རྩོམ་པ་པོ་ཚེ་རིང་དབྱངས་སྐྱིད་ནི་ ༡༩༦༣ ལོར་ཡར་ཀླུང་གཙང་པོའི་གཞུང་གི་གྲུ་ཁ་ཞིག་ཏུ་བཟོ་པ་དཀྱུས་མ་ཞིག་གི་ཁྱིམ་དུ་སྐྱེས། ཕྱི་ལོ་ ༡༩༨༧ ལོར་བོད་ལྗོངས་སློབ་ཆེན་ཐོན་པ་ནས་ད་བར་སློབ་གསོ་སློབ་ཁྲིད་ཀྱི་ཕྱག་ལས་ཕྲག་ཏུ་བཞེས་པ་དང་། ལས་བྲེལ་ཆེ་བའི་སློབ་ཞོར་དུ་བརྩམས་སྒྲུང་གིས་གཙོས་རྩོམ་འབྲིའི་བྱ་བའི་རྒྱུན་བསྐྱངས། ༢༠༠༧ ལོར་བརྩམས་སྒྲུང་ཕྱོགས་བསྒྲིགས་རི་རྩེའི་སྤྲིན་དཀར་ཞེས་པ་པར་སྐྲུན་བྱས་ཏེ་ཀློག་པ་པོའི་ཁྲོད་ཚུར་སྣང་ལན་ཆ་ཆེ་ཙམ་བྱུང་། མ་ཟད་བརྩམས་ཆོས་དེར་རྒྱལ་ཡོངས་གྲངས་ཉུང་མི་རིགས་ཀྱི་སྐབས་དགུ་པའི་རྟ་མཆོག་བུམ་པའི་བྱ་དགའ་ཐོབ། ༢༠༡༤ ལོའི་ཟླ་བ་ ༧ པར་ལྷུག་རྩོམ་ཕྱོགས་བསྒྲིགས་མི་ཚེའི་འགྲུལ་བཞུད་པར་དུ་བསྐྲུན་པ་དང་དེར་ཀློག་པ་པོའི་དགའ་བསུ་ཆེན་པོ་ཐོབ།
ལོ་མང་འབད་བརྩོན་བྱས་པ་བརྒྱུད་ ༢༠༡༦ ལོའི་ཟླ་བ་ ༥ པར་སྒྲུང་རིང་མེ་ཏོག་དང་རྨི་ལམ་ཞེས་པ་པར་སྐྲུན་བྱས་རྗེས་མདོ་དབུས་ཁམས་གསུམ་གྱི་ཀློག་པ་པོའི་ཁྲོད་དུ་ཚུར་སྣང་ལན་ཆ་ཆེ་ཙམ་བྱུང་བ་དང་བསྔགས་བརྗོད་ཀྱི་མེ་ཏོག་དང་སྦྲགས་སྐད་འཕྲིན་དང་། ཚགས་པར། དུས་དེབ་སོགས་ཀྱི་སྟེང་དཔྱད་གཏམ་སྤེལ་ནས་གྲོས་བསྡུར་འཁྲུག་པོ་བྱས། དེ་བཞིན་རྩོམ་ཡིག་ཁག་གཅིག་ལ་སྐབས་གསུམ་པའི་སྦྲང་ཆར་རྩོམ་རིག་བྱ་དགའ་དང་། སྐབས་གཉིས་པའི་གངས་རྒྱན་བུམ་པའི་བྱ་དགའ་ཐོབ་མྱོང་། ད་ལྟ་ཁོང་ནི་ཀྲུང་གོའི་རྩོམ་པ་པོ་མཐུན་ཚོགས་ཀྱི་ཚོགས་མི་ཡིན།
