ཀུན་བཟང་བླ་མའི་ཞལ་ལུང་ནང་གི་ཀོང་པོ་འབེན་གྱི་གཏམ་རྒྱུད་དེས་ང་ཚོ་ལ་བློ་སྐྱེད་ཅིག་སྟེར་སྲིད། ཡུལ་ཀོང་པོ་ན་ཀོང་པོ་འབེན་བྱ་བ་གླེན་པ་ཞིག་ཡོད།
ཐེངས་གཅིག་ཁོ་རང་དབུས་སུ་ཇོ་བོ་མཇལ་དུ་ཕྱིན། ཇོ་བོའི་མདུན་ན་ལྷ་གཉེར་སོགས་གཞན་སུ་ཡང་མེད་སྐབས་ཤིག་ལ་དྲུང་དུ་སོང་ནས། མཆོད་པའི་ཞལ་ཟས་དང་མར་མེ་རྣམས་མཐོང་བས་ཞལ་ཟས་ཀྱི་ཟན་འདི་རྣམས་མར་མེའི་མར་ཁུ་ལ་སྤགས་ནས་ཇོ་བོ་རིན་པོ་ཆེས་གསོལ་བ་ཡིན་ས་རེད། མར་ཁུ་རྣམས་མི་བཀག་པའི་ཆེད་དུ་མེ་སྦར་བ་ཡིན་ས་རེད། ངོ་བོ་ཁོང་གིས་ཇི་ལྟར་གསོལ་བ་ལྟར་བདག་གིས་ཀྱང་དེ་བཞིན་ཟ་དགོས་སྙམ་པས། ཞལ་ཟས་ཀྱི་རྩམ་པ་མར་མེའི་མར་ཁུ་ལ་བསྒྲེས་ནས་ཟོས། ཇོ་བོའི་ཞལ་ལ་བལྟས་ཏེ། ལྷ་བཤོས་ཁྱི་ཡིས་ཁྱེར་ཀྱང་འཛུམ་དམུལ་དམུལ། མར་མེ་རླུང་གིས་ཁྱེར་ཀྱང་འཛུམ་དམུལ་དམུལ་བྱེད་པ་བླ་མ་བཟང་། ངའི་ལྷམ་འདི་ཁྱེད་ལ་བཅོལ་བ་ཡིན་པས་ཉར་ཚགས་གྱིས་དང༌། ངས་ཁྱོད་ལ་སྐོར་བ་ཞིག་བྱ་འོང་ཞེས་བཤད། ལྷམ་ཕུད་དེ་ཇོ་བོའི་པང་དུ་བཞག་ནས་སྐོར་བར་སོང་། ཤུལ་ནས་ལྷ་གཉེར་འོང་ནས་ལྷམ་ཕྱིར་འདོར་བ་བརྩམས་ཚེ། ཇོ་བོ་རིན་པོ་ཆེས་གསུང་འབྱོན་ཏེ། དེ་ཀོང་པོ་འབེན་གྱིས་ང་ལ་བཅོལ་བ་ཡིན་པས་མ་འདོར་གསུངས།
སླར་ཁོ་ལོག་ཅིང་ལྷམ་བླངས་ཏེ་བླ་མ་བཟང་པོ་ཟེར་བ་ཁྱེད་རེད་འདུག སང་ཕོད་ངེད་ཚོའི་ཡུལ་དུ་ཤོག་དང་། ངས་ཕག་རྒན་བཤས་ནས་ཤ་བཙོ། ནམ་རྒན་བཙོས་ནས་ཆང་བསྙལ་ཏེ་བསྒུག་འདུག་ཅེས་སྨྲས་པས་ཇོ་བོས་ཀྱང་འོང་ངོ་གསུངས། དེ་ནས་ཁོ་རང་ཁྱིམ་དུ་ཐོན་རྗེས་ཆུང་མ་ལ། ངས་ཇོ་བོ་རིན་པོ་ཆེ་མགྲོན་དུ་བོས་ཡོད། ནམ་འབྱོན་ཆ་མི་འཚལ་བས་རྒྱུན་ལྡན་སྒོར་འབུད་པ་མང་ཙམ་གྱིས་ཞེས་བཤད། དེར་སང་ཕོད་ཙམ་ན་ཉིན་ཞིག་ཆུང་མ་ཆུ་ལེན་དུ་སོང་བས་ཆུ་ནང་དུ་ཇོ་བོའི་སྐུའི་གཟུགས་བརྙན་མངོན་པར་སྣང་། མོ་རང་འཕྲལ་མར་ཁྱིམ་ལ་བརྒྱུགས་ནས་ཆུ་ནང་ཕ་ཀི་ན་ཅིག་འདུག