ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ཞེས་བྱ་བ་བཞུགས་སོ༔ ༔
པདྨ་བཀའ་ཐང་ལེའུ་ ༡ ནུབ་བདེ་བ་ཆེན་པོའི་ཞིང་ཁམས་བསྟན་པ།
པདྨ་བཀའ་ཐང་ལེའུ་ ༢ སངས་རྒྱས་འོད་དཔག་མེད་ཀྱིས་སྤྲུལ་པ་བཀྱེ་བ།
པདྨ་བཀའ་ཐང་ལེའུ་ ༣ ཞིང་ཁམས་བསམ་གྱིས་མི་ཁྱབ་པར་འགྲོ་དོན་མཛད་པ།
པདྨ་བཀའ་ཐང་ལེའུ་ ༤ རྣམ་པར་སྣང་བྱེད་ཀྱི་བུ་ལྔ་ལ་དབང་བསྐུར་བ།
པདྨ་བཀའ་ཐང་ལེའུ་ ༥ རཱུ་ཏྲའི་སྐྱེ་རྒྱུད་བསྟན་པ།
པདྨ་བཀའ་ཐང་ལེའུ་ ༦ རྟ་ཕག་གིས་རཱུ་ཏྲ་བཏུལ་བ།
པདྨ་བཀའ་ཐང་ལེའུ་ ༧ སངས་རྒྱས་སྟོང་རྩ་གཉིས་ལ་དབང་བསྐུར་ལུང་བསྟན་པ།
པདྨ་བཀའ་ཐང་ལེའུ་ ༨ བསྟན་པ་གཉིས་ལྡན་བྱུང་ཚུལ་བསྟན་པ།
པདྨ་བཀའ་ཐང་ལེའུ་ ༩ གཙུག་ཕུད་རིས་བཟང་གི་སྲས་སུ་འཁྲུངས་པ།
པདྨ་བཀའ་ཐང་ལེའུ་ ༡༠ སྤྲིན་ལྡན་རྒྱལ་ཁམས་བསྟན་པ་གཉིས་ལྡན་གྱིས་བཏུལ།
པདྨ་བཀའ་ཐང་ལེའུ་ ༡༡ རྒྱ་གར་ཆོས་ཁུངས་བཙུན་པར་བསྟན་པ།
པདྨ་བཀའ་ཐང་ལེའུ་ ༡༢ ཨུ་རྒྱན་ཡུལ་གྱི་ཡུལ་རབས་བཤད་པ།
པདྨ་བཀའ་ཐང་ལེའུ་ ༡༣ རྒྱལ་པོ་སྤྱན་མེད་ཀྱིས་དཀོར་མཛོད་སྦྱིན་པ།
པདྨ་བཀའ་ཐང་ལེའུ་ ༡༤ གཟིགས་སྟངས་དྲི་མེད་མདངས་ལྡན།
པདྨ་བཀའ་ཐང་ལེའུ་ ༡༥ རྒྱལ་པོ་ཨིནྡྲ་བོ་དྷིའི་རྣམ་ཐར།
པདྨ་བཀའ་ཐང་ལེའུ་ ༡༦ རྒྱལ་པོ་ཨིནྡྲ་བོ་དྷིས་ཡིད་བཞིན་གྱི་ནོར་བུ་ལོན།
པདྨ་བཀའ་ཐང་ལེའུ་ ༡༧ ཨིནྡྲ་བོ་དྷི་མཇལ་ཞིང་རྟེན་འབྲེལ་བརྟགས་པ།
པདྨ་བཀའ་ཐང་ལེའུ་ ༡༨ རྒྱལ་པོ་ཨིནྡྲ་བོ་དྷིས་ནོར་བུ་ལ་གསོལ་བ་བཏབ་པ།
པདྨ་བཀའ་ཐང་ལེའུ་ ༡༩ མེ་ཏོག་ཨུ་དུམྺཱ་ར་གེ་སར།
པདྨ་བཀའ་ཐང་ལེའུ་ ༢༠ ཨུ་རྒྱན་ཡུལ་དུ་རྒྱལ་སྲིད་བཟུང་བ།
པདྨ་བཀའ་ཐང་ལེའུ་ ༢༡ རྒྱལ་སྲིད་སྤངས་པ།
པདྨ་བཀའ་ཐང་ལེའུ་ ༢༢ དུར་ཁྲོད་བསིལ་བའི་ཚལ་དུ་བཞུགས་པ།
པདྨ་བཀའ་ཐང་ལེའུ་ ༢༣ རྩིས་ལ་སྦྱངས་པ།
པདྨ་བཀའ་ཐང་ལེའུ་ ༢༤ སྨན་ལ་སྦྱངས་པ།
པདྨ་བཀའ་ཐང་ལེའུ་ ༢༥ རིག་པའི་གནས་ལྔ་ལ་མཁས་པར་སྦྱངས་པ།
པདྨ་བཀའ་ཐང་ལེའུ་ ༢༦ སྐུ་རབ་ཏུ་བྱུང་བ།
པདྨ་བཀའ་ཐང་ལེའུ་ ༢༧ རྒྱུ་མཚན་ཉིད་ཀྱི་ཐེག་པ་ལ་སྦྱངས་པ།
པདྨ་བཀའ་ཐང་ལེའུ་ ༢༨ བསྟན་པ་ལ་ཕན་པའི་ཕྱིར་ཀུན་དགའ་བོ་ལ་མདོ་དྲིས་པ།
པདྨ་བཀའ་ཐང་ལེའུ་ ༢༩ དུར་ཁྲོད་སྐུ་ལ་རྫོགས་སུ་བཞུགས་པ།
པདྨ་བཀའ་ཐང་ལེའུ་ ༣༠ དུར་ཁྲོད་བདེ་ཆེན་བརྡལ་དུ་བཞུགས་པ།
པདྨ་བཀའ་ཐང་ལེའུ་ ༣༡ དུར་ཁྲོད་ལྷུན་གྲུབ་བརྩེགས་སུ་བཞུགས་པ།
པདྨ་བཀའ་ཐང་ལེའུ་ ༣༢ དུར་ཁྲོད་ལངྐ་བརྩེགས་སུ་བཞུགས་པ།
པདྨ་བཀའ་ཐང་ལེའུ་ ༣༣ དུར་ཁྲོད་པདྨ་བརྩེགས་པར་བཞུགས་པ།
པདྨ་བཀའ་ཐང་ལེའུ་ ༣༤ དུར་ཁྲོད་ཆེན་པོ་གསང་ཆེན་རོལ་པར་བཞུགས་པ།
པདྨ་བཀའ་ཐང་ལེའུ་ ༣༥ སྤྱན་རས་གཟིགས་ཀྱིས་ལུང་བསྟན་ནས་རྒྱ་ནག་ཡུལ་དུ་བཞུགས་པ།
པདྨ་བཀའ་ཐང་ལེའུ་ ༣༦ སངས་རྒྱས་བསྟན་པ་སྲུང་ཐབས་མཛད་པ།
པདྨ་བཀའ་ཐང་ལེའུ་ ༣༧ གདུལ་བྱའི་ཞིང་ཁམས་གཟིགས་པ།
པདྨ་བཀའ་ཐང་ལེའུ་ ༣༨ ལྷ་ལྕམ་མནྡཱ་ར་བས་བྲམ་ཟེའི་སྐུ་ཤ་རྙེད་པ།
པདྨ་བཀའ་ཐང་ལེའུ་ ༣༩ ལྷ་ལྕམ་མནྡཱ་ར་བས་ཁྱིམ་སྤངས་ནས་ཆོས་མཛད་པ།
པདྨ་བཀའ་ཐང་ལེའུ་ ༤༠ ལྷ་ལྕམ་མནྡཱ་ར་བ་དང་མཇལ་འཕྲད་མཛད་པ།
པདྨ་བཀའ་ཐང་ལེའུ་ ༤༡ ཟ་ཧོར་རྒྱལ་པོས་གསོན་བསྲེགས་མཛད་པའི་ལེའུ།
པདྨ་བཀའ་ཐང་ལེའུ་ ༤༢ ཟ་ཧོར་ཡུལ་དུ་མཐའ་དམག་བཟློག་པ།
པདྨ་བཀའ་ཐང་ལེའུ་ ༤༣ ཟ་ཧོར་རྒྱལ་ཁམས་ཆོས་ལ་བཀོད་པ།
པདྨ་བཀའ་ཐང་ལེའུ་ ༤༤ ཚེ་ཡི་རིག་འཛིན་གྲུབ་པ།
པདྨ་བཀའ་ཐང་ལེའུ་ ༤༥ རྒྱལ་པོ་ཨ་ཤྭ་ཀ་ཆོས་ལ་བཙུད་པ།
པདྨ་བཀའ་ཐང་ལེའུ་ ༤༦ བཻདྡྷའི་ཡུལ་དང་སིངྒ་ལའི་ཡུལ་ཆོས་ལ་བཀོད་པ།
པདྨ་བཀའ་ཐང་ལེའུ་ ༤༧ བྷངྒ་ལའི་རྒྱལ་ས་ཕྲོགས་པ།
པདྨ་བཀའ་ཐང་ལེའུ་ ༤༨ ཨུ་རྒྱན་ཡུལ་ཁམས་འདུལ་བར་དགོངས་པ།
པདྨ་བཀའ་ཐང་ལེའུ་ ༤༩ ཨུ་རྒྱན་རྒྱལ་ཁམས་ཆོས་ལ་བཙུད་པ།
པདྨ་བཀའ་ཐང་ལེའུ་ ༥༠ རྒྱ་གར་རྔ་ཐུབ་ཅན་དང་ཁ་ཆེ་རྣམས་ཆོས་ལ་བཙུད་པ།
པདྨ་བཀའ་ཐང་ལེའུ་ ༥༡ ཟངས་གླིང་དང་གསེར་གླིང་གི་མུ་སྟེགས་པ་བཏུལ་བ།
པདྨ་བཀའ་ཐང་ལེའུ་ ༥༢ རྒྱལ་པོ་ཀླུའི་ཁྱབ་འཇུག་བཏུལ་བ།
པདྨ་བཀའ་ཐང་ལེའུ་ ༥༣ གཏེར་གྱི་བགྲོ་བ་གཏེར་ཆོས་གཏེར་སྟོན་གླེངས་པ།
པདྨ་བཀའ་ཐང་ལེའུ་ ༥༤ ཁྲི་སྲོང་ལྡེའུ་བཙན་གྱི་རྒྱལ་སྲིད་བཟུང་བ།
པདྨ་བཀའ་ཐང་ལེའུ་ ༥༥ བོད་རྒྱལ་ཐུགས་དགོངས་བཏང་ཞིང་བློན་འབངས་ལ་གདམ་ངག་བསྐུར་བ།
པདྨ་བཀའ་ཐང་ལེའུ་ ༥༦ བསམ་ཡས་གཙུག་ལག་ཁང་གི་ས་བཙལ་བ།
པདྨ་བཀའ་ཐང་ལེའུ་ ༥༧ མཁན་པོ་བོ་དྷི་ས་ཏྭ་གདན་དྲངས་པ།
པདྨ་བཀའ་ཐང་ལེའུ་ ༥༨ མཁན་པོ་བོ་དྷི་ས་ཏྭས་ལུང་བསྟན་པ།
པདྨ་བཀའ་ཐང་ལེའུ་ ༥༩ རྒྱལ་པོའི་བསྐྱར་ཤོག་པ་དང་མཇལ་བ།
པདྨ་བཀའ་ཐང་ལེའུ་ ༦༠ བོད་ཀྱི་ལྷ་འདྲེ་གདུག་པ་ཅན་རྣམས་བཏུལ་བ།
པདྨ་བཀའ་ཐང་ལེའུ་ ༦༡ བོད་ཀྱི་རྒྱལ་པོ་དང་ཕྱག་ལ་མ་འཆམས་པ།
པདྨ་བཀའ་ཐང་ལེའུ་ ༦༢ དཔལ་གྱི་བསམ་ཡས་འབྱོངས་པ།
པདྨ་བཀའ་ཐང་ལེའུ་ ༦༣ བསམ་ཡས་ཀྱི་དཀོར་སྲུང་སྤྱན་དྲངས་པ།
པདྨ་བཀའ་ཐང་ལེའུ་ ༦༤ བསམ་ཡས་རབ་གནས་མཛད་པ།
པདྨ་བཀའ་ཐང་ལེའུ་ ༦༥ བསམ་ཡས་ལ་བཀུར་སྟི་བྱས་པ།
པདྨ་བཀའ་ཐང་ལེའུ་ ༦༦ སློབ་དཔོན་རྣམ་གཉིས་བཞུགས་པར་ཞུས་པ།
པདྨ་བཀའ་ཐང་ལེའུ་ ༦༧ བོད་ཀྱི་རྒྱལ་པོས་ཆོས་ཁྲིམས་བསྡམས་པ།
པདྨ་བཀའ་ཐང་ལེའུ་ ༦༨ ལོ་ཙཱ་བ་གསུམ་ལུང་བསྟན་ནས་རྒྱལ་པོའི་ཐུགས་གསོས་པ།
པདྨ་བཀའ་ཐང་ལེའུ་ ༦༩ བཻ་རོ་ཙ་ན་གདན་དྲངས་པ།
པདྨ་བཀའ་ཐང་ལེའུ་ ༧༠ སློབ་དཔོན་རྣམ་གཉིས་སོགས་ཀྱིས་ཆོས་བསྒྱུར་བ།
པདྨ་བཀའ་ཐང་ལེའུ་ ༧༡ སད་མི་མི་བདུན་ལ་སོགས་རྒྱ་གར་དུ་བརྫངས་པ།
པདྨ་བཀའ་ཐང་ལེའུ་ ༧༢ བོད་ཀྱི་བཻ་རོ་ཙ་ན་མཇལ་ཕྲད་མཛད་པ།
པདྨ་བཀའ་ཐང་ལེའུ་ ༧༣ བཻ་རོ་ཙ་ནས་རྐང་མགྱོགས་བསྒྲུབས་པ།
པདྨ་བཀའ་ཐང་ལེའུ་ ༧༤ བཻ་རོ་ཙ་ན་བོད་དུ་འབྱོན་པར་ཆས་པ།
པདྨ་བཀའ་ཐང་ལེའུ་ ༧༥ བཻ་རོ་ཙ་ནས་ཆོས་གསུངས་པ་ལ་ཕྲ་མ་བྱུང་བ།
པདྨ་བཀའ་ཐང་ལེའུ་ ༧༦ བཻ་རོ་ཙ་ནས་མགུར་གསུངས་པ།
པདྨ་བཀའ་ཐང་ལེའུ་ ༧༧ བཻ་རོ་ཙ་ན་རྒྱལ་མོ་ཚ་བའི་རོང་དུ་སྤྱུགས་པ།
པདྨ་བཀའ་ཐང་ལེའུ་ ༧༨ དགེ་སློང་མི་ལྔ་དངོས་གྲུབ་བརྙེས་པ།
པདྨ་བཀའ་ཐང་ལེའུ་ ༧༩ ནམ་མཁའི་སྙིང་པོ་ལྷོ་བྲག་མཁར་ཆུར་སྤྱུགས་པ།
པདྨ་བཀའ་ཐང་ལེའུ་ ༨༠ པཎ་ཆེན་བི་མ་མི་ཏྲ་གདན་དྲངས་པ།
པདྨ་བཀའ་ཐང་ལེའུ་ ༨༡ པཎ་ཆེན་བི་མ་མི་ཏྲས་རྫུ་འཕྲུལ་བསྟན་པ།
པདྨ་བཀའ་ཐང་ལེའུ་ ༨༢ རྒྱ་གར་ནས་པཎྜི་ཏ་བརྒྱ་རྩ་བརྒྱད་གདན་དྲངས་ནས་བོན་བསྣུབས་པ།
པདྨ་བཀའ་ཐང་ལེའུ་ ༨༣ གཡུ་སྒྲ་སྙིང་པོས་བཻ་རོ་ཙ་ན་གདན་དྲངས་པ།
པདྨ་བཀའ་ཐང་ལེའུ་ ༨༤ སྒྲ་བསྒྱུར་གླིང་དུ་སྒྲ་བསྒྱུར་བ།
པདྨ་བཀའ་ཐང་ལེའུ་ ༨༥ བོད་དུ་གསུང་རབ་དམ་ཆོས་དག་ཐེར་བཏོན་པ།
པདྨ་བཀའ་ཐང་ལེའུ་ ༨༦ བསམ་ཡས་སྐུ་རྟེན་ལྷའི་བཞུགས་བྱང་དཀར་ཆག་ཏུ་བཀོད་པ།
པདྨ་བཀའ་ཐང་ལེའུ་ ༨༧ ཕྱི་མཚན་ཉིད་ཐེག་པའི་བཀའ་དང་བསྟན་བཅོས་འགྱུར་བྱང་།
པདྨ་བཀའ་ཐང་ལེའུ་ ༨༨ གསང་སྔགས་ཕྱི་ནང་གི་འགྱུར་བྱང་བསྡུས་པ།
པདྨ་བཀའ་ཐང་ལེའུ་ ༨༩ འདུས་བྱས་མི་རྟག་པར་བསྟན་པ།
པདྨ་བཀའ་ཐང་ལེའུ་ ༩༠ ལྷ་ལྕམ་པདྨ་གསལ་ལུང་བསྟན་པ།
པདྨ་བཀའ་ཐང་ལེའུ་ ༩༡ བོད་དུ་གཏེར་སྦས་པ།
པདྨ་བཀའ་ཐང་ལེའུ་ ༩༢ ས་རྟགས་གཏེར་གྱི་འབྱུང་དུས་བསྟན་པ།
པདྨ་བཀའ་ཐང་ལེའུ་ ༩༣ གཏེར་འཕྲད་རྣམས་ལ་ཞལ་གདམས་སྙིང་གཏམ་བཞག་པ།
པདྨ་བཀའ་ཐང་ལེའུ་ ༩༤ གཏེར་སྟོན་བརྟག་པ།
པདྨ་བཀའ་ཐང་ལེའུ་ ༩༥ མ་འོངས་སྒྲུབ་གནས་བསྟན་པ།
པདྨ་བཀའ་ཐང་ལེའུ་ ༩༦ སངས་རྒྱས་བསྟན་པའི་འཕེལ་འགྲིབ་བསྟན་པ།
པདྨ་བཀའ་ཐང་ལེའུ་ ༩༧ ལྷོ་ནུབ་སྲིན་པོའི་ཡུལ་དུ་འབྱོན་པར་དགོངས་པ།
པདྨ་བཀའ་ཐང་ལེའུ་ ༩༨ རྒྱལ་སྲས་མུ་ཏིག་བཙན་པོར་ཞལ་ཆེམས་གསུངས་པ།
པདྨ་བཀའ་ཐང་ལེའུ་ ༩༩ མཁའ་འགྲོས་བརྡ་བསྟོད་མཛད་པ།
པདྨ་བཀའ་ཐང་ལེའུ་ ༡༠༠ སྐུ་ཚབ་ལ་གསོལ་བ་བཏབ་པའི་ཕན་ཡོན་བསྟན་པ།
པདྨ་བཀའ་ཐང་ལེའུ་ ༡༠༡ རྗེས་འཇུག་བདེ་སྟོང་ལ་སྤྱོད་པ།
པདྨ་བཀའ་ཐང་ལེའུ་ ༡༠༢ སྐྱེ་བདུན་ཤའི་ཕན་ཡོན་བསྟན་པ།
པདྨ་བཀའ་ཐང་ལེའུ་ ༡༠༣ སྐལ་ལྡན་བུད་མེད་གསུམ་ལ་ཞལ་གདམས་གསུངས་པ།
པདྨ་བཀའ་ཐང་ལེའུ་ ༡༠༤ སྲོག་བདག་གཟའ་ཀླུ་གསུམ་གྱི་མཚང་དྲིས་པ།
པདྨ་བཀའ་ཐང་ལེའུ་ ༡༠༥ མང་ཡུལ་གུང་ཐང་ལ་ཀར་སྔ་འགྲོས་བཏང་བ།
པདྨ་བཀའ་ཐང་ལེའུ་ ༡༠༦། འཁོར་བའི་ཉེས་དམིགས་སོགས་གསུངས་པ།
པདྨ་བཀའ་ཐང་ལེའུ་ ༡༠༧ བད་ཡུལ་ནས་ལྷོ་ནུབ་སྲིན་པོ་འདུལ་དུ་བཞུད་པ།
པདྨ་བཀའ་ཐང་ལེའུ་ ༡༠༨ མོས་གུས་བརྗེད་བྱང་དཀར་ཤོག་ལ་བཏབ་པ།
པདྨ་བཀའ་ཐང་ལེའུ་ ༡ ནུབ་བདེ་བ་ཆེན་པོའི་ཞིང་ཁམས་བསྟན་པ།
ཨུ་རྒྱན་སྐད་དུ༔ རུ་ཨཀྵ་ཤ་ཀ་ར་ཎ༔ བོད་སྐད་དུ༔ གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་ཞེས་བྱ་བ༔ བདེན་པ་རང་བྱུང་སངས་རྒྱས་སྐུ་ལྔ་འཆང་༔ སྣ་ཚོགས་ཐབས་ཀྱིས་སེམས་ཅན་བདེ་ལ་བཀོད༔གདུལ་བྱའི་བསམ་པ་ཡོངས་སུ་རྫོགས་མཛད་པའི༔ སྐྱེ་ཤི་མི་མངའ་རྡོ་རྗེའི་སྐུ་ལ་འདུད༔ལྷ་ལྕམ་མནྡཱ་ར་བ་དང་༔ བལ་འབངས་ཀ་ལ་སིདྡྷི་དང་༔ བལ་མོ་ཤཱཀྱ་དེ་བ་དང་༔མོན་མོ་བཀྲ་ཤིས་ཁྱེ་འདྲེན་དང་༔ བུད་མེད་ཡེ་ཤེས་མཚོ་རྒྱལ་དང་༔ གུ་རུའི་ཐུགས་སུ་བྱོན་པའི་བུད་མེད་ལྔས༔ མི་འདུལ་ལས་ཅན་ཁ་ལོ་རྣམ་བསྒྱུར་དང་༔ དཀོན་མཆོག་གསུམ་ནི་གནས་པར་བྱ་བ་དང་༔བསྟན་གཉིས་ཡ་མ་ཟུང་གིས་སེལ་མེད་ཕྱིར༔ མདོ་སྔགས་ཐབས་དང་ཤེས་རབ་སྙིང་པོའི་བཀའ༔ ཉེ་བར་གྱུར་པ་གསང་སྔགས་བསྒྲུབ་པའི་ལུང་༔ བདེན་པའི་བཀའ་འཆད་ངེས་པའི་དོན་གོ་ཕྱིར༔ཨུ་རྒྱན་གུ་རུ་པདྨ་འབྱུང་གནས་ཀྱི༔ སྐུ་གསུང་ཐུགས་ཡོན་ཕྲིན་ལས་མཐའ་རྒྱས་པ༔ རྣམ་ཐར་སྟོང་ཕྲག་བཅུ་དང་བརྒྱ་ཕྲག་དགུ༔ མ་འོངས་དམ་ལྡན་དོན་དུ་བཀོད་ནས་སྦས༔དེ་ཐོན་མི་ལ་བསོད་ནམས་སྙན་གྲགས་འོང་༔ གུ་རུའི་རྣམ་ཐར་རྒྱས་བསྡུས་གང་འཐད་པར༔མཐོང་ཐོས་མོས་གུས་ཚད་མེད་བྱ་བ་གཅེས༔ འདི་ལ་དད་མོས་བསྟན་པའི་མཐའ་རྒྱས་འཛིན༔ བླ་མེད་བྱང་ཆུབ་སངས་རྒྱས་ཐེ་ཚོམ་མེད༔ དུས་གསུམ་མཁྱེན་པའི་སློབ་དཔོན་པདྨ་འབྱུང་༔ཕྱི་རྒྱུད་དག་པས་སྤྲུལ་སྐུའི་བསྟན་པ་འཛིན༔ ནང་རྒྱུད་དག་པས་ལོངས་སྐུའི་བསྟན་པ་སྐྱོང་༔ གསང་རྒྱུད་དག་པས་བསྐྱེད་རྫོགས་ངང་ལ་བཞུགས༔ འགྲན་གྱིས་དོ་མེད་སངས་རྒྱས་འདི་ཡིན་པས༔ དུས་གསུམ་འཇིག་རྟེན་ཁམས་འདིར་མཚུངས་མེད་རྗེ༔ རྒྱལ་བའི་བཀའ་ལས་རྩོད་མེད་སྤྲུལ་སྐུར་གྲགས༔ སྐྱོན་སྤངས་ཡོན་ཏན་ཡིད་བཞིན་ནོར་བུ་འདྲ༔ འགྲོ་ཀུན་མ་ལུས་དགོས་པའི་དོན་ཀུན་འགྲུབ༔མཛད་ཚུལ་རྣམ་གྲངས་བསམ་གྱིས་མི་ཁྱབ་ཀྱང་༔ འདི་རུ་སྤྲོས་ཏེ་མ་འོངས་སེམས་ལ་གླན༔
དེ་ལ་ནུབ་ཕྱོགས་པདྨོ་བཀོད་པའི་ཞིང་ཁམས་ཞེས་བྱ་བ༔ གསེར་གྱི་ས་གཞི་མིག་མངས་རིས་སུ་ཆགས་པ་ལས༔ ས་གཞི་རི་རབ་མིང་ཡང་མི་གྲག་བཙལ་ཀྱང་མི་རྙེད་པ༔བྱང་ཆུབ་ཤིང་གི་ལོ་འདབ་མེ་ཏོག་རྒྱས་པ་ལས༔ རྩི་ཤིང་ནགས་ཚལ་མིང་ཡང་མི་གྲག་བཙལ་ཀྱང་མི་རྙེད་པ༔ ཏིང་འཛིན་ཡན་ལག་བརྒྱད་ལྡན་ཆུ་བོ་འབབ་པ་ལས༔ སྣ་ཚོགས་ཆུ་ཡི་མིང་ཡང་མི་གྲག་བཙལ་ཀྱང་མི་རྙེད་པ༔ རིག་པའི་ཡེ་ཤེས་འོད་ལྔ་རང་མེ་འབར་བ་ལས༔ འཇིག་རྟེན་མེ་ཡི་མིང་ཡང་མི་གྲག་བཙལ་ཀྱང་མི་རྙེད་པ༔ རྣམ་པར་དག་པ་སྤོས་ཀྱི་དྲི་ངད་ལྡང་བ་ལས༔ འཇིག་རྟེན་ང་གི་མིང་ཡང་མི་གྲག་བཙལ་ཀྱང་མི་རྙེད་པ༔ ཁྱབ་གདལ་ཆོས་ཀྱི་དབྱིངས་ལ་ཕྱོགས་ལྷུང་མེད་པ་ལས༔ འབྱུང་བ་ནམ་མཁའི་མིང་ཡང་མི་གྲག་བཙལ་ཀྱང་མི་རྙེད་པ༔ དབྱིངས་རིག་ཡེ་ཤེས་གསལ་བའི་ཁྲི་གདུགས་བརྡལ་བ་ལས༔ ཉི་མ་ཟླ་བའི་མིང་ཡང་མི་གྲག་བཙལ་ཀྱང་མི་རྙེད་པ༔ རྒྱལ་བ་འཕགས་པའི་རང་འོད་ལྔ་རུ་འབར་བ་ལས༔ ཉིན་དང་མཚན་གྱི་མིང་ཡང་མི་གྲག་བཙལ་ཀྱང་མི་རྙེད་པ༔ མཆོག་ལྡན་ཆོས་ཀྱི་རྒྱལ་སྲིད་རང་ཤར་རང་གྲོལ་སྐྱོང་བ་ལས༔ རྒྱལ་པོ་བློན་པོའི་མིང་ཡང་མི་གྲག་བཙལ་ཀྱང་མི་རྙེད་པ༔ བདག་དང་གཞན་གཉིས་ཐ་མི་དད་པར་གཅིག་པ་ལས༔ འཐབ་ཅིང་རྩོད་པའི་མིང་ཡང་མི་གྲག་བཙལ་ཀྱང་མི་རྙེད་པ༔ འཚོ་བ་ཏིང་འཛིན་ཟས་ཀྱི་འཚོ་བས་ཚིམ་པ་ལས༔ཟས་ཞེས་བྱ་བའི་མིང་ཡང་མི་གྲག་བཙལ་ཀྱང་མི་རྙེད་པ༔ སྐོམ་དུ་ཡིད་བཞིན་བདུད་རྩིའི་ཆུ་རྒྱུན་འཐུང་བ་ལས༔ སྐོམ་ཞེས་བྱ་བའི་མིང་ཡང་མི་གྲག་བཙལ་ཀྱང་མི་རྙེད་པ༔ གོས་སུ་ཚུལ་ཁྲིམས་གཙང་མའི་གོས་བཟང་གྱོན་པ་ལས༔ གོས་ཞེས་བྱ་བའི་མིང་ཡང་མི་གྲག་བཙལ་ཀྱང་མི་རྙེད་པ༔ སྐྱེ་བ་པདྨའི་སྟེང་དུ་རྫུས་ཏེ་སྐྱེ་བ་ལས༔ སྐྱེ་བ་གཞན་གྱི་མིང་ཡང་མི་གྲག་བཙལ་ཀྱང་མི་རྙེད་པ༔ ཟག་མེད་རྡོ་རྗེ་ལྟ་བུའི་ཚེ་ལ་མངའ་བརྙེས་པས༔ རྒས་ཤིང་རྒུད་པའི་མིང་ཡང་མི་གྲག་བཙལ་ཀྱང་མི་རྙེད་པ༔ སྐྱེ་ཤི་མེད་པའི་ས་ལ་ཡོངས་རྫོགས་འཇོག་པ་ལས༔ སྐྱེ་ཞིང་འཆི་བའི་མིང་ཡང་མི་གྲག་བཙལ་ཀྱང་མི་རྙེད་པ༔དུས་གསུམ་སངས་རྒྱས་ཀུན་གྱི་ཞིང་མཆོག་དེ་ན་ནི༔ མ་ལུས་ཐམས་ཅད་བྱང་ཆུབ་ལ་སྤྱོད་སྐྱིད་པ་ལ༔མི་བདེ་སྡུག་བསྔལ་མིང་ཡང་མི་གྲག་བཙལ་ཀྱང་མི་རྙེད་པ༔ བདེ་ཅན་བྱང་ཆུབ་རྫོགས་སངས་རྒྱས་ཀྱི་ཞིང་དེ་ན༔ ངོ་བོ་རང་བཞིན་སྟོང་པ་ཉིད་ཀྱི་གཞལ་ཡས་ཁང་༔ངོས་གཏིང་ཟབ་ལོགས་རྒྱ་དང་དཔངས་ནི་ཚད་མེད་པ༔ ཕྱི་ནང་མེད་པ་ཆོས་དབྱིངས་མངོན་ཤེས་སྐར་ཁུང་གསལ༔ མི་མཁྱེན་པ་དང་མི་གཟིགས་པ་ནི་གཅིག་ཀྱང་མེད༔ སྟེང་ན་ཐེག་པ་ཆེན་པོའི་ཆོས་ཀྱི་གདུགས་ཕུབ་པ༔ འོག་ན་ཆགས་མེད་པདྨ་འོད་ལྡན་ཁྲི་བརྩིགས་པ༔ དགའ་བཞི་ཡེ་ཤེས་ཚད་མེད་བཞི་ཡི་གདན་བརྩེགས་པ༔ཕྱོགས་བཞི་མཚམས་བརྒྱད་བྱང་ཆུབ་ཡན་ལག་འཕན་ཕྱར་བ༔ ཆོས་རྣམས་ཕྱོགས་མེད་མཉམ་པ་ཉིད་ཀྱི་ངང་ལ་བྱས༔ རེ་དོགས་སྤང་བླང་གཉིས་སྣང་མེད་པའི་པདྨོ་བཀྲམ༔ཡེ་དག་དྲི་མཆོག་ཚུལ་ཁྲིམས་སྤོས་ཀྱི་དྲི་ངད་འཐུལ༔ སུས་ཀྱང་མ་བྱས་ཡེ་ནས་རང་བྱུང་ལྷུན་གྱིས་གྲུབ༔ ཏིང་འཛིན་མི་གཡོ་ཆོས་དབྱིངས་རྒྱ་མཚོ་དངས་པ་ལ༔རྣམ་ཤེས་མ་ཆགས་ཡེ་གྲུབ་པདྨོ་ཀུན་རྫོགས་འཁྲུངས༔ འགྲོ་བ་མ་ལུས་ཐུགས་རྗེའི་སྙོམས་པའི་རྒྱན་གྱིས་བརྒྱན༔ ཕོ་བྲང་དེ་ན་སངས་རྒྱས་འོད་དཔག་མེད་པ་བཞུགས༔སྟོབས་བཅུ་མི་འཇིགས་རྣམ་བཞི་སྐུ་ཡི་རྒྱན་རབ་མཛེས༔ སྐུ་ལུས་བཀོད་པ་མཚན་བཟང་བལྟ་བས་མི་ངོམས་ཤིང་༔ཐོ་ཕྱི་ཐམས་ཅད་འོད་ཟེར་སྣ་ཚོགས་འཇའ་འོད་འཁྲིགས༔ ཐུགས་རྗེའི་འོད་ཟེར་དཀར་དམར་སྣ་ཚོགས་ཕྱོགས་བཅུར་འཕྲོ༔ རྫོགས་པའི་སངས་རྒྱས་དཔལ་ལྡན་སྐྱེས་བུ་མཐུ་ལྡན་པ༔སྐུ་གསུང་ཐུགས་ཡོན་འཕྲིན་ལས་བལྟ་བས་ཆོག་མི་ཤེས༔ རྒྱལ་བ་རྒྱ་མཚོ་འཁོར་མང་དག་ནི་སྤྲིན་ལྟར་གཏིབས༔ མིག་ནི་མི་གཡོ་བདེ་ཆེན་ངང་ལ་མཉམ་པར་བཞག༔ བརྩེ་བའི་ཐུགས་རྗེ་འོད་ཟེར་དུ་མ་ཕྱོགས་བཅུར་འཕྲོ༔ འོད་ཟེར་རེ་རེའི་རྩེ་ལ་སངས་རྒྱས་སྤྲུལ་པ་འགྱེད༔ བསམ་གྱིས་མི་ཁྱབ་གྲངས་མེད་བརྗོད་དུ་མེད་པ་འཕྲོ༔ གང་ལ་གང་འདུལ་དཔག་ཏུ་མེད་པས་འགྲོ་དོན་མཛད༔ ཞིང་ཁམས་དེ་ན་འཕགས་པ་མིན་པ་གཞན་མི་གནས༔ སྤྲུལ་པ་ཡང་སྤྲུལ་ཉིད་སྤྲུལ་ཐོར་བུ་བསམ་མི་ཁྱབ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ནུབ་བདེ་བ་ཆེན་པོའི་ཞིང་ཁམས་བསྟན་པའི་ལེའུ་སྟེ་དང་པོའོ༔ ༔
པདྨ་བཀའ་ཐང་ལེའུ་ ༢ སངས་རྒྱས་འོད་དཔག་མེད་ཀྱིས་སྤྲུལ་པ་བཀྱེ་བ།
ཞིང་དེའི་སངས་རྒྱས་འོད་དཔག་མེད་པ་ཡིས༔ འཇིག་རྟེན་རྒྱལ་པོ་ལ་སོགས་དྲེགས་པ་ཅན༔ ཁེངས་སེམས་ཆེ་བས་བཅིངས་རྣམས་འདུལ་བའི་ཕྱིར༔ པདྨོ་བདེ་བ་ཅན་གྱི་ཞིང་ཁམས་སུ༔ དབུ་གཙུག་འོད་ཟེར་དམར་པོ་རྒྱལ་པོར་སྤྲུལ༔ མཚན་ནི་འཁོར་ལོས་སྒྱུར་རྒྱལ་བཟང་པོ་མཆོག༔ གླིང་བཞིར་དབང་མཛད་ལོངས་སྤྱོད་མངའ་ཐང་རྒྱས༔ བཙུན་མོ་སྟོང་ཡོད་སྲས་ནི་གཅིག་ཀྱང་མེད༔ ཅི་མཛད་ཐམས་ཅད་ཆོས་ཀྱི་བྱ་བ་མཛད༔ ལྷོ་ནུབ་མཚམས་ན་འོ་མ་ཅན་གྱི་མཚོ༔ རྒྱ་མཚོ་དེ་ལ་མེ་ཏོག་པདྨ་སྐྱེས༔ རྒྱལ་པོས་དཀོན་མཆོག་མཆོད་པ་བྱེད་པ་ལ༔ མེ་ཏོག་ལེན་པའི་ཁོལ་པོ་བཏང་ནས་སུ༔ མེ་ཏོག་བླངས་ནས་རྒྱལ་པོའི་ཕྱག་ཏུ་ཕུལ༔ རྒྱལ་པོས་དཀོན་མཆོག་དྲུང་དུ་འབུལ་བ་ལ༔ སངས་རྒྱས་འོད་དཔག་མེད་པའི་ལྗགས་དཀྱིལ་ནས༔ འོད་ཟེར་ཁ་དོག་ལྔ་ལྡན་རྒྱ་མཚོར་འཕྲོས༔ ནམ་ཞིག་དུས་ན་མེ་ཏོག་ལེན་པ་ཡི༔ ཕོ་ཉས་མེ་ཏོག་ལེན་དུ་ཕྱིན་པའི་ཚེ༔ མཚོ་ཡི་ནང་ན་པད་སྡོང་ཆེན་པོ་སྐྱེས༔ པདྨའི་ཡལ་ག་རྒོད་ཀྱི་གཤོག་པ་ཙམ༔ ལོ་མ་ཕུབ་ཙམ་དེ་ཡི་དཀྱིལ་དེ་ན༔ སྙིང་པོ་ཁ་མ་བྱེ་བའི་ཀོན་པ་ཙམ༔ ཨུ་དུམྺཱ་རའི་མེ་ཏོག་དེ་ཉིད་ནི༔ དབྱར་དགུན་གཉིས་ཀ་ཁ་ནི་མ་བྱེ་བས༔ ཕོ་ཉ་བ་ཀུན་ཡ་མཚན་སྐྱེས་ནས་སུ༔ ཇི་ལྟ་བ་བཞིན་རྒྱལ་པོའི་སྙན་དུ་གསོལ༔ རྒྱལ་པོས་དེ་ལ་གཉེར་ཀ་གྱིས་ཤིག་གསུངས༔ རྣམ་པར་དག་པའི་མེ་ཏོག་དེ་ཉིད་ལ༔ ཉིན་མཚན་རྒྱུན་དུ་ཐུན་བཟུང་བསྲུང་བར་གྱུར༔ སྤྲེལ་ལོ་དཔྱིད་ཟླ་ར་བའི་ཚེས་གཅིག་ཉིན༔ མེ་ཏོག་པདྨའི་ཁ་བྱེ་ཕྱོགས་བཞི་དབུས༔ ཁྱེའུ་ཁ་དོག་མི་འདྲ་ལྔ་བཞུགས་ནས༔ དབུ་སྐྲ་ཐོར་ཅོག་དར་སྣ་ལྔ་ཡིས་བཅིངས༔ དབུས་ན་མཐིང་ནག་ཤར་ན་དཀར་ནག་སྟེ༔ ལྷོ་ན་སེར་ནག་ནུབ་ན་དམར་ནག་མདོག༔ བྱང་ན་ལྗང་ནག་ལྔ་ག་རྒྱན་དྲུག་གསོལ༔ དེ་འདྲའི་རྣམ་ཐར་རྒྱལ་པོའི་སྙན་དུ་གསོལ༔ རྒྱལ་པོ་དགྱེས་པའི་རྣམ་འགྱུར་མང་བསྟན་ནས༔ གངས་ཀྱི་སེང་གེ་དཀར་མོ་ལྔ་དང་བཅས༔ རྟ་མཆོག་ལྔ་བརྒྱས་དྲངས་པའི་ཤིང་རྟ་ལ༔ འདོད་ཡོན་ལྔ་ཡི་མཆོད་པ་དཔག་མེད་བཀལ༔ རྒྱལ་པོ་བཙུན་མོ་བློན་པོ་དཔུང་དང་བཅས༔ སངས་རྒྱས་འོད་དཔག་མེད་པ་འཁོར་བརྒྱད་ཁྲི༔ འོ་མ་ཅན་གྱི་མཚོ་ཁར་ཕྱིན་པར་གྱུར༔ ཁྱེའུ་མི་སྨྲ་མི་འགྱུར་མི་གཡོ་བར༔ པདྨའི་དཀྱིལ་ན་གཟི་མདངས་འོད་དུ་འབར༔ དེ་ལ་རྒྱལ་པོས་བསྟོད་པ་བྱས་པ་ནི༔
ཨེ་མ་ཧོ༔ ལྷོ་ནུབ་འོ་མ་ཅན་གྱི་རྒྱ་མཚོ་ལས༔ པད་སྡོང་རྩེ་ལ་ཁྱེའུ་མཆེད་ལྔ་འཁྲུངས༔ མི་ཤིགས་སྐུ་ལ་ལོངས་སྤྱོད་རྫོགས་པས་བརྒྱན༔ སངས་རྒྱས་མ་ལུས་འདུས་པའི་ཐོར་ཅོག་བཅིངས༔ པདྨ་འབྱུང་གནས་ཞི་ཞིང་རབ་ཏུ་ཞི༔ སྐུ་ནི་འཇའ་ཚོན་མདོག་ཏུ་རབ་ཏུ་གདའ༔ ཚངས་པའི་གསུང་དབྱངས་སངས་རྒྱས་གསུང་ལྟར་མཆི༔ རབ་ཏུ་དཀར་ཚེམས་འཛུམ་ཞིང་རྣམ་པར་མཛེས༔ ཞལ་ནི་ཉ་རྒྱས་ཟླ་བའི་དཀྱིལ་འཁོར་འདྲ༔ སྤྱན་ནི་རིང་ཞིང་ཤངས་ནི་ལྷང་ངེ་བ༔ འགྲོ་བ་ཡོངས་ཀྱི་དཔལ་གྱུར་ཐུགས་རྗེའི་བདག༔ རྒྱས་སྲས་པདྨ་འབྱུང་གནས་འདི་འདྲ་བ༔ བདག་གིས་ཡོན་ཏན་བརྗོད་པར་མ་ནུས་བསྟོད༔ ཅེས་བསྟོད་ཁྱེའུ་ལྔ་ཡི་ཞལ་ནས་ནི༔ སངས་རྒྱས་འོད་དཔག་མེད་ལ་དྲིས་ཤིག་གསུངས༔ དེ་ནས་རྒྱལ་པོས་ཁྱེའུ་ལྔར་དྲིས་པ༔ འོད་དཔག་མེད་པའི་སྐུ་མཆོག་དྲི་མ་མེད༔ སངས་རྒྱས་གསུང་སྙན་རྒྱལ་པོ་ཚིམ་པར་མཛོད༔ ཕྱོགས་བཅུའི་འཇིག་རྟེན་དག་ན་གང་འཚོ་བ༔ སངས་རྒྱས་སྐུ་གཟུགས་ཁྱེའུ་འདི་ལྔ་གསུངས༔ ཞེས་གསོལ་སངས་རྒྱས་འོད་དཔག་མེད་པ་ཡིས༔ ཨེ་མ་ཧོ༔ སྐྱབས་དང་བྲལ་བས་འཁོར་བར་འཁོར་བ་ལས༔ དོན་གྱི་ལམ་སྟོར་ལུས་དང་ངག་ཡིད་དུབ༔ སེམས་ཅན་གང་དག་གནས་མེད་རྟེན་མེད་ཅིང་༔ ཡེ་ཤེས་ལྔ་ཡི་རོལ་པ་ཁྱེའུ་ལྔ༔ འཆི་འཕོ་འཇིག་རྟེན་གཞན་ལ་ཕན་ཕྱིར་བཤད༔ ཆོས་ཀྱི་རྣམ་གྲངས་ཤིན་ཏུ་ཟབ་མོ་སྔགས༔ གསང་སྔགས་བླ་མེད་རྡོ་རྗེ་ཐེག་པ་ཡི༔ བསྐྱེད་རྫོགས་གསུམ་སྨྲའི་སྟོན་པ་འདི་ལྔ་སྟེ༔ མཚན་འདིར་བརྗོད་ཀྱིས་རྒྱལ་པོའི་སྙན་དུ་ཟུངས༔ དབུས་ན་ཁྱེའུ་རྡོ་རྗེ་ཐོད་ཕྲེང་རྩལ༔ དེ་བཞིན་བུདྡྷ་རཏྣ་པདྨའོ༔ ཀརྨ་ཐོད་ཕྲེང་རྩལ་དང་རེ་རེ་ལས༔ སྐུ་གསུང་ཐུགས་ཡོན་འཕྲིན་ལས་ལྔ་ལྔར་སྤྲུལ༔ དེ་དག་རྫུས་སྐྱེས་མངལ་སྐྱེས་ལ་སོགས་པ༔ འཇིག་རྟེན་གཞལ་དུ་མེད་པའི་དོན་བྱེད་འགྱུར༔ འདི་ལྔ་སྤྱན་རས་གཟིགས་ཀྱི་སྤྲུལ་པ་ཡིན༔ འཁོར་ལོས་སྒྱུར་བའི་རྒྱལ་པོ་བཟང་པོ་མཆོག༔ རྒྱལ་པོ་བསོད་ནམས་སྟོང་ཕྲག་བརྒྱ་དང་ལྡན༔ ཁྱེའུ་ཕོ་བྲང་ནང་དུ་སྤྱན་དྲོངས་གསུངས༔ དེ་སྐད་གསུངས་མ་ཐག་ཏུ་ཁྱེའུ་ལྔ༔ སེང་གེའི་སྟེང་དུ་ཁྲི་སྙན་པགས་པ་བཏིང་༔ ལ་ལ་སྐྱིལ་ཀྲུང་ལ་ལ་ཕྱེད་སྐྱིལ་བཞུགས༔ ལ་ལ་བརྐྱང་བསྐུམ་ལ་ལ་ཙོག་པུར་བཞུགས༔ ལྷ་ཡི་རོལ་མོ་དཔག་ཏུ་མེད་པས་བསུས༔ བཟང་པོ་མཆོག་གི་བླ་མཆོད་ལ་གཤེགས་སོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སངས་རྒྱས་འོད་དཔག་མེད་ཀྱིས་སྤྲུལ་པ་བཀྱེ་བའི་ལེའུ་སྟེ་གཉིས་པའོ༔ ༔
པདྨ་བཀའ་ཐང་ལེའུ་ ༣ ཞིང་ཁམས་བསམ་གྱིས་མི་ཁྱབ་པར་འགྲོ་དོན་མཛད་པ།
དེ་ལྟར་བདེ་བ་ཆེན་པོའི་ཞིང་ཁམས་དེ༔ སངས་རྒྱས་ཉག་གཅིག་ཞིང་ཁམས་ཡིན་པའི་ཕྱིར༔ འཇིག་རྟེན་ཞིང་ཁམས་དཔག་མེད་བསམ་མི་ཁྱབ༔ འཁོར་བའི་སེམས་ཅན་དཔག་མེད་བསམ་མི་ཁྱབ༔ དེ་དག་ཉོན་མོངས་དགྲ་དཔུང་གཞོམ་པའི་ཕྱིར༔ མི་མཇེད་འཇིག་རྟེན་གྲགས་པ་འདི་ལྟ་སྟེ༔ ལྷ་ཡི་གནས་སུ་གུ་རུ་གསེར་ཐུབ་འཛིན༔ ལྷ་མིན་གནས་སུ་གུ་རུ་རྣམ་པར་རྒྱལ༔ མི་ཡི་གནས་སུ་གུ་རུ་ཤཱཀྱ་སེང་༔ བྱོལ་སོང་གནས་སུ་གུ་རུ་སེང་རབ་བརྟན༔ ཡི་དྭགས་གནས་སུ་གུ་རུ་རྣམ་སྣང་བྱེད༔ དམྱལ་བའི་གནས་སུ་གུ་རུ་རྣམ་པར་གནོན༔ མི་མཇེད་འཇིག་རྟེན་དྲུག་པོ་དེ་དག་གི༔ འཇིག་རྟེན་རེ་རེའི་ཕྱོགས་བཞི་མཚམས་བརྒྱད་ན༔ གུ་རུ་མཚན་ནི་བརྒྱད་བརྒྱད་སུམ་ཅུ་དྲུག༔ དེ་ཡང་སྟོང་གསུམ་གྱི་ནི་སྟོང་ཆེན་པོའི༔ མི་མཇེད་འཇིག་རྟེན་ཁམས་ཀྱི་ཕྱི་རོལ་ཕར༔ ཤར་གྱི་ཕྱོགས་ཀྱི་འཇིག་རྟེན་ཁམས་ལ་ཡང་༔ གླིང་བཞི་པ་ལ་ཞིང་ཁམས་བརྒྱ་ཡི་ཚད༔ སྟོང་ཕྲག་བཅུ་གཉིས་འདས་པའི་ཞིང་ཁམས་ཀྱི༔ མིང་ནི་འཇིག་རྟེན་དྲི་མ་མེད་པ་ཞེས༔ ཞིང་ཁམས་རྒྱན་ནི་རིན་ཆེན་སྣ་ཚོགས་བརྒྱན༔ དེ་ན་གནས་པའི་འགྲོ་བ་ཕོ་མོ་རྣམས༔ ཚེ་དང་ལོངས་སྤྱོད་དཔལ་འབྱོར་ཐམས་ཅད་ནི༔ སུམ་ཅུ་རྩ་གསུམ་ལྷ་དང་མཉམ་པ་ཡོད༔ བར་དོར་འཆི་བ་མེད་ཅིང་བརྫུས་ནས་སྐྱེ༔ འདོད་ཡོན་ཐམས་ཅད་བསམ་པ་ཙམ་གྱིས་འགྲུབ༔ དེ་ན་སྦྱིན་པ་གཏོང་དང་ལེན་པ་མེད༔ འཇིག་རྟེན་ཞིང་ཁམས་འདི་མིན་གཞན་དག་ན༔ སྟེར་སློང་ཡོད་ཟེར་དེ་ལ་སྨོན་པར་བྱེད༔ ཐུབ་པའི་དབང་པོ་དྲི་མེད་སྒྲ་ཞེས་དང་༔ གུ་རུ་པདྨ་སྐྱེ་བཟང་ཞེས་བྱ་བས༔ མདོ་སྔགས་གཉིས་ཀྱི་སྒྲོན་མ་ཡོངས་སུ་སྣང་༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ ལྷོ་ཕྱོགས་འཇིག་རྟེན་སྟོང་ཕྲག་བརྒྱ་འདས་ན༔ འཇིག་རྟེན་ཞིང་ཁམས་ཡོན་ཏན་འབྱུང་བ་ཞེས༔ ཤཱཀྱ་ཐུབ་པ་དཀོན་མཆོག་སྤྲིན་ཞེས་དང་༔ གུ་རུ་ལྷུན་གྲུབ་འོད་ཀོར་ཞེས་བྱ་བས༔ བསྟན་གཉིས་རྒྱ་མཚོ་ཡོངས་སུ་སྣང་བར་བྱེད༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ ནུབ་ཕྱོགས་འཇིག་རྟེན་སྟོང་ཕྲག་ཉི་ཤུ་འདས༔ ཞིང་ཁམས་རྒྱན་ནི་ཤིན་ཏུ་བཀྲམ་པ་ན༔ གང་ཟག་བརྫུས་ཏེ་སྐྱེ་བའི་འཇིག་རྟེན་ཏེ༔ ཚེ་ལོ་བརྒྱད་ཁྲི་བཞི་སྟོང་གནས་པའོ༔ ཤཱཀྱ་ཐུབ་པ་ཡོན་ཏན་འབྱུང་གནས་དང་༔ པདྨ་གར་གྱི་དབང་ཕྱུག་ཅེས་བྱ་བས༔ བསྟན་གཉིས་རྒྱ་མཚོ་ཡོངས་སུ་སྣང་བར་བྱེད༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ བྱང་ཕྱོགས་འཇིག་རྟེན་སྟོང་ཕྲག་སུམ་ཅུ་ན༔ ཞིང་ཁམས་བག་ཚ་མེད་པ་ཞེས་པ་ན༔ ཤཱཀྱ་ཐུབ་པ་སེང་གེ་སྒྲ་ཞེས་དང་༔ པདྨ་ཡེ་གྲུབ་མཐའ་བྲལ་ཞེས་བྱ་བས༔ བསྟན་གཉིས་རྒྱ་མཚོ་ཡོངས་སུ་སྣང་བར་བྱེད༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ ཤར་ལྷོ་འཇིག་རྟེན་སྟོང་ཕྲག་བརྒྱད་ཅུ་རྩ་བཞི་འདས༔ འཇིག་རྟེན་ཞིང་ཁམས་རྣམ་པར་མཛེས་པ་ཞེས༔ ཤཱཀྱ་ཐུབ་པ་མཛེས་པའི་ཏོག་ཅེས་དང་༔ པདྨ་འཁྲུལ་ཞིག་སེང་གེའི་ཞེས་བྱ་བས༔ བསྟན་གཉིས་རྒྱ་མཚོ་ཡོངས་སུ་སྣང་བར་བྱེད༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ ལྷོ་ནུབ་འཇིག་རྟེན་སྟོང་ཕྲག་བདུན་ཅུ་འདས༔ འཇིག་རྟེན་ཞིང་ཁམས་རབ་ཏུ་སྣང་ཞེས་ན༔ ཤཱཀྱ་ཐུབ་པ་གཟི་བརྗིད་རྒྱན་ཞེས་དང་༔ པདྨ་ཡེ་འཛུམ་བཞད་པ་རྩལ་ཞེས་བས༔ བསྟན་གཉིས་རྒྱ་མཚོ་ཡོངས་སུ་སྣང་བར་བྱེད༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ ནུབ་བྱང་འཇིག་རྟེན་སྟོང་ཕྲག་ལྔ་བཅུ་འདས༔ ཞིང་ཁམས་རབ་ཏུ་སྣང་བ་ཅན་ཞེས་བྱ༔ ཙནྡན་དྲི་མཆོག་དཔལ་ཞེས་བྱ་བ་དང་༔ པདྨ་རྗེ་བཙན་འགྲོ་བ་འདུལ་ཞེས་པས༔ བསྟན་གཉིས་རྒྱ་མཚོ་ཡོངས་སུ་སྣང་བར་བྱེད༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ བྱང་ཤར་མཚམས་ཀྱི་འཇིག་རྟེན་ཁམས་དག་ཏུ༔ སྟོང་ཕྲག་བཞི་བཅུ་རྩ་བཞི་འདས་པ་ཡི༔ ཞིང་ཁམས་གདུང་བ་སེལ་བ་ཞེས་བྱ་ན༔ ཐུབ་པ་སྙིང་རྗེའི་རྒྱལ་པོ་ཞེས་བྱ་དང་༔ པདྨ་འཇིག་རྟེན་དབང་ཕྱུག་ཅེས་བྱ་བས༔ བསྟན་གཉིས་རྒྱ་མཚོ་ཡོངས་སུ་སྣང་བར་བྱེད༔ དེ་ཉིད་འཇིག་རྟེན་དྲུག་གི་ཕྱོགས་མཚམས་ན༔ གུ་རུ་མཚན་བརྒྱད་ཡོངས་སུ་གསལ་བར་བྱེད༔ བསྟན་གཉིས་རྒྱ་མཚོ་དེར་གནས་དེར་གྱུར་པའི༔ རྣམ་པར་སྤྲོས་པ་ཞེས་བྱའི་འཇིག་རྟེན་ན༔ སངས་རྒྱས་མངོན་སྤྲོ་རྒྱལ་པོ་ཞེས་བྱ་དང་༔ པདྨ་རྒྱལ་མཚན་མེ་ཏོག་ཅེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ རིན་ཆེན་སྤྲོས་པ་ཞེས་བྱའི་འཇིག་རྟེན་ན༔ སངས་རྒྱས་རིན་ཆེན་རྒྱལ་པོ་ཞེས་བྱ་དང་༔ པདྨ་ཀོ་ལི་ཀོ་མི་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ འོད་ཟེར་འབྱུང་བ་ཞེས་བྱའི་འཇིག་རྟེན་ན༔ སངས་རྒྱས་འོད་ཀོར་ཡངས་པ་ཞེས་བྱ་དང་༔ པདྨ་རབ་རྒྱུ་ཀུན་སྦྱོང་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ དཀའ་བ་རྣམ་པར་སྤྱོད་པའི་ཞིང་ཁམས་ན༔ སངས་རྒྱས་དཀའ་ཐུབ་རྒྱལ་པོ་ཞེས་བྱ་དང་༔ པདྨ་གཡུལ་ལས་རྒྱལ་བ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ གཙུག་ཏོར་བཀོད་པ་ཞེས་བྱའི་འཇིག་རྟེན་ན༔ སངས་རྒྱས་གཙུག་ཏོར་སྙིང་པོ་ཞེས་བྱ་དང་༔ པདྨ་ས་མཁན་སྐྱབས་མགོན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ འོད་ཟེར་འབྱུང་བ་ཞེས་བྱའི་འཇིག་རྟེན་ན༔ སངས་རྒྱས་ངེས་པར་སོང་བ་ཞེས་བྱ་དང་༔ པདྨ་ཀོ་ཤ་ཎི་ཨི་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ངེས་པར་འཕགས་པ་ཞེས་བྱའི་འཇིག་རྟེན་ན༔ སངས་རྒྱས་ངེས་པར་གསུང་བ་ཞེས་བྱ་དང་༔ པདྨ་ལམ་སྟོར་བཤེས་གཉེན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ བདེ་བར་སྤྱོད་པ་ཞེས་བྱའི་འཇིག་རྟེན་ན༔ སངས་རྒྱས་བདེ་བ་ཆེན་པོ་ཞེས་བྱ་དང་༔ པདྨ་འཁོར་བའི་གཅོང་འབྱིན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ མེ་ཏོག་བཀྲམ་པ་ཞེས་བྱའི་འཇིག་རྟེན་ན༔ སངས་རྒྱས་མེ་ཏོག་དབང་པོའི་དབྱངས་ཞེས་དང་༔ པདྨ་འདོད་དགུ་རང་འབྱུང་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ཡོངས་སུ་གྲགས་པ་ཞེས་བྱའི་ཞིང་ཁམས་ན༔ སངས་རྒྱས་གྲགས་པའི་དཔལ་ཞེས་བྱ་བ་དང་༔ པདྨ་འདྲེན་པའི་དཔའ་བོ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔
རྣམ་པར་འཕྲུལ་བ་ཞེས་བྱའི་འཇིག་རྟེན་ན༔ སངས་རྒྱས་སྤྲུལ་པའི་རྒྱལ་པོ་ཞེས་བྱ་དང་༔ པདྨ་བཀའ་བཏགས་རྒྱལ་པོ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ རྣམ་པར་སྦྱང་བ་ཞེས་བྱའི་འཇིག་རྟེན་ན༔ སངས་རྒྱས་སྒྲ་དབྱངས་མི་ཟད་པ་ཞེས་དང་༔ པདྨ་ཀློང་ཡངས་དམ་པ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སྨན་གྱིས་བརྒྱན་པ་ཞེས་བྱའི་ཞིང་ཁམས་ན༔ སངས་རྒྱས་སྨན་གྱི་རྒྱལ་པོ་ཞེས་བྱ་དང་༔ པདྨ་སྤྱོད་ཡུལ་དག་པ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ དེ་བཞིན་རྣམ་པར་དག་པའི་འཇིག་རྟེན་དུ༔ སངས་རྒྱས་མྱུར་དུ་འཛིན་ཞེས་བྱ་བ་དང་༔ པདྨ་འཁོར་བ་དོང་སྤྲུག་ཅེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ རིན་ཆེན་བཀོད་པའི་འཇིག་རྟེན་བྱ་བ་ན༔ སངས་རྒྱས་དགའ་བའི་སྤྱན་ཞེས་བྱ་བ་དང་༔ པདྨ་རང་བྱུང་ཡེ་ཤེས་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ རྣམ་པར་བཀྲམ་པ་ཞེས་བྱའི་འཇིག་རྟེན་ན༔ ཡོངས་སུ་དགོངས་པའི་རྒྱལ་པོ་ཞེས་བྱ་དང་༔ པདྨ་དྷེ་བ་ཤུགས་ཅན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ བཻཌཱུརྱ་ཡི་སྙིང་པོ་ཞེས་བྱ་ན༔ སངས་རྒྱས་གསེར་གྱི་སྙིང་པོ་ཞེས་བྱ་དང་༔ པདྨ་ཡང་སྙིང་རང་གྲོལ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ འོད་ཟེར་དམ་པ་ཞེས་བྱའི་འཇིག་རྟེན་ན༔ སངས་རྒྱས་འོད་ཟེར་དཔལ་ཞེས་བྱ་བ་དང་༔ པདྨ་ཆོས་དབྱིངས་དཔལ་འབར་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ རྣམ་པར་ཞི་བ་ཞེས་བྱའི་འཇིག་རྟེན་ན༔ སངས་རྒྱས་ཞི་བའི་དབང་པོ་ཞེས་བྱ་དང་༔ པདྨ་ཀུན་སྐྱོང་ཆེན་པོ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སྤྲིན་ཆེན་རྣམ་པར་བཀོད་པའི་འཇིག་རྟེན་ན༔ སངས་རྒྱས་སྤྲིན་གྱི་དཔལ་ཞེས་བྱ་བ་དང་༔ པདྨ་གསེར་གྱི་རི་དབང་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ཡིད་ལ་མངོན་པར་དགའ་བའི་འཇིག་རྟེན་ན༔ སངས་རྒྱས་ཡིད་འོང་དབྱངས་ཞེས་བྱ་བ་དང་༔ པདྨ་རྒྱལ་བའི་མེ་ལོང་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ འཇིག་རྟེན་མེ་ལོང་དཀྱིལ་འཁོར་དབྱངས་ཞེས་པར༔ སངས་རྒྱས་མེ་ལོང་སྣང་ཞེས་བྱ་བ་དང་༔ པདྨ་མཐོན་མཐིང་ལྷབ་ལྷུབ་ཅེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ཟླ་བས་བརྒྱན་པ་ཞེས་བྱའི་ཞིང་ཁམས་ན༔ སངས་རྒྱས་ཟླ་འོད་དཔལ་ཞེས་བྱ་བ་དང་༔ པདྨ་ཡིད་སྣང་ཅོད་པན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ཉི་མའི་འོད་ཟེར་བརྒྱན་པའི་ཞིང་ཁམས་ན༔ སངས་རྒྱས་ཉི་མའི་སྙིང་པོ་དཔལ་ཞེས་དང་༔ པདྨ་ཨིནྡྲ་ནཱི་ལ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སྤོས་དྲི་ངད་ལྡན་ཞེས་བྱའི་ཞིང་ཁམས་ན༔ སངས་རྒྱས་སྤོས་ཀྱི་རྒྱལ་པོ་ཞེས་བྱ་དང་༔ པདྨ་རྣམ་དག་ཡེ་ཤེས་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ གསེར་འོད་སྣང་བ་ཞེས་བྱའི་འཇིག་རྟེན་ན༔ སངས་རྒྱས་གསེར་གྱི་འོད་འཕྲོ་བྱ་བ་དང་༔ པདྨ་སྣ་ཚོགས་རིན་ཆེན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ འོད་ཟེར་བཀོད་པ་ཞེས་བྱའི་ཞིང་ཁམས་ན༔ སངས་རྒྱས་བཀོད་པའི་རྒྱལ་པོ་ཞེས་བྱ་དང་༔ པདྨ་ཀུ་ལ་ག་ཡ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ གསེར་གྱི་འབྱུང་གནས་ཞེས་བྱའི་ཞིང་ཁམས་ན༔ སངས་རྒྱས་གསེར་གྱི་གཟུ་བ་ཞེས་བྱ་དང་༔ པདྨ་འབྲུག་ཆེན་ལྷུན་རྫོགས་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ དཔལ་གྱི་འོད་ཟེར་ཞེས་བྱའི་ཞིང་ཁམས་ན༔ སངས་རྒྱས་དཔལ་གྱི་རྒྱལ་པོ་ཞེས་བྱ་དང་༔ པདྨ་སྐྱེ་ཤི་གཉིས་སྤངས་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སྣང་བ་དམ་པ་ཞེས་བྱའི་ཞིང་ཁམས་ན༔ སངས་རྒྱས་སྣང་བ་བརྩེགས་པའི་དཔལ་ཞེས་དང་༔ པདྨ་འཇིགས་པ་བདེ་འབྱིན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ མྱ་ངན་མེད་པ་ཞེས་བྱའི་ཞིང་ཁམས་ན༔ སངས་རྒྱས་མྱ་ངན་མེད་པའི་དཔལ་ཞེས་དང་༔ པདྨ་ཆོས་ལེགས་མཐོང་དགའ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ དགའ་བའི་མདངས་ཞེས་བྱ་བའི་ཞིང་ཁམས་ན༔ སངས་རྒྱས་དགའ་བའི་མཆོག་དཔལ་ཞེས་བྱ་དང་༔ པདྨ་སྤྱི་བཅིངས་ནམ་མཁའ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ གཟི་བརྗིད་འབྱུང་བ་ཞེས་བྱའི་ཞིང་ཁམས་ན༔ སངས་རྒྱས་གཟི་བརྗིད་དཔལ་ཞེས་བྱ་བ་དང་༔ པདྨ་སཾ་ཨུ་པཀྴ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སངས་རྒྱས་འདུལ་བ་ཞེས་བྱའི་ཞིང་ཁམས་ན༔ སངས་རྒྱས་དགེ་རྩ་དྲན་བསྐྱེད་ཅེས་བྱ་དང་༔ པདྨ་རིན་ཆེན་ཕྲ་སྤྲས་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ཡོངས་སུ་སྦྱོང་བ་ཞེས་བྱའི་ཞིང་ཁམས་ན༔ སངས་རྒྱས་ངན་སོང་སྦྱོང་བ་ཞེས་བྱ་དང་༔ པདྨ་བྱེར་བཀྲམ་རྒྱ་ཡན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ཐ་དད་སྤྱོད་པ་ཞེས་བྱའི་ཞིང་ཁམས་ན༔ འཇིག་རྟེན་ཀུན་གྱི་སློབ་དཔོན་ཞེས་བྱ་དང་༔ པདྨ་མི་ནུབ་རྒྱལ་མཚན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ རྒྱལ་མཚན་དཔུང་རྒྱན་ཞེས་བྱའི་འཇིག་རྟེན་ན༔ སངས་རྒྱས་རྣམ་པར་རྒྱལ་བ་ཞེས་བྱ་དང་༔ པདྨ་མུན་པ་སྣང་བྱེད་ཅེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ མེ་ཏོག་མཛེས་བརྒྱན་ཞེས་བྱའི་འཇིག་རྟེན་ན༔ མེ་ཏོག་བཀོད་པའི་རྒྱལ་པོ་ཞེས་བྱ་དང་༔ པདྨ་མཻ་ཏྲི་ཀ་ཙེ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ མཛེས་པར་སྣང་བ་ཞེས་བྱའི་ཞིང་ཁམས་ན༔ སངས་རྒྱས་ཐམས་ཅད་སྣང་བ་ཞེས་བྱ་དང་༔ པདྨ་འཁོར་བ་རུ་ན་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ ཙནྡན་བཀོད་པ་ཞེས་བྱའི་ཞིང་ཁམས་ན༔ སངས་རྒྱས་ཙནྡན་དྲི་ཞེས་བྱ་བ་དང་༔ པདྨ་རོལ་བ་རྣམ་དག་ཅེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སེང་གེ་འབྱུང་གནས་ཞེས་བྱའི་ཞིང་ཁམས་ན༔ སངས་རྒྱས་སེང་གེ་འབུམ་གཟུགས་ཞེས་བྱ་དང་༔ པདྨ་ཐ་མུ་ཏི་ཏོ་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སྟོང་གསུམ་མི་མཇེད་འཇིག་རྟེན་ཁམས་འདི་ན༔ སངས་རྒྱས་ཐུབ་པ་ཆེན་པོ་ཞེས་བྱ་དང་༔ སློབ་དཔོན་པདྨ་འབྱུང་གནས་ཞེས་བྱ་བས༔ མདོ་སྔགས་ཇི་ལྟ་བ་བཞིན་ཆོས་སྟོན་ཏོ༔ སངས་རྒྱས་སྔ་མ་རྣམས་ཀྱིས་བཤད་པ་ཡི༔ པད་འབྱུང་སྐྱེས་རབས་རྣམ་ཐར་རྒྱས་པ་འདི༔ བདེ་བར་གཤེགས་པས་སྦྱིན་པའི་གནས་སུ་གསུངས༔ ཕྱི་ནང་ཁྱད་པར་བསྟན་གཉིས་དེ་བཞིན་ནོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ འཇིག་རྟེན་གྱི་ཞིང་ཁམས་བསམ་གྱིས་མི་ཁྱབ་པར་འགྲོ་དོན་མཛད་པའི་ལེའུ་སྟེ་གསུམ་པའོ༔ ༔
པདྨ་བཀའ་ཐང་ལེའུ་ ༤ རྣམ་པར་སྣང་བྱེད་ཀྱི་བུ་ལྔ་ལ་དབང་བསྐུར་བ།
དེ་ནས་གསང་སྔགས་བསྟན་པ་བསྐྱངས་ཚུལ་ནི༔ དེ་ལྟར་ཀུན་ཏུ་སྦྱོར་བ་རབ་བཏང་བས༔ སྲིད་པའི་མཚོ་ལས་འགྲོ་བ་མ་ལུས་སྒྲོལ༔ ཞི་བ་ཆགས་བྲལ་ལྷ་མིས་མཆོད་འོས་པ༔ བླ་མ་རྡོ་རྗེ་འཆང་དུ་སྐུ་བཞེངས་ནས༔ སྔོན་ཚེ་བསྐལ་པ་གྲངས་མེད་འདས་པ་ན༔ གྲངས་མེད་པ་ནས་གྲངས་མེད་བརྗོད་ལས་འདས༔ མང་པོ་བསམ་གྱིས་མི་ཁྱབ་འདས་པ་ན༔ བསྐལ་པ་མངོན་པར་དགའ་བ་ཞེས་བྱ་ལ༔ སངས་རྒྱས་སུམ་ཁྲི་སུམ་སྟོང་བྱུང་བའི་དུས༔ སངས་རྒྱས་ཀུན་ཏུ་བཟང་པོའི་བསྟན་པ་ལ༔ ཞིང་ཁམས་རྒྱན་ནི་བཀྲམ་པ་ཞེས་བྱ་བར༔ ཡབ་ནི་རྒྱལ་རིགས་སྤྱོད་པ་རུ་ཎ་དང་༔ ཡུམ་ནི་རིགས་སྤྱོད་མ་ཞེས་སྙིང་རྗེར་ལྡན༔ ཁྱེའུའི་མིང་ནི་བདེ་སྐྱོབ་ཅེས་བྱ་བས༔ ཐོག་མའི་སངས་རྒྱས་ཀུན་ཏུ་བཟང་པོ་ལ༔ སེམས་བསྐྱེད་ཞུས་པའི་མཚན་ནི་མཛེས་པའི་ཏོག༔ སྐྱེ་བ་བརྒྱུད་ནས་འཁོར་ལོས་སྒྱུར་བའི་རྒྱལ༔ རྣམ་པར་སྣང་བྱེད་བུ་ལྔར་སྐྱེས་པ་ནི༔ དམངས་ཀྱི་མཆོད་འོས་གདུང་བརྒྱུད་འཛིན་ཞེས་བྱ༔ རྡོ་རྗེ་འཆང་ལ་དབང་བསྐུར་ཞུས་པའི་མཚན༔ དམ་པ་མཐོང་བའི་སེམས་དཔའ་རྡོ་རྗེར་གསོལ༔ སངས་རྒྱས་མཚན་ནི་མི་འཁྲུགས་ཞེས་བྱའོ༔ ཡབ་ནི་དམངས་རིགས་དུ་མ་རྒྱས་པ་དང་༔ ཡུམ་ནི་དམངས་རིགས་དུ་མ་རྒྱས་མའི་བུ༔ ཁྱེའུའི་མིང་ནི་ཏྲ་མི་ཏ་ཞེས་བྱ༔ སེམས་བསྐྱེད་ཞུས་པའི་མཚན་ནི་མི་ཁྱབ་དཔལ༔ སྐྱེ་བ་བརྒྱུད་མཚན་རི་ཧ་ཟུར་ཞེས་པ༔ དབང་བསྐུར་མཚན་ནི་རྡོ་རྗེ་ཆོས་ཞེས་གྲགས༔ སངས་རྒྱས་མཚན་ནི་སྣང་བ་མཐའ་ཡས་སོ༔ ཡབ་ནི་བྲམ་ཟེའི་རིགས་ཏེ་ཨ་ར་ཛེ༔ ཡུམ་ནི་གུབྟི་མ་ཞེས་བྱ་བའི་བུ༔ ཁྱེའུའི་མིང་ནི་ལས་འབྱིན་ཞེས་བྱ་བ༔ སེམས་བསྐྱེད་ཞུས་པའི་མཚན་ནི་ཟླ་མཛེས་དཔལ༔ སྐྱེ་བ་བརྒྱུད་པའི་མཚན་ནི་ལས་འབྲེལ་ཞེས༔ དབང་བསྐུར་གསང་བའི་མཚན་ནི་རྡོ་རྗེ་དབྱིངས༔ སངས་རྒྱས་མཚན་ནི་རྣམ་པར་སྣང་མཛད་དོ༔ ཡབ་ནི་གདོལ་པའི་རིགས་ཏེ་གུ་པ་ཏ༔ ཡུམ་ནི་གདོལ་མོ་ས་མུནྟཱི་ཞེས་པ༔ ཁྱེའུའི་མིང་ནི་ཏམྦུ་ར་ཞེས་བྱ༔ སེམས་བསྐྱེད་ཞུས་པའི་མཚན་ནི་ཀུན་ལས་འགྲིག༔ སྐྱེ་བ་བརྒྱུད་པའི་མཚན་ནི་བྱེད་སྟོང་འཇོམས༔ དབང་བསྐུར་མཚན་ནི་ལས་ཀྱི་རྡོ་རྗེ་སྟེ༔ སངས་རྒྱས་མཚན་ནི་དོན་ཡོད་གྲུབ་པའོ༔ ཡབ་ནི་རྗེའུ་རིགས་ཡིན་ཏེ་ཀུན་ནས་དང་༔ ཡུམ་ནི་རྗེའུ་རིགས་མཚན་ལྡན་ཨ་ལམ་མ༔ ཁྱེའུའི་མིང་ནི་དཔལ་འབྱིན་ཞེས་བྱ་བ༔ སེམས་བསྐྱེད་ཞུས་པའི་མཚན་ནི་ནོར་འབྱིན་ཏེ༔ སྐྱེ་བ་བརྒྱུད་པའི་མཚན་ནི་ནོར་ལེགས་ཞེས༔ དབང་བསྐུར་མཚན་ནི་རྡོ་རྗེ་རིན་ཆེན་ཏེ༔ སངས་རྒྱས་མཚན་ནི་རིན་ཆེན་འབྱུང་གནས་སོ༔ ཐབས་གནད་ཆེས་ཟབ་མང་དུ་བསྟན་པ་ཡིས༔ གསང་སྔགས་བླ་མེད་སུ་དག་སྒོམ་བྱེད་པ༔ དེས་ན་བླ་མེད་རྣམ་ཐར་མཆོག་ཏུ་གསུངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བླ་མ་རྡོ་རྗེ་འཆང་དུ་སྐུ་བཞེངས་ནས་རིགས་ལྔའི་སྐྱེ་བརྒྱུད་དང་རྣམ་པར་སྣང་བྱེད་ཀྱི་བུ་ལྔ་ལ་དབང་བསྐུར་བའི་ལེའུ་སྟེ་བཞི་པའོ༔ ༔
པདྨ་བཀའ་ཐང་ལེའུ་ ༥ རཱུ་ཏྲའི་སྐྱེ་རྒྱུད་བསྟན་པ།
དེ་ནས་ཀུན་ཏུ་བཟང་པོའི་བསྟན་པའི་མཇུག༔ ཡུལ་གྱི་མིང་ནི་འདུ་ལྗོངས་མཚམས་ཞེས་བྱ༔ ཁྱིམ་བདག་ཀོའུ་ཀཱ་ལ་ཞེས་པ་ལ༔ བུ་ནི་ཀོའུ་ཀུན་དཀྲིས་ཞེས་བྱ་དང་༔ གཡོག་པོ་བྲ་མ་དེ་བ་བྱ་བ་གཉིས༔ བསྟན་པ་གཉིས་ཀྱི་གདུལ་བྱའི་ཞིང་དུ་གཟིགས༔ སྤྲུལ་སྐུའི་བསྟན་པ་མི་ནུབ་བྱ་བའི་ཕྱིར༔ དགེ་སློབ་ཐུབ་དཀའ་གཞོན་ནུར་སྐྱེ་བ་བཞེས༔ ལོངས་སྐུའི་བསྟན་པ་གསང་སྔགས་མི་ནུབ་ཕྱིར༔ རིགས་འཆང་ཁྱིམ་བདག་ཆེན་པོར་སྐྱེ་བ་བཞེས༔ སྐུ་གཅིག་མཚན་གཉིས་གྲགས་པའི་དགེ་སློང་ལ༔ མི་རྣམས་ཐམས་ཅད་རབ་ཏུ་ཤིན་ཏུ་འདུན༔ རྣལ་འབྱོར་ལྔ་ཡི་ལམ་ཆེན་བླངས་ནས་སྤྱོད༔ ཕུང་པོའི་གནས་ལ་སྟོང་པར་གྱུར་པར་ལྟ༔ དེ་དུས་ཀོའུ་ཀུན་དཀྲིས་དད་པ་སྐྱེས༔ གང་དག་མི་ལ་དྲིས་ནས་ཐེ་ཚོམ་བཅད༔ སྟོན་པ་ཐུབ་དཀའ་གཞོན་ནུ་ཇི་ལྟ་བ༔ བྱང་ཆུབ་མི་བསྒྲུབ་ཉོན་མོངས་མི་སྤོང་བ༔ ཅི་དགར་སྤྱོད་དུ་ཡོད་པའི་ཆོས་གསུང་ངམ༔ དེ་དག་དགེ་སློང་དེ་བཞིན་གསུང་ངོ་བརྗོད༔ མ་རིག་བསལ་ནས་མྱང་འདས་ཐོབ་པ་ལ༔ དེ་བས་ཐུབ་དཀའ་གཞོན་ནུ་མཆོག་ཏུ་གསུངས༔ ཀོའུ་ཀུན་དཀྲིས་བྲ་མ་དེ་བ་ཡིས༔ ཐུབ་དཀའ་གཞོན་ནུ་གནས་པའི་དྲུང་དུ་ཕྱིན༔ ཐེ་ཚོམ་དང་ནི་ཉོན་མོངས་གསུམ་པོ་དག༔ རང་ཉིད་ཅི་དགར་སྤྱད་པས་རྣལ་འབྱོར་དུ༔ འཕགས་པའི་བདེན་མཐོང་སྔགས་ཀྱི་དགོངས་ལོན་པར༔ ཐབས་ལ་མཁས་པས་ཉེ་བར་གཟུང་དུ་གསོལ༔ ཅེས་འདུན་ཞབས་མཐིལ་མགོ་བོ་བཏུད་བྱས་པས༔ སྟོན་པས་ཡིན་ནོ་ངེས་སོ་ལེགས་སོ་བྱིན༔ འཁོར་བའི་འཁོར་ལོ་ཇི་ལྟར་གནས་པ་དག༔ དེས་ན་དགེ་འདུན་རིན་ཆེན་མཆོག་ཏུ་གསུངས༔ ཞེས་གསུངས་དཔོན་གཡོག་གཉིས་ཀ་རབ་ཏུ་བྱུང་༔ ཐར་པ་ནག་པོ་དན་ཕག་ཆོས་མིང་བཏགས༔ དན་ཕག་ཐར་པའི་དུས་འཛིན་པ་རུ་བསྐོས༔ དེ་ནས་དགེསློང་ཐར་པ་ནག་པོ་ཡིས༔ ཐུབ་དཀའ་གཞོན་ནུའི་སྙན་དུ་འདི་སྐད་གསོལ༔ ཨེ་མ་སྔགས་སྐྱོང་རིག་སྔགས་འཆང་ཆེན་པོ༔ ཤིན་ཏུ་སྡུག་བསྔལ་ཀུན་ལས་གྲོལ་བྱེད་པ༔ ཇིལྟ་བ་ཡི་ལམ་དེ་གང་ལགས་གསུངས༔ སྟོན་པས་ཞལ་གྱི་འཛུམ་མདངས་བསྟན་ནས་སུ༔ ཇི་བཞིན་ཉིད་དེ་མ་བཅོས་པར༔ དངོས་པོ་བཞི་ལ་གནས་སྤྱད་ཀྱང་༔ ནམ་མཁའ་ལ་ནི་སྤྲིན་བཞིན་ཏེ༔ འདི་ནི་རྣལ་འབྱོར་དམ་པའི་ལམ༔ འདི་མ་རྟོགས་པར་ཁམས་གསུམ་ན༔ ལྟ་བའི་རིམ་པ་གཞན་མེད་དོ༔ ཞེས་གསུངས་ཚུལ་བཞིན་སེམས་ཀྱི་རྣམ་དཔྱད་བསྟན༔ ཐར་པ་གཡོག་དང་བཅས་པ་ཡི་རངས་ཏེ༔ གུས་དང་བཅས་པས་དེ་ལ་འདོད་ཡོན་མཆོད༔ མངོན་པར་བསྟོད་ནས་རང་གི་གནས་སུ་དེངས༔ ཆོས་སྒྲ་ཇི་བཞིན་པ་ལ་ཐར་པས་སྤྱད༔ ངེས་པའི་དོན་མ་རྟོགས་པས་ཉོན་མོངས་འབར༔ དངོས་པོ་བཞི་ལ་ཞེན་འཐས་བྱས་པ་ཡིས༔ ལུས་ནི་དམ་པའི་ཆས་ཞུགས་སེམས་ངན་འགྲོ༔ གཡོག་པོ་དན་ཕག་ངེས་པའི་དོན་རྟོགས་ནས༔ བློ་གྲོས་རབ་འཕེལ་ཇི་བཞིན་ཁོ་ནར་སྤྱད༔ མ་ཞེན་སྟོན་པའི་བསྟན་པ་གཉན་པར་ཤེས༔ ལུས་ནི་མ་རབས་ཆས་ཞུགས་གུད་དུ་དེངས༔ སེམས་ལ་ངེས་པའི་ལམ་ཕྱིན་ལྟ་མ་ལོག༔ དེ་ནས་རེ་ཞིག་དུས་ན་དཔོན་གཡོག་གཉིས༔ ལྟ་སྤྱོད་མ་མཐུན་གླགས་ལྟ་གྱ་ཚིག་བོས༔ དགེ་སློང་ཐར་པ་ནག་པོས་ལན་བཏབ་པ༔ བདག་ཅག་གཉིས་ནི་སློབ་དཔོན་གཅིག་ལ་གཏུགས༔ སྒྲ་གཅིག་དོན་དུ་འགྱུར་བར་འདོད་པ་དང་༔ ཉམས་ལེན་སོ་སོར་མ་མཐུན་ཇི་ལྟ་བུ༔ དན་ཕག་ཐར་པ་ནག་པོར་ལན་བཏབ་པ༔ བདག་གིས་ངེས་པར་མཉམ་པར་བཞག་པ་ལས༔ ཀུན་ཏུ་དང་བར་མ་གྱུར་གཞན་མ་གོ༔ དེ་ནས་ཐར་པ་ནག་པོས་ལན་བཏབ་པ༔ ངས་ཀྱང་དེ་ལྟར་ངེས་པས་དེར་སྤྱད་པས༔ གསང་སྔགས་སྤྱོད་དེ་ཆོས་བཞིན་མཐུན་པར་མཆིས༔ ཐར་པ་ནག་པོ་མངོན་པའི་ང་རྒྱལ་སྐྱེས༔ དན་ཕག་ཁྱོད་ཀྱི་ལྟ་སྤྱོད་ལོག་ཅེས་ཟེར༔ ཉོན་མོངས་དང་ནི་ཡེ་ཤེས་རྒྱུ་རྐྱེན་གཅིག༔ ཀུན་རྫོབ་རྩོལ་བྱས་དགེ་བས་སངས་མི་རྒྱ༔ དོན་དམ་རྩོལ་མེད་ངང་ལ་འཇོག་པ་ཡིན༔ དེ་ནས་དན་ཕག་ཚིག་གི་ལན་བཏབ་པ༔ རྣམ་ཤེས་ཞེན་འཛིན་དག་པ་ཡེ་ཤེས་ཏེ༔ ཇི་བཞིན་ཉིད་དེ་མ་བཅོས་སྔགས་ཀྱི་ལམ༔ ཉོན་མོངས་པ་ནི་སྤྲིན་བཞིན་དབྱིངས་སུ་དེངས༔ ཡས་འབིབས་སྤྱོད་པ་གསུམ་ལྡན་རྩོལ་བར་བྱ༔ འདི་ནི་སྟོན་པ་ཐུབ་དཀའི་བཞེད་པ་ཡིན༔ ཞེས་བརྗོད་ཐར་པ་ནག་པོ་ཀུན་འཁྲུགས་ནས༔ སློབ་དཔོན་ཐུབ་དཀའ་གཞོན་ནུ་མ་བཅོས་པ༔
