག་གིས་ཉམས་སུ་ལེན་ཚུལ་གསལ་བར་སྟོན་པ་ནི་བྱང་ཆུབ་ལམ་གྱི་རིམ་པ་སྟེ། རྗེ་བདག་ཉིད་ཆེན་པོས་བྱང་ཆུབ་ལམ་གྱི་རིམ་པ་འདི་མངོན་པར་རྟོགས་པའི་རྒྱན་གྱི་གདམས་ངག་ཡིན་ལ། ཞེས་སོགས་རྒྱ་ཆེར་གསུངས་པ་ལྟར་རོ། ། དེ་ལྟར་རྗེ་བཙུན་བྱམས་པ་མགོན་པོས་བྱང་ཆུབ་ལམ་གྱི་རིམ་པའི་གདམས་ངག་གི་གཞུང་རྩ་བ་མངོན་རྟོགས་རྒྱན་དང་། དེའི་ཉམས་ལེན་གྱི་གནད་རྣམས་མདོ་མང་པོ་ནས་བཏུས་ཏེ། རྒྱས་པར་སྟོན་པ་མདོ་སྡེ་རྒྱན་དང་། བྱང་ཆུབ་ལམ་གྱི་རིམ་པའི་ཞི་ལྷག་གཉིས་ཀྱི་ཉམས་ལེན་ཟུར་དུ་བཀར་ནས་སྟོན་པ་དབུས་མཐའ་རྣམ་འབྱེད་དང་། ཆོས་དང་ཆོས་ཉིད་རྣམ་འབྱེད་གཉིས་བྱང་ཆུབ་ལམ་གྱི་རིམ་པའི་ལྟ་བའི་གནད་མཐར་ཐུག་པ་མགོན་པོ་ཀླུ་སྒྲུབ་ཀྱིས་རྒྱལ་བའི་དགོངས་པ་བཀྲལ་བའི་དབུ་མའི་ལྟ་བ་དང་མཐུན་པར་སེམས་ཀྱི་ཆོས་ཉིད་སྤྲོས་པའི་མཐའ་ཐམས་ཅད་དང་བྲལ་བའི་རང་བཞིན་གནས་རིགས་གཏན་ལ་ཕབ་སྟེ་མཐར་ཐུག་ཐེག་པ་གཅིག་ཏུ་བསྒྲུབ་པ་རྒྱུད་བླ་མ་རྣམས་མཛད་དེ། དེ་དག་ལ་བྱམས་ཆོས་སྡེ་ལྔ་ཞེས་ཡོངས་སུ་གྲགས་སོ། ། དེས་ན་བྱང་ཆུབ་ལམ་གྱི་རིམ་པ་ལ་ཉམས་ལེན་སྙིང་པོར་བྱ་འདོད་པ་རྣམས་ཀྱིས་རྗེ་བཙུན་བྱམས་པ་མགོན་པོ་ལ་གསོལ་བ་གདབ་པ་དང་། བྱམས་མགོན་གྱི་གཞུང་འདི་དག་ལ་གཅེས་པོ་ཆེར་བཟུང་ནས་ཐོས་བསམ་སྒོམ་གསུམ་ལ་འབད་པར་བྱའོ། ། ། །
༈ རྒྱལ་བས་ལུང་བསྟན་འཕགས་པ་ཐོགས་མེད་ཞབས། ། ཞེས་བསྔགས་པ། འཕགས་པ་ཐོགས་མེད་ནི། འཇམ་དཔལ་རྩ་རྒྱུད་ལས། ང་ནི་མྱ་ངན་འདས་འོག་ཏུ། ། ལོ་ནི་དགུ་བརྒྱ་ལོན་བ་ན། ། ཐོགས་མེད་ཅེས་བྱའི་དགེ་སློང་ནི། ། བསྟན་བཅོས་དེ་ནི་དོན་ལ་མཁས། ། མདོ་སྡེ་ངེས་དོན་དྲང་བའི་དོན། ། རྣམ་པ་མང་པོ་རབ་ཏུ་འབྱེད། ། འཇིག་རྟེན་རིག་པ་སྟོན་བདག་ཉིད། ། གཞུང་འབྱེད་ངང་ཚུལ་ཅན་དུ་འགྱུར། ། དེ་ཡི་རིག་པ་གྲུབ་པ་ནི། ། ས་ལའི་ཕོ་ཉ་མོ་ཞེས་བརྗོད། ། དེ་ཡི་སྔགས་ཀྱི་མཐུ་ཡིས་ནི། ། བློ་ནི་བཟང་པོ་སྐྱེ་བར་འགྱུར། ། བསྟན་པ་ཡུན་རིང་གནས་བྱའི་ཕྱིར། ། མདོ་ཡི་དེ་ཉིད་བསྡུས་དོན་བྱེད། ། ལོ་ནི་བརྒྱ་དང་ལྔ་བཅུར་འཚོ། ། དེ་ལུས་ཞིག་ནས་ལྷ་ཡུལ་འགྲོ། ། ཞེས་གསལ་བར་ལུང་བསྟན་པ་ཐུབ་པའི་བསྟན་པ་ཉམས་དམས་པ་གསོ་བའི་ཕྱིར་དུ་སྙིང་རྗེ་དང་སྨོན་ལམ་གྱི་དབང་གིས་ཞིང་འདིར་བསམ་བཞིན་དུ་བྱོན་པ་ཞིག་སྟེ། དེ་ཡང། རྒྱལ་བ་མྱ་ངན་ལས་འདས་ནས་རིང་པོ་མ་ལོན་པ་ན་ནང་པའི་བསྟན་པ་སྡེ་པ་བཅོ་བརྒྱད་དུ་གྱེས་པ་དང་། དེ་ནས་ཀྱང་ཉན་ཐོས་ཀྱི་གྲུབ་མཐའ་སྨྲ་བ་མང་བོ་ཞིག་གིས་ཐེག་ཆེན་རྒྱལ་བའི་བཀའ་མིན་ནོ་ཞེས་ལོག་པར་བཟུང་སྟེ་ཐེག་པ་ཆེན་པོའི་བསྟན་པ་ཆེས་ཆེར་ཉམས་དམས་པར་བྱས་ཤིང་ཉན་ཐོས་ཀྱི་གྲུབ་མཐའ་སྨྲ་བ་རྣམས་ཀྱང་ཕན་ཚུན་རྩོད་པར་བྱེད་པས་འདི་ནི་བདེན་གྱི་གཞན་ནི་གཏི་མུག་གོ་ཞེས་ཕྱོགས་ཕྱོགས་སུ་གྱེས་པས་རྒྱལ་བའི་བསྟན་པ་ཤིན་ཏུ་ཉམས་ཤིང་། ལྷག་པར་བདུད་སྡིག་ཏོ་ཅན་གྱིས་བྱིན་གྱིས་བརླབས་ཏེ་ཡིད་བསྒྱུར་བའི་མུ་སྟེགས་ཀྱི་རྒན་མོ་ཞིག་ན་རེ། ནང་པའི་གཎྜའི་སྒྲ་ལས་འགེམས་ཞེས་པ་ཞིག་སྣང་སྟེ། འོ་སྐོལ་ལ་གནོད་མི་གནོད་བརྟག་པར་རིགས་སོ། ། ཟེར་ནས་བརྟགས་པས། ལྷ་དང་ཀླུ་དང་གནོད་སྦྱིན་གྱིས་མཆོད་པའི། ། དཀོན་མཆོག་གསུམ་གྱི་ཏོག་སྡེ་འདི་བརྡུངས་པས། ། མུ་སྟེགས་འཆལ་པའི་ཀླད་པ་རྣམ་པར་འགེམས། ། ཞེས་པར་རིག་ནས་དམག་དྲངས་ཏེ་བསྟན་པ་བསྣུབས་སོ། ། དེ་ནས་ཅུང་ཟད་འཕེལ་ནས་ཡོད་པའི་ཚེ། དབུས་ཀྱི་རྒྱལ་པོས་སྟག་གཟིག་གི་རྒྱལ་པོ་ལ་རས་ཀྱི་ན་བཟའ་སྲུབས་མེད་པ་ཞིག་སྐྱེས་སུ་བསྐུར་ཏེ། དེའི་སྙིང་གར་རྐང་རྗེས་འདྲ་བ་ཞིག་ཡོད་པས། ངན་སྔགས་བྱས་སོ་ཟེར་ནས་དམག་དྲངས་ཏེ་བསྣུབས་སོ། ། དེ་ནས་ཡང་ཅུང་ཟད་འཕེལ་ནས་ཡོད་པའི་ཚེ། ནང་པའི་གཙུག་ལག་ཁང་ཞིག་ཏུ་ཕྱི་པའི་སྤྲང་པོ་གཉིས་སློང་དུ་འོངས་པ་ལ་བཀྲུ་ཆུ་གཏོར་བས་ཁྲོས་ཏེ་ཉི་མ་བསྒྲུབས་ནས་ནང་པའི་གཙུག་ལག་ཁང་དང་གསུང་རབ་མང་པོ་བསྲེགས་ནས་བསྣུབས་སོ། ། དེའི་ཚེ་བྲམ་ཟེ་མོ་གསལ་བའི་ཚུལ་ཁྲིམས་ཞེས་པ་སྔོན་ཡུན་རིང་པོ་ནས་བྱང་ཆུབ་ཏུ་སེམས་བསྐྱེད་དེ་རྒྱལ་བའི་བསྟན་པ་གསོ་བའི་སྨོན་ལམ་གྱི་མཐུ་ཅན་ཞིག་ཡོད་པ་དེའི་བསམ་པ་ལ་ཐུབ་པའི་བསྟན་པ་ལ་དགྲ་ལན་གསུམ་བྱུང་སྟེ་ནུབ་པས། ད་འདི་དར་བར་བྱེད་ནུས་པ་གཞན་ཡང་མི་སྣང། བདག་ཀྱང་བུད་མེད་དུ་སོང་བས་མི་ནུས་ཀྱི། ལུས་ལས་བུ་བསྐྱེད་ལ་དར་བར་བྱེད་དུ་གཞུག་གོ་སྙམ་སྟེ་རྒྱལ་རིགས་དང་འདུས་པས་ཐོགས་མེད་འཁྲུངས་སོ། ། དེ་ནས་ཡུམ་གྱིས་སྲས་འཁྲུངས་མ་ཐག་ལྕེ་ལ་གྷི་ཧང་གིས་ཡི་གེ་ཨ་འདྲི་བ་སོགས་བློ་རྣོ་བའི་ཐབས་བྱས་ཤིང་རྣམ་པ་ཀུན་ནས་གཙང་སྦྲ་ལ་གནས་ཏེ་བུ་འདིས་རྒྱལ་བའི་བསྟན་པ་འཛིན་པ་ཞིག་ནམ་འོང་སྙམ་དུ་དེ་འབའ་ཞིག་ཡིད་ལ་བརྣགས་ཏེ་དེའི་ཐབས་ལ་འབད་ཅིང་ཡི་གེ་དང་རྩིས་དང་བྲམ་ཟེའི་རིག་བྱེད་སོགས་རིག་གནས་ཐུན་མོང་བ་རྣམས་ཡུམ་རང་ཉིད་ཀྱིས་བསླབས། དེ་ཆེར་སྐྱེས་པའི་ཚེ་གཞོན་ནུ་དེས། ཡུམ། ཕའི་ལས་གང་ཡིན་ཞུས་པས་ཡུམ་གྱིས་ཁྱོད་ཕའི་རིགས་སྐྱོང་པའི་ཕྱིར་བསྐྱེད་པ་མིན་གྱི། སངས་རྒྱས་ཀྱི་བསྟན་པ་ཉམས་པ་སེམས་ཀྱིས་མ་བཟོད་ནས་དེའི་ཕྱིར་བསྐྱེད་པ་ཡིན་པས་རྒྱལ་བའི་བསྟན་པ་ལ་རབ་ཏུ་བྱུང་ལ་སྡེ་སྣོད་གསུམ་ཀློག་པ་དང་། བསམ་གཏན་ལ་འབད་ནས་རྒྱལ་བའི་བསྟན་པ་དར་བར་གྱིས་ཤིག་ཅེས་གསུངས་ནས་རབ་ཏུ་བྱུང་སྟེ་དགེ་ཚུལ་དང་། དེ་ནས་མཁན་སློབ་དགེ་འདུན་དང་བཅས་པའི་དབུས་སུ་བསྙེན་པར་རྫོགས་ཏེ་སྡེ་སྣོད་གསུམ་ལ་སྦྱངས་ནས་ལོ་རེ་ལ་ཚིགས་བཅད་འབུམ་འབུམ་གྱི་ཚིག་དོན་གཉིས་ཀ་ཐུགས་སུ་ཆུད་པར་མཛད་པས་རིང་པོར་མ་ཐོགས་པར་སྡེ་སྣོད་གསུམ་ཐུགས་སུ་ཆུད། འོན་ཀྱང་ཤེར་ཕྱིན་གྱི་མདོ་སྡེ་རིན་པོ་ཆེའི་སྦས་དོན་མངོན་རྟོགས་ཀྱི་རིམ་པ་རྣམས་རྟོགས་དཀའ་བར་བྱུང་ནས་ཤེར་ཕྱིན་གྱི་མདོ་སྡེའི་དོན་ཐེག་པ་ཆེན་པོའི་ལམ་གྱི་ལུས་ཡོངས་སུ་རྫོགས་པ་ནམ་ཞིག་ན་རྙེད་སྙམ་དུ་དེ་འབའ་ཞིག་ཐུགས་ལ་བཅངས་ནས་ཚུལ་ཁྲིམས་དག་པར་བྱ་བ་དང་། ཚོགས་བསག་པ་དང་། སྒྲིབ་པ་སྦྱོང་བའི་སྒོ་དུ་མ་ལ་འབད་པ་དང་། ནང་དུ་ཡང་དག་འཇོག་ལ་རྟག་ཏུ་འགྲུས་པར་མཛད། དེ་ནས་སྔགས་ཀྱི་རྡོ་རྗེ་སློབ་དཔོན་ཞིག་ལ་སྒྱུ་འཕྲུལ་དྲ་བའི་དབང་ཞུ་བར་མཛད་ནས་དེའི་དཀྱིལ་འཁོར་དུ་ཞུགས་ཏེ་ལྷག་པའི་ལྷ་གང་ལ་འབྲེལ་ཆེ་དང་། གང་ལ་གསོལ་བ་བཏབ་ན་བྱིན་རླབས་མྱུར་བརྟག་པའི་ཕྱིར་མེ་ཏོག་དོར་བ་ན་མེ་ཏོག་བྱམས་མགོན་ལ་བབས་སོ། ། དེ་ནས་རྗེ་བཙུན་བྱམས་པ་བསྒྲུབས་ལ་བསྟན་པ་དར་བར་བྱའོ་སྙམ་དུ་དགོངས་ཏེ་རི་བྱ་རྐང་གི༌ཕུག་ཏུ་བསྒྲུབ་ཏུ་བྱོན་ཏེ་ལོ་གསུམ་ཏུ་བསྒྲུབས་པས་མཚན་མ་ཅུང་ཟད་ཀྱང་མ་མཐོང་བས་སྐྱོ་སྟེ་ཕྱིར་འཐོན་པ་ན་རྒན་པོ་ཤིང་བལ་གྱི་འདབ་མས་ལྕགས་ཀྱི་སྡོང་པོ་ལ་ཁབ་བྱེད་པ་མཐོང་ནས། ཁབ་ཇི་ལྟར་འབྱུང་ཞེས་དྲིས་པས། སྙིང་སྟོབས་ལྡན་པའི་སྐྱེས་བུ་ཡིས། ། བསྒྲུབས་ན་མི་འགྲུབ་གང་ཡང་མེད། ། དཀའ་ཡང་བརྣགས་པ་མ་དོར་ན། ། རི་བོ་རྣམས་ཀྱང་ཐལ་བར་རློག ། ཟེར་བས་བརྩོན་འགྲུས་བརྩོམ་དགོས་པར་དགོངས་ནས་སླར་ཡང་ལོ་གསུམ་དུ་མཚམས་བཅད་དེ་བསྒྲུབས་ཀྱང་འགྲུབ་པའི་མཚན་མ་གང་ཡང་མ་བྱུང་བས་སྐྱོ་སྟེ་ཕྱིར་འཐོན་པ་ན་ཆུ་ཐིགས་ཀྱིས་བྲག་ཟད་པ་མཐོང་ནས་བརྩོན་པས་ཡུན་རིང་དུ་བསྒྲུབ་དགོས་པར་མཐོང་ནས་ཡང་ལོ་གསུམ་དུ་མཚམས་བཅད་དེ་བསྒྲུབས་ཀྱང་འགྲུབ་པའི་མཚན་མ་གང་ཡང་མ་མཐོང་བ་ན་སྐྱོ་སྟེ་ཕྱིར་འཐོན་པས་བྱ་སྒྲོས་བྲག་ཟད་པ་མཐོང་སྟེ་ད་དུང་བརྩོན་པ་བྱེད་དགོས་པར་དགོངས་ནས་སླར་ཡང་ལོ་གསུམ་མཚམས་བཅད་དེ་བསྒྲུབས། དེ་ལྟར་ལོ་བཅུ་གཉིས་སུ་བསྒྲུབས་ཀྱང་འགྲུབ་པའི་མཚན་མ་མ་བྱུང་བས་སྐྱོ་སྟེ་འཐོན་ནས་ཕྱིན་པ་ན་ཁྱི་མོ་རོ་སྨད་འབུས་གཞིགས་པ། རོ་སྟོད་ཟུགས་ཤིང་ཟ་བ་ཞིག་མཐོང་ནས་སྙིང་རྗེ་ལྷག་པར་སྐྱེས་ཏེ། འབུ་རྣམས་བསལ་ན་འབུ་འཆི། མ་བསལ་ན་ཁྱི་མོ་འཆི་བར་སྣང་བས་རང་གི་ལུས་ལས་ཤ་བཅད་དེ་དེར་འབུ་རྣམས་བླང་ངོ་སྙམ་སྟེ་གྲོང་ཁྱེར་ཨ་ཙན་ཏ་ཞེས་བྱ་བར་ཕྱིན་ཏེ། གསེག་ཤང་གཏེང་བར་བཅུག་ནས་གསེར་གྱི་སྤུ་གྲི་གཡར་ཏེ་རང་གི་ལུས་ལས་ཤ་བཅད། ལག་པས་བླངས་ན་འབུ་རྣམས་ཤི་ཡི་དོགས་ཏེ། སྤྱན་བཙུམས་ཏེ་ལྗགས་ཀྱིས་བླངས་པ་ན་ཁྱི་མོ་མེད་པར་རྗེ་བཙུན་འོད་དང་བཅས་པར་མཐོང་ནས། ཀྱེ་མ་ཡབ་གཅིག་བདག་གི་སྐྱབས། ། ངལ་བརྒྱས་འབད་ཀྱང་འབྲས་མ་མཆིས། ། ཅི་ཕྱིར་ཆར་སྤྲིན་རྒྱ་མཚོའི་དཔུང། ། གདུང་བས་བསྲེགས་ཏེ་སྐོམ་ཚད་འབབ། ། བདག་གིས་དེ་ཙམ་བསྒྲུབས་ཀྱང་རྟགས་ཀྱང་མ་བྱུང་ན་ཐུགས་རྗེ་རེ་ཆུང་ཞེས་འཁངས་པས་རྗེ་བཙུན་གྱིས། ལྷ་ཡི་རྒྱལ་པོས་ཆར་ཕབ་ཀྱང་། ། ས་བོན་མི་རུང་མི་འཁྲུངས་ལྟར། ། སངས་རྒྱས་རྣམས་ནི་བྱོན་གྱུར་ཀྱང་། ། སྐལ་བ་མེད་པས་བཟང་མི་མྱོང་། ། ང་དང་པོ་ནས་ཡོད་དེ་ཁྱོད་རང་གི་སྒྲིབ་པས་མ་མཐོང་ལ། ད་ལྟ་སྙིང་རྗེ་ཆེན་པོ་སྐྱེས་པས་ལས་སྒྲིབ་དག་ནས་མཐོང་བ་ཡིན། དེ་ལྟར་ཡིན་པར་ཁྱོད་རང་ང་ཕྲག་གོང་དུ་ཁྱེར་ལ་མི་རྣམས་ལ་སྟོན་ཅིག་གསུངས་ནས་བསྟན་པས་མཐོང་བ་མ་བྱུང་བས་དེས་ཡིད་ཆེས་སོ། ། ཁྱོད་ཅི་འདོད་གསུང་བ་ལ་ཐེག་ཆེན་དར་བར་ཞུ་འཚལ་བྱས་པས། ངའི་ཆོས་གོས་ལ་འཇུས་ཤིག་གསུངས་ནས་དགའ་ལྡན་དུ་བྱོན་ཏེ་ལྷའི་གྲོ་སྐད་གཅིག ། མི་ལོ་ལྔ་བཅུར་བཞུགས་ཏེ་རྗེ་བཙུན་བྱམས་པ་མགོན་པོ་ལ་ཐེག་པ་ཆེན་པོའི་ཆོས་མཐའ་ཡས་པ་གསན་ཞིང་། ལྷག་པར་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་ཐེག་པ་ཆེན་པོའི་ལམ་གྱི་རིམ་པའི་གནད་རྣམས་གཏིང་ཕྱིན་པར་ཞུས་ཏེ་ཇི་ལྟར་གསུངས་པའི་དོན་རྣམས་ལ་སེམས་པ་དང་འཇལ་བ་དང་རྟོག་པར་བྱེད་ཅིང་བསྒོམས་པའི་མཐུས་ཏིང་ངེ་འཛིན་གྱི་སྒོ་བརྒྱ་ཕྲག་དུ་མ་ཐོབ་ཅིང་། མི་བརྗེད་པའི་གཟུངས་དང། ཐོགས་པ་མེད་པའི་སྤོབས་པ་དང་། ཐེག་པ་ཆེན་པོའི་ཆོས་རྣམ་པར་འབྱེད་པའི་ཤེས་རབ་ཐོབ་ཅིང་ཆོས་ཉིད་མངོན་དུ་གྱུར་ཏེ་འཕགས་པའི་ས་ཐོབ། དེ་ནས་གདུལ་བྱའི་དོན་དུ་ཤེར་ཕྱིན་གྱི་མདོ་སྡེ་རིན་པོ་ཆེའི་སྦས་དོན་མངོན་རྟོགས་ལམ་གྱི་རིམ་པ་ཚང་བར་སྟོན་པའི་བསྟན་བཅོས་རྩོམ་པར་ཞུས་པས་རྗེ་བཙུན་བྱམས་པ་མགོན་པོས་ཤེར་ཕྱིན་གྱི་མདོ་སྡེ་རིན་པོ་ཆེའི་སྦས་དོན་བྱང་ཆུབ་ལམ་གྱི་རིམ་པ་སྟོན་པའི་བསྟན་བཅོས་མངོན་པར་རྟོགས་པའི་རྒྱན་དང་། མདོ་སྡེ་རྒྱན་དང་། འབྱེད་རྣམ་གཉིས་དང། རྒྱུད་བླ་མ་སྟེ་ཆོས་ལྔ་བརྩམས་སོ། ། འཕགས་པ་ཐོགས་མེད་ཀྱིས་དགའ་ལྡན་དུ་བཞུགས་པའི་ཡུན་ཚད་ལ་ལྷའི་གྲོ་སྐད་ཅིག་མི་ལོ་ལྔ་བཅུ་གསུངས་པ་འདི་ལ་གྲོ་སྐད་གཅིག་ལ་མི་ལོ་ལྔ་བཅུ་ཇི་ལྟར་འོང་སྙམ་དུ་དོགས་པར་མི་བྱ་སྟེ་མཛོད་ལས། མི་རྣམས་ཀྱི་ལོ་ལྔ་བཅུ་ལ། ། འདོད་པ་དག་གི་ལྷ་རྣམས་ལས། ། འོག་མ་རྣམས་ཀྱི་ཉིན་ཞག་གཅིག ། གོང་མ་གཉིས་ཀ་ཉིས་འགྱུར་རོ། ། ཞེས་གསུངས་པ་ལྟར། རྒྱལ་ཆེན་རིས་བཞི་པའི་ཞག་གཅིག་ལ་མི་ལོ་ལྔ་བཅུ་འོང་ལ། ལྷ་གནས་གོང་མ་རྣམས་ཉིས་འགྱུར་དུ་གསུངས་པའི་སུམ་ཅུ་རྩ་གསུམ་པའི་ཞག་གཅིག་ལ་མི་ལོ་བརྒྱ། འཐབ་བྲལ་བའི་ཞག་གཅིག་ལ་མི་ལོ་ཉིས་བརྒྱ། དགའ་ལྡན་པའི་ཞག་གཅིག་ལ་མི་ལོ་བཞི་བརྒྱ་འོང་བས་དགའ་ལྡན་གྱི་ལྷའི་སྔ་དྲོའི་ཆ་གཅིག་ལ་མི་ལོ་ལྔ་བཅུ་ངེས་བར་འོང་ངོ་། ། དེ་ནས་འཕགས་པ་ཐོགས་མེད་ཆོས་ཀྱི་བདུད་རྩིས་ཚིམ་ནས་འཛམ་བུའི་གླིང་དུ་རྒྱལ་བའི་བསྟན་པ་སྤེལ་ཕྱིར་འབྱོན་པ་ན་སྔར་དགའ་ལྡན་དུ་ཡར་འབྱོན་དུས་བྱམས་མགོན་གྱི་ན་བཟའ་ལ་འཇུས་ཏེ་དེའི་རྫུ་འཕྲུལ་གྱིས་བྱོན་པ་ཡིན་ཡང། འཛམ་བུའི་གླིང་དུ་མར་འབྱོན་པའི་ཚེ་འཕགས་པ་ཐོགས་མེད་རང་ཉིད་ཀྱི་རྫུ་འཕྲུལ་གྱིས་བྱོན་ཏེ་མ་ག་དྷའི་ཡུལ་གྱི་ཕྱོགས་དབེན་པའི་ནགས་ཚལ་ཞིག་དུ་མང་དུ་ཐོས་པའི་སློབ་མ་ཉུང་ཤས་དང་བཅས་བཞུགས་ཏེ། དེ་དག་ལ་ཐེག་པ་ཆེན་པོའི་ལམ་གྱི་རིམ་པ་བསྟན་པས་དེ་དག་ཐམས་ཅད་ཀྱིས་བཟོད་པ་ཐོབ་ཅིང་རྫུ་འཕྲུལ་དང་མངོན་པར་ཤེས་པ་རྒྱ་ཆེན་པོ་ཐོབ་སྟེ་བསྟན་པའི་བྱ་བ་རྒྱ་ཆེར་ནུས་པ་ཤ་སྟག་བྱུང་བས་གནས་དེ་ལ་ཆོས་ཀྱི་མྱུ་གུའི་དགོན་པ་ཞེས་གྲགས་པར་ཆོས་འབྱུང་འགའ་ཞིག་ལས་བཤད། གནས་དེར་བྱམས་ཆོས་སྡེ་ལྔ་ཡི་གེར་བཀོད་ཅིང་མངོན་པར་རྟོགས་པའི་རྒྱན་དང་ཡུམ་གྱི་དོན་སྟོན་པ་དེ་ཉིད་རྣམ་ངེས་བརྩམས། རིམ་གྱིས་རྒྱུད་བླ་མའི་འགྲེལ་པ་དང་། མདོ་སྡེ་དགོངས་འགྲེལ་གྱི་འགྲེལ་པ་མཛད་ཅིང། རྗེ་བཙུན་གྱི་མན་ངག་ལ་བརྟེན་ནས་ཐེག་པ་ཆེན་པོའི་ལམ་གྱི་རིམ་པ་རྒྱས་པར་སྟོན་པ་བྱང་ཆུབ་སེམས་དཔའི་ས་སོགས་ས་སྡེ་ལྔ་དང་སྡོམ་རྣམ་པ་གཉིས་མཛད་དེ། ས་སྡེ་ལྔ་ནི་སའི་དངོས་གཞི། བྱང་ས། ཉན་ས། གཏན་ལ་དབབ་པ་བསྡུ་བ། གཞི་བསྡུ་བ་སྟེ་སྡེ་ལྔའོ། ། གཞི་བསྡུ་བ་ལ་མདོ་སྡེ་བསྡུ་བ། འདུལ་བ་བསྡུ་བ། རྣམ་གྲངས་བསྡུ་བ། རྣམ་བཤད་བསྡུ་བ་སྟེ་བཞི་ཡོད་དོ། ། སྡོམ་གཉིས་ནི། ཐེག་པ་ཆེན་པོའི་སྡོམ་ཐེག་བསྡུས་དང། ཐེག་པ་ཐུན་མོང་གི་སྡོམ་མངོན་པ་ཀུན་བཏུས་གཉིས་སོ། ། ཤེས་རབ་ཀྱི་ཕ་རོལ་ཏུ་ཕྱིན་པ་གསེར་མདོག་ཅན་གྱི་སྒྲུབ་ཐབས། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། གསེར་མདོག་ཅན་གྱི་ཤེར་ཕྱིན་གྱི་སྒྲུབ་ཐབས། ཡང་ཤེར་ཕྱིན་གྱི་སྒྲུབ་ཐབས། སངས་རྒྱས་རྗེས་དྲན་གྱི་མདོའི་འགྲེལ་པ། ཆོས་རྗེས་དྲན་གྱི་མདོའི་འགྲེལ་པ། དགེ་འདུན་རྗེས་དྲན་གྱི་མདོའི་འགྲེལ་པ། བསམ་གཏན་གྱི་སྒྲོན་མ། འཕགས་པ་བྱམས་པའི་སྒྲུབ་ཐབས། ཆོས་སྐུའི་ཡོན་ཏན་ཐུན་མོང་མ་ཡིན་པའི་བསྟོད་པ་རྣམས་མཛད་དོ། ། སློབ་དཔོན་འཕགས་པ་ཐོགས་མེད་འདི་ས་གསུམ་པ་བརྙེས་པར་གྲགས་ཤིང་། དེ་ལྟར་ན་ས་དང་པོ་ཐོབ་པའི་ཚེ་སྤྲུལ་པ་མི་འདྲ་བ་རྒྱ་ཕྲག་དུས་གཅིག་ལ་སྟོན་པ་དང་། སངས་རྒྱས་ཀྱི་ཞིང་བརྒྱ་ཕྲག་ཏུ་དུས་གཅིག་ལ་ཕྱིན་ནས་སངས་རྒྱས་བརྒྱ་ཕྲག་ལ་དུས་གཅིག་ཏུ་མཆོད་པ་དང་བསྙེན་བཀུར་བྱ་ནུས་པ་དང། འཇིག་རྟེན་གྱི་ཁམས་བརྒྱ་ཕྲག་ཏུ་སྤྲུལ་པ་བརྒྱ་ཕྲག་བཀྱེ་ནས་དེ་དང་དེའི་གདུལ་བྱ་རྣམས་ལ་དུས་གཅིག་ཏུ་ཆོས་སྟོན་ནུས་པ་དང་། རང་དང་གཞན་གྱི་ཚེ་རབས་བརྒྱ་ཕྲག་མང་པོ་མངོན་སུམ་དུ་མཐོང་བ་དང། མཚན་དཔེ་རྗེས་མཐུན་པ་ཐོབ་ཅིང་ལས་ཉོན་གྱི་དབང་དུ་མི་འགྲོ་བར་སྙིང་རྗེ་དང་སྨོན་ལམ་གྱི་དབང་ཁོ་ནས་སྐྱེ་བ་ལེན་པ་དང་། མཆོག་གི་སྤྲུལ་སྐུའི་ཞལ་མངོན་སུམ་དུ་མཐོང་སྟེ་ནམ་འདོད་དུ་སངས་རྒྱས་ལས་ཆོས་ཉན་ནུས་པ་སོགས་ཡོན་ཏན་མཐའ་ཡས་པ་མདོ་ལས་གསུངས་པས་བདག་ཉིད་ཆེན་པོ་འདིའི་ཡོན་ཏན་ནི་ས་ལ་གནས་པའི་སེམས་དཔའ་ནང་ཕན་ཚུན་དང་སངས་རྒྱས་རྣམས་ཀྱིས་མཁྱེན་པ་མ་གཏོགས་བློ་དམན་དག་གིས་ཕྱོགས་ཙམ་ཡང་ཤེས་ནུས་པ་མ་ཡིན་ནོ། ། སློབ་དཔོན་བདག་ཉིད་ཆེན་པོ་འདིའི་སྐུ་ལ་མཚན་དཔེ་རྗེས་མཐུན་པ་ཡོད་པ་དང་། དགུང་ལོ་བརྒྱ་ཕྲག་བརྒལ་བའི་ཚེ་ནའང་སྐུ་ལ་སྐྲ་དཀར་དང་གཉེར་མ་མེད་ཅིང་གཞོན་ནུའི་ཉམས་ལྟར་སྐུ་བལྟ་བས་ཆོག་མི་ཤེས་ཤིང་གཞོན་ཤ་ཆགས་པ་ཞིག་ཡོད་པར་བཤད། སློབ་དཔོན་བདག་ཉིད་ཆེན་པོ་འདིས་རྒྱལ་བའི་བསྟན་པ་རྒྱ་ཆེར་སྤེལ་བའི་ཚེ་མུ་སྟེགས་ཀྱི་སྨྲ་བ་ངན་པ་རྣམས་ཕལ་ཆེར་ནུབ། སངས་རྒྱས་ཀྱི་བསྟན་པ་ཆེས་ཆེར་འཕེལ་ནས་འཛམ་བུའི་གླིང་གི་ཆེ་དགུ་ཐམས་ཅད་ཀྱིས་བདག་ཉིད་ཆེན་པོ་འདི་ལ་མཆོད་ཅིང་བསྙེན་བཀུར། རྒྱལ་བའི་བསྟན་པ་ལ་ཞུགས་ནས་རྒྱལ་བ་དགྱེས་པའི་ལམ་ལ་སློབ་པར་འདོད་པ་ཐམས་ཅད་བདག་ཉིད་ཆེན་པོ་འདིའི་སློབ་མར་གྱུར་ཏེ་སློབ་དཔོན་འདིས་ཆོས་སྟོན་པའི་ཚེ་ཐེག་པ་ཆེན་པོའི་ཆོས་ཉན་པ་ཁྲི་ཕྲག་བརྒལ་བ་བྱུང་ཞེས་གྲགས་ཤིང་ཐུབ་བསྟན་མི་ནུབ་པའི་རྒྱལ་མཚན་འཛམ་གླིང་མཛེས་པར་བྱེད་པའི་རྒྱན་གཅིག་པུ་ཞེས་གཏམ་དུ་གྲགས་སོ། ། སློབ་དཔོན་འདིས་སྐུ་ཚེའི་མཇུག་ལ་ནཱ་ལནྡྲའི་མཁན་པོ་མཛད་དེ་ལོ་བཅུ་གཉིས་སུ་ནཱ་ལནྡྲ་བསྐྱངས་ཏེ་བསྟན་པའི་བདག་པོ་མཛད། རྒྱ་གར་གྱི་གནས་ཐམས་ཅད་དུ་མཆོད་གཞི་མང་དུ་བཙུགས། དགེ་འདུན་དུ་གྱི་སྡེ་ཆེས་ཆེར་འཕེལ་བར་མཛད། མཐར་རྒྱལ་པོའི་ཁབ་ཏུ་སྐུའི་བཀོད་པ་བསྡུས་ཏེ། དགའ་ལྡན་རྒྱལ་བ་མ་ཕམ་པའི་ཞབས་དྲུང་དུ་ཕེབས་ནས་ཐེག་པ་ཆེན་པོའི་ཆོས་ཀྱི་བདུད་རྩི་ལ་ལོངས་སྤྱོད་ཅིང་དགའ་ལྡན་གྱི་ལྷ་རྣམས་ལ་ཐེག་པ་ཆེན་པོའི་ཆོས་སྟོན་པ་དང་འདུལ་བར་འོས་པའི་གདུལ་བྱ་གང་དང་གང་ན་ཡོད་པའི་ཞིང་དེ་དང་དེར་སྤྲུལ་པའི་བཀོད་པ་བསམ་གྱིས་མི་ཁྱབ་པས་གདུལ་བྱ་བགྲང་བ་ལས་འདས་པ་སྐད་ཅིག་དང་སྐད་ཅིག་ལ་འཁོར་བ་དང་ངན་སོང་ལས་བསྒྲལ་ཏེ་མཐོ་རིས་དང་ཐར་པ་དང་ཐམས་ཅད་མཁྱེན་པའི་ལམ་ལ་འཁྲིད་ཅིང་བཞུགས་སོ། ། བདག་ཉིད་ཆེན་པོ་འདི་གང་དུ་མྱ་ངན་ལས་འདས་པའི་གནས་དེར་དད་པ་ཅན་དག་གིས་མཆོད་རྟེན་བརྩིགས་སོ། ། སློབ་དཔོན་འདི་ལ་སློབ་མ་བསྟན་པ་འཛིན་པ་བསམ་གྱིས་མི་ཁྱབ་པ་ཡོད་ཅིང་། སྲས་ཀྱི་ཐུ་བོ་བསྟན་པའི་བདག་པོར་གྱུར་པ་ནི་མཁས་མཆོག་དབྱིག་གཉེན་ནོ། ། སློབ་དཔོན་འདི་ཐུགས་བསྐྱེད་ཤིན་ཏུ་རྒྱ་ཆེ་བས་དེང་སང་ཡང་སློབ་དཔོན་འདིའི་གསུང་ས་སྡེ་རྣམས་ཕྱོགས་ཐམས་ཅད་དུ་ཁྱབ་པར་གནས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པའི་གདུལ་བྱ་རྣམས་ཀྱིས་འཕགས་པ་ཐོགས་མེད་ལ་ཡོན་ཏན་དང་བཀའ་དྲིན་དྲན་པའི་དད་གུས་ཆེན་པོས་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་བླ་མ་དང་ལྷག་པའི་ལྷ་དབྱེར་མ་མཆིས་པ་ལ་གསོལ་བ་ཤུགས་དྲག་ལ་རྒྱུན་རིང་བ་འདེབས་པ་དང་། ཐེག་པ་ཆེན་པོའི་ལམ་གྱི་རྩ་བ་བྱམས་སྙིང་རྗེ་བྱང་ཆུབ་ཀྱི་སེམས་ཐུགས་དམ་གྱི་མཐིལ་དུ་བྱེད་པ་དང་། སྐྱེས་བུ་གསུམ་གྱི་ལམ་ལ་བློ་སྦྱོང་བའི་ཚེ་སྐྱེས་བུ་ཆུང་ངུའི་སྐབས་ཀྱི་ལས་འབྲས་ཀྱི་དམིགས་སྐོར་ལ་སའི་དངོས་གཞི་ནས་གསུངས་པ་ལྟར་བསམ། སྐྱབས་འགྲོའི་དམིགས་སྐོར་ལ་གཏན་ལ་དབབ་པ་བསྡུ་བ་ནས་གསུངས་པ་ལྟར་བསམ། ཐེག་ཆེན་ཐུན་མོང་མིན་པའི་སྐྱབས་འགྲོ་ནི་རྒྱུད་བླ་དང་དེའི་འགྲེལ་པ་སློབ་དཔོན་འདིས་མཛད་པ་ནས་གསུངས་པ་ལྟར་བསམ། སྐྱེས་བུ་འབྲིང་གི་དམིགས་སྐོར་ལ་བདེན་བཞིའི་གནས་ཚུལ་བསམས་ཏེ་སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་བསྐྱེད་ཚུལ་ཉན་ས་དང་མངོན་པ་ཀུན་བཏུས་ནས་གསུངས་པ་ལྟར་བསམ། བསླབ་པ་གསུམ་རྒྱུད་ལ་བསྐྱེད་ཚུལ་ཉན་ས་ནས་གསུངས་པ་ལྟར་བསམ། བྱམས་སྙིང་རྗེ་བྱང་ཆུབ་ཀྱི་སེམས་དང་། རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་སློབ་ཚུལ་རྣམས་བྱང་ས་ནས་གསུངས་པ་ལྟར་བསམ། ཞི་གནས་བསྒྲུབ་ཚུལ་དང་སྤྱིར་ལྷག་མཐོང་གི་རྟོག་པ་སྐྱེ་ལུགས་རྣམས་ཉན་ས་ནས་གསུངས་པ་ལྟར་བསམ། ཟབ་མོ་དབུ་མའི་ལྟ་བ་ཐུན་མོང་མིན་པ་ནི་རྒྱུད་བླ་མའི་འགྲེལ་པ་སློབ་དཔོན་འདིས་མཛད་པ་ལས་གསུངས་པ་ལྟར་བསམས་ལ་བྱང་ཆུབ་ལམ་གྱི་རིམ་པ་ལ་ངེས་པ་ཕུ་ཐག་ཆོད་པ་རྙེད་པར་བྱས་ལ་ཉམས་ལེན་སྙིང་བོར་བྱའོ། ། ། །
༈ འཛམ་གླིང་མཁས་པའི་གཙུག་རྒྱན་དབྱིག་གི་གཉེན། ། ཞེས་བསྔགས་པ། མཁས་མཆོག་དབྱིག་གཉེན་ནི། འཕགས་པ་ཐོགས་མེད་དང་ཡུམ་གཅིག་པར་འཁྲུངས་ཏེ་འཕགས་པ་ཐོགས་མེད་འཁྲུངས་ནས་ཐུན་མོང་བའི་རིག་གནས་རྣམས་ལ་སྦྱངས་ཤིང་རབ་ཏུ་བྱུང་ནས་རིང་ཞིག་ལོན་པ་ན་སྔོན་ཡུན་རིང་པོ་ནས་བྱང་ཆུབ་ཀྱི་སེམས་ཆེས་ཆེར་རྒྱས་པ་རྒྱལ་བའི་བསྟན་པ་སྤེལ་བའི་སྨོན་ལམ་གྱི་མཐུ་ཅན་ཡུམ་བྲམ་ཟེ་མ་གསལ་བའི་ཚུལ་ཁྲིམས་དེ་ཉིད་ཀྱིས་བྲམ་ཟེ་དང་འདུས་པ་ལས་ཁྱེའུ་མཚན་དང་ལྡན་པ་ཞིག་བཙས་ཏེ། ཁྱེའུ་དེའི་ལྕེ་ལ་གྷི་ཧང་གི་ཡི་གེ་ཨ་འདྲི་བ་སོགས་བྲམ་ཟེའི་རིག་བྱེད་ལས་འབྱུང་བ་ལྟར་གྱི་བློ་རྣོ་བའི་ཆོ་ག་བྱས་ཤིང་ཁྲུས་དང་གཙང་སྦྲ་ལ་གནས་པའི་སྒོ་ནས་བསྐྱེད་བསྲིངས་ཏེ་ནར་སོན་པ་ན་ཡི་གེ་དང་། རྩིས་དང་། རིག་བྱེད་བཞི་ལ་སོགས་པ་ཐུན་མོང་བའི་རིག་གནས་རྣམས་ཡུམ་ཉིད་ཀྱིས་ལེགས་པར་བསླབས་ཏེ་ཁོང་དུ་ཆུད་པར་བྱས། དེ་ནས་ཡུམ་གྱིས་སྲས་ལ་འདི་སྐད་དུ། བུ། ཁྱོད་སྐྱེད་པ་ནི་རིགས་སྤེལ་བ་སོགས་འཇིག་རྟེན་གྱི་བྱ་བའི་ཆེད་དུ་བསྐྱེད་པ་མ་ཡིན་གྱི། རྒྱལ་བའི་བསྟན་པ་སྤེལ་བའི་ཕྱིར་བསྐྱེད་པ་ཡིན་པས་རབ་ཏུ་བྱུང་ལ་སྡེ་སྣོད་གསུམ་ལ་སྦྱངས་ཏེ་རྒྱལ་བའི་བསྟན་པ་དར་བར་གྱིས་ཤིག ། ཅེས་བསྐུལ་ནས་ནཱ་ལནྡྲར་རབ་ཏུ་བྱུང་། རབ་ཏུ་བྱུང་ཙམ་ཉིད་ནས་མཁན་སློབ་ཀྱིས་བསྟན་པ་ལྟར་འདུལ་བའི་བཅས་མཚམས་ཕྲ་ཞིང་ཕྲ་བ་མཐའ་དག་མིག་འབྲས་ལྟར་བསྲུངས་བ་གཞིར་བཞག་ནས་སྡེ་སྣོད་གསུམ་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར། དེ་ནས་མངོན་པའི་སྡེ་སྣོད་ཀྱི་དགོངས་དོན་ཕྲ་ཞིང་ཕྲ་བ་དག་རྟོགས་པར་བྱ་བའི་ཕྱིར་དང་། སྡེ་པ་བཅོ་བརྒྱད་སོ་སོའི་ལུགས་མ་འདྲེས་པར་ཤེས་པར་བྱ་བའི་ཕྱིར་དང་། གཞན་ཡང་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་ཕྱིན་པར་བྱ་བའི་ཕྱིར་མཁས་གྲུབ་དུ་མའི་འབྱུང་གནས་ཁ་ཆེའི་ཡུལ་དུ་ཕེབས་ནས་མཁས་པ་ཆེན་པོ་འདུན་བཟང་གི་དྲུང་དུ་སྔོན་དགྲ་བཅོམ་པ་རྣམས་ཀྱིས་མངོན་པ་སྡེ་བདུན་དང་འདུལ་བ་ལུང་སྡེ་བཞིའི་གནད་རྣམས་བསྡུས་ཏེ་གཏན་ལ་ཕབ་པའི་བསྟན་བཅོས་བྱེ་བྲག་ཏུ་བཤད་པ་ཆེན་པོ་གཞུང་འབུམ་ཕྲག་གཅིག་ཏུ་ལོངས་པ་ཡོད་པ་དེ་ལ་སྦྱངས་སོ། ། བསྟན་བཅོས་འདི་ལ་སྔོན་གྱི་མཁས་པ་རྣམས་ཀྱིས་བྱེ་བྲག་བཤད་མཚོ་ཆེན་མོ་ཞེས་ཀྱང་བརྗོད། བྱེ་བྲག་བཤད་མཛོད་ཅེས་ཀྱང་བརྗོད་དོ། ། དེ་ལྟ་བུའི་བསྟན་བཅོས་ཆེན་པོ་དེ་ཡོངས་སུ་རྫོགས་པ་ཐུགས་ལ་བཟུང་ནས་དོན་གྱི་གནད་མཐའ་དག་ལ་འཁྲུལ་པའི་དྲི་མ་ཕྲ་མོའང་མེད་པར་དྲི་མ་མེད་པའི་རིགས་པ་ཕྲ་མོས་ལེགས་པར་དཔྱད་ནས་མཐའ་དག་པར་ཐུགས་ལ་ཆུད་པར་མཛད། གཞན་ཡང་སློབ་དཔོན་འདུན་བཟང་ལ་མངའ་བའི་སྡེ་སྣོད་གསུམ་གྱི་བཤད་སྲོལ་མཐའ་དག་ལ་སྦྱངས་ནས་མཁས་པའི་ཕུལ་དུ་ཕྱིན་པར་གྱུར་ཏེ། ཁ་ཆེའི་ཡུལ་དུ་གདུལ་བྱ་བགྲང་བ་ལས་འདས་པ་ལ་ཆོས་མང་དུ་བསྟན་ཅིང་དྲི་མ་མེད་པའི་རིགས་ལམ་རྒྱས་པར་མཛད། དེ་ནས་རྒྱ་གར་དུ་འབྱོན་པར་བཞེད་པའི་ཚེ་བདུད་སྡིག་ཏོ་ཅན་གྱིས་བདག་ཉིད་ཆེན་པོ་འདིས་རྒྱལ་བའི་བསྟན་པ་ལ་བྱ་བ་རྒྱ་ཆེན་པོ་མཛད་པ་མ་བཟོད་ནས་ཆོམ་རྐུན་པ་མང་པོ་དང་ཤོ་གམ་བསྲུང་བའི་གནོད་སྦྱིན་གྱི་ཡིད་བསྒྱུར་ཏེ་དེ་དག་གིས་སློབ་དཔོན་གྱི་ལྷ་རྟེན་དང་གླེགས་བམ་ལ་སོགས་པ་ཡོ་བྱད་ཐམས་ཅད་ཕྲོགས། ཡང་གླེགས་བམ་ལ་སོགས་པ་གསར་དུ་བཞེངས་ནས་ཕེབས་པར་ལན་གསུམ་གྱི་བར་དུ་ཕྲོགས་པ་ན་སློབ་དཔོན་གྱི་ཐུགས་ལ་ད་ནོར་ནི་མེད་གླེགས་བམ་མེད་ཀྱང་ཆོས་ཐམས་ཅད་ནི་བློ་ལ་ཡོད་པ་སུས་ཀྱང་དབྲོག་ཏུ་མི་བཏུབ་པས་ཡོ་བྱད་གང་ཡང་མེད་པར་འགྲོའོ་སྙམ་དུ་དགོངས་ནས་ཕེབས་ཏེ་ནཱ་ལནྡྲར་བྱོན། དེར་སྡེ་སྣོད་འཛིན་པ་མང་པོ་ལ་ཆོས་རྒྱ་ཆེར་སྟོན་ཅིང་བཞུགས་པ་ན། གཅེན་འཕགས་པ་ཐོགས་མེད་ཀྱིས་བསྟན་བཅོས་མང་དུ་བརྩམས་པ་གསན་ནས། ཀྱེ་མ་ཐོགས་མེད་ནགས་སུ་ལོ། ། བཅུ་གཉིས་བར་དུ་ཏིང་འཛིན་བསྒྲུབས། ། ཏིང་འཛིན་མ་གྲུབ་གླང་ཆེན་གྱི། ། རྒྱབ་ཁལ་ལོངས་པའི་གྲུབ་མཐའ་བརྩམས། ། ཞེས་ཐེག་ཆེན་གྱི་གང་ཟག་དང་ཆོས་ལ་སྐུར་བ་བྱས་པ་གཅེན་གྱིས་གསན་ནས། ལོག་སྒྲུབ་དོན་མིན་དུ་འགྱུར་བ་མཁྱེན་ནས། དེ་བཟློག་པའི་ཕྱིར་སློབ་མ་གཉིས་ས་བཅུ་པ་དང་། བློ་གྲོས་མི་བཟད་པས་བསྟན་པ་འཛིན་དུ་བཅུག་ནས། གཅུང་ཅན་དུ་སོང་ལ་སྲོད་དང་ཐོ་རངས་ཐོན་ཅིག་ཅེས་བསྒོ་བ་ལྟར་བསྒྲུབས་པས། མདོ་བཏོན་པས་དེ་སློབ་དཔོན་དབྱིག་གཉེན་གྱིས་གསན་པ་ན། སྲོད་ལ་ཐེག་ཆེན་འདི་རྒྱུ་བཟང་འབྲས་བུ་ཁ་གཡེལ་བ་འདྲ་གསུང། ཐོ་རངས་རྒྱུ་འབྲས་གཉིས་ཀ་བཟང་བར་འདུག་པ་ལ་ངས་སྐུར་པ་བཏབ་པ་ལྕེ་འདིས་ལན་པས་གཅོད་གསུང་ནས་སྤུ་གྲི་འཚོལ་བའི་ཚེ་ཁོང་གཉིས་ཀྱིས་ལྗགས་དགུམ་མི་འཚལ། དེའི་སྒྲིབ་པ་སྦྱང་ཐབས་གཅེན་ལ་མངའ་བས་དེར་གཤེགས་པར་ཞུ་ཞུས་པས། སློབ་དཔོན་དབྱིག་གཉེན་འཔགས་པ་ཐོགས་མེད་ཀྱི་སར་བྱོན་ཏེ་ཆོས་གསན་པས་དད་ནས་འཕགས་པ་ཐོགས་མེད་ལ་ཉེས་པ་བཤགས་ཏེ་ཐེག་པ་ཆེན་པོའི་ཆོས་རྣམས་རིམ་གྱིས་གསན་ཞིང། དེའི་ཚེ་འཕགས་པ་ཐོགས་མེད་ལ་རྗེ་བཙུན་བྱམས་པ་མགོན་པོ་འབྲལ་མེད་དུ་བཞུགས་ནས་བྱ་བ་ཐམས་ཅད་རྗེ་བཙུན་ལ་ཞུ་ཞིང་མཛད་པ་དེ་གཅུང་གིས་མཁྱེན་ནས་ལྷག་པའི་ལྷ་དེ་བདག་ལ་བསྟན་པར་ཞུ་བྱས་པས། རྗེ་བཙུན་ལ་ཞུ་ཡི་གསུངས་ནས་ཞུས་པས། རྗེ་བཙུན་གྱི་ཞལ་ནས། ཁྱོད་སོ་སོའི་སྐྱེ་བོ་ཡིན་ཞིང་དང་པོར་ཐེག་ཆེན་ལ་སྐུར་བ་བཏབ་པས་ཚེ་འདི་ལ་ང་མཐོང་བའི་སྐལ་པ་མེད་ཀྱིས། སྒྲིབ་པ་སྦྱང་བར་བྱ་བའི་ཕྱིར་ཐེག་ཆེན་གྱི་མདོ་འགྲེལ་མང་དུ་རྩོམས། གཙུག་ཏོག་རྣམ་རྒྱལ་གྱི་གཟུངས་ཐོན། ཕྱི་མ་ལ་མཇལ་གསུངས། དེ་ནས་སློབ་དཔོན་དབྱིག་གཉེན་གཅེན་ལ་ལྷག་པར་དད་དེ། ང་ཡི་ཕུ་བོ་ཀླུ་དང་འདྲ། ། ང་ནི་ཆར་སྡོད་བྱ་དང་འདྲ། ། ཀླུ་ཡི་རྒྱལ་པོས་ཆར་ཕབ་ཀྱང་། ། བྱ་ཡི་གྲེ་བར་སོང་བ་མེད། ། ཅེས་གསུངས་ཤིང་རྗེ་བཙུན་བྱམས་པ་མགོན་པོའི་བཀའ་བཞིན་བསྒྲུབས་ཏེ་ཐོག་མར་བྱང་ཆུབ་ལམ་གྱི་རིམ་པའི་སྐྱེས་བུ་ཆུང་འབྲིང་གཉིས་ཀྱི་དམིགས་པ་དང་། སྐྱེས་བུ་ཆེན་པོའི་ཡང་སྒྲུབ་པའི་དམིགས་པ་བདེན་པ་བཞིའི་གནས་ཚུལ་ཞིབ་ཏུ་སྟོན་པ་ཆོས་མངོན་པ་མཛོད་ཀྱི་ཚིག་ལེའུར་བྱས་པ་བརྩམས་ཏེ་སྐྱེས་དང་བཅས་པ་འདུན་བཟང་ལ་སྤྲིངས་སོ། ། དེའི་སློབ་མ་དག་གིས་ལོ་དང་གྲགས་ལ་སོགས་པ་འདི་འོ་སྐོལ་གྱི་གྲུབ་མཐའ་ལ་ཟུར་ཟའོ། ། ཞེས་སྨྲས་པ་དང་། ཁོང་བསྟན་བཅོས་རྩོམ་པ་ལ་མཁས་པས་ཚིག་རྒྱན་ཡིན་གསུང་ཞིང། ཤིན་ཏུ་མཉེས་ནས་འདི་ལ་རང་འགྲེལ་ཞིག་མཛོད་ཅེས་བསྐུལ་མ་མཛད། དེ་ནས་སློབ་དཔོན་འཕགས་པ་ཐོགས་མེད་ལ་ཐེག་པ་ཆེན་པོའི་མདོ་སྡེ་མཐའ་དག་གསན་ཏེ་ལན་རེ་ཙམ་གྱིས་ཐུགས་སུ་ཆུད། བྱམས་མགོན་གྱི་བཀའ་ལྟར་ལྷག་པའི་ལྷ་བསྒྲུབ་པར་བཞེད་ནས་རྡོ་རྗེ་སློབ་དཔོན་ཞིག་ལ་རྗེ་བཙུན་རྣམ་རྒྱལ་མའི་དབང། ཕྱག་རྡོར་གྱི་དབང་དང་གདམས་ངག་གསན་ཏེ་གསུངས་སྔགས་བཟླས་པས་མྱུར་དུ་གྲུབ་སྟེ་ལྷག་པའི་ལྷ་དེ་གཉིས་ཀྱི་ཞལ་གཟིགས། ཏིང་ངེ་འཛིན་གྱི་སྒོ་མང་པོ་ཐུགས་རྒྱུད་ལ་འཁྲུངས། རྒྱལ་བའི་བཀའ་འཛམ་བུ་གླིང་ན་བཞུགས་པ་མཐའ་དག་ཐུགས་སུ་ཆུད་དེ་དེའི་ཚེ་ཉན་ཐོས་ཀྱི་སྡེ་སྣོད་གསུམ་ལ་མདོ་ལྔ་བརྒྱ་ཤོ་ལོ་ཀ་འབུམ་ཕྲག་གསུམ་ཡོད་པར་གྲགས་པ་དང་། ཐེག་པ་ཆེན་པོ་ལ་འཕགས་པ་དཀོན་མཆོག་བརྩེགས་པ་ཆེན་པོའི་མདོ། འདུས་པ་རིན་པོ་ཆེའི་མདོ། ཤེར་ཕྱིན་སྟོང་ཕྲག་བརྒྱ་པ་སོགས་མདོ་ལྔ་བརྒྱ། གསང་སྔགས་ཀྱི་གཟུངས་རྒྱུད་སྡེ་ལྔ་བརྒྱ་རྣམས་ཐུགས་སུ་ཆུད་དེ་ལོ་རེའི་ནང་དུ་ལན་རེ་ཁ་ཏོན་དུ་མཛད་དེ། དེ་ཡང་ལྕགས་ཀྱི་གཞོང་རིང་ཏིལ་མར་གྱིས་བཀང་བའི་ནང་དུ་ཞུགས་ནས་ཉིན་མཚན་སྦྲེལ་མ་ཞག་བཅོ་ལྔ་རེའི་རིང་ལ་གོང་དུ་སྨོས་པའི་མདོ་དེ་རྣམས་ཚར་རེ་ཁ་ཏོན་དུ་འགྲོ་བར་མཛད། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ནི་ཉིན་རེ་བཞིན་ཁ་ཏོན་དུ་མཛད་དེ། རྒྱལ་བ་མྱ་ངན་ལས་འདས་པའི་འོག་ཏུ་བདག་ཉིད་ཆེན་པོ་འདི་ལས་མང་དུ་ཐོས་པ་རྒྱ་ཆེ་བ་སུ་ཡང་མེད་དོ་ཞེས་འཕགས་ཡུལ་གྱི་མཁས་པ་རྣམས་གཏམ་དུ་གླེང་ངོ་། ། དེ་ནས་རྗེ་བཙུན་བྱམས་མགོན་གྱི་བཀའ་བཞིན་ཐེག་པ་ཆེན་པོའི་མདོ་འགྲེལ་རྣམས་རིམ་གྱིས་མཛད་དེ་བྱང་ཆུབ་ལམ་གྱི་རིམ་པའི་མན་ངག་གི་གནད་རྣམས་ཞིབ་ཏུ་སྟོན་པ་མདོ་སྡེ་རྒྱན་གྱི་འགྲེལ་པ་དང་། དབུས་མཐའ་རྣམ་འབྱེད་ཀྱི་འགྲེལ་པ། ཆོས་ཉིད་རྣམ་འབྱེད་ཀྱི་འགྲེལ་པ། ཐེག་བསྡུས་ཀྱི་འགྲེལ་པ། ཆོས་ཐམས་ཅད་རྣམ་རིག་ཙམ་དུ་སྟོན་པ་སུམ་ཅུ་པའི་ཚིག་ལེའུར་བྱས་པ། ཕྱི་རོལ་གྱི་དོན་འགོག་པ་ཉི་ཤུ་པའི་ཚིག་ལེའུར་བྱས་པ། ཉི་ཤུ་པའི་རང་འགྲེལ། རང་བཞིན་གསུམ་ངེས་པར་བསྟན་པ། ཕུང་པོ་ལྔའི་རབ་ཏུ་བྱེད་པ། རྣམ་པར་བཤད་པའི་རིགས་པ་མདོ་སྡེའི་དུམ་པ་བརྒྱ་པ། རྣམ་པར་བཤད་པའི་རིགས་པ། ལས་གྲུབ་པའི་རབ་ཏུ་བྱེད་པ། ཐེག་པ་ཆེན་པོའི་ཆོས་བརྒྱ་གསལ་བའི་བསྟན་བཅོས། ཆོས་མངོན་པ་མཛོད་ཀྱི་ཚིག་ལེའུར་བྱས་པ། དེའི་རང་འགྲེལ། བསྟན་བཅོས་ཚིགས་སུ་བཅད་པ་བསྡུས་པ། དེའི་རང་འགྲེལ། དཀོན་མཆོག་གསུམ་གྱི་བསྟོད་པ། སྒོ་དྲུག་པའི་གཟུངས་ཀྱི་རྣམ་བར་བཤད་པ། ཡོན་ཏན་བདུན་བརྗོད་པའི་གཏམ། ཚུལ་ཁྲིམས་ཀྱི་གཏམ། ཚོགས་ཀྱི་གཏམ། སངས་རྒྱས་རྗེས་སུ་དྲན་པའི་འགྲེལ་པ། ཆོས་རྗེས་སུ་དྲན་པའི་འགྲེལ་པ། དགེ་འདུན་རྗེས་སུ་དྲན་པའི་འགྲེལ་པ། འདོད་པའི་ཡོན་ཏན་ལྔའི་ཉེས་དམིགས་བཤད་པ། ཚིགས་སུ་བཅད་པ་གཅིག་པའི་བཤད་པ། ག་ཡ་གོ་རིའི་མདོའི་བཤད་པ། མདོ་སྡེ་ས་བཅུ་པའི་རྣམ་པར་བཤད་པ། བློ་གྲོས་མི་བཟད་པས་བསྟན་པའི་མདོའི་རྒྱ་ཆེར་འགྲེལ། རྟེན་ཅིང་འབྲེལ་པར་འབྱུང་བ་དང་པོ་དང་རྣམ་པར་དབྱེ་བ་བཤད་པ། མདོ་སྡེ་ས་བཅུ་པའི་འགྲེལ་བ། བཟང་སྤྱོད་སྨོན་ལམ་གྱི་འགྲེལ་པ་རྣམས་མཛད་དོ། ། འཔགས་པ་ཐོགས་མེད་མྱ་ངན་ལས་འདས་པའི་འོག་ཏུ་ནཱ་ལནྡྲའི་མཁན་པོ་མཛད་དེ་ཉིན་རེ་བཞིན་རབ་ཏུ་བྱུང་བ་དང་བསྙེན་པར་རྫོགས་པ་མང་པོའི་མཁན་པོ་མཛད་པ་དང་། ཐེག་པ་ཆེན་པོའི་མདོ་སྡེ་མི་འདྲ་བའི་ཆོས་ཐུན་ཉི་ཤུ་རེ་འཆག་མེད་གནང་བ་དང་། མུ་སྟེགས་ཀྱི་སྨྲ་བ་ངན་པ་བྱུང་ན་དེ་མ་ཐག་ཚར་གཅོད་པ་དང་། བསྟན་བཅོས་རྩོམ་པ་སོགས་མཁས་པའི་བྱ་བ་རྣམ་པ་གསུམ་གྱིས་དུས་འདའ་བར་མཛད། དེ་དུས་འཛམ་བུ་གླིང་གི་ཆེ་དགུ་མཐའ་དག་གིས་བདག་ཉིད་ཆེན་པོ་འདིའི་ཞབས་ལ་གཏུགས་ནས་མཆོད་ཅིང་བསྙེན་བཀུར་བ་དང། རང་རང་གི་དབང་པོ་དང་འཚམས་པའི་ཆོས་ཀྱི་བགོ་སྐལ་ལེན་པར་བྱེད་པས་དད་པ་ཅན་དག་གིས་གསོལ་བ་བཏབ་པ་ལྟར་ཡུལ་གཞན་དང་གཞན་དུའང་བྱོན་ནས་གང་དང་གང་དུ་རྒྱལ་བའི་བསྟན་པ་ཉམས་པ་དེ་དག་གསོས། སྔར་ཡོད་པ་རྣམས་ཆེས་ཆེར་འཕེལ་བར་མཛད། སློབ་དཔོན་འདི་ཤར་ཕྱོགས་གཽ་རིའི་ཡུལ་དུ་བྱོན་ནས་སྐལ་པ་དང་ལྡན་པ་མང་པོ་ཞིག་ལ་ཐེག་པ་ཆེན་པོའི་མདོ་སྡེ་རྒྱ་ཆེར་གསུངས་པས་དཀར་ཕྱོགས་ཀྱི་ལྷ་རྣམས་ཀྱིས་གསེར་གྱི་མེ་ཏོག་གི་ཆར་ཕབ་པ་ཀུན་གྱི་མཐུན་སྣང་དུ་གྲུབ་པ་བྱུང་བས་ཐམས་ཅད་དད་པ་ལྷག་པར་འཕེལ་ཏེ་སློབ་དཔོན་འདིའི་བཀའ་བཞིན་བསྒྲུབས་པས་ཕྱོགས་དེར་རྒྱལ་བའི་བསྟན་པ་རྒྱ་ཆེར་འཕེལ། རྒྱལ་བའི་བསྟན་པ་རིང་དུ་གནས་པའི་ཕྱིར་དགེ་འདུན་གྱི་སྡེ་གང་དང་གང་ན་ཡོད་པ་དེ་དང་དེར་མཆོད་གཞི་རྒྱ་ཆེན་པོ་འཛུགས་པར་མཛད། ཨོ་ཌི་བི་ཤའི་ཡུལ་དུ་བྲམ་ཟེ་ཆེན་པོ་ཞིག་གིས་སྦྱིན་བདག་བྱས་ཏེ་ཐེག་པ་ཆེན་པོའི་དགེ་འདུན་སྟོང་ཕྲག་བཅུ་གཉིས་ལ་ཟླ་བ་གསུམ་དུ་ཆོས་འཁོར་བཙུགས་ཏེ་དུས་སྟོན་རྒྱས་པར་བྱས། སློབ་དཔོན་འཕགས་པ་ཐོགས་མེད་ཀྱི་དུས་ལས་ཀྱང་ཐེག་པ་ཆེན་པོའི་འཆད་ཉན་རྒྱས་པར་བྱུང་སྟེ་བདག་ཉིད་ཆེན་པོ་འདིའི་སློབ་མ་ཐེག་པ་ཆེན་པོའི་དགེ་སློང་དྲུག་ཁྲི་ལོངས་པ་བྱུང་ཞེས་གྲགས་སོ། ། སློབ་དཔོན་རང་ཉིད་དང་ལྷན་ཅིག་ཏུ་གནས་པའི་དགེ་སློང་སྡེ་སྣོད་འཛིན་པའང་སྟོང་ཙམ་རེ་ཡོད་ཅིང་། དེ་ཐམས་ཅད་ཀྱང་ཚུལ་ཁྲིམས་རྣམ་པར་དག་པ། སྡེ་སྣོད་གསུམ་ལ་མང་དུ་ཐོས་པ་དང་ལྡན་པ། རྒྱལ་བའི་བསྟན་པ་འཛིན་ཅིང་སྤེལ་ནུས་པ་ཤ་སྟག་བྱུང་ཞེས་གྲག་གོ ། དེ་ལྟར་སློབ་དཔོན་དབྱིག་གཉེན་གྱིས་དགུང་ལོ་བརྒྱར་ཉེ་བའི་བར་དུ་རྒྱ་གར་དུ་བསྟན་པ་ལ་བྱ་བ་རྒྱ་ཆེན་པོ་མཛད་ནས་མཐར་དགོས་པ་མང་པོ་ཞིག་ལ་གཟིགས་ནས་སློབ་མ་སྡེ་སྣོད་འཛིན་པ་སྟོང་དང་བཅས་བལ་ཡུལ་དུ་བྱོན་ཏེ་བལ་ཡུལ་ན་གནས་པའི་དགེ་འདུན་རྣམས་ལ་ཐེག་པ་ཆེན་པོའི་ཆོས་རྒྱ་ཆེར་བསྟན་ཅིང་བསྟན་པ་ཡུན་རིང་དུ་གནས་པའི་ཕྱིར་ཕྱོགས་དེར་མཆོད་གཞི་ཡང་མང་དུ་འཛུགས་པར་མཛད། དེ་ནས་རང་བྱུང་གི་མཆོད་རྟེན་དུ་གྲགས་པ་མཆོད་རྟེན་གོ་མ་སཱ་ལ་གནྡྷེ་ལ་ཞབས་བསྐོར་མཛད་ཅིང་བཞུགས་པ་ན་ཧང་ངུ་ཞེས་པ་རབ་བྱུང་གི་ཆ་བྱད་འཛིན་པའི་ཁྱིམ་བཙུན་ཞིག་གིས་ཞིང་རྨོད་པ་དང་ཆང་གི་བུམ་པ་ཐོགས་པ་གཟིགས་པས་རྒྱལ་བའི་བསྟན་པ་འདི་ལྟར་ཉམས་དམས་སོ་སྙམ་དུ་ཐུགས་ཕྱུང་ནས་དགེ་འདུན་རྣམས་ལ་ཐ་མའི་གསུང་ཆོས་མང་དུ་སྩལ་ཏེ་གཙུག་ཏོར་རྣམ་རྒྱལ་གྱི་གཟུངས་འགོ་གཤམ་ལྡོག་ནས་བཟླས་ཏེ་སྐུ་ཚེའི་འདུ་བྱེད་བཏང་སྟེ་དེ་ཉིད་དུ་སྐུའི་བཀོད་པ་བསྡུས་ནས་རྗེ་བཙུན་བྱམས་པ་མགོན་པོ་དང་འཕགས་པ་ཐོགས་མེད་གང་དུ་བཞུགས་པའི་གནས་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། སློབ་དཔོན་དབྱིག་གཉེན་གང་དུ་མྱ་ངན་ལས་འདས་པའི་ས་དེར་སློབ་མ་དད་པ་ཅན་དག་གིས་སྐུ་གདུང་བཞུགས་པའི་མཆོད་རྟེན་བརྩིགས་པ་ད་ལྟའང་ཡོད་དོ། ། སློབ་དཔོན་བདག་ཉིད་ཆེན་པོ་འདི་ལ་སློབ་མ་བསྟན་པ་འཛིན་ནུས་པ་བསམ་གྱི་མི་ཁྱབ་པ་བྱུང་ཞིང་། དེ་ཐམས་ཅད་ཀྱི་ནང་ནས་མཆོག་ཏུ་གྱུར་པ་བཞི་སྟེ། འདུལ་བ་ལ་མཁས་པའི་མཆོག་ཏུ་གྱུར་པ་སློབ་དཔོན་ཡོན་ཏན་འོད། མངོན་པ་ལ་མཁས་པའི་མཆོག་ཏུ་གྱུར་པ་སློབ་དཔོན་བློ་གྲོས་བརྟན་པ། ཚད་མ་ལ་མཁས་པའི་མཆོག་ཏུ་གྱུར་པ་སློབ་དཔོན་ཕྱོགས་ཀྱི་གླང་པོ། ཕར་ཕྱིན་ལ་མཁས་པའི་མཆོག་ཏུ་གྱུར་པ་སློབ་དཔོན་འཕགས་པ་རྣམ་གྲོལ་སྡེ་བཞིའོ། །
དེ་ལ་འདུལ་བ་ལ་མཁས་པའི་མཆོག་ཏུ་གྱུར་པ་སློབ་དཔོན་ཡོན་ཏན་འོད་ནི་ཡུལ་བཅོམ་བརླག་ཏུ་བྲམ་ཟེའི་རིགས་སུ་འཁྲུངས། ཆུང་ངུའི་དུས་ནས་རིག་གནས་མཐའ་དག་ལ་མཁས་པར་སྦྱངས། དེ་ནས་རྒྱལ་བའི་བསྟན་པ་ལ་རབ་ཏུ་བྱུང་ཞིང་བསྙེན་པར་རྫོགས་ནས་མཁས་མཆོག་དབྱིག་གཉེན་གྱི་དྲུང་དུ་ཕེབས་ཏེ་སྡེ་སྣོད་གསུམ་ལ་སྦྱངས་ཤིང་ཐེག་པ་ཆེན་པོའི་ལམ་གྱི་རིམ་པ་གསན་ནས་ཐེག་ཆེན་གྱི་མདོ་སྡེ་མཐའ་དག་ལ་སྦྱངས། སྡེ་པ་བཅོ་བརྒྱད་པོ་སོ་སོའི་ལུགས་མ་འདྲེས་པར་མཁྱེན་ཅིང་འདུལ་བ་འབུམ་སྡེ་ཐུགས་ལ་བཟུང་སྟེ་རྒྱུན་དུ་ཁ་དོན་དུ་མཛད། དེ་ལྟར་ཀློག་པ་ཐོས་བསམ་དང་སྤོང་བ་བསམ་གཏན་ལ་བརྩོན་པར་མཛད་པས་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་ཞིང་གཟུངས་དང། སྤོབས་པ་དང། མངོན་པར་ཤེས་པ་དང། ཏིང་ངེ་འཛིན་གྱི་སྒོ་བརྒྱ་ཕྲག་མང་པོ་ཐུགས་ལ་འཁྲུངས། ལྷག་པར་སློབ་དཔོན་དབྱིག་གཉེན་གྱི་མན་ངག་ལ་བརྟེན་ནས་ལམ་རིམ་གྱིས་བགྲོད་དེ་འཕགས་པའི་ས་ཐོབ་པས་སློབ་དཔོན་འཕགས་ཡོན་ཏན་འོད་ཅེས་སྙན་པའི་གྲགས་པས་ཕྱོགས་ཀུན་ཁྱབ་པར་གྱུར་ཅིང་། རྒྱལ་བའི་བསྟན་པ་ལ་བྱ་བ་མཛད་ཕྱིར་འདུལ་བ་ལུང་སྡེ་བཞིའི་གནད་ཐམས་ཅད་བསྡུས་པ་འདུལ་བ་རྒྱ་མཚོའི་སྙིང་པོ་ཞེས་བྱ་བའི་བསྟན་བཅོས་ཆེན་པོ་མཛད་དེ། དེ་ལ་ནི་འདུལ་བའི་མདོ་ཞེས་ཡོངས་སུ་གྲགས་ཤིང་རྒྱལ་བའི་བཀའ་དང་ཁྱད་པར་མེད་པར་རྒྱལ་བའི་བསྟན་པ་ལ་རབ་ཏུ་བྱུང་བ་ཐམས་ཅད་ཀྱིས་ཚད་མར་འཛིན་ཅིང་འདུལ་བ་ལུང་ལ་བལྟ་བའི་མིག་ལྟ་བུ་སངས་རྒྱས་ཀྱི་བསྟན་པའི་སྒྲོན་མེ་སྔོན་བྱོན་པའི་མཁས་གྲུབ་ཐམས་ཅད་ཀྱིས་གཙིས་པོ་ཆེར་མཛད་དོ། ། གཞན་ཡང་འདུལ་བའི་ལས་བརྒྱ་རྩ་གཅིག་གི་ཆོ་ག་ཀརྨ་ཤ་ཏམ་དུ་གྲགས་པ་ཡང་མཛད་དེ། ད་ལྟ་རྒྱལ་བའི་བསྟན་པ་ལ་ཞུགས་ནས་དགེ་བསྙེན་དང། བར་མ་རབ་བྱུང་དང་། ཚིགས་སྔ་མ་དགེ་ཚུལ་གྱི་སྡོམ་པ་དང། བསླབ་གཞི་ཡོངས་སུ་རྫོགས་པ་དགེ་སློང་གི་སྡོམ་པ་ལེན་པའི་ཆོ་ག་དང་གཞི་གསུམ་གྱི་ཆོ་ག་སོགས་འདུལ་བའི་ལས་ཀྱི་ཆོ་ག་རྣམས་བདག་ཉིད་ཆེན་པོ་འདི་ཁོ་ནའི་བཀའ་དྲིན་ལས་བྱུང་བས་བསྟན་པ་འདི་ལ་བཀའ་དྲིན་མཚུངས་པ་མེད་པ་ཞིག་གོ ། བདག་ཉིད་ཆེན་པོ་འདི་འཕྲིན་ལས་ཀྱི་ཁྱབ་བདལ་ཤིན་ཏུ་ཆེ་བས་ལྷན་ཅིག་གནས་པའི་དགེ་སློང་ཡང་སྟོང་ཕྲག་ལྔ་རེ་ཙམ་ཡོད་པར་བཤད་ཅིང་། དེ་ཐམས་ཅད་ཀྱང་སྡེ་སྣོད་གསུམ་ལ་མང་དུ་ཐོས་པ་དང་ལྡན་པ། ཉིན་ཞག་ཕྲུགས་རེའི་ནང་དུ་ལྟུང་བ་བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམས། བྱིན་གྱིས་བརླབ་པར་འོས་པ་རྣམས་བྱིན་གྱིས་རླབས་ཏེ་ཚུལ་ཁྲིམས་རྣམ་པར་དག་པ་སྔོན་རྒྱལ་བ་ཞལ་བཞུགས་དུས་དང་བསྟན་པའི་གཏད་རབས་ཀྱི་སྐབས་དགྲ་བཅོམ་པ་རྣམས་ཀྱིས་བསྟན་པ་སྐྱོང་བའི་དུས་བཞིན་ཡོད་ཅེས་སྔོན་གྱི་མཁས་པ་རྣམས་ལ་གཏམ་དུ་གྲགས་སོ། །
བདག་ཉིད་ཆེན་པོ་དབྱིག་གཉེན་གྱི་སློབ་མ་མངོན་པ་ལ་མཁས་པའི་མཆོག་ཏུ་གྱུར་པ་སློབ་དཔོན་བློ་གྲོས་བརྟན་པ་ནི། སློབ་དཔོན་དབྱིག་གཉེན་བྷ་ག་བཱི་ཧཱར་ཞེས་བྱ་བ་ན་འབྲུ་མར་གྱིས་ཟངས་བཀང་བའི་ནང་ན་ཞུགས་ཏེ་འབུམ་སྡེ་བརྒྱད་ཅུ་ཞལ་ཏོན་མཛད་པའི་ཚེ་ཕུག་རོན་ཞིག་རྒྱུན་དུ་ཉན་ནས་སྡོད་པ་ནམ་ཞིག་ཚེ་འཕོས་ཏེ་མཐའ་འཁོབ་འདྲ་མ་ཞེས་བྱ་བར་དམངས་རིགས་ཀྱི་བུར་སྐྱེས། སྐྱེས་མ་ཐག་ངའི་སློབ་དཔོན་གང་ན་བཞུགས་ཞེས་འདྲི་བ་ལ། ཕས་ཁྱོད་ཀྱི་སློབ་དཔོན་སུ་ཡིན་དྲིས་པས་དབྱིག་གཉེན་ཡིན་ཟེར། ཕས་ཡུལ་དབུས་སུ་འགྲོ་བའི་ཚོང་པ་ལ་དྲིས་པས་དབྱིག་གཉེན་བཞུགས་པར་ཐོས་ནས། ཅུང་ཟད་སྐྱེས་པ་དང་སློབ་དཔོན་དབྱིག་གཉེན་ཅན་དུ་བསྐྱལ། སློབ་དཔོན་གྱིས་དེ་ལ་ཡི་གེ་ཕྱི་མོ་སློབ་པ་ནས་བཟུང་སྟེ་རིག་པའི་གནས་ཐམས་ཅད་ལ་མཁས་པར་བསླབས། ཆུང་ངུའི་དུས་ན་ནཱ་ལནྡྲ་ན་སྒྲོལ་མའི་རྟེན་བཞུགས་པའི་ཕྱག་ཏུ་སྲན་མའི་ཕུད་ཕུལ་ལ་བཟའ་སྙམ་ནས་འགའ་ཞིག་ཕུལ་བས་འགྲིལ་ནས་བྱུང་། ཡང་ཕུལ་བས་འགྲིལ། འཕགས་མས་མ་གསོལ་བར་རང་ཟ་བ་མི་འོང་སྙམ་ནས་ཟད་ཟད་ཕུལ་ཡང་འགྲིལ་བས་བྱིས་པ་ངུས་སོ། ། དེར་འཕགས་མས་ཞལ་དངོས་སུ་བསྟན་ཏེ་ངུ་མི་དགོས། ངས་ཁྱོད་ལ་བྱིན་གྱིས་བརླབས་ཀྱིས་ཁྱིམ་དུ་སོངས་གསུངས། དེ་ནས་མཁྱེན་རབ་ཐོགས་མེད་དུ་གྱུར་ཏེ་རྟེན་དེ་ལ་སྲན་མའི་སྒྲོལ་མ་ཞེས་གྲགས་སོ། ། སློབ་དཔོན་དེ་ལ་མདོ་དཀོན་མཆོག་བརྩེགས་པའི་ལེའུ་བཞི་བཅུ་ཞེ་དགུ་ཡན་ཆད་ཐུགས་ལ་མངའ་ཞིང་འགྲེལ་པ་ཡང་མཛད་ཅེས་གྲགས་སོ། ། དེའི་ཚེ་མཁས་པའི་གྲགས་པས་ཕྱོགས་ཀུན་ཏུ་ཁྱབ་ཅིང་། སློབ་དཔོན་དེས་མཛོད་ཀྱི་འགྲེལ་པ་གནམ་ལྕགས་ཐོག་གཟེར། ཆོས་མངོན་པ་ཀུན་ལས་བཏུས་ཀྱི་འགྲེལ་པ། རབ་ཏུ་བྱེད་པ་སྡེ་བརྒྱད་ཀྱི་འགྲེལ་པ་ལ་སོགས་པ་བསྟན་བཅོས་མང་དུ་བརྩམས་སོ། །
སློབ་དཔོན་དབྱིག་གཉེན་གྱི་སློབ་མ་ཚད་མ་ལ་མཁས་པའི་མཆོག་ཏུ་གྱུར་པ་སློབ་དཔོན་ཕྱོགས་ཀྱི་གླང་པོ་ཞེས་ཡོངས་སུ་གྲགས་པའི་བདག་ཉིད་ཆེན་པོ་དེ་ནི་རྒྱ་གར་ལྷོ་ཕྱོགས་ཀྱི་གྲོང་ཁྱེར་སིངྒ་བཀྟ་ཅེས་བྱ་བར་བྲམ་ཟེའི་རིགས་སུ་འཁྲུངས། སྐུ་འཁྲུངས་ནས་རིང་པོར་མ་ལོན་པར་བྲམ་ཟེའི་རིག་བྱེད་ཐམས་ཅད་དང་། གཞན་ཡང་རིག་གནས་ཐམས་ཅད་ལ་མཁས་པའི་ཕུལ་དུ་ཕྱིན་པར་གྱུར། སྔོན་ཡུན་རིང་པོ་ནས་གོམས་པའི་བག་ཆགས་བརྟས་པས་འཁོར་བ་མཐའ་དག་མེ་འབར་བའི་རླུབས་ལྟར་གཟིགས་ནས་ངེས་འབྱུང་ཤུགས་དྲག་པོས་བྲམ་ཟེའི་རིགས་དང་། ལོངས་སྤྱོད་དང་སློབ་འཁོར་རྒྱ་ཆེན་པོ་ལ་མ་ཆགས་པར་གནས་མ་བུ་པའི་སྡེ་པའི་མཁན་པོ་གླང་པོ་བྱིན་ཞེས་བྱ་བ་ལས་རབ་ཏུ་བྱུང་། མཚན་ཕྱོགས་ཀྱི་གླང་པོར་གསོལ། མཁན་པོ་དེ་ཉིད་ལ་བརྟེན་ཏེ་གནས་མ་བུ་པའི་ལུགས་དང་མཐུན་པའི་སྡེ་སྣོད་གསུམ་ལ་མཁས་པར་བྱས་ཤིང་ཁྱད་པར་ལྷག་པོར་རྟོགས། དེ་ནས་ཐེག་པ་ཆེན་པོའི་ལུང་དང་མན་ངག་མཐའ་དག་གསན་པར་བཞེད་ནས་སློབ་དཔོན་དབྱིག་གཉེན་གྱི་དྲུང་དུ་བྱོན། སྤྱིར་ཐེག་པ་ཆེ་ཆུང་གི་སྡེ་སྣོད་མཐའ་དག་དང། ཁྱད་པར་ཐེག་པ་ཆེན་པོའི་མདོ་སྡེ་རྣམས་དང་། རྗེ་བཙུན་བྱམས་པ་ནས་བརྒྱུད་པའི་ཐེག་པ་ཆེན་པོའི་མན་ངག་རྣམས་བུམ་པ་གང་བྱོའི་ཚུལ་དུ་ལེགས་པར་གསན། ཐེག་པ་ཆེན་པོའི་མདོ་སྡེ་ལྔ་བརྒྱ་ཙམ་ཁ་ཏོན་དུ་མཛད། དེ་ནས་རྡོ་རྗེ་སློབ་དཔོན་ཞིག་ལས་རྗེ་བཙུན་འཇམ་དཔལ་དབྱངས་ཀྱི་དབང་དང་སྒྲུབ་ཐབས་ལེགས་པར་གསན་ནས་སྒྲུབ་པ་མཛད་པས་རྗེ་བཙུན་འཇམ་པའི་དབྱངས་ཀྱི་ཞལ་མངོན་དུ་གཟིགས་ཤིང་གདམས་པ་དང་རྗེས་སུ་བསྟན་པ་ལེགས་པར་ཐོབ། དེ་ནས་བཟུང་ནམ་འདོད་དུ་རྗེ་བཙུན་འཇམ་པའི་དབྱངས་ཀྱི་ཞལ་གཟིགས་ཤིང་ཆོས་གསན་པར་མཛད། དེ་ནས་ཨོ་ཌི་བི་ཤའི་ཡུལ་གྱི་ནགས་ཚལ་ཤིན་ཏུ་དབེན་པའི་བྲག་རིའི་ཕུག་ཅིག་ཏུ་སྒྲུབ་པ་ལ་རྩེ་གཅིག་ཏུ་བཞུགས། དེ་ནས་ནཱ་ལནྡྲར་མུ་སྟེགས་ཀྱི་རྩོད་པ་བྱེད་པ་བྱུང་བ་ན་སློབ་དཔོན་འདིས་ཚར་བཅད་དོ། ། བདག་ཉིད་ཆེན་པོ་འདིས་སྤྱིར་རྒྱལ་བའི་གསུང་རབ་མཐའ་དག་གི་དགོངས་པ་བཀྲལ་ཞིང། ལྷག་པར་ཚད་མ་གཏན་ལ་འབེབ་པ་ལ་དམིགས་པ་བརྟག་པ་སོགས་ཚད་མའི་བསྟན་བཅོས་བརྒྱ་རྩ་མཛད་པར་གྲགས། སླར་ཡང་ཨོ་ཌི་བི་ཤའི་ཡུལ་དུ་གཤེགས་ནས་སྔར་གྱི་ཕུག་པར་བསམ་གཏན་ལ་རྩེ་གཅིག་ཏུ་གཞོལ་བར་མཛད། དུས་ནམ་ཞིག་ན་རིགས་པའི་མིག་དང་བྲལ་བའི་གདུལ་བྱ་རྣམས་ལ་ཐུགས་བརྩེ་བ་ཆེན་པོས་གཟིགས་ཏེ་རིགས་པའི་མིག་སྦྱིན་པར་མཛད་བཞེད་པ་ན། གདུལ་བྱ་རྣམས་བློ་གྲོས་ཀྱི་མཐུ་ཤིན་ཏུ་ཆུང་པ་དང་། སྔར་བརྩམ་པའི་ཚད་མའི་བསྟན་བཅོས་རྣམས་ཀྱང་རྣམ་གྲངས་མང་བས་ཁ་འཐོར་བ་ལྟ་བུར་གྱུར་པར་གཟིགས་ཏེ། སྔར་མཛད་པ་དེ་དག་ཐམས་ཅད་ཀྱི་གནད་བསྡུས་ཏེ་གསུང་རབ་སྤྱིའི་དགོངས་འགྲེལ་ཚད་མ་ཀུན་ལས་བཏུས་པ་བརྩོམ་པར་བཞེད་ནས། ཚད་མར་གྱུར་པ་འགྲོ་ལ་ཕན་བཞེད་པ། ། སྟོན་པ་བདེ་གཤེགས་སྐྱོབ་ལ་ཕྱག་འཚལ་ཏེ། ། ཞེས་པ་སྒྲུབ་ཕུག་གི་བྲག་ངོས་ལ་རྡོ་རྒྱུས་ཀྱིས་བྲིས་པ་ཙམ་གྱིས་འཇིག་རྟེན་གྱི་ཁམས་སུ་འོད་ཀྱི་སྣང་བ་ཆེན་པོ་བྱུང་། ས་གཡོས་ཤིང་སྒྲ་ཆེན་པོ་གྲག ། མུ་སྟེགས་ཀྱི་སྟོན་པ་རྣམས་ཀྱི་བྱིན་པ་རེངས་པར་གྱུར། དེ་གང་གི་ལྟས་ཡིན་སྙམ་དུ་མུ་སྟེགས་ཐུབ་རྒྱལ་ནག་པོས་མངོན་ཤེས་ཀྱིས་བརྟགས་པས་ཚད་མ་མདོའི་མཆོད་བརྗོད་བྲིས་པའི་བྱིན་རླབས་ཀྱི་མཐུར་མཐོང་ནས། སློབ་དཔོན་བསོད་སྙོམས་ལ་གཤེགས་པའི་ཤུལ་དུ་རྫུ་འཕྲུལ་གྱིས་འོངས་ནས་མཆོད་བརྗོད་ཀྱི་ཚིག་དེ་བསུབས་ནས་བཞག ། དེ་ལྟར་ལན་གསུམ་བྱས་པའི་ཐ་མ་ལ་སློབ་དཔོན་གྱིས་ཀྱལ་ཀས་བསུབས་པ་ཡིན་ན་འདི་ལ་དགོས་པ་ཆེན་པོ་ཡོད་པས་ཞོག་ཅིག ། རྩོད་པར་འདོད་ན་གཟུགས་སྟོན་དང་རྩོད་པར་བགྱིའོ། ། ཞེས་བྲིས་པས་བསོད་སྙོམས་ལས་འཁོར་བའི་ཚེ་ཁོ་དངོས་སུ་བསྡད་འདུག་པ་རིགས་པ་དྲི་མ་མེད་པས་ལན་གསུམ་གྱི་བར་དུ་ཕམ་པར་བྱས་པའི་ཚེ། ད་རྫུ་འཕྲུལ་འགྲན་ཟེར་ནས་ཁ་ནས་མེ་སྦར་ཏེ་སློབ་དཔོན་གྱི་ཆོས་གོས་རྣམ་གསུམ་དང་ཡོ་བྱད་བསྲེགས་པས། སློབ་དཔོན་ཐུགས་ཤིན་ཏུ་སྐྱོ་ནས་སེམས་ཅན་མ་རུངས་པ་འདི་འདྲ་བ་བསམ་གྱིས་མི་ཁྱབ་པས་སེམས་ཅན་ཐམས་ཅད་ཀྱི་དོན་བྱ་མི་ནུས་ཀྱི། ཐོད་ལེ་ཀོར་ནམ་མཁར་འཕངས་ནས་འདི་ནམ་ས་ལ་བབས་པའི་ཚེ་རང་ཉིད་གཅིག་བུ་གྲོལ་བ་དོན་དུ་གཉེར་བར་བགྱིའོ་སྙམ་དུ་དགོངས་པས། ཐོད་ལེ་ཀོར་འབབ་དུས་མ་བྱུང་བས་ནམ་མཁར་གཟིགས་པ་ན་རྗེ་བཙུན་འཇམ་པའི་དབྱངས་བལྟ་བས་ཆོག་མི་ཤེས་པ་ཞིག་གིས་ཐོད་ལེ་ཀོར་དེ་བསྣམས་ནས། བུ། མ་བྱེད་མ་བྱེད་ཐེག་པ་དམན་དང་ཕྲད་ལས་བློ་གྲོས་ངན་སྐྱེ་སྟེ། ། ཁྱོད་ཀྱི་བསྟན་བཅོས་འདི་ལ་མུ་སྟེགས་ཚོགས་ཀྱིས་གནོད་མི་ནུས་པར་ཤེས། ། ཁྱོད་ཀྱི་ས་མ་ཐོབ་ཀྱི་བར་དུ་དགེ་བའི་བཤེས་སུ་ང་འགྱུར་གྱི། ། ཕྱི་མའི་དུས་ན་འགྲོ་བ་ཀུན་གྱི་མིག་གཅིག་ཏུ་ནི་འདི་འགྱུར་རོ། ། ཞེས་ལུང་བསྟན་ཅིང་དབུགས་ཕྱུང་ནས་ཚད་མ་ཀུན་ལས་བཏུས་པ་བརྩོམ་པར་སྐུལ་མ་མཛད་པ་ན་སློབ་དཔོན་ཕྱོགས་ཀྱི་གླང་པོས་ཀྱང་ཐུགས་རྗེ་དང་སྙིང་སྟོབས་ཆེར་བཞེས་ནས་ཚད་མ་ཀུན་ལས་བཏུས་པ་མཛད་དེ། འཛམ་བུ་གླིང་གི་འགྲོ་བ་ཐམས་ཅད་ལ་བློ་གྲོས་ཀྱི་མིག་སྦྱིན་པར་མཛད་དོ། ། དེ་ནས་སླར་ཡང་བསམ་གཏན་ལ་རྩེ་གཅིག་ཏུ་བཞུགས་པས་སངས་རྒྱས་མང་པོའི་ཞལ་མཐོང་ཞིང། ཏིང་ངེ་འཛིན་གྱི་སྒོ་བརྒྱ་ཕྲག་མང་པོ་ཐོབ། ལྷ་རྣམས་ཀྱིས་མེ་ཏོག་གི་ཆར་ཕབ། ནགས་ཚལ་དེའི་ལྗོན་ཤིང་དང་མེ་ཏོག་རྣམས་ཀྱང་སློབ་དཔོན་གྱི་ཕྱོགས་སུ་མགོ་འདུད། གླང་པོ་ཆེ་ལ་སོགས་པ་ནགས་ཚལ་དེ་ན་གནས་པའི་རི་དྭགས་རྣམས་ཀྱང་སློབ་དཔོན་གྱི་ཞབས་ལ་མགོ་བོས་གཏུག་ཅིང་གུས་པའི་ཚུལ་བྱེད། ཡུལ་དེའི་རྒྱལ་པོ་འཁོར་དང་བཅས་པས་ཀྱང་ཞབས་ལ་ཕྱག་བྱས་སོ། ། དེ་ནས་ལྷོ་ཕྱོགས་སུ་བྱོན་ཏེ་མུ་སྟེགས་ཀྱི་སྨྲ་བ་ངན་པ་རྣམས་ཚར་བཅད། དགེ་འདུན་གྱི་སྡེ་རྣམས་ལ་སྡེ་སྣོད་གསུམ་རྒྱ་ཆེར་བཤད་དེ་སངས་རྒྱས་ཀྱི་བསྟན་པ་ཆེས་ཆེར་སྤེལ་བར་མཛད་དོ། ། དེ་ནས་སླར་ཡང་ཨོ་ཌི་བི་ཤའི་ཡུལ་དུ་བྱོན་ནས་ཡུལ་དེའི་རྒྱལ་པོ་འཁོར་བཅས་སངས་རྒྱས་ཀྱི་བསྟན་པ་ལ་བཙུད། བྲམ་ཟེ་ཆེན་པོ་ཞིག་གིས་སྦྱིན་བདག་བྱས་ཏེ་དགེ་འདུན་གྱི་སྡེ་མང་དུ་བཙུགས། ཡུལ་དེའི་སྐྱེ་བོ་རྣམས་སངས་རྒྱས་ཀྱི་བསྟན་པ་ལ་ཡིད་ཆེས་རྙེད་པའི་ཕྱིར་ཨ་རུ་རའི་སྡོང་པོ་ཆེན་པོ་སྐམ་པོ་ཞིག་བདེན་ཚིག་བརྗོད་ནས་སོར་ཆུད་པར་མཛད་དོ། ། དེ་ལྟར་འཕགས་ཡུལ་གྱི་ཕྱོགས་ཐམས་ཅད་དུ་སངས་རྒྱས་ཀྱི་བསྟན་པས་ཁྱབ་པར་མཛད་ནས་མཐར་ཨོ་ཌི་བི་ཤའི་ནགས་ཚལ་དབེན་པའི་སྒྲུབ་ཕུག་དེ་ཉིད་དུ་ངོ་མཚར་བའི་ལྟས་དུ་མ་དང་བཅས་ཏེ་ཞིང་གཞན་དུ་གཤེགས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་མཁས་མཆོག་དབྱིག་གཉེན་ལ་ཡོན་ཏན་དང་བཀའ་དྲིན་དྲན་པའི་དད་གུས་ཆེན་པོས་གསོལ་བ་འདེབས་ཤིང་བདག་ཉིད་ཆེན་པོ་འདིས་མཛད་པའི་ལེགས་བཤད་རྣམས་ལ་བལྟས་ནས་ལུང་ཙམ་སྐྱབས་སུ་གྱུར་པ་མིན་པར་རྒྱལ་བའི་གསུང་རབ་ཀྱི་དགོངས་དོན་དྲི་མ་མེད་པའི་རིགས་པས་རྙེད་པར་བྱས་ལ་གསུང་རབ་དགོངས་འགྲེལ་དང་བཅས་པའི་སྙིང་པོའི་དོན་བྱང་ཆུབ་ལམ་གྱི་རིམ་པ་ཉམས་ལེན་ལ་བརྩོན་པར་བྱའོ། ། ། །
༈ དབུ་མའི་ལམ་བརྙེས་འཕགས་པ་རྣམ་གྲོལ་སྡེ། ། ཞེས་བསྔགས་པ། ཀུན་མཁྱེན་གཉིས་པ་སློབ་དཔོན་དབྱིག་གཉེན་གྱི་སློབ་མ་མཆོག་བཞིའི་ནང་ཚན། འཕགས་པ་རྣམ་གྲོལ་སྡེ་ནི། ཡུལ་དབུས་དང་ལྷོ་ཕྱོགས་ཀྱི་མཚམས་འབར་བའི་ཕུག་དང་ཉེ་བར་སློབ་དཔོན་སངས་རྒྱས་འབངས་ཀྱི་དབོན་སྲས་སུ་འཁྲུངས། གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ། སྡེ་པ་བཅོ་བརྒྱད་ཀྱི་ནང་ནས་གནས་མ་བུ་པ་ཀུ་རུ་ཀུལླིའི་སྡེ་ལས་རབ་ཏུ་བྱུང་ཞིང་ལོ་ལོན་ནས་བསྙེན་པར་རྫོགས་པའི་སྡོམ་པ་བཞེས། སྡེ་པ་དེ་ལུགས་ཀྱི་འདུལ་བའི་བཅས་མཚམས་ཆེ་ཕྲ་མཐའ་དག་ལ་མཁས་པར་སྦྱངས་ཤིང་ཕྱག་ལེན་ལ་ཐེབས་པར་མཛད། སྔོན་ཡུན་རིང་པོ་ནས་བྱང་ཆུབ་མཆོག་ཏུ་ཐུགས་བསྐྱེད་ཅིང་ཚོགས་གཉིས་རྒྱ་ཆེན་པོ་བསགས། རྒྱལ་བའི་དམ་ཆོས་འཛིན་པའི་སྨོན་ལམ་རླབས་པོ་ཆེའི་མཐུ་གྲུབ་པས་སྡེ་སྣོད་གསུམ་དང་ཁྱད་པར་ཐེག་པ་ཆེན་པོའི་སྡེ་སྣོད། དེའི་ནང་ནས་ཀྱང་ཤེར་ཕྱིན་གྱི་མདོ་སྡེ་རིན་པོ་ཆེའི་མན་ངག་རྣམས་གསན་བཞེད་ནས་སློབ་དཔོན་དབྱིག་གཉེན་གྱི་དྲུང་དུ་ཕེབས་ཏེ་སློབ་དཔོན་དབྱིག་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་སྡེ་སྣོད་གསུམ་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར་ཅིང། ཁྱད་པར་ཤེར་ཕྱིན་གྱི་མདོ་སྡེ་རིན་པོ་ཆེ་རྣམས་རྫོགས་པར་གསན་ནས་ཚིག་དོན་གཉིས་ཀ་ཐུགས་སུ་ཆུད་པར་མཛད། ཤེར་ཕྱིན་གྱི་མདོ་སྡེའི་དོན་རྗེ་བཙུན་བྱམས་པ་མགོན་པོས་བྱང་ཆུབ་ལམ་གྱི་རིམ་པའི་མན་ངག་ཏུ་སྦྱར་བ་མངོན་པར་རྟོགས་པའི་རྒྱན་གསན་ཏེ་དེའི་དོན་ཐེག་པ་ཆེན་པོའི་ལམ་གྱི་ལུས་ཡོངས་སུ་རྫོགས་པ་ཐུགས་ཉམས་སུ་བཞེས་པས་ལམ་རིམ་གྱིས་བགྲོད་དེ་ཆོས་ཉིད་མངོན་སུམ་དུ་གཟིགས་པ་འཕགས་པའི་ལམ་ཐོབ། གཟུངས་དང་སྤོབས་པ་དང། མངོན་པར་ཤེས་པ་རྒྱ་ཆེན་པོ་དང་། དཔའ་བར་འགྲོ་བའི་ཏིང་ངེ་འཛིན་དང་། ནམ་མཁའ་མཛོད་ཀྱི་ཏིང་ངེ་འཛིན་ལ་སོགས་པ་མངོན་དུ་གྱུར། རྗེ་བཙུན་བྱམས་པ་མགོན་པོ་ཞལ་མཐོང་མངོན་པར་རྟོགས་པའི་རྒྱན་གྱི་བརྗོད་བྱ་དང་པོ་སེམས་བསྐྱེད་ནས་བཟུང་ཐ་མ་འཕྲིན་ལས་ཀྱི་བར་དོན་བདུན་ཅུ་པོ་རེ་རེ་ནས་ཤེར་ཕྱིན་གྱི་མདོ་དང་འབྱོར་པ་ཞིག་བྱུང་ན་ཅི་མ་རུང་སྙམ་དུ་སྨོན་ཞིང། དེ་ལྟར་དུ་བྱམས་མགོན་ལ་གསོལ་བ་ཤུགས་དྲག་ཏུ་བཏབ་པས། རྗེ་བཙུན་བྱམས་མགོན་གྱིས་ཝཱ་ར་ཎཱ་སིའི་གཙུག་ལག་ཁང་དུ་སོངས་དང་འདོད་པའི་དོན་འགྲུབ་པར་འགྱུར་རོ་ཞེས་ལུང་བསྟན། རྗེ་བཙུན་གྱི་བཀའ་བཞིན་ཝཱ་ར་ཎཱ་སིའི་གཙུག་ལག་ཁང་དུ་བྱོན་པ་ན། དེའི་ཚེ་དགེ་བསྙེན་ཞི་བའི་གོ་ཆ་ཞེས་བྱ་བ་ཞིག་གིས་ཤེར་ཕྱིན་སྟོང་ཕྲག་ཉི་ཤུ་ལྔ་པ་པོ་ཏ་ལ་ནས་སྤྱན་དྲངས་ཏེ་ཝཱ་ར་ཎཱ་སིའི་གཙུག་ལག་ཁང་དུ་ཕེབས་པ་དང་དུས་འགྲིག ། དེ་ཡང་རྒྱལ་བ་མྱ་ངན་ལས་འདས་ནས་བདུད་སྡིག་ཏོ་ཅན་གྱི་མཐུས་རྒྱལ་བའི་བསྟན་པ་ཉམས་པར་བྱེད་པའི་མུ་སྟེགས་ཅན་གྱི་གནོད་པ་རིམ་པར་བྱུང་བས་འཕགས་ཡུལ་ན་བཞུགས་པའི་རྒྱལ་བའི་བཀའི་གླེགས་བམ་མང་པོ་ཞིག་ནུབ་པར་གྱུར་པ་ལ། བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ཀླུ་ཡུལ་ནས་སྤྱན་དྲངས་ཏེ་རྒྱ་གར་ན་བཞུགས་ཤིང། ཤེར་ཕྱིན་སྟོང་ཕྲག་བརྒྱད་པ་སྔར་ནས་བཞུགས་པས་འཕགས་པ་གྲོལ་སྡེས་མངོན་རྟོགས་རྒྱན་ཤེར་ཕྱིན་དེ་གཉིས་དང་སྦྱར་ཡང་འགའ་ཞིག་གི་ཐད་ལ་འབྱོར་དཀའ་བར་བྱུང་བ་ཝཱ་ར་ཎཱ་སིའི་གཙུག་ལག་ཁང་དུ་ཉི་ཁྲི་ལ་གཟིགས་པས་ཐམས་ཅད་འབྱོར་ཏེ། དོན་བདུན་ཅུའི་དང་པོ་སེམས་བསྐྱེད་སྟོན་པ་ལ་ཉི་ཁྲིར། ཤ་ར་དྭ་ཏིའི་བུ། འདི་ལ་བྱང་ཆེན་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་ཤེར་ཕྱིན་ལ་བརྩོན་པར་བྱའོ། ། ཞེས་གསུངས། དེ་བཞིན་དུ་བྱང་ཆུབ་དོན་གཉེར་མདོར་བསྟན་རྒྱས་བཤད། གཞན་དོན་དོན་གཉེར་མདོར་བསྟན་རྒྱས་བཤད། ས་ལྟ་བུའི་སེམས་བསྐྱེད་ནས་ཆོས་ཀྱི་སྤྲིན་ལྟ་བུའི་སེམས་བསྐྱེད་ཀྱི་བར་སེམས་བསྐྱེད་ཉེར་གཉིས་རེ་རེ་ནས་མདོ་དང་འབྱོར་ཞིང། དེ་བཞིན་དུ་གདམས་ངག་གི་དང་པོ་སྒྲུབ་པ་ནས་བཟུང་འཕྲིན་ལས་ཉི་ཤུ་རྩ་བདུན་གྱི་བར་རེ་རེ་ནས་རྒྱལ་བས་གསུངས་པའི་མདོ་དང་འབྱོར་པས། རྒྱ་མཚོར་བགྲོད་པའི་དེད་དཔོན་གྱིས་ཡིད་བཞིན་གྱི་དོན་བུ་རྙེད་པ་ལྟར་ཐུགས་རབ་ཏུ་ཚིམ་པར་གྱུར་ཏོ། ། དགེ་བསྙེན་ཞི་བའི་གོ་ཆས་ཉི་ཁྲི་གདན་དྲངས་ཚུལ་ནི། དགེ་བསྙེན་དེ་ནགས་ཁྲོད་ཞིག་ན་འཕགས་པ་སྤྱན་རས་གཟིགས་ཀྱི་རྣལ་འབྱོར་ལ་རྩེ་གཅིག་ཏུ་གནས་པའི་ཚེ་ཡུལ་དེའི་རྒྱལ་པོ་ཞིག་གིས་བསྐུལ་ནས་པོ་ཏ་ལར་འགྲོ་བར་ཆས་ནས་འཕགས་པ་སྤྱན་རས་གཟིགས་ལ་གསོལ་བ་རྩེ་གཅིག་ཏུ་བཏབ་སྟེ་སོང་བ་ན་ལྷོ་ཕྱོགས་དཔལ་ལྡན་འབྲས་སྤུངས་ཀྱི་མཆོད་རྟེན་དུ་སླེབས། དེ་ནས་པོ་ཏ་ལར་འགྲོ་བའི་ལམ་ཡིག་ལྟར་འགའ་ཞིག་གི་ཐད་དུ་ས་འོག་ཏུ་བགྲོད་པ་དང་། རྒྱ་མཚོ་ལ་གཟིངས་བཅས་ཏེ་བགྲོད་པ་སོགས་དཀའ་བ་བརྒྱ་ཕྲག་དུ་མའི་སྒོ་ནས་ཕྱིན་ཏེ་པོ་ཏ་ལའི་རི་བོའི་གཤམ་དུ་སླེབས་པ་ན་གཡང་ས་ཆེན་པོ་སུས་ཀྱང་བགྲོད་མི་ནུས་པ་ཞིག་བྱུང་བས་ལྷ་མོ་རལ་གཅིག་མ་ལ་གསོལ་བ་བཏབ་པས་ལྷ་མོའི་མཐུས་གཡང་ས་ཆེན་པོ་དེ་ལ་ཟམ་པ་ཞིག་བྱུང་ནས་ཐར། དེ་ནས་གཅན་གཟན་གྱི་འཇིགས་པ་ཆེན་པོ་བྱུང་བ་ལ་འཕགས་པ་ཉིད་ལ་གསོལ་བ་བཏབ་པས་འཇིགས་པ་ལས་གྲོལ། དེ་ནས་རི་བོ་ལ་འཛེགས་པ་ན་རི་བོའི་གཤམ་དུ་རྗེ་བཙུན་མ་སྒྲོལ་མའི་གནས་དང། ཁྲོ་གཉེར་ཅན་མའི་གནས་དང། རིའི་རྩེ་མོ་ན་འཕགས་པའི་གཞལ་མེད་ཁང་ཡོད་པ་རྣམས་སུ་རིམ་གྱིས་ཕྱིན་ཏེ་འཕགས་པའི་ཞལ་དངོས་སུ་མཇལ། ཉི་ཁྲི་ལེ་བརྒྱད་མ་གདན་དྲངས། འཕགས་པ་ཐུགས་རྗེ་ཆེན་པོའི་མཐུས་གེགས་མེད་པར་ཝཱ་ར་ཎཱ་སིར་སླེབས་ནས་དེའི་གཙུག་ལག་ཁང་དུ་ཉི་ཁྲི་བཞུགས་སོ། ། དེ་ནས་འཕགས་པ་རྣམ་གྲོལ་སྡེས་མངོན་རྟོགས་རྒྱན་དང་ཉི་ཁྲི་སྦྱར་བའི་བསྟན་བཅོས་ཆེན་པོ་ཉི་ཁྲི་སྣང་བ་མཛད། འཛམ་བུའི་གླིང་དུ་མདོ་རྒྱན་སྦྱར་བའི་ཐོག་མ་འདི་ཡིན་ནོ། ། སློབ་དཔོན་བདག་ཉིད་ཆེན་པོ་འདིས་བསྟན་པའི་དོན་དུ་མདོ་རྒྱན་སྦྱར་ནས་སྐལ་པ་དང་ལྡན་པ་དག་ལ་རྒྱ་ཆེར་སྤེལ་ཞིང་། དེའི་ཚེ་ཤེར་ཕྱིན་གྱི་གདམས་ངག་ཉན་པའི་སློབ་མ་སྟོང་ཕྲག་མང་པོ་བྱུང་ཞིང་ཐེག་པ་ཆེན་པོའི་ལམ་གྱི་རིམ་པ་ལ་སློབ་པར་འདོད་པ་མཐའ་དག་བདག་ཉིད་ཆེན་པོ་འདིའི་ཞབས་རྡུལ་ལ་བརྟེན་པ་ཞིག་བྱུང་ངོ་། ། སློབ་དཔོན་འདིས་ལོ་སུམ་ཅུ་ཙམ་གྱི་རིང་བསྟན་པའི་བྱ་བ་རྒྱ་ཆེར་མཛད་ནས་དགའ་ལྡན་དུ་རྒྱལ་བ་མི་ཕམ་པའི་ཞབས་དྲུང་དུ་ཕེབས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་འཕགས་པ་གྲོལ་སྡེ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིས་མདོ་རྒྱན་སྦྱར་བའི་ཤིང་རྟའི་སྲོལ་ཕྱེ་བ་ལྟར་བྱང་ཆུབ་ལམ་གྱི་རིམ་པའི་གནད་རྣམས་རྒྱལ་བའི་གསུང་རབ་ཉིད་ལས་གསུངས་པའི་ཚུལ་ལ་ངེས་པ་རྙེད་པར་བྱས་ནས་གསུང་རབ་ཐམས་ཅད་ཀྱི་སྙིང་པོའི་དོན་མ་ཚང་པ་མེད་པ་བྱང་ཆུབ་ལམ་གྱི་རིམ་པའི་ཉམས་ལེན་ལ་བརྩོན་པ་ཆིག་བསྒྲིལ་དུ་བྱའོ། ། ། །
༈ དད་པའི་སར་གནས་བཙུན་པ་རྣམ་གྲོལ་སྡེ། ། ཞེས་བསྔགས་པ། བཙུན་པ་རྣམ་གྲོལ་སྡེ་ནི། གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ། སྡེ་སྣོད་གསུམ་ལ་མཁས་པར་སྦྱངས། འཕགས་པ་རྣམ་གྲོལ་སྡེ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་ཤེར་ཕྱིན་གྱི་མདོ་སྡེ་རིན་པོ་ཆེའི་མན་ངག་མངོན་པར་རྟོགས་པའི་རྒྱན་ཉི་ཁྲི་དང་སྦྱར་བ་གསན་ཏེ། དེའི་དོན་སྐྱེས་བུ་གསུམ་གྱི་ལམ་ལ་རིམ་གྱིས་སྦྱངས་པས་སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་དང་། བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་བཅོས་མ་མ་ཡིན་པ་ཐུགས་རྒྱུད་ལ་འཁྲུངས་ཏེ་ཐེག་པ་ཆེན་པོའི་ཚོགས་ལམ་དུ་ཞུགས་ཏེ་ཐེག་པ་ཆེན་པོའི་ལམ་རིམ་གྱིས་བགྲོད་ཕྱིར་ལོ་བཅུའི་རིང་ལ་རྗེ་བཙུན་བྱམས་མགོན་བསྒྲུབས་ཏེ་ཐེག་པ་ཆེན་པོའི་ལམ་གྱི་ལུས་ཡོངས་སུ་རྫོགས་པ་ལ་སྦྱངས་ཤིང། རྗེ་བཙུན་བྱམས་པ་མགོན་པོའི་ཞལ་མངོན་སུམ་དུ་མཐོང་བ་དང་། དེའི་མཐུས་ཐེག་པ་ཆེན་པོའི་ལམ་རྣམས་མྱུར་དུ་བགྲོད་ནུས་པ་ཞིག་བྱུང་ན་ཅི་མ་རུང་སྙམ་དུ་འབད་ཀྱང་བྱམས་མགོན་གྱི་ཞལ་མ་མཐོང་བ་ན། བྱམས་མགོན་གྱི་ཞལ་མྱུར་དུ་མཐོང་བའི་ཐབས་གཞན་ལ་དྲིས་པས་སྡིག་སྒྲིབ་སྦྱོང་བའི་དོན་དུ་སྦྱིན་སྲེག་བྱས་ན་ལེགས་ཞེས་ཟེར་བ་ལྟར་ཞི་བའི་ཐབ་ཁུང་དུ་བྱམས་མགོན་སྤྱན་དྲངས་ནས་སྲེགས་བླུགས་འབུམ་ཕྲག་བཅུ་གཉིས་ཕུལ་བས་བྱམས་མགོན་གྱི་ཞལ་གཟིགས། དེ་ནས་ལུང་དང་རྟོགས་པའི་ཡོན་ཏན་ཐམས་ཅད་ཆེས་ཆེར་རྒྱས་ཏེ་འཕགས་པ་གྲོལ་སྡེའི་མན་ངག་ལ་བརྟེན་ནས་བྱང་ཆུབ་ལམ་གྱི་རིམ་པའི་གནད་རྣམས་རྒྱས་པར་སྟོན་པ་ཉི་ཁྲི་རྣམ་འགྲེལ་མཛད་དོ། ། སློབ་དཔོན་འདི་རྗེ་བདག་ཉིད་ཆེན་པོས་དད་པའི་སར་གནས་ཞེས་ཚོགས་ལམ་པ་ཡིན་པར་བཤད་དོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་བཙུན་པ་རྣམ་གྲོལ་སྡེ་ལ་གསོལ་བ་འདེབས་ཤིང་བཤེས་གཉེན་བསྟེན་ཚུལ་ནས་ཞི་ལྷག་གི༌བར་བྱང་ཆུབ་ལམ་གྱི་རིམ་པའི་ཉམས་ལེན་གྱི་གནད་ཐམས་ཅད་རྒྱལ་བའི་ཡུམ་ཉིད་ལས་གསུངས་པའི་ཚུལ་ལ་ངེས་པ་རྙེད་པར་བྱས་ལ་ཡིད་ཆེས་ཀྱི་དད་པ་བརྟན་པོ་བསྐྱེད་ནས་བྱང་ཆུབ་ལམ་གྱི་རིམ་པ་སྒོམ་པ་ལ་བརྩོན་པ་ཆིག་བསྒྲིལ་དུ་བྱའོ། ། ། །
༈ རྨད་བྱུང་ངོ་མཚར་གནས་གྱུར་མཆོག་གི་སྡེ། ། ཞེས་བསྔགས་པ། སློབ་དཔོན་མཆོག་གི་སྡེ་ནི་རྒྱལ་བའི་བསྟན་པ་ལ་རབཏུ་བྱུང་ནས་སྡེ་སྣོད་གསུམ་ལ་མཁས་པར་སྦྱངས། བཙུན་པ་གྲོལ་སྡེ་བསྟེན་ནས་ཐེག་པ་ཆེན་པོའི་མདོ་སྡེ་མཐའ་དག་དང། ཁྱད་པར་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་མངོན་པར་རྟོགས་པའི་རྒྱན་ལས་འབྱུང་བ་ལྟར་ཐེག་པ་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་གསན་ནས་སྒྲུབ་པ་ལ་རྩེ་གཅིག་ཏུ་བཞུགས་པས་མྱོང་བ་ཕུལ་དུ་ཕྱིན་པ་ཐོན་ཏེ་སྐལ་པ་དང་ལྡན་པ་མཐའ་ཡས་པ་ལ་ཤེར་ཕྱིན་གྱི་མན་ངག་འདོམས་པར་མཛད་ཅིང་མདོ་རྒྱན་སྦྱར་བའི་མན་ངག་རྒྱ་ཆེར་སྤེལ་ལོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་མཆོག་གི་སྡེ་ལ་གསོལ་བ་འདེབས་ཤིང་སློབ་དཔོན་འདིས་ཇི་ལྟར་བསྟན་པ་ལྟར་མདོ་རྒྱན་སྦྱར་བའི་མན་ངག་ཐོབ་པར་བྱས་ལ་བྱང་ཆུབ་ལམ་གྱི་རིམ་པའི་ཉམས་ལེན་ལ་བརྩོན་པར་བྱའོ། ། ། །
༈ ཟབ་མོའི་ལམ་གྱིས་རྒྱུད་སྦྱངས་དུལ་བའི་སྡེ། ། ཞེས་བསྔགས་པ། སློབ་དཔོན་དུལ་བའི་སྡེ་ནི། རྒྱལ་བའི་བསྟན་པ་ལ་ཞུགས་ནས་སློབ་དཔོན་མཆོག་གི་སྡེ་ཡོངས་འཛིན་དུ་བསྟེན་ནས་སྡེ་སྣོད་གསུམ་ལ་སྦྱངས་ཤིང། ཁྱད་པར་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེའི་གདམས་ངག་མངོན་པར་རྟོགས་པའི་རྒྱན་ལ་སྦྱངས་ནས་བྱང་ཆུབ་ལམ་གྱི་རིམ་པའི་གནད་ཐམས་ཅད་ཐུགས་སུ་ཆུད་པར་མཛད། དེ་ནས་བྱང་ཆུབ་ལམ་གྱི་རིམ་པའི་ཉམས་ལེན་ལ་འབད་པས་རྟོགས་པ་ཕུལ་དུ་ཕྱིན་པ་ཐོབ། རྒྱལ་བའི་བསྟན་པ་སྤེལ་བའི་ཕྱིར་རྗེ་བཙུན་བྱམས་པ་མགོན་པོའི་སྐུ་བཞེངས། དེ་ལ་གསོལ་བ་རྩེ་གཅིག་བཏབ་པས། བྱམས་མགོན་གྱི་སྐུ་དེས་གསུང་བྱོན་ནས་བསྟན་པ་དང་སེམས་ཅན་གྱི་དོན་བྱེད་པ་ལ། རྗེ་བཙུན་སྒྲོལ་མ་ལ་གསོལ་བ་འདེབས་དགོས་པས་འཕགས་མ་སྒྲོལ་མའི་སྐུ་བཞེངས་ཞེས་གསུངས་པ་ལྟར་རྗེ་བཙུན་སྒྲོལ་མའི་སྐུ་བཞེངས། དེ་ལ་གསོལ་བ་རྩེ་གཅིག་ཏུ་བཏབ་པས་རྗེ་བཙུན་མ་སྒྲོལ་མས་འཕྲིན་ལས་མཛད་དེ་སྐལ་བ་དང་ལྡན་པ་མང་པོ་ལ་ཤེར་ཕྱིན་གྱི་མན་ངག་རྒྱ་ཆེར་སྤེལ་ཞིང། ཁྱད་པར་དུ་ཡང་བསྟན་པ་ཡོངས་རྫོགས་ཀྱི་བདག་པོ་མཁན་ཆེན་ཞི་བ་འཚོ་ལ་གྲོལ་སྡེ་རྣམ་གཉིས་ལས་བྱུང་བའི་མན་ངག ། བྱང་ཆུབ་ལམ་གྱི་རིམ་པའི་གནད་ཐམས་ཅད་ཤེར་ཕྱིན་གྱི་མདོ་སྡེ་རིན་པོ་ཆེ་དང་སྦྱར་ཏེ་ངེས་པ་གཏིང་ཚུགས་པར་བསྐྱེད་པ་མདོ་རྒྱན་སྦྱར་བའི་མན་ངག་མཐའ་དག་བུམ་པ་གང་བྱོའི་ཚུལ་དུ་ཡོངས་སུ་རྫོགས་པ་གནང་སྟེ་བསྟན་པའི་བདག་པོར་བྱིན་གྱིས་བརླབས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་དུལ་བའི་སྡེ་ལ་གསོལ་བ་འདེབས་ཤིང་བདག་ཉིད་ཆེན་པོ་འདི་ནས་བརྒྱུད་པའི་ལམ་གྱི་རིམ་པ་ལ་བག་ཆགས་ཅི་ཐེབས་བྱའོ། ། གྲོལ་སྡེ་རྣམ་གཉིས་དང་། མཆོག་སྡེ་དུལ་སྡེ་གཉིས་ཏེ་སློབ་དཔོན་བཞི་པོ་འདི་གང་དུ་འཁྲུངས་པའི་ཡུལ་དང་། རིགས་དང་རུས་གང་ཡིན་པ་དང། སྐུ་ཚེ་རིལ་པོའི་མཛད་པ་རྣམ་ཐར་ཞིབ་པ་མ་མཐོང་བས་སླར་རྙེད་ན་འདིར་བསྣན་པར་བྱའོ། ། ། །
༈ རླབས་ཆེན་སྤྱོད་པའི་གཏེར་གྱུར་རྣམ་སྣང་མཛད། ། ཅེས་བསྔགས་པ། མཁན་པོ་ཡང་དག་རྣམ་སྣང་མཛད། མཚན་གཞན་བོ་དྷི་ས་ཏྭ་ཞེས་ཀྱང་བྱ། ལེགས་སྦྱར་གྱི་སྐད་ལ་ཤནྟཱ་རཀྵི་ཏ། བོད་སྐད་དུ་ཞི་བ་འཚོ་ཞེས་བརྗོད་པ་མཁན་ཆེན་ཞི་བ་འཚོ་ནི། སྔོན་བསྐལ་པ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སྔོན་རོལ་ནས་བྱང་ཆུབ་མཆོག་ཏུ་ཐུགས་བསྐྱེད་དེ་ས་ལམ་མཐར་ཕྱིན་ནས་ཞིང་འདིར་ཐུབ་པའི་བསྟན་པ་སྤེལ་བའི་སླད་དུ་སྙིང་རྗེ་དང་སྨོན་ལམ་གྱི་དབང་གིས་བསམ་བཞིན་དུ་བྱོན་པ་ཞིག་སྟེ། དེ་ཡང་ཤར་ཕྱོགས་ཟ་ཧོར་རྒྱལ་པོའི་སྲས་སུ་སྐུ་འཁྲུངས། གཞོན་ནུ་ནས་ཁྱིམ་གྱི་གནས་ནི་སྡུག་བསྔལ་དུ་མའི་འབྱུང་གནས་བཙོན་ར་ལྟ་བུ་དང་། ཉོན་མོངས་པ་དང་ཉེས་པར་སྤྱོད་པ་ཐམས་ཅད་ཀྱི་འབྱུང་ཁུངས་སུ་རིག་ནས་སྲིད་པའི་ཕུན་ཚོགས་ལ་ཆགས་པ་མེད་པར་རྒྱལ་སྲིད་མཆིལ་མའི་ཐལ་བ་བཞིན་དུ་དོར་ཏེ་མཁན་པོ་ཡེ་ཤེས་སྙིང་པོའི་དྲུང་དུ་རབ་ཏུ་བྱུང་ཞིང་བསྙེན་པར་རྫོགས་པའི་སྡོམ་པ་བཞེས། དེ་ཡང་རྩ་བའི་སྡེ་པ་བཞི་ལས་གཞི་ཐམས་ཅད་ཡོད་པར་སྨྲ་བའི་སྡེ་པ་ཡིན་པས། མཁན་པོ་དེ་ཉིད་ལ་བརྟེན་ནས་གཞི་ཐམས་ཅད་ཡོད་པར་སྨྲ་བའི་ལུགས་ཀྱི་འདུལ་བ་ལུང་སྡེ་བཞི་ནས་གསུངས་པའི་དགག་སྒྲུབ་གནང་གསུམ་གྱི་བཅས་པ་ཆེ་ཕྲ་མཐའ་དག་ཐུགས་སུ་ཆུད་པར་མཛད་ནས་བཅས་པ་དང་རང་བཞིན་གྱི་ཁ་ན་མ་ཐོ་བའི་ཉེས་ལྟུང་ཕྲ་མོས་ཀྱང་མ་གོས་པའི་ཚུལ་ཁྲིམས་རྣམ་པར་དག་པ་ལ་གནས་ནས་སྡེ་སྣོད་གསུམ་ལ་སྦྱངས་ཏེ་མཁས་པའི་ཕུལ་དུ་ཕྱིན་པར་མཛད། དེ་ནས་བྱང་ཆུབ་ལམ་གྱི་རིམ་པའི་མན་ངག་རྣམས་གསན་བཞེད་ནས་སློབ་དཔོན་དུལ་བའི་སྡེ་ལ་བསྙེན་ཏེ་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་མངོན་པར་རྟོགས་པའི་རྒྱན་གསན་ཏེ། དེའི་མན་ངག་ཤེར་ཕྱིན་གྱི་མདོ་དང་བཅས་པའི་ཚིག་དོན་མཐའ་དག་ཐུགས་སུ་ཆུད་པར་མཛད། ཐེག་པ་ཆེན་པོའི་ལམ་གྱི་རིམ་པ་ལ་རྒྱ་ཆེ་བའི་ལམ་གྱི་རིམ་པ་དང་ཟབ་མོའི་ལམ་གྱི་རིམ་པ་གཉིས་ཡོད་པ་གཉིས་ཀ་མེད་མི་རུང་དུ་གཟིགས་ནས་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་རྒྱལ་བའི་དགོངས་པ་བཀྲལ་བའི་མན་ངག་མཐར་ཐུག་པ་དབུ་མའི་གཞུང་རྣམས་ལ་ལེགས་པར་སྦྱངས་ཏེ་ཐུགས་སུ་ཆུད་པར་མཛད། གཞུང་དེ་དག་གི་དོན་ལ་དྲི་མ་མེད་པའི་རིགས་པས་ལེགས་པར་དཔྱད་ནས་ངེས་ཤེས་གཏིང་ཕྱིན་པར་རྙེད་པ་ན་ཐུགས་རྒྱུད་ལ་སྦྱར་ཏེ་ཉམས་སུ་བཞེས་པས་ཐེག་པ་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་ལ་ཉམས་མྱོང་གི་རྟོགས་པ་ཁྱད་པར་ཅན་འཁྲུངས་པ་ན་སྐལ་བ་དང་ལྡན་པ་གཞན་དག་ལ་ཆོས་ཀྱི་བདུད་རྩི་རྒྱ་ཆེར་སྩལ་ཏེ། ཐེག་པ་ཆེན་པོའི་ལམ་གྱི་རིམ་པ་ཟབ་པ་དང་རྒྱ་ཆེ་བ་གཉིས་ཀ་སྟོན་པའི་བསྟན་བཅོས་དབུ་མ་རྒྱན་འགྲེལ་པ་དང་བཅས་པ་མཛད་དེ་གདུལ་བྱ་མཐའ་ཡས་པ་ལ་རྒྱ་ཆེར་སྤེལ་ཏེ་འཕགས་ཡུལ་དུ་ཤེར་ཕྱིན་གྱི་མན་ངག་ཉིན་མོ་ལྟར་གསལ་བར་མཛད། བདག་ཉིད་ཆེན་པོ་འདི་ནི་དགུང་ལོ་བརྒྱ་ཕྲག་མང་པོ་བཞུགས་པས། སྐུ་ཚེའི་སྟོད་སྨད་བར་གསུམ་གྱི་སློབ་མ་རིམ་པ་མང་དུ་ཡོད་ཅིང་སྲས་ཀྱི་ཐུ་བོ་འགྲན་ཟླ་དང་བྲལ་བ་ནི་སློབ་དཔོན་སེང་གེ་བཟང་པོ་དང་། མཁས་མཆོག་ཀཱ་མ་ལ་ཤཱི་ལ་གཉིས་སོ། ། མཁན་ཆེན་ཞི་བ་འཚོ་འདི་ནི་རྒྱལ་སྲས་གཞན་གྱིས་དཔག་པར་དཀའ་བའི་སྙིང་སྟོབས་དང་བྱང་ཆུབ་ཀྱི་སེམས་ཤིན་ཏུ་སྟོབས་ཆེ་བས་སྙིགས་མའི་དུས་འདིར་འགྲོ་བའི་དོན་མཛད་པ་ལ་རྒྱལ་སྲས་ཀྱི་སྤྱོད་པ་ཆེས་ཕུལ་དུ་བྱུང་བ་ཞིག་སྟེ། དོན་གྱི་དབང་འདི་ལ་གཟིགས་ནས་རྗེ་བདག་ཉིད་ཆེན་པོས། རླབས་ཆེན་སྤྱོད་པའི་གཏེར་གྱུར་ཅེས་བསྔགས་པ་ཡིན་ནོ། ། མཁན་ཆེན་ཞི་བ་འཚོ་འདིས་རྒྱ་བོད་ཐམས་ཅད་དུ་བསྟན་པ་ལ་བྱ་བ་རྒྱ་ཆེན་པོ་མཛད་པ་ཡིན་ཞིང། ལྷག་པར་བྱང་ཕྱོགས་བོད་ཡུལ་འདི་སྟོན་པ་ཐུགས་རྗེ་ཅན་དེས་ཀྱང་འདུལ་མ་ནུས་པར་མུན་པའི་གླིང་དུ་ལུས་ཤིང། སློབ་དཔོན་འདིའི་གོང་དུ་བྱོན་པའི་ཤིང་རྟ་ཆེན་པོ་གཉིས་སོགས་བདག་ཉིད་ཆེན་པོ་དེ་དག་ཐམས་ཅད་ཀྱིས་འདུལ་བར་མ་ནུས་པར་མཐའ་འཁོབ་མུན་གླིང་དུ་ལུས་པ་སློབ་དཔོན་འདིས་ཐུགས་ཀྱིས་མ་བཟོད་ནས་ཞིང་འདིར་བྱོན་ཞིང་དེ་ལྟ་ནའང་རྟེན་འབྲེལ་སྒོ་མང་པོ་ཞིག་ནས་འགྲིག་དགོས་པའི་དབང་གིས་སློབ་དཔོན་འདི་བྱོན་ནས་ལོ་དགུ་བརྒྱ་ལྷག་ཙམ་གྱི་བར་དུ་བོད་དུ་རྒྱལ་བའི་བསྟན་པ་འཛུགས་པའི་རྟེན་འབྲེལ་མ་འགྲིག་པར་ནམ་ཞིག་ན་བོད་ཁམས་མུན་པའི་གླིང་དུ་རྒྱལ་བའི་བསྟན་པའི་སྒྲོན་མེ་འཛུགས་པར་ནུས་སྙམ་དུ་དེ་འབའ་ཞིག་ཐུགས་ལ་བརྣགས་ནས་སྐུ་ཚེ་བྱིན་གྱིས་བརླབས་ཏེ་བཞུགས་པ་ལས། དུས་ནམ་ཞིག་ན་བོད་ཁམས་ཀྱི་རྗེ་བོ་ཆོས་རྒྱལ་སྲོང་བཙན་སྒམ་པོས་བོད་དུ་རྒྱལ་བསྟན་གྱི་སྲོལ་བཙུགས། ཇོ་བོ་ཤཱཀྱ་མུ་ནི་དང་ཇོ་བོ་མི་བསྐྱོད་རྡོ་རྗེ་གཉིས་རྒྱ་བལ་ནས་སྤྱན་དྲངས་ལྷ་སར་གཙུག་ལག་ཁང་བརྩིགས། མཐའ་འདུལ་ཡང་འདུལ་གྱི་ལྷ་ཁང་དང་མཆོད་རྟེན་རྣམས་བརྩིགས། ཆོས་ཀྱི་བརྡ་སློབ་པ་སོགས་བསྟན་པ་རིན་པོ་ཆེའི་སྲོལ་བཙུགས་ཀྱང་སྙིགས་མའི་སྐྱེ་བོ་རྣམས་བསོད་ནམས་དམན་པ་དང། བདུད་སྡིག་ཏོ་ཅན་འཁོར་ནག་ཕྱོགས་ཀྱི་འབྱུང་པོ་གདུག་པ་ཅན་རྣམས་དང་བཅས་པས་མི་རྣམས་ཀྱི་ཡིད་བསྒྱུར་ཏེ་ཆོས་རྒྱལ་སྲོང་བཙན་སྒམ་པོ་འདས་ནས་སྡིག་བློན་མང་པོས་རྒྱལ་བའི་བསྟན་པ་ཉམས་པར་བྱས་ཏེ། ཇོ་བོ་ཤཱཀྱ་མུནེ་མུན་ཁང་དུ་སྦ་བ་དང། ཆོས་བྱེད་རྣམས་ལ་ཆད་པས་གཅོད་པ་སོགས་རྣམ་པ་ཀུན་ནས་འཚེ་བར་བྱས་ཤིང་སླར་ཡང་ནག་ཕྱོགས་ཀྱི་སྟོབས་ཆེར་རྒྱས་ཏེ་ཇོ་བོ་རིན་པོ་ཆེ་བྱེ་ཐེམས་སུ་སྦ་བ་དང། དེས་ཀྱང་མི་ཆོག་པར་དེ་ནས་བཏོན་ཏེ་མང་ཡུལ་སྐྱིད་གྲོང་དུ་སྤྱུགས་པ་དང། རྒྱལ་བསྟན་གྱི་མཚན་ཙམ་ཡང་འདོན་དབང་མེད་པར་སྡིག་བློན་མང་པོས་ཁྲིམས་དམ་པར་བྱས་ཏེ་རྒྱལ་བསྟན་ཡི་གེ་འབྲུ་རེ་ཡང་ཀློག་ས་མེད་པར་མུན་གླིང་ཁོ་ནར་གྱུར་པ་ན། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཁྱེན་བརྩེ་ནུས་གསུམ་གཅིག་ཏུ་བསྡུས་པ་རིགས་གསུམ་མགོན་པོས་བོད་ཡུལ་དུ་རྒྱལ་བསྟན་འཛུགས་པར་ཐུགས་བསྐྱེད་དེ་སྤྱན་རས་གཟིགས་སྲོང་བཙན་སྒམ་པོས་བོད་ཡུལ་དུ་རྒྱལ་བསྟན་གྱི་སྲོལ་བཙུགས་པ་བདུད་སྡེ་དཔུང་དང་བཅས་པས་ཉམས་པར་བྱས་པ་དེ་ཉིད་གསོ་ཕྱིར་རྗེ་བཙུན་འཇམ་དཔལ་དབྱངས་མིའི་རྗེ་བོར་སྤྲུལ་པ་ཆོས་རྒྱལ་ཁྲི་སྲོང་ལྡེ་བཙན་རྒྱ་ཟ་ཀོང་ཇོ་ལས་སྐུ་འཁྲུངས་ནས་རིང་པོ་མ་ལོན་པ་ན་ཡབ་གཤེགས། འཁྲུངས་མ་ཐག་ནས་ཆོས་ཀྱི་བག་ཆགས་བརྟས་པ་དེ་བདུད་སྡེས་མ་བཟོད་པར་བདུད་བློན་རྣམས་ཀྱིས་འདི་རྒྱ་བཟའི་བུ་མིན་གྱི་ཞང་གི་ཚ་བོ་ཡིན་ཞེས་དབྲོག་པར་བརྩམས་པ་ན། རྒྱལ་བུ་ཆུང་ངུ་དེའི་ཞལ་ནས། ཁྲི་སྲོང་ལྡེ་བཙན་རྒྱ་ཚ་ལགས། ། སྣ་རྣམ་ཞང་གིས་ཅི་བགྱི་འཚལ། ། ཞེས་གསུངས་ནས་རང་ལ་རང་གིས་ཁྲི་སྲོང་ལྡེ་བཙན་ཞེས་མཚན་བཏགས། རྒྱ་བཟའི་སྲས་ཡིན་པར་ཡོངས་སུ་གྲགས་པར་བྱས། དེ་ནས་རྒྱལ་བུ་ཆུང་ངུ་དེས་སྔར་ཡབ་མེས་བཀའ་དྲིན་ཅན་དེ་དག་གིས་བོད་འདིར་སངས་རྒྱས་ཀྱི་བསྟན་པ་བཙུགས་པ་ད་ལྟ་མིང་ཙམ་ཡང་མེད་པ་འདི་ཐབས་གང་ཞིག་བྱས་ན་གསོ་བར་ནུས་སྙམ་དུ་དེ་འབའ་ཞིག་སེམས་པར་མཛད་དོ། ། དེ་ནས་དུས་ནམ་ཞིག་ན་རྒྱལ་པོས་སྦ་གསལ་སྣང་ལ་སོགས་པ་ཁ་ཤས་རྒྱ་ཡུལ་དུ་རྒྱལ་བའི་བཀའ་འཚོལ་དུ་བཏང། དེ་དག་གིས་ཀྱང་རྒྱལ་པོའི་བཀའ་བཞིན་རྩོལ་བ་ཆེན་པོས་ཕྱིན་ཏེ་རྒྱ་ནག་ནས་རྒྱལ་བའི་བཀའ་མང་པོ་སྤྱན་དྲངས། རྒྱལ་པོའི་སྐུ་མདུན་དུ་སླེབས་ཀྱང་སྡིག་བློན་རྣམས་དབང་ཆེ་བས་རྒྱལ་བའི་བཀའ་མཚན་ཙམ་ཡང་འདོན་དབང་མེད་པས་རེ་ཤིག་བཀའ་རྣམས་བྲག་ལ་སྦས། དེ་ནས་རྒྱལ་བུས་གསལ་སྣང་དང་གྲོས་བྱས་ཏེ་གསལ་སྣང་གིས་རྒྱ་གར་དུ་ཕྱིན་ནས་རྒྱལ་བའི་བཀའ་དང་དེའི་དོན་སྟོན་པའི་པཎྜི་ཏ་འཚོལ་རྩིས་དང། བདུད་བློན་རྣམས་ཀྱི་སྣང་ངོར་མང་ཡུལ་སྐྱིད་གྲོང་གི་དཔོན་དུ་བསྐོས་ཏེ་བཏང། དེ་ནས་གསལ་སྣང་གིས་རྒྱ་གར་དུ་ཕྱིན་ཏེ་རྡོ་རྗེ་གདན་གྱི་མ་ཧཱ་བོ་དྷི་དང་ཤྲཱི་ན་ལནྡྲར་མཆོད་པ་ཕུལ་བས་མེ་ཏོག་གི་ཆར་བབས། བྱང་ཆུབ་ཀྱི་ཤིང་ལས་འོ་མའི་རྒྱུན་བབས་ཤིང་དགེའོ་ཞེས་པའི་སྒྲ་འོད་དང་བཅས་པ་བྱུང། དེ་ནས་གསལ་སྣང་བལ་ཡུལ་དུ་བྱོན་པས་བལ་རྗེའི་མཆོད་གནས་སུ་མཁས་ཤིང་གྲུབ་པའི་པཎ་ཆེན་ཤནྟཱ་རཀྵི་ཏ་བཞུགས་པ་མང་ཡུལ་སྐྱིད་གྲོང་དུ་སྤྱན་དྲངས། བཞུགས་གནས་སུ་གཙུག་ལག་ཁང་གཉིས་བརྩིགས། སློབ་དཔོན་ལ་སེམས་བསྐྱེད་ཞུས་པས། སེམས་བསྐྱེད་ཞུ་བ་ལ་ཡོན་དགོས་གསུངས། གསེར་དངུལ་སོགས་རིན་པོ་ཆེ་དང་། དར་ཟབ་སྣམ་གོས་སོགས་ཡོ་བྱད་ཅི་ཡོད་ཕུལ་བས་ད་དུང་ཕུལ་ཅིག་གསུངས། ད་ལུས་ལ་བཅིངས་པའི་སྐ་རགས་གཅིག་མིན་པ་མེད་ཞུས་པས་དེ་ཡང་ཕུལ་ཅིག་གསུངས་ནས་ཕུལ། སེམས་བསྐྱེད་ཞུས་ཟིན་པ་ན་སློབ་དཔོན་གྱིས་འབུལ་བ་ཐམས་ཅད་ཚུར་གནང་ནས་ཁྱོད་དང་ང་གཉིས་སྐྱེ་བ་འདི་ལ་ངོ་ཤེས་པ་ཙམ་མ་ཡིན། སྐྱེ་བ་དུ་མའི་སྔ་རོལ་ནས་ངའི་དྲུང་དུ་སེམས་བསྐྱེད་པའི་སྲས་ཀྱི་ཐུ་བོ་ཡིན། ཁྱོད་ཀྱི་མིང་ཡེ་ཤེས་དབང་པོ་བྱ་བར་འགྱུར་རོ་གསུངས་ནས་མགོ་ལ་ཕྱག་གིས་བྱིལ་བྱིལ་མཛད། དེ་ནས་གསལ་སྣང་གིས་སློབ་དཔོན་ལ་ཕྱག་བྱས་ཏེ། བོད་ཡུལ་དུ་སངས་རྒྱས་ཀྱི་བསྟན་པ་དར་བའི་ཆེད་དུ་བོད་ཀྱི་རྒྱལ་པོའི་དགེ་བའི་བཤེས་གཉེན་དུ་འབྱོན་པ་ཅི་གནང་། ཞེས་གསོལ་བ་བཏབ་པས་སློབ་དཔོན་གྱིས་བོད་ངའི་གདུལ་སྐལ་ཡིན། བོད་ཀྱི་རྒྱལ་པོ་དང་ཁྱོད་ལྷན་ཅིག་མ་སྐྱེས་པས་ཁྱོད་གཉིས་ཀྱི་སྐྱེ་བ་དགུའི་བར་དུ་མང་ཡུལ་དང་ཟ་ཧོར་གཉིས་སུ་བསྒུགས་ནས་བསྡད་པ་ཡིན། ད་ཁྱེད་གཉིས་ཀྱང་ནར་སོན་ནས་དུས་ལ་བབ་པར་གདའ་བས་ངས་བོད་ཀྱི་རྒྱལ་པོའི་དགེ་བའི་བཤེས་གཉེན་བྱས་ལ་ཡུལ་བྱན་ཀར་ཆུ་བོ་ལོ་ཧི་ཏའི་འགྲམ། རི་ཧས་པུ་རིའི་དྲུང་དུ་བྲག་དམར་བསམ་ཡས་མི་འགྱུར་ལྷུན་གྱིས་གྲུབ་བ་ཞེས་བྱ་བའི་གཙུག་ལག་ཁང་གཅིག་ཀྱང་བཞེངས་སུ་གསོལ། ཞེས་གསུངས་ནས་སློབ་དཔོན་སླར་བལ་ཡུལ་དུ་གཤེགས། གསལ་སྣང་བོད་དུ་འོངས་ཏེ་རྒྱལ་པོའི་སྐུ་མདུན་དུ་མཆིས་ནས་དབེན་པ་ཞིག་ཏུ་ཆོས་བྱ་བར་རིགས་པ་དང་མཁས་པ་ཆེན་པོ་ཤནྟཱ་རཀྵི་ཏ་ཞེས་བྱ་བ་ད་ལྟ་བལ་ཡུལ་ན་བཞུགས་ཡོད། བོད་དུ་འབྱོན་པར་གསོལ་བ་བཏབ་པས་ཞལ་གྱིས་བཞེས། པཎྜི་ཏ་དེའི་བཀའ་མཆིད་ཀྱང་འདི་ལྟར་གནང་ཞེས་རྒྱལ་པོ་ལ་ཞིབ་ཏུ་གསོལ་བས་རྒྱལ་པོའི་ཞལ་ནས། ངེད་གཉིས་ཀྱིས་པཎྜི་ཏ་སྤྱན་དྲངས་ཏེ་རྒྱལ་བའི་བསྟན་པ་འཛུགས་པར་བདུད་བློན་འདི་དག་གིས་ཤེས་ན་ཁྱོད་སྲོག་དང་འབྲལ་བར་བྱེད་ཅིང་དོན་ཆེན་པོ་ལས་ཉམས་པར་འགྱུར་བས་ཁྱོད་རེ་ཤིག་ཡུལ་དུ་སོང་ལ་ཡིབ་ལ་སྡོད་ཅིག་ངས་ཐབས་ཀྱིས་དོན་གྲུབ་པ་ཞིག་བྱའོ་གསུངས་ནས་གསལ་སྣང་རེ་ཤིག་དབེན་པར་བྱོལ། དེ་ནས་རྒྱལ་པོའི་ཐབས་མཁས་ཀྱི་མཛད་པ་དུ་མས་བདུད་བློན་རྣམས་ཀྱི་བསམ་སྦྱོར་མཐའ་དག་བྱེ་མའི་ཆངས་བུ་ལྟར་ཞིག་སྟེ་ཆབ་སྲིད་ཆོས་ཀྱིས་སྐྱོང་བའི་དུས་ལ་བབ་པ་ན། རྒྱལ་པོས་བློན་པོ་རྣམས་ལ་བཀའ་སྩལ་པ། ངའི་ཡབ་མེས་རྣམས་ཀྱིས་རྒྱལ་བའི་བསྟན་པ་རིན་པོ་ཆེ་བཙུགས་པ་དེ་ཞང་མ་ཞང་སོགས་སྡིག་བློན་རྣམས་ཀྱིས་བཤིག ། ཇོ་བོ་ཤཱཀྱ་མུ་ནེ་མང་ཡུལ་སྐྱིད་གྲོང་དུ་སྤྱུགས་འདུག་པས། ད་ཇོ་བོ་ཤཱཀྱ་མུ་ནེ་དེ་སྤྱན་དྲངས། ངེད་རང་རྗེ་བློན་འབངས་དང་བཅས་པ་རྣམས་ཆོས་བྱེད་པ་མི་རུང་ངམ་གསུངས་པས། རྒྱལ་པོའི་བཀའ་བཞིན་རྗེ་བློན་འབངས་དང་བཅས་པ་རྣམས་ཆོས་བྱེད་པ་ལ་འཆམ་ནས་ཆོས་བྱེད་པ་ལ་རྒྱ་གར་ནས་འོངས་པའི་རྒྱུས་ཅན་དགོས་པས་སུ་ཡོད་ཅེས་གླེང་བ་ན། གསལ་སྣང་མང་ཡུལ་ནས་འོངས་པ་མཆི་བས་དེ་རྗེའི་སྤྱན་སྔར་དགུག་འཚལ་ཟེར་བ་བཞིན་གསལ་སྣང་རྒྱལ་པོའི་སྤྱན་སྔར་བཀུག་ནས་བཀའ་སྩལ་པ། རྒྱ་གར་དང་བལ་ཡུལ་ན་ཆོས་ལ་མཁས་པའི་པཎྜི་ཏ་སུ་ཡོད། དེ་ཁྱོད་ཀྱིས་སྤྱན་དྲོངས་ཤིག་ཅེས་བསྒོ་བ་ན། གསལ་སྣང་གིས་གསོལ་པ། ཟ་ཧོར་རྒྱལ་པོའི་སྲས་དགེ་སློང་ཤནྟཱ་རཀྵི་ཏ་ཞེས་བྱ་བ་ད་ལྟ་བལ་ཡུལ་ན་མཆིས་པ་དེ་དམ་པའི་ཆོས་དང་གཙུག་ལག་ཀུན་ལ་མཁས་པ་ཅིག་བདོག་ཅེས་གསོལ་པས། རྗེའི་ཞལ་ནས་ཁྱོད་ཡུལ་དུ་མ་འགྲོ་བར་པཎྜི་ཏེ་དེ་སྤྱན་དྲང་བའི་ཕྱིར་བལ་ཡུལ་དུ་སོངས་ལ་བལ་རྗེ་ལ་ངའི་བཀའི་སྒྲོམ་བུ་འདི་ཕུལ་ལ་པཎྜི་ཏ་དེ་ངེས་པར་སྤྱན་འདྲོངས་པར་གྱིས་ཤིག ། ཅེས་མངགས་ནས་གསལ་སྣང་བལ་ཡུལ་དུ་བརྗངས། གསལ་སྣང་བལ་ཡུལ་དུ་འབྱོར་ནས་བལ་རྗེ་ལ་རྒྱལ་པོའི་བཀའི་སྒྲོམ་བུ་ཕུལ་ནས་བོ་དྷི་ས་ཏྭ་བོད་ཡུལ་དུ་སྤྱན་འདྲེན་པར་ཆད། རིམ་གྱིས་མང་ཡུལ་དུ་ཕེབས་པ་ན་བོད་ནས་རྒྱལ་པོས་ཕེབས་བསུར་ཁང་ལང་འགྲོ་སྣ་ར་དང་། གཉེར་སྟག་ཚང་ལྡོང་གཟིགས། སྦྲང་རྒྱ་ར་ལེགས་གཟིགས་གསུམ་བཏང་བ་འབྱོར། དེ་ནས་རིམ་གྱིས་ཕེབས་ཏེ་རྒྱལ་པོའི་ཕོ་བྲང་དུ་ཕེབས་སུ་ཉེ་བ་ན། གསལ་སྣང་གིས་སྔོན་ལ་ཕྱིན་ནས་རྒྱལ་པོ་ལ་ཕྱག་ཕུལ། པཎྜི་ཏ་བྱོན་ཡོད་པའི་ལོ་རྒྱུས་རྣམས་གསོལ་བས་རྒྱལ་པོ་དགྱེས་ཏེ་གསལ་སྣང་ཁམས་བཟང་ཞིང་པཎྜི་ཏ་བདེ་བར་བྱོན་པ་ལེགས་ཞེས་རྒྱལ་པོས་བཀུར་སྟི་བགྱིས་པ་ན་ཞང་བློན་དག་ན་རེ། རྒྱ་བལ་གྱི་མི་ངན་སྔགས་མཁན་ཡང་མང་པོ་འོང་བས་སྔོན་ལ་རྟོག་དཔྱོད་མཛད་པ་ལེགས་ཟེར། སངས་ཤི་སོགས་འགའ་ཞིག་གིས་བརྟགས་ཀྱང་ཨཱ་ཙརྱའི་སྐད་མ་གོ ། ཁ་ཆེ་ཨ་ནན་ཏ་ལ་ལོ་ཙཱ་བཅོལ་ནས་དྲིས་པས། སློབ་དཔོན་གྱི་ཞལ་ནས། ལྷ་དཀོན་མཆོག་མཆོད། དམ་ཚིག་དང་སྡོམ་པ་ལ་གནས། གཙོ་བོར་སེམས་ཅན་ལ་ཕན་པ་འབའ་ཞིག་བྱེད་གསུངས། བློན་པོ་དེ་དག་གིས་རྒྱལ་པོ་ལ་ཨཱ་ཙརྱ་འདི་སྤྱོད་པ་ཁྱད་པར་དུ་འཕགས་པ་འདུག་པས་ཐུགས་འཕྲིག་བྱ་མི་འཚལ་ཞེས་གསོལ་ནས་ཕོ་བྲང་དུ་སྤྱན་དྲངས། ཕོ་བྲང་གི་ཆབ་སྒོར་བྱོན་པ་ན་ཕོ་ཉས་རྒྱལ་པོ་ལ་སློབ་དཔོན་སྒོ་ན་བྱོན་ནོ་ཞུས་པས། རྒྱལ་པོས་གསེར་ཕྱེ་བྲེ་གང་ཕྱག་རྟེན་དུ་ཕུལ་ནས་ཕྱག་བྱས་ཞབས་སྤྱི་བོར་བླངས་ཏེ་བྱིན་རླབས་ཞུས་པ་ན། སློབ་དཔོན་གྱི་ཞལ་ནས། རྒྱལ་པོ་ཆེན་པོ། ཁྱོད་ཀྱིས་ཁོ་བོ་མཁྱེན་ནམ་གསུངས་པས། རྒྱལ་པོས་སློབ་དཔོན་དང་སྔོན་ཆད་ཞལ་མ་འཛོམ་ལགས་ཞུས་པས། སློབ་དཔོན་གྱི་ཞལ་ནས། སྔོན་སངས་རྒྱས་འོད་སྲུངས་ཀྱི་བསྟན་པ་ལ་གཙུག་ལག་ཁང་གི་རྒྱན་བསྲུང་བའི་བྱིས་པ་གསུམ་གྱིས་བྱེ་མའི་མཆོད་རྟེན་བྱས་ཏེ་སྨོན་ལམ་བཏབ་པ། མ་འོངས་པ་ན་ངས་པཎྜི་ཏ་བྱ་བ། ཁྱོད་ཀྱིས་མཐའ་འཁོབ་ཀྱི་རྒྱལ་པོ་བྱ་བ། གསལ་སྣང་གིས་བརྡ་སྦྱོར་གྱི་བང་ཕྱིན་པ་བྱས་ལ་མཐའ་མཁོབ་ཀྱི་རྒྱལ་ཁམས་སུ་དམ་པའི་ཆོས་དར་བར་བྱེད་པའི་སྨོན་ལམ་བཏབ་པ་མཉེལ་ལམ་གསུངས། རྒྱལ་པོའི་ཞལ་ནས། དེ་མད་བདག་སྒོམ་ཡུན་ཐུངས་པས་ལན་ཞེས་གསོལ། དེ་ནས་རྒྱལ་པོས་བོད་དུ་སངས་རྒྱས་ཀྱི་བསྟན་པ་དར་བར་གསོལ་བ་བཏབ་ནས་བརྟག་པ་ཞུས་པ་ན། སློབ་དཔོན་གྱིས། ངེད་ཨཱ་ཙརྱ་བྱ་བ་རྟེན་འབྲེལ་བརྟག་པ་ལ་མཁས་པ་ཡིན། རྒྱལ་པོ་ཁྱོད་ཀྱིས་མགོ་ལ་ཐོད་བཅིངས་པ་དང་སྦྱར་ན་སྟོད་དུ་མངའ་རིས་ཞྭ་ཙམ་ཞིག ། ཞབས་ལ་ལྷམ་གསོལ་བས་སྨད་དུ་མངའ་རིས་ལྷམ་ཙམ་ཞིག་ལ་ཆོས་ཁྲིམས་ཆགས། སྐ་རགས་མ་བཅིངས་པ་དང་སྦྱར་ན་བར་དུ་རྒྱལ་ཁྲིམས་མྱུར་དུ་འཇིག་ཉེན་ཡོད། འོན་ཀྱང་རིན་པོ་ཆེའི་ཕྱག་རྟེན་ཕུལ་བས་རྒྱལ་བའི་བསྟན་པ་འཛུགས་བཏུབ་གསུངས། དེ་ནས་སློབ་དཔོན་གྱིས་ཕོ་བྲང་རླུང་ཚུབས་སུ་ཟླ་བ་བཞིར་དགེ་བ་བཅུ་ཁམས་བཅོ་བརྒྱད་རྟེན་འབྲེལ་བཅུ་གཉིས་ཀྱི་ཆོས་བཤད་པས། བོད་ཀྱི་ལྷ་སྲིན་ཁྲོས་ཏེ་འཕང་ཐང་ཆུས་ཁྱེར། དམར་པོ་རི་ལ་ཐོག་རྒྱབ། མི་ནད་ཕྱུགས་ནད་བྱུང་བས་བོད་འབངས་ཡོ་ལོག་ནས་ཆོས་བྱས་པས་ལན་ཟེར་བ་ན། རྒྱལ་པོ་ཁྲི་སྲོང་ལྡེ་བཙན་གྱིས་མཁན་ཆེན་པོ་དྷི་ས་ཏྭའི་ཞབས་ལ་དབུ་གཏུགས་ཏེ་བཤུམ་བཞིན་དུ་བོད་བསོད་ནམས་དམན་པས་ནག་ཕྱོགས་ཀྱི་མི་མ་ཡིན་རྣམས་ཀྱིས་བར་ཆད་འདི་འདྲ་བྱས། བོད་ཀྱི་མི་རྣམས་ཀྱང་འདི་སྐད་ཟེར་བས་སློབ་དཔོན་རེ་ཤིག་བལ་ཡུལ་དུ་གཤེགས་ནས་སླར་འབྱོན་དགོས་ཞེས་ཞུས་ཏེ་སློབ་དཔོན་བལ་ཡུལ་དུ་བྱོན། དེ་ནས་རིང་ཞིག་ནས་སྦ་གསལ་སྣང་རྒྱ་ཡུལ་དུ་ཆོས་འཚོལ་དུ་བཏང། སང་ཤི་ལ་སོགས་པ་སུམ་ཅུ་མཁན་ཆེན་ཞི་བ་འཚོ་སྤྱན་འདྲེན་དུ་བཏང་ངོ་། ། དེའི་ཚེ་རྒྱ་ནག་ཏུ་ཧ་ཤང་ཞིག་ན་རེ། ད་ཟླ་བ་དྲུག་ཞག་དྲུག་ན་འཕགས་པ་རྟ་སྐད་ཀྱི་སྤྲུལ་པ་འདི་འདྲ་ཞིག་འོང་ཞེས་འདྲ་འབག་བྱས་ཤིང། སང་ཤི་རྒྱ་ནག་ཏུ་སླེབ་པ་དང་རྒྱ་རྗེས་བྱ་དགའ་བྱིན། ཧ་ཤང་ལ་བསྒོམ་ལུང་བླངས་ཏེ་སླར་བོད་དུ་འཁོར་བ་ན་རྒྱལ་པོ་ལ་སྐྱེས་ཕུལ་ལོ། ། དེ་ནས་རྒྱལ་པོས་སང་ཤི་ལ་ཨཱ་ཙརྱ་ད་དུང་སྤྱན་མ་འདྲོངས་པས་ཁྱོད་སོངས་ཤིག་གསུངས། དེས་བལ་བོར་ཕྱིན་ནས་མཁན་ཆེན་ཞི་བ་འཚོ་སྤྱན་དྲངས་ཏེ་བྲག་དམར་འབྲིན་བཟང་དུ་ཕེབས་ནས་རྒྱལ་པོ་ལ། བོད་ཀྱི་ལྷ་སྲིན་མ་ཐུལ་བས་ཆོས་བྱེད་དུ་མི་སྟེར་ཞིང་བཙན་པོ་སྐུ་ཚེ་ཐུང་བ་ཡང་དེས་ལན་པས། མི་མ་ཡིན་གདུག་པ་ཅན་རྣམས་འདུལ་བ་ལ་སློབ་དཔོན་པདྨ་སམྦྷ་ཝ་ཞེས་བྱ་བ་མཐུ་རྩལ་དང་ལྡན་པ་ཞིག་ཡོད་པས་དེ་སྤྱན་དྲོངས་ཤིག་གསུངས་པ་ན། བཙན་པོས་རྨི་ལམ་དུ་བྱུང་བ་སྐད་བགྱིས་ཏེ། སྦ་མང་རྗེ་གསལ་སྣང་སོགས་མི་ལྔ་སྤྱན་འདྲེན་དུ་བཏང་བས། སློབ་དཔོན་གྱིས་མཁྱེན་ཏེ་མང་ཡུལ་གུང་ཐང་དུ་བྱོན་པ་དང་མཇལ་ནས་རིམ་གྱིས་ལྷ་སྲིན་གདུག་པ་ཅན་རྣམས་དམ་ལ་འདོགས་ཤིང་བྱོན་ཏེ། ཧས་པོ་རིར་ཕྱག་ཕེབས་ཏེ་བཙན་པོ་དང་མཇལ། མལ་གྲོ་ཕུར་བྱོན་ནས་བོད་ཀྱི་ལྷ་སྲིན་ཐམས་ཅད་དམ་ལ་བཏགས་སོ། ། དེ་ནས་མཁན་ཆེན་བོ་དྷི་ས་ཏྭ་དང། སློབ་དཔོན་པདྨ་སམྦྷ་ཝ་གཉིས་ཀྱིས་ས་ཆོག་མཛད་དེ་ཨོ་ཏཱནྟ་པཱུ་རིའི་གཙུག་ལག་ཁང་ལ་དཔེ་བླངས་ནས་རི་རབ་གླིང་བཅུ་གཉིས། ཉི་ཟླ་ཟུང་གཅིག་མཐའ་ལྕགས་རིས་བསྐོར་བའི་བཀོད་པ་མཛད་དེ་ཕྱི་ལོ་ 787 མེ་མོ་ཡོས་བུའི་ལོ་ལ་རྨང་བཏིང། 799 ས་མོ་ཡོས་ལ་ཚར་ནས་མཁན་ཆེན་བོ་དྷི་ས་ཏྭ་དང་སློབ་དཔོན་པདྨ་སམྦྷ་ཝས་རབ་གནས་མཛད་དགའ་སྟོན་བྱས་ཏེ། 803 ལུག་གི་ལོ་ལ་ཐམས་ཅད་ཡོད་སྨྲའི་སྡེ་པའི་དགེ་སློང་བཅུ་གཉིས་སྤྱན་དྲངས་ཏེ་བོད་ལ་རབ་བྱུང་བཏུབ་མི་བཏུབ་སད་པའི་ཕྱིར་ཡེ་ཤེས་དབང་པོ་ལ་སོགས་པ་མི་བདུན་རབ་ཏུ་བྱུང་བ་ན། རབ་ཏུ་བྱུང་མ་ཐག་ཏུ་དེ་དག་ལ་མངོན་པར་ཤེས་པ་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་དང་ལྡན་པར་གྱུར། བདུན་པོ་དེ་ལ་སད་མི་མི་བདུན་ཞེས་གྲགས་སོ། ། དེ་ནས་ཆོས་རྒྱལ་ཁྲི་སྲོང་ལྡེ་བཙན་གྱིས་གངས་རིའི་ཁྲོད་འདིར་མཁན་ཆེན་ཞི་བ་འཚོའི་མཁན་རྒྱུད་ཐམས་ཅད་ཡོད་པར་སྨྲ་བའི་ལུགས་འདི་དར་ཞིང་རྒྱས་ལ་ཡུན་རིང་དུ་གནས་པ་ཞིག་བྱུང་ན་ཅི་མ་རུང་སྙམ་དུ་འདིའི་མཁན་རྒྱུད་འཕགས་པ་ཤཱ་རིའི་བུ། སྒྲ་གཅན་ཟིན། ཀླུ་སྒྲུབ། ལེགས་ལྡན་འབྱེད། དཔལ་སྦས། ཡེ་ཤེས་སྙིང་པོ། མཁན་པོ་བོ་དྷི་ས་ཏྭ་རྣམས་བསམ་ཡས་ཀྱི་གྱང་རིས་ལ་འགོད་པར་མཛད་དོ། ། དེ་ནས་ཆོས་རྒྱལ་ཁྲི་སྲོང་ལྡེ་བཙན་གྱིས་མཁན་ཆེན་པོ་དྷི་ས་ཏྭ་རྙེད་བཀུར་ཚད་མེད་པས་མཆོད་ཅིང་བོད་ཁམས་འདིར་སངས་རྒྱས་ཀྱི་བསྟན་པ་རྒྱ་ཆེར་སྤེལ་བར་ཞུས་ཏེ། དེའི་འཕྲིན་ལས་ཀྱི་གྲོགས་སུ་ལོ་ཙཱ་མཁས་པ་ཡང་མང་དུ་བསླབས་རྒྱ་གར་ནས་སློབ་དཔོན་བི་མ་ལ་མི་ཏྲ་དང། སློབ་དཔོན་སངས་རྒྱས་གསང་བ་སོགས་མཁས་ཤིང་གྲུབ་པའི་པཎྜི་ཏ་ཆེན་པོ་མང་དུ་སྤྱན་དྲངས། རྒྱལ་བའི་བཀའ་དང་བསྟན་བཅོས་མཐའ་ཡས་པ་བསྒྱུར། གང་སྒྱུར་བའི་ཆོས་དེ་དག་ཐམས་ཅད་ལ་ལོ་ཆེན་མཁས་པ་རྣམས་ཀྱིས་ཞུས་ཏིག་ཡང་དག་པར་བྱས། དེ་དག་ཐམས་ཅད་ཀྱང་ཆོས་རྒྱལ་ཉིད་ཀྱི་སྤྱན་ལམ་དུ་ཕབ་ནས་ཆོས་ལྟར་བཅོས་པའི་བསྲེ་བསླད་ཕྲ་མོའང་མེད་པར་མཛད། བོད་ཁམས་ཐམས་ཅད་ལ་ཁྲིམས་འདི་ལྟར་བསྒྲགས་ཏེ། བོད་ཀྱི་མངའ་འོག་ན་གནས་པ་ཐམས་ཅད་ཀྱིས་དམ་པའི་ཆོས་ཚུལ་བཞིན་དུ་བྱ་བ་དང། རྒྱལ་བའི་བསྟན་པ་ལ་རབ་ཏུ་བྱུང་བ་རྣམས་ལ་བླ་ལྷག་ཏུ་གུས་པར་བྱ་བ་དང་། ཆོས་བྱེད་པ་རྣམས་ཀྱིས་ཀྱང་མཁན་ཆེན་བོ་དྷི་ས་ཏྭས་བོད་ཁམས་འདིར་རྒྱལ་བསྟན་གྱི་སྲོལ་ཇི་ལྟར་གཏོད་པ་ལྟར་འདུལ་བའི་བཅས་ཁྲིམས་རྣམ་པར་དག་པས་གཞི་བཟུང་ནས་སྤྱོད་པ་རྣམ་པར་དག་པ་དང་། འཕགས་པ་ཀླུ་སྒྲུབ་ཀྱིས་རྒྱལ་བའི་དགོངས་པ་ཇི་ལྟར་བཀྲལ་བའི་ལྟ་བ་རྣམ་པར་དག་པ་དེ་ཁོ་ན་བཞིན་བྱ་དགོས་པའི་བཀའ་ཁྲིམས་བསྒྲགས་སོ། ། དེ་ལྟར་མཁན་ཆེན་བོ་དྷི་ས་ཏྭས་རྒྱལ་བསྟན་ཉིན་མོ་ལྟར་གསལ་བས་མཛད་ནས་སྐུའི་བཀོད་པ་བསྡུ་བ་ལ་ཕྱོགས་པ་ན་ཆོས་རྒྱལ་ཁྲི་སྲོང་ལྡེ་བཙན་ལ་འདི་ལྟར་བཀའ་སྩལ་ཏེ། བོད་དུ་མུ་སྟེགས་ནི་མི་འབྱུང་གིས། སངས་རྒྱས་ཀྱི་བསྟན་པ་ཉིད་ཁ་གཉིས་སུ་གྱེས་ཏེ་རྩོད་པར་འགྱུར་བས། དེའི་ཚེ་ངའི་སློབ་མ་ཀ་མ་ལ་ཤཱི་ལ་སྤྱན་དྲོངས་ལ་རྩོད་པ་བྱེད་དུ་ཆུག་ཅིག། ། རྩོད་པ་བྱས་པས་རྩོད་པ་ཆོས་ཕྱོགས་སུ་ཞི་བར་འགྱུར་རོ། ། ཞེས་ལུང་བསྟན་ཏེ་ཞི་བར་གཤེགས་སོ། ། དེ་ནས་དུས་ནམ་ཞིག་ན་མཁན་ཆེན་ཞི་བ་འཚོས་ཇི་ལྟར་ལུང་བསྟན་པ་བཞིན་རྒྱ་ནག་གི་ཧྭ་ཤང་ལྟ་བ་ལོག་པ་འཛིན་པ་ཞིག་བྱུང་ནས་དེའི་ལུགས་དར་ཏེ་ལུས་ངག་གི་ཆོས་སྤྱོད་དགེ་བ་བྱས་པས་སངས་མི་རྒྱ། བྱར་མེད་ལ་གནས་ན་སངས་རྒྱས་ཟེར་ནས་ཆད་ལྟ་ལ་ཞེན་ཏེ་དགེ་སྦྱོར་མི་བྱེད། བོད་ཕལ་ཆེར་དེ་ལ་དགའ་སྟེ་དེའི་ལུགས་སློབ། དཔལ་དབྱངས་དང་། སྦ་རཏྣ་ལ་སོགས་པ་ཉུང་ཤས་ཤིག་མཁན་ཆེན་བོ་དྷི་ས་ཏྭའི་ལུགས་བྱེད་པས་ལྟ་སྤྱོད་མ་མཐུན་ཏེ་རྩོད་པ་ལ། བཙན་པོས་མཁན་ཆེན་བོ་དྷི་ས་ཏྭའི་ལུགས་བཞིན་དུ་ལྟ་སྤྱོད་ཀྱིས་ཤིག་གསུངས་པས། སྟོན་མུན་པ་རྣམས་ཁྲོས་ཏེ་ཆུ་གྲི་རྣོན་པོ་རེ་བསྲེལ་ཞིང་རྩེན་མིན་པ་རི་ལ་གསོད་ཟེར་བས་རྒྱལ་པོ་ཐུགས་མ་བདེ་ནས། ཡེ་ཤེས་དབང་པོ་འབོད་དུ་བཏང་བས་ལན་གཉིས་སུ་མ་ཁུགས་ནས་གསུམ་པ་ལ་མ་ཁུགས་ན་གསད་པར་བྱས་ཏེ་བཏང་བས། བྲག་ཕུག་འདོམ་བཅུ་གཉིས་པ་དཔྱང་ཐག་ལ་འགྲོ་དགོས་པ་ཞིག་ཏུ་ཕྱིན་ཏེ་གཤེགས་པར་ཞུ། མི་གཤེགས་ན་བདག་གསོད་དུ་འོང་བས་ལྕེབ་བྱས་པས་བྱོན་ཏེ་རྒྱལ་པོ་ལ་བདག་དགུག་མི་འཚལ། མཁན་པོའི་ཞལ་ཆེམས་འདི་ལྟར་བདོག་ཞུས་པས་རྒྱལ་པོ་མཉེལ་བསོས་ཏེ་སློབ་དཔོན་ཀ་མ་ལ་ཤཱི་ལ་སྤྱན་འདྲེན་པའི་ཕོ་ཉ་བཏང། དེ་ཧྭ་ཤང་གིས་ཚོར་ནས་ཡུམ་རྒྱས་པ་ལ་སོགས་པ་མདོ་སྡེ་ཟབ་མོ་རྣམས་སྤྱན་དྲངས་ཏེ་བཤད་པ་བསླབས། བསྟན་བཅོས་ལ་ཆོས་བྱ་མི་དགོས་ཉལ་པས་ཆོག་ཅེས་སྟོན་པ་བསམ་གཏན་ཉལ་བའི་འཁོར་ལོ། དེ་ལ་རྩོད་པ་སྤོང་བ་བསམ་གཏན་གྱི་ལོན། ཡང་ལོན་གཉིས། དེ་རིགས་པས་བསྒྲུབ་པ་ལྟ་བའི་རྒྱབ་ཤ། ། ལུང་གིས་བསྒྲུབ་པ་མདོ་སྡེ་བརྒྱད་ཅུ་ཁུངས་ལ་སོགས་པ་བྱས། མདོ་སྡེ་དགོངས་པ་ངེས་འགྲེལ་རང་གི་ལྟ་སྤྱོད་དང་འགལ་བར་མཐོང་ནས་རྡོག་པས་གྲིལ་ལོ། ། དེའི་ཚེ་ཡེ་ཤེས་དབང་པོས་མཁན་པོའི་དགོངས་པ་འདི་བཞིན་ཡིན་ཞེས་སྙན་དུ་གསོལ་བས་བཙན་པོ་དགྱེས་ཏེ་ཁྱོད་ངའི་ཨཱ་ཙརྱ་ཞེས་གསུང་ངོ་། ། དེ་ནས་ཀ་མ་ལ་ཤཱི་ལ་བྱོན་པ་དང་། བཙན་པོ་གུང་ལ་བཞུགས། ཧྭ་ཤང་གཡས་གྲལ་དུ་བྱས། སློབ་དཔོན་གཡོན་གྲལ་དུ་བྱས་ཏེ་རྩེན་མིན་རྣམས་དེའི་མཇུག་འཐུད། བཙན་པོས་གཉིས་ཀའི་ལག་ཏུ་མེ་ཏོག་ཕྲེང་བ་བཏད་དེ་ཁྱེད་གཉིས་གཤགས་ཀྱིས་ལ་གང་རྒྱལ་བ་ལ་ཕམ་པས་མེ་ཏོག་ཕྲེང་བ་ཕུལ་ཅིག ། ཕམ་པ་དེ་འདིར་མ་སྡོད་ཅིག་བཀའ་སྩལ་པ་དང། ཧྭ་ཤང་ན་རེ་ལས་དགེ་དང་མི་དགེ་སྤྱད་ན་མཐོ་རིས་དང་ངན་སོང་དུ་འགྲོ་བས་འཁོར་བ་ལས་མི་ཐར་ཞིང་སངས་རྒྱས་ཐོབ་པ་ལ་བསྒྲིབ་པ་ཡིན། དཔེར་ན་སྤྲིན་དཀར་ནག་གང་གིས་ཀྱང་ནམ་མཁའ་ལ་བསྒྲིབ་པ་དང་འདྲ། གང་ཞིག་ཅི་ལ་ཡང་མི་སེམས། ཅི་ཡང་མི་བསམ་པ་དེ་འཁོར་བ་ལས་ཡོངས་སུ་ཐར་བར་འགྱུར་རོ། ། ཅི་ལ་ཡང་མི་སེམས་མི་རྟོག་མི་དཔྱོད་པ་ནི་མི་དམིགས་པ་ཡིན་པས། ཅིག་ཅར་དུ་འཇུག་པ་ནི་ས་བཅུ་པ་དང་འདྲའོ། ། ཟེར་རོ། ། ཀ་མ་ལ་ཤཱི་ལའི་ཞལ་སྔ་ནས། དེ་ལྟར་ཅི་ལ་ཡང་མི་བསམ་ཟེར་བ་དེ་ནི་སོ་སོར་རྟོག་པའི་ཤེས་རབ་སྤངས་པ་ཡིན་ནོ། ། ཡང་དག་པའི་ཡེ་ཤེས་ཀྱི་རྩ་བ་སོ་སོར་རྟོག་པའི་ཤེར་རབ་ཡིན་པས། དེ་སྤངས་པས་འཇིག་རྟེན་ལས་འདས་པའི་ཤེས་རབ་ཀྱང་སྤངས་པར་འགྱུར་རོ། ། སོ་སོར་རྟོག་པའི་ཤེས་རབ་མེད་ན་རྣལ་འབྱོར་པ་ཐབས་གང་གིས་རྣམ་པར་མི་རྟོག་པ་ལ་གནས། གལ་ཏེ་ཆོས་ཐམས་ཅད་དྲན་པ་མེད་ཅིང་ཡིད་ལ་བྱ་བ་མེད་པ་ཡིན་ན། ཉམས་སུ་མྱོང་བ་ཐམས་ཅད་མི་དྲན་ཞིང། ཡིད་ལ་མི་བྱ་བར་མི་ནུས་སོ། ། གལ་ཏེ་བདག་གིས་ཆོས་དྲན་པར་མི་བྱའོ་སྙམ་ན་དེ་ཤིན་ཏུ་དྲན་པ་ཡིད་ལ་བྱས་པར་འགྱུར་རོ། ། དྲན་པ་མེད་པ་ཙམ་པོ་ལ་བྱེད་ན་བརྒྱལ་བའམ། འབོག་པའི་དུས་སུ་རྣམ་པར་མི་རྟོག་པར་འགྱུར་རོ། ། ཡང་དག་པའི་སོ་སོར་རྟོག་པ་མེད་པར་མི་རྟོག་པ་ལ་འཇུག་པའི་ཐབས་མེད་དོ། ། དེ་དྲན་པ་ཙམ་པོ་བཀག་ཀྱང་ཡང་དག་པའི་སོ་སོར་རྟོག་པ་མེད་ན་ཆོས་ཐམས་ཅད་ངོ་བོ་ཉིད་མེད་པ་ལ་ཇི་ལྟར་འཇུག་ནུས། སྟོང་པ་ཉིད་མ་རྟོགས་པར་སྒྲིབ་པ་སྤངས་པར་མི་འགྱུར་བས་ནའོ། ། དེས་ན་ཡང་དག་པའི་ཤེས་རབ་ཀྱིས་ཕྱིན་ཅི་ལོག་གི་སྣང་བ་རྒྱང་བསྲིངས་པ་ཡིན་ནོ། ། དེས་ན་དྲན་བཞིན་དུ་མི་དྲན་བྱར་མི་རུང་ངོ་། ། དྲན་པ་དང་ཡིད་ལ་བྱ་བ་མེད་པར་སྔོན་གྱི་གནས་རྗེས་སུ་དྲན་པ་དང་ཐམས་ཅད་མཁྱེན་པར་ཇི་ལྟར་འགྱུར། ཉོན་མོངས་པ་ཡང་ཇི་ལྟར་སྤོང། དེ་བས་ན་ཡང་དག་པའི་ཤེས་རབ་ཀྱིས་དོན་ངེས་པར་རྟོགས་པའི་རྣལ་འབྱོར་པས་དུས་གསུམ་ཕྱི་ནང་སྟོང་པར་རྟོགས་ནས་རྟོག་པ་ཉེ་བར་ཞི་སྟེ་ལྟ་བ་ངན་པ་ཐམས་ཅད་སྤངས། དེ་བརྟེན་ནས་ཐབས་ཤེས་རབ་ལ་མཁས་པས་སྒྲིབ་པ་ཐམས་ཅད་བསལ་ནས་སངས་རྒྱས་ཀྱི་ཆོས་ཐམས་ཅད་ཐོབ་པར་འགྱུར་རོ། ། ཞེས་གསུངས་སོ། ། དེ་ནས་བཙན་པོའི་ཞལནས། འཁོར་ཀུན་གྱིས་ཀྱང་མཆིད་གཤགས་ཐོབ་ཅིག་གསུངས། དེ་ནས་སྦ་ཡེ་ཤེས་དབང་པོས་ཅིག་ཅར་འཇུག་བྱ་བ་དང་། རིམ་གྱིས་འཇུག་བྱ་བ་གཉིས་དཔྱོད་དགོས་ཏེ། རིམ་གྱིས་འཇུག་ན་རྒྱུ་མ་མཆིས་པས། ངེད་དང་མི་འདྲ་ཅིག་ཅར་འཇུག་ན་ཁྱེད་ད་རུང་ཅི་བྱེད། དང་པོ་ནས་སངས་རྒྱས་ན་ཅི་ཉེས། དེ་བས་ན་རི་ལ་འཛེག་པའང་གོམ་པ་རེ་རེས་འཛེག་དགོས་ཏེ། གོམ་པ་གཅིག་གིས་བགྲོད་མི་ནུས་པ་ལྟར། ས་དང་པོ་ཐོབ་པའང་དཀའ་ན། ཐམས་ཅད་མཁྱེན་པ་ལྟ་ཅི་སྨོས། ངེས་རྩེན་མིན་གྱི་ལུགས་ཀྱིས་གསུང་རབ་ཀུན་ལ་ཤེས་རབ་གྱིས་སྦྱངས་པས་དོན་མ་ནོར་བར་ཤེས། ཆོས་སྤྱོད་བཅུ་ལ་བསླབས་ཏེ་བསྒོམས་པས་བཟོད་པ་ཐོབ། ས་དང་པོ་སྐྱོན་མེད་པ་ལ་ཞུགས་ཏེ་ས་བཅུ་རིམ་གྱིས་སྦྱངས་པས་ཚོགས་གཉིས་རྫོགས་ནས་འཚང་རྒྱ་བ་ཡིན། ཁྱེད་ལྟར་ན་ཚོགས་མ་རྫོགས། བློ་མ་སྦྱངས་པར་འཇིག་རྟེན་གྱི་བྱ་བ་ཡང་མི་ཤེས་ན་ཤེས་བྱ་ཐམས་ཅད་ཤེས་པར་ཇི་ལྟར་འགྱུར། ཅི་ཡང་མ་བྱས་པར་ཉལ་བས་ཟན་ཡང་མི་མྱོང་སྟེ། ལྟོགས་ཏེ་འཆི་ན་སངས་རྒྱས་ག་ལ་འགྲུབ། མ་བརྟགས་མ་དཔྱད་པར་གོམ་པ་བོར་ཡང་བརྡེགས་འཆོས་ན་ཆོས་ག་ལ་རྟོགས་ཞེས་བྱས་བ་ལ་སོགས་པ་རྒྱས་པར་སྨྲས་པས། སྟོན་མུན་པས་ལན་སྨྲ་བར་མ་ནུས་ཏེ་མེ་ཏོག་ཕྲེང་བ་སློབ་དཔོན་ལ་ཕུལ་ཏེ་ཕམ་བླངས་སོ། ། དེའི་ཚེ་ཅོ་རྨ་རྨ་ལ་སོགས་པ་མྱ་ངན་སྐྱེས་ཏེ་རང་གི་རྟེན་རྡོས་བརྡུངས་ཏེ་ཤི་ཞེས་གྲགས་སོ། ། དེ་ནས་བཙན་པོས་ད་ཕྱིན་ཆད་ལྟ་བ་ཀླུ་སྒྲུབ་ཀྱི་ལུགས་བཟུང་། སྤྱོད་པ་ཆོས་སྤྱོད་བཅུ་དང་ཕ་རོལ་ཕྱིན་པ་སློབས། སྟོན་མུན་གྱི་ལུགས་བྱེད་དུ་མི་དབང་ངོ་ཞེས་བཀའ་སྩལ་ཏེ་ཧྭ་ཤང་རྒྱའི་ཡུལ་དུ་རྫངས། དཔེ་རྣམས་བསྡུས་ཏེ་གཏེར་དུ་སྦས་སོ། ། དེ་ལྟར་མཁན་ཆེན་ཞི་བ་འཚོ་དང་མཁས་མཆོག་ཀ་མ་ལ་ཤཱི་ལ་གཉིས་ནི་བོད་ཁམས་བསྟན་པའི་སྒྲོན་མེ་ཡིན་པས་བཀའ་དྲིན་མཚུངས་པ་མེད་པ་ཞིག་གོ ། དེ་ནས་ཆོས་རྒྱལ་ཁྲི་སྲོང་ལྡེ་བཙན་གྱིས། མཁས་མཆོག་ཀ་མ་ལ་ཤཱི་ལ་ལ་བོད་ཁམས་སུ་བསྟན་པ་ལ་དག་ཐེར་མཛད་ནས་ལྟ་བ་ལོག་པར་སྨྲ་བ་རྣམས་སུན་ཕྱུང་བ་བཀའ་དྲིན་ཆེ་ཞེས་གུས་པས་མཆོད་པ་ཚད་མེད་པ་མཛད་ཅིང་ལུང་དང་རིགས་པ་དྲི་མ་མེད་པས་ལྟ་ངན་ལོག་པར་སྨྲ་བ་བཀག་པ་དེ་ལྟར་ཕྱིས་རབས་ཀྱི་གདུལ་བྱའི་དོན་དུ་ཡི་གེའི་འཁོད་པ་ཞིག་དགོས་ཞེས་བསྐུལ་བ་ལྟར་མཁས་མཆོག་ཀ་མ་ལ་ཤཱི་ལས་དབུ་མ་སྒོམ་རིམ་གསུམ་མཛད། སླར་ཡང་ཆོས་རྒྱལ་ཁྲི་སྲོང་ལྡེ་བཙན་གྱིས་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་རྒྱལ་བའི་དགོངས་པ་ལེགས་པར་བཀྲལ་བའི་དབུ་མའི་ལྟ་བ་མཐར་ཐུག་པ་འདི་འཇིག་རྟེན་འདིར་ཡུན་རིང་དུ་གནས་པར་བྱ་བའི་ཕྱིར་རིགས་པས་གསལ་བར་མཛད་པའི་བསྟན་བཅོས་ཞིག་མཛད་དགོས་པར་བསྐུལ་ཏེ། མཁས་མཆོག་ཀ་མ་ལ་ཤཱི་ལས་དབུ་མའི་ལམ་བཟང་གསལ་བར་སྟོན་པའི་བསྟན་བཅོས་དབུ་མ་སྣང་བ་མཛད་དོ། ། དེས་ན་བྱང་ཆུབ་ལམ་རིམ་ལ་ཉམས་ལེན་སྙིང་པོར་བྱ་འདོད་པ་རྣམས་ཀྱིས་སློབ་དཔོན་ཞི་བ་འཚོ་ཡབ་སྲས་ཀྱིས་མཛད་པའི་དབུ་མ་རྒྱན་རྩ་འགྲེལ་དང་། དབུ་མ་སྒོམ་རིམ་གསུམ་པོ་འདི་དག་ལ་ཡང་དང་ཡང་དུ་བལྟས་ཏེ། ལམ་གྱི་རིམ་པའི་གནད་རྣམས་ལ་ངེས་པ་གཏིང་ཚུགས་པར་བརྙེད་པར་བྱའོ། ། ། །
༈ ལམ་མཆོག་ཤེར་ཕྱིན་རྒྱས་མཛད་སེང་བཟང་ཞབས། ། ཞེས་བསྔགས་པ། སློབ་དཔོན་སེང་གེ་བཟང་པོ་ནི། སྔོན་ཡུན་རིང་པོ་ནས་ཐུགས་བསྐྱེད་དེ་རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་བསླབས་ནས། ཞིང་འདིར་རྒྱལ་བའི་བསྟན་པའི་སྙིང་པོ་ཤེར་ཕྱིན་གྱི་མན་ངག་སྤེལ་ཕྱིར་བསམ་བཞིན་དུ་བྱོན་པ་ཞིག་སྟེ། དེ་ཡང་སློབ་དཔོན་འདི་རྒྱལ་རིགས་སུ་སྐུ་འཁྲུངས། སྔོན་གྱི་ཆོས་འབྱུང་འགའ་ཞིག་ཏུ་སློབ་དཔོན་འདི་མའི་ལྟོ་ན་གནས་པའི་ཚེ་མ་ལ་སེང་གེའི་གནོད་པ་བྱུང་སྟེ་མའི་ལུས་སེང་གེས་ཟོས་ཀྱང་ལྟོ་ན་གནས་པའི་ཁྱེའུ་སེང་གེས་མ་ཟོས་པར་བདེ་བར་སྐྱེས་པས་སེང་གེ་བཟང་པོ་ཞེས་བཏགས་པར་བཤད། དེ་ནས་ནར་སོན་པ་ན་ཁྱིམ་གྱི་འདུ་འཛི་ལ་མ་ཆགས་པར་རྒྱལ་བའི་བསྟན་པ་ལ་རབ་ཏུ་བྱུང་སྟེ་བསླབ་གཞི་ཡོངས་སུ་རྫོགས་པ་དགེ་སློང་གི་སྡོམ་པ་བཞེས། རང་དང་གཞན་གྱི་གྲུབ་པའི་མཐའ་ཐམས་ཅད་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར། ཁྱད་པར་ཤེར་ཕྱིན་གྱི་དོན་འཚོལ་བ་ལ་བྱང་ཆུབ་སེམས་དཔའ་རྟག་ཏུ་ངུ་ལྟར་ལུས་དང་སྲོག་ལའང་མི་ལྟ་བར་བརྩོན་པ་ཆེར་མཛད་དེ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེའི་དོན་ཐེག་པ་གསུམ་གའི་ལམ་གྱི་རིམ་པའི་ལུས་ཡོངས་སུ་རྫོགས་པ་ལ་ངེས་པ་གཏིང་ཚུགས་པ་གཞན་གྱིས་དཀྲི་བར་མི་ནུས་པ་ཞིག་ནམ་ཞིག་ན་འོང་སྙམ་དུ་དེ་འབའ་ཞིག་འཚོལ་བ་ལྷུར་མཛད་དོ། ། དེའི་ཚེ་མཁན་ཆེན་ཞི་བ་འཚོ་བསྟན་པའི་བདག་པོར་བཞུགས་པས་མཁན་ཆེན་ཞི་བ་འཚོ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ། རྗེ་བཙུན་བྱམས་པ་ནས་བརྒྱུད་པའི་ཤེར་ཕྱིན་གྱི་མན་ངག་འཕགས་པ་ཐོགས་མེད་སྐུ་མཆེད་གཉིས་དང་། འཕགས་པ་གྲོལ་སྡེའི་གཞུང་རྣམས་ལ་ཞིབ་ཏུ་སྦྱངས་ཤིང། རྒྱལ་བའི་དགོངས་པ་དཔལ་མགོན་འཕགས་པ་ཀླུ་སྒྲུབ་ཀྱིས་བཀྲལ་བའི་དབུ་མའི་གཞུང་རྣམས་ལའང་ཞིབ་ཏུ་སྦྱངས། ཡང་དག་པར་རྫོགས་པའི་སངས་རྒྱས་ནས་རྗེ་བཙུན་བྱམས་པ་མགོན་པོ་དང་། དེ་ནས་ཐོགས་མེད་སྐུ་མཆེད་ལ་རིམ་གྱིས་བརྒྱུད་པའི་རྒྱ་ཆེ་བའི་ལམ་གྱི་རིམ་པའི་མན་ངག་རྣམས་དང། རྫོགས་པའི་སངས་རྒྱས་ནས་རྗེ་བཙུན་འཇམ་པའི་དབྱངས། དེ་ནས་དཔལ་མགོན་འཕགས་པ་ཀླུ་སྒྲུབ་ཡབ་སྲས་ལ་རིམ་གྱིས་བརྒྱུད་པའི་ཟབ་མོའི་ལམ་གྱི་རིམ་པའི་མན་ངག་རྣམས་རྫོགས་པར་གསན། ཇི་ལྟར་གསན་པའི་དོན་ལམ་གྱི་རིམ་པའི་གནད་རྣམས་ལ་ཡང་དང་ཡང་དུ་སེམས་པ་དང། འཇལ་བ་དང་། རྟོག་པ་དང་། རང་གི་རྒྱུད་ལ་འདྲིས་པར་བྱ་བའི་ཕྱིར་དམིགས་རྣམ་གོམས་པ་ལྷུར་ལེན་པ་རྣམས་ལ་འབད་དེ་རྒྱལ་བའི་བསྟན་པའི་སྙིང་པོ་ཐེག་པ་གསུམ་གའི་ལམ་གྱི་རིམ་པའི་ལུས་ཡོངས་སུ་རྫོགས་པ་ལ་མྱོང་བ་ཁྱད་པར་ཅན་འཁྲུངས། དེ་ནས་སྐལ་བ་དང་ལྡན་པ་སྟོང་ཕྲག་མང་པོ་དག་ལ་ཤེར་ཕྱིན་གྱི་གདམས་ངག་འདོམས་པར་མཛད། ད་དུང་རྒྱལ་བའི་བསྟན་པ་ལ་བྱ་བ་རྒྱ་ཆེར་མཛད་བཞེད་ནས། མཁན་ཆེན་ཞི་བ་འཚོ་ལ་རྗེ་བཙུན་བྱམས་པའི་སྒྲུབ་ཐབས་ཞུས་ནས་བསྒྲུབས་པས། མི་ལམ་དུ་དགེ་སློང་གུར་ཀུམ་གྱི་མདོག་ཅན་སྤྱོད་ལམ་མཛེས་པ་ཅིག་རྨིས་ཏེ། ཤར་ཕྱོགས་ཁ་སརྤཱ་ཎིར་སོངས་ཤིག ། ཅེས་ལུང་བསྟན་ཏོ། ། ཇི་ལྟར་ལུང་བསྟན་པ་ལྟར་དེར་སོང་ནས་ཞག་གསུམ་དུ་སྨྱུང་གནས་བྱས་ཏེ་རྨི་ལམ་བརྟགས་པས་ཐོ་རབས་ཀྱི་རྨི་ལམ་ན། ཨོ་ཏཱནྟ་པཱུ་རི་བི་ཧཱ་རའི་གནྔྷོ་ལའི་སྟེང་གི་ནམ་མཁའ་ལ་སྤྲིན་ཕུང་ཐུག་པོ་ཞིག་གི་གསེབ་ན་ལྷའི་ལུས་སྟོད་སྤྲིན་གྱི་གསེབ་ནས་བྱུང་ནས་མཆོད་རྫས་སྣ་ཚོགས་ཀྱིས་མཆོད་པ་མཐོང་སྟེ། ཅི་བྱེད་དྲིས་པས། རྗེ་བཙུན་བྱམས་མགོན་བརྒྱད་སྟོང་པ་གསུང་བ་ལ་མཆོད་པ་བྱེད་པ་ཡིན་ཟེར་ཏེ། རིང་དུ་བལྟས་པས་རྗེ་བཙུན་ཞལ་གསེར་མདོག་ཅན་སྤྱི་གཙུག་མཆོད་རྟེན་གྱིས་སྤྲས་པ་ཕྱག་གཡས་ཆོས་འཆད་ཀྱི་ཕྱག་རྒྱ་མཛད་པ་ཞིག་མཐོང་ནས་ཕྱག་དང་མཆོད་པ་བྱས་ཏེ། ཉིད་ཀྱི་བསྟན་བཅོས་ལ་དེང་སང་འགྲེལ་པ་མང་དུ་མཆིས་ན་གང་གི་རྗེས་སུ་འཇུག་པར་བགྱི་ཞེས་ཞུས་པས། ཐམས་ཅད་ཀྱི་གཞུང་ལེགས་པར་རྟོགས་ལ་འཐད་པ་བསྡུས་ཏེ་ཁྱོད་ཀྱིས་ཕྱོགས་གཅིག་ཏུ་བསྡུས་ལ་རྩོམས་ཤིག་ཅེས་གནང་བ་ཐོབ་བོ། ། མནལ་སད་དེ་མཆོད་པ་བྱས་ནས་བསྟན་བཅོས་བརྩམས་པའི་སྦྱིན་བདག་བཙལ་བའི་ཕྱིར་ཤར་ཕྱོགས་ཁ་སརྦཱ་ཎི་ནས་ནུབ་ཏུ་བྱོན་པ་ན། རྒྱལ་པོ་ངྷརྨཱ་པ་ལས་ཡུམ་འཆད་པ་ལ་སློབ་དཔོན་སེང་གེ་བཟང་པོ་མཁས་པར་ཐོས་ནས་གདན་འདྲེན་དུ་བཏང་བའི་ཕོ་ཉ་དང་ཕྲད་ནས་གདན་དྲངས་ཏེ་ཚ་བ་གསུམ་གྱི་གཙུག་ལག་ཁང་དུ་ཕེབས་ཏེ་དགེ་འདུན་སྟོང་ཕྲག་མང་པོ་ལ་ཤེར་ཕྱིན་གྱི་མན་ངག་རྒྱ་ཆེར་འདོམས་པར་མཛད། རྒྱལ་པོ་ངྷརྨཱ་པ་ལས་སྦྱིན་བདག་བྱས་ནས་བྱམས་མགོན་གྱིས་ལུང་བསྟན་པ་ལྟར་མངོན་རྟོགས་རྒྱན་གྱི་འགྲེལ་པ་དོན་གསལ་དང་། མངོན་རྟོགས་རྒྱན་དང་བརྒྱད་སྟོང་པ་སྦྱར་བའི་མན་ངག་བརྒྱད་སྟོང་འགྲེལ་ཆེན་དང་། འཕགས་པ་གྲོལ་སྡེས་མཛད་པའི་ཉི་ཁྲི་སྣང་བ་དང་མཐུན་པར་ཉི་ཁྲིའི་བསྡུས་དོན་ལེ་བརྒྱད་མ་དང་། ཡོན་ཏན་རིན་པོ་ཆེ་སྡུད་པའི་འགྲེལ་པ་རྟོགས་པར་སླ་བ་དང་། ཤེར་ཕྱིན་སྒོམ་པ། ཙནྡྲ་པའི་རྣམ་དབྱེའི་ཚིག་ལེའུར་བྱས་པ་རྣམས་མཛད་དོ། ། བདག་ཉིད་ཆེན་པོ་འདི་ནི་མཁྱེན་རབས་དང་ཐུགས་རྗེ་མཚུངས་པ་མེད་པ་དང་། རྗེ་བཙུན་བྱམས་པ་མགོན་པོས་བྱིན་གྱིས་བརླབས་པའི་མཐུས་འགྲེལ་པ་དོན་གསལ་ནི་བྱང་ཆུབ་ལམ་གྱི་རིམ་པ་ལ་བློ་སྦྱོང་བ་རྣམས་ལ་ཤེར་ཕྱིན་གྱི་མདོ་སྡེ་བལྟ་བའི་མིག་ལྟ་བུར་གྱུར་ཅིང་། བརྒྱད་སྟོང་འགྲེལ་ཆེན་ནི་དང་པོ་གནས་ཁང་བྱི་དོར་བྱ་བ་ནས་བཟུང་ཞི་གནས་དང་ལྷག་མཐོང་གཉིས་ཟུང་དུ་འབྲེལ་བའི་རྣལ་འབྱོར་སྒོམ་པའི་བར་སྐྱེས་བུ་གསུམ་གྱི་ལམ་གྱི་རིམ་པའི་གནད་ཐམས་ཅད་ཤེར་ཕྱིན་གྱི་མདོ་སྡེ་ནས་ཇི་ལྟར་གསུངས་པ་ལྟར་ལམ་གྱི་ངོ་བོ་གང་ཡིན་དང་། གྲངས་ཇི་ཙམ་དུ་ངེས་པ་དང་། གོ་རིམ་ཇི་ལྟར་ཡིན་པའི་ཚུལ་རྣམས་འཁྲུལ་པ་ཕྲ་མོའང་མེད་པར་ཤིན་ཏུ་གསལ་བར་སྟོན་པ་དང་། དམིགས་སྐོར་རེ་རེ་ནས་གཅིག་ཉམས་སུ་ལེན་པའི་ཚེ་གཞན་རྣམས་འདོར་དགོས་པ་མིན་པར། དམིགས་སྐོར་རེ་རེའི་སྟེེང་དུ་ལམ་གྱི་ལུས་ཡོངས་སུ་རྫོགས་པ་ཆ་ཚང་བར་བྱམས་མགོན་གྱི་མན་ངག་ལ་བརྟེན་ནས་རྩལ་དུ་བཏོན་ཏེ་འཆད་པ་དང་། དང་པོ་ཐར་པ་ཆ་མཐུན་ནས་བཟུང་མཐཪ་རྡོ་རྗེ་ལྟ་བུའི་ཏིང་ངེ་འཛིན་གྱིས་གཉིས་སྣང་འཁྲུལ་པའི་དངོས་གཉེན་བྱས་ཏེ་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པའི་བར་དང་། རྣམ་མཁྱེན་ཐོབ་ནས་འཕྲིན་ལས་ཉི་ཤུ་རྩ་བདུན་གྱི་སྒོ་ནས་སེམས་ཅན་གྱི་དོན་ཇི་ལྟར་བྱེད་པའི་བར་ཐམས་ཅད་ཚང་བར་བསྟན་པས་འཛམ་བུ་གླིང་པ་རྣམས་ལ་བཀའ་དྲིན་ཟླ་མེད་དུ་མཛད་དོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་སེང་གེ་བཟང་པོ་ལ་གསོལ་བ་འདེབས་ཤིང་། སློབ་དཔོན་འདིའི་གཞུང་རྣམས་ལ་ཡང་དང་ཡང་དུ་བལྟས་ཏེ་རང་གིས་གང་ཉམས་སུ་བླང་བར་བྱ་བའི་ལམ་གྱི་རིམ་པའི་གནད་རྣམས་ལ་བདུད་དང་སྡིག་གྲོགས་གང་གིས་ཀྱང་ཡིད་གཞན་དུ་བསྒྱུར་མི་ཐུབ་པའི་ངེས་པ་བརྟན་པོ་རྙེད་པར་བྱའོ། ། ། །
༈ རྒྱལ་བའི་མན་ངག་ཀུན་འཛིན་ཀུ་ས་ལི། ཞེས་བསྔགས་པ། མཚན་དངོས་རིན་ཆེན་བཟང་པོ་ཞེས་བརྗོད་པའི་བདག་ཉིད་ཆེན་པོ་འདི་རྒྱལ་བའི་བསྟན་པ་ལ་རབ་ཏུ་བྱུང་ནས་བསྙེན་པར་རྫོགས་པ་དགེ་སློང་གི་སྡོམ་པ་བཞེས། སློབ་དཔོན་སེང་གེ་བཟང་པོ་ཡོངས་འཛིན་དུ་བསྟེན་ནས་རྗེ་བཙུན་བྱམས་པ་མགོན་པོ་ནས་བརྒྱུད་པའི་ཤེར་ཕྱིན་གྱི་མན་ངག་རྣམས་ཡོངས་སུ་རྫོགས་པར་གསན་ཤིང་། དཔལ་མགོན་འཕགས་པ་ཀླུ་སྒྲུབ་ནས་བརྒྱུད་པའི་དབུ་མའི་མན་ངག་རྣམས་ཀྱང་ཡོངས་སུ་རྫོགས་པ་གསན། དེ་དུས་འཛམ་བུ་གླིང་ན་མཁས་ཤིང་གྲུབ་པའི་སྐྱེས་བུ་གང་དང་གང་ན་བཞུགས་པ་ཕལ་མོ་ཆེའི་ཞབས་ལ་གཏུགས་ནས་མདོ་སྡགས་ཀྱི་མན་ངག་མཐའ་དག་གསན་པར་མཛད་དེ། རྗེ་བཙུན་བྱམས་པ་ནས་བརྒྱུད་པའི་མན་ངག་མཐའ་དག་གསན་པ་ནི། བཀའ་གདམས་གླེགས་བམ་ལས། བྱམས་པ་ཐོགས་མེད་དབྱིག་གཉེན་རྣམ་གྲོལ་སྡེ། ། བཙུན་པ་གྲོལ་སྡེ་རྒྱལ་སྲས་མཆོག་གི་སྡེ། ། རྒྱལ་སྲས་དུལ་བའི་སྡེ་དང་གྲགས་པའི་དཔལ། ། སེང་བཟང་རིན་ཆེན་བཟང་དང་རིན་ཆེན་སྡེ། ། རྩ་བའི་བླ་མ་མཉམ་མེད་གསེར་གླིང་པ། ། རྒྱ་ཆེན་རྣམ་དག་སྤྱོད་ལ་ཕྱག་འཚལ་ལོ། ། ཞེས་གསུངས་པ་ལྟར་རོ། ། འདིའི་རིན་ཆེན་བཟང་པོ་ཞེས་པ་ནི་ཀུ་ས་ལི་ཆེ་བ་དང་། རིན་ཆེན་སྡེ་ཞེས་པ་ཀུ་ས་ལི་ཆུང་བ་ཡིན་པར་སྔོན་གྱི་ཆོས་འབྱུང་དག་ལས་བཤད་དོ། ། འཕགས་པ་ཀླུ་སྒྲུབ་ནས་བརྒྱུད་པའི་མན་ངག་མཐའ་དག་དང་། ཁྱད་པར་ཕ་རྒྱུད་གསང་བ་འདུས་པའི་མན་ངག་རྣམས་བླ་མ་འདིས་རིག་པའི་ཁུ་བྱུག་ལ་གསན་ཏེ། བཀའ་གདམས་གླེགས་བམ་ལས། ཀླུ་སྒྲུབ་ཟླ་གྲགས་རིག་པའི་ཁུ་བྱུག་དང་། ། བླ་མ་ཨ་ཝ་ངྷུ་ཏི་ཆེ་ཆུང་གཉིས། ། ལྟ་བའི་བླ་མ་ལྔ་ལ་ཕྱག་འཚལ་ལོ། ། ཞེས་གསུངས་པ་ལྟར་རོ། ། ཡེ་ཤེས་ཞབས་ལུགས་ཀྱི་མན་ངག་མཐའ་དག་བླ་མ་འདིས་སློབ་དཔོན་སངས་རྒྱས་ཞི་བ་ལ་གསན་ཏེ་བཀའ་གདམས་གླེགས་བམ་ལས། སངས་རྒྱས་ཡེ་ཤེས་ཞབས་དང་གསང་བ་པ། ། ཞི་བ་ཀུ་སུ་ལུ་དང་ཀུ་སུ་ལུ། ། གསང་སྔགས་མ་ལུས་བདག་ལ་སྦྱིན་མཛད་པའི། ། དྲིན་ཅན་བླ་མ་ལྔ་ལ་ཕྱག་འཚལ་ལོ། ། ཞེས་གསུངས་པ་ལྟར་རོ། ། རྣལ་འབྱོར་རྒྱུད་ཀྱི་མན་ངག་རྣམས་བླ་མ་འདིས་སངས་རྒྱས་ཞི་བའམ་སངས་རྒྱས་གསང་བ་གང་རིགས་ལས་གསན་ཏེ་བཀའ་གདམས་གླེགས་བམ་ལས། སངས་རྒྱས་ཡེ་ཤེས་སངས་རྒྱས་ཞི་བ་དང་། ། སངས་རྒྱས་གསང་བ་དང་ནི་ཀུ་སུ་ལུ། ། ཀུ་སུ་ལུ་ཞེས་ཀྲི་ཡ་ཡོ་ག་ཡི། ། གདམས་པ་སྦྱིན་མཛད་ལྔ་ལ་ཕྱག་འཚལ་ལོ། ། ཞེས་གསུངས་པ་ལྟར་རོ། ། མཁས་གྲུབ་ཆེན་པོ་སངས་རྒྱས་བསྐྱང་ནས་བརྒྱུད་པའི་མན་ངག་རྣམས་ཀྱང་འདིས་ཡོངས་སུ་རྫོགས་པར་གསན་ཏེ། བཀའ་གདམས་གླེགས་བམ་ལས། མཁས་གྲུབ་ཆེན་པོ་བུངྔྷ་པཱ་ལི་དང་། ། སངས་རྒྱས་ཡེ་ཤེས་སངས་རྒྱས་ཞི་བ་དང་། ། སངས་རྒྱས་གསང་བ་མཉམ་མེད་ཀུ་སུ་ལུ། ། རྩ་བའི་བླ་མ་དྲིན་ཅན་ཀུ་སུ་ལུ། ། བྱིན་བརླབས་བླ་མ་དྲུག་ལ་ཕྱག་འཚལ་ལོ། ། ཞེས་གསུངས་པ་ལྟར་རོ། ། ཡང་བླ་མ་ཀུ་ས་ལི་འདིས་ཐེག་པ་ཆེན་པོའི་ལམ་གྱི་རིམ་པའི་མན་ངག་རྣམས་སློབ་དཔོན་བློ་གྲོས་བརྟན་པ་ལ་ཡང་གསན་ཏེ་བཀའ་གདམས་གླེགས་བམ་ལས། བྱམས་པ་ཐོགས་མེད་དབྱིག་གཉེན་བློ་གྲོས་བརྟན། ། ཀུ་སུ་ལུ་གཉིས་བླ་མ་གསེར་གླིང་པ། ། བྱང་ཆུབ་མཆོག་ཏུ་སེམས་སྐྱེད་སྦྱིན་མཛད་པའི། ། དྲིན་ཅན་བླ་མ་བདུན་ལ་ཕྱག་འཚལ་ལོ། ། ཞེས་གསུངས་པ་ལྟར་རོ། ། དེ་ལྟར་མདོ་སྔགས་ཀྱི་མན་ངག་མཐའ་དག་ཀུ་ས་ལི་ཆེ་བ་འདི་ལ་མངའ་བས་ན། དོན་འདི་ལ་དགོངས་ནས་རྗེ་བདག་ཉིད་ཆེན་པོས། རྒྱལ་བའི་མན་ངག་ཀུན་འཛིན་ཞེས་བསྔགས་པ་མཛད་དོ། ། བདག་ཉིད་ཆེན་པོ་འདི་ནི་རྒྱལ་བའི་དམ་ཆོས་མ་ལུས་པ་འཛིན་པའི་སྨོན་ལམ་གྱི་མཐུ་གྲུབ་པ་ཞིག་སྟེ། འདིས་མདོ་སྔགས་ཀྱི་མན་ངག་མཐའ་དག་གསན་ནས་ཀུ་ས་ལི་ཆུང་བ་ལ་ཡོངས་སུ་རྫོགས་པ་གནང་། ཀུ་ས་ལི་ཆུང་བས་ཇོ་བོ་རྗེ་དཔལ་ལྡན་ཨ་ཏི་ཤ་ལ་ཡོངས་སུ་རྫོགས་པར་གནང་སྟེ་ཇོ་བོ་མདོ་སྔགས་ཡོངས་རྫོགས་ཀྱི་བསྟན་པའི་བདག་པོར་བཞུགས་པ་འདི་བྱུང་བ་ཡིན་པས་ཀུ་ས་ལི་ཞེས་བྱ་བའི་བདག་ཉིད་ཆེན་པོ་འདི་ནི་སྤྱིར་འཛམ་བུ་གླིང་པ་ཐམས་ཅད་དང་། ཁྱད་པར་ཁ་བ་ཅན་པ་རྣམས་ལ་བཀའ་དྲིན་མཚུངས་མེད་དུ་གྱུར་པ་ཡིན་ནོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་ཀུ་ས་ལི་ཆེ་བ་ལ་གསོལ་བ་འདེབས་ཤིང་སངས་རྒྱས་ནས་བཟུང་སྟེ་དམ་པ་བར་མ་ཆད་པ་ལས་བརྒྱུད་པའི་ལམ་གྱི་རིམ་པའི་མན་ངག་རྣམས་ཚང་བར་ཐོབ་པར་བྱས་ལ་དབེན་པའི་གནས་སུ་བྱང་ཆུབ་ལམ་གྱི་རིམ་པའི་ཉམས་ལེན་ལ་བརྩོན་པར་བྱའོ། ། ། །
༈ འགྲོ་ཀུན་བརྩེ་བས་རྗེས་འཛིན་དགེ་བ་ཅན། ཞེས་བསྔགས་པ། དགེ་བ་ཅན་ནམ་ཀུ་ས་ལི་ཆུང་བ། མཚན་དངོས་རིན་ཆེན་སྡེ། རྗེས་སུ་ཐུགས་དམ་ཉམས་རྟོགས་ལས་དཔགས་ཏེ་མཚན་དུ་གསོལ་བ་བླ་མ་བྱམས་པའི་རྣལ་འབྱོར་པ་ཞེས་གྲགས་པ་འདི་ནི། ལུང་དང་རྟོགས་པའི་ཡོན་ཏན་གྱིས་མངོན་པར་མཐོ་བ་ཐུབ་བསྟན་ཡོངས་རྫོགས་ཀྱི་བདག་པོར་བཞུགས་པ་ཞིག་སྟེ། སྐུ་གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་། བརྙེན་པར་རྫོགས་པའི་སྡོམ་པ་བཞེས་ནས་སྡེ་སྣོད་གསུམ་ལ་སྦྱངས་ཏེ་མཁས་པའི་ཕུལ་དུ་ཕྱིན་པར་གྱུར་ཅིང་། ཀུ་ས་ལི་ཆེ་བ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པའི་མན་ངག་མཐའ་དག་གསན་ཏེ་ཡོངས་སུ་རྫོགས་པ་ཐུགས་ལ་ཆུད་པར་མཛད། གདམས་ངག་དེ་དག་ཐམས་ཅད་ཀྱང་ཐོས་པ་ཙམ་ཞིག་ཏུ་མ་ལུས་པར་མན་ངག་སོ་སོ་ལ་སྦྱངས་ཏེ་ཉམས་ལེན་སྙིང་པོར་མཛད་ནས་གདམས་ངག་སོ་སོའི་ནུས་པ་ཐོན་པར་མཛད་ཅིང་། ལྷག་པར་རྗེ་བཙུན་བྱམས་པ་ནས་བརྒྱུད་པའི་རྒྱ་ཆེ་བའི་ལམ་གྱི་རིམ་པ་དང་། དཔལ་མགོན་འཕགས་པ་ཀླུ་སྒྲུབ་ནས་བརྒྱུད་པའི་ཟབ་མོའི་ལམ་གྱི་རིམ་པ་གཉིས་ལམ་གྱི་རིམ་པ་གཅིག་ཏུ་དྲིལ་པ་ཐེག་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་ལ་ཆུ་བོའི་རྒྱུན་བཞིན་དུ་ཡུན་བསྲིངས་ནས་ཉམས་ལེན་མཛད་པས་ལམ་གྱི་རིམ་པའི་རྟོགས་པ་ཡོངས་སུ་རྫོགས་པ་ཐུགས་ལ་འཁྲུངས་ཤིང་། དེའི་ནང་ནས་ཀྱང་བྱམས་སྙིང་རྗེ་བྱང་ཆུབ་ཀྱི་སེམས་ལ་ཐུགས་དམ་གྱི་མཐིལ་དུ་མཛད་པས་བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་བཅོས་མ་མིན་པ་ཐུགས་ལ་འཁྲུངས་ཏེ། བླ་མ་འདི་ཆོས་གསུང་བའི་རྩ་རུ་མི་གཅིག་གིས་ཁྱི་ལ་དབྱུག་པ་བརྒྱབ་པས། བླ་མ་ཨ་གསུངས་ནས་འགྱེལ་བ་ལ་གཞན་རྣམས་ཀྱི་རྟོག་པ་ལ་ཁྱི་ལ་ཅི་ཡང་མི་སྟོ་བར་འདུག་པ་ལ་ཚུལ་འཚོས་རེ་ཆེ་སྙམ་པ་བྱུང་བས། བླ་མས་དེ་མཁྱེན་ནས་སྐུ་རྒྱབ་བསྟན་པས་ཁྱི་ལ་བརྒྱབ་པའི་ཐད་ན་ཁྱུ་རེ་སྐྲངས་འདུག་པས་ཐམས་ཅད་ཡིད་ཆེས་སོ། ། དེ་ལྟར་ཀུ་ས་ལི་ཆུང་བའམ་བླ་མ་བྱམས་པའི་རྣལ་འབྱོར་པ་ཞེས་བྱ་བ་དེ་ནི་དབེན་པའི་གནས་སུ་བྱམས་སྙིང་རྗེ་བྱང་ཆུབ་ཀྱི་སེམས་ལ་ཐུགས་དམ་གཙོ་བོར་མཛད་ནས། ཀྭ་ཡེ་ཕ་མར་གྱུར་པའི་འགྲོ་བ་མ་ལུས་་དྲང་བའི་ཕྱིར། ། བདག་ལ་ཡོད་པའི་ཉོན་མོངས་དུག་ལྔ་གང་དག་གིས། ། སེམས་ཅན་རྣམས་ཀྱི་དུག་ལྔ་མ་ལུས་དྲང་བར་བྱ། ། འདོད་ཆགས་ལ་སོགས་མེད་པའི་དགེ་བ་གང་ཡོད་རྣམས། ། འགྲོ་དྲུག་སེམས་ཅན་རྣམས་ལ་སྙོམས་པར་བྲིམས་པར་བྱ། ། ན་ཚ་ལ་སོགས་འབྲས་བུར་གྱུར་པའི་སྡུག་བསྔལ་གྱིས། ། དེ་དང་རིགས་མཐུན་སྡུག་བསྔལ་མ་ལུས་དྲང་བར་བྱ། ། ན་ཚ་ལ་སོགས་མེད་པའི་ཕན་བདེ་གང་ཡིན་དེ། ། འགྲོ་དྲུག་སེམས་ཅན་རྣམས་ལ་སྙོམས་པར་བྲིམས་པར་བྱ། ། དེ་ལྟར་བྱས་ན་རང་ཉིད་འཁོར་བའི་རྒྱ་མཚོ་འདིར། ། སྐད་ཅིག་ཙམ་ཡང་འཁྱམ་པའི་གོ་སྐབས་ག་ལ་སྲིད། ། འོན་ཀྱང་ཇི་སྲིད་བྱང་ཆུབ་མ་ཐོབ་བར། ། མྱོང་འགྱུར་ཉོན་མོངས་རྒྱུ་འབྲས་ཇི་སྙེད་པ། ། ཐམས་ཅད་སྐྱེ་བ་འདི་ལ་ཡོངས་སུ་རྫོགས་པར་བྱ། ། དེ་ཡང་ད་ལོ་ཟླ་བ་འདི་ལ་དྲང་བར་བྱ། ། དེ་ཡང་དེ་རིང་ད་ལྟ་ཉིད་དུ་རྫོགས་བྱས་ནས། ། སྡུག་བསྔལ་བྲང་བྲེང་རབ་ཆད་ཙམ་ཞིག་ཐབས་སུ་བསྟེན། ། བློ་འདི་འབྱོངས་པར་གྱུར་ཅིག་བྱམས་པའི་རྣལ་འབྱོར་པ། ། ཞེས་བྱམས་སྙིང་རྗེ་བྱང་ཆུབ་ཀྱི་སེམས་གྱི་ཉམས་མགུར་མཛད་ཅིང་ཆུ་བོ་གངྒཱའི་འགྲམ་དུ་སྒོམ་ཞིང་བཞུགས་པ་ན། རྗེ་བཙུན་བྱམས་པ་མགོན་པོ་མདུན་དུ་བྱོན་ནས་ཞལ་བསྟན་ཏེ། ཐོས་པ་ཙམ་གྱིས་ངན་འགྲོའི་སྡུག་བསྔལ་སེལ་བའི་གླུ། ། བསམ་པ་ཙམ་གྱིས་འཁོར་བའི་ལྗོན་པ་གཅོད་པའི་གླུ། ། བསྒོམས་པ་ཙམ་གྱིས་བྱང་ཆུབ་མྱུར་དུ་འབྱིན་པའི་གླུ། ། བྱམས་པ་སྙིང་རྗེ་བྱང་ཆུབ་སེམས་ཀྱི་གླུ་འདི་མཚར། ། ཉོན་མོངས་དུག་ལྔས་དགྲ་བཞིན་འཇོམས་པར་རིག་ན་ཡང་། ། ཁྱོད་ཀྱི་འདི་ལྟར་ན་ནི་རྒྱུད་ལ་བསྟེན་པ་མཚར། ། ན་ཚ་སྡུག་བསྔལ་ཀུན་ནས་བཟོད་པར་དཀའ་ན་ཡང་། ། ཁྱོད་ཀྱི་འདི་ལྟར་ན་ནི་ངོ་མཚར་རྨད་དུ་བྱུང་། ། རང་དོན་ཡལ་བར་དོར་ནས་གཞན་དོན་ལྷུར་མཛད་ཚེ། ། རང་དབང་མེད་པར་འཁོར་བར་འཁྱམས་པ་སུ་ཡི་བཀའ། ། དེས་ན་རང་དོན་བསམ་པ་སྐད་ཅིག་མ་འཁྲིས་པར། ། གཞན་གྱི་མི་འདོད་བདག་གིས་ལན་པ་དམ་པ་ཡིན། ། ཐེག་པ་ཆེན་པོའི་གསུང་རབ་མཐའ་ཡས་མུ་མེད་ཀྱང་། ། འདི་རུ་མ་འདུས་རྡུལ་ཙམ་གང་ཡང་ཡོད་མ་ཡིན། ། དེ་ཕྱིར་རྣལ་འབྱོར་ཁྱོད་ཀྱི་རྡོ་རྗེའི་གླུ་དབྱངས་འདི། ། ཐོས་སམ་བསམ་མམ་བསྒོམ་མམ་བཤད་ཀྱང་རུང་། ། འཇིག་རྟེན་ལྷ་དང་བཅས་པའི་སྐྱབས་གནས་དམ་པ་སྟེ། ། ཕྱོགས་བཅུའི་རྒྱལ་བ་རྣམས་ཀྱི་ཐུགས་ཀྱི་ཉིང་ཁུ་དེ། ། ཁྱོད་ཀྱི་བློ་ལ་ཤར་བ་ངོ་མཚར་ཤིན་ཏུ་ཆེ། ། ཞེས་ཐུགས་ཤིན་ཏུ་མཉེས་པའི་སྒོ་ནས་དབུགས་དབྱུང་བར་མཛད་པས། བྱམས་སྙིང་རྗེའི་རྟོགས་པ་རྒྱ་ཆེར་འཕེལ་ཞིང་ཐེ་ཚོམ་གྱི་མདུད་པ་གྲོལ་ནས། མཐོང་ཐོས་དྲན་རེག་ཐམས་ཅད་ལ་ཕན་པའི་ནུས་པ་ཐོབ་སྟེ། འདི་ལྟར་ཉིན་ལན་གསུམ་མཚན་ལན་གསུམ་དུས་དང་གནས་སྐབས་ཐམས་ཅད་དུ་དྲན་པ་བརྗེད་པ་མ་མཆིས་པར་ཆོས་འདི་བློ་ལ་སྦྱངས་ཤིང་ཁམས་བསོས་རྡོ་རྗེའི་གླུ་དབྱངས་འདི་བླངས་པས། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་སྡིང་དང་། མི་འམ་ཅི་དང་། ལྟོ་འཕྱེའི་ཚོགས་དང་། ཤ་ཟ་དང་། སྲིན་པོ་ལ་སོགས་པ་མ་རང་གི་བུ་གཅིག་པུ་ལ་བྱམས་པ་བཞིན་དུ་གུས་པར་དབང་དུ་འདུས་པར་གྱུར་ཏོ། ། གཞན་ཡང་ཡུལ་གྱི་རྒྱལ་པོ་དང་། བློན་པོ་དང་། བཙུན་མོ་དང་། བྲམ་ཟེ་དང་། ཁྱིམ་བདག་དང་། ཁྱེའུ་བུ་མོ་དམང་རིགས་ལ་སོགས་པ་ཐམས་ཅད་དབང་དུ་འདུས་ཏེ། དགའ་བས་རྗེས་སུ་འབྲང་ཞིང་མཐོང་བ་དང་ཐོས་པ་ཐམས་ཅད་ཀྱང་བྱམས་པའི་རང་བཞིན་ཅན་དུ་གྱུར་ཏོ། ། གཞན་ཡང་རྟ་དང་གླང་པོ་དང་མ་ཧེ་དང་སྤྲེའུ་དང་འདབ་ཆགས་རྣམས་དང་། གཅན་གཟན་གྱི་ཚོགས་རྣམས་དང་། ཐ་ན་སྲོག་ཆགས་གྲོག་སྤུར་ཡན་ཆད་མི་འཇིགས་ཤིང་། བག་ཕེབས་པར་རྣལ་འབྱོར་པའི་དྲུང་དུ་འཁོད་པར་གྱུར་ཏོ། ། དེ་ལྟར་རྣལ་འབྱོར་པའི་ཐུགས་ཀྱིས་དགོངས་ནས་སླར་ཡང་། ཐོག་མེད་དུས་ནས་ཉེ་བར་འབྲེལ་བ་ཡི། ། ཕ་མར་གྱུར་པའི་སེམས་ཅན་མ་ལུས་པ། ། བྱང་ཆུབ་མཆོག་ལ་འགོད་པའི་ཡི་དམ་བསམ། ། ཆོས་འདིས་བྱམས་པ་མགོན་ལ་མཆོད་པར་བགྱི། ། དེ་ཚེ་རང་དོན་སྐད་ཅིག་མ་འཁྲིས་པར། ། གཞན་དོན་འབའ་ཞིག་སྙིང་ལ་གོམས་པར་བྱ། ། འདི་ནི་བྱང་ཆུབ་བསྒྲུབ་པའི་གཙོ་བོ་ཡིན། ། ཆོས་འདིས་བྱམས་པ་མགོན་ལ་མཆོད་པར་བགྱི། ། བདེ་སྡུག་བཏང་སྙོམས་ཚོར་བ་ཅི་བྱུང་ཡང་། ། བྱང་ཆུབ་འབྱིན་པའི་གྲོགས་སུ་དང་དུ་བླངས། ། བསྐལ་པ་དུ་མར་བསོད་ནམས་ཅི་གསོག་ཀྱང་། ། ཉན་ཐོས་སྡར་མའི་ཆོས་སུ་ཤོར་མ་གྱུར། ། ཆོས་འདིས་བྱམས་པ་མགོན་ལ་མཆོད་པར་བགྱི། ། དེ་ཙམ་ཞིག་ཏུ་མི་འདོད་ཅི་བྱུང་ཡང་། ། བཟོད་པའི་གོ་ཆ་ཅུང་ཟད་ཤོར་མ་གྱུར། ། ལྷག་པར་དྲིན་གྱིས་བསྐྱངས་པའི་སྐྱེ་བོ་ཡིས། ། ལོག་སྒྲུབ་བྱས་ཀྱང་འཛུམ་པའི་བཞིན་གྱིས་བསྐྱངས། ། ཆོས་འདིས་བྱམས་པ་མགོན་ལ་མཆོད་པར་བགྱི། ། སྡང་བའི་སྐྱེ་བོའི་ཕྱོགས་ནས་སྡིག་བསགས་ཀྱང་། ། ངན་པའི་བསམ་པ་སྐད་ཅིག་ཤོར་མ་གྱུར། ། སྣང་སྲིད་བདུད་དང་ལྷ་འདྲེ་དགྲར་ལངས་ཀྱང་། ། རང་འདོད་འཁྲིས་པའི་བསྲུང་སྐྱོབ་བྱེད་མ་མྱོང་། ། ཆོས་འདིས་བྱམས་པ་མགོན་ལ་མཆོད་པར་བགྱི། ། ངེས་པར་འཆི་བའི་ནད་ཀྱིས་བཏབ་གྱུར་ཀྱང་། ། ཆོས་མིན་དག་ལ་ཡིད་བརྟན་འཆའ་མ་མྱོང་། ། སེར་སྣ་གོམ་པས་འབྱོར་པ་ཆུང་ན་ཡང་། ། ལོག་པའི་འཚོ་བས་ལྟོ་གོས་བྱེད་མ་མྱོང་། ། ཆོས་འདིས་བྱམས་པ་མགོན་ལ་མཆོད་པར་བགྱི། ། ངན་པའི་གྲོགས་ཀྱིས་ཀུན་ནས་བསྐོར་ན་ཡང་། ། གཉེན་པོའི་རང་ཚུགས་གང་ལའང་བསྐྱེལ་མ་མྱོང་། ། མདོར་ན་འགྲོ་འམ་འདུག་གམ་ཅི་བྱེད་ཀྱང་། ། མ་བཏགས་བྱ་བ་གང་ཡང་བྱེད་མ་མྱོང་། ། ཆོས་འདིས་བྱམས་པ་མགོན་ལ་མཆོད་པར་བགྱི། ། དེ་ལྟར་ཡིན་མོད་འོན་ཀྱང་ཆོས་རྣམས་ལ། ། བདེན་པར་རྟོག་པ་རྡུལ་ཙམ་ཡོང་མ་མྱོང་། ། འདི་ནི་བྱང་ཆུབ་བསྒྲུབ་པའི་གཙོ་བོ་ཡིན། ། ཆོས་འདིས་བྱམས་པ་མགོན་ལ་མཆོད་པར་བགྱི། ། དེ་ལྟར་སྒྲུབ་པའི་མཆོད་པ་དམ་པ་འདི། ། རྣལ་འབྱོར་བདག་གི་བསམ་པ་སྦྱང་བའི་ཕྱིར། ། བྱམས་པའི་དཔུང་གིས་ཡོན་འདི་བཞེས་སུ་གསོལ། ། བཞེས་ལ་བློ་འདི་འབྱོངས་པར་མཛད་དུ་གསོལ། ། ཞེས་རྗེ་བཙུན་བྱམས་པ་མགོན་པོ་ལ་སྒྲུབ་པའི་མཆོད་པ་རྒྱ་ཆེར་ཕུལ། དེའི་ཚེ་བར་སྣང་ལ་མཆོད་པའི་ལྷ་མོ་ལྔ་དང་། སྒྲ་དང་འོད་ལ་སོགས་པ་ཡིད་དུ་འོང་བའི་མཆོད་པ་གཞན་ཡང་དཔག་ཏུ་མེད་པའི་རྣམ་པར་བྱུང་བར་གྱུར་ཏོ། ། དེའི་ཚེ་བྱམས་པའི་རྣལ་འབྱོར་པ་ལ་བློ་སྦྱོང་འདི་ཞུ་བ་ཆེས་མང་དུ་བྱུང་ཡང་གཙོ་བོར་གྱུར་པ་ནི་ཇོ་བོ་རྗེ་ཉིད་དེ། ། ཇོ་བོ་རྗེ་དཔལ་ལྡན་ཨ་ཏི་ཤ་ཐུབ་བསྟན་ཡོངས་རྫོགས་ཀྱི་བདག་པོར་གྱུར་པ་དང་། ལྷག་པར་བྱང་ཆུབ་ཀྱི་སེམས་ཀྱི་མངའ་བདག་ཏུ་གྱུར་ནས་ཁ་བ་ཅན་གྱི་གདུལ་བྱ་དམུ་རྒོད་ཅན་མཐའ་དག་བྱང་ཆུབ་ཀྱི་སེམས་རིན་པོ་ཆེའི་བྱིན་རླབས་ཀྱིས་སྐུ་མཐོང་བ་དང་གསུང་ཐོས་པ་ཐམས་ཅད་རང་དབང་མེད་པར་སེམས་དུལ་བར་འགྱུར་བ་དང་། ཐ་ན་མཚན་ཐོས་པ་ཙམ་གྱིས་ཀྱང་ཉོན་མོངས་པའི་གདུག་རྩུབ་ཞི་ནས་དད་པས་ཆོས་ལ་འདུན་པར་འགྱུར་བ་ད་ལྟའི་བར་དུ་བྱིན་རླབས་རྒྱུན་མ་ཆད་པ་འདི་བྱུང་བ་ཡིན་ནོ། ། དེས་ན་བྱང་ཆུབ་ལམ་རིམ་ལ་ཉམས་ལེན་སྙིང་པོར་བྱ་འདོད་པ་རྣམས་ཀྱི་ཀུ་ས་ལི་ཆུང་བ་སྐྱེས་མཆོག་བྱམས་པའི་རྣལ་འབྱོར་བ་ཆེན་པོ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་དྲན་པར་བྱས་ལ་བྱང་ཆུབ་ལམ་གྱི་རིམ་པ་ལ་བློ་སྦྱོང་ཞིང་ཁྱད་པར་བྱམས་སྙིང་རྗེ་བྱང་ཆུབ་ཀྱི་སེམས་དགེ་སྦྱོར་གྱི་མཐིལ་དུ་བཟུང་བར་བྱའོ། ། ཀུ་ས་ལི་ཆེ་ཆུང་གཉིས་པོ་འདི་གང་དུ་འཁྲུངས་པའི་ཡུལ་ཇི་ལྟར་ཡིན་པ་སོགས་རྣམ་ཐར་རྒྱས་པ་མ་མཐོང་བས་སླར་རྙེད་ན་འདིར་བསྣན་པར་བྱའོ། ། ། །
༈ བྱང་ཆུབ་ཐུགས་ལ་མངའ་བརྙེས་གསེར་གླིང་པ། ། ཞེས་བསྔགས་པ། སེམས་དཔའ་ཆེན་པོ་གསེར་གླིང་པ་ཆོས་ཀྱི་གྲགས་པ་ཞེས་བྱ་བ་དེ་ནི་ཚེ་རབས་མང་པོར་བྱང་ཆུབ་ཀྱི་སེམས་ལ་གོམས་པར་མཛད་པས་ཐུགས་སྙིང་རྗེའི་དབང་དུ་གྱུར་ཏེ་ཐེག་པ་ཆེན་པོའི་བསྟན་པའི་སྲོག་འཛིན་པའི་སྨོན་ལམ་རླབས་པོ་ཆེའི་མཐུ་གྲུབ་སྟེ་གསེར་གླིང་དུ་རྒྱལ་པོའི་སྲས་སུ་སྐུ་འཁྲུངས། གསེར་གླིང་དེ་ནི་གླིང་བཞི་དང་གླིང་ཕྲན་བརྒྱད་གང་ཡང་མིན་ཞིང་། འཛམ་བུའི་གླིང་དང་ཅུང་ཟད་ཉེ་བའི་ཕྱོགས་ན་མཐའ་རྒྱ་མཚོས་བསྐོར་ཞིང་གསེར་དང་དངུལ་ལ་སོགས་པ་རིན་པོ་ཆེ་མང་པོའི་འབྱུང་ཁུངས་ཡོད་པ། ཕྱོགས་ཐམས་ཅད་ནགས་ཚལ་སྡོན་པོའི་འཕྲེང་བ་འཁྲིགས་པས་བརྒྱན་པ། མེ་ཏོག་པངྨ་དང་ཨུཏྤལ་ལ་སོགས་པ་ཡིད་དུ་འོང་བ་མང་པོ་སྐྱེ་བའི་གནས་ལྷའི་དགའ་ཚལ་ལྟ་བུ་ཞིག་ཡོད་དེ། རང་བཞིན་གྱི་དཔའ་བོ་དང་རྣལ་འབྱོར་མ་མང་པོ་བཞུགས་པའི་གནས་ཡུལ་ཉེར་བཞིའི་ནང་ནས་སུ་ཝརྞ་དཱི་པ་ཞེས་པ་དེ་ཡིན་པར་གྲགས་སོ། ། དེ་འདྲ་བའི་གླིང་དེར་རྒྱལ་སྲས་བདག་ཉིད་ཆེན་པོ་འདི་རྒྱལ་པོའི་སྲས་སུ་འཁྲུངས་ནས་རིང་པོ་མ་ལོན་པར་སི་ན་སི་ན་ཞེས་དཀོན་མཆོག་ལ་སྐྱབས་སུ་འགྲོ་བའི་ཚིག་རྒྱུན་དུ་བརྗོད་པ་ཞིག་བྱུང་། ཡུལ་དེར་རེས་སངས་རྒྱས་ཀྱི་བསྟན་པ་དར། རེས་མུ་སྟེགས་དར་བ་ལས་དེ་སྐབས་མུ་སྟེགས་དར་བའི་སྐབས་ཡིན་ཡང་རྒྱལ་པོའི་སྲས་སུ་སོང་བས་སུས་ཀྱང་བཟློག་པར་བྱེད་མ་ནུས་སོ། ། རྒྱལ་བུ་དེ་ཆེར་སྐྱེས་ནས་རི་ཕུག་ཅིག་ནས་རྒྱལ་བ་ཤཱཀྱ་ཐུབ་པའི་སྐུ་ལི་མ་གཅིག་རྙེད་དེ་བྱུང་། དེ་ལ་མཆོད་པ་སྣ་ཚོགས་བྱས་པས་གླིང་དེ་སྔར་ལས་བདུན་འགྱུར་གྱིས་ལོ་ལེགས་པ་དང་། ནད་མེད་པ་དང་གནོད་པ་ཉུང་བ་ལ་སོགས་པ་བཀྲ་ཤིས་པར་གྱུར་ཏོ། ། དེས་གསེེར་གླིང་པ་ཐམས་ཅད་སངས་རྒྱས་ཀྱི་བསྟན་པ་ལ་དད་ནས་རྒྱལ་བུ་འདི་ཆོས་འཚོལ་དུ་བཏང་བ་དྲག་ཟེར་བས་རྒྱལ་བུ་ཤིན་ཏུ་དགྱེས་ནས། འཛམ་བུ་གླིང་དུ་བྱོན་པས་རྡོ་རྗེ་གདན་དུ་སྲིན་པོ་རྣམས་མཆོད་པ་ལ་འོངས་པ་དང་དུས་མཚུངས་པར་གྱུར། དེའི་ཚེ་གང་ཟག་ཡོན་ཏན་ཅན་ཐམས་ཅད་དེར་འདུ་བ་ཡིན་པས་མཁས་པ་དང་གྲུབ་པ་མང་པོ་འདུས་ཀྱང་བླ་མ་འདི་དམ་པ་གཞན་ལ་མོས་པ་མ་སྐྱེས། མ་ཧཱ་ཤྲཱི་རཏྣ་ལ་མོས་པ་ཆེར་སྐྱེས་ནས་ཞག་བདུན་འགྲོགས་ནས་སློབ་དཔོན་དེ་མེད་དེ་སོང་། རྒྱལ་བུས་ཕྱོགས་ཀུན་ཏུ་བཙལ་ཅིང་དྲིས་ཀྱང་མ་རྙེད་པས་ངལ་ནས་གཉིད་ལོག་པའི་རྨི་ལམ་དུ་བྱིས་པ་གཉིས་གླུ་ལེན་པ་ལ། རང་ཡུལ་འཁོར་དང་ལོངས་སྤྱོད་བོར། ། སྨིན་པ་གཅིག་གིས་རྩད་མ་ཆོད། ། རིང་ནས་ཕུང་ངམ་མྱུར་དུ་ཕུང་། ། རིགས་དག་བཟང་སྟེ་ཤེས་རབ་ཆུང་། ། ཟེར་བ་རྨིས། དེར་རྒྱལ་བུ་གཉིད་སད་པ་ན་སློབ་དཔོན་མ་ཧཱ་ཤྲཱི་རཏྣ་ཞེས་སྐྱེས་མཆོག་བྱམས་པའི་རྣལ་འབྱོར་པ་ཆེན་པོ་དངོས་སུ་བཞུགས་པ་མཐོང་བ་ན་དད་གུས་ཚད་མེད་པས་མཎྜལ་ཕུལ་ཏེ་གསོལ་བ་བཏབ་པས་བླ་མ་དེས་དགྱེས་བཞིན་དུ་ཞལ་གྱིས་བཞེས་ནས་རྒྱལ་བའི་བསྟན་པ་རབ་ཏུ་བྱུང་ཞིང་བསྙེན་པར་རྫོགས་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པའི་མན་ངག་ཕལ་མོ་ཆེ་གསན། ཁྱད་པར་དུ་ཡང་རྒྱལ་བའི་དགོངས་པ་ཤིང་རྟ་ཆེན་པོ་གཉིས་ཀྱིས་བཀྲལ་བའི་མན་ངག་ཟབ་པ་དང་རྒྱ་ཆེ་བའི་ལམ་གྱི་རིམ་པའི་ལུས་ཡོངས་སུ་རྫོགས་པ་སྐྱེས་བུ་གསུམ་གྱི་ལམ་གྱི་རིམ་པ་མཐའ་དག་པར་གསན་པས་སྣོད་གཅིག་ནས་གཅིག་ཏུ་བྱོ་བ་བཞིན་དུ་ཐུགས་སུ་ཆུད། མཚན་ཡང་གསེར་གླིང་པ་ཆོས་ཀྱི་གྲགས་པ་ཞེས་བཏགས། རྒྱ་གར་གྱི་མཁས་གྲུབ་གཞན་མང་པོ་ལའང་མདོ་སྔགས་ཀྱི་ཆོས་མང་དུ་གསན་ཞིང་། གཙོ་ཆེར་བླ་མ་བྱམས་པའི་རྣལ་འབྱོར་བ་ཆེན་པོ་ལ་བརྟེན་ཏེ་ལོ་བདུན་གྱི་རིང་ལ་ཆོས་གསན་པ་དང་བྱང་ཆུབ་ལམ་གྱི་རིམ་པ་བསྒོམ་བཞིན་བཞུགས་པས་ལམ་གྱི་རིམ་པའི་དམིགས་སྐོར་མཐའ་དག་ལ་ཉམས་མྱོང་གི་རྟོགས་པ་ཕུལ་དུ་བྱུང་བ་ཐོབ། མངོན་པར་རྟོགས་པའི་རྒྱན་དང་ཤེར་ཕྱིན་གྱི་མདོ་སྤྱར་བའི་མན་ངག་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར། ཁྱད་པར་དུ་ཡང་མགོན་པོ་འཇམ་པའི་དབྱངས་ནས་རྒྱལ་སྲས་ཞི་བ་ལྷ་ལ་བརྒྱུད་པའི་མན་ངག་བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་རླབས་ཆེན་པོ་ཐུགས་ལ་འཁྲུངས་ཏེ་དེ་ཁོ་ན་ཐུགས་དམ་གྱི་མཐིལ་དང་། ས་ལམ་འབྲས་བུ་དང་བཅས་པ་གཞན་ཐམས་ཅད་དེའི་ཡན་ལག་ཏུ་འགྲོ་བ་ཞིག་བྱུང་བས་དུས་དེའི་ཚེ་བྱང་ཆུབ་ཀྱི་སེམས་ཀྱི་བདག་པོར་གྲགས། དོན་གྱི་དབང་འདི་གཟིགས་ནས་རྗེ་བདག་ཉིད་ཆེན་པོས་བྱང་ཆུབ་ཐུགས་ལ་མངའ་བརྙེས་ཞེས་བསྔགས་པ་མཛད་པ་ཡིན་ནོ། ། བྱམས་སྙིང་རྗེ་བྱང་ཆུབ་ཀྱི་སེམས་ཆེས་ཆེར་རྒྱས་པས་སྐྱེ་བོ་རྣམས་ཀྱིས་མཻ་ཏྲི་པ་ཞེས་བྱམས་པའི་མཚན་ནས་འབོད་དེ། འདི་ལ་གསེར་གླིང་མཻ་ཏྲི་པ་ཞེས་གྲགས་སོ། ། དེ་ནས་གསེར་གླིང་པས་ཐུགས་ལ་བཞེད་པའི་དོན་ཐམས་ཅད་གྲུབ་ནས་གསེར་གླིང་དུ་བྱོན་ཏེ་རྒྱལ་བའི་བསྟན་པ་རྒྱ་ཆེར་སྤེལ་བས་ཡུལ་དེའི་སྐྱེ་བོ་ཐམས་ཅད་ཀྱི་གཙུག་གི་ནོར་བུ་ལྟ་བུར་གྱུར་ཏོ། ། དེ་ནས་གསེར་གླིང་པས་ཡུལ་དེའི་སྐྱེ་བོ་ཐམས་ཅད་དང་འཛམ་བུའི་གླིང་ནས་ཆོས་དོན་གཉེར་གྱིས་ལྷགས་པ་ཐམས་ཅད་ལ་ཐེག་པ་ཆེན་པོའི་ཆོས་རྒྱ་ཆེར་བསྟན་ཏེ་ཆོས་ཀྱིས་མཐོ་བའི་ཁང་བཟང་མི་ཡུལ་དུ་བབས་པ་འདྲ་བར་ཐེག་ཆེན་པོའི་ཆོས་ཀྱི་སྒྲ་དབྱངས་ཀྱིས་ཕྱོགས་ཀུན་ཏུ་ཁྱབ་ཅིང་ཡུལ་དེའི་སྐྱེ་བོ་ཕལ་པ་དག་ཀྱང་དཀོན་གསུམ་ལ་སྐྱབས་སུ་འགྲོ་བའི་ཚིག་ཁོ་ན་ཁ་ཏོན་དུ་བྱེད་ཅིང་། བྱང་ཆུབ་ཏུ་སྨོན་ལམ་འདེབས་པ་དང་རང་བཞིན་གྱི་དགེ་བའི་ལས་ལ་བརྩོན་ཞིང་དུས་རྟག་ཏུ་དཀོན་མཆོག་མཆོད་པ་ལྷུར་བྱེད། མུ་སྟེགས་ཀྱི་སྨྲ་བ་ངན་པ་རྣམས་ནི་ཉིན་བྱེད་ཤར་བའི་དུས་ཀྱི་འབྱུང་པོའི་བྱ་ལྟར་སྨྲ་བ་ནུབ་པར་གྱུར་རོ། ། དེ་ནས་གསེར་གླིང་པ་ཆེན་པོས་རྒྱལ་བསྟན་ཡུན་རིང་དུ་གནས་པའི་ཕྱིར་དུ་བྱང་ཆུབ་ལམ་གྱི་རིམ་པའི་མན་ངག་མདོ་རྒྱན་སྦྱར་བའི་འགྲེལ་བ་རྨད་དུ་བྱུང་བ་ཞིག་ཀྱང་མཛད་ཅིང་། བློ་སྦྱོང་སེམས་དཔའི་རིམ་པ་དང་། བློ་སྦྱོང་རྟོགས་པ་འབུར་འཇོམས། འཕགས་པ་མི་གཡོ་བའི་སྒྲུབ་ཐབས། མངོན་རྟོགས་རྒྱན་གྱི་འགྲེལ་པ་གཅོ་བོའི་དོན་བཅུ་གཅིག་ཏུ་བསྡུས་པ། བསླབ་པ་ཀུན་ལས་བཏུས་པའི་མངོན་པར་རྟོགས་པ། ཆོགས་བདག་ཁྲོ་བོའི་སྒྲུབ་ཐབས་སོགས་མཛད་དོ། ། དེ་ལྟར་བདག་ཉིད་ཆེན་པོ་འདིས་སྤྱིར་བསྟན་པ་ལ་བྱ་བ་རྒྱ་ཆེར་མཛད་ཅིང་། ལྷག་པར་ཇོ་བོ་རྗེ་དཔལ་ལྡན་ཨ་ཏི་ཤ་ལ་གསེར་གླིང་གི་ཕོ་བྲང་ཉིད་དུ་ལོ་བཅུ་གཉིས་བར་ཐེག་པ་ཆེན་པོའི་ལམ་གྱི་རིམ་པའི་མན་ངག་ཡོངས་སུ་རྫོགས་པ་གེགས་སེལ་བོགས་འདོན་དང་བཅས་པ་གནང་བས་ཇོ་བོ་རྗེའི་ཐུགས་ཀྱི་བུམ་བཟང་བྱང་ཆུབ་ཀྱི་སེམས་ཀྱི་བདུད་རྩིས་ཡོངས་སུ་གང་བས་བྱང་ཆུབ་ཀྱི་སེམས་རིན་པོ་ཆེའི་མཐུས་མཐོང་ཐོས་དྲན་རེག་ཐམས་ཅད་རྗེས་སུ་འཛིན་ཅིང་སྨིན་གྲོལ་ལ་འགོད་ནུས་པ་དང་། པཎ་གྲུབ་གཞན་ལས་འཕྲིན་ལས་ཀྱི་ཁྱབ་བརྡལ་ཆེ་བ་དང་། ལྷག་པར་བྱང་ཕྱོགས་གངས་རིའི་ཁྲོད་ཀྱི་འགྲོ་བ་དམུ་རྒོད་ཤིན་ཏུ་གདུལ་དཀའ་བ་རྣམས་ཀྱང་ཇོ་བོ་རྗེའི་སྐུ་མཐོང་བ་དང་། གསུང་ཐོས་པ་དང་། ཐ་ན་མཚན་ཙམ་ཐོས་པ་ཡན་ཆད་དད་ཅིང་འདུན་པ་དང་ཇོ་བོའི་མཚན་ཐོས་ཏེ་སྐུའི་རྣམ་པ་ཡིད་ལ་དྲན་པ་ན་རང་རང་གི་ཉོན་མོངས་གདུག་རྩུབ་རྣམས་སྐད་ཅིག་ལ་ཞི་ནས་དད་པ་དང་མོས་པ་ངང་གིས་སྐྱེ་བ་དང་། སྙིགས་མ་ལས་ཀྱང་ཆེས་ཆེར་སྙིགས་པའི་དུས་མཐའ་འདིར་རང་རང་གི་ཡུལ་གྱི་རྒན་པོ་སྔ་མ་དག་གི་ཟེར་སྒྲོས་ལ་ཞེན་ཏེ་བདག་ཅག་གི་འདི་ཁོ་ན་བདེན་གྱི་གཞན་ནི་གཏི་མུག་གོ་ཞེས་ཆགས་སྡང་རླུང་དམར་འཚུབ་པས་ཕྱོགས་ཀུན་གང་སྟེ་སྐྱེ་བོ་དམ་པ་ཅི་འདྲ་ཞིག་བྱོན་ཡང་དད་པ་སྐྱེ་དཀའ་བ་ལ་ཇོ་བོ་རྗེ་དཔལ་ལྡན་ཨ་ཏི་ཤ་ལ་ནི་གྲུབ་མཐའ་དང་ཡུལ་དང་སྡེ་དགོན་རིས་སུ་མ་ཆད་པར་མཆོག་་དམན་བར་མ་མཐའ་དག་གིས་མཚན་ཐོས་པ་ཙམ་གྱིས་ཐལ་མོ་སྦྱོར་བའི་འོས་སུ་བྱེད་ཅིང་། གསུང་གི་བདུད་རྩི་དག་ལའང་རང་གིས་ཉམས་སུ་ལེན་པར་མ་ནུས་ཀྱང་འདི་ནི་གཞན་ནོ་ཞེས་མི་སྤང་བར་སྨོན་ལམ་གྱི་ཡུལ་དུ་བྱེད་པ་འདི་བྱུང་བ་ཡིན་ནོ། ། དོན་གྱི་དབང་འདི་གཟིགས་ནས་ཇོ་བསྟོད་དུ། གསེར་གླིང་རྒྱལ་པོ་ས་སྐྱོང་བླ་མ་ལས། ། བྱང་ཆུབ་སེམས་ཀྱི་བདུད་རྩིའི་སྨན་བླངས་ནས། ། འགྲོ་བ་ཀུན་ལ་ཕན་པར་མཛད་པ་ཡི། ། དཔལ་ལྡན་ཨ་ཏི་ཤ་ལ་གསོལ་བ་འདེབས། ། ཞེས་གསུངས་སོ། ། དེ་ལྟར་གསེར་གླིང་པ་ཆེན་པོ་ཆོས་ཀྱི་གྲགས་པས་བསྟན་འགྲོའི་དོན་རྒྱ་ཆེར་མཛད་ནས་སྐུ་ཚེ་དེའི་དངོས་ཀྱི་གདུལ་བྱ་རྫོགས་པ་ན་སྐུའི་བཀོད་པ་བསྡུས་ཏེ་དགའ་ལྡན་ཆོས་ཀྱི་ཕོོ་བྲང་དུ་གཤེགས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་བླ་མ་གསེར་གླིང་པ་ཆེན་པོ་ལ་གསོལ་བ་འདེབས་ཤིང་རྒྱལ་སྲས་བདག་ཉིད་ཆེན་པོ་འདིའི་རྣམ་ཐར་ལྟར་བྱང་ཆུབ་ཀྱི་སེམས་རིན་པོ་ཆེ་དགེ་སྦྱོང་གྱི་མཐིལ་དུ་བཟུང་ནས་གསུང་རབ་དགོངས་འགྲེལ་དང་བཅས་པ་ཐམས་ཅད་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང་། སྐྱེས་ཟིན་གོང་ནས་གོང་དུ་འཕེལ་བའི་ཐབས་སུ་གོ་བར་བྱས་ལ་ལམ་གྱི་ལུས་ཡོངས་སུ་རྫོགས་པའི་ཉམས་ལེན་ལ་བརྩོན་པ་ཆིག་བསྒྲིལ་དུ་བྱའོ། ། ། །
༈ རྗེ་བཙུན་འཇམ་དཔལ་དབྱངས་ནས། དཔལ་མགོན་འཕགས་པ་ཀླུ་སྒྲུབ་
སོགས་ཟམ་མོ་ལྟ་རྒྱུད་ཀྱི་བླ་མ་རྣམས་ཀྱི་རྣམ་ཐར།
༈ ཇོ་བོ་རྗེ་དཔལ་ལྡན་ཨ་ཏི་ཤས་བྱང་ཆུབ་ལམ་གྱི་རིམ་པའི་བླ་མ་བརྒྱུད་པ་ལ། རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་གཉིས་སུ་གསུངས་ཤིང་། རྒྱ་ཆེན་སྤྱོད་རྒྱུད་ལ་ཡང་། རྒྱ་ཆེན་སྤྱོད་པའི་རྒྱུད་དང་། རླབས་ཆེན་སྤྱོད་པའི་རྒྱུད་ཅེས་གཉིས་སུ་གསུངས། དེའི་རླབས་ཆེན་སྤྱོད་ཡོད་པའི་རྒྱུད་ཀྱི་བླ་མ་རྣམས་ཀྱི་རྣམ་ཐར་འོག་ཏུ་སྟོན་ལ། ཟབ་མོ་ལྟ་རྒྱུད་ཀྱི་བླ་མ་རྣམས་ཀྱི་རྣམ་པར་ཐར་པ་ནི། ཡང་དག་པར་རྫོགས་པའི་སངས་རྒྱས་ནས་རྗེ་བཙུན་འཇམ་དཔལ་དབྱངས། དེ་ནས་དཔལ་མགོན་འཕགས་པ་ཀླུ་སྒྲུབ་སོགས་ལ་རིམ་བཞིན་བརྒྱུད་པ་ལ་ཟབ་མོ་ལྟ་རྒྱུད་ཅེས་གསུངས། དེ་ལ། སྨྲ་བ་ཟླ་མེད་འདྲེན་མཆོག་ཤཱཀྱའི་ཏོག ། ཅེས་བསྔགས་པ་སྟོན་པ་ཐུབ་པའི་དབང་པོའི་རྣམ་པར་ཐར་པ་ནི་སྔར་བརྗོད་ཟིན་པ་ལྟར་རོ། ། རྒྱལ་བའི་མཁྱེན་རབ་ཀུན་བསྡུས་འཇམ་པའི་དབྱངས། ། ཞེས་བསྔགས་པ། རྗེ་བཙུན་འཇམ་པའི་དབྱངས་ཀྱི་སྐུ་གསུང་ཐུགས་ཀྱི་ཡོན་ཏན་ནི་བསམ་གྱིས་མི་ཁྱབ་བརྗོད་ཀྱིས་མི་ལང་སྟེ་སྐུའི་ཡོན་ཏན་གཅིག་པུའང་ཕྱོགས་བཅུའི་རྒྱལ་བ་ཐམས་ཅད་ཀྱིས་གསུང་དབྱངས་འགག་པ་མེད་པས་རྒྱུན་མ་ཆད་པར་བསྐལ་པ་མུ་མེད་པའི་བར་དུ་བརྗོད་ཀྱང་ཟད་པའི་མཐའ་མེད་ན། མཁའ་ཁྱབ་ཀྱི་སེམས་ཅན་ཐམས་ཅད་ཀྱིས་ཇི་ཙམ་བརྗོད་ཀྱང་ཡོན་ཏན་ཆ་ཙམ་ཞིག་ཀྱང་བརྗོད་པར་ག་ལ་ནུས། དེ་ལྟར་ཡང་རྗེ་བདག་ཉིད་ཆེན་པོས། བསོད་ནམས་ཚོགས་རབ་རབ་འབྱམས་རྒྱུ་ལས་འཁྲུངས་པའི་སྐུ་མཆོག་མཆོག་ཏུ་མཛེས་པ་ཁྱོད་ཀྱི་སྐུ། ། ནམ་མཁའི་མཐས་གཏུགས་གཏུགས་པ་མེད་པའི་ཞིང་མཆོག་ཀུན་དུ་དུ་མའི་འགྲོ་ལ་མིག་འཕྲུལ་བཞིན། ། ལ་ལར་བལྟམ་ཞིང་ཞིང་གཞན་དུ་ཡང་བྱང་ཆུབ་ཚུལ་སྟོན་སྟོན་པ་ཁྱོད་ཀྱི་སྐུ་ཡི་ནི། ། བཀོད་པ་མཆོག་འདི་འདི་དང་གཞན་དུ་མ་ལུས་འགྲོ་ཀུན་ཀུན་མཁྱེན་གྱུར་ཀྱང་བརྗོད་མི་ནུས། ། ཞེས་གསུངས་པ་ལྟར་རོ། ། དེ་ལྟ་ནའང་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་རྗེ་བཙུན་འཇམ་པའི་དབྱངས་ལ་གསོལ་བ་འདེབས་པའི་ཚེ། ཡོན་ཏན་བསམས་ནས་དང་བ་བསྐྱེད་པའི་ཕྱིར་ཕྱོགས་ཙམ་ཞིག་བརྗོད་པ་ནི། རྗེ་བཙུན་འཇམ་པའི་དབྱངས་ཀྱིས་སྔོན་ཐུགས་བསྐྱེད་པའི་ཚུལ་ནི། སྔོན་བསྐལ་པ་གྲངས་མེད་པ་བརྒྱ་སྟོང་གངྒཱའི་ཀླུང་གི་བྱེ་མ་སྙེད་ཕྲག་བདུན་འདས་པ་དེའི་ཡང་ཕ་རོལ་ན། འཇིག་རྟེན་གྱི་ཁམས་འབྱུང་བ་བཟང་པོ་ཞེས་པར་དེ་བཞིན་གཤེགས་པ་འབྲུག་སྒྲའི་དབྱངས་ཀྱི་རྒྱལ་པོ་ཞེས་པ་འཇིག་རྟེན་དུ་བྱོན་པའི་ཚེ། རྗེ་བཙུན་འཇམ་དབྱངས་འདི་ཉིད་འཁོར་ལོས་སྒྱུར་བའི་རྒྱལ་པོ་ནམ་མཁའ་ཞེས་པར་གྱུར་པ་ན། བུ་དང་། ཆུང་མ་དང་། གཉེན་འདབས་དང་། འཁོར་དུ་བཅས་པ་ལ་ལས་གཞན་མེད་ཅིང་མ་སྐྱེ་བའི་སེམས་ཀྱིས་དེ་བཞིན་གཤེགས་པ་འབྲུག་སྒྲའི་དབྱངས་ཀྱི་རྒྱལ་པོ་ཉན་ཐོས་དང་། བྱང་ཆུབ་སེམས་དཔའི་འཁོར་དང་བཅས་པ། ལོ་བརྒྱད་ཁྲི་བཞི་སྟོང་གི་བར་དུ་མཆོད་ནས་དགེ་བའི་རྩ་བ་འདི། བརྒྱ་བྱིན་ནམ། ཚངས་པའམ། ཉན་རང་ལ་སོགས་པ་གང་གི་དོན་དུ་བསྔོ་སྙམ་པ་ལ། སྟེང་གི་ནམ་མཁའ་ལས་ལྟ་མང་པོས་སྒྲ་བསྒྲགས་པ། རྒྱལ་པོ་ཆེན་པོ་དེ་ལྟར་སེམས་མ་བསྐྱེད་པར་་བླ་ན་མེད་པ་རྫོགས་པའི་བྱང་ཆུབ་ཏུ་སེམས་བསྐྱེད་ཅིག་ཅེས་བསྐུལ་བ་དང་། རྒྱལ་པོ་ནམ་མཁའ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུས་ཡོངས་སུ་བསྐོར་ནས། དེ་བཞིན་གཤེགས་པ་འབྲུག་སྒྲའི་དབྱངས་ཀྱི་རྒྱལ་པོའི་དྲུང་དུ་དོང་སྟེ་སྔར་གྱི་བྱུང་ཚུལ་ཞུས་ནས། ཐུབ་པ་ཇི་ལྟར་སེམས་བསྐྱེད་ན། ། རྫོགས་པའི་བྱང་ཆུབ་སྐྱེ་བར་འགྱུར། ། ཡེ་ཤེས་དེ་ནི་གང་གིས་ཐོབ། ། དོན་དེ་བདག་ལ་བསྟན་དུ་གསོལ། ། བྱང་ཆུབ་སེམས་ནི་བསྐྱེད་བྱས་ཤིང་། ། ཐུབ་པ་ཁྱོད་འདྲར་བདག་ཀྱང་སྨོན། ། ཞེས་ཞུས་པ་ན། དེ་བཞིན་གཤེགས་པ་འབྲུག་སྒྲའི་དབྱངས་ཀྱི་རྒྱལ་པོས། ཆོས་རྣམས་ཐམས་ཅད་རྐྱེན་བཞིན་ཏེ། འདུན་པའི་རྩ་ལ་རབ་ཏུ་གནས། ། གང་གིས་སྨོན་ལམ་ཅི་བཏབ་པ། ། དེ་འདྲའི་འབྲས་བུ་ཐོབ་པར་འགྱུར། ། རྒྱལ་པོ་ངས་ཀྱང་སྔོན་ཆད་ནི། ། རྫོགས་པའི་བྱང་ཆུབ་སེམས་སྐྱེད་གྱུར། ། སེམས་ཅན་ཀུན་ལ་ཕན་དོན་དུ། ། ངས་ནི་སྨོན་ལམ་དམ་པ་བཏབ། ། སྨོན་ལམ་ཇི་ལྟར་བཏབ་ཚུལ་དུ། ། ངས་ནི་འབྲས་བུ་ཐོབ་པར་གྱུར། ། བྱང་ཆུབ་དམ་པ་ངས་ཐོབ་པས། ། ང་ཡི་བསམ་པ་རྫོགས་པར་གྱུར། ། རྒྱལ་པོ་ཆེན་པོ་བརྟན་གྱིས་ལ། ། མི་འགྱུར་སེམས་ནི་བསྐྱེད་པར་གྱིས། ། གལ་ཏེ་སྤྱོད་པ་སྤྱད་བྱས་ན། ། ཁྱོད་ཀྱང་ཡང་དག་སངས་རྒྱས་འགྱུར། ། ཞེས་གསུངས་ཤིང་སེམས་བསྐྱེད་པར་བསྐུལ་བ་ན་འཁོར་ལོས་བསྒྱུར་བའི་རྒྱལ་པོ་ནམ་མཁས་ཕྱོགས་བཅུའི་སངས་རྒྱས་ཐམས་ཅད་དཔང་དུ་བཞག་སྟེ། དེ་བཞིན་གཤེགས་པ་འབྲུག་སྒྲའི་དབྱངས་ཀྱི་རྒྱལ་པོའི་སྤྱན་སྔར་སྙིང་སྟོབས་ཆེན་པོས་འདི་ལྟར་ཐུགས་བསྐྱེད་ཅིང་སྨོན་ལམ་བཏབ་སྟེ། འཁོར་བ་ཐ་མ་མེད་པ་ཡི། ། སྔོན་གྱི་ཐ་མ་ཇི་སྲིད་པ། ། དེ་སྲིད་སེམས་ཅན་ཕན་དོན་དུ། ། སྤྱོད་པ་དཔག་ཡས་སྤྱད་པར་བྱ། ། འཇིག་རྟེན་མགོན་པོའི་སྤྱན་སྔར་འདིར། ། བྱང་ཆུབ་མཆོག་ཏུ་སེམས་བསྐྱེད་དོ། ། འགྲོ་བ་ཐམས་ཅད་མགྲོན་གཉེར་ཏེ། ། དབུལ་ཞིང་ཕོངས་ལས་སྒྲོལ་བར་བྱ། ། དེ་རིང་ཕན་ཆད་གལ་ཏེ་ཡང་། ། བདག་གིས་འདོད་ཆགས་སེམས་བསྐྱེད་ན། ། ཕྱོགས་བཅུ་དག་ན་གང་བཞུགས་པའི། ། སངས་རྒྱས་ཐམས་ཅད་བསླུས་པར་གྱུར། ། བྱང་ཆུབ་ནམ་ཞིག་ཐོབ་བར་དུ། ། ཐ་བའི་སེམས་དང་གནོད་སེམས་དང་། ། ཕྲག་དོག་དང་ནི་སེར་སྣ་ཡང་། ། དེ་རིང་ཕྱིན་ཆད་མི་བྱའོ། ། ཚངས་པའི་སྤྱོད་པ་བདག་གིས་སྤྱད། ། སྡིག་པའི་འདོད་པ་ཡོངས་སུ་བཏང་། ། ཚུལ་ཁྲིམས་སྡོམ་དང་དེས་པ་ལ། ། སངས་རྒྱས་རྗེས་སུ་བསླབ་པར་བྱ། ། བདག་ནི་བྱང་ཆུབ་རིངས་ཚུལ་དུ། ། འཚང་རྒྱར་མོས་ཤིང་སྤྲོ་བ་མེད། ། ཕྱི་མཐར་ཐུག་གི་བར་དུ་ཡང་། ། སེམས་ཅན་གཅིག་ཕྱིར་སྤྱད་པར་བྱ། ། ཚད་མེད་བསམ་གྱིས་མི་ཁྱབ་པའི། ། སངས་རྒྱས་ཞིང་ནི་སྦྱང་བར་བྱ། ། ཕྱོགས་རྣམས་བཅུ་པོ་ཐམས་ཅད་དུ། ། བདག་གི་མིང་ནི་ཐོས་པར་བྱ། ། བདག་གིས་བདག་ལ་ལུང་བསྟན་ཏེ། ། སངས་རྒྱས་འགྱུར་བར་དོགས་པ་མེད། ། བདག་གི་ལྷག་བསམ་རྣམ་པར་དག ། བདག་དབང་འདི་ན་འདྲེན་པ་རྣམས། ། ལུས་དང་ངག་གི་ལས་རྣམས་ཀྱང་། ། རྣམ་པ་ཀུན་ཏུ་བདག་གིས་སྦྱང་། ། ཡིད་ཀྱི་ལས་ཀྱང་སྦྱང་བར་བྱ། ། མི་དགེའི་ལས་ནི་སྤྱད་མི་བྱ། ། ཞེས་ཐུགས་བསྐྱེད། བཅོམ་ལྡན་འདས་བསྐལ་པ་བྱེ་བ་ཁྲག་ཁྲིག་ཕྲག་འབུམ་ཕྲག་བརྒྱ་སྟོང་གྲངས་མ་མཆིས་པ་ནས་ཉེ་བར་བཟུང་སྟེ། བདག་གིས་སྨོན་ལམ་བཏབ་པ་ནི། ནམ་བདག་གིས་ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་སུ་སངས་རྒྱས་ཀྱི་སྤྱན་སྒྲིབ་པ་མེད་པས་བལྟས་ན། སངས་རྒྱས་བཅོམ་ལྡན་འདས་གང་ཇི་སྙེད་པ་དེ་དག་ཐམས་ཅད་བདག་གིས་བྱང་ཆུབ་ལ་ཡང་དག་པར་བཙུད་པ་དང་། བདག་གིས་བྱང་ཆུབ་ཀྱི་སེམས་ལ་བཀོད་པ་དང་། བདག་གིས་སྤྱིན་པ་ལ་ཡང་དག་པར་བཙུད་པ་དང་། དེ་བཞིན་དུ་བདག་གིས་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ལ་ཡང་དག་པར་བཙུད་པ་དང་། བདག་གིས་བསྐུལ་བ་དང་། བདག་གིས་རྗེས་སུ་བསྟན་པར་གྱུར་པར་མ་མཐོང་བ་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བྱའོ། ། ནམ་བདག་གིས་སངས་རྒྱས་ཀྱི་སྤྱན་སྒྲིབ་པ་མེད་པས་ཕྱོགས་བཅུར་རྣམ་པར་བལྟས་ཀྱང་། བདག་གིས་སངས་རྒྱས་ཉིད་ལ་མ་བཀོད་པའི་དེ་བཞིན་གཤེགས་པ་དེ་ལྟ་བུ་གང་ཡང་མཐོང་བར་མ་གྱུར་པ་དེའི་ཚེ་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་ཞེས་ཐུགས་བསྐྱེད་ཅིང་སྨོན་ལམ་བཏབ་བོ། ། དེ་ནས་རྗེ་བཙུན་འཇམ་དཔལ་དབྱངས་ཀྱིས་སྔོན་སྲོག་ཆགས་གྲངས་མེད་མུ་མེད་པ་དེ་བཞིན་གཤེགས་པ་འབྲུག་སྒྲའི་དབྱངས་ཀྱི་རྒྱལ་པོའི་སྤྱན་སྔར་སེམས་བསྐྱེད་དུ་བཅུག་ནས་སྤྱིན་སོགས་ཕར་ཕྱིན་དྲུག་གི་ལམ་སྒོམ་པ་ལ་སྦྱར་ཏེ་སྨིན་པར་བྱས་ནས་སངས་རྒྱས་ནས་ཆོས་ཀྱི་འཁོར་ལོ་བསྐོར་ཏེ། སངས་རྒྱས་གཅིག་མ་གཏོགས་གཞན་ཐམས་ཅད་མྱ་ངན་ལས་འདས་ཟིན། གཅིག་ནི། འཇིག་རྟེན་གྱི་ཁམས་འདི་ནས་འོག་ཏུ་དཔག་ཚད་གངྒཱའི་གླུང་བཞི་ཁྲི་བཞི་སྟོང་གི་བྱེ་མ་རྙེད་འདས་པ་ན། འཇིག་རྟེན་གྱི་ཁམས་སའི་དབྱིངས་ཞེས་བྱ་བ་ན་ད་ལྟ་ཡང་བཞུགས་ཏེ་དེ་བཞིན་གཤེགས་པ་སའི་ལྷ་ཞེས་བྱའོ། ། གཞན་ཡང་རྗེ་བཙུན་འཇམ་དབྱངས་འདི་ཉིད། ཆོས་སྨྲ་བ་ཆོས་ཀྱི་རྒྱལ་མཚན་དུ་གྱུར་པའི་ཚེ། བདག་ཅག་གི་སྟོན་པ་ཤཱཀྱའི་རྒྱལ་པོ་ལ་སོགས་པའི་བསྐལ་བཟང་གི་སངས་རྒྱས་སྟོང་པོ་ཐམས་ཅད་བྱང་ཆུབ་ཀྱི་མཆོག་ཏུ་ཐུགས་བསྐྱེད་དུ་བཅུག་སྟེ་དགེ་བའི་བཤེས་གཉེན་མཛད་པ་ཡིན་ཏེ། དབུ་མ་ལ་འཇུག་པའི་རང་འགྲེལ་ལས། ཡོངས་སུ་འཛིན་པའི་ཁྱད་པར་ལས་ནི་འཕགས་པ་འཇམ་དཔལ་བྱང་ཆུབ་སེམས་དཔར་གྱུར་པ་ཉིད་ཀྱིས། དེ་བཞིན་གཤེགས་པ་ཤཱཀྱ་ཐུབ་པ་དང་། གཞན་ཡང་དེ་བཞིན་གཤེགས་པ་ཐམས་ཅད་ཆེས་ཐོག་མ་ཁོ་ནར་བྱང་ཆུབ་ཏུ་སེམས་བསྐྱེད་དུ་བཅུག་པར་འདོན་པ་ཡིན་ནོ། ། ཞེས་གསུངས་པའི་ཕྱིར། གཞན་ཡང་། རྗེ་བཙུན་འཇམ་དབྱངས་འདི་ཉིད་ཀྱི་ཐབས་མཁས་པ་ཆེན་པོས། བྱང་ཆུབ་ཏུ་སེམས་བསྐྱེད་དུ་བཅུག་སྟེ་སངས་རྒྱས་ནས་ཆོས་ཀྱི་འཁོར་ལོ་བསྐོར་བའི་སངས་རྒྱས་དེ་དང་དེའི་མཚན་རྐྱང་པ་བརྗོད་ཀྱང་བསྐལ་པ་བས་ལྷག་པར་མི་ཟད་ཅིང་། འཇམ་དཔལ་གྱིས་བྱང་ཆུབ་ཏུ་བཙུད་པའི་སངས་རྒྱས་རྣམས་ཀྱིས། འཇམ་དཔལ་ལ་དྲིན་གཟོའི་ཚུལ་དུ་གདུགས་སོགས་བསྐུར་བས་སྟོང་གསུམ་ཁེབས་པར་བྱུང་། ཡང་ལན་ཅིག་སྤྲུལ་པའི་ཁྱིམ་བདག་ཅིག་གིས་བཅོམ་ལྡན་འདས་ལ་ལྷུང་བཟེད་ཟས་ཀྱིས་བཀའ་སྟེ་ཕུལ་བ་ན། འཇམ་དཔལ་གྱིས། བཅོམ་ལྡན་འདས་ལ་ཞལ་ཟས་ཀྱི་ཕུད་མ་བསྩལ་བར་གསོལ་ན་བྱས་པ་མི་གཟོ་བར་འགྱུར་རོ་ཞུས་པས། འཁོར་གཞན་རྣམས་འཇམ་དཔལ་འདིས་བཅོམ་ལྡན་འདས་ལ་གང་དུ་ཕན་བཏགས་བསམས་པ་ན། སྟོན་པའི་ལྷུང་བཟེད་འོག་ཏུ་སོང་སྟེ་འཇིག་རྟེན་གྱི་ཁམས་གངྒཱའི་བྱེ་སྙེད་བདུན་ཅུ་རྩ་གཉིས་འདས་པའི་འཇིག་རྟེན་དུ་སོང་བ་ན་མཆོག་ཟུང་སོགས་ལ་ལྷུང་བཟེད་ཚོལ་བར་བཀའ་སྩལ་པས། འཇིག་རྟེན་གྱི་ཁམས་སྟོང་ཕྲག་བཅུ་གཉིས་ཚུན་དུ་བཙལ་ཀྱང་མ་རྙེད་པ་དང་། འཇམ་དཔལ་རང་ལ་བཀའ་གནང་བས་འཇམ་དཔལ་ཀྱིས་སྟན་དེ་ལ་འདུག་བཞིན་དུ་ལག་པ་བརྐྱངས་ནས་ལྷུང་བཟེད་བླངས་ནས་ཕུལ་ལོ། ། འཇམ་དཔལ་གྱིས་སྟོན་པ་ལ་ཕན་བཏགས་ཚུལ་དངོས་ནི། སྔོན་དེ་བཞིན་གཤེགས་པ་མི་ཐུབ་རྒྱལ་མཚན་འཇིག་རྟེན་དུ་བྱོན་པའི་ཚེ་རྗེ་བཙུན་འཇམ་དཔལ་དགེ་སློང་ཡེ་ཤེས་རྒྱལ་པོར་གྱུར་པས་ལྷུང་བཟེད་ཟས་ཀྱིས་བཀའ་སྟེ་བསྣམས་པ་ལ་བདག་ཅག་གི་སྟོན་པ་ཁྱེའུ་དྲི་མེད་དཔུང་པར་གྱུར་པས་སློངས་པས་ཟས་བྱིན་ནས། དེ་བཞིན་གཤེགས་པ་མི་ཐུབ་རྒྱལ་མཚན་གྱི་དྲུང་དུ་ཁྲིད་ནས་སྐྱབས་འགྲོ་དང་བྱང་ཆུབ་ཀྱི་སེམས་བསྐྱེད་དུ་བཅུག་པས་ཕན་བཏགས་པའོ། ། ཡང་རྒྱལ་པོ་མ་སྐྱེས་དགྲས་ཕ་གཟུགས་ཅན་སྙིང་པོ་བསད། སྟོན་པ་ལ་གླང་ཆེན་རྦད། དགེ་འདུན་ཕོ་མོའི་འཚོ་བ་བཅད། དགྲ་བཅོམ་མ་སེར་སྐྱ་བཟང་མོ་ཆུང་མར་དབང་མེད་དུ་བཀུག་པ་སོགས་ཀྱི་སྡིག་པ་ཆེན་པོ་བྱས་པས་འགྱོད་དེ་སྟོན་པ་ལ་སྡིག་པ་དང་འགྱོད་པ་སེལ་བར་ཞུས་པས། སྟོན་པས་རྗེ་བཙུན་འཇམ་དབྱངས་མ་གཏོགས་གཞན་གྱིས་ཁྱོད་ཀྱི་འགྱོད་པ་དང་ཐེ་ཆོམ་སེལ་བར་མི་ནུས་གསུངས་པས། རྒྱལ་པོས་འཕགས་པ་འཇམ་དཔལ་དང་། འོད་སྲུངས་གཉིས་རྒྱལ་པོའི་ཁབ་ཏུ་གདན་འདྲེན་པར་མཛད་འདོད་ནས་ཤཱ་རིའི་བུ་ལ། འཕགས་པ་འཇམ་དཔལ་ལ་འཁོར་དུ་མཆིས་དྲིས་པས། ལྔ་བརྒྱའོ་ཟེར་བ་ལ། རྒྱལ་པོས་འཇམ་དཔལ་ལ་སང་རྒྱལ་པོའི་ཁབ་ཏུ་གདུགས་ཚོད་ལ་གཤེགས་པར་ཅི་གནང་ཞུས་པས་ཞལ་གྱི་བཞེས་ནས། དེའི་སྲོད་ལ་ཤར་ཕྱོགས་སུ། དེ་བཞིན་གཤེགས་པ་བསྒྲགས་པའི་དཔལ་གྱི་དྲུང་དུ་བྱོན་ཏེ་བྱང་ཆུབ་སེམས་དཔའ་བརྒྱད་ཁྲི་ཉིས་སྟོང་ཁྲིད་ནས་ཞིང་འདིར་བྱོན་ནས་འཁོར་རྣམས་སྲོད་དང་། གུང་དང་། ཐོ་རངས་ཆོས་བསྟན་ཏེ་འཇམ་དཔལ་འཁོར་བརྒྱད་ཁྲི་ཉིས་སྟོང་ལྔ་བརྒྱ་དང་། འོད་སྲུངས་འཁོར་ལྔ་བརྒྱ་དང་བཅས་པ་རྒྱལ་པོའི་ཁབ་ཏུ་གཤེགས་པ་ན། རྒྱལ་པོས་སྟོང་གི་བཤོས་གྲབས་ལས་མ་ཆུད་པས་རྒྱལ་པོ་སྤ་འཁུམས་པ་ན་གནོད་སྤྱིན་ཀུ་བེ་རས་ལུས་དངོས་སུ་བསྟན་ནས། རྒྱལ་པོ། འཕགས་པ་འཇམ་དཔལ་ནི་ཐབས་ལ་མཁས་པས་ཟས་གཅིག་གིས་ཀྱང་ཐམས་ཅད་ཁྱབ་པར་བྱེད་པས་མ་འཁུམས་ཤིག་ཅེས་དབུགས་དབྱུང་། དེ་ནས་གདུགས་ཚད་ལ་བབ་པ་ན། འཁོར་འདི་དག་ལ་ལྷུང་བཟེེད་མི་སྣང་བས་འབྲས་ཆན་གང་དུ་བླུགས་ཟེར་བ་ལ་འཇམ་དཔལ་གྱིས་ངའི་འཁོར་འདི་དག་ནམ་ཟ་བ་ན་རང་རང་གི་ཞིང་ནས་ལྷུང་བཟེེད་འདིར་འོང་ངོ་ཞེས་གསུངས་མ་ཐག་འཁོར་དེ་དག་རྣམས་ལ་རང་རང་གི་ལག་ཏུ་ལྷུང་བཟེད་བྱུང་ཞིང་ཟོས་ཟིན་ནས་ལྷུང་བཟེད་རྣམས་མཁའ་ལ་འཕགས་ཏེ་སོང་། རྒྱལ་པོས་བཤམས་པའི་བཟའ་བཏུང་རྣམས་ཅུང་ཟད་ཀྱང་ཉུང་དུ་མ་སོང་བས་ཐམས་ཅད་ངོ་མཚར་དུ་གྱུར་ཏོ། ། དེ་ནས་འཕགས་པ་འཇམ་དཔལ་གྱིས་རྒྱལ་པོ་ལ་སྡིག་པ་དང་འགྱོད་པའི་ངོ་བོ་ཇི་ལྟར་འདུག་ལྟོས་ཤིག་ཅེས་སོགས་དོན་དམ་ལ་སྦྱར་བའི་ཆོས་གསུངས་པས་རྒྱལ་པོའི་འགྱོད་པ་དང་ཐེ་ཚོམ་ཐམས་ཅད་བསལ་བས། རྒྱལ་པོས་འཕགས་པ་འཇམ་དཔལ་ལ་ཡོན་དུ་རིན་པོ་ཆེའི་གོས་ཞིག་ཕུལ་བ་ན། འཇམ་དཔལ་མ་མཐོང་ནས་མྱ་ངན་དུ་གྱུར་པ་ལ། སུ་འདུག་འདུག་ལ་ཕུལ་ཅིག་ཟེར་བའི་སྒྲ་ཞིག་བྱུང་བ་ན་འོད་སྲུངས་སོགས་ལ་ཕུལ་བས་ཀྱང་སུ་ཡང་མ་མཐོང་ཞིང་། མཐར་རང་ཡང་མ་མཐོང་བས་བདག་ཏུ་འདུ་ཤེས་པའི་རྣམ་རྟོག་དང་བྲལ་ནས་སྟོང་ཉིད་ཀྱི་ཏིང་ངེ་འཛིན་གྱི་ངང་དུ་སོང་། ཏིང་ངེ་འཛིན་ལས་ལངས་པ་དང་འཕགས་པ་འཇམ་དཔལ་ལ་སོགས་པ་དངོས་སུ་མཐོང་ངོ་། ། ཡང་། སྔོན་མཚམས་མེད་ཀྱི་ལས་བྱས་པའི་ལས་ཀྱི་ལྷག་མ་ཅུང་ཟད་ཡོད་པ་ལ་སྤྱོད་པའི་བྱང་སེམས་ལྔ་འདུག་པ་དེ་དག་དམིགས་པ་དང་བྲལ་བར་བྱ་བའི་ཕྱིར། འཕགས་པ་འཇམ་དཔལ་གྱིས་ཕྱག་གཡས་ཀྱིས་རལ་གྲི་བླངས་པ་བརྡར་ནས་བཅོམ་ལྡན་འདས་ག་ལ་བ་དེར་བརྒྱུགས་པ་དང་། བཅོམ་ལྡན་འདས་ཀྱིས་ང་ནི་སད་ཟིན་གྱིས་ཐོངས་ཤིག་གསུངས་པས། དམིགས་པ་ལ་སྤྱོད་པའི་བྱང་སེམས་ལྔ་པོ་དེས། བདག་ཏུ་དམིགས་པ་བསད་ནས་མེད་པར་གོ ། ཆོས་ཐམས་ཅད་སྒྱུ་མ་ལྟ་བུར་རྟོགས་ཏེ། འཕགས་པ་འཇམ་་དཔལ་འདི་ནི་ཐབས་མཁས་པའོ་ཞེས་སོགས་ཀྱིས་བསྟོད་ནས་ནམ་མཁར་འཕགས་ཏེ། ཆོས་ཀུན་སྒྱུ་མ་ལྟ་བུ་སྟེ། ། ཡོངས་སུ་རྟོག་པས་ཀུན་ནས་བསྐྱེད། ། འདི་ལ་གྲུབ་པ་མ་མཆིས་ཏེ། ། ཆོས་འདི་ཐམས་ཅད་སྟོང་པ་ལགས། ། ཞེས་སྨྲས་སོ། ། ཡང་འཕགས་པ་འཇམ་དཔལ་གྱིས་སྟོང་པ་ཉིད་ལས་བརྩམས་ནས་སེམས་ནང་ན་ཡང་མེད། ཕྱི་རོལ་ན་ཡང་མེད། བར་ན་ཡང་མེད་པས། དེ་ལ་ནི་ཅི་ཡང་གྲོལ་རྒྱུ་ཡང་མེད། ཐོབ་པ་ཡང་མེད། མངོན་པར་རྟོགས་པ་མེད་དོ་གསུངས་པས། དེ་ཐོས་པ་ཙམ་གྱིས་དགེ་སློང་མང་པོ་རྣམ་པར་གྲོལ། དགེ་སློང་ཁ་ཅིག་གིས་དེའི་དོན་ལ་མ་དད་ནས་ཅི་ཡང་གྲོལ་རྒྱུ་ཡང་མེད་ན་འོ་སྐོལ་ཆོས་བྱས་པ་ལ་དོན་མི་འདུག་པས་འདོང་ཟེར་ནས་སོང་ངོ་། ། ཡང་འཕགས་པ་འཇམ་དཔལ་གྱིས་དེ་རྣམས་འདུལ་པའི་ཕྱིར་སྤྲུལ་པའི་དགེ་སློང་ཅིག་སྤྲུལ་ཏེ་བཏང་བས། དེ་རྣམས་དང་ལམ་དུ་ཕྲད་པས་ཁོང་རྣམས་ན་རེ། དགེ་སློང་གར་འགྲོ་ཟེར། སྤྲུལ་པའི་དགེ་སློང་ན་རེ། ང་ནི་འཇམ་དཔལ་གྱིས་ཆོས་བསྟན་པ་ལ་མ་མོས་ཡིད་མ་ཆེས་ནས་འགྲོ་ཟེར། ཁོང་རྣམས་ན་རེ། ངེད་ཀྱང་འཇམ་དཔལ་གྱིས་ཆོས་བསྟན་པ་ལ་མ་མོས་ཡིད་མ་ཆེས་པར་འགྲོ་བ་ཡིན་པས་འདོང་ཟེར། དེེར་སྤྲུལ་པ་ན་རེ། ཁྱེད་ཀྱིས་འཇམ་དཔལ་གྱིས་ཆོས་ཇི་སྐད་བསྟན་པ་ལ་མ་དད་ཟེར། གྲོལ་རྒྱུ་ཡང་མེད། ཐོབ་རྒྱུ་ཡང་མེད་ཟེར་ནས་མ་དད་ཟེར། སྤྲུལ་པ་ན་རེ། འོ་ན་ཁྱེད་ཀྱི་རྟོགས་རྒྱུ་དང་གྲོལ་རྒྱུ་དེ་གྲུ་བཞི་འམ། ཟླུམ་པོ་འམ། ནར་མོ་ལ་སོགས་པ་དབྱིབས། དཀར་པོ་ལ་སོགས་པ་ཁ་དོག ། ཕྱི་དང་ནང་ལ་སོགས་པ་ཇི་ལྟར་འདུག་ལྟོས་ཤིག་གསུངས་པས། ཁོང་རྣམས་ཀྱིས་བཏགས་དོན་བཙལ་བས་མ་རྙེད་པས། སྤྲུལ་པ་ན་རེ། དེ་ལ་བསམས་ནས་འཇམ་དཔལ་གྱིས་གྲོལ་རྒྱུ་ཡང་མེད། ཐོབ་རྒྱུ་ཡང་མེད་མངོན་པར་རྟོགས་རྒྱུ་ཡང་མེད་པར་གསུངས་པ་ཡིན་ནོ་བྱས་པས་དགེ་སློང་དེ་དག་ཐམས་ཅད་སེམས་རྣམ་པར་གྲོལ་བར་གྱུར་ཏེ་སླར་ལོག་ནས་འཕགས་པ་འཇམ་དཔལ་ལ་བསྙེན་བཀུར་ཕུན་སུམ་ཚོགས་པ་བྱས་པ་སོགས་ཐབས་ལ་མཁས་པའི་མཛད་པའི་སྒོ་ནས་སེམས་ཅན་དཔག་ཏུ་མེད་པའི་དོན་མཛད་དོ། ། ཡང་ལན་ཅིག་འཕགས་པ་འཇམ་དཔལ་གྱིས་རྒྱལ་པོ་གསལ་རྒྱལ་གྱི་བཙུན་མོའི་ཁྲོད་དུ་དབྱར་གནས་པ། རྒྱལ་བྱེད་ཚལ་དུ་བྱོན་པ་ལ། དགེ་སློང་འོད་སྲུངས་མ་རངས་པས་འཇམ་དཔལ་ལ་སྐྲོད་པའི་ལས་བྱ་བའི་ཕྱིར་གཎྜི་བརྡུངས་པ་ན། ཕྱོགས་བཅུའི་ཞིང་ཐམས་ཅད་འཇམ་དཔལ་གྱིས་གང་བར་མཐོང་བ་དང་། བཅོམ་ལྡན་འདས་ཀྱིས་འོད་སྲུངས་ལ། ཁྱོད་ཀྱིས་འཇམ་དཔལ་གྲངས་མེད་པ་འདི་ནང་ནས་གང་སྐྲོད་འདོད་གསུངས་པས་འོད་སྲུངས་སྐྱེངས་ཏེ། གཎྜི་བོར་བར་འདོད་ཀྱང་འཇོག་མ་ཐུབ་པས་སྒྲ་རྒྱུན་མི་འཆད་པར་བྱུང་བས། འཇམ་དཔལ་ལ་བཟོད་པར་གསོལ་བ་དང་གཎྜི་བཞག་ཐུབ་བོ། ། གཞན་ཡང་འཕགས་པ་གང་པོས་གཅིར་བུ་པ་བདེན་པ་པོ་སོགས་མུ་སྟེགས་བྱེད་མང་པོ་བདེན་པ་མཐོང་བའི་སྣོད་དུ་གཟིགས་ནས་ཆོས་བསྟན་ཀྱང་མི་ཉན་ཞིང་མ་ཐུལ་བར་ལུས་པ་ན། འཕགས་པ་འཇམ་དཔལ་གྱིས་སྤྲུལ་པ་ལྔ་བརྒྱ་བཀྱེ་ནས་བཏུལ་བ་སོགས་ཀྱི་གཏམ་རྒྱུད་ཡོད་དོ། ། འོ་ན་འཕགས་པ་འཇམ་དཔལ་འདི་ད་ལྟ་བྱང་སེམས་རང་རྒྱུད་པ་ཡིན་ནམ་སངས་རྒྱས་ཟིན་གང་ཡིན་སྙམ་ན། འདི་ཉིད་སྔོན་དེ་བཞིན་གཤེགས་པ་ཀླུ་རིགས་མཆོག་ཏུ་སངས་རྒྱས་པ་དང་། མདོ་ཁ་ཅིག་ཏུ་ཀླུ་རིགས་སྒྲོན་མར་སངས་རྒྱས་པར་གསུངས། གཞན་ཡང་། འཕགས་པ་འཇམ་དཔལ་གྱིས་རབ་འབྱོར་ལ། ཁོ་བོ་ནི་ཡང་དག་པར་རྫོགས་པའི་སངས་རྒྱས་ཡིན་ཏེ་བྱ་བའི་རྒྱུན་བཅད་པ་ནི་མ་ཡིན་ནོ། ། ཞེས་རྒྱུ་མཚན་དང་བཅས་པ་གསུངས་ཤིང་། འཇམ་དཔལ་ཞིང་བཀོད་ཀྱི་མདོ་ལས། འདི་ནི་དེ་བཞིན་གཤེགས་པའི་སྟོབས་བཅུ་ཡོངས་སུ་རྫོགས་སོ། ། འདི་བྱང་ཆུབ་སེམས་དཔའི་ས་བཅུ་ཡོངས་སུ་རྫོགས་སོ། ། འདི་སངས་རྒྱས་ཀྱི་ས་ཡོངས་སུ་རྫོགས་སོ། ། ཞེས་སོགས་མང་དུ་གསུངས། དེ་ལྟར་སངས་རྒྱས་ཟིན་ཀྱང་སླར་ཡང་དུལ་མེད་ཡང་དག་བསགས་པ་ཞེས་བྱ་བའི་ཞིང་དུ་རྒྱལ་བ་ཀུན་ཏུ་གཟིགས་སུ་འཚང་རྒྱ་བའི་ཚུལ་སྟོན་ཏོ། ། ཞིང་དེ་ནི་ལྷོ་ཕྱོགས་སུ་འབྱུང་ཞིང་འཇིག་རྟེན་གྱི་ཁམས་མི་མཇེད་འདི་ཉིད་ཀྱང་དེའི་ཁོངས་སུ་ཆུད་པར་གསུངས། ཞིང་དེའི་རྒྱ་ཁྱོན་ནི་གངྒཱའི་ཀླུང་དུ་མའི་བྱེ་མ་སྙེད་ཀྱི་གྲངས་དང་མཉམ་པའི་ཞིང་གི་ཐ་གྲུ་དང་མཉམ་ཞིང་། མཐོ་ཁྱད་སྲིད་པའི་རྩེ་མོ་དང་མཉམ་འོག་གཞི་རིན་པོ་ཆེ་སྣ་ཚོགས་ལས་སྒྲུབ་པ། ཞིང་དེར་མི་ཁོམ་པ་དང་། སྡུག་བསྔལ་མི་དགེ་བའི་སྒྲ་དང་། སྐྱོན་དུ་འགྱུར་བའི་སྒྲ་མེད་ཅིང་། སྒྲ་འབྱུང་བ་རྣམས་ཀྱང་ཆོས་ཀྱི་སྒྲར་འབྱུང་། སངས་རྒྱས་ཀྱི་ཞིང་གཞན་གྱི་སྣོད་ཀྱི་ཡོན་ཏན་ཀུན་འདིའི་སྣོད་ཀྱི་ཞིང་ལ་ཚང་བ་ཡིན་ལ། ཞིང་དེའི་དབུས་ན། བྱང་ཆུབ་ཀྱི་ཤིང་སྟོང་གསུམ་གྱི་སྟོང་ཆེན་པོ་བཅུའི་འཇིག་རྟེན་གྱི་ཁྱོན་དང་མཉམ་པ། དེའི་རྩ་བར་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་ན་རྒྱལ་བ་ཀུན་ཏུ་གཟིགས་སྐུ་མདོག་གསེར་བཅོ་མ་ལྟ་བུ་རྡོ་རྗེའི་སྐྱིལ་མོ་ཀླུང་གིས་བཞུགས་ཤིང་། ཕྱག་གཡས་སྐྱབས་སྤྱིན། གཡོན་མཉམ་གཞག་མཛད་པ། སྐུའི་ཚད་དཔག་ཚད་བརྒྱད་ཁྲི་བཞི་སྟོང་དང་ལྡན་པ། ཞིང་དེའི་གདུལ་བྱ་རྣམས་ཀྱིས་སྐུ་བལྟ་བར་འདོད་ཚེ། ཁྲིའི་སྟེང་ན་སྐུ་བཞུགས་པ། རང་གི་མདུན་དུ་བཞུགས་པར་མཐོང་བའི་མོད་ལ། ཆོས་ཞུ་མི་དགོས་པར་ཆོས་ཀྱི་ཚིག་དོན་མཐའ་དག་ཁོང་དུ་ཆུད་ནས་མཁས་པར་འགྱུར་བ་ཡིན། ཞིང་དེ་ན། ཉན་རང་དང་། བུད་མེད་དང་། མངལ་ནས་སྐྱེ་བ་མེད་ཅིང་། ཞེ་སྡང་དང་། ཐ་བ་དང་འཆབ་པ་མེད་པར་ཚངས་པར་སྤྱོད་པའི་ཆ་ལུགས་ཅན། ནམ་མཁའ་ལ་སྐྱིལ་མོ་ཀླུང་བཅས་པ། རྫུས་ཏེ་སྐྱེ་བ། སྐུ་དཔག་ཚད་བཞི་ཁྲི་ཉིས་སྟོང་ཡོད་པ་བྱང་ཆུབ་སེམས་དཔའ་ཤ་སྟག་མངོན་ཤེས་ལྔ་དང་ལྡན་པ། བཟའ་བཏུང་ཡིད་ལ་འདོད་པའི་ཚེ་རོ་མཆོག་དང་ལྡན་པའི་བཟའ་བཏུང་གིས་གང་བའི་སྣོད་ལག་པ་གཡས་པར་འབྱུང་། དེ་ཡང་གཞན་ལ་ཕུད་མ་ཕུལ་བར་རང་གིས་སྤྱོད་པ་ཚུལ་མ་ཡིན་ནོ་སྙམ་ནས་རྫུ་འཕྲུལ་གྱིས་ཕྱོགས་བཅུའི་སངས་རྒྱས་འཁོར་དང་བཅས་པ་ལ་ཕུལ། ཕོངས་ཤིང་སྡུག་བསྔལ་བ་དང་། ཡི་དྭགས་རྣམས་ཚིམ་པར་བྱས་ཏེ། རང་གི་ཞིང་དུ་འོངས་ནས་ལོངས་སྤྱོད་པར་བྱེད་ཅིང་། དེ་བཞིན་དུ་གོས་དང་ལོངས་སྤྱོད་གཞན་ལ་ཡང་དེ་ལྟར་བྱེད་དོ། ། དེས་ན་སངས་རྒྱས་གཞན་ཐམས་ཅད་ཀྱི་མཚན་བརྗོད་པ་ལས། འཕགས་པ་འཇམ་དཔལ་གྱི་མཚན་བརྗོད་པ་ཕན་ཡོན་ཆེ་ཞིང་། དེ་བས་ཀྱང་རྒྱལ་བ་ཀུན་ཏུ་གཟིགས་ཀྱི་མཚན་བརྗོད་པ་ཕན་ཡོན་ཆེ་བ་ཡིན་ཏེ། ཞིང་བཀོད་ཀྱི་མདོ་ལས། རིགས་ཀྱི་བུ་དག་སངས་རྒྱས་བྱེ་བ་ཕྲག་ཁྲིག་ཕྲག་འབུམ་གྱི་མཚན་བརྗོད་པ་བས་ནི། གང་གིས་འཇམ་དཔལ་གཞོན་ནུར་གྱུར་པའི་མིང་བརྗོད་པ་བསོད་ནམས་ཆེས་མང་དུ་བསྐྱེད་ན། བཅོམ་ལྡན་འདས་ཀུན་ཏུ་གཟིགས་ཀྱི་མཚན་བརྗོད་པ་ལྟ་ཅི་སྨོས། དེ་ཅིའི་ཕྱིར་ཞེ་ན་འཇམ་དཔལ་གཞོན་ནུར་གྱུར་པས་བསྐལ་པ་རེ་རེ་ཞིང་། སེམས་ཅན་གྱི་དོན་ཇི་སྙེད་དུ་བྱས་པའི་སེམས་ཅན་གྱི་དོན་དེ་ནི། སངས་རྒྱས་བྱེ་བ་ཕྲག་ཁྲིག་འབུམ་གྱིས་ཀྱང་མ་མཛད་དོ། ། ཞེས་གསུངས་པའི་ཕྱིར། འོ་ན། འཇིག་རྟེན་གྱི་ཁམས་བདེ་བ་ཅན་དང་། ཀུན་གཟིགས་ཀྱི་ཞིང་གཉིས་གང་ཁྱད་པར་འཕགས་ན། བདེ་བ་ཅན་གྱིས་ཡོན་ཏན་ནི་རྒྱ་མཆོ་ཆེན་པོ་ནས་སྐྲའི་རྩེ་མོས་བླངས་པའི་ཆུ་ཐིགས་གཅིག་ཙམ། ཀུན་ཏུ་གཟིགས་ཀྱི་ཞིང་གི་ཡོན་ཏན་ནི་རྒྱ་མཚོ་ཆེན་པོའི་ཆུའི་མང་ཉུང་ལྟ་བུ་ཡིན་ནོ། ། འོ་ན། རྒྱལ་བ་ཀུན་གཟིགས་པའི་ཞིང་ཁམས་ལྟ་བུ་གཞན་ཡོད་དམ་མེད་སྙམ་ན་ཡོད་དེ། དེ་བཞིན་གཤེགས་པ་ཀུན་གཟིགས་ཀྱི་ཞིང་དང་། དེ་བཞིན་གཤེགས་པ་ཀུན་ནས་འོད་ཟེར་ཡོན་ཏན་རྟག་ཏུ་མངའ་བ་རྒྱ་མཚོའི་རྒྱལ་པོའི་ཞིང་སྨོན་ལམ་ལ་རབ་ཏུ་གནས་པ་མངོན་པར་འཕགས་པ་གཉིས་ལ་ཡོན་ཏན་ལྷག་ཆད་མེད། གཞན་ཡང་རྒྱལ་བ་ཀུན་ཏུ་གཟིགས་པའི་ཞིང་ཁམས་ལྟ་བུ་ཡོད་དེ། བྱང་ཆུབ་སེམས་དཔའ་འོད་ཀྱི་ཏོག་དང་། བྱང་ཆུབ་སེམས་དཔའ་ཡེ་ཤེས་བླ་མ་དང་། བྱང་ཆུབ་སེམས་དཔའ་དབང་པོ་ཞི་བ་དང་། བྱང་ཆུབ་སེམས་དཔའ་སྨོན་ལམ་བློ་གྲོས་རྣམས་སངས་རྒྱས་པའི་སངས་རྒྱས་ཀྱི་ཞིང་ཡང་དེ་དང་འདྲ་བར་འབྱུང་བར་གསུངས་པས་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་གིས་ཀྱང་། འཕགས་པ་འཇམ་དཔལ་གྱི་ཞིང་ལྟར་བསྒྲུབ་པའི་སྨོན་ལམ་བཏབ་པས། དེ་དག་གི་ནང་ནས་བྱང་ཆུབ་སེམས་དཔའ་བཅུ་དྲུག་གིས་འཕགས་པ་འཇམ་དཔལ་གྱི་ཞིང་ལྟར་འགྲུབ་ཅིང་། ལྷག་མ་རྣམས་ཀྱིས་དེ་ལྟར་མི་འགྲུབ་ཀྱང་། བདེ་བ་ཅན་ལྟར་འགྲུབ་པར་གསུངས་སོ། ། འོ་ན། བདེ་བ་ཅན་གྱི་གདུལ་བྱ་དང་། རྒྱལ་བ་ཀུན་ཏུ་གཟིགས་པའི་གདུལ་བྱ་ལ་མང་ཉུང་གི་ཁྱད་པར་ཇི་ལྟར་ཡོད་ན་ཁྱད་པར་ཡོད་དེ། བདེ་བ་ཅན་ན་ཉན་ཐོས་ཡོད་ཅིང་། རྒྱལ་བ་ཀུན་ཏུ་གཟིགས་པའི་ཞིང་ཁམས་རྡུལ་མེད་ཡང་དག་བསགས་ན། འཁོར་བྱང་ཆུབ་སེམས་དཔའ་ཤ་སྟག་ལས་ཉན་རང་མེད། བདེ་བ་ཅན་གྱི་ཞིང་གི་གདུལ་བྱ་ནི་རྒྱལ་བ་ཀུན་ཏུ་གཟིགས་ཀྱི་ཞིང་གི་གདུལ་བྱ་ལ་ལྟོས་ན་ཏིལ་གྱི་རྫང་བ་ཞིག་གི་ཏིལ་འབྲུ་གཅིག་ལྟ་བུ། རྒྱལ་བ་ཀུན་ཏུ་གཟིགས་པའི་ཞིང་གི་གདུལ་བྱའི་གྲངས་རྗང་ནང་གི་ཏིལ་བྱིངས་པོ་ཙམ་གྱི་ཚོད་ཡིན་པར་གསུངས། གཞན་ཡང་རྒྱལ་བ་ཀུན་ཏུ་གཟིགས་པའི་ཞིང་ཁམས་སུ་སྐྱེ་བར་སྨོན་ལམ་བཏབ་པས། ལོངས་སྐུ་དང་སྤྲུལ་སྐུའི་ཞིང་ཐམས་ཅད་དུ་སྐྱེ་བའི་སྨོན་ལམ་བཏབ་པར་འགྲོ་ཞིང་། འཇམ་དཔལ་དང་། རྒྱལ་བ་ཀུན་ཏུ་གཟིགས་ལ་ཡི་དམ་བྱས་པས་མདོ་སྔགས་ཀྱི་ལྷ་ཚོགས་ཐམས་ཅད་ལ་ཡི་དམ་བྱས་པར་འགྲོ་བར་གསུངས་སོ། ། དེས་ན་ཞིང་དེར་སྐྱེ་བའི་རྒྱུའི་གཙོ་བོ་ནི། ཞིང་དེའི་ཡོན་ཏན་ཡིད་ལ་ཡང་ཡང་སེམས་པ། བྱང་ཆུབ་ཏུ་སེམས་བསྐྱེད་པ། སྤྱོད་པ་ཕྱིན་དྲུག་གི་གསལ་བའི་དབྱེ་བ་མཐའ་དག་ལ་སློབ་པ། འཕགས་པ་འཇམ་དཔལ་དང་། རྒྱལ་བ་ཀུན་ཏུ་གཟིགས་ཀྱི་མཚན་ནས་བརྗོད་པ། སྔགས་བཟླ་བ། དེ་གཉིས་ཀྱི་སྐུ་བཞེང་བ། དེའི་གསུང་རབ་འདྲི་ཀློག་སོགས་བྱ་བ་ཡིན་ནོ། ། དེས་ན་བྱང་ཆུབ་ལམ་རིམ་ལ་བློ་སྤྱོད་བར་འདོད་པ་རྣམས་ཀྱིས་རྗེ་བཙུན་འཇམ་པའི་དབྱངས་ཀྱི་སྐུ་གསུང་ཐུགས་ཀྱི་ཡོན་ཏན་རྣམས་བསམ་ནས་དད་གུས་ཆེན་པོས་གསོལ་བ་འདེབས་པ་ཤིན་ཏུ་གལ་ཆེ་སྟེ། སྤྱིར་བྱང་ཆུབ་ལམ་རིམ་ལ་གོ་བ་ཆགས་པ་དང་། ངེས་ཤེས་ཁྱད་པར་ཅན་བསྐྱེད་ལ་ཆོས་རབ་ཏུ་རྣམ་འབྱེད་ཀྱི་ཤེས་རབ་རྒྱས་དགོས་ལ། ལྷག་པར་ཟབ་མོ་དབུ་མའི་ལྟ་བ་ཕུ་ཐག་ཚོད་པ་ཞིག་རྙེད་པ་ལ་སོ་སོར་རྟོག་པའི་ཤེས་རབ་ཤིན་ཏུ་གསལ་ཞིང་རྣོ་བ་ཞིག་དགོས། ཤེས་རབ་དེ་ལྟ་བུ་ཞིག་སྐྱེ་བ་ལ་བླ་མ་དང་རྗེ་བཙུན་འཇམ་དཔལ་དབྱངས་དབྱེར་མ་མཆིས་པ་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ་སྟེ་སེམས་རྒྱུད་ལ་བྱིན་རླབས་ཞུགས་པ་ཞིག་དགོས་ཞེས་མགོན་པོ་འཇམ་དཔལ་དབྱངས་ཀྱིས་རྗེ་བདག་ཉིད་ཆེན་པོ་ལ་དངོས་སུ་གདམས་པ་ལྟར་ཡིན་པས་ན་རྗེ་བཙུན་འཇམ་དཔལ་དབྱངས་ལ་གསོལ་བ་ཤུགས་དྲག་འདེབས་ཤིང་བྱང་ཆུབ་ལམ་གྱི་རིམ་པའི་ཉམས་ལེན་ལ་འབད་པར་བྱའོ། ། ། །