དེ་ཁྱོད་ཀྱིས་བོས་པའི་མགྲོན་པོ་དེ་མ་རེད་དམ་ཞེས་དྲིས་པས། ཁོ་རང་དེ་འཕྲལ་སོང་བས་ཆུ་ནང་གི་དེ་ཇོ་བོ་ཡིན་པར་ཤེས་ནས། ཇོ་བོ་ཆུ་ནང་དུ་ལྷུང་ངོ་སྙམ་སྟེ་ཆུའི་ནང་དུ་མཆོངས་ནས་ཇོ་བོའི་སྐུ་ལ་འཇུས་པས། ཇོ་བོ་དངོས་སུ་ཆུ་ཁར་འཐེན་རྒྱུ་ལོན་པ་རེད། ཀོང་པོ་འབེན་གྱི་བཅོས་མ་མ་ཡིན་པའི་སེམས་ནང་ན། ཇོ་བོ་རིན་པོ་ཆེ་ནི་ང་ཚོས་མཐོང་བའི་འབག་སྐུ་དེ་དང་མི་འདྲ་བར་སངས་རྒྱུས་དངོས་དེ་ཡིན་པ་རེད། སངས་རྒྱས་བྱ་བ་ཡང་མཐའ་གཅིག་ཏུ་སྤྱི་ལེ་སྟོང་ཕྲག་དུ་མའི་ཡར་ངོགས་ན་ཡོད་པའི་གནའ་བོའི་རྒྱ་གར་བ་ཞིག་ཀྱང་མ་ཡིན་པར། ཕན་ཚུན་ཁ་གཏད་དུ་འདུག་ནས་ཁ་བརྡ་བྱེད་ཆོག་སའི་བླ་མ་ཞིག་ཡིན་པ་རེད། བླ་མ་ཡིན་ན་ནམ་མཁའ་ནས་ཕར་འཕུར་ཚུར་འཕུར་བྱེད་མི་ཞིག་ཡིན་མི་དགོས་ལ། ཟ་མ་ཟ་མི་དགོས་པའི་དྲི་ཟའི་རིགས་དེ་འདྲ་ཞིག་ཀྱང་ཡིན་མི་དགོས། བླ་མ་ཡིན་ཡང་སྒོ་ཕྱིར་ཕེབས་ན་དྲག་ཆར་དང་འཕྲད་སྲིད་ལ། སེམས་ཆུང་མ་བྱས་ན་ཆུ་ནང་དུའང་ལྷུང་སྲིད། ཀོང་པོ་འབེན་ཇོ་བོ་ལ་དད་པ་དང་དག་སྣང་ཡོད་པ་ལས། ཁོ་ལྟ་བུའི་གུས་སྲོལ་དང་འབྲེལ་འདྲིས་མི་ཤེས་པ་དག་གིས། ཇོ་བོ་རང་མགྲོན་དུ་འབོད་མི་སྲིད། ཁོ་ཇོ་བོ་ལ་དད་པ་དང་དག་སྣང་དེ་འདྲ་ཞིག་ཡོད་པའི་རྒྱུ་མཚན་ཡང་། བླ་མ་མིང་དུ་གྲགས་པ་དང་མངོན་ཤེས་དང་ལྡན་པ་སོགས་ཅིའང་མིན། ཡིན་ངེས་པ་གཅིག་ནི་འབེན་གྱི་སྣང་ངོ་ལ་ལྷ་བཤོས་ཁྱི་ཡིས་ཁུར་ཀྱང་འཛུམ་དམུལ་དམུལ། མར་མེ་རླུང་གིས་ཁྱེར་ཀྱང་འཛུམ་དམུལ་དམུལ་བྱེད་པ་དེ་ཡིན་ནོ།།
ཡོང་ཁུངས། ནང་ཆོས་རིག་པའི་འཕྲིན་སྟེགས།