ཁ་གསག་མེད་ཅིང་རྒྱུད་དྲང་རང་བཞིན་གསོད༔ འཛམ་གླིང་ཆོས་ཀྱི་རྒྱལ་པོ་ཐུབ་ཆེན་ལ༔ གང་ཡིན་དྲིར་འགྲོ་ལུས་ཤུགས་མྱུར་དུ་ཕྱུང་༔ དཔོན་གཡོག་གཉིས་ཀྱི་ལྷན་དུ་ཕྱིན་ནས་དྲིས༔ ཤགས་འབྱེད་སྟོན་པས་དན་ཕག་ལྟར་རོ་གསུངས༔ ཐར་པ་ནག་པོ་སེམས་ཚིག་རབ་ཏུ་ཁྲོས༔ སློབ་དཔོན་གཅིག་ལ་ལྟ་བ་མི་འདྲ་གཉིས༔ འདི་ལ་ཐམས་ཅད་ལོག་པར་དེ་དག་སྟོན༔ རྟག་ཏུ་ཕན་ཚུན་མཐུན་པ་མ་ཡིན་ཞིང་༔ དན་ཕག་གཡོག་ཏུ་མི་བསྟེན་སྒྲ་ཡང་འབྱིན༔ སྤྱོད་ཡུལ་ལམ་ངན་ཀུན་ཏུ་བསྐོར་བར་བགྱིད༔ ཚིག་རྩུབ་སུན་ཕྱུང་རིངས་པར་སྤྱུགས་ཏེ་སྤངས༔ སློབ་མར་འདྲ་ཞིང་སློབ་དཔོན་སྤྱི་མི་ཡིན༔ གཉིས་ཀ་ལྟར་རོ་ཙམ་ཞིག་མི་ཟེར་བར༔ ངེས་པར་ང་ཉིད་སུན་ཕྱུང་ཕྱིན་ལོག་སྟོན༔ ཉེ་རིང་ཅན་དེ་ས་འདིར་མ་ཆགས་པར༔ སྤྱུགས་ཏེ་རྒྱལ་ཁམས་ང་ཡིས་དབང་བསྡུ་བསམས༔ ཡུལ་ཕྱོགས་མཐའ་ལ་སྤྱུགས་ཏེ་རིང་སྤངས་སོ༔ ཐུབ་ཆེན་རྔ་དང་འབྲུག་གི་སྒྲ་སྒྲོག་ལྟར༔ འདུ་ལྗོངས་མཚམས་ཀྱི་འཇིག་རྟེན་འདི་ན་ནི༔ ཐུབ་དཀའ་ལ་ནི་སྐྱབས་སུ་མཆི་མི་རྣམས༔ སེམས་ཅན་བློ་ཆུང་རྣམས་ནི་མི་ཤེས་པས༔ ཆོས་རྣམས་ཐམས་ཅད་བཤད་པར་མི་ནུས་ཏེ༔ གྲོང་སྟོང་ལས་ཀྱི་འཁྲུལ་འཁོར་འདྲ་བར་གནས༔ ཞེས་གསུངས་ཞིང་ཁམས་གཞན་ལ་གཤེགས་པར་གྱུར༔ དེ་ནས་དགེ་སློང་ཐར་པ་ནག་པོ་ཁོ༔ འཇིག་རྟེན་སྐྱམ་ལིངས་འདུ་བྱེད་ལ་ཡེངས་ཏེ༔ ལྷ་སྒོམ་སྔགས་བཟླ་མ་ཁོམ་བློ་དྲེད་ནས༔ བླ་མ་དང་ནི་མཆེད་གྲོགས་དམ་ཚིག་ཉམས༔ ཆོས་སྒོ་གྲངས་མང་རྒྱ་ཆེར་གྱུར་པ་ལ༔ གཞལ་བྱ་གཉིས་ཀྱིས་གཞལ་བར་མ་བྱས་པར༔ ཐར་པས་ཚད་མ་རང་གི་ཞེན་ཕྱོགས་འབྲངས༔ འཇིག་རྟེན་ཐམས་ཅད་ལོག་པའི་ལམ་ལ་བསྒྱུར༔ ལོག་པའི་བརྟུལ་ཞུགས་ཕོ་མཐོང་ཐམས་ཅད་བསྒྲལ༔ མོ་མཐོང་སྦྱོར་བ་བྱས་ནས་དབང་དུ་བསྡུས༔ དུར་ཁྲོད་མི་རོ་བླངས་ནས་ཟས་སུ་ཟོས༔ མི་ལྤགས་གོས་གྱོན་ཁེ་མ་རྣམས་སུ་རྒྱུ༔ སྲོག་ཆགས་གསོད་པའི་བྱ་དང་ཁྱི་དང་ནི༔ གཅན་གཟན་རིགས་བྱེད་མང་པོ་ནོར་དུ་བསྲེལ༔ སྨད་འཚོང་མ་བསྡུས་དབང་བསྐུར་ཆགས་པ་སྤྱོད༔ དངོས་པོ་བཞི་ཡི་རང་བཞིན་འདས་པར་གྱུར༔ སྡིག་གི་ཚོགས་དཔོན་མི་དགེ་བཅུ་དབུས་ན༔ དབང་པོ་རྣམས་ནི་དམག་དང་ཆོམ་རྐུན་འདྲ༔ བསྟན་ནག་ལོ་སྐོར་བཅུ་གཉིས་བསྐྱངས་ནས་སུ༔ དེ་ནས་ཚེ་འཕོས་ཕྱི་མའི་སྐྱེ་བ་ནི༔ ཅེ་སྤྱང་ནག་པོའི་སྐྱེ་བ་ལྔ་བརྒྱ་དང་༔ ཁྱི་ནི་ལུ་དྷེའི་སྐྱེ་བ་ལྔ་བརྒྱ་དང་༔ ནེའུ་ལེ་ཤ་ཟན་སྐྱེ་བ་ལྔ་བརྒྱ་དང་༔ སྦྲང་བུ་ཏྲེ་མའི་སྐྱེ་བ་ལྔ་བརྒྱ་དང་༔ སྲིན་བུ་སུ་ཀའི་སྐྱེ་བ་ལྔ་བརྒྱ་དང་༔ རོ་ཟ་རྐང་འཇིབ་ལ་སོགས་བསམ་མི་ཁྱབ༔ དེ་ནས་ངན་སྐྱུགས་ཟ་བ་ལྔ་བརྒྱ་དང་༔ དུད་འགྲོའི་རིས་གྱུར་དཔག་ཏུ་མེད་པ་དང་༔ ཡི་དྭགས་རིས་གྱུར་དཔག་ཏུ་མེད་པ་དང་༔ དེ་ནས་མནར་མེད་དམྱལ་བར་སྐྱེ་བ་བླངས༔ དེ་ནས་རྡོ་རྗེ་དམྱལ་བ་ཞེས་བྱ་བར༔ ཚེ་ཡི་ཚད་ནི་བརྒྱད་ཁྲིར་གནས་པར་གྱུར༔ དེ་ནས་ཤ་ཟ་རུས་འཆའི་རིས་གྱུར་བླངས༔ དེ་ནས་ཚེ་འཕོས་སྲུལ་པོ་གཉའ་ཕྲག་བུ༔ སྲུལ་པོ་རྟོག་འདོད་ཅན་ཞེས་བྱ་བར་སྐྱེས༔ དེ་ནས་སྐྱེ་བ་སྟོང་ཕྲག་ཉི་ཤུའི་མཐར༔ སངས་རྒྱས་མར་མེ་མཛད་ཀྱི་བསྟན་པའི་རྗེས༔ ཤཱཀྱ་ཐུབ་པའི་བསྟན་པ་མ་བྱུང་བའི༔ བར་དེར་བསྟན་པའི་སྟོངས་ལ་ལོ་མང་བྱུང་༔ སྲིན་ཡུལ་ལང་ཀ་པཱུརྞ་ཞེས་བྱ་བར༔ སྨད་འཚོང་མ་ནི་ཀུན་ཏུ་རྒྱུ་ཞེས་ལ༔ སྲོད་ལ་བདུད་དང་དགུང་ལ་བཙན་དང་འཁྲིགས༔ ཐོ་རངས་ལྷ་དང་འཁྲིགས་པའི་མངལ་དུ་ཆགས༔ ཕ་ནི་ལྷ་འདྲེ་མི་བསྲུན་གསུམ་ཡོད་པས༔ ཟླ་བ་བརྒྱད་ན་བུ་ཆུང་མགོ་གསུམ་པ༔ ལག་པ་དྲུག་ཡོད་རྐང་པ་བཞི་ཡོད་པ༔ ལུས་ལ་རང་འཁྲུངས་གཤོག་པ་གཉིས་ཡོད་པ༔ མགོ་བོ་རེ་ལ་མིག་གསུམ་དགུ་ཡོད་པ༔ ཆ་བྱད་རྣམ་པ་སྣ་ཚོགས་མང་པོ་མངའ༔ སྐྱེས་མ་ཐག་ཏུ་བཀྲ་མི་ཤིས་པའི་རྟགས༔ ནད་དོ་ཅོག་གིས་ལང་ཀའི་ཡུལ་རྣམས་གང་༔ བསོད་ནམས་ཕུང་པོརྣམ་པར་ཉམས་པར་གྱུར༔ ཕུན་སུམ་ཚོགས་པའི་རྟགས་རྣམས་ཐམས་ཅད་ནུབ༔ མུ་གེ་འཁྲུག་ནད་ཡམས་ནད་དུག་གསུམ་འཕེལ༔ རྨི་ལམ་ངན་རྨིས་འབྱུང་པོའི་ཚོགས་རྣམས་འདུ༔ སྐྱེས་ནས་ཟླ་བ་དགུ་ན་བུ་ནད་ལོག༔ ཀུན་ཏུ་རྒྱུ་མ་དེ་ཉིད་ཤི་བར་གྱུར༔ ཡུལ་མི་རྣམས་ཀྱིས་རྒྱགས་ཕྲུག་ལྟས་ངན་འདི༔ མ་ཡི་ཕག་ཏུ་བཞག་པར་རིགས་སོ་ཟེར༔ ནལ་བྱི་ཞེས་བྱའི་དུར་ཤིང་རྩ་བ་ན༔ དུར་ཕག་ནག་པོ་གཏི་མུག་ཚང་བཅས་པ༔ རྐེད་པར་དུག་སྦྲུལ་ཞེ་སྡང་འཁྲ་ས་བྱེད༔ རྩེ་ལ་འདོད་ཆགས་དུར་བྱའི་ཚང་བཅས་པ༔ སྲིན་པོ་ཤི་ཚད་ཐམས་ཅད་དེར་སྐྱེལ་བ༔ སྟག་དང་གླང་པོ་ཆེ་ཡི་ཚང་བྱེད་པ༔ གདུག་པ་སྦྲུལ་རྣམས་ཐམས་ཅད་དེ་རུ་འཚོག༔ མཁའ་འགྲོ་མ་ཡིས་མི་རོ་དེ་རུ་འཁྱེར༔ དེ་ཡི་རྩ་བར་སྲིན་པོས་རོ་ཁང་བརྩིགས༔ མ་རོ་བུ་བཅས་ཁྱོགས་ལ་བླངས་ནས་བཅུག༔ བུ་དེས་མ་ལ་འཇུས་ཤིང་ནུ་མ་འཇིབས༔ ཆུ་སེར་གྱིས་ནི་བུ་སྲོག་ཞག་བདུན་འཚོ༔ དེ་ནས་ཁྲག་ཏུ་གཞིབས་པས་ཞག་བདུན་འཚོ༔ དེ་ནས་ནུ་མ་ཟོས་པས་ཞག་བདུན་འཚོ༔ དེ་ནས་ནང་ཁྲོལ་ཟོས་པས་ཞག་བདུན་འཚོ༔ དེ་ནས་ཕྱི་ཤ་ཟོས་པས་ཞག་བདུན་འཚོ༔ དེ་ནས་རྐང་མར་རྒྱུངས་པ་ལྷ་བ་དང་༔ ཀླད་པ་ཟོས་པས་ཞག་བདུན་བར་དུ་འཚོ༔ ཞག་པོ་བཞི་བཅུ་རྩ་གཉིས་ལུས་པོ་དར༔ བཟའ་རྒྱུ་མེད་པར་འགུལ་བས་རོ་ཁང་འགྱེལ༔ བལྟས་པས་མཁའ་འགྲོས་མི་རོ་ཟ་བ་མཐོང་༔ ཤ་ཟོས་ཁྲག་འཐུངས་པགས་པ་གོས་སུ་གྱོན༔ ཐོད་པར་ཁྲག་བླུགས་བྷནྡྷ་ཁྲག་སྐྱོགས་བྱས༔ སྦྲུལ་མཐོང་རྐང་གདུབ་ལག་གདུབ་དོ་ཤལ་བྱས༔ གླང་པོ་ཤི་མཐོང་ཤ་ཟོས་པགས་པ་བརྒྱངས༔ སྟག་མཐོང་ཤ་ཟོས་པགས་པས་ཤམ་ཐབས་བྱས༔ དེ་ནས་ཁ་ལ་ཞག་གི་སོར་རིས་ཆགས༔ ལུས་ལ་ཐལ་ཆེན་ཚོམ་བུ་བཀོད་པར་གྱུར༔ ཟས་སུ་རོ་ཟ་གོས་སུ་པགས་ོན་གྱོན༔ སྐོམ་དུ་ཁྲག་འཐུང་ལས་སུ་མི་དགེ་སྤྱོད༔ འཚོ་བ་རོས་འཚོ་གཟི་མདངས་འོད་དུ་འབར༔ གཡས་དཀར་གཡོན་དམར་དབུས་མཐིང་དྲག་པོའི་ཞལ༔ ལུས་པོ་ཤིན་ཏུ་ཆེ་བ་ཐལ་སྐྱའི་མདོག༔ ཤ་རྩུབ་ཉྭ་སུལ་རགས་ལ་བཞིན་མི་སྡུག༔ མི་མགོ་སྐམ་པོ་བྱུང་ཚད་ཕྱོགས་གཅིག་བརྒྱུས༔ རློན་པ་ཕྱོགས་གཅིག་རྙིད་པ་ཕྱོགས་གཅིག་བརྒྱུས༔ ཐོད་པ་ཚར་གསུམ་སེ་རལ་ཕྲེང་བ་བྱས༔ མཁུར་ཚོས་ཀུན་ལ་རཀྟའི་ཐིག་ལེ་བྱུགས༔ ལུས་ལ་ཕག་པའི་སྤུ་སྐྱེས་ཁ་མིག་དམར༔ མགོ་སྐྲ་ཁམ་ནག་རལ་པ་འབབ་རྙིགས་སུ༔ ཕྱེད་ལ་ཐོར་ཚུགས་སྦྲུལ་རིགས་ལྔ་ཡིས་བཅིངས༔ ཡན་ལག་ཐམས་ཅད་བྱ་ཡི་སྡེར་མོ་ཅན༔ དེ་དག་སྦྲུལ་རིགས་ལྔ་ཡིས་རིམ་པར་བཅིངས༔ གང་ཟིན་ལུས་ཀྱི་ཤ་རུས་རྔམ་ཟས་བྱེད༔ ཁ་ཊྭཱཾ་ལ་སོགས་མཚོན་ཆའི་རིགས་བྱེད་འཛིན༔ གཡོན་པ་བྷནྡྷ་ཁྲག་བཀང་རྟག་ཏུ་འཐུང་༔ ཁ་ངས་ཚ་བའི་འགོ་ནད་ཐམས་ཅད་འབྱུང་༔ སྣ་ནས་གྲང་བའི་ནད་རིགས་ཐམས་ཅད་འབྱུང་༔ མིག་དང་རྣ་བ་འོག་སྒོའི་བུ་ག་ནས༔ འདུས་པའི་ནད་རིགས་བཞི་བརྒྱ་རྩ་བཞི་འབྱུང་༔ ཁྱད་པར་གནམ་ནད་ས་ཆུ་མེ་ནད་དང་༔ གག་ལྷོག་གཟེར་དང་ཕོ་གླང་ཏྲེ་ཏྲེ་ཧོ༔ མཛེ་ཕོལ་འབྲུམ་བུ་རྒྱ་རིམས་དམུ་ཆུ་དང་༔ ཤུ་བ་མེ་དཔལ་བལ་ལྡགས་གཡེན་པ་དང་༔ གནོད་པའི་འཇིགས་སྐྲག་མང་པོ་སྣ་ཚོགས་འཕྲོ༔ མཚན་ནི་མ་ཟོས་མ་ཏྲཾ་ཀ་རུར་གྲགས༔ དེ་དུས་ཡུལ་ནི་ཉི་ཤུ་རྩ་བཞི་ལ༔ བདག་པོ་འཇིགས་བྱེད་མི་བཟད་རེ་རེ་ཡོད༔ པུལླི་ར་མ་ཛཱ་ལནྡྷ་ར་དང་༔ ཨོ་རྒྱན་ཨརྦུ་ཏ་བཞི་ལྷས་བཟུང་གནས༔ གོ་དཱ་ཝ་རི་རཱ་མེ་ཤྭ་ར་དང་༔ དེ་བི་མཱ་ལ་ཉེ་གནས་དྲི་ཟས་བཟུང་༔ དེ་ལྟར་བརྒྱད་ནི་ལྷ་དང་དྲི་ཟ་ཡིས༔ ནམ་མཁའ་ནས་འོངས་བཟུང་བས་མཁའ་སྤྱོད་ཟེར༔ ཀཱམྤཱུ་ཨོ་ཊི་གནོད་སྦྱིན་གྱིས་བཟུང་ཞིང་༔ ཏྲི་ཤ་ཀུ་ནེ་དང་ནི་ཀོ་ས་ལ༔ གནོད་སྦྱིན་འཁོར་གྱིས་བཟུང་བས་ཉེ་བའི་ཞིང་༔ ཀ་ལིངྐ་དང་ལམྤཱ་ཀ་གཉིས་ནི༔ སྲིན་པོས་བཟུང་བས་ཚནྡོ་ཧ་ཞེས་བཏགས༔ ཀཱཉྩི་ཧི་མལ་སྲིན་པོའི་འཁོར་གྱིས་བཟུང་༔ ཉེ་བའི་ཚནྡོ་ཧ་སྟེ་ས་སྤྱོད་དོ༔ པྲེ་ཏ་པུ་རི་སྲི་ཧ་དེ་བ་ཏ༔ ཀླུ་ཡིས་བཟུང་བས་འདུ་བའི་གནས་སུ་བཏགས༔ སཽ་རཥ་གསེར་གླིང་ཀླུ་འཁོར་ཉེ་བའི་འདུ༔ ནཱ་གར་སིནྡྷུ་དུར་ཁྲོད་ལྷ་མིན་བཟུང་༔ མ་རོ་ཀུ་ལུ་ཏ་ནི་ལྷ་མིན་འཁོར༔ ཉེ་བའི་དུར་ཁྲོད་ས་འོག་ཀླུ་དང་ནི༔ རི་རབ་ཁོང་གསེང་ནས་ཡོངས་ལྷ་མིན་གྱིས༔ བཟུང་བས་ས་འོག་ལ་སྤྱོད་ཅེས་སུ་གྲགས༔ དེ་དག་དྲེགས་པ་འཇིག་རྟེན་བདག་པོར་གྱུར༔ ཛམྦུ་གླིང་པ་རྣམས་ཀྱི་སྲོག་འཕྲོག་ཅིང་༔ དགྲ་སྟྭ་ཏྲི་ཤུལ་ཁ་ཊྭཱཾ་མཚོན་ཆ་འཛིན༔ ལུས་ལ་དུར་ཁྲོད་ཆས་བརྒྱད་རུས་པས་བརྒྱན༔ རང་རང་ཆུང་མར་ལྷན་ཅིག་སྤྱོད་པའི་དུས༔ བདག་ཅག་རྣམས་ནི་བདེ་ཞིང་འགྲན་ཟླ་མེད༔ དཔོན་གཅིག་མེད་ན་ནང་འཐབ་ཕུང་སྟེ་འགྲོ༔ བཟའ་བ་དང་ནི་བཏུང་བའི་སྒོ་འཕྲོག་པ༔ འཐབ་པ་དང་ནི་རྩོད་པ་འགྱེད་པར་འགྱུར༔ སྟོབས་ཆེན་དབང་ཕྱུག་ཆེན་པོ་ལྷ་ཆེན་པོ༔ ཐམས་ཅད་ལས་ཀྱིས་བསྐོས་པའི་སྒམ་བུ་ཕྱྭ༔ མ་ཏྲཾ་ཀ་རུར་དཔོན་བཅོལ་འཐད་ཅེས་གླེང་༔ ངེད་རང་ཚོ་དང་ལྟ་སྤྱོད་མཐུན་པའི་ཕྱིར༔ འབྱུང་པོ་སྲོག་ཟན་ཐམས་ཅད་ཁ་འཆམས་ནས༔ ལུས་སམ་ངག་གམ་འོན་ཏེ་ཡིད་ཀྱིས་ཀྱང་༔ དཔོན་གྱི་བཀའ་ལས་ནམ་ཡང་མི་འདར་ཆེད༔ ལྷ་འདྲེ་ཡོངས་ཀྱི་དཔོན་པོ་དེ་བཞིན་ནོ༔ ཐམས་ཅད་སྒམ་བུ་ཕྱྭ་ལ་རབ་ཏུ་འདུན༔ བགེགས་རྣམས་ཉིན་དང་མཚན་དུ་རྟག་པར་ཡང་༔ མ་རུངས་དེ་ལ་སྲུང་བ་བྱེད་པར་གྱུར༔ འབྱུང་པོའི་ཚོགས་ཏེ་མི་མ་ཡིན་རྣམས་འདུ༔ འཇིག་རྟེན་ཁམས་ལ་དབང་སྒྱུར་གསོན་པོར་ཟ༔ ཉིང་གཡོག་ཡང་གཡོག་ཐམས་ཅད་བྲན་དུ་བཀོལ༔ འཇིགས་བྱེད་སྟོབས་ཆེན་ཕ་རོལ་གནོན་པ་སྟེ༔ དེ་དུས་སེམས་ཅན་ཤི་ཚད་དམྱལ་བར་འགྲོ༔ འཇིག་རྟེན་དགེ་བར་གྲགས་རྣམས་གང་ཡོད་པ༔ ད་ནི་ང་ཡིས་བརྗོད་པར་བྱའོ་ཟེར༔ ང་ལས་ཆེ་ཞིང་ལྷག་པ་སུ་ཞིག་ཡོད༔ ང་རྒྱལ་གཏུམ་པོའི་སྐད་འབྱིན་རབ་ཏུ་འཁྲུགས༔ མེ་དཔུང་འབར་ནས་རིག་པ་ངར་བསྐྱེད་དེ༔ འབྱུང་པོ་ཀུན་གྱི་དབང་ཕྱུག་ང་ཡིན་པས༔ ང་ལས་ཆེ་བའི་དབང་ཕྱུག་གཞན་ཡོད་ན༔ དེ་ཡང་ང་ཡིས་དབང་དུ་བསྡུ་བ་ཡིན༔ ཞེས་པའི་ང་རྒྱལ་ཕྱོགས་བཅུར་བསྒྲགས་པ་ཡིས༔ དེ་དུས་འགྲོ་བའི་ཤེས་བློ་རྨོངས་པར་གྱུར༔ དུས་མཚན་མ་ཡིས་བདེན་པའི་ཚིག་འདི་བརྗོད༔ སྲིན་པོ་ལངྐའི་ཡུལ་གྱི་གྲོང་ཁྱེར་མཆོག༔ ཀོ་ཀ་ཐང་དམར་གླིང་གི་བྱན་ལག་ལྗོངས༔ རི་མ་ལ་ཡ་གནམ་ལྕགས་ཡོད་པའི་རྩེར༔ སྲིན་པོའི་རྒྱལ་པོ་ལངྐའི་མངའ་བདག་ཅེས༔ སངས་རྒྱས་མར་མེ་མཛད་ཀྱི་སློབ་མ་སྟེ༔ ཁྱོད་བས་དེ་ཡི་གྲགས་པ་རྣམ་པར་འཕེལ༔ གཡུལ་འགྱེད་དགྲ་ཀུན་གྱིས་ཀྱང་མི་བརྫིའོ༔ བདེ་བར་གཉིད་ལོག་བདེ་བར་རབ་ཏུ་སད༔ དེ་སྐད་ཅེས་བརྗོད་ཐོས་མ་ཐག་ཏུ་ནི༔ འཇིགས་བྱེད་སྐད་ཅིག་གཅིག་ལ་དམག་སྡེར་བཅས༔ གཡུལ་འགྱེད་བྱ་བཞིན་མཁའ་ལ་འཕུར་ནས་སུ༔ སྲིན་ཡུལ་བྱན་ལག་ལྗོངས་པའི་རི་ལ་བབས༔ ང་རྒྱལ་གཏུམ་པོས་མ་ཏྲཾ་རཱུ་ཏྲ་བསྒྲགས༔ ལངྐའི་ཡུལ་རྣམས་ཤིགས་ཤིག་ཡོམ་ཡོམ་གྱུར༔ སྲིན་པོ་སྲིན་མོ་ཐམས་ཅད་རབ་ཏུ་སྔངས༔ རྒྱལ་པོས་དེ་ལ་ཉུལ་པོ་བཏང་བ་ཡིས༔ འཇིགས་བྱེད་དམག་སྡེ་ལྟར་མི་བཟོད་པར་མཐོང་༔ བརྗོད་གཞི་རྒྱལ་པོའི་སྙན་དུ་གསོལ་བ་ཡིས༔ ལངྐའི་བདག་པོས་མཉམ་གཞག་ཐུགས་དགོངས་བཏང་༔ རྒྱལ་པོ་ཡོན་ཏན་འཛིན་གྱི་མདོ་ལས་ཀྱང་༔ བླ་མའི་ཐུགས་དཀྲུགས་མཆེད་གྲོགས་ཡིད་བསད་པ༔ སྲུལ་པོ་གཉའ་ཕྲག་ཕྲུ་གུ་རྟོག་འདོད་ཅན༔ ངན་སོང་གསུམ་ལས་ཚེ་ནི་འཕོས་གྱུར་པས༔ ལངྐའི་བདག་པོ་འཇོམས་པར་ཐེ་ཚོམ་མེད༔ མཐར་ནི་བདེ་བར་གཤེགས་པ་མང་པོས་འདུལ༔ བླ་མེད་རྡོ་རྗེ་ཐེག་པའི་བསྟན་པ་འབྱུང་༔ ཞེས་གསུངས་པ་ཡི་ལུང་བསྟན་ཅིག་འདུག་པས༔ ཡིན་ནམ་མ་ཡིན་ཉམས་སད་བྱ་རུ་ཡོད༔ རྒྱལ་པོས་སྲིན་པོའི་དམག་དཔུང་འཇོམས་པར་གཡུལ༔ དམག་གིས་སྒམ་བུ་ཕྱྭ་ལ་བརྡུགས་པར་གྱུར༔ ང་ནི་འགྲན་གྱིས་ཟླ་མེད་གཅིག་པུར་ཆེ༔ ང་ནི་དབང་ཕྱུག་མ་ཧཱ་དེ་བ་སྟེ༔ རྒྱལ་ཆེན་རིགས་བཞི་ལ་སོགས་ང་ཡི་གཡོག༔ ལྷ་སྲིན་སྡེ་བརྒྱད་མ་ལུས་ང་ཡི་བྲན༔ འཇིག་རྟེན་ཁམས་ཀྱི་བདག་པོ་ང་ཡིན་པས༔ སུ་ཞིག་ང་དང་འགྲན་གྱིས་དོ་ཟླ་ཡོད༔ རཱུ་ཏྲ་མ་ཏྲཾ་མ་རཱུ་ཏྲ༔ ཞེས་བརྗོད་སྲིན་པོའི་ཚོགས་རྣམས་དབང་དུ་བསྡུས༔ རྒྱལ་པོས་སངས་རྒྱས་བསྟན་པ་འཕེལ་བྱའིཕྱིར༔ ཁྱོད་ལ་བསྡོས་པར་གྱུར་པ་བདག་གནོང་འགྱོད༔ ཉིད་ཀྱི་འབངས་སུ་མཆིའོ་ངོ་མི་བཟློག༔ རྒྱལ་པོ་བཙུན་མོ་འཁོར་བཅས་མ་ལུས་དང་༔ སྲིན་པོའི་རྒྱལ་ཁམས་དབང་དུ་བསྡུས་པའི་ཚེ༔ སྲིན་པོའི་དེད་དཔོན་མ་ཏྲཾ་རཱུ་ཏྲར་གྲགས༔ གང་གིས་དེ་མཐོང་ཐོས་མ་ཐག་ཏུ་འདུན༔ དེ་ནས་ཡང་ནི་ང་རྒྱལ་ཆེ་བར་ོམ༔ བདག་ལས་ཆེ་བ་གང་དག་སུ་ཞིག་ཡོད༔ རཱུ་ཏྲ་མ་ཏྲཾ་མ་རཱུ་ཏྲ༔ དུས་མཚན་མ་ཡིས་ཤེད་བསྐྱེད་ཚིག་འདི་བརྗོད༔ ཁྱོད་བས་ཆེ་བ་ལྷ་མ་ཡིན་གྱི་གནས༔ ལྷ་མིན་དེད་དཔོན་མ་ཧཱ་ཀ་རུ་ཞེས༔ མཐུ་དང་རྫུ་འཕྲུལ་ཁྱད་པར་འཕགས་པ་ཡོད༔ འཇིགས་བྱེད་ཁམས་འཁྲུགས་མེ་དཔུང་ཆེན་པོར་གྱུར༔ འཕུར་རྩལ་མ་ཏྲཾ་ཀ་རུའི་གནས་སུ་བབས༔ ལྷུང་ཐབས་གྱུར་པའི་ངད་པ་དབུགས་ཧམས་ནས༔ ཚ་གྲང་ནད་ཀྱི་མཚོན་ཆར་ཕབ་ནས་བསད༔ ལུས་ཀུན་མེ་དབལ་འབྲུམ་བུའི་ཟུག་རྔུས་གདུངས༔ ཤི་མ་གསོན་དེའི་རྐང་པ་གཡས་ནས་འཇུས༔ ཛམྦུའི་གླིང་དུ་ཀླད་བསྐོར་བསྐྱུར་བཏང་བས༔ དགེ་གནས་བརྒྱད་ཀྱི་ཡུལ་དུ་ཆགས་པར་གྱུར༔ གསང་བའི་བྱན་མོ་བུ་འཁོར་བཅས་པ་རྣམས༔ གཟའ་བརྒྱད་རྒྱུ་སྐར་ཉི་ཤུ་རྩ་བརྒྱད་དང་༔ ལོག་པར་འདྲེན་པའི་བགེགས་རིགས་ཇི་སྙེད་པ༔ གང་གི་སྐྱབས་སུ་བྲོས་ཀྱང་མ་ཐར་ཏེ༔ སླར་ཡང་ཐམས་ཅད་འཇིགས་བྱེད་དྲུང་དུ་འདུས༔ ལྷ་མིན་ཀུན་གྱིས་སྲིད་བརླག་བསྐོས་བཏབ་ནས༔ བམ་རི་ཐོད་པ་མཁར་ཞེས་བྱ་བར་འཁྲས༔ ཕོ་བྲང་བདུད་ཀྱི་རྒྱལ་མཚན་ཕུགས་སུ་བཅུགས༔ སྐྲག་པའི་བདུད་མཚོན་སྒོ་ཡི་མདུན་དུ་ཕྱར༔ འཁོར་སའི་འཕྲུལ་ཆ་མང་པོས་བསྐོར་ནས་སུ༔ རྫུ་འཕྲུལ་རི་རབ་མཛུབ་མོའི་རྩེ་ལ་བཞག༔ ཀླད་ལ་བསྐོར་ཞིང་ང་རྒྱལ་སྒྲོགས་པ་ནི༔ རཱུ་ཏྲ་མ་ཏྲཾ་མ་རཱུ་ཏྲ༔ སྲིད་པ་འདི་ན་ང་བས་སུ་ཞིག་ཆེ༔ དུས་མཚན་ཆེ་བའི་ཟླ་ཡོད་འགྲན་བཙུགས་པ༔ སུམ་ཅུ་རྩ་གསུམ་དགའ་ལྡན་ལྷ་ཡུལ་ན༔ གསེར་འདྲ་ཉན་ཐོས་དགེ་འདུན་རྣམས་ཀྱི་དབུས༔ རྣམ་འདྲེན་དམ་པ་ཏོག་དཀར་ཞེས་བྱ་བ༔ དབང་བསྐུར་ཐོབ་པ་ལྷ་རྒྱལ་ཀུན་གྱིས་བསྟོད༔ སིལ་སྙན་མང་པོ་གླུ་དབྱངས་སྒྲས་བསྐུལ་ནས༔ ཐམས་ཅད་མ་ལུས་འདུད་པ་དེ་ཆེའོ༔ དེ་སྐད་སྨྲས་པས་གཏུམ་རྔམས་ཤིན་ཏུ་ཁྲོས༔ མི་སྡུག་བཞིན་བསྡུས་གཟུགས་བསྐྱོད་གཏུམ་རྔམས་འབར༔ མི་སྙན་ཚིག་འབྱིན་སྒྲ་དང་ས་གཡོས་བཅས༔ དམ་པ་ཏོག་དཀར་ཆོས་སྟན་མཐོ་བ་ནས༔ པང་བས་འུབས་བསྡུས་མི་མཇེད་འཇིག་རྟེན་དོར༔ མཆོག་ཆེན་ཉན་ཐོས་རྣམས་ཀྱིས་ཞི་བར་སྨྲས༔ ཀྱེ་མ་ཀྱི་ཧུད་སྡིག་པ་འདི་ལྟ་བུ༔ རུང་ངམ་དགེ་བའི་ལས་ལ་འདུན་བརྗོད་པས༔ གོས་ཟུང་བཞི་གྱོན་རང་རང་བདེ་བར་འདུག༔ ཁྱོད་ཀྱི་དབང་དུ་ང་འགྱུར་ག་ལ་སྲིད༔ ང་ནི་སྟོབས་ཆེན་དཔའ་བོ་ཡིན་ནོ་ཟེར༔ དེ་ནས་དམ་པ་ཏོག་དཀར་འདའ་ཚུལ་བསྟན༔ འཁོར་རྣམས་ཀུན་ལ་མི་བྱེད་དང་བས་བརྗོད༔ ཀྱེ་མ་ང་ཡི་མཆོག་ཆེན་ཉན་ཐོས་རྣམས༔ སངས་རྒྱས་བསྟན་པ་འདི་ལ་མ་དད་པ༔ སློབ་མ་དམ་ཉམས་ཐར་པ་ནག་པོ་འདི༔ འདིས་ནི་ལྷ་དང་མི་དང་ལྷ་མ་ཡིན༔ ཡང་དག་མ་ཡིན་ཡོངས་སུ་བསྡུ་བར་འགྱུར༔ རྫོགས་སངས་རྒྱས་ལ་སྡང་སེམས་འཇིག་རྟེན་ཕུང་༔ དེ་ཡི་ཉེས་པ་ཐམས་ཅད་འཕྲོག་བྱེད་པ༔ ཐུབ་དཀའ་གཞོན་ནུ་དན་ཕག་གཉིས་ཀྱི་ནི༔ ཚེ་འདིར་རྣམ་སྨིན་གློ་བུར་བསྐྱེད་པར་འགྱུར༔ ཞི་བ་དང་ནི་རྒྱས་པས་མི་ཐུལ་བས༔ དབང་དང་དྲག་པོའི་ལས་ཀྱིས་འདུལ་བར་འགྱུར༔ འཕགས་པའི་བདེན་པར་སུ་དག་ཡིད་མི་ཆེས༔ ལུས་ཀྱང་སྦྱིན་པར་ཡིད་ལ་བྱས་ནས་ནི༔ མཁའ་ལྟར་ཡས་འབིབས་ཐབས་མང་རྒྱལ་བས་འདུལ༔ དམ་རྫས་དགེ་བར་བསྒྲུབ་པའི་མྲྀ་ཏ༔ སྨན་རྣམས་བདུད་རྩིར་བསྒྱུར་བ་འདི་ལས་འབྱུང་༔ འདི་ཉིད་རྡུལ་ཕྲན་གཅིག་ཙམ་མ་ལུས་འདུལ༔ མི་མཐུན་གཉེན་པོ་རྡོ་རྗེ་རྟ་མགོ་ཅན༔ དན་ཕག་ལག་ན་རྡོ་རྗེ་དེ་བཞིན་གཤེགས༔ དགོངས་ཏེ་ཐུབ་དཀའ་རྡོ་རྗེ་སེམས་དཔའ་ཆེ༔ རྒྱལ་བའི་ལུང་བསྟན་མཆོག་འདི་དེ་ལྟར་བལྟ༔ ཕ་རོལ་དགྲ་ནི་ཡང་དག་ཟད་པར་བྱེད༔ ང་ནི་ལྷ་མོ་སྒྱུ་འཕྲུལ་ལྷུམས་སུ་འཇུག༔ བྱང་ཆུབ་ཤིང་དྲུང་ང་ནི་མཉམ་པར་འཇོག༔ དེལྟར་དེ་དག་རྟག་འཛིན་མི་བྱེད་པར༔ དེ་བས་ཐུབ་པའི་བསྟན་པ་མཆོག་ཏུ་གསུངས༔ སེམས་ཅན་ཀུན་ལ་བདེ་བ་སྦྱིན་པར་བྱེད༔ ཛམྦུའི་གླིང་འདིར་ཡུན་རིང་གནས་པར་འགྱུར༔ སྤྱོད་པ་ཟབ་མོ་སྦྱོར་སྒྲོལ་ཕུལ་ཕྱིན་གྱིས༔ ལུས་ཀྱི་བདག་འཛིན་མ་ཏྲཾ་རཱུ་ཏྲ་བསྒྲལ༔ འཇིག་རྟེན་བདེ་དང་མི་བདེའི་རྣམ་པ་ཀུན༔ ངག་གི་བདག་འཛིན་ཨ་ཀར་ཤ་རཱུ་ཏྲ༔ ངོ་བོ་གང་ལ་གང་གི་ཅི་ཞིག་བསྟན༔ སེམས་ཀྱི་བདག་འཛིན་ཁ་ཊྭཱཾ་ག་རཱུ་ཏྲ༔ རཱུ་ཏྲའི་ངོ་བོ་ངེས་ཚིག་དབྱེ་བ་གསུངས༔ རཱུ་ཏྲ་གསང་བ་ཕྱི་ནང་ཁོ་ན་ཉིད༔ རཱུ་ཏྲ་ལྔ་བཅུ་རྩ་བརྒྱད་སྡེ་དཔུང་བཅོམ༔ ཛམྦུའི་གླིང་དེ་ཉམས་ཀྱང་དགའ་བར་འགྱུར༔ དཀོན་མཆོག་ཟབ་མོའི་ཆོས་ཀྱིས་ཡུལ་ཁམས་སྐྱོང་༔ ཆོས་བསྟན་མི་ནུབ་མྱ་ངན་ཡོངས་མི་འདའ༔ ཞེས་པའི་ཞལ་ཐེམས་བཞག་ནས་ལྷུམས་སུ་ཞུགས༔ དེ་ནས་རཱུ་ཏྲའི་མངོན་ཤེས་ཕྲ་འུས་མཐོང་༔ ལྷ་ཆེན་དགའ་རབ་དབང་ཕྱུག་གཤེད་དུ་བསྐོས༔ དགའ་ལྡན་ལྷ་ཡུལ་ཐམས་ཅད་དབང་དུ་བསྡུས༔ ཚངས་པ་བརྒྱ་བྱིན་ལྷ་ཡི་ཁ་གནོན་བཞག༔ མ་ལ་ཡ་གནས་བམ་རི་ཐོད་མཁར་བཟུང་༔ མི་ཡི་ལུས་སུ་གནས་ཚད་ཟས་སུ་ཟ༔ རྔ་གླིང་རོལ་མོའི་དབྱངས་སྒྲ་སྣ་ཚོགས་དང་༔ གླུ་དང་གར་རྣམས་བྱེད་ཅིང་ཐམས་ཅད་གནས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གདུལ་ཞིང་རཱུ་ཏྲའི་སྐྱེ་རྒྱུད་བསྟན་པའི་ལེའུ་སྟེ་ལྔ་པའོ༔ ༔
པདྨ་བཀའ་ཐང་ལེའུ་ ༦ རྟ་ཕག་གིས་རཱུ་ཏྲ་བཏུལ་བ།
དེ་ནས་རཱུ་ཏྲ་བཏུལ་ཚུལ་བཤད་པ་ནི༔ གཙང་མའི་གནས་མཆོག་འོག་མིན་ཆོས་དབྱིངས་ནས༔ སྟོན་མཆོག་དམ་པ་ལྷ་མིས་མཆོད་འོས་པ༔ ཆོས་སྐུ་ཀུན་ཏུ་བཟང་པོ་འཁོར་དང་བཅས༔ ཐུགས་རྗེའི་སྤྲུལ་པ་སྟུག་པོ་བཀོད་པ་ནས༔ ལོངས་སྐུ་རྡོ་རྗེ་འཆང་ཆེན་འཁོར་བཅས་དང་༔ ལྕང་ལོ་ཅན་གྱི་ཕོ་བྲང་དམ་པ་ནས༔ སྤྲུལ་སྐུ་ཕྱག་ན་རྡོ་རྗེ་འཁོར་བཅས་དང་༔ བཀོད་པ་ལྷུན་གྱིས་གྲུབ་པའི་གཞལ་ཡས་ནས༔ སྐུ་གསུམ་དབྱེར་མེད་ཀུན་ཏུ་འཆང་ཆེན་དང་༔ འཇིག་རྟེན་མངོན་པར་དགའ་བའི་ཞིང་ཁམས་ནས༔ སངས་རྒྱས་རྡོ་རྗེ་སེམས་དཔའ་འཁོར་བཅས་དང་༔ འཇིག་རྟེན་དཔལ་དང་ལྡན་པའི་ཞིང་ཁམས་ནས༔ སངས་རྒྱས་རིན་ཆེན་འབྱུང་གནས་འཁོར་བཅས་དང་༔ འཇིག་རྟེན་བདེ་བ་ཅན་གྱི་ཞིང་ཁམས་ནས༔ སངས་རྒྱས་སྣང་བ་མཐའ་ཡས་འཁོར་བཅས་དང་༔ འཇིག་རྟེན་བྱང་ཆུབ་བརྒྱན་པའི་ཞིང་ཁམས་ནས༔ སངས་རྒྱས་རྣམ་པར་སྣང་མཛད་འཁོར་བཅས་དང་༔ འཇིག་རྟེན་རྣམ་པར་དག་པའི་ཞིང་ཁམས་ནས༔ སངས་རྒྱས་དོན་ཡོད་གྲུབ་པ་འཁོར་བཅས་དང་༔ གཞན་ཡང་བདེ་གཤེགས་དཔག་མེད་བརྗོད་མེད་པ༔ ལོངས་སྤྱོད་རྫོགས་སྐུ་ཉི་མའི་དཀྱིལ་འཁོར་ལྟར༔ རིག་འཛིན་བཅས་པ་བཀའ་ཡི་བགྲོ་བ་མཛད༔ སངས་རྒྱས་མཐུ་ཡིས་རཱུ་ཏྲ་མ་བཏུལ་ན༔ སངས་རྒྱས་བསྟན་པ་མི་འཕེལ་ངན་འགྲོར་ལྟུང་༔ ཀུན་ཏུ་ལོག་པར་སྤྱད་པའི་ལུས་ལ་ནི༔ གཤེད་མས་མཚོན་ཆ་རྣམས་ཀྱིས་གདབ་པར་རུང་༔ སྔོན་ཆད་བྱས་པ་གང་ཡིན་མ་སྨིན་ན༔ བདེན་པ་རབ་སྟོན་རྒྱལ་བ་བརྫུན་མར་གྱུར༔ འཇིགས་པར་འགྱུར་བ་མ་ཡིན་ནོན་པར་གྱིས༔ ཞེས་གསུངས་བཀའ་བགྲོས་ཡོངས་སུ་འཆམས་པར་གྱུར༔ གང་གིས་འདུལ་བའི་ལས་འཕྲོ་སྐབས་སུ་བབ༔ བདེ་གཤེགས་རྣམས་ཀྱི་ཡེ་ཤེས་སྤྱན་གྱིས་གཟིགས༔ ཐུབ་དཀའ་གཞོན་ནུ་དན་ཕག་གདུལ་བྱར་མཁྱེན༔ བདེ་བར་གཤེགས་པས་དབང་བསྐུར་རབ་ཏུ་གནས༔ ཐུབ་དཀའ་རྡོ་རྗེ་སེམས་དཔར་སངས་རྒྱས་ནས༔ དན་ཕག་ལག་ན་རྡོ་རྗེར་གནས་གྱུར་ཏེ༔ བདེ་བར་གཤེགས་པ་ཀུན་གྱིས་བཀའ་བསྒོས་པ༔ སྤྱན་རས་གཟིགས་དབང་སྒྲོལ་མར་མཚན་རྟགས་གཟུང་༔ རྟ་གདོང་ཕག་གདོང་ཞལ་གྱིས་ནོན་པར་གྱིས༔ ལེགས་པར་གསུངས་པའི་བཀའ་བགྲོས་དུས་ལ་བབ༔ ཟབ་པ་ཆགས་བྲལ་བདུད་རྩི་འདུས་མ་བྱས༔ གསུངས་ནས་རྟ་ཕག་མ་ལ་ཡ་རྩེར་བྱོན༔ ལུས་ཀྱིས་འབར་བ་ཆེན་པོའི་གར་དགུ་བསྒྱུར༔ རྟ་སྐད་ཐེངས་གསུམ་ཕག་སྐད་ལྔ་བཏོན་པས༔ རཱུ་ཏྲ་ཐར་པ་ནག་པོས་ལན་བཏབ་པ༔ རྟ་ཕག་མགྲིན་བུ་ཆུང་ཁྱོད་ཇི་སྐད་ཟེར༔ འཇིག་རྟེན་ལྷ་དང་ལྷ་མིན་དྲེགས་པའི་ཚོགས༔ ཀུན་གྱིས་ང་ཡི་ཡོན་ཏན་བརྗོད་ཅིང་བསྔགས༔ གུས་པའི་སེམས་ཀྱིས་ང་ཡི་ཞལ་ལ་བལྟ༔ ང་ནོན་མ་ཡིན་ཁྱོད་རང་བདེ་བར་འདུག༔ སྔོན་དུས་ཟུར་གོས་པས་ཀྱང་ང་མ་ནོན༔ ཞེས་བརྗོད་ལག་པ་བསྒྲེངས་ནས་མགོ་ལ་བཏུད༔ དེ་ནས་རྟ་མགྲིན་ཐར་པའི་འོག་སྒོར་ཞུགས༔ རྟ་མགོ་སྤྱི་གཙུག་རྒྱངས་ཀྱིས་བཏོན་ནས་སུ༔ ཁོ་ཡི་རྐང་ལག་ཐམས་ཅད་བརྒྱངས་པ་ཡིས༔ ཤིན་ཏུ་བག་དྲོ་རྒྱན་ཆ་ཕྱུག་པ་དང་༔ རྟ་མགོ་ཚིལ་ཁུས་ཚོས་ནས་ལྗང་གུར་གྱུར༔ ཕག་གདོང་ཆུང་མའི་བྷ་གའི་ནང་ཞུགས་ནས༔ ཕག་མགོ་སྤྱི་བོའི་གཙུག་ཏུ་རྒྱངས་ཀྱིས་ཕྱུང་༔ ཕག་མགོ་ཚིལ་ཁུས་ཚོས་ནས་ནག་པོར་གྱུར༔ རྟ་ཕག་ཞལ་སྦྱར་དམེ་བ་བརྩེགས་པ་བསྐྲུན༔ རྟ་སྐད་ཐེངས་དྲུག་ཕག་སྐད་ལྔ་ངུར་བས༔ བདེ་བར་གཤེགས་པ་མི་རོར་བྱ་བཞིན་འཐིབས༔ ཞི་བ་ཁྲོ་བོ་ཞི་མ་ཁྲོ་ལ་སོགས༔ དཔག་ཏུ་མེད་པ་ཐིབས་ཀྱིས་འཐིབས་པར་གྱུར༔
ལུས་ཀུན་བརྒྱངས་པས་ན་ཚ་མ་བཟོད་ནས༔ ཐར་པ་ནག་པོས་འོ་དོད་སྒྲ་འབྱིན་པ༔ ཕཱ་མཱ༔ ཧུ་ཡུ༔ རྟ་ཕག་གཉིས་ཀྱིས་རཱུ་ཏྲ་ཕམ༔ སངས་རྒྱས་ཀྱིས་ནི་བདུད་རྣམས་ཕམ༔ ཆོས་མ་ཡིན་རྣམས་ཆོས་ཀྱིས་ཕམ༔ དགེ་འདུན་གྱིས་ནི་མུ་སྟེགས་ཕམ༔ དབང་པོས་ལྷ་མིན་ཕམ་པར་གྱུར༔ ལྷ་མིན་གྱིས་ནི་ཟླ་བ་ཕམ༔ ནམ་མཁའ་ལྡིང་གིས་རྒྱ་མཚོ་ཕམ༔ མེ་ཡིས་ཤིང་རྣམས་ཕམ་པར་གྱུར༔ ཆུས་ནི་མེ་ཡང་ཕམ་པར་གྱུར༔ རླུང་གིས་སྤྲིན་རྣམས་རབ་ཏུ་ཕམ༔ རྡོ་རྗེ་ཡིས་ནི་རིན་ཆེན་ཕུག༔ མདང་སུམ་རྨི་ལམ་ངན་ནོ་བྱས༔ ཅི་མཛད་མྱུར་དུ་མཛོད་ཅིག་ཅེས༔ འཇིགས་པའི་སྒྲ་ནི་རབ་ཏུ་འབྱིན་པར་བྱེད༔ ཟག་པ་ཚར་ཅིག་རྒྱ་མཚོ་ཀླུ་གནས་ལྷུང་༔ དཔག་བསམ་ཤིང་རྒྱལ་ཙནྡན་སྦྲུལ་སྙིང་སྐྱེས༔ ཤིང་གི་རྩ་བ་ཀླུ་ཡི་ཡུལ་དུ་ཟུག༔ ལོ་འདབ་ལྷ་མ་ཡིན་གྱི་ཡུལ་དུ་འཁྲིགས༔ འབྲས་བུ་ལྷ་ཡི་ཡུལ་དུ་སྨིན་པར་གྱུར༔ མིང་ནི་བདུད་རྩི་ཨ་མྲྀ་ཏ་ཞེས་བྱ༔ རྟ་ཕག་རྒྱུ་བདེ་ལམ་བདེ་འབྲས་བུ་བདེ༔ བདེ་བ་ཆེན་པོའི་རོལ་རྩེད་མཛད་ནས་སུ༔ རཱུ་ཏྲའི་ཆས་ནི་མང་ལ་ཡང་པ་རྣམས༔ དེ་དག་ཡེ་ཤེས་ཆས་སུ་བྱིན་བརླབས་ནས༔ རྟ་ཕག་ཆོས་ཀྱི་དབྱིངས་སུ་གཤེགས་པར་གྱུར༔ དབུ་གསུམ་ཡོད་པའི་རྒྱུ་མཚན་དེ་ལྟར་ཡིན༔ དུར་ཁྲོད་ཆས་བརྒྱད་དཔལ་གྱི་ཆས་བརྒྱད་དང་༔ ལྷ་ལ་གཤོག་པ་ཡོད་པ་དེ་ལྟར་ཡིན༔ དཔེར་ན་དམག་བརྒྱབ་མི་བསད་ནོར་ཕྲོགས་མཚོན༔ དེ་ནས་ཕྱག་ན་རྡོ་རྗེས་སྤྲུལ་པ་བཀྱེ༔ རཱུ་ཏྲས་ཀྱང་ནི་སྤྲུལ་པ་བཀྱེ་བར་གྱུར༔ སྟོབས་ཆེན་མཐུ་བསྐྱེད་རྫུ་འཕྲུལ་བཀྱེ་བ་ལས༔ མགོ་ནི་གསུམ་གསུམ་དགུ་རུ་སྤྲུལ་པ་ལ༔ དེ་ནས་གསང་བདག་ཕྱག་ན་རྡོ་རྗེ་ཡིས༔ སྟོབས་ཆེན་དགུ་ཡི་རྫུ་འཕྲུལ་བཀྱེ་ནས་སུ༔ གཟས་པོའི་ནམ་མཁའ་ཐམས་ཅད་ཡོངས་སུ་བཀང་༔ རཱུ་ཏྲ་ས་བརྒྱད་ནོན་པའི་སེམས་དཔའ་ལ༔ རྣམ་པ་མང་པོའི་འདུལ་ཐབས་མཁས་པ་ཡིས༔ ལུས་ལ་བདེ་བར་གཤེགས་པའི་ཕོ་བྲང་བཏབ༔ རཱུ་ཏྲས་མ་བཟོད་ཆོ་ངེས་བཏབ་པ་ནི༔ ཕྱོགས་བཅུ་ཀུན་ནས་རྣམ་པར་རྒྱུག༔ ཐོད་མཁར་སྒོ་འགྲམ་གཡས་གཡོན་གྱི༔ བཟའ་ཤིང་ར་བའི་ནགས་ཚལ་ན༔ གནོད་སྦྱིན་སྲིན་པོ་འབྱུང་པོའི་ཚོགས༔ བྱེ་བ་སྟོང་ཕྲག་བརྒྱ་མཆིས་པ༔ རེམ་ཞིག་མྱུར་བར་ད་ལྟ་རེམ༔ འཁོར་གནས་ཡུལ་ཆེན་ཉི་ཤུ་རྩ་བཞི་ཡི༔ རཱུ་ཏྲའི་ཆ་འཛིན་བྱེ་བ་དུང་ཕྱུར་དམག༔ ཅི་བགྱིའི་བཀའ་ཉན་ཕོ་ཉར་བསྔགས་པའི་འཁོར༔ དཔག་ཏུ་མེད་པ་ཕྱོགས་མཚམས་ཐམས་ཅད་ནས༔ བར་སྣང་ས་གཞི་ཀུན་འཁྲིགས་བསོ་སྒྲ་སྒྲོགས༔ ཨམ་གཙིགས་རུ་ལུ་རུ་ལུའི་སྒྲ་སྒྲོག་ཅིང་༔ ལག་གི་མཚོན་ཆ་ཐམས་ཅད་དུས་གཅིག་གདེངས༔ སྲས་མཆོག་དམེ་བ་བརྩེགས་པས་ནང་དབྱེན་བྱས༔ དེ་ནས་རྡོ་རྗེ་འཛིན་པས་ཁྲོ་བོ་བཅུར༔ ཕུར་པ་རེ་བསྐུར་སྒྲོལ་བར་མངའ་གསོལ་ནས༔ རྟ་མགྲིན་རྟ་སྐད་ཐེངས་གསུམ་འདུར་གླུ་ཡིས༔ རཱུ་ཏྲའི་དམག་དཔུང་ངུ་འབོད་རབ་ཏུ་ངུ་༔ གནས་པའི་ཡུལ་དང་ལུས་ཀྱི་རྒྱན་ཆ་དང་༔ རང་རང་སྲོག་སྙིང་ཕྱག་མཚན་ཕྱུང་ནས་ཕུལ༔ དེ་ནས་ཐར་པ་ནག་པོ་ཉམ་ཐག་དུལ༔ སངས་རྒྱས་སྤྱོད་ཡུལ་ཁྱོད་ལ་ཕྱག་འཚལ་ལོ༔ རྣམ་སྨིན་བསྐྱེད་མཛད་ཁྱོད་ལ་ཕྱག་འཚལ་ལོ༔ བདག་གི་ལུས་རྣམས་འབྲས་བུར་སྤྱོད་གྱུར་ཅིག༔ སྔ་མ་གང་བྱས་འདི་ལ་སྨིན་གྱིས་ལྟོས༔ ཕྱི་མ་གང་ཡིན་ད་ལྟའི་ལས་ཀྱིས་བྱེད༔ ལས་འདི་ལུས་དང་གྲིབ་མ་བཞིན་དུ་འགྲོགས༔ རང་གིས་བྱས་པ་རང་གིས་མྱོང་བ་ཡིན༔ ཡི་ཆད་འགྱོད་ཀྱང་ལས་དབང་བཅོས་སུ་མེད༔ ལས་ཀྱིས་མནར་བའི་སྐྱེ་བོ་བདག་འདྲ་བ༔ ལུས་འདི་གདན་དུ་འབུལ་བས་བཞེས་སུ་གསོལ༔ དེ་ནས་དབང་ཕྱུག་མ་སོགས་འཁོར་རྣམས་ཀྱིས༔ དབུས་ལ་མཆིས་པའི་སྐལ་པ་མེད༔ དཀྱིལ་འཁོར་མཐའ་ལ་ངེད་རྣམས་ཞོག༔ ཕུད་ལ་འཚལ་བའི་སྐལ་བ་མེད༔ ལྷག་མ་ཞལ་ཆབ་ངེད་ལ་ཞུ༔ ད་ནས་འབངས་ཡིན་དོ་མི་བསྡོ༔ ཅི་བགྱིའི་བཀའ་ཉན་ངེད་ཀྱིས་བསྒྲུབ༔ མ་བྱམས་བུ་ལ་འཁྲིལ་བ་ལྟར༔ དམ་ལ་ངེས་པར་ཉེ་བར་བྱ༔ ཞེས་པའི་ཁས་བླངས་མནའ་བོར་རོ༔ དེ་ནས་གསང་བའི་བདག་པོ་ཡིས༔ ལུས་ངག་ཡིད་གསུམ་བྱིན་བརླབས་ནས༔ དམ་བསྲེས་དམ་ཆུ་བླུད་ནས་ཀྱང་༔ གནས་གསུམ་དམ་ཚིག་རྡོ་རྗེ་བཞག༔ བཀའ་ལས་མི་འདར་དམ་ཚིག་བསྒྲགས༔ གསང་མཚན་མ་ཧཱ་ཀཱ་ལར་བཏགས༔ རྡོ་རྗེ་ཐེག་པའི་གྲལ་ལ་བཞག༔ མ་འོངས་ཆོས་སྲུངས་གཉེར་བྱང་གཏད༔ དེ་ནས་བཀོད་པ་ལྷུན་གྲུབ་ཏུ༔ སངས་རྒྱས་ཐོབ་པར་ལུང་བསྟན་ཏོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྟ་ཕག་གིས་རཱུ་ཏྲ་བཏུལ་བའི་ལེའུ་སྟེ་དྲུག་པའོ༔ ༔
པདྨ་བཀའ་ཐང་ལེའུ་ ༧ སངས་རྒྱས་སྟོང་རྩ་གཉིས་ལ་དབང་བསྐུར་ལུང་བསྟན་པ།
དེ་ནས་སྤྲུལ་སྐུའི་བསྟན་པ་གངས་ཆེན་མཚོ༔ སངས་རྒྱས་སྟོང་རྩར་དབང་བཅུ་བསྐུར་ཚུལ་ནི༔ འཇིག་རྟེན་ཞིང་ཁམས་རྣམ་པར་བརྒྱན་པ་ཞེས༔ རབ་ཏུ་དགའ་བ་མཛེས་པའི་གླིང་བཞི་པ༔ འབྱོར་པས་ལེགས་པ་ཡངས་ཤིང་ཐ་གྲུ་ཆེ༔ གླིང་བཞི་རེ་རེ་ལ་ཡང་དཔག་ཚད་ནི༔ བརྒྱད་ཁྲི་བཞི་སྟོང་ཡོད་པའི་ཞིང་ཁམས་ན༔ དེ་དབུས་བསོད་ནམས་ཕུང་པོའི་ཕོ་བྲང་ནི༔ རྣམ་པར་དག་པ་ཅན་ཞེས་བྱ་བ་ཡོད༔ ཡངས་ཤིང་རྒྱ་ཆེ་སྐྱེད་མོས་ཚལ་ཁྲིས་བརྒྱན༔ དེ་ན་འཁོར་ལོས་སྒྱུར་བའི་རྒྱལ་པོ་ནི༔ ཡུལ་འཁོར་སྲུང་ཞེས་བྱ་བ་བདེ་བར་བཞུགས༔ རྒྱལ་སྲིད་རིན་ཆེན་སྣ་བདུན་དག་དང་ལྡན༔ གླིང་བཞིར་དབང་སྒྱུར་བཙུན་མོ་བདུན་འབུམ་ཡོད༔ བཙུན་མོ་རྣམས་ལ་བུ་ནི་སྟོང་ཚོ་གཅིག༔ མཚན་ནི་བཟང་པོ་སུམ་ཅུ་གཉིས་ཀྱིས་བརྒྱན༔ དེ་ནས་རྒྱལ་པོ་ཆེན་པོ་ཡུལ་འཁོར་སྲུང་༔ ཟླ་བ་ཉ་ཚེ་མེ་ཏོག་སྣ་ཚོགས་ཀྱིས༔ གང་བའི་སྐྱེད་མོས་ཚལ་གྱི་སར་སོང་ནས༔ རབ་ཏུ་རྩེ་ཞིང་དགའ་མགུར་སྤྱོད་པར་གྱུར༔ བཙུན་མོ་དམ་པ་མ་སྨད་མ་ཞེས་དང་༔ བཙུན་མོ་དཔེ་མེད་མ་ཞེས་བྱ་བ་གཉིས༔ རྫིང་བུ་དགའ་བ་ཞེས་བྱར་ཁྲུས་བྱས་ཏེ༔ ལུས་ལ་སྤོས་ཆུས་བགོས་ནས་སེང་གེའི་ཁྲི༔ པདྨའི་འབྱུང་གནས་བཟང་པོ་ལ་འདུག་སྟེ༔ དེ་དག་གཉིས་ཀྱི་པང་དུ་རྒྱལ་བུ་ནི༔ གཞོན་ནུ་གཟུགས་བཟང་མཛེས་པ་ལྟ་ན་སྡུག༔ ཁ་དོག་བཟང་པོ་རྒྱས་པ་ཆོག་མི་ཤེས༔ གཉིས་ནི་སྐྱིལ་མོ་ཀྲུང་བཅས་བརྫུས་ཏེ་བྱུང་༔ དེ་ནས་སྐད་ཅིག་སྟེང་གི་བར་སྣང་ལས༔ ཁྱེའུ་འདི་ཉིད་ཆོས་ཀྱི་སེམས་དཔའོ༔ དཔེ་མེད་མ་བུ་ཆོས་ཀྱི་བློ་གྲོས་སོ༔ ཞེས་པ་ལྷ་རྣམས་དུས་གཅིག་སྒྲ་འབྱིན་ཏོ༔ དེ་ནས་ཁྱེའུ་གཉིས་ཀྱིས་ཚིགས་བཅད་པ༔ གང་དག་བྱང་ཆུབ་ཏུ་ནི་སེམས་བསྐྱེད་ཅིང་༔ འཇིག་རྟེན་མགོན་པོ་ཡུལ་དུ་བྱུང་བ་ལ༔ རང་ཏུ་དང་བའི་སེམས་ཀྱིས་ཕྱག་འཚལ་བ༔ དེ་དག་རྙེད་པ་རབ་རྙེད་གྲོགས་པོ་དག༔ དགེ་བའི་རྩ་བ་བསྐྱེད་ནས་ཛམ་གླིང་བདེ༔ སེམས་ཅན་ཀུན་ལ་ཕན་བྱེད་ཚན་པོ་ཆེ༔ མཐོ་རིས་དག་ན་རིན་ཅེན་མཆོག་ཡོད་པ༔ མི་ཡི་མཆོག་དང་འདིར་ནི་མཚུངས་པ་མེད༔ ཅེས་པ་ལ་སོགས་ཚིགས་བཅད་མང་གསུངས་ནས༔ དེ་ནས་མ་ཡི་པང་ནས་བབས་ནས་སུ༔ རྒྱལ་པོ་ཡུལ་འཁོར་སྲུང་གི་དྲུང་སོང་སྟེ༔ རྐང་པར་ཕྱག་བྱས་ཐལ་མོ་སྦྱར་ནས་འདུག༔ ཡབ་གཅིག་བདག་གི་མཆིད་འདི་གསན་དུ་གསོལ༔ བསྐལ་པ་བྱེ་བར་ཆོས་རྙེད་རབ་ཏུ་དཀའ༔ དེ་རྙེད་ནས་ནི་བྱང་ཆུབ་མ་ཐོབ་པར༔ མཁས་པ་དག་ནི་གཞར་ཡང་མི་གཏོང་ངོ་༔ བདུད་རྩི་ཞི་བ་འདུས་མ་བྱས་པ་ཡི༔ ཆོས་དེ་དང་ནི་གང་ཡང་མཚུངས་པ་མེད༔ སེམས་ཅན་ཐམས་ཅད་རབ་ཏུ་དགའ་བར་འགྱུར༔ དེ་བས་དམ་ཆོས་རིན་ཅེན་མཆོག་ཏུ་གསུངས༔ ཞེས་པ་ལ་སོགས་ཚིགས་བཅད་མང་དུ་གསུངས༔ དེ་ནས་ཆོས་ཀྱི་རྒྱལ་པོ་ཡུལ་འཁོར་སྲུང་༔ དབེན་པར་སོང་སྟེ་གསང་སྔགས་རྣལ་འབྱོར་པ༔ ནུས་ལྡན་རྡོ་རྗེ་ཞེས་བྱའི་བླ་མའི་དྲུང་༔ རྒྱལ་པོས་ཐལ་མོ་སྦྱར་བྱས་འདུག་ནས་སུ༔ ཆོས་ཀྱི་ཤུགས་ཀྱིས་མིག་ནས་མཆི་མ་ཕྱུང་༔ སྐྱེ་རྒུ་རྣམས་ལ་རྟག་ཏུ་བྱམས་བྱེད་པ༔ བཙུན་མོའི་ཕག་ན་ལྷ་ཕྲུག་བརྫུས་སྐྱེས་པའི༔ འཇིགས་པ་ཐམས་ཅད་བདག་ལ་མེད་པར་གྱིས༔ ཚིགས་སུ་བཅད་པ་དེ་དག་གསོལ་བ་དང་༔ ནུས་ལྡན་རྡོ་རྗེས་རྒྱལ་པོའི་སྙན་གསོལ་བ༔ ཆོས་བསྟན་རྣམ་པ་སྣ་ཚོགས་རྒྱ་ཆེ་བ༔ ཇི་ལྟར་སངས་རྒྱས་སྟོང་སྐུ་མང་པོ་ཡི༔ རྟགས་དང་མཚན་མ་ཤིན་ཏུ་བཀྲ་ཤིས་པ༔ རིན་ཅེན་བུམ་པར་ཁྱེའུའི་མིང་བཅུག་སྟེ༔ དཀྱིལ་འཁོར་དབུས་བཞུགས་བསྒྲུབས་པས་ཐམས་ཅད་འགྲུབ༔ ཅེས་གསུངས་དེ་ནས་རྒྱལ་པོ་ཡུལ་འཁོར་སྲུང་༔ བཀོད་པ་ཆེན་པོའི་ཁང་པ་བརྩེགས་པའི་དབུས༔ སེང་ཁྲི་པདྨའི་འབྱུང་གནས་བཟང་པོར་འདུག༔ ནང་དུ་ཡང་དག་འཇོག་ཅིང་འདི་ལྟར་བསམ༔ བདག་གི་གཞོན་ནུ་འདི་དག་ཐམས་ཅད་ནི༔ བླ་མེད་ཡང་དག་ཞུགས་པ་ཤ་སྟག་སྟེ༔ གཞོན་ནུ་འདི་དག་ཐམས་ཅད་ནང་ནས་ནི༔ ཐོག་མར་སངས་རྒྱས་གང་འགྲོ་བརྟག་གོ་སྙམ༔ རིན་ཅེན་སྣ་བདུན་བུམ་པ་བྱེད་དུ་བཅུག༔ བྱི་དོར་ལེགས་པར་བྱས་ཤིང་འོ་མ་དང་༔ རཏྣ་འབྲུ་དང་མེ་ཏོག་དྲི་བཟང་བླུགས༔ གཞོན་ནུ་དེ་དག་མིང་བྲིས་བུམ་པར་བཅུག༔ ཁ་རྒྱན་མགུལ་ཆིངས་རིན་ཅེན་སྣ་ཚོགས་དང་༔ པདྨ་སྣ་ཚོགས་ཡིད་བཞིན་ནོར་བུས་བརྒྱན༔ བལྟ་ན་སྡུག་བྱས་པདྨའི་སྟེང་དུ་བཞག༔ བཀའ་རྣམས་འདུས་པའི་དཀྱིལ་འཁོར་ཞལ་ཕྱེ་ནས༔ ནུས་ལྡན་རྡོ་རྗེས་ཞག་བདུན་བར་དུ་བསྒྲུབས༔ ལྷ་ཡི་མེ་ཏོག་སྤོས་དང་ཕྱེ་མ་དང་༔ བདུག་པ་དང་ནི་བྱུག་པའི་རིགས་རྣམས་དང་༔ རོལ་མོ་སིལ་སྙན་རྣམས་ཀྱིས་ཞག་བདུན་མཆོད༔ རྒྱལ་པོ་བཙུན་མོ་བུ་སྟོང་འཁོར་དང་བཅས༔ རྫུས་སྐྱེས་གཉིས་ཀྱི་མདུན་དུ་བུམ་པ་བཞག༔ དེ་ནས་ནུས་ལྡན་རྡོ་རྗེས་དབང་བསྐུར་བ༔ སྤྱི་དབང་ཉེར་ལྔ་བྱེ་བྲག་དབང་བཅུ་དང་༔ སྒོས་དབང་དབང་གི་ཆུ་བོ་བཞི་ཕབ་བསྐུར༔ ལུང་བསྟན་བུམ་པའི་ནང་ནས་མིང་ཕྱུང་སྟེ༔ ཐོག་མར་གཞོན་ནུ་རྣམ་དག་བློ་གྲོས་བྱུང་༔
མིང་དེ་བྱུང་མ་ཐག་ཏུ་ས་ཆེན་གཡོས༔ བཙུན་མོའི་འཁོར་གྱི་ལག་གི་སིལ་སྙན་དང་༔ རོལ་མོ་ཐམས་ཅད་མ་དཀྲོལ་སྒྲ་འབྱིན་གྱུར༔ དེ་ནས་ནུས་ལྡན་ཐོག་མར་མིང་བྱུང་བའི༔ གཞོན་ནུ་རྣམ་དག་བློ་གྲོས་བྱ་བ་དེ༔ སངས་རྒྱས་འཁོར་བ་འཇིག་ཏུ་ལུང་བསྟན་གྱུར༔ དེ་འོག་གཞོན་ནུ་རྣམ་དག་རྒྱལ་ཞེས་བྱུང་༔ དེ་ནི་སངས་རྒྱས་གསེར་ཐུབ་ལུང་ཡང་བསྟན༔ དེ་འོག་དབང་པོ་ཞི་བ་ཞེས་བྱ་བྱུང་༔ སངས་རྒྱས་འོད་སྲུངས་ཞེས་བྱར་ལུང་ནི་བསྟན༔ དེ་འོག་གཞོན་ནུ་དོན་ནི་གྲུབ་པ་བྱུང་༔ སངས་རྒྱས་ཤཱཀྱ་ཐུབ་པར་ལུང་ཡང་བསྟན༔ དེ་འོག་གཞོན་ནུ་སྐ་རགས་ཅན་ཞེས་བྱུང་༔ དེ་ནི་བྱམས་པ་ཞེས་བྱར་ལུང་ཡང་བསྟན༔ དེ་འོག་གཞོན་ནུ་མཆོག་གི་བློ་གྲོས་བྱུང་༔ དེ་ནི་སངས་རྒྱས་སེང་གེར་ལུང་ཡང་བསྟན༔ དེ་ནས་ཐ་ཆུང་བློ་མཐའ་ཡས་མིང་བྱུང་༔ དེ་ནི་མོས་པ་ཞེས་བྱར་ལུང་ཡང་བསྟན༔ དེར་ནི་སྣག་གི་གཉེན་མཚམས་སྤུན་ན་རེ༔ བདག་ཅག་རྣམས་ཀྱིས་སེམས་ཅན་ཡོངས་སྨིན་བྱས༔ དེ་ཡི་འོག་ཏུ་ཁྱོད་ཀྱིས་ཅི་བྱར་ཡོད༔ ཅེས་བརྗོད་བློ་མཐའ་ཡས་ཀྱིས་ལན་སྨྲས་པ༔ སངས་རྒྱས་རྣམས་ནི་ནམ་མཁའ་མཚུངས་ཤིང་འདྲ༔ བདག་ཡིད་སེམས་ཅན་ཟད་པ་མེད་སྙམ་བགྱིད༔ ཚུལ་ཁྲིམས་དག་པས་སྨོན་ལམ་འདི་དག་འགྱུར༔ བདག་གི་སྨོན་ལམ་ཅི་འདྲ་འདིར་གསོན་ཅིག༔ ཁྱོད་ཀྱི་ཚེ་ཚད་ཅི་ཙམ་བདག་ལ་བསྡོམས༔ ཆོས་ཀྱི་རྒྱལ་པོ་ཇི་སྙེད་ཀུན་བསྡོམས་པ༔ ཐམས་ཅད་བསྡོམས་པ་དེ་དག་བདག་ཚེར་གྱུར༔ ཞེས་པ་སྨྲས་མ་ཐག་ཏུ་ལྷ་རྣམས་ཀྱིས༔ ཁྱོད་ཀྱི་བསམ་པ་རྗོགས་པར་གྱུར་ཅིག་བརྗོད༔ སངས་རྒྱས་སྟོང་དུ་གཅིག་གིས་མ་ཚང་བ༔ དེ་བཞིན་གཤེགས་པ་མོས་པས་བྱེད་པར་འགྱུར༔ དེ་ནས་རྫུས་སྐྱེས་གཉིས་ཀྱི་མིང་མ་བྱུང་༔ ཁོང་རང་གཉིས་ལ་ཇི་ལྟར་ཡིན་ཞེས་དྲིས༔ གཞོན་ནུ་ཆོས་ཀྱི་སེམས་དཔའི་ཞལ་ན་རེ༔ ཕུ་བོ་སྟོང་གི་བར་ཆད་བསྲུང་བ་ཡི༔ སྡུད་པ་པོ་ནི་ལག་ན་རྡོ་རྗེ་ཡིན༔ གཞོན་ནུ་ཆོས་ཀྱི་བློ་གྲོས་ཞལ་ན་རེ༔ ཕུ་བོ་སྟོང་གི་ཞུ་བ་པོ་བྱེད་པ༔ ཚངས་པའི་དབང་པོ་ཡིད་བཞིན་དེ་ཡིན་ནོ༔ དེ་ནས་གཞོན་ནུ་སྟོང་པོ་དེ་དག་གིས༔ ཆོས་ཀྱི་སེམས་དཔའ་ཆོས་ཀྱི་བློ་གྲོས་ལ༔ རིགས་ཀྱི་བུ་གཉིས་སྨོན་ལམ་ཇི་ལྟར་བཏབ༔ དེ་ལན་ཆོས་ཀྱི་སེམས་དཔས་སྨྲས་པ་ནི༔ བདག་གིས་ཁྱོད་རྣམས་བར་ཆད་བསྲུང་བ་དང་༔ ཕྱི་ནང་སངས་རྒྱས་ཆོས་རྣམས་ཉན་པ་དང་༔ ལག་ན་རྡོ་རྗེར་སྟོན་པར་སྨོན་ལམ་བཏབ༔ དེ་ནས་ཆོས་ཀྱི་བློ་གྲོས་ཀྱིས་སྨྲས་པ༔ བདག་གིས་ཁྱོད་རྣམས་བྱང་ཆུབ་ཐོབ་པའི་ཚེ༔ ཆོས་ཀྱི་འཁོར་ལོ་བསྐོར་བར་བསྐུལ་བ་སྟེ༔ ཆོས་བསྐུལ་ཆོས་ཉན་བྱེད་པར་སྨོན་ལམ་བཏབ༔ ཅེས་སྨྲས་སོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྣལ་འབྱོར་པ་ནུས་ལྡན་རྡོ་རྗེས་སངས་རྒྱས་སྟོང་རྩ་གཉིས་ལ་དབང་བསྐུར་ལུང་བསྟན་པའི་ལེའུ་སྟེ་བདུན་པའོ༔ ༔
པདྨ་བཀའ་ཐང་ལེའུ་ ༨ བསྟན་པ་གཉིས་ལྡན་བྱུང་ཚུལ་བསྟན་པ།
དེ་ནས་སངས་རྒྱས་བསྟན་པ་འཕེལ་བྱའི་ཕྱིར༔ པད་འབྱུང་རྫོགས་པའི་སངས་རྒྱས་བཀའ་བཞིན་དུ༔ མདོ་ལྟར་འཛམ་གླིང་བྱེ་བ་ཕྲག་བརྒྱ་སྟེ༔ སྔགས་ལྟར་འཛམ་གླིང་བྱེ་བ་ཕྲག་ས་ཡ༔ དེ་བཞིན་སྒྲ་མི་སྙན་དང་ཤར་ནུབ་པོ༔ བསྟན་པ་གཉིས་ལྡན་ཆགས་པ་ཛམྦུའི་གླིང་༔ བཀྲ་ཤིས་རབ་རྫོགས་ལས་ཀྱི་ས་པ་འདིར༔ རིགས་ལྔ་བྱོན་རྟིང་མུན་བསྐལ་ལྔ་བརྒྱ་བྱུང་༔ དེ་ནས་བསྐལ་པ་རྫོགས་ལྡན་བྱ་བ་ལ༔ མང་པོས་བཀུར་བའི་ཡར་དེད་ལྷ་དགུ་བྱུང་༔ སྤྱིར་གྱི་འཁོར་ལོས་སྒྱུར་བའི་རྒྱལ་པོ་དང་༔ སྤྲུལ་སྐུའི་བསྟན་པའི་བདག་པོས་སངས་རྒྱས་གཅིག༔ ལོངས་སྐུའི་བསྟན་པ་འཛིན་པའི་བརྫུས་སྐྱེས་གཅིག༔ གཅན་གཟན་རྒྱལ་པོ་གངས་ཀྱི་སེང་གེ་གཅིག༔ འདབ་ཆགས་རྒྱལ་པོ་མཁའ་ལྡིང་ཁྱུང་ཆེན་གཅིག༔ མེ་ཏོག་རྒྱལ་པོ་ཨུ་དུམྺཱ་ར་གཅིག༔ འདི་དག་དུས་མཚུངས་གཅིག་ཏུ་བྱུང་བ་ལ༔ རྒྱལ་པོ་འདི་དུས་གང་ཡང་མ་བྱོན་ཏེ༔ ཆོས་ཀྱིས་སྐྱེ་རྒུ་མགུ་བར་བྱེད་ཅིང་སྐྱོང་༔ ཚུལ་ཁྲིམས་དང་ནི་ཤེས་རབ་ཉམས་བླངས་པས༔ མི་ཡི་རྒྱལ་པོ་ཞེས་སུ་གྲགས་པའོ༔ དེ་ནས་མི་རབས་ལྔ་ནས་བསྟན་གཉིས་འབྲེལ༔ ཀུན་གྱི་སྤྱོད་ཡུལ་བསྟན་པ་གཉིས་ལྡན་དུས༔ འཁོར་ལོས་སྒྱུར་བའི་རྒྱལ་པོར་གྱུར་པའི་མིང་༔ ཏ་ལའི་རྐང་ལ་བུ་ནི་སྤྱི་བོ་སྐྱེས༔ གདུང་བརྒྱུད་བརྒྱ་དང་ཉི་ཤུ་རྩ་དགུ་ནི༔ སྤྲུལ་སྐུའི་བསྟན་པ་སྤྱོད་ཞིབ་རེ་དོགས་ཀྱིས༔ བྱང་ཆུབ་དོན་གཉེར་ཕར་ཕྱིན་བདེ་བར་འགྲོ༔ ངོ་བོ་བདག་པོ་སངས་རྒྱས་མར་མེ་མཛད༔ འཁོར་བ་འཇིག་དང་རབ་མཐོང་གཤེགས་པ་དང་༔ བདེ་མཛད་དོན་གཟིགས་རྒྱལ་ཞེས་བྱ་བ་དང་༔ རིམ་པར་སྐར་རྒྱལ་བྱོན་ནས་ཆོས་འཁོར་བསྐོར༔ ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ཡང་༔ བསྡུ་ན་གསུང་རབ་ཡན་ལག་བཅུ་གཉིས་ཏེ༔ དེ་ཡང་བསྡུ་ན་སྡེ་སྣོད་གསུམ་ལ་སོགས༔ གདུལ་བྱའི་ཞིང་ཁམས་མི་མཇེད་འཇིག་རྟེན་ཁམས༔ ལོངས་སྐུའི་བསྟན་པ་འབྲས་བུ་ཁོ་ན་ཉིད༔ སྤང་བླང་མེད་པས་ངེས་པ་རྙེད་པའི་ཆོས༔ གསང་སྔགས་སྨྲ་བ་པདྨའི་བླ་ཞེས་དང་༔ གུ་རུ་གྲགས་པའི་བླ་ཞེས་བྱ་བ་ཡིས༔ རྒྱལ་པོ་དགྲ་འདུལ་ཡན་ཆད་གདུལ་བྱར་བསྒྱུར༔ རྒྱུད་སྡེ་ཕྱི་ནང་བསམ་གྱིས་མི་ཁྱབ་དང་༔ བརྒྱ་ཕྲག་བཅུའམ་སྟོང་ཕྲག་ཉི་ཤུ་ལྔ༔ ཏནྟྲ་སྡེ་ནི་བཅོ་བརྒྱད་ལུང་མདོ་བདུན༔ བསྡུ་ན་ཡོ་ག་རྣམ་པ་གསུམ་དུ་འདུས༔ གདུལ་བྱའི་ཞིང་ཁམས་ནམ་མཁས་གར་ཁྱབ་བོ༔ དེ་ནས་བསྐལ་པ་གསུམ་ལྡན་དུས་ཀྱི་ཚེ༔ མ་ག་དྷ་ཡི་གྲོང་ཁྱེར་སྤོས་ལྡན་ན༔ རྒྱལ་པོ་ལག་བརྐྱང་བུ་ཚ་ཡང་ཚ་ནི༔ རྒྱལ་བརྒྱུད་འབུམ་དང་བདུན་ཁྲི་བཞི་སྟོང་ནི༔ བདེ་སྐྱིད་རྒྱ་མཚོ་བསྟན་པ་གཉིས་ལྡན་གྱིས༔ སེམས་ཅན་ལས་ལས་སྐྱེས་པའི་སྡུག་བསྔལ་ཞི༔ མི་དགེ་བཅུ་ནུབ་སངས་རྒྱས་རྣམ་པར་གཟིགས༔ གཙུག་ཏོར་ཅན་དང་ཐམས་ཅད་སྐྱོབ་པ་དང་༔ ལོག་པར་དད་སེལ་གསེར་ཐུབ་སངས་རྒྱས་ལྔས༔ ཤེས་རབ་ཕར་ཕྱིན་སྡེ་སྣོད་གསུམ་གྱིས་བཏུལ༔ ལྟ་སྤྱོད་སྦྱོར་སྒྲོལ་གཉིས་སུ་ལ་དོར་བ༔ དབང་པོ་རབ་ནི་ཚེ་གཅིག་བདེ་འགྲོར་འགྲོ༔ བདེ་སྐྱོང་རྡོ་རྗེ་ཟག་མེད་འོད་གསལ་དང་༔ ཀཱ་ལི་འདུལ་སྐྱོང་ས་མ་དྷི་འཆང་དང་༔ གུ་རུ་ཡོན་ཏན་བློ་ལྡན་བླ་མེད་གསུང་༔ ཞི་བ་རྡོ་རྗེ་དབྱིངས་དང་བཀའ་འདུས་དང་༔ བདེ་གཤེགས་འདུས་པ་བླ་མེད་དོན་རྫོགས་དང་༔ མ་གཤིན་ཕུར་པ་སྒྱུ་འཕྲུལ་ཞི་ཁྲོས་བཏུལ༔ དེ་ནས་གྲོང་ཁྱེར་ཀུན་ཏུ་སྣང་ཞེས་པར༔ རྒྱལ་པོ་ཚངས་བྱིན་བུ་ཚ་ཡང་ཚ་ནི༔ བདུན་འབུམ་དགུ་ཁྲི་བརྒྱ་དང་བཞི་བཅུ་བརྒྱད༔ མི་རྣམས་ལ་ནི་ཆོས་སྟོན་འོད་སྲུང་གིས༔ ཚུལ་ཁྲིམས་བསླབ་པ་ཏིང་འཛིན་བསླབ་པ་དང་༔ ཤེས་རབ་བསླབ་པ་གསུམ་གྱིས་ལུས་ཅན་བཏུལ༔ གུ་རུ་ཐབས་ཤེས་དབྱིངས་སྦྱོར་བྱ་བ་བྱོན༔ རྒྱལ་པོ་རྣ་བ་ཅན་ནི་ཡན་ཆད་དུ༔ གསང་སྔགས་བླ་མེད་རྡོ་རྗེ་ཐེག་པ་གསུངས༔ དེ་ནས་རྩོད་ལྡན་དུས་ཀྱི་ཐ་མ་ལ༔ ཐབས་ཤེས་དབྱིངས་སྦྱོར་ཚེ་ཡི་དུས་བྱས་ནས༔
ཉི་འོག་རྒྱལ་པོ་རྣ་བ་ཅན་གྱི་བུ༔ གོའུ་ཏ་མ་ཞེས་བྱར་སྐྱེ་བ་བླངས༔ ཡབ་ནི་རྒྱལ་པོར་ཞུ་བ་བྱས་ནས་སུ༔ དྲང་སྲོང་མདོག་ནག་ཅེས་བྱར་རབ་ཏུ་བྱུང་༔ ཡུལ་གྲུ་འཛིན་གྱི་སྨད་འཚོང་བཟང་མོ་དང་༔ སྐྱེས་བུ་གཡོན་ཅན་པདྨའི་རྩ་ལག་གཉིས༔ གདུལ་བྱའི་ཞིང་དུ་གཟིགས་ནས་སྲོག་བློས་བཏང་༔ གྲུ་འཛིན་ཉེ་འཁོར་ལོ་མའི་སྤྱིལ་པོ་བྱས༔ ནང་དུ་གོའུ་ཏ་མ་གནས་པ་ལ༔ དེ་ཚེ་གྲུ་འཛིན་སྨད་འཚོང་བཟང་མོ་དང་༔ སྐྱེས་བུ་གཡོན་ཅན་པདྨའི་རྩ་ལག་གཉིས༔ དགའ་མགུར་སྤྱོད་ཕྱིར་གོས་དང་རྒྱན་ཐོགས་ཆད༔ མི་གཞན་ཞིག་གིས་ཀཪྴ་པ་ཎི་ནི༔ ལྔ་བརྒྱ་ཐོགས་ནས་སྨད་འཚོང་བཟང་མོ་ལ༔ དགའ་མགུར་སྤྱད་ཀྱི་ཚུར་ཤོག་སྨྲས་པ་དང་༔ བསམས་ཏེ་པདྨའི་རྩ་ལག་བརྫུན་བཏང་ནས༔ དེ་དང་ལྷན་ཅིག་རྩེ་བར་གྱུར་པ་ལ༔ དེ་ནས་བཟང་མོའི་བུ་མོ་མངག་གཞུག་མས༔ སྐྱེས་བུ་པདྨའི་རྩ་ལག་ལ་བཟླས་ཏེ༔ བཟང་མོས་བཟོད་པར་གསོལ་ཀྱང་གྲི་ཕྱུང་བསད༔ དེ་ནས་བུ་མོས་ཇོ་མོ་བསད་དོ་ཞེས༔ ཀུ་ཅོའི་སྒྲ་བཏོན་ཀུན་གྱིས་ཐོས་ནས་བརྒྱུགས༔ གཡོན་ཅན་པདྨའི་རྩ་ལག་སྐྲག་ནས་སུ༔ དེ་ཚོར་མ་བཟོད་རལ་གྲི་ཁྲག་ཅན་ནི༔ དྲང་སྲོང་གོའུ་ཏ་མའི་མདུན་དུ་བོར༔ སྨྲ་བ་ཅན་མང་སྐྱེ་བོའི་ཚོགས་མདུན་ཞུགས༔ དེ་ནས་སྐྱེ་བོའི་ཚོགས་ཀྱིས་ཡིད་མ་འོས༔ རལ་གྲི་ཁྲག་ཅན་མཐོང་ནས་སྨྲས་པ་ནི༔ སངས་རྒྱས་བསྟན་ལ་རབ་ཏུ་བྱུང་བ་འདིས༔ བཟང་མོ་དང་ནི་ལྷན་ཅིག་དགའ་མགུར་སྤྱད༔ དགེ་འདུན་བསྟན་པ་ཅི་འདྲ་བསད་དོ་བསྒྲགས༔ དྲང་སྲོང་གོའུ་ཏ་མས་མ་ཉེས་པའི༔ བདེན་ཚིག་ཞི་བར་སྨྲས་ཀྱང་མ་ཕན་ཏེ༔ དམ་དུ་བཅིངས་ནས་རྒྱལ་པོའི་ཕྱག་ཏུ་ཕུལ༔ ཆད་པས་གཅད་ཕྱིར་གསལ་ཤིང་རྩེ་ལ་བསྐྱོན༔ མཁན་པོ་མདོག་ནག་གནས་སུ་འགྲོ་བ་ཡིས༔ ལམ་ནས་མཐོང་སྟེ་མདུན་དུ་ཕྱིན་ནས་སུ༔ སྨྲས་པ་ཀྱི་ཧུད་བུ་འདིས་ཅི་ཞིག་བྱས༔ གོའུས་སྨྲས་པ་མཁན་པོ་ལས་བསགས་མོད༔ མཁན་པོས་སྨྲས་པ་རྨ་ཕྱུང་བའམ་ནི༔ གནོད་པ་ཞིག་མ་བྱས་ན་དང་དྲག་སྟེ༔ གོའུས་སྨྲས་པ་མཁན་པོ་བདེན་པར་གསོན༔ གོའུ་ཏ་མས་བཟང་མོ་མ་བསད་ན༔ མཁན་པོའི་སྐུ་མདོག་གསེར་དུ་འགྱུར་བར་ཤོག༔ ཅེས་པའི་མ་ཉེས་བདེན་པ་བརྗོད་པ་ཡིས༔ མཁན་པོའི་པགས་པ་ནག་པོ་གསེར་དུ་གྱུར༔ དྲང་སྲོང་གསེར་མདོག་ཅན་ཞེས་ཡོངས་སུ་གྲགས༔ ལྷ་མིའི་ཁྱུ་མཆོག་ངོ་མཚར་མཆོག་ཏུ་གྱུར༔ དེ་ནས་མཁན་པོས་རྫུ་འཕྲུལ་རྫི་ཆར་ཕབ༔ ལུས་ལ་ཕོག་ནས་མེ་ང་དྲག་པོས་རེག༔ སྡུག་བསྔལ་གནས་ལེན་སྔོན་ཡུལ་སྤྱད་པ་ཡི༔ འཁྲིག་པའི་འདོད་ཆགས་རྗེས་སུ་དྲན་པར་བརྩམས༔ ཇི་བཞིན་ཇི་ལྟར་རྗེས་སུ་དྲན་བྱས་པས༔ ཁུ་བའི་ཐིགས་པ་གཉིས་དང་ཁྲག་འདྲེས་པ༔ ས་ལ་ལྷུང་བས་སྒོ་ང་གཉིས་སུ་གྱུར༔ ཉི་མའི་ཟེར་གྱིས་སྨིན་ཅིང་རྡོལ་བ་དང་༔ ཁྱེའུ་གཉིས་བྱུང་བུ་རམ་ཤིང་ཚལ་བཞུགས༔ དེ་ནས་སྨྲ་བ་ཅན་ནི་མང་པོ་བོས༔ གོའུ་ཏ་མ་གསལ་ཤིང་རྩེ་ནས་ཕབ༔ རྒྱལ་པོས་ཇི་ལྟར་བྱས་ཞེས་དྲིས་པ་ལས༔ གོའུ་ཏ་མ་དེ་ཉིད་ཤི་བར་གྱུར༔ དྲང་སྲོང་གསེར་མདོག་བདེན་པ་བརྗོད་པ་ནི༔ གོའུ་ཏ་མས་བཟང་མོ་མ་བསད་ན༔ ལས་སྨིན་གཡོན་ཅན་པདྨའི་རྩ་ལག་གྱུར༔ ཅེས་པའི་བདེན་བརྗོད་ལྷ་རྣམས་མཁའ་ལ་བྱོན༔ རྒྱལ་པོ་དམངས་ཀྱི་ཚོགས་ལ་ལྷས་སྨྲས་པ༔ ཉེས་མེད་དེ་དག་བསད་པ་ཇི་ལྟ་བུའི༔ རེ་བ་ཡོངས་སུ་རྫོགས་པར་མི་བྱེད་པའི༔ རྒྱལ་པོ་ཆོས་ལ་མི་གནས་ཆོས་མིན་ཕྱོགས༔ སེམས་ཅན་རྣམས་ལ་བདེ་བ་མི་འབྱུང་ཞིང་༔ གྲོང་ཁྱེར་ཀུ་ཤའི་ཚོང་དུས་འཇིག་པར་འགྱུར༔ ཡུལ་འཁྲུག་ནད་ཡམས་མུ་གེ་འབྱུང་བར་འགྱུར༔ དེར་ནི་ཇག་ཆོམ་གཡོ་བྱེད་མང་བར་འགྱུར༔ ཚེ་འདིར་ལེགས་པར་བྱས་དང་ཉེས་པར་བྱས༔ བྱ་བ་གང་ཡིན་བྱེད་ན་ཆོས་རྒྱལ་ཡིན༔ ཆོས་དང་མི་ལྡན་སྐྱེ་བོ་ངན་པ་བཀུར༔ ཆོས་ལྡན་ཉེས་མེད་ཆད་པས་བཅད་པ་ན༔ ཁྲིམས་འཇིག་ཉོན་མོངས་བརྒྱ་ཡིས་རྣམ་པར་འཁྲུག༔ དེ་བས་ཉེས་བྱས་ནག་ཅན་གང་ཡིན་པ༔ རང་གི་མི་དགེའི་ས་བོན་བཏབ་པ་ཡིས༔ རྣམ་སྨིན་འདི་བྱས་པ་ན་འདི་འབྱུང་ཡིན༔ གོ་དོན་རྣ་བར་ལྷོན་ལ་སེམས་ལ་གཞིགས༔ སྟོབས་མཐུས་ཉེས་པར་བྱས་པ་ཞི་བའི་ཕྱིར༔ དྲག་པོས་ཚར་བཅད་ལུས་ཀྱི་སྟོབས་ཉམས་གཞུག༔ དབང་པོའི་དངས་མ་མིག་གཉིས་འབྱིན་པ་དང་༔ ཡན་ལག་དམ་པ་མགོ་བོ་འབྲེག་པ་དང་༔ རྒྱུ་འབྲས་རྣམ་པ་ཐ་དད་བསྟན་པའི་ཕྱིར༔ སྔངས་སྐྲག་དྲག་ལས་མང་པོ་གང་ཡང་རུང་༔ མི་དགེའི་ལུས་སེམས་དགེ་བའི་ཁྲིམས་ཀྱིས་འཛིན༔ དངོས་པོའི་ངོ་བསྲུང་ཕྲ་མའི་ཕྱོགས་མིན་པར༔ འཇིག་རྟེན་སྐྱོང་བ་རྒྱལ་པོའི་ཁྲིམས་བཞིན་བསྲང་༔ མ་དད་པ་རྣམས་དད་པར་བགྱི་བ་དང་༔ དད་པ་རྣམས་ནི་སླར་གྱིས་དད་པར་གྱིས༔ མི་བསྲུན་སྡིག་ཅན་གཡོན་ཅན་འདུལ་བའི་ཕྱིར༔ དཔའ་བརྟན་གོ་ཆ་སྲ་ཞིང་མཚོན་རྣོ་བ༔ ས་གཞི་རབ་ཏུ་གཡོ་བའི་ལས་བྱེད་ན༔ ཆ་ལུགས་གཞན་ཡང་ཉེ་འཁོར་འཁོད་པར་འགྱུར༔ ཆར་ཆུ་དུས་འབབ་རྒྱལ་ཁམས་སྐྱ་ཡང་རྒྱས༔ མི་རྣམས་ཀུན་ལ་བདེ་ལེགས་འབྱུང་བའི་རྟགས༔ མི་ནད་ཕྱུགས་ནད་ལ་སོགས་ཆད་པ་དང་༔ ཆོས་ཀྱི་བསྟན་པ་འབྱུང་བར་སྨོས་ཅི་དགོས༔ དེ་སྐད་ལྷ་རྣམས་ཀུན་གྱིས་སྨྲས་པ་དང་༔ རྒྱལ་པོ་ཆེན་པོ་བཞི་ནི་མདུན་ལྷགས་ནས༔ གོའུ་ཏ་མ་དཔའ་བོ་ཁྱོད་ལ་ནི༔ གསེར་གྱི་མདོག་དང་བསོད་ནམས་བརྒྱ་ཡིས་མཚན༔ བལྟ་ན་སྡུག་ཅིང་མིག་ཏུ་མངོན་མཛེས་ལ༔ ལྷ་སྟོང་བྱེ་བ་རབ་ཏུ་དགའ་བར་བྱེད༔ སྐྱེ་བོས་མཐོང་དགའ་ལུས་ནི་རྟག་ཏུ་འཐོབ༔ བསྐལ་པ་དག་ནི་བྱེ་བ་བརྒྱ་སྟོང་ཕྲག༔ དགུ་བཅུ་རྩ་དགུར་འཁོར་ལོས་སྒྱུར་རྒྱལ་འགྱུར༔ ས་སྟེང་གནས་རྣམས་རལ་གྲི་གར་སོང་ལྟོས༔ ཞེས་པའི་ཚིག་སྨྲས་རྒྱལ་ཆེན་བཞི་རྣམས་ཀྱིས༔ རལ་གྲི་ཁྲག་ཅན་ནམ་མཁའི་དབྱིངས་ལ་བོར༔ བཟང་མོ་གསོད་མི་སུ་ཡིན་སྟེང་དུ་ཤོག༔ དམོད་པ་བོར་བས་རལ་གྲི་ཐོག་གྱུར་ནས༔ པདྨའི་རྩ་ལག་སྟེང་བབས་ཤི་བར་གྱུར༔ ཐོག་ཟེར་བུ་མོ་གྲོགས་སྤྱོད་གཉིས་ལ་ཕོག༔ གོའུ་ཏམ་སུམ་ཅུ་རྩ་གསུམ་ལྷ་ཡུལ་དུ༔ སྐུ་གསུམ་སྟོན་པ་ཀུན་ཏུ་འཆང་དུ་བཞེངས༔ རྒྱལ་པོ་དེ་ཉིད་ཁྲིམས་ལ་མཁས་པར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བསྟན་པ་གཉིས་ལྡན་བྱུང་ཚུལ་བསྟན་པའི་ལེའུ་སྟེ་བརྒྱད་པའོ༔ ༔
པདྨ་བཀའ་ཐང་ལེའུ་ ༩ གཙུག་ཕུད་རིས་བཟང་གི་སྲས་སུ་འཁྲུངས་པ།
དེ་ནས་ཀུན་མཁྱེན་ཀུན་གཟིགས་ཀུན་ཏུ་འཆང་༔ དད་པ་ཅན་གྱི་ལྷ་གནས་ཕོ་མོ་རྣམས༔ གསང་སྔགས་བླ་མེད་རྡོ་རྗེ་ཐེག་པ་བསྟན༔ བྲམ་ཟེའི་ཁྱེའུ་བླ་མ་ཚེ་འཕོས་པ༔ ལྷའི་བུ་དམ་པ་ཏོག་དཀར་ཞེས་བྱ་ལ༔ དབང་གི་ཆུ་བོ་ཆེན་པོ་བཞི་ཕབ་སྟེ༔ ཡོངས་སུ་འཛིན་པ་དགེ་བའི་བཤེས་གཉེན་དབང་༔ ཕྱི་ཡི་ཆས་བརྒྱད་སྤྲུལ་པའི་སྐུ་རུ་བསྐུར༔ ཆོས་བཀའ་གཏད་པ་པོ་ཏི་གླེགས་བམ་དབང་༔ ནང་གི་ཆས་བརྒྱད་ལོངས་སྤྱོད་རྫོགས་སྐུར་བསྐུར༔ རིག་པའི་རྩལ་དབང་ཡི་དམ་ལྷ་ཡི་དབང་༔ གསང་བའི་ཆས་བརྒྱད་ཆོས་ཀྱི་སྐུ་རུ་བསྐུར༔ ཡོངས་རྫོགས་ཕྱག་རྒྱ་ཆེན་པོ་མཆོག་གི་དབང་༔ དབང་གི་ཆས་བཅུ་མི་འགྱུར་རྡོ་རྗེར་བསྐུར༔ སྐུ་ལྔའི་བདག་ཉིད་བླ་མེད་རྡོ་རྗེ་འཆང་༔ ཡུམ་འཁྲིལ་ལྟ་བ་སྤྱི་འབྱམས་མངོན་བྱང་བསྐུར༔ དེ་ལྟར་སྒོས་དབང་རྫོགས་པར་བསྐུར་བྱས་ནས༔ དེ་ནས་སྤྱི་དབང་བཅུ་པོ་བསྐུར་བ་ནི༔ བདུད་རྩི་ཐོབ་ཕྱིར་ཚེ་ལ་དབང་བར་བསྐུར༔ སེམས་ཤེས་ཕྱིར་ན་སེམས་ལ་དབང་བར་བསྐུར༔ ནམ་མཁའ་མཛོད་ཕྱིར་ཡོ་བྱད་བརྙེས་དབང་བསྐུར༔ བག་ཆགས་དང་བཅས་ལས་ཀྱི་ལམ་བཅད་ཕྱིར༔ ལས་ལམ་བཅད་པ་ཏིང་ངེ་འཛིན་དབང་བསྐུར༔ བསམ་གཏན་བསྐྱེད་ཕྱིར་སྐྱེ་བའི་དབང་ནི་བསྐུར༔ ལྷུན་གྲུབ་འཇུག་པ་ཐོབ་ཕྱིར་རྫུ་འཕྲུལ་བསྐུར༔ ཟད་པར་སྐྱེ་མཆེད་ཐོབ་ཕྱིར་མོས་པ་བསྐུར༔ བསམ་པ་དོན་ཐོབ་བྱ་ཕྱིར་སྨོན་ལམ་བསྐུར༔ ལུས་ངག་ཡིད་ཀྱི་ལས་ཐོབ་ཡེ་ཤེས་བསྐུར༔ ཆོས་དབྱིངས་ཡང་དག་མཐའ་མཉམ་དྲི་མེད་ཕྱིར༔ ཆོས་ལ་དབང་བའི་དབང་དང་བཅུ་བསྐུར་རོ༔ ཁྱད་པར་དབང་ནི་ཉི་ཤུ་རྩ་ལྔ་བསྐུར༔ སྐུ་ཡི་དབང་ལྔ་སྤྱི་བོའི་གཙུག་ཏུ་བསྐུར༔ གསུང་གི་དབང་ལྔ་མགྲིན་པའི་གནས་སུ་བསྐུར༔ ཐུགས་ཀྱི་དབང་ལྔ་སྙིང་གའི་གནས་སུ་བསྐུར༔ ཡོན་ཏན་དབང་ལྔ་ལྟེ་བའི་གནས་སུ་བསྐུར༔ འཕྲིན་ལས་དབང་ལྔ་ཡན་ལག་ཀུན་ལ་བསྐུར༔ ལྷ་བརྒྱ་སྟོང་གིས་བསྟོད་ཅིང་བཀུར་ཏེ་བསྔགས༔ སིལ་སྙན་སྒྲ་དང་གླུ་དབྱངས་སྒྲ་ཡིས་བསྐུལ༔ དེ་ནས་ཏོག་དཀར་མི་ཡུལ་བྱོན་པ་ལས༔ ལྷ་འཁོར་རྣམས་ལ་བྱམས་པས་ཆོས་སྟོན་འགྱུར༔ དེ་ཕྱིར་ཏོག་དཀར་རང་གི་མགོ་ནས་ནི༔ ཐོད་དང་ཅོད་པན་བྱམས་པའི་མགོ་ལ་བཞག༔ ཁྱོད་ནི་ང་ཡི་འོག་ཏུ་སངས་རྒྱས་འགྱུར༔ ཞེས་པའི་ལུང་བསྟན་དབང་བསྐུར་གཟེངས་བསྟོད་ནས༔ སེར་སྐྱའི་རྒྱལ་པོ་ཟས་གཙང་སྲས་ལ་གཤེགས༔ དེ་ནས་བླ་མེད་སྟོན་པ་ཀུན་ཏུ་འཆང་༔ མི་ཡུལ་ཡོ་ག་གསུམ་གྱིས་འདུལ་བར་གཟིགས༔ འབྲས་བུ་གསང་སྔགས་རྡོ་རྗེ་ཐེག་པ་དེ༔ ལྷའི་བུ་ཡེ་ཤེས་ཏོག་གི་རྒྱལ་མཚན་ཞེས༔ དབང་གི་ཆུ་བོ་ཆེན་པོ་བཞི་ཕབ་ནས༔ ལྷ་མང་དབུས་ཀྱི་ཁྱུ་མཆོག་མངའ་གསོལ་ཏེ༔ རྒྱལ་པོ་གཙུག་ཕུད་རིས་བཟང་སྲས་ལ་གཤེགས༔ དེ་ཡི་གཤེགས་ཡུལ་ནུབ་ཕྱོགས་ཨུ་རྒྱན་ཡུལ༔ ཡུལ་གླིང་ཉི་ཤུ་རྩ་གཅིག་ཡོད་པའི་དབུས༔ ཨུ་རྒྱན་སྤྲིན་ནག་འདུས་པའི་དུར་ཁྲོད་བྱང་༔ ཧེ་རུ་ཀ་ཡི་གཙུག་ལག་ཁང་ཞེས་པ༔ རྒྱུ་ནི་རིན་ཅེན་སྣ་ཚོགས་ལས་གྲུབ་ཅིང་༔ དབྱིབས་ནི་ཟླུམ་པོ་མདོག་ནི་མཐིང་ག་སྟེ༔ ལྷ་ཁང་ཚད་ནི་ཚངས་པའི་འདོམ་གང་བ༔ ཕྱོགས་བཞི་དག་ལ་སྒོ་ནི་བཅུ་དྲུག་པ༔ འབྱེད་གཅོད་ཐམས་ཅད་དུས་གཅིག་བྱེད་པ་ཡོད༔ མཁའ་འགྲོས་བདག་བྱེད་རང་བྱུང་གཙུག་ལག་ཁང་༔ ཨུ་ཏ་ལ་ཡི་གཙུག་ལག་ཁང་ཡང་ཟེར༔ ལུང་བསྟན་གྱི་ནི་ལྷ་ཁང་ཞེས་ཀྱང་ཟེར༔ གྷནྡྷོ་ལ་ཡི་གཙུག་ལག་ཁང་ཡང་ཟེར༔ དེ་ཡི་བདག་པོ་འདོད་པ་བཞིན་བྱེད་པ༔ རྒྱལ་པོ་གཙུག་ཕུད་རིས་བཟང་ཞེས་བྱ་སྟེ༔ བཙུན་མོ་མཆོད་འོས་མ་ཞེས་བྱ་བ་ལ༔ རྒྱལ་བུ་མཚེ་མ་གཉིས་ནི་དུས་གཅིག་སྐྱེས༔ རྒྱལ་བུ་གཉིས་ཀར་དུས་གཅིག་ཁབ་བཞེས་ནས༔ སྲས་གང་སྔ་དེ་རྒྱལ་སར་འདོན་ནོ་གསུངས༔ བག་མ་གཉིས་ནི་ཉིན་གཅིག་དུས་གཅིག་བླངས༔ རྒྱལ་པོ་གཙུག་ཕུད་རིས་བཟང་ཞལ་ན་རེ༔ རྒྱལ་བུ་དུས་གཅིག་སྐྱེ་ཉེན་ཡོད་པས་ན༔ སྐད་ནི་གང་སྔ་ཞིག་གིས་བྱེད་པ་ཡིན༔ ངའི་ཁྲིའི་གཡས་གཡོན་ཉོལ་ཅིག་གསུངས་ནས་བསྙལ༔ ཐོར་ཚུགས་ཅན་གྱི་བཙུན་མོ་གུ་ན་མ༔ གཉིད་ལོག་པ་ཡི་རྨི་ལམ་ཟ་ཟི་ན༔ ལུས་ནས་མི་ཆེན་དཀར་པོ་ཞིག་ཐོན་ནས༔ རྩི་ཤིང་ནགས་ཚལ་ཐམས་ཅད་བཅད་པའི་ཤུལ༔ ས་དཀར་བྱུགས་ཏེ་རྣམ་པར་དཀར་བར་རྨིས༔ གཅིག་ལ་མོ་ཡི་ལུས་ནས་མི་ནག་ཐོན༔ མགོ་བོ་ཉི་ཟླའི་གསེབ་ཏུ་འཚངས་པ་རྨིས༔ རྒྱལ་པོ་ཉིད་ལ་ཐུགས་ནས་འོད་ཟེར་ནི༔ ཁ་དོག་ལྔ་སོང་ཉི་ཟླའི་གསེབ་སོང་རྨིས༔ ནང་པར་རྨི་ལྟས་ང་བཟང་ང་བཟང་ཟེར༔ རྨིས་ལྟས་མཁན་པོ་བོས་ནས་དྲིས་པ་ཡིས༔ མི་དཀར་དེ་ནི་འགྲོ་བའི་དོན་བྱེད་པའི༔ རྒྱལ་བུ་སྤྲུལ་པའི་སྐུ་ཞིག་སྐྱེ་བའི་རྟགས༔ རྩི་ཤིང་བཅད་པ་གདུག་པ་འདུལ་བ་ཡིན༔ ས་དཀར་བསྟན་པ་རྒྱས་པའི་རྟགས་ཡིན་ནོ༔ གཅིག་གི་ལུས་ནས་མི་ནག་ཆེན་པོ་དེ༔ རྒྱལ་ས་འཛིན་རྟགས་སྲས་འོང་ལུང་བསྟན་ནོ༔ ལོ་དེའི་དཔྱིད་ཟླ་ར་བའི་རྒྱལ་གྱི་ཉིན༔ བུ་རེ་སྐྱེས་ཏེ་སྐད་ཀྱང་མཉམ་པོར་བཏོན༔ ལྟས་བཟང་བྱུང་བས་ཐོར་ཅོག་ཅན་ན་རེ༔ དེ་མ་ཐག་ཏུ་ངའི་བུའི་ལྟས་ཡིན་ཟེར༔ རབ་རྩལ་ན་རེ་ངའི་བུའི་ལྟས་ཡིན་ཟེར༔ རྒྱལ་པོའི་རྒྱལ་ས་ང་ཡི་བུས་ཐོབ་ཟེར༔ དེ་ནས་རྒྱལ་པོས་རྒྱལ་སྲིད་མི་དམངས་བསྡུས༔ རྒྱལ་བུ་གཉིས་ལ་བཙས་སྟོན་ཆེན་པོ་བྱས༔ བྲམ་ཟེ་མཚན་མཁན་བུ་ཡི་མཚན་བརྟགས་ནས༔ རབ་རྩལ་བུ་ལ་ཐོར་ཅོག་ཅན་དུ་བཏགས༔ ཐོར་ཚུགས་བུ་ལ་ཤཱནྟ་རཀྵིར་བཏགས༔ བློན་རྣམས་རྒྱལ་པོ་གང་བྱེད་གྲོས་དྲིས་པས༔ བཞིན་བཟང་དཀྱེལ་ཆེ་ཞིག་གིས་རྒྱལ་པོ་གྱིས༔ ཟེར་བས་ཐོར་ཅོག་ཅན་ནི་རྒྱལ་སར་བཏོན༔ ཤཱནྟ་རཀྵི་ཐང་མཚམས་འཛིན་དུ་བཅུག༔ དེ་ནས་ཤཱནྟས་རྒྱལ་སྲིད་མ་ཐོབ་བར༔ གང་ལའང་ཁོ་དང་ང་གཉིས་མཉམ་པ་ལ༔ ཁོ་ཡིས་རྒྱལ་པོ་ང་ཉིད་དམངས་བྱེད་པ༔ འདི་འདྲ་མི་འོང་མི་འོས་སྙམ་ནས་སུ༔ རྒྱལ་སྲིད་དག་ལ་ཅི་གནོད་བྱས་པ་ཡིས༔ ཆད་པ་བྱུང་ནས་མཐའ་ལ་སྤྱུགས་པར་གྱུར༔ དེ་ནས་རྒྱ་གར་རྡོ་རྗེ་གདན་གྱི་ནུབ༔ དུར་ཁྲོད་ཆེན་པོ་སོ་ས་གླིང་བྱ་བ༔ མཐའ་སྐོར་དུ་ནི་དཔག་ཚད་གཅིག་ཡོད་པ༔ དེ་ཉིད་དབུས་ན་རང་བྱུང་མཆོད་རྟེན་ནི༔ རྒྱ་ཆེ་གཏིང་རིང་འཁོར་ལོ་གདུགས་དང་བཅས༔ རྒྱུ་ནི་རིན་ཅེན་དངུལ་ལས་བྱས་པ་ཡི༔ དྲིལ་བུ་གཡེར་ཁའི་དྲ་བ་དྲ་ཕྱེད་སྤྲས༔ ཉི་མ་དང་ནི་ཟླ་བས་བརྒྱན་པ་ལ༔ དེ་ལོགས་ཀཻ་རི་མ་བརྒྱད་རང་བྱུང་གནས༔ དེ་ཡི་བྱང་ཤར་མུན་ཐང་ཞེས་བྱའི་མཚོ༔ ནང་ན་ཆུ་སྲིན་ལ་སོགས་སྲོག་ཆགས་གཟུགས༔ ཐ་མ་སྣ་ཚོགས་འདུས་པའི་བྲག་གིས་བསྐོར༔ དེ་ཡི་ལྷོ་ནུབ་འཇིག་རྟེན་ལྷ་རྟེན་ནི༔ ཤིང་ནགས་ནྱ་གྲོ་དྷ་ཞེས་བྱ་བ་ལ༔ སྟེང་ན་དུར་བྱ་ནག་པོའི་ཚང་ཡོད་པ༔ རྐེད་པར་དུག་སྦྲུལ་ནག་པོའི་ཚང་བཅས་ཤིང་༔ རྩ་བར་དུར་ཕག་ནག་པོའི་ཚང་ཡོད་པར༔ འཇིག་རྟེན་ལྷ་ནི་དགའ་བྱེད་གཞོན་ནུ་ཞེས༔ གདོང་པ་སེང་གེ་ལག་བཞིས་རལ་གྲི་དང་༔ མི་མགོ་གཏུན་ཤིང་རྩེ་གསུམ་རོ་བཀལ་འཛིན༔ ཐོད་པའི་ཕྲེང་བས་ལུས་ཀུན་བརྒྱན་པ་ལ༔ ལུས་ལ་དར་ཆེན་སྔོ་ཁྲའི་འཇོལ་བེར་གསོལ༔ གསོད་བྱེད་མ་མོ་འབུམ་གྱིས་བསྐོར་ནས་ནི༔ གླང་པོ་ཆེ་ཞོན་ཤ་དང་ཁྲག་ལ་དད༔ དེ་ན་མཁའ་འགྲོ་མ་ཚོགས་དཔག་མེད་དེ༔ ལ་ལ་སེང་གེ་ཞོན་ནས་སྐྲ་གྲོལ་བ༔ ལག་ཏུ་ཐོད་པ་དགུ་བརྩེགས་རྒྱལ་མཚན་ཕྱར༔ ལ་ལ་བྱ་ཚོགས་ཞོན་ནས་ཀུ་ཅོ་འདོན༔ ལག་ཏུ་སེང་གེ་དག་གི་རྒྱལ་མཚན་ཕྱར༔ ལ་ལ་ལུས་གཅིག་གདོང་བཅུ་རྒྱུ་སྙིང་ཟ༔ ལ་ལ་བུད་མེད་ནག་མོ་རལ་བསྙིགས་མ༔ ཁ་ཡི་ནང་ནས་ཁྱི་སྤྱང་འབྱུང་བར་བྱེད༔ ལ་ལ་མི་ལུས་གཤོག་པ་ནམ་མཁའ་མཉམ༔ གནམ་ལྕགས་ཐོག་གི་ཆར་པ་འབེབས་པར་བྱེད༔ ལག་པ་དག་ན་སྟག་གི་རྒྱལ་མཚན་ཐོགས༔ ལ་ལ་རང་གི་ལུས་ཀྱི་སྟོད་སྨད་འདྲལ༔ ལ་ལ་རང་གི་ཡན་ལག་བཅད་ནས་སུ༔ ཕྱོགས་བཞི་མཚམས་བརྒྱད་དག་ལ་གཏོར་བ་ཡོད༔ དེ་ལྟར་རྫུ་འཕྲུལ་སྣ་ཚོགས་སྟོན་བྱེད་པ༔ དཔག་ཏུ་མེད་པ་བརྗོད་ཀྱིས་མི་ལང་ངོ་༔ དེ་ན་དུར་བྱ་དུར་ཕག་དུག་སྦྲུལ་དང་༔ ཅེ་སྤྱང་ཁ་དོག་མི་འདྲ་མང་པོ་དང་༔ སྤྱང་ཀི་ཀ་ལི་ཀ་ལ་སོགས་པ་དང་༔ མི་རོ་གསར་རྙིང་དཔག་ཏུ་མེད་པ་དང་༔ ཤ་དང་རུས་པ་ཁྲག་གི་རྒྱ་མཚོ་དང་༔ མི་མགོ་སྐམ་པོ་རློན་པ་རྙིང་པ་དང་༔ གཅན་གཟན་ལ་ལ་རོ་འདྲད་ལ་ལ་ཟ༔ ལ་ལ་རྒྱུག་ཅིང་ལ་ལ་ངུ་བ་དང་༔ ལ་ལ་མིག་འབྱིན་ལ་ལ་རྐང་པ་འཆའ༔ རུས་པ་མུར་དང་ཤ་ཟ་རྒྱུ་མ་འཐེན༔ རབ་ཏུ་འཇིགས་ཤིང་སྐྱི་བུང་དུར་ཁྲོད་དེར༔ ཤཱནྟ་རཀྵི་ཏ་ཡིས་ཕྱིན་ནས་སུ༔ འོད་མ་ལས་བྱས་ཤིང་གཞུ་ཤིང་མདའ་ཐོགས༔ ཕོ་བྱུང་བསད་ཅིང་མོ་བྱུང་སྤྱད་པ་ལས༔ མཁའ་འགྲོའི་མ་ཡི་ཚོགས་ཀྱིས་ཡོངས་སུ་བསྐོར༔ ཏིང་འཛིན་སྐྱོང་ཞིང་བརྒྱ་དང་དགུ་བཅུ་བཞུགས༔ དེ་ནས་སྤྲིན་ལྡན་རྒྱལ་ཁམས་འདུལ་བར་དགོངས༔ ཚོགས་ནས་ཕུང་པོ་ལྷག་མེད་འཇའ་ལྟར་ཡལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གཙུག་ཕུད་རིས་བཟང་གི་སྲས་སུ་འཁྲུངས་པའི་ལེའུ་སྟེ་དགུ་པའོ༔ ༔
པདྨ་བཀའ་ཐང་ལེའུ་ ༡༠ སྤྲིན་ལྡན་རྒྱལ་ཁམས་བསྟན་པ་གཉིས་ལྡན་གྱིས་བཏུལ།
དེ་ནས་མི་ཡུལ་སྤྲུལ་སྐུའི་བསྟན་པ་ནི༔ སྤྲིན་ལྡན་རྒྱལ་པོ་གདུལ་བྱའི་ཞིང་དུ་གཟིགས༔ དེ་དང་དུས་མཚུངས་རྣམ་ཤེས་རྩད་གཅོད་ཅེས༔ བསྐྱེད་རྫོགས་གསུམ་གྱིས་དབང་པོ་རབ་རྣམས་འདུལ༔ སྣང་མཛད་འོག་ཏུ་འཇིག་རྟེན་མགོན་པོའི་དུས༔ གསང་སྔགས་སྐྱོང་བ་རྟགས་སྦྱོར་ཡེ་ཤེས་ཞེས༔ སྤྲུལ་སྐུའི་བསྟན་པ་རིན་ཅེན་གྲགས་དང་ནི༔ ལོངས་སྐུའི་བསྟན་པ་གཏུམ་པོ་ཕུར་འབྱིན་ཞེས༔ ནམ་མཁའི་དབྱིངས་ཀྱིས་སྤྲུལ་སྐུའི་བསྟན་པས་འདུལ༔ དོན་སྦྱོར་འཇུག་སྲེད་ལོངས་སྐུའི་བསྟན་པས་འདུལ༔ སྒྲ་གཅན་ཉི་མས་སྤྲུལ་སྐུའི་བསྟན་པས་འདུལ༔ ཁམས་གསུམ་ཡོངས་སྒྲོལ་ལོངས་སྐུའི་བསྟན་པས་འདུལ༔ ཚངས་པ་དྲི་མེད་སྤྲུལ་སྐུའི་བསྟན་པས་འདུལ༔ བཻཌཱུར་རྒྱལ་པོས་ལོངས་སྐུའི་བསྟན་པས་འདུལ༔ བགེགས་བདག་འོད་ཀྱི་མཆོག་ཅེས་བྱ་བ་དང་༔ བསྟན་གཉིས་དུས་མཚུངས་འགྲོ་བ་འདུལ་བའོ༔ སྤྲུལ་སྐུའི་བསྟན་པ་ལུས་ངག་གཙོ་བོར་སྟོན༔ དབང་པོ་ཞི་བ་དུལ་བ་ཐུགས་ཞི་བ༔ ཞི་གནས་དམ་པའི་ཕ་རོལ་ཕྱིན་པའོ༔ ལོངས་སྐུའི་བསྟན་པ་གསུམ་ག་གཙོ་བོར་སྟོན༔ དུག་ལྔ་མི་སྤོང་ཐུག་ཕྲད་ལམ་དུ་ཁྱེར༔ ཕུང་པོ་ལྔ་ནི་རིགས་ལྔ་བརྗོད་པ་སྔགས༔ སེམས་ནི་ཆོས་དབྱིངས་ལྷག་མཐོང་མི་འགྱུར་བ༔ རིགས་དྲུག་འདོད་པ་མཚན་ཉིད་ཐེག་པ་ཡིན༔ རིགས་གསུམ་འདོད་པ་གསང་སྔགས་ཕྱི་པའོ༔ རིགས་ལྔར་འདོད་པ་སྔགས་ནི་ནང་པ་ཡིན༔ འདི་ཡི་དུས་ན་འགྲོ་བ་འདི་དག་ལ༔ བསོད་ནམས་ཉམས་ཏེ་ལོངས་སྤྱོད་མར་མར་བྲི༔ ཕྱི་ལྟར་ས་ཆུ་མེ་ང་འབྱུང་བ་བཞི༔ འདོད་པའི་ཁམས་སུ་འདོད་ཆགས་རང་བཞིན་ལྡང་༔ ཐོག་མར་བལྟས་པས་ཚིམ་པའི་འདོད་ཆགས་བྱུང་༔ གཅིག་ལ་གཅིག་ལྟ་དེ་ལ་དགའ་བདེ་སྐྱེ༔ དེ་ནས་བགད་པས་ཚིམ་པའི་འདོད་ཆགས་བྱུང་༔ སྐད་ཆེར་གད་མོ་གཅིག་ལ་གཅིག་དགོད་དོ༔ དེ་ནས་ལག་བཅངས་ཚིམ་པའི་འདོད་ཆགས་བྱུང་༔ གཅིག་ལ་གཅིག་གིས་ལག་པ་བཅངས་ཤིང་འཇུ༔ དེ་ནས་རྩ་དང་ཆུ་རྒྱུས་ཐམས་ཅད་གཡོས༔ ཕོ་མོ་འཁྱུད་པས་ཚིམ་པའི་འདོད་ཆགས་བྱུང་༔ འདོད་ཆགས་བཞི་ལས་འབྱུང་བ་བཞི་འདུས་ནས༔ བལྟས་པས་འབྱུང་བ་ཆུ་ནང་གཟུགས་བརྙན་གསལ༔ བྱང་སེམས་བརླན་པས་རྫུས་སྐྱེས་ཆུ་རུ་སྨིན༔ བགད་པས་འབྱུང་བ་ང་ལངས་སྒྲ་བསྒྲགས་པས༔ རླུང་སྟོབས་བྱང་སེམས་གཉིས་ཀྱིས་མངལ་སྐྱེས་སོ༔ ལག་བཅངས་འབྱུང་བ་ས་འཛིན་གཟུགས་འཛིན་པས༔ ས་ཡི་གཟུགས་ནི་སྒོ་ང་ལས་སྐྱེས་སོ༔ གཉིས་གཉིས་འཁྱུད་པས་འབྱུང་བ་མེ་དྲོད་སྐྱེས༔ བྱང་སེམས་བསྐྱོད་པས་དྲོད་གཤེར་ལས་སྐྱེས་སོ༔ འདོད་ཆགས་བཞི་ལས་གླིང་བཞིར་གྱེས་པ་ནི༔ ཤར་གྱི་ལུས་འཕགས་འགྲོ་ཀུན་བརྫུས་ནས་སྐྱེ༔ ལྷོ་ཡི་ཛམྦུ་གླིང་པ་མངལ་ལས་སྐྱེ༔ ནུབ་ཀྱི་བ་ལང་སྤྱོད་པ་སྒོང་ལས་སྐྱེ༔ བྱང་གི་སྒྲ་མི་སྙན་པ་དྲོད་གཤེར་སྐྱེ༔ བལྟས་པས་ཚིམ་པ་ལོ་བརྒྱའི་བར་དུ་བྱུང་༔ བགད་པས་ཚིམ་པ་དྲུག་ཅུའི་བར་དུ་བྱུང་༔ ལག་བཅངས་ཚིམ་པ་ལྔ་བཅུའི་བར་དུ་བྱུང་༔ གཉིས་གཉིས་འཁྱུད་པས་འདོད་ཆགས་བཞི་ག་ཚང་༔ ཐོག་མར་འདོད་ཆགས་གཡོ་བས་བལྟས་པ་ཚང་༔ དེ་ནས་དགོད་ཅིང་འཛུམ་པས་བགད་པ་ཚང་༔ དེ་ནས་ལག་པ་འཇུས་པས་ལག་བཅངས་ཚང་༔ དེ་དག་འཛོམས་ནས་དབང་པོའི་སྒོ་སྦྱོར་བ༔ འཁྱུད་པས་ཚིམ་པའི་འདོད་ཆགས་ཞེས་བྱའོ༔ དེ་ལྟར་ཁྱེའུ་དང་ནི་བུ་མོ་རྣམས༔ ཤེས་རབ་ལྡན་པ་ཆོས་ཀྱིས་འདུལ་བའོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྤྲིན་ལྡན་རྒྱལ་ཁམས་བསྟན་པ་གཉིས་ལྡན་གྱིས་བཏུལ་བའི་ལེའུ་སྟེ་བཅུ་པའོ༔ ༔