༈ ཟབ་མོའི་དོན་གཟིགས་འཕགས་མཆོག་ཀླུ་སྒྲུབ་ཞབས། ། ཞེས་བསྔགས་པ། དཔལ་མགོན་འཕགས་པ་ཀླུ་སྒྲུབ་ནི། སྔོན་བསྐལ་པ་གྲངས་མེད་མུ་མེད་པའི་དུས་ནས་ཐུགས་བསྐྱེད། བསྐལ་ཆེན་གྲངས་མེད་མང་པོར་ཚོགས་གཉིས་བར་མ་ཆད་དུ་བསགས། འཇིག་རྟེན་གྱི་ཁམས་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བར་སེམས་ཅན་གྲངས་མེད་པའི་དོན་མཛད་བཞིན་པ་ལས། ཞིང་འདིེར་ཐུབ་པའི་བསྟན་པ་སྤེལ་བའི་སླད་དུ་བསམ་བཞིན་དུ་བྱོན་པ་ཞིག་སྟེ། དེ་ཡང་དཔལ་མགོན་འཕགས་པ་ཀླུ་སྒྲུབ་ཞིང་འདིར་བྱོན་ནས་རྒྱལ་བའི་བསྟན་པ་སྤེལ་བར་རྒྱལ་བ་རང་ཉིད་ཀྱིས་ལུང་བསྟན་ཏེ། དཔལ་མགོན་འཕགས་པ་ཀླུ་སྒྲུབ་ཞིང་འདིར་ཐུབ་པའི་བསྟན་པ་སྤེལ་བའི་ཕྱིར་འབྱོན་པ་དང་ཇི་ལྟར་ཐུགས་བསྐྱེད་པ་ལྟར་རྒྱལ་བ་མྱ་ངན་ལས་འདས་ནས་བསྟན་པ་ཉམས་དམས་པར་གྱུར་པ་ན་འཕགས་པ་ཀླུ་སྒྲུབ་བྱོན་ནས་བསྟན་པ་རྒྱ་ཆེར་སྤེལ་བར་རྒྱལ་བ་ཉིད་ཀྱིས་ལུང་བསྟན་པ་ནི། སྔོན་ཐུགས་བསྐྱེད་ཚུལ་སྤྲིན་ཆེན་པོའི་མདོ་ལས་ཇི་ལྟར་གསུངས་པ་ནི། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་མུ་མེད་པ་འདས་པའི་སྔོན་རོལ་ཏུ་བདག་ཉིད་ཆེན་པོ་འདི་ཆོས་ཀྱི་རྒྱལ་པོ་བརྩོན་འགྲུས་ཆེན་པོའི་ཀླུ་ཞེས་བྱ་བར་འཁྲུངས་པའི་ཚེ། དེ་བཞིན་གཤེགས་པ་ཀླུ་རིགས་སྒྲོན་མ་ཞེས་བྱ་བ་དང་མཇལ་ཏེ། དེའི་ཚེ་དེ་བཞིན་གཤེགས་པ་ཀླུ་རིགས་སྒྲོན་མ་ལ་མཆོད་པའི་དངོས་པོ་ཚད་མེད་པས་མཆོད་ཅིང་རིན་པོ་ཆེ་རིན་ཐང་མེད་པ་སྤར་བ་གང་གཏོར་ཏེ་ཐུགས་བསྐྱེད་དང་སྨོན་ལམ་རྒྱ་ཆེན་པོ་མཛད་ཅིང་། ལྷག་པར་མ་འོངས་པའི་དུས་ན་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ནུབ་པ་ལ་ཐུག་པའི་ཚེ། བདག་རབ་ཏུ་བྱུང་སྟེ་ཆོས་ཀྱི་སྒྲ་ཆེན་པོ་ལན་གསུམ་བསྒྲགས་ལ་དམ་པའི་ཆོས་ཀྱི་ཕྱིར་བདག་གི་སྲོག་ཀྱང་འདོར་བར་གྱུར་ཅིག་ཅེས་ཞིང་འདིར་སྟོན་པའི་བསྟན་པ་སྤེལ་བའི་ཐུགས་བསྐྱེད་དང་དམ་བཅའ་མཛད་དོ། ། དེ་ལྟར་ཐུགས་བསྐྱེད་པ་ལྟར་ཞིང་འདིར་སྟོན་པ་ཐུབ་པའི་དབང་པོ་བྱོན་པའི་ཚེ་ལི་ཙཱ་བྱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་འཁྲུངས་པ་ན། ཐུབ་པའི་དབང་པོས་འཁོར་ཚོགས་རྒྱ་མཚོ་ལྟ་བུའི་དབུས་སུ་གཞོན་ནུ་དེའི་ཡོན་ཏན་རྒྱ་ཆེར་བསྔགས་ཤིང་། རྒྱལ་བ་རང་ཉིད་མྱ་ངན་ལས་འདས་པའི་འོག་ཏུ་ལོ་བཞི་བརྒྱ་ལོན་པ་ན་འཕགས་པ་ཀླུ་སྒྲུབ་ཏུ་གྱུར་ནས་རྒྱལ་བའི་བསྟན་པ་རྒྱས་པར་བྱེད་པར་ལུང་བསྟན། ལངྐར་གཤེགས་པའི་མདོ་ལས་ཀྱང་། ལྷོ་ཕྱོགས་བེ་དའི་ཡུལ་དུ་ནི། ། དགེ་སློང་དཔལ་ལྡན་ཆེར་གྲགས་པ། ། དེ་མིང་ཀླུ་ཞེས་བོད་པ་སྟེ། ། ཡོད་དང་མེད་པའི་ཕྱོགས་འཇིག་པ། ། ང་ཡི་ཐེག་པ་འཇིག་རྟེན་དུ། ། བླ་མེད་ཐེག་ཆེན་རབ་བཤད་ནས། ། རབ་ཏུ་དགའ་བའི་ས་བསྒྲུབས་ཏེ། ། བདེ་བ་ཅན་དུ་དེ་འགྲོ་འོ། ། ཞེས་དང་། འཇམ་དཔལ་རྩ་རྒྱུད་ལས། དེ་བཞིན་གཤེགས་པ་ང་འདས་ནས། ། ལོ་ནི་བཞི་བརྒྱ་ལོན་པ་ན། ། དགེ་སློང་ཀླུ་ཞེས་དེ་འབོད་འབྱུང་། ། བསྟན་པ་ལ་ནི་དད་ཅིང་ཕན། ། རབ་ཏུ་དགའ་བའི་ས་ཐོབ་པ། ། ལོ་ནི་དྲུག་བརྒྱ་དག་ཏུ་འཚོ། ། རིག་པ་རྨ་བྱ་ཆེན་མོ་ནི། ། བདག་ཉིད་ཆེན་པོ་དེས་ཀྱང་འགྲུབ། ། བསྟན་བཅོས་སྣ་ཚོགས་དོན་དང་ནི། ། དངོས་པོ་མེད་པའི་དོན་དེ་རིག ། གང་ཚེ་ལུས་དེ་བོར་བ་ན། ། བདེ་བ་ཅན་དུ་སྐྱེ་བར་འགྱུར། ། དེ་ནི་མཐར་གྱི་སངས་རྒྱས་ཉིད། ། ངེས་པ་ཁོ་ནར་ཡང་དག་ཐོབ། ། ཅེས་དང་། གསེར་འོད་དམ་པའི་མདོ་ལས་ལི་ཙཱ་བྱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ཞེས་རྒྱ་ཆེར་བསྔགས་པ་དེ་ཡང་བདག་ཉིད་ཆེན་པོ་འཕགས་པ་ཀླུ་སྒྲུབ་འདི་ཉིད་ཡིན་ཏེ། འཕགས་པ་སྤྲིན་ཆེན་པོ་སྟོང་ཕྲག་བཅུ་གཉིས་པའི་མདོ་འཇུག་འགྲེལ་དུ་དྲངས་པ་ལས། ཀུན་དགའ་བོ། ལི་ཙཱ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ནི། ང་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ཀླུ་ཞེས་བྱ་བའི་དགེ་སློང་དུ་གྱུར་ནས་ངའི་བསྟན་པ་རྒྱས་པར་བྱས་ཏེ། མཐར་རབ་ཏུ་དང་བའི་འོད་ཅེས་བྱ་བའི་ཞིང་དུ་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ། ། ཞེས་གསུངས། རྔ་བོ་ཆེའི་མདོ་ལས་ཀྱང་། ལི་ཙཱ་བྱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་འདི་སྟོན་པ་འདས་ནས་ལོ་བརྒྱད་ཅུ་པ་ལ་བསྟན་པ་ཉམས་པའི་ཚེ། སྟོན་པའི་མཚན་འཆང་པའི་དགེ་སློང་དུ་གྱུར་ནས་བསྟན་པ་རྒྱས་པར་བྱས་ཏེ་ལོ་བརྒྱ་ལོན་པའི་འོག་ཏུ་འདས་ནས་བདེ་བ་ཅན་དུ་སྐྱེ་བར་གསུངས་སོ། ། དུས་ཀྱི་འཁོར་ལོའི་རྒྱུད་ཕྱི་མ་ལས་ཀྱང་བདག་ཉིད་ཆེན་པོ་འདིས་བསྟན་པ་དང་སེམས་ཅན་གྱི་དོན་རྒྱ་ཆེན་པོ་བྱེད་པར་ལུང་བསྟན་ཅིང་། སྔར་སྨོས་པ་དེ་དག་ཀྱང་མཚོན་བྱེད་ཙམ་ཡིན་གྱི། དཔལ་མགོན་འཕགས་པ་ཀླུ་སྒྲུབ་ལུང་བསྟན་པའི་མདོ་རྒྱུད་ཀྱི་གསུངས་རབ་བརྒྱ་ཕྲག་ཙམ་ཡོད་ཅེས་འཕགས་ཡུལ་མཁས་པ་རྣམས་ལ་གཏམ་དུ་གྲགས་སོ། ། དཔལ་མགོན་འཕགས་པ་ཀླུ་སྒྲུབ་དུས་ཇི་ཙམ་ལ་བྱོན་པ་ནི་རྒྱལ་བ་མྱ་ངན་ལས་འདས་པའི་འོག་ཏུ་རྒྱལ་བའི་བསྟན་པ་འཛིན་པའི་སྐྱེས་བུ་ཇི་ལྟར་འབྱུང་བ་རྒྱལ་བ་ཉིད་ཀྱི་གསུང་ཚད་མར་གྱུར་པ་ལས་ཤེས་ཏེ། སྙིང་རྗེ་པད་དཀར་ལས། སྟོན་པ་འདས་ནས་བསྟན་པ་སུས་འཛིན་ཞེས་ཞུས་པའི་ལན་དུ། ཀུན་དགའ་བོ་དགེ་སློང་འོད་སྲུངས་དང་ཁྱོད་གཉིས་ཀྱི་ལོ་བཞི་བཅུ་ལྷག་ཙམ་དུ་ངའི་དམ་པའི་ཆོས་འཛིན་པར་འགྱུར་རོ། ། ཞེས་སོགས་ལུང་བསྟན་པ་ལྟར་རྒྱལ་བ་མྱ་ངན་ལས་འདས་ནས་གནས་བརྟན་འོད་སྲུངས་ཆེན་པོ་དང་འཕགས་པ་ཀུན་དགའ་བོ་དང་གནས་བརྟན་ཉེ་བར་འཁོར་གསུམ་གྱིས་རྒྱལ་བས་གསུངས་པའི་སྡེ་སྣོད་གསུམ་མ་ལུས་པར་བསྡུས་ཏེ་བཀའ་བསྡུ་དང་པོ་མཛད་ནས་འཇིག་རྟེན་དུ་རྒྱལ་བའི་བསྟན་པ་མི་ནུབ་པར་དར་ཞིང་རྒྱས་པར་བྱས། དེ་ནས་འོད་སྲུངས་ཆེན་པོ་མྱ་ངན་ལས་འདས་ནས་འཕགས་པ་ཀུན་དགའ་བོས་རྒྱལ་བའི་བསྟན་པ་བཟུང་སྟེ་ལོ་བཞི་བཅུའི་རིང་ལ་རྒྱ་ཆེར་སྤེལ། དེ་ནས་རིམ་གྱིས་ལེགས་མཐོང་ཆེན་པོའི་བར་བསྟན་པའི་གཏད་རབས་བདུན་གྱིས་རྒྱལ་བསྟན་མི་ནུབ་པར་སྤེལ་བར་མཛད། དེ་ནས་རྒྱལ་བ་མྱ་ངན་ལས་འདས་ནས་ལོ་བརྒྱ་ལོན་པ་ཙམ་ན་དགེ་སློང་རྩིང་སྤྱོད་ཅན་མང་པོ་ཞིག་གིས་གསེར་དངུལ་གྱི་རུང་བ་ཞེས་པ་ལ་སོགས་པ་འདུལ་བའི་བསླབ་པ་དང་འགལ་བའི་གཞི་བཅུ་དར་བ་ན་དཀར་ཕྱོགས་ཀྱི་ལྷ་རྣམས་ཀྱིས་རྒྱལ་བའི་བསྟན་པ་ལ་རྨ་ཕྱུང་ངོ་ཞེས་མྱ་ངན་ཆེན་པོ་བྱས་ཤིང་སྨྲེ་སྔགས་བཏོན་ཏེ་འཛམ་བུའི་གླིང་དང་རྒྱལ་ཆེན་བཞིའི་ལྷ་གནས་དང་སུམ་ཅུ་རྩ་གསུམ་སོགས་ལྷ་གནས་གོང་མ་རྣམས་སུའང་བསྒྲགས་ཏེ་དཀར་ཕྱོགས་ཀྱི་ལྷ་རྣམས་མྱ་ངན་ཆེན་པོར་གྱུར་ཅིང་བདུད་རིགས་རྣམས་དགའ་བའི་ཅ་ཅོ་སྒྲོག་པ་ཞིག་བྱུང་བ་ན་སྔོན་གྱི་ཐུགས་བསྐྱེད་དང་སྨོན་ལམ་གྱི་མཐུས་ཆོས་རྒྱལ་མྱ་ངན་མེད་ཅེས་བྱ་བ་བྱོན་ཏེ། ཆོས་རྒྱལ་དེས་སྦྱིན་བདག་བྱས། གནས་བརྟན་གྲགས་པ་ལ་སོགས་པ་དགྲ་བཅོམ་པ་བདུན་བརྒྱ་ཚོགས་ཏེ་ལོག་པར་སྨྲ་བ་རྣམས་བསུན་ཕྱུང་སྟོན་པ་ཐུགས་རྗེ་ཅན་དེས་འདུལ་བའི་བསླབ་ཁྲིམས་ཇི་ལྟར་བཅས་པ་དེ་ཁོ་ན་ལྟར་བྱ་བར་བསྒྲུབས་ཏེ་བཀའ་བསྡུ་གཉིས་པ་མཛད། དེའི་ཚེ་དཀར་ཕྱོགས་ཀྱི་ལྷ་རྣམས་དགའ་བའི་ཅ་ཅོ་སྒྲོག་ཅིང་ཡིད་ཚིམ་པར་གྱུར། དེ་ནས་དུས་རིམ་གྱིས་སྙིགས་པར་གྱུར་པ་དང་སེམས་ཅན་རྣམས་བསོད་ནམས་དམན་པའི་དབང་གིས་དམ་པའི་ཆོས་འདུལ་བ་ལ་ལོག་པར་སྨྲ་བ་མང་དུ་དར་ཞིང་། ལྷག་པར་སྡེ་པ་བཅོ་བརྒྱད་དུ་གྱེས་ཏེ་དེ་དག་ཐམས་ཅད་ནང་མི་མཐུན་པར་ཁོ་བོ་ཅག་གི་འདི་ཁོ་ན་བདེན་གྱི་གཞན་ནི་གཏི་མུག་གོ་ཞེས་རྩོད་པས་དུས་འདའ་བར་གྱུར་ཅིང་དམ་པའི་ཆོས་འདུལ་བ་ལ་ཀློག་པ་ཐོས་བསམ་དང་། སྤོང་བ་བསམ་གཏན་བྱ་བའི་ཚུལ་རྣམས་ཆེས་ཆེར་ཉམས་ཤིང་ཉན་ཐོས་ཀྱི་གྲུབ་མཐའ་སྨྲ་བ་མང་པོ་ཞིག་གིས་ཐེག་ཆེན་གྱི་མདོ་སྡེ་རྣམས་ནི་རྒྱལ་བའི་བཀའ་མིན་ནོ་ཞེས་ལོག་པར་སྨྲ་བའི་གཏམ་རྒྱ་ཆེར་བསྒྲགས་ཏེ་རྒྱལ་བའི་བསྟན་པ་ཆེས་ཆེར་ཉམས་པ་སྟོན་པ་ཐུགས་རྗེ་ཅན་ཉིད་ཀྱི་ཐུགས་བསྐྱེད་དང་སྨོན་ལམ་གྱི་མཐུས་ནམ་ཞིག་ན་རྒྱལ་པོ་ཀྲི་ཀྲིའི་རྨི་ལྟས་ལུང་བསྟན་པའི་མདོ་རྙེད་ནས་བལྟས་པས། རྒྱལ་བ་འོད་སྲུངས་ཀྱིས་རྒྱལ་པོ་ཀྲི་ཀྲི་ལ་ཁྱོད་ཀྱི་རྨི་ལྟས་དེ་རྣམས་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ལ་འདི་ལྟར་འབྱུང་བའི་ལྔ་ལྟས་ཡིན། ཞེས་གསུངས་ཤིང་། རྒྱལ་པོ་ཀྲི་ཀྲིའི་མི་ལྟས་ཇི་ལྟར་བྱུང་ཚུལ་ནི། མ་ག་ངྷ་བཟང་མོའི་རྟོགས་པ་བརྗོད་པ་ལས། སངས་རྒྱས་འོད་སྲུངས་ཀྱི་དུས་སུ་དེའི་སྦྱིན་བདག་རྒྱལ་པོ་ཀྲི་ཀྲི་ཞེས་བྱ་བ་བྱུང་བ་དེའི་རྨི་ལམ་དུ། གླང་པོའི་རྒྱལ་པོ་སྐར་ཁུང་ནས་བྱུང་བ་ལ་དེའི་མཇུག་མ་ཐོགས་པ་དང་། སྐོམ་པས་ཕྱི་ནས་ཁྲོན་པ་བསྙེགས་པ་དང་། ཕྱེ་བྲེ་གང་དང་མུ་ཏིག་བྲེ་གང་འཚོང་བྱེད་པ་དང་། ཙན་དན་དང་ཤིང་ཕལ་པ་རིན་མཉམ་པར་བྱེད་པ་དང་། ཀུན་དགའ་ར་བའི་མེ་ཏོག་དང་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པས་ཕྲོགས་པ་དང་། གླང་པོའི་ཕྲུག་གུས་སྤོས་ཀྱི་གླང་པོ་འཇིགས་པར་བྱེད་པ་དང་། སྤྲེའུ་མི་གཙང་བས་གོས་པས་གཞན་ལ་སྐུད་པ་དང་། སྤྲེའུ་རྒྱལ་པོར་དབང་བསྐུར་བ་མཐོང་བ་དང་། རས་ཡུག་གཅིག་མི་བཅོ་བརྒྱད་ཀྱིས་བགོས་པ་ལས་རེ་རེའི་ལག་ཏུ་ཡང་རས་ཡུག་ཚང་མ་རེ་རེ་བྱུང་བ་དང་། སྐྱེ་བོའི་ཚོགས་ཆེན་པོ་འདུས་ནས་འཐབ་རྩོད་བྱེད་པ་མཐོང་སྟེ། རྨི་ལམ་བཅུ་རྨིས་པས་བདག་ཉེས་སུ་དོགས་པས་འཇིགས་ཏེ། བཅོམ་ལྡན་འདས་འོད་སྲུངས་ལ་ཞུས་སོ། ། བཅོམ་ལྡན་འདས་ཀྱིས་དེ་དག་རྒྱལ་པོ་ཁྱོད་ལ་ཉེས་དམིགས་སུ་འགྱུར་བ་མ་ཡིན་གྱིས། མ་འོངས་པ་ན་ཚེ་ལོ་བརྒྱ་བའི་ཚེ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་ལ་མ་སྦྱངས་པའི་དགེ་སློང་རྣམས་ཁྱིམ་ནས་བྱུང་ཡང་གཙུག་ལག་ཁང་དང་རྙེད་པ་ལ་ཆགས་པ་འབྱུང་བས། གླང་པོ་ལུས་ཐོན་ནས་མཇུག་མ་ཐོགས་པ་དེ་ནི་དེའི་ལྟས་སོ། ། སྐོམ་པས་ཕྱི་ནས་ཁྲོན་པ་བསྙེགས་པ་ནི། གཙུག་ལག་ཁང་ན་གནས་པ་ལ་གཞན་གྱིས་ཆོས་གཤད་པ་ན་ཉན་པར་མི་བྱེད་པའི་ལྟས་སོ། ། ཕྱེ་དང་མུ་ཏིག་བརྗེ་བ་ནི་དེའི་ཚེ་ཉན་ཐོས་རྣམས་བཟའ་བའི་ཆེད་དུ་ཆོས་སྟོན་པ་འབྱུང་བས་དེའི་ལྟས་སོ། ། ཙན་དན་དང་ཤིང་གཞན་མཉམ་པར་མཐོང་བ་དེ་ནི། དེའི་ཚེ་ཉན་ཐོས་རྣམས་མུ་སྟེགས་ཀྱི་གཞུང་དང་། སངས་རྒྱས་ཀྱི་བཀའ་མཉམ་པར་འཛིན་པ་འབྱུང་བས་དེའི་ལྟས་སོ། ཀུན་དགའ་ར་བའི་མེ་ཏོག་ལ་སོགས་པ་ཕུན་སུམ་ཚོགས་པ་ཆོམ་པོས་ཕྲོགས་པ་ནི། དེའི་ཚེ་ཉན་ཐོས་མ་བསྡམས་པ་རྣམས་དགེ་འདུན་གྱི་ལོངས་སྤྱོད་ཀྱིས་ཁྱིམ་པའི་ངོ་བསྲུང་བ་འབྱུང་བས་དེའི་ལྟས་སོ། ། གླང་པོའི་ཕྲུག་གུས་སྤོས་ཀྱི་གླང་པོ་འཇིགས་པར་བྱེད་པ་ནི། དགེ་སློང་སྡིག་ཅན་གྱིས་ཚུལ་ཁྲིམས་དང་ལྡན་པའི་དགེ་སློང་ཟིལ་གྱིས་གནོན་པ་འབྱུང་བས་དེའི་ལྟས་སོ། ། མི་གཙང་བས་གོས་པའི་སྤྲེའུས་གཞན་ལ་སྐུད་པ་ནི། ཚུལ་ཁྲིམས་ཉམས་པས་ཚུལ་ཁྲིམས་དང་ལྡན་པ་ལ་བསྐུར་པ་འདེབས་པར་འགྱུར་བས་དེའི་ལྟས་སོ། ། སྤྲེའུ་རྒྱལ་པོར་དབང་བསྐུར་བ་ནི། དེའི་དུས་སུ་རྨོངས་པ་རྣམས་རྒྱལ་པོར་དབང་བསྐུར་བ་འབྱུང་བས་དེའི་ལྟས་སོ། ། མི་བཅོ་བརྒྱད་ཀྱིས་རས་ཡུག་གཅིག་བགོས་པས་སོ་སོའི་ལག་ཏུ་མ་ཉམས་པར་བྱུང་བ་ནི། ཤཱཀྱ་ཐུབ་པའི་བསྟན་པ་ལ་སྡེ་པ་བཅོ་བརྒྱད་དུ་གྱེས་ཀྱང་ཐམས་ཅད་རྣམ་པར་གྲོལ་བའི་སྐལ་བ་ཅན་ཡིན་པས་དེའི་ལྟས་སོ། ། སྐྱེ་བོའི་ཚོགས་འདུས་ནས་འཐབ་རྩོད་བྱེད་བ་དེ་ནི་ཤཱཀྱ་ཐུབ་པའི་བསྟན་པ་རྩོད་པའི་ཆོས་ཀྱིས་ནུབ་པར་འགྱུར་བས་དེའི་ལྟས་སོ། ། ཞེས་འབྱུང་ངོ་། ། མདོ་དེ་མཐོང་ནས་སྡེ་བ་བཅོ་བརྒྱད་པོ་ཐམས་ཅད་བློ་མཐུན་པར་གྱུར་ཏེ་གནས་བརྟན་སོ་སོའི་སྐད་མི་འདྲ་བ་དང་། ཆ་ལུགས་ཅུད་ཟད་ཀྱི་ཁྱད་པར་ལས། དོན་དུ་རྒྱལ་བའི་བཀའ་ཉིད་ལ་མཐུན་ཞིང་ཐམས་ཅད་ལམ་བསླབ་པ་གསུམ་ཉམས་སུ་བླངས་ཏེ་རྣམ་གྲོལ་ཐར་པ་སྒྲུབ་པའི་འབྲས་བུ་ཅན་དུ་མཚུངས་པར་མཐོང་ནས་ཀློག་པ་ཐོས་བསམ་དང་སྤོང་བ་བསམ་གཏན་གཉིས་ཀྱི་སྒོ་ནས་རྒྱལ་བསྟན་འཕེལ་བར་གྱུར་ཏེ། དེ་ལ་ནི་བསྔུ་བ་གསུམ་པ་ཞེས་གྲགས་སོ། ། དེ་ནས་ཡང་རྒྱལ་བསྟན་རིམ་གྱིས་ཉམས་དམས་ཤིང་ལྷག་པར་ཐེག་པ་ཆེན་པོའི་བསྟན་པ་མིང་ཙམ་ཡང་ནུབ་པ་ལ་ཕྱོགས་པ། རྒྱལ་བ་མྱ་ངན་ལས་འདས་ནས་ལོ་བཞི་བརྒྱ་ཙམ་ལོན་པ་ན་བདག་ཉིད་ཆེན་པོ་དཔལ་མགོན་འཕགས་པ་ཀླུ་སྒྲུབ་ཞིང་འདིར་བྱོན་ནོ། ། འཕགས་པ་སླུ་སྒྲུབ་གང་དུ་འཁྲུངས་པའི་ཡུལ་ནི། རྒྱ་གར་ལྷོ་ཕྱོགས་བཻ་དརྦྷའི་ཡུལ་ཏེ་ཡུལ་དེར་བྲམ་ཟེ་ཆེན་པོ་ཞིག་ལ་བུ་མེད་པ་ན། རྨི་ལམ་དུ་བྲམ་ཟེ་བརྒྱ་ལ་ཆོས་སྟོན་དྲངས་ན་བུ་རྙེད་པའི་ལུང་བསྟན་བྱུང་བར་དེ་ལྟར་བྱས་པས། བུ་གཅིག་བཙས་ཏེ་མཚན་མཁན་ལ་བསྟན་པས། མཚན་བཟང་མོད་ཀྱི་ཞག་བདུན་གྱི་ཚེ་ལས་མེད་ཟེར་བར། ཐབས་ཅི་ཡོད་དྲིས་པས། བྲམ་ཟེ་བརྒྱ་ལ་ཆོས་སྟོན་དྲངས་ན་ཟླ་བ་བདུན་དང་། དགེ་སློང་བརྒྱ་ལ་ཆོས་སྟོན་དྲངས་ན་ལོ་བདུན་འཚོ། དེ་ནས་ཐབས་མེད་ཟེར་བས། དེ་ལྟར་བྱས་ཏེ་ལོ་བདུན་དུ་ཉེ་བ་ན། བུའི་རོ་མཐོང་བ་ཕ་མས་མ་བཟོད་པས། གཡོག་དང་བཅས་པ་འཁྱམ་དུ་བཏང་ངོ་། ། དེ་ནས་རིམ་གྱིས་སོང་སྟེ་ཁ་སརྦཱ་ཎིའི་ཞལ་བལྟས་ཏེ། རིམ་གྱིས་དཔལ་ནཱ་ལནྡྲའི་ས་ར་ཧའི་སྒོ་དྲུང་དུ་སོང་སྟེ། སྙན་དངགས་ཀྱི་རིག་བྱེད་དག་སྟོན་པ་ན་བྲལ་ཟེ་ཆེན་པོས་རྒྱལ་སྲས་གཞོན་ནུ་དེ་ནང་དུ་ཁྲིད་ནས་འདིར་འོང་བའི་རྒྱུ་མཚན་གང་ཡིན་དྲིས། ཇི་ལྟར་གྱུར་པའི་རྒྱུ་མཚན་བཤད་པས། རབ་ཏུ་འབྱུུང་ནུས་ན་ཐབས་ཡོད་གསུངས་པས། ཕྱིས་རབ་ཏུ་འབྱུང་བར་ཁས་བླངས་ཏེ། ཚེ་དཔག་མེད་འཆི་བདག་འཇོམས་པའི་དཀྱིལ་འཁོར་དུ་དབང་བསྐུར་ནས་གཟུངས་འདོན་དུ་བཅུག ། ཁྱད་པར་ལོ་བདུན་པའི་ནུབ་མོ་མཚན་ཐོག་ཐག་བཏོན་པས། འཆི་བདག་གི་ཆད་པ་ལས་གྲོལ། ལོ་བརྒྱད་ལོན་པ་ན་རབ་ཏུ་བྱུང་ནས། ཤེས་བྱ་རིག་པའི་གནས་རྣམས་དང་། ཐེག་པ་ཆེ་ཆུང་ཐམས་ཅད་ལ་མཁས་པར་སྦྱངས་སོ། ། ཕྱིས་ཕ་མ་དང་མཇལ་ཞིང་བྲམ་ཟེ་ཆེན་པོ་དེ་ཉིད་ལས་དཔལ་གསང་བ་འདུས་པ་ལ་སོགས་པའི་གསང་སྔགས་ཀྱི་ཆོས་མང་དུ་ཞུས་པས། རྒྱུད་དང་སྙན་རྒྱུད་ཀྱི་གདམས་པ་དང་རྗེས་སུ་བསྟན་པ་མ་ལུས་པ་གནང་ཞིང་། དེ་ཉིད་ལ་མཁན་པོ་ཞུས་ཏེ་བསྙེན་པར་རྫོགས་པར་མཛད་དེ། མཚན་དགེ་སློང་དཔལ་ལྡན་ཞེས་གྲགས་སོ། ། དེ་ལྟར་ནཱ་ལནྡྲར་སྡེ་སྣོད་གསུམ་དང་རྒྱུད་སྡེ་བཞིའི་བཤད་སྲོལ་གང་ཡོད་པ་རྣམས་གསན་ཞིང་། གཙོ་བོར་ནི་ཚེ་རབས་ཐམས་ཅད་དུ་རྗེ་བཙུན་འཇམ་དཔལ་དབྱངས་ཀྱིས་རྗེས་སུ་བཟུང་བ་ཡིན་པས་རྗེ་བཙུན་འཇམ་དབྱངས་ལྷའི་བུའི་ཚུལ་བཟུང་བ་བྱང་སེམས་བློ་གྲོས་རིན་ཆེན་ལ་མདོ་དང་སྔགས་ཀྱི་དམ་པའི་ཆོས་མ་ལུས་པ་གསན་ཏེ། སྟོན་པ་ཤཱཀྱའི་རྒྱལ་པོ་ཞིང་འདིར་བྱོན་ནས་མདོ་སྔགས་ཀྱི་ཆོས་ཇི་སྙེད་གསུངས་པའི་གསང་པའི་གནས་ཐམས་ཅད་ཐུགས་ལ་ཆུད་པར་མཛད་དོ། ། དེའི་ཚེ་མུ་གེ་ཆེན་པོ་ཞིག་བྱུང་ནས་ནཱ་ལནྡྲའི་དགེ་འདུན་རྣམས་འཚོ་བས་ཕོངས་པར་གྱུར་པ་ན་གནས་བརྟན་སྒྲ་གཅན་འཛིན་བཟང་པོས་དཔལ་མགོན་འཕགས་པ་ཀླུ་སྒྲུབ་ལ་ནཱ་ལནྡྲའི་ཞལ་ཏ་པ་མཛད་ནས་དགེ་འདུན་རྣམས་སྐྱོང་དགོས་པར་བསྐུལ་བ་ན། དཔལ་མགོན་འཕགས་པ་ཀླུ་སྒྲུབ་ཀྱིས་ཀྱང་དེ་ལྟར་མཛད་པར་ཞལ་གྱིས་བཞེས་ཏེ་གླིང་བར་ནས་གསེར་འགྱུར་གྱི་རྩི་བཞེས་ནས་ཟངས་མང་པོ་གསེེར་དུ་བསྒྱུར་ཏེ་མུ་གེ་མེད་པའི་ས་ནས་འབྲས་དང་ནས་ལ་སོགས་པ་འཚོ་བའི་ཡོ་བྱད་ཐམས་ཅད་དྲངས་ཏེ་ལོ་བཅུ་གཉིས་ཀྱི་བར་དུ་དགེ་འདུན་རྣམས་འཚོ་བས་ཕོངས་པ་མེད་པར་མཛད། དེ་ནས་བསླབ་ཁྲིམས་འཆལ་པར་སྤྱོད་པ་མང་པོ་ཞིག་གིས་སའི་སྟེང་ཁྱབ་སྟེ་རྒྱལ་བའི་བསྟན་པའི་ནང་མཛོད་འདུལ་བ་ཆེས་ཆེར་ཉམས་པར་བྱས་པ་ཐུགས་ཀྱིས་མ་བཟོད་ནས་བསླབ་ཁྲིམས་འཆལ་པར་སྤྱོད་པ་སྟོང་ཕྲག་མང་པོ་གནས་ནས་ཕྱུང་། སྐལ་བ་དང་ལྡན་པ་རྣམས་ལ་སྡེ་སྣོད་གསུམ་གྱི་ཆོས་རྒྱ་ཆེར་བསྟན་ཅིང་ལྷག་པར་དམ་པའི་ཆོས་འདུལ་བ་རྒྱ་ཆེར་བསྒྲགས་ཏེ་སྔོན་སྟོན་པ་ཐུབ་པའི་དབང་པོས་ཝཱ་ར་ཎཱ་སིར་བཀའ་དང་པོ་བདེན་པ་བཞིའི་ཆོས་འཁོར་བསྐོར་བ་དང་མཚུངས་པ་ལྟ་བུ་ཞིག་མཛད་པས། མཛད་པ་དེ་ལ་སྔོན་གྱི་མཁས་པ་རྣམས་ཀྱིས་འཕགས་པ་ཀླུ་སྒྲུབ་ཀྱིས་དམ་པའི་ཆོས་ཀྱི་སྒྲ་ཆེན་པོ་ལན་གསུམ་བསྒྲགས་པའི་ནང་ནས་དང་པོ་དམ་པའི་ཆོས་འདུལ་བ་ཉམས་པ་གསོས་ཏེ་འདུལ་བའི་ཆོས་རྒྱ་ཆེར་བསྒྲགས་པ་ཞེས་གཏམ་དུ་གྲགས་སོ། ། དེའི་ཚེ་བདུད་སྡིག་ཏོ་ཅན་གྱིས་བྱིན་གྱིས་བརླབས་པ་དགེ་སློང་བདེ་བྱེད་ཅེས་པས་ཐེག་པ་ཆེན་པོ་བསུན་འབྱིན་པའི་བསྟན་བཅོས་གླེགས་བམ་མང་པོ་བརྩམས་ཏེ་ཐེག་པ་ཆེན་པོའི་ལྟ་སྤྱོད་གཉིས་ཀ་བསུན་འབྱིན་པ་ཞིག་བྱུང་བ་ན། བདག་ཉིད་ཆེན་པོ་འཕགས་པ་ཀླུ་སྒྲབ་ཀྱིས་ལོག་པར་སྨྲ་བ་དེའི་གཉེན་པོར་ཆོས་རྒྱ་ཆེར་གསུངས་ཏེ་ལྟ་བ་ལོག་པ་དེ་རྣམས་བསུན་ཕྱུང་། སྐལ་བ་དང་ལྡན་པ་མཐའ་ཡས་པ་ལ་སྡེ་སྣོད་གསུམ་གྱི་ཆོས་རྒྱ་ཆེར་སྟོན་པར་མཛད་པ་དེའི་ཚེ་བྱིས་པ་གཉིས་ཆོས་ཉན་དུ་འོངས་པའི་དྲི་ཞིམ་པོས་འཁོར་ཀུན་ཏུ་ཁྱབ་པར་གྱུར་ཅིང་། སོང་བ་དང་དྲི་ཞིམ་པོ་དེ་མེད་པར་གྱུར་པ་དང་། དེའི་རྒྱུ་མཚན་དྲིས་པས་དེ་དག་ན་རེ་ངེད་གླུའི་རྒྱལ་པོ་འཇོག་པོའི་བུ་ཡིན། མི་ཡུལ་དུ་འགྲོ་བ་ལ་ཙན་དན་གོར་ཤིརྵའི་བསྲུང་བ་བྱས་པ་ཡིན་ཟེར་རོ། ། ཙན་དན་དེ་བླང་དུ་ཡོད་དམ་དྲིས་པས། ཡབ་ལ་འདྲི་ཡིས་ཟེར་ནས་དྲིས་པས། སློབ་དཔོན་ཀླུའི་ཡུལ་དུ་འབྱོན་ན་འབུལ་ཟེར་བ་ན་སློབ་དཔོན་གྱིས་ཀླུའི་ཡུལ་དུ་གདུལ་བྱ་མཐའ་ཡས་པ་ལ་དགེ་བའི་རྩ་བ་བསྐྱེད་པ་དང་། ཤེས་རབ་ཀྱི་ཕ་རོལ་དུ་ཕྱིན་པ་སྟོང་ཕྲག་བརྒྱ་པ་གདན་དྲང་བ་སོགས་དགོས་པ་མང་པོ་ཞིག་ཉེ་བར་གཟིགས་ནས་འབྱོན་པར་ཞལ་གྱིས་བཞེས་ཏེ་ཀླུའི་ཡུལ་དུ་བྱོན། ཀླུའི་རྒྱལ་པོ་འཇོག་པོ་ལ་སོགས་པ་ཀླུ་རྒྱལ་མཐུ་བོ་ཆེ་རྣམས་ཀྱིས་གཙོས་དཀར་ཕྱོགས་ཀྱི་ཀླུ་བགྲང་བ་ལས་འདས་པས་མཆོད་པའི་དངོས་པོ་ཚད་མེད་པས་མཆོད་དེ་ཆོས་སྟོན་པར་གསོལ་བ་བཏབ་པ་ན་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་ཀླུའི་རྒྱལ་པོ་འཁོར་དང་བཅས་པ་ལ་ཆོས་བསྟན། ཀླུ་རྣམས་ཀྱིས་བཞུགས་པར་ཞུས་པས། ང་མཆོད་རྟེན་བྱེ་བ་བཞེང་བའི་འདམ་ཚོལ་བ་དང་འབུམ་གདན་འདྲེན་དུ་འོངས་ཀྱི་བསྡད་མི་ཁོམ་ཕྱིས་འོང་སྲིད་གསུངས་ཏེ། ཀླུའི་འདམ་མང་པོ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་དང་། གཟུངས་མང་པོ་སྤྱན་དྲངས་ཏེ་འཛམ་བུའི་གླིང་དུ་བྱོན། དེའི་ཚེ་ཀླུ་རྣམས་ཀྱིས་སློབ་དཔོན་སླར་ཡང་ཀླུའི་ཡུལ་དུ་ངེས་པར་འབྱོན་དགོས་ཞེས་གཏའ་མ་ལྟ་བུར་འབུམ་གྱི་གཤམ་ནས་བག་ཙམ་མ་བསྐུར་ཅེས་གྲགས་ཏེ་ཀླུ་ཡུལ་ནས་སྤྱན་དྲངས་པའི་ཡུམ་རྒྱས་པ་ལ་རྟག་ཏུ་ངུའི་ལེའུ་དང་ཆོས་འཕགས་ཀྱི་ལེའུ་རྣམས་མ་བྱུང་བས་བརྒྱད་སྟོང་པའི་གཤམ་གྱི་ལེའུ་གཉིས་པོ་དེ་ཡུམ་རྒྱས་པའི་གཤམ་དུ་སྤྱར་ཏེ་ལེའུ་གཉིས་པོ་དེ་ཡུམ་རྒྱས་བསྡུས་ལ་ཁྱད་གང་ཡང་མེད་དོ། ། དེ་ནས་སློབ་དཔོན་ཀླུ་སྒྲུབ་ཀྱིས་ཀླུ་ཡུལ་ནས་བཞེས་པའི་འདམ་དེས་མཆོད་རྟེན་བྱེ་བ་ལ་སོགས་པ་བྱས། ཀླུ་རྣམས་ཀྱིས་གྲོགས་བྱས་པས། དེ་ནས་ཀླུ་སྒྲུབ་ཏུ་མཚན་ཆགས། དེ་ནས་ལི་ཁ་ར་ཤི་འཕེལ་དུ་ཕེབས། གསེར་འགྱུར་མཛད་དེ་སྦྱིན་པ་རྒྱ་ཆེན་པོ་མཛད་ནས། བྲམ་ཟེ་རྒན་པོ་བཟའ་མི་གཉིས་ལ་གསེར་མང་བོ་གནང་བས་དད་དེ། རྒན་པོས་ཉེ་གནས་བྱས་ཆོས་མཉན་ཏེ་ཤི་ནས་སློབ་དཔོན་ཀླུའི་བྱང་ཆུབ་ཏུ་གྱུར་ཏོ། ། གཞན་ཡང་ལྷ་ཁང་མང་པོ་བཞེངས་ཤིང་། དྲིལ་བུ་ལྟ་བུའི་བྲག་གསེར་དུ་བསྒྱུར་བར་རྩོམ་པའི་ཚེ་སྒྲོལ་མའི་སྤྲུལ་པ་རྒན་མོའི་རྣམ་པ་ཅན་ཅིག་གིས། དེ་བས་མཆོག་བསྒྲུབས་ན་དོན་ཆེ་བས་དཔལ་གྱི་རི་ལ་སྒྲུབ་པ་གྱིས་ཤིག་གསུངས་ཏེ། དེར་སྒྲོལ་མའི་སྒྲུབ་ཐབས་ཀྱང་མཛད་དོ། ། དེ་ནས་སློབ་དཔོན་ཀླུ་སྒྲུབ་ཀྱིས་རྒྱ་གར་ཡུལ་དབུས་ཀྱི་གྲོང་ཁྱེར་ཆེན་པོ་དྲུག་གིས་གཙོས་ཕྱོགས་ཐམས་ཅད་དུ་གཙུག་ལག་ཁང་དང་མཆོད་རྟེན་མང་དུ་བརྩིགས། ཆོས་སྨྲ་བ་རྣམས་ལ་མཆོད་གཞི་མང་དུ་གཙུགས། འཛམ་བུའི་གླིང་གི་རྒྱལ་བའི་བསྟན་པ་ལ་ཞུགས་ནས་ཆོས་དོན་དུ་གཉེེར་བ་ཕལ་མོ་ཆེ་འདུས་པ་ལ་དམ་པའི་ཆོས་རྒྱ་ཆེར་སྩལ། ཁྱད་པར་དུ་ཡང་རྒྱལ་བ་ཉིད་ཀྱི་ཞལ་ནས། ཟབ་ཞི་སྤྲོས་བྲལ་འོད་གསལ་འདུས་མ་བྱས། ། བདུད་རྩི་ལྟ་བུའི་ཆོས་ཤིག་ཁོ་བོས་རྙེད། ། སུ་ལ་བསྟན་ཀྱང་གོ་བར་མི་ནུས་པས། ། མི་སྨྲ་ནགས་ཀྱི་ཚལ་དུ་གནས་པར་བྱ། ། ཞེས་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་ཆོས་རྣམས་ཀྱི་གནས་ལུགས་སྟོང་པ་ཉིད་ནི་ཤིན་དུ་རྟོགས་པར་དཀའ་བས་འཁྲུལ་མེད་དུ་རྟོགས་པ་སྲིད་མཐའ་ཙམ་དུ་སྣང་བ་དང་། ཕལ་མོ་ཆེ་ནི་ཐོས་པ་ཙམ་གྱིས་སྐྲག་སྟེ་སྤོང་བ་དང་། འགའ་ཞིག་ནི་མོས་བློ་བྱེད་ཀྱང་རང་བཞིན་གྱིས་མེད་པའི་དོན་གཏན་ནས་མེད་པའི་དོན་དུ་བཟུང་སྟེ་ཆད་མཐར་ལྷུང་ནས་ཕུང་བར་འགྱུར་བ་དང་། སྟོང་པ་ཉིད་ཀྱི་དོན་མ་རྟོགས་ན་ཐར་པ་དང་ཐམས་ཅད་མཁྱེན་པ་གང་གིའང་ལམ་བགྲོད་པའི་ཐབས་མེད་པར་གཟིགས་ནས་ཐུགས་སྙིང་རྗེ་ཆེན་པོས་རང་དབང་མེད་པར་བསྐུལ་ཏེ་ཆོས་རྣམས་ཀྱི་གནས་ལུགས་རྟེན་ཅིང་འབྲེལ་པར་འབྱུང་བ་དོན་དམ་པར་རང་བཞིན་གྱིས་གྲུབ་པ་རྡུལ་ཙམ་ཡང་མེད་པ་དང་། ཐ་སྙད་དུ་དཀར་ནག་གི་ལས་འབྲས་ནམ་ཡང་བསླུ་བ་མེད་པར་ངེས་པ་གཉིས་འགལ་མེད་དུ་རྟོགས་པ་དབུ་མའི་ལམ་བཟང་པོ་རྒྱ་ཆེར་བསྒྲགས་ཏེ། གང་གིས་རྟེན་ཅིང་འབྲེལ་པར་འབྱུང་། ། ཞེས་སོགས་དབུ་མ་རྩ་བའི་ཚིག་ལེའུར་བྱས་པ་དང་། དེའི་ཡན་ལག་གི་རིགས་ཚོགས་རྣམས་མཛད་དེ་སྔོན་སྟོན་པ་ཐུབ་པའི་དབང་པོས་བྱ་རྒོད་ཕུང་པོའི་རིར་ཤེར་ཕྱིན་གྱི་མདོ་སྡེ་རིན་པོ་ཆེ་བཀའ་སྩལ་པ་ཇི་ལྟ་བར་འཛམ་བུའི་གླིང་དུ་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་ཆེས་ཆེར་གསལ་བར་མཛད་དེ་ཐེག་པ་ཆེན་པོའི་ཆོས་ཀྱི་སྒྲ་བསྒྲག་པར་མཛད་དོ། ། དེ་ལ་ནི་བདག་ཉིད་ཆེན་པོ་ཀླུ་སྒྲུབ་ཀྱིས་འཛམ་བུའི་གླིང་དུ་ཆོས་ཀྱི་སྒྲ་ཆེན་པོ་ལན་གསུམ་བསྒྲགས་པའི་ནང་ནས་ཆོས་ཀྱི་སྒྲ་ཆེན་པོ་བསྒྲགས་པ་གཉིས་པ་ཞེས་མཁས་པ་རྣམས་ལ་གཏམ་དུ་གྲགས་སོ། དེ་ནས་གདུལ་བྱ་མང་པོ་ཞིག་གི་དོན་ལ་དགོངས་ཏེ་བྱང་སྒྲ་མི་སྙན་དུ་འབྱོན་པར་བཞེད་ནས་བྱོན་པའི་ལམ་ཁར་བྱིས་པ་ཅིག་ཛེ་ཏ་ཀའི་ལག་རིས་ལས་རྒྱལ་པོར་ལུང་བསྟན་ནས་སྒྲ་མི་སྙན་དུ་ཕེབས། དེར་ན་བཟའ་ཤིང་ལ་བཀལ་ནས་ཁྲུས་མཛད་པས། དེ་གཞན་གྱིས་ཁྱེར་བ་ལ་ང་ཡི་ཡིན་གསུངས་པས་ང་བདག་ཅན་ཟེར། དེ་ནས་སྒྲ་མི་སྙན་དུ་གདུལ་བྱའི་དོན་མཛད་ནས་ཚུར་ཕེབས་ཚེ་སྔར་རྒྱལ་པོ་ལུང་བསྟན་པའི་བྱིས་པ་དེ་རྒྱལ་པོར་གྱུར་པ་རྒྱལ་པོ་བདེ་སྤྱོད་བཟང་པོའི་མཆོད་གནས་སུ་ལོ་གསུམ་བཞུགས་ཏེ་དམ་པའི་ཆོས་རྒྱ་ཆེར་སྟོན་པར་མཛད། དེ་ནས་རྗེ་བཙུན་མ་སྒྲོལ་མས་བསྐུལ་བ་ལྟར་ལྷོ་ཕྱོགས་དཔལ་གྱི་རི་ལ་བྱོན་ཏེ་གཅོ་བོར་སྒྲུབ་པ་སྙིང་པོར་མཛད་ཅིང་སྲས་ཀྱི་ཐུ་བོ་ཨཱརྱ་དེ་ཝ་དང་སངས་རྒྱས་བསྐྱངས་ལ་སོགས་པ་བསྟན་འཛིན་ཆེན་པོ་མང་པོས་གཙོས་མི་དང་མི་མིན་གྱི་གདུལ་བྱ་མཐའ་ཡས་པ་ལ་དམ་པའི་ཆོས་རྒྱ་ཆེར་སྩལ་ཏེ་རྒྱལ་བ་རང་ཉིད་སླར་འཇིག་རྟེན་དུ་བྱོན་པ་ལྟ་བུར་བསྟན་པ་ཆེས་ཆེར་རྒྱས་པར་མཛད། རྒྱལ་བའི་བསྟན་པ་ནམ་ཡང་མི་ནུབ་པར་ཡུན་རིང་དུ་གནས་པའི་ཕྱིར་རྡོ་རྗེ་གདན་ལ་རྡོའི་དྲ་མིག་གི་ར་བ་དང་། མཆོད་རྟེན་བརྒྱ་ཕྲག་མང་པོ་དང་། དཔལ་ལྡན་འབྲས་སྤུངས་ཀྱི་བཀོད་པ་ཆེན་པོ་དང་། དགེ་འདུན་གྱི་སྡེ་རྣམས་ལ་མཆོད་གཞི་མང་པོ་གཙུགས། ནག་པོ་ཆེན་པོ་ལ་སོགས་པ་ཆོས་སྐྱོང་རྣམས་ལ་འཕྲིན་ལས་བཅོལ། ཙཎྜི་ཀ་དང་ནོར་རྒྱུན་མ་ལ་སོགས་པ་ནོར་ལྷ་མང་པོ་ལ་རྒྱལ་བའི་བསྟན་པ་བསྟན་འཛིན་དང་བཅས་པ་ལ་མཆོད་ཅིང་བསྙེན་བཀུར་བྱ་བར་བསྐོས་ཏེ་རྒྱལ་བའི་བསྟན་པ་སྒོ་ཀུན་ནས་འཕེལ་བར་མཛད། སྐུ་ཚེའི་སྨད་ལ་གཅོ་ཆེར། ལྷོ་ཕྱོགས་དཔལ་གྱི་རི་ལ་བཞུགས་ཤིང་རྒྱལ་བ་རང་ཉིད་སླར་བྱོན་པ་ལྟར་མདོ་སྔགས་གཉིས་ཀའི་ཆོས་ཀྱི་འཁོར་ལོ་རྒྱ་ཆེར་བསྐོར། ལྷག་པར་ཆོས་དབྱིངས་བསྟོད་པ་སོགས་མཛད་ནས་ཆོས་ཀྱི་སྒྲ་ཆེན་པོ་གསུམ་པ་བསྒྲགས་ཏེ་སྔོན་རྒྱལ་བས་ཆོས་ཀྱི་འཁོར་ལོ་བསྐོར་བ་དང་མཐུན་པར་གདུལ་བྱ་བགྲང་བ་ལས་འདས་པ་ཐེག་པ་ཆེན་པོའི་ལམ་ལ་འཁྲིད་པར་མཛད་ཅིང་། རྒྱལ་བས་གསུངས་པའི་ངེས་དོན་གྱི་མདོ་རྣམས་སུས་ཀྱང་དོན་གཞན་དུ་བསྒྱུར་མི་ཐུབ་པར་ངེས་པ་བརྟན་པོར་མཛད་དོ། ། ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་སྡེ་སྣོད་གསུམ་དང་རྒྱུད་སྡེ་བཞིའི་དགོངས་པ་འགྲེལ་པའི་བསྟན་བཅོས་མང་དུ་མཛད་པ་ནི་འདི་ལྟར་རྒྱལ་བའི་བསྟན་པ་ཡོངས་སུ་རྫོགས་པའི་སྙིང་པོ་ཐེག་པ་ཆེན་པོའི་ལམ་གྱི་ལུས་ཡོངས་སུ་རྫོགས་པ་བྱང་ཆུབ་ལམ་གྱི་རིམ་པ་རིགས་པའི་ལམ་ནས་དྲངས་ཏེ་སྟོན་པ་རིན་པོ་ཆེའི་ཕྲེང་བ་དང་། དེ་ཉིད་ལུང་གིས་བསྒྲུབ་པ་མདོ་སྡེ་ཀུན་ལས་བཏུས་པ་མཛད། ལམ་གྱི་རིམ་པའི་གནད་མཐའ་དག་རྒྱལ་བའི་བཀའ་དང་སྦྱར་ཏེ་སྟོན་པ་ལ། ས་ལུ་ལྗང་པའི་མདོ་འགྲེལ་དང་། རྗེ་བཙུན་འཇམ་དཔལ་གྱི་དོན་དམ་པའི་བསྟོད་པ་སོགས་བསྟོད་ཚོགས་དང་། དཔལ་གསང་བ་འདུས་པའི་སྒྲུབ་ཐབས་མདོར་བྱས་པ། སྒྲུབ་ཐབས་མདོ་དང་བསྲེས་པ། བྱང་ཆུབ་སེམས་འགྲེལ། རྫོགས་རིམ་རིམ་པ་ལྔ་པ། དབུ་མ་རྩ་བའི་ཚིག་ལེའུར་བྱས་པ་ཤེེས་རབ་ཅེས་བྱ་བ། རིགས་པ་དྲུག་ཅུ་བ། ཞིབ་མོ་རྣམ་འཐག ། སྟོང་ཉིད་བདུན་ཅུ་པ། རྩོད་པ་བཟློག་པའི་ཚིག་ལེའུར་བྱས་པ། བཤེས་པའི་སྤྲིང་ཡིག ། ཤེས་རབ་བརྒྱ་བ། སེམས་ཅན་མགུ་བར་བྱ་བའི་ཚིགས་སུ་བཅད་པ་བཅུ་གཅིག་པ། སྦོམ་པོའི་ལྷུང་བ་བརྒྱད་པ། འཕགས་པ་བཟང་པོ་སྤྱོད་པའི་སྨོན་ལམ་གྱི་བཤད་སྦྱར། རྨི་ལམ་ཡིད་བཞིན་ནོར་བུའི་གཏམ། སྤྱིན་པའི་གཏམ། སྲིད་པ་ལས་འདས་པའི་གཏམ། སྤྱོར་བ་བརྒྱད་པ། ལུགས་ཀྱི་བསྟན་བཅོས་ཤེས་རབ་སྡོང་བུ། ལུགས་ཀྱི་བསྟན་བཅོས་སྐྱེ་བོ་སོ་ཐིགས་སོགས་མདོ་རྒྱུད་ཀྱི་དགོངས་འགྲེལ་དང་། མདོ་སྔགས་ཀྱི་ལམ་གྱི་རིམ་པ་དང་། རྒྱུད་སྡེ་བཞི་ནས་གསུངས་པའི་ལྷ་མང་མོའི་སྒྲུབ་ཐབས་སོགས་བསྟན་བཅོས་མང་དུ་མཛད་དོ། ། དེ་ལྟར་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་རྒྱལ་བའི་བསྟན་པ་ལ་བྱ་བ་རྒྱ་ཆེར་མཛད་པ་ན་བདུད་སྡིག་ཏོ་ཅན་དཔུང་དང་བཅས་པས་ཕྲག་དོག་གིས་མ་བཟོད་པར་ཡོད་པ་ལ། ཐབས་གཞན་མ་རྙེད་པར། རྒྱལ་པོ་བདེ་སྤྱོད་ཀྱི་བཙུན་མོའི་མངལ་དུ་ཞུགས་པ་ཕྱིར་བཙས་པས་རྒྱལ་བུ་གཞོན་ནུ་ནུས་ལྡན་དུ་གྲགས་པ་ལ། མས་གོས་སྲུབས་མེད་པ་འཇིག་རྟེན་ན་རྙེད་པར་དཀའ་བ་ཞིག་བྱིན་པས། བུ་ན་རེ། འདི་ད་ལྟ་སྦོས་ལ་ང་རྒྱལ་སྲིད་སྐྱོང་བ་ན་བགོ་བར་བྱའོ་ཞེས་ཟེར་བར། མས་ཁྱོད་ཀྱི་ཕ་སློབ་དཔོན་ཀླུ་སྒྲུབ་དང་ཚེ་མཉམ་པའི་བཅུད་ལེན་སྒྲུབ་པས་སློབ་དཔོན་མ་གྲོངས་བར་དུ་མི་མཆི་བས། ཁྱོད་རྒྱལ་སྲིད་སྐྱོང་བ་མི་ཡོང་ཟེར་བས། བུ་མྱ་ངན་སྐྱེས་ཏེ་ངུས་པ་དང་། མ་ན་རེ། ངུ་མི་དགོས་ཀྱིས་སློབ་དཔོན་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་གནས་པས། དབུ་བསླང་ན་སྟེར་བར་འགྱུར་ཞིང་། དེར་ཡབ་ཀྱང་འགུམ་པས་ཁྱོད་ཀྱིས་རྒྱལ་སྲིད་ཐོབ་པར་འགྱུར་རོ་ཟེར། དེ་ནས་རྒྱལ་བུས་སློབ་དཔོན་གྱི་དྲུང་དུ་ཕྱིན་ནས་དབུ་བསླངས་པས། བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་འདི་ལྟར་དགོངས་ཏེ་སྔོན་སྟོན་པ་ཐུགས་རྗེ་ཅན་གྱིས་སློབ་པ་ལམ་གྱི་གནས་སྐབས་སུ་དབུ་སྤྱིན་པར་བཏང་བ་སོགས་བྱ་དཀའ་བའི་རྒྱལ་སྲས་ཀྱི་སྤྱོད་པ་མཛད་པ་དེ་ལྟར་དུ་ངས་ཀྱང་སྟོན་པའི་རྣམ་ཐར་བསྐྱང་བ་དང་། བདུད་སྡིག་ཏོ་ཅན་སྤ་བཀོང་བར་བྱ་བ་དང་། ཕྱི་མའི་སྐྱེ་བོ་རྣམས་ལ་སྣང་བར་བྱ་བ་དང་། རྒྱལ་སྲས་རྣམས་ལ་སྙིང་སྟོབས་སྐྱེད་པར་བྱ་བའི་ཕྱིར་སྦྱིན་པར་བྱའོ་སྙམ་དུ་དགོངས་ནས་དབུ་སྟེར་བར་ཞལ་གྱིས་བཞེས་པས། རལ་གྲིས་དབུ་བཅད་ཀྱང་མ་ཆོད་པར། སློབ་དཔོན་གྱི་ཞལ་ནས། ངས་སྔོན་འཇག་མ་ཞིག་བཅད་པའི་ཞར་ལ་འབུ་གཅིག་གི་སྐེ་བཅད་པའི་ཉེས་པ་ཡོད་པས་རྩྭ་ཀུ་ཤས་ཆོད་ཅིག་གསུངས་ནས་བཅད་པས་ཆོད། དེའི་ཁྲག་འོ་མར་བྱུང་ཞིང་དབུ་དེའི་ཞལ་ནས། ང་ནི་འདི་ནས་བདེ་བ་ཅན་དུ་འགྲོ། ། ཕྱི་ནས་ལུས་འདི་ལ་ནི་འཇུག་པར་གྱུར། ། ཅེས་པའི་ཚིག་བྱུང་བར་གྲགས། དེ་ནས་རྒྱལ་བུ་དེས་དབུ་སླར་འབྱར་གྱིས་དོགས་ནས་དཔག་ཚད་ཙམ་དུ་དོར་བ་སློབ་དཔོན་བཅུད་ལེན་གྲུབ་པས་སྐུ་ལུས་དང་དབུ་རྡོ་རུ་གྱུར་ཅིང་སླར་རིམ་གྱིས་དབུ་དང་སྐུ་ལུས་གཉིས་ཀ་མ་ཉམས་པར་ལོ་རེ་བཞིན་ཇེ་ཉེ་ཇེ་ཉེར་སོང་ནས་མཐར་དབུ་དང་སྐུ་ལུས་འབྱར་ནས་སློབ་དཔོན་རང་ཉིད་ཞལ་བཞུགས་དུས་ལྟར་བསྟན་པ་དང་འགྲོ་བའི་དོན་རྒྱ་ཆེར་མཛད་པར་གསུངས་སོ། ། བདག་ཉིད་ཆེན་པོ་འདི་ནི་སྔོན་ཡུན་རིང་པོ་ནས་སའི་དབང་ཕྱུག་ཏུ་གཤེགས་པ་ཞིག་ཡིན་པས་དབུ་སྦྱིན་པར་གཏོང་བ་ལ་ཡ་ང་བ་མེད་པར་དགའ་བཞིན་སྤྲོ་བཞིན་དུ་གཏོང་བར་མཛད་པ་ནི་ས་ཐོབ་པའི་རྟགས་སྟོན་པར་མཛད་པ་སྟེ། དབུ་མ་ལ་འཇུག་པ་ལས། ཇི་ལྟར་བྱིན་ཅིག་ཅེས་སྒྲ་ཐོས་བསམས་ལས། ། རྒྱལ་སྲས་བདེ་འབྱུང་དེ་ལྟར་ཐུབ་རྣམས་ལ། ། ཞི་བར་ཞུགས་པས་བདེ་བ་བྱེད་མིན་ན། ། ཐམས་ཅད་བཏང་བས་ལྟ་ཞིག་སྨོས་ཅི་དགོས། ། ཞེས་ས་ཐོབ་ནས་དབུ་སྦྱིན་པར་གཏོར་བ་ལ་སྡུག་བསྔལ་མེད་པར་མ་ཟད་དགེ་སློང་བསམ་གཏན་དང་པོ་ལ་མཉམ་པར་བཞག་པའི་བདེ་བ་ལས་ཀྱང་ལྷག་པའི་དགའ་བ་དང་བདེ་བ་བསྐྱེད་པར་གསུངས་པ་ལྟར་རོ། ། འཕགས་པ་ཀླུ་སྒྲུབ་ནི་ས་ཐོབ་པར་རྒྱལ་བས་མདོ་སྡེ་ནས་གསལ་བར་གསུངས་ཤིང་ཡོངས་སུ་གྲགས་པ་ལྟར་ཡིན་ལ། དེ་ཡང་ཐུན་མོང་བའི་སྣང་ངོར་དཔལ་གྱི་རི་ལ་ལོ་ཉིས་བརྒྱའི་བར་དུ་སྒྲུབ་པ་མཛད་ནས་ས་ལམ་གོང་ནས་གོང་དུ་བགྲོད་དེ་ས་བདུན་པ་ཐོབ་པར་གྲགས་ཤིང་། ས་དང་པོ་ཐོབ་པ་ནས་བཟུང་འཇིག་རྟེན་གྱི་ཁམས་བརྒྱར་སྤྲུལ་པའི་བཀོད་པ་བརྒྱ་སྟོན་པ་དང་། སངས་རྒྱས་བརྒྱ་ལ་སྐུའི་བཀོད་པ་བརྒྱས་དུས་གཅིག་ཏུ་ཆོས་མཉན་པ་སོགས་ཡོན་ཏན་བརྒྱ་ཕྲག་བཅུ་གཉིས་ཐོབ་ཅིང་། ཡོན་ཏན་དེ་དག་ས་གཉིས་པ་ནས་བཟུང་གོང་འཕེལ་དུ་འགྲོ་བར་གསུངས་པས་བསམ་གྱིས་མི་ཁྱབ་པའི་ཡོན་ཏན་དང་ལྡན་པ་ཡིན་ཞིང་། ཐུན་མོང་མིན་པར་ནི་སྒྲོན་གསལ་ལས་དེ་ལྟར་སློབ་དཔོན་ཆེན་པོ་དཔལ་ཀླུ་སྒྲུབ་ཀྱི་ཞལ་སྔ་ནས་ཀྱིས་ཉིད་ཀྱི་དོན་རྗེས་སུ་བརྙེས་ནས་སོ་སོར་རང་རིག་པ་རྡོ་རྗེ་འཛིན་པ་ཆེན་པོའི་ཏིང་ངེ་འཛིན་འཇིག་རྟེན་དུ་བསྟན་ནས། ལྷ་དང་མིའི་བདེ་བ་ལས་འདས་ཤིང་། མུ་སྟེགས་དང་ཉན་ཐོས་དང་རང་སངས་རྒྱས་ཀྱི་བསམ་གཏན་དང་སྙོམས་པར་འཇུག་པའི་བདེ་བ་ལས་འདས་ནས། སྐྱེ་བ་དང་འགག་པ་དང་བྲལ་པའི་དེ་བཞིན་གཤེགས་པའི་སྐུ། རྣམ་པ་ཐམས་ཅད་ཀྱི་མཆོག་དང་ལྡན་པ། སྐུ་ལྟ་བས་ཆོག་མི་ཤེས་པ་སྟོབས་བཅུ་དང་མི་འཇིགས་པ་ལ་སོགས་པ་སངས་རྒྱས་ཀྱི་ཡོན་ཏན་རྣམས་ཀྱིས་བརྒྱན་པ་བརྙེས་ནས་བདེ་བ་ཅན་དུ་གཤེགས་ཏེ། ཡོན་ཏན་གྱི་དབང་ཕྱུག་བརྒྱད་དང་ལྡན་པས་བཞུགས་སོ། ། ཞེས་འཕགས་པ་ཀླུ་སྒྲུབ་ཀྱིས་སྐུ་ཚེ་དེ་ལ་གསང་བ་འདུས་པའི་ལམ་ལ་བརྟེན་ནས་ཟུང་འཇུག་རྡོ་རྗེ་འཆང་གི་གོ་འཕང་བརྙེས་པར་གསུངས་སོ། ། དཔལ་མགོན་འཕགས་པ་ཀླུ་སྒྲུབ་ཀྱིས་རྒྱལ་བས་གསུངས་པའི་ཆོས་ཕུང་བརྒྱད་ཁྲི་བཞི་སྟོང་གི་དྲང་ངེས་དྲི་མ་མེད་པའི་རིགས་པས་ལེགས་པར་ཕྱེ་ནས་རྒྱལ་བའི་དགོངས་པ་འཁྲུལ་མེད་དུ་གཏན་ལ་ཕབ་པའི་ལམ་སྲོལ་དེ་ཉིད་འཛིན་ཅིང་སྤེལ་པར་བྱེད་པའི་ཐུགས་སྲས་བསྟན་འཛིན་དམ་པ་མཐའ་ཡས་པ་ཞིག་བྱོན་ཞིང་། ཐམས་ཅད་ཀྱི་ནང་ནས་གཙོ་བོར་གྱུར་པ་ཐུགས་སྲས་བཞི། ཉེ་བའི་ཐུགས་སྲས་གསུམ་སྟེ་བདུན་དུ་གྲགས་ཏེ། སློབ་དཔོན་ཀླུ་སྒྲུབ་ཀྱི་ཐུགས་སྲས་བཞི་ནི། འཇམ་དཔལ་ཞལ་མཐོང་ཤཱཀྱ་མི་ཏྲ། སྒྲོལ་མའི་ཞལ་མཐོང་ནཱ་ག་བོ་ངྷི། ས་བརྒྱད་ནོན་པ་ཨཱརྱ་དེ་ཝ། སྤྱན་རས་གཟིགས་ཞལ་མཐོང་མ་ཏངྐི་པ་བཞི་འོ། ། ཉེ་བའི་ཐུགས་སྲས་གསུམ་ནི། སངས་རྒྱས་བསྐྱངས། ལེགས་ལྡན་འབྱེད། སློབ་དཔོན་དཔའ་བོ་གསུམ་ཞེས་འབྱུང་ངོ་། །
དེ་དག་གི་ནང་ནས་ཀྱང་ཟླ་དང་བྲལ་བ་ནི་སློབ་དཔོན་ཨཱརྱ་དེ་ཝ་སྟེ། སློབ་དཔོན་ཨཱརྱ་དེ་ཝ་ནི་མདོ་སྔགས་གང་གི་ཐད་ལའང་འཁྲུལ་པའི་དྲི་མ་ཕྲ་མོའང་མེད་པར་སློབ་དཔོན་ཀླུ་སྒྲུབ་ཀྱི་དགོངས་པ་ཇི་བཞིན་དུ་གཏན་ལ་འབེབས་པའི་བསྟན་བཅོས་མང་དུ་མཛད་པ་པོ་སྟེ། སློབ་དཔོན་ཨཱརྱ་དེ་ཝས་སློབ་དཔོན་ཀླུ་སྒྲུབ་ཀྱི་དགོངས་པ་ལྟར་ཟབ་པ་དང་རྒྱ་ཆེ་བའི་ལམ་གྱི་རིམ་པ་ཡོངས་སུ་རྫོགས་པ་དྲི་མ་མེད་པའི་རིགས་པའི་ལམ་ནས་དྲངས་ཏེ་སྟོན་པའི་བསྟན་བཅོས་བཞི་བརྒྱ་པ་དང་། དཔལ་གསང་བ་འདུས་པ་གཙོ་བོར་བྱས་པའི་བླ་མེད་ཀྱི་ལམ་རིམ་གཉིས་ཀྱི་གནད་མཐར་ཐུག་པ་རྣམས་སྟོན་པའི་གཞུང་སྤྱོད་བསྡུས་སྒྲོན་མ་མཛད་ཅིང་གཞན་ཡང་བསྟན་བཅོས་མང་དུ་མཛད་དོ། ། འཕགས་ཡུལ་གྱི་མཁས་པ་ཐམས་ཅད་སློབ་དཔོན་ཀླུ་སྒྲུབ་ཡབ་སྲས་ཞེས་འཕགས་པ་ཀླུ་སྒྲུབ་དང་འཕགས་པ་ལྷ་གཉིས་ལ་རྣམ་པ་ཀུན་ཏུ་ཚད་མར་འཛིན་ཅིང་སྔོན་གྱི་དབུ་མ་བ་རྣམས་སློབ་དཔོན་འདི་གཉིས་ལ་གཞུང་ཕྱི་མོའི་དབུ་མ་བ་ཞེས་ཁུངས་མཐར་ཐུག་ཏུ་བྱེད་དོ། །
སློབ་དཔོན་ཤཱཀྱ་མི་ཏྲས་རིམ་ལྔའི་རིམ་པ་གཉིས་པའི་སྟོད་རྣམས་སློབ་དཔོན་ཀླུ་སྒྲུབ་ཉིད་ཀྱིས་རྗེས་སུ་གནང་བ་བྱིན་ནས་བརྩམས་པར་གྲགས་ཤིང་། འདིས་མཛད་པའི་བརྩམ་ཆོས་གཞན་མི་སྣང་ཡང་སློབ་དཔོན་འདིས་སྐལ་བ་དང་ལྡན་པ་མང་པོ་ལ་འཕགས་པ་ཀླུ་སྒྲུབ་ཀྱི་ལུགས་བཟང་རྒྱ་ཆེར་སྤེལ་བར་མཛད་དོ། ། ན་ག་བོ་ངྷི་ཞེས་པ་སློབ་དཔོན་ཀླུའི་བྱང་ཆུབ་ནི་འཕགས་པ་ཀླུ་སྒྲུབ་ཀྱི་མན་ངག་ལ་བརྟེན་ནས་འཇའ་ལུས་རྡོ་རྗེའི་སྐུ་བརྙེས་ཏེ་དཔལ་གྱི་རི་སོགས་གྲུབ་པའི་གནས་རྣམས་སུ་བཞུགས་ནས་དཔའ་བོ་དང་མཁའ་འགྲོ་བགྲང་བ་ལས་འདས་པ་དག་དང་སྐལ་བ་དང་ལྡན་པའི་མི་དག་ཀྱང་རྗེས་སུ་འཛིན་པར་མཛད་དོ། ། བཀའ་གདམས་གོང་མའི་དུས་སློབ་དཔོན་འདིས་བཀའ་གདམས་ཀྱི་བཤེས་གཉེན་ཆེན་པོ་མང་པོ་ལ་ཞལ་བསྟན་ནས་གདམས་པ་དང་རྗེས་སུ་བསྟན་པ་མང་དུ་སྩལ་པའི་རྣམ་ཐར་སྣང་ཞིང་། གྲུབ་ཆེན་ཆོས་རྡོ་རྗེ་དང་ཡང་དང་ཡང་དུ་འཚོགས་ཏེ་རྡོ་རྗེ་ཐེག་པའི་བཀའ་འགྲོ་བར་མཛད་པ་དང་། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་བཀྲ་ཤིས་ལྷུན་པོའི་དབྱེན་འདུམས་མཆོད་རྟེན་བཞེངས་ནས་རབ་གནས་མཛད་པའི་ཚེ་སློབ་དཔོན་ཀླུའི་བྱང་ཆུབ་དང་གྲུབ་ཆེན་ཆོས་རྡོ་རྗེ་གཉིས་དངོས་སུ་ཕེབས་ཏེ་མཆོད་རྟེན་གྱི་རྩེ་མོར་ལྷན་དུ་བཞུགས་ནས་རབ་གནས་མཛད་ཅིང་། པཎ་ཆེན་བློ་བཟང་ཆོས་ཀྱི་རྒྱལ་མཚན་ལ་གདམས་པ་དང་རྗེས་སུ་བསྟན་པ་ཡང་སྩལ་ཏོ། ། སློབ་དཔོན་འདིས་དཔལ་གསང་བ་འདུས་པའི་དཀྱིལ་འཁོར་གྱི་ཆོ་ག་དང་། སྐུ་གསུམ་ལམ་ཁྱེར་གྱི་ངོ་སྤྲོད་ཆེས་ཁྱད་པར་དུ་འཕགས་པ་རྣམ་བཞག་རིམ་པ་ཞེས་བྱ་བའི་བསྟན་བཅོས་མཛད་ཅིང་། གཞན་ཡང་མང་དུ་མཛད་དོ། ། མ་ཏངྐི་པས་ནི་འཕགས་པ་ཀླུ་སྒྲུབ་ཀྱི་སྙན་རྒྱུད་ཀྱི་མན་ངག་རྣམས་གྲུབ་ཆེན་ཏེ་ལོ་པ་ལ་ཡོངས་སུ་རྫོགས་པ་གནང་ཞིང་སྐལ་བ་དང་ལྡན་པ་གཞན་མང་པོ་ལ་ཡང་རྒྱ་ཆེར་སྤེལ་ལོ། །
སློབ་དཔོན་སངས་རྒྱས་བསྐྱངས་ནི་ལྷོ་ཕྱོགས་ཏམྦ་ལའི་ཡུལ་གྱི་བྱེ་བྲག་ངང་པས་རྩེ་བ་ཞེས་བྱ་བར་སྐུ་འཁྲུངས། རྒྱལ་བའི་བསྟན་པ་ལ་ཞུགས་ནས་རབ་ཏུ་བྱུང་ཞིང་བསྙེན་པར་རྫོགས་ཏེ་སྡེ་སྣོད་གསུམ་དང་རྒྱུད་སྡེ་བཞི་ལ་སྦྱངས་པས་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་དུ་སོན། འཕགས་པ་ཀླུ་སྒྲུབ་ཀྱི་ཞབས་ལ་བརྙེན་ཏེ་མདོ་སྔགས་ཀྱི་མན་ངག་རྣམས་གསན། སྒྲུབ་པ་ལྷུར་མཛད་པས་རྗེ་བཙུན་འཇམ་པའི་དབྱངས་དངོས་སུ་གྲུབ་ཅིང་། ལམ་རིམ་གྱིས་བགྲོད་དེ་གྲུབ་པའི་གོ་འཕང་མཐོན་པོར་གཤེགས་ནས་བསྟན་པའི་དོན་དུ་འཕགས་པ་ཀླུ་སྒྲུབ་ཀྱི་དགོངས་ཟབ་མཐར་ཐུག་པ་ཟབ་མོ་རྟེན་ཅིང་འབྲེལ་བར་འབྱུང་བའི་ཚུལ་རིགས་པའི་རྣམ་འགྱུར་བརྒྱ་ཕྲག་མང་པོས་གསལ་བར་བྱེད་པ་དབུ་མ་རྩ་ཤེའི་འགྲེལ་པ་མཛད་དེ། དེ་ལ་ནི་རྩ་ཤེའི་འགྲེལ་པ་བུངྔྷ་པཱ་ལི་ཏ་ཞེས་ཡོངས་སུ་གྲགས་ཏེ། རྩ་ཤེའི་འགྲེལ་པ་ཇི་སྙེད་མཆིས་པ་ཐམས་ཅད་ཀྱི་ནང་ནས་རྒྱལ་མཚན་གྱི་ཏོག་ལྟར་ཆེས་ཁྱད་པར་དུ་འཕགས་པ་ཞིག་ཡིན་པར་སློབ་དཔོན་ཟླ་བ་གྲགས་པ་དང་རྗེ་བདག་ཉིད་ཆེན་པོས་རྒྱ་ཆེར་བསྔགས་པ་མཛད་དོ། ། སློབ་དཔོན་འདིས་གཞན་ཡང་མདོ་རྒྱུད་ཀྱི་དགོངས་པ་འགྲེལ་པའི་བསྟན་བཅོས་མང་དུ་མཛད་དོ། །
སློབ་དཔོན་ལེགས་ལྡན་འབྱེད་ནི་ཟབ་མོ་དབུ་མའི་ལམ་བཟང་གསལ་བར་མཛད་ཕྱིར་འཕགས་པ་ཀླུ་སྒྲུབ་ཀྱི་སྲས་ཀྱི་ཐུ་བོའི་ཚུལ་དུ་བསམ་བཞིན་དུ་བྱོན་པ་ཞིག་སྟེ། བདག་ཉིད་ཆེན་པོ་འདི་ནི་འཕགས་མཆོག་རབ་འབྱོར་གྱི་སྤྲུལ་པ་ཡིན་པར་ཡོངས་སུ་གྲགས་པ་ལྟར་རོ། ། སློབ་དཔོན་འདིས་འཕགས་པ་ཀླུ་སྒྲུབ་ཀྱི་ལུགས་བཟང་གསལ་བར་བྱ་བའི་ཕྱིར། རྩ་ཤེའི་འགྲེལ་པ་ཤེས་རབ་སྒྲོན་མ་མཛད་ཅིང་། གཞན་ཡང་བསྟན་བཅོས་མང་དུ་མཛད་ལ། ཤེས་རབ་སྒྲོན་མར་རང་རྒྱུད་པའི་གྲུབ་མཐའ་འཆའ་བར་མཛད་པ་ནི་རྒྱལ་བའི་དགོངས་པ་འཕགས་པ་ཀླུ་སྒྲུབ་ཀྱིས་བཀྲལ་བའི་དབུ་མའི་ལྟ་བ་མཐར་ཐུག་པ་དེ་ཤིན་ཏུ་རྟོགས་དཀའ་བས་དེ་རྟོགས་པའི་ཐབས་སུ་གདུལ་བྱ་རྣམས་རིམ་གྱིས་བཀྲི་བའི་ཕྱིར་ཐབས་མཁས་ཀྱིས་མཛད་པ་ཞིག་གོ ། འཕགས་པ་ཀླུ་སྒྲུབ་ཀྱིས་འཛམ་བུའི་གླིང་དུ་ལོ་དྲུག་བརྒྱ་བཞུགས་ནས་བསྟན་པའི་དོན་རྒྱ་ཆེར་མཛད་པས་སྐུ་ཚེའི་སྟོད་སྨད་བར་གསུམ་གྱི་སློབ་མ་རིམ་པ་མང་པོ་ཡོད་པ་ལས། སྐུ་ཚེའི་སྨད་ཀྱི་སློབ་མའི་གཙོ་བོ་བསྟན་འཛིན་ཐམས་ཅད་ཀྱི་གཙུག་གི་ནོར་བུ་ལྟ་བུར་གྱུར་པ་ནི་སློབ་དཔོན་ཟླ་བ་གྲགས་པ་སྟེ། སློབ་མའི་ཐ་མ་ཟླ་གྲགས་ལ། ། ཆོས་ཀྱི་ཐ་མ་སྐྱེ་མེད་བསྟན། ། ཅེས་འཕགས་པ་ཀླུ་སྒྲུབ་བདེ་བ་ཅན་དུ་གཤེགས་ཁར་གསུངས་ཞེས་སྔོན་གྱི་ཆོས་འབྱུང་དག་ལས་འབྱུང་བ་ལྟར་རོ། ། བདག་ཉིད་ཆེན་པོ་འདིས་རྒྱལ་བའི་བསྟན་པ་ལ་བྱ་བ་ཇི་ལྟར་མཛད་པའི་ཚུལ་ནི་ད་ལྟ་ཉིད་དུ་འཆད་པར་འགྱུར་རོ། ། འཕགས་པ་ཀླུ་སྒྲུབ་ཀྱིས་ལོ་དྲུག་བརྒྱར་བསྟན་པའི་བྱ་བ་མཛད་ནས་བདེ་བ་ཅན་དུ་གཤེགས་ཏེ། སླར་ཡང་འཛམ་བུའི་གླིང་དུ་སྔར་གྱི་སྐུ་ལུས་དང་དབུ་འབྱར་ཏེ་འགྲོ་བའི་དོན་རྒྱ་ཆེར་མཛད་པར་གྲགས་ཤིང་། མཐར་དང་བའི་འོད་ཅེས་བྱ་བའི་འཇིག་རྟེན་དུ་དེ་བཞིན་གཤེགས་པ་ཡེ་ཤེས་འབྱུང་གནས་ཞེས་བྱ་བར་མངོན་པར་རྫོགས་པར་འཚང་རྒྱ་བར་གསུངས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དཔལ་མགོན་འཕགས་པ་ཀླུ་སྒྲུབ་ལ་གསོལ་བ་འདེབས་ཤིང་སློབ་དཔོན་བདག་ཉིད་ཆེན་པོ་འདིས་ཇི་ལྟར་གསུངས་པ་ལྟར་བཤེས་གཉེན་བསྟེན་ཚུལ་ནས་ཟུང་འཇུག་གི་བར་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པ་ལ་ལུང་དང་རིགས་པས་ངེས་པ་རྙེད་པར་བྱས་ལ་བརྩོན་པ་ཆེན་པོས་ཉམས་སུ་བླང་བར་བྱའོ། ། ། །
༈ འཕགས་པའི་དགོངས་པ་གསལ་མཛད་ཟླ་བ་གྲགས། ཞེས་བསྔགས་པ། དཔལ་ལྡན་ཟླ་བ་གྲགས་པ་ནི། རྒྱ་གར་ལྷོ་ཕྱོགས་ས་མ་ན་ཞེས་བྱའི་ཡུལ་དུ་སྐུ་འཁྲུངས་ཏེ། ཡུལ་དེར་བྲམ་ཟེ་ཕོ་མོ་གཉིས་ལ་བུ་སྤྲུལ་པའི་མཚན་རྟགས་དང་ལྡན་པ་ཞིག་བྱུང་ནས་མཚན་མཁན་རྣམས་ལ་བསྟན་པས་འདི་ནི་མཚན་ཤིན་ཏུ་བཟང་སྟེ། འདི་ནི་རྒྱལ་བའི་བསྟན་པ་ལ་ཞུགས་ནས་བསྟན་འཛིན་ཆེན་པོ་ཞིག་ཏུ་འགྱུར་རོ། ། ཞེས་ལུང་བསྟན། ཇི་ལྟར་ལུང་བསྟན་པ་ལྟར་ཕ་མ་གཉིས་ཀྱིས་ཀྱང་གནང་སྟེ་ན་ལནྡྲར་རབ་ཏུ་བྱུང་། ན་ལནྡྲའི་མཁན་པོ་ཟླ་བ་མགོན་པོ་ཞེས་བྱ་བ་ལས་ཚིགས་སྔ་མ་དགེ་ཚུལ་གྱི་སྡོམ་པ་བཞེས། མཁན་པོ་ཉིད་ཀྱི་མཚན་ལས་དྲངས་ཏེ་ཟླ་བ་གྲགས་པ་ཞེས་མཚན་བཏགས། དེ་ནས་རིམ་གྱིས་བསྙེན་རྫོགས་ཀྱི་སྡོམ་པ་བཞེས་ཤིང་སྡེ་སྣོད་གསུམ་དང་རྒྱུད་སྡེ་བཞི་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར་ཏེ་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན། འཕགས་པ་ཀླུ་སྒྲུབ་ཀྱི་ཞབས་རྡུལ་སྤྱི་བོས་བླངས་ཏེ། མདོ་སྔགས་ཀྱི་མན་ངག་ཡོངས་སུ་རྫོགས་པར་གསན། ཇི་ལྟར་གསན་པ་ལྟར་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པ་ལ་སྒྲུབ་པ་རྩེ་གཅིག་ཏུ་མཛད་པས་རྟོགས་པ་མཆོག་ཐོབ་སྟེ་ཕྱི་ནང་གི་སྤྲོས་པ་ཐམས་ཅད་དོར་ནས་ཉིན་མཚན་ཁོར་ཡུག་ཏུ་དོན་དམ་པའི་བྱང་ཆུབ་ཀྱི་སེམས་བསྒོམ་བཞིན་བཞུགས་པས་ཐ་མལ་པ་དག་གི་སྣང་བ་ལ་བཟའ་བཏུང་བྱེད་པ་དང་། བཤང་གཅི་འདོར་བ་ཙམ་མ་གཏོགས་བྱ་བ་གཞན་གང་ཡང་མི་བྱེད་པར་ཉལ་བ་འབའ་ཞིག་ལྷུར་མཛད་པ་ཞིག་ཏུ་མཐོང་ནས་དེ་དག་མ་རངས་ཏེ། ཟླ་བ་གྲགས་པ་འདི་ཐོས་བསམ་སྒོམ་པ་དང་། དགེ་འདུན་གྱི་ལས་གང་ཡང་མི་བྱེད་པར་ཟོས་ཀྱིན་ཉལ་སྡོད་པ་ཅིག་བྱུང་བས། དགེ་འདུན་རྣམས་ཀྱིས། འདི་སྔར་མུ་སྟེགས་པ་ཡིན་པས། ད་དུང་མུ་སྟེགས་པར་ལྡོག་པར་འདུག ། འདི་སྒྱུ་ཐབས་སུ་གནས་ནས་ད་གཟོད་འོ་སྐོལ་ལ་གནོད་ནས་འོང་། འདི་ནི་ལས་ངན་སྨེ་ཤ་ཅན། ། མུ་སྟེགས་ཉིད་ཀྱང་མ་དོར་བས། ། དགེ་འདུན་བྱ་བ་མི་བྱེད་དེ། ། འདི་ཡིས་གནོད་སྐྱེལ་འདོན་པར་རིགས། ། བྱས་པས། མཁན་པོ་ཟླ་བ་མགོན་པོས་བདག་ཉིད་ཆེན་པོ་འདིའི་ངང་ཚུལ་རྟོགས་པས་འདི་གནས་ནས་དབྱུང་བར་མི་རིགས་ཞེས་བཀག་ཅིང་ཐུགས་དམ་ལ་གཅིག་ཏུ་གཞོལ་བའི་མཛད་པ་དེ་ལ་ཤིན་ཏུ་དགྱེས་སོ། ། དེ་ནས་ན་ལནྡྲའི་མཁན་པོས་སློབ་དཔོན་ཟླ་བ་གྲགས་པ་ལ་རང་ཉིད་ཐུགས་དམ་ལས་གཡོ་བ་མེད་ཀྱང་དགེ་འདུན་གྱི་ཁྲོད་ན་ཐ་མལ་པ་མང་པོ་ཞིག་ཉིད་ཀྱི་ངང་ཚུལ་མ་རྟོགས་པར་སྡིག་གསོག་པར་འདུག་པས། ཁྱོད་ཀྱིས་གཉེར་ཅིག་གྱིས། ཉི་མ་གྲགས་གྲོགས་ལ་བཏང་གིས་གསུངས་པས་གཉེར་མཛད་ནས་མ་ཧེ་དང་བ་ལང་ལ་སོགས་པ་ནགས་ལ་ཡན་དུ་བཅུག་ནས། རི་མོའི་བ་ཞིག་བྱས་ནས་ཡོད་པ་ལ། དེ་འདུན་རྣམས་ཀྱིས་མ་ཧེ་ལ་སོགས་པ་ནགས་ལ་བརྒྱབ་ནས། ད་འདི་ཅི་བྱེད་བལྟའོ་བྱས་པས། ཉི་མ་གྲགས་པས་གཡོག་བྱས་ནས་ཞོ་དང་འོ་མ་མང་པོ་ཁྱེར་བྱུང་བས་ཉི་མ་གྲགས་ཀྱིས་མ་ཧེ་སོགས་རི་ལ་བརྒྱབ་ནས་ཞོ་དང་འོ་མ་འདི་ཙམ་འོང་བ་ཅི་ཡིན་བྱས་ནས་ཇི་ལྟར་བྱེད་བལྟས་པས། རི་མོའི་བ་ལས་བཞོས་ནས་འོང་བ་མཐོང་བ་གསང་ནས་བསྡད་པས། དེ་ནས་གཉེར་ཐོན་ནས་འབྲས་ལ་སོགས་པ་མང་པོ་གཏད་པས། ཁྱོད་ཀྱིས་མ་ཧེ་སོགས་རི་ལ་བརྒྱབ་ནས། འབྲས་དང་མར་ལ་སོགས་པ་མ་ཟད་པ་ཅི་ལས་བྱུང་ཟེར་བ་ལ། ཉི་མ་གྲགས་ན་རེ། དཔལ་ལྡན་ཟླ་བ་གྲགས་པ་ཡིས། ། རི་མོའི་བ་ལས་ཞོ་བཞོས་ནས། ། དགེ་འདུན་འཚོ་བ་ལེགས་པར་བསྒྲུབས། ། བྱས་པས། མཁན་པོ་ན་རེ། སེམས་ལ་དབང་ཐོབ་པས་རི་མོའི་བ་ལས་ཞོ་འཇོ་བ་ངོ་མཚར་ཆེ་གསུང་། ཡང་ལན་ཅིག ། ཏུ་རུཥྐའི་དམག་བྱུང་ནས་ནཱ་ལནྡྲར་ཟླ་བ་ཕྱེད་ཀྱི་ལམ་ན་སླེབས་ཟེར་ནས། པཎྜི་ཏ་དང་། ནུས་པ་ཅན་ཐམས་ཅད་ལ་དམག་བཟློག་པའི་ཐབས་ཡོད་དམ་ཞུས་པས། ཐབས་མ་བྱུང་བའི་ཚེ། ནཱ་ལནྡྲའི་ཆོས་སྐྱོང་གི་ཐུགས་ཀ་ནས། བྱ་རོག་ཅིག་བྱུང་ནས། ཟླ་བ་གྲགས་པ་ལ་ཞུས་ཟེར་ནས་ཞུས་པས། ཟླ་བའི་ཞལ་ནས་ཐབས་ཡོད་ཀྱིས། རྡོའི་སེང་གེ་གཅིག་གྱིས་ལ། སངས་རྒྱས་པ་རྣམས་ཀྱིས་དཀོན་མཆོག་གསུམ་ལ་གསོལ་བ་ཐོབ། མུ་སྟེགས་པ་རྣམས་ཀྱིས་ཀྱང་དབང་ཕྱུག་ཆེན་པོ་ལ་གསོལ་བ་ཐོབ་ཅིག་གསུངས་ནས། དེར་རྡོའི་སེང་གེ་བཅོས་ཟིན་པ་དང་། དེ་གས་ཤིང་། དེའི་ནང་ནས་མི་གཅིག་བྱུང་ནས། ངས་བྱ་དགོས་ཟེར་ལེགས་པ་ཅིག་བཅོས་ཟིན་པ་དང་། ཟླ་བ་གྲགས་པ་ཕེབས་ནས། ནཱ་ལནྡྲའི་བྱང་ཕྱོགས་སུ་དཔག་ཚད་བཅོ་ལྔ་པའི་བར་གྱི་རྡོའི་སེང་གེ་བཞག་པ་ཅན་དུ་དམག་རྣམས་སླེབས་བྱུང་བ་ན། དམག་རྣམས་སླེབས་བྱུང་ངོ་བྱས་ཀྱང་སེང་གེ་འགྲོར་མ་འདོད་པ་ལ། དགེ་འདུན་རྣམས་ན་རེ་འདིས་བསླུས། འོ་སྐོལ་ཕུང་ངོ་ཟེར་བ་ལ། སློབ་དཔོན་ཟླ་བ་གྲགས་པ་ཀོག་གིས་བཞེངས་ནས་ཙན་དན་གྱི་དབྱུག་པ་འདོམ་གང་པ་ཅིག་ཁྱེར་ནས་སེང་གེའི་མགོ་ལ་ཐེང་གསུམ་བརྒྱབ་པས་གཡུ་རལ་ལན་གསུམ་སྤྲུགས་དམག་ཐམས་ཅད་བསྐྲད་ནས་སེང་གེའི་གདོང་པ་ཁྲག་ཏུ་སོང་ནས་འདུག་པས། དེའི་དུས་རྒྱལ་པོ་སྟོབས་ལྡན་གཞོན་ནུས། དཔལ་ལྡན་ཟླ་བ་གྲགས་པ་ཡིས། ། སྟོབས་ལྡན་རྡོ་ཡི་སེང་གེ་བསྐུལ། ། ཏུ་རཥྐ་ཡི་དམག་བཟློག་ཀྱང་། ། ཤི་རྨས་མེད་པ་ངོ་མཚར་ཆེ། ། ཞེས་ཟེར་རོ། ། དེ་ནས་དགེ་འདུན་རྣམས་ན་རེ། འདི་ཟླ་བ་གྲགས་པའི་ནུས་པ་མིན། དགེ་འདུན་རྣམས་ཀྱིས་རབ་གནས་བྱ་དགོས་ཟེར་ནས། རབ་གནས་བྱས་པས་སེང་གེ་སའི་ནང་དུ་ནུབ་པས། མཁན་པོ་ན་རེ། འདི་ཟླ་བ་གྲགས་པ་སེམས་ལ་དབང་ཐོབ་པའི་བྱིན་རླབས་ཡིན་གསུང་། ཡང་སློབ་དཔོན་ནགས་ན་སྒོམ་གྱིན་བཞུགས་པ་ལ་ནགས་ལ་མེ་ཤོར་བའི་ཚེ། ནཱ་ལནྡྲ་པ་ལ་སོགས་པའི་ཡུལ་མི་རྣམས་ཀྱིས་བལྟར་ཕྱིན་པས། ཤིང་གི་ལྷ་མོ་ཞིག་གིས་རོ་སྟོད་བཏོན་ནས། བྱམས་མགོན་སྙིང་རྗེའི་བློ་ཅན་ཉིད། ། མེ་ཡིས་མི་འཚིག་ཆུས་མི་འཁྱེར། ། རླུང་གིས་འཐོར་བར་ག་ལ་ནུས། ། ཞེས་ཟེར། མི་རྣམས་ཀྱིས་ཕྱིན་པས་སློབ་དཔོན་གྱི་རྩྭའི་སྤྱིལ་བུའི་འདོམ་གང་ཚུན་ཆད་མེས་མ་འཚིག་པར་འདུག་ཅིང་། སློབ་དཔོན་གྱི་ཞལ་ནས། ང་ཡི་བླ་མ་ཀླུ་སྒྲུབ་ཀྱིས། ། སྐྱེ་བ་མེད་པའི་མེས་དངོས་པོའི། ། བུད་ཤིང་ཐམས་ཅད་བསྲེགས་པ་ཡིན། ། མཁན་པོ་ཡིས་ཀྱང་བསྲེགས་པ་ཡིན། ། ངས་ཀྱང་སྐྱེས་བ་མེད་པའི་མེས། ། དངོས་པོའི་བུད་ཤིང་བསྲེགས་པ་ཡིན། ། དངོས་པོའི་མེ་ཡིས་ག་ལ་ཚུགས། ། ཞེས་གསུངས་སོ། ། མངོན་པར་ཤེས་པ་ཐོགས་མེད་མངའ་བ་ཡིན་ཏེ། མུ་སྟེགས་ཀུ་མ་རི་ཀ་ན་རེ། སློབ་དཔོན་ལ་མངོན་ཤེས་ཡོད་པ་མི་བདེན་ཡོང་། བདེན་ན་བརྒྱ་བྱིན་ད་ལྟ་ཅི་བྱེད་དྲིས་པས། སློབ་དཔོན་གྱི་གསུང་ནས་བརྒྱ་བྱིན་དངོས་ནི་སུམ་ཅུ་རྩ་གསུམ་ན་ཡོད་ལ། སྤྲུལ་པ་ཅིག་དགའ་ལྡན་ན་བྱམས་པ་ལ་ཆོས་ཉན་གྱི་ཡོད་གསུངས་པས། ཀུ་མ་རི་ཡིད་མ་ཆེས་པ་ལ། སློབ་དཔོན་གྱི་ཕྱག་ཡབ་མཛད་པས། བརྒྱ་བྱིན་དངོས་འོངས་པ་དེ་ཁོས་མ་མཐོང་། ཡང་ཕྱག་ཡབ་མཛད་པས། སྤྲུལ་པ་འོངས་པ་ཁོས་མཐོང་ནས། ཁྱོད་བརྒྱ་བྱིན་ཡིན་ནམ་བྱས་པས་དངོས་མིན། དངོས་ཡིན་ན་མིག་སྟོང་ཡོད་པ་ལས། ང་ལ་རྗེས་ལས་མེད་ཟེར་ནས། བལྟས་པས་རྗེས་ལས་མི་འདུག་པས་ཀུ་མ་རི་ཡིད་ཆེས་སོ། ། དེས་ན་སློབ་དཔོན་འདི་ཉིད་པཎྜི་ཏ་རྣམས་ཀྱི་མཆོག་ཏུ་གྱུར་པ་ཡིན་ཏེ། ནཱ་ལནྡྲ་ན་པཎྜི་ཏ་མང་པོ་ཡོད་ཀྱང་། མུ་སྟེགས་ཀྱི་རྒོལ་བ་ཚར་གཅོད་མི་ནུས་ན་ཕྱིར་ཆོས་འཆད་མི་ནུས་ལ། སློབ་དཔོན་འདི་ཉིད་ཕྱིར་ཆོས་འཆད་པ་ན། ལྷོ་ཕྱོགས་ཀྱི་མཁས་པ་ཆེན་པོ་ཙནྡྲ་གཽ་མི་སློབ་དཔོན་ཆོས་འཆད་པའི་སར་འོངས་ཏེ་འདུད་པ་མི་བྱེད་པར་འགྲེངས་ཏེ་གནས་པ་ན་སློབ་དཔོན་ཟླ་བ་གྲགས་པའི་དགོངས་པ་ལ་རྩོད་དམ་བགྲོ་བར་འདོད་པ་ཅིག་འོངས་པ་ཡིན་སྙམ་ནས་དེ་ལ། ཕྱོགས་གང་ནས་འོངས། ཆོས་ཅི་ཤེས་དྲིས་པས། ལྷོ་ཕྱོགས་ནས་འོངས། སྒྲ་པ་ཎི། ཤེར་ཕྱིན་ཚུལ་བརྒྱ་ལྔ་བཅུ་པ། འཇམ་དཔལ་མཚན་བརྗོད་ཤེས་ཟེར། སྒྲ་དང་། མཚན་ཉིད་ཀྱི་རྩ་བ་དང་། སྔགས་ཀྱི་རྩ་བ་སྨོས་པས། ལུང་རིགས་ལ་མཁས་པར་ཁས་བླངས་ཀྱང་། ཚིག་ཁེངས་སྐྱུངས་པར་འདུག་པས། ཙནྡྲ་གཽ་མི་མིན་ནམ་དྲིས་པས། དེ་ལྟར་འཇིག་རྟེན་པ་རྣམས་འདོགས་སོ་གསུངས། འོ་ན་པཎྜི་ཏ་ཆེན་པོ་ཐོག་བབས་སུ་ཕེབས་པ་མ་ལེགས། བསུ་བ་བྱ་དགོས་པས་རེ་ཤིག་ཕྱིར་གཤེགས་ཤིག་བསུ་བ་བགྱིའོ་བྱས་ནས། ཆོས་འཆད་འཕྲོ་བཅད་དེ། གཎྜི་བརྡུངས་པཎྜི་ཏ་རྣམས་བསགས་ཏེ། འདིར་མཁས་པ་ཆེན་པོ་ཙནྡྲ་གཽ་མི་བྱོན་གྱིས། བསུ་བ་བྱ་དགོས་པས་ཤིང་རྟ་གཉིས་འཆོས་ལ་གཅིག་ལ་འཇམ་དཔལ་གྱི་སྐུ་བཞུགས། གཅིག་ལ་ཙནྡྲ་གཽ་མི་བཞུགས་ལ་མཆོད་པའི་ཚོགས་ཀྱིས་སྤྱན་དྲོངས་ཤིག་ཅེས་བསྒོས་ཏེ། དེ་ལྟར་བགྱིས་པའི་ཚེ། འཇམ་དཔལ་ལ་ཙནྡྲ་གཽ་མིས་བསྟོད་པས། སྐུ་དེ་དགྱེས་ཏེ་སློབ་དཔོན་ལ་ཞལ་ཕྱིར་གཟིགས་ཏེ། ད་ལྟ་ཡང་ནཱ་ལནྡྲ་ན་བྱིན་རླབས་ཅན་ཤིང་སྐུ་འཇིང་ཡོན་དུ་གྲགས་པ་བཞུགས། དེ་ནས་ཙནྡྲ་གཽ་མི་ནཱ་ལནྡྲར་བྱོན་པ་ལ་བསྙེན་བཀུར་ཞིང་། སློབ་དཔོན་ཟླ་བ་གྲགས་པ་དང་གདན་འཛོམ། ཕན་ཚུན་ཆོས་ཀྱི་བགྲོ་བ་མཛད་པས། སློབ་དཔོན་ཟླ་བ་གྲགས་པས་གང་དྲིས་པའི་ལན་ཐོགས་མེད་དུ་བཏབ། ཙནྡྲས་སྤྱན་རས་གཟིགས་ལ་དྲིས་ཤིང་ལན་ཐོགས་བཅས་སུ་འདེབས། དེའི་ཚེ་དཔལ་ལྡན་ཟླ་བས་གཟིགས་པས། སྤྱན་རས་གཟིགས་ཀྱི་རྡོ་སྐུ་བཞུགས་པའི་ཁང་པ་ནས་བྱུང་བས། ལན་ཅིག་དེར་སོང་སྟེ་རྒྱབ་ནས་ཉན་པས་ཆོས་འཆད་ཅིང་འདུག་པ་དང་། ཞལ་ལྟ་དགོས་དགོངས་ཏེ་ནང་དུ་ཕྱིན་པ་དང་སྤྲུལ་སྐུ་ཞལ་བརྟུལ་ཏེ། དེར་སློབ་དཔོན་གྱིས་ས་ཐེ་བཙུགས་ནས། ཁོང་ལ་ཞལ་སྟོན་པ་ལྟར་བདག་ལའང་བསྟན་དུ་གསོལ་ཞེས་གསོལ་བ་བཏབ་པས། མནལ་ལམ་དུ་བྱོན་ཏེ། ཁྱོད་འཇམ་དཔལ་གྱིས་བྱིན་གྱིས་བརླབས་པའི་མཁས་པ་ཆེན་པོ་ཡིན་པས་ངས་བྱིན་གྱིས་བརླབ་མི་དགོས། ཙནྡྲ་གཽ་མི་ལ་ཅུང་ཟད་བྱིན་གྱིས་བརླབས་པ་ཡིན་གྱིས་དེ་སྐད་མ་ཟེར་གསུང་། མནལ་སད་ཚེ་དེ་ལྟར་ལགས་ཀྱང་ཞལ་སྟོན་པར་ཞུ་ཞུས་པས་ཞལ་མངོན་སུམ་དུ་བསྟན་ཏོ། ། དེའི་ཚེ་བདག་གི་སྤྱི་གཙུག་ཏུ་བཞུགས་ལ་སེམས་ཅན་ཐམས་ཅད་ཀྱི་མཐོང་བར་མཛོད་ཅིག་ཅེས་གསོལ་བས། སྤྱན་རས་གཟིགས་ཀྱི་ཞལ་ནས་ངས་སེམས་ཅན་ཐམས་ཅད་ཀྱི་དྲུང་དུ་སོང་ཡང་། དེ་རྣམས་ལས་ཀྱི་སྒྲིབ་པས་ང་མཐོང་བར་མི་འགྱུར་གསུངས། ཅིས་ཀྱང་བཞུགས་ཤིག་ཅེས་གསོལ་བ་བཏབ་ནས། འཕགས་པ་སྤྱི་བོར་ཁྱེར་ནས་ཐམས་ཅད་དུ་ཕེབས་ནས་བདག་གི་སྤྱི་བོ་ན་འཕགས་པ་བཞུགས་སོ། ། ཕྱག་མཆོད་ཀྱིས་བྱས་ཀྱང་ལ་ལས་ཅི་ཡང་མ་མཐོང་། ལ་ལས་ཁྱི་རོར་མཐོང་། ཕལ་ཆེ་བས་ཆོས་མང་དུ་བཤད་པས་རླུང་སྨྱོ་ཡིན་ཟེར། ཆང་ཚོང་མ་ཞིག་གིས་ཞབས་ཙམ་མཐོང་བས་ཀྱང་ཐུན་མོང་གི་དངོས་གྲུབ་ཐོབ་པ་ཞིག་བྱུང་ཞེས་གྲག་གོ ། སློབ་དཔོན་འདིས་འཕགས་པ་ཀླུ་སྒྲུབ་ཀྱི་དགོངས་པ་ལྟར་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་ཟབ་པ་དང་རྒྱ་ཆེ་བའི་ལམ་གྱི་རིམ་པའི་ལུས་ཡོངས་སུ་རྫོགས་ཤིང་ས་ལམ་འབྲས་བུ་དང་བཅས་པ་རྒྱས་པར་སྟོན་པའི་གཞུང་དབུ་མ་ལ་འཇུག་པ་རང་འགྲེལ་དང་བཅས་པ་མཛད་ཅིང་། ཆོས་རྣམས་ཀྱི་གནས་ལུགས་སྟོང་པ་ཉིད་རིགས་པ་བརྒྱ་ཕྲག་གིས་སྒོ་ནས་གཏན་ལ་འབེབས་པ་དབུ་མ་རྩ་བའི་འགྲེལ་པ་ཚིག་གསལ་དང་། ལམ་ཐུན་མོང་བས་རྒྱུད་སྦྱངས་ནས་ཐུན་མོང་མིན་པ་བླ་མེད་ཀྱི་ལམ་ལ་འཇུག་པའི་འཇུག་སྒོ་དབང་དང་དམ་ཚིག ། ཞུགས་ནས་སྒོམ་བྱའི་ལམ་རིམ་པ་གཉིས་འབྲས་བུ་དང་བཅས་པ་མཐའ་དག་ཡོངས་སུ་རྫོགས་པར་སྟོན་པ་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྩ་རྒྱུད་ཀྱི་འགྲེལ་པ་སྒྲོན་མ་གསལ་བ་མཛད་དེ། ཚིག་གསལ་དང་། སྒྲོན་གསལ་གཉིས་ལ་ནི་སྔོན་གྱི་མཁས་པ་རྣམས་ཀྱིས། མཁའ་ལ་ཉི་ཟླ་རྣམ་གཉིས་ས་ལ་གསལ་བ་རྣམ་གཉིས་ཞེས་སའི་སྟེང་ན་འགྲན་ཟླ་མེད་པའི་བསྟན་བཅོས་སུ་བསྔགས་སོ། ། གཞན་ཡང་སློབ་དཔོན་འདིས་ལམ་གྱི་རིམ་པའི་ལྟ་བའི་གནད་རྣམས་སྟོན་པའི་བསྟན་བཅོས་བཞི་བརྒྱ་པའི་འགྲེལ་པ་དང་། རིགས་པ་དྲུག་ཅུ་པའི་འགྲེལ་པ་དང་། དབུ་མ་ཕུང་པོ་ལྔ་པ། སྟོང་ཉིད་བདུན་ཅུ་པའི་འགྲེལ་པ། སྐྱབས་འགྲོ་བདུན་ཅུ་པ། ཐུགས་རྗེ་ཆེན་པོ་ལ་སྨྲེ་སྔགས་སུ་གསོལ་པ། གསང་བ་འདུས་པའི་སྦྱོར་བ་ཡན་ལག་དྲུག་པའི་འགྲེལ་པ། གསང་བ་འདུས་པའི་མངོན་པར་རྟོགས་པའི་རྒྱན་གྱི་འགྲེལ་པ། རྡོ་རྗེ་སེམས་དཔའི་སྒྲུབ་ཐབས། ཁྲོ་བོ་བདུད་རྩི་འཁྱིལ་པའི་སྒྲུབ་ཐབས། སྒྲོལ་མའི་བསྟོད་པ་རྣམས་མཛད་དོ། ། སློབ་དཔོན་ཟླ་བ་གྲགས་པ་འདི་ནི་འཕགས་པ་ཀླུ་སྒྲུབ་ཀྱི་ལུགས་བཟང་གསལ་བར་མཛད་ཕྱིར་བསམ་བཞིན་དུ་བྱོན་པ་ཞིག་སྟེ། རྗེ་བདག་ཉིད་ཆེན་པོས་རྗེ་བཙུན་འཇམ་དཔལ་དབྱངས་ལ་འཕགས་པ་ཀླུ་སྒྲུབ་ཀྱི་དགོངས་པ་འགྲེལ་བ་ལ་སློབ་དཔོན་ཟླ་བ་གྲགས་པ་འཁྲུལ་མེད་འབའ་ཞིག་ཏུ་བཟུང་བས་ཨེ་ཆོག་ཞུས་པས། ཟླ་བ་གྲགས་པ་ནི་སྟེང་ཕྱོགས་འཇིག་རྟེན་གྱི་ཁམས་ཀྱི་ཞིང་གཅིག་གི ། དེ་བཞིན་གཤེགས་པ་ཅིག་གི་ཞབས་དྲུང་ནས་བྱང་ཆུབ་སེམས་དཔའ་རྣམ་དཔྱོད་དང་སྙིང་སྟོབས་མཆོག་ཏུ་གྱུར་པ་ཞིག་ཞིང་འདིར་འཕགས་པ་ཀླུ་སྒྲུབ་ཀྱི་ལུགས་བསྟན་པའི་སྙིང་པོ་གསལ་པར་བྱ་བའི་སླད་དུ་བསམ་བཞིན་དུ་སྐྱེ་བ་བཟུངས་པ་ཡིན་པས། འདི་འཕགས་པ་ཀླུ་སྒྲུབ་ཀྱི་དགོངས་པ་འགྲེལ་བ་ལ་སྔགས་མཚན་ཉིད་གང་གི་སྐབས་སུའང་འཁྲུལ་པ་ཕྲ་མོ་ཙམ་ཡང་མེད་པས། འདི་ལ་རྣམ་པ་ཐམས་ཅད་དུ་ཡིད་ཆེས་ཀྱི་གནས་འབའ་ཞིག་ཏུ་ངེས་པར་གཟུང་དགོས་པ་ཡིན་ནོ་ཞེས་གསུངས་པ་ལྟར་རོ། ། སློབ་དཔོན་ཟླ་བ་གྲགས་པ་འདི་ནི། རྒྱ་གར་གྲུབ་ཆེན་བརྒྱད་ཅུའི་ནང་ཚན་ཞིག་ཀྱང་ཡིན་ཏེ། བླ་མ་རྡོ་རྗེ་གདན་པས་གྲུབ་ཆེན་བརྒྱད་ཅུ་ལ་བསྟོད་པ་ལས། འཇམ་དཔལ་སྐུ་ཡི་སྤྲུལ་པར་འཁྲུངས། ། ཀླུ་སྒྲུབ་དགོངས་པ་ཐུགས་སུ་ཆུད། ། ཟླ་བ་གྲགས་པ་ཞེས་བྱ་བའི། ། བླ་མ་དེ་ལ་ཕྱག་འཚལ་ལོ། ། ཞེས་བསྟོད་པར་མཛད་དོ། ། དེས་ན་བྱང་ཆུབ་ལམ་གྱི་རིམ་པ་བློ་སྦྱོང་བར་འདོད་པ་རྣམས་ཀྱིས་ལམ་གྱི་རིམ་པའི་གནད་རྣམས་ལ་ངེས་པ་ཕུལ་ཕྱིན་བསྐྱེད་པ་ལ་སློབ་དཔོན་བདག་ཉིད་ཆེན་པོ་འདི་ལ་གསོལ་བ་འདེབས་པ་དང་། འདིའི་གཞུང་རྣམས་ལ་ཐོས་བསམ་གྱིས་འཇུག་པ་ཤིན་ཏུ་གལ་ཆེའོ། ། སློབ་དཔོན་འདི་ལ་སྙིང་ནས་གསོལ་བ་བཏབ་ན་བྱིན་རླབས་མྱུར་དུ་འཇུག་སྟེ། སློབ་དཔོན་འདི་ནི་རྡོ་རྗེའི་སྐུ་བརྙེས་ནས་ད་ལྟའང་འཛམ་བུའི་གླིང་ན་གདུལ་བྱའི་དོན་མཛད་བཞིན་པ་ཡིན་པ་ནི་སྔོན་པཱ་ཚབ་ལོ་ཙཱ་བས་སློབ་དཔོན་འདི་ལ་དད་ཅིང་གུས་པས་ཡུན་དུ་གསོལ་བ་བཏབ་སྟེ་ཁ་བ་ཅན་གྱི་ལྗོངས་འདིར་དབུ་མའི་ལམ་སྲོལ་བཟང་པོ་འདི་རྒྱ་ཆེར་འཕེལ་ན་ཅི་མ་རུང་སྙམ་སྟེ་རྒྱ་གར་དུ་ཕེབས་པས་སློབ་དཔོན་ཟླ་བ་གྲགས་པས་དངོས་སུ་ཞལ་བསྟན་ཏེ། གདམས་པ་དང་རྗེས་སུ་བསྟན་པ་རྒྱ་ཆེར་སྩལ་ཞིང་བོད་དུ་དབུ་མའི་ལམ་སྲོལ་རྒྱ་ཆེར་སྤེལ་ནུས་པར་བྱིན་གྱིས་བརླབས་པ་ལྟར་རོ། ། ། །
༈ དེ་སྲས་ཐུ་བོ་རིགས་པའི་ཁུ་བྱུག་ཆེ། ། ཞེས་བསྔགས་པ་རིགས་པའི་ཁུ་བྱུག་ཆེ་བ་ནི་སྐུ་གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་། ལོ་ལོན་ནས་བསྙེན་པར་རྫོགས། བི་ཀ་མ་ལ་ཤཱི་ལར་སྡེ་སྣོད་གསུམ་ལ་སྦྱངས་ཏེ་མཁས་པའི་ཕུལ་དུ་ཕྱིན་པར་གྱུར། སློབ་དཔོན་ཟླ་བ་གྲགས་པ་ལ་འཕགས་པ་ཀླུ་སྒྲུབ་ནས་བརྒྱུད་པའི་མདོ་སྔགས་ཀྱི་མན་ངག་རྣམས་རྫོགས་པར་གསན། ནང་དུ་ཡང་དག་འཇོག་ལ་རྩེ་གཅིག་ཏུ་བཞུགས་ཏེ་ཐེག་པ་ཆེན་པོའི་ལམ་གྱི་རིམ་པ་ལ་ཉམས་རྟོགས་ཕུལ་དུ་ཕྱིན་པ་ཐོབ། ལྟ་བའི་དཀའ་གནད་ཕྲ་མོ་འགའ་ཞིག་ལ་ངེས་པ་དྲང་བའི་ཕྱིར་བླ་མ་དང་ལྷག་པའི་ལྷ་དབྱེར་མེད་པ་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ། བསག་སྦྱང་རྒྱ་ཆེན་པོ་ལ་འབད་པས་དཔལ་མགོན་འཕགས་པ་ཀླུ་སྒྲུབ་ཀྱིས་དངོས་སུ་ཞལ་བསྟན་ནས་ལྟ་བའི་དཀའ་གནས་ཕྲ་མོ་རྣམས་ཞིབ་ཏུ་བསྟན་ཏེ་མཚན་འཛིན་གྱི་འཆིང་བ་མ་ལུས་པ་དྲུང་ཕྱུང་བར་མཛད། མངའ་རིས་ཆོས་རྒྱལ་བྱང་ཆུབ་འོད་ཀྱིས་ནག་ཚོ་ལོ་ཙཱ་བ་ཇོ་བོ་སྤྱན་འདྲེན་དུ་བཏང་བའི་ཚེ་ནག་ཚོ་ལོ་ཙཱ་བས་བི་ཀ་མ་ལ་ཤཱི་ལར་ཕྱིན་ནས་ཇོ་བོ་གང་དུ་བཞུགས་བཙད་དཔྱད་པའི་ཚེ་བི་ཀ་མ་ལ་ཤཱི་ལའི་ཚོགས་སུ་པཎྜི་ཏ་ཀུན་གྱི་གྲལ་དབུ་ལ་བཞུགས་པ་སྐུ་བགྲེས་ཤིང་བརྗིད་ཆགས་པ་འདི་མགོན་པོ་ཨ་ཏི་ཤ་ཨེ་ཡིན་ཞེས་དྲིས་པས། བོད་ཀྱི་ཚེ་དང་ལྡན་པ་ཅི་ཟེར། འདི་དཔལ་ལྡན་ཟླ་བ་གྲགས་པ་ལ་ཆོས་དངོས་སུ་ཉན་པ་རིགས་པའི་ཁུ་བྱུག་བྱ་བ་ཨ་ཏི་ཤའི་ཡང་བླ་མ་ཡིན་ཟེར། རིགས་པའི་ཁུ་བྱུག་འདི་མགོན་པོ་ཀླུ་སྒྲུབ་ཀྱི་ཡང་དངོས་སློབ་ཡིན་ཏེ། མཁས་གྲུབ་རིན་པོ་ཆེའི་གསང་བའི་རྣམ་ཐར་དུ་ཡང་རིགས་པའི་ཁུ་བྱུག་ཏུ་སྐྱེ་བ་བཞེས་དུས་འཕགས་པ་ཀླུ་སྒྲུབ་བྱོན་ནས་ལྟ་བའི་གནད་ཤིན་ཏུ་ཕྲ་བ་བསྟན་ནས་དངོས་འཛིན་གྱི་འཁྲུལ་པ་རྩ་བ་ནས་དྲུང་ཕྱུང་བར་མཛད་ཅིང་། ཀླུ་སྒྲུབ་ཀྱི་ཞལ་ནས། ངེད་རྒྱ་གར་གྱི་གྲུབ་ཐོབ་རྣམས་འཇམ་དབྱངས་ལ་བརྟེན་པ་ཡིན། དེའི་རྒྱུ་མཚན་ཡང་གསུང་རབ་ཀྱི་དཀའ་བའི་གནད་ཤིན་ཏུ་ཕྲ་བ་བྱུང་ན་རྗེ་བཙུན་འཇམ་དབྱངས་ལ་གསོལ་བ་བཏབ་ནས་ཟབ་མོའི་དོན་ལ་དཔྱོད་པ་ཡིན། ཁྱོད་ཀྱང་རྗེ་བཙུན་འཇམ་དབྱངས་བསྟེན་པར་བྱོས་ཤིག་ཅེས་གསུངས་སོ། ། ཞེས་སོགས་དང་། ཡང་ཀླུ་སྒྲུབ་ཀྱི་ཞལ་ལས་བདག་ཀྱང་མ་འོངས་པའི་དུས་སུ་མཐའ་འཁོབ་ཏུ་འགྲོ་བའི་དོན་བྱེད་པར་སྨོན། ཁྱོད་ཀྱང་དེའི་དུས་སུ་འཁོར་གྱི་ཐོག་མར་གདུལ་བྱ་རྣམས་ཀྱི་མཆོག་ཏུ་འགྱུར་རོ། ། ཞེས་མ་འོངས་ལུང་བསྟན་དང་བཅས་གསུངས་སོ། ། དེ་བཞིན་དུ་སློབ་དཔོན་ཟླ་བ་གྲགས་པས་ཀྱང་རིགས་པའི་ཁུ་བྱུག་ཆེ་བ་འདི་ལ་མ་འོངས་པའི་དུས་སུ་རྗེ་བཙུན་འཇམ་དབྱངས་དགེ་སློང་གི་ཚུལ་དུ་བསམས་བཞིན་དུ་མཐའ་འཁོབ་ཏུ་སྐྱེ་བ་བཞེས་པར་འདུག་པས་ཁྱོད་ཀྱང་དེར་སྐྱེ་བ་ལོངས་ལ་བཀའ་སྒྲུབ་པ་དང་བསྟན་པ་རྒྱས་པར་གྱིས་ཞེས་གསུངས་སོ། ། ཚུལ་དེ་དག་ནི་མཁས་གྲུབ་ཐམས་ཅད་མཁྱེན་པའི་གསང་བའི་རྣམ་ཐར་དུ་ཇི་ལྟར་གསུངས་པ་ལྟར་བཀོད་པ་ཡིན་ནོ། ། ། །
༈ རྒྱལ་སྲས་རིགས་པའི་ཁུ་བྱུག་གཉིས་པའི་ཞབས། ། ཞེས་བསྔགས་པ། རིགས་པའི་ཁུ་བྱུག་ཆུང་བ་ནི་བླ་མ་ཨ་ཝ་དྷུ་ཏི་པ་ཞེས་ཡོངས་སུ་གྲགས་པ་དེ་ཡིན་པར་མངོན་ཏེ། བཀའ་གདམས་གླེགས་བམ་ལས། ཀླུ་སྒྲུབ་ཟླ་གྲགས་རིགས་པའི་ཁུ་བྱུག་དང་། ། བླ་མ་ཨ་ཝ་དྷུ་ཏི་གསེར་གླིང་པ། ། ཐུན་མོང་མ་ཡིན་གདམས་པ་སྦྱིན་མཛད་པའི། ། དྲིན་ཅན་བླ་མ་ལྔ་ལ་ཕྱག་འཚལ་ལོ། ། ཞེས་ཇོ་བོ་རྗེས་ཟབ་མོ་ལྟ་བའི་བླ་བརྒྱུད་དུ་དེ་ལྟར་གསུངས་སོ། ། དེ་ལྟར་ན་བླ་མ་ཨ་ཝ་དྷུ་ཏི་པ་ཆེན་པོ་ནི་སྔོན་ཡུན་རིང་པོ་ནས་ལམ་ལ་གོམས་པའི་མཐུས་སྲིད་གསུམ་མེ་འབར་བའི་ཀློང་ལྟར་གཟིགས་ཏེ་འཁོར་བའི་ཕུན་ཚོགས་གང་ལ་ཡང་མ་ཆགས་པར་རྒྱལ་བའི་བསྟན་པའི་སྙིང་པོ་མཐར་ཐུག་པ་ཞིག་ལ་ཉམས་ལེན་སྙིང་པོར་མཛད་བཞེད་ནས་རིགས་པའི་ཁུ་བྱུག་ཆེ་བའི་ཞབས་ལ་གཏུགས་ཏེ་འཕགས་པ་ཀླུ་སྒྲུབ་ནས་བརྒྱུད་པའི་མན་ངག་རྣམས་ཡོངས་སུ་རྫོགས་པར་གསན་ནས་དབེན་པའི་གནས་སུ་སྒྲུབ་པ་རྩེ་གཅིག་ཏུ་མཛད་པས་གྲུབ་པའི་གོ་འཕང་མཐོན་པོར་གཤེགས་པ་ན་སྙིང་ནས་རྣམ་གྲོལ་དོན་དུ་གཉེར་བའི་སྐལ་ལྡན་རྣམས་རྗེས་སུ་འཛིན་པར་མཛད་ཅིང་། ལྷག་པར་ཇོ་བོ་རྗེ་དཔལ་ལྡན་ཨ་ཏི་ཤ་ལ་འཕགས་པ་ཀླུ་སྒྲུབ་ནས་བརྒྱུད་པའི་མན་ངག་རྣམས་རྫོགས་པར་གནང་། ཇོ་བོ་རྗེས་ཀྱང་བདག་ཉིད་ཆེན་པོ་འདི་ལོ་བདུན་གྱི་བར་དུ་འབྲལ་མེད་དུ་བསྟེན་པར་མཛད་ཅིང་བླ་མ་འདི་ཉིད་རང་དང་གཞན་གྱི་ཚེ་རབས་བརྒྱ་སྟོང་དྲན་པ་དང་ལྐོག་ཏུ་གྱུར་པའི་དོན་རྣམས་ཇི་བཞིན་དུ་མཁྱེན་པའི་མངོན་ཤེས་རྒྱ་ཆེན་པོ་དང་ལྡན་པ་ཞིག་སྟེ་ཇོ་བོ་རྗེས་བླ་མ་འདི་ལ་གདམས་ངག་ཞུ་བའི་ཚེ་རེས་འགའ་མཎྜལ་ཕུལ་ཏེ་གསོལ་བ་ཇི་ཙམ་བཏབ་ཀྱང་གང་ཡང་གསུང་བར་མི་མཛད། རེས་འགའ་རི་ཆེན་པོའི་གཡང་ས་ཉམ་ང་བ་བགྲོད་པ་དང་ཆུ་བོ་ཆེན་པོའི་ཟམ་པའི་སྟེང་ལ་འགྲོ་བ་སོགས་ཤིན་ཏུ་ཉམ་ང་བའི་སྐབས་སུའང་གང་ཡང་མ་ཞུས་ཀྱང་ཞལ་ཕྱིར་བསྒྱུར་ཏེ་ཧེ་བྷ་ཏན་ཏ་པཎྜི་ཏ་འདི་དང་འདི་ཞེས་བྱ་བ་དམྱལ་བ་འདི་དང་འདི་ན་འདུག་གོ ། ཇི་སྲིད་སངས་རྒྱས་མ་ཐོབ་བར་དུ་དཀར་ནག་གི་ལས་ཕྲ་མོའང་ནམ་ཡང་མི་བསླུ་བས་གཟབ་དགོས་པར་འདུག་གོ ། ཞེས་གསུང་འབྱོན་པ་ཞིག་ཡོད་གསུང་། ཇོ་བོ་རྗེས་རིགས་པའི་ཁུ་བྱུག་ཆེ་བ་དང་། བླ་མ་ཨ་ཝ་དྷུ་ཏི་པ་གཉིས་ཀ་ལ་ཆོས་གསན་ཞིང་གཙོ་བོར་བླ་མ་ཨ་ཝ་དྷུ་ཏི་པ་ལ་ཟབ་མོའི་ལམ་གྱི་རིམ་པའི་མན་ངག་རྣམས་རྫོགས་པར་གསན། ཇོ་བོ་ལ་པཎྜི་ཏ་དང་གྲུབ་ཆེན་གྱི་བླ་མ་མང་དུ་ཡོད་པ་ལས་དབུ་མའི་ལྟ་བ་སྟོན་པ་ལ་བླ་མ་འདི་ཉིད་བཟང་བར་བྱུང་སྟེ་ཟབ་མོ་དབུ་མའི་ལྟ་བ་མཐར་ཐུག་པ་སྟོན་པ་ཤིན་ཏུ་དཀོན་པས་ཇོ་བོས་བླ་མ་ཤན་ཏི་པ་ལ་ཕར་ཕྱིན་གྱི་སྐོར་གསན་པའི་ཚེ་བརྒྱད་སྟོང་པ་འཆད་པ་ན། བརྒྱད་སྟོང་འགྲེལ་ཆེན་དུ་སློབ་དཔོན་སེང་གེ་བཟང་པོས་འཕགས་པ་ཀླུ་སྒྲུབ་ཀྱི་མན་ངག་ལྟར་དབུ་མའི་རིགས་པ་ཕྲ་མོ་རྣམས་བྱུང་རེས་ཀྱིས་དགག་པ་མཛད་པ་ན་ཇོ་བོའི་ཐུགས་ལ་དབུ་མའི་ལྟ་བ་གསལ་བཏབ་པ་བཞིན་དུ་ཟབ་མོ་དབུ་མའི་ལྟ་བ་ལ་ངེས་ཤེས་ཆེར་འགྲོ་བ་ཞིག་ཡོད་གསུང་། བླ་མ་གསེར་གླིང་པ་ལམ་རིམ་འཆད་པའི་ཚེ་ལྟ་བའི་ཐད་དུ་གསེར་གླིང་པ་རང་ཉིད་སེམས་ཙམ་རྣམ་བདེན་གྱི་ལྟ་བ་འཛིན་པས་ལྟ་བ་དེ་ཉིད་རང་སྟོན་པར་མཛད། ཇོ་བོ་ལ་ཡང་ཁྱོད་ལྟ་བུའི་ཤེས་རབ་ཆེན་པོ་འདི་འདྲ་དབུ་མ་ཐལ་འགྱུར་བའི་ལྟ་བ་འཛིན་པ་ངོ་མཚར་ཞེས་ཡང་ཡང་གསུང་། ཇོ་བོ་རྗེ་ལ་ནི་བླ་མ་གསེར་གླིང་པས་དེ་ལྟར་གསུངས་རེས་ཀྱིས་འཕགས་པ་ཀླུ་སྒྲུབ་ཀྱི་དགོངས་པ་སློབ་དཔོན་ཟླ་བ་གྲགས་པས་ཇི་ལྟར་བཀྲལ་བ་ལྟར་གྱི་དབུ་མའི་ལྟ་བ་མཐར་ཐུག་དེ་ཉིད་ལ་གསལ་བཏབ་པ་བཞིན་དུ་ངེས་ཤེས་ཇེ་ཆེར་འགྲོ་བ་ཞིག་ཡོད་གསུང་། ཇོ་བོ་རྗེ་ནི་ཐེག་པ་ཆེན་པོའི་ལམ་གྱི་རིམ་པའི་བདག་པོར་ཡོངས་སུ་གྲགས་པ་ལྟར་ཡིན་པས་བླ་མའི་མཛད་སྤྱོད་ལ་སྐྱོན་རྟོག་མི་སྐྱེ་བར་མ་ཟད་ཅི་མཛད་ཐམས་ཅད་ལམ་གྱི་རིམ་པའི་བོགས་འདོན་དུ་འགྱུར་བ་དང་། ལྷག་པར་སློབ་དཔོན་ཟླ་བ་གྲགས་པས་འཕགས་པ་ཀླུ་སྒྲུབ་ཀྱི་དགོངས་པ་ཇི་ལྟར་བཀྲལ་བའི་དཀའ་གནས་མཐར་ཐུག་ཐ་སྙད་དུ་རྟེན་འབྲེལ་བསླུ་བ་མེད་པ་དང་། དོན་དམ་པར་རང་བཞིན་གྱིས་གྲུབ་པ་རྡུལ་ཙམ་ཡང་མེད་པའི་ཚུལ་རྟེན་འབྲེལ་ཟབ་མོ་དེ་ཉིད་མངོན་སུམ་དུ་གཟིགས་པ་ཡིན་པས་སུས་ཀྱང་བསྒྱུར་དུ་མེད་པའོ། ། དེས་ན་བྱང་ཆུབ་ལམ་གྱི་རིམ་པ་ལ་ཉམས་ལེན་སྙིང་པོར་བྱ་འདོད་པ་རྣམས་ཀྱིས་རིགས་པའི་ཁུ་བྱུག་ཆེ་བ་དང་བླ་མ་ཨ་ཝ་དྷུ་ཏི་པ་གཉིས་ལ་གསོལ་བ་འདེབས་ཤིང་བདག་ཉིད་ཆེན་པོ་འདི་གཉིས་ཀྱི་རྣམ་ཐར་བཟང་པོ་འདི་དག་བསམས་ལ་དོན་མེད་པའི་བྱ་བ་ཐམས་ཅད་བོར་ནས་ཐེག་པ་ཆེན་པོའི་ལམ་དང་ལན་ཅིག་མཇལ་བའི་སྐབས་འདིར་ཤེས་རྒྱུད་ལ་ཐེག་པ་ཆེན་པོའི་ལམ་ཡོངས་རྫོགས་ཀྱི་བག་ཆགས་ཅི་ཐེབས་ཞིག་བྱ་བ་ལ་འབད་པར་བྱའོ། ། རིགས་པའི་ཁུ་བྱུག་ཆེ་ཆུང་གཉིས་པོ་འདི་གང་དུ་འཁྲུངས་པ་སོགས་མཛད་པ་རྣམ་ཐར་ཞིབ་མོར་འཁོད་པ་མ་མཐོང་བས་སླར་རྙེད་ན་འདིར་བསྣན་པར་བྱའོ། ། ། །
༈ ཡང་རྗེ་བཙུན་འཇམ་དཔལ་དབྱངས་ནས། རྒྱལ་སྲས་ཞི་བ་ལྷ་སོགས༌ལ༌
བརྒྱུད་པའི་རླབས་ཆེན་སྤྱོད་རྒྱུད་ཀྱི་བླ་མ་རྣམས་ཀྱི་རྣམ་ཐར།
༈ ཇོ་བོ་རྗེ་དཔལ་ལྡན་ཨ་ཏི་ཤས་བྱང་ཆུབ་ལམ་གྱི་རིམ་པ་གསན་པའི་བླ་མ་བརྒྱུད་རིམ་ལ། རྗེ་བཙུན་བྱམས་པ་ནས་ཐོགས་མེད་སྐུ་མཆེད་སོགས་ལ་རིམ་གྱིས་བརྒྱུད་པའི་རྒྱ་ཆེན་སྤྱོད་རྒྱུད་དང་། རྗེ་བཙུན་འཇམ་དབྱངས་ནས་འཕགས་པ་ཀླུ་སྒྲུབ་ཡབ་སྲས་སོགས་ལ་རིམ་གྱིས་བརྒྱུད་པའི་ཟབ་མོ་ལྟ་རྒྱུད་དང་། ཡང་རྗེ་བཙུན་འཇམ་དབྱངས་ནས་རྒྱལ་སྲས་ཞི་བ་ལྷ་སོགས་ལ་རིམ་གྱིས་བརྒྱུད་པའི་རླབས་ཆེན་སྤྱོད་རྒྱུད་གསུམ་དུ་ཡོད་དེ་རྒྱུད་པ་འདི་གསུམ་གའི་མན་ངག་ཡོངས་སུ་རྫོགས་པ་ཇོ་བོ་རྗེ་ལ་མངའ་བས་བརྒྱུད་པའི་ཆུ་བོ་གསུམ་འདྲེས་ཞེས་བརྗོད་དོ། ། རྒྱ་ཆེ་བའི་ལམ་གྱི་རིམ་པའི་བརྒྱུད་རིམ་ལ་གཉིས་སུ་བྱས་པ་ནི་སྐྱེས་བུ་ཆུང་འབྲིང་དང་། སྤྱོད་པ་སྤྱི་བསླབ་དང་། ཞི་ལྷག་གི་སྐོར་ལ་ཁྱད་ཆེར་མེད་ཀྱང་བྱང་ཆུབ་ཀྱི་སེམས་རིན་པོ་ཆེ་སྒོམ་པའི་གདམས་ངག་ལ་ལུགས་མི་འདྲ་བ་གཉིས་བྱུང་སྟེ། ལུགས་དང་པོ་ནི་ཤེར་ཕྱིན་གྱི་མདོ་སྡེ་རིན་པོ་ཆེའི་དགོངས་དོན་ལྟར་བྱང་ཆུབ་ཀྱི་སེམས་རིན་པོ་ཆེ་བསྐྱེད་པའི་ཐབས་སུ་ཐོག་མར་སེམས་ཅན་ཐམས་ཅད་ལ་ཉེ་རིང་མེད་པའི་སེམས་སྙོམས་པའི་བཏང་སྙོམས་བསྒོམས། དེ་ནས་སེམས་ཅན་ཐམས་ཅད་རང་གི་མ་དྲིན་ཅན་དུ་སྒོམ། དེ་ནས་དྲིན་དྲན་དང་དྲིན་གཟོ་རིམ་གྱིས་བསྒོམས་ཏེ་ཡིད་འོང་གི་བྱམས་པ་བསྐྱེད། དེ་ནས་སྙིང་རྗེ་དང་ལྷག་བསམ་དང་བྱང་ཆུབ་ཀྱི་སེམས་རྣམས་རིམ་གྱིས་སྒོམ་པ་སྟེ་ཚུལ་དེ་ལ་ནི་རྒྱུ་འབྲས་མན་ངག་བདུན་གྱི་སྒོ་ནས་བློ་སྦྱོང་བ་ཞེས་བརྗོད་དོ། ། ལུགས་གཉིས་པ་ནི་སྡོང་པོ་བཀོད་པའི་མདོ་སོགས་ཀྱི་དགོངས་དོན་བསླབ་བཏུས་དང་སྤྱོད་འཇུག་གཉིས་ལས་ཇི་ལྟར་གསུངས་པ་ལྟར་བདག་གཅེས་འཛིན་གྱི་སྐྱོན་དང་། གཞན་གཅེས་འཛིན་གྱི་ཕན་ཡོན་སྒོ་དུ་མ་ནས་བསམས་ཏེ་སེམས་ཅན་ཐམས་ཅད་རང་ལ་རྣམ་པ་ཀུན་ཏུ་ཕན་བདེ་སྟེར་པའི་ཡིད་བཞིན་གྱི་ནོར་བུ་ལྟ་བུར་བསྒོམས་ནས་ཡིད་འོང་གི་བྱམས་པ་བསྐྱེད། དེ་ལ་བརྟེན་ནས་སྙིང་རྗེ་དང་ལྷག་བསམ་དང་བྱང་ཆུབ་ཀྱི་སེམས་རྣམས་རིམ་གྱིས་སྒོམ་པ་སྟེ་ཚུལ་དེ་ལ་ནི་བདག་གཞན་མཉམ་རྗེའི་སྒོ་ནས་བློ་སྦྱོང་བ་ཞེས་བརྗོད་ཅིང་། དེའི་མན་ངག་ཟུར་དུ་བཀོལ་བ་ལ་བློ་སྦྱོང་དོན་བདུན་མའི་ཁྲིད་ཅེས་ཀྱང་བརྗོད་དོ། ། འདིའི་བརྒྱུད་རིམ་ནི་བཀའ་གདམས་གླེགས་བམ་ལས། འཇམ་པའི་དབྱངས་དང་བློ་གྲོས་མི་ཟད་པ། ། ཨེ་ལ་དྷ་རི་དཔལ་བོ་རྡོ་རྗེ་དང་། ། བྱང་ཆུབ་སེམས་དཔའ་ཆེན་པོ་རིན་ཆེན་དཔལ། ། རྩ་བའི་བླ་མ་མགོན་པོ་གསེར་གླིང་པ། ། བདག་ལ་རྒྱ་ཆེན་སྤྱོད་པ་སྦྱིན་མཛད་པའི། ། དྲིན་ཅན་བླ་མ་དྲུག་ལ་ཕྱག་འཚལ་ལོ། ། ཞེས་གསུངས་པ་ལྟར་ཏེ། མགོན་པོ་འཇམ་དཔལ་དབྱངས་ཀྱིས་རྒྱལ་སྲས་ཞི་བ་ལྷ་ལ་གནང་། དེས་སློབ་དཔོན་ཨེ་ལ་དྷ་རི་ལ་གནང་། དེས་སློབ་དཔོན་དཔའ་བོ་རྡོ་རྗེ་ལ་གནང་། དེས་སློབ་དཔོན་མ་ཧཱ་ཤྲཱི་རཏྣ་བོ་དྷི་ས་ཏྭ་ཞེས་པ་བོད་སྐད་དུ་བྱང་ཆུབ་སེམས་དཔའ་ཆེན་པོ་རིན་ཆེན་དཔལ་ལ་གནང་། དེས་མགོན་པོ་གསེར་གླིང་པ་ལ་གནང་། དེས་ཇོ་བོ་རྗེ་ལ་གནང་ངོ་། །
འདིའི་བློ་གྲོས་མི་ཟད་པ་ཞེས་པ་རྒྱལ་སྲས་ཞི་བ་ལྷའི་མཚན་གྱི་རྣམ་གྲངས་ཡིན་ནོ། ། བརྒྱུད་རིམ་འདིའི་བླ་མ་རྣམས་ཀྱི་རྣམ་པར་ཐར་པ་ནི་སྟོན་པ་ཐུབ་པའི་དབང་པོ་དང་རྗེ་བཙུན་འཇམ་པའི་དབྱངས་གཉིས་ཀྱི་རྣམ་ཐར་སྔར་བརྗོད་ཟིན་པ་ལྟར་ཡིན་ལ། རྒྱལ་སྲས་ཞི་བ་ལྷ་གང་དུ་འཁྲུངས་པའི་ཡུལ་ནི། རྡོ་རྗེ་གདན་གྱི་ནུབ་ཕྱོགས་ཡུལ་འཁོར་མོ་བཟང་ཞེས་བྱ་བ་སྟེ་ཡུལ་དེར་ཡབ་རྒྱལ་པོ་དགེ་བའི་གོ་ཆ་དང་། ཡུམ་རྡོ་རྗེ་རྣལ་འབྱོར་མའི་སྤྲུལ་པར་གྲགས་པ་ཞིག་ཡོད་པ་དེ་གཉིས་ཀྱི་སྲས་སུ་རྒྱལ་སྲས་བདག་ཉིད་ཆེན་པོ་འདི་བསམ་བཞིན་དུ་སྐུ་འཁྲུངས། མཚན་ཞི་བའི་གོ་ཆ་ཞེས་བཏགས། མཐུན་པའི་དངོས་པོ་རྣམས་ཀྱིས་བསྐྱེད་བསྲིངས། སྐུ་ན་ཕྲ་མོ་ནས་རིག་གནས་ཐམས་ཅད་ལ་མཁས་པའི་ཕུལ་དུ་ཕྱིན། དགུང་ལོ་དྲུག་ལོན་པའི་ཚེ་སྦས་པའི་བརྟུལ་ཞུགས་འཛིན་པའི་གྲུབ་ཐོབ་ཞིག་དང་མཇལ་ཏེ་འཇམ་དཔལ་རྣོན་པོའི་དབང་དང་སྒྲུབ་ཐབས་ཞུས་ནས་སྒོམ་བཟླས་ལ་འབད་པས་རིང་པོར་མ་ཐོགས་པར་རྗེ་བཙུན་འཇམ་པའི་དབྱངས་ཞལ་གཟིགས། གདམས་པ་མང་དུ་སྩལ། དུས་རེ་ཤིག་ན་ཡབ་རྒྱལ་པོ་འདས་ནས་རྒྱལ་སྲས་བདག་ཉིད་ཆེན་པོ་དེ་ཡུལ་ཁམས་དེའི་འབངས་ཐམས་ཅད་ཀྱིས་བློ་མཐུན་པར་རྒྱལ་པོའི་ཁྲི་ལ་འབྱོན་པར་གསོལ་བ་བཏབ་པ་ན། ཚེ་རབས་མང་པོར་རྒྱལ་སྲས་ཀྱི་སྤྱོད་པ་ལ་བསླབས་ཏེ་གོམས་པ་ཀློང་དུ་གྱུར་པ་ཞིག་ཡིན་པས་སྲིད་པའི་ཕུན་ཚོགས་ལ་ཆགས་པའི་སྐབས་མེད་པ་ཞིག་ཡིན་ནའང་གཞན་གྱི་ངོ་བསྲུང་བ་ལ་གོམས་པས་ཡུལ་དེའི་འབངས་རྣམས་ཀྱི་ངོ་མ་ཟློག་པར་རྒྱལ་སྲིད་ལ་ཕེབས་པར་ཞལ་གྱིས་བཞེས་ཏེ་ནང་པར་ཁྲི་ལ་མངའ་གསོལ་རྒྱུའི་དོ་ནུབ་རྨི་ལམ་ན། སང་རང་ཉིད་སྡོད་པར་འགྱུར་བའི་ཁྲི་དེ་ལ་རྗེ་བཙུན་འཇམ་དབྱངས་བཞུགས་ནས། བུ་གཅིག་འདི་ནི་ང་ཡི་སྟན་ཡིན་ཏེ། ། ང་ནི་ཁྱོད་ཀྱི་དགེ་བའི་བཤེས་གཉེན་ཡིན། ། ང་དང་ཁྱོད་གཉིས་སྟན་གཅིག་ལ་འདུག་པ། ། འདི་ནི་རྣམ་པ་ཀུན་ཏུ་རིགས་མ་ཡིན། ། ཞེས་གསུངས་པ་རྨིས་པས་མནལ་སད་པ་ན་རྒྱལ་སྲིད་ཀྱི་དཔལ་ལ་ལོངས་སྤྱོད་མི་རིགས་དགོངས་ཏེ། བྲོས་ནས་ནཱ་ལནྡྲར་པཎྜི་ཏ་ལྔ་བརྒྱའི་ཁྱུ་མཆོག་རྒྱལ་བའི་ལྷ་ལས་རབ་ཏུ་བྱུང་སྟེ། མཚན་ཞི་བའི་ལྷ་ཞེས་བཏགས། མཁན་པོ་ལ་བརྟེན་ཏེ་སྡེ་སྣོད་གསུམ་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར་ཅིང་རྗེ་བཙུན་འཇམ་པའི་དབྱངས་ལ་ཡུན་དུ་ཆོས་གསན་ཏེ་མདོ་སྔགས་ཀྱི་བཀའ་དང་གདམས་ངག་མ་ལུས་པ་ཐུགས་སུ་ཆུད། ཕྱི་ནང་གི་གཡེང་བ་ཐམས་ཅད་བཅད་དེ། ནང་དུ་ཡང་དག་འཇོག་ལ་རྩེ་གཅིག་ཏུ་བཞུགས་པས་ས་ལམ་མཐོན་པོར་བྱོན་ཞིང་བསླབ་པ་ཀུན་ལས་བཏུས་པ་དང་། མདོ་སྡེ་ཀུན་ལས་བཏུས་པ་སོགས་རྒྱལ་སྲས་ཀྱི་སྤྱོད་པ་རླབས་པོ་ཆེ་སྟོན་པའི་བསྟན་བཅོས་རྩོམ་པ་སོགས་ནང་དུ་མཁས་པའི་བྱ་བ་རྣམ་པ་གསུམ་དང་ས་ལམ་གོང་ནས་གོང་དུ་འཕར་བ་དང་གཟུངས་དང་སྤོབས་པ་དང་རང་དང་གཞན་གྱི་ཚེ་རབས་བརྒྱ་སྟོང་དྲན་པའི་མངོན་པར་ཤེས་པ་དང་རྫུ་འཕྲུལ་གྱི་ཡུལ་ལ་ཐོགས་པ་མེད་པར་འཇུག་པ་སོགས་ནང་དུ་རྒྱལ་སྲས་སའི་དབང་ཕྱུག་གི་མཛད་པས་དུས་འདའ་ཡང་ཕྱི་རོལ་དམ་པ་མ་ཡིན་པའི་སྐྱེ་བོ་རྣམས་ཀྱི་ངོར་འཚོ་བ་བསྟེན་པ་དང་། ཉལ་བ་དང་། བཤང་གཅི་འདོར་བ་མ་གཏོགས་གླེགས་བམ་ཀློག་པ་སོགས་གཞན་གང་ཡང་མ་མཛད་པས་བྷ་སུ་ཀུ་སྟེ་འདུ་ཤེས་གསུམ་པ་ཞེས་གྲགས་སོ། ། དེའི་ཚེ་མངོན་ཤེས་མེད་པ་རྣམས་ཀྱིས་རབ་ཏུ་བྱུང་བའི་བྱ་བ་ནི་འཁོར་ལོ་གསུམ་གྱི་རོལ་པར་གནས་པ་ཤ་སྟག་ཡིན་པ་ལ། འདི་ནི་གང་དང་ཡང་མི་ལྡན་པས་དད་པས་བྱིན་པ་ལ་ལོངས་སྤྱད་དུ་མི་རུང་བས་བསྐྲད་པར་བྱ། དེ་ཡང་མདོ་འདོན་རེས་བྱས་པས་རང་བུད་དུ་འགྲོའོ་སྙམ་ནས་མདོ་འདོན་པར་གསོལ་བས། རྒྱལ་སྲས་འདིས་དེ་ལྟ་བུ་བདག་གིས་ག་ལ་ནུས་ཞེས་ཞལ་གྱིས་མ་བཞེས་པས། སླར་ཡང་ནན་ཏན་བསྐྱེད་དེ་གསོལ་བས་དེ་ལྟར་ན་བགྱིའོ་ཞེས་ཞལ་གྱིས་བཞེས་པ་ན་བརྙས་པ་བྱེད་པ་དེ་དག་གིས་དཔལ་ནཱ་ལནྡྲའི་དགེ་འདུན་ཐམས་ཅད་འདུས་པའི་དབུས་སུ། འཇིགས་བྲལ་གདོང་ལྔས་བཏགས་པའི་ཁྲི་མཐོན་པོ་བཤམས་ནས་དེ་ལ་ཇི་ལྟར་འཛེག་པ་དག་ཀྱང་མི་ཤེས་སོ་སྙམ་པ་ན། རྒྱལ་སྲས་འདིས་ཕྱག་གིས་ཅུང་ཟད་མནན་ནས་སྟེང་དུ་ཐོགས་པ་མེད་པར་གཤེགས། དེ་ནས་མདོ་སྔོན་ཆད་གྲགས་པ་ཞིག་འདོན་ནམ། མ་གྲགས་པ་ཞིག་འདོན་ཞེས་བཀའ་སྩལ་པས་སྔོན་མ་གྲགས་པ་ཞིག་གསུང་བར་ཞུ་ཞུས་པས། བདེ་གཤེགས་ཆོས་ཀྱི་སྐུ་མངའ་སྲས་བཅས་དང་། ། ཕྱག་འོས་ཀུན་ལའང་གུས་པར་ཕྱག་འཚལ་ཏེ། ། བདེ་གཤེགས་སྲས་ཀྱི་སྡོམ་ལ་འཇུག་པ་ནི། ། ལུང་བཞིན་མདོར་བསྡུས་ནས་ནི་བརྗོད་པར་བྱ། ། ཞེས་པ་ནས། གང་ཚེ་དངོས་དང་དངོས་མེད་དག ། ཅེས་པའི་བར་གསུངས་ནས། དེ་ཕྱིན་གསུང་བཞིན་དུ་རྫུ་འཕྲུལ་གྱིས་ནམ་མཁའ་ལ་འཕགས་ཏེ་ཇེ་མཐོ་ཇེ་མཐོར་མཁའ་དང་མཁྱེན་པ་འགྲན་པ་བཞིན་དུ་གཤེགས་ནས་མཐར་སྐུ་མི་སྣང་བར་གསུང་གྲག་པའི་སྒོ་ནས་རྫོགས་པར་བཏོན་ཏེ་གཤེགས་སོ། ། དེའི་ཤུལ་དུ་རྣ་བའི་མངོན་པར་ཤེས་པ་དང་། མི་བརྗེད་པའི་གཟུངས་ལ་དབང་འབྱོར་པའི་པཎྜི་ཏ་རྣམས་ཀྱིས་གཞུང་བཏུས་པ་ན། ཁ་ཆེ་བ་རྣམས་ཀྱིས་ལེའུ་དགུ་ཡོད་པར་བཟུང་ཞིང་། ཡུལ་དབུས་པ་རྣམས་ཀྱིས་ལེའུ་བཅུ་ཡོད་པར་བཟུང་བ་དང་། བསླབ་པ་ཀུན་ལས་བཏུས་པ་ཡང་། ། ངེས་པར་ཡང་དང་ཡང་དུ་བལྟ། ། ཡང་ན་རེ་ཤིག་མདོར་བསྡུས་པ། ། མདོ་སྡེ་ཀུན་ལས་བཏུས་པ་བལྟ། ། ཞེས་གསུངས་པའི་བསྟན་བཅོས་གཉིས་པོ་ཡང་ཇི་ལྟར་ཡིན་ཐེ་ཚོམ་དུ་གྱུར་པ་ན། དུས་ནམ་ཞིག་གི་ཚེ་ལྷོ་ཕྱོགས་མཆོད་རྟེན་དཔལ་ཡོན་ཅན་ཞེས་བྱ་བ་ན་བཞུགས་པ་ཐོས་ཏེ། དགེ་སློང་གཉིས་སྤྱན་འདྲེན་དུ་བཏང་བས། མ་བྱོན་པར་གཞུང་གི་ཚད་ཡུལ་དབུས་པ་རྣམས་ཀྱིས་བསྡུས་པ་ལྟར་ཡིན། བསླབ་བཏུས་དང་མདོ་བཏུས་གཉིས་པོ་ཁོ་བོའི་སྤོང་ཁང་གི་གདུང་གསེབ་ན་པཎྜི་ཏའི་ཡི་གེ་ཕྲ་མོ་བྲིས་ནས་ཡོད་ཅེས་གསུངས་ཤིང་སྤྱོད་འཇུག་དང་བསླབ་བཏུས་གཉིས་ཀའི་མན་ངག་རྣམས་ཀྱང་རྫོགས་པར་གནང་ངོ་། ། དེ་ནས་རྒྱལ་སྲས་ཞི་བ་ལྷས་སེམས་ཅན་གྱི་དོན་ཇི་ལྟ་བུ་ཞིག་བྱ་སྙམ་དུ་མངོན་པར་ཤེས་པས་གཟིགས་པ་ན། རྩོད་པས་རྒྱུད་འཁྲུགས་པའི་སེམས་ཅན་མང་པོ་ཞིག་གི་དོན་བྱ་དགོས་པར་གཟིགས་ནས་ཤར་ཕྱོགས་སུ་བྱོན་ཏེ་རྩོད་པ་ཆེན་པོ་བྱེད་པ་ཞིག་གི་འཐབ་ཟླ་མཛད་པས། རྫུ་འཕྲུལ་གྱིས་ཐམས་ཅད་འདུམས་པར་གྱུར་ཏེ་བདེ་བ་ལ་བཀོད་དོ། ། དེ་ནས་ཡང་སེམས་ཅན་གྱི་དོན་ཇི་ལྟ་བུ་ཞིག་བྱ་དགོས་སྙམ་དུ་དགོངས་པ་ན་ལྟ་བ་ངན་པའི་གཡངས་སར་ལྷུང་བ་མང་པོ་ཞིག་འདུལ་དགོས་པར་གཟིགས་ནས་ཡུལ་མ་ག་དྷའི་ནུབ་ཕྱོགས་ཧ་ཅང་མི་རིང་བ་ཞིག་ན། ཡ་མཚན་ཅན་གྱི་ལྟ་བ་ལོག་པ་འཛིན་པ་ལྔ་བརྒྱ་གནས་པ་དེ་དག་གི་འཁོར་དུ་བཞུགས་ནས་དེ་རྣམས་མགུ་བར་མཛད་དོ། ། དེ་ནས་རྒྱལ་སྲས་བདག་ཉིད་ཆེན་པོ་འདིའི་མཐུ་ཕུན་སུམ་ཚོགས་པ་དང་། ལོག་པར་སྨྲ་བ་དེ་དག་གི་སྔོན་གྱི་སྨོན་ལམ་རྣམ་པར་དག་པའི་མཐུས་དུས་ནམ་ཞིག་གི་ཚེ་ཞག་བདུན་གྱི་བར་དུ་བུ་ཡུག་ཆེན་པོ་བྱུང་བས་བཟའ་བཏུང་ཆད་དེ་ཉོན་མོངས་པར་གྱུར་ནས་སུ་སློང་ནུས་པ་དཔོན་དུ་བསྐོ་ཞིང་བསྐོ་བ་ཉན་པར་བྱས་པ་དང་། སློབ་དཔོན་གྱིས་འབྲས་ཆན་ལྷུང་བཟེད་གང་བླངས་ཏེ་བྱིན་གྱིས་བརླབས་ནས་ཐམས་ཅད་ཚིམ་པར་མཛད་དེ་སྔར་གྱི་ལྟ་བ་ངན་པ་དེ་རྣམས་བསུན་ཕྱུང་སྟེ་ཐུབ་པའི་བསྟན་པ་ལ་བཙུད་དོ། ། དེ་ནས་ཡང་སེམས་ཅན་སུ་ཞིག་ལ་ཕན་གདགས་པར་བྱ་སྙམ་དུ་མངོན་ཤེས་ཀྱིས་གཟིགས་པ་ན་མུ་གེས་ཉམ་ཐག་པའི་འགྲོ་བ་མང་པོ་ཞིག་ལ་ཕན་གདགས་དགོས་པར་གཟིགས་ནས་མུ་གེ་ཆེན་པོ་བྱུང་བས་སྤྲང་པོ་སྟོང་ཙམ་ཞིག་བྲུ་བ་ཚ་བས་ཉེན་ཏེ་འཆི་བ་ལ་ཐུག་པ་ན། རྒྱལ་སྲས་བདག་ཉིད་ཆེན་པོ་འདིས་འཚོ་བ་སྦྱར་ཞིང་ཆོས་བསྟན་ཏེ་བདེ་བ་ལ་བཀོད་དོ། ། དེ་ནས་ཡང་རྒྱལ་བའི་བསྟན་པ་ལ་བྱ་བ་ཇི་ལྟར་བྱ་སྙམ་དུ་དགོངས་པ་ན་རྒྱལ་པོ་གདུག་ཅན་ཞིག་བཏུལ་ན་སྐྱེ་འགྲོ་མང་པོ་དང་བསྟན་པ་ལ་ཕན་ཆེ་བར་གཟིགས་ནས་ཤར་ཕྱོགས་སུ་ཕེབས་ཏེ་ཨ་རི་བི་ཤ་ན་ཞེས་བྱ་བའི་རྒྱལ་པོའི་ཕོ་བྲང་གི་ཉེ་ལོགས་ཀྱི་བཞི་མདོ་རྣམས་མྱུལ་ཞིང་བཞུགས་པ་ན་མ་ཙ་ལའི་གནོད་པ་ཞེས་བྱ་བ་འཚོ་བ་མ་ཕྱིད་པས་གཞན་གྱི་རྫས་འཇོམས་པ་ལ་དགའ་ཞིང་། སྙིང་རྗེ་མེད་པ་དྲག་ཤུལ་ཅན་རྩུབ་པ་མི་བསྲུན་པ་མང་དུ་གནས་ཏེ། ཡུལ་གཞན་ནས་ཀྱང་དེ་དང་ཚུལ་མཚུངས་པ་དུ་མ་འདུས་པ་གྲངས་ཤིན་ཏུ་མང་པ་དག་རྒྱལ་པོ་དེའི་འབྱོར་པ་ལ་བལྟས་ནས་འོངས་པ་ན། རྒྱལ་པོ་དེ་མི་དགའ་བར་གྱུར་ཏེ། གནོད་བྱེད་འདི་རྣམས་འབྱོར་པ་ཀུན་གྱིས་མགུ་བར་བྱས་ན་ནི་བདག་གིས་རྒྱལ་སྲིད་ཐོབ་པའང་ཆུ་ཤིང་གི་སྙིང་པོ་ལྟར་འགྱུར་ལ། འདི་དག་རེ་བ་བཞིན་མ་བགྱིས་ན་ནི་སྐྱེ་བོ་གཡོན་ཅན་འདི་དག་གིས་བདག་གི་ལུས་སེམས་གཉིས་སོ་སོར་འབྲལ་བར་གདོན་མི་ཟའོ་སྙམ་ནས་རྒྱལ་པོ་དེ་མྱ་ངན་གྱིས་ནོན་པ་ན། རྒྱལ་སྲས་བདག་ཉིད་ཆེན་པོ་འདིས་རྒྱལ་པོ་དེ་ལ་ཐུགས་བརྩེ་བས་དེ་དག་བསྲུང་བར་ཞལ་གྱིས་བཞེས་ཏེ་སྐུ་བསྲུང་མཛད་པ་ན། བདག་ཉིད་ཆེན་པོ་འདིའི་མཐུ་ཚད་མེད་པས་གནོད་བྱེད་དེ་རྣམས་ཟིལ་གྱིས་མནན་ཏེ་རྒྱལ་པོ་འབངས་དང་བཅས་པ་བདེ་བར་མཛད་པ་ན། རྒྱལ་པོ་འཁོར་བཅས་ཤིན་ཏུ་དད་དེ་བཀུར་སྟི་ཕུན་སུམ་ཚོགས་པས་མཆོད་པ་ན། དམ་པ་འདི་ལ་རྗེ་བཙུན་གྱི་ཕྱག་ཆར་བཅངས་པའི་ཤིང་གི་རལ་གྲི་ཞིག་མ་གཏོགས་མཚོན་ཆ་གཞན་མེད་པ་གྲོགས་ཕྲག་དོག་ཅན་གྱིས་མཐོང་བ་ན་གྲོགས་ངན་དེས་མ་བཟོད་པར། རྒྱལ་པོ་ལ་འདི་ནི་སྐྱེས་བུ་གཡོན་ཅན་ཞིག་སྟེ་མཚོན་ཡང་ཤིང་གི་རལ་གྲི་ཞིག་ལས་མེད་པས་ལྷ་ཉིད་ཀྱི་སྐུ་བསྲུང་བར་མི་ནུས་པས་བརྟག་འཚལ་ལོ་ཞེས་གསོལ་པ་ན། རྒྱལ་པོ་ཁྲོས་ཏེ། རྒྱལ་སྲས་བདག་ཉིད་ཆེན་པོ་འདི་ལ་ཁྱོད་ཀྱི་རལ་གྲི་ཕྱུང་ཤིག་ཅེས་སྨྲས་པས། ལྷ་ཉིད་ལ་གནོད་པར་འགྱུར་རོ་ཞེས་གསུངས་པ་ན་གནོད་ཀྱང་བླ་ཡིས་ངེས་པར་ཕྱུང་ཞིག་ཟེར་རོ། ། འོ་ན་ལྷའི་སྤྱན་གཅིག་བཀབ་སྟེ་གཅིག་གིས་གཟིགས་ཤིག་ཅེས་གསུངས་པས། དེ་ལྟར་བྱས་ཏེ་རལ་གྲི་ཕྱུང་བས་དེའི་འོད་ཟེར་མིག་གིས་མ་བཟོད་དེ་མིག་གཅིག་ཞར་བ་དང་། བཟོད་པར་གསོལ་ཏེ་སྐྱབས་སུ་སོང་སྟེ་ཆོས་ལ་བཙུད་དོ། ། དེ་ནས་ཡང་བདག་ཉིད་ཆེན་པོས་མངོན་པར་ཤེས་པས་གཟིགས་པ་ན་རྒྱལ་བའི་བསྟན་པ་ལ་ལོག་པར་འཁུ་བའི་མུ་སྟེགས་མང་པོ་ཞིག་འདུལ་དགོས་པར་གཟིགས་ནས་དཔལ་གྱི་རིའི་ལྷོ་ཕྱོགས་སུ་བྱོན་ཏེ། ཨུ་ཙྪུ་སྨའི་སྤྱོད་པ་ཞེས་པ་སྤྲང་པོའི་ཆ་བྱད་གཅེར་བུ་ཁྲུད་མ་ཕོ་བའི་ཚིགས་མས་འཚོ་བར་བྱེད་པ་ན། ཁ་ཏི་བི་ཧ་རའི་རྒྱལ་པོའི་བྲན་མོ་ཀ་ཙ་མ་ཧས་ཁྲུད་མ་ཕོ་བའི་ཆུའི་ཟེགས་མ་སློབ་དཔོན་གྱི་ཞབས་ལ་ཕོག་པས་ལྕགས་བསྲེགས་ལ་བྲན་པ་ལྟར་ཁོལ་བ་མཐོང་། དེའི་ཚེ་རྒྱལ་པོ་དེ་ལ་མུ་སྟེགས་ཀྱི་སྟོན་པ་ཤང་ཀར་དེ་བ་ཞེས་བྱ་བས་ནང་པའི་པཎྜི་ཏ་དང་རྩོད་ཅིང་རྫུ་འཕྲུལ་འགྲན་པར་བྱས་ཏེ། དེ་ཡང་སུ་ཕམ་པ་དེ་སུ་རྒྱལ་བའི་བསྟན་པ་ལ་འཇུག་ཅིང་དེའི་ཆོས་དང་གཙུག་ལག་ཁང་སོགས་ཀྱང་མེར་སྲེག་པར་བྱེད་པས་ཁྱོད་ཀྱིས་གནང་བར་མཛད་ཅིང་དྲང་པོར་བཞུགས་སུ་གསོལ། ཞེས་གསོལ་པ་ལྟར། རྒྱལ་པོས་ཕོ་ཉ་བཀྱེ་སྟེ་ནང་པའི་དགེ་འདུན་རྣམས་བསྡུས་ནས་དོན་དེ་བསྙད་པ་ན་སུས་ཀྱང་ཁས་ལེན་མ་ནུས་པས་རྒྱལ་པོ་མྱ་ངན་དུ་གྱུར་པ་ན། བྲན་མོ་ཀ་ཙ་མ་ཧས་རྒྱལ་པོ་ལ་སྔར་མཐོང་བ་དེ་བཤད་པས། དེ་ལྟ་བུའི་སེམས་དཔའ་ཆེན་པོ་དེ་ག་ན་འདུག་ཀྱང་ཚོལ་ཅིག་གསུངས་ནས་ཕྱོགས་ཀུན་ཏུ་བཙལ་བས་ཤིང་སྡོང་གཅིག་གི་དྲུང་ན་བཞུགས་པ་དང་མཇལ་ནས། མུ་སྟེགས་ཀྱི་རྩོད་པ་དང་རྫུ་འཕྲུལ་ཕམ་པར་མཛད་དགོས་པར་གསོལ་བ་བཏབ་པས། དེ་ལྟ་བུ་ཁོ་བོས་ནུས་ཀྱི་ཆུ་བུམ་པ་གང་། རས་ཡུག་གཉིས། མེ་རྣམས་སྟ་གོན་གྱིས་ཤིག་གསུངས་ནས་དེ་ལྟར་བྱས་སོ། ། དེ་ནས་སྐྱེ་བོའི་ཚོགས་མང་པོ་འདུས་པའི་དབུས་སུ་གདན་ཁྲི་བཤམས་ཏེ་རྒྱལ་པོ་དང་། གཡས་གཡོན་དུ་སེམས་དཔའ་ཆེན་པོ་དང་མུ་སྟེགས་ཀྱི་སྟོན་པ་རྣམས་འཁོད་ནས་རྩོད་པས་བདག་ཉིད་ཆེན་པོ་འདིའི་ལུང་དང་རིགས་པའི་མཐུ་ཕུལ་དུ་བྱུང་བས་ཕྱིར་བརྒོལ་དེ་ཉིད་སྤོབས་པ་ལན་མེད་དུ་མཛད་དོ། ། སླར་ཡང་མུ་སྟེགས་བྱེད་དེས་རྫུ་འཕྲུལ་འགྲན་པར་ཆད་དེ་བར་སྣང་ལ་དབང་ཕྱུག་ཆེན་པོའི་དཀྱིལ་འཁོར་བྲིས་ཏེ་ཤར་སྒོ་ཙམ་ཟིན་པ་ན། བདག་ཉིད་ཆེན་པོ་འདིས་ཟད་པར་རླུང་གི་ཏིང་ངེ་འཛིན་ལ་སྙོམས་པར་ཞུགས་པས་འཚུབ་མ་ཆེན་པོ་ལང་སྟེ་རྩྭ་དང་ཤིང་དང་གྲོང་ཁྱེར་ཐམས་ཅད་ཀྱང་འགྱེལ་ལམ་འགྱེལ་ལ་ཐུག་པར་ལྡེག ། རྒྱལ་པོ་དང་བཙུན་མོ་དང་དེར་ཚོགས་པའི་མི་རྣམས་ཀྱང་བདས། དཀྱིལ་འཁོར་དང་བཅས་པའི་མུ་སྟེགས་ཀྱི་སྟོན་པ་ཡང་འཐོར་རླུང་གིས་བདས་པའི་བྱེའུ་བཞིན་དུ་ཕྱོགས་མཚམས་ཐམས་ཅད་དུ་འཁྱེར་ཞིང་མུན་པ་ཆེན་པོར་གྱུར་ཏོ། ། དེ་ནས་བདག་ཉིད་ཆེན་པོ་འདིས་སྨིན་མཚམས་ནས་འོད་ཕྱུང་སྟེ་རྒྱལ་པོ་དང་། བཙུན་མོ་ལ་ལམ་བསྟན་ནས་མདུན་དུ་བཀུག་སྟེ་གོས་དང་བྲལ་ཞིང་རྡུལ་གྱིས་གཡོགས་པ་ལ་ཆུས་བཀྲུས་ནས་རས་གསར་བ་གཡོགས་མེ་ལ་བསྲོས་ཏེ་བདེ་བར་བྱས་སོ། ། དེ་ནས་མུ་སྟེགས་ཀྱི་ལྷ་ཁང་རྣམས་བཤིག་མུ་སྟེགས་ཀྱི་གཙོ་བོ་དང་རྗེས་སུ་འཇུག་པ་མང་པོ་སངས་རྒྱས་ཀྱི་བསྟན་པ་ལ་བཙུད་པས་ད་ལྟའི་བར་དུ་ཡང་གནས་དེ་ལ་མུ་སྟེགས་ཕམ་པའི་ཡུལ་ཞེས་གྲགས་སོ། ། བདག་ཉིད་ཆེན་པོ་འདིའི་མཛད་པ་དེ་དག་ཐམས་ཅད་བསྟན་པ་དང་སེམས་ཅན་གྱི་དོན་དུ་མཛད་པ་ཤ་སྟག་སྟེ། རྒྱལ་བས་མི་ནི་ཨ་མྲའི་འབྲས་བུ་དང་མཚུངས་པས་ཕྱི་སྨིན་ལ་ནང་མ་སྨིན་པ་དང་། ནང་སྨིན་ལ་ཕྱི་མ་སྨིན་པ་དང་། ཕྱི་ནང་གཉིས་ཀ་སྨིན་པ་དང་། ཕྱི་ནང་གཉིས་ཀ་མ་སྨིན་པ་སྣ་ཚོགས་སུ་ཡོད་པར་གསུངས་པ་ལྟར་སོ་སོ་སྐྱེ་བོ་རང་དགའ་བ་དག་གིས་གཞན་གྱི་རྒྱུད་ཚོད་ཤེས་པ་ཤིན་ཏུ་དཀའ་བས། སྤྱིར་ཡང་སེམས་ཅན་སུ་ལའང་སྐྱོན་རྟོག་གི་བློ་མ་ཤོར་བར་བྱ་བ་དང་། ལྷག་པར་རྒྱལ་བའི་བསྟན་པ་ལ་ཞུགས་པ་རྣམས་ལ་སྐྱོན་བརྗོད་པ་ནི་ཐལ་བས་གཡོགས་པའི་མེ་དོང་དང་མཚུངས་པར་ཤིན་ཏུ་ཉེན་ཆེ་བའི་གནས་ཡིན་པས་ཕ་རོལ་སུ་ལའང་སྐྱོན་བརྗོད་མི་བྱ་བར་དག་སྣང་སྤྱོང་དགོས་སོ་ཞེས་འདོམས་པ་དང་། བྱང་ཆུབ་ལམ་རིམ་ལ་བློ་སྦྱོང་བ་རྣམས་ཀྱིས་ལམ་ལྟར་སྣང་དང་ཕྱོགས་རེ་བས་ཚིམ་པར་མི་བྱ་བར་ལམ་གྱི་ལུས་ཡོངས་སུ་རྫོགས་པ་ལ་སློབ་ཚུལ་སྤྱོད་འཇུག་དང་བསླབ་བཏུས་གཉིས་སུ་བརྗོད་པ་ལྟར་བྱ་དགོས་སོ་ཞེས་འདོམས་པ་དང་། རྗེ་བཙུན་འཇམ་པའི་དབྱངས་ལྷག་པའི་ལྷར་བསྟེན་ན་འདི་ལྟ་བུའི་ཡོན་ཏན་ཐོབ་པར་འགྱུར་རོ་ཞེས་འདོམས་པ་དང་། མུ་སྟེགས་ཀྱི་གཞུང་ལུགས་ནི་རྣམ་པ་ཀུན་ཏུ་ཡིད་བརྟན་མི་རུང་བའི་གནས་དང་། རྒྱལ་བའི་བསྟན་པ་ཁོ་ན་ཐར་འདོད་རྣམས་ཀྱི་འཇུག་ངོགས་ཡིན་ནོ་ཞེས་འདོམས་པ་སོགས་ཀྱི་ཆེད་དུ་མཛད་པ་དེ་ལྟར་མཛད་དོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་རྒྱལ་སྲས་ཞི་བ་ལྷ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་གཞུང་འདི་དག་ལ་གཙིས་པོ་ཆེར་བཟུང་ནས་ཐོས་བསམ་སྒོམ་པས་འཇུག་པ་ལ་འབད་པར་བྱའོ། ། ། །
༈ སློབ་དཔོན་ཨེ་ལ་དྷ་རི་ནི། རྒྱལ་སྲས་ཞི་བ་ལྷའི་སྲས་ཀྱི་ཐུ་བོ་སྟེ། རྒྱལ་སྲས་ཞི་བ་ལྷ་ལས་ཐེག་པ་ཆེན་པོའི་ལམ་གྱི་རིམ་པའི་མན་ངག་ཡོངས་སུ་རྫོགས་པ་མཉན་ནས་སྒྲུབ་པ་རྩེ་གཅིག་ཏུ་མཛད་པས་ལམ་གོང་མའི་རྟོགས་པ་མཆོག་ཐོབ་ཅིང་། རྗེ་བཙུན་འཇམ་པའི་དབྱངས་ཀྱི་ཞལ་མཐོང་ནས་རྒྱལ་སྲས་ཞི་བ་ལྷ་དང་རྟོགས་པ་མཉམ་པ་ཞིག་ཡིན་ཞེས་བཀའ་གདམས་གླེགས་ལས་གསུངས་སོ། ། ། །
༈ སློབ་དཔོན་དཔའ་བོ་རྡོ་རྗེ་ནི། སློབ་དཔོན་ཨེ་ལ་དྷ་རི་ཡོངས་འཛིན་དུ་བསྟེན་ནས་ཐེག་པ་ཆེན་པོའི་ལམ་གྱི་རིམ་པ་ཡོངས་སུ་རྫོགས་པ་གསན་ཏེ་སྒྲུབ་པ་རྩེ་གཅིག་ཏུ་མཛད་པས་སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་གིས་རྒྱུད་བསྐུལ་ནས་ཟས་བསོད་སྙོམས་པ་དང་། ཟས་སྟན་གཅིག་པ་དང་། ཟས་ཕྱིས་མི་ལེན་པ་དང་། ཆོས་གོས་གསུམ་པ་བ་དང་། ཕྱིང་པ་བ་དང་། ཕྱག་དར་ཁྲོད་པ་དང་། དགོན་པ་བ་དང་། ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་དང་། ཙོག་བུ་པ་དང་། གཞི་ཇི་བཞིན་པ་སྟེ་སྦྱངས་པའི་ཡོན་ཏན་བཅུ་གཉིས་དང་ལྡན་ཞིང་བདག་པས་གཞན་གཅེས་པའི་བྱང་ཆུབ་ཀྱི་སེམས་དང་སྲིད་གསུམ་རྨི་ལམ་ལྟ་བུར་གཟིགས་པའི་ལྟ་བའི་གདེང་ཐོབ་སྟེ། ཕྱི་མའི་སྐྱེ་བོ་རྣམས་ལ་སྣང་བར་བྱ་བའི་ཕྱིར་དབེན་པའི་རི་སུལ་དུ་སྒྲུབ་པ་ལ་རྩེ་གཅིག་ཏུ་གཞོལ་བ་ཞིག་ཡིན་ཞེས་བཀའ་གདམས་གླེགས་བམ་ལས་གསུངས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་ཨེ་ལ་དྷ་རི་དང་དཔའ་བོ་རྡོ་རྗེ་གཉིས་ལ་གསོལ་བ་འདེབས་ཤིང་། བདག་ཉིད་ཆེན་པོ་འདི་གཉིས་ཀྱི་རྣམ་ཐར་ལྟར་དབེན་པའི་གནས་སུ་ལམ་ཆ་ཚང་ལ་སྒྲུབ་པ་སྙིང་པོར་བྱའོ། ། ། །
༈ སློབ་དཔོན་མ་ཧཱ་ཤྲཱི་རཏྣ་བོ་དྷི་ས་ཏྭ། བོད་སྐད་དུ་བྱང་ཆུབ་སེམས་དཔའ་ཆེན་པོ་རིན་ཆེན་དཔལ་ཞེས་པ་ནི། སྐྱེས་མཆོག་བྱམས་པའི་རྣལ་འབྱོར་པ་སྟེ་འདིའི་རྣམ་པར་ཐར་པ་སྔར་བརྗོད་ཟིན་པ་ལྟར་རོ། ། བླ་མ་གསེར་གླིང་པ་ཆེན་པོའི་རྣམ་ཐར་ཡང་སྔར་བརྗོད་ཟིན་ལ། བླ་མ་གསེར་གླིང་པའི་ཞབས་དྲུང་དུ་ཇོ་བོ་རྗེ་དཔལ་ལྡན་ཨ་ཏི་ཤས་བདག་གཞན་མཉམ་བརྗེའི་བྱང་ཆུབ་ཀྱི་སེམས་སྦྱོང་བའི་གདམས་ངག་ཅེས་པ་བློ་སྦྱོང་དོན་བདུན་མའི་ཁྲིད་ལོ་བཅུ་གཉིས་ཀྱི་བར་དུ་ཕྱི་ནང་གི་གཡེང་བ་གང་གིས་ཀྱང་བར་མ་ཆོད་པར་གསན་པར་མཛད་དེ་ཇོ་བོ་རྗེའི་རྣམ་པར་ཐར་པ་ནི་ད་ལྟ་ཉིད་དུ་འཆད་པར་འགྱུར་རོ། ། རླབས་ཆེན་སྤྱོད་རྒྱུད་ཀྱི་གདམས་ངག་གི་སྙིང་པོ་བདག་པས་གཞན་གཅེས་པའི་བྱང་ཆུབ་ཀྱི་སེམས་མ་སྐྱེས་པ་བསྐྱེད་པ་དང་སྐྱེས་ཟིན་གོང་འཕེལ་དུ་བྱས་ཏེ་སེམས་རིན་པོ་ཆེ་འདིའི་སྒོ་ནས་ས་ལམ་བགྲོད་ཚུལ་སྟོན་པའི་གཞུང་མཆོག་ཏུ་གྱུར་པ་ནི་མདོ་སྡེ་ཕལ་པོ་ཆེ་དང་། དེའི་དགོངས་པ་འགྲེལ་བའི་གཞུང་རིན་ཆེན་ཕྲེང་བ་དང་། རྨི་ལམ་ཡིད་བཞིན་ནོར་བུའི་གཏམ་དང་། སེམས་ཅན་མགུ་བའི་ཚིགས་བཅད་དང་། སྤྱོད་འཇུག་དང་བསླབ་བཏུས་རྣམས་དང་། མདོ་དང་བསྟན་བཅོས་དེ་དག་གི་མན་ངག་རྩ་ཚིག་ཏུ་དྲིལ་བ་བླ་མ་གསེར་གླིང་པ་དང་། ཇོ་བོ་རྗེ་གཉིས་ཀྱིས་མཛད་པའི་བློ་སྦྱོང་རྩ་ཚིག་དང་། དྷརྨ་རཀྵི་ཏས་མཛད་པའི་བློ་སྦྱོང་མཚོན་ཆ་འཁོར་ལོ་དང་། བྱམས་པའི་རྣལ་འབྱོར་པས་མཛད་པའི་གྱེར་སྒོམ་རྡོ་རྗེའི་གླུ་དང་། བླ་མ་གོང་མ་གཅིག་ནས་གཅིག་ཏུ་བརྒྱུད་པའི་བློ་སྦྱོང་གི་ཁྲིད་དམིགས་མདོར་བསྡུས་སུ་བཀོད་པ་རྒྱལ་སྲས་ཐོགས་མེད་བཟང་པོས་མཛད་པའི་བློ་སྦྱོང་དོན་བདུན་མ་དང་། རྗེ་རིན་པོ་ཆེས་བློ་སྦྱོང་གི་ཁྲིད་རྒྱས་པ་གནང་དུས་སེམས་དཔའ་ཆེན་པོ་ཧོར་སྟོན་པས་ཟིན་བྲིས་སུ་བཏབ་པའི་བློ་སྦྱོང་གི་ཁྲིད་ཡིག་ཆེན་མོ་དང་། རྗེ་དགེ་འདུན་གྲུབ་ཀྱིས་མཛད་པའི་ཐེག་ཆེན་བློ་སྦྱོང་དང་། པཎ་ཆེན་བློ་བཟང་ཆོས་ཀྱི་རྒྱལ་མཚན་ཡབ་སྲས་ཀྱིས་མཛད་པའི་བློ་སྦྱོང་ཆེ་ཆུང་དུ་མ་ཡོད་ཅིང། རྒྱ་བོད་དུ་སྔོན་བྱུང་བའི་བློ་སྦྱོང་གི་ཡིག་ཆ་ཕལ་མོ་ཆེའི་ལེགས་ཆ་བསྡུས་ཤིང། རྗེ་བདག་ཉིད་ཆེན་པོའི་སྙན་རྒྱུད་ཀྱི་མན་ངག་གིས་བརྒྱན་ནས་བདག་གཞན་མཉམ་བརྗེའི་བྱང་ཆུབ་ཀྱི་སེམས་སྒོམ་ཚུལ་རྩལ་དུ་བཏོན་པ་བདག་གིས་སྦྱར་བའི་བློ་སྦྱོང་གི་ཁྲིད་ཡིག་ཆེན་མོ་བློ་བཟང་དགོངས་རྒྱན་ཞེས་བྱ་བ་ཞིག་ཀྱང་ཡོད་དོ། ། དེས་ན་བྱང་ཆུབ་ལམ་རིམ་ལ་ཉམས་ལེན་སྙིང་པོར་བྱ་འདོད་པ་རྣམས་ཀྱིས་བྱང་ཆུབ་ཀྱི་སེམས་སྒོམ་ཚུལ་ལ་ཤིང་རྟ་ཆེན་པོའི་མན་ངག་ཁྱད་པར་ཅན་གཉིས་ཡོད་པ་སོ་སོའི་མན་ངག་ལེགས་པར་མཉན་ལ་གོ་བ་ཕུ་ཐག་ཆོད་པ་བཙལ་ནས་མན་ངག་གཉིས་པོ་གཅིག་ཏུ་བསྲེས་ནས་ཉམས་སུ་ལེན་ཚུལ་ཤེས་པར་བྱས་ལ་བྱང་ཆུབ་ཀྱི་སེམས་རིན་པོ་ཆེ་ལ་བག་ཆགས་ཅི་ཐེབས་བྱའོ། ། ། །
༈ མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤ་དང་། ཐུགས་སྲས་འགའ་ཞིག་གི་རྣམ་ཐར།
༈ ཤིང་རྟ་ཆེན་པོའི་སྲོལ་འཛིན་མར་མེ་མཛད། ། ཅེས་བསྔགས་པ་ལེགས་སྦྱར་གི་སྐད་དུ་དཱི་པཾ་ཀ་ར་ཤྲཱི་ཛྙཱ་ན། བོད་ཀྱི་སྐད་དུ་དཔལ་མར་མེ་མཛད་ཡེ་ཤེས། མཚན་གཞན་ཇོ་བོ་རྗེ་དཔལ་ལྡན་ཨ་ཏི་ཤ་ཞེས་ཡོངས་སུ་གྲགས་པའི་བདག་ཉིད་ཆེན་པོ་དེ་གང་དུ་འཁྲུངས་པའི་ཡུལ་ནི། རྒྱ་གར་ཤར་ཕྱོགས་ཟ་ཧོར་ཏེ། དེ་ན་བྷཾ་ག་ལ་ཞེས་བྱ་བའི་གྲོང་ཁྱེར་ཆེན་པོ་མི་ཁྱིམ་འབུམ་ཕྲག་དུ་མ་ཡོད་པ། དེའི་དབུས་ན་རྒྱལ་པོའི་ཕོ་བྲང་གསེར་གྱི་རྒྱལ་མཚན་ཅན་ཞེས་བྱ་བ་ལོངས་སྤྱོད་མངའ་ཐང་བསམ་གྱིས་མི་ཁྱབ་པ་ཡོད་པ། ཡུལ་དེའི་ཁོ་ར་ཁོར་ཡུག་ཏུ་ཤིང་ལྗོན་པ་སྣ་ཚོགས་ཀྱི་ཕྲེང་བ་འཁྲིགས་པ། པདྨ་དང་ཨུཏྤལ་ལ་སོགས་པའི་མེ་ཏོག་སྣ་ཚོགས་ཀྱིས་ས་གཞི་ཁྱབ་པ། ར་བ་རིམ་པ་དུ་མ་དང། འོབས་རིམ་པ་དུ་མས་བསྐོར་བ་ཞིག་སྟེ། དེ་ལྟ་བུའི་རྒྱལ་པོའི་ཕོ་བྲང་དུ་ཡབ་རྒྱལ་པོ་དགེ་པའི་དཔལ་ཞེས་བྱ་བ་དང་། ཡུམ་དཔལ་མོ་འོད་ཟེར་ཅན་ཞེས་བྱ་བ་གཉིས་ཀྱི་སྲས་སུ་ཆུ་ཕོ་རྟའི་ལོ་ཕྱི་ལོ་ 982 བདག་ཉིད་ཆེན་པོ་འདི་བསམ་བཞིན་དུ་སྐུ་བལྟམས་སོ། ། རྒྱལ་སྲས་བདག་ཉིད་ཆེན་པོ་འདི་སྐུ་བལྟམས་པའི་ཚེ་དཀར་ཕྱོགས་ཀྱི་ལྷ་རྣམས་ཀྱིས་ནམ་མཁའ་ལས་མེ་ཏོག་གི་ཆར་ཕབ། ནམ་མཁའི་ངོས་རྣམས་འཇའ་ཚོན་གྱི་གུར་ཁྱིམ་གྱིས་བལྟམས། ལྷ་རྣམས་ཀྱིས་དགའ་བའི་གླུ་དབྱངས་དང་རོལ་མོའི་སྒྲ་བསྒྲགས་པ་མི་རྣམས་ཀྱིས་ཀྱང་ཐོས་པ་སོགས་ངོ་མཚར་ཡ་མཚན་བསམ་གྱིས་མི་ཁྱབ་པ་བྱུང་ངོ་། ། རྒྱལ་སྲས་དེ་ནི་འཇིག་རྟེན་ཀུན་གྱི་མིག་གི་བདུད་རྩི་ལྟ་བུ་ཞལ་དཀྱིལ་ཟླ་བ་ལྟར་དཀར་ཞིང། དཔྲལ་བའི་དབྱེས་ཆེ་ལ་སྣའི་གཟེངས་མཐོ་བ། སྤྱན་དཀྱུས་རིང་ཞིང་མཆུ་སྒྲོས་བིམ་བ་ལྟར་དམར་བ་སོགས་སྐྱེ་བོ་དམ་པའི་མཚན་རྟགས་དང་ལྡན་པས་མཐོང་བ་ཙམ་གྱིས་ཉོན་མོངས་དང་སྡུག་བསྔལ་ཞི་ཞིང། ཡིད་ལ་དགའ་བ་དང་བདེ་བ་སྐྱེ་ལ་དགེ་བའི་ས་བོན་བསྐྲུན་ནུས་པ་ཞིག་བྱུང་སྟེ། རྒྱལ་སྲས་གཞོན་ནུ་དེ་ལ་ཡབ་ཡུམ་གཉིས་ཀྱིས་ཟླ་བའི་སྙིང་པོ་ཞེས་མཚན་བཏགས་སོ། ། རྒྱལ་སྲས་གཞོན་ནུ་དེ་མ་མ་བརྒྱད་ལ་བཏད་དེ་མཐུན་པའི་དངོས་པོ་དག་གིས་བསྐྱེད་བསྲིངས་ཤིང་ཡབ་ཡུམ་གཉིས་དང་བཅས་ཕོ་བྲང་གི་ཡང་ཐོག་ན་མནལ་ཞིང་བཞུགས་པ་ན་ཕོ་བྲང་གི་ཐོག་ནས་ཚིག་སྒྲ་ཆེན་པོ་འཇིགས་སུ་རུང་བ་ཞིག་བྱུང་བ་ན་ཡབ་ཡུམ་འཁོར་དང་བཅས་པ་ཅི་ཞིག་གུ་སྙམ་དུ་རྟབ་ཅིང་ཕྱོགས་ཕྱོགས་སུ་བལྟ། རྒྱལ་སྲས་གཞོན་ནུ་དེ་ནི་འཇིགས་པ་མེད་པར་དགའ་བའི་རྣམ་འགྱུར་སྟོན་ཞིང་གནས་སོ། ། དེ་མ་ཐག་ཡབ་ཡུམ་སོགས་ཀྱི་མཐོང་སྣང་ལ་ཨུཏྤལ་སྔོན་པོ་འདབ་མ་མ་ཉམས་པ་ཡིད་དུ་འོང་བ་ཞིག་བབས་ལ། རྒྱལ་སྲས་གཞོན་ནུ་དེ་ལ་ནི་ཚེ་རབས་ཀུན་གྱི་ལྷག་བའི་ལྷ་རྗེ་བཙུན་མ་སྒྲོལ་མས་ཞལ་བསྟན་ཏེ་གསུང་གི་གནང་བ་སྩལ་ལོ། ། དུས་དེ་ནས་བཟུང་སྟེ་རྗེ་བཙུན་སྒྲོལ་མ་རྒྱུན་དུ་གཟིགས་ཤིང་བྱ་བ་གལ་ཆེ་བ་ཐམས་ཅད་ཀྱང་རྗེ་བཙུན་སྒྲོལ་མ་ཉིད་ལ་ཞུས་ནས་མཛད་དོ། ། གཞོན་ནུ་དེ་འཁྲུངས་ནས་ལོ་གཅིག་དང་ཟླ་བ་དྲུག་སོང་བ་ན། ཕོ་བྲང་དེ་དང་ཧ་ཅང་ཐག་མི་རིང་བ་ཞིག་ན་བི་ཀ་མ་ལ་པུ་རི་ཞེས་བྱ་བའི་གཙུག་ལག་ཁང་ཡོད་པ་དེར་རྒྱལ་པོ་ཡབ་ཡུམ་གྱིས་རྒྱལ་སྲས་གཞོན་ནུ་འདི་རིན་པོ་ཆེའི་ཤིང་རྟའི་ནང་དུ་གདན་དྲངས། ཤིང་རྟ་ལྔ་བརྒྱའི་འཁོར་དང་བཅས་རྒྱལ་པོའི་ཡོ་ལངས་ཆེན་པོས་གཙུག་ལག་ཁང་དེར་གཤེགས་པ་ན། གྲོང་ཁྱེར་གྱི་སྐྱེ་བོ་ཐམས་ཅད་ཕྱོགས་ཕྱོགས་སུ་འདུས་ནས་འཁྲུངས་པའི་ཚེ་ན་ལྷ་རྣམས་ཀྱིས་མཆོད་པ་བྱེད་པའི་རྒྱལ་བུ་ངོ་མཚར་ཅན་དེ་ད་གདོད་མཐོང་ངོ་ཞེས་སྐྱེ་བོ་ཐམས་ཅད་ཀྱིས་མིག་མི་འཛུམ་པར་རྒྱལ་བུ་ཉིད་ལ་བལྟ་ཞིང་དགའ་བའི་ཅ་ཅོའི་སྒྲ་བསྒྲགས་པ་ན་རྒྱལ་སྲས་གཞོན་ནུ་དེས་ཡབ་ཡུམ་གཉིས་ལ་སྐྱེ་བོ་འདི་དག་སུ་ཞིག་ཡིན་ཞེས་དྲིས་པ་ན་ཡབ་ཡུམ་གཉིས་ཀྱིས་འདི་དག་ནི་ཁྱོད་ཉིད་ཀྱི་འབངས་འཁོར་དག་ཡིན་ནོ། ། ཞེས་ཞུས་པ་ན། རྒྱལ་བུ་གཞོན་ནུ་དེས་སྐྱེ་བོ་འདི་དག་བདག་བཞིན་ཕུན་སུམ་ཚོགས་པ་དང་ལྡན་པ་དང་། ཐམས་ཅད་དགེ་བའི་རྩ་བ་བསྐྲུན་ཏེ་དམ་པའི་ཆོས་ཀྱིས་འཚོ་བར་ཤོག་ཅེས་གསུང་སྙན་པོས་བརྗོད་པ་ན་ཐམས་ཅད་ཨ་ལ་ལ་ཞེས་ངོ་མཚར་བའི་ཚིག་བརྗོད་ཅིང་ཐལ་མོ་སྦྱར་ཏེ་གནས་སོ། ། དེ་ནས་ཡབ་ཡུམ་སྲས་དང་བཅས་པ་གཙུག་ལག་ཁང་དུ་ཕེབས་ནས་དགེ་འདུན་རྣམས་ལ་བསྙེན་བཀུར་དང་མཆོག་གསུམ་གྱི་རྟེན་རྣམས་ལ་མཆོད་པ་ཕུལ་ཏེ་ཕྱག་འཚལ་ཞིང་སྨོན་ལམ་འདེབས་པ་ན་ཡབ་ཡུམ་གཉིས་སོགས་གཞན་ཐམས་ཅད་ཚེ་རིང་ཞིང་ནད་མེད་པ་དང་། ལོངས་སྤྱོད་ཕུན་སུམ་ཚོགས་པ་དང་། ཕྱི་མ་ངན་སོང་དུ་མི་ལྟུང་བར་བདེ་འགྲོར་སྐྱེས་ནས་མཆོག་གསུམ་ལ་བསྙེན་བཀུར་བགྱིད་པ་སོགས་ཀྱི་སྨོན་ལམ་འདེབས། རྒྱལ་སྲས་བདག་ཉིད་ཆེན་པོ་འདིས་ནི། བདག་ནི་དལ་འབྱོར་མི་དབང་ལུས་ཐོབ་ཅིང། ། སྐྱོན་མེད་དབང་པོས་དཀོན་མཆོག་གསུམ་མཐོང་ཞིང། ། རྟག་ཏུ་གུས་པས་དཀོན་མཆོག་སྤྱི་བོར་བླངས། ། དེ་རིང་ཉིད་ནས་སྐྱབས་གནས་མཛད་དུ་གསོལ། ། ནམ་ཡང་ཁྱིམ་པའི་ཆོས་ཀྱིས་མ་བཅིངས་པར། ། དགེ་འདུན་དབུས་སུ་ཆོས་འབྱོར་ཐོབ་པ་དང་། ། ང་རྒྱལ་མེད་པར་དཀོན་མཆོག་མཆོད་བྱེད་ཅིང། ། སྐྱེ་བོ་ཡོངས་ལ་སྙིང་རྗེས་ལྟ་བར་ཤོག ། ཅེས་སྨོན་ལམ་མཛད་པ་ན། དེར་ཚོགས་པའི་སྐྱེ་བོ་ཐམས་ཅད་དང་དཀར་ཕྱོགས་ཀྱི་ལྷ་རྣམས་ཀྱང་དགའ་ཞིང་མགུ་ནས་བདག་ཉིད་ཆེན་པོ་འདི་ལ་དད་པ་ལྷུར་བྱེད་པར་གྱུར་ཏོ། ། ཇོ་བོ་རྗེས་སྐུ་ཚེ་འདི་ལ་ཆོས་གསུང་བའི་ཐོག་མ་དེ་ཡིན་པར་བཀའ་གདམས་གླེགས་བམ་ལས་གསུངས་སོ། ། རྒྱལ་སྲས་གཞོན་ནུ་འདིས་འཁྲུངས་མ་ཐག་ནས་ཁྱིམ་གྱི་འདུ་འཛི་ལ་ཆགས་པ་མེད་ཅིང་ལྷག་པའི་ལྷའི་ཞལ་མཐོང་བ་དང། ཆོས་ཀྱི་དབྱངས་སྒྲོགས་པ་ལ་ཐོགས་པ་མེད་པར་གྱུར་པས་ཁྱིམ་གྱི་འདུ་འཛི་ལ་ཆགས་པའི་སྐབས་མེད་ནའང་ཡབ་ཡུམ་གཉིས་འཕངས་དང་བཅས་པས་ཁྱིམ་དུ་བཞུགས་པ་ཞིག་བྱུང་ན་ཅི་མ་རུང་སྙམ་དུ་གླུ་གར་དང་རྩེད་མོའི་བྱེ་བྲག་རྣམ་པ་སྣ་ཚོགས་སྦྱར་ཞིང་རྒྱལ་པོ་མང་པོའི་བུ་མོ་ཁབ་ཏུ་བཞེས་པའི་གྲབས་བཤམས་པ་ན་རྗེ་བཙུན་མ་སྒྲོལ་མས་རྒྱལ་སྲས་གཞོན་ནུ་དེ་ལ་ཞལ་བསྟན་ནས། ལྷ་ཅིག་མ་ཆགས་མ་ཆགས་སྐལ་བ་ཅན། ། འདམ་བུའི་ཚལ་དུ་གླང་པོ་བྱིང་བ་ལྟར། ། འདོད་པའི་འདམ་འདིར་དཔའ་བོ་ཁྱོད་བྱིང་ན། ། ཚུལ་ཁྲིམས་གོས་ཅན་བསྣུབས་པར་མི་འགྱུར་རམ། ། སྐྱེ་བ་ལྔ་བརྒྱ་ལྔ་བཅུ་རྩ་གཉིས་སུ། ། པཎ་ཆེན་དགེ་སློང་གཙང་མའི་ལུས་བརྒྱུད་ནས། ། པདྨའི་མཚོ་ལ་ངང་པ་འཇུག་པ་ལྟར། ། ཁྱོད་ནི་ཚེ་འདིར་རབ་ཏུ་འབྱུང་འགྱུར་ལེགས། ། ཞེས་རྒྱལ་སྲིད་ལ་མ་ཆགས་པར་ཆོས་མཛད་དགོས་པར་བསྐུལ་མ་བཏབ། རྒྱལ་སྲས་གཞོན་ནུ་རང་ཉིད་ཀྱང་དེ་ལྟར་དུ་སྨོན་པར་མཛད་ཅིང་བཟོ་དང། གསོ་བ་དང་། སྒྲ་དང། གཏན་ཚིགས་དང། ནང་རིག་པ་སྟེ་རིག་གནས་ཆེ་བ་ལྔ་དང། སྙན་ངག་དང་རྩིས་ལ་སོགས་པ་རིག་གནས་ཆུང་བ་རྣམས་ལའང་སྦྱངས་ཏེ་མཁས་པའི་ཕུལ་དུ་ཕྱིན་པར་གྱུར། ཁྱད་པར་དུ་ལོ་བཅོ་ལྔ་བཞེས་པའི་ཚེ་རིགས་ཐིགས་ཚར་གཅིག་གསན་པས་ཕྱི་རོལ་པའི་རྟོག་གེ་པ་མཁས་པར་གྲགས་པ་ཅིག་དང་རྩོད་པས་དེ་ཕམ་པར་མཛད་པས་སྙན་པའི་གྲགས་པ་ཀུན་ཏུ་རྒྱས་སོ། ། དེ་ནས་རྒྱལ་བུ་གཞོན་ནུ་དེས་འདི་ལྟར་དགོངས་ཏེ། འཁོར་བའི་ཕུན་ཚོགས་གང་ལའང་མ་ཆགས་པར་རྒྱལ་བའི་བསྟན་པ་ཡོངས་རྫོགས་ལ་བསླབས་ཏེ་ས་ལམ་མཐར་ཕྱིན་པ་ཞིག་ཅིས་ཀྱང་བྱེད། དེ་ལྟ་བུ་ཞིག་འབྱུང་བ་ལ་ལེགས་ཚོགས་ཐམས་ཅད་ཀྱི་རྩ་བ་བཤེས་གཉེན་དམ་པ་ཞིག་གིས་རྗེས་སུ་གཟུང་དགོས་པར་འདུག་པས་ལམ་མ་ནོར་བར་སྟོན་པའི་བཤེས་གཉེན་དམ་པ་སུ་ཞིག་ལ་བརྟེན་དགོངས་པ་ན། ཕོ་བྲང་དེ་དང་ཧ་ཅང་ཐག་མི་རིང་བའི་གནས་ཞིག་ན་ཛེ་ཏཱ་རི་དགྲ་ལས་རྣམ་རྒྱལ་བཞུགས་པར་ཐོས་ནས་རི་བྲག་བསྐོར་དུ་འགྲོ་ཞེས་སྙད་བཏགས་ནས་དམག་ཆས་སུ་ཞུགས་པའི་རྟ་པ་སུམ་བརྒྱ་ཙམ་དང་བཅས་ཛེ་ཏཱ་རིའི་དྲུང་དུ་ཕེབས་ནས་ཞབས་སྤྱི་བོར་བླངས་ཏེ་སྐྱབས་འགྲོ་དང་སེམས་བསྐྱེད་ཞུས། རྒྱལ་སྲིད་ལ་མ་ཆགས་པར་ཆོས་རྣམ་དག་ཅིག་འདོད་པས་རྗེས་སུ་འཛིན་དགོས་ཞེས་ཞུས་པ་ན་ཛེ་ཏཱ་རིས་རེ་ཤིག་ནཱ་ལནྡྲར་བླ་མ་བྱང་ཆུབ་བཟང་པོའི་སྤྱན་སྔར་སོངས་ཞེས་ལུང་བསྟན། དེ་ནས་རྒྱལ་བུ་དམག་གི་དཔུང་དང་བཅས་པས་ནཱ་ལནྡྲར་ཕེབས་ནས་བླ་མ་བྱང་ཆུབ་བཟང་པོའི་ཞབས་སྤྱི་བོར་བླངས་ཏེ་སེམས་བསྐྱེད་ཞུས། དེ་ནས་བླ་མ་བྱང་ཆུབ་བཟང་པོས་ནཱ་ལེནྡྲའི་བྱང་ཕྱོགས་ན་ཚེའི་རིག་འཛིན་བརྙེས་ཤིང་སྤྲོས་བྲལ་དབུ་མའི་དོན་གཟིགས་པའི་རྒྱལ་སྲས་རིགས་པའི་ཁུ་བྱུག་བཞུགས་པས་དེའི་དྲུང་དུ་སོངས་ཞེས་བཏང། དེ་ནས་རྒྱལ་བུ་གཞོན་ནུ་རྒྱལ་སྲས་རིགས་པའི་ཁུ་བྱུག་གི་དྲུང་དུ་ཕེབས་ཏེ། རིགས་པའི་ཁུ་བྱུག་གི་ཞབས་ལ་བསྙེན་ཏེ་གསོལ་བ་བཏབ་པས། རིགས་པའི་ཁུ་བྱུག་གིས་བྱང་ཆུབ་ལམ་གྱི་རིམ་པའི་གདམས་པ་སྤྱི་དང་། ཁྱད་པར་དཔལ་མགོན་འཕགས་པ་ཀླུ་སྒྲུབ་ནས་བརྒྱུད་པའི་ལྟ་བའི་མན་ངག་རྣམས་ཞིབ་པར་གནང་སྟེ། ད་དུང་བླ་མ་ཨ་ཝ་དྷུ་ཏི་པ་ཞེས་བྱ་བ་དབུ་མའི་ལམ་ལ་མངའ་བརྙེས་པ་ཞིག་ཡོད་པས་དེའི་དྲུང་དུ་སོངས་ཞེས་བཏང། དེ་ནས་རྒྱལ་བུ་གཞོན་ནུས་རིགས་པའི་ཁུ་བྱུག་གི་བཀའ་ལུང་ལྟར་བླ་མ་ཨ་ཝ་དྷུ་ཏི་པའི་ཞབས་དྲུང་དུ་ཕེབས་ནས་རྗེས་སུ་འཛིན་པར་ཞུས་པ་ན། བླ་མ་ཨ་ཝ་དྷུ་ཏི་པས་ཆོས་རྣམ་དག་བྱེད་པ་ལ་རྒྱལ་སྲིད་ཀྱི་འབྱོར་པ་སྤང་དགོས་ཏེ་རྒྱལ་སྲིད་ཀྱི་འབྱོར་པ་ནི་དུག་གི་མཚོ་དང་འདྲ་ཞིང། མེའི་འོབས་དང་འདྲ་བར་རྣམ་པ་ཀུན་ཏུ་ཕུང་བའི་རྒྱུ་ཡིན་པས་ལན་ཅིག་ཕར་སོངས་ལ་རྒྱལ་སྲིད་བློས་ཐོངས་ལ་དེ་ནས་ཚུར་ཤོག་ཅེས་ལུང་བསྟན། དེ་ནས་རྒྱལ་སྲས་གཞོན་ནུ་དེས་བླ་མས་ཇི་ལྟར་ལུང་བསྟན་པ་ལྟར་ཕོ་བྲང་དུ་ཕེབས་ནས་ཡབ་ཡུམ་ལ་གནང་བ་ནན་གྱིས་ཞུས་ཏེ་རྒྱལ་སྲིད་མཆི་མའི་ཐལ་བ་བཞིན་དུ་སྤངས་ནས་བླ་མ་ཨ་ཝ་དྷུ་ཏི་པའི་ཞབས་ལ་གཏུགས། ཨ་ཝ་དྷུ་ཏི་པས་ལུང་བསྟན་ནས་རི་ནག་པོའི་གཙུག་ལག་ཁང་གི་རྣལ་འབྱོར་གྱི་དབང་ཕྱུག་དཔལ་ཀྱཻ་རྡོ་རྗེའི་ཞལ་གཟིགས་ཤིང་རྡོ་རྗེ་མཁའ་འགྲོ་མས་ལུང་བསྟན་པ་ཐོབ་པའི་བླ་མ་རཱ་ཧུ་ལ་གུཔྟ་ལ་དབང་ཡོངས་སུ་རྫོགས་པར་ཞུས་ཤིང། གསང་མཚན་ཡེ་ཤེས་གསང་བའི་རྡོ་རྗེ་ཞེས་བྱ་བར་བཏགས། དེ་ནས་ལོ་བདུན་གྱི་རིང་ལ་བླ་མ་ཨ་ཝ་དྷུ་ཏི་པ་གཙོ་བོར་བསྟེན་ཅིང། གཞན་ཡང་དངོས་གྲུབ་བརྙེས་པའི་བླ་མ་དུ་མའི་སྤྱན་སྔར་རྡོ་རྗེ་ཐེག་པ་ལ་སྦྱངས་པས་གཞུང་དང་གདམས་ངག་མ་ལུས་པ་ལ་མཁས་པར་གྱུར་ཏེ་གསང་སྔགས་ལ་ང་ཉིད་མཁས་སོ་སྙམ་དུ་དགོངས་པ་བྱུང་བ་ན། ཌཱ་ཀི་མ་རྣམས་ཀྱིས་སྔགས་ཀྱི་གླེགས་བམ་སྔར་མཐོང་མ་མྱོང་བ་མང་པོ་མནལ་ལམ་དུ་བསྟན་ནས་ཐུགས་རྒྱལ་བཅག་གོ ། དེ་ལྟར་དགུང་ལོ་ཉི་ཤུ་རྩ་གཅིག་ནས་དགུང་ལོ་ཉེར་དགུའི་བར་དུ་རྒྱུད་སྡེ་བཞིའི་དབང་ལུང་མན་ངག་མཐའ་དག་ལ་སྦྱངས་ཤིང་ཐུགས་ཉམས་སུ་བཞེས་པས་ལྷག་པའི་ལྷ་མང་པོའི་ཞལ་གཟིགས། ཏིང་ངེ་འཛིན་དང་མངོན་པར་ཤེས་པ་རྒྱ་ཆེན་པོ་ཐོབ། ད་ཚེ་འདི་ལ་སྔགས་ཀྱི་བརྟུལ་ཞུགས་ཀྱི་སྤྱོད་པ་སྤྱད་དེ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་ཞིག་བྱེད་སྙམ་དུ་དགོངས་པ་ནར་མར་བྱུང་བ་ན་ནུབ་གཅིག་རྨི་ལམ་དུ། དཔལ་ཧེ་རུ་ཀ་མདུན་གྱི་ནམ་མཁའ་ལ་བྱོན་ནས། རིགས་ཀྱི་བུ་ཨ་ཝ་དྷུ་ཏིའི་སྤྱོད་པས་གར་ཡང་མི་ཕྱིན་གྱིས། ཁྱོད་རབ་ཏུ་ཕྱུང་ན་དུས་ཕྱིས་ཙ་ན་རབ་ཏུ་བྱུང་བའི་གདུལ་བྱ་མང་པོ་འོང་བར་འདུག་གོ་ཞེས་ལུང་བསྟན་ཏོ། ། ཡང་ནུབ་གཅིག་གི་རྨི་ལམ་དུ། བཅོམ་ལྡན་འདས་ཤཱཀྱ་ཐུབ་པ་དགེ་འདུན་མང་པོའི་འཁོར་དང་བཅས་ནས། གདུགས་ཚོད་གསོལ་གྱིན་འདུག ། དེའི་གྲལ་ཞབས་ན་ཇོ་བོ་ཉིད་ཀྱང་བཞུགས་འདུག་པ་ལ། བཅོམ་ལྡན་འདས་ཀྱིས་ཇོ་བོ་ལ་གཟིགས་ནས། མི་མ་གི་ཅི་ལ་ཆགས་ནས་རབ་ཏུ་མི་འབྱུང། ཞེས་གསུང་བ་ཅིག་རྨིས་པ་ན་ད་ངེས་པར་རབ་ཏུ་འབྱུང་བར་བྱའོ་སྙམ་དུ་དགོངས་ནས། དཔལ་རྡོ་རྗེ་གདན་བྱང་ཆུབ་ཆེན་པོ་བརྙེས་པའི་གནས་མ་ཏི་བྷི་ཧ་རའི་གཙུག་ལག་ཁང་དུ་དགེ་འདུན་ཕལ་ཆེན་སྡེ་པ། དེའི་ནང་ནས་འཇིག་རྟེན་ལས་འདས་པར་སྨྲ་བའི་སྡེ་པ་སློབ་དཔོན་སངས་རྒྱས་ཡེ་ཤེས་ཀྱི་བཀའ་རྒྱུད། གནས་བརྟན་འདུལ་བ་འཛིན་པ་ཆེན་པོ་སྦྱོར་བའི་ལམ་པ། དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པའི་ཏིང་འཛིན་བརྙེས་པའི་ཤཱི་ལ་རཀྵི་ཏ་ཞེས་བྱ་བ་ལ་མཁན་པོ་ཞུས་ནས་རབ་ཏུ་བྱུང་། མཚན་དཱི་པཾ་ཀ་ར་ཤྲཱི་ཛྙཱ་ན་ཞེས་བྱ་བར་བཏགས་སོ། ། དེ་ནས་མཚན་ཉིད་ཀྱི་ཐེག་པའི་སྡེ་སྣོད་གསུམ་ག་ལ་ཞིབ་ཏུ་སྦྱངས་ཤིང། ཁྱད་པར་བླ་མ་དྷ་རྨཱ་རཀྵི་ཏའི་སྤྱན་སྔར་འདུལ་བ་ལུང་སྡེ་བཞིའི་གནད་ཀུན་བསྡུས་ཤིང། མངོན་པ་སྡེ་བདུན་གྱི་གནད་ཀུན་བསྡུས་པའི་བསྟན་བཅོས་བྱེ་བྲག་ཏུ་བཤད་པ་ཆེན་པོ་ཞེས་བྱ་བ་བམ་པོ་བརྒྱད་བརྒྱ་ཙམ་ཡོད་པའི་བསྟན་བཅོས་ཆེན་པོ་དེ་ལོ་བཅུ་གཉིས་ཀྱི་བར་དུ་གསན་ནས་མཐའ་ཆོད་པར་སྦྱངས། སྡེ་པ་བཅོ་བརྒྱད་པོ་སོ་སོའི་བྱིན་ལེན་དང་རུང་ཆུ་སོགས་ཕྱག་ལེན་ཕྲ་མོ་མཐའ་དག་མ་འདྲེས་པར་མཁྱེན་ནས་འཕགས་ཡུལ་གྱི་སྡེ་པ་བཅོ་བརྒྱད་པོ་ཐམས་ཅད་ཀྱི་གཙུག་གི་ནོར་བུར་གྱུར་ཏོ། ། དེ་ལྟར་མདོ་སྔགས་ཀྱི་ཆོས་འཕགས་ཡུལ་ན་དེ་དུས་བཞུགས་པ་མཐའ་དག་གསན་ཅིང་ཐུགས་ཉམས་སུ་བཞེས་ནས་མྱུར་དུ་འཚང་རྒྱ་བ་ལ་ལམ་གང་ཞིག་མྱུར་སྙམ་པ་ནར་མར་ཡོད་པ་ན་རི་ནག་པོའི་ཁོང་གསེང་ན་བཞུགས་པའི་བླ་མ་རཱ་ཧུ་ལ་གུཔྟས་མངོན་པར་ཤེས་པས་མཁྱེན་ཏེ། དེར་བྱོན་ནས་ཇོ་བོ་ལ་གསུངས་པ། ཡི་དམ་གྱི་ལྷ་ཞལ་མཐོང་བ་དང་། དཀྱིལ་འཁོར་གྱི་ལྷ་ཚོགས་མང་པོ་མངོན་དུ་གྱུར་པ་དང་། ཐུན་མོང་གི་དངོས་གྲུབ་མང་པོ་ཐོབ་པ་དང། ཏིང་ངེ་འཛིན་རི་རྒྱུད་ཙམ་ཡོད་པས་གར་ཡང་མི་ཕྱིན། བྱམས་པ་དང་སྙིང་རྗེ་བྱང་ཆུབ་སེམས་ལ་བློ་སྦྱོངས། ཐུགས་རྗེ་ཆེན་པོ་སྙིང་རྗེའི་ལྷ་ཡིན་པས་ཡི་དམ་དུ་ཟུངས། འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་བྱེད་པར་དམ་འཆོས་ཤིག་གསུངས། ཡང་རྡོ་རྗེ་གདན་གྱི་ཁོར་ས་ན་ཕར་བསྐོར་བ་མཛད་པའི་ཚེ་ལྡེར་བཟོ་གཅིག་གིས་གཅིག་ལ་དྲི་བ་དང་ལན་འདེབས་པའི་ཚུལ་དང་། རྡོ་རྗེ་གདན་གྱི་ལྷོ་ཕྱོགས་ཀྱི་ནམ་མཁའ་ལ་མིའི་ལུས་ལས་འདས་པའི་བུ་མོ་གཉིས་གཅིག་གིས་གཅིག་ལ་དྲི་བའི་ཚུལ་དུ། མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས་ཆོས་གང་ལ་བསླབ་པར་བྱ་ཞེས་ཟེར་བ་ལ། ཅིག་ཤོས་ན་རེ་བྱང་ཆུབ་ཀྱི་སེམས་ལ་བསླབ་བར་བྱའོ། ། ཞེས་གསུངས་ནས། བྱང་ཆུབ་སེམས་སྦྱངས་ཐབས་བཟང་བ་ཅིག་གསུང་གི་འདུག་པ་ལ། བསྐོར་བ་འཕྲོ་བཅད་ནས་གསན་པས་སྣོད་གཅིག་ནས་གཅིག་ཏུ་བྱོ་བ་བཞིན་དུ་ཐུགས་སུ་ཆུད། སློབ་དཔོན་ཀླུ་སྒྲུབ་ཀྱིས་བཞེངས་པའི་རྡོ་ར་ན་བཞུགས་ཙ་ན། བུད་མེད་རྒན་གཞོན་གཉིས་འདུག་པས། གཞོན་པ་དེ་ལ་རྒན་པ་དེས་མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས་བྱང་ཆུབ་ཀྱི་སེམས་སྦྱོངས་གསུང་བ་དང་། ཡང་རྡོ་རྗེ་གདན་གྱི་གནྡྷོ་ལ་ལ་བསྐོར་བ་མཛད་པའི་ཚེ། བྱ་འདབ་འོག་ན་དེ་བཞིན་གཤེགས་པའི་སྐུ་གཅིག་བཞུགས་པའི་ཞལ་ནས། ཧེ་བྷ་དནྡ་མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས། བྱམས་སྙིང་རྗེ་བྱང་ཆུབ་ཀྱི་སེམས་སྦྱོངས་ཤིག་གསུངས། ཡང་རྡོ་ར་ཁང་བུ་ལ་བསྐོར་བ་མཛད་པའི་ཚེ། བ་སོའི་རྒྱལ་བ་ཤཱཀྱ་ཐུབ་པ་གཅིག་འདུག་པ་དེའི་ཞལ་ནས། ཛོ་ཀི། མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས་བྱང་ཆུབ་ཀྱི་སེམས་ལ་སྦྱོངས་གསུང་། དེ་ནས་ཇོ་བོ་རྗེས་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང་སྐྱེས་ཟིན་གོང་འཕེལ་དུ་བྱས་ཏེ་མཐར་ཕྱིན་པའི་ཕྱིར་དེའི་མན་ངག་ཡོངས་སུ་རྫོགས་པ་མངའ་བ་སུ་ཞིག་ཡོད་སྙམ་བཙད་དཔྱད་པ་ན་དུས་དེའི་ཚེ་བླ་མ་གསེར་གླིང་པ་ཆེན་པོ་བྱང་ཆུབ་ཀྱི་སེམས་ཀྱི་བདག་པོར་གྲགས་པས་བླ་མ་གསེར་གླིང་པ་ཆེན་པོའི་ཞབས་དྲུང་དུ་བྱང་ཆུབ་ཀྱི་སེམས་ཀྱི་གདམས་ངག་རྫོགས་པར་གསན་པའི་ཕྱིར་གསེར་གླིང་དུ་འབྱོན་པར་བཞེད་ནས་འཛམ་བུ་གླིང་ནས་གསེར་གླིང་དུ་ཚོང་ལ་འགྲོ་བའི་ཚོང་པ་ལམ་རྒྱུས་ཅན་དང་བཅས་རྒྱ་མཚོ་ལ་གྲུ་གཟིངས་བཅས་ནས་ཟླ་བ་བཅུ་གསུམ་གྱི་རིང་མཚོའི་སྟེང་ལ་བྱོན་ཏེ་དེའི་ཚེ་བདུད་དགའ་རབ་དབང་ཕྱུག་གིས་སངས་རྒྱས་ཀྱི་བསྟན་པ་དར་བ་མ་བཟོད་ནས་ཇོ་བོ་རྗེའི་བྱང་ཆུབ་ཀྱི་སེམས་ལ་བར་ཆད་བྱ་བའི་ཕྱིར་མི་མཐུན་པའི་རླུང་བཏང་སྟེ་གྲུ་གཟིངས་ལམ་ལོག་པར་བསྒྱུར་བ་དང། ཆུ་སྲིན་ཉ་མིག་ཆེན་པོ་རི་ལྟ་བུས་གྲུ་གཟིངས་ཀྱི་མདུན་བཀག་པ་དང། ནམ་མཁའ་ལས་ཐོག་བབས་པ་སོགས་གནོད་པ་ཚབས་ཆེན་པོ་བྱས་པ་ན་པཎྜི་ཏ་སའི་སྙིང་པོས་ཇོ་བོ་རྗེ་ལ་ཐུགས་དམ་བསྐུལ་བའི་གསོལ་འདེབས་ཤུགས་དྲག་ཏུ་བྱས་པས། ཇོ་བོ་རྗེས་གཤིན་རྗེའི་གཤེད་དམར་པོའི་ཏིང་ངེ་འཛིན་གྱི་སྒོ་ནས་བདུད་སྡེ་དཔུང་དང་བཅས་པ་བཏུལ་ཏེ་རིམ་གྱིས་གསེར་གླིང་དུ་ཕེབས། གསེར་གླིང་གི་སྣེ་ཟིན་མ་ཐག་བླ་མ་གསེར་གླིང་པ་ཆེན་པོའི་སློབ་མ་བསམ་གཏན་པ་འགའ་ཞིག་བཞུགས་པ་དང་མཇལ། དེར་ཞག་བཅུའི་རིང་དཔོན་སློབ་ཚང་མས་ངལ་བསོས་ཤིང་བསམ་གཏན་པ་དེ་དག་ལ་བླ་མ་གསེར་གླིང་པ་ཕྱོགས་གང་དུ་བཞུགས་དང་མཛད་པ་རྣམ་ཐར་ཇི་ལྟར་ཡོད་རྣམས་དྲི་གཏུགས་མཛད། བསམ་གཏན་པ་དེ་དག་གིས་ཀྱང་པཎྜི་ཏ་སའི་སྙིང་པོ་ལ་སོགས་པ་ཇོ་བོའི་སློབ་མ་རྣམས་ལ་ཇོ་བོ་རྗེའི་སྐུ་གསུང་ཐུགས་ཀྱི་ཡོན་ཏན་དང་མཛད་སྤྱོད་རྣམས་ཞིབ་ཏུ་དྲི་གཏུགས་བྱས་པས་ཡིད་ཆེས་ཀྱི་དད་པ་ཆེན་པོ་སྐྱེས་ནས་བསམ་གཏན་པ་དེ་དག་གིས་མྱུར་བར་ཕྱིན་ཏེ་བླ་མ་གསེར་གླིང་བ་ཆེན་པོ་ལ་འདི་སྐད་གསོལ་ཏོ། ། ཀྱཻ་བླ་མ་དམ་པ་གསན་དུ་གསོལ། དེང་སང་གླིང་འདིར་རྒྱ་གར་གྱི་མཁན་པོ་དཱི་བཾ་ཀཱ་ར་ཤྲཱི་ཛྙཱ་ན་བྱ་བ་དེ། སློབ་མ་བརྒྱ་དང་ཉི་ཤུ་རྩ་ལྔའི་ཚོགས་དང་ལྷན་ཅིག་ཏུ། རྒྱ་མཚོ་ཆེན་པོ་ལ་ཟླ་བ་བཅུ་གསུམ་གྱི་བར་དུ་བྱོན་པ་བདུད་དང་མུ་སྟེགས་ཀྱི་ལྷ་དབང་ཕྱུག་ཆེན་པོས་བར་ཆད་བྱས་པ་བྱམས་པ་དང་སྙིང་རྗེས་འཆིང་ཞིང་སྐུ་གསུང་ཐུགས་མདངས་མ་ཤོར་བར་བདག་ཅག་ག་ན་བ་དེར་ལྷགས་སོ། ། དེ་ལ་ཞག་བཅུ་བཞིའི་བར་དུ་ཆོས་ཀྱི་གཏམ་འགྲོ་བོར་བྱས་བས། བདག་ཅག་སེམས་རངས་ཤིང་ཚིམ་པར་གྱུར་ཏོ། ། ད་ནི་སྐབས་ཀྱི་དོན་ལ་མཁས་པ་ཆེན་པོ་དེ་ཁྱེད་ཀྱི་དྲུང་དུ་འོངས་ཏེ་དུས་གསུམ་གྱི་རྒྱལ་བ་ཐམས་ཅད་སྐྱེད་བར་བྱེད་པའི་ཡུམ་གཙོ་བོར་ཉན་པ་དང་། སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་དེ་ཐེག་པ་ཆེན་པོའི་བློ་སྦྱོང་བར་བགྱི། གཞན་ཡང་བླ་མའི་གཞུང་ལུགས་རྒྱ་མཚོ་ལྟ་བུ་ཉིན་མཚན་དུ་སྤྱད་པར་འདོད་པར་གདའ་བས་ཐུགས་རྗེ་ཆེན་པོས་གོ་སྐབས་དབྱེ་ཞིག ། ཅེས་ཞུས། དེ་ནས་ཇོ་བོ་རྗེ་དཔོན་སློབ་རྣམས་བླ་མ་གསེར་གླིང་པ་ཆེན་པོའི་ཕོ་བྲང་དང་ཉེ་བར་ཕེབས་པ་ན་བླ་མ་གསེར་གླིང་པས་དགེ་སློང་ཆོས་གོས་གསུམ་ཁ་དོག་མཐུན་པར་གསོལ་བ། ཐམས་ཅད་མཐུན་པར་རིལ་བ་སྤྱི་བླུགས་འཛིན་པ། ཐམས་ཅད་ཀྱང་འཁར་གསིལ་མཛེས་པར་བསྣམས་པ་ཤིན་ཏུ་དང་བ་འདྲེན་པ་དགྲ་བཅོམ་པ་ལྟ་བུ་ལྔ་བརྒྱ་དང་སུམ་ཅུ་རྩ་ལྔའི་སྣ་བླ་མ་གསེར་གླིང་བས་དྲངས་ནས་དགེ་ཚུལ་དྲུག་ཅུ་རྩ་གཉིས་ཀྱིས་བརྟེན་ཏེ། མདོར་ན་རབ་ཏུ་བྱུང་བ་ལྔ་བརྒྱ་དང་དགུ་བཅུ་རྩ་བདུན་གྱིས་རྒྱང་རིང་པོ་ནས་བསུ་བའི་ཕྱིར་ནར་གྱིས་བྱུང་བ་གཟིགས་སོ། ། དེ་མ་ཐག་ཏུ་བཅོམ་ལྡན་འདས་ཞལ་བཞུགས་པའི་དུས་ན་དགྲ་བཅོམ་པ་རྣམས་ཀྱིས་བསྐོར་བ་ལྟར་ཤིན་ཏུ་དང་བ་འདྲེན་ཞིང་ཐུགས་ཉམས་དགའ་བའི་མཐར་ཐུག་བར་གྱུར་ཏོ། ། དེ་ནས་ཇོ་བོ་རྗེས་པཎྜི་ཏ་སའི་སྙིང་པོ་ལ་སོགས་པ་རིགས་པའི་གནས་ལྔ་ལ་མཁས་པའི་པཎྜི་ཏ་དང། སྡེ་སྣོད་གསུམ་ལ་མཁས་པའི་དགེ་སློང་རྣམས་ཕྱགས་ལྷམ་འབྲིང་མིག་མ་གསོལ་བ་ཁ་ཆེ་གུར་ཀུམ་གྱིས་ལེགས་པར་ཁ་བསྒྱུར་བའི་ཆོས་གོས་རྣམ་གསུམ་ཕལ་ཆེན་སྡེ་བས་ལེགས་པར་བསྔགས་པ་མཛེས་པར་གསོལ་བ། ཐམས་ཅད་ཀྱང་རྟེན་འབྲེལ་གྱི་ཆེ་བས་ལྕགས་ཀྱི་ལྷུང་བཟེད་རབ་ཚད་རྡོལ་བུག་མེད་པ་བསྣམས་པ། ཟངས་ཀྱི་རིལ་བ་སྤྱི་བླུགས་མ་ག་དྷའི་བྲེ་གང་ཤོང་བ་དང། བསྟན་པའི་བདག་པོས་རབ་ཏུ་བསྔགས་པའི་འཁར་གསིལ་ལ་སོགས་པའི་རྟགས་མཚན་ཐམས་ཅད་ལེགས་པར་ཚང་བ་ཡོད་པ། ཐམས་ཅད་ཀྱང་པཎྜི་ཏའི་ཞྭ་ང་རྒྱལ་མེད་པ་གསོལ་བ། རྔ་ཡབ་དཀར་པོ་རེ་ཕྱག་ན་བསྣམས་པ་བརྒྱ་དང་ཉི་ཤུ་རྩ་ལྔས་ཇོ་བོའི་རྗེས་ལ་བར་དུ་མི་རེ་ཤོང་ཙམ་དུ་མ་འབྱར་བ། རྒྱངས་ཆེས་མ་དྲགས་པ། བར་མ་ཆད་པར་འཇའ་ཚོན་སྣ་ལྔའི་གུར་བཞིན་དུ་མགོན་པོ་གསེར་གླིང་པ་གང་ན་བཞུགས་པ་དེར་བྱོན་པ་དང། ཐམས་ཅད་ཕུན་སུམ་ཚོགས་པ་ཤ་སྟག་ཏུ་གྱུར་པས་དཀར་ཕྱོགས་ཀྱི་ལྷ་རྣམས་དགའ་ཞིང་མགུ་ནས་མེ་ཏོག་གི་ཆར་པ་ཕབ། གསེར་གླིང་ན་གནས་པའི་སྐྱེ་བོ་ཐམས་ཅད་བླ་མ་གཉིས་ཀྱི་མཛད་པ་ལ་ངོ་མཚར་རྨད་དུ་བྱུང་བའི་དད་པ་ཐོབ་བོ། ། དེ་ནས་ཇོ་བོ་རྗེས་རིན་པོ་ཆེའི་བུམ་པ་ལྟོ་བ་ཆེ་ལ་དབྱིབས་ཟླུམ་པ། རྩ་བ་བརྟན་ལ་མགྲིན་པ་རིང་བ། ཁ་ཡེལ་ལ་མཆུ་འཕྱང་བ། ནང་ན་དངོས་པོ་ཅི་ཡོད་ཕྱི་ནས་གསལ་ཞིང་རིན་པོ་ཆེ་གསེར་དང། དངུལ་དང་། མུ་ཏིག་དང། བྱུ་རུ་དང་། བཻ་ཌཱུརྱས་བཀང་སྟེ་བླ་མ་གསེར་གླིང་པ་ཆེན་པོའི་ཕྱག་ཏུ་ཕུལ། པཎྜི་ཏ་སའི་སྙིང་པོ་ལ་སོགས་པ་ཇོ་བོའི་སློབ་མ་གཞན་ཐམས་ཅད་ཀྱིས་ཀྱང་གསེར་ཞོ་རེ་ཕྱག་རྟེན་དུ་ཕུལ་ལོ། ། དེ་ནས་ཇོ་བོ་རྗེས་གསེར་གླིང་པའི་གཟིམ་ཁང་ཕོ་བྲང་གསེར་གདུགས་ཅན་གྱི་ནང་དུ་ཕེབས་ཏེ། བླ་མ་གསེར་གླིང་པ་ལ་མཎྜལ་ཕུལ་ནས་དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་གཅིག་པུ་ཤེར་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེའི་དོན་གྱི་སྙིང་པོ་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང་། སྐྱེས་ཟིན་གོང་ནས་གོང་དུ་སྤེལ་བ་དང། དེའི་ཐབས་སུ་ཐེག་པ་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་མགོན་པོ་བྱམས་པ་ནས་འཕགས་པ་ཐོགས་མེད་སྐུ་མཆེད་སོགས་ལ་བརྒྱུད་པ་དང། རྗེ་བཙུན་འཇམ་དབྱངས་ནས་རྒྱལ་སྲས་ཞི་བ་ལྷ་སོགས་ལ་རིམ་གྱིས་བརྒྱུད་པའི་གདམས་ངག་ཡོངས་སུ་རྫོགས་པ་གནང་དགོས་ཚུལ་ཞུས་པ་ན། བླ་མ་གསེར་གླིང་པས་དེ་ལ་ལོ་མང་པོ་འགོར་བས་ཉིད་རང་གིས་བཞུགས་ནུས་ན་ཅིས་ཀྱང་འབུལ་ཞེས་གསུངས། དེ་ལ་ཇོ་བོ་ཇི་ཙམ་འགོར་ཡང་ཡོངས་སུ་རྫོགས་པ་ཞིག་ཅིས་ཀྱང་ཞུ་ཞེས་གསོལ་བ་བཏབ་ནས་ལོ་བཅུ་གཉིས་ཀྱི་རིང་དབུ་སྔས་སྦྲེལ་ཏེ་ཐེག་པ་ཆེན་པོའི་ལམ་གྱི་རིམ་པའི་ལུས་སྤྱི་དང་། ཁྱད་པར་བྱང་ཆུབ་ཀྱི་སེམས་རིན་པོ་ཆེ་ལ་བློ་སྦྱོང་བའི་གདམས་ངག་རྣམས་བུམ་པ་གང་བྱོའི་ཚུལ་དུ་གསན། དེ་ནས་རྒྱ་མཚོར་འཇུག་པའི་དེད་དཔོན་གྱིས་ཡིད་བཞིན་གྱི་ནོར་བུ་རིན་པོ་ཆེ་རྙེད་ནས་རང་ཡུལ་དུ་ལྡོག་པ་ལྟར་ཇོ་བོ་རྗེ་ཡང་ཐུགས་ལེགས་པར་ཆིམ་ནས་རྒྱ་གར་དུ་ཕེབས་པར་པྱོགས་པ་ན་བླ་མ་གསེར་གླིང་པ་ཆེན་པོས་ཁོང་རང་ལ་ཆུང་ངུའི་དུས་ནས་རྙེད་པའི་ཐུབ་དབང་གི་གསེར་སྐུ་དེ་ཇོ་བོ་རྗེའི་ཕྱག་ཏུ་ཕུལ་ནས་བསྟན་པའི་བདག་པོར་བྱིན་གྱིས་བརླབས་སོ། ། དེ་ནས་ཇོ་བོ་རྗེ་དཔོན་སློབ་རྣམས་རྒྱ་མཚོ་ལ་གཟིངས་བཅས་ཏེ་རྒྱ་གར་དུ་ཕེབས་ནས་བསྟན་པའི་བདག་པོ་མཛད་ཅིང་བཞུགས། དེའི་ཚེ་ཇོ་བོ་རྗེ་རྡོ་རྗེ་གདན་ན་བཞུགས་དུས། མ་ག་དྷའི་རྒྱལ་པོ་ནཻརྱ་པཱ་ལ་དང། ནུབ་ཕྱོགས་ཀ་རྞའི་རྒྱལ་པོ་གཉིས་རྩོད་པར་གྱུར་ཏེ། ཀརྞའི་རྒྱལ་པོས་མ་ག་དྷར་དམག་དྲངས། གྲོང་མ་ཐུབ་པར་གནས་གཞི་རྣམས་སུ་དྲངས་པས་རབ་ཏུ་བྱུང་བ་བཞི། དགེ་བསྙེན་གཅིག་དང་ལྔ་བཀྲོངས། ཡོ་བྱད་མང་པོ་ཁྱེར་བའི་དུས་སུ་ཀོ་ལོང་མ་མཛད་པར་བྱང་ཆུབ་ཀྱི་སེམས་བསྒོམས། ཕྱིས་གཡུལ་ལོག་ནས་མ་ག་དྷའི་རྒྱལ་བོས་ཀརྞའི་དམག་མི་ཐམས་ཅད་གསོད་པ་ལ་ཐུག་པ་ན་ཀརྞའི་རྒྱལ་པོ་དང་དམག་མི་ཐམས་ཅད་ཀྱི་སྲོག་བསྐྱབས་ནས་བཏང། སླར་ཡང་དེ་གཉིས་འཐབས་པ་ན་ཇོ་བོ་རྗེས་ཟང་ཟིང་གི་ནོར་ཚད་མེད་པ་སོ་སོར་གནང་སྟེ་ཆུ་བོ་ཆེན་པོ་བརྒལ་ནས་དམག་ཕན་ཚུན་འདུམས་པར་མཛད་དེ་སེམས་ཅན་གྲངས་མེད་པའི་སྲོག་བསྐྱབས་སོ། ། དེ་ཡང། བསྟོད་པ་ལས། རྒྱལ་པོ་ནཻརྱ་པཱ་ལ་དང། ། ནུབ་ཕྱོགས་ཀརྞའི་རྒྱལ་པོ་གཉིས། ། རྩོད་པ་ཆེན་པོ་བྱུང་བའི་ཚེ། ། ནུབ་ཕྱོགས་ཀརྞའི་རྒྱལ་པོ་ཡིས། ། མ་ག་དྷར་ནི་དམག་དྲངས་པས། ། གྲོང་ཁྱེར་མ་ཐུབ་གནས་གཞིར་དྲངས། ། རབ་བྱུང་དགེ་བསྙེན་ལྔ་ཡང་བསད། ། ཡོ་བྱད་མང་པོ་གཞན་དུ་ཁྱེར། ། ཁྱོད་ལ་ཞེ་སྡང་མི་མངའ་བས། ། ཀོ་ལོང་མ་མཛད་སྙིང་རྗེ་འཁྲུངས། ། གཡུལ་ལོག་ཚེ་ན་དམག་མི་བསྐྱབས། ། ཕྱི་ནས་བླ་མས་འདུམས་མཛད་དེ། ། འཚོ་བའི་ཡོ་བྱད་མ་གཏོགས་པ། ། ཡོ་བྱད་ལྷག་མ་མེད་པར་བཏང། ། ལུས་དང་སྲོག་ལ་མ་གཟིགས་པར། ། ཆུ་བོ་ཆེན་པོ་ཡང་ཡང་བརྒལ། ། དེ་གཉིས་འདུམས་ནས་མཇའ་བོར་མཛད། ། ཅེས་གསུངས། ཡང་ཇོ་བོ་རྡོ་རྗེ་གདན་དུ་བསྐོར་བ་མཛད་ཀྱིན་བྱམས་སྙིང་རྗེ་བྱང་ཆུབ་ཀྱི་སེམས་ལ་ཐུགས་སྦྱོང་བ་ན། ལྷོ་ཕྱོགས་ནས་མུ་སྟེགས་པའི་པཎྜི་ཏ་གདུགས་བཅུ་གསུམ་ཕུབ་པ་གཅིག་བྱུང་ནས་སངས་རྒྱས་པའི་བསྟན་པའི་བདག་པོ་ཁྱོད་ཡིན། མུ་སྟེགས་པའི་བསྟན་པའི་བདག་པོ་ནི་ཁོ་བོ་ཡིན་པས་རང་ཅག་གཉིས་རྩོད་པ་བྱས་ལ་སུ་རྒྱལ་བ་དེའི་བསྟན་པ་ལ་འཇུག་དགོས་ཟེར་ནས། རྒྱལ་པོ་དཔང་དུ་བཙུགས་ཏེ་རྩོད་པ་བྱས་པས། ཇོ་བོས་ཚེགས་མེད་པར་ཚར་བཅད་པས་གདུགས་བཅུ་གསུམ་པོ་ཇོ་བོ་ལ་ཕུལ། ཞབས་སྤྱི་བོའི་གཙུག་ཏུ་བླངས། ། སློབ་མ་བྱས་ནས་ཕྱི་རོལ་པ་ཐམས་ཅད་ནང་པའི་བསྟན་པ་ལ་བཙུད་དོ། ། ཡང་སང་ཕོད་ལོ་དུས་སུ་མུ་སྟེགས་པའི་སྟོན་པ་གདུགས་བརྒྱད་ཕུབ་པ་གཅིག་བྱུང་བའང་སྔ་མ་བཞིན་དུ་ཚར་བཅད་དོ། ། ཡང་དེའི་སང་ཕོད་མུ་སྟེགས་ཀྱི་སྟོན་པ་གདུགས་ལྔ་ཕུབ་པ་སྒྲ་ཚད་ལ་ཤིན་ཏུ་མཁས་པ་གཅིག་བྱུང་ནས། སྔ་མ་ཁོ་ན་བཞིན་དུ་ཟེར་བ་ལ། ཇོ་བོས་ཀྱང་རྩོད་པར་ཞལ་གྱིས་བཞེས་ནས་རྩོད་པའི་དུས་བོར། རྒོལ་ཕྱིར་རྒོལ་གྱི་སྟན་བཤམས། པཎྜི་ཏ་མང་པོ་དང་། སྐྱེ་བའི་ཚོགས་འདུས་པར་གྱུར་པའི་དབུས་སུ་རྩོད་པ་བྱས་པས་ཐོག་མར་པཎྜི་ཏ་སུམ་ཅུ་ཙམ་གྱིས་གོ ། དེ་ནས་བཅོ་ལྔ་ཙམ་གྱིས་གོ ། དེ་ནས་ཕྲ་བར་གྱུར་པས་བཅུ་ཙམ་གྱིས་གོ ། དེ་ནས་ལྔ་ཙམ་གྱིས་གོ ། དེ་ནས་རབ་ཏུ་ཕྲ་བར་གྱུར་པས་ཁོང་རང་གཉིས་ཀྱིས་གོ་གཞན་གྱིས་མི་གོ་བར་གྱུར་ཏོ། ། དེར་མུ་སྟེགས་པ་དེས་སྒྲའི་ཚིགས་སུ་བཅད་པ་གཅིག་གི་དོན་དྲིས་པས་ཇོ་བོས་མ་དགོངས་པ་ན། ཁྱོད་དེར་སྡོད་ཅིག་གསུངས་ནས་ནང་དུ་ཕེབས་ཏེ་ཇོ་བོ་སྒྲོལ་མ་ལ་མཎྜལ་ཕུལ་གསོལ་བ་བཏབ་པས། ཐུགས་ལ་ཝལ་གྱིས་བྱུང་ནས་ལན་བཏབ་པས་པཎྜི་ཏ་དེ་ཚར་བཅད། སློབ་མར་ཁས་བླངས་ནས་སངས་རྒྱས་ཀྱི་བསྟན་པ་ལ་བཙུད་དོ། ། དེ་ནས་རྒྱལ་པོ་མཧཱ་པ་ལའི་རིང་ལ་ཇོ་བོ་རྗེ་བི་ཀ་མ་ལ་ཤཱི་ལའི་གཙུག་ལག་ཁང་དུ་སྤྱན་དྲངས། གཙུག་ལག་ཁང་བཅོ་བརྒྱད་ཀྱི་བདག་པོ་མཛད་ནས་སངས་རྒྱས་ཀྱི་བསྟན་པ་རྒྱ་ཆེར་སྤེལ། དུས་དེའི་ཚེ་རྒྱ་གར་ཤར་ནུབ་ཡུལ་དབུས་དང་བཅས་པའི་དགེ་འདུན་ཐམས་ཅད་ཀྱི་གཙུག་གི་ནོར་བུ་ལྟ་བུར་གྱུར་ཏེ་རྒྱལ་བའི་བསྟན་པ་ལ་རྒྱལ་བ་རང་ཉིད་སླར་བྱོན་པ་ལྟར་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པའི་མདོ་སྔགས་ཀྱི་བསྟན་པ་ཡོངས་རྫོགས་ཀྱི་བདག་པོར་བཞུགས་སོ། ། དེ་ནས་ཇོ་བོ་རྗེའི་སྔོན་གྱི་ཐུགས་བསྐྱེད་དང་སྨོན་ལམ་གྱི་མཐུ་དང་། ཁ་བ་ཅན་གྱི་མགོན་པོ་རྗེ་བཙུན་སྤྱན་རས་གཟིགས་ཀྱི་ཐུགས་རྗེའི་མཐུས་བོད་དུ་སངས་རྒྱས་ཀྱི་བསྟན་པ་རྒྱ་ཆེར་སྤེལ་བའི་དུས་ལ་བབ་སྟེ་མངའ་རིས་ཆོས་རྒྱལ་ཡེ་ཤེས་འོད་ཀྱི་དཀའ་བ་བརྒྱ་ཕྲག་དུ་མའི་སྒོ་ནས་རྒྱལ་བའི་བསྟན་པ་ཡོངས་སུ་རྫོགས་པ་ཞིག་བོད་ཁམས་འདིར་དར་བར་བྱ་བའི་ཕྱིར་བརྩོན་པ་ནར་མར་མཛད་དེ། མངའ་རིས་སྟོད་ནས་བློ་གསལ་ཡིད་གཞུང་བ་མང་པོ་རྒྱ་གར་དུ་བརྫངས། སཾ་སྐྲྀ་ཏའི་སྐད་བསླབས་ནས་ཆོས་བསྒྱུར་དུ་བཅུག ། ལྷག་པར་ལོ་ཆེན་རིན་ཆེན་བཟང་པོས་སྨོན་ལམ་རླབས་པོ་ཆེའི་མཐུ་གྲུབ་པས་སཾ་སྐྲི་ཏའི་སྐད་ཕུལ་ཕྱིན་མཁྱེན། མདོ་སྔགས་ཀྱི་ཆོས་མཐའ་ཡས་པ་བསྒྱུར། ལྷ་བླ་མས་སྦྱིན་བདག་བྱས་ཏེ་མཐོ་ལྡིང་གསེར་གྱི་ལྷ་ཁང་བཞེངས། སྔོན་གླང་དར་མས་རྒྱལ་བའི་བསྟན་པ་བསྣུབས་པ་ནས་ལོ་བདུན་ཅུ་ཙམ་གྱི་རིང་ལ་བོད་དུ་རབ་ཏུ་བྱུང་བ་གཅིག་ཀྱང་མེད་པར་བོད་མུན་པའི་གླིང་དུ་གྱུར་བ་ན་མངའ་རིས་ཆོས་རྒྱལ་བྱང་ཆུབ་སེམས་དཔའ་རྣམས་དང། ལོ་ཆེན་རིན་ཆེན་བཟང་པོ་ཡབ་སྲས་རྣམས་ཀྱིས་མཐུས་མངའ་རིས་སྟོད་དུ་དགེ་འདུན་གྱི་སྡེ་ཆགས་ཏེ་མར་རིམ་གྱིས་འཕེལ། མདོ་ཁམས་སུ་བླ་ཆེན་དགེ་བ་རབ་གསལ་གྱིས་དགེ་འདུན་གྱི་སྡེ་དང་འདུལ་བའི་བཤད་ཉན་བཙུགས་ཏེ་མདོ་ཁམས་ནས་ཡར་དར་ཏེ་དབུས་གཙང་གི་ལྗོངས་སུ་དགེ་འདུན་གྱི་སྡེ་རྒྱ་ཆེར་འཕེལ། དེ་ལྟ་ནའང་འགའ་ཞིག་འདུལ་བ་ལ་མོས་བློས་སྔགས་ཁྱད་དུ་གསོད། འགའ་ཞིག་སྔགས་ལ་མོས་བློས་འདུལ་བ་ཁྱད་དུ་གསོད། ཕལ་མོ་ཆེ་གྲུབ་མཐའི་ཁ་འཛིན་གྱི་བཤད་པ་ཙམ་ལས་ཐེག་པ་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་ཉམས་སུ་ལེན་པ་ལྟ་ཞོག ། ཕྱོགས་མཐོང་གི་གོ་བ་ཆགས་པའང་དཀོན་ཞིང་རྒྱ་གར་ནས་པཎྜི་ཏར་རློམ་པ་གསེར་འཚོལ་བ་མང་པོ་ཞིག་བོད་དུ་ལྷགས་ནས་སྔགས་ལ་སྙད་བཏགས་པའི་རྩིང་སྤྱོད་དང་རང་གཞན་ཕུང་ལ་འདེབས་པའི་ངན་སྔགས་མང་པོས་བོད་ཀྱི་སྐྱེ་བོ་བླུན་པོ་རྣམས་བསླུས་ཏེ་རྒྱལ་བའི་བསྟན་པ་རྣམ་པར་དག་པ་ཆགས་པ་ལ་བར་ཆད་ཆེར་བྱུང་བ་ན། ལྷ་བླ་མ་ཐུགས་རྗེ་ཅན་རྣམས་ཐུགས་མ་བདེ་བར་རྒྱ་བརྩོན་སེང་ལ་སོགས་པ་བློ་གསལ་སྙིང་སྟོབས་ཅན་མང་པོ་རྒྱ་གར་དུ་བརྫངས་ཏེ་སཾ་སྐྲྀ་ཏའི་སྐད་བསླབས་ནས་ཆོས་སྒྱུར་ཤེས་པ་ཞིག་བྱེད་པ་དང། ལྷག་པར་པཎྜི་ཏ་ཐུགས་རྒྱུད་འབྱོངས་པ་བསྟན་པ་ལ་ཕན་ཐོགས་ངེས་འདྲ་གདན་འདྲེན་དགོས་པའི་བཀའ་ཕབ་ནས་གསེར་ཕོན་ཆེ་བ་བསྐུར་ཏེ་བརྫངས། རྒྱ་བརྩོན་སེང་ལ་སོགས་པ་དེ་དག་གིས་ཀྱང་ལྷ་བླ་མའི་བཀའ་བཞིན་རྒྱ་གར་ལ་ཕྱིན་ཏེ། ལེགས་སྦྱར་གྱི་སྐད་བསླབས། མཁས་གྲུབ་མང་པོ་ལ་གཏུགས་ཏེ་མདོ་སྔགས་ཀྱི་ཆོས་མང་དུ་བསླབས། ལྷག་པར་བོད་ལ་ཕན་ཐོགས་པའི་པཎྜི་ཏ་ཐུགས་རྗེ་ཅན་ཇི་ལྟ་བུ་ཞིག་ཡོད་སྙམ་དུ་བཙད་དཔྱད་པ་ན་དེ་དུས་རྒྱ་གར་ན་པཎྜི་ཏ་བགྲང་བ་ལས་འདས་པ་བཞུགས་ཀྱང་ཐམས་ཅད་ཀྱི་གཙུག་གི་ནོར་བུ་ལྟ་བུར་བཞུགས་ཤིང། བདག་པས་གཞན་གཅེས་པའི་བྱང་ཆུབ་ཀྱི་སེམས་རླབས་ཆེན་པོ་ཐུགས་ལ་མངའ་བས་བོད་ཁམས་ཀྱི་སྐྱེ་བོ་དམུ་རྒོད་འདུལ་དཀའ་བ་རྣམས་འདུལ་ནུས་པ་ཇོ་བོ་རྗེ་དཔལ་ལྡན་ཨ་ཏི་ཤ་ཉིད་དུ་མཐོང་ནས་ཇི་ཙམ་གསོལ་བ་བཏབ་ཀྱང་གདན་འདྲེན་ནུས་པ་མ་བྱུང་བར་ལོ་ཙཱ་བ་དཔོན་སློབ་རྣམས་ཚུར་ལོག་སྟེ་མངའ་རིས་ཆོས་རྒྱལ་ཁུ་དཔོན་ལ་དེའི་རྒྱུ་མཚན་ཞུས་པ་ན་ཆོས་རྒྱལ་ཡེ་ཤེས་འོད་ཀྱིས་ད་དུང་གསེར་ཕོན་ཆེ་བ་བཙལ་ནས་ཇོ་བོ་རྗེ་གདན་འདྲེན་ཐུབ་པ་ཞིག་བྱེད་དགོས། ཅིས་ཀྱང་མ་ཐུབ་ན་དེའི་འོག་ནས་པཎྜི་ཏ་ཆེ་བ་འདྲ་གདན་དྲངས་ནས་བོད་དུ་སངས་རྒྱས་ཀྱི་བསྟན་པ་རྣམ་པར་དག་པ་ཚུགས་པ་ཞིག་ཅིས་ཀྱང་བྱེད་དགོངས་ནས་གསེར་འཚོལ་དུ་བྱོན་པས་གར་ལོག་གི་རྒྱལ་པོས་ཆོས་ཀྱི་རྒྱལ་པོ་ཡེ་ཤེས་འོད་པཎྜི་ཏ་གདན་འདྲེན་ཕྱིར་གསེར་འཚོལ་བར་རིག་ནས། འདིའི་ཕ་མེས་རྣམས་ཀྱིས་སྔོན་ཡང་སངས་རྒྱས་ཀྱི་བསྟན་པ་དར་བར་བྱས་ཟེར། འདི་མ་བཟུང་ན་འདིས་པཎྜི་ཏ་གདན་དྲངས་ནས། སངས་རྒྱས་ཀྱི་བསྟན་པ་དར་བར་བྱེད་འོང་བས་བཟུང་ལ་བཙོན་ཁང་དུ་ཆུག་ཅིག་ཟེར་ནས་ཆོས་རྒྱལ་ཡེ་ཤེས་འོད་བཟུང་ནས་མནར། དེ་ཆོས་རྒྱལ་བྱང་ཆུབ་འོད་ཀྱིས་ཐོས་ནས་རྟ་བ་བརྒྱ་བྱས་ཏེ་ཁུ་བོ་བཟློག་ཏུ་ཕྱིན་པས། གར་ལོག་གི་རྒྱལ་པོ་ཕ་ཚན་ཆེས་ནས་མ་བཟློག ། ཡང་དམག་བྱས་ནས་ཁོ་ལ་རྒྱབ་ན་ལྷོགས་པར་སྣང་སྟེ། དེའི་བར་དུ་འགྲོ་བ་མར་པོའི་སྲོག་འཆད་པར་སྣང་བ་དང། ང་རང་ལ་ཡང་བར་ཆོད་བྱུང་ན་ཇོ་བོ་ཆེན་པོ་སྤྱན་མི་འདྲོངས་པར་གདའ་བས་ཁོ་དང་ཐབས་མཁས་པས་བསྟུན་ཏེ་ཁུ་བོ་བླུའོ་སྙམ་དུ་དགོངས་ནས་བླུས་པ་དང་། ཁོ་ན་རེ། འོ་ན་ཁྱེད་རང་པཎྜི་ཏ་གདན་འདྲེན་པའི་འཕྲོ་བཤོལ། ཁྱེད་རང་ཡང་ངའི་འོག་ཏུ་ཞུགས། ཡང་ན་གསེར་རྒྱལ་པོ་རང་དང་མཉམ་པ་ཅིག་ཁྱེར་ལ་ཤོག ། དེ་ནས་རྒྱལ་པོ་བཏང་གིས་ཟེར་བ་ལ། གསེར་ལ་འདམས་ནས་གསེར་སྲང་བརྒྱ་ཐམ་པ་ཁྱེར་ཏེ། རྒྱལ་པོ་བླུས་པས་ཀྱང་ཁོ་མ་ཉན། དེ་ནས་ལུས་དང་མཉམ་པ་ཅིག་ཁྱེར་ནས་བླུས་པས་ཀྱང་ཐམས་ཅད་ཚང་བ་ཅིག་དགོས་ཟེར་ནས་ཁོ་མ་ཉན། དེར་ཁུ་བོ་ཁྲིམས་མུན་ན་བཙུད་དེ་འོ་བརྒྱལ་བར་བཞུགས་པའི་སྒོ་དྲུང་དུ་ཕྱི་ནས་ཁུ་བོ་ལ་བོས་ཏེ། བཀའ་དྲིན་ཆེན་པོ། སྔོན་གྱི་ལས་ཐོག་ཏུ་བབ་པ་ཡིན་པས། ངས་ཁོ་ལ་དམག་རྒྱབ་ནས་བཟློག་ན་ནི་སྐྱེ་བོ་ཚན་པོ་ཆེ་ཕུང་ལ་གཏད་ནས་རང་རེ་གཉིས་ཀྱང་ངན་སོང་དུ་འགྲོ་དགོས་པར་སྣང། པཎྜི་ཏ་གདན་མ་དྲངས་པར་ཁྱེད་རང་ངེད་ཀྱི་འོག་ཏུ་ཞུགས་ཟེར་བ་ལ་ནི། ཆོས་བློས་བཏང་ནས་སྡིག་རྒྱལ་གྱི་འོག་ཏུ་ཞུགས་པ་ལས། ཁྱེད་ཆོས་ལྡན་དུ་གཤེགས་པ་དྲག་སྙམ་དུ་བསམས། དེ་ནས་གསེར་ཁྱེད་རང་ཙམ་ཞིག་དགོས་ཟེར་བ་ལ་གསེར་བཙལ་བས། ཁྱེད་ཀྱི་སྐུ་ལུས་དང་མཉམ་པའི་ཚོད་ཙམ་ཞིག་རྙེད། དེས་ཁོ་མ་ཉན་པས་ད་ངས་དབུ་ཙམ་ཞིག་རྙེད་པ་དང་བླུར་འོང་གིས། དེའི་བར་དུ་སྔོན་གྱི་ལས་ལ་སེམས་པ་དང། དཀོན་མཆོག་གསུམ་ལ་གསོལ་བ་འདེབས་པ་དང། སྙིང་པོ་ཆེ་བྲང་འོག་ཏུ་བཅུག་པའི་བསོད་ནམས་མཛད་དགོས་པ་ཡིན། ཞེས་ཞུས་པ་དང། ཁུ་བོ་བཞད་ཅིག་མཛད་ནས། ཁྱོད་ལའང་གཅེས་ཕྲུག་སྣུམ་ཟན་མའི་བགས་ཅིག་ཡོད། དཀའ་སྤྱད་དང་སྙིང་རུས་མི་ནུས་སྙམ་པ་ཡིན་ཏེ། ང་ཤི་ཡང་ཁྱོད་ཀྱིས་ཕ་མེས་ཀྱི་སྲོལ་སྐྱོང་བར་སྣང། ཁྱོད་ཀྱི་དེ་གོ་བ་ཆེ། ང་དེས་ཆོག ། ངའི་བསམ་པ་ལ་བོད་འདིར་ཆོས་ཁྲིམས་ཞིག་མ་འཆོས་པར་ང་ཤི་ན་མི་རུང་བར་འདུག་སྙམ་པ་ཡིན་ཏེ། ད་ང་ན་སོ་ཡང་རྒས་འདིར་ང་ད་ལན་མ་ཤི་ཡང་ཚེ་ལོ་བཅུ་ཡིན་སྔར་ཚེ་འཁོར་བ་ཐོག་མ་མེད་པ་ནས་ཆོས་ཀྱི་ཕྱིར་གཅིག་ཀྱང་ཤི་བ་མེད། ད་ལན་ཆོས་ཕྱིར་ཤི་ན་ལེགས་པ་ཡིན་པས་རྒྱལ་པོ་འདི་ལ་གསེར་སེ་བ་ར་ཏི་ཅིག་ཀྱང་མ་སྟེར། གསེར་ང་རང་ཙམ་རྙེད་པ་ཤིན་ཏུ་རྔམ་ཆེ་ན། ད་མགོ་བོ་ཙམ་པ་ག་ན་རྙེད། གསེར་ཐམས་ཅད་རྒྱ་གར་དུ་ཁྱེར་ལ་ད་དུང་པཎྜི་ཏ་དེ་གདན་ཅི་འདྲོངས་གྱིས། པཎྜི་ཏ་ཆེན་པོའི་སྙན་དུ་ཡང། ང་ན་རེ། ངས་ཁྱེད་དང་སངས་རྒྱས་ཀྱི་བསྟན་པའི་ཕྱིར་ལུས་སྲོག་གར་ལོག་གི་རྒྱལ་པོ་ངན་པ་ལ་བྱིན་ཡོད་པས་ཚེ་རབས་ཐམས་ཅད་དུ་བདག་ལ་ཐུགས་རྗེས་འཛིན་པ་དང། ངའི་བསམ་པའི་གཙོ་བོ་ཁྱེད་བོད་དུ་བྱོན་ནས་སངས་རྒྱས་ཀྱི་བསྟན་པ་དར་བར་བྱེད་པ་ཡིན་པས་དེ་ཁོ་ན་བཞིན་དུ་མཛད་པ་དང། སྐྱེ་བ་འདིའི་འོག་རོལ་ཏུ་ཁྱེད་དང་ངེས་པར་མཇལ་བར་བྱིན་གྱིས་བརླབ་ཏུ་གསོལ། ཞེས་ངའི་འཕྲིན་མཛོད་ཅིག ། དེ་ལྟར་ལགས་པས་ང་བློས་ཐོངས་ལ་སངས་རྒྱས་ཀྱི་བསྟན་པ་ལ་སེམས་ཤིག་གསུང། དེ་ནས་ལྷ་བླ་མ་བྱང་ཆུབ་འོད་ཀྱིས་ནག་ཚོ་ལོ་ཙཱ་བ་སྐུ་མདུན་དུ་བོས་ཏེ་དགེ་བཤེས་པ། ཇོ་བོ་སྤྱན་འདྲེན་དུ་རྒྱ་གར་དུ་འབྱོན་དགོས་པར་འདུག་ཅེས་བྱ་དགའ་ཆེན་པོ་གནང་སྟེ་གསེར་ཕོན་ཆེ་བ་དང། གཡོག་ཇི་ཙམ་དགོས་པ་གཏོང། རྒྱ་གར་དུ་བྱོན་ནས་ཇོ་བོ་རྗེ་ལ་འདི་སྐད་ཞུས་ཤིག ། སྔོན་དུས་ཆོས་རྒྱལ་གོང་མ་རྣམས་ཀྱིས་དཀའ་བ་ཆེན་པོས་རྒྱལ་བའི་བསྟན་པ་བཙུགས་ཀྱང་གླང་དར་མས་བསྣུབས། དེ་ནས་ངེད་ཀྱི་ཡབ་མེས་ཆོས་རྒྱལ་རྣམས་ཀྱིས་དཀའ་བ་ཆེན་པོས་རྒྱལ་བའི་བསྟན་པ་བཙུགས་ཀྱང་མདོ་སྔགས་གཉིས་པོ་ཕན་ཚུན་ཚ་གྲང་ལྟར་སོང་བ་ལས་བསྟན་པ་ཡོངས་རྫོགས་ཉམས་ལེན་དུ་འཁྱེར་ཤེས་པ་ཤིན་ཏུ་དཀོན་པར་སྣང་ཞིང། རྩིང་སྤྱོད་ཅན་མང་པོས་བསྟན་པ་ལ་གནོད་པ་ཆེན་པོ་བྱས། ངེད་ཀྱི་ཁུ་བོ་ཡེ་ཤེས་འོད་ཀྱིས་ཚུལ་དེ་མ་བཟོད་ནས་ཇོ་བོ་རྗེ་ཁྱེད་གདན་འདྲེན་ཕྱིར་གསེར་འཚོལ་དུ་བྱོན་པས་ཁུ་བོ་གར་ལོག་གི་རྒྱལ་པོས་མེད་པར་བྱས་པའི་གཏམ་དེ་རྣམས་མགོན་པོ་ཨ་ཏི་ཤའི་སྙན་དུ་ཐོངས། ངའི་ཁུ་བོ་སྙིང་རྗེ་ཅན་དེ་འོ་ཨེ་བརྒྱལ། ངས་ཀྱང་ཁུ་བོ་དེ་བཞག་ནས་འོང་ཕོད་པ་སྒོའི་གསེང་ནས་ཕར་བལྟས་པས་སྐུ་ལུས་རྣམས་ནི་དར་གྱིས་བཅིངས། གསུང་གི་མདངས་ནི་ཤོར། སྔར་གྱི་དེ་ལས་རྣམ་པ་ཐམས་ཅད་འགྱུར། སྐུ་ལུས་བུང་བ་ཙམ་ཞིག་ཏུ་སོང། དེའི་ཁུང་ནའང་བོད་ཀྱི་སེམས་ཅན་དང་སངས་རྒྱས་ཀྱི་བསྟན་པ་དང་ཇོ་བོ་འབའ་ཞིག་ཐུགས་ལ་སེམས། ངེད་བོད་མཐའ་འཁོབ་ཀྱི་སེམས་ཅན་མ་རིག་པ་རྣམས་ཀྱི་སྙིང་སྟོབས་དེ་འདྲ་ན་ཁྱེད་འགྲོ་བའི་སྐྱབས་གནས་ཐུགས་རྗེ་ཅན་རྣམས་ཇི་ཙུག་ལ་སོང། ཞེས་ཞུས་ཤིག་ཅེས་མངགས་གསེར་སྲང་བདུན་བརྒྱ་བསྐུར་ཏེ་ནག་ཚོ་ལོ་ཙཱ་བ་དཔོན་གཡོག་རྣམས་རྒྱ་གར་དུ་ཇོ་བོ་སྤྱན་འདྲེན་དུ་བརྫངས་སོ། ། དེ་ནས་ནག་ཚོ་ལོ་ཙཱ་བ་དཔོན་གཡོག་འགས་ལྷ་བླ་མའི་བཀའ་བཞིན་རྒྱ་གར་དུ་བྱོན། ལམ་པར་རྣམས་སུ་ཆོམ་ཀུན་གྱི་འཇིགས་པ་སོགས་བར་ཆད་མང་བོ་བྱུང་བ་རྣམས་ཐུགས་རྗེ་ཆེན་པོའི་སྤྲུལ་པ་སྣ་ཚོགས་པས་བསལ་ཏེ་ཉེ་ཞོ་མེད་པར་བི་ཀ་མ་ལ་ཤཱི་ལར་སླེབས། རྒྱ་བརྩོན་སེང་དང་གྲོས་བྱས་ཏེ་ཇོ་བོ་གདན་འདྲེན་པའི་བཀོད་པ་བྱས་པ་ན་རེ་ཤིག་ཇོ་བོའི་ཞལ་མཇལ་བ་ཤིན་ཏུ་དཀའ་བ་བྱུང། དེ་ནས་ཐུགས་རྗེ་ཆེན་པོའི་སྤྲུལ་པས་ཇོ་བོ་བོད་དུ་འབྱོན་པའི་རྟེན་འབྲེལ་སྒོ་དུ་མ་ནས་བསྒྲིགས་ཏེ། ཉིན་ཅིག་རྒྱ་གར་གྱི་པཎྜི་ཏ་དང་རྒྱལ་པོ་གཞན་གྱིས་མ་ཚོར་བར་དབེན་པ་ཞིག་གི་དུས་རྒྱ་བརྩོན་སེང་གིས་ནག་ཚོ་ལོ་ཙཱ་བ་ལ་ཤོག་གསུངས་ནས་ཇོ་བོའི་གཟིམ་ཁང་དུ་ཁྲིད། མཎྜལ་ཁྲུ་གང་པ་ཅིག་ཡོད་པའི་སྟེང་དུ་གསེར་ལིང་བ་དེ་བཞག ། གསིལ་མ་རྣམས་ཚོམ་བུར་བཀོད་ནས་ཇོ་བོ་ལ་ཕུལ་ཏེ། ལོ་ཙཱ་བ་རྒྱ་བརྩོན་འགྲུས་སེང་གེས་གཏམ་བཏང་བ། བོད་ཀྱི་རྒྱལ་པོ་བྱང་ཆུབ་སེམས་དཔའ་ཡིན་ལུགས། ཆོས་རྒྱལ་མེས་དཔོན་གསུམ་གྱི་རིང་ལ་ཆོས་ཇི་ལྟར་དར་ལུགས། གླང་དར་མས་བསྟན་པ་བསྣུབས་ལུགས། བླ་ཆེན་པོའི་དྲིན་ལས་དགེ་འདུན་ཇི་ལྟར་འཕེལ་ལུགས། ལྷ་བླ་མ་ཁུ་དབོན་གྱིས་ཇོ་བོ་སྤྱན་འདྲེན་པའི་ཕྱིར་དཀའ་སྤྱད་བྱས་ལུགས། ད་ལྟ་བོད་ན་ཆོས་ལོག་ཇི་ལྟར་དར་ལུགས་ཞིབ་རྒྱས་དང་བཅས་པ་ཞུས་ནས། ད་ཡང་བོད་ཀྱི་རྒྱལ་པོ་བྱང་ཆུབ་སེམས་དཔའི་དེས་ཚེ་དང་ལྡན་པ་འདི་མགོན་པོ་ཁྱེད་སྤྱན་འདྲེན་དུ་བཏང་ནས་གདའ་བས། ན་ནིང་སྐད་མི་གསུང་བར་བོད་ལ་ཐུགས་རྗེས་གཟིགས་པར་ཞུ་ཞུས་པས། ཇོ་བོའི་ཞལ་ནས་བོད་ཀྱི་རྒྱལ་པོ་བྱང་ཆུབ་སེམས་དཔའ་ཡིན་པར་འདུག ། ཆོས་རྒྱལ་མེས་དཔོན་རྣམ་གསུམ་ཡང་བྱང་ཆུབ་སེམས་དཔའི་རྣམ་འཕྲུལ་ཡིན་ཏེ། དེ་བས་བླ་ཆེན་པོ་ཡང་བྱང་ཆུབ་སེམས་དཔའི་རྣམ་འཕྲུལ་ཡིན། དེ་མིན་ན་བསྟན་པའི་མེ་རོ་བསླང་བར་མི་ནུས། ཇོ་བོ་ལྷ་བླ་མ་དེ་ཀུན་བྱང་ཆུབ་སེམས་དཔའ་ཡིན་པར་འདུག ། བྱང་ཆུབ་སེམས་དཔའི་བཀའ་བཅག་ཏུ་ཡང་མི་རུང་བ་ཡིན། རྒྱལ་པོ་དེ་ལ་ངོ་ཡང་གནོང་བར་ཡོད། ཁོང་གི་མི་ནོར་མང་པོ་ཆུད་ཟོས་ལ་སོང། ཁྱེད་བོད་རྣམས་སྙིང་རྗེ་བར་ཡང་འདུག་སྟེ། ང་ཡང་ན་སོ་རྒས། ལྡེ་མིག་མང་པོའང་འཛིན། བྱ་བ་མང་པོའི་འཕྲོ་ཡང་ཡོད་པས་བོད་དུ་ཐོན་རེ་མི་འོང་ངམ། འོན་ཀྱང་ངས་བརྟག་པ་ཅིག་བྱ་ཡི། རེ་ཞིག་ཁྱེད་རང་གི་གསེར་ཚགས་གྱིས་གསུངས་ནས་ཕྱིར་ལ་གཏོད་པར་མཛད། དེ་ནས་ཇོ་བོ་རྗེས་བོད་ཁམས་ཀྱི་གདུལ་བྱ་རྣམས་ལ་ཐུགས་བརྩེ་པས་བོད་དུ་བྱོན་ན་སངས་རྒྱས་ཀྱི་བསྟན་པ་ལ་ཕན་མི་ཕན་དང། དེ་ལ་གེགས་བར་ཆད་ཀྱིས་གནོད་པ་ཡོད་མེད་སོགས་བརྟག་པ་མཛད་དེ་ལྷག་པའི་ལྷ་རྣམས་ལ་གསོལ་འདེབས་ཤུགས་དྲག་ཏུ་མཛད་ཅིང་རྡོ་རྗེ་གདན་དུ་བཞུགས་པའི་དུས། ལྷ་དང་བླ་མ་རྣམས་ཀྱིས་བྱང་ཆུབ་ཀྱི་སེམས་ཇི་ལྟར་སྦྱོང་བར་བསྐུལ་བ་བཞིན་ཐུགས་རྗེ་ཆེན་པོ་ཡི་དམ་དུ་བཟུང་ནས་རྡོ་རྗེའི་གདན་གྱི་ནུབ་ཕྱོགས་ན་འོད་དཔག་ཏུ་མེད་པའི་ལྷ་ཁང་ཞིག་ཡོད་པ་དེའི་ནང་དུ་བྱམས་པའི་ཐུགས་དམ་ལ་བཞུགས་པས། ཇོ་བོ་ཐུགས་རྗེ་ཆེན་པོའི་ཞལ་མངོན་སུམ་དུ་གཟིགས། ཐུགས་རྗེ་ཆེན་པོའི་ཞལ་ནས། སྐྱེས་བུ་དམ་པ་ལེགས་སོ་ལེགས་སོ་དུས་གསུམ་གྱི་སངས་རྒྱས་ཐམས་ཅད་ཀྱི་གསང་བའི་མཛོད་གང་ཡིན་པ་དེ་ཁྱོད་ཀྱིས་ཤེས་སོ། ། འདི་ནས་བྱང་ཕྱོགས་ན་ངའི་ཞིང་ཁམས་ཡོད། ཁྱོད་ཀྱི་ཡི་དམ་ཇོ་བོ་སྒྲོལ་མ་ཡང་དེ་ན་སེམས་ཅན་གྱི་དོན་མཛད་ཅིང་བཞུགས། ཁྱོད་ཀྱི་གདུལ་བྱ་མང་པོ་ཡང་དེ་ན་ཡོད་པས་བྱང་ཕྱོགས་སུ་སོངས་ཤིག་གསུངས་ནས་བོད་ཁ་བ་ཅན་འདུལ་བར་ལུང་བསྟན་ཏོ། ། ཡང་ཇོ་བོ་རྗེས་རྗེ་བཙུན་མ་སྒྲོལ་མའི་རྟེན་གྱི་སྤྱན་སྔར་མཆོད་པ་བཤམས། མཎྜལ་ཕུལ་ནས་གསོལ་བ་བཏབ་པ་ནི། ངས་བོད་དུ་ཕྱིན་ན་བསྟན་པ་དང་སེམས་ཅན་ལ་ཕན་ཐོགས་སམ་མི་ཐོགས་བྱ་བ་དང། རྒྱལ་པོ་བྱང་ཆུབ་སེམས་དཔའི་ཐུགས་དགོངས་རྫོགས་སམ་མི་རྫོགས་བྱ་བ་དང། རང་གི་ལུས་སྲོག་གི་བར་ཆད་དུ་འགྱུར་རམ་མི་འགྱུར་བྱ་བ་གསུམ་གསོལ་བ་བཏབ་པས། དེའི་ནུབ་མོ་རྨི་ལམ་ན། གནས་འདི་འདྲ་བ་ཞིག་ན་ནང་པའི་ལྷ་ཁང་ཆུང་ངུ་ཞིག་ཡོད། ནང་པར་དེར་སོངས་ལ་རྣལ་འབྱོར་མ་ཞིག་འོང་གི་དེ་ལ་དྲིས་དང་གསུང་བ་རྨིས། ནང་པར་ཇོ་བོས་མེ་ཏོག་སྙིམ་པ་གང་བསྣམས་ནས་ལྷ་ཁང་དེར་ཞུགས་པ་ན་རྣལ་འབྱོར་མ་རལ་པ་ས་ལ་ཞམ་མེ་བ་ཞིག་བྱུང། དེ་ལ་མེ་ཏོག་རྣམས་ཕུལ་ནས་ང་བོད་ཀྱི་རྒྱལ་པོས་སྤྱན་འདྲེན་ན་ངས་བོད་དུ་ཕྱིན་ན་བོད་ཀྱི་སེམས་ཅན་ལ་ཕན་ཐོགས་སམ་མི་ཐོགས་ཞུས་པས། བོད་དུ་བྱོན་ན་ཕན་ནི་ཐོགས་ནས་འོང། ཁྱད་པར་ཨུ་པ་སི་ཀ་གཅིག་ལ་བརྟེན་ནས་ཕན་ཐོགས་ཏེ་འོང་བར་འདུག ། དེ་བྱིན་གྱིས་རློབས་ཤིག་གསུངས། ད་དུང་རྡོ་རྗེ་གདན་ལ་མཆོད་པ་ཆེན་པོ་ཞིག་བྱས་ལ་གསོལ་བ་གདབ་དགོས་སྙམ་ནས་འབྱོན་པར་ཆས་པ་ན། མཁན་པོ་ཛྙཱ་ན་ཤྲཱི་མི་ཏྲས་འགྲོན་བུ་སྤར་གང་བསྐུར་ནས་རྡོ་རྗེ་གདན་ན་རྒན་མོ་རལ་པ་སེ་ཤ་རེ་བ་གཅིག་ཡོད་དེ་ལ་ཕུལ་གསུང་སྐད། དེ་ནས་རྡོ་རྗེ་གདན་དུ་བྱོན་ཙ་ན་རྒན་མོ་རལ་པ་སེ་ཤ་རེ་བ་གཅིག་ན་རེ། ང་ལ་བསྐུར་བའི་འགྲོན་བུ་ཚུར་ཐོང་གསུང། དེ་ལ་ཡང་ཡིད་ཀྱིས་ཕྱག་དང་དྲི་བ་མཛད་པས་ཀྱང་གོང་དང་མཐུན་པར་བྱུང། བོད་དུ་བྱོན་ན་ཕན་ཐོགས་པར་ལུང་བསྟན་པ་ན། ལུས་སྲོག་གི་བར་ཆད་དུ་འགྱུར་རམ་མི་འགྱུར་ཞུས་པས། ཚེ་ནི་བོད་དུ་བྱོན་ན་ཐུང་བར་འདུག་གསུང། ཇི་ཙམ་གྱིས་ཐུང་ཞུས་པས། བོད་དུ་མ་བྱོན་ན་དགུ་བཅུ་གོ་གཉིས་ཐུབ། ཕྱིན་ན་བདུན་ཅུ་རྩ་གསུམ་ལས་མི་ཐུབ་གསུང། དོན་ལ་ཉི་ཤུ་ཐམ་པས་ཐུང་དུ་སོང་བ་ཡིན་སྐད། དེའི་ཚེ་ཇོ་བོའི་ཐུགས་དགོངས་ལ་བོད་ལ་ཕན་ཐོགས་ན་ཚེ་ཐུང་ན་ཡང་ཐུང་སྟེ། ཚེ་ལ་མི་ལྟ་སྙམ་པའི་ཐུགས་སྟོབས་ཆེན་པོ་སྐྱེས་སོ། ། དེ་ནས་ཇོ་བོ་རྗེ་རྒྱ་གར་གྱི་དགེ་འདུན་གྱི་སྡེ་རྣམས་དང་སྦྱིན་བདག་རྣམས་ཀྱིས་བོད་དུ་བྱོན་ན་རྒྱ་གར་ཆོས་ཀྱི་འབྱུང་གནས་ཉམས་པར་འགྱུར་ཞེས་ཐམས་ཅད་ཀྱིས་མཐུན་པར་བཀག་ནས་བོད་དུ་འབྱོན་མི་འཇུག་པ་ལ། ཇོ་བོ་རྗེས་ཐབས་མཁས་ཀྱིས་བོད་དུ་འབྱོན་པའི་འཕྲོས་མེད་པར་རྡོ་རྗེ་གདན་སོགས་གནས་ཆེན་རྣམས་སུ་མཆོད་པ་རྒྱ་ཆེ་བ་རེ་བགྱིད་པ་ཡིན་གསུངས་ནས་གནས་རྣམས་སུ་ཕར་ཕེབས་ཚུར་ཕེབས་མཛད། ཇོ་བོ་འཇམ་དཔལ་རྡོ་རྗེ་སོགས་སྐུ་རྟེན་བྱིན་རླབས་ཅན་མང་པོ་དང་གསུང་རྟེན་གླེགས་བམ་མང་དུ་ཡོད་པ་རྣམས་འབྲོམ་ཆོས་ཀྱི་རྒྱལ་པོའི་ཐབས་མཁས་ཀྱི་སྤྲུལ་པ་ཚོང་པའི་རྣམ་པ་ཅན་ཞིག་གིས་སུས་ཀྱང་མ་ཚོར་བར་གདན་དྲངས། ཇོ་བོ་དཔོན་སློབ་རྣམས་རྒྱ་གར་ནས་ལྕགས་ཕོ་འབྲུག་གི་ ༡༠༤༠ མཇུག་ལ་ཕྱགས་བཏེག ། ལྕགས་མོ་སྤྲུལ་ལ་བལ་ཡུལ་དུ་ཕེབས། བལ་ཡུལ་གྱི་རྒྱལ་པོ་གྲགས་པ་མཐའ་ཡས་སོགས་སྡེ་དཔོན་རྣམས་དང་། པཎྜི་ཏ་རྣམས་ཀྱིས་གཙོས་དད་ལྡན་ཐམས་ཅད་ཀྱིས་གུས་པ་ཆེན་པོས་མཆོད་པའི་བྱེ་བྲག་སྣ་ཚོགས་པས་བསུས་ཤིང་གསོལ་བ་བཏབ་ནས་བལ་ཡུལ་དུ་ལོ་གཅིག་བཞུགས་ཏེ་ཆོས་ཀྱི་འཁོར་ལོ་རྒྱ་ཆེན་པོ་བསྐོར། ཐང་བྷི་ཧ་རའི་གཙུག་ལག་ཁང་བཞེངས་ཏེ་དགེ་འདུན་གྱི་སྡེ་བཙུགས། དེ་ནས་ཇོ་བོ་རྗེ་དཔོན་སློབ་རྣམས་ཀྱིས་བལ་པོ་རྫོང་དུ་ཕྱགས་ཕེབས་པ་ན་ལྷ་བཙུན་པའི་རྟ་པ་སུམ་བརྒྱ་ཙམ་བསུ་བ་ལ་གོས་དཀར་པོ་འབའ་ཞིག་གྱོན། རྒྱན་ཐམས་ཅད་ཀྱང་དཀར་པོ་འབའ་ཞིག་བྱས། བློན་པོ་ཆེན་པོ་ལྷའི་དབང་ཕྱུག་དང། ལྷའི་བློ་གྲོས་དང། ལྷའི་ཤེས་རབ་དང། ལྷའི་སྲིད་འཛིན་ཞེས་བྱ་བ་བཞི་ལ་དཔའ་བོ་དར་མདུང་དཀར་པོ་ཐོགས་པ་བཅུ་དྲུག་བཅུ་དྲུག་གིས་བསྐོར། གཞན་ཐམས་ཅད་ལ་ཡང་བ་དན་ཆུང་ངུ་རེ་དང། ཆུ་དར་གྱི་གདུགས་ཉི་ཤུ་དང། པི་ཝཾ་དང། གླིང་བུའི་སྒྲ་སྙན་འཁྲོལ་བ་དང། དཔོན་གཡོག་ཐམས་ཅད་ཀྱང་ངག་མཐུན་པར་དཀོན་མཆོག་གསུམ་ལ་སྐྱབས་འགྲོ་བྱེད་པ་དང། བོད་དུ་སངས་རྒྱས་ཀྱི་བསྟན་པ་དར་བར་འགྱུར་རོ་བྱ་བའི་ཁ་བརྡ་བཟང་པོ་བྱེད་པ་དང། ཨ་ཏི་ཤ་ལ་བདོ་བའི་ཕས་རྒོལ་ཐམས་ཅད་བདག་གིས་གཞོམ་པར་བྱའོ་ཞེས་དཔའ་བསྐྱེད་པ་དང། ཐམས་ཅད་རྟ་ལས་མི་འབབ་པར་གྲལ་སྒོར་མོར་བྱས་ཏེ། དབུས་སུ་ཨ་ཏི་ཤ་དཔོན་གཡོག་འཁོར་དང་བཅས་པ་རྣམས་བཅུག་ནས་མི་རྟ་ཐམས་ཅད་ཀྱི་མགོ་བོ་ནང་དུ་རུག་གིས་བསྟན། བློན་པོ་ཆེན་པོ་བཞིས་དབུས་སུ་འོངས། སྔོན་ཆོས་རྒྱལ་ཁྲི་སྲོང་ལྡེ་བཙན་གྱིས་མཁན་པོ་བོ་དྷི་སཏྭ་སྤྱན་དྲངས་པའི་དྲུང་དུ་བློན་པོ་རིག་པ་ཅན་རྣམས་ཀྱིས་ཟོར་མའི་གླུ་བླངས་པ་ལྟར་བློན་པོ་རྣམས་ཀྱིས་གླུ་བླངས་པ་ནི། ལོ་ཞེས་བྱ་བ་གྲག་སྟོང་སྙན་པའི་གླུ་དབྱངས་ལོ། ། ཞེས་སོགས་བཀྲ་ཤིས་པའི་གླུ་དབྱངས་མང་པོ་དང་བཅས་སྤྱན་དྲངས། ལོ་ཙཱ་བ་ཆེན་པོ་གུང་ཐང་པ་ལ་སོགས་པ་རབ་ཏུ་བྱུང་བའི་རྟ་བ་སུམ་ཅུ་རྩ་ལྔས་བསྐོར་བའི་དབུས་ན་ཆིབས་ཅང་ཤེས་མཐོང་སྨོན་ངང་བའི་སྟེང་ན་ཇོ་བོ་རྗེ་དཔལ་ལྡན་ཨ་ཏི་ཤ་ཁྲུ་གང་ཙམ་གྱིས་སྒ་ལ་མ་རེག་པར་མཛད་ནས་སྐུའི་དཀྱིལ་འཁོར་བབས་ཆགས་པ། མཛེས་པ། བལྟ་ན་སྡུག་པ། འཇིག་རྟེན་ལྷ་དང་བཅས་པས་མཆོད་པར་འོས་པ། འཇིག་རྟེན་མཁྱེན་ཅིང་སྐྱེས་བུ་འདུལ་བ་ཁ་ལོ་བསྒྱུར་བ་བླ་ན་མེད་པའི་ཞལ་འཛུམ་པ་དང་བཅས་པ། སཾ་སྐྲྀ་ཏའི་གསུང་འཁྲོལ་བ། རུས་པ་ཆགས་པ། ཚིག་གི་ལྷད་མེད་ལ་གསུང་གི་གདངས་སྙན་པ། གསུང་གི་ངར་ཆེ་ལ་དྲང་པོར་སྨྲ་བ་དེ་ཁྲོལ་མཛད་ནས། ཨེ་མ་ཧོ། ཨ་ཏི་ཨ་ཏི། ཕ་ལ་ཕ་ལ། ཕ་ལ་ཧོ་ཞེས་སོགས་སཾ་སྐྲྀ་ཏའི་སྐད་དུ་བཀྲ་ཤིས་མང་དུ་བརྗོད་པར་མཛད་ཅིང་རིམ་གྱིས་ཕེབས་ཏེ་གངས་རི་ཆེན་པོར་ཕེབས། གངས་རི་ཆེན་པོ་ལ་ཞབས་སྐོར་མཛད་པ་ན་གནས་བརྟན་ཆེན་པོ་ཡན་ལག་འབྱུང་འཁོར་དགྲ་བཅོམ་པ་རྣམས་དང་བཅས་གསོ་སྦྱོང་མཛད་པའི་གནྜིའི་སྒྲ་གསན་ཞིང་གནས་བརྟན་ཆེན་པོ་དང་དངོས་སུ་མཇལ་ནས་བཀའ་བགྲོ་བར་མཛད། མཚོ་མ་ཕམ་གྱི་འགྲམ་དུ་ཕེབས་ནས་ཆབ་གཏོར་མཛད་བའི་ཚེ་ཐུགས་རྗེ་ཆེན་པོའི་ཞལ་གཟིགས་ཤིང། ཀླུ་རྣམས་ཀྱིས་གུས་པས་མཆོད་པ་སོགས་ངོ་མཚར་ཡ་མཚན་ཆེ་བའི་རྣམ་ཐར་མང་དུ་མཆིས། ཕྱོགས་དེའི་དད་ལྡན་རྣམས་ལ་ཆོས་མང་དུ་གསུངས། དེ་ནས་རིམ་གྱིས་ཕེབས་ཏེ་གུ་གེ་མཐོ་ལྡིང་དུ་ཕེབས་སུ་ཉེ་བ་ན་ནག་ཚོ་ལོ་ཙཱ་བས་ལྷ་བླ་མ་བྱང་ཆུབ་འོད་ལ་རིང་པོར་མི་ཐོགས་པར་ཇོ་བོ་རྗེ་འཁོར་བཅས་མཐོ་ལྡིང་གསེར་གྱི་ལྷ་ཁང་དུ་འབྱོན་པར་ཡོད་པས་ཐུགས་དགྱེས་པར་ཞུ་ཞུས་པས་ལྷ་བཙུན་ཆེན་པོ་དགྱེས་པའི་མཐར་ཐུག་ནས། ངས་དད་གུས་མ་འོག་བར་གསོལ་བ་རྒྱུན་དུ་བཏབ་ནས་ཡུན་རིང་སོང་སྟེ་ལྷ་ཅིག་དང་མཇལ་བ་ཡིན་མདང་རྨི་ལམ་ན་ནུབ་ཕྱོགས་ནས་ཉི་མའི་དཀྱིལ་འཁོར་ཆེན་པོ་གཅིག་ཤར་བྱུང་བ་དང། ཤར་ཕྱོགས་ནས་ཟླ་བའི་དཀྱིལ་འཁོར་ཉ་གང་བ་འདྲ་བ་ཞིག་ཤར་ནས་བྱུང་བས། དེ་གཉིས་ལྷན་ཅིག་འཚོགས་མ་ཐག་སྤྲིན་དང་ཁུ་རྡུལ་ཐམས་ཅད་རང་སར་དེངས། སྐར་ཚོགས་ཐམས་ཅད་ནམ་གུང་བཞིན་དུ་གྲ་མ་ཉམས་པར་ཉི་ཟླ་གཉིས་ལ་འདུད་ཀྱིན་སྣང་བ་རྨིས། ད་ཟླ་བ་དེ་ང་ཡིན་སྙམ་ན་ཡང། ཤར་ཕྱོགས་མ་གི་ནས་བྱུང་བ་སུ་ཡིན་གང་ཡིན་ཆ་མེད་སུ་ཡིན་ཡང་དེས་གོ་ཆོད་པར་སྣང། རྨི་ལྟས་ཀྱང་ཤིན་ཏུ་བཟང་གསུངས། དེ་ནས་ཇོ་བོ་རྗེ་གཞིས་བྱེས་ཀྱི་རྟ་པ་ལྔ་བརྒྱ་ཙམ་གྱིས་བསྐོར་བའི་དབུས་ན་ཆིབས་མཐོང་སྨོན་རླུང་གཤོག་ལ་ཁྲུ་གང་ཙམ་མ་རེག་པར་ཉི་མའི་དཀྱིལ་འཁོར་ལྟར་ལྷམ་མེ། ཡེ་རེ། ལྷོད་དེ། ཤིག་གེ ། ཡར་བགྲེས་མ་དྲགས་པ། མར་གཞོན་མ་དྲགས་པ་དང་བ་འདྲེན་པའི་སྒང་དུ་གྱུར་བ། གཙང་ཆོས་ནས་འབྱུང་བ་བཞིན་དུ་པཎ་ཆེན་གྱི་དབུ་ཞྭ་ཤིན་ཏུ་མཛེས་པ་དེས་ནམ་མཁའི་མཐོངས་སྙེག་པ། དཔོན་སློབ་སུམ་ཅུ་རྩ་བཞི་པོ་ཐམས་ཅད་ལྟ་སྤྱོད་དང་ན་བཟའི་ཆ་ལུགས་ཁྱད་པར་མེད་ནའང། ཇོ་བོའི་ན་བཟའ་དེ་རྡོ་ཚོས་མ་སྣུམ་ཞིང་དྲི་ཞིམ་ལ་མདངས་ཆགས་པ། སྐུ་ཤ་ཆེ་བ་ལྟ་བུ་ལ་བརྗིད་ཆགས་པ། སྐུ་ལུས་དྲང་ཞིང་མཛེས་ལ་སྐབས་ཐམས་ཅད་ཕྱེད་པ། ཕྱག་དང་སོར་མོ་ཐམས་ཅད་ཟླུམ་ཞིང་རྒྱས་པ། བྱིན་གྱིས་ཕྲ་བ། དབུ་སྐྲ་གནག་ཅིང་སྣུམ་ལ་མཚམས་ཕྱེད་པ། དཔྲལ་བའི་དབྱེས་ཆེ་བ། ཐམས་ཅད་ནས་བལྟས་ཀྱང་འཛུམ་ཆགས་པ། སྨིན་མ་བཟང་ལ་མདངས་འབྲེལ་བ། སྣའི་གཟེངས་མཐོ་བ། ཞལ་གྱི་དཀྱུས་ལེགས་པ། མཆུའི་ཆག་ཐོན་པ། སྙན་ཤལ་རིང་ལ་མཛེས་པ། བག་དྲོ་བ། ཟིལ་ཆེ་བ། ཡང་དང་ཡང་དུ་ལྟ་སྙིང་འདོད་པ། དང་བ་འདྲེན་པའི་སྟོབས་ཀྱིས་བལྟས་ནས་མིག་སྡུད་མི་ཤེས་པ། གསུང་ཁྲོལ་ལ་སྙན་པ། གསུང་ཆེ་ལ་དྲང་བ། ལྡབས་ཀྱིན་མི་མཛད་པ། དམ་པའི་ཆོས་ཀྱི་གསུང་ཁོ་ནར་འབྱོན་པ། དད་པ་ཡེ་མེད་པ་དག་གིས་ཐོས་ཀྱང་དད་པ་གློ་བུར་དུ་སྐྱེ་ཞིང་རྒྱུད་དུལ་ཏེ་འགྲོ་བ། ཕྱོགས་ག་ནས་བལྟས་ཀྱང་སངས་རྒྱས་བཅོམ་ལྡན་འདས་ཀྱི་དྲུང་དུ་ལྷ་དང་བཅས་པའི་འཇིག་རྟེན་གྱིས་འདུད་པ་ལྟར་ལྷམ་མེ་ལྷན་ནེ་བསམ་གྱིས་མི་ཁྱབ་པའི་རྣམ་ཐར་དང་ལྡན་པ་ཅིག་སྣང་བ་དེ་སྐྱེ་བོའི་ཚོགས་སུས་མཐོང་ཡང་མཐོང་མ་ཐག་ཏུ་སྐྱབས་སུ་མཆིའོ། ། ཞེས་ལན་གསུམ་གསུམ་ཐམས་ཅད་ཀྱི་ཁ་ནས་འབྱུང་ཞིང་གཅིག་གིས་གཅིག་ལ་སྟོན་ཅིང་ཙག་སྒྲ་དི་རི་བྱས་ནས་ངོ་མཚར་ཆེ་འདི་ནི་མི་རང་ག་བ་མིན། སངས་རྒྱས་བཅོམ་ལྡན་འདས་སམ་དེ་ཡིན་ལ་ཆེ་ཟེར་ཞིང་ཐམས་ཅད་རང་ས་ནས་ཤེས་པ་གཟུང་རྒྱུ་མེད་པ་སྐད་ཆེན་པོས་འབོད་དེ། སྐྱབས་སུ་མཆིའོ། ། སངས་རྒྱས་བཅོམ་ལྡན་འདས་རྒྱ་གར་ཆོས་ཀྱི་རྒྱལ་པོ་པཎ་ཆེན་ལྔ་བཅུ་རྩ་གཉིས་ཀྱི་གཙུག་གི་ནོར་བུ་རིན་པོ་ཆེ། མགོན་པོ་ཨ་ཏི་ཤ་སངས་རྒྱས་བསྟན་པའི་བདག་པོ། བདག་ཅག་བོད་ཀྱི་སེམས་ཅན་ལས་ངན་ཅན་རྣམས་ལ་ཐུགས་རྗེས་གཟིགས་ཤིག ། ཁྱོད་ཀྱི་ཕྱོགས་སུ་དཀའ་ལས་བྱེད་པ་ལྷ་ཁུ་དཔོན་ཤིན་ཏུ་བདེན་པར་སྣང་ངོ་། ། བོད་ཀྱི་མི་ནོར་ཐམས་ཅད་ཟད་ཀྱང་འགྱོད་པ་མ་མཆིས་སོ། ། ཁྱེད་གདན་འདྲེན་པ་ལ་དཀའ་ལས་ཆེན་པོ་འོང་བ་རེ་བདེན། ད་ནི་འཇིག་རྟེན་གྱི་མགོན་པོ་བོད་དུ་བྱོན་ནོ། ། ཞེས་ཐམས་ཅད་དད་པས་ཕྱོགས་གཅིག་ཏུ་འུར་བ་དང། མགོན་པོ་ཨ་ཏི་ཤ་ཡང་ཤིན་ཏུ་མཉེས་ནས་བོད་ཀྱི་སེམས་ཅན་རྣམས་ཁོ་བོ་ལ་འདི་ལྟར་དད་པ་ཆེ་བ། བླ་མ་སངས་རྒྱས་བསྟན་པའི་བདག་པོ་ཐམས་ཅད་ཐེག་པ་ཆེན་པོའི་རིགས་ཅན། ཨེ་མ་ཕན་བདེའི་འབྱུང་གནས་དཀོན་མཆོག་གསུམ། ངའི་གདུལ་བྱ་རྣམས་ལ་ཐུགས་རྗེས་ཟུངས་ཤིག་གསུངས་ནས་ཁྲོམ་ཐམས་ཅད་ལ་གཟིགས་ཤིང་བྱིན་བརླབས་མཛད། ལྷ་བླ་མའི་ཨ་ཎི་ལྷ་ཅིག་ཆོས་འབུམ་གྱིས་ཇོ་བོའི་ཞལ་གྱི་དཀྱིལ་འཁོར་ལ་བལྟས་ཏེ་ཐལ་མོ་སྦྱར་ནས་མཁས་པ་འདིའི་ཕྱོགས་སུ་ངའི་མིང་པོ་གསེར་གྱི་རི་རབ་འདྲ་བ་ཅིག་གཤེགས་ཏེ། ང་སེམས་མི་ཁྲལ། མྱ་མི་ངན། མིང་པོ་དེའི་སྲོག་དང་པཎྜི་ཏ་འདི་བརྗེས་པ་ཡིན་ཏེ། བལ་པོ་ན་ཧ་སུ། མངའ་རིས་ན་རིན་བཟང། ཕྱོགས་ནས་ང་ཆེ་ཟེར་བ་རྣམས་ལ་ངོམ་པ་ཡིན། ངའི་ཚ་བོ་འདི་སྲིན་བུ་འདྲ་བ་ཞིག་བསྐྱངས་པས་ད་ལྟ་སའི་བདག་པོ་སྙིང་རུས་ཆེ་ལ་སྐབས་དོན་ཡོད་པ་འདི་འདྲ་ཞིག་བྱུང་ཟེར་ནས་ལྷ་བླ་མའི་མྱ་ངན་རིས་ནོན་པ་ཙམ་ཡོད་པ་སངས་པར་བྱས། མགུལ་གཡུ་གསེར་སྲང་ལྔ་བཅུ་རི་བ་ཞིག་ཡོད་པ་དེ་མགོན་པོ་ཨ་ཏི་ཤའི་ཕྱག་ཏུ་ཕུལ་ནས། ཐལ་མོ་སྦྱར་ནས་འདི་སྐད་ཟེར། མགོན་པོ་ཨ་ཏི་ཤ་གཡུ་རྡོག་འདི་མཆོད་པར་བཞེས་ལ་ཞུ་བ་འདི་གསོན་དང། ངའི་མིང་པོ་ལྷ་བླ་མ་ཡེ་ཤེས་འོད་བྱ་བ་དེ་མེས་པོ་ཆོས་ཀྱི་རྒྱལ་པོ་དེ་རྣམས་ཀྱི་ཆོས་ཀྱི་རྣམ་སྲོལ་སྙེག་པ་དང། སྙིགས་མའི་དུས་འདིར་སངས་རྒྱས་ཀྱི་བསྟན་པ་ལ་ལུས་ལོངས་སྤྱོད་དགེ་བའི་རྩ་བ་རྣམས་ལ་སྤྲུགས་པས། ཁྱེད་ལྟ་བུའི་བླ་མ་དཀོན་མཆོག་ཐུགས་རྗེ་ཆེན་པོ་དང་ལྡན་པ་རྣམས་ཀྱི་ཐུགས་རྗེའི་གོ་བར་ནས་སྙིང་སྟོབས་ཅན་དེ་མི་འདོད་པའི་ལག་ཏུ་ཤོར། ད་ནི་མིང་པོ་དེའི་ཚབ་མ་ཁྱེད་ལ་ཞུ་བ་ལགས་པས་སྐྱེ་བོ་ངན་པ་རྣམས་ཀྱི་ལོག་རྟོག་ངན་པ་གཅིག་པུ་སྦྱང་བའི་ཆེད་དུ་ཡང་བོད་དུ་ཡུན་བསྲིངས་ནས་རྒྱུན་དུ་བཞུགས་པ་ཞུ་འཚལ་ཞེས་གསོལ་བ་བཏབ། དེ་ནས་ཇོ་བོ་རྗེས་མཐོ་ལྟིང་གསེར་གྱི་ལྷ་ཁང་དུ་ཕེབས། ལྷ་བླ་མས་ཕེབས་སྟོན་རྒྱ་ཆེན་པོ་མཛད། ལོ་ཆེན་རིན་ཆེན་བཟང་པོས་ཀྱང་རང་གི་གནས་གཙུག་ལག་ཁང་དུ་སྤྱན་དྲངས། མཆོད་པའི་དངོས་པོ་ཚད་མེད་པས་མཆོད། དབུ་མ་སྣང་བ་སོགས་ཆོས་མཐའ་ཡས་པ་གསན་ཞིང། ལྷག་པར་བདེ་མཆོག་གི་དབང་དང་རྗེ་བཙུན་མའི་བྱིན་རླབས་གཉིས་ཞུས། བྱིན་རླབས་ཐོབ་པ་དང་རྟོགས་པ་དང་ཉམས་བཟང་པོ་སྐྱེས། དཔེ་དང་མཆོད་གནས་མ་གཏོགས་པ་ནོར་དངོས་པོ་ཅི་ཡོད་ཇོ་བོ་ལ་ཕུལ་ནས། ཇོ་བོའི་བདེ་མཆོག་དང་རྗེ་བཙུན་མ་ལ་ཐུགས་དམ་གྱི་མཐིལ་མཛད། ཇོ་བོའི་ཞལ་ནས། ངའི་ལོ་ཙཱ་ལ་འགྲོ་དགོས་གསུངས་པས། ལོ་ཙཱ་བས་དབུ་བསྟན་ཏེ། མགོ་བོ་དཀར་པོ་འདི་བཞིན་དུ་སོང་བས་ཁོ་བོ་སྒྲུབ་པ་ཅིག་བྱེད་པར་ཞུ་བ་ཕུལ་བས། ཀྭ་ཡེ་རིན་ཆེན་བཟང་པོ་ཁྱོད་སྒྲུབ་པ་གཤའ་མ་ཅིག་བྱེད་ན་སྐྱེ་བ་སྔ་མ་ཕན་ཆད་ཀྱི་དགེ་བའི་ཆོས། དཔག་ཏུ་མེད་པའི་མཐུ་ནི་ཡོད། དལ་འབྱོར་གྱི་མི་ལུས་རིན་པོ་ཆེ་ཐོབ་པར་དཀའ་བ་ནི་ཐོབ། སངས་རྒྱས་ཀྱི་བསྟན་པ་དང་ནི་ཕྲད། དེ་སྟོན་པའི་དགེ་བའི་བཤེས་གཉེན་དང་ནི་མཇལ། སྲིད་པའི་ནད་རབ་ཏུ་ཞི་བར་བྱེད་པ་དམ་པའི་ཆོས་ཀྱི་བདུད་རྩིའི་སྨན་ནི་རྙེད། གཏི་མུག་གི་མུན་པ་སེལ་བར་བྱེད་པ་དམ་པའི་ཆོས་ཀྱི་སྒྲོན་མེ་དང་ནི་ཕྲད། སྲིད་པའི་ཆུ་བོ་ལས་སྒྲོལ་བའི་ཐབས་ཤེས་ཀྱི་གྲུ་གཟིངས་རྙེད་པའི་སྐབས་འདིར། སེམས་བྱ་བ་ངན་པ་རྣམས་ཀྱིས་མ་གཡེངས་པར་མཛོད་ཅིག་གསུངས། ལོ་ཆེན་རིན་ཆེན་བཟང་པོས་ཇོ་བོའི་ཞལ་གདམས་དེ་ཐུགས་ལ་བཞག་ནས་སྒྲུབ་ཁང་གི་སྒོ་ལ་ལྕགས་གཟེར་བཏབ་ནས་ཆོས་སྟོན་བུག་པ་གཅིག་ནས་ཚུར་བླངས། སྒོའི་ཡ་ཐེམ་ལ་གནས་ཁང་འདིའི་ནང་དུ་ཐ་མལ་པའི་རྟོག་པ་སྐྱེས་ན་ཆོས་སྐྱོང་བའི་སྲུང་མ་རྣམས་ཀྱིས་མགོ་བོ་ཁོས་བྱ་བ་བྲིས་ནས་ཇོ་བོ་ཐེགས་རྗེས་ལོ་བཅུའི་བར་དུ་སྒྲུབ་པ་རྩེ་གཅིག་ཏུ་མཛད་པས། བདེ་མཆོག་གི་དཀྱིལ་འཁོར་མངོན་སུམ་དུ་གཟིགས་སོ། ། དེ་ནས་ལྷ་བླ་མ་བྱང་ཆུབ་འོད་ཀྱིས་ཇོ་བོ་རྗེ་ལ་གསོལ་བ་འདི་ལྟར་བཏབ་སྟེ་བྱང་ཕྱོགས་ཁ་བ་ཅན་གྱི་ལྗོངས་འདིར་སྔོན་དུས་ཆོས་རྒྱལ་མེས་དབོན་རྣམ་གསུམ་གྱིས་དཀའ་བ་བརྒྱ་ཕྲག་དུ་མའི་སྒོ་ནས་སངས་རྒྱས་ཀྱི་བསྟན་པ་བཙུགས་ལུགས། དེ་ནས་གླང་དར་གྱིས་བསྟན་པ་བསྣུབས་ལུགས། དེ་ནས་རང་གི་ཡབ་མེས་མངའ་རིས་ཆོས་རྒྱལ་རྣམས་ཀྱིས་ལུས་སྲོག་ཁྱད་དུ་བསད་ནས་བོད་འདིར་སངས་རྒྱས་ཀྱི་བསྟན་པ་བཙུགས་ཀྱང་ལོག་པར་སྨྲ་བ་མང་པོས་བསྟན་པ་ཆལ་ཆོལ་དུ་སོང་ཚུལ་སོགས་སྤྱན་མཆི་མ་འཁྲུག་བཞིན་དུ་ཞིབ་ཏུ་ཞུས་ནས་ད་ཇོ་བོ་ཐུགས་རྗེ་ཅན་ཁྱོད་ཀྱིས་བོད་ཀྱི་གདུལ་བྱ་དམུ་རྒོད་ཅན་འདི་རྣམས་ལ་ཆོས་ཟབ་ཟབ་མོ་དང། མཚར་མཚར་པོ་མི་འཚལ་གྱི་ལས་རྒྱུ་འབྲས་ཀྱི་ཆོས་ཀྱིས་བསྐྱང་བར་ཞུ། ལྷག་པར་རྒྱལ་བའི་གསུང་རབ་དགོངས་འགྲེལ་དང་བཅས་པ་ཐམས་ཅད་ཧྲིལ་གྱིས་དྲིལ་བ་ཉམས་སུ་བླང་བདེ་བ་བོད་སྤྱི་ལ་ཕན་པའི་ཆོས་ཞིག་ཐུགས་རྗེས་འཛིན་པ་ཞུ། ཞེས་ཞུས་པས་ཞུ་བ་དེ་ལ་ཇོ་བོ་རྗེ་ཤིན་ཏུ་དགྱེས་ནས། དུས་གསུམ་རྒྱལ་བ་ཐམས་ཅད་དག་དང་དེ་ཡི་ཆོས། ། དགེ་འདུན་རྣམས་ལ་གུས་པ་ཆེན་པོས་ཕྱག་བྱས་ཏེ། ། སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས། ། བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། ། ཞེས་སོགས་བྱང་ཆུབ་ལམ་གྱི་སྒྲོན་མ་མཛད། ཇོ་བོས་མངའ་རིས་གུ་གེར་བྱང་ཆུབ་ལམ་གྱི་སྒྲོན་མ་མཛད་པ་ན་ཇོ་བོའི་ཐུགས་བསྐྱེད་ལྷག་པར་བཟང་བའི་མཐུས། ཇི་ལྟར་ཉི་མ་ཤར་བ་ན། འུག་པ་དང་སྲིན་བྱ་སོགས་འབྱུང་པོའི་བྱ་རྣམས་སྒྲ་མི་གྲག་པར་རང་རང་གི་ཁུང་བུར་ཡིབ་པ་ཇི་ལྟ་བར་རྩིད་སྤྱོད་ཅན་མཐའ་དག་རེ་ཤིག་ནུབ་པ་ཞིག་བྱུང་ཞེས་སྔོན་གྱི་མཁས་པ་རྣམས་གཏམ་དུ་གླེང་ངོ་། ། དེ་ནས་ཇོ་བོ་རྗེ་ཉིད་བོད་དབུས་གཙང་གི་མཐིལ་དུ་ཕེབས་ནས་རྒྱལ་བའི་བསྟན་པ་རྒྱ་ཆེར་སྤེལ་བར་བཞེད་ཅིང་དོན་དེ་ལྟར་དུ་ངེས་མོད་ཀྱང། ཇོ་བོ་རྒྱ་གར་ནས་འབྱོན་དུས་བི་ཀ་མ་ལ་ཤཱི་ལའི་གནས་བརྟན་གྱིས་ནག་ཚོ་ལོ་ཙཱ་བ་ལ་འཕགས་ཡུལ་གྱི་བསྟན་པའི་བདག་པོ་ཇོ་བོ་རྗེ་འདི་བོད་དུ་རྒྱུན་རིང་བཞུགས་མི་ཆོག་པས་ལོ་གསུམ་གྱི་ཁོངས་སུ་ཚུར་བསྐྱེལ་ཐུབ་པ་བགྱི་དགོས། དེ་ལྟར་མ་བྱས་ན་ལོ་ཙཱ་བ་ཁྱོད་ཀྱི་ཆོས་དམ་ཚིག་གི་འབྲེལ་པ་ཉམས་སོ་ཞེས་དམ་ཚིག་ལ་བཀར་ཏེ་ལོ་ཙཱ་བས་ཁས་ལེན་བྱེད་དགོས་བྱུང་བས། ལོ་ཙཱ་བས་རྒྱ་གར་དུ་ད་འབྱོན་དགོས་ཞེས་བསྐུལ། ཇོ་བོས་ཀྱང་འབྱོན་པ་ལྟར་བྱས་ཏེ་པུ་ཧྲེང་དུ་ཕེབས། ཇོ་བོ་ལ་སྔར་ནས་རྗེ་བཙུན་སྒྲོལ་མས་བོད་དུ་དགེ་བསྙེན་ཆེན་པོ་ཞིག་ལ་བརྟེན་ནས་བསྟན་པ་ལ་ཕན་པ་རྒྱ་ཆེན་པོ་འོང་ཞེས་ཡང་དང་ཡང་དུ་གསུངས་ཤིང། དེ་སྐབས་ཀྱང་དགེ་བསྙེན་མྱུར་དུ་འོང་ཞེས་ཡང་ཡང་གསུང་བས་ཇོ་བོ་རྗེས་ཉིན་ལྟར་བྱ་ར་མཛད་ཅིང། ངའི་ཨུ་པ་སི་ཀ་མ་བྱུང་ཏཱ་རེ་བརྫུན་ནི་ཅང་གསུང་ངམ་ཞེས་གསུང་བར་མཛད། ཉིན་གཅིག་སྦྱིན་བདག་ཅིག་གིས་ཇོ་བོ་གདན་དྲངས་པའི་ཤུལ་དུ་འབྲོམ་རིན་པོ་ཆེ་ཕེབས་ཇོ་བོའི་གཟིམ་ཁང་དུ་ཕེབས་པ་ན། ཇོ་བོ་ད་ལྟ་སྦྱིན་བདག་ཞིག་གིས་གདན་དྲངས་སོང་བས་ད་ལྟ་ཕེབས་ཡོང་ཞེས་བརྗོད་པ་ན། འབྲོམ་རིན་པོ་ཆེས་ང་ཐེག་པ་ཆེན་པོའི་དགེ་བའི་བཤེས་གཉེན་དང་མཇལ་བ་སྐད་ཅིག་མ་སྔ་ཕྱི་ལའང་སྔ་མ་འདམ་པས་སྒུག་མི་ཐུབ་གར་བཞུགས་ཀྱི་སར་འགྲོ་ཞེས་ཕེབས་པས་སྲང་བར་ཞིག་ཏུ་མཇལ། འབྲོམ་རིན་པོ་ཆེས་བརྐྱང་ཕྱག་མཛད་དེ་ཇོ་བོའི་སྐུ་མདུན་དུ་ཕེབས་པ་ན་ཇོ་བོ་རྗེས་འབྲོམ་གྱི་དབུ་ཐོག་ཏུ་ཕྱག་བཞག་ནས་སཾ་སྐྲྀ་ཏའི་སྐད་དུ་ཤིས་བརྗོད་མང་དུ་མཛད། དེ་ཉིན་སྦྱིན་བདག་དེ་ལ་ངའི་ཨུ་པ་སི་ཀའི་སྐལ་བ་དགོས་ཞེས་བསྣམས་ནས་ཡོད་པ་དེ་གནང། ཇོ་བོ་རྗེ་ནི་སྐུ་ཚེ་ཧྲིལ་པོ་ཤ་མི་བཞེས་པར་དཀར་སྔོར་མཛད་པ་ཡིན་པས་དེ་ཉིན་གྱི་སྟོན་སྐལ་དེ་ལ་ཟན་དང་མར་སྦྲགས་ནས་ཡོད་པ་འབྲོམ་གྱིས་ཟན་དེ་བཞེས་མར་དེ་མ་བཞེས་པར་མར་མེ་ཀོང་བུ་མཚན་ཐུབ་ཅིག་བཟོས་ནས་ཇོ་བོའི་དབུ་སྔས་སུ་ཕུལ། དེ་ནས་བཟུང་སྟེ་སྐུ་ཚེ་ཧྲིལ་པོ་ཇོ་བོའི་དབུས་སྔས་སུ་མར་མེ་མཚན་ཐུབ་རྒྱུན་མ་ཆད་པ་ཕུལ་བ་ཡིན་གསུང། ཇོ་བོས་འབྲོམ་ཕེབས་པ་མཁྱེན་ནས་བུམ་པ་བསྒྲུབས་ཟིན་པས་མཇལ་བའི་ནུབ་མོ་དེ་རང་འབྲོམ་རིན་པོ་ཆེ་ལ་དབང་བསྐུར་སྲས་ཀྱི་ཐུ་བོར་བཟུང་ངོ་། ། དེ་ནས་པུ་ཧྲེང་ནས་རིམ་གྱིས་ཕེབས་ཏེ་མང་ཡུལ་སྐྱིད་གྲོང་དུ་ཕེབས། དེའི་ཚེ་ཇོ་བོ་རྗེ་ཉིད་ཀྱི་ཐུགས་བསྐྱེད་དང་བོད་ཀྱི་གདུལ་བྱ་རྣམས་ཀྱི་བསོད་ནམས་ཀྱིས་ཇོ་བོ་རྗེ་སྐྱིད་གྲོང་ནས་པལ་པོ་རྫོང་བརྒྱུད་དེ་རྒྱ་གར་ལ་གདན་འདྲེན་རྩིས་བྱས་ཀྱང་བལ་པོ་རྫོང་དུ་དུས་འཁྲུག་ལངས་པས་དམག་ཟིངས་ཆེན་པོས་ལམ་འགགས་ནས་སྐྱིད་གྲོང་དུ་ལོ་གཅིག་བཞུགས། འབྲོམ་རིན་པོ་ཆེས་ཐབས་མཁས་ཀྱིས་ཇོ་བོའི་སྙན་དུ་བོད་ན་སྐུ་གསུང་ཐུགས་རྟེན་མཐའ་ཡས་པ་ཡོད་ཚུལ་དང་དགེ་འདུན་གྱི་སྡེ་མང་པོ་ཆགས་ཏེ་དགེ་འདུན་སྟོང་ཕྲག་མང་པོ་ཡོད་ཚུལ་སོགས་ཞུས་པ་ན་ཇོ་བོ་དགྱེས་ནས་བོད་ལ་ཞལ་གཟིགས་ཏེ་ཕྱག་ཐལ་མོ་སྦྱར་དགེ་འདུན་དེ་སྙེད་བཞུགས་ན་དགྲ་བཅོམ་པ་ཡང་ཡོད་ངེས། བྱང་ཆུབ་སེམས་དཔའ་ཡང་མང་པོ་ཡོད་དུ་ངེས་གསུང་ནས་མཉེས་མཉེས་མཛད། བོད་དུ་འབྱོན་པར་བཞེད་པ་ན་འབྲོམ་རིན་པོ་ཆེས་དབུས་ཕྱོགས་ཀྱི་དགེ་འདུན་གྱི་སྡེ་རྣམས་སུ་འཕྲིན་ཡིག་བརྫངས་ཏེ། དེའི་ཚེ་དབུས་ན་བསྟན་པའི་ཁུར་བཞེས་པའི་བཤེས་གཉེན་ཆེ་བ་རྔོག་ལེགས་པའི་ཤེས་རབ་དང་། ཁུ་སྟོན་བརྩོན་འགྲུས་གཡུང་དྲུང་སོགས་མང་དུ་བཞུགས་ཡོད་ཀྱང་ཞུ་ཡིག་གི་གཉེར་ཁ་ཀ་བ་ཤཱཀྱ་དབང་ཕྱུག་ལ་གཏད་དེ་བོད་ཀྱི་བླ་ཆེན་མི་ཆེན་རྣམས་ཀྱིས་ཇོ་བོ་ཨ་ཏི་ཤ་གདན་འདྲེན་པར་སྟོན་དུས་ཚུན་ལ་འབྱོར་པ་ཅིས་ཀྱང་མཛོད་ཅེས་ཞུ་འཕྲིན་ཕུལ་བ་དགེ་བཤེས་ཀ་བས་བོད་ཀྱི་བླ་ཆེན་རྣམས་ལ་བརྡ་བྱས་ཏེ་ཐམས་ཅད་བློ་མཐུན་པར་མང་ཡུལ་སྐྱིད་གྲོང་ཕྱོགས་སུ་ཇོ་བོ་གདན་འདྲེན་དུ་འབྱོན་པའི་གྲབས་བྱས་པ་ན། ཁུ་སྟོན་གྱིས་སོགས་ཁོངས་སུ་འཇོག་པའི་མི་དེ་ང་མིན་ངས་སྔོན་ལ་ཕྱིན་ནས་ཇོ་བོ་གདན་འདྲེན་ཐུབ་པ་ཞིག་བྱེད་གསུངས་ནས་སྔོན་ལ་ཕེབས་པ་ན་གཞན་ཐམས་ཅད་ལ་ལྕག་བཏབ་པ་ལྟར་ཐམས་ཅད་འུར་ལངས་ཀྱིས་འཕྲལ་དུ་ཐོན་ཏེ་ཕེབས་བསུ་ལ་འཛོམ། ཇོ་བོ་རྗེས་སྐྱིད་གྲོང་དུ་ལོ་གཅིག་བཞུགས་རིང་དེ་ལ་གཙོ་བོར་རང་བྱུང་འཕགས་པའི་ལྷ་ཁང་དུ་སྐལ་བ་དང་ལྡན་པ་མང་པོ་ལ་ཆོས་ཀྱི་འཁོར་ལོ་བསྐོར། རང་བྱུང་འཕགས་པའི་བྱང་རི་ནགས་ཁྲོད་ཕུན་སུམ་ཚོགས་པ་ཞིག་ཡོད་པའི་ངོས་ལ་ཕེབས་ཏེ་གནས་དེར་སངས་རྒྱས་ཀྱི་བསྟན་པ་དར་བའི་རྟེན་འབྲེལ་བསྒྲིགས། ཇོ་བོས་གནས་དེར་བྱོན་ནས་བྱིན་གྱིས་བརླབས་སོ་ཞེས་ཕྱི་མའི་སྐྱེ་བོ་རྣམས་ལ་སྣང་བར་བྱ་བའི་ཕྱིར་རྡོ་ལ་ཕྱག་མཛུབ་ཀྱིས་མ་ཎི་བྲིས་ཏེ་བཞག་པས་གནས་དེ་ལ་མ་ཎི་ལ་ཁ་ཞེས་མིང་ཆགས། གནས་དེ་ནི་དེང་སང་བཀྲ་ཤིས་བསམ་གཏན་གླིང་གི་སྒྲུབ་སྡེ་ཆགས་པའི་གནས་འདི་ཡིན་ཏེ། མ་ཎི་ཇོ་བོའི་ཕྱག་བྲིས་མ་དེ་ནི་དེང་སང་ཡང་བལྟར་ཡོད་དོ། ། དེ་ལོ་ཇོ་བོས་དབྱར་གནས་མཛད་པའི་ས་དེ་ལ་གནས་ཞེས་མིང་དུ་ཆགས། དེར་ཇོ་བོས་སྐལ་བ་དང་ལྡན་པ་མང་པོ་ལ་ཆོས་སྟོན་པར་མཛད། ཡང་ཇོ་བོས་སྐལ་ལྡན་མང་པོ་ལ་ཆོས་འཁོར་རྒྱ་ཆེར་བསྐོར་བའི་གནས་ལ་ཆོས་འཁོར་ཞེས་མིང་ཆགས་ཏེ། དེང་སང་ཡང་གྲྭ་ཆོས་འཁོར་དང་ལ་ལྡེབས་ཆོས་འཁོར་ཞེས་མིང་དུ་ཆགས་ཤིང་ཡུལ་དེ་དང་དེ་དག་ན་གནས་པའི་སྐྱེ་བོ་རྣམས་ཇོ་བོ་རྗེ་ལ་གསོལ་བ་འདེབས་པ་ལྷུར་བྱེད་དོ། ། དེའི་ཚེ་ནག་ཚོ་ལོ་ཙཱ་བ་ཇོ་བོ་རྒྱ་གར་ལ་འཕྲལ་དུ་སྤྱན་འདྲེན་ནི་མ་ཐུབ། བི་ཀ་མ་ལ་ཤྲཱི་པའི་གནས་བརྟན་གྱིས་དམ་ཚིག་ལ་བཀར་བ་དྲན་ནས་ཡིད་སློང་སློང་པོར་གྱུར་བ་ན་ཇོ་བོ་རྗེས་མཁྱེན་ནས། ལོ་ཙཱ་བ་དེ་ཙམ་གྱི་སེམས་ངལ་བྱ་མི་དགོས་སྒྲུབ་པར་མ་ནུས་པ་ལ་ཉེས་པ་མེད་གསུངས་པ་ན། ལོ་ཙཱ་བ་གཏིང་ཐག་པ་ནས་དགའ་ཞིང་མགུ་སྟེ་དེ་ལྟར་ན་ཇོ་བོ་བོད་ལ་འབྱོན་པར་ཞུ་ཞེས་གསོལ་བ་བཏབ། དེ་ནས་དབུས་གཙང་གི་བླ་ཆེན་མི་ཆེན་རྣམས་ཀྱི་བསུ་བ་སླེབས། དེའི་ཚེ་བོད་ཀྱི་བླ་མ་ཆེན་པོ་རྣམས་ཀྱིས་བོད་ཀྱི་གཟབ་འཕྱོར་གྱི་ཆས་བསེ་ཐེབ་དང་རྟ་ཕྱིང་གྱོན་རྟ་བཟང་པོ་ལ་ཆིབས་ནས་འོངས་པ་ན་ཇོ་བོས་རྐྱང་རིང་པོ་ནས་གཟིགས་མ་ཐག ། ཨུ་པ་སི་ཀ་འདྲེ་མང་པོ་སླེབས་བྱུང་ཅི་ཡིན་ཞེས་དབུ་ན་བཟས་གཏུམས་ནས་བཞུགས། དེ་ནས་འབྲོམ་རིན་པོ་ཆེས་བོད་ཀྱི་བླ་ཆེན་རྣམས་ལ་རབ་བྱུང་གི་ཆས་རྣ་དག་མཛད་ནས་བྱོན་ཞེས་ཞུས་ནས་ཐམས་ཅད་ཀྱིས་ཆོས་གོས་རྣམ་པ་གསུམ་ལེགས་པར་བགོས་ཏེ་ཕེབས་པ་ན་ཇོ་བོ་མཉེས་ནས་བཞེངས་ཏེ་ཕྱག་ལན་མཛད། དེ་ནས་རིམ་གྱིས་གཙང་ཕྱོགས་ལ་ཕེབས་ཏེ་དཔལ་ཁུད་ཐང་དུ་མར་པ་ལོ་ཙཱ་རྒྱ་གར་དུ་བརྟིང་མ་ཕེབས་པ་དང་མཇལ། མར་པས་ཇོ་བོའི་ཞབས་སྤྱི་བོར་བླངས་ཏེ་ཆོས་ཞུས། ཇོ་བོས་ངའི་ལོ་ཙཱ་ལ་འགྲོ་གསུངས་པས། ད་རེས་ཅིས་ཀྱང་རྒྱ་གར་དུ་ཕྱིན་ཆོག་པ་དགོས་སླར་མཇལ་ཆོག་པ་ཞུ་ཞེས་ཞུས། དེ་ནས་རིམ་གྱིས་ཕེབས་ཏེ་ས་སྐྱའི་ཐད་དུ་ཕེབས་པ་ན། ས་སྐྱ་ལ་ཕྱག་མཛུབ་གཏད་དེ་གནས་འདིར་འཇམ་དབྱངས་ཀྱི་སྤྲུལ་པ་བདུན་འབྱུང་ཞེས་ལུང་བསྟན། དེ་ནས་རྒྱང་དུ་ཕེབས་གནས་དེའི་དགེ་འདུན་རྣམས་ལ་ཆོས་མང་དུ་གནང་། དེར་འབྲོག་མི་ལོ་ཙཱ་བས་ཇོ་བོའི་ཞབས་ལ་གཏུགས། བསྙེན་བཀུར་ཕུན་སུམ་ཚོགས་པ་མཛད། དེ་ནས་རིམ་གྱིས་ཕེབས་ཏེ་སྣར་ཐང་གི་ཐད་དུ་ཕེབས་པ་ན་གནས་འདིར་འཕགས་པའི་གནས་བརྟན་གྱི་སྤྲུལ་པ་འབྱུང་ཞེས་ལུང་བསྟན། དེ་ནས་ཚོང་དུས་སུ་ཕེབས་ཏེ་ཞ་ལུ་མཐིལ་གྱི་ལྷ་ཁང་དང་། ཁྱད་པར་རི་སྦུག་ཏུ་བཞུགས་ནས་ཆོས་མང་དུ་གསུངས་ཤིང་བྱིན་གྱིས་བརླབས། དེ་ནས་མྱང་སྟོད་ཉན་ཚོར་བྱོན་ནས་དབྱར་གནས་མཛད། དབྱར་ཟླ་བ་གསུམ་གྱི་རིང་ལ་ཕྱོགས་ཕྱོགས་ནས་འདུས་པའི་དད་ལྡན་མང་པོ་ལ་ཆོས་རྒྱ་ཆེར་སྩལ། ཡོལ་ཆོས་དབང་། ཡོལ་དྲང་སྲོང་། ཡོལ་ཐོག་འབེབས་གསུམ་དང་། རྗེ་འགོས་ལོས་ཀྱང་གནས་དེར་ཕེབས་ནས་ཇོ་བོའི་ཞབས་ལ་གཏུགས། དགེ་བའི་བཤེས་གཉེན་དགོན་པ་བས་ཀྱང་གནས་དེར་ཕེབས་ནས་ཇོ་བོའི་ཞབས་ལ་གཏུགས་ཏེ་ཇོ་བོའི་མཆོད་གནས་མཛད། དབྱར་གནས་གྲོལ་ནས་རོང་བརྒྱུད་དབུས་སུ་ཕེབས། གན་པ་བྱང་ཐང་དུ་ཕེབས་པ་ན་ལྷ་སའི་ཐད་ཀྱི་རི་ལ་ཕྱག་མཛུབ་གཏད་ནས་ཕ་གི་ན་ཅི་ཡོད་པ་ཡིན་གསུང་། ལྷ་སའི་གཙུག་ལག་ཁང་བདོག་པ་ལགས་ཞུས་པས། དེ་ཐད་འཇའི་གུར་གསུམ་བརྩེགས་འདུག ། ལྷའི་བུ་དང་བུ་མོ་མང་པོས་མཆོད་པ་བྱེད་ཀྱི་འདུག་གསུང་། དེ་ནས་ཆོས་འཁོར་བསམ་ཡས་སུ་ཕྱགས་ཕེབས། ལྷ་བཙུན་བོ་དྷི་རཱ་ཛས་ཞབས་ཏོག་ལེགས་པར་མཛད། བོད་ཀྱི་མི་ཆེན་མང་པོའང་འདུས་པ་ལ་ཆོས་རྒྱ་ཆེར་སྩལ། བསམ་ཡས་སུ་ཇོ་བོས་ལྷ་ཁང་ལ་ཐོགས་མེད་དུ་བྱོན་པ་དང་། ཞབས་ས་ལ་མ་རེག་པར་བསྐོར་བ་མཛད་པ་སོགས་རྫུ་འཕྲུལ་མང་པོ་བསྟན་ཏེ་ཕྱོགས་དེའི་གདུལ་བྱ་རྣམས་མི་ཕྱེད་པའི་དད་པ་ལ་བཀོད་དོ། ། དེ་ནས་ཁུ་སྟོན་གྱིས་ཡར་ཀླུངས་སུ་སྤྱན་དྲངས། ཐང་པོ་ཆེར་ར་ཁྲི་བཟང་བྱ་བས་བརྩིགས་པའི་ར་བརྩིགས་ཁང་བར་བཞུགས། ཆོས་མང་དུ་གསུངས། དེར་འབྲོམ་གྱིས་ཀྱང་སྤྱན་སྔར་བྱོན། ཁུས་ཞབས་ཏོག་བཟང་བ་ཁོ་ན་མ་བྱུང་བས། དཔོན་སློབ་རྣམས་བྲོས་ཏེ་མྱང་པོའི་གྲུ་ལ་ཞུགས་པ་ན། ཁུ་སྟོན་གྱིས་ཀྱང་རྗེས་བསྙེགས་སུ་སླེབས་ནས་ཨ་ཏི་ཤ་དེར་བཞུགས་ཞེས་སྐད་ཆེན་པོ་བཏང་། ཞུ་བ་བྱས་ཀྱང་མ་གསན་པར། དབུ་ཞྭ་ཕྱིར་བྱིན་རླབས་ཀྱི་རྟེན་དུ་འཕངས། དེ་ནས་འོན་གྱི་ལྷ་ཁང་ཀེ་རུར་ཟླ་བ་གཅིག་བཞུགས། དེའི་རྩིག་ངོས་ལ་ཉིད་ཀྱི་སྐུ་འདྲ་གཅིག་བྲི་བར་མཛད་དེ། དིང་སང་ཡང་མཆོད་པའི་གནས་སུ་གྱུར། དེ་ནས་བསམ་ཡས་སུ་ཕེབས་ནས་པེ་ཧར་གླིང་དུ་བཞུགས། རྒྱ་དཔེ་མང་པོ་འདུག་པ་གཟིགས་པས། ཤིན་ཏུ་དགྱེས་ཏེ་སྔོན་བོད་དུ་བསྟན་པ་བྱུང་བ་འདྲ་བ་རྒྱ་གར་དུ་ཡང་བྱུང་བ་དཀའ་གསུང་། བྱང་ཆུབ་ཆེན་པོ་གཟིགས་པས་མཧཱ་བོ་དྷི་དང་ཁྱད་མི་སྣང་གསུང་། གནས་དང་གཙུག་ལག་ཁང་ལ་ཐུགས་ཤིན་ཏུ་དགྱེས། དེ་ནས་བང་སྟོན་གྱི་བསུ་བ་རྟ་པ་ཉིས་བརྒྱ་ཙམ་སླེབས་ཏེ་དཔོན་གཡོག་རྣམས་རྒོད་དཀར་ལ་ལ་ཐེགས། སྲིའི་རྒྱ་ཕེབས་སུ་ཟླ་བ་ཕྱེད་བཞུགས། དེ་ནས་རྔོག་ལེགས་པའི་ཤེས་རབ་ཀྱིས་ལྷ་ས་འཕྲུལ་སྣང་དུ་སྤྱན་དྲངས། བསུ་བ་མཛད་པའི་དུས་སུ་ཇོ་བོ་ཐུགས་རྗེ་ཆེན་པོས་ཀྱང་བསུ་བ་མཛད་དེ། མི་རེང་སྐྱ་བོ་ཞིག་བྱུང་ནས། མཧཱ་པཎྜི་ཏ་བྱོན་པ་ལེགས་སོ། ། རྒྱལ་བར་གྱུར་ཅིག་གསུངས་ནས་བཞུད་པས། ཇོ་བོས་ཆིབས་ལས་བབས་ཏེ་བརྒྱུགས་པས་མ་ཟིན། དེ་ལྟར་མཛད་པ་ཅི་ལགས་ཞུས་པས། ཁྱེད་ཀྱིས་མི་རེང་སྐྱ་བོ་དེ་མཐོང་ངམ་གསུངས། མཐོང་ལགས་ཞུས་པས། དེ་ངའི་ཡི་དམ་ཐུགས་རྗེ་ཆེན་པོ་ཡིན། ཕྱག་བྱ་བར་འདོད་ནས་བརྒྱུགས་པས་མ་ཟིན་གསུང་། འཕྲུལ་སྣང་གི་ཐུགས་རྗེ་ཆེན་པོ་འདི་ལས་ངོ་མཚར་ཆེ་བ་མེད། ཐུགས་རྗེ་ཆེན་པོ་དངོས་ཡིན་གསུང་། ཇོ་བོ་ཤཱཀྱ་མུ་ནེ་གཟིགས་པས་སྤྲུལ་པའི་སྐུ་དངོས་ཡིན་གསུངས་ནས་རྒྱ་གར་གྱི་ལྷ་བཟོ་བ་མཁས་པ་གཅིག་ལ་འདི་ཁོ་ན་འདྲ་བ་ཞིག་བཞེངས་ཤིག་གསུངས་ནས་བཞེངས་སུ་བཅུག ། ཆོས་རྒྱལ་བྱང་ཆུབ་སེམས་དཔའ་དེས་སྤྲུལ་པའི་གཙུག་ལག་ཁང་ཆེན་པོ་འདི་ལྟ་བུ་བཞེངས་པའི་ལོ་རྒྱུས་ཤིག་འོང་ངམ་སྙམ་དུ་དགོངས་པའི་ཚེ། སྤྲང་མོ་སྨྱོན་མ་བྱ་བ་གཅིག་ན་རེ་གཙུག་ལག་ཁང་འདི་ཇི་ལྟར་བཞེངས་པའི་ལོ་རྒྱུས་འཚལ་ལམ་ཟེར། དེ་རང་བཞིན་གྱི་རྣལ་འབྱོར་མར་མཁྱེན་ནས་ཡིད་ཀྱིས་ཕྱག་དང་མཆོད་པ་བྱས་ནས་ཅིས་ཀྱང་འཚལ་ལགས་ཞུས་པས། འོ་ན་ཀ་བ་བུམ་པ་ཅན་ནས་འདོམ་ཕྱེད་དང་གསུམ་གཞལ་བའི་ས་ན་ཡོད། གཞན་ལ་མ་སྨྲ་ཞིག་གསུང་། དེ་ཇོ་བོས་རྙེད་པས་གཏེར་སྲུང་གཉན་པོ་ཞིག་འདུག་པ་ན་རེ། དེ་རིང་ཇི་ཙམ་ཟིན་པ་ཅིག་འདྲིར་གནང་གི་ཟེར་བས། རྣལ་འབྱོར་པས་དབུ་མཛད་སྟོན་པ་བཞི་གས་བྲིས་པས་ལྷག་བག་ཙམ་ཞིག་ལུས་གསུང་ངོ་། ། དོན་འདི་ལ་དགོངས་ནས་ཇོ་བོའི་བསྟོད་པ་སུམ་ཅུ་པ་ལས། གང་དུ་རྒྱལ་པོས་བཀའ་འཆེམས་གཏེར་དུ་སྦས། ། མཁའ་འགྲོས་གཏེར་ཁ་ཕྱེ་ནས་ཁྱོད་ལ་བསྟན། ། ཤཱཀྱ་མུ་ནེའི་འཇའ་ས་ཁྱོད་ཀྱི་དྲིན། ། ཇོ་བོ་བཀའ་དྲིན་ཅན་ལ་གསོལ་བ་འདེབས། ། ཞེས་གསུངས། ལྷ་སར་དགུན་གཅིག་བཞུགས། ཆོས་ཀྱང་དེར་གསུངས་པ་རྣམས་ཟབ། གཞན་ཡང་རྟགས་ཁྱད་པར་དུ་འཕགས་པ་མང་པོ་བྱུང་གསུང་། དེའི་དབྱར་རྡོག་བྱང་ཆུབ་འབྱུང་གནས་ཀྱིས་སྤྱན་དྲངས་ནས་ཡེར་པར་བཞུགས། འགྲོ་བའི་དོན་རྒྱ་ཆེར་མཛད། ཀ་བ་ཤཱཀྱ་དབང་ཕྱུག་གིས་འཕན་ཡུལ་དུ་སྤྱན་དྲངས། ལན་པ་སྤྱིལ་བུར་བཞུགས་ཆོས་མང་དུ་གསུངས། དེ་ནས་ཡེར་པར་བྱོན། དེའི་དུས་སུ་བང་སྟོན་གྱིས་སྤྱན་འདྲེན་བྱུང་སྟེ་ཕྱིར་ལམ་ལྷ་ས་བརྒྱུད་སྙེ་ཐང་དུ་ཕེབས། དེའི་ཚེ་འབྲོམ་རིན་པོ་ཆེས་དུས་གསུམ་གྱི་རྒྱལ་བ་ཀུན་གྱི་བགྲོད་པ་གཅིག་པའི་ལམ་པོ་ཆེ་ཤེས་རབ་ཀྱི་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེའི་དགོངས་དོན་བྱང་ཆུབ་ལམ་གྱི་རིམ་པའི་དཀའ་གནས་རྣམས་ལ་ཉིན་མཚན་ཀུན་ཏུ་དྲི་གཏུགས་ནར་མར་མཛད་ཅིང་། སངས་རྒྱས་འཇིག་རྟེན་དུ་བྱོན་པ་ཇི་ལྟ་བར་ལྷ་མི་བགྲང་བ་ལས་འདས་པ་ལ་ཆོས་ཀྱི་འཁོར་ལོ་རྒྱ་ཆེར་བསྐོར་བ་ན་དཀར་ཕྱོགས་ཀྱི་ལྷ་རྣམས་དགའ་ཞིང་མགུ་ནས་མཆོད་ཅིང་བསྙེན་བཀུར་བ་དང་། ཆེད་དུ་བརྗོད་པའི་དབྱངས་རྒྱ་ཆེར་བསྒྲགས་ཤིང་ལྷའི་དབང་པོ་བརྒྱ་བྱིན་གྱིས་རིན་པོ་ཆེ་སྣ་ལྔའི་མེ་ཏོག་གི་ཆར་པ་ཕབ་པ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ངོ་། ། དེ་ནས་ཡེར་པ་ལྷ་རི་སྙིང་པོའི་མགུལ་དུ་ཕེབས་ནས་ཇོ་བོ་ཡབ་སྲས་ཀྱིས་ལོ་གསུམ་གྱི་རིང་ལ་བྱང་ཆུབ་ལམ་གྱི་རིམ་པའི་དབུ་བཤེས་གཉེན་བསྟེན་ཚུལ་ནས་མཐར་འབྲས་བུ་ཟུང་འཇུག་གྲུབ་པའི་བར་གྱི་ས་ལམ་འབྲས་བུ་དང་བཅས་པའི་དཀའ་བའི་གནས་རྣམས་ལ་བརྒལ་ཞིང་བརྟག་པ་དང་ལུང་དང་རིགས་པས་མཐའ་གཅོད་པར་མཛད་ཅིང་། བྱང་ཆུབ་ལམ་གྱི་རིམ་པའི་སྙིང་པོའི་ཡང་སྙིང་པོ་བཀའ་གདམས་ལྷ་ཆོས་བདུན་ལྡན་གྱི་མན་ངག་གསང་བ་ལས་ཀྱང་ཆེས་ཆེར་གསང་བ། ཐིག་ལེ་བཅུ་དྲུག་གི་དབང་དང་གདམས་ངག་རྣམས་གནང་སྟེ། དེའི་ཚེ་རྗེ་བཙུན་སྒྲོལ་མའང་རྒྱུན་དུ་དངོས་སུ་བྱོན། རྒྱུད་པ་གསུམ་གྱི་བླ་མ་རྣམས་ཀྱང་དངོས་སུ་བྱོན་ཏེ་བླ་མ་ཡི་དམ་རྒྱལ་བ་སྲས་བཅས་ཞལ་འཛོམ་པའི་དབུས་སུ་རྗེ་བཙུན་མ་སྒྲོལ་མས་ཐིག་ལེ་བཅུ་དྲུག་གི་རྩ་ཚིག་གསུངས། འབྲོམ་རིན་པོ་ཆེའི་སྐུ་འོད་དུ་ཡལ་ཏེ་རྒྱལ་བ་རྒྱ་མཚོའི་དཀྱིལ་འཁོར་དུ་དངོས་སུ་བཞེངས། འོད་ཟེར་གྱི་སྤྲོ་བསྡུས་བསྐྱེད་རྫོགས་ཀྱི་ལམ་མཐར་ཐུག་པ་རྣམས་ཚུལ་འདི་ལྟར་རོ་ཞེས་མིག་ལ་སྟོན་པ་ལྟ་བུ་མཛད། དེའི་ཚེ་རྗེ་བཙུན་འཇམ་པའི་དབྱངས་ཀྱིས་བྱིན་གྱིས་བརླབས་པ་གསང་ཕུ་བ་ལེགས་པའི་ཤེས་རབ་ཀྱིས་ཇོ་བོ་ཡབ་སྲས་གཉིས་ལ་མཎྜལ་ཕུལ་ཏེ་ཡབ་སྲས་གཉིས་ཀའི་གསང་བ་ཐུན་མོང་མིན་པའི་བཀོད་པ་རྣམས་སྟོན་པར་ཡང་དང་ཡང་དུ་གསོལ་བ་བཏབ་པ་ན། འབྲོམ་རིན་པོ་ཆེའི་སྐྱེས་རབས་ཟབ་མོ་རྣམས་ཇོ་བོས་གསུངས། འབྲོམ་རིན་པོ་ཆེ་ཉིད་ཀྱིས་བཀའ་རྒྱ་ཤིན་ཏུ་དམ་པར་མཛད་པ་སྤྲུལ་པའི་གླེགས་བམ་ཞེས་པ་དེང་སང་བཀའ་གདམས་གླེགས་བམ་དུ་གྲགས་པ་འདི་གསུངས། མི་རབས་མང་པོའི་བར་དུ་ཆིག་བརྒྱུད་ཁོ་ན་ལས་རྒྱ་ཆེར་སྤེལ་བའི་གནང་བ་མ་ཐོབ། ཕྱིས་སུ་འབྲོམ་རིན་པོ་ཆེའི་སྤྲུལ་པ་འབྲོམ་ཀུ་མ་རས་བཀའ་རྒྱ་བཀྲོལ་ཏེ་རེ་གཉིས་ལ་སྤེལ། དེ་ནས་དཔལ་སྣར་ཐང་གི་ཆོས་སྡེར་རིམ་གྱིས་འཕེལ་ནས་དེང་སང་ཕྱོགས་ཐམས་ཅད་དུ་ཁྱབ་པ་འདི་བྱུང་བ་ཡིན་ནོ། ། དེ་ལྟར་ཇོ་བོ་རྗེ་དཔལ་ལྡན་ཨ་ཏི་ཤ་ནི་རྒྱ་བོད་ཐམས་ཅད་དུ་ཉི་ཟླ་ལྟར་གྲགས་ཤིང་བསྟན་འགྲོའི་དོན་མཛད་པའི་རྣམ་ཐར་མཐའ་དག་བརྗོད་པར་ག་ལ་ནུས། སྔར་བཤད་པ་དེ་དག་ནི་ཕྱོགས་ཙམ་ཞིག་བརྗོད་པ་ཡིན་ལ། རྣམ་ཐར་དེ་དག་གི་སྙིང་པོ་བསྡུ་ན། རིགས་ཕུན་སུམ་ཚོགས་པར་སྐྱེ་བ་བཞེས་པའི་ཚུལ། རྟེན་དེ་ལ་ཡོན་ཏན་བརྙེས་པའི་ཚུལ། བརྙེས་ནས་བསྟན་པ་ལ་བྱ་བ་མཛད་པའི་ཚུལ་གསུམ་དུ་འདུ་བ་ཡིན་ལ། དང་པོ་ནི་ཇོ་བོའི་བསྟོད་པ་བརྒྱད་ཅུ་པ་ལས། ཤར་ཕྱོགས་ཟ་ཧོར་ཡུལ་མཆོག་ན། ། དེ་ན་གྲོང་ཁྱེར་ཆེན་པོ་ཡོད། ། བི་ཀྲ་མ་ནི་པུ་ར་ཡིན། ། དེ་ཡི་དབུས་ན་རྒྱལ་པོའི་ཁབ། ། ཕོ་བྲང་ཤིན་ཏུ་ཡངས་པ་ཡོད། ། གསེར་གྱི་རྒྱལ་མཚན་ཅན་ཞེས་བྱ། ། ལོངས་སྤྱོད་མངའ་ཐང་འབྱོར་པ་ནི། ། རྒྱ་ནག་སྟོང་ཁུན་རྒྱལ་པོ་འདྲ། ། ཡུལ་དེའི་རྒྱལ་པོ་དགེ་བའི་དཔལ། ། བཙུན་མོ་དཔལ་མོ་འོད་ཟེར་ཅན། ། ཡབ་ཡུམ་གཉིས་ལ་སྲས་གསུམ་མངའ་། ། པདྨའི་སྙིང་དང་ཟླ་བའི་སྙིང་། ། དཔལ་གྱི་སྙིང་པོ་ཞེས་བྱའོ། ། རྒྱལ་བུ་པདྨའི་སྙིང་པོའི་ལ། ། བཙུན་མོ་ལྔ་ཡོད་སྲས་ནི་དགུ། ། སྲས་ཀྱི་ཐུ་བོ་བསོད་ནམས་དཔལ། ། ད་ལྟའི་དུས་ན་མཁས་པ་ཆེ། ། དྷ་ན་ཤྲཱི་ཞེས་བྱ་བར་གྲགས། ། ཆུང་བ་དཔལ་གྱི་སྙིང་པོ་ནི། ། དགེ་སློང་བཱི་རྱ་ཙནྡྲ་ཡིན། ། འབྲིང་པོ་ཟླ་བའི་སྙིང་པོ་ནི། ། ད་ལྟ་བླ་མ་རྗེ་བཙུན་ཡིན། ། ཞེས་འབྱུང་བ་ལྟར་རོ། ། ཡོན་ཏན་བརྙེས་ཚུལ་ལ་ལུང་རྟོགས་གཉིས་ལས། ལུང་གི་ཡོན་ཏན་བརྙེས་པའི་ཚུལ་ནི། ཕྱི་ནང་ཐུན་མོང་བའི་རིག་གནས་ཆེ་ཆུང་མཐའ་དག་དང་། རྒྱལ་བའི་བཀའ་སྡེ་སྣོད་གསུམ་དང་རྒྱུད་སྡེ་བཞི་དགོངས་འགྲེལ་དང་བཅས་པ་ལ་སྦྱངས་པ་མཐར་ཕྱིན་པར་མཛད་པས། རང་དང་གཞན་གྱི་སྡེ་པའི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་པས་ན་ལུང་གི་བསྟན་པའི་གནད་ཐམས་ཅད་ཕྱིན་ཅི་མ་ལོག་པར་ཐུགས་སུ་ཆུད་པ་ཡིན་ནོ། ། རྟོགས་པའི་ཡོན་ཏན་བརྙེས་ཚུལ་ནི། རྟོགས་པའི་ཡོན་ཏན་ཐམས་ཅད་བསྡུ་ན་བསླབ་པ་གསུམ་དུ་འདུ་ལ། ཚུལ་ཁྲིམས་ཀྱི་བསླབ་པ་ལ་ཡང་། སོ་ཐར་གྱི་ཚུལ་ཁྲིམས་དང་། བྱང་སེམས་ཀྱི་ཚུལ་ཁྲིམས་དང་། གསང་སྔགས་ཀྱི་ཚུལ་ཁྲིམས་གསུམ་ལས། སོ་ཐར་གྱི་ཚུལ་ཁྲིམས་རྣམ་པར་དག་པར་མཛད་ཚུལ་ནི། དགེ་སློང་གི་སྡོམ་པ་མནོས་ནས་རྔ་རྩིད་ལ་ཆགས་པའི་གཡག་གིས་རྔ་མ་ཉག་མ་རེ་རེ་ཤིང་ལ་ཐོགས་པ་ན་རྔོན་པས་སྲོག་དང་འཕྲལ་བར་མཐོང་ན་ཡང་སྲོག་དང་བསྡོས་ཏེ་རྔ་མ་མི་གཅོད་པར་བསྲུང་བ་ལྟར། ཁས་བླངས་པའི་བསླབ་པའི་གཞི་ཆེན་པོ་ལྟ་ཅི་སྨོས། བསླབ་བའི་གཞི་ཕྲ་མོ་རེ་རེ་ཡང་སྲོག་དང་བསྡོས་ནས་བསྲུངས་པས་གནས་བརྟན་འདུལ་བ་འཛིན་པ་ཆེན་པོར་གྱུར་ཏོ། ། བྱང་སེམས་ཀྱི་ཚུལ་ཁྲིམས་དང་ལྡན་ཚུལ་ནི། བྱམས་པ་དང་སྙིང་རྗེའི་རྩ་བ་ཅན་གྱི་བྱང་ཆུབ་ཀྱི་སེམས་སྦྱོང་བའི་གདམས་པ་མང་པོ་དང་། ཁྱད་པར་གསེར་གླིང་པ་བསྟེན་ནས་རྗེ་བཙུན་བྱམས་པ་དང་། འཇམ་པའི་དབྱངས་ནས་ཐོགས་མེད་དང་། ཞི་བ་ལྷ་ལ་བརྒྱུད་པའི་གདམས་པ་མཆོག་ལ་རིང་དུ་སྦྱངས་པས། བསྟོད་པ་ལས། རང་དོན་ཡལ་བར་དོར་ནས་གཞན་གྱི་དོན། ། ལྷུར་མཛད་དེ་ནི་བདག་གི་བླ་མ་ལགས། ། ཞེས་འབྱུང་བ་ལྟར་བདག་པས་གཞན་གཅེས་པའི་བྱང་ཆུབ་ཀྱི་སེམས་ཐུགས་རྒྱུད་ལ་འཁྲུངས་ཤིང་། སྨོན་པའི་སེམས་དེས་ཀུན་ཏུ་དྲངས་པའི་འཇུག་པའི་སེམས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་སློབ་པར་ཁས་བླངས་པའི་རྗེས་སུ་འགྲོ་བའི་བསླབ་པ་ལ་སློབ་པའི་སྤྱོད་པ་བཟང་པོས་རྒྱལ་སྲས་རྣམས་ཀྱི་བཅས་པའི་མཚམས་ལས་མི་འདའ་བར་མཛད་དོ། ། གསང་སྔགས་ཀྱི་ཚུལ་ཁྲིམས་དང་ལྡན་ཚུལ་ནི། རང་གི་ལུས་ལྷར་གཟིགས་པའི་བསྐྱེད་པའི་རིམ་པ་དང་། རྡོ་རྗེའི་ཐུགས་རྫོགས་པའི་རིམ་པའི་ཏིང་ངེ་འཛིན་དང་ལྡན་པས་རྣལ་འབྱོར་པའི་གཙོ་བོ་ཞེས་སྤྱིར་བསྟོད་ཅིང་། ཁྱད་པར་དུ་བཅས་པའི་མཚམས་ལས་མི་འདའ་བར་དམ་ཚིག་ཚུལ་བཞིན་དུ་སྲུང་བ་ཡང་། བསྟོད་པ་ལས། དྲན་དང་ཤེས་བཞིན་ལྡན་པ་ཡིས། ། ཚུལ་ཁྲིམས་མ་ཡིན་ཡིད་མི་མཛད། ། བག་ཡོད་དྲན་དང་གཡོ་སྒྱུ་མེད། ། ལྟུང་བའི་ཉེས་པས་ཁྱོད་མ་གོས། ། ཞེས་གསུངས་པ་ལྟར་རོ། ། དོན་འདི་ལ་རྗེ་བདག་ཉིད་ཆེན་པོས་སྡོམ་པ་གསུམ་གྱི་ཡོན་ཏན་དང་ལྡན་ཚུལ་དེ་དག་གསུངས་ནས། དེ་ལྟར་སྡོམ་པ་གསུམ་གྱི་ཚུལ་ཁྲིམས་ཀྱི་བསླབ་པ་རྣམས་ཁས་ལེན་པ་ལ་དཔའ་བ་ཙམ་མིན་པར་ཇི་ལྟར་ཁས་བླངས་པའི་རྗེས་སུ་འབྲངས་ཏེ་བཅས་པའི་མཚམས་ལས་མི་འདའ་བར་སྲུང་ཞིང་། བརྒྱ་ལ་ཅུང་ཟད་འདས་ན་ཡང་མྱུར་བ་མྱུར་བར་རང་རང་གི་ཕྱིར་བཅོས་ཀྱི་ཆོ་གས་དག་པར་བྱེད་པའི་རྣམ་པར་ཐར་པ་འདི་ནི་གསུང་རབ་ཀྱི་གནད་ཤེས་པའི་མཁས་པ་རྣམས་དགའ་བ་སྐྱེད་པའི་རྣམ་པར་ཐར་པར་ཤེས་པར་བྱས་ལ་དམ་པ་རྣམས་ཀྱི་རྗེས་སུ་བསླབ་པར་བྱའོ། ། ཞེས་གསུངས་སོ། ། ཏིང་ངེ་འཛིན་གྱི་བསླབ་པ་དང་ལྡན་ཚུལ་ནི། ཐུན་མོང་བ་ཞི་ལྷག་ཟུང་འབྲེལ་དང་ཐུན་མོང་མ་ཡིན་པ་བསྐྱེད་རིམ་མཐར་ཕྱིན་པར་མཛད་པའི་ཚུལ་ནི་རྣམ་ཐར་ཆེན་མོར་གསལ་བ་ལྟར་རོ། ། ཤེས་རབ་ཀྱི་བསླབ་པ་དང་ལྡན་ཚུལ་ནི། ཐུན་མོང་བ་ཞི་ལྷག་ཟུང་འབྲེལ་དང་ཐུན་མོང་མིན་པ་རྫོགས་རིམ་གྱི་རྟོགས་པ་ཁྱད་པར་ཅན་བརྙེས་པ་རྣམ་ཐར་ཆེན་མོ་དང་རྡོ་རྗེའི་གླུར་གསལ་བ་ལྟར་རོ། ། བསྟན་པ་ལ་བྱ་བ་མཛད་ཚུལ་ནི་རྒྱ་བོད་གཉིས་ཀར་རྒྱལ་བའི་བསྟན་པ་ལ་བྱ་བ་མཛད་ཚུལ་བསམ་གྱིས་མི་ཁྱབ་པ་སྔར་བརྗོད་ཟིན་པ་ལྟར་རོ། ། དེ་ལྟར་ཇོ་བོ་རྗེས་རྒྱ་བོད་གཉིས་ཀར་བསྟན་པ་ལ་བྱ་བ་རྒྱ་ཆེན་པོ་མཛད་ཅིང་། སླར་ཡང་རྒྱལ་བའི་བསྟན་པ་ཡུན་རིང་དུ་གནས་པར་བྱ་བའི་ཕྱིར་དང་། ཕྱི་མའི་སྐྱེ་བོ་རྣམས་ཇོ་བོ་རྗེས་འདི་ལྟར་གསུངས་ཞེས་གོ་བར་བྱ་བའི་ཕྱིར་དུ། རྒྱལ་བའི་བཀའ་སྡེ་སྣོད་གསུམ་དང་རྒྱུད་སྡེ་བཞི་དགོངས་འགྲེལ་དང་བཅས་པ་མཐའ་དག་ལས་ཡི་གེ་ན་གཅིག་ཀྱང་དོར་དུ་མེད་པར་གང་ཟག་གཅིག་གི་ཉམས་ལེན་གྱི་རིམ་པར་ཧྲིལ་གྱིས་དྲིལ་ནས་སྟོན་པའི་མན་ངག་བྱང་ཆུབ་ལམ་གྱི་སྒྲོན་མ་མཛད། བཀའ་གདམས་གོང་མའི་གསུང་སྒྲོས་ལས། འཛམ་བུ་གླིང་ན་གླེགས་བམ་གཅིག་ལ་ལམ་སྒྲོན་ལས་ཆེ་བ་མེད་གསུང་། དེ་ནི་ཤོག་བུ་གྲངས་མང་བས་དེ་ལྟར་བརྗོད་པ་མིན་གྱི་བརྗོད་བྱ་རྒྱ་ཆེ་བས་དེ་ལྟར་བརྗོད་དེ། གདུལ་བྱ་ལས་དང་པོ་པ་ཆོས་ལ་ཐོག་མར་འཇུག་པ་ཞིག་འཆི་བ་དྲན་ནས་འཇིག་རྟེན་ཕྱི་མའི་དོན་སྒྲུབ་པའི་བསམ་པ་བསྐྱེད་པ་ནས་བཟུང་མཐར་ཐུག་སངས་རྒྱས་ཀྱི་སའི་བར་གྱི་ས་ལམ་འབྲས་བུ་དང་བཅས་པ་མཐའ་དག་ལམ་སྒྲོན་གྱི་བརྗོད་བྱར་འདུ་བས་སོ། ། བྱང་ཆུབ་ལམ་གྱི་སྒྲོན་མ་ནས་གསུངས་པའི་ལམ་གྱི་རིམ་པའི་གནད་རྣམས་ལ་ངེས་པ་བསྐྱེད་པར་བྱ་བ་དང་། དེ་སྒོམ་པ་ལ་རྒྱུད་བསྐུལ་བར་བྱ་བ་དང་། ལམ་དེ་དག་གི་གེགས་སེལ་བོགས་འདོན་ཤེས་པའི་ཕྱིར་བསྟན་བཅོས་མཐའ་ཡས་པ་མཛད་དེ། སྙིང་པོ་བསྡུ་བ། སྙིང་པོ་ངེས་པར་བསྡུ་བ་གསང་འདུས་ཀྱི་དཀྱིལ་འཁོར་སྤྱན་རས་གཟིགས་གཙོ་བོར་སྟོན་པ་གསང་བ་འདུས་པ་འཇིག་རྟེན་དབང་ཕྱུག་གི་སྒྲུབ་ཐབས། འཕགས་པ་འཇིག་རྟེན་དབང་ཕྱུག་གི་སྒྲུབ་ཐབས་གསང་བ་འདུས་པ་ལ་བསྟོད་པ་གཉིས། འཁོར་བ་ལས་ཡིད་ངེས་པར་འབྱུང་བའི་གླུ། སྤྱོད་པའི་གླུ། ཆོས་ཀྱི་དབྱིངས་སུ་ལྟ་བའི་གླུ། ཏིང་ངེ་འཛིན་གྱི་ཚོགས་ཀྱི་ལེའུ་དང་། འཇིག་རྟེན་ལས་འདས་པའི་ཡན་ལག་བདུན་པའི་ཆོ་ག ། སྐུ་གསུང་ཐུགས་རབ་ཏུ་གནས་པའི་ཆོ་ག ། ལས་ཀྱི་སྒྲིབ་པ་ཐམས་ཅད་རྒྱུན་གཅོད་པར་བྱེད་པའི་གཟུངས་རྣལ་འབྱོར་རྒྱུད་དུ་དགོངས་པ་བཀྲལ་བ་མི་འཁྲུགས་པའི་སྒྲུབ་ཐབས་རྒྱས་བསྡུས་གཉིས། དེའི་དཀྱིལ་ཆོག་ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བ། མི་འཁྲུགས་པའི་སྦྱིན་སྲེག་གི་ཆོ་ག ། ཕྱག་ན་རྡོ་རྗེ་ལ་མངོན་རྟོགས་ཀྱི་སྒོ་ནས་བསྟོད་པ། རྟ་མགྲིན་ཞལ་གསུམ་ཕྱག་དྲུག་གི་སྒྲུབ་ཐབས་དང་། ཞལ་གསུམ་ཕྱག་བཞི་པའི་སྒྲུབ་ཐབས་གཉིས། འཕགས་པ་མི་གཡོ་བ་ལ་བསྟོད་པ་གཉིས། དེ་བཞིན་གཤེགས་པ་ཐམས་ཅད་ཀྱི་དམ་ཚིག་བསྲུང་བ་ཞེས་བྱ་བའི་གཙུག་ཏོར་དྲི་མེད་འོད་ཀྱི་སྒྲུབ་ཐབས། མཆོད་རྟེན་ལྔ་གདབ་པའི་ཆོ་ག་གཟུངས་ཆོག་ཆ་གཉིས། སྒྲོལ་མའི་སྒྲུབ་ཐབས། ལྷ་མོ་སྒྲོལ་མ་སྒོམ་པའི་ཆོ་ག་རྒྱས་པ། སྒྲོལ་མ་འཇིགས་པ་བརྒྱད་སྐྱོབ་ཀྱི་སྒྲུབ་ཐབས་དང་བསྟོད་པ། འཕགས་མ་སྒྲོལ་མའི་སྒྲུབ་ཐབས། དམ་ཚིག་ཐམས་ཅད་བསྡུས་པ་ཞེས་བྱ་བ། ཚོགས་བདག་ཆགས་པ་རྡོ་རྗེའི་བསྟོད་པ། བདུད་རྩི་འབྱུང་བ་ཞེས་བྱ་བའི་གཏོར་ཆོག ། ཆབ་གཏོར་དྲི་མེད། ཀླུ་གཏོར་གྱི་ཆོ་ག ། ཡི་གེ་དྲུག་པའི་སྒྲུབ་ཐབས། སྤྱན་རས་གཟིགས་ཁ་སརྦ་ཎིའི་སྒྲུབ་ཐབས། ཁྲོ་རྒྱལ་མི་གཡོ་བའི་སྒྲུབ་ཐབས། གཏུམ་པོ་ཁྲོ་བོ་ཆེན་པོའི་སྒྲུབ་ཐབས་དོན་དམ་པ། མགོན་པོ་གྲི་གུག་གི་སྒྲུབ་ཐབས། ཚོགས་བདག་ཞི་བའི་སྒྲུབ་ཐབས། ཚོགས་བདག་གསང་སྒྲུབ། ནོར་བདག་གཙོ་འཁོར་ལྔའི་བསྟོད་པ། རྟེན་འབྲེལ་སྙིང་པོའི་སྔགས་ཐེམས། བདེན་པ་གཉིས་ལ་འཇུག་པ་ཞེས་བྱ་བ་དབུ་མའི་མན་ངག ། དབུ་མའི་མན་ངག་རིན་པོ་ཆེའི་ཟ་མ་ཏོག་བཀོད་པ། དྲན་པ་གཅིག་པའི་མན་ངག ། མདོ་ཀུན་ལས་བཏུས་པའི་དོན་བསྡུས་པ། བྱང་ཆུབ་སེམས་དཔའི་སྤྱོད་པ་མདོ་ཙམ་གདམས་ངག་ཏུ་བྱས་པ། བྱང་ཆུབ་སེམས་དཔའི་ནོར་བུའི་ཕྲེང་བ། བྱང་ཆུབ་སེམས་དཔའི་ལས་དང་པོ་པའི་ལམ་ལ་འཇུག་པ་བསྟན་པ། སྐྱབས་སུ་འགྲོ་བ་བསྟན་པ་ཞེས་བྱ་བ། ཐེག་པ་ཆེན་པོའི་ལམ་གྱི་སྒྲུབ་ཐབས་ཡི་གེ་བསྡུས་པ། ཐེག་པ་ཆེན་པོའི་ཡུམ་གྱི་སྒྲུབ་ཐབས་ཤིན་ཏུ་བསྡུས་པ། རང་གི་བྱ་བའི་རིམ་པ་ལ་བསྐུལ་བ་དང་བཅས་པ་ཡི་གེར་བྲིས་པ། མི་དགེ་བ་བཅུའི་ལས་ཀྱི་ལམ་བསྟན་པ། ལས་རྣམ་པར་འབྱེད་པ་ཞེས་བྱ་བ། སྤྱོད་པ་བསྡུས་པའི་སྒྲོན་མ། མདོ་ཀུན་ལས་བཏུས་པའི་མན་ངག ། མདོ་ཀུན་ལས་བཏུས་པ་ཆེན་པོ། བྱང་ཆུབ་ཏུ་སེམས་བསྐྱེད་པའི་ཆོ་ག ། བྱང་ཆུབ་སེམས་དཔའི་སྡོམ་པའི་ཆོ་ག ། ཁ་ཏོན་དང་གླེགས་བམ་བཀླག་པའི་སྔོན་དུ་བྱ་བའི་ཆོ་ག ། ཕ་རོལ་ཏུ་ཕྱིན་པའི་སཱཙྪ་གདབ་པའི་ཆོ་ག ། བླ་མའི་བྱ་བའི་རིམ་པ་ཅིག ། རྒྱལ་པོ་ནེརྱ་པཱ་ལཱ་ལ་བརྫངས་པ་དྲི་མ་མེད་པའི་རིན་པོ་ཆེའི་འཕྲིན་ཡིག ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཤད་པ། ཤེར་ཕྱིན་དོན་བསྡུས་སྒྲོན་མེ། སྨན་བླའི་སྒྲུབ་ཐབས། ལས་སྒྲིབ་རྣམ་པར་སྦྱོང་པའི་ཆོ་ག་སོགས་མཛད་དོ། ། དེ་ལྟར་ཇོ་བོ་རྗེ་བོད་དུ་བྱོན་ནས་མངའ་རིས་སུ་ལོ་གསུམ། སྙེ་ཐང་དུ་ལོ་དགུ། དབུས་གཙང་གཞན་དུ་ལོ་ལྔའི་བར་དུ་སྐལ་བ་དང་ལྡན་པ་རྣམས་ལ་མདོ་སྔགས་ཀྱི་གཞུང་གདམས་ངག་མ་ལུས་པ་བསྟན་ནས་བསྟན་པའི་སྲོལ་ནུབ་པ་རྣམས་གསར་དུ་བཙུགས། སྲོལ་ཅུང་ཟད་ཡོད་པ་རྣམས་འཕེལ་པར་མཛད། ལོག་པར་རྟོག་པའི་དྲི་མས་སྦགས་པ་རྣམས་ལེགས་པར་བསལ་ཏེ་བསྟན་པ་རིན་པོ་ཆེ་དྲི་མ་དང་བྲལ་བར་མཛད་དོ། ། དེ་ནས་སྐུ་ཚེ་དེའི་དངོས་ཀྱི་གདུལ་བྱ་རྣམས་རྫོགས་པ་ན་ཞིང་གཞན་དུ་འབྱོན་པར་བཞེད་དེ། ཕྱི་ལོ་ 1054 ཤིང་ཕོ་རྟའི་ལོ་དབྱུག་པ་ཟླ་བའི་ཚེས་གསུམ་ནས་བཅོ་བརྒྱད་ཀྱི་བར་ཞག་བཅུ་དྲུག་གི་རིང་ལ་ཐིག་ལེ་བཅུ་དྲུག་གི་རིམ་པ་དང་མཐུན་པར་ཐུགས་དམ་སྡུད་རིམ་མཛད་ནས། ཆུ་བོ་གྱེན་དུ་ལྡོག་གམ་ལྟོས་ཤིག་གསུངས། བལྟར་ཕྱིན་པས་གྱེན་དུ་ལྡོག་གིན་གདའ་ཞུས་པས། འོ་ན་དེ་ཡན་ཆད་ཀྱིས་དོན་འདི་སྟོན། ཉམས་སུ་བླངས་རྒྱུ་འདི་ཡིན་གསུངས་ནས་བརྒྱད་སྟོང་པ་གསུང་འཕྲོ་བཅད། ཕྱག་ཏུ་རྡོ་རྗེ་དྲིལ་བུ་བཟུང་ནས་ཐུགས་དམ་རྩེ་གཅིག་ཏུ་མཛད་དོན་ལ་འདས་གྲོངས་མི་མངའ་ཡང་གདུལ་བྱ་ཐུན་མོང་བའི་སྣང་ངོར་དགུང་ལོ་བདུན་ཅུ་རྩ་གསུམ་པ་ཤིང་ཕོ་རྟའི་ལོ་སྟོན་ཟླ་འབྲིང་པོའི་ཚེས་བཅོ་བརྒྱད་ལ་སྙེ་ཐང་དུ་མྱ་ངན་ལས་འདའ་པའི་ཚུལ་བསྟན་ཏེ་འོད་གསལ་ཆོས་སྐུ་མངོན་དུ་མཛད་ནས་གཟུགས་སྐུར་བཞེངས་ནས་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། དེ་ཡང་བསྟོད་པ་སུམ་ཅུ་པ་ལས། ཁོ་བོ་འདི་ནས་དགའ་ལྡན་གནས་སུ་འགྲོ། ། ང་ལ་དད་ཅིང་གུས་པར་བྱེད་པ་རྣམས། ། དགའ་ལྡན་གནས་སུ་མཇལ་བར་འགྱུར་ཞེས་གསུངས། ། མ་འོངས་མངོན་སུམ་གཟིགས་ལ་གསོལ་བ་འདེབས། ། ཞེས་གསུངས་པ་ལྟར་དགའ་ལྡན་ཆོས་ཀྱི་ཕོ་བྲང་དུ་ནམ་མཁའ་དྲི་མ་མེད་པ་ཞེས་མཚན་གྲགས་ཤིང་རྗེ་བཙུན་མ་ཕམ་པའི་སྲས་ཀྱི་ཐུ་བོའི་ཚུལ་དུ་བཞུགས་ཏེ་དགའ་ལྡན་གྱི་ལྷ་རྣམས་དང་། ཕྱོགས་བཅུའི་ཞིང་རབ་འབྱམས་ནས་འདུས་པའི་བྱང་ཆུབ་སེམས་དཔའ་བགྲང་པ་ལས་འདས་པ་དག་ལ་ཐེག་པ་ཆེན་པོའི་ཆོས་རྒྱ་ཆེར་སྟོན་པར་མཛད་ཅིང་། མིག་འཕྲུལ་བཞིན་དུ་ཕྱོགས་བཅུའི་ཞིང་རབ་འབྱམས་ཐམས་ཅད་དུ་སྤྲུལ་པ་བཀྱེ་ནས་གདུལ་བྱའི་དོན་རྒྱུན་མི་འཆད་དུ་མཛད་ཅིང་བཞུགས་སོ། ། དེས་ན་རྒྱལ་བ་དགྱེས་པའི་ལམ་ལ་འཇུག་པར་འདོད་པ་རྣམས་ཀྱིས་མགོན་པོ་ཨ་ཏི་ཤའི་སྐུ་ཡིད་ལ་བྱས་ཏེ་རྒྱུན་དུ་གསོལ་བ་འདེབས་པ་དང་། མགོན་པོ་དེའི་གསུང་སྐྱེས་བུ་གསུམ་གྱི་ལམ་གྱི་རིམ་པ་ལ་ཉིན་རེ་བཞིན་དུ་ཡང་དང་ཡང་དུ་ཤར་སྒོམ་བྱས་ཏེ་བག་ཆགས་ཅི་ཐེབས་བྱ་བ་ལ་འབད་པར་བྱའོ། ། ཇོ་བོ་རྗེ་ལ་རྒྱ་བོད་གཉིས་ཀར་རྒྱུད་འཛིན་གྱི་སློབ་མ་བསམ་གྱིས་མི་ཁྱབ་པ་ཡོད་ཀྱང་། གཙོ་བོ་ནི་རྒྱ་གར་ན་ཇོ་བོ་དང་མཁྱེན་པ་མཉམ་པའི་པཎྜི་ཏ་ཆེན་པོ་བི་ཏོ་པ། དྷརྨཱ་ཨ་ཀ་ར་མ་ཏི། དབུ་མ་སེངྒེ། སའི་སྙིང་པོ་སྟེ་བཞི། གཞན་ཡང་བཤེས་གཉེན་གསང་བ་སོགས་བསྟན་པ་འཛིན་པའི་པཎྜི་ཏ་དང་། དབེན་པའི་རི་སུལ་དུ་སྒྲུབ་པ་སྙིང་པོར་བྱེད་པའི་ཀུ་སུ་ལུ་བགྲང་པ་ལས་འདས་པ་ཡོད་དོ། ། བོད་དུ་བྱོན་ནས་གདུལ་བྱ་བགྲང་བ་ལས་འདས་པ་ལ་ཆོས་འཁོར་བསྐོར་བར་མཛད་པས་རྒྱུད་འཛིན་བགྲང་བ་ལས་འདས་པ་ཡོད་མོད་ཀྱང་། གཙོ་བོ་ནི་མངའ་རིས་ནས་ལོ་ཙཱ་བ་རིན་ཆེན་བཟང་པོ། ནག་ཚོ་ལོ་ཙཱ་བ། ལྷ་བླ་མ་བྱང་ཆུབ་འོད། གཙང་ནས་འགར་དགེ་བ། འགོས་ལོ་ཆེན་པོ་ཡོལ་སྐུ་མཆེད། ལྷོ་བྲག་ནས་ཕྱག་ཁྲི་མཆོག་དང་དགེ་བ་སྐྱོང་། ཁམས་ནས་རྣལ་འབྱོར་པ་ཆེན་པོ། དགོན་པ་པ། ཤེས་རབ་རྡོ་རྗེ། ཕྱག་དར་སྟོན་པ། དབུས་ནས་ཁུ་རྔོག་འབྲོམ་གསུམ་རྣམས་ཇོ་བོའི་ཐུགས་སྲས་གཙོ་བོར་གྲགས་ཤིང་གཞན་ཡང་མཐའ་ཡས་སོ། །
དེ་ལ་ལོ་ཆེན་རིན་ཆེན་བཟང་པོ་ནི་ཕྱི་ལོ་ 958 ས་ཕོ་རྟའི་ལོ་ལ་ཡབ་གཞོན་ནུ་དབང་ཕྱུག་དང་། ཡུམ་ཅོག་རོ་ཀུན་བཟང་ཤེས་བརྟན་མའི་སྲས་སུ་སྐུ་འཁྲུངས། རིགས་གཡུ་རི་གཡུ་སྒྲ། དགུང་ལོ་བཅུ་གསུམ་བཞེས་པའི་ཚེ་མཁན་པོ་ཡེ་ཤེས་བཟང་པོ་ལ་རབ་ཏུ་བྱུང་། དེའི་མོད་ལ་འདུལ་བ་རྒྱ་ཆེར་འགྲེལ་ཐུགས་སུ་ཆུད། དེ་ནས་རྒྱལ་པོའི་བཀས་ཁ་ཆེར་བྱོན། ལོ་ཙཱ་མཁས་པར་བསླབས། པཎྜི་ཏ་ཀ་ར་རྣམ་གསུམ་སོགས་པཎ་གྲུབ་དུ་མ་ལ་གཏུགས་ཏེ་སྔགས་མཚན་ཉིད་ཀྱི་གཞུང་མང་པོ་ལ་སྦྱངས། མཁྱེན་པ་ཤིན་ཏུ་ཆེ་བས་མདོ་སྔགས་ཀྱི་ཆོས་མང་པོ་བསྒྱུར། ཕ་རོལ་ཏུ་ཕྱིན་པ་དང་རྒྱུད་ཀྱི་ཕྱོགས་གཉིས་ཀའི་བཤད་པ་རྒྱ་ཆེར་མཛད། དབང་དང་སྒྲུབ་པའི་ལག་ལེན་མང་དུ་བསྟན་ཏེ་བསྟན་པ་སྔ་དར་ལས་ཕྱི་དར་སྔགས་ཀྱི་བསྟན་པ་བོད་དུ་དར་བ་ཡང་ལོ་ཙཱ་བ་འདི་ཁོ་ནའི་བཀའ་དྲིན་ཡིན། པཎྜི་ཏ་བདུན་ཅུ་རྩ་ལྔ་བསྟེན་ནས་དམ་པའི་ཆོས་མང་དུ་གསན། བླ་ཆེན་པོ་ལྷ་ལྡེ་བཙན་གྱིས་དབུའི་མཆོད་གནས་དང་རྡོ་རྗེ་སློབ་དཔོན་དུ་བསྐུར། པུ་རངས་ཞེར་གྱི་གནས་གཞི་ཕུལ། གཙུག་ལག་ཁང་ཡང་བཞེངས། ཁ་ཆེའི་གཙུག་ལག་ཁང་དང་རོང་གི་གཙུག་ལག་ཁང་ལ་སོགས་པ་གནས་གཞི་དང་གཙུག་ལག་ཁང་དང་མཆོད་རྟེན་མང་དུ་བཞེངས། གུར་ཤིང་བརྩོན་འགྲུས་རྒྱལ་མཚན་ལ་སོགས་པའི་སློབ་མ་མཁས་གྲུབ་མང་པོ་དང་ཞུས་ཆེན་ཕེར་བའི་ལོ་ཙཱ་ཡང་བཅུ་ལྷག་ཙམ་ཐོན། འཕྲལ་གྱི་མཛད་པ་ཡང་སྐུ་གཟུགས་བཞེངས་པ་དང་། འགྱུར་མཛད་པ་ལ་སོགས་རེ་རེའི་རྗེས་ཀྱང་གཞན་གྱིས་མི་རྙོགས་པ་དང་། མཚན་ཡང་དག་པར་བརྗོད་པ་ཡང་སཾ་སྐྲྀ་ཏའི་སྐད་དུ་འབུམ་ཕྲག་གཅིག་བོད་སྐད་དུ་འབུམ་ཕྲག་གཅིག ། གཞན་ལ་ཡོན་བྱིན་ཏེ་འབུམ་ཕྲག་གཅིག་རྣམས་བཏོན། དགུང་ལོ་བརྒྱད་ཅུ་རྩ་ལྔ་བཞེས་པ་ཆུ་རྟ་ལ་ཇོ་བོ་བོད་དུ་བྱོན་པ་དང་མཇལ་ཏེ་སྔར་བསྒྱུར་བ་མང་པོ་ལ་ཞུས་དག་ཞུས། ཇོ་བོ་ཉིད་ཀྱིས་མཛད་པའི་དམ་ཚིག་བསྡུས་པ་བསྒྱུར་བས་འགྱུར་བཟང་བ་ཅིག་བྱུང་། དེ་ནས་ལོ་ཆེན་གྱིས་གསེར་སྲང་བདུན་དང་བཅས་པའི་མཎྜལ་ཕུལ་ནས་བདེ་མཆོག་གི་དབང་དང་བསྐྱེད་རྫོགས་ཀྱི་གདམས་ངག་རྣམས་ཞུས་ཏེ་ཇོ་བོའི་གདམས་ངག་སྐྱེས་བུ་གསུམ་གྱི་ལམ་གྱི་རིམ་པ་དང་བསྐྱེད་རྫོགས་ཀྱི་རིམ་པ་རྣམས་ལ་རྩེ་གཅིག་ཏུ་སྒྲུབ་པ་མཛད་པས་དཔལ་གསང་བ་འདུས་པ་དང་། བདེ་མཆོག་གི་ཞལ་གཟིགས་ཤིང་གྲུབ་པ་བརྙེས་ཏེ་དགུང་ལོ་དགུ་བཅུ་རྩ་བརྒྱད་པ་ 1055 ཤིང་མོ་ལུག་གི་དགུན་ཟླ་ཐ་ཆུང་གི་ཚེས་བཅུ་བདུན་ལ་མྱ་ངན་ལས་འདས་པའི་ཚུལ་བསྟན་པའི་ཚེ་ནམ་མཁའ་གང་བའི་ལྷ་རྣམས་ཀྱིས་རོལ་མོ་རྒྱ་ཆེར་སྒྲོག་པ་དང་། མེ་ཏོག་གི་ཆར་འབེབས་པ་ལ་སོགས་པ་གྲོང་པའི་སྐྱེ་བོ་ཐམས་ཅད་ཀྱི་མངོན་སུམ་དུ་གྱུར། གདུང་རྟེན་མ་བྱུང་བས་མཁའ་སྤྱོད་དུ་གཤེགས་པར་གྲགས། རིང་བསྲེལ་འོ་མ་སེའི་མདོག་ལྟ་བུ་གསུམ་བྱུང་བ་ཇི་ཞིག་ན་འབྲུག་ལྟ་བུའི་སྒྲ་དང་བཅས་ཏེ་ནམ་མཁར་སོང་བ་ཞིག་བྱུང་ཞེས་གྲགས་སོ། །
དགེ་བཤེས་ནག་ཚོ་ལོ་ཙཱ་བ་ནི། ཕྱི་ལོ་ 1011 ལྕགས་མོ་ཕག་ལ་གུང་ཐང་ཞེས་གྲགས་པ་མངའ་རིས་རྫོང་དགའི་ལྷ་གདོང་དུ་སྐུ་འཁྲུངས། གདུང་ནག་ཚོ། རབ་ཏུ་བྱུང་བའི་མཚན་ཚུལ་ཁྲིམས་རྒྱལ་བ། འདུལ་བ་མཁས་པར་མཁྱེན་པས་འདུལ་བ་འཛིན་པར་གྲགས། རྒྱ་བརྩོན་སེང་ལ་མངོན་པ་གསན། དགུང་ལོ་ཉེར་བདུན་པ་ལ་ཇོ་བོ་སྤྱན་འདྲེན་ལ་རྒྱ་གར་དུ་བྱོན། ཇོ་བོ་རྗེ་ལོ་བཅུ་དགུའི་བར་ཚུལ་བཞིན་བསྟེན། ཡོན་ཏན་ཐམས་ཅད་རྫོགས་པར་མཛད། ཇོ་བོ་རྗེ་བོད་དུ་སྤྱན་དྲངས་བས་བོད་ཁམས་སྤྱི་ལ་བཀའ་དྲིན་ཆེ་བ་ཡིན་པས། བོད་སྟོན་ཐམས་ཅད་ཀྱིས་ཀྱང་སློབ་དཔོན་ཞེས་བརྗོད་པ་ཡིན། ཇོ་བོའི་ཆོས་རྣམས་ཁོང་གིས་ཁུངས་ཕྱུང་ནས་ཞུར་བཅུག་པས་གཞན་རྣམས་ཀྱིས་ཀྱང་གདམས་པ་ཕལ་ཆེ་བ་ཐོབ་པས་ཁོང་བཀའ་དྲིན་ཤིན་ཏུ་ཆེ་བར་བྱེད། ནག་ཚོ་སྙེ་ཐང་ནས་མངའ་རིས་སུ་འབྱོན་ཁར་ཇོ་བོས་བསླབ་བྱ་མང་བར་མཛད་དེ། དམ་ཚིག་གསུམ་བཀོད་ཀྱི་སྐུ་ཕྱག་ཏུ་བཟུང་ནས་བྱིན་རླབས་མཛད། འདུལ་བ་མདོ་རྩ་དང་། གསང་བ་འདུས་པའི་རྒྱུད་དཔེ་དང་། འགྲོ་ཆོས་སུ་ཐུན་མོང་མ་ཡིན་པའི་སྤྱན་རས་གཟིགས་ཀྱི་སྒྲུབ་སྐོར་སོགས་སྦས་ཆོས་ཉི་ཤུ་གནང་ལུང་བསྟན་མང་དུ་མཛད་དེ་ཇོ་བོ་ཉིད་ཀྱི་སྐུ་མཐེ་བོང་ཙམ་སེང་ལྡེང་ལ་བྲིས་ཏེ་གའུར་བཅུག་ནས་དཔུང་པ་ལ་བཏེགས། མཉེས་མཉེས་རྒྱ་ཆེན་མཛད། དེ་ནས་ཡར་བྱོན་ནས་རས་ཁྲུ་བཅུ་དྲུག་པ་གཅིག་ལ་རི་མོ་མཁན་མཁས་པ་ཀྲིཥྞ་བྱ་བ་རྒྱ་གར་བ་ཅིག་ཡོད་པ་འདྲིར་བཅུག་ནས། སྟོད་ལ་ཇོ་བོའི་ཡི་དམ་གྱི་ལྷ་རྣམས་བྲིས། དེའི་འོག་ན་ཕར་ལ་ཇོ་བོའི་བླ་མ་བཅུ་གཉིས་པོ་བྲིས། དེ་ནས་ཇོ་བོ་རྗེ་ཉིད་ཀྱི་སྐུ་ཚད་ཁྲུས་གཞལ་ཏེ་བྲིས། གཡས་གཡོན་གཉིས་ན་ཉེ་གནས་རེ་ལྡེམ་སྐུར་བྲིས། གཡས་གཡོན་གྱི་མཐའ་རས་ལ་ཇོ་བོའི་མཛད་པ་རྣམས་དང་། འོག་ན་ཚུར་ཁུ་རྔོག་འབྲོམ་གསུམ་ལ་སོགས་པ་བོད་སྟོན་རྣམས་ཆོས་གྲྭའི་ཚུལ་དུ་བྲིས། དེའི་མདུན་དུ་ལོ་ཙཱ་བ་ཉིད་གསོལ་བ་འདེབས་པའི་ཚུལ་དུ་བྲིས། དེའི་རྒྱབ་ལ་ཇོ་བོའི་བསྟོད་པ་བརྒྱད་ཅུ་བ་བྲིས། རབ་གནས་མཛད་པའི་ཚེ། ཇོ་བོ་རྗེ་ཉིད་དགའ་ལྡན་ནས་འབྱོན་པར་ཞལ་གྱིས་བཞེས་པས་འདི་ཇོ་བོ་རྗེ་ཉིད་དང་ཁྱད་མེད་པ་ཡིན། མངའ་རིས་སྐོར་གསུམ་གྱི་རྟེན་ལ་བྱིན་རླབས་ཆེ་ཤོས་ཡིན་གསུང་། དེའི་རྗེས་སུ་ཛྙཱ་ན་ཨཱ་ཀ་ར་དང་། བལ་པོ་ཤྲཱིནྟཾ་བྷ་དྲ། ནག་པོ་དམ་ཚིག་རྡོ་རྗེ་ལ་སོགས་པ་བསྟེན་ནས་འགྱུར་ཡང་མང་དུ་མཛད་དོ། ། དེ་ནས་ཇོ་བོས་ལུང་བསྟན་པ་བཞིན་སྒྲུབ་པ་མཛད་པས་ཇོ་བོ་ཡི་གེ་དྲུག་པ། སྒྲོལ་མ། འཇམ་དཔལ་རྡོ་རྗེ་རྣམས་ཞལ་གཟིགས། ཁོང་རང་གི་ཡི་གེ་ལས་ཀྱང་། ནག་ཚོ་བདག་ཉིད་གཅིག་པུ་མ་གཏོགས་པ། ། ཇོ་བོའི་སློབ་མ་གཞན་ལ་ཡོད་རེ་སྐན། ། ཞེས་ཇོ་བོའི་མན་ངག་ཐུན་མོང་མ་ཡིན་པ་རྣམས་ཁོང་རང་ལ་ཡོད་པར་ཞལ་གྱིས་བཞེས་ཤིང་ཇོ་བོ་རྗེ་བོད་དུ་གདན་འདྲེན་མཛད་པས་ལོ་ཙཱ་བ་འདི་ནི་བོད་ཁམས་ཡོངས་ལ་བཀའ་དྲིན་བླ་ལྷག་ཏུ་ཆེ་བ་ཞིག་གོ།
ལྷ་བླ་མ་བྱང་ཆུབ་འོད་ནི་མངའ་རིས་ཆོས་རྒྱལ་གྱི་སྲས་སུ་སྐུ་འཁྲུངས། རྒྱལ་སྲིད་ལ་མ་ཆགས་པར་རབ་ཏུ་བྱུང་ཞིང་བསྙེན་པར་རྫོགས་ནས་བསྟན་པ་དང་སེམས་ཅན་གྱི་ཁུར་ཁྱེར་ཏེ་ཇོ་བོ་སྤྱན་འདྲེན་པའི་བྱེད་པ་པོ་མཛད། བསྟན་པ་སྤྱི་ཁྱབ་ཏུ་བྱང་ཆུབ་ལམ་གྱི་སྒྲོན་མ་ཞུས་ཏེ། ལོ་ཙཱ་བ་རྨ་དགེ་བའི་བློ་གྲོས་ཀྱིས་བསྒྱུར། ཁོང་གི་ཇོ་བོ་ལ་བདག་རྒྱུད་གསང་བ་འདུས་པ་མན་ངག་ཡེ་ཤེས་ཞབས་ལུགས་ཡི་དམ་ཐུགས་རྗེ་ཆེན་པོ་ལ་མོས་པས། འཇིག་རྟེན་དབང་ཕྱུག་གིས་དཀྱིལ་འཁོར་གྱི་གཙོ་བོ་བྱས་པའི་སྒྲུབ་ཐབས་ཤིག་ཞུ་ཞུས་པས། འཇིག་རྟེན་དབང་ཕྱུག་ལྷ་བཅུ་དགུའི་དཀྱིལ་འཁོར་གྱི་དབང་གནང་ཞིང་སྒྲུབ་ཐབས་ཆེ་ཆུང་གཉིས་བསྟོད་བ་དང་བཅས་མཛད་དེ་ལོ་ཙཱ་བས་བསྒྱུར། ཇོ་བོའི་འཇིག་རྟེན་དབང་ཕྱུག་ལ་ཐུགས་དམ་དུ་མཛད་པས་ཞལ་མངོན་སུམ་དུ་གཟིགས། དབུས་སུ་ཕེབས་ནས་ཀྱང་ཇོ་བོའི་ཞབས་ཏོག་མཛད་ཅིང་ཆོས་ཀྱང་མང་དུ་གསན། ཇོ་བོའི་གསུང་ལ་གཅེས་སྤྲས་སུ་མཛད་པས་ཇོ་བོ་རྗེ་ཤིན་ཏུ་མཉེས། ལྷ་བཙུན་བོ་དྷི་རཱ་ཛས་ཇོ་བོ་ལ་ལྷ་བཙུན་པས་ཕྱག་མཛད་ཙ་ན་མི་བཞེང་། ཁོ་བོས་ཕྱག་བགྱིས་ཙ་ན་སྐུ་ལུས་རྡོ་རྗེ་སྐྱིལ་ཀྲུང་མཛད་ཀྱང་བཞེང་བ་ཇི་ལྟར་ལགས་ཞུས་པས། ལྷ་བཙུན་པ་ངེའི་སློབ་མ་ཡིན་ཁྱེད་བོད་ཀྱི་རཱ་ཛ་ཡིན་གསུང་། འོ་ན་ཁོ་བོ་སློབ་མ་མ་ལགས་སམ་ཞུས་པས། ཇོ་བོ་སྤྱན་ཟིམ་མེ་མཛད་ནས་ལགས་ལགས་བཟོད་པ་མཛོད་གསུང་། སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་བས། ཞེས་ཇོ་བོ་རྗེ་ཐུགས་ཤིན་ཏུ་མཉེས་པས་སྲས་ཀྱི་ཐུ་བོར་གྱུར་པ་ཞིག་སྟེ། བྱང་ཆུབ་ལམ་གྱི་སྒྲོན་མ་ཞེས་འཛམ་གླིང་བསྟན་པའི་སྒྲོན་མེ་གཅིག་པུ་འདི་ཁོང་གི་བཀའ་དྲིན་ལས་བྱུང་བས་རྒྱལ་བའི་བསྟན་པ་ལ་བྱ་བ་ཆེན་པོ་བྱས་པ་ཞིག་གོ།
གཙང་གི་སློབ་མ་རྣམས་ཀྱི་གཙོ་བོ་རྗེ་འགོས་ལོ་ཙཱ་བ་ནི། རྟ་ནག་ཕུའི་ཁུག་པ་ཞེས་བྱ་བའི་སའི་ཆར་ཡུམ་སྒྲོལ་མའི་སྤྲུལ་པ་ཡིན་ཟེར་བ་ཞིག་ལ་འཁྲུངས། མཚན་ནི་ལྷས་བཙས་ཏེ་ལྷས་སྐྱབས་ཞེས་བྱ་བ་ཡིན་ལ། དང་པོར་ཟུར་པའི་སར་སློབ་གཉེར་ལ་བྱོན་པས་ལས་ཁོ་ན་བཅོལ་བས་འབྲོག་མིའི་ཐད་དུ་བྱོན། ཆོས་འབྲེལ་ཙམ་གནང་ཡང་རྒྱུད་ཉན་པར་འདོད་པ་ལ་གསེར་ཁྱེར་ཤོག་གསུངས་ནས་མ་གནང་བས། རང་གི་སྤོབས་པ་བསྐྱེད་དེ་རྒྱ་གར་དུ་ཕྱིན་ལ་ཁོང་འདྲ་བ་ཞིག་བྱ་སྙམ་ནས། གྱི་ཇོ་ཟླ་བའི་འོད་ཟེར་དང་འགྲོགས་ཏེ་རྒྱ་གར་དུ་བྱོན། པཎྜི་ཏ་རྣམས་ཀྱི་ཐད་དུ་ཆོས་གསན་པའི་ཚེ་ན་བརྩོན་འགྲུས་མ་བསྐྱེད་ན་འབྲོག་འདོམ་དེ་ལ་ངོ་ཚ་བར་ཡོད་གསུངས་ནས་སྙིང་ནས་བསྐྱེད་དེ་སློབ་གཉེར་ལ་འབད་པ་ཆེན་པོ་མཛད། ཁོང་ལ་བལ་པོ་ཕན་ཆད་ན་པཎྜི་ཏའི་བླ་མ་བདུན་ཅུ་དང་། མཁའ་འགྲོ་མའི་བླ་མ་གཉིས་ཏེ་བདུན་ཅུ་རྩ་གཉིས་ཡོད་པར་གྲགས། གསང་བ་འདུས་པ་གསན་པའི་གཙོ་བོ་ནི་བྷཾ་ག་ལའིམངོན་ཤེས་ཅན། ཟ་ཧོར་གྱི་བཙུན་མོ་ཅན། ཀོང་ཀ་ནའི་རྒྱལ་བུ་སྤྲིན་གྱི་ཤུགས་ཅན། རྡོ་རྗེ་གདན་གྱི་ནག་པོ་དམ་ཚིག་རྡོ་རྗེ། ཇོ་བོ་རྗེ། ཁ་ཆེ་གྲིབ་སྟན་གྱི་མཁས་པ་ཙནྡྲ་རཱ་ཧུ་ལ། རྒྱལ་པོའི་ཁབ་ཀྱི་ཞི་བ་བཟང་པོ། ཡེ་རང་གི་བལ་པོ་ཐུགས་རྗེ་ཆེན་པོ། བལ་པོ་རྫོང་གི་ན་བ་ཀུ་ཊཱི་བ། ནཱ་རོ་བའི་སློབ་མ་ཁ་ཆེ་ཛྙཱ་ན་ཨཱ་ཀ་ར་རྣམས་བསྟེན་ནས་གསང་བ་འདུས་པའི་རྒྱུད་འགྲེལ་པ་ཆ་ལག་དང་བཅས་པ་མཁས་པར་བསླབས་ནས་བཤད་པ་མཛད་པས་འཕྲིན་ལས་ཀྱི་དར་རྒྱས་ཤིན་ཏུ་ཆེ། རྒྱུད་འགྲེལ་པ་དང་བཅས་པ་ལ་འགྱུར་བཅོས་ཀྱང་ལན་གཉིས་སུ་མཛད། གཞན་ཡང་འགྱུར་མང་དུ་མཛད། ལྷག་པར་གསང་བ་འདུས་པ་འཕགས་ལུགས་ལ་འཕྲིན་ལས་ཀྱི་བཀའ་བབ་པས་བོད་དུ་འདུས་པའི་བཤད་སྲོལ་རྒྱ་ཆེར་སྤེལ་ལོ། ། ཆོས་རྗེ་བུ་སྟོན་རིན་པོ་ཆེ་དང་རྗེ་བདག་ཉིད་ཆེན་པོ་ཡབ་སྲས་རྣམས་ཀྱིས་རྗེ་འགོས་ཀྱི་འདུས་པའི་བཤད་སྲོལ་ཉིད་སྩལ་དུ་བཏོན་ནས་སྤེལ་བས་དེང་སང་གི་བར་དུ་བཤད་སྲོལ་རྒྱུན་མ་ཆད་པར་ཡོད་པ་འདི་བྱུང་བ་ཡིན་པས་བཀའ་དྲིན་ཤིན་ཏུ་ཆེ་བ་ཞིག་གོ།
ཡོལ་སྐུ་མཆེད་གསུམ་ནི། ཡོལ་ཆོས་དབང་། ཡོལ་དྲང་སྲོང་། ཡོལ་ཐོགས་འབེབས་ཏེ། གསུམ་ག་ཇོ་བོའི་དངོས་སློབ་ཡིན་ཡང་། དང་པོ་ཇོ་བོ་ཉན་ཚོར་ཕེབས་དུས་ཇོ་བོའི་ཞལ་ནས། ད་ནང་ཐོ་རངས་ནམ་མཁའ་ལ་ཧྲཱིཿདཀར་པོ་སྒྲ་དང་བཅས་པ་ཅིག་བྱུང་། དེ་བཅུ་གཅིག་ཞལ་གྱི་སྐུ་ལི་མ་འདི་ལ་ཕོག ། དེ་ལས་འོད་འཕྲོས་བོད་ཐམས་ཅད་འོད་ཀྱིས་ཁྱབ་ནས་འོད་དེ་བན་ཆུང་གཞོན་ནུ་གཅིག་ལ་ཕོག་པས་དེའི་སྒྱུ་ལུས་འོད་གསལ་དུ་ཤར་བ་རྨིས་གསུང་། ཉི་མ་རྩེ་ཤར་ལ་ཡོལ་ཆོས་དབང་བཙུན་ཆུང་ལོ་བཅུ་དྲུག་ལོན་པ་གཅིག་གིས་དར་སེར་པོ་ཞིག་ཕུལ། བདག་ལ་ཐུགས་རྗེ་ཆེན་པོའི་གདམས་ངག་ཅིག་ཞུ་ཟེར་བས་ཇོ་བོ་དགྱེས་ནས་བཅུ་གཅིག་ཞལ་གྱི་སྐུ་དེ་ཡང་གནང་། སྤྱན་རས་གཟིགས་ཀྱི་ཆོས་སྐོར་རྣམས་རྫོགས་པར་གནང་། དེ་ནས་རང་གི་གནས་སུ་ཇོ་བོ་སྤྱན་དྲངས་ཏེ་ཟླ་བ་གསུམ་དུ་ཞབས་ཏོག་མཛད། དེའི་ཚེ་ཚོགས་ཆོས་སུ་ཕ་རོལ་ཏུ་ཕྱིན་པ་གསུངས། ལྐོག་ཆོས་སུ་ཡོལ་མཆེད་གསུམ་ལ་ཀྲྀ་ཡའི་སྒྲུབ་ཐབས་རྣམས་གསུངས། ཡོལ་གྱིས་ཇོ་བོ་ལ་སྲུང་བ་ཟབ་མོ་ཞིག་ཞུ་ཞུས་པས་མ་ཎི་གསུངས། དེས་མི་འོང་ཞུས་པས་མི་གཡོ་བ་གསུངས། སྟོན་པས་བྱིན་རླབས་ཆེ་བ་ཞིག་ཞུ་བྱས་པས། ཡི་གེ་དྲུག་པ་དང་ཞལ་བཅུ་གཅིག་པ་གསུངས། ལོ་ཙཱ་བས་མཐུ་ཆེ་བ་ཞིག་ཞུ་ཞུས་པས་གཤིན་རྗེ་གཤེད་གསུངས། སྒྲུབ་ཐག་ཉེ་བ་ཞིག་ཞུས་པས་སྒྲོལ་མ་གསུངས། ཡོལ་གྱིས་ཐུགས་རྗེ་ཆེན་པོ་ཞི་ཁྲོའི་སྐོར་ཞུས་ནས་སྒྲུབ་པ་མཛད་པས་ཟླ་བ་དྲུག་ནས་ཞི་བའི་ལྷའི་ཞལ་གཟིགས། དེ་ནས་ཁྲོ་བོའི་ཞལ་གཟིགས། ཐུགས་རྗེ་ཆེན་པོའི་ཆོས་སྐོར་ལ་ཡོལ་ལས་མཁས་པ་མེད་གསུངས། ཕྱིས་དབུས་སུ་ཡང་བྱོན་ཏེ་ཆོས་མང་དུ་གསན། ཁྱད་པར་རྟ་མགྲིན་ཤྭ་ན་བཞི་བསྐོར་གྱི་སྒྲུབ་ཐབས་དེ་ལོ་ཙཱ་བ་དང་ལྷ་བཙུན་པ་སོགས་ཀྱིས་ཞུས་ཀྱང་མ་གནང་བར་ཡོལ་ལ་འདི་སྙིང་རྗེའི་ལྷ་ཡིན་ཁྱོད་སྙིང་རྗེ་ཆེ་བས་སྟེར་བ་ཡིན་གསུངས་ནས་གནང་། ཡོལ་ལ་བརྟེན་ནས་ཇོ་བོ་ལུགས་ཀྱི་ཐུགས་རྗེ་ཆེན་པོ་གཙོ་འཁོར་གསུམ་གྱི་གདམས་པ་གྲུབ་མཐའ་རིས་སུ་མ་ཆད་པ་དག་ལ་རྒྱ་ཆེར་འཕེལ་ལོ། །
རོང་པ་འགར་དགེ་ནི། རྟེན་དགེ་བསྙེན་ཡིན། ཇོ་བོ་སྤྱན་འདྲེན་ཏུ་མང་ཡུལ་དུ་བྱོན། བསམ་ཡས་སུ་ཡང་བྱོན་ཏེ། གསང་སྔགས་ཀྱི་གདམས་པ་མང་དུ་གསན་ཞིང་ཕྱིས་ཇོ་བོ་རྗེ་སྙེ་ཐང་དུ་བཞུགས་པའི་དུས་ཉང་རོའི་སྟོན་པ་བསོད་ནམས་ཡེ་ཤེས་དང་ལྷན་དུ་ཕེབས། དེ་ནས་དགེ་བཤེས་སྟོན་པས་མཆིམས་ཕུ་ནས་ལོ་ཙཱ་བ་སྤྱན་དྲངས། སྟོན་པ་དགེ་བས་ཞུས་ནས་དཔལ་དགྱེས་པ་རྡོ་རྗེ་སློབ་དཔོན་ཤནྟི་པས་མཛད་པའི་ལྷན་ཅིག་སྐྱེས་པའི་རྣལ་འབྱོར་དང་། ཇོ་བོ་རྗེ་ཉིད་ཀྱིས་མཛད་པའི་ཌོམྦི་ཧེ་རུ་ཀའི་བདུད་རྩིའི་འོད་ཀྱི་འགྲེལ་པ་དང་། དཔལ་འཁོར་ལོ་སྡོམ་པའི་གཞུང་མང་པོ་དང་། དཔལ་མཧཱ་མ་ཡའི་སྒྲུབ་ཐབས་སློབ་དཔོན་ཀུ་ཀུ་རི་པ་དང་ཤནྟི་པས་མཛད་པ་ལ་སོགས་པ་གསན། སྤྱིར་ན་འགར་འགོས་གཉིས་ལ་གསང་སྔགས་མཐའ་དག་གི་གདམས་པ་མ་ལུས་པར་གནང་། ཁྱད་པར་དུ་གསང་སྔགས་འཕགས་སྐོར་ལ་རྩལ་ཐོན། ལཱུ་ཨི་པའི་དབང་བཀའ། ལྷ་སྲས་ཀྱི་འགྲེལ་བའི་བཤད་བཀའ། ཆོས་ཚན་དགུ་ལ་སོགས་པའི་རྫོགས་རིམ་ཡོངས་སུ་རྫོགས་པ་གསན་ནས་རང་གི་ཐུགས་ཉམས་སུ་བཞེས་ཤིང་སྐལ་བ་དང་ལྡན་པ་གཞན་དག་ལའང་རྒྱ་ཆེར་སྤེལ་ལོ། །
ལྷོ་བྲག་པ་ཕྱག་ཁྲི་མཆོག་ནི། འཁྲུངས་ཡུལ་ལྷོ་བྲག་པ། ལྷ་སར་ཇོ་བོ་མཇལ་བའི་ལམ་ཞོར་ལ་སྙེ་ཐང་དུ་ཇོ་བོ་རྗེ་དང་མཇལ་ཏེ་གདམས་ངག་མང་དུ་ཐོབ། ལོ་ལྔ་བསྟེན། ཆོས་མངོན་པ་ལ་རྩ་ལ་ཐོན། འཇིག་རྟེན་དབང་ཕྱུག་དང་། ཇོ་མོ་སྒྲོལ་མའི་ཞལ་གཟིགས་ཤིང་ཁམས་གོང་མའི་ཏིང་ངེ་འཛིན་ལ་མངའ་བརྙེས། ཇོ་བོའི་རྣལ་འབྱོར་མི་བཞིའི་ཡ་གྱལ་གཅིག་ཡིན། ཇོ་བོ་མྱ་ངན་ལས་འདའ་ཁར། ཚེ་འདི་བློས་ཐོང་། ཚེ་གཞུག་འབྲོམ་སྟོན་པ་དང་མ་བྲལ་བ་གྱིས་ཤིག་གསུངས་པ་ལ་བརྟེན་ནས་འབྲོམ་གྱི་ཕྱག་ཕྱིར་ར་སྒྲེང་དུ་ཕེབས། དེ་ནས་ཇོ་བོའི་གདུང་ཁང་གི་དངུལ་འདོན་པ་དང་། ཇོ་བོའི་ཕྱག་དཔེ་ཁ་ཅིག་རྒྱ་གར་དུ་རྫོང་བའི་སླད་དུ་བལ་ཡུལ་དུ་བྱོན། རྒྱ་གར་དུ་རྒྱ་དཔེ་འཕྲིན་ཡིག་དང་བཅས་པའི་མི་མང་པོ་བརྫངས། དངུལ་རྣམས་ལ་ལྗང་པ་བྱས་ནས་ཀ་བ་ལིར་བཅུག ། ཚུར་བྱོན་པའི་ལམ་དུ་རྨི་ལམ་ལ་ཇོ་བོ་སྒྲོལ་མའི་ཞལ་ནས་བྲམ་ཟེའི་ཁྱེའུ་ལོ་བཅུ་ལོན་པ་གཅིག་རས་ཚོང་དུ་འོང་གི་དེ་ཉོས་ལ་ང་ལ་ཕུལ་ཞིག ། དེ་ལྟར་བྱས་ན་ལམ་དུ་བར་ཆད་ཀྱིས་མི་ཚུགས་པའི་གཉེར་ཁ་ཐམས་ཅད་ངས་བྱེད་ཟེར་པ་ཞིག་རྨིས། སང་རས་ཚོང་བ་གཅིག་བྱུང་སྟེ་ཇོ་མོ་ལ་བསྔོས་ནས་དཔལ་མོ་དཔལ་ཐང་ལ་བྱོན་ཙ་ན་ཇག་པ་མང་པོ་བྱུང་བས་ཟླ་བོ་ཐམས་ཅད་བཅོམ། ཕྱག་ཁྲི་མཆོག་གི་དངུལ་ལྗང་པ་དེ་རྣམས་གད་སྐྱིབས་ཞིག་ན་ཕར་ལ་བཞག་པས་ཇག་པས་མ་མཐོང་བར་ཚུར་ཐོན། ལོ་རྒྱུས་དེ་ར་སྒྲེང་དུ་དགོན་པ་བ་ལ་ཞུས་པས། སྒྲོལ་མ་དཀར་སྔོ་གཉིས་གང་དུ་འདུག་གསུང་། དེ་མ་དྲན་ཞུས་པས་དེ་གཉིས་ཀ་བཞེངས་གསུངས་ནས་རས་དེ་ལ་སྒྲོལ་མ་དཀར་སྔོ་གཉིས་ཀ་བཞེངས་ནས་ད་ལྟ་ར་སྒྲེང་ན་བཞུགས་པ་ལགས། གླང་རི་ཐང་པའི་ཞལ་ནས་རི་མོ་གསལ་རྒྱུ་མི་འདུག་སྟེ་སྤྲུལ་པའི་སྐུ་དངོས་ཡིན་གསུངས། དེ་ནས་རེ་ཤིག་ན་ཇ་ལུང་རྡོ་གང་གི་མང་སྐོལ་མཛད། དེ་རིང་ནི་གཏམ་རི་གཟར་གྱི་རྦབ་འདྲ་བ་ཅིག་འོང་བས་སོ་སོ་ནས་བཟོད་པ་མཛད་པ་ཞུ་གསུངས་ནས་བཟོད་གསོལ་སྔོན་ལ་མཛད། དགེ་བཤེས་སྟོན་པ་ལ་དགེ་བའི་བཤེས་གཉེན་པ་ལགས། ཁྱེད་ལ་ཇོ་བོའི་གདམས་ངག་ཐམས་ཅད་བུམ་པ་གང་བྱའོ་ཚུལ་དུ་མངའ་བ་ལགས་པས། དེས་ཀྱང་མི་ཕན། དེས་ཀྱང་མི་ཕན་མི་གསུང་བར་ཇོ་བོའི་གདམས་ངག་རྣམས་རྒྱུན་མི་གཅོད་པར་གསུང་བར་ཞུ། རྣལ་འབྱོར་པ་ལ། ཁྱོད་རྣལ་འབྱོར་པ་མི་ཆོས་སུ་ངན་ཏེ། ཇོ་བོའི་གཡོག་བཞག་ནས་རྦ་རྒྱ་མཚོའི་རྗེས་ལ་ཕྱིན། ལྷ་ཆོས་སུ་ངན་ཏེ་ཇོ་བོ་གདམས་ངག་བསྒོམ་པ་བཞག་ནས་སྦས་ཆུང་སྟོན་པའི་བདག་མེད་མའི་སྒྲུབ་ཐབས་བསླབས་པ་ཡིན་ཞེས་དང་། རྣལ་འབྱོར་པ་གོང་འོག་ལ་ཡང་བཀའ་ཕབ་ལམ་མེ་བ་ཞིག་མཛད་ནས། ད་ཁོ་བོ་ཇོ་བོའི་ཐུགས་དགོངས་སྐོང་དགོས་པ་ཡོད་པས། སང་ནས་མཚམས་གཅོད་པར་ཞུ་གསུང་བས། རྣལ་འབྱོར་པ་གོང་འོག་གི་ཐུགས་དགོངས་ལ་ཁོང་མཚམས་བཅད་ནས་མི་དང་མི་ཕྲད་པ་ཡིན་འོང་སྙམ་ཙ་ན་ཤུག་གསེབ་ལ་སོགས་པ་གར་ཐོད་ཐོད་དུ་བཞུགས་ནས་གདའ་སྐད། དེ་དུས་གསུང་ཕུ་ནས་རྣལ་འབྱོར་བ་ཤེས་རབ་རྡོ་རྗེ་ར་སྒྲེང་དུ་བྱོན། ཁོང་དང་ཆོས་ཀྱི་གསུང་གླེང་ཁོ་ཐག་ཆོད་པ་ཅིག་བྱ་སྙམ་ནས་བྱོན་པ་དང་། རྣལ་འབྱོར་པ་མི་བཞུགས་པར་གདའ་སྐད། གར་བཞུད་བྱས་པ། ཤུག་གསེབ་ཀྱི་ཕ་གི་ཡིན་ཟེར་བས། དེར་བྱོན་ཏེ་གསང་ཕུ་བ་དགེ་སློང་ཡིན། ཁྲི་མཆོག་དགེ་བསྙེན་ཡིན་པས་གསང་ཕུ་བ་ལ་ཚུར་ཕྱག་གསུམ་མཛད་ནས། ཁོ་བོ་ལ་མིའི་ཏིག་པོ་ཙམ་མི་བདོག་གསུངས་ནས། ཤུག་གསེབ་ན་ཕར་གཤེགས་པར་མཛད། གསང་ཕུ་བའི་ཞལ་ནས། དེ་ལས་ཡི་མུག་པ་དང་། དེ་ལས་ཁོ་ཐག་མ་ཆོད་པ་ཅིག་མ་བྱུང་གསུང་། ཁོང་འཇིག་རྟེན་གྱི་རྣམ་པར་རྟོག་པ་ལ་མཚམས་པོ་ཆེ་བད་ཀྱིས་བཅད་ནས་བཞུགས་པ་ཡིན་ཏེ། འཇིག་རྟེན་བློས་བཏང་ནས་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པ་ལ་སོགས་པ་ཇོ་བོའི་ཐུགས་དགོངས་ཇི་ལྟ་བ་བཞིན་དུ་བསྒྲུབ་པར་མཛད། ལན་ཅིག་ཡུལ་ནས་གསེར་ཞོ་ཁ་ཡར་ཞིག་བྱུང་བ་ན། གསེར་གྱི་ཐུམ་པོ་རྣམས་བཀྲོལ་ནས་ཕྱག་གི་མཐིལ་དུ་བླུགས། ཀ་གཉིས་མའི་མདུན་དུ་བྱོན་ནས། བདག་ནི་གྲོལ་བ་དོན་གཉེར་ལ། ། རྙེད་དང་བཀུར་སྟིས་འཆིང་མི་དགོས། ། གསུང་ཞིང་རྟེན་གྱི་གསེབ་ཏུ་གཏོར་ཏེ་བཏང་། རྭའི་ཟེའུ་ཆུང་ཆུང་ཞིག་ལ་སྐོར་བ་མཛད་པ་ལ། མྱ་ངན་འདས་རྟིང་བལྟས་པས། ནང་ན་ཇོ་བོའི་ན་བཟའ་བྲུལ་པ་ཅིག་སྣང་། གཞན་རྟེན་གྱི་དངོས་པོ་ཅི་ཡང་མི་འདུག ། དགོན་པ་བའི་ཞལ་ནས། ཝ། ར་སྒྲེང་བའི་མཐའ་འདི་ལྟར་སོང་བ་གསུང་། དེ་ཅི་ནོངས་ཞུས་པས། ངས་ཇོ་བོའི་ཐུགས་དམ་གྱི་ལྷ་བཞེངས། རྣལ་འབྱོར་པས་མདོ་མང་བྲིས། སྟོན་པ་འདས། ཁྲི་མཆོག་ཡོད་ནའང་འདི་ལྟར་མི་འགྲོ་བ་ལ་གསུང་། ཁྲི་མཆོག་གིས་ཅི་ཕན་ཞུས་པས། དེ་འཇིགས་ནས་བྱེད་མི་ཕོད་གསུང་། ཤ་ར་བའི་ཞལ་ནས། ད་ལྟའི་བཀའ་གདམས་པའི་སྲོལ་གང་ཡིན་ཆ་མེད། སྔོན་དགེ་བཤེས་སྟོན་པ་དང་། ཁྲི་མཆོག་དང་། རྣལ་འབྱོར་པ་རྣམས་ཀྱིས་སྐྱེ་སའི་ཡུལ་སྤངས་ཏེ་ཉེ་དུ་འབྲེལ་པ་ལ་ཤི་བ་ལྟར་བྱས་ནས་ཆོས་ལ་ནན་ཏན་ཆེར་བྱེད་པ་ཡིན་གསུང་། དགེ་བཤེས་གྲོ་ལུང་པའི་ཞལ་ནས། རྣལ་འབྱོར་པ་ཕྱག་ཁྲི་མཆོག་ཆོས་གྲྭའི་སློབ་དཔོན་སྤྱོད་པ་གཞན་གྱི་སེམས་ཤེས་པ་མངའ་བ་ཇོ་བོ་རྗེ་གཤེགས་ཁར་ཐ་མལ་པའི་རྟོག་པ་མ་རྒྱུ་བར་བྱང་ཆུབ་ཀྱི་སེམས་སྦྱོངས་ཤིག ། སྟོན་པ་དང་མ་བྲལ་བར་གྱིས་ཤིག་ཅེས་གདམས་པ་དང་། ལྷག་པར་དགོངས་པ་ལོ་བཞིར་ཐ་མལ་པའི་རྟོག་པ་མ་ཤོར་བར་གྲགས་པ་སྟེ། རྙེད་པ་ནི་འཕྲལ་འཚོ་ཙམ་ལས་མེད། མགྲོན་གྱི་སྣ་ལེན་ལ་སོགས་པ་ཚུལ་བཞིན་མཛད་པ་ན། ཉེ་གནས་སྐྱོ་ནས་འདི་ལྟ་བུ་མི་འགྲུབ་ཅེས་ཞུས་པ་དང་། བཀྱོན་ཏེ། གཅིག་པུར་འདུག་པ་ཏ་སོ་གསོད་དེ་ཆིག་སྐྱ་མི་ཐུབ་པས་དགེ་བཤེས་སྟོན་པ་ལ་བརྟེན་པ་ཡིན་གསུང་ངོ་། ། དེ་ལྟར་ཐ་མལ་གྱི་རྣམ་པར་རྟོག་པའི་རྒྱུ་བ་བཅད་དེ་དགུང་ལོ་ཞེ་གཉིས་ 1058 ས་ཁྱི་འགྲོ་བའི་ཚེ་ར་སྒྲེང་དུ་སྐུའི་བཀོད་པ་བསྡུས་ནས་དགའ་ལྡན་ཆོས་ཀྱི་ཕོ་བྲང་དུ་གཤེགས་སོ། །
༈ ལྷོ་བྲག་བ་དགེ་བ་སྐྱོང་གི་རྣམ་ཐར་རྙེད་ན་འདིར་འཇུག །
ཁམས་པ་སྐུ་མཆེད་བཞི་ནི། རྣལ་འབྱོར་བ་ཆེན་པོ་བྱང་ཆུབ་རིན་ཆེན། དགོན་པ་པ་དབང་ཕྱུག་རྒྱལ་མཚན། ཤེས་རབ་རྡོ་རྗེ། ཕྱག་དར་སྟོན་པ་རྣམས་སོ། ། དེ་ལ་རྣལ་འབྱོར་པ་ཆེན་པོ་བྱང་ཆུབ་རིན་ཆེན་ནི། མདོ་ཁམས་སྨད་དུ་ཕྱི་ལོ་ 1015 ཤིང་མོ་ཡོས་ལ་སྐུ་འཁྲུངས། སྐུ་གཞོན་ནུ་ནས་རབ་ཏུ་བྱུང་སྟེ་ཇོ་བོ་རྗེ་བོད་དུ་འབྱོན་པའི་སྙན་པ་གསན་ནས་མཇལ་བར་འདོད་དེ་བྱོན་པས་གཙང་གི་ཉན་ཚོར་ཇོ་བོ་དང་མཇལ། ཇོ་བོས་སྔོན་གྱི་འབྲེལ་པ་དང་ཆོས་ཀྱི་བག་ཆགས་ཡོད་པར་མཁྱེན་ནས་མཇལ་མ་ཐག་ཏུ་དམ་ཚིག་གསུམ་བཀོད་པའི་རྒྱལ་པོའི་ལུང་དང་། འདུ་ཤེས་བསྐྱེད་པའི་ཆོས་བཅུ་བྱ་བའི་གདམས་ངག་གནང་། རྒྱུན་གྱི་ཞབས་ཏོག་པ་ཉེ་གནས་མཛད་ཅིང་། རྒྱ་གར་དུ་ཇོ་བོའི་བླ་མ་རྣམས་ལ་འབུལ་སྐྱེལ་དང་། རྡོ་རྗེ་གདན་གྱི་མཆོད་པ་སོགས་བྱ་བར་ལན་གསུམ་བྱོན། ལན་ཅིག་དབུས་སུ་ཉང་པོའི་གྲུ་ལ་ཇོ་བོའི་ཕྱག་ཕྱི་མཛད་ཅིང་ཕེབས་དུས་ཇོ་བོ་ལ་གྲུ་གླ་ཅི་སྦྱིན་ཞུས་པས་ཇོ་བོས་ཕྱག་རྒྱ་ཞིག་མཛད་བས་དེ་གོ་ནས་ཀ་ར་བམ་པོ་ལྔ་བྱིན་བས་ཇོ་བོ་དགྱེས་ཏེ་ངས་རྐང་མགྱོགས་བསྒྲུབས་ནས་འཛམ་བུའི་གླིང་ལན་གསུམ་སྐོར་ཡང་ཁྱོད་འདྲ་པའི་སློབ་མ་མི་རྙེད་གསུང་། ཇོ་བོ་སྙེ་ཐང་དུ་བཞུགས་དུས་རྣལ་འབྱོར་པའི་ཐུགས་དགོངས་ལ་ཉིན་མཚན་དང་སྟོན་དཔྱིད་མེད་པར་བླ་མའི་ཞབས་ཏོག་བྱེད་བྱེད་ནས་བསྒོམ་བྱ་རྒྱུ་མ་བྱུང་བས་ང་བསོད་ནམས་ཆུང་སྙམ་པའི་བློ་ཞིག་སྐྱེས་པ་ཇོ་བོས་མཁྱེན་ནས་ལུས་ངག་ཡིད་གསུམ་བླ་མའི་ཞབས་ཏོག་ཏུ་བཀོལ་ན་སྒོམ་གྱི་དམིགས་པ་གཞན་ནས་བཙལ་མི་དགོས་གསུངས། དེའི་གནད་ཀས་དགེ་བཤེས་རྣལ་འབྱོར་པ་ལས་རྟོགས་པ་མཐོ་ལ་སྒོམ་བཟང་བ་མ་བྱུང་བ་ཡིན། དམ་ཚིག་གསུམ་བཀོད་པའི་རྒྱལ་པོའི་བཟླས་པ་སྟོང་ཕྲག་བརྒྱད་ཐོན་ཙ་ན་ཞལ་གཟིགས། ལས་སྣ་ཚོགས་ལ་རྩལ་ཐོན། དམ་ཚིག་གསུམ་བཀོད་རྒྱལ་པོ་དང་འཇམ་དཔལ་བགྲོ་བ་མཛད་པའི་ཞལ་གཟིགས། ཇོ་བོ་མྱ་ངན་ལས་འདས་ནས་ཞལ་འཆེམས་བཞིན་དགེ་བཤེས་སྟོན་པའི་ཕྱག་ཕྱིར་བྱོན་ནས་ར་སྒྲེང་དུ་བཞུགས། དགེ་བཤེས་སྟོན་པ་ཞི་བར་གཤེགས་རྗེས་ར་སྒྲེང་གི་གདན་ས་ལོ་བཅུ་གསུམ་མཛད། ར་སྒྲེང་གི་ཁྱམས་སྨད་ལ་སོགས་པ་མཛད་པ་ལྷག་མ་རྣམས་བསྒྲུབས་ཤིང་ཚོགས་པ་བསྐྱངས་པས་འཕྲིན་ལས་ཤིན་ཏུ་ཆེ་བ་བྱུང་། བུ་སློབ་ཆེ་བ་མང་ར་བ་བྱང་ཚུལ། སྟོད་ལུང་པ་ཆེན་པོ། ལྷག་མི། གཡག་རུམ། སྨྱུག་རུམ་པ་ཆེན་པོ་རྣམས་དང་། བཀའ་གདམས་སྐུ་མཆེད་གསུམ་གྱིས་ཀྱང་འདིའི་ཞབས་ལ་གཏུགས་པར་སྣང་ངོ་། ། བདག་ཉིད་ཆེན་པོ་འདི་ནི་མངོན་ཤེས་དང་རྫུ་འཕྲུལ་ཐོགས་པ་མེད་པ་མངའ་བ་ཞིག་སྟེ། འབྲོམ་རིན་པོ་ཆེ་སྐུ་སྙུན་པའི་སྐབས་ཤིག་རྫུ་འཕྲུལ་གྱིས་རྩིགས་པ་ལའང་ཐོགས་པ་མེད་བར་བྱོན་ནས་སྙུན་དྲིས་པའི་གཏམ་རྒྱུད་ཀྱང་ཡོད་ཅིང་། རྫོགས་རིམ་གྱི་རླུང་མཉམ་འཇུག་གི་ཏིང་ངེ་འཛིན་ཁྱད་པར་ཅན་ཐོབ་པ་ཞིག་ཡིན་པར་གསུངས། དགུང་ལོ་དྲུག་ཅུ་རེ་གསུམ་པ་ 1077 མེ་མོ་སྦྲུལ་གྱི་ལོའི་རྒྱལ་ཟླའི་ཡར་ཚེས་བརྒྱད་ལ་ངོ་མཚར་བའི་ལྟས་དང་བཅས་དགའ་ལྡན་དུ་གཤེགས་སོ། ། དགོན་པ་བ་ཆེན་པོའི་རྣམ་ཐར་ནི་འོག་ཏུ་འཆད་དོ། །
རྣལ་འབྱོར་པ་ཤེས་རབ་རྡོ་རྗེ་ནི། ཇོ་བོའི་གདམས་པ་མང་དུ་མངའ་ཞིང་ཁྱད་པར་གྲུབ་མཐའ་ལ་རྩལ་ཐོན། ཐུགས་དམ་ཡི་གེ་དྲུག་པའི་ཞལ་གཟིགས། ཇོ་བོ་ལོ་གསུམ་དུ་བསྟེན་པར་གྲགས། ལན་ཅིག་གི་ཚེ་མ་ཎི་བཟླས་པས་ཞལ་ནས་འོད་ཟེར་ཤྭ་ཤཱ་འོང་བ་ལ་རྣལ་འབྱོར་བ་ཆེན་པོའི་ཞལ་ནས། སྒོམ་ཆེན་འདི་ཁོ་ན་རེ་སྐྱིད། བྱང་ཆུབ་ཀྱི་ཐུགས་མངའ་བ་གསུང་། ཇོ་བོ་གཤེགས་ནས་གསང་ཕུར་བཞུགས་ཏེ་ཐུགས་དམ་ཆིག་ཆོད་དུ་མཛད། ཁོང་དང་རྣལ་འབྱོར་པ་ཁྲི་མཆོག་གཉིས་ཐུགས་བཅུགས་པས་གསང་ཕུ་དང་ར་སྒྲེང་གཉིས་ལ་ཡར་སྙེགས་མར་སྙེགས་བྱེད་པ་ལ་དྲོ་ཟན་འཁྱེར་མི་དགོས་གསུངས་ཏེ། རྐང་མགྱོགས་ཀྱི་རྫུ་འཕྲུལ་ཐོབ་པར་གྲགས། དགེ་བཤེས་སྤྱན་སྔའི་བླ་མ་ཡིན་པས་སློབ་དཔོན་སྒོམ་ཆེན་ཞེས་འབོད། གསང་ཕུར་སྐུ་གཤེགས་པས་གདུང་བཞུགས་པའི་ས་འབུམ་ཆུང་ངུ་ཞིག་གསང་ཕུའི་སྐོར་ལམ་ནུབ་ཕྱོགས་ན་ད་ལྟའང་བཞུགས་སོ། ། འདི་ལ་གོང་མ་རྣམས་གསང་ཕུར་སྐུ་ཡལ་ཞེས་བསྔགས་པ་ཆེ་བར་མཛད་དོ། །
ཕྱག་དར་སྟོན་པ་ནི། སྤྱིར་ཇོ་བོའི་ཆོས་མང་དུ་མཁྱེན་ཅིང་། ཁྱད་པར་ཕ་རོལ་ཏུ་ཕྱིན་པ་ལ་རྩལ་ཐོན། ཇོ་བོས་ཕྱག་དར་ལ་ལོགས་སུ་བླ་མའི་མན་ངག་བྱ་བ་གསང་བས་འགྲུབ་པ་ཡིན་ཏེ། བསྟན་པ་ཉམས་དམའ་བའི་དུས་སུ་བཟློ་དགོས། ཁྱོད་ཤེས་རབ་ཤིན་ཏུ་ཆེ་བས་ཇི་སྐད་བཤད་པ་བཞིན་དུ་གོ ། ངས་ཇི་སྐད་ཟེར་བ་བཞིན་དུ་བྱེད། གཞན་རྣམས་ཀྱིས་བསྟན་ཀྱང་མ་གོ་བས་དེ་མིན་ཞིག་ལོགས་ན་ཡོད་སྙམ་ནས་འོང་། ཁྱོད་བྱམས་སྙིང་རྗེ་བྱང་ཆུབ་ཀྱི་སེམས་སྒོམས་ཤིག་གསུངས། ཡང་དགེ་བཤེས་ཕྱག་དར་ལ་སོགས་པ་བོད་སྟོན་ཁ་ཅིག་གིས། ཇོ་བོའི་སྐུ་སྐྱེ་སྔ་མ་ཇི་ལྟར་བཞེས་པ་དང་། ཕྱི་མ་གང་དུ་འཁྲུངས་པ་དང་། འཚང་ཇི་ལྟར་རྒྱ་བའི་ལོ་རྒྱུས་ཤིག་ཡི་གེར་འདྲི་བར་ཞུས་པས། ཇོ་བོའི་ཞལ་ནས། ཁྱོད་ཀྱིས་གཙུག་ཏོར་འདོན་མ་མྱོང་ངམ་གསུངས། མྱོང་ལགས་ཞུས་པས། གཙུག་ཏོར་ནས། བཅད་དོ། ། ཕུར་བུས་གདབ་བོ། ། བྱ་བ་བགེགས་ལ་ནུས་པ་མེད་པར་བྱས་པ་ཡིན། དེ་བཞིན་དུ་བཀའ་དང་བླ་མའི་མན་ངག་ལ་ཚིག་གི་ཕུར་བུས་བཏབ་པས་བྱིན་རླབས་ཉམས་འགྲོ་བ་ཡིན། དེ་བས་ན་ཚིག་ཟིན་པ་དང་དོན་གོ་བར་བྱ་ཡིས། ཡི་གེར་འདྲི་བའི་འོས་མ་ཡིན་གསུང་། ཕྱག་དར་སྟོན་པ་ལ་ནན་ཏན་དུ་མཛད་ནས་ཡོན་ཏན་གསང་བས་འགྲུབ་པ་ཡིན་ནོ་གསུང་། སྙེ་ཐང་དུ་ཇོ་བོས་བོད་སྟོན་རྣམས་ལ་ཕར་ཕྱིན་ཐོག་མར་པཎྜི་ཏའི་བཤད་ལུགས་དང་། དེ་ནས་ཇོ་བོ་ཉིད་ཀྱི་བཞེད་པ་རྟོན་པ་བཞིའི་སྒོ་ནས་ཁྲིད་ཚུལ་གསུངས་པ་ལ་འདིས་ཟིན་བྲིས་མཛད་པའི་ཕར་ཕྱིན་ཁམས་ལུགས་མར་གྲགས་པའང་སྣང་སྟེ། སྔོན་གཙིགས་ཆེ་བར་བྱུང་འདུག་གོ ། ཇོ་བོ་གཤེགས་ནས་ར་སྒྲེང་དུ་བྱོན། སྟོན་པའི་སློབ་མ་མཛད། སྐུ་མཆེད་གསུམ་གྱིའང་སློབ་དཔོན་དུ་སྣང་ཞིང་། ཕྱིས་ཁམས་སུ་ཕེབས་ནས་བསྟན་འགྲོའི་དོན་རྒྱ་ཆེར་མཛད་ཅེས་གྲགས་སོ། ། ། །
དབུས་ཀྱི་སློབ་མའི་གཙོ་བོ་ཁུ་རྡོག་འབྲོམ་གསུམ་གྱི་ནང་ནས་དགེ་བཤེས་ཁུ་སྟོན་ནི་ཡུལ་ཡར་ཀླུངས། མཚན་བརྩོན་འགྲུས་གཡུང་དྲུང་། ཕྱི་ལོ་ 1011 ལྕགས་མོ་ཕག་ལ་སྐུ་འཁྲུངས་ཏེ་ནག་ཚོ་དང་འཁྲུངས་ལོ་གཅིག ། ཁོང་དང་རྔོག་ལེགས་པའི་ཤེས་རབ་བང་སྟོན་གསུམ་གྱིས་ཁམས་སུ་བྱོན་ཏེ། ཇོ་བོ་སེ་བཙུན་ལ་ཆོས་མང་དུ་གསན། གར་མི་ཡོན་ཏན་གཡུང་དྲུང་ལ་མངོན་པ་བསླབས་ཏེ་མཁས་པར་མཁྱེན། ཀླུ་མེས་ཐམས་ཅད་ཀྱི་གནས་བརྟན་མཛད། དེའི་དུས་སུ་ཁོང་ལས་མི་ཆེ་བ་མེད་པ་ཡིན་པ་ལ། དགེ་བཤེས་སྟོན་པས་དབུས་ཀྱི་མི་ཆེན་རྣམས་ལ་གནང་བའི་བཀའ་ཤོག་ན་ཁུའི་མཚན་མ་ཆུད་པས། ཐུགས་རྒྱལ་སྐྱེས་ཏེ་ཇོ་བོ་ང་རང་གིས་ཐོབ་བ་ཅིག་བྱའོ་སྙམ་ནས་སྔོན་ལ་ལྕག་བཏབ་སྟེ་བྱོན་པས། གཞན་རྣམས་ཀྱིའང་བསྐུལ་མར་གྱུར་ཏེ། ཞང་རོམ་གྱི་ཞལ་ནས། དུས་ཚུང་པ་དེ་གོ་བཅད་གསུང་སྟེ། ད་ཡང་དགེ་བཤེས་སྟོན་པ་དཀྱེལ་ཆེ་བའི་ཡོན་ཏན་ཡིན། དགེ་བཤེས་དེས་ཇོ་བོ་ཡུན་དུ་བསྟེན་ནས་གདམས་པ་མང་དུ་གསན། ཁྱད་པར་དུ་ཕ་རོལ་ཏུ་སྦྱིན་པའི་གདམས་པ་དང་། གཤིན་རྗེའི་ལན་ངག་ལ་རྩལ་ཐོན། ཐང་པོ་ཆེར་སྤྱན་དྲངས་ཏེ་ཆོས་ཀྱི་འཁོར་ལོ་བསྐོར། སྙེ་ཐང་དུ་ཁུས་ཕར་ཕྱིན་བཤད་པས་ཆོས་ཉན་སྟོང་ཙམ་འདུས་པ་བྱུང་། མཐར་དགུང་ལོ་དྲུག་ཅུ་རྩ་ལྔ་བཞེས་པ་ཤིང་མོ་ཡོས་ 1075 ལ་གཤེགས་སོ། །
རྔོག་ལེགས་པའི་ཤེས་རབ་ནི། ཆོས་རྒྱལ་ཁྲི་སྲོང་ལྡེ་བཙན་གྱི་བློན་པོ། རྔོག་ཆེན་པོ་བྱ་བ་བྱུང་སྟེ། བཙན་པོས་རྒྱ་ཡུལ་དུ་དམག་དྲངས་པའི་ཚེ་རྒྱལ་པོ་རི་དེའུ་ཞིག་གི་ཁར་བཞུགས། དམག་རྣམས་ཡུལ་འཇོམས་སུ་བཏང་བ་ན། རྒྱལ་པོའི་སྐུ་ལ་བསྡོ་བའི་སྐྱེན་པོ་འགའ་ཞིག་བྱུང་བ་ན། བློན་པོ་རྔོག་གིས་འགའ་ཞིག་བསད། འགའ་ཞིག་ནི་ཕྱིར་བྲོས། དེ་ནས་རྒྱ་ཞོ་ཧབ་ཀྱིས་བཏབ། རྒྱ་ཕྲུག་བྲག་ལ་བརྡབས་ཟེར་བ་དེའི་རྒྱུད་པ་ཡིན་ཏེ། ཡར་འབྲོག་དོའི་ཕྱི་རོལ་གྱི་མཚོ་ཆེན་པོའི་འགྲམ་དུ་གྲོང་ཆགས་པའི་སྔགས་རྙིང་མ་བའི་དགེ་བཤེས་རྡོ་རྗེ་གཞོན་ནུ་བྱ་བ་ལ་སྲས་ལྔ་བྱུང་བའི་ཆེ་བ་ལེགས་པའི་ཤེས་རབ། གཉིས་པ་ཀླུ་ཁྲི། གསུམ་པ་ཀླུ་བྱང་། བཞི་པ་ཆོས་སྐྱབས། ལྔ་པ་ཐུབ་པ་རྣམས་ལས་ཆེ་བ་ལེགས་པའི་ཤེས་རབ་ཀྱིས་འབྲིང་ཤེས་ཡོན་ཏན་ལ་རབ་ཏུ་བྱུང་། ཁམས་སུ་བྱོན་ནས་ཇོ་བོ་སེ་བཙུན་ལ་སྡེ་སྣོད་རྣམས་གསན་པས་མཁས་པར་མཁྱེན་ཏེ་སྟོན་པ་བཞུད་པའི་ཕྱི་ལོ་བྱི་བའི་ལོ་ལ་དབུས་སུ་ཕེབས། བཤད་པའི་གྲྭ་བཙུག་ནས་སློབ་མ་ཡང་མང་དུ་བྱུང་། དེ་ནས་དབུས་གཙང་གི་མི་ཆེན་རྣམས་དང་ལྷན་དུ་མང་ཡུལ་དུ་ཇོ་བོ་དང་མཇལ། ཆོས་མང་དུ་གསན། ཐུགས་རྒྱུད་ཤིན་ཏུ་བཟང་བས་ཇོ་བོའི་སློབ་མ་སུ་དང་ཡང་མི་མཐུན་པ་མེད། ལྷ་སར་ཇོ་བོ་དཔོན་གཡོག་སྤྱན་དྲངས་ནས་ཞབས་ཏོག་རྒྱ་ཆེར་མཛད། རྔོག་གིས་དབུ་མཛད་པའི་བོད་སྟོན་ཁ་ཅིག་ལ་དབང་བསྐུར་བའི་ཆོ་ག་རྒྱས་པར་གནང་། རྟོག་གེ་འབར་བ་བསྒྱུར་བའི་ཞུ་བ་ཕུལ། ཇོ་བོས་གནང་ནས་ནག་ཚོས་ཚང་བར་བསྒྱུར། དེའི་ཞར་ལ་དབུ་མའི་མན་ངག་ཀྱང་མཛད། རྣལ་འབྱོར་པ་ལ་གཟིགས་སུ་ཕུལ་བས་ངེད་ལ་ལྐོག་ཏུ་ཇི་ལྟར་ཁྲིད་པ་བཞིན་དུ་བྲིས་འདུག ། ཅུང་ཡང་ཟབ་དྲགས་གསུང་། དེ་ལོ་ཙཱ་བས་བསྒྱུར། དེའི་ཞབས་ན། ར་ས་འཕྲུལ་སྣང་གཙུག་ལག་ཁང་ཆེན་དུ། ། མར་མེ་མཛད་དཔལ་ཞེས་བྱའི་མཁས་པ་ལ། ། ཤཱཀྱའི་དགེ་སློང་རྔོག་བཙུན་ལེགས་ཤེ་ཡིས། ། གསོལ་བ་བཏབ་ནས་ཡི་གེར་བཀོད་པ་ཡིན། ། བྱ་བ་དེ་ཇོ་བོའི་གསུང་ཡིན། མཚན་ནི་མར་མེ་མཛད་ཅེས་གྲགས་པ་ཡི། ། མཁས་པ་འདི་ཡི་གཞུང་ལུགས་སུ་འཛིན་པ། ། གོལ་བའི་ལམ་དུ་མི་འགྲོ་ཞེས། ། ནག་ཚོ་ཚུལ་ཁྲིམས་རྒྱལ་བ་སྨྲ། ། ཞེས་གསུངས། དགེ་བཤེས་གསང་ཕུ་བ་དེས་ཇོ་བོ་ལོ་བཅུ་བསྟེན་ཅིང་། ལམ་རིམ་ཤླཽ་ཀ་དྲུག་དང་དེའི་གསལ་བྱེད་མཛད། སྤྱིར་ཇོ་བོའི་ཆོས་མང་དུ་མཁྱེན་ཀྱང་དབུ་མའི་ལྟ་བ་ལ་རྩལ་ཐོན། རྗེ་བཙུན་མ་སྒྲོལ་མའི་ཞལ་གཟིགས། ལན་ཅིག་ཇོ་བོའི་ཕྱག་ཕྱིར་བྱོན་པས་གསང་ཕུ་ལ་ཕྱག་མཛུབ་བཙུགས་ཏེ་ལུང་པ་ཡ་གིའི་ནང་ན་དུང་གཡས་སུ་འཁྱིལ་བ་འདྲ་བ་ཡོད། ལེགས་ཤེ་ཁྱོད་ཀྱིས་དེར་གཙུག་ལག་ཁང་ཐོབ་ལ་བཤད་ཉན་གྱིས་དང་བསྟན་པ་ལ་ཕན་ཐོགས་རྒྱ་ཆེན་འབྱུང་ཞེས་ལུང་བསྟན་པ་བཞིན་གསང་ཕུ་ནེའུ་ཐོག་ཏུ་གཙུག་ལག་ཁང་བཏབ་བཤད་ཉན་མཛད་པས་ཚོགས་པ་ལྔ་བརྒྱ་ཙམ་འདུས། དགེ་བཤེས་དེས་སྤྱིར་བསྟན་པ་ལ་བྱ་བ་རྒྱ་ཆེན་པོ་མཛད་ཅིང་། ལྷག་པར་ཇོ་བོ་ཡབ་སྲས་ཀྱི་གསང་ཆོས་བཀའ་གདམས་གླེགས་བམ་རིན་པོ་ཆེ་དང་ཐིག་ལེ་བཅུ་དྲུག་གི་མན་ངག་རྣམས་བཤེས་གཉེན་ཆེན་པོ་འདིའི་བཀའ་དྲིན་ལས་བྱུང་བས་བཀའ་དྲིན་མཚུངས་པ་མེད་པ་ཞིག་གོ།
གསང་བུ་བ་ཆེན་པོ་དེའི་དཔོན་པོ་རྔོག་ལོ་ཆེན་པོ་བློ་ལྡན་ཤེས་རབ་ནི། ཆོས་སྐྱབས་ཀྱི་སྲས་སུ་ས་མོ་ཕག་ཕྱི་ལོ་ 1059 ལ་སྐུ་འཁྲུངས། གཞོན་ནུའི་དུས་ནས་ཁུ་བོའི་དུང་དུ་བྱོན། ཁུ་བོ་དང་གཟུས་ཀྱི་སློབ་མ་སྦོ་ཆུང་བ་ཚུལ་ཁྲིམས་ཤེས་རབ་གཉིས་ལ་བརྟེན་ནས་རབ་ཏུ་བྱུང་སྟེ་དེ་གཉིས་ལ་གསན་པ་མང་དུ་མཛད་པས་ཁོང་གི་ཤེས་རབ་ལ་ཁུ་བོ་མཉེས་ནས། ལོ་བཅུ་བདུན་བཞེས་པའི་ཚེ་ཁ་ཆེར་སློབ་གཉེར་ལ་བརྫངས། དེའི་ཚེ་རྭ་ལོ། གཉན་ལོ། ཁྱུང་བོ་ཆོས་བརྩོན། རྡོ་སྟོན། བཙན་ཁ་བོ་ཆེ་རྣམས་དང་འགྲོགས་ནས་བྱོན་པས། མངའ་བདག་རྩེ་ལྔེས་དབུས་གཙང་ཁམས་གསུམ་གྱི་སྡེ་སྣོད་འཛིན་པ་རགས་པ་རྣམས་སྤྱན་དྲངས་ནས་མེ་ཕོ་འབྲུག་ 1076 ལོའི་ཆོས་འཁོར་མཛད་པ་དང་ཐུག ། རྩེ་ལྡེའི་སྲས་པོ་དབང་ཕྱུག་ལྡེས་རྔོག་གི་ཡོན་བདག་བྱ་བར་ཆད་ནས་ཁ་ཆེར་བྱོན། པཎྜི་ཏ་སཛྫ་ན་དང་པ་ར་ཧི་ཏ་བྷ་དྲ་ལ་སོགས་པ་དྲུག་ཙམ་བསྟེན། བར་དུ་རྒྱགས་ཆད་ནས་ཁ་ཆེ་ནས་གསེར་སློང་བྱ་བའི་ཡི་གེ་མངའ་རིས་སུ་བཏང་བ་ལས་དབང་ལྡེས་གསེར་མང་པོ་ཡང་བསྐུར། ཚད་མ་རྒྱན་སྒྱུར་ཅིག་བྱ་བའི་ཞུ་བ་བྱུང་བས། པཎྜི་ཏ་སྐལ་ལྡན་རྒྱལ་པོ་དང་། རྔོག་གིས་བསྒྱུར། དེར་ཁ་ཆེར་ལོ་བཅུ་བདུན་དུ་ཡང་དག་པར་སྦྱངས་སླར་བོད་དུ་བྱོན། བོད་དུ་ཡང་པཎྜི་ཏ་འབུམ་ཕྲག་གསུམ་པ་དང་། སུ་མ་ཏི་ཀཱིརྟི་གཉིས་ལ་ཆོས་གསན་ཞིང་བལ་པོར་ཡང་ཡུད་ཅིག་བྱོན་ནས། ཨ་རུ་ལ་བཛྲ་དང་། བ་རེནྡྲ་རུ་ཙི་ལ་སོགས་པ་ལ་སྔགས་ཀྱི་གསན་པ་ཡང་མཛད། སླར་བོད་དུ་ཕེབས་འགྱུར་མང་པོ་མཛད་པ་ཡང་དག་ཅིང་ཤིན་ཏུ་འགྱུར་བཟང་། འགྱུར་མཛད་པའི་ཚད་ནི། གྲོ་ལུང་པས། དམ་ཆོས་སྒྱུར་ལ་མངའ་བརྙེས་པ། ། རྒྱལ་ཡུམ་གཉིས་དང་བསྟན་བཅོས་གཞུང་། ། འབུམ་ཕྲག་གཅིག་དང་ཁྲི་ཁྲག་གསུམ། ། སྟོང་ཕྲག་བདུན་ནི་ལྷག་བཅས་བསྒྱུར། ། ཞེས་འབྱུང་བ་དེའོ། ། ལྷ་ས་དང་། བསམ་ཡས་དང་། གཉལ་སྒང་ཐོག་དང་། གཙང་རྒྱང་མཁར་དང་། ངན་ལམ་གྱི་མྱུ་གུ་སྣ་ལ་སོགས་པར་བཤད་པ་མཛད་པའི་ཚེ། མཁས་བཙུན་གྲྭ་པ་རིམ་པ་བཞིན་དུ་ལྷ་སར་ཁྲི་དང་སུམ་སྟོང་བདུན་བརྒྱ། བསམ་ཡས་དང་སྒང་ཐོག་གཉིས་སུ་སྟོང་ཚོ་བཅུ་གསུམ་རེ་དང་། རྒྱང་མཁར་དུ་ཁྲ་ཚོ་གཉིས། ངན་ལམ་དུ་དགེ་བཤེས་ཁྲི་ཚོ་གཅིག་དང་། རྣལ་འབྱོར་ཕོ་མོ་ཁྲི་ཚོ་གཉིས་ཏེ་ཁྲི་ཚོ་གསུམ་འཚོགས་སོ། ། ཟུར་ཆོས་པའི་གྲངས་ཀྱང་། རྒྱན་དང་ཆོས་མཆོག་འཆད་མཁན་ལྔ་བཅུ་རྩ་ལྔ། རྣམ་ངེས་འཆད་མཁན་ཉིས་བརྒྱ་རྩ་ལྔ། ལུང་ཆོས་སྨྲ་བ་སྟོང་ལྔ་བརྒྱ་བདུན་ཅུ་དོན་ལྔ། དྲིལ་བས་ཆོས་སྨྲ་བ་སྟོང་བརྒྱད་བརྒྱ་བརྒྱད་ཅུ་རྩ་ལྔ་བྱུང་། ཚད་མ་དང་བྱམས་ཆོས་དང་། དབུ་མ་ལ་སོགས་པའི་རྣམ་པར་བཤད་པ་མང་དུ་མཛད། ཕ་རོལ་ཏུ་ཕྱིན་པ་དྲུག་གི་སྤྱོད་པ་ཐམས་ཅད་རྫོགས་པར་སྤྱོད་པའི་སེམས་དཔའ་ཆེན་པོ་དེ་ནི་དབུས་གཙང་དུ་ལོ་བཅུ་བདུན་འགྲོ་དོན་མཛད་དེ་ 1109 དགུང་ལོ་ལྔ་བཅུ་རྩ་གཅིག་བཞེས་པའི་ཚེ། བསམ་ཡས་མ་རིའི་དྲུང་དུ་ཞིང་བརྗེས་ནས་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། ། །
གྲོ་ལུང་པ་ཆེན་པོ་བློ་གྲོས་འབྱུང་གནས་ནི། གཞོན་ནུའི་དུས་ན་ཇོ་བོ་ཡབ་སྲས་ཀྱི་ཞབས་ལ་གཏུགས་སྣང་སྟེ་ཁོང་རང་གི་བསྟན་རིམ་ལས། བདག་གིས་ཇོ་བོ་རྗེ་ལ་ཆོས་ལན་ཅིག་འཁུམས་པ་ན། འཕགས་པ་རྟག་ཏུ་ངུའི་བརྩོན་འགྲུས་ལྟ་བུ་བྱའོ་ཞེས་གསུང་ལ། དགེ་བཤེས་པའང་མདོར་ན་གཞན་ཅི་ཡང་མི་བསམ་པར་རྫོགས་པའི་བྱང་ཆུབ་དོན་དུ་གཉེར་བར་བྱའོ་ཞེས་གསུང་། ཡང་སྐྱབས་འགྲོའི་སྐབས་སུ། འདི་ལ་བདག་གི་བླ་མ་ནི་མཆོད་པ་དང་བཅས་པའི་མཎྜལ་གསུམ་བྱེད་དུ་བཅུག་སྟེ། ཞེས་གསུངས་པའི་དགེ་བཤེས་དང་བླ་མ་ནི་འབྲོམ་ཉིད་ཡིན་པར་གནའ་མཆན་གྱིས་བཤད་སྣང་ངོ་། ། སྤྱན་སྔ་ལ་ནི་རྡོ་རྗེ་ནམ་མཁའི་གོས་ཅན་མ་གསན་ཞིང་། ཁམ་པ་ལུང་པ་དང་། པོ་ཏོ་བ་ལ་ཡང་ཆོས་གསན་ཞིང་སློབ་དཔོན་ཞེས་འབོད་པ་མཛད། གཞན་ཡང་ཇོ་བོ་ནས་བརྒྱུད་པའི་ཆོས་དང་། གཞན་མདོ་སྔགས་ཀྱི་གཞུང་ཕལ་ཆེ་བ་རྔོག་ཁུ་དབོན་གཉིས་ལ་གསན་ཏེ་སྦྱངས་པས། སྔགས་མཚན་ཉིད་ལ་ཤིན་ཏུ་མཁས་ཤིང་བརྒྱད་སྟོང་པའི་འགྲེལ་པ་དང་། བྱམས་ཆོས་སྡེ་ལྔའི་འགྲེལ་པ་སོགས་ཡིག་ཆའང་མང་དུ་མཛད། ཁྱད་པར་དུ་བསྟན་པའི་རིམ་པ་ཆེ་ཆུང་གཉིས་དང་། ཇོ་བོའི་གཞུང་ཆུང་རྣམས་གཙོ་བོར་གྱུར་པའི་ཆོས་ཆུང་བརྒྱ་རྩ་ལ་དོན་གྱི་ཁོག་འཆིང་བའི་ཊཱིཀྐ་བསྡུས་པ་ཅིག་ཀྱང་མཛད་དོ། ། སྐུ་ཚེའི་སྟོད་ལ་ལོངས་སྤྱོད་ཀྱིས་ཕོངས་སེ་བྱུང་བས། གུན་པ་ལྷ་རྗེས་ཛམྦྷ་ལ་དཀར་པོའི་སྒྲུབ་སྐོར་བྱིན་པས་ལན་ཅིག་གྲོ་ལུང་པའི་དཀར་ཡོལ་གྱི་ནང་དུ་ཛམྦྷ་ལ་གཙོ་འཁོར་ལྔ་དངོས་སུ་བྱོན་པ་མི་གཞན་གྱི་མཐོང་གི་དོགས་ནས་ཕྱག་གིས་སྐྱོར་བས། གུན་པའི་ཞལ་ནས་དེ་ཙུག་མཛད་མི་དགོས་གཞན་གྱི་མཐོང་དོགས་མེད་གསུང་། དེ་ནས་བརྩམས་ཏེ་གྲོ་ལུང་པ་ལ་གྲྭ་ཚོགས་མང་དུ་འདུས། སྐུ་བསོད་སྐྱེས་ཏེ་བྲིན་ལྷས་ཀྱི་གཙུག་ལག་ཁང་བཏབ། དེར་རྔོག་ལོའི་ཆོས་ཁྲི་སྙིང་པོར་གྱུར་པའི་མཆོད་རྟེན་བརྩིགས། དེའི་བུམ་པར་ཟངས་ཆེན་སྟོང་པ་ཅིག་གི་ཁར་ཙན་དན་གྱི་དྲབས་བཀབ། དེའི་སྟེང་དུ་རྔོག་ལོའི་ཐུགས་ཟ་མ་ཏོག་ཏུ་བཞུགས། ཟངས་དེའི་ཁར་ལྷོ་ཕྱོགས་ཀྱི་བུ་ག་ནས་ཤིང་གི་ཝ་གཏད་ནས་བཞག ། ཕྱིས་གྲོ་ལུང་པ་དགུང་ལོ་བརྒྱད་ཅུ་པ་ལ་གཤེགས་དུས་ངའི་རིང་བསྲེལ་གང་བྱུང་མ་ཟགས་བར་མཆོད་རྟེན་གྱི་ལྷོའི་བུ་ག་ལ་སྐྱུར་ཅིག་ཅེས་ཞལ་ཆེམས་བཞག་གོ ། སྐུ་གདུང་ཞུ་དུས་ཕྱག་རིན་ཚུལ་གྱི་པང་དུ་ཕྱག་གཡས་པ་དང་། ཟམ་ཁ་པའི་པང་དུ་ཐུགས་སྦུར་ཁང་ནས་ཡར་ཏེ་བྱོན། དེ་ནས་ཞལ་ཆེམས་བཞིན་རིང་བསྲེལ་རྣམས་མཆོད་རྟེན་གྱི་བུ་གར་བསྐྱུར་བས་ཟངས་གང་བ་དང་འགྲིག་པ་ཞིག་བྱུང་ཞེས་གྲགས་སོ། ། བདག་ཉིད་ཆེན་པོ་འདིས་མཛད་པའི་བསྟན་རིམ་ཆེན་མོ་ནི་བྱང་ཆུབ་ལམ་གྱི་སྒྲོན་མའི་དགོངས་པ་འགྲེལ་བ་ལ་ཟླ་དང་བྲལ་བ་ཞིག་སྟེ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་ཀྱང་གྲོ་ལུང་པ་ཆེན་པོའི་བསྟན་རིམ་འདི་དང་མཇལ་བའི་ཚེ་མཆོད་པའི་བྱེ་བྲག་སྣ་ཚོགས་པས་བསུ་བ་མཛད་ཅིང་། སྐྱེས་བུ་གསུམ་གྱི་ལམ་སོ་སོའི་ངོ་བོ། གྲངས་ངེས། གོ་རིམ། སོ་སོའི་དམིགས་རྣམ་ཡིད་ལ་བྱེད་ཚུལ། བསྒོམས་པ་ལས་ཉམས་མྱོང་ཇི་ལྟར་སྐྱེ་བའི་རིམ་པ་སོགས་བྱང་ཆུབ་ལམ་གྱི་རིམ་པའི་དོན་སྟོན་པ་ལ་འགྲན་ཟླ་མེད་པའི་བསྟན་བཅོས་སུ་བསྔགས་པ་མཛད་དོ། ། འབྲོམ་རིན་པོ་ཆེའི་རྣམ་ཐར་ནི་ད་ལྟ་ཉིད་དུ་འཆད་པར་འགྱུར་རོ། ། ། །
༈ འབྲོམ་སྟོན་པ་རྒྱལ་བའི་འབྱུང་གནས་ཀྱི་རྣམ་ཐར།
༈ ལམ་བཟང་གསལ་མཛད་སྟོན་པ་རིན་པོ་ཆེ། ། ཞེས་བསྔགས་པ། འབྲོམ་སྟོན་པ་རྒྱལ་བའི་འབྱུང་གནས་ཞེས་མཚན་ཡོངས་སུ་གྲགས་པ་དེ་ནི། སྔོན་བསྐལ་པ་དཔག་ཏུ་མེད་པའི་སྔ་རོལ་ནས་ཐུགས་བསྐྱེད་དེ་རྫོགས་སྨིན་སྦྱང་གསུམ་མཐར་ཕྱིན་ནས་འཕགས་པ་ཐུགས་རྗེ་ཆེན་པོ་ཞེས་སངས་རྒྱས་ཀྱི་ཞིང་ཐམས་ཅད་དུ་གྲགས་ཤིང་སྤྲུལ་པའི་བཀོད་པས་སངས་རྒྱས་ཀྱི་ཞིང་ཐམས་ཅད་དང་མ་དག་པའི་འཇིག་རྟེན་གྱི་ཁམས་ཐམས་ཅད་ཁྱབ་ཅིང་། བདེ་བ་ཅན་དུ་མགོན་པོ་འོད་དཔག་ཏུ་མེད་པའི་སྲས་ཀྱི་ཐུ་བོའི་ཚུལ་བཟུང་བ་སོགས་ཕྱོགས་བཅུའི་སངས་རྒྱས་ཐམས་ཅད་ཀྱི་དྲུང་ན་སྲས་ཀྱི་ཐུ་བོའི་ཚུལ་འཛིན་པ་དང་། ཞིང་ཁམས་ལ་ལར་འཚང་རྒྱ་བའི་ཚུལ་སྟོན་པ་དང་། འཇིག་རྟེན་གྱི་ཁམས་ལ་ལར་འཁོར་ལོས་བསྒྱུར་བའི་རྒྱལ་པོ་དང་། ལ་ལར་བློན་པོ། ལ་ལར་སྡེ་དཔོན། ལ་ལར་མཁན་པོ། ལ་ལར་ཕ་མ། ལ་ལར་བྱ་དང་རི་དྭགས་ཚུན་ཆད་ཀྱི་ཚུལ་བཟུང་སྟེ་གང་ལ་གང་འདུལ་གྱི་སྐུའི་བཀོད་པས་སེམས་ཅན་གྱི་དོན་མཛད་བཞིན་པ་ལས་མི་མཇེད་འཇིག་རྟེན་གྱི་ཁམས་འདིར་བསྐལ་བཟང་གི་སངས་རྒྱས་སྟོང་གང་དུ་འཚང་རྒྱ་བའི་ཚུལ་སྟོན་པའི་གནས་འཛམ་བུའི་གླིང་གི་ལྷོ་ཕྱོགས་ན་པོ་ཏ་ལ་ཞེས་བྱ་བའི་སྤྲུལ་པའི་ཞིང་ཁམས་ཞིག་ན་བཞུགས་པ་ལས། ཕྱོགས་བཅུའི་རྒྱལ་བ་སྲས་དང་བཅས་པ་གདན་འཛོམ་སྟེ་བྱང་ཆུབ་སེམས་དཔའ་སྒྲིབ་པ་རྣམ་སེལ་ཕོ་ཉར་མངགས་ཏེ་བྱང་ཕྱོགས་ཁ་བ་ཅན་གྱི་ལྗོངས་འདིའི་གདུལ་བྱ་རྒྱལ་བ་གཞན་གྱིས་འདུལ་བར་མ་ནུས་པའི་དམུ་རྒོད་ཅན་འདི་རྣམས་ཐུགས་རྗེ་ཆེན་པོ་ཉིད་ཀྱིས་འདུལ་བར་འོས་སོ་ཞེས་བོད་ཁམས་ཀྱི་མགོན་པོར་འབྱོན་པའི་ཐུགས་རྗེ་བསྐུལ། དེ་བཞིན་དུ་ཆོས་རྒྱལ་དཀོན་མཆོག་འབངས་ཨྱོན་གྱི་ཡུལ་དུ་བྱོན་པའི་ཚེ་བླ་མ་དྲི་མ་མེད་པ་མཁའ་འགྲོ་བྱེ་བའི་ཆོགས་དང་བཅས་པས་ཀྱང་ཁ་བ་ཅན་དུ་བྱོན་ནས་སེམས་ཅན་གྱི་དོན་མཛད་དགོས་པར་བསྐུལ་བ་ལ་བརྟེན་ནས་འཕགས་པ་ཐུགས་རྗེ་ཆེན་པོས་མི་རྗེའི་ཚུལ་བཟུང་ནས་བོད་དུ་རྒྱལ་ཁྲིམས་བཙན་པོས་ཐམས་ཅད་དབང་དུ་བསྡུས། དགེ་བཅུའི་ཁྲིམས་ཀྱིས་ཆོས་ཀྱི་སྣོད་རུང་དུ་བྱས་སངས་རྒྱས་ཀྱི་བསྟན་པའི་གཞི་ཆགས་པ་ན་བླ་མ་དྲི་མ་མེད་པ་རྒྱ་གར་དུ་གནས་ལྔ་མཁྱེན་པའི་པཎ་ཆེན་དཔལ་མར་མེ་མཛད་ཡེ་ཤེས་ཞེས་བྱ་བར་སྐུ་འཁྲུངས་ནས་གདུལ་བྱ་འདུལ་བའི་དུས་ལ་བབ་པ་ན། ཐུགས་རྗེ་ཆེན་པོ་འབྲོམ་རྗེར་སྐུའི་བཀོད་པ་བསྟན་ཏེ། དེ་ཡང་འབྲོམ་རིན་པོ་ཆེ་གང་དུ་འཁྲུངས་པའི་གནས་ནི། གངས་རིའི་ཕྲེང་བས་ཡོངས་བསྐོར་ས་ཡི་གཞི། ། ལྷ་ཆེན་ཟུར་ཕུད་ལྔ་པས་བསྟེན་པའི་འདབས། ། རྗེའུའི་རིགས་ལས་འབྲོམ་ཞེས་རབ་གྲགས་པར། ། གཙོ་བོའི་རིགས་སུ་འཁྲུངས་ལ་ཕྱག་འཚལ་ལོ། ། ཞེས་གསུངས་པ་ལྟར་དབུ་རུའི་བྱང་གི་ཕྱོགས་ལྷ་ཆེན་ཐང་ལྷའི་ཞོལ། སྟོད་ལུང་གི་ཕུ་རྩྭ་སྒྱེ་མོའི་སའི་ཆར་ཡབ་སྐུ་གཤེན་ཡག་གཞེར་འཕེན་དང་། ཡུམ་ཁུ་འོད་བཟའ་ལན་ཅིག་མ་གཉིས་ཀྱི་སྲས་སུ་ཕྱི་ལོ་ 1004 ཤིང་ཕོ་འབྲུག་གི་ལོ་སྐུ་འཁྲུངས། དེ་ཡང་ཡབ་ཀྱིས་མ་ཡར་གཅིག་བཞེས་ཏེ་དེ་དང་འགྲོགས་ནས་ཡོད་པ་ལ། དེ་དང་ཐུགས་མ་མཐུན་པའི་རྐྱེན་གྱིས་བསྐུལ་ཏེ་གཞུ་རུ་ཞང་པོའི་སར་ལོ་བཅུ་གསུམ་ཙམ་ལ་བྱོན། དགེ་བཤེས་གཡུང་ཆོས་མགོན་བྱ་བ་ལ་ཀློག་ཡིག་བསླབས། དེར་ལོ་བཞི་བཞུགས། དགུང་ལོ་བཅུ་བདུན་ལོན་ཙ་ན་ཇོ་བོ་སེ་བཙུན་གཞོན་ནུ་གྲུམ་གྱི་མཁན་བུ་ཆེན་པོ་དེ་རྒྱ་གར་དུ་བཞུད་པའི་ཐུགས་དགོངས་ཀྱིས་བྱོན་པ་དང་གདན་འཛོམ་པས་ཤིན་ཏུ་དད་བར་གྱུར་ཏེ་བླ་མ་སེ་བཙུན་ལ་ཇོ་བོ་ཐུགས་རྗེ་ཆེན་པོ་ཡི་གེ་དྲུག་པའི་གདམས་པ་ཞུས། དེ་ནས་སེ་བཙུན་ཡར་བཞུད་བལ་ཡུལ་དུ་བྱོན་ནས་ཕྱི་རོལ་པའི་པཎྜི་ཏ་ཞིག་དང་ཆོས་གཏམ་བྱས་པས་སེ་བཙུན་རྒྱལ། ཕྱི་རོལ་པའི་མངོན་ཤེས་དང་ཁོང་གི་དཔྱད་འགྲན་པས་སེ་བཙུན་མ་ཐུབ་ནས་དེར་སེ་བཙུན་གྱི་ཐུགས་དགོངས་ལ་ཕྱི་རོལ་བས་ངན་བྱས་དོགས་པ་དང་། རྒྱ་གར་ནའང་ང་རང་བས་མཁས་བ་མེད་དམ་སྙམ་ནས་ཕྱིར་ལོག་བྱོན་པ་དང་གདན་འཛོམ་པས་འབྲོམ་རིན་པོ་ཆེས་བླ་མ་སེ་བཙུན་ལ་ཕྱག་ཕྱིར་འཁྲིད་པར་ཞུས་པས་སང་ཕོད་ཚོང་པ་དང་འགྲོགས་ལ་ཤོག ། ད་རེས་ཁྲིད་ན་བྱིས་པ་བརྐུས་ནས་ཁྲིད་ཟེར་དུ་འོང་གསུང་། དེ་ནས་འབྲོམ་རིན་པོ་ཆེས་རྒྱལ་གྱི་ཞང་སྣ་ནམ་རྡོ་རྗེ་དབང་ཕྱུག་ལ་དགེ་བསྙེན་གྱི་སྡོམ་བ་མནོས་ཏེ་མཚན་རྒྱལ་བའི་འབྱུང་གནས་སུ་གསོལ། གདུང་ལོ་བཅུ་དགུ་པ་ལ་བབ་པ་ན་མདོ་ཁམས་ཕྱོགས་སུ་འགྲོ་བའི་ཚོང་པ་དང་འགྲོགས་ཏེ་མདོ་ཁམས་ལྡན་མའི་ཡུལ་དུ་བྱོན་ནས་བླ་མ་སེ་བཙུན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ཏེ། སངས་རྒྱས་ཐམས་ཅད་མཆོད་པ་བས་བླ་མ་མཆོད་པ་ཕན་ཡོན་ཆེའོ་ཞེས་གདུལ་བྱ་རྣམས་ལ་འདོམས་པའི་ཕྱིར་བླ་མ་སེ་བཙུན་གྱི་ནང་གི་ཞབས་ཏོག་ཕྱེ་འཐག་པ་ཡན་ཆོད་དང་། ཕྱི་རོལ་ཏུ་རྟ་ཕྱུགས་མང་པོ་ཡོད་བས་ཉིན་པར་དེ་རྣམས་ཀྱི་རྫི་བོ་མཛད། ནུབ་མོ་རྟ་བཟང་ལ་ཞོན་འཁོར་གསུམ་ཚེར་མ་འདྲ་བ་བྱས་ཏེ་མེལ་ཚེ་མཛད། ཕྱེ་འཐག་པ་ན་དཔེ་ཆ་རང་ཐག་གི་སྟེང་དུ་བཞག་སྟེ་གཟིགས་པ་ལ་སོགས་པའི་སློབ་གཉེར་ལ་བརྩོན་པར་མཛད། ཕྱེ་བཏགས་པས་ཕྱག་མཐིལ་གླང་རྒན་གྱི་མཇིང་པ་ལྟར་སོང་། ཇོ་བོ་སེ་བཙུན་དེ་ཡོ་བྱད་ལ་ཆགས་པ་མི་མངའ། གཏོང་བར་ཡང་མི་མཛད་ཀྱང་མ་དད་པ་མ་བྱུང་། སེ་བཙུན་གྱི་བྱ་བྱེད་ལ་ཡང་དཀའ་བ་མ་བྱུང་གསུང་། འབྲོམ་རིན་པོ་ཆེ་འདི་ནི་ལམ་གྱི་རྩ་བ་བཤེས་གཉེན་བསྟེན་པའི་ཚུལ་ལ་རྒྱལ་བ་སྲས་བཅས་ཀུན་གྱིས་བསྔགས་པར་འོས་བ་ཞིག་བྱུང་སྟེ། ཤེར་ཕྱིན་གྱི་མདོ་སྡེ་རིན་པོ་ཆེར་བཤེས་གཉེན་བསྟེན་པའི་ཚུལ་ལ་བྱང་ཆུབ་སེམས་དཔའ་རྟག་ཏུ་ངུ་བསྔགས་འོས་སུ་མཛད་པ་ལྟར་འབྲོམ་རིན་པོ་ཆེ་འདི་ཡང་བྱང་ཆུབ་སེམས་དཔའ་རྟག་ཏུ་ངུ་དང་ལུས་ཀྱི་རྐང་བཏང་མ་བཏང་གི་ཁྱད་ལས་མེད་པ་ཞིག་བྱུང་། དེའི་ཚེ་བླ་མ་སེ་བཙུན་གྱི་སྤྱན་སྔར་མདོ་སྔགས་ཀྱི་གཞུང་མཐའ་ཡས་པ་སྦྱངས་ཤིང་། ཁྱད་པར་བདག་ཉིད་ཆེན་པོ་འཕགས་པ་ཀླུ་སྒྲུབ་ཡབ་སྲས་ཀྱི་གཞུང་དབུ་མའི་སྐོར་དང་། བྱམས་ཆོས་སྡེ་ལྔ་དང་། ཐོགས་མེད་སྐུ་མཆེད་ཀྱི་གཞུང་རྣམས་སོགས་སྤྱོད་ཕྱོགས་རྣམས་ལ་རྩལ་དུ་ཐོན་པར་སྦྱངས་ཏེ་ཆོས་གྲར་དགེ་འདུན་བྱིང་དང་བགྲོ་གླེང་མཛད་པ་ན་བདག་ཉིད་ཆེན་པོ་འདི་ལ་སུས་ཀྱང་ལན་འདོན་སྤོབས་པར་མ་ནུས་ནས་མཁས་པའི་ཕུལ་དུ་ཕྱིན་པར་གྲགས། དེའི་ཚེ་དགེ་འདུན་རྣམས་ཀྱིས་མཁས་པ་ཆེན་པོ་འདི་ལྟ་བུ་རྟ་བོང་གི་རྫི་བོ་དང་ཡོས་འཐག་པ་སོགས་ངན་ལས་ལ་བཀོལ་དུ་ཕངས་པས་ད་ཕྱིན་ཆད་ངན་ལས་བགྱི་མི་དགོས་པར་ཆོས་གྲར་ཕེབས་ཆོག་པ་དགོས་ཞེས་བླ་མ་སེ་བཙུན་ལ་ཞུས་ནས་དེ་བཞིན་དུ་གནང་། དུས་དེའི་ཚེ་ཁུ་སྟོན་བརྩོན་འགྲུས་གཡུང་དྲུང་དང་རྔོག་ལེགས་པའི་ཤེས་རབ་གཉིས་ཀྱང་ཆོས་གྲ་དེར་བཞུགས་བས་ཁུ་རྔོག་འབྲོམ་གསུམ་ཞེས་པའང་ཁམས་སུ་གྲགས་པ་ཡིན། དེ་ནས་འབྲོམ་རིན་པོ་ཆེའི་ཐུགས་དགོངས་ལ། དལ་འབྱོར་གྱི་མི་ལུས་ཐོབ་པར་དཀའ་བ་རྙེད་དུས་འདིར་ཆོས་རྣལ་མ་ཞིག་བྱེད་ན་འདི་ཙམ་གྱིས་ཆོག་གམ་མི་ཆོག ། རྒྱ་གར་མཁས་པ་ཅིག་ལ་འདྲི་བ་ལ་བར་དུ་ལོ་ཙཱ་མི་དགོས་པ་ཞིག་བྱ་དགོངས་ཏེ་པཎྜི་ཏ་སྒྲའི་ཚེར་མ་ཞེས་བྱ་བ་སྨྲྀ་ཏི་ཛྙཱ་ན་ཀིརྟི་ཕྱོགས་དེར་བྱོན་པ་ལ་སཾ་སྐྲྀ་ཏའི་སྐད་དང་རྒྱ་ཡིག་ཀྱང་བསླབས་བས་ལེགས་པར་མཁྱེན། དེ་དུས་འབྲོམ་རིན་པོ་ཆེས་པཎྜི་ཏ་སྨྲྀ་ཏི་ལ་རྒྱ་གར་ན་ད་ལྟ་པཎྜི་ཏ་ཆེ་བ་ཇི་སྐད་བྱ་བ་ཡོད་དྲིས་པས། ཆེ་བགྲེས་ནཱ་རོ་པ་དང་ཤཱནྟི་པ་བྱ་བ་ཡོད། དེ་གཉིས་ད་ཙམ་འདས་སམ། ད་ལྟ་པཎྜི་ཏ་དཱི་པཾ་ཀ་ར་བྱ་བ་རྒྱལ་རིགས་ལས་རབ་ཏུ་བྱུང་བ་ཅིག་ཡོད་དེ། དེ་རང་ཆེ་བར་འོང་ཟེར་བས་འབྲོམ་རིན་པོ་ཆེའི་ཐུགས་ལ་དེ་དང་མཇལ་ན་དགའ་བ་ལ། དེ་དང་ཅི་མཇལ་བྱ་དགོས་སྙམ་པ་བྱུང་། དེ་ལྟར་འབྲོམ་རིན་པོ་ཆེས་མདོ་ཁམས་སུ་བླ་མ་སེ་བཙུན་གྱི་སྤྱན་སྔར་ལོ་ཉི་ཤུའི་བར་དུ་བཞུགས་ཏེ་མདོ་སྔགས་ཀྱི་ཆོས་མང་དུ་གསན་པས་མཁས་པའི་ཕུལ་དུ་ཕྱིན། དགེ་བསྙེན་ཆོས་འཕེལ་དུའང་གྲགས་པ་བྱུང་སྟེ། དེ་ལྟར་དུ་འབྱུང་བར་རྒྱལ་བ་ཉིད་ཀྱིས་མདོ་ལས་ལུང་བསྟན་པ་ནི། སྙིང་རྗེ་པད་དཀར་དུ། བྱང་ཕྱོགས་སུ་བསྟན་པ་ལ་དད་པ་ལྟར་སྐྱེ་ཞིང་། རབ་བྱུང་ཆོས་བཞིན་མི་སྤྱོད་པ་ལོག་པར་ལྟུང་། དེར་དགེ་བསྙེན་ཆོས་འཕེལ་ཞེས་པ་རྫུ་འཕྲུལ་དང་ལྡན་པ་འབྱུང་། ཞེས་པ་དང་། སངས་རྒྱས་ཕལ་པོ་ཆེར། བྱང་ཕྱོགས་སུ་དགེ་བསྙེན་ཆོས་འཕེལ་བྱ་བ་འབྱུང་ཞེས་ལུང་བསྟན་པ་དང་མཐུན་ནོ། ། དེ་ནས་ཇོ་བོ་མངའ་རིས་སུ་ཕེབས་པ་འགྲུལ་བ་ལས་གསན་པས་སེ་བཙུན་ལ་མངའ་རིས་སུ་འགྲོ་བར་ཞུས། ཁོང་གིས་ཀྱང་མི་དགྱེས་པ་མེད་པར་དཔེ་རྟ་ཁལ་གཅིག་གནང་ནས་བྱོན་ནོ། ། བྱང་ལམ་དུ་སླེབ་ཙ་ན་མངའ་རིས་ཀྱི་ལྷ་བླ་མ་ཁུ་དཔོན་གྱིས་ཇོ་བོ་རྗེ་ལྷ་ཅིག་བྱ་བའི་པཎྜི་ཏ་ཆེན་པོ་ཞིག་གདན་དྲངས་ནས་ཡོད། དེ་རིང་པོར་མི་ཐོགས་པར་རྒྱ་གར་དུ་བཞུད་པར་འདུག་བྱ་བ་གསན་པས་དེར་ཇོ་བོའི་མཚན་ཐོས་པ་ཙམ་གྱིས་ཐུགས་རང་དབང་མེད་པར་གཡོས་ཏེ་དད་གུས་བསམ་གྱིས་མི་ཁྱབ་པ་འཁྲུངས། མཇལ་དུ་འབྱོན་པའི་འདུན་པ་དྲག་ཏུ་འཁྲུངས་སོ། ། དེ་ནས་ཇི་ལྟར་བཞེད་པ་ལྟར་བྱོན་ཏེ་སོག་ཆུ་ཁར་ཕེབས་པ་ན་ཁང་པ་ཅིག་ན་ཀུ་དི་རི་འདུག་པས། འདི་ན་ཅི་ཡོད་དྲིས་པས། འཕྲང་ཁ་བེར་ཆུང་ཡབ་བེར་ཆེན་གྱི་འདེད་དང་སྲིད་པོ་རྣམས་བསྡུ་བའི་ཆང་ཡོད་པ་ཡིན་ཟེར་བས། ཐག་རིང་ནས་བྱོན་པས་དེར་སྐྱེམ་བསྐྲུར་བྱོན་པ་ལ་འཕྲང་ཁ་བེར་ཆུང་གིས་ཁྱོད་ཆོས་གྲ་ནས་འོངས་པའི་དགེ་བསྙེན་ཞིག་འདུག་སྟེ་ང་ཡང་ཞང་འཕྲང་ཁ་བེར་ཆུང་བྱ་བའི་མི་ཆེན་ཞིག་ཡིན། ཁྱོད་ཀྱིས་དེ་ན་ཡར་ལ་ཕྱག་ཝ་འཁྱུག་པ་འདྲ་བ་ཅིག་གྱིས་ཟེར་པས་འབྲོམ་རིན་པོ་ཆེས་ཀྱང་དེ་བཞིན་དུ་མཛད། དེར་བེར་ཆུང་ཆོས་གཏམ་ལ་དགའ་བས་ཆོས་གཏམ་མང་པོ་བྱས་པའི་ཚེ་འབྲོམ་གྱིས་ཁོང་གི་ཚིག་སྣ་རེ་ནས་བརྡུངས་པས་ཁོ་ཐེ་ཚོམ་སྐྱེས་ནས། ཁམས་མ་གི་ན་འབྲོམ་སྟོན་པ་ཟེར་བའི་དགེ་བསྙེན་ཆོས་མཁན་ཞིག་ཡོད་ཟེར། དེ་ཁྱོད་ཡིན་ནམ་ཟེར་བར། ཡིན་པའང་སྲིད་གསུངས་པས་ཁོང་ཧ་ལས་ཏེ་ཁོང་རང་གི་འོག་གི་གྲུམ་ཙེ་ཕྱུང་སྟེ་དགེ་བཤེས་སྟོན་པ་ལ་བཏིངས། རྟ་བཟང་པོ་གཅིག་གི་ཐུར་མདའ་དར་ཡུག་གིས་བྱས་ནས་ཕུལ། ད་ཅི་ནས་ཕྱག་བླངས་བའི་བཟོད་གསོལ་བྱས། དེ་ནས་བགྲོ་གླེང་བྱས་པའི་བཟོད་གསོལ་བྱས། ར་སྒྲེང་གི་ས་ཆ་འདིར་དགོན་ས་མཛད་དེ་མཆོད་གནས་མཛད་པར་ཞུས་པ་ན་འབྲོམ་རིན་པོ་ཆེའི་ཞལ་ནས། ང་ད་རེས་སྡོད་མི་ཁོམ། མངའ་རིས་སྟོད་ཡ་གེར་པཎྜི་ཏ་ཆེན་པོ་ཞིག་བྱོན་ཟེར་བས་དེར་འགྲོ་གསུང་། འོ་ན་ཡས་མར་ཕེབས་ནས་ངའི་མཆོད་གནས་བྱ་དགོས་ཟེར་བས། སྟོན་པའི་ཞལ་ནས། རྩིགས་ཁ་གསུམ་འཛིན་དགོས་ཏེ་སྟེར་ན་བྱ་གསུང་། གང་བཞེད་ཞུས་པས། ཕོད་མདོའི་མཁར་འདི་བཤིག་ལ་གཙུག་ལག་ཁང་ཞིག་བཞེངས། ཤ་ཟན་དང་རྩམ་ཟན་གྱི་འཁྲུག་པ་ནི་བསྡུམས། ངའི་ཕྱི་ནས་ཡར་ལ་རྔོག་ལེགས་པའི་ཤེས་རབ་བྱ་བ་འོང་གི་དེ་ལ་ཆོས་ཚུགས། དེ་མ་བྱུང་ན་གཡོན་རུ་ན་ཁུ་སྟོན་བློ་རྣོན་པོ་བྱ་བ་ཡོད། དེ་སྤྱན་དྲོངས་ལ་ཆོས་ཚུགས་གསུངས། ཁོང་ན་རེ་གཉིས་པོ་བྱས་པས་ཆོག ། ཤ་ཟན་གྱི་འཁྲུག་པ་འདི་ལ་ང་རེ་བ་ཡིན། སྔར་ཡང་འབྲི་དྲུག་ཅུ་ཙམ་ཟོས་ཟིན། འོ་ན་ཡང་ཁམ་ཙམ་མེད། བསྡུམས་བྱས་པས་ཆོག་ཟེར་ནས་རྩིགས་གསུམ་པོ་ཁས་བླངས། དེ་ནས་དགེ་བཤེས་སྟོན་པས་རྒྱལ་གྱི་ཞང་ཆེན་པོ་བསླབ་པའི་སློབ་དཔོན་ཡིན་པས་ཕྱག་འཚལ་དུ་བྱོན། དེའི་ཚེ་དབུས་ཕྱོགས་ན་དགེ་བཤེས་ཀ་བ་མི་ཆེ་བས་རྒྱ་མོའི་ཕུར་བཞུགས་པ་མཇལ། ལྷ་བཙུན་བོ་དྷི་རཱ་ཛ་ལ་སོགས་པ་བོད་ཀྱི་མི་ཆེན་རྣམས་ལ་ཞེ་ས་མཛད་ནས། ད་ལྟ་མངའ་རིས་ན་ལྷ་བླ་མ་བྱང་ཆུབ་འོད་ཀྱིས་ཇོ་བོ་ལྷ་གཅིག་བྱ་བའི་པཎྜི་ཏ་མཁས་པ་ཅིག་གདན་དྲངས་ནས་ཡོད་ཟེར། ངས་དེ་གདན་འདྲོངས་ན་ཞལ་མཐོང་དང་བཅས་པའི་དབུལ་བ་གྱིས་ཤིག་པའི་ཞུ་བ་ཕུལ། ཀ་བ་ཤཱཀྱ་དབང་ཕྱུག་ལ་ཆབ་ཤོག་ཁྱེད་ཀྱི་ཕྱག་ཏུ་བརྫངས་ཀྱི། དེ་ཙ་ན་བསྐུལ་ལམ་གྱིས་ལ་ལ་སྟོད་དུ་བསུ་བས་སླེབ་པར་མཛོད་ཅིག་པའི་ཞུ་བ་ཕུལ་བས། ཀ་བ་ན་རེ། ཁྱོད་ཀྱིས་སྤྱན་ཅི་འདྲོངས་གྱིས། ངས་བསྐུལ་མ་བྱས་ནས་ལ་སྟོད་དུ་སླེབ་པར་བསུ་བ་བྱ་གསུང་། དེ་ནས་མི་ཆོས་རྣམས་གསེར་སློང་ལ་བྱོན་པས། ད་ལྟ་ཉུང་བ་ལས་མི་འོང་། ཕྱིས་མང་དུ་དབུལ་ཞུས་པས། ཉུང་ཡང་ད་ལྟ་འདོད། པཎྜི་ཏ་ཅན་དུ་རིངས་གསུང་། ཉུང་ཡང་བླངས་ཏེ་དེ་ནས་མི་གྲོང་མ་བརྒྱུད་པར་བྱང་ལམ་ལ་ཐེགས་པས་ལམ་ངོ་མ་ཤེས་པའི་སྐབས་སུ་བནྜེ་ཧྲལ་པོ་ཞིག་བྱུང་ནས་ལམ་བསྟན། ཡ་ཚད་སྐྱེལ་ཐུང་བྱས་ནས་བདེ་བར་བཞུད་ཅིག ། ད་སྣ་ཤུད་ཀྱི་འཁྲུག་པ་ལངས་པས་ང་འགྲོ་མི་ཁོམ་ཟེར་ནས་འཚུབ་མར་རེང་གིས་སོང་། པེ་ཧར་འདི་ཡང་ཆོས་གཤའ་མར་བྱེད་པ་ལ་གྲོགས་བྱེད་པར་འདུག་གསུང་། ཡང་ལམ་མ་རྙེད་པ་ཅིག་ལ་ཤ་བ་ཅིག་སོང་བའི་རྗེས་ལ་བྱོན་པས་ལམ་ཏིག་གིས་བྱུང་། དེ་ཇོ་མོ་སྒྲོལ་མའི་སྤྲུལ་པ་ཡིན་གསུང་། དེ་ཙ་ན་ཇོ་བོ་རྗེ་ལ་རྗེ་བཙུན་སྒྲོལ་མའི་ཞལ་ནས། ད་སྟེ་ཞག་གསུམ་དྲོ་དང་བཞིའི་ཉིན་པར་བོད་ཀྱི་ཨུ་པ་སི་ཀ་ཆེན་པོ་འབྱོན་པས། དེ་ལ་བྱིན་གྱིས་རློབས་ཤིག་ཅེས་ལུང་བསྟན། ཇོ་བོ་ཉིད་ཀྱིས་ཀྱང་། དེ་ལྟར་དུ་དགོངས་ཏེ་ཇོ་བོའི་ཞལ་ནས། ད་ཞག་གསུམ་དྲོ་དང་བཞི་ན་ཁོ་པོའི་སྐྱེ་བ་སྔ་མའི་སློབ་མ་ཨུ་པ་སི་ཀ་ཆེན་པོ་ཞྭ་སྤྱི་རིང་རྒྱང་ངེ་བ་གསོལ་བ་ཅིག་འོང་བར་འདུག་གསུངས་ནས་དབུ་སྔས་འགོར་བུམ་པ་བཞེངས་སུ་གསོལ་ཏེ། ཞག་གསུམ་གྱི་ནང་པར་ཨུ་པ་སི་ཀ་ལ་བྱ་ར་མཛད། དྲོ་ཁ་ཚུན་ཆད་མ་བྱོན་པས། ཏཱ་རེ་རྫུན་ནི་གསུང་བ་ཅང་སྲིད་དམ་གསུངས་ནས་གྲོང་གསེབ་ཅིག་ཏུ་ཆོས་སྟོན་ལ་བྱོན་པའི་ཤུལ་དུ་དགེ་བཤེས་སྟོན་པ་དཔོན་གཡོག་ཕེབས་པ་ལ། འཁོར་ཀུན་གྱིས་ད་ལྟ་རང་འབྱོན་པས་བཞུགས་ཤིག་བྱས་པ་ལ་ང་ཐེག་པ་ཆེན་པོའི་བླ་མ་དང་མཇལ་བ་སྐད་ཅིག་མ་སྔ་མ་དང་ཕྱི་མ་གཉིས་ཀྱང་སྔ་མ་ལ་འདམ་པ་ཡིན་གསུངས་ནས་བཞུད་པས། ཇོ་བོ་དང་སྲང་པར་ཞིག་ཏུ་མཇལ་ཏེ་ཕྱག་མཛད་ནས། ཕྱག་རྟེན་དུ་གསེར་ཕུལ། དེར་ཇོ་བོའི་ཕྱག་སྟོན་པའི་དབུ་ཐོག་ཏུ་བཞག་ནས། སཾ་སྐྲྀ་ཏའི་སྐད་དུ་ཤིས་བརྗོད་མཛད་ཅིང་བྱིན་གྱིས་བརླབས་སོ། ། དེ་ནས་འབྲོམ་རིན་པོ་ཆེས་གསོལ་བ་བཞེས་ནས་ཇོ་བོའི་གཟིམ་ཁང་དུ་བྱོན་པ་ན་ཇོ་བོ་རྗེས་བུམ་པ་དབུ་ཐོག་ཏུ་བཞག་སྟེ་དབང་བསྐུར་ཡང་ལེགས་པར་གནང་། དེའི་ཚེ་དགེ་བཤེས་སྟོན་པས་ཇོ་བོ་ལ་དྲི་བ་གསུམ་མཛད། རྒྱ་གར་ན་པཎྜི་ཏ་ཇི་ལྟ་བུ་ཡོད་བྱ་བ་དང་། ངའི་སྔ་མའི་ཆོས་དེ་ལམ་དུ་སོང་ངམ་མ་སོང་བྱ་བ་དང་། བླ་མ་ཉིད་ཀྱི་སྤྱན་སྔར་བསྡད་ན་ཇི་ལྟར་མཆི་བྱ་བ་དང་གསུམ་ཞུས་པས། ཇོ་བོའི་ཞལ་ནས་རྒྱ་གར་ན་པཎྜི་ཏ་མཁས་པ་མང་པོ་ཡོད། ང་བོད་དུ་འོང་ཙ་ན་ཤར་པྱོགས་བྷཾ་ག་ལ་ནའང་ཉིན་རེ་མ་ཆད་བར་གྲུབ་ཐོབ་རེ་འབྱོན་གྱི་ཡོད། ཁྱོད་ཀྱི་སྔ་མའི་ཆོས་དེ་ལམ་དུ་ཡེ་མ་སོང་། བླ་མའི་ཞབས་ཏོག་ལམ་དུ་སོང་། ད་ཁྱོད་འདི་རང་དུ་སྡོད། ངའི་ལྷ་མོ་སྒྲོལ་མས་ཁྱོད་ལུང་བསྟན་པ་ཡིན་གྱི་ངའི་བཀའ་བརྒྱུད་འདི་ལ་བྱིན་རླབས་ཡོད་ཀྱི་གསུང་། དེའི་ཉིན་བར་གྱི་ཡོན་བདག་དེས་སྟོན་སྐལ་གྱི་མར་ཚལ་གཅིག་བྱིན་པ་དེ་བཞུ་ནས་དེའི་ནུབ་མོ་མར་མེ་མཚན་ཐུབ་ཅིག་དབུ་སྔས་སུ་ཕུལ། དེ་ནས་ཇོ་བོ་ཞིང་གཤེགས་ཀྱི་བར་དང་། གཤེགས་ནས་ཀྱང་ར་སྒྲེང་དུ་སྐུ་གདུང་ལ་དཀར་མེ་མཚན་ཐུབ་རྒྱུན་མ་ཆད་པར་འབུལ་བར་མཛད། དེ་ནས་ཕལ་ཆེན་སྡེ་པའི་ལུགས་ཀྱི་རས་ཡོལ་གྱིས་ནུབ་ལྷག་ཐུབ་པར་འདོད་པས། དེའི་ནུབ་མོ་ནས་དབུ་སྔས་སྤྲེལ་ནས་ཆོས་རྒྱུན་དུ་གསན་པར་མཛད། སང་ནང་པར་དགེ་བཤེས་སྟོན་པ་ལ་ཆེད་དུ་དགོངས་ནས་བྱང་ཆུབ་ལམ་གྱི་སྒྲོན་མ་ལ་ཆོས་ཐུན་གཅིག་མཛད་དེ་ཚར་གཅིག་གསུངས། དེ་ནས་བཟུང་སྟེ་ཆོས་གང་གསན་ཐམས་ཅད་སྐྱེས་བུ་གསུམ་གྱི་ལམ་གྱི་རིམ་པའི་སྟེང་དུ་འབབ་པར་མཛད། འབྲོམ་རིན་པོ་ཆེས་ཇོ་བོ་རྒྱ་གར་དུ་ཞག་གསུམ་ན་ཐེགས་པ་ལ་སླེབས་ནས་བོད་དུ་བཞུགས་པར་ཞུ་བ་ཕུལ་བས། ཇོ་བོའི་ཞལ་ནས། གྲགས་པ་ངན་པ་སྤོང་མི་བྱེད། བྱ་བ་བྱང་ཆུབ་སེམས་དཔའི་ཉེས་པ་ཡིན་པས་རྒྱ་གར་དུ་འགྲོ་གསུང་ནས་མ་གནང་། དེའི་དུས་སུ་རྒྱ་གར་ན་ཇོ་བོ་ཙམ་པ་ཡང་གསེར་ལ་དམིགས་ནས་བོད་དུ་སོང་བྱ་བ་དང་། བོད་བ་ལང་དང་འདྲ་བའི་གསེབ་ན་ཆོས་ཐམས་ཅད་སྟོང་པ་ཉིད་ཡིན་ཟེར་ཞིང་འདུག་ལོ་བྱ་བ་དང་། གསང་སྔགས་མ་རྒྱུད་ཀྱིས་འགྲོ་བའི་དོན་མཛད་ཀྱི་འདུག་ལོ་བྱ་བའི་གྲགས་པ་བྱུང་བས་དེ་རྣམས་བསལ་བའི་ཆེད་དུ་ཇོ་བོ་ཉིད་ཀྱང་རྒྱ་གར་དུ་འབྱོན་པར་དགོངས་པ་ལྟར་མཛད། དེའི་ཚེ་འབྲོམ་རིན་པོ་ཆེས་ཇོ་བོ་བོད་དུ་འབྱོན་པར་བསྐུལ་བའི་ཕྱིར་དུ་ཐབས་མཁས་ཀྱིས་ངེད་ཀྱི་ལྷ་ས་དང་བསམ་ཡས་ལ་སོགས་པའི་གཙུག་ལག་ཁང་ན་སློབ་དཔོན་བོ་དྷི་སཏྭ་དང་ཀ་མ་ལ་ཤཱི་ལ་ལ་སོགས་པས་གདན་དྲངས་པའི་རྒྱ་དཔེ་མང་པོ་དང་ཇོ་བོ་ཤཱཀྱ་མུ་ནེ་སོགས་རྟེན་ཁྱད་པར་ཅན་མང་དུ་བཞུགས་ཤིང་དགེ་འདུན་སྟོང་ཕྲག་འདི་ཙམ་བཞུགས་པ་སོགས་ཀྱི་ལོ་རྒྱུས་མང་པོ་སྙན་དུ་གསོལ། དེ་ཐམས་ཅད་ཀྱང་ཇོ་བོ་བོད་དུ་བྱོན་པ་ལ་དགྱེས་པ་ལགས་ཞུས་པས། ཇོ་བོ་ཤིན་ཏུ་དགྱེས་ནས་སྙིགས་མའི་དུས་སུ་ཚངས་པར་སྤྱོད་པ་གྲངས་མང་བ་དེ་ཙམ་པ་རྒྱ་གར་ནའང་མི་བཞུགས། དེ་ཙམ་བཞུགས་ན་ངེས་པ་ཁོ་ནར་དགྲ་བཅོམ་པ་ཡང་བཞུགས་ཏེ་མཆི་གསུང་། བྱིན་པ་འདར་ཕྲིལ་ཕྲིལ་བོད་ཀྱི་ཕྱོགས་སུ་ཕྱག་མཛད། དེ་ཐམས་ཅད་ཀྱང་ཁོ་བོ་འོང་བ་ལ་དགའ་བ་ཡིན་ན་ངས་དགེ་འདུན་གྱི་ཆོས་ལྡན་གྱི་ངག་མི་གཅོག་པར་དམ་བཅས་པ་ཡིན་གསུངས་པས་འབྲོམ་རིན་པོ་ཆེ་སྤོབས་པ་སྐྱེས་ནས་ཇོ་བོ་ལ་བོད་དུ་འབྱོན་པར་ཞུ་བ་ཕུལ། ཇོ་བོས་ཀྱང་ཞལ་གྱིས་བཞེས་པ་ལགས། དགེ་བཤེས་ལོ་ཙཱ་བའི་ཞལ་ནས། ངས་དམྱལ་བར་འགྲོ་མི་ནུས། སློབ་དཔོན་གནས་བརྟན་དང་ཆད་དོན་ཡོད་པ་ཐུགས་ལ་མངའ་མོད་གསུང་བས་བོད་དུ་བཞུགས་དབང་མ་བྱུང་། ཇོ་བོའི་ཞལ་ནས། དང་པོ་ཚུར་ལ་སྤྱན་མ་འདྲོངས་དོགས། དེ་ནས་ཕར་ལ་སྤྱན་མ་འདྲོངས་དོགས། ངས་ལོ་ཙཱ་བ་སྦྱོང་བྱ་བའི་ཞལ་ཀྱལ་ཡང་གསུངས། དེར་འབྲོམ་རིན་པོ་ཆེའི་ཐུགས་དགོངས་ལ་བོད་ཀྱི་མི་ཆེན་རྣམས་གྲོགས་སུ་སྦྲན་ལ་སྤྱན་དྲང་དགོས་དགོངས་ནས་བཀའ་འཕྲིན་བརྫངས་བ་ནི། ཤིང་རྟའི་དབྱིབས་འདྲ་འཛམ་གླིང་གི ། བྱེ་བྲག་བརྗིད་ལྡན་གངས་རིའི་བྱང་། ། ལོ་ཧི་ཏ་འགྲམ་རིན་ཆེན་ཁུངས། ། ཁ་བ་ཅན་ཞེས་མིང་གྲགས་ན། ། བློ་ཆེན་སྟོབས་ལྡན་མི་བསྲུན་པ། ། བོད་ཅེས་བྱ་བ་གནས་པའི་ཕྱིར། ། མི་རྒྱལ་བྱང་ཆུབ་སེམས་དཔའ་ཆེ། ། དཔའ་ཆེན་མང་པོ་འཁོར་བཅས་ཀྱིས། ། སྨན་གདགས་ཐབས་སུ་དམ་ཆོས་བསྒྱུར། ། རྒྱུ་བཟང་བཀོད་ལེགས་གཙུག་ལག་ཁང་། ། བསམ་ཡས་ལ་སོགས་གནས་མཆོག་ན། ། སྔོན་རྒྱལ་འཕྲུལ་རྗེའི་དགོངས་བཀང་ཕྱིར། ། བསྟན་པ་བདུད་རྩི་རྒྱས་མཛད་ཅིང་། ། རྒྱལ་སྲས་འདྲེན་པ་དཀྱིལ་ཆེ་བ། ། མི་ཡི་རྒྱལ་བོ་ཤཱཀྱའི་སྲས། ། ལྷ་བཙུན་བོ་དྷི་རཱ་ཛ་དང་། ། དང་པོའི་དགེ་སློང་ལུགས་འབྱིན་དཔོན། ། བཙུན་ཆེན་ཡེ་ཤེས་བློ་གྲོས་དང་། ། ཐེག་ཆེན་གདུང་བརྒྱུད་བརྟན་མཛད་པའི། ། ཐེག་ཆེན་ཀ་བ་རྣམ་གསུམ་དང་། ། མིག་འབྱེད་དགེ་བཤེས་རྣམ་གཉིས་ཀྱི། ། རྗེས་སློབ་དཔལ་ལྡན་བཅུ་གཉིས་དང་། ། ཆོས་འཁོར་ཁྲིམས་བཞིན་སྐྱོང་མཛད་པའི། ། རིང་ལུགས་ཆེན་པོ་གཉིས་པོ་དང་། ། ཆོས་གྲྭའི་སློབ་དཔོན་ཐུགས་རྒྱལ་ཅན། ། ཀ་བ་གར་མི་མཆེད་གཉིས་དང་། ། དགེ་བཤེས་ཆེ་རྣམས་དགོངས་སྐྱོང་བའི། ། ཀུན་ཕན་དབང་ཕྱུག་རྒྱལ་མཚན་དང་། ། གནས་བརྟན་བན་སྐྱའི་རེ་གནས་པ། ། ཤཱཀ་གཞོན་རྒྱལ་བའི་སྲས་གཉིས་དང་། ། མཁས་བཙུན་ཆེན་པོར་སྙན་གྲགས་པ། ། ལེགས་པའི་ཤེས་རབ་ལ་སོགས་པའི། ། འཕགས་པའི་དགེ་སློང་དགེ་འདུན་ཆེ། ། སློབ་མ་ཡོན་བདག་འཁོར་བཅས་ལ། ། དགེ་བསྙེན་རྒྱལ་བའི་འབྱུང་གནས་ཀྱིས། ། གུས་པས་སྔོན་འགྲོའི་མཆེད་གསོལ་པ། ། ཁྱེད་ཀྱི་བྱང་ཆུབ་སྤྱོད་པ་ལ། ། བར་ཆད་མི་བདེ་མི་མངའ་འམ། ། མདོར་བསྡུས་གཅེས་པའི་དོན་གསོལ་བ། ། རྒྱ་གར་ཡུལ་གྱི་མཁས་བཙུན་མཆོག ། ཡོན་ཏན་མཐའ་ཡས་རྒྱས་མངའ་ཞིང་། ། ཡེ་ཤེས་མཐའ་ཅན་མཚན་ལྡན་པའི། ། མཁས་པ་ཆེན་པོ་འདིར་བྱོན་པ། ། ཁྱེད་ཀྱིས་ལོ་རྒྱུས་མཁྱེན་པ་ལགས། ། དེ་ལ་དངོས་ཉིད་དད་འཁྲུངས་ནས། ། ལྷ་བཙུན་བཀའ་སྩལ་མཆིས་པ་ཡིས། ། སྔར་ནི་དབུས་སུ་གཤེགས་ཞུས་ན། ། ཕར་རིངས་གསུངས་ནས་བཀའ་མ་གནང་། ། སླད་ནས་བལ་ཡུལ་ཤུལ་ཁ་ནས། ། དབུས་ཀྱི་དགེ་འདུན་རྒྱུས་གསོལ་བས། ། དད་ནས་ཕྱག་འཚལ་དགྱེས་གྱུར་ཏེ། ། ཚངས་སྤྱོད་གྲགས་མང་དེ་ལྟ་བུ། ། རྒྱ་གར་ཡུལ་ནའང་དཀོན་ཞེས་གསུང་། ། དེས་ཀྱང་དངོས་ཉིད་སྤོབས་སྐྱེས་ཏེ། ། ཁྱེད་ཀྱང་དད་པར་ཁུམས་ལགས་པས། ། ཡང་དང་ཡང་དུ་ཞུས་པ་ལས། ། ང་ཡི་དགེ་འདུན་དོན་སྒྲུབ་ཅིང་། ། བཀའ་མི་གཅོག་པར་དམ་བཅས་ཕྱིར། ། དགེ་འདུན་དག་ལ་གྲོས་ཡོད་ཅིང་། ། སྤྱན་འདྲེན་འོང་ན་འགྲོ་གསུང་བས། ། དགེ་སློང་གཞོན་ནུ་བློ་རྣོན་པོ། ། ལོ་ཙཱ་སྨན་ཐོགས་གཅིག་མཆིས་ན། ། ཁྱེད་ཅག་དམ་ཆོས་དོན་གཉེར་རྣམས། ། མོས་ཤིང་བཀའ་གྲོས་མཐུན་པ་ན། ། སྤྱི་སྒོས་གང་བདེའི་སྤྱན་འདྲེན་པ། ། དགེ་སློང་རྟ་མང་ཞལ་མཐོང་བཅས། ། སྟོན་དུས་ཚུན་ཆད་འདིར་བྱོན་མཛོད། ། བྱ་བ་དང་། གཞན་ཡང་བདག་གིས་དགྲར་རྟེན་སྔགས་དང་འཁྲུལ་པའི་རྒྱུ་གཞན་གྱིས། ། ཚུལ་ཁྲིམས་ཉམས་སོགས་ཉེས་མཐོང་དེའི་ཕྱིར་བདག་གིས་ཕན་བསམ་སྤྲིངས། ། མོས་པ་སྣ་ཚོགས་མཆིས་པས་འདི་ལ་མི་དགེ་གང་། ། རང་འདོད་གཙོ་བོར་མ་འཛིན་ཐུགས་གཞིགས་གཟོད་པར་མཛོད། ། དོན་ལྡན་ཡོན་ཏན་བརྗོད་པའི་མཚན་གྱི་སྔོན་འགྲོ་པ། ། ཤཱཀྱའི་དགེ་སློང་དགེ་འདུན་རྣམས་ཀྱི་སྤྱན་ལམ་དུ། ། ཀུན་ལ་ཕན་བསམ་དགེ་བས་ཡི་གེ་འདི་བསྡེབས་པའི། ། དགེ་བས་དགོངས་གྲུབ་ལེགས་པའི་དཔལ་འབྱུང་དོན་ལྡན་ཆེར་རྒྱས་སྨོན། ། བྱ་བའི་ཆབ་ཤོག་དབང་ཕྱུག་མགོན་ལ་བརྫངས་ནས་དགེ་བཤེས་ཀ་བའི་ཕྱག་ཏུ་གཏད་དོ། ། དེ་ནས་འབྲོམ་རིན་པོ་ཆེས་ཇོ་བོ་དཔོན་གཡོག་གཤེགས་པའི་ཕྱག་ཕྱིར་བྱོན་ཏེ་བོད་སྟོན་རྣམས་འབྱོན་དུ་རེ་ནས་ཅི་འགོར་མཛད། ལོ་ཙཱ་བས་ཕར་ལ་ཅི་མགྱོགས་མཛད་དོ། ། དེར་བོད་སྟོན་རྣམས་མ་སླེབ་པར་ཇོ་བོ་དཔོན་གཡོག་མང་ཡུལ་སྐྱིད་གྲོང་དུ་ཕེབས། དེ་ནས་བལ་པོ་རྫོང་རྒྱུད་དེ་རྒྱ་གར་དུ་ཕེབས་བར་ཆས་པ་ལྟར་མཛད་པ་ན་ས་མན་སྡེ་གསུམ་བྱ་བའི་འཁྲུག་པ་ལངས་ནས་བལ་པོ་རྫོང་འགགས་པས་མ་ཐོན། དེ་བོད་ཀྱི་བསོད་ནམས་སུ་བྱུང་བ་ལགས། དེར་དགེ་བཤེས་ལོ་ཙཱ་བ་དེ་ཐུགས་ཤིན་ཏུ་མ་བདེ་བ་ལ་ཇོ་བོའི་ཞལ་ནས། ཁྱོད་བློ་མི་བདེ་བ་མི་དགོས། སྒྲུབ་པར་མ་ནུས་པ་ལ་ཉེས་པ་གཏན་མེད་པ་ཡིན་གསུང་། དེར་ལོ་ཙཱ་བ་དགྱེས་ཏེ་ད་འོ་ན་བོད་དུ་འབྱོན་པར་ཞུ་ཟེར་ནས་བོད་དུ་སྤྱན་དྲངས་སོ། ། དེའི་དུས་སུ་གསེར་ཀོ་གཏུམ་ཞིག་དང་ལམ་སྒྲོན་ཇོ་བོའི་ཕྱག་བྲིས་ཡིན་པ་ཅིག་པུ་རངས་པའི་བནྡེ་གཉིས་ལ་བསྐུར་ནས་གསེར་འདི་སློབ་དཔོན་གནས་བརྟན་ལ་ཕུལ་ལ་ད་རེས་ཇོ་བོ་གདན་དྲངས་པ་ཡིན་ཏེ་བལ་པོའི་ལམ་འགགས་ནས་ཕྱིར་ལོག ། ད་སྤྱན་དྲོངས་གསུང་ན་ཡང་སྤྱན་འདྲེན། ཇོ་བོ་ཡང་བོད་ལ་མཉེས་ཤིང་འགྲོ་དོན་ཡང་ཆེན་པོ་འདུག་པས་བཞུགས་ཆོག་གམ་བྱ་བ་དང་། བསྟན་བཅོས་འདི་བི་ཀ་མ་ལ་ཤཱི་ལའི་པཎྜི་ཏ་རྣམས་ལ་གཟིགས་སུ་ཕུལ་ཞིག་པའི་འཕྲིན་བསྐུར་བཏང་བས་གཉིས་པོས་ཀྱང་ལམ་ལ་ཉེ་ཞོ་མེད་པར་བི་ཀ་མ་ལ་ཤཱི་ལར་སླེབ་སྟེ་གནས་བརྟན་དཀོན་མཆོག་འབྱུང་གནས་ལ་གསེར་རྣམས་ཕུལ། ཇོ་བོའི་ལོ་རྒྱུས་དང་ལོ་ཙཱ་བའི་འཕྲིན་རྒྱས་པར་གསོལ། བསྟན་བཅོས་དེ་པཎྜི་ཏ་རྣམས་ལ་གཟིགས་སུ་ཕུལ་བས་ནན་ཏར་མཉེས་ནས་བསྟན་བཅོས་འདི་ལེགས། ཡི་གེ་ཕྱག་བྲིས་མ་ནོར་བར་འདུག་གསུང་སྟེ་རྒྱལ་མཚན་གྱི་རྩེ་ལ་བཏགས་ནས་ཞག་ཉི་ཤུ་རྩ་གཅིག་ཏུ་མཆོད་པ་རྒྱ་ཆེན་པོ་མཛད། དེར་གནས་བརྟན་གྱི་ཞལ་ནས་ཇོ་བོ་འབྱོན་དུ་རེ་བ་ཡིན་ཏེ་ཆོས་འདི་ཕེབས་པས་ཇོ་བོ་དང་ཁྱད་མེད་དེ་ཇོ་བོ་བོད་ན་འགྲོ་དོན་ཆེ་བ་དེ་ལྷག་པར་དགའ། ཇོ་བོ་བོད་ལ་དང་པོ་ནས་མཉེས་པ་ང་རང་ལ་རྒྱུས་ཡོད། ད་སྐུ་ན་སོ་བྱོན་པས་བཤུལ་ཐག་རིང་པོ་ལ་ཚུར་སྤྱན་མ་དྲང་བར་བསྟན་བཅོས་འདི་ལ་འགྲེལ་པ་ཅིག་མཛད་ནས་བསྐུར་བ་ཞུ་གསུངས་ནས་གཉིས་པོ་ཚུར་བཏང་། ཁོང་གཉིས་པོས་ཀྱང་ཚུར་འཁོར་ནས་ཇོ་བོ་དཔོན་གཡོག་ལ་ཞུ་འཕྲིན་སྙན་དུ་གསོལ་བས་ནན་ཏར་མཉེས་ཤིང་། ཁྱད་པར་ལོ་ཙཱ་བའི་ཞལ་ནས་སློབ་དཔོན་གནས་བརྟན་གྱིས་རི་བས་ཀྱང་ལྕི་བའི་ཁུར་གཅིག་བསྐུར་བ་དེ་ད་སངས་ཀྱི་སོང་གསུང་། ཇོ་བོས་ཀྱང་དེ་འཕྲལ་དུ་འགྲེལ་པའི་དབུ་བཙུག་ནས་དཀའ་འགྲེལ་ཞིག་མཛད་དེ་སླར་ཁོང་གཉིས་པོ་ལ་བསྐུར་བས་པཎྜི་ཏ་རྣམས་ཀྱིས་ཉིན་ལམ་མང་པོ་ནས་བསུ་བ་བྱས། རྒྱལ་མཚན་གྱི་རྩེར་བཏགས་ནས་མཆོད་པ་ཆེན་པོ་མཛད་དོ། ། དེ་ཡང་། དེང་སང་བསྟན་འགྱུར་ནང་ན་ལམ་སྒྲོན་རང་འགྲེལ་ཞེས་གྲགས་པ་འདི་ལ་ཇོ་བོས་མཛད་ངེས་པ་དང་། ཇོ་བོས་མ་མཛད་པར་གཞན་གྱིས་གསར་དུ་བསྣན་པའི་ཆ་གཉིས་ཡོད་དེ་རྒྱ་གར་གྱི་པཎྜི་ཏ་རྣམས་ཀྱིས་བསྐུལ་བ་ལྟར་ཇོ་བོས་ལམ་སྒྲོན་ལ་རང་འགྲེལ་མདོར་བསྡུས་ཤིག་མཛད་ནས་རྒྱ་གར་དུ་བརྫངས། དེ་ལ་ཇོ་བོའི་སློབ་མ་བོད་སྟོན་མཁས་པ་འགའ་ཞིག་གིས་ཇོ་བོའི་གསུང་སྒྲོས་ལ་གཞི་བླངས་པའི་བཤད་པ་རེ་མང་ཞིག་བསྣན་པར་སྣང་སྟེ། དེ་ལ་ལེགས་པར་བཤད་པའང་མང་དུ་བྱུང་མོད་ཀྱི་ནོར་བར་མངོན་པ་འགའ་ཞིག་ཀྱང་བྱུང་ངོ་ཞེས་རྗེ་བདག་ཉིད་ཆེན་པོས་གསུངས་སོ། ། དེ་ལྟར་བླ་མ་རྗེ་བཙུན་ཆེན་པོ་འདིས་རྒྱ་གར་དུ་བཞུད་པ་བཞིན་དུ་མཛད། ལོ་ཙཱ་བས་སྐྱེལ་བ་བཞིན་མཛད་ཀྱང་བོད་རང་དུ་བཞུགས་པའི་རྒྱུ་མཚན་ནི་དང་པོ་ནས་ངེས་པ་ཡིན་ཏེ། ཁྱོད་སྔོན་སོ་མ་པུ་རི་ན། ། རྟོག་གེ་འགར་བ་གསུང་བའི་ཚེ། ། ད་ནི་ལོ་ནི་ཉི་ཤུ་ན། ། ཚེ་ཡི་འདུ་བྱེད་གཏོང་ཞེས་གསུངས། ། དེ་ནས་ལོ་གཉིས་ལོན་པ་ན། ། བོད་དུ་འབྱོན་ཁའི་དུས་སུ་ནི། ། བི་ཀ་མ་ལ་ཤཱི་ལར་ནི། ། ད་ནི་ལོ་ནི་བཅོ་བརྒྱད་ན། ། ཚེ་ཡི་འདུ་བྱེད་བཏང་ནས་སུ། ། ལུས་འདི་བོད་དུ་འཇོག་གོ་གསུངས། ། ཇི་སྐད་གསུང་བཞིན་མ་འཁྲུལ་བར། ། བྱུང་བ་དེ་ནི་ངོ་མཚར་ཆེ། ། ཞེས་གསུངས་པ་ལྟར་རོ། ། དགེ་བའི་བཤེས་གཉེན་ཤ་ར་བའི་ཞལ་ནས། ཇོ་བོ་བོད་དུ་བཞུགས་པར་རྒྱ་གར་རང་ནས་ངེས་པ་དཔེ་ཆ་དང་ཐུགས་དམ་གྱི་ལྷ་མ་ལུས་པ་སྤྱན་འདྲེན་ལུགས་དེས་ཀྱང་ཤེས་གསུང་ངོ་། ། འབྲོམ་རིན་པོ་ཆེ་ཐུགས་དགོངས་བཟང་བ་དང་། དེ་དུས་ཀྱི་མི་རྣམས་ཀྱང་བསམ་པ་བཟང་བས་བོད་ཀྱི་མི་ཆེན་རྣམས་ཀྱིས་ཀྱང་སོ་སོ་ནས་གསེར་དང་རྟ་ལ་སོགས་པའི་ཁྲལ་བཀྲལ་ནས་བོད་དབུས་གཙང་གི་མི་ཆེན་ཐམས་ཅད་ཀྱིས་ཇོ་བོ་རྗེ་བསུ་བ་ལ་བྱོན། དེའི་ཚེ་བོད་སྟོན་རྣམས་འབྱོན་པ་ལ་ཇོ་བོས་ཉིན་རེ་བཞིན་བྱ་ར་མཛད་ཙ་ན་བོད་སྟོན་རྣམས་ཀྱིས་ཚག་ཞུ་དང་བེར་གྱོན། རྟ་ལ་ཆིབས་བྱོན་པས་ཇོ་བོས་གཟིགས་མ་ཐག ། ཨུ་པ་སི་ཀ། མི་མ་ཡིན་མང་པོ་བྱུང་ངོ་གསུང་ནས་དབུ་རིལ་གྱི་གཏུམས། དེ་ནས་བོད་ཀྱི་མི་ཆེན་རྣམས་ཀྱིས་ཆོས་གོས་གྱོན་སེར་སྦྲེང་མཛད་ནས་ཕྱག་རྟེན་ཕུལ་བས་ཇོ་བོ་ཡང་དགྱེས་ནས་ཕྱག་ལན་མང་པོ་མཛད། དེ་ནས་ཇོ་བོ་རྗེ་དཔོན་གཡོག་ལ་བོད་སྟོན་རྣམས་ཀྱིས་སྣ་ལེན་དུ་བསྙེན་བཀུར་བཟང་པོ་ཞིག་མཛད་པས་རྒྱ་གར་གྱི་རབ་ཏུ་བྱུང་བ་བས་བོད་ཀྱི་རབ་བྱུང་འཚོ་བ་བཟང་བར་འདུག་གསུང་། དེ་ནས་གཙང་ལ་བསྟོད་ལྡོག་གི་ཚ་སྣ་བྱ་བར་དོ་ཧ་རྡོ་རྗེའི་མགུར་གསུངས་པས་འབྲོམ་རིན་པོ་ཆེས་བོད་དུ་འདི་མི་ལེགས། བསྐལ་པ་སྙིགས་པས་སྡོམ་པ་བསྲུང་བ་དང་ཚོགས་གསོག་པ་མི་མཆི། ལས་རྒྱུ་འབྲས་ལ་སོགས་པ་བསྟན་པ་སྤྱི་ལ་ཕན་པའི་ཆོས་གསུང་བར་ཞུས་པས། ཨ་ཏི་ཤ་ཡང་ཤིན་ཏུ་མཉེས་ཏེ། སེམས་ཅན་ཆེན་པོ་ཁྱོད་ལྟ་བུ་བོད་ན་བཞུགས་པ་བོད་བསོད་ནམས་ཆེ་ཡི། ཁོ་བོས་ཁྱོད་རྒྱ་གར་དུ་ཐོས་ན་བོད་དུ་འོང་མི་དགོས་པ་འདུག་པ་ལ་གསུང་། སྣེའུ་ཟུར་པའི་ཞལ་ནས། འུ་ཅག་ཡིན་ན་གཞན་སུ་ལའང་མེད་པའི་ཆོས་ཤིག་ཁོ་ན་ཞུ། དགེ་བཤེས་སྟོན་པ་དེ་ཐུགས་དགོངས་ཤིན་ཏུ་བཟང་པས་བོད་སྤྱི་ལ་ཕན་ཆེ་བའི་ཆོས་ཤིག་ཁོ་ན་ཞུ་བར་ལགས་པར་གདའ་གསུང་། དེ་ནས་གཙང་རོང་ན་མར་བྱོན་ཙ་ན་ཁང་པ་དོག་པས་གནས་ཁང་འདོད་རིགས་མ་རྙེད་པ་ལ་འབྲོམ་རིན་པོ་ཆེས་ཇོ་བོ་ཕྱིར་བཞུགས་སུ་བཅུག་ནས་དེའི་བར་དུ་ཁང་པའི་གད་བདར་བྱས། ཇོ་བོའི་དབུ་སྔས་སུ་མཎྜལ་ཞིག་ཀྱང་ཚང་པར་བྱས་འདུག་པས་ཇོ་བོའི་ཞལ་ནས། ང་ལ་སློབ་མ་ཁྱོད་འདྲ་བ་གཅིག་རྒྱ་གར་ནའང་ཡོད་གསུང་། པོ་ཏོ་བའི་ཞལ་ནས་དོན་ལ་མེད། ཡོད་ན་ཁ་སྐད་འདྲ་བ་འོང་ཐང་བ་ལ་གསུང་ངོ་། ། ཡང་ལན་ཅིག་གི་ཚེ་ཇོ་བོས་བྱིས་པ་ལྟར་མཛད་ནས་ནང་གི་གནས་རྣམས་ཕྱི་ས་ཆུང་ངུ་རེས་བཀང་བས་དེ་རྣམས་འབྲོམ་རིན་པོ་ཆེས་ལེགས་པར་ཕྱགས། སྐུའི་སྤྱོད་པ་ལ་མ་དད་པ་མ་སྐྱེས་པས་བྱ་རྒོད་ཀྱི་ཉིན་ལམ་བཅོ་བརྒྱད་ཀྱི་བར་གྱི་གཞན་གྱི་སེམས་ཤེས་པའི་མངོན་པར་ཤེས་པ་སྐྱེས་གསུངས། དེ་ནས་ཇོ་བོ་རྗེ་ཁུ་སྟོན་གྱིས་ཡར་ཀླུངས་སུ་སྤྱན་དྲངས་ཏེ་ཐང་པོ་ཆེར་ཕེབས། འབྲོམ་རིན་པོ་ཆེས་ཐང་པོ་ཆེར་མ་ཕེབས་པར་སྙེ་ཐང་དུ་ཕེབས་ནས་བང་སྟོན་སར་བྱོན་ཏེ་ད་ལྟ་ནི་ཇོ་བོ་ཁུས་སྤྱན་དྲངས་ནས་ཕེབས་ཁུས་ཞབས་ཏོག་འོ་མི་བརྒྱལ་བ་མི་འོང་། དེ་ཙ་ན་ཇོ་བོའི་བཞུགས་ས་ཅིག་དགོས་པས་ཁྱེད་ཀྱིས་སྙེ་ཐང་འདིར་བཞུགས་ས་བྱེད། ངས་ཐབས་མཁས་ཀྱིས་ཇོ་བོ་བསམ་ཡས་སུ་གདན་དྲངས་ཀྱིས། དེ་ཙ་ན་ཁྱེད་ཀྱིས་རྟ་པ་ཉིས་བརྒྱའི་ཞལ་མཐོང་དང་བཅས་པའི་བསུ་བ་གྱིས་ཤིག་གསུངས་པས་ཁོང་གིས་ཀྱང་ཞལ་གྱིས་བཞེས་སོ། ། དེ་ནས་འབྲོམ་རིན་པོ་ཆེས་ཇོ་བོའི་སྤྱན་སྔར་འགྲོ་དགོངས་ནས་ཡང་ཀླུངས་ནས་ཡར་བྱོན་པ་དང་ཐང་པོ་ཆེ་བའི་མི་ཅིག་ན་རེ། ཁྱོད་གར་འགྲོ་ཟེར། ཐང་པོ་ཆེར་འགྲོ་གསུངས་པས། སྨ་ཕབ་པར་འོང་ཟེར། ཇོ་བོ་དང་མཇལ་ན་སྨ་ཕབ་ནའང་ཕབ་སྙམ་པ་ཅིག་བྱུང་གསུང་། དེ་ནས་བནྡེ་ཞིག་ལ་ཇོ་བོའི་གཟིམ་ཁང་ག་ན་ཡོད་དྲིས་པས། སྟོན་དུ་མ་བཏུབ་པ་ལ་ཇོ་བོའི་སློབ་མ་ཨ་ཙ་ར་ཅིག་བྱུང་བས་ངོ་ཤེས་ནས་འབྲོམ་རིན་པོ་ཆེའི་རྩར་རྒྱུགས་བྱུང་། དེས་ནང་དུ་ཁྲིད་ནས་ཇོ་བོ་དང་མཇལ་བས་ཡུན་ཟླ་བ་གཅིག་ལས་མ་ལོན་པ་ལ་འོ་ཤིན་ཏུ་བརྒྱལ་བར་བྱས་ནས་གདའ། དེར་ཇོ་བོའི་ཞལ་ནས། ཨུ་པ་སི་ཀ་ཆེན་པོ། ང་རང་དང་པོ་གང་ནས་འོངས་པའི་སར་སྐྱོལ། བཀའ་འཁོར་འདི་ཀུན་ཡང་འོ་བརྒྱལ། རྟ་ཁལ་འདི་ཀུན་ཀྱང་མ་རྒན་ཡིན། ཁུ་སྟོན་ནི་འཁོར་ལོས་བསྒྱུར་བའི་རྒྱལ་པོ་ལྟ་བུ། ཁོ་བོ་ནི་དམངས་ཕལ་པ་ལྟ་བུ། ཁུ་སྟོན་ནི་སུམ་ཅུ་རྩ་གསུམ་གྱི་ལོངས་སྤྱོད་དང་ལྡན་པ་ལྟ་བུ། ཁོ་བོ་ནི་པྲེ་ཏེ་པུ་རིའི་གྲོང་ཁྱེར་ན་གནས་པ་ལྟ་བུ་བྱུང་གསུངས་པ་ལ། འབྲོམ་རིན་པོ་ཆེས་བདག་གིས་ཇོ་བོའི་བཞུགས་གནས་སྙེ་ཐང་ཟེར་བ། དབྱར་བསིལ་བ་དགུན་དྲོ་བ། ནགས་ཚལ་དང་ནེའུ་གསིང་ཡོད་པ། དགུན་ཡང་མེ་ཏོག་སྐྱེ་བ་ཞིག་བཙལ་བདོག་ཞུས་པས། ཨུ་པ་སི་ཀ་ད་ལྟ་རང་གཤེགས་གསུང་བ་ལ། ཁུ་ཡང་དབང་ཆེ་བས་ཁད་ལ་ཐབས་མཁས་བྱེད་དགོས་ཞུས་པས། ཁུ་སྟོན་གྱིས་མི་ཚོར་བའི་ཐབས་ང་རང་གིས་བྱེད་གསུང་ནས། དེའི་ནུབ་མོ་གྲུ་བསྡོགས་བྱས་ཏེ་ནམ་ལངས་པ་དང་ལམ་དུ་ཆུད་པར་བྱས་ནས་གཤེགས་པ་བནྡེ་མོ་ཞིག་གིས་མཐོང་ནས་ཁུ་སྟོན་ལ་བྱ་གཏོང་དུ་བྱིན། དེ་ནས་ཇོ་བོ་དཔོན་གཡོག་གིས་མྱང་པོའི་གྲུ་ལ་བྱོན། འབྲོམ་རིན་པོ་ཆེའི་ཞལ་ནས་མཉན་པ་ལ་སྔོན་ལ་ང་སྒྲོལ་ཅིག་ད་ལྟ་རང་རྡུང་གཏག་ཐམས་ཅད་ང་ལ་འོང་གསུངས་པས་མཉན་པས་སྔོན་ལ་བསྒྲལ། དེའི་ནུབ་མོ་འབྲོམ་རིན་པོ་ཆེ་དཔོན་གཡོག་གིས་འོན་དུ་མ་བཞུགས་པར་ཀ་ཆུར་ཕེབས། ཇོ་བོ་དཔོན་གཡོག་སྒྲོལ་ཀྱིན་ཡོད་ཙ་ན་དགེ་བཤེས་ཁུ་ཨ་ཏི་ཤ་ཟེར་ཅིང་རྒྱུགས་བྱུང་བ་གཟིགས་པས་ཇོ་བོའི་ཞལ་ནས་མཁས་པ་ཆེན་པོ་བྱོན། གྲུ་ཕྱིར་ཐེན་ཅིག་གསུངས་ནས་བཞུགས་པ་དང་ཁུ་ཡུས་ཆེ་བས་ཆིབས་པ་ཐལ་ནས་ཆུ་ནང་དུ་དེའུ་གྲོངས་བྱུང་། དེར་ཁུ་སྟོན་གྱིས་ཇོ་བོ་ལ་ལྡོག་པར་ཞུ་བ་ཕུལ་ཡང་མ་གནང་བར་དབུ་ཞྭ་ཕྱིར་འཕངས་ཏེ་བྱིན་རླབས་ཀྱི་རྟེན་དུ་གནང་། དེ་ནས་ཇོ་བོ་དཔོན་གཡོག་གིས་འོན་དུ་ཟླ་བ་གཅིག་བཞུགས་ནས་བསམ་ཡས་སུ་ཕེབས། དེའི་དུས་སུ་ཞང་འཕྲང་ཁ་བེར་ཆུང་གིས་འབྲོམ་རིན་པོ་ཆེ་སྤྱན་འདྲེན་པའི་མི་གཉིས་བཏང་ནས་ཡང་ཡང་བསྐུལ་བ་ལ་འབྲོམ་རིན་པོ་ཆེའི་ཞལ་ནས། ང་ད་ལྟ་འོང་མི་ཁོམ། ཇོ་བོ་སྐུ་ན་མཐོ་ལ་སྐུ་གཅོང་མང་བས་ཞབས་ཏོག་གལ་ཆེ། དེའི་བར་དུ་ཐུགས་མི་ཆད་པར་ཆོས་འདི་ཚོ་ལ་དགོངས་པར་ཞུ་གསུངས་ནས་འཕྲིན་ཡིག་བསྐུར་བ། ཡབ་མེས་ཆོ་རིགས་བཟང་པོའི་རྗེས་འབྲངས་ཤིང་། ། དགེ་བའི་བློ་མངའ་དལ་འབྱོར་ལྡན་རྣམས་ལ། ། ཕན་པར་དགོངས་པའི་སེམས་ཀྱིས་ཀུན་བསླངས་ན། ། བདུད་རྩི་འདྲ་བའི་གྲོས་ཤིག་ཡོངས་ལ་འདེབས། ། སྙོམས་པར་འཆར་བའི་ཉི་མའི་འོད་ཟེར་བཞིན། ། སངས་རྒྱས་བསྟན་པས་ཀུན་ལ་ཡོངས་ཁྱབ་ཀྱང་། ། བྱང་དུ་བལྟས་པའི་བྲག་ཕུག་ཇི་བཞིན་དུ། ། དམ་པའི་ལྷ་ཆོས་མི་མཛད་བློ་རེ་རྨོངས། ། འོ་སྐོལ་དལ་འབྱོར་མི་ལུས་ཐོབ་པ་ཡང་། ། ད་ལྟ་ཉིད་ཀྱི་སྐུ་སྤྱོད་མ་ལགས་ཏེ། ། ཡབ་ཡུམ་ལས་འཕྲོ་མཐུན་པའི་འདུ་འཕྲོད་དང་། ། ཚེ་སྔོན་བསོད་ནམས་བསགས་པའི་རྒྱུ་ལས་གྲུབ། ། དེ་ལྟར་རྙེད་དཀའི་མི་ལུས་ཐོབ་ཙ་ན། ། སྡིག་པ་སྤངས་ཏེ་དགེ་བ་མ་སྤྱད་ན། ། མཐོན་པོའི་རི་ལ་ཕྱིན་ནས་སླར་ལྷུང་བཞིན། ། མི་ལུས་ཐོབ་པ་དོན་མེད་ཆུད་མ་གཟོན། ། འོ་སྐོལ་སྟོན་པ་སངས་རྒྱས་བྱོན་ནས་ཀྱང་། ། དམ་ཆོས་བདུད་རྩི་ཇི་སྙེད་གསུངས་པ་དག ། རྟག་པའི་དོན་དུ་གསུངས་པ་མ་ཡིན་ཏེ། ། མི་རྟག་ངེས་ནས་གསུངས་པ་མ་ཡིན་ནམ། ། རྟག་གམ་མི་རྟག་དཔེར་ན་འདི་འདྲ་སྟེ། ། འོ་སྐོལ་ཡབ་མེས་སྔ་རབས་འདས་པ་དག ། ད་ལྟ་མིང་ཙམ་ལུས་ནས་མ་སོང་ངམ། ། རྟག་པ་ལགས་ན་ད་ལྟ་གང་ན་གདའ། ། འོ་སྐོལ་ཉིད་ཀྱི་སྐུ་རིང་འདི་ལ་ཡང་། ། ན་ཚོད་མཐུན་པའི་རྒན་གཞོན་མཐོ་དམན་སོགས། ། ཇི་སྙེད་གུམ་པ་ཐུགས་མཚོར་མི་མངའ་འམ། ། སྙན་གྱིས་གསན་པ་དེ་བས་ཤིན་ཏུ་མང་། ། ན་ནིང་དིང་སང་དོ་ཙིག་བར་ལ་ཡང་། ། འདས་པའི་མི་དང་ཡུལ་མི་ཁྱིམ་མཚེས་ལས། ། མཚོན་གྱིས་རྨས་དང་དེ་བཞིན་བྲོ་འཚལ་ནས། ། གྲངས་ཀྱིས་གུམ་པ་སྤྱན་གྱིས་མ་གཟིགས་སམ། ། ཀུན་ཀྱང་ཆོས་ཉིད་འདི་ལས་མ་འདས་ཏེ། ། འཆི་བའི་རེ་མོས་འོ་སྐོལ་ཀུན་ལ་འོང་། ། དེ་རིང་སང་གི་དབང་ཡང་མ་མཆིས་ཏེ། ། ཐམས་ཅད་མི་རྟག་འཇའ་ཚོན་རི་མོ་འདྲ། ། གཟུགས་ནི་ལྷོ་སྤྲིན་འདྲ་སྟེ་ཁད་ཀྱིས་འཇིག ། སྲོག་ནི་བ་ཐག་འདྲ་སྟེ་གྱི་ན་ཙམ། ། དབུགས་ནི་ན་བུན་འདྲ་སྟེ་ཡོད་ལ་མེད། ། ཚེ་ནི་གློག་དང་འདྲ་སྟེ་སྐད་ཅིག་མ། ། འོ་སྐོལ་ཕུང་པོ་འདི་ལ་ཕངས་མཛད་ཀྱང་། ། ཁྲེལ་མེད་སླེས་ལ་བོར་བ་མཐོང་བཞིན་དུ། ། སྒྱུ་མ་རྟག་ཏུ་རེ་བ་བློ་རེ་རྨོངས། ། སྟོང་པ་དངོས་པོར་ལྟ་བ་བློ་རེ་འཁྲུལ། ། ཇི་ལྟར་བགྱིས་ཀྱང་རང་དང་ཕུང་པོ་འདི། ། འབྲལ་བར་མི་འདོད་འགྲོགས་པར་རེ་འདོད་ཀྱང་། ། གོས་རྙིང་བརྗེ་བ་བཞིན་དུ་ཕྱིར་ལུས་ནས། ། ལུས་སེམས་སོ་སོར་ཆ་བ་མ་དགོངས་སམ། ། བསོད་ནམས་ལས་གྲུབ་འབྱུང་བཞི་འདུས་བསྐྱེད་པའི། ། པདྨ་ལྟ་བུར་རྒྱས་པའི་ལུས་འདི་ལ། ། དགྲ་སྡང་རྣམ་ཤེས་བརྒྱད་ནི་དུག་སྦྱོར་ན། ། སྒྱུ་མའི་ཕུང་པོ་ད་ལྟ་ཇི་སྙམ་མཛད། ། དེ་ལ་སྐྱེས་བུ་དམ་པའི་སྨན་པ་ཡིས། ། རྣམ་ཐར་བརྒྱད་ཀྱི་སྨན་གྱིས་མ་བཅོས་ན། ། འཆི་བདག་བདུད་ཀྱི་བགེགས་ནི་གདོན་ངོ་མཐོ། ། མ་རིག་དུག་གསུམ་གཏན་གྱི་ནད་གཞི་ཆེ། ། མི་རྟག་འཆི་བའི་ནད་ཀྱིས་ཟིན་པ་ལ། ། འཚོ་བྱེད་གཞོན་ནུའི་སྨན་གྱིས་ཅང་ཕན་ནམ། ། བདུད་ཀྱི་ཞགས་པ་ནག་པོས་ཟིན་པ་ལ། ། མོ་བོན་ལྟོ་དཔྱད་རིམ་གྲོས་ཅང་ཕན་ནམ། ། དབང་མེད་དུས་ཀྱིས་རྒྱས་འདེབས་བྱེད་པ་ལ། ། གཉེན་བཤེས་ཉེ་དུས་བསྐོར་བས་ཅང་ཕན་ནམ། ། རྟག་པ་མ་ལགས་ཀུན་ཀྱང་མི་རྟག་སྟེ། ། རྟག་ཏུ་བཏུབ་ན་སངས་རྒྱས་སྐུ་འདི་དག ། ཡོད་པ་མ་ལགས་ཀུན་ཀྱང་མེད་པ་སྟེ། ། ཡོད་དུ་བཏུབ་ན་རྣམ་ཤེས་སེམས་འདི་ཡོད། ། བདེན་པ་མ་ལགས་ཀུན་ཀྱང་བརྫུན་པ་སྟེ། ། བདེན་དུ་བཏུབ་ན་དམ་པའི་ཆོས་འདི་བདེན། ། ངེས་པ་མ་ལགས་ཀུན་ཀྱང་མ་ངེས་ཏེ། ། ངེས་སུ་བཏུབ་ན་དགེ་སྡིག་རྒྱུ་འབྲས་ངེས། ། འདོད་ཆགས་ཞེ་སྡང་མ་རིག་དེ་དག་ལས། ། མི་ཤེས་གཏི་མུག་གཉིད་ནི་མ་ཆེ་བར། ། དགེ་བ་བཅུ་ཡི་མེལ་ཚེ་འབད་ལ་མཛོད། ། མ་རིག་གཉིད་ལས་སངས་པའི་དུས་བྱུང་ན། ། ཡང་དག་བདེན་པའི་ནམ་ཞིག་ལངས་ཙ་ན། ། མཐོ་དམན་མཁའ་ལ་ཉི་ཤར་ཇི་བཞིན་དུ། ། འགྲོ་མགོན་སངས་རྒྱས་དེ་དང་ཕྲད་པར་མཛོད། ། ཅེས་བྱ་བའི་ཚིགས་སུ་བཅད་པ་བཅོ་བརྒྱད་དང་། ། གང་གི་དྲིན་གྱིས་བདག་བློ་རྒྱས་མཛད་པའི། ། བླ་མ་དམ་པ་རྣམས་ཀྱི་ཞབས་ལ་འདུད། ། གཏིང་མཐའ་མེད་པའི་འཁོར་བའི་རྒྱ་མཚོ་འདིར། ། དེ་སྔ་ཕན་ཆད་ཇི་ཙམ་པ་ཅིག་འཁྱམས། ། ད་ཡང་ཇི་ཙམ་པ་ཅིག་འཁྱམ་དགོས་པས། ། བླ་མ་དམ་པའི་གདམས་ངག་ཐོས་བསམ་བྱ། ། དེ་ལས་ཐར་བའི་དུས་ནི་ད་རེས་ཡིན། ། གློ་བུར་བར་དུ་གཅོད་པ་མ་བྱུང་ཡང་། ། ཚེ་ལ་ལོང་མེད་ཡུན་རིང་མི་སྡོད་ངེས། ། འཇིག་རྟེན་འདི་ཡི་བྱ་བ་རྒྱབ་ཏུ་བོར། ། འདི་དང་ཕྱི་མ་གཉིས་ཀ་མི་འགྲུབ་ཀྱི། ། ཕྱི་མ་གལ་ཆེ་ཆོས་ལ་འབད་པ་སྐྱེད། ། གཉིད་དང་སྙོམ་ལས་དབང་དུ་མ་གཏང་བར། ། སྟོང་པ་སྙིང་རྗེས་ཟིན་པ་རྩེ་གཅིག་སྒོམས། ། ཚེ་ལ་ལོང་མེད་འཆི་བདག་ཕོ་ཉས་སླེབ། ། བྱ་བ་ཐམས་ཅད་བྱེད་འཕྲོ་བཏང་ནས་ནི། ། རང་བཞིན་མཉམ་པ་ཉིད་ལ་བློ་བཞག་ནས། ། ཆོས་ཉིད་རྣམ་དག་འདི་ལ་ལྟ་བ་བྱ། ། མི་རྟོག་བདེ་གསལ་འདི་ལ་སྒོམ་པ་བྱ། ། མ་བཅོས་རང་བཞིན་འདི་ལ་སྤྱོད་པ་བྱ། ། སྐུ་བཞི་ཡེ་ཤེས་ལྔ་ལ་འབྲས་བུ་བྱ། ། ལྟ་སྒོམ་སྤྱོད་པ་འབྲས་བུ་རྣམ་པ་བཞི། ། སོ་སོ་ཐ་དད་མེད་པའི་ལམ་དུ་སེམས། ། ལྟ་བ་སྟོང་ཉིད་སྒོམ་ཞེས་ཁས་བླངས་ནས། ། སྤྱོད་པ་དངོས་པོར་འཛིན་ལས་མ་གྲོལ་ན། ། ལྟ་སྤྱོད་འཛོལ་ཏེ་ལོག་པའི་ལམ་དུ་འགྲོ། ། རང་གིས་རང་བསླུས་གཞན་གྱིས་ཞེ་ཡང་ཁྲེལ། ། ཆགས་སྡང་སྐྱེ་བའི་གྲོགས་ངན་ཐབས་ཀྱིས་སྤོངས། ། དེར་ཡང་ཀུན་དང་འདྲིས་པར་མི་བྱའོ། ། ཆགས་ན་ལྷ་ལ་ཆགས་ཀྱང་མི་གྲོལ་ཏེ། ། ཞེན་ན་ཆོས་ལ་ཞེན་ཡང་འཆིང་པའི་རྒྱུ། ། ཕྱུག་པོ་གསེར་སྲང་སྟོང་ལ་ཆགས་པ་དང་། ། དབུལ་བོ་ཁབ་སྐུད་ཙམ་ལ་ཆགས་པ་གཉིས། ། ཐར་པའི་བར་དུ་གཅོད་ལ་ཁྱད་པར་མེད། ། དེས་ན་ཅི་ལའང་ཞེན་ཆགས་མེད་པར་བྱ། ། འཁྲུལ་པའི་རྟོག་པ་མ་ཞིག་བར་དུ་ནི། ། དད་པས་བླ་མ་དག་དང་དཀོན་མཆོག་མཆོད། ། ཡི་དམ་ལྷ་ལ་གསོལ་བ་རྒྱུན་དུ་ཐོབ། ། ལུས་ངག་ཡིད་གསུམ་དགེ་བ་ནུས་ཚད་ཀྱིས། ། བསམ་དུ་མེད་པའི་ཆོས་ཉིད་དོན་བསྒོམས་ལ། ། འགྲོ་བ་རྣམས་ལ་སྙིང་རྗེ་རྒྱུན་དུ་སྐྱེད། ། སྟོང་པ་ཉིད་དང་སྙིང་རྗེ་དབྱེར་མེད་པ། ། སྒོམ་པ་གོལ་ས་མེད་པའི་ལམ་ཡིན་གསུང་། ། ཚེ་ལ་ལོང་མེད་ཡུན་རིང་མི་སྡོད་ངེས། ། འཇིག་རྟེན་ལྟོ་རྒྱབ་སྦྲངས་ཀྱང་ཕྱིད་དེ་མཆིས། ། ཆོས་དང་མཐུན་ན་ལྟོགས་རིར་ཤི་དོགས་མེད། ། འཇིག་རྟེན་འདི་ཡི་བྱ་བ་རྒྱབ་ཏུ་བོར། ། འདི་དང་ཕྱི་མ་གཉིས་ཀ་མི་འགྲུབ་ཀྱི། ། ཕྱི་མ་གལ་ཆེ་ཆོས་ལ་འབད་པ་ཐོན། ། གཉིད་དང་སྙོམ་ལས་དབང་དུ་མ་གཏང་བར། ། སྟོང་པ་སྙིང་རྗེའི་སྙིང་པོ་རྩེ་གཅིག་སྒོམས། ། ཕུང་པོ་ཉམས་པས་ལུས་ངག་མཐུ་ཉམས་ཀྱང་། ། ཡིད་ལ་ཅིས་ཀྱང་གདུང་བར་མི་བྱ་འོ། ། ད་ནི་ལེ་ལོའི་གླགས་མེད་རིང་མི་སྡོད། ། ཉིན་མཚན་གཉིས་ཀྱིས་ཚེ་འཛད་དགེ་མྱུར་མཛོད། ། འཆི་ཁར་འགྱོད་པས་མི་ཕན་ད་ལྟ་འབད། ། དངོས་པོ་ཅིས་ཀྱང་བྱར་མེད་གདམས་ངག་སྒོམས། ། དྲན་སྣང་ཐམས་ཅད་སྐྱེ་མེད་རྒྱས་བཏབ་ཅིང་། ། བྱེད་སྤྱོད་ཐམས་ཅད་སྒྱུ་མ་ལྟ་བུར་བྱ། ། བདེ་སྡུག་ཐམས་ཅད་མཉམ་པ་ཉིད་དུ་བསླབ། ། ཉེས་ལྟུང་ཕྲ་མོ་ཙམ་ཡང་ཕྱིར་བཅོས་བྱ། ། དེང་ནས་སྐྱེ་བ་འདི་ཡི་འོག་རོལ་ཏུ། ། སྡོམ་པ་གསུམ་དང་ལྡན་པའི་རྟེན་ཞིག་གིས། ། ཕྱག་རྒྱ་ཆེན་པོའི་དངོས་གྲུབ་ཐོབ་འགྱུར་བར། ། སྨོན་ལམ་གདབ་ཅིང་དེ་ཡི་རྒྱུ་ལ་འབད། ། ལུས་ངག་བྱ་བྱེད་མང་ན་སེམས་རྗེས་འབྲང་། ། གཉུག་མའི་སེམས་འདི་བཅོས་མས་མི་བསླད་ཅིང་། ། སྡིག་དང་སྡུག་བསྔལ་འཕེལ་བའི་ལམ་བོར་ལ། ། མཁའ་ལ་བྱ་སོང་བཞིན་དུ་རྗེས་མེད་བྱ། ། ཅི་འདྲས་མི་སྡུག་བྱས་པའི་ལན་མི་བླན། ། ཤེས་མཐུན་རྟོག་པ་བསྡུར་ན་དྲང་བོར་སྨྲ། ། མདོར་ན་ཆོས་ཉིད་རྟོགས་པའི་ཕྱི་རྟགས་སུ། ། བརྙས་པ་བྱུང་ཡང་ཀོ་ལོང་མི་བྱ་ཞིང་། ། ཚིག་ངན་སྨྲས་ཀྱང་ཁྲོ་བར་མི་བྱ་ལ། ། ཁྱད་གསོད་བྱས་ཀྱང་ང་རྒྱལ་མི་སྐྱེད་དོ། ། འགལ་བ་ཇི་ལྟར་བྱུང་ཡང་འདི་བསམ་སྟེ། ། འཁྲུལ་པས་བཅིངས་པའི་སེམས་ཅན་སྙིང་རེ་རྗེ། ། སྐྱེ་མེད་ཆོས་ལ་བདག་དང་གཞན་བཟུང་བ། ། འདི་ལ་དངོས་པོ་ཅི་ཡང་མེད་དོ་ཞེས། ། ཆོས་དབྱིངས་ཉིད་དུ་ངེས་པར་བསམ་པར་བྱ། ། དེ་ལྟར་ད་ལྟ་ཉིད་ནས་གོམས་བྱས་ན། ། ཀློང་དུ་གྱུར་ཚེ་ཅིས་ཀྱང་གནོད་མི་ནུས། ། རྫས་དང་ལོངས་སྤྱོད་ཆེ་ཆུང་ཅི་ཡོད་ཀྱང་། ། རང་དབང་ཡོད་ཚེ་ཕྲལ་བསྔོ་ཕྲལ་སྤྱད་བྱ། ། ཁ་ཅིག་ན་རེ་འཆི་ཁར་དགོས་ཟེར་ཏེ། ། འཆི་དུས་འབྱུང་བའི་ནད་ཀྱིས་བཏབ་པ་ལ། ། ནད་གཡོག་མང་བས་སྡུག་བསྔལ་བགོ་ཐབས་མེད། ། གཡོག་མེད་སྡུག་བསྔལ་འགྲོགས་ནས་ཁྱེར་བ་མེད། ། དེས་ན་ནད་གཡོག་ཡོད་མེད་གཉིས་ཀ་འདྲ། ། ཤི་བའི་རོ་དེ་ཙན་དན་མེར་བསྲེགས་སམ། ། ཆུར་བོར་དོང་བསྐྱུར་བྱ་ཁྱིས་ཟོས་པར་མཉམ། ། ཤུལ་དུ་གཏམ་སྙན་གཏམ་ངན་ཅི་བྱུང་ཡང་། ། བདག་གི་རྗེས་སུ་འབྲངས་ནས་མི་འོང་སྟེ། ། གསོན་ཚེ་དགེ་སྡིག་གཉིས་པོ་གང་བྱས་པའི། ། འབྲས་བུ་དེ་ཡི་དུས་སུ་འབྱུང་བར་འགྱུར། ། རྣལ་འབྱོར་པ་ཡི་འཆི་ལུགས་རྣམ་པ་གསུམ། ། སྨྱོན་པ་ལྟ་བུར་ཤི་བ་རབ་ཡིན་ཏེ། ། རི་དྭགས་ལྟ་བུར་ཤི་བ་འབྲིང་ཡིན་ནོ། ། རྒྱལ་པོ་ལྟ་བུར་ཤི་བ་ཐ་མ་ཡིན། ། དེས་ན་ཤུལ་དུ་ལུས་པ་མེད་པར་བྱ། ། འདོད་ཆུང་ཆོག་ཤེས་ང་རྒྱལ་མེད་པ་དང་། ། གཞན་དང་འབྲེལ་བསྐྱངས་རང་ལ་ངན་ཤོས་བྱ། ། དམན་ས་བཟུང་ན་སླར་ཡང་གཞན་དག་དང་། ། རང་ཡང་ཉོན་མོངས་མི་གསོག་དགེ་སྦྱོར་འཕེལ། ། དེས་ན་ཅི་ལའང་ཁེང་དྲེགས་མི་བྱ་འོ། ། དེ་ཕྱིར་བྱང་ཆུབ་སེམས་ནི་རྟག་ཏུ་སྦྱོངས། ། ཆོས་ཀྱི་དབྱིངས་ནི་གཉིས་མེད་རྣམ་དག་ལས། ། བྱང་ཆུབ་ཅེས་ནི་དེ་ལ་བརྗོད་པ་ཡིན། ། དེ་དོན་སེམས་པར་བྱེད་པའི་སེམས་དཔའ་ནི། ། དེ་ནི་བྱང་ཆུབ་སེམས་དཔའ་ཞེས་བྱ་སྟེ། ། བྱང་ཆུབ་དང་ནི་སེམས་ལ་གཉིས་མེད་སྤྱོད། ། གང་ཞིག་དེ་རྟོགས་འདོད་པའི་སྐྱེས་བུ་ནི། ། དེ་ནི་བྱང་ཆུབ་སེམས་དཔའ་ཞེས་བྱ་འོ། ། དེས་ན་དམ་པ་རྣམས་ཀྱི་རྗེས་སུ་བསླབ། ། མར་མེ་ཆུང་ངུ་རླུང་གིས་གསོད་པར་བྱེད། ། ནགས་ཚལ་མེ་ལ་རླུང་གིས་གྲོགས་ཀྱང་བྱེད། ། དེ་ཕྱིར་དང་པོར་རྐྱེན་ངན་དག་ལ་བྱོལ། ། བརྟན་པ་ཐོབ་ནས་ཐམས་ཅད་གྲོགས་སུ་འགྱུར། ། ཉམ་ཆུང་རྣམས་ལ་རྐྱེན་ངན་གནོད་པ་ཆེ། ། དེ་ལ་གཅིག་བུར་གནས་ཤིང་འདུ་འཛི་སྤང་། ། ཚེ་འདིའི་ལྟོ་རྒྱབ་ཇི་ལྟར་བྱས་ཀྱང་ཕྱིད། ། ཚེ་རབས་ཕྱི་མ་ཆོས་དང་ཕྲད་པར་དཀའ། ། དེ་བས་ཚེ་འདིར་ཆོས་ལ་འབད་པར་གྱིས། ། ད་ལྟ་དགེ་བའི་ལས་ལ་མ་འབད་ན། ། ཕྱི་མར་སྡུག་བསྔལ་མྱོང་བར་འགྱུར་ཏ་རེ། ། བླ་མ་དམ་པ་རྣམས་ཀྱི་མན་ངག་གིས། ། གཞུང་ལུགས་རྣམས་ནི་ཉམས་སུ་བླང་བར་བྱ། ། ཞེས་བྱ་བའི་བར་གྱི་ཚིགས་སུ་བཅད་པའི་གདམས་པ་དང་། ཁོ་འགྱུར་གྱི་དོགས་ནས་ཐུགས་དམ་འཇམ་པའི་རྡོ་རྗེ་ཡང་དེའི་དུས་སུ་བསྐུར་ནས་ང་ཇོ་བོ་དང་ཤི་འབྲལ་བྱེད། དེ་ནས་ཚེ་ལ་བར་ཆད་མ་བྱུང་ན་ཁྱོད་ཀྱི་མཆོད་གནས་ངས་བྱེད་པ་ཡིན་བྱ་བའི་ཞལ་འཕྲིན་ཡང་བསྐུར་བར་མཛད། དེ་ནས་འབྲོམ་རིན་པོ་ཆེས་ཇོ་བོའི་ཕྱག་ཕྱིར་ལྷ་སར་ཕེབས། དེའི་དུས་སུ་ཇོ་བོས་ཆང་གི་ཉེས་དམིགས་ལ་སོགས་པ་ཆོས་མང་དུ་གསུངས་ནས་ངས་ཕལ་ཆེན་སྡེ་བ་འཛུགས་གསུང་བ་ལ། འབྲོམ་རིན་པོ་ཆེས། ཨ་ཏི་ཤ། ། དེ་མི་མཛད་པར་ཞུ། བོད་དུ་འདི་མི་ལེགས་ཞེས་ཞུས་སོ། ། དེའི་རྒྱུ་མཚན་ཡང་སྔོན་དུས་ཆོས་རྒྱལ་ཁྲི་སྲོང་ལྡེ་བཙན་གྱིས་མཁན་ཆེན་བོ་དྷི་སཏྭ་བོད་དུ་སྤྱན་དྲངས་ནས་རྒྱལ་བའི་བསྟན་པ་འཛུགས་པར་གསོལ་བ་བཏབ་པ་ན། མཁན་ཆེན་བོ་དྷི་སཏྭས་སྦ་ཡེ་ཤེས་དབང་པོ་སོགས་མི་བདུན་རབ་ཏུ་བྱུང་ཞིང་སོ་ཐར་གྱི་བསླབ་ཁྲིམས་ལ་བཀོད་པས་དེ་དག་རབ་ཏུ་བྱུང་མ་ཐག་མངོན་ཤེས་དང་རྫུ་འཕྲུལ་ཐོབ་ཅིང་སྡེ་སྣོད་གསུམ་ལ་མཁས་པར་གྱུར། དེ་ནས་རིམ་གྱིས་དགེ་འདུན་གྱི་སྡེ་རྒྱ་ཆེར་འཕེལ། མཁན་རྒྱུད་འདི་ནི་གཞི་ཐམས་ཅད་ཡོད་པར་སྨྲ་བའི་སྡེ་པའི་བརྒྱུད་པ་ཡིན་པས་ཆོས་རྒྱལ་ཁྲི་སྲོང་ལྡེ་བཙན་གྱིས་ད་ཕྱིན་ཆད་བོད་འདིར་མཁན་ཆེན་པོ་དྷི་སཏྭའི་ལུགས་ལྟར་ཐམས་ཅད་ཡོད་སྨྲ་བའི་སྡེ་པ་ལས་སྡེ་པ་གཞན་མི་བྱ་བ་དང་། འཕགས་པ་ཀླུ་སྒྲུབ་ཡབ་སྲས་ཀྱི་ལྟ་བ་ལས་ལྟ་བ་གཞན་མི་འཛིན་པར་བཀས་བཅད་མཛད་པ་དེ་དང་མཐུན་པར་མཛད་བཞེད་པ་དང་། བོད་ཀྱི་གདུལ་བྱ་ཡོངས་ཀྱི་ཁམས་དང་བསམ་པ་ལ་གཟིགས་ནས་ཕལ་ཆེན་སྡེ་པའི་ལུགས་ཀྱི་བཅས་བ་འགའ་ཞིག་བོད་ཀྱི་གདུལ་བྱས་བསྲུང་དཀའ་བ་སོགས་ལ་གཟིགས་ནས་ཇོ་བོ་རྗེ་ལ་དེ་ལྟར་ཞུས་སོ། ། དེ་ནས་རྔོག་ལེགས་པའི་ཤེས་རབ་ཀྱིས་ཇོ་བོ་དཔོན་གཡོག་ཡེར་པར་སྤྱན་དྲངས་པའི་དུས་སུ་དགེ་བཤེས་སྟོན་པས་བྱང་དུ་མི་ཆོས་ལ་གསེར་སློང་མཛད་དུ་བྱོན། མི་ཆོས་རྣམས་ཀྱིས་འབྲོམ་རིན་པོ་ཆེ་མཇལ་བའི་གྲབས་བྱས་ནས་ཚུར་འོང་ཁ་མ་དང་ཐུག ། དེའི་བར་དུ་ཡབ་གྲོངས་འདུག་པས་མི་ཆོས་རྣམས་ཀྱིས་འབྲོམ་རིན་པོ་ཆེ་ལ་མ་ལེགས་བྱ་སྙམ་ཙ་ན་འབྲོམ་རིན་པོ་ཆེས་སྔོན་ལ་ཚུར་མཛད། དེ་ཀུན་ཡང་ཕྱི་རབས་ལ་དགོངས་པ་ཡིན་གསུང་། དེ་ནས་གསེར་སློང་མཛད་དེ་ཚུར་ཕེབས་ནས་ལྷ་རི་སྙིང་པོའི་མགུལ་དུ་འབུལ་བ་མཛད་དོ། ། འབྲོམ་རིན་པོ་ཆེའི་ཞལ་ནས་བླ་མ་རྗེ་བཙུན་ཆེན་པོ་ཟང་ཟིང་ལ་མཉེས་པ་མ་ལགས་ཏེ། ཁོ་བོ་ཚོགས་གསོག་པའི་ཆེད་དུ་ཟང་ཟིང་གི་མཆོད་པ་ཅུང་ཟད་བགྱིད་གསུངས་ནས། གསེར་ཞོ་དགུ་དགུ་ལ་སྲང་རེར་བརྩིས་པའི་གསེར་སྲང་བརྒྱ་རྩ་བརྒྱད། རྟ་ཉི་ཤུ་རྩ་གཅིག ། འབྲི་བཅུ་གཅིག ། བེར་གཉིས། དབྱི་སྤྱང་གི་པགས་པ་བཞི། ཁྲབ་བཞི། དངུལ་སྐྱོགས་གཉིས་གླ་གོར་གྱི་ཡོལ་གོ་གཅིག ། དེ་ལ་སོགས་པའི་ནོར་སྣ་བརྒྱ་རྩ་བརྒྱད་ཕུལ། དེའི་ཚེ་ཇོ་བོ་རྗེ་མཉེས་ནས་འབྲོམ་རིན་པོ་ཆེ་ལ་ཐུགས་མཉེས་པའི་བཀའ་ལུང་མང་དུ་གསུངས་ཤིང་། ཇོ་བོ་ཉིད་ཀྱིས་ཆོས་ལ་དཀའ་བ་སྤྱད་ལུགས། སྒྲུབ་པ་ཉམས་སུ་བླངས་ལུགས་ཡམ་མེ་བ་ཞིག་གསུངས་ནས་ཁྱོད་ཀྱིས་དཀའ་བའི་ལས་མ་བགྱིས་པར་སྙིང་པོའི་དོན་རྙེད་པ་བསོད་ནམས་ཤིན་ཏུ་ཆེ་ཡི། ད་ལེགས་པར་ནན་ཏན་དུ་གྱིས་ཤིག་གསུང་། རྟག་ཏུ་ངུ་དང་ཆོས་འཕགས་དང་ནོར་བཟང་གི་གཏམ་རྒྱུད་གསུངས་ནས་བླ་མའི་ཞབས་ཏོག་བྱེད་པ་འདི་ལ། བླ་མ་དེ་ལ་འདོད་པ་མི་མངའ་ཡང་རྟེན་ཅིང་འབྲེལ་བར་འབྱུང་བའི་ཆེ་བས་བྱ་དགོས་པ་ཡིན་གསུངས། འབྲོམ་རིན་པོ་ཆེས་གསེར་སློང་ལ་བྱོན་དུས་ཀྱི་ཟླ་བ་གཅིག་དང་། ཁུ་སྟོན་གྱིས་སྤྱན་དྲངས་དུས་ཟླ་བ་གཅིག་སྟེ། ཟླ་བ་གཉིས་མ་གཏོགས་པ་དང་པོར་ཇོ་བོ་དང་མཇལ་ནས་ཞི་བར་མ་གཤེགས་ཀྱི་བར་སྐད་ཅིག་ཀྱང་འབྲལ་མ་མྱོང་བ་ཡིན་གསུང་། ཡང་ཇོ་བོའི་ཞལ་ནས། ཨུ་པ་སི་ཀའི་རིགས་ཅི་ཡིན་གསུང་། རྗེའུའི་རིགས་ལགས་ཞུས་པས། རྗེའུའི་རིགས་ཀྱི་ང་རྒྱལ་མ་མཛད་གསུང་། ཡེ་མ་མཆིས་ཞུས་པས། བག་ཙམ་བདོག་སྟེ་མཆི། ཡེ་མི་རུང་གསུང་། འབྲོམ་རིན་པོ་ཆེ་ལ་ཁེངས་པ་དང་ཆེ་འགྱིངས་མི་མངའ་བས་བེར་ཆུང་གིས་ཕྱག་གྱིས་ཟེར་བ་ལའང་དེ་བཞིན་དུ་མཛད་པ་དང་། སྙེ་ཐང་དུ་ཁུ་སྟོན་བྱོན་པ་ལའང་ཕྱག་མཛད་ཅིང་། འབྲོམ་རིན་པོ་ཆེ་ལན་པ་སྤྱིལ་བུར་སྤྱན་དྲངས་དུས་ལམ་དུ་སྔགས་པ་གཅིག་དང་འཕྲད་པས་ཁ་ཆང་དྲི་ཆིལ་ལེ་བྱས་ནས་ཁོ་ན་རེ། དགེ་བསྙེན་འདི་ཡ་ཚད་ཁུར་ཟེར་ནས་ལྷམ་ཁྲེས་ཞིག་དང་གལ་ལྟེ་བསྐུར་བས་བགྱིའོ་གསུངས་ནས་ཁུར་བྱོན་པས་སྤྱིལ་བུ་བའི་དགེ་འདུན་རྣམས་ཀྱིས་བསུ་བའི་སེར་སྦྲེངས་བྱས་པ་སྔགས་པས་མཐོང་ནས་དགེ་བསྙེན་འདི་ཅི་ཡིན་ཟེར་བ་ལ། ཁོ་བོ་ལ་བསུ་བ་བྱེད་པའི་ཞད་དུ་གདའ་གསུངས་པས། ཁོ་སྐྱེངས་ཏེ་བྲོས་པ་ལ་སོགས་པའི་གཏན་རྒྱུད་གཞན་ཡང་མང་ངོ་། ། དེ་ནས་ཇོ་བོ་དཔོན་གཡོག་སྙེ་ཐང་དུ་སྤྱན་དྲངས་ནས་བཞུགས་པའི་དུས་སུ་ཇོ་བོའི་ཞལ་ནས། ཨུ་པ་སི་ཀ་ཁྱོད་ན་རེ་དགུན་ཡང་མེ་ཏོག་འཆར་བ་ཞིག་ཡོད་ཟེར་བ་མེ་ཏོག་ག་རེ་གསུངས་པས། འབྲོམ་རིན་པོ་ཆེས་སྙེའི་ན་མོ་ཆེར་ཇོ་བོ་རྗེ་གདན་དྲངས་ནས་གསིང་མའི་མེ་ཏོག་གཟིགས་ཕུལ་བས། ཇོ་བོའི་ཞལ་ནས་བརྫུན་མ་བཏང་ཙམ་འདུག་གསུང་། ངས་ས་ཕྱོགས་འདིར་མེ་ཏོག་མང་པོ་འཆར་བར་བྱིན་གྱིས་རླབས་ཀྱིས་གསུང་། ཇོ་བོའི་བྱིན་རླབས་ཀྱིས་སྙེ་ཐང་གི་ས་སྐོར་ན་མེ་ཏོག་གི་རིགས་གཞན་ན་མེད་པ་མང་པོ་ཡོད། ཇོ་བོའི་ཞལ་ནས། དུག་གི་མེ་ཏོག་དཀོན་མཆོག་ལ་དབུལ་མི་རུང་། སྤང་རྒྱན་འདི་ཨུཏྤལའི་རྒྱུ་རུ་འདུག་པ་ལ་བོད་གྲང་བས་ཁ་མ་བྱེ་བར་འདུག ། མེ་ཏོག་ཤང་ཤང་ནི་རྒྱ་གར་ན་ཡང་མེད། ཡོད་ན་ངས་གསེར་འཇལ་ནུས་གསུང་། དེའི་ཚེ་འབྲོམ་རིན་པོ་ཆེས་ལྗགས་ཀྱི་སྟེང་དུ་མེ་ཏོག་ངོ་མཚར་བ་ཞིག་སྤྲུལ་པ་སོགས་རྫུ་འཕྲུལ་གྱི་བཀོད་པ་སྣ་ཚོགས་བསྟན་པ་བཀའ་གདམས་གླེགས་བམ་ལས་འབྱུང་བ་ནི། ཇོ་བོ་རྗེས། ཀྱེ་མ་ཆུང་ཆུང་འབྲོམ་རྗེ་གཟིགས། ། འོལ་ལེ་འདབ་མའང་སྐྱེས་ཏེ་གདའ། ། དོད་དོད་བརྫུན་བུག་མ་རྡིབ་ཙམ། ། གསུང་བའི་ལྗགས་དེ་ང་ལ་སྟོན། ། དེ་ནས་འབྲོམ་རྗེས་ལྗགས་བརྐྱངས་པ། ། གཟིགས་པས་དེ་ལའང་མེ་ཏོག་གཅིག ། སྐྱེས་པ་གཟིགས་ནས་ཇོ་བོ་མཉེས། ། ཀྱེ་མའོ་ཡ་མཚན་དེ་ན་འདུག ། འབྲོམ་གྱི་ལྕེ་ནི་ནེ་ཐང་འདྲ། ། བུང་བ་ཞལ་དུ་མི་འཚང་ཙམ། ། འོ་ནའང་དངར་རྩི་མེད་དམ་ཅི། ། སླར་ཡང་འབྲོམ་རྗེས་ལྗགས་བརྐྱང་བའི། ། མེ་ཏོག་སྟེང་ནའང་ཇོ་བོ་གདའ། ། ཇོ་བོས་གཟིགས་ནས་འདི་སྐད་གསུང་། ། ཨ་རེ་ཅི་ཡང་དགོད་རེ་བྲོ། ། བདག་ལ་འབྲོམ་གྱིས་བུང་བ་བྱས། ། ཁོ་བོ་རེ་ཆུང་ནས་རྡོག་ཙམ། ། རེ་དོད་གསུང་ཞིང་ཕྱག་གིས་རེག ། པདྨའི་སྟེང་གི་ཇོ་བོ་བཞད། ། དེ་ནས་ཇོ་བོའི་བཞད་སྲིན་ལངས། ། ཡང་དང་ཡང་དུ་བཞད་པར་གྱུར། ། དེ་ནས་འབྲོམ་གྱིས་འདི་སྐད་སྨྲས། ། དགུན་དུས་འཁྲུངས་པའི་མེ་ཏོག་དཀར་འབུར་བ། ། ཁོ་བོ་ཟོག་མར་མ་བཏང་དྲིན་ཆེའོ། ། སྤྱིར་ཡང་མཐའ་འཁོབ་གནས་འདིར་གྲང་གཞི་ཆེ། ། ཁྱད་པར་དབུ་རུ་ཆུ་འཁྲིས་ས་འཁྱགས་མང་། ། དེང་སར་དགུན་དུས་མེ་ཏོག་འདབ་ལྔ་པ། ། ས་ལ་སྐྱེས་པས་ཇོ་བོ་མཉེས་གྱུར་ན། ། ཁྱད་པར་རྫུན་མེད་འབྲོམ་གྱི་ལྕེ་ལ་འཁྲུངས། ། བུང་བ་དྲིས་པས་བདེ་གཤེགས་སྐུ་གཟུགས་བྱོན། ། བཞད་པར་རབ་བཞད་བདེ་གཤེགས་འདི་འདྲར་བཞད། ། མཚར་མོས་རང་གི་བྱད་མཐོང་བཞིན་དུ་བཞད། ། ལྷ་མོ་རང་གཟུགས་སྟོན་པ་བཞིན་དུ་བཞད། ། བཀྲ་ཤིས་བླ་མ་མཉེས་བའི་བཀྲ་ཤིས་ཤོག ། སླར་ཡང་བླ་མ་རྗེ་བཙུན་འདི་སྐད་གསུང་། ། འབྲོམ་རྗེ་ད་དུང་ལྗགས་ཀྱི་མེ་ཏོག་སྟོན། ། སླར་ཡང་ལྗགས་བརྐྱང་གཟིགས་སུ་ཕུལ་བ་ཡི། ། བླ་མའི་མདུན་ནའང་འབྲོམ་ཆུང་ཆུང་ཆུང་གཅིག ། འཛུམ་འཛུམ་བླ་མའི་ཞལ་ལ་རབ་བལྟ་ཞིང་། ། བུ་ཆུང་སྐད་འདྲ་སྙན་པའི་སྒྲ་འབྱིན་གསན། ། གཟིགས་མ་ཐག་ཏུ་ཤིན་ཏུ་དགྱེས་གྱུར་ནས། ། མེ་ཏོག་འདི་འདྲ་རྒྱ་གར་ཡུལ་ནའང་མེད། ། ཟབ་མོའི་ཡབ་སྲས་ལྗགས་ཀྱི་སྟེང་ནའང་གདའ། ། ངོ་མཚར་ཆེའོ་ནང་གི་ཡ་གི་གཉིས། ། འབྲོམ་རྗེ་ལྗགས་དེ་གུལ་གུལ་མ་མཛད་ཅིག ། སྐུ་ཁམས་གསོ་ཕྱིར་འབྲོམ་གྱིས་རབ་གཡོས་པས། ། ལེགས་ལེགས་ལྡེག་ལྡེག་འབྲུལ་ལ་ཁད་དེ་གདའ། ། རབ་ཏུ་བཞད་ཅིང་འབྲོམ་རྗེ་ག་ལེ་མཛོད། ། ཁྱེའུ་གཞོན་ནུ་སྲན་རྡོག་ཟ་དང་མཚུངས། ། ལྕེ་ཡི་སྟེང་ན་རལ་རིལ་ལྟད་མོར་ཆེ། ། བདེ་གཤེགས་ལྗགས་ཀྱི་པདྨོ་ལས་འཁྲུངས་པའི། ། དང་པོར་བཞུགས་པའི་གཟུགས་ནས་ཡ་གི་གཉིས། ། མར་བྱོན་བདག་ཅག་གཉིས་ནི་ནང་དུ་འགྲོ། ། འབྲོམ་རྗེའི་ཞལ་ནས་ལན་དུ་འདི་སྐད་ཞུས། ། འཇིག་རྟེན་སྒྲོན་མ་ཡར་ལ་གཤེགས་སུ་གསོལ། ། ཁོ་བོས་ཕྱིན་པས་ཁོང་གཉིས་མི་ལུས་མཆི། ། དེ་ནས་རྒྱལ་བ་སྲས་བཅས་མཉེས་བཞིན་དུ། ། གཟིམ་ཁང་ནང་དུ་གཤེགས་ཏེ་བྱོན་པའི་ཚེ། ། ལྷ་ཡི་ཚོགས་ཀྱིས་མེ་ཏོག་དཔག་མེད་གཏོར། ། དེ་ནས་ཇོ་བོའི་ཞལ་ནས་འདི་སྐད་གསུང་། ། འབྲོམ་རྗེ་མེ་ཏོག་མཆོག་ལ་མཉེས་གྱུར་ན། ། ཁོ་བོས་ས་ཕྱོགས་འདི་དག་བྱིན་བརླབས་ལ། ། རིན་ཆེན་ལྔ་ཡི་མེ་ཏོག་འབྱུང་བར་བྱ། ། ལན་དུ་འབྲོམ་རྗེས་ཐུགས་ལ་ཐོགས་ཞུས་པས། ། གསེར་དངུལ་ལ་སོགས་མེ་ཏོག་བཟང་པོ་ཡིས། ། སྙེ་ཐང་ཁོངས་རྣམས་རབ་ཏུ་གང་བར་གྱུར། ། དེ་ནས་ཇོ་བོའི་ཞལ་ནས་འདི་སྐད་གསུངས། ། བླ་མས་བྱིན་བརླབས་མར་མེ་མཛད་དཔལ་ནས། ། བྱིན་གྱིས་བརླབས་པའི་མེ་ཏོག་འདི་བསྐྲུན་པས། ། འབྲོམ་གྱི་རྗེས་འབྲང་མཆོད་ཚོགས་འཕེལ་བར་ཤོག ། ཅེས་བཀའ་གདམས་གླེགས་བམ་ལས་འབྱུང་ངོ་། ། ཇོ་བོ་རྗེས་འབྲོམ་རིན་པོ་ཆེ་ཇོ་བོ་རང་ཉིད་དང་མཉམ་པ་འགྲན་ཟླ་མེད་པར་བསྔགས་ཏེ། འབྲོམ་རིན་པོ་ཆེས་ཇོ་བོ་ལ། ཁོ་བོ་ཟབ་མོ་དབུ་མའི་ལྟ་བ་འདི་ལྟར་འཛིན་ཞེས་སློབ་དཔོན་ཟླ་བ་གྲགས་པའི་ལུགས་ཀྱི་ལྟ་བའི་རྟོགས་པ་ཕུལ་བས། ཇོ་བོ་ཕྱག་ཐལ་མོ་ཤར་ཕྱོགས་སུ་སྦྱར་ནས་ད་ལྟ་རྒྱ་གར་ཤར་ཕྱོགས་ནའང་ལྟ་བ་འདི་ཁོ་ན་འཛིན་པ་ཡིན། ཁྱོད་ལྟ་བུའི་སེམས་དཔའ་ཆེན་པོ་བོད་ན་འདུག་པ་བོད་བསོད་ནམས་མི་ཆུང་གི ། ཁོ་བོ་བོད་དུ་འོང་མི་དགོས་པ་འདུག་པ་ལ་གསུངས་ནས་གདམས་པ་ཤས་ཤིག་གནང་ངོ་། ། དེ་ལྟར་འབྲོམ་རིན་པོ་ཆེས་ཇོ་བོ་རྗེ་མཉེས་པ་གསུམ་གྱི་སྒོ་ནས་མཉེས་པར་མཛད་ཅིང་། ལྷག་པར་ཡེར་པ་ལྷ་རི་སྙིང་པོའི་མགུལ་དུ་ལོ་གསུམ་གྱི་རིང་ལ་ཇོ་བོ་རྗེ་རྙེད་པ་དང་བཀུར་སྟི་ཚད་མེད་པས་མཆོད་ཅིང་། སྡིག་པ་ཅན་གྱི་སྐྱེ་བོས་དབེན་པར་བྱས་ཏེ་བྱང་ཆུབ་ལམ་གྱི་རིམ་པའི་འགོ་བཤེས་གཉེན་བསྟེན་ཚུལ་ནས་མཐར་འབྲས་བུ་མི་སློབ་པའི་ཟུང་འཇུག་འགྲུབ་པའི་བར་ལམ་སོ་སོའི་ངོ་བོ་གང་ཡིན་པ་དང་། ལམ་དེ་དང་དེ་རྒྱུད་ལ་བསྐྱེད་པ་ལ་རྒྱུ་ཚོགས་གང་དང་གང་ཞིག་དགོས་པ་དང་། དང་པོར་གང་ཉམས་སུ་བླང་བར་བྱ་བ་དེ་ནས་རིམ་གྱི་རིམ་གྱིས་བསྒྲུབ་དགོས་པའི་གོ་རིམ་ངེས་པ་དང་། ལམ་དེ་དང་དེ་དག་སྒྲུབ་པ་ལ་གེགས་ཇི་ལྟ་བུ་འབྱུང་བ་དང་། ལམ་དེ་དང་དེ་དག་སྟོན་པའི་བླ་མ་དང་སློབ་མ་ཇི་ལྟ་བུ་ཞིག་དགོས་པ་དང་། ཡི་དམ་གང་ལ་བྱ་དགོས་པ་སོགས་མཐའ་དག་པར་ཞུས་ཤིང་ཉིན་རེ་བཞིན་དུ་དྲི་གཏུགས་དང་བརྒལ་བརྟག་མང་དུ་མཛད་དེ་གཏན་ལ་ཕབ། དེའི་ཚེ་འབྲོམ་རིན་པོ་ཆེས་ལམ་གྱི་གནད་མཐར་ཐུག་པ་འདི་དག་ཁོང་གཞན་འགའ་ཞིག་ལའང་གནང་ན་ལེགས་པ་ལ་གཞན་སུ་ལའང་མི་གནང་བར་ཁོ་བོ་གཅིག་པུ་ལ་གནང་བ་ཅི་ཡིན་ཞེས་ཞུས་པ་ན། ཇོ་བོའི་ཞལ་ནས་ངས་ཁྱོད་མིན་པ་གཞན་ལ་གཏད་ས་མ་རྙེད་པ་ཡིན་གསུང་། ཚུལ་འདི་དག་ལ་བློ་གྲོས་ཅན་རྣམས་ཀྱིས་ལེགས་པར་དཔྱད་ན་ཇོ་བོ་རྗེ་ཉིད་བསྟན་པ་ཡོངས་རྫོགས་ཀྱི་བདག་པོ་ཡིན་པ་དང་ཇོ་བོ་རྗེས་འབྲོམ་རིན་པོ་ཆེ་ལ་བསྟན་པ་ཡོངས་རྫོགས་ཀྱི་མན་ངག་རྣམས་བུམ་པ་གང་བྱོའི་ཚུལ་དུ་གནང་བར་གོ་ནུས་ལ། དེ་ལྟར་གོ་ན་ཇོ་བོ་རྗེས་འབྲོམ་རིན་པོ་ཆེ་ལ་གནང་བ་ནས་བཟུང་ཆོས་ཀྱི་རྒྱལ་པོ་ཙོང་ཁ་པ་ཡབ་སྲས་ལ་རིམ་གྱིས་བརྒྱུད་དེ་བསྟན་པ་ཡོངས་རྫོགས་ཀྱི་མན་ངག་རྒྱུན་མ་ཆད་པར་ཡོད་པ་འདི་ལ་ཡིད་ཆེས་ཀྱི་དད་པ་རྐང་ཚུགས་པ་སྐྱེའོ། ། འདི་དག་ལ་བློ་ཆུང་འགའ་ཞིག་འབྲོམ་རིན་པོ་ཆེས་ཇོ་བོ་ལ་སྐྱེས་བུ་གསུམ་གྱི་ལམ་རིམ་རྫོགས་པར་གསན་མོད་ཀྱང་གསང་སྔགས་རྒྱུད་སྡེ་བཞིའི་མན་ངག་རྣམས་རྫོགས་པར་མ་གསན་ཏེ་ཇོ་བོ་རྗེས་དོ་ཧ་གསུང་བའི་ཚེ་འབྲོམ་རིན་པོ་ཆེས་ཨ་ཏི་ཤ་འདི་བོད་དུ་མི་ལེགས་ཞེས་བཀག་པས་སོ་སྙམ་པ་སྐྱེ་སྲིད་དེ། དེ་ནི་དེ་ལྟ་མ་ཡིན་ཏེ་འབྲོམ་རིན་པོ་ཆེ་ནི་ཐུགས་ནམ་མཁའ་ལྟར་རྒྱ་ཆེ་ཞིང་རྒྱ་མཚོ་ལྟར་གཏིང་ཟབ་པས་སྤྱིར་གསང་སྔགས་གསང་ནས་བྱ་དགོས་པ་དང་། ལྷག་པར་དོ་ཧ་སོགས་བླ་མེད་ཀྱི་རྫོགས་རིམ་མཐར་ཐུག་འདི་དག་ཤིན་ཏུ་གསང་བར་བྱ་དགོས་ཀྱི་དེ་ལྟ་མིན་པར་ཁྲོམ་བསྒྲགས་སུ་སོང་ན་འཆད་པ་པོ་རྣམས་ལ་རྩ་ལྟུང་འབྱུང་ཉེ་བ་དང་། ཉན་པ་པོ་བསོད་ནམས་དམན་ཞིང་བློ་གྲོས་ཆུང་བ་དག་ལ་ཕན་པ་ལས་གནོད་པ་ཆེ་བ་ཞིག་འབྱུང་སྟེ། གསང་སྔགས་སྒྲ་ཇི་བཞིན་པར་བཟུང་ནས་ནག་ཆང་ལ་བག་མེད་དུ་སྤྱོད་པ་སོགས་རང་ཉིད་ཕུང་བར་མ་ཟད་བསྟན་པ་རིན་པོ་ཆེ་རྨངས་ནས་འཇིག་པའི་རྐྱེན་དུ་འགྱུར་བར་གཟིགས་ནས་ཕྱི་ལྟར་དུ་དམ་དོག་ཆེ་བར་མཛད་པ་ཡིན་གྱི། གསང་བའི་གནས་སུ་ཇོ་བོ་རྗེས་འབྲོམ་རིན་པོ་ཆེ་ལ་རྒྱུད་སྡེ་བཞིའི་མན་ངག་ཡོངས་རྫོགས་གནང་ཞིང་ཁྱད་པར་ཕ་རྒྱུད་གསང་བ་འདུས་པ་དང་། མ་རྒྱུད་འཁོར་ལོ་སྡོམ་པའི་མན་ངག་མཐའ་དག་དང་། བླ་མེད་སྤྱིའི་མན་ངག་མཐར་ཐུག་པ་གྲུབ་པ་སྡེ་བདུན་དང་། སྙིང་པོ་སྐོར་གསུམ་གྱི་མན་ངག་རྣམས་བུམ་པ་གང་བྱོའི་ཚུལ་དུ་ཡོངས་སུ་རྫོགས་པར་གནང་ངོ་། ། འབྲོམ་རིན་པོ་ཆེ་ནི་ཇོ་བོ་རྗེ་ལས་མན་ངག་ཡོངས་རྫོགས་གསན་པ་ཙམ་དུ་མ་ཟད་རང་ཉིད་དཀྱིལ་འཁོར་གྱི་བདག་པོར་ལྷུན་གྱིས་གྲུབ་པ་ཞིག་ཡིན་ཏེ། ཡེར་པ་ལྷ་རི་སྙིང་པོའི་མགུལ་དུ་ཇོ་བོ་ཡབ་སྲས་གཉིས་ལོ་གསུམ་གྱི་རིང་ལ་ལམ་གྱི་དཀའ་གནས་རྣམས་ལ་བགྲོ་བ་མཛད་པ་དེའི་ཚེ་རྗེ་བཙུན་འཇམ་པའི་དབྱངས་ཀྱི་སྲས་ཀྱི་ཐུ་བོ་རྔོག་ལེགས་པའི་ཤེས་རབ་ཀྱིས་ཞབས་འབྲང་བ་གཅིག་མ་གཏོགས་རང་གི་གྲ་བུ་སློབ་སྦྱིན་བདག་དང་བཅས་པ་སུས་ཀྱང་མ་ཚོར་བར་གསང་སྟབས་ཀྱིས་ཡེར་པར་བྱོན་ནས་དངུལ་གྱི་མཎྡལ་ལ་དུང་གི་ཚོམ་བུ་བཀོད་དེ་འབྲོམ་ཆོས་ཀྱི་རྒྱལ་པོའི་སྐྱེས་རབས་སོགས་གསང་བ་ཟབ་མོ་རྣམས་གནང་དགོས་ཞེས་ཇོ་བོ་རྗེ་ལ་གསོལ་བ་བཏབ་པ་ན་ཇོ་བོ་རྗེས་ཀྱང་དེ་བཞིན་དུ་གནང་ནས། ད་ལམ་འབྲོམ་རིན་པོ་ཆེ་ཉིད་ལ་གསོལ་བ་གདབ་དགོས་ཞེས་འབྲོམ་ཉིད་ཀྱིས་གསུང་བར་བསྐུལ། རྗེ་བཙུན་མ་སྒྲོལ་མའང་དངོས་སུ་བྱོན། བརྒྱུད་པ་གསུམ་ལྡན་གྱི་བླ་མ་ཐམས་ཅད་ཀྱང་དངོས་སུ་ཕེབས། ནམ་མཁའི་ཁམས་སངས་རྒྱས་དང་བྱང་ཆུབ་སེམས་དཔས་གང་བ་རྣམས་ཀྱིས་ཀྱང་བྱིན་གྱིས་བརླབས་པ་ན་འབྲོམ་རིན་པོ་ཆེས་རང་ཉིད་སྤྱན་རས་གཟིགས་དངོས་ཡིན་པ་དང་། སྔོན་གྱི་ཐུགས་བསྐྱེད་དང་། སངས་རྒྱས་བྱང་སེམས་མང་པོས་ཀྱང་བསྐུལ་བ་ལ་བརྟེན་ནས་སྤྲུལ་བ་གྲངས་མེད་པས་བོད་ཡུལ་འདིར་སངས་རྒྱས་ཀྱི་བསྟན་པ་བཙུགས་པ་དང་། ལྷག་པར་སྔོན་གྱི་ཆོས་རྒྱལ་ལོ་པཎ་བཀའ་དྲིན་ཅན་དེ་དག་ཇོ་བོ་ཡབ་སྲས་གཉིས་ཀྱི་སྤྲུལ་པ་ཡིན་ཚུལ་སོགས་སྐུ་གསུང་ཐུགས་ཀྱི་གསང་བ་མང་དུ་གསུངས་པའི་མཐར་སྐུ་ཐིག་ལེ་སེར་པོ་ཞིག་ཏུ་ཁྱིལ་ཁྱིལ་འདུག་པའི་འཕྲོ་ལ་སྐུ་མི་སྣང་བར་ཡལ། དེར་དགེ་བཤེས་གསང་ཕུ་བ་དང་། ནག་ཚོ་ལོ་ཙཱ་བ་དང་། དགེ་བཤེས་ཀ་བ་གསུམ་འབྲོམ་རིན་པོ་ཆེའི་སྐུ་མ་མཐོང་བས་ཡིད་གདུང་ནས་མགྲིན་གཅིག་ཏུ། སྤྲུལ་བའི་ཆོས་རྒྱལ་གང་དུ་ཐལ། ། རྒྱལ་བ་རྒྱ་མཚོ་གང་དུ་གཤེགས། ། ཞེས་སོགས་གདུང་དབྱངས་ཀྱིས་གསོལ་འདེབས་ཤུགས་དྲག་མཛད་པ་ན། ཇོ་བོའི་ཞལ་ནས། རྒྱལ་བའི་འབྱུང་གནས་མཐོང་འདོད་ན། ། ཁོ་ཡི་རང་བཞིན་སྙིང་རྗེ་ཡིན། ། འགྲོ་བ་ཐམས་ཅད་ཡུལ་བྱས་ནས། ། བཟོད་གླགས་མེད་པའི་སྙིང་རྗེ་སྒོམས། ། རིང་པོར་མི་ཐོགས་མངོན་དུ་འགྱུར། ། ཞེས་གསུངས་པ་ན་ཁོང་གསུམ་གྱིས་སྙིང་རྗེ་ཆེན་པོ་ཤུགས་དྲག་ཏུ་བསྒོམས་པས། ཇོ་བོའི་ཐུགས་ཀ་ཤེད་ནས་ཐིག་ལེ་དཀར་པོ་ཞིག་ཁྱིལ་ཁྱིམ་བྱེད་པ་སྙམ་བྱེད་པ་སྙམ་བྱུང་བ་ལ། ཐིག་ལེ་དེ་ལས་འོད་ཟེར་དཀར་པོ་དྲུག་བྱུང་བས་བཞི་ཕྱོགས་བཞིར་འཕྲོས། གཉིས་སྟེང་འོག་ཏུ་འཕྲོས། དེ་ནས་སླར་འཁོར་ཏེ་བྱུང་ནས་སྟེང་གི་འོད་བླ་གབ་ཀྱི་རྣམ་པ་ཁྱིལ་ལེ་བ་ཁང་པ་ཀ་བ་བཞི་ཙམ་རྒྱ་ཁེབས་པ་བཏུད་ནས་བལྟས་ན་ཨོཾ་གྱི་རྣམ་པར་གནས་པ་ཞིག་འདུག་གོ ། དེ་བཞིན་དུ་འོག་གི་འོད་དེ་ཡང་དངུལ་དཀར་གྱི་མེ་ལོང་ལྟར་མཐོ་དམའ་མེད་པར་བླ་གབ་དང་རྒྱ་མཉམ་པར་གནས་པ་བཏུད་དེ་བལྟས་ན་ཧཱུྃ་གི་རྣམ་པར་གནས་སོ། ། དེ་བཞིན་དུ་ཤར་གྱི་འོད་དེ་ཡང་ལྷོ་བྱང་དུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་མའི་རྣམ་པར་གནས་སོ། ། དེ་བཞིན་དུ་ནུབ་ཀྱི་འོད་དེ་ཡང་ལྷོ་བྱང་དུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་པད་ཀྱི་རྣམ་པར་གནས་སོ། ། བྱང་གི་འོད་དེ་ཡང་དེ་བཞིན་དུ་ཤར་ནུབ་ཏུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་མེའི་རྣམ་པར་གནས་སོ། ། ལྷོའི་འོད་དེ་ཡང་དེ་བཞིན་དུ་ཤར་ནུབ་ཏུ་ངོས་ཕུན་སུམ་ཚོགས་པར་གནས་པ་བཏུད་དེ་བལྟས་ན་ཎིའི་རྣམ་པར་གནས་ཏེ། མདོར་ན་འོད་དཀར་པོའི་གཞལ་ཡས་ཁང་གི་རྣམ་པ་ཕུན་སུམ་ཚོགས་པ་དགའ་བ་བདེ་བ་རྣམ་པར་རྟོག་པས་མ་བཅིངས་པ་དེ་ལྟ་བུའི་གཞལ་ཡས་ཁང་གི་སྟེང་འོག་དང་ངོས་གང་ནས་བྱུང་ཆ་མེད་པར་ཐིག་ལེ་དཀར་པོ་སྲན་མའི་གའུ་ཙམ་ཞིག་བྱུང་སྟེ། དེ་ལ་སེམས་བཏུད་དེ་བལྟས་པས་དེ་འགྱུར་བ་སྙམ་བྱེད་པ་ན་དེའི་གསེབ་ཤེད་ནས་ཧྲཱི་དཀར་པོ་བཀྲག་འཚེར་བ་ཞིག་བྱུང་། དེ་ཡང་འོད་ཁ་དོག་རྣམ་པ་ལྔས་གཏུམ་ནས་འོད་ཀྱི་རྣམ་པར་ཧྲིལ་ཧྲིལ་ཡོང་བའི་གསེབ་ཤེད་ནས་རེས་འགའ་ཨའི་རྣམ་པ། རེས་འགའ་ཟླ་བའི་རྣམ་པ་འདྲ་བ་ཞིག་བྱུང་སྟེ་འོད་དེ་བཏེག་གོ། དེ་ནས་ཅུང་ཞིག་ནས་འོད་དེའི་གསེབ་ནས་ཚུར། ཨོཾ་མ་ཎི་པདྨེ་ཧཱུྃ། ཞེས་པའི་ཡིག་འབྲུ་དྲུག་རང་སྒྲ་དང་བཅས་སྟེང་འོག་ཕྱོགས་བཞི་དང་བཅས་པར་འོད་ཟེར་གྱི་རྣམ་པར་འཕྲོས་ཤིང་སླར་ཡང་འོད་དེའི་དཀྱིལ་དུ་ཐིམ། དེ་ནས་རེ་ཞིག་ནས་འོད་དེ་ཇེ་སྲབ་ཏུ་སོང་ནས་འོད་ཅུང་ཟད་ཡོད་པའི་གསེབ་ཕར་ལ་བལྟས་པས། ད་ཅི་ནས་གནས་པའི་ཧྲཱི་དེ་ལ་ཡིག་འབྲུ་དྲུག་པོས་གཡས་ཕྱོགས་ནས་བསྐོར་ཏེ། དེ་དག་ལ་ཡང་དབུས་ཀྱི་ཡི་གེ་འབྲུ་དེ་ལས་ཡིག་འབྲུ་དྲུག་པོ་དེ་དག་གི་རྣམ་པའི་འོད་ཟེར་འཕྲོས། དྲུག་པོ་དེ་ལས་ཀྱང་ཡིག་འབྲུ་རེ་རེ་ལའང་ཡིག་འབྲུ་དྲུག་དྲུག་གི་རྣམ་པའི་འོད་ཟེར་ཕྱོགས་བཅུར་འཕྲོས་ཏེ་མདོར་ན་འོད་ཟེར་དྲུག་ཅུ་དྲུག་ཅུ་བྱུང་། དེར་འོད་ཐམས་ཅད་དང་། ས་ཕྱོགས་ཐམས་ཅད་ཀྱང་ཡི་གེ་དྲུག་པ། ཨོཾ་མ་ཎི་པདྨེ་ཧཱུྃ་ཞེས་པའི་སྒྲ་འུར་འུར་བའི་སྣང་བ་བྱུང་། དེ་ནས་འོད་ཟེར་དྲུག་ཅུ་དྲུག་ཅུ་པོ་དེ་དག་ཚུར་འདུས་ཏེ་ལ་ལ་སྟེང་ལ་ལ་འོག་དང་ངོས་བཞི་ལ་ཐིམ། ལ་ལ་དབུས་ཀྱི་ཡིག་འབྲུ་ལ་བསྐོར་བའི་ཡིག་འབྲུ་དྲུག་ལ་ཐིམ། ལ་ལ་དབུས་ཀྱི་གཙོ་བོ་ཉིད་ལ་ཐིམ། དེ་ནས་རེ་ཞིག་ན་ཧྲཱི་དེ་ཉིད་བཤེས་གཉེན་པར་འགྱུར་བ་སྙམ་བྱེད་པའམ། ཡིག་འབྲུ་དྲུག་པོ་དེ་དག་གི་གསེབ་ནས་བྱུང་བ་སྙམ་བྱེད་པའམ། འོག་གཞི་ཟླ་བའི་དཀྱིལ་འཁོར་དེ་གཡོ་ཞིང་འདུག་པའི་གསེབ་ནས་བྱུང་བ་སྙམ་བྱེད་པའམ། རེས་འགའ་སྟེང་འོག་ངོས་བཞིའི་གསེབ་ནས་བྱུང་བ་སྙམ་བྱེད་དེ། མདོར་ན་དག་པའི་སྣང་བ་འཕགས་པའི་རྣམ་འཕྲུལ་གསལ་ལ་མི་རྟོག་པའི་འོད་ཀྱི་རྣམ་པར་བྱོན་ཏེ། ཧྲཱི་དེ་འགྱུར་བ་ལས་འོད་ཀྱི་གསེབ་ནས་འབྲོམ་རིན་པོ་ཆེ་བྱོན་པའི་ཞལ་ནས་ཆོས་ཐམས་ཅད་འདི་ལྟ་བུའི་རྣམ་པར་གདའ་གསུང་། དེ་ནས་དབུས་ཀྱི་ཡི་གེ་ལ་བསྐོར་བའི་ཡིག་འབྲུ་དྲུག་པོ་དེ་དབུས་ཀྱི་ཡིག་འབྲུ་ལ་ཐིམ། དབུས་ཀྱི་ཡིག་འབྲུ་དེ་ཡང་ཐིག་ལེ་གཅིག་ཏུ་ཁྱིལ། ཐིག་ལེ་དེ་ཡང་འོད་ཀྱི་རྣམ་པར་འོད་ཀྱི་གཞལ་ཡས་ཁང་ལ་ཐིམ། འོད་ཀྱི་གཞལ་ཡས་ཁང་དེ་ཡང་ཟླ་བའི་དཀྱིལ་འཁོར་ལ་ཐིམ། ཟླ་བ་དེ་ཡང་ཨ་འོད་ཀྱི་རྣམ་པ་ཅན་ཞིག་ཏུ་གྱུར། དེ་འབྲོམ་རིན་པོ་ཆེ་ལ་གཡས་ཕྱོགས་ནས་ཁྱིལ་ལེ་བསྐོར་ཞིང་བྱུང་བ། འབྲོམ་རིན་པོ་ཆེའི་ཞལ་ནས་ཨ་གསུངས་པས་ལྗགས་ཀྱི་སྟེང་ཁར་ཙེན་ཏེ་སོང་སྟེ་ཆོས་ཐམས་ཅད་སྐྱེ་བ་མེད་པའི་སྒོ་གསུངས་ཏེ། འབྲོམ་རིན་པོ་ཆེའི་སྐུ་རིལ་པོ་ཨའི་རྣམ་པར་ལམ་མེ་བྱུང་། དེར་རྔོག་ལེགས་པའི་ཤེས་རབ་ལ་སོགས་པ་རྣམས་ཀྱིས་འབྲོམ་རིན་པོ་ཆེ་ལ་ནམ་བལྟས་བལྟས་ཀྱི་ཚེ་ཨ་རེ་ལམ་ལམ་བྱུང་ནས། ཆོས་ཐམས་ཅད་སྐྱེ་བ་མེད་པའི་རྣམ་པ་ལམ་པ་རེ་བྱུང་། དེ་ནས་ཨའི་རྣམ་པ་དེ་མི་སྣང་བར་འབྲོམ་རིན་པོ་ཆེའི་སྐུ་འབའ་ཞིག་ཏུ་སྣང་ངོ་། ། དེའི་ཚེ་འབྲོམ་རིན་པོ་ཆེའི་ཞལ་ནས། དེ་རིང་འུ་ཅག་དཔོན་སློབ་ཀྱི་རྣམ་འཕྲུལ་དེ་ཀུན་རྟོག་གེ་པ་ཀུན་འགལ་བར་བརྩི། འོ་ནའང་བརྩིར་ཆུག ། ཆོས་ཀྱི་གནས་ལུགས་དེ་འདྲ་ཞིག་མིན་རི་ཞེས་རྒྱ་བོད་འགྲིམས་ནས་མནའ་སྐྱལ་ཡང་ཐོན་ནོ། ། ཞེས་གསུངས་སོ། ། ངེས་པ་དོན་དུ་དེ་ལྟར་ཡིན་མོད། ཐ་མལ་པའི་སྣང་ངོར་ཡང་ཇོ་བོ་རྗེས་འབྲོམ་རིན་པོ་ཆེ་ལ་མདོ་སྔགས་ཀྱི་མན་ངག་ཡོངས་སུ་རྫོགས་པ་གནང་ངོ་ཞེས་སྐྱེ་བོ་ཀུན་གྱིས་གོ་བའི་ཆེད་དུ་ཇོ་བོའི་ཞལ་ནས་ངས་ཁྱོད་ལ་འདི་མ་བཤད་དམ་གསུངས་ནས་ཆོས་རེ་རེ་ལ་ལན་རེ་རེ་བསྐྱར་ཞིང་གསུངས། དེ་ལྟར་ཐུགས་ལ་འདོགས་པས་ཇོ་བོའི་ཡོན་ཏན་སྣོད་གཅིག་ནས་ཐམས་ཅད་སྣོད་གཅིག་ཏུ་བྱོ་བ་ལྟ་བུ་འབྲོམ་རིན་པོ་ཆེ་ཡིན་གསུང་། འབྲོམ་རིན་པོ་ཆེས་ཇོ་བོའི་ཆོས་མང་དུ་མཁྱེན་ཅིང་། ཁྱད་པར་སྐྱེས་བུ་གསུམ་གྱི་ལམ་གྱི་རིམ་པ་ལ་རྩལ་ཐོན། ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས། ཁྱད་པར་བླ་མ་ལ་གསོལ་བ་ཐེབས་པས་ར་སྒྲེང་དུ་བཞུགས་དུས་ཇོ་བོ་དངོས་སུ་བྱོན། སླར་ཡང་གསོལ་བ་བཏབ་པས་བཅོམ་ལྡན་འདས་ཤཱཀྱ་ཐུབ་པའི་ཞལ་མངོན་སུམ་དུ་གཟིགས་སོ། ། ཇོ་བོ་རྗེ་ཞིང་གཤེགས་སུ་ཉེ་བ་ན་ཡང་འབྲོམ་རིན་པོ་ཆེ་ལ་ཇོ་བོ་རང་ཉིད་ཀྱི་འབྲལ་སྤང་ཨུ་རྒྱན་ནས་འོངས་པའི་རུས་རྒྱན་དང་། འོད་མའི་ཚལ་གྱི་ཤིང་ལ་བསིལ་བའི་ཚལ་གྱི་མི་ལྤགས་ཀྱི་གཡོགས་ཅན་གྱི་ཌཱ་མ་རུ་དང་། རིགས་ལྔའི་དབུ་རྒྱན་དང་། རྡོ་རྗེ་དྲིལ་བུ་དང་བཅས་པ་སྨྱུག་དོང་མཐོ་གང་པ་གཅིག་ཏུ་ཤོང་བར་མཛད་དེ་ཕྱག་ཏུ་གཏད་པ་དང་། ཇོ་བོའི་སློབ་མ་རྣམས་ཀྱིས་ཇོ་བོ་རྗེ་ཞིང་གཤེགས་ན་གདན་ས་སུས་འཛིན་རྒྱལ་ཚབ་སུས་བྱེད་ཅེས་ཞུས་པ་ན་ཇོ་བོ་རྗེས་ད་ཕྱིན་ཆད་ཐམས་ཅད་ཀྱིས་འབྲོམ་ལ་བརྟེན་གསུངས། དེ་ལ་དགེ་བཤེས་དགོན་པ་བས་དེ་གང་ཡིན་ཞེས་ཞུས་པས། ཁོ་ངས་བྱིན་གྱིས་བརླབས་པ་ཡིན་ཞེས་གསུངས་པ་སོགས་བཀའ་གདམས་གླེགས་བམ་ན་ཇོ་བོ་རྗེས་འབྲོམ་རིན་པོ་ཆེ་བསྟན་པའི་བདག་པོར་མངའ་གསོལ་བ་དང་། བརྒྱུད་པ་གསུམ་ལྡན་གྱི་བླ་མ་ཐམས་ཅད་དང་རྗེ་བཙུན་མ་སྒྲོལ་མ་སོགས་ལྷག་པའི་ལྷ་རྣམས་དང་། སྒྲོལ་མ་བཅུ་གཉིས་སོགས་མཁའ་འགྲོ་ཆོས་སྐྱོང་རྣམས་ཀྱིས་ཀྱང་འབྲོམ་རིན་པོ་ཆེ་ཇོ་བོའི་ཆོས་རྒྱུད་འཛིན་པའི་བདག་པོར་མངའ་གསོལ་བ་ལྟར་རོ། ། དེ་ནས་ཕྱི་ལོ་ 1054 ཤིང་ཕོ་རྟའི་ལོ་དབྱུག་པ་ཟླ་བའི་ཚེས་བཅོ་བརྒྱད་ལ་ཇོ་བོ་རྗེ་སྐུ་གཤེགས་པ་ན་ཇོ་བོའི་སློབ་མ་རྣམས་འདུས་ཏེ་གསོལ་བ་འདེབས་པའི་ཚེ་འབྲོམ་རིན་པོ་ཆེས་ལྡེ་མིག་རྣམས་དགེ་བཤེས་ཀ་བའི་ཕྱག་ཏུ་ཕུལ། ཀ་བས་ཀྱང་འབྲོམ་རིན་པོ་ཆེ་ཇི་ལྟར་བཞེད་པ་བཞིན་དུ་མཛད་དེ། ཇོ་བོའི་གདུང་དང་རྒྱ་དཔེ། གསེར་གླིང་པའི་དངུལ་གདུགས་ཅན་ལ་སོགས་པ་རྟེན་གཙིགས་ཆེ་ཤོས་རྣམས་འབྲོམ་རིན་པོ་ཆེ་ལ་གཏད། བུ་ཆེན་གཞན་རྣམས་ལའང་རྟེན་སྐལ་རེ་མཛད། དེ་ནས་ལུག་གི་ལོ་ལ་ཇོ་བོའི་འདས་མཆོད་ཆེན་མོ་མཛད། དེའི་ཚེ་དགེ་བཤེས་ཀ་བས་ཚོགས་སུ་གཏམ་བཏང་བ་གཞན་རྣམས་ཅི་ཙུག་བྱད་ཀྱང་ང་ཕ་རྦ་རག་གི་བུ་ཚོ་རྣམས་ཀྱིས་འབུལ་བ་འདིར་ཞོག་ཅིག ། ཇོ་བའི་གདན་སར་ལྷ་ཁང་བྲེ་ཙམ་ཞིག་བཞེང་དགོས་བྱས་པས་ཐམས་ཅད་ཀྱིས་འབུལ་བ་མ་ཁྱེར་བར་བཞག་སྟེ་འོར་གྱི་གཙུག་ལག་ཁང་བཞེངས། དེའི་དུས་སུ་འབྲོམ་རིན་པོ་ཆེའི་ཞལ་ནས། ད་ཇོ་བོའི་གདུང་འདི་རྣམས་དགེ་བསྙེན་དང་དགེ་ཚུལ་ལ་ཡང་མི་བསྐུར། ཁང་ནག་དུ་བ་ཅན་དུ་ཡང་མི་བཞུགས་གསུངས་ནས་དགེ་སློང་ཚུལ་ཁྲིམས་རྣམ་པར་དག་པ་གཉིས་སྤྱན་འདྲེན་དུ་བཅུག་སྟེ། སྟོད་ལུང་ཞོང་པའི་ན་ལ་སྦྲ་དཀར་ནག་གཉིས་ཕུབ་ནས་དཀར་པོའི་ནང་དུ་གདུང་བཞུགས་ཏེ་མཆོད་པ་མཛད། ནག་པོའི་ནང་དུ་གཡོས་མཛད། དེར་དགུང་གཅིག་བཞུགས། ས་ར་ལྷབ་ཀྱི་ན་ལ་དགུང་གཅིག ། ཡལ་ས་སྦུབ་ཀྱི་ན་ལ་དགུང་གཅིག ། ལམ་པ་གསེར་ཕུག་གི་ན་ལ་དགུང་གཅིག ། དེ་ནས་གནམ་གྱི་བྱེ་མ་ལུང་དུ་བྱོན། དེ་ནས་འཕྲང་ཁ་བེར་ཆུང་གིས་ཞུ་བ་བསྐྱར་ནས་འབུལ་དུ་བཏང་བྱུང་བས་འབྲོམ་རིན་པོ་ཆེའི་ཞལ་ནས། འུ་ཅག་རྣམས་ལ་སྤྱན་འདྲེན་མཁན་གདའ་ན་འགྲོ་འམ་མི་འགྲོ་གསུངས་པས། དགོན་པ་བའི་ཞལ་ནས་ཁོང་གི་མི་སྐྱིན་ལ་འགྲོ་མི་དགོས་སམ་གསུང་། དེར་ཁོང་ཡུས་ཆེ་བས་འབྲོམ་རིན་པོ་ཆེས་ཞལ་གྱིས་བཞེས་ནས་སྔོན་ལ་ཡི་དམ་དངུལ་གདུགས་ཅན་བསྐུར། དེའི་རྗེས་ལ་ར་སྒྲེང་དུ་བྱོན་ཏེ། མེ་ཕོ་ 1056 སྤྲེའུའི་ལོ་གསར་མཚམས་ལ་ཕྱགས་ཕེབས་ནས་ར་སྒྲེང་གི་དགོན་པ་གཟིགས་པས། རྒྱབ་ན་བྲག་རྡོ་རྗེ་འདྲ་བ་འདུག ། མདུན་ན་མཚོ་གཡུང་དྲུང་འཁྱིལ་བ་འདྲ་བ་འདུག ། གཡོན་གྱི་རི་རྒྱལ་སྲིད་རིན་པོ་ཆེ་སྣ་བདུན་འདྲ་བ་འདུག ། ཕ་བོང་ཐང་འཁོར་ལོ་རྩིབས་བརྒྱད་འདྲ་བ་འདུག ། ཤུག་པ་ར་ཙམ་ལུག་ཙམ་པ་ལ་གསེར་ལོ་གཡུ་ལོ་གཉིས་ལ་ཀ་བ་ཕེར་བ་འདུག ། ཆུ་མིག་བརྒྱ་རྩ་བརྒྱད་འདུག ། བྱ་རྣམ་པ་སྣ་ཚོགས་ཀུ་དི་རེ་བ་འདུག ། མི་མ་ཡིན་རྗེས་པོ་ཆེ་བྱ་བ་དཀར་ཕྱོགས་ལ་དགའ་བ་དང་། སྡོང་པོ་ཀུས་འདེབས་བྱ་བ་ནག་པོ་ལ་དགའ་བ་གཅིག་དང་གཉིས་འདུག ། དགོན་པ་ལ་ཐུགས་མཉེས་ནས་དེའི་ནུབ་མོ་སེང་གེའི་བྲག་ཕུག་ཏུ་བཞུགས་རྨི་ལམ་བརྟགས་པས། དབུ་རྩེ་རྙིང་མའི་ཤུལ་ན་གསེར་གྱི་མཆོད་རྟེན་གཅིག་འདུག་པ་ལས་འོད་ཟེར་འཕྲོས་པས། དེའི་སྣེ་ལ་དབུ་རྩེ་གཎ་ཇི་ར་མང་པོ་བྱུང་ནས་བོད་ཀྱི་ཡུལ་ཐམས་ཅད་ཁྱབ་པར་བྱས་ཚུར་འདུས་པས་ར་སྒྲེང་གི་ཤུག་པའི་གསེབ་ཐམས་ཅད་དུ་དབུ་རྩེ་གཎ་ཇི་ར་བཙུགས་པས་གང་བ་ད་ལྟ་ཡོད་པ་བཞིན་རྨིས། གཞན་ཡང་ཕ་བོང་ཐང་གི་རྡོ་རིན་པོ་ཆེའི་ཕུང་པོར་སོང་བ་དང་རྩེ་འཕྱིང་དཀར་མར་གྱི་ཕུང་པོར་སོང་བ་རྨིས། ནང་པར་སུམ་པ་མཐུ་ཆེན་དང་། རྣལ་འབྱོར་པ་ཆེན་པོ་དང་། དགོན་པ་བ་གསུམ་བྱོན་ནས་རྟགས་བཟང་ངམ་ཞུས་པས། བཟང་བར་གདའ་གསུང་། དེ་ནས་དགོན་པ་འདེབས་པར་ཐུགས་ཐག་བཅད་ནས་ས་འདུལ་ལ་བརྒྱད་སྟོང་འགྲེལ་ཆེན་གསུངས། ས་ཆོག་པཎྜི་ཏ་ཤྲཱི་སྠ་ར་ལ་ཞུས་པས་མ་གནང་། དགོན་པ་བ་ལ་ཞུས་པས་ཀྱང་མ་གནང་བ་ལ། ད་གསང་ཕུ་བ་ལ་ཞུ་སྙམ་པ་ལ་རྣལ་འབྱོར་པའི་ཞལ་ནས། སྟོན་པ་ལ་མི་ཀུན་ཇོ་བོའི་ཡོན་ཏན་ཁྱེད་ལ་ཡོད་པར་བྱེད་ཁྱེད་འདི་འདྲ་བ་ཟེར་བས། འབྲོམ་གྱི་ཞལ་ནས། ངས་ཤེས་པ་ཡིན་ཏེ་གཅིག་ཏུ་རྟེན་དམན། གཉིས་སུ་ཁྱེད་གོང་མ་རྣམས་ཀྱིས་ཁྲེལ་གྱི་དོགས། གསུམ་དུ་མི་མ་ཡིན་ལ་འཚེར་བས་ལན། ད་འདི་བཞིན་དུ་བྱེད་པ་ཡིན་གསུངས་ནས་སྔོན་ལ་ཇོ་བོའི་སྐུ་འབག་དང་འཇམ་དཔལ་རྡོ་རྗེ་གཉིས་སྤྱན་དྲངས། གསོལ་བ་བཏབ་ནས་ཆུ་མིག་བསུབས། སྐྱེར་ཕུང་རྩ་བ་ནས་བཏོན་པ་ལ་སྦྲུལ་མྱོག་ཆེར་བྱུང་བས་ཇི་སྙམ་དུ་ཡང་མ་བསམས། དེ་ནས་ཁྲི་བརྩིགས། ཐིག་བཏབ་སྦྲ་ཕུབ་ནས་འདིར་ཇོ་བོའི་གདུང་བཞུགས་པས་ཁྱེད་རྣམས་ཀྱིས་ཀྱང་མཆིལ་སྣབས་ལ་ཚོགས་པ་མ་འདོར་ཞིག་གསུང་ངོ་། ། དེའི་དུས་སུ་རྣལ་འབྱོར་པ་ཕྱག་ཁྲི་མཆོག་གིས་བལ་ཡུལ་དུ་དངུལ་འདོན་དུ་ཕྱིན་ནས་ཕྱིར་ཕེབས་པ་རྒྱ་གར་གྱི་ལྷ་བཟོ་མཁས་པ་ཨ་ཙ་ར་མ་ནུ་བྱ་བ་ལ་ཇོ་བོའི་གདུང་ཁང་དུ་དངུལ་གྱི་མཆོད་རྟེན་ནང་དཀྱིལ་འཁོར་གྱི་ལྷ་ཚོགས། ཕྱི་མཆོད་རྟེན་གྱི་རྣམ་པར་བཞེངས་སུ་གསོལ། ནང་རྫོངས་ཀྱི་གཟུངས་རྣམས་དངུལ་གྱི་ལྗང་པ་ལ་ཡི་གེ་བརྐོས་མ་བྲིས་ནས་བཞུགས། རི་རབ་ནི་ཐེག་པ་ཆེན་པོ་ཕ་རོལ་ཏུ་ཕྱིན་པའི་ལུགས་སུ་བགྱིས་ཏེ་མདུན་དུ་ཞལ་གཟིགས་པ་ཐུབ་པ་གཙོ་འཁོར་གསུམ། ནུབ་ཏུ་ཞལ་གཟིགས་པ་དམ་ཚིག་གསུམ་བཀོད་པ་གཙོ་འཁོར་གསུམ། བྱང་དུ་ཞལ་གཟིགས་པ་བྱམས་པ་མངོན་པར་བྱང་ཆུབ་པ་གཙོ་འཁོར་གསུམ། ཤར་དུ་ཞལ་གཟིགས་པ་སྨན་བྱ་གཙོ་འཁོར་གསུམ། བུམ་པ་ནི་ཐེག་པ་ཆེན་པོ་གསང་སྔགས་ཀྱི་ལུགས་སུ་བགྱིས་ཏེ། དཔལ་གསང་བ་འདུས་པ་ལྷ་བཅུ་དགུ་ཕྱི་ནང་དུ་འབུར་དུ་དོད་པ་ལ་ཕྱོགས་བཞི་ན་ཡབ་བཞི། མཚམས་བཞི་ན་ཡུམ་བཞི། གཙོ་བོ་འཇམ་དཔལ་རྡོ་རྗེ་བྲེའི་མགུལ་ན་བཞུགས། ལྷ་མོ་དྲུག་ནང་དུ་འབུར་དོད་དུ་བཞུགས། ཁྲོ་བོ་བཞི་ནས་ཙམ་རེ་ཟུར་གྱི་མཆོད་རྟེན་གྱི་ནང་ན་བཞུགས་པ་གཅིག་བཞེངས་སུ་གསོལ་ཏེ། འབྲོམ་རིན་པོ་ཆེས་རྣལ་འབྱོར་པ་རྣམས་དང་བཀའ་བགྲོས་མཛད་ནས་བྱ་ལོ་ལ་གདུང་ཁང་དང་གཙུག་ལག་ཁང་ཁྱུང་མགོ་ཅན་གྱི་རྔ་ཁང་ཡན་ཆོད་ཚར་བར་མཛད་ནས་ད་འདི་མན་ཆད་ལ་བྱེད་པ་པོ་ཞིག་འོང་གི་གསུང་སྟེ། འཛིན་རྡོ་ཡོན་ཏན་འབར་བྱ་བ་ལ་བོད་པ་མཛད་ནས་ཁྱོད་འཇིག་རྟེན་གྱི་ཤེས་ཆེ་བ་ཡིན་པས་ཤེས་ཀྱིས་དང་ཁོ་བོས་འཇིག་རྟེན་གྱི་རྣམ་པར་རྟོག་པ་སྤོང་བློ་ཞིག་བགྱི་གསུངས་ནས་ཁྱུང་མགོ་ཅན་ལ་བསྐོར་བ་མཛད་དེ་ཤངས་སྣབས་ཀྱིས་ཀྱང་ལྐོག་མ་ན་མར་སླེབ་པར་བྱས་ནས། འཇིག་རྟེན་མཁྱེན་པ་རྙེད་དང་མ་རྙེད་དང་། ། ཞེས་བྱ་བའི་ཚིགས་བཅད་དེ་འདོན་ཞིང་ཆོས་བརྒྱད་པོ་དེ་ལ་བཏང་སྙོམས་སུ་མཛད་ཅིང་བཞུགས་པ་ལགས། དེ་ལྟར་འབྲོམ་སྟོན་པ་རྒྱལ་བའི་འབྱུང་གནས་ཐུགས་ཟབ་ལ་དཀྱེལ་ཆེ་བ་མཁྱེན་པའི་ཚད་རྒྱ་མཚོ་ཆེན་པོ་དང་མཚུངས་པ་དེས་ར་སྒྲེང་དུ་ཇོ་བོའི་སྲོལ་བཟང་གིས་བཙུགས་ནས་ཡོད་པའི་དུས་སུ། ཐུགས་ཀྱི་སྲས་སྐུ་མཆེད་གསུམ་རིམ་པར་བྱོན་པ་ཡིན་ཏེ། ཕུ་ཆུང་བས་ནི་སྙེ་ཐང་ཉིད་ནས་ཕྱགས་ཕྱི་མཛད། སྤྱན་སྔས་ 1057 མེ་མོ་བྱའི་ལོ་ལ་ར་སྒྲེང་དུ་བྱོན། པོ་ཏོ་བས་དེའི་ཕྱི་ལོ་ལ་ར་སྒྲེང་དུ་བྱོན། དེ་ལྟར་ཞབས་དྲུང་དུ་བསྙེན་པའི་སློབ་མ་རྣམས་འཇིག་རྟེན་ལ་ཞེན་པ་བཟློག་ཏུ་བཅུག་ནས་ཆོས་ཁོ་ན་སེམས་སུ་བཅུག་པ་ལ་འབྲོམ་རིན་པོ་ཆེའི་དུས་ན་དགེ་འདུན་ལྔ་བཅུ་ཙམ་ལས་མེད་དེ། དེ་རྣམས་ཀྱི་དབང་དུ་བྱས་ན། ཏིང་ངེ་འཛིན་བཟང་པོ་ཐུགས་རྒྱུད་ལ་འཁྲུངས་ཤིང་ཚུལ་ཁྲིམས་རྣམ་པར་དག་པ། ཡི་དམ་གྱི་ལྷའི་ཞལ་གཟིགས་པ། མངོན་པར་ཤེས་པ་རྒྱ་ཆེན་པོ་དང་ལྡན་པ། ཆོས་རྣམས་ཀྱི་རང་དང་སྤྱིའི་མཚན་ཉིད་རིག་པའི་ཤེས་རབ་ཕུན་སུམ་ཚོགས་པ་མངའ་བ། ནུབ་ཕྱོགས་ཨྱོན་དང་འདྲ་བ་གྲུབ་ཐོབ་དུ་སྤུང་ངེ་བ་གཅིག་བྱོན་ཏེ། མཚོ་ལ་པདྨས་བརྒྱན་པ་འདྲ་བའི་འཁོར་སྐད་པ་དེ་དགེ་བཤེས་སྟོན་པའི་འཁོར་དེ་ཀུན་ལ་ཟེར་བ་ཡིན། དེ་བས་ན་མང་ཁ་ན་མེད་གྲུང་གཙོ་བ་ཡིན་གསུང་། དགེ་བཤེས་པོ་ཏོ་བས་ཀྱང་། ངའི་དོན་གྱི་མཁན་པོ་དེ་ར་སྒྲེང་གི་དགེ་བསྙེན་རྒན་པོ་དེར་སྣང་གསུངས་ནས། འབྲོམ་རིན་པོ་ཆེའི་གདམས་པ་ཐུགས་ཉམས་སུ་བཞེས་པས་ངེས་འབྱུང་གི་བསམ་པ་མ་བཅོས་པ་ཐུགས་ལ་འཁྲུངས་པ་ན་སྔར་གྱི་སོ་སོ་ཐར་པའི་སྡོམ་པ་ངེས་འབྱུང་གི་སྡོམ་པར་སོང་གསུང་བ་ལགས། དེ་ལ་སྤྱིར་ཇོ་བོ་བོད་དུ་ཕེབས་ནས་བདག་གཉེར་འབྲོམ་རིན་པོ་ཆེས་མཛད། ཇོ་བོ་རྗེ་ཉིད་ཀྱང་འབྲོམ་རིན་པོ་ཆེ་ཁོ་ན་ལ་ཐུགས་གཏོད་པར་མཛད། བསམ་ཡས་སུ་བཞུགས་པའི་ཚེ་ཇོ་བོ་རྗེས་འབྲོམ་རིན་པོ་ཆེ་ལ་གསང་སྔགས་ཀྱི་སྤྱོད་པའི་ཐབས་མང་པོ་དང་། མཆིམས་ཕུར་དོ་ཧ་ལ་སོགས་པའི་གདམས་པ་ཟབ་མོ་རྣམས་གནང་ཞིང་ནང་དུ་ཐུགས་ཉམས་སུ་བཞེས་པར་མཛད་ཀྱང་གསང་སྔགས་སྒྲ་ཇི་བཞིན་པར་སྤྱོད་པའི་རྩིང་སྤྱོད་རྣམས་ཇོ་བོའི་དྲིན་ལས་མེད་པ་ཅིག་བྱུང་ན་དགོངས་པས་གསང་སྔགས་ཟབ་མོ་རྣམས་གསན་པ་སྐད་དུ་ཡེ་མི་མཛད་པར་ཐེག་པ་ཆེན་པོའི་བླ་མ་བྱ་བ་བཤད་པ་ན་འབྱམས་ཀླས་པར་གོ་བ་བསྐྱེད་ལ། ལག་ཏུ་ལེན་པ་ན་བསྟན་པའི་ཐ་མ་ལ་གང་ཕན་དང་། ཐད་ཀར་དོན་དུ་གང་འགྱུར་སྟོན་པ་ཅིག་དགོས་གསུང་ཞིང་འབྲོམ་རིན་པོ་ཆེ་ཉིད་ཀྱང་དེ་ལྟར་དུ་འདོམས་པར་མཛད། འབྲོམ་རིན་པོ་ཆེས་ཞང་ཆོས་ཀྱི་རྒྱལ་པོ། ཇོ་བོ་ལེགས། ཡོངས་རྫོགས་རྣལ་འབྱོར་པ། སྤྱན་སྔ་དང་བཞི་མིན་པ་ལ་སྔགས་ཀྱི་དབང་བསྐུར་མ་གནང་བ་ཡིན་གསུང་། པོ་ཏོ་བས་འབྲོམ་རིན་པོ་ཆེའི་སྤྱན་སྔར་ལོ་ངོ་བདུན་བཞུགས་པ་ལ་བུམ་པ་འཆའ་བ་ལན་ཅིག་ལས་མ་གཟིགས་གསུང་། སྔོན་རྣལ་འབྱོར་པ་ཆེན་པོས་འབྲོམ་རིན་པོ་ཆེ་ལ་བསྲུང་སྡོམ་རྣམ་པར་དག་པའི་སྟངས་ཕུལ། ཏིང་ངེ་འཛིན་ཕུན་སུམ་ཚོགས་པའི་རྟོགས་པ་ཕུལ་བས། འབྲོམ་རིན་པོ་ཆེའི་ཞལ་ནས། ཁྱོད་བསྲུང་སྡོམ་རྣམ་པར་དག་སྟེ་བསྡམ་པར་བྱ་བའི་ཉེས་བྱས་ཕྲ་མོས་ཀྱང་མ་གོས། ཏིང་ངེ་འཛིན་བཟུང་སྟེ་རྣ་རྩར་རྔ་བོ་ཆེ་བརྡུངས་ཀྱང་མི་ཚོར་བ་ཡོད་ཀྱང་དེ་བས་ངའི་བྱམས་པ་སྙིང་རྗེ་བྱང་ཆུབ་ཀྱི་སེམས་མེད་ན་ཉིན་མཚན་དུ་བཤགས་པ་བྱ་དགོས་པའི་སར་སྐྱེས་དོགས་ཡོད་དོ་གསུང་ངོ་། ། ཡང་ལན་ཅིག་མུ་གེ་ཞིག་བྱུང་བའི་དུས་སུ་འབྲོམ་ཟ་ལོ་མཚོ་མ་བྱ་བ་ཞིག་གིས་ནས་མི་ཁུར་ལྔ་བཅུ་ཕུལ་ནས་དེའི་མིང་པོ་འབྲོམ་ཚིག་པ་ད་རེ་བྱ་བས་གཏམ་བཏང་བ། ཇོ་བོ་ལྷ་ཅིག་འཛམ་བུ་གླིང་གི་རྒྱན་དམ་པ་ཡིན། དེའི་མན་ངག་བུམ་པ་གང་བྱོའི་ཚུལ་དུ་མངའ་བ་དགེ་བའི་བཤེས་གཉེན་སྟོན་པ་ཁྱེད་ཡིན། ཕྱོགས་ཕྱོགས་ནས་བྱོན་པའི་གྲྭ་པ་ཀུན་ཡང་མན་ངག་འདོད་པ་ཡིན་པས་དེ་རིང་ཇོ་བོའི་མན་ངག་གསུང་བར་ཞུ་ཞུས་པས། འབྲོམ་རིན་པོ་ཆེའི་ཞལ་ནས་བྱ་བྱ་གསུངས་ནས་འཆི་བ་མི་རྟག་པ་དང་ལས་དང་འབྲས་བུ་མང་དུ་བསམས་ལ། ཁས་བླངས་པའི་སྡོམ་པ་དག་པར་བྱ། བྱམས་པ་དང་སྙིང་རྗེ་མང་དུ་སྒོམས་ལ་བྱང་ཆུབ་ཀྱི་སེམས་བརྟན་པར་བྱ། དེས་འཕངས་ནས་ཚོགས་སྒོ་སྣ་ཚོགས་ནས་གསོག་ཅིང་སྡིག་པ་སྒོ་སྣ་ཚོགས་ནས་སྦྱོང་བ་དེ་བླ་མའི་མན་ངག་ཡིན་པས། སང་ཙ་ན་ཇོ་བོ་རྗེ་ལྷ་ཅིག་དང་མ་ཕྲད་སྙམ་ནའང་དེ་ལས་མེད་དོ། ། འབྲོམ་དགེ་བསྙེན་རྒན་པོ་དེ་དང་མ་ཕྲད་སྙམ་ནའང་དེ་ལས་མེད་གསུང་། ཡང་འབྲོམ་རིན་པོ་ཆེའི་ཞལ་ནས། ངའི་ལམ་གྱི་རིམ་པ་འདི་ལ་སུ་ཡིད་ཆེས། ཁམས་མ་གི་ན་སྟོང་ཟོམ་ཡོན་ཏན་སྙིང་པོ་བྱ་བ་ཞིག་ཡོད་དེ། དེ་ལ་བཟླས་ན་ཡིད་ཆེས་སམ་གསུང་། འབྲོམ་རིན་པོ་ཆེས་དགོན་པ་ལ་ཉིན་གཅིག་ཐུགས་དམ་སྐྱེལ་དུ་བྱོན་ཙ་ན་མཎྜལ་རྡུལ་ཆིང་ངེ་འདུག་པ་ལ། སྒོམ་པ་དབང་ཕྱུག་རྒྱལ་མཚན། མཆོད་པ་མི་བརྗེ་བ་ཙུག་ཡིན་གསུངས་པས། བག་རེ་ནང་དུ་བསམ་འཚལ་བར་གདའ་བས་ཞུས་པས། ཁྱོད་གཅིག་པུ་ལ་སྒོམ་ཡོད་སྙམ་མམ། ཁྱོད་པས་ཨ་ཏི་ཤ་སྒོམ་བཟང་སྟེའང་མཆོད་པ་འདི་དང་འདི་རྣམས་མཛད་པ་ཡིན། ང་ལ་ཡིད་མ་ཆེས་ན་མདོ་སྡེ་ལྟོས་གསུང་། ཡང་འབྲོམ་རིན་པོ་ཆེ་སྐུ་ཁམས་ཅུང་མ་བདེ་བ་ཞིག་གི་དུས་སུ་རྣལ་འབྱོར་པ་ཆེན་པོས་རྩིག་པ་ལ་ཐག་ཐོགས་མེད་པར་བྱོན་ཏེ་བསྙུན་དྲིས་པས། ཇོ་བོ་བ། ཁྱོད་གང་ངོ་ཚ་བའི་ཡན་ལག་དེས་དྲེགས་སམ། སེམས་ཅན་བཞག་ནས་གར་ཆ། དེ་ནི་ཉིན་མཚན་དུ་བཤགས་པ་བྱ་དགོས་པའི་སར་སྐྱེ་བ་ཡིན་གསུང་ནས་བཀའ་བཀྱོན། ཡང་དགོན་པ་གོང་ན་འབྲོམ་རིན་པོ་ཆེ་དང་། རྣལ་འབྱོར་པ་རྣམ་པ་དང་། སྐུ་མཆེད་གསུམ་རྣམས་འཚོགས་ནས་ཀུ་རེ་བཞད་གད་ཙིག་སེ་མཛད་ཙ་ན། ཉེ་གནས་ན་རེ་ཀུ་རེ་ནི་ཀུ་རེ་སྟེ་འུ་ཅག་རྣམས་དེ་རིང་ཅི་ཟ་ཟེར་བ་ལ། དགོན་པ་བའི་ཞལ་ནས། ཨ་པོ་ནི་སྤུས་སྣ་གདོང་ན་ཡར་བྱུང་བ་འོ་ནི་ཀུན་ཟ་བ་ཡིན་གསུང་། དར་ཅིག་ལོན་ཙ་ན་ཡོན་བདག་གཅིག་གིས་ཕྱེ་དང་མར་ཐུད་འཁུར་བ་ཞོ་ལ་སོགས་པ་རྟ་རྒྱབ་གཅིག་བཀལ་ནས་བྱུང་བས་བསྙེན་བཀུར་བཟང་པོ་བྱས། དེར་འབྲོམ་རིན་པོ་ཆེས་བསྔོ་བ་ཡོན་བཤད་མཛད་ནས་ཡོན་བདག་དེ་སོང་བའི་ཤུལ་དུ་བཀའ་ཕབ་མཛད་དེ། སྒོམ་ཆེན་པ་ཀུན་ཀྱང་ཡོན་ཏན་བག་རེས་སྦོས་ནས་ཕྱིན་ཆད་དེ་འདྲ་བ་གསུང་རྒྱུ་མ་ལགས་གསུང་ནས་བཀྱོན་པར་མཛད། འབྲོམ་རིན་པོ་ཆེ་བརྒྱད་སྟོང་འགྲེལ་ཆེན་གསུང་བའི་དུས་སུ། མཁྱེན་གསུམ་ཐོན་ནས་རྣམ་ཀུན་ལ་མ་ཟུག་པའི་སྐབས་སུ་སྐུ་ཁམས་ལྟེམ་པ་ཅིག་བྱུང་ནས་འགྲེལ་པ་གསུང་མ་སྤྱོད་པར་འདི་མན་ཆོད་ཀྱི་དོད་པོ་གཅིག་བྱ་གསུངས་ནས། ཕ་རོལ་ཏུ་ཕྱིན་པ་དྲུག་གསུམ་བཅོ་བརྒྱད་དུ་ཕྱེ་བའི་ཉམས་སུ་བླང་བདེ་བ་ཅིག་གསུངས་པས། སྤྱན་སྔའི་ཞལ་ནས། གསུང་མ་སྤྱོད་པ་རང་གིས་འཚེངས་བསམ་པ་ཅིག་བྱུང་གསུང་། དེ་ལྟར་ན་འབྲོམ་རིན་པོ་ཆེ་དེས་གཡུང་ཆོས་མགོན་ལོ་བཞིར་བསྟེན། རྒྱལ་གྱི་ཞང་ལ་དགེ་བསྙེན་གྱི་སྡོམ་པ་མནོས་ནས་ཁམས་སུ་ཇོ་བོ་སེ་བཙུན་གྱི་ཞབས་དྲུང་དུ་ལོ་ཉི་ཤུ། དེ་ནས་ཇོ་བོ་དང་མཇལ་ནས་ཇོ་བོ་ཞིང་མ་གཤེགས་ཀྱི་བར་དུ་མི་འབྲལ་བར་ཞབས་ཏོག་མཛད། ཇོ་བོའི་ཡོན་ཏན་མ་ལུས་པ་ཐུགས་སུ་ཆུད་པར་མཛད་ནས་ར་སྒྲེང་དུ་ལོ་དགུར་བསྟན་པའི་མངའ་བདག་མཛད་དེ། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ཡང་སྒོས་སུ་བཀའ་གདམས་ཀྱི་བསྟན་པ་རིན་པོ་ཆེ་ཉི་མ་ཤར་བ་ལྟ་བུར་མཛད། ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་ཇོ་བོ་རྗེ་དང་འབྲོམ་རིན་པོ་ཆེ་རང་ཉིད་ཀྱི་ཐབས་མཁས་ཀྱི་སྤྲུལ་བ་འབྱོན་ཚུལ་གསང་བ་ཟབ་མོའི་གནས་རྣམས་ཀྱང་སྟོན་པར་མཛད་དེ། རྗེ་བཙུན་འཇམ་པའི་དབྱངས་ཀྱི་སྤྲུལ་བ་རྔོག་ལེགས་པའི་ཤེས་རབ་ཀྱིས་གསོལ་བ་ཤུགས་དྲག་ཏུ་བཏབ། ཇོ་བོ་རྗེས་ཀྱང་གསུང་བར་བསྐུལ་ནས་འབྲོམ་རིན་པོ་ཆེས་ཕྱོགས་བཅུའི་སངས་རྒྱས་ཐམས་ཅད་ཀྱིས་འཕགས་པ་སྤྱན་རས་གཟིགས་ཀྱི་ཐུགས་རྗེ་བསྐུལ་ནས་བོད་ཁ་བ་ཅན་གྱི་མགོན་པོར་བྱོན་པའི་ལོ་རྒྱུད་རྣམ་ཐར་ཞིབ་ཏུ་གསུངས་ཤིང་། མ་འོངས་པ་ནའང་ཇོ་བོ་རྗེ་དང་འབྲོམ་རིན་པོ་ཆེ་གཉིས་ཀྱི་སྤྲུལ་བ་རྒྱུན་མི་འཆད་པ་བྱོན་ནས་རྒྱལ་བསྟནའཛིན་ཅིང་སྤེལ་བ་དང་། དེ་དང་དེའི་ཚེ་དགོན་གནས་ཇི་ལྟ་བུ་འབྱུང་བ་དང་། མཚན་ཇི་ལྟ་བུ་འབྱུང་དང་། མཛད་པ་ཇི་ལྟ་བུ་མཛད་རྣམས་ལུང་བསྟན་པའི་གླེགས་བམ་མཛད། བཀའ་གདམས་བསྟན་པའི་ཆུ་འགོ་བཙུགས། བཀའ་གདམས་ཀྱི་བསྟན་པའི་སྙིང་པོའི་ཡང་སྙིང་པོ་ཐིག་ལེ་བཅུ་དྲུག་གི་གདམས་ངག་ཆ་ལག་དང་བཅས་པ་ཐོར་བུ་ཐོར་བུར་བསྟན་པ་དང་། ཁྱད་པར་རྒྱལ་བའི་བཀའ་དང་དགོངས་འགྲེལ་མ་ལུས་གང་ཟག་གཅིག་གི་ཉམས་ལེན་གྱི་རིམ་པར་ཧྲིལ་གྱིས་དྲིལ་བ་སྐྱེས་བུ་གསུམ་གྱི་ལམ་གྱི་རིམ་པ་རྒྱུད་ལ་སྦྱོར་ཚུལ་ཤིན་ཏུ་གསལ་ཞིང་གོ་བདེ་བ། བློ་མཐོ་དམའ་སུས་བལྟས་ཀྱང་རྒྱུད་འཁུལ་བ་རང་རྒྱུད་ལ་བསྐུལ་འདེབས་དད་པའི་ལྗོན་ཤིང་སོགས་གདམས་ངག་གི་ཡིག་འཇོག་ཀྱང་མང་དུ་མཛད་ནས་མྱ་ངན་ལས་འདའ་ཁར་པོ་ཏོ་བའི་པང་དུ་དབུ་བཞག་ནས་ཡོད་པའི་ཚེ་པོ་ཏོ་བའི་ཐུགས་ལ་འཇིགས་སར་སྐྱེལ་མས་བོར་བ་འདྲ་བ་ཞིག་འོང་བར་འདུག་ན་ད་སུ་ལ་བརྟེན་སྙམ་ཞིང་སྤྱན་ཆབ་འབྲོམ་རིན་པོ་ཆེའི་ན་བཟའི་གོང་ཙ་ན་མར་ཉིལ་གྱིས་བྱུང་བས་འབྲོམ་རིན་པོ་ཆེས་མཁྱེན་ནས། ཞལ་འཆེམས་ལ་ད་ཕན་ཆད་དགེ་བའི་བཤེས་གཉེན་འདི་ཁོ་ན་ལ་བརྟེན་དགོས་བྱ་བ་ཡེ་མེད་ཀྱི། མདོ་སྡེ་ལྟོས། དགེ་བའི་བཤེས་གཉེན་མདོ་སྡེ་ལ་གྱིས། གྲོགས་པོ་མིག་ཟུར་ལ་ལྕི་བ་དང་འགྲོགས། ཁ་མཉམ་ལག་མཉམ་དེས་ཀྱང་མི་འོང་བར་སྣང་། གཉིས་དང་གསུམ་ཡང་ཉུང་། གཅིག་པུར་ཡེ་མ་འདུག ། བཞི་ལྔ་མན་ཆོད་ཙམ་རན། དེ་ལས་མང་དུ་ཡང་མི་རུང་། སེམས་བཟང་པོར་གྱིས་དང་། ཁྱད་པར་ཅན་དང་ཕྲད་དེ་འོང་གི་གསུངས་ནས། མདུན་ན་ཇོ་བོ་ལེགས་ཡོད་པས། སེམས་བཟང་པོ་བྱང་ཆུབ་ཀྱི་སེམས་ལ་ཟེར་བ་མ་ལགས་སམ་ཞུས་པས། ཡིན་མོད་གསུངས་ནས་སྐུ་དངོས་ཀྱི་གདུལ་བྱ་རྣམས་རྫོགས་པ་ན་ 1063 ཤིང་ཕོ་འབྲུག་གི་ལོ་སྣྲོན་གྱི་ཟླ་བའི་ཚེས་ཉི་ཤུ་ལ་ར་སྒྲེང་དུ་སྐུའི་བཀོད་པ་བསྡུས་ཏེ་དགའ་ལྡན་ཆོས་ཀྱི་ཕོ་བྲང་དུ་རྒྱལ་བ་མ་ཕམ་པ་དང་ནམ་མཁའ་དྲི་མ་མེད་པ་འཁོར་བཅས་ཀྱི་ཞབས་དྲུང་དུ་ཕེབས་ཤིང་། གཞན་ཡང་ནམ་མཁས་གར་ཁྱབ་ཏུ་སྤྲུལ་པའི་བཀོད་པས་ཁྱབ་སྟེ། གདུལ་བྱ་གང་དང་གང་ན་ཡོད་པ་དེར་རང་རང་གི་ཁམས་དང་བསམ་པ་དང་མཐུན་པར་སྐུའི་བཀོད་པ་བསྟན་ནས་འགྲོ་བའི་དོན་མཛད་ཅིང་བཞུགས་སོ། ། འབྲོམ་རིན་པོ་ཆེ་འདི་ལ་ལྷ་དང་མིའི་སློབ་མ་བསམ་གྱིས་མི་ཁྱབ་པ་ཡོད་ཅིང་། བསྟན་པ་ཡོངས་རྫོགས་འཛིན་པའི་སློབ་མའང་ཆེས་མང་བར་ཡོད་ལ། ཡོངས་སུ་གྲགས་པའི་སློབ་མའི་གཙོ་བོ་ནི་དགེ་བཤེས་ཁམས་པ་ལུང་པ་ཆེན་པོ་དང་། རྣལ་འབྱོར་རྣམ་པ་བཞི་དང་བཀའ་གདམས་སྐུ་མཆེད་གསུམ་སྟེ།
ཁམས་པ་ལུང་པ་ཆེན་པོ་ནི། འཕན་ཡུལ་ཡུང་བར་ 1025 ཤིང་མོ་གླང་མ་འཁྲུངས། རུས་སྒང་། རྟེན་དགེ་བསྙེན་ཡིན་མཚན་ཤཱཀྱ་ཡོན་ཏན། གཞོན་པའི་དུས་སྡེ་སྣོད་ལ་ཡང་སྦྱངས་པ་མཛད་དེ། ཉིད་ཀྱི་ཞལ་ནས། ངས་ལྷ་ས་སྙེ་ཐང་དུ་བ་མ་ཡིན་པ་དང་རྟ་མ་ཡིན་པ་ལ་མི་ཚེ་བསྐྱལ་ཞེས་གྲགས། སྙེ་ཐང་དུ་ཇོ་བོ་ཉིད་དང་མཇལ་ཞིང་ཕྱིས་ར་སྒྲེང་དུ་དགེ་བཤེས་སྟོན་པ་ཡུན་རིང་དུ་བསྟེན་ཅིང་སྐུ་མཆེད་གསུམ་མམ་བཞི་ཞེས་གྲགས། པོ་ཏོ་བའི་ཞལ་ནས། ཡུང་བའི་དགེ་བཤེས་སྒང་ཤཱཀྱ་ཡོན་ཏན་གྱིས་ཆོས་བདེན་པར་བཟུང་ནས་སྐྱབས་སུ་མཆི་བྱས་པས། ད་ལྟ་ཡུང་བ་ལུང་པ་ན་ཁོང་ལས་བདེ་སྐྱིད་ཆེ་བ་མེད་གསུང་། དེ་ལྟར་དགེ་བཤེས་ཁམས་ལུང་པས་དགུང་ལོ་དགུ་བཅུའི་བར་སྒྲུབ་པའི་རྒྱལ་མཚན་བཙུགས་ཤིང་སེམས་ཅན་གྱི་དོན་མཛད་ནས་ 1115 ཤིང་མོ་ལུག་དགུ་བཅུ་རྩ་གཅིག་པ་རྟའི་ཟླ་བའི་ཚེས་བཅུ་བཞི་ལ་ཁམས་ལུང་དུ་སྐུ་གཤེགས། ཆོས་ལ་ཐུན་བརྒྱད་མར་མིང་ཐོགས་ཚོགས་པ་སྟོང་ཕྲག་རེ་ཙམ་འཚོགས། བྱང་ཆུབ་ཀྱི་ཐུགས་འབྱོངས་པས་ཞལ་མཐོང་བ་ཐམས་ཅད་དད་པར་གྱུར། ཕྱོགས་མཐའ་དག་ནས་མཇལ་མི་བྱུང་བ་ན། ཁྱེད་ཅག་གི་ཡུལ་ན་མི་རྒན་མེད་དམ་གསུང་བ་ལ། མི་རྒན་ཏ་ཡོད་དེ་ཁྱེད་ལྟ་བུ་མེད་ཅེས་ཞུས། མདོར་ན་མཐོང་ཐོས་དྲན་རེག་དོན་ལྡན་དུ་འགྱུར་ངེས་པའི་སྐྱེས་བུ་ཆེན་པོར་གྲགས་སོ། ། སྐུ་མཆེད་གསུམ་གྱི་རྣམ་པར་ཐར་པ་ནི་ཕྱི་ནས་འཆད་པར་འགྱུར་ལ། རྣལ་འབྱོར་པ་རྣམ་པ་བཞི་ནི། རྣལ་འབྱོར་པ་ཆེན་པོ་བྱང་ཆུབ་རིན་ཆེན། རྣལ་འབྱོར་དགོན་པ་བ་ཆེན་པོ་དབང་ཕྱུག་རྒྱལ་མཚན། རྣལ་འབྱོར་པ་ཤེས་རབ་རྡོ་རྗེ། རྣལ་འབྱོར་ཕྱག་དར་སྟོན་པ་བཞི་སྟེ་དེ་དག་གི་རྣམ་ཐར་ནི་སྔར་ཇོ་བོའི་རྣམ་ཐར་གྱི་སྐབས་སུ་བཤད་པ་ལྟར་རོ། ། གཞན་མ་དགེ་བཤེས་ཀ་བ་ཆེན་པོ། གསང་ཕུ་བ་ལེགས་པའི་ཤེས་རབ། ཡེར་པའི་དགེ་བཤེས་ཇོ་བོ་ལེགས་སོགས་སེམས་དཔའ་ཆེན་པོ་ངོ་མཚར་བསམ་གྱིས་མི་ཁྱབ་པའི་རྣམ་ཐར་དང་ལྡན་པ་མང་དུ་ཡོད་མོད་ཀྱི་ཡི་གེའི་ཁུར་གྱིས་འཇིགས་པས་འདིར་མཐའ་དག་མ་སྤྲོས་སོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་ཐུགས་རྗེ་ཆེན་པོ་རྒྱལ་བ་འབྲོམ་གྱི་རྣམ་ཐར་རྣམས་དྲན་པར་བྱས་ལ་སྐུའི་རྣམ་པ་ཡིད་ཡུལ་དུ་བྱས་ཏེ་ཡང་དང་ཡང་དུ་གསོལ་བ་གདབ་པ་དང་། ལྷག་པར་ཚེ་འདི་བློས་གཏོང་བ་དང་མཁའ་ཁྱབ་ཀྱི་སེམས་ཅན་ལ་བྱམས་སྙིང་རྗེ་སྦྱོང་བ་སོགས་འབྲོམ་རིན་པོ་ཆེའི་གསུང་རྣམས་དྲན་པར་བྱས་ལ་ཉིན་རེ་བཞིན་བྱང་ཆུབ་ལམ་གྱི་རིམ་པ་ལ་བག་ཆགས་ཅི་ཐེབས་བྱའོ། ། ། །
༈ རྣལ་འབྱོར་དབང་ཕྱུག་དཔལ་ལྡན་དགོན་པ་བ་སོགས་བཀའ་གདམས་
ལམ་རིམ་པའི་བླ་མ་རྣམས་ཀྱི་རྣམ་ཐར།
༈ ཇོ་བོ་རྗེས་བྱང་ཆུབ་ལམ་གྱི་རིམ་པའི་མན་ངག་གསན་བརྒྱུད་ལ་རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་གཉིས་བྱུང་ཞིང་། ཇོ་བོ་རྗེས་འབྲོམ་རིན་པོ་ཆེ་ལ་རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་ཀྱི་མན་ངག་གཉིས་གཅིག་ཏུ་བསྲེས་ནས་བཤེས་གཉེན་བསྟེན་ཚུལ་ནས་ཞི་ལྷག་གི་བར་བྱང་ཆུབ་ལམ་གྱི་རིམ་པའི་ལུས་གཅིག་ཏུ་དྲིལ་ནས་གནང་བས་དེ་ཕྱིན་ལ་རྒྱུད་པ་གཉིས་སོ་སོར་མེད་ཀྱི་ཇོ་བོ་ཡབ་སྲས་ལ་སློབ་མ་བསམ་གྱིས་མི་ཁྱབ་པ་བྱུང་བས་བརྒྱུད་ཚུལ་མཐའ་ཡས་པ་ཡོད་མོད་ཀྱང་གཙོ་བོ་ཡོངས་སུ་གྲགས་པ་ནི་ཇོ་བོ་ཡབ་སྲས་ནས་དགེ་བཤེས་དགོན་པ་བ། དེ་ནས་སྣེའུ་ཟུར་པ་སོགས་ལ་རིམ་གྱིས་བརྒྱུད་པ་དང་། འབྲོམ་རིན་པོ་ཆེ་ནས་དགེ་བཤེས་སྤྱན་སྔ་བ། དེ་ནས་བྱ་ཡུལ་བ་སོགས་ལ་བརྒྱུད་པ་དང་། འབྲོམ་རིན་པོ་ཆེ་ནས་དགེ་བཤེས་པོ་ཏོ་བ། དེ་ནས་ཤ་ར་བ་སོགས་ལ་བརྒྱུད་པ་གསུམ་བྱུང་ངོ་། ། དགེ་བཤེས་སྤྱན་སྔ་བ་ནས་བརྒྱུད་པ་ལ་བཀའ་གདམས་གདམས་ངག་པ་དང་། དགེ་བཤེས་པོ་ཏོ་བ་ནས་བརྒྱུད་པ་ལ་བཀའ་གདམས་གཞུང་པ་ཞེས་ཐ་སྙད་མཛད་དོ། །
དེ་ལ། རྣལ་འབྱོར་དབང་ཕྱུག་དཔལ་ལྡན་དགོན་པ་བ། ། ཞེས་བསྔགས་པ། དགེ་བཤེས་དགོན་པ་བ་ནི། མདོ་ཁམས་སྒང་དུ་སྔགས་པ་ཅིག་གི་སྲས་སུ་ 1016 མེ་ཕོ་འབྲུག་ལ་འཁྲུངས། གདུང་རུས་འཛེང་ཡིན་པས་ཕྱིས་དགོན་པ་བ་ར་སྒྲེང་ན་བཞུགས་པའི་ཚེ་འཛེང་སྒོམ་ཞེས་བརྗོད་པ་ཡང་རུས་མིང་ནས་བརྗོད་པ་ཡིན་ནོ། ། དེ་ནི་སྐུ་གཞོན་ནུ་ནས་རབ་ཏུ་བྱུང་། མཚན་དབང་ཕྱུག་རྒྱལ་མཚན་ཞེས་བཏགས། ནམ་ཞིག་ན་དུས་ཀྱི་ཆོས་ཉིད་ཀྱིས་ཡབ་ཡུམ་གཉིས་ཀ་གྲོངས་ནས་ཡབ་ལ་དཔེ་ཆ་མང་པོ་ཡོད་པ་གྲོགས་པོ་ཞིག་དང་གྲོས་བྱས་ཏེ། རི་ཁྲོད་དབེན་པ་ཅིག་ཏུ་ལྟ་རྟོག་བྱེད་ཅིང་དགེ་སྦྱོར་བྱེད་པའི་གྲོས་བྱས། པོ་ཏི་མང་པོའི་ཁྲེས་པོ་ཞིག་བཅོས། བརྒྱགས་ཕྱེ་ཚུན་བསྡོགས་ནས་འགྲོ་བར་ཆས་ཡོད་པའི་དུས་སུ། དབུས་ནས་ཡོངས་པའི་ཚོང་པ་ཚན་ཅིག་དང་ཕྲད་པས་མངའ་རིས་སྟོད་དུ་པཎྜི་ཏ་ཆེན་པོ་ཞིག་བྱོན་ལོ་བྱ་བ་གསན་པས་སྔོན་གྱི་བག་ཆགས་སད་དེ་པཎྜི་ཏ་ཆེན་པོ་དེ་དང་མཇལ་ནས་ཆོས་ཕུ་ཐག་ཆོད་པ་ཞུས་ཏེ་ཚེ་ཐུང་འདི་ལ་རྐྱེན་གང་གིའང་དབང་དུ་མ་སོང་བར་སྒྲུབ་པ་མཐར་ཕྱིན་པ་ཞིག་བྱེད་སྙམ་པའི་འདུན་པ་ཤུགས་དྲག་པོ་བྱུང་ནས་རང་ཡུལ་ཉེ་དུ་ནོར་ལོངས་སྤྱོད་གང་ལའང་མ་ཆགས་པར་དཔེ་ཆ་དང་བརྒྱགས་ཕྱེ་གྲོགས་པོ་ལ་བཞག ། དབུས་སུ་འགྲོ་བའི་ཚོང་པ་ཚན་ཅིག་བྱུང་བས། བརྒྱགས་མེད་པར་དེ་དག་དང་ལྷན་དུ་འགྲོན་པོ་རྣམས་ལ་སློང་གིན་བྱོན་ཏེ་གཙང་གི་ཉན་ཚོར་ཇོ་བོ་དང་མཇལ་ཆོས་ཞུས་པས། ངའི་བླ་མཆོད་བྱེད་ན་ཆོས་བཤད་གསུང་། ཁོ་བོས་བླ་མཆོད་རྔོ་མི་ཐོག ། ཆོས་ཤིག་ཐུགས་ལ་འདོགས་པར་ཞུ་བྱས་པས། བླ་མཆོད་མི་བྱེད་ན་ང་ཡང་ཆོས་མི་བཤད་གསུངས་པས། དེར་བླ་མཆོད་དུ་ཁས་བླངས་ནས་བཞུགས། ཇོ་བོ་རྗེས་འབྲོམ་རིན་པོ་ཆེ་ལ་ལྐོག་ཏུ་གསུངས་པ་རྣམས་མ་གཏོགས་ཆོས་གང་གསུངས་ཐམས་ཅད་ཞུས། ལྷག་པར་ཁོང་རང་ལ་ཆེད་དུ་སྐྱེས་བུ་གསུམ་གྱི་ལམ་གྱི་རིམ་པའི་ཁྲིད་རྫོགས་པར་གནང་ནས་བསྒོམས་པས་མྱོང་བ་ཕུལ་དུ་ཕྱིན་པ་ཐོན། སྔགས་ཀྱི་གདམས་པའང་མང་དུ་ཞུས་ཤིང་ཁྱད་པར་ཇོ་བོ་མི་གཡོ་པའི་སྒྲུབ་ཡིག་ཆེན་མོ་དམིགས་པ་སྐོར་གསུམ་དང་བཅས་པ་ལོ་ཙཱ་བས་ཀྱང་བར་དུ་མ་བཅད་པར་ཚང་བར་མཛད་ཅེས་སྔོན་གྱི་ཆོས་འབྱུང་འགའ་ཞིག་ལས་འབྱུང་སྟེ། ཇོ་བོས་བོད་སྐད་དུ་གསུངས་པའམ། ཁོང་རང་གིས་རྒྱ་སྐད་ལོབས་ཏེ་ལོ་ཙཱ་བ་ལ་མི་བལྟོས་པར་ཇོ་བོ་ལས་དངོས་སུ་གསན་པ་གང་རིས་སུ་མངོན་ནོ། ། ཇོ་བོ་རྗེས་སྐལ་ལྡན་གྱི་གདུལ་བྱ་ཁྱད་པར་ཅན་དུ་གཟིགས་ནས་ཆོས་དང་ཟང་ཟིང་གཉིས་ཀས་བསྐྱངས་ཏེ་བླ་མཆོད་མཛད་ཅིང་ལམ་ཡོངས་རྫོགས་རྒྱུད་ལ་སྐྱེ་བར་བྱིན་གྱིས་བརླབས། ཁོང་རང་གིས་ཀྱང་ཇོ་བོ་རྗེས་གནང་བའི་མན་ངག་ཐམས་ཅད་ལ་སྒྲུབ་པ་རྩེ་གཅིག་ཏུ་མཛད་པས་ལམ་རྒྱུད་ལ་སྐྱེ་བའི་རྒྱུ་ཚོགས་ཐམས་ཅད་ཚང་སྟེ། ལམ་གྱི་རྩ་བ་བཤེས་གཉེན་བསྟེན་ཚུལ་ལ་ཐུག་པས་ཇོ་བོ་རྗེ་ལ་སངས་རྒྱས་དངོས་ཀྱི་འདུ་ཤེས་བཅོས་མ་མིན་པ་སྐྱེས། སྐྱེས་བུ་ཆུང་ངུའི་ལམ་ལ་སྦྱངས་ཏེ་ཚེ་འདི་ལ་ཆགས་པའི་བསམ་པ་གཏན་ནས་ལོག་སྟེ་ཕྱི་མའི་དོན་འབའ་ཞིག་སྒྲུབ་པའི་བསམ་པ་དང་། ལས་འབྲས་ལ་གཏིང་ནས་ཡིད་ཆེས་པའི་དད་པ་དང་། སྐྱེས་བུ་འབྲིང་གི་ལམ་ལ་སྦྱངས་པའི་འཁོར་བ་མཐའ་དག་ལ་ཞེན་པ་ལོག་པའི་ངེས་འབྱུང་བཅོས་མ་མིན་པ་སྐྱེས་ཏེ་ཁས་བླངས་པའི་ཚུལ་ཁྲིམས་ལ་བསྡམ་པར་བྱ་བའི་ཉེས་པ་ཕྲ་མོ་ཙམ་གྱིས་ཀྱང་མ་གོས་པར་མཛད། ལམ་སྒྲུབ་པ་ལ་བརྩོན་པ་ཤུགས་དྲག་ལ་རྒྱུན་རིང་བ་ནར་མར་མཛད་དེ། ལན་ཅིག་གཟིམ་མལ་དུ་སྐྱིལ་ཀྲུང་ལམ་གྱིས་མཛད་པསབརླ་ཤ་ལ་སྤེན་མ་ཡོག་ཤིང་ཙམ་ཞིག་ཐམ་གྱིས་ཟུག ། དེ་འདྲ་བ་ལ་འབྱུང་རིན་མེད། དགེ་སྦྱོར་རང་གལ་ཆེ་སྙམ་ནས་ཐུགས་དམ་དུ་ཧྲིལ་གྱིས་སོང་། ནམ་ལངས་ཙ་ན་གཟིམ་མལ་ཐམས་ཅད་ཁྲག་གིས་གང་། སྐུའི་བརླ་ཤ་ཐམས་ཅད་ནུར་ནས་ཤིན་ཏུ་བསྙུང་བ་བྱུང་། དེ་དགེ་བཤེས་སྟོན་པས་གསན་པས་ཡེ་ཁམས་པ་གླེན་པ་དེ་ཕྱུང་ནས་བསྒོམས་པས་ཅི་མ་ཁྱབ་གསུང་། ལྐོག་ཏུ་ཁོང་གི་དེ་འདྲ་ཞིག་དགོས་པ་ཡིན་གསུངས་ནས་བསྔགས་པ་བརྗོད་པར་མཛད། དེ་ལྟར་བླ་མ་ལ་དད་པ་དང་། ཚུལ་ཁྲིམས་དག་པ་དང་། བསམ་གཏན་སྒོམ་པ་ལ་བརྩོན་པ་ཤུགས་དྲག་པ་སྟེ་རྒྱུ་གསུམ་པོ་དེ་ལ་བརྟེན་ནས་ཏིང་ངེ་འཛིན་ཕུན་སུམ་ཚོགས་པ་ནི་ཁམས་གོང་མའི་ཏིང་ངེ་འཛིན་བརྙེས་པ་ཡིན་གསུང་། ལན་ཅིག་ཙ་ན་རླུང་བཟུང་སྟེ་བ་སྤུ་ཡང་མི་འགུལ་བར་དྲོད་ཚ་ལམ་མེ་བྱས་ནས་ཞག་གསུམ་གསུམ་ཙམ་བཞུགས་པས། སློབ་མ་རྣམས་ད་ནི་གྲོངས་ཟིན་སྙམ་པ་ལ། ཨ་ཧ་ཧ་གསུང་ནས་ཀོག་གིས་བཞེངས། དེ་ཙུག་མཛད་པ་ཅི་ཙུག་ལགས་ཞུས་པས། ཁམས་ཅུང་ཞིག་མ་བདེ་བས་རླུང་བག་ཙམ་བཟུང་བ་ཡིན་གསུང་། རྒྱ་གར་ནག་ཆུང་བྱ་བ་དེ་ཡང་ར་སྒྲེང་དུ་བྱོན་པས། དགོན་པ་བའི་གྲང་ཁང་ལ་མཛུབ་མོ་བཙུགས་ཏེ་འདི་ལ་ཏིང་ངེ་འཛིན་དང་མངོན་ཤེས་ཡོད་ཟེར་བའང་བྱུང་། པོ་ཏོ་བ་ཀླུངས་ཤོད་ན་འགོ་ན་བཞུགས་པའི་དུས་སུ། ཕུ་ཆུང་བ་དང་སྣེའུ་ཟུར་པ་གཉིས་ཀྱིས་དགོན་པ་བའི་སྐུ་ཆེ་བའི་ཡོན་ཏན་གླེང་བ་ལ། ཕུ་ཆུང་བའི་ཞལ་ནས། ཞང་སྒོམ་ཁྱེད་འཕྱི་བ་ཡིན། ངེད་སྔོན་དགེ་བཤེས་དགོན་པ་བ་དང་ཇ་གྲལ་གཅིག་ན་བཞུགས་པའི་དུས་ན། དགོན་པ་བའི་ཞལ་ནས། ངས་བར་དེར་སངས་རྒྱས་རྗེས་སུ་དྲན་པ་བག་ཙམ་ཞིག་ཡིད་ལ་བྱའོ་གསུངས་ནས་སྤྱན་ཟིམ་ཙམ་མཛད་ནས་བཞུགས། རྗེས་ལ་ངས་ད་ལྟ་ཏིང་ངེ་འཛིན་ལ་མཉམ་པར་བཞག་པས་འོག་གི་ཕྱོགས་ན་སངས་རྒྱས་ཤིག་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ནས་ཆོས་གསུངས་པ་དེ་ངའི་ལྷའི་སྤྱན་གྱིས་མཐོང་བ་ཡིན། ལྷའི་སྙན་གྱིས་གསན་པ་ཡིན་གསུང་། ཡང་དགོན་པ་དབང་ཕྱུག་འོད་བྱ་བ་མཚམས་བཅད་མཛད་པ་ཅིག་བརྒྱགས་ཆད་ནས་དྲོ་གཟན་མེད་པས་མཚམས་བཏོན་ལ་དྲོ་གཟན་བཙལ་དགོས་སྙམ་ནས། ཕར་ཙམ་ཚུར་ཙམ་འདུག་ཙ་ན། དགོན་པ་བ་ལ་ཉེ་གནས་ཀྱིས་བཤོས་དྲངས་བྱིན་ལེན་ཞུས་ཙ་ན། བཤོས་དེ་ཕྱག་ཏུ་བསྣམས་ནས་ལ་འུར་འདི་ཁོ་ལ་སྐྱོལ་ཤོག ། ཁོ་ལ་དྲི་གཟན་མེད་གསུང་། ཉེ་གནས་ཀྱིས་སྐྱེལ་དུ་ཕྱིན་ཙ་ན། མཚམས་བཏོན་ལ་ཁད་གདའ་སྐད་ན་ཇི་ལྟ་བ་བཞིན་གཟིགས་པ་ཅིག་བདོག་པར་གདའ། ཡང་དགོན་པ་གོང་དུ་དགེ་བཤེས་སྟོན་པས་དབུ་མཛད་རྣལ་འབྱོར་པ་རྣམས་འཚོགས་ནས་བཞད་གད་ཤིག་གེ་འདུག་ཙ་ན། ཉེ་གནས་ཀྱིས་འུ་ཅག་དེ་རིང་ཅི་ཟ་ཞུས་པས། དགོན་པ་བས་ཨ་པོ་ནི་པུས་སྣ་གདོང་ན་ཡར་བྱུང་བ་འདི་ཀུན་ཟ་བ་ཡིན་གསུངས་པས། དེ་ལ་སྟོན་པས་ཀྱང་བཀྱོན་པས། ཕྱིས་དགེ་བཤེས་སྟོན་པས་བཀྱོན་དུ་འོང་གསུངས་ནས་དེ་ཙམ་མི་གསུང་བ་ཡིན། ཡང་སྣེའུ་ཟུར་པ་སྐུ་ཁམས་ལྟེམས་པ་ཅིག་ལ་སྟོན་པ་ཚུལ་སེང་བྱ་བའི་གྲོགས་པོ་ཞིག་ཡོད་པ་ན་རེ། དགོན་པ་བའི་མན་ངག་སྤྱི་བོར་མེ་འབར་བ་འདི་ལྟ་བུ་ཞིག་ཡོད་དེ་སྒོམས་ཟེར་བས། བསྒོམས་པས་ཇི་ལྟ་བ་བཞིན་དུ་བཏུབ་པར་བྱུང་། དེར་དགོན་པ་བའི་སྤྱན་སྔར་བྱོན་ནས་མདང་ད་ནང་ཁམས་ལྟེམས་པ་ཅིག་གདའ་ཞུས་པས། སྤྱི་བོ་ན་མེ་འབར་བ་དེ་སྒོམས་གསུང་། དེ་མི་ཤེས་ཞུས་པས་འོ་ན་མདང་ད་ནང་སྤྱི་བོ་ན་མེ་ཞིག་འབར་གྱིན་འདུག་པ་ཁོ་ནར་ཚོར་གསུང་སྟེ། ཇི་ལྟ་བ་བཞིན་ཐིགས་བྱུང་སྟེ་སྟོན་པ་ཚུལ་སེང་དེ་སྐད་ཟེར་བས་བསྒོམས་པ་ལགས་ཞུས་པས། འོ་གྲོགས་ལ་ཐོས་པའི་ཆོས་ཉམས་སུ་བླང་དུ་མི་བཏུབ། འདྲི་བ་ནི་མི་ཏོ། ད་འདི་བཞིན་དུ་གྱིས་གསུངས་ནས། དམིགས་པ་སྐོར་གསུམ་གྱི་གདམས་ངག་རྣམས་གསུངས། ཡང་སྣེའུ་ཟུར་པ་རྩེ་དྲོར་ཡོན་བདག་ཅིག་གིས་བཤོས་དྲངས་ཏེ་བཞུགས་པའི་དུས་སྟེང་ཆུང་ཞིག་ཏུ་ཐུགས་དམ་མཛད་པས་དགེ་སྦྱོར་ཤིན་ཏུ་འཕེལ་བར་བྱུང་། དགེ་བཤེས་ཀྱི་སྤྱན་སྔར་བྱོན་དུས་ཁྱོད་མདང་ད་ནང་སྟེང་ཆུང་ལྟེབ་ལྟེབ་དེ་ན་དགེ་སྦྱོར་ཤིན་ཏུ་འཕེལ་བར་འདུག་ཨང་གསུང་། རོག་ཐོམ་དུ་ལྷ་བཟོ་བའི་ལུགས་བྱེད་པ་ལ་ར་སྒྲེང་དུ་སྒོམ་ཆེན་རྣམས་ལ་གཏོར་མ་ཞུས་པས། དགོན་པ་བས། འུ་ཨ་གསུང་། ཅི་ལགས་ཞུས་པས། ལུགས་བརྡོལ་གསུང་། དྲིས་པས་དེ་ཙ་ན་བརྡོལ་འདུག་སྐད། ཡང་སྣེའུ་ཟུར་པས་བསྒོམས་ནས་རྟོགས་པ་ཤོག་པ་རེ་བྱུང་བའི་དུས་སུ། བླ་མའི་ཞབས་ལ་གཏུགས་པའི་ཕྱག་གཅིག་བྱ་དགོས་སྙམ་ནས་སྤྱན་སྔར་བྱོན་དུས། ཞབས་གཡས་པ་དེ་ཤད་ཀྱིས་རྐྱངས་ནས་འོང་བ་ལགས་པར་གདའ། ཆོས་འདི་ལྟ་བུ་ཞིག་ཞུ་སྙམ་པ་དེ་ཞུ་མི་དགོས་པར་བཤད་ཀྱིས་གསུང་འོང་བ་ཡིན། དམ་ཚིག་གསུམ་བཀོད་པའི་རྒྱལ་པོ་ལྷག་པའི་ལྷར་བཟུང་ནས་བཟླས་པ་སྟོང་ཕྲག་བརྒྱད་སོང་ཙ་ན་གཟིགས། དེ་ནས་སྟོང་ཕྲག་བརྒྱད་ནམ་སོང་སོང་ན་ཞལ་མི་གཟིགས་པ་བྱེད་མ་མྱོང་། གཞན་ཡང་དེ་བཞིན་གཤེགས་པའི་ཕན་ཡོན་གྱི་ལེའུ་ནས་གསུངས་པ་རྣམས་ལ་ངས་ཉམས་སུ་མ་མྱོང་བ་མེད་གསུང་། ལེའུ་དེ་ནས་གསུངས་པ་ལ་ནི་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། ། ཚེ་འདི་ཉིད་ལ་སངས་རྒྱས་ཀྱི་མཛད་པ་བྱེད་པར་འགྱུར་རོ། ། ཞེས་གསུངས་ཏེ་བསམ་གྱིས་མི་ཁྱབ་བོ། ། དགེ་བཤེས་དགོན་པ་བ་དེ་ཏིང་ངེ་འཛིན་ཤིན་ཏུ་བརྟན་པས་ལྷའི་གཟིགས་སྣང་དང་མངོན་པར་ཤེས་པ་རྒྱ་ཆེན་པོ་མངའ་བ་དེ་ལྟར་ཡིན་ཡང་དགོན་པ་བ་རང་གི་ཐུགས་ཀྱི་བཞེད་པའི་གཏིང་ལ་ལྷའི་ཞལ་མཐོང་བ་དང་མངོན་ཤེས་སྐྱེས་པ་དགེ་སྦྱོར་གྱི་འབྲས་བུ་གཙོ་བོར་འཛིན་པར་མི་མཛད་ཀྱི་ལམ་གྱི་རིམ་པའི་དམིགས་སྐོར་སོ་སོ་ལ་མྱོང་བ་བཅོས་མིན་སྐྱེས་པ་ཞིག་དང་ལྷག་པར་ལས་འབྲས་ལ་ཡིད་ཆེས་ནས་སྡོམ་པ་གསུམ་གྱི་བཅས་མཚམས་དག་པ་གཙོ་བོར་འཛིན་པར་མཛད་དེ། དགོན་པ་བའི་ཞལ་ནས། སྣེའུ་ཟུར་པ་ལ། ཡེ་འབར་སང་གནངས་ཙ་ན་ཁྱེད་ཀྱི་དགེ་བཤེས་པ་དེ་ཀུན་མན་ངག་གི་མཐིལ་གང་ལ་བྱེད་ཟེར་ནས་འདྲི་ན། མངོན་པར་ཤེས་པའམ་ཡི་དམ་གྱི་ལྷ་ཞལ་མཐོང་བ་ལ་བྱེད་བྱས་པ་འོང་ངོ་། ། ལས་རྒྱུ་འབྲས་ལ་ཇེ་ངེས་ཇེ་ངེས་སོང་ནས་ཇི་ལྟར་ཁས་བླངས་པའི་སྡོམ་པ་དག་པར་སྲུང་བ་ཞིག་ལ་བྱེད་ཟེར་བ་ཡིན་གསུང་ངོ་། ། ཇོ་བོའི་མན་ངག་ལམ་གྱི་རིམ་པའི་འགོ་བཤེས་གཉེན་བསྟེན་ཚུལ་ནས་མཐར་ཐུག་འབྲས་བུ་ཟུང་འཇུག་འགྲུབ་པའི་བར་རང་གི་རྒྱུད་ལ་སྦྱར་ནས་སྒོམ་པར་མཛད་པས་སྒོམ་གེགས་ཀྱང་མང་བར་བྱུང་སྟེ་ཇོ་བོས་འཕྲལ་ལ་སེལ་བར་མཛད་པས་ཇོ་བོའི་སློབ་མ་སྒོམ་གྱི་གེགས་སེལ་བ་ལ་རྩལ་ཐོན་པར་གྲགས། ཇོ་བོ་རྗེ་དང་ཉན་ཚོར་མཇལ་བ་ནས་མཐར་སྙེ་ཐང་དུ་ཇོ་བོ་ཞིང་གཤེགས་པའི་བར་འབྲལ་མེད་དུ་བསྟེན་ཅིང་། ཇོ་བོ་གཤེགས་ནས་ཇོ་བོའི་གསུང་བཞིན་ར་སྒྲེང་དུ་དགེ་བཤེས་སྟོན་པའི་ཕྱགས་ཕྱི་མཛད་དེ། དགེ་བཤེས་སྟོན་པ་དང་རྣལ་འབྱོར་པ་གདན་སར་བཞུགས་རིང་ལའང་དགོན་པ་གོང་དུ་སྒྲུབ་པ་རྩེ་གཅིག་ཏུ་མཛད། 1078 རྟ་ལོ་ལ་རྣལ་འབྱོར་པ་གཤེགས་པའི་ལོ་དེ་ཉིད་གཏོགས་པའི་ལོ་ལ་གདན་ས་མཛད་དེ་སྐལ་བ་དང་ལྡན་པ་དག་ལ་ཇོ་བོའི་མན་ངག་རྒྱ་ཆེར་སྤེལ་ལོ། ། དེ་ལྟར་དགེ་བའི་བཤེས་གཉེན་དགོན་པ་བ་ཆེན་པོ་དེས་རང་གི་སྲས་ཀྱི་ཐུ་བོ་སྣེའུ་ཟུར་པ་ལ་ཇོ་བོའི་མན་ངག་རྫོགས་པར་གནང་ཞིང་གཞན་ཡང་དངོས་ཀྱི་གདུལ་བྱ་རྣམས་སྨིན་པར་མཛད་ནས། དགུང་ལོ་དྲུག་ཅུ་རྩ་བདུན་པ་ 1082 ཆུ་ཕོ་ཁྱིའི་ལོ་མངོན་པར་བྱང་ཆུབ་པའི་ཉ་ལ་སྐུ་གཤེགས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། དགེ་བའི་དགོན་པ་བ་དེ་ལ་སློབ་མ་བསམ་གྱིས་མི་ཁྱབ་པ་བྱུང་བའི་ནང་ནས་ཡོངས་སུ་གྲགས་པ་སྣེའུ་ཟུར་པ། ཞང་ཀ་མ་བ། དགེ་བཤེས་འབན་གུང་རྒྱལ། ཁ་རག་སྒོམ་ཆུང་བ། རྒྱ་ལྕགས་རི་བ་སོགས་བསྟན་པ་ཡོངས་རྫོགས་འཛིན་པའི་བཤེས་གཉེན་མང་དུ་བྱོན་ནོ། །
དེ་ལ་ཀ་མ་བ་ནི། ཇོ་བོ་ལན་པ་སྤྱིལ་བུར་ཕེབས་དུས། ཡུམ་དེས་ཇོ་བོ་ལ་བྱིན་རླབས་ཞུས་པས། འདི་ལ་བུ་བཟང་པོ་ཞིག་འོང་ཞེས་ལུང་བསྟན་པ་བཞིན། 1057 མེ་མོ་བྱ་ལ་ཀླུངས་ཤོད་རུག་པར་སྐུ་འཁྲུངས། ཡབ་ཞང་འབེན་ཕྱུག་གི་སྲས་ཡིན་པས་ཞང་བུ་གཅིག་པར་གྲགས། མཚན་ཤེས་རབ་འོད། ཕྱིས་དགོན་པ་བ་མཇལ་དུ་བྱོན་པས། ཆོས་དང་ཟང་ཟིང་གཉིས་ཀྱིས་བསྐྱངས་ཤིང་པོ་ཏོ་བ་ལ་ཡང་ཆོས་གསན། མངོན་པར་རྟོགས་པའི་ཡོན་ཏན་ཚད་མེད་པ་དང་ལྡན་ཞིང་རྒྱ་བོད་སྐད་གཉིས་སྦྱོར་བའི་ལོ་ཙཱ་ཡང་འབྲིང་ཞིག་མཁྱེན། ཕྱི་རོལ་གྱི་དངོས་པོ་ངན་པ་རྣམས་བཟང་པོར་བསྒྱུར་ནུས་པའི་ཏིང་ངེ་འཛིན་བརྟན་པོ་མངའ། ཕྱིས་ཀ་མ་དགོན་པ་བཏབ་སྟེ་འཕྲིན་ལས་བསྐྱངས་པས། ཚོགས་པ་བདུན་བརྒྱ་ཙམ་འདུས་སོ། ། བདུན་ཅུ་རྩ་ལྔ་པ་ 1131 ལྕགས་མོ་ཕག་གི་ལོའི་རྟའི་ཟླ་བའི་ཉི་ཤུ་གསུམ་ལ་ཀ་མར་སྐུ་གཤེགས་སོ། །
དགོན་པ་བའི་སློབ་མ་དགེ་བཤེས་འབན་ནི། ཕན་ཡུལ་གྱི་སའི་ཆར་སྐུ་འཁྲུངས། རབ་ཏུ་བྱུང་བའི་མཚན་ཚུལ་ཁྲིམས་རྒྱལ་བ། ཀོ་དེ་ལུང་དུ་བཞུགས་པས་ཀོ་དེ་ལུང་པར་གྲགས། ཁོང་གིས་གཞོན་དུས་སྤྲང་བོ་འབའ་ཞིག་མཛད་ནས་ཐུགས་ཀྱང་མ་དུལ་བ་ཅིག་ཡོད་པ་ཡིན། ཕྱིས་དགོན་པ་བ་བསྟེན་ནས་ལམ་རིམ་ཐུགས་ཉམས་སུ་བཞེས་པས། ཆོས་རྣལ་མ་ཐུགས་རྒྱུད་ལ་འཁྲུངས་པ་ཅིག་བྱུང་བས། དགེ་བཤེས་པོ་ཏོ་བའི་གསུང་ནས་ཀྱང་། བོད་ཀྱི་རྒྱལ་ཁམས་ན་འཆི་བ་གཤའ་མར་བློ་ལ་སྐྱེས་པ་འབན་གུང་རྒྱལ་ཡིན་གསུངས་ཏེ། ཁོང་རབ་ཏུ་འབྱུང་བའི་སྔ་རོལ་དུ། ཕྱིས་འདི་འདྲ་བ་ནུས་བལྟ་བའི་ཕྱིར། རྒྱུ་མོའི་གྲོག་པོ་བྱ་བ་གཉན་པོ་ཞིག་ཡོད་པའི་སར་ནུབ་གཅིག་ཉལ་དུ་ཕྱིན་སྐད། དེ་ནས་རབ་ཏུ་བྱུང་ནས་ཐམས་ཅད་སྤངས་ཏེ་བསོད་སྙོམས་མཛད་པས། འཚོ་བ་མེད་པ་ཡང་ལན་མང་དུ་བྱུང། རང་ལ་རྔན་བགྲང་འདི་ལྟར་མཛད་དེ། དེ་རིང་སང་གི་དབང་བྱར་མེད་པར་གཏན་དུ་འདུག་རྩིས་མ་བྱེད་ཚུལ་ཁྲིམས་རྒྱལ་བ་གསུངས་ནས་ཆིག་སྨྲས་མཛད། འགྲོ་སྙིང་འདོད་ཙ་ན་སྒོ་གཏན་ལ་ཞོན་ནས་རྐང་པ་ཐག་པས་བཅིངས་ཏེ་བཞུགས་གསུང་། ཆོས་ནན་ཏར་བྱེད་ན་ཧུར་ཆེན་པོ་ཞིག་འབྱིན་མི་དགོས་སམ། མི་ངོར་མ་སོང་བ་ཅིག་མི་དགོས་སམ། མཐའ་རྒྱ་ཆོད་པ་ཅིག་མི་དགོས་སམ། ང་དགེ་ཚུལ་ཡིན་ན་གཙང་ཕུ་སྒོམ་ཆུང་ཙམ་ཞིག་འོང་། གྲོགས་པོ་གཅིག་ཤི་བའི་རོ་སྐྱེལ་དུ་སོང་བའི་ཤུལ་དུ་བཞུགས་པས་བག་ཙམ་འཇིགས་པའི་ཞད་ཅིག་བྱུང་བས། མེ་སྒྲོན་བཏེག་ནས་ཁྱོད་སུ་ལ་འཇིགས། གང་ན་ཅི་ཡོད་གསུང་སྐད། ཡང་ཁོང་གི་གསུང་ནས། སྔོན་ང་ཕོ་རེང་མི་གཅིག་ལ་སྟོན་ཐོག་ཁལ་བཞི་བཅུ་འོང་། གྲོང་པ་རྣམས་ཀྱིས་མིང་བཞི་བཅུ་སྡིགས་སུ་བཏགས། ཉིན་མོ་ལ་ཁའི་མི་རྒོད་བྱས། ནུབ་མོ་སྐུན་ཕུག་བྱས་པས་ལྟོ་མ་ཕྱིད། ད་མཆིལ་མ་རྡོ་ལ་མི་འདེབས་ཏེ་ལྟོ་ཕྱིད། མུ་གེ་ཆེན་པོ་བྱུང་ཡང་སུ་ཕྱུག་པ་ཅིག་དང་མཇིང་སྦྲེལ་ནས་བསྡད་ཆོག ། ཆོས་བདེན་སེམས་པ་ཉིས་བསྟུད་གསུམ་བསྟུད་དུ་འཆོར་གསུང་། སྔར་ངའི་ཁས་ཟས་མི་རྙེད་ད་ཟས་ཀྱིས་ངའི་ཁ་མི་རྙེད་གསུང་། རེས་འདི་སྐད་གསུང་། ང་ནི་ཚུལ་ཁྲིམས་རྒྱལ་བ་ཡིན་ནོ། ། ཁྱོད་ནི་འབན་གུང་རྒྱལ་ཡིན་ནོ། ། དགེ་སློང་ཚུལ་ཁྲིམས་རྒྱལ་བ་ལ་འབན་གུང་རྒྱལ་འགྲན་མ་ཆེ་ཞིག་གསུང་ཞིང་ཀོར་ཡུག་ཡུག་མཛད་ལོ། ། ཕན་ཡུལ་སྟོད་ཀྱི་དགོན་པ་མང་པོ་འཇོམས་མི་བྱུང་བ་ལ། དགོན་པ་ཐམས་ཅད་ཀྱིས་རུབ་ཆོས་བྱས་པས་འབན་གྱིས་ཆོས་གོས་གསོལ་ཆུ་བུམ་ཕྱག་ཏུ་ཐོགས་ནས། ད་ངའི་རུབ་ཆོས་འདི་ལས་བྱ་ཐབས་ཡོད་དམ་ཟེར་སྐད། དེ་ཕྱིས་སུ་པོ་ཏོ་བས་གསན་པས། ཤིན་ཏུ་མཉེས་ནས་ཁོའི་རུབ་ཆོས་དེ་ཡིན། འབན་གུང་རྒྱལ་གྱི་རུབ་ཆོས་དེ་ཡིན། འུ་ཅག་ཀྱང་བན་དེ་སློབ་ན་དེ་ཙུག་ཏུ་སློབ་དགོས་གསུང་སྐད། ཁ་ཆེ་པཎ་ཆེན་བྱོན་པའི་དུས་སུ་བོད་སྟོན་རྣམས་རྟ་རྨིག་ལྕགས་ཀྱིས་དྲིལ་ལྟ་བ་རྩད་དཔྱོད་དུ་བྱོན་པ་ལ། ཁོང་མི་ཚེ་ཐོས་པ་ལ་བསྐྱལ་བ་ཀུན་ཀྱང་ད་གདོད་ལྟ་བ་རྩད་དཔྱོད་ན། ང་ཆོས་ཆུང་སང་འདྲེས་འཁྱེར། གནངས་འདྲེས་འཁྱེར་ཟེར་བ་ཅིག་བསྡད་པས་ག་ན་འོང་། ང་ཡང་འགྲོ་བསམ་པ་ཅིག་བྱུང་བ་ལ། ག་རེ་ཐོས་པ་བྱས་པས་ཉོན་མོངས་པ་ཆུང་བར་འགྱུར། ཉོན་མོངས་པ་ཆུང་བ་ལ་བདུད་ཀྱིས་གླགས་མི་རྙེད་ཟེར་བ་ལ། ངས་ཐོས་པ་ཙམ་མ་བྱས་ཀྱང་ཉོན་མོངས་པ་ཆུང་དུ་སོང་ནས་འདུག ། ཁོང་ཐོས་པ་བྱས་པ་ཀུན་གྱི་ཉོན་མོངས་ཆུང་དུ་མ་སོང་བ་འདི་ཅིས་ལན་སྙམ་པ་ལ། ཁ་ལ་བརྒྱུད་པར་སོང་བས་ལན་སྙམ་པ་ཅིག་བྱུང་གསུང་། ད་ནི་སྟོན་པ་ཅིག་བྱས་ཀྱང་འོང་ངམ་སེམས། སྒོམ་ཆེན་ཞིག་བྱས་ཀྱང་འོང་ངམ་སེམས། གནས་བརྟན་ཞིག་བྱས་ཀྱང་འོང་ངམ་སེམས། གཙོ་བོ་ཞིག་བྱས་ཀྱང་འོང་ངམ་སེམས་གསུང་ངོ་། ། ཁོང་སྟོང་པ་ཉིད་ཀྱི་ཚིག་ཁོ་ན་ཞལ་ནས་འོང་བ་ལ། པོ་ཏོ་བའི་ཞལ་ནས། གུང་རྒྱལ་འདྲ་བ་འདི་ཁ་ལ་སྟོང་པ་ཐོགས་ནས་གསུངས་ཏེ་བཀྱོན། དགེ་བཤེས་ཀྱིས་བཀྱོན་པས་འདི་མ་ལེགས་པ་ཡིན་ཏེ་འོང་སྙམ་ནས་བཞག་པས། བཞག་ཏུ་མ་བཏུབ་པར་སྟོང་པ་ཉིད་དུ་ཆམ་ཅེར་སོང་བས། དགེ་བའི་བཤེས་གཉེན་པ་ཁོ་བོ་ལས་ནི་ཁྱད་དུ་མི་གསོད། སྟོང་པ་བཞག་ཏུ་མི་བཏུབ་པར་གདའ་ཞུས་པས། ཁྱོད་རང་སྒོམས་ཤིག་ངས་གཞན་ལ་བྱས་པ་ཡིན་གསུང་སྐད། ཡང་འབན་གྱི་ཞལ་ནས། ཉོན་མོངས་པའི་མཁར་སྒོར་གཉེན་པོའི་མདུང་ཐུང་ཞིག་བཟུང་ནས་སྡོད་པ་མིན་པ་གཞན་བྱ་རྒྱུ་མེད། ཁོ་སྒྲིམ་ན་ང་ཡང་སྒྲིམ། ཁོ་གློད་ན་ང་ཡང་གློད་གསུང་། ཡང་ཁོང་གིས་ཚུལ་ཤེ་ལ་གསུངས་པ། མི་རྟག་རྟག་ཏུ་རེ་པའི་སེམས་ཅན་སྙིང་རེ་རྗེ། ། སྐྱེ་འགྲོ་སྔ་མ་ཤི་བ་མ་མཐོང་ངམ། ། ཕྱི་མ་འཆི་བ་མ་ཚོར་རམ། ། འཇིག་རྟེན་ལས་ལ་ཟིན་དུས་མེད། ། སྐྱེ་ཤི་གཉིས་ལ་ཐར་དུས་མེད། ། གཏན་བདེ་བོར་ཀྱང་འགྱོད་དུས་མེད། ། ཆོས་ཀྱི་ངོ་བོ་མཐོང་དུས་མེད། ། ངལ་བ་དོན་མེད་གཏན་ཁང་བརྩིགས། ། བུད་མེད་མང་པོ་སྡུག་བསྔལ་སྣོད། ། བྲན་གཡོག་མང་པོ་ཁ་མཆུའི་རྒྱུ། ། ནོར་རྫས་མང་པོ་གཡེང་བའི་རྒྱུ། ། བུ་མོ་བཟང་སྡུག་ལྡན་པ་ཡང་། ། དྲོ་གང་ཙམ་གྱི་གྲང་བའི་ས། ། ཅི་ལ་བསམས་ཀྱང་ཕན་པར་མི་འགྱུར་བས། ། རང་གི་སེམས་ལ་ལྟ་བ་ཁོ་ནར་བྱ། ། ཞེས་གསུངས་སོ། ། དེ་ལྟར་དགེ་བཤེས་འབན་འདི་ནི་དགོན་པ་བ་དང་སྐུ་མཆེད་གསུམ་ལ་སོགས་པའི་དགེ་བའི་བཤེས་གཉེན་མང་པོས་བསྐྱངས། འཆི་བ་མི་རྟག་པ་ཐུགས་ལ་འཁྲུངས་པས་འདོད་པ་ལ་མདུང་ཐེབས། སྟོང་པ་ཉིད་ཀྱི་ལྟ་བས་འཁོར་བའི་རྩ་བ་དྲུངས་ཕྱུང་། བྱང་ཆུབ་ཀྱི་སེམས་ཀྱིས་བདག་གཞན་མཉམ་པར་དགོངས་པའི་དཔའ་བོ་ཆེན་པོ་ཞིག་བྱུང་ངོ་། །
དགོན་པ་བའི་སློབ་མ་ཁ་རག་སྒོམ་ཆུང་ཞེས་གྲགས་པ་དེ་ནི། གཙང་སྟོད་ཀྱི་དུང་ཞུར་བྱ་བར། ཡབ་དགོན་པ་དཀོན་མཆོག་རྟེན་གྱི་སྲས་སུ་འཁྲུངས། མཚན་དབང་ཕྱུག་བློ་གྲོས་ཞེས་བཏགས། སྐུ་གཞོན་ནུ་ནས་བམ་པོ་གནས་སུ་མཁན་པོ་མར་སྒོམ་ལ་རབ་ཏུ་བྱུང་། སྦས་སྒོམ་དང་དཔོན་སློབ་གཉིས་པོས་ར་སྒྲེང་དུ་བྱོན་པས། དགེ་བཤེས་སྟོན་པ་གཤེགས་རྟིང་། རྣལ་འབྱོར་པས་ཚོགས་པ་སྐྱོང་གིན་འདུག ། དེར་གཙང་བུ་ར་སྒྲེང་གི་སྒོམ་ཆེན་རྣམས་ལ་མོས་པ་བྱུང་པས་རྣལ་འབྱོར་པ་དང་། དགོན་པ་བ་ལོ་བདུན་བསྟེན། ཇོ་བོའི་གདམས་པ་རྣམས་ཚང་བར་ཞུས། དེ་ནས་ཐུགས་དགོངས་ལ་ད་ནི་རང་གིས་ཀྱང་ཆིག་སྐྱ་ཐུབ་སྟེ་འོང་སྙམ་སྟེ། ཉུང་མའི་ས་བོན་ཕུལ་གང་འཁྱེར་ནས་སྤྲགས་ཀྱི་ཀེ་རུ་རུ་བྱོན། དབྱར་ལོ་ཐུག་གསོལ། དགུན་ཉུང་ཐུག་ལ་ཕྱེ་ཐུན་རེ་བཏབ་ནས་གསོལ་ཏེ། སྒྲུབ་པ་ལོ་བཅུ་གཅིག་རྩེ་གཅིག་ཏུ་མཛད། དེ་ནས་ཕན་ཡུལ་དུ་གཅིག་པུར་རི་ལ་བསྒོམས་པ་ན། མདུན་དུ་མི་ནག་པོ་ཞིག་བྱུང་ནས་ཁྱོད་ཀྱི་མགོ་འདོད་དོ་ཞེས་ཟེར་རོ། ། རེ་ཞིག་སྡོད་ཅིག་སྦྱིན་ནོ་གསུངས་ནས། རང་གི་མན་ངག་བཞིན་མཛད་ནས་ཁྱེར་ཅིག་ཅེས་གསུངས་ཏེ། བལྟས་པས་དེ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པར་གྱུར་ནས་དེའི་ཞལ་གཟིགས་སོ། ། དེ་ལ་དགའ་མི་དགའི་རྟོག་པ་མ་བྱུང་གི ། དོན་རང་གི་ངོ་བོས་གྲུབ་པ་མེད་མོད་ཀྱི། འོན་ཀྱང་སེམས་འཁྲུལ་པའི་སྣང་བའོ་ཞེས་མཁྱེན་ནོ། ། ནམ་ཞིག་ན་དགེ་བཤེས་པོ་ཏོ་བ་ཆེན་པོ་དེའི་ཕྱོགས་སུ་འཆག་པ་ན། དེས་པོ་ཏོ་བ་ལ་ཕྱག་མཛད་ཅིང་། ཕན་ཚུན་ཆོས་ཀྱི་གཏམ་འདྲི་བ་དང་། པོ་ཏོ་བའི་ཞལ་ནས། གཅིག་པུར་རི་ལ་བསྒོམ་པ་ན་བར་ཆད་མ་བྱུང་ངམ་གསུང་། དེས་རང་གི་སྒྲུབ་ལུགས་དང་ཉམས་ཕུལ་ཞིང་མི་ནག་པོ་ཇི་ལྟར་བྱུང་ཚུལ་ཞུས་པས། དགེ་བཤེས་པོ་ཏོ་བས་དེ་ལ་ཐབས་ཇི་ལྟར་བྱས་གསུངས་པས། སྔ་མ་ལྟར་ཇི་ལྟར་གྱུར་ལུགས་དང་རྟོགས་པ་བརྗོད་པས། པོ་ཏོ་བ་ཐུགས་དགྱེས་ནས། སྐྱེས་བུ་དེ་ཁོ་ན་བཞིན་དུ་སྒྲུབས་ཤིག ། སུ་ལ་ཡང་དེ་ལས་ལྷག་པར་ཐབས་མེད་དོ་གསུངས་ནས་གཤེགས། ཐུགས་ཤིན་ཏུ་མཉེས་པས་ཉིན་རེ་བཞིན་པོ་ཏོ་བས་ཆོས་ཀྱི་གཏམ་རེ་ཆེད་དུ་སྐྱེལ་བར་མཛད་དོ། ། དགེ་བཤེས་ཁ་རག་སྒོམ་ཆུང་པ་འདིས་རག་མའི་ཕུར་སྒོམ་ཞིང་བཞུགས་པ་ན་ནགས་ལ་མེ་མཆེད་པས་སྲོག་ཆགས་གྲིབ་སོ་ལྟར་བྲོས་ཀྱང་མ་ཐར་བར་ཚིག་པ་ལ། མི་བཟོད་པའི་བརྩེ་བས་རྗེ་བཙུན་སྒྲོལ་མ་ལ་འཕྲལ་དུ་རང་གིས་བརྩམས་པའི་བསྟོད་པས་བསྟོད་ནས་མེར་མཆོངས་པས། མེ་རང་ཞིར་གྱུར་ཏེ། ངེས་པར་དྲོད་རྟགས་དང་ལྡན་ཞིང་། བྱམས་སྙིང་རྗེ་བྱང་ཆུབ་ཀྱི་སེམས་འབྱོངས་པས་བྱ་རི་དྭགས་རྣམས་ལ་ཟས་བསྟབས་པ་ཕྱག་ནས་ལེན་ནོ། ། ཡང་ལན་ཅིག་པོ་ཏོ་བའི་སྤྱན་སྔར་བྱོན། ལམ་རིམ་བློ་ལྡོག་བཞིའི་རྟོགས་པ་ཕུལ་བས་མཉེས་ཏེ། སྐྱེས་བུ་སྨྲ་བའི་སེང་གེར་སོང་གསུང་ངོ་། ། དེ་ནས་དགེ་བཤེས་སྒོམ་ཆུང་པ་ཁ་རག་ཏུ་སྒོམ་དུ་འབྱོན་པར་བཞེད་ནས་དགེ་བཤེས་པོ་ཏོ་བ་ལ་ཕྱག་འཚལ་དུ་བྱོན། འབྲལ་མི་ཕོད་པར་གཉིས་ཀ་སྤྱན་ཆབ་བྱུང་། ཕན་ཡུལ་རྒྱལ་དུ་ཕེབས་པ་ན། ཆོས་ཞུ་བ་དང་འབུལ་བ་ཆེན་པོ་ཡང་བྱུང་། དེ་ནས་ཁ་རག་ཏུ་བྱོན་ནས་ཁ་རག་ཕུག་པ་ནག་པོར་ཐུགས་དམ་མཛད། ཁ་རག་སྒོམ་ཆུང་ཞེས་གྲགས་སྙན་པས་ཕྱོགས་ཐམས་ཅད་དུ་ཁྱབ། དེར་ཚོགས་པ་སྟོང་ཙམ་འདུས་པ་ལ་བྱང་ཆུབ་ལམ་གྱི་རིམ་པ་རྒྱ་ཆེར་སྤེལ་ལོ། ། ཁ་རག་སྒོམ་ཆུང་པའི་ཞལ་ནས། དད་པ་མེད་པའི་མི་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས། དགེ་བའི་བཤེས་གཉེན་བསྟེན་ཅིང་མདོ་སྡེ་བལྟ། བརྩོན་འགྲུས་མེད་པའི་མི་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས། འཆི་བ་མི་རྟག་པ་སྒོམ་ཞིང་ལེ་ལོ་སྤོང་། ང་རྒྱལ་ཅན་གྱི་གང་ཟག་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས། རང་མགོ་སྨད་ལ་དམན་ས་བཟུང་། ཆོས་དེ་གསུམ་དང་ལྡན་ན་ཉན་ཐོས་ཀྱི་རྟེན་དུའང་རུང་། བྱང་ཆུབ་སེམས་དཔའི་རྟེན་དུའང་རུང་། གསང་སྔགས་ཀྱི་རྟེན་དུའང་རུང་། མདོར་ན་ཡོན་ཏན་ཐམས་ཅད་ཀྱི་རྟེན་དུ་རུང་བ་ཡིན་གསུང་ངོ་། ། གཤེགས་ཁར་ཡང་ལྷོ་པ་ལ། སྐྱེ་སའི་ཡུལ་སྤོངས། ཉེ་དུ་དང་ཐག་བསྲིངས། བཤེས་གཉེན་རྟག་ཏུ་བསྟེན། ཧྲུལ་བོའི་གོས་གྱོན། དམན་པའི་ས་བཟུང་། ངན་པའི་ཟས་ཟོ། ། རྒྱ་སྐད་ཆུ་བཞིན་འཐུང་ལ་སྒྲུབ་པ་གྱིས་གསུང་བའི་གདམས་ངག་གནང་། དེ་ནས་སྟོན་མོ་བཟང་པོ་ཞིག་མཛད་དེ་འདི་ཐ་མའི་ཟས་ཡིན་ནོ་གསུང་། ངའི་རུས་བུ་ལྷག་རོལ་བསྡུས་ལ། བྱང་ར་སྒྲེང་ན་དཔལ་ལྡན་དགོན་པ་བའི་སྐུ་འབུམ་ཡོད་པས། དེའི་གྲིབ་མ་དང་བསེར་བུ་ཕོག་སར་སྐྱོལ་ཅིག་གསུང་ནས་མྱ་ངན་ལས་འདས་སོ། །
དགེ་བཤེས་དགོན་པ་བའི་ཐུགས་སྲས་རྒྱ་ལྕགས་རི་བ་དེ་ནི། སྐྱེས་བུ་གསུམ་གྱི་ལམ་གྱི་རིམ་པ་ལ་རྩལ་ཐོན། ཡི་དམ་ལྷའི་ཞལ་གཟིགས། མངོན་པར་ཤེས་པ་རྒྱ་ཆེན་པོ་དང་ལྡན་པ་ཞིག་བྱུང་སྟེ། ལམ་གྱི་རིམ་པ་རྒྱ་ཆེར་སྤེལ་བར་མཛད། དྭགས་པོ་ལྷ་རྗེ་ཡང་དགེ་བཤེས་རྒྱ་ལྕགས་རི་བ་འདིའི་སར་བྱོན་ནས་བྱང་ཆུབ་ལམ་གྱི་རིམ་པའི་མན་ངག་རྫོགས་པར་གསན་ནས་ཉམས་བཞེས་མཐར་ཕྱིན་པར་མཛད་ཅིང་། རྗེ་མི་ལའི་ཞབས་དྲུང་ནས་ནཱ་རོ་ཆོས་དྲུག་དང་ཕྱག་ཆེན་གསན་ནས་ཉམས་རྟོགས་ཕུལ་ཕྱིན་འཁྲུངས་ཏེ་སྐལ་བ་དང་ལྡན་པ་མཐའ་ཡས་པ་ལ་ཇོ་བོ་རྗེའི་མན་ངག་བྱང་ཆུབ་ལམ་རིམ་དང་། རྗེ་མི་ལ་ནས་བརྒྱུད་པའི་མན་ངག་རྣམས་ཟུང་འབྲེལ་དུ་འདོམས་པར་མཛད་པས་སྒམ་པོ་པ་ལ་བཀའ་ཕྱག་ཆུ་བོ་གཉིས་འདྲེས་ཞེས་གྲགས་པའང་རྒྱུ་མཚན་དེ་ལྟར་ཡིན་ནོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་དགོན་པ་བ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་མཛད་པ་རྣམ་ཐར་ལྟར་བྱང་ཆུབ་ལམ་གྱི་རིམ་པ་ལ་སྒྲུབ་པ་མཐར་ཕྱིན་པ་ཞིག་བྱའོ། ། ། །
༈ ཟབ་མོའི་ཏིང་འཛིན་བརྟན་པའི་སྣེའུ་ཟུར་པ། ། ཞེས་བསྔགས་པ། དགེ་བའི་བཤེས་སྣེའུ་ཟུར་པ་ནི། སྤྲས་སྣེའུ་ཟུར་གྱི་ས་སྐོར་ཐོང་པ་ཞེས་བྱ་བར། ཡབ་ཞང་སྟག་པོ་ཞེས་པའི་སྲས་སུ་ 1062 ཆུ་ཕོ་སྟག་ལ་སྐུ་འཁྲུངས། སྐུ་ཚེ་སྔ་མ་རྣམས་སུ་བསམ་གཏན་བསྒོམས་པའི་བག་ཆགས་མཐུ་བརྟས་པས་བྱིས་པའི་དུས་ཉིད་ནས་སྐྱེ་པས་ཐོབ་པའི་ཏིང་ངེ་འཛིན་བརྟན་བོ་མངའ་བ་ཞིག་བྱུང་ཞིང་། ཁྱིམ་གྱི་འདུ་འཛི་ལ་ཆགས་པ་མེད་པར་གཞན་གྱི་ལད་མོ་དང་གཞན་གྱིས་དབང་མེད་དུ་བསྐུལ་བ་ཙམ་མིན་པར་ངེས་འབྱུང་ཤུགས་དྲག་པོས་གཞོན་ནུ་ནས་བྲག་རྒྱབ་ཏུ་རབ་ཏུ་བྱུང་། མཚན་ཡེ་ཤེས་འབར་ཞེས་བཏགས། ལོ་ལོན་ནས་བསྙེན་པར་རྫོགས། འདུལ་བ་ནས་གསུངས་པའི་དགག་སྒྲུབ་གནང་གསུམ་གྱི་བཅས་མཚམས་རྣམས་མིག་གི་འབྲས་བུ་ལྟར་བསྲུངས་ཏེ་ཚུལ་ཁྲིམས་རྣམ་པར་དག་པ་ལ་གནས་ནས་སྡེ་སྣོད་གསུམ་ལ་མང་དུ་ཐོས་པ་བཙལ། དགེ་འདུན་སྤྱིའི་ལས་གང་ལ་ཡང་སྐྱོ་ངལ་མེད་པར་བྱས་ཏེ་བྲག་རྒྱབ་ཀྱི་གཉེར་ཡང་ལོ་གཅིག་མཛད། དེར་བཞུགས་དུས་བྲག་རྒྱབ་པའི་སྟོན་པ་ཤཱཀ་ཚུལ་ཞེས་བྱ་བ་ཞིག་ར་སྒྲེང་དུ་དགོན་པ་བའི་སྤྱན་སྔར་བྱོན་པས། དེར་ཁོང་གིས་ངེད་ཀྱི་དེ་ན་བཙུན་ཆུང་སྐྱེས་ཐོབ་ཀྱི་ཏིང་ངེ་འཛིན་མངའ་བ་འདི་ལྟ་བུ་ཞིག་བདོག་ཞུས་པས་དགོན་པ་བ་སྐུ་ལུས་སྒྱེད་མཛད་ནས། ཨ་ཧ་ཧ་ཨ་རེ་སྐྱིད་ཨ་རེ་སྐྱིད། ཡང་ན་ཁོའི་དེ་ལ་བླ་མ་མི་དགོས་པར་ཏལ་གྱིས་འགྲོ་བའང་སྲིད། ཡང་ན་བླ་མ་ཞིག་དགོས་པའང་སྲིད་གསུངས་ནས་ཐུགས་དགྱེས་པའི་མཚན་མ་མཛད། དེར་སྟོན་པ་ཤཱཀ་ཚུལ་གྱིས་བྲག་རྒྱབ་ཏུ་འོངས་ནས་ཁྱེད་འདིར་མ་སྡོད་པར་ར་སྒྲེང་དུ་སོངས། དགོན་པ་གོང་མ་བས་ཐུགས་ལ་འདོགས་པར་འདུག་བྱས་པས། དགེ་བཤེས་དགོན་པ་བའི་མཚན་ཐོས་པ་ཙམ་གྱིས་སྣང་བ་འགྱུར་ཏེ་ལུས་ཀྱི་སྤུ་གཟིང་ཞེས་བྱེད་ཅིང་ཇོ་བོ་ཡབ་སྲས་གཉིས་ཀའི་མན་ངག་མངའ་བ་དགེ་བའི་བཤེས་གཉེན་དེ་ལྟ་བུ་ཞིག་དང་མཇལ་ནས་བྱང་ཆུབ་ལམ་གྱི་རིམ་པའི་མན་ངག་ཡོངས་སུ་རྫོགས་པ་ཞིག་ཐོབ་ན་ཅི་མ་རུང་སྙམ་དུ་སྨོན་པས་ར་སྒྲེང་དུ་བྱོན་ཏེ་དགེ་བཤེས་དགོན་པ་བ་མཇལ་བར་ཞུས་པས། སྐུ་མཚམས་དམ་པས་མཇལ་ས་མེད་ཟེར་བས་གཟིམ་ཁང་དེ་ལ་བསྐོར་བ་ལན་གསུམ་བྱས། བྱང་ཕྱོགས་ཀྱི་ཆུ་མིག་གི་ཁ་དེ་ནས་ཕྱག་ལན་གསུམ་མཛད་དེ་སྐྱེ་བ་འདི་ལ་སྐྱེས་བུ་དམ་པ་ཁྱོད་ཀྱི་གདུལ་བྱར་མ་གྱུར་ཀྱང་མ་འོངས་པ་ན་སྐྱེས་བུ་དམ་པ་ཁྱོད་ཀྱི་གདུལ་བྱར་གྱུར་ཅིག་བྱས་ནས་སྨོན་ལམ་བཏབ། སྤོས་རེང་བུ་གཅིག་ཀྱང་བསྲེགས་ནས་ཕུལ། ཆུ་མིག་ཁ་དེར་དྲོ་བཏབ། རྣལ་འབྱོར་པ་ཆེན་པོ་ལ་ཆོས་ཅི་རིགས་གསན་ཞིང་བཞུགས་པ་ན་དགེ་བཤེས་དགོན་པ་བས་མངོན་པར་ཤེས་པས་མཁྱེན་ཏེ་ཉེ་གནས་བཏང་ནས་ཤོག་གསུང་། དགེ་བཤེས་དགོན་པ་བའི་ཞབས་དྲུང་དུ་བྱོན་ནས་མཇལ་ཏེ་ཆོས་ཀྱི་གསོལ་བ་བཏབ་པ་ན་དགེ་བཤེས་དགོན་པ་བའི་ཞལ་ནས། ཨ་ཏི་ཤས་ང་ལ་དང་པོར་མཇལ་མ་ཐག་ཆོས་འདི་གནང་བ་ཡིན་གསུངས་ནས་བསྟན་པ་ལ་འཇུག་པའི་སྒོ་དམ་པ་སྐྱབས་འགྲོའི་ཁྲིད་དང་གཏོར་མའི་ཁྲིད་གཉིས་གནང་སྟེ། འོ། མ་བསམས་པའི་ཆོས་ཀྱིས་ཕན་མེད་པས་ཟླ་བ་ཕྱེད་ཕྱེད་སོམས་ལ་ཤོག་གསུང་། དགོན་པ་བ་ཆེན་པོས་ཇི་ལྟར་གསུང་བ་ལྟར། སྣེའུ་ཟུར་པས་རང་གི་སྤྱིལ་པོར་སྐྱབས་འགྲོ་དང་གཏོར་མ་གཉིས་ལ་ཟླ་བ་ཕྱེད་ཕྱེད་བླ་མས་ཇི་ལྟར་གསུང་བ་ལྟར་བསྐྱངས་ཏེ་མྱོང་བ་ཐོན་པ་བྱས། དེ་ནས་ཟང་ཟིང་གི་ཡོ་བྱད་རྒྱ་ཆེན་པོ་མེད་ཀྱང་སྤོས་རེང་བུ་རེ་བསྣམས་ཏེ་རང་གིས་ཇི་ལྟར་བསྐྱངས་པ་རྣམས་ཞུས། དགོན་པ་བ་ཆེན་པོས་ཀྱང་དགྱེས་བཞིན་དུ་སྔར་བསྐྱངས་པ་རྣམས་ལ་གེགས་སེལ་བོགས་འདོན་དང་། གསར་དུ་སྐྱོང་དགོས་རྣམས་མགོན་པོ་ཨ་ཏི་ཤའི་མན་ངག་ལྟར་སྐྱེས་བུ་གསུམ་ཀྱི་ལམ་ལ་རིམ་གྱིས་ཁྲིད་དེ་ཕས་བུ་ལ་སློབ་པ་ལྟར་མཛད། ལན་ཅིག་སྤྱན་སྔ་ན་མི་ཁ་ཅིག་འདུག་པ་ལ། ཁོ་ཁ་སང་ནས་མ་འོངས་པ་ཡིན་པས་སྔོན་ལ་ཐོངས་གསུངས་ནས་གང་དང་མི་སྙོམས་པར་མཛད། དགེ་བཤེས་དགོན་པ་བས་སྣེའུ་ཟུར་པ་ལ་ཆོས་གསུང་བའི་དུས་སུ་ཨ་ཏི་ཤ་འདི་གསུང་། ཨ་ཏི་ཤ་འདི་གསུང་གསུངས་ནས་ཆོས་མི་མང་ཙམ་རེ་གསུང་། ད་དུང་ཞིག་གསུངས་ན་ཉུངས་སམ་སྙམ་ཙ་ན་ཚིག་མང་ཁ་ན་མེད། དོན་སེམས་པ་གལ་ཆེ་བ་ཡིན་གསུང་དེ་ཀ་ལ་འཕྲོ་བཅད་ནས་མི་གསུང་། དེ་ལྟ་བུའི་ཚུལ་གྱིས་གདམས་ངག་རྣམས་ཚང་བར་ཐུགས་ལ་བཏགས། རེས་འགའ་ཕྱག་ཕུལ་ཏེ་ད་ལན་ཞབས་ཀྱིས་བྱིན་རླབས་གནང་བ་བྱུང་ན་བསམས་པ་ན་དགོན་པ་བས་ཞབས་ནར་གྱིས་བརྐྱངས་ནས་འོང་། དགོན་པ་བ་ཆེན་པོ་སྣེའུ་ཟུར་པ་ལ་ཐུགས་ཤིན་ཏུ་མཉེས་པས་ལན་ཅིག་ཕྱག་སོར་གསུམ་གྱིས་མགོ་ལ་བྱིན་རླབས་མཛད་པས། དབུ་ལ་ཕྱག་སོར་གསུམ་པོ་ཐིམ་པའི་ཤུལ་སྐྱོང་ལོག་གེ་བ་ཇི་སྲིད་འཚོའི་བར་དུ་ཡོད་གསུང་ངོ་། ། ལམ་ཐུན་མོང་བ་ལ་ཁྲིད་ནས་མྱོང་བ་ཕུལ་ཕྱིན་འཁྲུངས་པ་ན་གསང་སྔགས་རྡོ་རྗེ་ཐེག་པའི་དབང་དང་མན་ངག་རྣམས་གནང་ཞིང་། ལྷག་པར་མི་གཡོ་བ་ཡིད་དམ་དུ་ཟུངས་གསུངས་ནས་དེའི་དབང་དང་གདམས་པ་ལས་ཚོགས་དང་བཅས་པ་ཚང་བར་གནང་། སྣེའུ་ཟུར་པས་ཀྱང་མི་གཡོ་བ་ལྷག་པའི་ལྷར་བཟུང་ནས་བསྙེན་པ་མཛད་པས་མི་གཡོ་བ་ཞལ་གཟིགས། ལས་ཚོགས་ལ་ནུས་པ་ཐོན་ཞེས་གྲགས་སོ། ། དེ་ལྟར་སྣེའུ་ཟུར་པས་དགེ་བཤེས་དགོན་པ་བ་ཐོག་མར་མཇལ་བ་ནས་མཐར་ཞིང་གཤེགས་པའི་བར་འབྲལ་མེད་དུ་བསྟེན་ཅིང་བཀའ་བཞིན་དུ་བསྒྲུབས་པས་ཐུགས་སྲས་ཐུ་བོར་གྱུར། དགོན་པ་བ་གཤེགས་ནས་སྐུ་མཆེད་གསུམ་ག་ལ་ཆོས་འབྲེལ་མཛད། ཁྱད་པར་དུ་པོ་ཏོ་བའི་བླ་མཆོད་མཛད་ནས་ལོ་བཅུ་བཞིར་ཆོས་གསན། ལམ་གྱི་རིམ་པ་ཡང་དགོན་པ་བའི་དེ་གཞིར་མཛད། པོ་ཏོ་བའི་ལེགས་ལེགས་རྣམས་ཀྱང་བཏུས་པ་ཡིན་གསུང་། དེ་ནས་སྣེའུ་ཟུར་པའི་ཐུགས་དགོངས་ལ་འདི་ལྟར་ཤར་ཏེ། ད་ནི་དཔལ་ཨ་ཏི་ཤའི་མན་ངག་བྱང་ཆུབ་ལམ་གྱི་རིམ་པ་འདི་ལ་སྒྲུབ་པ་སྙིང་པོར་བྱ་བའི་ཕྱིར་རང་ཡུལ་ཉེ་དུ་གྲྭ་ས་གང་ལའང་མ་ཆགས་པར་ནམ་ཤི་བར་སྒྲུབ་པ་ལ་རྩེ་གཅིག་ཏུ་གནས་པར་བྱའོ་དགོངས་ནས་སྤྲས་ཐོང་པ་ན་སྔོན་གྱི་དུས་སུ་གཡོག་བྱས་པའི་ཡོན་བདག་གཅིག་གིས་ཞབས་ཏོག་བྱས་ནས་སྣེའུ་ཟུར་གྱི་དབེན་ཚ་གོག་པོ་དེ་ལ་བརྟེན་ཏེ་ཁང་ཆུང་ཞིག་བརྩིགས་ནས་ཐུགས་དམ་རྩེ་གཅིག་ཏུ་མཛད་པས། དགེ་སྦྱོར་ཤིན་ཏུ་འཕེལ་བས་འདི་བཞིན་བསྒོམས་ན་ནི་འཁོར་བ་འདི་ལ་འུར་བཟློག་སྟེ་འོང་བར་འདུག་དགོངས་པ་ཅིག་བྱུང་གསུང་། དགེ་བའི་བཤེས་གཉེན་པོ་ཏོ་བ་ཆེན་པོ་སྟག་ལུང་དུ་གྲྭ་ཚོགས་སྐྱོང་ཞིང་བཞུགས་པའི་ཚེ་དགེ་སློང་བཅུ་ལྷག་ཙམ་ལ་ཀླུ་ནད་བྱུང་བ་ལ་སྣེའུ་ཟུར་པ་ལ་ཁྱོད་ཀྱིས་ཀླུ་ནད་ཀྱིས་བཏབ་པ་འདི་དག་གསོས་གསུངས་པས་དགེ་བཤེས་པོ་ཏོ་བའི་བཀའ་བཞིན་དུ་སྣེའུ་ཟུར་པས་ནད་པ་དེ་དག་བཅོས་ཏེ་བདེ་བར་བྱས་པས་པོ་ཏོ་བ་ཐུགས་ཤིན་ཏུ་མཉེས་པ་བྱུང་། ཕྱིས་པོ་ཏོ་བ་སྐུ་ཁམས་བསྙེལ་བའི་ཚེའང་། འཁོར་གྱིས་དགེ་བའི་བཤེས་གཉེན་འདི་དང་འདི་སྔས་སྲུང་དུ་གདན་དྲངས་ན་ཞུས་དུས་གསན་དུ་མ་བཞེད། སྣེའུ་ཟུར་པ་སྤྱན་དྲང་ངམ་ཞུས་པས། ཞལ་ནས། དེ་བྱུང་ན་དེ་ཀ་རང་གིས་ཆོག་སྟེ་གསུང་བས་སྔས་བསྲུངས་ཀྱང་མཛད། དེར་ཐུགས་དམ་མཛད་པས་ནམ་མཁའ་ལ་མཐོ་བར་འཕགས་པའི་སྣང་བ་བྱུང་ཞུས་པས། པོ་ཏོ་བའི་ཞལ་ནས། ཨེ་འདི་ངའི་དོན་བྱེད་སྙམ་ཙ་ན་ཁོ་རང་གི་དོན་བྱས་ནས་འདུག་གསུང་། སྣེའུ་ཟུར་པའི་ཞལ་ནས། ང་ཡང་རྣལ་འབྱོར་པ་འབྲིང་པོ་ཞིག་ཡིན། སྡེ་དཔོན་དང་མི་ནག་པའི་ཐེམ་པ་འགོམ་མ་མྱོང་ནས་ལོ་བཞི་བཅུ་སོང་བ་ཡིན་གསུང་། རྣལ་འབྱོར་པ་འབྲིང་པོས་མི་ཚད་བོད་དུ་བྱོན་པའི་བཀའ་གདམས་པ་གཅིག་ལ་ཁོང་ལས་ཚུགས་ཐུབ་པ་མ་བྱུང་བ་ཡིན་ཞེས་དབོན་སྟོན་རིན་པོ་ཆེ་གསུང་ངོ་། ། དེ་ལྟར་དགེ་བཤེས་སྣེའུ་ཟུར་པས་དགེ་བཤེས་དགོན་པ་བ་དང་། དགེ་བཤེས་པོ་ཏོ་བ་གཉིས་ཀ་ལ་ལམ་རིམ་གྱི་ཁྲིད་གསན་ནས་སྒྲུབ་པ་དར་དྲག་ལ་རྒྱུན་རིང་བ་མཛད་པས་རྟོགས་པ་མཆོག་ཐོབ་སྟེ། དེ་ཡང་བཅས་པ་དང་རང་བཞིན་གྱི་ཁ་ན་མ་ཐོ་བ་ཕྲ་མོ་ཙམ་གྱིས་ཀྱང་མ་གོས་པའི་ཚུལ་ཁྲིམས་རྣམ་པར་དག་པ་དང་། ཚེ་འདིའི་བྱ་བ་གང་གིའང་དབང་དུ་མ་བཏང་བར་ད་ལྟ་རང་འཆི་བ་ལྟ་བུའི་བརྩོན་པ་ཤུགས་དྲག་པོས་མཚན་མོ་གཉིད་ཀྱང་ཡེ་མི་ཡོང་བར་ཉིན་མཚན་ཁོར་ཡུག་ཏུ་དགེ་སྦྱོར་ལ་ཆིག་སྒྲིལ་མཛད་དེ་གཞན་གྱིས་མདང་སང་རྨི་ལམ་འདྲ་ཅི་གདའ་ཞུས་པས་ཨ་འདི་ཅི་ཟེར། གཉིད་མེད་པར་རྨི་ལམ་ག་ན་འོང་གསུང་། དེ་ལྟར་མཛད་པས་ཏིང་ངེ་འཛིན་ཕུལ་ཕྱིན་ཐོབ་སྟེ་འབྲེ་ཆུང་བས་དགེ་བཤེས་ལ་ཏིང་ངེ་འཛིན་ཚད་ཇི་ཙམ་མངའ་ཞུས་པས། ངས་ཏིང་ངེ་འཛིན་གཅིག་ལ་མཉམ་པར་གཞག་ན་ཉིན་ཞག་བཅུ་བཞི་ཙམ་གནས་ཐུབ་པར་འདུག་གསུང་། སྤྱན་སྔའི་ཞལ་ནས། ངེད་ར་སྒྲེང་པ་རྣམས་ལ་ཏིང་འཛིན་གྱི་ཚད་ཀ་དེ་ཞང་སྒོམ་ཁོ་ན་ཆེ་བ་ཡིན་གསུང་། ཏིང་ངེ་འཛིན་ཤིན་ཏུ་བརྟན་ཅིང་དབེན་པར་དགེ་སྦྱོར་ལ་ཆིག་སྒྲིལ་མཛད་པས་རྗེ་བཙུན་མི་ལ་དང་དངོས་སུ་མ་མཇལ་ཡང་ཐུགས་མཐུན་པའི་གྲོགས་སུ་མཛད། ལན་ཅིག་གཡོག་པོ་དར་ཚུལ་བྱ་བས། ཐུགས་དམ་གཏོར་མ་ཚར་ནས་གཟིམ་མལ་དུ་སྐྱིལ་ཀྲུང་ལམ་གྱི་བཅས་ནས་ན་བཟའ་གསོལ། དེའི་སྟེང་ན་ཕར་ལ་རེ་ཁ་ཐེན་ནས་བཞག་སྟེ་ནང་པར་བལྟས་ཙ་ན་སྤུ་གས་ཙམ་ཡང་མི་ཡོང་བ་ཡིན། མཉམ་གཞག་བྱ་བ་དེ་འདྲ་བ་དགོས་པ་ཡིན། རྒྱུ་མཚན་འདི་དག་ལ་དགོངས་ནས་རྗེ་བདག་ཉིད་ཆེན་པོས། ཟབ་མོའི་ཏིང་འཛིན་བརྟན་པའི་སྣེའུ་ཟུར་པ་ཞེས་བསྟོད་པ་མཛད་དོ། ། བདག་ཉིད་ཆེན་པོ་འདི་སེམས་ལ་དབང་ཐོབ་པ་ཞིག་སྟེ། སྣེའུ་ཟུར་པ་ཉིད་ཀྱི་ཞལ་ནས། ངའི་སེམས་འདི་ང་རང་གིས་ཁ་ལོ་སྒྱུར་བཏུབ་པ་ཅིག་བྱུང་གསུང་། ཡང་ཞལ་ནས། སྔོན་གྱི་དུས་སུ་ང་རང་གི་སེམས་འདི་ཁ་ལོ་སྒྱུར་དུ་བཏུབ། མིས་ནི་མི་ཚོར། ད་ཡོང་འཁོར་བ་འདི་ལ་འུར་བཟློག་སྟེ་འོང་བར་འདུག་སྙམ་ཙ་ན། ཕྱིས་ལྷ་ཡིན་ཀླུ་ཡིན་ཟེར་ནས་གཅིག་འཚོགས་གཉིས་འཚོགས་མེ་ཏོག་ཤྭ་ཤྭ་བྱས་ནས་རང་གི་དགེ་སྦྱོར་བཅག ། མི་ལ་འདི་གྱིས་བྱས་པས་ནི་ཉན་དུ་མ་འདོད་གསུང་སྟེ། ཁོང་རང་གར་འདོད་དུ་བཀོལ་དུ་བཏུབ་པ་ཅིག་ག་སྣང་ངོ་གསུང་། བྱང་ཆུབ་ལམ་རིམ་ལ་མྱོང་བ་ཕུལ་ཕྱིན་ཐོན་པའི་རྟགས་སུ་ཐུགས་རྗེ་ཤིན་ཏུ་ཆེ་བས་ལོང་བ་དང་སྤྲང་བོ་ལ་སོགས་པ་དམན་པ་རྣམས་ལ་ཤིན་ཏུ་བྱམས་པར་མཛད། ལན་ཅིག་གཡོར་པོ་གཅིག་གིས་འཇམ་ཕྲུག་གིས་ན་བཟའ་སྦྱར་མ་གཅིག་ཕུལ་བས། ཕ་ཚད་ན་མཛེ་པོ་གཅིག་དགེ་བའི་བཤེས་གཉེན་གོས་གཅིག་ཞུ་འཚལ་ཟེར་བས། འདི་ཁྱེར་གསུངས་ནས་ཕྲུག་སྦྱར་མ་དེ་གནང་། གཡོར་པོ་དེ་ན་རེ། དེ་ལ་དགེ་བཤེས་པའི་ན་བཟའ་བགྱི་བསམས་ནས་དཀའ་ལས་ཅི་ཡང་བགྱིས་པ་ལགས། ཞག་གཅིག་མི་གསོལ་བ་ཟེར་བས་ཅི་ཟེར་ཁྱོད་རང་གི་མ་ལ་བྱིན་པ་ཡང་མི་དགའ་འམ་གསུང་། ངས་ཚེ་འདི་ལ་གསེར་སྲང་བདུན་སྟོང་སྦྱིན་པར་ཐོངས་གསུངས། ལམ་ཅིག་མུ་གེ་ཆེ་བ་ཅིག་བྱུང་བས་བཤོས་དེ་གསོལ་བ་བཞིན་མཛད་ནས་ན་བཟའི་ཕག་ཏུ་སྦས་ཏེ་སྤྲང་བོ་རྣམས་ལ་བྱིན་པས་སྤྲང་བོ་མང་པོའི་བརྒྱགས་བྱུང་། སྐུ་ཤ་ནག་རིད་ཀྱིས་སོང་པའི་དུས་སུ་གླང་ཐང་པ་དེ་ཕྱག་ཕྱི་ལ་བྱོན་པའི་ཞལ་རས་ཟླ་བ་ཤར་བ་བཞིན་གདའ་པས། རིན་པོ་ཆེའི་ཞལ་ནས། བྱང་ཆུབ་སེམས་དཔའ་བྱ་དཀའ་བའི་སྦྱིན་པ་བྱར་ཡོད་པའི་དུས་སུ། བརྒྱགས་ཚད་ཁྱོད་རང་གིས་ཟོས་ནས་ཁྱོད་ལ་བསམ་རླག་ཉམ་པོ་ཆེ་ཟེར་བ་ཡིན་གསུངས་ནས་བཀྱོན་པས། གླང་རི་ཐང་པ་འདར་ཕྲི་ལི་ལི་བྱུང་ཞེས་གྲག ། སྣེའུ་ཟུར་པ་འདི་ཁྲོ་བོའི་དབང་པོ་མི་གཡོ་བ་ལ་བསྙེན་སྒྲུབ་མཐར་ཕྱིན་པ་ཞིག་ཡིན་པས་ལྷ་འདིའི་སྒོ་ནས་འགྲོ་དོན་མཛད་པ་ལ་ནུས་པ་ཐོན་པ་ཞིག་སྟེ། དགེ་བཤེས་པདྨ་བྱང་ཆུབ་བྱ་བ་ལ་ཀླུའི་གནོད་པ་བྱུང་ནས། ཁོང་གི་སྣང་བ་ལ་སྦྲུལ་གཅིག་ཐོད་བཞིན་དུ་དཀྲིས་ནས་སྦྲུལ་མགོ་དེ་དཔྲལ་བའི་སྟེང་ན་གདེངས་ཀ་བཞིན་ཡོད་པ་མིས་མཐོང་གི་དོགས་ནས་བཀབ་སྟེ་སྣེའུ་ཟུར་པའི་སྤྱན་སྔར་འོངས་པས། དེ་ང་དང་ཁྱོད་རང་མིན་པ་གཞན་གྱིས་མི་མཐོང་། སྦེད་མི་དགོས། ད་ང་དེའི་སྟེང་དུ་སྒོམས་དང་གསུངས་པས། ཁོས་དེ་བཞིན་དུ་བསྒོམས་པས་གར་སོང་ཆ་མེད་པར་སོང་། ལན་ཅིག་ར་སྒྲེང་ལ་བྱོན་པའི་ཚེ། ཕ་བོང་གཅིག་ལ་ཞབས་གཏད་དེ་ཞབས་སྒྲོགས་བཅིངས་པས་སྦྲུལ་དཀར་པོ་གཅིག་ཕ་བོང་འོག་དེ་ནས་འཐོན་ཏེ་སོང་། དེ་ན་མཛེ་པོ་ཅིག་ཡོད་པ་གཞན་ཅི་ཡང་མ་དགོས་པར་དེ་གཅིག་པུས་ནད་གསོས། དགེ་བཤེས་ཀྱི་ཞལ་ནས། བོད་ཀྱི་སྲུང་བའི་སྐོར་དུ་གཏོགས་པ་རྣམས་ཕྱོགས་གཅིག་ཏུ་བཞག་པ་བས། ངས་དམིགས་པ་སྐོར་གསུམ་གྱིས་མཛེ་གསོས་པ་མང་བ་ཡིན་གསུང་། ཁམས་པ་ལུང་པ་ལ་མི་མ་ཡིན་ཚན་ཅིག་གིས། སྨྱུག་རུམ་དུ་གཏོར་མ་གཏོང་དེར་འགྲོ་ཟེར། འོ་ན་སྣེའུ་ཟུར་དུ་གཏོར་མ་ཟར་མི་འགྲོ་འམ་བྱས་པས། དེ་ན་རྡོ་རྗེའི་ར་དང་མེ་རི་བཅས་པས་མི་ཚུད་ཟེར། སྣེའུ་ཟུར་པའི་ཞལ་ནས་བཀའ་རྒྱུད་འདི་བྱིན་གྱིས་བརླབས་པའི་བཀའ་བརྒྱུད་ཡིན་པས། གཏོར་མ་འདྲེ་ལ་མི་འཆོར་ཙམ་པའི་བཀའ་བརྒྱུད་ཡིན་གསུང་ངོ་། ། སྣེའུ་ཟུར་པས་དགེ་བཤེས་དགོན་པ་བ་ལ་གེགས་སེལ་བོགས་འདོན་གྱི་མན་ངག་མཐའ་དག་ཞུས་ཏེ་ཐུགས་ཉམས་སུ་བསྟར་བས་གཞན་གྱི་སྒོམ་གེགས་སེལ་བ་ལ་ཤིན་ཏུ་མཁས་པ་ཞིག་སྟེ། ཨ་མེས་ཚུལ་ཁྲིམས་འབར་བྱ་བས་གཙང་གཡས་རུར་ཕྱིན་ནས་རི་བོ་ཆེའི་སྒོམ་སེམས་འཛིན་བག་རེ་བསླབས་པ་ཅིག་བདོག་པར་གདའ་བས་སྤྱན་སྔར་འོངས་ཏེ་རྟོགས་པ་ཕུལ་བས། དེས་མི་འོང་གསུང་། འོ་ན་ཇི་ལྟར་བགྱི་ཞུས་པས། འདི་བཞིན་དུ་སྒོམས་དང་གསུང་བ་ལ། སྒོམ་བསླབ་ཉེས་བྱ་བ་ཡིན་པས་སྔར་གྱི་སྟེང་དུ་སོང་ནས་མ་བཏུབ། ཡང་གཅིག་བསླབས་པས་མ་བཏུབ་པས། ད་འོ་ན་ཅམ་གྱིས་ཞོག་ལ་ཞག་ཤས་གསོལ་བ་ཐོབ་ཅིག་གསུངས། དེ་ནས་ཞག་ཁ་ཡར་གསོལ་བ་བཏབ་པས་དགེ་བཤེས་ཀྱི་གཟིམ་ཁང་ནས་བཅོམ་ལྡན་འདས་ཤཱཀྱ་ཐུབ་པའི་སྐུ་མཐོ་གང་ཙམ་པ་འོད་ལྷག་པ་ཅིག་ནར་གྱིས་བྱུང་ནས་ཨ་མེའི་སྤྱི་བོར་ཐིམ་པ་སྙམ་བྱེད་ཙ་ན་དེ་ཉིད་དུ་ཏིང་ངེ་འཛིན་དུ་ལྷན་གྱིས་སོང་བས་དགའ་དྲགས་རྟོགས་པ་འབུལ་དགོས་སྙམ་ཕྱིན་པས་གཟིམ་ཁང་གི་སྒོ་ན་མིས་གཅེར་ནས་སྤྱན་སྔར་མ་ཐོན། ཕྱི་ནས་སྐེ་རྨྱང་རྨྱང་བྱས་པས་ཞལ་ནས། འོ་ཨ་མེས་དེ་ཙུག་འོང་བ་ཡིན་གསུངས་ནས་ཏིག་གིས་མཁྱེན་པ་ཞིག་བྱུང་ཞེས་གྲག་གོ ། བདག་ཉིད་ཆེན་པོ་འདི་ལ་གཞན་སེམས་ཤེས་པའི་མངོན་པར་ཤེས་པའང་རྒྱ་ཆེན་པོ་མངའ་སྟེ། སྣེའུ་ཟུར་པའི་སྤྱན་སྔ་ན་ཇོ་སྟན་ཚང་རོང་པ་བྱ་བའི་འདུལ་འཛིན་དེ་ནུབ་གཅིག་བཞིན་དུ་བསམ་པས། ཆས་རྐྱེན་མེད་པའི་ཁང་པ་འདི་བྲག་ཕུག་གཅིག་དང་ཁྱད་མེད། ཡུལ་དུ་འགྲོ་དགོས་སྙམ་པ་ཅིག་བྱུང་། སང་དགེ་བཤེས་དེས་ཉེ་གནས་བཏང་ནས་འདིར་ཤོག་དང་གསུང་། སྤྱན་སྔར་ཕྱིན་པས། འོ་བླ་མ་བསྟེན་པའི་དུས་སུ་ཁང་པ་ལ་བྲག་ཕུག་ཏུ་སྒོམ་པ་མིན། ཆས་རྐྱེན་མེད་ན་འདི་ནས་ལོངས་གསུངས་ནས། ནས་སྒྲོ་བ་གང་། མར་ཚུད་གཅིག ། ཇ་ཞིབ་མ་གང་གནང་། ཡང་ལྷོ་བྲག་པ་བཤིད་སྟོན་ཁ་འདར་བྱ་བ་ལ་དགེ་བཤེས་ཀྱི་ཞལ་ནས། ཁ་འདར་བ་ལ་འུར་སོངས། མ་ལ་གཉིད་མེད་ནས་ཟླ་བ་ཁྱུར་བོ་གཉིས་སོང་ན་གསུང་། དེར་ཡུལ་དུ་ཕྱིན་པས་མ་རྒན་ཤེད། ཁྱོད་མེད་པས་སྙིང་མ་དགའ་ནས་གཉིད་མེད་ནས་ཟླ་བ་ཁྱུར་པོ་གཉིས་ལོན་ཟེར་ཏེ་ཏིག་གིས་དགོངས། ཡང་དགེ་བཤེས་དགྱེར་གྱིས་སྣེའུ་ཟུར་པའི་སྤྱན་སྔར་བྱོན། དེ་ན་འཕྱིང་པ་དྲས་ནས་སྟན་ཆུང་གཅིག་གི་བཟོ་མཛད་ཀྱིན་གདའ། དེར་ཁོང་གི་ཐུགས་དགོངས་ལ། དགེ་བཤེས་འདི་ཐུགས་རྒྱུད་རང་ཇི་ཙམ་པ་ཡིན་ནམ། མངོན་ཤེས་མངའ་འམ་མི་མངའ་སྙམ་པ་ཅིག་བྱུང་ཙ་ན། འགྲམ་པ་ལ་ཐལ་ལྕག་ཅིག་རྒྱབ་ནས། ཨ་ན་ཅི་གདའ་ལེ་གསུངས། བདག་ཉིད་ཆེན་པོ་འདིས་རང་དང་གཞན་གྱི་ཚེ་རབས་སྔ་ཕྱི་མང་པོ་མཁྱེན་པ་ནི། དགེ་བཤེས་སྣེའུ་ཟུར་པ་ཉིད་ཀྱི་ཞལ་ནས། ང་སྐྱེ་བ་སྔ་མ་མི་དབུལ་པོ་ཞིག་ལས་ཚེ་འཕོས་པ་ཡིན། སྐྱེ་བ་ཕྱི་མ་དགའ་ལྡན་དུ་སྨོན་ལམ་འདེབས་གསུངས། བདག་ཉིད་ཆེན་པོ་འདི་ལ་ཏིང་ངེ་འཛིན་བརྟན་པོའི་མཐུས་རྫུ་འཕྲུལ་དང་མངོན་ཤེས་ཀྱང་མངའ་སྟེ། ལན་ཅིག་ཙ་ན་ཉེ་གནས་ཞང་བཙུན་བྱ་བས་ན་བཟའ་ཁུར་ནས་ཕུ་ཆུང་པའི་འབུམ་པའི་རྩ་ནས་ཕར་དཔོན་གཡོག་གཉིས་ཀྱིས་བྱོན། འབུམ་པའི་ཟུར་དུ་སླེབ་ཙ་ན་སྟོན་པ་ཤཱཀ་ཚུལ་གྱིས་ཕྱག་བྱས། ཕྱག་གཏོད་མཛད་པའི་བར་དེར་ཞང་བཙུན་གྱིས་ན་བཟའ་རྣམས་ཐང་ལ་བཞག་ནས་སྟོན་པ་ཤཱཀ་ཚུལ་ལ་ཕྱག་བྱས། ན་བཟའ་ཁུར་ནས་འབུམ་ཆུང་ཟུར་དུ་འོངས་ཙ་ན་ཇི་ལྟར་བྱས་ཆ་མེད་པར་གཟིམ་ཁང་ན་ཕར་ཡུད་བཞུད་པ་ཅིག་བྱུང་ཞེས་གྲག་གོ ། ཡང་ནུབ་གཅིག་ཆར་ཆེན་པོ་བྱུང་བས་གཟིམ་ཁང་གི་ཝ་རྩ་ཤོར་ནས་ཆུ་ནར་གྱིས་བྱུང་བས། ཉེ་གནས་ཀྱིས་ཇི་ལྟར་མཛད་དམ་སྙམ་ནས་བརྫུས་བསྡད་པས། གཟིམ་མལ་ནས་ཀོག་གིས་བཞེངས་ནས་ས་སྐས་ལ་ཐེགས་པ་བཞིན་རྩེན་གྱིས་གཤེགས་ཏེ་ཝ་ཁ་དེར་ཅག་ཅག་ཅིག་མཛད་ནས་ཡང་ས་སྐས་ལ་འབྱོན་པ་བཞིན་བྱོན་པ་ཉེ་གནས་ཀྱིས་དངོས་སུ་མཐོང་། ཡང་གྲོག་ཅེས་བྱ་བའི་ཡུལ་ན་ཤ་འཛུལ་སྨོན་ནེ་བྱ་བ་དད་གུས་ཤིན་ཏུ་ཆེ་བ་ཡོད་པ་ཚེའི་དུས་བྱས་པས་ནངས་གཅིག་ཞལ་ནས། ཉེ་གནས་ལ་འུ་ཅག་གི་ཡང་གྲོག་གི་ཡོན་བདག་དེ་ཤི་བ་འདྲ་གསུང་། ཇི་ཙུག་གདའ་ཞུས་པས། ད་ནང་ཡོན་བདག་དེ་གོས་གསར་པ་ཅིག་གྱོན། མེ་ཏོག་ཚན་ཞིག་ཐོགས་ནས་ངའི་དྲུང་དུ་བྱུང་གསུངས་ཏེ། དེའི་དུས་ཁོ་ནར་ཚེའི་དུས་བྱས་པ་ཇི་ལྟ་བ་བཞིན་མཁྱེན་པར་གདའ། ཡང་བྱ་ཡུལ་བ་ཆེན་པོས་སྤྱན་སྔ་གཤེགས་པའི་སྐུ་སྐལ་ཞིག་དང་ན་བཟའ་ཞིག་སྐྱེལ་དུ་བྱོན། དེར་གསུང་གླེང་འདྲ་མཛད་དེ། སྣེའུ་ཟུར་པའི་ཞལ་ནས་དུས་ཚོད་འདི་ཁོ་ན་ལ་འདས་ཏེ་འོང་། ཚེས་གྲངས་འདིའི་ཉི་མའི་དུས་ཚོད་འདི་ཙམ་ལ་ཤར་ཕྱོགས་ནས་འོད་ཟེར་ཞིག་བྱུང་ནས་འཇམ་དཔལ་སྐུ་མདོག་དམར་སེར་ཞིག་ནམ་མཁའ་ལ་གཤེགས་པའི་སྣང་བ་ཅིག་བྱུང་། ཕྱིས་འདི་ལྟར་བརྩིས་ཙ་ན་དུས་ཚོད་དང་ཚེས་གྲངས་ཀྱང་ཏིག་གེ་པར་འདུག་པ་ལ། རྟོག་པ་ཅིག་གིས་བསྒྲིགས་ནས་ཆོས་ཞུ་རྒྱུ་འདྲ་ཡོད་པ་མ་ཞུས་གསུངས་ནས་འགྱོད་པ་མཛད་དོ། ། དགེ་བཤེས་སྣེའུ་ཟུར་པ་དེ་གཙོ་བོར་དགེ་བཤེས་དགོན་པ་བ་ལ་བརྟེན་ཞིང་སྐུ་མཆེད་གསུམ་ལའང་བརྟེན་ལ། དགེ་བཤེས་སྤྱན་སྔ་བ་ལ་མི་གཡོ་བའི་སྒྲུབ་སྐོར་ཞུས། དགེ་བཤེས་དགོན་པ་བ་དང་སྤྱན་སྔ་བ་གཉིས་ཀས་གནང་བའི་ཇོ་བོ་མི་གཡོ་བའི་བསྙེན་པ་མང་དུ་མཛད་པས་ཞལ་གཟིགས། དགེ་བཤེས་སྒྲེ་པ་དེ་སྤྱན་སྔའི་སློབ་མར་གདའ་ན། ཇོ་བོ་མི་གཡོ་བའི་ཡི་གེ་བཅུ་པ་ཁོ་ན་བགྲངས་པས་མི་གཡོ་བ་དམར་པོ་ཞལ་གཟིགས། ཀ་མ་བ་ལ་དྲིས་པས་ཆ་མེད་བཟླས་པ་འདྲ་བགྱིས་དང་གསུང་། དགེ་བཤེས་ཀྱི་སྤྱན་སྔར་བྱོན་པས། འོ་སྐྱེས་བུ་དད་པས་གོ་བཅད་ནས་འདུག་གི་གསུང་། འོ་ན་དམར་པོར་འོང་བ་ཇི་ལྟར་ལགས་ཞུས་པས་ཁྱོད་ཐུགས་རྗེ་ཆེ་བའི་རྟགས་ཡིན་གསུང་། འོ་ན་དེའི་སྔོན་དུ་ཇོ་མོའི་སྣང་བ་ཅིག་ཀྱང་གདའ་ན་ཞུས་པས། ཡི་དམ་གྱི་ལྷ་གང་གི་ཞལ་མཐོང་ཡང་ལས་ཀྱི་ལྷ་མོ་ཡིན་པས་སྔོན་ལ་ཇོ་མོའི་ཞལ་མཐོང་བ་ཆོས་ཉིད་ཡིན་གསུང་། དེར་དགེ་བཤེས་སྒྲེ་པས་དགེ་བའི་བཤེས་གཉེན་ལ་ཡང་དེ་ལྟ་བུའི་ཡོན་ཏན་མངའ་འམ་ཞུས་པས་ང་ལ་བསྟན་པའི་སྒོར་ཞུགས་མ་ཐག་ནས་དེ་འདྲའི་སྣང་བ་མང་དུ་བྱུང་གསུང་། དགོན་པ་བའི་གདམས་པ་ལ་བརྟེན་ནས་དམ་ཚིག་གསུམ་བཀོད་པའི་རྒྱལ་པོའི་སྒོམ་ཟླས་མཛད་པས་ཀྱང་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པའི་ཞལ་གཟིགས་སོ། ། དགེ་བཤེས་སྣེའུ་ཟུར་པ་རང་ཉིད་སྨིན་པར་མ་ཟད་གདུལ་བྱ་གཞན་གྱི་རྒྱུད་བྱིན་གྱིས་རློབས་པ་ལའང་མངའ་བརྙེས་པ་ཞིག་སྟེ། དགེ་བཤེས་སྣེའུ་ཟུར་པའི་དྲུང་ན་འདུག་པ་ཀུན་ཀྱང་ལས་དང་ཉོན་མོངས་པ་འགོ་ནོན་པ་དང་། ཡོན་ཏན་རིན་པོ་ཆེ་རྣམས་མེ་ལོང་གི་ངོས་ལ་ཤར་བ་བཞིན་གསལ་པ་ཆོས་ཉིད་ཡིན། དབྱར་གཅིག་ཆར་ཆེས་པས་གཟིམ་ཆུང་གི་རྩིག་པའི་ཟུར་དེ་ཞིག ། དེར་ཞང་བཙུན་དགེ་འདུན་གྱིས་གཡོག་བྱས་ནས་འདག་པ་དང་རྡོ་བཏང་། དགེ་བཤེས་ཀྱི་ཐུགས་དམ་འཕྲེང་བ་དེ་དབུ་ལ་བསྐོར་ནས་རྩིག་པ་མཛད་པའི་ཚེ་དེ་མ་ཚར་གྱི་རིང་ལ་ཞང་བཙུན་གྱིས་ཀྱང་མི་ཕྱུགས་མང་པོའི་སེམས་ཤེས་པ་བྱུང་ཞེས་ཟེར། དགེ་བཤེས་སྣེའུ་ཟུར་པས་སྐལ་བ་དང་ལྡན་པ་གཞན་མང་པོ་ལ་ལམ་རིམ་གྱི་ཁྲིད་རྒྱ་ཆེར་སྩལ་ཏེ། དགེ་བའི་བཤེས་གཉེན་དགོན་པ་བ་དེ་རང་ལ་བློ་གཏད་པའི་སློབ་མ་རྣམས་ལ་དབྱར་དུས་ལམ་རིམ་ཚར་རེ་དང་དགུན་དུས་ལམ་རིམ་ཚར་རེ་གནང་བ། དགེ་བཤེས་སྣེའུ་ཟུར་པའང་དགོན་པ་བའི་རྣམ་ཐར་རྗེས་སུ་བསྐྱངས་ཏེ་ལམ་གྱི་རིམ་པ་དེ་དབྱར་ཚར་རེ་དགུན་ཚར་རེ་གསུང་། སྐལ་བ་དང་ལྡན་པ་མང་པོ་ལམ་གྱི་རིམ་པ་ལ་ཁྲིད་པས་བསྐྱང་བཏུབ་པར་བྱུང་གསུང་། ལམ་རིམ་གྱི་ཁྲིད་རྒྱས་པར་གསུངས་པ་ལ་སློབ་མས་ཟིན་བྲིས་སུ་བྱས་པའང་མང་དུ་ཡོད། དེ་ལ་བརྟེན་ནས་བོད་འདིར་སྣེའུ་ཟུར་པའི་ལུགས་ཀྱི་ལམ་གྱི་རིམ་པ་ཤིན་ཏུ་དར་བར་བྱུང་ངོ་། ། དེ་ལྟར་བསྟན་པ་ལ་བྱ་བ་རྒྱ་ཆེན་པོ་མཛད་པས་སློབ་མ་མཐའ་ཡས་པ་བྱུང་ཞིང་། པོ་ཏོ་བ་གཤེགས་ནས་གྲྭ་པ་མང་པོ་སྣེའུ་ཟུར་དུ་ལྷགས། སྨྱུག་རུམ་པ་འདའ་པའི་དུས་སུ། ང་ལ་བླ་མར་འཛིན་པ་རྣམས་སྦྲས་ཐོང་པ་ན་དགོན་པ་བའི་སློབ་མ་མི་གཡོ་བའི་བསྐྱེད་རིམ་ལ་བརྟན་པ་ཐོབ་པ་ཅིག་ཡོད་པས་དེར་སོངས་གསུངས་ནས་ཁོང་གི་གྲྭ་པ་མང་པོ་ཞིག་ཀྱང་བྱོན། ཁམས་པ་ལུང་པ་གཤེགས་རྗེས་ཇ་རྫ་ཚུན་ཆད་ཁུར་ནས་བྱུང་བས་གྲྭ་པ་དེ་ཡང་འུར་གྱིས་སོང་། ཚ་རོང་གི་ཇོ་སྟན་ནག་པོ་ལ་སོགས་པའི་འདུལ་བ་འཛིན་པ་ཆེན་པོ་མང་པོས་ཀྱང་ཞབས་ལ་གཏུགས། གཞན་ཡང་དགེ་བའི་བཤེས་གཉེན་རིན་ཆེན་སྒང་པ། ལྷ་འབྲི་སྒང་པ། འདུལ་འཛིན་ཐག་མ་བ་སོགས་བསྟན་པ་ཡོངས་རྫོགས་འཛིན་པའི་དགེ་བའི་བཤེས་གཉེན་ཡང་མང་དུ་བྱུང་ངོ་། ། ཚོགས་པ་ཡང་མང་དུས་སུ་ཉིས་སྟོང་ལྷག་ཙམ་འདུས། ཕུ་ཆུང་བའི་རྟེན་འབྲེལ་དེ་ཡང་མཁས་པའི་ཚད་ཅིག་མཁྱེན། བསླབ་ཕྱོགས་དང་ཕ་རོལ་ཏུ་ཕྱིན་པ་དེ་ཡང་མཁས་པའི་ཚད་ཅིག་མཁྱེན། ལན་ཅིག་བརྒྱད་སྟོང་འགྲེལ་ཆེན་ཞིག་གསུངས་པས་སྐབས་དང་པོ་གཅིག་པུ་ལ་ཟླ་བ་གསུམ་སོང་གསུངས་སོ། ། བདག་ཉིད་ཆེན་པོ་འདི་སྤྲུལ་པའི་སྐུར་ཡང་གྲགས་ཏེ། དེ་དུས་ཕན་ཡུལ་དུ་ནད་ཡམས་ཆེན་པོ་བྱུང་བས་མི་མང་པོའང་ཤི། དེ་ནས་མི་མ་ཡིན་རྣམས་སྣེའུ་ཟུར་དུ་འགྲོ་བར་བརྩམས་པ་ན་ནམ་མཁའ་ལས། དེ་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྲུལ་པ་ཡིན་ནོ་བྱ་བའི་སྒྲ་བྱུང་བས་མི་མ་ཡིན་རྣམས་ཕྱིར་ལོག་སྟེ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྲུལ་པར་ཡང་གྲགས་སོ། ། དེ་ལྟར་དགེ་བའི་བཤེས་གཉེན་སྣེའུ་ཟུར་པས་བསྟན་པའི་བྱ་བ་རྒྱ་ཆེན་པོ་མཛད་ནས་སྐུ་དངོས་ཀྱི་གདུལ་བྱ་རྣམས་ཕལ་ཆེར་རྫོགས་ཏེ་ཞིང་གཤེགས་པ་ལ་ཉེ་བ་ན་ཆོས་ཤིག་གནང་བའི་དུས་སུ་བྱང་ཤར་མཚམས་དེར་བྲག་བརྡབས་པ་འདྲ་པའི་སྒྲ་ཆེན་པོ་དང་། འོད་དང་ས་གཡོ་བ་ལ་སོགས་པའང་བྱུང་། དེ་ནས་སྐུ་ཁམས་ཅུང་ཟད་ལྟེམ་པ་ཅིག་བྱུང་བ་ལ་ཉེ་གནས་དཔོན་རྡོག་ཆུང་བ་བྱ་བ་སྣེའུ་ཟུར་པ་ཇི་སྐད་གསུང་བ་བཞིན་སྒྲུབ་པ་ཅིག་ཡོད་པ་དེས་ལྷ་རྗེ་ཡེ་འབྱུང་བྱ་བའི་སྨན་པ་ཅིག་བོས་ནས་སྦྱོང་ཆུང་ཅིག་བྱས་པས་འཕྲོ་མ་ཆོད་ནས་སྐུ་ཤེད་དེ་ཞན་ཙམ་བྱུང་། ནམ་མཁའ་ལས་བདུད་རིགས་ཀྱི་ཡི་དྭགས་མིང་འདི་ཞེས་བྱ་བས་དགེ་བཤེས་ཀྱི་ཐུགས་དམ་ལ་བར་ཆད་བྱེད་པ་འདུག་པས་བཟླས་པ་གྱིས་བྱ་བའི་སྒྲ་སྤྱན་སྔར་བཞུགས་པ་རྣམས་ཀྱིས་ཀྱང་ཚོར་བར་བྱུང་བས། ཁྱེད་རྣམས་ཀྱིས་སྔགས་རིང་དེ་ལ་མིང་སྤེལ་ཆུག་ལ་བཟླས་པ་གྱིས་གསུང་བས་དགེ་འདུན་རྣམས་ཀྱིས་བཟླས་པ་བྱས། དེ་ནས་ཞག་བདུན་སོང་བ་ན་སྨན་པ་གཅིག་དང་ཚུལ་ཁྲིམས་འོད་ཟེར་གཉིས་ཞབས་དྲུང་ན་ཡོད་དུས་སྐྱིལ་ཀྲུང་ལམ་གྱི་མཛད་ནས་ཐུགས་དམ་དུ་ལྷན་གྱིས་སོང་། ཁོང་གཉིས་ཀྱིས་བལྟས་པས་ཞལ་ཀོ་ཕྱང་གིས་སོང་བྱུང་ཙ་ན་སྤྱི་བོ་ནས་ཡར་ལ་འོད་འཇག་མ་ཙམ་ཞིག་དཀར་ནར་གྱིས་སོང་། ཕྱི་ན་ཡོད་པ་ཀུན་གྱིས་སྦ་ལྕག་ཙམ་དཀར་ནར་ནར་མཐོང་། དེ་ཇེ་ཆེ་ལ་སོང་ནས་ནམ་མཁའ་ལ་འོད་རྫ་མ་ཙམ་ཞིག་ཏུ་སོང་བ་ཞིག་བྱུང་ངོ་། ། དེ་ལྟར་དགེ་བའི་བཤེས་གཉེན་སྣེའུ་ཟུར་པ་དེ་དགུང་ལོ་བདུན་ཅུ་རྩ་བདུན་པ་ 1138 ས་ཕོ་རྟའི་ལོ་ལ་ཞིང་གཤེགས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། སློབ་མ་རྣམས་ཀྱིས་སྤུར་གང་དུ་སྦྱོང་སྙམ་པ་ལ་སྤུར་ལ་འཇའ་གཅིག་ཟུག་པའི་སྣེ་མོ་ཤོད་དེ་ན་ཞིང་གཅིག་ཡོད་པའི་སྟེང་དུ་ཟུག་དེར་འོད་གཡུལ་ཐང་ཙམ་ཞིག་ཞག་གཉིས་གསུམ་དུ་བྱུང་བས། དགེ་བཤེས་ཉིད་ཀྱི་བསྟན་པ་ཡིན་ཏེ་འོང་སྙམ་ནས་དེར་སྤུར་སྦྱངས་པའི་དུས་ཉི་མའི་དཀྱིལ་འཁོར་གྱི་དབུས་ནས་འོད་ཟེར་ཅིག་བྱུང་བ་སྤུར་ཁང་ལ་ནར་གྱིས་ཟུག་པས་གདུགས་ཀྱི་ཡུ་བ་འདྲ་བ་ཅིག་བྱུང་། ཉི་མ་དེ་ལ་སྤྲིན་སྲས་སེ་བ་ཅིག་བྱུང་བས་འཇའ་ཚོན་གདུགས་འདྲ་བས་བསྐོར་བའང་བྱུང་། སྤུར་ཁང་གི་ཁྲིའི་ཟུར་བཞི་ལ་འཇའ་ཚོན་འཕྱར་དར་འདྲ་བ་བཞི་དང་། གཞན་ཡང་འཇའ་ཚོན་འཕན་འདྲ་བ་དང་རྒྱལ་མཚན་འདྲ་བ་མང་པོའང་བྱུང་། དེའི་དུས་སུ་ལྷ་བཀའ་གདམས་པ་དེ་ཞབས་ཏོག་ཀྱང་ཆེ། མི་ཡང་ཆེ་བས་མང་བསྐོལ་ཞིག་བྱས་ནས་འདི་ལ་རྟེན་ཁྱད་པར་ཅན་བྱོན་འོང་བས། དེ་བྱོན་ན་འམ་བུ་ལ་ཐུགས་ལ་འདོགས་པར་ཞུ་ཟེར་ནས་སྤྱི་ཞུས་བྱས། གདུང་རྣམས་གདན་དྲངས་པའི་དུས་སུ་དགོན་པ་བས་ཕྱག་གཡས་པ་བཞག་པའི་རྗེས་ཀྱི་དབུ་ཐོད་དེ་ལྷ་བཀའ་གདམས་པ་ལ་ཕུལ་བས་དངུལ་གྱི་གདུང་རྟེན་ཞིག་བཞེངས། ཕྱིས་འབྲི་སྒང་ནས་གདན་དྲངས་ཏེ་དོན་སྟེང་གི་གདུང་རྟེན་ཆེན་མོའི་ནང་ན་བཞུགས། ཕྱག་མཉལ་སྨད་གསེར་ཕྱེ་འབུམ་པའི་ནང་ན་བཞུགས་པར་གྲགས། ཞལ་ཀོ་རིན་ཆེན་སྒང་གི་མཆོད་རྟེན་ནང་ན་བཞུགས། གཞན་ཡང་རིང་བསྲེལ་དཔག་ཏུ་མེད་པ་བྱོན་ནོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་སྣེའུ་ཟུར་པ་ལ་གསོལ་བ་འདེབས་ཤིང་གསོལ་བ་བཏབ་ན་སེམས་རྒྱུད་ལས་སུ་རུང་བ་དང་། དབེན་པར་སྒྲུབ་ཚུགས་ཟིན་པ་དང་། སྒྲུབ་པ་བྱེད་པ་ལ་མི་མ་ཡིན་གྱི་བར་ཆད་མི་འབྱུང་བ་དང་། ལྷག་པར་ཀླུ་ནད་ཞི་བ་ལ་ཤིན་ཏུ་བསྔགས་སོ། ། གཙོ་བོར་ནི་བདག་ཉིད་ཆེན་པོ་འདིའི་མཛད་པ་རྣམ་ཐར་རྣམས་དྲན་པར་བྱས་ལ་སྤྱིར་སྐྱེ་བོ་མང་པོ་དང་བསྲེ་བསླད་མི་བྱ་བ་དང་། ལྷག་པར་གྲོང་ཁྲོད་དུ་རྒྱུ་བ་སྤངས་ཏེ་དབེན་པའི་གནས་སུ་ལམ་གྱི་རིམ་པའི་ཉམས་ལེན་མཐར་ཕྱིན་པ་ཞིག་བྱའོ། ། ། །
འདི་ཡན་དབུས་གཙང་གི་མཁས་གྲུབ་རྣམས་རིག་མཛོད་དུ་བཀོད་ཟིན།
༈ འདུལ་བའི་སྡེ་སྣོད་ཀུན་འཛིན་ཐག་མ་བ། ། ཞེས་བསྔགས་པ། དགེ་བཤེས་སྣེའུ་ཟུར་པའི་ཐུགས་སྲས་འདུལ་འཛིན་ཆེན་པོ་ཐག་མ་བ་ནི། སྐུ་གཞོན་ནུའི་དུས་ནས། སྤྱིར་འཁོར་བའི་ཆོས་ཐམས་ཅད་ལ་ཞེན་པ་ལོག་ཅིང་། ཁྱད་པར་ཁྱིམ་གྱི་གནས་ནི་ཉོན་མོངས་པ་དང་ཉེས་པར་སྤྱོད་པ་མང་པོའི་འབྱུང་གནས་སུ་མཐོང་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་། སྤྱིར་སྡེ་སྣོད་གསུམ་ག་ལ་སྦྱངས་ཤིང་། ཁྱད་པར་འདུལ་འཛིན་ཆེན་པོ་ཤ་མི་སྨོན་ལམ་ཚུལ་ཁྲིམས་ཚུལ་བཞིན་དུ་བསྟེན་ཏེ་འདུལ་བ་ལུང་སྡེ་བཞིའི་ཚིག་དོན་མཐའ་དག་ལ་མཁས་པར་བསླབས། འདུལ་བ་ནས་ཇི་ལྟར་གསུངས་པའི་བཅས་མཚམས་ཕྲ་རགས་ཐམས་ཅད་ཕྱག་ལེན་ལ་བཏབ་སྟེ་ཚུལ་བཞིན་དུ་བསྲུང་བར་མཛད་པས་འདུལ་འཛིན་ཆེན་པོར་གྲགས། དགེ་བའི་བཤེས་གཉེན་སྣེའུ་ཟུར་པའི་ཞབས་དྲུང་དུ་བྱོན་ནས་སྣེའུ་ཟུར་པ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་པོ་ཆེ་བྱང་ཆུབ་ལམ་གྱི་རིམ་པའི་ཁྲིད་ཡོངས་སུ་རྫོགས་པར་གསན་ཏེ་ཉམས་སུ་བླངས་ནས་མྱོང་བ་ཐོན་པར་མཛད། སྐལ་བ་དང་ལྡན་པ་གཞན་དག་ལའང་རྒྱ་ཆེར་སྤེལ་ཞིང་སྟོད་ལུང་ཐག་མ་བཟུང་ནས་འདུལ་བའི་བཤད་སྲོལ་རྒྱ་ཆེར་སྤེལ་བས་རང་གི་དབོན་རྒྱུད་ཐག་མ་བ་ཕྱི་མ་དཔལ་ཆེན་རྡོར་གཞོན་དང་འདུལ་འཛིན་ཆེན་པོ་སྦལ་ཏི་ཇོ་སྲས་ལ་སོགས་པའི་འདུལ་འཛིན་མཁས་པ་མང་དུ་བྱུང་ཞིང་། ཁྱད་པར་སྤྲུལ་པའི་སྐྱེས་མཆོག་སངས་རྒྱས་དཔོན་གྱིས་ཀྱང་འདིའི་ཞབས་ལ་གཏུགས་ཏེ་འདུལ་བ་མཁས་པར་བསླབས་ནས་སྐལ་བ་དང་ལྡན་པ་བགྲང་བ་ལས་འདས་པ་ལ་འདུལ་བ་རྒྱ་ཆེར་སྤེལ་བས་འདུལ་བའི་བཤད་སྲོལ་གྱི་འཕྲིན་ལས་ཆེར་བྱུང་བས་རྗེ་བདག་ཉིད་ཆེན་པོས་ཀྱང་། འདུལ་བའི་སྡེ་སྣོད་ཀུན་འཛིན་ཐག་མ་བ། ། ཞེས་བསྔགས་པ་མཛད་དོ། ། འདུལ་འཛིན་ཐག་མ་བ་འདིའི་མཚན་དངོས་ནི་ཀ་བ་དར་སེང་ཞེས་བྱ་ལ། འདུལ་འཛིན་ཐག་མ་བ་ནས་བརྒྱུད་པའི་ལམ་རིམ་གྱི་ཁྲིད་ཀ་ནི་ལྷོ་བྲག་ཕྱོགས་སུ་རྒྱ་ཆེར་འཕེལ་ཏེ་ལྷོ་བྲག་མཁན་ཆེན་ནམ་མཁའ་སེང་གེས་འདུལ་འཛིན་ཐག་མ་བའི་ཞབས་ལ་གཏུགས་ཏེ་དགོན་པ་བ་ནས་བརྒྱུད་པའི་ལམ་རིམ་གྱི་ཁྲིད་རྫོགས་པར་གསན། མཁན་ཆེན་ནམ་མཁའ་སེང་གེས། མཁན་ཆེན་ནམ་མཁའ་རྒྱལ་པོ་ལ་གནང་། དེས་མཁན་ཆེན་སེང་གེ་བཟང་པོ་ལ་གནང་། དེས་མཁན་ཆེན་རྒྱལ་སྲས་བཟང་པོ་ལ་གནང་། དེས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ལ་གནང་སྟེ། ལྷོ་བྲག་མཁན་ཆེན་ནམ་མཁའ་སེང་གེའི་རྣམ་ཐར་ནི་ད་ལྟ་ཉིད་དུ་འཆད་ལ། མཁན་ཆེན་ནམ་མཁའ་རྒྱལ་པོ་ནས་ལྷོ་བྲག་གྲུབ་ཆེན་གྱི་བར་བླ་མ་བཞི་པ་འདིའི་རྣམ་ཐར་ནི་འོག་ཏུ་དགེ་བཤེས་སྤྱན་སྔ་བ་ནས་བརྒྱུད་པའི་བཀའ་གདམས་གདམས་ངག་པའི་བླ་མ་རྣམས་ཀྱི་རྣམ་ཐར་འཆད་པའི་སྐབས་སུ་འཆད་དོ། ། འདུལ་འཛིན་ཐག་མ་བ་འདིའི་རྣམ་ཐར་རྒྱས་པ་མ་མཐོང་བས་སླར་རྙེད་ན་འདིར་བསྣན་པར་བྱའོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་འདུལ་འཛིན་ཐག་མ་བའི་རྣམ་ཐར་དྲན་པར་བྱས་ལ་གསོལ་བ་གདབ་པ་དང་། བྱང་ཆུབ་ལམ་རིམ་ལ་བློ་སྦྱོང་བའི་ཚེ་འདུལ་བའི་བཅས་མཚམས་ཡལ་བར་དོར་ནས་ཆོས་གཞན་ཞིག་ལ་བློ་སྦྱོང་བ་སྐད་བྱེད་པ་རྩ་བ་མེད་པའི་ཡལ་ག་འཚོལ་བའི་ངལ་བ་མི་བྱ་བར། བསྟན་པའི་རྩ་བ་འདུལ་བའི་བསླབ་བྱ་ལ་ནན་ཏན་དུ་བྱས་ནས་ལམ་གྱི་རྩ་བ་ཚུགས་པ་ཞིག་བྱའོ། ། ། །
༈ བརྩོན་པས་སྒྲུབ་པ་ལྷུར་ལེན་ནམ་སེང་ཞབས། ། ཞེས་བསྔགས་པ། ལྷོ་བྲག་མཁན་ཆེན་ནམ་མཁའ་སེང་གེ་ནི། ཆོས་རྒྱལ་ཁྲི་སྲོང་ལྡེའུ་བཙན་གྱི་ཆོས་བློན་ཤུད་ཕུ་དཔལ་གྱི་སེང་གེའི་རྒྱུད་དུ་ལྷོ་བྲག་ཏུ་སྐུ་འཁྲུངས། སྔགས་རྙིང་མའི་ཁྱིམ་བཙུན་གྱི་རིགས་བརྒྱུད་ཡིན་ཡང་སྔོན་ཡུན་རིང་པོ་ནས་ལམ་ལ་སྦྱངས་པའི་བག་ཆགས་ཀྱི་མཐུ་བརྟས་པས་འཁྲུངས་ཙམ་ཉིད་ནས་ཆོས་འབའ་ཞིག་སེམས་ཤིང་སྨྲ་ཤེས་པ་ནས་བཟུང་དམ་པའི་ཆོས་འདུལ་བ་ལ་མོས་ཤིང་བཀའ་གདམས་ལམ་རིམ་ལ་མོས་པ་རྩེ་གཅིག་བྱེད་པ་ཞིག་བྱུང་ནས་དགུང་ལོ་བཅུ་གསུམ་པ་ལ་དགྲ་བཅོམ་པ་སྦལ་ཏི་ཇོ་སྲས་ཀྱི་ཞབས་ལ་གཏུགས་ནས་རབ་ཏུ་བྱུང་། འདུལ་བའི་གསན་སྦྱོང་མཐར་ཕྱིན་པར་མཛད། སྔོན་གྱི་ལས་འབྲེལ་བཟང་པོས་འདུལ་འཛིན་ཐག་མ་བ་དང་མཇལ། གུས་པ་ཆེན་པོས་གསོལ་བ་བཏབ་པ་ན་འདུལ་འཛིན་ཐག་མ་བས་ཚེ་དང་ལྡན་པའི་ཚུལ་ཁྲིམས་འགོ་ཐོན་པ་འོང་གི་གསུང་། དེ་ནས་འདུལ་འཛིན་ཐག་མ་བ་ཆེན་པོ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་རྒྱལ་བའི་གསུང་རབ་ཀུན་གྱི་སྙིང་པོ་བྱང་ཆུབ་ལམ་གྱི་རིམ་པའི་ཁྲིད་བཀའ་གདམས་གཞུང་པའི་བཤད་སྲོལ་ལྟར་གསན་ནས་ཐུགས་སུ་ཆུད་པར་མཛད། ལམ་ཐུན་མོང་བའི་སྟེང་དུ་ཐུན་མོང་མིན་པ་རྡོ་རྗེ་ཐེག་པ་ལ་སློབ་པའི་ཕྱིར་ཐག་མ་བ་ཆེན་པོས་མི་གཡོ་བ་དཀར་པོ་ལྷག་པའི་ལྷར་ཟུངས་གསུངས་ནས་དེའི་སྒྲུབ་ཐབས་དང་མན་ངག་གནང་བ་ལྟར་བསྒྲུབས་པས་ཞལ་གཟིགས་ཐུན་མོང་དང་ཐུན་མོང་མིན་པའི་ལམ་གྱི་རིམ་པ་ལ་བརྩོན་པ་ཤུགས་དྲག་ལ་རྒྱུན་རིང་བ་མཛད་པས་མྱོང་བ་ཕུལ་ཕྱིན་ཐོན། དོན་འདི་ལ་དགོངས་ནས་རྗེ་ཐམས་ཅད་མཁྱེན་པས། བརྩོན་པས་སྒྲུབ་པ་ལྷུར་ལེན་ནམ་སེང་ཞབས། ། ཞེས་བསྔགས་སོ། ། དེ་ནས་མཁན་ཆེན་ནམ་མཁའ་སེང་གེས་དགེ་བའི་བཤེས་གཉེན་དོན་སྟེང་པ་ལ་སྒྲོལ་མའི་ཆོས་སྐོར་ཞུས། གཞན་ཡང་དམ་ཚིག་གསུམ་བཀོད། ཛམ་བྷ་ལ། ཚོགས་བདག་རྣམས་ཞུས་ཏེ་བསྒྲུབས་པས་ལྷ་དེ་དང་དེའི་ཞལ་གཟིགས། དེ་ལྟར་བརྩོན་པ་ཆེན་པོས་སྒྲུབ་པ་རྒྱུན་རིང་དུ་མཛད་ནས་རང་ཉིད་མི་ཉམས་པའི་གདེང་ཐོབ་པ་ན་རང་གི་དབོན་སྲས་མཁན་ཆེན་ནམ་མཁའ་རྒྱལ་པོ་སོགས་སྐལ་བ་དང་ལྡན་པ་མཐའ་ཡས་པ་ལ་བྱང་ཆུབ་ལམ་གྱི་རིམ་པའི་ཁྲིད་རྒྱ་ཆེར་སྤེལ། ལྷོ་བྲག་ཕྱོགས་སུ་གཞི་གསུམ་གྱི་ཕྱག་ལེན་སོགས་འདུལ་ཁྲིམས་རྣམ་པར་དག་པ་འཕེལ་བར་མཛད་དེ་ལྷོ་བྲག་སྒྲོ་བ་དགོན་པ་སོགས་ཀྱི་མཁན་པོ་མཛད་དེ་ལྷོ་ཕྱོགས་སྤྱི་དང་ཁྱད་པར་ཤུད་ཕུ་པའི་རྒྱུད་ལ་བཀའ་གདམས་བསྟན་འཛིན་རིམ་པར་བྱོན་པ་ཐམས་ཅད་མཁན་ཆེན་འདིའི་བཀའ་དྲིན་ལས་བྱུང་ངོ་། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་མཁན་ཆེན་ནམ་མཁའ་སེང་གེ་ལ་གསོལ་བ་འདེབས་ཤིང་དམ་པ་འདིའི་རྣམ་ཐར་ལྟར་འདུལ་བའི་བཅས་མཚམས་དག་པ་གཞིར་བཟུང་ནས་བྱང་ཆུབ་ལམ་གྱི་རིམ་པ་སྒོམ་པ་ལ་བརྩོན་པ་ཆུ་བོའི་རྒྱུན་བཞིན་བྱའོ། ། ། །
༈ རྒྱལ་བའི་གདུང་འཚོབ་བཤེས་གཉེན་པོ་ཏོ་བ་སོགས་བཀའ་གདམས་
གཞུང་པ་བའི་བླ་མ་རྣམས་ཀྱི་རྣམ་ཐར།
༈ འབྲོམ་རིན་པོ་ཆེ་ནས་དགེ་བའི་བཤེས་གཉེན་པོ་ཏོ་བ་ལ་བརྒྱུད་པའི་བཀའ་གདམས་གཞུང་པའི་བླ་མ་རྣམས་ཀྱི་རྣམ་ཐར་འཆད་པ་ལ། རྒྱལ་བའི་གདུང་འཚོབ་བཤེས་གཉེན་པོ་ཏོ་བ། ། ཞེས་བསྔགས་པ། གངས་རིའི་ཁྲོད་འདིར་རྒྱལ་བའི་བསྟན་པ་སྤེལ་བའི་སླད་དུ་བསམས་བཞིན་དུ་བྱོན་པའི་སྤྲུལ་པའི་སྐྱེས་མཆོག་དཀའ་ཐུབ་ཀྱི་རི་སུལ་དུ་དྲང་སྲོང་གི་སྤྱོད་ཚུལ་གྱིས་གནས་ནས་བསྟན་པའི་བདག་པོ་མཛད་པ་དགེ་བའི་བཤེས་གཉེན་པོ་ཏོ་བ་ནི། འཕན་ཡུལ་སྤྲས་ཀྱི་བའོ་ཐང་དུ་ཡབ་སྐུ་གཤེན་སྲིད་ལ་ཕྱུག་སྟེ་སྲིད་པོ་ཞེས་གྲགས་པ་དང་། ཡུམ་རིགས་རྣམ་པར་དག་པ་ལེ་མོ་ཞེས་གྲགས་པ་གཉིས་ཀྱི་སྲས་སུ་ 1027 རབ་བྱུང་དང་པོའི་མེ་མོ་ཡོས་ཀྱི་ལོ་ལ་སྐུ་འཁྲུངས། གདུང་གཉོས། བྱིས་པའི་དུས་ཉིད་ནས་བྱམས་སྙིང་རྗེ་བྱང་ཆུབ་ཀྱི་སེམས་རླབས་ཆེན་པོ་རང་འཁྲུངས་སུ་བྱུང་སྟེ་འགྲོ་བ་གཞན་སྡུག་བསྔལ་པ་གཟིགས་ན་གཏིང་ནས་མི་དགའ་ཞིང་འདིའི་སྡུག་བསྔལ་འདི་ཐབས་གང་གིས་སེལ་བར་ནུས་སྙམ་པ་དང་། གཞན་བདེ་བ་གཟིགས་ན་ཐུགས་དགའ་ཞིང་འདིའི་བདེ་བ་འདི་ནམ་ཡང་མི་ཉམས་པར་གོང་འཕེལ་དུ་སོང་ན་སྙམ་པ་འབྱུང་བ་ཞིག་ཡོད། སྐྱེ་བོ་གཞན་དག་གིས་དབུས་གཙང་གི་ཆུ་འདི་ཐམས་ཅད་ཀོང་ཆུ་རླེག་བྱ་བ་ཅིག་ཏུ་འགྲོ། དེ་ན་བྱ་འདམ་སེལ་བྱ་བ་ཡོད་པས་ཆུ་དེས་མི་རོ་རྟ་རོ་ཐམས་ཅད་བསལ། བྱ་དེ་ཤི་ན་དེ་བསལ་མཁན་མེད་པས་ཆུ་འཁྱིལ་འོང་ཟེར་བ་གསན་པས་བྱ་དེ་ཤིན་ཏུ་གཅེས་པར་འདུག་གོ་གསུངས་ནས་བྱ་དེ་ཤི་དོགས་ནས་ཐུགས་ལས་མཛད། རྒྱ་ལམ་གྱི་འགྲོན་པོའི་སར་བྱོན་ནས་འགྲོན་པོ་ཀུན་ཁྱེད་ཅག་གི་ཡུལ་དུ་ལོ་ལེགས་པར་ཤོག ། བྱེད་སུ་དོན་འགྲུབ་པར་ཤོག་ཅིག་ཅེས་སྨོན་ལམ་འདེབས། དགེ་བཤེས་པོ་ཏོ་བ་ཉིད་ཀྱི་ཞལ་ནས། རང་གིས་དྲན་པ་རྙེད་པ་ནས་ཕ་རོལ་བོ་རྒྱལ་ན་དགའ། བདེ་ན་དགའ། སྐྱིད་ན་དགའ་བ་ལས། རང་རྒྱལ་བ་སོགས་བྱུང་ན་དགའ་སྙམ་པའི་རྟོག་པ་འོང་མ་མྱོང་། མི་གཉིས་འགྲོགས་ནས་འགྲོ་བ་མཐོང་ན་ཡང་འདི་གཉིས་མཐུན་ན་རུང་སྟེ་སྙམ་དུ་དགོངས་པ་ཁོ་ན་འོང་བ་ཡིན་གསུང་། དགེ་བཤེས་ཤ་ར་བས་བསྟོད་པ་མཛད་པ་ན་ཡང་། བརྡ་ཕྲད་ཚུན་ཆད་བྱིས་པའི་དུས་ཉིད་ནས། ། གཞན་གྱི་བདེ་སྡུག་ཐུན་མོང་ཉིད་དུ་གྱུར་། ། ཅེས་གསུངས། ཡབ་དེ་བོན་ཡིན་པས་དགེ་བཤེས་པོ་ཏོ་བ་ཆེན་པོས་ཀྱང་བྱིས་པའི་དུས་བོན་ཆོག་འདྲ་ཡང་མཛད་པས་བོན་གྱི་ཆོ་ག་འདི་དཀོན་མཆོག་གསུམ་ལས་ཕྱི་རོལ་ཏུ་གྱུར་པ་འདི་འདྲ་ཅི་རུང་ཞེས་ཐུགས་མ་མཉེས་པའི་བཀའ་ཡང་སྩལ། དེ་ཙ་ན་སྒོམ་ཆེན་ཞིག་ཤི་བའི་སྤུར་སྦྱངས་པས་འཇའ་དང་འོད་ལ་སོགས་པ་བྱུང་། དེ་ཡབ་ལ་དྲིས་པས་སྒོམ་ཆེན་ཞིག་གྲོངས་པ་ཡིན་ཟེར་པས་ངས་ཀྱང་བསླབས་ན་སྒོམ་ཆེན་ཞིག་འོང་སྙམ་པ་བྱུང་གསུང་། ཡབ་ལ་བླ་མཆོད་སྦ་སྒོམ་ཞེས་པ་གང་ཟག་ཁྱད་པར་ཅན་ཅིག་ཡོད་དེ་ལ་བྱིས་པའི་དུས་སུ་བསྙེན་གནས་ཀྱི་སྡོམ་པ་བླངས་ནས་སང་བསྲུང་བའི་དེ་རིང་ཆང་འཐུངས་པས་བད་ཀན་ལ་ཕོག་ནས་སྐྱུགས། ཡབ་ཀྱིས་ཁམས་ངན་པར་འདུག་པས་དེ་རིང་མ་སྲུངས། ཉ་སྟོང་བརྒྱད་གསུམ་བྱ་བ་ཡིན་པས་སང་སྲུངས་བྱས་པས། ཡབ་ཅི་དགའ་དགའ་ཟེར་དུས་ནམ་ཡིན་པ་ན་སྲུང་བ་ཡིན། ཁམས་བཟང་ན་བསྲུང་ལ། ཁམས་ངན་ན་མ་བསྲུངས་པས་ག་ན་འོང་གསུང་། དེ་ལ་སྦ་སྒོམ་མཉེས་ནས། གཉེན་པོ་དང་ལྡན་པ་ཅིག་འོང་བར་འདུག་རབ་ཏུ་བྱུང་ལ་ཆོས་ཤིག་བྱེད་དུ་གཞུག་དགོས་ཤེས་ཕ་མ་གཉིས་ལ་ཡང་ཡང་བསྐུལ་ཞིང་གཞོན་ནུ་རང་ཉིད་ཀྱང་སྔོན་གོམས་པའི་བག་ཆགས་འཐུག་པོའི་མཐུས་སྤྱིར་འཁོར་བའི་གནས་ཐམས་ཅད་ཡིད་བརྟན་མི་རུང་བ་སྡུག་བསྔལ་གྱི་རང་བཞིན་ཅན་དུ་རིག་ཅིང་། ཁྱད་པར་ཁྱིམ་གྱི་གནས་ནི་ཉོན་མོངས་དང་ཉེས་པར་སྤྱོད་པའི་འབྱུང་གནས་སྡུག་བསྔལ་གྱི་རྩ་བ་བཙོན་ར་ལྟ་བུར་གཟིགས་ནས་རབ་ཏུ་འབྱུང་བར་འདོད་པའི་འདུན་པ་དྲག་པོས་བསྐུལ་ཞིང་ཕ་མ་གཉིས་ཀྱིས་ཀྱང་གནང་སྟེ་ཡེར་པ་བ་རྔོག་བྱང་ཆུབ་འབྱུང་གནས་ཀྱིས་མཁན་པོ། གླན་ཚུལ་བྱང་ལ་སློབ་དཔོན་ཞུས་ནས་རབ་ཏུ་བྱུང་མཚན་རིན་ཆེན་གསལ་ཞེས་བྱ་བར་གསོལ། སློབ་དཔོན་སྦ་སྒོམ་ལ་སྒོམ་ཞིག་བསླབས་པར་ཞུ་བྱས་པས་ཁོང་གི་གསུང་ནས། ཁྱོད་སྒོམ་གཤའ་མར་བྱེད་ན་ཆོས་ཨེན་ཅིག་ཉན་དགོས། དེ་ལྟ་མིན་ན་སྒོམ་ཆེན་གྱི་སྒོམ་མཆན་ཁུང་བས་ཕུ་ཐག་ཐུང་སྟེ་འགྲོ་བ་ཡིན་གསུངས་པས་ཐོག་མར་བཀའ་གདམས་ཀྱི་ཆོས་སྤྱོད་རྣམས་བསླབས། ཁས་བླངས་པའི་བསླབ་ཁྲིམས་དག་པར་བསྲུང་བ་གཞིར་བཞག་ནས་ཁུ་སྟོན་ལ་སོགས་པ་མཁས་པ་མང་པོ་ལ་བརྟེན་ཏེ་སྡེ་སྣོད་གསུམ་ལ་སྦྱངས་ནས་མཁས་པའི་ཕུལ་དུ་ཕྱིན་པར་མཛད། བདག་ཉིད་ཆེན་པོ་འདི་གཞོན་ནུའི་དུས་སུ་ཇོ་བོ་རྗེ་ཡང་བཞུགས་པས་ཇོ་བོ་ལ་ཡེར་བར་དགེ་བཤེས་སྟོན་པ་བྱང་དུ་གསེར་འཚོལ་དུ་བཞུད་པའི་ཤུལ་དུ་ནག་ཚོས་ལོ་ཙཱ་བྱས་ནས་སྒོམ་རིམ་བར་པ་གཅིག་གསན་པ་ལ་སྐད་ནི་མ་ཤེས། བན་གསར་དུ་སོང་བས་བརྡ་གཞན་མེད་པཎྜི་ཏ་ལ་བཟླ་བརྒྱུ་མང་པོ་འོང་བར་འདུག་པ་ལ་ལོ་ཙཱ་བ་ལ་ཅུང་ཟད་ལས་མི་འོང་བར་སྣང་གསུང་། བྲག་རྒྱབ་པའི་བཟའ་མི་ཡིན་པས་ཕྱུགས་ས་ན་བྲག་ཀ་ཇོ་བཙུན་བྱ་བ་དང་ལྷན་དུ་བཞུགས་པ་ན་ཇོ་བཙུན་གཉིད་ལོག་ཁོང་གིས་མངོན་རྟོགས་ཞལ་འདོན་མཛད་པ་ལ་ཇོ་བཙུན་ན་རེ་ཐོན་ཅིག་གྲྭ་པ་མང་པོ་བྱུང་ངོ་ཟེར། གཉིད་སད་ནས་གླེང་པས་ཁྱེད་ཁ་ཏོན་བྱེད་པ་ལ་མི་མ་ཡིན་དཔག་ཏུ་མེད་པ་འདུས་ནས་ཆོས་ཉན་པ་རྨིས་ཟེར། ཤ་ར་བའི་ཞལ་ནས། མི་མ་ཡིན་ལའང་མངོན་ཤེས་ཡོད་པ་ཡིན་གསུང་། བྲག་རྒྱབ་ཏུ་གཉེར་ཅིག་མཛད་པ་ལ་གོ་ཤིན་ཏུ་ཆོད་པ་ཅིག་མཛད་དེ། མདོ་མང་གཅིག་གི་ཕྱག་ལན་ཀྱང་མཛད། དེའི་བར་ལ་དགེ་འདུན་སྤྱི་བས་ལྷག་པ་ཞོ་བཤལ་གཅིག་ལས་འཐུང་མ་མྱོང་གསུང་། བྲག་རྒྱབ་པའི་དབོན་ར་ཞག་ཤཱཀྱ་རིན་ཆེན་ན་རེ། ར་བ་ཟླུམ་པོ་ལ་སོགས་པའི་གཉེར་བྱེད་དགོས་ཟེར་བ་ལ་སྐྱོ་ཤས་ཆེན་པོ་མངའ་བས་མི་བྱེད་གསུངས་ནས་དོན་མེད་པའི་བྱ་བ་ཐམས་ཅད་སྤངས་ཏེ་རབ་ཏུ་བྱུང་བའི་བྱ་བའི་གཙོ་བོ་ཀློག་པ་ཐོས་བསམ་དང་། སྤོང་བ་བསམ་གཏན་ལ་ཁོར་ཡུག་ཏུ་བརྩོན་པར་མཛད། དེ་ནས་དབེན་པའི་གནས་ཞིག་ཏུ་རྩེ་གཅིག་ཏུ་སྒོམ་པར་བཞེད་ནས་ཡབ་ཀྱི་མཆོད་གནས་རང་ཉིད་ཀྱིས་བསྙེན་གནས་ཀྱི་སྡོམ་པ་ཞུས་པའི་སློབ་དཔོན་སྦ་སྒོམ་ལ་གྲོས་ཞུས་པས། སྦ་སྒོམ་གྱིས་ཁྱོད་སྒྲུབ་པ་གཤའ་མ་ཞིག་བྱ་འདོད་ན་བྱང་ར་སྒྲེང་ན་ཇོ་བོ་རྗེ་དཔལ་ལྡན་ཨ་ཏི་ཤའི་མན་ངག་ཡོངས་སུ་རྫོགས་པར་མངའ་བ་འབྲོམ་སྟོན་པ་ཞེས་བྱ་བ་བཞུགས་པས། དེའི་ཞབས་དྲུང་དུ་ཕྱིན་ནས་མན་ངག་རྣམས་ཞུས་ན་ལེགས་ཞེས་བསྐུལ་བ་ལྟར་རང་ཉིད་ཀྱང་དད་གུས་ཆེན་པོས་དེ་ལྟར་བྱ་བར་འདོད་ནས་ར་སྒྲེང་དུ་དགེ་བཤེས་སྟོན་པའི་སྤྱན་སྔར་ཕྱིན་ལ་དབྱར་དགུན་གཅིག་ཙམ་བསྡད། གདམས་ངག་ཞུས་ནས་ཁམས་སུ་ཕྱིན་ལ་མིང་རུས་ཚུན་ཆད་སྤོས་ལ་སྒོམ་ཞིག་བྱ་སྙམ་ནས་ཅང་སྟོན་དང་གཉིས་འགྲོགས་ནས་རྒྱལ་གྱི་གླན་ཚུལ་བྱང་དགེ་ཚུལ་གྱི་སློབ་དཔོན་ཡིན་པས་ཕྱག་འཚལ་དུ་བྱོན། དེ་ནས་ར་སྒྲེང་དུ་བྱོན་པ་ལ་བྲག་རྒྱབ་པའི་དབོན་གྱིས་ཀྱང་དགེ་བཤེས་སྟོན་པ་ལ་ཁྱེད་ཀྱི་སྤྱན་སྔར་ངའི་མི་ཞིག་ཐལ་གྱི། དེ་གཞན་དུ་མ་གཏོང་ཞིག་ཟེར་བའི་འཕྲིན་ཡིག་སླེབས། དེ་ནས་འབྲོམ་རིན་པོ་ཆེ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་བྱང་ཆུབ་ལམ་གྱི་རིམ་པའི་ཁྲིད་ཞུས་པ་ན་འབྲོམ་རིན་པོ་ཆེས་རང་གི་སྲས་ཀྱི་ཐུ་བོ་བསྟན་པའི་བདག་པོར་འགྱུར་བར་གཟིགས་ནས་སྤྱན་གྱི་འབྲས་བུ་ལྟར་བསྐྱངས་ཤིང་། ལམ་གྱི་རིམ་པའི་དབུ་བཤེས་གཉེན་བསྟེན་ཚུལ་ནས་ཐར་ཆགས་སུ་གདམས་ཤིང་དམིགས་སྐོར་རེ་རེ་ནས་བཤད་ཆོས་ཙམ་དུ་མ་ལུས་པར་རྒྱུད་ལ་སྐོར་ཏེ་མྱོང་བ་ཐོན་ངེས་སུ་འཁྲིད་པར་མཛད་པས་དགེ་བའི་བཤེས་གཉེན་སྟོན་པ་རིན་པོ་ཆེའི་ཡོན་ཏན་དང་། ཇི་ལྟར་གསུངས་པའི་ལམ་གྱི་གནད་རྣམས་ལ་ཡིད་ཆེས་ཀྱི་དད་པ་བརྟན་པོ་སྐྱེས་ཤིང་ཁྱད་པར་དུ་སྤྱོད་འཇུག་གི ། བདག་ནི་གྲོལ་བ་དོན་གཉེར་ལ། ། རྙེད་དང་བཀུར་སྟིས་འཆིང་མི་དགོས། ། ཞེས་པ་ལ་བརྟན་པའི་མན་ངག་གསུངས་པའི་ཐད་ཀར་ཐུགས་སྣ་འགྱུར་ཏེ་ཚེ་འདིའི་རྟོག་པ་བསྐྱུར། དགེ་བའི་བཤེས་གཉེན་འབྲོམ་རིན་པོ་ཆེ་འབྲལ་མེད་དུ་བསྟེན་པ་ཡིན། ང་དང་པོར་འོང་དུས་ན་ཐོག་ཅིག་མན་ངག་ཞུས་ནས་གནས་གཞན་ཞིག་ཏུ་འགྲོ་བསམས་པ་ཡིན་ཏེ། ད་ང་འགྲེས་སྨད་ཙམ་དུ་སོང་ཟེར་ཡང་མི་ཆ་གསུང་། དེས་ན་མན་ངག་ཆང་དུ་འགའ་ཙམ་གྱིས་མི་ཆོག་ལ། དེ་ཡང་ཞུས་ནས་གཞན་དུ་ཕྱིན་པས་མི་ཆོག་པར་དགེ་བཤེས་མཚན་ཉིད་དང་ལྡན་པ་དང་མི་འབྲལ་བར་བསྟེན་དགོས་པར་དགོངས་ནས་ལོ་བདུན་བསྟེན་པ་ལས་དགེ་བཤེས་སྟོན་པའི་ཐུགས་ཀྱང་ཟིན། བའོ་ཐང་འདིར་ཇི་ལྟ་བུའི་མི་ཆེན་པོ་ཞིག་འབྱོན་པར་འདུག་གསུངས། དགེ་བཤེས་རྣལ་འབྱོར་པ་དང་དགོན་པ་བ་ཡང་མ་འདས་བར་དུ་ར་སྒྲེང་དུ་བཞུགས་ནས་སྒྲུབ་པ་རྩེ་གཅིག་ཏུ་མཛད། བར་སྐབས་ཤིག་སྦ་སྒོམ་དང་ལྷན་དུ་མདོ་སྡེ་རྒྱན་གྱི་རྩ་བ་གཟིགས་ཤིང་བཞུགས། དེར་ནུབ་གཅིག་སྤང་ལེབ་གཅིག་ལ་མདའ་མང་པོ་རྒྱབ་ནས་བཏོན་པས་མདེའུ་ཁ་ཡར་ལུས་པ་རྨིས། ཕྱིས་ཊཱིཀྐ་དང་སྦྱར་ནས་གཟིགས་པས་མདེའུ་མ་ལུས་པར་ཐོན་པ་རྨིས་ཏེ་རྗེ་བཙུན་བྱམས་པའི་དགོངས་པ་ཇི་ལྟ་བ་བཞིན་དུ་ལོངས་པ་ཡིན་གསུངས། དེ་ལྟར་དགེ་བའི་བཤེས་གཉེན་པོ་ཏོ་བས་འབྲོམ་རིན་པོ་ཆེ་ཐོག་མ་མཇལ་བ་ནས་མཐར་ནམ་གཤེགས་བར་དུ་སྐད་ཅིག་ཀྱང་འབྲལ་མ་ཕོད་པར་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན། འབྲོམ་རིན་པོ་ཆེས་ཀྱང་སྲས་ཀྱི་ཐུ་བོར་བཟུང་། ལན་ཅིག་འབྲོམ་རིན་པོ་ཆེ་སྐུ་བསྙུན་པ་ཞིག་གི་སྐབས་པོ་ཏོ་བའི་པང་དུ་དབུ་བཞག་ནས་ཡོད་པའི་ཚེ། པོ་ཏོ་བའི་ཐུགས་དགོངས་ལ་འཇིགས་སར་སྐྱེལ་མས་བོར་བ་འདྲ་བ་ཞིག་འོང་བ་འདུག་ན་ད་སུ་ལ་བརྟེན་སྙམ་པ་དང་སྤྱན་ཆབ་གོང་པའི་རྩ་ན་མར་ཉིལ་གྱིས་བྱུང་བ་དགེ་བཤེས་སྟོན་པས་མཁྱེན་ནས། ངས་ཁྱོད་ཀྱི་བརྟེན་ས་སུ་ཡང་མ་མཐོང་བས་ད་ཕན་ཆད་གསུམ་ཡན་ཆད་ལྔ་མན་ཆད་དཔུང་གདང་ཆོས། དགེ་བའི་བཤེས་གཉེན་མདོ་སྡེ་ལ་གྱིས་ལ་སེམས་བཟང་པོ་གྱིས་དང་ཁྱད་པར་ཅན་དང་ཕྲད་དེ་འོང་གསུངས་པས། མདུན་ན་ཇོ་བོ་ལེགས་ཡོང་པས་སེམས་བཟང་པོ་གང་ལ་ཟེར་ཞུས་པས། འོ་ན་བྱང་ཆུབ་ཀྱི་སེམས་ལ་ཟེར་བ་ཡིན་མོད་ཅེས་ལན་གཉིས་བསྟུད་ནས་གསུངས་པས། དེ་སྔ་ནས་ཀྱང་མི་གོ་རྒྱུ་མེད་པ་ལ་དེས་གསལ་བཏབ་པ་འདྲ་བ་ཞིག་བྱུང་ནས་དེའི་ཐབས་ལྐོག་ཏུ་མན་ངག་ཏུ་ཡང་གསུངས། ཚོགས་སུ་ལུང་དང་སྦྱར་ནས་ཀྱང་གསུངས། བཀའ་བཀྱོན་ཚུན་ཆད་ཀྱིས་ཀྱང་དེའི་ཐབས་སུ་གསུང་ནས་ཡོད་པས་ལོ་གཉིས་ཙམ་དུ་མྱ་ངན་ཡང་སངས་པ་འདྲ་ཞིག་བྱུང་བ་ལ། ཕྱིས་སེམས་བཟང་པོ་ལ་ཁོང་རང་དགོས་པར་སོང་བས་མྱ་ངན་ལ་སངས་དུས་མེད་གསུང་། མཐར་འབྲོམ་རིན་པོ་ཆེ་མྱ་ངན་འདའ་ཁར་དགེ་བཤེས་པོ་ཏོ་བས་འབྲོམ་རིན་པོ་ཆེ་ལ་བླ་མ་མ་བཞུགས་ན་སུ་ལ་བརྟེན་ཞུས་པས། བོད་ཕུ་ཐུང་ཙམ་འདི་ན་ཁྱོད་ཀྱི་དགེ་བཤེས་ངས་མ་མཐོང་གི་དགེ་བཤེས་མདོ་སྡེ་ལ་གྱིས་གསུང་། དགེ་བཤེས་སྟོན་པ་མྱ་ངན་ལས་འདས་པའི་དུས་སུ་མནལ་ལམ་དུ་རྩེ་ཕྱིང་དཀར་གྱི་སྟེང་དུ་བྱོན་ནས་རལ་གྲི་ཞིག་ལག་ཏུ་ཐོགས་ཏེ་དུང་ཞིག་བུས་པས་འཛམ་བུའི་གླིང་ཐམས་ཅད་དུ་ཐོས་སམ་སེམས་པ་ཅིག་རྨིས། མནལ་སད་པ་དང་རལ་གྲི་ཐོགས་པ་རྨིས་པ་ནི་ཤེས་རབ་ཇེ་ཆེ་ཇེ་ཆེར་འགྲོ། དུང་བུས་པ་རྨིས་པས་ཆོས་ནི་འགའ་རེ་ཙམ་འཆད་པ་ཅིག་འོང་གསུང་། དེའི་ཟང་ཟིང་གི་བགོ་སྐལ་ནི་ཅི་ཡང་མེད། ཐུགས་དམ་དུ་དགེ་བཤེས་སྟོན་པའི་རག་ཤའི་ཕྲེང་བ་ཉི་ཤུ་རྩ་གཅིག་དང་། ཕྱག་འཁར་གཉལ་དུ་སྤྱན་དྲངས་པ་དེ་གཉིས་ཡོད་གསུང་། དགོན་པ་བ་འདས་ནས་ར་སྒྲེང་བསྐྱང་བར་དགོངས་ཏེ། དབྱར་དེ་སྐྱོ་བསངས་ལ་བསླབ་བཏུས་ཤིག་གསུངས་པ་ལ་གཞན་གྱི་ཤེས་པ་སྒྱུར་ནུས་པ་ལྟ་བུ་ཞིག་བྱུང་བ་ལ། དེར་དཔོན་ཆོས་ཀྱི་རྒྱལ་པོ་ལ་ཡང་མ་བཏུབ། རྨི་ལམ་ན་ཁོང་རང་གིས་ཐོང་མཁན་མཛད་དེ། ཞིང་ར་དེ་རྨོས་པས་འོག་ཐམས་ཅད་རྫ་རོང་དུ་སོང་ནས་རྨོར་མ་བཏུབ་པ་ཅིག་རྨིས་པས། ཞིང་སྦྱང་དུ་མ་བཏུབ་པ་ཡིན་གསུང་ནས་ར་སྒྲེང་གི་ཆས་དངོས་གང་ཡོད་བསྐྱུར་ཏེ་གཅིག་པུར་གཤེགས། དེ་ནས་དགེ་བཤེས་པོ་ཏོ་བ་དང་ཕུ་ཆུང་བ་དང་། སྤྱན་སྔ་བ་སྟེ་སྐུ་མཆེད་གསུམ་ག་ཡང་ཚེ་འདི་ལ་ཤ་གཟུག་རང་བཟའ་བར་ཆད་ནས། ར་སྒྲེང་ཆོས་ཀྱི་མུ་གེས་ཐེགས་ཡོད། དེ་ཙ་ན་ཡོན་བཤད་ཕུ་ཆུང་བས་མཛད་པ་ལ་ཉིན་གཅིག་པོ་ཏོ་བ་མཛད་དུ་བཅུག་པས། གཞན་གྱི་ཤེས་པ་སྒྱུར་ནུས་པ་འདྲ་བ་ཅིག་བྱུང་པས་ཕུ་ཕུང་བའི་ཞལ་ནས། འུ་ཅིའི་ཇོ་བོས་ཆོས་གད་མེད་གཡང་མེད་དགོངས་ཏེ་གདའ། ཇོ་བོ་ཆེན་པོའི་གསུང་བཞག་ནས་ངས་ཡོན་བཤད་བྱས་གསུངས་ནས་མཛད་མ་ཉན། དེ་ཕྱིན་པོ་ཏོ་བས་མཛད། ར་སྒྲེང་ནས་བྱོན་ཏེ་སྐུ་མཆེད་ལྷན་ཅིག་ཏུ་ཀླུངས་ཤོད་ན་འགོར་བསྒོམས། དེ་ནས་སྤྱན་སྔས་ཕྱོར་ཕུར་སྐུ་མཚམས་མཛད་ནས་བཞུགས། གཉིས་པོས་འཕན་ཡུལ་སྟོད་དང་རྒྱལ་ངོས་སུ་བསོད་སྙོམས་མཛད་ཅིང་བཞུགས། ལ་མོར་སྒྱེ་ཟེར་བ་དེར་ཡང་བཞུགས། དེ་ལྟར་རང་རྒྱུད་སྨིན་ནས་གཞན་དོན་གྱི་ཚོགས་བསྡུས་པའི་དང་པོ་སྒྲོ་ལག་དགོན་པ་ཡིན་པར་གསལ་ཏེ། དགེ་བཤེས་དོལ་པས་སྒྲོ་ལག་ཏུ་མཇལ་ཙ་ན་ཚོགས་ནས་ལོ་ངོ་གསུམ་སོང་ཞིང་། གྲྭ་པ་སུམ་ཅུ་ཙམ་འདུག་གསུང་། དེ་ནས་ཁྲག་འཛབ་ཁུང་མིག་ཏུ་དབྱར་གཉིས་བཞུགས་ནས་ལམ་སྒྲོན་དང་། ཡོན་ཏན་མཐའ་ཡས་པར་བསྟོད་པ་དང་། བཤེས་པའི་སྤྲིངས་ཡིག་གསུངས་པས་གྲྭ་པ་བརྒྱ་ཙམ་འདུས། དགུན་རྒྱལ་གྱི་གངས་རྒྱལ་མོར་བསླབ་བཏུས་གསུངས། གྲྭ་པ་སུམ་བརྒྱ་ཙམ་འདུས། དེ་ནས་ཀམ་ཡུང་བའི་གྲྭ་པ་མང་པོ་བྱུང་། བཟློག་ཀྱང་ཉན་དུ་མ་འདོད་ནས་དབྱར་གཅིག་ཆོས་མ་གསུངས་པར་སྐུ་མཆེད་གཉིས་ལ་མོ་སྡིང་པོ་ཆེར་བཞུགས། དེའི་དབྱར་ཚུལ་འཇུག་ཡང་དག་པ་ཅིག་བྱས་ཏེ་དགེ་བཤེས་པོ་ཏོ་བའི་ཞལ་ནས། ང་ལ་དེའི་དབྱར་ཐ་མལ་གྱི་རྟོག་པ་སྐད་ཅིག་ཀྱང་མ་སྐྱེས་གསུང་། ཕུ་ཆུང་བའི་ཞལ་ནས། ངས་རྟེན་འབྲེལ་འབའ་ཞིག་བསྒོམས་པས་རྟེན་འབྲེལ་རང་དུ་སོང་གསུང་། དེ་ནས་དར་ཡུལ་ཀོ་རུ་ན་བཞུགས་པའི་ཚེ་པོ་ཏོ་བ་ཆེན་པོའི་ཡབ་དགེ་བཤེས་ཀྱི་སྤྱན་སྔར་བྱུང་སྟེ་ཕྱག་བཙལ་ནས། ཕྱི་མ་ལ་ཐུགས་ལ་གདགས་པར་ཞུ། གོས་དུག་འདི་ཀུན་དགེ་བསྙེན་གྱིས་བགོར་བཏུབ་བམ། གླང་གཅིག་ཡོད་པ་གྲྭ་པའི་ཁལ་གྱིས་ཟེར་ནས་བཞུད། དགེ་བཤེས་པོ་ཏོ་བའི་ཞལ་ནས། ཨ་ན་ཕ་རྒན་དེ་ལྟོས་དང་གསུངས་ནས་བལྟས་པས་མལ་ན་འདས་ནས་འདུག ། དེ་ནས་དགུང་ལོ་དྲུག་ཅུ་རྩ་གཅིག་པ་ལ་སྤྲས་ཀྱི་པོ་ཏོ་དགོན་པ་ན་བཞུགས་པའི་དུས་སུ་འཕན་ཡུལ་སྟོད་དུ་སྡེ་རྩོད་ཆེན་པོ་ཞིག་བྱུང་བས་ས་ཕུག་པའི་ཇོ་བོ་མང་པོ་དང་། རྒྱལ་ནས་བྲོས་པ་མང་དུ་བྱུང་། དེ་ཐམས་ཅད་ལ་དགུན་འདི་ཇི་ལྟར་བཏུབ་བཏུབ་གྱིས་ཤིག་དབྱར་ནས་སྦྲས་སུ་བསྡད་ཀྱི་གསུང་། དེ་ནས་དཔྱིད་ལུང་སྟོངས་མ་ཟིན་པར་དོག་ནས་སྡུད་མོ་བཏབ་པས། དཔེར་ན་སེང་གེ་རི་སུལ་བརྟེན་ནས་འཇིགས་མེད་པར། ཞེས་པ་དེ་ལན་གསུམ་གྱི་བར་དུ་བྱུང་ནས། དབྱར་སྟག་ལུང་ཐང་དུ་བཞུགས་གྲྭ་པ་དྲུག་བརྒྱ་ཙམ་འཚོགས། ཕྱིས་སྟག་ལུང་དུ་ཆོས་ཉན་པ་དགེ་འདུན་རྣམས་ལ་གསེར་ཞོ་ཕྱེད་ཕྱེད་གནང་བས་གསེར་སྲང་བརྒྱད་ཅུ་ཙམ་སོང་། གྲྭ་བ་སྟོང་དང་སུམ་བརྒྱ་ཙམ་བཞུགས་པར་གསལ། གཞུ་མཁན་བྲག་དང་དབྱར་ས་དགུན་ས་མཛད་དེ་གཉིས་ཀར་བཞུགས། དེ་ནས་དགེ་བཤེས་སྤྲགས་པ་ཞེས་གྲགས་པ་བྱུང་། དེ་ནས་ཀྱང་ན་འགོར་བཞུགས་པར་གསལ་ཏེ། ཤ་ར་བའི་ཞལ་ནས། སྔར་ན་འགོ་ན་བཞུགས་པ་ན་དེ་རིང་མངོན་པར་བྱང་ཆུབ་པའི་དུས་ཡིན་གསུངས་ཏེ་མཛད་རྒྱུ་ཅང་མེད། ཕྱིས་དུས་དེར་མཆོད་པ་ཆེ་བ་རེ་མཛད་དེ་ཁོ་བོ་སྔ་མ་དེ་ལ་སྨོན་གསུང་། ན་འགོ་ན་བཞུགས་དུས་ས་དེ་གཉན་པས་སྤྱིལ་པོ་བརྩིག་པ་དང་རྐོ་རློག་སོགས་བྱས་པས་གྲྭ་པ་རྣམས་ཀྱི་རྨི་ལམ་དུ་སྡིག་སྦྲུལ་དང་སྦལ་ལྕོང་སོགས་རྨིས་པ་ལ་དགེ་བཤེས་པོ་ཏོ་བའི་ཞལ་ནས། ཁྱེད་སྐྲག་མི་དགོས་ངའི་རྒྱབ་འདི་ན་ནུབ་ཕྱོགས་ཀྱི་རྒྱལ་པོ་སྤྱན་མི་བཟང་ལུས་དང་གྲིབ་མ་བཞིན་དུ་རྟག་ཏུ་ཡོད་ཀྱི་གསུངས། བར་ཆད་ཀྱིས་མི་ཚུགས་པའི་རྒྱུ་ཡང་བྱང་ཆུབ་སེམས་དཔའ་ཉན་ཐོས་ཀྱི་ཆ་ལུགས་ཀྱིས་སེམས་ཅན་གྱི་དོན་མཛད་པའི་གནས་བརྟན་བཅུ་དྲུག་གི་གཅིག་ཡིན་གསུང་། རམ་སྡིངས་མ་བ་ལ་ཁྱེད་མ་འཇེམ་ནས་ཡིད་ཆད་མི་དགོས་ང་གནས་བརྟན་བཅུ་དྲུག་གི་གཅིག་ཡིན་པས་ང་དང་མཇལ་བ་ཁྱོད་བསོད་ནམས་མི་ཆུང་གསུང་། དེ་ལ་དགེ་བཤེས་པོ་ཏོ་བ་ཆེན་པོ་དེ་གནས་བརྟན་ཡན་ལག་འབྱུང་གི་སྤྲུལ་པར་གྲགས་ཤིང་གྲགས་པ་ལྟར་དུ་རང་ཉིད་ཀྱིས་ཀྱང་ཞལ་གྱིས་བཞེས། བཀའ་གདམས་གླེགས་བམ་ལས་དགེ་བཤེས་པོ་ཏོ་བ་འདི་ཉིད་བཤེས་གཉེན་འབྲོམ་རིན་པོ་ཆེ་རྒྱལ་པོ་དད་པ་བརྟན་པོར་སྐུ་འཁྲུངས་པའི་ཚེ་སྲས་ཆེ་བ་སངས་རྒྱས་འཛིན་པོ་ཏོ་བ། དྷརྨཱ་འཛིན་ཕུ་ཆུང་བ། དགེ་འདུན་འཛིན་སྤྱན་སྔ་བར་འགྱུར་བར་ལུང་བསྟན་ཏེ་དད་པ་བརྟན་པོའི་འཁྲུངས་རབས་ལས། སྲས་སངས་རྒྱས་འཛིན་ནི་འདི་ནས་ལོ་ནི་མི་མང་བར་རིན་ཆེན་གསལ་ཞེས་བྱ་བ་རྒྱལ་བའི་འབྱུང་གནས་ཀྱི་སྲས་ཀྱི་ཐུབ་བོར་འགྱུར། དྷརྨཱ་འཛིན་གཞོན་ནུ་རྒྱལ་མཚན་ཞེས་བྱ་བ་འདི་དེང་སང་གི་ཞུས་ལན་འདི་དག་གི་བདག་པོ་དམ་པ་ཅིག་ཏུ་འགྱུར། དགེ་འདུན་འཛིན་ནི་ཚུལ་ཁྲིམས་འབར་ཞེས་བྱ་བ་རྒྱལ་བའི་འབྱུང་གནས་ཀྱི་གདམས་པ་མང་པོ་ཉམས་སུ་ལེན་ཅིང་སངས་རྒྱས་ཀྱི་བསྟན་པ་ལ་ཕན་པའི་བཤེས་གཉེན་དམ་པ་ཅིག་ཏུ་འགྱུར་རོ་ཞེས་གསུངས། ཡང་གླེགས་བམ་དུ་སྐུ་མཆེད་གསུམ་པོ་དེ། རིགས་གསུམ་མགོན་པོའི་སྤྲུལ་པ་ཡིན་ཏེ། བཀའ་གདམས་གླེགས་བམ་གྱི་ལུང་བསྟན་གྱི་ལེའུ་ནས། འདི་ནས་སྤྱན་རས་གཟིགས་དབང་དང་། ། འཇམ་པའི་དབྱངས་དང་གསང་བའི་བདག ། གཞན་ཡང་འཇམ་དབྱངས་ཉིད་སྤྲུལ་པ། ། སྤྲུལ་པའི་ཁྱེའུ་གཟུགས་མཛེས་སོ། ། རྩེ་ལྔའི་རི་ལས་འདིར་ལྷགས་གདའ། ། དང་པོ་གསུམ་ནི་ང་ཡི་སྲས། ། པོ་ཏོ་བ་དང་ཕུ་ཆུང་པ། ། སྤྱན་སྔ་ཞེས་བྱ་སྐུ་མཆེད་གསུམ། ། ཞེས་གསུངས། འབྲོམ་རིན་པོ་ཆེས། ཇོ་བོ་ལ་འབུལ་ཆེན་མཛད་པའི་ཚེ། ཇོ་བོའི་ཞལ་ནས་ཧུ་འུམ། ཁྱེའུ་དཀར་པོ་འདི་ལ་ད་ལྟ་ངས་བོད་འདི་ན་བཀོད་པ་དྲུག་ཅུ་རྩ་ལྔ་མཐོང་གསུང་བ་འདི་ཕུ་ཆུང་བ། ཁྱེའུ་སེར་པོ་ན་རེ་ཁོ་བོ་ལ་བཀོད་པ་དགུ་བཅུ་མཆིས། པོ་ཏོ་བ། ཁྱེའུ་སྔོན་པོ་ན་རེ། ཁོ་བོ་ལའང་བྱང་ཕྱོགས་ན་བརྒྱ་དང་དྲུག་ཅུ་རྩ་ལྔ། འདི་ན་དྲུག་གི་གདུལ་བྱ་ལས་མ་མཆིས་གསུང་བ་སྤྱན་སྔ་ཚུལ་ཁྲིམས་འབར་ཡིན་པར་གོ། ཞེས་གསུངས། ཡང་སྔོན་བལ་ཡུལ་དུ་འཕགས་པ་ཤིང་ཀུན་ལ་ནུབ་ཐུན་དང་ཐོ་རང་གཉིས་མིས་སྐོར་བ་བྱེད། གུང་ཐུན་འབྱུང་བ་བཞི་གཉིད་ལོག་པའི་དུས་སུ་མི་མ་ཡིན་རྣམས་སྐོར་བ་བྱེད། དེའི་དུས་གྲུབ་ཐོབ་མིན་པས་བསྐོར་བ་བྱེད་ན་བར་ཆད་འོང་། རྣལ་འབྱོར་པ་ཅིག་གིས་ཕག་མོའི་དངོས་གྲུབ་བརྙེས་ནས་མི་མ་ཡིན་རྣམས་ཀྱི་གསེབ་ཏུ་སྐོར་བ་བྱས་པས། དེ་རྣམས་གླུ་ལེན་གྱི་འདུག་པའི་ནང་ན་མར། སྔོན་ནས་སྔོན་གྱི་དུས་ཙ་ན། ། ཐུགས་དགོངས་བླ་ན་མེད་པ་དེ། ། ཇོ་བོ་ཨ་ཏི་ཤ་ལ་བྱུང་། ། ད་ལྟ་མ་རིག་འཁྲུལ་པར་འཁྱམས། ། ཨ་ཏི་ཤ་ཡི་གདུང་གསོབ་པ། ། འཕགས་པ་སྐུ་མཆེད་གསུམ་པོ་དེ། ། གཅིག་ཙམ་ལྷོ་བལ་གྱི་མཚམས་ན་ཡོད། ། འཕགས་པ་འཇམ་དཔལ་དང་གཉིས་སུ་མེད། ། གཅིག་ཙམ་བལ་བོའི་ཡུལ་ན་ཡོད། ། འཕགས་པ་ཝ་ཏི་དང་གཉིས་སུ་མེད། ། གཅིག་ཙམ་མང་ཡུལ་གྱི་གྲོང་ན་ཡོད། ། འཕགས་པ་དབུ་ཁང་དང་གཉིས་སུ་མེད། ། ཟེར་བ་གསན། རྟེན་དེ་རྣམས་རིགས་གསུམ་མགོན་པོ་དངོས་ཡིན་པས་བཀའ་གདམས་སྐུ་མཆེད་གསུམ་པོ་འདི་ཡང་རིགས་གསུམ་མགོན་པོའི་སྤྲུལ་པ་ཡིན་ཞེས་བཀའ་གདམས་ཆོས་འབྱུང་ལས་བཤད་དོ། ། ངས་དོན་དུ་སྤྲུལ་པའི་སྐྱེས་བུ་ཡིན་པར་བཤད་མོད། ཐུན་མོང་བ་གདུལ་བྱའི་སྣང་ངོར་ཡང་མཛད་པ་རྣམ་ཐར་བསམ་གྱིས་མི་ཁྱབ་སྟེ། དགེ་བཤེས་པོ་ཏོ་བ་ཆེན་པོ་དེ་འབྲོམ་རིན་པོ་ཆེ་ཁོ་ན་ལ་བརྟེན་ནས་བྱང་ཆུབ་ལམ་གྱི་རིམ་པའི་འགོ་བཤེས་གཉེན་བསྟེན་ཚུལ་ནས་འབྲས་བུ་མི་སློབ་ཟུང་འཇུག་འགྲུབ་པའི་བར་དམིགས་སྐོར་རེ་རེ་ནས་མྱོང་པ་ཕུལ་ཕྱིན་བཏོན་ཏེ་བསྐྱངས་པས་རྩོལ་མེད་ཀྱི་མྱོང་བ་ཕུལ་ཕྱིན་འཁྲུངས་ཏེ་སྐྱེས་བུ་ཆུང་འབྲིང་གི་ལམ་ལ་སྦྱངས་པའི་འབྲས་བུ་ཚེ་འདིའི་ལུས་ལོངས་སྤྱོད་རྙེད་བཀུར་སྙན་གྲགས་འཁོར་གཡོག་གང་ལའང་ཆགས་པ་སྐད་ཅིག་ཀྱང་མི་སྐྱེ་བར་རི་དྭགས་རྨས་མ་བཞིན་དུ་དབེན་པ་ནས་དབེན་པར་འཕོ་བར་མཛད། ལན་ཅིག་སྦྱིན་བདག་ཅིག་གིས་གཡུ་གྲུ་དམར་ཆེན་པོ་ཞིག་ཕུལ་བ་ན་ཕྱག་ཏུ་མ་བཞེས་བར་མདུན་དུ་ཞོག་ཅིག་པའི་བརྡ་མཛད། བསྔོ་བ་ལེགས་པར་མཛད། སང་ཉིན་དགེ་བཤེས་དཔོན་སློབ་རྣམས་ཕྱོགས་གཞན་ཞིག་ཏུ་ཕེབས་པ་ན་སྦྱིན་བདག་དེ་ཡིད་མ་ཆེས་པར་བཞུགས་སར་བལྟར་ཕྱིན་པས་གཡུ་དེ་མདངས་གང་བཞག་ས་དེ་ཁ་རང་ན་འདུག་ཟེར། དགེ་བཤེས་པོ་ཏོ་བ་དང་དེའི་འཁོར་ཐམས་ཅད་ཀྱང་ཟང་ཟིང་གི་དངོས་པོ་གང་ལའང་མི་ཆགས་པར་ཚེ་བློས་བཏང་ཤ་སྟག་ཏུ་བྱུང་སྟེ་རྣམ་པར་ཐར་པ་དེ་ཙམ་ཡང་བསྟན་པ་རིན་པོ་ཆེའི་རྒྱན་དུ་ཆེའོ། ། དགེ་བཤེས་པོ་ཏོ་བ་ཆེན་པོ་དེ་ལ་ཚེ་བློས་བཏང་གི་གྲྭ་པ་རྣམ་གྲོལ་སྒྲུབ་པ་ཤ་སྟག་སྟོང་ཙམ་རེ་འཁོར་དུ་འདུས་ཤིང་། དེ་ཐམས་ཅད་སྡོམ་གསུམ་གྱི་བཅས་མཚམས་དག་པ་བསྟན་པ་ཡོངས་རྫོགས་ཀྱི་ཉམས་ལེན་ལ་གཅིག་ཏུ་གཞོལ་བ། སྒོ་གསུམ་གྱི་སྤྱོད་པ་ཐམས་ཅད་དགེ་བཤེས་པོ་ཏོ་བ་ཉིད་ཀྱི་རྗེས་སུ་སློབ་པ་ཤ་སྟག་བྱུང་བས་འཛམ་བུའི་གླིང་གི་སའི་ཆ་ཐམས་ཅད་དུ་སྙན་པའི་གྲགས་པས་ཁྱབ་སྟེ་རྒྱ་གར་འཕགས་པའི་ཡུལ་དུའང་བོད་ན་རབ་ཏུ་བྱུང་བ་སྟོང་ཙམ་རྣམ་ཐར་གཅིག་ལ་འགོད་ནུས་པའི་སེམས་དཔའ་ཆེན་པོ་ཞིག་བཞུགས་ཡོད་འདུག་ཅེས་གྲགས་པ་བྱུང་ངོ་། ། ཡང་ལན་ཅིག་དགེ་བཤེས་པོ་ཏོ་བ་མཁར་ཐོག་ན་ཁ་བ་འཆགས་ནས་དོ་ནུབ་གཞོན་ནུ་མ་བདུན་གྱི་རྟོགས་བརྗོད་ནས་བཤད་པ་དང་འདྲ་བ་ཅིག་བྱུང་བས་དགའ་བ་ཞིག་བྱུང་གསུང་། གཞོན་ནུ་མ་བདུན་གྱི་རྟོགས་བརྗོད་ལས་ཇི་ལྟར་འབྱུང་བ་ནི། སྐྲ་རྣམས་བྲེགས་པར་གྱུར་ནས་ནི། ། ཕྱག་དར་ཁྲོད་ཀྱི་གོས་འཆང་ཞིང་། ། དགོན་པ་ཡུལ་དུ་འདོད་པར་ནི། ། ནམ་ཞིག་དེ་ལྟར་འགྱུར་ཞིག་གུ། ། ཞེས་གསུངས་པ་ལྟར་རོ། ། དགེ་བཤེས་པོ་ཏོ་བའི་མཛད་པ་རྣམ་ཐར་བཀའ་གདམས་ཀྱི་བཤེས་གཉེན་ཆེན་པོ་ཞིག་གིས་བསྡུས་པ་ནི་འདི་ལྟར། དགེ་བཤེས་པོ་ཏོ་བ་དེ་སྐྱེས་ཐོབ་ཀྱི་ལྷག་བསམ་ཅན། གནས་བརྟན་ཆེན་པོའི་གྲགས་པ་ཅན། བསྟན་པའི་ཁྱབ་གདལ་ཆེ་བ། སྡེ་སྣོད་ཀྱི་དོན་སྤྱིར་ཤར་བ། གཞུང་གི་བྱེད་པ་མཁས་པ། འདུལ་བའི་ཕྱག་ལེན་འཐེམས་པ། རབ་ཏུ་བྱུང་བའི་ཆ་ཐིངས་པ། བསྟན་པའི་བདག་པོ་ཞིག་བྱོན་པས། དགུང་དུས་དིང་སང་གི་བར་དུ་ཁས་བླངས་ལ་རྟོག་དཔྱོད་བྱེད་པའམ། སྡོམ་པའི་རྩིས་གཞི་འདིང་བའམ། སྡེ་སྣོད་ལ་བློ་ཁ་ཕྱོགས་པའམ། འདོད་པ་ལ་སྐྱོན་དུ་ལྟ་བའམ། ཡོན་ཏན་ལ་ངོམས་པ་བག་ཙམ་ཞིག་མཆིས་པ་འདི་དེའི་འོད་ལ་བརྟེན་པ་ཞིག་ལགས་པར་གདའ་གསུངས། དགེ་བཤེས་པོ་ཏོ་བ་དེ་སྡེ་སྣོད་གསུམ་ལ་མཁྱེན་པ་རྒྱས་ཤིང་། དེ་ཐམས་ཅད་གདམས་ངག་ཏུ་ཤར་བ་ཞིག་བྱུང་སྟེ། འབྲོམ་རིན་པོ་ཆེས་བསྟན་པའི་ཁྱབ་གདལ་གསུང་ཙ་ན་པོ་ཏོ་བའི་ངོས་སུ་ཞལ་བསྟན་ནས་གསུང་། པོ་ཏོ་བ་ཆེན་པོ་དེ་གནས་བརྟན་བཅུ་དྲུག་གི་ཡ་བོ་གཅིག་ཡིན་ཀྱང་གསུང་། ཐུགས་རབ་ཤིན་ཏུ་ཆེ་བས་མདུན་དུ་པོ་ཏི་ཅི་བྱུང་ཡང་སྐྱེས་བུ་གསུམ་གྱིས་ཁོག་བཅིངས་ནས་པོ་ཏི་ལ་ཟིན་བཤད་དུ་མཛད། པོ་ཏོ་བའི་ཞལ་ནས། རྒྱལ་གྱི་ཞང་ཆེན་པོ་དང་། འབྲོམ་རྒན་པོ་དེ་མིན་པ་ལྷ་འདྲེ་མི་གསུམ་ཐམས་ཅད་རྒྱ་སྐད་ཀྱིས་བཅུན་ནས་བཞག་གསུང་། འབྲོམ་བསྟེན་ཡུན་ཐུང་སྟེ་ཁྱུར་པོ་ལོ་ངོ་མཐོང་བདུན་དུ་བསྟེན། འབྲོམ་གཤེགས་ནས་ཀྱང་རྣལ་འབྱོར་པ་དང་། དགོན་པ་བས་སྐུ་མཆེད་གསུམ་མིག་གི་འབྲས་བུ་ལྟར་བསྐྱངས། དགོན་པ་བ་འདས་ནས་སྐུ་མཆེད་གསུམ་གྱིས་ཕ་བོང་ཐང་དུ་གྲོས་མཛད་སྐད་ན། འུ་ཅག་ཚེ་འདི་ལ་མི་ལ་ཆོས་བཤད་མི་བྱ། བན་མོའི་བསྙེན་བཀུར་མི་བཟའ། སྡེ་པ་དང་དགོན་པ་བདག་ཏུ་མི་བཟུང་། སྐྱེ་བ་ཕྱི་མ་བྱམས་པ་དང་། ཇོ་བོའི་སྤྱན་སྔར་སྨོན་ལམ་བཏབ། གཅིག་ལ་གཅིག་བརྟེན་དུ་བྱས་ལ་དགེ་སྦྱོར་སྟབས་ཅིག་ཏུ་བྱའོ་ཞེས་གྲོས་མཛད་དོ། ། དགེ་བཤེས་པོ་ཏོ་བའི་མཛད་སྤྱོད་རགས་རིམ་རྣམས་གླང་བྱ་རབ་པས་སྡོམས་སུ་བཀོད་པ་ནི། གཞན་གྱི་དཔོན་དང་གཡོག་མི་བྱ། ། གཞན་སེམས་མི་དཀྲུག་སེམས་མི་བཟུང་། ། བསྲེ་བསླད་མི་བྱ་འབྲེལ་མི་བྱ། ། ལྟོགས་འཇེན་མི་བྱ་འདྲིས་མི་བྱ། ། གྱོང་དུ་བྱ་ཞིང་འགྲོགས་དཀར་བྱ། ། རྟེན་བཞེང་བ་དང་རྟེན་ལ་མཆོད། ། ཀློག་འདོན་སྦྱིན་གཏོང་བྱ་བ་ཡང་། ། རྒྱ་ཆེན་ཡོངས་སུ་སྤང་ནས་ནི། ། རང་གི་ཟས་གོས་འཚོ་བ་ཡང་། ། ངན་ངོན་ཙམ་གྱིས་ཆོག་བྱ་ཞིང་། ། དབེན་པའི་གནས་སུ་སོང་ནས་ནི། ། སྒྲུབ་པ་སྙིང་པོར་བླང་བར་བྱ། ། ཞེས་གསུངས་སོ། ། དགེ་བཤེས་པོ་ཏོ་བའི་རྣམ་ཐར་མཛེས་པའི་པདྨོ་རྩ་འགྲེལ་ལས་གསུངས་ཚུལ་ནི། སྤང་བྱའི་གནས་ཀྱི་དབང་དུ་བྱས་ནས། རང་ཡུལ་གནས་གཞི་དག་དང་གཞི་དགོན་དང་། ། གྲོང་དང་འདུ་འཛི་སྤྱོད་ཡུལ་མ་ཡིན་ལྔ། ། མི་གཙང་འཆལ་པ་དམ་ཚིག་ཉམས་པའི་གནས། ། མི་དང་མི་མིན་བར་ཆད་གནས་ཀུན་སྤངས། ། ཞེས་དང་། སྤང་བར་བྱ་བའི་གྲོགས་ནི། འཆལ་པ་དམ་ཉམས་འདྲེས་ཁྱེར་བུད་མེད་དང་། ། ལྟ་སྤྱོད་མི་མཐུན་ཚེ་འདི་དོན་དུ་གཉེར། ། མི་གཞི་མ་གྲུབ་བླུན་དང་འདོད་པ་ཆེ། ། ཉེ་འབྲེལ་ལ་སོགས་སྡིག་གྲོགས་མཐའ་དག་སྤང་། ། ཞེས་སོ། ། སྤང་བྱའི་ཟས་ནི། ཤ་ཆང་སྒོག་བཙོང་འབགས་བཙོག་མི་གཙང་དང་། ། དཀོར་དང་གླུད་དང་ལས་ཀྱིས་འཚོ་བ་དང་། ། ལོག་འཚོ་ལྔ་དང་རྡེའུ་འཆའ་ཆུ་འཐུང་སོགས། ། མཐའ་གཉིས་སྤྱོད་པའི་མ་དག་འཚོ་བ་སྤང་། ། ཞེས་སོ། ། སྤང་བྱའི་གོས་ནི། གཅན་གཟན་རེ་བ་ཕུ་དུང་མ་ལ་སོགས། ། རྒྱུ་དང་ཁ་དོག་མི་རུང་ཚད་ལས་འདས། ། ཧ་ཅང་བཟང་དང་ངན་དྲགས་མཛེས་ཆོས་ཅན། ། ཆོས་འདུལ་གཞུང་དང་འགལ་བའི་གོས་ཀུན་སྤང་། ། ཞེས་པའོ། ། སྤང་བྱའི་ནོར་ནི། དགེ་སྦྱོང་ཀུན་གྱིས་བཅང་དུ་མི་རུང་ནོར། ། རིན་པོ་ཆེ་སོགས་མ་བརྟགས་དངོས་པོ་བརྒྱད། ། དཀོར་དང་གླུད་དང་གང་ལ་ཞེན་འགྱུར་བ། ། ཡོངས་སུ་འཛིན་པ་ཐམས་ཅད་དགྲ་བཞིན་སྤང་། ། ཞེས་སོ། ། སྤང་བྱའི་ལས་ནི། ཞིང་ལས་ཚོང་དང་བུན་སྐྱེད་དུད་འགྲོ་སྐྱོང་། ། སྨན་དང་བཟོ་དང་གཉེན་བཤེས་བསྐྱང་རན་དང་། ། གྲོང་ཆོག་བྱེད་དང་ཆར་འབེབས་སེར་བ་བསྲུང་། ། གཙོ་བོ་གནས་གཞིའི་བང་ཆེན་ལས་རྣམས་སྤང་། ། ཞེས་པ་སྟེ། དེ་དག་ནི་བཀའ་རྒྱུད་འདིའི་སྤང་བར་བྱ་བ་རྣམ་པ་དྲུག་གོ ། བསྒྲུབ་པར་བྱ་བའམ་བླང་བར་བྱ་བ་ནི། མདོ་རྒྱུད་གསུང་རབ་ཀུན་གྱི་སྙིང་པོ་སྐྱེས་བུ་གསུམ་གྱི་ལམ་གྱི་རིམ་པའི་ཉམས་ལེན་རྣམ་པར་ཐར་པ་དུ་མའི་རྒྱན་གྱིས་སྤྲས་པའི་ལམ་གྱི་ཆ་ལག་དང་བཅས་པ་རྣམས་སོ། ། ཉམས་སུ་བླང་བར་བྱ་བ་ལ་བླ་མ་བསྟེན་ཚུལ་གྱི་ཁྱད་པར་ནི། བླ་མ་ཐ་དད་སྣ་ཚོགས་མི་འཚོལ་ཞིང་། ། མཚན་ཉིད་ལྡན་པ་གཅིག་ལ་ལེགས་བརྟེན་ནས། ། དེ་ཡི་དམ་ཚིག་སྲོག་པས་གཅེས་པར་བྱེད། ། རྣམ་ཐར་ཐམས་ཅད་དེ་ཡི་རྗེས་སུ་སློབ། ། ཅེས་དང་། སྡོམ་ཁྲིམས་ཀྱི་ཁྱད་པར་ནི། རྒྱུད་དང་འཚམས་པའི་སྡོམ་ཁྲིམས་ལེགས་པར་བླངས། ། དེ་ཡི་བསླབ་བྱ་དེ་ཉིད་གཞུང་བཞིན་སློབ། ། ཅེས་དང་། བློ་སྦྱོང་ཚུལ་ནི། བློ་སྦྱོང་བློ་སྣ་མས་རིམ་བཞིན་དུ་སྦྱོང་། ། མཉམ་གཞག་རྟོགས་པ་རྗེས་ཀྱིས་གཏན་ལ་འབེབས། ། ཞེས་སོ། ། ཤེས་བྱ་ཤེས་པའི་ཁྱད་པར་ནི། མན་ངག་རིགས་པ་སྣ་ཚོགས་མི་འཚོལ་ཞིང་། ། བསླབ་འོས་ཤེས་བྱ་ཀུན་ལ་བློ་གྲོས་སྦྱངས། ། ཞེས་དང་། མན་ངག་གི་ཁྱད་པར་ནི། ཁ་ཕོ་ཅན་གྱི་མན་ངག་མི་འཚོལ་ལ། ། མན་ངག་དམ་པ་སྡེ་སྣོད་གསུམ་ལ་བྱེད། ། ཅེས་སོ། ། ཚེ་འདིའི་འཁྲི་བ་གཅོད་ཚུལ་གྱི་ཁྱད་པར། སྐྱེས་པའི་ཡུལ་སྤངས་ཉེ་དུའི་འབྲེལ་ཐག་བཅད། ། སྡེ་དང་ཡོན་བདག་ཕྱོགས་འཛིན་ཀུན་ལས་གྲོལ། ། དུད་འགྲོའི་གཡོག་དང་ཞིང་ལས་མ་ཟིན་དང་། ། མི་སེམས་འཛིན་སོགས་སྡུག་བསྔལ་ཀུན་དང་བྲལ། ། ཞེས་དང་། བྱ་བའི་ཁྱད་པར་ནི། བློ་སྦྱོང་དགེ་སྦྱོར་ལ་སོགས་བྱ་བ་ཀུན། ། མངོན་ཚན་ཆུང་ལ་དོན་གྱིས་ས་ཕྱོད་ཆེ། ། ལག་རྗེས་དག་ལ་གཙོ་བོར་མི་མཛད་ཅིང་། ། ཐོས་བསམ་སྒོམ་གསུམ་སྟན་ཐོག་གཅིག་ཏུ་མཛད། ། ཅེས་དང་། ཐོ་ཅོ་མི་མཛད་པ་ནི། འདོད་པ་ཕུགས་བཅུག་ཆགས་མེད་ལྟར་སྟོན་དང་། ། རང་དོན་ཕུགས་བཅུག་གཞན་ཕན་ལྟར་བྱེད་དང་། ། ཚེ་འདིར་མངོན་ཞེན་རྟོག་ལྡན་ལ་སོགས་པ། ། བརྫུན་དང་འདྲེས་པའི་ཐོ་ཅོ་མི་མཛད་ཅིང་། ། ཞེས་དང་། མཁས་པའི་ཁྱད་པར་ནི། རྣམ་དག་སྡེ་སྣོད་གསལ་བའི་མེ་ལོང་ལ། ། ཆོས་དང་ཆོས་མིན་གནས་ལུགས་ལེགས་མཐོང་བའི། ། འཇིག་རྟེན་ལེགས་པའི་ལམ་ལ་མི་བརྟེན་པར། ། མཁས་རྣམས་ཞུགས་པའི་ལམ་ལ་རྗེས་སུ་འཇུག ། ཅེས་དང་། ལྟ་སྤྱོད་དག་པའི་ཁྱད་པར་ནི། ལུས་ངག་ཀུན་སྤྱོད་ཆོས་འདུལ་ཇི་བཞིན་ལ། ། བརྩེ་སྟོང་དབྱེར་མེད་ཐེག་པ་མཆོག་སེམས་བརྟན། ། བླང་དོར་གཉིས་མེད་གནས་ལུགས་དོན་ཤེས་ཀྱང་། ། རྣམ་རྟོག་མ་ཟད་ཟད་ཚུལ་སྟོན་མི་བྱེད། ། ཅེས་དང་། བརྟན་པའི་ཁྱད་པར་ནི། འཁོར་བའི་རང་བཞིན་ཇི་བཞིན་རྟོགས་གྱུར་པའི། ། སྐྱིད་སྡུག་ཀུན་གྱིས་སྤྱོད་པ་མི་འགྱུར་ཞིང་། ། ལེགས་ཉེས་རྐྱེན་གྱིས་ཆོས་ལས་མི་བསྐྱོད་ལ། ། སྐྱོ་བའི་སེམས་ཀྱིས་ཐར་ལམ་དགེ་ལ་འདྲེན། ། ཞེས་དང་། ཆོས་བརྒྱད་སྤང་བའི་ཁྱད་པར་ནི། གང་ལ་ཞེན་པས་སྡུག་བསྔལ་ཀུན་འབྱུང་ཞིང་། ། ཅི་བྱས་ཆོས་ཀུན་ལྟར་སྣང་ཉིད་འགྱུར་བ། ། འཇིག་རྟེན་ཀུན་གྱིས་བསྒྲུབ་བྱ་འཇིག་རྟེན་གྱི། ། ཆོས་བརྒྱད་སྤངས་ཀྱང་སྤང་བ་ལྟར་མི་མངོན། ། ཞེས་སོ། ། ཐུགས་རྗེའི་ཁྱད་པར་ནི། མར་གྱུར་འགྲོ་བའི་སྡུག་བསྔལ་མ་བཟོད་པས། ། གཞན་དོན་མིན་པ་ཡིད་ལ་མི་དྲན་ཡང་། ། ཐུགས་རྗེ་ཅན་དུ་མངོན་མངོན་མི་མཛད་ཅིང་། ། མི་བྱེད་ཐམས་ཅད་གཞན་དོན་ཉིད་དུ་མཛད། ། ཅེས་དང་། ཤེས་རབ་ཀྱི་ཁྱད་པར་ནི། ཆོས་རྣམས་ཐམས་ཅད་སྣང་ལ་རང་བཞིན་མེད། ། སྒྱུ་མ་ནམ་མཁའི་ངོ་བོར་ཤེས་གྱུར་ཀྱང་། ། དཀར་ནག་ལས་དང་ལས་ཀྱི་རྣམ་སྨིན་ལ། ། ཡིད་ཆེས་དད་པས་ཤིན་ཏུ་གུས་པ་ཡིན། ། ཞེས་སོ། ། རྒྱལ་སྲས་ཀྱི་སྤྱོད་པ་ལ་སློབ་པའི་ཚེ་ཕར་ཕྱིན་དྲུག་གི་མི་མཐུན་ཕྱོགས་སྤོང་ཚུལ་ནི། གཞན་ལས་བསྡུས་ནས་གཞན་ལ་འགྱེད་པ་དང་། ། སྙན་གྲགས་འདོད་དང་རྙེད་པ་འདོད་པ་དང་། ། ཐོས་བསམ་ཀུན་དོར་ཉེས་ལྟུང་ཁྱད་དུ་བསད། ། མ་དག་སྦྱིན་པ་ཆོས་སུ་མི་མཛད་ཅིང་། ། རབ་བྱུང་མཁན་སློབ་བྱས་ཀྱང་བསྟན་པ་ལ། ། རྨ་འབྱིན་རེ་ལས་བསྐྱངས་འདོད་མི་འོང་ཞེས། ། སྤྱིར་ཡང་མཁན་སློབ་མི་མཛད་ཁྱད་པར་དུ། ། བན་མོ་སྐྱར་ཆོག་བར་ཆད་ཅན་གྱི་མིན། ། མ་ཤི་ཙམ་གྱི་ཟས་གོས་ངན་ལ་བརྟེན། ། ཆོས་ཀྱི་དོན་དུ་སྲོག་ཀྱང་འདོར་ནུས་པ། ། གཞན་དང་འཐབ་རྩོད་དོ་ཟླ་མི་བྱེད་པར། ། གང་དུ་མ་བདེ་ས་དེ་ཉིད་ནས་འགྲོ། ། རྙེད་དང་སྙན་གྲགས་དོན་དུ་མི་གཉེར་བས། ། འཇིག་རྟེན་ལེགས་པ་ཅི་ཡང་མི་སྒྲུབ་ཅིང་། ། བྱ་ངན་ལས་ཀུན་ངན་སྐྱུགས་དགྲ་བཞིན་དོར། ། དུས་བཞི་ཀུན་ཏུ་ཆོས་སྤྱོད་བཅུ་ལ་འབད། ། འདོད་དང་མི་དགེ་སྤོང་བྱེད་མངོན་ཤེས་སོགས། ། ཡོན་ཏན་འབྱུང་བྱེད་བསམ་གཏན་མ་གཏོགས་པ། ། གནས་པ་ཚམ་ཚོམ་སྒོམ་དུ་མི་འཚལ་ཞིང་། ། སྒོ་གསུམ་དགེ་ལ་རྩེ་གཅིག་ཉམས་པ་མེད། ། དྲི་མེད་སྡེ་སྣོད་མིག་དང་སྒྲོན་མེ་དང་། ། སྨན་གྱུར་མང་དུ་ཐོས་པས་མི་ངོམས་ཤིང་། ། ཐོས་པ་ཀུན་ཀྱང་ཉི་མ་དེ་རིང་ནས། ། དངོས་དང་མོས་པས་ཉམས་སུ་བླང་བྱར་ཉན། ། བརྒལ་ལན་སུན་འབྱིན་ཆོས་དམག་ཟེར་མཆུ་ཉུང་། ། དབང་ཟ་རང་གཟོ་བསྡུས་དོན་མི་མཛད་ཅིང་། ། དོན་གྱི་མཐའ་ཆོད་ཚིག་ཉུང་དོན་ཀུན་གོ ། མང་ཐོས་ལུང་ལྡན་དོན་གྱི་ས་མཚམས་ཕྱེད། ། གྲུབ་མཐའ་མ་འདྲེས་ཆོས་སྐད་བཟང་ལ་བརྟེན། ། ཅི་བཤད་སྒོམ་དོན་བློ་སྣ་སྒྱུར་ལ་མཁས། ། ཉམས་པ་ཟུར་གསོ་ཚིག་འབྲུ་དམ་པ་བཀྲོལ། ། འཁྲུགས་པ་ཀུན་བསྡེབས་འབྱམས་པ་ངག་ཏུ་འདྲིལ། ། བཀའ་ཆད་འགྱུར་འཁྲུགས་འགྱུར་མང་དགེ་ལ་བལྟ། ། མཁས་པའི་རྩོམ་ལུགས་འགྲེལ་ཊཱིཀ་དུ་མ་དང་། ། བླ་མའི་མན་ངག་རང་གི་བློ་གྲོས་ལ། ། བརྟེན་ནས་རྣམ་དག་ཆོས་བཤད་དེ་ལྟར་མཛད། ། ལྔ་བརྒྱ་ཐ་མར་རང་ཉིད་མི་ཉམས་ཤིང་། ། སྒྲུབ་པ་ཚུལ་བཞིན་ཞེ་ནས་བྱེད་གྱུར་ན། ། ཆོས་ཀྱི་དཔོན་དང་སྒྲུབ་གཡོག་ལ་སོགས་པ། ། ཚད་ལྡན་དོན་མཐུན་འགའ་ཞིག་མ་གཏོགས་པ། ། གཞན་གྱི་དཔོན་དང་གཡོག་པོ་མི་བྱེད་ཅིང་། ། བླ་མ་སྒྲུབ་གཡོག་ལ་སོགས་མ་གཏོགས་པ། ། གཞན་སེམས་མི་གཟུང་ཀུན་གྱི་སེམས་མི་དཀྲུག ། ལྟོགས་འཇེན་འབྲེལ་འདྲིས་ལ་སོགས་བྱ་བ་སྤང་། ། གྱོང་ཞིང་འགྲོགས་དཀའ་རྣམ་ཐར་གཙང་བ་དང་། ། དམན་པའི་ས་བཟུང་ཟས་གོས་ངན་ལ་བརྟེན། ། དད་བརྩོན་བློ་དང་སྙིང་རྗེ་ཆེ་བསྐྱེད་ལ། ། མི་རྗེས་མི་སྙེག་ཆོས་དང་གང་མཐུན་བྱ། ། དབེན་ཞིང་ཉམས་དགའ་འཚོ་བ་འབད་རྩོལ་ཆུང་། ། གནོད་ཚེ་ཀུན་བྲལ་དེ་ནི་བསྒྲུབ་པའི་གནས། ། བག་ཡངས་སོས་དལ་ཉིད་དུ་མ་སོང་བར། ། ཆུ་བོའི་རྒྱུན་ལྟར་རྒྱུན་ཆད་མེད་པར་སྒྲུབས། ། ཚེ་འདིར་མ་ཆགས་བྱ་རྒྱུ་ཆོས་ལས་མེད། ། ཁས་བླངས་གཙང་ཞིང་ལས་འབྲས་སྲོག་ལྟར་འཛིན། ། འཁོར་བས་ཡིད་འབྱུང་མར་གྱུར་འགྲོ་ལ་བརྩེ། ། བདག་འཛིན་དགྲ་ཐུལ་མ་ནོར་རྫོགས་པར་འདོད། ། ཅེས་གསུངས་པ་རྣམས་ཏེ་རྒྱས་པར་ནི་མཛེས་པའི་པདྨོ་རྩ་འགྲེལ་གཉིས་ལས་ཤེས་པར་བྱའོ། ། དགེ་བཤེས་པོ་ཏོ་བ་དེ་འབྲོམ་རིན་པོ་ཆེ་ལ་གསང་སྔགས་ཀྱི་མན་ངག་རྣམས་མཐིལ་ཕྱིན་པར་ཞུས་ནས་བླ་མེད་ཀྱི་ལམ་རིམ་གཉིས་ཀྱི་ཉམས་ལེན་མཐར་ཕྱིན་པར་མཛད་པ་ཞིག་ཡིན་ཡང་གསང་སྔགས་ཤིན་ཏུ་གསང་བར་མཛད་ནས་རྒྱུན་གྱི་དམ་ཚིག་གི་རྡོར་དྲིལ་ཉེ་གནས་ཀྱིས་ཀྱང་ཞིང་གཤེགས་ནས་མ་གཏོགས་མ་མཐོང་། གསང་སྔགས་ཀྱི་བཟླས་བརྗོད་མཐར་ཕྱིན་པས་ཆོས་སྲུང་རྣམས་ཀྱང་བྲན་དུ་ཁོལ་བ་ཞིག་སྟེ་འོལ་པ་སྟོན་ཆུང་གིས་དཔལ་ལྷ་མོ་རྦད་པས་དགེ་བཤེས་མཁར་པུ་བ་འདས། འཁོར་རྗེས་ན་འདུག་པ་ལ་ཡང་གནོད་པས་དགེ་བཤེས་པོ་ཏོ་བས་དཔལ་ལྷ་མོ་ལ་འདི་ལྟར་བཀའ་བཀྱོན་ཏེ། ཁྱོད་སངས་རྒྱས་ལ་ཆོས་དངོས་སུ་ཉན་པས་ཀྱང་འདི་ལྟར་བྱེད་ན། ངེད་ལུང་ལ་བརྟེན་པས་ཇི་ལྟར་བྱེད་གསུངས་པས། ནུབ་གཅིག་མནལ་ལམ་ན་བུ་མོ་གཞོན་ནུ་མ་གཅིག་གིས་གཡག་རྒོད་གཉིས་གཉའ་བཅག་ནས་དེད་སོང་། ཕ་ཚད་སོང་བ་དང་དེ་ཐམས་ཅད་ནམ་མཁའ་ལ་འཕུར་ནས་སོང་བ་ཅིག་རྨིས། དེ་ནས་ཕྱིས་གནོད་པ་ཡེ་མ་བྱུང་གསུང་། དགེ་བཤེས་པོ་ཏོ་བ་ཆེན་པོ་དེའི་སྐུའི་རྣམ་པ་ནི་གདོང་དཀྱུས་ཐུང་ངེ་བ། ཞལ་དཀྱིལ་དཀར་ལ་དམར་བའི་མདངས་ཆགས་པ། སྤྱན་རྩ་ཧུར་རེ་མཛད་པ་ཅིག་བཞུགས། ཆོས་གསུང་དུས་ཧུར་བཏོན་ནས་གསུངས་པས་དང་པོར་ཕྱམ་ཚེ་ཞུས། དེ་ནས་བླ་གོས་ཀྱང་རྐེད་པ་ཙམ་དུ་ཞུས་འགྲོ་བ། ཐུགས་ཤེས་རབ་ཤིན་ཏུ་ཆེ་བས་ཚིག་བཞི་པ་རེ་ལ་ཡང་འདིའི་ཆ་ནས་འདི་ལྟར་འགྲོ་འདིའི་ཆ་ནས་འདི་ལྟར་འགྲོ་ཞེས་དོན་མི་འདྲ་བ་བཅུ་བཅུ་ཙམ་འཆད་པ་ཞིག་ཡོད་པར་གསུངས། དགེ་བཤེས་པོ་ཏོ་བ་དེ་ལམ་རིམ་འཆད་པའི་ཚེ་ལམ་སྒྲོན་རྩ་བར་བྱས་ནས། བཀའ་གདམས་གཞུང་དྲུག་དང་། རིན་ཆེན་ཕྲེང་བ། སློབ་སྤྲིངས། བཤེས་སྤྲིངས། ཀ་མ་ལ་ཤཱི་ལའི་སྒོམ་རིམ་རྣམས་དང་སྦྱར་ཏེ་མཐའ་ཆོད་པར་མཛད། གཞན་ཡང་ཇོ་བོའི་བདེན་གཉིས་ལ་སོགས་པ་པོ་ཏི་ལ་བྱུང་བཤད་མཛད་པས་སློབ་དཔོན་པས་ཆོས་འདི་ཙམ་སུ་ལས་བསླབས་པ་ལགས་ཞུས་པས། སློབ་དཔོན་པྲཛྙཱ་ལ་བསླབས་པ་ཡིན་གསུང་། བཀའ་གདམས་ཟེར་བའི་སྒྲ་བོ་ཆེ་དེ་ཡང་དགེ་བཤེས་པོ་ཏོ་བ་ཆེན་པོའི་དུས་སུ་གྲགས་པ་ཡིན། རྣམ་ཐར་གཙང་བ་དང་། ཁྱབ་གདལ་ཆེ་བའང་དེ་དུས་བྱུང་བ་ཡིན་གསུང་། ཤིན་ཏུ་གཏིང་ཟབ་པས་ང་ལ་ཡོན་ཏན་འདི་ཡོད་མི་གསུང་ཡང་བྱང་ཆུབ་ཀྱི་ཐུགས་མངའ་བ། ཡི་དམ་གྱི་ཞལ་གཟིགས་པ། མངོན་པར་ཤེས་པ་རྒྱ་ཆེན་པོ་དང་ལྡན་པ་ཞིག་གོ ། དེ་ནས་ཤིང་མོ་བྱའི་ལོ་དབྱར་ཟླ་འབྲིང་པོའི་ཉ་ལ་དབྱར་གནས་མཛད་ནས། ཚེས་བཅུ་བདུན་ལ་སློབ་མ་ལ་སྤྲིངས་པའི་དབུ་བཙུགས། ཉི་ཤུ་གསུམ་གྱི་ཉིན་རྒས་པའི་སྡུག་བསྔལ་ཡན་ཆད་ཐོན། ཀ་བ་ལི་ཞལ་བསྡམས་ནས་ཁྱེད་ཅག་ང་ལ་དགེ་བཤེས་ཤིག་རེ་ཏེ་ད་ལྟ་མིང་ལས་མེད་མ་འོངས་པ་ན་མཚན་ཉིད་དང་ལྡན་པ་ཞིག་ཅི་འགྲུབ་བྱ། འུ་ཅག་རྣམས་གཏོར་མ་ཆེན་པོ་ཞིག་བཤམས་ལ་མནའ་ཐོ་ཞིག་གཅད་དགོས། ད་ཕྱིན་ཆད་སྡུག་ཏུ་འཇུག་མཁན་ཚེ་འདིའི་རྣམ་རྟོག་ཡིན་པས། དེ་མི་བོར་རི། སངས་རྒྱས་ཀྱི་བསྟན་པ་འུར་བྱིད་དུ་གཏོང་བའི་བྱ་རོག་དང་འུག་པ་བྱེད་རི་བྱས་ལ་མནའ་སྐྱོལ་གསུངས་ནས། སྤྱན་ཆབ་སྒོར་སྒོར་མཛད་ཅིང་སྟན་ལས་བཞེངས་ནས་ནང་དུ་གཤེགས་སོ། ། དེའི་ནུབ་མོ་ནས་ཅུང་ཟད་བསྙུང་། སང་དྲོའི་དུས་སུ་ཆོས་སྟོན་ཐོན་ནས་ཇོ་རིན་ང་ཡང་འགྲོ་བར་འདུག་སྟེ་མ་སྔས་རན་པ་ཡིན། འགྱོད་བ་མེད་པར་འགྲོ་གསུངས་ནས་གཟིམ་ཁང་དུ་གཤེགས་སོ། ། དེའི་ཉིན་པར་ཆོས་མ་གསུངས། མཚན་མོ་ཅང་སྟོན་ལ་སོགས་པ་སྙུན་གཡོག་པ་རྣམས་ལ་ང་གཉིད་ཟི་བ་འདྲ་བ་ཅིག་ལ་ཕྱོགས་བཅུའི་ནམ་མཁའ་གང་བའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཐོང་ནས། དེ་དག་ལ་གསོལ་བ་བཏབ་པའི་སྣང་བ་ཅིག་བྱུང་གསུངས་དེའི་དུས་སུ་གྲྭ་པ་རྣམས་ཀྱིས་སྐུ་རིམ་བྱེད་པའི་ཁྲལ་བསྡུས་པ་ན། ཐེག་པ་ཆེན་པོའི་བླ་མའི་རིམ་གྲོ་བྱེད་པ་ལ་བྲེ་སྲང་ཀྲོག་ཀྲོག་བྱེད་པས་ཅིར་ཡང་མི་འགྱུར། དུག་ཧྲུལ་གྱོན་ནས་ས་སྐྱོར་ལ་ཕར་མཉེས་ཚུར་མཉེས་བྱེད་པ་ཅིག་དགོས་པ་ཡིན་གསུང་། ཉི་ཤུ་དགུའི་ནུབ་མོ་བགྲེས་པ་རྣམས་ཞལ་མཇལ་དུ་འོང་པས། མར་མེ་མདུན་དུ་ཁྱེར་ལ་ཤོག་གསུངས་ནས་ཁོ་ཐག་ཆོད་པ་ལྟར་གནང་ནས་ད་སོངས་གསུང་། དེ་ནས་ཅུང་ཟད་ལོན་པ་ན་ཞབས་འབྲིང་ནང་འཁོར་བ་དག་དང་། མཆོད་གནས་རྣམས་སྤྱན་སྔར་བྱོན་པ་ལ། ཁྱེད་རྣམས་ཀྱིས་དགེ་བའི་བཤེས་གཉེན་མཉེས་པར་བྱས་ཏེ། སྤྱན་དང་ལྡན་པའི་ཇོ་བོ་ཨ་ཏི་ཤའི་ཞལ་ནས། བླ་མའི་ཞབས་ཏོག་བྱས་པ་དོན་མེད་པ་མ་ཡིན། དོན་ཆུང་བ་མ་ཡིན་གསུངས་པས། ངའི་ཚིག་ལ་ཡིད་ཆེས་པར་གྱིས། ཁྱེད་རྣམས་ལ་ལས་ངའི་མིག་གི་དོད་བྱས། ལ་ལས་ལག་པའི་དོད་བྱས་ཏེ་དོན་ཆེ་བ་ཡིན་གསུང་། གནམ་སྟོང་ཉིན་ཅང་སྟོན་དཀོན་མཆོག་འབར་གྱིས་ཚོགས་པ་ལ་ཞལ་གཅིག་སྟོན་པར་ཞུ། གྲྭ་པ་རྣམས་དེ་སྔར་བཀག་པས་བདག་ཅག་ལ་འབར་ཞིང་བདོག་ལགས་ཞུས་པས། རྒན་པོ་འཆི་ཁ་མ་ཅིག་བལྟས་པ་ལ་དགོས་པ་ཅང་ཡོད་དམ་གསུངས། ནན་གྱིས་ཞུས་པས་འོ་ན་ཁྲི་བརྩིགས་མཆོད་པ་བཟང་པོ་ཤོམས་ཤིག་གསུངས། གྲྭ་པ་རྣམས་ཀྱིས་དེ་ལྟར་བྱས་པའི་ཚེ་དགེ་བཤེས་པོ་ཏོ་བ་ཆེན་པོ་ཁྲི་ལ་བྱོན་ནས་ཆོས་ཤིག་གནང་ནས་ཕྱག་ཐལ་མོ་སྦྱར་ཏེ་སེམས་ཅན་སྐྱབས་མེད་པ་རྣམས་ཀྱི་སྐྱབས། མགོན་མེད་པ་རྣམས་ཀྱི་མགོན། དེ་བཞིན་དུ་གནས་དང་། གླིང་དང་། དཔུང་གཉེན་དང་། འཁྲ་ས་མེད་པ་རྣམས་ཀྱི་འཁྲ་སར་གྱུར་ཅིག་གསུངས་ནས། ཐལ་མོ་ཕྱིར་ལ་ཤིག་གིས་སོང་སྟེ་སྐུའི་བཀོད་པ་བསྡུས་བར་བརྩམས། དེ་ལྟར་དགེ་བའི་བཤེས་གཉེན་པོ་ཏོ་བ་འདི་ 1027 མེ་མོ་ཡོས་ལ་འཁྲུངས། བདུན་ཅུ་དོན་དགུའི་བར་བསྟན་འགྲོའི་དོན་མཛད་ནས་བདུན་ཅུ་དོན་དགུ་པ་ 1105 ཤིང་མོ་བྱའི་དབྱར་ཟླ་འབྲིང་པོའི་གནམ་སྟོང་གི་སྔ་དྲོ་པོ་ཏོ་དགོན་པར་སྐུ་གཤེགས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། དེ་ནས་གནམ་སྟོང་གི་མཚན་མོ་སྐུ་གདུང་འཁྱམས་སུ་སྤྱན་དྲངས་ནས་སྲོད་དང་། གོང་དང་། ཐོ་རེངས་གསུམ་དུ་གཡོར་གཙང་དང་། ཆུ་འཁྲིས་པ་དང་། འཕན་ཡུལ་བ་གསུམ་གྱི་མཆོད་པ་རྒྱ་ཆེན་པོ་མཛད། ཚེས་གཅིག་ལ་གཡོར་སྟོན་ཆོས་འབར་དང་། གཙང་པ་རྗེ་བཙུན་ཡེ་རྒྱལ་དང་། ཆུ་འཁྲིས་པ་སྟོན་པ་དབང་གཞོན་དང་། ཞང་བཙུན་ཤེས་རབ་རྒྱ་མཚོ་དང་། སྟོད་ལུང་པ་སྟོན་པ་རྒྱལ་པོ་དང་། འཕན་ཡུལ་བ་སྟོན་པ་ཤཱཀ་གཞོན་རྣམས་ཀྱིས་གདུང་གཉེར་མཛད་ནས་སྤུར་སྦྱངས་པའི་ཚེ། སྤུར་ཁང་གི་ཕྱོགས་བཞིར་རིན་པོ་ཆེའི་མཆོད་རྟེན་བཞི་བྱུང་བ་དང་། དཀར་ཕྱོགས་ཀྱི་ལྷ་རྣམས་ཀྱིས་ཕྱག་དང་མཆོད་པ་བྱས་ཤིང་ཕྱག་འཚལ་ལོ་ཞེས་པའི་སྒྲ་མི་རྣམས་ཀྱིས་ཀྱང་ཐོས་པ་བྱུང་། ལས་ཚན་གསུམ་དང་། བྲག་རྒྱབ་པས་ཕྱོགས་བཞི་ནས་མཆོད་པ་ཕུལ། ཐུགས་ལྗགས་རིང་བསྲེལ་ལ་སོགས་པའི་རྟེན་ངོ་མཚར་ཅན་མང་དུ་བྱོན། ཚེས་གཉིས་ལ་གདུང་ཆ་ལྔར་བགོས། ཚེས་གསུམ་ལ་ན་བཟའ་བགོས་དབྱར་གྲྭ་པ་རྣམས་དེར་བཞུགས་ནས་སྤུར་སྦྱངས་པའི་སར་མཆོད་རྟེན་བཞེངས་ཏེ་དགག་དབྱེ་ཐོན་ནས་སོ་སོར་བྱོན་ནོ། ། གདུང་ཁང་དུ་དངུལ་གྱི་མཆོད་རྟེན་བྱེད་པ་དགེ་བཤེས་ཕུ་ཆུང་པས་གསན་ནས། གདུང་རྟེན་དངུལ་ལས་བྱས་ན་དངུལ་མི་ངན་གྱིས་ཁྱེར་ནས་ངའི་གྲོགས་པོའི་སྐུ་གདུང་གྲོག་ནང་དུ་སྤུར་ངེ་འོང་དོགས་ཡོད་དགོངས་ནས་ཇོ་བོ་ཚུལ་བསོད་ལ་འདིར་ཤོག་གིས་གསུངས་པས། ཚུལ་བསོད་འབྱོན་དུ་མ་གནང་ཕྱིས་རབ་གནས་ལ་ཕུ་ཆུང་བ་སྤྱན་དྲངས་པའི་དུས་སུ་ཞལ་ནས་དངུལ་མ་བྱས་ན་ལེགས་པ་ཡིན་ཏེ། ད་བྱས་ཀྱི་རྟིང་ལ་རབ་གནས་ལ་བབ་པས་དབྱར་དོ་བོ་དགོན་པར་སྡོད་པའི་ལམ་གཞོར་ལ་བྱ་ཡ། འཁོར་ལོ་ཡན་ཆད་རྒྱན་ཡིན་པས་མ་ཚར་ཡང་བཏུབ། བྲེ་མན་ཆད་ཚར་བར་གྱིས་གསུངས་ནས་ཚུར་ལམ་གདུང་རྟེན་གྱི་རབ་གནས་མཛད་དོ། ། དགེ་བའི་བཤེས་གཉེན་པོ་ཏོ་བ་ཆེན་པོ་དེས་བསྟན་པའི་བྱ་བ་རྒྱ་ཆེན་པོ་མཛད་པས་སྤྱིར་གདུལ་བྱ་བགྲང་བ་ལས་འདས་ཤིང་། དུས་གཅིག་ཏུ་འདུས་པ་ལའང་ལས་སྐལ་བར་ལྡན་པའི་གྲྭ་པ་ཉིས་སྟོང་ཙམ་འདུས་པའི་ནང་ནས། བཀའ་བབ་ཀྱི་བུ་ཆེན་བརྒྱད་དུ་གྲགས་པ་ནི། དང་ཚུགས་མཆོག་ཟུང་གཅིག་ལ་འགྲན་པ་ཞིག་ཡོད་པའི་བཀའ་དགེ་བཤེས་ཕོ་བྲང་སྡིང་པ་ལ་བབ། རྩོད་པ་པཎྜི་ཏའི་རྒོལ་བ་ཡང་བཟློག་ནུས་པའི་བཀའ་དགེ་བཤེས་དོལ་པ་ཆེན་པོ་ལ་བབ། བྱམས་སྙིང་རྗེ་བྱང་ཆུབ་ཀྱི་སེམས་བདག་གཞན་བརྗེ་ནུས་པའི་བཀའ་གླང་རི་ཐང་པ་ལ་བབ། བཀའ་འགྱུར་རོ་ཅོག་ལ་གཞུང་བཤད་བྱེད་པ་ཐམས་ཅད་མཁྱེན་པའི་ཡེ་ཤེས་ལ་མངའ་བརྙེས་པ་འདྲ་བ་འོང་བའི་བཀའ་ཞང་ཤ་ར་བ་ལ་བབ། སྟོང་ཉིད་ཀྱི་ལྟ་བས་དངོས་པོ་དང་མཚན་མར་འཛིན་པ་ཐམས་ཅད་འཇིག་ནུས་པ་ཡོད་པའི་བཀའ་རམ་སྡིངས་མ་བ་ལ་བབ། གསུང་རབ་ཐམས་ཅད་སྐྱེས་བུ་གསུམ་གྱི་གདམས་ངག་ཏུ་དྲིལ་ནས་སྨན་པ་མཁས་པས་ནད་བརྟགས་ཏེ་ནད་ཐོག་ཏུ་སྨན་གཏོང་བ་འདྲ་བ་ཡོད་པའི་བཀའ་སྣང་དྲིའུ་ལྷས་པ་ཡེ་ཤེས་རྒྱལ་མཚན་ལ་བབ། མཆོད་པ་ཀུན་ཏུ་བཟུང་པོའི་མཆོད་སྤྲིན་ལ་འགྲན་ནུས་པ་ཅིག་ཡོད་པའི་བཀའ་དགེ་བཤེས་བྲག་དཀར་བ་ལ་བབ། བླ་མ་ལ་སངས་རྒྱས་དངོས་ཀྱི་མོས་གུས་རྒྱུན་ཆད་མེད་པ་ཡོད་པའི་བཀའ་གཉལ་བ་ཆོས་འབར་ལ་བབ་བོ། ། གཞན་ཡང་བསྟན་པ་ཡོངས་རྫོགས་འཛིན་པའི་བུ་ཆེན་སྐྱེས་བུ་དམ་པ་མང་པོ་བྱོན་ནོ། །