པདྨ་བཀའ་ཐང་ལེའུ་ ༡༡ རྒྱ་གར་ཆོས་ཁུངས་བཙུན་པར་བསྟན་པ།
དེ་ནས་ཤཱཀྱ་ཐུབ་པའི་ཞིང་ཁམས་དང་༔ རིགས་གསུམ་མགོན་པོའི་ཞིང་ཁམས་འདུལ་བའི་ཕྱིར༔ ཁྱད་པར་བོད་ཁམས་འདྲེ་དང་མ་སངས་ཡུལ༔ དུད་འགྲོའི་རྒྱལ་ཁམས་སྤྲེའུའི་ཚ་བོ་རྣམས༔ ཆོས་ལ་བཀོད་པར་བྱ་བའི་སྐྱེས་རབས་ནི༔ ཤཱཀ་ཐུབ་ཚེ་ལོ་བརྒྱད་ཅུའི་དུས་བྱོན་ནས༔ མཚན་ཉིད་ཐེག་པ་འཁོར་ལོ་རིམ་པ་གསུམ༔ གསང་སྔགས་ཕྱི་པ་དང་ནི་བཞི་རུ་བསྐོར༔ བླ་མེད་རྡོ་རྗེ་ཐེག་པ་བསྐྱེད་རྫོགས་གསུམ༔ ཆོས་ཀྱི་རྣམ་གྲངས་ཚིག་གཅིག་མ་གསུངས་པར༔ ཕྱིས་ནི་འབྱུང་འགྱུར་ལུང་དུ་བསྟན་པའོ༔ ཅི་ཕྱིར་ལྟ་སྤྱོད་སྦྱོར་སྒྲོལ་ཟབ་པའི་ཕྱིར༔ འདོད་པའི་ཡོན་ཏན་ལྔ་ལ་ལོངས་སྤྱོད་ཕྱིར༔ བསྟན་པའི་གཞི་མ་དགེ་འདུན་ཡིན་པའི་ཕྱིར༔ ཡུལ་གཅིག་རྒྱ་གར་རྡོ་རྗེ་གདན་གཅིག་ན༔ བསྟན་པ་གཅིག་ལ་སྟོན་པ་གཉིས་མི་འབྱུང་༔ བྱུང་ན་མི་སྲིད་མདོ་སྔགས་ལུང་དང་འགལ༔ དེ་བཞིན་འཁོར་ལོས་སྒྱུར་རྒྱལ་གཉིས་མི་འབྱུང་༔ བྱུང་ན་བསྟན་པའི་ཆོམ་པོ་དམར་ལས་མཁན༔ བསྟན་པའི་སེལ་ཏེ་ཚབས་ཆེར་སྤང་བར་བྱ༔ དེ་བཞིན་གཤེགས་པ་ལྷ་ཡི་ལྷར་གྱུར་པ༔ མི་མཆོག་མཚུངས་མེད་པདྨ་འབྱུང་གནས་དེ༔ སངས་རྒྱས་སྲས་སུ་མདོ་སྔགས་ལུང་ནས་གསུངས༔ དབུས་འགྱུར་ཚལ་ལུང་བསྟན་པའི་མདོ་ལས༔ འདི་ནས་ལོ་ནི་བཞི་གཉིས་ན༔ དྷ་ན་ཀོ་ཤའི་མཚོ་གླིང་ན༔ རང་འཁྲུངས་པདྨའི་སྟེང་དུ་ནི༔ པདྨ་འབྱུང་གནས་ཞེས་བྱ་བ༔ གསང་སྔགས་བསྟན་པའི་བདག་པོ་འབྱུང་༔ ཞེས་པ་དང་༔ བླ་མེད་དོན་རྫོགས་འདུས་པའི་རྒྱུད་ལས༔ འདི་ནས་མྱ་ངན་འདས་འོག་ཏུ༔ ལོ་ནི་བཅུ་རུ་གཉིས་ཆད་ན༔ འཇིག་རྟེན་ཀུན་ལས་རྒྱལ་བའི་མཆོག༔ ཨུ་རྒྱན་ཡུལ་དུ་ང་ཉིད་འབྱུང་༔ པདྨ་འབྱུང་གནས་ཞེས་བྱ་བ༔ གསང་སྔགས་བསྟན་པ་ལུང་དུ་སྟོན༔ ཞེས་པ་དང་༔ བཀའ་འདུས་རྩ་བའི་རྒྱུད་ལས་ཀྱང་༔ སྤྱི་དཔལ་ཆེན་པོ་ང་དང་གཉིས་སུ་མེད་པ༔ མཚོ་སྐྱེས་རྡོ་རྗེ་ཞེས་བྱ་བ་ད་ལྟ་ང་དང་ཚུལ་མཐུན་པ་ཞིག་འབྱུང་༔ དེས་བཀའ་འདུས་སྤྱི་ཏིའི་ཐེག་པ་འདི་ཟ་ཧོར་གྱི་ཡུལ་དུ་རྒྱལ་པོ་གཙུག་ལག་འཛིན་ལ་སོགས་པ་ལ་རྒྱ་ཆེར་སྟོན་པར་འགྱུར༔ ཞེས་གསུངས་སོ༔
མྱ་ངན་འདས་པའི་མདོ་ལས༔ ཤིང་སཱ་ལའི་དྲུང་རྩཱ་མཆོག་གཉིས་ཀྱི་བར་ན༔ བཅོམ་ལྡན་འདས་ལ་འོད་སྲུངས་དང་གཅུང་དགའ་བོ་མ་གཏོགས་པ༔ དགེ་སློང་གི་དགེ་འདུན་བརྒྱ་ཕྲག་བཅུས་བསྐོར་ནས༔ ཉེ་གནས་ཆེན་པོ་ཀཱ་ཏྱ་ཡ་ན་དང་༔ ཙུནྡ་དང་༔ ཀུན་དགའ་བོ་རྣམས་ལ་བཀའ་སྩལ་པ༔ ང་ནི་ཡོངས་སུ་མྱ་ངན་ལས་འདའོ༔ ཁྱེད་རྣམས་མྱ་ངན་མ་བྱེད་ཅིག༔ མདངས་ལྡན་དྲི་མེད་མཚོ་དཀྱིལ་དུ༔ ང་ལས་ལྷག་པའི་སྐྱེས་བུ་འབྱུང་༔ ཁྱེད་རྣམས་ངུ་བར་མ་བྱེད་ཅིག༔ ཚེ་ལོ་གྲངས་མེད་ཐུབ་པ་ཡང་༔ ཐ་མ་འཆི་བར་ཤེས་པར་བྱ༔ ཞེས་གསུངས་སོ༔ ཤིན་ཏུ་བདེན་པར་གསུང་ཞིང་བརྫུན་མེད་པ༔ མདོ་ལྟར་རྒྱལ་བ་ཤཱཀྱ་ཐུབ་པར་གྲགས༔ སྔགས་ལྟར་གུ་རུ་པདྨ་འབྱུང་གནས་ཞེས༔ དེ་ཉིད་སྐུ་ཡི་འཁྲུངས་ཚུལ་མང་ན་ཡང་༔ ཞིང་ཁམས་འདི་ཡི་འཁྲུངས་ཚུལ་འདི་ལྟ་སྟེ༔ རྒྱ་གར་ཡུལ་གླིང་ཆེན་པོ་དགུ་ཡོད་པའི༔ དབུས་ན་ཐུབ་པའི་བཞུགས་གནས་རྡོ་རྗེ་གདན༔ དེ་ཡི་ཤར་ཕྱོགས་བྷངྒ་ལ་ཡི་གླིང་༔ ལྷོ་ཕྱོགས་བེ་དྷའི་གླིང་ཞེས་བྱ་བ་ཡོད༔ ནུབ་ཀྱི་ཕྱོགས་ན་ཨུ་རྒྱན་གླིང་ཞེས་ཡོད༔ བྱང་གི་ཕྱོགས་ན་ཁ་ཆེའི་གླིང་ཞེས་ཡོད༔ ཤར་ལྷོ་མཚམས་ན་ཟ་ཧོར་གླིང་ཞེས་ཡོད༔ ལྷོ་ནུབ་མཚམས་ན་ཁང་བུའི་གླིང་ཞེས་ཡོད༔ ནུབ་བྱང་མཚམས་ན་ཟངས་གླིང་ཞེས་བྱ་ཡོད༔ བྱང་ཤར་མཚམས་ན་ཀ་མ་རུ་པའི་གླིང་༔ ཡུལ་གླིང་དགུ་པོ་མི་རིགས་མི་འདྲ་ཞིང་༔ ལ་ལ་གཟུགས་ཆེ་ལ་ལ་ཆུང་བ་ཡོད༔ ལ་ལ་དཔེ་མེད་མཚར་ལ་ལ་ལ་གོག༔ གླིང་རེ་ན་ཡང་སྐད་རིགས་མི་གཅིག་ཅིང་༔ སྐད་རིགས་མི་གཅིག་སུམ་བརྒྱ་དྲུག་ཅུ་ཡོད༔ ཡི་གེ་མི་འདྲ་སུམ་བརྒྱ་དྲུག་ཅུ་ཡོད༔ དཔེར་ན་རྒྱ་གར་ཤར་སྐད་བྱ་བ་དང་༔ དེ་བཞིན་ལྷོ་སྐད་ནུབ་སྐད་བྱང་སྐད་དོ༔ གླིང་གཞན་ལ་ཡང་དེ་བཞིན་ཤེས་པར་བྱ༔ གོས་སུ་རས་གོས་འཚོ་བ་འབྲས་ཟན་མཐུན༔ སྤྱོད་པ་ལུས་རྒྱན་འདོགས་ཚུལ་མི་མཐུན་ནོ༔ གླིང་རེ་ན་ཡང་རྒྱལ་པོ་མང་དུ་ཡོད༔ སྲིད་སྐྱོང་རྒྱལ་པོ་རེ་དང་ཆོས་རྒྱལ་རེ༔ སྲིད་སྐྱོང་རྒྱལ་པོས་ཆོས་ལ་ཁ་མི་འཇུག༔ ཆོས་སྐྱོང་རྒྱལ་པོས་སྲིད་ལ་ཁ་མི་འཇུག༔ རྒྱ་གར་རྒྱལ་ཁྲིམས་ཤིན་ཏུ་གཉན་པ་ཡིས༔ རིགས་དེའི་ལས་མིན་འཆོལ་བར་སྤྱད་དུ་མེད༔ མཚན་ཉིད་ཆོས་ཀྱི་བདེན་པ་མཐོང་བ་ལ༔ དྲང་སྲོང་ཞེས་སུ་མཚན་ནི་གསོལ་བ་ཡིན༔ གསང་སྔགས་ཆོས་ཀྱི་བདེན་པ་མཐོང་བ་ལ༔ གྲུབ་ཐོབ་ཅེས་ནི་མཚན་དུ་གསོལ་བ་ཡིན༔ དབུ་ཟླུམ་ཞབས་རྗེན་ངུར་སྨྲིག་འཆང་བ་དང་༔ མི་དགེ་བཅུ་སྤོང་སྤྱོད་པ་ཞིབ་པ་ལ༔ དགེ་འདུན་ཞེས་ནི་མཚན་དུ་གསོལ་བ་ཡིན༔ ལྕང་ལོ་ཆས་བརྒྱད་རྒྱན་དྲུག་འཆང་བ་དང་༔ འདོད་ཡོན་ལྔ་ལ་ལོངས་སྤྱོད་ས་སྡེ་འཛུགས༔ གསང་སྔགས་རྣལ་འབྱོར་པ་ཞེས་མཚན་དུ་གསོལ༔ དེ་དག་ཀུན་གྱི་མཐུན་རྐྱེན་བསྲིང་བ་ལ༔ ཡོན་བདག་ཅེས་སུ་མཚན་ནི་གསོལ་བ་ཡིན༔ སོ་སོར་ཐར་པ་རིགས་ནི་བདུན་ནམ་བརྒྱད༔ བྱམས་པ་ལྔ་དང་སྙིང་རྗེ་ལྔ་དང་ནི༔ བཏང་སྙོམས་ལྔ་དང་དགའ་བ་ལྔ་ལ་སྦྱོར༔ བསླབ་པ་གསུམ་མམ་ཉི་ཤུ་སྟོན་པ་ནི༔ མཁན་པོ་ཞེས་སུ་མཚན་ནི་གསོལ་བ་ཡིན༔ ལྟ་སྤྱོད་དབང་ངམ་དཀྱིལ་འཁོར་རབ་ཏུ་གནས༔ འཕྲིན་སྒྲུབ་ཏིང་འཛིན་མཆོད་སྔགས་སྦྱོར་སྒྲོལ་གཉིས༔ སྒྲུབ་ཆེན་བརྒྱད་ལ་ཕྱག་ལེན་འདེབས་པ་ནི༔ བླ་མ་ཞེས་སུ་མཚན་ནི་གསོལ་བ་ཡིན༔ དེ་དག་གང་དང་འབྲེལ་མེད་ཡ་མ་ཟུང་༔ བསྟན་པ་གཉིས་ཀྱི་སེལ་དེ་ཚར་གཅོད་དོ༔ ཆོས་ཀྱི་རྔ་ཆེན་བརྡུངས་པས་ཐམས་ཅད་འདུ༔ ཉན་དབང་ཆོས་ཀྱི་རྒྱལ་པོའི་ཁྲི་ཞིག་བརྩིགས༔ ཚར་གཅོད་སྲིད་སྐྱོང་རྒྱལ་པོའི་ཁྲི་ཞིག་བརྩིགས༔ གཡས་སུ་རྣལ་འབྱོར་ཕོ་མོ་ཐམས་ཅད་བསྒྲིགས༔ གཡོན་དུ་དགེ་འདུན་ཕོ་མོ་ཐམས་ཅད་བསྒྲིགས༔ མདུན་དུ་སྐྱེ་བོ་ཕོ་མོ་ཐམས་ཅད་འཚོགས༔ དགུང་ལ་བསྟན་བཅོས་རྩོམ་མི་ཆོས་དེ་དང་༔ གཡས་གཡོན་རྒྱལ་མཚན་ཁྲི་དང་བཅས་པ་སྡོད༔ ཆོས་སྐྱོང་རྒྱལ་པོས་ཆོས་དེ་གང་ཡིན་འདྲི༔ མི་དེས་འདི་ལྟར་ཡིན་ཞེས་ཁས་བླངས་ནས༔ མདོ་ཆོས་ཡིན་ན་དགེ་འདུན་གྲལ་ལ་འགྲིམ༔ སྔགས་ཆོས་ཡིན་ན་རྣལ་འབྱོར་གྲལ་ལ་འགྲིམ༔ བརྟག་གཞིག་བཏང་ནས་རྒྱལ་པོའི་ཕྱག་ཏུ་འབུལ༔ རྒྱལ་པོས་ལོ་དང་ཟླ་བར་བརྟག་པ་བྱེད༔ རྒྱལ་བའི་བཀའ་ཡིས་གནང་ངམ་མི་གནང་ལྟ༔ འཕགས་པའི་ལུང་གིས་གྲུབ་བམ་མི་གྲུབ་ལྟ༔ རིགས་པས་འཐད་དམ་མི་འཐད་བརྟག་པར་བྱེད༔ གཏན་ཚིགས་རྒྱ་ཡིས་ཐེབས་སམ་མི་ཐེབས་ལྟ༔ དེ་ནས་གནམ་ལ་ཉི་མ་དུ་ཤར་འཚོགས༔ བསྟན་བཅོས་རྩོམ་མི་པཎྜི་ཏ་དང་རྩོད༔ ཡིད་ཆེས་མྱོང་ཐོག་ཁེལ་ལམ་མི་འཁེལ་ལྟ༔ ངེས་ཤེས་གོ་བས་ཆོད་དམ་མི་འཆོད་ལྟ༔ མཚོན་བྱ་དཔེ་ཡིས་མཚོན་ནམ་མི་མཚོན་ལྟ༔ དེ་ལྟར་ཐེག་པ་གང་ཡིན་ངོས་བཟུང་བལྟས༔ ཆོས་འདི་མི་འདིས་བརྩམས་པ་ཡིན་ཞེས་པའི༔ སྒྲ་བསྒྲགས་ཉོན་ཟེར་ཚར་གསུམ་ཀློག་པར་བྱེད༔ ལེགས་པར་འདུག་ན་ཡར་ལ་གཟེངས་བསྟོད་དེ༔ མདོའམ་སྔགས་ཕྱོགས་འདི་ལ་གཏོགས་སོ་ཟེར༔ མདོ་སྔགས་གང་ཡིན་པཎ་ཆེན་ཞལ་འཆམས་ཟེར༔ ཆོས་དེརྒྱལ་མཚན་རྩེ་མོར་འདོགས་པར་བྱེད༔ ཆོས་རྒྱལ་པཎྜི་ཏ་ཡིས་མེ་ཏོག་འཐོར༔ བསྟན་བཅོས་རྩོམ་མི་སེང་གེའི་ཁྲི་ཐོག་འདོན༔ དེ་ལ་བསྟོད་ཅིང་བསྔགས་པ་ཆེ་བར་བརྗོད༔ རིགས་མཐུན་རྣམས་ཀྱིས་བཀུར་སྟི་ཕུ་དུད་བྱེད༔ སྲིད་སྐྱོང་རྒྱལ་འབངས་རྣམས་ཀྱིས་ལྷ་ཕྱག་འཚལ༔ ཡུལ་ཕྱོགས་ཀུན་ཏུ་ཆོས་དེ་ཅི་དར་བྱེད༔ ལོག་ཆོས་འདུག་ན་མར་ལ་སྨ་འབེབས་ཏེ༔ བསྟན་བཅོས་དེ་ཉིད་ཁྱི་ཡི་མཇུག་མར་བཅིངས༔ དེ་ལ་མེ་སྦར་ཚོགས་པའི་གྲལ་ལ་འགྲིམ༔ འདི་ཡི་དུད་པས་ཕོག་པའང་དམྱལ་བར་འགྲོ༔ ཐམས་ཅད་སྣ་ལ་ལག་ཁོབ་བྲོས་ཤིག་ཟེར༔ ཚར་གཅོད་དབང་པོ་སྲིད་སྐྱོང་རྒྱལ་པོ་ཡིས༔ བསྟན་བཅོས་རྩོམ་མིའི་ལག་མགོ་གཉིས་པོ་འབྲེག༔ ཀཪྴ་པ་ཎི་བརྫི་བའི་ཁོལ་པོར་སྤྱུག༔ ཐམས་ཅད་གྲོས་འཆམ་ཆོས་ལོག་བསྣུབས་པས་ན༔ རྒྱ་གར་ཆོས་ཁུངས་བཙུན་པ་དེ་བཞིན་ནོ༔ ཆོས་ལུགས་མི་འདྲ་མང་པོ་མི་འབྱུང་ཞིང་༔ བཟང་འདོད་སྙན་མིང་མང་པོ་མི་འདོགས་སོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱ་གར་ཆོས་ཁུངས་བཙུན་པར་བསྟན་པའི་ལེའུ་སྟེ་བཅུ་གཅིག་པའོ༔ ༔
པདྨ་བཀའ་ཐང་ལེའུ་ ༡༢ ཨུ་རྒྱན་ཡུལ་གྱི་ཡུལ་རབས་བཤད་པ།
འདི་ཡི་དུས་ན་ནུབ་ཕྱོགས་ཨུ་རྒྱན་ཡུལ༔ ཨུ་རྒྱན་ཡུལ་ལ་འཛམ་གླིང་སུམ་གཉིས་ཡོད༔ ཡུལ་གྱི་ཆགས་ལུགས་ཆ་ལང་ཁ་སྦུབས་འདྲ༔ ཡུལ་ཆེན་ལྔ་དང་ཡུལ་གླིང་ཉི་ཤུ་གཅིག༔ ཡུལ་གྲུ་ཆེན་པོ་བྱེ་བ་བཅོ་བརྒྱད་དགུ༔ གྲོང་ཁྱེར་ཆེན་པོ་དགུ་བཅུ་རྩ་དྲུག་ཡོད༔ ཡུལ་ཆེན་དྷ་ན་ཀོ་ཤ་དབུས་ན་ཡོད༔ གྲོང་ཁྱེར་ཆེན་པོ་ཉི་ཤུ་རྩ་གཉིས་ཡོད༔ གྲོང་ཁྱེར་ཆེན་པོ་མཛེས་ལྡན་ཞེས་བྱ་བ༔ དེ་ཡི་དབུས་ན་ཐོར་ཅོག་དགུ་ལྡན་ཡོད༔ བཻ་ཌཱུརྱ་ཡི་ཕོ་བྲང་རིན་པོ་ཆེ༔ འོད་འབར་བྱིན་ཆེ་གྲུ་བཞིར་གསེར་གྱི་ལྕོག༔ གཡུ་ཡི་ཁ་བད་དྲ་བ་དྲ་ཕྱེད་ལྡན༔ དེ་ལ་ཁྱམས་དང་སྒོ་ཁྱུད་བཞི་དང་བཅས༔ ལྕགས་རི་དང་ནི་མདའ་ཡབ་མཛེས་པས་བསྐོར༔ ནང་ན་རྒྱལ་པོ་ཨིནྡྲ་བོ་དྷི་བཞུགས༔ ནང་བློན་བརྒྱ་དང་ཕྱི་བློན་སྟོང་གི་བསྐོར༔ བཙུན་མོ་འོད་འཆང་མ་ནི་ཁབ་ཏུ་བཞེས༔ ཐོར་ཅོག་དགུ་ལྡན་དབུས་ན་རང་བྱུང་གི༔ མཆོད་རྟེན་ཧེ་རུ་ཀ་ཡི་ལྷ་ཁང་ཡོད༔ རྒྱུ་ནི་རིན་ཅེན་སྣ་ཚོགས་ལས་གྲུབ་པ༔ འོད་ཟེར་དྲ་བ་མང་པོ་ཕྱོགས་བཅུར་འཕྲོ༔ ཁ་དོག་དཀར་པོ་རྣམ་པ་གཟི་ལྟ་བུ༔ རྒྱུ་ནི་རིན་ཅེན་ཤེལ་ལས་ལེགས་གྲུབ་པའི༔ རང་བྱུང་གཟི་འདྲའི་མཆོད་རྟེན་ཁྲ་ཁྱུག་ཁྱུག༔ དབྱིབས་ལེགས་བང་རིམ་དང་བཅས་ཟླུམ་པོར་གནས༔ རྒྱང་གྲགས་གཅིག་ནི་གྱེན་དུ་འཕགས་པ་ལ༔ དུས་ནི་ནམ་ཡང་འཇིག་པ་མི་མངའ་བ༔ ཚད་ནི་ཕྱོགས་རེར་ཚངས་པའི་འདོམ་གང་ཚད༔ དཔག་ཚད་གསུམ་གསུམ་ཡོད་པ་མཚན་ལྔར་ལྡན༔ ཆོས་བཟང་སྤྲིན་གྱི་ཡང་རྫོང་ཞེས་ཀྱང་བྱ༔ རྡོ་རྗེ་མི་ཤིགས་ཕུག་པ་ཞེས་ཀྱང་བྱ༔ སྤྲིན་ནག་འདུས་པའི་དུར་ཁྲོད་ཅེས་ཀྱང་བྱ༔ བཀོད་པ་ལྷུན་གྲུབ་ཕོ་བྲང་ཞེས་ཀྱང་བྱ༔ ཧེ་རུ་ཀ་ཡི་ལྷ་ཁང་ཞེས་ཀྱང་བྱ༔ ཆོས་འབྱུང་རྣམ་པར་དག་པ་གྲུ་བཞི་པ༔ སྒོ་ནི་གཅིག་བགྲངས་གཉིས་བགྲངས་བརྒྱ་རྩ་བརྒྱད༔ སྒོ་དང་རྟ་བབས་བཅས་པའི་ཕྱི་རོལ་ན༔ གནོད་སྦྱིན་བསྲུང་བའི་མཁར་ཆེན་སྟོང་ཡོད་པ༔ སྒོ་བཞི་འཁོར་ས་བརྒྱ་དང་བརྒྱད་ཅུ་ཡོད༔ མེ་ཡི་འོབས་དང་གཅན་གཟན་འཕྲང་དང་ནི༔ དུག་གི་མཚོ་དང་ཀེང་རུས་རི་རབ་བསྐོར༔ དུར་ཁྲོད་ལྷ་མོའི་འཁོར་དང་ནད་གདོན་གདོལ༔ ས་ལ་སུ་ལ་པགས་པའི་བྲང་ཆེན་བསྐོར༔ ཐ་མ་རྡོ་རྗེ་ཕ་ལམ་ལྕགས་རིས་བསྐོར༔ སྤྲིན་གྱི་རྒྱལ་པོ་གང་བ་འཁྲིགས་པ་དང་༔ འཇིག་རྟེན་མཁའ་འགྲོ་ལས་ཀྱི་མཁའ་འགྲོ་མ༔ སྒོ་བའི་ཌཱ་ཀི་ཡེ་ཤེས་ཌཱ་ཀི་མ༔ བཀྲ་ཤིས་སྒོ་མང་ལྕགས་རི་བརྒྱད་ཀྱིས་བསྐོར༔ འོག་ན་འཇིག་རྟེན་མཁའ་འགྲོས་སྐོར་བ་བྱེད༔ དེ་ཡི་འོག་ནས་ཀླུ་རྣམས་མཆོད་པ་འབུལ༔ བར་ན་ལས་ཀྱི་ཌཱ་ཀིས་སྐོར་བ་བྱེད༔ སྟེང་ན་ཡེ་ཤེས་ཌཱ་ཀིས་སྐོར་བ་བྱེད༔ བྲག་གི་ཐེམ་སྐས་བུམ་སྟན་ལོགས་བཞི་ལ༔ འཕྲིན་ལས་བཞི་ཡི་ཕྱག་རྒྱ་བཞིས་རྒྱས་གདབ༔ བུམ་པར་རྟེན་འབྲེལ་སྙིང་པོར་རང་བྱུང་ཤར༔ སྒོ་བཞིའི་སྟོད་ན་ཧཿརིཿནིཿསཿཤར༔ སྒོ་སྨད་མགོན་པོའི་སྲོག་སྙིང་ཡི་གེ་བཅུ༔ མཚན་མོ་མེ་འབར་ཉིན་མོ་འཇའ་རུ་འཁྲིགས༔ ཉིན་མཚན་རྒྱུན་དུ་སྤྲིན་དང་ཁུ་ངས་དགབ༔ ཆུ་ཆེན་བསྐོར་ཞིང་ཤིང་སྣའི་ནགས་ཚོགས་འཐུག༔ བྱ་དང་གཅན་གཟན་མང་པོ་ངར་སྐད་འདོན༔ བུམ་པའི་ནང་ནི་གསང་སྔགས་ཆོས་ཟབ་གང༔ བྲེ་ནང་དེ་བཞིན་གཤེགས་པའི་རིང་བསྲེལ་བཞུགས༔ དེའི་ནང་ལུང་བསྟན་ལྷ་ཁང་ཞེས་བྱ་བ༔ མདོག་ནི་མཐིང་ག་སྣང་བའི་གཟུགས་སུ་གྲུབ༔ ལག་པས་རེག་པའི་གཟུགས་སུ་མ་གྲུབ་པ༔ འཇའ་འོད་ལྟ་བུའི་རང་བཞིན་ལྷ་ཁང་ཡོད༔ དེ་ཡི་མཐའ་མར་མཁའ་འགྲོ་མ་ཡི་ཡུལ༔ ཌཱ་ཀི་འབུམ་ཁྲི་བུད་མེད་གྲོང་ཁྱེར་བཞི༔ དེ་དག་གི་ནི་མཆོད་ཁང་རེ་རེ་ན༔ གསང་སྔགས་ཟབ་མོ་དཔག་ཏུ་མེད་པ་བཞུགས༔ ཐོར་ཅོག་དགུ་ལྡན་དབུས་སུ་བཞག་པ་ཡི༔ ཤར་ན་ཛམྦུ་མཱ་ལའི་ཡུལ་ཞེས་ཡོད༔ ལྷོ་ན་པརྦ་ཏ་ཡི་གླིང་ཞེས་ཡོད༔ ནུབ་ན་ནཱ་ག་སིངྔྷིའི་ཡུལ་ཞེས་ཡོད༔ བྱང་ན་ཀ་ཀ་ཤམྦྷ་ལ་ཞེས་ཡོད༔ ཤར་ལྷོ་མཚམས་ན་དྲང་སྲོང་མེ་ལྷའི་ཡུལ༔ ལྷོ་ནུབ་མཚམས་ན་སྲིན་པོའི་ཡུལ་ཞེས་ཡོད༔ ནུབ་བྱང་མཚམས་ན་ང་ལྷའི་ཡུལ་ཞེས་ཡོད༔ བྱང་ཤར་མཚམས་ན་བགེགས་ཀྱི་ཡུལ་ཞེས་ཡོད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཨུ་རྒྱན་ཡུལ་གྱི་ཡུལ་རབས་བཤད་པའི་ལེའུ་སྟེ་བཅུ་གཉིས་པའོ༔ ༔
པདྨ་བཀའ་ཐང་ལེའུ་ ༡༣ རྒྱལ་པོ་སྤྱན་མེད་ཀྱིས་དཀོར་མཛོད་སྦྱིན་པ།
རིན་ཅེན་ཕོ་བྲང་ལྕོག་དགུ་ལྡན་པ་ཡི༔ བཻ་ཌཱུརྱ་ཡི་འོད་ཟེར་འབར་བ་ན༔ ཨུ་རྒྱན་ཡུལ་ཁམས་དག་ལ་དབང་སྒྱུར་བའི༔ རྒྱལ་པོ་སྤྱན་མེད་འབྱོར་ལྡན་ཞེས་ཀྱང་བྱ༔ ཆོས་རྒྱལ་པྲཛྙཱ་ཀཱིརྟི་ཞེས་ཀྱང་བྱ༔ རྒྱལ་པོ་ཆེན་པོ་གའུ་ཤ་ཞེས་བྱ༔ རྒྱལ་པོ་དྷ་ན་པཱ་ལ་ཞེས་ཀྱང་བྱ༔ རྒྱལ་པོ་ཨིནྡྲ་བོ་དྷི་ཞེས་ཀྱང་བྱ༔ དེ་ནས་རྒྱལ་པོ་སྤྱན་མེད་འབྱོར་ལྡན་དེ༔ མངའ་ཐང་འབྱོར་པ་ཆེ་སྟེ་མིག་གཉིས་ལོང་༔ སྲས་མེད་རྒྱལ་བློན་ཐམས་ཅད་ཡིད་ལ་གཅགས༔ བཙུན་མོ་ཞིག་ལ་རྒྱལ་བུ་སྐྱེས་པ་ལས༔ རྒྱལ་པོ་བཙུན་མོ་བློན་པོ་ཡིད་བདེར་གྱུར༔ བཙས་སྟོན་བྱས་ནས་རྒྱལ་བུ་ཤི་བ་དང་༔ རྒྱལ་པོ་བཙུན་མོ་ཐམས་ཅད་མྱ་ངན་ནོན༔ ཡུལ་དེར་མུ་གེ་ཆེན་པོ་ཞིག་ཀྱང་བྱུང་༔ མི་ནི་མང་དུ་ཤི་བར་གྱུར་པའི་ཚེ༔ རྒྱལ་པོ་སྤྱན་མེད་འབྱོར་ལྡན་ཡིད་སྐྱོ་སྨྲས༔ འཇིག་རྟེན་ཁམས་ན་ང་ལས་སྡུག་པ་མེད༔ དབང་པོའི་དངས་མ་མིག་ནི་ང་ལ་མེད༔ ཚེ་འདིར་དགོས་པའི་བུ་ནི་ང་ལ་མེད༔ ཕྱི་མར་དགོས་པའི་ཆོས་ནི་ང་ལ་མེད༔ རྒྱལ་པོ་འདེགས་པའི་དམངས་རྣམས་མུ་གེས་ཤི༔ ཞེས་པའི་སྨྲེ་སྔགས་སེམས་གཅོང་གདུང་བ་ལ༔ དེ་ནས་སྲང་སྲོང་ཨཱ་སེས་མྱ་ངན་བསངས༔ མི་ཡི་བདག་པོ་རྒྱལ་ཉིད་གསོན་མཛོད་དང་༔ བསགས་པའི་ནོར་འཛད་སྐྱེས་པའི་ཐ་མ་འཆི༔ འཇིག་རྟེན་དག་ན་ཚེ་ཐར་ཡོད་མ་ཡིན༔ འཇིག་པའི་རྐྱེན་མང་འཚོ་བའི་རྐྱེན་ནི་ཉུང་༔ གསོན་པར་འདོད་ཀྱང་རང་དབང་ཅུང་ཟད་མེད༔ མྱ་ངན་མ་མཛད་དགེ་བའི་ཕན་ཡོན་སོམས༔ ཡིད་བརྟན་ཞུམ་མེད་སྟོབས་ཆེ་ཁ་དོག་བདེ༔ དེ་སྐད་བརྗོད་པས་རྒྱལ་པོ་ཐུགས་ཚིམ་གྱུར༔ དབྱར་ཟླ་ར་བའི་ཚེས་ནི་བཅོ་ལྔ་ལ༔ དཀོན་ཅོག་དྲུང་དུ་མཆོད་པ་རྒྱ་ཆེན་ཕུལ༔ དཀོན་ཅོག་སྦྱིན་དང་ཆོས་ཀྱི་སྤྲིན་ཞེས་པ༔ ཐེག་པ་ཆེན་པོའི་མདོ་སྡེ་ཚར་གཅིག་བཏོན༔ འགྲོ་བ་རྣམས་ལ་མཆོད་སྦྱིན་རྒྱ་ཆེན་པོ༔ ཅི་ཡོད་སྦྱིན་པར་གཏོང་བར་དམ་བཅས་ཏེ༔ དེ་དུས་ཙ་ན་མི་ཀུན་མེ་ཏོག་ཟ༔ གྲོང་ཁྱེར་ཀ་མ་རུ་ཡི་བྱང་ཤར་ན༔ རྒྱ་མཚོ་དྲི་མེད་མདངས་ལྡན་ཞེས་བྱ་བར༔ མེ་ཏོག་པདྨ་མང་པོ་སྐྱེས་པ་ལ༔ མེ་ཏོག་ཨུ་དུམྺཱ་རའི་ནགས་ཚལ་ནི༔ སྡོང་པོ་པང་གིས་མི་འཁྱུད་པ་ཞིག་འདུག༔ ལོ་སྐོར་རེ་ལ་གསར་རྙིང་བརྗེས་ནས་སྐྱེ༔ ནམ་ཞིག་འབྲུག་ལོ་སྟོན་ཟླ་ར་བ་ཡི༔ ཁྲི་གདུགས་སྐར་མ་རྒྱལ་གྱི་ཉིན་པར་ནི༔ བློན་པོས་པདྨ་ལེན་དུ་ཕྱིན་པའི་ཚེ༔ པདྨའི་ཟེའུ་འབྲུ་མཐོ་བརྒྱད་འདུག་པའི་སྟེང་༔ ཁྱེའུ་ལྟ་མཛེས་ཟིལ་པ་ཕྲོམ་མེར་འདུག༔ ཁྱེར་ནས་རྒྱལ་པོའི་ཕྱག་ཏུ་ཕུལ་བ་ན༔ བུ་སྐལ་ཡོང་སྲིད་ཁྱེར་སྙམ་བསམས་པ་དང་༔ ལེགས་སམ་ལེགས་ན་བཟའ་སྨད་གུ་ཡང་སྐྱིད༔ ཉེས་སམ་ཉེས་ན་གྲི་བོ་རང་ལ་འབབ༔ དེ་བས་ཞུས་ནས་བཀའ་བཞིན་བྱ་བར་རིགས༔ རྒྱལ་པོའི་སྒོར་འོངས་འཕྲིན་འདོན་དོན་ཆེན་འཇལ༔ རྒྱལ་པོའི་དཀོར་མཛོད་ནོར་རྣམས་སྦྱིན་པར་བཏང་༔ ལོ་མང་སོང་ནས་དཀོར་མཛོད་ནོར་རྣམས་སྟོངས༔ སྦྱིན་པའི་འཕྲོ་ཆད་སློང་བའི་འཕྲོ་མ་ཆད༔ ད་ནི་བང་མཛོད་ཐམས་ཅད་སྟོངས་སོ་བརྗོད༔ སློང་བས་ངེད་ཀྱི་སྐལ་བ་མེད་པ་ན༔ སྔོན་ཆད་སྦྱིན་པ་བཏང་བ་དོན་མེད་ཟེར༔ དེ་ནས་རྒྱལ་པོས་ཐུགས་དགོངས་བཏང་བ་ལས༔ ཕྱི་བློན་ནང་བློན་བློན་པོའི་ཚོགས་རྣམས་བསྡུས༔ སྦྱིན་པ་ལོ་མངས་ཟས་ནོར་ཐམས་ཅད་ཟད༔ སློང་མོ་བ་ཡིས་འཕྲོ་མ་ཆད་པར་འདོད༔ ད་ནི་ཟས་ནོར་འབྱུང་ཐབས་ཅི་བྱ་གསུངས༔ ལ་ལས་སོ་ནམ་བྱས་ན་འབྱུང་ངོ་ཟེར༔ ལ་ལས་ཚོང་ཁེ་བྱས་ན་འབྱུང་ངོ་ཟེར༔ ལ་ལས་དམག་ཇག་དགྲ་ཟླ་བཅོམ་ན་ཟེར༔ ལ་ལས་ཅི་ཟེར་ལ་ལས་ཅང་ཟེར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོ་སྤྱན་མེད་འབྱོར་ལྡན་གྱིས་དཀོར་མཛོད་སྦྱིན་པར་བཏང་བའི་ལེའུ་སྟེ་བཅུ་གསུམ་པའོ༔ ༔
པདྨ་བཀའ་ཐང་ལེའུ་ ༡༤ གཟིགས་སྟངས་དྲི་མེད་མདངས་ལྡན།
དེ་ནས་སངས་རྒྱས་སྣང་བ་མཐའ་ཡས་ཀྱིས༔ ཟག་མེད་རིན་པོ་ཆེ་ཡི་ཕོ་བྲང་ནས༔ སྐུ་གསུང་ཐུགས་ཡོན་འཕྲིན་ལས་སྤྲུལ་པ་བཀྱེ༔ སྐུ་ལུས་བཀོད་པ་མཚན་བཟང་སུམ་ཅུ་གཉིས༔ འཁོར་ལོས་སྒྱུར་རྒྱལ་བཟང་པོ་མཆོག་ཏུ་སྤྲུལ༔ གླིང་བཞིར་དབང་མཛད་ཆོས་ཀྱི་འཁོར་ལོ་བསྐོར༔ འགྲོ་འདུལ་གཟིགས་སྟངས་རྣམ་པ་གསུམ་ལ་གཟིགས༔ གཟིགས་སྟངས་དང་པོ་འགྲོ་བ་རིགས་དྲུག་ཏུ༔ འགྲོ་བ་འདུལ་བའི་ཐུབ་དྲུག་གུ་རུ་དྲུག༔ མི་རྣམས་རྒྱུ་འབྲས་ཡིད་ཆེས་བསྐྱེད་པའི་ཕྱིར༔ ཨིནྡྲ་བོ་དྷིར་བུ་མེད་པ་ལ་གཟིགས༔ གཟིགས་སྟངས་གཉིས་པ་རྒྱ་བོད་རྩུབ་འགྱུར་ཅན༔ ལྷ་འདྲེ་ཤིན་ཏུ་ཐུ་བ་འདུལ་བར་དགོངས༔ རྫུས་སྐྱེས་མ་ཡིན་མངལ་སྐྱེས་མི་ཐུལ་བས།དྲི་མེད་མདངས་ལྡན་གཡུ་ཡི་མཚོ་ལ་གཟིགས༔ གཟིགས་སྟངས་གསུམ་པ་བོད་ཀྱི་རྒྱལ་ཁམས་སུ༔ ལྷ་སྲིན་འཁྲུག་པ་གདུག་པ་ཅན་གྱི་ཡུལ༔ མུན་པར་ཆོས་ཀྱི་སྒྲོན་མེ་གསལ་བྱེད་པ༔ ཆོས་རྒྱལ་ཆེན་པོ་ཁྲི་སྲོང་ལྡེའུ་བཙན་གཟིགས༔ གསལ་དབྱེ་ཞིབ་པར་བཤད་ན་འདི་ལྟར་རོ༔ ཨུ་རྒྱན་དྷ་ན་ཀོ་ཤའི་མཚོ་གླིང་ན༔ རྒྱ་མཚོ་དྲི་མེད་མདངས་ལྡན་ཞེས་བྱ་འཁོར༔ ཆུ་ཞེང་དཔག་ཚད་བརྒྱ་ཕྲག་ཉི་ཤུ་ཡོད༔ དྲི་མེད་མདངས་ལྡན་དཔག་ཚད་འབུམ་ཕྲག་གཅིག༔ ཟླུམ་ལ་འཁྱིལ་བ་སྔོ་ལ་དངས་པའི་མཚོ༔ དྲི་མེད་མདངས་ལྡན་ཡོན་ཏན་བརྒྱད་དང་ལྡན༔ དེ་གང་ཞེ་ན་རྣམ་གྲངས་འདི་ལྟ་སྟེ༔ གཙང་དང་དངས་པ་བསིལ་དང་འཇམ་པ་དང་༔ བསུང་དང་ངོམས་པ་བདེ་དང་ཞིམ་པའོ༔ གཙང་བ་དྲི་དང་ལྷན་ཅིག་མི་གནས་པ༔ དངས་པ་འདམ་གྱི་རྙོག་པ་མེད་པའོ༔ བསིལ་བ་ཞེས་ནི་ངར་དང་ལྡན་པའོ༔ འཇམ་པ་འཐུངས་ན་ཟུག་རྔུ་མེད་པའོ༔ བསུང་ནི་བཟང་པོའི་ངད་དང་ལྡན་པའོ༔
ཞིམ་པ་རོ་ནི་མཆོག་ཏུ་གྱུར་པའོ༔ ངོམས་པ་གདུང་བ་སེལ་བར་བྱེད་པའོ༔ བདེ་བ་གང་དེའི་ལུས་ལ་ཕན་པའོ༔ ནད་གདོན་བགེགས་ཀྱི་རིགས་གྱུར་གང་ལའང་ཕན༔ ཆུ་དེ་ལེན་དཀའ་རྫུ་འཕྲུལ་སྤྱོད་ཡུལ་ལོ༔ ལས་འཕྲོ་བཟང་པོ་ཡོད་པ་ཀུན་གྱིས་ལོན༔ འགྲོ་བ་སེམས་ཅན་ཀུན་གྱིས་སྒྲིབ་པ་སྦྱོང་༔ འཐུངས་དང་བཀྲུས་པ་མཐོང་བའི་མི༔ རྩོད་པ་ཅན་གྱི་སེམས་ཅན་ཡང་༔ ཆུ་འཐུངས་མི་རྩོད་པ་རུ་འགྱུར༔ འཐབ་མོ་ཅན་གྱི་སེམས་ཅན་ཡང་༔ ཆུ་འཐུངས་མི་འཐབ་པ་རུ་འགྱུར༔ ཁྲོ་གཏུམ་ཅན་གྱི་སེམས་ཅན་ཡང་༔ ཆུ་འཐུངས་མི་ཁྲོ་བ་རུ་འགྱུར༔ ཚིག་པ་ཅན་གྱི་སེམས་ཅན་ཡང་༔ ཆུ་འཐུངས་མི་ཚིག་པ་རུ་འགྱུར༔ རིགས་དྲུག་སེམས་ཅན་མང་པོ་ལས༔ ལྟ་བའི་མིག་རྣོ་ཀུན་གྱིས་ལྟོས༔ ལོག་ལྟ་ཀུན་གྱིས་ག་ལ་མཐོང་༔ ས་ལེར་འོད་གསལ་མདངས་ལྡན་མཆོག༔ འདྲེན་པའི་སྐྱེས་བུ་ཀོ་ཤའི་མཚོ་ལས་འཁྲུངས༔ ཨུ་རྒྱན་ཡུལ་གྱི་ལྷོ་ནུབ་ཉེ་བ་ན༔ དགེ་བའི་རྟགས་བྱུང་མཚོ་ཆེན་ཞིག་གི་གླིང་༔ རབ་ལེགས་མཛེས་ལྡན་ཅན་གྱི་ནུབ་བྱང་ངོས༔ གྲོང་ཁྱེར་ཀ་མ་རཱུ་པའི་བྱང་ཤར་མཚམས༔ པདྨའི་སྡོང་པོ་ཨུ་དུམྺཱ་རའི་ཚལ༔ ཉིན་མོ་ཉི་མས་མེ་ཏོག་ཆུ་གཏིང་བྱིང་༔ རྒྱ་མཚོ་ཆེན་པོ་བྱིན་དང་ལྡན་པར་བྱེད༔ མཚན་མོ་ཁ་རུ་ཐོན་པས་འོད་དང་ལྡན༔ འདྲེན་པའི་སྐྱེས་བུ་ཀོ་ཤའི་མཚོ་ལས་འཁྲུངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གཟིགས་སྟངས་དྲི་མེད་མདངས་ལྡན་ཡོན་ཏན་བརྒྱད་ལྡན་མཚོ་རབས་ཀྱི་ལེའུ་སྟེ་བཅུ་བཞི་པའོ༔ ༔
པདྨ་བཀའ་ཐང་ལེའུ་ ༡༥ རྒྱལ་པོ་ཨིནྡྲ་བོ་དྷིའི་རྣམ་ཐར།
དེ་ནས་རྒྱལ་པོ་ལ་སྲས་མི་མངའ་བས༔ མོ་མས་མོ་བྱས་རྩིས་པས་རྩིས་བརྩིས་ཤིང་༔ ཕྱྭ་པ་རྣམས་ཀྱིས་ཕྱྭ་གཡང་བླན་བྱས་པས༔ སྦྱིན་གཏོང་ཕོངས་མེད་བགྱིས་ན་སྲས་འབྱུང་ཞེས༔ ཆོས་སྐྱོང་རྒྱལ་པོ་ཨིནྡྲ་བོ་དྷི་ཡིས༔ ནང་པའི་པཎ་ཆེན་ལྔ་བརྒྱ་རྩ་གཅིག་དང་༔ དེ་བཞིན་ཕྱི་པ་ལྔ་བརྒྱ་རྩ་གཅིག་སྟེ༔ བླ་མཆོད་བཟང་པོ་སྟོང་དང་རྩ་གཉིས་རྣམས༔ རང་རང་ལྷ་ལ་མཆོད་སྒྲུབ་བྱེད་དུ་བཅུག༔ རྒྱལ་པོས་སྲས་འབྱུང་གསོལ་བ་བཏབ་ནས་སུ༔ སྦྲུལ་ལོ་ཆོ་འཕྲུལ་ཆེན་པོའི་ཉ་ལ་ནི༔ རིན་པོ་ཆེ་ཡི་མཛོད་མིག་སུམ་སྟོང་ཕྱེ༔ དེ་ནས་རང་བྱུང་གཟི་འདྲའི་མཆོད་རྟེན་ལ༔ ཕྱི་མཆོད་ནང་མཆོད་གསང་མཆོད་ཆེན་པོ་མཛད༔ ཕྱོགས་བཞི་མཚམས་བརྒྱད་མཐའ་དག་སྐད་བསྒྲགས་ནས༔ གང་ལ་གང་མཁོ་བཏང་ཡང་སྲས་མ་བྱུང་༔ བླ་མཆོད་དྲང་སྲོང་ཨཱ་སེ་ན་ཞེས་བྱ༔ བདེན་པ་མཐོང་བ་གྲུབ་པ་ཐོབ་པ་ཞིག༔ དཔོན་གཡོག་བདུན་བྱུང་ངེད་ལ་སྦྱིན་ཐོང་ཟེར༔ སྦྱིན་པ་གཏོང་རྒྱུ་མེད་དོ་སྨྲས་པ་དང་༔ ངེད་ཀྱི་སྦྱིན་པའི་སྐལ་བ་མེད་པ་ན༔ གཞན་སྦྱིན་བཏང་བ་དོན་མེད་ཆུ་ལ་ཕོ༔ ངེད་ཀྱིས་བདེན་པའི་སྟོབས་བརྗོད་འགྲུབ་བོ་གསུངས༔ རྒྱལ་པོའི་ཞལ་ནས་འོ་ན་ཁྱོད་ཅག་རྣམས༔ ང་ཡི་ཕོ་བྲང་ནང་གཤེགས་བཞུགས་སུ་གསོལ༔ དྲང་སྲོང་རྣམས་ཀྱིས་བདེན་པའི་ཚིག་བརྗོད་པ༔ སྲས་འབྱུང་བ་རུ་སྨོན་ལམ་དགེ་བར་ཐོབ༔ བཙུན་མོ་རྣམས་ཀྱིས་བཀུར་སྟི་གྱིས་ཤིག་གསུངས༔ རྒྱལ་པོ་དཔོན་གཡོག་ཕྱི་ཡི་རྒྱ་མཚོ་ལ༔ ནོར་བུ་ལེན་དུ་ཕྱིན་པའི་ཤུལ་དུ་ནི༔ ཕྱི་ནང་བླ་མཆོད་པཎ་ཆེན་སྟོང་རྩ་གཉིས༔ རབ་ཏུ་ཤིན་ཏུ་ཐུགས་མུག་ཡིད་ཆད་ནས༔ ལྷ་འདྲེ་གདུག་པ་ཅན་རྣམས་སྒྲོལ་བ་ཡི༔ སྦྱིན་སྲེག་བྱེད་པའི་བཅའ་གཞི་བྱེད་པར་བཤམས༔ ལྷ་འདྲེ་ཐམས་ཅད་འདུས་ཤིང་འཁྲུགས་ནས་སུ༔ ཐོག་སེར་གློག་འཁྱུག་སྒྲ་འོད་ང་ནག་འཁྲུགས༔ ས་གཡོས་རྡོ་སེར་དམག་འཁྲུག་མུག་ཡམས་ཀྱིས༔ ཨུ་རྒྱན་ཡུལ་རྣམས་བྲེད་ཅིང་རབ་ཏུ་སྐྲག༔ ས་ནས་འཕར་ཞིང་ཆོ་ངེ་ཆོ་དགུ་འདེབས༔ ཉ་མོ་བྱེ་ཚན་བཏོན་པ་བཞིན་གྱུར་ཏོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོ་ཨིནྡྲ་བོ་དྷིའི་རྣམ་ཐར་གྱི་ལེའུ་སྟེ་བཅོ་ལྔ་པའོ༔ ༔
པདྨ་བཀའ་ཐང་ལེའུ་ ༡༦ རྒྱལ་པོ་ཨིནྡྲ་བོ་དྷིས་ཡིད་བཞིན་གྱི་ནོར་བུ་ལོན་པ།
དེ་ནས་རྒྱལ་པོས་དེ་དག་བྱ་ལས་རྣམས༔ ཆོས་དང་མཐུན་པའི་བྱ་ལས་མ་ཡིན་བསམ༔ རྒྱ་མཚོར་ཞུགས་ཏེ་ནོར་བུ་རིན་ཅེན་བླངས༔ དབུལ་ཕོངས་རྣམས་ལ་སྦྱིན་པ་ཡིད་བཞིན་བྱ༔ རྒྱ་མཚོར་རིན་ཅེན་ལེན་དུ་ཕྱིན་མནོ་ཞིང་༔ དེ་ཚེ་ཡུལ་ན་ཚོང་དཔོན་རྒད་པོ་ཞིག༔ སྔོན་ཆད་རྒྱ་མཚོར་ལན་མང་ཕྱིན་པ་ཡོད༔ དེ་ཡི་གན་དུ་རྒྱལ་པོ་སོང་ནས་སུ༔ ཁོ་བོ་རྒྱ་མཚོར་འཇུག་པའི་ས་མཁན་དུ༔ ཁྱོད་ཉིད་འགྲོ་དགོས་ད་ལྟ་ཆོས་ཤིག་སྨྲས༔ དེད་དཔོན་རྒྱ་མཚོར་འགྲོ་ནི་མི་རུང་སྟེ༔ དབུལ་ཕོངས་ལུས་སྲོག་བསྡོས་ནས་འགྲོ་བ་ཡིན༔ རྒྱ་མཚོའི་ནང་ན་ཆུ་བས་རྦ་ཀློང་འཁྱིལ༔ ཆུ་སྲིན་དང་ནི་ཀླུ་ཡང་གདུག་པ་ཅན༔ སྲིན་མོ་རི་ཆུའི་མདོག་ཅན་ལ་སོགས་པ༔ ཤིན་ཏུ་ཡ་ངའི་བགེགས་ཀྱང་མང་དུ་ཡོད༔ རྒྱལ་པོའི་སྤྱན་གྱིས་མི་གཟིགས་འགྲོ་མི་ནུས༔ ཞེས་སྨྲས་དེ་ནས་རྒྱལ་པོས་བསྒོ་བ་ནི༔ བསམ་པ་འདི་ཉིད་མ་གྲུབ་ཤི་ནས་སྡོད༔ རྒྱ་མཚོར་འགྲོ་བའི་ས་མཁན་གྱིས་ཤིག་དང་༔ ཅི་དགོས་བཀའ་སྩོལ་བདག་གིས་བསྒྲུབ་བོ་ཟེར༔ དེད་དཔོན་ས་མཁན་འདི་སྐད་ཅེས་པ་སྨྲས༔ ཆུ་སྲིན་བརྟག་པའི་ཕུག་རོན་གསོན་མ་དགོས༔ ཕུག་རོན་གསོ་བའི་བ་གཞོན་དམར་མོ་དགོས༔ བ་ཉིད་གསོ་བའི་རྩྭ་ཕོན་མང་དུ་དགོས༔ ཆུ་སྲིན་གསོད་པའི་དུང་ནི་གསོན་མ་དགོས༔ གཟིངས་དང་གཟིངས་ཀྱི་སྡོམ་ཐག་གསུམ་ཐོག་དགོས༔ ཕྱོགས་བཞིར་ཞ་ཉེའི་གཏིང་རྡོ་ཆེན་པོ་བཞི༔ གསོ་མ་ར་ཙ་རྔ་མའི་ཐག་པ་དགོས༔ རླུང་ཕྱོགས་འབབ་ལ་གཡེར་ཤིང་རྒྱལ་མཚན་དགོས༔ དེ་ནས་རྒྱལ་པོས་དེ་རྣམས་ལེགས་པར་བསྒྲུབས༔ དེད་དཔོན་གྲུ་བཅོས་གཟིངས་ཆས་ལེགས་པར་བྱས༔ རྒྱལ་པོའི་འཁོར་གྱིས་མི་བཞུད་བཤོལ་བཏབ་ཀྱང་༔ མ་གནང་གཟིངས་ཀྱི་ནང་དུ་ཞུགས་པར་གྱུར༔ ཚོང་པ་ལྔ་བརྒྱ་ཙམ་ཡང་གཟིངས་ལ་ཞུགས༔ དེ་ནས་དེད་དཔོན་རྒྱ་མཚོའི་ནང་ལ་ཕྱིན༔ གྲུ་ནང་ཞུགས་ནས་ཐག་པ་བདུན་གྱིས་བརྟོད༔ རླུང་ཕྱོགས་སྦྱར་ཏེ་འགྲོ་བའི་ཚོང་པ་ལ༔ རྒྱ་མཚོའི་ནང་ན་བགེགས་རིགས་སྣ་ཚོགས་ཡོད༔ བདེ་བར་ཕྱིར་འཁོར་བ་ནི་ཤིན་ཏུ་ཉུང་༔ དེ་ལ་ཐེ་ཚོམ་ཟ་རྣམས་ཕྱིར་དེངས་ཤིག༔ གལ་ཏེ་ལུས་དང་སྲོག་ལ་མི་བལྟ་ཞིང་༔ ཕ་དང་བུ་དང་ཆུང་མ་གཉེན་བཤེས་ལ༔ མ་ཆགས་མ་ཞེན་རིན་ཅེན་སེམས་པ་རྣམས༔ རིན་ཅེན་གླིང་དུ་ཕྱིན་ཀྱང་བདེ་བར་འཁོར༔ བུ་དང་ཚ་རབས་ཡང་ཚ་བདུན་ཚུན་ཆོད༔ རིན་ཅེན་ནོར་དང་མི་འབྲལ་འཚེངས་པར་འགྱུར༔ ཞེས་བསྒྲགས་དེ་ནས་ཐག་པ་གཅིག་བཅད་དོ༔ དེ་བཞིན་ཉི་མ་བདུན་པར་དེ་སྐད་བསྒོ༔ ཐག་པ་རེ་རེ་བཅད་ནས་ང་ཕྱོགས་སུ༔ དར་པོ་ཆེ་དང་གཡེར་ཤིང་རྒྱལ་མཚན་བསྒྲེངས༔ མགྱོགས་པའི་ཁྱད་ཀྱང་དཔག་ཆེན་མདའ་བཞིན་སོང་༔ དེ་ནས་རིན་པོ་ཆེ་ཡི་གླིང་ཕྱིན་ནས༔ འཁོར་རྣམས་རིན་པོ་ཆེ་ཡི་གླིང་དུ་བཞག༔ རྒྱལ་པོ་དེད་དཔོན་གྲུ་ཆུང་ཞིག་ནང་ཞུགས༔ རིམ་གྱིས་བགྲོད་པས་རིན་ཅེན་གླིང་ཉེར་སླེབས༔ སྨོན་ལམ་སྟོབས་ཀྱིས་རྒྱལ་པོའི་མཐོང་ཡུལ་དུ༔ རགས་པའི་ཡུལ་སྣང་ཅུང་ཞིག་གསལ་བར་གྱུར༔ བལྟས་པས་རི་ནི་དཀར་པོ་ཞིག་སྣང་སྟེ༔ རྒྱལ་པོས་ཕ་གི་ཅི་ཡི་རི་ཡིན་དྲིས༔ དེད་དཔོན་ཕ་གི་དངུལ་གྱི་རི་ཡིན་ཟེར༔ དེ་ནས་སོང་བས་རི་ནི་སྔོན་པོ་མཐོང་༔ ཕ་གི་ཅི་ཡི་རི་ཡིན་དྲིས་པ་དང་༔ རིན་ཅེན་བཻ་ཌཱུརྱ་ཡི་རི་ཡིན་ཟེར༔ དེ་ནས་ཡང་སོང་སེར་པོ་ཞིག་སྣང་སྟེ༔ དེ་ནི་རིན་ཅེན་གསེར་གྱི་རི་ཡིན་ཟེར༔ གསེར་གྱི་རི་དེའི་རྩ་རུ་ཕྱིན་པ་དང་༔ ས་གཞི་ཐམས་ཅད་གསེར་གྱི་བྱེ་མར་སྣང་༔ གསེར་གྱི་བྱེ་མའི་སྟེང་དུ་ཡུན་ཞིག་འདུག༔ རྒྱལ་པོའི་སྙན་དུ་དེད་དཔོན་འདི་སྐད་སྨྲས༔ བདག་ནིརྒས་པས་ད་ནི་འགྲོ་མི་ཕོད༔ ཁྱོད་ཀྱིས་འདི་ནས་དཔག་ཚད་གཅིག་སོང་དང་༔ མདུན་ན་རིན་ཅེན་སྣ་ཚོགས་མཁར་བརྒྱ་ཡོད༔ ཐེ་ཚོམ་མེད་པར་མཁར་ནང་བཙངས་ཀྱིས་སོང་༔ གལ་ཏེ་མཁར་སྒོ་བཅད་ནས་འདུག་པ་ན༔ མཁར་གྱི་ཡ་ཐེམ་གསེར་གྱི་གཡུང་དྲུང་བྲིས༔ མ་ཐེམ་རྡོ་རྗེ་རྒྱ་གྲམ་བྲིས་པ་ཡོད༔ སྒོ་དྲུང་རྡོ་རྗེའི་གཏུན་བུ་ཞིག་ཡོད་དེ༔ རྡོ་རྗེའི་གཏུན་གྱིས་མཁར་གྱི་སྒོ་རྡུངས་ཤིག༔ དེ་ཡི་ནང་ནས་ཀླུ་ཡི་བུ་མོ་ནི༔ མཛེས་ལྡན་མ་ཞེས་ཁ་དོག་མཐིང་ག་ཞིག༔ མགོ་ལུས་མེད་པར་རིན་ཅེན་སྣ་བདུན་བརྒྱན༔ ལག་ན་སྔོ་ཧྲིལ་ཁ་དོག་འོད་ལྔ་འབར༔ ཡིད་བཞིན་ནོར་བུའི་མཆོག་དེ་འབུལ་དུ་འོང་༔ ཐོབ་མ་ཐག་ཏུ་མ་ཤོར་དམ་དུ་བཟུང་༔ དེ་ལོན་པས་ན་ནོར་བུས་བསམ་དགུ་འབྱུང་༔ དབང་པོ་རབ་ཏུ་བསྡོམས་ལ་མ་སྨྲ་ཞིག༔ མཇུག་ལ་ལྷ་མོ་ལྔ་ཞིག་འོངས་ནས་ཀྱང་༔ རིན་ཅེན་མང་པོ་ཐོགས་ནས་འབུལ་དུ་འོང་༔ མྱུར་དུ་ལོང་ལ་གོས་ཀྱི་མཐུར་ཐུམས་ཤིག༔ ཅེས་པ་དེད་དཔོན་རྒྱལ་པོར་བསླབས་པ་དང་༔ རྒྱལ་པོས་བསྒོ་བ་བཞིན་དུ་བྱས་ཏེ་ཕྱིན༔ རིན་ཅེན་མཁར་ནི་མང་པོའི་ནང་ནས་སུ༔ རིན་ཅེན་སྣ་བདུན་མཁར་གྱི་ནང་དུ་ཕྱིན༔ སྒོ་ཡང་དམ་བཅད་རྡོ་རྗེའི་གཏུན་བུས་བརྡུངས༔ སྒོ་ནི་རང་བྱེ་ལྷ་མོས་རིན་ཅེན་ཐོགས༔ ལྷ་མོ་མཐིང་གས་ནོར་བུ་སྔོན་པོ་བྱིན༔ ཀླུ་མོ་རྣམས་ཀྱིས་རིན་ཅེན་མང་པོ་བྱིན༔ དེད་དཔོན་སྨྲས་པ་བཞིན་དུ་ནོར་བུ་བླངས༔ རིང་པོར་མ་ལོན་དེ་མ་ཐག་ཕྱིར་ལོག༔ དེད་དཔོན་གནས་སར་ཕྱིན་ཏེ་དྲིན་ཆེ་སྨྲས༔ ནོར་བུ་གོས་ཀྱིས་གཏུམས་ཏེ་གསོལ་བཏབ་པས༔ རྒྱལ་པོའི་སྤྱན་ལོང་གཡོན་པ་ཕྱེད་པར་གྱུར༔ ཨིནྡྲ་བོ་དྷི་ཞེས་ནི་སྒྲ་བྱུང་ངོ་༔ དེ་ནས་ཚོང་པ་ཕལ་པ་ཡོད་དེར་ཕྱིན༔ དེད་དཔོན་ནོར་བུ་བརྟག་ལ་མཁས་པ་དེས༔ རིན་ཅེན་མང་ཉུང་བཟང་ངན་ཚད་བསྟན་ནས༔ ནོར་བུའི་ནང་ནས་རིན་ཅེན་མང་པོ་ཚོལ༔ ནོར་བུ་མཆིང་བུ་ལ་སོགས་བགོས་ནས་བྱིན༔ མངས་ན་གཟིངས་ཆུར་བྱིང་ནས་སྲོག་དང་འབྲལ༔ ཆོག་ཤེས་གྱིས་ཤིག་གཟིངས་ལ་འཇུག་གོ་ཟེར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོ་ཨིནྡྲ་བོ་དྷིས་ཡིད་བཞིན་གྱི་ནོར་བུ་ལོན་པའི་ལེའུ་སྟེ་བཅུ་དྲུག་པའོ༔ ༔
པདྨ་བཀའ་ཐང་ལེའུ་ ༡༧ ཨིནྡྲ་བོ་དྷི་མཇལ་ཞིང་རྟེན་འབྲེལ་བརྟགས་པ།
དེ་ནས་གཟིངས་ཀྱི་ཁ་ལོ་བསྒྱུར་ནས་སུ༔ རྒྱལ་པོ་འཁོར་བཅས་ཡུལ་ཕྱོགས་འོངས་པ་དང་༔ གོང་གི་པདྨ་ལེན་པའི་བློན་པོ་དེ༔ ཆོས་ཀྱི་བློན་པོ་ཏྲིག་ན་འཛིན་ཞེས་ཏེ༔ གྲུ་ཆུང་ཞིག་ཏུ་ཞུགས་ནས་སྔུན་བསུར་བྱུང་༔ རྒྱ་གར་རྡོ་རྗེ་གདན་གྱི་ལྷོ་ནུབ་མཚམས༔ ནུབ་ཕྱོགས་ཨུ་རྒྱན་ཡུལ་གྱི་བྱང་ཤར་ངོས༔ དྷ་ན་ཀོ་ཤའི་ནུབ་བྱང་པདྨོའི་ཚལ༔ དྲི་མེད་མདངས་ལྡན་རྒྱ་མཚོའི་གླིང་ཞིག་ན༔ ངུར་བ་ཁྲུང་ཁྲུང་ལ་སོགས་ཆུ་བྱའི་རིགས༔ དཔག་ཏུ་མེད་པ་ཁྲ་ཅེམ་སོང་བའི་དབུས༔ འཇའ་ཚོན་སྣ་ལྔའི་འོད་ཀོར་གུར་ཕུབ་འདུག༔ རྒྱལ་པོས་ཏྲིག་ན་འཛིན་ལ་བཀའ་སྩལ་པ༔ ཕ་གིར་ཅི་འདུག་ལྟོས་ལ་ཤོག་དང་གསུངས༔ རྒྱལ་པོར་སྤྱན་མེད་གཟིགས་པ་ཇི་ལྟར་ཡིན༔ ངས་ནི་ཡིད་བཞིན་ནོར་བུ་ལོན་པ་ལས༔ གསོལ་བ་བཏབ་པས་མི་གཡོན་ཕྱེད་དོ་གསུངས༔ བློན་པོས་སྨྲས་པ་པདྨའི་ཚལ་དབུས་ན༔ ཁྱེའུ་ཆུང་ཡ་མཚན་ཅན་ཞིག་བཞུགས་ནས་འདུག༔ རྒྱལ་པོའི་བུ་སྐལ་ཁྱེར་སྙམ་སོམ་ཉི་ཞུགས༔ རྒྱལ་པོ་ཉིད་རང་གཟིགས་སུ་ཆས་པར་ཞུ༔ རྒྱལ་པོ་ཨིནྡྲ་བོ་དྷིའི་ཞལ་ན་རེ༔ ཉེ་བར་འགྲོ་དགོས་མདང་གི་རྨི་ལམ་ན༔ གསེར་གྱི་རྡོ་རྗེ་རྩེ་དགུ་འོད་འཕྲོ་ཞིག༔ ནམ་མཁའ་ནས་བྱུང་ལག་ཏུ་ལོན་པ་རྨིས༔ ཉི་མ་བདག་གི་སྙིང་ནས་ཤར་བ་རྨིས༔ དེ་སྐད་གསུངས་ནས་རྒྱལ་པོ་བློན་པོ་གཉིས༔ གྲུ་ཆུང་ཞིག་ཏུ་ཞུགས་ནས་ཕྱིན་པ་དང་༔ ངུར་པའི་ཚོགས་རྣམས་སྒྲ་དིར་འདྲོགས་པར་གྱུར༔ པདྨའི་སྟེང་ན་ཁྱེའུ་ལོ་བརྒྱད་ཙམ༔ བལྟ་ན་སྡུག་པ་བྱད་བཞིན་ལེགས་པ་ཞིག༔ སྐུ་མདོག་དུང་ལ་ཕོ་ཚོས་བསྐུས་པ་འདྲ༔ རྒྱལ་པོ་ངོ་མཚར་སྐྱེས་ནས་གསོལ་བ་ནི༔
ཨེ་མ་ཧོཿཡ་མཚན་ཅན་གྱི་ཁྱེའུ་ཆུང་ཁྱད་འཕགས་ཁྱོད༔ ཡབ་ནི་གང་ཡིན་ཡུམ་ནི་གང་ཡིན་པ༔ ཡུལ་ནི་གང་ཡིན་རིགས་ནི་གང་དུ་གཏོགས༔ ཟས་སུ་ཅི་གསོལ་འདི་རུ་ཅི་མཛད་གསུངས༔ དེ་ནས་ཁྱེའུ་ཆུང་གིས་བཀའ་སྩལ་པ༔ བདག་གི་ཕ་ནི་རིག་པའི་ཡེ་ཤེས་ཡིན༔ མ་ནི་བདེ་སྟོང་ཀུན་ཏུ་བཟང་མོ་ཡིན༔ ཡུལ་ནི་ཆོས་དབྱིངས་སྐྱེ་བ་མེད་པ་ཡིན༔ རིགས་ནི་དབྱིངས་རིག་གཉིས་སུ་མེད་པར་གཏོགས༔ ཟས་སུ་གཉིས་སྣང་རྟོག་པ་ཟ་བ་ཡིན༔ འདིར་ནི་ཉོན་མོངས་གསོད་པའི་སྤྱོད་པ་སྐྱོང་༔ དེ་སྐད་གསུངས་པས་རྒྱལ་པོ་སྤྱན་ཆབ་ཤོར༔ མིག་ལོང་གཡས་པ་དེ་ཡང་ཕྱེད་པར་གྱུར༔ ཆོས་བློན་ཏྲིག་ན་འཛིན་གྱིས་ངུ་འབོད་བཏོན༔ རྒྱལ་བུའི་མཚན་ནི་མཚོ་སྐྱེས་རྡོ་རྗེར་བཏགས༔ འདི་ནི་སྤྲུལ་པའི་སྐུ་ཞིག་ཡིན་སྙམ་ནས༔ ང་ཡི་བུ་སྐལ་མཆོད་གནས་བྱའོ་སྙམ༔ པདྨའི་སྡོང་པོ་ཁྱེའུར་བཅས་པ་ཁྱེར༔ རྒྱལ་པོ་ཉིད་ཀྱི་ཡུལ་ཕྱོགས་ཕྱིན་པར་གྱུར༔ ངུར་པ་ཁྲུང་ཁྲུང་ལ་སོགས་ཆུ་བྱའི་རིགས༔ ལ་ལ་ཕྱིར་འབྲང་ལ་ལ་སྐད་ངན་སྒྲོགས༔ ལ་ལ་ཁྱེའུའི་སྟེང་དུ་ལྷུང་ཐབས་འབེབས༔ ལ་ལ་མཚོ་མཐར་ཕྱོགས་བཞི་མཚམས་བརྒྱད་བསྐོར༔ ལ་ལ་མཆུ་ནི་ས་ལ་བཙུགས་ནས་བསྒྲེ༔ དེ་ནས་ཕྱིན་ཕྱིན་གྱུར་པའི་མཚོ་འགྲམ་ན༔ མི་རྒན་མགོ་དཀར་ཞིག་གིས་ཉ་རྒྱ་བཙུགས༔ ལྕགས་ཀྱུ་རེ་ཡིས་ཉ་རེ་བཟུང་ནས་སུ༔ སྐམ་ལ་ཕྱུང་ནས་ལིང་ལིང་འཕར་གྱིན་འདུག༔ གུ་རུ་མཚོ་སྐྱེས་རྡོ་རྗེའི་ཐུགས་དགོངས་ལ༔ བདག་གིས་རྒྱལ་པོའི་རྒྱལ་སྲིད་གཟུང་བ་ན༔ ཉ་མོ་ལྕགས་ཀྱུས་ཟིན་འདྲའི་སྡུག་བསྔལ་ཡོད༔ ཅེས་པའི་བརྡ་ཆོས་ལ་ཉེ་རྟེན་འབྲེལ་གོ༔ དེ་ནས་ཡང་ཕྱིན་གྱུར་པའི་ཚལ་ཞིག་ན༔ ཁྭ་ད་ཞིག་གིས་སྲེག་པ་བདས་སོང་བས༔ ཚེར་ཕུང་ཞིག་ལ་སྲེག་པ་འཁྲིས་ནས་སོང་༔ ཁྭ་ད་དེ་ཡང་ཚེར་ཕུང་རྩར་སོང་ནས༔ ཁྭ་དས་གཡས་ཕྱིན་སྲེག་པས་གཡོན་ལ་བྲོས༔ ཁྭ་དས་གཡོན་ཕྱིན་སྲེག་པས་གཡས་ལ་བྲོས༔ དེ་ཉིད་འབྲོས་འདེད་ཡུན་རིང་བྱས་ནས་སུ༔ བར་སྐབས་ཞིག་ལ་སྲེག་པས་བྲོས་པས་ཐར༔ ཚེར་ཕུང་དེ་ཉིད་རྒྱལ་པོའི་རྒྱལ་སྲིད་དང་༔ ཁྭ་ད་དེ་ཉིད་ཨིནྡྲ་བོ་དྷི་འདྲ༔ སྲེག་པ་དེ་ཉིད་མཚོ་སྐྱེས་རྡོ་རྗེ་སྟེ༔ རྒྱལ་སྲིད་ཐབས་ཀྱིས་སྤང་བའི་བརྡ་རུ་གོ༔ དེ་ནས་ཕྱིན་པས་འཇག་ཁྱིམ་གྲོང་ཞིག་ན༔ དགེ་བསྙེན་ཕོ་མོ་གཉིས་ཀྱི་བུ་ཤར་ཅིག༔ བྱི་པ་བསད་པས་ཁྱིམ་དུ་མི་གཏོང་མཐོང་༔ རྒྱལ་པོའི་ཁྲིམས་ལ་གནོད་པ་བསྐྱལ་བ་ན༔ བདག་ཉིད་སྤྱུག་པའི་བརྡ་ཆོས་རྟེན་འབྲེལ་གོ༔ དེ་ནས་རྒྱལ་པོའི་ཕོ་བྲང་མཐོང་བར་གྱུར༔ ཐམས་ཅད་རབ་ཏུ་དགའ་ནས་ལྟད་མོས་བསུས༔ སྟག་ཤོན་སེང་ཤོན་ཁྱུང་ཤོན་བརྒྱ་ཕྲག་གསུམ༔ སྔགས་འཆམ་སྔགས་གར་སྔགས་གིང་བརྒྱ་གསུམ་དང་༔ ནི་གུ་རྒྱན་ལྡན་བརྒྱ་གསུམ་ཞེ་ས་འབུལ༔ ཁྱེའུ་སུམ་བརྒྱས་གར་གྱི་ཕྱག་རྒྱ་བསྒྱུར༔ རྔ་བོ་ཆེ་སོགས་རོལ་མོའི་རིགས་བྱེད་སྦིར༔ གདུགས་དང་རྒྱལ་མཚན་དར་གྱི་རིགས་བྱེད་ཕྱར༔ འཇིག་རྟེན་ཁམས་ཀྱི་ལྟད་མོའི་རིགས་བྱེད་རྣམས༔ འདྲ་འབག་མང་པོ་གྱོན་ནས་རྩེ་བར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོ་ཨིནྡྲ་བོ་དྷི་དང་ཞལ་མཇལ་ཞིང་རྟེན་འབྲེལ་བརྟགས་པའི་ལེའུ་སྟེ་བཅུ་བདུན་པའོ༔ ༔
པདྨ་བཀའ་ཐང་ལེའུ་ ༡༨ རྒྱལ་པོ་ཨིནྡྲ་བོ་དྷིས་ནོར་བུ་ལ་གསོལ་བ་བཏབ་པ།
དེ་ནས་རྒྱལ་པོ་ཨིནྡྲ་བོ་དྷི་ཡིས༔ དགོས་འབྱུང་ཡིད་བཞིན་ནོར་བུ་རིན་པོ་ཆེ༔ བ་ཚྭ་ཅན་གྱི་ཆུ་ལ་ལེགས་པར་བཀྲུས༔ ཀཱ་ཤི་ཀ་ཡི་རས་ཀྱིས་བྲད་ནས་སུ༔ ཤིང་ཁྱོགས་དར་ཟབ་འདོ་ལེའི་སྟེང་དུ་བཞག༔ ང་ཡིས་རྙེད་པའི་ནོར་བུ་རིན་ཅེན་འདི༔ ཡིད་བཞིན་ནོར་བུ་ཡང་དག་ཡིན་ངེས་ན༔ ང་ཡི་ཁྱེའུ་འདི་ཉིད་བཞུགས་པའི་ཁྲི༔ རིན་ཅེན་སྣ་བདུན་མཐོ་བའི་ཁྲིར་གྱུར་ལ༔ རིན་ཅེན་སྣ་བདུན་གདུགས་ཀྱང་ཡོད་པར་ཤོག༔ དེ་སྐད་བརྗོད་མ་ཐག་ཏུ་གྲུབ་པར་གྱུར༔ དེ་ལ་ཁྱེའུ་བཞུགས་རྒྱལ་པོར་མངའ་གསོལ་ནས༔ མཚན་ཡང་པདྨ་རྒྱལ་པོ་ཞེས་བྱར་བཏགས༔ དེ་ནས་རྒྱལ་པོས་སྨོན་ལམ་འདི་སྐད་བཏབ༔ ང་ཡིས་ལོན་པའི་ནོར་བུ་རིན་ཅེན་འདི༔ ཡིད་བཞིན་མ་ནོར་བ་ཞིག་ཡིན་ངེས་ན༔ བང་མཛོད་སྟོངས་པ་ཐམས་ཅད་གང་བར་ཤོག༔ དེ་སྐད་བརྗོད་མ་ཐག་ཏུ་བང་མཛོད་རྣམས༔ སྔར་དུས་ཅི་ཡོད་ཐམས་ཅད་གང་བར་གྱུར༔ དེ་ནས་རྒྱལ་པོས་རྔ་བོ་ཆེ་བརྡུངས་ནས༔ ཕྱོགས་བཞི་མཚམས་བརྒྱད་ཀུན་ཏུ་སྒྲ་བསྒྲགས་ཏེ༔ རྒྱལ་པོ་ཨིནྡྲ་བོ་དྷིས་ཡིད་བཞིན་ལོན༔ ནོར་བུ་རིན་ཅེན་དགོས་འདོད་ཆར་འབེབས་པས༔ གང་སུ་ཅི་འདོད་གང་འདོད་ཐམས་ཅད་ལོངས༔ དེ་སྐད་ཅེས་པ་ཕོ་ཉས་སྒྲ་བསྒྲགས་སོ༔ རྒྱལ་པོས་ཡིད་བཞིན་ནོར་བུར་ཁྲུས་ཆབ་གསོལ༔ རྒྱལ་མཚན་རྩེ་ལ་བཏགས་ནས་གདུགས་འཕན་ཕྱར༔ ཙནྡན་ཨ་ཀ་རུ་དང་ཆོས་དབྱངས་དང་༔ སི་ཧཱ་ལ་སོགས་དྲི་བཟང་དྲི་ཡིས་བདུགས༔ ཕྱི་ནང་མཆོད་པ་འདོད་ཡོན་མང་པོས་མཆོད༔ རོལ་མོའི་རིགས་བྱེད་དཔག་ཏུ་མེད་པས་བསྐོར༔ རྒྱལ་པོས་ཁྲུས་བྱས་གོས་བཟང་གཙང་མ་གྱོན༔ ཕྱོགས་བཞིའི་ལྷ་ལ་ཕྱག་བཙལ་འདི་སྐད་བརྗོད༔ ང་ཡིས་རྙེད་པའི་ནོར་བུ་རཏྣ་འདི༔ ཡིད་བཞིན་མ་ནོར་བ་ཞིག་ཡིན་ངེས་ན༔ མཆོག་དང་ཐུན་མོང་ཅི་འདོད་ཆར་ཕོབ་ཅིག༔ བརྗོད་པ་ཙམ་གྱིས་ཕྱོགས་བཞིར་ང་ལངས་ནས༔ མི་གཙང་ཐམས་ཅད་ཕྱགས་ནས་གཙང་བར་བྱས༔ དེ་ཡི་སྟེང་དུ་སྦྲང་ཆར་ཟིམ་བུར་བབ༔ རྡུལ་མི་ལྡང་བར་བྱི་དོར་བྱས་ནས་སུ༔ དང་པོར་ཁ་ཟས་རོ་བརྒྱའི་ཆར་པ་ཕབ༔ ལྟོགས་པའི་མི་རྣམས་ཐམས་ཅད་ཚིམ་པར་བྱས༔ དེ་ནས་གོས་ཀྱི་རིགས་བྱེད་ཆར་པ་ཕབ༔ འཁྱགས་པའི་མི་རྣམས་ཐམས་ཅད་ཚིམ་པར་བྱས༔ དེ་ནས་ནོར་གྱི་རིགས་བྱེད་ཆར་པ་ཕབ༔ རིན་ཅེན་གསེར་གཡུ་བཻཌཱུརྱ་དང་ནི༔ མུ་ས་གརྦྷ་དང་ནི་བཞོན་པ་དང་༔ ཐེག་པ་ཁྱོག་དང་སྐྱེད་མོས་ཚལ་དང་མཚེར༔ ཞིང་དང་ཁང་པ་རྐང་འགྲོས་ལ་སོགས་པ༔ གང་ལ་གང་འདོད་ཐམས་ཅད་ཚིམ་པར་བྱས༔ རྒྱལ་པོའི་མངའ་འོག་ཡོད་པ་ཐམས་ཅད་རྣམས༔ ལྟོགས་ཕོངས་དབུལ་བའི་སྡུག་བསྔལ་བྲལ་བར་གྱུར༔ དེ་ནས་མཁའ་ལ་སྒྲ་དང་འོད་དུ་བཅས༔ འཇའ་འོད་ཟེར་གསུམ་ནང་ནས་སྒྲ་བྱུང་སྟེ༔ བདེ་བ་ཆེན་པོ་དྲུག་པ་རྡོ་རྗེ་འཆང་༔ མེ་རི་འབར་བར་རྒྱལ་པོ་ཛའི་ཁང་ཐོག༔ ཏནྟྲ་སྡེ་ནི་བཅོ་བརྒྱད་ཆར་པ་ཕབ༔ རིགས་ལྔ་ཁྲག་འཐུང་མཁའ་འགྲོ་མ་རྣམས་འདུས༔ སིངྒྷའི་ནགས་ཚལ་ལུང་གི་མདོ་བདུན་ཕབ༔ དྷ་ན་ཀོ་ཤའི་གླིང་གི་རྒྱལ་པོའི་ཁབ༔ རྫོགས་ཆེན་རྩ་བ་ཡན་ལག་རྒྱུད་ཆར་ཕབ༔ ད་ནི་ཐེག་པ་ཆེན་པོའི་ཆོས་ལ་སྤྱོད༔ རང་རང་མཆོག་གི་དངོས་གྲུབ་ཐོབ་པར་གྱུར༔ ཞེས་གསུངས་སོ༔ རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོ་ཨིནྡྲ་བོ་དྷིས་ནོར་བུ་ལ་གསོལ་བ་བཏབ་པའི་ལེའུ་སྟེ་བཅོ་བརྒྱད་པའོ༔ ༔
པདྨ་བཀའ་ཐང་ལེའུ་ ༡༩ མེ་ཏོག་ཨུ་དུམྺཱ་ར་གེ་སར།
དཔེར་ན་ཡིད་བཞིན་ནོར་བུ་རིན་པོ་ཆེ༔ རྡུལ་ཕྱིས་བཀྲུས་བཤད་དར་གྱི་ལྡིང་ཁུག་བཅུག༔ རྒྱལ་མཚན་རྩེར་བཏགས་མཆོད་ཕུལ་སྨོན་ལམ་བཏབ༔ ཇི་ལྟར་འདོད་པ་བཞིན་དུ་འབྱུང་བ་ལྟར༔ རྒྱལ་རིགས་མེ་ཏོག་དཀར་པོར་སྐྱེ་བ་ནི༔ རྒྱལ་པོའི་རིགས་སུ་གཏོགས་པས་ཆེ་བ་ཡིན༔ རྗེའུ་རིགས་མེ་ཏོག་སེར་པོར་སྐྱེ་བའོ༔ རྗེའུའི་རིགས་སུ་གཏོགས་པས་བཙུན་པ་ཡིན༔ བྲམ་ཟེའི་རིགས་ནི་མེ་ཏོག་དམར་པོར་སྐྱེ༔ བྲམ་ཟེའི་་རིགས་སུ་གཏོགས་པས་གཙང་བའོ༔ དམངས་རིགས་མེ་ཏོག་ལྗང་གུར་སྐྱེ་བ་ཡིན༔ དམངས་ཀྱི་རིགས་སུ་གཏོགས་པས་གདོལ་བའོ༔ འཁོར་བ་སྟོངས་ཀྱིས་དོགས་ནས་སྦྱོང་བའི་དོན༔ ཨུ་དུམྺཱ་རའི་མེ་ཏོག་པདྨ་ནི༔ ས་ཆ་གང་བྱུང་གནས་ལ་མི་སྐྱེ་སྟེ༔ མ་དྲོས་བྱང་ཕྱོགས་རྩེ་ལྔའི་ཕ་རོལ་ལམ༔ དྷ་ན་ཀོ་ཤ་དྲི་མེད་མདངས་ལྡན་མཚོར༔ མེ་ཏོག་ཨུ་དུམྺཱ་རའི་ཚལ་ཡོད་དོ༔ མེ་ཏོག་ཚད་ནི་ཏཱ་ལའི་འཕང་ལོ་ཙམ༔ དཔག་ཚད་གཅིག་དང་འཁོར་ཡུག་ཁྱབ་པ་ལ༔ བྲམ་ཟེའི་མེ་ཏོག་དམར་པོའི་ནང་དབུས་སུ༔ སྣང་བ་མཐའ་ཡས་ཐུགས་ཀའི་ས་བོན་ཧྲཱིཿའོད་དུ་ཞུ་བས་ཐར་པ་ཐོབ་པའི་སྐུ༔ མཚན་བཟང་སུམ་ཅུ་རྩ་གཉིས་རྟགས་རྣམས་ཚང་༔ སྐྱེས་བུ་ཐབས་ལ་མཁས་མཆོག་པདྨ་འབྱུང་༔ ཐུན་མོང་མ་ཡིན་རྫུ་འཕྲུལ་ཤིན་ཏུ་ཆེ༔ ཕྱིན་ཅི་ལོག་རྣམས་འདི་ལ་མ་སྡངས་ཤིག༔ སྐྱེ་རྒ་ན་འཆི་བདུད་ཀྱི་ཆུ་བོ་ལ༔ སེམས་ཅན་ཐམས་ཅད་ཤི་ཞིང་མ་ལུས་ན༔ འདྲེན་པའི་སློབ་དཔོན་ངོ་ཡང་ཅང་ཤེས་སམ༔ མ་རྟོགས་པ་ནི་གཏི་མུག་རང་བཞིན་གནས༔ དམུས་ལོང་ལ་ནི་མདོག་བསྟན་ལྟ་བུར་གྱུར༔ དེ་བས་མ་མཐོང་བ་ནི་གསེར་ལ་འགོང་༔ མི་རིགས་པ་ནི་དཔོན་ལ་བསྡོ་བ་ཡིན༔ སྟོང་གསུམ་གསེར་དུ་གྱུར་ན་གསེར་ལ་འགོང་༔ ཐམས་ཅད་དཔོན་དུ་གྱུར་ན་དཔོན་ལ་བསྡོ༔ དེ་བས་མཁའ་འགྲོ་མ་རྣམས་སྤྲོ་བ་སྐྱེས༔ ལྷ་སྲིན་སྡེ་བརྒྱད་རྣམས་ནི་བཀའ་བཙན་ཞིང་༔ སྐྱེ་འགྲོ་སེམས་ཅན་ཀུན་གྱི་དོན་ནུས་འགྱུར༔ འཁོར་ནི་མཁའ་འགྲོ་མ་ཡི་ཚོགས་ཀྱིས་བསྐོར༔ སྲོག་མ་སྲིང་མ་ཀོང་མ་འཇིབ་མ་དང་༔ དཀར་ཤམ་མ་དང་རྐང་ཆེན་བློ་སྦྱོང་མ༔ དཔལ་གཟེར་མ་དང་དཔལ་གྲུབ་རྣམ་གཡེང་མ༔ ཐམས་ཅད་དམར་མོ་ཕྱག་གཉིས་གྲི་ཐོད་ཐོགས༔ མཁའ་འགྲོ་བཅུ་བཞི་བར་སྣང་དག་ལ་འཕྱོ༔ མཁའ་འགྲོ་སྡེ་ལྔ་ལུས་དཔག་མེད་པར་སྤྲུལ༔ ཕྱག་གིས་མཆོད་པ་དཔག་མེད་འབུལ༔ མེ་ཏོག་མ་དང་བདུག་སྤོས་མ༔ སྣང་གསལ་མ་དང་དྲི་ཆབ་མ༔ བྱུག་པ་མ་དང་ཞལ་ཟས་མ༔ ཚོགས་མཆོད་མ་དང་རོལ་མོ་མས༔ བསྟོད་པ་གླུ་ཡི་མཆོད་པ་འབུལ༔ ཧྲཱིཿཡུལ་གྱི་མིང་ནི་རྒྱན་ཡུལ༔ གནས་ཀྱི་མིང་ནི་ཀོ་ཤའི་མཚོ༔ མེ་ཏོག་མིང་ནི་ཨུ་དུམྺཱར༔ རིགས་ནི་དམར་པོ་བྲམ་ཟེའི་རིགས༔ ཁམས་གསུམ་དབང་སྡུད་གེ་སར་ཡུམ༔ མངལ་སྐྱོན་མ་གོས་སྤྲུལ་པའི་སྐུ༔ སུམ་ཅུ་རྩ་གཉིས་མཚན་མཆོག་ལྡན༔ བཟང་པོ་མཆོག་ལ་ཕྱག་འཚལ་བསྟོད༔ ཅེས་པས་མཁའ་འགྲོ་རྣམས་ཀྱིས་མགྲིན་གཅིག་བསྟོད༔ ནམ་མཁའི་སྤྲིན་གསེབ་སྐུ་ཡི་ཕྱེད་ཐོན་པའི༔ ཐུབ་པ་ལྔ་བཅུ་རྩ་བཞིས་མེ་ཏོག་འཐོར༔ ཕུན་སུམ་ཚོགས་པ་ཕྱི་ཡི་ཡིད་བཞིན་རྒྱ་མཚོ་འདྲ༔ ཕྱོགས་གྱུར་ཀུན་ནས་གང་ལ་ཅི་འཚམ་སྟོབས་འབེབས་ཤིང་༔ ཐམས་ཅད་མཁྱེན་པས་འགྲོ་བའི་རེ་བ་སྐོང་མཛད་པ༔ སངས་རྒྱས་པདྨའི་འདབ་འདྲ་རྒྱས་པའི་བཀྲ་ཤིས་ཤོག༔ མི་མཇེད་འཇིག་རྟེན་གསེར་གྱི་ས་གཞི་བརྡལ་བ་ལ༔ གླིང་བཞི་རི་རབ་ལྕགས་རི་མུ་ཁྱུད་དཔལ་མངའ་བ༔ བསྟན་གཉིས་ཉི་ཟླ་ཟུང་གཅིག་སྐོར་བ་བྱེད་པ་ཡིས༔ འགྲོ་ཀུན་མ་རིག་མུན་པ་སངས་བའི་བཀྲ་ཤིས་ཤོག༔ འཁོར་ལོས་སྒྱུར་རྒྱལ་འཇིག་རྟེན་བདེ་བའི་སྟོབས་མངའ་བ༔ སེམས་ཅན་ཐམས་ཅད་དགའ་བར་བགྱིད་པའི་འོད་འཕྲོ་བས༔ བསྐལ་པ་བཟང་པོར་གཟུགས་བཟང་བ་དང་སྤོབས་པར་ལྡན༔ ཆོས་ཀུན་དར་བས་སྐྱེ་དགུ་ཞི་བའི་བཀྲ་ཤིས་ཤོག༔ ཚེ་རིང་དཔལ་འབྱོར་ལོངས་སྤྱོད་བསོད་ནམས་དགེ་ལེགས་དཔལ༔ དགེ་འདུན་ཤེས་གསུམ་ལྡན་པའི་བསྟན་པའི་གངས་ཅན་མཚོ༔ ཕྱོགས་བཅུ་ཀུན་ནས་མཆོག་དང་ཐུན་མོང་གཉིས་འདུ་བ༔ འཇིག་རྟེན་གསུམ་གྲགས་ལྷ་མིས་མཆོད་པའི་བཀྲ་ཤིས་ཤོག༔ ཕྱོགས་བཞི་མཚམས་བརྒྱད་སྟེང་གི་ཕྱོགས་ནས་ནི༔ ཐུབ་པ་དྲུག་དང་དུས་གསུམ་སངས་རྒྱས་རྣམས༔ དྲུག་དྲུག་སྤྲིན་གྱི་གསེབ་ན་གྲལ་བྱས་ནས༔ རོལ་མོའི་སྒྲ་བསྒྲགས་མེ་ཏོག་ཆར་དུ་ཕབ༔ བཀྲ་ཤིས་རྟགས་ཀྱི་གླུ་དབྱངས་མང་བརྗོད་ནས༔ དེ་ལྟར་སྤྲུལ་པའི་སྐུ་རུ་མངའ་གསོལ་ལོ༔ རིགས་ཀྱི་མཁའ་འགྲོ་ཆེན་མོ་བཅུ་དྲུག་གིས༔ ལོངས་སྤྱོད་རྫོགས་པའི་སྐུ་རུ་མངའ་གསོལ་བ༔ ཧཱུྃ་ཆོས་དབྱིངས་རྣམ་དག་དྲི་མེད་མདངས་ལྡན་པའི༔ ཡ་མཚན་པདྨ་གེ་སར་སྡོང་པོ་ལས༔ མ་བཅོས་སྤྲོས་བྲལ་བདེ་བ་ཆེན་པོར་བྱོན༔ སྐུ་གཅིག་མཚན་བརྒྱད་ཁྱོད་ལ་ཕྱག་འཚལ་བསྟོད༔ རང་བྱུང་ལྷུན་གྲུབ་པདྨའི་ཤར་ཕྱོགས་སུ༔ སྤྲུལ་པ་ཡོངས་རྫོགས་ཤཱཀྱ་སེང་གེར་སྤྲུལ༔ རྡོ་རྗེ་མཁའ་འགྲོ་མ་ཚོགས་འཁོར་གྱིས་བསྐོར༔ སྐྱེ་མེད་རྣམ་དག་འོད་གསལ་དཀྱིལ་ན་བཞུགས༔ ཤཱཀྱ་སེང་གེའི་སྐུ་ལ་ཕྱག་འཚལ་ལོ༔ ཐབས་མཁས་རྒྱ་ཆེན་པདྨའི་ལྷོཕྱོགས་སུ༔ ཡེ་ཤེས་ཀློང་ཆེན་པདྨ་རྒྱལ་པོར་སྤྲུལ༔ རིན་ཅེན་མཁའ་འགྲོ་མ་ཚོགས་འཁོར་གྱིས་བསྐོར༔ ཅིར་སྣང་རིག་པ་གང་ལ་གང་འདུལ་བཞུགས༔ པདྨ་རྒྱལ་པོའི་སྐུ་ལ་ཕྱག་འཚལ་ལོ༔ རྒྱ་མཚོར་སྨད་ཟུག་པདྨའི་ནུབ་ཕྱོགས་སུ༔ ནམ་མཁའི་ལུས་ཅན་པདྨ་སམྦྷར་སྤྲུལ༔ འཁོར་དུ་པདྨའི་མ་ཚོགས་འཁོར་གྱིས་བསྐོར༔ རྫུ་འཕྲུལ་འདོད་དགུ་སྟོབས་ལྡན་དཀྱིལ་ན་བཞུགས༔ པདྨ་སམྦྷའི་སྐུ་ལ་ཕྱག་འཚལ་ལོ༔ འཕྲིན་ལས་ཁྱབ་གདལ་པདྨའི་བྱང་ཕྱོགས་སུ༔ ཉོན་མོངས་བདུད་འཇོམས་རྡོ་རྗེ་གྲོ་ལོད་སྤྲུལ༔ འཁོར་དུ་ཀརྨ་མཁའ་འགྲོ་མ་ཚོགས་བསྐོར༔ ཡེ་ཤེས་ལྔ་རྫོགས་སྣ་ལྔའི་དཀྱིལ་ན་བཞུགས༔ རྡོ་རྗེ་གྲོ་ལོད་སྐུ་ལ་ཕྱག་འཚལ་ལོ༔ བྱང་ཆུབ་ཡན་ལག་པདྨའི་ཤར་ལྷོ་རུ༔ མ་རིག་མུན་སེལ་ཉི་མ་འོད་ཟེར་སྤྲུལ༔ འཁོར་དུ་བཛྲ་དཔའ་བོ་གིང་གིས་བསྐོར༔ བྱང་སེམས་འགྲོ་དོན་མཛད་པའི་དཀྱིལ་ན་བཞུགས༔ ཉི་མ་འོད་ཟེར་སྐུ་ལ་ཕྱག་འཚལ་ལོ༔ ཐེག་དགུ་སྟོབས་སྤྱོད་ལྷོ་ནུབ་པདྨ་རུ༔ སྲིན་པོའི་ཁ་གནོན་པདྨ་འབྱུང་གནས་སྤྲུལ༔ འཁོར་དུ་རིན་ཅེན་དཔའ་བོ་གིང་གིས་བསྐོར༔ ལམ་ལྔ་ས་བཅུ་བགྲོད་མེད་དཀྱིལ་ན་བཞུགས༔ པདྨ་འབྱུང་གནས་སྐུ་ལ་ཕྱག་འཚལ་ལོ༔ སྐྱེ་མེད་སྐུ་འཁྲུངས་པདྨའི་ནུབ་བྱང་དུ༔ རིགས་དྲུག་ཆོས་སྟོན་སེང་གེ་སྒྲ་སྒྲོགས་སྤྲུལ༔ འཁོར་དུ་པདྨ་དཔའ་བོ་གིང་གིས་བསྐོར༔ གཟུང་འཛིན་དག་པས་ཕྱོགས་མཚམས་དཀྱིལ་ན་བཞུགས༔ སེང་གེ་སྒྲ་སྒྲོགས་སྐུ་ལ་ཕྱག་འཚལ་ལོ༔ ཅིས་ཀྱང་མི་འགྱུར་པདྨའི་བྱང་ཤར་དུ༔ ཤེས་རབ་མེ་འབར་བློ་ལྡན་མཆོག་སྲེད་སྤྲུལ༔ འཁོར་དུ་ཀརྨ་དཔའ་བོ་གིང་གིས་བསྐོར༔ ཚད་མེད་བཞི་ལྡན་དོང་སྤྲུགས་དཀྱིལ་ན་བཞུགས༔ བློ་ལྡན་མཆོག་སྲེད་སྐུ་ལ་ཕྱག་འཚལ་ལོ༔ བླ་མའི་འཁོར་ཚོགས་ཌཱ་ཀི་གིང་གི་ཚོགས༔ ཆོས་སྐྱོང་སྒོ་བ་བཞི་དང་སྒོ་མ་བཞི༔ མ་མོ་མཁའ་འགྲོ་ཕྱི་ནང་བར་ཆད་སྲུང་༔ བཀའ་སྲུང་དམ་ཅན་རྣམས་ལ་ཕྱག་འཚལ་ལོ༔ ཌཱ་ཀི་ཐམས་ཅད་བར་སྣང་གར་སྟབས་མཛད༔ ལྷ་རྣམས་ནམ་མཁའི་དབྱིངས་ནས་རོལ་མོ་སྒྲོགས༔ ལྷ་སྲིན་སྡེ་བརྒྱད་ཕྱི་ནས་བསྐོར་བ་དང་༔ ཀླུ་ཆེན་བརྒྱད་པོས་པད་སྡོང་མཐར་བསྐོར་ཞིང་༔ ཉིན་མཚན་ཀུན་ཏུ་རིན་ཅེན་འཐོར་བར་བྱེད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ མེ་ཏོག་ཨུ་དུམྺཱ་ར་གེ་སར་གྱི་ལེའུ་སྟེ་བཅུ་དགུ་པའོ༔ ༔
པདྨ་བཀའ་ཐང་ལེའུ་ ༢༠ ཨུ་རྒྱན་ཡུལ་དུ་རྒྱལ་སྲིད་བཟུང་བ།
དེ་ནས་རྒྱལ་སྲས་པདྨ་རྒྱལ་པོ་ཡིས༔ ཟླ་མེད་གཅིག་པུར་ཕ་ཚད་འཁྱམ་དུ་ཕྱིན༔ ལྷོ་ཕྱོགས་མྱ་ངམ་ཚང་ཞེས་བྱ་བའི་ཚལ༔ ལྗོན་པའི་ཤིང་གྲིབ་སྐྱིལ་ཀྲུང་བཅས་ཏེ་བཞུགས༔ དྲང་སྲོང་ཆེན་པོ་འོད་ཟེར་ཅན་ཞེས་དང་༔ དྲང་སྲོང་ཆེན་པོ་གནས་འཇོག་ཅེས་བྱ་དང་༔ དྲང་སྲོང་ཆེན་པོ་འགྲོ་སྐྱོང་ལ་སོགས་པ༔ དྲང་སྲོང་མང་པོ་མཁའ་ལ་འགྲོ་བ་ལས༔ སྟེང་དུ་ཕྱིན་པར་མ་ནུས་འོག་ཏུ་བལྟས༔ རྒྱལ་སྲས་སྤྲུལ་སྐུ་དཔལ་དང་གཟི་མདངས་འབར༔ མཚན་བཟང་སྟོབས་ཆེ་ཤུགས་ཅན་བདོག་མཐོང་ནས༔ འདི་དེ་སུ་ཞིག་རྣམ་ཐོས་བུའམ་ནི༔ འཁོར་ལོས་སྒྱུར་བའི་རྒྱལ་པོ་ཞིག་ནི་ཡིན༔ འཇིག་རྟེན་འདི་ན་རྣམ་པ་འདི་ལྟ་བུ༔ དྲང་སྲོང་རྣམས་ཀྱིས་དེ་སྐད་སྨྲས་པ་དང་༔ སྐྱེད་མོས་ཚལ་ནས་ལྗོན་པའི་ལྷ་མོས་སྨྲས༔ རྣམ་ཐོས་བུ་དང་སྟོང་ཕྲག་ཆར་མི་ཉེ༔ འདི་དྲུང་ཕྱིན་ན་གང་དང་འགྲན་མི་ནུས༔ དྲང་སྲོང་ཚིག་དེ་ཐོས་པས་ས་ལ་བབས༔ དྲི་མེད་རྒྱལ་སྲས་མཉམ་པར་བཞག་པ་མཐོང་༔ དྲང་སྲོང་རྣམས་ཀྱིས་བདེན་པའི་ཚིག་བརྗོད་པ༔ ཨེ་མ་ཧོ༔ རིན་ཅེན་སྣ་ཚོགས་ལྗོན་པའི་ཤིང་ཆེན་ལ༔ བཀྲ་ཤིས་བྱ་ཚོགས་མང་པོ་སྐད་སྙན་འབྱིན༔ མེ་ཏོག་སྣ་ཚོགས་ལེགས་པར་འཁྲུངས་པའི་ཚལ༔ ཆོས་དེ་རྣམ་པའི་མཆོག་ཀུན་ལྡན་བསྒོམ་པ༔ པདྨ་རྒྱལ་པོའི་སྐུ་མཆོག་དྲི་མ་མེད༔ སངས་རྒྱས་གཉིས་པ་འཇིག་རྟེན་སྒྲོན་མ་ཁྱོད༔ བདག་ཅག་བསྐལ་པ་སྟོང་དུ་ལྕེ་བརྒྱ་ཡིས༔ ཡོན་ཏན་ཅུང་ཟད་བརྗོད་པར་མ་ིནུས་ཚིམ༔ ཞེས་བརྗོད་བསྐོར་བ་ལན་བདུན་བྱས་ནས་སུ༔ དྲང་སྲོང་རྣམས་ནི་མཁའ་ལ་སོང་བར་གྱུར༔ རྒྱལ་པོ་གཞོན་ནུ་མི་འདུག་གར་སོང་ཞེས༔ གཞོན་ནུ་ཚོལ་ཕྱིན་ལྗོན་པའི་ཤིང་གྲིབ་ལ༔ སྐྱིལ་ཀྲུང་བཅས་ནས་ལྟ་སྟངས་མཛད་པ་མཐོང་༔ རྒྱལ་པོ་ཨིནྡྲ་བོ་དྷིས་དེར་སོང་ནས༔ སྐྱེ་རྒུ་མི་ཟད་གཞན་དག་རྣམས༔ ཟས་དང་སྐོམ་དང་མི་འབྲལ་ཏེ༔ ལོངས་སྤྱོད་ཆེན་པོའི་ཚུལ་བགྱིད་ཅིང་༔ ཕྱོགས་ཉིད་ཀུན་ཏུ་རྣམ་པར་རྒྱུ༔ རྒྱལ་བུ་ཅི་ཕྱིར་ཐུགས་མ་ཕེབས༔ སྐྱེས་བུ་གཞོན་ནུ་ལུས་མཛེས་པ༔ སྡུག་ཅིང་ཡིད་འོང་གཅིག་པུ་འདིར༔ ཐལ་མོ་སྦྱར་ཏེ་ཕྱག་འཚལ་ལོ༔ ཐམས་ཅད་མཁྱེན་པ་ཐམས་ཅད་གཟིགས༔ སྲོག་དང་ལུས་ལ་མི་ལྟ་བར༔ ཞེ་སར་བཅས་ནས་ཁྱེའུ་མཆོད༔ ཕོ་བྲང་ནང་དུ་བདེ་བར་འདུག༔ ཅེས་བརྗོད་ཁྱེའུས་ཕོ་བྲང་ཕྱིན་པར་གྱུར༔ དེ་ནས་རེ་ཞིག་དུས་ན་བློན་པོ་རྣམས༔ རྒྱལ་པོའི་འདུན་སར་ལྷན་ཅིག་ཚོགས་པ་དང་༔ བློན་པོ་རྒན་རབས་ཁ་ཅིག་འདི་སྐད་སྨྲ༔ རྒྱལ་པོ་ཐུགས་ཀྱིས་མཁྱེན་པས་དགོངས་པར་མཛོད༔ རྒྱལ་བུ་ཕོ་བྲང་ཐུགས་མི་ཕེབས་པ་ནི༔ ཁམས་རྒྱས་ལང་ཚོ་དར་བབ་ཡིད་སྲུབས་འཕེལ༔ བཙུན་མོ་བླངས་ན་ཐུགས་ཕེབས་གནང་བར་མཛོད༔ ཅེས་གསོལ་རྒྱལ་པོའི་ཐུགས་སུ་ལྷགས་པར་གྱུར༔ དེ་ནས་རྒྱལ་པོས་བློན་པོའི་ལན་སྨྲས་པ༔ དེལྟར་བྱའོ་སྤྲུལ་སྐུའི་ཚུལ་མཐུན་པའི༔ བུ་མོ་གང་ཞིག་སུ་དག་ཡོད་ལྟོས་ཤིག༔ དེ་ནས་ཆོས་བློན་ཏྲིག་ན་འཛིན་ཞེས་པས༔ ཉིན་མཚན་གཡེལ་བ་མེད་པར་གང་དག་ནས༔ བུ་མོ་བརྒྱ་ཕྲག་སྟོང་ཕྲག་མང་པོ་བསྡུས༔ ཁྱེའུས་ཕོ་བྲང་རྩེ་ནས་གཟིགས་སུ་བཅུག༔ རབ་ཏུ་དགའ་བའི་སེམས་བསྒྱུར་བཙུན་མོར་ཁབ༔ ཚུལ་མཐུན་དམ་པ་འདི་ཡིན་གསུང་བར་ཞུ༔ བློན་པོས་རིན་ཅེན་མང་པོ་སྦྱིན་དུ་བཅུག༔ རྒྱལ་པོ་ཆེན་པོས་སྲས་ལ་འདི་སྐད་གསོལ༔ བདག་ཅག་རྣམས་ཀྱི་བསམ་པ་ཅི་ཡིན་པ༔ ཚིག་འདི་དྲི་མེད་མཆོག་གིས་གསན་དུ་གསོལ༔ ནི་གུ་གང་དག་འདི་རུ་ལྷགས་གྱུར་པ༔ སྤྲུལ་སྐུའི་ཐུགས་སུ་བྱོན་པ་སྩལ་ལགས་ཀྱི༔ རྒྱལ་སྲས་དྲི་མེད་མཆོག་དེས་ཚིགས་སུ་བཅད༔ སུག་བཞི་མི་འཛུགས་བྱོལ་སོང་ཁྱུ་རེ་ཆེ༔ བ་ཡུ་ཁོལ་ཐག་ཅན་ཚོས་ཅི་ཞིག་བྱ༔ ཆང་མང་འཐུངས་པའི་ར་རོ་ཏོག་ཅོར་ཆེ༔
ལྷ་འདྲེས་མ་བརླམས་སྨྱོ་བ་ཡིན་ནམ་ཅི༔ ཉོན་མོངས་ནད་གང་རང་ཉིད་ལྷ་མོར་མཐོང་༔ སྲོག་མ་བཅད་པའི་རོ་ཚོས་ཅི་ཞིག་བྱ༔ དེ་སྐད་གསུངས་ནས་འགོལ་བའི་གནས་ལ་སོང་༔ རྒྱལ་པོས་བཙུན་མོ་དམ་པ་འདིས་ཉན་པ༔ དེ་ནས་ཞག་བདུན་བར་དུ་ལན་གྱིས་གསུངས༔ དེ་ནས་པདྨ་རྒྱལ་པོའི་བསམ་པ་ལ༔ ཁྱིམ་ཐབ་འདི་ལ་སྦྱར་མ་ཐག་ཏུ་ནི༔ འཐབ་མོ་འཁོན་རྩོད་མྱ་ངན་སྡུག་བསྔལ་རྩ༔ འོན་ཀྱང་ནོར་བུ་འདམ་རྙོག་ཁྲོད་ནས་འོང་༔ ལམ་གྲོགས་གེགས་མི་བྱེད་པའི་བུད་མེད་དེ༔ རྒྱུ་ལམ་བདེ་བའི་རོ་ཡིས་ཚིམ་གྱུར་ནས༔ ཡོ་ག་རྣམ་གསུམ་སྤྱོད་ལ་བསྔགས་པའོ༔ དེ་སྙམ་སེམས་ནས་ཡི་གེར་བྲིས་པ་ནི༔ བག་ཡོད་གཟུགས་མཛེས་མི་དགེའི་ཁྱིམ་ནས་འབྱོལ༔ ན་ཚོད་རུས་རིགས་དག་པས་སེམས་བསྒྱུར་འོས༔ གཡོ་མེད་མི་ཁྲོ་ཕྲག་དོག་སེར་སྣ་མེད༔ ངོ་ཚ་ཤེས་ཤིང་བག་ཡོད་གཏོང་ལ་མོས༔ འདོད་ཆགས་ཞེ་སྡང་གཏི་མུག་ཤས་ཆུང་བ༔ བདག་གི་སེམས་དང་འགལ་བར་མི་བྱེད་དེ༔ དེ་འདྲའི་བུ་མོ་མཆིས་ན་བཀའ་སྩོལ་ཅིག༔ བུ་མོ་ཕལ་པ་མང་ཡང་བདག་འདུན་མིན༔ ཞེས་པ་ལ་སོགས་ཚིགས་བཅད་རྒྱལ་པོས་ཐོས༔ རྒྱལ་པོས་ཏྲིག་ན་འཛིན་ལ་བཀའ་སྩལ་པ༔ ཏྲིག་ན་འཛིན་ཁྱོད་སིངྒ་ལ་རུ་སོང་༔ མི་ཁྱིམ་བུ་མོ་ཐམས་ཅད་ལྟོས་ཤོག་གསུངས༔ ཡོན་ཏན་དེ་ཚང་བུ་མོ་གང་ཡང་རུང་༔ ཡོངས་སུ་བཟུང་ལ་འདི་རུ་ཁྲིད་ཤོག་གསུངས༔ དེ་ནས་བློན་པོས་ཡུལ་དེའི་ཁྱིམ་ཀུན་བཙལ༔ དེ་ལྟ་བུ་ནི་གཅིག་ཀྱང་མི་འདུག་ནས༔ སངས་རྒྱས་དུས་སྟོན་བྱེད་པའི་ལྟད་མོ་ལ༔ བུ་མོ་ལྔ་བརྒྱ་ལྷན་གཅིག་འདུག་པའི་དབུས༔ བུ་མོ་གཟུགས་མཛེས་ལྟ་ན་སྡུག་པ་མཐོང་༔ ཁྱོད་ཉིད་སུ་ཡི་བུ་མོ་ཡིན་ཞེས་སྨྲས༔ སུ་ཡི་བུ་མོ་ཡིན་ན་ཅི་བྱེད་ཟེར༔ དབང་པོའི་སྲས་པོ་གཟུགས་ནི་མཛེས་གྱུར་པ༔ མངལ་སྐྱོན་མ་གོས་རྫུས་སྐྱེས་པདྨར་འཁྲུངས༔ དེ་ཡི་བཙུན་མོར་ཁྱོད་ཉིད་འོས་སམ་སྙམ༔ དགའ་བའི་འཛུམ་སྟོན་བདག་ལ་མིང་སྨྲོས་ཤིག༔ བུ་མོས་བཞིན་དཀར་སོ་ཡི་མདངས་བསྟན་ནས༔ བུ་མོའི་ཁྱུ་ནས་ཕ་ཚད་ཅིག་ཏུ་དོན༔ ང་ཡི་མིང་ནི་འོད་འཆང་མ་ཞེས་ཟེར༔ རྒྱལ་པོ་ཙནྡྲ་གོམ་ཤིའི་སྲས་མོ་ཡིན༔ མི་མཆོག་ཁྱོད་ཀྱིས་མྱུར་དུ་མཆིས་པར་མཛོད༔ རྒྱལ་པོ་དྷ་ན་ཧ་ཏའི་བུ་ལ་ནི༔ ང་ནི་བག་མར་སང་འགྲོ་གནངས་འགྲོར་ཡོད༔ མི་མཆོག་ཁྱོད་ནི་རྩོལ་བའི་དུས་བབ་སྨྲས༔ དེ་ནས་ཆོས་བློན་ཆེན་པོ་ཏྲིག་ན་འཛིན༔ སིངྒ་ལ་ཡི་རྒྱལ་པོའི་དྲུང་དུ་ཕྱིན༔ རྒྱལ་པོ་ཟླ་བ་གཞོན་ནུར་ཡི་གེ་བསྟན༔ རྒྱལ་པོས་ཡི་གེ་ཀློག་ནས་ཚིག་སྨྲས་པ༔ ཡི་གེའི་ནང་བཞིན་བུ་མོར་ཚང་འདུག་སྟེ༔ ཁྱོད་འཕྱིས་རྒྱལ་པོ་དྷ་ཧའི་བུ་ལ་བྱིན༔ དེ་ལ་མྱུར་དུ་གུད་དུ་འགྲོ་དགོས་ཡོད༔ ཅེས་ཐོས་བློན་པོ་ཡིད་འཁྱོག་མྱུར་བར་ཕྱིན༔ རྒྱལ་པོས་སུ་ལ་དེ་ལྟར་ཡོད་ཅེས་དྲིས༔ བློན་པོས་རྒྱལ་པོ་ཟླ་བ་གཞོན་ནུ་ལ༔ བུ་མོ་ཡོན་ཏན་དེ་དག་ཚང་བ་མཆིས༔ འོང་བར་མི་སྣང་དྷ་ཧའི་བུ་ལ་ཐལ༔ ཞེས་སྨྲས་ཡོན་ཏན་ཨེ་ཚང་རྒྱལ་བུར་འདྲི༔ བུ་མོ་ལྔ་བརྒྱ་ལྷན་ཅིག་ཁྲིད་ལ་ཤོག༔ རིན་ཅེན་མང་པོའི་སྦྱིན་པ་བྱེད་དུ་འཇུག༔ ཡིད་བཞིན་ནོར་བུ་གང་ལ་བྱིན་དེ་ཡིན༔ ཞེས་གསུངས་དེ་ནས་བློན་པོས་སིངྒར་ཕྱིན༔ རྒྱལ་སྲས་མཆོག་དེ་ནོར་བུ་སྦྱིན་པར་གཏོང་༔ བུ་མོ་ལྔ་བརྒྱ་རིན་ཅེན་ལེན་དུ་གཤེགས༔ ཞེས་བརྗོད་ལྔ་བརྒྱ་ལྷན་ཅིག་ཁྲིད་ནས་འོང་༔ ཕོ་བྲང་ཕྱི་རོལ་རིན་ཅེན་མང་པོ་སྤུངས༔ རྒྱལ་སྲས་མཐོ་བའི་པདྨའི་ཁྲི་ལ་འདུག༔ ཁྲི་ཡི་གཡོན་དུ་རིན་ཆེན་སྙོད་མི་བཞག༔ བུ་མོ་བཞི་བརྒྱ་དགུ་བཅུ་གོ་དགུ་ནི༔ རིན་ཅེན་བླངས་ཤིང་ལྟ་མི་བཟོད་པར་སོང་༔ ཕྱི་ན་བལྟ་ན་སྡུག་ཅིང་ཡིད་འོང་ཞིག༔ མདུན་དུ་ཐལ་སྦྱར་པུས་བཙུགས་ཞལ་ལ་ལྟ༔ ཚིགས་སུ་བཅད་པས་རྒྱལ་སྲས་སྐུ་ལ་བསྟོད༔ ཨེ་མ་ཧོ༔ རྒྱལ་སྲས་ཁྱོད་ཀྱི་གཟུགས་ནི་བལྟས་མི་ངོམས༔ བཻཌཱུརྱ་འདྲ་སྐུ་མདོག་དཀར་རྣམས་དང་༔ བྱུ་རུའི་མདོག་འདྲ་དམར་པོ་ཟངས་འདྲ་བས༔ ཁྱོད་ལ་དཔེ་ནི་བགྱི་བར་མི་ནུས་ཏེ༔ བདག་ནི་ཁྱོད་གཟུགས་བལྟ་བས་རབ་ཏུ་སྐོམ༔ ཐུགས་རྗེས་ཆབ་ཀྱིས་བདག་ལ་ཚིམ་པར་མཛོད༔ འདྲེན་པ་ཁྱོད་ནི་བདག་ལ་མི་དགྱེས་སམ༔ ཞེས་བསྟོད་མཆི་མ་མང་དུ་ཕྱུང་བ་དང་༔ པདྨ་རྒྱལ་པོས་ཡིད་བཞིན་ནོར་བུ་བླངས༔ བཞིན་གྱི་དཀྱིལ་འཁོར་འོད་འཆང་མ་ལ་བསྟན༔ མི་དབང་ཟླ་བའི་སྲས་མོ་འོད་འཆང་ཁྱོད༔ ཁྱོད་དང་ཟུར་འདྲ་ཙམ་ཡང་ས་སྟེང་མེད༔ རྟག་པར་ཁོར་ཡུག་ཏུ་ནི་ཁྱོད་ཉིད་དྲན༔ བདག་ནི་བདེ་བར་གཤེགས་པ་མཐོང་རབ་སྐོམ༔ མཐོང་བའི་ཆུ་བསིལ་བདག་ལ་སྩལ་ཏུ་གསོལ༔ ཞེས་བརྗོད་ཡིད་བཞིན་ནོར་བུ་བྱིན་པ་དང་༔ བཙུན་མོ་འོད་འཆང་མས་བླངས་ཚིགས་སུ་བཅད༔ རྒྱལ་སྲས་ཡོན་ཏན་ཡེ་ཤེས་རྒྱ་མཚོ་ལས༔ ལས་ངན་ལམ་དང་བྲལ་བ་བདག་ཡིན་ན༔ ཐིགས་པ་གཅིག་ཙམ་ཐུགས་བརྩེར་གྱུར་པ་ལ༔ བདག་གིས་དོག་སར་པུས་མོ་བཙུགས་ནས་སུ༔ རྒྱལ་སྲས་གཟུགས་སྐོམ་ཤིན་ཏུ་མྱ་ངན་སེམས༔ འདྲེན་པའི་སླད་དུ་སྙིང་རྗེའི་སྐད་ཀྱིས་ངུ་༔ ཞེས་གསོལ་ཡིད་བཞིན་ནོར་བུ་ཕྱག་གཏད་སོང་༔ དེ་ནས་རྒྱལ་པོ་ཨིནྡྲ་བོ་དྷི་ཡིས༔ རྒྱལ་པོ་ཟླ་བ་གཞོན་ནུར་ཡི་གེ་བསྲིངས༔ རྒྱལ་པོ་ཁྱོད་ནི་བསོད་ནམས་རྒྱ་མཚོའི་དབུས༔ འོད་འཆང་མཛེས་པའི་ཡོན་ཏན་རྣམས་ཀྱིས་བརྒྱན༔ ལྷ་མོའི་གཟུགས་འཛིན་མ་ནི་བདག་བུར་བྱིན༔ ཞེས་པའི་ཡི་གེ་རྒྱལ་པོས་མཐོང་བ་དང་༔ རྒྱལ་པོ་ཟླ་བ་གཞོན་ནུས་ལན་བསྐུར་བ༔ རྒྱལ་པོའི་དབང་པོ་དམ་པ་ཨིནྡྲ་ཡི༔ བུ་དེ་སྙིང་སྟོབས་དམ་པ་མཆོག་གྱུར་ཅིང་༔ གང་གིས་བུ་མོ་བདེ་བར་བྱས་པ་ཡིན༔ དྷ་ཧའི་བུ་ལ་བསྟན་པ་འདི་བཤད་ཟིན༔ རྩོད་པར་ཆས་ལ་ལྟ་བས་བདག་ཀྱང་དོགས༔ སྤྲོ་ཞིང་སྐྱེས་ཀྱི་འགྲོགས་པས་ཞེ་མ་ཚོ༔ ཡིག་ལན་མཐོང་བས་རྒྱལ་པོ་ཡིད་མ་བདེ༔ རྒྱལ་སྲས་དམ་པ་དེ་ལ་རྒྱལ་པོས་སྨྲས༔ འོད་འཆང་མཚན་དེ་ཤིན་ཏུ་ཚང་མཆིས་ན༔ དེ་ནི་ཐབས་ཀྱིས་བཙུན་མོར་བླང་བར་བགྱི༔ ཞེས་གསུངས་དེ་ནས་སྲས་ཀྱིས་ལན་གསོལ་བ༔ སེམས་ཅན་དམ་པ་དེ་ནི་ཡོན་ཏན་ལྡན༔ ཉམ་ཆུང་མུན་པ་འཐིབས་པོར་གནས་པར་གྱུར༔ ཡབ་གཅིག་གསོན་ནམ་འོན་ཏེ་ཤིའམ་ཅི༔ གཞོན་པ་མགྱོགས་པས་མྱུར་དུ་ཕོ་བྲང་བཀྲིས༔ ཞེས་གསུངས་རྒྱལ་པོས་བློན་པོར་བཀའ་བསྒོས་པ༔ འདི་ལྟར་བློན་པོ་མྱུར་དུ་དེར་སོང་ལ༔ བྲམ་ཟེ་རྟེན་འབྲེལ་མཁན་པོ་བོས་ཤོག་གསུངས༔ རྒྱལ་པོས་བྲམ་ཟེ་རྟེན་འབྲེལ་མཁན་པོ་དེ༔ རིན་ཆེན་མང་པོ་བྱིན་ཏེ་ཚིམ་པར་བྱས༔ བདག་བུ་སྡུག་ཅིང་ཡིད་འོང་གཅིག་པུ་འདི༔ ཟླ་བའི་བུ་མོ་འོད་འཆང་མ་ཡིས་ཟིན༔ རྒྱལ་པོ་དྷ་ཧའི་བུ་ལ་ཐལ་ཟིན་སྨྲེང་༔ བག་མར་འགྲོ་བའི་ལམ་དུ་ཞུགས་པའི་ཚེ༔ བུ་མོ་དེ་ཡི་ལག་པ་གཡས་གཡོན་ལ༔ སྔགས་བཏབ་ལྕགས་ཀྱི་ཕྱེ་མ་འདི་ཉིད་ནི༔ སེན་མོའི་བར་དུ་ཟར་མའི་ཆུས་སྦྱོར་རྫོངས༔ ཞེས་གསུངས་རྒྱལ་པོའི་བཀའ་ནི་གཉན་པའི་ཕྱིར༔ བྲམ་ཟེ་ཁས་བླངས་དམ་བཅས་མནའ་བོར་རོ༔ དེ་ནས་དུས་བབ་བག་མར་འགྲོ་བ་ལ༔ ཡུལ་ཆོས་བུ་མོ་འབུམ་ཕྲག་མང་པོའི་གསེབ༔ ཆ་ལུགས་འདྲ་འདྲ་མི་ཤེས་བྱས་ནས་གཏོང་༔ ལྟད་མོ་བལྟ་བ་དམར་ནག་ཁྲོམ་དུ་འཁྱིལ༔ བློན་པོ་ཏྲིག་ན་དཔོན་གཡོག་ལྔ་བརྒྱར་བཅས༔ ལག་ཏུ་ལྕགས་ལེན་རྡོ་བཟུང་མིའི་སྲང་བསྡད༔ དེ་ནས་རྒྱལ་པོ་ཨིནྡྲ་བོ་དྷི་ཡིས༔ ཕོ་བྲང་རྩེ་བརྒྱད་དར་དང་རྒྱལ་མཚན་ཕྱར༔ རྒྱལ་མཚན་རྩེ་ལ་ཡིད་བཞིན་ནོར་བུ་བཏགས༔ ཕྱོགས་བཞིར་ཕྱག་བཙལ་གསོལ་བ་འདི་སྐད་བཏབ༔ ང་ཡིས་རྙེད་པའི་ཡིད་བཞིན་ནོར་བུ་འདི༔ བསམ་འཕེལ་དགོས་དགུ་འབྱུང་བ་ཡིན་གྱུར་ན༔ ཡོན་ཏན་ལྡན་པའི་བུ་མོ་འོད་འཆང་མ༔ འཁོར་གཡོག་ལྔ་བརྒྱར་བཅས་པ་འདིར་ཤོག་ཅིག༔ དེ་སྐད་བརྗོད་པས་བཙུན་མོ་འོད་འཆང་མ༔ འབུམ་ཕྲག་ཕྱེད་སོང་ཕྱེད་ན་ཡོད་པ་ལས༔ བློན་པོ་ཏྲིག་ན་ཡོད་པའི་མདུན་ས་དེར༔ རང་དབང་མེད་པར་ལག་གཉིས་འཐེན་བཞིན་བྱེད༔ བློན་པོ་འཁོར་བཅས་རང་གི་ཡུལ་ཕྱོགས་འོངས༔ ཕྱི་ལ་འོད་འཆང་དཔོན་གཡོག་ལྔ་བརྒྱ་བྱུང་༔ བག་མ་ཕྲོགས་ཟེར་ཕྱི་ལ་མང་པོ་འཐབ༔ གིང་ཆེན་བཞི་ཡིས་འདོ་ལེའི་སྟེང་ལ་ཁྱེར༔ ནམ་མཁའི་དབྱིངས་ལ་རེས་མཐོང་རེས་མི་མཐོང་༔ ཐོར་ཅོག་དགུ་ལྡན་ཕོ་བྲང་ནང་དུ་བབས༔ རྒྱལ་པོ་བློན་པོའི་ཚོགས་ཀྱིས་ཡོངས་བསྐོར་ནས༔ སྤྲུལ་སྐུ་འཇིག་རྟེན་ཆོས་དང་མཐུན་བྱའི་ཕྱིར༔ རྒྱལ་པོ་གཞན་ཞིག་བུ་མོ་བླངས་པའི་ཚུལ༔ བློན་པོས་མིང་འབོད་ལམ་ནས་འོང་བ་མཐོང་༔ བློན་པོ་དེ་ཉིད་ཤིན་ཏུ་སེམས་དགའ་སྟེ༔ གླང་ཆེན་ཞོན་ནས་འོད་འཆང་བལྟ་ཕྱིར་འོངས༔ བུ་མོ་ལྔ་བརྒྱས་འོད་འཆང་ཁྲུས་ནས་ཕྱུང་༔ ཤིན་ཏུ་ཁྲུས་བགྱིས་ཤིན་ཏུ་བརྒྱན་བརྒྱན་ནས༔ མཐོང་བས་དགའ་བས་བཙུན་མོ་ལྟ་བར་བྱེད༔ སྟན་བཟང་སྟེང་དུ་ཕྱིན་ཏེ་དགའ་མགུར་སྤྱོད༔ བུ་མོ་བརྒྱ་སྟོང་འབུམ་ཕྲག་ནང་ནས་ཀྱང་༔ འོད་འཆང་མ་ནི་བཙུན་མོ་མཆོག་དབང་བསྐུར༔ རྒྱལ་སྲས་མཆོག་ལ་མཆོད་པའི་ལས་བྱེད་དོ༔ ལྷ་ཀླུ་གནོད་སྦྱིན་དྲི་ཟ་ལ་སོགས་པས༔ དགའ་བའི་སྒྲ་འབྱིན་ཕོ་བྲང་ནང་དུ་རྩེ༔ ཕོ་བྲང་མཁར་བརྒྱད་ལྷ་ཁང་ཁྱིམ་ལྟ་བུ༔ སྒོ་ཁང་རྟ་བབས་སྐར་ཁུང་བསིལ་ཁང་དང་༔ རིན་ཅེན་སྣ་ཚོགས་བརྒྱན་པའི་ཁྱིམ་ན་འདུག༔ ཡོ་བྱད་ཕུན་སུམ་ཚོགས་པའི་ལོངས་སྤྱོད་ལ༔ བཙུན་མོའི་འཁོར་རྣམས་ལྷ་ཡི་བུ་མོ་འདྲ༔ ལྟ་སྤྱོད་མཐུན་ཅིང་ཁ་ན་མ་ཐོ་མེད༔ བུད་མེད་ཚོགས་ཀྱི་སྤྱོད་ལམ་ཡིད་དུ་འོང་༔ མཛའ་བོ་གཉེན་བཤེས་ཡིད་དག་དགའ་མཆིད་སྨྲ༔ ཤིང་རྟའི་འཁོར་ལོ་གྱད་ཆེན་བཞིས་བསྒྱུར་ནས༔ ཕོ་བྲང་ཕྱོགས་བཞིར་ཉིན་བཞིན་སྐྱོ་བསངས་བྱེད༔ རོལ་མོ་མང་པོའི་བྱེ་བྲག་བསམ་མི་ཁྱབ༔ ལོ་ལྔའི་བར་དུ་ཕོ་བྲང་གནས་པར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཨུ་རྒྱན་ཡུལ་དུ་རྒྱལ་སྲིད་བཟུང་བའི་ལེའུ་སྟེ་ཉི་ཤུ་པའོ༔ ༔
པདྨ་བཀའ་ཐང་ལེའུ་ ༢༡ རྒྱལ་སྲིད་སྤངས་པ།
དེ་ནས་རེ་ཞིག་དུས་ན་སྒྲ་འོད་བྱུང་༔ རྡོ་རྗེ་སེམས་དཔའ་མདུན་གྱི་ནམ་མཁར་བྱོན༔ ལྷ་འཁོར་སྟོང་ཕྲག་བདུན་ཅུ་རྩ་གཉིས་བསྐོར༔ འཇའ་འོད་དཀྱིལ་ནས་ཚིགས་སུ་བཅད་པ་སྨྲས༔ ཨེ་མ་ཧོ༔ རྒྱལ་པོའི་ཕོ་བྲང་དབུས་ན་ནི༔ ཆོས་ཀྱི་རྒྱལ་པོ་གནས་གྱུར་པ༔ བཙུན་མོ་སྡུག་གུའི་ཚོགས་ཀྱིས་བསྐོར༔ ཕན་ཚུན་གནས་ཀྱང་འདུ་བ་དག༔ དེ་དག་ཐམས་ཅད་མི་དགའ་ཞིང་༔ འཇིགས་པའི་ཡིད་ཀྱིས་མྱ་ངན་བྱེད༔ དེ་ཡི་དུས་ལ་ད་བབ་བོ༔ རྒྱལ་སྲིད་རུལ་བ་བཞིན་དུ་དོར༔ ཞེས་གསུངས་མི་སྣང་མཁའ་ལ་ཡལ་བར་གྱུར༔ དེ་ནས་ཨིནྡྲ་བོ་དྷིའི་རྨི་ལྟས་ལོག༔ ཉི་ཟླ་གཉིས་ཀ་དུས་གཅིག་རྒས་པ་རྨིས༔ ཕོ་བྲང་ནང་དུ་བཤུམ་མོ་བྱེད་པ་རྨིས༔ མྱ་ངན་རབ་ཏུ་གདུངས་ཤིང་སྨྲེ་སྔགས་འདོན༔ རྒྱལ་པོ་བློན་པོ་སྙིང་རྗེའི་སྐད་ཀྱིས་ངུ་༔ དེ་སྐད་བརྗོད་ཅིང་ཡིད་ནི་རབ་ཏུ་ཞུམ༔ དེ་ནས་རྒྱལ་སྲས་པདྨ་རྒྱལ་པོ་ཡིས༔ སྔར་གྱི་སྐྱེད་མོས་ཚལ་གྱི་ས་རུ་ཕྱིན༔ བློན་པོའི་ཚོགས་ཀྱིས་ཡོངས་སུ་བསྐོར་བ་ལ༔ ཤར་གྱིཕྱོགས་ནས་འཁོར་ལོ་རྩིབས་སྟོང་པ༔ ལྟེ་བ་མུ་ཁྱུད་དང་བཅས་ཡོངས་སུ་རྫོགས༔ བཟོ་མཁན་མ་བྱས་ལྷ་རྫས་གསེར་རང་བཞིན༔ འགྲན་གྱིས་ཟླ་མེད་ལས་ལས་གྲུབ་པའིཕྱིར༔ འཁོར་ལོས་སྒྱུར་བའི་རྒྱལ་པོར་གྱུར་པ་ལ༔ རྒྱལ་སྲིད་སྣ་བདུན་རིན་ཅེན་སྣ་བདུན་དང་༔ ཡོ་བྱད་སྣ་བདུན་དམ་རྫས་སྣ་བདུན་བྱུང་༔ ཁམས་ཀྱི་རྒྱལ་ཕྲན་རྣམས་ཀྱིས་བསུ་བ་བྱེད༔ དེ་ནས་མི་མཆོག་རྒྱལ་སྲས་དགོངས་པ་ལ༔ རྒྱལ་ས་བཟུང་བས་འགྲོ་བའི་དོན་མི་འགྲུབ༔ སེམས་ཅན་མང་པོ་ངན་འགྲོའི་གཡང་ལ་འཆོར༔ རྒྱལ་སྲིད་སྤང་བའི་ཐབས་ཤིག་བྱ་དགོས་བསམས༔ པདྨའི་རྩ་ལག་སྨད་འཚོང་བཟང་མོ་གཉིས༔ ངན་སོང་གསུམ་འཁོར་གཅིག་ནི་སྦྲང་མར་སྐྱེས༔ གཅིག་ནི་བུ་ཆུང་མཚན་མ་བཟང་པོར་སྐྱེས༔ ད་སྟེ་ཞག་བདུན་ཤི་ནས་དམྱལ་བར་འགྲོ༔ འཕགས་ཞལ་ཉི་ཞུར་ཙམ་ཡང་མི་མཐོང་སྟེ༔ ཐུགས་རྗེས་གཟིགས་ནས་ལས་ངན་འཛད་པ་དང་༔ རྒྱལ་པོ་དང་ནི་བློན་པོས་སུན་འདོན་ཕྱིར༔ རྒྱལ་ཕྲན་ཞིག་གིས་བུ་ཆུང་བསིལ་གྲིབ་བསྙལ༔ དེ་ཡི་མགོ་ལ་སྦྲང་མ་ཞིག་འདུག་ནས༔ རྒྱལ་སྲས་པདྨས་སོར་རྡེའུ་ཞིག་འཕངས་པས༔ སྦྲང་མ་བུ་ཆུང་ཀླད་པའི་དཀྱིལ་དིམ་ཤི༔ ཐམས་ཅད་མི་རིགས་མི་འཚམ་ཧ་ལས་ནས༔ འཁོར་ལོས་སྒྱུར་བའི་རྒྱལ་པོས་ཡུལ་གནོད་མེད༔ མཚོན་ཆས་གཡུལ་རྒྱལ་གསོད་དུ་མི་འཇུག་ལ༔ མི་ཐོང་རྒྱལ་པོ་འདི་ནི་གནོད་འཚེ་བྱེད༔ ཅེས་པ་ལ་སོགས་ཁས་བརྒྱ་བྱེད་པར་གྱུར༔ རྒྱལ་ཕྲན་བུ་རོ་ཡབ་ཀྱི་མདུན་དུ་བོར༔ དེ་ནས་ཡབ་ཀྱིས་སྲས་ལ་འདི་སྐད་སྨྲས༔ སེམས་ཅན་བདེ་བར་བྱེད་པ་རྒྱལ་པོའི་ཁྲིམས༔ གཞོན་ནུས་རྒྱལ་ཁྲིམས་བཤིག་པ་མིན་ནམ་ཅི༔ འཁོར་ལོས་སྒྱུར་རྒྱལ་ལོ་ཀར་བྱོན་པའི་ཚེ༔ ཡུལ་དེའི་མིརྣམས་ཐམས་ཅད་བདེ་བ་ལ༔ ཁམས་གྱི་རྒྱལ་ཕྲན་བུ་བསད་ཁྲིམས་ལ་མཆོངས༔ ཞེས་གསུངས་རྒྱལ་སྲས་མཆོག་གིས་ལན་གསོལ་བ༔ ཡབ་མཆོག་བདག་ལ་དགྱེས་པར་གསོན་མཛོད་དང་༔ བདག་ནི་འདི་ཡི་སྐྱེ་བ་ཡང་སྔ་ལ༔ ཉི་འོག་རྒྱལ་པོ་རྣ་བ་ཅན་གྱི་བུ༔ གོའུ་ཏ་མ་ཞེས་བྱར་སྐྱེ་བ་བླངས༔ དྲང་སྲོང་མདོག་ནག་ཅེས་བྱར་རབ་ཏུ་བྱུང་༔ ཡུལ་གྲུ་འཛིན་དུ་ལོ་མའི་སྤྱིལ་པོར་འདུག༔ དེ་ན་སྨད་འཚོང་བཟང་མོ་བྱ་བ་དང་༔ གཡོན་ཅན་པདྨའི་རྩ་ལག་བྱ་བ་ཡོད༔ དེ་གཉིས་དགའ་མགུར་སྤྱོད་ཕྱིར་ཆས་པ་ལ༔ ལམ་དུ་ཨ་རི་ཞེས་བྱའི་ཚོང་པ་ཡིས༔ བཟང་མོར་ཀཪྴ་པ་ཎ་ལྔ་བརྒྱ་བྱིན༔ དེ་དང་ལྷན་ཅིག་རྩེས་པས་བུ་མོས་བསྙད༔ པདྨའི་རྩ་ལག་ཁྲོས་ནས་བཟང་མོ་བསད༔ རལ་གྲི་གོའུ་ཏ་མའི་མདུན་དུ་བོར༔ རྒྱལ་པོས་བཅིངས་པས་གོའུ་ཏ་མ་ཤི༔ པདྨའི་རྩ་ལག་སྦྲང་མའི་སྐྱེ་བ་བླངས༔ སྨད་འཚོང་བཟང་མོ་བློན་པོའི་བུ་རུ་སྐྱེས༔ གོའུ་ཏ་མ་དེ་ནི་ད་ལྟ་ང་༔ ལས་ཀྱི་སྲོག་ལན་དེ་ལྟར་ཆགས་པ་ཡིན༔ རྒྱབ་ཚད་མི་ཕོག་ཕོག་ཚད་མི་འཆི་ན༔ རྒྱལ་པོས་མཁྱེན་མཛོད་ཁྲིམས་ནི་མ་བཤིགས་གསུངས༔ དེ་ནས་རྒྱལ་པོས་བུ་ཆུང་ཤི་སྟོང་བྱིན༔ རྒྱལ་སྲས་ཕོ་བྲང་ནང་དུ་སྤྱན་དྲངས་ནས༔ ཕྱི་སྒོ་ནང་སྒོ་བར་སྒོ་གནམ་སྒོ་ལ༔ གྱད་ཀྱི་བློན་པོ་སྒོ་སྲུངས་བརྒྱ་བརྒྱ་བཞག༔ རྒྱལ་སྲས་ཕྱི་རུ་སྐྱོ་བསངས་མ་གཏོང་བསྒོས༔ ཕྱི་ལ་འོབས་བརྐོས་སྒོ་གཏན་གཞུག་ཏུ་བཅུག༔ གྲོང་ཁྱེར་སྒོ་བཞིར་དམག་གི་དཔུང་ཆེན་བཞག༔ འོད་འཆང་མ་དང་རྒྱལ་སྲས་ལྷན་ཅིག་ཏུ༔ མནལ་བའི་ཚེ་ན་རི་འགུལ་ས་ནི་གཡོས༔ ལྗོན་ཤིང་ང་གིས་བསྐྱོད་པས་རྩ་ནས་དོན༔ གནམ་ས་གཉིས་ནི་འགྲེ་ལོག་བསྒྱུར་བ་དང་༔ མགོ་ཡི་སྐྲ་བཅད་སོ་གཅིག་ཕྱུང་བ་རྨིས༔ དེ་ནས་གཉིད་སད་སྙིང་མ་དགའ་ཞིང་བཤུམ༔ རྨི་ལམ་དེ་འདྲ་རྨི་བ་ཅི་འགྱུར་སྨྲས༔ རྒྱལ་སྲས་མཆོག་གིས་བཙུན་མོ་ལ་སྨྲས་པ༔ འོད་འཆང་ཁྱོད་ནི་སྡིག་མེད་དགེ་སེམས་ལྡན༔ རྨི་ལྟས་བཟང་གིས་ཁ་རོག་ཉོལ་ཞེས་གསུངས༔ དེ་ནས་རྒྱལ་སྲས་རྒྱལ་པོའི་ཁང་བཟང་སོང་༔ ཁང་བཟང་ཐམས་ཅད་འོད་ཟེར་གང་བར་གྱུར༔ རྒྱལ་པོའི་མནལ་སད་ཉི་མ་ཤར་བྱུང་ཟེར༔ བལྟས་པས་རྒྱལ་སྲས་དམ་པ་དེ་མཐོང་ནས༔ མཚན་མོ་རྒྱུ་བ་ཅིས་ཉེས་མི་གཟིམས་པར༔ པདྨ་འདྲ་བའི་མིག་རིང་ཅི་མཛད་གསུངས༔ རྒྱལ་སྲས་ཡབ་ལ་ཐལ་སྦྱར་པུས་བཙུགས་ནས༔ ཡབ་གསན་ང་ནི་ཚེ་གཅིག་སངས་རྒྱས་བསྒྲུབ༔ གཏི་མུག་རོ་ཉལ་བྱེད་ལ་སྐྱིད་པ་མེད༔ ལེ་ལོ་དང་ནི་གཡེང་བ་རབ་སྤངས་ནས༔ ཆོས་ཀྱི་གཏམ་མང་སྣ་ཚོགས་ཉེ་བར་སྟོན༔ དེ་ལ་སྐྱོ་བའི་སེམས་ནི་མ་མཛད་ཅིག༔ ཅེས་སྨྲས་རྒྱལ་པོ་མཆི་མས་བརྣངས་འདི་བརྗོད༔ ཁྱོད་ནི་སེམས་ཅན་ལེགས་བྱེད་དགོངས་པ་སྟེ༔ ཤིན་ཏུ་ཉམ་ཆུང་རང་གི་བུ་ལ་ཡང་༔ བདག་ནི་ལས་ཀྱི་འཕྲོ་དང་སྐལ་བར་ལྡན༔ ངེས་པར་མི་ལུས་ཐོབ་ནས་རྒྱལ་པོར་གྱུར༔ སྲས་ཀྱིས་ཕོངས་ནས་དཀོར་མཛོད་སྦྱིན་པར་བཏང་༔ ལམ་ལ་བགྲོད་དཀའ་རྒྱ་མཚོའི་ནོར་བུ་བླངས༔ ཡབ་དང་ཡུམ་མེད་པདྨའི་སྡོང་པོ་ལས༔ རྒྱུ་དང་རྐྱེན་མེད་སྤྲུལ་པའི་སྐུ་དང་མཇལ༔ རྒྱལ་སྲིད་ཕུལ་ནས་གཙུག་གི་ནོར་བུ་ཞུས༔ འཁོར་བའི་ཆོས་ལ་སྐྱོ་བ་མ་མཛད་པར༔ བདག་དང་ཡུལ་འཁོར་བྱམས་པས་སྐྱོངས་མཛོད་གསུངས༔ དེ་ནས་རྒྱལ་སྲས་མཆོག་གིས་འདི་སྐད་གསོལ༔ འདོད་ཆགས་ཞེ་སྡང་གཏི་མུག་མ་གྲོལ་བའི༔ འགྲོ་བ་གསུམ་པོ་འདི་མིན་གཞན་ན་མེད༔ ལུས་འདིའི་སྡུག་བསྔལ་ཕྲ་མོ་མི་བཟོད་པར༔ ངན་སོང་གསུམ་གྱི་སྡུག་བསྔལ་བཟོད་དུ་རེ༔ སྡུག་བསྔལ་ཆེན་པོ་ནམ་འོང་ཆ་མེད་པར༔ ཚེ་འདི་རྟག་པར་བཟུང་ནས་གཉེར་ཀ་བྱེད༔ བློ་ནོར་སྙིང་མེད་དབུས་སུ་ང་མི་སྡོད༔ འཁོར་བ་སྒྱུ་མར་མི་ཆགས་རབ་ཏུ་འབྱུང་༔ གཡེང་བ་འདུ་འཛི་སྤངས་ནས་སྤྱོད་པ་སྐྱོང་༔ ཞེས་གསུངས་རྒྱལ་པོ་མཆི་མས་མིག་གང་ནས༔ ཀྱེ་མ་ཁྱོད་དང་མ་ཕྲད་སྔོན་རོལ་ཏུ༔ བདག་ཉིད་མི་འཆི་གསོན་པ་ཇི་ལྟ་བུ༔ འཆི་བདག་ཅི་ཕྱིར་ང་ལ་སྔར་མི་འོངས༔ སྡུག་བསྔལ་འདི་ལས་གཞན་མི་འབྱུང་ཞེས་གསུངས༔ དེ་ནས་རྒྱལ་སྲས་མཆོག་གིས་ཐུགས་གསོས་ཏེ༔ སྔོན་གྱི་རྒྱལ་སྲས་རྣམས་ཀྱིས་ཆོས་བཤད་པ༔ བདག་གིས་ཀུན་རྫོབ་བདེན་པ་ལ་བརྟེན་ནས༔ ཡབ་མཆོག་རྒྱལ་པོའི་ཐུགས་ཀྱི་གཅོང་འབྱིན་ཕྱིར༔ ཚིགས་སུ་བཅད་དེ་སྨྲས་པར་བགྱིའོ་གསོན༔ སྔར་འདུས་སྡོད་པ་མེད་པས་འབྲལ་བར་ངེས༔ གནས་སྐབས་ཡུད་ཙམ་ཡིན་པས་འབྲལ་བར་ངེས༔ རྒྱལ་བློན་ཚོང་དུས་འདྲ་བས་སོ་སོར་འགྱེས༔ འཇིག་རྟེན་དག་ན་རྟག་པའི་ཆོས་མེད་དེ༔ སྔར་ལུས་མེད་པས་ཐམས་ཅད་འཆི་བར་ངེས༔ ཕུང་པོ་འདུས་བྱས་ཡིན་པས་འཇིག་པར་ངེས༔ མི་ཚེ་སྐད་ཅིག་མི་སྡོད་འགྲོ་བར་ངེས༔ བྱས་པ་ཐམས་ཅད་མི་རྟག་འཇིག་པར་ངེས༔ བརྩིགས་པའི་གནས་ཀྱིས་འཆི་བ་ལ་མི་བསྟོངས༔ འབྲེལ་བའི་གཉེན་གྱིས་འཆི་བ་ལ་མི་བསྟོངས༔ བསགས་པའི་ནོར་གྱིས་འཆི་བ་ལ་མི་བསྟོངས༔ རང་ལུས་དཔའ་བགོས་འཆི་བ་ལ་མི་བསྟོངས༔ རྒྱུས་མེད་ས་རུ་གཅིག་པུར་འཁྱམ་དགོས་ན༔ དེ་ཀུན་བདེན་ནམ་གུས་པའི་སེམས་ཀྱིས་གཞིགས༔ བདག་གིས་ཐེག་པ་ཆེན་པོའི་ཆོས་བཙལ་ནས༔ ཡབ་ཡུམ་མྱུར་དུ་བླ་མེད་སངས་རྒྱས་བཏོན༔ དེ་ལྟར་ལེགས་སྨྲས་སོམས་ལ་ཐུགས་བདེར་མཛོད༔ དེ་སྐད་གསུངས་པས་རྒྱལ་པོའི་ཐུགས་ཆད་ནས༔ དེ་ཀ་ཡིན་ཟེར་བློ་ནི་ནང་དུ་བྲོས༔ བུ་ལ་ཆགས་པའི་སྲེད་པ་ཡོངས་སུ་བཅད༔ ཁྱོད་ཀྱི་བསམ་པ་ཡོངས་སུ་རྫོགས་གྱུར་ཅིག༔ དབུ་ཐུམ་གཏུམས་ནས་ཀྱི་ཧུད་ཟེར་ཞིང་ངུས༔ དེ་ནས་རྒྱལ་སྲས་དམ་པས་རང་ཁྱིམ་ཕྱིན༔ ནམ་ལངས་བློན་པོའི་ཚོགས་རྣམས་ཐམས་ཅད་བསགས༔ རྒྱལ་སྲིད་སྤང་ཕྱིར་བརྟུལ་ཞུགས་སྤྱོད་པ་མཛད༔ སྐུ་ནི་གཅེར་བུ་རུས་པའི་རྒྱན་དྲུག་གསོལ༔ ཕྱག་ཏུ་རྡོར་དྲིལ་ཁ་ཊྭཱྃ་རྩེ་གསུམ་ཐོགས༔ ཕོ་བྲང་རྩེ་མོར་གར་སྟབས་མཛད་པ་ལས༔ ལྟད་མོ་བལྟ་བའི་དམངས་ཕལ་མང་པོ་ཚོགས༔ རྡོ་རྗེ་ཁ་ཊྭཱྃ་ཤོར་བའི་རྫུ་བག་མཛད༔ བདུད་ཀྱི་བློན་པོ་དབང་ཆེ་ཁ་བཙན་པ༔ ཀ་ཏ་མ་ཞེས་ཨུ་པ་ཏ་ཡི་བུ༔ པྲ་ཏ་ཀ་ར་མ་བུའི་མགོ་དཀྱིལ་ཕོག༔ རྡོ་རྗེ་ཀླད་པའི་དཀྱིལ་དུ་སོང་ནས་གུམ༔ ཁ་ཊྭཱྃ་མ་ཡི་སྙིང་ལ་ཕོག་ནས་ཤི༔ དེ་ནས་བློན་པོ་རྣམས་ཀྱིས་རྒྱལ་པོར་ཞུས༔ རྒྱལ་བུར་མངའ་གསོལ་ཚུལ་མིན་སྤྱོད་པ་བྱས༔ སྔ་དུས་རྒྱལ་ཕྲན་བུ་བསད་ལན་ཆགས་ཟེར༔ ད་ཡང་བློན་པོའི་བུ་སྨད་བསད་གདའ་བས༔ རྒྱལ་ཁྲིམས་གང་ཉེས་ཆད་པས་མ་བཅད་ན༔ ད་དུང་རྒྱལ་པོས་འདི་འདྲ་འགའ་བྱེད་དོ༔ གསལ་ཤིང་རྩེ་ལ་བསྐྱོན་པའི་ཆད་པ་འཚལ༔ ཞེས་ཞུས་རྒྱལ་པོ་ཐུགས་འཁྲུགས་སེམས་མ་དགའ༔ ཁྲིམས་བཙན་བློན་པོ་ངོ་སོ་འདོན་པའི་ཕྱིར༔ རྒྱལ་པོས་འཇིག་རྟེན་མཐུན་པར་གཏམ་སྨྲས་པ༔ འདི་ནི་མི་མ་ཡིན་གྱི་བུའམ་ཅི༔ སྤྲུལ་པའི་སྐུ་ཞིག་ཡིན་ནམ་མི་ཤེས་པས༔ བསད་པས་མི་འོང་མཐའ་ལ་སྤྱུགས་ཀྱིས་གསུངས༔ རྒྱལ་བུར་ཐུགས་ཡིད་ཆགས་པས་མ་དགའ་ཡང་༔ རྒྱལ་ཁྲིམས་བཙན་པས་མི་སྤྱུགས་དབང་མེད་ནས༔ རྒྱལ་བློན་ཐམས་ཅད་ཚོགས་པའི་མདུན་སྨྲས་པ༔ རིན་ཅེན་མཚོ་དཀྱིལ་པདྨའི་སྡོང་པོ་ལས༔ ཕ་མེད་མ་མེད་ཁྱེའུ་སྤྲུལ་པའི་སྐུ༔ སྐུ་མཆོག་དྲི་མེད་ཡོན་ཏན་རབ་བརྒྱན་པ༔ སྲས་ཀྱིས་ཕོངས་ནས་རྒྱལ་སར་དབང་བསྐུར་བྱས༔ རྒྱལ་བུའི་སྤྱོད་རྩུབ་བློན་པོའི་ཕྲུ་གུ་བཀུམས༔ བློན་པོ་རྣམས་ཀྱིས་རྒྱལ་ཁྲིམས་ཆད་པ་གཅོད༔ གསལ་ཤིང་རྩེར་བསྐྱོན་ཟེར་ཡང་སྤྱུགས་ཁས་བླངས༔ ད་ནི་རྒྱལ་བུ་གང་དགར་བཞུད་ཅེས་གསུངས༔ དེ་ནས་རྒྱལ་བུས་ཡབ་ལ་འདི་སྐད་གསོལ༔ འཇིག་རྟེན་འདི་ན་ཕ་དང་མ་དཀོན་ཡང་༔ ཡབ་དང་ཡུམ་དུ་བགྱིས་ནས་རྒྱལ་སྲིད་བྱིན༔ ང་ནི་གོའུ་ཏ་མར་ཡོད་པའི་དུས༔ པྲ་ཏ་ཀ་ར་མངག་གཞུག་བུ་མོ་ཡིན༔ མ་འདི་ཚོང་པ་ཨ་རིའི་སྐྱེ་བ་ཡིན༔ ལས་ཀྱི་ལན་ཆགས་བློན་པོའི་བུ་སྨད་བཀུམས༔ རྒྱལ་ཁྲིམས་བཙན་པས་བདག་ནི་སྤྱུགས་ན་ལེགས༔ རྒྱལ་པོའི་གསུང་བཞིན་རྗེས་སུ་འཇུག་པར་ཞུ༔ དེ་སྐད་གསུངས་པས་རྒྱལ་པོ་མ་དགྱེས་སོ༔ བློན་རྣམས་རྒྱལ་སྲས་སྤྱུག་པའི་གྲོས་འདུན་བྱེད༔ ལ་ལ་འབྲུ་ཤའི་ཡུལ་དུ་སྤྱུག་གོ་ཟེར༔ ལ་ལ་བཻདྡྷའི་ཡུལ་དུ་སྤྱུག་གོ་ཟེར༔ ལ་ལ་བྷངྒ་ལའི་ཡུལ་སྤྱུག་གོ་ཟེར༔ ཁ་ཅིག་མུ་སྟེགས་ཟངས་གླིང་སྤྱུག་གོ་ཟེར༔ ཁ་ཅིག་ཁང་བུའི་གླིང་དུ་སྤྱུག་གོ་ཟེར༔ ཁ་ཅིག་ལི་ཡི་ཡུལ་དུ་སྤྱུག་གོ་ཟེར༔ ཁ་ཅིག་རྒྱ་ནག་ཡུལ་དུ་སྤྱུག་གོ་ཟེར༔ ལ་ལ་ནཱ་ལེནྡྲ་རུ་སྤྱུག་གོ་ཟེར༔ ལ་ལ་ཐོ་གར་ཡུལ་དུ་སྤྱུག་གོ་ཟེར༔ ལ་ལ་ཟ་ཧོར་ཡུལ་དུ་སྤྱུག་གོ་ཟེར༔ ལ་ལ་འ་ཤའི་ཡུལ་དུ་སྤྱུག་གོ་ཟེར༔ ཁ་ཅིག་སྟག་གཟིག་ཡུལ་དུ་སྤྱུག་གོ་ཟེར༔ ཁ་ཅིག་མ་རུ་ཙེའི་ཡུལ་སྤྱུག་གོ་ཟེར༔ ཁ་ཅིག་བྱང་ཕྱོགས་ཤམྦྷ་ལར་སྤྱུག་ཟེར༔ བློན་རྣམས་སྤྱུག་པའི་ཡུལ་ལ་ཁ་མ་འཆམས༔ རྒྱལ་པོས་འགྲོ་བའི་ཡུལ་ཕྱོགས་གང་ལ་མཉེས༔ མཉེས་པའི་ཡུལ་ཕྱོགས་དེ་ལ་སྤྱུག་གིས་གསུངས༔ རྒྱལ་བུ་སངས་རྒྱས་གཉིས་པས་འདི་སྐད་གསོལ༔ གནས་ལ་ངེས་པ་མེད་པས་གར་སྤྱུགས་གཞལ་ཡས་ཁང་༔ བྱ་རྒྱུ་ཆོས་ལས་མེད་པས་རྒྱལ་པོའི་གདན་ས་རུ༔ ཡོ་ག་རྣམ་གསུམ་སྤྱོད་པའི་མི་དེ་སྐྱིད་དང་འཕྲད༔ སེམས་ལ་སྐྱེ་ཤི་མེད་པས་བསད་པས་ང་མི་འཇིགས༔ ཡུལ་ལ་ཞེན་པ་མེད་པས་སྤྱུགས་ཀྱང་ང་མི་འཇིགས༔ ཡབ་ཡུམ་གཉིས་པོ་ཡུན་ཅིག་བདེ་བར་རབ་བཞུགས་མཛོད༔ དེ་སྐད་གསུངས་ནས་ཡབ་ཡུམ་ཕྱག་འཚལ་ལོ༔ བཙུན་མོས་རྒྱལ་བུའི་མགུལ་ལ་འཁྱུད་ནས་སུ༔ ཀྱེ་ཧུད་བུ་སྡུག་ཡིད་འོང་མཐོང་དགའ་བ༔ གྲོས་ངན་སྤྱུག་པའི་དབང་དུ་ཅི་ཕྱིར་སོང་༔ བུ་ཚབ་ང་སྤྱུགས་ཅི་ཕྱིར་གོ་མི་ཆོད༔ ཅེས་བརྗོད་རྒྱལ་བ་ཉིད་ལ་ཁ་ནི་གཏུགས༔ རྒྱལ་པོ་ཨིནྡྲ་བོ་དྷིའི་ཞལ་ནས་ནི༔ བློན་པོས་མ་མཐོང་ནོར་བུ་ཁྱེར་ཅིག་གསུངས༔ དབུལ་བཀྲེས་སྐོམ་འཁྱགས་སྡུག་བསྔལ་འདི་ཡིས་སེལ༔ གསོལ་བ་གང་བཏབ་དགོས་འདོད་འདི་ལས་བྱུང་༔ འདི་ལ་རྒྱལ་བུའི་མཐུན་རྐྱེན་མཛོད་ཅིག་གསུངས༔ རྒྱལ་བུའི་ཞལ་ནས་ཡབ་ལ་འདི་སྐད་གསོལ༔ བདག་གི་སྣང་བ་ཡིད་བཞིན་ནོར་བུ་སྟེ༔ ཡབ་ཀྱི་ནོར་བུས་བདག་ལ་ཅི་ཞིག་བྱ༔ འདི་ལ་ནོར་བུའི་ཟླ་བོ་མཛོད་ཅིག་གསུངས༔ ལྗགས་ཀྱི་མཆིལ་མ་རྒྱལ་པོའི་ཕྱག་ཏུ་བསྐྱུར༔ དེ་ཉིད་ཡིད་བཞིན་ནོར་བུ་བསམ་འཕེལ་གྱུར༔ དེ་ནས་བློན་པོའི་ཚོགས་གསེབ་རྒྱལ་པོ་བྱོན༔ དུར་ཁྲོད་བསིལ་བའི་ཚལ་ཞེས་འཇིགས་སུ་རུང་༔ སྐྱི་བུང་བྱེད་པ་དེ་རུ་སྤྱུག་གོ་ཟེར༔ བློན་པོ་ཐམས་ཅད་ཁ་འཆམ་ཐབས་ཅིག་འདུག༔ རྒྱལ་པོས་བློན་པོ་རྣམས་ལ་བཀའ་སྩལ་པ༔ འཇིག་རྟེན་ཁམས་ན་འགྲན་གྱི་ཟླ་བྲལ་བ༔ འཁོར་ལོས་སྒྱུར་བའི་རྒྱལ་པོ་རིན་པོ་ཆེ༔ མཚན་བཟང་སུམ་ཅུ་རྩ་གཉིས་མཚན་འཆང་བའི༔ སྐུ་མཆོག་དམ་པ་དཔེ་མེད་འདི་འདྲ་བ༔ སྔར་ཡང་མ་བྱོན་ད་ཡང་མི་འབྱོན་ན༔ ཁྲིམས་ལ་མཆོངས་ཀྱང་འདི་ཉིད་སྤྱུག་པར་ཕོངས༔ སྔོན་ཆད་རབ་ཏུ་བྱུང་དོགས་མེལ་ཚེ་བཞག༔ ད་ནི་སྤྱུག་པ་སུ་ཡི་སྙིང་ལ་ཕོད༔ བཀྲ་མི་ཤིས་པ་འཁྲུག་དང་ནད་མུག་འོང་༔ ཞེས་གསུངས་བློན་པོ་ཨུ་པ་ཏ་ཁྲོས་ནས༔ ཁྲིམས་སྲུང་རྒྱལ་པོ་སྨྲ་བ་ལན་ཅིག་ཡིན༔ དེ་ལས་མངས་ན་རྒྱལ་སྲིད་ཟིན་མི་འགྱུར༔ གྲོས་མཁན་བློན་པོའི་འདུན་གྲོས་ལན་ཅིག་ཡིན༔ དེ་ལས་མངས་ན་གྲོས་ཐག་ཆོད་མི་འགྱུར༔ ཐམས་ཅད་ཁ་འཆམས་བསིལ་བའི་ཚལ་དུ་སྤྱུག༔ ཅེས་སྨྲས་རྒྱལ་སྲས་སྤྱུག་པ་ཀུན་ཐོས་ནས༔ ཡུལ་མི་ཐམས་ཅད་ལྟད་མོ་བལྟ་བར་འདུས༔ དེ་དག་དཔག་ཚད་བརྒྱ་དང་སུམ་བརྒྱ་དང་༔ དཔག་ཚད་སྟོང་གི་ལམ་ནས་འོངས་པ་དང་༔ དཔག་ཚད་འབུམ་དང་ཁྲི་ནས་ལྷགས་པ་དང་༔ བྱེ་བ་ས་ཡ་དག་ནས་སྤྲིན་བཞིན་འདུས༔ མི་རྣམས་གཟུགས་བཟང་ཡན་ལག་རགས་པ་དང་༔ ཤིན་ཏུ་མཛེས་ཤིང་ཉམས་དགའ་མདངས་དང་ལྡན༔ ཐམས་ཅད་སྤྱི་བོར་རལ་པ་ཐོར་ཅོག་བྱས༔ གསེར་དངུལ་མུ་མེན་བྱུ་རུ་ལ་སོགས་བརྒྱན༔ རས་གོས་དཀར་དམར་སྣ་ཚོགས་གྱོན་པས་གང་༔ བུད་མེད་སྐྲ་ཡི་མདུད་པ་རྒྱ་མདུད་བཅིངས༔ དུང་དང་རུས་པ་གཡུ་ཡི་རྒྱན་གྱིས་བརྒྱན༔ དགེ་སྦྱོང་བྲམ་ཟེ་དབུལ་ཕོངས་མགོན་མེད་དང་༔ ནད་པ་ལ་སོགས་ཐམས་ཅད་དུས་དེར་འདུས༔ གྲོང་ཁྱེར་ཕྱི་རོལ་ལམ་ལ་ཐག་ཐོག་གང་༔ དེ་ནས་རྒྱལ་བུ་ཕོ་བྲང་ནང་སྒོར་ཐོན༔ རྔ་བོ་ཆེ་དང་དུང་དང་རྫ་རྔ་དང་༔ རྔ་ཕྲན་པི་ཝང་གླིང་བུ་མ་དཀྲོལ་འཁྲོལ༔ བཙུན་མོ་འོད་འཆང་མས་ནི་ཕྱི་ལ་འབྲངས༔ དྲི་མེད་དྲི་བྲལ་ཁྱོད་ནི་གང་བཞུད་པ༔ བདག་ཀྱང་ཁྱོད་དང་ལྷན་ཅིག་འགྲོ་བར་བགྱི༔ འོན་ཏེ་ཕོ་བྲང་འདི་ལ་གཟིགས་ནས་སུ༔ སྐྱེ་འཆི་མཐར་ཕྱིན་མ་ཐོབ་བར་དུ་བཞུགས༔ ཞེས་ངུས་མཆི་མ་འཁོར་ཞིང་སྨྲས་པ་དང་༔ རྒྱལ་བུ་དམ་པ་ནང་དུ་འཐེན་མཛད་ནས༔ སྤྱོད་པ་བསྐྱངས་པས་ཡབ་ཀྱི་ཁྲིམས་དང་འགལ༔ རྒྱལ་ཁྲིམས་གཉན་པས་འདི་ནས་སྤྱུག་པར་མཆི༔ ལྷ་མོའི་གཟུགས་ཁྱོད་གང་དུ་ཅི་བྱེད་འགྲོ༔ རྒྱལ་པོ་བློན་འབངས་བར་དུ་བདེ་ཞིང་སྐྱིད༔ བརྩེ་བར་མ་བྱེད་ཕྱིས་ཤིག་མཇལ་དུ་འོང་༔ དེ་སྐད་གསུངས་པས་འོད་འཆང་བསམ་པ་ལ༔ འདི་ལྟར་སྤྱུག་པ་ཡབ་ཀྱི་ངག་ཡོད་འོང་༔ དེ་མིན་ཁྲིམས་དང་འགལ་བར་བྱས་གྱུར་ཀྱང་༔ མི་མཆོག་འདི་འདྲ་སྤྱུག་པ་ཕངས་སྙམ་ནས༔ ཐེན་དང་ཡབ་ལ་ཞུ་བ་ཡོད་ཀྱི་ཟེར༔ བཙུན་མོ་འོད་འཆང་རྒྱལ་པོའི་དྲུང་དུ་ཕྱིན༔ པུས་བཙུགས་འདུག་སྟེ་བཤུམ་མོའི་ཡུས་འདི་བརྗོད༔ ཅི་ནས་འབྲངས་པའི་ཁྲིམས་ཀྱིས་ཡུལ་སྲིད་བདེ༔ འབངས་མང་སྟོབས་ལ་མ་གཏད་གྲོས་གདབ་གསོལ༔ རྒྱལ་པོའི་ཐུགས་ནི་སྨྱོ་བ་ཡིན་ནམ་ཅི༔ མི་མཆོག་འདི་དང་ཕྱིན་ཆད་ཕྲད་པར་དཀའ༔ རྒྱལ་པོའི་སྲས་གཅིག་བུ་འདི་མཐར་སྤྱུགས་ནས༔ སྲས་ནི་གཞན་མེད་ཁྲིམས་ཀྱིས་ཅི་ཞིག་བྱ༔ ཁོ་མོ་ཕོ་བྲང་འདིར་ནི་ཅི་ལ་སྡོད༔ ཅེས་པ་ལ་སོགས་མང་དུ་སྨྲས་པ་དང་༔ རྒྱལ་པོས་ཁྱོད་བདེན་འོད་འཆང་ཁྱོད་རེ་བདེན༔ ཅི་ཕྱིར་ཁྱོད་ཟེར་བཞིན་དུ་མི་ཉན་སྨྲས༔ རྒྱལ་པོས་བློན་པོ་ཚོགས་པའི་དབུས་སུ་ཕྱིན༔ རྒྱལ་བའི་སྲས་དེ་ཕོ་བྲང་ཕྱིར་ཐོན་ནས༔ ལྗོན་ཤིང་མྱ་ངན་ཚང་གི་དྲུང་ན་འདུག༔ འདུས་པ་རྣམས་ལ་སྤྲོ་བའི་ཚིག་སྨྲས་པ༔ ལུས་འདི་མི་རྟག་གཡང་ཁའི་སྡོང་པོ་འདྲ༔ དབུགས་ནི་མི་རྟག་ལ་ཁའི་ན་བུན་འདྲ༔ ཡིད་ནི་མི་རྟག་ནམ་མཁའི་གློག་དང་འདྲ༔ ཚེ་འདི་མི་རྟག་རྩྭ་ཁའི་ཟིལ་བ་འདྲ༔ ཞེས་གསུངས་ཕྱོགས་ནས་འདུས་པའི་མགྲོན་པོ་རྣམས༔ ཆེ་ཆུང་མེད་པ་ཐམས་ཅད་མཆི་མས་བརྣངས༔ དེ་ནས་འཇིག་རྟེན་སྐྱོང་བ་ཆེན་པོ་བཞི༔ རྣམ་ཐོས་སྲས་དང་ཡུལ་འཁོར་སྲུང་དང་ནི༔ སྤྱན་མི་བཟང་དང་དེ་བཞིན་འཕགས་སྐྱེས་པོ༔ བུ་དང་བློན་པོ་འཁོར་དང་མངག་པ་དང་༔ ཕོ་ཉ་གཡོག་འཁོར་ཁ་དོག་འཕགས་པ་དག༔ གནས་དེར་ལྷགས་ནས་རྒྱལ་སྲིད་སྣ་བདུན་བསུ༔ རྒྱལ་སྲས་མདུན་དུ་པུས་བཙུགས་ཐལ་སྦྱར་ནས༔ སྙན་ངག་ཚིགས་སུ་བཅད་པས་བསྐུལ་བ་ནི༔
ཨེ་མ་ཧོཿརྒྱལ་པོའི་རྒྱལ་ས་ཐུན་མོང་སྐྱབས་གནས་མིན༔ སྐྱེ་གནས་སོ་སོར་སྔ་ཕྱིར་སྤྲུལ་པའི་སྐུ༔ པད་འབྱུང་མ་ཡིན་ངེས་དོན་སྟོན་པ་མེད༔ ཐ་དད་དྲང་ཕྱིར་ཐེག་པ་སོ་སོ་ཀུན༔ ལྟ་སྤྱོད་སྦྱོར་སྒྲོལ་པད་འབྱུང་སངས་རྒྱས་ལམ༔ འབྲས་བུ་བདག་གཞན་མཆོག་ཐུན་སངས་རྒྱས་འགྲུབ༔ ཅེས་བསྐུལ་མཁའ་འགྲོ་སྡེ་བཞི་མདུན་དུ་བྱུང་༔ གླུ་གར་རྟ་མཆོག་རིན་ཅེན་ཁྲིད་བྱུང་ནས༔ རྒྱལ་བའི་སྲས་ཁྱོད་རྟ་མཆོག་འདི་ལ་ཆིབས༔ མཁའ་འགྲོ་སྡེ་བཞིས་ཆིབས་ཀྱི་རྐང་ལག་བཏེག༔ ཡངས་ཆེན་ནམ་མཁའ་དྭངས་པའི་དབྱིངས་ལ་བཞུད༔ རྒྱལ་སྲིད་སྣ་བདུན་སྔོན་མཇུག་ན་རེ་བྱས༔ ཐོ་ཕྱི་ཐམས་ཅད་འཇའ་འོད་སྒོར་རེ་བཞུད༔ སྐྱེ་བོ་མང་པོའི་ཚོགས་རྣམས་ཕྱི་ལ་ལྟ༔ མྱ་ངན་ངུ་ཞིང་གདོང་ལས་མཆི་མ་གཟགས༔ བུད་མེད་ཚོགས་རྣམས་ཉམ་ཐག་ས་ལ་འདྲེ༔ རྒྱལ་པོ་ཀྱི་ཧུད་བུ་སྡུག་བརྗོད་ཅིང་ངུ་༔ འོད་འཆང་འགྱེལ་ནས་དྲན་པ་ཉམས་པར་གྱུར༔ རྐན་དང་མཆུ་དང་ཁ་དང་སོ་བསྐམས་ནས༔ ཅང་མི་ཟེར་ཞིང་དབུགས་ཀྱི་རྒྱུ་བ་ཆད༔ འཁོར་གཡོག་བུད་མེད་ལྔ་བརྒྱ་མིག་ཆུ་གཟགས༔ ཉམ་ཐག་ལག་པ་གཉིས་ཀྱིས་བྲང་རྡུང་ཞིང་༔ ཉ་ཐང་ཕྱིང་བཞིན་ས་སྟེང་འདྲེ་ལྡོག་བྱེད༔ བདུད་བློན་རྣམས་ཀྱི་དབུགས་ནི་ཧད་ཧད་བྱས༔ རྒྱལ་བུ་དེ་ཉིད་གར་བཞུད་ལྟ་བར་བྱེད༔ ཡུམ་གྱིས་ཇི་ལྟར་སྡུག་པའི་བུ་འདི་ནི༔ ཕྱིན་ཆད་མི་མཐོང་འདི་འདྲའི་ལྟས་ངན་པ༔ བདག་ལུས་མྱ་ངན་མེ་ཡིས་ཚིག་ཅེས་བརྗོད༔ ཆོས་བློན་རྣམས་ཀྱིས་ཕྱི་ལ་ཕྱག་བཙལ་ནས༔ བདག་ཅག་ཐམས་ཅད་ཁྱོད་ཀྱིས་འདུལ་བར་ཤོག༔ ཅེས་པའི་སྨོན་ལམ་མང་པོ་འདེབས་པར་བྱེད༔ ཨུ་རྒྱན་ཡུལ་ནས་ལྷོ་ཕྱོགས་ངོས་ལ་གཤེགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་སྲིད་སྤངས་པའི་ལེའུ་སྟེ་ཉེར་གཅིག་པའོ༔ ༔
པདྨ་བཀའ་ཐང་ལེའུ་ ༢༢ དུར་ཁྲོད་བསིལ་བའི་ཚལ་དུ་བཞུགས་པ།
དེ་ནས་ལྔ་ལྡན་ཡུལ་དུ་ས་རུབ་ནས༔ རྒྱལ་བུས་རྟ་མཆོག་སྟེང་ནས་ས་ལ་བབས༔ རྒྱ་གར་བཀའ་སྐྱོང་བྲག་ཕུག་བྱ་བར་བཞུགས༔ རྡོ་རྗེ་དབྱིངས་ཀྱི་དཀྱིལ་འཁོར་ཞལ་ཕྱེ་ནས༔ སྒྲུབ་པ་ཞག་བདུན་མཛད་པས་གྲུབ་པ་ཐོབ༔ ཞི་བའི་ལྷ་ཚོགས་ནམ་མཁའི་འཇའ་ཚོན་ལྟར༔ སྣང་ལ་རང་བཞིན་མེད་པ་མེ་ལོང་གཟུགས༔ ཞལ་མཐོང་མཆོག་དང་ཐུན་མོང་གཉིས་གྲུབ་ནས༔ སྐྱེ་ཤི་མེད་པ་ཚེ་ཡི་རིག་འཛིན་ཐོབ༔ དེ་ནས་རྡོ་རྗེ་གདན་གྱི་ལྷོ་ནུབ་མཚམས༔ དཔག་ཚད་ལྔ་འདས་དུར་ཁྲོད་བསིལ་བའི་ཚལ༔ རོ་མྱགས་ཚལ་དང་འདམ་བུའི་ཚལ་ཀྱང་ཟེར༔ མཐའ་སྐོར་དཔག་ཚད་ཕྱེད་དང་གཉིས་ཡོད་པའི༔ རིན་ཅེན་ས་ལྟེ་ལྟ་བུ་ཡོད་པ་ལ༔ ཁོད་སྙོམས་ལག་མཐིལ་ལྟ་བུར་མཐོ་དམན་མེད༔ དེ་ཉིད་དབུས་ན་ལྷ་ལས་བབས་པ་ཡི༔ མཆོད་རྟེན་བདེ་བྱེད་བརྩེགས་པ་ཞེས་བྱ་བ༔ ཕྱི་ནི་མཆོད་རྟེན་ནང་ནི་གཞལ་ཡས་ཁང་༔ རྒྱུ་ནི་རིན་ཅེན་སྣ་ཚོགས་ལས་གྲུབ་པ༔ སྒོ་ནི་ཟངས་ལས་བྱས་ཤིང་གསེར་གྱིས་བྱུགས༔ འཁོར་ལོ་གདུགས་དང་བུམ་པ་བྲེ་དང་བཅས༔ དྲིལ་བུ་ཚར་དངར་སྒྲ་ནི་སྣ་ཚོགས་འབྱུང་༔ ཕྱོགས་བཞི་དག་ན་སྟོན་པའི་སྐུ་རྟེན་རེ༔ དུར་ཁྲོད་བྱང་ཤར་འཇིག་རྟེན་ལྷ་ཆེན་རྟེན༔ དཔག་བསམ་ཤིང་ནི་བྷ་ས་ལ་ཞེས་ཟེར༔ དུར་བྱའི་ཚོགས་ནི་དཔག་ཏུ་མེད་པ་གནས༔ འཇིག་རྟེན་ལྷ་ནི་དགའ་བྱེད་ཤྭ་ར་ཞེས༔ ཞོན་པ་སེང་གེ་ནག་པོ་ལ་ཞོན་ནས༔ ལག་པར་མདུང་ནག་རྩེ་མོ་གསུམ་པ་ཐོགས༔ གོས་སུ་ལེ་བརྒན་དམར་པོའི་འཇོལ་བེར་གསོལ༔ འགྲོ་བའི་སྲོག་ལེན་ཐོགས་པ་མེད་པའི་འཁོར༔ བྱེ་བ་དང་བཅས་ལྷ་སྲིན་སྡེ་བརྒྱད་འདུ༔ དེ་ན་མཁའ་འགྲོ་མ་ནི་དཔག་མེད་གནས༔ ལ་ལའི་མིག་ནས་ཉི་མའི་འོད་ཟེར་འབྱུང་༔ ལ་ལ་འབྲུག་གི་སྒྲ་སྒྲོགས་མ་ཧེ་ཞོན༔ ལ་ལ་གྲི་ཐོགས་མིག་ནི་འབྲུ་ཚུགས་ལྟ༔ ལ་ལ་ཐོད་བརྩེགས་ཐོགས་ནས་སྟག་ལ་ཞོན༔ ལ་ལ་མི་རོ་ཐོགས་ནས་སེང་གེ་ཞོན༔ ལ་ལ་རྒྱུ་མ་ཟ་ཞིང་ཁྱུང་ལ་ཞོན༔ ལ་ལ་མདུང་རྩེ་མེ་འབར་ཅེ་སྤྱང་ཞོན༔ ལ་ལ་ཁྲག་མཚོ་ོབ་ཅིང་གདོང་ལྔ་པ༔ ལ་ལ་ལག་པ་དཔག་ཏུ་མེད་པ་ན༔ སེམས་ཅན་རིགས་བྱེད་རྣམ་པ་མང་པོ་ཐོགས༔ ལ་ལ་རང་གི་མགོ་བཅད་ལག་ན་ཐོགས༔ ལ་ལ་རང་གི་སྙིང་ཕྱུང་ལག་ན་ཐོགས༔ ལ་ལ་རང་གི་ཁོག་པ་ཁ་ཕྱེ་ནས༔ ནང་ཁྲོལ་རྒྱུ་མ་གཟིངས་ཤིང་ཟ་བར་བྱེད༔ ལ་ལ་ཕོ་མཚན་མོ་མཚན་ངོམ་ཞིང་སྦེད༔ རྟ་དང་བ་ལང་གླང་པོ་ཞོན་པ་གནས༔ དབུས་ན་དག་བྱེད་སྐྱི་བུང་མཚོ་ཡོད་པར༔ དུར་ཁྲོད་གནས་པའི་སྲོག་ཆགས་དཔག་མེད་གནས༔ འགྲོ་བ་རྣམས་ཀྱིས་སྐད་ཅིག་རྒྱུ་མི་ནུས༔ སྲོག་དངོས་ལེན་ཅིང་ཟ་བར་བྱེད་པའི་གནས༔ གདུལ་བྱ་ཕྱིན་ཅི་མ་ལོག་འདུལ་དགོངས་ནས༔ པདྨ་རྒྱལ་པོ་ཉིད་ཀྱིས་དེར་བྱོན་ཏེ༔ བམ་རོ་གསར་རྙིང་མང་པོའི་ཁྲི་ལ་བཞུགས༔ དུར་ཁྲོད་གནས་པའི་རབ་འཇིགས་སྲོག་ཆགས་ཀྱིས༔ ཁྱད་དུ་འཕགས་པའི་ཤིང་ཐོག་མང་པོ་ཕུལ༔ མཁའ་འགྲོ་མ་རྣམས་ཕྱག་བྱས་རབ་ཏུ་འདུད༔ དབུས་ཀྱི་མཆོད་རྟེན་སྐུ་ཡི་རྒྱབ་བརྟེན་ནས༔ ལོ་ལྔར་བཞུགས་ནས་ཁྱད་པར་ཐེག་པ་དགུ༔ མཁའ་འགྲོ་མ་ཚོགས་རྣམས་ལ་ཆོས་བསྟན་ཏོ༔ ཡུལ་དེའི་ཆོས་ལུགས་རྒྱལ་པོའི་བཙུན་མོའམ༔ དྲག་དྲག་མགོ་ཅན་ཤི་བར་གྱུར་པ་ན༔ དུར་ཁྲོད་དེ་རུ་ཅི་འཁྱོལ་བྱེད་པ་ལ༔ རོ་གོས་རས་ཡུག་རེ་ཡིས་བསྒྲིལ་ནས་སུ༔ མི་ནི་ཤི་ཚད་དུར་ཁྲོད་དེ་རུ་སྐྱེལ༔ རོ་ཟས་འབྲས་ཆན་ཁལ་རེ་སྔས་བཅུག་འཇོག༔ པདྨ་རྒྱལ་པོས་བརྟུལ་ཞུགས་སྤྱོད་པ་བསྐྱངས༔ རོ་རྒྱགས་འབྲས་ཟོས་རོ་གོས་རས་ཡུག་གྱོན༔ ནམ་ཞིག་ཡུལ་དེར་མུ་གེ་ཆེན་པོ་བྱུང༔ ཕལ་ཆེར་ཤི་ནས་རོ་རྒྱགས་འབྲས་སྐྱེལ་ཆད༔ རོ་གོས་རས་ཡུག་རེ་ཡིས་དྲིལ་ནས་བསྐྱལ༔ པདྨ་རྒྱལ་པོས་བམ་རོའི་སྒྲུབ་པ་མཛད༔ ཟས་སུ་རོ་ཟོས་གོས་སུ་རོ་གོས་གྱོན༔ ཀཻ་རཱི་མ་བརྒྱད་མཁའ་འགྲོ་དབང་དུ་བསྡུས༔ གའུ་ཤོད་ཕྱིན་བརྟུལ་ཞུགས་སྤྱོད་པ་མཛད༔ ཕོ་བྱུང་བསྒྲལ་ནས་མ་མོ་མཁའ་འགྲོ་མཆོད༔ མོ་བྱུང་སྦྱོར་བ་བྱས་ནས་དབང་དུ་བསྡུས༔ ཡུལ་དེའི་རྒྱལ་པོ་ཨརྟི་ཞེས་པ་ཡི༔ བཙུན་མོ་སྦྲུམ་མ་གཅིག་གི་རོ་བཤས་པས༔ ཁོག་པའི་ནང་ནས་བུ་མོ་མ་ཤི་བྱུང་༔ འདི་ལ་ང་ཡི་མུ་དྲ་བྱའོ་སྨྲས༔ རྒྱལ་པོའི་ཐུགས་ལ་མ་ལྡན་བརྙས་པར་སོང་༔ ཡུལ་མི་ཐམས་ཅད་ལོག་ནས་ལིངས་ལ་བཏང་༔ རྒྱལ་བུ་དྷརྨྨ་ཤྲཱི་ཞེས་རྩལ་ལྡན་ཞིག༔ ལུང་པའི་མདོ་རུ་མཚོན་ཐོགས་བསྒུག་ཏུ་བཅུག༔ རྔོན་པས་ལུང་པ་བཤུས་ནས་མདའ་ལ་དེད༔ དྷརྨྨས་ཤཱཀྱ་སེང་གེའི་མིག་སྔ་ནས༔ འོད་མའི་མདའ་གཞུ་འཕངས་པས་མིག་ཕོག་ཤི༔ མ་སོད་ལུང་པའི་མདའ་ལ་ཤོར་བ་ཡིས༔ བདུད་པོ་ཤོར་བ་གཞོན་ནུ་ཞེས་མཚན་བཏགས༔ དེར་ནི་འགྱོད་པ་དྲག་པོ་སྐྱེས་པ་ཡིས༔ མཁའ་འགྲོས་བརྟུལ་ཞུགས་སྤྱོད་པའི་མཆོད་རྟེན་བཞེངས༔ ཨུརྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དུར་ཁྲོད་བསིལ་བའི་ཚལ་དུ་བཞུགས་པའི་ལེའུ་སྟེ་ཉེར་གཉིས་པའོ༔ ༔
པདྨ་བཀའ་ཐང་ལེའུ་ ༢༣ རྩིས་ལ་སྦྱངས་པ།
དེ་ནས་གསལ་ལྡན་ཡུལ་དུ་ཕྱིན་པ་དང་༔ ཤཱཀྱའི་དྲང་སྲོང་སྲིད་སྒྲུབ་བྱ་དང་ཕྲད༔ ཁྱོད་ཀྱིས་ཅི་ཤེས་དྲིས་པས་རྩིས་ཤེས་ཟེར༔ དེ་ལ་མཉེས་པའི་ཡོན་ཕུལ་རྩིས་སློབས་བྱས༔ དང་པོར་ལོ་ཡི་བྱུང་ཚུལ་བསླབས་པ་ནི༔ ཡུམ་ལ་ལྷ་ཡིས་བྱིན་བས་མཛད་པ་ཡིས༔ མ་རིག་བྱི་བའི་ལོ་ནི་དེ་ནས་བྱུང་༔ ལྷུམས་ཞུགས་གླང་པོ་ཐལ་ཀར་མཆེ་དྲུག་སྤྲུལ༔ འདུ་བྱེད་གླང་གི་ལོ་ནི་དེ་ནས་བྱུང་༔ ལྷུམས་ནང་ཁྲ་བོ་ཁྱི་ལེར་འདུག་པ་ཡིས༔ རྣམ་ཤེས་སྟག་གི་ལོ་ནི་དེ་ནས་བྱུང་༔ བལྟམས་དུས་སྙན་ནི་ཀྲོང་ངེ་བྱོན་པ་ཡིས༔ མིང་གཟུགས་ཡོས་བུའི་ལོ་ནི་དེ་ནས་བྱུང་༔ འཁྲུངས་ཚེ་ནམ་མཁའ་དག་ནས་སྒྲ་བྱུང་བས༔ སྐྱེ་མཆེད་དྲུག་ཅེས་འབྲུག་ལོ་དེ་ནས་བྱུང་༔ སྐུ་ལ་ཀླུ་ཡི་རྒྱལ་པོས་ཁྲུས་བྱས་པས༔ རེག་པ་སྦྲུལ་གྱི་ལོ་ནི་དེ་ནས་བྱུང་༔ རྟ་ནི་ངང་པ་གསེར་ལྡན་ཞོན་པ་ཡིས༔ ཚོར་བ་རྟ་ལོ་པ་ནི་དེ་ནས་བྱུང་༔ དེ་ནས་ལྷ་ཡིས་ལུག་གི་ཞོདྲངས་པས༔ སྲེད་པ་ལུག་གི་ལོ་ནི་དེ་ནས་བྱུང་༔ སྤྲེའུ་ཧ་ལུ་མ་དྷས་སྦྲང་རྩི་ཕུལ༔ ལེན་པ་སྤྲེའུའི་ལོ་ནི་དེ་ནས་བྱུང་༔ འདབ་ཆགས་རྒྱལ་པོ་ཁྱུང་སྦྲུལ་སོར་ཕྲག་འབྲེལ༔ སྲིད་པ་བྱ་ལོ་པ་ནི་དེ་ནས་བྱུང་༔ ཁྱི་ཚོགས་གོང་ཀར་སངས་རྒྱས་ཆོས་ཉན་པས༔ སྐྱེ་བ་ཁྱི་ལོ་པ་ནི་དེ་ནས་བྱུང་༔ ལྕགས་ཀྱི་ཕག་མོ་དགུ་བཙུགས་སྟོབས་འགྲན་པས༔ རྒ་ཤི་ཕག་ལོ་པ་ནི་དེ་ནས་བྱུང་༔ སངས་རྒྱས་ཐུབ་པའི་མཛད་པ་བཅུ་གཉིས་ལས༔ སྲིད་པའི་ལོ་འགྲོས་རྟེན་འབྲེལ་བཅུ་གཉིས་སྲིད༔ ཅེས་སོགས་ཐེག་དམན་བློས་བྱས་རྩིས་གཞུང་དང་༔ འདུལ་བ་ལུང་དང་རྒྱ་ཆེར་རོལ་པ་དང་༔ ཕལ་ཆེན་སོགས་ནས་བཤད་པའི་གྲངས་རྩིས་དང་༔ མདོ་སྡེ་སྟག་རྣ་མཚན་རྟགས་ལས་ཀྱི་རྩིས༔ འཕགས་པ་རྟག་ཏུ་ངུ་ཡི་རྒྱུན་དཔྱད་རྩིས༔ མདོ་སྡེ་གསང་བ་ཆེན་པོ་བསྟན་འབེབས་རྩིས༔ མདོ་སྡེ་ཁམས་གསུམ་སྣང་བྱེད་གཟེར་དམིགས་རྩིས༔ མྱ་ངན་འདས་པ་ཤི་བ་རོ་འགྲོས་རྩིས༔ ཤིས་པར་བརྗོད་པ་ཚོང་དང་བག་མའི་རྩིས༔ དུས་ཀྱི་འཁོར་ལོའི་ཉི་ཟླ་གཟའ་སྐར་སོགས༔ བརྟན་གཡོ་ཕྱི་ནང་གཞན་གསུམ་བརྩི་ཚུལ་དང་༔ རྡོ་རྗེ་གདན་བཞིའི་སྲིད་པ་འདྲེན་འཛིན་རྩིས༔ མཁའ་འགྲོ་རྒྱ་མཚོ་ཕྱི་ནང་རྣལ་འབྱོར་རྩིས༔ ཆོས་མངོན་རྡུལ་དང་རྡུལ་ཕྲན་རྩིས་རྣམས་བསླབས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྩིས་ལ་སྦྱངས་པའི་ལེའུ་སྟེ་ཉེར་གསུམ་པའོ༔ ༔
པདྨ་བཀའ་ཐང་ལེའུ་ ༢༤ སྨན་ལ་སྦྱངས་པ།
དེ་ནས་པདྨ་ཅན་གྱི་ཡུལ་དུ་ཕྱིན༔ སྨན་པ་འཚོ་བྱེད་གཞོན་ནུའི་བུ་དང་ཕྲད༔ ཁྱོད་ཀྱིས་ཅི་ཤེས་བྱས་པས་སྨན་ཤེས་ཟེར༔ ང་ལ་སྨན་ཞིག་སློབས་དང་བྱས་པ་ཡིས༔ ང་ནི་རྒས་པས་ལུས་འདར་མཁས་རྒྱུ་མེད༔ སློབ་དཔོན་མི་འོང་འོང་ན་བསླབས་ཀྱི་ཟེར༔ ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས༔ གསུམ་ནི་དགུན་ཏེ་གསུམ་ནི་དཔྱིད་ཡིན་ནོ༔ དེ་ལྟར་ཟླ་བའི་གོ་རིམ་དུས་ནི་དྲུག༔ ལོ་གཅིག་ལ་ནི་ཟླ་བ་བཅུ་གཉིས་འདོད༔ གསུམ་གསུམ་དུ་ནི་ཚིགས་རྣམས་འདུས་པར་ཤེས༔ ཟླ་བ་གཉིས་གཉིས་ཤིང་གི་དུས་སུ་བསྟན༔ ཟས་དང་སྐོམ་ནི་དེ་ལྟར་འཇུ་བར་འགྱུར༔ སྨན་པ་དང་ནི་ཁམས་དང་དུས་ཀྱང་བསྟན༔ དབང་པོ་དང་ནི་ཁམས་རྣམས་དེ་དག་ཀྱང་༔ ལོ་གཅིག་ལ་ནི་ཚིགས་རྣམས་ཡོངས་སུ་འགྱུར༔ དབང་པོ་དག་ནི་ཡོངས་སུ་འགྱུར་བས་ན༔ ལུས་ཅན་རྣམས་ལ་སྣ་ཚོགས་ནད་ཀྱང་འབྱུང་༔ འདི་ཉིད་ལ་ནི་སྨན་པས་ཟླ་གསུམ་བཞི༔ ཚོགས་ཀྱི་བར་དང་དུས་དྲུག་རྣམས་དང་ནི༔ ཁམས་དྲུག་མཁས་པར་བྱ་བ་ཤེས་པར་བྱ༔ ཟས་སྐོམ་སྨན་རྣམས་གོ་རིམ་ཇི་བཞིན་ཏེ༔ རླུང་ནི་ཤས་ཆེའི་ནད་ནི་དབྱར་ན་ལྡང་༔ སྟོན་དུ་གྱུར་པ་ན་ནི་མཁྲིས་པ་གཡོ༔ དགུན་གྱི་དུས་ན་དེ་བཞིན་འདུས་པ་སྟེ༔ བད་ཀན་ཤས་ཆེའི་ནད་ནི་དཔྱིད་ལྡང་ངོ་༔ དབྱར་ནི་སྣུམ་དྲོ་ལན་ཚྭ་སྐྱུར་བའི་རོ༔ སྟོན་ནི་མངར་དང་སྣུམ་དང་བསིལ་བའོ༔ དགུན་ནི་མངར་དང་སྐྱུར་དང་སྣུམ་པ་སྟེ༔ དཔྱིད་ཀྱི་དུས་ན་རྩུབ་དྲོ་ཚ་བའོ༔ བད་ཀན་ཆེ་བ་ཟོས་མ་ཐག་ཏུ་ལྡང་༔ མཁྲིས་པ་ཆེ་བ་འཇུ་བའི་དུས་ན་ལྡང་༔ རླུང་ཤས་ཆེ་བ་ཞུ་མ་ཐག་ཏུ་ལྡང་༔ ཁམས་གསུམ་གཡོ་བ་དེ་ནི་དེ་ལྟར་རོ༔ རླུང་གི་བདག་ཉིད་ལ་ནི་བཅུད་ཀྱིས་གསོ༔ བཀྲུ་སྨན་གྱིས་ནི་མཁྲིས་པ་གསོ་བར་བྱ༔ འདུས་པ་ལ་ནི་གསུམ་དུ་མཐུན་ལྡན་པ༔ བད་ཀན་ཚིགས་སུ་བབས་ན་སྐྱུགས་སྨན་བཏང་༔ རླུང་ཤས་ཆེ་དང་མཁྲིས་དང་འདུས་པ་དང་༔ བད་ཀན་ཤས་ཆེའི་ཚིགས་རྣམས་ཤེས་པར་བྱ༔ དུས་གང་ཁམས་གང་ལུས་ནི་གང་ཡིན་པ༔ དེ་ཡི་སྨན་དང་བཟའ་བཏུང་བསྟེན་པར་བྱ༔ ཁོ་བོ་སྨན་པའི་བདག་ཉིད་མཁས་པ་ཆེ༔ རིག་བྱེད་ཡན་ལག་བརྒྱད་དང་ལྡན་པ་དང་༔ སྨན་གྱི་ཕུང་པོ་བསམ་མི་ཁྱབ་པ་བསླབས༔ ཡང་དག་པར་ནི་མཁས་པར་ཁོང་དུ་ཆུད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྨན་ལ་སྦྱངས་པའི་ལེའུ་སྟེ་ཉེར་བཞི་པའོ༔ ༔
པདྨ་བཀའ་ཐང་ལེའུ་ ༢༥ རིག་པའི་གནས་ལྔ་ལ་མཁས་པར་སྦྱངས་པ།
དེ་ནས་རཱ་ག་ལ་ཡི་ཡུལ་དུ་ཕྱིན༔ ཨཱ་ཙར་ཀུན་གྱི་བཤེས་གཉེན་ཞེས་བྱ་བ༔ རྒད་པོ་མགོ་དཀར་སྨ་ར་དཀར་དང་ཕྲད༔ རྒད་པོ་ཁྱོད་ཀྱིས་ཅི་ཤེས་སྨྲས་པ་ཡིས༔ སྒྲ་དང་ཡི་གེའི་བསྟན་པ་ཅི་འདྲ་བ༔ ཉི་འོག་ས་སྟེང་འགྲན་ཟླ་མེད་ཅེས་ཟེར༔ བདག་ལ་སྒྲ་དང་ཡི་གེ་བསླབ་ཏུ་གསོལ༔ དེ་སྐད་གསོལ་བས་དང་པོར་སྒྲ་ཉིད་བསླབས༔ ལེགས་སྦྱར་སཾ་སྐྲྀ་ཏ་ནི་ལྷ་ཡི་སྐད༔ ཨ་ཝ་བྷྲཾ་ཤཱི་གསང་བ་བརྡ་ཡི་སྐད༔ པྲ་ཀྲྀ་ཏ་ནི་བརྡ་སྦྱོར་འཕྲལ་གྱི་སྐད༔ པི་ཤཱ་ཙི་ནི་ཤ་ཟ་འདྲེ་ཡི་སྐད༔ སྒྲ་ནི་ཐད་སོར་བསྒྱུར་དང་ཐད་ལོག་བསྒྱུར༔ བརྒྱུད་དེ་བསྒྱུར་དང་བསྒྲུབས་ཏེ་བསྒྱུར་བ་དང་༔ སྒྲ་གཅིག་དོན་མང་དོན་གཅིག་སྒྲ་མང་བསླབས༔ དེ་ནས་ཡི་གེའི་རིགས་ལ་སྦྱངས་པ་ནི༔ ལཱཉྩ་ན་དང་ན་གར་ཝརྟུ་ལ༔ ཀསྨིར་སིནྡྷུ་དྷ་རི་ཀ་སོགས་དང་༔ ཚངས་པ་ཁ་རོ་ཏ་ཡི་ཡི་གེ་སོགས༔ ཡིག་རིགས་མི་འདྲ་དྲུག་ཅུ་རྩ་བཞི་དང་༔ སྐད་རིགས་མི་གཅིག་སུམ་བརྒྱ་དྲུག་ཅུ་བསླབས༔ དེ་ནས་བཟོ་བོ་བི་ཤྭ་ཀརྨ་ཞེས༔ ལོ་ནི་བརྒྱད་ཅུ་འགྲོ་བ་ཞིག་རྩར་ཕྱིན༔ གསེར་འགྱུར་རྩི་དང་རིན་པོ་ཆེ་ཡི་བཟོ༔ ལྷ་བཟོ་གོས་བཟོ་ཤིང་བཟོ་རྩི་བཟོ་དང་༔ དངུལ་བཟོ་ཟངས་བཟོ་ལྕགས་བཟོ་རྡོ་བཟོ་དང་༔ ཐགས་དང་ལྷམ་དང་ཞྭ་དང་ལུགས་དང་ལས༔ ཤེས་བྱའི་རིགས་སུ་གྱུར་པ་ཐམས་ཅད་བསླབས༔ དེ་ནས་གྲོང་ཁྱེར་ཞིག་ཏུ་ཕྱིན་པ་དང་༔ སྨྱུག་མ་འཇག་མའི་ལྷགས་སྐྱོབ་ནང་ཞིག་ན༔ དུད་པ་ཕྱུར་ཕྱུར་འདུག་པས་དེ་རུ་ཕྱིན༔ སྤྲང་མོ་ཞིག་གིས་རྫ་རྩི་བྱེད་ཀྱིན་འདུག༔ འདི་ཡི་བྱ་ཐབས་ང་ལ་སློབས་དང་བྱས༔ ཁྱོད་ནི་ཕུན་སུམ་ཚོགས་པར་འདུག་པ་ལ༔ རྫ་རྩི་བསླབས་ནས་ཅི་ཞིག་བྱའམ་ཟེར༔ རབ་ནི་རྡོ་སྦྱོར་འབྲིང་ནི་ས་སྦྱོར་ཡིན༔ ཐ་མ་ལུགས་སྦྱོར་ཡང་ཐ་མར་ཚིལ་སྦྱོར༔ ཤེས་བྱ་དེ་ལྟ་བུ་ཡང་བསླབ་པར་བྱ༔ རྗེས་སུ་མྱོང་བ་དེ་ནི་རབ་ཏུ་བརྟན༔ ཨུརྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རིག་པའི་གནས་ལྔ་ལ་མཁས་པར་སྦྱངས་པའི་ལེའུ་སྟེ་ཉེར་ལྔ་པའོ༔ ༔
པདྨ་བཀའ་ཐང་ལེའུ་ ༢༦ སྐུ་རབ་ཏུ་བྱུང་བ།
དེ་ནས་དགེ་སློང་ཤཱཀྱ་མཻ་ཏྲཱི་དང་༔ ཤཱཀྱ་བཤེས་གཉེན་བྱ་བ་གཉིས་དང་ཕྲད༔ ཁྱོད་གཉིས་ཐད་ཀ་གར་འགྲོ་དྲིས་པ་ཡིས༔ བྲག་དམར་བྱ་སྐྱིབས་ཅན་ཞེས་བྱ་བ་ན༔ སློབ་དཔོན་པྲ་བྷ་ཧསྟི་བྱ་བ་བཞུགས༔ དེ་ལ་ཆོས་ཞུར་འགྲོ་བ་ཡིན་ཞེས་ཟེར༔ འོ་ན་ང་ཡང་འགྲོ་བྱས་བསྡོངས་ནས་ཕྱིན༔ སློབ་དཔོན་པྲ་བྷ་ཧསྟི་དང་མཇལ་ནས༔ ཁྱོད་ལ་བདག་ནི་ཚངས་སྤྱོད་རབ་ཏུ་འབྱུང་༔ ཆོ་ག་དེ་ནི་རབ་ཏུ་བསྟན་ཏུ་གསོལ༔ དེ་སྐད་གསོལ་བས་སློབ་དཔོན་ཞལ་ན་རེ༔ བདག་གིས་རྣལ་འབྱོར་ཡོ་གའི་རྒྱུད་རྣམས་ཤེས༔ དེ་ལྟ་བུ་ནི་སྤྱོད་ན་སྦྱིན་པར་བྱ༔ རབ་ཏུ་བྱུང་བའི་མཁན་པོ་ངས་མི་འོང་༔ བཅོམ་ལྡན་འདས་ཀྱི་ཉེ་གནས་ཀུན་དགའ་བོ༔ ཨ་སུ་ར་ཡི་བྲག་ཕུག་བཞུགས་ནས་ཡོད༔ ཚངས་སྤྱོད་རབ་ཏུ་བྱུང་ན་དེར་ཕྱུང་གསུངས༔ དབང་མ་བསྐུར་བར་གསང་སྔགས་འཆད་སྣོད་མིན༔ བྱིས་པ་འཇུག་པ་ཐུན་མོང་དབང་ལྔ་བསྐུར༔ ཏ་ཐཱ་སཾ་གྲ་ངན་སོང་སྦྱོང་རྒྱུད་དང་༔ ཁྲོ་བོ་ཁམས་གསུམ་རྣམ་རྒྱལ་ཏནྟྲ་དང་༔ མ་ཧཱ་ཛ་ཡ་ཡོ་ག་ཙཱརྱ་དང་༔ པཱ་ར་མི་ཏ་ལས་ཀྱི་རྟོག་པའི་རྒྱུད༔ དེ་སོགས་ཡོ་གའི་རྒྱུད་སྡེ་མ་ལུས་གསུངས༔ ཇིལྟར་གསུངས་པ་དེ་བཞིན་ཁོང་དུ་ཆུད༔ ཡོ་ག་སུམ་ཅུ་རྩ་གཉིས་ལྷ་ཞལ་མཐོང་༔ དེ་ནས་ཤིང་ཕོ་རྟ་ལོ་སྤྲེལ་ཟླ་ཡི༔ ཚེས་བརྒྱད་ཨ་སུ་ར་ཡི་བྲག་ཕུག་ཕྱིན༔ དགེ་སློང་ཁྲི་ཕྲག་མང་པོ་བཞུགས་པ་ཡིས༔ རྨི་ལམ་ཉི་མ་གཅིག་ཤུལ་གཅིག་ཤར་རྨིས༔ ནམ་མཁའ་ཐམས་ཅད་སྒྲ་དང་འོད་ཀྱིས་གང་༔ རེས་འགའ་སངས་རྒྱས་གཟུགས་སུ་སྟོན་པར་བྱེད༔ རེས་འགའ་འོད་ནི་འབའ་ཞིག་སྣང་བར་བྱེད༔ དེ་བཞིན་ཆོ་འཕྲུལ་མང་པོ་རྨིས་པར་གྱུར༔ དེ་ནས་ཚེས་བཅུ་སྐར་མ་ལག་སོར་ཉིན༔ དྲང་སྲོང་ཉི་མའི་གུང་དང་ལྷན་ཅིག་ཏུ༔ གཉིས་ཀ་རབ་ཏུ་བྱུང་ནས་བསྟན་པ་གཏད༔ ས་ཡི་ལྷ་མོས་ཆོས་གོས་ངུར་སྨྲིག་ཕུལ༔ ཕྱོགས་བཅུའི་སངས་རྒྱས་མདུན་གྱི་མཁའ་ལ་བྱོན༔ བསྟན་པའི་མངའ་བདག་ཤཱཀྱ་སེང་གེར་གསོལ༔ འོད་སྲུངས་ཆེན་པོས་ལྕང་ལོ་གསིལ་བ་ལ༔ སྤུ་གྲིའི་ཁ་ནེལ་ཕོད་པར་མ་གྱུར་ཏེ༔ སྤུ་གྲི་བརྡར་བས་མཁའ་འགྲོ་མ་བཞིས་བཟུང་༔ ཌཱ་ཀི་སྒྲ་ཡི་རྣ་བ་ཅན་བྱུང་ནས༔ སྤུ་གྲི་ཕྲོགས་ཏེ་མདུན་གྱི་ནམ་མཁར་བོར༔ དེར་ནི་སྤུ་གྲིས་གཏམས་པའི་མཆོད་རྟེན་བྱུང་༔ འདུལ་ཁྲིམས་ལྡན་པའི་དགེ་སློང་ཆ་ལུགས་འཛིན༔ བདུད་བཞི་བཅོམ་པས་སངས་རྒྱས་ཀུན་དང་མཉམ༔ བྱང་ཆུབ་སེམས་དཔའ་འབུམ་ཕྲག་མང་པོ་རྣམས༔ བཀའ་ཡི་བགྲོ་བ་བྱེད་པའི་ནང་ན་འདུག༔ བྱང་ཆུབ་སེམས་དཔའ་སུ་མི་ཏྲ་ཞེས་བཏགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྐུ་རབ་ཏུ་བྱུང་བའི་ལེའུ་སྟེ་ཉེར་དྲུག་པའོ༔ ༔
པདྨ་བཀའ་ཐང་ལེའུ་ ༢༧ རྒྱུ་མཚན་ཉིད་ཀྱི་ཐེག་པ་ལ་སྦྱངས་པ།
དེ་ནས་ཀུན་དགའ་འོད་སྲུངས་ཆོས་ཞུ་བའི༔ བར་སྐབས་བར་སྐབས་སུ་མི་ཏྲ་ཡིས་གསོལ༔ དགེ་སློང་ཆེན་པོ་འདི་ཙམ་ནང་ནས་ནི༔ བཅོམ་ལྡན་འདས་ཀྱི་ཞམ་རིང་ཁྱོད་བྱེད་པ༔ འདི་ནི་དགོས་ཆེད་ཡོད་ཀྱིས་ནན་ཏན་གསུངས༔ ཀུན་དགའ་བོས་ནི་གུས་པས་ཉོན་ཅིག་གསུངས༔ ང་ནི་འཇིག་རྟེན་ཁམས་ན་རྩོད་པ་མེད༔ རྩོད་མེད་ཆོས་འདི་སངས་རྒྱས་ཞལ་ནས་གསུངས༔ ཐུབ་པ་ཉི་ཤུ་རྩ་དགུ་ཁབ་ཏུ་གནས༔ ཆོས་ལ་དཀའ་བ་སྤྱད་པ་ལོ་དྲུག་སྟེ༔ མཉན་ཡོད་ལེགས་པའི་སྐར་མས་ཉི་ཤུ་བཞི༔ དགེ་སློང་ལེགས་པའི་སྐར་མ་ཞེས་བྱ་བ༔ མདོ་སྡེ་བཅུ་གཉིས་སྡེ་ནི་བློ་ནས་འཆད༔ དོན་མི་སྒོམ་ཞིང་ཚིག་ལ་འཆེལ་བ་ལ༔ ཐུབ་པས་ཞི་བ་ལ་ནི་མི་འཇུག་པའི༔ ཚིག་ལ་མཁས་པ་མཁས་པ་མ་ཡིན་ཏེ༔ མི་གཡོ་དོན་ལ་མཁས་ན་མཁས་པ་ཡིན༔ ཞེས་གསུངས་ལེགས་པའི་སྐར་མ་ལོག་ལྟ་སྐྱེས༔ ཐུབ་པའི་མཚན་བཟང་སུམ་ཅུ་རྩ་གཉིས་དང་༔ དཔེ་བྱད་བཟང་པོ་བརྒྱད་ཅུས་བརྒྱན་པ་དང་༔ འོད་ནི་འདོམ་གང་ཡོད་པའི་སྐུ་མཆོག་ལ༔ ལོ་ནི་ཉི་ཤུ་རྩ་བཞིར་ཁྱོད་གཡོག་བྱས༔ ཡོན་ཏན་ཏིལ་འབྲུ་ཙམ་ཞིག་ངས་མ་མཐོང་༔ རྒྱལ་པོ་ཟས་གཙང་རྒྱལ་ས་མ་ཟིན་པའི༔ གོ་མ་ཆོད་ཀྱི་མི་ཁྱམས་རྐང་འདྲེན་ལས༔ ཆོས་ནི་ང་མཁས་མཉམ་པོའི་གཡོག་མི་བྱེད༔ ཅེས་སྨྲས་ཕྱི་རོལ་ངམ་གྲོག་དཔག་ཚད་དེང་༔ ཐུབ་པའི་དབང་པོས་རྡོ་རྗེ་གདན་དུ་བྱོན༔ བྱང་ཆུབ་ཤིང་དྲུང་སེང་གེའི་ང་རོ་སྒྲོགས༔ ཀྭའི་ཀྭའི་ཀྭའི༔ ཚེ་དང་ལྡན་པ་ཐམས་ཅད་འདུས་ཤིག་གསུངས༔ དེ་ནས་དགེ་འདུན་ཐམས་ཅད་འདུས་པ་ལས༔ ལེགས་པའི་སྐར་མ་ཁོ་ནི་ཁྲོས་ཏེ་སོང་༔ ཁྱོད་རྣམས་སུ་ཡིས་ང་ཡི་ཉེ་གནས་བྱེད༔ དགྲ་བཅོམ་རྣམས་ཀྱིས་གུས་པའི་ཕྱག་འཚལ་ཏེ༔ པུས་མོ་གཡས་པའི་ལྷ་ང་ས་ལ་བཙུགས༔ ཁྱོད་ཀྱི་ཞམ་རིང་ངེད་ཀྱིས་བྱེད་པར་ཞུས༔ ཐུབ་དབང་ཞལ་ནི་ནག་རོག་བསྟན་ནས་སུ༔ ཁྱོད་རྣམས་ཅི་ཕྱིར་ང་ཡི་ཉེ་གནས་བྱེད༔