དེ་ལ་དགེ་བའི་བཤེས་གཉེན་ཕོ་བྲང་སྡིང་པ་ནི། གདུང་གཉོས་འཁྲུངས་ཡུལ་གྲབ་པ། མཚན་གཞོན་ནུ་འོད། དགེ་བཤེས་པོ་ཏོ་བ་ཡུན་རིང་དུ་བསྟེན་པ་ཡིན་ཏེ། དབྱར་དགུན་ཅུང་ཟད་མ་གཏོགས་ཞལ་མཇལ་ནས་མྱ་ངན་ལས་མ་འདས་བར་དུ་ཞབས་དྲུང་དུ་བཞུགས་ནས་ཅི་མཛད་ཐམས་ཅད་ལ་ཡོན་ཏན་དུ་འཛིན་པ་ལས་མི་མཐུན་པར་འཛིན་པར་བྱེད་མ་མྱོང་བའི་སྐྱེས་བུ་དེ་ལ་པོ་ཏོ་བ་མྱ་ངན་ལས་འདའ་ཁར་ཁྱོད་ཀྱང་བཅུ་བཅོ་ལྔ་ཙམ་དང་འགྲོགས། གཅིག་པུར་བསྡད་ན་བྲ་བ་བཞིན་དུ་དགྲས་འཁྱེར་རོ་གསུང་། དགེ་བཤེས་པོ་ཏོ་བའི་གདམས་པ་མ་ལུས་པ་ཐུགས་སུ་ཆུད། ཁྱད་པར་ཆོས་གསུང་བ་ཐམས་ཅད་དཔེ་སྣ་ཚོགས་དང་སྦྱར་ནས་གསུངས་པ་ལ་ངོ་མཚར་སྐྱེས་ནས་ཕོ་བྲང་སྡིང་པས་དགེ་བཤེས་པོ་ཏོ་བ་ལ་དཔེ་རྣམས་ཕྱོགས་གཅིག་ཏུ་བསྡེབས་པར་ཞུས་པས། དར་ཅིག་ཐུགས་དགོངས་མཛད། དེ་ནས་འོ་ན་བྱེད་ན་ཡང་གྱིས་གསུངས་པས། ཕོ་བྲང་སྡིང་པས་དཔེ་རྣམས་ཕྱོགས་གཅིག་ཏུ་དང་པོར་བསྡེབས་པ་ལ། པོ་ཏོ་བ་མཁར་ཐོག་ན་བཞུགས་པའི་དུས་སུ། གནས་བརྟན་རྒྱ་ལེ་འབར་བྱ་བས་བཤེས་གཉེན་པས་གསུངས་པའི་དཔེ་ཆོས་འདི་རྣམས་ལ་ཉམས་སུ་ལེན་པའི་གོ་རིམ་ཞིག་གསུང་བར་ཞུ་ཞུས་ནས་གསུངས་པ་དགེ་བཤེས་བྲག་དཀར་པས་ཐུགས་ལ་བཟུང་སྟེ། པོ་ཏོ་བ་གཤེགས་ནས་ལོ་དྲུག་ལོ་པ་ན་དགེ་བཤེས་བྲག་དཀར་བས་གྲབ་པ་ཅན་དུ་བྱོན་ནས། དགེ་བའི་བཤེས་གཉེན་གྱིས་གསུངས་པའི་དཔེ་ཆོས་འདི་ལ་ཞུ་གཏུགས་འདྲ་དགོས་པར་བདོག་པས་དཔེ་ཆོས་ཚར་གཅིག་ཞུ་ཞུས་པས་གྲབ་པའི་ཞལ་ནས། ཁྱེད་རང་དགེ་བཤེས་པོ་ཏོ་བའི་དྲུང་དུ་བཞུགས་ཡུན་ང་བས་རིང་ན་དཔེ་ལ་ཁྱེད་རང་མཁས་པ་མིན་ནམ་གསུང་པ་ལ། ཧ་ཅང་ནན་ཏན་མ་བྱས་ཞུས་པས་གྲབ་པས་བྲག་དཀར་བ་ལ་ཚར་གཅིག་གསུང་། དེ་ནས་ཁོང་ལ་རྟོགས་པ་གསར་པ་འཁྲུངས་ཏེ་ཐོག་མར་གནས་བརྟན་རྒྱ་ལེ་འབར་ལ་དཔེ་ཆོས་རྒྱས་པ་ཅིག་གསུངས། དེ་ནས་གྲབ་པས་བསྡེབས་པའི་གཞུང་ལ་བརྟེན། ཁོང་གི་དེ་ན་མ་ཚང་བ་ཀུན་བསྣན། ཟུར་མ་ཐོན་པ་ཀུན་གསལ་བར་བྱས་གོང་འོག་འཁྲུགས་པ་ཀུན་སོ་སོར་བསྡེབས། བག་ཙམ་བཅོས་ཏེ་གྲབ་པའི་དེ་བས་ཀྱང་ཟབ་ལ་རྒྱ་ཆེ་བའི་དཔེ་ཆོས་མཛད། དགེ་བཤེས་བྲག་དཀར་བ་ལ་སློབ་དཔོན་འཕན་ཡུལ་བ་བྱང་ཆུབ་སྣང་བས་གསན། དེ་ལ་རྟ་ནག་མདའ་རུ་འཁྲུངས་པའི་ལྕེ་སྒོམ་རྫོང་པ་ཤེས་རབ་རྡོ་རྗེས་གསན་ཞིང་གོ་བདེ་བར་ཡང་བཅོས་ནས་གཞན་ལ་དར་བར་མཛད་དོ། ། དགེ་བཤེས་གྲབ་པས་གྲབ་གནས་གསར་དང་ཕོ་བྲང་སྡིངས་བཏབ། གྲྭ་པ་བཞི་བརྒྱ་ཙམ་འདུས། དགུང་ལོ་རེ་ལྔ་པ་ལ་གྲབ་གནས་གསར་དུ་གཤེགས།
དགེ་བཤེས་བྲག་དཀར་བ་ནི་སྤྲེའུའི་ལོ་ལ་སྐུ་འཁྲུངས། དགེ་བཤེས་པོ་ཏོ་བ་ཡུན་རིང་དུ་བསྟེན་ནས་དགེ་བཤེས་པོ་ཏོ་བའི་གསུང་སྒྲོས་དཔེ་ཆོས་རྩ་འགྲེལ་བརྩམས། པོ་ཏོ་བ་གཤེགས་ནས་ཕོ་བྲང་སྡིངས་པ་ལའང་གཏུགས། དགེ་བཤེས་བྲག་དཀར་བའི་ཞལ་ནས་མདུང་དགོན་པ་ལ། འགྲོ་དྲུག་སེམས་ཅན་ཐམས་ཅད་ལ། ། ཕྱོགས་བཞིར་གཏོར་མ་གཏོང་བ་བཞིན། ། འབའ་ས་འབུས་འཁྱེར་བྱེད་པ་ནི། ། ནམ་ཞིག་བདག་ཉིད་འགྱུར་ཞིག་གུ། ། བྱ་བ་ཡིན་ནོ་གསུངས། བྲག་དཀར་བའི་ཞལ་ནས། མི་འདི་སྦྱང་སླ་བར་འདུག་གསུང་། མདུང་དགོན་པའི་ཞལ་ནས། མི་མ་ཡིན་སྦྱང་སླ། མི་ལ་གོ་བ་འཇོལ་བ་འོང་། མི་མ་ཡིན་ལ་མངོན་ཤེས་ཡོད་པས་གོ་བ་འཇོལ་བ་མི་འོང་གསུང་། འདིས་གནས་ཁང་གཅིག་ཏུ་ལོ་ཉི་ཤུ་རྩ་གསུམ་བཞུགས་པ་ལ། ཀོ་མཐིལ་གཅིག་གིས་ལོ་གསུམ་ཐུབ། མར་ལོག་གཅིག་གིས་ཟླ་བ་གཅིག་དང་ཞག་བཅུ་གསུམ་ཐུབ། ཟླ་བ་རེ་རེ་ལ་ནས་བྲེ་ལྔ་ལྔ་ལས་མི་འཛད། ངས་ཆོས་ཁ་ལུས་གཉིས་ཀས་བཤད་ཀྱང་ཁྱེད་ཀྱིས་མི་གོ ། བྲག་དཀར་ནས་སྟག་རྩེར་འཕོ་རྩ་ན་ཁམ་ཕོར་བརྒྱད་དང་བུམ་པ་གཅིག་ལས་འཁྱེར་རྒྱུ་མེད་གསུང་། དེ་ནས་དགུང་ལོ་བརྒྱད་ཅུ་པ་ཡོས་ལོའི་དགུན་ཟླ་ཐ་ཆུང་གི་ཉི་ཤུ་གཉིས་ལ་གཤེགས། དགེ་བཤེས་འདིས་ལམ་རིམ་འཆད་དུས་གྲྭ་པ་གསུམ་བརྒྱ་ཙམ་འདུས་སོ། །
དགེ་བཤེས་དོལ་པ་ནི། 1059 ས་མོ་ཕག་གི་ལོ་ལ་ཡབ་དགེ་བཤེས་ལེགས་པའི་རྒྱ་མཚོ་ཟེར་བ་ཐེག་པ་ཆེན་པོ་གསང་སྔགས་ཀྱི་མཁྱེན་པ་ཤིན་ཏུ་ཆེ་བ། མི་གཞི་ཡང་ལེགས་པ་ཅིག་ཡོད་པ་དེ་ལ་སྲས་གཉིས་མངའ་བའི་ཆེ་ཤོས་སུ་འཁྲུངས། གདུང་རོག་སྐྱེངས་པ་ཡིན། བཙས་ནས་ལོ་ལྔའི་བར་དུ་སྐུ་ལུས་ལ་རྟག་ཏུ་འོད་འཁོར་བ་ཅིག་བྱུང་། ལོ་ལྔ་ལོན་ནས་ཀློག་ཡིག་སློབ་པར་མཛད། དེ་ནས་ལོ་བཅུ་བཞི་ལོན་གྱི་བར་དུ་དགེ་བཤེས་ཆོས་ཀྱི་ལ་མངོན་པ་གསན། དེ་ནས་ལོ་བཅུ་དགུའི་བར་དུ་ཁྱུང་པོ་གྲགས་སེང་ལ་སོགས་པ་ལ་དབུ་ཚད་གསན། དེ་ནས་ཡབ་ལ་རབ་ཏུ་འབྱུང་བར་ཞུས་པས། ངེད་སྔགས་པའི་བརྒྱུད་ཡིན་གསུང་ནས་མ་གནང་། ཡང་ཡང་ཞུས་པས་ཁྱོད་རབ་ཏུ་འབྱུང་ན་ཆུང་བ་འདི་ལ་སྔགས་པ་ཅིག་འཚོལ་བ་ལས་འོད་མེད་གསུང་། དེ་ནས་ལོ་ཉི་ཤུ་ལོན་པ་ན་འོན་དུ་ཆོས་འཁོར་ཞིག་གི་དུས་སུ་ལྷབ་སྟོན་གཤེན་གསུམ་བྱ་བ་འཚོགས་པ་ཡིན་ཏེ། དེས་དུས་སུ་མི་ཆེ་ཤོས་ཡིན། དེར་དགེ་བཤེས་གཤེན་ལ་མཁན་པོ་ཞུས་ནས། སྔ་དྲོ་དགེ་ཚུལ་ཕྱི་དྲོ་དགེ་སློང་། སྲོད་ལ་སེམས་བསྐྱེད་གནང་སྟེ་ནན་ཏན་བྱེད་ན་དེ་ཙུག་བྱེད་དགོས་པ་ཡིན་བྱ་བའི་ཞལ་གྱལ་ཡང་གསུང་། དེ་ནས་རྒྱ་འདུལ་བ་འཛིན་པ་ལ་འདུལ་བ་གསན། ལོ་གསུམ་ན་གནས་མལ་གྱི་གཞི་མ་གཏོགས་པ་མདོ་རྩ་བློ་ནས་རྩར་གྱིས་བཤད། དགེ་བཤེས་རྒྱ་གྲོང་འདུལ་མཛད་པས། ངེད་ཟུར་ཆོས་པ་རྣམས་ཀྱིས་དད་ལྡན་རྣམས་ལ་རེ་མོས་ཀྱིས་ཆོས་འཆད་པ་ལ། ངས་ཐེག་ཆེན་རྣལ་འབྱོར་བཤད་པས་དད་ལྡན་རྣམས་དད་པ་སྐྱེས་ནས་ངུ་སྟེ་ང་རང་ལ་པྲིག་པ་ཅིག་ཀྱང་མ་བྱུང་། ཕྱིས་དགེ་བཤེས་པོ་ཏོ་བའི་གསུང་གི་འཁྲིགས་བཅུག་པས། སྔར་གྱི་དེ་ཇི་ཙུག་སོང་ན་སྙམ་པ་ཅིག་བྱུང་གསུང་། ཡབ་ཀྱི་ཞལ་ནས་ངའི་གྲོགས་པོ་འབྲོམ་སྟོན་གྱི་སློབ་མ་སྒོམ་སློབ་པ་ཅིག་ཡོད་པར་འདུག་པས་དེར་སོང་གསུངས་ཏེ། ངའི་དགེ་བའི་བཤེས་གཉེན་གྱི་ཐོག་མ་ཕ་རྒན་དེར་གྱུར་ནས་འདུག་གསུང། དེ་ནས་ལོ་ཉི་ཤུ་རྩ་དྲུག་པ་ལ་པོ་ཏོ་བ་སྒྲོ་ལག་དགོན་པ་ན་བཞུགས་པའི་སྤྱན་སྔར་བྱོན། ཇ་དཀོན་པས་ག་བུར་གྱི་ཐང་སྨན་བནྡེ་བཅུ་ལྷག་ཙམ་ལ་དྲངས། ཆོས་གོས་ལིང་བཟང་པོ་ཞིག་ཡོད་པ་ཕུལ་ནས་ཆོས་ཀྱི་ཞུ་བ་བྱས་པས། ཁྱོད་ལམ་ནོར་བ་ཡིན། ལྷ་ས་ན་ཉན་བཤད་ཉི་མ་ཤར་བ་ལྟ་བུ་ཡོད་པ་དེར་མི་སྡོད་པར་ང་ལ་ནི་འཆི་བ་རྗེས་སུ་དྲན་པ་བྱ་བའི་ཆོས་གཅིག་ལས་མེད། དེ་ལ་མགུ་ན་ལོ་བཞི་སྡོད། ཆོས་གོས་འདི་ཡང་ཚོངས་ལ་བརྒྱགས་ཀྱིས་གསུངས་ནས་ཚུར་ལ་གནང་། དེ་ནས་དགོངས་ཆོས་ཀྱི་དུང་བྱུང་ནས་བྱོན་པ་ན་རིན་ཆེན་ཕྲེང་བའི་རྒྱལ་པོའི་ཚུལ་བསྟན་པའི་ལེའུ་ལ་སླེབ་ནས། ཁྱོད་ཀྱིས་མཁྱེན་པར་མཛད་སླད་དང་། ། འགྲོ་བ་ལ་ཡང་བརྩེ་སླད་དུ། ། ཁྱོད་ལ་མི་སྙན་ཡང་སྨན་པ། ། བདག་ལྟ་གཅིག་པུ་ཏེ་པོར་གསོལ། ། ཞེས་པ་དེ་ནས་ཐོས་པ་ཡིན་ཏེ། ཚོགས་ཆོས་ཐོས་པའི་སྔ་ཤོས་འདི་ཡིན་གསུང་། དེ་ཐོན་ནས་མདོ་སྡེ་རྒྱན་ཞིག་གསུངས། དེ་དུས་ཚོགས་བསྡུས་ནས་ལོ་གསུམ་ལོན་ནས་འདུག ། གྲྭ་པ་སུམ་ཅུ་ཙམ་བཞུགས་ཀྱི་འདུག་པ་ལ་ལྐོག་ཆོས་ཁྲིད་པ་གསུམ་བཞི་ཙམ་ལས་ཡོད་ཡོད་མི་འདྲ། ཐུགས་མ་མཉེས་ཙ་ན་ཁྱེད་ལེགས་པར་བྱེད་ན་གྱིས། མི་བྱེད་ན་ང་ལ་བློ་མི་བདེ་བ་གསུམ་བཞི་ཙམ་ལས་མེད་དོ་གསུང་གི་འདུག ། དེ་ནས་དབྱར་གནས་ཀྱི་དུས་ལ་བབ་ནས་ཡོན་ཤེ་ལ་ཞུ་སྣ་བཅོལ་ནས་དབྱར་འདིའི་བྱ་བ་ཞུ་བའི་གནས་ཀྱི་སློབ་དཔོན་ཞིག་ཀྱང་ཞུ་ཞུས་པས། ཇི་ལྟ་བུའི་ཡོན་ཤེ་ཡང་འོང་བ་གསུངས་ནས་བཞེངས་ནས་བཞུད། ཐུགས་མ་དགྱེས་པས་མ་ལེགས་པ་བྱས་སྙམ་པ་ན། སང་དགོངས་དེ་འདིར་ཤོག་གསུངས་ནས་བྱོན་པས། ཇོ་བོ་སྟོན་པ་ང་ལ་གནས་ཀྱི་སློབ་དཔོན་ཞུ་ཟེར་ཏེ་ད་ལྟ་གནས་ཀྱི་སློབ་དཔོན་མཚན་ཉིད་དང་ལྡན་པ་མེད། ར་སྒྲེང་གི་ཤུག་པའི་གསེབ་དེར་དགེ་བཤེས་སྟོན་པ་གནས་ཀྱི་སློབ་དཔོན་དུ་འོས་པ་ཅིག་བྱུང་བ་ཡིན་ཏེ། སུས་ཀྱང་གནས་མ་བཅས་པར་སྐུ་གཤེགས་སོ། ། བཅོམ་ལྡན་འདས་ཀྱིས་གནས་དྲན་པ་ཉེ་བར་བཞག་པ་བཞི་ལ་ཆོས་ཤིག་གསུངས་པས། འུ་ཅག་ཀྱང་དེ་ལ་གནས་འཆའ་དགོས་པ་ཡིན་གསུང་། དོལ་པ་ཉིད་ཀྱི་ཞལ་ནས། ངས་པོ་ཏོ་བའི་གསུང་དེ་སྐད་གཞན་དག་ལ་བཟླས་པས་གནས་དགེ་བསྙེན་ལ་འཆའ་འམ་སྙམ་སྟེ། ཚེ་འདི་ཕྱི་ཐམས་ཅད་ཀྱི་མདུན་མ་དེ་ལ་བལྟོས་པས་གནས་སུ་ངེས་པར་འོང་བ་ཡིན་གསུངས། སྤྱན་སྔའི་ཞལ་ནས་ཀྱང་། ངའི་དོན་གྱི་མཁན་པོ་དགེ་བསྙེན་རྒན་པོ་དེར་འདུག་བྱ་བ་གསུངས། དགེ་བཤེས་དོལ་པས་ཆོས་ལ་འཕྲིག་བག་རེ་རྙེད་པས། སྔར་གྱི་ཆོས་ཐམས་ཅད་ཀྱིས་གོ་མི་ཆོད་པར་གོ ། ཕྱི་མ་ཕན་ཆད་གལ་ཆེ་པའི་བློ་བག་རེ་བྱུང་བས། ཨན་རེ་བསམ་སྙམ་པ་མིན་པ་བཤད་སྙམ་པ་མེད་པས་དཔེ་དང་ཡིག་སྣ་ཀུན་ཀྱང་མི་ལ་བྱིན། ཀ་པ་ལི་རང་སྟོང་པར་བཞག་གསུང་། དེ་བས་ན་དགེ་བའི་བཤེས་གཉེན་དགོས་སྙམ་པ་ཅིག་བྱུང་གསུང་། དགེ་བཤེས་དེ་དང་མ་ཕྲད་ཀྱི་རིང་ལ་ངེད་གླེན་པ་ཆེན་པོར་འདུག ། རབ་ཏུ་བྱུང་དགེ་བའི་བཤེས་གཉེན་དེ་དང་མཇལ་བས། བདེ་སྐྱིད་སྙན་གྲགས་ཐམས་ཅད་ངེད་ཆེ་གསུང་། ལོ་ཉི་ཤུ་རྩ་གཉིས་སུ་པོ་ཏོ་བའི་དྲུང་དུ་བསྡད་པ་ཡིན་ཏེ། དེས་ངོམས་པའམ་ཆོག་སྙམ་པ་ཡེ་མ་བྱུང་གསུང་། དགེ་བཤེས་དོལ་པ་ཆེན་པོས་དབྱར་དགུན་པོ་ཏོ་བའི་སར་བཞུགས་ནས། སྟོན་དཔྱིད་སྐུ་མཆེད་གཉིས་པོའི་སྤྱན་སྔར་རེ་མོས་སུ་བཞུགས། དེ་ནས་པོ་ཏོ་བ་ 1105 བྱ་ལོའི་དབྱར་གནས་ཀྱི་ཟླ་བའི་གནམ་སྟོང་ལ་མྱ་ངན་ལས་འདས་ནས་དབྱར་དེར་བཞུགས། སྟོན་ཆོད་པ་དང་ཚུར་བྱོན་ནས་དཔོན་གཡོག་བཅུ་ཙམ་ཆུ་སྣ་དགོན་པར་བཞུགས། ཚུར་འབྱོན་ཁར་ཁམས་པ་ལུང་པ་ལ་ཡང་ཆོས་འབྲེལ་གསན། དེ་ནས་དཔོན་འཕགས་པས་དཔྱད་ལ་གང་དུ་སྤྱན་དྲངས་ཏེ་ཕུལ། 1106 ཁྱི་ལོ་ལ་ཡ་གད་བཟུང་སྟེ་ལོ་གཉིས་སུ་གཞུང་མ་གསུངས་པར་སྟོང་ཐུན་སྐྱ་རེ་མ་ཆག་པར་གསུངས། དེ་ནས་འཁོར་རྣམས་ཀྱིས་ཞུས་ནས། དང་པོར་སློབ་མ་ལ་སྤྲིངས་པ་ཅིག་གསུངས། དེ་ནས་བེའུ་བུམ་སྔོན་པོར་གྲགས་པ་འདི་གསུངས་ཏེ་དགེ་བཤེས་དེའི་ཞལ་ནས། རང་གི་རྒྱུད་ལ་ཅི་ཕན་བྱ་བའི་ཆེད་དུ་འཕངས་འཕངས་རྣམས་བརྗེད་ཀྱིས་དོགས་ནས་བྲིས་པ་ཡིན། བཤད་པའི་གོ་ཆ་མ་བྱས། གོ་ཆ་བྱས་ན་དབྱར་དགུན་རེའི་ཆོས་གསུངས་ཚོད་རྣམས་བཟུང་ཡང་ཟད་པ་མེད་པ་འོང་སྟེ། གཅིག་པུར་སྡོད་ན་དགོས་སྙམ་ནས་ཁ་ཡར་བྲིས་ནས་ཡོད་པ་ལ་དགེ་བཤེས་ཕོ་བྲང་སྡིངས་པས་དཔེ་ཆོས་དེ་བསྡེབས་འདུག་པ་གསན་པས། འོ་ན་ངའི་དེ་རྣམས་ཀྱང་ལྷན་ཅིག་ཏུ་བསྡེབས་ན་གཞན་ལ་ཕན་པ་སྲིད་དམ་སྙམ་ནས་ཡ་གད་དུ་བསྡེབས་པ་ཡིན་ཏེ། རྩོམ་ཡང་ལེགས་པ་ཅིག་བྱུང་། དེ་ནས་དགུན་བེའུ་བུམ་གསུང་བར་དགོངས་པ་ལ་ཇོ་མོ་དཔེ་མོ་ཕྱ་བ་ན་རེ། དགེ་བཤེས་ལ་རྨི་ལམ་ངན་པ་ཅིག་བྱུང་དགེ་བཤེས་ཀྱི་ནང་ཁྲོལ་ཡིན་ཟེར་བ་ཅིག་དོལ་ལུང་བ་ལ་འགྱེད་ཀྱིན་སྣང་ཟེར་བ་ཅིག་རྨིས་ཟེར་བས། ནང་ཁྲོལ་ཞིག་ནི་འགྱེད་ཉེན་ཡོད་དེ། སྐུ་རིམ་མི་དགོས་གསུང་ནས་དགུན་དེ་ནས་གསུང་བར་མཛད་དེ་འགྲོ་བ་དཔག་ཏུ་མེད་པའི་དོན་མཛད་དོ། ། དགེ་བཤེས་ཤ་ར་བའི་ཕྱག་ཏུ་བེའུ་བུམ་འདི་བྱོན་པས་དགེ་བཤེས་དེ་བསྟན་བཅོས་རྩོམ་པའི་འབྲིང་ཚད་དུ་སྐྱོལ་ནས་འདུག་གསུང་སྟེ་ཚར་གཅིག་བཞེངས་པར་མཛད། སློབ་དཔོན་དོན་སྟེང་བའི་ཞལ་ནས། ང་ཡང་འདི་གཅིག་ཐོས་པར་འདོད་པས་གདུངས་ནས་ཡོད་ཙ་ན་དཔྱིད་ཅིག་གསུང་ཟེར་བ་ཐོས་ནས་ཡ་གད་དུ་ཕྱིན་པས་དེའི་ནུབ་མོ་རྡོ་རྗེ་གདན་དུ་ཕྱིན་པ་ཅིག་རྨིས། དེ་ནས་དགེ་བཤེས་དེའི་གསུང་གིས་བྱིན་གྱིས་བརླབས་པས་ཕན་པར་བྱུང་ནས་དགེ་བཤེས་ལ་སྨན་པར་མཆི་བར་གདའ་ཞུས་པས། གཅིག་པུར་སྡོད་ན་འདིས་དགེ་བཤེས་བཏུབ་པ་ཡིན་གསུང་། གཞན་ཡང་དགེ་བའི་བཤེས་གཉེན་འདི་ཇོ་བོ་ཉིད་ཀྱིས་ཀྱང་ལུང་བསྟན། སྐྱེ་བ་བདུན་པའི་རྟགས་དང་ལྡན། བླ་མ་རྣམས་ཀྱིས་ཇི་སྐད་བསྟན་པ་བཞིན་ཐུགས་ལ་འཁྲུངས། བདེ་བར་གཤེགས་པ་མང་པོའི་ཞལ་གཟིགས། མངོན་པར་ཤེས་པ་རྒྱ་ཆེན་པོ་མངའ། དེ་ཡང་སྙེ་ཐང་འོར་དུ་རབ་གནས་ཤིག་ལ་སྤྱན་དྲངས་པའི་ཚེ་སྟོད་ལུང་པའི་བཙུན་ཆུང་གཉིས་ཀྱིས་སེམས་བསྐྱེད་ཞུ་སྙམ་ནས་ཡང་ཡང་བརྩམས་པ་ལ། དགེ་བཤེས་མི་མང་པོས་གཡེངས་ནས་ཞུ་བའི་སྐབས་མ་བྱུང་བས། ཐུགས་ཀྱིས་མཁྱེན་ནས་ཁྱེད་རང་གྲབས་ཀྱིས། ཚར་བ་དང་ང་བོས་གསུང་། ཇོ་སྟན་མངའ་རིས་པས་ཡི་གེ་དྲུག་པ་ལི་མ་དེ་སྤྱན་དྲངས་ནས་བྱོན་པ་དགེ་བཤེས་དོལ་པས་ཡེ་མ་གསན་པ་ལ། ཁོང་དོལ་པའི་གཟིམ་ཁང་དུ་བྱོན་ནས་ཕྱག་བྱ་བར་བརྩམས་པས། སྔོན་ལ་ལྷ་ཚུར་སྤྱན་དྲོངས་གསུངས་ནས་མངོན་ཤེས་ཀྱིས་མཁྱེན། བཟང་ཡུལ་དུ་བྱོན་པའི་དུས་ན་ལྕེ་དྭལ་སྒང་པའི་ཞལ་ནས། ང་ལ་སྔར་བས་སྒོམ་བཟང་བ་ཅིག་སྐྱེས་པ་ལ། ཅིའི་ཕན་ཡོན་ཡིན་སྙམ་པ་ན་དགེ་བཤེས་དོལ་པ་དེར་བྱོན་པ་གཟིགས་པས་ཁོང་གི་བྱིན་རླབས་ཡིན་གསུངས་ནས་བསྙེན་བཀུར་ཆེ་བར་མཛད། ཕྱིས་ཀྱང་དེར་བྱོན་པའི་དུས་ན་དེ་ཁོ་ན་བཞིན་དུ་བྱུང་བས་དད་གུས་ཤིན་ཏུ་ཆེ་བར་མཛད་གསུང་། དགེ་བཤེས་མོན་བུ་ཆུང་བའི་ཞལ་ནས། དགེ་བཤེས་ཡ་གད་པ་དེ་རིང་འདི་ན་ཡར་ལ་འབྱོན་པར་འདུག ། མདངས་ཆོས་བསམ་དུ་བཏུབ་པ་ཅིག་བྱུང་གསུངས་ནས། དགེ་བཤེས་དཔོན་གཡོག་འབྱོན་པ་ལ་བྱ་ར་མཛད་དེ། མོན་བུ་ཆུང་གི་ལུང་པའི་མདོར་ཕེབས་པ་ན་བཟང་སྤོས་མང་པོ་བསྲེགས་ནས་གསོལ་བ་འདེབས་པ་ཡིན་གསུང་། གཞན་ཡང་དགེ་བཤེས་འདི་མཐོང་བ་དང་། གསུང་ཐོས་པ་དང་། དྲན་པ་ཙམ་གྱིས་ཀྱང་གཞན་གྱི་ཉོན་མོངས་པའི་གཉེན་པོར་འགྲོ་བ་ཅིག་ཡོད་པ་ཡིན་གསུང་སྟེ། ལྷོར་བྱོན་པའི་དུས་རྒན་པོ་ཞིག་ན་རེ། ཕ་སྤུན་ཞིག་གིས་ཅི་བྱེད་པ་བྱེད་དུ་མ་སྟེར། དུག་བཏང་ནས་བསད་སྙམ་པ་ལགས་ཏེ་ཁ་སང་ཁྱེད་དང་མཇལ་བས་བསམ་པ་དེ་ལོག ། ད་ངན་བུ་ལ་བཟའ་ཁྲིམས་ཤིག་དང་སྲོག་གཅོད་ཀྱི་སྡོམ་པ་ཅིག་ཞུ་ཟེར་བ་ལ། ཁོ་ཅི་ལ་གསོད་ཁྱོད་རང་གིས་སྐྱེ་བ་སྔ་མ་ལ་ཁོ་ལ་གནོད་པ་བྱས་པའི་རྟགས་ཡིན་གསུངས་ནས། ཕམ་ཕབས་ཤིག་གནང་། ཡང་བུད་མེད་གཅིག་ན་རེ། ངན་བུ་ལ་བུ་ནོར་རུང་ཞིག་བདོག་པ་ཁོང་གིས་བསད་ནས་ཞེ་སྡང་ཆེན་པོ་སྐྱེས་པ་ལ་ཁ་སང་ཁྱེད་མཐོང་བས་ཆུང་དུ་ཐལ། མི་ཀུན་ན་རེ་སྐྱེ་བ་བདུན་པའི་བྱང་ཆུབ་སེམས་དཔའ་ལགས་ཟེར་ན་ལགས་སམ། ངན་བུ་ལ་བཟའ་ཁྲིམས་ཤིག་ཀྱང་ཞུ་ཟེར་བ་ལ། མ་རྒན་སྐྱེ་བ་བདུན་པ་མི་འདྲ་ན། འུ་ཅག་བཟའ་ཁྲིམས་ཤིག་བྱ་དགོས་གསུངས་ནས་བུའི་མྱ་ངན་སེལ་བའི་གདམས་ངག་དང་བཟའ་ཁྲིམས་གནང་། དེ་ལྟར་དགེ་བཤེས་དོལ་པ་མཚན་དངོས་ཤེས་རབ་རྒྱ་མཚོ། ཡ་གད་པ་ཞེས་ཀྱང་གྲགས་པ་དེ་དགུང་ལོ་ཉི་ཤུ་རྩ་དྲུག་ཏུ་ཚོགས་དཔོན་མཛད་དེ་འགྲོ་བ་དཔག་ཏུ་མེད་པ་སྨིན་པར་མཛད་ནས་སྨིན་དྲུག་གི་ཟླ་སྨད་ལ་གྲར་ཕེབས་དུས་སྐུ་ཁམས་ཅུང་ཟད་བསྙེལ་ནས་ཡར་བྱོན། ཟླ་བ་ཕྱི་མ་ལ་ཆོས་ཆེན་པོ་ཞིག་འཆད་དེ་འདི་རྣམས་ཀྱིས་མི་གོ་ཉེན་ཡོད་གསུང་། སྐུ་གཤེགས་ཁར་དགུན་དེ་ཆོས་ཆེན་པོ་ཞིག་འཆད་དེ་ཁྱེད་ཀྱིས་མི་གོ་བར་གདའ་གསུངས་བ་ལ། གཞན་གྱིས་མ་གོ་བར། བེའུ་བུམ་གསུང་ངམ། བསླབ་བཏུས་གསུང་ཟེར། དགེ་བཤེས་དོལ་པའི་གསུང་དེ་ཐོས་པ་ཙམ་གྱིས་ཀྱང་བློ་སྣ་བསྒྱུར་ནུས་པ་ཞིག་ཡོད་པར་གསུངས། དེ་ལྟར་བསྟན་འགྲོའི་དོན་རྒྱ་ཆེར་མཛད་ནས་དགུང་ལོ་དོན་གསུམ་པ་ 1131 ལྕགས་མོ་ཕག་གི་ལོ་དགུན་ཟླ་འབྲིང་པོའི་ཚེས་བདུན་གྱི་དྲོ་ཐོན་པ་ན་ཡ་གད་ཉིད་དུ་སྐུ་གཤེགས་སོ། ། ཡ་གད་དུ་ཚོགས་པ་སྟོང་ཙམ་འདུས་པའི་ནང་ནས་བུ་སློབ་ཆེ་བ་ནི་ལྷ་འབྲི་སྒང་པ། དོན་སྟེང་བ་ཆེན་པོ། བྱ་འཆད་ཁ་བ། དཔལ་ཕག་མོ་གྲུ་པས་ཀྱང་འདི་ལ་ཆོས་འབྲེལ་གསན་སྣང་ངོ་། ། དབུས་ཀྱི་ཉི་ཟླ་ཟུང་གཅིག་ཅེས་ཡོངས་སུ་གྲགས་པ་བཤེས་གཉེན་ཆེན་པོ་པོ་ཏོ་བའི་ཐུགས་སྲས་གླང་རི་ཐང་པ་དང་ཤ་ར་བ་གཉིས་ལས། ཤ་ར་བའི་རྣམ་ཐར་ནི་འཆད་པར་འགྱུར་ལ།
དགེ་བའི་བཤེས་གཉེན་གླང་རི་ཐང་པ་ནི་འཕན་ཡུལ་གཉན་གོང་གསེར་མ་ཤོངས་སུ་ཡབ་ཇོ་བོ་དར་མ་མདོ་བཟང་གི་སྲས་སུ་ 1054 ཤིང་ཕོ་རྟ་ལ་འཁྲུངས། རུས་ཤུགས་ཚངས། ཁོ་རང་གི་ཞང་པོ་བཤེས་གཉེན་གྲོག་མོ་མཁར་པ་ལ་རབ་ཏུ་བྱུང་། མཚན་རྡོ་རྗེ་སེང་གེར་བཏགས། རྒྱལ་བ་འོད་དཔག་ཏུ་མེད་པའི་སྤྲུལ་པར་བྱེད་ལ། སྔོན་ལོ་ཙཱ་བ་སྐ་བ་དཔལ་བརྩེགས་སུ་སྤྲུལ་ནས་བསྟན་པ་ཆེས་ཆེར་གསལ་བར་མཛད་ཅིང་། འདིར་གདུལ་བྱ་བློ་དམན་པ་རྣམས་ཀྱི་ངོར་དང་པོར་ཤིན་ཏུ་བཀྲེན་པའི་ཚུལ་མཛད་དེ་འཚོ་བ་དཀའ་ཐུབ་ལ་གནས་ནས་སྡེ་སྣོད་གསུམ་ལ་སྦྱངས་ཤིང་། སྡེ་སྣོད་གསུམ་གྱི་བརྗོད་བྱའི་དོན་ཐམས་ཅད་སྐྱེས་བུ་གསུམ་གྱི་ལམ་གྱི་རིམ་པར་དྲིལ་ནས་ཉམས་སུ་ལེན་པའི་མན་ངག་བྱང་ཆུབ་ལམ་གྱི་རིམ་པ་ལ་ཐུགས་རྩེ་ཆིག་སྒྲིལ་དུ་མཛད་ནས་བཀའ་གདམས་སྐུ་མཆེད་གསུམ་ག་ལ་གཏུགས་ཤིང་གཙོ་བོར་ནི་དགེ་བའི་བཤེས་གཉེན་པོ་ཏོ་བ་ཆེན་པོ་ལ་བཀའ་གདམས་གཞུང་དྲུག་གི་བཤད་པ་མཐའ་དག་པ་དང་། ལྐོག་ཆོས་སུ་བདག་པས་གཞན་གཅེས་པའི་བྱང་ཆུབ་ཀྱི་སེམས་སྒོམ་པའི་མན་ངག་བློ་སྦྱོང་དོན་བདུན་མའི་ཁྲིད་ལེགས་པར་གསན་ཏེ་ཉམས་ལེན་གྱི་མཐིལ་དུ་མཛད་དོ། ། དགེ་བཤེས་སྣེའུ་ཟུར་པ་ལའང་ལམ་རིམ་གྱི་ཁྲིད་གསན་ནོ། ། དགེ་བཤེས་གླང་ཐང་པས་ལོར་སྤྱན་སྔ་ལ་ཆོས་གསན་དུས་ཡོས་སྤར་བ་རེས་གདན་ནོན་མཛད་ཀྱིན་བཞུགས། དེ་ནས་བསོད་སྙོམས་མཛད་པའི་རྙེད་པ་གང་བྱུང་སྤྱིར་དགེ་འདུན་དང་། ཁྱད་པར་པོ་ཏོ་བ་དཔོན་སློབ་རྣམས་ལ་དྲངས་པས་སྐུ་བསོད་སྐྱེས་ཏེ་གྲྭ་པ་ཉིས་སྟོང་ཙམ་འཚོགས་པའི་བརྒྱགས་ཁོང་རང་གིས་གནང་། གནས་ངེས་མེད་མཛད། གཙོ་བོར་པོ་ཏོ་བའི་རྣམ་ཐར་དང་གསུང་སྒྲོས་འཛིན། པོ་ཏོ་བ་གཤེགས་ཁར་དགེ་བཤེས་གླང་ཐང་པ་ལ་ཁྱེད་གནས་གཅིག་ཏུ་མ་བཞུགས། དངོས་པོ་ཅིང་ཡང་བདག་གིར་མ་འཛིན། དེ་གཉིས་སེམས་ལ་ཞོག་གསུང་། སྤྱན་སྔ་ལ་དགེ་བཤེས་གླང་ཐང་པས་ཁོ་བོ་མི་ཚེ་ཧྲིལ་གྱིས་བྱམས་པ་ཁོ་ན་སྒོམ་པར་ཞུ་ཞུས་པས། སྤྱན་སྔས་དབུ་ཞྭ་ཕུད་ནས་ཇོ་བོ་པ་ཆད་བྱད་བཟང་གསུངས་ནས་དབུ་དུད་དུད་མཛད། ལན་ཅིག་གི་ཚེ་ཚེ་རབས་ཐམས་ཅད་དུ་དགེ་སློང་གི་དངོས་པོ་དང་མི་འབྲལ་བའི་དམ་བཅའ་བརྟན་པོ་མཛད་པས། དཔལ་ལྷ་མོ་དྲེའུའི་སྐད་ལྷང་ངེ་བྱོན་ནས་དེའི་བར་དུ་ངས་ཁྱོད་ཀྱི་གྲོགས་བྱའོ་གསུང་། གླང་ཐང་པའི་ཞལ་ནས། ཅི་ཙུག་སོང་ངམ། བསྲུང་སྡོམ་བག་རེ་ཡང་བྱས། བསམ་སྒོམ་བག་རེ་ཡང་བྱས། བསོད་ནམས་ཀྱི་ལས་བག་རེ་ཡང་བྱས་པ་ལ་ཅི་འདྲིའི་པོ་ཏི་ཟབ་མོ་ཞིག་ཞལ་ཕྱེ་ཡང་སྐྱོན་ཐམས་ཅད་རང་གི་ཡིན། ཡོན་ཏན་ཐམས་ཅད་ཇོ་བོ་སེམས་ཅན་གྱི་ཡིན། དེའི་གདན་ཀས་ཁེ་དང་རྒྱལ་ཁ་ཐམས་ཅད་གཞན་ལ་བྱིན་ལ། གྱོང་དང་བུབ་ཁ་ཐམས་ཅད་རང་གིས་བླང་སེམས་པ་མིན་པ་གོ་རྒྱུ་མ་རྙེད་གསུང་། ཡང་ཞལ་ནས། འགྲོ་བ་རིགས་དྲུག་གར་སྐྱེ་ཆ་མེད་དེ། གར་སྐྱེས་ཀྱང་སེམས་ཅན་ལ་ཕན་འདོགས་པ་འདི་མི་བརྗེད་དམ་སེམས། མིག་ལོང་ཡང་ཆོས་མི་འཆོར། རྣ་བ་འོན་པ་དང་། མཛེས་ཁྱེར་བ་དང་། རྐང་ལག་ཞ་བ་དང་། ལྕེ་ལྐུགས་ཀྱང་ཆོས་མི་འཚོར་གསུངས་ཏེ་དོན་ལ་ཕྱིར་མི་ལྡོག་པར་ཞལ་གྱིས་བཞེས་པ་ཡིན། པོ་ཏོ་བ་ཞིང་གཤེགས་ནས་ཐང་གྲོང་ལྟག་ཏུ་གཏོར་མ་མཛད་དུས་གཏོར་སྡེར་བྱ་རོག་གིས་ཁྱེར་ཏེ་གླང་ཐང་གི་ཤར་གྱི་རི་དེའུ་དེའི་ཁར་བཞག་པས་གླང་ཐང་པས་དེར་བྱོན། དཔོན་ཤཱཀྱ་བྱ་བས་ཞབས་ཏོག་བྱས་ཏེ་དེར་ལོ་གསུམ་སྒྲུབ་པ་མཛད། ཞོལ་དུ་སྒྲུབ་ཆུ་ཡང་བྱུང་། ཉིན་མཚན་དབྱེར་མེད་དུ་བྱང་ཆུབ་ཀྱི་སེམས་ཀྱི་ཏིང་ངེ་འཛིན་སྒོམ་པར་མཛད་པས་ཀླུ་མོ་སྤུན་གསུམ་གྱིས་གླང་ཐང་གི་གནས་ཕུལ། དགེ་འདུན་གྱི་སྡེ་འཛུགས་པར་ཞུས། ཕྱིས་རི་དེའི་སྟེང་ནས་ཡར་འཕུར་ཏེ་ཐུགས་ཕྲེང་སྐྱུར་སར་ཁྲོན་པ་བྲུས། དབུ་ཞྭ་སྐྱུར་སར་བླ་བྲང་བྱས་ཏེ་གླང་ཐང་གི་དགོན་པ་བཏབ། པོ་ཏོ་བའི་མཛད་པ་བཞིན་དུ་བཀའ་གདམས་གཞུང་དྲུག་དང་། ལམ་སྒྲོན་བྱམས་ཆོས་ལ་སོགས་པའི་གཞུང་ཆེ་བ་རྣམས་ཀྱིས་སློབ་མ་བསྐྱངས། གླང་ཐང་པ་ལ་མོ་ཆགས་དེའུར་བཞུགས་དུས་བྱ་ཡུལ་བས་ཀྱང་འདུལ་བ་མདོ་རྩ་གསན། ཕྱིས་གླང་ཐང་པ་སྣེའུ་ཟུར་པའི་ཡང་སློབ་མར་གྱུར་ཅིང་། སྣེའུ་ཟུར་པས་གླང་ཐང་པ་ལ་ཁྱེད་ཀྱི་ཡོན་ཏན་དང་བདེ་བ་འདི་རྣམས་གཞན་གང་ལས་ཀྱང་མ་བྱུང་བྱང་ཆུབ་ཀྱི་སེམས་ལས་བྱུང་བ་ཡིན་ནོ་གསུང་སྟེ། དེ་ཁོ་ན་བཞིན་དུ་བདག་གཞན་བརྗེ་བའི་བྱང་ཆུབ་ཀྱི་སེམས་ཁོ་ན་ལ་གཙོ་བོར་མཛད་དེ། གླང་ཐང་པ་ཉིད་ཀྱི་ཞལ་ནས་ཁོ་བོས་རླུང་ཐ་མལ་དུ་གཏོང་མ་མྱོང་གསུངས་ཏེ་གཏོང་ལེན་སྒོམ་པ་དང་ནམ་ཡང་མ་བྲལ་བར་མཛད་པའི་གསུང་ངོ་། ། གླང་ཐང་པ་ཞལ་བཞུགས་རིང་གླང་ཐང་གི་ལྕགས་རིའི་ནང་དུ་སྲོག་ཆགས་རྣམས་གཅིག་ལ་གཅིག་མི་འཚེ་བར་གྲགས། བླ་མ་རྡོ་རྗེ་གདན་པས་ཁྱུང་པོ་རྣལ་འབྱོར་ལ་སངས་རྒྱས་སྣང་བ་མཐའ་ཡས་ཀྱི་སྤྲུལ་པ་གླང་རི་ཐང་པ་ལས་བསྙེན་པར་རྫོགས་ཤིག་ཅེས་ལུང་བསྟན་པ་ལྟར་དགེ་བཤེས་གླང་ཐང་པས་མཁས་གྲུབ་ཁྱུང་པོ་རྣལ་འབྱོར་གྱི་མཁན་པོ་མཛད་དོ། ། ལན་ཅིག་དགེ་བཤེས་པོ་ཏོ་བ་ཀླུངས་ཤོད་ན་འགོ་ན་བཞུགས་རྩ་ན། གླང་རི་ཐང་པ་དེར་བྱོན་དུས་གླང་ཐང་པ་སྐུ་ཁམས་མ་བདེ། དང་ཁ་ངན་པས། སྤྱིར་རིགས་དྲུག་གི་སྡུག་བསྔལ་འདི་འདྲ། དྲག་ཤོས་མི་ཡིན་དེའི་ནང་ནས་ཀྱང་རབ་ཏུ་བྱུང་བ་ཡིན་ཏེ་འདི་འདྲ་བ་སྙམ་ནས་ལས་འབྲས་དང་འཁོར་བའི་ཉེས་དམིགས་བསམ་པས་སྐྱོ་ཞིང་ཡིད་འབྱུང་བ་ནི་སྐྱེས། ལུས་ལ་སྡིག་པ་སྦྱོང་བའི་ནུས་པ་མེད་སྙམ་ནས། པོ་ཏོ་བ་བསྐོར་བ་མཛད་པའི་ལམ་ཁར་ན་བཟའ་གདན་དུ་བཏིངས་ནས་དགེ་བའི་བཤེས་གཉེན་པ་འདིར་བཞུགས་པ་ཞུ་དང་ཞུས་པས། ཅི་བྱེད་ང་བསྐོར་བ་བྱེད་གསུང་ནས་མ་གནང་བ་ལ་དོན་གལ་ཆེ་བ་ཅིག་བདོག་བཞུགས་པར་ཞུ་དང་ཞུས་པས། དགེ་བཤེས་པ་སྟན་ཐོག་ཏུ་བཞུགས་པ་ལ་གླང་རི་ཐང་པས་ཁོ་བོ་དབྱར་ཁམས་ངན་པར་བྱུང་། དང་ཁ་ཡང་ངན་པར་བྱུང་། མི་རྟག་པ་དང་འཁོར་བའི་ཉེས་དམིགས་བསྒོམས་པས་ཡིད་འབྱུང་སྐྱེས། དགེ་སྦྱོར་བྱེད་པའི་ནུས་པ་མེད་པས་ཤེས་པ་ཤིན་ཏུ་མ་བདེ། གདམས་ངག་ཅིག་ཞུ་འཚལ་ཞུས་པས། པོ་ཏོ་བའི་ཞལ་ནས། ཇོ་བོ་ཁམས་དག་གྲང་དྲོ་སྙོམས་པའི་ཉམས་བདེ་སྟེ་ཚེ་ཕྱི་མ་ལ་ཕན་ནམ་གསུང་ནས་དགྲ་བཅོམ་པ་གཉིས་ཀྱི་གཏམ་རྒྱུད་དྲངས་ནས། གཞན་ཡང་སྡུག་བསྔལ་ཡོན་ཏན་ནི། ། སྐྱོ་བས་དྲེགས་པ་སེལ་བར་བྱེད། ། འཁོར་བ་པ་ལ་སྙིང་རྗེ་སྐྱེ། ། སྡིག་ལ་འཛེམ་ཞིང་དགེ་ལ་དགའ། ། བྱ་བ་ཡིན་ཕར་སོངས་དང་ང་སྐོར་བ་བྱེད་གསུངས་ནས་བཞུད། གླང་ཐང་པ་དེའི་ནུབ་མོ་ནས་བདེ་བསྙུང་དྭངས་སོ། ། གླང་ཐང་པ་བསོད་ནམས་གསོག་པ་ལ་དགྱེས། ཟྭ་ཐུག་ནུར་ནུར་པ་སྐོལ་བ་མི་གང་གལ་ཆེ་བ་ལ་འདྲེན། ལན་ཅིག་ཇ་ནི་མེད། རྩབས་རེ་དང་བཅས་པའི་ཚ་པ་ཅིག་པོ་ཏོ་བ་དཔོན་སློབ་ལ་དྲངས། བསྔོ་བ་བྱེད་ཙ་ན་ཁ་བ་ཐུལ་གྱིས་བྱུང་བས། པོ་ཏོ་བའི་ཞལ་ནས་སྒོམ་ནག་ཁྱོད་ཉི་མ་དེ་རི་ནས་དབུལ་དང་བྲལ་བ་ཡིན་ནོ་གསུང་། དགེ་བཤེས་གླང་ཐང་པས་ལྷ་སར་བསྐོར་བ་ཡུན་རིང་མཛད་དུས་དགོང་མོ་ཕྱི་སེ་བ་ཅིག་ལ་བྱོན་པས་སྐད་ཅིག་ལྷང་ལྷང་གྲག་པ་གཟིགས་སུ་བྱོན་པས་བུད་མེད་གཞོན་ནུ་ཅིག་སྐྱིགས་འདུག་པ་བཀྲོལ་ནས་བུད་མེད་དེ་གོས་ཀྱི་འཐུ་བར་བསྙལ། ཁྱོད་རང་ང་ལ་ཕ་དང་བུའི་འདུ་ཤེས་ཞོག ། ངས་ཁྱོད་ལ་མ་དང་སྲིང་མོའི་འདུ་ཤེས་འཇོག་གསུངས་ནས་བཞུགས། སང་མོ་ལ་ན་བཟའ་ཅིག་བྱིན་ནས་བཏང་། ཕྱིས་བུད་མེད་དེས་ཡོན་བདག་གི་རྩ་བ་བྱས་གླང་ཐང་ཤར་གྱི་རི་དེའུ་དེའི་ཁར་སྒྲུབ་ཁང་བརྩིགས་ནས་སྒྲུབ་པ་མཛད། དེ་ནས་བཤེས་གཉེན་ཆེན་པོ་འདིས་གདུལ་བྱ་འདུལ་བའི་དུས་ལ་བབ་པ་ན། གླང་ཐང་གི་དགོན་པ་བཏབ་ཚུལ་དང་བྱང་ཆུབ་ལམ་རིམ་བཀའ་གདམས་གཞུང་དྲུག་དང་སྦྱར་ཏེ་རྒྱ་ཆེར་བསྟན་པའི་ཚུལ་སྔར་བཤད་ཟིན་ཅིང་། རང་རྒྱུད་འདུལ་བ་གཙོ་བོར་མཛད་དེ་འདོད་ཡོན་གྱི་འཁྲི་བ་ཆོད་པ་ཡང་འགྲོན་པོ་གཞུང་འགྲོན་པ་ལམ་ལ་འགྲོ་ཁ་མ་ཅིག་གིས་ཇ་ལེགས་པ་ཞིབ་མ་གང་ཕུལ། སྐོལ་ནས་བཞེས་པའི་ཞུ་བ་ཕུལ་ནས་ཡོད་པ་ལ་ཡོན་བདག་དེ་མདོ་ནས་ཡར་འཁོར་ནས་མཇལ་དུ་ཕྱིན་པས་ཇ་རྡུལ་ཁད་དེ་འདུག་པ་ལ་ཇ་མ་སྐོལ་ལམ་ཞུས་པས་ངས་ཀྱང་ཁོ་མ་སྐོལ། ཁོས་ཀྱང་ང་མ་སྐོལ་གསུང་། ཉེ་གནས་ཀྱིས་ངེད་རང་ལ་མི་རྣམས་ཀྱིས་གླང་རི་ཐང་པ་ངོ་ནག་པ་ཞུ་ཡི་འདུག ། མཇལ་མི་བྱུང་བ་རྣམས་ལ་གསུང་གླེང་རེ་དང་ཞལ་ངོ་དཀར་པ་རེ་མཛད་ན་ཞུས་པས། དེའང་ཡིན་ཏེ་འཁོར་བའི་ཉེས་དམིགས་བསམ་ན་ངོ་དཀར་ས་འདུག་གེ ། དེས་ན་འཁོར་ལ་འདི་གསོས་དུས་མེད་པའི་ནད་དང་། ཐར་དུས་མེད་པའི་བཙོན་དུ་འདུག་གོ་གསུང་། རབ་ཏུ་བྱུང་ནས་སྐུ་ཚེ་རིལ་པོ་ལ་ཞལ་འཛུམ་པ་ལན་གསུམ་ལས་མ་བྱུང་། ད་ལྟར་དགེ་བཤེས་གླང་ཐང་པས་སྒྲུབ་པ་དར་དྲག་ལ་རྒྱུན་རིང་བ་མཛད་ཅིང་ཐེག་ཆེན་གྱི་ཆོས་མཐའ་དག་ལ་སྐད་ཅིག་ཀྱང་གཡེལ་བ་མེད་པར་སྦྱངས་ཏེ་གཟུངས་དང་ཏིང་ངེ་འཛིན་ལ་སོགས་པ་སངས་རྒྱས་ཀྱི་ཆོས་གྲངས་མེད་པ་ལ་རྣམ་པར་རྩེ་ཞིང་། སྤྱན་དང་མངོན་པར་མཁྱེན་པ་ལ་སོགས་པ་ཡོན་ཏན་ཐམས་ཅད་ཀྱིས་ཕྱུག་པ། བདེ་བར་གཤེགས་པ་ནམ་མཁའི་སྐར་ཚོགས་ཙམ་གྱི་ཞལ་གཟིགས། སྤྱོད་འཇུག་ལས། བདག་བདེ་གཞན་གྱི་སྡུག་བསྔལ་དག ། ཡང་དག་བརྗེ་བ་མ་བྱས་ན། ། སངས་རྒྱས་ཉིད་དུ་མི་འགྲུབ་ཅིང་། ། འཁོར་བ་ན་ཡང་བདེ་བ་མེད། ། ཅེས་གསུངས་པ་ལྟར་བདག་གཞན་བརྗེ་བའི་ཉམས་ལེན་གཏོང་ལེན་རླུང་ལ་སྐྱོན་ནས་བསྒོམ་པས་འབད་མེད་ལྷུན་གྲུབ་ཏུ་བྱུང་སྟེ། ཁོ་བོས་རླུང་ཐ་མལ་དུ་གཏོང་མ་མྱོང་གསུང་། ལན་ཅིག་གླང་ཐང་པ་ཆོས་གསུང་བའི་པང་དུ་བུད་མེད་ཞིག་གིས་བུ་ཆུང་སྐྱེས་མ་ཐག་ཅིག་བསྐྱལ་ནས་འདི་ཁྱེད་རང་གི་བུ་ཡིན་ནོ་ངས་མི་གསོས་སོ་ཟེར་ནས་སོང་། དེ་ལ་ཞལ་ངོ་འགྱུར་བ་ཙམ་ཡང་མེད་པར་དང་བླངས་མཛད། འོ་འདུ་བཙལ་ནས་མ་རྒྱགས་བུ་རྒྱགས་གནང་། བུ་དེ་ཆེར་སྐྱེས་པ་དང་སྔར་གྱི་མི་ཚང་གིས་བསྙེན་བཀུར་བྱས་ནས་དེ་གོང་བུ་ཆུང་འདྲ་བྱུང་བ་མ་གསོས། འདི་ཡང་འདི་བཞིན་མ་བྱས་ན་མི་གསོས་པ་མོ་དང་རྩིས་ལ་བྱུང་བས་དེ་ལྟར་བྱས་པ་ལགས། བཟོད་པ་མཛད་ཅིང་བུ་གནང་བ་ཞུས་པས་ཅི་དགར་གནང་སྟེ་འདི་ནི་བྱང་ཆུབ་སེམས་དཔའི་སྤྱོད་པ་བྱ་དཀའ་བའི་གནས་ལ་བསླབས་པའོ། ། ལྷ་མོ་ལུང་གི་དགོན་པ་ན་བཞུགས་དུས་དབྱར་ཅིག་སེ་ལྕོག་པའི་ཞིང་ལ་ཆུའི་གནོད་པ་བྱུང་བ་ལ། ཆུ་སྒྱུར་ཞུས་པས་རྭ་ཅོ་ཁ་བཅད་པ་ཐེ་རྩེས་མནན་པ་ཞིག་བསྐུར་ནས་ཆུའི་གནོད་པ་འོང་བའི་ལོགས་ལ་སྦོས་གསུང་། དེ་བཞིན་བྱས་པས་ཆུ་ཕར་འགྱུར། ཕྱིས་རྭ་ཅོ་ཁ་ཕྱེ་ནས་བལྟས་པས། འདི་ན་དགེ་སློང་རྡོ་རྗེ་སེང་གེ་ཡོད་པས་ཆུ་ཁྱོད་ཕར་རྒྱུག་ཟེར་པ་ཅིག་འདུག་གོ ། དེ་ནི་བདེན་པའི་བྱིན་གྱིས་བརླབས་ཀྱིས་མེ་ཡི་ཕུང་པོ་ཞི། ། དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། ། ཞེས་གསུངས་པ་དང་ཚུལ་མཚུངས་པའོ། ། གླང་རི་ཐང་གི་ཐུགས་དམ་འབུམ་པ་རྒྱལ་བ་སྲས་བཅས་ཀྱི་ཕོ་བྲང་མཐོང་བ་དོན་ལྡན་བཞེངས་གྲུབ་ནས་རྟེན་དམ་ཚིག་པ་ལ་ཡེ་ཤེས་པ་རབ་ཏུ་གནས་པའི་བརྟན་བཞུགས་དང་། མེ་ཏོག་གི་མངའ་དབུལ་ཕྱོགས་བཞི་རེ་རེ་ནས་བཤེས་གཉེན་ཆེན་པོ་པོ་ཏོ་བ་ལ་སོགས་པ་དགེ་སློང་རྣམ་དག་སྣམ་སྦྱར་བཞེས་པ་བརྒྱ་རྩ་བརྒྱད་ཙམ་གྱིས་མེ་ཏོག་གི་ཆར་ཕབ་པའི་ཚེ། ནམ་མཁའ་ལ་འཇའ་ཚོན་རྣམ་པར་བཀྲ་བའི་གུར་བཀྲ་ཤིས་རྟགས་བརྒྱད་ལྟ་བུ་ངོ་མཚར་བས་གང་། བར་སྣང་ནས་ལྷས་མེ་ཏོག་གི་ཆར་ཕབ་བའི་དྲི་བསུང་ཁྱད་པར་ཅན་དུད་འགྲོས་ཀྱང་མནམ་དུ་རུང་བ་བྱུང་། ཞལ་བསྲོ་ལ་དཀོན་མཆོག་གི་མཆོད་པ་རྒྱ་ཆེན་པོ་དང་། དགེ་འདུན་འདུས་པ་རྒྱ་མཚོའི་ཚོགས་ལ་བསྙེན་བཀུར་དང་། སྐྱེ་བོ་མཐའ་ཡས་པ་ལ་སྦྱིན་གཏོང་རྒྱ་ཆེན་པོ་དང་། ཕོངས་པ་ལ་ཕམ་བབས་ཆེར་སྩལ་ཏེ། དེ་ཡང་། བདོག་པ་ཐམས་ཅད་འབྲས་བཅས་ཏེ་། ། སྐྱེ་བོ་ཀུན་ལ་བཏང་སེམས་ཀྱིས། ། སྦྱིན་པའི་ཕ་རོལ་ཕྱིན་གསུངས་ཏེ། ། ཞེས་པ་ལྟར་རོ། ། དང་པོའི་དུས་སུ་གླང་ཐང་པ་དང་ཤ་བོ་སྒང་པ་གཉིས་ཆོས་ཕར་གསན་ཚུར་གསན་བྱེད། ཤ་བོ་སྒང་པའི་ཞལ་ནས། གླང་ཐང་པ་བྱང་ཆུབ་ཀྱི་སེམས་ཚན་ཆེ། ངས་ཕན་འདོགས་པ་ལ་སྲོག་གཏོང་ནུས་ཏེ། གནོད་པ་སྐྱེལ་བ་ལ་མི་ནུས། ཁོང་གིས་གཉིས་ཀ་ལ་ནུས་གསུང་། གཉན་རྣ་མོ་པ་དང་། ཁོང་རྣམ་གསུམ་འཛོམ་པ་ལ། ད་ལྟ་འཆི་ན་ཇི་ལྟར་བྱེད་བྱས་པས། རྣ་མོའི་ཞལ་ནས་འདི་ཙུག་ཀྱང་བྱེད། འདི་ཙུག་ཀྱང་བྱེད་བྱ་བ་ཁ་ཡར་བྱུང་སྟེ་མངས་པ་ཡིན་གསུང་། ཤ་བོ་སྒང་པའི་ཞལ་ནས་བྱང་ཆུབ་ཀྱི་སེམས་སྦྱོང་བ་མིན་པ་གཞན་བྱ་རྒྱུ་མེད་གསུང་། གླང་ཐང་པའི་ཞལ་ནས། ཁོ་བོ་ད་ལྟ་རང་འཆི་ཡང་བསྐྱེད་འདོན་རྒྱུ་སྤུ་ཙམ་ཡང་མེད་གསུང་། སེམས་དཔའ་ཆེན་པོ་གླང་རི་ཐང་པ་སྐུ་མྱ་ངན་ལས་འདའ་ཁར་སེམས་ཅན་གྱི་དོན་དུ་དམྱལ་བར་སྐྱེ་བར་སྨོན་ལམ་བཏབ་པ་ཡིན་ཏེ་མི་འགྲུབ་པ་འདྲ། དག་པའི་སྣང་བ་འབའ་ཞིག་འཆར་ཡིན་འདུག་གསུང་ནས་ཐུགས་ཁྲལ་མཛད་པར་གསུངས། དགེ་བའི་བཤེས་གཉེན་འཆད་ཁ་བས་དགེ་བའི་བཤེས་གཉེན་ལྕགས་ཞིང་པ་ལ་གླང་ཐང་པའི་བློ་སྦྱོང་ཚིག་བརྒྱད་མ་གསན་ནས། ཐུགས་འགྱུར་བའི་ཚིག་བརྒྱད་མ་ནི། བདག་ནི་སེམས་ཅན་ཐམས་ཅད་ལ། ། ཡིད་བཞིན་ནོར་བུ་ལས་ལྷག་པའི། ། དོན་མཆོག་སྒྲུབ་པའི་བསམ་པ་ཡིས། ། རྟག་ཏུ་གཅེས་པར་འཛིན་པར་ཤོག ། གང་དུ་སུ་དང་འགྲོགས་པའི་ཚེ། ། བདག་ཉིད་ཀུན་ནས་དམན་ལྟ་ཞིང་། ། གཞན་ལ་བསམ་པ་ཐག་པ་ཡིས། ། མཆོག་ཏུ་གཅེས་པར་འཛིན་པར་ཤོག ། སྤྱོད་ལམ་ཀུན་ཏུ་རང་རྒྱུད་ལ། ། རྟོག་ཅིང་ཉོན་མོངས་སྐྱེས་མ་ཐག ། བདག་གཞན་མ་རུང་བྱེད་པས་ན། ། བཙན་ཐབས་གདོང་ནས་བཟློག་པར་ཤོག ། རང་བཞིན་ངན་པའི་སེམས་ཅན་ནི། ། སྡིག་སྡུག་དྲག་པོས་ནོན་མཐོང་ཚེ། ། རིན་ཆེན་གཏེར་དང་འཕྲད་པ་བཞིན། ། རྙེད་པར་དཀའ་བའི་གཅེས་འཛིན་ཤོག ། བདག་ལ་གཞན་གྱིས་ཕྲག་དོག་གིས། ། གཤེ་བསྐུར་ལ་སོགས་མི་རིགས་པའི། ། གྱོད་ཁ་རང་གིས་ལེན་པ་དང་། ། རྒྱལ་ཁ་གཞན་ལ་འབུལ་བར་ཤོག ། གང་ལ་བདག་གིས་ཕན་བཏགས་པའི། ། རེ་བ་ཆེ་བ་གང་ཞིག་གིས། ། ཤིན་ཏུ་མི་རིགས་གནོད་བྱེད་ནའང་། ། བཤེས་གཉེན་དམ་པར་བལྟ་བར་ཤོག ། མདོར་ན་དངོས་དང་བརྒྱུད་པ་ཡིས། ། ཕན་བདེ་མ་རྣམས་ཀུན་ལ་འབུལ། ། མ་ཡི་གནོད་དང་སྡུག་བསྔལ་ཀུན། ། གསང་བས་བདག་ལ་ལེན་པར་ཤོག ། དེ་དག་ཀུན་ཀྱང་ཆོས་བརྒྱད་ཀྱི། ། རྟོག་པའི་དྲི་མས་མ་སྦགས་ཤིང་། ། ཆོས་ཀུན་སྒྱུ་མར་ཤེས་པའི་བློས། ། ཞེན་མེད་འཆིང་བ་ལས་གྲོལ་ཤོག ། ཅེས་གསུངས་པ་འདིའོ། ། དེ་ལྟར་སེམས་དཔའ་ཆེན་པོ་གླང་རི་ཐང་པས་བསྟན་འགྲོའི་དོན་རྒྱ་ཆེར་མཛད་ནས་མཐར་དགུང་ལོ་བདུན་ཅུ་བཞེས་པ་ 1123 ཆུ་མོ་ཡོས་ལོའི་དཔྱིད་ཟླ་ཐ་ཆུང་ས་གའི་ཉི་ཤུ་གསུམ་ལ། གླང་ཐང་དུ་སྐུ་གཤེགས་ནས་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། སྐུ་གདུང་ལ་མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་ཏེ་ཞུགས་ལ་ཕུལ་བའི་ཚེ། ནམ་མཁའ་ལ་འཇའི་གུར་གྱི་རིམ་པ་དང་། མེ་ཏོག་གི་ཆར་དང་། ལྷའི་སྤོས་ཀྱི་ངད་ལྡང་བ་དང་། རབ་བྱུང་དང་སྐྱེ་བོའི་ཚོགས་ཁྲི་ཁྲག་ཙམ་ཚོགས་པ་ལ་མཐོང་སྣང་དག་པ་དང་། བྱང་ཆུབ་ཀྱི་སེམས་དང་དད་པ་མི་ཕྱེད་པ་སྐྱེས་པ་ཕལ་ཆེར་ལ་བྱུང་ཞིང་། གདུང་རུས་ལ་ལྷ་སྐུ་དང་། ཐུགས་དང་། གདུང་ཤ་རི་རམ་དང་། རིང་བསྲེལ་དང་བཅས་པ་བསམ་གྱིས་མི་ཁྱབ་པ་བྱུང་སྟེ་གདུང་རིང་བསྲེལ་གྱིས་ཀྱང་འགྲོ་བའི་དོན་རྒྱ་ཆེེར་མཛད་དོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སེམས་དཔའ་ཆེན་པོ་པོ་ཏོ་བ་སྲས་དང་བཅས་པ་ལ་མཆོད་ཅིང་གསོལ་བ་གདབ་པ་དང་། སེམས་དཔའ་ཆེན་པོ་འདིའི་རྣམ་པར་ཐར་པ་དྲན་པར་བྱས་ལ་ལག་ཏུ་ཅི་ལོན་བྱ་བ་དང་། ཐ་ན་སྨོན་ལམ་གྱི་ཡུལ་དུ་བྱས་ནས་ཀྱང་མཛད་པ་རྣམ་ཐར་དེ་དག་བསམས་ལ་བག་ཆགས་ཅི་ཐེབས་བྱའོ། ། ། །
༈ རྣམ་དཔྱོད་འགྲན་ཟླ་བྲལ་བའི་ཤ་ར་བ། ། ཞེས་བསྔགས་པ། བྱང་ཕྱོགས་གངས་རིའི་ཁྲོད་འདིར་རྒྱལ་བའི་བསྟན་པའི་སྙིང་པོ་ཇོ་བོ་ཡབ་སྲས་ཀྱི་མན་ངག་བྱང་ཆུབ་ལམ་གྱི་རིམ་པ་སྤེལ་བའི་སླད་དུ་བསམ་བཞིན་དུ་བྱོན་པ་སེམས་དཔའ་ཆེན་པོ་ཤ་ར་བ་གང་དུ་འཁྲུངས་པའི་ཡུལ་ནི། བྱང་ར་སྒྲེང་ནས་ཡ་ཚད་ཕྱིན་པའི་ཡུལ་རོམ་པོ་ཞེས་པ་ཡིན་ལ། གནས་དེར་པ་ཚབ་རོམ་པོའི་རྒྱུད་དུ་ 1070 ལྕགས་ཕོ་ཁྱིའི་ལོ་ཡུམ་ཕྱུགས་མ་སྐྱོང་བའི་ཕྱིར་རྡོ་ལེབ་ཆེན་པོ་ཞིག་གི་སྟེང་ན་བཞུགས་པའི་དུས་སུ་འཁྲུངས་ཏེ། ཕྱིས་རྡོ་ལེབ་དེ་ལ་ཤ་ར་བ་བལྟམས་ས་ཞེས་གྲགས་ཤིང་རྡོ་ལེབ་དེའི་སྟེང་ན་ཤ་ར་བ་འཁྲུངས་ནས་ཞབས་བརྐྱངས་པའི་ཤུལ་རྡོ་ལ་ཞབས་རྗེས་ཀྱང་ཡོད་ཅེས་རྗེ་བཙུན་བླ་མ་བློ་བཟང་ཡེ་ཤེས་གསུང་། གནས་དེ་ད་ལྟ་ཀུན་གྱི་ཕྱག་མཆོད་ཀྱི་གནས་སུ་བྱེད་དོ། ། དེ་ནས་དགུང་ལོ་བཅོ་བརྒྱད་ཀྱི་བར་ཡབ་ཡུམ་གཉིས་ཀྱིས་བསྐྱངས་ཤིང་ཁྱིམ་དུ་ཞུགས། དེར་བཞུགས་རིང་བྱིས་པའི་སྤྱོད་པ་མཐའ་དག་ལས་ངང་གིས་ལོག ། སྔར་ཡུན་རིང་པོ་ནས་གོམས་པའི་བག་ཆགས་བརྟས་པས་ཡི་གེ་འདྲི་ཀློག་སོགས་ནི་ཚེགས་མེད་པར་མཁྱེན། དཀོན་མཆོག་མཆོད་པ་སོགས་དགེ་བའི་ལས་ལ་ནི་ངང་གིས་འཇུག ། སྐལ་བ་མཉམ་པའི་སེམས་ཅན་གཞན་དག་མཐོང་ན་བྱམས་པའི་མིག་གིས་བལྟ་ཞིང་བརྩེ་བའི་འཛུམ་གྱིས་བསུ་བ་ལས་གཞན་ལ་ཁྲོ་བ་དང་སྐྱོན་བརྗོད་པ་སོགས་སྒོ་གསུམ་ཉེས་པར་སྤྱོད་པ་ལ་ནི་ངོ་ཚར་བལྟས་ཏེ་འཇུག་པའི་སྐབས་མེད། གཞན་དུ་ན་བསམ་པ་འདི་ལྟ་བུ་དག་འཁྲུངས་པར་ངེས་ཏེ། སྐྱེས་རབས་ལས། བཙོན་ར་འདྲ་བའི་ཁྱིམ་ལ་ནི། ། ནམ་ཡང་བདེ་བར་མ་སེམས་ཤིག ། ཕྱུག་གམ་ཡང་ན་དབུལ་ཡང་རུང་། ། ཁྱིམ་ན་གནས་པ་ནད་དུ་ཆེ། ། གཅིག་ནི་བསྲུང་བས་ཉོན་མོངས་ལ། ། གཉིས་པ་འཆོལ་བས་ཤ་ཐང་ངོ་། ། ཕྱུག་གམ་ཡང་ན་དབུལ་ཡང་རུང་། ། གང་ན་བདེ་བ་མེད་གྱུར་པ། ། དེ་ལ་དགའ་བར་རྨོངས་པ་ནི། ། སྡིག་པའི་འབྲས་བུ་སྨིན་པ་ཉིད། ། ཅེས་གསུངས་པ་ལྟར། ཁྱིམ་ན་གནས་པ་ནི་ཉོན་མོངས་པ་དང་། ཉེས་པར་སྤྱོད་དང་སྡུག་བསྔལ་དུ་མའི་འབྱུང་གནས་སུ་རིག་ནས་བདག་ནམ་ཞིག་ན་བཙོན་དོང་དང་འདྲ་བའི་ཁྱིམ་གྱི་གནས་འདི་ནས་བྱུང་སྟེ་རྒྱལ་བའི་བསྟན་པ་ལ་ཞུགས་ནས་ཐོས་བསམ་སྒོམ་གསུམ་ལ་འབད་པ་ཞིག་ནམ་འོང་སྙམ་དུ་དེ་འབའ་ཞིག་བསམ་ཞིང་མདོ་སྔགས་ཀྱི་གསུང་རབ་རྣམས་ལ་ཡང་དང་ཡང་དུ་བལྟ་བ་ལྷུར་ལེན་པར་བྱེད་དོ། ། དེ་ནས་ཕ་མ་དང་ཉེ་དུ་རྣམས་ཀྱིས་བག་མ་ལེན་པའི་སྦྱོར་བ་བཤམས་པ་ན་རང་ཡུལ་ཉེ་དུ་ནོར་ལོངས་སྤྱོད་གང་ལའང་མ་ཆགས་པར་མཆིལ་སྣབས་བཞིན་དུ་དོར་ཏེ་དགུང་ལོ་བཅོ་བརྒྱད་པའི་དཔྱིད་བྲོས་ནས་ཀླུངས་ཤོད་དུ་ཕེབས་ནས་རབ་ཏུ་བྱུང་། མཚན་ཡོན་ཏན་གྲགས་སུ་བཏགས། རབ་ཏུ་བྱུང་བའི་ས་དེ་ལ་ཀླུངས་ཤོད་ཆོར་བ་ཞེས་གྲགས། དེར་ཡང་ཉེ་དུ་རྣམས་ཀྱིས་འཛིན་མི་བྱུང་དོགས་ནས་ཀླུངས་ཤོད་ཕྱུར་བུ་ཞེས་བྱ་བ་ན་དགེ་བའི་བཤེས་གཉེན་སྤྱན་སྔ་བ་ཆེན་པོ་མཚམས་དམ་པར་བཅད་པའི་སར་བྱོན། སྤྱན་སྔ་བ་ཆེན་པོས་ཀྱང་བཀའ་གདམས་བསྟན་འཛིན་ཆེན་པོ་ཞིག་ཏུ་འགྱུར་བར་གཟིགས་ནས། དགྱེས་བཞིན་དུ་རྗེས་སུ་བཟུང་ནས་གདམས་པ་དང་རྗེས་སུ་བསྟན་པ་མང་དུ་སྩལ། དེའི་ཚེ་ཤ་ར་བ་ཡོན་ཏན་གྲགས་ཀྱི་ཐུགས་དགོངས་ལ་བཀའ་གདམས་སྐུ་མཆེད་གསུམ་པོ་ལ་ཇོ་བོའི་རྗེའི་མན་ངག་ཞུས་ནས་གཙང་ཕྱོགས་སུ་གསང་སྔགས་ཀྱི་ཆོས་མང་པོ་ཞིག་ཞུ་བར་འབྱོན་བཞེད་ནར་མར་འཁྲུངས་ཏེ། དུས་དེའི་ཚེ་གཙང་ན་འབྲོག་མི་ལོ་ཙཱ་བ་དང་རྗེ་འགོས་ལོ་ཆེན་པོ་བཞུགས་ཏེ་གསང་སྔགས་རྒྱུད་སྡེ་བཞིའི་འཆད་ཉན་ཤིན་ཏུ་དར་བ་ཡོད་པས་རྡོ་རྗེ་འཛིན་པ་ཆེན་པོ་དེ་དག་གི་ཞབས་ལ་གཏུགས་ཏེ་རྒྱུད་སྡེ་བཞི་ག་དང་། ཁྱད་པར་གསང་སྔགས་བླ་མེད་ཀྱི་མན་ངག་རྣམས་ཞུས་ཏེ་སྔགས་ལམ་སྒོམ་པ་ཞིག་གཙོ་བོར་བྱེད་དགོངས་པ་བྱུང་། དེ་ནས་དེ་ཁའི་དབྱར་དུས་དགེ་བའི་བཤེས་གཉེན་པོ་ཏོ་བ་ཆེན་པོ་སྟག་ལུང་ཐང་ན་བཞུགས་པའི་སྤྱན་སྔར་བྱོན། ཆོས་ཀྱི་གསོལ་བ་བཏབ་པ་ན་དགེ་བཤེས་པོ་ཏོ་བ་ཆེན་པོས་ཀྱང་རང་གི་སྲས་ཀྱི་ཐུབ་བོ་བསྟན་པའི་བདག་པོར་འགྱུར་བར་གཟིགས་ནས་སྤྱན་གྱི་འབྲས་བུ་ལྟར་བསྐྱངས་ཏེ་དུས་གསུམ་གྱི་རྒྱལ་བ་ཐམས་ཅད་གང་ནས་གཤེགས་པའི་ལམ་པོ་ཆེ། རྒྱལ་བས་གསུངས་པའི་ཆོས་ཕུང་བརྒྱད་ཁྲི་བཞི་སྟོང་པོ་ཐམས་ཅད་ཉམས་ལེན་གྱི་ལུས་གཅིག་ཏུ་དྲིལ་བ་བྱང་ཆུབ་ལམ་གྱི་རིམ་པའི་ཁྲིད་གནང་སྟེ། ཐོག་མར་གང་ཉམས་སུ་བླང་བར་བྱ་བ་དེ་ནས་བཟུང་སྟེ་མཐར་འབྲས་བུ་འགྲུབ་པའི་བར་གྱི་ལམ་གྱི་གྲངས་དང་གོ་རིམ་ལམ་སོ་སོའི་ངོ་བོ་རྣམས་རྒྱལ་བའི་བཀའ་དང་ཤིང་རྟ་ཆེན་པོའི་གཞུང་ནས་འབྱུང་བའི་དྲི་མ་མེད་པའི་རིགས་པས་ཆེས་ཞིབ་པར་མིག་ལ་མངོན་སུམ་དུ་སྣང་པའི་དཔེ་དང་བཅས་ཁྲིད་པར་མཛད་པ་ན་ཤ་ར་བ་ཆེན་པོ་སྔོན་ཡུན་རིང་པོ་ནས་ལམ་ལ་སྦྱངས་པའི་བག་ཆགས་སད་དེ་ལམ་གྱི་གྲངས་དང་གོ་རིམ་ལ་ལྡོག་ཏུ་མེད་པའི་དད་པ་དང་། ཚིག་ཙམ་མིན་པར་རིགས་པའི་ལམ་ནས་དྲངས་པའི་ངེས་ཤེས་བརྟན་པོ་རྙེད་ནས་རེ་ཤིག་སྔགས་ལམ་མཐོན་པོ་ལ་འཇུག་པའི་རེ་བ་མི་འདུག་སྙམ་ནས་གཙང་དུ་འགྲོ་བའི་འདུན་པ་ལོག ། ལམ་མ་ནོར་བར་སྟོན་པའི་དགེ་བའི་བཤེས་གཉེན་འདི་ལྟ་བུ་དང་ལན་ཅིག་མཇལ་བ་འདི་ག་ལ་འདོར་སྙམ་དུ་སྐད་ཅིག་གཅིག་ཀྱང་འབྲལ་མི་ཕོད་པར་དང་པོར་མཇལ་བ་དེ་ནས་བཟུང་མཐར་དགེ་བཤེས་པོ་ཏོ་བ་ཆེན་པོ་ཞིང་གཤེགས་ཀྱི་བར་ནམ་ཡང་མ་བྲལ་བར་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་ལམ་གྱི་རིམ་པའི་གདམས་ངག་མ་ལུས་པ་བུམ་པ་གང་བྱོར་གསན། བར་སྐབས་ཤིག་ཉེ་དུ་རྣམས་དང་ཡུལ་ཕྱོགས་ཀྱི་མི་མང་པོ་ཞིག་གིས་རང་གི་ཁུ་བོའི་གནས་རོམ་པོ་རེ་ཞེས་པའི་དགོན་གནས་ཞིག་གི་ཆོས་དཔོན་དུ་འབྱོན་དགོས་པར་བསྐུལ་བ་ན་སླར་ཞིག་འབྱོན་ནམ་སྙམ་དུ་དགོངས་པ་བྱུང་བ་ལ་དགེ་བཤེས་པོ་ཏོ་བ་ཆེན་པོས་བསླབ་བཏུས་གསུང་བའི་སྐབས་བྱང་སེམས་ཀྱི་ལམ་བགྲོད་པའི་བར་ཆད་གནོད་འགྱུར་རྣམས་གསུང་བའི་ཚེ་ཞལ་ཏ་པའི་གནོད་པ་ཞིབ་ཏུ་གསུངས་པས་ཐུགས་ངེས་བརྟན་པོ་འཁྲུངས་ཏེ། དེ་ནས་ཆོས་དཔོན་དུ་འགྲོ་བའི་སྤྲོས་པ་ཆོད་གསུང་། ཐོག་མར་དགེ་བཤེས་པོ་ཏོ་བའི་གྲྭ་པ་བྱིང་གྲས་ལོ་དགུ་མཛད། དེ་ནས་དགེ་བཤེས་པོ་ཏོ་བ་ཆེན་པོ་ཐུགས་ཤིན་ཏུ་མཉེས་པས་སྐུ་འཁོར་ནང་མ་ལོ་དགུ་མཛད་དེ་ཁྱོན་དགེ་བཤེས་པོ་ཏོ་བ་ཆེན་པོ་ལོ་བཅོ་བརྒྱད་བསྟེན་ཏེ་དེའི་རིང་ལ་བྱང་ཆུབ་ལམ་གྱི་རིམ་པའི་ཁྲིད་མཐའ་ཆོད་པར་གསན་ཏེ། དེ་ཡང་རྗེ་བཙུན་བྱམས་པས་མཛད་པའི་མངོན་པར་རྟོགས་པའི་རྒྱན་བྱང་ཆུབ་ལམ་གྱི་རིམ་པའི་རྩ་བ་མན་ངག་ཏུ་བྱས། དེའི་སྟེང་དུ་མདོ་སྡེ་རྒྱན་དང་། སློབ་དཔོན་དཔའ་བོས་མཛད་པའི་སྐྱེས་རབས་སོ་བཞི་པ་དང་། རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་དང་བསླབ་བཏུས་གཉིས་དང་ཆེད་དུ་བརྗོད་པའི་ཚོམ་དང་། བྱང་ས་སྟེ་བཀའ་གདམས་གཞུང་དྲུག་གུང་བསྒྲིགས་ཏེ་བྱང་ཆུབ་ལམ་གྱི་རིམ་པའི་མན་ངག་རྣམས་དམིགས་སྐོར་རེ་རེ་ནས་གཞུང་དྲུག་པོ་དེ་དག་གང་རིགས་ནས་རྒྱས་པར་བཤད། གཞན་ཡང་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་མདོ་སྡེ་ཀུན་ལས་བཏུས་པ་དང་། རིན་ཆེན་ཕྲེང་བ་དང་རྩ་ཤེ་ལ་སོགས་པའི་རིགས་ཚོགས་རྣམས་དང་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་གསུམ་ལ་སོགས་པ་གསུང་རབ་དགོངས་འགྲེལ་དང་བཅས་པ་ཐམས་ཅད་བྱང་ཆུབ་ལམ་གྱི་རིམ་པའི་གདམས་ངག་ཏུ་ངོ་སྤྲད་ནས་སྟོན་པར་མཛད་པས་རྒྱལ་བའི་གསུང་རབ་དགོངས་འགྲེལ་དང་བཅས་པ་འཆད་པ་ལ་མི་འཇིགས་པའི་སྤོབས་པ་ཐོབ། རང་དང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་སོན། སྡེ་སྣོད་གསུམ་དང་ཤིང་རྟ་ཆེན་པོའི་གཞུང་རྣམས་ཕལ་ཆེར་ཐུགས་ལ་གཟུང་སྟེ་སྐལ་བ་དང་ལྡན་པ་གཞན་དག་ལ་གསུང་རབ་དགོངས་འགྲེལ་དང་བཅས་པ་མཐའ་དག་བྱང་ཆུབ་ལམ་གྱི་རིམ་པར་བསྡུས་ནས་འདོམས་པ་ལ་དབང་འབྱོར་པས་བོད་དུ་སྐྱེས་པའི་མི་ཞིག་ལ་ཤ་ར་བ་ཆེན་པོ་ལས་མཁྱེན་རབ་རླབས་ཆེ་བ་མེད་ཅེས་བཀའ་གདམས་གོང་མའི་གསུང་བསྒྲོས་ལས་འབྱུང་། དོན་འདི་དག་ལ་དགོངས་ནས་རྗེ་ཐམས་ཅད་མཁྱེན་པས་ཀྱང་། རྣམ་དཔྱོད་འགྲན་ཟླ་བྲལ་བའི་ཤ་ར་བ། ། ཞེས་བསྔགས་པ་མཛད་དོ། ། ཤ་ར་བ་ཆེན་པོ་ཉིད་ཀྱི་ཞལ་ནས། དེང་དུས་ཆོས་བྱེད་ཀུན་ཆོས་འཆད་པ་པོ་གང་ན་ཡོད་ཟེར་བ་ཐམས་ཅད་ཀྱི་རྩར་འགྲོ་སྟེ། སྟོན་པ་རིན་པོ་ཆེ་ཡབ་སྲས་ཀྱི་ལུགས་དེ་མིན། དགེ་བཤེས་སྟོན་པས་སྐུ་ཚེ་དེ་ལ་བླ་མ་ལྔ་ལས་མ་བསྟེན། དེ་ཡང་དགེ་བསྙེན་གྱི་སྡོམ་པའི་སློབ་དཔོན་དང་། ཀློག་ཡིག་སློབ་པའི་སློབ་དཔོན་དང་། བླ་མ་སེ་བཙུན་དང་། པཎྜི་ཏ་སྨྲི་ཏི་དང་། ཇོ་བོ་རྗེ་སྟེ། དེ་རྣམས་ཀྱི་ནང་ནས་ཀྱང་གཞན་རྣམས་ལ་ཆོས་འབྲེལ་རེ་ཙམ་ཡིན་བླ་མ་སེ་བཙུན་པ་ལ་མཚན་ཉིད་ཀྱི་གཞུང་རྣམས་གསན། གཙོ་བོ་ནི་ཇོ་བོ་རྗེ་ཉིད་ལ་བརྟེན་ནས་བྱང་ཆུབ་ལམ་གྱི་རིམ་པ་མཐའ་དག་པར་གསན་ཏེ། ཇོ་བོ་རྗེ་མངའ་རིས་སུ་མཇལ་བ་ནས་མཐར་སྙེ་ཐང་དུ་ཞིང་གཤེགས་པའི་བར་ཇོ་བོ་རྗེ་ཉིད་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་མདོ་སྔགས་ཀྱི་གསུང་རབ་དགོངས་འགྲེལ་དང་བཅས་པ་མཐའ་དག་བྱང་ཆུབ་ལམ་གྱི་རིམ་པར་བསྡུས་ཏེ་གསན་ཞིང་དེ་འབའ་ཞིག་ཐུགས་ཉམས་སུ་བཞེས་པས་བསྟན་པ་ཡོངས་རྫོགས་ཀྱི་བདག་པོར་བྱོན་པ་ཡིན། དགེ་བཤེས་པོ་ཏོ་བ་ཆེན་པོས་ཀྱང་ཁྱིམ་དུ་བཞུགས་སྐབས་སྦ་སྒོམ་ལ་བསྙེན་གནས་ཀྱི་སྡོམ་པ་ཞིག་ཞུས་བླ་མ་དེ་དང་། དགེ་ཚུལ་གྱི་སྡོམ་པའི་མཁན་སློབ་དང་། མཚན་ཉིད་ལ་བསླབ་སྦྱོང་མཛད་པའི་སྐབས་ཀྱི་སློབ་དཔོན་དང་། འབྲོམ་རིན་པོ་ཆེ་རྣམས་མ་གཏོགས་པ་བླ་མ་མ་བསྟེན། དེ་ཡང་གཙོ་བོར་འབྲོམ་རིན་པོ་ཆེ་ཉིད་ལ་བརྟེན་ཏེ། དང་པོ་མཇལ་བ་ནས་མཐར་ཞིང་ནམ་གཤེགས་ཀྱི་བར་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་བྱང་ཆུབ་ལམ་གྱི་རིམ་པ་ཉིད་ལ་སྦྱངས་པས་བསྟན་པ་ཡོངས་རྫོགས་ཀྱི་བདག་པོར་བྱོན། ཁོ་བོས་ཀྱང་བཀའ་གདམས་སྐུ་མཆེད་རིན་པོ་ཆེ་གསུམ་ལ་བརྟེན་ཅིང་དེའི་ནང་ནས་ཀྱང་དགེ་བའི་བཤེས་གཉེན་པོ་ཏོ་བ་ཆེན་པོ་ཉིད་ལ་བརྟེན། གཞན་དག་དགེ་ཚུལ་གྱི་མཁན་སློབ་མ་གཏོགས་བླ་མ་གཞན་མ་བསྟེན། དགེ་བཤེས་པོ་ཏོ་བ་ཆེན་པོ་ནི་ལོ་བཅོ་བརྒྱད་ཀྱི་བར་དུ་བསྟེན་ཏེ་མི་མཉེས་པ་སྐད་ཅིག་ཀྱང་བྱེད་མ་མྱོང་གསུང་། མཐར་དགེ་བཤེས་པོ་ཏོ་བ་ཞིང་གཤེགས་ནས་དགེ་བཤེས་པོ་ཏོ་བའི་སློབ་མ་ཕལ་ཆེར་ཤ་ར་བའི་རྗེས་སུ་འབྲང་སྟེ་འཁོར་བརྒྱ་ཕྲག་མང་པོ་དང་བཅས་ཀླུངས་ཤོད་དུ་བྱོན་ནས་ཚོགས་བསྡུས། ཡོ་བྱད་གང་བྱུང་ཐམས་ཅད་དགེ་འདུན་ལ་བསྔོས། དེ་ནས་སྙན་པའི་གྲགས་པས་འཛིན་མའི་ཁྱོན་ཀུན་ཁྱབ་སྟེ་བྱང་ཆུབ་ལམ་གྱི་རིམ་པ་རྒྱ་ཆེར་བཤད་པས་ཆོས་གསན་པ་མང་དུས་སུམ་སྟོང་འདུས་པ་བྱུང་། ཕལ་ཆེར་ཉིས་སྟོང་ལྷག་ཙམ་རྒྱུན་དུ་འདུས། དེ་ཐམས་ཅད་ཀྱང་དགེ་བཤེས་ཤ་ར་བ་ཆེན་པོ་ཉིད་ཀྱི་རྣམ་ཐར་རྗེས་སུ་སྐྱོང་བ་ཤ་སྟག་བྱུང་སྟེ། ཤ་ར་བ་ཆེན་པོ་ཉིད་ཀྱིས་རང་གི་འཁོར་དུ་འདུས་པའི་གདུལ་བྱ་ཐམས་ཅད་ཚུལ་ཁྲིམས་རྣམ་པར་དག་པ་གཞིར་བཟུང་ནས་སྐྱེས་བུ་གསུམ་གྱི་ལམ་གྱི་རིམ་པ་སྒོམ་པ་ལ་སྦྱར། ལམ་གྱི་རིམ་པའི་ཡང་རྩ་བ་བཤེས་གཉེན་བསྟེན་ཚུལ་རྣམ་པར་དག་པ་ཞིག་དགོས་ཞེས་འདོམས་པར་མཛད། ཤ་ར་བ་ཉིད་ཀྱི་ཞལ་ནས་ཐེག་པ་ཆེན་པོའི་ལམ་གྱི་རྩ་བ་དགེ་བའི་བཤེས་གཉེན་ཡིན། དགེ་བའི་བཤེས་གཉེན་ལ་མ་བསྟེན་པར་ལམ་གང་ཡང་སྐྱེ་བ་མི་སྲིད་པ་ཡིན། ས་བཅུའི་བྱང་ཆུབ་སེམས་དཔའ་བསྐལ་པ་གྲངས་མེད་གསུམ་དུ་ཚོགས་བསགས་པ་ལ་ཡང་ཕྱོགས་བཅུའི་སངས་རྒྱས་རྣམས་ཀྱིས་ཕྱག་གཡས་པ་དབུ་ཐོག་ཏུ་བཞག་ནས་བྱིན་གྱིས་མ་བརླབས་པར་རྡོ་རྗེ་ལྟ་བུའི་ཏིང་ངེ་འཛིན་ཐོབ་མི་སྲིད་པས་དེ་བཞིན་གཤེགས་པ་དེ་དག་གནས་སྐབས་དེ་ན་དགེ་བའི་བཤེས་གཉེན་བྱ་བར་འདོད་པ་ཡིན། ད་ལྟ་འུ་ཅག་ཐམས་ཅད་ཀ་ཅ་ཁོ་ན་ལ་རྩི་བ་ལ་སྐུ་མཆེད་གསུམ་པོ་ལ་རེས་གསུམ་ག་སྤྱིར་འབུལ་བ་འོང་། རེས་གཉིས་ལ་འོང་བལ། དུས་དེ་ཐམས་ཅད་ན་གསུམ་ལ་ཕུལ་ན་གཉིས་ལ་འབུལ། གཉིས་ལ་ཕུལ་ན་གཅིག་ལ་འབུལ་གྱི་ང་འདི་འདོད་ཡེ་མི་གསུང་དེ་ལྟ་བུ་ལ་དད་གསུང་། དགེ་བཤེས་ཤ་ར་བ་ཆེན་པོ་དེ། དགེ་བཤེས་པོ་ཏོ་བའི་རྣམ་ཐར་སྐྱོང་བ་མ་གཏོགས་སུ་ལའང་མི་འདུད་སུ་དང་ཡང་མི་ཁོན། གང་དུ་འདུག་ཀྱང་དམའ་ས་འཛིན་རྐྱེན་བཟང་ངན་གང་བྱུང་ཡང་བྱང་ཆུབ་ལམ་གྱི་རིམ་པ་སྒོམ་པ་ཁོ་ན་ལས་ཐབས་གཞན་གང་ཡང་མི་མཛད། སྐུ་མཐོང་བ་དང་གསུང་ཐོས་པ་ཐམས་ཅད་དད་པ་རང་དབང་མེད་པར་སྐྱེ། དད་རྫས་དང་གཤིན་རྫས་གང་བྱུང་ཡང་དཀོན་མཆོག་གི་མཆོད་པ་དང་། དགེ་འདུན་གྱི་བསྙེན་བཀུར་ཁོ་ན་ལ་གཏོང་བ་ལས་མི་དགོས་པའི་སར་ཡེ་མི་གཏོང་། མ་དག་པའི་རྫས་ཡེ་མི་འཆང་གཞན་གྱིས་ཞིང་དང་ཁང་ཁྱིམ་དང་ཕྱུགས་ལ་སོགས་ཕུལ་ཡང་གཏན་ནས་མི་བཞེས། ལན་ཅིག་སྦྱིན་བདག་ཞིག་གིས་ཞིང་རྔས་པའི་ཐོག་ཅིག་ཕུལ་བ་ན་དགེ་འདུན་ལ་ཕུལ་ང་ལ་མི་དགོས་རྩ་སོག་ཚུར་སྐྱོལ་གྲྭ་པ་རྣམས་ཀྱི་རྒྱགས་སྐྱེལ་མིའི་ཁལ་མ་ལ་ཕན་འགྲོ་གསུང་། དགེ་བཤེས་པོ་ཏོ་བ་དང་ཤ་ར་བ་གཉིས་པོས་ཐབས་ལྟོ་བཅོས་གང་ཡང་མ་མཛད་པར་ལམ་རིམ་ཁོ་ན་སྒོམ་པར་མཛད་པས་རང་དང་སློབ་མ་རྣམས་ལ་ནད་གདོན་གྱི་འཚེ་བ་ཉུང་། ལྷ་འདྲེ་མི་གསུམ་བྱམས་ཚེ་རིང་བར་བྱུང་། དགེ་བཤེས་སྤྱན་སྔ་བ་དང་བྱ་ཡུལ་བ་དཔོན་སློབ་རྣམས་ཐབས་རིམ་མན་ངག་འདི་མི་མཁྱེན་བྱ་བ་མེད་པས་གདུལ་བྱ་རྣམས་ཀྱང་མན་ངག་སྣ་ཚོགས་ལག་ལེན་བྱེད་པ་བྱུང་ཡང་ནད་གདོན་གྱི་འཚེ་བ་མེད་ཞེས་བཀའ་གདམས་གོང་མའི་གསུང་སྒྲོས་ལས་འབྱུང་། ཤ་ར་བ་ཉིད་ཀྱི་ཞལ་ནས་སྤྱིར་ལེགས་ཉེས་ཅི་བྱུང་ཆོས་ལ་བརྟེན་པ། དེའི་ནང་ནས་ཀྱང་འདུལ་བ་ལ་བརྟེན་ན་ལྡབ་ཀྱང་མི་དགོས་པ་ཞེ་གཙང་བ། རྟག་ཐུབ་པ། ཉམས་དགའ་བ། མཐའ་བཟང་བ་ཡིན་གསུང་། ཡང་ཞལ་ནས་རྟེན་དང་བསྲུང་བ་མི་དགོས་པའི་གང་ཟག་གསུམ་ཡིན། དགེ་སློང་ཆོས་གོས་རྣམ་གསུམ་ལས་ཡོངས་སུ་བཟུང་བ་ཐམས་ཅད་སྤངས་ཏེ་ཉེས་པ་ཕྲ་ཞིང་ཕྲ་བས་ཀྱང་མ་གོས་པ་ཞིག་བྱུང་ན་རྟེན་དེ་ཉིད་མཆོད་གནས་ཡིན་པས་མི་དགོས། བྱང་ཆུབ་ཀྱི་སེམས་སྨོན་འཇུག་གཉིས་རྣལ་མར་ཡོད་པ་དེ་སེམས་ཅན་ཐམས་ཅད་ཀྱི་མཆོད་གནས་ཡིན་པས་མི་དགོས། སྔགས་པ་མཚན་ཉིད་དང་ལྡན་པ་སྣང་བ་ཐམས་ཅད་ལྷ་དང་ལྷ་མོར་ཤེས་པ་ལ་མི་དགོས་གསུང་། བཀའ་རྒྱུད་ཟམ་མ་ཆད་པའི་གདམས་པ་ལ་བརྟེན་ནས་ཤེས་བཞིན་ཆེན་པོས་ཐམས་ཅད་མིག་འོག་ཏུ་ཆུད་པར་བྱས་ཏེ། སྤྱོད་ལམ་རྣམ་བཞིར་ཅི་བྱེད་ཐམས་ཅད་ཐར་པའི་རྒྱུར་དཀར་ལམ་གྱིས་གཏོང་ཤེས་པ་ཅིག་དགོས་གསུང་། ཡང་ཞལ་ནས་བྱ་ཡུལ་བའི་བཀའ་རྒྱུད་འདི་ལ་སྲུང་བ་ཟད་པ་མེད་པ་ཅིག་ཡོད་དེ་འཚེ་བ་ཤིན་ཏུ་མང་། མི་དབང་དུ་བསྡུ་བའི་ཐབས་ཟད་པ་མེད་དེ་ངན་སྨ་དེ་མང་བོ་སྣང་། ཚེ་སྤེལ་ཐབས་ཁོ་ན་མཛད་དེ་སྐུ་ཚེ་རིང་བ་ཙམ་མ་བྱུང་ལ། པོ་ཏོ་བའི་བཀའ་རྒྱུད་འདི་བསྟན་པ་རིན་པོ་ཆེ་ཁས་བླངས་ཀྱི་ཆོས་ཁོ་ན་ལས་སྤན་སྤུན་ཡེ་མི་མཛད་དེ་འཚེ་བ་ཉུང་མི་བྱམས་སྐུ་ཚེ་རིང་བར་བྱུང་སྟེ། ཁོ་བོས་ནི་མན་ངག་དེ་མངོན་སུམ་དུ་གོ་བར་བྱུང་གསུང་། ལན་ཅིག་ཤ་ར་བ་ཆེན་པོས་ལམ་རིམ་གྱི་ཁྲིད་གནང་བའི་རྗེས་ལ་འདི་སྐད་གསུང་སྟེ་ཁམས་ངན་ཡང་ཆོས་ཀྱི་ཕན་ན་ཕན་པ་ཡིན་སྙམ་ནས་འབད་དེ་བཤད་པ་ཡིན། ཆོས་ཀྱི་ཕན་ན་ཕན་པར་བརྩི། གཞན་གྱིས་ཕན་པ་ཏ་ཕ་མས་ཀྱང་འདི་ལྟར་བྱེད་དེ་དེས་ཐར་པ་ལ་ཅང་མ་ཕན། གྲྭ་པ་ཆོས་ལ་མ་མགུ་ནས་སོང་ན་དེ་རང་གི་ཉེས་པར་བརྩི། གཞན་ལ་མ་མགུ་ནས་སོང་བ་རང་གི་ཉེས་པར་མི་བརྩི་གསུང་། སྒོམ་པ་ཀློག་འབར་གྱིས་བྱ་ཡུལ་དུ་ཕྱིན་པའི་དུས་སུ་རྩབས་འདྲེན་དུ་བྱུང་བ་ལ་ང་གཅོང་ལུང་བའི་གྲྭ་པ་ལ་རྩབས་འདྲེན་ནམ་ཟེར་ནས་འཐུང་མ་འདོད། དེ་ལ་ཤིན་ཏུ་མཉེས་པར་མཛད། ལན་ཅིག་ཤ་ར་བ་ཆེན་པོ་ལ་སློབ་མ་རྣམས་ཀྱིས་ཕྱོགས་གཞན་ཞིག་ཏུ་འབྱོན་པར་ཞུས་པ་ན་ཆོས་འཕེལ་ན་གང་དུ་ཕྱིན་ཀྱང་ཆོག ། གཉེན་ཉེ་དུ་ལ་ཆགས་པའང་མེད། གནས་གཞི་སྡེ་དགོན་ལ་ཆགས་པའང་མེད། ཁོ་བོའི་སྟེང་ན་དབང་ཆེ་བ་གཞན་ངོ་སྲུང་དགོས་པའང་སུ་ཡང་མེད་གསུང་ཤ་ར་བ་ཆེན་པོ་ཐུགས་བསྐྱེད་ཤིན་ཏུ་བཟང་བས་འཁོར་སུམ་སྟོང་ཙམ་འདུས་པ་དེ་ཐམས་ཅད་ཀྱང་ཐོས་བསམ་སྒོམ་པས་དུས་འདའ། ཟས་གོས་གནས་མལ་དང་སྡེ་དགོན་ལ་ཆགས་པ་སྤངས་པ་ཤ་སྟག་བཞུགས། ཆོས་གནང་བ་ཐམས་ཅད་ཀྱང་སྐྱེས་བུ་གསུམ་གྱི་ལམ་གྱི་རིམ་པ་ཉིད་ལ་སྐོར་ནས་དེའི་ཐོག་ཏུ་འབབ་པ་ཁོ་ན་མཛད། ཚོང་དང་བུན་བསྐྱེད་ཀྱིས་ནོར་བསྒྲུབས་ནས་དཀོན་མཆོག་མཆོད་པ་དང་དབུལ་ཕོངས་ལ་སྦྱིན་གཏོང་བྱེད་པ་བྱུང་ན་ང་ནི་ཁྱེད་ལ་གཏོང་བའི་ཕན་ཡོན་མི་བརྗོད་ཀྱིས་འཛིན་པའི་ཉེས་དམིགས་བརྗོད་པ་ཡིན་གསུང་ནས་མི་དགྱེས། དབེན་པའི་རི་སུལ་དུ་ཚུལ་ཁྲིམས་རྣམ་པར་དག་པ་ལ་གནས་པ་བྱུང་ན་ཤིན་ཏུ་དགྱེས་ཏེ་དབེན་པའི་རི་སུལ་དུ་དྲང་སྲོང་གི་སྤྱོད་ཚུལ་གྱིས་གནས་པ་ཅིག་བྱུང་ན་གཟོད་ཕས་བུ་གསོས་བྱ་བ་ཡིན་གསུང་། རབ་ཏུ་བྱུང་བ་ཞིང་ལས་བྱེད་པ་གཟིགས་ན་ཤིན་ཏུ་མི་དགྱེས་ཏེ། ཤ་ར་བ་ཉིད་ཀྱི་ཞལ་ནས་རབ་ཏུ་བྱུང་བ་བྱ་བ་སོ་ནམ་རྣམ་བཞི་སྤངས་པ་ཅིག་ལ་ཟེར་བ་ཡིན། དགེ་སློང་བྱ་བ་འདོད་པ་སྤངས་པ་ཅིག་ལ་ཟེར་བ་ཡིན། བྱང་ཆུབ་སེམས་དཔའ་བྱ་བ་རང་དོན་སྤངས་པ་ཅིག་ལ་ཟེར་བ་ཡིན། སྒོམ་ཆེན་བྱ་བ་འདུ་འཛི་སྤངས་པ་ཅིག་ལ་ཟེར་བ་ཡིན་གསུངས། སེམས་དཔའ་ཆེན་པོ་འདི་ནི་ཇོ་བོ་རྗེས། འཕྲལ་ལ་ཟས་འཚོལ་བྱ་དང་འདྲ། ། ཁག་སྟེ་ལངས་པས་གཞིས་རྫོགས་པ། ། བྱར་མེད་དེ་ནི་བསྟན་ཡུལ་ཡིན། ། ཞེས་གསུངས་པ་ལྟར་ཇོ་བོ་ཡབ་སྲས་ཀྱི་རྣམ་ཐར་གཙང་མ་གཞན་འདྲེས་མེད་པར་སྐྱོང་བ། ཕྱི་རབས་ཀྱི་གདུལ་བྱ་ཀུན་གྱི་སྨོན་གནས་སུ་འོས་པ་ཞིག་བྱུང་སྟེ། ཤ་ར་བ་ཉིད་ཀྱི་ཞལ་ནས། རུག་པའི་ཇོ་བོ་གཞོན་ནུ་གྲགས་བྱ་བ་དེ་དང་། ལན་ཚ་རབ་ཀྱི་སྒོམ་པ་དབང་ཕྱུག་རྒྱལ་མཚན་བྱ་བ་དེ་གཉིས་ལོ་བདུན་ཅུ་ཙམ་ལ་འདས་པ་ལ། འཚོ་བ་ནི་དགེ་འདུན་གྱི་ནང་ནས་ལེན། སང་གི་བྱ་བ་ནི་དེ་རིང་བྱེད་པ་མ་ཡིན་བྱ་བ་གཞན་གང་ཡང་མེད་པར་དགེ་སྦྱོར་བར་མ་ཆད་པར་འདས་ཏེ་དེ་གཉིས་ཁོ་ན་ལ་སྨོན་གསུང་། ཡང་ན་ནིང་འདས་པ་གྲྭ་པ་ཆོས་མཐུན་དེ་ཆོས་ལས་གཞན་གྱིས་ནི་བློ་མ་སྦགས། དགེ་བཤེས་ལ་ནི་ཡི་དམ་ལྷ་དང་ཁྱད་པར་མེད་པར་ཤེས། སེམས་ནི་བཀོལ་དུ་བཏུབ་དགེ་སྦྱོར་ལས་བྱ་བ་གཞན་ནི་ཅི་ཡང་མེད་དེ་ལྟ་བུ་ལ་སྨོན་གསུང་། བོད་སྔ་རབས་སུ་བྱོན་པའི་བཤེས་གཉེན་རྣམས་ལ་སྤྱོད་པ་རྣམ་པར་དག་པ་ཇོ་བོ་ཡབ་སྲས་ཀྱི་དགོངས་པ་ལྟར་བྱེད་པ་མང་བར་བྱུང་ནའང་ལྟ་བ་རྣམ་པར་དག་པ་ཇོ་བོ་ཡབ་སྲས་ཀྱི་དགོངས་པ་ལྟར་འཕགས་པ་ཀླུ་སྒྲུབ་ཀྱི་དབུ་མ་རིགས་ཚོགས་ཀྱི་དོན་སློབ་དཔོན་སངས་རྒྱས་བསྐྱངས་དང་སློབ་དཔོན་ཟླ་བ་གྲགས་པས་བཀྲལ་བའི་དབུ་མའི་ལྟ་བ་མཐར་ཐུག་པ་རྟོགས་པ་དཀོན་པར་བྱུང་འདུག་པ་ན་སེམས་དཔའ་ཆེན་པོ་ཤ་ར་བ་འདི་བཞུགས་པའི་དུས་སུ་པ་ཚབ་ལོ་ཙཱ་བས་རྒྱ་གར་དུ་བྱོན་ཏེ་སློབ་དཔོན་ཟླ་བ་གྲགས་པ་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ་པས་སློབ་དཔོན་ཟླ་བ་གྲགས་པས་དངོས་སུ་ཞལ་བསྟན་ཏེ་བྱིན་གྱིས་བརླབས་པས་དབུ་མའི་ལྟ་བ་ཐུན་མོང་མ་ཡིན་པ་རྟོགས། བོད་དུ་འཕགས་པ་ཀླུ་སྒྲུབ་ཀྱི་ལྟ་བ་ཐུན་མོང་མ་ཡིན་པ་དེ་དར་ན་ཅི་མ་རུང་སྙམ་དུ་དགོངས་ནས་དབུ་མ་ལ་འཇུག་པ་བསྒྱུར། བོད་དུ་ལུགས་བཟང་དེ་སྤེལ་བའི་འཕྲིན་ལས་མཛད་པ་ན་བླུན་པོ་རྨོངས་པའི་ཁྱུ་དག་གིས་ཆོས་ཐམས་ཅད་རང་བཞིན་གྱིས་མ་གྲུབ་པ་བཏགས་ཡོད་མིང་རྐྱང་ཙམ་གྱི་ཚུལ་དེ་ཐོས་པ་ན། ཆོས་ཐམས་ཅད་རང་བཞིན་གྱིས་མེད་པར་ལྟ་བ་ནི་ཆད་ལྟའོ་ཞེས་སྨྲས་ནས་ཀླུ་སྒྲུབ་ལུགས་བཟང་སྤེལ་བའི་འཕྲིན་ལས་བཀག་པ་ན་དགེ་བའི་བཤེས་གཉེན་ཤ་ར་བས་ཀླུ་སྒྲུབ་ཡབ་སྲས་ཀྱི་དགོངས་པ་ཡིན་མིན་ངས་ཤེས་གསུངས་ནས་པ་ཚབ་ལོ་ཙཱ་བ་ལ་དབུ་མའི་ལུགས་ཀྱི་གཞི་ལམ་འབྲས་གསུམ་གྱི་རྣམ་གཞག་ཇི་ལྟར་ཡིན་དང་། དབུ་མའི་ལྟ་བའི་དགག་བྱ་གང་ཡིན་དང་། དེ་འགོག་བྱེད་རིགས་པའི་གཙོ་བོ་གང་ལ་བྱེད་དང་། དབུ་མའི་ལྟ་བ་སྒོམ་པའི་ཚེ་སྦྱོར་དངོས་རྗེས་གསུམ་དུ་ཇི་ལྟར་བྱེད་ཅེས་དྲི་བ་ཞིབ་ཏུ་བསྐུར་ནས་གྲྭ་གཞོན་ཤེས་རབ་ཅན་གཉིས་པ་ཚབ་ལོ་ཙཱ་བའི་སར་བཏང་བས། པ་ཚབ་ལོ་ཙཱ་བས་དེའི་ལན་དུ་འཕགས་པ་ཀླུ་སྒྲུབ་ཀྱི་དགོངས་པ་སློབ་དཔོན་ཟླ་བ་གྲགས་པས་བཀྲལ་བའི་དབུ་མའི་ལྟ་བ་མཐར་ཐུག་འདི་ཡིན་དང་། དེ་སྒོམ་པའི་ཚེ་སྦྱོར་དངོས་རྗེས་གསུམ་དུ་ཇི་ལྟར་བྱ་བ་འཕགས་པ་ཀླུ་སྒྲུབ་ཡབ་སྲས་ཀྱི་མན་ངག་འདི་ལྟར་ཡོད་ཅེས་ལན་ཞིབ་ཏུ་ཕུལ་བ་དགེ་བཤེས་ཤ་ར་བ་ཆེན་པོ་དགེ་འདུན་སུམ་སྟོང་ལ་ཉེ་བའི་ཚོགས་དབུར་བཞུགས་ནས་བུར་སྟོན་ཞིག་གསོལ་ལ་ཁད་དུ་ཡོད་པའི་ཐོག་ཏུ་སླེབས་པས་ཚོགས་དབུའི་ས་དེ་ཁར་ལེགས་པར་གཟིགས་པས་སྤྱན་ཆབ་མང་པོ་བྱོན་བུ་རམ་ཕྱག་གིས་གང་གཅོགས་ཤིག་གནམ་དུ་གཏོར་ནས་ཀླུ་སྒྲུབ་ཡབ་སྲས་མཆོད། པ་ཚབ་ལོ་ཙཱ་བ་མཆོད། ཆོས་འདི་འདྲ་ཞིག་གིས་འཁོར་འདས་ཀྱི་ཤན་འབྱེད་པ་ཡིན། ཤེར་ཕྱིན་གྱི་མདོ་སྡེ་རིན་པོ་ཆེའི་དགོངས་པ་འདི་ཡིན་གསུང་ནས་བཙུན་ཆུང་ལྔ་བཅུ་ཙམ་ཞིག་པ་ཚབ་ལོ་ཙཱ་བ་ལ་དབུ་མ་མཉན་དུ་བཏང་། དབུ་མའི་ལུགས་བཟང་སྤེལ་བ་ལ་མཐུན་པའི་རྐྱེན་ཟང་ཟིང་མང་པོ་བསྐུར། པ་ཚབ་ལོ་ཙཱ་བ་ལ་བསྔགས་བརྗོད་ཆེ་བར་མཛད་པས་ལོག་པར་རྟོག་པའི་སྨྲ་བ་ངན་པ་རྣམས་རང་ཤུགས་ཀྱིས་འགགས། པ་ཚབ་ལོ་ཙཱ་བ་ལ་འཕྲིན་ལས་ཆེར་འཕེལ་བར་གྱུར་ཏོ། ། དེ་དུས་པ་ཚབ་ལོ་ཙཱ་བས་རང་ཉིད་ཀྱིས་བསྒྱུར་བའི་དབུ་མ་འཇུག་པ་དགེ་བཤེས་ཤ་ར་བ་ལ་གཟིགས་སུ་ཕུལ་བས། ཤ་ར་བ་ཆེན་པོས་ལེགས་པར་གཟིགས་ཏེ། འདི་ལ་འདི་ལྟར་འོང་ཐང་ཞེས་འགྱུར་སྐྱོན་གང་བྱུང་ཐམས་ཅད་བྲིས་ནས་རྒྱ་དཔེ་ལ་ལྟོས་ཞེས་བསྐུར་བ་ན་པ་ཚབ་ལོ་ཙཱ་བས་རྒྱ་དཔེ་ལ་གཟིགས་པས་ཤ་ར་བས་གང་གསུང་བ་དེ་ཁོ་ན་བཞིན་དུ་བྱུང་བས་དགེ་བའི་བཤེས་གཉེན་ཤ་ར་བ་ལ་རྒྱལ་བའི་བཀའ་འགྱུར་རོ་ཅོག་ཐུགས་ལ་མངའོ་ཞེས་གྲགས་པ་བྱུང་ངོ་། ། དགེ་བའི་བཤེས་གཉེན་ཤ་ར་བ་འདི་ཉིད་བཀའ་གདམས་གླེགས་བམ་ལས་གསལ་བར་ལུང་བསྟན་པ་ཡིན་ཏེ། དད་པ་རབ་ཏུ་བརྟན་པའི་འཁྲུངས་རབས་ལས། དེས་ན་རྒྱལ་པོ་དགེ་བ་དཔལ། ། ཁྱོད་ཀྱི་སྲས་ཀྱི་སྲོལ་འཛིན་པ། ། ཤ་ར་བ་ཞེས་ཡུལ་ལས་གྲགས། ། ཞེས་པ་དང་། ལུང་བསྟན་གྱི་ལེའུ་ལས། ཡོན་ཏན་གྲགས་པས་ཟབ་གཞུང་རྣམས། ། རྫོགས་པར་མཛད་ནས་དར་ཡུལ་མདར། ། དག་སྣང་གང་ཤར་དགོན་པ་བཞེངས། ། དེ་ནས་ཤ་ར་བ་ཞེས་གྲགས། ། ཞང་རྗེ་རོམ་པོའི་མི་རིགས་གཅིག ། གཏན་གྱི་དོན་གཉེར་གུས་པས་མཆི། ། ཞེས་དང་། དག་པའི་སྣང་བ་རབ་ཤར་བ། ། རྒྱལ་བ་རྒྱ་མཚོ་ལས་འཁྲུངས་ཤིང་། ། མཁས་པ་ང་ནི་ལས་ཅན་རྣམས། ། ཕྱོགས་བཞིར་འགྲོ་ཞིང་འདྲེ་ན་ཡང་། ། དབུས་འདིར་ཤར་བ་པ་ཞེས་གྲགས། ། འདི་ནི་ཤར་གྱི་མཐའ་འཁོབ་འདུལ། ། དེ་ནས་ནུབ་ཕྱོགས་མཐའ་འཁོབ་ཏུ། ། ཤར་པ་ཅི་འདྲ་རྩྭ་ཡུལ་དང་། ། ཞིང་དང་གྲོང་པ་དག་གིས་དབེན། ། སྐྱ་བོ་རྒྱ་ཆེན་ཞག་མེད་ཅིག ། སྣུམ་ཞིང་སྐལ་བཟང་དུ་མ་སྡུད། ། ཅེས་གསུངས་སོ། ། དེ་ལྟར་སེམས་དཔའ་ཆེན་པོ་ཤ་ར་བས་བསྟན་འགྲོའི་དོན་རྒྱ་ཆེར་མཛད་ནས་མ་འོངས་པའི་གདུལ་བྱ་རྣམས་ཀྱི་དོན་དུ་བྱང་ཆུབ་ལམ་གྱི་རིམ་པའི་ཁྲིད་ཡིག་ཆེ་ཆུང་གཉིས་དང་དགེ་བའི་བཤེས་གཉེན་པོ་ཏོ་བའི་རྣམ་ཐར་ཚིགས་བཅད་མ་ཞིག་ཀྱང་མཛད། དགེ་བཤེས་ཤ་ར་བ་འདིས་བྱང་ཆུབ་ལམ་གྱི་སྒྲོན་མ་འཆད་སྐབས་ཇི་ལྟར་གསུངས་པ་རྣམས་ཟིན་བྲིས་སུ་བཀོད་པ་ལམ་སྒྲོན་གྱི་འགྲེལ་པ་རྒྱས་ཤིང་ངོ་མཚར་རྨད་དུ་བྱུང་བ་ཞིག་ཀྱང་སྣང་ངོ་། ། བདག་ཉིད་ཆེན་པོ་འདིས་ལོ་སུམ་ཅུ་རྩ་དྲུག་ཏུ་ཚོགས་པ་བསྐྱངས་ནས་བསྟན་པའི་བྱ་བ་རྒྱ་ཆེར་མཛད་ཅིང་། དེ་ཡང་ཇོ་བོ་རྗེ་དཔལ་ལྡན་ཨ་ཏི་ཤའི་མན་ངག་སྐྱེས་བུ་གསུམ་གྱི་ལམ་གྱི་རིམ་པ་ཁོ་ནས་གདུལ་བྱའི་དོན་མཛད་ཅིང་། རྒྱལ་བའི་བཀའ་དང་ཤིང་རྟ་ཆེན་པོའི་གཞུང་ཐམས་ཅད་སྐྱེས་བུ་གསུམ་གྱི་ལམ་རིམ་ཁོ་ནའི་སྟེང་དུ་འབབ་པར་མཛད། རྐྱེན་བཟང་ངན་གང་བྱུང་ཡང་ཚུལ་ཁྲིམས་རྣམ་པར་དག་པ་བསྲུང་བ་གཞིར་བཞག་ནས་བྱང་ཆུབ་ལམ་གྱི་རིམ་པ་སྒོམ་པ་ཉིད་མཛད་པ་ལས་རང་ཉིད་དང་སློབ་མ་སུ་ལའང་མོ་བོན་གྱི་བཅོས་ཀ་སོགས་ཙབ་ཙུབ་ཡེ་མི་མཛད། དགེ་འདུན་སུམ་སྟོང་འདུས་ཏེ་དེ་ཐམས་ཅད་རྒྱལ་བ་རང་ཉིད་ཀྱིས་ཇི་ལྟར་གསུངས་པའི་ཚུལ་ཁྲིམས་རྣམ་པར་དག་པ་དང་ལམ་རྣམ་པར་དག་པ་སྒོམ་པ་ལ་སྦྱར་ཏེ་ཐམས་ཅད་རྣམ་ཐར་གཙང་མ་རྒྱལ་བ་རང་ཉིད་དངོས་སུ་བཞུགས་པའི་དུས་ཀྱི་མཛད་པ་རྣམ་ཐར་ཇི་བཞིན་དུ་སྐྱོང་བར་མཛད་དོ། ། དེ་ལྟར་དགེ་བའི་བཤེས་གཉེན་ཤ་ར་བ་ཆེན་པོས་བསྟན་པའི་དོན་རྒྱ་ཆེར་མཛད་ནས་དགུང་ལོ་བདུན་ཅུ་དོན་གཉིས་པ་ 1141 ལྕགས་མོ་བྱའི་ལོ་རྒྱལ་གྱི་ཟླ་བའི་ཚེས་ཉེར་དྲུག་སྐུའི་བཀོད་པ་བསྡུས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། དེ་ནས་དེར་ཚོགས་པའི་དགེ་འདུན་རྣམས་ཀྱིས་ཟླ་བ་ཕྱེད་ཀྱི་བར་སྐུ་གདུང་རིལ་པོར་བཞུགས་པའི་མདུན་དུ་རྒྱལ་བའི་ཡུམ་བསྒྲགས་ཤིང་མཆོད་པ་རྒྱ་ཆེར་ཕུལ། དེ་ནས་པུར་སྦྱངས་ཏེ་གདུང་དང་རིང་བསྲེལ་ན་བཟའ་རྣམས་དགེ་འདུན་སྟོང་དང་བདུན་བརྒྱས་བགོས་ཏེ་ཕྱོགས་ཕྱོགས་སུ་ཕྱག་དང་མཆོད་པའི་རྟེན་དུ་བཞུགས་ཤིང་། སློབ་མ་རྣམས་ཀྱིས་བདག་ཉིད་ཆེན་པོའི་གསུང་ལྟར་ཕྱོགས་ཕྱོགས་སུ་སྒྲུབ་པའི་རྒྱལ་མཚན་བཙུགས་ཏེ་དགོངས་པ་ཡོངས་སུ་རྫོགས་པར་མཛད་དོ། ། དེ་ལྟར་དགེ་བའི་བཤེས་གཉེན་ཤ་ར་བ་ཆེན་པོ་ལ་སློབ་མ་སྟོང་ཕྲག་མང་པོ་འདུས་པའི་ནང་ནས་འགྲན་པའི་ཟླ་ཐམས་ཅད་དང་བྲལ་བ་བཀའ་གདམས་བསྟན་པའི་སྲོག་ཤིང་དུ་གྱུར་པ་རྒྱལ་བའི་གདུང་འཚོབ་ཆེན་པོ་ནི་སེམས་དཔའ་ཆེན་པོ་འཆད་ཁ་བ་ཡིན་ལ། སེམས་དཔའ་ཆེན་པོ་འདིའི་རྣམ་ཐར་ནི་འཆད་པར་འགྱུར་ལ། གཞན་ཡང་གཏུམ་སྟོན་བློ་གྲོས་གྲགས་པ་ལ་སོགས་པ་འཕྲིན་ལས་རྒྱ་ཆེར་སྤེལ་བའི་བསྟན་འཛིན་དམ་པ་མང་དུ་བྱོན་ནོ། །
དེ་ལ་གཏུམ་སྟོན་བློ་གྲོས་གྲགས་པ་ནི་ཤབ་སྒོ་ལྔའི་ལྕགས་མཁར་རྩེའི་དབུ་མང་དུ་ 1106 མེ་ཕོ་ཁྱི་ལ་འཁྲུངས། གདུང་རུས་གཏུམ། རྔོག་ཚོའི་མཁན་པོ་ལྡོག་ཅོད་པ་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས། མཁན་པོ་དེ་ཉིད་དང་རྒྱ་འདུལ་འཛིན་ལ་འདུལ་བ་ལེགས་པར་བསླབས་ཏེ་འདུལ་བའི་བཤད་པ་ཡང་མཛད། དེ་ནས་དབུས་སུ་བྱོན་ཏེ་ཤ་ར་བ་ལོ་བཅུའི་བར་དུ་བསྟེན་ཅིང་མཉེས་པར་མཛད་དེ། བཀའ་གདམས་ཀྱི་ཡོན་ཏན་མ་ལུས་པ་ཐུགས་སུ་ཆུད་པར་མཛད། ཤ་ར་བ་མྱ་ངན་ལས་འདའ་ཁར། དགེ་འདུན་ལ་ཞལ་ཆེམས་གནང་བའི་རྗེས་ལ་གཏུམ་སྟོན་བློ་གྲོས་གྲགས་པ་ལ་གཙང་པ་འདུལ་འཛིན་ཞེས་བོས་ཏེ། ཆོས་ཀྱི་འཕྲོ་ཅུང་ཟད་གནང་ནས། ལྷག་མ་སྐྱེ་བ་ཕྱི་མ་ལ་བྱེད་པ་ཡིན་ནོ། ། ཁྱོད་ཀྱང་དགེ་སློང་བཞི་སྡེ་རེ་དང་འགྲོགས་ཤིག་ཅེས་གསུང་ནས་ཤ་ར་བ་ 1141 ལྕགས་བྱ་ལ་སྐུ་གཤེགས། དེ་ནས་ 1153 ཆུ་བྱའི་བར་གནས་ཅི་རིགས་པར་བཞུགས་ནས། དེ་རྗེས་སྣར་ཐང་གི་མདའི་ཐང་སྟོང་ལ་ལོ་ར་ཅིག་ཡོད་པར་སྤྱིལ་པོ་མཛད་ནས་འམ་བུ་འདིར་དགེ་སྦྱོར་བྱེད་པ་ཡིན་གསུངས་ཏེ། ཐོག་མར་ཆུ་མོ་བྱ་ལ་ཕེབས་དགེ་སློང་བཞི་སྡེ་དང་བཅས་ཏེ་དགོན་པ་བཏབ་ནས་ལོ་བཅུ་བཞི་བཞུགས། དེ་རྗེས་ལ་སྟོད་བྱང་གི་རྟ་སྡེ་ཆོས་ལུང་དུ་བྱོན་ནས་ཐུགས་དམ་མཛད། དྲུག་ཅུ་རྩ་གཅིག་པ་ 1166 མེ་ཕོ་ཁྱིའི་ལོ་རྒྱལ་གྱི་ཟླ་བའི་ཉི་ཤུ་གསུམ་ལ་མྱ་ངན་ལས་འདས། འདི་ལ་ཆོས་ལུང་སྐུ་གཤེགས་ཞེས་ཀྱང་གྲགས་སོ། ། གཏུམ་སྟོན་བློ་གྲོས་གྲགས་ཀྱི་རྗེས་སུ་སྣར་ཐང་གི་གདན་སར་སྡོ་སྟོན་ཤེས་རབ་གྲགས་པ། ཞང་བཙུན་རྡོ་རྗེ་འོད། དཔལ་ལྡན་གྲོ་མོ་ཆེ། ཆོས་ཀྱི་བླ་མ། ཐུགས་རྗེ་ཆེན་པོའི་སྤྲུལ་པ་སངས་རྒྱས་སྒོམ་པ། མཆིམས་ཆེན་མོ་ནམ་མཁའ་གྲགས་སོགས་རིམ་གྱིས་བྱོན་ཏེ། མཆིམས་ནམ་མཁའ་གྲགས་འདིས་སྣར་ཐང་དུ་སྡེ་སྣོད་གསུམ་གྱི་བཤད་པ་རྒྱ་ཆེར་སྤེལ་ཞིང་། ཤིང་རྟ་ཆེན་པོ་རྣམས་ཀྱི་གཞུང་ཕལ་ཆེ་བ་འགའ་ཞིག་ལ་འགྲེལ་པ། འགའ་ཞིག་ལ་བསྡུས་དོན་མཛད། འདིས་མཛད་པའི་མངོན་པ་མཛོད་ཀྱི་ཊཱིཀ་ཆེན་ངོ་མཚར་རྨད་དུ་བྱུང་བ་ཞིག་ཀྱང་ཡོད་དོ། ། བདག་ཉིད་ཆེན་པོ་འདི་འཕགས་པའི་གནས་བརྟན་གྱི་སྤྲུལ་བར་གྲགས་ཤིང་འདིའི་རིང་ལ་གནས་བརྟན་བཅུ་དྲུག་སྣར་ཐང་དུ་ཡང་ཡང་ཞལ་འཛོམ་པ་བྱུང་ཞིང་། འགྲོ་མགོན་ཆོས་རྒྱལ་འཕགས་པ་དང་། བཅོམ་ལྡན་རིག་རལ་དང་། དབུས་པ་བློ་གསལ་དཔོན་སློབ་སོགས་བསྟན་འཛིན་ཆེན་པོ་མང་པོས་ཀྱང་འདིའི་ཞབས་ལ་གཏུགས་ཤིང་། གཙོ་བོར་བྱང་ཆུབ་ལམ་གྱི་རིམ་པ་རྒྱ་ཆེར་བཤད་ནས་དཔལ་སྣར་ཐང་བསྟན་པ་མ་ཚང་བ་མེད་པའི་འབྱུང་གནས་སུ་བསྒྲུབས་སོ། ། འདིའི་རྗེས་སུ་སྣར་ཐང་གི་གདན་སར་སྐྱོ་སྟོན་པ་དང་མཁན་ཆེན་ཉི་མ་རྒྱལ་མཚན་པ་སོགས་རིམ་པར་བྱོན་ཞིང་། རྗེ་ཤེས་རབ་སེང་གེ་དང་། རྗེ་དགེ་འདུན་གྲུབ་དང་། འདུལ་འཛིན་བློ་གྲོས་སྦས་པ་སོགས་བསྟན་པའི་ཉི་མ་ཆེན་པོ་མང་དུ་བྱོན་ཏེ་རྗེ་དགེ་འདུན་གྲུབ་པ་ཡབ་སྲས་ཀྱི་བར་དུ་བྱོན་པ་ཐམས་ཅད་ཚུལ་ཁྲིམས་རྣམ་པར་དག་ཅིང་། སྡེ་སྣོད་ལ་ནང་བྱན་ཆུད་པ། འཆལ་པ་དང་། དམ་ཉམས་དང་། འདྲེས་ཁྱེར་གྱིས་མ་བསླད་པ། དགེ་བཤེས་སྟོན་པ་ནས་བརྒྱུད་པའི་རྣམ་པར་ཐར་པ་དྲི་མ་མེད་པ་འཛིན་པ་ཤ་སྟག་ཡིན་ལ། བཀའ་གདམས་གཞུང་པའི་བཤད་སྲོལ་ལ་བརྟེན་ནས་སྐྱེས་བུ་གསུམ་གྱི་ལམ་གྱི་རིམ་པ་འཆད་པ་དང་ཉན་པ་དང་སྒོམ་པ་རྣམས་གཙོ་བོར་འདོན་ཞིང་། ཤིང་རྟ་ཆེན་པོའི་གཞུང་སྤྱི་དང་ཁྱད་པར་བྱང་ས་དང་མདོ་སྡེ་རྒྱན་སྐྱེས་རབས་དང་ཚོམ། བསླབ་བཏུས་དང་སྤྱོད་འཇུག་སྟེ་གཞུང་དྲུག་པོ་དེ་སྐྱེས་བུ་གསུམ་པོའི་ལམ་གྱི་མན་ངག་ཏུ་རྩལ་དུ་བཏོན་ནས་འཆད་ཉན་མཛད་ཅིང་བློ་སྦྱོང་དོན་བདུན་མ་དང་བཀའ་གདམས་ཐིག་ལེ་བཅུ་དྲུག་ལྐོག་ཆོས་སུ་མཛད་དེ་ཉམས་ལེན་མཛད་དོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་ཤ་ར་བ་ཆེན་པོ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་བསྟན་པ་ཡོངས་རྫོགས་ཉམས་ལེན་གྱི་ལུས་གཅིག་ཏུ་དྲིལ་བའི་མན་ངག་བྱང་ཆུབ་ལམ་གྱི་རིམ་པ་སྒོམ་པ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ། ། ། །
༈ བྱང་ཆུབ་ཐུགས་ཀྱི་བཀའ་བབ་འཆད་ཁ་བ། ། ཞེས་བསྔགས་པ་སེམས་དཔའ་ཆེན་པོ་འཆད་ཁ་བ་ནི། 1101 ལྕགས་མོ་སྦྲུལ་ལ་ལོ་རོར་ཡབ་འཕགས་པ་སྐྱབས་དང་། ཡུམ་བསོད་ནམས་སྐྱིད་གཉིས་ཀྱི་སྲས་སུ་འཁྲུངས། ཞབས་ལ་འཁོར་ལོའི་མཚན་དང་ལྡན་པ་སོགས་སྐྱེ་བོ་དམ་པའི་རྟགས་དང་ལྡན་པ་ཞིག་བྱུང་། གཞོན་ནུ་ནས་ཆོས་ཀྱི་བག་ཆགས་སད་དེ་ལོ་རོར་བླ་མ་རས་ཆུང་པ་དང་མཇལ་བས་ཁོང་གི་སར་ཟླ་བ་གཉིས་ཙམ་བཞུགས། གདམས་པ་མང་དུ་གསན་ནས་ཚུར་འབྱོན་ཁར་བླ་མའི་ཞལ་ནས་འདིར་བཞུགས་ཁྱོད་ལ་ཆོས་ཀྱིས་ཕན་པ་ཅིག་འོང་བར་སྣང་གསུང་བས་དེར་འབྱོན་པའི་རྩིས་སུ་བྱས་ནས་ཚུར་ཕེབས། ཡུལ་ནས་རྟ་སྔོན་པོ་ཞིག་ལ་ཁལ་བཀལ་ནས་བྱོན་ཙ་ན་ལོ་རོ་ཞིང་གསར་ན་གཉལ་པ་ཆེན་པོ་ཆོས་བར་མཛད་ཅིང་བཞུགས་པས་དད་དེ་རྒྱལ་བའི་བསྟན་པ་ལ་རབ་ཏུ་འབྱུང་བར་མཛད་བཞེད་ནས་གནས་དེར་དགུང་ལོ་ཉི་ཤུ་རྩ་གཅིག་གི་ཐོག་བཤེས་གཉེན་རྩི་བོར་བ་ལ་མཁན་པོ་ཞུས། ཆག་རིན་ཆེན་འཆང་ལ་སློབ་དཔོན་ཞུས་ནས་རབ་ཏུ་བྱུང་མཚན་ཡེ་ཤེས་རྡོ་རྗེར་བཏགས། དེར་རྡོ་རྗེ་བཙན་པོ་རའི་ཆོས་འཁོར་གྱི་རིམ་གྲོ་ལ་བླ་མ་རས་ཆུང་པ་སྤྱན་དྲངས་པའི་ཕྱགས་ཕྱིར་ཐེགས། བླ་མས་སྦྱིན་སྲེག་ལན་ཉི་ཤུ་ལྷག་ཙམ་མཛད་ནས་ད་རེས་ཀྱི་འདི་ལ་རྟ་གཅིག་གི་ཚིགས་པ་བུར་བ་ཞིག་ཀྱང་མི་འོང་བ་ང་རང་གིས་ཁས་ལེན་གསུངས་ནས་ཆོས་འཁོར་ལ་ནི་མ་བཞུགས་པར་བཞུད། ཆོས་འཁོར་དེ་ལ་གླང་གཉོས་ལ་སོགས་པའི་གཉལ་ལོ་རོ་བྱར་གསུམ་གྱི་དགེ་བཤེས་དཔག་ཏུ་མེད་པ་འཚོགས། ལོ་ཙཱ་བ་ཡང་གསུམ་བཞི་བྱོན། ཆོས་འཁོར་དེ་ལ་རྔོག་ལོ་ལ་སོགས་པའི་སྡེ་སྣོད་འཛིན་པ་མང་པོ་དབུ་མ་དང་སེམས་ཙམ་སོགས་ཀྱི་གླེང་སླང་མང་པོ་མཛད་ཀྱིན་སྣང་བས་དེ་ཆོས་ཇི་སྐད་བྱ་བ་ཡིན་དྲིས་པས་གྲུབ་མཐའ་བྱ་བ་ཡིན་ཟེར། དེས་ཐུགས་ཕྲོགས་ནས་གཉལ་དུ་ཡང་གྲུབ་མཐའ་རྩད་དཔྱད་གནས་དེར་འདུལ་བ་འཛིན་པ་ཚ་རོང་པ་དང་། ཞང་ཤེས་རབ་སྤྲིང་དྭགས་པོ་གཙང་འདུལ་བ་རྣམས་ལ་མཁན་སློབ་ཞུས་ནས་དགུང་ལོ་ཉི་ཤུ་རྩ་གསུམ་ལ་བསྙེན་རྫོགས་མཛད། དེ་ནས་ཤ་མི་ལ་འདུལ་བ་གསན་ཅིང་བཞུགས་ཙ་ན་ཡར་ཀླུངས་སུ་ཆོས་འཁོར་ཆེན་པོ་ཞིག་བྱུང་བའི་དུས་དགེ་བཤེས་གཉགས་དང་། ཤ་མི་དང་། མར་འགོས་ལ་སོགས་པ་དགེ་བཤེས་བཙན་ལ་མདོ་སྡེ་རྒྱན་གསན་པ་གཟིགས་པས་དེར་བཙན་ལ་དད་པར་བྱུང་སྟེ་དགེ་བཤེས་བཙན་ལ་མདོ་སྡེ་རྒྱན་ཚར་དྲུག་གསན། ཞར་ཆོས་པ་དང་བཅས་པས་རྩ་འགྲེལ་ཚར་ཕྱེད་དང་བཅུ་གཉིས་གསན། དགེ་བཤེས་འཆད་ཁ་བ་འདི་སྔགས་པ་ཞིག་གི་རིགས་སུ་འཁྲུངས་ཏེ་ཡབ་ཀྱི་ཕ་ཆོས་སྔགས་སྙིང་མའི་གླེགས་བམ་མང་པོ་ལའང་གཟིགས། རས་ཆུང་པ་ལས་རྗེ་བཙུན་མི་ལའི་གདམས་ངག་རྣམས་ཞུས་ཏེ་སྔགས་གསར་མའི་རྒྱུད་དང་རྒྱུད་འགྲེལ་གྱི་གླེགས་བམ་མང་པོ་ལའང་གཟིགས། དགེ་བཤེས་བཙན་དང་བྱ་ཡུལ་བ་ལ་སོགས་པ་བླ་མ་གཞན་ཡང་མང་པོ་ལ་གཏུགས་ཏེ་སྡེ་སྣོད་གསུམ་དང་གཞུང་ལུགས་མང་པོ་ལའང་སྦྱངས། ཁྱད་པར་གྲུབ་མཐའ་བཞི་ལ་མཁས་པར་སྦྱངས་ཏེ་མདོ་སྔགས་ཀྱི་པོ་ཏི་བརྒྱ་ཙམ་ཞིག་ཐུགས་ལ་བཞུགས་ཀྱང་། ཐུགས་ཀྱི་གཏིང་ན་ངེས་པར་འཚང་རྒྱ་བ་ལ་ཆོས་གཞན་ཞིག་ཡོད་ཡོད་དགོངས་ཏེ་ཐུགས་ཀྱི་གཏིང་མི་བདེ་ཞིང་བློ་ཐག་མ་ཆོད་པ་ཞིག་ནར་མར་བྱུང་། དེ་ནས་དགེ་བཤེས་མྱང་ལྕགས་ཞིང་པ་ལ་བློ་སྦྱོང་ཚིག་བརྒྱད་མ་གསན། དེ་ནས་ལུགས་སྨད་པ་ཅན་དུ་བྱོན་ནས་སྣེའུ་ཟུར་པའི་ལུགས་ཀྱི་ལམ་རིམ་གྱི་ཁྲིད་གསན་ལུགས་སྨད་པས་དང་པོ་ཕུ་ཆུང་བའི་ལུགས་ཀྱི་རྟེན་འབྲེལ་ཡང་ཕ་བོང་ཁ་པ་ལས་གསན་པས་དགེ་བཤེས་ལུགས་སྨད་པ་ལ་རྟེན་འབྲེལ་གྱི་ཁྲིད་དེ་ཡང་གསན། ཉན་ས་དང་། བྱང་ཆུབ་སེམས་དཔའི་ས་ལ་སོགས་པ་གསན་ཏེ་ལོ་བཞི་བསྟེན། དགེ་བཤེས་དོལ་པ་ལོ་ལྔ་བསྟེན་ནས་བེའུ་བུམ་སྔོན་པོ་ལ་སོགས་པ་གསན། གྲའི་སོ་ཐང་པ་ལ་རྡོ་རྗེ་རྣམ་འཇོམས་གསན། ཁོང་ལ་བདག་དབུ་རུ་བྱང་དུ་བཀའ་གདམས་ཤིག་ཉན་དུ་འགྲོ་བས་བརྟག་པ་ཅིག་མཛད་དགོས་ཞུས་པས། ཁྱོད་ཡང་དག་པའི་དགེ་བའི་བཤེས་གཉེན་ཞིག་དང་མ་མཇལ་བར་ལ་དམྱལ་བའི་མེ་ནང་དུ་བསྲེགས་ཀྱང་བར་ཆད་མི་འབྱུང་བར་ངས་ཤེས་ཀྱི་གསུང་། དེ་ནས་གླང་རི་ཐང་པ་ལ་དད་ནས་མཇལ་དུ་བྱོན་ཏེ་ལྷ་སར་ཕེབས་དུས་གླང་རི་ཐང་པ་འདས་ཟེར་བ་གསན། ད་འོ་ན་ཁོང་གི་ཤུལ་ན་རྟོགས་པ་གང་མཐོ་དྲིས་པས། གཉན་མཐོ་ཟེར་ནས་འཁོར་གཉིས་བལྟར་བཏང་། ཁོང་རང་གིས་ལྷ་སར་གསོལ་བ་འདེབས་ཀྱིན་བཞུགས། དེར་འཁོར་གཉིས་ལོག་བྱུང་ནས། གཉན་དང་། བ་ཝ། མདོ་སྡེ་གསུམ་གདན་ས་ལ་མ་མཐུན་པར་འདུག་ཟེར་བ་གསན་པས། གདན་ས་ལ་མ་མཐུན་ན་བློ་སྦྱོང་གི་རེ་བ་མེད་སྙམ་དུ་གླང་ཐང་དུ་འབྱོན་རྩིས་བཤོལ། འོན་ཀྱང་དགེ་བཤེས་དེ་གསུམ་གདན་ས་ལ་མ་མཐུན་པ་དེ་ཆེ་འདོད་ཀྱིས་མ་མཐུན་པ་མིན། དགེ་བཤེས་གླང་ཐང་བའི་རྣམ་ཐར་ལྟར་གསུམ་གས་དམའ་ས་བཟུང་སྟེ་གཅིག་ལ་གདན་ས་བསྐོས་ན་ང་བས་ཉིད་ཅག་ཡོན་ཏན་ཆེ་བས་ང་མི་འོས་ཉིད་ཅག་གིས་མཛད་དགོས་ཞེས་ཟེར། གཞན་གཉིས་ཀྱང་དེ་ལྟར་ཟེར་ནས་མ་མཐུན་པ་ཡིན་ཞེས་བཀའ་གདམས་གོང་མའི་གསུང་སྒྲོས་ལས་འབྱུང་ངོ་། ། དེ་ནས་དགེ་བཤེས་འཆད་ཁ་བ་རང་ལོ་སུམ་ཅུ་པ་ 1130 ལྕགས་ཁྱི་ལ་ཤ་ར་བ་ཆེན་པོ་ཞོའི་ཁང་པ་ན་བཞུགས་པའི་སྤྱན་སྔར་མཇལ། དབྱར་དེ་ཉན་ཐོས་ཀྱི་ས་གསུང་ཞིང་འདུག་པ་ཉན་པས། བྱིངས་སེ་ཉོག་སེ་བ་ཅིག་ལས་བློ་ཁུལ་བ་མ་བྱུང་། དེར་བློ་སྦྱོང་གི་ཚིག་གསལ་བར་མ་བྱུང་བ་ལ་ཉིན་གཅིག་གྲྭ་པ་རྣམས་སྟོན་མོ་ལ་སོང་ནས། དགེ་བའི་བཤེས་གཉེན་ཤ་ར་བ་འབུམ་པ་ལ་བསྐོར་བ་མཛད་པའི་དྲུང་དུ་ཕྱིན་ནས་ཁོང་རང་གི་ཕྱམ་ཚེ་བཏིངས་ཏེ། དགེ་བའི་བཤེས་གཉེན་པ་འདིར་བཞུགས་པར་ཞུ་དང་ཞུས་པས། དེར་སྡད་ནས་ཅི་བྱེད་གསུང་། གྲོས་ཤིག་ཞུ་བ་ལགས་བྱས་པས། ངས་གྲོས་ཐག་ཐམས་ཅད་ཆོས་ཁྲིའི་ཁ་ནས་བཅད་པ་ཡིན། དེར་མ་ཆོད་པ་ཅི་ཡོད་གསུངས། བདག་གིས་མཐོང་བའི་དཔེ་ཅིག་ན། ཁེ་དང་རྒྱལ་ཁ་གཞན་ལ་བྱིན། ། གྱོང་དང་བུབ་ཁ་རང་གིས་ལོང་། ། ཟེར་བ་ཅིག་གདའ་བ་འདི་ཟབ་མི་ཟབ་ཇི་ལྟར་ལགས། གནས་ཁང་མ་རྙེད་པ་དང་། གྲོགས་ཀྱིས་བློ་རྩ་གཡེངས་པ་སོགས་བྱུང་དུས་སེམས་ལ་ཕན་པར་བྱུང་བ་ལགས་ཞུས་པས། དགེ་བའི་བཤེས་གཉེན་ཤ་ར་བའི་ཞལ་ནས། ཇོ་བོ་སྟོན་པ། ཁྱོད་ཀྱི་སེམས་ལ་ཕན་མི་ཕན་གྱི་ཁ་ན་ཅི་ཡོད། ཡང་དག་པའི་སངས་རྒྱས་མི་སྒྲུབ་ན་ཕར་ཞོག ། སྒྲུབ་ན་ཆོས་དེ་ལ་མ་བརྟེན་པར་འགྲུབ་མི་སྲིད་གསུང་། འོ་ན་བདག་ཅག་ལུང་ཆོས་པ་ལགས་པས། དེ་ལ་ལུང་ཞིག་དྲང་བར་ཞུ་ཞུས་པས། མགོན་པོ་ཀླུ་སྒྲུབ་ལ་ཚད་མར་མི་འཛིན་པ་སུ་ཡོད། དེས་རིན་པོ་ཆེའི་ཕྲེང་བར། བདག་ལ་དེ་དག་སྡིག་སྨིན་ཅིང་། ། བདག་དེ་མ་ལུས་དེར་སྨིན་ཤོག ། ཅེས་བྱ་བ་གསུངས་པ་ལགས་གསུང་། འོ་ན་བདག་ལ་དེའི་གདམས་པ་ཅིག་ཞུ་འཚལ་ཞུས་པས། ཇོ་བོ་རང་རྐྱེན་ཐུབ་པར་གྱིས་ཤིག ། ངས་གདམས་ངག་རྣམས་རིམ་གྱིས་བྱའོ་གསུངས་ནས་བློ་སྦྱོང་གི་ཁྲིད་ལོ་བཅུ་གཉིས་ཉམས་ཁྲིད་དུ་བསྐྱངས་པས། བྱང་ཆུབ་ཀྱི་སེམས་ཀྱིས་ཐུགས་རྒྱུད་གང་ནས་བདག་གཅེས་འཛིན་གྱི་འཁྲི་བ་རྩད་ནས་ཆོད་པ་བྱུང་སྟེ། ཞལ་ནས། སྔོན་སྦྱངས་ལས་ཀྱི་འཕྲོ་སད་པས། ། རང་གི་མོས་པ་མང་བའི་རྒྱུས། ། སྡུག་བསྔལ་གཏམ་ངན་ཁྱད་བསད་ནས། ། བདག་འཛིན་འདུལ་བའི་གདམས་ངག་ཞུས། ། ད་ནི་ཤི་ཡང་མི་འགྱོད་དོ། ། ཞེས་བློ་སྦྱོང་ལ་གདེང་ཐོབ་པའི་གསུང་བྱོན་ནོ། ། དགེ་བཤེས་ཤ་ར་བ་དེ་ཚོགས་པ་སྟོང་ཕྲག་མང་པོ་ལ་ལམ་རིམ་གྱི་ཁྲིད་དང་། བྱམས་ཆོས་སྡེ་ལྔ། ས་སྡེ་རྣམས་རྒྱུན་དུ་རྒྱ་ཆེར་གསུང་བར་མཛད་ཀྱང་བདག་གཞན་མཉམ་བརྗེའི་མན་ངག་མཐར་ཐུག་པ་རྣམས་དགེ་བཤེས་འཆད་ཁ་བ་སོགས་རེ་གཉིས་ལ་ལྐོག་ཏུ་གནང་བ་ལས་ཚོགས་སུ་མི་གསུང་། ལན་ཅིག་རྒྱུད་བླ་གསུང་བ་ན། བདག་གི་དགེ་བ་དང་བདེ་བ་ཇོ་བོ་སེམས་ཅན་ལ་གཏོང་། སེམས་ཅན་གྱི་སྡིག་པ་དང་སྡུག་བསྔལ་ཐམས་ཅད་རང་གིས་བླངས་དགོས་པ་ཡིན་ཏེ། ཐུགས་ཀྱིས་ལྕོགས་ན་དེ་བཞིན་དུ་མཛོད་ཅིག་གསུང་བས། ང་ལ་འཁྲིག་ཡོད་པས་གོ ། གཞན་གོ་བ་ཙམ་ཡང་མི་འདུག་གསུང་། ཡང་དགེ་བཤེས་འཆད་ཁ་བའི་ཞལ་ནས། ཤ་ར་བ་ལ་འདི་རྩད་མ་ཆོད་ཀྱི་རིང་ལ་ཇི་ཙམ་པའི་ཆོས་དང་གདམས་ངག་ཐོས་ཀྱང་སངས་རྒྱས་སྒྲུབ་པ་ལ་ད་དུང་འདི་ཙུག་མིན་པ་ཅིག་ག་ཤེད་ན་ཡོད་དེ་འོང་སེམས་པ་མིན་པ་ཁོ་ཐག་ཆོད་པ་མ་བྱུང་བ་ལ། དགེ་བཤེས་ཤ་ར་བ་ལས་འདི་རྩད་ཆོད་པ་དང་། ད་བྱུང་འདི་ལས་ལྷག་པ་གང་ནའང་མེད་སྙམ་ནས་ཐག་ཆོད། འགྲམ་ཆུ་མི་ལྡང་ཉན་སྙིང་མི་འདོད། ལྷོད་སོང་བ་ཅིག་བྱུང་གསུང་། དགེ་བཤེས་འཆད་ཁ་བ་འདིས་དང་པོར་དགེ་བའི་བཤེས་གཉེན་ཤ་ར་བ་དང་ཞོའི་ཁང་པར་མཇལ་བ་ནས་གནས་དེར་ལོ་གཉིས། ཅོང་ལུང་དགེ་གོང་དུ་ལོ་དྲུག ། ཤ་ར་བའི་གདན་ས་ཉིད་དུ་ལོ་བརྒྱད་དེ་ཤ་ར་བ་ལོ་བཅུ་གཉིས་(བཅུ་དྲུག་)འབྲལ་མེད་བསྟེན་ཏེ་ཇོ་བོ་རྗེ་ཡབ་སྲས་ཀྱི་ལྐོག་ཆོས་བདག་གཞན་མཉམ་བརྗེའི་བྱང་ཆུབ་ཀྱི་སེམས་ཀྱི་མན་ངག་རྣམས་བུམ་པ་གང་བྱོར་ཐོབ་སྟེ་ཐེག་ཆེན་བསྟན་པའི་བདག་པོར་གྱུར་ཏོ། ། དེ་ཡང་དགེ་བཤེས་འཆད་ཁ་བ་ཆེན་པོ་འདིས་དང་པོར་གཉལ་གྱི་ཆོས་འཁོར་ནས་བཟུང་སྟེ། གྲུབ་མཐའ་ཁོ་ན་རྩད་བཅད། གཉན་ལ་མངོན་པ་ཉན་པས་ཀྱང་གྲུབ་མཐའ་མང་པོ་བྱུང་། སྤྱིར་དགེ་བཤེས་ཆེན་པོ་ཤ་ར་བ་ལས་གྲུབ་མཐའ་ཐམས་ཅད་བྱུང་བ་ཡིན། ཤ་ར་བ་ཆེན་པོ་གྲུབ་མཐའ་ལོགས་སུ་གསུང་བ་མེད་ཀྱང་། ཤེས་རབ་ལེའུ་ལས། གྲུབ་མཐའ་གསུང་བའི་ས་བོན་དེ་ཙམ་ལ་བརྟེན་ནས་རྩད་བཅད་པ་ཡིན། གྲུབ་མཐའ་ཕྱོགས་མཐའ་དག་རྒྱུས་ཡོད་པ་ཤ་ར་བ་ཆེན་པོ་ལས་མི་སྣང་། ཚོགས་སུ་གྲུབ་མཐའི་ཟུར་ཙམ་ལས་མི་འོང་བར་སྣང་གསུང་། ཤ་ར་བ་གཤེགས་ནས་འཆད་ཁ་བས་འཁོར་རྣམས་ལ་གྲུབ་མཐའ་བཞིའི་ཆོས་འདི་སྟོང་ཐུན་དུ་གསུངས། དེ་ནས་སྒྱེར་སྒོམ་ཆོས་གྲགས་ཀྱིས་ནས་རྗང་བ་གང་ཕུལ་ནས་ཡི་གེར་བསྡེབས་པར་ཞུས་ནས་མཁའ་རུ་བྱ་བ་དེར་ཡི་གེར་བསྡེབས། དང་པོར་ཡི་གེ་འདི་སུའི་ལག་ཏུ་སོང་བ་ང་དང་ཁྱད་མེད་པ་འོང་། རང་གི་རྒྱུད་ལ་སེམས་པ་མིན་པ་བཤད་དགོས་སྙམ་པ་མེད་པ་ལ། ཁ་ཟད་ཟད་དུ་བཤད་ཀྱང་མི་གོ་བ་ཅིག་བྱུང་། དབུ་མ་པའི་ཚིག་བདུན་པོ་དེ་ལ་བཤད་པ་ཞིག་དགོས་སྙམ་པ་ཅིག་ཡོད་ཅེས་གསུང་། ཤ་ར་བ་གཤེགས་རྟིང་ལོ་སུམ་ཅུ་རྩ་བཞི་བཞུགས་ཏེ་བས་མཐའ་རྣམས་སུ་ཐུགས་དམ་གྱི་གཙོ་བོ་བྱང་ཆུབ་ཀྱི་སེམས་གཉིས་ལ་མཛད་ཅིང་། ཞབས་དྲུང་དུ་ཉེ་བར་ལྷགས་པ་རྣམས་ལའང་ཤ་ར་བའི་མཛད་པ་བཞིན་སྡེ་སྣོད་ཀྱི་བཤད་པ་དང་། གྲུབ་མཐའི་དཀའ་གནད་དང་། ལམ་རིམ་གྱི་ཁྲིད་འདེབས་པར་མཛད་ཅིང་། རེ་རེ་གཉིས་གཉིས་ལ་བློ་སྦྱོང་གི་གདམས་པ་ལྐོག་ཆོས་སུ་མཛད་པས་ཕན་ཐོགས་པའང་འགའ་རེ་བྱུང་བས། ཕྱིས་འདྲེས་ཕུ་སྒོམ་ཆེན་སྡིངས་སུ་བཞུགས་དུས་ཆོས་འདི་ཚོགས་ཆོས་སུ་བཤད་པའི་འོས་མིན། བཏུབ་པ་འགའ་ལ་ལྐོག་ཁྲིད་དུ་བྱེད་པ་ཡིན་ཏེ། སུ་ལ་ཕན་དང་སུ་ལ་མི་ཕན་མི་ཤེས་པར་འདུག ། ཉེ་གནས་ཁྱོད་ལ་མར་དང་བུ་རམ་ཡོད་ན་ནང་པར་སྒོམ་ཆེན་པ་རྣམས་ལ་མར་ཁུའི་བཤོར་འདྲེན་དང་བུར་སྟོན་གྱིས། ངའི་ཆོས་འདི་ལ་མིང་གཅིག་འདོགས་པའི་མིང་སྟོན་བྱེད་པ་ཡིན་གསུངས་ནས། དེའི་དུས་སུ་ཐེག་ཆེན་བློ་སྦྱོང་སྙན་རྒྱུན་ཆེན་མོའི་དོན་ཐམས་ཅད་བསྡུས་ཏེ། སྔོན་འགྲོ་རྟེན་གྱི་ཆོས་བཞི་བསྟན་པ། དངོས་གཞི་བྱང་ཆུབ་ཀྱི་སེམས་གཉིས་སྦྱང་བ། རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བ། ཚེ་གཅིག་གི་ཉམས་ལེན་དྲིལ་ནས་བསྟན་པ། བློ་འབྱོངས་པའི་ཚད། བློ་སྦྱོང་གི་དམ་ཚིག ། བློ་སྦྱོང་གི་བསླབ་བྱ་སྟེ་དོན་ཚན་བདུན་དུ་བསྡུས་ནས་ས་བཅད་མཛད་དེ་ཡི་གེར་བཏབ། བློ་སྦྱོང་དོན་བདུན་མ་ཞེས་མཚན་བཏགས། ཚོགས་ཆོས་བྱེད་པའི་སྲོལ་དེ་ནས་བྱུང་བ་ཡིན། དེའི་རྗེས་སུ་མལ་གྲོར་བྱོན་ནས་འཆད་ཁ་རྙིང་མའི་དགོན་པ་བཏབ། དེར་འགྲོ་དོན་ལོ་བཅུ་གཅིག་བསྐྱངས། ཚོགས་པ་དགུ་བརྒྱ་ཙམ་འདུས། སེ་སྤྱིལ་བུ་བ་ལ་འཆད་ཁ་གསར་མ་འདེབས་པའི་ལུང་བསྟན་མཛད། བྱ་རྒན་གྱི་མི་ཚེ་མཐའ་རུ་སྐྱེལ་གསུང་ནས་མཐའ་ཕུར་བྱོན། མཐར་ཐུག་གསུམ་གྱི་གདམས་པ་ལ་སོགས་པ་མཛད། བློ་རྒོད་གར་སྐྱེས་སུ་སྐྱེས་འགོ་སྒྱུར། ། རྟོག་དཔྱོད་ཀུན་ཇི་ལྟར་དགྱེས་དགྱེས་མཛོད། ། བསོད་སྙོམས་བྱེད་ཅིང་རི་ཁྲོད་འགྲིམ། ། སྡེ་དགོན་ཀུན་ཇི་ལྟར་དགྱེས་དགྱེས་མཛོད། ། ལྷ་དང་བླ་མ་ལ་གསོལ་བ་འདེབས། ། ཡོན་བདག་ཀུན་ཇི་ལྟར་དགྱེས་དགྱེས་མཛོད། ། བྲག་ཕུག་ཏུ་ཚེམ་བེར་གྱོན་ནས་འདུག ། ཕྲུག་ཆུང་ཀུན་ཇི་ལྟར་དགྱེས་དགྱེས་མཛོད། ། མ་རྒན་ལྷ་ཀླུ་ལ་ཁ་ཏོན་བསྔོ། ། ཆོས་བཤད་ཀུན་ཇི་ལྟར་དགྱེས་དགྱེས་མཛོད། ། གཅིག་པུར་ཆུ་ཐུག་གི་མི་ཚེ་སྐྱེལ། ། སྒྱེད་ཁ་ཀུན་ཇི་ལྟར་དགྱེས་དགྱེས་མཛོད། ། གཅིག་པུར་དགེ་ཆོས་སྤེལ་པར་བྱེད། ། བཀའ་འཁོར་ཀུན་ཇི་ལྟར་དགྱེས་དགྱེས་མཛོད། ། ཅེས་སོགས་དང་། ལྟོ་རྒྱབ་གཉིས་ལ་གྱོང་བསྐུར་ནས། ། རི་དྭགས་རྨས་མའི་བརྟུལ་ཞུགས་སྤྱད། ། རང་གི་འདོད་པ་ཁྱད་བསད་ནས། ། བླ་མའི་བཀའ་སྩལ་གཞུང་བཞིན་བསྒྲུབས། ། ད་ནི་ཤི་ཡང་མི་འགྱོད་དོ། ། ཞེས་གསུངས། འདའ་ཁ་ཙ་ན་ཡང་འཇིག་རྟེན་ན་སྒྲ་གཅིག་ཐོས་པ་ལ་བློ་སྦྱོང་གི་སྒྲ་ལས་སྙན་པ་མེད་པས། ཁྱོད་ཀྱིས་ངའི་རྣ་བར་སྒྲོགས་ཤིག་ཅེས་པ་དང་། ད་རེས་ནི་འདོད་པ་ཙུག་ཁ་ནའང་མ་བྱུང་། སེམས་ཅན་གྱི་དོན་དུ་དམྱལ་བར་འགྲོ་འདོད་པ་ཁོ་ན་ཡིན་པ་ལ། ད་ནི་བདེ་བ་ཅན་གྱི་སྣང་བ་ཅིག་ཁོ་ན་བྱུང་གསུང་། གཅུང་པོས་སྐུ་ཁམས་ཞན་པར་གདའ། ཐུགས་དམ་མཛོད་ཅིག་ཞུས་པས། བློ་སྦྱོང་གི་ཚིག་ཁ་ཡར་གསུངས་ནས། ཁམས་ཞན་ཡང་དེ་ལྟ་བུ་ཞིག་མིན་པ་གནས་པ་ཚམ་ཚོམ་གྱིས་ས་ཕྱོད་པར་མ་མཐོང་གསུང་། དེ་ནས་མཐའ་ཕུར་ཟླ་བ་བརྒྱད་བཞུགས་ནས་རང་ལོ་དོན་ལྔ་པ་ 1175 ཤིང་མོ་ལུག་གི་སྨལ་པོ་ཟླ་བའི་ཚེས་ལྔའི་སྲོད་ལ་གནས་དེ་ཉིད་དུ་མྱ་ངན་ལས་འདས། སྤུར་སྦྱངས་པས་ཐུགས་ལྗགས་སྤྱན་གསུམ་དང་མེ་ཏོག་གི་ཆར་ལ་སོགས་པ་ངོ་མཚར་ཅན་མང་དུ་བྱུང་ངོ་། ། སེམས་དཔའ་ཆེན་པོ་འཆད་ཁ་བ་འདི་བཀའ་གདམས་གླེགས་བམ་ལས་ལུང་བསྟན་ཏེ། བཀའ་གདམས་གླེགས་བམ་གྱི་བཀའ་གདམས་བསྟན་འཛིན་རྣམས་ལུང་བསྟན་པའི་ཐད་ལས། ཁྱད་པར་དུ་ཐེག་པ་ཆེན་པོ་ལ་བློ་སྦྱོང་བ་བོད་ཀྱི་བྱང་ཆུབ་སེམས་དཔའི་ཡབ་གཅིག་གི་ཡུལ་མལ་གྲོའི་ནང་དུ་བྱོན་ཏེ་འཆད་པ་ཆེན་པོ་ཞིག་གི་སྟེང་དུ་བློ་སྦྱོང་སྒོམ་ཞེས་སོགས་གསལ་པར་ལུང་བསྟན་ཏོ། ། འཆད་ཁ་བ་ཡེ་ཤེས་རྡོ་རྗེ་ཞེས་གྲགས་པའི་བདག་ཉིད་ཆེན་པོ་འདིས་ཕྱི་མའི་སྐྱེ་བོ་རྣམས་ཀྱི་དོན་དུ་ཇོ་བོ་ཡབ་སྲས་ཀྱི་དགོངས་པ་གསལ་བར་བྱེད་པའི་བསྟན་བཅོས་མང་དུ་མཛད་དོ། ། བདག་ཉིད་ཆེན་པོ་འདི་ལ་གསུང་ལས་སྐྱེས་པའི་སྲས་མང་དུ་བྱོན་ཞིང་མན་ངག་ཐམས་ཅད་བུམ་པ་གང་བྱོར་ཡོད་པའི་བསྟན་འཛིན་ཆེན་པོ་ནི་སེ་སྤྱིལ་བུ་བའོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པའི་གདུལ་བྱ་རྣམས་ཀྱིས་སེམས་དཔའ་ཆེན་པོ་འཆད་ཁ་བ་ལ་གསོལ་བ་འདེབས་ཤིང་། བདག་ཉིད་ཆེན་པོ་འདིའི་མཛད་པ་རྣམ་ཐར་རྣམས་དྲན་པར་བྱས་ལ་ཐེག་པ་ཆེན་པོའི་ལམ་གྱི་འཇུག་སྒོ་དང་། གཞུང་ཤིང་དང་སྙིང་པོ་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང་། སྐྱེས་ཟིན་གོང་ནས་གོང་དུ་སྤེལ་བ་དང་། མཐར་འབྲས་བུ་གྲུབ་ནས་སེམས་ཅན་གྱི་དོན་བྱ་བའི་བར་གྱི་ལམ་གྱི་གནད་ལ་ངེས་པ་གཏིང་ཚུགས་པ་བསྐྱེད་ནས་ས་ལམ་འབྲས་བུ་དང་བཅས་པ་ཐམས་ཅད་བྱང་ཆུབ་ཀྱི་སེམས་རིན་པོ་ཆེའི་ཁོངས་སུ་འདུ་བར་ཤེས་པར་བྱས་ནས་བྱང་ཆུབ་ཀྱི་སེམས་རིན་པོ་ཆེ་སྒོམ་པ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ། ། ། །
༈ ལུང་རྟོགས་མངའ་བདག་བྱང་སེམས་སྤྱིལ་བུ་བ། ། ཞེས་བསྔགས་པ། སེམས་དཔའ་ཆེན་པོ་སེ་སྤྱིལ་བུ་བ་ནི། གཉལ་སྟོད་དར་མ་སྒང་དུ་ 1121 ལྕགས་མོ་གླང་ལ་འཁྲུངས། སེ་ཞེས་པ་རུས་མིང་ངོ་། ། སྔོན་ཡུན་རིང་པོ་ནས་ལམ་ལ་སྦྱངས་པའི་མཐུས་སྐུ་གཞོན་ནུ་ནས་གཞན་གྱིས་བསྐུལ་བ་ལ་མ་བལྟོས་པར་ངེས་འབྱུང་གི་བསམ་པ་ཤུགས་དྲག་པོས་ཀུན་ནས་བསླངས་ཏེ་དགེ་བཤེས་ཆ་པའི་དྲུང་དུ་རབ་ཏུ་བྱུང་། ལོ་ལོན་ནས་མཁན་པོ་དེ་ཉིད་ལས་བསྙེན་པར་རྫོགས་མཚན་ཆོས་ཀྱི་རྒྱལ་མཚན་ཞེས་བཏགས། ལྷན་ཅིག་སྐྱེས་པའི་བློ་གྲོས་རབ་ཏུ་གསལ་བས་སྡེ་སྣོད་གསུམ་གྱི་བརྗོད་བྱའི་གནས་རྣམས་ལ་མཁས་པའི་ཕུལ་དུ་ཕྱིན་པར་གྱུར། དེའི་ཚེ་ཐུགས་བསམ་འདི་ལྟ་བུ་དག་འཁྲུངས་པར་ངེས་ཏེ། རྒྱལ་བའི་བཀའ་དང་དགོངས་འགྲེལ་གྱི་བསྟན་བཅོས་ཐམས་ཅད་རང་གི་རྒྱུད་འདུལ་བའི་ཆེད་དུ་གསུངས་ཤིང་། ཤེས་རྒྱུད་འདུལ་བའི་ཐབས་མཆོག་ཏུ་གྱུར་པ་ནི་བྱང་ཆུབ་ལམ་གྱི་རིམ་པ་དང་། དེའི་ཡང་སྙིང་པོ་ཐེག་པ་ཆེན་པོའི་བློ་སྦྱོང་འདི་ཡིན་པར་ངེས་པས་ཐེག་ཆེན་བློ་སྦྱོང་གི་བདག་པོ་སེམས་དཔའ་ཆེན་པོ་འཆད་ཁ་བའི་ཞབས་ལ་གཏུགས་ཏེ་ལམ་རིམ་བློ་སྦྱོང་གི་གདམས་པ་སླར་སུ་ལའང་འདྲི་མི་དགོས་པ་ཕུ་ཐག་ཆོད་པ་ཞིག་ཞུས་ལ་ཚེ་དང་སྒྲུབ་པ་མཉམ་པ་ཞིག་བྱེད་སྙམ་པའི་འདུན་པ་ཤུགས་དྲག་པོ་འཁྲུངས་ནས་དགེ་བའི་བཤེས་གཉེན་འཆད་ཁ་བ་ཆེན་པོའི་ཞབས་དྲུང་དུ་ཕེབས་ཏེ། དགེ་བཤེས་འཆད་ཁ་བ་ལྷ་སྡིངས་སུ་བཞུགས་དུས་མཇལ། བློ་སྦྱོང་གི་གདམས་པ་ཐོག་མར་དེར་གསན། ལོ་ཉི་ཤུ་རྩ་བཞིའི་བར་དུ་དགེ་བཤེས་འཆད་ཁ་བ་ཆེན་པོ་བསྟེན་ནས་བློ་སྦྱོང་ཁོ་ན་ལ་ཉན་བསམ་བྱས་གསུངས་ཏེ། དགེ་བཤེས་འཆད་ཁ་བ་ཐོག་མར་མཇལ་བ་ནས་བཟུང་ནམ་གཤེགས་ཀྱི་བར་དུ་འབྲལ་མེད་དུ་བསྟེན་ནས་བློ་སྦྱོང་གི་གདམས་ངག་ཞུས། སྒོ་གསུམ་གྱི་སྤྱོད་པ་ཐམས་ཅད་བློ་སྦྱོང་ཁོ་ནའི་གྲོགས་སུ་འགྲོ་བ་ཞིག་མཛད་ནས་ལམ་གྱི་རིམ་པའི་ལུས་སྤྱི་དང་། ཁྱད་པར་བྱང་ཆུབ་ཀྱི་སེམས་རིན་པོ་ཆེ་ལ་བཅོས་མིན་གྱི་མྱོང་བ་འཁྲུངས་ནས་བདག་ཉིད་མི་ཉམས་པའི་གདེང་ཐོབ་པ་ན་སྐལ་བ་དང་ལྡན་པ་གཞན་མང་པོ་ལའང་ཆོས་ཀྱི་བདུད་རྩི་སྩལ། སྔར་འཆད་ཁ་བ་ཆེན་པོས་ལུང་བསྟན་པ་བཞིན། ཤིང་སྤྲེ་ལ་འཆད་ཁ་གསར་མ་བཏབ། བྱ་འཆད་ཀྱི་ནང་རྟེན་ལ་སྐུ་ལྡེར་རིན་པོ་ཆེ་དང་། ཕྱི་རྟེན་གྱི་འབུམ་པ་ལ་སོགས་པ་བཞེངས་ཏེ་ཚོགས་བསྡུས་ནས་འཆད་ཁ་དང་ལྷ་སྡིངས་ལ་སོགས་པར་ཆོས་མང་དུ་གསུངས་ཤིང་། བློ་སྦྱོང་ལའང་ཚོགས་ཆོས་ཁོ་ནར་མཛད། དེ་ནས་དུས་ནམ་ཞིག་ན་ཤིན་ཏུ་དབེན་པའི་གནས་ཤིག་ཏུ་འབྱོན་བཞེད་དེ་བྱེན་ན་བཞུགས་པའི་དུས། སྤྱིལ་དུ་འཕོ་ཁར་དགེ་སློང་སྐྱེའུ་ཆུང་ན་རེ། དགེ་བཤེས་ཆེན་པོའི་སློབ་མ་མང་བ་ཅིག་བྱོན་པ་ལ། སྐུ་ཚེ་ཐུང་བར་བྱུང་བ་དེ་ཅིས་ལན་ན་ངའི་བསམ་པ་ལ་སྔགས་དང་ཕ་རོལ་ཏུ་ཕྱིན་པ་གཉིས་ཀ་ལ་བློ་སྦྱོང་འདི་ལས་ཟབ་པ་གང་ནའང་མི་འདུག་པ་ལ་དེ་ལ་ཚོགས་ཆོས་བྱས་པས་དེས་ལན་ངེས་སྙམ་པ་ཅིག་བྱུང་ཟེར་བས། དེ་བདེན། འདི་བས་ཟབ་པ་མེད། ཚོགས་སུ་བཤད་པའི་འོས་མིན། དགེ་བཤེས་འཆད་ཁ་བ་ཆེན་པོ་ལ་འཛམ་བུ་གླིང་གི་སའི་ཆ་མཐའ་དག་ནས་བློ་སྦྱོང་དོན་དུ་གཉེར་བའི་གདུལ་བྱ་འདུས་པ་ན་རེ་རེ་ནས་ཁྲིད་ཀྱིས་མ་ལང་བས་ཚོགས་ཆོས་སུ་གསུངས། དེ་སྲོལ་དུ་སོང་བ་ཡིན་གསུངས་ནས་དམ་པར་མཛད། དེ་ནས་ཤིན་ཏུ་དབེན་པ་ལ་དགྱེས་པས། ཀླུངས་ཤོད་དུ་སྤྱིལ་བུའི་དགོན་པ་བཏབ་སྟེ་རྣམ་གཡེངས་སྤངས་ནས་སྟོད་དུ་མཁར་གོང་ལ་ཁ་དང་། སྨད་དུ་ཉུང་ཞིང་སྒང་དུ་མཚམས་ཐོ་བརྒྱབ་ནས་ལོ་བདུན་མཚམས་དམ་པོར་བཅད་ནས་ལམ་རིམ་བློ་སྦྱོང་རྩེ་གཅིག་ཏུ་སྒོམ་པར་མཛད། སྤྱིལ་དུ་བཞུགས་རིང་ལ་ཚོགས་ཆོས་སུ་ལན་གསུམ་ལས་མ་གནང་། དེ་རྣམས་ཀྱི་དུས་སུའང་ཚོགས་ཆོས་ཀྱི་འོས་མ་ཡིན་ཏེ། ཁོང་མི་ཆེན་གྱིས་ཞུས་པས་ངོ་མ་བཟོད་པ་ཡིན། ད་ཚོགས་སུ་འདི་ལས་འཆད་པ་མི་འོང་བས་ཁྱེད་རང་ཐམས་ཅད་ནན་ཆགས་ཀྱིས་ཤིག་གསུང་། སྤྱིལ་དུ་མཆོད་ཁང་རང་ཡང་མེད་པར་འདི་ཁོ་ན་སྦྱང་སྙམ་པ་ཡིན་པ་ལ་གསུང་། ཐུགས་དམ་ཡང་འདི་ཁོ་ན་ལ་མཛད་པས། ཡེངས་པ་ལ་སོགས་པ་ཅི་བྱུང་ཡང་བློ་སྦྱོང་མི་འཆོར། རྟོགས་པ་ཡང་འདི་ཚིག་གིས་བགྲངས་པའི་དུས་སུ་སྐྱེས་པ་ཡིན་གསུང་། དེ་ནས་བྲག་དཀར་གནས་བརྟན་ལ་སོགས་པ་འཆད་ཁ་བ་རྣམས་ཀྱིས་སྤྱན་དྲངས་པས་དགུན་ཆོས་ལ་འབྱོན་པར་ཞལ་གྱིས་བཞེས་ནས་བྱོན། དེ་ནས་ཞིང་ནམ་གཤེགས་ཀྱི་བར་དབྱར་གྱི་ཚུལ་འཇུག་སྤྱིལ་བུར་མཛད། དགུན་ཆོས་འཆད་ཁར་མཛད་པའི་སྲོལ་བྱུང་། འཆད་ཁ་བ་གཤེགས་ནས་མེ་སྤྲེ་ནས་ས་བྱའི་བར་དགོན་པ་གོང་འོག་ཏུ་ལོ་བཅུ་བཞི་བཞུགས་ཏེ། རང་ལོ་དྲུག་ཅུ་རྩ་དགུ་པ་ 1189 ས་མོ་བྱའི་དབྱར་ཟླ་ར་བའི་ཚེས་བཅུ་གསུམ་ལ་སྤྱིལ་བུར་དེད་དཔོན་རྒྱ་མཚོ་ཆེན་པོ་ནས་ཡིད་བཞིན་གྱི་ནོར་བུ་ཐོབ་སྟེ་རང་ཡུལ་དུ་འགྲོ་བ་དང་། བུ་བྱེས་སུ་འཁྱམས་པ་ཕ་ཁྱིམ་དུ་འགྲོ་བ་ལྟར་དགའ་བཞིན་སྤྲོ་བཞིན་དུ་ཞི་བར་གཤེགས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། ། སེམས་དཔའ་ཆེན་པོ་འདི་ནི་བཀའ་གདམས་གླེགས་བམ་རིན་པོ་ཆེ་ནས་གསལ་བར་ལུང་བསྟན་ཏེ། གླེགས་བམ་ལས། རེ་ཞིག་སྤྱིལ་བུ་མཛད་ནས་བཞུགས་པས། དགེ་སློང་དང་དགེ་ཚུལ་གྱི་བྱང་ཆུབ་སེམས་དཔའ་དུ་མ་འདུས་ཏེ། སེང་ལྡེང་ནགས་ཀྱི་རི་བོ་ལ་སེང་ལྡེང་ནགས་ཀྱི་སྒྲོལ་མས་བྱིན་གྱིས་བརླབས་པའི་སྐྱེས་བུ་དམ་པ་གཅིག་དྲུང་དུ་བསྟེན་པ་ལ། བྱང་ཆུབ་སེམས་དཔའ་བའི་ཞལ་ནས། ཁྱེད་སྔོན་བདག་ཅག་གི་བླ་མ་རྒྱལ་བའི་འབྱུང་གནས་ཀྱི་བླ་མ་སེ་བཙུན་བྱ་བ་ཞིག་ཡོད། དེ་ཡིན་པར་འདུག་དེའི་རིགས་སུའང་གདའ། ད་ཁྱེད་རང་ཀླུངས་ཤོད་ཀྱི་ནང་ན་སྤྱིལ་བུ་བྱ་བའི་ལུང་པ་ཡོད། དེ་ལྷས་བྱིན་གྱིས་བརླབས་པའི་ཡུལ་ཡིན་དེར་སོང་། ཁྱེད་ལ་ཤཱཀྱའི་གདུང་རིགས་འཛིན་པ་ལྷའི་ལྷ་ཞིག་ནས་ལྔ་ལས་མི་ཉུང་བར་འབྱུང་། ཞེས་གནས་དང་བཅས་པ་གསལ་བར་ལུང་བསྟན་ཏོ། ། འདིས་ནི་ལྷ་ལུང་གི་དབང་ཕྱུག་དང་། ལྷ་འགྲོ་བའི་མགོན་པོ་གཉིས་ཀྱང་བཀའ་གདམས་བསྟན་འཛིན་ཆེན་པོར་ལུང་བསྟན་པ་ཡིན་ནོ། ། སེམས་དཔའ་ཆེན་པོ་སྤྱིལ་བུ་བ་འདི་ལ་བསྟན་འཛིན་གྱི་སློབ་མ་མང་དུ་བྱུང་བའི་ནང་ནས་བྱང་ཆུབ་ལམ་གྱི་རིམ་པའི་མན་ངག་ཡོངས་སུ་རྫོགས་པ་བུམ་པ་གང་བྱོར་ཐོབ་པའི་སྲས་ཀྱི་ཐུ་བོ་ནི་ལྷ་ལུང་གི་དབང་ཕྱུག་གོ ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སེམས་དཔའ་ཆེན་པོ་འདི་ལ་གསོལ་བ་འདེབས་ཤིང་། སེམས་དཔའ་ཆེན་པོ་འདིའི་རྣམ་ཐར་ལྟར་བརྩོན་པ་ཐམས་ཅད་གཅིག་ཏུ་དྲིལ་ཏེ་བྱང་ཆུབ་ལམ་གྱི་རིམ་པའི་ཉམས་ལེན་ལ་འབད་པར་བྱའོ། ། ། །
༈ དྲི་མེད་ལུང་གི་དབང་ཕྱུག་མཁས་པའི་མཆོག ། ཅེས་བསྔགས་པ། བཤེས་གཉེན་ཆེན་པོ་ལྷ་ལུང་གི་དབང་ཕྱུག་ནི། ཕོ་བྲང་ཁང་དམར་དུ་ཡབ་ཇོ་བོ་རྣལ་འབྱོར། ཡུམ་སྣ་ནམ་བཟའི་དཔལ་འདྲེན་གཉིས་ཀྱི་སྲས་སུ་ 1158 ས་ཕོ་སྟག་གི་ལོ་ཆོ་འཕྲུལ་ཟླ་བའི་ཚེ་བཅོ་ལྔའི་ཉི་མ་ཤར་བ་དང་དུས་མཚུངས་པར་སྐུ་འཁྲུངས། བྱིས་པ་ཆུང་ངུའི་གནས་སྐབས་ཉིད་ནས་སྒོ་གསུམ་གྱི་སྤྱོད་པ་ཐམས་ཅད་ཞི་ཞིང་དུལ་བ་དང་། གཞན་གྱིས་བསྐུལ་བ་ལ་མི་བལྟོས་པར་དམ་པའི་ཆོས་འཚོལ་བ་ལ་ངང་གིས་ཞུགས་པ་ཞིག་བྱུང་ཞིང་། དགུང་ལོ་བརྒྱད་བཞེས་པའི་ཚེ། གུ་རི་བ་ཆེན་པོ་ལ་བསྙེན་གནས་དང་། ཆོས་སྤྱོད་མང་པོའི་ལུང་ཞུས་ཏེ་ཆོས་བཞིན་སྤྱོད་པས་དུས་འདའ་བར་མཛད། དེའི་དུས་སུ་ཐུགས་བསམ་འདི་ལྟ་བུ་དག་འཁྲུངས་པར་ངེས་ཏེ། བདག་རིགས་མཐོན་པོར་སྐྱེས་ཤིང་འབྱོར་པ་དང་ལྡན་ཡང་ཡུད་ཙམ་ནས་ངེས་པར་འདོར་དགོས་པས་མི་རྟག་པ། མི་བརྟན་པ། ཡིད་བརྟན་མི་རུང་བ་བསླུ་བའི་ཆོས་ཅན་འདི་ལ་ཆགས་པས་ཅི་ཞིག་རུང་། ད་ལྟ་རྒྱལ་བའི་བསྟན་པའི་སྙིང་པོ་མཐར་ཐུག་པ་དཔལ་ལྷ་ཅིག་དི་པཾ་ཀ་རའི་ཆོས་རྒྱུད་མ་ཉམས་པར་ཡིན་པའི་སྐབས་འདིར་རྒྱལ་བའི་བསྟན་པ་ལ་ཞུགས་ནས་རྒྱལ་བ་དགྱེས་པའི་ཆོས་རྣམ་པར་དག་པ་ཞིག་ཅི་ནས་ཀྱང་བྱ་སྙམ་དུ་འདུན་པ་དྲག་པོ་འཁྲུངས་ཤིང་། དམ་པ་གོང་མའི་རྣམ་ཐར་ལ་ཡིད་སྨོན་རྒྱུན་དུ་མཛད། དེ་དུས་སྣེའུ་ཟུར་པའི་མཚན་ཐོས་པ་ཙམ་གྱིས་དད་པ་སྐྱེས། དེ་ནས་ད་ནི་ངེས་པར་མི་གཙང་བའི་འདམ་རྫབ་ལྟ་བུ་ཁྱིམ་གྱི་གནས་འདི་དོར་ནས་རབ་ཏུ་འབྱུང་བར་བྱའོ་སྙམ་དུ་ཐག་བཅད་དེ་དགུང་ལོ་བཅུ་བཞི་པ་ལ་གུ་རི་པ་ལ་དགེ་བསྙེན་གྱི་སྡོམ་པ་མནོས། བཅོ་ལྔ་ལ་རྒྱ་དུར་གྱི་མཁན་པོ་ཀླུབས་དཀར་དང་། དགེ་བཤེས་གཙང་པ་ཁྱུང་པོ་སྤྱན་དྲངས་ཏེ། ཀླུབས་དཀར་གྱིས་སློབ་དཔོན་དང་། ཁྱུང་པོ་ལ་མཁན་པོ་ཞུས་ཏེ་བྱ་སར་རབ་ཏུ་བྱུང་། མཚན་བྱང་ཆུབ་རིན་ཆེན་དུ་བཏགས། དེའི་ཚེ་མཁན་སློབ་ལ་འདུལ་བའི་བསླབ་བྱ་ལེགས་པར་གསན་ནས་ཕྱག་ལེན་ལ་ཐེབས་པར་མཛད་ཅིང་། ཀ་རི་ཀ་ལྔ་བཅུ་པ་གསན་ནས་ཐུགས་སུ་ཆུད་པར་མཛད། དགེ་ཚུལ་གྱི་བསླབ་བྱ་རྒྱས་པར་སྟོན་པ་འདུལ་བ་སུམ་བརྒྱ་པར་ཚར་གཉིས་གསན། འདུལ་བ་ལུང་ལའང་ལེགས་པར་གཟིགས་ཏེ་བསླབ་བྱ་ཕྲ་རགས་རྣམས་མ་འདྲེས་པར་མཁྱེན་ཅིང་ཇི་ལྟར་མཁྱེན་པ་ལྟར་ཕྱག་ལེན་ལ་བཏབ། འདུལ་བའི་བསླབ་བྱ་བསྲུང་བ་གཞིར་བཟུང་ནས་སྡེ་སྣོད་གསུམ་ག་ལ་སྦྱངས་ཏེ་མཁས་པའི་ཕུལ་དུ་ཕྱིན་པར་གྱུར། སྐལ་བ་དང་ལྡན་པ་ཁ་ཤས་ལ་ཆོས་ཀྱང་གསུངས། དགེ་བཤེས་འཆད་ཁ་བའི་སྐུ་འབག་གཅིག་གཟིགས་པས་ཤིན་ཏུ་དད་དེ། འདི་ཇི་སྐད་བྱ་བ་ཡིན་བྱས་པས་འཆད་ཁ་བ་ཡིན་འདས་ཟེར། ད་ལྟ་སེ་བཞུགས་བྱས་པས་དད་དེ་སེམས་དཔའ་ཆེན་པོ་སེ་སྤྱིལ་བུ་བའི་སར་བྱོན་ཏེ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན། གསུང་རབ་དགོངས་འགྲེལ་དང་བཅས་པའི་སྙིང་པོ་བྱང་ཆུབ་ལམ་གྱི་རིམ་པའི་ཁྲིད་གསན་ཏེ་ཉམས་སུ་བཞེས། རྒྱལ་བའི་གསུང་རབ་དགོངས་འགྲེལ་དང་བཅས་པ་ཐམས་ཅད་དང་། ཁྱད་པར་བཀའ་གདམས་གཞུང་དྲུག་བྱང་ཆུབ་ལམ་གྱི་རིམ་པའི་མན་ངག་ཏུ་ངོ་འཕྲོད་དེ་བྱང་ཆུབ་ལམ་རིམ་ལ་ཉམས་ལེན་ཆིག་སྒྲིལ་དུ་མཛད་པས་སེམས་དཔའ་ཆེན་པོ་སེ་སྤྱིལ་བུ་བ་ཐུགས་གཏིང་ནས་དགྱེས་པར་གྱུར། དེར་བཞུགས་པའི་གྲྭ་པ་ཐམས་ཅད་ཀྱིས་དང་བ་ཆེན་པོས་སྤྱིལ་བུ་ཞིག་བརྩིགས། དགུང་ལོ་ཉི་ཤུ་རྩ་བཞི་ལ་སེའི་ཞལ་ནས་དགེ་སློང་གིས་གསུང་བས། བརྒྱ་སར་སྒང་ནས་མཁན་པོ་གླན་གདན་དྲངས་ནས་མཁན་པོ་ཞུས། སློབ་དཔོན་ཞང་གིས་ལས་ཆོག་པ་མཛད། གཉགས་ཀྱིས་གསང་སྟེ་བ་མཛད་དེ་བསྙེན་པར་རྫོགས། དུས་དེའི་ཚེ་ཁ་ཆེ་པཎ་ཆེན་ཤཱཀྱ་ཤྲཱི་ཡང་བོད་དུ་བྱོན་པས་ཁ་ཆེ་པཎ་ཆེན་ལ་ཆོས་མང་དུ་ཞུས། གཞན་ཡང་དགེ་བའི་བཤེས་གཉེན་མཁས་པ་མང་དུ་བསྟེན་ཏེ་རྒྱལ་བའི་བཀའ་བོད་དུ་འགྱུར་རོ་ཅོག་ཐམས་ཅད་ཀྱི་ལུང་ཐོབ་པར་མཛད། བཀའ་གདམས་གཞུང་དྲུག་སོགས་ཤིང་རྟ་ཆེན་པོའི་གཞུང་རྣམས་ལས་བོད་ན་ལུང་རྒྱུན་གང་བཞུགས་ཐམས་ཅད་རྩད་དཔྱད་དེ་ཐོབ་པར་མཛད། དྲི་མ་མེད་པའི་རིགས་པའི་སྣང་བ་ཆེས་ཆེར་རྒྱས་ཏེ་བསྟན་པ་ཡོངས་རྫོགས་ཀྱི་གནད་ལ་འཁྲུལ་མེད་ཀྱི་ངེས་པ་བརྟན་པོ་རྙེད་པ་ན་ཚེ་འདིའི་གཡེང་བ་ཐམས་ཅད་བཅད་དེ་རུག་པར་སྐུ་མཚམས་དམ་པོ་མཛད། དེ་དུས་བསག་སྦྱང་གཙོ་བོར་བཏོན་པས་ཐོག་མར་བཅོམ་ལྡན་འདས་སྨན་བླའི་ལྷ་ཚོགས་རྣམས་ཞལ་གཟིགས། ཇི་ལྟར་དང་བའི་ཆུ་ནང་དུ་ཟླ་གཟུགས་འཆར་བ་ལྟར་སངས་རྒྱས་དང་བྱང་སེམས་མང་པོའི་ཞལ་མཐོང་ཞིང་། ལྷ་སར་བྱོན་དུས་ཇོ་བོ་རིན་པོ་ཆེའི་ཐུགས་ཀ་ནས་འོད་ཟེར་འཕྲོས་ཏེ་ཉིད་ཀྱི་ཐུགས་ཀར་ཐིམ་པའི་སྣང་བ་བྱུང་། བྱམས་སྙིང་རྗེ་བྱང་ཆུབ་ཀྱི་སེམས་སྒོམ་པ་ལྷུར་མཛད་པས་མགོན་པོ་སྤྱན་རས་གཟིགས་ནམ་འདོད་དུ་ཞལ་གཟིགས། དེའི་གནད་ཀྱིས་ལྷ་ཁུ་དབོན་གྱི་ཐང་ཀ་ཞལ་སྤྲོད་འདི་འདྲི་བའི་དབུས་སུ་བཅུ་གཅིག་ཞལ་འདྲི་བའི་སྲོལ་ཡང་དར། ལུང་རིགས་དུ་མ་ལ་དབང་བསྒྱུར་ཞིང་བཀའ་འགྱུར་རོ་འཚལ་གྱི་ལུང་བཞུགས་པས་ལྷ་ལུང་གི་དབང་ཕྱུག་ཅེས་གྲགས་ཤིང་། ལྷ་ཆེན་པོའང་ཟེར། དོན་འདི་ལ་དགོངས་ནས་རྗེ་ཐམས་ཅད་མཁྱེན་པས་ཀྱང་། དྲི་མེད་ལུང་གི་དབང་ཕྱུག་མཁས་པའི་མཆོག ། ཅེས་བསྔགས་པ་མཛད་དོ། ། མཁས་པ་ཆེན་པོ་འདིའི་གསུང་སྒྲོས་ལ་བརྟེན་པའི་འཆད་ཁ་བའི་གྲུབ་མཐའ་གཅེས་བསྡུས་ལ་ཊཱིཀྐ་ཆེན་པོ་ཞིག་དང་། བློ་སྦྱོང་གི་ཟིན་བྲིས་རྒྱས་པ་ལེགས་པ་ཅིག་ཀྱང་ཡོད་ཅེས་བཀའ་གདམས་ཆོས་འབྱུང་ལས་གསུངས་སོ། ། ལྷ་ལུང་གི་དབང་ཕྱུག་འདིས་དགེ་བའི་བཤེས་གཉེན་སེ་སྤྱིལ་བུ་བ་ཆེན་པོ་ཐོག་མར་མཇལ་བ་ནས་ནམ་གཤེགས་ཀྱི་བར་ཚུལ་བཞིན་དུ་བསྟེན། སྤྱིལ་བུ་བ་གཤེགས་ནས་ 1190 ལྕགས་ཕོ་ཁྱིའི་ལོ་སྤྱིལ་བུ་དང་འཆད་ཁའི་གདན་ས་མཛད་དེ་བཀའ་གདམས་གཞུང་པའི་ལུགས་སྲོལ་ལེགས་པར་བསྐྱང་པའི་སྒོ་ནས་ཆུ་ཕོ་འབྲུག་གི་བར་ལོ་བཞི་བཅུ་རྩ་གསུམ་གདན་ས་མཛད་ཅིང་བསྟན་འགྲོའི་དོན་རྒྱ་ཆེར་མཛད་དེ། རང་ལོ་བདུན་ཅུ་རྩ་ལྔ་པ་ 1232 ཆུ་འབྲུག་གི་ཆོ་འཕྲུལ་ཟླ་བའི་ཚེས་བཅོ་ལྔ་ལ་ཞི་བར་གཤེགས་སོ། ། མཁས་པ་ཆེན་པོ་འདི་ལ་སློབ་མ་མང་དུ་བྱུང་ཞིང་སྲས་ཀྱི་ཐུ་བོ་བཀའ་གདམས་གཞུང་པའི་མན་ངག་ཐམས་ཅད་བུམ་པ་གང་བྱོར་མངའ་བ་ནི་ལྷ་འགྲོ་བའི་མགོན་པོའོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་བདག་ཉིད་ཆེན་པོ་འདི་ལ་གསོལ་བ་འདེབས་ཤིང་། འདིའི་རྣམ་ཐར་ལྟར་རྒྱལ་བའི་གསུང་རབ་དགོངས་འགྲེལ་དང་བཅས་པ་མཐའ་དག་ཚིག་དང་དོན་གྱི་སྒོ་ནས་འཛིན་པའི་སྨོན་ལམ་གདབ་ཅིང་། གཙོ་བོར་གསུང་རབ་དགོངས་འགྲེལ་དང་བཅས་པའི་སྙིང་པོ་བྱང་ཆུབ་ལམ་གྱི་རིམ་པ་སྒོམ་པ་ལ་བློ་ནུས་ཅི་ཡོད་ཀྱིས་འབད་པར་བྱའོ། ། ། །
༈ ཁམས་གསུམ་འགྲོ་བའི་མགོན་པོ་རིན་པོ་ཆེ། ། ཞེས་བསྔགས་པ། ལྷ་འགྲོ་བའི་མགོན་པོ་ནི་ཕོ་བྲང་ཁང་དམར་དུ་ཡབ་ཇོ་འབག་དང་། ཡུམ་ལྷ་འབྲི་སྒང་པའི་ལྕམ་མོ་ལྷ་ཅིག་འཛམ་གླིང་རྒྱན་གཉིས་ཀྱི་སྲས་སུ་ 1186 མེ་ཕོ་རྟ་ལ་འཁྲུངས། སྐུ་གཞོན་ནུ་ནས་དམ་པའི་ཆོས་འཚོལ་བ་ལྷུར་ལེན་པ་ཞིག་བྱུང་སྟེ། ལོ་དྲུག་ལོན་པའི་ཚེ་ཀོང་འདུལ་བ་འཛིན་པ་ཆེན་པོ་ལ་བསྙེན་གནས་ཀྱི་སྡོམ་པ་མནོས། དེ་ནས་ཁྱིམ་གྱི་གནས་བཙོན་ར་ལྟ་བུར་མཐོང་སྟེ་ངེས་འབྱུང་ཤུགས་དྲག་པོས་བསྐུལ་ནས་ལོ་བཅུ་དྲུག་པ་ལ་འཆད་ཁར་ཁུ་བོའི་དྲུང་དུ་བྱོན་ནས་དགེ་བསྙེན་གྱི་སྡོམ་པ་མནོས། དེའི་མོད་ལ་སྐྱོར་མོ་ལུང་དུ་སྦལ་ཏི་ལ་མཁན་པོ་དང་། གྲོ་ས་པའི་དགེ་བཤེས་གནས་བརྟན་ལ་སློབ་དཔོན་ཞུས་ཏེ་རབ་ཏུ་བྱུང་ནས་མཚན་དབང་ཕྱུག་འོད་དུ་བཏགས། ཕྱིས་པོ་ཏོར་དགེ་བཤེས་གནས་བརྟན་ལ་མཁན་པོ་དང་། སུ་གུ་དོ་ནས་དགེ་བཤེས་རྒྱལ་ཚ་གདན་དྲངས་ནས་ལས་ཀྱི་སློབ་དཔོན་ཞུས། ཇོ་བཙུན་པས་གསང་སྟེ་སྟོན་པ་མཛད་དེ་བསྙེན་པར་རྫོགས་ནས་འདུལ་བའི་བསླབ་བྱ་རྣམས་ལེགས་པར་བསླབས་ཏེ་ཕྱག་ལེན་ལ་ཐེབས་པར་མཛད། དེ་ནས་རང་གི་ཁུ་བོ་ལྷ་ལུང་གི་དབང་ཕྱུག་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་སྤྱིར་ཆོས་མང་དུ་གསན་ཅིང་། ལྷག་པར་ཇོ་བོ་ཡབ་སྲས་ནས་དགེ་བའི་བཤེས་གཉེན་པོ་ཏོ་བ་ཆེན་པོ་ལ་བརྒྱུད་པའི་བཀའ་གདམས་གཞུང་པའི་མན་ངག་བྱང་ཆུབ་ལམ་གྱི་རིམ་པའི་འགོ་བཤེས་གཉེན་བསྟེན་ཚུལ་ནས་ཞི་ལྷག་གི་བར་དམིགས་སྐོར་རེ་རེ་ནས་སྙན་རྒྱུད་ཀྱི་མན་ངག་གིས་ངོ་སྤྲོད་དང་རྒྱལ་བའི་བཀའ་དང་ཤིང་རྟ་ཆེན་པོའི་གཞུང་གི་སྟེང་ནས་ངེས་པ་ཕུལ་ཕྱིན་འདྲེན་ཚུལ་རྣམས་ཡོངས་སུ་རྫོགས་པར་གསན་ཞིང་ཐུགས་ཉམས་སུ་བཞེས་ཏེ་གདེང་ཐོབ་པར་མཛད། ཁུ་བོ་ལྷ་ལུང་གི་དབང་ཕྱུག་ཞིང་གཤེགས་ནས་སྤྱིལ་བུ་དང་འཆད་ཁའི་གདན་ས་མཛད་དེ། 1233 ཆུ་མོ་སྦྲུལ་ནས། 1259 ས་མོ་ལུག་གི་བར་ལོ་ཉི་ཤུ་རྩ་བདུན་བཞུགས་ནས་བསྟན་པའི་བདག་པོ་མཛད། པོ་ཏོ་གནས་བརྟན་དང་། བཀའ་གདམས་གཞུང་པའི་བཤེས་གཉེན་རྣམས་གྲོས་མཛད་དེ་པོ་ཏོ་སྡེ་མ་ལག་དང་བཅས་པ་ཕུལ། ཀོང་བོ་ནས་རྟ་བར། བུ་ཆུ་བྱང་ལུང་གསུམ་གྱིས་ཐོག་དྲངས་པའི་སྡེ་པ་སུམཅུ་ཙམ་གྱིས་གཙུག་ལག་ཁང་གི་ལྡེ་མིག་གཏད་ནས་ཕུལ། དྭགས་པོ་ནས་བླ་མདའ། ཀན་ན་མོ་ཤོད་ཀྱིས་ཐོག་དྲངས་པའི་སྡེ་པ་མི་སྡེ་དང་བཅས་པ་ཕུལ། ཕྱིས་ཀྱང་ཡུན་རིང་པོར་དེ་རྣམས་སུ་དཀོན་གཉེར་དང་མི་དབོན་བསྐོས། གཉལ་ནས་ཟངས་པོ་ཆེ་པས་གདན་དྲངས་ཏེ་སྐུ་འབུམ་ཆེན་མོའི་རབ་གནས་མཛད། ཟངས་པོ་ཆེ་སྡེ་མ་ལག་དང་བཅས་པ་ཕུལ་ནས་གཙུག་ལག་ཁང་གི་ལྡེ་མིག་ཕུལ། རོང་རྩེ་དཀར་དུ་གདུང་ཁང་ཆེན་མོའི་རབ་གནས་ལ་སྤྱན་དྲངས་ནས་སྡེ་མ་ལག་དང་བཅས་པ་ཕུལ། དུས་ཕྱིས་ཀྱང་ཟངས་པོ་ཆེ་དང་། གྲ་སྐོར་ན་སྤྱིལ་བུ་བའི་ཆོས་རྒྱུད་འཛིན་པ་མང་དུ་བྱུང་ངོ་། ། ཨེ་ནའང་བུ་དལ་ལ་སོགས་པ་ནས་ཡོན་བདག་དང་བུ་སློབ་མང་དུ་བྱུང་། ཐུན་མོང་བ་བྱང་ཆུབ་ལམ་གྱི་རིམ་པ་དང་། ཐུན་མོང་མིན་པ་རྡོ་རྗེ་ཐེག་པའི་ལམ་ལ་སྦྱངས་ཏེ་བསྙེན་སྒྲུབ་མཛད་པས་ཡི་དམ་མང་པོའི་ཞལ་གཟིགས་ཤིང་ལྷག་པར་མི་གཡོ་བ་དངོས་སུ་གྲུབ་པས་མི་གཡོ་བའི་སྤྲུལ་པར་གྲགས་པ་བྱུང་། ཡར་ཀླུངས་སུ་གོང་པོ་རིར་སེང་གེ་སྒྲའི་ཞལ་གཟིགས། པོ་ཏོ་ན་དགེ་བཤེས་འདི་ལ་ཆོས་གསུང་བའི་ཐུབ་པའི་སྐུ་གཅིག་ཀྱང་བཞུགས། བསྟན་པའི་ནང་མཛོད་འདུལ་བ་གཙོ་བོར་མཛད་པས་སྤྱིལ་བུར་ཚུལ་བཞུགས་གཅིག་གི་སྟེང་དུ་གནས་བརྟན་བཅུ་དྲུག་དངོས་སུ་བྱོན་པས། འགྲོ་བའི་མགོན་པོ་ལ་གནས་བརྟན་བཅུ་དྲུག་གིས་བསྐོར་བའི་ཐང་སྐུ་ཡང་མང་དུ་འཕེལ། དབྱར་གནས་ཀྱི་ཚེ་གནས་བརྟན་བཅུ་དྲུག་གི་ཚུལ་ཤིང་རེ་ཡང་ལེན། མང་ཇའི་དུས་སུ་གནས་བརྟན་གསོལ་འདེབས་འཆག་མེད་མཛད། ལྷ་སར་ཇོ་བོས་ཆོས་གསུངས་ཤིང་ར་སྒྲེང་དུ་བྱོན་པའི་ཚེ་ཇོ་བོ་རྗེ་དཔལ་ལྡན་ཨ་ཏི་ཤས་ཞལ་དངོས་སུ་བསྟན་ནས་གདམས་པ་དང་རྗེས་སུ་བསྟན་པ་མང་དུ་སྩལ། བདག་ཉིད་ཆེན་པོ་འདི་ཡི་དམ་ལྷའི་བསྙེན་སྒྲུབ་མཐར་ཕྱིན་པས་འདམ་དུ་ལྷ་མོ་ཆེ་ཞིག་ལ་གདོན་ཞུགས་ནས་སུས་ཀྱང་མ་ཐོན་པ་ལ་དེར་བྱོན་ནས་བགེགས་སྐྲོད་མཛད་པས་ལྷའི་མཆན་ཁུང་གཉིས་ནས་ཕུག་རོན་རེ་འཕུར་ཞིང་། དེ་གཉིས་སྤྱང་ཀིར་སོང་བ་ཀུན་གྱིས་མཐོང་བ་བྱུང་སྟེ། དེ་ནས་རབ་གནས་ལེགས་པར་མཛད། འགྲོ་མགོན་ཆོས་རྒྱལ་འཕགས་པ་ཕྱིར་ཐེགས་དུས་དགེ་བའི་བཤེས་གཉེན་གཞན་རྣམས་ཕྱིར་ལོག ། དགེ་བའི་བཤེས་གཉེན་འགྲོ་མགོན་རིན་པོ་ཆེ་ཁྱེད་དང་འབྲལ་མི་ཕོད་པར་འདུག་ལྷན་ཅིག་ཏུ་གཤེགས་གསུངས་ནས་ཤ་པོ་སྲང་བར་ཚུན་བྱོན། མཁས་བཙུན་དང་མི་ཆེན་མང་པོའི་དོན་མཛད་ནས་རང་ལོ་དོན་བཞི་པ་ 1259 ས་མོ་ལུག་གི་ལོ་སྟོན་ཟླ་ཐ་ཆུང་གི་ཉེར་གཅིག་ལ་སྤྱིལ་བུར་གཤེགས་སོ། ། དེ་ནས་སློབ་མ་རྣམས་ཀྱིས་མཆོད་པ་རྒྱ་ཆེར་བྱས་ཏེ་སྐུ་གདུང་བཞུ་བས་ལྷ་སྐུ་ལ་སོགས་པའི་རྟེན་མང་དུ་བྱོན་ཞིང་། ཁྱད་པར་ཐུགས་ལྗགས་སྤྱན་གསུམ་བྱོན་པ་སྤྱན་སྤྱིལ་བུའི་ནང་རྟེན་གསེར་སྐུའི་ནང་དུ་བཞུགས། ཐུགས་འཆད་ཁ་བས་གདན་དྲངས་ནས་ངོ་སྒྲའི་གདུང་ཁང་ན་བཞུགས། ལྗགས་སུ་གུ་དོར་གདན་དྲངས་ནས་བྱང་ཆུབ་ཆེན་པོའི་ནང་ན་བཞུགས། དུང་གཡས་འཁྱིལ་བཞི་བྱོན་པ་ལ་གཅིག་རུག་པའི་གསེར་སྐུར་བཞུགས། གཅིག་སྤངས་པའི་རྟེན་སྐལ་ལ་གདུང་ཁང་ན་བཞུགས་ནས་ངོ་སྒྲ་ན་ཡོད། གཅིག་ད་ལྟ་སྤྱིལ་བུའི་ནང་རྟེན་ལ་བཞུགས་སོ། ། ལྷ་ལུང་གི་དབང་ཕྱུག་དང་། ལྷ་འགྲོ་བའི་མགོན་པོ་གཉིས་པོ་འདི་དང་འདི་གཉིས་ཀྱི་ཆོས་རྒྱུད་འཛིན་པ་སྤྱིལ་བུ་དང་འཆད་ཁའི་གདན་ས་བ་གསུམ་ཙམ་དང་བཅས་བཀའ་གདམས་གླེགས་བམ་ལས་གསལ་བར་ལུང་བསྟན་པ་ནི། སེ་སྤྱིལ་བ་ལུང་བསྟན་པའི་འཕྲོ་ནས། ཁྱེད་ལ་ཤཱཀྱའི་གདུང་རིགས་འཛིན་པ་ལྷའི་ལྷ་ཞིག་ནས་བཟུང་ལྔ་ལས་མི་ཉུང་བ་འབྱུང་། ཞེས་སོགས་གསལ་བར་ལུང་བསྟན་ཏོ། ། བདག་ཉིད་ཆེན་པོ་འདི་འཕྲིན་ལས་ཀྱི་ཁྱབ་བདལ་བླ་ལྷག་ཏུ་ཆེ་བ་ཞིག་བྱུང་བས་རྗེ་ཐམས་ཅད་མཁྱེན་པས། ཁམས་གསུམ་འགྲོ་བའི་མགོན་པོ་རིན་པོ་ཆེ། ། ཞེས་བསྔགས་པ་ཆེ་བར་མཛད་དོ། ། འགྲོ་མགོན་རིན་པོ་ཆེ་འདི་ལ་སློབ་མ་བསམ་གྱིས་མི་ཁྱབ་པ་ཞིག་ཡོད་ཀྱང་། སྲས་ཀྱི་ཐུ་བོ་བཀའ་གདམས་གཞུང་པའི་རྒྱུད་འཛིན་ཆེན་པོ་ནི་དགེ་བའི་བཤེས་གཉེན་བཟང་ཆེན་པའོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་ལྷ་འགྲོ་བའི་མགོན་པོ་འདི་ལ་གསོལ་བ་འདེབས་ཤིང་། འདིའི་རྣམ་ཐར་ལྟར་བཀའ་གདམས་ཀྱི་རྣམ་ཐར་གཙང་མ་བསྲེ་བསླད་མེད་པར་སྐྱོང་ཞིང་བྱང་ཆུབ་ལམ་གྱི་རིམ་པའི་ལམ་ཐུན་མོང་བ་དང་ཐུན་མོང་མིན་པ་གཉིས་ཀ་ལ་བག་ཆགས་ཅི་ཐེབས་བྱའོ། ། ། །
༈ རྣམ་དག་ཚུལ་ཁྲིམས་ངད་ལྡང་བཟང་ཆེན་པ། ། ཞེས་བསྔགས་པ། དགེ་བའི་བཤེས་གཉེན་བཟང་ཆེན་པ་ནི། གཉལ་སྨད་དུ་ངོ་མཚར་བའི་ལྟས་དང་བཅས་ཏེ་སྐུ་འཁྲུངས། ཆུང་ངུའི་དུས་ནས་ཁྱིམ་གྱི་འདུ་འཛི་ལ་མ་ཆགས་པར་རྒྱལ་བའི་བསྟན་པ་ལ་ཞུགས་ནས་དམ་པའི་ཆོས་རྣམ་པར་དག་པ་ཞིག་བྱ་བར་འདོད་པའི་འདུན་པ་ཤུགས་དྲག་པོ་ནར་མར་བྱུང་སྟེ་སུས་ཀྱང་བཟློག་མ་ཐུབ་པར་བཟང་ཆེན་གྱི་གདན་ས་པ་མཁན་པོ་བསོད་ནམས་འབྱུང་གནས་ལས་རབ་ཏུ་བྱུང་ཞིང་ཚིགས་སྔ་མ་དགེ་ཚུལ་གྱི་སྡོམ་པ་མནོས། མཚན་དར་མ་བསོད་ནམས་སུ་བཏགས་མཁན་པོ་དེ་ཉིད་ལ་བརྟེན་ཏེ་དགེ་ཚུལ་གྱི་བསླབ་བྱ་རྣམས་ལེགས་པར་བསླབས་ཤིང་ཆོས་སྤྱོད་རྣམས་ཐུགས་སུ་ཆུད་པར་མཛད། དེ་ནས་གཞུང་ལུགས་རྣམས་ལ་སྦྱངས་ཏེ་སྡེ་སྣོད་གསུམ་ལ་མཁས་པར་བསླབས། ངེས་འབྱུང་གི་བསམ་པ་རྣམ་པར་དག་པས་རྒྱུད་བསྐུལ་ཏེ་མཁན་པོ་དར་ཡེ་བ། ཁ་སྐོང་གི་དགེ་འདུན་གྲངས་ཚང་བ་དང་བཅས་པའི་དབུས་སུ་བསྙེན་པར་རྫོགས། ལྷ་འགྲོ་བའི་མགོན་པོའི་ཞབས་རྡུལ་སྤྱི་བོས་བླངས་ཏེ་འདུལ་བ་ལུང་སྡེ་བཞིའི་བརྗོད་བྱའི་དོན་ཐམས་ཅད་སློབ་དཔོན་ཡོན་ཏན་འོད་ཀྱིས་འདུལ་བའི་མདོར་གཏན་ལ་ཕབ་པ་ལྟར་བྱིན་ལེན་དང་རུང་ཆུ་འདེབས་པ་ཡན་ཆད་དགེ་སློང་གི་བསླབ་བྱ་ཕྲ་རགས་ཐམས་ཅད་ཐུགས་སུ་ཆུད་པར་མཛད་དེ་ལག་ཏུ་བདར་ནས་འདུལ་བ་ནས་བཤད་པའི་བཅས་རང་གི་ཉེས་པ་ཕྲ་མོས་ཀྱང་མ་གོས་པའི་ཚུལ་ཁྲིམས་རྣམ་པར་དག་པར་བསྲུང་བར་མཛད། ཚུལ་ཁྲིམས་ཀྱི་མཐུ་ལས་སྐྱེས་པའི་དྲི་བཟང་པོ་རྫི་ཕྱོགས་མིན་པར་འཕྲོ་བ་ཞིག་ཡོད་པར་གྲགས། དོན་འདི་ལ་དགོངས་ནས་རྗེ་ཐམས་ཅད་མཁྱེན་པས་བཤེས་གཉེན་ཆེན་པོ་འདི་ལ། རྣམ་དག་ཚུལ་ཁྲིམས་ངད་ལྡང་བཟང་ཆེན་པ། ། ཞེས་བསྔགས་སོ། ། ལྷ་འགྲོ་བའི་མགོན་པོ་ལ་རྒྱལ་བའི་བཀའ་དང་ཤིང་རྟ་ཆེན་པོའི་གཞུང་མང་པོ་གསན་ཏེ་གཞུང་ལུགས་རྣམས་ལ་མཁས་པའི་ཕུལ་དུ་ཕྱིན་པར་གྱུར་པ་ན་རང་གི་ཡོན་ཏན་གྱི་སྟོབས་ཀྱིས་དགེ་འདུན་ཚང་མས་བཟང་ཆེན་གྱི་གདན་སར་བསྐོས་ཏེ་ཆོས་གྲྭ་ཆེན་པོ་དེའི་སེང་གེའི་ཁྲི་ལ་བཞུགས་ནས་ཤིང་རྟ་ཆེན་པོའི་གཞུང་ལུགས་རྣམས་རྒྱ་ཆེར་སྤེལ་བས་དགེ་བའི་བཤེས་གཉེན་བཟང་ཆེན་པ་ཞེས་ཕྱོགས་ཀུན་ཏུ་སྙན་པར་གྲགས། དེ་ནས་ལྷ་འགྲོ་བའི་མགོན་པོ་བཟང་ཆེན་དུ་གདན་དྲངས་ནས་མཆོད་ཅིང་བསྙེན་བཀུར་ཏེ་རྒྱལ་བའི་གསུང་རབ་དགོངས་འགྲེལ་དང་བཅས་པ་མཐའ་དག་གི་དོན་གང་ཟག་གཅིག་གི་ཉམས་ལེན་གྱི་རིམ་པར་དྲིལ་བ་དཔལ་ཨ་ཏི་ཤའི་མན་ངག་བྱང་ཆུབ་ལམ་གྱི་རིམ་པའི་མྱོང་ཁྲིད་ལེགས་པར་གསན། དེ་ཡང་ཐོས་ལོ་ཙམ་ལ་མ་བཞག་པར་ཚུལ་བཞིན་དུ་ཉམས་སུ་བླངས་པས་མྱོང་བ་ལེགས་པར་ཐོན། ལྷ་འགྲོ་བའི་མགོན་པོ་ལ་བཀའ་གདམས་གཞུང་དྲུག་གསན་ཏེ་ལམ་གྱི་རིམ་པའི་དམིགས་སྐོར་མཐའ་དག་ཤིང་རྟ་ཆེན་པོའི་གཞུང་དང་སྦྱར་ཏེ་འཆད་པ་ལ་མི་འཇིགས་པའི་སྤོབས་པ་ཐོབ། ཁ་ཆེ་པཎ་ཆེན་ཤཱཀྱ་ཤྲཱི་བཟང་ཆེན་དུ་གདན་དྲངས་ཏེ་མདོ་སྔགས་ཀྱི་ཆོས་མང་དུ་གསན། སྲས་ཀྱི་ཐུ་བོ་མཚོ་སྣ་པ་ཆེན་པོ་སོགས་སྐལ་བ་དང་ལྡན་པ་མང་པོ་ལ་བྱང་ཆུབ་ལམ་གྱི་རིམ་པའི་ཁྲིད་དང་ཤིང་རྟ་ཆེན་པོའི་གཞུང་ལུགས་རྣམས་རྒྱ་ཆེར་སྤེལ་བར་མཛད་ནས་མཐར་དགུང་ལོ་བདུན་ཅུ་རྩ་ལྔ་རུ་ཕེབས་པའི་ཚེ་ཤ་དུག་ཞིག་གིས་སྐུ་བསྙུན་པ་ན་དགེ་འདུན་ཐམས་ཅད་ཀྱིས་རིམ་གྲོ་རྒྱ་ཆེར་མཛད་ཅིང་། ཆོས་སྐྱོང་མགོན་པོ་ཏྲཀྴད་ཀྱིས་ཀྱང་བྱ་རོག་ཏུ་སྤྲུལ་ནས་རྒྱ་བལ་ནས་ཨ་རུ་ར་རློན་པ་བླངས་ཏེ་ཕུལ་བ་སོགས་ཐབས་དང་རིམ་གྲོ་ཅི་བྱས་ཀྱང་མ་བཟློག་པར་ཞིང་གཤེགས། དགེ་འདུན་རྣམས་ཀྱིས་མཆོད་པ་རྒྱ་ཆེར་བྱས་ཏེ་སྤུར་གྱི་མཆོད་རྟེན་བཞེངས་པའི་དྲུང་ན་ཆོས་སྐྱོང་ཏྲཀྴད་ཀྱིས་ཕུལ་བའི་ཨ་རུ་ར་རློན་པ་དེ་བཞག ། སྤུར་གྱི་ཞལ་ནུབ་ཕྱོགས་སུ་བསྟན་པ་ཞིག་བྱུང་བས་གྲྭ་སྐོར་དུ་བཀའ་གདམས་ཀྱི་བསྟན་པ་རྒྱ་ཆེར་འཕེལ་བའི་རྟེན་འབྲེལ་དུ་བྱུང་ཞེས་གླེང་ངོ་། ། བཤེས་གཉེན་ཆེན་པོ་འདི་ལ་རྒྱུད་འཛིན་གྱི་སློབ་མ་མང་དུ་བྱུང་བ་ལས་སྲས་ཀྱི་ཐུ་བོ་ནི་མཚོ་སྣ་པ་ཆེན་པོའོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་བཤེས་གཉེན་ཆེན་པོ་འདི་ལ་གསོལ་བ་འདེབས་ཤིང་འདིའི་རྣམ་ཐར་ལྟར་ཚུལ་ཁྲིམས་རྣམ་པར་དག་པ་གཞིར་བཟུང་ནས་བྱང་ཆུབ་ལམ་གྱི་རིམ་པ་ལ་བློ་སྦྱོང་ཞིང་གཞུང་ལུགས་གདམ་པར་འཆར་བ་ཞིག་འོང་བར་བྱའོ། ། ། །
༈ འདུལ་བ་འབུམ་སྡེའི་མངའ་བདག་མཚོ་སྣ་པ། ། ཞེས་བསྔགས་པ་འདུལ་འཛིན་མཚོ་སྣ་པ་ཆེན་པོ་ནི། མོན་མཚོ་སྣ་སྟོད་དུ་སྐུ་འཁྲུངས། བྱིས་པ་སྨྲ་ཤེས་ཙམ་ནས་ཆོས་བྱེད་པའི་འདུན་པ་ཁོ་ནས་སྒོ་གསུམ་གྱི་སྤྱོད་པ་ཐམས་ཅད་ཆོས་དང་མཐུན་པར་མཛད་པ་ལས་བྱིས་པའི་ངང་ཚུལ་དུ་མི་འགྲོ་བ་ཞིག་བྱུང་ཞིང་། དགུང་ལོ་བརྒྱད་ལོན་པའི་ཚེ་བླ་མའི་དྲུང་དུ་འགྲོ་ཟེར་ནས་སུས་བཀག་ཀྱང་མ་ཐུབ་པར་དགེ་བའི་བཤེས་གཉེན་བཟང་ཆེན་པའི་ཐད་དུ་གྲོས་ཏེ་རབ་ཏུ་བྱུང་། ཚིགས་སྔ་མ་དགེ་ཚུལ་གྱི་སྡོམ་པ་མནོས་ཏེ་མཚན་ཤེས་རབ་བཟང་པོ་ཞེས་བཏགས། དུས་དེའི་ཚེ་པཎྜི་ཏ་མཁས་པའི་ཉམས་དང་ལྡན་པ་ཞིག་རང་ཤུགས་ཀྱིས་བྱུང་བས་སྡེ་སྣོད་འཛིན་པ་བློ་གྲོས་སེང་གེའི་སྐྱེ་བར་གྲགས་པ་བྱུང་ངོ་། ། དེ་ནས་དགེ་བའི་བཤེས་གཉེན་བཟང་ཆེན་པ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་བཀའ་གདམས་གཞུང་དྲུག་ལ་སོགས་པའི་ཤིང་རྟ་ཆེན་པོའི་གཞུང་རྣམས་ལ་ལེགས་པར་སྦྱངས་ཤིང་། ཁྱད་པར་དུ་འདུལ་བ་ལུང་སྡེ་བཞི་དང་། དེ་ཐམས་ཅད་ཀྱི་བརྗོད་བྱའི་དོན་གཅིག་ཏུ་བསྡུས་པ་འདུལ་བ་མདོ་རྩ་བ་ལ་སྦྱངས་ཏེ་ཚིག་དོན་མཐའ་དག་ཐུགས་སུ་ཆུད་པར་མཛད་ཅིང་། དགེ་བའི་བཤེས་གཉེན་བཟང་ཆེན་པ་ལ་མཁན་པོ་ཞུས་ཏེ་མཁན་སློབ་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས་ཏེ། འདུལ་བའི་བསླབ་བྱ་མཐའ་དག་ཆེས་ཞིབ་པར་ཐུགས་ལ་མངའ་བ་ལྟར་ཕྱག་ལེན་ལ་ཐེབས་པར་མཛད་པས་འཕགས་པ་ཉེ་བར་འཁོར་སླར་ཡང་གངས་རིའི་ཁྲོད་དུ་བྱོན་པ་ཇི་ལྟ་བར་གྱུར་ཏོ། ། དེ་ནས་དགེ་བའི་བཤེས་གཉེན་བཟང་ཆེན་པ་ལས་དུས་གསུམ་གྱི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་ལམ་པོ་ཆེ་ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ། དཔལ་ཨ་ཏི་ཤས་གངས་རིའི་ཁྲོད་འདིར་གསལ་བར་མཛད་པའི་མན་ངག་བྱང་ཆུབ་ལམ་གྱི་རིམ་པའི་ཁྲིད་བཀའ་གདམས་གཞུང་པའི་བཤད་སྲོལ་ལྟར་མཐའ་དག་པར་གསན་ནས་ཉམས་སུ་བླངས་ཏེ་གདེང་ཐོབ་པར་མཛད། བདག་ཉིད་ཆེན་པོ་འདི་ནི་རྒྱལ་བའི་དམ་ཆོས་འཛིན་པའི་སྨོན་ལམ་རླབས་པོ་ཆེའི་མཐུ་གྲུབ་པ་ཞིག་ཡིན་པས་གསུང་རབ་དགོངས་འགྲེལ་དང་བཅས་པ་ལ་ཐོས་པ་ཉིན་པར་མཛད་པར་མ་ཟད་རྨི་ལམ་སྒྱུ་མའི་རྣམ་ཐར་འབྱོངས་པས་མཚན་མོ་མནལ་ལམ་དུ་ཡང་སློབ་དཔོན་ཡོན་ཏན་འོད་ལ་འདུལ་བ་གསན། རྒྱལ་སྲས་ཞི་བ་ལྷ་ལ་སྤྱོད་འཇུག་གསན། སློབ་དཔོན་དབྱིག་གཉེན་ལ་མངོན་པར་མཛོད་གསན། སློབ་དཔོན་ཕྱོགས་ཀྱི་གླང་པོ་ལ་ཚད་མའི་མདོ་གསན། སློབ་དཔོན་ཆོས་ཀྱི་གྲགས་པ་ལ་རྣམ་འགྲེལ་སོགས་ཚད་མ་སྡེ་བདུན་གསན། སློབ་དཔོན་ཟླ་བ་གྲགས་པ་ལ་གསང་འདུས་གསན། རྗེ་བཙུན་བྱམས་པ་མགོན་པོ་ལ་མངོན་རྟོགས་རྒྱན་གསན་པར་གྲགས། དེ་ལྟར་ཐོས་པ་རྒྱ་མཚོའི་ཕ་རོལ་ཏུ་བྱོན་ཞིང་། ལྷག་པར་འདུལ་བ་ལ་མཁས་པའི་ཕུལ་དུ་གྱུར་པས་མགོན་པོ་ལ་སོགས་པའི་ཆོས་སྲུང་རྣམས་དང་། དཀར་ཕྱོགས་ཀྱི་ལྷ་མང་པོས་འདུལ་བའི་བསྟན་བཅོས་གངས་རིའི་ཁྲོད་ཀྱི་གདུལ་བྱ་རྣམས་ཀྱིས་གོ་སླ་བ་ལུང་སྡེ་བཞིའི་གནད་བསྡུས་པ་ཞིག་རྩོམས་ཤིག ། དེ་ལ་ཐོས་བསམ་བྱེད་པ་ཐམས་ཅད་ངེད་ཀྱིས་བུ་བཞིན་སྐྱོང་ངོ་ཞེས་བསྐུལ་ཞིང་། དགེ་འདུན་མང་པོས་གྲྭ་སྐོར་གྱི་གདན་སར་འབྱོན་དགོས་པར་བསྐུལ་ཏེ་ཆོས་གྲྭ་ཆེན་པོ་གྲྭ་སྐོར་གྱི་སེང་གེའི་ཁྲི་ལ་བཞུགས་ཏེ། ཤིང་རྟ་ཆེན་པོའི་གཞུང་ལུགས་རྣམས་རྒྱ་ཆེར་སྤེལ་ཞིང་ལུང་སྡེ་བཞིའི་གནད་ཀུན་བསྡུས་པ་འདུལ་བའི་མདོའི་རྣམ་བཤད་ཉི་མའི་འོད་ཟེར་ཞེས་བྱ་བ་བརྩམས་ཏེ། དཀར་ཕྱོགས་ཀྱི་ལྷ་རྣམས་ཀྱིས་ཆོས་འདི་ལ་བསྔགས་པ་བརྗོད་ཕྱིར་བརྩམས་མ་ཐག་དཀར་ཕྱོགས་ཀྱི་ལྷ་རྣམས་ཀྱིས་གླེགས་བམ་གདན་དྲངས་ཏེ་སླར་ཡང་ལན་གཉིས་པ་བརྩམས་ཞེས་གྲགས་སོ། ། གཞན་ཡང་། བདག་ཉིད་ཆེན་པོ་འདིས་ལམ་རིམ་ལ་སོགས་པའི་བསྟན་བཅོས་ཀྱང་མང་དུ་མཛད་དོ། ། བདག་ཉིད་ཆེན་པོ་འདི་ནི་དགེ་བའི་བཤེས་གཉེན་པོ་ཏོ་བའི་རྣམ་ཐར་ལྟར་སྐྱེས་བུ་གསུམ་གྱི་ལམ་གྱི་རིམ་པ་ཤིང་རྟ་ཆེན་པོའི་གཞུང་དང་སྦྱར་ཏེ་འཆད་པ་ལ་མི་འཇིགས་པའི་སྤོབས་པ་ཐོབ་ཅིང་། ཕྱི་ལྟར་དུ་གསང་སྔགས་ལ་དམ་དོག་ཆེ་བར་མཛད་ཀྱང་ནང་དུ་རང་ཉིད་སྔགས་ཀྱི་ཉམས་ལེན་ཕུལ་དུ་ཕྱིན་པ་མངའ་བས། དཔལ་གསང་བ་འདུས་པའི་རྫོགས་རིམ་གྱི་རྨི་ལམ་འཛིན་པ་ལ་མངའ་བརྙེས་པས་རྨི་ལམ་དུ་སངས་རྒྱས་ཀྱི་ཞིང་གཞན་དུ་བགྲོད་པ་དང་། གདུལ་བྱ་ལ་ཆོས་སྟོན་པ་དང་། སངས་རྒྱས་བྱང་སེམས་ལས་ཆོས་ཉན་པ་སོགས་སྤྲུལ་བསྒྱུར་སྣ་ཚོགས་ནུས་པ་ཞིག་སྟེ། དེའི་ཚུལ་ཟུར་ཙམ་ནི་སྔར་སྨོས་པ་ལྟར་རོ། ། དེ་ལྟར་བསྟན་འགྲོའི་དོན་རྒྱ་ཆེར་མཛད་ནས་དགུང་ལོ་དོན་གཉིས་བཞེས་པའི་ཚེ་དགེ་འདུན་རྣམས་ལ་བསླབ་བྱ་རྒྱས་པར་མཛད་དེ་གྲྭ་སྐོར་གྱི་གདན་ས་མོན་གྲ་པ་ལ་གཏད་ནས་ཞི་བར་གཤེགས་སོ། ། འདུལ་འཛིན་ཆེན་པོ་འདི་ལ་སློབ་མ་བསམ་གྱིས་མི་ཁྱབ་པ་ཡོད་ཀྱང་ཐུགས་སྲས་ཐུ་བོ་རང་གི་རྒྱལ་ཚབ་ཏུ་མངའ་གསོལ་བ་ནི་དགེ་བའི་བཤེས་གཉེན་མོན་གྲ་པ་ཆེན་པོའོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་འདུལ་འཛིན་ཆེན་པོ་འདི་ལ་གསོལ་བ་འདེབས་ཤིང་བསྟན་པའི་ནང་མཛོད་འདུལ་བའི་བཅས་མཚམས་དག་པ་གཞིར་བཟུང་ནས་བྱང་ཆུབ་ལམ་གྱི་རིམ་པ་ལ་བློ་སྦྱང་བར་བྱའོ། ། ། །
༈ ཆོས་མངོན་རྒྱ་མཚོའི་མཐར་སོན་མོན་གྲ་པ། ། ཞེས་བསྔགས་པ། དགེ་བའི་བཤེས་གཉེན་མོན་གྲ་པ་ནི། མོན་དང་མཚོ་སྣའི་བར་གྱི་ཡུལ་མོན་གྲོང་དུ་སྐུ་འཁྲུངས། གཞོན་ནུ་ཉིད་ནས་ཆོས་ཀྱི་བག་ཆགས་བརྟས་པས་རང་ཡུལ་ཉེ་དུ་དང་བཅས་པ་ལ་མ་ཆགས་པར་མཆིལ་མའི་ཐལ་བ་བཞིན་དོར་ཏེ་གྲྭ་སྐོར་དུ་མཁན་ཆེན་མཚོ་སྣ་པའི་ཞབས་དྲུང་དུ་ཕེབས་ནས་རབ་ཏུ་བྱུང་། མཚན་ཚུལ་ཁྲིམས་བཀྲ་ཤིས་ཞེས་བཏགས། མཁན་ཆེན་མཚོ་སྣ་པ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ། སྡེ་སྣོད་གསུམ་གྱི་དགོངས་པ་འགྲེལ་བའི་ཤིང་རྟ་ཆེན་པོའི་གཞུང་རྣམས་ལ་སྦྱངས་པས་མཁས་པའི་གོ་འཕང་ཐོབ་ཅིང་། ཁྱད་པར་མངོན་པ་སྡེ་བདུན་དགོངས་འགྲེལ་དང་བཅས་པ་ལ་མཁས་པའི་ཕུལ་དུ་ཕྱིན་པར་གྱུར་ཏེ་ཆོས་མངོན་པའི་དོན་ལ་མི་འཇིགས་པའི་སྤོབས་པ་ཐོབ། མཁན་ཆེན་མཚོ་སྣ་པ་ལས་བསྙེན་པར་རྫོགས་ཏེ་འདུལ་བའི་བསླབ་བྱ་རྣམས་གསན་ནས་ལག་ཏུ་བླངས། འདུལ་བ་འཛིན་པའི་མཆོག་ཏུ་གྱུར། དེ་ལྟར་གཞུང་ལུགས་རྒྱ་མཚོ་ལྟ་བུ་ལ་སྦྱངས་པས་མཁས་པའི་ཕུལ་དུ་ཕྱིན་པ་ན་མཚོ་སྣ་པ་ཆེན་པོ་ལ་བྱང་ཆུབ་ལམ་གྱི་རིམ་པའི་ཁྲིད་བཀའ་གདམས་གཞུང་པའི་བཤད་སྲོལ་ལྟར་གསན་ཏེ་ཉམས་ལེན་ལ་སྦྱར་བས་མྱོང་བ་ཁྱད་པར་ཅན་ཐོན་ཏེ་མཁས་བཙུན་བཟང་གསུམ་འཛོམ་པའི་བཤེས་གཉེན་ཆེན་པོར་གྱུར་པ་ན་མཚོ་སྣ་པ་ཆེན་པོས་རང་གི་རྒྱ་ཚབ་བསྟན་འཛིན་མཆོག་ཏུ་འགྱུར་བར་གཟིགས་ནས་བསྔགས་འོས་སུ་མཛད་ཅིང་། གྲྭ་སྐོར་གྱི་གདན་ས་བགྱི་དགོས་ཞེས་ཡང་ཡང་གསུངས་ཀྱང་བདག་ཉིད་ཆེན་པོ་འདི་བྱང་ཆུབ་ལམ་རིམ་ལ་མྱོང་བ་ཕུལ་ཕྱིན་ཐོན་པས་ཚངས་པ་དང་བརྒྱ་བྱིན་གྱི་དཔལ་ལའང་མི་སྨོན་ན་ཚེ་འདིའི་རྙེད་བཀུར་སྙན་གྲགས་ལ་སྨོན་པ་མེད་པ་ལྟ་ཅི་སྨོས་པར་གྱུར་ནས་བདག་ལྟ་བུས་བླ་མའི་གདན་ས་སྐྱོང་བར་ག་ལ་ནུས་ཞེས་མཛད་དུ་མ་བཞེད། མཐར་མཁན་ཆེན་མཚོ་སྣ་པ་གཤེགས་ཁར་དགེ་འདུན་རྣམས་ལ་ཞལ་གདམས་རྒྱ་ཆེར་མཛད་ནས་གདན་ས་འདི་མོན་གྲ་པ་ལ་གཏོད་གསུངས་ནས་ཞི་བར་གཤེགས་པ་ན་བླ་མའི་གསུང་གི་ཐ་མ་ཞལ་ཆེམས་ལྟ་བུར་སོང་གཤིས་མཛད་ཐབས་མ་བྱུང་བར་གྲྭ་སྐོར་གྱི་གདན་སར་ཕེབས་ནས་གཙོ་བོར་འདུལ་བ་དང་མངོན་པ་རྒྱ་ཆེར་བཤད་ཅིང་། ཕར་ཚད་དབུ་མ་རྣམས་ཀྱང་སྔར་སྲོལ་གང་ཡོད་བཤད་ནས་ཤིང་རྟ་ཆེན་པོའི་གཞུང་ལུགས་ཤིན་ཏུ་དར་བར་མཛད། སྐལ་བ་དང་ལྡན་པ་དག་ལ་བྱང་ཆུབ་ལམ་གྱི་རིམ་པའི་ཁྲིད་བཀའ་གདམས་གཞུང་པའི་བཤད་སྲོལ་ལྟར་ཞིབ་ཏུ་བཤད་པས་ཆོས་ཀྱི་བདུད་རྩིས་ཚིམས་པ་མང་དུ་བྱུང་ཞིང་། ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་ལམ་རིམ་གྱི་ཁྲིད་ཡིག་ཀྱང་མཛད་དོ། ། མཁན་ཆེན་མོན་གྲ་པ་འདི་ལ་མཁས་ཤིང་གྲུབ་པའི་སློབ་མ་གྲུབ་ཆེན་ལས་ཀྱི་རྡོ་རྗེ་དང་། མཁན་ཆེན་ཆོས་སྐྱབས་བཟང་པོ་སོགས་བསྟན་པ་ལ་བྱ་བ་རྒྱ་ཆེར་བགྱིད་པ་མང་དུ་བྱུང་ངོ་། ། དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་མོན་གྲ་པ་ཆེན་པོ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་ཤིང་རྟ་ཆེན་པོའི་གཞུང་ལུགས་རྣམས་ལ་སྦྱངས་ནས་གཞུང་ལུགས་གདམས་པར་འཆར་བར་བྱེད་པ་དང་། གཞུང་ལུགས་གདམས་པར་ཤར་བའི་མན་ངག ། བྱང་ཆུབ་ལམ་གྱི་རིམ་པའི་ཉམས་ལེན་ལ་འབད་ནས་རང་གི་རྒྱུད་བཏུལ་ཏེ་གདུལ་བྱ་གཞན་ལའང་ཕན་ངེས་པ་ཞིག་བྱའོ། ། ། །
༈ ཟབ་ཅིང་རྒྱ་ཆེའི་ཆོས༷་ལ་མངའ་བརྙེས་པས། ། སྐལ་ལྡན་འགྲོ་བ་ཀུན་གྱི་སྐྱབ༷ས་སུ་གྱུར། ། འཕྲིན་ལས་བཟ༷ང་པོ༷ས་བསྟན་པ་རྒྱས་མཛད་པ། ། དཔལ་ལྡན་བླ་མའི་ཞབས་ལ་གསོལ་བ་འདེབས། ། ཞེས་བསྔགས་པ་མཁན་ཆེན་ཆོས་སྐྱབས་བཟང་པོ་ནི་གཉལ་དུ་རིགས་རུས་ཕུན་སུམ་ཚོགས་པ་ཞིག་ཏུ་སྐུ་འཁྲུངས། ཆུང་ངུའི་དུས་སུ་ཡབ་ཡུམ་གཉིས་ཀྱིས་བསྣམས་ནས་མཁན་ཆེན་མཚོ་སྣ་པ་ཆོས་གྲྭར་ཕེབས་པ་དང་ཐུག་སྟེ་མཇལ་བའི་ཚེ། མཚོ་སྣ་པའི་སྐུ་ཆོས་རླུང་གིས་བསྐྱོད་པ་བྱིས་པ་ཆུང་ངུ་འདིའི་སྟེང་དུ་གཡོགས་པ་ལྟར་བཀབ་པར་གྱུར་པས་མཁན་ཆེན་མཚོ་སྣ་པ་བཞད་ཅིང་ཆེར་དགྱེས་ནས་བྱིས་པ་འདི་ངའི་ཆོས་གོས་ཀྱིས་བསྐྱབས་པ་ལྟར་འདུག་པས་འདི་ང་ལ་བྱིན་ཅིག་ཅེས་ཡབ་ཡུམ་གཉིས་ལ་གསུངས་པས་ཡབ་ཡུམ་གཉིས་ཀྱིས་ཀྱང་མཚོ་སྣ་པའི་བཀའ་ལྡོག་མ་ནུས་པར་ཕུལ་བས་མཁན་ཆེན་མཚོ་སྣ་པས་བཞེས་ཏེ་ཆོས་སྐྱབས་བཟང་པོ་ཞེས་མིང་བཏགས། ལོ་བདུན་ལོན་པ་ན་རབ་ཏུ་བྱུང་ཞིང་སྡེ་སྣོད་གསུམ་ལེགས་པར་བསླབས། ལོ་ལོན་པ་ན་བསྙེན་པར་རྫོགས་པར་མཛད་དེ་སྤྱན་གྱི་འབྲས་བུ་ལྟར་བསྐྱངས། རང་ཉིད་ལ་ཡོད་པའི་ལུང་དང་མན་ངག་ཐམས་ཅད་གནང་ཞིང་། ལྷག་པར་བཀའ་གདམས་གཞུང་པའི་བཤད་སྲོལ་ལྟར་གྱི་བྱང་ཆུབ་ལམ་གྱི་རིམ་པའི་མན་ངག་མ་ལུས་པར་གནང་། མཁན་ཆེན་མཚོ་སྣ་པ་ཞིང་གཤེགས་ནས་དགེ་བའི་བཤེས་གཉེན་མོན་གྲྭ་པ་ཚུལ་བཞིན་དུ་བསྟེན་ནས་མོན་གྲྭ་པ་ལ་མངའ་བའི་བཀའ་དང་གདམས་ངག་མང་པོ་གསན་ཞིང་ལྷག་པར་བྱང་ཆུབ་ལམ་གྱི་རིམ་པའི་ཁྲིད་ཡང་དང་ཡང་དུ་གསན་ཏེ། ཉམས་སུ་བཞེས་པས་བྱང་ཆུབ་ལམ་གྱི་རིམ་པའི་མན་ངག་བཀའ་གདམས་གཞུང་པའི་བཤད་སྲོལ་ལྟར་རང་གི་རྒྱུད་ལ་སྐོར་ནས་ཉམས་སུ་ལེན་པ་དང་། གཞན་ལ་སྟོན་པ་ལ་མི་འཇིགས་པའི་སྤོབས་པ་ཐོབ་པར་གྱུར་ཏོ། ། བདག་ཉིད་ཆེན་པོ་འདི་ནི་ཐོས་པ་རྒྱ་མཚོའི་ཕ་རོལ་ཏུ་སོན་ཞིང་། ལམ་གྱི་རྟོགས་པ་མཐོན་པོར་བྱོན་ཏེ་ཕྱིར་མི་ལྡོག་པའི་རྟགས་ཐོབ་པ་ཞིག་ཡིན་ཞེས་གྲགས་སོ། ། མཁན་ཆེན་ཆོས་སྐྱབས་བཟང་པོ་འདིས་དགེ་བའི་བཤེས་གཉེན་མཚོ་སྣ་པ་དང་མོན་གྲ་པ་གཉིས་ཀ་ལ་གཏུགས་ཏེ་བཀའ་གདམས་གཞུང་པའི་བཤད་སྲོལ་ལྟར་གྱི་སྐྱེས་བུ་གསུམ་གྱི་ལམ་གྱི་རིམ་པ་ཡང་དང་ཡང་དུ་གསན་ཏེ་སྦྱངས་པ་མཐར་ཕྱིན་མཛད་པ་ནི། རྗེ་བཙུན་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་ཁོང་པ་ལ་བཀའ་གདམས་གཞུང་པའི་བཤད་སྲོལ་ལྟར་གྱི་བྱང་ཆུབ་ལམ་གྱི་རིམ་པའི་ཁྲིད་གསན་པར་འགྱུར་བ་འདི་ལ་དགོངས་པར་མངོན་ཞིང་། རྗེ་ཐམས་ཅད་མཁྱེན་པས་བཀའ་གདམས་གཞུང་པའི་བཤད་སྲོལ་ལྟར་གྱི་ལམ་རིམ་གྱི་ཁྲིད་གསན་ནས་སྐལ་བ་དང་ལྡན་པ་བགྲང་བ་ལས་འདས་པ་ལ་གནང་ནས་ས་ཆེན་པོའི་ཁྱོན་འདི་ཐམས་ཅད་ཆོས་འདིའི་འཕྲིན་ལས་ཀྱིས་ཁྱབ་པ་འདི་བྱུང་ངོ་། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་ཕྱིར་མི་ལྡོག་པའི་སེམས་དཔའ་ཆེན་པོ་མཁན་ཆེན་ཆོས་སྐྱབས་བཟང་པོ་ལ་གསོལ་བ་འདེབས་ཤིང་། བདག་ཉིད་ཆེན་པོ་འདིའི་རྣམ་ཐར་ལྟར་རྒྱལ་བའི་དཀའ་དང་གཞུང་ལུགས་མ་ལུས་འདུ་བའི་ཆོས་ཀྱི་རྒྱ་མཚོ་ཆེན་པོ་བྱང་ཆུབ་ལམ་གྱི་རིམ་པ་ལ་སློབ་པའི་ཚེ་བཀླགས་ལུང་ཙམ་རེ་ཐོབ་པ་དང་། དམིགས་སྐོར་རེ་གཉིས་གོ་བས་ཚིམ་པར་མི་བྱ་བར་དགེ་བའི་བཤེས་གཉེན་མཁས་པ་ལ་གཏུགས་ཏེ་ཡང་དང་ཡང་དུ་མཉན་ནས་ངེས་པ་གཏིང་ཚུགས་པ་བསྐྱེད་པ་དང་། ཇི་ཙམ་ཐོས་པ་དེ་ཙམ་དུ་རྒྱུད་ལ་སྦྱར་ནས་ཉམས་སུ་ལེན་པ་ལ་འབད་པར་བྱའོ། ། ། །
༈ གྲུབ་པའི་དབང་ཕྱུག་ཆེན་པོ་ཚུལ་ཁྲིམས་འབར་སོགས་བཀའ་གདམས་
གདམས་ངག་པའི་བླ་མ་རྣམས་ཀྱི་རྣམ་ཐར།
༈ དགེ་བཤེས་སྟོན་པ་ནས་དགེ་བཤེས་པོ་ཏོ་བ། དེ་ནས་གྲྭ་སྐོར་མཁན་ཆེན་ཆོས་སྐྱབས་བཟང་པོའི་བར་གྱི་བརྒྱུད་རིམ་དེ་ནི་རྗེ་ཐམས་ཅད་མཁྱེན་པས་བཀའ་གདམས་གཞུང་པའི་ལམ་རིམ་གསན་བརྒྱུད་ཡིན་ལ། བཀའ་གདམས་གདམས་ངག་པར་གྲགས་པ་དགེ་བཤེས་སྟོན་པ་ནས་སྤྱན་སྔ་ཚུལ་ཁྲིམས་འབར་ལ་བརྒྱུད་པའི་བླ་མ་རྣམས་ཀྱི་རྣམ་ཐར་ནི། གྲུབ་པའི་དབང་ཕྱུག་ཆེན་པོ་ཚུལ་ཁྲིམས་འབར། ། ཞེས་བསྔགས་པ། དགེ་བཤེས་སྤྱན་སྔ་བ་ནི་ཉན་གྱི་སྣང་ར་སྒང་དུ་ཡབ་ཤཱཀྱ་རྡོ་རྗེ་དང་། ཡུམ་ལི་མོ་ཡེ་ཤེས་སྒྲོན་གཉིས་ཀྱི་སྲས་སུ་ 1033 ཆུ་མོ་བྱའི་ལོ་ལ་འཁྲུངས། མཚན་སྟག་ཚབ་འབར་ཞེས་བཏགས། སྔོན་ཡུན་རིང་པོ་ནས་ལམ་ལ་སྦྱངས་པའི་བག་ཆགས་བརྟས་པས་གཞན་གྱིས་བསྐུལ་བ་ལ་མ་བལྟོས་པར་སྐྱེས་བུ་གསུམ་གའི་ལམ་གྱི་གནད་རྣམས་ལ་བག་ཆགས་སད་དེ་བྱིས་པའི་དུས་སུ་སྤྱིར་འདུས་བྱས་འདི་ཐམས་ཅད་ཅད་སྡོད་པའི་མཐུ་མེད་པར་འཇིག་པ་དང་། ཁྱད་པར་རང་གི་ལུས་མྱུར་དུ་འཇིག་པའི་ངང་ཚུལ་དྲན་ནས་རྒྱུན་དུ་བཤུམ་པ་ཞིག་བྱུང་བས་ཡུམ་དེས་ཁྱོད་འཇིགས་མི་དགོས་མྱུར་དུ་ཤི་འགྲོ་སྙམ་པའི་བློ་དེ་སླར་བརྗེད་འགྲོ་ཟེར་སྤྱན་སྔའི་ཡུམ་དེ་ནི་རང་བཞིན་གྱི་རྣལ་འབྱོར་མ་ཞིག་ཡིན་པར་གྲགས་པས་དེང་སང་རང་ཅག་ཐ་མལ་པ་རྣམས་ལ་བླ་མ་རེའི་བཀའ་དྲིན་ལས་འཆི་བ་དྲན་པའི་བློ་རིབ་ཙམ་རེ་བྱུང་ཡང་སྣང་ཤས་མཐུ་ཆེ་བས་ཆུ་ལ་དབྱུག་གུས་བྲིས་པ་ལྟར་དེ་མ་ཐག་བརྗེད་ནས་རྟག་འཛིན་གྱི་དབང་དུ་འགྲོ་བའི་ངང་ཚུལ་དེ་ཡུམ་དེས་བརྗོད་པའོ། ། དེ་དུས་ཡུམ་གྱིས་པང་དུ་ཁྱེར་ནས་སློབ་དཔོན་གྲོང་འདུལ་བ་ཅིག་ལ་ཕུང་པོ་ལྔའི་རབ་བྱེད་གསན་པས། ཕུང་པོ་འདི་ལྔར་འབྱེད་ཚོད་ཀྱིས་མཐར་སྟོང་པ་ཉིད་དུ་འདུག་སྙམ་སྟེ་བདག་མེད་པའི་ལྟ་བ་རང་འཁྲུངས་སུ་བྱུང་། གཞན་ཡང་བྱིས་པའི་གནས་སྐབས་དེར་ལྷག་པའི་ལྷ་མང་པོའི་སྣང་བ་ཡང་ཡང་འཆར་བ་ཞིག་བྱུང་། ལོ་བཅུ་གཉིས་ལོན་ཙ་ན་རྣལ་འབྱོར་མ་གོང་མོ་སྒང་བ་བྱ་བ་བྱོན་ནས་གདམས་ངག་ཅིག་གསུངས་པས་མྱོང་བ་ཁྱད་པར་ཅན་སྐྱེས་པ་ཞིག་བྱུང་སྟེ། དེ་ནི་རང་བཞིན་གྱི་རྣལ་འབྱོར་མས་བྱིན་གྱིས་བརླབས་པ་ཡིན་པར་གསུངས། ཡང་ལན་ཅིག་ཙ་ན་ར་ལུག་འཚོར་རི་ཞིག་གི་རྩེར་བྱོན་པས། ད་སྟེ་ལོ་བརྒྱ་ཐམ་པ་ན་འདི་ནས་མཐོང་བའི་མི་ཐམས་ཅད་འཆི་བ་ཡིན་དགོངས་ཐུགས་ཕྱུང་བའི་མགུར་གསུངས་པ་རི་ཞོལ་གྱི་བཙས་མི་བ་རྣམས་ལ་སྙན་པར་བྱུང་ནས། འོར་ཆེ་སྟག་ཚབ་འབར་སྙན་རང་སྙན་ད་དུང་ཞིག་ལོངས་དང་ཟེར་བས། ང་མ་དགའ་ཆེས་ནས་བླངས་པ་ལ་ཁོང་ད་དུང་ལོངས་ཟེར་ཨང་གསུང་། དེ་ནས་ 1050 དགུང་ལོ་བཅོ་བརྒྱད་པ་ལ་སྟོད་ལུང་ཚ་ཐོག་དགོན་པར་མལ་ཤེས་རབ་སེམས་དཔའི་དྲུང་དུ་རབ་ཏུ་བྱུང་། མཚན་ཚུལ་ཁྲིམས་འབར་དུ་བཏགས། དེར་ཡུམ་གྱི་རྨི་ལམ་དུ་དུང་དཀར་ཞིག་བུས་པ་འཛམ་བུ་གླིང་པ་ཐམས་ཅད་ཀྱིས་ཐོས་པ་ཞིག་བྱུང་བས། ངའི་བུ་འདི་ལ་རབ་ཏུ་བྱུང་ནས་གྲགས་པ་ཡང་ཆེ་བ་ཅིག་འོང་བར་འདུག་ཟེར། སློབ་གཉེར་མཛད་དུས་ཚ་ཐོག་དགོན་པར་བྱོན་པའི་ཞོར་ལ། ཇོ་བོ་སྙེའི་ན་མོ་ཆེར་བཞུགས་པ་དང་མཇལ། སེམས་བསྐྱེད་གསུང་བ་གསན། དེ་དུས་ཇོ་བོས་འདི་པའི་སྤྱི་བོར་ཕྱག་བཞག ། སཾ་སྐྲྀ་ཏའི་སྐད་དུ་བཀྲ་ཤིས་ཀྱི་ཚིགས་བཅད་མང་པོ་མཛད། གསེར་གླིང་པའི་བུམ་པ་པདྨའི་ཆུཾ་ཅན་གནང་། ངའི་ཆོས་རྒྱུད་འཛིན་པ་ཅིག་འོང་གསུང་། དེ་ནས་ལན་ཚ་རབ་དང་། རུག་པར་སྡེ་སྣོད་ཀྱི་གསན་སྦྱོང་མང་དུ་མཛད། རྒྱ་གར་རྡོ་རྗེ་གདན་ཆོས་ཀྱི་འབྱུང་ཁུངས་ཡིན་པས་དེར་འབྱོན་དགོངས་ཏེ་སྐད་དོད་དང་རྒྱ་ཡིག་མང་དུ་བསླབས། དེའི་དུས་སུ་མདོ་སྡེ་གཟིགས་པས་ཆོས་ཐོག་ཏུ་ཧྲིལ་ཧྲིལ་འགྲོ་བར་བྱུང་བས་སོ་སོ་སྐྱེ་བོའི་ས་ནས་སངས་རྒྱས་ཀྱི་སར་འགྲོ་བ་ལ་བླ་མ་མི་དགོས་པར་སྣང་སྙམ་པ་བྱུང་། ཕྱིས་སུ་བསམས་ཙ་ན་སྔར་གྱི་དེས་གར་ཡང་མི་ཕྱིན་པར་འདུག་གསུང་། དེའི་དུས་སུ་ཡུམ་རུག་པར་བྱོན་ནས་རུག་པའི་བན་དེ་རྣམས་ལ་འདི་ནི་དགྲས་བདས་པ་ཡིན། འདི་འདྲེས་བདས་པ་ཡིན། སྙིང་ནས་ཆོས་བྱ་བསམ་ནས་རབ་ཏུ་བྱུང་བ་ནི་ཁྱོད་དང་སློབ་དཔོན་ཞང་བཙུན་གཉིས་ཡིན་ཁྱོད་ཆོས་གཤའ་མ་ཞིག་བྱེད་ན་ར་སྒྲེང་དུ་དགེ་བཤེས་སྟོན་པའི་སྤྱན་སྔར་འགྲོ་གསུངས་ནས་ཡུམ་གྱིས་ཁྲིད་དེ་ 1057 དགུང་ལོ་ཉེར་ལྔ་པ་ལ་དགེ་བཤེས་སྟོན་པ་དང་མཇལ། སྤྱན་སྔའི་ཞལ་ནས། ངའི་མ་དེ་རང་བཞིན་གྱི་རྣལ་འབྱོར་མ་ཡིན་པས་འདིར་བསྐྱལ་བ་ཡིན་གསུང་། དེའི་ཚེ་དགེ་བཤེས་སྟོན་པ་ལ་ལམ་གྱི་འགྲོ་ཆོས་ཞུས་ནས་རྒྱ་གར་དུ་རྣལ་འབྱོར་པ་ཅིག་ལ་གཏུག་སྙམ་དུ་དགོངས་པ་ལ་དགེ་བཤེས་སྟོན་པའི་ཞལ་ནས། ཁྱོད་རྒྱ་གར་དུ་མ་འགྲོ་ངས་ཐུགས་ལ་གདགས་ཀྱི་གསུང་བས། དགེ་བཤེས་སྟོན་པས་ཐུགས་ལ་འདོགས་ན་རྒྱ་གར་དུ་འགྲོ་དོན་མི་འདུག་དགོངས་པ་བྱུང་ནས་བཤེས་གཉེན་སྟོན་པ་རིན་པོ་ཆེ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་དུས་གསུམ་གྱི་སངས་རྒྱས་ཐམས་ཅད་གང་ནས་གཤེགས་པའི་ལམ་པོ་ཆེ་བཀའ་དང་དགོངས་འགྲེལ་ཐམས་ཅད་ཀྱི་སྙིང་པོའི་དོན་བྱང་ཆུབ་ལམ་གྱི་རིམ་པའི་མྱོང་ཁྲིད་གསན་པས་ལམ་གྱི་རིམ་པའི་དམིགས་སྐོར་རྣམས་བསམ་དུ་བཏུབ་པར་བྱུང་བ་ལ། དགེ་བཤེས་སྟོན་པའི་ཞལ་ནས། དུས་ཚོད་འདི་ཙ་ན་ཤོག་གསུང་བས་སྤྱན་སྔར་ཕྱིན་དུས་གྲོག་པོའི་གསེབ་ལ་ཉི་མ་བྱུང་བ་དེ། སྤྱན་སྔའི་ན་བཟའ་ལ་ཤར་བས་བཀྲ་ཤིས་རྫས་བརྒྱད་ལ་སོགས་པའི་གཟུགས་མང་པོ་བྱུང་བས་རྟེན་འབྲེལ་ཤིན་ཏུ་བཟང་གསུངས་ནས་མཉེས་པ་ཡིན། དགེ་བཤེས་སྟོན་པ་དེ་ཕར་ཕྱིན་གསུང་བའི་དུས་སུ་སྐུ་མཆེད་གསུམ་ཀ་བ་ལི་གཅིག་ལ་གཟིགས་པ་ཡིན་པར་གདའ། དགེ་བཤེས་སྟོན་པ་གྲུབ་མཐའ་ཞིག་གསུང་བ་གསན་དུ་བྱོན་པས། སྟོན་པའི་ཞལ་ནས། ང་ཁྱོད་ལ་སྒོམ་ཆེན་ཞིག་རེ་བ་ཡིན། ཁྱོད་རང་ནང་དུ་སྒོམས་ཤིག་གསུང་བས། སྤྱན་སྔས་ཕྱག་མཛད་ནས་བྱོན་པ་དང་། སྟོན་པའི་ཞལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་བྱ་བ་དེ་ཁོ་འདྲ་བ་ཞིག་ལ་ཟེར་བ་ཡིན་གསུངས། ཡོངས་རྫོགས་རྣལ་འབྱོར་པའི་ཞལ་ནས། དགེ་བཤེས་སྟོན་པས་ཐུགས་ལ་འདོགས་པར་སྣང་བས། ཁྱེད་རང་གསང་སྔགས་ཀྱི་ཆོས་ཞུས་ན་འོང་གསུང་བས། སྐུ་མཆེད་གཞན་གཉིས་ཀྱི་དྲོའི་དུ་བ་རེང་བྱུང་དུས་སྤྱན་སྔས་དྲོ་ཐོན་པར་བྱས། དེར་དགེ་བཤེས་སྟོན་པ་དྲོའི་དུས་བཞེས་སྐྱོ་སུན་རེ་གསོལ་བས། དེ་དུས་སུ་གདམས་ངག་ཞུས་པས་ཐེག་པ་ཆེན་པོ་གསང་སྔགས་ཀྱི་གདམས་པ་མ་ལུས་པ་གནང་བ་ཡིན། སྤྱན་སྔའི་ཞལ་ནས། ཡོངས་རྫོགས་རྣལ་འབྱོར་པ་འདི་ང་ལ་བཀའ་དྲིན་ཆེ་གསུང་། ཡང་དགེ་བཤེས་སྟོན་པའི་ཞལ་ནས། ཇོ་བོ་པ་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་དེ། འདོད་ཆགས་ཀྱི་གཉེན་པོར་གསུངས་པ་རྣམས་ཀྱིས་ཞེ་སྡང་འཇོམས་མི་ནུས། ཞེ་སྡང་གི་གཉེན་པོར་གསུངས་པ་རྣམས་ཀྱིས་འདོད་ཆགས་འཇོམས་མི་ནུས་པས་ཉོན་མོངས་སོ་སོའི་གཉེན་པོ་སོ་སོར་བསྟེན་དགོས་པ་ཡིན་ཉོན་མོངས་ཐམས་ཅད་ཀྱི་གཉེན་པོ་བྱེད་ནུས་པའི་ཆོས་ནི་རྟེན་ཅིང་འབྲེལ་པར་འབྱུང་བ་ཟབ་མོ་སྟོང་པ་ཉིད་སྒོམ་པ་འདི་ཡིན་གསུངས་ནས་འཕགས་པ་ཀླུ་སྒྲུབ་ཀྱིས་རྒྱལ་བའི་དགོངས་པ་བཀྲལ་བའི་མན་ངག་དབུ་མའི་གདམས་ངག་རྣམས་ལེགས་པར་གནང་། དེ་ལྟར་དང་པོར་དགེ་བཤེས་སྟོན་པ་དང་མཇལ་བ་ནས་ནམ་གཤེགས་ཀྱི་བར་འབྲལ་མེད་དུ་ལོ་བརྒྱད་བསྟེན། དེ་ནས་དགེ་བཤེས་སྟོན་པ་སྐུ་གཤེགས་པས་ཐུགས་ངལ་ཆེན་པོ་བྱུང་བ་ན། ནུབ་གཅིག་རྨི་ལམ་ན་ཉི་མ་ཞིག་ལུས་ལ་ཤར་བ་རྨིས། དེ་དགེ་བཤེས་སྟོན་པའི་ཡོན་ཏན་མ་ལུས་པ་རང་གིས་ཐོབ་པ་ཡིན་ཨང་སྙམ་པ་བྱུང་། དེ་ནས་ཐུགས་དགོངས་ལ་རྣལ་འབྱོར་པ་གོང་འོག་འདི་རྣམས་ལ་ཇོ་བོའི་ཡོན་ཏན་མ་ལུས་པ་མངའ་བ་ཡིན་སྙམ་ནས་བསྟེན་ཏེ་རྣལ་འབྱོར་པ་ཆེན་པོ་དེ་བདེན་པ་གཉིས་དང་ལས་ཁ་ཚར་ལ་དགེ་བཤེས་སྟོན་པ་བས་ཀྱང་ཅི་ཞིབ་ཙམ་དུ་བྱུང་། དགོན་པ་བ་དེ་སྒོམ་སྐྱོན་སེལ་བ་དང་ཆོས་ཟབ་མོ་ཐམས་ཅད་ལ་དགེ་བཤེས་སྟོན་པ་བས་ཀྱང་ཅི་ཞིབ་ཙམ་དུ་བྱུང་། རྣལ་འབྱོར་པ་ཤེས་རབ་རྡོ་རྗེ་དེ་གྲུབ་མཐའ་ལ་དགེ་བཤེས་སྟོན་པ་བས་ཀྱང་ཅི་ཞིབ་ཙམ་དུ་བྱུང་། དེ་ནས་སྤྱན་སྔ་བས་ར་སྒྲེང་དུ་ཇོ་བོའི་སློབ་མ་རྣལ་འབྱོར་པ་ཆེན་པོ་དང་། དགེ་བཤེས་དགོན་པ་བ་སོགས་བསྟེན་ཅིང་ཚེ་འདིའི་བྱ་བ་ཐམས་ཅད་བློས་བཏང་སྟེ་བྱང་ཆུབ་ལམ་གྱི་རིམ་པ་སྒོམ་པ་ལ་དཀའ་སྤྱད་དྲག་པོའི་སྒོ་ནས་བརྩོན་པ་ལྷུར་མཛད། དེ་དུས་སྤྱན་སྔ་བ་འཚོ་ཆས་ཤིན་ཏུ་བཀྲེན་པས་ན་བཟའ་རྣམས་ཧྲལ་ཧྲུལ་དུ་གྱུར་ཏེ་མཐང་གོས་ལ་ཀོ་བའི་ལྷན་པ་བྱས་པས་སྤྱན་སྔ་ཀོ་ཤམ་པ་ཞེས་གྲགས་པ་བྱུང་། ངེས་འབྱུང་ཤུགས་དྲག་པོས་རྒྱུད་བསྐུལ་ནས་མཚན་མོ་མནལ་ཡེ་མེད་པར་ལམ་རིམ་སྒོམ་པ་ལ་ཁོར་ཡུག་ཏུ་འབད་པས་རྣལ་འབྱོར་པ་ཆེན་པོས་བག་རེ་ཆོགས་དེ་ཙམ་བརྩོན་པ་ཆེས་ན་ཁམས་ལོག་ཉེན་ཡོད་གསུང་བ་ལ། སྤྱན་སྔས་དེ་ལྟ་ལགས་ཏེ། དལ་འབྱོར་འདི་རྙེད་པར་དཀའ་བས་ཞེས་གསུངས་སྤྱན་སྔ་བ་ཐུགས་དམ་ལ་འཇུག་རེས་ཀྱིས། གང་ཚེ་རང་དབང་འཇུག་ཅིང་མཐུན་གནས་པ། ། གལ་ཏེ་འདི་བདག་འཛིན་པར་མི་བྱེད་ན། ། གཡང་སར་ལྷུང་བས་གཞན་དབང་འཇུག་འགྱུར་བ། ། དེ་ལས་ཕྱིས་ནས་གང་གིས་སློང་བར་འགྱུར། ། ཞེས་འཇུག་པ་ནས་གསུངས་པ་དེ་ལན་རེ་བཏོན་ཏེ་དལ་འབྱོར་རྙེད་དཀས་རྒྱུད་བསྐུལ་ཏེ་འཇུག ། ཡང་སྤྱན་སྔས་བྱ་ཡུལ་པ་ལ་དལ་བ་འབྱོར་པ་མིའི་ལུས་ཐོབ་པ་དྲན་ནམ་ཞེས་ཡང་ཡང་གསུང་བར་མཛད་དེ། དལ་འབྱོར་དོན་ཆེ་རྙེད་དཀའ་དང་ནམ་འཆི་ཆ་མེད་དྲན་པས་རྒྱུད་བསྐུལ་ཏེ་སྐད་ཅིག་ཀྱང་ཡེངས་ལོང་མེད་པར་ལམ་རིམ་སྒོམ་པ་ལ་བརྩོན་པ་ཆུ་བོའི་རྒྱུན་བཞིན་མཛད་དོ། ། དེ་ལྟར་སྒྲུབ་པ་དར་དྲག་ལ་རྒྱུན་རིང་བ་མཛད་པས་ལམ་གྱི་རིམ་པ་ལ་མྱོང་བ་ཕུལ་ཕྱིན་ཐོན་ཞིང་། མེ་ལོང་གཡའ་དག་པ་ལ་གཟུགས་བརྙན་འཆར་བ་ཇི་བཞིན་དུ་སངས་རྒྱས་དང་བྱང་སེམས་མང་པོས་ཞལ་བསྟན་ནས་དངོས་སུ་བྱིན་གྱིས་བརླབས། ནངས་ཅིག་བཅོམ་ལྡན་འདས་གར་གྱི་དབང་ཕྱུག་ཕྱག་ཏུ་བུམ་པ་བསྣམས་པ་ཅིག་བྱོན་ནས་སྐུ་ཁྲུས་གསོལ་བས་སྐུ་ལུས་ཀྱི་མི་གཙང་བ་ཐམས་ཅད་སངས་ཀྱིས་དག་པའི་སྣང་བ་བྱུང་། ལན་ཅིག་ཁོང་རང་ཇོ་བོ་མི་གཡོ་བ་ཞྭ་ཐེབ་ཆུང་ཆུང་གསོལ་བ་གཅིག་ཏུ་གཟིགས་སོ། ། སྤྱན་སྔ་བ་འདི་ནི་རིག་གནས་མཐའ་དག་ལ་མཁས་པ་ཞིག་སྟེ། རྒྱ་ཡིག་རང་ཡང་རིགས་མི་འདྲ་བ་བདུན་ཙམ་མཁྱེན། ངས་ལོ་ཙཱ་བྱས་ཀྱང་འབྲིང་པོ་ཞིག་འོང་ངམ་སྙམ་པ་ཡིན། ངས་ཐེག་པ་ཆེན་པོ་གསང་སྔགས་ལ་ཕན་ཡོན་ཆེ་ཟེར་བ་རྣམས་ལ་བསྙེན་པ་ཚད་དུ་མ་བསྐྱལ་བ་མེད། ལས་ཚོགས་རྣམས་ལའང་ཉམས་སུ་མ་བླངས་པ་མེད། སཱཙྪ་གཅིག་པུའང་རི་དེའུ་ཙམ་བཏབ་པ་ཡིན། སྤང་སྤོས་གཅིག་པུའང་ཁང་པ་གང་བ་ཙམ་གཏམས་པ་ཡིན་གསུང་། དེ་ནས་ 1095 ཤིང་མོ་ཕག་གི་ལོ་དགུང་ལོ་དྲུག་ཅུ་རེ་གསུམ་བཞེས་དུས་ལོ་དགོན་པ་གདབ་པར་དགོངས་ནས་རྒྱ་ཡོན་བདག་ལ་རྨི་ལམ་བརྟག་པ་ཞུས་པས། རྒྱའི་ཞལ་ནས་ཆོས་བགྲེས་པོ་ཞིག་ཡུལ་དུ་འགྲོ་ཟེར་བ་བྱུང་། སྤྱན་སྔའི་ཞལ་ནས་རྨི་ལམ་རྣོ་གསུང་སྐད། དེ་ནས་ཉན་དུ་བྱོན། ཡོན་བདག་བྱ་རྗེ་སྟོད་པས་མར་གྱི་མེ་ཏོག་མང་པོ་ཕུལ་བས་ངའི་ཡོན་བདག་དཔལ་གསུམ་ཕུ་བ་གསུངས་ནས་མཉེས། དེ་ནས་ལོའི་གཙུག་ལག་ཁང་ཀ་བཞི་མ་བཞེངས། རྟེན་གཙོ་ལ་དགེ་བཤེས་སྟོན་པ། རྣལ་འབྱོར་པ་ཆེན་པོ། དགོན་པ་བ་གསུམ་གྱི་ནང་རྟེན་དུ་དངུལ་གྱི་གདུང་ཁང་དང་། གསེར་འབུམ་གཡུ་ཕྲ་ཅན། ཕྱི་རྟེན་དུ་མཆོད་རྟེན་གསུམ་བཞེངས། དེ་རྣམས་ཀྱི་རྩིག་འཕྲེང་རེ་རེ་ལ་རབ་ཏུ་གནས་པ་ལན་རེ་རེ་མཛད་ཅིང་སློབ་དཔོན་ནཱ་ག་བོ་དྷིས་ཀྱང་དེ་བཞིན་དུ་མཛད་པས་བྱིན་རླབས་ཤིན་ཏུ་ཆེ་བ་ལགས། བྱ་ཡུལ་བས་སྤྱན་སྔ་ལ། སློབ་དཔོན་ནཱ་ག་བོ་དྷི་ཞལ་གཟིགས་ཟེར་བ་མེད་དམ་ཞུས་པས། ཨ་ན་མ་བཙུན་ཆུང་འདྲ་འདྲིར་བཅུག་པའི་ཆོས་མི་འདྲི་བར། འདིར་མ་བཅུག་པའི་དེ་འདྲ་བས་ཅི་བྱ་གསུངས་ནས་མ་གནང་། ཡང་ཞུས་པས་ངས་སློབ་དཔོན་ནཱ་ག་བོ་དྷིའི་ཞལ་མཐོང་ཆོས་ཐོས་ཁྱོད་རང་ཡང་གསོལ་བ་ཐོབ་དང་བྱིན་གྱིས་རློབ་པ་ཡིན་གྱི་གསུང་། སྔོན་ར་སྒྲེང་དུ་བྱོན་པ་ཅིག་ལ་ཕ་བོང་ཐང་ན་ཡར་སློབ་དཔོན་ནཱ་ག་བོ་དྷི་དགེ་བཤེས་སྟོན་པའི་རྣམ་པར་བྱས་ནས་བཞུགས་པ་ཞལ་གཟིགས། དེ་ནས་གར་བཞུད་ཆ་མེད་པར་བཞུད། ང་རང་དད་གུས་ཆུང་བས་ལན་སྙམ་ནས་གསོལ་བ་ཤུགས་དྲག་བཏབ་པས་དངོས་སུ་བྱོན་ནས་བྱིན་གྱིས་བརླབས། ཆོས་བཞི་ཚན་བཞི་ལ་སོགས་པ་གདམས་པ་དང་རྗེས་སུ་བསྟན་པ་མང་དུ་སྩལ་ལོ། ། དེ་ནས་དགེ་བཤེས་སྤྱན་སྔ་བས་སྨྱུག་རུམ་དུ་བྱོན་ཏེ་ཕ་བོང་དཀར་ལེབ་བྱ་བའི་སྟེང་ནས་བྱ་ཡུལ་གྱི་རྒྱབ་རི་གཟིགས་པས། རི་དེ་རྒྱལ་བའི་གཙུག་ཏོར་འདྲ། ། ཡན་ལག་བརྒྱད་ལྡན་ཆུ་བོ་འབབ། ། དེ་ཡི་ཤར་ལྷོའི་ཕྱོགས་མཚམས་ན། ། ཚེ་དང་ལྡན་པའི་དགོན་གནས་ཡོད། ། རི་བྱ་ཡུལ་ཡུལ་བ་ཕ་གིའི་ཐད་དུ་གཙུག་ལག་ཁང་བཞེངས་ནས་སེམས་ཅན་ལ་ཕན་པ་རྒྱ་ཆེན་པོ་གྱིས་ཞེས་ལུང་བསྟན། དེར་ཞབས་རྗེས་ཀྱང་བྱོན། དེ་ནས་ཅུང་ཟད་བསྙེལ་བའི་དུས་ཤིག་རྣལ་འབྱོར་པ་ཆེན་པོ་གར་གཤེགས་གསུངས། དེ་ནི་རྣལ་འབྱོར་པ་ཆེན་པོ་དང་མཇལ་བར་ངེས། ཡང་ལན་ཅིག་ཉི་མ་ཤར་ཨང་གསུང་། ལན་ཅིག་འཁོར་ལོ་འཁོར་ཨང་གསུང་། ཅི་ལགས་ཞུས་པས། འཇམ་དཔལ་བརྟན་པའི་འཁོར་ལོ་གསུང་། ད་སྔར་མ་མྱོང་པའི་བདེ་བ་ཅིག་མྱོང་བར་སྣང་གསུང་། དེ་ནས་དགུང་ལོ་བདུན་ཅུ་དོན་གཅིག་པ་ 1103 ཆུ་མོ་ལུག་གི་སྨལ་པོ་ཟླ་བའི་ཚེས་ཉི་ཤུ་གཅིག་ལ་ཞི་བར་གཤེགས། དེ་ནས་ལོ་པའི་སྡེ་པ་རྣམས་ཀྱིས་སྤུར་བརྐུས་ནས་གདན་འདྲེན་རྩིས་བྱས་པ་ལ་གདན་འདྲེན་མ་ཐུབ་པར་གཙང་ཁ་དེར་ཞུགས་ལ་ཞེན། དེའི་ཚེ་སྤྱན་སྔའི་ཐུགས་ནམ་མཁའ་ལ་བྱོན་ཏེ་བྱ་ཡུལ་བ་ཆེན་པོ་སྨྱུག་རུམ་གྱི་གདོང་དེ་ན་གསོལ་བ་འདེབས་ཀྱིན་བཞུགས་པའི་པང་དུ་བྱུང་བས་ཐུགས་ཀྱི་གཏོད་ས་ང་རང་ཡིན་སྙམ་དུ་དགོངས་པ་བྱུང་གསུངས། དེ་ལྟར་སེམས་དཔའ་ཆེན་པོ་སྤྱན་སྔ་བ་འདིས་རྒྱལ་བའི་བསྟན་པ་ལ་བྱ་བ་རྒྱ་ཆེར་མཛད་དེ་དགེ་འདུན་གྱི་སྡེ་མང་དུ་བཙུགས། སྐུ་གསུང་ཐུགས་ཀྱི་རྟེན་མཐའ་ཡས་པ་བཞེངས། སྐལ་བ་དང་ལྡན་པ་མཐའ་ཡས་པ་ལ་ལམ་གྱི་རིམ་པའི་ཁྲིད་གནང་སྟེ་ཚོགས་པ་བདུན་བརྒྱ་ཙམ་འདུས་པས་བསྟན་པ་འཛིན་པའི་སློབ་མ་མང་དུ་བྱུང་ཞིང་ཐམས་ཅད་ཀྱི་ནང་ནས་འགྲན་ཟླ་མེད་པའི་ཐུགས་སྲས་ནི་བྱ་ཡུལ་པ་ཆེན་པོ། སྟོད་ལུང་པ་ཆེན་པོ། སྨྱུག་རུམ་པ་ཆེན་པོ་གསུམ་སྟེ་འདི་གསུམ་ལ་སྤྱན་སྔའི་སློབ་མ་འགྲན་གྱི་དོ་མེད་གསུམ་ཞེས་གྲགས་སོ། ། བྱ་ཡུལ་པ་ཆེན་པོའི་རྣམ་ཐར་ནི་འཆད་པར་འགྱུར་ལ།
སྟོད་ལུང་པ་ཆེན་པོ་རིན་ཆེན་སྙིང་པོ་ནི། གསེར་ཕུག་ལྕང་མ་ཅན་དུ་ 1032 ཆུ་ཕོ་སྤྲེའུ་ལ་སྐུ་འཁྲུངས། དེ་ལྐོག་ཏུ་ཁྱུང་པོ་ཇོ་གསོད་ལས་རབ་ཏུ་བྱུང་། དེ་ནས་གཞོན་ནུ་ནས་གཙང་དུ་བྱོན་ནས། བླ་མ་སེང་གེ་སྒྲ་གཅན་འཛིན་བཟང་པོ། པཎྜི་ཏ་འབུམ་ཕྲག་གསུམ་པ་ལ་སོགས་པ་མཁས་པ་མང་པོ་ལ་མདོ་སྔགས་ཀྱི་གསན་སྦྱོང་རྒྱ་ཆེར་མཛད། རྩོད་པ་ཡང་བཟང་། དེ་ནས་སྟོད་ལུང་ཐག་མར་དབུས་གཙང་གི་སྟོན་ཆེན་ཐམས་ཅད་འཚོགས་ནས་ཆོས་ཀྱི་བགྲོ་གླེང་འབའ་ཞིག་མཛད་པས་ཁོང་གིས་ཀྱང་གྲྭ་སྐོར་ལ་བྱོན། རྩོད་པ་མཛད་པས། གློག་སྐྱ་གཙོ་རྒན་བྱ་བས་ཉན་ནས། ཁོ་ན་རེ་བོད་དབུས་གཙང་གི་སྟོན་ཆེན་འདི་ཙམ་ཞིག་ཉིན་རེ་བཞིན་འཚོགས་ནས་མར་འཁོར་བ་སྤོང་ལུགས། ཡར་ཐར་པ་སྒྲུབ་ལུགས་ཀྱི་ཆོས་ཚིག་བཞི་པ་གཅིག་མེད་པར་ཀླད་པ་གས་གས་བ་ལང་དཀར་ཟལ་འཆི་བ་འདི་བྱུར་རེ་ཆེ་ཟེར་བ་སྟོད་ལུང་རིན་ཆེན་སྙིང་པོས་གསན་པས། ཁོང་ཀྱང་དེ་ཙམ་ཞིག་གོ་འདུག་ནས། ང་རྒྱ་གར་དུ་ཆོས་འཚོལ་བ་ལ་འགྲོ་དགོངས་ནས་བྱོན་པ་དང་། མཁའ་རུ་བའི་གྲྭ་པ་དགེ་སློང་སྣམ་སྦྱར་ཕྲག་པར་བཞག་པ་ཚུལ་ཁྲིམས་ཀྱི་དྲི་བྲོ་བ་ཞིག་དང་མཇལ་ཏེ། ཚེ་འདི་ཡུན་ཐུང་ཤེས་བྱའི་རྣམ་པ་མང་། ། ཚེ་ཡི་ཚད་ཀྱང་ཇི་ཙམ་མི་ཤེས་པས། ། ངང་ལས་ཆུ་ལས་འོ་མ་ལེན་པ་ལྟར། ། རང་གི་འདོད་པ་དང་དུ་བླང་བར་བྱ། ། ཞེས་གསུང་བས། དེ་སུས་མཛད་བྱས་པས་ཇོ་བོའི་གསུང་ཡིན་ཟེར། གང་ནས་བྱོན་བྱས་པས། མཁའ་རུ་དགོན་པ་ནས་འོང་ཟེར། དེ་ནས་མཁའ་རུ་བའི་དྲུང་དུ་བྱོན་ཏེ་སྐྱབས་འགྲོའི་ཆོས་སྐོར་གསུང་བ་གསན། མཁའ་རུ་བས་ལུང་བསྟན་ནས་ར་སྒྲེང་དུ་རྣལ་འབྱོར་པ་ཆེན་པོའི་སྤྱན་སྔར་བྱོན། ལྟ་བའི་དྲི་བ་མང་པོ་མཛད་པས། སྔོན་དུ་ཐབས་གོམས་པས་རྒྱུད་སྨིན་དགོས་པ་ཡིན་གསུངས་ནས། ཐོག་མར་སྐྱབས་འགྲོ་དང་། བྱམས་སྙིང་རྗེ་ནས་རིམ་གྱིས་ཁྲིད་དེ་ཆོས་མང་དུ་གསན། ལོ་བཅུ་གཅིག་ལོན་དུས་ཇོ་བོ་བོད་དུ་ཕེབས་པ་ལ་ཤམ་ཐབས་ཁྲལ་ཀྱང་འཇལ་བར་སྣང་། སྟོད་ལུང་པ་ཆེན་པོས་ར་སྒྲེང་དུ་རྣལ་འབྱོར་པ་ཆེན་པོའི་སྤྱན་སྔར་བྱོན་པའི་དུས། རྟེན་དགེ་སློང་ཡིན་པ་དང་མི་ཆེ་བའི་དོན་གྱིས་བྲང་ཁང་དེ་རྙེད་པ་དཀའ་ཙམ་ཞིག་བྱུང་བ་ལ། རྣལ་འབྱོར་པ་ཆེན་པོས་སྒྲོལ་སྒོམ་གཞོན་ནུ་སྨོན་ལམ་བྱ་བ་ལ་གནས་ཁང་ལེགས་པོ་ཞིག་ཡོད་དེ། ཁོ་ཁྱེད་ལ་ཉམ་ང་ཟེར་བ་གདའ་གསུངས་པས། སྟོད་ལུང་པས་སྒྲོལ་སྒོམ་གཞོན་ནུ་སྨོན་ལམ་གྱི་སྒོ་གང་ཡིན་དྲིས་ཏེ་ནང་དུ་ཙངས་ཀྱིས་བྱོན་ནས། སྒྲོལ་སྒོམ་ཁྱོད་ང་ལ་ཉམ་ང་ཟེར་བ་ཉམ་ང་མི་དགོས། ཆུ་ཡང་ང་རང་གིས་ལེན། ཡོས་ཀྱང་ང་རང་གིས་འཐག ། ཕྱེ་སྐྱོ་ཡང་ང་རང་གིས་བསྐོལ། ངའི་མལ་དེ་འདི་ཁོ་ནར་འོས་པ་སྣང་གསུང་ནས་ས་གཅིག་ཏུ་གཟིམ་མལ་མཛད། དེར་སྒྲོལ་སྒོམ་དད་པ་བཅོས་མིན་སྐྱེས་ནས་སློབ་མར་གྱུར། ལན་ཅིག་རྣལ་འབྱོར་པའི་སྐུ་མདུན་དུ་བྱོན་ཟེར་བ་བྱུང་བས། དེར་བྱོན་ཙ་ན་སྟན་ཐོན་པོ་ཞིག་བཤམས་འདུག་པ་ལ། རྣལ་འབྱོར་པས་ཇོ་བོ་སྟོན་པ་སྟན་ལ་གཤེགས་གསུངས་པས། བདག་འདི་ལ་མི་མཆི་ཞུས་པས། རྣལ་འབྱོར་པའི་ཞལ་ནས། ཇོ་བོ་སྟོན་པ་ད་དུང་མཚན་ཉིད་པའི་སྐྱ་དྲི་མ་སངས་པར་འདུག་གསུང་བས། ཁོང་གི་ཐུགས་ལ་ང་ས་འདིར་ཐིམ་གྱིས་སོང་ན་རུང་བ་ལ་དགོངས་པ་བྱུང་གསུང་། རྣལ་འབྱོར་པ་ལོ་བརྒྱད་དང་། དགོན་པ་བ་ལོ་ལྔ་བསྟེན་པར་གདའ། དེ་དུས་སྤྱན་སྔ་སྐུ་མཚམས་ལ་བཞུགས་པས་སྤྱན་སྔ་ལ་དད་པ་འཁྲུངས་ཏེ་རྣལ་འབྱོར་པས་ངོ་ཆེན་མཛད་ནས་ཆོས་ཐུན་བཞི་ཚན་གཅིག་ཐོག་མར་གསན། རྣལ་འབྱོར་པ་སྐུ་གཤེགས་ནས་སྤྱན་སྔ་ལ་བརྟེན། གསེར་སྲང་བརྒྱད་བརྒྱ་འབུལ་བའི་དམ་བཅའ་མཛད་པ་ལ། ཕྱེད་དང་དྲུག་བརྒྱ་ཕྱག་ཏུ་ཐོངས་དུས་སྤྱན་སྔ་སྐུ་གཤེགས་པས། ཕྱེད་དང་སུམ་བརྒྱས་དགོངས་པ་རྫོགས་པའི་དོན་དུ་སྟོད་ལུང་བཙན་གྲོ་དགོན་པ་གཙུག་ལག་ཁང་དང་བཅས་པ་དགུང་ལོ་བདུན་ཅུ་རྩ་གཉིས་པ་ 1103 ཆུ་མོ་ལུག་ལ་བཞེངས། སྐུ་གསུང་ཐུགས་ཀྱི་རྟེན་སྔ་ཕྱིར་དཔག་ཏུ་མེད་པ་བཞེངས་པའི་གྲགས་ཆེ་བ། རབ་གནས་ཀྱི་དུས་སྤྱན་སྔ་ལ་ཆོས་གསུངས་པའི་འཇམ་དཔལ་དཔའ་བོའི་སྐུ་ལ་སོགས་པ་རྒྱུད་སྦྱངས་མ་བདུན་དང་། རྣལ་འབྱོར་པས་རབ་གནས་མཛད་པ་པོ་ཏོའི་གསུང་འབྱོན། མཁའ་རུའི་ལྗང་སྐྱེས། བཙན་གྲོའི་ཆུ་ཁོལ་ཞེས་རྟེན་རྟགས་ཐོན་གསུམ་དུ་གྲགས་པའི་ཆུ་ཁོལ་ཐུབ་པ་སོགས་མང་དུ་བཞེངས། ཁོང་གི་ཞལ་ནས། སྟོད་ལུང་པའི་བན་དེ་ལ་ཆོས་སྟོན་དྲངས་པ་བས། ལོ་པའི་ཁྱི་ལ་ཟན་བྱིན་པ་བསོད་ནམས་ཆེ་ཞེས་གསུངས་ཏེ། ཕྱོགས་བཅུའི་སངས་རྒྱས་ཐམས་ཅད་མཆོད་པ་བས་བླ་མའི་བ་སྤུའི་བུ་ག་གཅིག་མཆོད་པ་ཕན་ཡོན་ཆེ་བ་གསང་བ་འདུས་པའི་རྒྱུད་སོགས་རྒྱུད་དང་གྲུབ་ཆེན་གྱི་གཞུང་མང་པོ་ལས་འབྱུང་བ་དང་། བྱང་ཆུབ་ལམ་གྱི་རིམ་པའི་རྩ་བ་བཤེས་གཉེན་བསྟེན་ཚུལ་ལ་ཐུག་པས་འདིའི་ཐད་ནས་རྟེན་འབྲེལ་གྱི་སྒོ་མ་འཕྱུགས་པ་ཞིག་དགོས་ཞེས་འདོམས་པའོ། ། དེ་ལྟར་སྟོད་ལུང་པ་ཆེན་པོས་སྤྱན་སྔ་ལོ་བདུན་བསྟེན་ནས་མཉེས་པ་གསུམ་གྱིས་མཉེས་པར་མཛད། སྤྱན་དང་མངོན་པར་ཤེས་པ་མངའ། ཡི་དམ་མང་པོའི་ཞལ་གཟིགས། བདེན་གཉིས་ཀྱི་རྟོགས་པ་ཐུགས་ལ་འཁྲུངས། འགྲོ་བའི་དོན་རྒྱ་ཆེན་པོ་མཛད་དེ་དགུང་ལོ་བརྒྱད་ཅུ་རྩ་ལྔ་པ་ 1116 མེ་ཕོ་སྤྲེའུའི་ལོ་མངོན་པར་བྱང་ཆུབ་པའི་ཟླ་བའི་ཚེས་བརྒྱད་ལ་ལམ་དགོན་དུ་སྐུ་གཤེགས་སོ། ། སྤྱན་སྔའི་སློབ་མ་སྨྱུག་རུམ་པ་ཆེན་པོ་ནི། སྤྱན་སྔའི་ཞབས་ལ་བསྙེན་ནས་གདམས་པ་མང་དུ་གསན། ཀླུངས་ཤོད་མདར་སྨྱུག་རུམ་གྱི་དགོན་པ་བཏབ། ཕྱིས་སྤྱན་སྔ་ཕེབས་ནས་གནས་དེ་རྡོ་རྗེ་གདན་དུ་བྱིན་གྱིས་རློབ་པར་མཛད། རྗེ་སྒམ་པོ་པས་ཀྱང་བླ་མ་འདིའི་ཞབས་ལ་བཏུགས་ཏེ་བཀའ་གདམས་ལམ་རིམ་གསན་ནས་སྐལ་བ་དང་ལྡན་པ་མཐའ་ཡས་པ་ལ་འདོམས་པར་མཛད་དོ། ། དགེ་བཤེས་སྨྱུག་རུམ་པ་འདི་ནི་དུས་སྐབས་ཀུན་ཏུ་རང་གི་རྒྱུད་ལ་བརྟགས་ནས་རང་རྒྱུད་འདུལ་བ་གཙོ་བོར་མཛད་དེ་ཡི་དམ་ལྷའི་བསྙེན་པ་བྱེད་པའི་ཚེ་ཡང་རང་གི་ཉོན་མོངས་འདུལ་བའི་ཐབས་ཁོ་ནར་མཛད་དེ་སྨྱུག་རུམ་པའི་ཞལ་ནས། ཉོན་མོངས་པ་ཉུག་གིས་བྱུང་ཙ་ན་ལེ་ལོ་མི་བྱ་བར་མོད་ལ་གཉེན་པོས་བཟློག ། མ་ནུས་ན་ལང་ལ་མཎྜལ་དང་མཆོད་པ་བཤམས་བླ་མ་དང་ཡི་དམ་ལ་ཕུལ་ལ་གསོལ་བ་གདབ། དེ་ལ་དམིགས་ནས་ཁྲོ་བོའི་བཟླས་པ་བྱས་པས་ཉལ་གྱིས་འགྲོ་གསུང་ངོ་། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་བཀའ་གདམས་སྐུ་མཆེད་གསུམ་གྱི་ནང་ནས་སྐུ་ན་གཞོན་པ་འབྲོམ་ཆོས་ཀྱི་རྒྱལ་པོའི་གསང་བའི་མཛོད་འཛིན་པ་སྤྱན་སྔ་བ་ཆེན་པོ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་དལ་འབྱོར་རྙེད་པར་དཀའ་བ་དང་། ཚེ་ལ་ལོང་མེད་པའི་ཚུལ་ཡང་ཡང་བསམས་ལ་སྒྲུབ་པ་ལ་ནང་ནས་བསྐུལ་ཏེ་བྱང་ཆུབ་ལམ་གྱི་རིམ་པ་སྒོམ་པ་ལ་བརྩོན་པ་ཆུ་བོའི་རྒྱུན་བཞིན་བྱའོ། ། ། །
༈ བཤེས་གཉེན་ཚུལ་བཞིན་བསྟེན་མཛད་གཞོན་ནུ་འོད། ། ཅེས་བསྔགས་པ། དགེ་བའི་བཤེས་གཉེན་བྱ་ཡུལ་པ་ཆེན་པོ་ནི། སྟོད་ལུང་གོལ་གོ་ལུང་དུ་ཡབ་གཡུང་དྲུང་འབར་དང་། ཡུམ་སྟོད་ལུང་པའི་ལྕམ་མོ་གྱི་ལྗང་བཟའ་ལྕམ་བུ་གཉིས་ཀྱི་སྲས་སུ་ 1075 ཤིང་མོ་ཡོས་ལ་འཁྲུངས། མཚན་འབུམ་རྟག་ཅེས་བཏགས། སྔོན་ཡུན་རིང་པོ་ནས་ལམ་ལ་སྦྱངས་པའི་བག་ཆགས་སད་པས་བྱིས་པའི་སྤྱོད་ཚུལ་རྒྱང་བསྲིངས་ཏེ་དམ་པའི་ཆོས་འཚོལ་བ་ལྷུར་མཛད་པ་ཞིག་ཡོད་པ་ལས། དགུང་ལོ་བདུན་པ་ལ་སྟོད་ལུང་པ་ཆེན་པོ་དང་མཇལ། དགེ་བའི་བཤེས་གཉེན་བསྟེན་ཚུལ་ཁྱད་པར་དུ་འཕགས་པ་ཞིག་ཡོད་པས་སྟོད་ལུང་པ་ཆེན་པོ་ཤིན་ཏུ་མཉེས་ནས་ཆོས་ཅི་རིགས་གནང་། དེ་ནས་དགུང་ལོ་བཅུ་གཉིས་པ་ལ་ཚ་ཐོག་དགོན་པར་རྣལ་འབྱོར་པའི་སློབ་མ་སྒོམ་པ་བྱང་གྲགས་ཀྱིས་མཁན་པོ་དང་། སྤྱན་སྔའི་སློབ་མ་ཡེ་ཤེས་རྒྱལ་མཚན་གྱིས་སློབ་དཔོན་མཛད་ནས་རབ་ཏུ་བྱུང་། མཚན་གཞོན་ནུ་འོད་དུ་བཏགས། བཅུ་གསུམ་པ་ལ་གོལ་གོ་ལུང་གི་གཉེར་ལོ་གཅིག་མཛད། བཅུ་བཞི་པ་ལ་ཡུམ་འདའ་ལ་ཁད་པའི་སར་བྱོན་ནས་སྐྱབས་འགྲོ་དང་སེམས་བསྐྱེད་འབོགས་པར་མཛད། ཡུམ་གྲོངས་པ་གཟིགས་པས་རྐྱེན་བྱས་སྲིད་པ་མཐའ་དག་ལ་ཞེན་པ་ལོག་སྟེ་ཐུགས་ལ་སྐྱོ་ཤས་ཆེན་པོ་སྐྱེས་ནས་སྟོད་ལུང་པ་མར་གྲོ་ཟར་ན་བཞུགས་པའི་སར་དགུང་ལོ་བཅུ་དྲུག་ལ་བྱོན། བསླབ་བཏུས་སྤྱོད་འཇུག་ལ་སོགས་པའི་ལམ་གྱི་རིམ་པའི་མན་ངག་གི་གཞུང་རྣམས་ལེགས་པར་གསན་ནས་ཐུགས་ལ་ངེས་པར་མཛད། དགེ་བའི་བཤེས་གཉེན་སྟོད་ལུང་པ་ཆེན་པོ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་ཞབས་ཏོག་ལོ་ལྔ་ཙམ་ཞིག་མཛད། ལན་ཅིག་སྤྱན་སྔ་ཕྱོར་པ་ན་བཞུགས་པའི་སར། སྟོད་ལུང་པ་དཔོན་སློབ་གཉིས་ཀྱིས་མཇལ་དུ་བྱོན་པས། སྤྱན་སྔའི་མངོན་པར་ཤེས་པས་གཟིགས་ནས། ཇོ་བོ་སྟོན་པ་རེ་སྐྱིད་ན་འཁོར་འདི་ལྟ་བུ་ཡོད་པ་ཞེས་ཡང་ཡང་གསུང་བས། དགེ་བའི་བཤེས་གཉེན་བཞེད་ན་འབུལ་ཞུས་པས། ཇོ་བོ་སྟོན་པས་ཅང་འབུལ་ཕོད་དམ་གསུང་བས། མཉེས་པར་བྱུང་སྙམ་ནས། དར་ཡུག་གཅིག་བཏགས་ནས་ཕུལ་བས་ལོ་གཅིག་སོང་བ་ན་ཇོ་བོ་སྟོན་པ་རང་ལ་དགོས་གསུངས་ནས། ན་བཟའ་ཕྲུག་ཅིག་བསྐོན་ནས་སྟོད་ལུང་པའི་སར་བཏང་། དེ་ཙ་ན་སྟོད་ལུང་པའི་ཞལ་ནས། ངའི་དགེ་བའི་བཤེས་གཉེན་མ་མཉེས་པར་བྱས་ཨང་གསུང་། མ་མཉེས་པར་མ་བགྱིས། སྟོན་པ་རང་ལ་དགོས་རྒྱུག་གསུང་བས་འོངས་པ་ལགས་ཞུས་པས། འདི་ཅི་ཟེར་པ་ཡིན། ངས་ཁྱོད་ཕུལ་ཟིན་པ་ཡིན་པས་དོ་ནུབ་ལས་མ་སྡོད་པར་རྒྱུག་ཅིག་གསུང་། སྔར་བཀྱོན་པས་འཚེར་བ་ལ་ད་རེས་ལས་དགའ་བ་ཅིག་མ་བྱུང་གསུང་། དེ་ནས་སྤྱན་སྔའི་སྐུ་མདུན་དུ་བྱོན་པས་སྤྱན་སྔའི་ཞལ་ནས། འུ་ཅག་ཕ་བུ་གཉིས་ད་གདོད་སྐྱིད་གཅིག་བྱའོ་གསུང་། ལོ་དགུའི་བར་དུ་ཞབས་ཏོག་ཚུལ་བཞིན་དུ་མཛད་པས། སྤྱན་སྔ་མཉེས་པའི་གསུང་མང་པོའང་བྱོན། མཚན་མོ་མཎྜལ་བྱས་ནས་གསོལ་བ་བཏབ་པས། སྤྱན་སྔའི་ཕྱག་ན་རིང་བསྲེལ་མང་དུ་ཡོད་པ་འཕེལ། སྤྱན་སྔའི་ཞལ་ནས། ཁྱོད་ཁོ་ན་ཚེ་རབས་སུ་སྐྱིད་ཅིག་གསུང་། པོ་ཏོ་བའི་ཞལ་ནས། ཁྱེད་རྣམ་པ་ལས་དགའ་བ་ཅིག་སྨད་མ་གི་ན་ལི་ལེའི་བུ་ལ་ཉེ་གནས་ཤིག་ཡོད་ཀྱི། ཁྱོད་དེར་སོང་ལ་ལྟོས་དང་མ་ཐའང་ཁོང་འཛུམ་པ་ཅིག་བྱས་ནས་གཏོང་གི་གསུང་། སྤྱན་སྔའི་གསུང་ནས། ཁྱོད་ཀྱི་ཤེས་རབ་འདིས་ལྷ་ས་སྙེ་ཐང་ཕྱགས་ཤིང་ཐོགས་པ་ཅིག་བྱས་ན་འོང་གསུང་། ཡང་ཁྱོད་ནི་ཐར་ཟིན་གྱི་ང་མ་འཇོག་ཅིག་གསུང་། སྤྱན་སྔ་ཤིན་ཏུ་མཉེས་པས། ཁོང་བཙུན་ཆུང་བྱུང་ཙ་ན། ངེད་རྒན་པོ་ཀུན་ཁྱི་དང་འདྲ་ཟེར་ནས་ཕྲག་དོག་བྱེད་པ་ཡང་བྱུང་། ལན་ཅིག་སྟོད་ལུང་པས་སྤྱན་སྔ་མཇལ་དུ་བྱོན་ཙ་ན། བཙུན་ཆུང་འདི་ཅི་འདྲ་ཞུས་པས། ཁོ་སྒོར་སོང་ནས་བཤད་གསུངས་ནས་བྱ་ཡུལ་བ་སྒོར་བཞུད་པ་དང་བཙུན་ཆུང་འདིའི་དབང་དུ་བྱས་ན། དད་པ་ང་བས་ཆེ། ཤེས་རབ་ང་བས་ཆེ། བརྩོན་འགྲུས་ང་བས་ཆེ། སྙིང་རྗེ་ང་བས་ཆེ། ནམ་མཁའ་ལ་མདུང་བསྐོར་གསུང་། ཆོས་གསུང་ཚད་ཐམས་ཅད་ཀྱི་རྩར་འཇོག ། ལན་ཅིག་ཉན་ཕུའི་དགོན་པར་མང་ར་དང་བྱ་ཡུལ་བ་གཉིས་ལ་དབང་སྟབས་ཤིག་ཏུ་མཛད། སྤྱན་སྔས་རབ་གནས་ཀྱི་ཆོ་ག་རྣལ་མར་བསླབས་པ་དགེ་བཤེས་ཀོར་ཆེན་པོ་དང་། མང་ར་སྒོམ་པ་གཉིས་ཡིན། སྨྱུག་རུམ་ན་བཞུགས་དུས། ཁྱོད་ལ་དགོས་གསུང་ནས་རབ་ཏུ་གནས་པའི་ཆོ་ག་རྒྱས་པ་རྣལ་མ་ཅིག་བྱ་ཡུལ་བ་ལ་གདོད་བསླབས་པ་ཡིན་གསུང་། ཡང་སྤྱན་སྔའི་ཞལ་ནས། བྱ་ཡུལ་བ་ལ་ཁྱོད་སྒྲུབ་པ་པོ་ཞིག་འོང་སྙམ་ཙ་ན། ཚོགས་སྡུད་པ་ཅིག་འོང་བར་འདུག་གསུང་། ནུབ་ཅིག་གི་རྨི་ལམ་ན་འབུམ་པ་ཅིག་ལ་མེ་ལོང་མང་པོ་བཀབ་པ་ཅིག་རྨིས་ཞུས་པས། ཁྱོད་ཁ་ན་རེ་སྡུག ། རྟག་ཏུ་མི་ངོ་ཞི་ཆེ་ལྟ་དགོས་བྱ་བའི་རྟགས་ཡིན་གསུང་བ་ལ། དེ་ཐུགས་མད་པར་གདའ། དགེ་བའི་བཤེས་གཉེན་གྱི་ཞབས་ཏོག་བྱེད་ཙ་ན། གྲྭ་པ་དེ་ཙམ་ཞིག་གི་ངོ་ལྟ་དགོས་པ་བྱུང་། ད་ལྟ་འདི་ཙམ་ཞིག་གི་ངོ་ལྟ་དགོས་བྱུང་གསུང་། མི་གཞན་གྱི་བསམ་པ་ལ། སྤྱན་སྔའི་ཞབས་ཏོག་ཁོ་ན་ལ་འཁོལ་བས་ཆོས་ཤེས་པ་ཅང་འོང་ངམ་སྙམ་ནས་དེ་སྐད་ཟེར་བ་ལ། ངའི་རྣ་བའི་ལམ་དུ་བྱུང་བས་ཆོག་པ་ཡིན་གསུང་། ནངས་ཅིག་ཐལ་བ་འབོད་དུ་བྱོན་པས། སྐས་གདང་གསུམ་པའི་ཁར་ཕེབས་པའི་ཚེ། བཀའ་སྡེ་སྣོད་ཀྱི་དོན་མ་ལུས་པར་ཐུགས་ལ་ལམ་གྱིས་ཤར། ཏིང་ངེ་འཛིན་གྱི་ངང་དུ་ཁྱུར་གྱིས་འགྲོ་བ་ཞིག་བྱུང་བས་བླ་མའི་ཞབས་ཏོག་ལ་ཡིད་ཆེས་ཏེ། སྐྱིད་སྨད་པའི་དགེ་བཤེས་འདི་རྣམས་བླ་མའི་ཞབས་ཏོག་ལ་མི་འབད་པར་ཐོས་པ་ཁོ་ན་ལ་འབད་པ་འདི་ནོར་བ་ཡིན་གསུང་། ལན་ཅིག་སྤྱན་སྔའི་ཞལ་ནས། ཁྱོད་ཀྱིས་ཚ་བ་དེར་ཅི་བཏབ་བམ། མདང་ད་ནངས་ཤེད་ཨེན་རེ་སྐྱེས་གསུང་། ཟླ་བ་གཅིག་ལ་ན་བཟའ་དྲོད་མ་རང་ཡང་བཅུ་གསུམ་ཕུལ་གསུང་། ངས་རིན་པོ་ཆེ་དེ་རྫས་ཡོ་བྱད་དད་པ་ཤེས་རབ་ཀྱིས་མཉེས་པ་མ་ལགས་ཏེ། ལུས་ལ་ཞོ་ཤ་ཡོད་པས་ཤ་ཁྲག་ལྦུ་བར་སོང་སོང་དུ་འབུངས་པ་ཡིན། ད་ལྟ་མཁས་བཙུན་སྟོན་སྒོམ་ཐམས་ཅད་འདུན་པ་འདི་ཡང་དགེ་བཤེས་དེ་མཉེས་པར་བྱས་པ་ལས་བྱུང་བ་ཡིན་གསུང་། ལན་ཅིག་ཡུལ་དུ་བྱོན་ནས་ཐུགས་རྩོལ་མཛད་པས་གསེར་སྲང་བཅུ་གཉིས་རྙེད། སྟོད་ལུང་པས་བརྒྱད་གནང་བྱུང་བས་གསེར་སྲང་ཉི་ཤུའི་འབུལ་བ་མཛད། སྤྱན་སྔ་འདའ་ཁར་མ་འོངས་པ་ན་ཐུགས་ལ་གདགས་པར་ཞུ་ཞུས་པས། སྤྱན་སྔའི་ཞལ་ནས། ཇི་སྲིད་ཆོས་ཀྱི་སྐུ་ཞིག་ཏུ་མ་གྱུར་གྱི་བར་དུ་འུ་ཅག་གཉིས་ཕ་སྤད་བྱེད་པ་ཡིན་མོད་གསུང་སྟེ་ང་དེ་ལ་རེ་བ་ཡིན་གསུང་། སྤྱན་སྔ་གཤེགས་རྟིང་ཕུ་ཆུང་བ་དང་། པོ་ཏོ་བའི་སར་གསེར་སྲང་རེའི་འབུལ་བ་བསྐྱལ། པོ་ཏོ་བའི་ཞལ་ནས། ངའི་འདིར་སྡོད་ཁང་པ་ཡང་རྩིག ། བརྒྱགས་ཀྱང་ངས་སྦྱར་ཏེ་སྒོམ་དུ་གཞུག་གི་གསུང་བ་ལ། སྟོད་ལུང་པས་བཀྱོན་གྱི་དོགས་ནས་མ་བཞུགས་གསུང་། ཕུ་ཆུང་དུ་བྱོན་དུས་ཇོ་བོ་མི་གཡོ་པའི་ཞལ་གཟིགས། སྤྱན་སྔའི་ཐུགས་དམ་ཡིན་པས་མྱ་ངན་སེལ་བ་ལ་བྱོན་པའི་ཞད་དུ་གདའ། ལན་ཅིག་མགོན་པོ་གྲི་གུག་ཐོད་པ་ཅན་གྱི་ཞལ་གཟིགས། ཐུགས་རྗེ་ཆེན་པོའི་རིགས་དཔག་ཏུ་མེད་པའི་ཞལ་གཟིགས། དེ་ནས་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པའི་ཞལ་གཟིགས་གསུང་། ལན་ཅིག་བྲུལ་གྱིས་ར་བ་སྐོར་བར་བཞུགས་དུས་སྐྱོ་སངས་ལ་བྱོན་པས། སློབ་དཔོན་ནཱག་པོ་དྷི་དང་ཞལ་མཇལ་ཞིང་ཆོས་གསུངས། དེ་ནས་ནང་དུ་བྱོན་ནས་མཆོད་པ་ཕུལ་གསོལ་བ་བཏབ་པས། མཁའ་འགྲོ་མ་མང་པོ་གར་བྱེད་ཅིང་བྱུང་བ་ཞལ་གཟིགས་གསུང་། སྤྱན་སྔ་འདའ་ཁར་ཁྱོད་འཚེངས་བྱ་བ་ལན་གསུམ་གསུངས། ཁྱོད་མི་ཆོས་ཀྱི་ཡུལ་དུ་མ་འགྲོ་དགེ་སློང་མ་བྱེད་གསུང་བ་ལ། ཕྱིས་མང་ར་སྒོམ་པའི་ཞལ་ནས། བྱ་ཡུལ་བ་ལ་ཁྱོད་དགེ་སློང་བྱ་དགོས་གསུང་བས། སྤྱན་སྔ་ལ་གསོལ་བ་བཏབ་སྟེ་རྨི་ལམ་བརྟག་པར་མཛད་པས། གདུང་རྟེན་གཅིག་ལ་ལུགས་ལན་གཉིས་མི་དགོས་བྱ་བ་ཅིག་བྱུང་། དེར་མི་གནང་བ་ཡིན་སྙམ་ཡོད་ཙ་ན་དགེ་བཤེས་མང་རས་དབང་མ་བྱུང་བས། ཡང་དགེ་སློང་བྱེད་པར་གསོལ་བ་བཏབ་པས། སྣམ་སྦྱར་རྒྱ་གར་མ་ཅིག་གནང་བ་རྨིས་ནས། དགེ་སློང་བྱེད་པར་གནང་བ་བྱུང་སྙམ་ནས་མཁན་པོ་འཆད་འུ་པས་མཛད། མང་རས་ལས་སློབ། རྒྱ་ཤེས་རབ་འབར་གྱིས་གསང་སྟེ་བ་མཛད་ནས་བསྙེན་པར་རྫོགས། དེ་ནས་གླང་རི་ཐང་པ་ལ་མདོ་རྩ་ཚར་གཅིག་གསན། རྒྱ་ཤེས་རབ་འབར་ལ་ཚར་གཉིས། སྟོད་ལུང་གི་སློབ་དཔོན་ཤེས་རབ་བླ་མ་ལ་ཚར་གཅིག་སྟེ་ཚར་བཞི་ཉན་གསུང་། གཞན་གྱིས་ཆོས་གསན་དུས་ན་ཟིན་བྲིས་མཛད་དམ་མ་མཛད་ཞུས་པས། ཟིན་བྲིས་འདྲ་བས་གར་ཡང་མི་ཕྱིན། ཆོས་ཐམས་ཅད་དུས་གཅིག་ལ་ལམ་གྱིས་ཤེས་དགོས་པ་ཡིན་གསུང་། སྤྱན་སྔའི་ཞབས་ཏོག་ལོ་དགུ་མཛད་དེ། རྟག་ཏུ་ངུས་ཆོས་འཕགས་བསྟེན་པ་དང། འབྲོམ་རིན་པོ་ཆེས་ཇོ་བོ་བསྟེན་པ་དང་མཚུངས་པར་ལམ་གྱི་རྩ་བ་བཤེས་གཉེན་བསྟེན་ཚུལ་ལ་རྒྱལ་བ་སྲས་བཅས་ཀུན་གྱིས་བསྔགས་འོས་སུ་གྱུར་པ་ཞིག་མཛད། དགུང་ལོ་ཉི་ཤུ་རྩ་དགུའི་ཐོག་ཏུ་སྤྱན་སྔ་བ་སྐུ་གཤེགས། དེ་ནས་ལོ་བཞི་སྐུ་མཚམས་ལ་བཞུགས། ཚོགས་བསྡུས་པའི་སྔ་ཤོས་གཉེར་དུ་བྱན་དར་མ་རཏྣས་སྤྱན་དྲངས་ཏེ་ཆོས་གསུངས། དེ་ནས་དགོན་པ་འདེབས་པར་དགོངས་པ་ལ། བྱ་ཡུལ་གྱི་ཤུལ་དེ་ན་སྔགས་བཙུན་བཟའ་མི་གཉིས་ཡོད་པས། དེ་གཉིས་ཀྱིས་གནས་དེ་ཞ་པ་ལ་ཕུལ། ཞ་པས་གླང་རི་ཐང་པ་ལ་ཕུལ། ཁོང་གིས་བརྟག་པ་མཛད་པས་ས་དེ་གཉན་པར་འདུག་གསུང་ནས་མ་བཞེས། སླར་ཞ་པས་བྱ་ཡུལ་པ་ལ་ཕུལ་བས་ཐུགས་དགྱེས་ཏེ། ས་བདག་ཕལ་ཆེ་བ་གནས་གཞན་དུ་སྤོ་བའི་ཆོ་ག་མཛད། ཀླུ་གཉན་ཆེ་བ་གཅིག་གི་སྟེང་དུ་གཟིམ་མལ་བཅས་ནས་བཏུལ། དེ་ནས་ས་དེ་ཕ་བོང་ཐག་ཐུག་ཏུ་ཡོད་པ་ལ་ལ་བཅག ། ལ་ལ་སྦེད་པ་ལ་སོགས་པའི་རྩོལ་བ་ཆེན་པོ་མཛད་དེ། དབུ་རྩེ་ཀ་བ་བཅུ་གཉིས། ཁྱམས་ཀ་བ་བཞི་བཅུ་རྩ་གཉིས་ཡོད་པ་རྣམས་ 1114 ཤིང་ཕོ་རྟའི་ལོ་ལ་རྨང་བཏིངས་ནས། ལོ་བཅུ་གསུམ་པ་མེ་རྟའི་ནང་ཚུན་དུ་དགོན་པ་གཏོར་ཚུགས་ཡན་རྫོགས་པར་གྲུབ། ཤ་ར་བ་དང་ཡང་ཐུགས་བཅུགས་པས་ཁོང་གི་གྲྭ་པ་རྣམས་ཀྱང་གཙུག་ལག་ཁང་བརྩིག་པའི་ལས་མི་ལ་བཏང་། ཉེ་གནས་ཤེར་སེང་བྱ་བས་ཤིང་རྣམས་ཉང་པོ་ནགས་ཤོད་ནས་དྲངས། དབུ་རྩེ་ཚར་ནས་ཤེར་སེང་ན་རེ། ཆེན་པོ་ཞིག་ནི་ཚར། ད་ཁེངས་པར་མཛོད་ཅིག་ཟེར་བ་ལ་དགེ་བཤེས་ཀྱི་ཞལ་ནས་ཤོང་བར་གྱིས་ཤིག་གསུངས། ཁྱམས་སྟོད་ཚར་ཁྱམས་སྨད་མ་ཚར་བ་ལ་གནས་བརྟན་སེ་ཆུང་བྱ་བས་ཤེར་སེང་ལ་དུག་བཏང་བས། འཆི་ཁར་དགེ་བཤེས་ཀྱིས་ཁྱོད་འཇིགས་མི་དགོས། ང་དང་ལྷན་དུ་འོང་གི་གསུངས་ནས་བུམ་ཆོག་མཛད་པས་ངན་སོང་ནས་ཐོན་གསུང་། གཙུག་ལག་ཁང་ལེགས་པར་ཚར་ནས་དབུ་རྩེར་འབུམ་ཆ་བདུན་ཅུ་ཙམ་གྱིས་ཐོག་དྲངས་པའི་རྟེན་དང་བཅས་པ་ས་རྒྱན་གནམ་རྒྱན་མི་ཤོང་བ་ཙམ་བྱུང་། སྤྱན་སྔའི་ཐུགས་བཞུགས་པའི་དངུལ་གྱི་གདུང་ཁང་དར་ཅོག་ཅན་ལ་སོགས་པ་དགེ་བཤེས་ཉིད་ཀྱིས་བཞེངས་པའང་མང་དུ་ཡོད་དོ། ། ལན་ཅིག་ཚོགས་སུ་དགེ་བཤེས་ཀྱི་ཞལ་ནས། གཙུག་ལག་ཁང་བཞེངས་པ་རྒྱལ་བློན་བྱང་ཆུབ་སེམས་དཔའི་ལས་ཡིན། རབ་ཏུ་བྱུང་བའི་ལས་མིན་ཟེར་ཏེ། སྔོན་གྱི་དུས་སུ་སློབ་དཔོན་སངས་རྒྱས་ཡེ་ཤེས་ཞབས་ཀྱིས་གཙུག་ལག་ཁང་བཞེངས་པ་དང་། ཇོ་བོས་བལ་ཡུལ་དུ་ཐང་བི་ཧ་རའི་གཙུག་ལག་ཁང་བཞེངས་པས་ཆོས་ཚུགས་ཤིན་ཏུ་བཟང་བར་བྱུང་བ་དང་། ཇོ་བོའི་བཀའ་ལུང་གིས་དགེ་བཤེས་སྟོན་པས་ར་སྒྲེང་གི་གཙུག་ལག་ཁང་བཞེངས་སུ་གསོལ་བ་ལགས། འུ་ཅག་གིས་ཀྱང་བླ་མ་རྣམས་ཀྱི་ཐུགས་དགོངས་བསྐང་བའི་ཆེད་དང་། དཀོན་མཆོག་གསུམ་གྱི་ཞབས་ཏོག་དང་། གཞན་ལ་ཕན་གདགས་པར་བྱ་བའི་ཆེད་དུ་བཞེངས་སུ་གསོལ་བ་ཡིན། འུ་ཅག་གིས་དེ་གོང་ལོ་བཅུ་གཉིས་བཅུ་གསུམ་གཞན་ལ་འཆི་བ་མི་རྟག་པ་ཤ་སྟག་བཤད་དེ། ང་རང་ལ་ཕྱི་ནང་གི་མི་རྟག་པ་རྣལ་མ་ཅིག་མདང་ད་ནང་རྒྱུད་ལ་སྐྱེས། ལས་འབྲས་ལ་ཡིད་ཆེས་པའི་དད་པ་རྣལ་མ་ཅིག་གདོད་རྒྱུད་ལ་སྐྱེས། འཁོར་བ་ལ་ཡིད་འབྱུང་རྣལ་མ་ཅིག ། བྱམས་སྙིང་རྗེ་བྱང་ཆུབ་ཀྱི་སེམས་རྣལ་མ་ཅིག ། ཀུན་རྫོབ་སྒྱུ་མ་ལྟ་བུ་ནས་གནས་ལུགས་ཕྱིན་ཅི་མ་ལོག་པའི་བར་ལ་ངེས་པ་རྣལ་མ་གཅིག་ཀྱང་གདོད་རྒྱུད་ལ་སྐྱེས། དེས་ན་ང་རང་ལ་གོ་བ་ཅིག་ཡོད་ཨང་གསུང་། དགེ་བཤེས་མཐའ་བཞི་སྒོམ་བརྩོན་གྱིས། བྱང་ཆུབ་སེམས་དཔའ་ཞི་བ་སྐྱོང་བྱ་བ་དེ་བྱ་ཡུལ་བ་ལ་ཟེར་བ་ཡིན་གསུངས་པ་དང་། བྱ་ཡུལ་བ་ཕུ་ཆུང་ན་བཞུགས་དུས་མང་ར་སྒོམ་པའི་ཞལ་ནས། ད་ལྟ་ཕུ་ཆུང་ན་ཉན་ཐོས་ཀྱི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་དཔའ་ཞིག་སྨིན་བདོག་གསུང་། ལན་ཅིག་བྱ་ཡུལ་དུ་ལྷ་རྗེ་སྙི་སྒོམ་གྱིས་དགེ་བའི་བཤེས་གཉེན་ལགས། ཁྱེད་ཀྱི་ཐུགས་ལ་བདེན་པ་གཉིས་ཅི་ཙུག་སྐྱེས་གསུང་པར་ཞུ་ཞུས་པས། དགེ་བཤེས་ཀྱི་ཞལ་ནས་ཀུན་རྫོབ་བྱང་ཆུབ་ཀྱི་སེམས་དང་དོན་དམ་བྱང་ཆུབ་ཀྱི་སེམས་རྒྱུད་ལ་སྐྱེས་གསུངས། དེ་ལ་སྙི་སྒོམ་གྱིས་རང་གི་སེམས་ཉིད་གཞིགས་ནས་སྟོང་པར་གཏོང་བ་ལགས་སམ། ཕྱི་རོལ་གྱི་ཡུལ་གཞིགས་ནས་སྟོང་པར་གཏོང་བ་ལགས་ཞུས་པས། དགེ་བཤེས་ཀྱི་ཞལ་ནས། མདའ་དུམ་ཁོང་དུ་བཞག་ནས་རྨ་ཁ་ཚིལ་བུས་བསྐུས་པའི་ཆོས་ཀྱིས་གང་ཡང་མི་ཕྱིན། རྐུན་མ་ནགས་ལ་སོང་བ་ལ་རྗེས་གྲམ་པ་དཔྱོད་པའི་ཆོས་ཀྱིས་གར་ཡང་མི་ཕྱིན་པས། རང་གི་སེམས་ཉིད་སྟོང་པར་གཏོང་བ་ཡིན། དེས་ཕྱི་རོལ་གྱི་སྒྲོག་རང་གྲོལ་ལ་འགྲོ། ཐམས་ཅད་སྟོང་པ་ཉིད་ཡིན་གསུང་། འདི་ཇི་ཙམ་ན་ཐུགས་ལ་འཁྲུངས་ཞུས་པས། ང་དང་པོ་སྤྱན་སྔའི་ཞབས་ཏོག་བྱེད་པའི་དུས་ན་སྐྱེས་པ་ཡིན་གསུང་། ཡང་རྗེ་སྒམ་པོ་པས་བླ་མ་རིན་པོ་ཆེ་འཁོར་ཟར་ཟིར་མང་པོ་དང་གཙུག་ལག་ཁང་བཞེངས་པ་སོགས་མཛད་པ་མང་པོ་འདི་རྣམས་ཀྱིས་ཐུགས་དམ་ལ་མི་གནོད་དམ་ཞུས་པས། མི་གནོད་གསུངས། ཡང་ལན་ཅིག་སློབ་མ་ཅིག་གཙང་དུ་འགྲོ་བ་ལ་ང་ལ་ལོ་ཁྱུད་སྐོར་གཅིག་འཇིག་རྟེན་གྱི་རྣམ་པར་རྟོག་པ་སྐྱེ་མ་མྱོང་བ་ཡིན། ང་ལ་གསོལ་བ་འབད་ལ་ཐོབ། བར་ཆད་མི་འབྱུང་ཞིང་བྱིན་རླབས་འབྱུང་གསུང་། ལན་ཅིག་དགེ་བཤེས་ཀྱི་ཞལ་ནས། བཀའ་གདམས་པའི་དགེ་བཤེས་མང་པོ་ཞིག་གིས་སྔགས་མི་ཤེས། ཤེས་ཀྱང་དགེ་བའི་བཤེས་གཉེན་ལ་ལུང་མ་ཐོབ། འུ་ཅག་གིས་སྔགས་ཤེས་པ་ཡིན། དགེ་བའི་བཤེས་གཉེན་ལ་ལུང་ལེགས་པར་ཐོབ་པ་ཡིན་པས་འཆད་འཚལ་གསུངས་ནས། གསང་སྔགས་ཀྱི་གདམས་པའང་མང་དུ་གནང་བར་མཛད། དགེ་བཤེས་ཤ་ར་བ་སུ་ལའང་མཉེས་པ་མེད་པ་ཅིག་ཡིན་ཏེ། བྱ་ཡུལ་བ་དེའི་ཐུགས་སུས་ཀྱང་དཔོགས་མི་ནུས་པ་ཅིག་སྣང་གསུང་སྐད། དགེ་བཤེས་ཤ་ར་བ་དབྱེ་གོང་དུ་བཞུགས་པ་ཅིག་ལ་ཕྱག་ལ་བྱོན། དེ་ནས་ཕྱིར་འབྱོན་ཁར་དགེ་བཤེས་ཤ་ར་བས་སྐྱེལ་ཐུང་མཛད་པ་ལ། བྱ་ཡུལ་བའི་ཞལ་ནས། མ་འོངས་པ་ན་དགའ་ལྡན་དུ་མཇལ་བར་ཞུ་གསུང་བ་ལ། དགེ་བཤེས་ཤ་ར་བའི་ཞལ་ནས། འུ་ཅག་གཉིས་རྒན་པོ་མིན། ད་དུང་ཐེངས་གཅིག་མཇལ་གསུངས་པ་ལ། དེ་ནས་མ་མཇལ་བར་འདས། དེ་ནས་བྱ་ཡུལ་བ་རྣམས་ལ་ཁྱེད་རང་གི་མདུན་མ་བྱུང་ན། ཆས་རྐྱེན་གྱིས་འཐོགས་པ་མེད་ཀྱི་གསུང་བ་དང་། སང་ཕོད་མྱ་ངན་ལས་འདའ་བའི་ད་ལོ་སྤྱན་སྔའི་འདས་མཆོད་ལ་བུ་རམ་ལག་པས་ཐེག་ཚད་གཏོང་དགོས། སང་ཕོད་ནས་འགྲུབ་ངེས་མེད་གསུང་བ་ལ། དགག་དབྱེའི་དུས་སུ་ལས་བྱེད་དཀོན་གཉེར་རྣམས་ཀྱིས་ད་རེས་འབུངས་ཤིག ། ཕྱིས་ནས་དགོས་ཏེ་མི་འོང་གསུང་བ་དང་། ཚུལ་ཐོན་ནས་གནས་བརྟན་བརྩོན་འགྲུས་རྡོ་རྗེས་རབ་གནས་ཤིག་མཛད་ནས་འདི་ངའི་རབ་གནས་ཀྱི་ཕྱི་མ་ཡིན་གསུངས་ནས་མྱ་ངན་ལས་འདའ་བའི་གསུང་བྱོན། གཞན་ཡང་བྱ་ཡུལ། ཀླུངས་ཤོད། མལ་གྲོ་གསུམ་དུ་དུས་གཅིག་ལ་གྲལ་དབུ་མཛད་པ་དང་། མདོ་སྨད་དུ་ངང་ཚང་བའི་གཙུག་ལག་ཁང་གི་རབ་གནས་དང་། དྭགས་པོ་ཤ་བ་གླིང་པའི་མཆོད་རྟེན་གྱི་རབ་གནས་ཞུས་པས། དུས་ཚོད་ཚེས་གྲངས་འདི་ལ་མཆོད་པ་རྒྱ་ཆེན་པོ་ཤོམས། གསོལ་བ་ཐོབ། ངས་གཟིམ་ཆུང་འདིའི་སྟེང་ནས་རབ་གནས་བྱེད་པ་ཡིན་གསུང་ཏེ། ཀུན་གྱིས་མཐོང་སར་གཙུག་ལག་ཁང་དང་མཆོད་རྟེན་གྱི་སྟེང་དུ་ཕྱག་ནས་བབས་པས། དེ་ནས་སྤྲུལ་པའི་སྐུར་གྲགས། མི་མ་ཡིན་མང་པོ་ལ་ཆོས་གསུངས་པ་དང་། བསྐྱེད་རྫོགས་ཀྱི་ཏིང་ངེ་འཛིན་བརྟན་པོ་དང་ལྡན་ཞིང་མངོན་པར་ཤེས་པ་རྒྱ་ཆེན་པོ་མངའ་བའི་ལོ་རྒྱུས་མང་དུ་སྣང་ངོ་། ། དེ་ལྟར་བདག་ཉིད་ཆེན་པོ་འདིས་འགྲོ་བའི་དོན་ཡུན་རིང་དུ་མཛད་དེ། དགུང་ལོ་དྲུག་ཅུ་རྩ་བཞི་པ་ 1138 ས་ཕོ་རྟའི་སྨིན་དྲུག་ཟླ་བའི་ཚེས་བཅོ་བརྒྱད་ལ་གཤེགས་པའི་ཚུལ་བསྟན་ཁར་ཇོ་བོ་པ་ཚན་ཅིག་གིས་ངེད་རྣམས་ཇི་ལྟར་བྱ་ཞུས་པས། ཁྱེད་ཐམས་ཅད་བསྲུང་སྡོམ་དག་ཏུ་གྱིས། ང་ལ་དད་པ་དང་གུས་པ་སྒོམས། ངའི་རུས་བུ་འདི་སྲེགས་ཤིག་གསུངས། དེ་ནས་འུ་ཅག་གི་དགེ་བཤེས་འུ་ཅག་གི་དགེ་བཤེས་གསུངས་ནས། བླ་མ་རྡོ་རྗེ་གདན་དུ་ཡུན་རིང་ཨང་གསུང་། དེ་ནས་ཞལ་བསིལ་ནས་འཇུག་པའི་ཆོ་ག་གཅིག་མཛད། འཆི་བ་བྱ་བ་མེད་མྱ་ངན་བྱ་མི་དགོས་གསུངས་ནས། སྐྱིལ་མོ་ཀླུང་བཅས་ནས་ཐུགས་དམ་མཛད། དེ་ནས་སྒོམ་པ་བྱང་བླ་ལ་མཉེས་མཉེས་ཙམ་མཛད། སེང་གེའི་ཉལ་སྟབས་བྱ་གསུངས་ནས་སྤྱི་བོ་ནས་ཡར་རླངས་པ་ཆེན་པོ་ཞིག་ཕྱུར་གྱིས་བྱུང་ནས། དབུ་ཟིལ་པ་ཕྲོམ་མེ་བ་ལ་མྱ་ངན་ལས་འདའ་བའི་ཚུལ་བསྟན། 1138 དགུང་ལོ་དྲུག་ཅུ་རྩ་བཞི་པ་སྨིན་དྲུག་ཟླ་བའི་ཚེས་བཅོ་བརྒྱད་ལ་གཤེགས་པའི་ཕྱི་དེ་ཉིན་པར་ནམ་མཁའ་ལ་འཇའ་ཚོན་དཔག་ཏུ་མེད་པ་བྱུང་། དེ་ནས་སྤུར་དབོན་ཤེས་རབ་ལ་སོགས་པའི་གནས་བརྟན་རྣམས་ཀྱིས་བདག་བྱས་ནས་གྲྭ་པ་ཉིས་སྟོང་ལ་དབང་མ་བྱུང་བ་ལ། དགེ་བཤེས་ཤ་ར་བས། བྱང་ཆུབ་སེམས་དཔའ་ཆེན་པོ་དེའི་སྤུར་རུལ་དུ་བཅུག་ན་དྲི་མི་ཞིམ་པར་ཚོར་བ་ཐམས་ཅད་དམྱལ་བར་འགྲོ་བས་སྤུར་སྦྱོངས་གསུང་བ་ལ་བརྟེན་ནས། སྐུ་སྟོད་རྡོ་རྒྱུས་ཀྱི་སྤང་ཁེབས་ཀྱིས་དྲིལ་ནས་སྐུ་སྨད་བཞུ་བར་གནས་བརྟན་རྣམས་ཀྱིས་གནང་ནས་སྦྱངས་པས། དུ་བས་གར་ཁྱབ་ཏུ་རིང་བསྲེལ་བྱུང་བ་དང་། དུང་གཡས་འཁྱིལ། རྣམ་རྒྱལ་མཆོད་རྟེན། སྒྲོལ་མ་རྣམས་བྱོན། རྒྱ་སྟོན་གྱིས་རིང་བསྲེལ་ཉིས་བརྒྱ་ལྔ་བཅུ་རྩ་བདུན། སྒོམ་པ་བརྩོན་འགྲུས་རྒྱལ་མཚན་གྱིས་བརྒྱ་ཉི་ཤུ་རྩ་བདུན། མང་ར་གཞོན་ནུ་གཡུང་དྲུང་ལ་དྲུག་ཅུ། གད་ཤགས་ལ་ཕྱེད་དང་ཉིས་བརྒྱ། ཡར་ཀླུངས་པ་སྨོན་སྟོན་ལ་ཉིས་བརྒྱ། ཉང་པོ་གཞོན་ཤའི་རིང་བསྲེལ་གཅིག་ལ་དགུར་འཕེལ། རྟ་ཤ་སྐྱོན་གུ་ལ་སུམ་བརྒྱ། གོལ་གོ་ལུང་གི་དངུལ་གྱི་གདུང་རྟེན་ན་རིང་བསྲེལ་བརྒྱ་རྩ་བརྒྱད། ཇོ་བཙུནབྱམས་པ་ལ་སུམ་ཅུ། ལྷ་བཟོ་སྒོག་སྐྱ་ལ་སུམ་ཅུ། ངར་པ་ལ་བཅོ་ལྔ། གདུང་སོལ་ཁྱོར་གང་གི་ནང་དུ་རིང་བསྲེལ་བདུན་ཅུ་རྣམས་བྱོན་པས་གདུལ་བྱ་རྣམས་ཚིམ་པར་བྱས་སོ། ། བདག་ཉིད་ཆེན་པོ་དེ་ལ་ཚོགས་པ་ཉིས་སྟོང་ལྔ་བརྒྱ་ཙམ་འདུས་པའི་ནང་ནས་བྱང་ཆུབ་ལམ་གྱི་རིམ་པའི་ཁྲིད་རྒྱ་ཆེར་སྤེལ་བའི་རྒྱུད་འཛིན་ཆེན་པོ་ནི་སྒྱེར་སྒོམ་པ་ཆེན་པོ་ཡིན་ལ། གཞན་ཡང་རྗེ་སྒམ་པོ་པ་སོགས་བསྟན་འཛིན་དམ་པ་མང་དུ་བྱོན་ནོ། ། སྒྱེར་སྒོམ་པ་ཆེན་པོའི་རྣམ་ཐར་ནི་འཆད་པར་འགྱུར་ལ། །
རྗེ་སྒམ་པོ་པ་ནི། གཉལ་སྟོད་བོད་སྙིར་ཡབ་དབུ་གཙོ་རྒྱལ་འབར་དང་། ཡུམ་ཤོ་རོམ་བཟའི་སྲས་སུ་ 1079 ས་མོ་ལུག་ལ་འཁྲུངས། དགུང་ལོ་ཉི་ཤུ་རྩ་དྲུག་ལ་དྭགས་པོ་རོང་ཁར་མར་ཡུལ་བློ་ལྡན་གྱིས་མཁན་པོ་དང་། ཤ་བ་གླིང་པ་ལ་སློབ་དཔོན་ཞུས་ཏེ་ཚིག་རྫོགས་མཛད། མཚན་བློ་གྲོས་གྲགས་སུ་བཏགས་ཤིང་། ཡོངས་ལ་བསོད་ནམས་རིན་ཆེན་ཞེས་གྲགས་སོ། ། རྗེ་སྒམ་པོ་པས་དགེ་བའི་བཤེས་གཉེན་བྱ་ཡུལ་བ་ཆེན་པོ། ཤ་བ་གླིང་པ། རྒྱ་ཡོན་བདག ། དགེ་བཤེས་སྒྲེ་པ། སྨྱུག་རུམ་པ་ཆེན་པོ། རྒྱ་ལྕགས་རི་གོང་ཁ་བ་ཆེན་པོ་རྣམས་བསྟེན་ནས་བཀའ་གདམས་ཀྱི་གདམས་པ་མ་ལུས་པ་གསན་ཏེ་སྒྲུབ་པ་བྱ་དགོངས་ནས། ཡབ་མེས་ཀྱིས་བརྩིགས་པའི་གསེར་ཁ་བྱ་བའི་གནས་གཞིར་བྲང་ཁང་བརྩིགས། ཕ་ཞིང་གིས་མཐུན་རྐྱེན་བྱས་ནས་སྒྲུབ་པ་ཡུན་རིང་དུ་མཛད་པས་བྱང་ཆུབ་ལམ་གྱི་རིམ་པ་ལ་མྱོང་བ་ཐོན་ཏེ། སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་དང་བྱམས་སྙིང་རྗེ་བྱང་ཆུབ་ཀྱི་སེམས་བཅོས་མ་མ་ཡིན་པ་དང་། གནས་ལུགས་རྟོགས་པའི་ལྟ་བ་རྣམས་རྒྱུད་ལ་སྐྱེས་ཤིང་། ཉིན་ཞག་མང་པོའི་བར་དུ་ཏིང་ངེ་འཛིན་རེའི་ནང་དུ་གནས་ནུས་པ་བྱུང་། དེ་ནས་རྒྱ་ལྕགས་རིར་ཞབས་བསྐོར་མཛད་པའི་ཚེ་སྤྲང་པོ་གསུམ་ལས་རྗེ་བཙུན་མི་ལའི་སྙན་པ་གསན་པས། དད་པའི་རྐྱེན་བྱས་ཏེ་ཕ་ཞིང་གསེར་དུ་བཙོངས། བཀའ་གདམས་ཀྱི་བླ་མ་རྣམས་ལ་ཕྱི་ཕྱག་མཛད། དེ་ནས་རྗེ་བཙུན་མི་ལའི་སྤྱན་སྔར་བྱོན་ཏེ་བླ་མེད་ཀྱི་རྒྱུད་སྡེ་མཐའ་དག་གི་སྙིང་པོའི་བཅུད་བསྡུས་པ་ནཱ་རོའི་ཆོས་དྲུག་དང་། དེའི་ཡན་ལག་གི་གདམས་པ་རྣམས་ལེགས་པར་གསན་ནས་ཐུགས་ཉམས་སུ་བཞེས་པས་རྟོགས་པ་ཐོབ་ནས་གདུལ་བྱ་འདུལ་བའི་དུས་ལ་བབ་པ་ན་དྭགས་ལྷ་སྒམ་པོ་བཏབ་སྟེ་འགྲོ་དོན་བསྐྱངས་པས། བཀའ་ཕྱག་ཆུ་བོ་གཉིས་འདྲེས་པར་གྲགས་ཤིང་། སློབ་མའང་མཁས་ཤིང་གྲུབ་པ་བརྙེས་པ་མང་དུ་བྱོན་ནོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་བྱ་ཡུལ་བ་ཆེན་པོ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་ལེགས་ཚོགས་ཐམས་ཅད་ཀྱི་རྩ་བ་བཤེས་གཉེན་དམ་པ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་སྐྱེས་བུ་གསུམ་གྱི་ལམ་གྱི་རིམ་པ་ཉམས་སུ་ལེན་པ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ། ། ། །
༈ ཐེག་མཆོག་ལམ་གྱིས་རྒྱུད་སྦྱངས་དགྱེར་སྒོམ་ཞབས། ། ཞེས་བསྔགས་པ། དགེ་བའི་བཤེས་གཉེན་དགྱེར་སྒོམ་པ་ཆེན་པོ་ནི། བྲམ་ཟེ་དགྱེར་ལྷ་སྣང་གི་རིགས་སུ་སྣོན་གྱི་མདར་ཡབ་དགྱེར་ཤེར་རབ་སྐྱབས་དང་། ཡུམ་གཡང་མ་ཀླུ་ལྕམ་གཉིས་ཀྱི་སྲས་སུ་ 1090 ལྕགས་ཕོ་རྟ་ལ་འཁྲུངས། གཞོན་ནུའི་དུས་ནས་ཆོས་ཀྱི་བག་ཆགས་སད་པས་ཆོས་བཞིན་སྤྱོད་པས་དུས་འདའ་བ་ཞིག་བྱུང་ཞིང་། དགུང་ལོ་བཅུ་གཉིས་ལོན་དུས་ཡབ་གྲོངས་པས་ཡུམ་གྱིས་བྱིས་པ་ཆེ་བ་གཉིས་ཕྲག་ཏུ་བཅུག ། ཆུང་བ་རྒྱབ་ཏུ་ཁུར་ནས་གཉེར་ན་ཞང་པོ་བྱན་དར་མ་རཏྣ་བྱ་བས་གཉེར་གྱི་དཔོན་མཛད་པས་དེ་ལ་གཏད་ནས་རྒྱལ་སྲས་འདི་གཉེར་དུ་དགུང་ལོ་བཅུ་གཉིས་ལ་རབ་ཏུ་བྱུང་། མཚན་གཞོན་ནུ་གྲགས་པར་གསོལ། རབ་ཏུ་བྱུང་ཙམ་ཉིད་ནས་འདུལ་བའི་བཅས་མཚམས་རྣམས་ལེགས་པར་བསླབས་ཏེ་མིག་གི་འབྲས་བུ་ལྟར་གཅེས་པར་བསྲུང་ཞིང་བཀའ་གདམས་ཀྱི་ཆོས་སྤྱོད་འཛིན་པ་སོགས་ལ་བརྩོན་པ་ཆེར་མཛད་དོ། ། དེ་ནས་གླང་རི་ཐང་པའི་ཕྱག་ཕྱིར་བྱོན་ཏེ། གླང་རི་ཐང་པའི་ཞར་ཆོས་པ་འདུལ་བ་འཛིན་པ་ཅིག་ལ་འདུལ་བ་གསན། དེ་ནས་བྱ་ཡུལ་བ་ཆེན་པོ་གཉེར་དུ་བྱོན་པ་ཅིག་ལ་ཚོགས་ཆོས་གསན། བྱ་ཡུལ་བས་ཚོགས་ཆོས་ཀྱི་སྔ་ཤོས་གཉེར་དུ་གནང་བ་ཡིན་པ་འདུག ། དེའི་དུས་སུ་དགེ་བཤེས་དགྱེར་འདིའི་བསླབ་པའི་སློབ་དཔོན་ཅིག་གི་ཞལ་ནས། བྱ་ཡུལ་བ་ལ་འདི་ལ་ཐུགས་ལ་གདགས་པར་ཞུ། འདི་ལ་རེ་ཆེ་བ་ལགས་འདིས་སྡོམ་པ་བླངས་པའི་ནུབ་མོ་སཱཙྪ་ལེགས་པ་ཀོར་པོར་ནས་ཕྱུང་བ་རྨིས་གསུང་བ་ལ། བྱ་ཡུལ་བའི་ཞལ་ནས། ངའི་སྐྱེ་བ་སྔ་མའི་སློབ་དཔོན་ཅིག་ཡིན་པར་འདུག་གསུངས་ནས་དགེ་བཤེས་བྱ་ཡུལ་བ་ཆེན་པོས་དབུ་ཞྭ་ཕུད་དེ་དགྱེར་སྒོམ་པའི་དབུ་ལ་གསོལ་ནས་ཕྱག་བཞག་བྱིན་རླབས་མཛད། སྒོམ་ཆེན་ཆེ་ངེས་པ་ཅིག་ཅི་འོང་བྱེད་དགོས་བསོད་ནམས་ཅན་ཞིག་འོང་བར་འདུག་གི་ང་བས་ཀྱང་ཁྱོད་བསོད་ནམས་ཆེ་བ་ཡིན་གསུངས། ཕྱིས་སུ་སོང་ཙ་ན་བྱ་ཡུལ་བ་ཆེན་པོ་ལས་ང་ཚེ་རིང་བར་བྱུང་། དེའི་སྟོབས་ཀྱིས་བསམ་པ་ཐམས་ཅད་འགྲུབ་པར་བྱུང་གསུང་། ཉིན་ཅིག་བྱ་ཡུལ་བ་སྐྱོ་སངས་ལ་འབྱོན་པའི་ཕྱི་ན་ཕར་བྱོན་པས་མེ་ཏོག་ཁུག་ཆོས་གཙང་སིང་བ་གསུམ་རྙེད། བྱ་ཡུལ་བ་ལ་ཕུལ་བས་རྟེན་འབྲེལ་བཟང་། ཁྱོད་ལ་སྡེ་སྣོད་གསུམ་པ་ཅིག་བྱ་དགོས་གསུང་། དེ་ནས་བྱ་ཡུལ་བ་ཆེན་པོ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་གཙོ་བོར་ལམ་རིམ་གྱི་ཁྲིད་དང་གཞན་ཡང་བྱ་ཡུལ་བ་ལ་མངའ་བའི་ཆོས་རྣམས་མ་ལུས་པར་གསན། བྱ་ཡུལ་བ་ལ་ལམ་རིམ་གྱི་ཁྲིད་ཇི་ལྟར་གསན་པ་ལྟར་ཐུགས་ཉམས་སུ་བཞེས་ཤིང་ཆོས་གང་གསན་པ་ཐམས་ཅད་ཚིག་གཅིག་ཀྱང་ཆུད་མ་ཟོས་པར་མཁྱེན་རབ་རླབས་ཆེན་པོས་ལེགས་པར་བཟུང་ནས་མཉེལ་བ་མེད་པར་མཛད་དེ་དགེ་བཤེས་དགྱེར་སྒོམ་པ་རང་ཉིད་ཀྱི་ཞལ་ནས། ངས་བྱ་ཡུལ་བ་ཆེན་པོའི་ཞལ་ལས་གང་ཐོས་པ་ཐམས་ཅད་ད་དུང་མ་བརྗེད་པར་གསལ་བར་ཡོད་གསུང་། དེ་ནས་དགེ་བཤེས་རྩི་སྒོམ་བྱ་བས་སྣེའུ་ཟུར་དུ་བྱོན་ནས། ངེད་ཅག་གི་དེ་ན་བཙུན་ཆུང་བློ་རྣོ་བ་འདི་ལྟ་བུ་ཞིག་བདོག ། འདི་ཁའི་སྤྱན་སྔར་བྱུང་ན་ཐུགས་ལ་འདོགས་པར་ཞུ་བྱས་པས་ཐུགས་མཉེས་ནས་དེ་ཁྲིད་ལ་ཤོག་གསུངས། དེ་ནས་རྩི་སྒོམ་གྱིས་དགྱེར་སྒོམ་ལ་སྤྲས་ཀྱི་ཐོད་པ་བྱ་བ་ན། དགེ་བཤེས་སྣེའུ་ཟུར་པ་བྱ་བ་ཇོ་བོ་མི་གཡོ་བའི་སྐུ་ལ་བརྟན་པ་ཐོབ་པ་ཅིག་ཡོད་པས་ཁྱེད་དེར་སོངས། ཐུགས་ལ་འདོགས་པར་འདུག་གི་གསུང་། དེ་ནས་དགེ་བཤེས་དགྱེར་སྒོམ་གྱིས་སྣེའུ་ཟུར་དུ་འབྱོན་པའི་ཐུགས་དགོངས་གཏད། སང་འབྱོན་པའི་དོ་ནུབ་སྣེའུ་ཟུར་གྱི་གཟིམ་ཁང་དང་། བྲང་ཁང་དང་འབུམ་པ་ལ་སོགས་པ་ཇི་ལྟ་བ་བཞིན་གཟིགས། སང་ནང་པར་གཞན་ལ་ལ་བྱོན་ཏེ་བྱན་གྱི་ཕུ་བ་ཅན། ལ་མོའི་ཕུ་དང་ཀ་བ་ཀླུངས་ལ་བྱོན། ཡུང་བར་དགོང་མོ་ཕྱི་བར་སླེབ། སྒོམ་ཆེན་པ་ཞིག་གིས་གནས་ཁང་དང་གནས་མལ་ཤིན་ཏུ་འཛོམ་པ་ཅིག་ཐུགས་ལ་བཏགས། དེ་ནས་སང་ཁམས་པ་ལུང་པའི་གྲྭ་པ་ཚན་ཅིག་དང་འགྲོགས་ནས་ཁམས་པ་ལུང་ལ་བྱོན། དེར་ཞག་གཅིག་བཞུགས། ནང་པར་ཁམས་ལུང་ནས་སྣེའུ་ཟུར་དུ་འགྲོ་བ་ཚན་ཅིག་དང་འགྲོགས་ནས་བྱོན་པས་འཕྱི་མོ་ལས་མ་སླེབས། དེར་སྤྱན་སྔར་བྱོན་པས། ཁྱེད་གང་ནས་བྱོན་པ་ཡིན་གསུང་། ཁོ་བོ་སྣོན་ནས་མཆིས་པ་ལགས་ཞུས་པས། འོ་ན་རྩི་སྒོམ་གྱིས་ཟེར་བ་དེ་ཡིན་ནམ་གསུང་། ལགས་ཞུས་པས། ད་ངོ་ཤེས་འདྲ་ཡོད་ན་དོ་ནུབ་དེར་ཉོལ་ལ་སང་ཁ་སྣང་མིག་སྣང་ལ་ཤོག་གསུང་། ནངས་པར་བྱོན་པས་ཇོ་བོ་མི་གཡོ་བའི་དམིགས་སྐོར་གསུམ་གྱི་བཟླས་ལུང་དང་། ཁ་འབར་མའི་གཏོར་མ་གཉིས་གནང་ནས་དེ་ཡི་གེ་ཅིག་ལ་འཛིན་དགོས་གསུང་། ཇི་ལྟ་བ་བཞིན་ཟིན་བྱུང་ལགས་ཞུས་པས། ཁྱེད་ཀྱིས་ནི་ཁོ་བོ་ཐུགས་ལས་ཆུང་ངུར་གཞོལ་བས་ཆོག་པ་ཅིག་འོང་བར་འདུག་གོ་གསུང་། ད་ཁྱོད་འདིར་སྡད་ཆོག་གམ་གསུང་བ་ལ། ད་རེས་སྐོར་གཅིག་འགྲོ། བརྒྱགས་ཀྱི་རྩོལ་བསྒྲུབ་བྱས་ནས་འོང་བ་ལགས་ཞུས་པས། འོ་ན་ཅི་ཐོན་གྱིས་ཤིག་གསུངས་ནས་མར་ཚུད་གཅིག ། ཇ་བཟང་པོ་མོན་ཞལ་གང་། སྐུ་འགག་གསོལ་འཕྲོ་གཅིག་རྣམས་གནང་། དེ་ནས་ཚུར་བྱོན་ནས་བརྒྱགས་ཀྱི་རྩོལ་བསྒྲུབ་བྱས་ཏེ་སྤྱན་སྔར་བྱོན་ཙ་ན། ད་ཁྱོད་ངའི་གཡོག་བྱེད་དམ་ཆོས་སེམས་གསུང་བ་ལ། ཆོས་སེམས་ལགས་ཞུས་པས། འོ་ན་ཆོས་སེམས་པ་ལ་ཁང་པ་རང་དབང་ཐོབ་པ་ཅིག་དགོས་གསུངས་ནས། གསེར་ཞོ་དོ་སྐུ་རྐེད་ལས་ཕྱུང་ནས། འདིས་ཁང་ཆུང་ཞིག་ཉོས་གསུང་། དེ་ནས་གདམས་ངག་བཏབ་སྟེ་གཞན་རྣམས་ཀྱིས་ང་མ་རྙེད་པར་འདུག་སྟེ། ངས་ཁྱོད་ཕར་བཙལ་བ་ཡིན་ནོ་དགེ་སྦྱོར་གྱིས་གསུངས་ནས་གདམས་ངག་ཐམས་ཅད་ཚར་བར་མཛད་དེ་ཐུགས་ལ་ཤིན་ཏུ་བཏགས། སྣེའུ་ཟུར་དུ་བཞུགས་རིང་ཆོས་གསན་པའི་སྐབས་མ་གཏོགས་མཚམས་ལ་བརྟེན་ནས་དགེ་སྦྱོར་ལ་བརྩོན་པར་མཛད། ཚོགས་ཆོས་ཐུན་གཅིག་ཆག་གཞན་ཡེ་མ་ཆག་པར་ནན་ཏན་བྱས་པ་ཡིན་གསུང་། ངས་སྣེའུ་ཟུར་དུ་ལོ་དགུ་བསྡད་དེ་དབྱར་དགུན་བསྡད་ནས་སྟོན་དཔྱིད་འགྲོ་ཡིན་མ་བྱས་གསུང་། དེ་དུས་སྣེའུ་ཟུར་པ་ལ་ཚོགས་པ་ཤིན་ཏུ་ཆེ་ན་སེམས་ཅན་ལ་ཕན་ཐོགས་པ་བག་རེ་གདའ་འམ་ཞེས་གཞན་གྱིས་ཞུས་པ་ལ། ཕྱ་པའི་བཙུན་ཆུང་འདི་ལ་རེ་བ་ལགས་གསུང་བར་གདའ། དེ་ཙ་ན་བྲང་དཔོན་ཕྱ་པ་ཅིག་ཡོད་པས་དགེ་བཤེས་འདི་ལ་ཕྱ་པའི་བཙུན་ཆུང་བྱ་བར་གྲགས། སྣེའུ་ཟུར་པས་ཚོགས་སུ་ཡང་ཁྱེད་རྣམས་ཁོ་ལ་མ་འགྲན་པར་དགེ་སྦྱོར་བྱེད་ཆུག་གསུངས་ནས། སུ་དང་ཡང་མི་མཉམ་པར་མཛད། དེ་ནས་སྒོམ་པ་ལ་གཙོ་བོར་མཛད་པས་དགྱེར་སྒོམ་ཆེན་པོ་ཞེས་གྲགས་སོ། ། དགེ་བཤེས་དགྱེར་སྒོམ་ཆེན་པོ་ཞེས་གྲགས་པ་འདི་ནི། དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་བསྟེན་ནས་བྱང་ཆུབ་ལམ་གྱི་རིམ་པ་སྒོམ་པ་ལ་བརྩོན་པ་ཤུགས་དྲག་ལ་རྒྱུན་རིང་བ་མཛད་པས་ལམ་གྱི་རིམ་པའི་རྟོགས་པ་རྣམས་བཅོས་མ་མིན་པར་ཐོབ་པ་ཞིག་སྟེ་ངེས་འབྱུང་གི་བསམ་པ་རྣམ་པར་དག་པ་རྒྱུད་ལ་སྐྱེས་པས་འདོད་པའི་ཡུལ་ལ་ནམ་ཡང་མི་གཡེང་བར་དྲན་ཤེས་བག་ཡོད་བརྟན་པོས་བསྡམ་པར་བྱ་བའི་ཉེས་པ་ཕྲ་མོ་ཙམ་གྱིས་ཀྱང་མ་གོས་པ་ཞིག་སྟེ། ཐ་ན་སཾ་པྲསྟ་ཞེས་མ་བརྗོད་པར་བཞེས་པ་མི་མཛད་པ་སོགས་འདུལ་བའི་བཅས་མཚམས་ཕྲ་རགས་ཐམས་ཅད་ཉམས་པ་མེད་པར་བསྲུང་བར་མཛད། བརྩོན་འགྲུས་ཤིན་ཏུ་ཆེ་བས་མི་གཡོ་བའི་གཟུངས་དུང་ཕྱུར་མང་པོ་བཟླ་བར་མཛད་དེ། ཉིད་ཀྱི་ཞལ་ནས། དགེ་བའི་བཤེས་གཉེན་སྤྱན་སྔ་བས་ངས་ཡི་གེ་བཅུ་པ་འདི་རང་ཡང་དུང་ཕྱུར་བཅུ་གསུམ་སོང་གསུང་བ་ལགས་པར་གདའ་སྟེ། ངས་ཀྱང་དེ་ཙམ་ཞིག་འགྲོ་བར་སྣང་གསུང་། གཞན་ཡང་ལུས་ངག་ཡིད་གསུམ་ཐ་མལ་དུ་སྡོད་མ་མྱོང་གསུང་། ཚོགས་ཆོས་ལྐོག་ཆོས་གང་མཛད་ཀྱང་ཐུགས་གོ་ཆ་ཤིན་ཏུ་ཆེ། དང་པོ་ཚོགས་མི་སྡུད་པ་ཡིན། བསྡུས་ཀྱི་རྟིང་ལ་ཡན་པར་བཞག་པས་མི་འོང་གསུངས་ནས་བརྩོན་འགྲུས་ཆེན་པོ་མཛད་དོ། ། བྱམས་སྙིང་རྗེ་བྱང་ཆུབ་ཀྱི་སེམས་ཤུགས་དྲག་པས་སེམས་ཅན་དམན་པ་སུ་འདྲ་ཞིག་ལའང་ཕན་ཐོགས་ནུས་པ་བྱུང་ན་དེ་ལ་ངེས་པར་ཕན་ཐོགས་མཛད། གྲོང་པའི་སྐྱེ་བོ་ཉམ་ཐག་དག་གིས་གདན་དྲངས་ཀྱང་དེ་ལ་ཕན་པར་འགྱུར་ན་ངེས་པར་འབྱོན་པར་མཛད་པས་གཞན་དག་གིས་གྲོང་ཆོག་སོགས་ལ་མི་གཤེགས་པའི་ཞུ་བ་ཕུལ་པ་ན་སེམས་ཅན་གྱི་དོན་འགྲུབ་བཞིན་དུ་མི་བྱེད་ན། བྱང་ཆུབ་སེམས་དཔའི་བག་མེད་པའི་གནས་བྱ་བ་ཡིན་གསུངས་ནས་ཞི་བར་མ་གཤེགས་ཀྱི་བར་གྲོང་ཆོག་མཛད། བརྒྱད་ཅུ་རྩ་གཉིས་ཀྱི་བར་དུ་མོ་རེང་མ་ཞིག་ན་ཡང་སྔས་ཁར་བྱོན་ནས། སྐྱབས་འགྲོ་སེམས་བསྐྱེད་འབོགས་པར་མཛད། ང་ཆུང་ངུ་ནས་ཞེ་སྡང་ཆེར་སྐྱེ་མ་མྱོང་། གཞན་ལ་ཕན་སེམས་དེ་ངང་གིས་བྱུང་གསུང་ངོ་། ། དོན་འདི་ལ་དགོངས་ནས་རྗེ་ཐམས་ཅད་མཁྱེན་པས། ཐེག་མཆོག་ལམ་གྱིས་རྒྱུད་སྦྱངས་དགྱེར་སྒོམ་ཞབས། ། ཞེས་བསྔགས་སོ། ། ཐུགས་རབ་ཤིན་ཏུ་ཆེ་བས་ལམ་གྱི་རིམ་པའི་གནད་རྣམས་ལ་རིགས་པའི་རྣམ་གྲངས་མཐའ་ཡས་པས་དཔྱོད་པར་མཛད་དོ། ། བཤེས་གཉེན་ལ་སངས་རྒྱས་ཀྱི་འདུ་ཤེས་མིན་པ་ཐ་མལ་པའི་འདུ་ཤེས་སྐྱེ་མ་མྱོང་གསུང་། དེ་ལྟར་བཤེས་གཉེན་ལ་གུས་པ་བཅོས་མ་མིན་པ་འཁྲུངས་པས་སངས་རྒྱས་ཐམས་ཅད་མཆོད་པ་བས་བླ་མ་མཆོད་པ་བྱིན་རླབས་ཆེ་བར་གསུངས་པ་ཡང་དགེ་བཤེས་འདི་ལ་དངོས་སུ་བྱུང་སྟེ། བླ་མ་ལ་གསོལ་བ་བཏབ་པ་ན་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ཏེ། ལྷག་པའི་ལྷ་མང་པོའི་ཞལ་གཟིགས་པ་དང་། སྤྱན་དང་མངོན་ཤེས་སོགས་གོང་མའི་ཡོན་ཏན་མཐའ་ཡས་པ་ཐུགས་རྒྱུད་ལ་འཁྲུངས། བླ་མ་གོང་མའི་མན་ངག་ཚིག་གཅིག་ཀྱང་ཆུད་མ་ཟོས་པར་ཐུགས་ལ་བཟུང་ནས་སྲས་ཀྱི་ཐུ་བོ་སངས་རྒྱས་དབོན་ལ་སོགས་པ་སྐལ་ལྡན་མཐའ་ཡས་པ་ལ་གདམས་ངག་འདོམས་པར་མཛད་དོ། ། དགེ་སྦྱོར་ལ་བརྩོན་པ་ཤུགས་དྲག་ལ་རྒྱུན་རིང་བ་མཛད་པས་ཏིང་ངེ་འཛིན་མཚན་ཉིད་ཚང་བ་ཤིང་རྟ་ཆེན་པོའི་གཞུང་ལས་ཇི་ལྟར་གསུངས་པ་ལྟར་ཐུགས་རྒྱུད་ལ་འཁྲུངས་ཏེ། ཏིང་ངེ་འཛིན་མཚན་ཉིད་བཞི་ལྡན་ཐུགས་རྒྱུད་ལ་འཁྲུངས་ནས། རིན་པོ་ཆེ་ལ་རྟོགས་པ་ཕུལ་བས། ཁྱེད་ལ་ལོ་དྲུག་ཅུ་བདུན་ཅུ་ལོན་ཙ་ན་སེ་བོ་ཐལ་མོ་སྦྱོར་བ་ལོང་ངེ་བ་ཅིག་འོང་བར་འདུག་གི ། དེའི་དུས་སུ་འབུམ་པ་གཅིག་བརྩིགས་ཤིག་མ་བརྩིགས་ན་སད་ཆེན་པོ་ཧ་པ་ཡིན་ནོ་གསུང་། དགེ་བཤེས་རྟག་ཐོག་པའི་ཞལ་ནས། རིན་པོ་ཆེ་སྣེའུ་ཟུར་པ་ལ་ནུབ་གཅིག་ལ་རྟོགས་པ་འབུལ་པ་བཞི་བྱུང་བ་ལ། ཏིང་ངེ་འཛིན་མཚན་ཉིད་བཞི་ལྡན་ཐུགས་རྒྱུད་ལ་འཁྲུངས་པ་གཅིག་བྱུང་བས། དེ་ཁོ་ན་ལ་དད་པར་བྱུང་སྟེ། ཕྱིས་རྩད་དཔྱད་ཙ་ན་དགེ་བཤེས་རིན་ཆེན་སྒང་པ་དེ་ཡིན་པར་སྣང་གསུང་ངོ་། ། ཏིང་ངེ་འཛིན་གསལ་ཆ་ཤིན་ཏུ་ཆེ་བས་སངས་རྒྱས་དང་བྱང་སེམས་མང་པོའི་ཞལ་གཟིགས་ཏེ་ཡུམ་གྱི་པུས་མོ་ལ་བརྟེན་ནས་བྱ་ར་བྱེད་པའི་དུས་སུ་ལྷ་ཞིག་གི་ཞལ་མཐོང་། དེ་ཙ་ན་ངོས་མ་ཟིན་པ་ལ་ཕྱིས་རྒྱུད་སྡེ་མཐོང་བས། གཤིན་རྗེ་གཤེད་ཡིན་པར་སྣང་གསུང་། སྣེའུ་ཟུར་ན་བཞུགས་པའི་དུས་སུ་ཇོ་བོ་མི་གཡོ་བའི་ཞལ་གཟིགས། སྣེའུ་ཟུར་པ་གཤེགས་ནས་དགུང་ལོ་ཉི་ཤུ་རྩ་དགུ་པ་ལ་ཡོན་བདག་ཀུན་གྱིས་གདན་དྲངས། དབྱར་གཅིག་ལྷབ་མོར་བཞུགས། ལམ་རིམ་ཚར་གཅིག་གསུངས། དེ་ནས་རིན་ཆེན་སྒང་དུ་བྱོན་ནས་གཙུག་ལག་ཁང་རྙིང་མ་དང་དགོན་པ་རིན་ཆེན་སྒང་ 1119 ས་མོ་ཕག་ལ་རྨང་བཏིངས། འདིར་བཞུགས་པའི་དུས་སུ། ལྷོ་ཕྱོགས་ཀྱི་རྒྱུད་འདིར་བཅོམ་ལྡན་འདས་ཤཱཀྱ་ཐུབ་པ་ཞལ་གཟིགས། ལྷོ་ནུབ་མཚམས་སུ་སངས་རྒྱས་སྨན་གྱི་བླའི་ཞལ་གཟིགས། ནུབ་ཕྱོགས་རྒྱ་མཚོའི་འགྲམ་ན་ཇོ་བོ་ཐུགས་རྗེ་ཆེན་པོ་གངས་རི་ལྟ་བུའི་ཞལ་གཟིགས་པ་ཡིན་གསུང་། ཡང་ཁོང་རང་གི་སྐུ་ལུས་དཀྱིལ་འཁོར་གྱི་ལྷ་ཚོགས་སུ་གཟིགས་པ་དང་། ལུས་གཞལ་ཡས་ཁང་དུ་སོང་བའི་ནང་ན་རིགས་ལྔ་བཞུགས་པ་ཅིག་གཟིགས། ཡང་གཟིམ་ཆུང་མཆོད་ཁང་གི་ཀ་བའི་རྩ་དེར་ཇོ་བོ་ཐུགས་རྗེ་ཆེན་པོ་དང་། ཇོ་མོ་སྒྲོལ་མ་གཉིས་མཉམ་དུ་ཞལ་གཟིགས། ཇོ་མོ་ཕྱག་བརྒྱད་མ་ལ་དེའི་དུས་སུ་སྒྲུབ་ཐབས་དེའང་གསན། ཕྱིས་བྱ་ཡུལ་དུ་བྱོན་ནས་དགེ་བའི་བཤེས་གཉེན་བྱ་ཡུལ་བ་ལ་འདི་འདྲའི་སྣང་བ་ཅིག་གདའ་ཞུས་པས། ངོ་མཚར་ཆེ་ཐ་མལ་པར་མི་གདའ་གསུང་། བྱ་ཡུལ་བའི་ཞལ་ནས་ཇོ་བོ་དགྱེར་སྒོམ་པ་ལ་དགོས་ཏེ་མི་མཆི་ནའང་། འོ་ན་ཡང་འམ་བུས་དྲན་པ་གསོ་བ་ཙམ་ཞིག་བགྱི་གསུངས་ནས་ཇོ་མོ་ཕྱག་བརྒྱད་མའི་སྒྲུབ་ཐབས་ཚར་གཅིག་གསུངས་པས་སྔ་མ་ཇོ་མོས་དངོས་སུ་གསུངས་པ་དང་ཁྱད་མ་བྱུང་གསུང་། ཡང་དགེ་བཤེས་བྱ་ཡུལ་བའི་ཞལ་ནས། རབ་གནས་ལ་སོགས་པ་དགྱེར་སྒོམ་པ་ཉིད་ཀྱིས་ཀྱང་མཁྱེན་ནས་མཆི་སྟེ། འཚལ་ན་ངན་བུས་ཞབས་ཏོག་བགྱི་གསུངས་ནས། ཆོས་ཐམས་ཅད་མ་ཞུས་པར་གནང་། ཡང་དགེ་བཤེས་བྱ་ཡུལ་བའི་ཞལ་ནས། དགོན་པ་འདིར་བཞུགས་ལ་ངའི་བཤོས་རེ་གསོལ། ང་ལ་དྲིན་ཆེ་བ་ལགས་གསུང་། ཡོན་བདག་ཚོ་ཅིག་གིས་དགོན་པ་བརྩིགས་ཟིན་འགོ་དགོས་པར་བདོག་ཞུས་པས། འོ་ན་ངས་ཀྱང་དགྱེར་སྒོམ་པའི་བསྲུང་བ་བགྱི། དགྱེར་སྒོམ་པས་ཀྱང་ང་ལ་དེ་བཞིན་མཛད་པར་ཞུ་གསུང་། ངས་དེ་ཙ་ན་དེ་བཞིན་དུ་བྱས་ན་རྒྱ་སྣུབས་དགོན་གསུམ་གྱི་མིང་ཡང་མི་འོང་གསུང་། གཞན་ཡང་དམ་ཚིག་གསུམ་བཀོད་པའི་རྒྱལ་པོའི་ཞལ་གཟིགས། རྡོ་རྗེ་གདན་ཡིན་སྙམ་པ་ཅིག་ཏུ་བྱང་ཆུབ་ཆེན་པོ་གཙོ་འཁོར་གསུམ་པ་དེ་ཞལ་གཟིགས། བྱ་ཡུལ་ན་བཞུགས་པའི་ཚེ་ཆོས་སྐྱོང་མ་དེའི་ཞལ་གཟིགས་གསུང་། ཡི་དམ་ལྷའི་བཟླས་བརྗོད་མཐཪ་ཕྱིན་པར་མཛད་པས་གཞན་ཕན་གྱི་ནུས་པ་ཁྱད་པར་ཅན་ཐོབ་སྟེ། རྟག་པ་ཆེད་འཛིན་བཟླས་ལུང་ཐུག་པ་མེད་པ་ཅིག་མཛད་པ་ལ། གཞན་ལ་ཕན་མ་ཐོགས་པ་ཡེ་མ་བྱུང་། སྐུ་ལུས་རྡོ་རྗེ་འདྲ་བས་ཚེམས་བསྙུང་བ་གཅིག་ཀྱང་མ་བྱུང་གསུང་། བྱིས་པའི་དུས་ན་ནད་ཡམས་ཆེན་པོ་ཞིག་བྱུང་བས་བྱིས་པ་མང་པོ་གུམ། རོ་ཐམས་ཅད་མཁར་རྒྱབ་ཏུ་བསྐྱལ་གཅུང་པོ་གཉིས་ཀྱང་ན་བས་ངས་ཁོང་གཉིས་གཡས་གཡོན་དུ་བཞག་སྟེ་གཙུག་ཏོར་བཏོན་པས་ནུབ་ཅིག་གི་རྨི་ལམ་ན་མཁར་རྒྱབ་ཏུ་ཕྱིན་པས། བྱ་མགོ་བརྙན་མི་འདྲ་བ་མང་པོ་ཐིབ་ཐིབ་འདུག ། ཁྲོན་པ་གཅིག་གི་ཁ་ནའང་བྱ་མང་བོ་ཐིབ་ཐིབ་འདུག་པས། ཁྲོན་པ་དེར་བལྟས་པས་ཁོང་གཉིས་པོ་དེ་ཤི་ལ་ཁད་པ་རེ་བྱས་འདུག་པས། ངས་ལག་པ་ནས་བཟུང་སྟེ་ཙར་ཙར་བཏོན་པ་རྨིས། སང་ནངས་པར་ཁོང་གཉིས་པོ་སངས་དྲག་པ་ཅིག་བྱུང་གསུང་། གཞན་སེམས་ཤེས་པའི་མངོན་པར་ཤེས་པའང་རླབས་ཆེན་པོ་མངའ་སྟེ། ཐུགས་སྲས་སངས་རྒྱས་དབོན་སྟོན་ཆེན་པོ་གཞོན་པའི་དུས་སུ་ཕྲེང་བ་འདི་བྱིན་ན་རུང་སྟེ་སྙམ་ཙ་ན། ཕྲེང་བ་དེ་ཕྱག་ཏུ་བསྣམས་ནས་དགོས་པ་མེད་འདི་ཀུན་འདྲ་བ་མངོན་ཚན་ཆེ་བ་ཡིན་གསུང་། ཡང་དབོན་སྟོན་གྱི་ཞལ་ནས། དགེ་སྦྱོར་བྱེད་འདོད་མ་བྱུང་བའི་དུས་སུ་སྤྱན་སྔར་ཕྱིན་ཙ་ན། ཞལ་རས་ནག་ཐིང་མཛད་ནས་དགོས་པ་མེད་གསུང་། ནངས་ཅིག་དགེ་སྦྱོར་བྱེད་འདོད་ལྷན་གྱིས་བྱུང་བས་སྤྱན་སྔར་ཕྱིན་ཙ་ན། ད་ནངས་ཅི་ཙུག་བྱུང་གསུང་། འདི་ཙུག་གདའ་ཞུས་པས་དེ་ངས་བྱིན་གྱིས་བརླབས་པ་ཡིན། ད་ང་རྒས་ཆོས་འདི་ཡང་དགོས། འདི་ཡང་དགོས་པ་ཡིན་གསུང་། དེ་དག་ནི་གཞན་གྱི་སེམས་ཤེས་པའི་ཡོན་ཏན་ནོ། ། རྫུ་འཕྲུལ་གྱི་ཡུལ་ཤེས་པའི་ཡོན་ཏན་ནི། ཇོ་བཙུན་ཡེ་ཤེས་བླ་མས་ཆོས་ཞུ་སྙམ་ནས་གཟིམ་ཆུང་དུ་བྱོན་པས། སྒོ་ནང་ནས་བསྡམས་ནས་བཞུགས། དེར་ཐེམ་པ་ལ་སྙེས་ནས་བཞུགས་ཙ་ན། དགེ་བཤེས་ཆེན་པོ་ཕྱི་ངེས་ནས་བྱོན་བྱུང་གསུང་ངོ་། ། དེ་ལྟར་དགུང་ལོ་བརྒྱད་ཅུ་རྩ་གཉིས་ཀྱི་བར་དུ་དགོན་པ་རིན་ཆེན་སྒང་དུ་བཞུགས་ནས་ལམ་གྱི་རིམ་པ་འདིས་གདུལ་བྱ་མང་པོའི་དོན་མཛད་པ་ཡིན་ཏེ། རྩ་ཚིག་འདི་རྣམས་ཨ་ཏི་ཤས་དགོན་པ་བ་ལ་ཁྲིད་པ་དེ་ཀ་ཉིད་ཡིན། བཤད་པ་དང་ལུང་ཀུན་པོ་ཏོ་བ་ཆེན་པོའི་གཞི་ཆེ། རང་རེའི་ཡིག་སྣས་མ་ཆོག་པར་གཞན་ལ་བལྟས་ནས་བཤད་པ་ཚིག་ཁ་ཡར་རེ་བྱེད་དེ། ཚིལ་མང་ཁ་ན་མེད། མདའ་གཞུ་པང་པ་གང་ཡང་གཏད་ས་མདེའུ་རྩེ་གང་ལས་མེད་པ་ཡིན། འུ་ཅག་ཐེག་པ་ཆེན་པོ་བའི་དབང་དུ་བྱས་ན་གཏད་ས་བློ་སྣ་གཞན་དོན་དུ་འགྱུར་བ་ལ་བྱའོ་གསུང་། ཡང་བླ་མ་ཞལ་བཞུགས་པའི་དུས་སུ་ཐེ་ཚོམ་དང་སྒྲོ་འདོགས་ཐམས་ཅད་ཆོད་པར་བྱས་ནས་ཞལ་མི་བཞུགས་པའི་དུས་སུ་དོད་ཐུབ་པར་བྱས་ཏེ་དགེ་སྦྱོར་བྱེད་དགོས་པ་ཡིན་གསུང་། གཞན་ཡང་བླ་མ་གོང་མ་དེ་སྐུ་ཡལ་ནས་བླ་མ་དེའི་གདམས་ངག་མི་ཉམས་ཤིང་འཕེལ་བའི་དགེ་བཤེས་དང་གྲོགས་པོ་ལ་བརྟེན་པ་གལ་ཆེ། རང་གི་བླ་མའི་མཛད་སྤྱོད་དང་མི་མཐུན་པའི་བླ་མ་གཉིས་པ་མི་བཙལ། བཙལ་ན་བླ་མ་སྔ་མའི་བྱིན་རླབས་དུང་གི་རྡུལ་ཕྱིས་པ་བཞིན་དུ་འགྲོ་གསུང་། ཡང་བླ་མ་ཞལ་མི་བཞུགས་པའི་དུས་སུ་དགེ་འདུན་ཆོས་དང་མཐུན་པའི་གྲོགས་ལ་བརྟེན་ནས་བླ་མའི་མན་ངག་གི་རྒྱབ་ཏུ་མདོ་སྡེ་བལྟས་ན་ཡང་མི་ཉམས་པ་ཡིན་གསུང་། ཡང་རང་གི་བླ་མ་འདས་ནས་དེའི་གདམས་ངག་དང་རྗེས་སུ་བསྟན་པ་ཉམས་སུ་ལེན་པའི་བླ་མ་ཕྱི་མ་ཅིག་ལ་བརྟེན་ནའང་རང་མི་ཉམས་པ་ཡིན་བྱ་བ་ནན་ཏན་དང་བཅས་པ་གསུང་། ཡང་དབོན་སྟོན་ལ་གདན་འདྲེན་པ་གཉིས་བྱུང་གསུངས། དེའི་ནུབ་མོ་དབོན་སྟོན་གྱི་རྨི་ལམ་ན་ལྷའི་བུའི་མཆོད་པ་ཡིན་ཟེར་བ་ཚན་ཅིག་དང་མི་དཀར་པོ་གཙང་སིང་བ་གཅིག་བྱུང་། དགེ་བཤེས་དགྱེར་སྒོམ་ཆེན་པོ་ན་བཟའ་མཐང་རྐྱང་གཅིག་དང་དབུ་ཞྭ་ལྟེབ་མོ་དེ་གསོལ། ཕྱག་འཁར་དེ་བསྣམས་ནས་མི་དཀར་པོ་དེ་དང་གཉིས་བྱོན་ནས། དབོན་སྟོན་གྱི་དབུ་སྔས་སུ་ཕྱག་འཁར་དེ་བཙུགས་གདམས་ངག་ཁ་ཡར་ཞིག་གསུང་། མི་དཀར་པོ་དེ་དང་དགྱེར་སྒོམ་ཆེན་པོ་གཉིས་ཤར་ལྷོ་མཚམས་ཀྱི་ནམ་མཁའ་ལ་གཤེགས་པ་ཅིག་རྨིས། དེ་ནས་ཚ་བ་ཐོན་རྗེས་ལ་ཞལ་ཆེམས་ཁ་ཡར་ཞིག་གསུངས་པ་ན། དབོན་སྟོན་སྐུ་ན་གཞོན་པས་མཆི་མ་མ་ཐུབ། དེ་མིན་ན་དེའི་ཚེ་གསུང་ཁ་ཡར་འོང་བ་འདུག་པ་ལ་གསུང་། གཞན་ཡང་རྟེན་བྱིན་རླབས་ཅན་འདི་དང་འདི་ཡོད། ཀ་བ་ལི་དང་བེའུ་བུམ་ན་ཆོས་འདི་དང་འདི་ཡོད། མི་ལག་འགྲིམ་དུ་མ་གཞུག ། ང་ལ་དུས་རྟག་ཏུ་སྣང་དམིགས་ཀྱི་དངོས་པོ་འདི་འོད་དམ་འཇའི་རྣམ་པར་ཡོད་པ་ཡིན། ཁྱོད་ལའང་དེ་ལྟར་བྱུང་ན་ཆོས་བཤད་དང་རབ་གནས་དང་གཏོར་ཆེན་བཟླས་ལུང་ལ་སོགས་པ་རྣམས་གྱིས་གསུང་། ཁྱོད་རང་ཡང་ཆོས་དང་མཐུན་པར་གྱིས་ལ་སྡེ་དགོན་འདི་གཉིས་ཆོས་དང་མཐུན་པར་བྱུང་ན་སྐྱོངས། མ་མཐུན་ན་ཞོག་གསུང་བས་བྱ་སྟབས་བདེ་བར་བྱུང་། དེ་ནས་དགུང་ལོ་བརྒྱད་ཅུ་རྩ་གཉིས་པ་ 1171 ལྕགས་མོ་ཡོས་ཀྱི་ཉེར་དགུ་ལ་རིན་ཆེན་སྒང་དུ་མྱ་ངན་ལས་འདའ་བའི་མཛད་པ་བསྟན་ཏེ། སྐྱིལ་ཀྲུང་ལམ་གྱིས་མཛད་ནས། ཕྱག་ས་གནོན་མཉམ་གཞག་མཛད། དབུའི་སྟེང་ན་ཡར་རླང་པ་བུམ་པའི་ཁ་ཆངས་འདྲ་བ་ཅིག་བྱུང་། འུ་ཅག་སྣང་བ་མ་དག་པས་དེ་ལས་མ་མཐོང་གཞན་དུ་ན་འོད་དུ་འོང་བ་ཡིན་གསུང་། དེ་ནས་གདུལ་བྱ་རྣམས་ཀྱིས་སྐུ་གདུང་ལ་མཆོད་པ་དང་སྨོན་ལམ་རྒྱ་ཆེན་པོ་མཛད་དོ། ། བདག་ཉིད་ཆེན་པོ་འདི་ལ་སློབ་མ་བརྒྱད་བརྒྱ་ཙམ་འཚོགས་པའི་ནང་ནས་སློབ་མ་ཆེ་བ་ནི། ཐུགས་ཀྱི་སྲས་འགྲོ་མགོན་སངས་རྒྱས་དབོན་སྟོན་ཡིན་ལ་གཞན་ཡང་བསྟན་འཛིན་གྱི་སྐྱེས་བུ་དམ་པ་མང་དུ་བྱོན་ནོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་དགྱེར་སྒོམ་པ་ཆེན་པོ་ལ་གསོལ་བ་འདེབས་ཤིང་། བཤེས་གཉེན་ཆེན་པོ་འདིའི་རྣམ་ཐར་ལྟར་སྐྱེས་བུ་གསུམ་གྱི་ལམ་གྱི་རིམ་པ་ལ་བློ་སྦྱངས་ནས་མྱོང་བ་བཅོས་མིན་ཐོན་པར་བྱ་ཞིང་། ཐ་ན་སྨོན་ལམ་གྱི་ཡུལ་དུ་བྱས་ཏེ་ཡང་བློ་སྦྱང་བར་བྱའོ། ། ། །
༈ རྨད་བྱུང་ཡོན་ཏན་མཛོད་འཛིན་སངས་རྒྱས་དབོན། ། ཞེས་བསྔགས་པ། དགེ་བའི་བཤེས་གཉེན་སངས་རྒྱས་དབོན་སྟོན་རིན་པོ་ཆེ་ནི། བསྐལ་པ་དཔག་ཏུ་མེད་པའི་སྔ་རོལ་ནས་ཐེག་པ་ཆེན་པོའི་ལམ་ལ་སྦྱངས་ཏེ་ཕྱིར་མི་ལྡོག་པའི་གདེང་ཐོབ་ནས་སྙིགས་མའི་འགྲོ་བ་ཉམ་ཐག་རྣམས་ལ་ལྷག་པར་བརྩེ་བ་ཐུགས་རྗེ་ཆེན་པོ་གཞན་དབང་དུ་གྱུར་པས་ཉེར་ལེན་མཛད་དེ། བྲམ་ཟེ་དགྱེར་ལྷ་སྣང་གི་རིགས་སུ་ཡབ་ཡོན་བདག་བུ་མོ་སྟག་དང་། ཡུམ་ཤ་མོ་མདོག་གི་སྲས་སུ་ 1138 ས་རྟ་ལ་སྐུ་འཁྲུངས། དེ་ཡང་ཡུམ་མནལ་ཐུམ་པ་ཅིག་གི་སྐབས་སུ་བལྟམས་ཟིན་འདུག་པ་མིན་པ་མ་ཚོར་བར་སྣང་། དེའི་ནུབ་མོ་ཡབ་ཀྱི་རྨི་ལམ་ན་ཉི་མ་ཆེན་པོ་ཞིག་ཤར་བའི་སྣང་བས་འཛམ་བུའི་གླིང་ཁྱབ་པ་ཅིག་བྱུང་། ངའི་བུ་འདི་བསོད་ནམས་ཅན་ཞིག་འོང་བ་འདྲ་གསུང་། དེ་ནས་ཁུ་བོ་དགེ་བཤེས་དགྱེར་སྒོམ་པ་ཆེན་པོའི་ཞལ་ནས། ཡོན་བདག་གི་བྱིས་པ་དེ་ངའི་དྲུང་དུ་སྐྱོལ། དེར་བཞག་ཏུ་ཕངས། བཙུན་པ་ཅིག་བྱེད་དགོས་གསུང་། བྱིས་པའི་དུས་རྩེད་མོའི་སར་ཕ་བོང་ལ་ཞབས་རྗེས་བྱོན། དེ་ནས་རིན་ཆེན་སྒང་དུ་རང་གི་ཁུ་བོ་དགེ་བཤེས་དགྱེར་སྒོམ་པ་ཆེན་པོའི་སྤྱན་སྔར་བྱོན་པས་དགེ་བཤེས་ཆེན་པོའི་ཞལ་ནས། འཁོར་རྣམས་ལ་ཁྱེད་ཀུན་གྱིས་ཡོན་བདག་གི་བྱིས་པ་འདི་ལ་གུས་པར་གྱིས་ཤིག ། འདི་ངོ་མཚར་ཅན་ཞིག་ཡིན་ནོ་གསུངས་ནས་ཐུགས་ལ་བཏགས་པར་མཛད། ཡང་ཞལ་ནས། ཁྱོད་ཀྱི་ཕ་དེ་ང་ལ་དྲིན་ཆེ་བས་བྱམས་པར་བྱས་པ་ཡིན་ནོ་གསུང་། དེ་ནས་དགུང་ལོ་བཅུ་བདུན་བཞེས་དུས་དགེ་བཤེས་འབེན་ཐང་པས་མཁན་པོ་དང་། སློབ་དཔོན་ལྟེའུ་སྒོམ་གྱིས་སློབ་དཔོན་མཛད་ནས་རབ་ཏུ་བྱུང་། མཚན་གཞོན་ནུ་འབྱུང་གནས་སུ་བཏགས། མཁན་པོའི་ཞལ་ནས། འདི་ལ་བསོད་ནམས་འུར་ཐག་ཆད་པ་ཅིག་རེ་བ་ཡིན། མདང་རྨི་ལམ་དུ་ཡིད་བཞིན་གྱི་ནོར་བུ་ཡིན་ཟེར་བ་ཅིག་ལ་ཕྱི་བདར་བྱས་པ་རྨིས་གསུང་། སློབ་དཔོན་སྒོམ་པའི་ཞལ་ནས་ཉི་ཟླ་གཉིས་དུས་གཅིག་ལ་ཤར་པ་རྨིས་གསུང་། དགེ་བའི་བཤེས་གཉེན་དགྱེར་སྒོམ་པ་ཆེན་པོ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་བྱང་ཆུབ་ལམ་གྱི་རིམ་པའི་མྱོང་ཁྲིད་གསན་ཏེ། དགེ་ཚུལ་གྱི་རིང་ལ་ལམ་རིམ་གྱི་ཁྲིད་དང་ཇོ་བོའི་སྒྲུབ་ཡིག་ཚར་པར་མཛད། ལོ་ཉི་ཤུ་བཞེས་པ་ན་དགེ་བཤེས་དགྱེར་སྒོམ་གྱི་ཞལ་ནས་ཁྱོད་དགེ་སློང་ཞིག་བྱེད་དགོས་གསུངས་ནས། དགེ་བཤེས་ཉང་བྲན་གྱིས་མཁན་པོ་དང་། དགེ་བཤེས་ཆོས་དང་། དགེ་བཤེས་ཁ་ཆེས་ལས་སློབ་དང་གསང་སྟོན་མཛད་ནས་བསྙེན་པར་རྫོགས་འདུལ་བའི་བསླབ་བྱ་རྣམས་ལ་ཚུལ་བཞིན་དུ་བསླབས། དབྱར་དགུན་གསུམ་ཙམ་མཁན་པོའི་དྲུང་དུ་བཞུགས་ཏེ་སྤྱོད་ཕྱོགས་རྣམས་གསན་ནས་མཁྱེན་པར་མཛད། འབེན་ཐང་པ་ལ་འདུལ་བའི་བསླབ་བྱ་གསན་པར་མཛད་དོ། ། དེ་ནས་དགེ་བཤེས་ཀ་བ་དར་སེང་གི་ཐད་དུ་འདུལ་བའི་སློབ་གཉེར་རྣམས་ལོ་གསུམ་ལ་ཚར་བར་མཛད་དེ་འདུལ་བ་ལ་ཤིན་ཏུ་མཁས་པར་གྱུར་ནས་སྐལ་བ་དང་ལྡན་པ་མང་པོ་ལ་ཀ་རི་ཀའི་སྟེང་ནས་དགེ་ཚུལ་གྱི་བསླབ་བྱ་དང་འདུལ་བ་མདོ་རྩ་བ་རྒྱ་ཆེར་བཤད་པར་མཛད་དོ། ། དེ་ནས་དགེ་བའི་བཤེས་གཉེན་དགྱེར་སྒོམ་པ་ཆེན་པོ་སྐུ་ན་བྱོན་པས་ཡར་བྱོན་ཏེ་བྲང་ཁང་ཞིག་བཟུང་ནས་ཐུགས་དམ་རྩེ་གཅིག་མཛད་ཅིང་སྒྲུབ་པས་བླ་མ་མཉེས་པར་མཛད། ལན་ཅིག་དགེ་བཤེས་དགྱེར་སྒོམ་པ་ཆེན་པོ་ལ་ཐུགས་ལ་གདགས་པར་ཞུ་ཞུས་པས། ངས་དུས་རྟག་ཏུ་རྩར་བཞག་པ་འདི་ཐུགས་ལ་བཏགས་པ་ཡིན། དགེ་བཤེས་ཚན་ཅིག་གིས་ཉེ་དུ་དང་འབྲེལ་པ་ཕྱོགས་སུ་ཉེར་མི་སྟེར་བར་མཛད་པ་ཡིན་གསུང་། གཙང་པའི་གྲྭ་པ་ཀུན་གྱིས་དགེ་བཤེས་དགྱེར་སྒོམ་ཆེན་པོ་ལ་ངོ་ཆེན་ཞུས་ནས་ང་ལ་འདུལ་བ་འཆད་དགོས་གསུང་བ་ལ་ངན་བུ་ལ་བཀའ་གདམས་ར་རི་ཞིག་འོང་བར་འདུག་ན་ཆོས་བཤད་མི་བགྱི། དེ་མི་འོང་ན་འདུལ་བ་བཤད་པས་རང་ཉིད་མཁས་སུའང་འགྲོ་བས་བགྱི་ཞུས་པས་ཅང་མི་གསུང་བས་ཐུགས་ལ་བཏགས་སྙམ་པ་བྱུང་གསུང་། དེ་ནི་བཀའ་གདམས་གོང་མའི་རྣམ་ཐར་ཤ་གཟུག་རང་ཟའི་དཔེ་ལྟར་ཐོག་མར་དབེན་པའི་གནས་སུ་རང་རྒྱུད་བཏུལ་ནས་རང་ཉིད་མི་ཉམས་པའི་གདེང་ཐོབ་པ་ན་གདུལ་བྱ་གཞན་ལ་ཆོས་འཆད་སོགས་གཞན་དོན་མཛད་ཅེས་པའི་དོན་ནོ། ། དེ་ནས་དགྱེར་སྒོམ་པ་ཆེན་པོ་སྐུ་ན་མཐོ་བར་བྱོན་ཞིང་བླ་མའི་ཞབས་ཏོག་བྱེད་པ་ཉིད་རང་གི་ཚོགས་རྫོགས་པའི་ཐབས་མཆོག་ཡིན་པར་དགོངས་ནས་ཕྱིས་གཟིམ་ཆུང་དུ་བཞུགས་ནས་གཟིམ་གཡོག་མཛད། ཆོས་ཞུས་པ་ལས་ཀྱང་གླེང་སླང་ཞུས་པ་མང་གསུང་། སྤྲུལ་པའི་སྐྱེས་མཆོག་དབོན་སྟོན་རིན་པོ་ཆེ་འདི་ནི་སྐུ་ཚེ་སྔོན་ནས་སྦྱངས་པའི་མཐུ་ཅན་ཡིན་པར་མ་ཟད། སྐུ་ཚེ་འདིར་ཡང་དགེ་བའི་བཤེས་གཉེན་རྣམ་པ་ཀུན་ཏུ་མཉེས་པར་བྱས་ནས་བྱང་ཆུབ་ལམ་གྱི་རིམ་པ་ལ་ཉམས་ལེན་སྙིང་པོར་མཛད་པས་ལམ་གྱི་རིམ་པའི་རྟོགས་པ་རྣམས་ཕུལ་དུ་ཕྱིན་པར་ཐོབ་པ་ཞིག་སྟེ། སྐྱེས་བུ་ཆུང་འབྲིང་གི་ལམ་ལ་སྦྱངས་ནས་ངེས་འབྱུང་གི་བསམ་པ་རྣམ་པར་དག་པ་སྐྱེས་ཏེ་ཚུལ་ཁྲིམས་ཀྱི་བསླབ་པ་ལ་བསྡམ་པར་བྱ་བའི་ཉེས་བྱས་ཕྲ་མོས་ཀྱང་མ་གོས་པས་བདེན་པའི་ཚིག་གྲུབ་པ་ཞིག་གོ ། བཤེས་གཉེན་བསྟེན་ཚུལ་ལ་མྱོང་བ་ཕུལ་ཕྱིན་ཐོན་ཏེ་བླ་མ་ལ་དུས་རྟག་ཏུ་སངས་རྒྱས་ཀྱི་འདུ་ཤེས་མངའ་སྟེ། དགེ་བཤེས་དགྱེར་སྒོམ་པ་ཆེན་པོ་ལོགས་སུ་བཞག་པའི་ཡི་དམ་གྱི་ལྷ་གཞན་མེད་གསུང་། བླ་མ་སངས་རྒྱས་སུ་མཐོང་བའི་མོས་གུས་བཅོས་མིན་སྐྱེས་པས་བླ་མའི་སྐུའི་བྱིན་རླབས་ཞུགས་པས་ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས་ཏེ། རིན་ཆེན་སྒང་དུ་འཇུག་པ་སེམས་བསྐྱེད་ཞུས་པའི་ཐོ་རངས་ཀྱི་དུས་སུ་འོད་མེ་ལོང་ཙམ་ཞིག་གི་ནང་དུ་བླ་མ་བརྒྱ་རྩ་བཅུ་གཉིས་ལ་བརྟེན་ནས་བྱང་ཆུབ་སེམས་དཔའི་བསླབ་པ་ཡོངས་སུ་རྫོགས་པར་མཛད་པ་ཡིན་གསུང་། འཕྲང་འོག་ཏུ་དབང་ཞུས་པའི་དུས་སུ་དགེ་བཤེས་དགྱེར་སྒོམ་པ་ཆེན་པོའི་བྱང་ཁོག་ནང་ན་གསང་བ་འདུས་པའི་ལྷ་བཅུ་དགུ་མའི་གཙོ་བོ་དགེ་བཤེས་དགྱེར་སྒོམ་པ་ཉིད་ཀྱིས་མཛད་ནས་དབང་བཞི་རྫོགས་པར་བསྐུར་བས་དབང་བཞི་པའི་དོན་ཐུགས་རྒྱུད་ལ་འཁྲུངས་པ་ཡིན་གསུང་། ནུབ་ཅིག་གི་རྨི་ལམ་ན་སློབ་དཔོན་ལ་བ་པ་བྱོན་ནས་གསང་སྔགས་ཀྱི་དགོངས་པ་མང་དུ་གསུངས། དེ་དགེ་བཤེས་དགྱེར་སྒོམ་པ་ལ་ཞུས་པས། ཐུགས་དགྱེས་པའི་མཚན་མ་མཛད་ལོ་བཅོ་བརྒྱད་ཀྱི་བར་དུ་དགེ་བཤེས་དགྱེར་སྒོམ་པ་ཆེན་པོ་བསྟེན་ནས་ཆོས་ལ་ནན་ཆགས་སུ་བགྱིས་ཏེ་སྒྲུབ་པའི་མཆོད་པས་བླ་མ་མཉེས་པར་མཛད་དོ། ། དགེ་བཤེས་དགྱེར་སྒོམ་པ་ཆེན་པོ་གཤེགས་པའི་སྤུར་ལ་སངས་རྒྱས་བྱང་སེམས་དཔག་ཏུ་མེད་པས་མཆོད་པ་མཛད་པ་ཞལ་གཟིགས། ཐུགས་ངན་མཛད་པས་དགེ་བཤེས་དགྱེར་སྒོམ་པ་ཉིད་དངོས་སུ་བྱོན་ནས་ང་རྟག་ཏུ་དྲན་པར་གྱིས་གསུང་བས་ཐུགས་ངན་སངས། འུ་ཅག་ལ་ནི་ནམ་འདོད་ཀྱིས་དགེ་བཤེས་དགྱེར་སྒོམ་པ་ཆེན་པོ་དང་མཇལ་ནས་ལུང་ཐམས་ཅད་ཞུ་བ་ཡིན་གསུང་། ལན་ཅིག་ཙ་ན་འུ་ཅག་ལ་ཚེ་རིང་པོ་འོང་ངེས་མེད། གདན་ས་འདི་དགེ་བཤེས་ལྷོ་པ་ལ་གཏད་ལ་རི་ཁྲོད་ཅིག་བྱ་དགོངས་ཙ་ན་དགེ་བཤེས་དགྱེར་སྒོམ་པས་མི་དཀར་པོ་གཅིག་ཁྲིད་ནས། འདི་ལ་གཞན་མི་འཚལ་བར་གདའི། ཚེ་རིང་བ་ཅིག་མཛད་པར་ཞུ་གསུང་བ་ཅིག་རྨིས། སང་གསོལ་བ་ཅིག་བཏབ་པས། དགེ་བཤེས་དགྱེར་སྒོམ་པ་རྨི་ལམ་དུ་བྱོན་ནས་ཇོ་བོ་ཐུགས་རྗེ་ཆེན་པོས་སྐུ་ཚེ་རིང་བར་བྱིན་གྱིས་བརླབས་པ་ཡིན་ནོ་གསུང་། གདུང་ཁང་གི་རབ་གནས་མཛད་པའི་ཚེ། སངས་རྒྱས་བྱང་སེམས་ཐམས་ཅད་ཀྱི་ཐུགས་ཀ་ནས་འོད་ཟེར་དཀར་ཤ་ར་ར་བྱུང་བའི་སྣང་བ་བྱུང་གསུང་། བྱ་སའི་རབ་གནས་ཀྱི་སྟ་གོན་གྱི་དུས་སུ་སློབ་དཔོན་ནཱ་བ་བོ་དྷི་དང་མཇལ། སློབ་དཔོན་ནཱ་ག་བོ་དྷི་འདི་ངའི་རྩ་བའི་བླ་མ་ཅིག་ཡིན། གསོལ་བ་བཏབ་ཙ་ན་མི་མཇལ་བ་བྱེད་མ་མྱོང་གསུང་། རིན་ཆེན་སྒང་ན་བཞུགས་ཙ་ན་རྨི་ལམ་དུ་ནགས་གསེབ་ཅིག་ན་བྲག་ཕུག་ལེགས་པ་ཅིག་འདུག ། དེའི་ནང་དུ་བྱོན་ཙ་ན། ཇོ་བོ་ནཱ་རོ་པ་བདུད་རྩི་ཀ་པཱ་ལ་གང་ཐོགས་ནས་འདུག ། ཁྱེད་འདི་འདོད་དམ་གསུང་། ཞུ་འཚལ་ཞུས་པས། བདུད་རྩི་དེ་ནས་གནང་། དབང་དང་བྱིན་རླབས་ཀྱང་མཛད་གསུང་། སྐམ་ན་བཞུགས་པའི་ཚེ་དབོན་སྟོན་ཆེན་པོ་རི་ལ་བཞུད། སློབ་དཔོན་བཟང་མོ་བས་ཕྱིར་བྱོན་ཙ་ན་བྲག་སྒང་ཞིག་ན་བཞུགས་འདུག ། དབོན་སྟོན་གྱི་ཞལ་ནས། དེ་ན་མར་རྣལ་འབྱོར་པ་བཟའ་མི་གཉིས་སོང་བ་ཡིན་ཏེ་ཁྱེད་དང་ཨེ་ཕྲད་གསུང་། མ་ཕྲད་ཞུས་པས་འོ་ན་དེ་ཐ་མལ་པར་མི་འདུག་གསུང་། ཅི་འདྲ་ཞིག་གདའ་ཞུས་པས་རས་ཀྱི་ཨང་ཀ་རག་རེ་གྱོན། རྣལ་འབྱོར་མ་དེས་ཁོག་མ་ཅིག་ཁུར་ནས་འདུག ། ང་ལ་རང་བཞིན་མེད་པའི་ངང་ལས་རྩ་རླུང་གི་འདུ་འཕྲོད་འདྲ་བ་སྒོམས་དང་བདེ་སྟོང་གི་ཉམས་འཕེལ་བ་ཡིན་གསུང་། བྲག་སྔོན་ལ་སྐུ་མཚམས་མཛད་པའི་དུས་སུ་ཀླུ་སྒྲུབ་ཡབ་སྲས་བྱོན་ནས་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་པ་ཉིད་ལའོ་བྱ་བ་དེ་ལ་བགྲོ་གླེང་མཛད་པ་ཅིག་གཟིགས། ར་སྒྲེང་དུ་བྱོན་པའི་ཚེ་ཇོ་བོའི་ཕྱག་དཔེ་འདི་རྣམས་གཟིགས་དགོངས་ཙ་ན་ཨ་ཏི་ཤ་རྨི་ལམ་དུ་བྱོན་ནས་འདི་འདི་སྐད་བྱ་བ་ཡིན་གསུངས་ནས་ཕྱག་དཔེ་རྣམས་ཅག་གེ་བསྟན། ཡང་དགའ་ལྡན་དུ་མགོན་པོ་བྱམས་པ་དང་མཇལ་ཆོས་ཀྱང་གསན་གསུང་། བཟང་མོའི་དགོན་པ་རྨང་འདིང་ཙ་ན་བྱང་ཆུབ་ཆེན་པོ་གཙོ་འཁོར་གསུམ་ཞལ་གཟིགས། གཞན་ཡང་ཇོ་བོ་མི་གཡོ་བ་དང་སྒྲོལ་མ་དང་གཤིན་རྗེ་གཤེད་དང་རྟ་མགྲིན་ལ་སོགས་པའི་ཞལ་གཟིགས། བཟང་མོར་དེ་དུས་དཔལ་ལྷ་མོ་དཔོན་གཡོག་གསུམ་ཞལ་ཇི་ལྟར་གཟིགས་པ་བཞིན་གཟིམ་ཆུང་བྲག་ལོགས་ལ་རང་བྱུང་དུ་བྱུང་། ཡང་དེར་ནངས་གཅིག་ཇོ་མོ་སྒྲོལ་མ་ལྷ་མོ་དབྱངས་ཅན་མ་ཀུ་རུ་ཀུལླེ་གསུམ་གྱིས་དབོན་སྟོན་ཆེན་པོ་ལ་བསྙེན་བཀུར་མཛད་ནས་ཀུ་རུ་ཀུལླེས་གཏམ་བཏང་བས་རྡུགས། དབྱངས་ཅན་མས་ཐལ་མོ་བརྡབས། སྒྲོལ་མས་ཞལ་བཀབ་གསུང་། ཡང་རྨི་ལམ་ན། རྒྱལ་པོ་ཨིནྡྲ་བྷུ་དྷིའི་ཞབས་ལ་རྩྭ་ཨ་བ་གཉིས་སྐྱེས་ནས་འདུག་པ་ལ་གཅིག་གསོལ་བས་སྔར་མ་མྱོང་བའི་རོ་བཟང་པོ་ཞིག་བྱུང་། འདི་ཅི་ལགས་ཞུས་པས། བདུད་རྩི་ཟིལ་མངར་བྱ་བ་དངོས་གྲུབ་ཀྱི་ཟས་ཡིན་གསུང་བས་འོ་ན་གཅིག་པུས་ཟ་བ་ཕངས། སེམས་ཅན་ཐམས་ཅད་ལ་སྦྱིན་དགོས་སྙམ་ནས་རྩྭ་ཨ་བ་གཅིག་བཞག་གསུང་། མགོན་པོ་གྲི་གུག་དང་བེང་སོགས་ཆོས་སྐྱོང་མང་པོ་ཞིག་བྱིས་པའི་དུས་རང་ནས་ཞལ་གཟིགས་པ་ཡིན་གསུང་ངོ་། ། བླ་མ་ལ་སངས་རྒྱས་ཀྱི་འདུ་ཤེས་བཅོས་མ་མིན་པ་འཁྲུངས་པས་བླ་མའི་གསུང་གི་བྱིན་རླབས་ཞུགས་ཏེ་བཀའ་བསྟན་བཅོས་ཐམས་ཅད་ལ་ཐོགས་པ་མེད་པའི་སྤོབས་པ་མངའ། ནུབ་ཅིག་རྨི་ལམ་ན་དགེ་བཤེས་དགྱེར་སྒོམ་པ་ཆེན་པོ་བྱོན་ནས་སྟོན་པས་ཆོས་ཁྲི་འདིའི་སྟེང་ནས་ཆོས་གསུང་བར་ཞུ་གསུང་། དེ་ནས་ཁྲི་ཁ་དེ་ནས་ཆོས་གསུངས་པས་ཚོགས་པ་རྣམས་ཀྱིས་འོར་ཆེ་བཏབ། དགེ་བཤེས་དགྱེར་སྒོམ་པ་ཆེན་པོ་བཞད་ཀྱིན་འདུག་སྟེ་ཆོས་བཤད་བྱ་བའི་གནང་བ་བྱིན་པ་འདྲ་གསུང་། དེ་ནས་གཉེར་དུ་ཆོས་འགོ་མ་གསུང་བའི་དུས་སུ་དབོན་སྟོན་པའི་ལྟེ་བའི་ཁུང་བུ་ནས་ཉི་མ་ཆེན་པོ་ཅིག་ཤར་བས། འཛམ་བུའི་གླིང་གི་སེམས་ཅན་རྣམས་ཀྱི་རྒྱུད་དྲོས་པའི་སྣང་བ་བྱུང་། དེ་ནས་སེམས་ཅན་ལ་ཕན་ནམ་བསམ་ནས་ཆོས་བཤད་བྱས་པ་ཡིན་གསུང་། གཉེར་དུ་ཚོགས་ཆོས་ཤིག་གསུང་ཙ་ན། ཚིགས་བཅད་གཅིག་ལ་ཐོགས་པ་ཅིག་བྱུང་བས། ཆོས་ཐུན་དེ་ལད་སྙམ་བྱུང་ཙ་ན། ཆོས་ཐོན་ནས་གཟིམ་ཆུང་དུ་བྱོན་པས། གསང་བ་འདུས་པའི་དཀྱིལ་འཁོར་གྱི་གཙོ་བོ་དགེ་བཤེས་དགྱེར་སྒོམ་པ་ཆེན་པོས་མཛད། ཞལ་འཛུམ་མཛད་ནས་ཆོས་བཤད་བྱ་བ་ཡང་དཀའ་མོ་ལགས་ང་ལ་གསོལ་བ་ཐོབ་གསུང་། དེ་ནས་སྡེ་སྣོད་འཛིན་པ་བརྒྱས་བསྐོར་ཀྱང་ཉམ་ང་བ་སྤུ་ཙམ་ཡང་མེད། ཐམས་ཅད་ལ་རྡོ་རུས་ཐུག་པར་བྱས་པ་ཡིན། ཡ་གི་གསང་བ་འདུས་པ་ནས་ཀཱ་རི་ཀ་ཡན་ཆད་ལ་ཁུག་པར་ལུས་པ་གཅིག་ཀྱང་མེད། ད་རེས་འདི་འདྲ་ཞིག་བཤད་དེ་ཉན་ཐོས་ཀྱི་སའམ། རང་སངས་རྒྱས་ཀྱི་སའམ། རྟག་ཆད་ཀྱི་མཐར་ལྷུང་སྙམ་པ་ནི་གཅིག་ཀྱང་མེད། ཐམས་ཅད་ལ་བླ་ན་མེད་པའི་བྱང་ཆུབ་ཀྱི་ལམ་ཚང་ལ་མ་ནོར་བ་བཤད་དམ་སེམས་པ་ཡིན་གསུང་། བླ་མའི་ཐུགས་ཀྱི་བྱིན་རླབས་ཐོབ་པས་སྤྱིར་ཏིང་ངེ་འཛིན་གྱི་སྒོ་དུ་མ་ལ་མངའ་བརྙེས། ཁྱད་པར་དུ་སྒྱུ་མ་ལྟ་བུའི་ཏིང་ངེ་འཛིན་ཐུགས་ལ་འཁྲུངས་ཤིང་། ལྷག་པའི་བསམ་པ་རྣམ་པར་དག་པས་རང་བས་གཞན་གཅེས་པར་འཛིན་པ་སྒྱུ་མའི་རྣམ་པར་ཐར་པས་འགྲོ་བའི་དོན་མཛད་པ་ཡིན་ཏེ། ཞལ་ནས་ཀྱང་། ཏིང་འཛིན་ནང་ནས་སྒྱུ་མ་ལྟ་བུ་དང་། ། སྙིང་རྗེའི་ནང་ནས་བདག་གཞན་བརྗེ་བ་སྟེ། ། འགྲོ་བའི་ནང་དུ་རང་འབྱུང་སངས་རྒྱས་འགྱུར། ། ཞེས་གསུངས། ལྷག་མཐོང་གི་དམིགས་སྐོར་ལ་མྱོང་བ་ཐོན་ཏེ། རྟག་ཆད་ཀྱི་མཐའ་གཉིས་དང་བྲལ་བའི་དབུ་མ་ཆེན་པོ་ཐུགས་སུ་ཆུད་པ་ཡིན་ཏེ། ནུབ་ཅིག་རྨི་ལམ་ན་གྱང་རོ་སྟོང་པ་འདྲ་བ་ཅིག་ཏུ་བྱོན་པས། གཅིག་ན་རེ། འདི་འཕགས་པ་ཀླུ་སྒྲུབ་ཀྱི་རེ་ཤུལ་ཡིན། ཁྱོད་ལ་འབུལ་ཟེར་བ་ཅིག་བྱུང་སྟེ། ཀླུ་སྒྲུབ་ཀྱི་ལྟ་བ་དེ་ཇི་ལྟ་བ་བཞིན་དུ་རྟོགས་སམ་སེམས། བདེན་གཉིས་ཀྱི་དགོངས་པ་དེ་ལོན་ནམ་སེམས་གསུང་། སྟོང་པ་རྟེན་འབྲེལ་དུ་ཤར་ཏེ་རྒྱུ་འབྲས་ཀྱི་ཤེས་བྱ་མ་ལུས་པ་མཁྱེན་པ་ཡིན་ཏེ། ཞལ་ནས། རྒྱུ་འབྲས་མ་ལུས་པ་མཁྱེན་པ་སངས་རྒྱས་ཉག་གཅིག་ཡིན། འུ་ཅག་གིས་ཀྱང་རྒྱུ་འབྲས་ཐམས་ཅད་འོལ་ལེ་ཤེས་པར་འདུག་སྟེ། མེ་ལོང་གི་ངོས་ལ་ཤར་བ་བཞིན་སྣང་། བསྙོན་ཏོལ་གཟུགས་པ་གང་ནའང་མེད་གསུངས། རྒྱལ་སྲས་ཀྱི་སྤྱོད་པ་ལ་སློབ་པ་ལ་གདེང་ཐོབ་སྟེ་སེམས་ཅན་རྣམས་ལ་མ་བུ་གཅིག་པ་ལ་བརྩེ་བ་བཞིན་དུ་བྱམས་པར་མཛད། ཁྱད་པར་མི་ཆེན་འོག་ཏུ་ལྷུང་བའམ། འཚེ་ཞིང་སྡིག་པ་གསོག་པ་ལ་ཤིན་ཏུ་བྱམས་ཏེ། གཙང་ཐོག་གི་གནས་བརྟན་བཙུན་ཆུང་ཤད་རིན་ཆེན་སྒང་པ་ལ་སྡིག་བསགས་ན་བཟའ་འོང་ཟེར་ངས་སྡིག་གསོག་པ་ལ་ཟས་ནོར་བྱིན་ཏེ་མི་འགྱོད་གསུང་། ཏིང་ངེ་འཛིན་ཤིན་ཏུ་བརྟན་པའི་སྟོབས་ཀྱིས་རྫུ་འཕྲུལ་གྱི་མངོན་ཤེས་ཐོབ་སྟེ། གྱེ་རེ་སྒོམ་ཤེ་དང་། དབོན་སྟོན་ཆེན་པོ་གཉིས་འགྲོགས་ནས་གཟིམ་ཆུང་དུ་བྱོན་ཙ་ན་ལྡེ་མིག་མེད་པས་སྒོམ་ཤེས་ལྡེ་མིག་བླངས་ནས་འོང་ཙ་ན་ནང་ན་ཕེབས་འདུག ། ཡང་ཉེ་གནས་དར་མ་འོད་ཀྱིས་སྐས་ཐོག་ཁར་དྲངས་ནས་ཉི་མ་ལ་བསྡད་ཙ་ན་དབོན་སྟོན་རྒྱ་མཐོངས་ལ་བྱོན་ནས། ཨ་ན་མ་བག་མེད་པའི་སྤྱོད་པ་བྱས་མི་ལ་མ་བཤད་གསུང་། ཡང་རི་ལ་བྱོན་པ་ཅིག་ལ་དབོན་སྟོན་ཤུལ་ན་བཞུགས། འཁོར་རྣམས་ཀྱིས་མར་སྔོན་ལ་འོངས་པས་ལམ་ཁར་ཆར་པ་བཏང་ཙ་ན་དྲིལ་བུ་སིལ་གྱིས་བྱུང་བས་དབོན་སྟོན་གཟིམ་ཆུང་ན་བཞུགས་འདུག ། ལན་ཅིག་ཀ་གཉིས་མའི་སྐས་དེ་མེད་པ་ཅིག་ལ་རྒྱ་མཐོངས་ཀྱི་ནམ་མཁའ་ལ་སྐས་ལ་གཤེགས་པ་བཞིན་དུ་ཕེབས་པ་རྒྱལ་ཡེས་མཐོང་། དེ་ལ་སོགས་པ་ས་རྡོ་རི་བྲག་ལ་ཐོགས་རྡུགས་མི་མངའོ། ། ལྷའི་རྣ་བའི་མངོན་ཤེས་ཐོབ་སྟེ། ངས་ཆེད་དུ་གཏད་ན་འཛམ་བུ་གླིང་གི་ཆེ་བ་འབྲུག་གི་སྒྲ་ནས་ཆུང་བ་ཤིག་སྲོ་ཡན་ཆད་ཀྱི་སྒྲ་ཐོས་པར་འདུག་གསུང་། གཞན་སེམས་ཤེས་པའི་མངོན་ཤེས་ཐོབ་སྟེ་གཞན་གྱི་ཡིད་ལ་དྲན་པ་རྣམས་ཅར་ཕོག་ཏུ་མཁྱེན་ཏེ། བྱ་སར་བཞུགས་པའི་ནུབ་མོ་ཞིག་ད་ལྟ་རིན་ཆེན་སྒང་ན་ལྷོ་པའི་སྒོམ་ཆེན་གསུམ་འུ་ཅག་ལ་ཚོད་འཛིན་བྱེད་ཅིང་མ་མཉེས་པར་འདུག་གསུང་། དེ་རྟིང་དུ་སྒོམ་ཆེན་གསུམ་པོས་ཐོས་པས་འཇིགས་ཆུམ་གྱིས་སོང་ཟེར། ལྷའི་མིག་གི་མངོན་ཤེས་ཐོབ་སྟེ། ངས་མཉམ་པར་བཞག་སྟེ་བལྟས་ན་འཛམ་བུ་གླིང་གི་གཟུགས་ཅན་གྱི་དངོས་པོ་རྣམས་ལ་མི་མཐོང་བ་མེད། ཁྲི་ཁ་ནས་ཤོད་དུ་བལྟ་བ་དང་ཁྱད་མེད་གསུང་། སྒོམ་པ་ཇོ་སྲས་པས་སློབ་དཔོན་གྱིས་བརྟག་པ་མཛད་པ་འདི་ཇི་ལྟ་བུ་ཞིག་གིས་གཟིགས་པ་ལགས་ཞུས་པས། འདི་ནས་ཤར་ཕྱོགས་ཀྱི་འཇིག་རྟེན་གྱི་ཁམས་བལྟ་བར་བྱའོ་སྙམ་དུ་འཕེན་པ་བཏང་ནས་མཉམ་པར་བཞག་པས་ཏིང་ངེ་འཛིན་གསལ་བ་ལ་བརྟེན་ནས་མེ་ལོང་ནང་གི་གཟུགས་བརྙན་ལ་བལྟ་བའི་ཚོད་ཙམ་དུ་མཐོང་བ་ཡིན་གསུང་། སྔོན་གནས་རྗེས་དྲན་གྱི་མངོན་ཤེས་ཐོབ་སྟེ། གཙང་མའི་གནས་ནས་སྐུ་སྐྱེ་བ་འཕོས་པ་དྲན་པ་དང་། སྐྱེ་བ་ཕྱི་མ་ལ་འཁོར་ལོས་སྒྱུར་བའི་རྒྱལ་པོར་འགྱུར་གསུང་སྟེ། སྔོན་ཚེ་གནས་གཙང་ལྷ་ནས་འཕོས། ། དབུས་སུ་མི་ལུས་གཙང་མ་བླངས། ། རྒྱལ་བའི་བསྟན་ལ་རབ་བྱུང་ནས། ། ལོ་གསུམ་འདུལ་བའི་སྡེ་སྣོད་བསླབས། ། བཅོ་བརྒྱད་སངས་རྒྱས་གཉིས་པ་བསྟེན། ། མ་འོངས་འཁོར་ལོས་སྒྱུར་བ་བྱེད། ། ཅེས་བྱ་བ་གསུངས། འོ་ན་བྱ་ཡུལ་བ་ཆེན་པོ་ཡིན་པའི་གྲགས་པ་གདའ་བ་ལགས་སམ་ཞུས་པས། བྱ་ཡུལ་གྱི་བག་ཆགས་ཀྱང་མང་པར་འདུག ། སྔ་མ་དེ་ཡིན་ཞད་དུ་གདའ་གསུང་། དགེ་བཤེས་དགྱེར་སྒོམ་ཆེན་པོའི་འབུམ་པ་འདི་བཞེངས་ཙ་ན་ང་ལ་འཁོར་ལོས་སྒྱུར་བའི་རྒྱལ་པོར་སྐྱེ་བའི་སྣང་བ་མང་པོ་བྱུང་། འབུམ་པ་འདི་དེའི་རྒྱུའི་གཙོ་བོ་ཡིན་གསུང་། དེར་འཁོར་ལོ་དེ་གང་དུ་གདའ་ཞུས་པས་གསེར་གྱི་འཁོར་ལོར་སྣང་། རྒྱལ་སྲིད་རིན་ཆེན་སྣ་བདུན་དང་། ཉེ་བའི་རིན་པོ་ཆེ་སྣ་བདུན་རྣམས་གདའ་གསུང་། བླ་མའི་བྱིན་རླབས་ཞུགས་པས་དགེ་བཤེས་དགྱེར་སྒོམ་པ་ཆེན་པོའི་ཕྱིའི་གདུང་རྟེན་དང་ནང་གི་གདུང་རྟེན་གཉིས་ལ་སོགས་པའི་མཛད་པ་རླབས་པོ་ཆེ་ཐམས་ཅད་ཇི་ལྟར་བཞེད་པ་བཞིན་དུ་གྲུབ། ཆུ་ཚན་ལ་གཤེགས་དུས་འཆད་ཁ་བ་ཆེན་པོའི་ཞལ་ནས། ཁྱོད་ཀྱིས་འགྲོ་བ་ལ་ཕན་པའི་རྟགས་ཁྱད་པར་ཅན་ང་ལ་བྱུང་བས་ཐུགས་གོ་ཆ་ཆེན་པོ་མཛད་འཚལ་གསུང་། ཡང་རིན་ཆེན་སྒང་ན་བཞུགས་དུས་ལྷ་མོ་སྐུལ་བྱེད་མ་བྱོན་ནས། རྡོ་རྗེ་སེམས་དཔའ་སེམས་ཅན་གྱི་དོན་ལ་གཤེགས་སུ་གསོལ་ཞེས་གསོལ་བ་བཏབ་པས། དྭགས་པོ་ལྷ་ས་སོགས་གཡོར་པོའི་རྒྱལ་ཁམས་རྣམས་བསྐོར་བས་པོ་ཏི་རང་ལའང་ཉིས་སྟོང་དང་བཞི་བཅུ་རྩ་གཉིས་བྱོན། ཟང་ཟིང་གི་དངོས་པོ་ཟད་པ་མེད་པ་ཅིག་བྱུང་། དེ་ལ་བརྟེན་ནས་གཙུག་ལག་ཁང་གསར་མ་བཞེང་བར་བརྩམས། གཙུག་ལག་ཁང་དེ་བྱང་ཕྱོགས་སུ་བརྩམ་པའི་དུས་སུ་གསོལ་བ་ཅིག་བཏབ་པས་རྨི་ལམ་དུ་ནུབ་ཕྱོགས་དེ་ན་ཁྲི་ཞིག་གི་སྟེང་ན་སྤྱན་སྔ་རིན་པོ་ཆེ། གཡས་ན་མགོན་པོ། གཡོན་ན་དཔལ་ལྷ་མོ། ཆོས་སྐྱོང་བའི་བསྲུང་མ་ཐམས་ཅད་འཚོགས་ནས་འདུག ། འདི་བཞིན་མཛད་དགོས་གསུངས་ནས་བསླབ་བྱ་མང་དུ་མཛད་པ་ཅིག་རྨིས། དེ་ནས་ 1182 ཆུ་ཕོ་སྟག་གི་དཔྱིད་ས་ག་ཟླ་བའི་ཚེས་བཅུ་གསུམ་གྱི་གཟའ་སྤེན་པ་དང་སྐར་མ་སྦོ་ལ་རྨང་བཏིངས་ཏེ་དབུ་རྩེ་ཀ་ཆེན་བཅུ་གཉིས། ཁྱམས་ཆེན་ཀ་བ་དྲུག་ཅུ་རྩ་བཞི། མགོན་ཁང་ཀ་བ་གཉིས་རྣམས་ལོ་སྐོར་གཅིག་གི་ནང་དུ་གྲུབ་པར་མཛད་དོ། ། དེ་དུས་དཔོན་དར་མ་རྡོ་རྗེ་ནགས་ཤོད་ལ་ཤིང་འདྲེན་དུ་རྫོང་བའི་ཚེ་གཏོར་ཆེན་ཞིག་མཛད་པས། དཔལ་ལྷ་མོ་དེ་བོང་བུ་ལ་ཆིབས་ནས་མཁའ་འགྲོ་མའི་འཁོར་གྱིས་བསྐོར་བ་ཞལ་གཟིགས། རྒྱས་པའི་འཕྲིན་ལས་ལ་མངའ་བརྙེས་ཏེ་བྱ་སར་རབ་གནས་ལ་གཤེགས་པའི་དུས་སུ་མི་ཀུན་ན་རེ། ན་སོ་གཞོན་དྲགས་པས་རབ་གནས་ཅང་འོང་ངམ་ཟེར་ཏེ། མི་ཚེ་སྒྲུབ་པ་ལ་བསྐྱལ་བ་རྣམས་དང་འུ་ཅག་གཉིས་གསང་སྔགས་ཀྱི་བཟླས་པ་སྐྱོལ་བ་གང་མང་ཅི་ཆ་གསུང་། དེའི་དུས་སུ་སྟོང་བར་མའི་སེམས་ཅན་ཡིན་ཟེར་བ་མང་པོ་ལ་ལ་འགྲོ་བའི་ཟླ་བོ་མེད་པར་འདུག་པས་ངས་ལ་དེ་ལ་བསྒྲལ། འདི་རྣམས་ཕྱིར་མི་ལྡོག་པར་གྱུར་ཅིག་པའི་སྨོན་ལམ་བཏབ་པ་ཅིག་རྨི་ལམ་དུ་བྱུང་། སྐྱིད་ཤོད་ན་བཞུགས་པའི་དུས་སུ་བྱ་ཡུལ་གྱི་ལ་ཁ་ཡིན་ནམ་སྙམ་བྱེད་པ་ཅིག་ནས་དུང་དཀར་པོ་ཞིག་བུས་པས་འཛམ་བུའི་གླིང་ཙམ་དུ་ཐོས་པ་ཅིག་རྨིས། འུ་ཅག་གི་མིང་འདི་འཛམ་བུའི་གླིང་ཙམ་དུ་ཐོས་པ་ཅིག་འོང་པར་འདུག་གསུང་། སྐྱིད་ཤོད་དུ་སྐུ་ཁམས་ལྟེམ་པ་ཅིག་གི་དུས་སུ་མགོན་པོ་ཏྲཀ་ཤད་བྱུང་ནས་ང་རིན་ཆེན་སྒང་པའི་དབོན་སྟོན་འདོད་པ་ཡིན་ཟེར་བ་ལ། ངས་ཏིང་ངེ་འཛིན་གྱི་དམིགས་པ་ཅིག་གིས་བཅིངས་པས་འགུལ་མ་ནུས་པར་ད་ཁྱེད་ཀྱི་ཞབས་ཏོག་བྱེད་གཏོར་མ་གཅིག་ཀྱང་ཞུ་ཟེར་བས། དེ་ནས་དམ་ལ་བཏགས་ནས་བཞག་གསུང་། ཞང་ཚལ་བའི་ལྷ་ཆེན་དཔལ་འབར་ལའང་བགེགས་སྐྲོད་དང་རབ་ཏུ་གནས་པ་རི་བོ་མཎྜལ་གྱི་རྩེ་ནས་མཛད་པར་གྲགས། གཞན་ཡང་ར་སྒྲེང་དང་བྱ་ཡུལ་གྱི་གཙུག་ལག་ཁང་གི་ཞིག་གསོས་དང་དགེ་འདུན་ལ་འབུལ་ནོད་རྒྱ་ཆེན་པོ་མཛད། དེ་དུས་ཇོ་བོ་འཇམ་དཔལ་རྡོ་རྗེས་འོད་ཟེར་གྱི་སྣ་ལ་ཆོས་གསུང་། རྒྱ་མར་གཙུག་ལག་ཁང་གི་རྟེན་གཙོར་དངུལ་གྱི་གདུང་ཁང་གིས་ཐོག་དྲངས་པའི་སྐུ་གསུང་ཐུགས་ཀྱི་རྟེན་དཔག་ཏུ་མེད་པ་དང་བཅས་པ་ལེགས་པར་མཛད་དོ། ། དེ་ལྟར་ལམ་ལ་སྦྱངས་པ་མཐར་ཕྱིན་པར་མཛད་པས་ཕྱིར་མི་ལྡོག་པའི་རྟགས་ཐོབ་སྟེ། ལན་ཅིག་སྒོམ་ཚུལ་གྱིས་འཇམ་དཔལ་རྩ་བའི་རྒྱུད་ནས་སློབ་དཔོན་པ་ལུང་བསྟན་པ་ཅིག་ཞུས་པས། སྔོན་འུ་ཅག་འདུལ་གྲྭ་ན་འདུག་ཙ་ན་སློབ་དཔོན་ཀ་བ་དར་སེང་གི་ཞལ་ནས། མཛོད་སྤུ་འདིའི་ཡོད་ལུགས་ཀྱིས་ཉིད་མདོ་ནས་ལུང་བསྟན་པ་ཅིག་ཡོད་ངེས་གསུང་བ་ལ། གང་ན་མཆི་ཞུས་ཏེ་དུས་དེང་སང་ནི་ལུང་བསྟན་འོང་དགོས་པའི་ཚོད་དུ་འདུག ། འུ་ཅག་གིས་ཀྱང་སངས་རྒྱས་དགྱེས་པའི་སྤྱོད་པ་བྱས་པ་ཡིན་གསུང་། འོ་ན་ལུང་བསྟན་པ་ཚོད་ཇི་ཙམ་ནས་མཆི་བ་ལགས་ཞུས་པས། ས་ཐོབ་ནས་འོང་བ་ལགས་གསུང་། སློབ་དཔོན་བཟང་མོ་བས་སྤྱན་སྔར་བྱོན་པ་ཅིག་ལ། ད་ནང་སངས་རྒྱས་ཐམས་ཅད་ཀྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་ནས་རྗེ་བཙུན་མ་ཕྱག་བརྒྱད་སྒྲོལ་མ་ལ་ཕོག ། སྒྲོལ་མའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས། རང་ལ་ཕོག་ནས་ངའི་སྐུ་ལུས་ཐམས་ཅད་འོད་ཀྱིས་ཁྱབ་པའི་སྣང་བ་བྱུང་གསུང་། དེ་བཟང་མོ་བས་ཁ་ཆེ་པཎ་ཆེན་ལ་ཞུས་པས་པཎ་ཆེན་གྱི་ཞལ་ནས། སངས་རྒྱས་ཐམས་ཅད་ཀྱིས་འོད་ཟེར་གྱིས་དབང་བསྐུར་བ་བྱ་བ་ས་བཅུ་པ་ཐོབ་པའི་རྟགས་ཡིན་གསུང་། དེ་དབོན་སྟོན་ཆེན་པོ་ལ་བླ་མ་པཎ་ཆེན་འདི་སྐད་གསུང་ཞུས་པས། ངས་མཐོང་ལམ་ཙམ་ལས་མ་ཐོབ་སྙམ་པ་ཡིན་ཏེ་རྟགས་རྣམས་དང་བསྟུན་ན་སྒོམ་ལམ་ཡང་རྫོགས་པའི་རིགས་སུ་སྣང་གསུང་། ལན་ཅིག་ཞུགས་མེ་ལ་བཞུགས་དུས་གཅིག་ལ་སྒོམ་ཚུལ་གྱིས། སློབ་དཔོན་པའི་ཕྱག་ཞབས་ལ་འཁོར་ལོ་རྩིབས་བརྒྱད་གདའ་བ་ལ་མུ་ཁྱུད་ཕྱི་མ་འདི་མ་འབྱར་ཙམ་དུ་གདའ་བ་ཇི་ལྟར་ལགས་ཞུས་པས། གསལ་ལ་རྫོགས་པ་སངས་རྒྱས་ཀྱི་མཚན་ཡིན་འཁོར་ལོས་སྒྱུར་བའི་རྒྱལ་པོ་དང་། ས་ལ་གནས་པའི་བྱང་ཆུབ་སེམས་དཔའ་གཉིས་ལ་འདི་བཞིན་དུ་བག་མ་རྫོགས་ཙམ་འོང་བ་ཡིན་གསུང་། སྨིན་མཚམས་ན་མཛོད་སྤུ་འཐེན་ན་སོར་བཞི་ཡོད་པ། བཞག་ན་གཡས་སུ་འཁྱིལ་བ། ཞབས་མཐིལ་ལ་བཀྲ་ཤིས་རྟགས་བརྒྱད་ཀྱི་རི་མོ། ཕྱག་ལ་ཀ་ཁ་སུམ་ཅུའི་རི་མོ་ཡོད་པ་ཐམས་ཅད་ལ་མཐུན་སྣང་དུ་ཡོད། སྐུ་ཁམས་ལྟེམ་པ་ཅིག་ལ་བཟང་མོ་བས་མནལ་བསྲུངས་པས། དེའི་དུས་སུ་སློབ་དཔོན་པས་ཡི་དམ་གྱི་ལྷ་ཇི་ཙམ་ཞིག་ཞལ་གཟིགས། ཐུགས་དམ་གྱི་མཐིལ་གང་ལ་མཛད་གསུང་བར་ཞུ་ཞུས་པས། ངས་ཞལ་བལྟ་བར་འདོད་ན་སྐད་ཅིག་རེ་རེ་ལ་ཡང་སངས་རྒྱས་བྱང་སེམས་ཉི་ཟེར་གྱི་རྡུལ་ཙམ་ལྟར་ཡོད། འོ་སྐོལ་གྱི་བཀའ་རྒྱུད་འདིའི་དབང་དུ་བྱས་ན་ཡི་དམ་གྱི་ལྷ་ཞལ་གཟིགས་པ་དང་། མངོན་པར་ཤེས་པ་ཐུགས་དམ་གྱི་གཙོ་བོར་མི་བྱེད། བྱང་ཆུབ་ཀྱི་སེམས་ཀྱིས་ཀུན་ནས་བསླང་བའི་ཟུང་འཇུག་སྒྱུ་མ་ལྟ་བུ་ལ་ཐུགས་དམ་གྱི་མཐིལ་བྱེད་པ་ཡིན་གསུང་ངོ་། ། སངས་རྒྱས་དབོན་སྟོན་འདི་ནི་ཕྱིར་མི་ལྡོག་པའི་སེམས་དཔའ་ལུང་བསྟན་ཐོབ་པ་ཞིག་ཡིན་པ་ནི་ཁ་ཆེ་པཎ་ཆེན་གྱི་རྣམ་ཐར་ལས་ཤེས་ཏེ། སིང་ག་གླིང་ན་དགྲ་བཅོམ་པ་ཅིག་བཞུགས་པ་དེས་ཁ་ཆེའི་པཎྜི་ཏ་ཤཱཀྱ་ཤྲཱིའི་གཅུང་པོ་ལ་མེ་ཏོག་བཞི་ཟ་མ་ཏོག་ཏུ་བཅུག་ནས། དགྲ་བཅོམ་པ་དེའི་ཞལ་ནས། མེ་ཏོག་འདི་རྣམས་ཁྱོད་ཀྱི་ཕུ་བོ་དེ་བོད་དུ་འགྲོ་བར་སྣང་བས་དེ་ལ་བསྐུར་ལ། གཅིག་འབྲི་ཞེས་བྱ་བའི་ས་ཕྱོགས་ན་སློབ་དཔོན་ཀླུ་སྒྲུབ་བྱང་ཆུབ་སེམས་དཔའ་རིན་ཆེན་དཔལ་ཞེས་བྱ་བར་སྐྱེ་བ་བླངས་ནས་ཡོད་པ་དེ་ལ་སྤྲོད། གཅིག་རཏྣ་ཀུ་ཊི་ཞེས་བྱ་བའི་གཙུག་ལག་ཁང་ན་བྱང་ཆུབ་སེམས་དཔའ་སྐལ་ལྡན་ཤིང་རྟའི་སྐྱེ་བ་ཡོད་པ་དེ་ལ་སྤྲོད། གཅིག་དྭི་བྷ་གི་ཞིག་ཡོད་པ་དེ་ལ་སྤྲོད། གཅིག་དྭི་བྷ་གི་དེས་ལྷ་ཆེན་པོ་ཞིག་བཞེངས་པ་དེའི་ཐུགས་ཀར་ཞོག ། ཅེས་གསུངས་པ་བཞིན་དུ་ཁ་ཆེའི་པཎྜི་ཏས་ཀྱང་དེ་བཞིན་དུ་སོ་སོར་སྤྲད་དོ། ། ཡང་དབོན་སྟོན་རིན་པོ་ཆེས་བསམ་ཡས་སུ་ཆོས་འཁོར་མཛད་པ་ཅིག་གི་དུས་སུ། ཁ་ཆེ་པཎ་ཆེན་གྱིས་དེ་རིང་བསྐལ་བཟང་སངས་རྒྱས་སྟོང་གི་ཡ་གྱལ་སྐལ་ལྡན་ཤིང་རྟ་བྱ་བ་མཇལ་དགོས་པར་འདུག་གི་དགེ་སྦྱོར་གྱི་ཐུན་མྱུར་དུ་གྱིས་ཤིག་བྱ་བའི་སྒྲ་ཞིག་ཐོས། དེའི་རྗེས་དེ་མ་ཐག་ཏུ་རིན་ཆེན་སྒང་པ་མཇལ་ཁ་ཞུ་བར་སླེབས་ཞེས་འབྱུང་ངོ་། ། དེ་ལྟར་འགྲོ་བའི་མགོན་པོ་དབོན་སྟོན་རིན་པོ་ཆེས་དགུང་ལོ་བདུན་ཅུ་རྩ་གསུམ་ཚུན་ཆད་དུ་སངས་རྒྱས་ཀྱི་བསྟན་པ་རིན་པོ་ཆེ་ལེགས་པར་བསྐྱངས་དབུ་རུ་བྱང་ཕྱོགས་ཀྱི་བཀའ་གདམས་ཀྱི་བསྟན་པའི་བདག་པོ་མཛད། དགེ་བཤེས་སྟོན་པའི་དགོངས་པ་བསྒྲུབས། བསམ་གྱིས་མི་ཁྱབ་པའི་འཕྲིན་ལས་ཀྱི་མཛད་པ་དུ་མས་འགྲོ་བ་རང་རང་གི་མོས་པ་མཐའ་དག་ཚིམ་པར་མཛད་ནས། སྙིགས་མའི་སེམས་ཅན་ལ་ཐུགས་སྐྱོ་བ་མི་མངའ་ཡང་འཕྲིན་ལས་ཀྱི་ཐ་མ་དེ་ཉིད་ཀྱིས་སེམས་ཅན་གྱི་དོན་དུ་འགྱུར་པ་དང་། ཞིང་ཁམས་གཞན་དག་ཏུ་འགྲོ་བའི་དོན་རླབས་ཆེ་བར་དགོངས་ནས། གནམ་ལོ་རྟའི་ལོ་འགོ་ནས་སློབ་དཔོན་ནཱ་ག་པོ་དྷི་འདི་སྐད་གསུང་། དགེ་བཤེས་ཆེན་པོ་འདི་སྐད་གསུང་། ད་ནི་ཞིང་ཁམས་གཞན་ཞིག་ཏུ་བྱེད་དགོས་པ་འདྲ། ཞེས་བྱ་བ་ལ་སོགས་པ་སྐྱོ་བ་བསྐྱེད་པའི་ཆོས་མང་དུ་གསུངས། དབྱར་ཚུལ་ནང་དུའང་ལན་ཅིག་འདི་སྐད་གསུང་། འུ་ཅག་དགེ་བཤེས་ཆེན་པོའི་དགུང་ལོའི་ཚད་ཙམ་དུ་སྡོད་སེམས་པ་ཡིན་ཏེ་ད་ཚོད་རན་པ་འདྲ། འུ་ཅག་ལྟ་བུ་མེད་ན་དབུ་རུ་བྱང་ཕྱོགས་ཀྱི་བསྟན་པ་ལ་ཁའི་ན་བུན་བཞིན་དུ་ཡལ་ནས་འགྲོ་བ་འདི་ལ་བག་ཚེར་ཙམ་དུ་སྣང་། གཞན་ཚེར་བ་མེད་གསུང་། དེ་ནས་ 1210 ལྕགས་ཕོ་རྟའི་ལོ་དགུན་ཟླ་འབྲིང་པོ་མགོ་ཟླ་བའི་ཚེས་གཉིས་ཀྱི་དགོང་མོ་སྤྱན་སྔར་ཕག་ཤེས་རབ་དབང་ཕྱུག་བྱུང་བ་ལ། ཁྱོད་ཀྱིས་སྟོན་མོ་ཇི་ཙམ་ན་བྱེད་གསུང་བས། ཚེས་བཅུ་གསུམ་ལ་སྒྲུབ་རྩིས་ལགས་ཞུས་པས། འུ་ཅག་ལ་ཡང་དུས་ཐུག་པ་འདྲ་བ་ཡོད་པས་གནངས་ཚེས་བཞིའི་ཉིན་མོ་ཅི་འགྲུབ་ཀྱིས་གསུང་། དེ་ནས་ཚེས་གསུམ་གྱི་དགོངས་མོ་གཟིམ་ཆུང་དུ་བྱོན་ནས། འུ་ཅག་གི་ལོ་ཉི་ཤུ་རྩ་ལྔ་ལ་འདུལ་བའི་བཤད་པ་བྱས། སུམ་ཅུ་རྩ་གསུམ་ལ་གདན་སར་བཏོན། སུམ་ཅུ་རྩ་བཞི་ལ་དགེ་བཤེས་དགྱེར་སྒོམ་པ་ཆེན་པོ་བདེ་བར་གཤེགས། སུམ་ཅུ་རྩ་ལྔའི་ངོ་ལ་བཀའ་གདམས་ཀྱི་བཤད་པ་བྱས་ནས་ཉི་མ་དེ་རིང་ཕན་ཆད་ལ་ཅི་བཟོད་བྱས་པ་ཡིན། དགེ་བཤེས་ཆེན་པོའི་ཐུགས་དགོངས་ཀྱང་མ་ལུས་པར་བསྐངས་པ་ཡིན། ད་ནི་རི་བྲག་གམ་དབེན་པ་ཅིག་ཏུ་སྙེག་སྙིང་འདོད། དགེ་བཤེས་ཆེན་པོ་དེ་འདའ་བའི་དུས་སུ་བསྙུན་ནད་ལ་སོགས་པའི་ཚན་མ་མ་བྱུང་། འུ་ཅག་ལ་ཡང་མི་འོང་། སྟོན་པའི་ནད་འདི་ཀུན་འོང་མི་ཐང་བ་ཡིན་ཏེ། དེ་སྔ་ཕན་ཆད་ཡགས་རབ་འོང་དུ་རེ་བ་ཡིན་པ་ལ་དཀྱེལ་ཆེ་བར་སྣང་། འུ་ཅག་གི་བཀའ་རྒྱུད་འདི་བྱིན་རླབས་ཆེ་བ་ཡིན་གྱི། ང་དང་དགེ་བཤེས་ཆེན་པོ་གཉིས་དྲན་པར་གྱིས་བྱ་བ་ཞལ་ཆེམས་ཀྱི་ཚུལ་དུ་གསུངས། དེ་ནས་གྲལ་ཚེས་བཞིའི་ཉིན་བར་རིན་ཆེན་གྲགས་ཀྱི་དགེ་རྩ་ནས་བཟུང་སྟེ། འབར་རྫོགས་ལ་སོགས་པར་མི་རྟག་པའི་ཆོས་མང་དུ་གསུངས། དེ་ནས་ཉི་མ་མ་རྒས་ཙམ་དེ་ལ་རྒྱ་མར་བྱོན། རྒྱུན་གཏོར་མཛད་པའི་རྗེས་ལ། སྐྱིལ་ཀླུང་ལམ་མེ་མཛད་ནས་ཚེས་བཞིའི་སྲོད་འཁོར་རྗེས་དེ་ལ་དགོངས་པ་མྱ་ངན་ལས་འདའ་བའི་ཚུལ་བསྟན། སློབ་དཔོན་སྟོན་པས་གསོལ་བ་བཏབ་པས་སྐུ་མདངས་དེ་སྔར་བས་ཀྱང་གཟི་བརྗིད་ཆེར་སོང་། དེ་ནས་ཞག་བཞིའི་བར་དུ་མཆོད་པ་རྒྱས་པར་བྱས། ཞལ་ལྔའི་ཉིན་པར་ཚོགས་པ་ལ་སྤུར་གྱི་ཞལ་བསྟན། ཞག་དྲུག་གི་ཉིན་པར་གདུང་གི་ཞབས་ཏོག་བྱས། ཞག་བདུན་གྱི་དགོངས་མོ་མཆོད་ཁང་ཆེན་མོའི་རྔ་ཁང་དུ་སྐུ་གདུང་གདན་དྲངས་ཏེ་དད་ལྡན་ཐམས་ཅད་ཀྱིས་མཆོད་པ་རྒྱ་ཆེར་ཕུལ་ཏེ་སྨོན་ལམ་བཏབ་བོ། ། བདག་ཉིད་ཆེན་པོ་འདི་ལ་སྤྱིར་ཆོས་ཐོབ་པའི་སློབ་མ་བསམ་གྱིས་མི་ཁྱབ་པ་བྱུང་ཞིང་ལམ་རིམ་གྱི་ཁྲིད་སྤེལ་ནུས་པའི་བསྟན་འཛིན་དམ་པའང་མང་དུ་བྱོན་ལ། བཀའ་གདམས་གདམས་ངག་པའི་མན་ངག་ལྟར་གྱི་སྐྱེས་བུ་གསུམ་གྱི་ལམ་གྱི་རིམ་པ་རྒྱ་ཆེར་སྤེལ་བའི་སློབ་མའི་གཙོ་བོ་ནི་ལྷོ་བྲག་མཁན་ཆེན་ནམ་མཁའ་རྒྱལ་པོའོ། ། མཁན་ཆེན་ནམ་མཁའ་རྒྱལ་པོས་མཁན་ཆེན་སེང་གེ་བཟང་པོ་ལ་གནང་། དེས་མཁན་ཆེན་རྒྱལ་སྲས་བཟང་པོ་ལ་གནང་། དེས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ལ་གནང་ངོ་། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སྤྲུལ་པའི་སྐྱེས་མཆོག་སངས་རྒྱས་དབོན་སྟོན་རིན་པོ་ཆེར་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་བཤེས་གཉེན་བསྟེན་ཚུལ་ནས་བཟུང་། ཞི་ལྷག་ཟུང་འབྲེལ་གྱི་བར་སྐྱེས་བུ་གསུམ་གྱི་ལམ་གྱི་རིམ་པ་ལ་སྒོ་གསུམ་བརྩོན་པ་ཆིག་སྒྲིལ་དུ་བློ་སྦྱངས་ནས་མྱོང་བ་ཐོན་ངེས་ཤིག་བྱ་བ་ལ་འབད་པར་བྱའོ། ། ། །
༈ དམ་པས་བྱིན་བརླབས་ནམ་མཁའ་རྒྱལ་པོ་དང་། ། ཞེས་བསྔགས་པ། མཁན་ཆེན་ནམ་མཁའ་རྒྱལ་པོ་ནི་ཤུད་ཕུ་བའི་རིགས་སུ་མཁན་ཆེན་ནམ་མཁའ་སེང་གེའི་གཅུང་པོའི་སྲས་སུ་འཁྲུངས། གཞོན་ནུའི་དུས་ནས་རིགས་རྒྱུད་དང་ཁྱིམ་གྱི་ལོངས་སྤྱོད་གང་ལའང་མ་ཆགས་པར་ཁུ་བོ་མཁན་ཆེན་ནམ་མཁའ་སེང་གེའི་དྲུང་དུ་རབ་ཏུ་བྱུང་སྟེ་འདུལ་བའི་ཀུན་སྤྱོད་རྣམས་ལེགས་པར་བརླབས། མཁན་ཆེན་མཚོ་སྣ་བ་དང་། མོན་གྲ་པ་སོགས་དགེ་བའི་བཤེས་གཉེན་མང་པོའི་ཞབས་ལ་གཏུགས་ཏེ། འདུལ་བ་དང་། མངོན་པ་མཛོད་དང་། བྱམས་ཆོས་རྣམས་དང་དབུ་མའི་གཞུང་རྣམས་ལ་སྦྱངས་པ་མཐར་ཕྱིན་པར་མཛད། སངས་རྒྱས་དབོན་སྟོན་གྱི་ཞབས་ལ་གཏུགས་ཏེ་བཀའ་གདམས་གདམས་ངག་པའི་བྱང་ཆུབ་ལམ་གྱི་རིམ་པའི་ཁྲིད་ལེགས་པར་གསན་ཏེ་ཐུགས་ལ་ཆུད་པར་མཛད། སླར་ཡང་ཁུ་བོ་མཁན་ཆེན་ནམ་མཁའ་སེང་གེའི་དྲུང་དུ་བཀའ་གདམས་གཞུང་པའི་བཤད་སྲོལ་ལྟར་གྱི་བྱང་ཆུབ་ལམ་གྱི་རིམ་པའི་ཁྲིད་གསན་ནས་ཐུགས་ཉམས་སུ་བཞེས་ཏེ་མཁན་ཆེན་འདི་ལ་བཀའ་གདམས་གཞུང་པ་དང་གདམས་ངག་པའི་བཤད་སྲོལ་གཉིས་ཀ་མངའ་བས་བརྒྱུད་པའི་ཆུ་བོ་གཉིས་འདྲེས་ཞེས་བསྔགས་སོ། ། དེ་ནས་རྗེ་བཙུན་སྒྲོལ་མས་ལྷོ་མོན་ཕྱོགས་སུ་ལམ་གྱི་རིམ་པའི་འཕྲིན་ལས་འཕེལ་བར་ལུང་བསྟན་པ་བཞིན་ལམ་རིམ་གྱི་ཁྲིད་རྒྱ་ཆེར་གནང་བས་བསྟན་འཛིན་མང་དུ་བྱོན་ཞིང་རྒྱུད་འཛིན་གྱི་གཙོ་བོ་ནི་རང་གི་དབོན་སྲས་མཁན་ཆེན་སེང་གེ་བཟང་པོའོ། ། བདག་ཉིད་ཆེན་པོ་འདི་ལ་ཐུབ་པ་དམ་ཚིག་གསུམ་བཀོད་དང་རྗེ་བཙུན་སྒྲོལ་མ་དང་མི་གཡོ་བ་དང་། བདེ་མཆོག་ལ་སོགས་པ་ལྷག་པའི་ལྷ་མང་པོས་ཞལ་བསྟན་ཅིང་གསུང་གི་གནང་བ་སྩལ། ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་བསྟན་བཅོས་ཀྱང་མང་དུ་མཛད་དོ། ། དེ་ལྟར་བསྟན་འགྲོའི་དོན་རྒྱ་ཆེར་མཛད་ནས་རྗེ་བཙུན་སྒྲོལ་མས་ལུང་བསྟན་པ་ལྟར་སྐུའི་བཀོད་པ་བསྡུས་ནས་བདེ་བ་ཅན་དུ་གཤེགས་སོ། ། བདག་ཉིད་ཆེན་པོ་འདི་ལ་འབྲོམ་རིན་པོ་ཆེ་ནས་དགེ་བཤེས་པོ་ཏོ་བ་ལ་བརྒྱུད་པ་དང་། འབྲོམ་རིན་པོ་ཆེ་ནས་དགེ་བའི་བཤེས་གཉེན་སྤྱན་སྔ་བ་ལ་བརྒྱུད་པའི་མན་ངག་གཉིས་ཀ་མངའ་ཞིང། བླ་མ་རྣམས་ཀྱིས་བྱིན་གྱིས་བརླབས་པའི་བཀའ་བབ་ཆེ་བས་ན་རྗེ་ཐམས་ཅད་མཁྱེན་པས་ཀྱང་། དམ་པས་བྱིན་བརླབས་ནམ་མཁའ་རྒྱལ་པོ་ཞེས་བསྔགས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་མཁན་ཆེན་ནམ་མཁའ་རྒྱལ་པོ་ལ་གསོལ་བ་འདེབས་ཤིང་། དངོས་གྲུབ་ཐམས་ཅད་ཀྱི་རྩ་བ་བླ་མ་དམ་པའི་བྱིན་རླབས་ཐོབ་པར་བྱས་ལ་བྱང་ཆུབ་ལམ་རིམ་སྒོམ་པ་ལ་འབད་པར་བྱའོ། ། ། །
༈ འཇིག་རྟེན་ཆོས་བརྒྱད་སྤངས་པའི་སེང་གེ་བཟང་། ། ཞེས་བསྔགས་པ། མཁན་ཆེན་སེང་གེ་བཟང་པོ་ནི་ཤུད་ཕུ་བའི་བརྒྱུད་དུ་མཁན་ཆེན་ནམ་མཁའ་རྒྱལ་པོའི་དབོན་སྲས་སུ་འཁྲུངས། སྔོན་གྱི་བག་ཆགས་བཟང་པོའི་མཐུས་དགུང་ལོ་བདུན་ལོན་དུས་འདོད་པའི་ཡོན་ཏན་གང་ལའང་མ་ཆགས་པར་སུས་ཀྱང་མཐོང་ཚོར་མེད་པར་ཕུག་པ་ཞིག་ཏུ་ཕེབས་ཏེ། ཁམས་ཟས་རགས་པ་ལ་མི་བལྟོས་པར་རྡེའུ་གསོལ་ནས་སྒྲུབ་པ་ཁོ་ན་མཛད་པས་ལྷག་པའི་ལྷ་མང་པོས་བྱིན་གྱིས་བརླབས་ཤིང་ཉམས་རྟོགས་ཁྱད་པར་ཅན་སྐྱེས། དགུང་ལོ་ཉི་ཤུ་རྩ་བརྒྱད་པ་ལ་མཁན་ཆེན་ནམ་མཁའ་རྒྱལ་པོའི་དྲུང་དུ་རབ་ཏུ་བྱུང་སྟེ་འདུལ་བའི་ཀུན་སྤྱོད་རྣམས་ལེགས་པར་བསླབས། ཞང་ཡེ་ཤེས་མཛེས་ཀྱི་དྲུང་དུ་འདུལ་བ་མདོ་རྩ་བ་ལ་ཐུགས་སྦྱོང་མཛད། དེ་ནས་མཁན་ཆེན་ནམ་མཁའ་རྒྱལ་པོའི་དྲུང་དུ་བྱང་ཆུབ་ལམ་གྱི་རིམ་པའི་ཁྲིད་གསན་ནས་ཐུགས་ཉམས་སུ་བཞེས་ཏེ་གདེང་ཐོབ་པར་མཛད། མཁན་ཆེན་ནམ་མཁའ་རྒྱལ་པོ་ཞིང་གཤེགས་ནས་གདན་སར་ཕེབས་ཏེ་གཞི་གསུམ་གྱི་ཕྱག་ལེན་སོགས་འདུལ་བའི་བསླབ་བྱ་ཕྲ་རགས་ཐམས་ཅད་ལ་དག་ཐེར་མཛད། གླ་བོ་དགོན་གསར་གྱི་ཆོས་སྡེ་གསར་དུ་བཙུགས། འདུལ་འཛིན་མཚོ་སྣ་བ་ཆེན་པོ་སྤྱན་དྲངས་དགེ་འདུན་མང་དུ་ཚོགས་པ་ལ་ཆོས་འཁོར་བསྐོར་བ་སོགས་བསྟན་པའི་བྱ་བ་རྒྱ་ཆེར་མཛད་དོ། ། བདག་ཉིད་ཆེན་པོ་འདིས་འདོད་ཡོན་ལ་ཆགས་པ་སྤངས་ཏེ། དཀའ་ཐུབ་ཀྱི་སྒོ་ནས་སྒྲུབ་པ་རྒྱུན་རིང་དུ་མཛད་པས་ཉམས་རྟོགས་ཁྱད་པར་ཅན་བརྙེས་པས་ན་རྗེ་ཐམས་ཅད་མཁྱེན་པས་ཀྱང་། འཇིག་རྟེན་ཆོས་བརྒྱད་སྤངས་པའི་སེང་གེ་བཟང་། ། ཞེས་བསྔགས་སོ། ། དེ་ལྟར་བསྟན་པ་ལ་བྱ་བ་རྒྱ་ཆེར་མཛད་ནས་སྐུའི་བཀོད་པ་བསྡུ་བའི་ཚེ་ལྕང་ལོ་ཅན་དུ་འགྲོ་གསུངས་ནས་ཞིང་གཤེགས་ཏེ། དེའི་ཚེ་མེ་ཏོག་སྔོན་པོའི་ཆར་བབས་པ་སོགས་ངོ་མཚར་བའི་ལྟས་བྱུང་ངོ་། ། བདག་ཉིད་ཆེན་པོ་འདིས་སྐལ་བ་དང་ལྡན་པ་མང་པོ་ལ་ལམ་རིམ་གྱི་ཁྲིད་གནང་བས་སློབ་མ་མང་དུ་བྱུང་ཡང་རྒྱུད་འཛིན་གྱི་གཙོ་བོ་ནི་མཁན་ཆེན་རྒྱལ་སྲས་བཟང་པོའོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་མཁན་ཆེན་སེང་གེ་བཟང་པོ་ལ་གསོལ་བ་འདེབས་ཤིང་དམ་པ་འདིའི་རྣམ་ཐར་ལྟར་འདོད་ཡོན་ལ་ཆགས་པའི་དབང་དུ་མ་སོང་བར་སྦྱངས་པའི་ཡོན་ཏན་ལ་གནས་ནས་བྱང་ཆུབ་ལམ་གྱི་རིམ་པ་སྒོམ་པ་ལ་བརྩོན་པ་ལྷུར་བྱའོ། ། ། །
༈ རྒྱལ་སྲས་བཟང་པོ་ཞེས་བསྔགས་པ། མཁན་ཆེན་རྒྱལ་སྲས་བཟང་པོ་ནི། ངོ་མཚར་བའི་ལྟས་དང་བཅས་ཤུད་ཕུ་བའི་རིགས་སུ་སྐུ་འཁྲུངས། ཁྱིམ་གྱི་འདུ་འཛི་ལ་མ་ཆགས་པར་ངེས་འབྱུང་གི་བསམ་པས་རྒྱུད་བསྐུལ་ཏེ། དགུང་ལོ་བཅུ་གཅིག་པ་ལ་མཁན་ཆེན་སེང་གེ་བཟང་པོའི་དྲུང་དུ་རབ་ཏུ་བྱུང་། འདུལ་འཛིན་མཚོ་སྣ་བ་དང་དགེ་བའི་བཤེས་གཉེན་མོན་གྲ་པ་སོགས་དམ་པ་མང་པོའི་ཞབས་ལ་གཏུགས་ཏེ། དཀའ་ཆེན་བཞི་ལ་སྦྱངས་པ་མཐར་ཕྱིན་པར་མཛད་ནས་དགུང་ལོ་བཅོ་ལྔ་ལོན་པའི་ཚེ་འདུལ་བའི་བཤད་པའང་མཛད། མཁན་ཆེན་སེང་གེ་བཟང་པོའི་དྲུང་དུ་བྱང་ཆུབ་ལམ་གྱི་རིམ་པའི་ཁྲིད་དང་ལམ་རིམ་གྱི་མན་ངག་སྤྱོད་འཇུག་ལ་སོགས་པ་བཀའ་གདམས་ཀྱི་ཆོས་རྣམས་གསན། ཐུགས་རྗེ་ཆེན་པོའི་ཆོས་སྐོར་རྣམས་ཀྱང་ཡོངས་སུ་རྫོགས་པར་གསན་ནས་ལམ་ཐུན་མོང་བ་དང་ཐུན་མོང་མ་ཡིན་པའི་ལམ་གྱི་རིམ་པ་རྣམས་ལ་མྱོང་བ་ཐོན་པར་མཛད། སྒྲོ་བ་དགོན་པའི་གདན་སར་ཕེབས་ཏེ་སྐུ་གསུང་ཐུགས་རྟེན་མང་དུ་བཞེངས། མོན་གྲ་པ་ཆེན་པོ་དགེ་འདུན་གྱི་སྡེ་མང་པོ་དང་བཅས་སྤྱན་དྲངས་ཏེ་ཆོས་འཁོར་བཙུགས། ལྷོ་བྲག་གྲུབ་ཆེན་སོགས་སྐལ་བ་དང་ལྡན་པ་མང་པོ་ལ་ལམ་གྱི་རིམ་པའི་ཁྲིད་དང་བཀའ་གདམས་ཀྱི་ཆོས་རྣམས་རྒྱས་པར་གནང་། དེ་ནས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ལ་ལུགས་གཉིས་ཀྱི་ཞལ་ཏ་ལེགས་པར་གནང་ནས་ངོ་མཚར་བའི་ལྟས་བསམ་གྱིས་མི་ཁྱབ་པ་དང་བཅས་ཞི་བར་གཤེགས། ལྷོ་བྲག་ཕྱོགས་སུ་བཀའ་གདམས་ཀྱི་བསྟན་པ་ཡུན་རིང་དུ་གནས་པའི་རྟེན་འབྲེལ་དུ་སྐུ་གདུང་རིལ་པོར་སྒྲོ་བ་དགོན་པའི་གསེར་འབུམ་གྱི་ནང་དུ་བཞུགས་སོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་མཁན་ཆེན་རྒྱལ་སྲས་བཟང་པོ་ལ་གསོལ་བ་འདེབས་ཤིང་དམ་པ་འདིའི་རྣམ་ཐར་ལྟར་ལམ་མ་ནོར་བར་སྟོན་པའི་བཤེས་གཉེན་དམ་པ་ཚུལ་བཞིན་དུ་བསྟེན་ནས་སྐྱེས་བུ་གསུམ་གྱི་ལམ་གྱི་རིམ་པ་བསྒོམ་པ་ལ་བརྩོན་པར་བྱའོ། ། ། །
༈ བྱང་ཆུབ་ཐུགས་ཀྱིས་འགྲོ་ཀུན་བུ་བཞིན་གཟིགས། ། ལྷག་པའི་ལྷ་ཡིས་རྗེས་བཟུང་བྱིན་གྱིས་བརླབས། ། སྙིགས་དུས་འགྲོ་བ་འདྲེན་པའི་བཤེས་གཉེན་མཆོག ། ནམ་མཁའ་རྒྱལ་མཚན་ཞབས་ལ་གསོལ་བ་འདེབས། ། ཞེས་བསྔགས་པ་ལྷོ་བྲག་མཁན་ཆེན་ནམ་མཁའ་རྒྱལ་མཚན་ནི་ཡབ་སློབ་དཔོན་ནམ་མཁའ་བཟང་པོ་དང་། ཡུམ་རིན་ཆེན་རྒྱན་ཅེས་བྱ་བའི་སྲས་སུ་ 1326 མེ་ཕོ་སྟག་གི་ལོ་ལ་ཤུད་ཕུའི་རིགས་སུ་སྐུ་བལྟམས། འཁྲུངས་ཙམ་ཉིད་ནས་སཾ་སྐྲྀ་ཏའི་སྐད་དུ་དེ་བཞིན་གཤེགས་པའི་མཚན་བརྗོད་པ་སོགས་སྨྲ་ཤེས་ཤིང་། བསམ་བཞིན་དུ་བྱོན་པའི་སྤྲུལ་པ་ཞིག་ཡིན་པའི་རྟགས་བསྟན། དགུང་ལོ་གཉིས་པ་ལ་སྔོན་གྱི་སྐྱེ་བ་དྲན་པའི་སྟོབས་ཀྱིས་གཏོར་མ་གཏོང་པའི་ལད་མོ་མཛད། ལོ་གསུམ་པའི་དུས་སུ་ལྷག་པའི་ལྷ་མང་པོའི་ཞལ་མཐོང་བ་བྱུང་། དགུང་ལོ་བདུན་པ་ལ་ཁུ་བོ་མཁན་ཆེན་རྒྱལ་སྲས་པ་ལ་དགེ་བསྙེན་གྱི་སྡོམ་པ་མནོས། ཁྱིམ་གྱི་འདུ་འཛི་ལ་མ་ཆགས་པར་ངེས་འབྱུང་གི་བསམ་པ་ཤུགས་དྲག་པོས་བསྐུལ་ཏེ་མཁན་ཆེན་རྒྱལ་སྲས་བཟང་པོའི་དྲུང་དུ་རབ་ཏུ་བྱུང་ཞིང་དགེ་ཚུལ་གྱི་སྡོམ་པ་བཞེས། ཐུགས་རྗེ་ཆེན་པོའི་ཆོས་སྐོར་རྣམས་གསན། དེའི་ཚེ་བུད་མེད་པདྨའི་ཕོར་པ་ན་འོ་ཐུག་གི་ཚོད་མ་ཁྱེར་བ་བཞིས་འདི་སྐད་དུ། སྐྱེ་རྒ་ན་འཆིའི་སྣང་ཚུལ་འདི། ། ཐོས་པས་ཡི་མུག་སྐྱེ་འགྱུར་ན། ། ངན་སོང་སྡུག་བསྔལ་བཟོད་དཀའ་བས། ། གཞན་ཕན་བྱང་སེམས་བདུད་རྩི་ཐུངས། ། ཞེས་གསུངས་ནས་པད་ཕོར་གྱི་འོ་མ་དེ་བྱིན་ནས་ཤར་ཕྱོགས་ཀྱི་ནམ་མཁའ་ལ་བཞུད། དེ་ནས་སྤྱན་རས་གཟིགས་ཀྱི་བསྙེན་པ་མང་དུ་མཛད། ལོ་བཅུ་པ་ལ་ཁུ་བོའི་དྲུང་དུ་སྣེའུ་ཟུར་པ་ནས་བརྒྱུད་པ་དང་བྱ་ཡུལ་བ་ནས་བརྒྱུད་པའི་ལམ་རིམ་དང་ཐུགས་རྗེ་ཆེན་པོ་དང་མི་གཡོ་བ་རྟ་མགྲིན་ལྷ་བཞི་སྒྲོལ་མ་ཉེར་གཅིག་ལ་སོགས་པའི་ཆོས་སྐོར་མང་དུ་ཞུས། རྟགས་ཁྱད་པར་ཅན་ཡང་མང་དུ་བྱུང་། ལོ་བཅུ་གསུམ་པའི་ཀེག་ལ་དགེ་སྦྱོར་ཉིན་མཚན་ཡེངས་པ་མེད་པར་མཛད། ནུབ་མོ་སྒྲོ་བ་དགོན་པའི་འབུམ་པ་ལ་སྐོར་བ་མཛད་པས་སྐུ་ལུས་ལས་འོད་འཕྲོ་བ་རྒྱང་རིང་པོ་ན་གནས་པའི་སྐྱེ་བོ་དག་གིས་ཀྱང་མཐོང་ནས་འབུམ་པ་ལ་མེས་སྐོར་བ་བྱེད་ཀྱི་འདུག་ཟེར་བ་བྱུང་། དགུང་ལོ་བཅོ་ལྔ་པ་ལ་འདུལ་བའི་སློབ་གཉེར་མཛད། བཅུ་བདུན་པ་ལ་འཆད་ཉན་མཚོན་རེ་མཛད་ཀྱང་ཐུགས་ལ་ལུང་སྟོང་ཞིག་ཏུ་སྒོམ་སྒྲུབ་འབའ་ཞིག་མཛད་དགོངས་པ་བྱུང་གསུང་། ལོ་བཅུ་དགུའི་དུས་ལྷ་སར་ཇོ་བོ་མཇལ་དུ་བྱོན་ནས་ཉིན་མཚན་གཉིས་ཀ་སྐོར་བ་མང་དུ་མཛད། ནུབ་གཅིག་ར་མོ་ཆེའི་ཁྱམས་སུ་བཞུགས་པས་ལྕགས་སྒོ་དེ་ཕྱེ་ནས་མི་ནག་པོ་འཇིགས་སུ་རུང་བ་དར་ནག་གི་གོས་གྱོན་པ་ཅིག་བྱུང་ནས། ཁྱོད་ནི་ལས་ཀྱི་རྡོ་རྗེ་བདེ་ལྡན་ཞེས་བྱ་བ་ཡིན་ནོ། ། ད་རིན་ཆེན་སྒང་དུ་སོངས་ལ་འཇམ་དབྱངས་ཀྱི་སྤྲུལ་པ་གཅིག་དང་མཇལ་ནས་འོང་གི་གསུང་བ་བྱུང་། མི་ནག་པོ་དེ་མགོན་པོ་གྲི་གུག་ཡིན་པར་འདུག་གསུང་། དེ་ནས་རིན་ཆེན་སྒང་དུ་བྱོན། རིན་པོ་ཆེ་བཀྲས་རྒྱལ་བའི་དྲུང་དུ་བསྙེན་པར་རྫོགས། ལམ་རིམ་བློ་སྦྱང་སེམས་བསྐྱེད་ཀྱི་ཆོས་སྐོར་དང་གཞན་ཡང་གསང་སྔགས་ཀྱི་སྒྲུབ་ལུགས་མང་དུ་གསན། དེའི་ཚེ་རིན་པོ་ཆེའི་ཞལ་ནས་ཁྱོད་ཀྱིས་ཡི་དམ་གང་ལ་བྱས། རབ་ཏུ་བྱུང་ནས་ལོ་དུ་སོང་། སློབ་གཉེར་གང་ལ་བྱས། ཁྱེད་ལ་ཆོས་པ་ཨ་ཐོ་བ་ཅིག་འོང་བར་འདུག་གསུངས་ནས་མཉེས་པའི་ཞལ་ཏ་མང་དུ་གནང་། དེ་ནས་རི་ཟངས་རྡོག་པའི་དྲུང་དུ་བྱོན་ཏེ་འདུལ་བ་རྒྱ་ཆེར་འགྲེལ། ཀརྨ་ཤ་ཏམ། ཉི་ཁྲི་སྣང་བ། བསླབ་པ་ཀུན་ལས་བཏུས། ཇོ་བོའི་ཆོས་ཆུང་བརྒྱ་རྩ། ཉི་མ་སྦས་པའི་སྒྲོལ་མ་ཉེར་གཅིག་གི་ལས་ཚོགས་སོགས་ཆོས་མང་དུ་གསན། དེ་ནས་ལྷོ་བྲག་ཏུ་ཕེབས་ཏེ་ཆེ་སར་བཏོན། དེ་ནས་ལོ་ཉེར་གཉིས་ལོན་པའི་ཚེ་ཁྱེའུ་དཀར་པོ་ཞིག་བྱུང་ནས། ཁྱོད་ལ་ཚེ་སྔོན་གྱི་རྣམ་སྨིན་ཡོད་པས་བྱང་ཆུབ་ལྟུང་བཤགས་ཀྱི་སྒྲུབ་པ་གྱིས་ཟེར་ནས་འཇའ་བཞིན་ཡལ། དེ་ནས་ལྟུང་བཤགས་ཀྱི་སྒྲུབ་པ་ལ་ཞུགས་ཐུན་རེ་ལ་ཕྱག་བདུན་བརྒྱ་རེའི་དམ་བཅའ་མཛད། ནུབ་གཅིག་གི་རྨི་ལམ་དུ་བཙུན་ཆུང་ལོ་བརྒྱད་པའི་ན་ཚོད་ཙམ་པ་སུམ་ཅུ་རྩ་ལྔ་བྱོན་ནས། སྡུག་བསྔལ་རྒྱ་མཚོར་བྱིང་བའི་གཞི་ཆེན་པོ། ། ཆགས་དང་སྡང་བའི་ངན་རྟོག་སྣ་ཚོགས་འདི། ། ངོ་བོ་རང་བཞིན་མེད་པར་རྟོགས་པ་ན། ། སྤང་བླངས་རྒྱུ་རྐྱེན་མེད་པ་ཆོས་ཀྱི་སྐུ། ། ཞེས་པ་ལ་སོགས་པའི་ཆོས་ཚིགས་བཅད་རེ་རེ་གསུངས་ནས་ནམ་མཁའ་ལ་བཞུད་པ་རྨིས། ཐུགས་དམ་ཤིན་ཏུ་འཕེལ་ཏེ་ཁམས་འདུས་ཤིག་ཡོད་པ་ཞི་ཞིང་བྱང་ཆུབ་ཀྱི་སེམས་དང་སྙིང་རྗེ་བཅོས་མ་མ་ཡིན་པ་རྒྱུད་ལ་སྐྱེས་ནས་ཉིན་མཚན་འཕྲོ་མི་ཆོད་པ་བྱུང་གསུང་། དགུང་ལོ་ཉེར་གསུམ་ལོན་དུས་སྒྲོ་བ་དགོན་པར་ཟླ་བ་དྲུག་མཚམས་བཅད་ནས་འཇམ་དཔལ་དང་དོན་ཞགས་ལ་གསོལ་བ་བཏབ། ཉེར་ལྔ་ལོན་དུས་བླ་མ་བདེ་བའི་འབྱུང་གནས་ཁར་ཆུར་བྱོན་པ་ལ་ཆོས་མང་དུ་གསན། ཡང་དེའི་ལོ་མཁན་ཆེན་རྒྱལ་སྲས་པས་མོན་གྲ་པ་གདན་དྲངས་ཏེ་ཆོས་འཁོར་ཆེན་མོ་མཛད། མོན་གྲ་པ་ལ་ཕྱག་རྡོར་ཁྱུང་ལྔའི་དབང་ལུང་དང་བློ་སྦྱོང་ཚིག་བརྒྱད་མ་སོགས་ཆོས་མང་དུ་གསན། དགུང་ལོ་སུམ་ཅུ་རྩ་གཅིག་ལོན་དུས་རྒྱལ་སྲས་པ་ཞིང་གཞན་དུ་གཤེགས་པའི་དགོངས་རྫོགས་ལ་གསེར་སྐུ་ཆེན་པོ་བཞེངས། ཕྱོགས་དེའི་སེར་སྐྱ་ཚང་མས་གདན་ས་མཛད་དགོས་པར་གསོལ་བ་བཏབ་སྟེ་སྒྲོ་བ་དགོན་པའི་ཆོས་ཀྱི་ཁྲི་ལ་ཕེབས། དེའི་ཚེ་གསང་བདག་གི་ཞལ་ནས། ལས་ཀྱི་རྡོ་རྗེ། ཁ་ཡི་ཆོས་ཀྱིས་འཚང་མི་རྒྱ། ། གཤོག་མེད་བྱ་ཡིས་འཕུར་མི་ནུས། ། སྨིག་རྒྱུའི་ཆུ་ཡིས་སྐོམ་མི་སེལ། ། རྒྱ་མཚོར་སྐོམ་རིར་མི་འཆི་འཚལ། ། ཁུ་བོ་མཻ་ཏྲི་འདི་སྐད་གསུང་། ། དེ་ཡང་ས་གསེར་ཟླ་བ་མེ། ། གཏེར་དང་རིན་ཆེན་འབྱུང་གནས་མཚོ། ། ཞེས་སོགས་སེམས་བསྐྱེད་ཉི་ཤུ་རྩ་གཉིས་ཀྱི་གདམས་པ་གནང་། དགུང་ལོ་བཞི་བཅུ་བཞེས་དུས་གསང་བདག་ལ་ཞུས་པས། སྡོམ་པ་གསུམ་གྱི་ཉེས་ལྟུང་དང་དམ་ཚིག་ཉམས་ཆགས་སྦྱོང་བའི་ཐབས་གསང་བ་བསམ་གྱིས་མི་ཁྱབ་པའི་གདམས་པ་ཟབ་མོ་གསུང་། ཕྱིས་ཡི་གེར་འདེབས་པར་མཛད་དོ། ། དགུང་ལོ་ཞེ་གཉིས་པའི་དུས་གསང་བདག་གི་ཞལ་ནས། ལས་ཀྱི་རྡོ་རྗེ། བླ་མ་ལ་མོས་གུས་མ་ཐོབ་པར་ཡི་དམ་ལྷའི་ཞལ་མཐོང་ཟེར་བ་དང་ཉམས་རྟོགས་བཟང་པོ་སྐྱེས་ཟེར་བ་རྫུན་ཡིན། འཆི་བ་སྙིང་ནས་མ་དྲན་པར་འཇིག་རྟེན་བློས་བཏང་ཟེར་བ་དང་། ལས་རྒྱུ་འབྲལ་ལ་ཡིད་ཆེས་མེད་པར་སྡིག་པ་མ་བྱས་ཟེར་བ་དང་། ཕན་སེམས་རྡུལ་ཙམ་མེད་པར་བྱམས་པ་སྙིང་རྗེ་རྒྱུད་ལ་སྐྱེས་ཟེར་བ་དང་། ཀུན་རྫོབ་ཀྱི་ཆོས་ཐམས་ཅད་བདེན་མེད་དུ་མ་རྟོགས་པར་སྟོང་པ་ཉིད་རྟོགས་ཟེར་བ་རྣམས་རྫུན་ཡིན། ཆོས་གཤའ་མ་ཅིག་བྱེད་ན་གཞི་དད་པ་གལ་ཆེ་གསུང་། དད་པ་སྐྱེ་བའི་རྒྱུ་གང་ལགས་ཞུས་པས་བླ་མ་སངས་རྒྱས་ལྟ་བུ་བསྟེན་ན་དད་པ་སྐྱེ། འཆི་བ་མི་རྟག་པ་དྲན་ན་དད་པ་སྐྱེ། མཆེད་གྲོགས་དད་པ་ཅན་དང་འགྲོགས་ན་དད་པ་སྐྱེ། འཁོར་བའི་ཉེས་དམིགས་དྲན་ན་དད་པ་སྐྱེ། ཞེས་པ་ལ་སོགས་པའི་གདམས་པ་མང་དུ་གསུངས་སོ། ། ཡང་ལན་ཅིག་བྲམ་ཟེ་ཆེན་པོ་ས་ར་ཧ་ཡིན་ཟེར་བ་གྲུབ་ཐོབ་ཅིག་དང་མཇལ། དེས་རྡོ་རྗེའི་ལུས་ཀྱི་གནས་ལུགས་རྒྱས་པ་ཅིག་གསུངས། དགུང་ལོ་རེ་གཅིག་བཞེས་དུས་ལི་ཡུལ་ཡིན་ཟེར་བའི་ལུང་པ་གསུམ་གཤིབ་འདུག་པའི་དབུས་མ་དེའི་དཀྱིལ་སྟོད་ན་ཕོ་བྲང་ཆེན་པོ་ཞིག་འདུག ། ཕོ་བྲང་དེ་ན་སུ་བཞུགས་པ་ཡིན་དྲིས་པས་ཇོ་བོ་དཱི་པཾ་ཀ་ར་ཤྲཱི་ཛྙཱ་ན་བཞུགས་པ་ཡིན་གསུང་། ཇོ་བོ་དེ་དང་མཇལ་བ་ཞིག་བྱུང་ན་སྙམ་ནས་གསོལ་བ་འདེབས་ཀྱིན་ཕྱིན་པས་ཇོ་བོ་ཆེན་པོ་ཞལ་རས་དཀར་ལ་སྐུ་བོང་ཆེ་བ་པཎ་ཞྭ་དམར་པོ་གསོལ་བ་ཅིག་བཞུགས་འདུག ། ཐུགས་རྗེས་གཟུང་དུ་གསོལ་ཞེས་གསོལ་བ་བཏབ་པས་ཇོ་བོ་རྗེས་གདམས་པ་མང་དུ་སྩལ་ལོ། ། དགུང་ལོ་བདུན་ཅུ་བཞེས་དུས་འཇག་དཀར་དུ་རྡོ་རྗེ་རྣམ་འཇོམས་ཀྱི་དབང་བྱས་པའི་ཐོ་རངས་ཡི་དམ་ལྷའི་ལུང་བསྟན་ལ། བཅོམ་ལྡན་འདས་མགོན་པོ་བྱམས་པའི་སྤྲུལ་པ་ཅིག་གི་གསུང་ཡིག་ཁྱེར་བའི་མི་བཞི་འོང་བར་ཡོད་གསུང་བ་བྱུང་། སང་དེ་མི་བཞི་བྱུང་། དགེ་བའི་བཤེས་གཉེན་བློ་བཟང་གྲགས་པའི་གསུང་ཡིག་ཡིན་པར་འདུག ། ཁོང་གི་ལོ་རྒྱུས་རྣམས་ཐོས་པ་ན་སྔོན་གྱི་དཔོན་སློབ་ཀྱི་འབྲེལ་པས་ཡིད་སྤྲོ་བ་ཅིག་བྱུང་གསུང་། དེ་ནས་ནུབ་གཅིག་རྨི་ལམ་དུ་དགེ་བཤེས་བློ་བཟང་གྲགས་པས་སངས་རྒྱས་རབ་བདུན་སྤྱན་དྲངས་ཡོད་ཟེར་བའི་སྐད་ལྷང་བ་ཅིག་བྱུང་། དེ་དང་བདག་མཇལ་ན་དགའ་བ་ལ་སྙམ་ཙ་ན། འཇའ་ཚོན་སྣ་ལྔའི་སྟེང་ན་ཚུར་སངས་རྒྱས་བདུན་པོ་དགུང་ལོ་བཅུ་གཉིས་པའི་ན་ཚོད་ལྟ་བུ་གཙུག་ཏོར་ཀྲོང་ངེ་ཡོད་པ་བྱོན་བྱུང་བས། གཉིད་སད་དེ་བལྟས་པས་ཡུན་རིང་དུ་བཞུགས་འདུག ། དེ་དུས་ཁོང་རྫིང་ཕྱིའི་མཆོད་ཁང་ལ་རབ་གནས་མཛད་ཀྱིན་ཡོད་པར་འདུག་གསུང་། ཡང་ལན་ཅིག་བུ་མོ་དཀར་མོ་ཞིག་ན་རེ། བྱམས་པས་བྱིན་གྱིས་བརླབས་པའི་གང་ཟག་འཇམ་པའི་དབྱངས་དང་གཉིས་སུ་མེད་པ་ལྷ་མོ་དབྱངས་ཅན་མས་རིག་པ་སྟེར་བར་བྱེད་པ་ཅིག་དང་སྐྱེ་བ་བཅོ་ལྔའི་གོང་ནས་འབྲེལ་བ་ཞིག་འོང་བར་ཡོད་པས། དེ་ལ་ཆོས་བཀའ་ལ་བསྲིས་མ་འཇུག་པར་བྱིན། ཕར་ལའང་ཆོས་ཞུས་ཟེར་བཞིན་བྱུང་གསུང་། ཡང་ལན་ཅིག་མགོན་པོ་བྱམས་པ་འབྱོན་ཀྱིན་ཡོད་ཟེར་བའི་སྐད་ལྷང་བ་ཅིག་བྱུང་། དེ་དུས་ཆོས་རྗེ་དཀའ་བཞི་བ་རྒྱ་མོ་རི་འཕྲེང་ལ་ཕེབས་པའི་ཚོད་དུ་འདུག ། སངས་རྒྱས་ཀྱིས་ཆོས་འཁོར་བསྐོར་བའི་དུས་དྲུག་པའི་ཚེས་བཞིའི་ཉིན་སྒྲོ་བ་དགོན་པར་ཕེབས་པ་ལ། བསུ་བ་ལ་ཐེགས་པས་རྗེ་བཙུན་འཇམ་དབྱངས་ཕེབས་བྱུང་བར་གཟིགས། རྗེ་བཙུན་ཙོང་ཁ་པས་བདག་ཕྱག་ན་རྡོ་རྗེར་དངོས་སུ་གཟིགས་འདུག་གསུང་། དེའི་ནུབ་མོ་རྗེ་རིན་པོ་ཆེ་ལ་བླ་མའི་རྣལ་འབྱོར་ཞིག་ཕོག་པས། ཕྱག་ན་རྡོ་རྗེ་བྱོན་ནས་རྗེ་རིན་པོ་ཆེ་ལ་ཐིམ་སོང་གསུང་། དེ་ནས་ཚེས་བཅོ་ལྔའི་ཐོ་རངས་ཤིག་བྱམས་པ་ཉིད་ལ་བསླབ་བཏུས་ཞུས་ཟེར་བ་ཞིག་བྱུང་། དེ་ནས་རྗེ་བཙུན་ཙོང་ཁ་པ་ལ་བསླབ་བཏུས་གསུང་པར་ཞུས་པས། རྗེ་བཙུན་ཙོང་ཁ་པས་གསུངས་ནས་ཡི་དམ་ལྷ་དེ་སྐད་གསུངས་ངམ་གསུང་ནས་བསླབ་བཏུས་གསུངས། དེ་དུས་མཐོང་སྣང་ལ་རྗེ་ཙོང་ཁ་པའི་དབུའི་སྟེང་ན་རྗེ་བཙུན་བྱམས་པ་བཞུགས། དཔུང་པ་གཡས་ན་འཇམ་དཀར། གཡོན་ན་དབྱངས་ཅན་མ། ཆོས་སྐྱོང་དང་མཁའ་འགྲོ་མང་པོས་བསྐོར་ཞིང། ལྷ་འདྲེ་མང་པོའང་ཆོས་ཉན་ཀྱིན་འདུག་པས་མོས་གུས་ཐུན་མོང་མ་ཡིན་པ་སྐྱེས་ཞེས་གསུང་། སོ་སོར་འབྲང་མའི་དབང་དང་སེམས་བསྐྱེད་ཀྱང་གསན། རྗེ་ཙོང་ཁ་པ་ལ་བདག་གིས་ཆོས་བཀའ་མ་ལུས་པ་རྫོགས་པར་ཕུལ། རྗེ་ཙོང་ཁ་པའི་འཁོར་བླ་མ་མཇལ་དཀར་བ་སོགས་ཕུན་སུམ་ཚོགས་པ་རྣམས་ལའང་ཆོས་ལུང་མང་དུ་བྱས། དཔོན་སློབ་ཐམས་ཅད་ལ་དད་པ་ཐོབ། དེའི་སྟོབས་ཀྱིས་ཁོ་བོ་ལའང་ཡོན་ཏན་བག་རེ་སྐྱེས་པ་བྱུང་། བདག་གིས་ཆོས་བསྟན་པའི་དུས་སུ་རྗེ་ཙོང་ཁ་པའི་གཟིགས་སྣང་ལ་ངའི་མགོ་ཐོག་ཏུ་ཤཱཀྱ་ཐུབ་པ། གཡས་སུ་ཕྱག་ན་རྡོ་རྗེ། གཡོན་དུ་གདུགས་དཀར་ཅན་རྣམས་བཞུགས་འདུག་པ་གཟིགས་འདུག་གསུང་། དེ་ལྟར་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ཞེས་མཚན་ཡོངས་སུ་གྲགས་པའི་བདག་ཉིད་ཆེན་པོ་འདིས་དགེ་བཤེས་སྟོན་པ་ནས་དགོན་པ་བ། དེ་ནས་སྣེའུ་ཟུར་པ་སོགས་ལ་བརྒྱུད་པའི་ལམ་རིམ་དང་། དགེ་བཤེས་སྟོན་པ་ནས་སྤྱན་སྔ་བ། དེ་ནས་བྱ་ཡུལ་བ་སོགས་ལ་རིམ་གྱིས་བརྒྱུད་པའི་ལམ་རིམ་སྟེ་བྱང་ཆུབ་ལམ་གྱི་རིམ་པ་བརྒྱུད་པའི་ཆུ་བོ་གཉིས་འདྲེས་ཀྱི་མན་ངག་རྣམས་རང་གིས་ཐུགས་ཉམས་སུ་བཞེས་ནས་རྟོགས་པ་མཆོག་ཐོབ་ཅིང་སྐལ་བ་དང་ལྡན་པ་གཞན་དག་ལའང་རྒྱ་ཆེར་སྤེལ་བས་བརྒྱུད་པའི་སྲོལ་འཛིན་ཇི་ལྟར་བྱུང་བ་ནི་ཡི་དམ་གསང་བའི་བདག་པོའི་ལུང་བསྟན་ལས། དད་པ་ཐོབ་པ་འབུམ་ཚོ་གཅིག ། ངེས་པར་གྲོལ་བ་ལྔ་བཅུ་སྟེ། ། རྩོད་མེད་གྲུབ་ཐོབ་བརྒྱད་དུ་ངེས། ། འགྲན་གྱི་དོ་མེད་བློ་བཟང་ཡིན། ། ཞེས་གསུངས་པ་ལྟར་བསྟན་འཛིན་དམ་པ་མང་དུ་བྱོན་ཞིང། འཕྲིན་ལས་རྒྱ་ཆེར་སྤེལ་བ་གངས་རིའི་ཁྲོད་ན་འགྲན་པའི་ཟླ་ཐམས་ཅད་དང་བྲལ་བ་ནི་རྗེ་བཙུན་ཆོས་ཀྱི་རྒྱལ་པོ་ཙོང་ཁ་པ་ཆེན་པོའོ། ། དེ་ལྟར་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་གྱིས་བསྟན་པ་དང་འགྲོ་བའི་དོན་རྒྱ་ཆེར་མཛད་ནས་སྐུ་ཚེ་འདིའི་དངོས་ཀྱི་གདུལ་བྱ་རྣམས་རྫོགས་པ་ན། དགུང་ལོ་བདུན་ཅུ་དོན་དྲུག་ཏུ་ཕེབས་པ་ 1401 ལྕགས་མོ་སྦྲུལ་གྱི་ལོ་ངོ་མཚར་བའི་ལྟས་བསམ་གྱིས་མི་ཁྱབ་པ་དང་བཅས་ཞི་བར་གཤེགས། སྐུ་གདུང་ཞུགས་ལ་ཕུལ་བས་ལྷ་སྐུ་རང་བྱུང་དང་རིང་བསྲེལ་ཁྲི་ཁྲག་མང་པོ་ཕེབས་ཏེ་སྐུ་གདུང་རིང་བསྲེལ་གྱིས་ཀྱང་གདུལ་བྱ་མཐའ་ཡས་པའི་བསོད་ནམས་ཀྱི་ཞིང་མཛད་དོ། ། དེས་ན་བྱང་ཆུབ་ལམ་རིམ་ལ་བློ་སྦྱོང་པར་འདོད་པ་རྣམས་ཀྱིས་བླ་མ་ཕྱག་རྡོར་བ་ཞེས་ཀྱང་གྲགས། གྲུབ་ཆེན་ལས་ཀྱི་རྡོ་རྗེ་ཞེས་ཀྱང་གྲགས། ལྷོ་བྲག་མཁན་ཆེན་ཞེས་ཀྱང་གྲགས་པ་མཁན་ཆེན་ནམ་མཁའ་རྒྱལ་མཚན་ལ་གསོལ་བ་འདེབས་ཤིང་། བདག་ཉིད་ཆེན་པོ་འདིའི་རྣམ་ཐར་ལྟར་བླ་མ་དང་ལྷག་པའི་ལྷ་དབྱེར་མ་མཆིས་པ་ལ་གསོལ་བ་འདེབས་ཤིང་། རྒྱལ་བའི་བཀའ་དང་དགོངས་འགྲེལ་མ་ལུས་པའི་དོན་གཅིག་ཏུ་བསྡུས་པའི་མན་ངག་བྱང་ཆུབ་ལམ་གྱི་རིམ་པ་སྒོམ་པ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ། ། ། །
༈ འཇམ་མགོན་བླ་མ་ཙོང་ཁ་པ་ཆེན་པོའི་མཛད་རྣམ།
༈ དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། ། དྲི་མེད་མཁྱེན་པའི་དབང་པོ་འཇམ་པའི་དབྱངས། ། བདུད་དཔུང་མ་ལུས་འཇོམས་མཛད་གསང་བའི་བདག ། གངས་ཅན་མཁས་པའི་གཙུག་རྒྱན་ཙོང་ཁ་པ། ། བློ་བཟང་གྲགས་པའི་ཞབས་ལ་གསོལ་བ་འདེབས། ། ཞེས་བསྔགས་པ་སྙིགས་མའི་དུས་སུ་གངས་རིའི་ཁྲོད་འདིར་རྒྱལ་བའི་བསྟན་པ་སྤེལ་བ་ལ་མཁྱེན་བརྩེ་ནུས་གསུམ་གང་གི་ཐད་ནས་ཀྱང་འགྲན་པའི་ཟླ་དང་བྲལ་བ་རིགས་གསུམ་མགོན་པོ་དང་མཚུངས་ཤིང་། རྒྱལ་བསྟན་ཡོངས་རྫོགས་འཛིན་ཅིང་སྤེལ་བ་ལ་རྒྱལ་བ་རང་ཉིད་སླར་བྱོན་པ་ལྟ་བུར་གྱུར་པ་རྗེ་བཙུན་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ནི། སྔོན་བསྐལ་པ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་པའི་དུས་ནས་བྱང་ཆུབ་མཆོག་ཏུ་ཐུགས་བསྐྱེད་དེ་རྒྱལ་བ་གྲངས་མེད་པ་མཆོད་ཅིང་བསྙེན་བཀུར། ཚོགས་གཉིས་ཡོངས་སུ་རྫོགས་ཏེ་སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་ཆོས་བཅོ་བརྒྱད་ལ་སོགས་པ་སངས་རྒྱས་ཀྱི་ཡོན་ཏན་ཐམས་ཅད་ཡོངས་སུ་རྫོགས་ནས་ནམ་མཁའི་མཐས་ཀླས་པའི་ཞིང་ཁམས་རབ་འབྱམས་ཐམས་ཅད་དུ་གདུལ་བྱ་རྣམས་ཀྱི་ཁམས་དང་བསམ་པ་དང་བག་ལ་ཉལ་དང་མཐུན་པར་སངས་རྒྱས་ཀྱི་མཛད་པས་འདུལ་བར་འོས་པ་རྣམས་ལ་སངས་རྒྱས་ཀྱི་མཛད་པ་སྟོན། བྱང་ཆུབ་སེམས་དཔའི་གཟུགས་ཀྱིས་འདུལ་བར་འོས་པ་རྣམས་ལ་བྱང་ཆུབ་སེམས་དཔའི་གཟུགས་སྟོན། ཉན་རང་གིས་འདུལ་བར་འོས་པ་རྣམས་ལ་ཉན་ཐོས་དང་རང་སངས་རྒྱས་ཀྱི་གཟུགས་སུ་སྟོན། རྒྱལ་པོས་འདུལ་བར་འོས་པ་རྣམས་ལ་རྒྱལ་པོའི་གཟུགས་སུ་སྟོན། ཐ་མལ་པའི་གཟུགས་ཀྱིས་འདུལ་བར་འོས་པ་རྣམས་ལ་གདུལ་བྱ་རང་རང་དང་སྐལ་བ་མཉམ་པའི་ཐ་མལ་པའི་གཟུགས་སྟོན་ཅིང་། གང་ལ་གང་འཚམས་ཀྱི་སྤྲུལ་པས་འགྲོ་བ་རྣམས་སྨིན་ཅིང་གྲོལ་བར་མཛད་པ་ལ་འབད་རྩོལ་དང་རྣམ་རྟོག་མི་མངའ་བར་ལྷུན་གྱིས་གྲུབ་པའི་འཕྲིན་ལས་ཀྱིས་ཁྱབ་པར་མཛད་ཅིང་བཞུགས་པ་ལས་མི་མཇེད་འཇིག་རྟེན་གྱི་ཞིང་འདིར་སྟོན་པ་ཐུབ་པའི་དབང་པོས་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པའི་མདོ་སྔགས་ཀྱི་ཆོས་ཀྱི་འཁོར་ལོ་བསྐོར་བར་མཛད་པ་འདི་ཉིད་སངས་རྒྱས་ཀྱི་མཛད་པ་ཐམས་ཅད་ཀྱི་ནང་ནས་རབ་དང་ཕུལ་དང་མཆོག་དང་གོང་ན་མེད་པར་གཟིགས་ནས་མདོ་སྔགས་ཡོངས་སུ་རྫོགས་པའི་བསྟན་པ་འདི་ཉིད་བྱང་ཕྱོགས་གངས་རིའི་ལྗོངས་འདིར་ཆེས་ཆེར་གསལ་པར་མཛད་ཕྱིར་བསམས་བཞིན་དུ་བྱོན་པ་ཞིག་གོ། རྗེ་བཙུན་ཙོང་ཁ་པ་ཆེན་པོ་འདི་ཉིད་རྒྱལ་བའི་མདོ་སྔགས་ཀྱི་བསྟན་པ་ཡོངས་སུ་རྫོགས་པ་སྤེལ་བའི་ཕྱིར་བསམ་བཞིན་བྱོན་པ་གང་གིས་ཤེས་སྙམ་ན། དེ་ནི་རྒྱལ་བའི་བཀའ་ལུང་ཚད་མ་དཔང་པོར་གྱུར་པ་ལས་ཤེས་ཏེ། སྐྱོབ་པ་ཉིད་གཟིགས་ལམ་གསུང་བ། ། འབྲས་མེད་ཕྱིར་ན་རྫུན་མི་གསུང་། ། ཞེས་གསུངས་པ་ལྟར་སྟོན་པ་ཐུབ་པའི་དབང་པོ་དུས་གསུམ་གྱི་ཤེས་བྱ་ཐམས་ཅད་ལག་མཐིལ་དུ་སྐྱུ་རུ་ར་བཞག་པ་ལྟར་མངོན་སུམ་དུ་གཟིགས་ཤིང་། རང་གི་ཡེ་ཤེས་སྒྲིབ་པ་མེད་པས་ཇི་ལྟར་གཟིགས་པ་དེ་ཁོ་ན་ལྟར་གསུང་བ་ལས་རྫུན་གསུང་བ་རྣམ་པ་ཀུན་ཏུ་མི་སྲིད་པར་བདེན་པ་གསུང་བའི་བཀའ་མདོ་དང་སྔགས་ཀྱི་ལུང་མང་པོ་དང་སྔོན་གྱི་སྐྱེས་བུ་དམ་པ་མང་པོའི་གསུང་ཚད་མ་དག་ལས་ཤེས་ཏེ། དེ་ཡང་རྗེ་བླ་མ་འདི་ཉིད་གངས་རིའི་ལྗོངས་འདིར་རྒྱལ་བསྟན་སྤེལ་བའི་ཕྱིར་དུ་འབྱོན་པར་མདོ་ལས་ལུང་བསྟན་ཚུལ་ནི། མདོ་སྡེ་གདམས་ངག་འབོགས་པའི་རྒྱལ་པོའི་བསྟན་པ་དྭངས་སྙིགས་འབྱེད་པའི་ལེའུ་ལས། ཀུན་དགའ་བོ། ད་ལྟ་ང་ལ་ཤེལ་དཀར་གྱི། ། ཕྲེང་བ་སྟེར་བའི་ཁྱེའུ་འདི། ། ང་ཡི་བསྟན་པའི་གསོ་བྱེད་ལ། ། མ་འོངས་སྙིགས་མའི་དུས་སུ་ནི། ། འབྲི་དང་ལྡན་གྱི་ས་མཚམས་སུ། ། དགེ་ཞེས་བྱ་བའི་དགོན་པ་འདེབས། ། བློ་བཟང་ཞེས་བྱའི་མིང་ཅན་འབྱུང་། ། འཁོར་ནི་རྣམ་མང་བསྡུ་བར་བྱེད། ། ཆོས་སྤྱོད་བཅུ་ཡི་རྒྱུན་འཛུགས་ཤིང་། ། ལྷ་ཁང་ཀ་བ་ཤིང་ལོ་ཅན། ། ང་ཡི་གཟུགས་སྐུ་རྣམ་གཉིས་ལ། ། དབུ་རྒྱན་འབུལ་ཞིང་མཆོད་པ་བྱེད། ། སྟོན་པའི་མདོ་བཞིན་གསུང་སྒྲོག་ཅིང་། ། སྙན་པའི་དབྱངས་ཀྱིས་གསོལ་བ་འདེབས། ། དེ་ལ་གསོལ་བ་རབ་འདེབས་ན། ། བསྟན་པ་ལོ་སྟོང་བར་དུ་གནས། ། དེ་ནས་འཕོས་ནས་ཤར་ཕྱོགས་ཀྱི། ། རྨད་བྱུང་བཀོད་པའི་འཇིག་རྟེན་དུ། ། སེང་གེའི་ང་རོ་ཞེས་བྱར་འགྱུར། ། དེ་ལ་དད་བྱེད་ཞིང་དེར་སྐྱེ། ། ཞིང་མཆོག་དེ་ནི་ཁྱད་པར་འཕགས། ། ཞེས་རྗེ་བླ་མ་ཙོང་ཁ་པ་ཆེན་པོའི་མཛད་པ་རྣམ་ཐར་དང་བཅས་པ་གསལ་བར་ལུང་བསྟན་ཏོ། ། རྗེ་བླ་མ་འདི་སྔོན་སངས་རྒྱས་ཞལ་བཞུགས་པའི་དུས་སུ་བྲམ་ཟེའི་ཁྱེའུར་འཁྲུངས་པ་བྱང་ཆུབ་སེམས་དཔའ་མོས་པའི་བློ་གྲོས་ཞེས་བྱ་བས་ཁྲིད་ནས་སྟོན་པ་ཐུབ་པའི་དབང་པོ་རྡོ་རྗེ་གདན་དུ་བཞུགས་པ་དང་མཇལ་ཏེ། ཤེས་དཀར་པོའི་འཕྲེང་བ་དྲི་མ་མེད་པ་བརྒྱ་རྩ་གཅིག་ཕུལ་ནས་བྱང་ཆུབ་ཏུ་ཐུགས་བསྐྱེད་ཅིང་། རྒྱལ་བ་མྱ་ངན་ལས་འདས་པའི་འོག་ཏུ་བསྟན་པ་ཉམས་པ་ལ་ཕྱོགས་པའི་ཚེ་བྱང་ཕྱོགས་གངས་རིའི་ཁྲོད་དུ་སྤྱིར་ཐུབ་པའི་བསྟན་པ་ཡོངས་སུ་རྫོགས་པ་གསལ་བར་བྱེད་པ་དང་། ལྷག་པར་བསྟན་པའི་སྙིང་པོ་ཟབ་མོ་དབུ་མའི་ལྟ་བ་རྣམ་པར་དག་པ་རྒྱལ་བ་རང་ཉིད་ཀྱི་དགོངས་པ་བཞིན་དུ་ཆེས་ཆེར་རྒྱས་པར་བྱེད་ནུས་པའི་སྨོན་ལམ་བཏབ་པ་ན་དེ་ཁོ་ན་ལྟར་འགྲུབ་བོ་ཞེས་ལུང་སྟོན་པ་ལ་ཀུན་དགའ་བོ། ། ད་ལྟ་ང་ལ་ཤེལ་དཀར་གྱི། ། ཕྲེང་བ་སྟེར་བའི་ཁྱེའུ་འདི། ། ང་ཡི་བསྟན་པའི་གསོ་བྱེད་ལ། ། ཞེས་སོགས་གསུངས། དེ་ལྟར་ལུང་བསྟན་པ་དེ་ཡང་རྗེ་བཙུན་བླ་མ་ཙོང་ཁ་པ་ཆེན་པོ་འདི་ཉིད་ཁོ་ན་ལ་གོ་བའི་ཕྱིར་བཞུགས་གནས་དང་མཚན་གསལ་བར་ལུང་བསྟན་པ་ནི། མ་འོངས་སྙིགས་མའི་དུས་སུ་ནི། ། འབྲི་དང་ལྡན་གྱི་ས་མཚམས་སུ། ། དགེ་ཞེས་བྱ་བའི་དགོན་པ་འདེབས། ། བློ་བཟང་ཞེས་བྱའི་མིང་ཅན་འབྱུང་། ། ཞེས་འབྲི་ཁུང་དང་སྐྱིད་ཤོད་ལྡན་གྱི་མཚམས་སུ་དགེ་ལྡན་ཞེས་བྱ་བའི་དགོན་པ་འདེབས་པ་དང་། དེའི་རྗེས་འཇུག་རྣམས་ལའང་དགེ་ལུགས་པ་ཞེས་ཟེར་བ་འབྱུང་བ་དང་། མཚན་བློ་བཟང་གྲགས་པ་ཞེས་བརྗོད་པ་འབྱུང་བར་གསལ་བར་ལུང་བསྟན། རྗེ་འདིའི་མཛད་པ་རྣམ་ཐར་ལུང་སྟོན་པ་ལ། འཁོར་ནི་རྣམ་མང་བསྡུ་བར་བྱེད། ། ཆོས་སྤྱོད་བཅུ་ཡི་རྒྱུན་འཛུགས་ཤིང་། ། ལྷ་ཁང་ཀ་བ་ཤིང་ལོ་ཅན། ། ང་ཡི་གཟུགས་སྐུ་རྣམ་གཉིས་ལ། ། དབུ་རྒྱན་འབུལ་ཞིང་མཆོད་པ་བྱེད། ། སྟོན་པའི་མདོ་བཞིན་གསུང་སྒྲོག་ཅིང་། ། སྙན་པའི་དབྱངས་ཀྱིས་གསོལ་བ་འདེབས། ། ཞེས་གསུངས་ཏེ། རྗེ་བདག་ཉིད་ཆེན་པོ་ཁ་བ་ཅན་གྱི་ལྗོངས་འདིར་བྱོན་ནས་གདུལ་བྱ་འདུལ་བའི་དུས་ལ་བབ་པ་ན། རྗེ་བཙུན་སྤྱན་རས་གཟིགས་དང་རྗེ་བཙུན་གསང་བའི་བདག་པོ་ལ་སོགས་པ་ཕྱོགས་བཅུའི་ཞིང་ནས་རྒྱལ་སྲས་མཐུ་ཆེན་མང་པོ་ཞིག་རྗེ་འདིའི་བསྟན་པ་སྤེལ་བའི་གྲོགས་སུ་བྱོན་ཏེ། དབང་ཕྱུག་དང་། སྟོབས་དང་། ལོངས་སྤྱོད་ཀྱིས་འཁོར་དབང་མེད་དུ་བསྡུས་པ་མ་ཡིན་པར་སྐད་ཅིག་ཉིད་ལ་ནུབ་ཕྱོགས་ཛ་ལནྡྷ་ར་ནས་ཤར་པྱོགས་རྒྱ་མཚོ་ཆེན་པོ་ལ་ཐུག་གི་བར་རྗེ་བླ་མའི་འཁོར་ཐུབ་བསྟན་ཡོངས་རྫོགས་འཛིན་པའི་བཤེས་གཉེན་ཆེན་པོ་དག་གིས་ཁྱབ་སྟེ་རྣམ་པར་དཀར་བའི་ཆོས་ཀྱི་འཕྲིན་ལས་ཀྱིས་ས་ཆེན་པོའི་ཁྱོན་འདི་ཡོངས་སུ་གང་བ་མཆོག་དམན་བར་མ་ཀུན་གྱི་མིག་ལ་སྣང་བ་འདི་རྒྱལ་བས་ལུང་བསྟན་པ་ལྟར་མངོན་སུམ་དུ་གྲུབ་པ་ཡིན་ལ། གངས་རིའི་ཁྲོད་འདིར་ཐུབ་པའི་བསྟན་པ་ཡུན་རིང་དུ་གནས་པའི་རྟེན་འབྲེལ་བསྒྲིག་ཕྱིར་ཆོས་རྒྱལ་སྲོང་བཙན་སྒམ་པོས་སྤྲུལ་པའི་བཟོ་བོ་མཐའ་ཡས་པ་སྤྲུལ་ཏེ་བཞེངས་པ་ལྷ་ལྡན་སྤྲུལ་པའི་གཙུག་ལག་ཁང་། གང་དུ་བཀའ་ཆེམས་གཏེར་དུ་སྦས་པའི་ཀ་བ་ཤིང་ལོ་ཅན་ཞེས་བྱ་བ་ཡོད་པའི་ལྷ་ཁང་གི་རྟེན་གྱི་གཙོ་བོ་སྟོན་པའི་སྐུ་གཟུགས་བསྟན་པ་འདི་ལ་སྟོན་པ་རང་ཉིད་དངོས་སུ་བཞུགས་པ་དང་མཚུངས་པར་བྱིན་རླབས་ཅན་དུ་གྲགས་པ་ཇོ་བོ་ཤཱཀྱ་མུ་ནེ་དང་། མི་བསྐྱོད་རྡོ་རྗེ་གཉིས་ལ་དབུ་རྒྱན་འབུལ་ཞིང་ཆོ་འཕྲུལ་གྱི་མཆོད་པ་རྒྱ་ཆེན་པོ་བླ་ན་མེད་པ་བྱེད་པ་དང་། དེའི་དུས་སུ་དགེ་འདུན་ཁྲི་ཁྲག་བརྒལ་བ་འཚོགས་ཏེ་གསོལ་བ་འདེབས་པ་རྣམས་གསལ་བར་ལུང་བསྟན། དེ་ལྟར་མཛད་པའི་མཐུས་ཐུབ་པའི་བསྟན་པ་ཉམས་པ་གསོས་ཏེ་ལོ་སྟོང་གི་བར་དུ་འཕེལ་ཞིང་གནས་པ་དང་། རྗེ་འདི་ཉིད་མ་འོངས་པ་ན་ངོ་མཚར་རྨད་བྱུང་བཀོད་པའི་འཇིག་རྟེན་དུ་རྒྱལ་བ་སེང་གེའི་ང་རོ་ཞེས་བྱ་བར་འཚང་རྒྱ་བར་འགྱུར་བ་དང་། རྗེ་བླ་མ་འདི་ལ་དད་པ་བྱེད་པ་རྣམས་ཀྱང་ཞིང་དེར་སྐྱེ་བར་འགྱུར་རོ་ཞེས་སྟོན་པ་ལ། དེ་ལ་གསོལ་བ་རབ་འདེབས་ན། ། བསྟན་པ་ལོ་སྟོང་བར་དུ་གནས། ། དེ་ནས་འཕོས་ནས་ཤར་ཕྱོགས་ཀྱི། ། རྨད་བྱུང་བཀོད་པའི་འཇིག་རྟེན་དུ། ། སེང་གེའི་ང་རོ་ཞེས་བྱར་འགྱུར། ། དེ་ལ་དད་བྱེད་ཞིང་དེར་སྐྱེ། ། ཞིང་མཆོག་དེ་ནི་ཁྱད་པར་འཕགས། ། ཞེས་གསལ་བར་གསུངས་སོ། ། ལྷ་མོ་དྲི་མ་མེད་པས་ཞུས་པའི་མདོ་ལས། བྱང་ཕྱོགས་གངས་རིའི་རྒྱུད་ཀྱི་སར། ། དགེ་བ་ལྡན་པའི་ས་ཕྱོགས་སུ། ། དམ་པའི་ཆོས་ནི་རྒྱས་པར་འགྱུར། ། ཞེས་རྗེ་བླ་མ་འདི་ཉིད་གང་དུ་འབྱོན་པའི་དགོན་གནས་གསལ་བར་ལུང་བསྟན་ཏོ། ། ལང་ཀར་གཤེགས་པའི་མདོ་ལས་བསྟན་པ་ནི། མདོ་དེ་ཉིད་རྒྱ་ནག་ཏུ་འགྱུར་བ་ལས། བཅོམ་ལྡན་འདས་ལ་ཀླུའི་རྒྱལ་པོ་མ་དྲོས་པས་དུང་དཀར་པོ་ཞིག་ཕུལ་བ་མཽ་འགལ་གྱི་བུ་ལ་གནང་ནས་འདི་ཁྱོད་ཀྱིས་འགོག་པའི་རིར་སྦོས་ཤིག ། མ་འོངས་པ་ན་དགེ་སློང་པདྨའི་ངད་ལྡན་འདིས་གཏེར་ནས་འདོན་པས་དེའི་ཚོགས་དུང་དུ་འགྱུར་གྱི་གཏེར་བདག་སྤྲེའུའི་གནས་བྱེད་དོ། ། ཞེས་རྗེ་བདག་ཉིད་ཆེན་པོ་འདིས། འགོག་པ་རི་ཞེས་བྱ་བ་འབྲོག་རི་བོ་ཆེ་དགའ་ལྡན་གྱི་བྱང་ངོས་ནས་དུང་གཏེར་ནས་བཞེས་ཏེ་ལྷ་ས་སྨོན་ལམ་ཆེན་མོའི་ཚོགས་དུང་མཛད། དེ་ནས་འཇམ་དབྱངས་ཆོས་རྗེ་ལ་གནང་སྟེ་འབྲས་སྤུངས་སུ་རྗེའི་བསྟན་པ་ཆེས་ཆེར་འཕེལ་བའི་རྟེན་འབྲེལ་བསྒྲིག་པར་མཛད། ཐུགས་སྨོན་མཛད་པ་ལྟར་གྲུབ་སྟེ་ད་ལྟ་ཡང་འཛམ་བུའི་གླིང་ན་མདོ་སྔགས་ཀྱི་བཤད་སྒྲུབ་འཕེལ་བ་དང་། དགེ་འདུན་གྲངས་མང་བར་བཞུགས་ཤིང་། གཏེར་དུང་ཡང་ཀུན་གྱི་མིག་ལ་བལྟར་ཡོད་པ་འདི་ལྟར་རོ། ། གཏེར་དུང་དེ་བཞིན་ད་ལྟ་རྒྱ་གར་ལྷོ་ཕྱོགས་འབྲས་སྤུངས་ཚོགས་ཆེན་གྱི་རྟེན་གཙོར་བཞུགས་སོ། ། རྗེ་བཙུན་འཇམ་པའི་དབྱངས་ཀྱིས་ཀྱང་རྗེ་རིན་པོ་ཆེ་ཉིད་ལ་སྤྲུལ་པའི་གླེགས་བམ་ཆེན་མོ་གནང་དུས་གཏེར་དུང་འདིའི་ལོ་རྒྱུས་གསལ་བར་གསུངས་པ་གྲུབ་ཆེན་དབེན་ས་པས་ལུང་བསྟན་གསལ་བའི་མེ་ལོང་ཡི་གེར་བཀོད་པ་དབེན་ས་བཀའ་འབུམ་ན་བཞུགས་པ་ལྟར་རོ། ། རྗེ་བླ་མ་འདི་ཉིད་རྒྱུད་ནས་ལུང་བསྟན་ཚུལ་ནི། འཇམ་དཔལ་རྩ་རྒྱུད་ལས། ། འཇིག་རྟེན་ང་ནི་མྱ་ངན་འདས། ། ས་ཡི་སྟེང་འདི་སྟོངས་གྱུར་ན། ། ཁྱོད་ཉིད་བྱིས་པའི་གཟུགས་ཀྱིས་ནི། ། སངས་རྒྱས་མཛད་པ་བྱེད་པར་འགྱུར། ། དེ་ཚེ་དགོན་ཆེན་རབ་དགའ་བ། ། ཁ་བ་ཅན་ནང་ཡོད་པ་ཡིན། ། ཞེས་གསལ་བར་ལུང་བསྟན་ཏེ། དེ་ཡང་རྒྱལ་བ་མྱ་ངན་ལས་འདས་ནས་འགྲོ་བ་མགོན་སྐྱབས་དང་བྲལ་བར་གྱུར་པ་ན་རྗེ་བཙུན་འཇམ་པའི་དབྱངས་བྱིས་པ་སྟེ་ཐ་མལ་པའི་ཚུལ་བཟུང་ནས་སེམས་ཅན་གྱི་དོན་རྒྱ་ཆེར་མཛད་པ་དང་། ལྷག་པར་བྱང་ཕྱོགས་ཁ་བ་ཅན་དུ་དགའ་ལྡན་ཞེས་བྱ་བའི་དགོན་པར་སངས་རྒྱས་ཀྱི་མཛད་པ་བྱེད་པ་དང་། མཚན་ཡང་བློ་བཟང་གྲགས་པ་ཞེས་འབྱུང་བར་ལུང་བསྟན། ཡང་འཇམ་དཔལ་རྩ་རྒྱུད་ལས། བློ་ལྡན་དང་པོར་ཡི་གེ་མ། ། དེ་བཞིན་སྡོམ་བརྩོན་དད་པ་འབྱུང་། ། རྣམ་པ་དུ་མར་སྡོམ་བརྩོན་གསུངས། ། དེ་ཚེ་མཐའ་ཡས་འབྱུང་བར་འགྱུར། ། སྡོམ་བརྩོན་ཐམས་ཅད་བསྒྲགས་པ་ཡང་། ། སྟོན་པའི་བསྟན་པ་གསལ་བར་བྱེད། ། བསྟན་པ་དེ་ཚེ་ས་སྟེང་དུ། ། རྣམ་པར་ཉམས་ཤིང་སྣང་མེད་ལ། ། སྟོན་པའི་གཟུགས་བརྙན་ཡིད་དུ་འོང་། ། བྱེད་པར་འགྱུར་བར་ཐེ་ཚོམ་མེད། ། ཐམས་ཅད་བྱང་ཆུབ་ལུང་བསྟན་ཏེ། ། ང་ཡི་བྱང་ཆུབ་མཆོག་ཐོབ་འགྱུར། ། དེར་ནི་འཇིག་རྟེན་སྦྱིན་གནས་འགྱུར། ། སྲིད་པ་གསུམ་གྱི་མཐར་ཡང་བྱེད། ། སྔགས་དང་རྒྱུད་ལ་མངོན་བརྩོན་པའི། ། གྲགས་པ་འཛིན་པར་ཤེས་པར་བྱ། ། ཞེས་ཤིན་ཏུ་གསལ་བར་ལུང་བསྟན་ཏེ། ། ཡི་གེ་མ་ཞེས་པ་ནི། བློ་བཟང་གྲགས་པ་ཞེས་པའི་སཾ་སྐྲྀ་ཏའི་སྐད་ཀྱི་མིང་ཡིག་དང་པོ་སྟེ། བློ་བཟང་གྲགས་པ་ཞེས་པའི་སྐད་དོད་ལ། མ་ཏི་བྷ་དྲ་ཀིརྟི་ཞེས་འབྱུང་ངོ་། ། དེ་ཡང་མ་ཏི་ཞེས་པ་གཞན་དང་འཁྲུལ་གཞི་མི་འབྱུང་བའི་ཕྱིར་རྗེ་འདིའི་མཛད་ཆེན་བཞིའི་ཡ་གྱལ་ཆོ་འཕྲུལ་མཆོད་པའི་མཛད་པ་ཇོ་བོ་ལ་དབུ་རྒྱན་ཕུལ་ཏེ་ཡིད་འོང་དུ་བྱེད་པ་དང་། དེའི་ཚེ་གདུལ་བྱ་བགྲང་བ་ལས་འདས་པ་ལ་དགེ་བའི་རྩ་བ་བསྐྱེད་དེ་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་བ་དང་། དེ་ལྟ་བུའི་བསྟན་པ་འཛིན་པའི་བདག་ཉིད་ཆེན་པོ་དེ་གྲགས་པའི་མཚན་ཅན་ཞིག་བྱུང་ངོ་། ། ཞེས་གཞན་སུ་དང་ཡང་མི་ནོར་བར་བྱ་བའི་ཕྱིར་གསེར་བརྟག་པའི་རྡོ་ཀ་ཞི་པ་ལྟར་ལུང་བསྟན་མཛད་དོ། ། དེ་ལྟར་མདོ་རྒྱུད་དུ་མ་ནས་ལུང་བསྟན་ཅིང་སྔོན་གྱི་སྐྱེས་བུ་དམ་པ་དུ་མས་ཀྱང་བསྟན་པའི་བདག་པོ་རྗེ་བླ་མ་འདི་ལྟར་འབྱོན་པ་ལུང་བསྟན་ཏེ། ཆོས་རྒྱལ་སྲོང་བཙན་སྒམ་པོས། དེ་ནས་ཁྱད་པར་བསྙེན་བཀུར་ཆེར་མཛད་པ། ། དགེ་སློང་བྱང་སེམས་ཤར་ཕྱོགས་སྐུ་འཁྲུངས་པ། ། གསང་སྔགས་འཆང་ཞིང་སྐྱེས་ཆེན་དམ་པ་ནི། ། སྙིང་པོའི་མཐའ་རྟེན་རྣལ་འབྱོར་ཆེན་པོ་དེས། ། ཞལ་ཡང་བསྒྱུར་ཞིང་བསྙེན་བཀུར་ཆེན་པོ་མཛད། ། དེ་ལ་བསྙེན་བཀུར་ཆེར་བྱེད་དེ་དག་ནི། ། འཕགས་པའི་གང་ཟག་དགེ་སྦྱོང་ཤ་སྟག་གོ ། དེ་ཕྱིར་དེ་དག་ཀུན་ལ་གུས་པ་བསྐྱེད། ། དེ་དག་ཅི་ཕྱིར་འཕགས་པ་ཡིན་ཞེ་ན། ། སངས་རྒྱས་རྣམས་ལ་མཛད་པ་ཆེན་པོ་མཛད། ། དེ་ཕྱིར་དེ་དག་འཕགས་པའི་གང་ཟག་གོ ། དེ་ལྟར་འཕགས་པའི་གང་ཟག་རྣམས་འབྱུང་ཞིང་། ། འཁོར་ནི་ལེགས་གནས་སྟོན་པའི་གསུང་རབ་དང་། ། སྟོན་པའི་སྐུ་གཟུགས་དངོས་སུ་བཞུགས་པ་དང་། ། རི་བོ་ཡོན་ཏན་ཅན་ཡང་དེ་ན་ཡོད། ། ཅེས་བདག་ཉིད་ཆེན་པོ་འདི་འཁྲུངས་ཡུལ་དང་། དགེ་བསྙེན་གྱི་སྡོམ་པ་བཞེས་པའི་མཚན་དང་། ཇོ་བོ་རྣམ་གཉིས་ལ་དབུ་རྒྱན་འབུལ་བ་དང་། མཆོད་པ་རྒྱ་ཆེན་པོ་མཛད་དེ་བསྟན་པ་རྒྱས་པར་མཛད་པ་དང་། གསུང་ལས་སྐྱེས་པའི་འཕགས་པའི་གང་ཟག་མཐའ་ཡས་པ་འབྱུང་ཞིང་སྟོན་པའི་བསྟན་པ་ཆེས་ཆེར་གསལ་བར་མཛད་པ་རྣམས་གསལ་བར་ལུང་བསྟན་ཏོ། ། ཇོ་བོ་རྗེ་དཔལ་ལྡན་ཨ་ཏི་ཤ་དང་འབྲོམ་རིན་པོ་ཆེ་གཉིས་ཀྱིས་ཡེར་པ་ལྷ་རི་སྙིང་པོར་ལོ་གསུམ་གྱི་བར་དུ་བགྲོ་བ་མཛད་པའི་གསང་ཆོས་བཀའ་གདམས་གླེགས་བམ་ལས། བླ་མ་དྲི་མ་མེད་པས། བདག་ཀྱང་གནས་དེར་ལྷ་འདྲེ་འདུལ་དུ་འགྲོ། ཞེས་སློབ་དཔོན་པདྨ་དང་། སྤྲུལ་པ་གཅིག་ནི་རྒྱ་གར་གནས་སུ་འགྲོ། ཞེས་ཇོ་བོ་ཆེན་པོ་དང་། སྤྲུལ་པ་གཅིག་ནི་བལ་པོའི་མཐིལ་དུ་འགྲོ། ཞེས་པཎྜི་ཏ་པདྨ་བཛྲ་དང་། སྤྲུལ་པ་གཅིག་ནི་མདོ་ཁམས་སྨད་ལ་འགྲོ། ཞེས་མདོ་སྨད་དུ་འཁྲུངས་པ་འཇམ་མགོན་བླ་མ་དང་། མར་མེ་མཛད་ཀྱང་གནས་མཆོག་འདིར། ། སྒྲོལ་མར་བཅས་ཏེ་སྤྲུལ་སྟོང་འགྱེད། ། ལྷག་པར་ཆགས་མེད་བསོད་སྙོམས་པས། ། སྙན་པའི་དབྱངས་ཀྱིས་གསོལ་བ་འདེབས། ། ཕྱོགས་བཞིའི་ལས་ཅན་དབང་དུ་སྡུད། ། ང་ཡི་མཆོད་ཚོགས་རྒྱས་པར་བྱེད། ། མར་མེ་མཛད་དང་བྱམས་པ་ཡང་། ། ཁྱོད་ཀྱི་གྲོགས་བཟང་སྤེལ་བར་བྱེད། ། རིང་པོར་མི་ཐོགས་གནས་མཆོག་འདིར། ། མཆོད་ཚོགས་རྒྱ་མཚོ་འདུ་བར་འགྱུར། ། སྤྱན་རས་གཟིགས་དབང་བཟང་པོར་སྤྲུལ། ། ཞེས་དང་། གླེགས་བམ་ཕ་ཆོས་ལས། གྲགས་དང་ཡང་གྲགས་རིན་ཆེན་གྱི། ། གྲགས་པའི་མཐའ་བཟང་དཔལ་དུ་གྲགས། ། བློ་གྲོས་ཤེས་རབ་གཞན་དུ་གསོལ། ། གཞན་ཡང་གྲགས་པའི་མཚན་རབ་ཅན། ། མང་པོས་འགྲོ་བའི་བདེ་སྐྱིད་བསྐྲུན། ། ཞེས་དང་། དེ་ཉིད་ལས། བདག་གི་སྤྲུལ་པ་དམ་པ་ཅིག ། རེས་འགའ་དགེ་སློང་ཉིད་དུ་སྤྲུལ། ། དེས་ནི་གནས་དེ་སྐྱོང་བར་བྱེད། ། རེས་འགའ་བྱིས་པའི་གཟུགས་སུ་འོང་། ། རེས་འགའ་དབུལ་ཕོངས་སྤྲང་པོའི་གཟུགས། ། རེས་འགའ་བྱོལ་སོང་བྱ་ཁྱིའི་གཟུགས། ། རེས་འགའ་གསོལ་འདེབས་དབྱངས་ཀྱི་གཟུགས། ། རེས་འགའ་ཡིག་འབྲུ་གཟུངས་ཀྱི་གཟུགས། ། གྲགས་པ་ཅན་ནི་དགེ་སློང་ངོ་། ། བསྟན་གནས་བར་དུ་ཡང་ཡང་འོང་། ། དེ་ནི་རྒྱུད་པ་ཉིད་དང་མཚུངས། ། ཁྲིམས་ལྡན་དེ་ཡིས་བྱིན་བརླབས་ཤིང་། ། སྐྱེས་བུ་གསུམ་ནི་དོན་གཉེར་བའི། ། བྱ་བ་མྱོང་བ་བརྒྱ་ཕྲག་ཙམ། ། གནས་དེར་བསམ་གཏན་སྒོམ་པར་བྱེད། ། ཅེས་དང་། ལྷ་དང་བཅས་པའི་མཆོད་པའི་གནས། ། བཀུར་འོས་ཉིད་དུ་ངེས་པར་འགྱུར། ། མདོར་ན་གནས་མཆོག་དེ་དག་ཏུ། ། དང་པོ་བཞི་གྲྭ་ནས་བཟུང་སྟེ། ། ཐ་མར་སྟོང་ཕྲག་ཕྱེད་དང་གསུམ། ། བསླབ་པ་གསུམ་ལྡན་ཤཱཀྱའི་སྲས། ། འགྲོ་བ་ཀུན་གྱི་མགོན་དུ་འགྱུར། ། གནས་དེར་ཕྱོགས་དང་ཕྱོགས་མཚམས་ནས། ། དགེ་འདུན་དཔག་མེད་འདུ་བར་འགྱུར། ། སྤྱིར་ཡང་ལས་ཅན་ཕྱོགས་བཅུར་འཕྲོ། ། ཕྱི་ཡི་རྒྱ་མཚོ་དག་དང་མཚུངས། ། ཆུ་བོ་བརྒྱ་ཡིས་གང་མི་ནུས། ། ཅི་ཙམ་ཞིག་གིས་དམའ་མི་ནུས། ། ཞེས་དང་། ཡང་། ཐ་མར་བསྟན་པའི་མེ་རོ་དག ། གྲགས་པའི་མཚན་གྱིས་གསོ་བར་བྱེད། ། དུ་མའི་ཕན་བདེ་སྒྲུབ་བྱེད་པའི། ། དེ་ཡང་གནས་མཆོག་དམ་པ་ཡིན། ། ཞེས་རྗེ་བདག་ཉིད་ཆེན་པོ་འཁོར་དང་བཅས་པ་གསལ་བར་ལུང་བསྟན་ཏོ། ། རྗེ་བཙུན་འཇམ་པའི་དབྱངས་ཀྱིས་གྲུབ་ཆེན་འཇམ་དཔལ་རྒྱ་མཚོ་ལ་གསུངས་པའི་ལུང་བསྟན་ལས་ཀྱང་། སྟོན་བསྐལ་པ་གྲངས་མེད་དཔག་ཏུ་མེད་པའི་སྔ་རོལ་ཏུ། དེ་བཞིན་གཤེགས་པ་དབང་པོའི་ཏོག་ཅེས་བྱ་བ་འཇིག་རྟེན་དུ་བྱུང་སྟེ། འཁོར་ཚོགས་རྒྱ་མཚོའི་དབུས་སུ་ཐེག་པ་མཆོག་ཏུ་གྱུར་པ་རྡོ་རྗེ་ཐེག་པའི་ཆོས་ཀྱི་འཁོར་ལོ་བསྐོར་བར་མཛད་དོ། ། དེའི་ཚེ་རྗེ་བདག་ཉིད་ཆེན་པོ་འདི་ཉིད་རྗེ་བཙུན་འཇམ་དཔལ་དབྱངས་ཀྱི་སྲས་ཀྱི་ཐུ་བོ། གཟུངས་དང་། སྤོབས་པ་དང་། མངོན་པར་ཤེས་པ་དང་། ཏིང་ངེ་འཛིན་དང་། བདེན་གཉིས་མངོན་སུམ་དུ་གཟིགས་པ་དག་པའི་ཡེ་ཤེས་ལ་སོགས་པ་ཡོན་ཏན་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། ། དེ་ནས་རྗེ་བཙུན་འཇམ་དཔལ་དབྱངས་འཁོར་དང་བཅས་པ་དེ་བཞིན་གཤེགས་པ་དབང་པོའི་ཏོག་རྡོ་རྗེ་ཐེག་པའི་ཆོས་འཁོར་བསྐོར་བའི་མདུན་སར་གཤེགས་ཤིང་བཞུགས་པ་ན། བཅོམ་ལྡན་འདས་རྒྱལ་བ་དབང་པོའི་ཏོག་གིས་ཚངས་པའི་དབྱངས་ཀྱིས། བྱང་ཆུབ་སེམས་དཔའ་གང་དག་མ་དག་པའི་ཞིང་ཁམས་གྲངས་མེད་པ་རྣམས་སུ་ཟབ་མོ་དབུ་མའི་ལམ་དང་འབྲེལ་བའི་རྡོ་རྗེ་ཐེག་པའི་ལམ་བཟང་ལུས་དང་སྲོག་ལ་མི་ལྟ་བར་རྒྱས་པར་བྱེད་པ་དེ་ནི། རྒྱལ་སྲས་རྣམས་ཀྱི་རླབས་ཆེན་སྤྱོད་པ་རྒྱ་མཚོའི་རབ་དང་། ཕུལ་དང་། མཆོག་ཏུ་གྱུར་པའོ། ། ཞེས་སེང་གེའི་སྒྲ་སྒྲགས་པ་ན། བདག་ཉིད་ཆེན་པོ་འདི་སྙིང་སྟོབས་ཆེས་ཆེར་རྒྱས་པས་འཁོར་ཚོགས་རྒྱ་མཚོའི་དབུས་སུ་བཞེངས་ཏེ་ཞུམ་པ་མེད་པའི་སྒྲ་དབྱངས་ཀྱིས། དེང་ནས་བརྩམས་ཏེ་ལུས་དང་སྲོག་ལ་མི་ལྟ་བར་མ་དག་པའི་ཞིང་གྲངས་མེད་པར་ཟབ་མོ་དབུ་མའི་ལྟ་བ་དང་འབྲེལ་བའི་རྡོ་རྗེ་ཐེག་པའི་ལམ་བཟང་རྒྱས་པར་བྱའོ་ཞེས་དེ་བཞིན་གཤེགས་པ་དབང་པོའི་ཏོག་སོགས་ཕྱོགས་བཅུའི་རྒྱལ་བ་སྲས་བཅས་དཔང་དུ་བཞག་སྟེ་དམ་བཅས་ཤིང་བདེན་པའི་ཚིག་གི་སྒྲ་དབྱངས་བསྒྲགས་སོ། ། དེའི་ཚེ་དེ་བཞིན་གཤེགས་པ་དབང་པོའི་ཏོག་སོགས་ཕྱོགས་བཅུའི་སངས་རྒྱས་ཐམས་ཅད་ཀྱིས་ལེགས་སོ། ། ཁྱོད་ནི་བྱང་ཆུབ་སེམས་དཔའ་སྙིང་སྟོབས་ཆེན་པོའོ། ། ཞེས་དབུགས་དབྱུང་ཞིང་། དེ་ནས་བཟུང་སྟེ་སངས་རྒྱས་ཀྱི་ཞིང་ཐམས་ཅད་དུའང་བདག་ཉིད་ཆེན་པོ་འདིའི་མཚན་བྱང་ཆུབ་སེམས་དཔའ་སྙིང་སྟོབས་ཆེན་པོར་གྲགས་སོ། ། དེ་ནས་རྒྱལ་བ་དབང་པོའི་ཏོག་སྐུ་ལས་འོད་ཟེར་གྱི་ཚོགས་བྱེ་བ་དཔག་ཏུ་མེད་པ་འགྱེད་ཅིང་ཞལ་འཛུམ་པ་དང་ལྡན་པས། ཁྱོད་ཀྱིས་ཇི་ལྟར་དམ་བཅས་པ་བཞིན་དུ་དེང་ནས་བཟུང་སྟེ་མ་དག་པའི་ཞིང་གྲངས་མེད་པ་རྣམས་སུ་མདོ་སྔགས་ཀྱི་དམ་ཆོས་རྒྱས་པར་བྱས་ཏེ། མཐར་གྱིས་ངོ་མཚར་རྨད་བྱུང་བཀོད་པའི་ཞིང་དུ་དེ་བཞིན་གཤེགས་པ་སེང་གེའི་ང་རོ་ཞེས་བྱ་བའི་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་པར་མཛད་དོ། ། ཡེ་ཤེས་ཀྱི་མཁའ་འགྲོ་མ་མ་ཅིག་ལབ་ཀྱི་སྒྲོན་མས་གཅོད་གཞུང་ཆེན་མོར་བསྟན་པའི་འཕེལ་འགྲིབ་ལུང་བསྟན་པ་ལས། ཡུམ་གྱིས་དེ་ལྟ་བུའི་རྒྱལ་ཁྲིམས་དང་ཆོས་ཁྲིམས་འཕྱུགས་པའི་དུས་སངས་རྒྱས་ཀྱི་བསྟན་པ་མུན་ནག་ཏུ་གློག་འཁྱུག་པ་ལྟ་བུ་ཞིག་འབྱུང་ཞེས་གསུངས་པ་ལ། བསོད་ནམས་རྒྱན་ལ་སོགས་པ་བུ་མོ་བཞིས། དེ་ལྟ་བུའི་བཀའ་དྲིན་ཅན་དེ་སུ་ལགས། ཞེས་སོགས་མང་དུ་ཞུས་པའི་ལན་དུ། བུ་མོ་ཁྱོད་ཀྱིས་དྲིས་པའི་བྱང་སེམས་དེ། ། མ་འོངས་བསྐལ་བཟང་སངས་རྒྱས་བདུན་པ་ཡིན། ད་ལྟ་བྱང་ཆུབ་སེམས་དཔའ་སྙིང་སྟོབས་ཆེ། ། སྙིགས་དུས་ལོག་སྤྱོད་བོད་ཡུལ་བྱུང་བའི་ཚེ། ། དགེ་སློང་ཚུལ་འཛིན་གྲགས་པའི་མཚན་ཐོགས་ཏེ། ། གང་གི་ཞིང་དུ་སེང་གེའི་ང་རོར་གྲགས། ། ཁྲིམས་འཆལ་ལོག་སྤྱོད་སྤོབས་པ་ཟིལ་གནོན་པས། ། ཁྲིམས་འཆལ་བག་མེད་ཡང་དག་ཁྲིམས་ལ་སྦྱོར། ། ཐུབ་ཉིད་སྲོལ་བཏོད་བསྟན་པའི་ཕྱག་རྟགས་འཛིན། ། བསྟན་པ་གསལ་བར་བྱེད་པའི་དགེ་སློང་ངོ་། ། མཐའ་ཡས་རྒྱུད་སྡེའི་ཚོགས་ལ་དབང་བསྒྱུར་ཞིང་། ། རྒྱུད་སྡེ་རྒྱ་མཚོའི་དགོངས་པའི་བཅུད་ཕྱུང་ནས། ། གདུལ་བྱར་གྱུར་པའི་སྐལ་ལྡན་ཚིམ་པར་མཛད། ། ཅེས་བདག་ཉིད་ཆེན་པོ་འདི་སྙིགས་མའི་དུས་འདིར་བསམས་བཞིན་དུ་བྱོན་ཏེ་མདོ་སྔགས་ཀྱི་བསྟན་པ་ཡོངས་སུ་རྫོགས་པ་ཆེས་ཆེར་སྤེལ་བར་མཛད་པ་གསལ་བར་ལུང་བསྟན་ཏོ། ། དེ་ལྟར་མདོ་རྒྱུད་བསྟན་བཅོས་མང་པོ་ནས་ལུང་བསྟན་ཚུལ་བརྗོད་པ་དེ་དག་ནི། རྗེ་འདི་འབྱོན་པའི་དུས་ཚོད་དང་། འཁྲུངས་ཡུལ་དང་། དགོན་གནས་དང་། མཚན་དང་། མཛད་པ་རྣམ་ཐར་རྣམས་འདི་དང་འདི་ལྟར་འབྱུང་ངོ་། ། ཞེས་གསལ་བར་ལུང་བསྟན་པ་འགའ་ཞིག་བརྗོད་པ་ཡིན་གྱི། དོན་གྱིས་ལུང་བསྟན་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱད་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་རྒྱལ་བ་རང་ཉིད་མྱ་ངན་ལས་འདས་པའི་འོག་ཏུ་རྒྱ་གར་ལྷོ་ཕྱོགས་སུ་དར་བར་འགྱུར་བ་དང་། དེ་ནས་རྒྱ་གར་གྱི་བྱང་ཕྱོགས་ཁ་བ་ཅན་འདིར་དར་བར་འགྱུར་བ་ལུང་བསྟན་ཏེ། རྒྱ་གར་ལྷོ་ཕྱོགས་སུ་དར་བ་ནི་རྒྱལ་བ་མྱ་ངན་ལས་འདས་ནས་ལོ་བཞི་བརྒྱ་ཙམ་སོང་བ་ན་འཕགས་པ་ཀླུ་སྒྲུབ་འཇིག་རྟེན་དུ་བྱོན་ཏེ་ཤེར་ཕྱིན་གྱི་དོན་ཟབ་མོ་དབུ་མའི་ལྟ་བ་ཆེས་ཆེར་དར་བར་མཛད་པའོ། ། འཕགས་པ་ཀླུ་སྒྲུབ་ཅེས་བྱ་བ་དེ་ཡང་རྗེ་བདག་ཉིད་ཆེན་པོ་འདི་ཡིན་ཏེ། རྗེ་འདི་ཉིད་འཕགས་པ་ཀླུ་སྒྲུབ་དང་ཐུགས་རྒྱུད་གཅིག་པར་སྔོན་བྱོན་པའི་དམ་པ་མང་པོས་གསུངས་ཤིང་། དོན་དེ་ལ་འཇམ་དབྱངས་ཁ་ཆེས་ཀྱང་། ནཱ་ག་ཛུ་ནའི་རྣམ་འཕྲུལ་ཙོང་ཁ་པ། ། ཞེས་བསྔགས་སོ། ། བྱང་ཕྱོགས་སུ་དར་བར་འགྱུར་ཞེས་གསུངས་པ་དེ་ལ། འདི་ལྟ་བུའི་ཤེར་ཕྱིན་ཟབ་མོ་འདི་དུས་ཀྱི་ཐ་མ་ལ་བྱང་ཕྱོགས་སུ་ཇི་ལྟར་དར་བར་འགྱུར། ཤེར་ཕྱིན་ཟབ་མོ་འདི་འཛིན་པ་མང་པོའམ་ཉུང་ངུ་ཇི་ལྟ་བུ་ཞིག་འབྱུང་ཞེས་ཞུས་པ་ན་བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་བྱང་གི་ཡུལ་དང་བྱང་གི་ཕྱོགས་ཀྱི་ཆར་བྱང་ཆུབ་སེམས་དཔའ་སེམས་དཔའ་ཆེན་པོ་མང་ཞིང་ཤིན་ཏུ་མང་དུ་འབྱུང་བར་འགྱུར་རོ། ། ཤཱ་རིའི་བུ་དེ་དག་མང་མོད་ཀྱི་མང་པོ་དེ་དག་ལས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉན་པ་དང་འདྲི་བ་དང་འཛིན་པ་དང་འཆང་པ་དང་ཀློག་པ་དང་ཀུན་ཆུབ་པར་བྱེད་པ་དང་རབ་ཏུ་འདོན་པ་དང་སྟོན་པ་དང་ཉེ་བར་སྟོན་པ་དང་ལུང་འབོགས་པ་དང་ཁ་ཏོན་བྱེད་པར་འགྱུར་བ་དང་དེ་བཞིན་ཉིད་དུ་སློབ་པ་དང་དེ་བཞིན་ཉིད་དུ་སྒྲུབ་པ་དང་དེ་བཞིན་ཉིད་དུ་རྣལ་འབྱོར་དུ་བྱེད་པར་འགྱུར་བ་དང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཤད་པ་ན་འགོང་བར་མི་འགྱུར་ཀུན་ཏུ་ཞུམ་པར་མི་འགྱུར་བག་ཚ་བར་མི་འགྱུར་བག་འཁུམས་པར་མི་འགྱུར་ཡིད་ཕྱིར་ཕྱོགས་པར་མི་འགྱུར་དངང་པར་མི་འགྱུར་ཀུན་ཏུ་སྐྲག་པར་མི་འགྱུར་ཀུན་ཏུ་སྐྲག་པ་དང་ལྡན་པར་མི་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཆེས་ཉུང་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཡུན་རིང་བོ་ནས་ཐེག་པ་ལ་ཡང་དག་པར་ཞུགས་པར་རིག་པར་བྱའོ། ། དེ་དག་ནི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་རྗེས་སུ་འབྲང་ཞིང་ཡོངས་སུ་དྲིས་པ་དང་ཡོངས་སུ་ཞུས་པ་དང་ཡོངས་སུ་དྲི་བ་བྱས་ཤིང་གང་ཟག་བྱང་ཆུབ་སེམས་དཔའི་ཐེག་པ་ཅན་རིགས་ཀྱི་བུ་འམ་རིགས་ཀྱི་བུ་མོ་དེ་དག་གིས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་མཆོད་པ་ཡིན་ནོ། ། དེ་དག་ནི་ཚུལ་ཁྲིམས་ཡོངས་སུ་རྫོགས་པར་བྱེད་པར་འགྱུར་རོ། ། དེ་དག་ནི་འདི་ལྟ་སྟེ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་འདི་ཉིད་ལས་བརྩམས་ཏེ་སྐྱེ་བོ་མང་པོའི་དོན་བྱེད་པར་འགྱུར་རོ། ། དེ་ཅིའི་ཕྱིར་ཞེ་ན། དེ་ནི་འདི་ལྟར་རིགས་ཀྱི་བུ་དང་རིགས་ཀྱི་བུ་མོ་དེ་དག་ལ་ང་ཉིད་ཀྱིས་ཐམས་ཅད་མཁྱེན་པ་ཉིད་དང་ལྡན་པའི་གཏམ་བྱས་སོ། ། དེ་དག་ནི་ཚེ་རབས་འཕོས་ཀྱང་ཐམས་ཅད་མཁྱེན་པ་ཉིད་དང་ལྡན་པ་དང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་འདི་ཉིད་ལ་ཡང་དག་པར་སྤྱོད་པར་འགྱུར་རོ། ། འདི་ལྟ་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ནས་དེ་ཉིད་ཀྱི་གཏམ་བྱེད་པར་འགྱུར་དེ་ཉིད་ཀྱི་གཏམ་ལ་མངོན་པར་དགའ་བར་འགྱུར་རོ། ། དེ་དག་ལ་ལེགས་པར་གནས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མཉམ་པར་བཞག་པར་འགྱུར་ཏེ་བདུད་ཀྱིས་ཀྱང་དབྱེ་བར་བྱེད་མི་ནུས་ན་འདི་ལྟ་སྟེ་སེམས་ཅན་གཞན་དག་གིས་འདུན་པའམ་སྔགས་ཀྱི་སྒོ་ནས་དབྱེ་བ་ལྟ་ཅི་སྨོས། དེ་ཅིའི་ཕྱིར་ཞེ་ན། དེ་ནི་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མཐུ་བརྟན་པའི་ཕྱིར་རོ། ། རིགས་ཀྱི་བུ་དང་རིགས་ཀྱི་བུ་མོ་དག་གིས་དེ་ཐོས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་དགའ་བ་དང་དང་བ་དང་རབ་ཏུ་དང་བ་རྒྱ་ཆེན་པོ་ཐོབ་པར་འགྱུར་རོ། ། དེ་དག་གིས་ནི་འདི་ལྟ་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སྐྱེ་བོ་མང་པོ་དག་གིས་དགེ་བའི་རྩ་བ་བསྐྱེད་པར་འགྱུར་རོ། ། དེ་ཅིའི་ཕྱིར་ཞེ་ན་འདི་ལྟར་རིགས་ཀྱི་བུ་དང་རིགས་ཀྱི་བུ་མོ་དེ་དག་གིས་ནི་ངའི་མངོན་སུམ་དུ་ཚིག་འདི་སྐད་དུ། བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་གིས་སྲོག་ཆགས་བརྒྱ་ཕྲག་མང་པོ་དང་སྲོག་ཆགས་སྟོང་ཕྲག་མང་པོ་དང་སྲོག་ཆགས་བརྒྱ་སྟོང་ཕྲག་མང་པོ་དང་སྲོག་ཆགས་བྱེ་བ་བརྒྱ་ཕྲག་མང་པོ་དང་སྲོག་ཆགས་བྱེ་བ་སྟོང་ཕྲག་མང་པོ་དང་སྲོག་ཆགས་བྱེ་བ་བརྒྱ་སྟོང་ཕྲག་མང་པོ་དང་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་བཞག་པར་བྱའོ། ། ཡང་དག་པར་བསྟན་པར་བྱའོ། ། ཡང་དག་པར་འགོད་པར་བྱའོ། ། ཡང་དག་པར་གཟེངས་བསྟོད་པར་བྱའོ། ། ཡང་དག་པར་དགའ་བ་བསྐྱེད་པར་བྱའོ། ། ཡང་དག་པར་རབ་ཏུ་དབྱེ་བར་བྱའོ། ། རྫོགས་པའི་བྱང་ཆུབ་ལ་གནས་པར་བྱའོ། ། སླར་མི་ལྡོག་པར་བྱའོ། ། ཞེས་སྨྲས་སོ། ། ཞེས་ལུང་བསྟན་ཏོ། ། འདིས་རྗེ་བདག་ཉིད་ཆེན་པོ་ཇི་ལྟར་ལུང་བསྟན་སྙམ་ན། བྱང་ཕྱོགས་གངས་རིའི་ལྗོངས་འདིར་ཤེར་ཕྱིན་ཟབ་མོ་འདི་འཛིན་ཅིང་ཀློག་པ་མང་པོ་ཞིག་འབྱུང་ནའང་དོན་ཕྱིན་ཅི་མ་ལོག་པར་རྟོགས་ནས་རྒྱ་ཆེར་སྤེལ་བར་བྱེད་ནུས་པ་ནི་ཉུང་ངུ་ལས་མི་འབྱུང་བ་དང་། དེ་ལྟར་སྟོན་ནུས་པའི་སེམས་དཔའ་ཆེན་པོ་དེ་ནི་སྔོན་ཡུན་རིང་པོ་ནས་ལམ་ལ་སྦྱངས་པ་བྱས་པ་ཚོགས་གཉིས་མཐར་ཕྱིན་པ་གདུལ་བྱའི་དོན་དུ་བསམ་བཞིན་དུ་བྱོན་པ་ཞིག་འབྱུང་བ་དང་། དེ་འདྲ་བའི་སེམས་དཔའ་ཆེན་པོ་དེ་རྒྱལ་བ་རང་ཉིད་ཀྱི་སྤྱན་སྔར་སེམས་བསྐྱེད་ཅིང་ཤེར་ཕྱིན་ཟབ་མོ་འདིའི་དོན་རྒྱ་ཆེར་སྤེལ་བར་བྱའོ་ཞེས་དམ་བཅས་ཤིང་སྨོན་ལམ་བཏབ་པ་ཡིན་པར་གསུངས་པ་འདིས་རྗེ་བླ་མ་འདི་ཉིད་ལུང་བསྟན་པ་ཡིན་པར་ཤེས་ཏེ། ཤེར་ཕྱིན་ཟབ་མོ་འདིའི་དོན་ལ་སྦས་དོན་མངོན་རྟོགས་ཀྱི་རིམ་པ་དང་། དངོས་བསྟན་སྟོང་ཉིད་ཀྱི་རིམ་པ་གཉིས་ཡོད་ཅིང་། སྦས་དོན་མངོན་རྟོགས་ཀྱི་རིམ་པ་བཤེས་གཉེན་དམ་པ་ཚུལ་བཞིན་དུ་བསྟེན་ནས་དང་པོར་ཐར་པ་ཆ་མཐུན་གྱི་དགེ་རྩ་བསྐྱེད། དེ་ནས་ས་ལམ་རིམ་གྱིས་བགྲོད་ཚུལ་དང་། མཐར་འབྲས་བུ་ཐོབ་ནས་འཕྲིན་ལས་ཉི་ཤུ་རྩ་བདུན་གྱི་སྒོ་ནས་གདུལ་བྱའི་དོན་བྱེད་ཚུལ་གྱི་བར་ལམ་གྱི་གྲངས་དང་གོ་རིམ་དང་ངོ་བོ་རྣམས་རྒྱལ་བའི་དགོངས་པ་ཤིང་རྟ་ཆེན་པོས་བཀྲལ་བ་ཇི་བཞིན་དུ་མཐའ་དག་པར་གཏན་ལ་འབེབས་ནུས་པ་དང་། ཇི་ལྟར་གཏན་ལ་ཕབ་པའི་དོན་རྣམས་སྐྱེས་བུ་གསུམ་གྱི་ལམ་གྱི་རིམ་པར་བསྡུས་ཏེ་སྐལ་བ་དང་ལྡན་པའི་གདུལ་བྱ་ལས་དང་པོ་བའི་ས་ནས་སངས་རྒྱས་ཀྱི་སའི་བར་ལ་མཐར་གྱིས་ཁྲིད་པར་མཛད་པ་རྗེ་བླ་མ་འདི་དང་མཚུངས་པ་གངས་རིའི་ཁྲོད་འདིར་སུ་ཡང་མ་བྱུང་བ་དང་། དངོས་བསྟན་སྟོང་ཉིད་ཀྱི་རིམ་པ་ལའང་ཤེར་ཕྱིན་གྱི་མདོའི་དོན་འཕགས་པ་ཀླུ་སྒྲུབ་ཡབ་སྲས་ཀྱིས་ཇི་ལྟར་བཀྲལ་བ་ལྟར་ཟབ་མོ་དབུ་མའི་ལྟ་བ་འཁྲུལ་པའི་དྲི་མ་ཐམས་ཅད་དང་བྲལ་བ་རིགས་པའི་ལམ་ནས་གཏན་ལ་ཕབ་སྟེ་ཇི་ལྟར་སྒོམ་པའི་ཚུལ་དང་། བསྒོམས་ནས་ས་ལམ་རིམ་གྱིས་བགྲོད་དེ་འབྲས་བུ་ཆོས་སྐུ་འགྲུབ་ཚུལ་རྣམས་མཐའ་དག་པར་སྟོན་ནུས་པ་རྗེ་བླ་མ་འདི་དང་མཚུངས་པ་བྱང་ཕྱོགས་འདིར་སུ་ཡང་མ་བྱུང་བས་ན་རྒྱལ་བས་བྱང་ཕྱོགས་སུ་ཤེར་ཕྱིན་གྱི་མདོ་སྡེ་ཟབ་མོའི་དོན་རྒྱལ་བ་རང་ཉིད་ཀྱི་དགོངས་པ་ལྟར་སྟོན་ནུས་པའི་སེམས་དཔའ་ཆེན་པོ་འབྱུང་ངོ་ཞེས་ལུང་བསྟན་པ་དེ་རྗེ་འདི་ཉིད་ལུང་བསྟན་པར་འོས་མེད་ཀྱིས་འགྲུབ་བོ། ། གཞན་ཡང་དེ་ལྟར་ཤེར་ཕྱིན་ཟབ་མོ་སྟོན་ནུས་པའི་སེམས་དཔའ་ཆེན་པོ་དེས་རྒྱལ་བ་རང་ཉིད་ཀྱི་སྤྱན་སྔར་སེམས་བསྐྱེད་ཅིང་ཤེར་ཕྱིན་ཟབ་མོ་འདིའི་དོན་རྒྱ་ཆེར་སྤེལ་བར་བྱའོ་ཞེས་དམ་བཅས་པ་ཡིན་པར་གསུངས་པ་དེས་ཀྱང་རྗེ་བླ་མ་འདི་ཉིད་ལུང་བསྟན་པ་ཡིན་པར་གསལ་བར་གྲུབ་སྟེ་རྗེ་འདིས་སྔོན་སྟོན་པ་ཐུབ་པའི་དབང་པོ་དང་ཐུགས་རྒྱུད་གཅིག་པའི་རྒྱལ་བ་དབང་པོའི་ཏོག་གི་སྤྱན་སྔར་སྙིགས་མའི་དུས་སུ་ཟབ་མོ་དབུ་མའི་ལྟ་བ་རྒྱ་ཆེར་སྤེལ་བར་དམ་བཅས་པ་དང་། སྟོན་པ་རྡོ་རྗེ་གདན་དུ་བཞུགས་པའི་ཚེ་ཤེལ་དཀར་པོའི་ཕྲེང་བ་ཕུལ་ཏེ་ཟབ་མོ་དབུ་མའི་ལྟ་བ་སྤེལ་བར་ཐུགས་བསྐྱེད་ཅིང་དམ་བཅས་པ་སྔར་དྲངས་ཟིན་པ་ལྟར་རོ། ། བདག་ཅག་གིས་རྗེ་བླ་མ་འདི་ལྟར་ལུང་བསྟན་ཏོ་ཞེས་བརྗོད་པ་འདི་ཡང་རྗེའི་རྗེས་འཇུག་ཡིན་པ་རྒྱུ་མཚན་དུ་བྱས་པའི་རྨོངས་ཞེན་དང་འདུ་ཤེས་བསྒྱུར་ཏེ་རབ་བརྟགས་དང་ཟོལ་བསྟོད་བྱས་པ་མིན་གྱི་རྒྱལ་བའི་དགོངས་པ་འགྲེལ་བ་ལ་རྗེ་འདི་ཉིད་དང་མཚུངས་པ་གཞན་མེད་དོ་ཞེས་སྨྲས་པ་དེ་ནི་སྣང་རུང་མ་དམིགས་པའི་རྟགས་ཡང་དག་པས་གྲུབ་པ་ཡིན་ནོ། ། གཞན་ཡང་ལྷོ་བྲག་གྲུབ་ཆེན་ལ་གསང་བདག་ཕྱག་ན་རྡོ་རྗེས་ལུང་བསྟན་བྱུང་བ་དང་། བླ་མ་དབུ་མ་པ་ལ་རྗེ་བཙུན་འཇམ་དཔལ་དབྱངས་ཀྱིས་ལུང་བསྟན་བྱུང་བ་སོགས་ལྷག་པའི་ལྷ་རྣམས་ཀྱིས་ལུང་བསྟན་པའི་ཚུལ་མང་དུ་ཡོད་དེ་འོག་ཏུ་རིམ་བཞིན་འཆད་དོ། ། དེ་ལྟར་མདོ་རྒྱུད་བསྟན་བཅོས་རྣམས་ནས་ལུང་བསྟན་པ་ལྟར། རྗེ་བླ་མར་འདི་ཉིད་གང་དུ་འཁྲུངས་པའི་ཡུལ་ནི་མདོ་ཁམས་སྨད་ཀྱི་སའི་ཆ་ཤར་ཙོང་ཁ་ཞེས་གྲགས་པ་དེ་ཡིན་ལ། དེར་ཇི་ལྟར་འཁྲུངས་པའི་ཚུལ་ནི། 1356 མེ་ཕོ་སྤྲེའུའི་ལོ་དགུན་གྱི་དུས་རྗེ་འདིའི་ཡབ་ཀྱི་མནལ་ལམ་དུ། རྒྱ་ནག་རི་བོ་རྩེ་ལྔ་ནས་འོངས་ཟེར་བའི་བཙུན་པ་མེ་ཏོག་གི་ཕྲེང་བ་དུ་མ་སྤྲེལ་བའི་ཆོས་གོས་དང་། སུམ་ཅུ་རྩ་གསུམ་གྱི་ཤིང་ལོ་ཡིན་ཟེར་བ་དར་སེར་པོ་འདྲ་བའི་ཤམ་ཐབས་ཅན་པོ་ཏི་ཁྱེར་བ་ཞིག་བྱུང་ནས། ང་ཁྱེད་ལ་གནས་ཤིག་གཡོར་བ་ཡིན་ཟེར་ནས་མཆོད་ཁང་ཞིག་ཡོད་པའི་ནང་དུ་སོང་བའི་སྣང་བ་བྱུང་། ཡུམ་གྱི་མནལ་ལམ་དུ་ཡང་མེ་ཏོག་གི་ཐང་ཆེན་པོ་ཞིག་ཏུ་བུད་མེད་སྟོང་ཕྲག་ཙམ་གྲལ་བྱས་པའི་ནང་ན་ཡུམ་རང་ཡང་བསྡད་པར། ཤར་ནས་ཁྱེའུ་དཀར་པོ་བུམ་པ་འཛིན་པ་ཅིག་དང་། ནུབ་ནས་བུ་མོ་དམར་མོ་རྨ་བྱའི་སྒྲོ་མདོངས་སྡེར་མ་ཙམ་ཡོད་པ་ཅིག་ལག་པ་གཡས་ན་བཟུང་། མེ་ལོང་ཆེན་པོ་ཞིག་གཡོན་ན་བཟུང་ནས་བྱུང་བས། དེ་གཉིས་གྲོས་བྱས་ཏེ་བུད་མེད་ཐམས་ཅད་ལ་འདིས་རུང་ངམ་འདིས་རུང་ངམ་ཞེས་ཁྱེའུ་དེས་བུ་མོ་དེ་ལ་འདྲི་ཞིང་བུ་མོ་དེས་གཞན་རྣམས་རེ་རེ་ལ་སྐྱོན་རེ་བཏགས། ཁྱེའུ་དེས་ཡུམ་ལ་མཛུབ་མོ་བཙུགས་ནས་འདིས་རུང་ངམ་ཞེས་འདྲི་བ་ལ། བུ་མོ་དེས་འཛུམ་བྱས་ནས་རུང་ཟེར། འོ་ན་འདི་ལ་ཁྲུས་ཀྱིས་ཟེར་ནས། ཇི་ལྟར་བལྟམས་པ་ཞེས་སོགས་དབྱངས་དང་བཅས་ཁྲུས་བྱས་པས་ལུས་ཀྱི་དྲི་མ་དག་ནས་བདེ་སངས་སངས་པའི་སྣང་བ་ཞིག་བྱུང་བ་དང་། གཉིད་སད་ནས་ལུས་ཡང་བ་དང་སེམས་བདེ་བ་ལ་སོགས་པའི་དགེ་མཚན་དུ་མ་བྱུང་ངོ་། ། དུས་དེ་ནས་བཟུང་སྟེ་ཁྱིམ་མཚེས་དང་ཡུལ་མི་རྣམས་ཀྱི་རྨི་ལམ་དུའང་དགེ་འདུན་མང་པོས་ཇོ་བོ་རིན་པོ་ཆེ་དབུས་ནས་གདན་དྲངས་བྱུང་བ་སོགས་རྨི་ལྟས་ངོ་མཚར་བ་མང་དུ་བྱུང་བ་དང་། ཉི་ཟླ་སྐར་གསུམ་དུས་གཅིག་ལ་ཤར་བ་དང་། མེ་ཏོག་གི་ཆར་ཡང་ཡང་འབབ་པ་དང་སྤོས་ཀྱི་དྲི་བཟང་པོ་བྲོ་བ་དང་། ནམ་མཁའ་ལ་རོལ་མོའི་སྒྲ་གྲག་པ་དང་། ས་གཡོ་བ་ལ་སོགས་པའི་ངོ་མཚར་བའི་ལྟས་ཡུལ་དེར་ཀུན་གྱི་མཐུན་སྣང་དུ་གྲུབ་པ་དུ་མ་བྱུང་ངོ་། ། དེ་ནས་ 1357 བྱ་ལོ་ཟླ་བ་དང་པོའི་ཚེས་བཅུའི་ནུབ་མོ་ཡུམ་གྱི་མནལ་ལམ་དུ་དགེ་འདུན་བསམ་གྱིས་མི་ཁྱབ་པས་གདུགས་དང་རྒྱལ་མཚན་དང་རྔ་བོ་ཆེ་ལ་སོགས་པ་མཆོད་པའི་བྱེ་བྲག་མཐའ་ཡས་པ་བཟུང་སྟེ། སྤྱན་རས་གཟིགས་འབྱོན་པ་ལ་བསུ་བ་བྱེད་ཟེར་ཀྱིན་འདུག་པས་ཕྱོགས་ཀུན་ཏུ་བལྟས་ཀྱང་མ་མཐོང་། རྗེས་ལ་བལྟས་པས་སྤྲིན་གྱི་ཐད་ཙམ་དུ་གསེར་སྐུ་རི་བོ་ཙམ་པ་འོད་ཟེར་ཉི་མ་ལྟར་ཕྱོགས་ཐམས་ཅད་དུ་འཕྲོ་བ་དང་ཆོས་ཀྱི་སྒྲ་དབྱངས་དང་བཅས་པ་ཅིག་ལྷའི་བུ་དང་བུ་མོ་ཡིན་ཟེར་བའི་ཆ་ལུགས་ཕུན་སུམ་ཚོགས་པ་དང་ལྡན་པ་དུ་མས་བསྐོར་བ་ཞིག་མར་མར་བབས་བྱུང་བས་གསེར་སྐུ་དེ་ཇེ་ཆུང་ཇེ་ཆུང་ལ་སོང་། སྤྱི་གཙུག་གི་ཐད་ཙམ་དུ་སླེབས་པའི་ཚེ་མཐོ་གང་ཙམ་པ་ཤིན་ཏུ་མཛེས་པ་ཞིག་ཏུ་གྱུར་ནས་རང་ལ་ཐིམ། དེའི་འཁོར་རྣམས་དང་བསུ་མི་རྣམས་ཀྱང་རང་ལ་ཐིམ་པར་མཐོང་བས་རང་ལ་ཕྱག་དང་བསྐོར་བ་དང་མཆོད་པ་བྱེད་ཅིང་བཀྲ་ཤིས་བརྗོད་པ་སོགས་རྨིས་བས་ཕྱི་དེའི་ཉིན་པར་ནས་རིག་པ་གསལ་བ་སྐྱིད་སྣང་ཆེ་བ་བྱུང་། དེ་ཕྱིན་མ་བརྟགས་མ་དཔྱད་པའི་དུས་ནའང་ངའི་ལུས་འདི་ལ་བརྙས་མི་རུང་སྙམ་ནས་གཅེས་སྤྲས་དང་གཙང་སྦྲ་ལ་བརྩོན་པ་སོགས་རང་ཤུགས་ཀྱིས་བྱུང་། ཡབ་ཀྱི་མནལ་ལམ་དུ་ལྕང་ལོ་ཅན་ནས་ཕྱག་ན་རྡོ་རྗེས་འཕངས་སམ་སྙམ་པའི་གསེར་གྱི་རྡོ་རྗེ་འབར་བ་གཅིག་ཡུམ་ལ་ཐིམ་པ་རྨིས་པས་བུ་སྟོབས་ལྡན་ཅིག་སྐྱེ་བ་ཡིན་ནམ་ཞེས་གླེང་བ་བྱུང་ངོ་། ། སྐུ་བལྟམས་པའི་དུས་ལ་བབ་པའི་ཚེ་ཡུམ་གྱི་མནལ་ལམ་དུ། དགེ་འདུན་མང་པོ་དང་སྐྱེ་བོའི་ཁྲོམ་ཆེན་པོས་མཆོད་པ་རྣམ་ལྔ་ཁྱེར་ནས་མཆོད་ཁང་མཇལ་ཟེར། དེ་གང་ན་ཡོད་དྲིས་པས་སྔར་གྱི་ཁྱེའུ་དཀར་པོ་དེས་ཆུ་ཤེལ་གྱི་ལྡེ་མིག་གཅིག་བཟུང་ནས་འདི་ན་ཡོད་ཟེར་ཞིང་ཡུམ་རང་གི་བྲང་ན་སྒོ་ཆུང་སེར་པོ་ཞིག་འདུག་པ་ཕྱེ་བའི་ནང་ནས་སྔར་ལུས་ལ་ཐིམ་པའི་གསེར་སྐུ་དེ་བཏོན་ནས་དྲི་མས་ཅུང་ཟད་ནོགས་པ་ལ་སྔར་གྱི་བུ་མོ་དེ་བྱུང་ནས་དེ་ལ་བུམ་ཆུས་ཁྲུས་བྱས། རྨ་བྱའི་སྒྲོས་བྱབས་རྒྱ་གར་གྱི་སྐད་ཡིན་ནམ་སྙམ་པའི་དར་དིར་མང་པོ་དབྱངས་སུ་ལེན་ཞིང་ལྷ་དེ་ལ་མཆོད་པ་འབུལ་ཀྱིན་འདུག་པའི་སྣང་བ་བྱུང་། གཉིད་སད་ནས་ཐོ་རངས་སྐར་ཆེན་ཤར་བ་དང་སྟབས་ཅིག་པར་ 1357 རབ་བྱུང་དྲུག་པའི་མེ་མོ་བྱའི་ལོ་ངོ་མཚར་བའི་ལྟས་མང་པོ་དང་བཅས་བདེ་བར་འཁྲུངས་སོ། ། དེའི་ཚེ་ཚངས་པ་དང་བརྒྱ་བྱིན་ལ་སོགས་པའི་དཀར་ཕྱོགས་ཀྱི་ལྷ་རྣམས་ཀྱིས་ད་ནི་འགྲོ་བ་མགོན་དང་བཅས་སོ། ། ཐུབ་པའི་བསྟན་པ་ཉམས་པ་གསོས་པར་འགྱུར་རོ། ། བདུད་ཀྱི་སྡེ་ཕམ་མོ། ། དཀར་ཕྱོགས་ཀྱི་ལྷ་རྣམས་རྒྱལ་ལོ་ཞེས་ཤིས་པ་བརྗོད་པའི་ཚིག་འཛམ་བུའི་གླིང་ནས་འོག་མིན་གྱི་བར་དུ་བསྒྲགས་ཤིང་། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱིས་བདག་ཉིད་ཆེན་པོ་འདིའི་དོན་གྲུབ་པར་གྱུར་ཅིག་ཅེས་སྨོན་ལམ་མཛད་ཅིང་མེ་ཏོག་གཏོར། གསང་བའི་བདག་པོ་ཕྱག་ན་རྡོ་རྗེ་དང་། རྒྱལ་པོ་ཆེན་པོ་རྣམ་ཐོས་སྲས་ལ་སོགས་པ་གཡེལ་བ་མེད་པར་རྗེས་སུ་འབྲངས་ཏེ་བར་ཆད་བསྲུང་བ་ལ་བརྩོན་པར་གྱུར་ཏོ། ། རྒྱལ་བ་ཐམས་ཅད་ཀྱི་གདུང་འཚོབ་རྒྱལ་བའི་མྱུ་གུ་གངས་ཅན་གསེར་གྱི་ས་གཞིར་གསར་དུ་འཁྲུངས་པ་གཞོན་ནུའི་གཟུགས་ཅན་དེའི་དབུ་ནི་གདུགས་ལྟ་བུ་དང་། དཔྲལ་བ་དབྱེས་ཆེ་ཞིང་སྨིན་མ་འབྱར་ལ་ཤངས་ཀྱི་གཟེངས་མཐོ་བ་དང་། སྙན་ཤལ་རིང་དུ་འཕྱང་ཞིང་ཡན་ལག་དང་ཉིང་ལག་རྒྱས་ལ་དཀུ་སྐབས་ཕྱེད་པ་དང་། དབང་པོ་ཡོངས་སུ་གསལ་ཞིང་པགས་པའི་མདོག་ནི་མེ་ཏོག་ཀུནྡ་ལྟར་དཀར་བ། ལྗགས་པདྨའི་འདབ་མ་ལྟར་འཇམ་ཞིང་མཉེན་ལ་རིང་བ། མཆུ་སྒྲོས་བིམ་པ་ལྟར་དམར་བ་སོགས་མཚན་བཟང་གིས་མཛེས་པ་འཇིག་རྟེན་ཀུན་གྱི་མིག་གི་བདུད་རྩི་ལྟ་བུ་ཞིག་བྱུང་བར་གྱུར་ཏོ། ། ཡབ་ཡུམ་དེ་གཉིས་ཀྱང་ཐ་མལ་པ་མིན་པར་སྔོན་ཡུན་རིང་པོ་ནས་བདག་ཉིད་ཆེན་པོ་འདིས་བསྟན་འགྲོའི་དོན་རྒྱ་ཆེན་པོ་མཛད་པའི་ཚེ་མཐུན་པའི་རྐྱེན་སྒྲུབ་པར་སྨོན་ལམ་བཏབ་ནས་བསམ་བཞིན་དུ་བྱོན་པ་ཞིག་སྟེ། ཡབ་དེ་ནི་དཔའ་མཛངས་བརྟུལ་ཕོད་ཅན་འབྱོར་པ་དང་ལྡན་ཞིང་གཏོང་བ་ལ་དགའ་བ་རིགས་མཐོ་བ་མལ་གྱི་རིགས། རིགས་རུས་འབྱོར་པ་ཕུན་ཚོགས་དང་ལྡན་ཡང་ཁེངས་པ་མེད་པར་སློང་བ་རྣམས་ལ་བྱམས་པ། རྗེ་བཙུན་འཇམ་པའི་དབྱངས་ཀྱི་རྣལ་འབྱོར་དང་ལྡན་པ། རྒྱུན་དུ་འཇམ་དཔལ་མཚན་བརྗོད་ཁ་ཏོན་དུ་མཛད་པ་ཞིག་གོ ། ཡུམ་དེ་ནི་གཟུགས་བཟང་ཞིང་མཛེས་ལ་གཡོ་སྒྱུ་ཆུང་བ། ཉམ་ཆུང་རྣམས་ལ་སྙིང་རྗེ་ཆེ། རྒྱལ་བ་བསྐྱེད་པའི་ཡུམ་དུ་འོས་པ་ཞིག་གོ ། རྒྱལ་སྲས་གཞོན་ནུ་དེ་འཁྲུངས་པའི་སང་ཉིན་ཡུལ་དེའི་ཕུ་ན་རྡོ་རྗེ་འཇིགས་བྱེད་ཀྱི་གྲུབ་ཐོབ་ཏུ་གྲགས་པའི་བདག་ཉིད་ཆེན་པོ་ཆོས་རྗེ་དོན་གྲུབ་རིན་ཆེན་ཞེས་བྱ་བ་བཞུགས་ཡོད་པ་དེས་ཡབ་ཡུམ་གཉིས་ལ་ལེགས་སོའི་བསྔགས་པ་དང་གནང་སྦྱིན། རྒྱལ་སྲས་གཞོན་ནུ་དེ་ལ་བཞེས་རྒྱུའི་བདུད་རྩི་རིལ་བུ་སྐུ་ལ་བཅང་རྒྱུའི་སྲུང་མདུད། རྟེན་འབྲེལ་བསྒྲིག་པར་དགོངས་ཏེ་རྡོ་རྗེ་འཇིགས་བྱེད་ཀྱི་བྲིས་སྐུ་བྱིན་རླབས་ཅན་གཅིག་དང་། བུ་ཆུང་སྐྱོང་ལུགས་ཀྱི་ཡི་གེ་ལ་སོགས་པ་ཉེ་གནས་ཚུལ་ཁྲིམས་དང་ལྡན་པ་ཞིག་ལ་བསྐུར་ནས་བྱུང་སྟེ་བླ་མ་དེས་ཐུགས་མཁྱེན་གྱིས་མཁྱེན་པར་འདུག ། ཕྱིས་རྒྱུ་མཚན་ཞུས་པས། ངས་རྨི་ལམ་དུ་རྡོ་རྗེ་འཇིགས་བྱེད་དང་མཇལ་བས་གསོལ་བ་བཏབ། ཁྱད་པར་དུ་ཞལ་ཡང་ཡང་བསྟན་དུ་གསོལ་ཞེས་ཞུས་པས། སང་ཕོད་ད་ཙམ་ལུང་པ་འདིའི་མདའ་རུ་ཡོང་། དེ་བར་དུ་བདེ་བར་གྱིས་གསུང་བས། དེ་གང་ཡིན་དཔྱད་པའི་ཕྱིར་ཏིང་ངེ་འཛིན་ལ་མཉམ་པར་བཞག་པས་ཁྱེད་ཀྱི་བུར་འདུག་པ་ཐིགས་པ་ཡིན་གསུང་བ་ལ་སོགས་པའི་གསང་བའི་གནས་དུ་མ་གསུངས་ནས། ཕྱིས་ཀྱང་བུ་ཆུང་བསྐྱེད་བསྲིང་བ་དང་། འཇམ་དཔལ་དབྱངས་དང་དབྱངས་ཅན་མ་ལ་སོགས་པའི་སྒོ་ནས་ཤེས་རབ་འཕེལ་བའི་ཐབས་དུ་མའང་མཛད་དོ། ། རྒྱལ་སྲས་གཞོན་ནུ་དེ་ཡུམ་གྱི་མངལ་ནས་འཁྲུངས་མ་ཐག་ལྟེ་བ་བཅད་པའི་མཚལ་ཁྲག་ས་ལ་ལྷུང་བ་ལས་ཙནྡན་དཀར་པོའི་སྡོང་པོ་ཞིག་གསར་དུ་སྐྱེས་པ་དེ་ལ་ཡལ་ག་མང་དུ་གྱེས་ཤིང་ལོ་མ་འབུམ་ཡོད་པ། ལོ་མ་རེ་རེ་ལ་དེ་བཞིན་གཤེགས་པ་སེང་གེའི་ང་རོའི་སྐུ་རེ་རེ་ཡོད་པ་ཞིག་བྱུང་བས་སྐུ་འབུམ་ཞེས་གྲགས། དུས་ཕྱིས་རྒྱལ་བ་བསོད་ནམས་རྒྱ་མཚོ་གནས་དེར་བྱོན་ནས་གུས་པ་ཆེན་པོས་མཆོད་པ་རྒྱ་ཆེན་པོ་མཛད་ཅིང་། ཤིང་འདི་འདྲ་ལས་ལྷག་པའི་བྱིན་རླབས་ཅན་དཀོན་ཞེས་ཤིང་དེའི་ཕྱི་དངུལ་གྱིས་བསྟུམས་ཏེ་བྱང་ཆུབ་མཆོད་རྟེན་གྱི་རྣམ་པར་བྱས། གནས་དེར་རྗེ་བླ་མའི་མདོ་སྔགས་ཀྱི་བསྟན་པ་ཡོངས་སུ་རྫོགས་པ་ལ་བཤད་སྒྲུབ་བྱེད་པའི་དགེ་འདུན་གྱི་སྡེ་ཞིག་གསར་དུ་འཛུགས་པར་བཞེད་དེ་ཞལ་བཀོད་གནང་བ་ཐུགས་བཞེད་ལྟར་གྲུབ་ནས་སྐུ་འབུམ་བྱམས་པ་གླིང་ཞེས་བཏགས། མཆོད་སྡོང་དེའི་ཕྱི་རོལ་ཏུ་ཙན་དན་གྱི་སྡོང་པོ་གསར་བ་ཞིག་ཐོན་པ་དེ་ལ་ཡང་ཡལ་ག་དང་ལོ་མ་རྣམས་ལ་ཨ་ར་པ་ཙ་ན་དང་། དྷིཿདང་ཧཱུཾ་ལ་སོགས་པ་ཡི་གེའི་གཟུགས་རང་བྱོན་དུ་འབྱུང་བ་དང་། དེའི་ཡལ་ག་དང་ལོ་མ་ཟོས་ན་ཤེས་རབ་སྐྱེ་ཞིང་རིམས་ནད་སོགས་ཞི་བ་ཀུན་གྱི་མཐུན་སྣང་དུ་ཡོད་དོ། ། དེ་ལྟ་བུའི་རྒྱལ་སྲས་གཞོན་ནུ་དེ་ཉིད་སྙིགས་མའི་དུས་འདིར་བྱོན་ཡང་འདམ་གྱི་དབུས་སུ་སྐྱེས་པའི་པདྨ་འདམ་གྱིས་མི་གོས་བ་ལྟར་སྙིགས་མའི་སྐྱོན་གང་གིས་ཀྱང་མ་གོས་ཤིང་བྱིས་པའི་ཚུལ་བཟུང་ཡང་བྱིས་པའི་རྒུད་པ་ཐམས་ཅད་ལས་ཡང་དག་པར་འདས། བག་མེད་པར་རྩེ་བ་མཐའ་དག་ལས་ནི་ངང་གིས་ལོག ། ཉེས་པར་སྤྱོད་པ་རྣམས་ནི་རང་བཞིན་གྱིས་བསྡམས་ཀུན་ལ་སྙན་པར་སྨྲ་ཞིང་ཁྲོ་བ་སྤངས་པ་དང་། འགྲོགས་ན་བདེ་ཞིང་སློང་བའི་སྐྱེ་བོ་དག་ལ་གཏོང་བའི་ལག་བརྐྱངས་པ་དང་། མགོན་མེད་པ་དག་ལ་སྙིང་བརྩེ་ཞིང་བདེན་པར་སྨྲ་བ་དང་། བློ་གྲོས་དཔག་པར་དཀའ་ཞིང་ཆོས་འཚོལ་བ་ལ་ངང་གིས་ཞུགས་པ་ལ་སོགས་པ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་དག་ནི་བྱིས་པ་གཞན་དག་སྐྱེས་ཙམ་ཉིད་ནས་ནུ་ཞོ་ལེན་པའི་ཀུན་ཏུ་སྤྱོད་པ་དག་ཆེད་དུ་བསླབ་པར་བྱ་མི་དགོས་པ་ཇི་ལྟ་བ་དེ་བཞིན་དུ་གྱུར་ཏོ། ། རྒྱལ་སྲས་གཞོན་ནུ་དེ་དགུང་ལོ་གསུམ་པ་ལ་བབ་པ་ན་ཆོས་རྗེ་ཀརྨ་བ་རོལ་པའི་རྡོ་རྗེ་ལས་དགེ་བསྙེན་གྱི་སྡོམ་པ་ཡོངས་སུ་རྫོགས་པར་མནོས་ཏེ། མཚན་ཡང་ཀུན་དགའ་སྙིང་པོ་ཞེས་བཏགས་སོ། ། ལོ་དེ་ལ་ཆོས་རྗེ་དོན་གྲུབ་རིན་ཆེན་པ་དེ་ཉིད་རྗེ་འདིའི་ཡབ་ཀྱིས་གདན་དྲངས་པ་ཞིག་གི་དུས་ན་ཆོས་རྗེ་དོན་གྲུབ་རིན་ཆེན་པས་ཡབ་ཡུམ་གཉིས་ལ་རྟ་དང་ལུག་ལ་སོགས་པ་ཟང་ཟིང་གི་གནང་སྦྱིན་དཔག་ཏུ་མེད་པ་མཛད་ནས་ཁྱེད་ཀྱི་བུ་འདི་ང་ལ་ཕུལ་ཞིག་ཅེས་བཀའ་གནང་བ་ཡབ་ཡུམ་གཉིས་ཀྱིས་ཀྱང་དང་དུ་བླངས་ཏེ་སྤྲོ་དགའ་དང་བཅས་པས་ཕུལ། དེ་ནས་དགུང་ལོ་བདུན་པ་ལ་ཉེ་བར་བབ་པ་ན་རྗེ་འདིས་ཆོས་རྗེ་དེའི་ཞབས་དྲུང་དུ་ཕེབས་པར་མཛད་དེ། རབ་ཏུ་མ་བྱུང་བའི་སྔ་རོལ་ཉིད་དུ་ཆོས་རྗེ་དེས་རྗེ་འདི་པ་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་དཀྱིལ་འཁོར་དུ་བཅུག་ནས་དབང་བསྐུར་ཏེ་གསང་སྔགས་རྡོ་རྗེ་ཐེག་པའི་སྒོར་སྨིན་པར་མཛད་ཅིང་། དེ་ནས་བཅོམ་ལྡན་འདས་འཁོར་ལོ་བདེ་མཆོག་དྲིལ་བུ་པ་དང་། ཀྱཻ་རྡོ་རྗེ་དང་ཕྱག་ན་རྡོ་རྗེ་ལ་སོགས་པའི་དཀྱིལ་འཁོར་དུ་བཅུག་ཅིང་དབང་བསྐུར། གསང་མཚན་དོན་ཡོད་རྡོ་རྗེ་ཞེས་བཏགས། རྗེ་འདི་པས་རིག་པ་འཛིན་པའི་སྡོམ་པ་དང་དམ་ཚིག་ཡོངས་སུ་རྫོགས་པར་མནོས་ཏེ་དབང་དུས་སུ་ཇི་ལྟར་ཞལ་གྱིས་བཞེས་པ་ལྟར་མིག་གི་འབྲས་བུ་ལྟར་གཅེས་པར་སྲུང་བར་མཛད་དོ། ། ཆོས་རྗེ་དེའི་དྲུང་དུ་ཐོག་མར་ཕེབས་མ་ཁད་ནས་གསུང་རབ་ཀློག་པ་པོ་མང་དུ་འདུག་པ་རྣམས་ལ་གཟིགས་ཤིང་ཐུགས་ཀྱི་དཔྱད་པས་དེ་ཙམ་གྱིས་ཀློག་རང་ཉིད་ཀྱིས་ཐོགས་མེད་དུ་འདོན་པར་ནུས་པ་བྱུང་ཞིང་ཆེད་དུ་གཏད་ནས་བསླབ་དགོས་པ་མ་བྱུང་། དབང་ཐོབ་ནས་རབ་ཏུ་མ་བྱུང་བའི་གོང་དགུང་ལོ་བདུན་དུ་ཉེ་བ་ཙམ་གྱི་དུས་ཉིད་དུ་འང་། བདེ་མཆོག་དགྱེས་རྡོར་ཀུན་རིག་གཤིན་རྗེ་གཤེད་ལ་སོགས་པའི་མངོན་རྟོགས་དང་དཀྱིལ་ཆོག་མང་པོ་ཐུགས་ལ་བཟུང་། གཤིན་རྗེའི་གཤེད་དང་བདེ་མཆོག་གི་བསྙེན་པ་ཡང་མཛད་ནས་བདེ་མཆོག་དྲིལ་བུ་བའི་བདག་འཇུག་ཀྱང་ལན་མང་དུ་མཛད་ཅིང་། ལྷའི་རྣལ་འབྱོར་དང་བཟླས་པའི་རིམ་པ་ལ་སོགས་པ་ལ་གཅིག་ཏུ་གཞོལ་བར་མཛད་དོ། ། དེའི་ཚེ་ན་རྗེ་འདི་ལ་བཅོམ་ལྡན་འདས་ཕྱག་ན་རྡོ་རྗེ་གཏུམ་པོ་ཕྱག་གཉིས་པའི་རྣམ་པ་ཞིག་ཡུན་རིང་པོའི་བར་དུ་ནུབ་རེ་བཞིན་མནལ་ལམ་དུ་གསལ་བར་འཆར་བ་དང་། གཞན་ཡང་སངས་རྒྱས་དང་བྱང་སེམས་མང་པོའི་སྣང་བ་ཤར་ཞིང་། ཁྱད་པར་ཇོ་བོ་ཆེན་པོ་དཔལ་ལྡན་ཨ་ཏི་ཤ་མནལ་ལམ་དུ་ནར་མར་འོང་བ་ཞིག་བྱུང་། ཕྱིས་དབུས་སུ་ཕེབས་དུས་སྐུ་འདྲ་གཟིགས་པ་ན། སྔར་མནལ་ལམ་དུ་གཟིགས་པ་དེའི་རྣམ་པ་ཇི་ལྟ་བར་འདུག་ཅེས་གསུང་སྟེ། དེ་ནི་ཇོ་བོ་ཉིད་ཁ་བ་ཅན་འདིར་བསྟན་པ་ཉམས་པ་གསོ་བའི་སླད་དུ་བྱོན་པ་ལྟར། མདོ་སྔགས་ཀྱི་ལམ་གྱི་རིམ་པ་ཡོངས་སུ་རྫོགས་པས་གདུལ་བྱ་རྣམས་སྨིན་ཅིང་གྲོལ་བར་མཛད་དེ་བསྟན་པ་རིན་པོ་ཆེ་མི་ནུབ་པའི་རྒྱལ་མཚན་འཛིན་པ་རྣམས་ཀྱི་གཙུག་གི་ནོར་བུར་འགྱུར་བ་འདི་ཉིད་ཀྱི་སྔ་ལྟས་སོ། ། དེ་ལྟར་རྗེ་འདི་པ་དེའི་ཚེ་རྒྱལ་སྲས་གཞོན་ནུའི་ཚུལ་བཟུང་བ་དེ་དགུང་ལོ་བདུན་ལ་བབ་པའི་ཚེ། ཁྱིམ་ནས་ཁྱིམ་མེད་པར་རབ་ཏུ་འབྱུང་བར་མཛད་དེ། ངུར་སྨྲིག་གི་རྒྱལ་མཚན་ཡང་དག་པར་བཞེས་སོ། ། དེ་ཡང་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་ཞིང་ལུང་དང་རྟོགས་པའི་ཡོན་ཏན་གྱི་ཚོགས་ཀྱིས་མངོན་པར་མཐོ་བའི་བླ་མ་དོན་གྲུབ་རིན་ཆེན་པས་མཁན་པོ་མཛད་དབུས་གཙང་དང་བལ་པོ་སོགས་སུ་མཁས་གྲུབ་དང་པཎྜི་ཏ་དུ་མ་ལ་གཏུགས་ནས་མདོ་སྔགས་མང་པོ་ལ་སྦྱངས་པའི་བཤེས་གཉེན་ཆེན་པོ་ཏ་དབེན་གཞོན་ནུ་སེང་གེ་ཞེས་གྲགས་པའི་སློབ་མ་གཞོན་ནུ་བྱང་ཆུབ་ཅེས་བྱ་བས་སློབ་དཔོན་མཛད་དེ་ཚིགས་སྔ་མ་དགེ་ཚུལ་གྱི་སྡོམ་པ་ཡང་དག་པར་མནོས་ཤིང་། མཚན་ཡང་བློ་བཟང་གྲགས་པའི་དཔལ་ཞེས་བྱ་བར་གསོལ་ཏོ། ། རྗེ་འདི་ཆོས་རྗེ་དོན་གྲུབ་རིན་ཆེན་པ་འདིས་བྱིས་པ་ཉིད་ནས་བདག་གིར་མཛད་དེ་བསྟན་པ་རིན་པོ་ཆེའི་བདག་པོ་ཆོས་ཀྱི་རྒྱལ་པོར་འགྱུར་བར་དགོངས་ནས་ཐུགས་ཀྱི་ཡུལ་དུ་ཤིན་ཏུ་གཅེས་པར་བཟུང་སྟེ། སྨན་གྱི་ཤིང་ལྗོན་པ་ཆེན་པོའི་མྱུ་གུ་ལྟར་ལེགས་པར་བསྐྱངས། རབ་ཏུ་བྱུང་ཞིང་རྡོ་རྗེ་ཐེག་པའི་སྒོར་སྨིན་པར་མཛད་དེ་དབུས་གཙང་དུ་འབྱོན་པའི་ཆས་རྐྱེན་དང་བསྐུལ་མ་ཡང་དག་མཛད་པས་བཀའ་དྲིན་ཟླ་མེད་དུ་འཛིན་པར་མཛད་དེ། རྗེ་འདིས་ཆོས་རྗེ་དོན་གྲུབ་རིན་ཆེན་གྱི་མཚན་ཐོས་པ་ན་ཕྱག་ཐལ་མོ་སྦྱོར་ཞིང་ཆོས་རྗེ་དེ་ཉིད་ཀྱི་དུས་མཆོད་ཀྱང་འཆག་མེད་མཛད་དོ། ། དེ་ནས་དེའི་ཚེ་རྗེ་འདིའི་ཐུགས་ལ་འདི་ལྟ་བུ་དག་འཁྲུངས་པར་ངེས་ཏེ། རྒྱལ་བའི་བསྟན་པ་ལ་རབ་ཏུ་བྱུང་བ་རྣམས་ཀྱི་བྱ་བ་ནི་གཉིས་ཏེ། ཀློག་པ་ཐོས་བསམ་དང་སྤོང་བ་བསམ་གཏན་ནོ། ། དེ་ལ་བདག་གིས་ཀྱང་འདི་གཉིས་ཀ་བྱ་སྟེ་རྒྱལ་བའི་དགོངས་པ་ཤིང་རྟ་ཆེན་པོ་རྣམས་ཀྱིས་བཀྲལ་བའི་གཞུང་ལུགས་ཆེན་མོ་རྣམས་ལ་ཐོས་བསམ་ཕུ་ཐག་ཆོད་པ་ཞིག་བྱས་ལ་གཞུང་དོན་གདམས་པར་འཆར་བའི་ཉམས་ལེན་ལ་འབད་དེ་རྒྱལ་བསྟན་ཡོངས་སུ་རྫོགས་པ་རང་གི་རྒྱུད་ལ་འཛིན་ཅིང་སྐལ་བ་དང་ལྡན་པ་གཞན་དག་ལའང་རྒྱ་ཆེར་སྤེལ་ཏེ་རྒྱལ་བའི་བསྟན་པ་རིན་པོ་ཆེ་འཇིག་རྟེན་འདིར་དར་ཞིང་རྒྱས་པ་ཞིག་ཅི་ནས་བྱའོ་སྙམ་དུ་ཐུགས་བསམ་རླབས་པོ་ཆེ་དེ་ལྟ་བུ་འཁྲུངས་པར་གྱུར་ཏོ། ། དེ་ནས་ 1372 དགུང་ལོ་བཅུ་དྲུག་ལ་བབ་པའི་ཚེ་ཆོས་རྗེ་དོན་གྲུབ་རིན་ཆེན་པས་ཀྱང་བསྐུལ་ཞིང་བདག་ཉིད་ཀྱང་སྤྲོ་བ་ཤུགས་དྲག་པོས་སྔོན་གྱི་ཆོས་རྒྱལ་པོ་པཎ་རྣམས་ཀྱི་བཀའ་དྲིན་ལས་རྒྱལ་བསྟན་ཡོངས་སུ་རྫོགས་པ་གང་དུ་དར་བའི་ས་དབུས་གཙང་གི་ལྗོངས་སུ་འབྱོན་པར་བཞེད་པ་ན། ཆོས་རྗེ་དོན་གྲུབ་རིན་ཆེན་པས་དབུས་གཙང་གི་ལྗོངས་སུ་བྱོན་ནས་ཐོས་བསམ་སྒོམ་གསུམ་འདི་ལྟར་བྱ་དགོས་སོ་ཞེས་ཞལ་གདམས་རྒྱས་པར་གནང་ནས་དོན་དེ་ཉིད་ཐུགས་ལ་གཟུང་བདེ་བའི་ཕྱིར་ཚིགས་སུ་བཅད་པའི་སྒོ་ནས་ཀྱང་གདམས་པ་ནི། གཞོན་ནུ་བློ་བཟང་གྲགས་པ་ཁྱོད། ། སྔོན་སྦྱངས་དགེ་བའི་ལས་འཕྲོ་ཅན། ། སྔོན་ཚེ་དམ་ཆོས་བདུད་རྩིའི་རོ། ། འཐུངས་པའི་བག་ཆགས་ཡོད་པར་ངེས། ། ཞེས་པ་དང་། ཡུམ་ཆེན་རྒྱས་འབྲིང་བསྡུས་གསུམ་གྱི། ། རྒྱན་དུ་གྱུར་པའི་མངོན་རྟོགས་རྒྱན། ། ཐོག་མར་བསླབ་ཅིང་ནན་ཏན་བྱ། ། དེ་ལ་མཁས་པར་གྱུར་པ་ན། ། ལུང་ཆོས་ཀུན་ལ་འཕྲིག་ཚུད་འགྱུར། ། དེ་ཡང་སེམས་ཀྱི་ཟུར་ལ་ཞོག ། དེ་ནས་བྱང་ཆུབ་སེམས་དཔའ་ཡི། ། ལམ་དང་སྤྱོད་པའི་རྣམ་གཞག་དག ། སྟོན་པར་བྱེད་པའི་མདོ་སྡེ་རྒྱན། ། མཁས་པའི་ཡན་ལག་དག་ཏུ་བསླབ། ། འཁོར་བ་མྱ་ངན་འདས་པ་ཡི། ། རྟེན་དུ་སྟོན་པའི་ཆོས་དང་ནི། ། ཆོས་ཉིད་རྣམ་འབྱེད་བསྟན་བཅོས་དང་། ། ཐོག་མ་མཐའ་མ་རྣམ་སྤངས་པའི། ། དབུ་མའི་ལམ་ནི་སྟོན་པས་ན། ། དབུས་དང་མཐའ་ནི་རྣམ་འབྱེད་དང་། ། སེམས་ཀྱི་ཆོས་ཉིད་དག་པ་ནི། ། སེམས་ཅན་ཀུན་ལ་ཡོད་པ་སྟེ། ། དེ་ཉིད་བདེ་གཤེགས་སྙིང་པོར་ནི། ། སྟོན་བྱེད་ཐེག་ཆེན་རྒྱུད་བླ་མ། ། བྱམས་ཆོས་ལྔ་པོ་དེ་དག་ལ། ། མཁས་པར་བྱེད་པའི་གོ་ཆ་གྱིས། ། རྒྱས་པའི་བསྟན་བཅོས་རྣམ་འགྲེལ་དང་། ། འབྲིང་དུ་སྟོན་པའི་རྣམ་ངེས་དང་། ། ཤིན་ཏུ་བསྡུས་པ་རིགས་ཐིགས་ཏེ། ། ལུས་དང་འདྲ་བའི་བསྟན་བཅོས་གསུམ། ། གཏན་ཚིགས་ཐིགས་པ་འབྲེལ་བརྟག་དང་། ། རྒྱུད་གཞན་སྒྲུབ་པ་རྩོད་རིག་སྟེ། ། འཕྲོས་པ་ཡན་ལག་ལྟ་བུ་ཟེར། ། ཆོས་ཀྱི་གྲགས་པ་ལས་བྱུང་བའི། ། ཚད་མ་སྡེ་བདུན་འཛམ་གླིང་ན། ། སངས་རྒྱས་བསྟན་པ་གསལ་བྱེད་པ། ། ཉི་མ་ཟླ་བ་ལྟ་བུར་གྲགས། ། འདི་ཡི་འོག་ཏུ་དེ་རྣམས་སློབས། ། ཞེས་སོགས་དང་། བློ་གྲོས་བཟང་ལྡན་ཁྱོད་ཀྱིས་ནི། ། མཐའ་བྲལ་ཆེན་པོའི་ལྟ་བ་ལ། ། གལ་ཏེ་མོས་པ་ཡོད་གྱུར་ན། ། འཕགས་པ་ཀླུ་སྒྲུབ་ཀྱིས་མཛད་པའི། ། དབུ་མ་རིགས་པའི་ཚོགས་རྣམས་དང་། ། ཞེས་སོགས། ཤིང་རྟ་ཆེན་པོ་གཉིས་རྗེས་འབྲང་དང་བཅས་པའི་གཞུང་རྣམས་ལ་ཐོས་པ་ཕུ་ཐག་ཆོད་པ་ཞིག་བྱ་དགོས་པ་དང་། ཐོས་པའི་དོན་ལ་ཉམས་ལེན་སྙིང་པོར་མཛད་དེ་གདེང་ཐོབ་པ་ཞིག་བྱ་དགོས་པ་དང་། རང་གིས་ཇི་ལྟར་དགོངས་པ་ལྟར་སྐལ་བ་དང་ལྡན་པ་གཞན་དག་ལའང་སྤེལ་ཏེ་རྒྱལ་བསྟན་ཡོངས་སུ་རྫོགས་པ་འཛིན་ཅིང་སྤེལ་ཐུབ་པ་ཞིག་ཅི་ནས་ཀྱང་བྱ་དགོས་སོ་ཞེས་ནན་ཏན་དུ་གདམས་ཤིང་། ཚེ་རབས་གཏན་གྱི་ལྷག་པའི་ལྷ་ཡི་དམ་རྡོ་རྗེ་འཇིགས་བྱེད་དང་། བར་ཆད་སྲུང་བའི་ལྷ་ཕྱག་རྡོར་འཁོར་ཆེན་དང་། ཤེས་རབ་བསྐྱེད་པའི་ལྷ་འཇམ་དཔལ་ཨ་ར་པ་ཙ་ན་དང་། ཚེ་བསྲིང་བའི་ལྷ་ཚེ་དཔག་མེད་དང་། མཐུན་རྐྱེན་སྒྲུབ་པའི་ལྷ་རྣམ་ཐོས་སྲས་དང་། འགལ་རྐྱེན་སེལ་ཞིང་མཐུན་རྐྱེན་སྒྲུབ་པའི་ལྷ་ཡེ་ཤེས་ཀྱི་མགོན་པོ་ཕྱག་དྲུག་པ་དང་དམ་ཅན་ཆོས་རྒྱལ་རྣམས་ངེད་ཀྱིས་བྱིན་པ་ལྟར་བསྟེན་ལ་བསྙེན་སྒྲུབ་དང་མཆོད་གཏོར་མ་འཆག་པར་གྱིས་ཞེས་གདམས་སོ། ། དེ་ནས་རྗེ་འདི་པས་ཆོས་རྗེ་དོན་གྲུབ་རིན་ཆེན་ལ་བཀའ་བཞིན་བགྱིའོ་ཞེས་ཞུས་ཤིང་ཕྱག་བཙལ་ཏེ་བྱིན་རླབས་ཞུས་ནས་འབྲི་ཁུང་མཐེལ་བའི་འབུལ་དཔོན་ལྡན་མ་རིན་ཆེན་དཔལ་གྱིས་གདན་དྲངས་ནས་འཕྲིན་ལས་པ་དང་འགྲོགས་ཏེ་བྱོན། 1373 གླང་ལོའི་སྟོན་གྱི་དུས་སུ་འབྲི་ཁུང་དཔལ་གྱི་ནགས་ཁྲོད་དུ་ཕེབས། དེའི་ཚེ་འབྲི་ཁུང་གི་སྤྱན་སྔ་རིན་པོ་ཆེ་ཆོས་ཀྱི་རྒྱལ་པོ་བཞུགས་པས་ཁོང་གི་སྤྱན་སྔར་མཇལ། ཐེག་ཆེན་སེམས་བསྐྱེད་ཀྱི་ཆོ་ག་དང་ཕྱག་ཆེན་ལྔ་ལྡན་ལ་སོགས་པ་ཟབ་ཁྲིད་མང་དུ་གསན། དེ་ནས་སློབ་གཉེར་ཞིག་ལ་འབྱོན་པར་བཞེད་པ་ལ་གྲོགས་འགའ་ཞིག་གི་དབང་གིས་ཚལ་པའི་སྨན་པ་མཁས་པ་དཔོན་དཀོན་མཆོག་སྐྱབས་ཞེས་པའི་གམ་དུ་བྱོན་ནས་གསོ་དཔྱད་ཀྱི་གཞུང་ལ་སྦྱངས་ཤིང་། ཡན་ལག་བརྒྱད་པ་ཐུགས་ལ་བཟུང་སྟེ་གསོ་དཔྱད་ཀྱི་སྐོར་རྣམས་བསླབས་པས་གཞུང་མན་ངག་ལག་ལེན་དང་བཅས་པ་ལ་ཤིན་ཏུ་མཁས་པར་གྱུར་ཏེ། ཕྱིས་བསྙུང་དུས་སུ་སྨན་པ་བཅུ་བདུན་བཅོ་བརྒྱད་ཙམ་འཚོགས་པའི་དུས་སུའང་ནད་གང་ལ་སྨན་གང་འཇུག་པ་དང་། སྨན་གྱི་སྦྱོར་སྡེ། བསིལ་དྲོད་ལ་སོགས་པའི་ཁྱད་པར་ཐམས་ཅད་དྲུང་དུ་ཞུས་ནས་ལག་ལེན་བདག་ཅག་རྣམས་ཀྱིས་བྱེད་པ་ཡིན་ཟེར་བ་དང་། སྨན་པ་མཁས་པར་གྲགས་པ་ཐམས་ཅད་ཀྱང་ད་ལྟ་ཁ་བ་ཅན་ན་ཆོས་རྗེ་རིན་པོ་ཆེ་ལས་སྨན་པ་མཁས་པ་མི་འདུག་པའི་གནད་ཀྱིས་བདག་ཅག་རྣམས་ཀྱང་དྲུང་དུ་སྨན་སྦྱོར་ལ་ཕྱིན་པས་སྨན་གྱི་རྣམ་དབྱེ་མང་དུ་གསུང་བ་ཐོས་པ་ལ་བརྟེན་ནས། སྔར་ལོ་མང་དུ་བསླབས་པ་བས་བློ་བསྐྱེད་ཆེ་བར་བྱུང་ཞེས་གླེང་ངོ་། ། དེར་ཡུན་ཧ་ཅང་མི་རིང་བ་ཞིག་བཞུགས་ནས། ཆོས་གྲྭ་ཆེན་པོ་བདེ་བ་ཅན་དུ་བྱོན། བདེ་བ་ཅན་པའི་རིན་པོ་ཆེ་སྙེ་ཐང་པ་བཀྲ་ཤིས་སེང་གེ་དང་། གདན་ས་པ་དགེ་བསྐོང་པ་གཉིས་ལ་ཆོས་འབྲེལ་གསན། ཀློག་པའི་སློབ་དཔོན་ཡོན་ཏན་རྒྱ་མཚོ་དང་། ཞར་ཆོས་པ་སློབ་དཔོན་ཨུ་རྒྱན་པས་མཛད་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་རྩ་འགྲེལ་ལ་ལེགས་པར་ཐུགས་སྦྱོངས་མཛད། ཞག་བཅོ་བརྒྱད་ཙམ་གྱིས་གཞུང་གི་ཚིག་མཐའ་དག་ཤིན་ཏུ་བྱང་བར་ཐུགས་སུ་ཆུད་དེ། འཇམ་སྐྱའི་ཊཱིཀྐའི་སྟེང་ནས་ཆོས་གསན་ཞིང་དོན་ཀུན་ཆུབ་པར་མཛད་དེ། སྦྱོར་བ་བརྩི་བ་སོགས་ཀྱི་ཐུགས་བརྩོན་ཆེར་མ་མཛད་ཀྱང་རིང་པོ་མ་ལོན་པར་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་དོན་ལ་ཤིན་ཏུ་མཁས་པར་གྱུར་ནས། སློབ་དཔོན་དང་གྲོགས་མཆེད་ཐམས་ཅད་ཀྱང་རྗེ་འདིའི་བློ་གྲོས་ཀྱི་རྩལ་དཔག་པར་དཀའ་བ་ལ་ཆེས་ཆེར་ངོ་མཚར་བའི་གནས་སུ་འཛིན་ལ། ཐེག་པ་ཆེན་པོ་མདོ་སྡེའི་རྒྱན་ནི། སྔར་མདོ་སྨད་དུ་བཞུགས་པའི་དུས་ནས་ཐུགས་ལ་ཆུད་ཅིང་། བཤད་གསར་དང་འཆད་པ་སོགས་མཛད་ཀྱང་བདེ་བ་ཅན་པའི་བླ་མ་འཇམ་རིན་པ་ཞེས་གྲགས་པའི་དགེ་བཤེས་ཆེན་པོ་དེ་བྱམས་ཆོས་ལ་ཤིན་ཏུ་མཁས་པར་བྱེད་ཀྱིན་འདུག་པས། མདོ་སྡེ་རྒྱན་ལ་སོགས་པའི་བྱམས་ཆོས་རྣམས་ལེགས་པར་གསན་ཞིང་ཐུགས་སུ་ཆུད་པར་མཛད། བདེ་བ་ཅན་དུ་ཐུགས་སྦྱོངས་ལ་བཞུགས་པའི་ཚེ་སྐབས་ཤིག་ཏུ་རྗེ་བཙུན་འཇམ་པའི་དབྱངས་ཀྱི་རྣམ་འཕྲུལ་ས་སྐྱོང་མིའི་དབང་པོའི་ཅོད་པན་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་པ་དབེན་གནས་ཆོས་རྫོང་དུ་ཕྱག་ཕེབས་པའི་སྤྱན་སྔར་མཇལ། འཇམ་དབྱངས་ཨ་ར་པ་ཙ་ནའི་རྗེས་གནང་། བདེ་མཆོག་དྲིལ་བུ་པའི་ལུས་དཀྱིལ་གྱི་དབང་། གུར་གྱི་མགོན་པོའི་རྗེས་གནང་རྣམས་གསན་ནོ། ། དེ་ལྟར་ལོ་གཉིས་ཙམ་ལ་ཕར་ཕྱིན་གྱི་ཚིག་དོན་ལ་ཤིན་ཏུ་མཁས་པར་གྱུར་ནས་དགུང་ལོ་བཅུ་དགུའི་སྟེང་དུ་གསང་ཕུ་དང་བདེ་བ་ཅན་ལ་སོགས་པ་རྣམས་སུ་གྲྭ་སྐོར་ལ་བྱོན། བློ་གྲོས་དང་ཆོས་སྐད་ཕུན་སུམ་ཚོགས་པའི་སྙན་པ་རིང་དུ་སོང་ཞིང་། བཤེས་གཉེན་མཁས་པ་དག་གི་ཡིད་ཀྱི་དབང་པོ་རྣམ་པར་དཔྱོད་པའི་ལྕགས་ཀྱུས་དྲངས་པར་གྱུར་ཏོ། ། དེ་ནས་གཙང་ཕྱོགས་ལ་འབྱོན་པར་བཞེད་དེ། རིན་སྤུངས་ཀྱི་ཕུའི་ལ་ལ་བྱོན་མྱང་སྟོད་མཁར་ཁ་བརྒྱུད་ནས་ཞ་ལུར་ཕེབས། བུ་སྟོན་རིན་པོ་ཆེའི་དམ་པའི་ཆོས་ཀྱི་རྒྱལ་སྲིད་འཛིན་པའི་གདན་ས་པ་ལོ་ཙཱ་བ་མཁན་ཆེན་རིན་ཆེན་རྣམ་རྒྱལ་བའི་དྲུང་དུ་མཇལ། བདེ་མཆོག་མཻཏྲི་བཅུ་གསུམ་མའི་དབང་ཞིག་གསན། དེ་ནས་སྣར་ཐང་ལ་བྱོན། དེ་ནས་གདན་ས་ཆེན་པོ་དཔལ་ལྡན་ས་སྐྱར་ཕེབས། ས་སྐྱའི་དུས་ཆོས་མ་ཚུགས་ཀྱི་རིང་ལ་ས་བཟང་དུ་བྱོན་ནས་ས་བཟང་པཎ་ཆེན་མ་ཏི་བའི་དྲུང་དུ་ཆོས་བཀའ་ཅི་རིགས་པ་གསན། དུས་ཆོས་ཚུགས་ནས་ས་སྐྱར་ཕར་ཕྱིན་གྱི་གྲྭ་སྐོར་མཛད། དེ་ནས་ལ་སྟོད་བྱང་ལ་བྱོན། འདར་བཟང་ལྡན་ངམ་རིང་འགའ་རོང་ཆོས་སྡེ་རྣམས་སུའང་གྲྭ་སྐོར་མཛད་ནས་ཇོ་མོ་ནང་དུ་ཕེབས། ཆོས་རྗེ་ཕྱོགས་ལས་རྣམ་རྒྱལ་བའི་དྲུང་དུ་སྦྱོར་བ་ཡན་ལག་དྲུག་གི་ཁྲིད་ལ་སོགས་པ་གསན། དེ་ནས་བོ་དོང་ལ་བྱོན། མར་རེས་སྤྱི་བོ་ལྷས་སུ་ཕེབས། དེའི་མཁན་ཆེན་པ་ལ་བཀའ་གདམས་ལམ་རིམ་གྱི་ལུང་ཐོབ་ཅིག་མཛད། དེ་ནས་ཆོས་གྲྭ་ཆེན་པོ་ཨེར་གྲྭ་སྐོར་མཛད་ནས་སྣར་ཐང་དུ་ཕེབས། སྣར་ཐང་གི་མཁས་པ་བླ་མ་ལོ་ཙཱ་བ་དོན་བཟང་པ་ལ་མཛོད་ཀྱི་བཤད་པ་ཚར་གཅིག་གསན་ནོ། ། དེ་ནས་མྱང་སྟོད་དུ་ཕེབས་ཏེ་གནས་རྙིང་པའི་གཟུངས་སྒྲུབ་ཀྱི་སྟེང་དུ་ཕར་ཕྱིན་གྱི་གྲྭ་སྐོར་མཛད། དབྱར་ཆོས་ལ་རྩེ་ཆེན་དུ་ཕེབས་པར་མཛད་ནས་མཁས་པའི་དབང་པོ་ཉ་དཔོན་ཀུན་དགའ་དཔལ་བའི་སྤྱན་སྔར་ཕར་ཕྱིན་གྱི་གཟབས་བཤད་ཚར་གཅིག་གསན། ཐུགས་རབ་གསལ་ཞིང་རྣམ་དཔྱོད་ཡོངས་སུ་རྣོ་བ་དང་། བཤད་པར་བྱ་བའི་གནས་རྣམས་བརྡའ་སྤྲོད་པ་ཕུལ་དུ་བྱུང་བས་གདུལ་བྱའི་རྣ་བར་འབབ་ཅིང་། མཁས་པའི་རྣམ་འགྱུར་གྱིས་ཤིན་ཏུ་ཐུགས་རངས་པར་གྱུར། དེའི་ཚེ་ཁོང་པ་ལ་མངོན་པ་མཛོད་ཅིག་གསུང་བར་ཞུས་པས། ངས་ལེགས་པར་ཤོད་པར་ཡོད་དེ་དོན་གཉེར་བྱེད་མཁན་མ་བྱུང་བས་ལྟ་རྟོག་ཀྱང་འགའ་རེ་དགོས། ཁམས་ཀྱང་མ་བདེ་ཞིང་ཕར་ཚད་འཆད་དགོས་པ་འདིས་འཕྲལ་ལ་འཆད་པ་མི་འགྲུབ་པ་འདུག་ངེད་ཀྱི་སློབ་མ་རེད་མདའ་པ་འདི་བློ་གྲོས་ཅན་མངོན་པ་ལ་ཤིན་ཏུ་མཁས་པ་ཞིག་ཡོད་པས་ཁྱོད་རང་ཡང་འདི་ལ་ཉན་ན་འཐད་ཅིང་། ཉན་པར་མི་སྤྲོ་ན་མཛུབ་ཁྲིད་ཅིག་བཅོལ་བ་དྲག་ཅེས་ཡང་ཡང་གསུང་གིན་འདུག་པ་དང་། ཁོང་གི་སློབ་མ་སྔར་ནས་ཞལ་འཚོ་བ་ཡོད་པས་ཀྱང་འཚམས་སྦྱར་ནས། རྗེ་བཙུན་རེད་མདའ་པ་དབྱར་དེ་ས་སྐྱ་ནས་རྩེ་ཆེན་ན་ཕེབས་འདུག་པ་ལ་མངོན་པ་མཛོད་ཀྱི་རང་འགྲེལ་གྱི་སྟེང་ནས་མཛུབ་ཁྲིད་དུ་མཛད་དེ་གསན་པས། གཞུང་གི་ཚིགས་རིགས་ཙམ་ལ་བརྟེན་པ་མ་ཡིན་པར་བསྟན་བཅོས་ཀྱི་ལུས་ཡོངས་སུ་རྫོགས་པའི་དོན་གྱི་ཁོག་ལེགས་པར་བསྒྲིགས་ནས་འགངས་ཆུན་པའི་གོ་བ་བོགས་ཆོད་དུ་སྟེར་ནུས་པ་ཞིག་འདུག་པས་དད་པ་ཆེན་པོ་འཁྲུངས། གང་གསུངས་ཐམས་ཅད་ལན་རེ་ཁོ་ནས་ཚིག་དོན་ལྷག་མ་མེད་པར་ཐུགས་སུ་ཆུད་ཅིང་། དཀའ་བའི་གནས་རྣམས་ལ་དྲི་གཏུགས་ལེགས་པར་མཛད་པས་རྗེ་བཙུན་རེད་མདའ་པ་ཡང་ཤིན་ཏུ་ཐུགས་ཕྲོགས་པར་གྱུར་ཏེ་ཁྱེད་ལ་མཛུབ་ཁྲིད་བྱེད་པ་ལ་ལེགས་པར་སྒྲིམ་དགོས་པར་འདུག་ཅེས་གསུང་ངོ་། ། རྗེ་རིན་པོ་ཆེ་འདི་ཉིད་ཀྱིས་རྒྱལ་བའི་གསུང་རབ་ཀྱི་དྲང་ངེས་རྣམ་པར་འབྱེད་པའི་ཤིང་རྟ་ཆེན་པོ་དག་གི་ལམ་སྲོལ། དབུ་ཚད་ཀྱི་རིགས་པའི་སྒོ་དང་པོ་རྗེ་བཙུན་འདི་ཉིད་ལས་རྙེད་པས་དེའི་ཕྱིར་རྗེ་རེད་མདའ་པ་འདི་འགྲན་ཟླ་མེད་པའི་བླ་མའི་གཙོ་བོར་མཛད་པ་ཡིན་ནོ། ། དེ་ལྟ་བུའི་བླ་མ་དེ་ཉིད་ལ་མཛོད་ཀྱི་ཆོས་ཐུན་འགའ་ཞིག་མཛུབ་ཁྲིད་ཀྱི་ལུགས་སུ་མཛད། དེ་ལྷག་དོན་ལ་ཁྱད་པར་མི་འདུག་ཀྱང་ད་ལྟའི་མཚན་ཉིད་པ་རྣམས་ལ་གྲགས་པ་དང་བསྟུན་ནས་ཆོས་ཉན་བཤད་ཀྱི་ལུགས་སུ་བྱས་ནས་གསན་གསུང་། རྩེ་ཆེན་གྱི་དབྱར་ཆོས་དེ་གྲོལ་ནས་སྟོན་བླ་མ་རྗེ་བཙུན་པ་དང་དཔོན་སློབ་གཉིས་ཀས་མྱང་སྟོད་བསམ་གླིང་དུ་ཆོས་བར་ལ་བྱོན་ནས་རྗེ་བཙུན་རེད་མདའ་པ་ལ་དབུ་མ་ལ་འཇུག་པ་ཚར་གཅིག་གསན། རྗེ་བཙུན་རེད་མདའ་པས་ཀྱང་དབུ་མ་གསུང་བའི་སྔ་ཤོས་དེར་འདུག ། དེའི་དུས་སུ་གྲུབ་པ་བརྙེས་པའི་རྣལ་འབྱོར་གྱི་དབང་ཕྱུག་ཆེན་པོ་གནས་ལྔ་རིག་པའི་མཁས་པ་མཁན་ཆེན་ལོ་ཙཱ་བ་བྱང་ཆུབ་རྩེ་མོ་དབུས་སུ་བྱོན། དགུན་ཆོས་ལ་སྐྱིད་ཤོད་ཀྱི་པོ་ཏ་ལར་མངོན་པ་ཀུན་ལས་བཏུས་གསུང་བ་འདུག་ཅེས་གསན་ནས། དེ་དུས་ཁོང་མངོན་པའི་བདག་པོར་བྱེད་ཀྱིན་འདུག་པས་ཅི་ནས་ཀྱང་ཀུན་ལས་བཏུས་ཚར་གཅིག་གསན་པར་བཞེད་དེ། སྟོན་གྱི་མཇུག་ལ་མྱང་སྟོད་ནས་ཕྱགས་བཏེག་ནས་དབུས་སུ་ཕེབས་པར་མཛད། པོ་ཏ་ལར་བྱོན་ནས་ལོ་ཆེན་བྱང་རྩེ་ལ་མངོན་པ་གསུང་བར་ཞུས་པས་ཁོང་པ་རང་ཤིན་ཏུ་གསུང་བར་བཞེད་པ་འདུག་པ་ལ། འོན་ཀྱང་དགུང་ལོ་མང་དུ་བཞེས་པ་སོགས་ཀྱི་དབང་གིས་མྱུར་དུ་ཁོང་རང་གི་གདན་སར་ཕེབས་པ་འཐད་སྙམ་པ་ཡིད་ལ་བཞག་ནས། མྱུར་བར་གཙང་པྱོགས་སུ་ཐེགས་པར་འདུན་པའི་ཞུ་བ་རྫོང་ཇི་བས་ཕུལ་བ་ལ་བརྟེན་ནས། དེ་འཕྲལ་དབུས་ནས་གཙང་ཕྱོགས་སུ་ཕྱགས་བཏེགས་པས་མངོན་པའི་ཐུགས་བཞེད་མ་གྲུབ་ཀྱང་ཆོས་འབྲེལ་ཞིག་གསན། དེའི་དགུན་ཆོས་བདེ་བ་ཅན་དུ་བྱོན་ནས་བཞུགས། དེ་རྗེས་སྐྱོང་མོ་ལུང་པའི་མཁན་པོ་དཀའ་བཞི་བ་བློ་གསལ་བ་ཞེས་གྲགས་པ་འདུལ་མཛོད་ལ་ཤིན་ཏུ་མཁས་པར་བྱེད་པ་དེའི་དྲུང་དུ་སྐྱོར་མོ་ལུང་དུ་བྱོན། ཁོང་སྔོན་དུས་ཀྱི་འདུལ་བ་འཛིན་པ་རྒྱ་མཚོའི་ཁྲོད་ན་ཉི་མ་ལྟར་གྲགས་པའི་འདུལ་འཛིན་ཆེན་པོ་དགེ་བའི་བཤེས་གཉེན་ཐག་མ་པའི་བུ་ཆེན་སྦལ་ཏི་དགྲ་བཅོམ་པའི་བཤད་རྒྱུན་འཛིན་པའི་གདན་ས་པ་འདུལ་བ་ལ་ཤིན་ཏུ་མཁས་པར་འདུག་པས། དེའི་ལེགས་པར་བཤད་པའི་བགོ་སྐལ་བླང་བར་བཞེད་དེ་ཁོང་ལ་འདུལ་བ་མདོ་རྩ་བ་འགྲེལ་པ་ཆ་ལག་དང་བཅས་པ་རྫོགས་པར་གསན་ཏེ། ཁོང་གི་ཐུགས་ལ་མངའ་བའི་འདུལ་བའི་བཤད་སྲོལ་ལྷག་མ་མེད་པར་ཐུགས་སུ་ཆུད་ཅིང་ཁྱད་པར་ལྷག་པོར་རྟོགས། དེའི་ཚེ་ཆོས་གསན་པའི་ཞར་ལ་མདོ་རྩ་བའི་རྒྱ་ཆེར་འགྲེལ་གྱི་དབུ་ནས་ཉིན་རེ་བཞིན་ཤོག་བུ་མདའ་ཚད་བཅུ་བདུན་རེ་ཙམ་མ་ཆག་པར་ཐུགས་ལ་བཟུང་། དུས་དེ་དག་གི་ཚེ་ན་ཚོགས་སུ་མང་ཇ་ལ་བྱོན་པ་སོགས་ཀྱི་སྐབས་སུ་དགེ་འདུན་རྣམས་ཡུམ་གྱི་མདོ་འདོན་པའི་རིང་ལ་ཤེར་ཕྱིན་གྱི་དོན་བསམས་པ་ན་ཆོས་ཐམས་ཅད་སྣང་ལ་ངོས་བཟུང་མེད་པའི་དོན་ལ་མཉམ་པར་བཞག་པས། དགེ་འདུན་གྱི་ཆོས་སྤྱོད་དང་བདུད་བཟློག་སོགས་ཀྱི་ཚིག་འབྲུ་ཙམ་ཡང་ཐུགས་ཀྱིས་མ་ངེས་པར་རྣམ་རྟོག་གི་རྒྱུ་བ་རགས་པ་ཐམས་ཅད་ལོག་ནས་གསལ་སྟོང་འཛིན་མེད་ཀྱི་ངང་ལ་ཐུགས་རྩེ་གཅིག་ཏུ་གནས་པ་མང་ཇའི་འགོ་མཇུག་འཁྱོངས་པ་འབད་རྩོལ་མེད་པར་གནས་པ་བྱུང་། བོད་ཀྱི་གྲུབ་ཐོབ་ཏུ་བྱེད་པའི་རྟོགས་པ་བཟང་ཤོས་མཐར་ཐུག་པ་འཁྲུངས་འདུག་ནའང་། གསུང་རབ་ཀྱི་གནད་མ་ལུས་པ་ཐུགས་སུ་ཆུད་པའི་བདག་ཉིད་ཆེན་པོ་འདི་ནི་དེ་འདྲ་བ་ལའང་སེམས་གནས་ཀྱི་ཉམས་བཟང་པོ་ཐུགས་ལ་འཁྲུངས་པའི་ཏིང་ངེ་འཛིན་ཐུན་མོང་བའི་ཁྱད་པར་ཙམ་མ་གཏོགས། དེ་ཁོ་ན་ཉིད་རྟོགས་པའི་ཏིང་ངེ་འཛིན་ཐུན་མོང་མ་ཡིན་པར་འཁྲུལ་པའི་དྲི་ཙམ་ཡང་མི་བྲོ་བ་འདི་ལྟ་བུ་ནི་མཁས་པ་མགུ་པའི་ཡོན་ཏན་དཔག་པར་དཀའ་བ་ཡིན་ནོ། ། དེའི་ཚེ་རྒྱ་ཆེར་འགྲེལ་གྱི་བམ་པོ་བཞི་བཅུ་ལྷག་ཙམ་ཐུགས་ལ་ཆུད་པར་མཛད། དེའི་ཚེ་སྐུ་སྟོད་ལ་བསྙུན་གཞི་དྲག་པོ་ཞིག་རྒྱུན་རིང་ཙམ་བྱུང་ཡང་རྒྱལ་སྲས་རྟག་ཏུ་ངུ་ཤེར་ཕྱིན་འཚོལ་བའི་ཚེ་ལུས་དང་སྲོག་ལའང་མི་ལྟ་བར་ཤེར་ཕྱིན་བཙལ་བ་ཇི་ལྟ་བ་བཞིན་དུ་བསྙུན་གཞི་དེ་ལ་ཇི་མི་སྙམ་པར་སློབ་མ་འགའ་ཞིག་དང་བཅས་གཙང་ཕྱོགས་ལ་བྱོན། ས་སྐྱར་འབྱོན་བཞེད་པ་ལ་ལམ་དུ་ཧ་ཅང་གྲང་བའི་རེག་པས་འོ་བརྒྱལ་བར་འདུག་པ་དང་ཤུལ་ཐག་རིང་བས་ངུར་སྨྲིག་གི་ཕུ་ལ་ལམ་མཛད་དེ་གནས་རྙིང་དུ་བྱོན། དེའི་དགུན་གནས་རྙིང་དུ་བཞུགས། གནས་རྙིང་བའི་དོན་གཉེར་བ་དང་ཕྱག་ཕྱི་ལ་བྱོན་པ་འགའ་ཞིག་གིས་ནན་ཆེར་གསོལ་བ་བཏབ་པ་ལ་བརྟེན་ནས། དེ་གོང་མངོན་པ་ཀུན་ལས་བཏུས་ལ་ཆེད་དུ་གཏད་པའི་གཟིགས་རྟོག་མ་མཛད་ཀྱང་། དེ་དུས་ཚིག་ལ་གཟིགས་པ་ཙམ་གྱིས་དོན་ཡང་ཐུགས་ལ་ཅིག་ཅར་དུ་གསལ་བར་ཤར་བས་ཐོག་མར་གཟིགས་པའི་རིམ་པ་བཞིན་གཞན་ལ་ཡང་འདོམས་པའི་སྒོ་ནས། མངོན་པ་ཀུན་ལས་བཏུས་ཚར་གཅིག་རྩལ་བཤད་མཛད་དོ། ། དེ་ནས་ས་སྐྱར་བྱོན། དེའི་ཚེ་ས་སྐྱ་ན་བླ་མ་རྗེ་བཙུན་རེད་མདའ་པ་ཆེན་པོ་ལམ་འབྲས་གསན་ཀྱིན་འདུག་པ་དང་མཇལ་དེ་ནས་བཟུང་སྟེ་ཟླ་བ་བཅུ་གཅིག་ཙམ་གྱི་རིང་ལ་ས་སྐྱར་རྗེ་རེད་མདའ་པའི་སྤྱན་སྔར་བཞུགས། རྗེ་བཙུན་པ་ཁོང་རང་ལམ་འབྲས་སོགས་གསན་པའི་ངང་ནས། རྗེ་འདི་ལ་མངོན་པ་ཀུན་ལས་བཏུས་གཟབས་བཤད་ཚར་གཅིག་མཛད། གཞན་ཡང་དེའི་ཚེ་ཚད་མ་རྣམ་འགྲེལ་ལ་གཙོ་བོར་སྦྱངས་ཤིང་གསན་པ་དང་། དབུ་མ་འཇུག་པ་སོགས་ཀྱི་བཤད་པ་དང་། འདུལ་བ་ལུང་ལ་སོགས་པ་བཀའ་བསྟན་བཅོས་མང་པོའི་ལུང་ཡང་གསན། བླ་མ་རྡོ་རྗེ་རིན་ཆེན་པའི་དྲུང་དུ་བརྟག་གཉིས་པ་ལུགས་ཀྱི་བཤད་པ་ཚར་གཅིག་ཀྱང་གསན་ཞིང་། ས་སྐྱར་བླ་མ་རྗེ་བཙུན་པས་འཚམ་སྦྱོར་མཛད་ནས་བླ་བྲང་ཤར་པ་ཚང་གི་སྔགས་ཀྱི་དགེ་བཤེས་བགྲེས་པོ་མན་ངག་ལ་མཁས་པར་བྱེད་པ་ཞིག་འདུག་པ་ལས་མན་ངག་བླངས་ཏེ་བླ་བྲང་རིན་ཆེན་སྒང་གི་རྒྱབ་ཕྱོགས་དེ་ལ་བྱོན་གྱིན་མ་ནིང་གི་ཧ་འདོན་པ་སོགས་ལན་འགའ་ཡར་མཛད་པས་སྔར་གྱི་སྐུ་སྟོད་ཀྱི་བསྙུན་གཞི་དེ་ལྷག་མ་མེད་པར་འཐོན། ས་སྐྱ་ནས་དཔོན་སློབ་རྣམས་ཀྱིས་ལ་སྟོད་བྱང་གི་སའི་ཆ་ངམ་རིང་དུ་ཆོས་བར་ལ་བྱོན་ནས། དཔྱིད་དང་དབྱར་གཉིས་ཀ་ངམ་རིང་དུ་བཞུགས། བླ་མ་རྗེ་བཙུན་པས་དེར་མངོན་པ་ཀུན་ལས་བསྡུས་ཀྱི་ཊཱིཀྐ་ཆེན་མོ་དེའི་རྩོམ་པ་མཛད། བརྩམས་ཚར་རིམ་བཞིན་རྗེ་འདི་པས་ཀྱང་ཐུགས་ལ་ཆུད་པར་མཛད་ཅིང་། རྒྱས་པའི་བསྟན་བཅོས་ཚད་མ་རྣམ་འགྲེལ་གྱི་རང་འགྲེལ་དེ་ཞིབ་ཏུ་གསུང་བར་ཞུས་ནས་ཚར་གཅིག་གསན་ནོ། ། དེའི་སྟོན་འཁྲུངས་ཡུལ་ནས་རྐྱེན་དུ་བབ་པའི་འཚོག་བཅས་ཅི་རིགས་པ་ཕྲིན་ལས་པའི་ནང་དུ་འབུལ་བ་བསྐུར་ཡོད་པ་འོང་ཟེར་ནས་དེ་བཞེས་པ་ལ་སོགས་པའི་སླད་དུ་ངམ་རིང་ནས་ས་སྐྱ་ལ་ལམ་མཛད་དེ་དབུས་སུ་བྱོན། དབུས་སུ་ཕེབས་ནས་གྲོགས་དང་སློབ་འབྲེལ་མང་པོས་བསྐུལ་ཞིང་མདོ་སྨད་ནས་ཡུམ་གྱིས་ཀྱང་ཞུ་བ་ནན་ཆེར་བྱུང་བས་རྐྱེན་བྱས་ནས། ལན་ཅིག་མདོ་སྨད་ལ་འབྱོན་པར་བཞེད་པ་འཁྲུངས་ཏེ། མལ་གྲོ་ལྷ་ལུང་དུ་བྱོན། ལག་ལེན་འགའ་ཞིག་ལ་ཐུགས་སྦྱོང་ཡང་མཛད་པར་བརྩམས་པ་ལ་མཚམས་ཤིག་ནས། ཅི་བྱེད་དེ་འདྲ་ལ་དགོས་པ་མི་འདུག ། ད་ནི་མདོ་ཁམས་རང་ཡུལ་གྱི་ཕྱོགས་ལ་གཏན་ནས་མི་འགྲོ་བའི་ཡིད་དམ་བཅའ་བར་བྱའོ་སྙམ་དུ་དགོངས་པ་ཤུགས་དྲག་པོ་སྐྱོ་ཤས་དང་བཅས་པ་ཞིག་འཁྲུངས་ནས་དེ་འཕྲལ་དུ་མདོ་སྨད་ལ་མི་འབྱོན་པའི་ཐུགས་ཐག་བཅད་དོ། ། དེ་ཡང་བདག་ཉིད་ཆེན་པོ་འདི་ལ་ཆེད་དུ་བསམ་པའི་སྒོ་ནས་རྙེད་བཀུར་དང་། སྙན་གྲགས་དང་། འཁོར་བའི་ཕུན་ཚོགས་གཞན་གང་ཡང་རུང་བ། ཐ་ན་ཚངས་པ་དང་བརྒྱ་བྱིན་གྱི་དཔལ་ལའང་མངོན་པར་འདོད་པའི་སྲེད་པ་སྐྱེ་མ་མྱོང་བ་ལྟ་ཞོག་གི ། ཕུན་སུམ་ཚོགས་པའི་དཔལ་ཇི་ཙམ་འབྱོར་པ་དེ་ཙམ་གྱིས་སླར་ཞིང་སྲེད་པ་ཟད་པའི་སྟོབས་ཆེས་ཆེར་རྒྱས་པར་འགྱུར་བའི་གྲོགས་བྱེད་པ་ནི་དམ་པ་རྣམས་ཀྱིས་དྲན་ཤེས་ཀྱི་ལྕགས་ཀྱུས་ཡིད་ཀྱི་གཉིས་འཐུང་ཡོངས་སུ་བཟུང་བའི་འབད་པ་ལ་བལྟོས་ནས་ཉམས་སུ་བླང་བ་ཡང་ཤིན་ཏུ་བྱ་དཀའ་བའི་གནས་ཡིན་ན། འདི་ནི་བློ་སྔོན་དུ་གཏོང་བ་ལ་ཅུང་ཟད་ཀྱང་བལྟོས་པ་མེད་པར་གཞན་དག་གིས་བསྙེན་བཀུར་བ་དང་། སྙན་པར་སྨྲ་ཞིང་ལེགས་པར་བསྔགས་པ་དང་། འབྱོར་པའི་ཁྱད་པར་མཆོག་ཏུ་གྱུར་པ་རྒྱ་ཆེན་པོས་མངོན་པར་མཆོད་པ་སོགས་ཕུན་སུམ་ཚོགས་པ་ཇི་ཙམ་ཞིག་བྱུང་བ་དེ་ཙམ་གྱིས་ཀྱང་སླར་ཞིང་འདུ་བྱེད་ཐམས་ཅད་ལ་མི་རྟག་པའི་འདུ་ཤེས་དང་། མགོན་མེད་པ་ཐམས་ཅད་ལ་བསྐྱབ་པར་འདོད་པའི་བརྩེ་བ་དང་། རྒྱལ་བ་སྲས་བཅས་ཐམས་ཅད་བསྙེན་བཀུར་བར་བཞེད་པའི་དད་པ་རྣམས་ཕན་ཚུན་འགྲན་པ་བཞིན་དུ་འཕེལ་བར་འགྱུར་གྱི། གཞན་དུ་ན་སྲེད་པ་འཕེལ་བ་དང་རྗེས་སུ་མཐུན་པ་ནི་གནས་མེད་ཅིང་གོ་སྐབས་མེད་དོ། ། འདི་ནི་རྗེ་འདིའི་སྐྱེ་བས་ཐོབ་པ་ལྷན་སྐྱེས་ཀྱི་ཡོན་ཏན་ཡིན་གྱི། སྐུ་ཚེ་འདི་ཉིད་དུ་གཉེན་པོས་གསར་དུ་བསྐྱེད་པའི་སྦྱོར་བྱུང་ནི་མ་ཡིན་ནོ། ། དེ་ཡང་རྗེ་ཉིད་ཀྱི་ཞལ་ནས་ཁོ་བོ་ལ་གཞན་གྱིས་སྟན་བཟང་པོ་བཤམས་པ་དང་། གུས་པའི་བསྙེན་བཀུར་སོགས་ཅི་ཙམ་བྱས་པ་ཙམ་གྱིས་ཆེད་དུ་བསམ་མི་དགོས་པར་དུས་དེའི་སྐབས་རང་དུ་འདི་ཐམས་ཅད་མི་རྟག་ཅིང་ཡིད་བརྟན་དུ་མི་རུང་བ་སྒྱུ་མའི་བློ་བྲིད་དང་འདྲ་བ་ཡིན་སྙམ་པའི་སྐྱོ་བ་ཤུགས་དྲག་པོ་སྣང་བ་བུན་ལོང་དུ་ཐོངས་པ་ཡིད་གཏིང་ནས་འགྱུར་བ་རྒྱུན་རིང་བོ་རེ་སྐྱེ་བ་ཞིག་དང་པོ་ཉིད་ནས་རང་ཆས་སུ་ཡོད་པ་ཡིན་ཞེས་གསུང་ངོ། ། འདི་ནི་ཤིན་ཏུ་མཐོ་བའི་རྟོགས་པ་ཁྱད་པར་ཅན་དུ་བོད་ལ་གྲགས་པ་མང་པོ་ཞིག་གིས་ཆ་ཙམ་དུ་ཡང་བསྒྲུན་པར་མི་ནུས་པའི་མངོན་པར་རྟོགས་པའི་ཡོན་ཏན་ཡིན་ལ། ཟག་བཅས་ཀྱི་ཕུན་ཚོགས་ལ་སྲེད་པ་འགོག་པ་མེད་དུ་མི་རུང་བའི་དགོས་པ་ཉེ་བར་གཟིགས་ནས་ཆོས་ཀྱི་རྗེ་སངས་རྒྱས་བཅོམ་ལྡན་འདས་ཀྱིས་ཀྱང་། དེའི་གཉེན་པོ་ཡིད་ལ་བྱེད་པ་ཐེག་པ་ཆེ་ཆུང་གི་མདོ་སྡེ་རྣམས་སུ་ལན་ཅིག་མ་ཡིན་པར་བཀའ་སྩལ་པ་ལྟ་ཞོག་གི ། ཐ་ན་དགེ་སློང་རྣམས་ལ་རིན་པོ་ཆེའི་ཁྲི་ལ་འདུག་པ་སོགས་བྱ་དགོས་པ་བྱུང་ནའང་མི་རྟག་པས་ཉེན་པའི་འདུ་ཤེས་ཉེ་བར་བཞག་པར་བྱ་བ་སོགས་ཀྱི་བསླབ་པ་བཅས་པའི་སྒོ་ནས་ཀྱང་དོན་དེ་སྒྲུབ་པར་མཛད་པ་ཡིན་ནོ། ། དེ་བས་ན་ཚུལ་འདི་ནི་མཁས་པ་མགུ་བ་བསྐྱེད་པའི་རྣམ་པར་ཐར་པ་ཆེས་ངོ་མཚར་རྨད་དུ་བྱུང་བ་ཞིག་གོ ། དེ་ནས་སྟོན་དེ་ལ་མལ་གྲོ་ལྷ་ལུང་པའི་བླ་མ་བསོད་ནམས་གྲགས་པ་ལ་ཆོས་ལུང་ཡང་མང་རབ་གསན་ཞིང་། བར་ཞིག་ཏུ་སྐུ་མཚམས་བཅད་ནས་ཐུགས་དམ་མཛད། རྣམ་འགྲེལ་གྱི་རྣམ་བཤད་རིགས་མཛོད་ལ་གཟིགས་རྟོག་མཛད་ཅིང་། ལེའུ་གཉིས་པའི་སྐབས་ཀྱི་ལམ་གྱི་རྣམ་གཞག་སྟོན་པའི་སྐབས་ལ་ལེགས་པར་གཟིགས་པས་རྐྱེན་བྱས་ནས། ཆོས་ཀྱི་གྲགས་པའི་གཞུང་ལུགས་དང་རིགས་པའི་སྲོལ་ལ་ལྡོག་ཏུ་མེད་པའི་དད་པ་ཤུགས་དྲག་པོ་མནན་པས་མི་ནོན་པ་འཁྲུངས་ཤིང་། སྟོན་དེར་བཞུགས་ཀྱི་རིང་ལ་རྣམ་འགྲེལ་གྱི་གཞུང་ལ་གཟིགས་ཙམ་ནས་དད་པའི་སྤུ་ལོང་གཡོས་ཏེ་སྤྱན་ཆབ་ཀྱི་རྒྱུན་བཅད་པར་མི་ནུས་པ་རྟག་ཏུ་འོང་བ་ཞིག་བྱུང་གསུང་ངོ་། ། དེའི་དགུན་ཆོས་བདེ་བ་ཅན་དུ་བཞུགས། དཔྱིད་ཆོས་སྔོན་མ་ལ། གྲྭ་སྐོར་མཛད་བཞེད་པའི་པོ་ཏི་འགའ་ཡར་གྱི་གཟིགས་རྟོག་མཛད་ནས་གཙང་ལ་བྱོན། སྣར་ཐང་དུ་ཕེབས། བླ་མ་ལོ་ཙཱ་བ་དོན་བཟང་པས་ཚད་མའི་ཊཱིཀྐ་ཞིག་མཛད་འདུག་པ་དེ་ཚར་གཅིག་ཅིས་ཀྱང་ཉོན། ཞེས་བཀའ་གནང་ནས་གསན། དབྱར་ཆོས་དེ་སྣར་ཐང་དུ་རྣམ་འགྲེལ་མངོན་པ་གོང་འོག་མདོ་རྩ་དང་བཅས་པའི་གྲྭ་སྐོར་མཛད། སྣར་ཐང་དུ་གཞུང་བསྐྱུར་བཙུགས་པའི་ཐོག་མ་དེ་ཡིན་པ་འདུག ། དེ་ནས་སྟོན་ཆོས་ལ་བླ་མ་རྗེ་བཙུན་རེད་མདའ་པ་ཆེན་པོ་བོ་དོང་དུ་ཆོས་བར་ལ་ཕེབས་པ་གསན་ནས་ཨེར་བྱོན། བླ་མ་ལོ་ཙཱ་བ་ནམ་མཁའ་བཟང་པོ་ལ་སྙན་དངགས་མེ་ལོང་གི་བཤད་པ་ལ་སོགས་པ་གསན། གཙོ་བོར་རྗེ་བཙུན་རེད་མདའ་པ་ལ་དབུ་ཚད་མངོན་པ་སོགས་གསན་ཞིང་ཕར་ཕྱིན་དང་འདུལ་བ་ཡང་རྗེ་བཙུན་ཉིད་ཀྱི་དྲུང་དུ་ཚར་རེ་ཉན་ན་རྟེན་འབྲེལ་གྱི་ཁྱད་པར་ཞིག་འོང་དུ་རེ་བས་གསུང་འཚལ་ཞུས་ནས་ཚར་རེ་གསན། དབུ་མ་འཇུག་པའི་བཤད་པ་ཞིབ་ཏུ་གསན་ཞིང་། རྩ་ཤེ་ལ་སོགས་པའི་རིགས་ཚོགས་ཀྱི་བཤད་པ་གསན་པ་མ་བྱུང་ཞིང་། དབུ་མ་རིགས་ཚོགས་རྣམས་ཀྱི་ལུང་ཞིག་སྣར་ཐང་མཁན་པོ་ཀུན་དགའ་རྒྱལ་མཚན་པ་ལ་གསན། ཁོང་གིས་ནི་ཁོང་རང་གི་ཟུར་ཆེན་གྱི་གོ་ས་དེ་སྔར་དབུ་མའི་ཟུར་ཆོས་པ་ཞིག་གི་གོ་སར་འདུག་པས་དེ་ནས་བརྒྱུད་པར་འདུག་གསུང་ཞིང་། བདེ་བ་ཅན་བླ་མ་འཇམ་རིན་པ་ལའང་ལུང་གསན་ཁོང་གིས་ཆོས་རྗེ་བླ་མ་ལ་གསན་པར་འདུག ། བླ་མ་རྗེ་བཙུན་གྱིས་དབུ་མ་རིགས་ཚོགས་རྣམས་ཀྱི་ལུང་བྲང་མོ་ཆེའི་གདན་ས་བླ་མ་ཆོས་ཤེས་པ་ལ་གསན། ཁོང་གིས་སྣར་ཐང་པ་ཤེར་སེང་གི་དྲུང་དུ་གསན་པར་འདུག་གསུང་སྟེ། མདོར་ན་དེའི་ཚེ་རྗེ་རིན་པོ་ཆེ་དཔོན་སློབ་ལ་རིགས་ཚོགས་རྣམས་ཀྱི་བཤད་པ་ལྟ་ཞོག ། ལུང་ཙམ་ཞུ་བའི་ཡུལ་ཡང་དཀའ་བར་བྱུང་འདུག་གོ ། དེ་ནས་དཔོན་སློབ་གཉིས་ཀ་ཐབས་ཅིག་ཏུ་ས་སྐྱར་བྱོན། རྗེ་རིན་པོ་ཆེ་འདིས་དེའི་ཚེ་ས་སྐྱར་གོང་དུ་སྨོས་པའི་དཀའ་ཆེན་རྣམས་ཀྱི་གྲྭ་སྐོར་མཛད། དེ་དུས་པོ་ཏི་གཞན་བཅུ་ལྷག་ཙམ་གྱི་གྲྭ་སྐོར་ཡང་མཛད་པས་ཆོག་པ་ཡོད་ཀྱང་། དེ་དུས་ཀྱི་གྲྭ་ས་རྣམས་ན་པོ་ཏི་གཞན་རྣམས་ཀྱི་གྲྭ་སྐོར་བྱེད་པའི་ལུགས་མ་དར་འདུག་པས་མ་བྱས་གསུང་ངོ་། ། དེ་ནས་དེ་འཕྲལ་དབུས་ལ་བྱོན་ནས་སོས་ཚལ་གུང་ཐང་ནས་བརྩམས་ཏེ་རིམ་པ་བཞིན་དུ་གསང་ཕུ་དང་རྩེས་དང་ལ་སོགས་པའི་གྲྭ་ས་ཆེན་པོ་རྣམས་སུ་ཕར་ཕྱིན་སྔར་ནས་མཛད་ཚར་བས་དེ་མ་གཏོགས་པ་དཀའ་ཆེན་ལྷག་མ་བཞིའི་གྲྭ་སྐོར་མཛད་ཅིང་། དེའི་ཚེ་དབུས་གཙང་གི་གྲྭ་ས་ཆེན་པོ་རྣམས་ཀྱི་དགེ་བའི་བཤེས་གཉེན་སྡེ་སྣོད་འཛིན་པ་རྒྱ་མཚོ་ལྟ་བུ་མཐའ་དག་ཀྱང་རྗེ་བླ་མ་འདིའི་སྐུ་གསུང་ཐུགས་ཀྱི་རྣམ་ཐར་ལ་སྙིང་ནས་དད་པ་ཐོབ་ཅིང་བདག་ཉིད་ཆེན་པོ་འདི་ནི་སྔོན་ཡུན་རིང་པོ་ནས་ལམ་ལ་སྦྱངས་པ་མཐར་ཕྱིན་པ་ཞིག་ཞིང་འདིར་གདུལ་བྱའི་དོན་དུ་བསམ་བཞིན་དུ་བྱོན་པ་ཞིག་ཡིན་པ་ནི་གོར་མ་ཆག་གོ ། ཞེས་མཐུན་པར་བརྗོད་ཅིང་དམ་པའི་མགོན་འདི་ལྟ་བུ་ལ་བརྟེན་པ་ལས་ལྷག་པ་གང་ནའང་མེད་དོ་ཞེས་རྗེ་འདིའི་ཞབས་རྡུལ་སྤྱི་བོར་བླངས་ཏེ་བཀའ་བཞིན་དུ་སྒྲུབ་པ་ལ་འབད་པར་གྱུར་ཏོ། ། དེའི་ཚེ་ཆོས་གྲྭ་ཆེན་པོ་རྣམས་སུ་གྲྭ་སྐོར་ལ་བྱོན་པའི་སྐབས་དག་ཏུའང་དད་པའི་ཤུགས་ཀྱིས་གསོལ་བ་འདེབས་ཤིང་དམ་པའི་ཆོས་ཀྱི་བཀའ་སྩལ་མཉན་ནས་རྗེ་ཉིད་ཀྱི་སློབ་མར་ཁས་ལེན་པའི་སྡེ་སྣོད་འཛིན་པའང་དུ་མ་ཞིག་བྱུང་ལ། བདག་ལེགས་སུ་འདོད་པ་དག་ནི་འདི་འདྲ་བའི་དམ་པའི་མགོན་ལ་བརྟེན་པ་ལས་འདོད་པའི་གནས་འཐོབ་པར་འགྱུར་གྱི། གཞན་གྱིས་ནི་མ་ཡིན་ནོ་སྙམ་དུ་བསམ་ནས་བདག་ཉིད་ཆེན་པོ་འདིའི་ཞབས་འབྲིང་དུ་ཁས་ལེན་པར་ཡང་བྱེད་དོ། ། དེ་ནས་རྩེས་དང་གི་གྲྭ་སྐོར་ཚར་ནས་ཡར་ཀླུངས་རྣམ་རྒྱལ་དུ་མ་བྱོན་སངས་རྒྱས་གསུམ་པ་ཁ་ཆེའི་པཎྜི་ཏ་བསོད་སྙོམས་པ་ཆེན་པོ་ཤཱཀྱ་ཤྲཱི་བྷ་དྲའི་མཁན་བརྒྱུད་ཚོགས་ཆེན་པོའི་མཁན་པོ་དཀའ་བཞི་པ་ཚུལ་ཁྲིམས་རིན་ཆེན་གྱིས་མཁན་པོ་མཛད། ཚོགས་པ་བྱི་རྫིང་པའི་མཁན་པོ་གནས་བརྟན་འདུལ་བ་འཛིན་པ་ཤེས་རབ་མགོན་པོས་ལས་ཀྱི་སློབ་དཔོན་མཛད། བྱི་རྫིང་པའི་དབུ་མཛད་སྡོམ་བརྩོན་བསོད་ནམས་རྡོ་རྗེས་གསང་སྟེ་སྟོན་པ་མཛད་ཅིང་། ཚོགས་པ་གཉིས་ཀྱི་དགེ་སློང་ཁ་སྐོང་དུ་འོས་པ་གྲངས་ཚང་བས་དད་པའི་དགེ་འདུན་མཛད་ནས་བསྙེན་པར་རྫོགས་པའི་སྡོམ་པ་ཡང་དག་པར་བཞེས་ཏེ་གནས་བརྟན་ཆེན་པོ་འོད་སྲུངས་གངས་རིའི་ལྗོངས་འདིར་སླར་ཡང་བྱོན་པ་ཇི་ལྟ་བ་བཞིན་དུ་ལྷ་དང་བཅས་པའི་འགྲོ་བ་ཐམས་ཅད་ཀྱི་བསོད་ནམས་ཀྱི་ཞིང་གཅིག་པུར་གྱུར་ཏོ། ། དེ་ནས་གདན་ས་ཐེལ་དུ་བྱོན། སྤྱན་སྔ་རིན་པོ་ཆེ་གྲགས་པ་བྱང་ཆུབ་པའི་དྲུང་དུ་མཇལ། ལེགས་བཤད་ཀྱི་སྐྱེས་ཕུལ་ཞིང་དམ་པའི་ཆོས་ཀྱི་བཀའ་མཆིད་མཛད་པས་ཆོས་རྗེ་སྤྱན་སྔ་བ་དད་པའི་ཤུགས་ཀྱིས་སྤྱན་ཆབ་བྱུང། ཕྱིས་ཀྱང་དྲུང་ན་འཁོད་པ་དག་དང་འབེལ་བའི་བཀའ་མཆིད་གླེང་བ་ན་སྐུ་ན་གཞོན་ནུ་འདི་འདྲ་བ་ལའང་ཡོན་ཏན་གྱི་གཏེར་ཆེན་པོ་འདི་ལྟ་བུ་འདུག་ན་ཁོ་བོའི་སྐྱེ་ས་འདི་འདྲ་བ་ཞེས་ཐུགས་ཕྱུང་བའི་གསུང་ཡང་ཡང་འབྱོན་པར་མཛད་དོ། ། དེའི་ཚེ་སྤྱན་སྔ་རིན་པོ་ཆེ་དེ་ཉིད་ལ་ལམ་འབྲས་བུ་དང་བཅས་པའི་མན་ངག་ཡོངས་སུ་རྫོགས་པ་དང་། ནཱ་རོ་པའི་ཆོས་དྲུག་དང་རྗེ་ཕག་མོ་གྲུ་པ་དང་ཆོས་རྗེ་འཇིག་རྟེན་མགོན་པོའི་བཀའ་འབུམ་ལ་སོགས་པ་ལྷོ་བྲག་མར་པ་ནས་རྗེ་བཙུན་མི་ལ་ལ་བརྒྱུད་པའི་གདམས་ངག་གང་ཡོད་དང་། ལྷོ་བྲག་མར་པ་ནས་རྔོག་ཆོས་སྐུ་རྡོ་རྗེ་ལ་བརྒྱུད་པའི་མན་ངག་གང་ཡོད་དང་། འགྲོ་མགོན་ཕག་མོ་གྲུ་པའི་གསུང་གང་ཡོད་དང་མན་ངག་གང་ཡོད་གསན་ཏེ་མན་ངག་དེ་དང་དེ་དག་གི་ནུས་པ་ཐོན་པར་མཛད་དོ། ། དེ་ནས་འོན་གྱི་ལྷ་ཁང་ཀེ་རུར་ཆོས་བར་ལ་བྱོན། ཚ་གོ་དབོན་པོ་སོགས་སྡེ་སྣོད་འཛིན་པ་མང་པོ་ཞིག་ལ་ཕར་ཚད་དབུ་མ་སོགས་ཀྱི་ཆོས་མང་དུ་གསུངས། དེ་ནས་སྐྱིད་ཤོད་དུ་ཕེབས་ཏེ་ཚལ་དུ་བཞུགས་ནས་བཀའ་དང་བསྟན་བཅོས་བོད་ཡུལ་དུ་འགྱུར་རོ་འཚལ་ལ་གཟིགས་རྟོག་ཞིབ་པར་མཛད། གསུང་རབ་མཐའ་དག་གི་དོན་ལ་རྣམ་པར་དཔྱོད་པའི་སྒོ་དུ་མ་ཞིག་ཐུགས་ལ་འཁྲུངས། མངོན་པར་རྟོགས་པའི་རྒྱན་འགྲེལ་པ་དང་བཅས་པའི་རྣམ་བཤད་ཆེན་མོའི་རྩོམ་པའང་མཛད། དེའི་ཚེ་འཛིན་བཟང་བར་གྲགས་པ་གླིང་མཚུངས་མེད་དང་། མདོ་སྨད་པ་འཇམ་དཔལ་བཀྲ་ཤིས་དང་། ཤཱཀྱ་གྲུབ་ཅེས་པ་གསུམ་དང་། རྗེ་འདིས་འཛིན་གྱི་ཁྱད་པར་ཆེ་ཆུང་ཉམས་སད་མཛད་པས། རྗེ་འདིས་ནམ་ལངས་པ་ནས་ཚལ་དབུས་གླིང་གི་གཙུག་ལག་ཁང་གི་ཏོག་གི་རྩེ་ལ་ཉི་མ་ཤར་བ་དང་མཉམ་དུ་སྔོན་གཟིགས་མ་མྱོང་བའི་དཔེ་མདའ་ཚད་ཕྲེང་དགུ་མ་ཞིག་གི་ཤོག་ལྡེབས་བཞི་ཤིན་ཏུ་དག་པར་ཐུགས་ལ་ཆུད་འདུག་ཅིང་། གླིང་མཚུངས་མེད་ཀྱིས་ཕྱེད་དང་གསུམ་ཐོ་རེ་བ་ཞིག་དང་། གཞན་གཉིས་ཀྱིས་རེ་རེ་ལས་མ་ཟིན་ནོ། ། སྐབས་ཤིག་ཏུ་ཚ་གོ་དབོན་པོ་མཁན་ཆེན་ངག་དབང་གྲགས་པ་ཕྱག་ཕྱི་ལ་ཁྲིད་ནས་ལྷ་སར་ཇོ་བོ་ཐུགས་རྗེ་ཆེན་པོ་རང་བྱུང་ལྔ་ལྡན་གྱི་དྲུང་དུ་བྱོན་ནས་སྨྱུང་གནས་མང་དུ་མཛད། དེའི་ནུབ་གཅིག་གི་ཚེ་དཔོན་སློབ་གཉིས་ཀས་གསོལ་བ་དྲག་ཏུ་བཏབ་ནས་མནལ་ལམ་གྱི་ལྟས་བརྟགས་པས། ཚ་གོ་བ་ལ་དུང་དཀར་ཆེན་པོ་གཉིས་ནམ་མཁའ་ལས་བབས་ནས་ཁོང་གི་ཐུ་བར་ལྷུང་བྱུང་བ་དེ་མ་ཁད་དེ་གཉིས་འདྲེས་ནས་གཅིག་ཏུ་སོང་འདུག ། དེ་ལག་ཏུ་བླངས་ནས་བུས་པས་སྒྲ་ཆེན་པོ་དཔག་ཏུ་མེད་པ་གྲགས་པ་ཞིག་རྨིས་འདུག་སྟེ། ཕྱིས་ཁོང་གིས་རྒྱལ་མོ་རོང་གི་སྨད་དུ་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་དེ་འཕྲིན་ལས་རྒྱ་ཆེན་པོ་བྱུང་འདུག་པ་དེའི་ལྟས་ཡིན་པར་གསུངས། རྗེ་འདི་པའི་མནལ་ལམ་དུ་སྙེ་ཐང་གི་ཡར་འཕྲང་ཡར་ལ་ཐོན་པའི་བྲག་མདའ་སྒྲོ་ཟེར་བ་དེ་འདྲ་བ་ཞིག་གི་བྲག་རི་གཟར་པོ་ཞིག་ལ་འཛེགས་བྱོན་པས་རྡོ་ལེབ་དཀར་པོ་ཤིན་ཏུ་འཇམ་པ་ཞིག་གི་སྟེང་ན་ཨུཏྤལ་སྔོན་པོ་ཆེས་ཆེར་རྒྱས་ཤིང་ཁ་དོག་གསལ་བ། འདབ་མ་མ་བརྙིངས་པ། ཡུ་བ་དང་བཅས་པ་ཞིག་འདུག་དེ་ཕྱག་ཏུ་བླངས། འདི་རྗེ་བཙུན་སྒྲོལ་མའི་ཕྱག་མཚན་དུ་འདུག་པས་དེས་རྗེས་སུ་འཛིན་པའི་ལྟས་ཡིན་ནམ་དགོངས་པ་ན། ད་ལན་དེ་མ་ཡིན་ཚེའི་ལྟས་ཡིན་གསུང་བ་ཞིག་བྱུང་། ཚལ་ནས་དགུན་ཆོས་ལ་བདེ་བ་ཅན་དུ་བྱོན། སྡེ་སྣོད་མང་དུ་གསུངས། དཔྱིད་དབུས་སྟོད་བྱ་ཡུལ་དུ་ཕེབས། དགེ་བའི་བཤེས་གཉེན་བདུན་ཅུ་ཙམ་ཞིག་ལ་ཕར་ཚད་དབུ་མ་འཇུག་པ་མངོན་པ་ཀུན་ལས་བཏུས་རྣམས་གསུངས། སླར་ཡང་ཚལ་དུ་བྱོན་ནས་ཕར་ཕྱིན་གྱི་རྣམ་བཤད་ཀྱི་འཕྲོ་མཛད་ཅིང་མཇུག་བདེ་བ་ཅན་དུ་རྫོགས་པར་མཛད། དེ་ནས། མདོ་རྒྱུད་ཀྱི་གཞུང་ཆེ་ཆུང་དུ་མ་ལ་མཁས་པར་སྦྱངས་ཤིང་། ཁྱད་པར་དུས་ཀྱི་འཁོར་ལོ་ཆ་ལག་དང་བཅས་པ་ལ་མཁས་པར་གྲགས་པ་ཚལ་པ་བླ་མ་རྟོགས་ལྡན་ཡེ་ཤེས་རྒྱལ་མཚན་པ་ལ་དུས་འཁོར་གསུང་བར་ཞུས། ཁོང་གིས་ཀྱང་ཞལ་གྱིས་བཞེས་ནས་དཔོན་སློབ་གཉིས་ཀས་སྐྱོར་མོ་ལུང་དུ་བཞུགས་ཏེ་དུས་ཀྱི་འཁོར་ལོའི་འགྲེལ་ཆེན་དྲི་མ་མེད་པའི་འོད་ཀྱི་བཤད་པ་ཞིབ་པར་གསན་ཞིང་། རྒྱུ་མཚན་རྩིས་དང་ལག་ལེན་རྣམས་ལའང་མཁས་པར་སྦྱངས། སྐྱོར་མོ་ལུང་དུ་སྡེ་སྣོད་འཛིན་པ་མང་པོ་ལ་གཞུང་ཆེ་ཆུང་མང་པོའི་བཤད་པའང་གསུངས་ནས། སླར་ཡང་དེའི་ཕྱི་ལོ་དབྱར་ཆོས་བདེ་བ་ཅན་དུ་བཞུགས། བློ་གསལ་འདུས་པ་རྒྱ་མཚོའི་ཚོགས་ལ་སྡེ་སྣོད་ཀྱི་བཤད་པ་མང་དུ་གནང་། དེ་ནས་དགུན་སྟོད་ལུང་མཚོ་སྨད་ངང་དཀར་དུ་དུས་འཁོར་ལ་ཐུགས་སྦྱོང་ཤིན་ཏུ་འགྲུས་པར་མཛད། བཤེས་གཉེན་བློ་གསལ་མང་པོ་ལ་སྡེ་སྣོད་ཀྱང་མང་དུ་གསུངས། དེ་ནས་རྫོང་ཆི་གྲགས་པ་རིན་ཆེན་པ་དེ་རྗེ་འདི་པ་ལ་དེ་གོང་ནས་མི་ཕྱེད་པའི་དད་པ་ཡོད་པས་སྔ་ཕྱིར་གསོལ་བ་མང་དུ་བཏབ་པ་ལ་དགོངས་ནས་ཡར་ཀླུངས་ཕྱོགས་ལ་འབྱོན་པར་བཞེད་དེ་སྲིན་པོ་རིར་ཕེབས་པ་ན། དེ་དུས་གོང་དཀར་ན་སྒོམ་པ་ཆོས་རྒྱལ་ཡོད་པ་ཁོང་ཡང་རྗེ་འདི་ལ་སྙིང་ནས་དད་པ་ཡོད་པའི་དབང་གིས་ཞུ་བ་ནན་ཆེར་ཕུལ་ཏེ་སོས་དེ་རིགས་ལྔ་ལྷ་ཁང་དུ་བཞུགས། སྡེ་སྣོད་འཛིན་པ་བདུན་ཅུ་ལྷག་ཙམ་ལ་ཕར་ཚད་མངོན་པ་གོང་འོག་འདུལ་བ་མདོ་རྩ་དབུ་མ་འཇུག་པ་སོགས་གསུངས། གོང་དཀར་ནས་བསྙེན་བཀུར་དང་ཞབས་ཏོག་ཚད་མེད་པ་བྱས། དེ་ནས་ཡར་ཀླུངས་དུ་བྱོན་ནས་སྨོན་མཁར་དུ་བཞུགས་ཏེ་སྡེ་སྣོད་མང་དུ་གསུངས་ཤིང། རྫོང་ཆི་བས་ཡོ་བྱད་མཁོ་དགུ་ཐམས་ཅད་ཀྱིས་གུས་པས་མཆོད། དེ་ལྟར་སྔ་ཕྱིར་སྡེ་སྣོད་དཔག་ཏུ་མེད་པ་ནར་མར་གསུང་བ་དེ་དག་སྐབས་རྣམས་སུའང་། རྒྱུད་སྡེ་གོང་འོག་གི་དཀྱིལ་འཁོར་ཆེན་པོ་རྣམས་སུ། སྐལ་བ་དང་ལྡན་པའི་གདུལ་བྱ་དབང་གིས་སྨིན་པར་མཛད་པ་དང་། གཞན་ཡང་ལྷ་སོ་སོའི་རྗེས་གནང་དང་། ལུང་དང་མན་ངག་ལ་སོགས་པ་གང་ལ་གང་འཚམ་གྱི་ཆོས་ཀྱིས་གདུལ་བྱ་དཔག་ཏུ་མེད་པ་སྨིན་ཅིང་གྲོལ་བར་མཛད་དོ། ། ལྷག་པར་ཡང་དེའི་ཚེ་རྗེ་འདི་ཉིད་ངག་གི་ལྷ་མོ་དབྱངས་ཅན་མས་རྗེས་སུ་བཟུང་བར་གྲགས་ཤིང། དེའི་རྗེས་གནང་ཞུ་བ་གར་བྱོན་དུ་མང་བ་ཞིག་འོང་ཞེས་གྲག་གོ ། དེ་ནས་དགུན་མོན་མཁར་བཀྲ་ཤིས་གདོང་དུ་བཞུགས། དེ་དུས་ནུབ་ཅིག་ཞུགས་མེ་ལ་བཞུགས་ནས་བོད་ཀྱི་མཁས་གྲུབ་རྣམས་ཀྱི་རྣམ་པར་ཐར་པ་ཅི་རིགས་པ་གསུང་བའི་སྐབས་སུ། དཀའ་བཞི་པ་ཤེར་སེང་གིས་ཆོས་ཐོག་གཅིག་ལ་པོ་ཏི་བཅུ་གཅིག་གསུངས་འདུག ། དུས་ཕྱིས་བོད་དུ་པོ་ཏི་དུས་གཅིག་ལ་གསུངས་པ་དེ་མང་ཤོས་སུ་འོང་བ་འདྲ་གསུང་། དེ་ནས་དགེ་བཤེས་ཤ་སྟོན་ལ་སོགས་པས་རྗེ་ཉིད་ནས་ཀྱང་དེ་ཙམ་ཞིག་དུས་གཅིག་ཏུ་གསུང་འཚལ་ཞུས་པས། རྩོལ་བ་བྱས་ན་དེ་ཙམ་ཞིག་འཆད་ཐུབ་པ་འདྲ་གསུང་། འོ་ན་ཅིས་ཀྱང་གསུང་འཚལ་ཞེས་ནན་གྱིས་གསོལ་བ་བཏབ་པས་ཞལ་གྱིས་བཞེས་ཏེ་ཟླ་བ་དེའི་ཚེ་བཅུ་ནས་གནམ་གང་གི་བར་སྐུ་མཚམས་བཅད་ནས་གཟིགས་རྟོག་མཛད། གནམ་གང་གི་ཉིན་ཕྱག་དཔེ་ཐམས་ཅད་ཀྱི་སྐུ་རགས་བཅིངས། ཚེས་གཅིག་ནས་ཆོས་འཛུགས་པར་བཞེད་པ་ལ་གསང་ཕུ་སོགས་ནས་འབྱོན་པའི་དོན་གཉེར་བ་སྡེ་སྣོད་འཛིན་པ་མང་པོ་ཞིག་སྒུག་དགོས་པ་བྱུང་བས་ཉི་མ་གསུམ་ཙམ་གྱི་བར་དུ་མི་ལ་དང་མར་པ་སོགས་ཀྱི་གསུང་རྒྱུན་ཐོར་བུ་འགའ་གསུངས། ཚེས་ལྔ་ནས་ཉི་མ་གཅིག་ལ་རྒྱ་གར་སྐད་བཅོ་ལྔའི་དབུ་དུས་གཅིག་ལ་བཙུགས་ནས་ཉིན་རེ་ཞིང་ཐོ་རངས་ནས་སྲོད་ཀྱི་བར་ལ་ཆོས་ཐུན་བཅོ་ལྔ་རེ་མ་ཆག་པར་ཐུགས་བཤད་མཛད། དེའི་ནང་པོ་ཏི་ཆུང་བ་གཉིས་རྫོགས་པར་གསུངས་ཚར་བ་ན་དེའི་དོད་དུ་སླར་ཡང་ཆུང་བ་གཉིས་བཙུགས་ནས། ཚད་མ་རྣམ་འགྲེལ། ཕར་ཕྱིན། མངོན་པ་གོང་འོག་གཉིས། འདུལ་བ་མདོ་རྩ་བ། བྱམས་ཆོས་ཕྱི་མ་བཞི། དབུ་མ་རིགས་པའི་ཚོགས་ལྔ། འཇུག་པ། བཞི་བརྒྱ་པ། སྤྱོད་འཇུག་སྟེ་བསྟན་བཅོས་བཅུ་བདུན་གྱི་བཤད་པ་དཀའ་ཆེན་འགའ་ཞིག་བོད་ཀྱི་ཊཱིཀྐ་ཆེན་མོ་རེ་གཞིར་བཞག་པའི་ཐོག་ཏུ་འགྲེལ་པའི་འཆད་ཚུལ་དུ་མ་དགག་སྒྲུབ་དང་བཅས་པས་གཏན་ལ་ཕབ་ཅིང་། གཞུང་གཞན་རྣམས་ཕལ་ཆེ་བ་རང་རང་གི་འགྲེལ་པའི་སྟེང་ནས་གཞུང་ཕྲ་རགས་མ་ལུས་པ་ལ་བཤད་པ་ཞིབ་པར་མཛད་དེ་ཟླ་བ་གསུམ་ལ་རྫོགས་པར་མཛད་ཅིང་། དེའི་སྐབས་སུའང་། སྲོད་ཆོས་གྲོལ་ནས་རྡོ་རྗེ་འཇིགས་བྱེད་ཀྱི་བདག་འཇུག་ལ་སོགས་པ་ཐུགས་དམ་རིམ་གཉིས་གྱི་རྣལ་འབྱོར་རྣམས་མ་ཆག་པར་མཛད་དེ། སྐྱེ་བོ་ཀུན་ཡང་འདི་ནི་ལྷག་པའི་ལྷས་དངོས་སུ་བྱིན་གྱིས་བརླབས་པའམ། གཟུངས་ཐོབ་པའི་བྱང་ཆུབ་སེམས་དཔའ་ཆེན་པོ་ཞིག་ཡིན་པར་ངེས་ཀྱི་གཞན་ལ་འདི་ལྟ་བུ་འབྱུང་བ་མི་སྲིད་དོ་ཞེས་མཐུན་པར་གླེང་ངོ་། ། དེའི་དབྱར་ཁ་ཡར་ཀླུངས་ཨོ་ཀར་བྲག་ཏུ་བཞུགས་ནས་སྐུ་མཚམས་དམ་པ་མཛད། བཅོམ་ལྡན་འདས་དཔལ་འཁོར་ལོ་བདེ་མཆོག་གི་སྒོམ་བཟླས་དང་ཐུན་བཞིའི་རྣལ་འབྱོར། བདག་འཇུག་ཤིན་ཏུ་མང་བར་མཛད་ཅིང་ནེ་གུ་ཆོས་དྲུག་གི་དམིགས་སྐོར་རྣམས་ཐུགས་ཉམས་སུ་བསྟར་ནས་ལེགས་པར་སྦྱངས་ཏེ་ཞག་རེ་ལ་གཏུམ་མོའི་རླུང་སྦྱོར་ཡང་བརྒྱད་བརྒྱ་རེ་ཙམ་མཛད་དོ་ཞེས་གསུང་ཞིང་གཏུམ་མོ་ལ་སོགས་པའི་ཐུགས་དམ་གྱི་ཉམས་བཟང་པོ་མང་དུ་འཁྲུངས་སོ། ། དེ་ནས་སྟོན་སྐྱིད་ཤོད་དུ་ཕེབས། རྗེ་བཙུན་རེད་མདའ་པའི་ཞལ་སྔ་ནས་ཀྱང་དབུས་སུ་ཆོས་བར་ལ་ཕེབས་པས་དཔོན་སློབ་གཉིས་ཀས་པོ་ཏ་ལར་བཞུགས་ནས་དམ་པའི་ཆོས་ཀྱི་བཀའ་བགྲོ་བ་མང་དུ་མཛད་ཅིང་གདུལ་བྱ་རྣམས་ལའང་ལེགས་པར་བཤད་པའི་སྐྱེས་སྩལ་ནས་རྗེ་བཙུན་པ་སླར་ཡང་གཙང་ལ་བྱོན། རྗེ་བླ་མ་འདི་ཉིད་ཀྱིས་དེའི་དགུན་སྐྱོར་མོ་ལུང་གི་བྲག་ཏུ་བཞུགས་ནས་སྡེ་སྣོད་འཛིན་པ་ཆེན་པོ་དུ་མ་ལ་དུས་འཁོར་དང་ཕར་ཚད་མངོན་པ་སོགས་མང་དུ་གསུང་སོ། ། དེ་ནས་དེའི་དཔྱིད་རྟའི་ལོ་ལ་རྒྱུད་སྡེ་ཆེན་པོ་རྣམས་ཀྱི་བཤད་པ་དང་། དབང་ལག་ལེན་མན་ངག་དང་བཅས་པ་མཐའ་དག་རྫོགས་པ་ཞིག་རྩད་གཅོད་མཛད་པར་བཞེད་པ་དང་། བླ་མ་རྗེ་བཙུན་རེད་མདའ་པ་དང་དཔོན་སློབ་གསུང་གླེང་མཛད་པའི་དགོས་པ་འགའ་ཞིག་གི་ཕྱིར་དུ་གཙང་ལ་བྱོན། རོང་གི་སྣུབས་ཆོས་ལུང་དུ་བཞུགས། ཚོགས་པའི་མཁན་པོ་རིན་ཆེན་གྲགས་པ་བཤེས་གཉེན་པ་ལ་བཀའ་ལུང་ཅི་རིགས་པ་གསན། དེ་དུས་རྗེ་འདི་པའི་ཞབས་འབྲིང་ལ་ཡོད་པའི་སྔོ་ཕྱི་དབོན་པོ་བསོད་ནམས་གྲགས་དང་། མདོ་སྨད་པ་དགེ་བཤེས་ཤེས་རབ་གྲགས་ཞེས་པ་གཉིས་ཀྱིས་བླ་མ་དབུ་མ་པ་བརྩོན་འགྲུས་སེང་གེ་བདེ་མཆོག་སྟེང་ཞེས་པའི་དབེན་གནས་ཞིག་ན་བཞུགས་པའི་དྲུང་དུ་མཇལ་བ་ལ་ཕྱིན་ཆོས་འབྲེལ་ཞུས་གསུང་གླེང་བྱུང་བས། དབུ་མ་པའི་ཞལ་ནས། ངེད་ཁྱེད་གྱི་སློབ་དཔོན་པ་དེ་ལ་དབྱངས་ཅན་མའི་རྗེས་གནང་ཞིག་ཞུ་དགོས་གསུང་། དེ་ནས་བླ་མ་དབུ་མ་པ་དང་རྗེ་འདི་པ་ཞལ་འཛོམ་མཛད་དེ། བླ་མ་དབུ་མ་པས་རྗེ་འདི་ལ་དབྱངས་ཅན་མའི་རྗེས་གནང་ཞུས། དེའི་ཚེ་གསུང་གླེང་ཞིབ་ཏུ་མཛད་པས་བླ་མ་དབུ་མ་པ་ཁོང་རང་ལ་མདོ་ཁམས་ན་ཕྱུགས་མ་སྐྱོང་བའི་དུས་ཉིད་ནས་རྗེ་བཙུན་འཇམ་པའི་དབྱངས་ཀྱི་སྐུ་དང་གསུང་གི་སྣང་བ་ནར་མར་འོང་ཚུལ་དང་། དེ་ལ་སྔ་ཕྱིར་བརྟག་པ་བྱས་ཚུལ་ལ་སོགས་པ་ཞིབ་པར་ཞུས་ནས། ད་དུང་ངེད་འདི་ལ་གཏིང་ནས་ངེས་པ་རྙེད་པ་མེད་པས་བརྟག་དཔྱད་ཡང་དག་ཅིག་ཐུགས་ལ་འདོགས་པར་ཞུ་ད་ལན་ཡང་རྗེ་བཙུན་གྱི་སྐུའི་སྣང་བ་དེའི་གསུང་ནས། རྗེ་ཉིད་ལ་དབྱངས་ཅན་མའི་རྗེས་གནང་ཞུ་བ་ལ་རྒྱུག་གསུང་ནས་འོངས་པ་ཡིན། ཞེས་གསུང་པ་ལ་རྗེ་འདི་པས་དབུ་མའི་ལྟ་བ་སོགས་ཆོས་ཀྱི་གནད་ཟབ་མོ་རྣམས་ཀྱི་དྲི་གཏུགས་མཛད་པ་སོགས་ཀྱི་སྒོ་ནས་ལེགས་པར་བརྟགས་པས་རྟག་ཐུབ་པ་འདུག་པས་ཐུགས་ཡིད་གཉིས་ཟ་དགོས་པར་མི་གདའ། གསོལ་བ་དྲག་ཏུ་ཐོབ་མཛོད། འོན་ཀྱང་རྗེ་བཙུན་གྱི་སྐུ་དང་གསུང་རང་མཚན་པ་ད་ལྟ་དབང་ཤེས་ལ་སྣང་བ་མིན། ཡི་དམ་གྱི་སྐུ་དངོས་ཀྱིས་གཏད་པའི་རྣམ་པ་ཡིད་ཤེས་ལ་དངོས་སུ་སྣང་བ་ཞིག་ཡིན། ངེད་ཀྱང་འཇམ་པའི་དབྱངས་ཀྱི་སྒྲུབ་སྐོར་མན་ངག་སོགས་འདི་ཕྱོགས་ལ་ཤེས་འདོད་ཆེ་བར་ཡོད་པས་ཞུ་དགོས་ནའང་ད་ལན་རྗེ་བཙུན་རེད་མདའ་པའི་དྲུང་ནས་སྟག་ཚང་དུ་འབྱོན་པ་དང་དཔོན་སློབ་དུས་ངེས་མཛད་པའི་མཇལ་ཕྲད་དགོས་པར་ཡོད་པ་སོགས་ཀྱིས་བྲེལ་ནས་མི་འགྲུབ་འདུག ། རྗེས་སུ་རྟེན་འབྲེལ་ཅིག་ཅིས་ཀྱང་སྒྲིག་འཚལ་ཞེས་གསུངས་ནས་སྟག་ཚང་རྫོང་ཁར་བྱོན། མཁན་ཆེན་ལོ་ཙཱ་བ་གྲགས་པ་རྒྱལ་མཚན་པ་དང་། རྗེ་བཙུན་དམ་པ་རེད་མདའ་པ་དང་། བླ་མ་ལོ་ཙཱ་བ་དོན་བཟང་བ་དང་། རྗེའི་ཞལ་སྔ་ནས་དང་། དེ་དག་གི་ཞབས་འབྲིང་དུ་ལྷགས་པའི་བཤེས་གཉེན་སྡེ་སྣོད་འཛིན་པ་ཕུན་སུམ་ཚོགས་པ་དུ་མ་དང་། གཉུག་མར་གནས་པའི་དགེ་འདུན་གྱི་ཚོགས་དང་བཅས་པའི་ཡུལ་མཆོག་ཏུ་གྱུར་པ་གདན་མངོན་པར་འཛོམ་པ་ཐམས་ཅད་ཀྱི་ཉེ་བར་མཁོ་བའི་འཚོགས་ཆས། ཞལ་ཟས་དང་གནས་མལ་ལ་སོགས་པ་ཕུན་སུམ་ཚོགས་པའི་མཐིལ་ལེན་གྱི་ཐུགས་ཁུར་རྒྱ་ཆེན་པོ་དག་རྒྱལ་སྲས་འདུལ་བ་འཛིན་པ་ཆེན་པོ་གཞུང་ལུགས་རབ་འབྱམས་ལ་མཁྱེན་པ་རྒྱས་ཤིང་། གཅིག་ཏུ་བསྟན་པ་རིན་པོ་ཆེའི་ཁུར་འཁྱེར་བ་ལ་མི་མཉམ་པའི་བརྟུལ་ཞུགས་ཅན་ཆོས་རྗེ་ལོ་ཙཱ་བ་སྐྱབས་མཆོག་དཔལ་བཟང་པོས་བཞེས་སོ། ། དེའི་ཚེ་རིན་པོ་ཆེ་གྲགས་པ་རྒྱལ་མཚན་པས་ཕར་ཕྱིན་དང་། ཆོས་རྗེ་སྐྱབས་མཆོག་པས་བརྟག་གཉིས་གསུངས་ཤིང་། རྗེ་བཙུན་དམ་པ་རེད་མདའ་པའི་ཞལ་སྔ་ནས། ཁོང་རང་གིས་མཛད་པའི་རྣམ་འགྲེལ་རྒྱན་གྱི་འགྲེལ་བཤད་ཆེན་མོ་དེ་གསུང་བ་རྗེ་འདིས་གསན་ཞིང་། དཔོན་སློབ་གཉིས་ཀྱིས་དཀའ་པའི་གནས་གཏན་ལ་འབེབས་པའི་རིགས་པའི་བརྒལ་བརྟག་ཀྱང་མང་དུ་མཛད། དེ་ནས་དཔོན་སློབ་གཉིས་ཀྱིས་འབའ་འུ་འབའ་གཉེར་དུ་ཆོས་བར་བཏེག་ནས་བྱོན། རྗེ་རིན་པོ་ཆེ་འདིས་བླ་མ་རྗེ་བཙུན་རེད་མདའ་པའི་ཞལ་སྔ་ནས་ལ་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྩ་རྒྱུད་ཀྱི་བཤད་པ་ཚར་གཅིག་གསན། དེའི་ཚེ་གོང་གསུམ་བདེ་ཆེན་པའི་བླ་མ་རིན་པོ་ཆེ་ཆོས་ཀྱི་དཔལ་བའི་དྲུང་དུ་དུས་འཁོར་ཞིག་གསན་དགོས་དགོངས་པ་བྱུང་བའི་ནུབ་གཅིག་མནལ་ལམ་དུ། ཆོས་ཀྱི་དཔལ་གྱིས་བུ་སྟོན་རིན་པོ་ཆེ་ལ་དུས་འཁོར་འགྲེལ་ཆེན་ཚར་བཅུ་བདུན་ཉན་པ་ཡིན་ནོ་ཟེར་བ་ཞིག་བྱུང་། ཕྱིས་ཁོང་དང་མཇལ་དུས་རིན་པོ་ཆེས་བུ་སྟོན་གྱི་དྲུང་དུ་དུས་འཁོར་ཚར་དུ་གསན་པ་ལགས་ཞུས་པས། བཅུ་བདུན་ཉན་ཞེས་གསུང་ངོ་། ། དེ་དུས་རྗེ་བཙུན་རེད་མདའ་པའི་ཞལ་ནས། སྔགས་ཀྱི་རྩད་གཅོད་དེ་ཙམ་མཛད་པ་ལ་ཡུན་རིང་འགྱང་། ད་ལྟ་སྡེ་སྣོད་ཀྱི་བཤད་པས་ཕན་ཐོགས་རྒྱ་ཆེན་པོ་འོང་གིན་འདུག་པས་རེ་ཞིག་བཤད་པ་མཛད་པ་མི་འཐད་དམ་ཞེས་གསུང་བ་ལ། བདག་སྔགས་ཀྱི་ཕྱོགས་ལ་འདུན་པ་དྲག་པོ་བདོགས་པས་སྔོན་ལ་སྔགས་ཕྱོགས་ཀྱི་རྩད་གཅོད་བགྱིད་པ་ལགས་ཞེས་གསུངས། དེ་ཡང་རྗེ་རིན་པོ་ཆེ་འདིའི་ཞལ་ནས་ངེད་སྔགས་ཀྱི་ཕྱོགས་ལ་གཞན་གྱིས་བསྐུལ་དགོས་པ་མེད། ཆུང་ངུ་ནས་འདི་ལ་ཤེས་འདོད་དྲག་པོ་ཡོད་ཅིང་། དེ་ཡང་རྒྱུད་སྡེ་མཐའ་དག་ཡོངས་སུ་རྫོགས་པར་བསླབ་དགོས་སྙམ་པ་ཞིག་དང་པོ་ནས་ཡོད་ཅེས་གསུང་ངོ་། ། དེ་ནས་བླ་མ་རྗེ་བཙུན་པས་ས་སྐྱ་ལ་ཕྱགས་བཏེག ། རྗེ་འདི་པས་རོང་ཆོས་ལུང་དུ་བྱོན། བླ་མ་དབུ་མ་པ་དང་ཆོས་ཀྱི་གསུང་གླེང་མང་དུ་མཛད། རྗེ་བཙུན་འཇམ་པའི་དབྱངས་ཀྱི་ཆོས་སྐོར་ཡང་མང་དུ་གསན། བླ་མ་དབུ་མ་པས་ཀྱང་རྗེ་རིན་པོ་ཆེ་འདི་ཉིད་ལ་དབུ་མ་ལ་འཇུག་པའི་རང་འགྲེལ་སོགས་ཆོས་བཀའ་ཅི་རིགས་གསན་པར་མཛད་དོ། ། རྗེ་རིན་པོ་ཆེ་འདི་པས་སྟོན་གྱི་རིང་རོང་གི་རི་ལུང་ཕུག་ཏུ་ཐུགས་དམ་ལ་བཞུགས། སྟོན་གཞུག་མྱང་སྟོད་སྨད་ཀྱི་མཚམས་གོང་གསུམ་བདེ་ཆེན་དུ་ཕེབས་ནས། ཐམས་ཅད་མཁྱེན་པ་བུ་སྟོན་རིན་པོ་ཆེའི་བུ་ཆེན་རྣམས་ཀྱི་ནང་ནས་དུས་ཀྱི་འཁོར་ལོ་ལ་མཁས་པའི་མཆོག་ཏུ་གྱུར་པ། གཞན་ཡང་སྔགས་ཀྱི་གཞུང་དང་ལག་ལེན་མན་ངག་སོགས་མཐའ་ཡས་པ་ལ་མངའ་འབྱོར་པའི་རིན་པོ་ཆེ་ཆོས་ཀྱི་དཔལ་པའི་དྲུང་དུ་མཇལ། ཐོག་མར་མཇལ་བའི་དགོངས་མོ་དེ་ཕྱག་ཕྱིས་དར་སེར་པོ་ཞིག་ཕུལ། སང་ཉིན་ཇ་ཞལ་ཞིག་མཛད་དེ་གོས་ནེ་ཙོ་ཁ་ཡུག་གཅིག་ཕུལ་ནས་དུས་ཀྱི་འཁོར་ལོའི་འགྲེལ་ཆེན་ཆ་ལག་དང་བཅས་པ་གསུང་བར་ཞུས། དེ་དུས་ཀྱང་འགྲེལ་ཆེན་གསུང་བའི་ལེའུ་དང་པོ་རྫོགས་པའི་མཚམས་ལ་འདུག་པས། ཁོང་གི་ཞལ་ནས། མདང་གི་དར་སེར་པོ་དེ་སའི་ཁམས་སྡུད་རིམ་དང་མཐུན་པས་རྫོགས་རིམ་ཡོངས་སུ་རྫོགས་པར་འོང་བ་འདུག་ད་ནངས་ཀྱི་གོས་ཡུག་འདི་ལྗང་ཁུ་ནམ་མཁའི་ཁམས་ཡིན་བསྐྱེད་རིམ་དང་མཐུན་པས་བསྐྱེད་རིམ་ཡོངས་སུ་རྫོགས་པར་འོང་བར་འདུག ། ཆོས་མཚམས་ལེའུ་གཉིས་པའི་འགོ ། གང་ཞིག་ཆེན་པོའི་མི་རྣམས་སྨིན་པར་བྱ་བའི་དོན་དུ། ཞེས་སྐབས་ལ་སླེབ་བྱུང་བས་རྟེན་འབྲེལ་ཤིན་ཏུ་ལེགས། ཆོས་ཐམས་ཅད་ཡོངས་སུ་རྫོགས་པར་བྱེད་དགོས། ཞེས་པའི་དགྱེས་བཞིན་དུ་ཞལ་གྱིས་བཞེས། ལེའུ་དེ་ནས་དབུ་བཙུགས་ཏེ་གསུངས་ཤིང། སླར་ཡང་ལེའུ་དང་པོའི་འགོ་ནས་སྐྱར་ཏེ་གསུངས། སྟོན་གཞུག་དེ་ནས་དཔྱིད་སྔ་མ་མ་རྫོགས་པར་གསན་ནོ། ། དེ་ནས་ཡོ་གའི་བཀའ་ལུང་བཤད་པ་མཐའ་དག་གསན་པར་བཞེད་པ་ལ་སྔོན་དུ་ཕྱག་ལེན་ཞིག་སྦྱང་བར་བཞེད་ནས། ཞ་ལུ་ན་དེ་དུས་བུ་སྟོན་རིན་པོ་ཆེ་པའི་མཆོད་གཡོག་པ་གཙོ་བོ་ཞིག་ཡིན་པ་ཡོ་གའི་ལག་ལེན་ལ་ཤིན་ཏུ་མཁས་པར་གྲགས་པའི་ཡོ་ག་བ་ཚེ་དབང་ཞེས་པའི་སློབ་མ་དྲག་པ་ཡོ་ག་བ་མགོན་བཟང་ཞེས་བྱ་བ་གདན་དྲངས་ནས། ཁོང་དང་རྗེ་རིན་པོ་ཆེ་གཉིས་ཀྱིས་མྱང་སྟོད་སྨད་ཀྱི་མཚམས་འཁྲིས་རྩ་ཁང་ཞེས་པར་བཞུགས་ནས་རྡོ་རྗེ་དབྱིངས་དང་དཔལ་མཆོག་རྩེ་མོ་ལ་སོགས་པ་ཡོ་གའི་དཀྱིལ་འཁོར་ཆེན་པོ་མཐའ་དག་གི་བྲིས་ཐིག་གར་དབྱངས། དཀྱིལ་ཆོག་གི་ཆོག་ཁྲིད། ཕྱག་རྒྱ་འཆིང་བ་སོགས་ལ་ཤིན་ཏུ་བྱང་བར་སྦྱངས། དེའི་ཚེ་ནུབ་གཅིག་མནལ་ལམ་དུ། ཁྲི་ཆེན་པོ་ཞིག་གི་སྟེང་ན་བླ་མ་ཁྱུང་པོ་ལྷས་པ་ཡིན་ཟེར་བའི་བླ་མ་བགྲེས་པོ་དབུ་རྒྱན་གསོལ། རྡོ་རྗེ་དྲིལ་བུ་ཕྱག་ན་བཟུང་བ་ཞིག་བཞུགས། དེའི་སྐུ་མདུན་ན་རྗེ་རིན་པོ་ཆེ་ཉིད་ཀྱང་བཞུགས་འདུག་པ་ལ། བླ་མ་དེ་བཞེངས་ནས་རྡོ་རྗེའི་འགྲོས་ཀྱིས་དྲིལ་སྟབས་དང་བཅས་རྗེ་འདི་ཉིད་ལ་གཡས་སུ་བསྐོར་བ་ལན་གསུམ་མཛད་ཅིང་། ཕྲེང་བ་ནས་བྱུང་བའི་ཨེ་ཀཱ་པ་ཙི་ཀཱ་ཡ་ཞེས་སོགས་ཀྱི་སྒྲ་བསྒྲགས་ནས་རྗེའི་དབུའི་སྟེང་དུ་རྡོ་རྗེ་དྲིལ་བུ་བཟུང་སྟེ་ཀརྨ་བཛྲ་ཞེས་བྱ་བའོ། ། ཞེས་གསུངས་ནས་ཁྲི་ལ་བཞུགས་སོང་བ་ཞིག་བྱུང་། མནལ་སད་ནས་བརྟགས་པ་ན་སྔར་གྱི་གསང་མཚན་དོན་ཡོད་རྡོ་རྗེ་ཡིན་པ་དང་། ཀརྨ་བཛྲ་ཡང་དོན་གྲུབ་ཀྱི་རིགས་ཀྱི་མིང་དུ་འདུག་པས་འདྲ་བ་འདུག་དགོངས་པ་ཞིག་བྱུང་གསུང་ངོ་། ། སླར་ཡང་དཔྱིད་སྨད་དེ་ནས་དབྱར་དང་སྟོན་འགོ་མའི་རིང་ལ་གོང་གསུམ་བདེ་ཆེན་དུ་བྱོན་ནས། རིན་ཆེན་ཆོས་ཀྱི་དཔལ་བ་ལ་རྡོ་རྗེ་ཕྲེང་བའི་དབང་ལུང་མཛུབ་ཁྲིད་བཤད་པ་གར་ཐིག་དབྱངས་གསུམ་གྱི་ཕྱག་ལེན་ཁྲིད་དང་བཅས་པའི་སྒོ་ནས་ཕྲེང་བ་སྐོར་གསུམ་ལ་མཁས་པར་སྦྱངས། གཞན་ཡང་བཅོམ་ལྡན་འདས་ཕྱག་ན་རྡོ་རྗེ་འཁོར་ལོ་ཆེན་པོ་ལ་སོགས་པའི་དབང་ལུང་མན་ངག་དང་བཅས་པ་ལ་སོགས་པ་ཟབ་ཅིང་རྒྱ་ཆེ་བའི་ཆོས་མང་དུ་གསན། དེ་ནས་ཞ་ལུར་རིན་པོ་ཆེ་ཁྱུང་པོ་ལྷས་པ་ལ་ཡོ་གའི་སྐོར་གསན་པ་ལ་འབྱོན་པར་དགོངས་ཡོད་པ་ལ། ནུབ་གཅིག་མནལ་ལམ་དུ་ཁྲི་ཆེན་པོ་ཞིག་གི་སྟེང་ན་རིན་པོ་ཆེ་ཁྱུང་པོ་བ་ཡིན་ཟེར་བའི་བླ་མ་བགྲེས་པོ་ཞིག་བཟང་པོའི་འདུག་སྟངས་མཛད་ནས་བཞུགས། དེའི་དྲུང་ན་རྗེ་འདི་པའང་བཞུགས་ཡོད་པ་ལ། བླ་མ་དེས་ཕྱག་གཉིས་ཀྱིས་ཐུགས་ཀའི་ན་བཟའ་བསལ་ནས་ཐུགས་ཀ་སྟོན་གྱིན་འདུག་པ་ལ་གཟིགས་པས། བླ་མ་དེའི་ཐུགས་ཀ་ནས་སྔགས་ཀྱི་ཕྲེང་བ་རིང་པོ་རིམ་པ་དུ་མས་བསྐོར་བའི་འཁོར་ལོ་ཡིག་འབྲུ་རྣམས་ཧྲམ་མེ་འདུག་པ་གཟིགས་པས་སྔགས་རྣམས་ཕལ་ཆེ་བ་བཀླགས་པ་ཞིག་རྨིས། ཕྱིས་མཇལ་བ་ན་སྐུའི་རྣམ་པ་མནལ་ལམ་དུ་བྱུང་བ་དེ་ཉིད་རང་དུ་འདུག་གསུང་ངོ་། ། དེ་ནས་སྟོན་ཕྱི་མ་དགུན་དཔྱིད་དབྱར་རྣམས་སྦྲེལ་ནས་ཞ་ལུར་བཞུགས། སྔགས་འཆང་རྡོ་རྗེ་འཛིན་པ་ཆེན་པོ་རིན་པོ་ཆེ་ཁྱུང་པོ་ལྷས་པའི་དྲུང་དུ་ཡོ་གའི་དཀྱིལ་འཁོར་ཆེན་པོ་རྣམས་ཀྱིས་ཐོག་དྲངས་རྒྱུད་སྡེ་འོག་མ་རྣམས་ཀྱི་བཀའ་ད་ལྟ་བོད་ན་རྣམ་པར་དག་པའི་དབང་གི་ཆུ་བོ་རྒྱུན་མ་ཆད་པར་ཡོད་པ་ཕལ་ཆེ་བ་ཡོངས་སུ་རྫོགས་པར་གསན་ཞིང་། བཅོམ་ལྡན་འདས་འཁོར་ལོ་བདེ་མཆོག་ལཱུ་ཨི་པ་དང་ནག་པོ་པའི་ལུགས་ལ་སོགས་པས་ཐོག་དྲངས་པའི་བླ་མེད་ཀྱི་བཀའ་ལུང་ཡང་དཔག་ཏུ་མེད་པ་གསན། ཁོང་ལ་མངའ་བའི་བཀའ་ལུང་ཕལ་ཆེར་བུམ་པ་གང་བྱོའི་ཚུལ་དུ་ཐུགས་རྒྱུད་ལ་གཏམས་པར་མཛད། དེའི་ཚེ་འབུལ་བ་ཚོགས་འཁོར་ཞབས་ཏོག་ནར་མ་སོགས་ཀྱིས་མཉེས་པར་མཛད་དོ། ། དེ་དུས་རྗེ་བཙུན་ཁྱུང་ལྷས་པའི་ཞལ་སྔ་ནས་ཀྱིས་དབང་རེ་རེ་གནང་ཚར་བའི་མཇུག་ཏུ་འདི་ང་ལ་ཡང་བླ་མ་འདི་ཞེས་བྱ་བས་དགྱེས་བཞིན་དུ་གནང་བ་ཡིན་བྱ་བ་རེ་ཅིས་ཀྱང་གསུང་ཞིང་། བཀའ་ལུང་རྣམས་རྫོགས་པ་ན། ད་ནི་ཆོས་བདག་པོ་ལ་འཕྲོད་པས་འགྱོད་པ་མེད་དོ་ཞེས་གསུང་ཞིང་། དང་པོ་བུ་སྟོན་ཐམས་ཅད་མཁྱེན་པ་དང་། བླ་མ་ཁྱུང་ལྷས་པ་གཉིས་ཀས་ཀུན་མཁྱེན་འཕགས་འོད་པའི་དྲུང་དུ་དཔལ་གསང་བ་འདུས་པ་དང་ཡོ་ག་ལ་སོགས་པའི་དཀྱིལ་འཁོར་ཆེན་པོ་རྣམས་ཀྱི་དབང་གསན་དུས་ཚོགས་འཁོར་ཞིག་གི་གྲལ་དུ། ཀུན་མཁྱེན་པའི་ཞལ་ནས། རྗེ་མར་པས་ཉི་མ་ཤར་དུ་ཀ་ཆེན་བཙུགས་པ་དེ། ཞེས་སོགས་ཀྱི་མགུར་དེ་འདོན་པ་སྤོས་ནས། ཉི་མ་ཤར་དུ་ཀ་ཆེན་བཙུགས་པ་དེ། ཁྱུང་པོ་སྟོན་སྒོམ་ཁྱོད་ལ་མི་ཟེར་རམ། ། ཞེས་གསུངས་པའི་ལོ་རྒྱུས་ཀྱང་གསུངས། དེ་ནི་རྗེ་བཙུན་ཁྱུང་ལྷས་པས་ཀུན་མཁྱེན་འཕགས་པ་དང་། བུ་སྟོན་ཐམས་ཅད་མཁྱེན་པ་གཉིས་ལས་སྔགས་ཀྱི་གདམ་པ་རྒྱ་མཚོ་ལྟ་བུ་བཞེས་པའི་བྱིན་རླབས་ཀྱི་བཅུད་མ་ཉམས་པར་རྗེ་རིན་པོ་ཆེ་འདི་པའི་ཕྱག་ཏུ་རྡོ་རྗེ་ཐེག་པའི་བསྟན་པ་ཡོངས་སུ་རྫོགས་པར་འཕྲོད་ནས་ཕྱོགས་འདིར་སྐྱེ་དགུ་ཐམས་ཅད་ཀྱི་ཕན་བདེའི་རྩ་ལག་ཏུ་གྱུར་པ་འདིའི་དོན་ལ་དགོངས་པར་གསལ་ལོ། ། རྗེ་རིན་པོ་ཉིད་ཀྱི་ཞལ་ནས། སྔགས་ཀྱི་དངོས་གྲུབ་ཐམས་ཅད་ཀྱི་རྩ་བ་གཙོ་བོར་བླ་མ་མཉེས་པར་བྱས་པ་འབའ་ཞིག་ལ་རག་ལས་འདུག་པས་དབང་གནང་བའི་དུས་ཐམས་ཅད་དུ་བླ་མས་མཉེས་བཞིན་དུ་གནང་བ་ཡིན་ནོ། ། ཞེས་གསུངས་པ་དེ་ལ་དཔྱད་རྒྱུ་ཆེན་པོ་ཞིག་འདུག་གོ་ཞེས་གསུང་ངོ་། ། དེ་ནས་རྗེ་བཙུན་དམ་པ་ཁྱུང་པོ་ལྷས་པ་ལས་གསན་དགོས་རྣམས་ཀྱི་ཐུགས་ཐག་ལེགས་པར་ཆོད་ནས། པ་སྣམ་གྱི་ཕག་པ་རི་ན་བླ་མ་བདེ་ཆེན་པ་ཆོས་ཀྱི་དཔལ་བ་གདན་དྲངས་ནས་བཞུགས་འདུག་པའི་སྤྱན་སྔར་བྱོན། སླར་ཡང་རྡོ་རྗེ་སྙིང་འགྲེལ། ཕྱག་རྡོར་བསྟོད་འགྲེལ། ནཱ་རོ་འགྲེལ་ཆེན་ལ་སོགས་པ་དུས་འཁོར་གྱི་ཆ་ལག་མང་པོ་ཞིག་གསན་ཞིང་དཔལ་གསང་བ་འདུས་པ་ལུགས་གཉིས་ལ་བུ་སྟོན་རིན་པོ་ཆེས་ཡིག་ཆ་མཛད་པ་ཅི་ཡོད་ཀྱི་བཤད་ལུང་ལ་སོགས་པ་ཆོས་བཀའ་མང་དུ་གསན། དེ་ནས་ཁོང་པ་གོང་གསུམ་བདེ་ཆེན་དུ་ཐེགས། རྗེ་རིན་པོ་ཆེས་ཕག་པ་རིར་ཞ་ལུ་བའི་ཡོ་ག་བ་མཁས་པ་སྡེ་སྣོད་འཛིན་པ་ཆེན་པོ་རྒྱལ་མཚན་གྲགས་པ་སྤྱན་དྲངས་ནས་ཡོ་གའི་གར་དབྱངས་སོགས་ཕྱག་ལེན་རྣམས་ཀྱི་དག་ཐེར་ཡང་དག་མཛད། ཆོས་བཀའ་ཡང་ཅི་རིགས་པ་གསན། ཁྱད་པར་བུ་སྟོན་གྱིས་མཛད་པའི་རྡོ་རྗེ་འབྱུང་བའི་རྣམ་བཤད་ཆེན་མོ་གསན་ཞིང་། ཡོ་གའི་རྩ་རྒྱུད་དེ་ཉིད་བསྡུས་པ། བཤད་རྒྱུད་རྡོ་རྗེ་རྩེ་མོ། དཔལ་མཆོག ། ངན་སོང་སྦྱོང་བའི་རྒྱུད་ལ་སོགས་པ་དང་། དེ་ཉིད་སྣང་བ། ཀོ་ས་ལའི་རྒྱན། དཔལ་མཆོག་འགྲེལ་ཆེན་ལ་སོགས་པ་རྒྱུད་དང་འགྲེལ་པ་རྒྱ་གཞུང་གི་རིགས་དཔག་ཏུ་མེད་པའི་ལུང་ཡང་གསན་ནོ། ། དེ་ནས་སྤྲེལ་ལོའི་སྟོན་བླ་མ་དབུ་མ་པ་དང་ལྷན་ཅིག་ཏུ་དཔོན་སློབ་གཉིས་ཀས་དབུས་ཀྱི་དགའ་བ་གདོང་དུ་ཕྱགས་ཕེབས། ལྷ་སར་ཇོ་བོ་རིན་པོ་ཆེའི་དྲུང་དུ་གསོལ་བ་འདེབས་པ་ལ་བྱོན་ནས། དཔོན་སློབ་གཉིས་ཀས་དགའ་བ་གདོང་དུ་སྐུ་མཚམས་ལེགས་པར་བཅད་ནས་བཞུགས། དེ་ཡང་སྐྱེ་རབས་མང་པོ་ནས་རྗེ་བཙུན་འཇམ་པའི་དབྱངས་གྱིས་རྗེས་སུ་བཟུང་སྟེ་ས་ལམ་མཐོན་པོར་བྱོན་ཞིང་སྐུ་ཚེ་འདིར་ཡང་འཁྲུངས་ཙམ་ཉིད་ནས་རྗེ་བཙུན་འཇམ་པའི་དབྱངས་ཀྱིས་རྗེས་སུ་བཟུང་སྟེ་གསུང་གི་གནང་བ་རྒྱུན་དུ་སྩལ་བ་སོགས་ཡོན་ཏན་གྱི་ཚོགས་ཀྱིས་མངོན་པར་མཐོ་བའི་བླ་མ་དབུ་མ་པ་དང་ཐབས་ཅིག་ཏུ་དགའ་བ་གདོང་དུ་བཞུགས་རིང་ལའང་ཁོང་ལ་རྗེ་བཙུན་འཇམ་པའི་དབྱངས་ཀྱི་ཆོས་སྐོར་མང་དུ་གསན་ཞིང་། བླ་མ་དང་ཡི་དམ་ཐ་མི་དད་དུ་བྱས་པ་ལ་གསོལ་བ་དྲག་ཏུ་འདེབས་པ་དང་། ཡི་དམ་གྱི་བསྙེན་སྒྲུབ་ལ་ཤིནཏུ་འགྲུས་པར་མཛད། ཁྱད་པར་རྗེ་རིན་པོ་ཆེ་འདི་ནི་བསྐལ་པ་བགྲང་བ་ལས་འདས་པའི་སྔོན་རོལ་ནས་ལམ་ལ་ལེགས་པར་སྦྱངས་པའི་རིགས་ཀྱི་ནུས་པ་ཡོངས་སུ་སྨིན་པའི་དབང་གིས་གསུང་རབ་དགོངས་འགྲེལ་དང་བཅས་པ་ལ་ཐོས་བསམ་སྒོམ་པ་ཇི་སྙེད་ཅིག་མཛད་པ་ཐམས་ཅད་ལའང་ཚེ་འདིའི་རྙེད་བཀུར་དང་། སྙན་གྲགས་དང་། འཁོར་དང་། འདུ་འགོད་ཕུན་སུམ་ཚོགས་པ་དང་། བདག་ཉིད་གཞན་ལས་ཁྱད་པར་འཕགས་པ་ཉིད་དུ་མཐོང་བར་གྱུར་ན་ཅི་མ་རུང་སྙམ་པ་སོགས་ཀྱི་ཀུན་སློང་གི་དྲི་ཙམ་ཡང་མ་འདྲེས་པར་སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པའི་ཆེད་དུ་དམིགས་པ་འབའ་ཞིག་གིས་ཐུགས་རང་དབང་མེད་པར་ཕྲོགས་པས། ཚིག་འགྲིག་འགྲིག་མོ་དང་། དོན་མཁས་པ་གཞན་གྱིས་བཤད་པ་ལས་ཁྱད་དུ་ཐོན་ཐོན་མོ་དང་། མང་པོ་ཚོགས་པའི་དབུས་སུ་རང་གི་ལུགས་རྣམ་པར་བཞག་པ་ལ་གཞན་གྱིས་བརྒལ་བར་མི་ནུས་ཤིང་། གཞན་གྱི་འདོད་པ་ཐབས་སྣ་ཚོགས་ཀྱི་སྒོ་ནས་དགག་ནུས་པ་ཙམ་གྱིས་ཐུགས་ཚིམ་པ་དང་། དེ་འདྲ་བ་ཙམ་ཞིག་ལྷུར་མཛད་པའི་དྲི་ཙམ་ཡང་མི་མངའ་ཞིང་། བདག་ཉིད་རྒྱལ་ཞིང་ཕ་རོལ་སྨ་དབབ་པར་བཞེད་པ་དང་། རང་ཉིད་མཁས་པར་རློམ་པའི་ང་རྒྱལ་གྱིས་རང་གིས་གང་ཤེས་པ་དེ་ཉིད་གཞན་ལ་གྲགས་པར་བྱ་བའི་ཆེད་དུ། འཆད་པའམ། རྩོད་པའམ་རྩོམ་པ་འདི་ལྟ་བུ་ཞིག་དང་པོ་ཐོས་བསམ་གཙོ་བོར་ལྷུར་མཛད་པའི་ཐོག་མ་ནས་བརྩམས་ཏེ་ཞིང་གཤེགས་པའི་བར་གང་གིས་སྐབས་སུའང་དུས་འདིའི་ཚེ་ཚུལ་འདི་ལྟར་མཛད་དོ་ཞེས་གཟུ་བོར་གནས་པ་སུས་ཀྱང་ལན་ཅིག་ཀྱང་དྲང་པོར་གླེང་བའི་སྐབས་མེད་པ་འདི་ནི། ཆོས་ལ་བློ་ཁ་ཅུང་ཟད་ཅིག་ཕྱོགས་པ་ཡན་ཆད་སུས་བསམས་ཀྱང་གཟུ་བོའི་བློས་བསམ་ན་ནི། རང་དབང་མེད་པ་ཉིད་དུ་དད་པ་ལྷག་པར་སྐྱེད་པའི་སྐྱེས་བུ་དམ་པའི་རྣམ་ཐར་ངོ་མཚར་བ་ཡིན་ནོ། ། དེའི་ཕྱིར་གསུང་རབ་དགོངས་འགྲེལ་དང་བཅས་པའི་དོན་རྣམ་པར་གཏན་ལ་འབེབས་པ་ནའང་། ཐར་པ་དང་ཐམས་ཅད་མཁྱེན་པར་བགྲོད་པའི་ལམ་གོང་འོག་ཐམས་ཅད་རྒྱལ་བའི་དགོངས་པ་ཇི་ལྟ་བ་དང་། ཤིང་རྟ་ཆེན་པོ་རྣམས་ཀྱི་ལུགས་ཇི་ལྟ་བ་བཞིན་དུ་རྙེད་པ་ཞིག་ཇི་ལྟར་བྱས་ན་འོང་ཞིག་གུ་སྙམ་དུ་འདི་ཉིད་འབའ་ཞིག་ཐུགས་ལ་བཅགས་པས་དཔྱོད་པར་མཛད་ཅིང་། དེ་ཡང་དབང་པོ་རྣོན་པོ་ཆོས་ཀྱི་རྗེས་སུ་འབྲང་བའི་རིགས་མཆོག་ཏུ་གྱུར་པས་གཞན་གྱི་ཚིག་ཙམ་ལ་བརྟེན་ནས་རྣམ་པར་དཔྱོད་པ་ལུང་ཙམ་སྐྱབས་སུ་གྱུར་པ་རྣམས་ཀྱི་ངང་ཚུལ་ནི་ངོ་བོ་ཉིད་ཀྱིས་མི་མངའ་བས། འདི་སྙམ་དུ་རྒྱལ་བའི་གསུང་རབ་འགྲེལ་བའི་མཆོག་ཏུ་ལུང་བསྟན་པའི་ཤིང་རྟའི་སྲོལ་འབྱེད་ཆེན་པོ་དག་གིས་བསྟན་པའི་རིགས་པ་ལ་བརྟེན་ནས་རྒྱལ་བའི་གསུང་རབ་ཀྱི་དྲང་ངེས་ཚུལ་བཞིན་དུ་ཕྱེ་བའི་ངེས་དོན་གྱི་གསུང་རབ་ཀྱི་དོན་ཤིན་ཏུ་ཕྲ་བའི་རིགས་པས་རྣམ་པར་དཔྱད་ཀྱང་མཐའ་གཞན་དུ་མི་འགྱུར་བའི་ཚུལ་གྱིས་རྙེད་པ་ཞིག་སྐྱེས་བུ་སྐོམ་པས་གདུངས་པས་བཏུང་བ་དོན་དུ་གཉེར་བ་ལྟ་བུའི་ཐུགས་ཀྱིས། ཚུལ་འདིས་གསུང་རབ་ཀྱི་དོན་འཚོལ་བ་འབའ་ཞིག་ལྷུར་མཛད་དོ། ། དེ་ཡང་རྗེ་ཉིད་ཀྱི་ཞལ་ནས། ད་ལྟ་བོད་ན་ཤེས་རབ་ཆེ་བ་གོ་བ་བཟང་བའི་མཐར་ཐུག་ཏུ་རྩི་བ་འདི་ཚོ་ལྟར་གསུང་རབ་དགོངས་འགྲེལ་དང་བཅས་པའི་བསྟན་བཅོས་ཕལ་ཆེར་ལ་བལྟས་པ་ཙམ་ནས་འདིའི་དོན་འདིར་འདུག་སྙམ་པ་འབད་མེད་དུ་ལམ་ལམ་འཆར་བ། དེ་གཞན་ལ་བསྟན་ན་གོ་བ་ཆེན་པོ་བློ་ཡུལ་དུ་བདེ་སང་སང་བ་འཆར་ཐུབ་པ་ཞིག་ང་ལ་སྔ་མོ་ནས་ཡོད་དེ། དེ་འདྲ་ལ་ཡིད་བརྟན་བྱར་མི་རུང་། རིགས་པ་ཕྲ་མོས་ལེགས་པར་དཔྱད་པ་ན་དང་པོར་ཡིན་ཡིན་འདྲ་བའི་གོ་བ་རྙེད་པ་རྣམས་ཀྱང་ཕལ་ཆེར་ཞིག་འགྲོ་བ་ཀ་མང་། དེས་ན་རིགས་པ་རྣམ་པར་དག་པ་ཕྲ་མོ་ཞིག་གིས་ལེགས་པར་དཔྱད་པའི་དཔྱད་པ་མ་རྫོགས་བར་དུ་དོན་དེར་ཁ་ཚོན་བཅད་ཀྱང་ཤབ་ཤོབ་ཏུ་འགྲོ་བ་ཡིན་ཞེས་གསུང་ངོ་། ། དེ་ཡང་དེའི་ཚེ་འཕགས་པ་ཀླུ་སྒྲུབ་ཡབ་སྲས་ཀྱི་དགོངས་པ་མཐར་ཐུག་པའི་ལྟ་བ་དང་། གསང་བ་འདུས་པའི་ལམ་རིམ་པ་ལྔ། དེའི་ནང་ནས་ཀྱང་སྒྱུ་ལུས་འདི་ཤིན་ཏུ་རྟོགས་དཀའ་བ་དང་། རྟོགས་ན་དོན་ཆེ་ཞིང་མ་རྟོགས་ན་ནི་ལོག་པར་ལྟུང་བའི་གཡང་སའང་ཤིན་ཏུ་ཆེ་ལ། དེ་ཁོ་ན་ཉིད་སྒོམ་པ་དང་། སྔགས་བླ་མེད་ཀྱི་ལམ་ལ་བརྟེན་ནས་སངས་རྒྱས་འཚོལ་བ་སོགས་ཚིག་ཙམ་དུ་འགྱུར་བར་དགོངས་ཏེ། འདི་དག་མགོན་པོ་ཀླུ་སྒྲུབ་ཡབ་སྲས་ཀྱི་དགོངས་པ་བཞིན་འཁྲུལ་མེད་དུ་སྟོན་པའི་བཤེས་གཉེན་དམ་པ་རྒྱ་བོད་བལ་གསུམ། དབུས་གཙང་ཁམས་གསུམ་སོགས་གང་ན་ཡོད་ཀྱང་དེའི་ཁུངས་ཤིག་རྙེད་ན་ནི་དེ་འཚོལ་བའི་ཕྱིར་དུ་ལུས་སྲོག་ཐེད་ལ་བོར་ནས་དཀའ་བ་ཅི་བྱུང་ཡང་དང་དུ་བླངས་ཏེ་ད་ལྟ་ཉིད་དུའང་འགྲོ་དགོས་དགོངས་པ་སྙིང་ནས་ཤུགས་དྲག་པོ་དེའི་ཚེ་ཡོད་དོ། ། ཞེས་རྗེ་ཉིད་གསུང་ངོ་། ། དེའི་དུས་སུའང་བླ་མ་དབུ་མ་པས་ལོ་ཙཱ་བྱས་ནས་རྗེ་བཙུན་འཇམ་པའི་དབྱངས་ལ་དབུ་མའི་ལྟ་བ་དང་། སྔགས་མཚན་ཉིད་ཀྱི་ཁྱད་པར། སྔགས་བླ་མེད་ཀྱི་ལམ་ཀྱི་གནད་ཆེ་ཤོས་རྣམས་དང་། རིམ་པ་ལྔའི་གོ་རིམ། གྲངས་ངེས་སོགས་མཐའ་ཡས་པ་ཞིག་གི་དྲི་བ་དང་། དོགས་པ་ཆོད་པའི་ཆེད་དུ་བརྒལ་ཞིང་བརྟགས་པའི་སྒོ་ནས་འདྲི་བ་ལ་སོགས་པ་འབའ་ཞིག་གཙོ་བོར་མཛད། རྗེ་རིན་པོ་ཆེ་འདིས་དེའི་ཚེ་རྗེ་བཙུན་འཇམ་པའི་དབྱངས་ལ་ཟབ་མོ་དབུ་མའི་ལྟ་བ་སོགས་མདོ་སྔགས་ཀྱི་ལམ་གྱི་གནད་མཐར་ཐུག་པ་རྣམས་ལ་དྲི་བ་དང་བརྒལ་བརྟག་མང་དུ་མཛད་པའི་སྐབས་སུ་རྗེ་བཙུན་འཇམ་དཔལ་དབྱངས་ཀྱིས་ཐལ་རང་གི་ཁྱད་པར། ལྷན་སྐྱེས་དང་ཀུན་བརྟགས་ཀྱི་བདག་འཛིན་གཉིས་ཀྱིས་ཇི་ལྟར་བཟུང་བ་ལྟར་གྱི་བདག་དང་། རྟགས་ཀྱི་དགག་བྱའི་ཚད་ཕྲ་རགས། ལྟ་བ་རྟོགས་པའི་ཚད། ཐལ་འགྱུར་བའི་ལྟ་བ་འདིའི་ལུགས་ཀྱི་ཀུན་རྫོབ་རྣམ་པར་འཇོག་པའི་ཚུལ་ལ་སོགས་པ་རྣམས་ཀྱི་དཔྱད་པ་ཞིབ་ཏུ་མཛད་པའི་ས་བོན་ཤིན་ཏུ་འདྲིལ་བ་རེ་དང་། སྔགས་མཚན་ཉིད་ཀྱི་ལམ་ཐུན་མོང་བ་དང་ཐུན་མོང་མ་ཡིན་པའི་ཁྱད་པར། དཔལ་གསང་བ་འདུས་པའི་རིམ་པ་ལྔའི་ངོ་བོ་དང་། གོ་རིམ་གྲངས་ངེས་ལ་སོགས་པ་རྣམས་ཀྱི་གནད་ཐུན་མོང་མ་ཡིན་པ་ཤིན་ཏུ་འདྲིལ་བ་རེ་གསུངས། མི་གོ་བར་འདུག་ལགས་ཞུས་པས། འདི་རྣམས་མ་བརྗེད་པ་གྱིས་ལ་ཟིན་བྲིས་སུ་གྱིས། བླ་མ་དང་ཡི་དམ་ཐ་མི་དད་དུ་བྱས་པ་ལ་གསོལ་བ་འདེབས་ཤིང་བསྙེན་སྒྲུབ་བྱེད་པ་དང་། བསག་སྦྱང་གཉིས་ལ་ལེགས་པར་འབད་པ་དང་། གཞུང་ལུགས་ཀྱི་དོན་ལ་རིགས་པས་རྣམ་པར་དཔྱོད་ཅིང་ཞིབ་ཏུ་སེམས་པ་རྣམས་སུམ་སྒྲིལ་དུ་ཉམས་སུ་ལོངས་ལ་ཚིམ་མ་སླ་བར་རྒྱུན་བསྲིངས་ལ་ལེགས་པར་དཔྱོད་ཅིག་དང་། སྐབས་སུ་བབ་ན་ངས་ས་བོན་བཏབ་པ་འདི་རྣམས་ཀྱིས་ཀྱང་རྐྱེན་བྱས་ནས་ལེགས་པར་གོ་བ་ཞིག་མྱུར་དུ་འོང་བ་འདུག་ཅེས་གསུང་ངོ་། ། འཕགས་པ་ཀླུ་སྒྲུབ་ཡབ་སྲས་ཀྱི་ལུགས་ཀྱི་དབུ་མ་དང་གསང་བ་འདུས་པ་ལ་ཤེས་འདོད་ཤིན་ཏུ་ཆེ་བར་ཡོད་པས་རྩད་གཅོད་པའི་བླ་མ་བོད་ན་སུ་དྲག་ཞུས་པ་ལ། རེད་མདའ་པ་ལས་དྲག་པ་མེད། འོན་ཀྱང་ཁྱོད་ལ་མཐའ་མ་ལུས་པར་ཆོད་པའི་གོ་བ་རྫོགས་པར་བསྐྱེད་མི་ཐུབ། དབུ་མ་པས་ལོ་ཙཱ་བྱས་ནས་ངས་ཁྱོད་ལ་བཤད་ན་དེ་ཀ་དྲག་པར་འོང་ནའང་ཁོ་ཡང་མྱུར་དུ་མདོ་ཁམས་ལ་འགྲོ་དགོས་པར་སྣང་། དེས་ན་ད་ལྟ་ནས་བཤད་པ་མ་བྱེད་པར་བྱ་བྲལ་གྱིས་ལ་དབེན་པ་སྟེན། གོང་དུ་བཤད་པ་ལྟར་སུམ་སྒྲིལ་དུ་ཉམས་སུ་ལེན་པ་དང་དམིགས་རྣམ་སྐྱོང་བ་སོགས་ལ་ལེགས་པར་འབད་ན་རིང་པོར་མི་ཐོགས་པར་དེ་རྣམས་ཀྱི་དོན་རྙེད་པར་འགྱུར་རོ་ཞེས་གསུང་ངོ་། ། གཞན་ཡང་ཆོས་ཀྱི་གནད་དང་གཞུང་གང་ལ་བརྟེན་ནས་འཚོལ་བ་སོགས་གསུངས་པ་ལ་ཚད་མེད། རྒྱ་གར་གྱི་པཎྜི་ཏ་མཁས་པ་རྣམས་ལའང་འགའ་ཞིག་གི་གཞུང་ལ་འཁྲུལ་མེད་རང་འབའ་ཞིག་ཏུ་གཟུང་མི་ཉན་པའི་དམིགས་བསལ་རེ་ཙམ་ཡང་བྱུང་བས། འོ་ན་འཕགས་པ་ཀླུ་སྒྲུབ་ཀྱི་དགོངས་པ་ལ་སློབ་དཔོན་ཟླ་བ་གྲགས་པ་འཁྲུལ་མེད་རང་འབའ་ཞིག་ཏུ་བཟུང་པས་ཨེ་ཆོག་ཞུས་པས། ཟླ་བ་གྲགས་པ་ནི་སྟེང་ཕྱོགས་འཇིག་རྟེན་གྱི་ཁམས་ཀྱི་ཞིང་གཅིག་གི་དེ་བཞིན་གཤེགས་པ་ཞིག་གི་ཞབས་དྲུང་ནས་བྱང་ཆུབ་སེམས་དཔའ་རྣམ་དཔྱོད་དང་སྙིང་སྟོབས་མཆོག་ཏུ་གྱུར་པ་ཞིག་ཞིང་འདིར་འཔགས་པ་ཀླུ་སྒྲུབ་ཀྱི་ལུགས་བསྟན་པའི་སྙིང་པོ་གསལ་བར་བྱ་བའི་སླད་དུ་བསམ་བཞིན་དུ་སྐྱེ་བ་བཟུང་བ་ཡིན་པས་འདི་འཕགས་པ་ཀླུ་སྒྲུབ་ཀྱི་དགོངས་པ་འགྲེལ་བ་ལ་སྔགས་མཚན་ཉིད་གང་གི་སྐབས་སུའང་འཁྲུལ་པ་ཕྲ་མོ་ཙམ་ཡང་མེད་པས་འདི་ལ་རྣམ་པ་ཐམས་ཅད་དུ་ཡིད་ཆེས་ཀྱི་གནས་འབའ་ཞིག་ཏུ་ངེས་པར་གཟུང་དགོས་པ་ཡིན་ནོ། ། ཞེས་གསུང་ངོ་། ། བླ་མ་དབུ་མས་རྗེ་བཙུན་འཇམ་དབྱངས་ལ་རྗེ་རིན་པོ་ཆེ་འདིའི་སྐུ་སྐྱེ་སྔ་ཕྱི་སོགས་ཀྱི་ཞུ་བ་མཛད་པས། རྗེ་བཙུན་གྱི་ཞལ་ནས། སྔོན་སངས་རྒྱས་འཇིག་རྟེན་ན་བཞུགས་པའི་དུས་སུ་བླ་མ་འདི་རྒྱ་གར་དུ་བྲམ་ཟེའི་ཁྱེའུ་ཞིག་ཏུ་འཁྲུངས། དེའི་ཚེ་དགེ་སློང་གི་ཆ་ལུགས་འཛིན་པའི་བྱང་ཆུབ་སེམས་དཔའ་མོས་པའི་བློ་གྲོས་ཞེས་བྱ་བ་དང་མཇལ་ནས་དེ་ཉིད་མཉེས་པར་བྱས་ཤིང་ཞབས་འབྲིང་དུ་འབྲང་ཆོས་མང་དུ་གསན། དེས་ཁྲིད་དེ་སྟོན་པ་ཤཱཀྱ་ཐུབ་པའི་ཞབས་དྲུང་དུ་མཇལ་ཞིང་སེམས་བསྐྱེད། དེའི་ཚེ་སྟོན་པ་ལ་ཤེལ་དཀར་པོ་དྲི་མ་མེད་པ་བརྒྱ་རྩའི་ཕྲེང་བ་ཞིག་དད་པས་ཕུལ་ནས་སྨོན་ལམ་བཏབ་པས་སྟོང་བ་ཉིད་ཀྱི་ལྟ་བ་ཕྱིན་ཅི་མ་ལོག་པ་རྟོགས་པའི་ས་བོན་བཞག་པ་ཡིན། ད་སྐུ་སྐྱེ་འདིའི་ཕྱི་མ་ལ་དགའ་ལྡན་དུ་རྒྱལ་བ་མི་ཕལ་པའི་ཆོས་ཀྱི་མདུན་སར་ཐེག་པ་ཆེན་པོའི་ཆོས་ཀྱི་འབྱོར་པ་དཔག་ཏུ་མེད་པ་ལ་ལོངས་སྤྱོད་པར་འགྱུར་ཞིང་། མཚན་ནི་བྱང་ཆུབ་སེམས་དཔའ་འཇམ་དཔལ་སྙིང་པོ་ཞེས་བྱ་བར་འགྱུར་རོ་ཞེས་གསུངས། རྗེ་རིན་པོ་ཆེ་འདི་པ་སྐུ་སྐྱེ་ཕྱི་མ་དགའ་ལྡན་དུ་ཕེབས་པ་སོགས་ཀྱི་ལོ་རྒྱུས་མཁས་གྲུབ་ཐམས་ཅད་མཁྱེན་པས་རྗེ་རིན་པོ་ཆེ་ཉིད་ལ་ཇི་ལྟར་ལགས་ཞེས་ཞུས་པ་ན་རྗེ་རིན་པོ་ཆེའི་ཞལ་ནས་འདིའི་ཕྱི་མ་དགའ་ལྡན་དུ་འགྲོ་བ་འདི་ལ་རང་བླ་མ་དབུ་མ་པ་དང་བླ་མ་ཕྱག་རྡོར་བ་སོགས་མང་པོ་ཞིག་ཞལ་མཐུན་པར་འདུག་ཅེས་ནང་ཐུགས་ཀྱི་སྲས་གཅིག་མཁས་གྲུབ་ཐམས་ཅད་མཁྱེན་པ་ལ་གསུངས་སོ། ། དེ་དུས་རྗེ་རིན་པོ་ཆེ་རང་ཡང་ཅུང་ཟད་འཆད་ཉན་པ་ཐུགས་བཞེད་ཆེ། བླ་མ་དབུ་མ་པ་ཡང་དེ་དང་མཐུན་པས། སྐུ་ན་ཚོད་ཤིན་ཏུ་གཞོན་ཞིང་མཁྱེན་རབ་དང་ཕན་འདོགས་ཤིན་ཏུ་ཆེ་བ་འདི་འདྲ་བ་ལ་ད་རུང་བཤད་ཉན་ངོས་མཛད་ན་བསྟན་པ་ལ་ཕན་ཐོགས་ཤིན་ཏུ་ཆེ་ཞིང་། འཆད་ཉན་འཕེལ་བོ་འདི་འདྲ་བའི་འཕྲོལ་ལ་བྱ་བྲལ་ལ་བྱོན་ན་ངེད་ལའང་སྐྱེ་བོ་རྣམས་ཀྱིས་ཁ་ཟེར་དུ་འོང་བས་རེ་ཞིག་འཆད་ཉན་མཛད་པས་ཆོག་པ་ཞིག་འཆལ་ཞུས་པས། རྗེ་བཙུན་གྱི་ཞལ་ནས་བསྟན་པ་དང་སེམས་ཅན་ལ་གང་ཕན་ཁྱོད་ཀྱིས་མི་ཤེས། ཁ་ཟེར་བ་ལ་བཟོད་པ་སྒོམས། དབེན་པ་བསྟེན་ནས་ཐུགས་དམ་མ་བྱས་ན་སྐུ་ཚེ་རིང་པོ་མི་འོང་། ཕན་འདོགས་ཀྱང་ལྟར་སྣང་ཞིག་ལས་མི་འོང་བས་བྱ་བྲལ་ལ་ཕྱིན་པ་འཐད་ཅེས་གསུང་ངོ་། ། སྐྱིད་ཤོད་དགའ་བ་གདོང་དུ་བླ་མ་དབུ་མ་པ་དང་རྗེ་རིན་པོ་ཆེ་གཉིས་པོ་ལས་མེད་པའི་སྐུ་མཚམས་དམ་པོ་བཅད། གཉིས་པོའང་གཟིམ་ཁང་སོ་སོར་བྱས་ནས་གསོལ་ཇ་སོགས་ལ་འཚོག་པར་མཛད་ཅིང་། གསོལ་ཇ་བཞེས་པའི་སྐབས་སུའང་བླ་མ་དབུ་མ་པས་ལོ་ཙཱ་མཛད་ནས་རྗེ་བཙུན་འཇམ་པའི་དབྱངས་ལ་ཆོས་མང་དུ་གསན་ཞིང་དྲི་བ་དཔག་ཏུ་མེད་པ་མཛད། དེ་དུས་ཐོག་མར་བླ་མ་དབུ་མ་པ་ལ་རྗེ་བཙུན་གྱིས་གནང་བའི་ཞི་གནས་ཀྱི་དམིགས་པ་གསན་ནས་སྒོམ་གྱིན་ཡོད་པ་ལ། དོ་ཞག་རང་འདི་ལས་ཀྱང་རྗེ་བཙུན་འཇམ་པའི་དབྱངས་ཉིད་ལ་གསོལ་བ་བཏབ་ཅིང་བསྙེན་བསྒྲུབ་བྱས་ན་དེ་ངོས་དོན་ཆེ་བ་འདྲ་དགོངས་ནས་བླ་མ་དབུ་མ་པ་ལ་དེ་ལྟར་ཞུས་པས་དེ་བཞིན་མཛད་པས་ཆོག་ཅེས་གསུངས་ནས། ཉིན་མཚན་དུ་བླ་མ་དང་རྗེ་བཙུན་ཐ་མི་དད་དུ་བྱས་པ་ལ་གསོལ་བ་བཏབ་ཅིང་བསྙེན་བསྒྲུབ་མཛད་པས། ཞག་མང་པོ་མ་སོང་བ་ལ་ཉིན་གཅིག་དཀྱིལ་གྱི་ལྟེ་བའི་རྒྱ་ཁྱོན་འཚམ་པ་ཞིག་ཁ་དོག་རྒྱ་མཐིང་བཟང་པོས་ལེགས་པར་བྱུགས་པ་འདྲ་བ་ལ། ཤིན་ཏུ་དྭངས་པ་བལྟ་བས་ཆོག་མི་ཤེས་པ་ཞིག་གི་དབྱིབས་ཤིན་ཏུ་ཟླུམ་པོར་འདུག་པའི་མཐའ་ཐམས་ཅད་འོད་ཟེར་ཁ་དོག་སྣ་ལྔ་པ་འཇའ་ཚོན་ལྟ་བུའི་དྲ་བས་འཁྲིགས་པའི་དབུས་ཀྱི་ལྟེ་བ་སྔོན་པོ་དེའི་རྒྱ་ཁྱོན་དང་འཚམ་པར། རྡོ་རྗེའི་སྐྱིལ་ཀྲུང་གིས་བཞུགས་པའི་རྗེ་བཙུན་འཇམ་པའི་དབྱངས་ཨ་ར་པ་ཙ་ན་གུར་གུམ་མདོག་ཅན་བལྟ་བས་ཆོག་མི་ཤེས་པ་ཞིག་གི་སྐུའི་སྣང་བ་དངོས་སུ་གཟིགས། དེ་བླ་མ་དབུ་མ་པ་ལ་མ་ཞུས་ཀྱང་བླ་མ་དབུ་མ་པས་ཁྱེད་རང་ལའང་སྐུའི་སྣང་བ་ཡོད་པ་འདྲ་གསུངས་ནས་ཐིག་བྱུང་། དེ་འདྲ་བའི་སྐུའི་སྣང་བ་དེ་ནམ་འདོད་རེས་ཀྱི་གསོལ་བ་བཏབ་པའི་དུས་ཕལ་ཆེར་དངོས་སུ་ནར་མར་འབྱུང་བ་ཞིག་དེ་ནས་བརྩམས་ཏེ་དུས་རྟག་ཏུ་ཡོད་ཅེས་ནང་ཐུགས་ཀྱི་སྲས་གཅིག་མཁས་གྲུབ་སྨྲ་བའི་ཉི་མ་ལ་ཤིན་ཏུ་གསང་བར་བྱས་ཏེ་གསུངས། དེ་ཡང་རྗེ་རིན་པོ་ཆེ་འདིས་རྗེ་བཙུན་འཇམ་པའི་དབྱངས་དཔའ་གཅིག་དང་། བླ་མེད་ལ་སོགས་པ་རྣམས་དང་བཀའ་སྡོད་གཤིན་རྗེ་ཆོས་ཀྱི་རྒྱལ་པོ་ཕྱི་ནང་གསང་གསུམ་ལ་སོགས་པ་རྣམས་ཀྱི་རྗེས་གནང་དང་བྱིན་རླབས། ཏིང་ངེ་འཛིན་གྱི་དབང་བཞི་སོགས་ནི། རྗེ་བཙུན་འཇམ་པའི་དབྱངས་རང་ཉིད་ལ་གསན་ལ། དེ་ཡང་དཔའ་གཅིག་གི་རྗེས་གནང་མཛད་པའི་རིང་ལ་རྗེ་བཙུན་ཡང་དཔའ་བོ་གཅིག་པར་རང་གི་སྐུའི་རྣམ་པར་ཡོད་པ་ལ་ནང་སྒྲུབ་དང་། གསང་སྒྲུབ་སོགས་ཀྱི་དབང་མཛད་པའི་ཚེ་དཔའ་བོ་གཅིག་པ་དེ། དེ་མ་ཐག་ཡབ་ཡུམ་ཞལ་སྦྱོར་གྱི་རྣམ་པར་འགྱུར་འགྲོ་བ་དང་། ཆོས་སྐྱོང་གི་རྗེས་གནང་མཛད་པའི་སྐབས་སུ། དེ་མ་ཐག་བཅོམ་ལྡན་འདས་རྡོ་རྗེ་འཇིགས་བྱེད་ཀྱི་རྣམ་པར་འགྱུར་ནས་གཤིན་རྗེ་ཆོས་ཀྱི་རྒྱལ་པོ་ལ་བཀའ་བསྒོ་བར་མཛད་པ་ལ་སོགས་པ་དེ་འདྲ་བའི་རྣམ་འཕྲུལ་ངོ་མཚར་བ་སྟོན་པར་མཛད་པར་གསུངས། དེ་ནས་རྗེ་བཙུན་འཇམ་པའི་དབྱངས་ཀྱིས་བླ་མ་དབུ་མ་པ་ལ་གནང་བའི་ལས་ཚོགས་དང་། དམིགས་པ་སྐྱོང་བའི་རིམ་པ་སོགས་མང་པོ་ཞིག་གི་ལུང་ནི་བླ་མ་དབུ་མ་པ་ཉིད་ལ་གསན་ནོ། ། དེ་ནས་སྒྲུབ་པ་ལ་འབྱོན་པའི་ཐུགས་ཐག་བཅད། འཁོར་ཇི་ལྟ་བུ་འཁྲིད་རྗེ་བཙུན་ལ་ཞུས་པས་བླ་མ་འཇམ་དཔལ་རྒྱ་མཚོ་བ་སོགས་མདོ་ཁམས་པ་བཞི་དང་། དབུས་པ་བཞི་སྟེ་བརྒྱད་པོ་དེ་འཁྲིད་པའི་གནང་བ་བྱུང་། དེ་ནས་བླ་མ་དབུ་མ་པ་མདོ་ཁམས་ལ་འབྱོན་པའི་སྐྱེལ་མ་ལ་ལྷ་སར་བྱོན་དུས་ད་དཔོན་སློབ་རེ་ཞིག་མི་མཇལ་བས་གནས་བྱིན་རླབས་ཅན་འདིར་རྗེ་བཙུན་འཇམ་པའི་དབྱངས་ལ་གསོལ་བ་བཏབ། ཉམས་ལེན་གྱི་གནད་བསྡུས་པའི་གདམས་པ་ཞིག་ཞུས་པ་དྲག་ཅེས་བཀའ་བགྲོས་ནས། ལྷ་སའི་ཐོག་སྟེང་མ་རང་གི་ལྷོ་ཕྱོགས་ཀྱི་གསེར་ཕུབ་ཀྱི་བྱ་འདབས་འོག་དེར་མཆོད་པ་བཤམས། གསོལ་བ་དྲག་ཏུ་བཏབ་པས་རྗེ་བཙུན་འཇམ་པའི་དབྱངས་ཀྱིས་ཉམས་ལེན་གྱི་གནད་བསྡུས་པའི་ཚིགས་སུ་བཅད་པ་འགའ་ཞིག་གསུངས། རྗེ་བླ་མ་འདིས་དེ་ཀའི་དུས་སུ་གསུང་རིམ་བཞིན་ཡི་གེར་འགོད་པར་མཛད་དོ། ། དེའི་དུས་སུ་རྗེ་བཙུན་འཇམ་པའི་དབྱངས་ཀྱིས་གསུངས་པའི་མན་ངག་གི་རྩ་ཚིག་ཡི་གེར་འགོད་པར་མཛད་པ་ནི་བཀའ་འབུམ་ཐོར་བུར་གསལ་པ་ལྟར་རོ། ། གཞན་ཡང་གསུང་རབ་ཀྱི་གནད་དང་། དཔྱོད་པ་མཛད་པའི་སྒོ་བསྟན་པ་ལ་ཚད་མེད་དོ། ། དེའི་ཚེ་གཞན་ཡང་རྗེ་བཙུན་འཇམ་པའི་དབྱངས་ཀྱི་ཞལ་ནས། ད་ཕྱིན་ཆད་བླ་མ་དང་ཡི་དམ་ཐ་མི་དད་དུ་བྱས་པ་ལ་གསོལ་བ་འདེབས་པ། སྔར་བསགས་ཀྱི་སྡིག་ལྟུང་སྦྱོང་ཞིང་ཚོགས་རྒྱ་ཆེན་པོ་གོང་ནས་གོང་དུ་སྤེལ་བའི་གསག་སྦྱང་ལ་འབད་པ། ཤིང་རྟ་ཆེན་པོ་རྣམས་ཀྱི་རིགས་པ་ལ་བརྟེན་ནས་མདོ་རྒྱུད་དགོངས་འགྲེལ་དང་བཅས་པའི་དོན་ལ་ཞིབ་ཏུ་དཔྱོད་པ་སུམ་སྒྲིལ་དུ་གྱིས་ལ་རྒྱུན་མ་ཆད་པར་ཉམས་སུ་ལོངས་དང་། རིང་པོ་མི་ཐོགས་པར་ལྟ་བའི་གནད་མཐར་ཐུག་པ་དང་། མདོ་རྒྱུད་ཀྱི་དོན་མཐའ་དག་ལ་མི་འཁྲུལ་བའི་ངེས་པ་རྙེད་པར་འགྱུར། ད་ལྟ་ནས་བཤད་པ་བྱས་ཀྱང་ཕན་ཐོགས་ལྟར་སྣང་ལས་མི་འོང་བས་རེ་ཤིག་བྱ་བྲལ་བྱས། དབེན་པ་བསྟེན་ནས་སྒྲུབ་པ་སྙིང་པོར་གྱིས་ཤིག་ཅེས་གསུངས་ཤིང་། དམུ་རྒོད་གདུལ་དཀའི་སེམས་ཅན་འདི་རྣམས་ལ། ། བཤད་པས་ཕན་ཐོགས་ཆེན་པོ་ག་ལ་འགྱུར། ། དེ་བས་སྒྲུབ་པ་ལྷུར་བླངས་དབེན་པ་སྟེན། ། རང་གཞན་གཉིས་ཀ་འཚེངས་པའི་ལམ་རྙེད་སྙམ། ། ཞེས་ནན་ཏན་དུ་གདམས་ཤིང་བསྐུལ་བར་མཛད་དོ། ། དེ་ལྟར་བསྐུལ་བ་དང་། རྗེ་འདི་ཉིད་ཀྱིས་ཀྱང་ཚུལ་དེ་ལེགས་པར་དགོངས་ནས་བྱ་བྲལ་མཛད་ཅིང་། དབེན་པ་བསྟེན་ནས་སྒྲུབ་པ་སྙིང་པོར་མཛད་པ་ལ་ཐུགས་ཐག་བཅད་དོ། ། དེ་ནས་བླ་མ་དབུ་མ་པ་དེ་གའི་སྟོན་མདོ་ཁམས་ལ་འབྱོན་པར་ཆས། རྗེའི་ཞལ་སྔ་ནས་ཀྱང་ལྷ་སར་སྐྱེལ་མ་ལ་བྱོན། དཔོན་སློབ་གཉིས་ཀས་གསོལ་བ་དྲག་ཏུ་བཏབ། ལྷ་སའི་སྒོ་ཁང་སྟེང་གི་གཙུག་ལག་ཁང་དུ། བླ་མ་དབུ་མ་པ་ལ་རྗེ་འདིས་དཔལ་གསང་བ་འདུས་པ་མི་བསྐྱོད་པའི་དབང་བཞི་རྫོགས་པར་གནང་། དེ་ནས་རྗེ་རིན་པོ་ཆེས་སྐྱོར་མོ་ལུང་དུ་ཕེབས། སྟོན་མཇུག་དེ་ཆོས་མང་དུ་གསུངས། དགུན་ལ་ཉེ་བ་ 1392 སྤྲེའུའི་ལོ་ཟླ་བ་བཅུ་བ་ལ་བབ་པ། དགུང་ལོ་སུམ་ཅུ་རྩ་དྲུག་པ་ལ་སྐྱོར་མོ་ལུང་ནས་ཕྱགས་བཏེག ། སློབ་དཔོན་རིན་པོ་ཆེ་འཇམ་དཀར་བ་ཞེས་གྲགས་པ་དཔལ་ལྡན་བཟང་པོ་དང་། རྟོགས་ལྡན་བྱང་སེང་བ། གནས་བརྟན་རིན་ཆེན་རྒྱལ་མཚན་པ། གནས་བརྟན་བཟང་སྐྱོང་བ་སྟེ་དབུས་པ་བཞི། བླ་མ་རྟོགས་ལྡན་འཇམ་དཔལ་རྒྱ་མཚོ་བ། དགེ་བཤེས་ཤེས་རབ་གྲགས། དགེ་བཤེས་འཇམ་དཔལ་བཀྲ་ཤིས། དགེ་བཤེས་དཔལ་སྐྱོང་སྟེ་མདོ་སྨད་པ་བཞི་དང་བཅས་པ་ཕྱག་ཕྱིར་ཁྲིད། དེ་གོང་ནས། གཞིས་ཁ་སྣེའུ་རྫོང་པས་ཞབས་ཏོག་ལེགས་པོ་མཛད་ཀྱིན་ཡོད་ཅིང་། དེ་དུས་ཀྱང་ཁོང་གིས་ཞབས་ཏོག་བསྒྲུབས་ཏེ་དཔོན་སློབ་དགུས་གཞུང་ཀོ་མཛད་ནས་བྱ་བྲལ་ལ་བྱོན་ཏེ་འོལ་ཁར་ཕེབས། དེའི་དགུན་དཔྱིད་རྣམས་འོལ་ཁ་ཆོས་ལུང་དུ་བཞུགས་ཤིང་། དེ་ནས་བཟུང་སྟེ་འོལ་ཁ་བ་ཡབ་སྲས་རྣམས་ཀྱིས་དད་པ་ཆེན་པོས་སྦྱིན་བདག་མཛད་དེ་ཞབས་ཏོག་ཕུན་སུམ་ཚོགས་པ་བསྒྲུབས། འོལ་ཁ་ཆོས་ལུང་དུ་བཞུགས་རིང་ལ་ཡང་ཐོག་མར་བསག་སྦྱང་གནད་ཆེ་བར་དགོངས་ཏེ་དཔོན་སློབ་ཐམས་ཅད་ཀྱིས་སྟོབས་བཞི་ཚང་བའི་བསག་སྦྱང་ལ་ཤིན་ཏུ་འགྲུས་པར་མཛད། རྗེ་རིན་པོ་ཆེ་ཉིད་ཀྱིས་ཀྱང་ལྟུང་བཤགས་བརྒྱ་ཕྱག་དང་བཅས་པ་དང་། ཕྱག་སོར་གྱི་རྩེ་མོ་རྣམས་སེར་ཁར་སོང་གི་བར་དུ་མཎྜལ་འབུལ་བ་སོགས་ལ་དཔག་པར་དཀའ་བའི་བརྩོན་པ་དྲག་པོ་མཛད་ཅིང་། དགེ་བའི་བཤེས་གཉེན་གྲོ་ལུང་པ་ཆེན་པོའི་གསུང་ལས། མདོ་སངས་རྒྱས་ཕལ་པོ་ཆེ་འདི་མ་འགྱུར་ན་བོད་ཀྱི་བྱང་ཆུབ་སེམས་དཔའ་རྣམས་སྤྱོད་པ་ལ་སློབ་ཚུལ་ཇི་ལྟར་བྱེད་དམ་ཞེས་འབྱུང་བ་ལྟར་དུ། སངས་རྒྱས་ཕལ་པོ་ཆེ་ལ་སོགས་པ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་རྣམས་སྟོན་པའི་མདོ་སྡེ་རྣམས་ལ་གཟིགས་རྟོག་ཞིབ་པར་མཛད་དེ་ཐེག་པ་ཆེན་པོའི་རིགས་ཀྱི་ནུས་པ་ཡོངས་སུ་རྒྱས་པར་བྱེད་པའི་ཐབས་རྨད་དུ་བྱུང་བ་བྱང་ཆུབ་སེམས་དཔའི་སྙིང་སྟོབས་དཔག་པར་དཀའ་བས་རྒྱལ་སྲས་ཀྱི་སྤྱོད་པ་རླབས་ཤིན་ཏུ་ཆེ་ཞིང་རྣམ་པ་མཐའ་ཡས་པ་རྣམས་ལ་སྔར་གྱི་བྱང་ཆུབ་སེམས་དཔའ་ཆེན་པོའི་རྣམས་ཀྱིས་བསླབས་ཤིང་། ད་ལྟ་དང་མ་འོངས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་སློབ་པ་དང་། སློབ་པར་འགྱུར་པའི་ཚུལ་མདོ་སྡེ་མཐའ་ཡས་པ་ནས་གསུངས་པ་དེ་རྣམས་ལ། བདག་ཉིད་ཀྱང་ད་ལྟ་ནས་དེ་ལྟ་བུའི་ཚུལ་ལ་འཇུག་པ་ལ་ཞུམ་པ་གཏན་མི་སྐྱེ་ཞིང་། སྤྲོ་དགའ་ཤུགས་དྲག་པོས་འཇུག་པར་བྱ་བའི་ཆེད་དུ་མདོ་སྡེ་ནས་འབྱུང་བའི་རྒྱལ་སྲས་ཀྱི་སྙིང་སྟོབས་དང་སྤྱོད་པ་གང་རླབས་ཆེ་ཆེ་རྣམས་ལ་རེ་རེ་ནས་དམིགས་ཕུག་གིན་ཐུགས་སྦྱོང་བའི་དམིགས་རྣམ་ནར་མར་བསྟེན་པས་དང་པོ་ཞིག་ཅུང་དཀའ་ཙམ་བྱུང་ཡང་། ཕྱིས་ལེགས་པར་གོམས་ནས་འབད་རྩོལ་མི་དགོས་པར་རང་ཤུགས་ཀྱིས་རྒྱལ་སྲས་ཀྱི་སྙིང་སྟོབས་དང་སྤྱོད་པ་རྨད་དུ་བྱུང་བའི་ཇི་འདྲའི་དཔག་དཀའ་བ་ཞིག་ལའང་ཞུམ་པ་ནམ་ཡང་མི་སྐྱེ་ཞིང་། སྤྲོ་དགའ་ཤུགས་དྲག་པོས་ངང་གིས་འཇུག་པ་ཞིག་བྱུང་ཞེས་རྗེ་ཐམས་ཅད་མཁྱེན་པ་ཉིད་ཀྱིས་ནང་ཐུགས་ཀྱི་སྲས་གཅིག་མཁས་གྲུབ་སྨྲ་བའི་ཉི་མ་ལ་གསུངས་སོ། ། དེ་ལྟར་འོལ་ཁ་ཆོས་ལུང་དུ་རྗེ་རིན་པོ་ཆེ་འཁོར་དག་པ་རྣམ་བརྒྱད་དང་བཅས་པས་བསག་སྦྱང་རླབས་ཆེན་པོ་ལ་འབད་པའི་ཚེ་རྗེ་འདིས་ལྟུང་བཤགས་དང་བརྒྱ་ཕྱག་སྦྲགས་ནས་མཛད་རེས་ཀྱི། སངས་རྒྱས་སུམ་ཅུ་རྩ་ལྔའི་སྐུའི་སྣང་བ་དངོས་སུ་གཟིགས་པ་ནར་མར་བྱུང་། དེའི་ཚེ་རྗེ་བཙུན་བྱམས་པ་མགོན་པོ་སྐུ་གསེར་བཙོ་མའི་ཁ་དོག་ལྟ་བུ་ལ་རིན་པོ་ཆེའི་རྒྱན་དང་ཆོས་འཆད་ཀྱི་ཕྱག་རྒྱས་མེ་ཏོག་གི་སྡོང་བུ་བསྣམས་པ། རིན་པོ་ཆེའི་ཁྲི་ལ་སྐྱིལ་ཀྲུང་གིས་བཞུགས་པ་དེ་འདྲ་བའི་སྐུ་ཤིན་ཏུ་ཆེ་བ་དང་། རྒྱལ་བ་སྨན་གྱི་བླ་བླ་གོས་སེར་བོ་མནབས་པ་དང་། རྗེ་བཙུན་བྱམས་མགོན་བཟང་པོའི་འདུག་སྟངས་མཛད་པ་རབ་བྱུང་གི་ཆ་བྱད་ཅན་སྣམ་སྦྱར་གསོལ་བ་ཕྱག་གིས་ཀླུ་ཤིང་གི་སྡོང་བུ་རིལ་བས་མཚན་པ་འཛིན་པ་དེ་འདྲ་བ་དང་། གཞན་ཡང་རྒྱལ་བ་ཚེ་དཔག་ཏུ་མེད་པ་སོགས་སངས་རྒྱས་བྱང་སེམས་མང་པོའི་སྐུའི་སྣང་བ་གཟིགས་པ་མང་དུ་བྱུང་། འདི་རྣམས་ཉམས་སྣང་ཡིན་པས་ངེས་པ་ཆེར་མེད་དགོངས་ནས་དེ་ཙམ་དུ་ཆེད་ཆེར་མ་མཛད་ནའང་། བླ་མ་རྟོགས་ལྡན་འཇམ་དཔལ་རྒྱ་མཚོ་བ་ལ་རྗེ་བཙུན་གྱི་སྐུ་དང་གསུང་གི་སྣང་བ་དངོས་སུ་བྱུང་བ་འཁྲུལ་མེད་ཅིག་ཡོད་པས། ཁོང་ལ་རྗེ་བཙུན་འཇམ་དཔལ་དབྱངས་ཀྱིས་གསུང་ནས་རྗེ་ལ་གཟིགས་སྣང་བྱུང་བ་དེ་རྣམས་ཉམས་སྣང་རང་དགའ་བ་མིན་པས་གསོལ་བ་དྲག་ཏུ་ཐོབ། ཕྱིས་རྟེན་འབྲེལ་ཁྱད་པར་ཅན་ཡོད་པ་ཡིན་གསུང་བ་བྱུང་འདུག་གསུང་ངོ་། ། རྟོགས་ལྡན་པའི་སྣང་བ་དེ་ལའང་རྗེའི་དྲུང་ནས་བརྟག་དཔྱད་མང་དུ་མཛད་ཅིང་། ཆོས་ཀྱི་གནད་ཟབ་མོ་དྲིས་པ་རྣམས་ཕལ་ཆེར་འཕྱུག་མེད་དུ་འོང་བར་འདུག་པས་ཐུགས་ལེགས་པར་ཆེས་སོ། །
དེ་ནས་རྗེ་རིན་པོ་ཆེ་འཁོར་བཅས་ཀྱིས་རྫིང་ཕྱིའི་ཇོ་བོ་བྱམས་པ་མཇལ། མཆོད་པ་དང་སྨོན་ལམ་རླབས་པོ་ཆེ་མང་དུ་མཛད། དེ་ནས་དྭགས་པོ་སྨན་ལུང་གི་རྒྱ་སོག་ཕུར་བྱོན་དགུན་གྱི་རིང་དེར་བཞུགས་ཐུགས་དམ་ཤིན་ཏུ་འཕེལ་ཞིང་ཡོན་ཏན་གྱི་ཁྱད་པར་བསམ་གྱིས་མི་ཁྱབ་པ་མང་དུ་བརྙེས་ཏེ་དེ་དུས་རྗེ་བཙུན་འཇམ་པའི་དབྱངས་ཀྱི་སྐུ་ཤིན་ཏུ་ཆེ་བ་གཟི་བརྗིད་ཕུན་སུམ་ཚོགས་པ་ཞིག་ལ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པའི་འཁོར་གྱིས་བསྐོར་བ་དང་། འཕགས་པ་ཀླུ་སྒྲུབ། ཨཱརྱ་དཱེ་བ། སངས་རྒྱས་བསྐྱངས། ཀླུ་བྱང་། ཟླ་བ་གྲགས་པ། ཐོགས་མེད་སྐུ་མཆེད། ཕྱོགས་གླང་། ཆོས་གྲགས། ཡོན་ཏན་འོད་དང་ཤཱཀྱ་འོད། ལྷ་དབང་བློ། རྒྱན་མཁན་པོ། ཀ་མ་ལ་ཤཱི་ལ། ཨ་བྷྱ་ཡ་ལ་སོགས་པའི་པཎྜི་ཏ་དུ་མ་དང་། རྒྱལ་པོ་ཨིནྡྲ་བོ་དྷི། བྲམ་ཟེ་ཆེན་པོ་ས་ར་ཧ། ལཱུ་ཨི་པ། དྲིལ་བུ་པ། ནག་པོ་སྤྱོད་པ་ལ་སོགས་པའི་གྲུབ་ཆེན་དུ་མའི་སྐུའི་སྣང་བ་དངོས་སུ་གཟིགས། ཉམས་སྣང་ལ་གཏད་པ་མེད་ལས་ཆེ་དགོངས་པས། རྗེ་བཙུན་འཇམ་པའི་དབྱངས་ཀྱིས་སྔར་བཞིན་ཉམས་སྣང་རང་དགའ་བ་མིན་པས་གསོལ་བ་དྲག་ཏུ་ཐོབ། འདི་རྣམས་ཀྱི་གཞུང་ལ་བརྟེན་ནས་རང་གཞན་ལ་ཕན་ཐོགས་རྒྱ་ཆེན་པོ་འོང་བའི་རྟེན་འབྲེལ་ཡིན། ཞེས་གསུང་ངོ་། ། དེའི་ཚེ་བཅོམ་ལྡན་འདས་རྡོ་རྗེ་འཇིགས་བྱེད་ཀྱི་སྐུ་ཞལ་ཕྱག་ཡོངས་སུ་རྫོགས་པ་ཤིན་ཏུ་ཆེ་བ་གཟི་བརྗིད་བཟོད་པར་དཀའ་བ་ཞིག་ཞལ་གཟིགས། དེ་དུས་ནས་འཇིགས་བྱེད་ཀྱི་བདག་འཇུག་ཉིན་རེ་བཞིན་མཛད་པ་ནམ་ཡང་འཆག་མེད་དུ་མཛད་དོ། ། ཡང་དེར་སྔར་དང་འདྲ་བའི་རྗེ་བཙུན་འཇམ་པའི་དབྱངས་ཀྱི་སྐུའི་སྣང་བ་དངོས་སུ་གཟིགས་པའི་ཐུགས་ཀའི་ནང་ན་ཕར་རལ་གྲིའི་ཡུ་བ་ཟུག་ཅིང་། རྗེའི་ཐུགས་ཀར་རྩེ་མོ་ཟུག་པ་ལ། བདུད་རྩིའི་རྒྱུན་ཁ་དོག་དཀར་སེར་ཤིན་ཏུ་སྣུམ་པ་འོད་ཀྱི་ཆུ་རྒྱུན་འདྲ་བ་ཞིག་རྗེ་བཙུན་གྱི་ཐུགས་ཀ་ནས་རལ་གྲིའི་སྟེང་ལ་བརྒྱུད་དེ་ནར་རེ་བྱུང་ནས་རྗེའི་ཐུགས་ཀར་ཞུགས་པས་སྐུའི་ནང་ཐམས་ཅད་བདེ་བ་ཆེན་པོ་དཔག་ཏུ་མེད་པས་གང་བ་བརྗོད་པར་མི་ནུས་པ་ཞིག་འཁྲུངས། དེ་དུས་ངོ་མཁྱེན་པ་དང་མི་མཁྱེན་པའི་འཁོར་དུ་མ་ཁ་གདངས་ནས་བཟེད་འདུག་པས། འགའ་ཞིག་གི་ཁར་མང་དུ་འགྲོ་ཞིང་། འགའ་ཞིག་གི་ཁར་ཉུང་ཟད་རེ་དང་། འགའ་ཞིག་གིས་ཁ་གདངས་ཀྱང་ཅུང་ཟད་ཀྱང་མི་འགྲོ་བ་དེ་འདྲའང་འདུག་གསུང་ངོ་། ། མདོར་ན་གནས་དེར་དེ་འདྲ་བའི་དག་པའི་སྣང་བ་དང་ཐུགས་རྒྱུད་ལ་མངོན་པར་རྟོགས་པའི་ཡོན་ཏན་དཔག་ཏུ་མེད་པ་ཞིག་འཁྲུངས་སོ། ། དེ་ནས་རྗེ་བཙུན་འཇམ་པའི་དབྱངས་ཀྱིས་རྫིང་ཕྱིའི་གཙུག་ལག་ཁང་ལ་ཞིག་གསོ་མཛད་ན་བསྟན་པར་ཕན་ཆེ་ཞེས་བསྐུལ་བ་ལ་བརྟེན་ནས་རྫིང་ཕྱིའི་གཙུག་ལག་ཁང་ལ་ཞིག་གསོ་མཛད་པར་བརྩམས་སོ། ། དེ་ཡང་རྫིང་ཕྱིའི་གཙུག་ལག་ཁང་དེ་སྔོན་གར་མི་ཡོན་ཏན་གཡུང་དྲུང་གིས་བཞེངས་པ། ཇོ་བོ་བྱམས་པའི་སྐུ་ལི་ཁྲ་མི་ཚད་ལྷག་ཙམ་ཤིན་ཏུ་བྱིན་རླབས་ཆེ་ཞིང་ངོ་མཚར་བ་བཞུགས་པ་ཡུལ་དུ་བྱུང་བ་ཞིག་འདུག་ནའང་། ཕྱིས་ལྷ་རིས་ཐམས་ཅད་ཉམས་ཤིང་གོགས། ཇོ་བོའི་སྐུ་དེ་ཡང་རྡུལ་ཁྲོད་ན་འོ་བརྒྱལ་ཞིང་། སྐུ་ལ་བྱ་ཐལ་སོགས་མི་གཙང་བས་གོས་པར་གྱུར་པ་གཟིགས་པས་ཐུགས་ཀྱིས་མ་བཟོད་པར་སྤྱན་ཆབ་བྱུང་ཞིང་། དེའི་ཞིག་གསོས་མཛད་པར་དགོངས་ནས་འོལ་ཁ་སྟག་རྩེ་བ་ལ་ཞལ་ཏ་གནང་སྟེ། རྩིག་པ་དང་ཐོག་དང་ཞལ་བ་སོགས་འཆོས་དགོས་རྣམས་ཁོང་གིས་ལེགས་པར་བསྒྲུབས་ཤིང་། དེ་ནས་ལྡེབས་བྲིས་རྣམས་དཔོན་སློབ་རྣམས་རང་གིས་ཆ་རྐྱེན་དང་ཞལ་ཏ་མཛད་ནས་སྒྲུབ་པར་བརྩམས་པའི་ཚེ། དཔོན་སློབ་བཅུ་གཉིས་ཡོད་པའི་ཕྱག་རྫས་གཏོར་ཆ་སོགས་གང་ཡོད་ལ་རིན་བཏབ་པས་ཞོ་བཅུ་གཉིས་ལས་མ་བྱུང་བས་ཇི་ལྟར་མཛད་ཀྱི་རྔོ་མ་ཐོགས་པ་ལ། རྣམ་སྲས་ཀྱི་འཛིན་གཏོར་ཞིག་བཅས་ནས་འཕྲིན་ལས་འཆོལ་བར་དགོངས་པའི་ཚེ་མར་མེད་པ་ལ་བཙུན་པ་ཞིག་གིས་མར་གྲོད་པུ་གང་ཕུལ། དེ་ལ་མར་གྱི་འཛིན་གཏོར་བཅས་ནས་འཕྲིན་ལས་བཅོལ་བས་དེའི་སང་ཉིན་རང་ལ་འབྲོག་པ་འགས་མར་ཐུད་མང་པོ་བཀལ་བྱུང་སྟེ་ཕུལ། དེ་ནས་བཟུང་སྟེ་འབུལ་བ་མང་པོ་རིམ་པ་བཞིན་བྱུང་བས་ཡོ་བྱད་ཀྱིས་མ་འཐོགས། འདིར་མ་ཟད་ཆོས་ལྡན་གྱི་དགོས་པ་ཁྱད་པར་ཅན་གཟིགས་པའི་སྐབས་གཞན་དུའང་རྣམ་སྲས་ལ་མར་གྱི་གཏོར་མ་དང་བཅས་ཏེ་འཕྲིན་ལས་བཅོལ་བས་ཡོ་བྱད་དཔག་ཏུ་མེད་པ་གློ་བུར་དུ་བྱུང་བའི་ལོ་རྒྱུས་མང་དུ་ཡོད་དོ། ། དེ་ནས་ཡར་ཀླུངས་ཕྱོགས་ནས་ཀྱང་ལྷ་བཟོ་བ་ཚོན་རྩི་ཁྱེར་ནས་རི་མོའི་དད་བླངས་ལ་འོངས་པའང་མང་དུ་བྱུང་ངོ་། ། དེ་ནས་རྗེ་བཙུན་འཇམ་པའི་དབྱངས་ཀྱིས་རྗེ་བཙུན་བྱམས་མགོན་གྱི་བསྟོད་པ་རིན་ཆེན་གསལ་བའི་སྒྲོན་མེ་ཞེས་བྱ་བ་རྗེ་བཙུན་བྱམས་མགོན་ལ་ཕྱོགས་བཅུའི་སངས་རྒྱས་ཐམས་ཅད་ཀྱིས་འོད་ཟེར་ཆེན་པོའི་དབང་བསྐུར་བ་ལ་གཞི་གྱིས་ལ་རྩོམས་གསུངས་པ་ལ་བརྟེན་ནས་རྗེ་བཙུན་བྱམས་མགོན་གྱི་བསྟོད་པ་རིན་པོ་ཆེ་གསལ་བའི་སྒྲོན་མེ་མཛད་ཅིང་། དེ་བཞིན་དུ་བདེ་བ་ཅན་དུ་སྐྱེ་བ་འཛིན་པའི་སྨོན་ལམ་ཞིང་མཆོག་སྒོ་འབྱེད་དང་། རང་ཉིད་མ་འོངས་པ་ན་གང་དུ་སྤྲུལ་པའི་སྐུར་འཚང་རྒྱ་བའི་མཛད་པ་སྟོན་པའི་ཞིང་ཡོངས་སུ་གཟུང་བའི་སྨོན་ལམ་ཡང་རྗེ་བཙུན་གྱི་གསུང་གིས་བསྐུལ་ནས། དོན་གྱི་ངོ་བོ་དང་གོ་རིམ་སོགས་རྗེ་བཙུན་གྱིས་གསུངས་པ་ངེས་ཀྱིས་ཚིག་སྦྱོར་གྱིས་བསྒྲིགས་པ་ཡིན་ནོ་གསུངས། དེའི་ཚེ་ལྷ་བཟོ་བ་རྣམས་ཀྱང་བསྙེན་གནས་དང་གསོ་སྦྱོང་གི་སྡོམ་པ་ལ་བཀོད་ནས་འདྲིར་འཇུག་པ་དང་། ལས་བྱེད་པའི་མི་ཕལ་པ་རྣམས་ཀྱང་ཐ་མལ་པའི་ཚིག་སྨྲ་བ་སྤངས་ནས་སྨོན་ལམ་གྱི་ཚིགས་སུ་བཅད་པ་སོགས་ཤས་ཆེར་ཁ་ཏོན་དུ་བྱེད་པས་ལས་སྒྲུབ་པ་ལ་གཞོལ་བར་མཛད་ལ། དེའི་ཚེ་རྗེ་བཙུན་འཇམ་པའི་དབྱངས་ཀྱི་ཞིང་བཀོད་བཞེངས་པའི་སྐྱ་རིས་བཏབ་ཚར་བ་དེ་ལ་རབ་གནས་ཤིག་མཛད་པས་རྗེ་བཙུན་འཇམ་པའི་དབྱངས་ཀྱི་སྐུ་དངོས་སུ་བྱོན་ནས་ཐིམ་སོང་བའི་གཟིགས་སྣང་བྱུང་ཞིང་སངས་རྒྱས་སུམ་ཅུ་རྩ་ལྔའི་སྐུ་འདྲི་བར་བརྩམས་པ་ལ། ལྷ་བཟོ་བ་རྣམས་ཀྱིས་སྐུ་མདོག་ཕྱག་རྒྱ་སོགས་ཇི་ལྟར་འདྲི་བ་མ་ཤེས་ནས་རྗེའི་དྲུང་དུ་ཞུས་པ་དེའི་ཚེ་གསོལ་བ་བཏབ་པས་ཇི་ལྟར་འདྲི་བའི་གོ་རིམ་དང་མཐུན་པར་རྒྱལ་བ་སུམ་ཅུ་རྩ་ལྔའི་སྐུ་རིམ་བཞིན་གཟིགས་པའི་གཟིགས་སྣང་བཞིན་དུ་སྐུ་མདོག་སོགས་འདི་ལྟར་བྲིས་ཤིག་ཅེས་ཞལ་ཏ་གནང་ནས་འདྲིར་བཅུག ། དེར་མ་ཟད་ཞིང་བཀོད་གཞན་རྣམས་ལའང་རབ་གནས་ཀྱི་དུས་སུ་ཡེ་ཤེས་པ་དགུག་གཞུག་མཛད་པ་ན་ལྷ་དེ་དང་དེའི་རྣམ་པ་རེ་ཐིམ་སོང་བའི་སྣང་བ་མ་བྱུང་བ་མེད་ཅེས་གསུང་ངོ་། ། ཞིང་བཀོད་རེ་བྲིས་ཚར་རིམ་གྱིས་རབ་གནས་མཛད་དེ། མར་མེ་ཕུལ་བ་ལ་མ་བཟུང་བ་གཅིག་ཀྱང་མ་བྱུང་། དེ་ལྟར་རི་མོ་རྣམས་ལེགས་པར་གྲུབ་ནས། འཇམ་དཔལ་གསང་ལྡན་གྱི་དཀྱིལ་འཁོར་བཞེངས་ཏེ། རྗེ་ཉིད་ཀྱིས་རབ་ཏུ་གནས་པ་རྒྱས་པར་མཛད་ཅིང་། དེའི་ཚེ་སློབ་མ་སྐལ་ལྡན་བཅུ་ལྷག་པ་ཞིག་ལ་གསང་ལྡན་གྱི་དབང་ཡང་གནང་ལ། རབ་སྟོན་མཛད་པའི་སྐབས་སུ་གདན་ས་ཕན་ཚུན་གྱི་མདོ་སྨད་པ་སོགས་ཀྱིས་གོས་དར་སོགས་འབུལ་བ་མང་དུ་བྱུང་བས་རྟེན་འབུར་དུ་དོད་པ་རྣམས་ཀྱི་ན་བཟའ། ལོགས་བྲིས་ཐམས་ཅད་ལ་ཞལ་ཁེབས་དང་བཅས་པ་ལེགས་པར་གྲུབ་བོ། ། དེའི་ཚེ་རབ་གནས་དངོས་གཞིའི་ཉིན་ཐུགས་དམ་ནར་མར་མཛད་པ་དང་། ལས་བྱེད་དང་བྱ་བའི་དུས་ཚིགས་འཛིན་པ་མང་པོ་ཞིག་གི་ཐུགས་དམ་དང་བྱ་བ་སོགས་སྔར་ལས་ཆེས་སྔ་བའི་ཚོད་ལ་ཟིན་ནས་འདི་ཅི་ཞིག་སྙམ་དུ་གྲིབ་ཚོད་བཙུགས་ཤིང་ཞིབ་ཏུ་བརྟགས་པས། དེ་ཉིན་ཉི་མ་ཚད་ལས་ཆེས་རིང་དུ་གྱུར་པ་ཞིག་ཀུན་གྱི་མཐུན་སྣང་དུ་བྱུང་ངོ་། ། གཞན་ཡང་འགའ་ཞིག་གི་རྨི་ལམ་ན་མཁའ་འགྲོས་རི་མོ་འདྲི་བ་མཐོང་བ་དང་། ལྷོ་བྲག་མཁན་ཆེན་ཕྱག་རྡོར་བའི་གཟིགས་སྣང་ལ། སངས་རྒྱས་རབས་བདུན་ནམ་མཁའ་ལ་བྱང་ཕྱོགས་སུ་འབྱོན་པ་གཟིགས། གང་དུ་བཞུད་ཅེས་གསོལ་བས་རྫིང་ཕྱིའི་རབ་གནས་ལ་སྤྱན་འདྲེན་གྱིན་འདུག་ཅེས་གསུང་བའི་ཚེས་གྲངས་དང་རབ་གནས་མཛད་པའི་ཚེས་གྲངས་གཉིས་ཕྱིས་བརྩིས་པས་མཐུན་པར་བྱུང་ངོ་། ། དེ་ནས་ལྷོ་བྲག་མཁན་ཆེན་ནམ་མཁའ་རྒྱལ་མཚན་པས་འདིར་ཅིག་ཅི་ནས་ཕྱག་ཕེབས་པར་ཞུ། བཀའ་འདྲི་ཞུ་བའི་འདོད་པ་ཡང་ཡོད། སྐུ་ཚེ་བསྲིང་བའི་རྟེན་འབྲེལ་སྒྲིག་པ་སོགས་ཀྱི་སྙན་བསྐུལ་འདྲ་ཡང་འབུལ་བ་ལགས། ཞེས་པའི་གསུང་ཡིག་ནན་ཆེར་བྱུང་ཞིང་རྗེ་རང་ཉིད་ཀྱང་ལྷོ་བྲག་མཁན་ཆེན་གྱི་དྲུང་ནས་བཀའ་གདམས་གདམས་ངག་པ་ནས་བརྒྱུད་པའི་ལམ་རིམ་གྱི་ཁྲིད་སོགས་ཆོས་བཀའ་ཅི་རིགས་གསན་པར་བཞེད་ནས་ལྷོ་བྲག་བྲའོ་དགོན་པར་བྱོན། དེའི་ཚེ་ལྷོ་བྲག་མཁན་ཆེན་དང་རྗེ་རིན་པོ་ཆེ་གཉིས་ཀ་ལ་དག་པའི་གཟིགས་སྣང་ངོ་མཚར་བ་མང་དུ་བྱུང་བ་ནི་ལྷོ་བྲག་མཁན་ཆེན་གྱི་ཞལ་ནས་བདག་གིས་ལོ་བདུན་ཅུ་ལོན་དུས་ལྷ་མོ་དཀར་མོ་ཞིག་ན་རེ་བྱམས་པས་བྱིན་གྱིས་བརླབས་པའི་གང་ཟག་འཇམ་དཔལ་དབྱངས་དང་གཉིས་སུ་མེད་པ། ལྷ་མོ་དབྱངས་ཅན་མས་རིག་པ་སྟེར་བར་བྱེད་པ་ཕུན་སུམ་ཚོགས་པ་ཅིག་དང་སྐྱེ་བ་བཅོ་ལྔའི་གོང་ནས་འབྲེལ་པ་ཡོད་ཅིང་། ཕན་ཚུན་དཔོན་སློབ་ཏུ་འབྲེལ་པ་ཅིག་འོང་བ་ཡོད་པས། དེ་ལ་ཆོས་བཀའ་ལ་བསྲིས་མ་འཇུག་པར་བྱིན། ཕར་ཡང་ཆོས་ཞུས་ཟེར་བ་ཅིག་བྱུང་བས་བདག་མོས་གུས་དཔག་ཏུ་མེད་པ་སྐྱེས་སོ། ། ཡང་ལན་ཅིག་མགོན་པོ་བྱམས་པ་འབྱོན་གྱིན་ཡོད་ཟེར་བའི་སྐད་ལྷང་བ་ཅིག་བྱུང། དེ་དུས་ཆོས་རྗེ་དཀའ་བཞི་པ་རྒྱ་མོ་རི་འཕྲེད་ལ་ཕེབས་པའི་ཚོད་དུ་འདུག ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་དུས་དྲུག་པའི་ཚེས་བཞིའི་ཉིན་ལྷོ་བྲག་སྒྲོ་བ་དགོན་པར་ཕྱགས་ཕེབས་བྱོན་པ་བདག་གིས་བསྲུ་བ་ལ་ཕྱིན་པས། རྗེ་བཙུན་འཇམ་དབྱངས་འོད་ཀྱི་དྲ་བས་མཛེས་པ་ཞིག་ཕེབས་བྱུང་བར་མཐོང་། རྗེ་ཙོང་ཁ་པས་བདག་ཕྱག་ན་རྡོ་རྗེར་དངོས་སུ་གཟིགས་ཤིང་། དེའི་གསུས་པའི་དཀྱིལ་འཁོར་ཤིན་ཏུ་ལྡིར་ཞིང་བཻཌཱུརྱ་ལྟར་དྭངས་པ་སྦྲུལ་སྔོ་ཁྲས་སྤྲས་པ་གཟིགས་འདུག ། དེ་ནི་སྔར་ལས་ཀྱང་གདུལ་བྱ་འཕྲིན་ལས་རྒྱས་སུ་འགྲོ་བའི་བརྡ་ཡིན། དེའི་ནུབ་མོ་རྗེ་ཙོང་ཁ་པས་བླ་མའི་རྣལ་འབྱོར་ཞིག་ཞུ་གསུང་། བདག་གིས་བླ་མའི་རྣལ་འབྱོར་ཞིག་ཕོག་པས། ཕྱག་ན་རྡོ་རྗེ་བྱོན་ནས་རྗེ་ཙོང་ཁ་པ་ལ་ཐིམ་སོང་། ཡང་ཚེས་བཅོ་ལྔའི་ཐོ་རངས་བྱམས་པ་ཉིད་ལ་བསླབ་བཏུས་ཞུས་ཟེར་བ་ཞིག་བྱུང་། རྗེ་ཙོང་ཁ་པ་ལ་བསླབ་བཏུས་གསུང་བར་ཞུ་ཞུས་པས། རྗེ་ཙོང་ཁ་པས་ཡི་དམ་ལྷ་དེ་སྐད་གསུང་ངམ་གསུང་། གསུང་ལགས་ཞུས་པས་བསླབ་བཏུས་གསུངས། ཆོས་ཉན་དུས་མཐོང་སྣང་ལ་རྗེ་ཙོང་ཁ་པའི་དབུའི་སྟེང་ན་རྗེ་བཙུན་བྱམས་པ་བཞུགས། དཔུང་པ་གཡས་ན་འཇམ་དབྱངས་དཀར་པོ། གཡོན་ན་ལྷ་མོ་དབྱངས་ཅན་བཞུགས་འདུག ། མགོན་པོ་ཕྱག་བཞི་པ་དང་ཕྱག་དྲུག་པས་གཙོ་བྱས་པའི་ཆོས་སྐྱོང་དང་མཁའ་འགྲོ་བསམ་གྱིས་མི་ཁྱབ་པས་བསྐོར་ནས་འདུག་གོ ། གཞན་ཡང་དཀར་ཕྱོགས་ལ་དགའ་བའི་ལྷ་འདྲེའི་ཚོགས་མང་པོ་ཆོས་ཉན་ཞིང་འདུག་པས་མོས་གུས་ཐུན་མོང་མ་ཡིན་པ་སྐྱེས་སོ། ། སོ་སོ་འབྲང་མའི་དབང་དང་སེམས་བསྐྱེད་ཀྱང་ཞུས་སོ། ། རྗེ་ཙོང་ཁ་པས་བདག་ལ་ཚུར་ཆོས་ཞུས་པ་ལ་བྱང་ཆུབ་ལམ་ཀྱི་རིམ་པའི་བཀའ་བབས་གཉིས་ཀྱི་ཁྲིད། ཕྱག་ན་རྡོ་རྗེས་གསུངས་པའི་གསང་བ་བསམ་གྱིས་མི་ཁྱབ་པའི་ཁྲིད་ལུང་རྗེས་གནང་། ཕྱག་རྡོར་སྐུ་ལྔའི་རྗེས་གནང་། ཞུ་ལན་རྡོ་རྗེ་ཕྲེང་བ། ཞུ་ལན་གཅེས་ཕྲེང་གི་ལུང་རྗེས་གནང་། ཕྱག་ན་རྡོ་རྗེ་ཁྱུང་ལྔའི་དབང་དང་རྗེས་གནང་། དྲེགས་པ་ཀུན་འདུལ་གྱི་དབང་། རྟ་མགྲིན་དཔའ་བོ་གཅིག་པ་ཞལ་གསུམ་ཕྱག་དྲུག་པའི་རྗེས་གནང་སོགས་བྱས་པའི་དུས། རྗེས་གནང་དང་དབང་གི་བྱ་བ་ཌཱ་ཀཱི་རྣམས་ཀྱིས་བྱེད་པ་དང་། བདུད་རྩི་ཀཱ་པ་ལ་གང་རྗེ་ཙོང་ཁ་པ་ལ་ཕུལ་བས་དེར་ལྦུ་བ་ཤར་བའི་ནང་དུ་འཇམ་དབྱངས། ཛམ་ལྷ་རྣམ་སྲས་རྣམས་རེ་རེ་བཞུགས་པ་གཟིགས་ཤིང་རྟགས་ངོ་མཚར་ཅན་མང་ཞིག་བྱུང་སྟེ་བཤད་ཀྱིས་མི་ལང་ངོ་ཞེས་གསུངས། དེ་དུས་རྗེ་རིན་པོ་ཆེས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ལ་དགེ་བའི་བཤེས་གཉེན་སྤྱན་སྔ་བ་ནས་བྱ་ཡུལ་པ་ལ་བརྒྱུད་པ་དང་དགོན་པ་བ་ནས་སྣེའུ་ཟུར་པ་ལ་བརྒྱུད་པའི་བཀའ་གདམས་གདམས་ངག་པའི་ལམ་རིམ་གྱི་ཁྲིད་རྒྱས་པར་གསན་ཏེ་ལྷོ་བྲག་མཁན་ཆེན་ལ། སྤྱན་སྔ་བ་ནས་བྱ་ཡུལ་པ་ལ་བརྒྱུད་པ་དང་། དགེ་བཤེས་དགོན་པ་བ་ནས་སྣེའུ་ཟུར་པ་ལ་བརྒྱུད་པའི་ལམ་རིམ་གཉིས་ཀ་མངའོ། ། ལྷོ་བྲག་མཁན་ཆེན་པ་དེ་ནི་གསང་བའི་བདག་པོ་ཕྱག་ན་རྡོ་རྗེས་རྒྱུན་དུ་རྗེས་སུ་བཟུང་སྟེ་བྱ་བ་ཐམས་ཅད་གསང་བདག་ལ་ཞུས་ཏེ་བྱེད་པ་ཞིག་ཡིན་པས་ལྷོ་བྲག་གྲུབ་ཆེན་ཞེས་གྲགས་ཤིང་། ལྷོ་བྲག་ཕྱག་རྡོར་བ་ཞེས་ཀྱང་གྲགས་སོ། ། དེ་ལྟ་བུའི་བླ་མ་བདག་ཉིད་ཆེན་པོ་དེས་རྗེ་རིན་པོ་ཆེ་འདིའི་རྣམ་ཐར་ལ་ཡིད་ཆེས་ཀྱི་དད་པ་ཐོབ་སྟེ་བསླབ་པ་ཀུན་ལས་བཏུས་པ་ཞུ་བར་མཛད། བསླབ་བཏུས་ཞུ་བའི་ཚེ་ལྷོ་བྲག་མཁན་ཆེན་འཁོར་དགེ་འདུན་མང་པོ་དང་བཅས་ཞུས་ཤིང་། ལྷོ་བྲག་མཁན་ཆེན་རང་ཉིད་གཅིག་པུས་གྲ་ལྔའི་དབང་དང་དབྱངས་ཅན་མའི་རྗེས་གནང་སོགས་ཟབ་ཆོས་མང་དུ་གསན། དེའི་ཚེ་རྗེ་རིན་པོ་ཆེ་ཟབ་མོ་དབུ་མའི་ལྟ་བ་མཐར་ཐུག་པ་དང་། གསང་བ་འདུས་པའི་སྒྱུ་ལུས་སོགས་མདོ་སྔགས་གཉིས་ཀའི་ལམ་གྱི་དཀའ་གནས་མཐར་ཐུག་པ་འགའ་ཞིག་རྩད་དཔྱོད་ཕྱིར་རྒྱ་གར་དུ་སློབ་དཔོན་ཀླུའི་བྱང་ཆུབ་དང་གྲུབ་ཆེན་མི་ཏྲ་སོགས་མཇལ་བར་ཕེབས་བཞེད་ནས་དཔོན་སློབ་བཅུ་གསུམ་རྟེན་འབྲེལ་བསྒྲིགས་ཏེ་ཕེབས་རྩིས་མཛད་པ་ན་གསང་བདག་ཕྱག་ན་རྡོ་རྗེའི་གསུང་ལྟར་ལྷོ་བྲག་མཁན་ཆེན་ནམ་མཁའ་རྒྱལ་མཚན་གྱིས་རྗེ་རིན་པོ་ཆེ་རྒྱ་གར་དུ་ཕེབས་ན་སློབ་དཔོན་ཀླུའི་བྱང་ཆུབ་དང་གྲུབ་ཆེན་མི་ཏྲ་སོགས་དང་དངོས་སུ་མཇལ་ནས་ཡོན་ཏན་ཁྱད་པར་ཅན་བརྙེས་པ་དང་། རྒྱ་གར་རྡོ་རྗེ་གདན་གྱི་མཁན་པོ་མཛད་ནས་སླར་བོད་དུ་འབྱོན་མི་ཐུབ་པ་དང་། འཁོར་སེམས་དཔའ་ཆེན་པོ་འདི་དག་ཚད་པས་གུམ་པར་འགྱུར་བ་སོགས་དགག་བྱ་མང་པོ་མཆིས་པས་རྒྱ་གར་དུ་མི་འབྱོན་པར་བོད་རང་དུ་བཞུགས་པ་ཞིག་ཅིས་ཀྱང་མཁྱེན་ཞེས་ནན་ཆེན་པོས་གསོལ་བ་བཏབ་རྗེ་ཉིད་ཀྱིས་ཀྱང་དོན་དེ་ལྟར་དུ་དགོངས་ནས་རྒྱ་གར་དུ་ཕེབས་པ་ཤོལ་ཏེ་བོད་དུ་བཞུགས་པར་མཛད་པས་ན་ལྷོ་བྲག་མཁན་ཆེན་ནམ་མཁའ་རྒྱལ་མཚན་པ་ནི་བྱང་ཕྱོགས་ཁ་བ་ཅན་གྱི་གདུལ་བྱ་རྣམས་ལ་བཀའ་དྲིན་མཚུངས་པ་མེད་པ་ཞིག་གོ ། རྗེ་རིན་པོ་ཆེ་རྒྱ་གར་ལ་འབྱོན་པར་ཆས་པའི་དུས་དེའི་ཚེ་རྗེ་བཙུན་འཇམ་པའི་དབྱངས་ཀྱིས་རྫིང་ཕྱིའི་ཇོ་བོ་ལ་དགེ་སྦྱོང་གི་རྟགས་ཚང་མའི་སྐྱེས་འབུལ་བ་དང་བཅས་པའི་བསྟོད་ཅིང་གསོལ་བ་འདེབས་པའི་ཚིག་ཚངས་པའི་ཅོད་པན་ཞེས་བྱ་བ་དོན་གྱི་རིམ་པ་འདི་ལྟར་གྱིས་ལ་རྩོམས་ལ་ཕུལ་ཅིག་དང་། ཕྱིས་འདུལ་བའི་བསླབ་ཁྲིམས་རྣམ་པར་དག་པ་ལ་བརྟེན་ནས་བསྟན་པ་ལ་ཕན་པ་རྒྱ་ཆེན་པོ་འབྱུང་བའི་རྟེན་འབྲེལ་ཡོད་དོ། ། ཞེས་གསུང་བ་ལ་བརྟེན་ནས་དེ་ལྟར་དུ་བརྩམས་ཏེ་ཕུལ་ལོ། ། ཕྱིས་ཀྱང་རྗེ་བཙུན་གྱི་གསུང་གིས་ནན་གྱིས་བསྐུལ་ཞིང་། བསྟན་པའི་རྩ་བ་ཡིན་པའི་ཐུགས་ངེས་ཤུགས་དྲག་པོ་འཁྲུངས་པ་དང་། བསྟན་པ་ཉམས་པ་ཐུགས་ཀྱིས་བསྲན་པར་མ་བཟོད་པའི་སྟོབས་ཀྱིས་འདུལ་བའི་ལག་ལེན་ཕྱིར་བཅོས་ཡན་ཆད་ཡོངས་སུ་རྫོགས་པ་སྔ་མའི་སྲོལ་ཀ་ཙམ་ལ་མ་ལྟོས་པར་ལེགས་པར་འཛུགས་པར་མཛད་དོ། ། དོན་འདི་ལ་རྗེ་ཉིད་ཀྱི་ཞལ་ནས་བསྟན་པའི་ནང་མཛོད་འདུལ་བའི་བསླབ་ཁྲིམས་ཉམས་པ་སེམས་ཀྱིས་མ་བཟོད་ནས་རུང་ཆུ་གདབ་པ་ཡན་ཆད་འདུལ་བའི་བཅས་མཚམས་ཕྲ་རགས་ཐམས་ཅད་གསར་དུ་བཙུགས་པ་ཡིན་གྱི། གཞན་ལས་ཁྱད་པར་ཐོན་པ་ཞིག་དོན་དུ་གཉེར་ནས་བྱས་པ་ག་ལ་ཡིན་ཞེས་གསུང་ངོ་། ། དེ་ནས་རྗེ་རིན་པོ་ཆེ་གཉལ་ལ་བྱོན། གཉལ་ལོ་རོར་ཕེབས་ནས། ལོ་རོ་སྟོང་སྟག་ཏུ་ཟླ་བ་ལྔ་ཙམ་བཞུགས། དེར་དགེ་བའི་བཤེས་གཉེན་ཆེན་པོ་བྲིན་ལས་པས་མཛད་པའི་བསྟན་རིམ་ཆེན་མོ་གདན་དྲངས་བྱུང་བ་ལ་བསུ་བ་མཛད། མཆོད་པ་ཕུལ། ཞིབ་པར་གཟིགས་པས་ཐུགས་ངེས་ཆེན་པོ་འཁྲུངས། དེར་བསྟན་རིམ་ཚར་གཅིག་གསུངས། སླར་ཡང་བྱ་བྲལ་ལ་བྱོན་པ་ཉིད་ནས་རྒྱལ་བའི་གསུང་རབ་མཐའ་དག་གི་དོན་ཚིག་སྤྱི་ཙམ་ལ་མ་ལུས་པར་ད་ལྟ་ལས་དང་པོ་བ་ཉིད་ནས་རང་གི་རྒྱུད་ལ་བསྐོར་ནས་ཉམས་སུ་བླངས་པས་ཆོག་པའི་ཚུལ་ལམ་གྱི་ངོ་བོ། གྲངས་ངེས་གོ་རིམ་སོགས་ཐམས་ཅད་ཤིང་རྟ་ཆེན་པོ་རྣམས་ཀྱི་ལམ་སྲོལ་དང་མཐུན་པ་ཞིག་མེད་དུ་མི་རུང་བར་གཟིགས་ནས་བླ་མ་ཡི་དམ་ལ་གསོལ་བ་ཤུགས་དྲག་ཏུ་བཏབ་ཅིང་། གསུང་རབ་དགོངས་འགྲེལ་དང་བཅས་པ་མཐའ་དག་ལ་ཞིབ་ཏུ་དཔྱོད་པ་རྒྱུན་མི་འཆད་དུ་མཛད་པས། ཐོག་མར་བཤེས་གཉེན་བསྟེན་པ་ནས་འགོ་བརྩམས་ཏེ་མཐར་ཞི་གནས་དང་ལྷག་མཐོང་ལ་བསླབ་ཚུལ་གྱི་བར་ཐེག་པ་ཆེ་ཆུང་ཐུན་མོང་དང་། ཐེག་ཆེན་ཐུན་མོང་མ་ཡིན་པའི་ལམ་སྤྱི་དང་། དེའི་སྟེང་དུ་སྔགས་ཀྱི་ཐབས་མཁས་ཀྱི་ཁྱད་པར་ཐུན་མོང་མ་ཡིན་པ་རྣམས་བསྣོན་པ་བཏབ་ནས་ཉམས་སུ་ལེན་ཚུལ་གྱི་ལམ་གྱི་ངོ་བོ་དང་གོ་རིམ་དང་གྲངས་ངེས་ལ་ཕྱིན་ཅི་མ་ལོག་པའི་ངེས་པ་འཁྲུངས་ནས་གསུང་རབ་དགོངས་འགྲེལ་དང་བཅས་པ་གང་ལའང་ཁོལ་བཏོན་རེ་ཙམ་མ་ཡིན་པར་ཐམས་ཅད་གང་ཟག་གཅིག་འཚང་རྒྱ་བའི་ཆ་རྐྱེན་དུ་སྦྱར་ནས་ཉམས་ལེན་གྱི་ཕྱོགས་སུ་འཁྱེར་ཤེས་པ། དེ་ཡང་བཤད་པ་ཙམ་མ་ཡིན་པར་ད་ལྟ་བློ་མཐོ་དམན་དབང་པོ་རབ་འབྲིང་ཐ་མ་གང་ཡིན་གྱི་རྒྱུད་ལ་བསྐོར་ནས་དམིགས་རྣམ་གྱི་རིམ་པར་ཉམས་སུ་ལེན་པའི་ལག་ལེན་དུ་འཁྱེར་བདེ་ཞིང་འཆུན་ཆེ་ལ། སེམས་འདུལ་བའི་རིམ་པ་འབའ་ཞིག་ལྷུར་མཛད་པའི་སྒོ་ནས་གདུལ་བྱ་མཆོག་དམན་ཐམས་ཅད་ཇི་ལྟར་བཀྲི་བའི་རིམ་པ་ལ་མངའ་བརྙེས་ཤིང་། གངས་རིའི་ཁྲོད་འདིར་ཚུལ་འདི་ནི་སེམས་དཔའ་ཆེན་པོ་དཔལ་མར་མེ་མཛད་ཡེ་ཤེས་ཀྱི་གདམས་པ་བྱང་ཆུབ་ལམ་གྱི་རིམ་པའི་མཚན་ཉིད་དང་སྔགས་ཀྱི་ཐེག་པའི་ལམ་གྱི་རིམ་པ་ཕྱིན་ཅི་མ་ལོག་པར་གཏན་ལ་ཕབ་པའི་ཤིང་རྟའི་སྲོལ་འདི་ཉིད་ཡ་མཚན་པར་གཟིགས་ཤིང་དེའི་སྲོལ་ལ་བརྟེན་ནས་ཐུགས་ངེས་ཆེར་འཁྲུངས། དཔལ་ལྡན་ཨ་ཏི་ཤའི་གདམས་པའི་སྲོལ་ལ་ཡང་དགེ་བའི་བཤེས་གཉེན་ཆེན་པོ་པོ་ཏོ་བ་སོགས་ཀྱི་གདམས་པ་ལ་ཡང་རྨད་དུ་བྱུང་བའི་ཐུགས་ངེས་ཡོད་མོད་ཀྱི། འོན་ཀྱང་ལྷག་པར་བླ་མ་ལོ་ཙཱ་བ་ཆེན་པོ་བློ་ལྡན་ཤེས་རབ་ཀྱིས་མཛད་པའི་བསྟན་རིམ་དང་། དེའི་སྲས་ཀྱི་ཐུ་བོ་དཔལ་ལྡན་གྲོ་ལུང་པས་མཛད་པའི་བསྟན་རིམ་ཆེན་མོ་སོགས་དང་། རང་ཉིད་ཀྱིས་དགོངས་པའི་ལམ་གྱི་རིམ་པ་རྣམས་མཐུན་ཤས་ཆེ་ཞིང་སྲོལ་ཕུལ་དུ་བྱུང་བར་གཟིགས་སོ། ། དཔལ་ལྡན་ཨ་ཏི་ཤའི་གདམས་པ་དེ་ཡང་གསུང་རབ་དང་དགོངས་འགྲེལ་གྱི་བསྟན་བཅོས་མན་ངག་མཐའ་དག་ལམ་གྱི་རིམ་པ་གཅིག་ཏུ་དྲིལ་ནས་སྟོན་པར་སྣང་བས་འཆད་ཤེས་པ་དང་ཉན་ཤེས་པ་གཉིས་ཀྱིས་བཤད་ཅིང་ཉམས་སུ་བླངས་ན་མན་ངག་ཆང་ཅུང་དུ་མ་ཟད་གསུང་རབ་མཐའ་དག་གི་གུང་འགྲིག་ནས་འོང་བར་སྣང་བས། ལམ་ཐུན་མོང་པ་ལ་བློ་སྦྱོང་བ་ནས་འཁྲིད་དགོས་བའི་གདུལ་བྱ་རྣམས་ལ་ཁྲིད་ཀྱི་རྣམ་གྲངས་མང་པོ་སྟོན་པ་མ་བྱས་གསུང་ཞིང་། འདི་ཁོ་ནའི་སྟེང་ནས་འཁྲིད་པར་མཛད་དོ། ། དེ་ནས་རྗེ་རིན་པོ་ཆེ་དཔོན་སློབ་སུམ་ཅུ་ལྷག་ཙམ་གྱིས་ཙ་རི་མ་ཆེན་ལ་བྱོན། ཞག་འགའ་བཞུགས་རི་པ་རྣམས་ལ་མང་ཇ་གནང་སྦྱིན་དང་བཅས་པ་མཛད། རི་ཁྲོད་གཟིགས་ཤིང་བདེ་མཆོག་གི་བདག་འཇུག་ལ་སོགས་པ་མཛད་ངོ་མཚར་བའི་ལྟས་མང་དུ་བྱུང་། ཙ་རིར་ཕེབས་དུས་གནས་འདིར་ཡང་ནང་མཆོད་དང་བཅས་པའི་ཚོགས་འཁོར་རང་བྱེད་པ་མི་འོང་དགོངས་པ་ཞིག་ཐུགས་ལ་འཁྲུངས་པས། དེ་མ་ཁད་ནས་ཞབས་ཀྱི་ཁོལ་བུ་ཞིག་ལ་གློ་བུར་དུ་ཚེར་མ་ཟུག་པ་འདྲ་བའི་ཚ་ཟུག་དང་བསྙུན་ཟུག་ཆེན་པོ་རང་ཡོད་པ་སྐྲངས་པ་ནག་པོ་ཞིག་བྱུང་བ་ལ། སྐབས་ཤིག་ཏུ་ནང་མཆོད་དང་བཅས་པའི་བདེ་མཆོག་གི་ཚོགས་འཁོར་ཞིག་མཛད་པས་ཚོགས་འཁོར་མ་གྲོལ་ཙམ་ནས་ཟུག་མེད་པར་དེ་མ་ཁད་དྭངས་སོ། ། དེ་ནས་ཙ་རི་ནས་ཡར་ཕེབས་ཏེ་གཉལ་ལ་འབྱོན་པའི་ལམ་དུ་མོ་ལའི་ལ་རྩར་ཞག་བཞུགས་མཛད་པའི་ནུབ་རྗེ་བཙུན་བྱམས་མགོན་གྱི་སྐུ་ཤིན་ཏུ་ཆེ་བ། ལྷུན་པོ་ལྟར་མངོན་པར་བརྗིད་ཅིང་ཉི་མ་ལྟར་གཟི་བརྗིད་འབར་བ་ཞིག་གིས་རིགས་ཀྱི་བུ་ཁྱོད་སངས་རྒྱས་འཇིག་རྟེན་དུ་བྱོན་པ་འདྲ་བ་ཞིག་འོང་བས་ཤེས་པར་བྱོས་ཤིག་ཅེས་སེང་གེའི་སྒྲས་དབུགས་ཕྱུང་ཞིང་སྤྲོ་བ་བསྐྱེད་པར་མཛད་པའི་སྣང་བ་དངོས་སུ་བྱུང་གསུང་ངོ་། ། དེ་ནས་གཉལ་སྨད་སེང་གེ་རྫོང་ན་བཞུགས་པའི་དུས་སུ་དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་ལ་སོགས་པའི་ལམ་གྱི་གནད་རྣམས་ལ་དཔྱད་པ་མང་དུ་མཛད་པས་མ་འཁྲུལ་བའི་ངེས་པ་འཁྲུངས་ཤིང་འཕྱུག་མེད་ཀྱི་གཟེར་ཐེབས་ནས་མི་འཇིགས་པ་བརྙེས། བཅོམ་ལྡན་འདས་དུས་ཀྱི་འཁོར་ལོ་དཔའ་བོ་གཅིག་པ་ཞིག་གི་གཟིགས་སྣང་ནར་མར་འོང་ཞིང་ནུབ་གཅིག་གི་མནལ་ལམ་དུ་དུས་ཀྱི་འཁོར་ལོའི་ཞལ་ནས་ཁྱོད་ཀྱིས་དུས་ཀྱི་འཁོར་ལོ་འདི་ལ་རྒྱལ་པོ་ཟླ་བ་བཟང་པོ་བྱོན་པ་འདྲ་བ་ཞིག་འོང་བར་ཡོད་དོ་ཞེས་གསུང་། གཉལ་སྨད་སེང་གེ་རྫོང་དུ་བཞུགས་དུས་གསེར་ཕྱེ་འབུམ་པ་ལ་མཆོད་པ་ཆེན་པོ་ཕུལ་ཞིང་དེར་འདུལ་བའི་ཆོས་མང་དུ་གསུངས། ལག་ལེན་ཕྲན་ཚེགས་རུང་ཆུ་འདེབས་པ་ཡན་ཆད་ཞིབ་པར་མཛད། དེའི་ཚེ་རྗེའི་ཞལ་ནས་ཡོན་ཏན་ཐམས་ཅད་ཀྱི་གཞི་མ་ཁས་བླངས་པའི་ཚུལ་ཁྲིམས་དག་དགོས་པ་ཡིན། ངེད་ལ་ནི་སོ་སོར་ཐར་པའི་ཕམ་ལྷག་སྦོམ་པོ་དང་བཅས་པའི་ལྟུང་བ་འོང་མ་མྱོང་། ལྟུང་བྱེད་ཉེས་བྱས་དང་བཅས་པ་འགའ་རེ་བྱུང་བ་རྣམས་བཤགས་བསྡམས་བྱེད་གསུང་ནས་མཛད་ཅིང་འཁོར་རྣམས་ཀྱང་ཚུལ་དེ་ཉིད་ལ་སྦྱོར་བར་མཛད་དེ། གངས་རིའི་ཁྲོད་འདིར་སངས་རྒྱས་ཀྱི་བསྟན་པ་ཆེས་ཆེར་ཉམས་པར་གྱུར་པ་གཏིང་ནས་མ་བཟོད་པའི་ཐུགས་ཀྱིས་བསྟན་པ་རིན་པོ་ཆེའི་རྨང་དཀའ་བ་ཆེན་པོས་གཞི་ནས་འཛུགས་པར་མཛད་པས་ཕྱི་རབས་གངས་རིའི་ཁྲོད་ཀྱི་སྐྱེ་བོ་ཡོངས་ལ་རྒྱལ་བ་ཉིད་དང་མཚུངས་པར་བཀའ་དྲིན་ཆེ་བ་ཡིན་ནོ། ། གཉལ་དུ་བཞུགས་དུས་དབྱངས་ཅན་མའི་གསུང་གིས་དགུང་ལོ་ལྔ་བཅུ་རྩ་བདུན་ཐུབ་དེ་བར་རང་གཞན་གྱི་དོན་དཔག་ཏུ་མེད་པ་འགྲུབ་གསུང་བ་ལ། རྗེ་བཙུན་མ་རྣམ་པར་རྒྱལ་མ་སོགས་ལ་གསོལ་བ་བཏབ་ཅིང་བསྙེན་བསྒྲུབ་མང་དུ་བྱས་པས་དེ་ལས་རིང་ཞིག་ཐུབ་པར་མི་འགྱུར་རམ་ཞེས་ཞུས་པས་དེ་ཐམས་ཅད་ཕལ་ཆེར་སྔོན་གྱི་སྨོན་ལམ་གྱི་ཤུགས་དང་། ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་ཐུགས་འདུན་ཆེས་པ་ལ་སོགས་པའི་དབང་གིས་བློ་གྲོས་གོང་ནས་གོང་དུ་འཕེལ་བའི་རྒྱུ་འབའ་ཞིག་ཏུ་སོང་བས་སྐུ་ཚེ་ལ་དེ་ཙམ་དུ་ཕན་པ་མ་བྱུང་ཞེས་གསུང་བ་ཞིག་བྱུང་། རྗེ་བཙུན་འཇམ་པའི་དབྱངས་ཀྱི་སྐུ་དང་གསུང་གི་སྣང་བ་རྒྱུན་དུ་འབྱུང་བའི་གྲུབ་ཆེན་འཇམ་དཔལ་རྒྱ་མཚོ་བ་ལ་རྗེ་བཙུན་འཇམ་པའི་དབྱངས་ཀྱིས་ད་ཕན་ཆད་སྐུ་ཚེའི་བར་ཆད་ལ་སྒོས་སུ་དམིགས་པའི་བཟློག་ཐབས་དང་། སྐུ་ཚེ་བསྲིང་བའི་ཕྱི་ནང་གི་རྟེན་འབྲེལ་ལེགས་པར་བསྒྲིགས་ན་དཀའ་སེ་བ་ཞིག་ལ་བཟློག་པར་ནུས་སོ་ཞེས་གསུང་བ་བྱུང་། ཡང་གཉལ་གྱི་སེང་གེ་རྫོང་ན་བཞུགས་དུས་རྗེ་བཙུན་འཇམ་པའི་དབྱངས་ལ། སྔགས་མཚན་ཉིད་ཀྱི་ལམ་གྱི་ངོ་བོ་དང་། གོ་རིམ་གྲངས་ངེས་སོགས་དང་ཁྱད་པར་ཞི་ལྷག་གི་ཉམས་ལེན་གྱི་གནད་རྣམས་ཞུས་པས། ད་ངེད་ལ་ཡང་ཡང་འདྲི་མི་དགོས། གཞུང་ཆེན་མོ་རྣམས་ལ་ཞིབ་པར་དཔྱོད་དང་། ངེད་ཀྱིས་བསྟན་པ་རྣམས་དང་ཕལ་ཆེར་མཐུན་པ་ཤ་སྟག་འོང་། མི་མཐུན་པ་རེ་ཙམ་བྱུང་ན་འདོར་སྦུས་གདམས་ངག་ཏུ་འདོད་པ་རྣམས་ལ་འབབ་ཀྱི་གཞུང་ཆེན་མོ་རྣམས་འདོར་དུ་མི་རུང་ངོ་ཞེས་གསུང་ཞིང་། མན་ངག་གིས་ལྡེ་མིག་བྱས་ནས་མདོ་རྒྱུད་དགོངས་འགྲེལ་དང་བཅས་པ་རྣམས་ལ་དཔྱད་པས། དཔྱད་པ་རྫོགས་པའི་ཚད་ནི་ལུང་རིགས་ཀྱི་ལམ་ནས་དྲངས་པའི་ངེས་པ་རྙེད་ནས་བློས་དོན་དེར་ཐག་བཅད་པ་ན་གཏིང་ན་མི་བདེ་བའི་རྣམ་པ་མེད་པ་ཅིག་འོང་། དེ་དུས་དོན་དེ་ལ་དཔྱད་པ་རྫོགས་པ་ཡིན་ནོ་ཞེས་གསུང་སྟེ། ཕྱིན་ཆད་འཁྲུལ་མེད་རང་ཞིག་བྱུང་གསུང་ངོ་། ། དེ་ནས་དཔྱིད་གཉལ་གྱི་སྒང་ཆུང་དུ་བཞུགས། དགེ་འདུན་རྣམས་ལ་ཆོས་མང་དུ་གསུངས། གྲོང་པ་སྐྱེ་བོའི་ཚོགས་དཔག་ཏུ་མེད་པ་དད་པ་དྲག་པོ་དང་བཅས་ཏེ་འདུས་པ་ཐམས་ཅད་ཀྱང་བསྙེན་གནས་དང་སྐྱབས་འགྲོ་སོགས་འཕྲལ་དང་ཡུན་དུ་ཕན་པའི་དགེ་བ་ལ་ལེགས་པར་སྦྱར་ཞིང་། རྗེ་ཉིད་ཀྱིས་ཐོག་མ་མཛད་དེ་ཐམས་ཅད་བསྐུལ་ནས་ཚྭ་ཚྭ་འབུམ་ཐེར་མང་པོ་བཏབ་ཅིང་ཕྱིས་ཀྱང་ཚུལ་དེ་ཉིད་སྒྲུབ་པ་ལ་སྦྱོར་པར་མཛད་དོ། ། དེ་ནས་གཉལ་སྟོད་རབ་ཀྲོང་དུ་བྱོན། དབྱར་བཞུགས་མཛད། གནས་དེར་སྲས་ཀྱི་ཐུ་བོ་རྗེ་དར་མ་རིན་ཆེན་གྱིས་མཇལ། རྣམ་འགྲེལ་གྱི་ལམ་ཁྲིད་གསན་པས་རྗེ་རིན་པོ་ཆེའི་གསུང་ལ་ཡིད་ཆེས་ཀྱི་དད་པ་བརྟན་པོ་རྙེད་ནས་དེ་ཕྱིན་རྗེའི་ཞབས་འབྲིང་དུ་བཞུགས་སོ། ། དེ་ནས་གཉལ་ཕྱོགས་ཀྱི་སྡེ་སྣོད་འཛིན་པ་ཐམས་ཅད་འདུས་པ་ལ་ཆོས་འཁོར་རྒྱ་ཆེན་པོ་མཛད་དོ། ། དེ་ལྟར་གཉལ་ཕྱོགས་སུ་བསྟན་པ་དང་སེམས་ཅན་གྱི་དོན་རྨད་དུ་བྱུང་བ་རྣམས་ལེགས་པར་མཛད་ནས་སླར་ཡང་འོལ་ཁར་ཕེབས། དེ་ནས་འོ་དེ་གུང་རྒྱལ་གྱི་ལྷ་ཞོལ་དབེན་གནས་ལྷ་སྡིངས་སུ་ལོ་གཅིག་བཞུགས་ཆོས་མང་དུ་གསུངས་རྗེ་འདིས་ཐལ་རང་གི་ལྟ་བའི་གནད་རྣམས་ལ་བྱ་བྲལ་ལ་འབྱོན་པའི་གོང་ཉིད་ནས་དེ་བར་དུ་དཔྱད་པ་ནར་མར་མཛད་ནའང་། མཐར་ཐུག་པའི་གནད་ལ་མི་བདེ་བ་གཏན་ནས་ལོག་པའི་ངེས་པ་འདྲེན་མ་ཐུབ་གསུངས་ཏེ། དེང་སང་གི་གདུལ་བྱ་མི་རྟག་པ་ཕྲ་མོའི་གནས་ཚུལ་ཙམ་ཡང་མ་རྟོགས་པར་ཟབ་མོ་དབུ་མའི་ལྟ་བ་རྟོགས་པར་ཁས་འཆེ་བ་དང་ལས་འབྲས་ལ་ཡིད་ཆེས་པའི་བསམ་པ་མེད་པར་དབུ་མའི་ལྟ་བ་རྟོགས་པར་ཁས་འཆེ་བ་རྣམས་ལ་ཐུགས་བརྩེ་བས་དགོངས་ཏེ་འདི་ལྟ་བུའི་ཚུལ་བསྟན་ཏེ་ཟབ་མོ་དབུ་མའི་ལྟ་བ་ཤིན་ཏུ་རྟོགས་དཀའ་བ་ནི་རྒྱལ་བ་ཉིད་ཀྱི་ཞལ་ནས། ཟབ་ཞི་སྤྲོས་བྲལ་འོད་གསལ་འདུས་མ་བྱས། ། བདུད་རྩི་ལྟ་བུའི་ཆོས་ཤིག་ཁོ་བོས་རྙེད། ། སུ་ལ་བསྟན་ཀྱང་གོ་བར་མི་ནུས་པས། ། མི་སྨྲ་ནགས་ཀྱི་ཚལ་དུ་གནས་པར་བྱ། ། ཞེས་ཆོས་ཐམས་ཅད་ཀྱི་གནས་ལུགས་སྤྲོས་པའི་མཐའ་ཐམས་ཅད་དང་བྲལ་བའི་སྟོང་པ་ཉིད་ནི་ཤིན་ཏུ་རྟོགས་དཀའ་བས་མཐའ་དག་པར་རྟོགས་པ་སྲིད་མཐའ་ཙམ་དུ་གསུངས་པ་དང་། འཕགས་པ་ཀླུ་སྒྲུབ་ཀྱི་ཞལ་ནས། རེ་ཤིག་ལུས་འདི་མི་གཙང་ཉིད། ། རགས་ཤིང་མངོན་སུམ་སྤྱོད་ཡུལ་བ། ། རྟག་ཏུ་སྣང་བའང་གང་གི་ཚེ། ། སེམས་ལ་གནས་པ་མ་ཡིན་པ། ། དེ་ཚེ་དམ་ཆོས་གནས་མེད་པ། ། ཕྲ་རབ་མངོན་སུམ་མ་ཡིན་པ། ། ཟབ་མོ་དེ་ཀོ་ཇི་ལྟ་བུར། ། སེམས་ལ་བདེ་བླག་འཇུག་པར་འགྱུར། ། ཆོས་འདི་ཟབ་ཕྱིར་སྐྱེ་བོ་ཡིས། ། ཤེས་པར་དཀའ་བ་ཐུགས་ཆུད་དེ། ། དེས་ན་ཐུབ་པ་སངས་རྒྱས་ནས། ། ཆོས་བསྟན་པ་ལས་ལོག་པར་གྱུར། ། ཅེས་མི་རྟག་པ་ལ་ངེས་ཤིས་མ་འདྲོངས་པར་དབུ་མའི་ལྟ་བ་རྟོགས་པ་མི་སྲིད་པར་གསུངས་པ་ལྟར་རོ། །
རྗེ་རིན་པོ་ཆེས་གནས་དེར་བླ་མ་དང་རྗེ་བཙུན་འཇམ་པའི་དབྱངས་ཐ་མི་དད་དུ་བྱས་པ་ལ་གསོལ་བ་དྲག་ཏུ་འདེབས་པ་དང་། རིགས་པའི་དཔྱད་པ་ཞིབ་པར་མཛད་པས་བྱིན་གྱིས་བརླབས་པའི་མཚན་མ་ཁྱད་པར་ཅན་བྱུང་། སློབ་དཔོན་སངས་རྒྱས་བསྐྱངས་ཀྱི་འགྲེལ་པ་བུ་ངྔྷ་པཱ་ལི་ཏ་ལ་ལེགས་པར་གཟིགས་པས་ཀྱང་འཚམས་སྦྱར་ཏེ། མགོན་པོ་ཀླུ་སྒྲུབ་ཡབ་སྲས་ཀྱི་ལྟ་བའི་གནད་མཐར་ཐུག་པ་དང་། དགག་བྱའི་མཚམས་འཛིན་སོགས་ལ་སྔར་དང་མི་འདྲ་བའི་ངེས་པ་གཏིང་ཚུགས་པ་འཁྲུངས་ཤིང་མཚན་འཛིན་གྱི་དམིགས་གཏད་ཐམས་ཅད་ཞིག ། དེ་ཁོ་ན་ཉིད་ཀྱི་དོན་ལ་མཐའ་གཞན་དུ་དོགས་པའི་སྒྲོ་འདོགས་ལྷག་མ་མེད་པར་དྲུངས་ཕྱུང་བར་གྱུར་ཏེ། སྟོན་པ་ལ་ཤེས་ནས་དད་པ་ཐོབ་པའི་ཤུགས་ཀྱིས་དྲངས་པ་ཟབ་མོ་རྟེན་ཅིང་འབྲེལ་པར་འབྱུང་བ་གསུང་བའི་སྒོ་ནས་བསྟོད་པ་ལེགས་པར་བཤད་པའི་སྙིང་པོ་ཞེས་བྱ་བ་མཛད་དོ། །