ན་སོ་རྒས་ཤིང་འབྱུང་བ་རྒུད་ནས་མེད༔ ཚེ་དང་ལྡན་པ་རྣམས་ཀྱིས་མཉམ་པར་གཞག༔ ཐུབ་དབང་ཐུགས་ཀྱི་རྩེ་མོ་གང་ལ་གཏད༔ དགྲ་བཅོམ་རྣམས་ཀྱི་ཡེ་ཤེས་སྤྱན་གྱིས་གཟིགས༔ དགེ་སློང་པཱུརྞ་ཤཱི་ལར་གཏད་པ་ནི༔ མཽངྒལ་གྱི་བུ་ཡིས་མཐོང་ནས་སུ༔ དགྲ་བཅོམ་པ་ནི་ལྔ་བརྒྱས་པཱུརྞ་ལ༔ ཕྱག་བཙལ་ཐུབ་པའི་ཞམ་རིང་གྱིས་ཤིག་བརྗོད༔ ཐུབ་པའི་དབང་པོས་ཀུན་དགའ་ལེགས་སོ་གསུངས༔ ཞལ་གྱི་དཀྱིལ་འཁོར་འཛུམ་པའི་མདངས་ཀྱང་བསྟན༔ ང་ཡིས་ཉེ་གནས་མི་ཡོང་བྱེད་དགོས་ན༔ བཅའ་བ་རྣམ་པ་འདི་གསུམ་གནང་བར་ཞུ༔ ལྟོ་དང་གོས་ནི་རང་ལ་ཟ་བ་དང་༔ ངས་ནི་ཞུ་བ་གང་ཞུས་གནང་བ་དང་༔ ང་མེད་ཤུལ་དུ་ཆོས་མི་གསུང་དང་གསུམ༔ འདི་གསུམ་བཅོམ་ལྡན་འདས་ཀྱིས་གནང་བར་མཛོད༔ ཐུབ་དབང་འཛུམ་པའི་ཉ་རྒྱས་ཟླ་ཞལ་བསྟན༔ ཀུན་དགའ་བོ་ཁྱོད་ལེགས་སོ་ལན་གསུམ་གསུངས༔ ང་ཡིས་དྲི་བ་དང་པོར་སྔ་བ་ནི༔ དགེ་སློང་ལེགས་པའི་སྐར་མ་ཇི་ལྟར་དྲིས༔ ཆོས་ཀྱི་བདག་ཉིད་སངས་རྒྱས་དེ་ཞལ་ནས༔ ཐོས་མང་དགེ་སློང་ལེགས་པའི་སྐར་མ་འདི༔ ད་སྟེ་ཞག་བདུན་ཚེ་ཡི་དུས་བྱས་ནས༔ མེ་ཏོག་ལྡུམ་རར་ཡི་དྭགས་ཞིག་ཏུ་སྐྱེ༔ ཀུན་དགའ་བོ་ཡིས་ལེགས་སྐར་མདུན་དུ་ཕྱིན༔ སངས་རྒྱས་གསུང་དེ་རྣ་བར་བཏབ་པ་དང་༔ ལེགས་པའི་སྐར་མས་སེམས་ལ་ཟོན་བཅུག་སྟེ༔ རེས་འགའ་ཁོ་ཡི་བརྫུན་དེ་བདེན་གྱི་ཡོད༔ ཞག་བདུན་ནང་བར་ཞེས་ཁྲེལ་འདེད་དགོས་སྙམ༔ ཞག་དྲུག་བར་དུ་འདུག་ས་གཅིག་ཏུ་བསྡད༔ སྨྱུང་སྦྱངས་རྒྱུན་བཅད་ཟ་མ་མ་ཟོས་སོ༔ ཞག་བདུན་འགྲོ་བའི་ནུབ་མོ་ཁ་བསྐམས་ནས༔ ཆུ་འཐུངས་ཆུ་མ་འཇུ་བར་ཚེ་དུས་བྱས༔ ཀུན་དགའ་བོ་ཡིས་ནང་ཞོགས་ལྟ་རུ་ཕྱིན༔ ཇི་ལྟ་བ་བཞིན་གྱུར་ཏེ་ངེས་ཤེས་སྐྱེས༔ དེ་ནས་མེ་ཏོག་ལྡུམ་རར་ཕྱིན་པ་དང་༔ ཡི་དྭགས་ཆེན་པོ་ལྟར་མི་བཟོད་པའི་ལུས༔ ཐུབ་པའི་དབང་པོ་གར་བཞུགས་རྒྱབ་བསྟན་འདུག༔ དེ་བཞིན་ཆོས་སྨྲས་རྣ་བ་ལག་པས་འགེབས༔ རྐྱེན་དེས་བྱས་ཏེ་བདག་གིས་ཞམ་རིང་བྱས༔ ལེགས་པའི་སྐར་མ་ལོགྲངས་ཉི་ཤུ་བཞི༔ ཀུན་དགའ་བོས་ནི་ལོ་གྲངས་ཉི་ཤུ་གཅིག༔ ཐུབ་དབང་སུམ་ཅུ་སོ་ལྔའི་ལོ་ལོན་ནས༔ སྐྱེ་བ་ལྕགས་ཕོ་ཁྱི་ཡི་ལོ་ལ་ནི༔ སྔོན་ཆད་མ་བསྐོར་ཆོས་ཀྱི་འཁོར་ལོ་བསྐོར༔ རྡོ་རྗེ་གདན་དང་ཝཱ་རཱ་ཎ་སཱི་རུ༔ འཁོར་ལོ་དང་པོ་ལྔ་སྡེ་བཟང་ལ་བསྐོར༔ སྡུག་བསྔལ་ཀུན་འབྱུང་འགོག་པ་ལམ་བདེན་པ༔ ལོ་བདུན་ཟླ་བ་གཉིས་ཀྱིས་མ་ཚང་བར༔ བདེན་པ་བཞི་བལྡབས་སྤྲོས་ནས་བཅུ་གཉིས་གསུངས༔ མདོ་སྡེ་ལེགས་ཉེས་བསྟན་དང་ལས་བརྒྱ་པ༔ མདོ་སྡེ་ལས་རྣམ་འབྱེད་དང་ལས་རྣམ་འཐག༔ མདོ་སྡེ་ལས་ཀྱི་རྣམ་སྨིན་བསྟན་པ་དང་༔ གང་པོའི་རྟོགས་བརྗོད་བྲམ་ཟེ་ཚོགས་ཀྱི་མདོ༔ དྲིན་ལན་བསབས་མདོ་མཛངས་བླུན་དྲན་ཉེར་གཞག༔ དེ་དག་དྲང་དོན་བསྟན་པའི་མདོ་བཅུའོ༔ ཉོན་མོངས་འདོད་ཆགས་འདུལ་བའི་གཉེན་པོ་རུ༔ འདུལ་བ་གཞི་དང་རྣམ་འབྱེད་གཞུང་བླ་མ༔ ཕྲན་ཚེགས་བཞི་ནི་རྩ་བའི་མདོ་བཞིའོ༔ རྩ་བའི་ལུང་དང་དགེ་སློང་སོ་ཐར་དང་༔ དགེ་སློང་མ་ཡི་སོ་ཐར་ལ་སོགས་པ༔ ཐེག་དམན་དྲང་ཕྱིར་ཆོས་ཚུལ་དཔག་མེད་གསུངས༔ ཉོན་མོངས་སྤང་དང་འགེགས་ཤིང་ཚོགས་དྲུག་འདོད༔ ས་ནི་བརྒྱད་འདོད་གང་ཟག་བདག་མེད་དང་༔ ཆོས་ཀྱི་བདག་མེད་ཀྱི་ནི་ཕྱེད་རྟོགས་པའི༔ འབྲས་བུ་དགྲ་བཅོམ་འཐོབ་པའི་ཆོས་འཁོར་བསྐོར༔ འཁོར་ལོ་བར་པ་མེ་ཕོ་འབྲུག་ལོ་ནས༔ ཤིང་མོ་གླང་བར་མ་ག་དྷ་ཡི་ཡུལ༔ རྒྱལ་པོའི་ཁབ་དང་བྱ་རྒོད་ཕུང་པོའི་རིར༔ བྱམས་པ་སྤྱན་རས་གཟིགས་སོགས་བྱང་སེམས་འཁོར༔ རབ་འབྱོར་ལ་སོགས་དགེ་སློང་ལྔ་སྟོང་ལ༔ ལོ་བཅུའི་བར་དུ་མཚན་ཉིད་མེད་ཆོས་གསུངས༔ ཉོན་མོངས་ཞེ་སྡང་འདུལ་བའི་གཉེན་པོ་རུ༔ ངེས་དོན་མདོ་སྡེ་རྒྱས་འབྲིང་གསུམ་དུ་གསུངས༔ སྟོང་ཕྲག་བརྒྱ་པ་ཉི་ཁྲི་ལྔ་སྟོང་པ༔ ཁྲི་བརྒྱད་སྟོང་པ་ཤེས་རབ་ཁྲི་པ་དང་༔ བརྒྱད་སྟོང་པ་དང་སྡུད་པ་ཡུམ་དྲུག་གོ༔ རབ་རྩལ་ཞུས་དང་ཤེར་ཕྱིན་ལྔ་བརྒྱ་པ༔ རྡོ་རྗེ་གཅོད་པ་ཚུལ་བརྒྱ་ལྔ་བཅུ་པ༔ ཀཽ་ཤི་ཀ་སུམ་ཅུ་སྒོ་ཉེར་ལྔ༔ ཤེས་རབ་སྙིང་པོ་ཡི་གེ་ཉུང་ངུ་དང་༔ ཡི་གེ་གཅིག་མ་དཀོན་བརྩེགས་འདུས་པ་བཞི༔ ཤེར་ཕྱིན་བདུན་བརྒྱ་པ་སྟེ་སྲས་བཅུ་གཅིག༔ དེ་ལྟར་ཡུམ་སྲས་བཅུ་བདུན་གཞན་ཡང་ནི༔ ཕར་ཕྱིན་སྟོང་ཉིད་སྟོན་པའི་ཆོས་གསུངས་པ༔ མངོན་པར་རྟོགས་པའི་སྐབས་བརྒྱད་དོན་བདུན་ཅུ༔ ལམ་ལྔ་ས་བཅུ་འགྲེས་རྐང་བརྒྱ་རྩ་བརྒྱད༔ ཉོན་མོངས་རྣམ་སྦྱོང་ཚོགས་ནི་བརྒྱད་དུ་འདོད༔ ཆོས་དང་གང་ཟག་གཉིས་ཀའི་བདག་མེད་རྟོགས༔ ས་བཅུ་རྫོགས་ནས་ཆོས་སྐུ་འཐོབ་པར་བསྟན༔ འཁོར་ལོ་ཐ་མ་ཡངས་པ་ཅན་གྱི་ཡུལ༔ མེ་ཕོ་སྟག་ནས་ས་ཕོ་སྟག་གི་བར༔ ནཱ་ལེནྡྲ་ཡི་གཙུག་ལག་མ་ལ་ཡ༔ པདྨ་ཅན་དང་ལྷ་གནས་ལ་སོགས་པར༔ ལྷ་ཀླུ་དྲི་ཟའི་བུ་མོ་ཤེས་རབ་གཟིངས༔ བྱང་ཆུབ་སེམས་དཔའ་རྣམ་གྲོལ་སྡེ་སོགས་ལ༔ བཅུ་གསུམ་བར་དུ་ངེས་དོན་ཆོས་འཁོར་བསྐོར༔ ཕལ་ཆེན་དཀོན་བརྩེགས་ལངྐར་གཤེགས་པ་དང་༔ དགོངས་པ་ངེས་འགྲེལ་དཔལ་ཕྲེང་སེང་གེའི་སྒྲ༔ དབུས་འགྱུར་ཚལ་དང་སྔོན་གནས་བརྒྱ་རྩ་བརྒྱད༔ པད་དཀར་གསེར་འོད་དམ་པ་མྱང་འདས་མདོ༔ བྱམས་ཞུས་མངོན་པའི་སྡེ་སྣོད་ལ་སོགས་གསུངས༔ སེམས་ཅན་ཁམས་བཞུགས་བདེ་གཤེགས་སྙིང་པོ་བསྟན༔ འཁོར་ལོ་བཞི་པ་གནས་ནི་མ་ལ་ཡ༔ ལྕང་ལོ་ཅན་དང་གནམ་ལྕགས་ཡོད་པའི་རྩེར༔ ལྷ་ཡི་དབང་པོ་བརྒྱ་བྱིན་ཞུ་བ་ཕུལ༔ ཕྱི་རྒྱུད་ཀྲཱི་ཡའི་ཆོས་ཀྱི་འཁོར་ལོ་བསྐོར༔ རིག་སྔགས་ཀུན་གྱི་ཁོག་དབུབ་དཔུང་བཟང་རྒྱུད༔ རིག་སྔགས་ལག་ན་རྡོ་རྗེ་དབང་བསྐུར་རྒྱུད༔ རིག་སྔགས་གསལ་བ་རིག་པ་མཆོག་གི་རྒྱུད༔ རིག་སྔགས་འདུལ་བ་སིདྡྷི་ཀ་རིའི་རྒྱུད༔ རིག་སྔགས་འཕྲིན་ལས་ཁམས་གསུམ་རྣམ་རྒྱལ་རྒྱུད༔ རིག་སྔགས་དགོངས་པ་བསམ་གཏན་ཕྱི་མའི་རྒྱུད༔ འཇམ་དཔལ་རྩ་རྒྱུད་རྡོ་རྗེ་མི་འགྱུར་རྒྱུད༔ དོན་ཡོད་ཞགས་པ་རྡོ་རྗེ་རྣམ་འཇོམས་རྒྱུད༔ གཏུམ་ཆེན་མི་གཡོ་བ་ཡི་རྒྱུད་ལ་སོགས༔ ཀྲི་ཡ་སྡེ་དྲུག་སྡེ་ལྔ་ལ་སོགས་གསུམ༔ དགའ་ལྡན་གནས་སུ་ཨུ་པ་སྡེ་བཞི་གསུངས༔ འཇམ་དཔལ་ཡེ་ཤེས་སེམས་དཔའི་དྲི་མེད་རྒྱུད༔ འཇམ་དཔལ་རྣོན་པོ་དྲི་མ་མེད་པའི་རྒྱུད༔ འཇམ་དཔལ་དྲ་བ་གཅོད་དང་གསང་བརྟན་རྒྱུད༔ འཁོར་ནི་འདོད་ཁམས་གཟུགས་ཁམས་འཁོར་ལ་གསུངས༔ ནཻརཱཉྫ་ན་འོག་མིན་གནས་སོགས་སུ༔ དེ་ཉིད་བསྡུས་པ་དཔལ་མཆོག་དང་པོ་དང་༔ རྡོ་རྗེ་རྩེ་མོ་ངན་སོང་སྦྱོང་བའི་རྒྱུད༔ ས་མོ་ཡོས་ནས་ཤིང་མོ་བྱ་ཡི་བར༔ ལོ་བདུན་བར་དུ་གསང་སྔགས་ཕྱི་པ་གསུངས༔ ནང་པ་བླ་མེད་རྡོ་རྗེའི་ཐེག་པ་ནི༔ ཕྱག་ན་རྡོ་རྗེས་སྟོན་ཅིག་ལུང་བསྟན་ནས༔ ཚིག་གཅིག་མ་གསུངས་བསྟན་པའི་སེལ་བྱེད་གསུངས༔ ཡུལ་གཅིག་རྒྱ་གར་རྡོ་རྗེ་གདན་གཅིག་ན༔ བསྟན་པ་གཅིག་ལ་སྟོན་པ་གཉིས་མི་འབྱུང་༔ བྱུང་ན་མི་སྲིད་ཐུབ་པའི་བསྟན་པ་བརྗེ༔ ཉོན་མོངས་འདོད་ཆགས་འདུལ་བའི་གཉེན་པོ་རུ༔ འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས༔ ཉོན་མོངས་ཞེ་སྡང་འདུལ་བའི་གཉེན་པོ་རུ༔ མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས༔ ཉོན་མོངས་གཏི་མུག་འདུལ་བའི་གཉེན་པོ་རུ༔ མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས༔ དུག་གསུམ་ཆ་མཉམ་འདུལ་བའི་གཉེན་པོ་རུ༔ གསང་སྔགས་སྡེ་སྣོད་ཉི་ཁྲི་ཆིག་སྟོང་གསུངས༔ ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དེ༔ བསྡུ་ན་གསུང་རབ་ཡན་ལག་བཅུ་གཉིས་འདུ༔ དབྱངས་བསྙད་མདོའི་སྡེ་ལུང་དུ་བསྟན་པའི་སྡེ༔ ཚིགས་བཅད་ཆེད་དུ་བརྗོད་དང་གླེང་གཞིའི་སྡེ༔ རྟོགས་བརྗོད་སྐྱེས་རབས་ཤིན་ཏུ་རྒྱས་པའི་སྡེ༔ རྨད་བྱུང་གཏན་དབབ་དེ་ལྟར་བྱུང་བའི་སྡེ༔ བསྡུས་པས་འདུལ་བ་མདོ་སྡེ་མངོན་པ་གསུམ༔ བརྒྱད་ཅུ་རྩ་གཉིས་བར་དུ་ཆོས་འཁོར་བསྐོར༔ ཤིང་མོ་བྱ་ལོ་མེ་ཕོ་བྱི་བའི་ཟླ༔ ཚེས་བརྒྱད་ནམ་གུང་ཐུབ་པ་མྱ་ངན་འདས༔ ད་ལྟ་ཤིང་ཕོ་རྟ་ཡིས་ལོ་བཅུ་སོང་༔ དེ་སྐད་གསུངས་པས་སུ་མི་ཏྲ་ནི་ཚིམ༔ ལོ་ལྔའི་བར་དུ་ཉིན་མཚན་ཁ་སྦྱར་ནས༔ མདོ་སྔགས་གཉིས་ཀྱི་ལུང་རྣམས་རྫོགས་པར་ཞུས༔ རིམ་གྱིས་ཉམས་སུ་ལེན་པའི་ཐབས་སུ་འདུག༔ མཚན་ཉིད་སྡེ་གསུམ་ཚིག་མང་དོན་ཆུང་དགོངས༔ ཚིག་ཉུང་དོན་ཆེ་གསང་སྔགས་ཕྱི་ནང་གཉིས༔ འདོད་ཐོབ་ཤེས་པ་རྩོལ་སྒྲུབ་སེམས་རྒྱུད་བཅིངས༔ འོག་མས་སེམས་ཉིད་དོན་དེ་མིརྟོགས་མཁྱེན༔ ཀུན་རྫོབ་དམིགས་བཅས་ཕྱོགས་སྟོང་ཤེས་སྒྲིབ་བསྒྲིབས༔ དོན་དམ་རང་བཞིན་ཡེ་སྟོང་ཡེ་ཤེས་ཡིན༔ ཁྱད་དུ་འཕགས་པའི་ཆོས་ཤིག་བཙལ་དགོས་སྙམ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཀུན་དགའ་བོ་ལ་ཕྱི་ཐུབ་པའི་ཐེག་པ་གསུམ༔ ནང་སྔགས་ཀྱི་ཐེག་པ་གསུམ༔ རྒྱུ་མཚན་ཉིད་ཀྱི་ཐེག་པ་ལ་སྦྱངས་པའི་ལེའུ་སྟེ་ཉེར་བདུན་པའོ༔ ༔
པདྨ་བཀའ་ཐང་ལེའུ་ ༢༨ བསྟན་པ་ལ་ཕན་པའི་ཕྱིར་ཀུན་དགའ་བོ་ལ་མདོ་དྲིས་པ།
དེ་ནས་གུ་རུ་ཤཱཀྱ་སེང་གེ་ཡིས༔ ཐོས་པའི་མཆོག་གྱུར་ཀུན་དགའ་བོ་ལ་ནི༔ མདོ་སྔགས་ཡི་གེར་བཏབ་ནས་ཇི་ཙམ་སོང་༔ གྲངས་སུ་བྱས་ན་པོ་ཏི་དུ་ཙམ་མཆིས༔ བཞུགས་པའི་གནས་ནི་གང་དང་གང་ན་བཞུགས༔ དགེ་བ་དམ་པ་ངས་ཉན་ཁྱོད་ཀྱིས་སྨྲོས༔ དེ་ནས་ཀུན་དགའ་བོ་ཡིས་ལེགས་གསུངས་པ༔ ཐུབ་དབང་ཡོངས་སུ་འདས་ནས་ད་བར་དུ༔ སངས་རྒྱས་གསུང་རྣམས་ཡི་གེར་ཐེབས་ཚད་བཏབ༔ གླེགས་བམ་བྱས་པས་གླང་ཆེན་རབ་བརྟན་གྱི༔ གསུང་རབ་དམ་ཆོས་རྒྱབ་ཁལ་ལྔ་བརྒྱ་བྱུང་༔ གནས་ལ་མ་འཆམས་ལྷ་ཀླུས་ཐོབ་ཤ་བྱས༔ རྒྱས་པ་འབུམ་ནི་ཀླུའི་ཡུལ་གཏེར་དུ་སྦས༔ ཉི་ཁྲི་བརྒྱ་བྱིན་ཡུལ་ཏུ་གཏེར་དུ་སྦས༔ ཁྲི་པ་ལྷ་མ་ཡིན་གྱི་ཡུལ་དུ་སྦས༔ བརྒྱད་སྟོང་པ་ནི་རྣམ་སྲས་ཡུལ་དུ་སྦས༔ སྡུད་པ་གྲོང་ཁྱེར་མེ་ཏོག་བློ་གྲོས་སྦས༔ ཤེར་སྙིང་བྲམ་མོ་བདེ་བའི་ནང་དུ་སྦས༔ དྲང་དོན་མདོ་བཅུ་ཐོ་གར་ཡུལ་དུ་སྦས༔ མདོ་སྡེ་ཕལ་ཆེར་རྡོ་རྗེ་གདན་དུ་སྦས༔ མངོན་པ་ནཱ་ལེནྡྲ་ཡི་གཙུག་ལག་སྦས༔ ཡུམ་སྲས་བཅུ་བདུན་སཱ་ལའི་ཡུལ་དུ་སྦས༔ རྒྱ་ཆེར་རོལ་པ་བྲུ་ཤའི་ཡུལ་དུ་སྦས༔ བསྐལ་པ་བཟང་པོ་ཟངས་གླིང་ཡུལ་དུ་སྦས༔ མདོ་སྡེ་རྟེན་འབྲེལ་སྙིང་པོ་ཐོ་གར་ཡུལ༔ ལངྐར་གཤེགས་པ་སྲིན་པོའི་ཡུལ་དུ་སྦས༔ གསེར་འོད་དམ་པ་རི་རབ་ཟོམ་དུ་སྦས༔ ཕལ་པོ་ཆེ་ནི་རྒྱ་ནག་ཡུལ་དུ་སྦས༔ དཀོན་མཆོག་བརྩེགས་པ་ཡངས་པ་ཅན་དུ་སྦས༔ པདྨ་དཀར་པོ་རི་བོ་ཏ་ལར་སྦས༔ བསོད་སྐྱབས་བདུད་རྩི་ལྔ་པ་བྷངྒ་ལ༔ རྣམ་གཟིགས་ཆོས་ཀྱི་མེ་ལོང་བཻདྡྷའི་ཡུལ༔ འོད་སྲུངས་སྟོང་པ་རྣམ་འབྱེད་ཁ་ཆེའི་ཡུལ༔ འཆི་འཕོ་བསྟན་པ་ཁང་བུའི་གླིང་དུ་སྦས༔ འདས་པ་ཀྲ་མ་ཤཱི་ལའི་གཙུག་ལག་ཁང་༔ གསང་སྔགས་ཕལ་ཆེར་ཨུ་རྒྱན་ཡུལ་དུ་སྦས༔ བཀའ་འདས་རྒྱུད་ལྔ་གནམ་ལྕགས་ཕ་བོང་སྦས༔ ཟག་པ་མེད་དང་ཟ་མ་ཏོག་ཆེ་ཆུང་༔ ཆུ་བོ་ནཻརཱཉྫ་ནའི་མཚོ་ལ་སྦས༔ འཇམ་དཔལ་རྩ་རྒྱུད་ཀ་མ་རུ་པར་སྦས༔ ཙྪིནྡྷ་མ་ཎི་མ་ག་དྷ་རུ་སྦས༔ གྲྭ་ལྔ་དུར་ཁྲོད་བསིལ་བའི་ཚལ་དུ་སྦས༔ རིན་ཆེན་ཏོག་གཟུངས་ཁང་བུའི་གླིང་དུ་སྦས༔ གདམས་ངག་འབོགས་དང་དབུས་འགྱུར་ཚལ་ལ་སོགས༔ བཀའ་འཁོར་བཞི་ཀ་ཟ་ཧོར་ཡུལ་དུ་སྦས༔ ཐུབ་པའི་བསྟན་པ་སྟོངས་སུ་ཕངས་པ་ཡིས༔ ནམ་མཁའ་ས་འོག་བྲག་དང་ཆུ་དང་ཤིང་༔ རི་དང་ཕུག་པ་བས་མཐའ་དུར་ཁྲོད་དང་༔ གཙུག་ལག་ཁང་དང་མཆོད་རྟེན་ནཱ་ལེནྡྲ༔ དྲི་ཟ་གྲུལ་བུམ་གནོད་སྦྱིན་ཀླུ་དབང་ཡུལ༔ མདོ་སྡེ་བཞག་པར་བྱས་ནས་དར་བར་བྱེད༔ འཇིག་རྟེན་གཏེར་ཆེན་རྣམས་ནི་རྒྱལ་པོ་དང་༔ རྐུན་པོ་མེ་ཆུས་བསླུས་ནས་ཟད་པར་འགྱུར༔ དེ་བཞིན་གཤེགས་པའི་དམ་པའི་ཆོས་གཏེར་འདི༔ བསྐལ་པ་མང་པོར་གང་སྦས་ཆུད་མི་ཟ༔ དེ་དག་ཕྱི་མའི་དུས་ན་འབྱིན་ལུང་བསྟན༔ ཐུབ་པ་མྱ་ངན་འདས་འོག་ཏུ༔ ལོ་ནི་ཉི་ཤུ་རྩ་བརྒྱད་ན༔ རྒྱལ་པོ་ཛ་ཞེས་བྱ་བ་འབྱུང་༔ དེ་བཞིན་གཤེགས་པ་ང་འདས་ནས༔ ལོ་ནི་བརྒྱད་ཅུ་ལོན་པ་ན༔ ནུབ་ཕྱོགས་ཨུ་རྒྱན་ཡུལ་ཞེས་པར༔ དེ་བ་བཟང་སྐྱོང་ཞེས་བྱ་འབྱུང་༔ ཡོ་ག་རྣམ་གསུམ་སྟོན་པར་བྱེད༔ ང་ནི་འདི་ནས་མི་གནས་ནས༔ ལོ་ནི་བཞི་བརྒྱ་ལོན་པ་ན༔ དགེ་སློང་ཀླུ་ཞེས་བྱ་བ་འབྱུང་༔ བསྟན་པ་འདི་ལ་དད་ཅིང་སྐྱོང་༔ དེ་བཞིན་གཤེགས་པ་ང་འདས་ནས༔ ལོ་ནི་སུམ་བརྒྱ་སུམ་ཅུ་ན༔ སངས་རྒྱས་གསང་བ་ཞེས་བྱ་འབྱུང་༔ དེ་ཡིས་མཐུ་འབྱིན་ཕན་ཡོན་ཚོར༔ ང་ནི་མྱ་ངན་འདས་འོག་ཏུ༔ ལོ་ནི་ལྔ་བརྒྱ་བདུན་ཅུ་ན༔ ཞིང་པ་ལྔ་ཐུབ་ཅན་གྱི་བུ༔ ཤྲཱི་ཧཱུྃ་ཀ་ར་ཞེས་བྱ་འབྱུང་༔ ང་ནི་མྱ་ངན་འདས་འོག་ཏུ༔ ལོ་ནི་བརྒྱད་བརྒྱ་དགུ་ཉེ་ན༔ ཟི་ཡན་ཏ་ཡི་ཡུལ་དུ་ནི༔ ལུས་བསྐྱེད་དག་པའི་མཆེད་གཉིས་འབྱུང་༔ མངོན་པའི་བཀའ་རྣམས་དར་བར་བྱེད༔ ང་ནི་མི་གནས་འདས་འོག་ཏུ༔ ལོ་ནི་བཞི་གཉིས་ལོན་པ་ན༔ སྔོན་གྱི་ལས་ཀྱིས་རབ་བསྐུལ་ནས༔ སིངྒ་ལ་ཡི་ཡུལ་དུ་ནི༔ མངལ་སྐྱེས་སྤངས་པའི་བརྫུས་སྐྱེས་ཉིད༔ པདྨ་འབྱུང་གནས་རྫུ་འཕྲུལ་ཅན༔ འཕགས་པ་ལྷ་ཡིས་རྒོལ་བ་འཇོམས༔ དཀའ་འགྲེལ་དག་ལ་མཁས་པ་བྱུང་༔ ང་ནི་མི་གནས་འདས་འོག་ཏུ༔ ལོ་ནི་ལྔ་བརྒྱ་ལྔ་བཅུ་ན༔ ཟ་ཧོར་གནྡུ་ཞེས་བྱ་བར༔ རྒྱལ་པོ་གོ་མ་དེ་བྱིའི་བུ༔ བ་ོདྷི་ས་ཏྭ་ཞེས་བྱ་འབྱུང་༔ འདི་ནས་ཁ་ཆེའི་ཡུལ་དུ་ནི༔ ནུབ་ཕྱོགས་གླང་པོ་སྒང་ཞེས་པར༔ བི་མ་མི་ཏྲ་ཞེས་བྱ་འབྱུང་༔ དེ་ཡི་མཐུ་བྱིན་ཡོན་ཏན་གྲགས༔ གདོང་དམར་ཅན་གྱི་ཡུལ་དུ་ནི༔ སྟོན་པ་མྱ་ངན་འདས་འོག་ཏུ༔ ལོ་ནི་ཕྱེད་དང་ཉིས་སྟོང་ན༔ དམ་པའི་ཆོས་ནི་འབྱུང་བར་འགྱུར༔ དགེ་བ་ཅན་གྱི་ས་ཕྱོགས་སུ༔ བྱང་ཕྱོགས་གངས་རིའི་རྒྱུད་བར་དུ༔ ལོ་ནི་ཉིས་སྟོང་ལྔ་བརྒྱ་ན༔ དམ་པའི་ཆོས་ནི་རྒྱས་པར་འགྱུར༔ ང་ནི་མྱ་ངན་འདས་འོག་ཏུ༔ ང་དང་འདྲ་བའི་སྐྱེས་བུ་ཡིས༔ རྒྱལ་བའི་དགོངས་པ་འགྲོལ་བར་བྱེད༔ བསྟན་བཅོས་དག་ཏུ་ང་ཡིས་བཤད༔ ཅེས་གསུངས་སོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བསྟན་པ་ལ་ཕན་པའི་ཕྱིར་ཀུན་དགའ་བོ་ལ་མདོ་དྲིས་པའི་ལེའུ་སྟེ་ཉེར་བརྒྱད་པའོ༔ ༔
པདྨ་བཀའ་ཐང་ལེའུ་ ༢༩ དུར་ཁྲོད་སྐུ་ལ་རྫོགས་སུ་བཞུགས་པ།
དེ་ནས་དགེ་སློང་ཤཱཀྱ་སེང་གེ་ཡིས༔ ཡུལ་གྱི་མིང་ནི་བཻདྡྷའི་ཡུལ་དུ་ཕྱིན༔ དུར་ཁྲོད་ཆེན་པོ་སྐུ་ལ་རྫོགས་ཞེས་པ༔ མཐའ་སྐོར་དཔག་ཚད་ཕྱེད་དང་བཞི་ཡོད་པའི༔ དབུས་ན་མཆོད་རྟེན་རི་བོ་ཏ་ལ་ཞེས༔ རྒྱུ་ནི་རིན་ཆེན་ཤེལ་ལས་གྲུབ་པ་ཡི༔ ལོགས་ལ་མ་མོ་ཆེན་མོ་ཙཻ་རཱི་མ༔ ཤར་ན་ལྗོན་ཤིང་མཐུ་འབྱིན་ཞེས་བྱ་བ༔ དུར་ཤིང་དེ་ལ་དུར་བྱ་མང་པོ་གནས༔ སྨད་ན་མི་མ་ཡིན་གྱི་སྒྱུ་མ་མཁན༔ བུད་མེད་མཛེས་མ་ཁྱི་རུ་བསྒྱུར་བ་དང་༔ རྡེའུ་ཤིང་བུ་སེམས་ཅན་ཀེང་རུས་བསྒྱུར༔ གཟའ་སྐར་ཉི་ཟླ་རོ་ནི་སྐམ་ོན་བསྒྱུར༔ དེ་བཞིན་སྣ་ཚོགས་སྒྱུ་མ་བྱེད་པའི་གནས༔ དུར་ཁྲོད་ལྷོ་ན་དུར་ཆུ་འགྲམ་མཚོ་ཞེས༔ རྗིང་དབུས་ཀེང་རུས་པདྨ་ལྔ་བརྩེགས་སྐྱེས༔ དེ་ཡི་མཐའ་སྐོར་དུར་མེ་རང་བཞིན་འབར༔ མེ་འབར་གསེབ་ན་མི་ལུས་ཕྱེད་ཚལ་དང་༔ རྐང་དང་མགོ་དང་ལག་པ་པགས་པ་དང་༔ གསར་རྙིང་ཚིག་དང་མ་ཚིག་ཚིག་ལ་ཁད༔ དུར་ཁྲོད་ནུབ་ན་དུར་ང་འཚུབ་མ་འཚུབ༔
རླུང་གི་གསེབ་ན་འབྱུང་པོ་ཡི་དྭགས་ཁྱུ༔ བུ་ཆུང་རེའུ་ལུག་བ་ལང་ཀེང་རུས་ཞོན༔ ལ་ལ་ནད་པ་ལ་ལ་མི་རོ་ཐོགས༔ ལ་ལ་སྣབས་ལུད་ལ་ལ་མེ་ཆུ་ཐོགས༔ ལ་ལ་ཞོ་མར་ལ་ལ་ཤ་ཆང་ཐོགས༔ བྱང་ན་དུར་རི་ས་ཆེན་རབ་གཡོ་ཞེས༔ དུར་རིའི་རྒྱལ་པོ་འདུ་འཛིན་དེ་ལ་ནི༔ དུར་གྱི་སེམས་ཅན་ཐམས་ཅད་གནས་བཅས་སྡོད༔ རྐེད་པར་ཡིད་བཞིན་ནོར་བུའི་གཏེར་ཡོད་པ༔ དེ་ཡི་ཤར་ན་འཇིག་རྟེན་སྐྱོང་བའི་ལྷ༔ དབང་ཕྱུག་མ་ཧཱ་པཱ་ལ་ཡ་ཞེས་པ༔ ལུས་པོ་གཡག་ལ་མགོ་བོ་སེང་གེའི་གདོང་༔ ལུས་སྨད་སྦྲུལ་ལ་སྲིན་པོའི་སྟེང་དུ་ཞོན༔ ལག་པར་ཁ་ཊྭཱཾ་མི་རོའི་རྒྱལ་མཚན་ཕྱར༔ དེ་ཡི་འཁོར་ན་གཟུགས་མང་མཐའ་ཡས་པ༔ འདོད་དགུར་བསྒྱུར་བའི་གཟུགས་ཅན་སྣ་ཚོགས་རྩེ༔ ལྷོ་ཕྱོགས་བློ་འཕེལ་དམར་པོ་བསམ་གཏན་བསྒོམ༔ དུར་ཁྲོད་དེར་ནི་མཆོད་རྟེན་རྒྱབ་བརྟེན་ནས༔ མཁའ་འགྲོ་མ་ལ་ཆོས་གསུངས་ལོ་ལྔ་བཞུགས༔ མཚན་ནི་ཉི་མ་འོད་ཟེར་ཞེས་སུ་གྲགས༔ གཞན་དོན་འཕྲིན་ལས་འབྲས་བུ་ལོ་འདབ་རྒྱས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དུར་ཁྲོད་སྐུ་ལ་རྫོགས་སུ་བཞུགས་པའི་ལེའུ་སྟེ་ཉེར་དགུ་པའོ༔ ༔
པདྨ་བཀའ་ཐང་ལེའུ་ ༣༠ དུར་ཁྲོད་བདེ་ཆེན་བརྡལ་དུ་བཞུགས་པ།
དེ་ནས་ཚིག་ཉུང་དོན་ཆེ་ཅིག་ཅར་པ༔ རྟོགས་གྲོལ་དུས་མཉམ་ཆོས་ཤིག་བཙལ་དགོས་སྙམ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ཕྱིན༔ ཆོས་སྐུའི་སྟོན་པ་ཀུན་ཏུ་བཟང་པོ་ཞེས༔ སྐུ་མདོག་མཐིང་ག་སེང་གེའི་ཁྲི་ལ་བཞུགས༔ སྣ་ཚོགས་རྒྱན་མང་རིགས་ལྔའི་དབུ་རྒྱན་གསོལ༔ མཉམ་གཞག་ཐོ་ཕྱི་འཇའ་འོད་ཟེར་དུ་འཕྲོ༔ ཉི་མ་འོད་ཟེར་དམའ་བའི་ས་ལ་འདུག༔ མིག་གི་དབང་པོས་ཆོས་སྨྲའི་ཞལ་ལ་ལྟ༔ རྣ་བའི་དབང་པོས་མ་ཡེངས་གསུང་ལ་ཉན༔ ཡིད་ཀྱི་དབང་པོས་ཚིག་བཟུང་དོན་ལ་བརྟགས༔ རྫོགས་པ་ཆེན་པོ་སྤྲོས་པ་མེད་པའི་ཀློང་༔ རྩ་བའི་སྐོར་ནི་སེམས་སྨད་བཅོ་བརྒྱད་དེ༔ ནམ་མཁའ་ཆེ་དང་རིག་པའི་ཁུ་བྱུག་དང་༔ ཁྱུང་ཆེན་ལྡིང་བ་རྩལ་ཆེན་སྤྲུགས་པ་དང་༔ བསྒོམ་དོན་དྲུག་པ་རྩེ་མོ་བྱུང་རྒྱལ་དང་༔ ནམ་མཁའི་རྒྱལ་པོ་བདེ་བ་ཕྲ་བཀོད་དང་༔ རྫོགས་པ་སྤྱི་སྤྱོད་རིན་ཅེན་ཀུན་འདུས་དང་༔ སྲོག་གི་འཁོར་ལོ་བྱང་ཆུབ་སེམས་ཏིག་དང་༔ རྫོགས་ཆེན་བདེ་འབྱམས་སྲིད་པ་སྤྱི་ཆིངས་དང་༔ རྗེ་བཙན་དམ་པ་ཡིད་བཞིན་ནོར་བུ་དང་༔ ཐིག་ལེ་ཀློང་ཡངས་རྡོ་ལ་གསེར་ཞུན་ནོ༔ གསང་མཚན་བླ་མེད་རྡོ་རྗེ་འཆང་དུ་བཏགས༔ དགྱེས་པའི་ཡུམ་དང་བདེ་ཆེན་སྙོམས་པར་འཇུག༔ སྙན་པའི་སྒྲ་ཡིས་ཕྱོགས་མཚམས་ཀུན་ཏུ་ཁྱབ༔ དེ་ནས་ཡུལ་གྱི་མིང་ནི་ཁ་ཆེའི་ཡུལ༔ གསང་ལམ་མནོལ་མའི་དུར་ཁྲོད་བདེ་ཆེན་བརྡལ༔ དཔག་ཚད་ཕྱེད་དང་དྲུག་གིས་བསྐོར་བ་ལ༔ དབུས་ན་རང་བྱུང་མཆོད་རྟེན་ཀ་ནི་ཀ༔ བསྟན་པ་ཀུན་གྱི་རང་བཞིན་ཕྱོགས་མདོག་ཅན༔ མ་མོ་ཆེན་མོ་ཀཻ་རཱི་མ་གནས་པ༔ བྱང་ན་དུར་ཤིང་ལྗོན་པ་སྣ་ལེན་ཞེས༔ དུར་ཁྲོད་སེམས་ཅན་སྤྲ་སྤྲེའུ་མང་པོ་དང་༔ མཁའ་འགྲོ་མ་རྣམས་གར་གྱི་ཕྱག་རྒྱ་བསྒྱུར༔ འོག་ན་འཇིགས་པ་མི་བཟད་དུར་ཆུ་ཞེས༔ དུར་གྱི་སེམས་ཅན་མང་པོ་ལ་ལ་དགོད༔ ལ་ལ་ངུ་ཞིང་ལ་ལ་འཛིང་འཐབ་གསོད༔ དུར་ཁྲོད་ལྷོ་ན་དུར་མེ་རང་འབར་འཕྱོ༔ ཚག་ཆོམ་འུར་ཆོམ་དཔག་ཚད་རྒྱང་གྲགས་མཆོངས༔ མེ་གསེབ་མེ་ལྷ་ར་ཞོན་མང་པོ་ནི༔ ལག་ན་རྐང་རུས་དགང་གཟར་བླུགས་གཟར་བསྣམས༔ དུར་ཁྲོད་ནུབ་ན་དུར་ང་འཚུབ་ཟླ་ཞེས༔ གསེབ་ན་མཁའ་འགྲོ་མང་པོ་མི་རོ་ཁུར༔ ལག་ན་མི་རྐང་གླིང་བུ་འབུད་པར་བྱེད༔ ནུབ་བྱང་དུར་རིའི་རྒྱལ་པོ་རྩེ་བརྒྱ་པར༔ དུར་གྱི་སེམས་ཅན་མང་པོ་དེ་ལ་སྡོད༔ རཏྣ་ཡིད་བཞིན་ནོར་བུའི་གཏེར་ཡོད་པ༔ བྱང་ཤར་མཚམས་ན་མཁའ་འགྲོ་མིག་རིང་མ༔ སྔོན་མོ་རས་ནི་དམར་པོའི་ཨང་རག་གྱོན༔ མཆུ་ནི་རྨ་བྱ་མིག་ནི་འུག་པར་འདུག༔ སྐུ་སྟོད་དག་ལ་རུས་པའི་རྒྱན་དྲུག་གསོལ༔ དཔྲལ་བའི་དཀྱིལ་ན་མེ་ལོང་ཞིག་འདུག་པ༔ རལ་པ་ཐོར་ཚུགས་རྡོ་རྗེ་དཀྱིལ་དུ་བཅིངས༔ ལག་པ་གཉིས་ཀྱིས་གཡང་གཞི་བས་བུར་བཤུ༔ ལྷོ་ནུབ་དུད་སོལ་ལྷ་མོ་དྲེའུ་རྟ་ཞོན༔ དུར་ཁྲོད་དེར་ནི་མཆོད་རྟེན་རྒྱབ་བརྟེན་ནས༔ མཁའ་འགྲོ་མ་ལ་ཆོས་འཁོར་ལོ་ལྔ་བསྐོར༔ དེ་ནས་བྷངྒ་ལ་ཡི་ཡུལ་དུ་ཆས༔ གྲོང་ཁྱེར་མིང་ནི་གསས་ཁང་བྱ་བ་ན༔ བོན་པོ་གཡུང་གཤེན་བྱ་བ་ཡོད་པ་ལས༔ གནམ་ལ་ཉི་མ་དུ་ཤར་བོན་བྱེད་འགྲོ༔ རེ་ཞིག་དུས་ན་བོན་པོ་ཁྲེ་ཆང་མྱོས༔ འཁར་རྔ་སྟོང་གསུམ་སྒྲ་སྒྲོགས་བྱ་བ་བོར༔ དེ་ནས་མི་ལྟོགས་ཤིག་གིས་བ་བོར་བཙལ༔ བ་ནི་མ་རྙེད་བོན་པོའི་འཁར་རྔ་རྙེད༔ ནང་དུ་ཁྱེར་ནས་བྱིས་པས་འཁར་རྔ་བརྡུངས༔ བོན་པོས་འཁར་རྔ་བཙལ་བས་བ་ཞིག་རྙེད༔ དེད་འོངས་ཞོ་བཞོས་བྱིས་པ་རྣམས་ལ་བྱིན༔ བོན་པོས་མི་ལྟོགས་འཁར་རྔ་བརྐུས་ཟེར་བརྩད༔ མི་ལྟོགས་བོན་པོས་བ་བརྐུས་ཟེར་ནས་བརྩད༔ མ་འཆམས་ཁ་ཆེ་རྒྱལ་པོའི་དྲུང་དུ་གཏུགས༔ བ་དང་འཁར་རྔ་བརྗེས་ལ་མ་འཐབས་ཟེར༔ མི་ལྟོགས་བ་ཁྱེར་བོན་པོས་འཁར་རྔ་ཁྱེར༔ མི་ལྟོགས་ཆུང་མས་འོ་མ་བཞོས་འདུག་ཟེར༔ མ་སྨད་རྣམས་ཀྱིས་མི་ལྟོགས་སུན་ཕྱུང་ནས༔ བོན་པོས་སྔོན་ཕྱིན་འོ་མ་བཞོས་སྨྲས་པས༔ བོན་པོས་ཁྱོད་ཀྱིས་འཁར་རྔ་བརྡུངས་འདུག་ལོ༔ བརྡུངས་པས་ཅི་སྟོ་ཟད་ནི་མི་འགྲོ་ཡི༔ བཞོས་པས་ཅི་སྟོ་བསྐམ་ནི་མི་འགྲོ་ཟེར༔ མ་འཆམས་རྒྱལ་པོའི་དྲུང་དུ་ཞུ་བར་ཕྱིན༔ བོན་པོས་བ་འཚོས་མི་ལྟོགས་ངར་ཐོགས་གསུངས༔ བ་ཡང་མི་འཚོ་ངར་ཡང་མི་འདོགས་ཞུས༔ རྒྱལ་པོས་ཡིན་ཆུག་སྨྲས་ནས་རང་ཡུལ་ཕྱིན༔ མི་ལྟོགས་དེ་ཡིས་བོན་པོ་ལམ་དུ་བསད༔ བོན་པོའི་ཆུང་མ་དེ་དང་ལྷན་ཅིག་བསྡེབས༔ ཆུང་མས་མིང་བོར་ཚིག་བསྲིངས་མི་ལྟོགས་བཅིངས༔ བོན་པོའི་རོ་བསྐུར་རྒྱལ་པོའི་དྲུང་དུ་ཕུལ༔ རྒྱལ་པོས་བོན་པོའི་རོ་དང་དོ་ཡ་བྱས༔ བ་ལ་བཀལ་ནས་བོན་པོའི་འཁར་རྔ་བརྡུངས༔ བཙལ་བས་རྙེད་མ་ལེགས་དང་སྟོར་མ་ལེགས༔ ཐམས་ཅད་མ་བརྟགས་རྫས་ནི་མ་སྒྲུབ་ཅིག༔
ཅེས་པའི་སྒྲ་བསྒྲགས་གྲོང་ཁྱེར་ཐམས་ཅད་བསྐོར༔ དུར་ཁྲོད་བདེ་ཆེན་བརྡལ་དུ་བསྐྱལ་བར་གྱུར༔ ཉི་མ་འོད་ཟེར་འདི་ལྟར་ཅི་ཉེས་དྲིས༔ མི་ལྟོགས་བརྫུན་སྨྲས་བོན་པོས་ཕ་བསད་ནས༔ བུ་དང་ཕ་རོ་དོ་ཡ་བྱས་སོ་ཟེར༔ མཁྱེན་ཏེ་བ་དང་མི་ལྟོགས་སྲོག་སྐྱབས་མཛད༔ དུར་ཁྲོད་བདག་པོ་རྣམས་དང་འདྲིས་སུ་བཅུག༔ བ་འདི་འཚོས་ལ་འོ་མས་འཚོ་བ་གྱིས༔ ཆོས་ཉོན་གསུངས་པས་བུ་སྨད་ཡོད་ཅེས་ཟེར༔ བུ་སྨད་ཡོད་པས་ཅི་སྟོ་ཆོས་གྱིས་གསུངས༔ གསང་སྔགས་འཁོར་ནི་ཚོམ་བུར་བཅས་པ་ཡིན༔ སངས་རྒྱས་ཡུལ་དུ་ཁྱུ་དེད་བཏང་གིས་གསུངས༔ དེ་སྐད་གསུངས་པས་མི་ལྟོགས་མ་དགའ་སྟེ༔ དགེ་སྦྱོང་ཁྲམ་རྐྱལ་རྫུན་མ་འདི་འདྲ་བ༔ བཙུན་པའི་ཆས་ཡིན་བྱས་ན་སྔགས་པར་འདུག༔ སྔགས་པའི་ཆས་ཡིན་བྱས་ན་བཙུན་པར་འདུག༔ བུད་མེད་འདི་དག་ཁོ་ཡི་ཆུང་མར་འདུག༔ ཕྲུ་གུ་དེ་ཚོ་གང་ན་ཡོད་ན་སྙམ༔ ལོག་ལྟ་སྐྱེས་ཀྱང་འདུན་པ་བཞིན་དུ་བྱས༔ དེ་ནས་ཁོ་ཡི་བ་ཤི་འཚོ་བ་ཆད༔ ཉི་མ་འོད་ཟེར་དུར་ཤིང་སེམས་ཅན་སྨྲས༔ ཁྱེད་ཚོས་མི་འདིར་གནོད་འཚེ་མ་བྱེད་པར༔ དུར་ཤིང་སྣ་ལྡན་ཤིང་ཐོག་བཟའ་རུ་ཆུག༔ སྤྲ་དང་སྤྲེའུས་ཟོས་པས་མི་ལྟོགས་བསྲུངས༔ ཤིང་ཐོག་ཨ་འཕྲག་གཡས་གཡོན་བརྒྱངས་ནས་སུ༔ བུ་སྨད་བྱིན་ནས་ཁྲིད་འོང་བསམ་པ་ལ༔ མར་བབས་རྐང་པའི་འོག་ནས་ཤིང་ཞིག་ཆག༔ ལུས་པོ་དཔྱངས་ནས་ལག་པས་འཆང་བས་ཆག༔ འཇིགས་པ་མི་བཟད་དུར་ཆུའི་ནང་དུ་ལྷུང་༔ དུར་གྱི་སེམས་ཅན་མང་པོས་བཟའ་བར་ཆས༔ སྤྲེའུས་བསྲུངས་ནས་སྤྲ་ཡིས་ལེན་པ་ལ༔ ལྗོན་ཤིང་འོག་ནས་བོ་བའི་ཆལ་ཆོལ་དེར༔ ཇི་ལྟར་བྱས་ཀྱང་ཐར་པར་མ་གྱུར་ཏེ༔ སྤྲ་རྣམས་ཐམས་ཅད་ཤིང་སྡོང་རྩེ་ལ་བསྡད༔ སྤྲེའུ་གཅིག་གི་མཇུག་མར་གཅིག་འཆང་ནས༔ སྤྲ་ཡིས་སྤྲེའུ་ཕྱི་མའི་མཇུག་མ་བཟུང་༔ སྤྲེའུའི་ཐག་པས་མི་ལྟོགས་སྟེང་དུ་བཏང་༔ བང་པས་བཏབ་ནས་ཡར་ལ་འཐེན་ནས་སུ༔ སྤྲ་ཡིས་སྤྲེའུ་རེ་རེ་བཞིན་དུ་བཏབ༔ མི་ལྟོགས་དེ་ཉིད་ཤིང་ཁར་ཐོན་པ་དང་༔ སྤྲ་སྤྲེ་ཐམས་ཅད་དུབ་ནས་གཉིད་དུ་སོང་༔ ཤིང་ཐོག་བུ་སྨད་ཁྲིད་ནས་བཟའ་དགོས་བསམས༔ མི་ལྟོགས་ལྗོན་ཤིང་སྡོང་པོ་སྤྲུགས་པ་ཡིས༔ སྤྲ་སྤྲེ་དུས་གཅིག་དུར་མཚོའི་ནང་དུ་ལྷུང་༔ དུར་ཆུའི་སེམས་ཅན་རྣམས་ཀྱིས་ཟོས་པར་གྱུར༔ དེ་ནས་མི་ལྟོགས་གུ་རུའི་དྲུང་དུ་ཕྱིན༔ རླུང་གཡོས་སྤྲ་སྤྲེ་ཐམས་ཅད་དུར་ཆུར་ལྷུང་༔ ང་ཡིས་ཤིང་འབྱར་བྲོས་པས་ཐར་བ་ཡིན༔ དེ་སྐད་ཟེར་བས་གུ་རུའི་ཐུགས་ཀྱིས་ཁྲེལ༔ ཕན་ཆེན་མ་བཏགས་གནོད་ཆེར་ག་ལ་སྐྱེལ༔ བྱིན་པར་མ་གྱུར་འདོད་དུ་ག་ལ་འོང་༔ སྐྱོན་ཅན་རྫུན་མའི་རྒྱུ་ནི་གང་ལ་དྲང་༔ རང་འདོད་ཕུགས་བཅུག་མི་བཟང་ག་ལ་ཡིན༔ དུར་ཁྲོད་འདི་ནས་ཁྱོད་ཀྱིས་གར་མི་ཐར༔ མི་མ་ཡིན་གྱིས་གསོན་པོར་ཟ་བར་འགྱུར༔ དེ་སྐད་གསུངས་པས་ལོག་པའི་བློ་བསྲེལ་ཏེ༔ ང་དང་ཁོ་གཉིས་ཅི་ལ་མི་མཉམ་བསམས༔ སུ་ཡི་དྲིན་མེད་ང་རང་རང་རྒོད་ཡིན༔ མི་མ་ཡིན་གྱིས་ཟ་ན་ཁྱོད་ཀྱང་ཟ༔ བྲང་འོག་མི་དགེ་བཅུ་ཡིས་གང་བར་འགྱུར༔ དེ་ལ་རྒྱལ་བ་སྙིང་རྗེ་དྲག་པོ་སྐྱེས༔ ང་ཡིས་བུ་སྨད་གསེབ་ཏུ་བསྐྱལ་ཅིག་གསུངས༔ དུར་ཁྲོད་འཇིགས་པའི་ཉེན་དང་བྲལ་བ་དང་༔ མ་སྨད་བདུན་དང་ལྷན་ཅིག་འཛོམས་པའི་ཚེ༔ གཅིག་ལ་གཅིག་དགའ་ཆེན་པོ་བྱེད་པར་གྱུར༔ དེ་ནས་མ་སྨད་ཐམས་ཅད་ཁྲིད་ནས་སུ༔ དུར་ཤིང་ཤིང་ཐོག་བཟའ་བར་འོངས་བ་ལ༔ ལམ་དུ་གཅན་གཟན་རྣམས་ཀྱིས་ཟོས་པར་གྱུར༔ ཐོས་བསམ་ལྡན་པས་འགྲོ་བ་མ་ལུས་འདུལ༔ བྱམས་པ་ཆེན་པོས་ཕ་མ་ལྟ་བུར་མཛད༔ གུ་རུ་བློ་ལྡན་མཆོག་སྲེད་ཅེས་སུ་གྲགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དུར་ཁྲོད་བདེ་ཆེན་བརྡལ་དུ་བཞུགས་པའི་ལེའུ་སྟེ་སུམ་ཅུ་པའོ༔ ༔
པདྨ་བཀའ་ཐང་ལེའུ་ ༣༡ དུར་ཁྲོད་ལྷུན་གྲུབ་བརྩེགས་སུ་བཞུགས་པ།
དེ་ནས་མཁའ་དབྱིངས་རྣམ་པར་དག་པའི་ཀློང་༔ སྤྲུལ་སྐུའི་སྟོན་པ་རྡོ་རྗེ་སེམས་དཔའ་ཞེས༔ གླང་ཆེན་རབ་ཏུ་བརྟན་པའི་སྟེང་ན་བཞུགས༔ གཡས་པ་གསེར་གྱི་རྡོ་རྗེ་ཐུགས་ཀར་བསྣམས༔ གཡོན་པ་དངུལ་གྱི་དྲིལ་བུ་དཀུ་ལ་བརྟེན༔ དབུ་ལ་རིགས་ལྔའི་སངས་རྒྱས་རྫོགས་པར་བརྒྱན༔ སྐུ་ལ་རྒྱན་ནི་ཐམས་ཅད་རྫོགས་པས་བཀླུབས༔ དཔུང་རྒྱན་ཕྱག་གདུབ་ཞབས་གདུབ་རུས་པས་མཛེས༔ ཤེལ་གྱི་ཁ་དོག་འདྲ་སྟེ་དཀར་ལ་འཚེར༔ བསྐྱེད་པ་མ་ཧཱ་ཡོ་ག་ལ་མཁས་པ༔ ཕྱི་སྣོད་ཐམས་ཅད་གཞལ་ཡས་ཁང་དུ་སྟོན༔ ནང་བཅུད་ཐམས་ཅད་ལྷ་དང་ལྷ་མོར་སྟོན༔ སྒྲ་རུ་གྲགས་པ་ཐམས་ཅད་སྔགས་སུ་སྟོན༔ ཐམས་ཅད་སྐུ་གསུང་ཐུགས་ཀྱི་རོལ་པར་སྟོན༔ བསྐྱེད་པ་མ་ཧཱ་ཡོ་གའི་རྒྱུད་སྡེ་ནི༔ རྒྱས་པར་དབྱེ་ན་རྒྱུད་སྡེ་འབུམ་ཚོ་ལྔ༔ བསྡུ་ན་རྩ་བའི་ཏནྟྲ་སྡེ་བཅོ་བརྒྱད༔ སྐུ་ཡི་ཏནྟྲ་སངས་རྒྱས་མཉམ་སྦྱོར་ལ༔ རྩ་བ་དེ་ལས་འཕྲོས་པའི་ཏནྟྲ་གཉིས༔ གླང་པོ་རབ་འབོག་གླང་པོ་ཆུར་འཇུག་དང་༔ རྩ་རྒྱུད་སངས་རྒྱས་མཉམ་སྦྱོར་རང་དང་གསུམ༔ གསུང་གི་ཏནྟྲ་ཟླ་གསང་ཐིག་ལེ་ལ༔ རྩ་བ་དེ་ལས་འཕྲོས་པའི་ཏནྟྲ་གཉིས༔ གཅིག་ལས་འཕྲོས་དང་པདྨ་དབང་ཆེན་རྒྱུད༔ རྩ་རྒྱུད་ཟླ་གསང་ཐིག་ལེ་རང་དང་གསུམ༔ ཐུགས་ཀྱི་ཏནྟྲ་གསང་བ་འདུས་པ་ལ༔ རྩ་བ་དེ་ལས་འཕྲོས་པའི་ཏནྟྲ་གཉིས༔ རྩེ་གསུམ་འདུས་དང་རི་བོ་བརྩེགས་པའི་རྒྱུད༔ རྩ་རྒྱུད་གསང་བ་འདུས་པ་རང་དང་གསུམ༔ ཡོན་ཏན་ཏནྟྲ་དཔལ་མཆོག་དང་པོ་ལ༔ རྩ་བ་དེ་ལས་འཕྲོས་པའི་ཏནྟྲ་གཉིས༔ ནམ་མཁའ་མཛོད་ཀྱི་བྱིན་བརླབས་ཏནྟྲ་དང་༔ དམ་རྫས་བདུད་རྩིའི་སྒྲུབ་ཐབས་ཏནྟྲ་དང་༔ རྩ་རྒྱུད་དཔལ་མཆོག་དང་པོ་རང་དང་གསུམ༔ འཕྲིན་ལས་ཏནྟྲ་ཀརྨ་མཱ་ལེ་ལ༔ རྩ་བ་དེ་ལས་འཕྲོས་པའི་ཏནྟྲ་གཉིས༔ ཀཱི་ལ་བཞི་བཅུ་རྩ་གཉིས་ཏནྟྲ་དང་༔ སྒྲོལ་མ་བརྩེགས་པ་ལས་ཀྱི་ཏནྟྲ་དང་༔ རྩ་རྒྱུད་ཀརྨ་མཱ་ལེ་རང་དང་གསུམ༔ མཚན་ཉིད་དང་ནི་རྒྱུད་རྣམས་ཐམས་ཅད་སྤྱི༔ གསང་བའི་སྙིང་པོ་དང་ནི་བཅུ་དྲུག་གོ༔ དམ་ཚིག་སྡོམ་པ་ཀུན་གི་གཞི་མ་ནི༔ བཀོད་པ་རྒྱལ་པོའི་རྒྱུད་དང་བཅུ་བདུན་ཏེ༔ ལས་བཞི་འཕྲིན་ལས་ཀུན་གྱི་ཁ་སྐོངས་སམ༔ ཡོན་ཏན་ཐམས་ཅད་ཀྱི་ནི་མཇུག་བསྡུ་བ༔ ཐབས་ཀྱི་ཞགས་པའི་རྒྱུད་དང་བཅོ་བརྒྱད་གསུངས༔ ལྟ་བ་བདེན་པ་དབྱེར་མེད་གཅིག་ཏུ་བསྟན༔ སྒོམ་པ་ཏིང་འཛིན་རྣམ་གསུམ་སྒོམ་པར་བྱེད༔ སྤྱོད་པ་དམ་རྫས་ཐབས་ཀྱིས་ཟིན་པར་སྤྱོད༔ འབྲས་བུ་ཁྱད་པར་དགུ་ཡི་ས་ཐོབ་བོ༔ གསང་མཚན་སྔར་བཞིན་རྡོ་རྗེ་འཆང་དུ་བཏགས༔ དེ་ནས་ཡུལ་གྱི་མིང་ནི་བལ་པོའི་ཡུལ༔ དུར་ཁྲོད་མིང་ནི་ལྷུན་གྲུབ་བརྩེགས་པ་ཞེས༔ དཔག་ཚད་ཕྱེད་དང་ལྔ་ཡིས་བསྐོར་བ་ལ༔ དབུས་ན་མཆོད་རྟེན་བྱ་རི་ཁ་ཤོར་ནི༔ མ་མོ་ཆེན་མོ་ཀསྨ་རཱི་གནས་པ༔ ལྷོ་ན་ལྗོན་པ་དུར་ཤིང་སེར་པོ་ཞེས༔
དུར་བྱའི་རིགས་བྱེད་མང་པོ་ཤ་སྐད་སྒྲོག༔ ནུབ་ན་དུར་ཆུ་བུ་རམ་ཤིང་ལྡན་མཚོ༔ དུར་གྱི་སེམས་ཅན་མང་པོ་གནས་པ་ཡོད༔ བྱང་ན་དུར་མེ་འུར་འུར་ཞེས་བྱ་བའི༔ མེ་དཔུང་ནང་ན་མི་ལུས་ར་མགོ་ཅན༔ ལུག་དང་ཁྱི་དང་བྱི་ལ་ཕག་པ་བྱ༔ དཀར་དམར་སྣ་ཚོགས་ཀེང་རུས་ལག་བཟུང་བ༔ ཤར་ན་དུར་ང་ཕྱོགས་འཚུབ་ཅེས་བྱ་བའི༔ རླུང་གསེབ་མཁའ་འགྲོ་མང་པོ་ཀེང་རུས་འཕྱར༔ བྱང་ཤར་དུར་རིའི་རྒྱལ་པོ་སྤོས་ངད་ལྡན༔ དུར་གྱི་སེམས་ཅན་མང་པོ་ཚང་བཅས་ཤིང་༔ རཏྣ་ཡིད་བཞིན་ནོར་བུའི་གཏེར་སྦས་པ༔ ལྷོ་ནུབ་བར་སྣང་ཁམས་ཀྱི་གློག་མ་སྤྲིན༔ འབྲུག་གི་མགོ་ལ་གློག་གི་ལུས་པོ་ཅན༔ ལག་པ་གཉིས་ཀྱིས་མེ་དཔུང་མེ་དར་འཕྱར༔ རྩེ་ལ་ཀེང་རུས་པགས་པ་རྐེད་བུད་བཏགས༔ ཤར་ལྷོར་གནོད་སྦྱིན་རྒོད་མ་ཁ་ཞེས་པ༔ མི་ལུས་བོང་བུའི་མགོ་ལ་བྱ་གཤོག་ཅན༔ ཁ་ནས་སྟག་སྤྱང་གཅན་གཟན་མང་པོ་སྐྱུག༔ ལག་པ་གཉིས་ཀྱིས་འོད་མའི་མདའ་གཞུ་བཀང་༔ ཁམ་ནག་ལུས་ལ་བྱ་རྒོད་ཐུལ་པ་གྱོན༔ ཤིན་ཏུ་འཇིགས་པའི་དུར་ཁྲོད་ཆེན་པོ་དེར༔ ལོ་ལྔ་བཞུགས་ནས་མཁའ་འགྲོར་ཆོས་འཁོར་བསྐོར༔ གནོད་སྦྱིན་རྫོང་དུ་དམ་སྲི་སྡེ་བརྒྱད་བཏུལ༔ ཁམས་གསུམ་དབང་བསྡུས་སྲིད་གསུམ་ཟིལ་གྱིས་མནན༔ མཚན་ནི་སེང་གེ་སྒྲ་སྒྲོགས་ཞེས་སུ་གྲགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དུར་ཁྲོད་ལྷུན་གྲུབ་བརྩེགས་སུ་བཞུགས་པའི་ལེའུ་སྟེ་སོ་གཅིག་པའོ༔ ༔
པདྨ་བཀའ་ཐང་ལེའུ་ ༣༢ དུར་ཁྲོད་ལངྐ་བརྩེགས་སུ་བཞུགས་པ།
དེ་ནས་བཀོད་པ་ལྷུན་གྲུབ་ཕོ་བྲང་ཞེས༔ མདོག་ནི་མཐིང་ག་དཔག་ཚད་ལས་འདས་པ༔ དབྱིབས་ནི་ཟླུམ་པོ་འཇའ་འོད་ཟེར་གསུམ་འཕྲོ༔ དེ་ནང་སྐུ་བཞིའི་སྟོན་པ་ཀུན་དུ་འཆང་༔ སྐུ་མདོག་མཐིང་ནག་སེང་གེའི་སྟེང་ན་བཞུགས༔ དུར་ཁྲོད་ཆས་བརྒྱད་རུས་པའི་རྒྱན་དྲུག་དང་༔ དཔལ་གྱི་ཆས་བརྒྱད་རཏྣའི་རྒྱན་དྲུག་གསོལ༔ རྡོ་རྗེ་དྲིལ་འཛིན་ཡུམ་དང་འཁྲིལ་ནས་བཞུགས༔ ཐེག་པ་ཐུན་མོང་དགུ་དང་ཁྱད་པར་དགུ༔ ཆོས་རྣམས་ཐམས་ཅད་དབྱེར་མེད་གཅིག་ཏུ་སྟོན༔ སྤྱི་ཏི་ཡོ་གར་མཁས་པའི་དྲུང་དུ་ཕྱིན༔ སྤྱི་ཏིའི་རྒྱུད་སྡེ་བྱེ་བ་ཕྲག་བཅུ་དང་༔ སྟོང་ཕྲག་བདུན་ཅུ་རྩ་གཉིས་ལེགས་པར་གསུངས༔ བཀའ་འདུས་རྒྱལ་པོ་ཟུག་པ་རྩ་བའི་རྒྱུད༔ འགྲིལ་བ་སྟོང་པོ་གྱེས་པ་ཡལ་གའི་རྒྱུད༔ རྒྱས་པ་ལོ་འདབ་སྨིན་པ་འབྲས་བུའི་རྒྱུད༔ བསྡུས་པའི་རྒྱུད་དང་ལུང་གི་རྒྱུད་དང་ནི༔ མན་ངག་རྒྱུད་དང་རྒྱ་ཆེར་བཤད་པའི་རྒྱུད༔ སྐུ་ཡོངས་རྫོགས་པ་མི་ཕྱེད་པ་ཡི་མདོ༔ གསུང་ཡོངས་རྫོགས་པ་མ་འདྲེས་པ་ཡི་མདོ༔ ཐུགས་ཡོངས་རྫོགས་པ་ཡེ་ཤེས་སྒོ་ལྔའི་མདོ༔ ཡོན་ཏན་ཡོངས་རྫོགས་གོལ་ས་བཅད་པའི་མདོ༔ འཕྲིན་ལས་ཡོངས་རྫོགས་རྣམ་གྲངས་ངེས་པའི་མདོ༔ ཁྲིམས་གསུམ་ཡོངས་རྫོགས་རྩ་བ་བརྟན་པའི་མདོ༔ ལས་ཀྱི་ཁོལ་པོ་རྒྱུན་དུ་བཀོལ་བའི་མདོ༔ ཁྱད་པར་སྤྱི་མདོ་ཉི་ཤུ་རྩ་གཅིག་གསུངས༔ ལྟ་བ་དངོས་མེད་ཡེ་སྟོང་ཐེར་ཟུག་སྟོན༔ སྒོམ་པ་གང་ཤར་ཏིང་འཛིན་བཞི་ལྔ་སྒོམ༔ སྤྱོད་པ་སྣ་ཚོགས་ལམ་ཁྱེར་ལས་སུ་རུང་༔ འབྲས་བུ་བཅོ་བརྒྱད་དེ་བཞིན་གཤེགས་པའི་ས༔ གསང་མཚན་ཀུན་ཏུ་འཆང་ཞེས་ཡོངས་སུ་གྲགས༔
དེ་ནས་ཡུལ་གྱི་མིང་ནི་ཟ་ཧོར་ཡུལ༔ དུར་ཁྲོད་ཆེན་པོ་ལངྐ་བརྩེགས་པ་ཞེས༔ དཔག་ཚད་ཕྱེད་དང་བདུན་གྱིས་བསྐོར་བ་ཡི༔ དབུས་ན་མཆོད་རྟེན་བདེ་བྱེད་གཞོན་ནུ་གྲུབ༔ མ་མོ་ཆེན་མོ་ཙནྜ་ལཱི་གནས་པ༔ ནུབ་ན་ལྗོན་པ་དུར་ཤིང་བ་ལེ་ཝ༔ དུར་བྱ་མང་པོའི་ཚང་བཅས་ཤིང་ཏོག་ཟ༔ སྤྲ་དང་སྤྲེའུ་མང་པོས་ཀེང་རུས་བཀྲམ༔ བྱང་ན་དུར་མཚོ་སྐྱོན་བྲལ་མཚོ་ཞེས་པར༔ ཆུ་སྲིན་ཆུ་རྟ་ཆུ་གླང་ཆུ་ལུག་དང་༔ ཆུ་མི་རུས་སྦལ་ཉ་ཆེན་དུང་སོགས་རྒྱུ༔ ཤར་ན་དུར་མེ་གཟི་བརྗིད་འཕྲོག་ཅེས་པ༔ མེ་དཔུང་དུམ་བུ་མང་པོ་ཆད་འགྲོ་བའི༔ མེ་གསེབ་དོམ་དྲེད་རྒོད་དང་སྤྱང་ཀིའི་ཚོགས༔ ཁ་ནས་སེམས་ཅན་རིགས་བྱེད་ཀེང་རུས་སྐྱུག༔ ལྷོ་ན་དུར་ང་ཁོ་ར་ཁོར་ཡུག་ཅེས༔ རླུང་གསེབ་སྤྲ་དང་ཕྱུགས་ལུག་བཅས་པ་ཀུན༔ ཐམས་ཅད་ནམ་མཁའི་དབྱིངས་ལ་ཁྱེར་འགྲོ་བ༔ ཤར་ལྷོ་དུར་རིའི་རྒྱལ་པོ་དབང་པོའི་བྲག༔ དུར་གྱི་སེམས་ཅན་མང་ཤིའི་ཀེང་རུས་དང་༔ དགོས་འདོད་འབྱུང་བ་ཡིད་བཞིན་ནོར་བུའི་གཏེར༔ བྱང་ཤར་མཁའ་འགྲོ་རྡོ་རྗེ་བདུད་འདུལ་མ༔ སྐུ་མདོག་དམར་མོ་རས་སྔོན་ཨང་རག་གྱོན༔ མཆུ་ནི་རྨ་བྱ་མིག་ནི་འུག་པར་འདུག༔ སྐུ་སྟོད་དག་ལ་རུས་པའི་རྒྱན་དྲུག་གསོལ༔ དཔྲལ་བའི་དཀྱིལ་ན་མེ་ལོང་ཅིག་ཡོད་པ༔ རལ་པ་ཐོར་ཚུགས་རྡོ་རྗེ་དཀྱིལ་དུ་བཅིངས༔ ལག་པ་གཉིས་ཀྱིས་རྡོ་རྗེ་སེར་པོ་ཐོགས༔ མཚན་མ་དཀྲུག་ཅིང་ཁ་ནས་བུ་ཆུང་སྐྱུག༔ ལྷོ་ནུབ་མཚམས་ན་དུས་མཚན་ཀོ་ཤ་ཞེས༔ སེང་མགོ་གཡས་གསུམ་གཡོན་གསུམ་དགུ་ཡོད་པ༔ ལུས་ལ་སྟག་གི་པགས་པའི་ཐུལ་པ་གྱོན༔ མི་རོ་སྐམ་རློན་རྙིད་པ་སེ་ལེ་ཁུར༔ ལག་ན་མདུང་རིང་རྔ་ནག་བཏགས་པ་འཕྱར༔ རྟ་ནག་མི་རོའི་སྒ་ཆ་བྱས་པ་ཞོན༔ ཤིན་ཏུ་འཇིགས་པའི་དུར་ཁྲོད་ཆེན་པོ་དེར༔ ལོ་ལྔ་བཞུགས་ནས་མཁའ་འགྲོར་ཆོས་འཁོར་བསྐོར༔ མཚན་ནི་པདྨ་སམྦྷ་ཞེས་བྱར་གྲགས༔ དེ་ནས་དགའ་རབ་རྡོ་རྗེ་ཞེས་བྱ་བ༔ ལྷའི་བུ་ཀུན་དགའ་སྙིང་པོ་ཚེ་འཕོས་པ༔ རྒྱ་གར་རྩེ་ཕྲུག་རིན་ཅེན་སྒང་བྱ་ན༔ ཡབ་ནི་རྒྱལ་པོ་དྷརྨཱ་ཨ་ཤྭ་ཀ༔ ཡུམ་ནི་བདེ་གཤེགས་རིགས་ལྡན་མ་གཉིས་ལ༔ སྲས་པོ་མེད་ཅིང་སྲས་མོ་གཉིས་ཡོད་དེ༔ གཡུང་དྲུང་སྐྱིད་དང་མཚོ་སྐྱེས་ས་ལེ་མ༔ བཀྲ་ཤིས་གཡུང་དྲུང་སྐྱིད་ནི་ཁབ་ཏུ་གཤེགས༔ མཚོ་སྐྱེས་ས་ལེ་མ་ནི་ཆོས་བྱར་དགོངས༔ མཛོ་མོ་དཀར་མོ་ཞིག་ལ་ཆས་རྐྱེན་བཀལ༔ གཡོག་མོ་དགེ་ལྡན་མ་ནི་ཁྲིད་ནས་སུ༔ འབྲས་གསུམ་ཚལ་གྱི་ཁུ་བྱུག་སྡིངས་སུ་བསྒོམས༔ ནམ་དེའི་དགུང་ལ་རྨི་ལམ་རིན་ཅེན་གྱི༔ བུམ་པར་བདུད་རྩི་བླུགས་ནས་འཐུངས་པ་རྨིས༔ དེ་ཡི་ནང་པར་གཡུ་ཡི་ནེ་ཙོ་ཞིག༔ སྲས་མོའི་ཕྲག་པ་གཡས་སུ་བབས་ནས་ནི༔ ལྷ་གཅིག་ཁྱོད་ལ་སྲས་ཤིག་བཙས་ནས་སུ༔ དེ་ནི་ལྷ་དང་མི་ཡི་སྟོན་པ་སྟེ༔ དགའ་རབ་རྡོ་རྗེ་ཞེས་བྱར་འགྱུར་རོ་ཟེར༔ ནེ་ཙོ་འཕུར་སོང་བུ་མོའི་མཆིད་ན་རེ༔ ང་ནི་བུ་ཚ་མི་འདོད་ཆོས་བྱས་ཡིན༔ སྡུག་བྱ་འཕུང་བྱ་འདི་ནི་ཅི་སྐད་ཟེར༔ དེ་ནས་སང་ཕོད་སྲས་ཤིག་འཁྲུངས་པ་ལས༔ ཕ་མེད་བུ་འདིས་དགོས་པ་མེད་ཟེར་ནས༔ གཡོག་མོར་ཐལ་དོང་ནང་དུ་བསྐྱུར་དུ་བཅུག༔ ཞག་བདུན་ལོན་ནས་སྔར་གྱི་རྨི་ལམ་དྲན༔ སྤྲུལ་པའི་སྐུ་ཞིག་ཡིན་སྲིད་ལྟོས་དང་བྱས༔ བལྟས་པས་བུ་དེ་མ་ཤི་ཐལ་གསེབ་ན༔ འཕྲ་ཤད་ལིང་ལིང་རྩེ་ཡིན་འདུག་པ་ལས༔ དེ་ལ་དགྱེས་ནས་རོ་ལངས་བདེ་བར་བཏགས༔ དེ་ནས་བུ་དེ་གཞན་གྱི་ཟླ་སྐྱེད་པས༔ དེ་ཡི་ཞག་སྐྱེད་ཤིན་ཏུ་ཆེ་བར་གྱུར༔ དེ་བཞིན་ལོ་སྐྱེད་པས་ཀྱང་ཟླ་སྐྱེད་ཆེ༔ ལོ་བརྒྱད་ལོན་ནས་ཡུམ་ལ་འདི་སྐད་བརྗོད༔ རྡོ་རྗེ་སེམས་དཔའ་གར་བཞུགས་ཆོས་ཉན་འགྲོ༔ ཆོས་ཀྱི་ཆར་པ་སེམས་ཅན་ཀུན་ལ་འབེབས༔ ཡུམ་གྱིས་རྡོར་སེམས་མི་མངོན་དབྱིངས་ན་བཞུགས༔ ཁྱོད་ཀྱིས་མི་མཐོང་འདུག་པར་འཚལ་ཞེས་སྨྲས༔ ལན་ཅིག་དུས་ན་བྱིས་པ་དེ་སྟོར་ནས༔ ཡུན་རིང་མེད་དེ་དེ་ནས་བྱུང་ཙ་ན༔ ངས་དཔལ་རྡོ་རྗེ་སེམས་དཔར་ཆོས་ཉན་ཕྱིན༔ རྡོ་རྗེ་སེམས་དཔས་ཅི་ཤེས་ངས་ཤེས་ཟེར༔ དེ་ནས་ཡུམ་ཡང་ངོ་མཚར་སྐྱེས་པ་ལས༔ པཎ་ཆེན་ལྔ་བརྒྱར་བགྲོ་གླེང་བྱེད་འགྲོ་ཟེར༔ ཡུམ་གྱིས་པཎ་ཆེན་ལྔ་བརྒྱ་ཤིན་ཏུ་མཁས༔ ཚོགས་པ་ཆོས་གྲའི་སྟོན་པ་ཡིན་པས་ན༔ ཁྱོད་ཀྱིས་མི་ཐུབ་བྱས་པས་ཐུབ་འོང་ཟེར༔ འོ་ན་ངའི་ཡབ་དྷརྨཱ་ཨ་ཤྭ་ཀའི༔ མཆོད་གནས་ཡིན་པས་ཡབ་ལ་ཞུས་ཤིག་གསུངས༔ ཁྱེའུས་རྩེ་ཕྲུག་རིན་ཅེན་སྒང་དུ་ཕྱིན༔ པཎ་ཆེན་ལྔ་བརྒྱར་བགྲོ་གླེང་བྱེད་པ་ཡིན༔ ཕྱག་ནི་རྩེ་སྤྲོད་བཞེས་པར་ཞུ་བྱས་པས༔ རྒྱལ་པོས་མི་ཐུབ་ཟེར་ཀྱང་ཐུབ་ཁས་བླངས༔ དེ་ནས་རྒྱལ་པོས་པཎྜི་ཏ་རྣམས་ལ༔ དེ་སྐད་ཟེར་བའི་ཟི་ཡན་ཅིག་གདའ་བས༔ ཕྱག་ནི་རྩེ་སྤྲོད་གནང་བར་ཞུ་ཞེས་གསུངས༔ པཎྜི་ཏ་རྣམས་བགྲོ་གླེང་བྱེད་པ་ན༔ མ་ཐུབ་རྒྱལ་པོས་ཆད་པས་ཆོད་ཅིག་གསུངས༔ དེ་ནས་ཁྱེའུས་ཕྱག་རྩེ་སྤྲོད་དུ་བྱས༔ བགྲོ་གླེང་བྱས་པས་པཎྜི་ཏ་རྣམས་ཕམ༔ ཐེག་པ་གང་ནས་གླེངས་ཀྱང་མ་ཐུབ་སྟེ༔ ངོ་མཚར་སྐྱེས་ཏེ་སངས་རྒྱས་བྱོན་ནོ་ཟེར༔ ཨ་ལ་ལ་སྟེ་ཆོས་བྱོན་དགེ་འདུན་བྱོན༔ བདེ་བ་ཆེན་པོ་ཎྜི་ཡཱ་ཞེས་བྱར་བཏགས༔ རྒྱལ་པོ་དགྱེས་པས་དགྱེས་པ་རྡོ་རྗེར་བཏགས༔ ཡུམ་གྱིས་བཞད་པས་བཞད་པ་རྡོ་རྗེར་བཏགས༔ ཡུལ་མི་དགའ་བས་དགའ་རབ་རྡོ་རྗེར་བཏགས༔ དེ་ཚེ་སིངྒ་ལ་ཡི་རྒྱལ་པོ་ནི༔ རྒྱལ་པོ་གཞོན་ནུ་དཔལ་ཞེས་བྱ་བའི་བུ༔ མཁས་པ་འཇམ་དཔལ་བཤེས་གཉེན་ཞེས་བྱ་བ༔ རྒྱ་མཚོའི་གླིང་ལ་སྐུ་སྐྱོ་འཆག་ཏུ་བཞུད༔ མི་བཞུགས་པ་ལས་སླར་ལོག་ཙ་ན་ནི༔ ཐེག་པ་བརྒྱད་ལས་མཐོ་བའི་དགུ་པ་ནི༔ ཨ་ཏི་ཡོ་ག་བྱ་བ་ཁས་ལེན་པའི༔ བྱིས་དཀར་རས་སྔོན་ཨང་རག་གྱོན་པ་ཞིག༔ པཎྜི་ཏ་རྣམས་ཀུན་གྱིས་མ་ཐུབ་གྲགས༔ སོ་མཚམས་འབྱེད་པས་ཚར་གཅོད་འདོང་ངོ་གསུངས༔ འཇམ་དཔལ་བཤེས་གཉེན་དཔོན་གཡོག་རྣམས་ཀྱིས་བྱོན༔ སངས་རྒྱས་སྤྲུལ་པ་དགའ་རབ་རྡོ་རྗེ་དེ༔ ཨུ་རྒྱན་ཡུལ་གྱི་དྷ་ན་ཀོ་ཤའི་གླིང་༔ དྷ་ཧེ་ན་ཡི་འདུ་ཁང་ཆེན་པོ་ན༔ ཆོས་གསུང་བཞུགས་པའི་དྲུང་དུ་བཤེས་གཉེན་བྱོན༔ རྩོད་པ་བྱས་པས་འཇམ་དཔལ་བཤེས་གཉེན་གྱིས༔ ལུང་རིགས་མན་ངག་གང་ཡང་མ་ཐུབ་ནས༔ སྔར་དུ་གཤེ་སྐུར་བཏབ་བར་འགྱོད་པ་སྐྱེས༔ སྡིག་པ་སྦྱང་དོན་རང་གི་ལྕེ་བཅད་སྙམ༔ གཡོག་པོའི་མིང་བོས་སྤུ་གྲི་ལོང་ཤོག་ཟེར༔ དགའ་རབ་རྡོ་རྗེས་སྤུ་གྲིས་ཅི་བྱེད་གསུངས༔ ཁྱེད་ལ་སྡིག་བསགས་ད་ནི་ལྕེ་གཅོད་ཟེར༔ ལྕེ་བས་སྙིང་བཏོན་དེ་ཡིས་སྡིག་མི་འདག༔ མན་ངག་ཆོས་རྣམས་མ་རྨོངས་མཁས་པར་སློབས༔ རང་གི་ཉམས་དང་སྦྱར་བའི་ཆོས་ཤིག་རྩོམས༔ དེ་སྐད་གསུངས་པས་ཆོས་རྣམས་མ་ལུས་ཞུས༔ བྱང་སེམས་སྡེ་ལ་འགྲེལ་པ་གསེར་ཞུན་བརྩམས༔ དེ་སྐད་ཡོངས་སུ་གྲགས་པས་ས་སྟེང་ཁྱབ༔ པདྨ་སམྦྷས་དགའ་རབ་དྲུང་དུ་ཕྱིན༔ རྫོགས་ཆེན་སྙིང་ཐིག་རྒྱུད་ནི་བཅུ་བདུན་དང་༔ སྔགས་སྲུངས་ནག་མོའི་རྒྱུད་དང་བཅོ་བརྒྱད་གསན༔ གོལ་ས་གཅོད་པ་གླང་པོ་སུན་འབྱིན་རྒྱུད༔ རྒྱལ་པོ་ལྟ་བ་ལ་ཟློའི་རྒྱུད་དང་ནི༔ བྲམ་ཟེ་ཐེག་པ་ཤན་འབྱེད་རྒྱུད་ཅེས་དང་༔ ཀློང་དགུ་བམ་པོ་ཉི་ཁྲི་ཆིག་སྟོང་བསྟན༔ སེམས་ཉིད་ཆོས་སྐུར་ངོ་སྤྲོད་བླ་མ་ཡིན༔ རང་རིག་སྐྱེ་མེད་ས་གསུམ་དུས་གཅིག་ནོན༔ སེམས་ཉིད་འགག་མེད་སངས་རྒྱས་འཕོ་འགྱུར་མེད༔ དགའ་རབ་རྡོ་རྗེ་ཆོས་ཀྱི་བྱུང་ཁུངས་བཟང་༔ ཐམས་ཅད་མཁྱེན་ཅིང་ཁོང་དུ་ཆུད་པར་གྱུར༔ ལྟ་བ་ཀ་དག་ཆོས་དབྱིངས་མ་བུར་ཐིམ༔ སྒོམ་པ་མ་བཅོས་རང་བཞིན་ལྷུན་གྱིས་གྲུབ༔ སྤྱོད་པ་ཉོན་མོངས་བྱང་ཆུབ་བླང་དོར་མེད༔ འབྲས་བུ་སྤང་ཐོབ་མེད་པར་རང་སར་གྲོལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དུར་ཁྲོད་ལངྐ་བརྩེགས་སུ་བཞུགས་པའི་ལེའུ་སྟེ་སོ་གཉིས་པའོ༔ ༔
པདྨ་བཀའ་ཐང་ལེའུ་ ༣༣ དུར་ཁྲོད་པདྨ་བརྩེགས་པར་བཞུགས་པ།
དེ་ནས་ཡུལ་གྱི་མིང་ནི་རྒྱན་ཡུལ༔ དུར་ཁྲོད་ཆེན་པོ་པདྨ་བརྩེགས་ཞེས་པ༔ མཐའ་སྐོར་དཔག་ཚད་ཕྱེད་དང་གཉིས་ཡོད་པའི༔ དབུས་ན་མཆོད་རྟེན་རང་བྱུང་རང་འོད་ཅན༔ མ་མོ་ཆེན་མོ་པུཀྐ་སཱི་གནས་པ༔ ཤར་ལྷོར་ལྗོན་པའི་དུར་ཤིང་ཙུ་ཏ་ཞེས༔ དུར་བྱ་མང་པོའི་དེ་ལ་གནས་ཡོད་པ༔ ལྷོ་ནུབ་དུར་ཆུ་སྔོ་བསངས་རྒྱ་མཚོ་ཞེས༔ དུར་ཉ་དུར་སྲིན་དུར་སྦལ་མང་པོ་ཡོད༔ དྲི་ཟའི་བུ་མོ་དཀར་མོ་མང་པོ་ནི༔ དུར་ཆུའི་སེམས་ཅན་ཤི་ཚད་ཐམས་ཅད་ཟ༔ ནུབ་བྱང་དུར་མེ་མཐོང་འཚིག་འབར་བ་ཞེས༔ མེ་གསེབ་ང་ལྷའི་བུ་མོ་མང་པོ་ནི༔ སེར་དཀར་ཤ་བ་ཞོན་ནས་ཀེང་རུས་འཕྱར༔ བྱང་ཤར་དུར་ང་ཤིན་ཏུ་རྒྱས་ཞེས་པའི༔ རླུང་གསེབ་དམག་འཁྲུག་གཡུལ་འགྱེད་གོ་ཆ་ཅན༔ ཤར་ན་དུར་རི་སོ་ལེགས་ཞེས་བྱ་བར༔ དུར་གྱི་སེམས་ཅན་གཅན་གཟན་མང་པོ་ཉལ༔ ཟད་མི་ཤེས་པའི་ཆོས་གཏེར་ཡོ་ག་གསུམ༔ ལྷོ་ན་ཡེ་ཤེས་མཁའ་འགྲོ་མདོག་སྣ་ཚོགས༔ འབྲི་ཀློག་སྒོམ་དང་འཆད་དང་ལུང་སྟོན་པ༔ བྱང་ན་ལྷ་འདྲེ་ཡོངས་ཀྱི་ཚོགས་འདུ་ཅན༔ རབ་ཏུ་འཇིགས་པའི་དུར་ཁྲོད་ཆེན་པོ་དེར༔ མཆོད་རྟེན་རྒྱབ་བརྟེན་ལོ་ལྔར་ཆོས་འཁོར་བསྐོར༔ མཁའ་འགྲོ་ཞི་བ་འཚོ་ཞེས་མདོག་དཀར་བ༔ རས་ཀྱི་ཨང་རག་སྔོན་པོ་སྨད་ལ་དཀྲིས༔ ལག་ཏུ་བྷནྡྷའི་སྐྱོགས་ནི་ཁྲག་གིས་བཀང་༔ སྐྲ་ནི་ཐོར་ཅོག་ཐོད་སྐམ་ཕྲེང་བས་བཅིངས༔ པདྨ་སམྦྷའི་དྲུང་ན་པུས་བཙུགས་འདུག༔ སྦྱོར་སྒྲོལ་ཕུན་སུམ་ཚོགས་པ་སློབ་པར་བྱེད༔ གསང་བའི་མཚན་ནི་སེང་གེ་སྒྲ་སྒྲོག་གྲགས༔ དེ་ནས་སྤྲིན་ནག་འདུས་པའི་དུར་ཁྲོད་དུ༔ རིགས་ལྡན་བདེ་བ་བཟང་སྐྱོང་ཞེས་བྱ་བ༔ ཕྱག་རྡོར་སྤྲུལ་པ་སྣང་བའི་གཟུགས་སུ་གྲུབ༔ རེག་པའི་གཟུགས་སུ་མ་གྲུབ་འོད་ཀྱི་ལུས༔ གཅེར་བུ་སྐྲ་གྲོལ་དར་སྔོན་སྨད་ལ་དཀྲིས༔ གཡས་པའི་ཕྱག་ན་གསེར་གྱི་རྡོ་རྗེ་བསྣམས༔ གཡོན་པའིཕྱག་ན་དངུལ་གྱི་དྲིལ་བུ་འཁྲོལ༔ འཇའ་ཡི་རྣམ་པ་ལྟ་བུར་བཞུགས་པ་ལ༔ རྫོགས་པ་ཨ་ནུ་ཡོ་གའི་རྒྱུད་སྡེ་ནི༔ གསང་སྔགས་བླ་མེད་དོན་རྫོགས་འདུས་པའི་རྒྱུད༔ སྤྱིརྒྱུད་དགུ་དང་སྒོས་རྒྱུད་བཅོ་ལྔ་གསན༔ བྱེ་བྲག་རྒྱུད་ནི་བརྒྱ་ཕྲག་བཅུ་རྣམས་དང་༔ གསང་ཆེན་སྒྱུ་འཕྲུལ་ཆེན་པོ་སྡེ་བརྒྱད་གསན༔ རྡོར་སེམས་སྒྱུ་འཕྲུལ་གསང་བའི་སྙིང་པོ་དང་༔ རོལ་པ་མངོན་རྫོགས་ལྷ་མོ་སྒྱུ་འཕྲུལ་དང་༔ དཀྱིལ་འཁོར་རྫོགས་པ་སྒྱུ་འཕྲུལ་བརྒྱད་པ་དང་༔ འཕྲིན་ལས་རྫོགས་པ་སྒྱུ་འཕྲུལ་བཞི་བཅུ་པ༔ ཡེ་ཤེས་རང་སྣང་སྒྱུ་འཕྲུལ་བླ་མ་དང་༔ ཡོན་ཏན་མཐར་ཕྱིན་སྒྱུ་འཕྲུལ་བརྒྱད་ཅུ་པ༔ དམ་ཚིག་མཆོག་ཏུ་སྟོན་པ་ལེ་ལག་དང་༔ སྡེ་སྣོད་ཡོངས་ཁྱབ་སྒྱུ་འཕྲུལ་དྲ་བ་ཞུས༔ ཡུལ་གྱི་མིང་ནི་ལི་ཡི་ཡུལ་དུ་ཕྱིན༔ དུར་ཁྲོད་ཆེན་པོ་ལོ་ཀ་བརྩེགས་ཞེས་པ༔ མཐའ་སྐོར་དཔག་ཚད་ཕྱེད་དང་བཞི་ཡོད་པའི༔ དབུས་ན་རང་བྱུང་མཆོད་རྟེན་ཀེའུ་ཤ༔ མ་མོ་ཆེན་མོ་སྨ་ཤ་ནི་གནས་པ༔ ནུབ་བྱང་ལྗོན་པའི་དུར་ཤིང་ལྟ་ན་སྡུག༔ དུག་སྦྲུལ་འཁྲིལ་ཞིང་དུར་ཕག་མང་པོས་བསྐོར༔ དུར་བྱའི་ཚང་བཅས་ཕྲུ་གུ་ཤ་ཡིས་གསོ༔ བྱང་ཤར་དུར་ཆུ་དྲི་བྲལ་མཚོ་ཞེས་པར༔ དུར་ཆུའི་སེམས་ཅན་མང་པོས་སེམས་ཅན་ཟ༔ ལ་ལ་ཀེང་རུས་ལ་ལ་ཤི་ལ་ཁད༔ ལ་ལ་རྙིད་པ་ལ་ལ་ཕྱེད་ཚལ་དང་༔ ལ་ལ་གསོན་པོ་མགོ་མཇུག་ཟར་ཡོད་པ༔ གྲུལ་བུམ་བུ་མོ་སེར་མོ་མང་པོ་ནི༔ དུར་ཆུའི་སེམས་ཅན་ཤི་ཚད་པགས་པ་བཤུ༔ ཤར་ལྷོར་དུར་མེ་གྲིབ་ཅན་ཞེས་བྱའི་གསེབ༔ ཕག་པ་དཀར་ནག་མང་པོ་ཀེང་རུས་སྐྱུག༔ ལྷོ་ནུབ་དུར་ང་འཚུབ་འཚུབ་ཅེས་བྱའི་ནང་༔ སྟག་གཟིག་མ་བུ་མང་པོ་འཛིང་ཞིང་འབྲོས༔ ནུབ་བྱང་དུར་རིའི་རྒྱལ་པོ་སྲིད་པ་ཅན༔ སྲིན་བུ་མེ་ཁྱེར་མང་པོ་མེ་སྟག་འཕྲོ༔ དུར་གྱི་སེམས་ཅན་མང་པོ་ལ་ལ་ཤི༔ ལ་ལ་ན་ཞིང་ལ་ལ་འཆི་འཕྲས་བྱེད༔ ལ་ལ་ཀེང་རུས་ལ་ལ་མདའ་ཕོག་པ༔ ལ་ལ་གསོན་ཅིང་ལ་ལ་ལང་ཚོ་ལྡན༔ འདོད་ཡོན་འབྱུང་བ་ནོར་བུའི་གཏེར་ཡོད་པ༔ ལྷོ་ན་བ་ལང་ཞེས་བྱ་གླང་པོའི་གདོང་༔ ནག་པོ་ལུས་ལ་གཟིག་གི་ཐུལ་པ་གྱོན༔ ལག་པ་གཉིས་ཀྱིས་ཐོད་པའི་མདུང་རིང་འཛིན༔ རྒྱབ་ན་ཆུ་སྲིན་ཉ་ཡི་སེ་ལེ་ཁུར༔ ཕག་དཀར་མི་རོའི་སྒ་ཆ་བྱས་པ་ཞོན༔ ནུབ་ན་གླང་ཞོན་ནག་མོ་དམར་ལྕམ་མ༔ ཏྲི་ཤཱུལ་རྩེ་གསུམ་ཐོད་ཁྲག་མི་སྙིང་ཟ༔ ཤིན་ཏུ་འཇིགས་པའི་དུར་ཁྲོད་ཆེན་པོ་དེར༔ ལོ་ལྔ་བཞུགས་ནས་མཁའ་འགྲོར་ཆོས་འཁོར་བསྐོར༔ མཚན་ནི་རྡོ་རྗེ་གྲོ་ལོད་ཅེས་བྱར་གྲགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དུར་ཁྲོད་པདྨ་བརྩེགས་པར་བཞུགས་པའི་ལེའུ་སྟེ་སོ་གསུམ་པའོ༔ ༔
པདྨ་བཀའ་ཐང་ལེའུ་ ༣༤ དུར་ཁྲོད་ཆེན་པོ་གསང་ཆེན་རོལ་པར་བཞུགས་པ།
དེ་ནས་མཁའ་སྤྱོད་རིག་འཛིན་གནས་སུ་ཕྱིན༔ བདེ་ཆེན་གསང་ལམ་མནོལ་མའི་དུར་ཁྲོད་ན༔ མཁའ་འགྲོ་ཉི་ཟླ་དངོས་གྲུབ་ཅེས་ཀྱང་བྱ༔ མཁའ་འགྲོའི་གཙོ་མོ་གསང་བ་ཡེ་ཤེས་ཞེས༔ དགེ་སློང་ཀུན་དགའ་སྨོན་ལམ་ཞེས་ཀྱང་བྱ༔ མཁའ་འགྲོ་ལས་ཀྱི་དབང་མོ་ཆེའི་དྲུང་ཕྱིན༔ ཐོད་མཁར་སྒོ་བཅད་ནང་དུ་མ་ཐར་ནས༔ གཡོག་མོ་ཀུ་མཱ་ར་ལ་འཕྲིན་བརྒྱུད་པས༔ ལན་ནི་མ་བྱུང་བརྗེད་དམ་སྨྲས་པ་ཡིས༔ ཤེལ་གྱི་བུམ་པ་ཁུར་ནས་ཆུ་ལེན་འདུག༔ ངས་བསྐུར་བྱས་པས་བུམ་སྟེགས་ཁ་རུ་བཞག༔ རྒྱལ་བས་བུམ་སྟེགས་བུམ་པ་འབྱར་དུ་བཅུག༔ ལངས་པར་མ་གྱུར་ཁུག་ཁུག་ལན་འགའ་བྱས༔ བུམ་ཐག་ཕུད་ནས་རྒྱལ་བའི་མདུན་དུ་འོངས༔ ཤེལ་གྱི་གྲི་གུས་བྲང་གཤགས་ཁ་ཕྱེ་ནས༔ ཞི་བ་རྡོ་རྗེ་དབྱིངས་ཀྱི་ལྷ་ཚོགས་རྣམས༔ བཀྲ་ལམ་བསྟན་ནས་ངག་ནས་འདི་སྐད་གསུངས༔ ཁྱོད་ཀྱང་སྔགས་པ་ནུས་མཐུ་ཅན་འདུག་སྟེ༔ དེ་བས་ངའི་འདི་ཡ་མཚན་མི་ཆེའམ༔ དེ་སྐད་ཟེར་བས་ཕྱག་བཙལ་བསྐོར་བ་བྱས༔ མཆོག་དབང་གོང་མ་བདག་ལ་བསྐུར་དུ་གསོལ༔ ང་ནི་གཡོག་ཡིན་ནང་དུ་འདེང་ཟེར་ཕྱིན༔ ཉི་ཟླའི་ཁྲི་བརྩེགས་ཉི་ཟླའི་གདུགས་ཕུབ་པ༔ ཉི་མ་ཟླ་བའི་རྒྱན་དྲུག་སྐུ་ལ་གསོལ༔ དགེ་སློང་མ་བཞུགས་ཕྱག་བཙལ་བསྐོར་བ་བྱས༔ གསེར་གྱི་འཁོར་ལོ་རྩིབས་སྟོང་ཕུལ་ནས་ནི༔ ཕྱི་ནང་གསང་བའི་དབང་བསྐུར་ཞུ་གསོལ་བས༔ ལྷ་ཚོགས་མདུན་གྱི་ནམ་མཁར་ཁྲ་ཆེམ་བྱུང་༔ སྐལ་ལྡན་རིགས་ལྡན་ད་ལྟ་དབང་ཞུས་གསུངས༔ བླ་མ་མེད་པའི་གོང་རོལ་ན༔ སངས་རྒྱས་བྱ་བའི་མིང་ཡང་མེད༔ བསྐལ་པ་སྟོང་གི་སངས་རྒྱས་ཀྱང་༔ བླ་མ་དག་ལ་བརྟེན་ནས་བྱུང་༔ དཔལ་ལྡན་བླ་མ་ཡོན་ཏན་མཚོ༔ བཞིན་གྱི་དཀྱིལ་འཁོར་ལེགས་བསྟན་ནས༔ ཐུགས་རྗེས་སློབ་མ་ལ་གཟིགས་ཞུ༔ དབང་ནི་ལྷ་ལ་མི་ཞུ་བླ་མར་ཞུ༔ དེ་སྐད་སྨྲས་པས་དགེ་སློང་མའི་ཞལ་ནས༔ དབང་ཞུ་ཤེས་གསུངས་ལྷ་ཚོགས་ཐུགས་ཀར་བསྡུས༔ རྡོ་རྗེ་གྲོ་ལོད་ཡི་གེ་ཧཱུྃ་དུ་བསྒྱུར༔ ཞལ་དུ་མིད་ནས་བྱིན་གྱིས་བརླབས་པ་ཡིས༔ ཕྱི་ལྟར་སངས་རྒྱས་སྣང་བ་མཐའ་ཡས་སྐུ༔ ཚེ་ཡི་རིག་འཛིན་གྲུབ་པའི་དབང་རྣམས་ཐོབ༔ ཁོང་པའི་ནང་སླེབས་བྱིན་གྱིས་བརླབས་པ་ཡིས༔ ནང་ལྟར་འཕགས་པ་སྤྱན་རས་གཟིགས་ཀྱི་སྐུ༔ ཕྱག་རྒྱ་ཆེན་པོ་བསྒོམ་པའི་དབང་རྣམས་ཐོབ༔ གསང་བའི་པདྨོར་བཏོན་ནས་བྱིན་བརླབས་པས༔ ལུས་ངག་ཡིད་གསུམ་ཤེས་སྒྲིབ་དག་པར་སྦྱངས༔ གསང་བ་ལྟར་ན་རྟ་འགྲིན་དབང་གི་སྐུ༔ དྲེགས་པའི་ལྷ་འདྲེ་དམ་ལ་འདོགས་དབང་ཐོབ༔ དེ་ནས་འོག་མིན་ཆོས་དབྱིངས་ཕོ་བྲང་དུ༔ སྟུག་པོ་བཀོད་པ་བཀོད་པ་ལྷུན་གྲུབ་ན༔ རྒྱལ་བ་རྒྱ་མཚོ་རྣམས་ཀྱི་བཀའ་སྡོད་པ༔ རིག་འཛིན་རྡོ་རྗེ་རྒྱས་བྱ་བའི་མིང་ཡང་མེད༔ བསྐལ་པ་སྟོང་གི་སངས་རྒྱས་ཀྱང་༔ བླ་མ་དག་ལ་བརྟེན་ནས་བྱུང་༔ དཔལ་ལྡན་བླ་མ་ཡོན་ཏན་མཚོ༔ བཞིན་གྱི་དཀྱིལ་འཁོར་ལེགས་བསྟན་ནས༔ ཐུགས་རྗེས་སློབ་མ་ལ་གཟིགས་ཞུ༔ དབང་ནི་ལྷ་ལ་མི་ཞུ་བླ་མར་ཞུ༔ དེ་སྐད་སྨྲས་པས་དགེ་སློང་མའི་ཞལ་ནས༔ དབང་ཞུ་ཤེས་གསུངས་ལྷ་ཚོགས་ཐུགས་ཀར་བསྡུས༔ རྡོ་རྗེ་གྲོ་ལོད་ཡི་གེ་ཧཱུྃ་དུ་བསྒྱུར༔ ཞལ་དུ་མིད་ནས་བྱིན་གྱིས་བརླབས་པ་ཡིས༔ ཕྱི་ལྟར་སངས་རྒྱས་སྣང་བ་མཐའ་ཡས་སྐུ༔ ཚེ་ཡི་རིག་འཛིན་གྲུབ་པའི་དབང་རྣམས་ཐོབ༔ ཁོང་པའི་ནང་སླེབས་བྱིན་གྱིས་བརླབས་པ་ཡིས༔ ནང་ལྟར་འཕགས་པ་སྤྱན་རས་གཟིགས་ཀྱི་སྐུ༔ ཕྱག་རྒྱ་ཆེན་པོ་བསྒོམ་པའི་དབང་རྣམས་ཐོབ༔ གསང་བའི་པདྨོར་བཏོན་ནས་བྱིན་བརླབས་པས༔ ལུས་ངག་ཡིད་གསུམ་ཤེས་སྒྲིབ་དག་པར་སྦྱངས༔ གསང་བ་ལྟར་ན་རྟ་འགྲིན་དབང་གི་སྐུ༔ དྲེགས་པའི་ལྷ་འདྲེ་དམ་ལ་འདོགས་དབང་ཐོབ༔ དེ་ནས་འོག་མིན་ཆོས་དབྱིངས་ཕོ་བྲང་དུ༔ སྟུག་པོ་བཀོད་པ་བཀོད་པ་ལྷུན་གྲུབ་ན༔ རྒྱལ་བ་རྒྱ་མཚོ་རྣམས་ཀྱི་བཀའ་སྡོད་པ༔ རིག་འཛིན་རྡོ་རྗེ་ཆོས་ནི་ཞེས་ཀྱང་བྱ༔ རྡོ་རྗེ་སྙིང་པོ་འཛིན་པ་ཞེས་ཀྱང་བྱ༔ རིག་འཛིན་རྒྱལ་པོ་ཀུན་ཛ་ར་ཞེས་པ༔ དུང་ལ་ཕོ་ཚོས་བསྐུས་པའི་ཞལ་བསྟན་ནས༔ ལྷ་ཡི་བུ་དང་བུ་མོ་མང་པོས་བསྐོར༔ འཇའ་དང་འོད་དང་རོལ་མོའི་སྒྲ་དང་བཅས༔ གནས་དེ་ཉིད་དུ་བཀའ་གཏད་དབང་རྣམས་བསྐུར༔ ཡོངས་སུ་འཛིན་པ་དགེ་བའི་བཤེས་གཉེན་དབང་༔ ཕྱི་ཡི་ཆས་བརྒྱད་སྤྲུལ་པའི་སྐུ་རུ་བསྐུར༔ ཆོས་བཀའ་གཏད་པ་པོ་ཏི་གླེགས་བམ་དབང་༔ ནང་གི་ཆས་བརྒྱད་ལོངས་སྤྱོད་རྫོགས་སྐུར་བསྐུར༔ རིག་པའི་རྩལ་དབང་ཡི་དམ་ལྷ་ཡི་དབང་༔ གསང་བའི་ཆས་བརྒྱད་ཆོས་ཀྱི་སྐུ་རུ་བསྐུར༔ ཡོངས་རྫོགས་ཕྱག་རྒྱ་ཆེན་པོ་མཆོག་གི་དབང་༔ དབང་གི་ཆས་བཅུ་མི་འགྱུར་རྡོ་རྗེར་བསྐུར༔ སྐུ་ལྔའི་བདག་ཉིད་བླ་མ་རྡོ་རྗེ་འཆང་༔ ཡུམ་འཁྲིལ་ལྟ་བ་སྤྱི་འབྱམས་མངོན་བྱང་བསྐུར༔ དེ་ནས་སྦས་པའི་དབང་ལྔ་བསྐུར་བ་ནི༔ རཏྣའི་སྲིད་དབང་ཛམ་ལའི་ནོར་དབང་དང་༔ བྲམ་ཟེའི་གཏེར་དབང་དྲེགས་པའི་སྲོག་དབང་དང་༔ སྡུད་པའི་ཁྲོམ་དབང་བཅས་པ་བསྐུར་བར་གྱུར༔ དེ་ནས་རྡོ་རྗེ་གྲོ་ལོད་ལུང་བསྟན་ཏེ༔ རྒྱ་གར་གསེར་གླིང་དབེན་སྐྱོང་བྲག་ཕུག་ན༔ རྒྱལ་པོ་སྐར་རྒྱལ་ཞེས་བྱའི་སྲས་པོ་ནི༔ ཤྲཱི་སིངྷ་ཞེས་བྱ་བཞུགས་ནས་ཡོད༔ ཆོས་རྣམས་ཐམས་ཅད་དབྱེར་མེད་གཅིག་སྒོམ་པ༔ ངོ་སྤྲོད་གནད་དུ་བསྣུན་ཅིག་ས་མ་ཡ༔ དེ་ནས་ཤྲཱི་སིངྷའི་དྲུང་དུ་བྱོན༔ ཆོས་ཀུན་དབྱེར་མེད་དོན་དམ་གནད་ཅིག་ཞུ༔ ཤྲཱི་སིངྷས་མཁའ་ལ་སྡིག་མཛུབ་གཏད༔ གང་ཤར་མ་ཞེན་གང་ཤར་མ་ཞེན་ཅིག༔ མ་ཤར་མ་ཤར་ཤར་ཤར་ཤར་མ་ཞེན༔ ཤར་གྲོལ་དུས་མཉམ་ཤར་གྲོལ་དུས་མཉམ་མོ༔ སྟོང་སྟོང་མི་སྟོང་མི་སྟོང་རྣམ་པར་སྟོང་༔ མ་འགགས་མ་འགགས་འགགས་འགགས་འགག་པ་མེད༔ ཡེ་སྟོང་ཡེ་སྟོང་རྣམ་སྟོང་རྣམ་པར་སྟོང་༔ སྟེང་འོག་བར་མཚམས་ཕྱོགས་མེད་ཀུན་ཤར་འདི༔ ཤྲཱི་སིངྷའི་དོན་དམ་གནད་དེ་མཛོད༔ ལྟ་སྤྱོད་སྣོད་རུང་དབྱེར་མེད་ངང་གིས་འཆར༔ ཞེས་གསུངས་རྡོ་རྗེ་ལྟ་བུའི་ཀློང་དུ་ཐིམ༔ ཡུལ་གྱི་མིང་ནི་སཱ་ལའི་ཡུལ་དུ་བྱོན༔ དུར་ཁྲོད་ཆེན་པོ་གསང་ཆེན་རོལ་པ་ཞེས༔ མཐའ་སྐོར་དཔག་ཚད་ཕྱེད་དང་བཞི་ཡོད་པའི༔ དབུས་ན་རང་བྱུང་མཆོད་རྟེན་ཀ་པ་ཏ༔ མ་མོ་ཆེན་མོ་བཻཏྟཱ་ལཱི་གནས་པ༔ ལྷོ་ནུབ་ལྗོན་པའི་དུར་ཤིང་གསེར་ལྡན་ལ༔ དུར་གྱི་སེམས་ཅན་མང་པོ་ཤིང་ཏོག་ལེན༔ ནུབ་བྱང་དུར་ཆུ་མཆོག་མཚོ་ཞེས་བྱ་བ༔ དུར་གྱི་སེམས་ཅན་མང་པོ་གནས་པ་ཡོད༔ ཀླུ་དབང་གནོད་སྦྱིན་བུ་མོ་རོ་ལེན་མ༔ བྱང་ཤར་དུར་མེ་དུད་སྤྲིན་ཞེས་བྱ་བ༔ མེ་ང་འཚུབ་གསེབ་འདྲེ་སྲིན་ཕོ་མོ་རྣམས༔ ལ་ལ་མི་རོ་རྟ་རོ་བ་ལང་དང་༔ སེམས་ཅན་རིགས་བྱེད་ཟ་བ་དཔག་མེད་རྩེ༔ ཤར་ལྷོ་དུར་ང་ལངས་འབྱིན་ཞེས་བྱ་བ༔ ཁམ་ནག་གསེབ་ན་སེམས་ཅན་མི་འདྲ་བ༔ དཔག་ཏུ་མེད་པ་ལ་ལ་ཤི་བར་གྱུར༔ ལ་ལ་སྐྱེ་ཞིང་ལ་ལ་རྒས་པ་ཡོད༔ ནུབ་ན་དུར་རི་ལྷ་མིན་འབབ་ཅེས་པར༔ དུར་གྱི་སེམས་ཅན་མང་པོ་མི་འདྲ་གནས༔ དབུལ་བྲལ་ཡིད་བཞིན་ནོར་བུའི་གཏེར་ཡོད་པ༔ བྱང་ན་འདུ་འཆང་མ་ཞེས་ལྷ་མོའི་གཟུགས༔ སེར་མོ་ལུས་ལ་རྒོད་ཀྱི་ཐུལ་བ་གྱོན༔ ལག་པས་བམ་གྱི་ཁོག་སྟོད་ཁོག་སྨད་འདྲལ༔ རྒྱབ་ན་མི་མགོ་ོན་པའི་སེ་ལེ་ཁུར༔ ལུག་ནག་ཀེང་རུས་སྒ་ཆས་བྱས་པ་ཞོན༔ ཤར་ན་ཀ་ཅའི་བདག་མོ་ཞེས་བྱ་བ༔ དམར་མོ་མི་རོ་ཞོན་ནས་ཞིང་དབྱུག་འཕྱར༔ ཤིན་ཏུ་འཇིགས་པའི་དུར་ཁྲོད་ཆེན་པོ་དེར༔ མཆོད་རྟེན་རྒྱབ་བརྟེན་ལོ་ལྔའི་བར་དུ་ནི༔ མཁའ་འགྲོ་རྣམས་ལ་ཆོས་ཀྱི་འཁོར་ལོ་བསྐོར༔ གསང་བའི་མཚན་ནི་ཐོད་ཕྲེང་རྩལ་དུ་གྲགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དུར་ཁྲོད་ཆེན་པོ་གསང་ཆེན་རོལ་པར་བཞུགས་པའི་ལེའུ་སྟེ་སོ་བཞི་པའོ༔ ༔
པདྨ་བཀའ་ཐང་ལེའུ་ ༣༥ སྤྱན་རས་གཟིགས་ཀྱིས་ལུང་བསྟན་ནས་རྒྱ་ནག་ཡུལ་དུ་བཞུགས་པ།
དེ་ནས་རྒྱ་ནག་རི་བོ་རྩེ་ལྔའི་ཤར༔ ཆུ་བོ་སུ་ཏ་སི་རི་ཞེས་བྱའི་འགྲམ༔ རི་བོ་དེ་ཤན་རྩེ་ལ་འཇམ་དཔལ་བཞུགས༔ དེ་ཡང་སངས་རྒྱས་ཤཱཀྱ་ཐུབ་པ་ཡིས༔ རྒྱ་གར་ཆོས་ཀྱི་འཁོར་ལོ་བཞི་བསྐོར་ནས༔ རྒྱ་ནག་རྒྱལ་ཁམས་ཆོས་ལ་འཛུད་པར་དགོངས༔ རྒྱ་ནག་ཡུལ་དུ་ཆོས་ཀྱི་འཁོར་ལོ་བསྐོར༔ དགེ་བའི་ཕན་ཡོན་སྡིག་པའི་ཉེས་དམིགས་གསུངས༔ སུ་ཡང་ཉན་མཁན་མེད་ཅིང་སྐུར་བ་འདེབས༔ དོན་དམ་བདེན་པའི་ཆོས་ཀྱིས་མ་ཐུལ་བས༔ ཐུགས་མུག་བྱ་རྒོད་ཕུང་པོའི་རི་ལ་བཞུགས༔ ཀུན་རྫོབ་བདེན་པ་རྩིས་ཀྱིས་འདུལ་བར་དགོངས༔ རྒྱ་ནག་རི་བོ་རྩེ་ལྔ་ཞེས་བྱ་བ༔ འོད་ཟེར་ཁ་དོག་རྣམ་པ་ལྔ་ལྡན་པའི༔ རྩེ་ལ་མཆོད་རྟེན་རིགས་ནི་ལྔ་ཡོད་པ༔ རྨང་ན་ཛམྦཱུ་ཏྲི་ཤའི་ཤིང་སྐྱེས་པ༔ དེ་ལ་གཙུག་ནས་འོད་ཟེར་སེར་པོ་བསྟིམས༔ མཁྱེན་རབ་བདག་པོ་འཕགས་པ་འཇམ་དཔལ་ཞེས༔ ཤིང་ནི་ཛམྦཱུ་ཏྲི་ཤའི་ལྦ་བ་ལས༔ མི་འགྱུར་གསེར་ལྟར་བརྫུས་ནས་སྐུ་འཁྲུངས་ཏེ༔ བསྐྱེད་པའི་ཡབ་མེད་བལྟམས་པའི་ཡུམ་ཡང་མེད༔ འཁོར་བའི་སྐྱོན་གྱི་དྲི་མས་མ་གོས་པའི༔ གཡས་པའི་ཕྱག་ན་ཤེས་རབ་རལ་གྲི་གདེངས༔ གཡོན་པའི་ཕྱག་ན་པོ་ཏི་ཨུཏྤལ་བསྣམས༔ སྤྱི་བོའི་གཙུག་ན་མཐིང་གི་ཤོག་བུ་ལ༔ གསེར་གྱི་རུས་སྦལ་འཇའ་ཚོན་སྣ་ལྔས་བསྐོར༔ ཆུ་བོ་སུ་ཏ་སི་རིའི་གཏིང་དུ་སོང་༔ དེ་ཡི་ལྦུ་བར་རུས་སྦལ་དཀར་པོ་བྱུང་༔ ཕོ་སྦལ་མོ་སྦལ་གཉིས་ནི་བཤོས་པ་ཡིས༔ དེ་ལས་རུས་སྦལ་རྣམ་པ་ལྔ་བྱུང་སྟེ༔ ཤཱཀ་ཐུབ་ལྷ་ཡུལ་འོད་ཟེར་དཀར་པོ་སྤྲོས༔ ལྷ་མོ་རྣམ་རྒྱལ་མ་ཞེས་རྒྱན་ལྡན་ཞིག༔ འཕགས་པ་འཇམ་དཔལ་ཉིད་ཀྱི་མདུན་དུ་བྱུང་༔ འཇམ་དཔལ་སྤྲུལ་པའི་རུས་སྦལ་ཕྱག་མཐིལ་བླངས༔ འདི་ནི་མ་ཧཱ་གསེར་གྱི་རུས་སྦལ་ཏེ༔ རུས་སྦལ་རྩ་བ་འདུས་པའི་རྒྱུད་བདུན་གསུངས༔ དེ་ནས་གསོན་རྩིས་ཉི་ཁྲི་ཆིག་སྟོང་བཤད༔ གཤིན་པོའི་རྩིས་ལ་ཉི་ཁྲི་ཆིག་སྟོང་དང་༔ བག་མའི་རྩིས་ལ་ཉི་ཁྲི་ཆིག་སྟོང་དང་༔ ས་དཔྱད་རྩིས་ལ་ཉི་ཁྲི་ཆིག་སྟོང་དང་༔ རྩིས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས༔ ཛམྦཱུའི་གླིང་གི་སེམས་ཅན་ཐམས་ཅད་ཀུན༔ འཇིག་རྟེན་ཀུན་རྫོབ་གཙུག་ལག་བཤད་ལ་འདུས༔ ཆོས་ལ་ཉན་མཁན་མེད་པར་ནུབ་ལ་ཐུག༔ འཕགས་པ་འཇམ་དཔལ་ཐུགས་ཀྱི་དགོངས་པ་ལ༔ ཐུབ་པའི་དོན་དམ་ཆོས་ལ་མི་ཉན་ཟེར༔ ང་ཡིས་ཀུན་རྫོབ་བཤད་ལ་ཡིད་ཆེས་འདུ༔ རྩིས་འདི་མ་བསྣུབས་དམ་ཆོས་མི་དར་བསམ༔ གཙུག་ལག་སྒོ་མོ་བརྒྱད་ཁྲི་བཞི་སྟོང་རྣམས༔ ཟངས་ཆེན་གའུ་ཁ་སྦྱར་ནང་དུ་བཅུག༔ རི་བོ་རྩེ་ལྔའི་བྱང་ཤར་གཏེར་དུ་སྦས༔ དེ་དུས་ཁམས་གསུམ་སེམས་ཅན་ཐམས་ཅད་ལ༔ ཚེ་ཐུང་ནད་མང་ནོར་དབུལ་མི་མི་འཕེལ༔ འབྲོག་པ་ཕྱུགས་ཉེས་བོད་པ་ལོ་ཉེས་ཤིང་༔ མུ་གེ་དམག་འཁྲུག་མི་ནད་ཕྱུགས་ནད་དར༔ ཉི་མ་ཤར་ལྷོའི་རི་བོ་དཀར་གསལ་རྩེའི༔ བྱང་ཆུབ་སེམས་དཔའ་སྤྱན་རས་གཟིགས་ཀྱི་ནི༔ རྒྱལ་བའི་སྲས་པོ་པད་འབྱུང་དྲུང་དུ་འོངས༔ ང་ཡིས་འཁོར་བ་དོང་ནས་ལན་གསུམ་སྤྲུགས༔ གཅིག་ཀྱང་མེད་སྙམ་རི་བོ་ཏ་ལར་བལྟས༔ སྔར་བཞིན་འདུག་ནས་མིག་ནས་མཆི་མ་ཕྱུང་༔ སྲིན་ལག་བླངས་གཏོར་འགྲོ་དོན་སྨོན་ལམ་བཏབ༔ གངས་ཆུང་ཚེ་འཕོས་བདེ་མཆོག་བྱ་བར་སྐྱེས༔ དེ་ལ་བུ་བཞི་གསུམ་གྱི་གོང་མ་ཁྱོད༔ སེམས་ཅན་མི་བདེའི་ཉེས་པ་འདི་དག་རྣམས༔ གཙུག་ལག་གཏེར་དུ་སྦས་པས་ལན་པ་ཡིན༔ ཁྱོད་ཀྱིས་ཚངས་པར་སྤྲུལ་ལ་གཏེར་འདི་ཐོན༔ འགྲོ་ཀུན་འོ་བརྒྱལ་ཉེན་ཕྱིར་ལུང་འདི་བསྟན༔ ཞེས་གསུངས་སླར་ཡང་རི་བོ་ཏ་ལར་བྱོན༔ དེ་ནས་གུ་རུ་པདྨ་འབྱུང་གནས་ཀྱིས༔ ལྷའི་བུ་ཚངས་པ་གདོང་བཞིར་སྤྲུལ་ནས་སུ༔ འཕགས་པ་འཇམ་དཔལ་བཞུགས་པའི་དྲུང་དུ་ཕྱིན༔ འཇམ་དཔལ་དཔྱད་འདི་དོན་དམ་བདེན་མིན་ཀྱང་༔ ཀུན་རྫོབ་བདེན་པས་སེམས་ཅན་ཕན་ཐོགས་འདུག༔ རྩིས་འདི་གཏེར་ནས་ཕྱུང་ལ་ང་ལ་ཤོད༔ དུས་དེར་ལྷ་མོ་རྣམ་རྒྱལ་མ་ཡང་བྱུང་༔ ཀླུ་རྒྱལ་འཇོག་པོ་སྦྲུལ་མགོ་བདུན་པ་བྱུང་༔ འཕགས་པས་ཞལ་གྱིས་བཞེས་ཏེ་གཏེར་ནས་ཕྱུང་༔ མཐིང་ཤུན་གུར་ཕུབ་ཤིང་རྟའི་འཁོར་ལོས་དྲངས༔ ཁ་ཕྱེ་རྩིས་སྒོ་བརྒྱད་ཁྲི་བཞི་སྟོང་བཤད༔ དང་པོ་སྤང་རྒྱན་བླ་མ་བཅུ་སྐོར་བཤད༔ རྒྱ་མ་ལས་ཀྱི་སྐོར་མགོ་དྲུག་ཅུ་དང་༔ སྡོང་པོ་དགུ་འདུས་དཀའ་བ་དགུ་བསྒྲིལ་དང་༔ རྒྱ་ཡི་ཞིབ་གཤེར་ས་དཔྱད་ཨ་བྱི་ཏ༔ གནམ་ས་རྗེས་གཅོད་འབྱུང་བ་སེལ་གཞིག་དང་༔ བག་མ་གི་གོང་རྒྱ་མོ་དར་ཚགས་དང་༔ གཤིན་རྩིས་ཟངས་སྐྱམ་མ་བུ་བཅོ་ལྔ་པ༔ བཅོ་བརྒྱད་པ་དང་ཆུང་དུར་ལ་སོགས་པ༔ བཅུ་གསུམ་པ་དང་བལ་མོ་ལྡེམ་སྐོར་དང་༔ དམིགས་སེལ་རྣམ་བཞི་འབྱུང་བ་ལྔ་བརྩེགས་དང་༔ འཇམ་ཡིག་མདོ་འགྲེལ་གཞུང་དཔྱད་ལྔ་པ་དང་༔ དར་རྒུད་འཕྲུལ་གྱི་མེ་ལོང་ལ་སོགས་པ༔ གཙུག་ལག་སྡེ་དགུ་གྱིམ་ཤང་རྣམ་པ་གསུམ༔ གབ་རྩེ་ལྔ་བརྩེགས་ལ་སོགས་ཐོག་མར་གསུངས༔ བར་དུ་རྒྱ་ཡི་བསྟན་པ་བཅོ་བརྒྱད་བཤད༔ ཁྲ་བོ་གཟི་མིག་ཏྲཱི་ཀ་དུམ་དམར་ནག༔ བྱ་ར་དགུ་སྐོར་གཅེར་མཐོང་ཕྱི་ནང་དང་༔ བསམ་ལས་བྱུང་ཚོར་རྒྱ་རྒྱུད་རིང་ཐུང་བརྩེགས༔ གསེར་གྱི་མེ་ཏོག་དཔལ་འབར་མིའི་འཁྲུངས་དཔེ༔ གསེར་དཔེ་བཅུ་གཉིས་གསང་མཛོད་ཆེ་ཆུང་འབྲེལ༔ གནམ་ས་བཀོད་པའི་ཕྱགས་ཤིང་གཅེས་བསྡུས་ཡིག༔ མན་ངག་ཐུགས་སྒྲོམ་རྣོ་མཉེན་འཕྲུལ་དར་ཚགས༔ སྨེ་བའི་སྡེ་མིག་ཀ་ཁ་རབ་འབྲིང་དང་༔ རྩེ་འཛིན་བདུན་བརྒྱ་ཉི་ཤུར་བལ་ཡིག་ནི༔ སུམ་བརྒྱ་དྲུག་ཅུ་དང་ནི་བཅོ་བརྒྱད་གསུངས༔ གསུམ་པ་ཕྱི་རྒྱུད་ནང་རྒྱུད་གསང་རྒྱུད་གསུམ༔ ཡང་གསང་ཐུགས་རྒྱུད་སྡེ་རུ་ལོངས་པའི་རྒྱུད༔ སྡེ་རུ་ལོངས་པ་འཇིག་རྟེན་གཙུག་ལག་རྒྱུད༔ མཁའ་འགྲོ་གཙུག་ལག་རྡོ་རྗེ་གཙུག་ལག་རྒྱུད༔ སྡོང་པོ་དགུ་འདུས་སྣང་གསལ་སྒྲོན་མེའི་རྒྱུད༔ ཞིབ་གཤེར་ནག་པོ་ཀ་བ་ནག་རྒྱུད་བདུན༔ ཕྱི་རྒྱུད་ཁྲ་བོ་རྒྱ་ཆེར་འགྲེལ་པའི་རྒྱུད༔ དར་རྒུད་སྙིང་རྒྱུད་འཕྲུལ་གྱི་མིག་ཚགས་དང་༔ བར་རྒྱུད་གསེར་མིག་གསལ་བ་རྒྱུད་ཕྱིའོ༔ དར་རྒུད་གསལ་བའི་རྒྱུད་དང་འཁྲུགས་ཡིག་རྒྱུད༔ ནང་གི་སྤར་ཁ་སྨེ་བའི་རྒྱུད་ལ་ནི༔ སྤར་ཁ་དག་ལ་རྒྱུད་ནི་སྡེ་བརྒྱད་དོ༔ སྤར་ཁ་འཁྲུགས་ཡིག་རྩ་བའི་རྒྱུད་དང་ནི༔ སྤར་ཁ་འཇམ་ཡིག་མདོ་འགྲེལ་གསེར་འགྲེལ་རྒྱུད༔ སྤར་ཁ་གསེར་ཐིག་གསེར་གྱི་ཉེའུ་ཆུང་རྒྱུད༔ གསེར་གྱི་ཕྱེ་ལེབ་སྡོམ་ཚིག་འཁོར་ལོའི་རྒྱུད༔ སྤར་ཁ་ས་རིས་ཆེན་མོའི་རྒྱུད་རྣམས་སོ༔ སྨེ་བ་འདི་ལ་རྒྱུད་སྡེ་ལྔ་རུ་ཡོད༔ སྨེ་བ་དགུ་གླིང་གསང་བའི་རྒྱུད་དང་ནི༔ ཧ་ལོ་འབར་རྒྱུད་རྒྱ་ཆེར་འགྲེལ་པའི་རྒྱུད༔ ཟ་འོག་གུར་རྒྱུད་དམར་ནག་འཁྲུག་རྒྱུད་དོ༔ སྨེ་སྒོ་ནུབ་བསྟན་ཕོ་དྲུག་གནམ་དུ་འགྲོ༔ མོ་དྲུག་སར་འགྲོ་དབུས་ནས་ལྷོ་ནུབ་ལུག༔ སྦྲུལ་དང་ཁྱི་སྟག་བྱ་འབྲུག་བྱི་བ་གླང་༔ རང་ཐོག་ཕོ་དྲུག་གཡས་ལ་མོ་དྲུག་གཡོན༔ ཡང་གསང་ཐུགས་ལ་ཐེབས་ཟློག་ནག་པོའི་རྒྱུད༔ མངལ་མཚོན་ང་རྒྱུད་གྱིམ་ཤང་ལྟོ་ཡི་རྒྱུད༔ གའུ་དམར་ནག་སེ་ལུང་ཁུག་པའི་རྒྱུད༔ སྙིང་གཟེར་སྲོག་ཏིག་ནག་པོའི་རྒྱུད་དང་ནི༔ སྲིད་པའི་ལྟོ་རྒྱུད་ཆེ་འབྲིང་ཆུང་གསུམ་མོ༔ གབ་རྩེ་རྣམ་བརྒྱད་ཕྱི་ཡི་སྐོར་འགོ་དྲུག༔ སྤར་ཁ་སྨེ་བ་དར་རྒུད་རྣམ་པ་གསུམ༔ ལོ་དང་ཟླ་བ་གཟའ་དང་སྐར་མ་གསུམ༔ ནང་གི་སྐོར་འགོ་རྣམ་པ་དྲུག་དག་པ༔ ལུས་སྲོག་དབང་ཐང་ང་རྟ་བླ་ཁམས་དྲུག༔ གསང་བའི་སྐོར་འགོ་རྣམ་པ་དྲུག་ཡིན་ཏེ༔ སྐྱེས་ང་སྤར་སྨེ་ཕྱི་ཡི་ལོག་མིན་གསུམ༔ དགུ་མིག་དུར་མིག་སྐག་དང་རྣམ་པ་གསུམ༔ བཞི་པ་གཙུག་ལག་དཔྱད་དུ་གསུངས་པ་ནི༔ སྣང་གསལ་སྒྲོན་མ་ལྷ་ལ་གདམས་པའི་རྒྱུད༔ གསང་འགྲེལ་མ་ཧཱ་ནག་པོ་རྩ་བའི་རྒྱུད༔ རུས་སྦལ་ཁྲ་བོ་མདོག་གཅོད་ང་གི་ནི༔ ར་རུ་བསེ་རུ་ལྕགས་བཞི་མེ་བརྒྱད་དང་༔ སྤར་ཁའི་གཞུང་དཔྱད་ཆེ་ཆུང་གཟའ་རྒྱུད་གཉིས༔ གཟའ་བཞི་མས་རླུང་གོང་ཕུར་ལྡེ་མིག་དང་༔ དགུ་མིག་དུར་མིག་སྤར་གྱི་འབུམ་ནག་དང་༔ ལྟོ་བཞི་གསེར་འགྲེལ་གཟའ་ཉི་དགུ་ཞུར་དང་༔ སྤར་ཁ་བསྟན་རྒྱུད་སྦྲ་རྟགས་གསེར་ལས་བཅུ༔ བསམ་ཀ་ཕྱི་ལྟ་བསམ་ཀ་དགུ་སུམ་འགྱུར༔ སྐྱེ་གནས་གསུམ་པ་མངལ་ཕུགས་ས་དཔྱད་རྒྱུད༔ དེབས་ཆེན་དེབས་ཆུང་རྒྱ་ཡི་ནང་དཔྱད་ཆེ༔ འབྱུང་ཆེན་འབྱུང་ཆུང་སྐོར་ཡིག་སྨད་ལྔ་བཅུ༔ ཁྲོམ་རྩིས་ཆེན་མོ་ལེའུ་བརྒྱད་ཅུ་པ༔ ལྟོ་སྒྲོམ་འབུམ་ཏིག་འབྲུག་རྩིས་གསལ་བཀྲ་གཉིས༔ འབྱུང་བ་སྣང་གི་མེ་ལོང་རྒྱའི་སྤུངས་ལྟོ༔ དས་ཆད་ནག་པོ་ཟླ་གསང་སྟག་ཤམ་ནག༔ ས་དཔྱད་རིན་ཅེན་ཕྲེང་བ་དཔྱད་སྤྱང་ཀི༔ འཇིག་པའི་ལྕེ་མདུང་ཆེན་པོ་བཅུ་གསུམ་དང་༔ ཟངས་སྐྱམ་རྡེའུ་ནག་སྲིད་པའི་དུར་སྒྲོམ་དང་༔ ཟངས་སྐྱམ་གྱི་འགྲོས་ཟངས་སྐྱམ་མེ་ལོང་ལྔ༔ ཟངས་སྐྱམ་ཞུ་རུ་ཟངས་སྐྱམ་པདྨ་དང་༔ དཔྱད་ཀྱི་ཁོག་པ་ཆེན་པོ་ལ་སོགས་པ༔ གབ་རྩེ་སུམ་བརྒྱ་དང་ནི་དྲུག་ཅུ་བཤད༔ མཚན་ནི་ཚངས་པ་གདོང་བཞི་པ་རུ་གྲགས༔ གཙུག་ལག་ཚངས་པའི་སྤྱི་རྒྱུད་བཞི་ཡང་མཛད༔ ཤར་གདོང་དཀར་པོས་གསོན་རྩིས་ལེགས་བཤད་མཛད༔ བྱང་གདོང་ནག་པོས་གཤིན་རྩིས་ཟངས་སྐྱམ་མཛད༔ ནུབ་གདོང་དམར་པོས་བག་རྩིས་བཀྲ་བཞི་མཛད༔ ལྷོ་གདོང་སེར་པོས་ས་དཔྱད་རིན་སྤུངས་མཛད༔ གདོང་བཞི་གཅིག་དྲིལ་ཚངས་པ་བཞི་འདུས་མཛད༔ སྤྱི་དྲིལ་རྩིས་འདུས་མ་རིག་མུན་སེལ་མཛད༔ སྒོས་བཅོས་ཕན་ཐབས་ནམ་མཁའ་མཛོད་བརྙེས་མཛད༔ བྱེ་བྲག་དམག་ལྟོ་ཁྲོམ་རྩིས་གྱིམ་ཤང་མཛད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྤྱན་རས་གཟིགས་ཀྱིས་ལུང་བསྟན་ནས་རྒྱ་ནག་ཡུལ་དུ་བཞུགས་པའི་ལེའུ་སྟེ་སོ་ལྔ་པའོ༔ ༔
པདྨ་བཀའ་ཐང་ལེའུ་ ༣༦ སངས་རྒྱས་བསྟན་པ་སྲུང་ཐབས་མཛད་པ།
དེ་ནས་རྒྱ་གར་ཡུལ་གྱི་ཕར་མཐའ་ན༔ རྒྱ་ནག་ཆེན་པོའི་ཡུལ་གྱི་ཚུར་མཐའ་ན༔ བཤན་པའི་གྲོང་ཁྱེར་སྡིག་ཅན་བྱ་བ་ཡོད༔ དེ་དག་མཐུན་པས་མཐུན་པ་གདུལ་བའི་ཕྱིར༔ རིགས་ངན་ཁྱིམ་པ་གཉིས་ཀྱི་བུ་རུ་སྤྲུལ༔ གདོལ་པ་ལག་ངན་ཀ་ཏི་ཞེས་བྱ་བས༔ འཇག་མའི་སྤྱིལ་པོ་ཅིག་ནི་ཕུབ་ནས་སུ༔ མི་རྣམས་ཐམས་ཅད་དད་པ་ལྡོག་པའི་ཕྱིར༔ རི་དྭགས་སེམས་ཅན་ཐམས་ཅད་བསད་ཅིང་ཟོས༔ དེས་ཀྱང་མ་ཚིམ་རང་ཤ་བཅད་ནས་ཟོས༔ དེར་ནི་མི་རྣམས་མང་དུ་དཔྱས་པ་ཡིས༔ བྲག་ཕུག་ས་མིན་ཀུ་ཏ་ལ་རུ་བྲོས༔ བཤན་པའི་གྲོགས་པོ་གཏུམ་པོ་ལོག་སྤྱོད་ལ༔ སྤྲུལ་པའི་ལག་ཆ་སྣ་ཚོགས་བྱིན་ནས་སུ༔ ཁྱོད་དང་ང་ནི་ལས་ཀ་མཐུན་ནོ་ཟེར༔ རིགས་ངན་རྔོན་པའི་ལས་ཀ་གྱིས་ཤིག་སྨྲས༔ རང་གིས་འོད་མའི་མདའ་གཞུ་བརྒྱ་ཀུན་བྱིན༔ གསོད་གཅོད་ལས་ཀྱིས་ང་ཡིས་གནས་སུ་དྲང་༔ ང་ཡིས་ངན་སོང་གསུམ་གྱི་སྒོ་བཅད་གསུངས༔ སེམས་ཅན་བསམ་བློ་མི་གཅིག་ཐ་དད་པས༔ རང་ཉིད་མནོ་བ་བཞིན་དུ་གཞན་མི་མནོ༔ མི་ལུས་ལས་ངན་ཁ་དྲག་པོ་རྣམས་ཀུན༔ ཉོན་མོངས་ནང་ཁང་ཁོང་ཁྲོའི་རང་བཞིན་ཚོ༔ རྣམ་རྟོག་འཕྲོ་འགྱུར་མང་ཞིང་ཁ་ལག་རྩུབ༔ དམུ་རྒོད་བསམ་པ་ལས་སུ་མ་རུང་རྣམས༔ ཆོས་སྤང་ལ་སོགས་བསྟན་པའི་སེལ་བྱེད་པས༔ དེ་དག་བསྒྲལ་ཕྱིར་མཐུ་དང་ངན་སྔགས་དགོས༔ དེ་ཕྱིར་ངན་སྔགས་ཆོས་ཤིག་བཙལ་དགོས་བསམས༔ འཇིག་རྟེན་ཞིང་ཁམས་དུར་ཁྲོད་ཆེན་པོའི་གླིང་༔ ཡུལ་ཕྱོགས་ཕུང་ལུང་ནག་པོའི་དུར་ཁྲོད་ཕྱིན༔ མུ་སྟེགས་ཁ་ལ་མེ་འབར་སྒོ་དྲུང་དུ༔ འཚུབ་མ་ནག་པོ་ཞིག་གི་དཀྱིལ་ནང་ན༔ མེ་དམར་བྱ་ཕོ་ཙམ་ཞིག་མ་ཤི་བར༔ འཇིག་རྟེན་དྲེགས་པ་ཕོ་མོ་ཐམས་ཅད་བསྐོར༔ སོད་ཅིག་རྡུངས་ཤིག་ཆོད་ཅིག་ཁྲིད་ལ་ཤོག༔ སྔགས་པས་བརྗོད་པ་ཙམ་གྱིས་ལས་བྱེད་དེ༔ ཟས་སུ་དམར་གཏོར་ཟ་ཞིང་མཚན་མོ་རྒྱུ༔ བསྟན་པའི་རཱུ་ཏྲ་ཕོ་མོ་མང་པོ་ནི༔ ལ་ལས་ཁྲིད་ཅིང་ལ་ལས་ཕྱི་ནས་འཕུལ༔ ལ་ལས་སྙིང་འདོན་ལ་ལས་མིག་སྒྱིད་གཅོད༔ ལ་ལ་ཀླུས་ཟོས་ལ་ལ་ནད་ཡམས་རྒྱབ༔ ལ་ལ་དུ་འབྲང་ལ་ལ་དུར་ཤིད་བྱེད༔ ལ་ལ་དམག་འཁྲུག་ལ་ལ་མུ་གེ་བྱུང་༔ ལ་ལ་སད་བྱུང་ལ་ལ་སེར་བས་རྡུང་༔ ལ་ལ་ཡུལ་དོན་ལ་ལ་ཞིང་ཁམས་སྟོངས༔ ལ་ལ་སྨྱོ་འབོག་ལ་ལ་ཁ་ལྐུགས་པ༔ ལ་ལ་རྒྱལ་འཇིགས་ལ་ལ་མེ་ཡིས་འཇིགས༔ ལ་ལ་ཆུས་འཇིགས་ལ་ལ་དུག་སྦྲུལ་འཇིགས༔ ལ་ལ་དུག་འཇིགས་ལ་ལ་ནམ་མཁས་འཇིགས༔ ལ་ལ་དགྲས་འཇིགས་ལ་ལ་ཡོ་ལོག་འཇིགས༔ ལ་ལ་གཅན་གཟན་ལ་ལ་རང་ལྕེབས་པ༔ ལེགས་བྱས་ཉེས་བྱས་རྣམ་སྨིན་ལ་ཡོགས་བསྐྱེད༔ སྔགས་པ་ཇེ་ལེགས་ཇེ་ལེགས་ཇེ་བཟང་འགྲོ༔ བསྟན་པའི་དགྲ་དེ་ཅི་སྙད་ཅི་ལ་བཏགས༔ ཇེ་དམའ་ཇེ་དམའ་ཇེ་ཞེན་ཇེ་ཞེན་འགྲོ༔ མི་ནོར་ཟས་གསུམ་བྱ་རུ་མི་བཏུབ་པའི༔ རབ་ཏུ་འཇིགས་པའི་སྒྲུབ་ཁང་དེ་ཉིད་དུ༔ ལྷ་དང་ཀླུ་དང་གཟའ་དང་རྒྱལ་པོ་དང་༔ བདུད་དང་བཙན་དང་དམུ་དང་ཐེའུ་རང་དང་༔ གྲུལ་བུམ་ཀླུ་དབང་གནོད་སྦྱིན་དྲི་ཟ་དང་༔ བྲམ་ཟེ་མུ་སྟེགས་མོན་པ་སོག་པོ་དང་༔ མེ་ཉག་ཧོར་དང་མཐའ་མི་ཨཱ་ཙ་ར༔ མགོན་པོ་མ་མོ་མེ་ལྷ་ལྷ་མ་ཡིན༔ ཕྱི་དང་ནང་དང་གསང་བའི་ལྷ་མ་སྲིན༔ སྡེ་ཚན་བརྒྱད་བརྒྱད་རང་རང་སྲོག་སྙིང་ཕུལ༔ དེ་དུས་བདག་འདྲ་རྡོ་རྗེ་དྲག་པོ་རྩལ༔ བསྟན་པའི་ཆོས་སྐྱོང་དགྲ་ལ་རྦད་པའི་ཐབས༔ སྲིད་པའི་མ་མོ་ལས་ལ་བཏང་བའི་ཐབས༔ ལྷ་སྲིན་སྡེ་བརྒྱད་བྲན་དུ་བཀོལ་བའི་ཐབས༔ ཤིས་ལ་ཚན་ཆེ་རྣོ་མྱུར་ཐོག་དང་འདྲ༔ སྲོག་སྙིང་བགྲངས་པས་སྲིད་པ་སླར་ལོག་འགྱུར༔ མི་སྲིད་སྲིད་པ་ཅི་ཡང་སྲིད་པ་ཡི༔ ངན་སྔགས་རྣམ་གྲངས་མང་པོ་ཡི་གེར་བཏབ༔ མཐུ་གཏད་སེར་གསུམ་སེལ་འབྱེད་མནན་གསུམ་བསྡུས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སངས་རྒྱས་བསྟན་པ་སྲུང་ཐབས་མཛད་པའི་ལེའུ་སྟེ་སོ་དྲུག་པའོ༔ ༔
པདྨ་བཀའ་ཐང་ལེའུ་ ༣༧ གདུལ་བྱའི་ཞིང་ཁམས་གཟིགས་པ།
དེ་ནས་བྱ་རྒོད་ཕུང་པོའི་རི་ལ་བཞུགས༔ བདག་གི་གདུལ་ཞིང་གང་ན་འདུག་གཟིགས་པས༔ མེ་ལོང་གཅིག་ནང་ཉི་མ་གཅིག་ཤར་ལྟར༔ ནུབ་པ་མེད་པ་ཡིད་བཞིན་ནོར་བུའི་ཚུལ༔ ཐོས་པ་ལས་བྱུང་ཤེས་རབ་རྒྱུད་ལ་འབྱོངས༔ འགྲོ་བ་འདྲེན་པའི་ཆོས་འཆད་ཉམ་མི་ང་༔ བསམ་པ་ལས་བྱུང་ཤེས་རབ་རྒྱུད་ལ་འབྱོངས༔ ཕྱི་རོལ་རྩོད་པའི་གྲུབ་མཐའ་ཉམ་མི་ང་༔ བསྒོམ་པ་ལས་བྱུང་ཤེས་རབ་རྒྱུད་ལ་འབྱོངས༔ སེམས་ཀྱི་མཐར་ཐུག་ལྟ་བ་ཉམ་མི་ང་༔ ང་ནི་མིང་གི་སངས་རྒྱས་མ་ཡིན་ཏེ༔ དགེ་སྦྱོང་འབྲས་བུ་བཞི་ཐོབ་སངས་རྒྱས་ཡིན༔ ཆོས་སྨྲས་གོ་འདྲེད་ཁྱེར་བའི་འཁོར་མི་བསྟེན༔ གདམས་ངག་སྣོད་རྙིངས་ཁྱེར་ལ་ཆོས་མི་འཆད༔ དད་པ་སྣུམ་དྲེད་ཁྱེར་བའི་ཁྱུར་མི་བསྡད༔ དམ་ཚིག་ཚོད་ཡོད་བྱེད་པའི་གྲོགས་མི་འགྲོག༔ དེ་ལྟར་དགོངས་ནས་ཡེ་ཤེས་སྤྱན་གྱིས་གཟིགས༔ སེམས་ཅན་ཐམས་ཅད་མ་རིག་ལས་ཀྱིས་བསྒྲིབས༔ ཉེ་ཡང་མ་མཐོང་རང་སེམས་ངོ་མ་ཤེས༔ བཤད་ཀྱང་མ་ཐོས་མུན་ཕྲག་རྒྱང་ཐག་རིང་༔ བདེ་བ་བསྒྲུབས་པས་སྡུག་བསྔལ་འཁོར་བ་འགྲུབ༔ གཅིག་ཀྱང་གདུལ་བྱའི་ཞིང་དུ་མི་འདུག་ནས༔ ཨུ་རྒྱན་ཡུལ་གྱི་དྲི་མེད་མདངས་ལྡན་དུ༔ མཁའ་འགྲོ་མ་ལ་ཆོས་བཤད་དོན་འགྱུར་དགོངས༔ ཆར་ཆད་ཉི་སྤྲིན་འཇའ་ཚོན་ཤར་བ་ལྟར༔ སྐད་ཅིག་ཉིད་ལ་དྷ་ན་ཀོ་ཤར་བྱོན༔ གསང་སྔགས་མཁའ་འགྲོ་མ་ཡི་བརྡ་སྐད་གསུངས༔ རྒྱ་མཚོའི་གླིང་གི་མཁའ་འགྲོ་མ་བཞི་འདུས༔ རྡོ་རྗེ་ཕག་མོ་ལུས་དང་གྲིབ་བཞིན་འཁོར༔ རྒྱ་མཚོའི་ཀླུ་དང་བར་སྣང་གཟའ་སྐར་འདུས༔ ཆོས་བཤད་དམ་བསྲེས་བྲན་དུ་ཁས་བླངས་བྱུང་༔ བྱ་བྱེད་སྤྱོད་པ་འཇིག་རྟེན་པ་ལས་ལོག༔ ཡེ་ཤེས་སྤྱན་གྱིས་གདུལ་བྱ་གང་འདུག་གཟིགས༔ ཟ་ཧོར་རྒྱལ་ཁམས་ཐམས་ཅད་གདུལ་བྱར་མཁྱེན༔ དེ་ཡང་ཨུ་རྒྱན་ཡུལ་གྱི་བྱང་ཤར་མཚམས༔ ཟ་ཧོར་ཡུལ་གྱི་གྲོང་ཁྱེར་ཆེན་པོའི་དབུས༔ ཕོ་བྲང་རཏྣ་པུ་རི་བྱ་བ་ན༔ ཟ་ཧོར་རྒྱལ་པོ་གཙུག་ལག་འཛིན་ཞེས་པ༔ བཙུན་མོ་སུམ་བརྒྱ་དང་ནི་དྲུག་ཅུས་བསྐོར༔ ཕྱི་བློན་ནང་བློན་བདུན་བརྒྱ་ཉི་ཤུར་བཅས༔ ཟ་ཧོར་རྒྱལ་ཁམས་ཡོངས་ལ་དབང་བསྒྱུར་བའི༔ རྒྱལ་པོ་དེ་ཉིད་གདུལ་བྱའི་ཞིང་དུ་གཟིགས༔ རེ་ཞིག་དུས་ན་བཙུན་མོ་ཧའུ་ཀིས༔ ཉི་མ་བརྒྱད་ནི་དུས་གཅིག་ཤར་བ་ཡིས༔ ཟ་ཧོར་ཡུལ་ཁམས་གཞོབ་ཏུ་སོང་བ་དང་༔ མགོ་ལ་གཡུ་ཡི་མཆོད་རྟེན་སྐྱེས་པ་རྨིས༔ རྨི་ལམ་རྒྱལ་པོའི་སྙན་དུ་གསོལ་བ་ཡིས༔ རྟོག་པ་ཟོས་ནས་རིམ་གྲོ་ཆེན་པོ་བྱས༔ རྨི་ལམ་རྨིས་པའི་བཙུན་མོ་རྒན་པ་ལ༔ ལུས་པོ་མ་བདེ་བུ་སྐྱེའི་ལྟས་ལེགས་བྱུང་༔ ལུས་ནི་ཡང་ཞིང་གོམ་པ་འདེགས་འཇོག་མགྱོགས༔ ལྷ་ཡི་བུ་དང་བུ་མོ་མང་པོ་ཡིས༔ སྐོར་བ་བྱེད་ཅིང་བཀུར་སྟི་མཆོད་པ་བྱེད༔ རང་བཞིན་ཉམས་དགའ་ཤེས་པ་མི་འཚུབ་ཅིང་༔ མདངས་ནི་ཡལ་ཡལ་བྱིན་ནི་ཐིབས་ཐིབ་བྱེད༔ བག་དྲོ་འུར་འུར་ལུས་བདེ་ཆམ་ཆམ་བྱེད༔ རྒྱལ་པོའི་སྙན་དུ་དེ་ལྟའི་ལྟས་བྱུང་སྨྲས༔ རྒྱལ་པོ་དགྱེས་ཏེ་རྒྱལ་བུ་འོང་བའི་རྟགས༔ བཙུན་མོར་བཀུར་སྟི་རིམ་གྲོ་ཆེ་བར་བྱེད༔ རྒྱལ་བུ་སྐྱེ་རེ་བུ་མོ་སྐྱེས་པར་གྱུར༔ རྒྱལ་པོ་ཐུགས་གཙིགས་ཆུང་སྟེ་ཁྲམ་མ་གསུངས༔ བཙུན་མོ་ཡི་མུག་རྨི་ལྟས་དེ་འདྲ་བར༔ བུ་ནི་ཅི་ཕྱིར་མི་སྐྱེ་སྙམ་ནས་སུ༔ བྲམ་ཟེ་མཚན་མཁན་བོས་ནས་ནི་གུ་བསྟན༔ འདི་དེ་ལུས་ལ་ཡོད་པའི་རྨི་ལྟས་སྨྲས༔ བྲམ་ཟེས་བུ་མོ་དྲི་བཟང་ཆུ་ཡིས་བཀྲུས༔ ཉི་གྲིབ་མཚམས་སུ་ཕྱིང་དཀར་བཏིང་བའི་སྟེང་༔ བུ་མོ་བཞག་ནས་མཚན་བརྟག་བྱས་པ་ཡིས༔ བྲམ་ཟེ་རང་དབང་མེད་པར་མཆི་མ་ཟགས༔ བཙུན་མོ་ནི་གུ་གཉིས་ལ་ཕྱག་འཚལ་ཏེ༔ བཙུན་མོ་ཧད་ནས་བྲམ་ཟེར་འདི་སྐད་གསུངས༔ བུ་མོའི་མཚན་རྟགས་ངན་པ་མ་ཡིན་ནམ༔ གང་ལྟར་འདུག་པ་རྫུན་མེད་དྲང་པོར་སྨྲོས༔ བྲམ་ཟེས་མཚན་རྟགས་མི་ངན་ཤིན་ཏུ་བཟང་༔ མཚན་བཟང་སུམ་ཅུ་རྩ་གཉིས་དཔེ་བྱད་བརྒྱན༔ མཛེས་ཤིང་ལྟ་བས་ཆོག་མི་ཤེས་པ་འདི༔ མི་ཡི་བུ་མིན་ལྷ་ཡི་སྲས་མོ་སྟེ༔ ཡེ་ཤེས་མཁའ་འགྲོ་མ་ནི་མི་ཡུལ་བྱོན༔ འདི་ལ་ཁྱིམ་པའི་བདག་དེ་སུ་ཡིན་པ༔ འཁོར་ལོས་སྒྱུར་བའི་རྒྱལ་པོར་སྨོས་ཅི་དགོས༔ འདི་ནི་ཁྱིམ་མེད་རབ་ཏུ་བྱུང་བ་ན༔ ཚེ་ལུས་གཅིག་གིས་ཟ་ཧོར་ཡུལ་ཁམས་འདྲེན༔ འདི་འདྲའི་མཚན་མཆོག་སུ་ལའང་ཡོད་མིན་གསུངས༔ མིང་ཡང་ལྷ་ལྕམ་མནྡཱ་ར་བར་བཏགས༔ གཞན་མའི་ལོ་སྐྱེད་ལས་ཀྱང་ཟླ་སྐྱེད་ཆེ༔ དེ་བཞིན་ཟླ་སྐྱེད་པས་ཀྱང་ཞག་སྐྱེད་ཆེ༔ ལྷ་ལྕམ་དགུང་ལོ་བཅུ་གསུམ་ལོན་པའི་དུས༔ ཕྱོགས་བཞི་མཚམས་བརྒྱད་ཡེ་ཤེས་མཁའ་འགྲོར་གྲགས༔ ལྷ་ལྕམ་ཉིད་ལ་ལྟ་མི་མང་དུ་འདུས༔ དགའ་མཐུན་འཁོར་བའི་སྣང་ཅན་སེམས་ཡིད་ཕྲོགས༔ ལེགས་པའི་གཟུགས་ནི་ཤིན་ཏུ་རྙེད་དཀའ་བའི༔ བུ་མོའི་དངོས་པོ་དེ་ལ་ཐོབ་ཤ་བྱེད༔ རྒྱ་གར་རྒྱལ་པོས་བུ་མོའི་རིན་དུ་ནི༔ རྟ་མཆོག་རིན་ཅེན་གསེར་གྱི་དོང་རྩེ་བྱིན༔ རྒྱ་ནག་རྒྱལ་པོས་ཇ་རྟ་དར་ཟབ་བཀལ༔ གྱད་ཀྱི་མི་བརྒྱ་རྟ་བརྒྱ་རིན་ལ་བྱིན༔ བྷངྒ་ལ་ཡི་རྒྱལ་པོས་གླང་པོ་ཆེ༔ ནོར་གྱི་རིགས་བྱེད་བཀལ་བ་སུམ་བརྒྱ་བྱིན༔ བཻདྡྷའི་རྒྱལ་པོས་སེང་གེ་དཀར་མོ་ཞིག༔ ཡིད་བཞིན་ནོར་བུས་བརྒྱན་ནས་རིན་ལ་བྱིན༔ ཨུ་རྒྱན་རྒྱལ་པོས་རཏྣ་མང་དུ་བསྐྱལ༔ ཁ་ཆེའི་རྒྱལ་པོས་སྨན་དོས་མང་དུ་བསྐྱལ༔ ལི་ཡི་རྒྱལ་པོས་དོང་རྩེ་མང་དུ་བསྐྱལ༔ སྟག་གཟིག་རྒྱལ་པོས་ཤ་མར་མང་དུ་བསྐྱལ༔ གེ་སར་རྒྱལ་པོས་གོ་མཚོན་མང་པོ་བསྐྱལ༔ ཞང་ཞུང་རྒྱལ་པོས་རྐང་འགྲོས་མང་དུ་བསྐྱལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གདུལ་བྱའི་ཞིང་ཁམས་གཟིགས་པའི་ལེའུ་སྟེ་སོ་བདུན་པའོ༔ ༔
པདྨ་བཀའ་ཐང་ལེའུ་ ༣༨ ལྷ་ལྕམ་མནྡཱ་ར་བས་བྲམ་ཟེའི་སྐུ་ཤ་རྙེད་པ།
དེ་ནས་ཟ་ཧོར་རྒྱལ་པོ་གཙུག་ལག་འཛིན༔ ཐུགས་ནི་ཤིན་ཏུ་མ་བདེ་གཉིད་ཡར་ཏེ༔ བུ་མོ་འདི་ཡིས་དགྲ་མང་ཚོལ་བར་འདུག༔ རྒྱལ་པོ་གཅིག་ལ་བྱིན་ན་གཞན་མི་དགའ༔ ཡང་ན་བུ་མོ་འདི་འདྲ་བཅུ་ཡོད་ན༔ རེ་རེ་བྱིན་པས་དེ་ཡིས་ཁྱབ་མོད་སྙམ༔ ཡང་ན་འདི་ཡང་མེད་ན་དེས་ཆོག་པས༔ ད་ནི་ཇི་ལྟར་བྱ་སྙམ་ནང་བློན་བཅུར༔ བཀའ་བགྲོས་ཞིབ་ཏུ་བྱས་པའི་གྲོས་འཆམས་ལ༔ བུ་མོ་རང་ལ་དྲིས་ནས་གང་མོས་གཏོང་༔ གྲོས་ཐག་ཆོད་ནས་ལྷ་ལྕམ་མདུན་དུ་བོས༔ རྒྱལ་པོས་ཁྱོད་རང་གར་འགྲོ་འདོམས་ཤིག་གསུངས༔ གང་ལ་དགའ་བ་དེ་ལ་སྟེར་བ་ཡིན༔ ལྷ་ལྕམ་དེ་མ་ཐག་ཏུ་མཆི་མས་བརྣངས༔ མང་དུ་ངུ་ཞིང་གང་ལའང་མི་འགྲོ་གསུངས༔ ཡབ་ཀྱིས་མི་འགྲོ་བྱས་པས་ག་ལ་ཕན༔ འདོད་མིས་སྒོ་ཕྱི་ཐམས་ཅད་འགགས་འདུག་པ༔ ཞག་གསུམ་བར་དུ་ཁྱོད་རང་བསམ་མནོ་ཐོང་༔ དེ་ནས་ང་ལ་ལན་དེ་ཁྱེར་ཤོག་གསུངས༔ ལྷ་ལྕམ་འགོལ་བའི་ཕོ་བྲང་རྩེ་མོར་ཕྱིན༔ གཡོག་མོ་གསུམ་དང་ལྷན་ཅིག་འདུག་པར་བྱས༔ ཉིན་དང་མཚན་དུ་གཞིགས་ཤིང་བསམ་པ་ཡིས༔ རྟེན་ཉམས་ངན་སོང་གསུམ་དུ་མ་སྐྱེས་ཤིང་༔ རྟེན་མ་ཉམས་ཀྱང་སྐྱེ་བ་བུད་མེད་ལུས༔ ཕྱེད་མི་ཡིན་ཀྱང་བྱང་ཆུབ་བསྒྲུབ་ཏུ་ཡོད༔ གླིང་ཉམས་གླིང་ཆེན་གླིང་ཆུང་མ་སྐྱེས་ཤིང་༔ གླིང་ནི་མ་ཉམས་ཛམྦུའི་གླིང་དུ་སྐྱེས༔ གནས་ཉམས་མོན་དང་ཀླ་ཀློར་མ་སྐྱེས་ཤིང་༔ གནས་ནི་མ་ཉམས་ཟ་ཧོར་ཡུལ་དུ་སྐྱེས༔ དབང་པོ་ཉམས་པ་སྐྱོན་ཅན་མ་སྐྱེས་ཤིང་༔ དབང་པོ་མ་ཉམས་སྐྱོན་མེད་བཀྲ་བར་སྐྱེས༔ སེམས་ཉམས་གདོན་དབང་སོང་དུ་མ་སྐྱེས་ཤིང་༔ ཤེས་པ་མ་ཉམས་རང་དབང་ཐོབ་པར་སྐྱེས༔ ལས་ཉམས་སྡིག་སྤྱོད་ལས་སུ་མ་སྐྱེས་ཤིང་༔ ལས་མ་ཉམས་པ་ཆོས་ལ་མོས་པར་སྐྱེས༔ རིགས་ཉམས་རིགས་ངན་བུ་མོར་མ་སྐྱེས་ཤིང་༔ རིགས་མ་ཉམས་པ་རྒྱལ་པོའི་བུ་མོར་སྐྱེས༔ ད་ལྟ་ང་ཉིད་བུད་མེད་ལུས་གྱུར་ཀྱང་༔ རིགས་བཟང་འབྲས་ལེགས་ལོངས་སྤྱོད་ཆེ་བ་དང་༔ རྒྱལ་པོ་རྣམས་ཀྱིས་ཧབ་ཤ་བྱེད་པ་ཀུན༔ ཚེ་རབས་སྔ་མ་དམ་ཆོས་བྱས་ལས་བྱུང་༔ ད་རེས་འདི་ལ་ཆོས་ཤིག་མ་བྱས་ན༔ ཕྱི་མ་ཅི་འདྲའི་ལུས་ལེན་མི་ཤེས་ཤིང་༔ ཆོས་དང་ཕྲད་པའང་ཤིན་ཏུ་དཀའ་འོ་སྙམ༔ ལས་མཐའ་ལོག་པར་འཇུག་པའི་བྱ་བ་སྤངས༔ ལས་མཐའ་མ་ལོག་དམ་ཆོས་མཐར་ཕྱིན་བྱ༔ མ་བྱུང་ལྷ་ལྕམ་འདུན་མ་ཉེས་སོ་སྙམ༔ སྡུག་བསྔལ་ཕུན་སུམ་ཚོགས་པའི་དབུས་ཉིད་དུ༔ སྡིག་པ་སྒོས་ཁུར་བྱས་ནས་སྡོད་དགོས་ཏེ༔ བཞག་པར་འདོད་ཀྱང་དབང་མེད་འདུན་མ་ཐལ༔ བདག་པོ་ཇི་ལྟར་ཡོན་ཏན་ལྡན་གྱུར་ཀྱང་༔ ཚེ་གཅིག་སྡུག་རོགས་བ་ལང་གསེར་རྒྱན་ཅན༔ ང་ནི་ཇི་ལྟར་ཡོན་ཏན་ལྡན་གྱུར་ཀྱང་༔ འགག་ཀྱིའི་ཁྱི་མོ་ཚང་མ་རྒྱན་བཟང་མ༔ ཁ་དང་ལག་པ་སྐད་ཅིག་དལ་དུ་མེད༔ དོན་མེད་འཁྲུལ་པའི་ལས་ལ་ཡེངས་ཤིང་འཁྱོག༔ རང་དབང་ཡོད་དུས་ཆོས་ཤིག་བྱ་དགོས་སྙམ༔ ལྷ་ལྕམ་ཡབ་ཀྱི་དྲུང་དུ་ཕྱིན་ནས་སུ༔ འདི་ཕྱི་གཉིས་སྡུག་ཁྱིམ་ཐབ་ང་མི་བྱེད༔ བྱེད་དབང་བྱུང་ན་དམ་པའི་ཆོས་ཤིག་བྱེད༔ བྱེད་དབང་མ་བྱུང་ལུས་འདི་སྤངས་ནས་སུ༔ ཆོས་བྱར་ཡོད་པའི་ལུས་ཤིག་སྨོན་ལམ་འདེབས༔ དེ་སྐད་གསུངས་པས་རྒྱལ་པོ་མ་དགྱེས་ནས༔ ལྷ་ལྕམ་གཡོག་མོ་ལྔ་བརྒྱའི་དཀྱིལ་དུ་བཅུག༔ ཕོབྲང་ནང་ནས་ཕྱི་རུ་མ་བཏང་བྱས༔ གལ་ཏེ་འདི་ཉིད་ལྕེབས་སམ་བྲོས་པ་ན༔ གཡོག་མོ་ལྔ་བརྒྱ་གསོན་པོར་ཁྱིས་ཟར་འཇུག༔ ཅེས་པ་གཡོག་མོ་རྣམས་ལ་ངག་བཅུག་གོ༔ རྒྱལ་པོའི་ཡུལ་ལུགས་བཙུན་མོ་རེ་རེ་ཡི༔ ཕོ་བྲང་ཞག་རེ་མལ་རེ་སྡོད་པ་ལ༔ བཞེས་པ་འདྲེན་པ་གཟོབ་པའི་རེ་མོས་བྱེད༔ བཙུན་མོ་རྒན་པ་ཧའུ་ཀིའི་རེས་ལ༔ ཕྱོགས་ཀྱི་གཉེ་བོ་མངས་ནས་རྒྱ་རི་ཟད༔ བཞེས་པ་འདྲེན་པའི་སྤགས་ནི་མེད་པར་གྱུར༔ རྒྱ་རི་ཉོ་བར་གཞན་གཏོང་བློ་མ་ཁེལ༔ ལྷ་ལྕམ་ཚོང་དུས་རྒྱ་རི་ཉོ་རུ་བཏང་༔ ཆར་པ་ཆེས་ནས་ཚོང་དུས་མ་འཛོམས་པར༔ ལོག་ནས་འོངས་པའི་ལམ་ཀ་ཞིག་ཏུ་ནི༔ ཁྱེའུ་ལོ་བརྒྱད་པ་ཞིག་ཤི་ནས་འདུག༔ ཆར་པས་དག་ནས་སྐྱ་སྒང་འདུག་པ་དེ༔ ལྷ་ལྕམ་ཉྭ་བཞི་ཐམས་ཅད་ལེགས་པར་བྲེགས༔ སྣོད་དུ་བཅུག་ནས་ཕོ་བྲང་ནང་དུ་འོངས༔ བཙུན་མོའི་ངག་ནས་རྒྱ་རི་རྙེད་དམ་ཟེར༔ ལྷ་ལྕམ་རྙེད་སྨྲས་ཁྱོད་ཀྱིས་ཚོས་ཤིག་ཟེར༔ ལྷལྕམ་བཙོས་ཤིང་ཁུ་བ་ཡང་ཡང་ཕོ༔ སྤོད་ཀྱི་རིགས་བྱེད་མང་པོ་བཏབ་ནས་སུ༔ ཨ་མ་ཤ་ཚོས་བཞེས་པ་དྲོངས་ཤིག་གསོལ༔ རྒྱལ་པོར་བཙུན་མོས་བཞེས་པ་དྲངས་པ་ཡིས༔ བཞེས་པ་འཇུ་བར་གྱུར་པའི་དུས་སྐབས་ན༔ རྒྱལ་པོའི་ལུས་ལ་བདེ་བ་མེ་རུ་འབར༔ སྟན་གྱི་ཁ་ནས་འདོམ་གང་འཕགས་ནས་སུ༔ ནམ་མཁའི་དབྱིངས་ལ་བྱ་བཞིན་འཕུར་ལ་ཁད༔ དེ་ལྟར་བྱུང་བས་སྐྱེ་བདུན་ཤ་རུ་རིག༔ རྒྱལ་པོ་ལྐུགས་པས་མི་ལ་འབོད་པ་བཞིན༔ ང་རོའི་སྒྲ་ཡིས་ཧ་འུ་ཀི་ཞེས་བོས༔ རྒྱལ་པོའི་མདུན་དུ་བཙུན་མོ་ཤོག་ཟེར་ཕྱིན༔ ལག་པ་གཡོན་པས་བཙུན་མོའི་མཐོང་རྩ་བཟུང་༔ གཡས་པས་གྲི་བཟུང་རྩེ་ཆུང་བ་ལ་བཙུགས༔ མ་མགལ་ཁར་བརྫངས་སྣ་གོང་བཞིན་བསྙེར་ནས༔ ཁྱོད་ཀྱིས་ད་ནང་ང་ལ་དྲངས་པ་ཡི༔ ཤ་དེ་གང་བྱུང་འཆད་དམ་མི་འཆད་ཟེར༔ མི་འཆད་གྱུར་ན་ཁྱོད་ཉིད་གསོད་དོ་ཟེར༔ བཙུན་མོ་བྲེད་ཅིང་སྔངས་ནས་མ་བཟོད་དེ༔ ང་ལ་རྒྱུས་མེད་མནྡཱ་ར་བར་དྲིས༔ འབྲས་བསྐུར་ཚོང་དུས་ཉོ་རུ་བཏང་བ་ཡིན༔ དེ་སྐད་སྨྲས་པས་རྒྱལ་པོས་ཕྱག་བཏང་ནས༔ འོ་ན་མནྡཱ་ར་བ་ཁྲིད་ཤོག་གསུངས༔ བཙུན་མོ་ལྷ་ལྕམ་ཁྲིད་ནས་འོངས་པ་ཡིས༔ རྒྱལ་པོས་ཕྱག་གཡོན་ལྷ་ལྕམ་མཐོང་རྩ་བཟུང་༔ གཡས་པས་གྲི་བཟུང་རྩེའུ་ཆུང་ལ་བཙུགས༔ བདག་ལ་དྲངས་པའི་ཤ་དེ་གང་ནས་ཉོས༔ འཆད་དམ་མི་འཆད་མི་འཆད་གསོད་དོ་ཟེར༔ ལྷ་ལྕམ་བྲེད་སྔངས་བརྫུན་སྨྲ་མ་ཤེས་པར༔ ང་ལ་ཨ་མས་མཱཾ་ས་ཉོར་སོང་ཟེར༔ ཆར་པ་ཆེས་པས་ཚོང་དུས་མི་འདུག་ནས༔ ལོག་ནས་འོངས་པའི་ལམ་ཀ་ཞིག་ན་ནི༔ ཁྱེའུའི་རོ་ཞིག་ཆར་པས་དག་ནས་འདུག༔ རས་སྒྱེའི་འབྲས་ཕོ་ཉྭ་ཤ་བྲེགས་ནས་བཅུག༔ ཚོས་པར་བཙོས་ནས་ཆུ་ཕོ་སྤོད་བཏབ་དྲངས༔ ཤ་དུག་བྱུང་ངམ་ཅི་བྱུང་གསོལ་བ་དང་༔ འོ་ན་རོ་དེ་སྒོངས་པོ་ཁྱེར་ཤོག་གསུངས༔ ལྷ་ལྕམ་རོ་དེ་ཡོད་དམ་མེད་ན་སྙམ༔ བྱ་དང་གཅན་གཟན་ཟོས་སམ་མ་ཟོས་སམ༔ མགྱོགས་པར་མྱུར་དུ་ལུས་བཀོལ་ཕྱིན་པ་དང་༔ རོ་དེ་འདུག་པས་ལྷ་ལྕམ་ཁུར་ནས་འོངས༔ ཡབ་ཀྱི་དྲུང་དུ་བསྐྱལ་བས་ཡབ་ཉིད་མཉེས༔ རྐང་ལག་མགོ་ལུས་ཤ་ལྤགས་མ་ལུས་ཀུན༔ རྡོ་ཡིས་བཏགས་ནས་རིལ་བུ་དཔག་མེད་བྱས༔ རིན་ཅེན་སྣ་བདུན་སྒྲོམ་གྱི་ནང་དུ་བཅུག༔ ཁ་ལ་རིན་ཆེན་སྣ་བདུན་རྒྱས་བཏབ་ནས༔ དུར་ཁྲོད་དགའ་བའི་ཚལ་དུ་གཏེར་དུ་སྦས༔ མ་མོ་མཁའ་འགྲོ་རྣམས་ལ་གཉེར་བྱང་གཏད༔ མཁའ་འགྲོ་བདུད་འདུལ་མ་ལ་བྱ་ར་བཅོལ༔ དུས་མཚན་ཀོ་ཤ་དེ་ཡི་བཙས་སུ་བཞག༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལྷ་ལྕམ་མནྡཱ་ར་བས་བྲམ་ཟེའི་སྐུ་ཤ་རྙེད་པའི་ལེའུ་སྟེ་སོ་བརྒྱད་པའོ༔ ༔
པདྨ་བཀའ་ཐང་ལེའུ་ ༣༩ ལྷ་ལྕམ་མནྡཱ་ར་བས་ཁྱིམ་སྤངས་ནས་ཆོས་མཛད་པ།
དེ་ནས་ལྷ་ལྕམ་མནྡཱ་ར་བ་ཡིས༔ ཕོ་བྲང་ནང་ནས་གསང་སྒོ་ཞིག་ལ་འཐོན༔ ཤར་ཕྱོགས་རྒྱང་གྲགས་གཅིག་སར་སླེབས་པ་དང་༔ གོས་ཕུད་ལུས་རྒྱན་ཐམས་ཅད་བཀྲོལ་ནས་ནི༔ སེམས་ཤོང་མ་ཁྱོད་འདི་ཁྱེར་ཕར་ལོག་གསུངས༔ བདག་གིས་ཁྱེད་བཞག་ལོག་པ་ག་ནས་ཕོད༔ ཅི་མཛད་བདག་ལ་སྨྲོས་ལ་ནང་དུ་གཤེགས༔ ནི་གུ་ས་ལས་བཞེངས་ཏེ་ཐལ་མོ་སྦྱར༔ ཕྱོགས་བཞི་མཚམས་བརྒྱད་ལྷ་ལ་ཕྱག་མང་བཙལ༔ སངས་རྒྱས་ཆོས་ལས་ཤེས་མི་ཆགས་སོ་གསུངས༔ ལུས་ཀྱི་རྒྱན་ཆ་རིན་ཅེན་མང་པོ་ཀུན༔ རྡོ་ཡིས་བརྡུངས་ནས་མདུན་གྱི་ནམ་མཁར་གཏོར༔ བདག་གི་བསམ་པ་ཆོས་བཞིན་བསྒྲུབ་ཏུ་གསོལ༔ བག་མའི་བར་དུ་གཅོད་པ་མ་གཏང་ཞིག༔ དེ་སྐད་བརྗོད་ནས་དར་ཟབ་ན་བཟའ་ཀུན༔ དུམ་བུར་གཏུབས་ཏེ་ཕྱོགས་བཞི་མཚམས་བརྒྱད་གཏོར༔ འདི་འདྲ་གྱོན་པའི་ལུས་སུ་མ་གྱུར་ཅིག༔ འཇིག་རྟེན་ཆོས་བརྒྱད་ཀུན་དང་བྲལ་བར་ཤོག༔ རང་གི་སྐྲ་ལོ་གཡས་འབྱིད་གཡོན་འབྱིད་བྱས༔ རྫ་མ་ཟངས་བཞིན་སྐྲ་ནི་ཅི་ཡང་མེད༔ གདོང་ལ་སྤར་ཤད་བྱས་ནས་ཉམས་སུ་བཅུག༔ སེམས་ཤོང་མ་ཡིས་ངུ་འབོད་དྲག་ཏུ་བཏོན༔ མི་ཡི་རྒྱལ་མོ་ཡུལ་སྲིད་འཛིན་པ་ཐོན༔ ཇི་ལྟ་བུ་བྱེད་འདི་འདྲའི་ལས་སྤྱོད་པ༔ བརྩེ་བ་ཀུན་གྱིས་གཟུང་བར་མཛོད་ཅིག་ན༔ འཛིན་འཆང་གྲོགས་འབོད་སྨྲེ་སྔགས་སྐད་ཆེན་བཏོན༔ ཡབ་ཡུམ་གཉིས་ལ་རུང་ངམ་ལྷ་ལྕམ་སོམས༔ ཞེས་སྨྲས་ལྷ་ལྕམ་སེམས་ཤོང་མར་སྨྲས་པ༔ ཕོ་སེམས་འགུལ་བའི་ལུས་འདི་མེད་ཀྱང་རུང་༔ ཆོས་ལ་བར་ཆད་མེད་པ་འགྲུབ་པར་ཤོག༔ ཅེས་སྨྲས་སློག་ཧྲུལ་དོར་བ་གོས་སུ་གྱོན༔ ཁྱིམ་གྱི་འཁྲི་བཅད་མི་གཙང་རྫས་བཞིན་དོར༔ ལུས་ངག་ཡིད་བསྡམས་སྨྲ་བ་བཅད་ནས་སུ༔ ཕོ་ཚོས་ཚལ་དུ་མཉམ་གཞག་སེམས་དབེན་བཅུག༔ སྐོམ་བྱུང་ཆུ་འཐུངས་ལྟོགས་ན་ས་ཟོས་སྡོད༔ དེ་སྐད་གསུངས་ནས་ལོག་ཏུ་མ་འདོད་དེ༔ སེམས་ཤོང་རབ་ཏུ་ངུ་ཞིང་ཁྱིམ་དུ་སོང་༔ ཕ་མ་གཉིས་ལ་སྐྱོ་ཤས་ཚིགས་སུ་བཅད༔ ཀྱེ་མ༔ ལྷ་ལྕམ་སྐུ་མདོག་མ་ཧེའི་མདོག་འདྲ་སྟེ༔ བཟང་པོའི་མཚན་གྱིས་སྐུ་ལུས་རབ་བརྒྱན་པ༔ དཔེ་བྱད་སྣ་ཚོགས་ལྡན་པའི་ཁྱུ་མཆོག་མ༔ བཻ་ཌཱུརྱ་ཡི་མདོག་ལྟར་རྣམ་པར་མཛེས༔ གསུང་དབྱངས་ངང་པའི་སྐད་ལྟར་དལ་ཞིང་སྙན༔ ཞེ་སྡང་རྩུབ་པའི་ཚིག་མེད་འཛུམ་དང་ལྡན༔ ཁོང་མི་ཁྲོ་ཞིང་སྲོག་ཆགས་སྙིང་རྗེས་སྐྱོང་༔ ཁོལ་པོ་ཁོལ་མོ་སུ་འཁོར་མ་ལྟར་བྱམས༔ ཨུ་དུམྺཱ་རའི་མེ་ཏོག་དེ་འདྲ་བ༔ ཕྱོགས་ཀྱི་རྒྱལ་པོས་ཐོབ་ཤ་བྱས་པ་ཡིས༔ ཕོ་བྲང་ནང་དུ་མི་བཞུགས་ཆོས་ལ་བྲོས༔ ལྷ་ལྕམ་དེ་ཡི་རྣམ་ཐར་དེ་འདྲའོ༔ ང་ཡིས་ཇི་ལྟར་བྱས་ཀྱང་གྲོས་མ་ཐེབས༔ ཞེས་སྨྲས་མཆི་མ་མང་དུ་གཟགས་པར་གྱུར༔ དེ་ནས་རྒྱལ་པོ་ཕོ་བྲང་ནང་ནས་ཐོན༔ རྒྱལ་པོ་བཙུན་མོ་ལྷ་ལྕམ་འཚོལ་ཞིང་འདྲི༔ སེམས་ཤོང་མ་ནི་དབུགས་བརྣངས་མཆི་མ་ཕྱིས༔ རྗེ་གཅིག་མི་དབང་རྒྱལ་པོ་གསན་མཛོད་དང་༔ བུ་མོ་ཀུན་གྱི་ཁྱུ་མཆོག་ལྷ་མོ་དེ༔ ཕོ་བྲང་ནང་དུ་མ་འཁྱོམ་ཕྱི་རོལ་གཤེགས༔ ཕོ་ཚོས་ཚལ་དུ་རང་གི་ལུས་སྨ་ཕབ༔ རྒྱན་རྣམས་ངར་བྱིན་སེམས་ཤོང་ལོག་ཅིག་གསུངས༔ ང་ཡིས་བརྒྱུགས་དང་བྱས་ཀྱང་འོང་མཁན་མེད༔ ལྷ་གཅིག་དམ་པ་མནྡཱ་ར་བ་དེ༔ ལུས་ལ་གོས་མེད་དམན་པའི་ཆས་སུ་ཞུགས༔ སྐོམ་དུ་ཆུ་འཐུང་ཟས་སུ་ས་ཟ་ཞིང་༔ བསྒུལ་བསྐྱོད་མི་བྱེད་ཕྱེད་སྐྱིལ་ས་ལ་འབྱར༔ ཞུས་ཀྱང་ལན་མེད་བེམ་པོའི་མདུན་ཕྱིན་འདྲ༔ དེ་སྐད་གསོལ་བས་རྒྱལ་པོ་གཏུམ་ཞིང་ཁྲོས༔ ཆོས་མགོ་མི་ཐོན་དཔེ་ནི་མང་དུ་བགྲངས༔ བུ་མོ་འདོད་ལ་ཁ་ཟས་ནོར་ཚིམ་ཕྱིན༔ རྒྱལ་པོ་རྣམས་ལ་གོ་བརྡའི་ཤོག་འཕྲིན་བསྐུར༔ གཉེ་པོ་རྣམས་ཀྱིས་ཆོས་བྱེད་བྱར་ཡོད་པ༔ ཁྱིམ་ཐབ་བྱར་དབང་མེད་པའི་གཙིགས་ཀ་བསྡམས༔ རང་རང་ཡུལ་ལ་ནོར་ཁྱེར་ལོག་པར་གྱུར༔ དེ་ནས་རྒྱལ་པོ་གཙུག་ལག་འཛིན་གྱིས་ནི༔ རྒྱལ་པོ་གོ་མ་དེ་བྱི་བྱ་བའི་སྲས༔ མཁན་པོ་ཞི་བ་འཚོ་ཞེས་བྱ་བ་ལ༔ ལྷ་ལྕམ་སྡོམ་པ་ལེན་བཅུག་བཀུར་སྟི་བྱས༔ བུ་མོ་ཆོས་མགོ་ཐོན་པར་བྱ་བའི་ཕྱིར༔ ཁོལ་མོལྔ་བརྒྱ་པོ་ཡང་ཆོས་སྒོར་བཅུག༔ ལྷ་ལྕམ་དཔོན་གཡོག་ཕོ་བྲང་ལོགས་ཤིག་བཞག༔ རྒྱལ་བློན་དམངས་དང་བཅས་པས་བཀུར་སྟི་བྱེད༔ སྔ་དྲོའི་དུས་སུ་སེམས་ཞི་བསམ་གཏན་བསྒོམས༔ ཕྱི་དྲོའི་དུས་སུ་ལྷོ་ཕྱོགས་སྔོ་ཞིང་འཇམ༔ མཐིང་གར་འདུག་པ་སྤང་གི་ངོས་ལོགས་ལ༔ མེ་ཏོག་དྲི་ཞིམ་སྣ་ཚོགས་རབ་བརྒྱན་པའི༔ ཕྱོགས་ལྗོངས་རྒྱུ་ཞིང་ཕྱི་ལ་སྐུ་འཆག་འགྲོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལྷ་ལྕམ་མནྡཱ་ར་བས་ཁྱིམ་ཐབ་སྤངས་ནས་ཆོས་མཛད་པའི་ལེའུ་སྟེ་སོ་དགུ་པའོ༔
པདྨ་བཀའ་ཐང་ལེའུ་ ༤༠ ལྷ་ལྕམ་མནྡཱ་ར་བ་དང་མཇལ་འཕྲད་མཛད་པ།
དེ་ནས་ཨུ་རྒྱན་པདྨ་འབྱུང་གནས་ཀྱིས༔ མནྡཱ་ར་བ་དཔོན་གཡོག་གདུལ་བྱར་གཟིགས༔ ཉི་མ་སྤྲིན་ཆར་འདྲེས་པའི་འཇའ་འགྱུས་བཞིན༔ ཨུ་རྒྱན་དྷ་ན་ཀོ་ཤའི་མཚོ་གླིང་ནས༔ ཟ་ཧོར་ཡུལ་དུ་ནམ་མཁའི་དབྱིངས་ལ་བྱོན༔ སྤྲེའུ་ལོ་ཕག་གི་ཟླ་བའི་ཚེས་བཅུའི་ཉིན༔ ལྷ་ལྕམ་དཔོན་གཡོག་སྐྱོ་བསང་བྱེད་པའི་གནས༔ སྐྱེད་མོས་ཚལ་གྱི་བར་སྣང་སྐྱིལ་ཀྲུང་བཅས༔ འཇའ་འོད་ཟེར་ཁྱིམ་གཟི་མདངས་འོད་དུ་འབར༔ ཞི་བའི་གཟུགས་མཐོང་ལོ་བརྒྱད་རྣམ་པ་ཅན༔ ཤིན་ཏུ་འཛུམ་ཞིང་བརྡ་ཆོས་མང་དུ་མཛད༔ ལྷ་ལྕམ་སྐུ་དེ་མཐོང་བ་ཙམ་གྱིས་ནི༔ དད་པའི་ཡུས་ཀྱིས་དྲན་མེད་ས་ལ་འགྱེལ༔ པདྨའི་ཐུགས་རྗེ་ལྷ་ལྕམ་ཉིད་ལ་ཤར༔ དགུག་པའི་ཕོ་ཉས་སྒོ་གསུམ་དབང་དུ་བསྡུས༔ རབ་ཏུ་དགའ་བས་ལྷ་ལྕམ་དྲན་པ་རྙེད༔ ཁོལ་མོ་ལ་ལ་གདན་ཁྲི་བཤམ་དུ་བཅུག༔ ཁོལ་མོ་ལ་ལ་བྱ་ར་བ་ལ་བསྐོས༔ ཁོལ་མོ་ལ་ལ་སྲང་ཀ་ཉུལ་དུ་བཅུག༔ རྒྱལ་བའི་སྲས་དེ་ས་ལ་ཕེབས་པར་གྱུར༔ བདེ་བར་གྱུར་ཅིང་ཚིམ་པའི་མནྡཱ་རས༔ ཕོ་བྲང་ནང་དུ་གཤེགས་པར་ཚིགས་སུ་བཅད༔ ཨེ་མ་ཧོ༔ རྒྱལ་བ་སངས་རྒྱས་ཐུགས་སྲས་གཙུག་གི་ནོར༔ རང་དོན་རྫོགས་སངས་རྒྱས་ནས་གཞན་དོན་དུ༔ སྙིང་རྗེའི་ལྕགས་ཀྱུས་འགྲོ་བ་ཡོངས་ལ་འཛིན༔ བྱམས་པའི་གསོ་དཔྱད་སེམས་ཅན་ཡོངས་ལ་མཛད༔ དགའ་བའི་གཟི་མདངས་ཀྱིས་ནི་བདག་ལ་བསྟན༔ བཏང་སྙོམས་གྲུ་ལ་དགྲ་གཉེན་མེད་པར་སྒྲོལ༔ དམུས་ལོང་སེམས་ཅན་ཀུན་གྱི་སྐྱབས་གཅིག་པུ༔ ཕོ་བྲང་ནང་དུ་ཆོས་གསུང་བཞུགས་པར་ཞུ༔ དེ་ནས་ཕོ་བྲང་ནང་དུ་སྤྱན་དྲངས་ཏེ༔ མཛེས་མཐོ་རཏྣའི་ཁྲི་བཤམས་བཞུགས་སུ་གསོལ༔ སྒོ་བ་བཙུགས་ནས་ནང་དུ་མི་མི་གཏོང་༔ འདོད་ཡོན་བཟའ་བཏུང་མང་པོའི་ཚོགས་འཁོར་བཤམས༔ གསེར་དངུལ་མུ་ཏིག་རིན་ཅེན་རིགས་བྱེད་དང་༔ དར་ཟབ་རས་དང་ཐགས་སུ་བཏགས་པའི་རིགས༔ སྐུ་ལ་མཛེས་པ་ཞལ་དུ་བདའ་བ་ཕུལ༔ ལྷ་ལྕམ་དམའ་བའི་ས་ལ་འདུག་ནས་སུ༔ ཞེ་སར་བཅས་པའི་ཡིད་འཇུག་རྣམ་འགྱུར་བསྟན༔ གུས་པའི་ཕྱག་བཙལ་སྙན་པའི་ངག་གིས་ཞུས༔ དུས་གསུམ་སངས་རྒྱས་ཞལ་སྐྱིན་མཆོག་དངོས་ཀྱི༔ འཁྲུངས་ཡུལ་གང་ལགས་མཚན་ནི་ཇི་ལྟ་བུ༔ རིགས་ནི་གང་ལགས་ཡབ་ཡུམ་ཇི་ལྟ་བུ༔ བཀའ་མཆིད་དམ་པ་བདུད་རྩི་གསུང་དུ་གསོལ༔ རྒྱལ་བས་དགེ་སློང་མ་ལ་བཀའ་སྩལ་པ༔ བསྐྱེད་པའི་ཡབ་མེད་ཆོས་དབྱིངས་སྟོང་པ་ཉིད༔ བལྟམས་པའི་ཡུམ་མེད་ཤེས་རབ་སྟོང་པའི་ངང་༔ མི་ལ་མཆོག་སྩོལ་སྲིད་བཅིངས་གྲོལ་བའི་རིགས༔ ང་ནི་བདེ་བའི་དངོས་གྲུབ་ཅེས་བྱའོ༔ སངས་རྒྱས་འདུལ་ཞིང་ཁྱད་པར་འཕགས་པ་རུ༔ འགྲོ་རེའི་མདུན་དུ་སྤྲུལ་སྐུའི་སྟོན་པ་འབྱོན༔ སྔོན་ཚེ་སྣང་བ་མཐའ་ཡས་འོད་དཔག་མེད༔ རི་བོ་ཏ་ལར་མགོན་པོ་སྤྱན་རས་གཟིགས༔ དྷ་ན་ཀོ་ཤར་པདྨ་འབྱུང་གནས་སྐུ༔ མཚོན་ཚུལ་ཙམ་ལ་གསུམ་དུ་སྣང་གྱུར་ཀྱང་༔ དོན་ལ་དབྱེར་མེད་སོ་སོར་ཐ་མི་དད༔ ཆོས་དབྱིངས་གནས་སུ་ཀུན་ཏུ་བཟང་པོ་དང་༔ སྟུག་པོ་བཀོད་པར་རྡོ་རྗེ་འཆང་ཆེན་པོ༔ རྡོ་རྗེ་གདན་དུ་ཐུབ་པ་ཆེན་པོ་ཉིད༔ གཉིས་མེད་པདྨ་ང་རུ་ལྷུན་གྱིས་གྲུབ༔ འགྲོ་དོན་ཀུན་ལས་བྱིན་བས་རྨད་པོ་ཆེ༔ བསྐྱེད་པའི་ཡབ་བརྒྱད་བལྟམས་པའི་ཡུམ་བརྒྱད་དང་༔ བྱོན་པའི་ཡུལ་བརྒྱད་བཞུགས་པའི་གནས་བརྒྱད་དང་༔ དེ་བཞིན་སྒྲུབ་པ་མཛད་པའི་དུར་ཁྲོད་བརྒྱད༔ གུ་རུ་མཚན་བརྒྱད་རྣམ་ཤེས་ཚོགས་བརྒྱད་དག༔ བླ་མ་རྡོ་རྗེ་སློབ་དཔོན་ཆས་བརྒྱད་དང་༔ སྒྱུ་འཕྲུལ་སྡེ་བརྒྱད་དཔལ་གྱི་ཆས་བརྒྱད་དང་༔ སྒྲུབ་པ་བཀའ་བརྒྱད་དུར་ཁྲོད་ཆས་བརྒྱད་དང་༔ སྦྱོར་བ་སྒྲོལ་བ་ཚར་ཕྱིན་གྲུབ་ཆེན་བརྒྱད༔ བསྟེན་པའི་རུ་བརྒྱད་མཛད་པའི་འཕྲིན་ལས་བརྒྱད༔ འདས་པའི་མཚན་བརྒྱད་མ་འོངས་མཚན་བརྒྱད་དེ༔ མ་ངེས་མཚན་བརྒྱད་ད་ལྟའི་མཚན་བརྒྱད་ལས༔ ཚོགས་གཉིས་མཐར་ཕྱིན་ཡོན་ཏན་རབ་རྫོགས་པ༔ སྲས་ཀྱི་མཆོག་གྱུར་སྤྲུལ་པ་བསམ་མི་ཁྱབ༔ འདས་དང་མ་འོངས་ད་ལྟ་ཐམས་ཅད་དུ༔ བསྟན་པའི་རྒྱལ་མཚན་ཕྱོགས་བཅུར་རབ་ཏུ་བཙུགས༔ ཞེས་གསུངས་ལྷ་ལྕམ་རབ་ཏུ་དགྱེས་པར་གྱུར༔ ཡོ་ག་རྣམ་གསུམ་ཆོས་ཀྱི་འཁོར་ལོ་བསྐོར༔ ཆོས་ཀྱི་ཆར་ཕབ་བདེ་ཞིང་སྐྱིད་པ་ལ༔ འཇིག་རྟེན་ཁྱིམ་པོ་ཆེ་ཡི་ནང་ཞིག་ན༔ ལས་མ་དག་པའི་བ་ལང་རྫི་བོ་ཞིག༔ བ་ལང་ཚོལ་ཕྱིན་མ་རྙེད་ལོག་པ་དང་༔ རྒྱལ་བ་དང་པོ་ས་ལ་ཕེབས་པ་མཐོང་༔ བར་དུ་ལྷ་ལྕམ་ཕོ་བྲང་སྤྱན་དྲངས་མཐོང་༔ ཐ་མ་ཉན་དུ་བྱས་པས་ཕོ་སྐད་ཐོས༔ དེ་དུས་ཟ་ཧོར་རྒྱལ་ཁམས་ཐམས་ཅད་ནི༔ ལྷ་ལྕམ་མནྡཱ་ར་བར་མངོན་པར་བསྟོད༔ ཕོ་མོ་ཐམས་ཅད་ཡིད་སྨོན་བྱེད་པ་ལ༔ རྫི་བོས་ཁྱིམ་པོ་ཆེ་ཡི་གོ་རུ་གླེངས༔ ཆོས་དང་ཅིའི་ཆོས་དགེ་སྦྱོང་འཁྱམ་པོ་བསྡེབས༔ ཆོས་མ་ཡིན་པའི་སྤྱོད་པ་བྱེད་དོ་ཟེར༔ ནང་པར་བྱིས་པས་ཉི་རའི་ཁྲོད་དུ་གླེངས༔ གཅིག་གླེངས་གཉིས་གླེངས་ཡུལ་གྱི་གཙོ་བོས་གླེངས༔ ཕྱི་བློན་ནང་བློན་བཙུན་མོས་རིམ་པར་གླེངས༔ བཙུན་མོ་གཞོན་པས་རྒྱལ་པོའི་སྙན་དུ་སྨྲས༔ རྒྱལ་པོས་འདི་ནི་ཅི་ཟེར་སྨྱོའམ་གསུངས༔ བུད་མེད་ཁ་ནི་མི་དགེའི་བང་མཛོད་ཡིན༔ ཤབ་ཤུབ་མང་པོ་བུད་མེད་འདྲེ་དང་མཚུངས་༔ དང་པོ་གཏམ་དེ་སུས་ཟེར་ཁྲིད་ཤོག་གསུངས༔ བཙུན་མོས་ནང་བློན་རྒྱལ་པོའི་དྲུང་དུ་ཁྲིད༔ ནང་བློན་ཕྱི་བློན་རིམ་པར་གཙོ་བོ་དང་༔ གཙོ་བོ་རྣམས་ཀྱིས་དམངས་རྣམས་བསགས་ནས་སུ༔ ལྷལྕམ་མེ་ཏོག་མནྡཱ་ར་བ་ལ༔ ཟླ་བོ་དགེ་སྦྱོང་ཞིག་འདུག་ཟེར་བ་དེ༔ ཕོ་ཡིས་མཐོང་ན་བློན་པོའི་དྲག་ཤོས་འཆོལ༔ མོ་ཡིས་མཐོང་ན་བཙུན་མོའི་དྲག་ཤོས་འཆོལ༔ མིག་མཐོང་ལག་ཟིན་སུ་ཡོད་སྨྲོས་ཤིག་ཟེར༔ སྐད་པོ་ཆེ་ཡི་སྐད་ཀྱིས་ང་རོ་བསྒྲགས༔ ཉི་མ་དུ་ཤར་བྱས་ཀྱང་མཐོང་མ་བྱུང་༔ གྲགས་པ་ངན་པས་ས་སྟེང་ཁྱབ་པར་གྱུར༔ དེ་དུས་བློན་པོ་རྣམས་ཀྱིས་གཙོ་བོ་བཟུང་༔ རྒྱལ་པོའི་མདུན་དུ་དེ་དག་གཏུགས་པར་གྱུར༔ རྒྱལ་པོའི་ཞལ་ནས་དྲན་ཚད་སྨྲ་རྒྱུ་མིན༔ གཏམ་འདི་ཁམ་ཆེས་བུ་མོ་འདོད་མཁན་མང་༔ རྒྱལ་པོ་རྣམས་དང་ལབ་དགོས་སོ་མི་བསོད༔ དམ་པོར་ཆིངས་ལ་ཁྲི་མུན་ནང་ཆུག་གསུངས༔ རྒྱལ་པོས་ལྷ་ལྕམ་ཡོད་པའི་ཕོ་བྲང་ཕྱིན༔ ནང་ཀུན་ལེགས་པར་ཉུལ་བས་མ་མཐོང་སྟེ༔ དེ་ན་རྒྱལ་པོས་ཕོ་བྲང་ཕྱི་རུ་བྱོན༔ བློན་རྣམས་དུས་གཅིག་ཁྲིམས་རྔ་རྡུངས་ཤིག་གསུངས༔ ཟ་ཧོར་མི་ནི་ཆེ་ཆུང་མེད་པར་བསྡུས༔ ནོར་གྱི་བང་མཛོད་གཅིག་བཏིབ་ཁྲོམ་དཀྱིལ་སྤུངས༔ སྐད་པོ་ཆེ་ཡི་སྐད་གྱི་ང་རོ་བསྒྲགས༔ ལྷ་ལྕམ་ཁྱིམ་སྤངས་ལྷ་ཆོས་བྱས་པ་ལ༔ གྲོགས་པོ་དགེ་སྦྱོང་འདུག་ཟེར་སུ་ཡིས་མཐོང་༔ ངས་མཐོང་སྨྲོས་ཤིག་སྤུངས་པའི་ནོར་འདི་སྟེར༔ ཉི་མ་དུ་ཤར་བྱས་ཀྱང་མ་བྱུང་སྟེ༔ མཐའ་ཡི་རྒྱལ་པོ་རྣམས་ཀྱི་གཏམ་རྩོད་པ༔ རྒྱ་གར་རྒྱལ་པོའི་བྲམ་ཟེ་མི་བདུན་བྱུང་༔ རྒྱ་ནག་རྒྱལ་པོའི་གཙུག་ལག་མི་ལྔ་བྱུང་༔ བྷངྒའི་རྒྱལ་པོའི་ཙར་མི་བཅུ་བྱུང་༔ བཻདྡྷའི་རྒྱལ་པོའི་བློན་པོ་མི་གསུམ་བྱུང་༔ ཨུ་རྒྱན་རྒྱལ་པོའི་གར་མཁན་མི་བརྒྱད་བྱུང་༔ ཁ་ཆེའི་རྒྱལ་པོའི་ཚོང་བ་བརྡལ་ཅིག་བྱུང་༔ ལི་ཡི་རྒྱལ་པོའི་མུ་ཏོ་ཁྱུ་ཞིག་བྱུང་༔ སྟག་གཟིགས་རྒྱལ་པོའི་རོལ་མཁན་གྲ་ཞིག་བྱུང་༔ གེ་སར་རྒྱལ་པོའི་རྣལ་འབྱོར་མི་གསུམ་བྱུང་༔ ཞང་ཞུང་རྒྱལ་པོའི་བོན་པོ་མི་གཉིས་བྱུང་༔ རྒན་དང་གཞོན་དང་བྱིས་པ་ཡན་ཆད་ལ༔ ཐམས་ཅད་ལྷ་ལྕམ་མནྡཱ་ར་བ་འདྲི༔ དེ་ནས་གཙོ་བོ་ཞིག་གི་ཆུང་མ་ཡིས༔ བ་ལང་རྫི་བོ་དེ་ཡི་མགོ་བསྐོར་ནས༔ ཁྱོད་ཀྱི་བ་ལང་འཚོ་བའི་ཚབ་མ་གཏོང་༔ ཚོགས་པའི་གསེབ་ཏུ་ཁྱོད་ཀྱིས་མཐོང་ཟེར་དགོས༔
གཙོ་བོའི་ཆུང་མ་ཐམས་ཅད་ལྷན་ཅིག་འདུས༔ རྫི་བོ་དེ་ལ་ཀ་ཅས་ཚིམ་པར་བྱས༔ བ་ལང་རྫི་བོས་དམར་ནག་ཁྲོམ་དཀྱིལ་ཕྱིན༔ སྐད་པོ་ཆེ་ཡི་སྐད་བཏོན་ཕྱི་མ་ལ༔ ཚོགས་པའི་དཀྱིལ་ནས་མི་ཞིག་ལངས་བྱུང་སྟེ༔ དེ་ཡང་མཚན་མི་སྡུག་པ་དགུ་ཡིས་བརྒྱན༔ མགོ་ཆེ་རྐུབ་འབུར་ཤ་རྩུབ་ལྦ་རི་འདྲ༔ ཁ་ཆེ་སྣ་ཉག་མིག་ཕུགས་ཤིན་ཏུ་རིང་༔ མདོག་ནག་མདུན་གྱི་ཡ་སོ་གཅིག་དོན་པ༔ དེས་ནི་ངས་མཐོང་ནང་དུ་ལྟོས་དང་ཟེར༔ མི་དེ་ཟས་ནོར་མདུན་དུ་བཟུང་ནས་སུ༔ རྒྱལ་པོས་བློན་པོ་སོང་ལ་ལྟོས་ཤོག་གསུངས༔ བཙུན་མོ་ངས་ལྟའི་ཟེར་ནས་སྔོན་ལ་སོང་༔ གཡོག་མོས་སྒོ་བསྡམས་ནང་དུ་མ་བཏང་ནས༔ བཙུན་མོ་བདེན་ངེས་བསམས་ནས་བརྒྱལ་བར་གྱུར༔ བློན་པོས་རྒྱལ་པོའི་སྙན་དུ་དེ་སྐད་སྨྲས༔ རྒྱལ་པོའི་ཞལ་ནས་བཙུན་མོར་ཆུ་རྒྱོབ་ལ༔ ཕོ་བྲང་ནང་སྐྱོལ་སྒོ་དེ་སྟྭ་རེས་གསེས༔ དགེ་སྦྱོང་ཟུང་ལ་འདི་རུ་ཁྲིད་ཤོག་གསུངས༔ དེ་ནས་བློན་པོས་སྒོ་གསེས་ནང་དུ་ཕྱིན༔ ཆོས་སྟན་མཐོ་བར་རཏྣའི་ཁྲི་ཐོག་ན༔ སྐུ་ཟིལ་མེ་ལོང་ཉི་མ་ཕོག་པ་ལྟར༔ ལྟ་བས་མི་བཟོད་གཟི་མདངས་འོད་དུ་འབར༔ ཚངས་པའི་གསུང་ནི་ཆོས་སུ་ལྷང་ལྷང་སྒྲོགས༔ ལྷ་ལྕམ་དཔོན་གཡོག་ཐལ་སྦྱར་མཆི་མ་ཕྱུང་༔ བློན་པོ་རྣམས་ཀྱིས་འཇུ་བར་མ་ཕོད་ནས༔ སླར་ཡང་རྒྱལ་པོའི་སྙན་དུ་ཞུས་པ་ཡིས༔ མཐའ་མི་དགེ་སྦྱོང་དེ་ནི་ཡ་མཚན་ཏེ༔ རྣམ་ཐོས་བུའམ་ཚངས་པའི་བུ་ཞིག་ཡིན༔ ལྷ་ལྕམ་བླ་མ་ཡིན་འདྲ་འཇུ་མ་སྤོབས༔ དེ་སྐད་གསོལ་བས་རྒྱལ་པོ་སྤར་གྱིས་འཕར༔ མཐའ་མིས་ང་ཡི་བུ་མོའི་སྨ་འབེབས་པ༔ རིགས་ཉམས་དགེ་སྦྱོང་དེ་ནི་ལེགས་པར་ཆིངས༔ ཏ་ལ་ཏིལ་མར་ཁྲལ་བསྡུས་གསོན་སྲེགས་གྱིས༔ ལྷ་ལྕམ་ཁྱིམ་ལ་བཏང་དུས་མི་འགྲོ་བར༔ ད་ནི་མཐའ་མི་འཁྱམ་པོ་ཞིག་དང་བསྡེབས༔ ས་ལ་དོང་བྲུས་ཚེར་མའི་སྟན་གོས་པར༔ མི་ལོ་ཉི་ཤུ་རྩ་ལྔའི་བར་དུ་ཞོག༔ ཐོག་ཕུབ་ནམ་མཁའ་སྔོ་ཙམ་མི་མཐོང་གྱིས༔ གཡོག་གཉིས་ཉི་མའི་མདངས་མི་མཐོང་བར་ཆུག༔ ཁོལ་མོ་ལྔ་བརྒྱ་ཐེམ་པའི་ཕྱིར་མ་བཏང་༔ སྐྱེས་པའི་སྐད་མི་ཐོས་པའི་ཕུགས་སུ་ཆུག༔ དེ་སྐད་གསུངས་ནས་རྒྱལ་པོ་ཕོ་བྲང་གཤེགས༔ གཙོ་བོ་ཁྲི་མུན་ནང་ནས་ཕྱི་ལ་ཐོན༔ ཤིག་སྲོ་གྲ་རྒྱས་ཤ་ལྤགས་རུས་མིག་ཐིམ༔ ཆུང་མ་རྣམས་དང་ལྷན་ཅིག་འདུས་པར་གྱུར༔ ཟས་ཆང་སྣ་ལེན་དགའ་བའི་སེམས་གཏིང་སྟོན༔ དེ་ནས་གཙོ་བོས་ཕྱོགས་ཀྱི་དམག་དཔོན་ལ༔ ཕོ་ཉ་བཏང་ནས་དགེ་སྦྱོང་སྟེང་དུ་ཕབ༔ ཕྱི་ནང་བློན་པོ་གཙོ་བོར་བཅས་པ་ཡིས༔ ལ་ལས་དོང་བྲུས་ལ་ལས་ཚེར་མ་བཅད༔ ལྷ་ལྕམ་ཡོད་པའི་ཕྲོ་བྲང་ཕྱིན་པར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལྷ་ལྕམ་མནྡཱ་ར་བ་དང་མཇལ་འཕྲད་མཛད་པའི་ལེའུ་སྟེ་བཞི་བཅུ་པའོ༔ ༔
པདྨ་བཀའ་ཐང་ལེའུ་ ༤༡ ཟ་ཧོར་རྒྱལ་པོས་གསོན་བསྲེགས་མཛད་པའི་ལེའུ།
དེ་ནས་གཙོ་བོ་རྣམས་ཀྱིས་ཁྲིམས་བསྲངས་པ༔ དགེ་སྦྱོང་ཁྱོད་ཀྱིས་ལྷ་ལྕམ་ལུས་བསླད་པས༔ ཉེས་མེད་གཙོ་བོ་རྒྱལ་པོའི་ཆད་པས་མནར༔ ལྷ་ལྕམ་ཁྱིམ་དུ་མ་ཕྱིན་བྱ་བ་འདིས༔ རྒྱལ་རིགས་ཉམས་བཅུག་ཉེས་མེད་ཁྲིམས་ལ་གཏུགས༔ དེ་སྐད་སྨྲས་པས་ལྷ་ལྕམ་ཞལ་ན་རེ༔ རྒྱལ་པོའི་སྲས་འདི་ང་ཡི་བླ་མ་ཡིན༔ ལྷ་ལྕམ་འཇིག་རྟེན་སྐྱོན་གྱིས་གོས་པ་མེད༔ སྨྲས་ཀྱང་མ་ཕན་སློབ་དཔོན་སྟེང་དུ་ཤོར༔ ལ་ལས་གོས་ཕུད་ལ་ལས་ཕྱག་ཞབས་བཟུང་༔ ལྷ་ལྕམ་ཁོ་མོའི་སྙིང་འདི་གས་ལ་ཐུག༔ ལུས་འདི་མི་བཟད་རབ་ཏུ་གཟིར་གྱུར་ཏེ༔ མྱ་ངན་ཉམ་ཐགས་མཆི་མས་མིག་གཉིས་གཟིར༔ ཕན་གྲོགས་ནུས་པ་ཅུང་ཟད་ཙམ་ཡང་མེད༔ སློབ་དཔོན་ཕྱག་གཉིས་རྒྱབ་ཏུ་དམ་པར་བཅིངས༔ མགུལ་ལ་གསོ་མ་ར་ཙའི་ཐག་པ་བཏགས༔ ཀྱེ་མ་ཀྱི་ཧུད་མི་ཡིས་ཕོད་པ་ན༔ སྔོན་ཁྲིད་བརྡེག་འཕུལ་རྟ་པའི་འཕྲང་ལ་བཅུག༔ ལུང་པའི་སུམ་མདོ་ཐང་སྟོང་ཞིག་ཏུ་བཞག༔ ཤིང་གི་ནང་ནས་རབ་ཏུ་ཚ་བའི་ཤིང་༔ ཏ་ལའི་ལོ་མ་དེའུ་ཙམ་ཞིག་བརྩིགས༔ དེ་ལ་ཏིལ་གྱི་མར་ཁུས་ངར་བཏགས་ནས༔ ཙནྡན་ཁུར་རེ་ཏིལ་མར་བྲེ་རེ་བསྡུས༔ དེ་ཉིད་རྒྱལ་བའི་སྐུ་ལ་དམ་དུ་བཅིངས༔ དེ་ཡི་དཀྱིལ་བཅུག་ཕྱོགས་བཞིར་མེ་བཏང་ནས༔ གཡབ་མོ་བརྡུལ་བས་ལུང་པར་དུད་སྤྲིན་འཚུབས༔ བློན་པོ་རྣམས་ནི་གནས་ལ་ལོག་པ་དང་༔ དེ་དུས་སྒྲ་དང་ས་གཡོས་ཆེན་པོ་བྱུང་༔ ནམ་མཁའི་ལྷ་རྣམས་སེམས་ཀྱིས་མ་བཟོད་དེ༔ ཆོང་བརྒྱངས་བཏོན་པས་འདོད་ལྷ་ཀུན་གྱིས་ཐོས༔ རྒྱལ་ཆེན་རིགས་བཞི་སུམ་ཅུ་རྩ་གསུམ་ནས༔ འཐབ་བྲལ་མན་ཆོད་ཐོས་ནས་ར་མདར་འོངས༔ འོག་མིན་གནས་དང་བཀོད་པ་ལྷུན་གྲུབ་ནས༔ བདེ་བར་གཤེགས་པ་སྐར་ཚོགས་བཞིན་དུ་འཁྲིགས༔ མཁའ་འགྲོ་མ་རྣམས་ཀུ་ཅོ་ཅལ་ཅོལ་སྨྲེང་༔ ལ་ལས་ཆུ་སྐྱེལ་ལ་ལས་ཆུ་བརྒྱབ་ཅིང་༔ ལ་ལས་ཤིང་སྡུད་ལ་ལས་བཅིངས་པ་འགྲོལ༔ ལ་ལས་ཆར་འབེབས་ལ་ལས་རྫིང་བུ་བསྐྱིལ༔ ཞག་བདུན་བར་དུ་དུད་པ་མ་ཆད་པས༔ སྔར་བསྲེགས་ཞག་གསུམ་དུད་པ་ཆད་པ་ལ༔ ད་རེས་ཞག་བདུན་དུད་པ་མ་ཆད་སྙམ༔ རྟ་དང་གླང་པོ་འགྲོ་བའི་ཆས་གྱིས་གསུངས༔ རྒྱལ་པོས་ཡིད་མ་ཆེས་པར་ལྟ་རུ་ཕྱིན༔ ས་ཕྱོགས་དེ་ཉིད་ཆུ་ཡི་རྒྱ་མཚོར་གྱུར༔ རྒྱ་མཚོའི་མཐའ་མ་མེ་འོབས་ཆེན་པོས་བསྐོར༔ མེ་ལྕེ་ཐམས་ཅད་ཕྱི་ལ་འབར་བར་བྱས༔ རྒྱ་མཚོའི་དཀྱིལ་ན་པདྨའི་སྡོང་པོ་སྐྱེས༔ པད་སྡོང་སྟེང་ན་ཁྱེའུ་ལོ་བརྒྱད་པ༔ སྐུ་མདོག་དུང་ལ་ཕོ་ཚོས་བསྐུས་པ་འདྲ༔