རྗེ་རིན་པོ་ཆེའི་མཛད་པ་རྣམ་ཐར་འདི་དག་ལ་བློ་གྲོས་ཅན་རྣམས་ཀྱིས་ལེགས་པར་དཔྱོད་ཤེས་ན་བྱང་ཆུབ་ལམ་གྱི་རིམ་པའི་གོ་རིམ་ལ་ངེས་པ་ཕུལ་ཕྱིན་སྟེར་ཞིང་བྱང་ཆུབ་ལམ་རིམ་གྱི་རྩ་བའི་གདམས་ངག་གི་གཞུང་མངོན་རྟོགས་རྒྱན་དུ། སངས་རྒྱས་རྣམས་ལ་ལྷག་པར་བྱས། ། དེ་ལ་དགེ་བའི་རྩ་བ་བསྐྲུན། ། དགེ་བའི་བཤེས་ཀྱི་མགོན་བཅས་པ། ། འདི་མཉན་པ་ཡི་སྣོད་ཡིན་ནོ། ། ཞེས་གསུངས་པའི་དོན་ལ་ངེས་པ་ཆེན་པོ་སྐྱེའོ། ། དབུ་མའི་ལྟ་བ་འཁྲུལ་མེད་རྙེད་པའི་ཚེ་སྣང་བ་ཇི་ལྟར་འཆར་བ་ནི་རྗེ་ཉིད་ཀྱི་ཞལ་ནས་ད་ལྟ་ལེགས་པར་གོམས་པས་རྗེས་ཐོབ་ཏུའང་སྣ་ཚོགས་པའི་སྣང་བ་འདི་ཐམས་ཅད་སྟོང་བཞིན་དུ་སྣང་བའི་སྒྱུ་མ་ལྟར་འཆར་གྱི། སྟོང་པ་ཉིད་ཀྱི་རྒྱས་མ་ཐེབས་པའི་སྣང་བ་རང་དགའ་བ་ཆེར་མི་འཆར་བར་འདུག ། ཅེས་གསུང་ངོ་། ། རྗེ་བླ་མ་འདིས་བྱང་ཆུབ་ལམ་གྱི་རིམ་པ་ལ་མྱོང་བ་ཐོན་པར་བྱེད་པ་ལ་ཚུལ་འདི་ལྟར་བྱ་དགོས་སོ་ཞེས་གདུལ་བྱ་རྣམས་ལ་འདོམས་པའི་ཕྱིར་བླ་མ་དང་ཡི་དམ་ཐ་མི་དད་དུ་བྱས་ནས་གསོལ་བ་འདེབས་པ་དང་། བསག་སྦྱང་ལ་རྩེ་གཅིག་ཏུ་བརྩོན་པར་མཛད་ཅིང་། སྐྱེ་བོ་ཕལ་པ་རྣམས་ཀྱི་བློ་ཡུལ་དུ་ཤོང་དཀའ་བའི་བསྙེན་སྒྲུབ་ལ་རྒྱུན་མི་འཆད་དུ་བརྩོན་པར་མཛད་པས་ལྷག་པའི་ལྷ་དུ་མས་བྱིན་གྱིས་བརླབས་པའི་ཚུལ་དཔག་པར་དཀའ་བ་ཡོད་ལ། ཁྱད་པར། རྒྱལ་བ་ཀུན་གྱི་ཡབ་གཅིག་རྗེ་བཙུན་འཇམ་པའི་དབྱངས་ཀྱི་ཞལ་མངོན་སུམ་དུ་གཟིགས་ཤིང་རྒྱུན་དུ་དགེ་བའི་བཤེས་གཉེན་མཛད་པའི་སྟོབས་ཀྱིས་གསུང་རབ་མཐའ་དག་གི་དོན་ལ་འཁྲུལ་པ་མི་མངའ་བར་གྱུར་པ་ཡིན་ལ། གསུང་རབ་ཀྱི་དོན་ཅི་འདྲ་པའི་རྟོགས་དཀའ་བ་ཞིག་ཡིན་ནའང་། ཐོག་མར་རིགས་པས་ཞིབ་ཏུ་དཔྱད་པས་ཕལ་ཆེར་དགོངས་འོང་། དེ་ལྟར་མཛད་ཀྱང་ཐུགས་ངེས་མཐའ་ཆོད་པ་འདྲེན་མ་ཐུབ་པ་རྣམས་ལ། བླ་མ་དང་རྗེ་བཙུན་འཇམ་པའི་དབྱངས་ཐ་མི་དད་ལ་གསོལ་བ་དྲག་ཏུ་བཏབ་ཅིང་མཎྜལ་ཕུལ་བས། དེ་མ་ཐག་འབད་མེད་དུ་དཔྱིས་ཕྱིན་པར་དགོངས་ནས་འོང་བ་ནི་རྗེ་ཉིད་ཀྱི་ཐུགས་སྲས་ཐམས་ཅད་ལ་མཐུན་སྣང་དུ་ཡོད་པར་གསུངས། གཞན་ཡང་རྗེ་བཙུན་འཇམ་པའི་དབྱངས་ཀྱི་སྐུ་དང་གསུང་གི་སྣང་བ་ཇི་ལྟར་བྱུང་བ་སོགས་དག་པའི་གཟིགས་སྣང་མཐའ་ཡས་པའི་རྣམ་པར་ཐར་པ་ནི་རྒྱལ་བ་ནང་ཕན་ཚུན་གྱི་སྤྱོད་ཡུལ་ཡིན་པས་མཐའ་དག་བརྗོད་པར་ག་ལ་ནུས། རྗེ་བཙུན་འཇམ་པའི་དབྱངས་ཀྱིས་རྒྱུན་དུ་ཞལ་བསྟན་ནས་བྱ་བ་ཐམས་ཅད་རྗེ་བཙུན་འཇམ་པའི་དབྱངས་ལ་ཞུས་ནས་མཛད་པ་ནི། རྗེ་ཉིད་ཀྱི་ཞལ་ནས་གསུང་རབ་ཀྱི་དོན་ལ་ཚུལ་ཇི་ལྟར་དཔྱོད། དཔྱད་པ་རྫོགས་མ་རྫོགས། ཉམས་ལེན་གྱི་གནད། གདུལ་བྱ་ཇི་ལྟར་བཀྲི། འཁོར་ཇི་ལྟ་བུ་བསྟེན། གནས་ཇི་ལྟ་བུར་སྡོད་པ་སོགས་ཕལ་ཆེར་རང་བཟོས་ཞུགས་པ་མ་བྱས་ཞེས་གསུང་ངོ་། ། དེ་ནས་སྟོན་འོལ་ཁར་བྱོན། དགུན་དཔྱིད་འགར་ཕུག་ཏུ་བཞུགས་ནས་འོལ་ཁའི་དགེ་འདུན་རྣམས་ལ་ཆོས་མང་དུ་གསུངས་སོ། ། དེ་ནས་ཨེའི་ཏེའུ་རར་བྱོན། དབྱར་བཞུགས་མཛད། ཨེ་པའི་དགེ་འདུན་རྣམས་ལ་ཆོས་མང་དུ་གསུངས་ཤིང་སྐྱེ་བོ་ཐམས་ཅད་དགེ་བའི་ལམ་ལ་བཀོད། དེ་ནས་འོལ་ཁའི་བྲག་གདོང་དུ་བྱོན། དགུན་བཞུགས་མཛད། དེ་ནས་རྫིང་ཕྱིར་ཇོ་བོ་བྱམས་པའི་དྲུང་དུ་ཞག་བཅོ་ལྔའི་རིང་ལ་མཆོད་པ་རྒྱ་ཆེ་ཞིང་བཀོད་པ་ཡིད་འཕྲོག་པ་རྒྱུན་མི་འཆད་པར་མཛད་དེ་བསྟན་པ་དང་སེམས་ཅན་འབའ་ཞིག་ལ་དགོངས་ནས་འཕྲལ་དང་ཡུལ་དུ་ཕན་བདེ་རྒྱས་པའི་སྨོན་ལམ་རླབས་ཆེ་བ་མཛད་དོ། ། དེ་ནས་སྨན་ལུང་གི་རྒྱ་སོག་ཕུར་ཆོ་འཕྲུལ་ཆེན་པོའི་དུས་མཆོད་ཞག་བཅོ་ལྔའི་རིང་ལ་མཆོད་པ་རྒྱ་ཆེ་ཞིང་བཀོད་པ་ཕུན་སུམ་ཚོགས་པ་བཤམས་ཏེ་ཏིང་ངེ་འཛིན་གྱིས་བྱིན་གྱིས་བརླབས་ནས་མཆོད་ཡུལ་ཐམས་ཅད་མཉེས་པར་བྱེད་པའི་མཆོད་པའི་ཆོ་ག་དང་། འཕྲལ་དང་ཡུན་གྱི་ཕན་བདེ་རྒྱས་པའི་སྨོན་ལམ་དཔག་ཏུ་མེད་པ་མཛད་པའི་སྐབས་སུ། མཆོད་པའི་ཞིང་ཕྱོགས་བཅུའི་དེ་བཞིན་གཤེགས་པ་རྣམས་སྤྱན་འདྲེན་པའི་ཐུགས་ཀྱི་འདུན་པ་ཤུག་དྲགས་པོ་མཛད་པ་ན། ཤར་ཕྱོགས་ཀྱི་དེ་བཞིན་གཤེགས་པ་ཐམས་ཅད་སྐུ་མདོག་དཀར་པོ་རྣམ་སྣང་གི་རྣམ་པས་ཤར་ཕྱོགས་ཀྱི་ནམ་མཁའི་ཁྱོན་ཐམས་ཅད་གང་བར་འཁྲིགས་པ་དང་། དེ་བཞིན་དུ་ལྷོ་ཕྱོགས་དང་ནུབ་དང་བྱང་དང་དབུས་སམ་སྟེང་གི་ནམ་མཁའི་ཁྱོན་ཐམས་ཅད་རིམ་པ་བཞིན་དུ། རིན་འབྱུང་། འོད་དཔག་མེད། དོན་གྲུབ། མི་བསྐྱོད་པའི་རྣམ་པ་ཅན་གྱི་དེ་བཞིན་གཤེགས་པས་ཁྱབ་ཅིང་། བཀོད་པ་དེ་འདྲ་བའི་སྒོ་ནས་སྟེང་དང་ལོགས་ཀྱི་ནམ་མཁའི་ཁམས་ཐམས་ཅད་བར་མཚམས་མེད་པར་དེ་བཞིན་གཤེགས་པའི་སྐུས་གུར་ཕུབ་པ་ལྟར་གྱུར་ཏེ་མཆོད་པ་བདག་གིར་མཛད་པའི་གཟིགས་སྣང་དངོས་སུ་འཆར་བ་ཡང་ཡང་བྱུང་། ཕྱིས་ལྷ་སར་ཆོ་འཕྲུལ་ཆེན་པོའི་མཆོད་པ་རྒྱ་ཆེན་པོ་བསམ་གྱི་མི་ཁྱབ་པ་སྨོན་ལམ་ཆེན་མོར་གྲགས་པ་མཛད་པའི་དུས་སུའང་གཟིགས་སྣང་དེ་འདྲ་བ་ནར་མར་བྱུང་སྟེ། དེ་དུས་མཆོད་ཡུལ་དང་མཆོད་པ་ཐམས་ཅད་ལ་བདེ་སྟོང་གི་རྒྱས་བཏབ་ཅིང་མཆོད་པ་ཕུལ་བས་དེ་ཐམས་ཅད་བདེ་སྟོང་གི་རྣམ་རོལ་དུ་འཆར་བ་བྱུང་གསུང་ངོ་། ། དེ་ནས་དཔྱིད་རྗེ་དར་མ་རིན་ཆེན་གྱི་ཞལ་སྔ་ནས་གཙོ་མཛད། སྡེ་སྣོད་འཛིན་པ་ཉིས་བརྒྱ་ལྷག་ཙམ་ལ་ཆོས་མང་དུ་གསུངས། དེ་ནས་ཉང་པོ་ཕྱོགས་ནས་དད་པ་ཆེན་པོས་གསོལ་བ་བཏབ་པ་ལ་བརྟེན་ནས་ཉང་པོ་མདང་མདོའི་དགོན་པར་བྱོན། དབྱར་བཞུགས་མཛད། ཉང་པོ་ཕྱོགས་ཀྱི་དགེ་འདུན་རྣམས་ལ་ཆོས་མང་དུ་གསུངས་ཤིང་སྐྱེ་བོའི་ཚོགས་ལ་ཕན་པ་རྒྱ་ཆེན་པོ་མཛད། དེའི་སྐབས་སུ་དབོན་ནམ་མཁའ་བཟང་པོ་བས་རྔོག་ལོ་ཆེན་པོའི་གདན་ས་པ་སློབ་དཔོན་ཆེན་པོ་དཀོན་མཆོག་ཚུལ་ཁྲིམས་པ་ངོ་ཆེན་ལ་སྦྲན་ཏེ་སྐྱིད་ཤོད་ཕྱོགས་སུ་ཕེབས་པར་ཞུ་བའི་གསོལ་བ་འདེབས་པ་སྔ་མོ་ནས་ནར་མར་ཡོད་པའི་གཏིང་བསྐུལ་གྱི་གསོལ་འདེབས་པས་སླེབ་པ་དང་། ཇོ་བོ་རིན་པོ་ཆེ་མཇལ་བར་བཞེད་པས་ཀྱང་ཐུགས་དྲངས་ཏེ་སྟོན་སྐྱིད་ཤོད་དུ་ཕེབས། པོ་ཏ་ལར་བཞུགས་ནས་གསང་བདེ་གུང་གསུམ། དགའ་སྐྱོར་ཟུལ་གསུམ་གྱི་གདན་ས་བ་རྣམས་ཀྱིས་ཐོག་དྲངས་པའི་སྡེ་སྣོད་འཛིན་པ་བརྒྱ་ཕྲག་དུ་མ་ལ་དབུ་མ་སྣང་བ། འདུལ་བ། ལམ་རིམ་ལ་སོགས་པའི་ཆོས་མང་དུ་གསུངས། དེའི་ཕྱི་རེས་སོས་ཀ་དགའ་བ་གདོང་དུ་བྱོན། ཐེག་པ་ཆེན་པོར་འཇུག་པ་རྣམས་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཔང་པོར་བྱས་ཏེ་ཁས་བླངས་པའི་སེམས་བསྐྱེད་བསླབ་བྱ་རྣམས་ལ་ཇི་ལྟར་བསླབ་ཚུལ་མཐའ་དག་པར་ཤེས་ནས་ཚུལ་བཞིན་དུ་སློབ་པ་ཞིག་མ་བྱུང་ན་དེའི་ཐེག་པ་ཆེན་པོ་བ་མིང་ཙམ་དུ་འགྱུར་བར་དགོངས་ཤིང་། གསང་སྔགས་རྡོ་རྗེ་ཐེག་པ་ལ་འཇུག་པར་འདོད་ན་ལམ་ཐུན་མོང་བ་ལ་ལེགས་པར་བློ་སྦྱངས་པའི་སྟེང་དུ་བླ་མ་བསྟེན་ཚུལ་ཐེག་ཆེན་ཐུན་མོང་བའི་སྐབས་སུ་བསྟན་པ་ལས་ཀྱང་ཆེས་ཁྱད་པར་དུ་གྱུར་པ་ཞིག་གི་སྒོ་ནས་དབང་བསྐུར་རྒྱུད་སྡེ་དང་མཐུན་པ་ཞིག་བླ་མ་མཚན་ཉིད་དང་ལྡན་པ་ལས་མནོས་ཏེ། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམས་མིག་གི་འབྲས་བུ་ལྟར་གཅེས་པར་འཛིན་ཅིང་། ཁྱད་པར་རྩ་ལྟུང་ལ་སྲོག་བསྡོས་བྱས་ནས་ལེགས་པར་སྡོམ་པ་ཞིག་མ་བྱུང་ན་ཁས་བླངས་པའི་དམ་ཚིག་ཡལ་བར་དོར་ནས་སྔགས་ཀྱི་ལམ་ལ་སློབ་པ་སྐད་བྱས་ཀྱང་ངན་འགྲོ་མི་བཟད་པའི་སྒོ་འབྱེད་པར་དགོངས་ནས། ཨེ་མ་ཐེག་པ་ཆེན་པོ་སྤྱི་དང་ཁྱད་པར་བ་ལ་སློབ་པར་འདོད་པ་དག་ཚུལ་འདི་ལྟ་བུས་སྤྱོད་པར་གྱུར་ན་ཅི་མ་རུང་སྙམ་དུ་སྙིང་ནས་ཤས་མ་བཟོད་པའི་ཐུགས་བརྩེ་བ་ཆེན་པོས་ཀུན་ནས་བསླངས་ཏེ་གདུལ་བྱ་རྣམས་ལའང་ཚུལ་དེ་ཉིད་འདོམས་པར་མཛད་དོ། ། དེར་ཡང་བྱང་སའི་ཚུལ་ཁྲིམས་ལེའུ། བླ་མ་ལྔ་བཅུ་པ། རྩ་ལྟུང་བཅུ་བཞི་པ་རྣམས་ཀྱི་བཤད་པ་ཤིན་ཏུ་ཞིབ་པར་གསུངས། དེའི་ཆོས་མཇུག་ལ་བླ་མ་རྗེ་བཙུན་རེད་མདའ་པ་ཆེན་པོའི་ཞལ་སྔ་ནས་མངའ་རིས་ནས་བྱོན། དབྱར་གནས་སྟག་ཚང་དུ་མཛད་དེ་དབུས་སུ་བྱོན་ནས་དགའ་བ་གདོང་དུ་ཕྱགས་ཕེབས། བསུ་བ་དང་། བསྙེན་བཀུར་དང་། ཞབས་ཏོག་རྨད་དུ་བྱུང་བ་མཛད་ནས་དཔོན་སློབ་གཉིས་ཀས་ཆོས་མང་དུ་གསུངས། དེ་ནས་ཡབ་སྲས་གཉིས་ཀའང་དབེན་པ་ལ་དགྱེས་ཤིང་། བྱང་ར་སྒྲེང་གི་དབེན་པའི་གནས་ཀྱི་བསྔགས་པ་གཏམ་དུ་བརྗོད་པ་སྙན་དུ་སོན་པས་ཀྱང་ཐུགས་གཡོས་པར་གྱུར་ལ་དཔལ་ལྡན་ཨ་ཏི་ཤས་ལུང་བསྟན་པའི་གནས། སྟོན་པ་རིན་པོ་ཆེ་ཡབ་སྲས་ཀྱི་གདན་ས། བཀའ་གདམས་པའི་དམ་པའི་ཆོས་ཀྱི་ཆུ་བོ་ཐམས་ཅད་ཀྱི་འབྱུང་ཁུངས་སུ་གྱུར་པས་ཀྱང་གཟིགས་པར་བཞེད་དེ་ཡབ་སྲས་གཉིས་ཀྱིས་ཐོག་མ་མཛད་པའི་དགེ་འདུན་སྡེ་སྣོད་འཛིན་པ་མང་པོའི་ཚོགས་དང་བཅས་པ་ར་སྒྲེང་ལ་ཕྱགས་གཏེག་དགུན་བཞུགས་ར་སྒྲེང་དུ་མཛད། བླ་མ་རྗེ་བཙུན་ཆེན་པོས་རིགས་པ་དྲུག་ཅུ་པ་དང་གསང་འདུས་རིམ་ལྔ་སོགས་གསུངས། རྗེ་རིན་པོ་ཆེས་ཐེག་པ་ཆེན་པོ་མདོ་སྡེ་རྒྱན་དང་། དབུས་མཐའ་དང་། ཀུན་ལས་བཏུས་དང་། ཉན་ས་ལ་སོགས་པ་ཐམས་ཅད་གུང་ལེགས་པར་བསྒྲིགས་ཏེ་ཞི་གནས་ཀྱི་བཤད་པ་མཐའ་དག་པར་གསུངས་ཤིང་། སྒོམ་དུ་བཅུག་པས་འགའ་ཞིག་གི་རྒྱུད་ལ་གསུང་རབ་དང་མཐུན་པའི་ཞི་གནས་ཀྱི་མྱོང་བ་ཁྱད་པར་ཅན་འཁྲུངས། ཡབ་སྲས་གཉིས་ཀྱིས་སྔགས་དང་མཚན་ཉིད་ཀྱི་ལམ་གྱི་གནད་དུ་མ་ལ་འབེལ་བའི་གཏམ་གྱི་བཀའ་མཆིད་ཤིན་ཏུ་ཞིབ་པར་མཛད། དེ་ནས་ཆོས་རྗེ་ལོ་ཙཱ་བ་དང་། འབྲི་ཁུང་ཆོས་རྗེ་གཉིས་ཀས་ཞལ་འཛོམ་པར་ཞུ་བའི་ཕོ་ཉ་དང་གསུང་འཕྲིན་ནར་མར་བྱུང་བས། རྗེ་རིན་པོ་ཆེས་དཔྱིད་འགོ་འབྲི་ཁུང་དུ་བྱོན། ཆོས་མང་དུ་གསུངས། སྤྱན་སྔ་རིན་པོ་ཆེ་ཆོས་ཀྱི་རྒྱལ་པོ་ལ་ནཱ་རོ་ཆོས་དྲུག་དང་། ཕྱག་ཆེན་ལྷན་ཅིག་སྐྱེས་སྦྱོར་ལ་སོགས་པ་གསན། དེ་ནས་རྗེ་རིན་པོ་ཆེ་དང་རྗེ་རེད་མདའ་པ་དང་ཆོས་རྗེ་ལོ་ཙཱ་བ་སྐྱབས་མཆོག་དཔལ་བཟང་གསུམ་ག་གནམ་ཙེང་ལྟེང་དུ་ཨར་ཆེན་པོ་བྱང་ཆུབ་ཡེ་ཤེས་ཀྱི་གཙུག་ལག་ཁང་དུ་ཞལ་མངོན་པར་འཛོམ་ཞིང་། དཔོན་ཡོན་ཏན་རྒྱ་མཚོ་བས་དད་པ་དང་གཏོང་བ་ཤིན་ཏུ་ཡངས་པའི་བསམ་པ་རྒྱ་ཆེན་པོས་ཞབས་ཏོག་བྱས་ཏེ་སྡེ་སྣོད་གསུམ་འཛིན་པའི་མཁས་པའི་དབང་པོ་དུ་མས་ཐོག་དྲངས་པའི་དགེ་འདུན་དྲུག་བརྒྱ་ལྷག་ཙམ་གྱིས་དབྱར་གནས་པར་ཞལ་གྱིས་བཞེས་ནས་ཆོས་རྗེ་གསུམ་གས་ཀྱང་བསྟན་པ་རིན་པོ་ཆེའི་དག་ཏེར་རྣམ་པར་དག་པ་ཞིག་མཛད་པར་དགོངས་ཤིང་། དེ་ཡང་ཇི་སྲིད་དུ་རྒྱལ་བའི་བསྟན་པའི་ནང་མཛོད་འདུལ་བ་རྫོགས་པར་ཡོད་པ་དེ་སྲིད་སངས་རྒྱས་ཀྱི་བསྟན་པ་ཡོད་ལ། དེ་མེད་ན་མེད་པར་གསུངས་པ་དེ་ཉིད་ཐུགས་ལ་ལྕི་བར་གྱུར་ནས་བསྟན་པ་འབའ་ཞིག་ལ་དགོངས་པའི་ཐུགས་ཀྱིས་འདུལ་བ་མདོ་རྩ་བའི་བཤད་པ་རྒྱས་པ་རེ་གསུངས་ཤིང་དེའི་དུས་སུ་གཞི་བཅུ་བདུན་ནས་གསུངས་པའི་བཅས་པ་ཕྲ་མོ་ཞིག་ཡན་ཆད་ད་ལྟའི་གང་ཟག་གིས་ཉམས་སུ་བླང་ནུས་རྣམས་དང་། རྣམ་འབྱེད་ནས་འབྱུང་བའི་བཅས་པ་རྣམས་ལས་འདས་པའི་ལྟུང་བ་ཐམས་ཅད་རང་གི་མིང་རིགས་ཀྱིས་ཕྱིར་འཆོས་པའི་ཆོ་ག་ཇི་ལྟར་བཤད་པ་བཞིན་གྱི་ཕྱག་ལེན་རྣམ་པར་དག་པའི་སྲོལ་ལེགས་པར་བཙུགས་ཏེ། དེའི་ཚེ་འདུལ་བ་གསན་པ་ཕལ་ཆེ་བས་ཀྱང་རང་རང་གི་རྒྱུད་ལ་བརྟགས་ནས་ལྟུང་བ་ཕྲ་རགས་ཐམས་ཅད་བཤགས་ཡུལ་མང་ཉུང་གི་བྱེ་བྲག་དང་། དངོས་པོ་སྤངས་པའི་ཆེད་ལས་སྔོན་དུ་གཏོང་བ་སོགས་ཇི་ལྟར་བཤད་པ་བཞིན་དུ་ཕྱག་ལེན་ལ་བཏབ་ནས་ཕྱིར་བཅོས་མཛད་དེ། དེ་ཕྱིན་ཆད་ཕྱག་ཕྱི་ལ་གཉུག་མར་གནས་པ་ཕལ་ཆེ་བས་ཉིན་རེ་བཞིན་རང་རང་གི་རྒྱུད་ལ་བརྟགས་ནས་ལྟུང་བ་ངང་ཡུན་དུ་མི་འགྲོགས་པར་ཕྱིར་འཆོས་པ་དང་། ཡོ་བྱད་བྱིན་བརླབ། རུང་ཁང་གཅོད་པ། ནུབ་ལྷག་ཉལ་བསྲུང་སོགས་ཀྱི་ཕྱག་ལེན་དག་ལའང་ཆེས་བརྩོན་པར་མཛད་ན་དེ་ཙམ་དུ་བསྒྲུབ་མི་དཀའ་བ་རྣམས་ལ་ནི་ལྟ་སྨོས་ཀྱང་ཅི་དགོས། དེ་བས་ན་སངས་རྒྱས་ཀྱི་བསྟན་པའི་རྩ་བ་སོ་སོར་ཐར་པའི་རྨང་རྫོགས་པར་གསོས་པས་བསྟན་པ་ལ་བྱ་བ་མཛད་པ་ཞིག་ལ་འདི་ཡ་མཚན་པ་ཡིན་ནོ། ། ཞེས་མཁས་གྲུབ་ཐམས་ཅད་མཁྱེན་པས་གསུངས་ཏེ། གངས་རིའི་ཁྲོད་འདིར་འདུལ་བ་ལུང་སྡེ་བཞིའི་དོན་སློབ་དཔོན་ཡོན་ཏན་འོད་ཀྱིས་བཀྲལ་བ་ལྟར་དགག་སྒྲུབ་གནང་གསུམ་གྱི་བཅས་མཚམས་མཐའ་དག་རྒྱལ་བ་རང་ཉིད་ཀྱི་དགོངས་པ་ཇི་ལྟ་བ་བཞིན་དུ་འཆད་ཤེས་པ་དང་། བཤད་པ་ལྟར་དུ་བཅས་མཚམས་དག་ལག་ཏུ་ལོངས་པ་དང་། དེ་ཡང་བྱང་ཆུབ་ལམ་གྱི་རིམ་པ་དང་སྦྱར་ཏེ་ཐེག་པ་ཆེ་ཆུང་གཉིས་ཀའི་ལམ་གྱི་གཞི་རྟེན་དུ་འགྱུར་བ་དང་། རྒྱལ་སྲས་ཀྱི་སྤྱོད་པ་ལ་སློབ་པའི་ཚེ་འབྲས་བུ་གཟུགས་སྐུ་བསྒྲུབ་པའི་ཐབས་སུ་འགྱུར་བར་བྱེད་པ་སོགས་རྒྱལ་བ་དགྱེས་པའི་ལམ་ལ་སློབ་པར་འདོད་པ་རྣམས་ལ་བཀའ་དྲིན་ཟླ་མེད་དུ་མཛད་དོ། ། གཞན་ཡང་གནས་དེར་དབུ་མ་དང་ཚད་མ་རྣམ་འགྲེལ་ལ་སོགས་པའི་ཆོས་ཀྱི་འཁོར་ལོ་མང་དུ་བསྐོར། དགག་དབྱེ་ཐོན་ནས་རྗེ་བཙུན་རེད་མདའ་པ་གཙང་ལ་ཕེབས་རྗེ་རིན་པོ་ཆེ་དང་ལོ་ཆེན་སྐྱབས་མཆོག་དཔལ་བཟང་གཉིས་འཁོར་དང་བཅས་པ་སླར་ར་སྒྲེང་དུ་བྱོན་ནས་བྲག་སེང་གེའི་ཞོལ་དུ་རྗེ་རིན་ཆེའི་བཞུགས་གནས་བཏབ་སྟེ་ཇོ་བོའི་སྐུ་འདྲ་དབུ་ཡོན་མར་གྲགས་པ་སྤྱན་དྲངས་རྗེ་རིན་པོ་ཆེས་སྐུ་མཚམས་མཛད་དེ་ཇོ་བོའི་སྤྱན་སྔར་མཆོད་པ་རྒྱ་ཆེན་པོ་བཤམས་ནས་གསོལ་བ་ཤུགས་དྲག་ལ་རྒྱུན་རིང་བར་འདེབས་པར་མཛད་པས་སྟོན་པ་ཐུབ་པའི་དབང་པོ་ནས་ལྷོ་བྲག་གྲུབ་ཆེན་དང་གྲྭ་སྐོར་མཁན་ཆེན་གྱི་བར་ལམ་རིམ་བརྒྱུད་པའི་བླ་མ་རྣམས་ཞལ་གཟིགས། དེའི་ཚེ་ལམ་རིམ་བླ་མ་བརྒྱུད་པའི་གསོལ་འདེབས་ལམ་མཆོག་སྒོ་འབྱེད་གསར་རྩོམ་མཛད་དེ། དེའི་སྒོ་ནས་གསོལ་བ་ཤུགས་དྲག་ལ་རྒྱུན་རིང་བ་འདེབས་པར་མཛད་པས་བྱིན་གྱིས་བརླབས་པའི་མཚན་མ་ཁྱད་པར་ཅན་མང་དུ་བྱུང་ཞིང་གདམས་པ་དང་རྗེས་སུ་བསྟན་པའང་མང་དུ་གསུངས། མཐར་ལམ་རིམ་བརྒྱུད་པའི་བླ་མ་རྣམས་རིམ་གྱིས་ཐིམ་སྟེ་ཇོ་བོ་རྗེ་དང་། པོ་ཏོ་བ། ཤ་ར་བ་རྣམས་ཡུན་རིང་དུ་ཞལ་གཟིགས། མཐར་པོ་ཏོ་བ་དང་ཤ་ར་་ཡང་ཇོ་བོ་ལ་ཐིམ། ཇོ་བོ་རྗེས་རྗེ་རིན་པོ་ཆེའི་དབུ་ཐོག་ཏུ་ཕྱག་བཞག་སྟེ་བསྟན་པ་ལ་བྱ་བ་རྒྱ་ཆེན་པོ་གྱིས། བྱང་ཆུབ་སྒྲུབ་པ་དང་སེམས་ཅན་གྱི་དོན་བྱེད་པའི་གྲོགས་བདག་གིས་བགྱི་གསུང་ནས་མི་སྣང་བར་གྱུར། དེ་ནས་རྗེ་རིན་པོ་ཆེས་རྒྱལ་བའི་བསྟན་པ་ལ་བྱ་བ་བྱེད་པའི་མཆོག་ནི་གསུང་རབ་དགོངས་འགྲེལ་དང་བཅས་པ་མཐའ་དག་གི་དོན་གང་ཟག་གཅིག་གི་ཉམས་ལེན་གྱི་རིམ་པར་བསྡུས་ཏེ་ཕྱི་རབས་ཀྱི་གདུལ་བྱ་རྣམས་ཀྱིས་ཉམས་སུ་བླང་བདེ་བ་ཞིག་རྩོམ་པར་བཞེད་པ་འཁྲུངས་ཤིང་། ལོ་ཆེན་སྐྱབས་མཆོག་དཔལ་བཟང་པོ་སོགས་མང་པོས་ཀྱང་བྱང་ཆུབ་ལམ་གྱི་རིམ་པའི་ཁྲིད་ཡིག་རྒྱས་པ་ཞིག་ཅི་ནས་ཀྱང་མཛད་དུ་གསོལ་ཞེས་གསོལ་བ་ཤུགས་དྲག་ཏུ་བཏབ། ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་ཀྱང་ཐུགས་རྗེ་བསྐུལ་བར་མཛད། དཀར་ཕྱོགས་ཀྱི་ལྷ་དང་སྲུང་མ་མང་པོས་མཐུན་པའི་རྐྱེན་སྦྱར་ཏེ་རྒྱལ་བའི་གསུང་རབ་མཐའ་དག་གི་གནད་བསྡུས་པ། ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ། བྱང་ཆུབ་ལམ་གྱི་རིམ་པའི་སྒོ་ནས་སྐལ་བ་དང་ལྡན་པ་སངས་རྒྱས་ཀྱི་སར་འཁྲིད་པའི་ཚུལ་རྒྱས་པར་སྟོན་པ་ལམ་རིམ་ཆེན་མོའི་རྩོམ་པ་མཛད། དེ་ལྟར་ར་སྒྲེང་གི་བྲག་སེང་གེའི་ཞོལ་དུ་བྱང་ཆུབ་ལམ་རིམ་ཆེན་མོ་རྩོམ་པ་མཛད་པའི་ཚེ་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་བྱིན་གྱིས་བརླབ་པ་དང་། རྨ་ཆེན་སྤོམ་ར་དང་གཉན་ཆེན་ཐང་ལྷ་སོགས་བོད་ཀྱི་གཞི་བདག་ལྷ་ཆེན་རྣམས་ཀྱིས་ཀྱང་མཐུན་པའི་རྐྱེན་སྦྱར་ཞིང་བདག་ཅག་རྣམས་ལའང་སྨོན་པའི་ཚིག་སྦྱར་བ་ཞིག་དགོས་ཞེས་ཞུས་པ་ལྟར་རྗེ་རིན་པོ་ཆེས་ལམ་རིམ་ཆེན་མོའི་མཇུག་ཏུ། སྲས་བཅས་རྒྱལ་བའི་རྨད་བྱུང་འཕྲིན་ལས་ལས། ། ལེགས་གྲུབ་བྱང་ཆུབ་ལམ་གྱི་རིམ་པས་ཀྱང་། ། ཐར་འདོད་རྣམས་ཀྱི་ཡིད་པ་དཔལ་སྟེར་ཞིང་། ། རྒྱལ་བའི་མཛད་པ་རིང་དུ་སྐྱོང་གྱུར་ཅིག ། ལམ་བཟང་སྒྲིག་པའི་མཐུན་རྐྱེན་སྒྲུབ་བྱེད་ཅིང་། ། འགལ་རྐྱེན་སེལ་བྱེད་མི་དང་མི་མིན་ཀུན། ། ཚེ་རབས་ཀུན་ཏུ་རྒྱལ་བས་བསྔགས་པ་ཡི། ། རྣམ་དག་ལམ་དང་འབྲེལ་བར་མ་གྱུར་ཅིག ། ཅེས་སྨོན་ལམ་མཛད་པ་ཡིན་ཞེས་ལམ་རིམ་ཆེན་མོའི་བཤད་ལུང་གི་སྐབས་བླ་མ་གོང་མ་གཅིག་ནས་གཅིག་ཏུ་བརྒྱུད་པའི་གསུང་རྒྱུན་ལས་འབྱུང་ངོ་། ། དེ་ལྟར་ལམ་རིམ་ཆེན་མོའི་རྩོམ་པ་གྲུབ་ནས་འཁོར་རྣམས་ལ་འདི་ལྟར་བཀའ་སྩལ་ཏེ། ད་ཕྱིན་ཆད་སྔགས་ཀྱི་ཆོས་ཐན་ཐུན་འཆད་འདོད་པས། ཁྱེད་དྲག་པ་འགའ་རེས་ཆོས་རྗེ་ལོ་ཙཱ་བ་ལ་དཔལ་གསང་བ་འདུས་པ་མི་བསྐྱོད་པའི་དབང་ཞུས་ལ་སྔགས་ཀྱི་སྡོམ་པ་གསོར་ཆུག་གསུང་། དེ་ནས་བླ་མ་འཇམ་དཀར་བ་དང་། འདུལ་འཛིན་གྲགས་པ་རྒྱལ་མཚན་གཉིས་ཀྱིས་གཙོ་མཛད། ཉི་ཤུ་རྩ་ལྔས་དབང་ཞུས། དེ་ཡང་རྗེ་རིན་པོ་ཆེ་རང་གིས་སྨོན་འཇུག་གི་སྡོམ་པ་ཕོག་པ་འགའ་ཞིག་མ་གཏོགས་གཞན་རྣམས་ལ་ཆོས་རྗེ་ལོ་ཙཱ་བས་སྨོན་འཇུག་གི་སྡོམ་པ་ཕོག་ཅིང་། དེ་ནས་དབང་བསྐུར་བར་མཛད་དོ། ། གཞན་ཡང་གནས་དེ་ཉིད་དུ། རྗེ་རིན་པོ་ཆེ་རང་ཉིད་ཀྱིས་སྔར་གནམ་རྩེར་ལྟེང་དང་ལམ་པ་དགོན་པ་སོགས་སུ་སྨོན་འཇུག་གི་སྡོམ་པ་གནང་བ་འགའ་ཞིག་གི་གཙོས་ཐེག་པ་ཆེན་པོའི་ལམ་ལ་སློབ་པར་འདོད་པ་རྣམས་ལ་ཐུགས་བརྩེ་བས་དགོངས་ནས་བྱང་སའི་ཚུལ་ཁྲིམས་ལེའུའི་རྒྱ་ཆེར་འགྲེལ་ཡང་མཛད་ཅིང་། དོན་གཉེར་ཅན་མང་པོས་གསོལ་བ་དྲག་ཏུ་བཏབ་པ་ལ་བརྟེན་ནས། རྩ་ལྟུང་དང་བླ་མ་ལྔ་བཅུ་པའི་རྣམ་བཤད་ཀྱང་མཛད་དོ། ། དེ་ནས་ལོ་ཆེན་སྐྱབས་མཆོག་དཔལ་བཟང་པོ་བྱང་ཆུབ་ལམ་རིམ་གྱི་གླེགས་བམ་ཕྱག་ཏུ་བཞེས་ཤིང་ལེགས་བཤད་རིན་པོ་ཆེའི་སྐྱེས་ཀྱིས་ཐུགས་ཀྱི་བང་མཛོད་གཏམས་ཏེ་གཙང་ལ་ཕྱགས་བཏེག ། རྗེ་རིན་པོ་ཆེས་དབྱར་དགུན་གཉིས་ཙམ་དེ་ཉིད་དུ་བཞུགས་ནས་ལམ་རིམ་ལ་སོགས་པ་ཆོས་མང་དུ་གསུངས། ཆོ་འཕྲུལ་ཆེན་པོའི་དུས་མཆོད་ལ་མཆོད་པ་དང་སྨོན་ལམ་ཤིན་ཏུ་རླབས་ཆེ་ཞིང་ངོ་མཚར་བ་མཛད་དོ། ། དེ་ནས་རིམ་གྱིས་བྱོན་ནས་ལྷས་ཕུ་དགོན་གསར་དུ་ཕྱགས་ཕེབས། བློ་གྲོས་དང་ལྡན་པའི་སྡེ་སྣོད་འཛིན་པ་དུ་མ་ལ་ཚད་མ་རྣམ་འགྲེལ་གྱི་བརྗོད་བྱའི་གཙོ་བོ་མཐའ་དག་རིགས་པའི་ལམ་ནས་དྲངས་ཏེ་གཞུང་ལམ་གྱི་རིམ་པར་བསྒྲིགས་ནས་ཉམས་ལེན་ལ་སྦྱར་ཏེ་གསུངས་པས། སྡེ་སྣོད་འཛིན་པ་ཐམས་ཅད་སྔོན་ལན་ཅིག་ཀྱང་མ་མྱོང་བའི་ལེགས་པར་བཤད་པའི་བདུད་རྩིའི་རོ་ཕུལ་དུ་བྱུང་བ་མྱོང་བས་ཡིད་རང་དབང་མེད་པར་ཕྲོགས་ཏེ་ངོ་མཚར་བའི་གཏམ་གྱིས་དུས་འདའ་བར་བྱེད་ཅིང་། དེ་ཕྱིན་ཆད་ཀྱང་སྐབས་སྐབས་སུ་གསུངས་པས། སྔོན་ཆད་གངས་རིའི་ཁྲོད་འདིར་ཚད་མ་ཚིག་གི་ན་ཡམ་མམ། ཕྱིའི་གོ་རྒྱ་གཅོད་པའི་ཚེ་བསྟན་བཅོས་གཞན་བལྟ་བ་ལ་ཅུང་ཟད་དྲག་ཏུ་འགྲོ་བའི་ཡན་ལག་ཙམ་དུ་ཉེ་བར་མཁོ་བར་ཟད་ཀྱི། འདི་ཉམས་ལེན་ལ་མཁོ་བའི་ཐེ་ཚོམ་ཙམ་ཡང་སུ་ལའང་མེད་པས། ཕལ་མོ་ཆེ་ཞིག་དོན་མ་ཡིན་པ་སྐྱེད་པར་བྱེད་པ་ལ། ད་ལྟ་བློ་གྲོས་དང་ལྡན་ཞིང་གཟུ་བོར་གནས་པ་དག་ལ། འདི་ཉིད་ཉམས་ལེན་སྟོན་པའི་བསྟན་བཅོས་ཤིག་ལ་རྨད་དུ་བྱུང་བའི་ཕྱོགས་མཐོང་ཙམ་ཡོད་པ་འདི་ནི་རྗེ་རིན་པོ་ཆེ་འདི་འབའ་ཞིག་གི་ཐུགས་རྗེ་ལ་བརྟེན་པ་ཡིན་ཏེ། འདི་ཙམ་གྱི་བཀའ་དྲིན་ཡང་གངས་ཅན་པ་ཡོངས་ཀྱིས་གསབ་པར་སླ་བ་མ་ཡིན་ནོ། ། དེ་དུས་རྗེ་རིན་པོ་ཆེས་ཚད་མའི་ལམ་བསྒྲིགས་གསུངས་པ་རྣམས་རྗེ་དར་མ་རིན་ཆེན་གྱིས་ཟིན་བྲིས་སུ་བཏབ་སྟེ་དེང་སང་ཚད་མའི་བརྗེད་བྱང་དུ་གྲགས་པ་འདི་ཡིན་ནོ། ། དེ་ནས་མིའི་དབང་པོ་གྲགས་པ་རྒྱལ་མཚན་པས་ནན་ཆེར་གསོལ་བ་བཏབ་པ་ལ་བརྟེན་ནས་འོན་བདེ་ཆེན་སྟེང་དུ་ཕེབས། སྡེ་སྣོད་འཛིན་པ་བརྒྱ་ཕྲག་དུ་མ་འདུས་པ་རྣམས་ཀྱིས་དེ་ཉིད་དུ་དབྱར་གནས་པར་ཞལ་གྱིས་བཞེས་ཏེ། རྒྱལ་བཟང་སྨོན་མཁར་ནས་ཞབས་ཏོག་བསམ་གྱིས་མི་ཁྱབ་པ་བསྒྲུབས། བྱང་ཆུབ་ལམ་གྱི་རིམ་པའི་ཁྲིད་དང་། དབུ་ཚད་ཀྱི་དཀའ་བའི་གནས་འགྲོལ་བའི་ཆོས་མང་དུ་གསུངས། དེ་ནས་འོ་དེ་གུང་རྒྱལ་གྱི་ལྷ་ཞོལ་འོལ་ཁའི་བྱམས་པ་གླིང་དུ་ཕྱགས་ཕེབས་དོན་གཉེར་ཅན་རྣམས་ལ་ལམ་རིམ་དང་བསྐྱེད་རྫོགས་ཀྱི་ཆོས་མང་དུ་གསུངས། དེ་ནས་རྗེ་རིན་པོ་ཆེ་སྐུ་མཚམས་ཤིན་ཏུ་དམ་པ་ལ་བཞུགས་ཏེ་བླ་མ་དང་རྗེ་བཙུན་འཇམ་པའི་དབྱངས་དབྱེར་མ་མཆིས་པ་ལ་གསོལ་བ་ཤུགས་དྲག་ཏུ་འདེབས་པར་མཛད་པས། རྗེ་བཙུན་འཇམ་པའི་དབྱངས་ཀྱིས་སློབ་དཔོན་ཀླུའི་བྱང་ཆུབ་ཀྱིས་མཛད་པའི་གསང་བ་འདུས་པའི་མན་ངག་རྣམ་གཞག་རིམ་པའི་ཊཱིཀྐ་ཞིག་བྱས་ན་བསྟན་པར་ཕན་ཆེ་ཞེས་གསུངས་པ་ལྟར་རྣམ་གཞག་རིམ་པའི་ཊཱིཀྐ་མཛད་དེ་དོན་གཉེར་ཅན་རྣམས་ལ་ཞིབ་པར་གསུངས། དེ་ཡང་སྤྱིར་རིམ་ལྔའི་དོན་དང་། ཁྱད་པར་རིམ་པ་གསུམ་པའི་སྒྱུ་ལུས་ཀྱི་སྒྲུབ་ཚུལ་སོགས་དཔལ་གསང་བ་འདུས་པའི་རྩ་བཤད་ཀྱི་རྒྱུད་དང་། འཕགས་པ་ཡབ་སྲས་ལྔའི་གཞུང་ནས་འབྱུང་བའི་དོན་ཐུན་མོང་མ་ཡིན་པར་རགས་པ་རྣམས་དཔྱིས་ཕྱིན་པ་ཞིག་ལེགས་པར་གོ་ནས་དེ་དུས་ལོ་བཅུ་ལྷག་སོང་བ་ལ་དེ་བར་དུ་སྨྲ་མ་ནུས། དེ་ནས་དེ་དུས་ཟུར་ཙམ་སྨྲས་པ་ཡིན་ཞེས་གསུང་ངོ་། ། དེ་ནས་ལོ་ཆེན་སྐྱབས་མཆོག་དཔལ་བཟངཔོ་དང་། སྤྱན་སྔ་བསོད་ནམས་བཟང་པོ་སོགས་དམ་པ་མང་པོས་གསོལ་བ་བཏབ་པ་ལ་བརྟེན་ནས། རྒྱུད་སྡེ་བཞིའི་ལམ་གྱི་ལུས་ཡོངས་སུ་རྫོགས་པ་སྟོན་པའི་བསྟན་བཅོས་ཆེན་པོ་གསང་ཆེན་ལམ་གྱི་རིམ་པ་མཛད་དེ་གངས་རིའི་ཁྲོད་འདིར་གསང་སྔགས་རྒྱུད་སྡེ་བཞིའི་ལམ་གྱི་རིམ་པ་ལ་སྔོན་མེད་པའི་ཤིང་རྟའི་ལམ་སྲོལ་ཕྱེ་བར་མཛད་དོ། ། དེ་ནས་སྡེ་སྣོད་འཛིན་པ་དུ་མ་ལ་གསང་སྔགས་ལམ་རིམ་གསུངས། དེའི་ཚེ་བར་ཆད་ཀྱི་ལྟས་ཤིན་ཏུ་རྩུབ་པ་ཅི་རིགས་པ་བྱུང་། དགེ་བཤེས་གཅིག་གཉིས་ཀྱང་འདས་པ་ལ། དཔོན་སློབ་རྣམས་ཀྱིས་སྐུ་མཚམས་དམ་པར་མཛད་དེ་ཐུགས་དམ་དང་ཟློག་པ་སོགས་ལ་ཤིན་ཏུ་འགྲུས་པར་མཛད་པས་ཚེགས་མེད་པར་བཟློག ། དེའི་ཚེ་བཅོམ་ལྡན་འདས་རྡོ་རྗེ་འཇིགས་བྱེད་ཀྱི་སྒྲུབ་ཐབས་བདུད་ཐམས་ཅད་ལས་རྣམ་པར་རྒྱལ་བ་དང་སྦྱིན་སྲེག་གི་ཆོ་ག་རྒྱས་པའི་རྩོམ་པ་ཡང་མཛད་དོ། ། རྗེ་རིན་པོ་ཆེ་འདི་ཉིད་ཐུགས་དམ་སྒོམ་བཟླས་སོགས་མཛད་པའི་སྐབས་སུ་སྐུ་མདུན་ན་ཡོད་པ་རྣམས་ཀྱིས་སྒོ་གསུམ་གྱི་སྤྱོད་པ་ཅི་བྱས་ཀྱང་ཆེད་དུ་གཏད་ནས་ཐུགས་བཅུག་ན་མ་གཏོགས་ཐུགས་ཀྱིས་དེ་རྣམས་ཅི་ཡང་མི་ངེས་པ་ཞིག་ཡོད་པར་གསུངས། དེ་དུས་ཐུགས་སྲས་རྣམས་ཀྱིས་ཐུགས་དམ་རྐྱེན་གང་གིས་ཀྱང་མི་གཡེང་བ་འདི་དུས་ཇི་ཙམ་ནས་ལགས་ཞུས་པས། དགེ་སྦྱོར་གྱི་དུས་སུ་དེ་ལྟར་འོང་བ་བྱམས་པ་གླིང་ནས་ཡིན། ལྟ་རྟོག་དང་དཔྱད་པ་ཞིབ་པོ་བྱེད་པའི་སྐབས་སུ་དེ་ལྟར་འོང་བ་སྔ་མོ་ནས་ཡོད་ཅེས་གསུང་ངོ་། ། གནས་དེར་ལོ་གཉིས་བཞུགས། དེ་ནས་བྱང་ཆུབ་ལུང་དུ་དགུན་བཞུགས་མཛད། སྔགས་མཚན་ཉིད་ཀྱི་སྡེ་སྣོད་འཛིན་པ་བརྒྱ་ཕྲག་དུ་མ་ལ་གསང་སྔགས་ལམ་རིམ་གསུངས། སོས་ཀ་སྐྱིད་ཤོད་དུ་བྱོན། སྣེའུ་ནས་དད་པ་དྲག་པོས་ཞབས་ཏོག་ཚད་མེད་པ་ནར་མར་མཛད་དེ་དབྱར་གནས་སེ་ར་ཆོས་སྡིངས་སུ་བཞུགས། སྐུ་མཚམས་ཤིན་ཏུ་དམ་པར་མཛད། གསང་འདུས་རིམ་ལྔ་དང་། དཔྱིད་ཐིག་སོགས་མ་རྒྱུད་ཀྱི་རྫོགས་རིམ་འགའ་ཞིག་གསུངས། གནས་དེར་མཁས་གྲུབ་བསྟན་པའི་ཉི་མ་དགེ་ལེགས་དཔལ་བཟང་པོས་ཀྱང་མཇལ། དེར་གསོལ་བ་འདེབས་པ་མང་པོའི་ངོར་དབུ་མ་རྩ་ཤེའི་རྒྱ་ཆེར་འགྲེལ་མཛད་པར་བཞེད་ནས་གཞུང་གི་རིགས་པའི་དཀའ་གནས་ཕྲ་མོ་རྣམས་ལ་དཔྱད་པ་ཞིབ་ཏུ་མཛད་པས། རིགས་པ་ཕྲ་མོ་འགའ་ཞིག་ལ་དོགས་པ་ཅུང་ཟད་དཔྱད་དཀའ་བ་བྱུང་ནས། བླ་མ་དང་རྗེ་བཙུན་འཇམ་པའི་དབྱངས་ལ་གསོལ་བ་དྲག་ཏུ་བཏབ་པས། སྐབས་ཤིག་ན། ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་སྟོང་ཉིད་ཉི་ཤུའི་འགྲེས་རྐང་རྣམས་གསེར་བཙོ་མ་ཡི་གེར་བཀོད་པའི་རྣམ་པས་བར་སྣང་ཁྲིག་གིས་གང་བར་གཟིགས་པ་ཡང་ཡང་བྱུང་བས། རྩ་ཤེའི་རིགས་པ་ཤིན་ཏུ་ཕྲ་བ་རྣམས་ལའང་དོགས་པ་ལྷག་མ་མེད་པར་འབད་མེད་དུ་ཆོད་སོང་གསུང་ངོ་། ། དེ་ནས་ར་ཁ་བྲག་ཏུ་ཕེབས་ནས་དྲང་བ་དང་ངེས་པའི་དོན་རྣམ་པར་འབྱེད་པའི་བསྟན་བཅོས་ལེགས་བཤད་སྙིང་པོ་མཛད། སེ་ར་ཆོས་སྡིངས་སུ་རྩ་ཤེའི་རྣམ་བཤད་ཆེན་མོ་མཛད། དེའི་ཚེ་རྒྱ་ནག་གི་རྒྱལ་པོ་ཆེན་པོ་ཏ་མིང་གིས་རྗེ་རིན་པོ་ཆེ་འདི་ལ་དད་པ་ཆེན་པོས་ལུང་དང་གནང་སྦྱིན་དཔག་ཏུ་མེད་པའི་འབུལ་སྐྱེལ་དང་། རྒྱ་ཡུལ་དུ་བསོད་ནམས་ཀྱི་ཞིང་དང་། སྐྱེ་བོ་མཐའ་དག་ལ་དམ་པའི་ཆོས་ཀྱི་བཀའ་དྲིན་མཛད་པའི་སླད་དུ་སྤྱན་འདྲེན་པའི་གསོལ་བ་ནན་ཆེར་འདེབས་པ་ལ་གསེར་ཡིག་པ་ཏཱ་ཞིང་བཞིས་འགོ་བྱས་བརྒྱ་ཕྲག་མང་པོ་མངགས་བྱུང་བ་ལ། དང་པོར་ཅུང་ཟད་དབེན་པ་འདྲར་མངོན་ཆུང་བར་བཞུགས་ཏེ་གསེར་ཡིག་པ་རྣམས་མཇལ་དུ་མ་གནང་། རྗེས་སུ་མི་དབང་གྲགས་པ་རྒྱལ་མཚན་པས་གཙོ་མཛད། དཔོན་ནམ་མཁའ་བཟང་པོ་བ་དང་བཅས་པ་ངོ་ཆེན་ལ་སྦྲན་ནས་གསེར་ཡིག་པ་རྣམས་ཀྱིས་མཆི་མ་ཕྱུང་ཞིང་ཞུ་བ་ནན་གྱིས་ཕུལ་བས་རྗེ་རིན་པོ་ཆེས་སེ་རར་ཕེབས། མཇལ་ཁ་གནང་། འབུལ་བ་རྣམས་བཞེས། རྒྱ་ཡུལ་ལ་འབྱོན་པ་དགག་བྱ་ཆེ་ཞིང་དགོས་པ་ཆུང་བའི་རྒྱུ་མཚན་དང་བཅས་པའི་ཞལ་ཏ་ནན་ཅན་ཞིབ་པར་བྱོན་ནས་བྱམས་ཆེན་ཆོས་རྗེ་སྐུ་ཚབ་ཏུ་མངགས་ཏེ་༸གོང་མའི་གསེར་ཡིག་པ་རྣམས་ཕྱིར་སློག ། དེ་ནས་སེ་ར་ཆོས་སྡིངས་སུ་སྡེ་སྣོད་འཛིན་པ་བརྒྱ་ཕྲག་མང་པོ་ཚོགས་པ་ལ་རྩ་ཤེ། དྲང་ངེས་རྣམ་འབྱེད། བཞི་བརྒྱ་པ། གསང་སྔགས་ལམ་རིམ། རྩ་ལྟུང་དང་བླ་མ་ལྔ་བཅུ་པ་ལ་སོགས་པའི་བཤད་པ་ཞིབ་པར་གསུངས་ཤིང་བྱང་ཆུབ་ལམ་གྱི་རིམ་པའི་ཁྲིད་ཀྱང་གནང་། དེ་ནས་གསང་ཕུ། བདེ་བ་ཅན། དགའ་སྐྱོར་ཟུལ་གསུམ་བཅས་ཀྱི་གདན་ས་པ། ཐང་སག་པའི་གདན་ཟུར་ལ་སོགས་པ་དགེ་བའི་བཤེས་གཉེན་སྡེ་སྣོད་འཛིན་པ་དྲུག་བརྒྱ་ཙམ་འདུས་པ་ལ་སྣེའུ་ནས་དབྱར་གནས་ཀྱི་བདག་རྐྱེན་དང་། དཔོན་སློབ་རྣམས་ཀྱི་སྤྱི་སྒོས་ཞབས་ཏོག་ཕུན་སུམ་ཚོགས་པ་མཛད། དེ་ལྟར་སེ་ར་ཆོས་སྡིངས་སུ་ལོ་གཉིས་ཙམ་བཞུགས་ནས་དགག་དབྱེ་ཐོན་པ་དང་། མི་དབང་གྲགས་པ་རྒྱལ་མཚན་པས་གསོལ་བ་བཏབ་པ་ལ་བརྟེན་ནས་སྐྱིད་སྨད་གྲུམ་བུ་ལུང་དུ་ཕྱགས་བཏེག ། ཕྱགས་ཕྱིར་བྱོན་པའི་བཤེས་གཉེན་ལྔ་བརྒྱ་ཙམ་ལ་ཕོགས་དང་ཞབས་ཏོག་ཕུལ་དུ་བྱུང་བ་མཛད་ཅིང་། གཞན་ཡང་ཕྱོགས་མཐའ་དག་ནས་དམ་པའི་ཆོས་གསུང་གི་བདུད་རྩི་ལེན་པ་ལ་འདུས་པ་དང་བཅས་དགེ་འདུན་སྟོང་ལོངས་པ་ཙམ་འཚོགས་ཤིང་། དགུན་བཞུགས་དེར་མཛད་ལམ་རིམ་དང་བདེ་མཆོག་ལཱུ་ཨི་པའི་སྒྲུབས་ཐབས་དང་། མ་རྒྱུད་ཀྱི་རྫོགས་རིམ་སོགས་རྒྱས་པར་གསུངས་སོ། ། དེ་ནས་རྗེ་རིན་པོ་ཆེས་གངས་རིའི་ལྗོངས་འདིར་རྒྱལ་བའི་བསྟན་པ་རིན་པོ་ཆེ་མི་ཉམས་ཤིང་འཕེལ་བའི་རྟེན་འབྲེལ་དུ་དགོངས་ནས་གངས་རིའི་མགོན་པོ་ཆོས་རྒྱལ་སྲོང་བཙན་སྒམ་པོས་གངས་རིའི་ཁྲོད་འདིར་ཐུབ་པའི་དབང་པོའི་བསྟན་པ་རིན་པོ་ཆེའི་སྒྲོན་མེ་གསར་དུ་བཙུགས་པའི་གནས་ལྷ་ལྡན་སྤྲུལ་པའི་གཙུག་ལག་ཁང་ལ་ཞིག་གསོ་ལེགས་པར་མཛད་དེ་རྟེན་དང་བརྟེན་པར་བཅས་པ་ཐམས་ཅད་གསར་དུ་བཞེངས་པ་ལྟ་བུར་མཛད་དེ་ 1409 གླང་གི་ལོ་ཟླ་བ་དང་པོའི་ཚེས་གཅིག་ནས་བཅོ་ལྔའི་བར་དུ་ཆོ་འཕྲུལ་ཆེན་པོའི་དུས་ཀྱི་མཆོད་པ་དངོས་གཞི་མཛད་པ་ལ། ཇོ་བོ་རིན་པོ་ཆེའི་དྲུང་དུ་དེ་བཞིན་གཤེགས་པ་རིགས་རྣམ་པ་ལྔ་འཕུལ་ལས་བཏོན་པ་དར་དཔྱངས་དང་བཅས་པའི་དབུ་རྒྱན་རྒྱུ་གསེར་བཟང་པོ་འབའ་ཞིག་ལས་བསྒྲུབས་པ། རིན་པོ་ཆེ་ནལ་དང། མུ་ཏིག་དང་། གཡུ་ལ་སོགས་པའི་ཕྲ་བཟང་པོ་བཀོད་པས་མཛེས་པར་བྱས་པ་དང་། ཇོ་བོ་མི་བསྐྱོད་རྡོ་རྗེ་དང་བཅུ་གཅིག་ཞལ་ལ། དངུལ་བཟང་པོ་ལས་བྱས་པའི་དབུ་རྒྱན་ཕུན་སུམ་ཚོགས་པ་དང་བཅས་པ་ཕུལ་ཞིང་། ཇོ་བོ་རིན་པོ་ཆེའི་དྲུང་དུ་དངུལ་གྱི་ལྷུང་བཟེད་ཆེ་ཚད་དུ་ལོངས་པ་དེའི་ཁ་ལ་འཚམ་པའི་དངུལ་གྱི་མཎྜལ་དང་བཅས་པ་དང་། ཇོ་ཤཱཀ་རྣམ་གཉིས་བཅུ་གཅིག་ཞལ་དང་བཅས་པ་ལ་ཆོ་འཕྲུལ་གྱི་རིང་ཉིན་རེ་བཞིན་ཞལ་གསེར། ཚེས་བརྒྱད་དང་བཅོ་ལྔ་ལ་སྐུ་ཡོངས་རྫོགས་ལ་གསེར་ཆབ་དང་བཅས་པ་ཕུལ་ཞིང་། ཇོ་ཤཱཀ་རྣམ་གཉིས་དང་ཐུབ་པ་གངས་ཆེན་མཚོས་གཙོ་མཛད་སྤྲུལ་སྐུའི་རྣམ་པ་ཅན་གྱི་སྐུ་འབུར་དུ་དོད་པ་ཐམས་ཅད་ལ་གོས་དར་ཕུན་སུམ་ཚོགས་པ་ལས་བྱས་པའི་བླ་གོས་དང་སྣམ་སྦྱར་དང་། སེམས་དཔའ་སེམས་མ་བཅུ་དྲུག་ལ་སོགས་པ་དང་ཁྲོ་བོའི་རྣམ་པར་བཞུགས་པ་ལ་སོགས་པ་རྣམས་ལ་ནི་དར་ཆེན་དང་གན་གོས་ལ་སོགས་པའི་སྟོད་གཡོགས་དང་སྨད་གཡོགས་དང་། གཞན་ཡང་གཙུག་ལག་ཁང་ཆེ་ཆུང་རྣམས་ཀྱི་ཏོག་དང་བྱ་འདབ་ལ་སོགས་པའི་རྩེ་ཟུར་ཕན་ཚུན་དུ་ཐ་གུས་སྤྲེལ་བ་ཐམས་ཅད་ལ་བ་དན་དང་རྔ་ཡབ་དང་དྲིལ་བུ་ལ་སོགས་པས་བར་མ་ཆད་པར་མཛེས་པར་བྱས་ཤིང་། ཕྱིའི་སྐོར་ལམ་ཆེན་མོའི་ཕྱི་རོལ་ནས་ཤིང་ཆེན་པོ་འཕང་ཤིན་ཏུ་མཐོ་བ་རྣམས་ལ་གོས་དར་སོགས་ལས་བྱས་པའི་བ་དན་ཆེན་པོ་འཇིགས་སུ་རུང་བ་ལ་ཕྱོགས་སྐྱོང་དང་དེའི་སྐུས་ཏོག་ལ་བརྒྱན་ཅིང་། དེ་དང་དེའི་སྔགས་བ་དན་ཉིད་ལ་བྲིས་པ་བཅོ་ལྔ་ཕྱོགས་སྐྱོང་བ་བཅོ་ལྔ་པོ་རང་རང་གི་ཁ་དོག་དང་མཐུན་པ་རང་རང་གི་ཕྱོགས་སུ་ལེགས་པར་བཙུགས་ནས་ནུབ་རེ་བཞིན་དེ་དག་གི་རྩ་བའི་གཏོར་སྟེགས་ཁར་ཕྱོགས་གཏོར་གཏོང་བ་དང་། དེ་དག་གི་བར་བར་དུ་གདུགས་དཀར་ལ་སོགས་པའི་རྒྱལ་མཚན་རང་རང་གི་ཆོ་ག་བཞིན་དུ་ལེགས་པར་བཙུགས་ཤིང་། བ་དན་དང་རྒྱལ་མཚན་དེ་དག་གི་ཤིང་རྣམས་ཐ་གུས་སྦྲེལ་བ་ལ་འཕན་དང་རྔ་ཡབ་དང་། དྲིལ་བུ་ལ་སོགས་པས་བར་མ་ཆད་པར་མཛེས་པར་བྱས་པ་ནི་འཇའ་ཚོན་ཀུན་ནས་བཀྲ་བས་ནམ་མཁའི་ལམ་ཁྱབ་པར་བྱས་པ་ལྟ་བུ་དང་། གཞན་ཡང་ཉིན་པར་ཡང་ཁྱམས་ནང་མ་ཡན་ཆད་ལ་དཀར་མེ་བརྒྱ་ཕྲག་བཞི་རེ་ཙམ་དང་། བར་སྐོར་ལ་བརྒྱ་ཕྲག་ལྷག་པ་དང་། ཕྱི་སྐོར་ལ་རྡོ་རིང་གི་འགྲམ། ཇོ་བོ་རིན་པོ་ཆེའི་ཞལ་གྱི་དྲང་ཐད་དུ་ཀོང་བུ་ཆེན་པོ་གྲུ་བཞི་པ་ཕྱོགས་རེ་ལ་འདོམ་ཚད་མ་གསུམ་གསུམ་ཡོད་པ་དེ་ཉིད་མར་ཁུས་ལེགས་པར་བཀངས་པ་ལ་འཚམ་པའི་སྡོང་བུ་ལས་འབར་བའི་མེ་ལྕེ་ན་གསེར་གྱི་མཆོད་སྡོང་གིས་ནམ་མཁའི་ལམ་འགོག་པར་བྱེད་པ་ལྟ་བུས་ཐོག་དྲངས། རྫའི་ཁོག་མ་ཆེན་པོ་མར་ཁུས་བཀང་བའི་སྡོང་བུ་མི་ཆེན་པོའི་ལག་པའི་སྦོམ་ཙམ་ལ་འཕང་མདའ་ཚད་ལྷག་ཙམ་གྱི་མར་མེ་བར་ཐག་འཚམ་པར་བཀོད་པས་ཕྱི་སྐོར་གྱི་ཕྱི་རིམ་འཁོར་བ་དང་། གཞན་ཡང་ར་མོ་ཆེ། ཀླུ་ཕུག ། པོ་ཏ་ལ། གུང་ཐང་རྣམས་སུའང་དཀར་མེ་དུ་མ་དང་། མཚན་མོ་ནི་བར་སྐོར་གྱི་རྩིག་འགྲམ་འཁོར་བ་དང་། ཁྱམས་གྲྭ་ཕྱི་མའི་ཀ་ཚར་ཇི་ལྟར་ཡོད་པ་བཞིན་དུ་མར་མེའི་ཕྲེང་བ་བཀོད་པས་མིག་གིས་བལྟ་བ་ཙམ་ཡང་བཟོད་དཀའ་བར་བྱས་ཏེ། མཚན་མོའི་གུང་ལའང་སྟེང་དུ་མངོན་པར་བལྟས་པ་ན་ནམ་མཁའ་མར་མེའི་འོད་ཀྱི་གོས་དང་བཅས་པས་ཁ་དོག་དམར་སྐྱ་ཉིད་དུ་མཐོང་བ་མ་གཏོགས་སྐར་མ་གཅིག་གི་གཟུགས་ཀྱང་མཐོང་བའི་ཡུལ་ལས་འདས་པར་གྱུར་ཏོ། ། གཞན་ཡང་ཡོན་ཆབ་བརྒྱ་ཕྲག་བརྒལ་བ་ཉིན་རེ་བཞིན་གསར་དུ་མངོན་པར་བཤམས་པ་རྣམས་ལ་ཁ་ཆེ་གུར་ཀུམ་སྦངས་པའི་ཁུ་བས་ཁ་ལེགས་པར་བསྒྱུར་བའི་གུར་ཀུམ་གྱི་རོ་མ་ནི་ཉིན་རེ་ལའང་བྲེས་གཞལ་དགོས་པ་དང་། གཞན་ཡང་སྤོས་ཀྱི་རྒྱལ་མཚན་དང་། གདུགས་དང་། སྤོས་སྣོད་ཐ་དད་དུ་མངོན་པར་བསྲེགས་པ་ལ་སོགས་པའི་དྲི་བཟང་པོས་ཕྱི་རོལ་གྱི་ཁོར་ཡུག་ཐམས་ཅད་དུའང་ཉིན་མཚན་གཉིས་ཀ་མངོན་པར་ཁྱབ་ཅིང་། དུ་བ་རྣམས་ནི་བར་སྣང་ལ་སྤྲིན་གྱི་སྣ་རིང་པོ་དག་ཕན་ཚུན་མདུད་པའི་ལྡ་ལྡི་བྲེས་པ་ལྟ་བུ། ཐ་ན་ཕྱི་སྐོར་གྱི་སྐོར་ལམ་རྣམས་ཀྱང་སྤོས་ཀྱི་ཆུས་ཆག་ཆག་བཏབ་པར་བྱས་ན་གཞན་ལྟ་ཅི་སྨོས། ཞལ་ཟས་མདའ་ཚད་ལྷག་ཙམ་ལ་མར་གྱི་རྒྱལ་སྲིད་རིན་པོ་ཆེ་སྣ་བདུན་ལ་སོགས་པའི་རྒྱན་ཡིད་འཕྲོག་པས་བརྒྱན་པ་བརྒྱ་རྩ་བརྒྱད་རེ་ཉིན་རེ་བཞིན་གསར་པ་གསར་པ་ཕུལ་ཞིང་། ཀོང་བུ་ཆེན་པོའི་གཡས་གཡོན་དུ་ས་སྟེགས་ལ་རྩམ་པ་ཁལ་བཞི་བརྒྱ་རེ་ལས་བྱས་པའི་ལྷ་བཤོས་རྒྱན་བཟང་པོ་དཔག་ཏུ་མེད་པས་སྤྲས་པ། འཕྱར་དར་བཙུགས་པ་དང་བཅས་པ་མངོན་པར་བཤམས་པའི་ཞལ་ཟས་རྙིང་པ་རྣམས་ནི་བདག་གིར་བྱེད་པ་མེད་པར་སྐྱེ་བོ་ཕོངས་པ་སྤྲང་པོའི་ཚོགས་ལ་བལྟོས་པ་མེད་པར་བྱིན། གཞན་ཡང་མཆོད་པའི་བྱེ་བྲག་མཐའ་ཡས་པ་དང་། རྒྱལ་སྲིད་རིན་པོ་ཆེ་སྣ་བདུན་ལ་སོགས་པའི་བཀོད་པ་ཡིད་འཕྲོག་པ་དཔག་ཏུ་མེད་པ་དང་བཅས་པས་མངོན་པར་མཆོད་དེ། རྗེ་བླ་མ་ཉིད་ཀྱིས་སྔགས་དང་ཕྱག་རྒྱ་དང་ཏིང་ངེ་འཛིན་གྱིས་བྱིན་གྱིས་བརླབས་ནས་མདོ་སྡེ་དང་རྒྱུད་སྡེ་ནས་བྱུང་བའི་ཆོ་ག་རྣམ་པར་དག་པས་མངོན་པར་མཆོད་ཅིང་། བསྟན་པ་དང་སེམས་ཅན་འབའ་ཞིག་ལ་དགོངས་པའི་ཐུགས་བསྐྱེད་ཤུགས་དྲག་པོས་བསྟན་པ་རྒྱས་པ་དང་སེམས་ཅན་ལ་ཕན་བདེ་འབྱུང་བའི་སྨོན་ལམ་རྣམ་པར་དག་པ་ཉིན་རེ་བཞིན་མཛད་ལ། དགེ་འདུན་སྐྱེ་བོའི་ཚོགས་དང་བཅས་པ་ལ་ཉིན་རེ་བཞིན་སློབ་དཔོན་དཔའ་བོས་མཛད་པའི་སྐྱེས་རབས་ཀྱི་ཆོས་ཐུན་རེ་གསུངས་ཏེ་དེའི་དུས་སྨོན་ལམ་ལ་འདུས་པའི་སྐྱེ་བོ་ཐམས་ཅད་རང་བཞིན་གྱིས་རྒྱུད་འཇམ་པ་དང་། དང་བ་དང་། དགེ་བ་ལ་སྤྲོ་བ་སོགས་ཀྱི་གཞན་དབང་དུ་གྱུར་པས་ཉིན་མཚན་ཁོར་ཡུག་ཏུ་ཆོས་མཉན་པ་དང་། ཕྱག་དང་། སྐོར་བ་དང་། སྨོན་ལམ་འདེབས་པ་དང་། གཟུངས་ཁ་ཏོན་དུ་བྱེད་པ་སོགས་དགེ་བའི་བྱ་བ་འབའ་ཞིག་གིས་དུས་འདའ་བར་གྱུར་ཅིང་། དེ་ཡང་མཚན་ཕྱེད་ལ་བབ་པའི་དུས་རང་ན་ཕྱི་སྐོར་བྱེད་པ་ཉིན་མོ་བས་ཅུང་ཟད་ཉུང་བར་མངོན་པ་ཙམ་མ་གཏོགས། སྐོར་བ་བྱེད་པ་བར་ཆད་པ་ནི་ཅུང་ཟད་ཀྱང་མ་བྱུང་ངོ་། ། དེ་ལྟ་བུའི་སྨོན་ལམ་བསམ་ལས་འདས་པའི་སྒོ་ནས་བསྟན་པ་དང་སེམས་ཅན་གྱི་གསོས་སུ་འགྱུར་བར་མཛད་དེ། དེའི་ཚེ་ཐུགས་དམ་པ་ཉམས་སྣང་ཤིན་ཏུ་བཟང་པོ་ཞིག་གི་མནལ་ལམ་དུ། ལྷ་སའི་ཉེ་སྐོར་གྱི་གཞི་ལས་སྐྱེ་བོའི་ཚོགས་གྲངས་ལས་འདས་པ་ཐོན་ནས། ཐམས་ཅད་ནམ་མཁའ་ལ་ཡར་ཐལ་བྱུང་དུ་འགྲོ་ཡི་འདུག ། འདི་ཅི་ཡིན་བྱས་པས་ངེད་རྣམས་ཇོ་བོ་རིན་པོ་ཆེ་ལ་འདི་ལྟར་མཆོད་པས་ཚངས་པའི་འཇིག་རྟེན་དུ་འགྲོ་བ་ཡིན་ཟེར་བ་དེ་འདྲ་བའི་རྨི་ལམ་ཡང་བྱུང་སྟེ། རྒྱལ་བས་སྔོན་མཉན་ཡོད་དུ་ཆོ་འཕྲུལ་ཆེན་པོ་བསྟན་པའི་དུས་སུ་གདུལ་བྱའི་དོན་ཇི་ལྟར་མཛད་པ་དེ་ཁོ་ན་བཞིན་དུ་ལྷ་མི་བགྲང་བ་ལས་འདས་པ་ཞིག་སྨིན་ཅིང་གྲོལ་བར་མཛད་དེ་ངན་སོང་གི་རྒྱུན་ལམ་ནི་བཅད། མཐོ་རིས་དང་ཐར་པའི་ལམ་ནི་ལམ་པོ་ཆེ་བཞིན་དུ་བྱས་ཏེ། རྒྱལ་བའི་བསྟན་པ་ལ་རྒྱལ་བ་རང་ཉིད་སླར་བྱོན་པ་ལྟ་བུར་མཛད་དོ། ། དེའི་ཚེ་རྗེ་རིན་པོ་ཆེ་ལ་གངས་ཅན་གྱི་བསྟན་འཛིན་དམ་པ་མང་པོ་དང་། ཡོན་བདག་ཆེ་ཕྲ་མང་པོས་རྒྱུན་དུ་ས་གཅིག་ཏུ་བཞུགས་ཆོག་པའི་དགོན་གནས་ཤིག་བཏབ་ཆོག་པ་དགོས་ཞེས་ཡང་དང་ཡང་དུ་གསོལ་བ་བཏབ་པ་ན་རྗེ་རིན་པོ་ཅེས་ཀྱང་མ་འོངས་པ་ན་བསྟན་པའི་རྒྱུན་ལ་ཕན་པར་དགོངས་ཞལ་གྱིས་བཞེས་ཏེ་ཇོ་བོ་རིན་པོ་ཆེའི་སྐུ་མདུན་དུ་དགོན་གནས་གང་བཟང་བརྟགས་པས་འབྲོག་རི་བོ་ཆེ་བཟང་བར་བྱུང་ཞིང་། ལྷོ་བྲག་གྲུབ་ཆེན་ལ་གསང་བའི་བདག་པོས། དབང་བསྐུར་རི་ཡི་ལྡེབས་དག་ཏུ། ། བཙུན་མོ་སྡིངས་ཀྱི་ངོས་ཕྱོགས་སུ། ། དགེ་འདུན་དཔག་མེད་འདུ་བར་འགྱུར། ། རི་ནི་གང་ཡིན་འཇམ་དབྱངས་འཆད། ། དབུས་གཙང་མདོ་ཁམས་རྒྱ་ཡུལ་གྱི། ། མཆོད་གནས་དམ་པ་ཚོགས་གསོག་རྟེན། ། མངའ་རིས་བོད་ཁམས་ཀུན་གྱི་སྐྱབས། ། ཕྱོགས་བཅུར་སྡེ་དགོན་རྒྱས་པ་འབྱུང་། ། ཞེས་ལུང་བསྟན་པ་ལྟར་འབྲོག་རི་བོ་ཆེར་དགོན་གནས་འདེབས་པར་དགོངས་ནས་སྨོན་ལམ་གྲོལ་འཔྲལ་འབྲོག་རི་བོ་ཆེར་ཞབས་ཀྱིས་བཅགས་ནས་ས་གཞི་བྱིན་གྱིས་བརླབས། སྲས་ཀྱི་ཐུ་བོ་རྣམས་ལ་འདི་ལྟར་བགྱིས་ཀྱི་བཀའ་ལུང་སྩལ། དེ་ནས་དཔྱིད་སྔོན་མ་སེ་ར་ཆོས་སྡིངས་སུ་བཞུགས། སྡེ་སྣོད་འཛིན་པ་དྲུག་བརྒྱ་ཙམ་ལ་དབུ་མ་རྩ་ཤེ། ཚུལ་ཁྲིམས་ལེའུ། སྒྲུབས་ཐབས་ཀུན་བཟང་། ལམ་རིམ་ལ་སོགས་པ་མདོ་སྔགས་ཀྱི་ཆོས་མང་དུ་གསུངས། དེ་ནས་སྤྱན་སྔ་རིན་པོ་ཆེ་བསོད་ནམས་བཟང་པོ་བས་གསོལ་བ་ནན་ཆེར་བཏབ་པ་ལ་བརྟེན་ནས། དཔྱིད་རྟིང་མ་རྗེ་རིན་པོ་ཆེ་དཔོན་སློབ་ཉིས་བརྒྱ་ཙམ་གྱིས་ཟངས་རིའི་ཕུ་མཆིན་དུ་བྱོན། སྤྱན་སྔ་རིན་པོ་ཆེ་བསོད་ནམས་བཟང་པོ་དང་། མཁན་ཆེན་རྒྱལ་བཟང་བས་གཙོ་མཛད་ཐེལ་པའི་རི་དགེ་མང་པོ་དང་། གཞན་ཡང་སྡེ་སྣོད་འཛིན་པ་མང་དུ་འདུས་པ་རྣམས་ལ་ལམ་རིམ་ལ་སོགས་པའི་ཆོས་མང་དུ་གསུངས། སྲས་ཀྱི་ཐུ་བོ་རྗེ་དར་མ་རིན་ཆེན་པ་དང་། འདུལ་འཛིན་གྲགས་པ་རྒྱལ་མཚན་གཉིས་ཀྱིས་ཐོག་མ་མཛད་བའི་དགེ་འདུན་ཕལ་ཆེ་བས་འབྲོག་རི་བོ་ཆེར་བྱོན་ཏེ་དགེ་ལྡན་རྣམ་པར་རྒྱལ་བའི་གླིང་བཏབ། ཕྱོགས་ཀྱི་ཡོན་བདག་དང་། ཉེ་སྐོར་གྱི་བན་སྐྱའི་སྡེ་ཐམས་ཅད་ཀྱིས་དད་བསླངས་ཚད་མེད་པ་དགའ་སྤྲོ་དང་བཅས་པས་བསྒྲུབས་པས་དེ་ཁའི་ལོ་ལ་གཟིམ་ཁང་གིས་ཐོག་དྲངས་བྲང་ཁང་རྫོགས་པར་གྲུབ་པ་བདུན་ཅུ་ལྷག་ཙམ་དང་། གཞི་བཏིང་བ་བརྒྱ་ཕྲག་བརྒལ་བ་བྱུང་། བྲང་ཁང་སོ་སོ་ཕལ་ཆེ་བ་ལའང་འདུལ་བ་ནས་ཇི་ལྟར་གསུངས་པ་བཞིན་དུ། དང་པོར་གཞི་བརྟག་པ་དང་། བརྟགས་ནས་དགེ་འདུན་ལ་གསོལ་བ་དང་། དེ་ནས་དགེ་འདུན་གྱིས་གནང་བ་སྦྱིན་པ་དང་། ལག་གི་བླ་བསྐོ་བ་དང་། རྡེ་བཏེག་པའི་མཐའ་ལས་བྱུང་པའི་རུང་ཁང་གཅོད་པ་དང་། ཁང་པའི་ཚད་ལས་མ་ལྷག་པར་རྩིག་པ་སོགས་ཀྱི་ཕྱག་ལེན་དག་ཐེར་ཅན་མཛད་པས། མཁར་ལས་ཀྱི་ཕྱག་ལེན་ཙམ་ཀྱིས་ཀྱང་བསྟན་པ་རིན་པོ་ཆེ་གསལ་བར་མཛད་དོ། ། རྗེ་ཉིད་ཀྱིས་ལོ་དེའི་དབྱར་གནས་འོལ་ཁ་བས་གདན་དྲངས་ནས་འོལ་ཁ་བསམ་གཏན་གླིང་དུ་མཛད་དེ་རྗེ་རིན་པོ་ཆེས་སྐུ་མཚམས་དམ་པོ་བཅད་ནས་བླ་མ་དང་ཡི་དམ་ཐ་མི་དད་དུ་དམིགས་པ་ལ་གསོལ་བ་ཤུགས་དྲག་པོ་འདེབས་པར་མཛད་ཅིང་། དཔལ་གསང་བ་འདུས་པའི་རྫོགས་རིམ་རིམ་པ་ལྔའི་ངོ་སྤྲོད་ཆེན་མོ་རིམ་པ་ལྔ་གསལ་བའི་སྒྲོན་མེ་རྩོམ་པའི་ཐུགས་འདུན་བཏང་། ཟིན་བྲིས་འདེབས་པ་མཛད་པའི་སྐབས་སུ། མནལ་ལམ་གྱི་ལྟས་ངོ་མཚར་བ་བྱུང་བ་དག་མཉེལ་བར་གྱུར་ན་མི་རུང་སྙམ་དུ་དགོངས་ནས། བརྡའི་ཚིག་གིས་རྣམ་པར་བཅིངས་པའི་ཆིགས་སུ་བཅད་པ་ཡི་གེར་མཛད་དེ། ཀུན་གྱི་མིག་ལམ་དུ་འགྱུར་བའི་གནས་ཇི་ལྟ་བར་བཞག་པར་མཛད་དོ། ། དེ་ནི་བཀའ་འབུམ་ཐོར་བུར་གསལ་བ་ལྟར་དང་། བརྡ་ཚིག་དེ་དག་གི་དོན་མཁས་གྲུབ་ཐམས་ཅད་མཁྱེན་པས་ཞིབ་ཏུ་བཀྲལ་བ་ལྟར་རོ། ། དེ་ནས་གནས་དེར་མདོ་སྔགས་ཀྱི་ཆོས་མང་དུ་གསུངས། 1410 སྟག་ལོ་ཟླ་བ་གཉིས་པའི་ཚེས་ལྔ་ལ་རི་བོ་དགེ་ལྡན་རྣམ་པར་རྒྱལ་བའི་གླིང་དུ་ཕྱགས་ཕེབས། ལམ་རིམ་གསང་འདུས་སྒྲོན་གསལ་རིམ་ལྔ་དང་བཅས་པ་གསུངས་ཤིང་། མངོན་པ་ཀུན་ལས་བཏུས་དང་ས་སྡེ་ལ་སོགས་པའི་འགངས་ཀྱི་རྣམ་གཞག་དང་། ཚད་མའི་དཀའ་གནས་ཀྱང་མང་དུ་གསུངས། དཔལ་གསང་བ་འདུས་པའི་བཤད་རྒྱུད་ལྷ་མོ་བཞི་ཞུས་དང་ཡེ་ཤེས་རྡོ་རྗེ་ཀུན་ལས་བཏུས་གཉིས་ཀྱི་རྣམ་བཤད་རྒྱས་པའི་རྩོམ་པའང་མཛད། དེའི་པྱི་ལོ་དཔལ་གསང་བ་འདུས་པའི་རྫོགས་རིམ་རིམ་པ་ལྔ་རབ་ཏུ་གསལ་བའི་སྒྲོན་མེ་ཞེས་བྱ་བའི་ལེགས་པར་བཤད་པའི་གཏེར་ཆེན་པོ་དེ་ཉིད་དང་། རིམ་ལྔ་གདན་རྫོགས་ཀྱི་ཁྲིད་ཡིག་དང་བཅས་པའང་མཛད་ནས་ཐེག་པ་ཆེན་པོའི་ཆོས་ཀྱི་འབྱོར་པ་དཔག་ཏུ་མེད་པ་སྩོལ་བར་མཛད་དོ། ། དེ་ནས་དགུང་ལོ་ལྔ་བཅུ་ང་བདུན་པའི་ཐོག་ཏུ་རྒྱལ་བའི་བསྟན་པ་ཆེས་ཆེར་རྒྱས་པ་བདུད་སྡིག་ཏོ་ཅན་གྱིས་མ་བཟོད་ནས་བར་ཆད་ཀྱི་མཚན་མ་ཅི་རིགས་བྱུང་བ་བྱམས་སྙིང་རྗེ་བྱང་ཆུབ་ཀྱི་སེམས་ཀྱི་མཐུ་དང་། འོད་གསལ་བདེ་བ་ཆེན་པོའི་ཡེ་ཤེས་ཀྱི་མཐུས་བཟློག་པར་མཛད། དེ་ཡང་སྔོན་ཐུབ་པའི་དབང་པོས་བདུད་བྱེ་བ་ཕྲག་དུང་ཕྱུར་བྱམས་པའི་དཔུང་གིས་བཟློག་པར་མཛད་པ་ཇི་ལྟ་བ་དེ་བཞིན་དུ་མཛད་དེ་ལྷ་དང་བཅས་པའི་འགྲོ་བ་ཐམས་ཅད་ཀྱི་དབུགས་ཕྱིན་པ་ཐོབ་པར་གྱུར་ཏོ། ། དེ་ནས་ལོ་དེའི་ཕྱི་ལོ་མི་དབང་གྲགས་པ་རྒྱལ་མཚན་པས་གསོལ་བ་བཏབ་ནས་འོན་བཀྲ་ཤིས་རྡོ་ཁར་གདན་དྲངས། སྡེ་སྣོད་འཛིན་པ་བརྒྱ་ཕྲག་དུ་མ་ལ་དབུ་ཚད་དང་ལམ་རིམ་ལ་སོགས་པའི་ཆོས་མང་དུ་གསུངས་ནས་ཕྱོགས་དེའི་སྐྱེ་བོ་མཐའ་དག་ཚིམ་པར་མཛད་དོ། ། རྗེ་རིན་པོ་ཆེའི་སྐུ་བཀྲ་ཤིས་རྡོ་ཁ་མར་གྲགས་པའི་བྱིན་རླབས་ཅན་འདི་རྣམས་ཀྱང་དེ་དུས་བྱུང་བ་ཡིན་ནོ། ། དེ་ནས་དགའ་ལྡན་རྣམ་པར་རྒྱལ་བའི་གླིང་དུ་ཚུར་ཕེབས། དེ་ནས་བརྩམས་ཏེ་རིམ་པ་བཞིན་དུ་དཔལ་འཁོར་ལོ་བདེ་མཆོག་ལཱུ་ཨི་པའི་ཊཱིཀྐ་ཆེན་མོ་དང་། རྫོགས་རིམ་རྣལ་འབྱོར་བཞི་ལྡན་གྱི་ཁྲིད་ཡིག་ཆེ་ཆུང་། བདེ་མཆོག་གི་སྒྲུབ་ཐབས། དཔལ་གསང་བ་འདུས་པའི་རྩ་རྒྱུད་དང་འགྲེལ་པ་སྒྲོན་གསལ་གྱི་ཞུས་དག་དག་ཐེར་ཅན་མཛད་ནས། ཆིག་དོན་ཤིན་ཏུ་ཞིབ་པར་འཆད་པའི་མཆན་བུ་དང་། ལེའུ་སོ་སོ་དང་སྤྱིའི་དཀའ་བའི་གནས་རྣམ་པར་གཏན་ལ་འབེབས་པའི་མཐའ་གཅོད་དང་། དོན་ཚན་སོ་སོའི་དམིགས་འབྱེད་པའི་བསྡུས་དོན་དང་བཅས་པ་མཛད་ཅིང་། རྒྱུད་སྡེ་བཞི་དང་འབྲེལ་བའི་བཤད་པ་མཐའ་དག་པ་རྒྱུན་མ་ཆད་པར་གསུངས་པས་རྒྱལ་བའི་བསྟན་པ་རིན་པོ་ཆེའི་སྙིང་པོ་མཐའ་དག་ཉམས་ནས་མིང་ཙམ་ཡང་མེད་པར་གྱུར་པ་གཞི་ནས་བསླངས་ཏེ་ལེགས་པར་གསལ་བར་མཛད་པས་གངས་ཅན་པ་རྣམས་ལ་རྒྱལ་བ་བས་ཀྱང་བཀའ་དྲིན་ཆེ་བར་གྱུར་པ་ཡིན་ནོ། ། དེ་ནས་ 1415 ལུག་ལོའི་དབྱར་ནས་འགོ་བརྩམས་སྔགས་ཀྱི་བསྒྲུབ་མཆོད་ཁང་པ་ཞིག་གསར་དུ་བསྒྲུབ་པའི་ཞལ་བཀོད་མཛད་དེ་གཙུག་ལག་ཁང་ཁྱམས་གཙང་ཁང་དང་བཅས་པ་ལ་ཀ་བ་བདུན་ཅུ་རྩ་གཉིས་ཀྱི་ས་ལ། དབུས་ཀྱི་གཙང་ཁང་དུ་སྟོན་པའི་སྐུ་ཇོ་བོ་རིན་པོ་ཆེའི་སྐུ་ཚད་ལས་ཅུང་ཞིག་གིས་ཆེ་བ་དང་། སྟེང་གི་གཙང་ཁང་དུ། དཔལ་གསང་བ་འདུས་པ་ལྷ་སུམ་ཅུ་རྩ་གཉིས། དཔལ་འཁོར་ལོ་བདེ་མཆོག་ལཱུ་ཨི་པ་ལྷ་དྲུག་ཅུ་རྩ་གཉིས། དཔལ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་རྣམས་ཀྱི་རྟེན་དང་བརྟེན་པར་བཅས་པའི་གཞལ་ཡས་ཁང་བློས་བསླངས་རྣམས་རྒྱུ་རིན་པོ་ཆེ་འབའ་ཞིག་ལས་བསྒྲུབས། དེ་ཡང་གཞལ་ཡས་ཁང་དང་ལྷ་གཞན་རྣམས་ཟངས་ལ་གསེར་གསོལ་བ། གཙོ་བོ་རྣམས་དང་། ཕྱོགས་ཀྱི་དེ་གཞིན་གཤེགས་པ་དང་སྙིང་པོའི་རྣལ་འབྱོར་མ་རྣམས་དངུལ་བཟང་པོ་འབའ་ཞིག་ལས་བཞེངས་པའི་གཙོ་བོ་ཡུམ་དང་བཅས་པ་རྣམས་རེ་རེ་ལའང་དངུལ་བྲེ་ཆེན་གཉིས་ལྷག་རེ་དང་རྡོར་དབྱིངས་ཀྱི་གཙོ་བོ་ལ་དངུལ་བྲེ་ཆེན་གཉིས་མ་ལོངས་ཙམ་དང་། འཁོར་གྱི་ལྷ་བཅུ་གཉིས་ལ་རེ་རེ་ལའང་དངུལ་བྲེ་ཆེན་ཕྱེད་དང་གཉིས་རེ་ཅུང་མ་ལོངས་ཙམ་དང་བཅས་པ་དང་། དེ་དག་ལ་རིན་པོ་ཆེ་དང་། གཡུ་རྙིང་བཟང་པོ་དཔག་ཏུ་མེད་པའི་ཕྲ་བསམ་གྱིས་མི་ཁྱབ་པ་དང་། གཞན་ཡང་རྗེ་བཙུན་འཇམ་པའི་དབྱངས། རྒྱལ་བ་ཚེ་དཔག་མེད། རྗེ་བཙུན་བྱམས་མགོན། བཅོམ་ལྡན་འདས་རྡོ་རྗེ་འཇིགས་བྱེད་ཞལ་ཕྱག་ཡོངས་སུ་རྫོགས་པ་རྣམས་ཀྱི་གསེར་སྐུ་མདའ་ཚད་རེ་དང་། བཅོམ་ལྡན་འདས་མ་གཙུག་ཏོར་རྣམ་པར་རྒྱལ་མ་དང་། གཙུག་ཏོར་གདུགས་དཀར་གཉིས་ཀྱི་གསེར་སྐུ་ཁྲུ་ཚད་རེ་དང་། གོས་དར་བཟང་པོ་མཐའ་ཡས་པ་བརྡུངས་པའི་དར་འདམ་འབའ་ཞིག་ལས་བསྒྲུབས་པའི་བཅོམ་ལྡན་འདས་རྡོ་རྗེ་འཇིགས་བྱེད་ཞལ་ཕྱག་ཡོངས་སུ་རྫོགས་པའི་སྐུ་ལ་རྒྱབ་མཐོ་བཅུ་བདུན་ཡོད་པ་རྣམས་བཞེངས་ཤིང་། དེ་དག་ཐམས་ཅད་ཀྱང་ལྷ་བཟོའི་བཟོ་ཐིག་དང་ཕྱག་ཚད་ཕལ་པ་མ་ཡིན་པར། ཤཱ་རིའི་བུ་དང་ཚངས་པ་ཨེ་ཌའི་བུ་ལ་སོགས་པས་ཞུས་པའི་ཕྱག་ཚད་ཀྱི་ཡི་གེའང་མང་དུ་ཡོད་མོད་ཀྱི་གཙོ་བོར། དཔལ་འཁོར་ལོ་བདེ་མཆོག་སྡོམ་པ་འབྱུང་བའི་རྒྱུད་ཀྱི་ལེའུ་གཅིག་གིས་ལྷའི་ཕྱག་ཚད་ཞིབ་པར་སྟོན་ཅིང་། དེའི་རྒྱ་ཆེར་འགྲེལ་རཏྣ་རཀྵི་ཏས་ཁྱད་པར་ཞིབ་ཏུ་གཏན་ལ་ཕབ་པ་དང་། དཔལ་གཤིན་རྗེ་གཤེད་དམར་པོ་དང་ནག་པོའི་རྒྱུད་གཉིས་ཀྱི་ལེའུ་རེ་རེས་ལྷའི་ཕྱག་ཚད་སྟོན་པ་རྣམས་གུང་ལེགས་པར་བསྒྲིགས་པའི་ཐིག་ཁོག་ནས་དྲངས་ཏེ། ལྷ་རྣམས་རྒྱལ་བས་གསུངས་པའི་ཕྱག་ཚད་དང་ལྡན་པར་བཞེངས་ཤིང་། དེ་དག་རྣམས་ལའང་རྒྱུའི་བྱིན་རླབས་སོགས་ཚུལ་བཞིན་དུ་མཛད་པས་གེགས་མེད་ཅིང་ཁྱད་པར་ཅན་གྲུབ་སྟེ། ལུགས་བཏང་བ་ལ་འདི་འདྲ་བའི་ལུགས་འདྲེན་བདེ་བ་དང་མཚར་བ་སྔར་འོང་མ་མྱོང་ཞེས་ལྷ་བཟོ་བ་དག་ཟེར་ལ། ཐམས་ཅད་ཀྱང་བལྟས་པ་ཙམ་གྱིས་ཡིད་འཕྲོག་པར་བྱེད་པའི་མིག་གི་བདུད་རྩི་འབའ་ཞིག་ཉེ་བར་བྱོན་ནོ། ། དེ་དག་ལས་ཀྱང་། ཁྱད་པར་དུ་གཞལ་ཡས་ཁང་གསུམ་བཞེངས་པའི་ལུགས་སྔ་མ་བཏང་བའི་ལུགས་ཕུད་ལ། དཔའ་བོ་ཁཎྜ་ཀ་པཱ་ལ་འཇའ་ཚོན་མ་བྱོན་ཏེ། དེ་ཡང་རྒྱུ་ཟངས་ཡིན་ཡང་ལུགས་ཀོང་ནས་བྱོན་མ་ཁད་ལ་ཟངས་ཀྱི་ཁ་དོག་ཡུངས་འབྲུའི་རྗེས་ཙམ་ཡང་མི་མངོན་པར་སྐུ་ཐམས་ཅད་འོད་ཟེར་ལྔའི་གོང་བུར་གྱུར་པའི་སྔོན་པོ་རྣམས་ནི་རྒྱ་མཐིང་བཟང་པོའི་མདངས་ཀྱིས་བསྒྲུན་དུ་མེད་ལ། དམར་པོ་དག་ནི་ད་ཆུ་བཏུལ་མ་བཟང་པོའི་ཁ་དོག་ལས་བདུན་འགྱུར་གྱིས་ལྷག་ཅིང་། དམར་སེར་དག་ནི་ལི་ཁྲིའི་མདངས་མོག་མོག་པོར་བྱེད་ལ། སེར་པོ་དག་གསེར་བཟང་པོའི་རྒྱན་གྱི་མདངས་ཀྱང་ར་གན་ལྟར་བྱེད་པ། གཞན་ཡང་དཀར་པོ་དང་། ལྗང་གུ་དང་། བཙོད་ཀྱི་ཁ་དོག་སོགས་དུ་མ་སྤེལ་བ་ནམ་མཁའི་འཇའ་ཚོན་སྐུ་ལ་འཁྱུད་པའི་རྣམ་པ་ལྟ་བུ་མིག་གིས་བཟོད་པར་དཀའ་བའི་འོད་ཟེར་གྱི་ཕུང་པོ་ཆེན་པོ་ཞིག་བྱོན་ཏེ། བྲད་བརྡར་སོགས་ཅུང་ཟད་ཀྱང་མ་བྱས་ཀྱང་ཤིན་ཏུ་འཇམ་ཞིང་གཙང་བ་ཤིན་ཏུ་ངོ་མཚར་བར་གྱུར་ནས། འདི་ལྟ་བུ་ཅི་ཞིག་ཅེས་གཟིགས་སུ་ཕུལ་ཞིང་། དག་བྱེད་ཀྱི་རྫས་དུ་མས་ཤིན་ཏུ་དག་པར་བྱི་དོར་བྱས་ཀྱང་སྔར་ལས་ཀྱང་འོད་ཟེར་རྣམས་ཆེས་ཆེར་ཁ་དོག་གསལ་བར་གྱུར་ནས། ལུགས་ཁ་བཅད་པའི་མཚམས་ལ་བལྟས་པས་ཟངས་ཀྱི་ཁ་དོག་ཐམས་ཅད་ཀྱང་དེ་འདྲ་བ་འབའ་ཞིག་ཏུ་གནས་འགྱུར་ནས་བཅད་མཚམས་འོད་ཟེར་སྣ་ལྔར་ཁྲིག་གེ་སྣང་ངོ་། ། རྗེའི་ཞལ་ནས་རྟེན་འདི་ལ་རྒྱན་དང་ན་བཟའ་ཁྱད་པར་ཅན་ཕུལ་ལ་གསོལ་བ་ཐོབ་བྲད་བརྡར་མ་བྱེད་ཅེས་གསུང་ངོ་། ། དེ་ལྟར་རྟེན་དེ་རྣམས་དང་གཙུག་ལག་ཁང་དང་བཅས་པ་རགས་རིམ་ཞིག་ལོ་དེ་ཁའི་ཁོངས་སུ་གྲུབ། ཉེ་སྐོར་གྱི་དགེ་འདུན་གྱི་སྡེ་རྣམས་དང་། ཕྱུགས་ལྷས་ཀྱི་གྲོང་པ་སྐྱེ་བོའི་ཚོགས་དང་བཅས་པ་ཐམས་ཅད་བསགས་ཏེ་རབ་སྟོན་བཟང་པོ་རྨད་དུ་བྱུང་བ་མཛད་ཅིང་། རྒྱུད་སྡེ་ནས་གསུངས་པའི་ཆོ་ག་རྣམ་པར་དག་པས་རབ་ཏུ་གནས་པ་ཕུན་སུམ་ཚོགས་པ་རྒྱས་པར་མཛད་དེ། དེ་ཕྱིན་ཆད་དབུ་རུ་སྟོད་སྨད་ཀྱི་ཕྱོགས་ཀུན་ཏུ་ལོ་ལེགས་པ་དང་། ཆར་ཆུ་དུས་སུ་འབབ་པ་དང་། བཤད་སྒྲུབ་རྒྱས་པ་ལ་སོགས་པའི་ཁྱད་པར་སྔར་ལས་ཕུལ་དུ་བྱུང་བའི་ངོ་མཚར་དང་ལྡན་པར་གྱུར་ཏོ། ། 1418 ཁྱི་ལོ་ལ་སྡེ་སྣོད་འཛིན་པ་བརྒྱ་ཕྲག་དུ་མ་ཕྱོགས་མཐའ་དག་ནས་བྱོན་པ་དང་། གཉུག་མར་གནས་པའི་དགེ་འདུན་དང་བཅས་པ་ལ་དགེ་ལྡན་ཉིད་དུ་ཆོས་ཀྱི་འཁོར་ལོ་རྒྱུན་མ་ཆད་པར་བསྐོར་ཞིང་། དཔལ་གསང་བ་འདུས་པའི་འགྲེལ་པ་སྒྲོན་གསལ་མཆན་དང་བཅས་པ་དང་། བཤད་རྒྱུད་འགའ་ཞིག་དང་། རིམ་ལྔའི་ཁྲིད་རྒྱས་པ་དང་། སྦྱོར་བ་ཡན་ལག་དྲུག་པའི་ཁྲིད་རྒྱས་པ་དང་། དུས་ཀྱི་འཁོར་ལོའི་འགྲེལ་ཆེན་དྲི་མ་མེད་པའི་འོད་ཀྱི་བཤད་པ་ཆེས་ཞིབ་པ་དང་། གཞན་ཡང་དབུ་ཚད། བདེ་མཆོག ། ལམ་རིམ་ལ་སོགས་པའི་ཆོས་ཟབ་ཅིང་རྒྱ་ཆེ་བ་དཔག་ཏུ་མེད་པ་གསུངས། དེའི་དབྱར་དང་སྟོན་ལ་གཙུག་ལག་ཁང་གི་ཁྱམས་ལ་ལོགས་བྲིས་ཀྱང་གྲུབ་པར་མཛད། དབུ་མ་ལ་འཇུག་པའི་རྣམ་བཤད་ཆེན་མོ་མཛད་པའང་ལེགས་པར་རྫོགས་པར་མཛད་དོ། ། ལོ་དེའི་གཞུག་ནས་ཐུགས་ཀྱི་དགོངས་པ་དང་སྟ་གོན་མཛད་ནས། དཔལ་གསང་བ་འདུས་པའི་རྩ་རྒྱུད་འགྲེལ་པ་སྒྲོན་གསལ་དང་བཅས་པ་པར་དུ་བརྐོ་བའི་སྦྱོར་བ་ཉེ་བར་བརྩམས་པས་འབད་རྩོལ་མེད་པར་ 1419 ཕག་ལོའི་ནང་དུ་ལེགས་པར་མཐར་ཕྱིན་པར་མཛད་ལ་ཕག་ལོ་ལ་སྡེ་སྣོད་འཛིན་པ་མཐའ་ཡས་པ་ལ་དཔྱིད་དང་དབྱར་གྱི་རིང་ལ་དཔལ་འཁོར་ལོ་བདེ་མཆོག་གི་རྩ་བའི་རྒྱུད་ལ་སོགས་པའི་ཆོས་དཔག་ཏུ་མེད་པ་གསུངས་ཤིང་། བདེ་མཆོག་རྩ་རྒྱུད་ཀྱི་ཊཱིཀྐ་རྨད་དུ་བྱུང་བའི་རྩོམ་པའང་རྫོགས་པར་མཛད་དོ། ། རྗེ་ཐམས་ཅད་མཁྱེན་པ་ཆེན་པོའི་མཛད་པའི་གཙོ་བོ་ནི་གདུལ་བྱ་རྣམས་ལ་ཆོས་བསྟན་ནས་སྨིན་ཅིང་གྲོལ་བར་མཛད་པ་འདི་ཡིན་ལ། མཛད་པ་དེ་ནི་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱི་ཡང་མཛད་པའི་གཙོ་བོ་ཡིན་ཏེ། མཛད་པ་ཀུན་ལས་གསུང་གི་ནི། ། མཛད་པ་མཆོག་ཡིན་དེ་ཡང་ནི། ། འདི་ཉིད་ཡིན་ཕྱིར་མཁས་པ་ཡིས། ། འདི་ལས་སངས་རྒྱས་རྗེས་དྲན་བྱོས། ། ཞེས་གསུངས་པ་ལྟར་རོ། ། དེས་ན་གངས་རིའི་ཁྲོད་འདིར་རྗེ་ཐམས་ཅད་མཁྱེན་པ་དང་མཛད་པ་མཚུངས་པ་སུ་ཡང་མ་བྱོན་ཏེ། སྔོན་རྒྱ་གར་འཕགས་པའི་ཡུལ་དུ་རྒྱལ་བ་མྱ་ངན་ལས་འདས་ནས་རྒྱལ་བའི་བསྟན་པ་འཛིན་ཅིང་སྤེལ་བ་ལ་འཕགས་པ་ཀླུ་སྒྲུབ་དང་མཚུངས་པ་སུ་ཡང་མ་བྱུང་བས་འཕགས་པ་ཀླུ་སྒྲུབ་ནི་རྒྱལ་བའི་བསྟན་པ་ལ་རྒྱལ་བ་ཉིད་ལྟར་བཀའ་དྲིན་མཚུངས་པ་མེད་པའོ་ཞེས་འཕགས་ཡུལ་གྱི་མཁས་གྲུབ་ཐམས་ཅད་མཐུན་པར་གླེང་ལ། དེ་བཞིན་དུ་བོད་ཡུལ་གངས་ཅན་གྱི་ལྗོངས་འདིར་ཡང་རྒྱལ་བའི་བསྟན་པ་འཛིན་ཅིང་སྤེལ་བའི་སེམས་དཔའ་ཆེན་པོ་བགྲང་བ་ལས་འདས་པ་བྱོན་མོད་ཀྱང་། རྒྱལ་བས་གསུངས་པའི་མདོ་སྔགས་ཀྱི་བསྟན་པ་ཡོངས་སུ་རྫོགས་པ་འཛིན་ཅིང་སྤེལ་བ་ལ་རྗེ་ཐམས་ཅད་མཁྱེན་པ་འདི་དང་མཚུངས་པ་སུ་ཡང་མ་བྱུང་བས་གངས་རིའི་ཁྲོད་འདིར་རྒྱལ་བསྟན་སྤེལ་བ་ལ་རྒྱལ་བ་རང་ཉིད་སླར་བྱོན་པ་ལྟར་རྣམ་པ་ཀུན་ནས་མཚུངས་པ་མེད་ཅིང་བཀའ་དྲིན་ཟླ་མེད་པར་གྱུར་ཏོ། ། དེ་ཡང་བདག་ཅག་གིས་རྗེ་བདག་ཉིད་ཆེན་པོ་ལ་དེ་ལྟར་བསྔགས་པ་དེ་རང་ཉིད་རྗེས་འཇུག་ཡིན་པ་རྒྱུ་མཚན་དུ་བྱས་ཏེ་མི་བདེན་བཞིན་དུ་འདུ་ཤེས་བསྒྱུར་ནས་བརྗོད་པ་མ་ཡིན་གྱི། དོན་ལ་གནས་པའི་རང་བཞིན་བརྗོད་པ་སྟེ། ཐུབ་བསྟན་པདྨོའི་ཚལ་ལ་འཇིག་རྟེན་འདིར། ། ཁྱོད་ནི་རྒྱལ་བའི་ཉི་མ་ཇི་བཞིན་ཞེས། ། མི་ཕམ་མགོན་པོས་ཁྱོད་ལ་མངོན་སུམ་དུ། ། དབུགས་དབྱུང་མཆོག་ཏུ་བསྔགས་ལ་གསོལ་བ་འདེབས། ། ཞེས་གསུངས་པ་ལྟར་རྗེ་རིན་པོ་ཆེ་ཙ་རི་ནས་བྱོན་ཏེ་མོ་ལའི་ལ་རྩར་ཕེབས་པའི་ཚེ་རྗེ་བཙུན་བྱམས་པ་མགོན་པོ་དངོས་སུ་བྱོན་ཏེ། ཕྱག་གཡས་པ་རྗེའི་དབུ་ཐོག་ཏུ་བཞག་ནས་རིགས་ཀྱི་བུ་ཁྱོད་ནི་རྒྱལ་བའི་བསྟན་པ་ལ་རྒྱལ་བ་རང་ཉིད་སླར་བྱོན་པ་ལྟ་བུར་འགྱུར་བར་ཤེས་པར་གྱིས་ཤིག་ཅེས་ལུང་བསྟན་པ་དང་དབུགས་དབྱུང་བ་མཛད་པ་ལྟར་རོ། ། དེ་ལའང་འདི་སྙམ་དུ་མདོ་ལས། དགེ་སློང་དག་གམ་མཁས་རྣམས་ཀྱིས། ། བསྲེགས་བཅད་བརྡར་པའི་གསེར་བཞིན་དུ། ། ལེགས་པར་བརྟགས་ལ་ང་ཡི་བཀའ། ། བླང་བར་བྱ་ཡི་གུས་ཕྱིར་མིན། ། ཞེས་དང་། ཚད་མ་རྣམ་འགྲེལ་ལས། བརྗོད་པར་འདོད་པའི་གཞན་དབང་ཕྱིར། ། སྒྲ་རྣམས་གང་ནའང་མེད་མ་ཡིན། ། དེ་ཡོད་པས་ནི་དོན་གྲུབ་ན། ། ཐམས་ཅད་ཀྱིས་ནི་ཐམས་ཅད་གྲུབ། ། ཅེས་གསུངས་པ་ལྟར། འདི་འདིའོ་ཞེས་བརྗོད་པའི་ཚིག་ཙམ་དང་ལུང་ཙམ་གྱིས་མཆོག་ཏུ་སྒྲུབ་པར་མི་ནུས་ཏེ། གཞན་དུ་ན་བླ་མ་གཞན་དག་ཐམས་ཅད་ལའང་འདི་འབའ་ཞིག་ཟླ་མེད་པའོ་ཞེས་བརྗོད་པས་ཆོག་གོ་སྙམ་ན། དེ་ནི་བདེན་ཏེ། གངས་རིའི་ཁྲོད་འདིར་རྒྱལ་བསྟན་འཛིན་ཅིང་སྤེལ་བ་ལ་རྗེ་ཐམས་ཅད་མཁྱེན་པ་ཉིད་མཚུངས་ཟླ་མེད་པའོ་ཞེས་བརྗོད་པ་ནི་ལུང་ཙམ་ལ་སྐྱབས་བཅོལ་ནས་བརྗོད་པ་མིན་གྱི། ཚུལ་འདི་ནི་དྲི་མ་མེད་པའི་རིགས་པས་ལེགས་པར་གྲུབ་པ་ཡིན་ནོ། ། ཇི་ལྟར་ཞེ་ན་ཚུལ་འདི་ལ་འབྲས་བུའི་རྟགས་དང་། སྣང་རུང་མ་དམིགས་པའི་རྟགས་དང་། ཡིད་ཆེས་ཀྱི་རྟགས་ཡང་དག་གསུམ་གྱི་སྒོ་ནས་ངེས་ཤེས་བསྐྱེད་པར་བྱར་ཡོད་དེ། འབྲས་བུའི་རྟགས་ལས་ཤེས་ཚུལ་ནི། རྗེ་བཙུན་བྱམས་པས། གང་དང་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པ། ། ཞེས་གསུངས་པ་ལྟར་གདུལ་བྱ་རྣམས་ལ་མཐོ་རིས་དང་ཐར་པ་དང་ཐམས་ཅད་མཁྱེན་པར་བགྲོད་པའི་ལམ་ཚང་ལ་མ་ནོར་བ། སངས་རྒྱས་དངོས་སུ་བྱོན་ཡང་དེ་ཕན་དུ་གསུང་དུ་མེད་པ་བྱང་ཆུབ་ལམ་རིམ་ཆེ་ཆུང་དང་། རྡོ་རྗེ་འཆང་ཆེན་པོའི་ལམ་གྱི་རིམ་པ་དང་། རིམ་ལྔ་གསལ་བའི་སྒྲོན་མེ་སོགས་མདོ་སྔགས་ཀྱི་གསུང་རབ་དགོངས་འགྲེལ་དང་བཅས་པའི་དོན་གྱི་སྙིང་པོ་མཐའ་དག་དྲི་མ་མེད་པའི་རིགས་པའི་ལམ་ནས་དྲངས་ཏེ་ངེས་པ་གཏིང་ཚུགས་པར་བསྐྱེད་པའི་བསྟན་བཅོས་ཆེན་པོ་འདི་དག་ལས་དཔག་པར་ནུས་སོ། ། དེ་ཡང་ཚད་མ་རྣམ་འགྲེལ་ལས། བླང་དང་དོར་བྱའི་དེ་ཉིད་ནི། ། ཐབས་དང་བཅས་པའི་རིག་མཛད་པ། ། གང་དེ་ཚད་མ་ཉིད་འདོད་ཀྱི། ། ཐམས་ཅད་རིག་མཛད་མ་ཡིན་ནོ། ། རིང་པོ་མཐོང་ངམ་མིན་ཡང་རུང་། ། འདོད་པའི་དེ་ཉིད་མཐོང་བ་ཡིན། ། ཞེས་གསལ་བར་གསུངས་པ་ལྟར་རོ། ། སྣང་རུང་མ་དམིགས་པའི་རྟགས་ཀྱིས་བསྒྲུབ་པ་ནི། རྒྱལ་བའི་མདོ་སྔགས་ཀྱི་བསྟན་པ་སྤེལ་བ་ལ་ཕྱོགས་འདིར་རྗེ་ཐམས་ཅད་མཁྱེན་པ་དང་མཚུངས་པ་གཞན་མ་བྱུང་སྟེ། རྗེ་བླ་མ་འདི་དང་མཚུངས་པ་གཞན་ཞིག་ཡོད་ན་འདིའོ་ཞེས་བསྟན་རྒྱུ་དགོས་པ་ལ་མི་སྣང་བའི་ཕྱིར་རོ། ། དེ་ཡང་སྔོན་དུས་འཕགས་མཆོག་ཐུགས་རྗེ་ཆེན་པོ་མི་རྗེའི་རྣམ་པར་བྱོན་པ་ཆོས་རྒྱལ་སྲོང་བཙན་སྒམ་པོ་སོགས་སྤྲུལ་པའི་ཆོས་རྒྱལ་མེས་དཔོན་རྣམ་གསུམ་དང་། སད་མི་མི་བདུན་སོགས་བསྟན་པ་སྔ་དར་ལ་བྱོན་པ་དེ་རྣམས་དང་། བསྟན་པ་ཕྱི་དར་ལ་ལྷོ་བྲག་མར་པ་ལོ་ཙཱ་དང་། འབྲོག་མི་ལོ་ཙཱ་བ་དང་། རྗེ་འགོས་དང་། ར་ལོ་ཆེན་པོ་སོགས་ལོ་ཙཱ་བ་བཀའ་དྲིན་ཅན་མང་པོ་དང་། རྣལ་འབྱོར་གྱི་དབང་ཕྱུག་མི་ལ་རས་པ་སོགས་གྲུབ་པའི་གོ་འཕང་མཐོན་པོར་བྱོན་པའི་སྐྱེས་བུ་དམ་པ་མང་དུ་བྱོན་མོད་ཀྱང་རྒྱལ་བས་གསུངས་པའི་མདོ་སྔགས་ཀྱི་བསྟན་པ་ཡོངས་རྫོགས་སྤེལ་བ་ལ་རྗེ་བླ་མ་འདི་དང་མཚུངས་པ་སུ་ཡང་མེད་དེ། སྔོན་བྱོན་པ་དེ་དག་ལས་འགའ་ཞིག་གིས་སྔགས་ཕྱོགས་མང་དུ་སྤེལ་ཡང་བསྟན་པའི་རྩ་བ་འདུལ་བ་སྤེལ་ནུས་པ་མ་བྱུང་། སྔགས་ལའང་རྒྱུད་སྡེ་བཞི་གའི་འཇུག་སྒོ་དབང་དང་དམ་ཚིག ། སོ་སོའི་ལམ་བགྲོད་ཚུལ་སོགས་རྡོ་རྗེ་འཆང་གི་དགོངས་པ་ཇི་བཞིན་དུ་མཐའ་དག་པར་འཛིན་ཅིང་སྤེལ་ནུས་པ་དཀོན་པར་བྱུང་ངོ་། ། འགའ་ཞིག་གིས་འདུལ་ཁྲིམས་གཙོ་བོར་བྱས་ཏེ་ཅུང་ཟད་རེ་སྤེལ་ནུས་པ་བྱུང་ཡང་ཐེག་པ་ཆེན་པོ་སྤྱི་དང་ཁྱད་པར་གསང་སྔགས་སྤེལ་ནུས་པ་མ་བྱུང་། འགའ་ཞིག་ལ་རང་རང་གི་ཐུགས་རྒྱུད་ལ་ས་ལམ་གྱི་རྟོགས་པ་ཁྱད་པར་ཅན་འཁྲུངས་ཀྱང་གདུལ་བྱ་འཁྲིད་པའི་ཚེ་ཡི་དམ་རེའི་སྒོམ་བཟླས་ལ་གཙོ་བོར་འཁྲིད་པ་དང་། སྔགས་ཀྱི་བསྐྱེད་རྫོགས་གང་རུང་རེ་གཙོ་བོར་སྟོན་པ་ལས་བསྟན་པ་ཡོངས་རྫོགས་སྤེལ་ནུས་པ་མ་བྱུང་ལ། རྗེ་ཐམས་ཅད་མཁྱེན་པ་འདིས་ནི་རྒྱལ་བའི་བསྟན་པའི་ནང་མཛོད་འདུལ་བ་སྤེལ་བ་ལ་རྒྱལ་བ་རང་ཉིད་སླར་བྱོན་པ་ལྟ་བུར་མཛད་དེ། འདུལ་བ་ལུང་སྡེ་བཞི་ནས་གསུངས་པའི་དགག་སྒྲུབ་གནང་གསུམ་གྱི་བཅས་མཚམས་ཕྲ་རགས་མཐའ་དག་གདུལ་བྱ་ལ་ངོ་སྤྲད་དེ་བཅས་པ་སོ་སོའི་དགག་བྱ་ཉོན་མོངས་དང་ཉེས་སྤྱོད་གང་གི་གཉེན་པོར་གསུངས་པ་དང་། དགོས་པ་བཅས་པ་དེ་དང་དེ་དག་བསྲུངས་པ་ལས་སེམས་རྒྱུད་ལ་རྟོགས་པ་གང་དང་གང་ཞིག་སྐྱེ་བ་དང་། ཇི་ལྟར་བསྲུང་ཚུལ་ལུང་གང་གི་ཐད་ནས་གསུངས་པ་དང་། གླེང་གཞི་གང་ལ་བརྟེན་ནས་བཅས་པ་དེ་མཛད་པ་སོགས་མཐའ་དག་པར་ངོ་འཕྲོད་པ་དང་། དེ་ཡང་ཤེས་པ་ཙམ་ལ་མ་བཞག་པར་ཆབ་ལེན་ལྷམ་འབུད། ནུབ་ལྷག་གཅོད་པ། རུང་ཆུ་གདབ་པ་ཡན་ཆད་བཅས་མཚམས་མཐའ་དག་ལག་ལེན་ལ་སྦྱར་ཞིང་ཡུལ་དུས་ཀྱི་དབང་གིས་བཅས་འགལ་གྱི་ཉེས་པ་བྱུང་ན་དེ་མ་ཐག་བཤགས་པ་དང་། བསྡམ་པ་དང་། བྱིན་གྱིས་བརླབ་པ་རྣམས་འདུལ་བ་ནས་གསུངས་པ་ལྟར་བྱས་ཏེ་སྡིག་ལྟུང་དང་ཞག་ཏུ་མི་འགྲོགས་པའི་ཚུལ་ཁྲིམས་རྣམ་པར་དག་པ་ལ་སྦྱར་ཏེ་ནུབ་ཛ་ལན་དྷ་ར་ནས་ཤར་ཕྱོགས་རྒྱ་མཚོ་ཆེན་པོ་ལ་ཐུག་གི་བར་འདུལ་བའི་བཅས་མཚམས་རྣམ་པར་དག་པ་བསྲུང་བའི་དགེ་འདུན་གྱི་སྡེས་ཁྱབ་པ་ད་ལྟའི་བར་དུ་མ་ཉམས་པར་ཐམས་ཅད་ཀྱི་མིག་ལ་སྣང་བ་འདི་ཡིན་ལ། འདི་ལྟ་བུའི་སངས་རྒྱས་ཀྱི་མཛད་པ་བྱེད་པ་པོ་བྱང་ཕྱོགས་འདིར་སུ་ཡང་མ་བྱུང་ངོ་། ། དེ་བཞིན་དུ་བྱང་ཆུབ་སེམས་དཔའི་བསླབ་པའི་གནས་ལའང་དང་པོར་སྨོན་སེམས་དང་འཇུག་སྡོམ་ལེན་ལུགས། བླངས་ནས་སྨོན་པའི་བསླབ་བྱ་ཐུན་མོང་དང་ཐུན་མོང་མ་ཡིན་པ་རྣམས་དང་། འཇུག་སྡོམ་གྱི་བསླབ་བྱར་རྩ་ལྟུང་དང་ཉེས་བྱས་བསྲུང་ཚུལ། འཇུག་སྡོམ་གྱི་སྒྲུབ་པའི་བསླབ་བྱ་ཚུལ་ཁྲིམས་རྣམ་པ་གསུམ་མམ་ཕྱིན་དྲུག་དང་བསྡུ་བཞི་ལ་སློབ་ཚུལ། དེ་དག་ཐམས་ཅད་ཐེག་ཆེན་གྱི་མདོ་གང་དང་གང་ནས་གསུངས་ཚུལ། མདོའི་དགོངས་པ་ཤིང་རྟ་ཆེན་པོས་བཀྲལ་ཚུལ། ཤིང་རྟ་ཆེན་པོའི་ལམ་སྲོལ་འཛིན་པའི་བླ་མ་གོང་མ་གཅིག་ནས་གཅིག་ཏུ་བརྒྱུད་པའི་ཕྱག་ལེན་ལ་སྲུང་ཐབས་ཇི་ལྟར་ཡོད་ཚུལ། དེ་དག་ལས་འདས་ན་བཤགས་པ་ཇི་ལྟར་བྱེད་ཚུལ། དེ་དག་ཐམས་ཅད་ཕྱག་ལེན་ལ་འདེབས་ཚུལ་རྣམས་མཐའ་དག་པར་ཐུགས་སྲས་སེམས་དཔའ་ཆེན་པོ་རྣམས་ལ་ཁྲིད་ཅིང་ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ་སོགས་སུ་མཐའ་དག་པར་གཏན་ལ་འབེབས་པར་མཛད་དེ། འདི་ལྟ་བུ་དང་མཚུངས་པ་གངས་རིའི་ཁྲོད་འདིར་སྔོན་མ་བྱུང་པ་ཀུན་ལ་གསལ་བ་ལྟར་རོ། ། ཐེག་པ་ཐུན་མོང་བའི་ལམ་གྱི་གནད་ཐམས་ཅད་ཉམས་ལེན་གྱི་རིམ་པར་བསྡུས་ཏེ་རྒྱལ་བའི་གསུང་རབ་དགོངས་འགྲེལ་དང་བཅས་པ་ལས་ཡི་གེ་ན་གཅིག་ཀྱང་དོར་དུ་མེད་པར་གང་ཟག་གཅིག་ལས་དང་པོ་པའི་ས་ནས་སངས་རྒྱས་ཀྱི་སའི་བར་དུ་རིམ་གྱིས་འཁྲིད་པའི་ཉམས་ལེན་དུ་སྦྱར་ཏེ་གཏན་ལ་འབེབས་པ་བྱང་ཆུབ་ལམ་རིམ་ཆེ་ཆུང་དང་། དེ་ཡང་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་རྗེ་བཙུན་བྱམས་པས་གསུངས་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་དང་སྦྱར་ཏེ་མཐའ་དག་པར་གཏན་ལ་འབེབས་པའི་བསྟན་བཅོས་ལེགས་བཤད་གསེར་གྱི་ཕྲེང་བ་དང་། འཕགས་པ་ཀླུ་སྒྲུབ་ཀྱི་དགོངས་པ་ལྟར་ཟབ་མོ་དབུ་མའི་ལྟ་བ་མཐའ་དག་པར་གཏན་ལ་འབེབས་པ་རྩ་ཤེའི་རྣམ་བཤད་ཆེན་མོ་རིགས་པའི་རྒྱ་མཚོ་དང་། དབུ་མ་ལ་འཇུག་པའི་རྣམ་བཤད་དགོངས་པ་རབ་གསལ་དང་། དྲང་བ་དང་ངེས་པའི་དོན་རྣམ་པར་འབྱེད་པ་ལེགས་བཤད་སྙིང་པོ་ཆེ་བ་དང་། རྒྱལ་བའི་དགོངས་པ་འཕགས་པ་ཀླུ་སྒྲུབ་ཀྱིས་བཀྲལ་བའི་ངེས་དོན་མཐར་ཐུག་རྟེན་འབྲེལ་ཟབ་མོའི་ཚུལ་ཆེས་གསལ་བར་སྟོན་པ་ལེགས་བཤད་སྙིང་པོ་ཆུང་བ་སོགས་སྔོན་མེད་པའི་བསྟན་བཅོས་ཆེན་པོ་འདི་དག་མཛད་ཅིང་། བསྟན་བཅོས་ཆེན་པོ་དེ་དག་གི་བཤད་རྒྱུན་ཡང་ད་ལྟའི་བར་དུ་མ་ཉམས་པར་བཞུགས་པས་འདི་ལྟ་བུའི་སངས་རྒྱས་ཀྱི་འཕྲིན་ལས་ལ་འགྲན་བཟོད་པ་སུ་ཡང་མེད་དོ། ། ཚུལ་འདི་དག་ལ་གཟུ་བོའི་བློས་དཔྱད་ན་དེ་དེ་བཞིན་ནོ་ཞེས་ཐལ་མོ་སྦྱོར་པ་ལས་འོས་མེད་དེ། སྔོན་དུས་གངས་རིའི་ཁྲོད་འདིར་རིག་གནས་མཐའ་དག་མཁས་པའི་དབང་པོར་གྲགས་པ་སྟག་ཚང་ལོ་ཙཱ་བས་ཀྱང་ཐོག་མར་ཁོང་རང་རྗེའི་རྗེས་འཇུག་མིན་གཤིས་བྲག་ཅའི་སྒྲ་བཞིན་གཞན་ཟེར་གྱི་རྗེས་སུ་འབྲངས་ཏེ་རྗེའི་གསུང་ལ་དགག་པ་ཅི་རིགས་མཛད་ཀྱང་རྗེས་སུ་ལེགས་བཤད་གསེར་ཕྲེང་སོགས་རྗེའི་གསུང་རྣམས་ལ་བལྟས་ཏེ་ལེགས་པར་བརྟགས་པ་ན་སྔར་བྱས་ལ་ནོང་ཞིང་འགྱོད་པ་དང་། རྗེ་རིན་པོ་ཆེའི་བསྟན་པ་ལ་ཡིད་ཆེས་ཀྱི་དད་པ་གཏིང་ཚུགས་པ་སྐྱེས་ཏེ་བཤགས་པ་དང་སྨོན་ལམ་གྱི་ཚིག ། བློ་ཆེན་རྒྱལ་བ་རྣམས་ཀྱི་སྤྱན་སྔ་རུ། ། བཟང་པོའི་སྨོན་ལམ་རླབས་ཆེན་གྲུབ་པའི་མཐུས། ། གྲགས་པའི་སྒྲ་ཆེན་ཐུབ་བསྟན་འགྲོ་བའི་དཔལ། ། བློ་བཟང་གྲགས་པའི་དཔལ་ལ་གུས་ཕྱག་འཚལ། ། ཞེས་སོགས་བཤགས་པ་དང་སྨོན་ལམ་མང་དུ་མཛད་ཅིང་། དེའི་རྒྱུ་མཚན་ཡང་། ཁྱོད་བློའི་ཉི་མ་གཞོན་ནུའི་དུས་ཀྱི་ཚེ། ། མདོ་དང་རྒྱན་གྱི་པད་ཚལ་རྒྱས་མཐོང་ནས། ། བདག་བློ་ཁེངས་པའི་ཀུ་མུད་ལྷག་པར་ཟུམ། ། ཟབ་ཡངས་མཁྱེན་པའི་གཏེར་ལ་གསོལ་བ་འདེབས། ། ཞེས་སོགས་རྗེའི་གསུང་རབ་རྣམས་ལ་གཟུ་བོའི་བློས་དཔྱད་ནས་ཡིད་ཆེས་སྐྱེས་པ་ཡིན་ཚུལ་གསལ་བར་གསུངས་འདུག་པ་དང་། དེ་བཞིན་དུ་ཀརྨ་པ་མི་བསྐྱོད་རྡོ་རྗེས་ཀྱང་ཕར་ཕྱིན་གྱི་ཊཱིཀྐ་སོགས་ཡིག་ཆ་འགའ་ཞིག་ཏུ་གཞན་གྱི་འདོད་ངོ་དང་བསྟུན་ནས་རྗེ་རིན་པོ་ཆེས་འཕགས་པ་ཀླུ་སྒྲུབ་ཀྱི་དགོངས་པ་ཐུན་མོང་མིན་པ་ཇི་བཞིན་བཀྲལ་བའི་ལྟ་བའི་གནད་རྣམས་ལ་དགག་པ་ཅུང་ཟད་མཛད་ཀྱང་། རྗེས་སུ་ཁོང་རང་གིས་མཛད་པའི་ཕར་ཕྱིན་གྱི་ཊཱིཀྐ་དེ་རྒྱལ་བ་དགེ་འདུན་རྒྱ་མཚོ་ལ་ཕུལ་ནས་སེ་འབྲས་ཀྱི་ཆོས་རྗེ་རྣམས་ཀྱིས་འདི་ལ་གཟིགས་ནས་འཐད་མི་འཐད་ཀྱི་དཔྱད་པ་མཛོད་གསུངས་པ་ན། སེ་ར་རྗེ་བཙུན་པས་དཔལ་མགོན་འཕགས་པ་ཀླུ་སྒྲུབ་ཀྱི་དགོངས་པ་རྗེ་རིན་པོ་ཆེས་བཀྲལ་བ་དང་མི་མཐུན་པ་རྣམས་དྲི་མ་མེད་པའི་རིགས་པས་སུན་དབྱུང་སྟེ་མཐའ་ཆོད་པར་མཛད་པ་ཀར་ལན་ཀླུ་སྒྲུབ་དགོངས་རྒྱན་མཛད་ནས། ཀརྨ་པ་མི་བསྐྱད་རྡོ་རྗེ་ལ་ཕུལ་བ་ན། རྗེ་ཀརྨ་པ་ཤིན་ཏུ་མཉེས་ནས། སེ་ར་རྗེ་བཙུན་པ་ལ་ཞུ་ཡིག་གནང་བར་ཡང་། དེང་སང་གི་སྐྱེ་བོ་བློ་ཆུང་འགའ་ཞིག་རང་རང་གི་ལུགས་ལ་རྨོངས་ཞེན་གྱིས་འདི་ཁོ་ན་བདེན་གྱི་གཞན་ནི་གཏི་མུག་གོ་ཞེས་བརྗོད་པ་དག་གི་འདོད་པ་དང་བསྟུན་པའི་བརྗོད་ཚུལ་ཙམ་ལས་ངེད་རང་ནི་རྗེའི་གསུང་རབ་རྣམས་ལ་ཡིད་ཆེས་ཀྱི་དད་པ་གཏིང་ཚུགས་པར་ཡོད་ཅེས་གསུངས་འདུག་པ་དང་། འབྲུག་པ་མི་ཕམ་པདྨ་དཀར་པོས་ཀྱང་སྐུ་ཚེའི་སྟོད་ལ་ཕྱོགས་སུ་ལྷུང་བའི་སྐྱེ་བོ་འགའ་ཞིག་གི་ཚིག་གི་རྗེས་སུ་ཞུགས་ཏེ་རྗེའི་གསུང་ལ་སྐྱོན་བརྗོད་ཅི་རིགས་ཤོར་ཡང་རྗེས་སུ་རྗེའི་གསུང་རབ་རྣམས་ལ་ཞིབ་ཏུ་གཟིགས་པ་ན་ཐུགས་འགྱོད་ཆེན་པོ་སྐྱེས་ཏེ་དགའ་ལྡན་དུ་ཕེབས་ནས་རྗེ་རིན་པོ་ཆེའི་སྐུ་གདུང་ལ་མཆོད་པ་ཚད་མེད་པ་ཕུལ་ཏེ་བཤགས་ཤིང་སྨོན་ལམ་འདེབས་པར་མཛད་པ་དང་རྗེ་ལ་བསྟོད་པ་མཛད་པའི་ཚིགས་བཅད་ལས་ཀྱང་། ཆོས་ཀྱི་རྒྱལ་པོ་ཆེན་པོ་ཤར་ཙོང་ཁ་པ་བློ་བཟང་གྲགས་པའི་དཔལ་གྱི་ཞབས་ཀྱི་པདྨོ་དྲི་མ་མེད་པ་ལ་ཕྱག་འཚལ་ལོ། ། དགེ་ལེགས་ཆུ་གཏེར་ཆེན་པོས་འཇིག་རྟེན་ལ། ། བློ་བཟང་ཉིན་མོར་བྱེད་པ་ཁྱོད་སྦྱིན་ཚུན། ། ས་འདི་རྨོངས་པའི་མུན་ལས་རྣམ་རྒྱལ་ཞེས། ། གྲགས་པའི་གཞིར་གྱུར་དེ་ལ་ཕྱག་འཚལ་ལོ། ། གང་དང་རྒྱལ་བ་ཀུན་གྱི་ཡོན་ཏན་ནི། ། སྲང་ལ་གཞལ་བཞིན་ལྕི་ཡང་མ་མཆིས་པས། ། ལྔ་བརྒྱ་པ་ཡི་གཙུག་རྒྱན་དུ་འོས་པ། ། ཐམས་ཅད་མཁྱེན་པ་ཁྱོད་ལ་ཕྱག་འཚལ་ལོ། ། སེང་གེའི་ཁྲི་ལ་སེང་གེའི་སྒྲ་བསྒྲགས་པས། ། སྨྲ་བའི་གླང་ཆེན་ཐམས་ཅད་དངངས་གྱུར་ཕྱིར། ། མཚུངས་བྲལ་ཁྱོད་ནི་སེང་གེའི་ང་རོའི་མཚན། ། བསྐལ་བཟང་སྒྲོན་མར་གྱུར་ལ་ཕྱག་འཚལ་ལོ། ། ལྷག་པའི་ཚུལ་ཁྲིམས་ཧ་རི་ཙན་དན་བསུང་། ། ཁྱོད་དྲིན་དྲི་བཞོན་གྱིས་འདིར་ཁྱོངས་པས་སུ། ། འཁོར་བའི་ཚ་གདུང་མིང་ཙམ་ལྷག་གྱུར་པས། ། སློབ་མར་བཅས་པ་བསྔགས་འོས་དེར་ཕྱག་འཚལ། ། ཞེས་སོགས་བསྔགས་པའི་ཚིགས་བཅད་མང་དུ་འབྱུང་བ་ལྟར་རོ། ། སྔགས་ཀྱི་སྐོར་ལ་འཇུག་སྒོ་དབང་དང་དབང་དུས་སུ་ཁས་བླངས་པའི་དམ་ཚིག་དང་སྡོམ་པ་དག་པར་བྱེད་ཚུལ། དེ་ནས་ལམ་བགྲོད་ཚུལ་རྣམས་མཐའ་དག་པར་འདོམས་པ་ལ་རྗེ་རིན་པོ་ཆེ་འདི་གངས་རིའི་ཁྲོད་ན་མཚུངས་ཟླ་མེད་པ་ཞིག་སྟེ་དེ་ཡང་གསང་སྔགས་རྒྱུད་སྡེ་བཞི་ལ་འཇུག་སྒོ་དབང་བསྐུར་ཚུལ་མི་འདྲ་བ་དང་། དེའི་དུས་སུ་ཐོབ་པའི་དམ་ཚིག་དང་སྡོམ་པ་བསྲུང་ཚུལ་ཐུན་མོང་མ་ཡིན་པའི་ཁྱད་པར་ཡོད་པ་རྣམས་དང་། དེ་ནས་ལམ་བགྲོད་ཚུལ་ལ་རྒྱུད་སྡེ་འོག་མ་ལ་མཚན་བཅས་དང་མཚན་མེད་ཀྱི་རྣལ་འབྱོར། བླ་མེད་ལ་རིམ་གཉིས་ཀྱི་རྣལ་འབྱོར། དེ་ལའང་ཕ་རྒྱུད་མ་རྒྱུད་གཉིས་ཀྱི་ཐུན་མོང་མིན་པའི་ཁྱད་པར་མི་འདྲ་བ་མང་དུ་ཡོད་པ་རྣམས་རྗེ་རིན་པོ་ཆེ་འདིས་རྒྱལ་བ་རྡོ་རྗེ་འཆང་སླར་ཡང་ཕྱོགས་འདིར་དངོས་སུ་བྱོན་པ་ཇི་ལྟ་བར་རྡོ་རྗེ་འཆང་ཆེན་པོའི་ལམ་གྱི་རིམ་པ་གསང་བ་ཀུན་གྱི་གནད་རྣམ་པར་ཕྱེ་བ་ཞེས་བྱ་བ་སྔོན་མེད་པའི་ལེགས་པར་བཤད་པའི་གཏེར་ཆེན་པོ་འདི་མཛད་ཅིང་། བྱེ་བྲག་ཏུ་ཕ་རྒྱུད་གསང་བ་འདུས་པའི་ལམ་གྱི་གནད་རྣམས་མཐའ་དག་པར་གཏན་ལ་འབེབས་པ་ལ་རྩ་རྒྱུད་ཀྱི་འགྲེལ་པ་སྒྲོན་མ་གསལ་བའི་མཆན་འགྲེལ། དཀའ་གནས་མཐའ་གཅོད། བསྡུས་དོན་བཅས་དང་། རིམ་ལྔའི་ངོ་སྤྲོད་ཆེན་མོ་རིམ་ལྔ་གསལ་བའི་སྒྲོན་མེ་སོགས་སྔོན་མེད་པའི་ལེགས་བཤད་ཆེས་མང་བ་དང་། མ་རྒྱུད་བདེ་མཆོག་ལཱུ་ཨི་པའི་སྒྲུབ་ཐབས་ཀྱི་རྣམ་བཤད་འདོད་འཇོ་དང་། རྫོགས་རིམ་གྱི་ཁྲིད་ཡིག་ཆེ་ཆུང་དང་བདེ་མཆོག་རྩ་རྒྱུད་ཀྱི་ཊཱིཀྐ་ངོ་མཚར་རྨད་དུ་བྱུང་བ་སྔོན་མེད་པའི་ལེགས་བཤད་ཀྱི་གཏེར་ཆེན་པོ་འདི་སོགས་རྡོ་རྗེ་འཆང་དངོས་སུ་བྱོན་ཡང་དེ་ཕན་དུ་གསུང་དུ་མེད་པའི་སྔགས་ཀྱི་བསྟན་བཅོས་མང་པོ་འོག་ཏུ་གསལ་བ་ལྟར་མཛད་དེ། རྗེ་འདིའི་མཛད་པ་ལྟ་བུ་གངས་རིའི་ཁྲོད་འདིར་སྔོན་ཆད་མ་བྱུང་བ་ཀུན་ལ་མངོན་སུམ་དུ་སྣང་བ་ལྟར་རོ། ། རྗེ་བཙུན་བླ་མ་འདིས་གངས་རིའི་ཁྲོད་འདིར་སངས་རྒྱས་ཀྱི་མཛད་པ་མཛད་པར་ཡིད་ཆེས་པའི་རྟགས་ཀྱིས་སྒྲུབ་པ་ནི། ལྷོ་བྲག་གྲུབ་ཆེན་ལ་གསང་པའི་བདག་པོས་རྗེ་འདིའི་མཛད་པ་རྣམ་ཐར་ཁྱད་པར་དུ་འཕགས་པ་འདི་ལྟར་གསུངས་པ་རྣམས་དང་། རྗེ་བཙུན་འཇམ་པའི་དབྱངས་ཀྱིས་དབུ་མ་པ་དཔའ་བོ་རྡོ་རྗེ་ལ་གསུངས་པ་དང་། ཡང་གྲུབ་ཆེན་འཇམ་དཔལ་རྒྱ་མཚོ་ལ་གསུངས་པ་དང་། རྗེ་རིན་པོ་ཆེ་རང་ཉིད་ལ་སངས་རྒྱས་དང་བྱང་སེམས་མང་པོས་ཞལ་གཟིགས་ནས་ལུང་བསྟན་དང་དབུགས་དབྱུང་བ་མཛད་པ་སྔར་དྲངས་ཟིན་པ་ལྟར་ཤིན་ཏུ་ཡིད་ཆེས་པའི་གནས་སུ་ཡོད་མོད། འོན་ཀྱང་དེ་ཙམ་གྱི་ལུང་ལ་འཆེལ་བ་མིན་པར་དྲི་མ་མེད་པའི་རིགས་པའི་ལམ་སྲོལ་ཤེས་པའི་མཁས་པ་རྣམས་ལ་རྗེ་འདིས་སངས་རྒྱས་ཀྱི་མཛད་པ་མཛད་པར་ཡིད་ཆེས་པའི་རྟགས་སུ་མི་འགྱུར་བས་རྒྱལ་བ་ཉིད་ཀྱི་མདོ་སྡེ་དང་རྒྱུད་སྡེ་རྩོད་མེད་རྒྱ་བོད་གཉིས་ཀར་ཡོངས་སུ་གྲགས་པ་ཞིག་གི་སྟེང་ནས་སྒྲུབ་དགོས་ལ། དེ་ནི་སྔར་དྲངས་ཟིན་པ་ལྟར་ལངྐར་གཤེགས་པའི་མདོ་དང་། མདོ་སྡེ་གདམས་ངག་འབོགས་པའི་རྒྱལ་པོ་དང་། འཇམ་དཔལ་རྩ་རྒྱུད་རྣམས་ལས་སྒྲུབ་པ་ཡིན་ལ། དེའི་ནང་ནས་ཀྱང་འཇམ་དཔལ་རྩ་རྒྱུད་ལས། འཇིག་རྟེན་ང་ནི་མྱ་ངན་འདས། ། ས་ཡི་སྟེང་འདི་སྟོངས་པ་ན། ། ཁྱོད་ཉིད་བྱིས་པའི་གཟུགས་ཀྱིས་ནི། ། སངས་རྒྱས་མཛད་པ་བྱེད་པར་འགྱུར། ། ཞེས་སོགས་རྒྱལ་བ་མྱ་ངན་ལས་འདས་པའི་འོག་ཏུ་འཇིག་རྟེན་མགོན་མེད་འདྲེན་པ་མེད་པར་གྱུར་པ་ན་རྗེ་བཙུན་འཇམ་པའི་དབྱངས་ཐ་མལ་པའི་གཟུགས་བཟུང་སྟེ་བྱང་ཕྱོགས་ཁ་བ་ཅན་འདིར་སངས་རྒྱས་ཀྱི་མཛད་པ་མཛད་པ་དང་། དེ་ལྟར་མཛད་པ་པོ་དེའི་མིང་ལ་བློ་བཟང་ཞེས་པ་དང་གྲགས་པ་ཞེས་པའི་མཚན་འབྱུང་བ་དང་། དེའི་དགོན་གནས་ཀྱི་མིང་ལ་དགའ་ལྡན་ཞེས་འབྱུང་བ་གསལ་བར་ལུང་བསྟན་པ་འདིས་རྗེ་འདི་ཉིད་ཀྱིས་གངས་རིའི་ཁྲོད་འདིར་སངས་རྒྱས་དངོས་སུ་བྱོན་པ་ལྟ་བུའི་མཛད་པ་མཛད་པར་ཀུན་གྱིས་ཡིད་ཆེས་པར་གྲུབ་བོ། ། དེ་ལྟར་རྗེ་རིན་པོ་ཆེ་འདིས་སངས་རྒྱས་ཀྱི་མཛད་པའི་གཙོ་བོ་ཆོས་ཀྱི་འཁོར་ལོ་བསྐོར་བའི་མཛད་པ་ངོ་མཚར་རྨད་དུ་བྱུང་བ་ཞིང་འདིར་བྱོན་པ་ནས་མཐར་དགའ་ལྡན་ལ་བྱོན་པའི་བར་གོང་འཕེལ་དུ་མཛད་དེ་ཕྱི་རབས་ཀྱི་གདུལ་བྱ་རྣམས་ལ་ཐུགས་བརྩེ་བས་དགོངས་ཏེ་མདོ་སྔགས་ཀྱི་ལམ་བཟང་པོ་རྣམས་འདི་ལྟར་ཡོད་དོ་ཞེས་ཡི་གེར་འགོད་པར་མཛད་པ་ནི། དུས་གསུམ་གྱི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་ལམ་པོ་ཆེ་ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱིས་རྒྱལ་བའི་དགོངས་པ་དྲི་མ་མེད་པའི་རིགས་ལམ་ནས་དྲངས་ཏེ་ཡོངས་སུ་རྫོགས་པ་བཀྲལ་བའི་ལམ་སྲོལ་སྐྱེས་བུ་ཆུང་འབྲིང་ཆེ་གསུམ་གྱིས་ཉམས་སུ་བླང་བའི་རིམ་པ་ཐམས་ཅད་མ་ཚང་བ་མེད་པར་སྟོན་པའི་མན་ངག་བྱང་ཆུབ་ལམ་རིམ་ཆེན་མོ། ། དེའི་སྙིང་པོའི་གནང་བསྡུས་པ་ལམ་རིམ་ཆུང་བ། བྱང་ཆུབ་ལམ་གྱི་རིམ་པའི་ཁྲིད་ཀྱི་ས་བཅད། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དང་བཅས་པའི་རྒྱ་ཆེར་བཤད་པ་ལེགས་བཤད་གསེར་གྱི་ཕྲེང་བ། བྱང་ཆུབ་སེམས་དཔའི་ཚུལ་ཁྲིམས་ཀྱི་རྣམ་བཤད་བྱང་ཆུབ་གཞུང་ལམ། ཞི་ལྷག་གཉིས་ཀྱི་དཀའ་བའི་གནས་རྒྱལ་བའི་དགོངས་པ་ཕྱིན་ཅི་མ་ལོག་པར་བཤད་པ། དྲང་བ་དང་ངེས་པའི་དོན་རྣམ་པར་ཕྱེ་བའི་བསྟན་བཅོས་ལེགས་བཤད་སྙིང་པོ། རྗེ་བཙུན་འཇམ་པའི་དབྱངས་ཀྱིས་རྗེ་ལ་གནང་བའི་ལྟ་བའི་གནད་འགག་རྗེ་རེད་མདའ་བར་ཕུལ་བ། དབུ་མའི་ལྟ་ཁྲིད། ཚིག་སྦྱོར་ཕུན་སུམ་ཚོགས་པའི་སྙན་ངག་གི་ལམ་ནས་དྲངས་པའི་བློ་སྦྱོང་། དབུ་མ་རྒྱན་གྱི་ཟིན་བྲིས་རྗེ་རང་གིས་གནང་བ། ཡིད་དང་ཀུན་གཞིའི་དཀའ་བའི་གནས་རྒྱ་ཆེར་འགྲེལ། སྡེ་བདུན་ལ་འཇུག་པའི་སྒོ་དོན་གཉེར་ཡིད་ཀྱི་མུན་སེལ། བསམ་གཟུགས་ཟིན་བྲིས། དབུ་མའི་ལྟ་ཁྲིད་བསྡུས་པ། དགེ་འདུན་ཉི་ཤུ་བསྡུས་པ་དང་ཞུགས་གནས་སྐྱེས་བུ་ཆེན་པོའི་དཀའ་གནས། དབུ་མ་རྩ་ཤེའི་རྣམ་བཤད་རིགས་པའི་རྒྱ་མཚོ། བསྟན་བཅོས་ཆེན་པོ་དབུ་མ་ལ་འཇུག་པའི་རྣམ་བཤད་དགོངས་པ་རབ་གསལ། རྒྱལ་བ་ཁྱབ་བདག་རྡོ་རྗེ་འཆང་ཆེན་པོའི་ལམ་གྱི་རིམ་པ་གསང་བ་ཀུན་གྱི་གནད་རྣམ་པར་ཕྱེ་བ་ཞེས་བྱ་བ། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་མན་ངག་རིམ་པ་ལྔ་གསལ་བའི་སྒྲོན་མེ། རྣམ་གཞག་རིམ་པའི་རྣམ་བཤད་དཔལ་གསང་བ་འདུས་པའི་གནད་དོན་གསལ་བ། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྫོགས་རིམ་རིམ་ལྔ་གདན་རྫོགས་ཀྱི་དམར་ཁྲིད། འདུས་པའི་བཤད་རྒྱུད་ལྷ་མོ་བཞི་ཞུས་ཀྱི་རྒྱ་ཆེར་བཤད་པ་སྲོག་རྩོལ་གྱི་དེ་ཁོ་ན་ཉིད་གསལ་བ་དཔལ་གསང་བ་འདུས་པའི་བཤད་རྒྱུད་ཡེ་ཤེས་རྡོ་རྗེ་ཀུན་ལས་བཏུས་པའི་ཊཱིཀྐ། བཤད་རྒྱུད་རྡོ་རྗེ་ཕྲེང་བའི་ཟིན་བྲིས། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྩ་བའི་རྒྱུད་སྒྲོན་མ་རབ་ཏུ་གསལ་བར་བྱེད་པའི་རྒྱ་ཆེར་བཤད་པ་འཆད་པའི་ས་བཅད་བསྡུས་དོན། དཔལ་གསང་བ་འདུས་པའི་དཀའ་བའི་གནས་ཀྱི་མཐའ་གཅོད་རིན་པོ་ཆེའི་མྱུ་གུ། རྒྱུད་ཐམས་ཅད་ཀྱི་རྒྱལ་པོ་དཔལ་གསང་བ་འདུས་པའི་རྒྱ་ཆེར་བཤད་པ་སྒྲོན་མ་གསལ་བའི་ཚིག་དོན་ཇི་བཞིན་འབྱེད་པའི་མཆན་གྱི་ཡང་འགྲེལ། རྗེ་བཙུན་འཇམ་པའི་དབྱངས་ཀྱི་གསུང་ཐུན་མོང་མ་ཡིན་པ་རྗེ་རེད་མདའ་བར་ཕུལ་བ། དཔལ་གསང་བ་འདུས་པའི་སྒྲུབ་ཐབས་ཀྱི་ལྷན་ཐབས། དཔལ་གསང་བ་འདུས་པའི་མངོན་རྟོགས་དང་བསམ་གཏན་གྱི་སྒྲུབ་མཆོད་ངག་ཏུ་འདོན་པའི་ལྷན་ཐབས། དཔལ་གསང་བ་འདུས་པའི་སྒྲུབ་ཐབས་རྣལ་འབྱོར་དག་པའི་རིམ་པ། བཞི་བརྒྱ་ལྔ་བཅུ་པའི་སྐོར་གྱི་ཟིན་བྲིས། དཔལ་གསང་བ་འདུས་པ་མི་བསྐྱོད་རྡོ་རྗེའི་དཀྱིལ་འཁོར་གྱི་ཆོ་ག་དབང་གི་དོན་གྱི་དེ་ཉིད་རབ་ཏུ་གསལ་བ། རྡོ་རྗེ་བཟླས་པའི་རིམ་པའི་ཟིན་བྲིས། དགོངས་པ་བླ་ན་མེད་པའི་རིམ་པའི་ཟིན་བྲིས། མན་ངག་གི་མཐར་ཐུག་བདག་བྱིན་རླབས། མན་ངག་གི་མཐར་ཐུག་མངོན་པར་བྱང་ཆུབ་པའི་རིམ་པའི་བཤད་པ། རིམ་ལྔ་བསྡུས་པའི་ཟིན་བྲིས། རྣལ་འབྱོར་བཞི་རིམ། རྣལ་འབྱོར་བཞིའི་རིམ་པའི་ཊཱིཀྐ། འདུས་པའི་དཀའ་གནད་ཀྱི་ཟིན་བྲིས། རྒྱལ་བས་བྱིན་དང་ཤཱནྟི་པའི་གསང་འདུས་ཀྱི་འགྲེལ་པ་དང་དུལ་བས་བྱིན་གྱིས་སྒྱུ་འཕྲུལ་དཀྱིལ་ཆོག་གི་ཟིན་བྲིས། ཁྲོ་བཅུའི་ཟིན་བྲིས། ལྷག་པ་ཡི་ནི་ལྷ་གཅིག་ཉིད་ཅེས་པའི་དོན་བཤད་པ། བསམ་གཏན་ཕྱི་མ། གསང་བ་ཁྱད་གཞི། གྲུབ་ཆེན་བརྒྱད་ཀྱི་བཞུགས་ཚུལ། འཇམ་དཔལ་གསང་ལྡན་གྱི་དཔྱད་པ་ཡོངས་སུ་རྫོགས་ནས་ཟིན་བྲིས་སུ་གནང་བ། ཞེ་དགུ་མའི་ཟིན་བྲིས། འཇམ་དཔལ་ཞི་དྲག་གི་བསྲུང་བ། འཇིགས་བྱེད་ཀྱི་ཕྱག་མཚན་སོགས་ཀྱི་བཤད་པའི་ཟིན་བྲིས། རྡོ་རྗེ་འཇིགས་བྱེད་ལྷ་བཅུ་གསུམ་མའི་སྒྲུབ་ཐབས་རིན་པོ་ཆེའི་ཟ་མ་ཏོག ། རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས་བདུད་ཐམས་ཅད་ལས་རྣམ་པར་རྒྱལ་བ། གཤིན་རྗེ་དགྲ་ནག་གི་སྒྲུབ་པའི་ཐབས་རིན་པོ་ཆེ་འབར་བ། གཤིན་རྗེ་གཤེད་ལྷ་བཅུ་གསུམ་མ་རྣམས་ཀྱི་དཀྱིལ་འཁོར་དུ་དབང་བསྐུར་བའི་ཆོ་ག་རིན་པོ་ཆེའི་ཕྲེང་བ། འཇམ་དབྱངས་ཞི་ཁྲོ་སྦྲགས་སྒྲུབ་ཐུན་མོང་མ་ཡིན་པ། རྡོ་རྗེ་འཇིགས་བྱེད་སེར་བོ་ལ་བརྟེན་པའི་ཤིན་ཏུ་ཟབ་པའི་མན་ངག ། ཡི་གེ་བཞི་པའི་བསྲུང་བ་མན་ངག་རྩ་གསུམ་དང་གཤིན་རྗེ་སྦྱོར་ཚུལ་རྣམས་དང་རྩ་དང་གཤིན་རྗེ་སྦྱོར་ཚུལ། འཇིགས་བྱེད་ཀྱི་དག་སྦྱོར། རྡོ་རྗེ་འཇིགས་བྱེད་ཀྱི་འཕྲིན་ལས་བཞིའི་སྦྱིན་སྲེག་དངོས་གྲུབ་རྒྱ་མཚོ། བླ་མ་ལྔ་བཅུ་པའི་རྣམ་བཤད་སློབ་མའི་རེ་བ་ཀུན་སྐོང་། བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ། བཅོམ་ལྡན་འདས་དཔལ་འཁོར་ལོ་བདེ་མཆོག་གི་མངོན་པར་རྟོགས་པའི་རྒྱ་ཆེར་བཤད་པ་འདོད་པ་འཇོ་བ། རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བཅོམ་ལྡན་འདས་འཁོར་ལོ་སྡོམ་པའི་སྒྲུབ་པའི་ཐབས་བདེ་ཆེན་གསལ་བ། རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བདེ་མཆོག་རྫོགས་རིམ་གྱི་རྣམ་བཤད་དངོས་གྲུབ་སྙེ་མ། རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བདེ་མཆོག་གི་རྫོགས་རིམ་རྣལ་འབྱོར་ཆེན་པོའི་ཁྲིད་ཀྱི་རིམ་པ་མདོར་བསྡུས་པ། དཔལ་མངོན་པར་རྟོགས་པའི་འགྲེལ་པ་ཁྱད་པར་གསལ་བྱེད་ལས་ཟུར་དུ་ཕྱུང་བ། མཁའ་འགྲོ་རྒྱ་མཚོའི་སྐོར་གྱི་ཟིན་བྲིས། གསང་སྔགས་ཀྱི་ཚུལ་ཁྲིམས་ཀྱི་རྣམ་བཤད་དངོས་གྲུབ་ཀྱི་སྙེ་མ། རྗེ་བཙུན་འཇམ་པའི་རྡོ་རྗེའི་སྒྲུབ་ཐབས་འཇམ་པའི་དབྱངས་ཀྱི་དགོངས་པ་གསལ་བ། ཆོ་ག་ཉི་ཤུའི་ཁུངས་དགོད་པ། རྣལ་འབྱོར་གྱི་དབང་ཕྱུག་དྲིལ་བུ་ལུགས་བདེ་མཆོག་ལུས་དཀྱིལ་གྱི་མངོན་རྟོགས་དགོངས་པ་རབ་གསལ། རྣལ་འབྱོར་གྱི་དབང་ཕྱུག་དྲིལ་བུ་ལུགས་བདེ་མཆོག་ལུས་དཀྱིལ་གྱི་དབང་ཆོག་རིན་པོ་ཆེའི་བང་མཛོད། དཔལ་འཁོར་ལོ་བདེ་མཆོག་རིམ་ལྔའི་རྣམ་བཤད་སྦས་དོན་ལྟ་བའི་མིག་རྣམ་པར་འབྱེད་པ། མཁའ་སྤྱོད་མ་དམར་མོའི་སྒྲུབ་ཐབས། རྡོ་རྗེ་མཁའ་འགྲོའི་འགྲེལ་པའི་ཟིན་བྲིས། རྡོ་རྗེ་རྣལ་འབྱོར་མའི་འགྲེལ་པ་ཚེས་བཅུའི་མཆོད་པའི་རྟོག་པའི་ཆོ་ག་གྲུབ་ཆེན་དཱ་རི་ཀ་པས་མཛད་པའི་ཟིན་བྲིས། མན་ངག་སྙེ་མའི་ཟིན་བྲིས། དཔལ་འཁོར་ལོ་སྡོམ་པའི་ཕྱི་རོལ་མཆོད་པའི་ཆོ་ག་ལག་མཆོད་དང་དཔྱིད་ཀྱི་རྒྱལ་པོའི་གླུ། རྫོགས་རིམ་དཔྱིད་ཀྱི་ཐིག་ལེ། ཟབ་ལམ་ནཱ་རོའི་ཆོས་དྲུག་གི་སྒོ་ནས་ཁྲིད་པའི་རིམ་པ་ཡིད་ཆེས་གསུམ་ལྡན། རྒྱུད་བརྟག་པ་གཉིས་པའི་ཟིན་བྲིས། ཀྱཻ་རྡོ་རྗེའི་རྒྱུད་ཀྱི་ཟིན་བྲིས་དང་། ཀྱཻ་རྡོ་རྗེའི་ཟིན་བྲིས། རྗེ་བཙུན་མ་བདག་མེད་མའི་དཀྱིལ་འཁོར་གྱི་སྒྲུབ་ཐབས་ཟིན་བྲིས། དཔལ་མཆོག་གི་ཟིན་བྲིས། སངས་རྒྱས་ཐོད་པའི་མི་འཇིགས་གཞུང་འགྲེལ་སོགས་ཀྱི་ཟིན་བྲིས། ཀུན་རིག་ཆོ་གའི་ཟིན་བྲིས། མདོར་བསྡུས་དང་པོ་ལ་ཨ་ཙ་ལ་གརྦས་དོན་ཚན་བདུན་དུ་བྱེད་པ། འཕོ་ཁྲིད་ཀྱི་རྩ་ཚིག་བརྟག་པ་བརྒྱད་པའི་རབ་ཏུ་བྱེད་པ་གསུམ་པ། རྣམ་ཤེས་གོང་དུ་འཕོ་བའི་རྒྱ་ཆེར་བཤད་པ་གསེར་གྱི་སྒོ་འབྱེད། སྤྲིན་བྲལ་བའི་མན་ངག་དང་རྟ་མགྲིན་ཤྭ་ན་བཞི་བསྐོར། རི་ཁྲོད་ལོ་མ་ཅན་གྱི་སྒྲུབ་ཐབས། ལྷ་མོ་དབྱངས་ཅན་མའི་སྒྲུབ་ཐབས། དབྱངས་ཅན་མའི་སྒྲུབ་ཐབས། བཅོམ་ལྡན་འདས་རྨེ་བརྩེགས་ཀྱི་སྒྲུབ་ཐབས། དེ་ཉིད་བསྡུས་པའི་འགྲེལ་བའི་ཟིན་བྲིས། རྡོ་རྗེ་དབྱིངས་ཀྱི་ས་ཆོག་གི་ཟིན་བྲིས། རྡོ་རྗེ་དབྱིངས་ཀྱི་འཁོར་བསྒྱུར་གྱི་བསྙེན་པའི་རིམ་པ་སོགས་ཀྱི་ཟིན་བྲིས། སྦྱོར་དྲུག་གི་རྡོ་རྗེའི་ཚིགས་བཅད། དེའི་བཤད་པ། དུས་འཁོར་གྱི་མངོན་རྟོགས་དང་དབང་གི་ཟིན་བྲིས། སྦྱོར་དྲུག་ཉེར་མཁོའི་ཟིན་བྲིས། འཆི་ཞག་དང་ཚེ་ལྷག་ཇི་ཙམ་ཡོད་དཔྱད་པ་རྡོ་རྗེ་རྩེ་མོའི་ཟིན་བྲིས། ཡེ་ཤེས་མཁའ་འགྲོའི་སྒྲུབ་ཐབས། འཕོ་བ། བཀའ་བསྒོ་བྱ་ཚུལ། སྒྲ་མི་སྙན་གྱི་ཚེ་སྒྲུབ། འདུལ་བ་མདོ་རྩ་བའི་ཟིན་བྲིས། གཞི་ནས་འབྱུང་བའི་བསླབ་བྱའི་ཟིན་བྲིས། ཞུགས་པ་དང་གནས་པའི་སྐྱེས་བུ་ཆེན་པོ་རྣམས་ཀྱིས་རྣམ་པར་བཞག་པ་བློ་གསལ་བགྲོད་པའི་ཐེམ་སྐས། གཟུགས་ཀྱི་ཆུང་མཐའ་དང་དུས་ཀྱི་ཐུང་མཐའ་སོགས་ལས་བརྩམས་པའི་དྲིས་ལན། བླ་མའི་རྣལ་འབྱོར་ཟབ་ཁྱད་ཅན་མཁས་གྲུབ་རྗེ་ལ་གནང་བ། བ་སོ་ཆོས་རྗེ་ལ་གཅིག་བརྒྱུད་ཀྱི་ཚུལ་དུ་གནང་བའི་བླ་མའི་རྣལ་འབྱོར། ཞུ་ལན་སྨན་མཆོག་བདུད་རྩིའི་ཕྲེང་བ། སྡོམ་པ་གོང་མ་གཉིས་ཀྱི་ཕྱིར་བཅོས། གཏོར་མ་བརྒྱ་རྩའི་རིམ་པ། རྗེ་རང་ཉིད་ཀྱི་གསན་ཡིག ། བྱང་ཆུབ་ལམ་གྱི་རིམ་པའི་བླ་མ་བརྒྱུད་པ་ལ་གསོལ་བ་འདེབས་པའི་ཚུལ་ལམ་མཆོག་སྒོ་འབྱེད་སོགས་བསྟོད་ཚོགས་དང་ཆབ་ཤོག་དྲིས་ལན་སོགས་གསུང་ཐོར་བུ་བ། རྗེ་རིན་པོ་ཆེ་རང་ཉིད་ཀྱིས་ཇི་ལྟར་ཐུགས་ཉམས་སུ་བཞེས་པ་ལྟར་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པའི་ཉམས་ལེན་འདི་ལྟར་བྱ་དགོས་སོ་ཞེས་འདོམས་པའི་ཉམས་མགུར་ལམ་རིམ་བསྡུས་དོན་དུ་གྲགས་པ་རྣམས་མཛད། རྗེ་རིན་པོ་ཆེའི་གསུང་ལ་ཐུགས་སྲས་མཁས་གྲུབ་ཆེན་པོ་རྣམས་ཀྱིས་ཟིན་བྲིས་སུ་བྱས་པའི་མདོ་སྔགས་ཀྱི་ལེགས་བཤད་མང་དུ་བཞུགས་པ་ནི་ཡོངས་སུ་གྲགས་པ་ལྟར་རོ། ། འདི་ལྟ་བུའི་མདོ་སྔགས་ཀྱི་བསྟན་བཅོས་རྒྱ་ཆེན་པོ་འདི་སྙེད་ཅིག་མཛད་པ་འདི་དག་ཐམས་ཅད་རྒྱལ་བ་རང་ཉིད་ཀྱི་གསུང་དང་། ཤིང་རྟ་ཆེན་པོ་གཉིས་ཀྱི་གཞུང་ཇི་ལྟ་བ་བཞིན་དུ་ཐེག་པ་གོང་འོག་དང་རྒྱུད་སྡེ་གོང་འོག་གྲུབ་མཐའ་རྣམ་བཞི་གང་གི་ཐད་ལའང་རང་རང་གི་ལུགས་མ་འདྲེས་པར་སྟོན་པ་ལས། ཕན་ཚུན་འདྲེས་པའི་སྐྱོན་ཕྲ་མོའང་མེད་ཅིང་། སྔ་ཕྱི་འགལ་བ་དང་རང་ཚིག་འགལ་བ་དང་ཟློས་བུར་སྨྲ་བ་སོགས་ཀྱི་སྐྱོན་ཡང་རྣམ་པ་ཀུན་ནས་མེད་པར་དྲི་མ་མེད་པའི་རིགས་ལམ་སྦྱངས་པའི་མཁས་པ་རྣམས་ཀྱིས་གཟུ་བོའི་བློས་ཇི་ཙམ་དཔྱད་ཀྱང་འདིའི་ཐད་ནས་ནོར་རོ་ཞེས་ཚིག་གཅིག་ལའང་སྐྱོན་གདགས་སུ་མེད་པ་དང་། ཐ་སྙད་ཀྱི་གཙུག་ལག་དག་དང་ཡང་མི་འགལ་བར་སྔོན་ཆོས་རྒྱལ་སྲོང་བཙན་སྒམ་པོའི་དུས་ཆོས་རྒྱལ་ཐུགས་རྗེ་ཅན་གྱི་བཀའ་ལྟར་འཇམ་དབྱངས་ཀྱི་སྤྲུལ་པ་ཐོན་མིས་ཡི་གེའི་བརྡ་ཆད་འདི་ལྟར་བྱ་དགོས་སོ་ཞེས་བོད་ཁམས་ཡོངས་ལ་གདམས་པའི་བསྟན་བཅོས་སུམ་ཅུ་པ་དང་རྟགས་འཇུག་ནས་ཇི་ལྟར་བཤད་པ་ལྟར་དོན་སོ་སོ་ལ་ཡི་གེའི་སྔོན་འཇུག་སོགས་ཐོབ་ཇི་ལྟར་དགོས་པ་རྣམས་ཅུང་ཟད་ཀྱང་མ་འཕྱུགས་པ་དང་། སྔོན་གྱི་ཆོས་རྒྱལ་ལོ་པཎ་རྣམས་ཀྱིས་བཀས་བཅད་མཛད་པ་ལྟར་གྱི་ཆོས་ཀྱི་བརྡ་ཆད་ཁོ་ན་ལས་ཡུལ་མི་རང་བཞིན་པའི་ཕལ་སྐད་དང་། རང་རང་གི་ཡུལ་ཕྱོགས་ཀྱི་སྐད་སོགས་ཀྱི་སྐྱོན་ཕྲ་མོ་ཡང་མ་འདྲེས་པར་དོན་བཟང་བ། ཚིག་འབྲུ་བཟང་བ། མ་འདྲེས་པ། མ་སྦགས་པ། ཡོངས་སུ་རྫོགས་པ། གདུལ་བྱའི་རྒྱུད་དང་འཚམ་པ། སུས་བལྟས་ཀྱང་ཕན་ཐོགས་པ་སོགས་རྒྱལ་བས་ཆོས་ཀྱི་བསྔགས་པ་ཇི་ལྟར་མཛད་པ་དང་རྣམ་པ་ཀུན་ནས་མཐུན་པ་ཤ་སྟག་ཏུ་ཡོད་དོ། ། ཚུལ་འདིས་ཀྱང་རྗེ་ཐམས་ཅད་མཁྱེན་པ་འདི་ཉིད་གངས་རིའི་ཁྲོད་འདིར་མཚུངས་ཟླ་མེད་ཅིང་ཕྱི་རབས་ཀྱི་གདུལ་བྱ་ཡོངས་ལ་བཀའ་དྲིན་ཟླ་མེད་པར་གྲུབ་བོ། ། རྗེ་རིན་པོ་ཆེ་འདི་ཉིད་ཀྱི་སྐུ་གསུང་ཐུགས་ཀྱི་རྣམ་ཐར་བསམ་གྱི་མི་ཁྱབ་པ་སྔར་བརྗོད་པ་དེ་ལྟར་ཡིན་ཞིང་། འཕྲལ་གྱི་མཛད་སྤྱོད་ཀྱང་སྙིགས་མའི་སྐྱེ་བོ་སུ་དང་ཡང་མི་མཚུངས་པའི་ངོ་མཚར་རྨད་དུ་བྱུང་བ་ཞིག་བཞུགས་ཏེ། རྗེ་རིན་པོ་ཆེ་འདི་ཉིད་མདོ་སྨད་དུ་སྐུ་འཁྲུངས་པ་ནས་མཐར་མྱ་ངན་ལས་འདས་པའི་བར་ལ་ཐུགས་རྒྱུད་འཁྲུགས་ཏེ་གཞན་ལ་ཞེ་གཅོད་པའི་ཚིག་ངན་པ་སྨྲ་བ་དེ་དུས་ཀྱི་སྐུ་དངོས་ཀྱི་གདུལ་བྱ་སུ་ལའང་བསྟན་རྒྱུ་མེད་ཅིང་། མཚན་ཉིད་ཀྱི་སློབ་གཉེར་མཛད་པའི་སྐབས་སུའང་དེང་སང་གི་གདུལ་བྱ་ཕལ་ཆེར་ཕ་རོལ་དང་རྩོད་པའི་ཚེ་ཕ་རོལ་སྨ་དབབ་པའི་ཚིག་སྨྲ་གང་ཐུབ་དང་། ལུས་ཀྱི་རྣམ་འགྱུར་ཡང་འགྱིང་བ་དང་ཁེངས་པ་དང་ཕ་རོལ་གནོན་པའི་རྣམ་འགྱུར་བྱེད་པ་འདི་འདྲ་གཏན་ནས་མིན་པར་རྗེ་བླ་མ་འདིས་དབུས་གཙང་གྲྭ་ས་ཆེན་པོ་རྣམས་སུ་ཐུགས་གཉེར་མཛད་པ་དང། གྲྭ་སྐོར་མཛད་པའི་སྐབས་གང་དུའང་རྒོལ་བ་ཕ་རོལ་པོ་ལ་ངན་སྨྲ་མཛད་པ་ནམ་ཡང་མི་སྲིད་ཅིང་སྐུ་ལུས་ཀྱི་རྣམ་འགྱུར་ཡང་ཞི་ཞིང་དུལ་བ་དང་འཇམ་ཞིང་དེས་པ་དང་། གསུང་སྙན་ཞིང་བརྗིད་ལ་གསོང་པོར་སྨྲ་བ་དང་། ཕ་རོལ་པོ་ལ་ཕན་པའི་ཚིག་ཁོ་ན་བརྗོད་པ་ལས་སྐུ་དང་གསུང་གི་རྣམ་འགྱུར་ལ་སྐྱོན་ཆགས་པ་དེ་དུས་སྐུ་དངོས་སུ་མཐོང་བ་ལའང་དུས་འདིའི་ཆ་འདི་ལྟར་མཛད་དོ་ཞེས་བསྟན་རྒྱུ་མེད་པ་ཡོངས་སུ་གྲགས་པ་ལྟར་ཡིན་ལ། དེའི་དབང་གིས་གྲྭ་ས་གང་དང་གང་དུ་བྱོན་པ་དེ་དང་དེར་རྗེ་འདིའི་སྐུ་མཐོང་བ་དང་གསུང་གི་གདངས་ཐོས་པ་ཙམ་གྱིས་སྣང་བ་འགྱུར་ཏེ་རྗེ་འདིའི་ཞབས་དྲུང་དུ་བསྙེན་ཏེ་སློབ་མར་ཁས་ལེན་པ་ཤ་སྟག་བྱུང་སྟེ་སྐད་ཅིག་ཉིད་ལ་གངས་ཅན་གྱི་སའི་ཆ་ཐམས་ཅད་རྗེ་འདིའི་སློབ་མས་ཁྱབ་པ་འདི་བྱུང་བ་ཡིན་ནོ། ། རྗེ་འདི་ལ་རྒྱ་མཚོའི་གླིང་བར་ཚུན་ཆད་ནས་གདུལ་བྱ་འདུས་ཏེ་ས་ཆེན་པོའི་ཁྱོན་འདི་ཐམས་ཅད་སློབ་མས་གང་བ་དེ་ལྟ་བུ་བྱུང་ཡང་ཆེན་པོར་རློམ་པའི་ཆེ་འགྱིང་ནམ་ཡང་མི་མཛད་ཅིང་། རང་ཉིད་ཤེས་བྱ་ཀུན་ལ་ཐོགས་པ་མེད་པའི་མཁྱེན་པ་མངའ་བ་ཡིན་ཡང་། སྔོན་བྱོན་པའི་བསྟན་འཛིན་གྱི་སྐྱེས་བུ་དམ་པ་རྣམས་ལ་སྐྱོན་བརྗོད་ནམ་ཡང་མི་མཛད་པར་དག་སྣང་དང་བཀའ་དྲིན་དྲན་པའི་གུས་པ་ལྷུར་མཛད་དེ། སྔོན་བྱོན་པའི་ལོ་ཙཱ་བ་བཀའ་དྲིན་ཅན་རྣམས་དང་། བསྟན་པའི་གསལ་བྱེད་གྲུབ་མཐའ་རིས་སུ་མ་ཆད་པ་ཀུན་ལ་དག་སྣང་དང་གུས་པ་ལྷུར་མཛད་དེ་སོ་སོའི་ཡིག་ཆར་ནོར་འཁྲུལ་སོགས་ཅི་ཡོད་ཀྱང་དེ་རྒྱུ་མཚན་དུ་བྱས་ཏེ་དམ་པ་དེ་དང་དེ་དག་ལ་སྐྱོན་བརྗོད་པ་ནམ་ཡང་མི་མཛད་དེ། རྗེའི་མདོ་སྔགས་ཀྱི་གསུང་རབ་ཇི་སྙེད་ཅིག་བཞུགས་པ་དག་གི་ནང་ན་སྔོན་བྱོན་པའི་ལོ་ཙཱ་བ་བཀའ་དྲིན་ཅན་དེ་དག་དང་། སྒྲུབ་པ་མཛད་པའི་སྐྱེས་བུ་དམ་པ་ཇི་སྙེད་ཅིག་བྱོན་པ་དེ་དག་དང་། དགེ་འདུན་གྱི་སྡེ་འཛུགས་པའི་དམ་པ་གྲུབ་མཐའ་རིས་མི་འདྲ་བ་མང་པོ་ཞིག་བྱོན་པ་དེ་དག་སུ་ལའང་མཚན་ནས་སྨོས་ཏེ་སྐྱོན་བརྗོད་པ་བསྟན་རྒྱུ་མེད་དོ། ། འོན་ཀྱང་ཐིག་དྲང་པོར་བཏབ་ན་ཀྱོག་པོ་ཟུར་ལ་ཐོན་པ་ཆོས་ཉིད་ཡིན་པ་ལྟར་རྗེ་རིན་པོ་ཆེ་འདིས་རྒྱལ་བའི་དགོངས་པ་ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱིས་ཇི་ལྟར་བཀྲལ་བ་ལྟར་གཏན་ལ་ཕབ་པ་ན། ཤིང་རྟ་ཆེན་པོས་རྒྱལ་བའི་དགོངས་པ་བཀྲལ་བ་དང་མི་མཐུན་པར་སྨྲ་བ་རྣམས་སྐྱོན་ཅན་དུ་རང་ཤུགས་ཀྱིས་ཐོན་འོང་སྟེ་དེ་ནི་རྗེ་འདིའི་སྐྱོན་དུ་ག་ལ་འགྱུར་ཏེ་ཤིང་རྟ་ཆེན་པོ་གཉིས་ཀྱིས་རྒྱལ་བའི་དགོངས་པ་བཀྲལ་བ་བཞིན་ནོ། ། གཞན་ཡང་རྗེ་འདིས་སྐུ་ཚེ་ཧྲིལ་པོར་སོ་ནམ་དང་ཚོང་བུན་བསྐྱེད་སོགས་འདུལ་བ་དང་འགལ་བའི་ལས་ནམ་ཡང་མ་མཛད་དེ་བྱ་བྲལ་གྱི་སློབ་མ་སྟོང་ཕྲག་མང་པོ་སྐྱོང་དགོས་པའི་ཚེ་ཡང་ཆོས་དང་མཐུན་པའི་འཚོ་བ་ཁོ་ན་ལ་སྦྱོར་བ་ལས་བུན་བསྐྱེད་སོགས་ལོག་འཚོའི་རིགས་ལ་སྦྱར་བ་དངོས་ཀྱི་གདུལ་བྱ་སུས་ཀྱང་མཐོང་བ་མེད་ཅིང་། དཀོན་མཆོག་གི་མཆོད་པ་རླབས་ཆེན་པོ་མཛད་པ་དང་། དགེ་འདུན་གྱི་སྡེ་སྐྱོང་བ་དང་། མཆོག་གསུམ་གྱི་རྟེན་གསར་དུ་བཞེང་བ་སོགས་ལ་མཐུན་པའི་འཚོག་ཆས་ངེས་པར་འཚོལ་དགོས་པ་བྱུང་ན་རྒྱལ་པོ་ཆེན་པོ་རྣམ་ཐོས་སྲས་ལ་གཏོར་མ་ཕུལ་ཏེ་སྔོན་ཐུབ་པའི་སྤྱན་སྔར་ཇི་ལྟར་ཁས་བླངས་པ་ལྟར་རྒྱལ་བའི་བསྟན་པ་སྤེལ་ཕྱིར་འཕྲིན་པས་འདི་སྒྲུབས་ཤིག་ཅེས་བསྐུལ་པ་ཙམ་གྱིས་གང་དགོས་པའི་ཡོ་བྱད་ཐམས་ཅད་འབད་མེད་ལྷུན་གྲུབ་ཏུ་བྱུང་བ་ནི་སྐུ་དངོས་ཀྱི་གདུལ་བྱ་ཐམས་ཅད་ལ་མཐུན་སྣང་དུ་གྲུབ་པའོ། ། དེ་ལྟར་རྗེ་རིན་པོ་ཆེ་བསྟན་པ་དང་གདུལ་བྱའི་དོན་རྨད་དུ་བྱུང་བ་རྒྱ་ཆེར་མཛད་པས་གངས་རིའི་ཁྲོད་ཀྱི་སྐལ་བ་དང་ལྡན་པ་སྐུ་དངོས་ཀྱི་གདུལ་བྱ་དག་གི་དོན་ཕལ་ཆེར་མཛད་ཟིན་པ་ན་སྟོན་པ་མྱ་ངན་ལས་འདའ་ཁར་གྲོང་ཁྱེར་རྩྭ་ཅན་དུ་བྱོན་ནས་ཀུན་ཏུ་རྒྱུ་རབ་བཟང་དང་དྲི་ཟའི་རྒྱལ་པོ་རབ་དགའ་འདུལ་བར་མཛད་པ་ཇི་ལྟ་བར་སྐུ་ཚེ་འདིའི་དངོས་ཀྱི་གདུལ་བྱའི་ཐ་མ་འགའ་ཞིག་གི་དོན་བྱ་བར་དགོངས་པ་དང་། གངས་རིའི་ལྗོངས་འདིར་རྒྱུད་ཀྱི་འཆད་ཉན་རྐང་ཚུགས་པའི་གྲྭ་ཚང་ཞིག་ངེས་པར་འཛུགས་བཞེད་པ་དང་། གངས་ཅན་སྐྱེ་འགྲོ་ཡོངས་ཀྱི་ཕན་བདེའི་རྩ་ལག་ལྷ་ལྡན་སྤྲུལ་བའི་གཙུག་ལག་ཁང་གི་རྟེན་རྣམས་ལ་མཆོད་པ་རྒྱ་ཆེན་པོ་ཕུལ་ཏེ་རྒྱལ་བའི་བསྟན་པ་ཡུན་རིང་གནས་པའི་ཐུགས་སྨོན་མཛད་པ་སོགས་དགོས་པ་མང་པོ་ཞིག་གི་ཕྱིར་སྟོད་ལུང་གི་ཆུ་ཚན་ལ་འབྱོན་བཞེད་པ་ལྟར་བྱས་ཏེ་རི་བོ་དགའ་ལྡན་ནས་ཕྱགས་བཏེག་སྟེ་ལྷ་སར་མཆོད་པ་དང་སྨོན་ལམ་རྣམ་པར་དག་པ་མཛད་ནས་སྟོད་ལུང་གི་ཆབ་ཚན་ཁར་བྱོན། འོན་ཀྱང་ཆབ་ཚན་གྱིས་ནི་ཞབས་ལ་ཅུང་ཟད་ཙམ་བདུག་པ་ལས་མ་མཛད། གཙོ་བོར་སྟོད་ལུང་ཕུ་མདའི་སྐྱེ་བོའི་ཚོགས་མཐའ་ཡས་པ་དག་ལ་ཆོས་དང་བྱིན་རླབས་ཀྱི་སྐྱེས་གནང་ཞིང་། དད་ལྡན་སོ་སོས་བསྙེན་བཀུར་བ་དང་ཟང་ཟིང་གི་དངོས་པོ་ཕུལ་བ་རྣམས་དད་པ་ཅན་དེ་དང་དེ་དག་གི་དགེ་རྩ་བསྐྱེད་པའི་ཕྱིར་བཞེས། ཞལ་མཐོང་ཞིང་གསུང་ཐོས་པ་ཙམ་གྱིས་ཀྱང་དོན་དང་ལྡན་པར་མཛད་དེ། སླར་འབྲས་སྤུངས་སུ་བྱོན་པའི་ཚེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པས་གཙོས་འབྲས་སྤུངས་ཀྱི་དགེ་འདུན་ཐམས་ཅད་ཀྱིས་མཆོད་པའི་བྱེ་བྲག་སྣ་ཚོགས་པ་ཐོགས། གསོལ་བ་འདེབས་པའི་དབྱངས་ཀྱི་ང་རོ་དང་བཅས་བསུས། འདུ་ལི་ལ་གདན་དྲངས་པའི་འདུ་ལིའི་སྣེ་ལ་འཇའ་ཚོན་ཁ་དོག་ལྔ་པ་ཀུན་ནས་བཀྲ་བ་ཐལ་བྱུང་དུ་ཟུག་པ་དང་། འབྲས་སྤུངས་སུ་ཕེབས་ནས་ཀྱང་ཆོས་གསུང་བའི་ཚེ་ཆོས་གྲྭའི་དབུས་སུ་འཇའ་ཚོན་སྣ་ལྔ་པ་ནམ་མཁའི་དབྱིངས་ནས་ཀ་བ་བཙུགས་པ་ལྟར་ཆེས་གསལ་པར་ཟུག་པ་སོགས་རྗེ་རིན་པོ་ཆེའི་སྐུ་ཚེ་འདིའི་མཛད་པ་ཕལ་ཆེར་རྫོགས་ནས་ཞིང་ཁམས་གཞན་དུ་འབྱོན་པར་བཞེད་པ་ན་དཀར་ཕྱོགས་ཀྱི་ལྷ་རྣམས་ཀྱིས་བསུ་བའི་བཀོད་པ་བཤམས་པ་དང་། ལྷག་པར་ནམ་མཁའི་དབྱིངས་ནས་འཇའ་ཀ་བ་བཙུགས་པ་ལྟར་བྱུང་བ་ནི་དགའ་ལྡན་གྱི་ལྷ་རྣམས་ཀྱིས་རྗེ་རིན་པོ་དགའ་ལྡན་དུ་འབྱོན་པ་ལ་བསུ་བའི་བཀོད་པ་བཤམས་པ་ཡིན་པར་ངེས་པ་དེ་ལྟ་བུའི་ལྟས་མངོན་སུམ་དུ་བབ་པར་གྱུར་ལ། གཞན་ཡང་འབྲས་སྤུངས་སུ་བཞུགས་རིང་ལ་དགེ་བའི་བཤེས་གཉེན་སྡེ་སྣོད་འཛིན་པ་སྟོང་ཕྲག་གཉིས་ཙམ་འདུས་ཤིང་། སྣེའུ་ནས་ཞབས་ཏོག་དང་ཅི་དགོས་ཀྱི་ཕོགས་བསྙེན་བཀུར་འབུལ་ནོད་སོགས་བསམ་གྱིས་མི་ཁྱབ་པ་མཛད་ལ། དེའི་ཚེ་ལམ་རིམ་གྱི་ཁྲིད། ནཱ་རོ་ཆོས་དྲུག ། དབུ་མ་ལ་འཇུག་པ། གསང་བ་འདུས་པའི་རྒྱུད་ལ་སོགས་པ་གསུངས་ཤིང་། དེ་ཡང་སྔོན་ཆད་གྲོང་པའི་སྐྱེ་བོ་ཕོ་མོ་དུ་མ་ལ་ཁྲིད་ཆེར་མི་གནང་། ཁྱད་པར་ལམ་རིམ་གྱི་ཁྲིད་ལའང་འཚོག་ཏུ་མི་རུང་བ་ལ་སོགས་པའི་དམ་བཞག་ཆེ་བར་ཡོད་པ་ལ་དེ་དུས་གྲོང་པའི་སྐྱེ་བོ་ཇི་ཙམ་ཞིག་འོངས་པ་དང་། དུས་ནམ་འོངས་ཐམས་ཅད་ལ་ཁྱད་པར་མེད་པར་ཐ་ན་སྤྲང་པོའི་ཚོགས་དུ་མ་འདུས་པ་ཡན་ཆད་ཐམས་ཅད་ལ་ལམ་རིམ་དང་དབུ་མ་ལ་སོགས་པའང་བཀག་པ་མེད་པར་གནང་། འབྲས་སྤུངས་སུ་སྐབས་ཤིག་ནས་གཞན་ཕལ་མོ་ཆེ་ལ་ལྐོག་ཏུ་གྱུར་པའི་མངོན་ཆུང་བར་གྱིས་གསུང་ནས་ལྷ་བཟོ་བ་ལ་དམ་བཞག་ཆེ་བར་མཛད་དེ་བཅོམ་ལྡན་འདས་རྣམ་པར་སྣང་མཛད་ཀྱི་དངུལ་སྐུ་ཆེན་པོ་ཞིག་བཞེང་བའི་ཞལ་ཏ་མཛད། དེ་ལྟར་ཆོས་ཀྱི་འཁོར་ལོ་རྒྱ་ཆེར་བསྐོར་ནས། སྔོན་ཆད་དུས་འཁོར་མ་གཏོགས་པའི་རྒྱུད་ལ་ལེ་མཚམ་མཛད་པའི་ལུགས་མེད་པ་ལ་དེའི་ཚེ་གསང་འདུས་ཀྱི་ལེའུ་དགུ་པའི་མི་བསྐྱོད་སངས་རྒྱས་ཞིང་དག་ཏུ། ། རྒྱལ་བའི་སྲས་སུ་སྐྱེ་བར་འགྱུར། ། ཞེས་པའི་མཚམས་སུ་ཆོས་མཚམས་མཛད་ནས། མྱུར་དུ་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་ཉིད་དུ་འབྱོན་བཞེད་པའི་ཞལ་ཏ་གནང་། དེ་ལ་སྦྱིན་བདག་དང་། ཆོས་གསན་པ་རྣམས་ཀྱིས་ད་དུང་ཟླ་བ་གཅིག་གམ་ཟླ་ཕྱེད་ཙམ་དུའང་བཞུགས་ནས་ཆོས་འཕྲོ་རྫོགས་པར་གསུང་བ་ཞིག་ཐུགས་རྗེས་གཟུང་འཚལ། ཐ་ན་རྒྱུད་ཀྱི་འཕྲོ་རྣམས་བཀླགས་ལུང་མཛད་པ་ཙམ་ཞིག་ཀྱང་གནང་འཚལ་ཞེས་གསོལ་བ་ནན་ཆེར་བཏབ་ཀྱང་གསན་དུ་མ་བཞེད་ནས། ད་ལན་མྱུར་དུ་བཏེག་པ་ཐམས་ཅད་ལ་དགའ་བས་འདེགས། རྒྱུད་དང་ལམ་རིམ་འཕྲོ་ལ་འཇོག་པའི་འདུན་པ་ཁ་སིང་དུ་བཏང་ཚར་གསུང་ནས་ཆོས་མཚམས་མཛད་དེ། དེ་ཡང་ད་དུང་དུ་སྔགས་དང་མཚན་ཉིད་ཀྱི་གསུང་སྒྲོས་ཀྱི་བཤད་རྒྱུན་རྫོགས་པ་མེད་པར་འཕྲོ་རིང་དུ་གནས་པའི་རྟེན་འབྲེལ་བསྒྲིག་པའི་དགོངས་པ་མཛད། དེ་ནས་ལྷ་སར་ཕྱགས་བཏེག ། ཇོ་བོ་རིན་པོ་ཆེའི་དྲུང་དུ་བྱོན་ཏེ་ཕྱག་དང་མཆོད་པ་དང་སྨོན་ལམ་རྣམ་པར་དག་པ་རྒྱ་ཆེར་མཛད་ནས་ད་དུང་ཡང་བསྟན་པ་རིན་པོ་ཆེ་ཡུན་རིང་དུ་གནས་པའི་གསོལ་འདེབས་ཤུགས་དྲག་མཛད། དེ་ནས་བྱམས་ཆེན་ཆོས་རྗེ་ཤཱཀྱ་ཡེ་ཤེས་པས་སྤྱན་དྲངས་ཏེ་སེ་ར་ཆོས་སྡིངས་སུ་བྱོན། བྱམས་ཆེན་ཆོས་རྗེ་དཔོན་སློབ་རྣམས་ཀྱིས་བསྙེན་བཀུར་དང་མཆོད་པ་ཚད་མེད་པས་མཆོད། བྱམས་ཆེན་ཆོས་རྗེ་ལ་སེ་རར་ཤིང་རྟ་ཆེན་པོའི་གཞུང་ལུགས་རྣམས་ལ་འཆད་ཉན་གྱི་བསྟན་པ་རྒྱ་ཆེར་སྤེལ་དགོས་པའི་ཞལ་ཏ་མང་དུ་གནང་ཞིང་། ཁྱད་པར་གངས་རིའི་ཁྲོད་འདིར་སྔགས་ཀྱི་རྒྱུད་སྡེ་ལ་འཆད་ཉན་རྣམ་པར་དག་པ་ཡོང་ཡེ་རྣམ་པ་ཐམས་ཅད་དུ་ནུབ་པར་གྱུར་ནས་རིང་ཞིག་ལོན། རྗེ་རང་ཉིད་ཀྱིས་བཤད་པ་རྣམ་པར་དག་པ་མཛད་པའི་གསུང་གི་བདུད་རྩི་ཉམས་སུ་མྱོང་བས་བློ་གྲོས་ཀྱི་ལུས་ཡོངས་སུ་ཚིམ་པ་མང་དུ་བྱོན་མོད་ཀྱི། དེ་ལྟ་ནའང་ད་དུང་རྒྱུད་སྡེའི་འཆད་ཉན་རྐང་ཚུགས་པའི་གྲྭ་ས་ཐིངས་པ་སྔོན་ཆད་མེད་པས། དེ་འདྲ་བའི་འཆད་ཉན་གྱི་གཞི་རྣམ་པར་དག་པ་ཚུགས་ན་ཅི་མ་རུང་སྙམ་དུ་བསྟན་པ་འབའ་ཞིག་ལ་དགོངས་པའི་ཐུགས་ཀྱི་འདུན་པ་ཤུགས་དྲག་པོས་བྱམས་ཆེན་ཆོས་རྗེ་ལ་སེ་ར་ཆོས་སྡིངས་སུ་གཞི་འདུལ་བའི་བསླབ་ཁྲིམས་རྣམ་པར་དག་པ་ལ་གནས་ནས་དཔལ་གསང་བ་འདུས་པ་དང་བདེ་མཆོག་གཉིས་ཀྱི་བཤད་སྒྲུབ་རྐང་ཚུགས་པའི་རྒྱུད་གྲྭ་ཞིག་འཛུགས་དགོས་པའི་ཞལ་ཏ་གནང་སྟེ་སེ་ར་ཆོས་སྡིངས་སུ་ཆོས་རྗེ་བས་ཐུགས་ཁུར་ཆེས་ཆེར་བཞེས་ནས། གཞི་འདུལ་བའི་བསླབ་ཁྲིམས་རྣམ་པར་དག་པ་ལ་བརྟེན་ཏེ། དཔལ་གསང་བ་འདུས་པ་དང་བདེ་མཆོག་གི་རྩ་རྒྱུད་ལ་འཆད་ཉན་རྐང་ཚུགས་པའི་གྲྭ་ས་རྣམ་པར་དག་པ་འཛུགས་པའི་ཞལ་བཀོད་དང་ཆོས་དཔོན་བསྐོ་བ་ལ་སོགས་པ་མཛད་ཅིང་། རྟེན་འབྲེལ་ཁྱད་པར་ཅན་བསྒྲིག་པའི་ཆེད་དུ་གནས་དེར་གསོ་སྦྱོང་མཛད། རྒྱུད་ཀྱི་རྒྱལ་པོ་གཉིས་ཀྱི་དབུ་ནས་ཆོས་ཐུན་རེ་གསུངས་སོ། ། དེ་ནས་རིམ་གྱིས་ཡར་ལམ་བདེ་ཆེན་རྩེར་ཕྱགས་ཕེབས། དེར་ཡང་བྲག་དཀར་རྫོང་དཔོན་པོ་ཡབ་ཡུམ་ལ་དཔལ་གསང་བ་འདུས་པ་དང་འཁོར་ལོ་བདེ་མཆོག་གཉིས་ཀྱི་བཤད་གྲྭ་རྣམ་པར་དག་པ་ཚུགས་པའི་གྲྭ་ཚང་ཞིག་འཛུགས་དགོས་པའི་ཞལ་ཏེ་བྱོན་ཞིང་། ཁོང་པས་ཀྱང་དད་པ་ཆེན་པོས་དགའ་སྤྲོ་དང་བཅས་ཏེ་བཀའི་ཁུར་སྤྱི་བོས་མནོས་ནས་བདེ་ཆེན་རྩེར་དཔལ་གསང་བ་འདུས་པ་དང་འཁོར་ལོ་སྡོམ་པ་གཉིས་ཀྱི་འཆད་ཉན་རྣམ་པར་དག་པ་རྐང་ཚུགས་པ་གཞི་འདུལ་བའི་བསླབ་ཁྲིམས་ཕྱག་སྲོལ་མ་ཉམས་པ་ལ་བརྟེན་པའི་གྲྭ་ས་བཙུགས། རྗེ་རང་ཉིད་ཀྱིས་ཀྱང་མཐུན་རྐྱེན་གྱི་ནས་གཞི་འཛུགས་པ་སོགས་ཀྱི་རྐྱེན་དུ་བབ་པའི་ཡོ་བྱད་དཔག་ཏུ་མེད་པའི་གནང་སྦྱིན་མཛད་ཅིང་རྫོང་དཔོན་པས་བདག་རྐྱེན་ཕུན་སུམ་ཚོགས་པའི་ཐུགས་ཁུར་བཞེས་སོ། ། དེ་ནས་གནས་དེ་ཉིད་ལ་རབ་ཏུ་གནས་པ་ཞུས་པས། ད་ལན་མིན་པ་རབ་གནས་བྱེད་པ་མི་འོང་བས་ད་ལན་རྒྱས་པ་ཞིག་བྱེད་དགོས་གསུང་ནས་རབ་ཏུ་གནས་པ་རྒྱས་པར་མཛད་དེ། གནས་དེ་ཉིད་ཀྱི་གཙུག་ལག་ཁང་དེ་ལ་གསང་སྔགས་མཁར་ཞེས་བྱ་བར་མིང་དུ་གདགས་པའང་མཛད་དོ། ། དེ་ནས་བྲག་དཀར་དུ་བྱོན། དེ་ནས་གྲུ་བཞིར་གདན་འདྲེན་ཞུས་ནས་བྱོན་ཏེ། དེ་ཡང་འབྲས་སྤུངས་ནས་ཕྱགས་བཏེག་ནས་དགའ་ལྡན་དུ་མ་ཕེབས་ཀྱི་རིང་ལ་གང་དུ་སྤྱན་དྲངས་པ་ཐམས་ཅད་དུ་ད་ཡང་ཡང་འོང་བ་མི་འོང་བས་ད་ལན་འགྲོ་དགོས་གསུང་ནས་ཞལ་གྱིས་བཞེས་པར་མཛད་དོ། ། གྲུ་བཞིར་ཕེབས་པའི་ནུབ་གཎྜི་བརྡུངས་པའི་སྒྲ་ཆེན་པོ་གྲགས་པས་ཐམས་ཅད་ཐེ་ཚོམ་དུ་གྱུར་ནས་བརྟགས་ཀྱང་། མི་ཞིག་གིས་བརྡུངས་པ་མ་ཡིན་པར་ངེས་པ་ཙམ་དུ་ཟད་ཀྱི། གཞན་དུ་ན་རྡུང་བར་བྱེད་པ་སུ་ཞིག་གིས་གནས་གང་དུ་བརྡུངས་པ་སོགས་གང་དུའང་བརྟག་པར་མི་ནུས་པར་ཡུན་རིང་དུ་སྒྲ་ཤིན་ཏུ་གྲག་ཅིང་གསུང་མཐོ་བ་རྡུང་བར་བྱེད་པ་ཞིག་བྱུང་ངོ་། ། གཞན་ཡང་འབྲས་སྤུངས་ནས་ཡར་ལ་ཕྱགས་མ་བཏེག་པའི་གོང་ཙམ་གྱི་སྐབས་སུའང་། ས་ཆེན་པོ་གློ་བུར་ཉིད་དུ་གཡོ་བ་དང་། ནམ་མཁའི་དབྱིངས་མཐའ་མི་མངོན་པའི་ལམ་རིང་པོ་ནས་འོངས་པའི་འཇའ་ཚོན་རྣམ་པར་བཀྲ་བ་མཐའ་ཡས་པ་རི་བོ་དགའ་ལྡན་གྱི་རྩེ་ལ་ཡང་དང་ཡང་དུ་ཟུག་པ་བྱུང་སྟེ། དེ་ནི་རྗེ་རིན་པོ་ཆེ་འདི་ཉིད་འོད་གསལ་ཆོས་སྐུ་མངོན་དུ་མཛད་ནས་གཟུགས་ཀྱི་སྐུར་བཞེང་བ་དང་མཉམ་དུ་ཕྱོགས་བཅུའི་ཞིང་རབ་འབྱམས་ཐམས་ཅད་དུ་སྤྲུལ་བ་འགྱེད་པར་མཛད་པས། ཕྱོགས་བཅུའི་སངས་རྒྱས་ཀྱི་ཞིང་དག་ནས་མཆོད་རྫས་སྣ་ཚོགས་ཐོགས་པའི་ལྷ་བགྲང་བ་ལས་འདས་པས་བསུ་བ་བྱས་པ་ཡིན་པར་གདོན་མི་ཟ་སྟེ། དཔལ་འཁོར་ལོ་སྡོམ་པའི་རྩ་རྒྱུད་ལས། འཁོར་ལོ་སྡོམ་པའི་རྣལ་འབྱོར་པ་དམ་ཚིག་དང་སྡོམ་པ་ཚུལ་བཞིན་དུ་བསྲུང་བ་དག་འཆི་བའི་དུས་བྱེད་པ་ན་དཔའ་བོ་དང་དཔའ་མོ་བགྲང་བ་ལས་འདས་པས་མཆོད་པའི་བྱེ་བྲག་སྣ་ཚོགས་པ་ཐོགས་ཏེ་མཁའ་སྤྱོད་དུ་འཁྲིད་པར་གསུངས་ན། རྗེ་བདག་ཉིད་ཆེན་པོ་འདི་ལྟ་བུ་འོད་གསལ་ཆོས་སྐུ་མངོན་དུ་མཛད་ནས་ཟུང་འཇུག་གི་སྐུར་བཞེངས་པ་ལ་ཕྱོགས་བཅུའི་དཔའ་བོ་དང་དཔའ་མོ་ཐམས་ཅད་ཀྱིས་མཆོད་པ་བྱེད་པ་དང་། ཞིང་གང་དང་གང་དུ་བྱོན་པ་དེ་དང་དེར་མཆོད་པའི་བྱེ་བྲག་སྣ་ཚོགས་ཐོགས་པས་བསུ་བ་བྱེད་པ་ལྟ་ཅི་སྨོས་སོ། ། དེ་ནས་གྲུ་བཞི་ནས་ཕྱགས་བཏེག་ནས་དགའ་ལྡན་དུ་ཕེབས་པ་ན་ཐོག་མར་ཡངས་པ་ཅན་གྱི་གཙུག་ལག་ཁང་ཆེན་པོར་བྱོན་ཏེ་འདིར་ད་ཡང་ཡང་འོང་བ་མི་འོང་བས་མཆོད་གཏོར་རྒྱ་ཆེར་ཤོམས་གསུངས་ནས་སྟོན་པའི་སྐུ་དང། གཞལ་ཡས་ཁང་རྣམས་དང་། ཡི་དམ་གྱི་དྲུང་དུ་མཆོད་པ་དང་གཏོར་མ་རྒྱ་ཆེར་མཛད་དེ་གསོལ་བ་གདབ་པ་དང་སྨོན་ལམ་གྱི་རིམ་པ་ལ་སོགས་པ་མང་དུ་མཛད། དེ་ནས་འདུ་ཁང་དུ་དགེ་འདུན་གྱི་མང་ཇ་འདྲེན་པ་ཞིག་གིས་གདན་དྲངས་པས་ཚོགས་ཀྱི་དབུས་སུ་ཕེབས་ཏེ་སྦྱིན་བདག་སོགས་ཀྱི་ཆེད་དུ་ཞུ་བ་སུའང་མེད་པར་བདེ་བ་ཅན་གྱི་སྨོན་ལམ་རྒྱས་པ་དགེ་འདུན་ཚོགས་པ་རྒྱ་མཚོའི་དབུས་སུ་ཤིས་བརྗོད་དང་བཅས་པ་མཛད་དེ། ཕྱི་རབས་ཀྱི་གདུལ་བྱ་རྣམས་ལ་རྗེ་ཉིད་ཀྱིས་ཇི་ལྟར་གསུངས་པའི་མདོ་སྔགས་ཡོངས་སུ་རྫོགས་པའི་ལམ་སྲོལ་བཟང་པོ་འདི་ཉིད་མི་ཉམས་ཤིང་གོང་ནས་གོང་དུ་འཕེལ་བའི་རྟེན་འབྲེལ་བསྒྲིག་པའི་ཕྱིར་འདུས་པ་རྒྱ་མཚོའི་དབུས་སུ་བྱོན་ནས་ཐུགས་སྨོན་དང་བཀྲ་ཤིས་དེ་ལྟར་མཛད་དོ། ། དེ་ནས་གཟིམ་ཁང་དུ་ཕེབས་ཏེ་བཞུགས་གདན་ལ་བཞུགས་པ་ན། ད་ནི་རང་རེའི་དགོན་པ་རང་དབང་ཐོབ་པ་འདིར་སླེབ་བྱུང་བས་བློ་བདེའོ། ། ཞེས་བཀའ་སྩལ། དེའི་ཉིན་མོ་འདས་པའི་མཚན་མོའི་གུང་ཐུན་ལ་བབ་པ་ཙམ་ནས་སྐུ་ཁམས་ཅུང་ཞིག་བསྙེལ་བའི་ཚུལ་བསྟན་ཏེ། དེའི་སང་ཉིན་ནས་དགེ་འདུན་ཐམས་ཅད་ཀྱིས་ཀྱང་སྐུ་རིམ་ལ་འབད་པ་འདོན་པར་མཛད། དེ་ལྟ་ནའང་སང་གི་ཉི་ཕྱེད་ཙམ་བར་དུ་སྐུ་ལུས་ཀྱི་ཆ་སོ་སོ་ལ་བསྙུན་ཟུག་ཏུ་མངོན་པ་ཅུང་ཟད་ཡོད་གསུང་བ་མ་གཏོགས་དེ་ནས་བསྙུན་ཟུག་ཀྱང་ཆེན་པོ་མེད་པར་ཅུང་ཟད་ཐུགས་ཉོག་པར་གསལ་ཙམ་གྱི་བར་ལ་ཉིན་ཞག་གཉིས་ཀྱི་རིང་དུ་སྐུ་རིམ་བསྒྲུབས། དེའི་ཚེ་སྲས་ཀྱི་ཐུ་བོ་རྗེ་དར་མ་རིན་ཆེན་ལ་བསྟན་པའི་བྱ་བ་མཛད་ཚུལ་འདི་ལྟར་དགོས་བྱ་བ་ལ་སོགས་པའི་ཞལ་ཏ་ཞིབ་པར་སྔ་མོ་ནས་གནང་ཚར་བ་དེའི་ཚེ་རྒྱས་པར་མ་གསུངས་ཤིང་། དབུ་ཞྭ་སྣེ་རིང་དང་གོས་བེར་ཞིག་གནང་སྟེ་དོན་གྱིས་རྒྱལ་ཚབ་ཏུ་བསྐོ་བར་མཛད། གནས་བརྟན་རིན་ཆེན་རྒྱལ་མཚན་པ་ལ་སོགས་པ་སྐུ་དྲུང་ན་འཁོད་པ་ལ། ཚུལ་འདི་ཤེས་པར་གྱིས་ལ་བྱང་ཆུབ་ཀྱི་སེམས་སྒོམས་ཤིག་ཅེས་སོགས་ཙམ་གསུང་། གཞན་སྐུ་ཁམས་ཅུང་ཟད་བསྙེལ་བའི་ཚུལ་བསྟན་པའི་རིང་ལའང་སྔར་གྱི་ཐུན་བཞིའི་རྣལ་འབྱོར་དང་བདག་འཇུག་ལ་སོགས་པའི་ཐུགས་དམ་གྱི་རིམ་པ་རྣམས་འཆག་མེད་དུ་མཛད་པ་དང་། གཞན་ཡང་གཙོ་བོར་ནང་གི་ཏིང་ངེ་འཛིན་ལ་མཆོག་ཏུ་གཞོལ་བའི་ཐུགས་དམ་ལ་ཁོར་ཡུག་ཏུ་བཞུགས་པར་གྱུར་ཏོ། ། དེ་ནས་ 1419 ས་ཕག་ཟླ་བ་བཅུ་པའི་ཚེས་ཉི་ཤུ་བཞིའི་དགོངས་མོ་བཅོམ་ལྡན་འདས་བདེ་མཆོག་འཁོར་ལོའི་མཆོད་པ་རྒྱས་པ་ཞིག་མཛད་དེ་དེའི་ཚེ་ཀ་པཱ་ལ་མར་མེད་པ་ཅིག་ཁྱེར་ཤོག་གསུང་ནས་དེར་ནང་མཆོད་བྱིན་རླབས་རྒྱས་པ་ཞིག་མཛད་དེ། བདག་ཉིད་ཀྱིས་བདུད་རྩི་མྱང་བ་ལན་སུམ་ཅུ་རྩ་གཉིས་སམ། བཅུ་དྲུག་ཕྲག་གཉིས་སུ་མཛད་པ་ལ། དེ་ཡང་བདེ་མཆོག་གི་མཆོད་པ་དེ་དང་འབྲེལ་བས་དེ་ཉིད་ཀྱི་དབང་དུ་མཛད་པ་ཡིན་ལ་རག་ཅིང་། གཞན་དུ་ན་ལྷའི་འཁོར་ལོ་འདི་འདྲ་བ་ཞིག་གི་དབང་དུ་མཛད་ནས་བདུད་རྩི་མྱང་བ་མཛད་དོ་ཞེས་བྱ་བར་ནི་སུས་ཀྱང་ཁོང་དུ་མ་ཆུད་དེ། སྐུ་དྲུང་ན་འཁོད་པ་ཁ་ཅིག་ནི་གྲངས་ལ་དཔགས་ནས་བཅོམ་ལྡན་འདས་དཔལ་གསང་བ་འདུས་པའི་སྒོ་ནས་མཛད་པར་ཡང་རྟོག་གོ ། གཞན་ཡང་དེ་དག་གི་ཚེ་ཡི་དམ་གྱི་ཁྱད་པར་མངོན་སུམ་དུ་གཟིགས་པ་ལ་སོགས་པའི་གཟིགས་སྣང་ཁྱད་པར་ཅན་མང་དུ་ཡོད་པའི་རྣམ་པ་དུ་མ་མངོན་མོད་ཀྱི། སྐུ་དྲུང་ན་འཁོད་པ་དག་གིས་ཇི་ལྟར་མཆིས་པ་ཞུ་བར་མ་ནུས་སོ། ། དེ་ནས་མཚན་མོའི་རིང་ལ་ཐུགས་དམ་ལ་རྩེ་གཅིག་ཏུ་བཞུགས་ཏེ། དེ་ཡང་ཕྱི་རོལ་ནས་མངོན་པ་ལ་རྡོ་རྗེ་བཟླས་པ་ལ་སོགས་པ་མཛད་པ་ཤས་ཆེ་བར་མངོན་ནོ་ཞེས་ཟེར་ཏེ། མདོར་ན་འཆི་བ་འོད་གསལ་ཆོས་སྐུ་དང་སྲེ་བའི་མན་ངག་རྣམས་ཐུགས་ཉམས་སུ་བསྟར་བ་ཡིན་པར་ངེས་སོ། ། དེའི་སང་ཉིན་ཉི་ཤུ་ལྔའི་སྔ་དྲོ་དང་པོ་ནས་ཞབས་རྡོ་རྗེ་སྐྱིལ་མོ་ཀྲུང་དུ་མཛད། ཕྱག་གཉིས་མཉམ་པར་བཞག་སྟེ་ཐུགས་དམ་ལ་རྩེ་གཅིག་ཏུ་བཞུགས་པ་ལས་ཉི་མར་ཤར་རྗེས་ཙམ་ལ་སྟོང་པ་གསུམ་རིམ་གྱིས་ཐིམ་ནས་ཐམས་ཅད་སྟོང་པ་འོད་གསལ་དོན་དམ་པའི་བདེན་པ་མངོན་དུ་མཛད་དེ་ནང་དུ་འོད་གསལ་ཆོས་སྐུ་མངོན་དུ་མཛད་པ་དང་དུས་མཉམ་དུ་ཕྱིའི་སྐུ་ལུས་འགྱུར་ཏེ། ཞལ་གྱི་དཀྱིལ་འཁོར་དེ་གོང་ཅུང་ཟད་སྐུ་ཁམས་བསྙེལ་བ་སོགས་ཀྱིས་སྔར་ལས་སྐུ་མདངས་ཅུང་ཞིག་ཆུང་བར་ཡོད་ནའང་། དེའི་ཚེ་གློ་བུར་དུ་ཞལ་གྱི་དཀྱིལ་འཁོར་ཟླ་བ་ལྟར་རྒྱས་པར་གྱུར་ཏེ་སྐུའི་ཆ་ཐམས་ཅད་འོད་ཀྱི་ལུས་ཅན་གྱི་ལྷ་བུ་གཞོན་ནུ་ལྟར་གྱུར་ཅིང་། སྐུའི་ཤ་ཞུ་བ་དང་། ལྟར་ལྟར་པོར་གྱུར་པ་དང་། ཁམ་ཁུམ་དུ་གྱུར་པ་ལ་སོགས་པ་ཅུང་ཟད་ཀྱང་མེད་ལ། སྔར་གྱི་སྐུའི་གཉེར་མ་རྣམས་ཀྱང་སྐྲའི་རྩེ་མོ་བརྒྱར་བཤགས་པའི་ཚོད་ཙམ་དུའང་ཐམས་ཅད་ཀྱི་ཐམས་ཅད་དུ་མེད་པར་གྱུར་ཏེ་བལྟ་བར་མི་བཟོད་པའི་འོད་ཀྱི་ཕུང་པོ་དང་ལྡན་ཞིང་། དེ་ཡང་ཁ་ཅིག་ནི་སྐུའི་འོད་དམར་སེར་དུ་སྣང་ངོ་ཞེས་ཟེར། ཁ་ཅིག་ནི་དཀར་སེར་དུ་སྣང་ངོ་ཞེས་ཟེར། ཁ་ཅིག་ནི་གསེར་བཙོ་མ་ལྟ་བུར་སྣང་ངོ་ཞེས་ཟེར་ཏེ། ལོ་བཅུ་དྲུག་ལོན་པའི་ན་ཚོད་དང་ལྡན་པའི་ལྷའི་ལུས་ཅན། ཇི་ལྟར་འཇམ་དཔལ་གཞོན་ནུར་གྱུར་པ་རྒྱན་དང་ཆ་ལུགས་སྤངས་ནས་ནང་དུ་ཡང་དག་འཇོག་ལ་མཉམ་པར་བཞག་པ་ཇི་ལྟ་བ་དེ་ལྟར་གྱུར་ཏོ། ། འདི་ནི་ཆོས་ཉིད་ཡིན་ཏེ་ཐེག་པ་ཐུན་མོང་བ་ལ་ཡང་། གང་གི་རྒྱུད་ལ་མཐོང་བའི་ལམ་སྐྱེས་པ་དང་། དགྲ་བཅོམ་པ་མངོན་དུ་བྱས་པ་ལ་སོགས་པའི་སྒོ་ནས་བདུད་རྩི་ཐོབ་པར་གྱུར་པ་ན། དབང་བོ་ཡོངས་སུ་གསལ་ཞིང་། བཞིན་གྱི་མདོག་ནི་དག་ལ། པགས་པའི་མདོག་ནི་དཀར་བ་ལ་སོགས་པ་ལུས་ཀྱི་མདངས་སྔར་ལས་གནས་འགྱུར་བ་འབྱུང་བར་འདུལ་བ་ལུང་ལས་གསུངས་སོ། ། དེ་བས་ན་རྗེ་འདི་ཡང་དེའི་ཚེ་འོད་གསལ་དོན་དམ་པའི་བདེན་པ་མངོན་དུ་མཛད་དེ། འཆི་བ་ཆོས་ཀྱི་སྐུར་བསྒྱུར་བའི་སྒོ་ནས་བར་དོ་སྒྱུ་མའི་སྐུར་བཞེངས་ཏེ། བར་དོ་ལོངས་སྤྱོད་རྫོགས་པའི་སྐུ་མཆོག་གི་དངོས་གྲུབ་ཀྱི་གོ་འཕང་མཐར་ཐུག་པ་མངོན་དུ་མཛད་པ་ཡིན་ནོ་ཞེས་ནང་ཐུགས་ཀྱི་སྲས་གཅིག་མཁས་གྲུབ་སྨྲ་བའི་ཉི་མ་དང་གྲུབ་ཆེན་འཇམ་དཔལ་རྒྱ་མཚོ་སོགས་རྗེའི་ཐུགས་སྲས་རྣམས་མཐུན་པར་གསུང་ངོ་། ། དེ་ལྟར་རྗེ་རིན་པོ་ཆེས་འོད་གསལ་ཆོས་སྐུ་མངོན་དུ་མཛད་ནས་འོད་གསལ་དེ་ལས་བཞེངས་པ་དང་དུས་མཉམ་དུ་མཚན་དཔེས་སྤྲས་པའི་གཟུགས་ཀྱི་སྐུ་འདུས་པའི་རྩ་རྒྱུད་ལས། དཔག་ཚད་བརྒྱ་ཡི་ཁྱོན་ཙམ་དུ། ། རྡོ་རྗེ་འབར་བའི་འོད་དག་གིས། ། རྒྱན་རྣམས་ཀུན་གྱིས་བརྒྱན་པ་ཡི། ། དག་པའི་བདག་ཉིད་སྣང་བར་འགྱུར། ། ཚངས་པ་དྲག་པོ་ལ་སོགས་ལྷས། ། ནམ་ཡང་མཐོང་བར་མི་ནུས་སོ། ། ཞེས་གསུངས་པ་ལྟར་ནམ་མཁའི་དབྱིངས་ཐམས་ཅད་འོད་ཟེར་གྱི་དྲ་བས་འགེངས་ཤིང་། ཚངས་པ་དང་བརྒྱ་བྱིན་ལ་སོགས་པའི་ལྷ་མཐུ་བོ་ཆེ་དག་གིས་ཀྱང་མཐོང་བར་མི་ནུས་ན་གཞན་དག་གིས་ལྟ་ཅི་སྨོས་པ་ཡེ་ཤེས་ཀྱི་སྐུ་ནམ་མཁའ་མ་ཟད་ཀྱི་བར་དུ་འགྱུར་བ་མེད་པ། གསུང་ཚངས་པའི་དབྱངས་ལ་འགག་པ་མེད་པ། ཐུགས་བདེན་པ་གཉིས་མངོན་སུམ་དུ་གཟིགས་པ་ལས་ནམ་ཡང་ཉམས་པ་མེད་པ། སྐུ་ལས་སྤྲུལ་པ་ཕྱོགས་བཅུར་སྤྲོས་པས་ནམ་མཁའི་དབྱིངས་ཐམས་ཅད་ཁྱབ་པས་སེམས་ཅན་རྣམས་ལ་གང་ལ་གང་འདུལ་གྱི་དོན་མཛད་བཞིན་དུ་ཞིང་འདིའི་གདུལ་བྱ་རྣམས་ཀྱི་དོན་དུ་སྔར་ལྷག་པའི་ལྷ་མང་པོས་ལུང་བསྟན་པ་ལྟར་དགའ་ལྡན་ཆོས་ཀྱི་ཕོ་བྲང་དུ་ཕེབས་ནས་རྗེ་བཙུན་བྱམས་པ་མགོན་པོའི་སྲས་ཀྱི་ཐུ་བོའི་ཚུལ་བཟུང་བ་འཇམ་དཔལ་སྙིང་པོ་ཞེས་བྱ་བ་དགའ་ལྡན་གྱི་ལྷ་རྣམས་ཀྱིས་གཙོས་ཕྱོགས་བཅུའི་ཞིང་ནས་འདུས་པའི་གདུལ་བྱ་སའི་རྡུལ་དང་མཉམ་པ་དག་ལ་ཐེག་པ་ཆེན་པོའི་ཆོས་ཀྱི་དགའ་སྟོན་འགྱེད་ཅིང་བཞུགས་སོ། ། དེ་ནས་སྲས་ཀྱི་གཙོ་བོ་རྣམས་ཀྱིས་གཙོས་དགའ་ལྡན་དུ་སྙུག་མར་གནས་པ་རྣམས་དང་། ཕྱོགས་ཕྱོགས་ནས་འདུས་པའི་དད་ལྡན་བགྲང་བ་ལས་འདས་པ་དག་དང་། དཀར་ཕྱོགས་ཀྱི་ལྷ་དང་ཀླུ་ལ་སོགས་པ་ས་དང་བར་སྣང་གི་ཁྱོན་ཐམས་ཅད་ཡོངས་སུ་གང་བའི་དད་ལྡན་དག་གིས་སྐུ་གདུང་རིན་པོ་ཆེ་ལ་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ཚད་མེད་པས་མཆོད་དེ་རྗེ་རིན་པོ་ཆེས་གངས་རིའི་ཁྲོད་འདིར་རྒྱལ་བསྟན་ཡོངས་རྫོགས་གསར་དུ་འཛུགས་པར་མཛད་པ་འདི་ཉིད་ནམ་ཡང་རྒྱུན་མི་ཆད་ཅིང་མི་ཉམས་པར་གནས་པའི་རྟེན་འབྲེལ་དུ་སྐུ་གདུང་རིལ་པོ་ཙན་དན་གྱི་སྒྲོམ་གྱི་ནང་དུ་བཞུགས། དེ་ཡང་རིན་པོ་ཆེའི་སྒྲོམ་གྱི་ནང་དུ་བཞུགས་ཏེ་དགའ་ལྡན་རྣམ་པར་རྒྱལ་བའི་གླིང་ཉིད་ན་ལྷ་དང་བཅས་པའི་འགྲོ་བ་ཡོངས་ཀྱི་བསོད་ནམས་ཀྱི་ཞིང་དུ་བཞུགས་སོ། །
དེ་ལྟར་རྗེ་རིན་པོ་ཆེས་སངས་རྒྱས་འཇིག་རྟེན་དུ་སླར་བྱོན་པ་ལྟར་མདོ་སྔགས་ཀྱི་བསྟན་པ་ཡོངས་སུ་རྫོགས་པ་རྒྱ་ཆེར་སྤེལ་བར་མཛད་པས་རྒྱུད་འཛིན་གྱི་སློབ་མ་ཕྱོགས་ཀྱི་ཐ་གྲུ་ཀུན་ཏུ་བཞུགས་པས་མཐའ་དག་བརྗོད་པར་སུ་ཞིག་གིས་ནུས། བསིལ་ལྡན་གྱི་ལྗོངས་འདིར་བསྟན་པ་འཛིན་སྐྱོང་སྤེལ་གསུམ་མཛད་པའི་བསྟན་འཛིན་ཆེན་པོ་ཇི་སྙེད་བྱོན་པ་དག་ཀྱང་བགྲང་བར་མི་ནུས་ལ། སྔོན་གྱི་མཁས་པ་དག་གིས་གཙོ་བོ་དག་ལས་ཕྱོགས་ཙམ་རེ་བརྗོད་པ་ལའང་མང་དུ་མཆིས་ཤིང་། བརྗོད་ཚུལ་འང་མི་འདྲ་བ་མང་དུ་སྣང་སྟེ། མཁས་གྲུབ་ནོར་བཟང་རྒྱ་མཚོས་ནི་རྗེའི་ཐུགས་སྲས་བསམ་གྱིས་མི་ཁྱབ་པ་བྱུང་བ་རྣམས་ཀྱི་ནང་ནས་ཁྱད་པར་དུ་འཕགས་པ་འགའ་ཞིག་བརྗོད་པ་ནི། གཙང་ནས་རྒྱལ་ཚབ་དར་མ་རིན་ཆེན་སོགས་དགུ། དབུས་ནས་འདུལ་འཛིན་གྲགས་པ་རྒྱལ་མཚན་སོགས་བཅུ་གསུམ། ཁམས་ནས་ཚ་ཁོ་མཁན་ཆེན་ངག་དབང་གྲགས་པ་སོགས་ལྔ། མངའ་རིས་ནས་བྱང་སེམས་ཤེས་རབ་བཟང་པོ་སོགས་ལྔ་རྣམས་གཙོ་བོར་མཛད་དེ། དེ་དག་གི་མཚན་རྣམས་ནི་མཁས་གྲུབ་ནོར་བཟང་རྒྱ་མཚོ་ཉིད་གྱིས་མཛད་པའི་རྗེའི་བུ་སློབ་བྱུང་ཚུལ་དུ་གསལ་ལོ། །
༈ རྗེ་རིན་པོ་ཆེ་ལ་མི་ཕྱེད་པའི་དད་པ་ཅན་བཟང་བཟང་ནེ་རིང་པ་འཆི་མེད་རབ་རྒྱས་ཀྱིས་ནི་རྗེའི་ཐུགས་སྲས་གཙོ་བོ་རྣམས་བསྡུས་པའི་སྡོམས་འདི་ལྟར་མཛད་དེ། ལུང་བསྟན་རྣམ་དག་ཡོད་པའི་བུ་ཆེན་ཐུགས་སྲས་བདུན། སྔོན་དུས་བྱ་བྲལ་མཛད་དུས་ཀྱི་ཕྱག་ཕྱི་བ་བློས་བཏང་བརྒྱད། སྐུ་བསྙུན་དུས་བསྙུན་གཡོག་དང་། སྐུ་རིམ་རྐང་ཚུགས་མཛད་པའི་བུ་ཆེན་བདུན། གདན་སའི་ལུགས་གཉིས་སྤེལ་བའི་བུ་ཆེན་མཁས་གྲུབ་བརྒྱད། ཡི་གེས་ཐུགས་ཟིན་པའི་བུ་ཆེན་གསུམ། འཕྲིན་ལས་རྩོད་པ་མེད་པའི་བུ་ཆེན་གསུམ། སྒྲུབ་པ་གཙོ་བོར་མཛད་པའི་བུ་ཆེན་རྟོགས་ལྡན་གྱི་མཚན་ཅན་བཞི་དང་། རི་སྒྲུབ་གཉིས། གཞུང་ལུགས་རབ་འབྱམས་མཁྱེན་པའི་མཁས་མཆོག་གཉིས། སྟོད་སྨད་ཀྱི་ཤེས་རབ་བཟང་པོ་རྣམ་གཉིས། བྱང་སེམས་རྣམ་གཉིས། སེམས་དཔའ་རྣམ་གཉིས། གྲགས་པ་རྣམ་གཉིས། བཀའ་བབ་ཀྱི་བུ་ཆེན་དྲུག ། སྡེ་དཔོན་གྲུབ་ཐོབ་ཀྱི་བུ་ཆེན་རྩོད་མེད་གསུམ། རིགས་རུས་ཁུངས་བཙུན་གྱི་མཁས་གྲུབ་རྣམ་པ་གསུམ། རྒྱལ་ཚབ་བསྟན་འཛིན་གྱི་བུ་ཆེན་རིན་པོ་ཆེ་རྣམ་པ་གསུམ། སྡེ་དཔོན་ཐུགས་གྲོལ་གྱི་མཁས་པ་གཅིག ། བྱ་བཏང་སྦས་པའི་གྲུབ་ཐོབ་གཅིག ། མཁས་མཆོག་ཡོངས་གྲགས་ཀྱི་ཆོས་རྗེ་གཉིས། བྱ་བཏང་ཡོངས་གྲགས་ཀྱི་གྲུབ་ཐོབ་གཅིག་ཅེས་སྡེ་ཚན་ཚོམས་སུ་བགྲངས་སོ། ། དེ་དག་སོ་སོའི་མཚན་དང་། ངོས་འཛིན་ནི་ཁོང་པས་མཛད་པའི་རྗེའི་རྣམ་ཐར་གསེར་གྱི་མཆོད་སྡོང་དུ་གསལ་ལོ། །
༈ པཎ་ཆེན་བསོད་ནམས་གྲགས་པས་མཛད་པའི་ཆོས་འབྱུང་ཡིད་ཀྱི་མཛེས་རྒྱན་དུ་རྗེ་རིན་པོ་ཆེའི་སློབ་མ་གཙོ་བོ་དག་སྡེ་ཚན་སྡེ་ཚན་དུ་བྱས་ནས་ཚོམས་སུ་བསྡུས་པ་ནི། བླ་མ་ཆོས་འབྲེལ་གསན་པ་གསུམ། བྱ་བྲལ་ལ་མ་ཕེབས་གོང་གི་སློབ་མ་ལྔ་ཚར་བཞི། བྱ་བྲལ་ལ་ཐེགས་དུས་ཀྱི་འཁོར་དག་པ་རྣམ་བརྒྱད། སྲས་ཀྱི་ཐུ་བོ་གཉིས། གཉིས་པོ་དེའི་སྟེང་དུ་འཇམ་དཀར་བ་བསྣན་ཏེ་གསང་བདག་གིས་ལུང་བསྟན་པའི་འཁོར་ཁྱད་འཕགས་གསུམ། ནང་ཐུགས་ཀྱི་སྲས་གཅིག ། འཕྲིན་ལས་ནམ་མཁའ་དང་མཉམ་པའི་བུ་ཆེན་བཞི། དབུས་གཙང་བསྟན་པའི་སྒྲོན་མེ་བཅུ། གཞན་དོན་ལྷུན་གྱིས་གྲུབ་པའི་སེམས་དཔའ་དྲུག ། མི་དབང་གཙུག་ན་མཛེས་པའི་ཏི་ཤྲཱི་གཉིས། རྒྱ་ཆེན་མང་དུ་ཐོས་པའི་དབོན་སྲས་གཉིས། སྦྱངས་པའི་ཡོན་ཏན་འཛིན་པའི་ཅོག་པུ་པ་ཆེ་ཆུང་གཉིས། རྣམ་དཔྱོད་ཕུལ་དུ་བྱུང་བའི་མཁས་པ་གཉིས། བསྟན་པ་ཕྱོགས་མཐར་སྐྱོང་བའི་དར་ཆེན་དྲུག ། སྐད་གཉིས་སྨྲ་བའི་ལོ་ཙཱ་བ་གཉིས། ས་སྐྱོང་ཆོས་རྗེ་དྲུག ། གསུང་རབ་མང་དུ་མཁྱེན་པའི་བསྟན་འཛིན་བརྒྱད། མདོ་རོང་གི་མཁས་པ་བཞི། མཁའ་སྤྱོད་གྲུབ་པའི་གདུང་རྒྱུད་གཉིས། ཡ་མཚན་ཅན་གྱི་སྐྱེས་བུ་གཉིས། སྐྱེ་དགུའི་གཙུག་རྒྱན་སྤྱན་སྔ་བརྒྱད། ཁྲི་སྟེང་མཛེས་པའི་བླ་ཆེན་བཞི། ཚོགས་པ་སྐྱོང་བའི་མཁན་པོ་བཞི། སྡེ་དགོན་ཕྲ་མོའི་ཆེན་པོ་ལྔ། དབང་བཞི་སྐུར་བའི་ཆོས་བསྒོ་བ་གཉིས། ལུང་རིགས་སྨྲ་བའི་དཀའ་བཅུ་པ་བཞི། ཚིག་དོན་སྨྲ་བའི་དཀའ་བཞི་པ་བཅུ། བརྟུལ་ཞུགས་འཛིན་པའི་ཇོ་སྟན་བཞི། ཚུལ་ཁྲིམས་རྣམ་པར་དག་པའི་གནས་བརྟན་དྲུག ། ཚེ་བློས་བཏང་གི་རྟོགས་ལྡན་ལྔ། ལྷ་གཟིགས་གྲགས་པ་རྒྱ་མཚོ་སོགས་བསྟན་འཛིན་བཅོ་ལྔ་རྣམས་སྡེ་ཚན་དུ་བྱས་ཏེ་བགྲངས་སོ། ། འདི་དག་གི་མཚན་དང་ངོས་འཛིན་རྣམས་ཆོས་འབྱུང་དེ་ཉིད་དུ་གསལ་ལོ། ། འདིར་ནི་ཐམས་ཅད་བརྗོད་པར་མི་ནུས་ཀྱིས་སྲས་ཀྱི་ཐུ་བོ་གཉིས་སོགས་ཡོངས་སུ་གྲགས་པ་འགའ་ཞིག་གི་རྣམ་ཐར་རིམ་པས་བརྗོད་པར་བྱའོ། །
༈ རྗེའི་ཐུགས་སྲས་ཚ་ཁོ་དབོན་པོར་གྲགས་པ་མཁན་ཆེན་ངག་དབང་གྲགས་པ་ནི། རྒྱལ་མོ་རོང་དུ་ཚ་ཁོ་རྒྱལ་པོའི་རིགས་སུ་འཁྲུངས། དབུས་གཙང་དུ་བྱོན་ཏེ་རྗེ་བདག་ཉིད་ཆེན་པོ་སོགས་མཁས་པ་དུ་མའི་ཞབས་པད་བསྟེན་ནས། སྡེ་སྣོད་དང་རྒྱུད་སྡེ་ལ་སྦྱངས་པས་མཁས་པའི་གོ་འཕང་བརྙེས། རྗེ་རིན་པོ་ཆེ་ལས་བྱང་ཆུབ་ལམ་གྱི་རིམ་པའི་ཁྲིད་དང་། ལམ་གྱི་གཙོ་བོ་རྣམ་པ་གསུམ་གྱི་ཁྲིད་གསན་ཏེ་མྱོང་བ་ཐོན་པར་མཛད། རྗེ་རིན་པོ་ཆེ་ལ་རྗེ་བཙུན་འཇམ་པའི་དབྱངས་ཀྱིས་གསུང་རབ་ཐམས་ཅད་ཀྱི་དོན་ལམ་གྱི་གཙོ་བོ་རྣམ་པ་གསུམ་དུ་བསྡུས་ནས་འདོམས་པར་མཛད་པའི་མན་ངག་གི་རྩ་ཚིག་བཀའ་འབུམ་ཐོར་བུར་བཞུགས་པ་འདི་ཡང་རྒྱལ་སྲས་འདིའི་དོན་དུ་རྗེ་རིན་པོ་ཆེས་ཡི་གེར་འགོད་པར་མཛད། རྩ་ཚིག་དེའི་མཇུག་ཏུ། དེ་ལྟར་ལམ་གྱི་གཙོ་བོ་རྣམ་གསུམ་གྱི། ། གནད་རྣམས་རང་གིས་ཇི་བཞིན་རྟོགས་པའི་ཚེ། ། དབེན་པ་བསྟེན་ལ་བརྩོན་འགྲུས་སྟོབས་བསྐྱེད་ནས། ། གཏན་གྱི་མདུན་མ་མྱུར་དུ་སྒྲུབས་ཤིག་བུ། ། ཞེས་རྒྱལ་སྲས་འདི་ལ་ཐུགས་ཤིན་ཏུ་མཉེས་པའི་གསུང་ཡང་བྱོན་ནོ། ། རྗེ་རིན་པོ་ཆེ་ལ་བླ་མེད་ཀྱི་དབང་དང་རིམ་གཉིས་ཀྱི་མན་ངག་རྣམས་ལེགས་པར་གསན་ཏེ་ཐུགས་ཉམས་སུ་བཞེས་པས་རིམ་པ་གཉིས་ཀྱི་ཏིང་ངེ་འཛིན་བརྟན་པོ་ཐུགས་རྒྱུད་ལ་འཁྲུངས། རྒྱལ་སྲས་འདིས་རྗེ་རིན་པོ་ཆེ་དཀའ་བཞིའི་གྲྭ་སྐོར་མཛད་པའི་སྐབས་ནས་བཟུང་ཞབས་འབྲིང་པ་རྒྱུན་རིན་དུ་མཛད་དེ། མཉེས་པ་གསུམ་གྱིས་མཉེས་པར་མཛད་ཅིང། རྗེ་རིན་པོ་ཆེ་དང་རྒྱལ་སྲས་འདི་གཉིས་ཀྱིས་ཐུགས་རྗེ་ཆེན་པོ་རང་བྱུང་ལྔ་ལྡན་གྱི་མདུན་དུ་སྨྱུང་གནས་མང་དུ་མཛད་ཅིང་། དེའི་ཚེ་དཔོན་སློབ་གཉིས་ཀས་ཐུགས་རྗེ་ཆེན་པོ་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ་པས། རྒྱལ་སྲས་འདི་ལ་སྐུ་ཚེའི་མཇུག་ལ་འཕྲིན་ལས་རྒྱ་ཆེན་པོ་ཡོང་བའི་མཚན་ལྟས་ཤར། དེ་ནས་རྗེ་རིན་པོ་ཆེས་ཀྱང་གནང་བ་ཁྲོལ་ཏེ། རྒྱལ་སྲས་འདིས་མདོ་སྨད་དུ་བྱོན་ནས་རྗེ་བླ་མའི་རིང་ལུགས་འཛིན་པའི་དགོན་སྡེ་མང་དུ་བཙུགས་ཏེ། ཇ་ཕུ་སྟོད་དུ་ད་ཚང་ལྷན་གྲུབ་གླིང་ཟེར་བའི་དགོན་པ་དང་། ཇ་ཕུའི་སྐེད་ན་བ་མགོ་དགོན་པ། ཇ་ཕུའི་སྨད་ན་སུམ་མདོ་དགོན་པ། མུ་དགེའི་ས་ཆར་བཀྲ་ཤིས་འཁོར་ལོའི་དགོན་ཟེར་བ་རྣམས་བཏབ། གཞན་ཡང་དགོན་པ་བརྒྱ་རྩ་བརྒྱད་བཏབ་པར་གྲགས། མཁན་ཆེན་འདི་ལ་རྗེ་བདག་ཉིད་ཆེན་པོ་ཐུགས་ཤིན་ཏུ་དགྱེས་པ་ཞིག་སྟེ། ཆབ་ཤོག་ལས། ཁོ་བོས་སྨྲས་པའི་རྗེས་སུ་ཞུགས་ཤིག་དང་། ། ཚེ་རབས་ཀུན་ཏུ་སྤྱོད་དང་སྨོན་ལམ་ཀུན། ། མཚུངས་པར་སྤྱད་དེ་ནམ་ཞིག་ཚངས་རྒྱ་ཚེ། ། བདུད་རྩིའི་བགོ་བཤའ་ཐོག་མར་སྦྱིན་པར་བྱ། ། ཞེས་གསུངས་སོ། ། ། །
༈ རྗེ་རིན་པོ་ཆེ་བྱ་བྲལ་ལ་ཕེབས་སྐབས་རྗེ་བཙུན་འཇམ་པའི་དབྱངས་ཀྱིས་ལུང་བསྟན་པའི་འཁོར་དག་པ་རྣམ་བརྒྱད་ནི། བླ་མ་འཇམ་དཀར་བ་ཞེས་གྲགས་པ་འཇམ་དཔལ་ཆོས་བཟང་། གནས་བརྟན་བཟང་སྐྱོང་བ། གནས་བརྟན་རིན་ཆེན་རྒྱལ་མཚན། གནས་བརྟན་བྱང་སེང་བ། བླ་མ་འཇམ་དཔལ་རྒྱ་མཚོ། དགེ་བཤེས་ཤེས་རབ་གྲགས། དགེ་བཤེས་འཇམ་དཔལ་བཀྲ་ཤིས། དགེ་བཤེས་དཔལ་སྐྱོང་རྣམས་སོ། ། བདག་ཉིད་ཆེན་པོ་འདི་དག་ནི་སྔོན་ཡུན་རིང་པོ་ནས་རྗེ་རིན་པོ་ཆེས་རྗེས་སུ་བཟུང་བ། སྨོན་ལམ་སྟབས་གཅིག་ཏུ་མཛད་པ། སྲིད་པ་མཐའ་དག་མེ་འབར་བའི་རླུབས་ལྟར་མཐོང་སྟེ་འཁོར་བའི་ཕུན་ཚོགས་ལ་རྒྱབ་ཀྱིས་ཕྱོགས་པ། རང་དོན་དུ་ཞི་བདེའི་གོ་འཕང་ལའང་མི་སྨོན་པ་ཐུགས་བྱམས་པ་དང་སྙིང་རྗེའི་གཞན་དབང་དུ་གྱུར་ཏེ་རྒྱལ་སྲས་ཀྱི་སྤྱོད་པ་རྒྱ་མཚོར་སློབ་པ་ལ་ཞུམ་པ་མེད་པ། སྲིད་གསུམ་དྲི་ཟའི་གྲོང་ཁྱེར་ལྟར་གཟིགས་ཏེ་བདག་ལྟའི་བུད་ཤིང་ཡེ་ཤེས་ཀྱི་མེས་བསྲེགས་པ། རྗེ་བཙུན་འཇམ་པའི་དབྱངས་ཀྱིས་ཚེ་རབས་ཀུན་ཏུ་རྗེས་སུ་བཟུང་བ། ཕྱི་ནང་གི་རྒྱུ་རྐྱེན་ཐམས་ཅད་ཚང་བས་སྐད་ཅིག་རེ་རེར་ཡང་ས་ལམ་གྱི་བགྲོད་པ་གོང་འཕེལ་དུ་འབྱོན་པ། རྗེ་རིན་པོ་ཆེའི་བསྟན་པ་མཛེས་པའི་རྒྱན་དུ་ཆེ་བ། རྒྱལ་བ་སྲས་བཅས་ཀུན་གྱིས་བསྔགས་པའི་གནས་སུ་གྱུར་པ་ཞིག་གོ ། འདི་དག་སོ་སོར་གང་དུ་འཁྲུངས་པ་དང་། སྐུ་ཚེ་ཧྲིལ་པོའི་མཛད་པ་ཇི་ལྟར་ཡིན་པ་རྣམས་ཞིབ་ཏུ་བྲིས་ན་ཡི་གེའི་ཁུར་ཆེས་པར་འགྱུར་བས་མ་བཀོད་ལ། བླ་མ་འཇམ་དཔལ་རྒྱ་མཚོ་བ་ནི། ལམ་རིམ་བརྒྱུད་པར་བཞུགས་པས་དེའི་རྣམ་ཐར་ནི་འོག་ཏུ་འཆད་དོ། ། ། །
༈ འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོའི་རྣམ་ཐར།
༈ འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ནི། 1379 དོན་གྲུབ་ཅེས་པ་ས་མོ་ལུག་གི་ལོ་ལ་བསམ་ཡས་སུ་སྐུ་འཁྲུངས། རྩེས་དང་དུ་རབ་ཏུ་བྱུང་སྟེ་གྲལ་འཛིན་མཛད། གསང་ཕུར་གཉལ་རྒོད་རིན་བསམ་དང་། ལྡན་མ་དཀོན་མཆོག་སེང་གེ་ལ་ཕར་ཚད། སྐྱོར་མོ་ལུང་དུ་མཁན་ཆེན་དཀའ་བཞི་པ་ལ་འདུལ་མངོན། དགེ་ལྡན་དུ་རྗེ་རིན་པོ་ཆེ་ཉིད་ལ་དྲང་ངེས་རྣམ་འབྱེད། རྩ་འཇུག་གི་བཤད་པ། བྱང་ཆུབ་ལམ་རིམ་ཆེ་ཆུང། སྔགས་རིམ་ཆེན་མོ། དཔལ་གསང་བ་འདུས་པའི་རྩ་རྒྱུད་འགྲེལ་པ་སྒྲོན་མ་གསལ་བ་དང་བཅས་པ། བཤད་རྒྱུད་ལྔ། མདོར་བྱས། མདོ་བསྲེ། རྣམ་གཞག་རིམ་པ། རྡོ་རྗེ་སེམས་དཔའི་སྒྲུབ་ཐབས། རིམ་ལྔ། སྤྱོད་བསྡུས། རིམ་ལྔ་གསལ་སྒྲོན། རིམ་ལྔ་གདན་རྫོགས། བདེ་དགྱེས་ཀྱིས་ཆོས་སྐོར། ཡོ་གའི་སྐོར་སོགས་རྒྱ་ཆེར་གསན་པས་བཀའ་བསྟན་བཅོས་མང་དུ་མཁྱེན་པའི་མཁྱེན་རབ་ལ་སུས་ཀྱང་འགྲན་དུ་མེད་པར་གྲགས། རྗེ་རིན་པོ་ཆེ་ཉིད་ཀྱིས་མཁན་པོ། འདུལ་པ་འཛིན་པས་ལས་སློབ། རྒྱལ་ཚབ་ཆོས་རྗེས་གསང་སྟོན་མཛད་ནས་བསྙེན་པར་རྫོགས། རྗེ་ཐམས་ཅད་མཁྱེན་པ་ཉིད་ཀྱིས་ཆོས་རྗེ་འདི་པ་དང་། ཆོས་རྒྱལ་ནམ་མཁའ་བཟང་པོ་མཆོད་ཡོན་གཉིས་ལ་ཆོས་སྡེ་འདེབས་དགོས་པའི་བཀའ་སྔ་ཕྱིར་ཕེབས་པ་དང་། ཆོས་རྗེ་པའི་མནལ་ལམ་དུའང་ལྷ་གནམ་ཐེ་དཀར་པོ་ཡིན་ཟེར་བ་ཞིག་གིས་དགོན་པའི་ས་ཡུལ་བསྟན་ཏེ་འདིར་ཁྱོད་ཀྱིས་དགོན་པ་ཞིག་ཐོབ། ངས་བཙུན་པ་སྟོང་ཕྲག་ལྔ་འབུལ་ཟེར། དེ་ཀའི་མོད་ལ་དན་འབག་མདའ་ནས་ཡར་བྱོན་པས་ལོངས་སྤྱོད་ཀྱི་ཆུ་ཡིན་ཟེར་བའི་རྫིང་བུ་མང་པོ་འདུག་པ་གཟིགས་ཤིང་ཁྱད་པར་གླང་ཆེན་རི་གདོང་དུ་རྫིང་བུ་མང་པོའི་འགྲམ་ན་རྗེ་རིན་པོ་ཆེ་བཞུགས་ནས་འདི་རྣམས་ཐོས་བསམ་གྱི་རྫིང་བུ་ཡིན་པས་ཐུངས་གསུང་བ་སོགས་ཀྱི་ལྟས་ཡ་མཚན་ཅན་བྱུང་ཞིང་ཕྱི་ནང་གི་རྟེན་འབྲེལ་འགྲིག་པ་ན། ཉིད་ཀྱི་དགུང་ལོ་སོ་བརྒྱད་པ་ 1416 མེ་ཕོ་སྤྲེའུའི་ལོ་ལ་དཔལ་ལྡན་འབྲས་སྤུངས་ཀྱི་ཆོས་སྡེ་ཆེན་པོ་བཏབ། ཆོས་རྗེ་རང་གདན་སར་བཞུགས་ནས་གྲྭ་ཚང་སོ་སོར་སློབ་དཔོན་བསྐོ་བ་མཛད་ཅིང། གཞིས་ཁ་སྣེའུ་ནས་ལོ་ལོ་བཞིན་སྨོན་ལམ་ཆེན་མོ་དང་གདུགས་དཀར་འཛུགས་པ། དབྱར་ཚུལ་དགུན་ཚུལ་ལྟར་ཆགས་པ། གཟིམ་ཁང་དང་འཆད་ཉན་ཁང་ཚོར་ན་བཟའ་གསོལ་ཆས་ནམ་དགོས་སུ་ཕུལ་བ་ལས་དགོན་པ་མ་བས་བུ་དགའ་བ་འོང་བར་ལུང་བསྟན་པ་ལྟར་གྲྭ་ཚོགས་བཅའ་ཁྲིམས་བཤད་ཉན་སོགས་ཕུན་ཚོགས་མཐའ་དག་གོང་ནས་གོང་དུ་འཕེལ་བར་གྱུར། ཆོས་ནམ་ཚུགས་སུ་མདོ་ཕྱོགས་ཀྱི་པོ་ཏི་བརྒྱད་བརྒྱད་རང་རང་གི་འགྲེལ་པ་བོད་ཊཱི་ཀ་རེ་དང་སྦྱར་ནས་གསུང་བ་གནང་ཞིང་། སྤྱིར་ན་གཞུང་ལུགས་ཀྱི་པོ་ཏི་ཆེན་མོ་བརྒྱ་དང་སུམ་ཅུ་ལ་ཐུགས་བཤད་མཛད། གསང་འདུས་འཕགས་ལུགས། བདེ་མཆོག་ལཱུ་ནག་དྲིལ་གསུམ། དགྱེས་རྡོར། དགྲ་འཇིགས་གཤེད་གསུམ། མི་གཡོ་བ། སྒྲོལ་མ་སོགས་ཡི་དམ་གྱི་ལྷ་མང་པོའི་བསྙེན་པ་རྒྱུན་དུ་མཛད་པ་དང་། ཞག་རེ་ལ་ཨ་ར་པ་ཙ་ན་ཚར་སྟོང་ཕྲག་གཉིས་རེ་དང་། མཚན་བརྗོད་ཚར་གསུམ་རེ། ཐུགས་རྗེ་ཆེན་པོའི་གཟུངས་ཡིག་དྲུག་ཁྲི་ཚོ་རེ་བཟླ་བ་འཆག་མེད་དུ་མཛད་པས་ཕྱིས་དུང་ཕྱུར་གཉིས་ལྷག་པར་ལོངས། མཚན་ཉིད་པ་གཅིག་ལ་མ་ཎི་སོང་བ་ང་མང་ཞེས་གསུང་། དེ་ལྟར་ལྷའི་བསྙེན་སྒྲུབ་ལ་འགྲུས་པར་མཛད་པས་དབུས་ན་རྗེ་བཙུན་འཇམ་དབྱངས། གཡས་ན་མགོན་པོ་ཀླུ་སྒྲུབ། གཡོན་ན་ཞི་བ་འཚོ། མདུན་ན་རྗེ་རིན་པོ་ཆེ་ངོ་ཆེན་གྱི་རྣམ་པ་ཅན་དུ་འཁོད་པ་ཞིག་གི་གཟིགས་སྣང་དངོས་སུ་རྒྱུན་མར་འབྱུང་བ་དང་། མནལ་ལམ་དུ་འཕགས་པ་ཀླུ་སྒྲུབ་གཙོ་འཁོར། ཆོས་རྒྱལ་སྲོང་བཙན་སྒམ་པོ་ཡབ་ཡུམ། རྗེ་རིན་པོ་ཆེ། ཡེ་ཤེས་མགོན་པོ་ཕྱག་དྲུག་པ། ལྕམ་དྲལ། རྒྱལ་ཆེན་བཞི་སོགས་ཀྱིས་རྗེས་སུ་བཟུང་བའི་མཚན་མ་བྱུང་བ་སོགས་བསམ་གྱིས་མི་ཁྱབ་བོ། ། རྗེ་རིན་པོ་ཆེའི་མན་ངག་ལྟར་རིམ་གཉིས་ཀྱི་རྣལ་འབྱོར་མཐར་ཕྱིན་པར་མཛད་པས་བདེ་སྟོང་དབྱེར་མེད་ཀྱི་རྫོགས་རིམ་ཟབ་མོ་ཐུགས་རྒྱུད་ལ་མངའ་བས། རླུང་འོད་ཟེར་ལྔ་པའི་ཁ་དོག་གསལ་བར་གཟིགས་པ་སོགས་སྒྱུ་ལུས་འགྲུབ་པའི་མཚན་མ་ཐོབ་སྟེ། རྒྱུད་དང་གྲུབ་ཆེན་གྱི་གཞུང་ཤེས་པ་ཞིག་གིས་བལྟས་ན་བསམ་གྱིས་མི་ཁྱབ་པའི་རྣམ་ཐར་རོ། ། འཕྲལ་གྱི་མཛད་སྤྱོད་ཀྱང་ཕྱག་ཏུ་བྱུང་བའི་དངོས་པོ་རྣམས་ཆ་གསུམ་དུ་བགོས་ནས་ཆ་གཅིག་གིས་ཕྱག་དཔེ་དང་རྟེན་གསུམ་བཞེང་། ཆ་གཅིག་གིས་ནད་པ་རྣམས་ཀྱི་ཕྱིར་དུ་སྨན་སྦྱིན་མཛད། ཆ་གཅིག་གིས་གཟིམ་ཁང་གི་ཐབ་སྤྱོད་དང་སློབ་མ་སྐྱོང་བར་མཛད་དོ། ། དེ་ནས་དགུང་ལོ་བདུན་ཅུ་པ་ 1448 ས་འབྲུག་གི་དགུན་ཆོས་ཀྱི་མཇུག་ལ། རྩེ་ཁ་བས་གདན་དྲངས་ནས་ཞག་ཤས་བཞུགས། སླར་འབྲས་སྤུངས་སུ་ཕེབས་ནས་བསླབ་བཏུས་ཀྱི་བརྩོན་འགྲུས་ལེའུའི་མཇུག་ཆོས་ཐུན་གཉིས་ཀྱིས་རྫོགས་པར་མཛད་ལ། དེ་ནི་བརྩོན་འགྲུས་མཐར་ཕྱིན་ཞེས་པའི་དོན་ཏེ། སྐུ་ཚེ་དེ་ལ་འབྲས་སྤུངས་སུ་ཆོས་འཁོར་བསྐོར་བའི་ཐ་མར་བྱུང་སྣང། དུས་དེ་ནས་སྐུ་ཅུང་ཟད་བསྙུན་པས་ཕེབས་བཞུགས་དཀའ་བར་ཡོད་ནའང་བསྟན་པ་དང་སེམས་ཅན་ལ་དགོངས་ཏེ་རིམ་པས་གཞིས་ཁར་ལོ་གསར་དང་ལྷ་སར་སྨོན་ལམ་ཆེན་མོའི་གྲལ་དབུར་ཕེབས་ནས་ཇོ་བོ་རྣམ་གཉིས་དང། བཅུ་གཅིག་ཞལ་སོགས་མཇལ་དུས་ད་ལན་མིན་པ་ཨེ་མཇལ་མི་ཤེས་གསུང་། ཐུགས་མདུན་དྲག་པོའི་སྒོ་ནས་སྨོན་ལམ་དཔག་ཏུ་མེད་པ་མཛད། འབྲས་སྤུངས་ལ་ཕེབས་ཞོར་པོ་ཏ་ལར་ཞག་གསུམ་བཞུགས། ནང་སོ་དང་ཡོན་མཆོད་བཞུགས་གདན་ལ་འཁོད་དུས་ཤིག ། ཆོས་རྗེའི་ཞལ་ནས། རྗེ་བཙུན་གྲགས་པའི་མངོན་རྟོགས་ལྗོན་ཤིང་དུ། ། འདི་དག་སྟོན་པའི་བླ་མའི་བཀའ་དྲིན་ནི། ། དྲན་པའི་ཚེ་ན་དད་པས་མཆི་མ་ལྷུང་། ། ཞེས་གསུངས་ཏེ་རྗེ་རྣམ་གཉིས་ཀྱི་ཐུགས་རྒྱུད་ནི་མི་ཤེས། གསུང་རབ་ནི་རིམ་ལྔ་གསལ་སྒྲོན་ཉིད་ཟླ་དང་བྲལ་བས་མཆི་མ་ལྷུང་ན་འདི་ལ་ལྷུང་རྒྱུ་ཡིན་ཏེ་ད་ལེགས་པར་འཆད་པ་དཀོན། བསྟན་པའི་མཇུག་མ་རྣམ་དག་ཅིག་འདུག་སྟེ་འཇུ་མཁན་མི་འདུག ། ད་ངེད་རང་གི་ཁ་སྟབས་ནི་འདི་ལྟར་སོང་། གསུངས་ནས་གསུང་འདར། སྤྱན་ཆབ་མང་པོ་མཛད་པས་ནང་སོ་དཔོན་བློན་ཡང་སྤྱན་ཆབ་མང་པོ་ལྷུང་བར་སྣང་། འབྲས་སྤུངས་སུ་ཕེབས་ནས་ནང་སོ་དཔོན་བློན་དང་གྲྭ་བུ་སློབ་རྣམས་ཀྱིས་ཟླ་བ་སྦྲེལ་ནས་སྐུ་རིམ་རྒྱ་ཆེན་པོ་བསྒྲུབས་ཤིང་ཞབས་པད་བརྟན་དགོས་པའི་ཞུ་བ་ཕུལ་བ་ན་ཉིད་ཀྱི་ཞལ་ནས། མདངས་རྗེ་རིན་པོ་ཆེ་ཕེབས་ནས་ངེད་རང་གཉིས་རྒྱ་ནག་ཏུ་འགྲོ་རི་བོ་རྩེ་ལྔར་སྒྲུབ་པ་བྱེད་གསུང་པས། ད་རྗེ་རིན་པོ་ཆེ་ལ་སྡེ་སྣོད་གསུམ་དང་རྒྱུད་སྡེ་བཞི་གསུང་གིན་བཞུགས་ཞུས་དང་གསུངས་ནས་ཕྱག་ཐལ་མོ་སྦྱར། སྤྱན་ཆབ་མང་པོའང་མཛད་དོ། ། དེ་ནས་ཧོར་ཟླ་གཉིས་པའི་མཇུག་ལ་ནུབ་ཅིག་མནལ་ལམ་དུ་རྗེ་རིན་པོ་ཆེ་ཕེབས་ནས་རྗེ་བཙུན་འཇམ་པའི་དབྱངས་ཀྱི་ཕྱག་དྲིལ་ཡིན་གསུང་བ་ཞིག་གནང་། ད་ཁྱོད་ངོ་གཉིས་སྡོད་གསུང་བ་ཞིག་རྨིས་པ་དྲུང་འཁོར་བ་རྣམས་ལ་གསུང་པས། ཁོང་རྣམས་ཟླ་བ་དང་ལོ་གང་ཡིན་ལ་མ་དན་ཡང་དོན་ལ་ཟླ་བ་ཡིན་སྣང་། དེ་ནས་མྱ་ངན་ལས་འདའ་བའི་ལྟས་བྱུང་བ་ན་གཟིམ་ཆུང་དུ་ཕེབས་ཏེ་ཞབས་གཉིས་སྐྱིལ་ཀྲུང་དང་ཕྱག་གཉིས་མཉམ་གཞག་མཛད་ནས་ཐུགས་དམ་ལ་ཐུགས་གཏད་པས་སྐུ་སྨད་ནས་དྲོད་ཡར་ལ་རིམ་གྱིས་སྡུད་པའི་ཚེ་རྗེ་བཙུན་འཇམ་དབྱངས་ཀྱི་ཞལ་གཟིགས་བྲིས་སྐུ་དེ་སྐུ་མདུན་དུ་སྤྱན་དྲངས། རྗེ་བཙུན་ཕེབས་ཡོད་ལགས་ཞུས་པས་སྤྱན་གྱིས་ནི་མ་གཟིགས། དབུ་དུད་པ་ཞིག་མཛད། ཅུང་ཞིག་ལོན་པ་ན་ད་མི་དགོངས་པར་འདུག་སྙམ་ནས་བྲིས་སྐུ་དེ་སྐུ་རྒྱབ་གཡོན་ཕྱོགས་སུ་གདན་དྲངས་པས་ཇི་ལྟར་སྤྱན་དྲངས་པ་ལྟར་བྲིས་སྐུ་ལ་སྤྱན་གདངས་ཏེ་ཨོག་སྐོ་སྐུ་དཔུང་གཡོན་པའི་སྟེང་དུ་བཞག་ནས་ཞག་འགའ་བཞུགས་པས་ཕལ་ཆེར་གྱིས་སྐུའི་གཟི་མདངས་ལ་དཔགས་ནས་འཁྲུལ་པའང་སྐྱེས། དེ་ནས་ 1449 ས་མོ་སྦྲུལ་ལོ་དེའི་ཟླ་བ་བཞི་པ་ས་ག་ཟླ་བའི་ཚེས་བཅོ་བརྒྱད་ལ་དགའ་ལྡན་ཆོས་ཀྱི་ཕོ་བྲང་མི་ཕམ་རྒྱལ་བའི་མདུན་སར་རྗེ་འཇམ་དཔལ་སྙིང་པོའི་ཞབས་དྲུང་དུ་ཕེབས་སོ། ། ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་རྗེའི་དགོངས་པ་གསལ་བར་མཛད་པའི་བརྩམས་ཆོས་ཀྱང་རྗེ་ཐམས་ཅད་མཁྱེན་པའི་གསང་བའི་རྣམ་ཐར་གསོལ་འདེབས། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཚང་ལ་མ་ནོར་བ་ལས་དང་པོ་པས་ཉམས་སུ་བླང་བདེ་བ། རྗེས་ར་སྒྲེང་དུ་བསླབ་བཏུས་གསུངས་པའི་ཟིན་བྲིས། ཟབ་ལམ་གཏུམ་མོའི་གཞུང་ཁྲིད། ཉིད་ཀྱི་རྒྱུན་གྱི་ཁ་ཏོན་མཛད་རྒྱུར་འཇམ་དབྱངས་ལ་བསྟོད་པ། དུས་འཁོར་རྒྱུད་འགྲེལ་གྱི་བརྡ་ཆད། བདེ་མཆོག་ཉུང་ངུའི་རྒྱུད་ལ་ལེའུ་ང་གཅིག་ཡོད་པའི་ལེའུ་དང་པོའི་རྒྱུད་དོན་མདོར་བསྟན། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྫོགས་རིམ་རིམ་ལྔ་གདན་རྫོགས་ཀྱི་དམར་ཁྲིད། གསང་འདུས་རིམ་ལྔ་གདན་རྫོགས་ཀྱི་དམར་ཁྲིད་ཁྲིད་ཡིག་ལ་མི་གསལ་བ་རྣམས་བརྗེད་བྱང་བྲིས་པ། གསང་འདུས་རིམ་ལྔ་གདན་རྫོགས་ཀྱི་ཁྲིད་ཡིག ། གསང་འདུས་རིམ་ལྔ་གསལ་སྒྲོན་གྱི་སྐབས་སུ་ཉེ་བར་མཁོ་བ་འགའ་ཞིག་བརྗོད་པ་ལ་སོགས་པ་མང་དུ་ཡོད་དོ། ། འཇམ་དབྱངས་ཆོས་རྗེ་ཞིང་གཤེགས་པ་དེའི་ཚེ་ནམ་མཁའ་ཤིན་ཏུ་དྭངས་བ་ལ་འཇའ་དཀར་པོ་དང་། ཁ་དོག་སྣ་ལྔའི་གུར་ལྕགས་སྒྲོག་ལྟར་འབྲེལ་བ། འབྲས་སྤུངས་ནས་དགེ་ལྡན་གྱི་བར་ལ་ཤར་བ་དང་། ལྷའི་མེ་ཏོག་གི་ཆར་མང་དུ་བབས་པ་སོགས་སྐྱེ་བོ་ཀུན་གྱི་མིག་ལམ་དུ་བྱུང་ངོ་། ། སྐུ་གདུང་ནི་བཤད་གྲྭ་ཡུན་རིང་དུ་གནས་པའི་རྟེན་འབྲེལ་དུ་དངུལ་གྱི་མཆོད་རྟེན་ནང་ན་མ་ཉམས་པར་བཞུགས་ཏེ་ཆོས་གྲྭ་ཆེན་པོ་དཔལ་ལྡན་འབྲས་སྤུངས་ཀྱི་གཙུག་ལག་ཁང་ན་བསོད་ནམས་ཀྱི་ཞིང་དུ་བཞུགས་སོ། ། ། །
༈ བྱམས་ཆེན་ཆོས་རྗེ་ཤཱཀྱ་ཡེ་ཤེས་ཀྱི་རྣམ་ཐར།
༈ བྱམས་ཆེན་ཆོས་རྗེ་ཤཱཀྱ་ཡེ་ཤེས་ནི། རྒྱལ་བ་ཞེས་པ་ 1354 ཤིང་ཕོ་རྟའི་ལོ་སྣྲོན་ཟླའི་ཡར་ངོའི་ཚེས་གཅིག་གི་ཉིན་ཚལ་གུང་ཐང་དུ་ཚལ་པར་གྲགས་པའི་དཔོན་རིགས་ཤིག་ཏུ་སྐུ་འཁྲུངས། གཞོན་ནུ་ཉིད་ནས་སྔོན་གྱི་སྐྱེ་གནས་མང་པོ་རྗེས་སུ་དྲན་པ་སོགས་མངོན་པར་རྟོགས་པའི་ཡོན་ཏན་གྱིས་ཕྱུག་ནའང་། བླ་མ་མཁས་པའི་དབང་པོ་དུ་མ་བསྟེན་ནས་རྒྱལ་བའི་གསུང་རབ་མཐའ་དག་ལ་མཁས་པར་སྦྱངས་ཏེ་མཐར་ཕྱིན་པར་མཛད། ཁྱད་པར་དུ་རྗེ་བཙུན་ཙོང་ཁ་པ་ཆེན་པོའི་སྤྱན་སྔར་མདོ་སྔགས་ཀྱི་ཟབ་ཁྲིད་མང་པོ་གསན་ཏེ་མཁས་པའི་དབང་པོར་གྱུར། དེ་དུས་སུ་རྒྱ་ནག་གོང་མ་ཡུང་ལོ་རྒྱལ་པོས་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་སྙན་པ་གསན་ནས་གོང་མའི་རྒྱལ་ཁབ་ཏུ་གདན་འདྲེན་པའི་ཕྱིར་བློན་པོ་ཧའུ་ཞེན་སོགས་ཏཱ་ཞིང་བཞིས་གཙོ་བྱས་གསེར་ཡིག་པ་མི་སྣ་མང་པོ་མངགས་ཏེ་ལུང་དང་གནང་སྦྱིན་འབུལ་བ་གྱ་ནོམ་དང་བཅས་ཁྱེར་ནས་ཙོང་ཁ་པ་ཆེན་པོ་གདན་འདྲེན་ལ་བཏང་ཡང་། རྗེ་རིན་པོ་ཆེ་སེ་ར་ཆོས་སྡིངས་སུ་སྐུ་མཚམས་ཤིན་ཏུ་དམ་པར་མཛད་པའི་སྐབས་སུ་གསེར་ཡིག་པ་རྣམས་སླེབས་བྱུང་བ་ལ། དང་པོར་ཅུང་ཟད་དབེན་པ་འདྲར་མངོན་ཆུང་བར་བཞུགས་ཏེ་གསེར་ཡིག་པ་རྣམས་མཇལ་དུ་མ་གནང་བ་ལ། ཞུ་བ་ནན་གྱིས་ཕུལ་བས་སེ་རར་ཕེབས་ནས་མཇལ་ཁ་གནང་། འབུལ་བ་རྣམས་བཞེས་རྒྱ་ཡུལ་དུ་འབྱོན་པ་དགག་བྱ་ཆེ་ཞིང་དགོས་པ་ཆུང་བའི་རྒྱུ་མཚན་དང་བཅས་པའི་ཞལ་ཏ་ཏཱ་ཞིང་རྣམས་ལ་ཞིབ་རྒྱས་གནང་ནས་རྗེ་རིན་པོ་ཆེ་སྤྱན་མ་འདྲོངས་པར་རྗེ་ཉིད་ཀྱི་སྐུ་ཚབ་ཏུ་ལས་འབྲེལ་གྱི་དབང་གིས་སྤྲུལ་པའི་སྐུ་བྱམས་ཆེན་ཆོས་རྗེ་མངགས་པ་གདན་དྲངས་ཏེ་བླ་མ་གྲྭ་སློབ་ཏཱ་ཞིང་མི་བཞི་མི་སྣ་མང་པོ་དང་བཅས་ལྷོ་ཁ་ཁམས་ཕྱོགས་ལི་ཐང་བརྒྱུད་ནས་རིམ་གྱིས་རྒྱ་ནག་གོང་མའི་ཕོ་བྲང་དུ་ཕེབས་ཏེ་ཡུང་ལོ་རྒྱལ་པོ་མཇལ། གོང་མ་ཆེན་པོས་ཀྱང་སྲིད་ཞུ་བསྙེན་བཀུར་ཕུན་སུམ་ཚོགས་པ་མཛད། དེ་ནས་གོང་མ་རྒྱལ་པོས་བྱམས་ཆེན་ཆོས་རྗེ་ལ་རྒྱལ་ཁབ་འདིར་རྒྱལ་བ་ཙོང་ཁ་པའི་བསྟན་པའི་སྙིང་པོ་རྣམས་དར་བ་ཞིག་བྱ་འདོད་པས་མདོ་སྔགས་ཀྱི་ཆོས་སྤྱི་དང་ཁྱད་པར་རྒྱུད་སྡེ་བཞིའི་དཀྱིལ་འཁོར་ཆེན་པོ་རྣམས་བསྒྲུབ་ཅིང་མཆོད་པ་བྱེད་དགོས་པའི་བཀའ་ལུང་གནང་། དེ་ནས་བྱམས་ཆེན་ཆོས་རྗེས་ལོ་གསར་ནས་དཔྱིད་ཟླ་འབྲིང་པོའི་ཚེས་འགོར་ཆོག་གྲྭ་གསང་འདུས་དགྱེས་རྡོར་བདེ་མཆོག་འཁོར་ཆེན་འཇིགས་བྱེད་ཞེ་དགུ་མ་སྨན་བླ་རྣམས་ཀྱི་སྒྲུབ་མཆོད་ཀྱི་སྟ་གོན་བཙུགས་ཏེ་ཚེས་དགུ་ནས་བཟུང་ཟླ་བ་གསུམ་གྱི་བར་དུ་སྒྲུབ་མཆོད་མཛད་དོ། ། གྲུབ་པའི་རྟགས་ནམ་མཁའ་ལ་ལྷའི་རོལ་མོའི་སྒྲ་དང་། ཁ་དོག་སྣ་ལྔའི་འཇའ་འོད་འཁྱིལ་ཞིང་དབྱིབས་རྒྱལ་མཚན་ལྟ་བུ་དང་། རྡོ་རྗེ་འཁོར་ལོ་པདྨ་སྣ་ཚོགས་རྡོ་རྗེ་ལྟ་བུར་ཤར་བ་རྣམས་སྐྱ་སེར་ཀུན་གྱིས་མངོན་སུམ་དུ་མཐོང་། སྤྲིན་མེད་པའི་ནམ་མཁའ་ལས་ལྷས་མེ་ཏོག་གི་ཆར་འབེབས་པ་སོགས་ལྟས་ཁྱད་པར་ཅན་མང་དུ་བྱུང་ཞིང་། རྒྱལ་པོའི་རྨི་ལམ་དུ་ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཧེ་ཡིན་ཟིའི་ནམ་མཁར་བཀྲ་ལམ་གྱིས་བཞུགས་པ་ཡང་ཡང་རྨིས་པ་ཡང་བྱུང་གསུངས། ཆོས་རྗེ་རང་ཉིད་ཀྱིས་ཀྱང་དཀྱིལ་འཁོར་ལྷ་ཚོགས་རྣམས་ཀྱི་ཞལ་ཡང་ཡང་གཟིགས། དེ་ནས་གོང་མ་ཆེན་པོ་ཐུགས་དད་ཚད་མེད་པ་སྐྱེས་ཏེ་གསེར་གྱི་འཁོར་ལོ་ཡོད་པའི་ཐམ་ཀ་འབུལ་བ་ཚད་མེད་པ་དང་བཅས་གནང་སྟེ་བསྔགས་བརྗོད་གཟེངས་བསྟོད་མཛད། དེ་ནས་རྒྱལ་པོའི་དགུང་ལོ་ཁྲི་ཚོ་ཁྲི་ཚོར་སྤེལ་བའི་ཕྱིར་དུ་གྲུབ་པའི་རྒྱལ་མོའི་ལུགས་ཀྱི་ཚེ་དབང་རྗེས་གནང་། གྲུབ་ཆེན་ཏེ་ལོ་པའི་ལུགས་ཀྱི་བདེ་མཆོག་འཆི་བ་མཐར་བྱེད་ཀྱི་དབང་བསྐུར་ཏེ་སྤྱི་བོར་བུམ་པ་བཞག་པས་བདུད་རྩིས་བུམ་པ་གང་སྟེ་འཕྱུར་བར་ཀུན་གྱིས་མཐོང་བ་བྱུང་ཞིང་ཚེ་རིལ་སོགས་ལ་འོད་འཚེར་བ་ལ་སོགས་པའི་གྲུབ་རྟགས་ཡང་མང་པོ་བསྟན། རྒྱལ་པོ་ཤིན་ཏུ་ཡ་མཚན་ཏེ་གུས་པ་ཆེར་མཛད། རིན་པོ་ཆེ་གསེར་དངུལ་གྱི་ཕྲས་བརྒྱན་པའི་བཞུགས་ཁྲི། ཡི་ཅི་མདུན་ལྕོག ། ཞབས་སྟེགས་བཞུགས་སྟན་སོགས་འབུལ་བ་ཚད་མེད་པ་གནང་། གནང་ཡང་རྒྱ་ཧོར་གྱི་ཡུལ་གྲུ་དེ་རྣམས་སུ་རབ་བྱུང་བསྙེན་རྫོགས། ཁྱིམ་པ་རྣམས་ལ་བསྙེན་གནས་དང་དགེ་བསྙེན་གྱི་སྡོམ་པ་སྦྱིན་པ་དང་། རང་རང་གི་བློ་དང་འཚམ་པའི་ཆོས་བསྟན་ནས་རྗེ་རིན་པོ་ཆེའི་བསྟན་པས་ཕྱོགས་དེ་ཁྱབ་པར་མཛད། དེ་ནས་ཕྱོགས་ནས་ཆེད་དུ་འོངས་ཏེ་མཇལ་ཕྲད་བྱེད་པའི་བླ་དཔོན་སྐྱེ་བོ་སེར་སྐྱ་ཆེ་ཕྲ་ཐམས་ཅད་ཀྱིས་འབུལ་བ་ཞབས་ཏོག་ཕུན་སུམ་ཚོགས་པ་བསྒྲུབས་ཤིང་དེ་དག་སོ་སོའི་སྐལ་བ་དང་འཚམ་པར་རབ་བྱུང་བསྙེན་རྫོགས། དབང་ལུང་རྗེས་གནང་ཁྲིད་མན་ངག་བསྙེན་གནས་སྨྱུང་གནས་ཀྱི་སྡོམ་པ་སོགས་རང་རང་གི་འདོད་མོས་ལྟར་ཚིམ་པར་སྩལ་ཏེ་སྨིན་ཅིང་གྲོལ་བར་མཛད། དེ་ནས་གོང་མ་རྒྱལ་པོ་ལ་རྒྱལ་བ་ཙོང་ཁ་པ་ཞལ་མཇལ་བ་དང་། མཆོད་ཅིང་བསྙེན་བཀུར་བ་དང་། ཆོས་ཟབ་མོ་མང་པོའི་བཀའ་དྲིན་ཞུ་བ་སོགས་ཀྱི་ཆེད་དུ་དབུས་གཙང་དུ་ཕྱིན་ཆོག་པ་དགོས་ཞེས་དགོངས་པ་ཞུ་པར་མཛད་པས། གོང་མ་ཆེན་པོས་ཀྱང་དགོངས་པ་ཁྲོལ་ཏེ། གོང་ནས་གསེར་ཡིག་པ་སྐྱེལ་བའི་མི་སྣ་དང་བཅས་ཕེབས་ཏེ་ཤན་ཟེའི་ལམ་ཆེན་བརྒྱུད་ནས་རིམ་པས་ལི་ཐང་བྱམས་ཆེན་ཆོས་འཁོར་སོགས་ནས་བོད་ཡུལ་དབུས་ཀྱི་སེ་རར་ཕྱགས་ཕེབས་ཏེ་རྗེ་རིན་པོ་ཆེ་དང་མཇལ། རྒྱལ་པོས་གནང་བའི་གནས་བཅུའི་ཐགས་སྐུ། ལྗོན་ཤིང་གི་གུར། གསེར་དངུལ་གྱི་མཎྜལ་ལ་རིན་པོ་ཆེའི་ཚོམ་བུ་དང་བཅས་པ། གོས་དར་སྣ་ཚོགས་གཏོས་ཆེ་བ་ཕུལ་ནས་ཞབས་བརྟན་གསོལ་འདེབས་ཀྱང་མཛད། ཇོ་བོ་ཤཱཀྱ་མུ་ནེར་གསེར་འབུལ། མགུལ་རྒྱན་མཆོད་ཆའི་རིགས། རི་བོ་དགའ་ལྡན་གྱིས་གཙོས་དགེ་འདུན་རྣམས་ལ་འགྱེད་མང་ཇ་སོགས་གནང། མི་སྣ་ལྡོག་དུས་རྒྱལ་པོ་ལ་ལེགས་གསོལ་ཞུ་འབུལ་བྱས། མི་སྣ་རྫོང་བ་མཛད། དེ་ནས་སྔ་མོ་ནས་རྗེ་རིན་པོ་ཆེ་སེ་རར་བཞུགས་དུས། རྩ་ཤེ། དྲང་ངེས་རྣམ་འབྱེད། བཞི་བརྒྱ་པ། བྱང་ཆུབ་ལམ་རིམ། གསང་སྔགས་ལམ་རིམ་གྱི་ཁྲིད། རྩ་ལྟུང་བཅུ་བཞི་པ་དང་བླ་མ་ལྔ་བཅུ་པའི་རྣམ་བཤད་གཉིས་ལ་སོགས་པའི་ཆོས་མང་པོ་གསན་ནའང་། སླར་ཡང་དཔལ་གསང་བ་འདུས་པའི་འགྲེལ་པ་སྒྲོན་གསལ་མཆན་བུ་དང་བཅས་པ། བཤད་རྒྱུད་འགའ་ཞིག་གི་ལུང་། རིམ་ལྔའི་ཁྲིད། སྦྱོར་བ་ཡན་ལག་དྲུག་པའི་ཁྲིད་རྒྱས་པ། དུས་འཁོར་གྱི་འགྲེལ་ཆེན་དྲི་མེད་འོད་ཀྱི་བཤད་པ་ཆེས་ཞིབ་པ། ནཱ་རོ་ཆོས་དྲུག ། དབུ་མ་འཇུག་པ། ཚད་མ་རྣམ་འགྲེལ། བདེ་མཆོག་རྩ་བའི་རྒྱུད་ལ་སོགས་པའི་ཆོས་ཟབ་ཅིང་རྒྱ་ཆེ་བ་དཔག་ཏུ་མེད་པ་གསན། དེ་ནས་ལོ་རེ་བཞིན་གོང་མ་ཆེན་པོར་མཚམས་ཞུ་དང་ཆོས་ཀྱི་གདམས་པ་གོང་ནས་གོང་འཕེལ་དུ་མཛད། གོང་མ་ཆེན་པོས་ཀྱང་ལོ་རེ་བཞིན་གསེར་ཡིག་འབུལ་ནོད་གྱ་ནོམ་པ་དང་བཅས་སྩལ། དེ་ནས་རྗེ་རིན་པོ་ཆེ་ཞིང་གཤེགས་པ་ལ་ཉེ་བའི་ཚེ། ལྟོད་ལུང་གི་ཆབ་ཆེན་དང་། དེ་ནས་འབྲས་སྤུངས་སུ་བྱོན། དེ་ནས་ལྷ་སར་བྱོན་པའི་ཚེ་བྱམས་ཆེན་ཆོས་རྗེ་འདི་པས་རྗེ་རིན་པོ་ཆེ་སེ་རར་གདན་འདྲེན་བྱེད་པའི་གྲབས་ཀྱང་སྒྲིགས་ཏེ་སྤྱན་དྲངས་ནས་སེ་ར་ཆོས་སྡིངས་སུ་བཞུགས། བསྙེན་བཀུར་ཚད་མེད་པས་མཆོད། དེའི་ཚེ་རྗེ་རིན་པོ་ཆེས་བྱམས་ཆེན་ཆོས་རྗེ་འདི་པ་ལ་སེ་རར་དགེ་འདུན་གྱི་སྡེ་བཙུགས་ནས་བཤད་སྒྲུབ་རྐང་ཚུགས་པ་ཞིག་བྱེད་དགོས་པའི་བསླབ་སྟོན་ཞལ་ཏ་རྒྱས་པར་གནང་ཞིང་། ཁྱད་པར་གངས་རིའི་ཁྲོད་འདིར་སྔགས་ཀྱི་རྒྱུད་སྡེ་ལ་འཆད་ཉན་རྣམ་པར་དག་པ་ནུབ་པར་གྱུར་ནས་རིང་ཞིག་ལོན། རྗེ་རིན་པོ་ཆེ་ཉིད་ཀྱིས་བཤད་པ་རྣམ་པར་དག་པར་མཛད་པའི་གསུང་གི་བདུད་རྩི་ཉམས་སུ་མྱོང་བའི་བློ་གྲོས་ཀྱི་ལུས་ཡོངས་སུ་ཚིམ་པ་མང་དུ་བྱོན་མོད་ཀྱི། དེ་ལྟ་ན་ཡང་ད་དུང་རྒྱུད་སྡེའི་འཆད་ཉན་རྐང་ཚུགས་པའི་གྲྭ་ས་གཞི་ཐིངས་པ་སྔོན་ཆད་མེད་པས། དེ་འདྲ་བའི་འཆད་ཉན་གྱི་གཞི་རྣམ་པར་དག་པ་ཚུགས་ན་ཅི་མ་རུང་སྙམ་དུ་བསྟན་པ་འབའ་ཞིག་ལ་དགོངས་པའི་ཐུགས་ཀྱི་འདུན་པ་ཤུགས་དྲག་པོས་དེའི་ཚེ་བྱམས་ཆེན་ཆོས་རྗེ་འདི་པ་ལ་བདེ་གསང་གཉིས་ཀྱི་འཆད་ཉན་རྐང་ཚུགས་པའི་སྔགས་གྲྭ་ཞིག་འཛུགས་པའི་ཞལ་ཏ་གནང་སྟེ། བྱམས་ཆེན་ཆོས་རྗེ་འདི་པས་ཀྱང་རྗེ་རིན་པོ་ཆེའི་བཀའ་བཞིན་དུ་སྒྲུབ་པའི་ཐུགས་ཁུར་རྒྱ་ཆེར་བཞེས་ནས། སེ་ར་ཆོས་སྡིངས་སུ་གཞི་འདུལ་བའི་བསླབ་ཁྲིམས་རྣམ་པར་དག་པ་ལ་བརྟེན་ཏེ་དཔལ་གསང་བ་འདུས་པ་དང་། བདེ་མཆོག་གི་རྩ་རྒྱུད་ལ་འཆད་ཉན་རྐང་ཚུགས་པའི་གྲྭ་ས་རྣམ་པར་དག་པ་འཛུགས་པའི་ཞལ་བཀོད་དང་། ཆོས་དཔོན་བསྐོ་བ་ལ་སོགས་པ་མཛད་ཅིང་རྟེན་འབྲེལ་ཁྱད་པར་ཅན་སྒྲིག་པའི་ཆེད་དུ་གནས་དེར་གསོ་སྦྱོང་མཛད། རྒྱུད་ཀྱི་རྒྱལ་པོ་གཉིས་ཀྱི་དབུ་ནས་ཆོས་ཐུན་རེ་གསུངས་པ་ལ་སོགས་པ་རྟེན་འབྲེལ་བསྒྲིག་པར་མཛད་པ་ལ་བརྟེན་ཏེ་སེ་ར་ཐེག་ཆེན་གླིང་བཏབ། དེ་ནས་རིང་པོར་མ་ལོན་པར་རྗེ་རིན་པོ་ཆེ་གཞན་དོན་དུ་གཤེགས་པའི་གདུང་མཇལ་མགུལ་རྒྱན་མཆོད་མེ་སོགས་གདུང་མཆོད་རྒྱ་ཆེན་པོ་མཛད། སེ་ར་ཆོས་སྡིངས་སུ་བྱམས་ཆེན་ཆོས་རྗེ་རང་ཉིད་ཀྱིས་གཙོས་དགེ་འདུན་མང་པོ་དང་བཅས་གསང་བདེ་འཇིགས་གསུམ་གྱི་དཀྱིལ་འཁོར་ཆེན་པོ་དག་ཞལ་ཕྱེ་ནས། བླ་མ་རྡོ་རྗེ་འཆང་དང་ཐ་མི་དད་པ་ལ་ཕྱི་ནང་གསང་བའི་མཆོད་པ་རྒྱ་ཆེན་པོས་མཉེས་པར་བྱས་ཤིང་། བདག་ཉིད་འཇུག་ཅིང་དབང་བླང་བ་ལ་སོགས་པས་དམ་ཚིག་དང་སྡོམ་པ་རྣམ་པར་དག་པར་བགྱིས་ཏེ། ཐུགས་ཀྱི་དགོངས་པ་ཡོངས་སུ་རྫོགས་པ་དང་། བླ་མ་མཆོག་གི་ཡེ་ཤེས་ཀྱིས་གཟིགས་པ་ནམ་དུ་ཡང་འབྲལ་བ་མེད་པའི་སྨོན་ལམ་རྒྱ་ཆེན་པོ་བཏབ་པས་ངོ་མཚར་བའི་ལྟས་མང་དུ་བྱུང་སྟེ། ནམ་མཁར་འཇའ་ཡང་ཡང་ཤར་བ་དང་མེ་ཏོག་གི་ཆར་ཡང་ཡང་བབས། བྱི་ལོ་ཟླ་བ་བཅུ་བར་དགེ་ལྡན་དུ་རྡོ་རྗེ་འཛིན་པ་བརྒྱ་ཕྲག་དུ་མས་དཀྱིལ་འཁོར་དཔག་ཏུ་མེད་པ་བསྒྲུབ་ཅིང་མཆོད་པའི་དུས་ཀྱི་མཆོད་པ་བསྒྲུབས་པ་དེའི་ཚེ་དཔོན་ནམ་མཁའ་བཟང་པོ་ཁུ་དབོན་པའི་དྲུང་ནས། ར་ཁ་བྲག་ཏུ་ཆོས་རྗེ་བྱམས་ཆེན་པ་འདིས་གཙོ་བོ་མཛད་པའི་དགེ་བའི་བཤེས་གཉེན་དུ་མ་སྤྱན་དྲངས་ནས་དུས་ཀྱི་མཆོད་པ་རྒྱ་ཆེན་པོར་མཛད་དེ་གསོལ་བ་བཏབ་པས་མེ་ཏོག་གི་ཆར་བབས་པ་ནི། མེ་ཏོག་མུ་ཏིག་གི་མདོག་ལྟ་བུ་ཆུང་ངུ་ས་ལ་ཁ་བ་ལྟར་ཆགས་པ་དང་གཞན་ཡང་འདབ་མ་དྲུག་པ་ལ་སོགས་པ་ཁ་ཅིག་གི་མདོག་ནི་དུང་དང་། ཁ་ཅིག་ནི་གསེར་བཙོ་མ། ཁ་ཅིག་ནི་ལི་ཁྲི་ལྟ་བུ། ཁ་ཅིག་ནི་རྒྱ་མཐིང་བཟང་པོས་བྱུགས་པ་ལྟ་བུ་མིའི་ལག་པའི་ཁྱོན་ཙམ་དཔག་ཏུ་མེད་པ་བབས་སོ། ། བྱམས་ཆེན་ཆོས་རྗེ་འདིས་རྗེ་རིན་པོ་ཆེའི་དགོངས་རྫོགས་སུ་མཆོད་འབུལ་མཛད་པ་ལ་དེ་ལྟ་བུའི་རྟགས་ངོ་མཚར་ཅན་འབྱུང་བ་ནི་བྱམས་ཆེན་ཆོས་རྗེ་འདི་ཉིད་རྗེ་རིན་པོ་ཆེའི་ཐུགས་རྗེའི་བྱིན་རླབས་ཞུགས་པའི་སྐྱེས་བུ་དམ་པ་གཞན་དང་མི་འདྲ་བ་ཞིག་ཡིན་པའི་རྟགས་ཏེ་རྣམ་པར་ཐར་པ་ངོ་མཚར་བ་ཡིན་ནོ། ། དེ་ནས་སླར་ཡང་གོང་མ་ཆེན་པོ་ཡུང་ལོ་རྒྱལ་པོས་གདན་དྲངས་ཏེ་རྒྱ་ནག་ཏུ་ཕེབས། རྒྱལ་པོ་ཆོས་དང་ཟང་ཟིང་གིས་མཉེས་པར་བྱས། རྒྱ་ནག་གི་ཡུལ་དུ་རྫུ་འཕྲུལ་གྱི་བཀོད་པ་མང་དུ་བསྟན་ཅིང་། རྗེ་རིན་པོ་ཆེའི་རིང་ལུགས་དྲི་མ་མེད་པ་ཕྱོགས་ཀུན་ཏུ་རྒྱ་ཆེར་སྤེལ། རྗེ་རིན་པོ་ཆེའི་ཐུགས་བསྐྱེད་དང་བྱམས་ཆེན་ཆོས་རྗེ་ཉིད་ཀྱི་སྔོན་གྱི་སྨོན་ལམ་གྱི་དབང་གིས་རྒྱ་ནག་ཐེ་ཛུང་ཡུང་ལོ་རྒྱལ་པོ་ནས་ཟོན་ཏེ་རྒྱལ་པོའི་བར་རྒྱལ་རབས་བཞིས་མཆོད་པའི་དཔལ་ཡོན་བླ་ན་མེད་པ་མཛད་དེ། དགུང་ལོ་བརྒྱད་ཅུ་གྱ་གཉིས་བཞེས་པ་ 1435 ཤིང་མོ་ཡོས་ལོ་ཟླ་བ་བཅུ་པའི་ཚེས་བཅོ་བརྒྱད་ཀྱི་ཉིན་བུ་ཆེན་ཀཱོ་ཤྲི་ཨ་མོ་གྷ་དང་བསོད་ནམས་ཤེས་རབ་རྣམ་པ་གཉིས་ལ་ཞལ་བཀོད་གནང་སྟེ། ཕྱི་ནང་གི་དོ་དམ་མཛད་ནས་སྐུ་མཚམས་ལ་བཞུགས་ཏེ་ཐུགས་དམ་མཛད། ཉི་ཤུ་བཞི་ལ་མཛོ་མོ་མཁར་དུ་ཞིང་གཤེགས་སོ། ། དེ་ནས་ཡོངས་ཀྱི་དགེ་བའི་བཤེས་གཉེན་མང་པོས་དགོངས་པ་ཡོངས་སུ་རྫོགས་པའི་ཕྱིར་དགེ་རྩ་རྒྱ་ཆེན་པོ་བསྒྲུབས་ཤིང་གདུང་མཆོད་རྒྱ་ཆེན་པོ་ཉིན་ཞག་བཞི་བཅུ་ཞེ་དགུའི་བར་དུ་བསྒྲུབས། དེའི་ཚེ་ནམ་མཁའ་ལ་འཇའ་འོད་འཁྲིགས་ཤིང་། ལྷས་མེ་ཏོག་གི་ཆར་ཕབ་པ་སོགས་ངོ་མཚར་བའི་ལྟས་མང་དུ་བྱུང་ངོ་། ། ཁྲ་སའི་ཞེས་བྱ་བའི་ས་ཆད་དེར་ཀཱོ་ཤྲི་དཔལ་ལྡན་པས་གཙོས་དགེ་བའི་བཤེས་གཉེན་མང་པོའི་ཚོགས་དང་བློན་ཆེན་མི་ཆེན་དམག་དཔོན་མི་དཔོན་སོགས་སྐྱ་སེར་མང་པོ་འདུས་ནས་སྐུ་གདུང་ཞུགས་འབུལ་མཛད་པ་ལ་ཀཱོ་ཤྲི་དཔལ་ལྡན་པས་མེ་སྦོར་བའི་སྟངས་ཀ་ཙམ་བྱས་པ་ལ་མེ་རང་འབར་དུ་སོང་ཞིང་། འཇའ་ཚོན་སྣ་ལྔའི་གདུགས་དང་རྒྱལ་མཚན་བ་དན་བཀྲ་ཤིས་རྟགས་བརྒྱད་ཀྱི་དབྱིབས་ལྟ་བུའི་ལྟས་བཟང་ཁྱད་པར་ཅན་ནམ་མཁའི་ཁམས་གང་བར་བྱུང་བ་ཀུན་གྱིས་མཐོང་ཞིང་ངོ་མཚར་བའི་གནས་སུ་གྱུར་ཏོ། ། རྗེ་རིན་པོ་ཆེའི་ཐུགས་སྲས་བསྟན་འཛིན་དམ་པ་སྔར་སྨོས་པ་དེ་དག་ཐམས་ཅད་ཚུལ་ཁྲིམས་རྣམ་པར་དག་པ་བྱང་ཆུབ་ལམ་གྱི་རིམ་པ་ལ་ཉམས་ལེན་སྙིང་པོར་མཛད་པ་ས་ལམ་གོང་ནས་གོང་དུ་བགྲོད་བཞིན་པ་དང་འགའ་ཞིག་ལམ་གྱི་བགྲོད་པ་མཐར་ཕྱིན་ཏེ་སྤྲུལ་པས་འགྲོ་དོན་མཛད་པ། དམ་ཉམས་དང་འཆལ་པ་དང་འདྲེ་ཅན་གྱིས་མ་བསླད་པ་རྣམ་ཐར་གཙང་བ། ལུང་དང་རྟོགས་པའི་ཡོན་ཏན་གྱིས་མངོན་པར་མཐོ་བ། བསྟན་པ་ལ་བྱ་བ་མཛད་པ་ཤ་སྟག་བཞུགས་ཏེ། འདིར་མཐའ་དག་བྲི་མ་ནུས་ལ། མཁས་གྲུབ་སྨྲ་བའི་ཉི་མ་དགེ་ལེགས་དཔལ་བཟང་དང་། བ་སོ་ཆོས་ཀྱི་རྒྱལ་མཚན་དང་། རྗེ་བཙུན་ཤེས་རབ་སེང་གེ་དང་། ཐམས་ཅད་མཁྱེན་པ་དགེ་འདུན་གྲུབ་པ་རྣམས་ནི་ལམ་རིམ་བླ་བརྒྱུད་དུ་བཞུགས་པས་དེ་དག་གི་རྣམ་ཐར་རྣམས་ནི་སོ་སོའི་བརྒྱུད་རིམ་དུ་འཆད་དོ། ། དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པའི་གདུལ་བྱ་རྣམས་ཀྱིས་རྒྱལ་བ་སྲས་བཅས་ཀུན་གྱི་མཁྱེན་བརྩེ་ནུས་གསུམ་གཅིག་ཏུ་བསྡུས་པའི་ངོ་བོ་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ལ་གསོལ་བ་འདེབས་པ་ལྷུར་བྱ་ཞིང་། རྗེ་བདག་ཉིད་ཆེན་པོའི་རྣམ་ཐར་ལྟར་གང་ཉམས་སུ་བླང་བར་བྱ་བའི་གནས་རྣམས་ལ་ཤིང་རྟ་ཆེན་པོའི་གཞུང་ནས་འབྱུང་བའི་དྲི་མ་མེད་པའི་རིགས་པས་ངེས་པ་རྙེད་པར་བྱ་བ་དང་། ཇི་ལྟར་ངེས་པའི་དོན་ལ་དབེན་པའི་གནས་སུ་ཚེ་འདིའི་འཁྲི་བ་བཅད་དེ་སྒྲུབ་པ་སྙིང་པོར་བྱ་བ་དང་། བསྟན་པའི་རྩ་བ་སོ་སོར་ཐར་པའི་བཅས་མཚམས་རྣམས་མིག་གི་འབྲས་བུ་ལྟར་བསྲུང་བ་གཞིར་བྱས་ནས་རྒྱལ་བའི་བཀའ་དང་ཤིང་རྟ་ཆེན་པོའི་གཞུང་རྣམས་གདམས་པའི་མཆོག་ཏུ་འཁྱེར་བར་བྱ་བ་དང་། ལམ་གྱི་ཡན་ལག་ཕྲ་མོ་རེ་ལ་ཞེན་པ་མིན་པར་ལམ་གྱི་ལུས་ཡོངས་སུ་རྫོགས་པ་ལ་སློབ་པ་དང་། མདོ་སྔགས་གཉིས་ཚ་གྲང་ལྟར་འགལ་བར་སོང་བ་མིན་པར་གཅིག་གྲོགས་སུ་གཅིག་འགྲོ་བར་བྱས་ལ་བཤེས་གཉེན་བསྟེན་ཚུལ་ནས་བཟུང་མཐར་ཐུག་གི་འབྲས་བུ་མི་སློབ་པའི་ཟུང་འཇུག་གི་བར་ས་ལམ་འབྲས་བུ་དང་བཅས་པ་ཡོངས་སུ་རྫོགས་པ་རང་གི་རྒྱུད་ལ་སྦྱར་ཏེ་ཉིན་རེ་བཞིན་བག་ཆགས་ཅི་ཐེབས་བྱ་བ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ། ། ། །
༈ ཞེས་གོང་དུ་གསལ་བ་རྣམས་ཡོངས་འཛིན་ཡེ་ཤེས་རྒྱལ་མཚན་གྱི་གསུང་ལམ་རིམ་བླ་མ་བརྒྱུད་པའི་རྣམ་ཐར་གཞིར་གཞག། ཕྱི་ནང་གི་དོན་གཉེར་ཅན་རྣམས་ཀྱི་ཐུགས་དགོངས་ལྟར་གཟིགས་བདེའི་ཆེད་བོད་ཀྱི་རབ་ལོ་རྣམས་ཕྱི་ལོར་བསྒྱུར་བ་དང་། སྡེ་ཚན་གཟིགས་བདེའི་མཚོན་དབྱེའི་དཀར་ཆག་གསར་འགོད་ཞུས་པ་བཅས་ལགས་སོ། ། ། །