སྐུ་ནི་གྲང་གྲང་བསིལ་བསིལ་ལྟར་དུ་འདུག༔ ཐོ་ཕྱི་ཐམས་ཅད་འཇའ་དང་འོད་ཀྱིས་བསྐོར༔ ལྷ་ལྕམ་འདྲ་བའི་བུ་མོ་བརྒྱ་ཡིས་བསྟོད༔ མདངས་ནི་ཡལ་ཡལ་བྱིན་ནི་ཐིབས་ཐིབ་འདུག༔ ཡིད་མ་ཆེས་པར་ཕྱོགས་བཞིར་ཕྱིན་ནས་བལྟས༔ གང་ནས་བལྟས་ཀྱང་དེ་ལྟར་འདུག་པ་དང་༔ རྒྱལ་པོ་མིག་ནི་འཁྲུལ་པ་ཡིན་ནམ་སྙམ༔ མིག་ནི་ཕྱིས་ཤིང་ཡང་ཡང་བལྟས་པ་ཡིས༔ ཁྱེའུའི་ཞལ་ནས་རྒྱལ་པོར་འདི་སྐད་གསུངས༔ དུས་གསུམ་སངས་རྒྱས་ངོ་བོ་བླ་མ་ལ༔ གསོན་སྲེག་བྱེད་པའི་སྡིག་རྒྱལ་བྱོན་ལགས་སམ༔ འཇིག་རྟེན་སླུ་བྱེད་ཆོས་ལ་རབ་ཆགས་ནས༔ དོན་མེད་ཁྲིམས་འཇུག་སྡིག་རྒྱལ་བྱོན་ལགས་སམ༔ མ་རིག་རྩ་བ་ཉོན་མོངས་དུག་ལྔ་ལ༔ འཕྲལ་ཕུགས་གནས་པའི་སྡིག་རྒྱལ་བྱོན་ལགས་སམ༔ འདུན་མའི་རྩ་བ་སེམས་ཅན་མགུ་བྱེད་ལ༔ མི་དགེས་རྒྱགས་པའི་རྒྱལ་བློན་བྱོན་ལགས་སམ༔ དེ་སྐད་གསུངས་པས་རྒྱལ་པོ་ས་ལ་འགྱེལ༔ ཕ་ངས་འདི་འདྲ་བྱེད་པ་དྲན་པ་ཟེར༔ ལག་གཉིས་བྲང་ལ་དྲག་ཏུ་བསྣུན་བྱེད་ཅིང་༔ བྱེ་ཚན་ཐང་ལ་བཏོན་པའི་ཉ་བཞིན་དུ༔ མགོ་ལུས་ས་ལ་རྡེབ་ཅིང་འགྲེ་ལྡོག་བྱེད༔ ང་འདྲ་ཡོད་པ་ཟེར་ཞིང་ཆོ་ངེ་འདེབས༔ བློན་པོས་རྒྱལ་འཛིན་ཁྱེའུ་ལྟ་ཞིང་དུ༔ མི་རྣམས་གཅིག་སླེབས་གཉིས་སླེབས་ས་དེར་འོངས༔ མཐའ་མི་དགེ་སྦྱོང་མ་ཤི་འདུག་པར་གྲགས༔ བྱ་བའི་འཕྲོ་བསྐྱུར་ཕོ་མོ་ཐམས་ཅད་རྒྱུག༔ ཟ་ཧོར་ཡུལ་ན་འདུག་ཚད་ཐམས་ཅད་ཚོགས༔ རྒས་པ་འཁོགས་པ་ཁུར་དང་འཁར་བ་བཙུགས༔ དེ་ནས་དཔག་ཚད་བརྒྱ་སྟོང་མང་པོའི་ཡུལ༔ ས་གཞི་མི་མངོན་དམར་ནག་ཁྲོམ་དུ་འཁྲིགས༔ དེ་ནས་རྒྱལ་པོ་འགྱེལ་ནས་བུབ་ཅིང་ངུས༔ ལུས་པོ་སར་རྡེབ་ཕྱག་ནི་གྲངས་མེད་བཙལ༔ མི་འཚམ་ལས་བྱས་འགྱོད་པ་རྟས་མི་སླེབ༔ རབ་ཏུ་ཚ་བའི་མེ་ཡིས་མ་ཚུགས་པར༔ མེ་འོབས་དཀྱིལ་ན་ཏིལ་མར་རྒྱ་མཚོར་འཁྱིལ༔ རྒྱ་མཚོའི་དཀྱིལ་ན་པདྨའི་སྡོང་པོ་སྐྱེས༔ པད་སྡོང་དཀྱིལ་ན་དུས་གསུམ་སངས་རྒྱས་བཞུགས༔ སྐྱོན་གྱིས་མ་གོས་འགྱུར་བ་མི་མངའ་བ༔ བདེ་བ་པདྨའི་འབྱུང་གནས་ཁྱོད་ལ་བསྟོད༔ བདག་གི་བློ་ངན་སྐུ་ལ་བརྙས་བགྱིས་པ༔ མི་འཆབ་མི་སྦེད་མཐོལ་ཞིང་བཤགས་པར་བགྱི༔ རྒྱལ་པོའི་རྒྱལ་སྲིད་འབུལ་བས་བཞེས་སུ་གསོལ༔ རྒྱལ་པོའི་དབང་པོ་གཙུག་ལག་འཛིན་པ་ནི༔ ཁྱོད་ཀྱི་རྗེས་སུ་འཇུག་པའི་རྒྱལ་པོར་གྱུར༔ སེམས་ཅན་མ་རིག་ཁམ་ཆེན་དགོངས་མཛོད་ལ༔ རྗེ་ཉིད་ཕོ་བྲང་ནང་དུ་བཞུགས་པར་ཞུ༔ དེ་ནས་ཆོས་བཟང་ལྷ་ཡི་འདུན་ས་ནས༔ ལྷ་དབང་བརྒྱ་བྱིན་འཁོར་དང་བཅས་འོངས་ནས༔ པི་ཝང་སྒྲ་ལ་བཅུག་ནས་བསྟོད་པར་བྱེད༔ པདྨ་སྲིད་ཐུབ་འཛིན་ནི་འཁོར་བཅས་པས༔ རྔ་སྒྲའི་སྐད་ལ་བཅུག་ནས་བསྟོད་པར་བྱེད༔ ཧྲཱི༔ མ་བཅོས་སྤྲོས་བྲལ་བླ་མ་ཆོས་ཀྱི་སྐུ༔ བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ༔ པད་སྡོང་ལས་བྱུང་བླ་མ་སྤྲུལ་པའི་སྐུ༔ སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད༔ སྐུ་ནི་མི་འགྱུར་ཀུན་ཏུ་བཟང་པོའི་སྐུ༔ གསུང་ནི་མི་འགག་མཉམ་ཉིད་རིག་པའི་གསུང་༔ ཐུགས་ནི་མི་གཡོ་སྨྲ་བསམ་བརྗོད་ལས་འདས༔ སྐུ་གསུང་ཐུགས་ལྡན་པདྨ་རྒྱལ་ལ་བསྟོད༔ འགྲོ་བའི་དོན་དུ་རང་བྱུང་འོད་དཔག་མེད༔ བཀྲ་ཤིས་ཡོན་ཏན་དུ་མས་བརྒྱན་པའི་སྐུ༔ འཇིག་རྟེན་མངའ་སྒྱུར་པདྨ་རྒྱལ་བའི་སྲས༔ རྡོ་རྗེ་ཐོད་ཕྲེང་རྩལ་ལ་ཕྱག་འཚལ་བསྟོད༔ ཞི་བའི་ལས་མཛད་རྡོ་རྗེ་ཐོད་ཕྲེང་རྩལ༔ རྒྱས་པའི་ལས་མཛད་རཏྣ་ཐོད་ཕྲེང་རྩལ༔ དབང་གི་ལས་མཛད་པདྨ་ཐོད་ཕྲེང་རྩལ༔ མངོན་སྤྱོད་ལས་མཛད་ཀརྨ་ཐོད་ཕྲེང་རྩལ༔ ཐམས་ཅད་ལྷུན་འགྲུབ་བུདྡྷ་ཐོད་ཕྲེང་རྩལ༔ འཕྲིན་ལས་རྫོགས་པའི་རྗེ་ལ་ཕྱག་འཚལ་བསྟོད༔ ཧྲཱིཿམ་ཆགས་སྐྱོན་གྱིས་མ་གོས་པའི༔ པདྨ་འབྱུང་གནས་སྐུ་ལ་བསྟོད༔ ཡོན་ཏན་ཐམས་ཅད་རབ་རྫོགས་པའི༔ པདྨ་སམྦྷའི་སྐུ་ལ་བསྟོད༔ རྨོངས་པའི་མུན་པ་སེལ་མཛད་པའི༔ ཉི་མ་འོད་ཟེར་སྐུ་ལ་བསྟོད༔ ལོག་འདྲེན་བདུད་བཞི་འདུལ་མཛད་པའི༔ ཤཱཀྱ་སེང་གེའི་སྐུ་ལ་བསྟོད༔ མུ་སྟེགས་དམ་སྲི་འདུལ་མཛད་པའི༔ སེང་གེ་སྒྲ་སྒྲོགས་སྐུ་ལ་བསྟོད༔ ཤེས་བྱ་ཀུན་ལ་མ་རྨོངས་པའི༔ བློ་ལྡན་མཆོག་སྲེད་སྐུ་ལ་བསྟོད༔ ཁམས་གསུམ་སྲིད་གསུམ་དབང་དུ་སྡུད༔ པདྨ་རྒྱལ་པོའི་སྐུ་ལ་བསྟོད༔ བདུད་དང་ལོག་འདྲེན་ཚར་གཅོད་པའི༔ རྡོ་རྗེ་གྲོ་ལོད་སྐུ་ལ་བསྟོད༔ བདེ་བ་ཐམས་ཅད་སྐུ་ལ་རྫོགས༔ ཡེ་ཤེས་མཁའ་འགྲོའི་སྐུ་ལ་བསྟོད༔ ཅེས་བསྟོད་དེ་ནས་གུ་རུའི་ཞལ་ནས་སུ༔ རྒྱལ་པོ་གཙུག་ལག་འཛིན་པ་ཉོན་ཅིག་གསུངས༔ ང་ཡི་བཀོད་པ་ནམ་མཁའི་རང་བཞིན་ལ༔ དགའ་དང་མི་དགའི་ཟུག་རྔུ་ག་ལ་མཆི༔ ཟག་མེད་སྐུ་ལ་འབྱུང་བ་མེས་མི་ཚུགས༔ མི་དགའི་འདུ་ཤེས་ཅུང་ཟད་ཙམ་ཡང་མེད༔ སེམས་ཅན་ཡིན་པས་ནོར་འཁྲུལ་འོང་བར་མཆི༔ རྒྱལ་པོ་ཡོན་ཏན་ཀུན་ལྡན་རི་རབ་འདྲ༔ སངས་རྒྱས་ལམ་ལ་སྐྱེ་རྒུ་འཛུད་པའི་ཕྱིར༔ རྒྱལ་པོའི་ཞལ་མཆིད་མི་བསྐྱུང་བདག་མཆིའོ༔ དེ་སྐད་གསུངས་པས་རྒྱལ་པོས་ཕྱག་མང་བཙལ༔ བློན་པོ་རྣམས་ལ་མགྱོགས་པར་ཕོ་བྲང་སོང་༔ ཟ་འོག་བེར་མཛོད་གསར་པའི་སྒོ་ཕྱེས་ལ༔ ང་ཡི་ཞྭ་གོས་ཐམས་ཅད་ཁྱེར་ལ་ཤོག༔ ཤིང་རྟ་གདུགས་དང་རྒྱལ་མཚན་ལོང་ཤོག་གསུངས༔ དེ་ནས་བློན་པོས་མྱུར་ཕྱིན་ལོན་པ་དང་༔ ཤིང་རྟའི་སྟེང་དུ་དར་ཟབ་འབོལ་བརྩེགས་བཏིང་༔ ཤིང་རྟའི་ཟུར་བཞིར་གཡེར་ཤིང་དར་བཞི་ཕྱར༔ སྐུ་ལ་རྒྱལ་པོའི་ཟབ་བེར་སྔོ་བཀྲ་གསོལ༔ དེ་ནས་ལེ་བརྒན་དམར་དང་ཟ་འོག་དང་༔ དེ་ནས་བེར་ཆེན་སྣ་ལྔ་ལྔ་བརྩེགས་གསོལ༔ དབུ་ལ་རྒྱལ་པོའི་དབུ་ཞྭ་པད་འདབ་ཅན༔ ནོར་བུ་ཁ་དོག་མི་གཅིག་ལྔ་བརྩེགས་ལ༔ གསེར་གྱི་རྡོ་རྗེ་རྩེ་དགུ་བཙུགས་པ་ཡི༔ རྩེ་མོར་རྒོད་ཀྱི་རྩེ་རྒྱས་མཛེས་པ་དང་༔ དར་སྣ་མང་པོའི་ཅོད་པན་བཏགས་པས་བརྒྱན༔ རིན་ཅེན་གསེར་གྱི་ཉི་ཟླ་གསལ་བའི་ཞྭ༔ དབུ་ཞྭ་ཁྱད་འཕགས་ཡིད་བཞིན་ནོར་བུ་གྱོན༔ འཛམ་གླིང་བྱེ་ཕྲག་ས་ཡ་གདུལ་ཞིང་ན༔ པད་འབྱུང་བྱེ་ཕྲག་ས་ཡ་ཆོ་འཕྲུལ་སྟོན༔ ཤིང་རྟའི་སྟེང་དུ་སྤྱན་དྲངས་བཞུགས་པར་གྱུར༔ ཤིང་རྟའི་ཐག་པ་སུས་ཀྱང་འདྲུད་དབང་མེད༔ རྒྱལ་པོ་ཉིད་ཀྱིས་ལུས་ཀྱི་གོས་ཕུད་ནས༔ ཤིང་རྟའི་ཐག་པ་མགུལ་ལ་དཀྲིས་ནས་འདྲུད༔ གྱད་བརྒྱས་འདུས་པའི་ཁྲོམ་རྣམས་སྔོན་ལ་བཤགས༔ ལ་ལ་ཕྱག་འཚལ་ལ་ལ་གསོལ་བ་འདེབས༔ ལ་ལ་ངུ་བཤུམ་ལ་ལ་སེམས་ཉམས་བརྒྱལ༔ ལ་ལ་སྔོན་ཕྱིན་པད་འབྱུང་ཞལ་ལ་ལྟ༔ དེ་ནས་ཕོ་བྲང་ནང་དུ་སྤྱན་དྲངས་ནས༔ རིན་ཅེན་སྣ་བདུན་ཕོ་བྲང་ནང་དུ་ནི༔ རིན་ཅེན་བརྒྱན་པའི་ཁྲི་ལ་བཞུགས་སུ་གསོལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཟ་ཧོར་རྒྱལ་པོས་གསོན་བསྲེགས་མཛད་པའི་ལེའུ་སྟེ་ཞེ་གཅིག་པའོ༔ ༔
པདྨ་བཀའ་ཐང་ལེའུ་ ༤༢ ཟ་ཧོར་ཡུལ་དུ་མཐའ་དམག་བཟློག་པ།
དེ་ནས་རྒྱལ་པོའི་ཞལ་ནས་བློན་པོ་ལ༔ ལྷ་ལྕམ་མནྡཱ་ར་བ་ཁྲིད་ཤོག་གསུངས༔ བློན་པོས་མྱུར་ཕྱིན་དོང་གི་ཁ་བཤུས་ནས༔ ཚེར་མ་ཐམས་ཅད་གཡས་གཡོན་དོར་ནས་སུ༔ ཡབ་ཀྱི་ཞལ་ནས་ཕོ་བྲང་བྱོན་གྱིས་གསུངས༔ ལྷ་ལྕམ་ད་གཤེགས་ཕོ་བྲང་ནང་དུ་གཤེགས༔ ལན་མང་སྨྲས་ཀྱང་མ་ཐོས་བཞིན་དུ་མཛད༔ བློན་པོས་ནང་ཕྱིན་རྒྱལ་པོའི་སྙན་དུ་གསོལ༔ ལྷ་ལྕམ་ཁྲོས་ནས་ལན་མི་སྟེར་བར་འདུག༔ རྒྱལ་པོ་དེ་མ་ཐག་ཏུ་སྤྱན་ཆབ་ཤོར༔ བུ་མོ་བདེན་གྱིས་ཨ་མ་སོང་ཤོག་གསུངས༔ བཙུན་མོས་གོས་ཁྱེར་ལྷ་ལྕམ་མདུན་དུ་ཕྱིན༔ ལྷ་ལྕམ་ཚེར་མ་ཐམས་ཅད་ཤ་ལྤགས་དིམ༔ ལྟ་མི་བཟོད་པ་སྙིང་རྗེའི་གནས་སུ་འདུག༔ བུ་མོ་གོས་གྱོན་ཕོ་བྲང་ནང་དུ་འདོང་༔ དེ་སྐད་སྨྲས་པས་ལྷ་ལྕམ་ཞལ་ན་རེ༔ ཨ་མ་བུ་མོ་ཡབ་ཀྱི་བཀའ་མི་གཅོག༔ མི་ལོ་ཉི་ཤུ་རྩ་ལྔ་མ་སོང་བར༔ སྡུག་ཀྱང་འདུག་ས་འདི་གར་སྡོད་དོ་ཟེར༔ བཙུན་མོས་ལག་ནས་འཐེན་ཀྱང་འགྲོར་མ་བཏུབ༔ བུ་མོས་ཕོད་པ་ཟེར་ཞིང་ཁ་སྙིང་གཏུགས༔ བཙུན་མོ་གཡོག་མོས་མང་དུ་བཤུམས་པ་ཡིས༔ བུད་མེད་གཅིག་བྱུང་གཉིས་བྱུང་མང་པོ་འདུས༔ དེ་ནས་ཟ་ཧོར་མོ་ལུས་ཐོབ་ཚད་ཚོགས༔ ཐམས་ཅད་ངུ་ཞིང་ལུང་པ་འབའ་དིར་སོང་༔ རྒྱལ་པོའི་ཐུགས་ལ་བུ་མོ་ཤིའམ་སྙམ༔ རྒྱལ་པོ་ཉིད་ཀྱིས་ལྷ་ལྕམ་མདུན་དུ་ཕྱིན༔ བུ་མོའི་ཆོས་གེགས་བྱས་པ་ང་ཡིན་མོད༔ འགྱོད་པ་ཅན་གྱི་ཕ་ལ་བུ་མོས་སོམས༔ ང་ཡིས་མཐོ་མཐོ་བྱས་པས་དམའ་དམའ་བྱུང་༔ དོན་མ་ཤེས་པས་སྙིང་ང་གཅོང་གིས་ཟིན༔ ཞེས་གསུངས་ཁ་དང་སྙིང་གཏུགས་ངུད་མོ་འབྱིན༔ དེ་ནས་ལྷ་ལྕམ་ཕོ་བྲང་ནང་དུ་ཕྱིན༔ སློབ་དཔོན་ཞལ་མཐོང་སྐྱབས་སུ་སྙིང་ནས་མཆི༔ ལྷ་ལྕམ་དམའ་བའི་ས་ལ་པུས་བཙུགས་ནས༔ ཞེ་སར་བཅས་པའི་སྙན་ངག་ཚིག་བསྟོད་པ༔ ཨེ་མ་ཧོ༔ དགེ་མེད་གླིང་དུ་སངས་རྒྱས་སྤྲུལ་པ་བྱོན༔ མི་འཇིགས་སྟོབས་ལྡན་རེ་དོགས་མེད་པར་འཕྱོ༔ ཕྱག་ཞབས་རྫུ་འཕྲུལ་ཉམ་ང་མེད་པའི་སྐུ༔ རྫུ་འཕྲུལ་ཅིར་ཡང་གསལ་བ་བཀྲ་ཤིས་ཤིང་༔ པད་སྡོང་ལས་འཁྲུངས་དཀར་ལ་དམར་མདངས་ཅན༔ བཟང་པོའི་མཚན་གྱིས་སྐུ་ལ་བརྒྱན་པ་ནི༔ ལེགས་པའི་དཔེ་བྱད་མཚན་བཟང་སུམ་ཅུ་གཉིས༔ དུས་གསུམ་སངས་རྒྱས་པད་འབྱུང་སྐུ་ལ་རྫོགས༔ པད་འབྱུང་སྐུ་ཡིས་ཐ་དད་མོས་པ་འདུལ༔ མཚན་དང་དཔེ་བྱད་ལོངས་སྤྱོད་རྫོགས་པའི་སྐུ༔ རི་རབ་ལྟ་བུར་སྐུ་ནི་ལྷུན་བརྗིད་མཐོ༔ རི་རྒྱལ་བུམ་པ་ལྟ་བུར་དབུ་ནི་ཟླུམ༔ བུང་བ་ཨུཏྤལ་ལྟ་བུར་དབུ་སྐྲ་མཛེས༔ ཟླ་བ་རྒྱས་པ་ལྟ་བུ་དཔྲལ་དབྱེས་ཆེ༔ སྐར་ཆེན་ཤར་འདྲ་སྤྱན་གཉིས་གནག་ཅིང་རིང་༔ འདི་ཡི་སྨིན་མ་ཁྱུང་ཆེན་ལྡིང་བ་འདྲ༔ ཁྱུང་གཤོག་བརྒྱངས་པ་ལྟ་བུར་རྫི་མ་ལེགས༔ སྙན་ནི་པདྨ་ཁ་ཕྱེ་ལྟ་བུ་སྟེ༔ ཤངས་རྒྱུད་ལེགས་ཤིང་ལྟ་ན་སྡུག་པའི་ཤངས༔ རབ་མཛེས་མཆུ་སྒྲོས་པདྨའི་ཟེ་བ་འདྲ༔ ལྗགས་རིང་སྲབ་གཉེན་པདྨའི་མདོག་ལྟར་དམར༔ ཚེམས་དཀར་ཐགས་བཟང་དུང་མདོག་གངས་རི་འདྲ༔ ཚེམས་ཕྲེང་ལྔ་བཅུ་རྩ་བརྒྱད་ཞལ་ལ་མཛེས༔ ཞི་བའི་ཞལ་མཐོང་ཨོས་ཀོ་ལྷང་ངེ་བ༔ ཀ་ལ་པིངྐ་ལྟ་བུ་ཚངས་པའི་དབྱངས༔ ཞལ་ཚོམས་དོམ་ནག་དཀྱུས་འདྲ་ལྟ་བུར་རིང་༔ སྐུ་མདོག་དུང་ལ་ཕོ་ཚོས་བསྐུས་པ་འདྲ༔ མགུལ་ནི་བུམ་པའི་མགྲིན་པ་ལྟ་བུར་ལེགས༔ འདི་ཡི་སྐུ་སྟོད་སེང་གེ་འགྱིང་པ་འདྲ༔ དཔུང་པའི་མགོ་ཟླུམ་ཕྲག་པ་ཡན་ལག་རྒྱས༔ ཕྱག་ཞབས་སོར་མོ་དྲ་བས་འབྲེལ་བ་དང་༔ སེན་མོའི་མདོག་ནི་ཟངས་དམར་ཤེལ་འོད་འདྲ༔ པདྨའི་སྦུ་གུ་ལྟ་བུར་ལྟེ་བ་མཛེས༔ བྱིན་པ་ཨེ་ན་ཡ་འདྲ་ཞབས་པད་འབུར༔ མཁའ་ལ་འཇའ་འཁྱུས་ལྟ་བུར་འཕུར་རྩལ་འགྲོ༔ སྦ་བ་སྦུབས་སུ་རྟ་གླང་ལྟ་བུར་ནུབ༔ གཞོན་ནུ་བཙས་འདྲ་སྐུ་ལུས་ཡན་ལག་རྒྱས༔ འཛུམ་ཤིང་ཤིན་ཏུ་མཛེས་པའི་དྲི་མེད་ཞལ༔ གཟུགས་བལྟས་མི་ངོམས་སྐྱེ་བོས་མཐོང་ན་དགའ༔ འོད་ཟེར་དུ་མ་འབར་བས་འོད་ཁྱིམ་འདྲ༔ རོ་མཆོག་འཇམ་ཞིང་དམ་པ་མཆོག་རབ་འཕགས༔ མི་ཤིགས་རྡོ་རྗེ་ལྟ་བུར་ཟག་པ་མེད༔ འདྲ་བ་འདི་དག་པད་འབྱུང་མཚན་བཟང་པོ༔ སུམ་ཅུ་རྩ་གཉིས་རྒྱལ་སྲས་སྐུ་ལ་བསྟོད༔ ཅེས་པས་གུས་བསྟོད་ཕྱག་ཀྱང་མང་དུ་འཚལ༔ དགྱེས་པའི་ཞལ་བསྟན་བདག་ལ་འདི་སྐད་གསུངས༔ ཆ་མཐུན་རྟགས་ཙམ་ཕྱི་ཡི་སྡུག་བསྔལ་བཞི༔ ཁ་ཅིག་ད་ལྟའི་དགྲ་ལ་ངོས་འཛིན་ཏེ༔ དེ་མིན་དགྲ་སྡང་ངན་སོང་གསུམ་ལ་ཟེར༔ ད་ལྟའི་དགྲ་འདི་གཉེན་འགྲོར་ཚགས་མེད་གསུངས༔ གཉེན་བྱམས་ད་ལྟའི་གཉེན་ལ་ངོས་འཛིན་ཏེ༔ གཉེན་བྱམས་བྱ་བ་མཚན་ལྡན་བླ་མ་ཡིན༔ ཕན་པའི་ལམ་སྟོན་གནོད་པའི་ལམ་ལས་ཟློག༔ ད་ལྟའི་གཉེན་བྱམས་ཤ་ཚ་བཞིན་དུ་བྱས༔ ཆོས་བཤོལ་གང་མིན་འདུག་པ་ཐམས་ཅད་སློབ༔ དཔེ་ངན་མང་པོ་བགྲང་ཞིང་འཁོར་བར་བསྐྱུར༔ མེད་པ་བཙལ་གྱིས་མི་རྙེད་སྡུག་བསྔལ་རྒྱུ༔ ནོར་དང་ལོངས་སྤྱོད་འདི་ལ་མི་ཟེར་ཏེ༔ ད་རྟའི་ནོར་དང་ལོངས་སྤྱོད་བཙལ་ཀྱང་རྙེད༔ བཙལ་བས་མི་རྙེད་འཕགས་པའི་ནོར་བདུན་ཡིན༔ ཡོད་པ་བསྐྱངས་ཀྱིས་མི་ལང་སྡུག་བསྔལ་ཏེ༔ ད་ལྟའི་འཁོར་འདབ་ནོར་ལ་ཟེར་བ་མིན༔ སངས་རྒྱས་རང་ལ་ཡོད་པ་ཡན་པར་ཤོར༔ ངོ་མ་འཕྲོད་པས་བསྐྱངས་ཀྱང་མ་འཁྱོངས་ཡིན༔ རྐྱེན་ངན་དངོས་གྲུབ་ཤེས་པས་དང་དུ་ལོང་༔ བར་ཆད་ཡོན་ཏན་ཤེས་པས་ནང་དུ་བསུབས༔ དེ་སྐད་གསུངས་པས་ལྷ་ལྕམ་དགྱེས་པར་གྱུར༔ དེ་ནས་རྒྱལ་སྲིད་ལྷ་ལྕམ་བཅས་པ་དང་༔ ནོར་གྱི་བང་མཛོད་དཔག་ཏུ་མེད་པ་ཡི༔ ཡིད་བཞིན་ནོར་བུ་སྐྱེ་བདུན་རིལ་བུ་རྣམས༔ ཆགས་ཞེན་མེད་པར་སྤྲུལ་སྐུའི་དྲུང་ཕུལ་ནས༔ ཆོས་ཀྱི་འཁོར་ལོ་བསྐོར་ནས་ཞུ་བར་ཕུལ༔ རྒྱལ་པོ་མ་འདས་བར་དུ་བཞུགས་པར་ཞུས༔ ཟ་ཧོར་མ་སྨིན་བར་དུ་བསྡད་ཀྱིས་གསུངས༔ བཀའ་འདུས་ཆོས་ཀྱི་རྒྱ་མཚོའི་ཆོས་བཀའ་ཕྱེས༔ སངས་རྒྱས་བསྟན་པ་མཐའ་དབུས་མེད་པར་བརྡལ༔ ཕྱོགས་བཅུ་ཀུན་ཏུ་པད་འབྱུང་སྙན་པས་ཁྱབ༔ མུན་སངས་ཤེས་པ་བུན་ཅིང་རིག་པ་བདེ༔ ཁས་བརྒྱ་ཆོས་བྱེད་སྡིག་མེད་དགེ་བ་འཕེལ༔
རྒྱལ་སྲས་པདྨ་འབྱུང་གནས་གདུལ་ཞིང་གྱུར༔ སེམས་ཅན་མ་སྨིན་པ་ནི་གཅིག་ཀྱང་མེད༔ དེ་ནས་གཏམ་ཚོལ་རང་རང་ཡུལ་ལ་བགྲོད༔ ཐོས་མཐོང་བཀང་སར་རང་རང་རྒྱལ་པོས་སྨྲས༔ ཐམས་ཅད་མི་བདེན་སྒྱུ་མ་ཡིན་མཆིས་ཟེར༔ མཐའ་ཡི་རྒྱལ་པོས་དམག་བསྡུས་བརྒྱག་པར་བརྩམས༔ རྒྱ་གར་རྒྱལ་པོ་གྲགས་འཛིན་ཞེས་པའི་བུ༔ མ་ཧཱ་པཱ་ལས་དམག་ཁྱེར་འོངས་པ་ལ༔ ཟ་ཧོར་མི་རྣམས་ས་བསྲེག་རྡོ་རྔོད་བྱེད༔ ལ་ལ་ཡར་སྐྱེལ་ལ་ལ་མར་སྐྱེལ་ཞིང་༔ ལ་ལ་འཐབ་ཟེར་གོ་གསར་བྱེད་པ་ལ༔ རྒྱལ་སྲས་དམ་པ་པདྨ་འབྱུང་གནས་ཀྱིས༔ སྐད་ཅིག་ལྷ་མ་ཡིན་གྱི་གནས་སུ་བྱོན༔ པདྨ་རྣམ་པར་རྒྱལ་བའི་མདའ་གཞུ་གཡར༔ མདའ་གཞུ་གླང་པོ་ཆེ་ལ་བཀལ་ནས་སུ༔ གྱད་གཉིས་སྔོན་མཇུག་བསྐུལ་ནས་དམག་གསེབ་བཏང་༔ གཞུ་འདིར་མདའ་འདི་འཕེན་པའི་དམག་སྟོང་ཡོད༔ འཐབ་ཡ་བྱེད་པའི་ལག་ཆ་ས་རེ་གྱིས༔ ཞེས་པའི་ཤོག་འཕྲིན་མ་ཧཱ་པཱ་ལར་སྤྲད༔ གཞུ་དེ་དམག་གིས་འཐེན་པས་ཁ་མ་ཕྱེད༔ འདི་ནི་ཁེངས་པ་མི་སྲིད་བརྫུན་ཡིན་པས༔ ངེས་པར་བདེན་ན་ཕོབ་ལ་ཁྱེར་ཤོག་ཟེར༔ གླང་པོར་གཞུ་བཀལ་ཟ་ཧོར་ཡུལ་དུ་འོངས༔ གཞུ་འདི་ཕོབ་ལས་བསྐུར་ཟེར་སྨྲས་པ་དང་༔ རྒྱལ་བས་སྟོབས་ལྡན་གཞུ་དེ་ཐབས་ཀྱིས་ཕབ༔ དགྱེ་ལང་དགུ་ལང་བྱས་ནས་བསྐུར་བཏང་བས༔ གྱད་དམག་ཐམས་ཅད་ཧ་ལས་གྱུར་པ་དང་༔ ཐུབ་པ་མི་སྲིད་ཟེར་ནས་དམག་རྣམས་ཟགས༔ རྒྱལ་པོ་གཞན་གྱི་དམག་རྣམས་ཀུན་ལ་ཡང་༔ དཔའ་བོ་ཡོད་ན་གཞུ་འདི་བདུངས་ཤིག་སྨྲས༔ གཞུ་བདུངས་སྤོབས་པ་གཅིག་ཀྱང་མ་བྱུང་ནས༔ གཞུ་འདི་འགེངས་པའི་མི་དེ་ཁྲིད་ཤོག་ཟེར༔ རྒྱལ་བས་ཁྱབ་འཇུག་རཱ་ཧུ་ལ་བཏང་སྟེ༔ དཔག་ཚད་བཅུ་རུ་རྭ་ཞིག་འབེན་ལ་བཙུགས༔ བྱང་ཆུབ་སེམས་དཔས་མདའ་བརྒྱབ་ཧ་ལས་གྱེས༔ མགོ་དགུ་བྱ་རོག་མགོ་དང་བཅུ་ཡོད་པ༔ ལུས་པོ་ཐམས་ཅད་མིག་གིས་གང་བ་ཡི༔ དམག་མི་འདུག་ཅེས་ཡོངས་སུ་གྲགས་པར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཟ་ཧོར་ཡུལ་དུ་མཐའ་དམག་བཟློག་པའི་ལེའུ་སྟེ་ཞེ་གཉིས་པའོ༔ ༔
པདྨ་བཀའ་ཐང་ལེའུ་ ༤༣ ཟ་ཧོར་རྒྱལ་ཁམས་ཆོས་ལ་བཀོད་པ།
དེ་ནས་རྒྱལ་པོ་གཙུག་ལག་འཛིན་གྱིས་ནི༔ ཕོ་བྲང་གླིང་བརྒྱད་གླིང་ཕྲན་བརྒྱ་རྩ་བརྒྱད༔ གདུགས་ཐོགས་ཕོ་བྲང་རྩེ་མོར་སྤྱན་དྲངས་ནས༔ འདོད་པའི་ཡོན་ཏན་ལྔ་ལ་ལོངས་སྤྱོད་གྱུར༔ རྒྱལ་པོ་གཙུག་ལག་འཛིན་གྱིས་ཕྱག་ཕུལ་ནས༔ མ་རིག་མུན་པ་སེལ་བའི་ཉི་མ་རྗེ༔ གསང་སྔགས་ཟབ་ཅིང་རྒྱ་ཆེ་དོན་འགྲེལ་པ༔ ཐོས་བསམ་དཀའ་ཐུབ་ལ་ནི་མི་ལྟོས་པར༔ མྱུར་དུ་ཚེ་གཅིག་ལུས་གཅིག་འཚང་རྒྱ་བའི༔ རྒྱུད་ལུང་མ་བུ་བཤད་འགྲེལ་དང་བཅས་པ༔ སྒོམ་ཁོག་གནད་ཀྱི་གདམས་པ་དང་བཅས་པ༔ འཕྲིན་ལས་ཕྱག་བཞེས་ལག་ལེན་དང་བཅས་པ༔ ལས་ཀྱི་ཁ་ཚར་སྒོས་དོན་དང་བཅས་པ༔ གསང་སྔགས་སྤྱི་གནད་སྐོར་འགོ་དང་བཅས་པ༔ ཡིད་ཆེས་བརྒྱུད་པའི་ལོ་རྒྱུས་དང་བཅས་པ༔ རང་གཞན་ཀུན་གྱི་དོན་རྣམས་མྱུར་འགྲུབ་པ༔ ལྷ་ཚོགས་རིགས་སུ་གྱུར་པ་ཀུན་ཚང་བ༔ ཐེག་པ་གོང་འོག་གང་དང་མི་འགལ་བ༔ ཆ་ཚང་གཅིག་ཏུ་འགྲིལ་བའི་ཆོས་ཤིག་ཞུ༔ ཞེས་གསོལ་རིན་ཅེན་རྣམས་ཀྱིས་མཉེས་པར་བྱས༔ ཨུ་རྒྱན་ཆེན་པོ་པདྨའི་ཞལ་ནས་ནི༔ རྒྱལ་པོ་འཇིག་རྟེན་གཡེང་བ་ཆེ་བས་སུ༔ ཟབ་ཆོས་ཉམས་སུ་ལེན་པ་ཤིན་ཏུ་དཀའ༔ ཐེག་པ་ཆེན་པོ་གསང་སྔགས་ཆོས་འདི་རྣམས༔ དབང་མ་བསྐུར་བར་བཤད་སྒྲུབ་བྱར་མི་རུང་༔ དཔེར་ན་རྫ་སོ་མ་བཏང་ཆུ་བླུགས་འཇིག༔ དབང་བསྐུར་ཐོབ་ནས་ཆོས་ཀྱི་སྣོད་རུང་ཡིན་༔ དེ་ནས་རྒྱལ་པོ་ཉིད་ཀྱིས་གཙོ་བྱས་པའི༔ རྗེ་འབངས་ཉི་ཤུ་རྩ་གཅིག་དགའ་བའི་ཚལ༔ མཁའ་འགྲོ་འཁྲིགས་པའི་ཡང་དབེན་གནས་མཆོག་ཏུ༔ དབང་རྣམས་ཐམས་ཅད་ཡོངས་སུ་རྫོགས་པར་བསྐུར༔ རྒྱལ་པོས་འཁོར་བ་མ་སྟོངས་བར་དུ་ནི༔ སེམས་ཅན་གང་ལ་གང་འདུལ་དེ་འདུལ་དུ༔ བླ་མེད་ཆོས་ཀྱི་འཁོར་ལོ་བསྐོར་བ་ཡི༔ རྗེ་ཡི་འཕྲིན་ལས་པ་རུ་སྨོན་ལམ་བཏབ༔ འབངས་ནི་ཉི་ཤུས་འཁོར་དུ་སྨོན་ལམ་བཏབ༔ དེ་ཚེ་མཁའ་ལས་སྒྲ་བྱུང་མེ་ཏོག་བབ༔
དེ་ནས་ཨུ་རྒྱན་པདྨ་འབྱུང་གནས་ཀྱིས༔ བཀའ་སྐྱོང་དམ་པའི་རྒྱུད་ལྔ་ལོ་གཅིག་གསུངས༔ ཆོས་ཚན་བརྒྱ་དང་སུམ་ཅུ་སོ་བརྒྱད་གདམས༔ རྫོགས་ཆེན་བཀའ་འདུས་སྙིང་ཐིག་རྒྱུད་ཀྱི་སྐོར༔ བཞི་ཚན་ལྔ་དང་རྒྱུད་ནི་ཉི་ཤུ་སྟེ༔ མན་ངག་བརྒྱ་དང་བཞི་བཅུ་རྩ་གཉིས་གདམས༔ མདོ་སྔགས་གཉིས་ཀྱིས་ཟ་ཧོར་ཆོས་ལ་བཀོད༔ ཟུར་ཙམ་ཡིན་གྱིས་ཡི་གེར་བཀོད་དུ་མངས༔ དེ་ནས་རེ་ཞིག་དུས་ན་ལུང་བསྟན་གླིང་༔ ལྷ་ལྕམ་མནྡཱ་ར་བས་ཚོགས་འཁོར་བཤམས༔ གུས་ཕྱག་དགུ་སྤྲུགས་བཙལ་ནས་ཞུས་པ་ནི༔ མདོ་སྔགས་ཁྱད་པར་གང་གིས་འབྱེད་པ་ལགས༔ རྒྱུ་དང་འབྲས་བུ་གཉིས་ཀྱིས་ཕྱེ་བ་ཡིན༔ དྲང་དོན་ངེས་དོན་གང་གིས་འབྱེད་པ་ལགས༔ ཐེག་པ་ཆེ་ཆུང་གཉིས་ཀྱིས་ཕྱེ་བ་ཡིན༔ ཀུན་རྫོབ་དོན་དམ་ཁྱད་པར་གང་འབྱེད་ལགས༔ འཇིག་དང་མི་འཇིག་གཉིས་ཀྱིས་ཕྱེ་བ་ཡིན༔ ཐབས་ཤེས་ཁྱད་པར་གང་གིས་འབྱེད་པ་ལགས༔ ཡོད་དང་མེད་པ་གཉིས་ཀྱིས་ཕྱེ་བ་ཡིན༔ འཁོར་འདས་ཁྱད་པར་གང་གིས་འབྱེད་པ་ལགས༔ རིག་དང་མ་རིག་གཉིས་ཀྱིས་ཕྱེའོ་གསུངས༔ བདག་གི་སྔ་ཕྱིའི་སྐྱེ་བ་དུ་ཙམ་ལགས༔ བདེ་སྐྱེད་མ་ལན་མི་འཚལ་ཕར་ཞོག་གསུངས༔ ངའི་ཡབ་རྒྱལ་པོ་གཙུག་ལག་འཛིན་པ་འདི༔ སྐྱེ་བ་སྔ་མ་ཅི་འདྲ་ཡིན་ཞུས་པས༔ བདེ་སྐྱེད་མ་ཡི་ཡབ་ནི་འདི་ལྟ་སྟེ༔ སུ་ལ་བྷེ་ཡུལ་གྲོང་ཁྱེར་ཀ་ལིངྐའི༔ བྲམ་ཟེའི་རྒྱལ་པོ་ཞིག་གི་བུ་རུ་སྐྱེས༔ ཝཱ་རཱ་ཎ་སཱིར་ཐུབ་པར་རབ་ཏུ་བྱུང་༔ ཀྲ་མ་ཤཱི་ལར་མུ་སྟེགས་འཇིགས་པ་ཡོད༔ སྒོ་བཞི་ཟླ་བ་རེ་མོས་བྱས་ཀྱིན་བསྲུང་༔ མུ་སྟེགས་རྐོན་པ་བཙུགས་པས་འཆོར་ལ་ཉེ༔ རབ་རྩལ་སྒོར་ཆས་གྲི་མདུང་སྦྱོར་བ་ཡིས༔ མཚན་མོ་མུ་སྟེགས་དམག་རྣམས་དག་པར་བྱས༔ ཟངས་གླིང་ཡུལ་ན་དྭ་ཕྲུག་ཡུགས་སའི་ཁྱུ༔ གཙུག་ལག་ཁང་ནི་བསྲུངས་པའི་དགེ་བ་དང་༔ མུ་སྟེགས་དམག་རྣམས་བསད་པའི་སྡིག་པ་ནི༔ གཉིས་ཀ་ལུས་དང་གྲིབ་མ་བཞིན་དུ་འགྲོགས༔ འགྲོ་བ་དྲུག་ཀའི་སྐྱེ་བ་འགའ་རེ་བླངས༔ སྐྱེ་བ་འདི་གོང་རྒྱ་གར་གའུ་ཤོད༔ རྒྱལ་པོ་ཨར་ཏའི་བཙུན་མོ་ཤི་བའི་ལྟོར༔ བདག་གིས་རོ་བཤས་བུ་མོ་མ་ཤི་བྱུང་༔ དེ་ཉིད་ཚེ་འཕོས་ཁྱོད་ཀྱི་ཡབ་ཏུ་སྐྱེས༔ སུ་ལའང་མ་འཆད་དམ་ཚིག་ས་མ་ཡ༔ ལྷ་ལྕམ་ཡབ་ལ་སྙིང་རྗེ་སྐྱེས་ཏེ་ངུས༔ སྐྱེ་བ་ཕྱི་མ་ག་རུ་སྐྱེ་ན་ཞུས༔ སྐྱེ་བར་གྱུར་ཚོད་ཙམ་པ་འགའ་ཞིག་ལེན༔ མཐར་ནི་སྤྲེའུའི་རྒྱལ་ཁམས་བོད་ཀྱི་ཡུལ༔ ཨ་ཀར་མ་ཏི་ཤཱི་ལ་བྱ་བར་སྐྱེ༔ དེ་ནས་སྲིན་ཡུལ་རིག་བྱེད་རྩལ་བུར་སྐྱེ༔ དེ་ནས་ཀོ་ཏ་ལ་ཡི་རྒྱལ་པོའི་སྲས༔ ལྷ་ལྕམ་མནྡྷེ་བཟང་མོ་བྱ་བར་སྐྱེ༔ དེ་ནས་ལྷ་མ་ཡིན་གྱི་ཡུལ་དུ་ནི༔ པདྨ་རྣམ་པར་རྒྱལ་བར་ཆོས་ཉན་ནས༔ བལ་ཡུལ་ཞེས་བྱར་བན་སྒོམ་གཉིས་ཀྱི་བུ༔ དེ་བ་ཨ་ཀར་ཙནྡྲ་ཞེས་བྱར་སྐྱེ༔ དེ་ནས་རི་བོ་ཏ་ལར་འཕགས་པའི་དྲུང་༔ སྤྱན་རས་གཟིགས་ལ་ཆོས་ཉན་མཁའ་སྤྱོད་མྱུལ༔ མཐའ་འཁོབ་ཡུལ་དུ་མུ་ཏིག་ཅེས་བྱའི་སྲས༔ རྒྱལ་སྲས་ལྷ་རྗེ་ཞེས་བྱར་སྐྱེ་བ་ལེན༔ དེ་ནས་སྐྱེ་བ་ཉི་ཤུ་ཟ་ཧོར་སྐྱེ༔ རེ་འགའ་དུད་འགྲོ་རེ་འགའ་རྒྱལ་པོ་དང་༔ རེ་འགའ་པཎ་ཆེན་རེ་འགའ་དམངས་ཕལ་པ༔ སུ་ལའང་མ་འཆད་དམ་ཚིག་ས་མ་ཡ༔ ལྷ་ལྕམ་འཁོར་བའི་གཏིང་རྡོར་འདུག་ཟེར་ངུས༔ སྐྱེ་བ་ཆོད་དུས་ཙ་ན་འོང་ཞེས་ཞུས༔ འགྲོ་དྲུག་འཁོར་བའི་སེམས་ཅན་མ་ལུས་པ༔ རྒྱལ་ཉིད་ཀུན་གྱིས་ཐོབ་ཕྱིར་སྐྱེ་བ་ལེན༔ སེམས་ཅན་ཐམས་ཅད་ཟད་པར་གྱུར་པ་དང་༔ བདེ་སྐྱེད་མ་ཡི་ཡབ་ཀྱི་སྐྱེ་བ་ཆོད༔ བྱེ་མ་བཙིར་བས་མར་ཁུ་ནམ་བྱུང་ན༔ བདེ་སྐྱེད་མ་ཡི་ཡབ་ཀྱི་སྐྱེ་བ་ཆོད༔ ཆུ་ལ་མེ་ཤིང་ནམ་ནི་བཏུབ་ཙ་ན༔ བདེ་སྐྱེད་མ་ཡི་ཡབ་ཀྱི་སྐྱེ་བ་ཆོད༔ ཅི་ཕྱིར་འཁོར་བའི་སེམས་ཅན་འདྲེན་པའི་ཕྱིར༔ ཡབ་ནི་ལན་མང་སྐྱེ་བ་ལེན་པ་ལ༔ ཆོས་ལྟར་བཅོས་པའི་བརྫུན་མ་མ་བཏང་གསུངས༔ མུན་ཕྲག་སེམས་ཅན་སྒྲོན་མ་བྱེད་པའི་ཕྱིར༔ རྒྱལ་པོ་ཐམས་ཅད་མཁྱེན་པས་འདུལ་བ་ལ༔ ཆོས་ལ་ཕྱོགས་རིས་བར་ཆད་མ་བཏང་གསུངས༔ སྐྱབས་མགོན་མེད་པའི་ས་མཁན་བྱེད་པའི་ཕྱིར༔ རྒྱལ་པོ་འཁོར་བ་དང་དུ་ལེན་པ་ལ༔ སངས་རྒྱས་ཆོས་ཀྱིས་མགོ་བསྐོར་མ་བཏང་གསུངས༔ ཡབ་འདི་འཁོར་བའི་གཏིང་རྡོ་བྱེད་དམ་ཞུས༔ འཁོར་བ་སྤངས་པའི་སངས་རྒྱས་ག་ལ་ཡོད༔ བདེ་སྐྱེད་མ་ཁྱོད་འཁོར་བར་སྐྱོན་མ་བལྟ༔ མྱ་ངན་འདས་ལ་ཡོན་ཏན་མ་འཛིན་གསུངས༔ ཟ་ཧོར་ཡུལ་དུ་ལོ་ནི་ཉིས་བརྒྱ་བཞུགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཟ་ཧོར་རྒྱལ་ཁམས་ཆོས་ལ་བཀོད་པའི་ལེའུ་སྟེ་ཞེ་གསུམ་པའོ༔ ༔
པདྨ་བཀའ་ཐང་ལེའུ་ ༤༤ ཚེ་ཡི་རིག་འཛིན་གྲུབ་པ།
དེ་ནས་ཟ་ཧོར་རྒྱལ་པོ་ཚེའི་དུས་བྱས༔ སྲས་ནི་ཀུན་སྐྱོང་ཞེས་བྱར་རྒྱལ་སྲིད་གཏད༔ ཨུ་རྒྱན་ཡབ་ཡུམ་ཕོ་བྲང་རྩེ་མོ་ནས༔ ད་ནི་ཚེ་ཡི་རིག་འཛིན་ཞིག་བསྒྲུབས་ལ༔ རྒྱ་གར་ཡུལ་དང་ཨུ་རྒྱན་མུ་སྟེགས་ཡུལ༔ ཡུལ་རིགས་དུ་མའི་མི་རྣམས་ཆོས་ལ་གཟུད༔ སྙམ་ཞིང་ཐུགས་དགོངས་གཏད་པའི་དེ་མ་ཐག༔ ནམ་མཁའི་མཐོངས་ནས་ལྷ་མོ་བཞི་བྱུང་ནས༔ གསེར་གྱི་རྡོ་རྗེ་རྒྱ་གྲམ་གདན་དུ་བཏིངས༔ དེ་ཡི་སྟེང་དུ་ཡབ་ཡུམ་བཞུགས་སུ་གསོལ༔ ཙཱ་རྩི་མཐིང་ནག་ཆིབས་སུ་དྲི་ཟ་ཞོན༔ ལག་པ་གཉིས་ཀྱིས་ཤར་གྱི་རྡོ་རྗེ་བཏེག༔ འཛིན་བྱེད་སེར་མོ་ཆིབས་སུ་གྲུལ་བུམ་ཞོན༔ ལག་པ་གཉིས་ཀྱིས་ལྷོ་ཡི་རྡོ་རྗེ་བཏེག༔ དུས་ལྕེ་དམར་མོ་ཆིབས་སུ་ཀླུ་དབང་ཞོན༔ ལག་པ་གཉིས་ཀྱིས་ནུབ་ཀྱི་རྡོ་རྗེ་བཏེག༔ ཚངས་མ་ལྗང་གུ་ཆིབས་སུ་གནོད་སྦྱིན་ཞོན༔ ལག་པ་གཉིས་ཀྱིས་བྱང་གི་རྡོ་རྗེ་བཏེག༔ མདུན་གྱི་ནམ་མཁའ་ཉིད་ལ་གཤེགས་པར་གྱུར༔ རི་བོ་དེ་ཤན་ཡ་ག་ཞེས་བྱ་བ༔ རི་རྩེར་གཡུ་ཡི་ན་བུན་འཐུལ་བ་ལ༔ རྨང་ན་རྒྱ་མཚོ་གཏིང་ཟབ་འཁྱིལ་བ་ཡི༔ མདུན་དུ་མེ་ཏོག་སྣ་ཚོགས་གླིང་ཆགས་པ༔ བྱ་སྐད་སྙན་པ་སྣ་ཚོགས་སྒྲོག་པའི་ས༔ གནམ་སྒོ་ཟླ་གམ་ཁ་ནི་ཤར་དུ་ལྟ༔
དུས་བཟང་ལ་ནི་མཁའ་འགྲོ་དངོས་སུ་འབྱོན༔ ཉམས་དགའ་དང་སྤྲོ་སྐྱོ་བ་མེད་པའི་གནས༔ ཏིང་འཛིན་རྒྱུད་ལ་རང་ཤུགས་སྐྱེ་བའི་ས༔ ཕོ་བྲང་རི་བོ་ཏ་ལའི་རྩེ་མོར་བྱོན༔ བྲག་ཕུག་མཱ་ར་ཏི་ཀ་ཞེས་བྱ་བ༔ རིགས་གསུམ་མགོན་པོས་བྱིན་གྱིས་བརླབས་པའི་གནས༔ དགུན་ཡང་མེ་ཏོག་ཆར་དུ་འབབ་པ་ལ༔ བཀྲ་ཤིས་བྱིན་བས་ཆེ་བའི་གནས་མཆོག་དེར༔ ཚེ་དཔག་མེད་པའི་དཀྱིལ་འཁོར་ཞལ་ཕྱེ་ནས༔ ཚེ་ཡི་རིག་འཛིན་ཟླ་བ་གསུམ་དུ་བསྒྲུབས༔ ཚེ་དཔག་མེད་པ་མདུན་གྱི་ནམ་མཁར་བྱོན༔ ཡབ་ཡུམ་གཉིས་ཀྱི་སྤྱི་བོར་བུམ་པ་བཞག༔ བསྐལ་པ་ཆགས་ནས་འཇིག་རྟེན་མ་སྟོངས་པར༔ རྡོ་རྗེའི་སྐུ་ལ་སྐྱེ་འཆི་མེད་དབང་བསྐུར༔ ཏིང་འཛིན་བསྒོམས་པས་འཁོར་འདས་རུ་ཤན་ཕྱེད༔ ཚེ་ཡི་རིག་འཛིན་འཇའ་ལུས་ཐོབ་པར་གྱུར༔ སེམས་རྟགས་ལུས་ཤར་བགྲེས་རྒུད་མི་མངའ་བ༔ ཟག་པ་མེད་པ་འཇའ་འོད་ཟེར་རང་བཞིན༔ འཁོར་བ་མ་སྟོངས་བཞུགས་པའི་ཚེ་ཐོབ་ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཚེ་ཡི་རིག་འཛིན་གྲུབ་པའི་ལེའུ་སྟེ་ཞེ་བཞི་པའོ༔ ༔
པདྨ་བཀའ་ཐང་ལེའུ་ ༤༥ རྒྱལ་པོ་ཨ་ཤྭ་ཀ་ཆོས་ལ་བཙུད་པ།
དེ་ནས་ཟ་ཧོར་རྒྱ་གར་གཉིས་ཀྱི་མཚམས༔ ཀོ་ཏ་ལ་ཞེས་བྱ་བའི་ཡུལ་དུ་བྱོན༔ གཡའ་རི་གོང་གི་བྲག་ཕུག་གོང་མར་བཞུགས༔ བཀའ་འདུས་ཆོས་ཀྱི་རྒྱ་མཚོའི་དལ་ཞལ་ཕྱེས༔ མི་ལོ་བཅུ་གཉིས་བར་དུ་བསྒྲུབ་པ་མཛད༔ རྒྱལ་པོ་ནུ་ཤ་རཱུ་པས་ཞབས་ནས་བཏེག༔ དེ་ནས་རིང་པོར་མ་ལོན་དུས་གཅིག་ན༔ དུར་ཁྲོད་ཆེན་པོ་ཧཱ་ཧཱ་སྒྲོག་པ་ན༔ གཅན་གཟན་མང་པོ་དཔག་ཏུ་མེད་པ་ཚོགས༔ དུར་ཁྲོད་རོ་མེད་ཉིན་མཚན་ཁ་སྦྱར་དུ༔ ལྟོགས་ནས་ངུ་བའི་གཅན་གཟན་སྙིང་རྗེ་སྐྱེས༔ དུར་ཁྲོད་ཕྱིན་ནས་སྐུ་ལུས་སྦྱིན་པར་བཏང་༔ གཅན་གཟན་ཟ་རྒྱུ་མ་རྙེད་རྒྱབ་བསྟན་དུ༔ ཞག་བདུན་ཁོངས་སུ་གཅན་གཟན་ཚེ་དུས་བྱེད༔ དེ་ནས་མནར་མེད་དམྱལ་ཁམས་འགྲོ་བར་གཟིགས༔ རྒྱལ་པོ་གཙུག་ལག་འཛིན་དེ་གར་སྐྱེས་བལྟས༔ ནུ་ཤའི་བུ་མོ་མནྡྷེ་བཟང་མོར་སྐྱེས༔ དེའི་ཤ་ལྟོར་སོང་མཐོ་རིས་སྤོར་བར་མཁྱེན༔ སྙིང་རྗེའི་སེམས་དང་ལྡན་པའི་མཁའ་འགྲོ་མ༔ སྙིང་རྗེ་སྐྱེ་ཕྱིར་ནེའུ་ལེའི་ཚང་དུ་སྤྲུལ༔ དེ་ཡང་ཤིན་ཏུ་ཉེན་ཅིང་ཉོན་མོངས་པ༔ གནོད་པ་མང་ཞིང་ལྟར་མི་བཟོད་པར་སྤྲུལ༔ མནྡྷེ་བཟང་མོས་ཀུ་ཤ་འཐུ་རུ་ཕྱིན༔ ཚང་ལ་ཏཱ་ལའི་ལོ་མ་བཅད་ནས་བཀབ༔ རླུང་གིས་བཏེག་པས་མཐའ་མ་རྡོ་ཡིས་མནན༔ ནེའུ་ལེ་ཕོ་བྱུང་རྡེག་སེམས་མེད་པར་ཕོག༔ རྐྱེན་དེས་བསྐུལ་ནས་བུ་མོས་ཆོས་བྱེད་བརྩམས༔ ཟང་ཟིང་བཀལ་ནས་གཡའ་རི་གོང་དུ་ཕྱིན༔ རྒྱལ་བས་དབང་བསྐུར་བྱིན་གྱིས་བརླབས་ནས་ནི༔ ཁྱོད་ཀྱི་ལུས་འདི་དུར་ཁྲོད་ཕ་གིར་བྱིན༔ གཅན་གཟན་འདི་དག་མི་ལུས་ཐོབ་ནས་ཀྱང་༔ ཁྱོད་ཀྱིས་འདུལ་བའི་གདུལ་བྱའི་ཞིང་དུ་འགྱུར༔ ཁྱོད་ནི་སྐྱེ་བ་འགའ་ཞིག་བརྒྱུད་པ་ན༔ ཁ་བ་ཅན་དུ་གནམ་རི་ཞེས་བྱའི་བརྒྱུད༔ སྲོང་བཙན་སྒམ་པོ་ཞེས་བྱའི་རྒྱལ་པོར་སྐྱེ༔ ཐུགས་རྗེ་ཆེན་པོ་སྤྱན་འདྲེན་ཕོ་ཉ་བ༔ མཐའ་འཁོབ་ཡུལ་ནས་རྒྱ་གར་ཡུལ་དུ་འགྲིམ༔ དེ་དུས་གཅན་གཟན་འདི་དག་མི་ལུས་ཐོབ༔ གཅན་གཟན་མང་ཞིག་རྒྱ་གར་ཡུལ་དུ་སྐྱེ༔ ལ་ལ་སིངྒ་ལ་ཡི་ཡུལ་དུ་སྐྱེ༔ ད་ལྟ་འབྲེལ་ཐོགས་ཁྱོད་ལ་འདུན་དུ་འོང་༔ འདི་དག་རྣམས་ཀྱིས་ལྷ་ཁང་ཉིས་བརྒྱ་བཞེངས༔ དཀོན་ཅོག་གསུམ་བཞུགས་དེ་ལ་མཆོད་པ་བྱེད༔ སྤྲེའུའི་ཚ་རྣམས་ལྷ་ཕྱག་འཚལ་བའི་རྟེན༔ ཐུགས་རྗེ་ཆེན་པོ་བཅུ་གཅིག་ཞལ་ཡང་འབྱོན༔ དམ་རྫས་ངོ་མཚར་ཅན་ནི་བརྒྱ་དང་བཅས༔ ལྷ་ཡི་བུ་མོ་བཅུ་དྲུག་མཆོད་གཡོག་བྱེད༔ ཅེས་གསུངས་དེ་ནས་བུ་མོས་ལུས་རྒྱན་ཕུལ༔ དུར་ཁྲོད་ཕྱིན་པས་གཅན་གཟན་ཟོས་པར་གྱུར༔ ཞག་ཏུ་སོང་ནས་རྒྱལ་པོ་འཁོར་བཅས་བྱུང་༔ སྙིང་ནི་མི་དགའ་བུ་མོར་རྨི་ལམ་ངན་༔ མནྡྷེ་བཟང་མོ་གང་དུ་སོང་ཟེར་འདྲི༔ ཕྱོགས་རྣམས་ཀུན་ཏུ་ཡོངས་སུ་ཚོལ་བར་གྱུར༔ དུར་ཁྲོད་སོང་བས་ཁྲག་གིས་འཁྲས་པ་དང་༔ རས་གོས་ཕ་ཚད་སྐྲ་ལོ་ཕན་ཚུན་འཐོར༔ རྐང་གི་ཁྲལ་ཁྲོལ་ཐོད་པ་བུམ་རིལ་མཐོང་༔ དུར་ཁྲོད་འདི་རུ་སུ་བསྐྱལ་སུ་ཤི་སྙམ༔ མནྡྷེ་བཟང་མོ་མིན་ན་རུང་སྟེ་ཟེར༔ མྱ་ངན་ངུ་བཤུམ་རྒྱལ་བ་ཉིད་ལ་འདྲི༔ ཁྱོད་ཀྱི་བུ་མོ་གཅན་གཟན་ཟོས་སོ་གསུངས༔ དེ་མ་ཐག་ཏུ་སེམས་ཉམས་བརྒྱལ་བར་གྱུར༔ སློབ་དཔོན་ཆུ་བརྒྱབ་བརྒྱལ་བ་སངས་པ་དང་༔ རྒྱལ་བས་མནྡྷེ་བཟང་མོའི་སྐྱེ་རྒྱུད་གསུངས༔ དེ་ནས་རྒྱལ་པོ་འཁོར་བཅས་ཆོས་ལ་ཚུད༔ ཡུལ་དེར་ཐེག་པ་ཆེན་པོ་སྤྱི་ཏི་དར༔ དེ་ནས་རྒྱ་གར་ཡུལ་དུ་འབྱོན་དགོངས་ནས༔ གྲོང་ཁྱེར་མེ་ཏོག་རྒྱས་པ་ཞེས་བྱ་ན༔ རྒྱལ་པོ་ཨ་ཤྭ་ཀ་ཞེས་བདུད་དབང་སྒྱུར༔ བསྟན་པའི་དབྱེན་བྱས་དགེ་འདུན་ཐམས་ཅད་འཁྲུགས༔ ཉན་ཐོས་སྡེ་པ་གཉིས་སུ་ཆད་པར་གྱུར༔ གཞོན་ནུ་མང་ཞིག་ཆད་པས་ཕལ་ཆེན་སྡེ༔ རྒན་པ་ཉུང་ཞིག་ཆད་པས་གནས་བརྟན་སྡེ༔ མི་ལོ་ཉིས་བརྒྱ་ལྷག་ཙམ་སོང་བར་གྱུར༔ རྒྱལ་པོ་དེ་ཡིས་རྔ་སྒྲ་ཅན་རྣམས་བཅོམ༔ གྲོང་ཁྱེར་ཤིང་ཐག་ཅན་རྣམས་འཇོམས་པ་ལ༔ ཨ་ཤྭ་ཀ་ནི་ཁང་པ་ཞིག་ཏུ་འདུག༔ རྒྱལ་པོ་དེ་ཉིད་གདུལ་བྱའི་ཞིང་དུ་གཟིགས༔ པད་འབྱུང་དགེ་སློང་ཞིག་ཏུ་སྤྲུལ་ནས་ནི༔
རྒྱལ་པོའི་ནང་དུ་བསོད་སྙོམས་སློང་དུ་ཕྱིན༔ ང་ལ་བརྙས་པ་བྱེད་འདི་ཟུང་ཤིག་ཟེར༔ ཟངས་མོ་ཆེ་ནང་ཏིལ་གྱི་མར་ཁུ་བླུགས༔ འོག་ནས་རབ་ཏུ་ཚ་བའི་ཤིང་མེ་བུས༔ དགེ་སློང་ཆས་ཕྱུང་ཟངས་ཀྱི་ནང་དུ་བཅུག༔ ནང་བར་བལྟས་པས་ཟངས་ནང་པདྨ་སྐྱེས༔ འདོམ་དོ་འཕགས་ནས་པདྨའི་ཟེའུ་འབྲུའི་དབུས༔ དགེ་སློང་ཅི་ཡང་མ་ཉེས་བཞུགས་པར་གྱུར༔ རྒྱལ་པོ་ཨ་ཤྭ་གནོང་འགྱོད་དྲག་པོ་སྐྱེས༔ སྦྱིན་གནས་འདི་ལྟ་བུ་ལ་མི་འཚམ་བྱས༔ ང་ཡིས་སྡིག་པ་མཚམས་མེད་མང་པོ་བསགས༔ སྡིག་པ་ཇི་ལྟར་བྱས་ན་འདག་ཅེས་ཞུས༔ དེ་ནི་དགེ་སློང་དབང་པོའི་སྡེ་ལ་དྲིས༔ སྤྲུལ་པའི་དགེ་སློང་རྒྱལ་པོས་ཁྲིད་ནས་ཕྱིན༔ དགེ་སློང་དབང་པོའི་སྡེ་ཡིས་ཞལ་ནས་ནི༔ ཛམྦུའི་གླིང་གི་ས་གནས་བྱེ་བ་རུ༔ ནུབ་གཅིག་མཆོད་རྟེན་བྱེ་བ་བཞེངས་པ་དང་༔ སྐྱབས་མགོན་མེད་ལ་ཟས་ནོར་བྱིན་ན་འདག༔ དེ་སྐད་གསུངས་པས་རྒྱལ་པོའི་བསམ་པ་ལ༔ མགོན་མེད་ཟས་སྦྱིན་གཏོང་དང་སླ་སྟེ་ན༔ ནུབ་གཅིག་མཆོད་རྟེན་བྱེ་བས་གཅིག་མི་འགྲུབ༔ སྡིག་པ་མི་འདག་ཟེར་བ་ཡིན་ཅེས་སྨྲས༔ དེ་ནས་དགེ་སློང་ཆེན་པོ་དབང་པོའི་སྡེས༔ ཁྱོད་ནི་སངས་རྒྱས་ལུང་བསྟན་རྒྱལ་པོ་ཡིན༔ བྱང་ཆུབ་ཤིང་དྲུང་སོང་ལ་སྨོན་ལམ་ཐོབ༔ རྒྱལ་པོ་ཨཤྭས་བྱང་ཆུབ་ཤིང་དྲུང་ཕྱིན༔ སངས་རྒྱས་ལུང་བསྟན་རྒྱལ་པོ་ང་ཡིན་ན༔ ནུབ་གཅིག་འཛམ་གླིང་ས་གནས་བྱེ་བ་རུ༔ ལྷ་འདྲེས་མཆོད་རྟེན་བྱེ་བ་བཞེངས་པར་ཤོག༔ དེ་མ་ཐག་ཏུ་མཆོད་རྟེན་བྱེ་བ་གྲུབ༔ དབུལ་པོ་ཐམས་ཅད་ཟས་ནོར་གོས་ཀྱིས་བསྐྱངས༔ ཡངས་པ་ཅན་དུ་བསྟན་པའི་སོ་ནམ་བྱས༔ མྱ་ངན་མེད་པར་མགོན་མེད་ཟས་སྦྱིན་གྲགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོ་ཨ་ཤྭ་ཀ་ཆོས་ལ་བཙུད་པའི་ལེའུ་སྟེ་ཞེ་ལྔ་པའོ༔ ༔
པདྨ་བཀའ་ཐང་ལེའུ་ ༤༦ བཻདྡྷའི་ཡུལ་དང་སིངྒ་ལའི་ཡུལ་ཆོས་ལ་བཀོད་པ།
དེ་ནས་ལྷོ་ཕྱོགས་བཻདྡྷའི་ཡུལ་དུ་བྱོན༔ དྲ་བ་གཙུག་དགུའི་དུར་ཁྲོད་བཞུགས་པ་ལས༔ རྒྱལ་པོ་སྟོབས་ཞེས་བྲམ་ཟེ་སྨན་པས་བཏེག༔ གསོ་བྱེད་སྤོར་ཐོང་མཁས་པའི་རྒྱལ་པོ་དེ༔ ཁབ་ཏུ་ཆེན་ཆུན་གཉིས་བཞེས་ཡོད་པ་ལ༔ ཆེན་མའི་སྲས་ལ་ཡབ་ཀྱིས་ཐུགས་ལ་བཏགས༔ གསོ་བའི་རིག་གནས་ཐམས་ཅད་རྫོགས་པར་བསླབས༔ ཡུན་རིང་སྦྱང་བཅུག་མཁས་པའི་མངའ་བདག་གཏད༔ ཆུན་མའི་སྲས་ལ་དུས་གཅིག་གནང་ནས་སུ༔ ཁྱེད་གཉིས་ཤེས་པའི་ཡོན་ཏན་བསྡུར་དགོས་ཟེར༔ ཆུན་མ་ཤིན་ཏུ་སྡུག་བསྔལ་གདུངས་པར་གྱུར༔ ངའི་བུས་རྒྱལ་ས་མི་ཐོབ་སྙམ་ནས་སུ༔ སྲས་ཀྱིས་དྲ་བ་གཙུག་དགུའི་དུར་ཁྲོད་ཕྱིན༔ དགེ་སློང་ཆེན་པོ་དབང་པོའི་སྡེ་ཉིད་ལ༔ རིག་པའི་གནས་ལྔ་ཉིན་མཚན་ཁ་སྦྱར་བསླབས༔ དབུ་མཚན་མཐོང་བས་དབུ་ཞབས་དོན་ཁོང་ཆུད༔ ཡུམ་གྱིས་ཤེས་སམ་དྲིས་པས་ཕུལ་ཕྱིན་གསུངས༔ མ་དེ་ཤིན་ཏུ་དགའ་ནས་བུར་ཕྱག་འཚལ༔ དེ་ནས་ཡོན་ཏན་བསྡུར་བའི་དུས་ལ་བབ༔ ཁྲི་གཉིས་བརྩིགས་ནས་སྲས་གཉིས་བཞུགས་སུ་བཅུག༔ གང་མཁས་པ་ལ་རྒྱལ་ས་གཏོད་པ་ལ༔ ཆེན་མའི་སྲས་ཀྱིས་གསོ་རིག་སྔོན་ལ་གསུངས༔ བམ་པོ་སུམ་བརྒྱ་མཁྱེན་པས་ཡ་མཚན་སྐྱེས༔ དམངས་རྣམས་ཆུན་མའི་སྲས་ལ་སྨྲ་མི་དགོས༔ མ་བསླབས་ཤེས་པ་དཀའ་ཟེར་ཆས་ཆོད་བྱེད༔ དེར་ཡང་ཡུམ་ནི་ཐུགས་མ་བདེ་བར་ངུས༔ ཆེན་མས་སྲས་ལ་བསྐོར་བ་མང་དུ་བྱས༔ ཕྱག་བཙལ་ངའི་བུས་མངའ་ཐང་ཐོབ་བོ་ཟེར༔ ད་ནས་ཆུན་མའིསྲས་ཀྱིས་གསོ་རིག་གསུངས༔ ལྷ་དང་ཀླུ་དང་དྲི་ཟར་བཅས་པ་འདུས༔ ཡབ་ཀྱིས་གནང་བའི་བམ་པོ་སུམ་བརྒྱའི་སྟེང་༔ གསོ་རིག་བསྟན་བཅོས་སྔར་མ་གྲགས་པ་གསུངས༔ ལྷ་ཀླུས་ཕྱག་བཙལ་བསྐོར་བ་བྱས་ནས་དེངས༔ དམངས་རྣམས་མ་བསླབས་ཤེས་པ་ཨ་ལ་ཟེར༔ ཡབ་ཀྱིས་ཕྱག་བཙལ་ཞབས་ནི་སྤྱི་བོར་བླངས༔ མངའ་ཐང་སྲས་གཉིས་བགོ་བཤའ་བཏང་བ་ལ༔ མངའ་ཐང་མི་འདོད་རབ་ཏུ་བྱུང་གསོལ་ཞེས༔ ཐེངས་གསུམ་ཞུས་ཀྱང་མ་གནང་དེ་ནས་གནང་༔ དགེ་སློང་དབང་པོའི་སྡེ་ལ་རབ་ཏུ་བྱུང་༔ བསྙེན་རྫོགས་མཛད་ནས་དམ་པའི་ཆོས་ལ་སྦྱངས༔ ཆོས་མིང་སིདྡྷི་ཕ་ལ་ཞེས་སུ་གྲགས༔ དེ་ནས་འགྲོ་བ་རྣམས་ལ་ཕན་པའི་ཕྱིར༔ སྒྲ་དང་ཚད་མའི་བསྟན་བཅོས་མང་པོ་མཛད༔ གསང་སྔགས་གྲུབ་བརྙེས་སྒྲུབ་ཐབས་མང་པོ་མཛད༔ དེ་དུས་ཀྲ་མ་ཤཱི་ལའི་གཙུག་ལག་ཁང་༔ མུ་སྟེགས་ཉི་མ་སིདྡྷིས་མིག་བལྟས་བསྲེགས༔ མངོན་པའི་བཀའ་རྣམས་ཕལ་ཆེར་ཚིག་པར་གྱུར༔ དེ་ཡི་མེ་གྲིབ་ཀླུ་ཡི་རྒྱལ་པོར་ཕོག༔ ཀླུ་ཡི་རྒྱལ་པོ་བཏང་གཟུང་ནད་ཀྱིས་བཏབ༔ ཤིན་ཏུ་ཉམ་ཐག་ཅི་བྱས་ཕན་མེད་ནས༔ ཀླུ་འཁོར་གདུངས་པའི་སྨྲེ་སྔགས་མང་པོ་བཏོན༔ ཀླུ་ཡི་རྒྱལ་པོ་དགའ་བོའི་ཞལ་ན་རེ༔ ཛམྦུའི་གླིང་གི་འཚོ་བྱེད་སྤྱན་འདྲོངས་ན༔ ན་ཚ་འདི་ལས་ཐར་པ་ཅང་སྲིད་དམ༔ དེ་མིན་ཅི་བྱས་ཕན་མེད་ཚེའི་དུས་བྱེད༔ ཅེས་ཐོས་ཀླུ་རིགས་ནང་ནས་ཆོས་དད་པ༔ གཉིས་ཀྱིས་སྤྱན་འདྲེན་འགྲོ་བར་ཁས་བླངས་ནས༔ དེ་གཉིས་ལ་ནི་རིན་ཅེན་མང་དུ་བསྐུར༔
དགེ་སློང་ཆེན་པོ་དེ་ལ་མཆོད་ཅིག་བསྒོས༔ དེ་ནས་ནོར་རྒྱས་དང་ནི་དུང་སྐྱོང་གིས༔ རྫུ་འཕྲུལ་ཛམྦུའི་གླིང་དུ་སྐད་ཅིག་ཕྱིན༔ དགེ་སློང་ཆེན་པོ་སིདྡྷི་ཕ་ལ་ལ༔ མགོ་བོས་ཕྱག་བཙལ་ཐལ་མོ་སྦྱར་ནས་སུ༔ གྲོས་མཐུན་ཚིག་མཐུན་སྐད་མཐུན་རཏྣ་ཕུལ༔ དགེ་སློང་ཆེན་པོ་གཟིགས་སྟངས་གསུམ་ལ་གཟིགས༔ གཟིགས་སྟངས་དང་པོ་ཀླུ་བསྙུང་ལས་ཐར་པ༔ གཟིགས་སྟངས་གཉིས་པ་གཏི་མུག་ནད་བསལ་བ༔ གཟིགས་སྟངས་གསུམ་པ་རྒྱས་པ་འབུམ་ལ་གཟིགས༔ ཀླུ་ཡི་ཡུལ་དུ་སྐད་ཅིག་ཕྱིན་པར་གྱུར༔ ཀླུ་རྣམས་མཚེའུ་ཚལ་དུ་དགེ་སློང་འདུས༔ ཀླུ་ཡི་རྒྱལ་པོ་ཀླུ་སྨན་སྣ་ཚོགས་གསོས༔ རྒྱལ་པོ་ནད་ལས་གྲོལ་བའི་དྲིན་ལན་དུ༔ རིན་པོ་ཆེ་དང་ཕ་རོལ་ཕྱིན་ཡུམ་ཕུལ༔ ཨཱ་ཙཪྻ་མཆོག་ནཱ་གཱ་རྫུ་ནར་གྲགས༔ དེ་ནས་ཨུ་རྒྱན་པདྨ་འབྱུང་གནས་ཀྱིས༔ སིངྒ་ལ་ཡི་རྒྱལ་ཁམས་གདུལ་བྱར་གཟིགས༔ ཀི་ཛ་ར་ཡི་དུར་ཁྲོད་བཞུགས་ནས་སུ༔ རྒྱལ་པོ་ཤྲཱི་ཀུ་མཱས་ཞབས་ནས་བཏེག༔ འདི་དུས་ཀྲ་མ་ཤཱི་མའི་གཙུག་ལག་ཁང་༔ མུ་སྟེགས་དམག་དྲངས་གཙུག་ལག་ཁང་འགའ་བསྲེགས༔ རེ་ཞིག་དུས་ན་རྒྱལ་པོའི་ལྡུམ་རའི་ནང་༔ མཚོ་དཀྱིལ་མེ་ཏོག་པདྨའི་སྡོང་པོ་ལས༔ མེ་ཏོག་མང་པོ་ཉིན་པར་ཁ་འབྱེད་ཅིང་༔ མཚན་མོ་ཁ་ནི་ཟུམ་ནས་སྡོད་པ་ལ༔ པདྨ་གཅིག་ནི་ཉིན་ཡང་ཁ་མ་བྱེ༔ ལྡུམ་ར་བས་ནི་རྒྱལ་པོར་དེ་ལྟར་བསྙད༔ རྒྱལ་པོའི་ཞལ་ནས་གཉེར་ཀ་གྱིས་ཤིག་གསུངས༔ དེ་ནས་རྒྱལ་པོའི་བཙུན་མོ་འཁོར་བཅས་ཀྱིས༔ གཟིགས་སུ་བྱོན་པས་པདྨ་ཁ་བྱེའི་དབུས༔ ཁྱེའུ་ལོ་བརྒྱད་ཟིལ་པ་ཕྲོམ་མེ་འདུག༔ རྒྱལ་པོས་མཁན་པོ་སུ་མི་ཏྲ་ལ་དྲིས༔ མཁན་པོའི་ཞལ་ནས་རྒྱལ་པོ་གསོན་ཅིག་གསུངས༔ དེ་ནི་ཤཱཀྱ་མི་ཏྲའི་སྐྱེ་བ་སྟེ༔ རྒྱ་གར་ཤར་ཕྱོགས་བྲམ་ཟེ་སཔྟ་ལའི༔ བུ་ནི་ཤཱཀྱ་བཤེས་གཉེན་ཚེ་འཕོས་པ༔ དབང་ཕྱུག་ཆེན་པོའི་གྲུབ་ཐོབ་ནང་པའི་དགྲ༔ མ་ཏི་ཙི་ཏྲ་འདུལ་བའི་གཉེན་པོ་ཡིན༔ ཕོ་བྲང་སྤྱན་དྲོངས་བཀུར་སྟི་གྱིས་ཤིག་གསུངས༔ དབང་བསྐུར་ཆོས་བཤད་ཨཱརྱ་དེ་བར་བཏགས༔ ཚངས་སྤྱོད་རབ་ཏུ་བྱུང་བར་ཞུ་ཕུལ་བས༔ སློབ་དཔོན་ཀླུ་གྲུབ་རབ་ཏུ་བྱུང་ལུང་བསྟན༔ མི་ལོ་ཉིས་བརྒྱ་བཞུགས་ནས་ཆོས་ལ་བཀོད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བཻདྡྷའི་ཡུལ་དང་སིངྒ་ལའི་ཡུལ་ཆོས་ལ་བཀོད་པའི་ལེའུ་སྟེ་ཞེ་དྲུག་པའོ༔ ༔
པདྨ་བཀའ་ཐང་ལེའུ་ ༤༧ བྷངྒ་ལའི་རྒྱལ་ས་ཕྲོགས་པ།
དེ་ནས་ཤར་ཕྱོགས་བྷངྒ་ལ་རུ་བྱོན༔ རཱ་ཛཱ་ཆེན་པོ་ནོར་བུ་འོད་ལྡན་ཞེས༔ མུ་སྟེགས་རྒྱལ་པོ་གསུང་རབ་མི་དད་པ༔ དང་པོར་མངོན་པར་མི་དགའ་གནོད་པར་བྱེད༔ ཕོ་བྲང་མཁར་གྱི་སྒོ་ནི་བརྒྱད་ཡོད་པ༔ ཕྱི་སྒོའི་ནང་ན་དབང་པོའི་ཡུལ་སྟོན་གྱི༔ བུ་མོ་ལྔ་ནི་ཤིན་ཏུ་མཛེས་པ་ལ༔ ཡིད་དུ་འོང་བའི་ཆ་ལུགས་དུ་མ་སྟོན༔ འདོད་ཡོན་ལྔ་ནི་ལག་ཏུ་བླངས་ནས་སྟེར༔ བར་སྒོ་ཞིག་ན་མ་འོངས་ལུང་སྟོན་པའི༔ སྒོ་འགྲམ་འདས་འོངས་གླེང་སློང་བུ་མོ་གཉིས༔ ངག་ནི་ཚངས་པའི་དབྱངས་ལྟར་སྙན་པ་ལ༔ གཏམ་ཡང་ཚངས་པ་ཆེན་པོ་ལྟ་བུར་མཁས༔ ནང་སྒོའི་ཕྱི་འགྲམ་རཀྴ་སྟོབས་པོ་ཆེའི༔ བུ་ལྔ་འཇིགས་པའི་མཚོན་ཆ་སྣ་ཚོགས་ཐོགས༔ སྒོ་ཡི་ནང་འགྲམ་སྒོ་སྲུང་སྡིག་ལྟོ་ཅན༔ ཕྱི་ལ་རེ་མིག་སྟོང་ཕྲག་བརྒྱད་ཅུ་བརྒྱད༔ ཕོ་བྲང་དེ་ལ་འོབས་ཀྱི་འཁོར་ས་དྲུག༔ མཁར་དེའི་བར་ཁང་ཉི་ཟླ་ཁ་སྦྱར་གྱི༔ ནང་ནི་རིན་ཅེན་སྣ་ལྔའི་འོད་ཀྱིས་ཁེངས༔ དེ་ལ་རིན་ཅེན་ཤེལ་གྱི་སྐས་བཙུགས་པ༔ རཏྣ་འཕྲུལ་གྱི་མེ་ལོང་ལས་བྱས་མཐོང་༔ དེ་ནང་རཱ་ཛ་ནོར་བུ་འོད་ལྡན་སྡོད༔ གནས་པ་ནང་གནས་གཟིགས་པ་ཕྱི་རུ་གཟིགས༔ དེ་ཡི་སྤྱི་གཙུག་ཡིད་བཞིན་ནོར་བུ་ནི༔ རིན་པོ་ཆེ་ནི་བསམ་འཕེལ་བྱ་བ་ཡོད༔ འཁོར་ནི་མུ་སྟེགས་གྲངས་མེད་བསྐོར་བའི་དབུས༔ རྒྱལ་པོ་དེ་ནི་ཤིན་ཏུ་དབང་ཆེ་བས༔ ནོར་བུ་རིན་ཅེན་ཡོད་བཞིན་གཞན་གྱི་འཕྲོག༔ སེམས་ཅན་དབུལ་ཕོངས་དུབ་ཅིང་སྡུག་བསྔལ་འཇུག༔ དེ་ནི་པད་འབྱུང་གདུལ་བྱའི་ཞིང་དུ་གཟིགས༔ གྲོང་ཁྱེར་སྲོང་གར་མནྡཱ་ར་བ་བཞག༔
བྱི་ལའི་གདོང་པ་ཅན་དུ་སྤྲུལ་ཅིག་གསུངས་༔ གདོང་ཅན་སྐྱེས་བུ་གསུམ་གྱིས་དམག་དཔོན་བྱས༔ མཚོན་གྱིས་མི་ཕེད་སྲ་བའི་གོ་ཆ་གྱོན༔ རྩེ་གསུམ་ལྡན་པའི་མཚོན་ཆ་མང་དུ་ཐོགས༔ བརྒྱད་ཁྲི་བཞི་སྟོང་འཁོར་བཅས་དམག་དྲངས་འཐབས༔ རྒྱལ་པོའི་འཁོར་ས་དྲུག་བཅོམ་དམག་རྣམས་བསད༔ འདོད་ཡོན་བུ་མོ་ལྔ་ཕྲོགས་སྒོ་སྲུངས་བཀུམས༔ གནམ་སྒོ་འབྱུང་འཇུག་མེད་པའི་ནང་དུ་ཕྱིན༔ ཁྲོ་བཅུའི་རྒྱལ་པོ་བཀོད་པ་ལྷུན་གྲུབ་ཁྲིད༔ པདྨ་ཀུན་ཏུ་འཆང་གི་སྐུ་རུ་བཞེངས༔ རྒྱལ་པོ་འོག་མིན་གནས་སུ་བསྒྲལ་བར་གྱུར༔ རྒྱལ་པོའི་ཤུལ་བཟུང་ཆོས་ཀྱིས་རྒྱལ་སྲིད་བསྐྱངས༔ འདི་དུས་ཀྲ་མ་ཤཱི་ལའི་གཙུག་ལག་ཁང་༔ སྟག་གཟིག་རྒྱལ་པོ་ཧུ་ལུ་ཀས་དམག་གཡབས༔ གཙུག་ལག་ཁང་ནི་བཅུ་གཉིས་མེ་ལ་བསྲེགས༔ མངོན་པའི་བཀའ་ནུབ་གཙུག་ལག་ཁང་ནི་མེད༔ དགེ་སློང་གསལ་བའི་ཚུལ་ཁྲིམས་ལུས་བསྐྱེད་ནས༔ བྱམས་པའི་ཆོས་ལྔ་པྲ་ཀར་ཎ་སྡེ་བརྒྱད༔ ཐོགས་མེད་དབྱིག་གཉེན་བསྟན་བཅོས་ཕྱིས་བརྩམས་དར༔ པད་འབྱུང་བསྟན་པ་བྷངྒ་ལ་ན་རྒྱས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བྷངྒ་ལའི་རྒྱལ་ས་ཕྲོགས་པའི་ལེའུ་སྟེ་ཞེ་བདུན་པའོ༔ ༔
པདྨ་བཀའ་ཐང་ལེའུ་ ༤༨ ཨུ་རྒྱན་ཡུལ་ཁམས་འདུལ་བར་དགོངས་པ།
དེ་ནས་གདུལ་བྱར་གྱུར་པ་གང་འདུག་གཟིགས༔ ཨིནྡྲ་བོ་དྷིས་ཕོ་ཉ་བཏང་དང་ཕྲད༔ གྲོགས་པོ་གསེར་འོད་གཞོན་ནུ་ཞེས་བྱ་བ༔ མནྡཱ་ར་བ་མཐོང་བས་ལོག་ལྟ་སྐྱེས༔ ཀྱེ་མ་དུས་ངན་ཆོས་པ་འདི་འདྲ་བ༔ སོ་སོའི་སྐྱེ་བོ་ཡིན་ཡང་ངོ་མི་མཚར༔ གཏམ་ནི་མང་དུ་སྨྲས་ཀྱང་ལྷག་མ་ལྔས༔ མགོ་ནག་མི་ལ་འདུན་མ་ཅི་ཡང་ཡོད༔ འོད་འཆང་མ་ནི་བར་མ་དོ་རུ་འཁྱམས༔ གླགས་ལྟ་ཐ་མ་མཆིས་པར་བགྱིད་ལགས་སོ༔ དེ་སྐད་སྨྲས་ནས་ཨུ་རྒྱན་ཡུལ་དུ་དེངས༔ དེ་ནས་ཨུ་རྒྱན་ཐབས་ཀྱིས་འདུལ་བར་དགོངས༔ འབྲས་ལྡན་ཀརྐ་ཏ་ཡི་ཚོང་དུས་སུ༔ བྲམ་ཟེ་ཕོ་མོའི་ཁྱེའུ་ཞིག་ཏུ་སྤྲུལ༔ སྐྱེ་བདུན་ཤ་ཞིག་བཙལ་ནས་དོན་བྱ་བསམས༔ ཁཪྶ་པ་ཎིའི་གཙུག་ལག་ཁང་འཁོར་ན༔ བྲམ་ཟེ་སྐྱེ་བདུན་དུང་གི་རྣ་ཅ་ཅན༔ དེ་ལ་ལུས་འདོད་ཕྱག་དང་བསྐོར་བ་བྱས༔ ང་ལ་བསྐོར་བ་བྱས་ནས་ཅི་བྱེད་ཟེར༔ སེམས་ཅན་དོན་བྱེད་སྐྱེ་བདུན་ཤ་དགོས་པས༔ ཁྱོད་ཀྱི་བློས་ཐོངས་ད་ལྟ་ལུས་འདི་ཞུ༔ མི་ཐོངས་ནམ་ཤི་ཙ་ན་ཞུ་བྱས་པས༔ བྲམ་ཟེ་དུང་རྣས་ཅུང་ཞིག་བསམས་ནས་སུ༔ འཇིག་རྟེན་འདི་ན་གཅེས་པ་རང་སྲོག་ཡིན༔ ང་འཆིའི་དུས་ན་སྐད་ཅིག་བཏང་གི་ཟེར༔ དེ་ནས་ལོ་ལྔ་སོང་ནས་སྐད་བྱུང་སྟེ༔ ཌོམྦྷི་པ་དང་སྐད་ནི་ཕྲད་ཙམ་བྱུང་༔ དེ་ནས་རོ་དྲངས་ཅེ་སྤྱང་མང་པོ་བྱུང་༔ ཌོམྦྷིས་རེངས་པའི་ལྟ་སྟངས་བྱས་ནས་ནི༔ སྟག་ལ་ཞོན་ནས་རོ་དེ་པང་དུ་ཁྱེར༔ ཞེ་སྡང་གདུག་པའི་སྦྲུལ་གྱིས་གོང་རྨེད་བྱས༔ རུས་པའི་རྒྱན་གྱོན་ཁ་ཊྭཱཾ་རྩེ་གསུམ་ཐོགས༔ གྲོང་ཁྱེར་འབྲས་ལྡན་དངོས་གྲུབ་སུ་འདོད་བྱས༔ བཅོས་མའི་རྣལ་འབྱོར་ཐོ་ཅོ་ལས་མེད་པར༔ སྟག་ལ་སྦྲང་རྒོད་བླུད་ནས་ཞོན་པ་ཡིན༔ དུག་སྦྲུལ་གླ་རྩིབྱིན་པའི་རྟགས་ཡིན་ཟེར༔ དེ་མིན་ཁྱོད་ཀྱིས་འདི་འདྲ་མི་ཐུབ་གླེང་༔ དེ་ནས་ཆང་འཚོང་བི་ན་ས་ཞེས་ལ༔ ཆར་ཉོར་ཕྱིན་ཏེ་ཆང་ནི་ཙམ་ཉོ་ཟེར༔ ཁྱོད་ལ་ཆང་ནི་ཙམ་ཡོད་ཉོ་བྱས་པས༔ ང་ལ་ཆང་ཁལ་ལྔ་བརྒྱ་ཙམ་ཡོད་ལོ༔
ཆང་ཚོངས་བྱས་པས་ཆང་རིན་ཇི་ཙམ་ཟེར༔ ཆང་རིན་ཉི་མ་འདི་ནུབ་ཙ་ན་སྟེར༔ དེ་སྐད་སྨྲས་པས་ཆང་མས་ཆང་བཙོངས་སོ༔ དུས་ལ་མ་འཇལ་རྒྱལ་ཁྲིམས་ཆད་པ་ཡོད༔ ཆང་རིན་མེད་ནས་ཉི་མ་སྟོད་ལ་མནན༔ རྩྭ་དང་ཤིང་དང་ཆུ་མིག་ཐམས་ཅད་བསྐམས༔ སེམས་ཅན་ཕྲ་མོ་ཐམས་ཅད་ཚིག་པ་ལ༔ རཱ་ཛ་ཟངས་ཀྱི་དྲེག་པ་བྱ་བ་དེས༔ ཡུལ་མི་ཐམས་ཅད་བསགས་ནས་གྲོས་བྱས་པས༔ བི་ནས་ངའི་གན་རྣལ་འབྱོར་ཡོད་དོ་ཟེར༔ ཡུལ་མི་ཐམས་ཅད་ཁ་འཆམས་ཚིག་གཅིག་ཏུ༔ རྣལ་འབྱོར་བྱ་བ་ཐབས་མང་དེས་ལན་ཟེར༔ དེ་ནས་རཱ་ཛས་སློབ་དཔོན་དྲུང་དུ་ཕྱིན༔ རྣལ་འབྱོར་བྱ་བ་སེམས་ཅན་དོན་བྱེད་ཡིན༔ འདི་འདྲའི་གནོད་འཚེ་མ་བྱེད་བྱས་པ་ཡིས༔ ཆང་རིན་མེད་ཟེར་རཱ་ཛས་ཁས་ལེན་བྱས༔ ཉི་མ་བཏང་བས་ཞག་བདུན་ཐོ་རངས་སོང་༔ དེ་ནས་ཀུ་རུ་ཀེུའི་བྲག་ཕུག་བཞུགས༔ ཆང་ཚོང་བི་ན་ས་ནི་དད་པ་སྐྱེས༔ གླང་པོ་ཆེ་ལ་ཆང་བཀལ་བྲག་ཕུག་བྱུང་༔ ཌོམྦྷི་ཧེ་རུས་གདམས་ངག་རྫོགས་པར་བྱིན༔ རླུང་སེམས་འབྱོངས་པས་ཆུར་མི་འབྱིང་བ་དང་༔ ནམ་མཁའ་དག་ལ་བྱ་བཞིན་ཐོགས་པ་མེད༔ དེ་ནས་རེ་ཞིག་དུས་ན་རྒྱལ་པོ་ནི༔ ཨིནྡྲ་བོ་དྷིས་དུར་ཁྲོད་ས་འཆག་ཕྱིན༔ དུག་སྦྲུལ་ཟིན་ནས་ཤིན་ཏུ་ན་བར་གྱུར༔ བྲམ་ཟེ་སྔགས་མཁན་སྨན་པ་རྣམས་ལ་བསྟན༔ ཐམས་ཅད་རྒྱ་མཚོའི་གཏིང་གི་ཆུ་ཕན་ཟེར༔ ཆུ་ལེན་པ་ལ་རྐང་མགྱོགས་བཏང་བར་གྱུར༔ ཆུ་ལོན་ཁྱེར་ནས་འོངས་པའི་ལམ་ཀ་རུ༔ རྒྱལ་པོ་ལ་གནོད་ཀླུ་ཡིས་ཁྱེའུར་སྤྲུལ༔ ངུ་ཡིན་བྱུང་བས་ཅི་ཉེས་བྱས་པ་ལ༔ ཨིནྡྲ་བོ་དྷི་གྲོངས་ཞེས་ཟེར་བ་དང་༔ ལམ་དུ་ཆུ་ཕོ་ངུ་ཡིན་ཕྱིན་པ་ཡིས༔ མ་གྲོངས་འདུག་ནས་ཆུ་ཁྱོངས་ག་རེ་ཟེར༔ རཱ་ཛ་གྲོངས་ཟེར་ཕོ་ནས་མེད་བྱས་པས༔ འོ་ན་ང་འཆི་གདམས་པ་ཡོད་པ་ཡི༔ རྣལ་འབྱོར་པ་འདྲ་ཚོལ་ཟེར་རྒྱལ་པོས་ངུས༔ བཙུན་མོ་ལྔ་བརྒྱའི་ཆུང་དག་ཆོས་ལ་མོས༔ པདྨ་རྒྱལ་པོ་སྤྱན་དྲངས་འཐད་ཅེས་ཟེར༔ བི་ན་ས་ལ་གདམས་པ་ཡོད་ཟེར་བོས༔ བི་ནས་ཆང་ཁྱེར་ཡོངས་ནས་རྒྱལ་པོ་ལ༔ རིགས་ཀྱི་རྟོག་པ་སྤོངས་ལ་ཆང་འདི་གསོལ༔ རྒྱལ་པོས་འཐུངས་པས་ན་ཚ་ཞི་བར་གྱུར༔ རྒྱ་མཚོའི་གཏིང་གི་ཆུ་ཡང་ངས་བླང་ཟེར༔ རཱ་ཛ་འདི་ནི་ཙུག་བྱེད་ལྟོས་ཤིག་བསྒོས༔ ཕྱི་ན་ཕར་ལ་རྐང་མགྱོགས་བཏང་བར་གྱུར༔ ཆུ་ཐོག་ཕར་ལ་ཡེ་རེ་རེ་སོང་ནས༔ ཆུ་ཡི་དཀྱིལ་དུ་རྡོག་གིས་སོང་ནས་སུ༔ རྒྱ་མཚོའི་གཏིང་གི་ཆུ་བླངས་ཁྱེར་བྱུང་བས༔ རྐང་མགྱོགས་དབུགས་ནི་ཧལ་ཧལ་བརྒྱུགས་བྱུང་ནས༔ རྒྱལ་པོས་དེ་ཙམ་རྒྱུག་པ་ཅི་བྱུང་གསུངས༔ བི་ན་ས་ཡིས་ཆུ་ཁྱེར་བྱུང་ཞེས་ཟེར༔ དེ་ནས་བི་ནས་ཆུ་དྲངས་སོས་པར་གྱུར༔ ང་འགྲོ་བྱས་པས་མཆོད་གནས་གྱིས་ཟེར་བཟུང་༔ འབངས་རྣམས་ཨིནྡྲ་བོ་དྷི་ཅོལ་རེ་ཆུང་༔ རིགས་ངན་བུད་མེད་མཆོད་གནས་འཆོལ་བ་ཟེར༔ བཙུན་མོ་རྣམས་ཀྱང་སྣང་བ་ངན་པ་འཛིན༔ བི་ནས་ང་ལ་ཡིད་མི་ཆེས་པར་འདུག༔ མི་ཡང་གླེང་འདུག་ང་འགྲོ་བྱས་པ་ལ༔ རྒྱལ་པོས་ཁྱོད་འགྲོ་ང་ཡང་ཤི་ནས་སྡོད༔ ཁྱོད་ཀྱི་རྐེ་འབྲེག་ཟེར་ནས་མ་བཏང་ངོ་༔ ང་ཡིས་མི་ཐུལ་བུ་ཞིག་སྤྲུལ་དགོས་སྙམ༔ བུ་དེ་རྒྱལ་པོ་ཨིནྡྲ་བོ་དྷིར་གཏད༔ མ་ནི་གར་སོང་ཆ་མེད་སྤྱོད་པར་སོང་༔ བུ་ནི་དུས་ཕྱིས་ལ་བ་པ་ཞེས་གྲགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཨུ་རྒྱན་ཡུལ་ཁམས་འདུལ་བར་དགོངས་པའི་ལེའུ་སྟེ་ཞེ་བརྒྱད་པའོ༔ ༔
པདྨ་བཀའ་ཐང་ལེའུ་ ༤༩ ཨུ་རྒྱན་རྒྱལ་ཁམས་ཆོས་ལ་བཙུད་པ།
དེ་ནས་ཨུ་རྒྱན་ཡུལ་ཁམས་གདུལ་བྱར་གཟིགས༔ མཁའ་འགྲོ་མ་བཞིས་འདོ་ལེའི་སྟེང་ལ་བཏེག༔ ཨུ་རྒྱན་ཡུལ་དུ་ཡབ་ཡུམ་བསོད་སྙོམས་མཛད༔ སྔར་གྱི་བུ་བསད་རྒྱལ་བློན་རྣམས་ཀྱིས་ཤེས༔ ཁམས་ཀྱི་རྒྱལ་པོའི་བུ་བསད་དྲན་པ་བསྐུལ༔ བཙུན་མོ་མཆོག་གྱུར་འོད་འཆང་མ་འདྲ་དོར༔ ཨུ་པ་ཏ་ཡི་བུ་སྨད་གཉིས་ཀ་བཀུམས༔ སྤྲང་མོ་ཞིག་དང་བསྡེབས་ནས་ཡུལ་དུ་བྱུང་༔ ད་ཡང་ཡུལ་འདིར་གནོད་པ་ཅི་བྱེད་ན༔ བདེ་བར་མི་འཚལ་ཉེས་པའི་སླད་དུ་སྟེ༔ བློན་པོ་ཐམས་ཅད་ཡོངས་སུ་འདུས་པར་གྱུར༔ རྒྱལ་པོ་ཉིད་ལ་ཚངས་པར་སྨྲ་རྒྱུ་མེད༔ ཙནྡན་ཁུར་རེ་ཏིལ་མར་བྲེ་རེ་བསྡུས༔ ཡབ་ཡུམ་ལྷན་སྦྱར་བཅིངས་ནས་བསྲེགས་པར་གྱུར༔ སྔོན་ཆད་བསྲེགས་པ་ཞག་བདུན་དུ་བ་འཆད༔ ཉེར་གཅིག་བར་དུ་དུ་བ་མ་ཆད་ནས༔ རྒྱལ་པོས་ལྟོས་ཤིག་བསྐུལ་བས་བལྟ་མ་ནུས༔ སྔར་གྱི་ཡབ་ཉིད་ཐུགས་མ་ཆེས་ནས་དྲིས༔ བཙུན་མོ་འོད་འཆང་མ་ནི་མིག་སེར་གྱིས༔ ང་ཡིས་གྲོགས་གོ་མ་ཆོད་མི་ཅིག་ཡིན༔ རྒྱལ་པོའི་སྙན་དུ་རྟིང་ལ་བརྗོད་བྱ་ཟེར༔ སྤྲུལ་པའི་སྐུ་ཞིག་ཡིན་ན་མི་འཚིག་སྙམ༔ འཁོར་དང་བཅས་པས་ལྟ་རུ་ཡོངས་ཙ་ན༔ ཏིལ་མར་ཞིང་དོར་གཅིག་ཙམ་མཚོ་འཁྱིལ་དབུས༔ སོལ་བའི་གུར་ཆེན་སྟེང་ན་པད་སྡོང་སྐྱེས༔ པདྨའི་སྟེང་ན་ཡབ་ཡུམ་སྙོམ་འཇུག་གར༔ སྐུ་མཆོག་རབ་གསལ་དྲི་བཟང་བསིལ་ངད་ལྡན༔ སྔར་གྱི་འགྲོ་རྣམས་ཐུགས་རྗེས་བསྒྲལ་བའི་ཕྱིར༔ ཐོད་པའི་ཕྲེང་བ་སྐུ་ལ་གསོལ་ནས་བཞུགས༔ རྒྱལ་པོ་ལ་སོགས་ཐམས་ཅད་ངོ་མཚར་སྐྱེས༔ ཨུ་རྒྱན་རྒྱལ་ཁམས་ཆེ་ཆུང་མེད་པར་འདུས༔ ས་ཡི་ལྷ་མོ་བརྟན་མ་འཁོར་བཅས་ཀྱིས༔ ཏམྦུ་ར་ཡི་རྒྱུད་བསྒྲེངས་བསྟོད་པས་བསྙེན༔ ཧཱུྃ༔ རྒྱ་མཚོར་སྐུ་འཁྲུངས་ཨུ་རྒྱན་ཡུལ་དུ་བྱོན༔ རྒྱལ་པོའི་སྲས་མཛད་རྫུ་འཕྲུལ་སྣ་ཚོགས་བསྟན༔ འཁོར་བར་མ་ཆགས་ཐབས་ཀྱི་རོལ་རྩེད་མཛད༔ པདྨ་རྒྱལ་པོའི་སྐུ་ལ་ཕྱག་འཚལ་བསྟོད༔ རྒྱ་གར་ཡུལ་བྱོན་རྡོ་རྗེ་གདན་དུ་བཞུགས༔
བདུད་བཞི་བཅོམ་པས་སངས་རྒྱས་ཀུན་དང་མཉམ༔ འདུལ་ཁྲིམས་ལྡན་པས་དགེ་སློང་ཆ་ལུགས་འཛིན༔ ཤཱཀྱ་སེང་གེའི་སྐུ་ལ་ཕྱག་འཚལ་བསྟོད༔ ཟ་ཧོར་ཡུལ་བྱོན་མ་ག་དྷ་རུ་བཞུགས༔ བསིལ་བའི་ཚལ་དུ་བམ་རོའི་སྒྲུབ་པ་མཛད༔ སྡེ་སྣོད་བཅུ་གཉིས་ཐུགས་ཀྱི་ཀློང་ན་གསལ༔ པདྨ་སམྦྷའི་སྐུ་ལ་ཕྱག་འཚལ་བསྟོད༔ མུ་སྟེགས་ཡུལ་བྱོན་དགའ་བའི་ཚལ་དུ་བཞུགས༔ སྙན་པའི་སྒྲ་ཡིས་ཕྱོགས་མཚམས་ཀུན་ཏུ་ཁྱབ༔ གསང་སྔགས་ཕྱི་ནང་ཐུགས་ཀྱི་དཀྱིལ་ན་གསལ༔ རྡོ་རྗེ་གྲོ་ལོད་སྐུ་ལ་ཕྱག་འཚལ་བསྟོད༔ ཡངས་པ་ཅན་བྱོན་སོ་ས་གླིང་དུ་བཞུགས༔ ལྟ་བ་མི་ཚོལ་ཞི་གནས་སྒོམ་མི་བྱེད༔ ཐ་དད་ཕྱོགས་འཛིན་མ་གོས་ནམ་མཁར་གདལ༔ པདྨ་ཐོད་ཕྲེང་སྐུ་ལ་ཕྱག་འཚལ་བསྟོད༔ ཁ་ཆེའི་ཡུལ་བྱོན་སིངྒ་ལ་རུ་བཞུགས༔ ཐོས་བསམ་ལྡན་པས་འགྲོ་བ་མ་ལུས་འདུལ༔ བྱམས་པ་ཆེན་པོས་ཕ་མ་ལྟ་བུར་མཛད༔ བློ་ལྡན་མཆོག་སྲེད་སྐུ་ལ་ཕྱག་འཚལ་བསྟོད༔ ལི་ཡི་ཡུལ་བྱོན་ལྕང་ར་སྨུག་པོར་བཞུགས༔ ཤེལ་གོང་བྲག་ལ་མངོན་ཤེས་མཁའ་ལྟར་ཁྱབ༔ གཞན་དོན་འཕྲིན་ལས་འབྲས་བུ་ལོ་འདབ་རྒྱས༔ ཉི་མ་འོད་ཟེར་སྐུ་ལ་ཕྱག་འཚལ་བསྟོད༔ བལ་པོའི་ཡུལ་བྱོན་ཡང་ལེ་ཤོད་དུ་བཞུགས༔ གནོད་སྦྱིན་རྫོང་དུ་དམ་སྲི་སྡེ་བརྒྱད་བཏུལ༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ སེང་གེ་སྒྲ་སྒྲོག་སྐུ་ལ་ཕྱག་འཚལ་བསྟོད༔ བོད་ཡུལ་དབུས་འབྱོན་སྟག་ཚང་སེང་ཕུག་བཞུགས༔ སྣང་བ་མཐའ་ཡས་སྤྲུལ་པ་མི་ཡི་མགོན༔ མཁའ་འགྲོ་སྡེ་བཞི་མ་ཚོགས་རོལ་ཏུ་ཁྲིད༔ བདེ་བའི་དངོས་གྲུབ་སྐུ་ལ་ཕྱག་འཚལ་བསྟོད༔ སྲིན་པོའི་ཡུལ་འབྱོན་རྔ་ཡབ་གླིང་དུ་བཞུགས༔ ཟངས་མདོག་དཔལ་རིར་གདོང་དམར་སྲིན་པོ་འདུལ༔ སྐྱེ་འགྲོ་སེམས་ཅན་ཐམས་ཅད་བདེ་ལ་འགོད༔ པདྨ་འབྱུང་གནས་སྐུ་ལ་ཕྱག་འཚལ་བསྟོད༔ ཅེས་བསྟོད་གཡས་ཕྱོགས་ལན་གསུམ་བསྐོར་བྱས་ནས༔ མདུན་ནས་ཕྱག་བྱས་ས་ལ་ཐིམ་པར་གྱུར༔ དེ་ནས་རྒྱལ་པོས་ཕོ་བྲང་གདན་འདྲེན་ཞུས༔ བཀའ་འདུས་ཆོས་ཀྱི་རྒྱ་མཚོའི་བཤད་སྒྲུབ་བཙུགས༔ མི་ལོ་ཉིས་བརྒྱར་བཞུགས་ནས་ཆོས་གསུངས་ཏེ༔ ཨུ་རྒྱན་རྒྱལ་ཁམས་ཐམས་ཅད་ཆོས་ལ་བཀོད༔ ཨིནྡྲ་བོ་དྷི་བཙུན་མོ་འཁོར་བཅས་རྣམས༔ ཚོམ་བུ་ལྔ་བརྒྱ་དང་བཅས་ལྷག་མེད་དུ༔ ཕྱག་རྒྱ་ཆེན་པོ་མཆོག་གི་རིག་འཛིན་ཐོབ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཨུ་རྒྱན་རྒྱལ་ཁམས་ཆོས་ལ་བཙུད་པའི་ལེའུ་སྟེ་ཞེ་དགུ་པའོ༔ ༔
པདྨ་བཀའ་ཐང་ལེའུ་ ༥༠ རྒྱ་གར་རྔ་ཐུབ་ཅན་དང་ཁ་ཆེ་རྣམས་ཆོས་ལ་བཙུད་པ།
དེ་ནས་ལྷ་ལྕམ་མནྡཱ་ར་བ་ཡིས༔ ཨུ་རྒྱན་ཧེ་རུ་ཀ་ཡི་མཆོད་ཁང་བཞེངས༔ འདོད་དགུར་སྒྱུར་བའི་གཟུགས་ཅན་མཁའ་འགྲོ་མ༔ རེས་འགའ་མཁའ་འགྲོ་རེས་འགའ་ཅེ་སྤྱང་སྟེ༔ རེས་འགའ་སྟག་མོ་རེས་འགའ་འཇའ་ཚོན་ལྟར༔ མཁའ་འགྲོ་རྣམས་ཀྱི་ཚོགས་དཔོན་མཛད་པར་གྱུར༔ དུས་ཕྱིས་སངས་རྒྱས་བསྟན་པ་མ་སྟོངས་པར༔ སྐབས་དང་སྐབས་སུ་ལྷ་ལྕམ་སྤྲུལ་པ་འབྱུང་༔ དེ་ནས་ཨུརྒྱན་པདྨ་འབྱུང་གནས་ཀྱིས༔ རྒྱ་གར་རྔ་ཐུབ་ཅན་གྱི་ཡུལ་དུ་བྱོན༔ གྲོང་ཁྱེར་བལ་འབངས་འགྱུར་ཞེས་བྱ་བ་ན༔ འཐག་མཁན་བཟའ་མི་གཉིས་ལ་བུ་མོ་ཡོད༔ མ་དེ་ཤི་ནས་ཕ་ཡི་བསམ་པ་ལ༔ བུ་མོ་ནམས་ཀྱང་མི་སོས་འཆི་སྙམ་སྟེ༔ མ་ཡི་རོ་དང་ལྷན་ཅིག་དུར་ཁྲོད་བསྐྱལ༔ ལྷ་ལྕམ་མནྡཱ་ར་བས་སྟག་མོར་སྤྲུལ༔ མ་ཡི་རོ་ལ་རོལ་ཏུ་ཡོངས་ཙ་ན༔ བུ་མོ་མ་ཡི་ནུ་མ་འཇིབ་ཀྱིན་འདུག༔ སྟག་མོས་སྙིང་རྗེ་སྐྱེས་ནས་པང་དུ་བླངས༔ བུ་མོར་མ་ཡི་འཛིན་རྟོག་མ་བྱུང་བར༔ མ་རོ་གྲང་ཞིང་སྟག་མོ་དྲོ་བ་ཡིས༔ ནུ་མ་འདྲད་པས་ཞག་ལོག་ཟླ་ལོག་སྐྱེས༔ ཉིན་པར་དུས་ན་ཤིང་ལ་འཐུས་ཀྱིན་བཀལ༔ མཚན་མོའི་དུས་སུ་ཐགས་སུ་འདྲེན་ཅིང་འཐག༔ བལ་འབངས་ཀ་ལ་སིདྡྷི་ཞེས་བྱར་གྲགས༔ པད་འབྱུང་དེ་ཉིད་གདུལ་བྱའི་ཞིང་དུ་མཁྱེན༔ དགེ་སློང་སཽ་ཁྱ་དེ་བ་ཞེས་བྱར་སྤྲུལ༔ བུ་མོ་དེ་ཉིད་ནགས་གསེབ་ཁྲིད་ནས་སུ༔ འདོད་ཆགས་བཞི་སྦྱོར་སྒྲུབ་པ་མཛད་ཅིང་བཞུགས༔ དེ་ནས་རེ་ཞིག་དུས་སུ་གྱུར་པ་ན༔ ཞིང་པ་རྔ་ཐུབ་ཅན་གྱི་བུ་ཡིན་ཟེར༔ མིང་ནི་ནོར་བུ་གོ་ལེབ་ཅེས་བྱ་བ༔ ཁྱིམ་བདག་བཟང་པོ་ཞིག་གིཕྱུགས་རྫི་དེ༔ ཉི་མ་དུ་ཤར་ནགས་གསེབ་ཕྱུགས་འཚོར་འོང་༔ ན་མ་ཇི་བཞིན་དགེ་སློང་ཡབ་ཡུམ་ལ༔ ཤིང་ལོའི་ནང་དུ་འོ་མ་བཞོས་ཀྱིན་ཕུལ༔ རེ་ཞིག་དགེ་སློང་ཞལ་ནས་ནོར་བུ་ལ༔ ན་མ་རེས་ཀྱིས་ང་ལ་ཞོ་འབུལ་བ༔ ཁྱོད་ལ་འདོད་པ་ཅི་ཡོད་གསུངས་པ་ཡིས༔ ཅི་ཡང་མི་འདོད་མོས་ནས་ཁྱོད་ལ་ཕུལ༔ ཆོས་ཤིག་འདོད་དམ་འདོད་ན་སྦྱིན་གསུངས་པས༔ ཆོས་དང་འདོད་དེ་ང་ལ་ཡོན་མེད་ཟེར༔ དགེ་སློང་ཞལ་ནས་ན་མ་རེ་རེ་བཞིན༔ ཁྱོད་ཀྱི་ཞོ་ཕུལ་ཁོ་ན་ཡོན་ཡིན་མོད༔ ནང་པར་སྔ་བར་ཤོག་དང་ཆོས་སྦྱིན་གསུངས༔ འོངས་ནས་ཤིང་ལོའི་ནང་དུ་ཞོ་བཞོས་ཕུལ༔ རྡོ་རྗེ་སེམས་དཔའ་རྒྱན་གཅིག་སྒྲུབ་ཐབས་བྱིན༔ བསྒྲུབས་པས་སྟན་ཐོག་དེ་ཉིད་གྲུབ་པ་ཐོབ༔ དགེ་སློང་ཡབ་ཡུམ་གཉིས་ཀྱིས་གཟིགས་པ་ཡིས༔ ནོར་བུའི་སྨིན་མཚམས་ཧཱུྃ་ཞིག་འདུག་པར་མཐོང་༔ མཚན་ནི་སློབ་དཔོན་ཧཱུྃ་ཆེན་ཀ་རར་བཏགས༔ བཀའ་འདུས་དམ་པའི་རྒྱུད་ལྔརྫོགས་པར་གསུངས༔ སྐུ་ཆེའི་ཡོན་ཏན་རྐང་མགྱོགས་དངོས་གྲུབ་ཐོབ༔ ས་ལ་ཁྲུ་གང་ཙམ་དུ་མ་རེག་འབྱོན༔
གསུང་མཐར་ཕྱིན་པས་སྤྱི་བོར་རྟ་མགྲིན་བྱུང་༔ ཐུགས་མཐར་ཕྱིན་པས་ཐུགས་ཀར་རྡོ་རྗེ་བྱུང་༔ འཕྲིན་ལས་མཐར་ཕྱིན་དཔྲལ་བའི་དཀྱིལ་དུ་ནི༔ གཡུ་ཡི་རྡོ་རྗེ་རྒྱ་གྲམ་འཁོར་བ་བྱུང་༔ ཡོན་ཏན་མཐར་ཕྱིན་གནས་དགུའི་བུ་ག་ནས༔ འོད་ཟེར་དགུ་ཚན་དགུ་འཕྲོ་མཚན་བཟང་བརྒྱན༔ དགོངས་ཤིག་ཕྱུགས་མའི་ཕྱི་ལ་མར་ཕྱིན་པས༔ ཇོ་བོས་རྡོ་རྗེ་སེམས་དཔའ་བྱོན་ནོ་ཟེར༔ གྲོང་ཁྱེར་དབུས་སུ་གདན་བཏིངས་བསྐོར་བ་བྱས༔ ཇོ་བོ་བདག་ནི་ཕྱུགས་རྫི་ཅི་ཡིས་ཉེས༔ ཕྱུགས་རྫི་མ་ཡིན་རྡོ་རྗེ་སེམས་དཔའ་ལགས༔ ཐམས་ཅད་འདུས་ཏེ་བླ་མ་ཉིད་དུ་བཀུར༔ རྔ་ཐུབ་ཡུལ་ཁམས་ཆོས་ལ་ཚུད་པར་གྱུར༔ དེ་ནས་རྔ་ཐུབ་ཅན་གྱི་ནུབ་ཀྱི་ཕྱོགས༔ ཁ་ཆེའི་ཡུལ་གྱི་གླང་པོ་སྒང་ཞེས་ན༔ རྒྱལ་པོ་དྷརྨ་ཨ་ཤྭ་བྱ་བའི་སྲས༔ ལྷ་ལྕམ་དྷརྨ་བྷེ་ཏི་ཞེས་བྱ་བ༔ ཤིན་ཏུ་མཛེས་པ་ལྷ་ཡི་སྲས་མོ་ཞིག༔ དེ་ཉིད་གཉིད་ལོག་འདུག་པའི་རྨི་ལམ་དུ༔ མི་ནི་དཀར་པོ་ཤིན་ཏུ་མཛེས་པ་ལས༔ འོད་ཟེར་དཀར་པོ་འཕྲོ་བ་ཞིག་བྱུང་ནས༔ བདུད་རྩི་བུམ་པ་གང་ནི་སྤྱི་བོར་བཞག༔ ཚངས་བུག་སོང་ནས་ལུས་ཀུན་བདེ་བས་ཁེངས༔ དེ་ནས་ལུས་མ་བདེ་ནས་བུ་ཞིག་བཙས༔ ཁྱོ་ཕོ་མེད་པའི་བུ་འདི་ངོ་ཚ་སྙམ༔ བྱེ་མའི་གསེབ་ཏུ་བོར་ནས་བཞག་པ་ལ༔ ཁྱིམ་བདག་བདེ་ལྡན་འཁོར་ལོ་ཞེས་བྱ་ནི༔ གྲོང་ཁྱེར་འབུམ་ཚོ་ཉེར་དགུའི་ཁ་སྒྱུར་བ༔ དེ་ཡི་ཀུཀྐུའི་བུ་ཆུང་ཁྱེར་བྱུང་བས༔ མ་ཉམས་མིག་གཉིས་ཁྲ་ཧྲིག་འདུག་ནས་སུ༔ ཁྱིས་བདག་བི་མ་མི་ཏྲ་ཀྱི་ཧུད་ཟེར༔ པང་དུ་བླངས་ཏེ་ནང་དུ་ཁྱེར་ནས་ཕྱིན༔ བདག་ཉིད་གསལ་རིག་མ་ཞེས་ཆུང་མར་གཏད༔ ཞག་ལོག་ཟླ་ལོག་ལོ་ལོག་སྐྱེད་ཆེར་གྱུར༔ ལོ་ལྔ་ལོན་ནས་ཕ་མར་རབ་བྱུང་ཞུས༔ སྡོམ་པ་མི་སྐྱེ་ཟེར་ནས་མ་གནང་ནས༔ རིགས་ལྡན་རྒྱལ་པོ་པདྨ་དཀར་པོ་ལ༔ རིག་པའི་གནས་ལྔ་དག་ལ་མཁས་པར་སྦྱངས༔ ལྷག་པར་ཆོས་ལ་མཁས་པར་གྱུར་པ་དང་༔ མཁན་པོ་སུ་མི་ཏྲ་ལ་རབ་ཏུ་བྱུང་༔ མཚན་ནི་ཤཱཀྱ་ཤྲཱི་བྷ་དྲར་གྲགས༔ ཁ་ཆེའི་རྒྱལ་ཁམས་ཐམས་ཅད་ཆོས་ལ་བཀོད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱ་གར་རྔ་ཐུབ་ཅན་དང་ཁ་ཆེ་རྣམས་ཆོས་ལ་བཙུད་པའི་ལེའུ་སྟེ་ལྔ་བཅུ་པའོ༔ ༔
པདྨ་བཀའ་ཐང་ལེའུ་ ༥༡ ཟངས་གླིང་དང་གསེར་གླིང་གི་མུ་སྟེགས་པ་བཏུལ་བ།
དེ་ནས་མུ་སྟེགས་བསྟན་པ་བསྣུབ་པའི་ཕྱིར༔ ཟངས་གླིང་ཡུལ་ཕྱིན་མུ་སྟེགས་སྟོན་པའི་ཁྱུ༔ ལྔ་བརྒྱ་དག་དང་བགྲོ་གླེང་བྱས་པ་ཡིས༔ མུ་སྟེགས་པ་ཡིས་མ་ཐུབ་མཐུ་བྱེད་ཟེར༔ ནགས་ཁྲོད་ཕྱིན་ནས་མཐུ་ནི་བསྒྲུབས་པའི་ཚེ༔ མཁའ་འགྲོ་བདུད་འདུལ་མ་ཡིས་རྒྱལ་བ་ལ༔ བསེ་སྒྲོམ་གཏད་ནས་མུ་སྟེགས་ཐུལ་ཅིག་བསྒོས༔ བསེ་སྒྲོམ་ནང་ནས་སྲོག་སེར་གཏད་དང་བཅས༔ མཁའ་འགྲོའི་ངན་སྔགས་ཞག་བདུན་རེག་འཕུང་བྱུང་༔ མུ་སྟེགས་ནགས་ཁྲོད་མཐུ་བྱེད་ཐོག་ཕབ་ནས༔ ཐམས་ཅད་མེས་ཚིག་མུ་སྟེགས་ཁ་དག་གྱུར༔ མ་ཤི་བ་རྣམས་ནང་པའི་བསྟན་ལ་བཅུག༔ དེ་ནས་རྒྱ་གར་གསེར་གླིང་བྱ་བའི་ཡུལ༔ མུ་སྟེགས་བྱེད་ཀྱི་གྲོང་ཁྱེར་ཆེན་པོའི་དབུས༔ མུ་སྟེགས་རྒྱལ་པོ་ནམ་མཁའི་ཤུགས་ཅན་དང་༔ བཙུན་མོ་ཙནྟྲི་ད་ལ་བྱ་བ་ལ༔ བུ་ནི་ཉི་མའི་ཤུགས་ཅན་ཞེས་བྱ་བ༔ མདོག་སྔོ་རིགས་ངན་མིག་ནི་ཡ་གཅིག་ཞར༔ རྐང་པ་གཡོན་ཞ་ལག་པ་གཡོན་མ་ལག༔ ད་སྐལ་ཡོད་ཅིང་ཀོ་རུལ་གསེབ་དྲི་མནམ༔ རྒྱལ་བུ་དེ་ཉིད་གཞན་གྱིས་མཐོང་དོགས་ནས༔ ཕྱི་རུ་མི་འགྲིམ་ཕོ་བྲང་ནང་དུ་སྦེད༔ ཆེ་བར་ནར་སོན་ཕ་མ་གཉིས་ལ་ནི༔ ང་ལ་ཁྱིམ་ཐབ་གྱིས་ཤིག་ཟེར་བ་ལ༔ ཀྱེ་མ་ཀྱེ་ཧུད་བུ་ཁྱོད་ཁ་རོག་སྡོད༔ ཁྱོད་ནི་གཟུགས་བྱད་མ་ལེགས་གཏི་ཐུག་པས༔ ཆུང་མ་ཁྱོད་ལ་འོང་མཁན་མི་ཡོང་ན༔ བུ་ཁྱོད་ཆོས་གྱིས་ཆོས་རྒྱགས་སྦྱིན་གྱིས་སྨྲས༔ ཆོས་དེ་ནང་བཏང་ཕྱི་བྱུགས་ངས་མི་འོང་༔ ཁྱེད་གཉིས་ང་ལ་ཆུང་མ་མི་ལེན་ན༔ ཁྱིམ་ལ་མེ་བརྒྱབ་ལྕེབས་ནས་བསྡད་དོ་ཟེར༔ ལག་ཏུ་མེ་ཁྱེར་བཟུང་བས་མ་ཐུབ་སྟེ༔
བུ་ཁྱོད་དེ་ཡི་ནག་ལ་ཐུག་གྱུར་ན༔ ཅིས་ཀྱང་མ་ཕན་ཆུང་མ་ལོན་ཅིག་ཟེར༔ བུད་མེད་ཕལ་གྱིས་ཆུང་མའི་གོ་མི་ཆོད༔ ང་ནི་ཇི་ལྟར་ཞན་ཀྱང་རྒྱལ་པོ་ཡིན༔ མཚན་ལྡན་ལྟ་ན་སྡུག་པ་ལོང་ཞིག་ཟེར༔ རྒྱ་གར་ཏྲེ་ཏ་རཱ་ཛའི་སྲས་མོ་ནི༔ ལྷ་ལྕམ་ཨ་ཐམ་རྒྱལ་མོ་ཞེས་བྱ་བ༔ ལེགས་པའི་དཔེ་འཇོག་མཚན་དང་ལྡན་པ་དེ༔ སྨྱན་ཁ་བཅུག་ནས་རིན་བསྐྱལ་བཀུག་པར་གྱུར༔ རྒྱལ་བུ་ཕོག་ནས་ཕ་མས་ཟུར་དུ་བསྡད༔ བུད་མེད་དེ་ཉིད་ཁྱོ་ལ་མ་དགའ་སྟེ༔ འབྲོས་པར་བརྩམས་པས་ཁྱོ་ཕོས་སྒོ་བཀག་ཉལ༔ ལྕེབ་པར་བརྩམས་པས་ཆས་མ་འཛོམས་པར་ལུས༔ བྱ་བ་མི་བྱེད་ཉིན་མཚན་མེད་པར་ངུ་༔ རུས་མིག་ཤ་དིམ་རྒྱུ་མ་སྒལ་ཚིགས་འབྱར༔ ཁྱོ་ཕོ་དེ་ཡང་ཆུང་མ་བྲོས་དོགས་དུབ༔ བཟའ་མི་དེ་གཉིས་གདུལ་བྱའི་ཞིང་དུ་གཟིགས༔ ཕོ་བྲང་ནང་དུ་སྒྱུ་མའི་ལྟད་མོ་མཛད༔ ཁྱོ་ཕོས་སྒོ་བཅད་ཕྱིར་འོངས་ཕྱི་ནས་བལྟས༔ ཆུང་མས་གློ་སྐར་སྒོ་ཕྱེ་ནང་ནས་བལྟས༔ སྒྱུ་མ་མཁན་འདི་བདག་གྲོགས་ཡིན་ན་སྙམ༔ སེམས་ཀྱིས་ཤེས་ནས་ཆོས་གསུངས་འདི་སྐད་ལོ༔ བུད་མེད་སྙིང་དུ་སྐྱེས་པ་ཞུགས་པ་ནི༔ ནད་དུ་སྙིང་ང་ཞུགས་པའི་དོ་ཟླ་མིན༔ སྐྱེས་པའི་སྙིང་དུ་བུད་མེད་ཞུགས་པ་ནི༔ སྨྱོ་འདྲེ་རྒྱལ་འགོང་ཕལ་གྱི་དོ་ཟླ་མིན༔ བཟའ་མི་སྙོམས་ཆུང་ཁྱིམ་ཐབ་བྱེད་པ་ནི༔ ཆོམ་རྐུན་ཨ་ར་ཕལ་གྱི་དོ་ཟླ་མིན༔ ཞེས་གསུངས་གཉིས་ཀ་དད་ཅིང་འདུན་པར་གྱུར༔ ནང་པ་སངས་རྒྱས་བསྟན་ལ་བཙུད་པ་ཡིས༔ རྒྱལ་པོ་ནམ་མཁའི་ཤུགས་ཅན་མ་དགྱེས་ནས༔ ན་ཆུང་ལྡོམ་བུ་དགེ་སྦྱོང་འདྲ་བ་འདིས༔ དང་པོར་ང་ཡི་བླ་མཆོད་ཐོག་ཕབ་བསད༔ བར་དུ་བུ་ཡི་ཁྱིམ་བཤིག་གསོད་དགོས་ཟེར༔ གསེར་གླིང་མི་ལ་སོ་ཕག་ཕ་གུ་བསྡུས༔ རྒྱལ་སྲས་ཕ་གུའི་སྒྲོམ་བཅུག་བསྲེགས་པ་ཡིས༔ གསེར་གྱི་མཆོད་རྟེན་བང་རིམ་བུམ་པ་བྲེ༔ གདུགས་དང་ཆོས་འཁོར་ཡོད་པ་ཞིག་ཏུ་གྱུར༔ ཉི་མའི་ཤུགས་ཅན་བཟའ་མིས་བསྐོར་བ་བྱེད༔ རྒྱལ་པོ་འགྱོད་ཅིང་དད་ནས་ཆོས་ལ་ཚུད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཟངས་གླིང་དང་གསེར་གླིང་གི་མུ་སྟེགས་པ་བཏུལ་བའི་ལེའུ་སྟེ་ང་གཅིག་པའོ༔ ༔
པདྨ་བཀའ་ཐང་ལེའུ་ ༥༢ རྒྱལ་པོ་ཀླུའི་ཁྱབ་འཇུག་བཏུལ་བ།
དེ་ནས་ཀ་མ་རུ་པ་ལི་ཡུལ་དང་༔ མ་རུ་ཙེ་དང་འ་ཤ་འབྲུ་ཤའི་ཡུལ༔ ཤམྦྷ་ལ་དང་ཞང་ཞུང་ཏ་ཟིག་ཡུལ༔ གེ་སར་ཐོ་གར་སྲིན་ཡུལ་རུག་མ་དང་༔ ཀླུ་ཡི་ཡུལ་སོགས་ཐམས་ཅད་ཆོས་ལ་བཙུད༔ གཙུག་ལག་ཁང་ནི་འབུམ་ཚོ་བརྒྱད་བཞེངས་སོ༔ ཕྲ་མོ་བྱེ་བ་དགུ་ཁྲི་སྟོང་བཅུ་གསུམ༔ དེ་དག་གླིང་བཞིའི་དབང་ཕྱུག་འཁོར་ལོས་སྒྱུར༔ དེ་ནས་རི་བོ་ཏ་ལའི་རྩེ་མོར་བྱོན༔ ཤེལ་གྱི་མཆོད་རྟེན་བམ་རིམ་སོ་གསུམ་པར༔ དགོངས་པ་མཉམ་པར་བཞག་ནས་བཞུགས་པའི་དུས༔ རྡོ་རྗེ་གདན་དུ་མུ་སྟེགས་པ་ཤོར་ནས༔ རྒྱལ་པོ་ཀླུ་ཡི་ཁྱབ་འཇུག་ཅེས་བྱ་བ༔ སྡིག་སྤྱོད་རྒྱལ་པོ་འཇིགས་སུ་རུང་བ་ཞིག༔ བཙུན་མོ་སྲས་དང་འཁོར་འབངས་རྒྱས་པར་གྱུར༔ མུ་སྟེགས་སྟོན་པ་སྡེ་དྲུག་ཞབས་ནས་འདེགས༔ རྡོ་རྗེ་གདན་གྱི་ནང་ནི་ཁོས་བཟུང་ནས༔ ནང་པ་སངས་རྒྱས་ཆོས་ལུགས་ཐམས་ཅད་བསྣུབས༔ དཀོན་ཅོག་མཆོད་རྟེན་ཐམས་ཅད་བཤིག་པར་གྱུར༔ རྒྱལ་པོ་དེ་ཡི་མཛད་སྤྱོད་རྣམ་ཐར་ནི༔ ལག་ཆར་མཚོན་འཛིན་ཟས་སུ་སེམས་ཅན་ཟ༔ འཁོར་དུ་དམག་དང་ཁོལ་པོ་འབུམ་སྡེས་བསྐོར༔ ངག་ནས་རྒྱོབ་སོད་རྡུངས་ཀྱི་སྒྲ་སྒྲོག་ཅིང་༔ ཉིན་ཞག་རེ་ལ་སེམས་ཅན་བརྒྱད་ཁྲི་འཆི༔ ཡུལ་ཁམས་དེ་ཡི་ཤིང་རྣམས་མ་ལུས་བསྡུས༔ རྡོ་རྗེ་གདན་གྱི་སྟེང་འོག་ཐམས་ཅད་བཀང་༔ རྒྱལ་པོའི་ཁ་ཟས་གསོན་མའི་ཉ་ལ་དགྱེས༔ རྒྱ་གར་རྒྱལ་ཁམས་མི་སྐྱིད་སྡུག་ལ་བཀོད༔ དེ་ཉིད་ཆོས་ཀྱིས་འདུལ་བར་དགོངས་པ་ལ༔ གདུལ་དཀའ་གདུལ་ཐབས་ཇི་སྙེད་དགོངས་ན་ཡང་༔ སྐུ་དངོས་ཀྱིས་ནི་ཐུལ་བར་མ་གཟིགས་ནས༔ ཡེ་ཤེས་སྤྱན་གྱིས་རྒྱ་གར་ཡུལ་ལ་གཟིགས༔ ཕ་ནི་བྲམ་ཟེ་དགའ་བ་འཛིན་ཞེས་བྱ༔ མ་ནི་བདེ་བ་བསྐྱེད་མ་གཉིས་ལ་ནི༔ བུ་ནི་སྙིང་ཤོང་འཛིན་ཞེས་བྱ་བ་དང་༔ བུ་མོ་དགེ་བ་ལྕམ་དང་གཉིས་འདུག་པས༔ བུ་མོ་དེ་ལ་སྐྱེས་པའི་བུ་ཞིག་དང་༔ ཉ་མོ་ཀ་ཤ་གཉིས་ཀྱིས་བཏུལ་ན་ཐུལ༔ དེ་མིན་གང་གིས་བཏུལ་ཀྱང་མི་ཐུལ་གཟིགས༔ བུ་མོ་བྲག་དམར་བྱ་སྐྱིབས་སྲིབས་ཚལ་ན༔ མཛོ་མོའི་ཁྱུ་ཞིག་འཚོ་ཡིན་བསྡད་པ་ལ༔ ཆར་བྱུང་བྲག་ཕུག་ཕྱིན་པས་གཉིད་དུ་སོང་༔
དེ་ལ་པདྨས་བྱིན་བརླབས་དབང་བསྐུར་བས༔ བུ་མོ་གཉིད་སད་ཙ་ན་རྨི་ལམ་དྲན༔ དེ་འདྲའི་ཁྱོ་ཞིག་ཡོད་ན་དགའ་བ་སྙམ༔ དེ་ནས་ལུས་མ་བདེ་བས་མནའ་མར་བཤད༔ བདག་ནི་སྐྱེས་པ་གང་དང་མ་ཉེ་བར༔ ཁྱོ་མེད་བུ་ཚ་མྱུར་དུ་ལྕེབ་སྙམ་ཡོད༔ མནའ་མས་མིང་པོའི་རྣ་བར་སྨྲས་པ་དང་༔ མ་ལྕེབས་གྱིས་ལ་བུ་དེ་ངས་གསོ་གྱིས༔ དེ་ནས་ཟླ་ངོ་དགུ་ན་བུ་ཞིག་བཙས༔ བྲམ་ཟེར་མཚན་ལྟས་བསྟན་པས་མཚན་ལེགས་ཟེར༔ མིང་ཡང་བདེ་མཆོག་དུས་ཀྱི་སྙིང་པོར་བཏགས༔ ལོག་པོར་སྐྱེད་ཆེ་ལོ་བརྒྱད་ལོན་པ་དང་༔ ཨ་མ་ང་ཡི་ཕ་ལས་གང་ཡིན་ཟེར༔ ཨ་མའི་མིག་ནས་མཆི་མ་ཤར་གྱིས་བྱུང་༔ ཁྱོད་ལ་ཕ་མེད་དེ་སྐད་མ་ཟེར་བརྗོད༔ འོ་ན་ཡུལ་གྱི་རྒྱལ་པོར་ཇི་སྐད་ཟེར༔ རྒྱལ་པོའི་བླ་མཆོད་ཇི་སྐད་བྱ་བ་ཡོད༔ རྒྱལ་པོ་ཀླུ་ཡི་ཁྱབ་འཇུག་བྱ་བ་ཡོད༔ བླ་མཆོད་མུ་སྟེགས་སྟོན་པ་དྲུག་གིས་བྱེད༔ དེ་སྐད་སྨྲས་པས་བུ་དེ་འདི་སྐད་ཟེར༔ ང་འགྲོ་རྒྱ་གར་རྡོ་རྗེ་གདན་དུ་འགྲོ༔ ཕ་མེད་བུ་ནི་མ་ཡིས་མི་སོས་སོ༔ དེ་སྐད་ཟེར་ནས་རྡོ་རྗེ་གདན་དུ་སོང་༔ སྒོ་སྲུང་པ་ཡིས་ནང་དུ་མ་བཏང་བར༔ མུ་སྟེགས་སྟོན་པ་དྲུག་དང་རྒྱལ་པོ་རྣམས༔ སྐྱོ་བསངས་བྱེད་པའི་དྲུང་དུ་ཕྱིན་པར་གྱུར༔ བདག་ལ་ཆོས་ཀྱི་སྦྱིན་པས་བསྐྱང་དུ་གསོལ༔ བྱིས་པ་ལོ་བརྒྱད་ལོན་པས་ཆོས་མི་གོ༔ ཕྱིར་ཤིག་ཟེར་ནས་དབྱུག་པས་བྲང་ནས་ཕུལ༔ ང་ལ་ཕ་མ་ཉེ་འབྲེལ་གང་ཡང་མེད༔ ཁོལ་པོར་རྗེས་གཟུང་ལྟོ་གོས་བསྐྱང་དུ་གསོལ༔ རྒྱལ་པོས་ནང་ཁྲིད་ཐབ་གཡོག་འཆོལ་ལོ་ཟེར༔ དེ་ནས་བདེ་མཆོག་དུས་སྙིང་ནང་དུ་ཚུད༔ སྤྱོད་པ་འདྲེས་ནས་མུ་སྟེགས་པར་གྱུར་ཏོ༔ ཉ་དམངས་ཀ་ཤའི་སྤྲུལ་པ་ཉ་ཆེར་གྱུར༔ རྒྱལ་པོའི་གསོལ་ཉ་པ་ཡིས་བཟུང་ནས་དྲངས༔ ཉ་དེ་སོ་འོག་མ་ཆུད་ཁྱུར་མིད་སོང་༔ ཡར་ལ་མ་སྐྱུགས་མར་ལ་མ་དོན་བར༔ ཁོང་པའི་ནང་དུ་ཉ་ཡིས་བཀྱོགས་པ་དང་༔ རྒྱལ་པོ་ཡར་ལང་མར་ཉལ་བསྒྲེ་ཞིང་ལྡོག༔ ས་གཅིག་མི་ཚུགས་ཧྲིལ་ཧྲིལ་ཀར་ཀར་བྱས༔ འཇིགས་པའི་སྐད་འདོན་བཤུ་དང་ཧུ་ཡིས་འདེབས༔ བཙུན་མོ་བློན་པོས་སེམས་ཀྱིས་མ་བཟོད་ནས༔ མུ་སྟེགས་བླ་མཆོད་གྱུར་ཚད་སྤྱན་དྲངས་ཏེ༔ འཁོར་བཅས་མ་ལུས་རྒྱལ་པོའི་དྲུང་དུ་འདུས༔ ལ་ལས་མགོ་བཟུང་ལ་ལས་ལག་པ་བཟུང་༔ བསྙུངས་རིང་དོས་དྲག་ནད་ཀྱིས་ཟིན་པར་གྱུར༔ དེ་ནས་བདེ་མཆོག་དུས་སྙིང་བསམ་ངན་འགྱུས༔ ཆུ་ལ་དུག་བཏབ་ཤིང་གསེབ་སྤྲ་མེ་བཅུག༔ སྟེང་འོག་ཕྱོགས་ཀྱི་གློ་སྐར་སྒོ་ཕྱེ་ནས༔ སྒོ་རྣམས་རིམ་པར་ཕྱི་འབྱར་བརྒྱག་གིན་འོངས༔ ཟ་ཧོར་ཡུལ་བྲོས་ཞི་འཚོར་རབ་ཏུ་བྱུང་༔ དེ་དུས་རྒྱ་གར་ཚོང་པ་ཟ་ཧོར་བྱུང་༔ ཚོང་པ་རྣམས་ལ་རྒྱ་གར་གཏམ་སྐད་དྲིས༔ རྡོ་རྗེ་གདན་ལ་མེ་ཤོར་ཐམས་ཅད་ཚིག༔ མུ་སྟེགས་འཁོར་དང་བཅས་པ་རྩ་བ་བུད༔ གཙོ་བོ་གྲོས་བྱས་རྒྱལ་པོ་ཞིག་མེད་ན༔ ནང་འཐབ་བྱས་ནས་བདེ་བ་མི་འོང་ཟེར༔ རྒྱལ་པོ་ཚོལ་ལ་ཉི་མ་དུ་ཤར་འཚོག༔ ལོ་གཅིག་སོང་སྟེ་རྒྱལ་པོ་མ་རྙེད་ཟེར༔ དེ་ནས་བདེ་མཆོག་དུས་ཀྱི་སྙིང་པོ་ཡིས༔ མུ་ཏོའི་ཆས་ཞུགས་རྒྱ་གར་ཡུལ་དུ་ཕྱིན༔ མི་ཁྲོམ་དམར་ནག་འཁྱིལ་བའི་མཐའ་རུ་བསྡད༔ གླང་ཆེན་བུམ་བསྐུར་རྒྱལ་པོ་ཚོལ་དུ་བཅུག༔ མཇུག་མ་ཀྱོག་ལང་ལྕི་བ་རྩར་སྤྲུགས་ནས༔ བདེ་མཆོག་དུས་སྙིང་མགོ་ཐོག་བུམ་པ་བཞག༔ དེ་ནས་གཙོ་བོ་དེར་འདུས་ཁྲུས་གོས་གསོལ༔ རྒྱལ་པོ་ཁྲིར་བཏོན་གདུགས་དང་རྒྱལ་མཚན་བསྒྲེངས༔ རྒྱལ་པོའི་བཙུན་མོ་གང་ལ་འཚོལ་གསུངས་པས༔ དད་པ་ཆེ་ཞིང་ནང་པ་སངས་རྒྱས་མོས༔ སྙིང་རྗེ་ཆེ་ཞིང་དབུལ་ཕོངས་ཟས་ནོར་སྐྱོང་༔ ཡ་རབས་རྟགས་དགུ་ཚོང་ལ་བཙུན་མོ་འཚོལ༔ དེ་འདྲ་མ་རྙེད་གླང་ཆེན་འཚོལ་དུ་བཅུག༔ ན་ཚོད་རྒན་སོང་ཞིག་གི་མགོ་ཐོག་བཞག༔ དེ་ནས་རྒྱལ་པོ་དེ་ལ་ཁྲིམས་སྡོམ་ཞུས༔ རྡོ་རྗེ་གདན་ལ་སོ་ནམ་གྱིས་ཤིག་གསུངས༔ ཐམས་ཅད་ས་སེལ་རྡོ་སེལ་བྱེད་པར་གྱུར༔ རེ་ཞིག་རྒྱལ་པོ་བཙུན་མོ་འཛོམ་འཕྲོད་བྱུང་༔ རྒྱལ་པོས་བཙུན་མོའི་མིང་ཡུལ་གང་ཡིན་དྲིས༔ ཀེའུ་ར་དང་ཨུ་ཤའི་ཐོ་སྐོར་ཡིན༔ མིང་ནི་དགེ་མ་ལྕམ་ཞེས་ཟེར་བ་ལགས༔ དེ་སྐད་བྱས་པས་རྒྱལ་པོས་ཁ་འོ་གཏུགས༔ ཁྱོད་ཀྱིས་བདེ་མཆོག་དུས་སྙིང་ཤེས་སམ་ཟེར༔ སྐྱེས་པ་སུ་དང་མ་ཉེ་ང་ལ་སྐྱེས༔ ལོ་ལྔ་ལོན་ནས་རྡོ་རྗེ་གདན་དུ་སོང་༔ མེ་ཤོར་ང་ཡི་བུ་ཡང་ཚིག་ཟེར་ངུས༔ རྒྱལ་པོས་ཨ་མ་ཁྱོད་ཀྱི་བུ་ཡིན་ཟེར༔ མ་དེས་མིན་ཟེར་ཡིད་ཆེས་མི་བྱེད་ནས༔ ང་ཁྱོད་བུ་ཡིན་རྡོ་རྗེ་གདན་ནང་དུ༔ ཉ་ནི་གསོན་མར་ཡོད་པར་ཤོག་ཅིག་ཟེར༔ རྒྱལ་པོ་བཙུན་མོས་བལྟ་རུ་ཕྱིན་པར་གྱུར༔ ཤིང་ལེབ་ཅིག་གི་འོག་ན་ཉ་བོ་ཆེ༔ ཟིལ་པ་ཕྲོམ་ཕྲོམ་དབུགས་ནི་ལྷེབས་ལྷེབས་འདུག༔ མ་ཡིད་ཆེས་ཏེ་བུ་ལ་ཕྱག་བསྐོར་བྱས༔ བུ་དེ་རི་བོ་ཏ་ལའི་གནས་སུ་སོང་༔ ཉ་དེ་ལྕང་ལོ་ཅན་དུ་སོང་བར་གྱུར༔ དགེ་མ་ལྕམ་ནི་རྒྱན་དུར་ཁྲོད་སོང་༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོ་ཀླུའི་ཁྱབ་འཇུག་བཏུལ་བའི་ལེའུ་སྟེ་ང་གཉིས་པའོ༔ ༔
པདྨ་བཀའ་ཐང་ལེའུ་ ༥༣ གཏེར་གྱི་བགྲོ་བ་གཏེར་ཆོས་གཏེར་སྟོན་གླེངས་པ།
དེ་ནས་ཨུ་རྒྱན་པདྨ་འབྱུང་གནས་ཀྱིས༔ རྡོ་རྗེ་གདན་བཞུགས་རབ་གནས་མེ་ཏོག་འཐོར༔ ཆོས་བྲིས་རྟེན་བཞེངས་བསྟན་པ་སོ་རུ་ཆུད༔ ལི་ཁར་ཤིང་འཕེལ་གཙུག་ལག་ཁང་དུ་བྱོན༔ མདོ་སྔགས་བསྟན་པ་ཟུང་འཇུག་ཉིས་བརྒྱ་བཞུགས༔ དེ་ནས་ཕྱག་རྒྱ་ཆེན་པོའི་རིག་འཛིན་ཞིག༔ གྲུབ་པར་མ་གྱུར་དོན་མེད་དགོངས་ནས་སུ༔ རྒྱ་གར་བལ་པོ་གཉིས་ཀྱི་མཚམས་སུ་བྱོན༔ སེང་གེ་གནམ་མཆོངས་འདྲ་བའི་རི་ལ་བཞུགས༔ སེམས་ལ་རྩལ་སྦྱོང་སྒོམ་གྱིན་ཡོད་ཙ་ན༔ ཡུལ་དེའི་སྡིག་སྤྱོད་རྔོན་པ་མི་བདུན་གྱིས༔ ཁྱི་ཁྲིད་རི་དྭགས་བཤོར་དུ་བྱུང་བ་ལ༔ ཁྱི་དང་རྔོན་པ་ཁ་བཅིངས་རེངས་བཅུག་ནས༔ རྒྱལ་པོས་ཕོ་ཉ་བཏང་ནས་མ་འདེད་ཟེར༔ ཤིང་ཀུན་གཙུག་ལག་ཁང་ལ་བསྐོར་བར་ཕྱིན༔ རྒྱལ་པོའི་བཙུན་མོ་བུ་ནད་ལོག་ནས་ཤི༔ བུ་མོ་དང་བཅས་དུར་ཁྲོད་བསྐྱལ་བ་ལས༔ སྤྲེའུ་ཞིག་གིས་བུ་མོ་དེ་ཉིད་གསོས༔ ཉིན་པར་ཤིང་རྩེར་ཤིང་ཐོག་ཟ་ཡིན་སྡོད༔ མཚན་མོ་བྲག་སྟེང་ཤིང་ལོ་གྱོན་ནས་ཉལ༔ བལ་མོ་ཤཱཀྱ་དེ་བ་ཞེས་བྱ་སྟེ༔ རྐང་ལག་སོར་མོ་ངང་པ་བཞིན་དུ་འབྲེལ༔ མཚན་ལྡན་མྱུར་བདེའི་ཕོ་ཉར་དེ་ཉིད་ཁྲིད༔ བལ་ཡུལ་ཡང་ལེ་ཤོད་ཀྱི་བྲག་ཕུག་ཕྱིན༔ གཏེར་ཀ་བྱེ་བ་འབུམ་ཁྲི་སྦེད་པ་ཡི༔ བགྲོ་བ་བྱས་པས་བར་ཆོད་རྣམ་བཞི་བྱུང་༔ སྲོད་ལ་བྱི་དུར་གློག་མ་སྤྲིན་བྱུང་ནས༔ དགོངས་པ་བཤིག་ནས་བར་སྣང་ཁམས་ལ་སོང་༔ གནམ་ལ་ཆར་མེད་ཉི་མ་མེ་བཞིན་འབར༔ དགུང་ལ་བདུད་ནི་ཁ་ཏོན་བྱེད་ཚུལ་བྱུང་༔ དགོངས་པ་བཤིག་ནས་བར་སྣང་ཁམས་ལ་སོང་༔ བལ་ཡུལ་མུ་གེ་སྤྲིན་དམར་བཞིན་དུ་འཁྲིགས༔ ཐོ་རངས་ཇོ་བོ་ཤིང་བྱ་ཅན་བྱུང་ནས༔ དགོངས་པ་བཤིག་ནས་བར་སྣང་ཁམས་ལ་སོང་༔ བལ་ཡུལ་མི་རོ་ལུད་ཕུང་བཞིན་དུ་སྐྱེལ༔ ཉིན་པར་དམ་སྲི་དུང་དུང་བྱུང་ནས་ནི༔ མི་ནད་ཕྱུགས་ནད་བཀྲ་མི་ཤིས་པར་བྱས༔ བར་ཆད་རྣམ་བཞི་ཟློག་པའི་གླུ་འདི་གསུངས༔ མ་རུངས་མི་བཟད་གནོད་བྱེད་རྣམས༔ སངས་རྒྱས་བཀའ་ལས་འགལ་བྱེད་པ༔ འདི་ལྟར་མེ་ཏོག་པདྨ་ནི༔ འདམ་གྱི་སྐྱོན་གྱིས་མ་གོས་ཏེ༔ འདོད་པ་བཞིན་དུ་བདེ་བར་འཚོ༔ ཐབས་མཆོག་ལྡན་པའི་རྣལ་འབྱོར་པ༔ བཅིངས་པ་ལས་ནི་གྲོལ་བར་བྱེད༔ སྡིག་ཅན་ཁྱེད་བཞིས་མི་ཤེས་སོ༔ ཡི་གེར་བྲིས་ནས་གཏེར་སྦ་ཡིས༔ དུས་མཐའི་སེམས་ཅན་འདུལ་དཀའ་བ༔ གཏེར་ཆོས་སྤང་དུ་ག་ལ་རུང་༔ འདི་ནི་བྲིས་པ་ཙམ་གྱིས་ཀྱང་༔ སངས་རྒྱས་བསྟན་པ་འཕེལ་བར་འགྱུར༔ སྙིང་རྗེའི་ལྕགས་ཀྱུ་དང་བྲལ་ན༔ སྙིགས་མའི་སེམས་ཅན་སུ་ལ་རེ༔ བར་གཅོད་མ་བྱེད་གཏེར་སྲུངས་གྱིས༔ ཞེས་གསུངས་བར་ཆད་བདུད་ཀྱི་གཡུལ་ལས་རྒྱལ༔ མཚོ་ལས་ངས་བྱུང་གནམ་ལས་ཆར་པ་བབ༔ རྩི་ཤིང་འབྲས་བུ་རྒྱས་པས་ནད་མུག་སངས༔ བསྟན་གཉིས་དབང་པོ་ཐམས་ཅད་མཁྱེན་པ་ཡིས༔ མ་འོངས་དོན་དུ་ཟབ་གཏེར་སྦས་ཚུལ་ནི༔ བག་ཆགས་ཅན་གྱི་གདུལ་བྱ་ཡིད་དྲང་ཕྱིར༔ ལོ་བརྒྱད་ཁྱེའུ་ཆུང་མཛེས་པའི་ཞལ་མངའ་བ༔ པདྨ་ལྟ་བུར་བཀྲག་མདངས་དམར་ཆགས་པ༔ ཉི་འོད་བཞིན་དུ་བལྟར་མི་བཟོད་པའི་ཞལ༔ མཚན་དང་དཔེ་བྱད་རྫོགས་པའི་སྐུ་དངོས་བསྟན༔ དར་དམར་ཆོས་གོས་གསེར་གྱི་པ་ཏྲས་བཀླུབས༔ ཐེག་པ་སྣ་ཚོགས་ཟབ་ཆེན་བེར་ཕྱམ་གསོལ༔ དུག་གསུམ་རྩད་གཅོད་ཁ་ཊྭཱཾ་རྩེ་གསུམ་ལ༔ སྐུ་གསུམ་ལྷུན་གྲུབ་ཐོད་པ་གསུམ་བརྩེགས་བརྒྱན༔ ཟུང་འཇུག་བརྡ་སྦྱོར་རྡོ་རྗེ་དྲིལ་བུ་བསྣམས༔ ཤ་བའི་སྙན་ཞུ་གསེར་གྱི་པ་ཏྲས་མཛེས༔ ལྟ་བ་ཡས་འབིབས་རྒོད་ཀྱི་རྩེ་རྒྱལ་བཙུགས༔ སྐུ་ལྔ་རབ་རྫོགས་དར་སྣ་ལྔ་ཡིས་བརྒྱན༔ གདུལ་བྱའི་རེ་སྐོང་སེང་གེར་རཏྣའི་ཁྲི༔ པདྨའི་གདན་ལ་ཞབས་གཉིས་སྐྱིལ་ཀྲུང་བཞུགས༔ འདོད་དགུར་བསྒྱུར་བའི་ཆོས་སྨྲ་རིན་ཅེན་བརྩེགས༔ རེས་འགའ་པདྨ་འགྲོ་མགོན་རྩལ་དུ་གྲགས༔ རེས་འགའ་པདྨ་དབང་ཕྱུག་མགོན་དུ་གྲགས༔ རེས་འགའ་པདྨ་གྲུབ་པའི་བློ་གྲོས་གྲགས༔ རེས་འགའ་པདྨ་ཆེ་མཆོག་རྩལ་དུ་གྲགས༔ རེས་འགའ་པདྨ་མཁའ་འགྲོའི་དབང་ཕྱུག་གྲགས༔ རེས་འགའ་མགོན་པོ་བིཪྺ་པ་ཞེས་གྲགས༔ རེས་འགའ་པདྨ་ནག་པོ་སྤྱོད་པར་གྲགས༔ རེས་འགའ་ཁྱེའུ་ཆུང་མཁའ་ལྡིང་རྩལ་དུ་གྲགས༔ རེས་འགའ་པདྨ་ས་ར་ཧ་ཞེས་གྲགས༔ རེས་འགའ་པདྨ་མངའ་བདག་རྩལ་དུ་གྲགས༔ རེས་འགའ་པདྨ་ཀུན་ཏུ་རྒྱུ་ཞེས་གྲགས༔ རེས་འགའ་པདྨ་ཆགས་མཆོག་རྩལ་དུ་གྲགས༔ རེས་འགའ་པདྨ་འགྲོ་བའི་སྐྱབས་སུ་གྲགས༔ རེས་འགའ་པདྨ་འཕྲིན་ལས་མགོན་དུ་གྲགས༔ རེས་འགའ་པདྨ་དོན་ཡོད་ཞགས་པར་གྲགས༔ རེས་འགའ་པདྨ་གཟི་བརྗིད་འོད་འཕྲོར་གྲགས༔ རེས་འགའ་པདྨ་ཌོམྦྷི་པ་ཞེས་གྲགས༔ རེས་འགའ་རིགས་ལྡན་པདྨ་དཀར་པོར་གྲགས༔ རེས་འགའ་པདྨ་བཛྲ་ཞེས་སུ་གྲགས༔ རེས་འགའ་པདྨ་ཐོད་ཕྲེང་རྩལ་དུ་གྲགས༔ འདོད་དགུར་བསྒྱུར་བའི་འཕྲུལ་མཚན་ཉི་ཤུ་སྟེ༔ བསྟན་པའི་སྒྲོན་མ་གཏེར་ཆོས་ནམ་མཁའ་མཛོད༔ ཞ་ཉེ་རིན་ཅེན་བསེ་ཤིང་རྫ་རྡོ་ཐོད༔ རཏྣའི་སྒྲོམ་བུ་སྣ་ཚོགས་གཏེར་གྱི་སྣོད༔ ཏ་ལ་མཐིང་ཤོག་གྲོ་ག་སྐྱང་ནུལ་བ༔ གསེར་དངུལ་ཟངས་ལྕགས་བཻཌཱུརྱ་གཡུ་མཚལ༔ སྣག་ཚ་ལ་སོགས་བྲིས་ཤིང་ཞུས་དག་མཛད༔ འཁྲུགས་བསྡེབས་གབ་བསལ་སྦས་བསྟན་རྡོར་ཚིག་བཀྲོལ༔ ལྷ་ཀླུ་མི་ཡི་ཡུལ་དུ་སྦས་པའི་གཏེར༔
གཏེར་གྱི་ངོ་བོ་ཟད་མི་ཤེས་པ་སྟེ༔ ངེས་ཚིག་མཚོན་དཔེ་ཡིད་བཞིན་ནོར་བུའི་གཏེར༔ དབྱེ་ན་གཏེར་གྱི་རིགས་བྱེད་བཅོ་བརྒྱད་དེ༔ གསང་གཏེར་ཟབ་གཏེར་ཐུགས་གཏེར་དགོངས་གཏེར་བཞི༔ རྫས་གཏེར་བླ་གཏེར་གཏེར་ཕྲན་གཏེར་སྨྱོན་དང་༔ རྒྱ་གཏེར་བོད་གཏེར་རྗེ་གཏེར་ཡབ་གཏེར་བཞི༔ ཡུམ་གཏེར་མ་ནིང་གཏེར་དང་ཕྱི་གཏེར་གསུམ༔ ནང་གཏེར་བར་གཏེར་ནོར་གཏེར་བཅོ་བརྒྱད་དོ༔ དེ་དག་རེ་རེའང་སྤྱི་དོན་བཅུ་བཅུར་ལྡན༔ གཏེར་སྣོད་གཏེར་ཤོག་བྲི་བའི་རྒྱུ་དང་གསུམ༔ གཏེར་ཡིག་གཏེར་གནས་གཏེར་སྲུངས་གཏེར་སྟོན་བཞི༔ འདོན་དུས་འདུལ་བྱེད་གདུལ་བྱའི་ཞིང་བཅུའོ༔ དང་པོ་གསང་གཏེར་གཏེར་སྣོད་གསང་བའི་སྣོད༔ གཏེར་ཤོག་གསང་ཤོག་གཏེར་སྣག་གསང་སྣག་རྒྱུ༔ གཏེར་ཡིག་གསང་ཡིག་གཏེར་གནས་གསང་གནས་ཏེ༔ གཏེར་སྲུངས་གསང་སྲུངས་གཏེར་སྟོན་གསང་སྟོན་དང་༔ འདོན་དུས་འདུལ་བྱེད་གདུལ་བྱའང་གསང་བའོ༔ གཉིས་པ་ཟབ་གཏེར་གཏེར་སྣོད་ཟབ་སྣོད་དུ༔ གཏེར་ཤོག་ཟབ་ཤོག་གཏེར་སྣག་ཟབ་སྣག་རྒྱུ༔ གཏེར་ཡིག་ཟབ་ཡིག་གཏེར་གནས་ཟབ་གནས་ཏེ༔ གཏེར་སྲུངས་ཟབ་སྲུངས་གཏེར་སྟོན་ཟབ་སྟོན་དང་༔ འདོན་དུས་འདུལ་བྱེད་གདུལ་བྱའང་ཟབ་པའོ༔ གསུམ་པ་ཐུགས་གཏེར་གཏེར་སྣོད་ཐུགས་སྣོད་དུ༔ ཐུགས་ཤོག་ཐུགས་ཡིག་ཐུགས་སྣག་ཐུགས་གནས་སུ༔ ཐུགས་སྲུངས་ཐུགས་སྟོན་ཐུགས་དུས་ཐུགས་འདུལ་ལོ༔ བཞི་པ་དགོངས་གཏེར་གཏེར་སྣོད་དགོངས་པའི་སྣོད༔ དགོངས་ཤོག་དགོངས་རྒྱུ་དགོངས་ཡིག་དགོངས་གནས་སུ༔ དགོངས་སྲུངས་དགོངས་སྟོན་དགོངས་དུས་དགོངས་འདུལ་ལོ༔ ལྔ་པ་རྫས་གཏེར་གཏེར་སྣོད་རྫས་ཀྱི་སྣོད༔ རྫས་ཤོག་རྫས་སྣག་རྫས་ཡིག་རྫས་གནས་སུ༔ རྫས་སྲུངས་རྫས་སྟོན་རྫས་དུས་རྫས་འདུལ་ལོ༔ དྲུག་པ་བླ་གཏེར་གཏེར་སྣོད་བླ་སྣོད་དུ༔ བླ་ཤོག་བླ་སྣག་བླ་ཡིག་བླ་གནས་སུ༔ བླ་སྟོན་བླ་སྲུངས་བླ་དུས་བླ་འདུལ་ལོ༔ འདི་ནི་བསྐལ་ཞབས་སྲིད་མགོར་མི་སྲིད་གབ༔ བླ་གཏེར་བཏོན་པས་རྒྱལ་ཁམས་འཕུང་བར་འགྱུར༔ རྒྱ་བོད་གཉིས་ན་བླ་གཏེར་ཉེར་ལྔ་ཡོད༔ སེམས་ཅན་ཡུན་དུ་བདེ་ཕྱིར་ཡུན་དུ་སྦས༔ བདུན་པ་གཏེར་ཕྲན་གཏེར་སྣོད་ཕྲན་སྣོད་དུ༔ ཕྲན་ཤོག་ཕྲན་སྣག་ཕྲན་ཡིག་ཕྲན་གནས་སུ༔ ཕྲན་སྲུངས་ཕྲན་སྟོན་ཕྲན་དུས་ཕྲན་འདུལ་ལོ༔ བརྒྱད་པ་གཏེར་སྨྱོན་གཏེར་སྣོད་སྨྱོན་སྣོད་དུ༔ སྨྱོན་ཤོག་སྨྱོན་སྣག་སྨྱོན་ཡིག་སྨྱོན་གནས་སུ༔ སྨྱོན་སྲུངས་སྨྱོན་སྟོན་སྨྱོན་དུས་སྨྱོན་འདུལ་ལོ༔ དགུ་པ་རྒྱ་གཏེར་གཏེར་སྣོད་རྒྱ་སྣོད་དུ༔ རྒྱ་ཤོག་རྒྱ་སྣག་རྒྱ་ཡིག་རྒྱ་གནས་སུ༔ རྒྱ་སྲུངས་རྒྱ་སྟོན་རྒྱ་དུས་རྒྱ་འདུལ་ལོ༔ བཅུ་པ་བོད་གཏེར་གཏེར་སྣོད་བོད་སྣོད་དུ༔ བོད་ཤོག་བོད་སྣག་བོད་ཡིག་བོད་གནས་སུ༔ བོད་སྲུངས་བོད་སྟོན་བོད་དུས་བོད་འདུལ་ལོ༔ བཅུ་གཅིག་རྗེ་གཏེར་གཏེར་སྣོད་རྗེ་སྣོད་དུ༔ རྗེ་ཤོག་རྗེ་སྣག་རྗེ་ཡིག་རྗེ་གནས་སུ༔ རྗེ་སྲུངས་རྗེ་སྟོན་རྗེ་དུས་རྗེ་འདུལ་ལོ༔ འདི་ནི་རྒྱལ་པོའི་རྫས་ཡིན་གཞན་གྱིས་མིན༔ བཅུ་གཉིས་ཡབ་གཏེར་གཏེར་སྣོད་ཡབ་སྣོད་དུ༔ ཡབ་ཤོག་ཡབ་སྣག་ཡབ་ཡིག་ཡབ་གནས་སུ༔ ཡབ་སྲུངས་ཡབ་སྟོན་ཡབ་དུས་ཡབ་འདུལ་ལོ༔ བཅུ་གསུམ་ཡུམ་གཏེར་གཏེར་སྣོད་ཡུམ་སྣོད་དུ༔ ཡུམ་ཤོག་མཚལ་ཟངས་ཁྲག་ཚོས་སྣག་ཚའི་རྒྱུ༔ ཡུམ་ཡིག་ཡུམ་གནས་ཡུམ་སྲུངས་ཡུམ་སྟོན་གྱིས༔ ཡུམ་དུས་ཡུམ་འདུལ་གདུལ་བྱའི་ཞིང་གྱུར་ཡུམ༔ བཅུ་བཞི་མ་ནིང་གཏེར་སྣོད་མ་ནིང་སྣོད༔ མ་ནིང་ཤོག་བུར་མ་ནིང་སྣག་ཚས་བྲིས༔ མ་ནིང་ཡི་གེ་གནས་སྲུངས་མ་ནིང་སྟེ༔ མ་ནིང་གཏེར་སྟོན་མ་ནིང་དུས་ཚོད་དུ༔ མ་ནིང་འདུལ་བྱེད་མ་ནིང་གདུལ་ཞིང་ངོ་༔ བཅོ་ལྔ་ཕྱི་གཏེར་གཏེར་སྣོད་ཕྱི་སྣོད་དུ༔ ཕྱི་ཤོག་ཕྱི་སྣག་ཕྱི་ཡིག་ཕྱི་གནས་སུ༔ ཕྱི་སྲུངས་ཕྱི་སྟོན་ཕྱི་དུས་ཕྱི་འདུལ་ལོ༔ འདི་ནི་སློབ་དཔོན་ཀླུ་སྒྲུབ་ཨཱརྱ་དེས༔ ཕྱི་པ་ནང་པའི་བསྟན་ལ་བཙུད་པའོ༔ བཅུ་དྲུག་ནང་གཏེར་གཏེར་སྣོད་ནང་སྣོད་དུ༔ ནང་ཤོག་ནང་སྣག་ནང་ཡིག་ནང་གནས་སུ༔ ནང་སྲུངས་ནང་སྟོན་ནང་དུས་ནང་འདུལ་ལོ༔ བཅུ་བདུན་བར་གཏེར་གཏེར་སྣོད་བར་སྣོད་དུ༔ བར་ཤོག་བར་སྣག་བར་ཡིག་བར་གནས་སུ༔ བར་སྲུངས་བར་སྟོན་བར་དུས་བར་འདུལ་ལོ༔ བཅོ་བརྒྱད་རིན་ཅེན་ནོར་གཏེར་གཏེར་སྣོད་ནི༔ ས་ཆུ་མེ་ང་ནམ་མཁའ་རི་དང་བྲག༔ ནོར་ཤོག་ནོར་སྣག་ནོར་ཡིག་ནོར་གནས་སུ༔ ནོར་སྲུངས་ནོར་སྟོན་ནོར་དུས་ནོར་འདུལ་ལོ༔ འདི་ནི་རྒྱལ་པོ་ཨིནྡྲ་བོ་དྷི་ཡིས༔ སྤྱིར་བསྡུས་བརྒྱ་དང་བརྒྱད་ཅུར་བསྡུས་ཏེ་སྦས༔ ཕྱོགས་བཅུའི་ས་གཡོས་འཇིག་རྟེན་འོད་ཀྱིས་བཀང་༔ ལྷས་ཀྱང་མེ་ཏོག་སྣ་ཚོགས་ཆར་དུ་ཕབ༔ བར་སྣང་སྤྲིན་གསེབ་མཆོད་པ་རྒྱ་ཆེན་ཕུལ༔ མཁའ་འགྲོ་ཆོས་སྐྱོང་གཏེར་སྲུང་སྐོར་བ་བྱེད༔ འཇིག་རྟེན་མ་རིག་མུན་པ་བསལ་བའི་ཕྱིར༔ སྐྱེ་སྔོན་དབང་ཐོབ་ལུང་བསྟན་ལས་འཕྲོ་ཅན༔ གཏེར་གྱི་དབང་སྐལ་གཏད་པའི་མི་དྲུག་སྟེ༔ མི་གཅིག་དགྲས་ཉེན་སྦས་པའི་གཏེར་ལ་དབང་༔ གཅེས་དགུ་ཅོག་གཞག་སྦས་པའི་གཏེར་ལ་དབང་༔ ནད་དུ་མཛེ་འགོས་སྦས་པའི་གཏེར་ལ་དབང་༔ དབུལ་ཕོངས་སྒྲུབ་ནུས་སྦས་པའི་གཏེར་ལ་དབང་༔ བུ་ལོན་ཤ་འདེད་སྦས་པའི་གཏེར་ལ་དབང་༔ ཁ་ཉེན་དབང་ཆུང་སྦས་པའི་གཏེར་ལ་དབང་༔ གཏེར་གྱི་ལས་འཕྲོ་མེད་པའི་མི་ལྔ་སྟེ༔ མི་དབང་སྟོབས་པོ་ཆེ་ལ་ལས་འཕྲོ་མེད༔ བསོད་ནམས་མངའ་ཐང་རྒྱས་ལ་ལས་འཕྲོ་མེད༔ མི་ནོར་ཟས་གསུམ་འཛོམས་ལ་ལས་འཕྲོ་མེད༔ འཇིག་རྟེན་གཡེང་བ་ཆེ་ལ་ལས་འཕྲོ་མེད༔ མིག་རྣོ་ལག་བདེ་ཤེས་ཞིབ་ལས་འཕྲོ་མེད༔ ལས་འཕྲོ་མེད་པས་ཐོན་རི་ན་རག་སྐན༔ གལ་ཏེ་བྱུང་ན་ཚབས་ཆེར་སྤང་བར་བྱ༔ བརྫུན་གཏེར་བཅོས་མ་གཏེར་འདྲ་གཏེར་ཆོས་སེལ༔ བསྟན་པའི་ཆོམ་ཆེན་བྱེད་པའི་དམར་ལས་མཁན༔ གང་གི་བློ་ལས་མ་རུངས་སུ་ངོ་ཤེས༔ དམྱལ་བས་མི་བསྡིགས་འཇིགས་བསྲན་ཅན་རྣམས་དང་༔ ཨུ་རྒྱན་ང་དང་སྨོན་ལམ་གང་དུ་བཏབ༔ གཏེར་ཁུངས་ཕྱུང་ཡང་རྣོ་ནུས་ཅུང་ཟད་མེད༔ དེ་འདྲའི་ཐོ་ཕྱིར་མི་ཉེ་སྤང་བའི་རྒྱུ༔ ཤེས་རབ་ཡོད་ན་ས་སྟེང་ཆོས་ཀྱིས་གང་༔ མོས་གུས་ཡོད་ན་བླ་མར་མ་གྱུར་མེད༔ བཅོ་བརྒྱད་སེང་གེ་གངས་ལ་འགྲོ་བ་ལ༔ བརྫུན་གཏེར་སེང་གེའི་གྲོགས་པོ་གང་དུ་འགྲོ༔ གཏེར་ཞེས་བྱུང་ཁུངས་ཡིད་ཆེས་ལོ་རྒྱུས་ཀྱང་༔ རཱུ་ཏྲ་ཐར་པ་ནག་པོ་བཏུལ་ལས་བྱུང་༔ རྣམ་ཤེས་ཚོགས་བརྒྱད་ལ་ནི་དུར་ཁྲོད་བརྒྱད༔ པགས་པ་ཤོག་བུ་རྐང་པ་སྨྱུ་གུ་བྱུང་༔ ཆུ་བཞི་སྣག་ཚ་དུག་ལྔ་ཆོས་ཚིག་བྱུང་༔ ཐོད་པ་སྒྲོ་བ་ཁ་སྣ་གཏེར་སྣོད་བྱུང་༔ སྣོད་དྲུག་གཏེར་གྱིས་དབང་སྐལ་ལུང་བསྟན་བྱུང་༔ དོན་སྙིང་ལྔ་ལས་སྐལ་མེད་ལུང་བསྟན་བྱུང་༔ ཕུང་པོ་ལྔ་དང་དབང་པོ་ལྔ་དང་ནི༔ འབྱུང་བ་ལྔ་དང་ལུས་ངག་ཡིད་གསུམ་ལས༔ གཏེར་གྱི་རིགས་བྱེད་བྱེ་བ་བཅོ་བརྒྱད་བྱུང་༔ བསྡུ་ན་བཅུར་བསྡུ་གཏེར་དབུགས་གཏེར་ཤ་གཉིས༔ གཏེར་ལྤགས་གཏེར་སྤུ་གཏེར་གྱི་སྙིང་ཁྲག་དང་༔ གཏེར་གྱི་ལྟོ་ཚིལ་གཏེར་གྱི་ཡན་ལག་བདུན༔ གཏེར་གྱི་ཆུ་བ་རྐང་མར་གཏེར་ཀླད་བཅུ༔ གཏེར་སྨྱོན་ཞེས་པ་མིག་གི་འབྲས་བུ་ཡིན༔ གཏེར་ཕྲན་ཞེས་པ་མིག་རྣག་སྣ་སྤབས་ཡིན༔ མ་ནིང་བྱ་བ་སྣབས་ལུད་ཁུ་བ་ཡིན༔ བླ་གཏེར་ཞེས་ནི་སྲོག་པ་རྩ་ལ་ཟེར༔ བར་གཏེར་བྱ་བ་གཏེར་གྱི་མཆིན་ཁྲི་ཡིན༔ ཀུན་ལ་དེ་བཞིན་འགྲེས་འདེད་ཤེས་པར་བྱ༔ སྐབས་སུ་སྦས་པའི་གཏེར་རེ་རྡོལ་བ་ཡང་༔ གོ་སྙོད་སྣེའུ་ཟླ་ཚོད་ལྕམ་ལོ་བཞིན༔ ངེས་མེད་གང་བྱུང་གནས་ལ་མི་སྐྱེ་སྟེ༔ ཨུ་དུམྺཱ་རའི་མཆོག་གི་མེ་ཏོག་ནི༔ མ་དྲོས་བྱང་ཕྱོགས་རྩེ་ལྔའི་ཕ་རོལ་ལམ༔ ཨུ་རྒྱན་དྷ་ན་ཀོ་ཤའི་ནུབ་བྱང་དུ༔ འཇིག་རྟེན་མགོན་པོ་སངས་རྒྱས་འབྱོན་ཚེ་སྐྱེ༔ ཡིད་ཆེས་ངེས་ཤེས་སྐྱེད་པའི་གཏེར་སྟོན་དང་༔ དེ་བཞིན་དུས་གཅིག་གཏེར་མང་རྡོལ་མི་སྲིད༔ སྲིད་པ་སླར་ལོག་སྒྱུར་བའི་རྒྱལ་པོ་གཅིག༔ དེ་ལ་ཡིད་ཆེས་བསྐྱེད་པའི་གཏེར་སྟོན་གཅིག༔ དཔེར་ན་འཇིག་རྟེན་སྒྲོན་མའི་རྒྱལ་བ་ནི༔ རྒྱལ་རིགས་འཁྲུངས་ན་མེ་ཏོག་དཀར་པོ་སྐྱེ༔ བྲམ་ཟེའི་རིགས་འཁྲུངས་མེ་ཏོག་དམར་པོ་སྐྱེ༔ རྗེའུ་རིགས་འཁྲུངས་ན་མེ་ཏོག་སེར་པོ་སྐྱེ༔ དམངས་རིགས་འཁྲུངས་ན་མེ་ཏོག་མཐིང་ག་སྐྱེ༔ ལྷུམས་སུ་ཞུགས་ཚེ་མེ་ཏོག་ཁ་ནི་འབུས༔ སྐུ་བལྟམས་ཚེ་ན་མེ་ཏོག་ཁ་ནི་བྱེ༔ ཆོས་འཁོར་བསྐོར་ཚེ་མེ་ཏོག་རབ་ཏུ་རྒྱས༔ མྱ་ངན་འདས་ཚེ་མེ་ཏོག་དབྱིངས་སུ་ཡལ༔ དེ་བཞིན་སྐལ་ལྡན་ཟབ་གཏེར་སྤྱོད་པའི་དུས༔ མཁའ་འགྲོ་ཆོས་སྐྱོང་ལྷ་སྲིན་སྡེ་བརྒྱད་འཐིབས༔ ཁ་རྒྱས་གཡུལ་འཁྲུགས་དབུས་སུ་འཇུག་པ་བཞིན༔ ལྷ་འདྲེ་ཡིད་ཀྱི་གཟུགས་ཅན་བར་དུ་གཅོད༔ འདོད་ཆགས་ལས་གྱུར་བུད་མེད་བདུད་མོ་དང་༔ ཞེ་སྡང་ལས་གྱུར་བཙུན་གཟུགས་སྡོམ་ཉམས་དང་༔ གཏི་མུག་ལས་གྱུར་སྔགས་པ་དམ་ཉམས་དང་༔ གཞན་ཡང་དེ་འདྲ་རིགས་བྱེད་ཤེས་པ་བསྒྱུར༔ ལྷ་འདྲེ་མི་གསུམ་བར་གཅོད་བྱེད་པར་འགྱུར༔ ཆེས་ཏེ་གཏེར་འཆོར་རང་གི་སྲོག་ལ་འོང་༔ ཆུང་སྟེ་མི་ནོར་ཟས་གསུམ་བྱར་མི་བཏུབ༔ ནག་པོ་བདུད་དང་སྟོབས་འགྲན་དུས་ཡིན་པས༔ གཏད་པའི་གཏེར་བདག་ཐམས་ཅད་འཁྲེན་ཅིང་འཚུབ༔ ལས་ཀྱིས་བསྐུལ་བས་ཟོན་བྱེད་གཞག་ཏུ་མེད༔ དེ་ཕྱིར་ལས་འཕྲོ་སྔོན་དུ་སོང་བ་ལས༔ གཏེར་སྟོན་དཔེར་ན་ཉིན་སྐར་བཞིན་དུ་ཉུང་༔ དུས་གཅིག་གཏེར་སྟོན་གཉིས་གསུམ་འབྱུང་མི་སྲིད༔ བྱུང་ན་གཏེར་སེལ་ལྡེམ་དགོངས་ཅན་དུ་ངེས༔ བར་ཆོད་མེད་པའི་དངོས་གྲུབ་མི་འབྱུང་བས༔ ཟུང་འཇུག་འདུག་གམ་ཡ་བྲལ་གོང་བཞིན་བརྟག༔ ཟུང་འཇུག་འདུག་ན་གཅིག་ནི་ཚེ་དུས་བྱེད༔ ཡུལ་གཅིག་དུས་གཅིག་གཏེར་སྟོན་གཉིས་མིསྲིད༔ གཅིག་ལ་གཅིག་དགྲ་བྱེད་ཕྱིར་མ་བསྟན་ནོ༔ ལྷན་ཅིག་གཉིས་མིན་པདྨའི་གཏེར་ཆོས་བཞིན༔ གཅིག་པོ་མར་འགྲིབ་གཅིག་ལས་ཡར་འཕེལ་ཡིན༔ ང་ཡི་གཏེར་ཆོས་གཏད་དོ་གཉེར་ཆེན་པོ༔ སྟོང་གསུམ་ཆོས་ཀྱིས་བཀང་ངོ་ཨུ་དུམྺཱར༔ མ་རིག་མུན་པ་སོལ་ཅིག་འོད་པོ་ཆེ༔ དུས་གསུམ་འགྲོ་བ་ཐུལ་ཅིག་ཕྱི་ཐག་ཅན༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གཏེར་གྱི་བགྲོ་བ་གཏེར་ཆོས་གཏེར་སྟོན་གླེངས་པའི་ལེའུ་སྟེ་ང་གསུམ་པའོ༔ ༔
པདྨ་བཀའ་ཐང་ལེའུ་ ༥༤ ཁྲི་སྲོང་ལྡེའུ་བཙན་གྱི་རྒྱལ་སྲིད་བཟུང་བ།
དེ་ནས་བལ་ཡུལ་ཚ་བ་ཚ་ཤོད་བྱོན༔ ཆུ་མིག་བྱང་ཆུབ་རིང་མོ་ཞེས་བྱ་བ༔ དགུན་ཡང་མེ་ཏོག་སྐྱེ་དེར་སྒྲུབ་པ་མཛད༔ དེ་དུས་སེམས་ཅན་སྲོག་ལ་དབང་བྱེད་པའི༔ ས་བདག་ཆེན་མོ་མཆེད་བཞི་དམ་ལ་བཏགས༔ ཕུར་པའི་བཀའ་སྲུང་བསེ་མོ་མཆེད་བཞིར་གསོལ༔ དེ་ནས་ཀོ་ཤ་ཙནྡན་གླིང་དུ་བྱོན༔ ཕུལླ་ཧ་རིའི་བྲག་ཕུག་ཐུགས་དམ་བཞུགས༔ སྲོད་ལ་ཕྱག་ན་རྡོ་རྗེའི་ལུང་བསྟན་བྱུང་༔ ཚེ་གཅིག་སངས་རྒྱས་བདུད་ཀྱི་བར་ཆོད་འབྱུང་༔ དེ་ཟློག་རྒྱལ་པོའི་ཁབ་ཀྱི་ནུབ་ཕྱོགས་ཀྱི༔ དུར་ཁྲོད་ཆེན་པོའི་ལྷོ་ནུབ་མཚམས་ཤིག་ན༔ དུར་ཤིང་ནག་པོའི་ཚལ་ནས་དངོས་གྲུབ་ལོང་༔ ལུང་བསྟན་བྱུང་ནས་གནམ་སྟོང་ནུབ་མོ་བྱོན༔ མེ་འབར་གསེབ་ན་ལྕགས་ཀྱི་སྡིག་པ་ནི༔ མགོ་དགུ་རྭ་ནི་བཅོ་བརྒྱད་ཡོད་པ་ཞིག༔ དཔྲལ་བ་རེ་ལ་མིག་ནི་གསུམ་གསུམ་ཡོད༔ མི་བཟད་འཇིགས་པ་དེ་ལ་ཕྱག་མཆོད་བྱས༔ སང་དགོང་ཤོག་ཅིག་དངོས་གྲུབ་སྦྱིན་ནོ་གསུངས༔ ཕྱིན་དུས་རྡོ་བ་གྲུ་གསུམ་ཞིག་འདུག་ནས༔ དེ་བཀོག་དོང་ནས་བསེ་ཡི་སྒྲོམ་བུ་བྱུང་༔ བལྟས་པས་ཕུར་པའི་ཆོས་འདུག་གཟིགས་པས་མཁྱེན༔ མིག་རེ་ལས་ནི་ཐེག་པ་རེ་རེ་བྱུང་༔ རྭ་རེར་ཐེག་པ་རེ་རེ་བཅོ་བརྒྱད་བྱུང་༔ དེ་ནས་རྒྱ་གར་རྡོ་རྗེ་གདན་དུ་ནི༔ རྒྱལ་པོ་ཉི་མ་སེང་གེས་གདན་དྲངས་བཞུགས༔ དེ་ནས་བོད་དུ་གདན་དྲངས་བྱོན་ཚུལ་ནི༔ བོད་ཀྱི་རྒྱལ་པོ་ཁྲི་ལྡེ་གཙུག་བརྟན་གྱིས༔ རྒྱ་ནག་རྩིས་ཀྱི་བཀའ་བབས་གདན་དྲངས་ནས༔ རྩིས་སྨན་གཉིས་ཀྱིས་བོད་ཁམས་སེམས་ཅན་བསྐྱངས༔ རྒྱ་མོ་གྱིམ་ཤང་ཀོང་ཇོ་ཁབ་ཏུ་བཞེས༔ བོད་ལ་ཕན་པའི་གཙུག་ལག་སྡེ་དགུ་འབྱོངས༔ བོད་ཁམས་འཕགས་པ་འཇམ་དཔལ་གདུལ་བྱར་གཟིགས༔ རྒྱལ་པོ་ཡབ་ཡུམ་ཕོ་བྲང་བྲག་དམར་ན༔ གཟིམས་པའི་ལྷུམས་སུ་རྒྱ་ནག་རྩེ་ལྔ་ནས༔ འཇམ་དཔལ་ཐུགས་ནས་འོད་ཟེར་སྣ་ལྔ་འཕྲོས༔ གྱིམ་ཤང་རྨི་ལམ་ཉི་མ་ཤར་བ་དང་༔ མཛེས་སྡུག་ཁྱེའུ་ལྷུམས་སུ་ཞུགས་པ་རྨིས༔
ས་གཞི་ཐམས་ཅད་འོད་ཀྱིས་གང་བ་དང་༔ ཡིད་བཞིན་ནོར་བུའི་ཆར་པ་བབ་པ་རྨིས༔ རྨི་ལམ་རྒྱལ་པོའི་སྙན་དུ་གསོལ་བ་ཡིས༔ རྒྱལ་པོ་ཤིན་ཏུ་དགྱེས་ནས་རིམ་གྲོ་བྱས༔ ལུས་ནི་མི་བདེ་མེད་པར་འགུལ་བར་བྱེད༔ ཤེས་པ་གསལ་ཞིང་ལུས་པོ་ཡང་བ་དང་༔ ཉོན་མོངས་མེད་ཅིང་སེམས་བདེ་ཉམས་དགར་གྱུར༔ ཟླ་དགུ་ངོ་བཅུ་ཕོ་བྲང་བྲག་དམར་དུ༔ རྟ་ལོ་དཔྱིད་ཟླ་ར་བ་སྟག་ཟླའི་ཉིན༔ སྐར་མ་རྒྱལ་གྱི་ནམ་ལངས་ཉི་ཤར་དྲོས༔ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་འཁྲུངས༔ རྒྱ་ནག་མཁས་པ་བི་རྗེ་བཙན་པ་ཡིས༔ གབ་རྩེ་བཏིང་ནས་བཟང་ངན་བརྩིས་པའི་ལུང་༔ རྒྱ་ཡི་གཙུག་ལག་སྤོར་ཐང་ཁྲ་མོ་ལས༔ དཔལ་འབར་མི་ཡི་འཁྲུངས་དཔེ་རྩིས་སུ་ཤར༔ སྨེ་བ་དགུ་འགྱུར་སྤར་ཁ་བརྒྱད་འཆར་གྱི༔ ཁ་དམར་བཞིན་ན་རྒྱལ་པོའི་ཅི་བསམ་འགྲུབ༔ སོ་ནི་དུང་སོ་འཁོར་མ་ཡོད་པ་ལ༔ སྐྲ་ལོ་མཐོན་མཐིང་སྤྱི་གཙུག་གཡས་སུ་འཁྱིལ༔ ཤིན་ཏུ་མཛེས་པ་ལྷ་ཡི་བུ་ཞིག་འདྲ༔ ཕུན་སུམ་ཚོགས་པའི་ལོ་པཎ་ཐམས་ཅད་སྡུད༔ འཆད་གྲ་སྒོམ་གྲ་ཆོས་ཀྱི་བསྟན་པ་ཆགས༔ རྒྱ་བོད་གཉིས་བར་ཆོས་ཀྱི་ཟམ་པ་འཛུགས༔ ཞེས་གསུངས་མཚན་ཡང་ཁྲི་སྲོང་ལྡེའུ་བཙན་བཏགས༔ དགུང་ལོ་བཅུ་གསུམ་ལོན་ནས་ཡབ་གཤེགས་ཏེ༔ བཅོ་ལྔའི་ལོ་ལ་རྒྱལ་པོར་མངའ་གསོལ་ནས༔ བཙུན་མོ་ཚེ་སྤོང་བཟའ་ནི་དམར་རྒྱན་དང་༔ འབྲོ་བཟའ་བྱང་ཆུབ་སྒྲོན་གཉིས་ཁབ་ཏུ་བཞེས༔ ལོ་བདུན་བར་དུ་ཇག་དམག་དཔོན་བྱས་ནས༔ ཕྱི་ཡི་སོ་བསྲུངས་ནང་གི་སོ་ཚིས་མཛད༔ བཅུ་བདུན་ལོ་ལ་ཆོས་ཀྱི་བསམ་པ་སྐྱེས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཁྲི་སྲོང་ལྡེའུ་བཙན་སྐུ་འཁྲུངས་ཤིང་རྒྱལ་སྲིད་བཟུང་བའི་ལེའུ་སྟེ་ང་བཞི་པའོ༔ ༔
པདྨ་བཀའ་ཐང་ལེའུ་ ༥༥ བོད་རྒྱལ་ཐུགས་དགོངས་བཏང་ཞིང་བློན་འབངས་ལ་གདམ་ང་བསྐུར་བ།
དེ་ནས་ཡབ་མེས་ཀུན་གྱི་ཐང་ཡིག་བལྟས༔ ཡབ་མེས་ཐོ་ཐོ་སྙན་བཙན་སྐུ་རིང་ལ༔ དམ་པ་ཆོས་ཀྱི་དབུ་བརྙེས་རྒྱལ་པོར་བྱོན༔ ཕྱག་ན་རྡོ་རྗེའི་སྤྲུལ་པའི་རྒྱལ་པོར་འདུག༔ སྤང་སྐོང་ཕྱག་རྒྱ་མདོ་སྡེ་ཟ་མ་ཏོག༔ དགེ་བ་བཅུ་དང་ལས་འབྲས་རྣམ་པར་འབྱེད༔ མུ་དྲའི་རྟེན་འབྲེལ་ཕྱག་རྒྱ་མདོ་སྔགས་གཉིས༔ བསྟན་པ་གཉིས་ལྡན་བོད་དུ་བྱུང་ནས་འདུག༔ གཉན་པོ་གསང་བར་མཚན་གསོལ་བོད་ཁམས་བསྐྱངས༔ དེ་ནས་རྒྱལ་རབས་ལྔ་སོང་ལྷ་ས་རུ༔ རྒྱལ་པོ་སྲོང་བཙན་སྒམ་པོའི་སྐུ་རིང་ལ༔ དམ་པ་ཆོས་ཀྱི་སྲོལ་བཏོད་རྒྱལ་པོར་བྱོན༔ སྤྱན་རས་གཟིགས་ཀྱི་སྤྲུལ་པའིརྒྱལ་པོར་འདུག༔ ཁྲ་འབྲུག་ལྷ་ས་ར་མོ་ཆེ་དང་ནི༔ འཕྲུལ་སྣང་གཙོ་བྱས་མཐའ་འདུལ་ཡང་འདུལ་གྱི༔ གཙུག་ལག་ཁང་ནི་བརྒྱ་དང་རྩ་བརྒྱད་བཞེངས༔ ཇོ་ཤཱཀ་མི་བསྐྱོད་རྡོ་རྗེས་གཙོ་བྱས་པའི༔ ལུགས་མ་རང་བྱོན་རྡོ་སྐུ་མང་གདན་དྲངས༔ གསུང་རབ་དཀོན་ཅོག་སྤྲིན་གྱིས་གཙོ་བྱས་ནས༔ པདྨ་དཀར་པོ་ཙྪིནྡྷ་མ་ཎི་དང་༔ ཏོག་དང་གྲ་ལྔ་ལ་སོགས་བོད་དུ་བྱུང་༔ བདག་གིས་བསྟན་གཉིས་དར་རྒྱས་གཏོང་དགོས་སྙམ༔ གཙུག་ལག་ཁང་ཞིག་བཞེངས་པར་འབངས་དང་བགྲོས༔ ནང་བློན་དེ་སྐད་བགྱི་བ་མི་འཚལ་བར༔ དེ་མིན་གཞན་ཞིག་གདམ་ང་བསྐུར་དང་ཟེར༔
རྗེ་ཡི་ཞལ་ནས་བློན་འབངས་ཐམས་ཅད་ཉོན༔ ང་ནི་དཔེ་སྲོལ་ལས་ཐབས་ཤིག་བྱེད་པས༔ ཁྱེད་རྣམས་གདམ་ཀ་བསྐུར་གྱི་གང་སླ་གྱིས༔ གཙང་བོ་ཟངས་ཀྱི་སྦུབས་སུ་འཇུག་དང་གཅིག༔ བསམ་ཡས་ཧས་པོ་རི་ཡི་རྩེ་མོ་ནས༔ ཞང་པོའི་ཡུལ་མཐོང་ཤེལ་གྱི་མཆོད་རྟེན་བརྩིག༔ ཝ་ལུང་གྲོག་པོ་གསེར་ཕྱེས་འགེངས་དང་གསུམ༔ གཙུག་ལག་བྲེ་ཞབས་ཙམ་ཞིག་བརྩིག་གམ་འདོམས༔ བློན་འབངས་རྣམས་ཀྱིས་མི་འགྲུབ་གདམ་ཀ་ཟེར༔ གཙང་པོ་ཟངས་ཀྱི་སྦུབས་སུ་འཇུག་པ་བས༔ ཟངས་ཁལ་ཙམ་ཡང་དཀོན་པས་མི་འགྲུབ་བོ༔ ཤེལ་གྱི་མཆོད་རྟེན་ཞང་ཡུལ་རྒྱ་མཐོང་བས༔ ཤེལ་ཕྲེང་བཟང་པོ་བརྒྱ་ཚར་འགྲུབ་པར་དཀའ༔ ཝ་ལུང་གྲོག་པོ་གསེར་ཕྱེས་འགེངས་པ་བས༔ གསེར་གྱི་ཁང་ཚངས་ཙམ་ཡང་མི་འགྲུབ་བོ༔ དེ་གསུམ་གང་ཡང་མི་འགྲུབ་འཇོག་པར་ཞུ༔ གཙུག་ལག་ཁང་ཞིག་བཞེངས་པར་གསོལ་བ་ལས༔ དེ་ཉིད་མ་ཚར་བར་དུ་བྱེད་པར་གསོལ༔ དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ བླ་མཁྱེན་བི་རྗེ་བཙན་པར་མངའ་གསོལ་ནས༔ བོད་ཡུལ་ལུང་པའི་ས་དཔྱད་གང་ལེགས་བཙལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཀྱི་རྒྱལ་པོས་ཐུགས་དགོངས་བཏང་ཞིང་བློན་འབངས་ལ་གདམ་ང་བསྐུར་བའི་ལེའུ་སྟེ་ང་ལྔ་པའོ༔ ༔
པདྨ་བཀའ་ཐང་ལེའུ་ ༥༦ བསམ་ཡས་གཙུག་ལག་ཁང་གི་ས་བཙལ་བ།
དེ་ནས་བསམ་ཡས་མཚོ་མོ་མགུལ་དུ་བྱོན༔ ས་དཔྱད་གཟིགས་པས་བི་རྗེའི་ཞལ་ན་རེ༔ ཧས་པོ་རི་ནི་དུང་སེང་གནམ་མཆོང་འདྲ༔ མེ་ཡར་དྲེའུ་རྟ་ཆུ་འཐུང་འདྲ་སྟེ་བཟང་༔ མཆིམས་ཕུའི་རི་འདི་གཡུ་སེང་གནམ་མཆོང་འདྲ༔ ཤར་རི་རྒྱལ་པོ་གདན་ལ་བཞུགས་པ་འདྲ༔ དགེ་རྒྱས་རི་འདི་རིན་ཅེན་སྤུངས་པ་འདྲ༔ མཆིམས་ཕུའི་ལུང་པ་པདྨ་ཁ་བྱེ་འདྲ༔ བྲག་དམར་བྱུ་རུའི་སེང་གེ་གནམ་འཕྱོ་འདྲ༔ དོལ་ཐང་དར་དཀར་ཡོལ་བ་བྲེས་པ་འདྲ༔ དབུ་ཚལ་རྫིང་བུ་མར་ཁུའི་གཞོང་པ་འདྲ༔ ལྷོ་ཕྱོགས་གཙང་པོ་གཡུ་འབྲུག་གྱེན་འགྲོ་འདྲ༔ སྤྱིར་ན་བྲག་དམར་ཟན་གཡང་ས་དཔྱད་འདྲ༔ རུས་སྦལ་ཁོག་པར་སྦྲང་རོ་གཏིབས་པ་འདྲ༔
ཕྱོགས་བཞིའི་ས་སྤོས་མཚམས་བཞི་འགྲམས་ནས་འདུག༔ བོད་ཡུལ་རུ་བཞིའི་ནོར་རྣམས་འཕེལ་བའི་རི༔ ཆུ་བོ་རི་ནི་རིན་ཅེན་སྤུངས་འདྲ་འདུག༔ གྲུབ་ཐོབ་རྒྱུན་ཆད་མེད་པར་འོང་བའི་རི༔ འུ་ཤང་རྡོ་དང་སྐར་ཆུང་འདྲ་བ་འདུག༔ བོད་རྣམས་ཚེ་རིང་བདེ་བས་འཚོ་བའི་རི༔ གཙང་གི་རུ་ལག་གཞོན་པ་སྐྱེས་འདྲ་འདུག༔ བློན་པོ་རིག་པ་ཅན་མང་འོང་བའི་རི༔ འཕྱིང་བར་སྟག་རྩེ་གླང་ཆེན་འགྱིང་འདྲ་འདུག༔ སྟོན་ཆེན་འོང་རི་པི་ཝང་རྒྱུད་འདྲ་འདུག༔ བོད་ལ་སྐབས་སུ་འཁྲུག་པ་འོང་བའི་རི༔ རི་ནག་སོག་པོ་ཁྲོས་པ་འདྲ་བའང་འདུག༔ ཅེས་སོགས་བོད་ཀྱི་ས་དཔྱད་རྒྱས་པར་གསུངས༔ དེ་ནས་བསམ་ཡས་འོམ་བུ་ཚལ་དུ་བྱོན༔ བྲག་དམར་འོམ་བུ་ཚལ་དུ་རྨང་བཏིང་བས༔ བོད་ཀྱི་ལྷ་འདྲེ་གདུག་པ་ཅན་རྣམས་འདུས༔ ཉིན་པར་བརྩིགས་པ་མཚན་བཤིག་བརྩིག་མ་སྟེར༔ གཙུག་ལག་རྩིས་དང་པྲ་མོབྱས་པ་ཡིས༔ རྒྱ་གར་རྒྱ་ནག་ཟ་ཧོར་ལ་སོགས་ནས༔ ས་འདུལ་མཁན་གྱི་བླ་མཆོད་གདན་དྲངས་ནས༔ རྒྱལ་པོའི་ཐུགས་དགོངས་རྫོགས་པར་འོང་ངོ་གསུངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བསམ་ཡས་གཙུག་ལག་ཁང་གི་ས་བཙལ་བའི་ལེའུ་སྟེ་ང་དྲུག་པའོ༔ ༔
པདྨ་བཀའ་ཐང་ལེའུ་ ༥༧ མཁན་པོ་བོ་དྷི་ས་ཏྭ་གདན་དྲངས་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ རྒྱལ་བའི་བློ་གྲོས་ལ་སོགས་དཔོན་གཡོག་གསུམ༔ ཟ་ཧོར་ཡུལ་དུ་གཏམ་མྱུལ་བ་ལ་བཏང་༔ སིངྷ་རཱ་ཛ་རྒྱ་གར་ཡུལ་དུ་བཏང་༔ གྲུ་གུ་ཨེ་བག་རྒྱ་ནག་ཡུལ་ལ་བཏང་༔ དེ་ནས་རྒྱལ་བའི་བློ་གྲོས་དཔོན་གཡོག་གསུམ༔ རྡོ་རྗེ་གདན་གྱི་ནུབ་བྱང་མཚམས་ཁ་གཏད༔ ཟ་ཧོར་ཡུལ་དུ་ས་ལམ་བགྲོད་པར་གྱུར༔ མི་རིགས་མི་འདྲ་སྐད་རིགས་མི་འདྲ་བས༔ མང་པོ་འདུས་ནས་སྣ་ལག་བཀབ་ཀྱིན་ལྟ༔ རིམ་པར་མཆེད་ནས་བཙུན་མོ་རྣམས་ཀྱིས་བལྟས༔ རྒྱལ་པོས་གསན་ནས་མི་གཞན་ཅི་ཡོད་འདྲི༔ ཕར་ཚུར་གཏམ་ནི་མ་གོ་དུད་འགྲོ་འདྲ༔ དེ་ནས་བགས་ཀྱིས་འདྲིས་ཤིང་གཏམ་གོ་ནས༔ ཆོས་རྒྱལ་གཅིག་དང་སྲིད་རྒྱལ་གཉིས་ཀྱི་འོག༔ ཟ་ཧོར་རྒྱལ་ཁམས་ཐམས་ཅད་འདུ་བ་ལ༔
ཆོས་རྒྱལ་དེ་ཉིད་ཆོས་ལས་སྲིད་མི་སྲུང་༔ སྲིད་རྒྱལ་དེ་ཉིད་སྲིད་ལས་ཆོས་མི་འཆད༔ ཆོས་རྒྱལ་གོ་མ་དེ་བྱིའི་སྲས་པོ་ནི༔ སྐུ་གཅིག་མཚན་གསུམ་གྲགས་པའི་མཁན་པོ་ཞིག༔ ཆོས་ཀྱི་འཁོར་ལོ་བསྐོར་བའི་ཆོས་གྲར་ཕྱིན༔ གསུང་ནི་མ་གོ་སྐུ་ལ་མོས་པ་ཐོབ༔ བོ་དྷི་སཏྭ་ཤཱནྟ་དེ་བ་ཉིད༔ ཟ་ཧོར་ཡུལ་ན་རྩོད་མེད་ཆོས་སྨྲར་གྲགས༔ གཏམ་ཁུངས་ཆོད་ནས་བོད་དུ་འོངས་པར་གྱུར༔ རྒྱལ་པོའི་སྙན་དུ་གསོལ་བས་རྒྱལ་པོ་དགྱེས༔ དེ་ནས་སྦ་མི་ཛྙཱ་ན་ཤྭ་ར་དང་༔ གཉགས་པ་ཛྙཱ་ན་ཀུ་མཱ་ར་གཉིས་ལ༔ གཡོག་པོ་གསུམ་གསུམ་གསེར་ཕྱེ་བྲེ་རེ་བསྐུར༔ བཀའ་འཕྲིན་ཤུན་པའི་ལོགས་ལ་བཀོད་པ་ནི༔ བསྟན་པ་རིན་ཅེན་མཆོག་ཏུ་གདུགས་ཁེབས་པ༔ མཐའ་ཁོབ་མུན་པའི་གླིང་དུ་སྐར་ཙམ་མེད༔ ས་སྟེང་གནས་པའི་རབ་རིབ་ཉིད་ཀྱིས་སོལ༔ ལྷ་སྲིན་མ་བྱེ་འདྲེ་ཡིས་གཟིངས་པས་འཁུམས༔ ཞེས་པའི་བཀའ་ནན་ཆེ་བར་མཛད་ནས་སུ༔ མྱུར་མགྱོགས་པ་རྣམས་དགོངས་མཐུན་གཉིས་གཉིས་བསྡེབས༔ སྔ་ཕྱི་ཉི་མ་སྟེང་འོག་མགྲོན་ཚན་བཞི༔ སྔ་མའི་ཞལ་སར་ཕྱི་མས་གནས་མལ་འདུག༔ མགྲོན་ཚན་གཉིས་ནི་གཅན་འཕྲང་པ་ཡིས་བཅོམ༔ ཛྙཱ་ན་ཤྭ་ར་ཛྙཱ་ན་ཀུ་མཱ་ཡིས༔ ཟ་ཧོར་ས་ཆོད་མཁན་པོའི་དྲུང་དུ་སླེབས༔ བཀའ་འཕྲིན་གསེར་ཕྱེ་ཕྱག་ཏུ་ཕུལ་བ་ཡིས༔ མཁན་པོས་དགྱེས་པའི་ཞལ་མདངས་དཀར་བསྟན་ནས༔ མྱུར་མགྱོགས་པ་དང་བསྡོངས་ནས་བོད་དུ་བྱོན༔ བོད་དུ་ཕེབས་ནས་གསང་ཕུར་རྗེ་དང་མཇལ༔ ཟ་ཧོར་མཁན་པོས་རྗེ་ལ་ཕྱག་བཙལ་ནས༔ རང་དོན་འགལ་མེད་ཆེན་པོའི་རྣམ་ཐར་ནི༔ ཁུར་ལ་མི་རྩེག་ས་ཡིས་འཇིག་རྟེན་འདེགས༔ ཉི་མ་བས་ཆེན་རྟ་ཞོན་རྒྱུ་བར་བྱེད༔ གླང་ཆེན་རྒྱབ་ཁལ་རབ་ཏུ་བརྟན་པར་འཁུར༔ ཞེས་གསུངས་རྒྱལ་པོའི་ཕྱག་ལ་འཇུས་པ་ཡིས༔ ཡོན་མཆོད་ཐུགས་དགོངས་ཤིན་ཏུ་འདྲེས་པར་གྱུར༔ མཁན་པོས་བསྙེན་གནས་སྡོམ་པའི་ཆོ་ག་མཛད༔ དེ་ནས་བྲག་དམར་མགྲིན་བཟང་ཆག་ཕེབས་ནས༔ ཇོ་མོ་གཉིས་ལ་བསྙེན་གནས་ཆོ་ག་མཛད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཀྱི་རྒྱལ་པོས་མཁན་པོ་བོ་དྷི་ས་ཏྭ་གདན་དྲངས་པའི་ལེའུ་སྟེ་ང་བདུན་པའོ༔ ༔
པདྨ་བཀའ་ཐང་ལེའུ་ ༥༨ མཁན་པོ་བོ་དྷི་ས་ཏྭས་ལུང་བསྟན་པ།
དེ་ནས་མེ་མོ་གླང་ལོའི་ཉི་ཤུ་ལ༔ བསམ་ཡས་གླིང་བཞི་གླིང་ཕྲན་བཅུ་གཉིས་དང་༔ ཡཀྴ་ལྟག་འོག་ཉི་ཟླ་གཉིས་ཀྱི་ཚུལ༔ ས་རིས་བཅད་ནས་མཁན་པོས་ས་བཏུལ་ནས༔ རྒྱལ་པོའི་སྐུ་ལ་དར་དཀར་ན་བཟའ་གསོལ༔ ཕྱག་ཏུ་གསེར་གྱི་འཇོར་ལ་སྨན་སྣ་བྱུགས༔ ས་ལ་ཁྲུ་གང་བརྐོས་པའི་འོག་ནས་ནི༔ ས་ཞག་དཀར་སེར་དམར་གསུམ་བྱུང་བ་ཡིས༔ རྒྱལ་པོས་ཞལ་དུ་གསོལ་ཞིང་དབུ་ལ་བྱུགས༔ མཁན་པོའི་ཞལ་ནས་རྗེ་ཡི་བསམ་པ་འགྲུབ༔ བསྟན་པ་རབ་ཏུ་དར་བར་གྱུར་ཅིག་གསུངས༔ དེ་ནས་རྩིག་པའི་རྨང་བཙུགས་བརྩིགས་པ་ལས༔ ཨཱརྱ་པ་ལོའི་སེ་ཕུང་ཞིག་ཡོད་ཀླུས༔ སེ་ཕུང་གཅོད་པར་ཤེས་ནས་མ་བཟོད་པར༔ ལྷ་འདྲེ་ཐམས་ཅད་ར་མདར་ལྷོགས་ནས་ནི༔ དགེ་བསྙེན་གསུམ་དང་གནོད་སྦྱིན་མི་མ་ཡིན༔ བོད་ཀྱི་ལྷ་འདྲེས་གཙོ་བྱས་ཐམས་ཅད་ཀྱིས༔ ཉིན་བརྩིགས་མཚན་བཤིག་ས་རྡོ་རང་གནས་བསྐྱལ༔ དེ་ནས་མངའ་བདག་རྒྱལ་པོས་མཁན་པོ་ལ༔ ད་ལྟ་མ་འོངས་སེམས་ཅན་སྐྱབས་གནས་སུ༔ གཙུག་ལག་ཁང་འདི་ལེགས་པར་བཞེང་འདོད་པས༔ བདག་སྒྲིབ་ཆེའམ་མཁན་པོས་བྱིན་མ་བརླབས༔ བསམ་པ་མི་འགྲུབ་འདྲའོ་ཞུས་པ་ཡིས༔ བདག་ནི་བྱང་ཆུབ་སེམས་བློ་འབྱོངས་པར་སྦྱངས༔ ཞི་བས་མི་ཐུལ་དྲག་པོས་འདུལ་དགོས་འདུག༔ ད་ལྟར་རྒྱ་གར་རྡོ་རྗེ་གདན་དྲུང་དུ༔ ཨུ་རྒྱན་མཁན་པོ་པདྨ་འབྱུང་གནས་བཞུགས༔ རིག་པའི་གནས་ལྔ་ལ་ནི་མཁས་ཆེན་པོ༔ དོན་གྱི་རྩལ་འབྱོངས་མཆོག་ཐུན་དངོས་གྲུབ་བརྙེས༔ བདུད་བཅོམ་སྡེ་བརྒྱད་བྲན་དུ་ཁོལ་བ་ཡིས༔ ལྷ་འདྲེ་འདར་ཞིང་འབྱུང་པོའི་ཚོགས་རྣམས་འདུད༔ དུས་གསུམ་སངས་རྒྱས་མཆོག་དེ་སྤྱན་དྲངས་ན༔ ལྷ་འདྲེས་འཁུ་མི་ནུས་ཏེ་ཐུགས་དགོངས་འགྲུབ༔ ཅེས་གསུངས་རྒྱལ་པོས་སྤྱན་མི་འདྲོང་ཞུས་པས༔ མཁན་པོས་སྤྱན་འདྲོངས་སྔོན་གྱི་སྨོན་ལམ་ཡོད༔ སྤྱིར་ན་ཡང་དག་རྫོགས་པའི་སངས་རྒྱས་ཀྱིས༔ འགྲོ་བའི་དོན་མཛད་སངས་རྒྱས་རིམ་པར་བྱོན༔ ཁྱད་པར་འཕགས་པ་སྤྱན་རས་གཟིགས་དབང་གིས༔ འགྲོ་བ་དཔག་མེད་འཁོར་བའི་མཚོ་ལས་བསྒྲལ༔ ཕོ་བྲང་རི་བོ་ཏ་ལའི་རྩེ་མོར་བྱོན༔ སེམས་ཅན་གཅིག་ཀྱང་མེད་སྙམ་གཟིགས་པ་ཡིས༔ འགྲོ་བའི་མཐའ་ལ་ཐུག་མེད་སྔ་མ་བཞིན༔ སྤྱན་རས་གཟིགས་ཀྱང་དོན་མི་འདུག་སྙམ་ནས༔ སྤྱན་གཉིས་ནས་ཀྱང་སྤྱན་ཆབ་གཉིས་བྱུང་སྟེ༔ སྲིན་ལག་གཉིས་ཀྱིས་གཏོར་ནས་མ་འོངས་དུས༔ སྤྱན་ཆབ་གཉིས་ཀྱིས་འགྲོ་བའི་དོན་བྱེད་ཤོག༔ ཅེས་པའི་སྨོན་ལམ་བཏབ་པས་ལྷ་ཡུལ་དུ༔ དབང་པོ་བརྒྱ་བྱིན་སྲས་མོ་གཉིས་སུ་སྐྱེས༔ ལྷ་མོ་གང་མ་གང་ཆུང་ཞེས་བྱ་ཡོད༔ གང་ཆུང་གིས་ནི་ལྷ་ཡི་མེ་ཏོག་བརྐུས༔ ལྷ་ཡི་འདུལ་ཁྲིམས་རྣམ་པར་དག་པ་ཉམས༔ མི་ཡི་གནས་སུ་ལྷུང་ནས་བལ་ཡུལ་དུ༔ བྱ་རྫི་གསལ་ལེའི་བུ་མོ་བདེ་མཆོག་སྐྱེས༔ རིགས་ངན་བཞི་དང་བཤོས་པས་བུ་བཞི་བྱུང་༔ རྟ་རྫིས་བཤོས་པའི་བུ་ནི་ཆེ་ཤོས་ཡིན༔ དེ་འོག་ཕག་རྫིས་བཤོས་པའི་བུ་གཅིག་སྐྱེས༔ དེ་འོག་བྱི་རྫིས་བཤོས་པའི་བུ་གཅིག་སྐྱེས༔ དེ་ནས་བྱ་རྫིས་བཤོས་པའི་བུ་གཅིག་སྐྱེས༔ བྱ་བཙོས་གླ་བསགས་བུ་ཚོ་མངའ་ཐང་ཕོག༔ གླའི་ལྷག་མཆོད་རྟེན་བྱ་རུང་ཁ་ཤོར་བཞེངས༔ དེ་ཡང་བུམ་པ་ནས་ནི་བུམ་སྟེགས་ཁར༔ གོམ་པ་དགུ་དགུ་ཡོད་པ་ཞིག་ནི་བཞེངས༔ བུམ་པ་མ་ཐོགས་པར་ནི་ཚེ་དུས་བྱས༔ དམ་ཚིག་ལྷ་མོ་པྲ་མོ་ཧར་སངས་རྒྱས༔ དེ་ནས་བུ་བཞིས་འདུས་ནས་གྲོས་བྱས་པ༔ བྱ་རྫི་མ་གཅིག་བུ་བཞིར་མངའ་ཐང་ཕོག༔ མཆོད་རྟེན་བཞེངས་འཕྲོར་ངེད་བཞིས་མཆོད་རྟེན་ལ༔ བུམ་པ་གདགས་དགོས་ཟེར་ནས་བུམ་པ་བཏགས༔ དེ་དུས་བུ་བཞིས་སྨོན་ལམ་རེ་རེ་བཏབ༔ ཆེ་དག་རྟ་རྫི་བུ་ཡི་སྨོན་ལམ་ནི༔ མཆོད་རྟེན་འདི་ལ་བུམ་པ་བཏགས་པའི་མཐུས༔ ས་བདག་མགོ་ནག་རྒྱལ་པོར་སྐྱེ་བར་ཤོག༔ དེ་སྐད་བཏབ་པས་རྗེ་རྒྱལ་ཁྱོད་ཉིད་ཡིན༔ དེ་འོག་ཕག་རྫི་བུ་ཡི་སྨོན་ལམ་ནི༔ མཆོད་རྟེན་འདི་ལ་བུམ་པ་བཏགས་པའི་མཐུས༔ རིག་འཛིན་སྔགས་འཆང་དགོངས་རྒྱུད་དག་པ་ཡིས༔ རྫུས་སྐྱེས་ལྷ་འདྲེ་མི་གསུམ་འདུལ་བར་ཤོག༔ སྨོན་ལམ་མཐུ་བཙན་པདྨ་འབྱུང་གནས་ཡིན༔ དེ་འོག་ཁྱི་རྫིའི་བུ་ཡི་སྨོན་ལམ་ནི༔ མཆོད་རྟེན་འདི་ལ་བུམ་པ་བཏགས་པའི་མཐུས༔ བསྟན་པའི་གཞི་མ་དགེ་འདུན་མཆོག་ཏུ་ཤོག༔ དགེ་སློང་བོ་དྷི་ས་ཏྭ་ང་ཉིད་ཡིན༔ བྱ་རྫི་བུ་ཡི་སྨོན་ལམ་བཏབ་པ་ནི༔ ཕུ་བོས་སངས་རྒྱས་བསྟན་པ་འཛིན་པར་འདུག༔ དེ་འོག་སངས་རྒྱས་བསྟན་པ་སྲུང་བར་འདུག༔ དེ་འོག་སངས་རྒྱས་བསྟན་པ་སྐྱོང་བར་འདུག༔ ང་ཡིས་འཕྲིན་བློན་པ་རུ་སྨོན་ལམ་འདེབས༔ མཆོད་རྟེན་འདི་ལ་བུམ་པ་བཏགས་པའི་མཐུས༔ སྤུན་ཟླ་རྣམས་ཀྱི་འཕྲིན་བློན་བྱེད་པར་ཤོག༔ ད་ལྟ་ཡར་ཀླུངས་སྦ་མི་ཁྲི་གཞེར་ཡིན༔ སྨོན་ལམ་འབྲེལ་བ་ཡོད་པས་སྤྱན་འདྲོངས་གསུངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ མཁན་པོ་བོ་དྷི་ས་ཏྭས་ལུང་བསྟན་པའི་ལེའུ་སྟེ་ང་བརྒྱད་པའོ༔ ༔
པདྨ་བཀའ་ཐང་ལེའུ་ ༥༩ རྒྱལ་པོའི་བསྐྱར་ཤོག་པ་དང་མཇལ་བ།
དེ་ནས་སིངྷ་རཱ་ཛས་རྒྱ་གར་འཁོར༔ རྒྱལ་པོ་ཁྲི་སྲོང་ལྡེའུ་བཙན་སྙན་གསོལ་བ༔ རྒྱ་གར་ཡུལ་ན་པཎྜི་ཏ་ཡི་ཚོགས༔ ནམ་མཁའི་སྐར་ཚོགས་ཙམ་ལ་ཚོད་མ་ཐེབས༔ དེ་དག་ནང་ནས་མཆོག་ཏུ་གྱུར་པ་ནི༔ གུ་རུ་པདྨ་འབྱུང་གནས་ཞེས་བྱ་བ༔ གཡའ་རི་གོང་གི་བྲག་ལ་བཞུགས་ནས་མཆིས༔ མངལ་སྐྱེས་མ་ཡིན་བརྫུས་སྐྱེས་སྤྲུལ་སྐུར་གྲགས༔ དེ་སྐད་གསོལ་པས་རྒྱལ་པོ་ཤིན་ཏུ་དགྱེས༔ དེ་ནས་རྒྱལ་པོས་མྱུར་མགྱོགས་ཁ་གསུམ་བཏང་༔ སྦ་མི་ཁྲི་གཞེར་རྡོ་རྗེ་བདུད་འཇོམས་དང་༔ མཆིམས་ཀྱི་ཕྲུ་གུ་ཤཱཀྱ་པྲ་བྷ་དང་༔ ཤུད་པུ་དཔལ་གྱི་སེང་གེ་བཞི་ལ་ནི༔ གསེར་ཕྱེ་བྲེ་རེ་གསེར་གྱི་པ་ཏྲ་རེ༔ རྒྱ་གར་རྡོ་རྗེ་གདན་དུ་བརྫངས་པར་གྱུར༔ ལོ་ཙཱ་བཞི་པོས་རྒྱ་གར་ཡུལ་དུ་བགྲོད༔ གསེར་ཕྱེ་བྲེ་གང་རྒྱལ་པོ་ཉི་མར་ཕུལ༔ གསེར་གྱི་པ་ཏྲ་བཀའ་འཕྲིན་ཕྱག་ཏུ་སྤྲད༔ བྲེ་གང་བླ་མཆོད་པཎྜི་ཏ་ལ་ཕུལ༔ བྲེ་གང་པ་ཏྲ་ཨུ་རྒྱན་པདྨར་ཕུལ༔ སློབ་དཔོན་ཆེན་པོས་རྒྱལ་པོ་ཡོན་མཆོད་དགོངས༔ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་ཉིད༔ བསྟན་པའི་གཞི་མ་ཐུགས་དམ་གཙུག་ལག་ཁང་༔ བཞེང་པར་འཚལ་བས་ལྷ་འདྲེ་རྣམས་ཀྱིས་བཀག༔ ས་གཞི་བྱིན་བས་རབ་གནས་བྱ་ཕྱིར་དང་༔ སངས་རྒྱས་བསྟན་པ་འཛིན་སྐྱོང་བསྲུང་བའི་ཕྱིར༔ སྤྱན་འདྲེན་མཆིས་པས་ཐུགས་རྗེས་གཟུང་བར་ཞུ༔ ཞེས་གསོལ་ཨུ་རྒྱན་ཆེན་པོས་བཀའ་གནང་ནས༔ ས་ཕོ་རྟ་ལོ་དགུན་ཟླ་འབྲིང་པོ་ཡི༔ བཅོ་ལྔ་སྐར་མ་སྨིན་དྲུག་བཤུལ་ལམ་ཞུགས༔ གནམ་སྟོང་ཉིན་པར་བལ་ཡུལ་གདན་ཕེབས་ཏེ༔ ཨུ་རྒྱན་མཁན་པོ་པདྨའི་ཞལ་ནས་ནི༔ བོད་ཀྱི་ལྷ་འདྲེ་གཟིངས་པ་ལངས་འདུག་པས༔ ང་ཡིས་འདུལ་ཞིང་ཕྱི་ན་མར་ལ་འོང་༔ མངལ་སྐྱེས་ལུས་ཀྱིས་ལྷ་འདྲེའི་ཟེར་མི་ཐུབ༔ ལོ་ཙཱ་བ་རྣམས་སྔོན་ལ་སོང་ཞིག་གསུངས༔
བྱིན་བརླབས་སྲུང་བ་བཏགས་ནས་སྔོན་ལ་བཏང་༔ ཨུ་རྒྱན་ཆེན་པོས་བལ་ཡུལ་ཟླ་གསུམ་བཞུགས༔ བལ་པོ་བ་སུ་དྷ་ར་ལ་སོགས་པ༔ བལ་པོའི་འགྲོ་དོན་རྒྱ་ཆེར་མཛད་ནས་ནི༔ ཨེ་ཡི་གཙུག་ལག་ཁང་དུ་གཏེར་ཀ་སྦས༔ ཨ་སུ་ར་དང་ཡང་ལེ་ཤོད་ལ་སོགས༔ བལ་ཡུལ་ཤིང་ཁུན་ལ་སོགས་གཙུག་ལག་ཁང་༔ ས་བཙན་བྲག་ལ་གཏེར་ཀ་སྟོང་རྩ་སྦས༔ དེ་ནས་དབྱར་ཟླ་ར་བའི་ཚེས་གཅིག་ལ༔ བཤུལ་ལམ་ཞུགས་ནས་འབྱོན་པར་བཞེད་པའི་ཚེ༔ རྒྱ་བལ་ཤིང་སྐྱེས་རྩེ་མོ་བོད་དུ་བསྟན༔ མེ་ཏོག་ཐམས་ཅད་བོད་བལྟས་ཁ་བྱེར་གྱུར༔ རྒྱ་དང་བལ་པོའི་པཎ་ཆེན་རྨི་ལྟས་ལོག༔ ཉི་ཟླ་དུས་གཅིག་བོད་དུ་ཤར་བ་དང་༔ རྒྱ་ཆོས་མ་ལུས་བོད་དུ་སོང་བ་ལས༔ མཐའ་འཁོབ་གཙུག་ལག་ཁང་གིས་ཁེངས་པ་རྨིས༔ དེ་ཚེ་མཁའ་འགྲོ་སྡེ་བཞི་སེར་སྣ་ཤོར༔ གུ་རུ་བོད་དུ་བཞུད་པ་འདི་སྐད་བཤོལ༔ རྡོ་རྗེ་སློབ་དཔོན་དགོངས་མཛོད་དང་༔ རྩི་ཤིང་རྩེ་མོའི་སྟོན་ལུགས་སམ༔ མེ་ཏོག་ཁ་ཡི་ལྟ་ཕྱོགས་སམ༔ པཎ་ཆེན་རྨི་ལམ་ངན་ལུགས་སམ༔ དཀྱིལ་འཁོར་མདངས་ཡལ་སྐྱེན་ལུགས་ཀྱིས༔ སློབ་དཔོན་བོད་དུ་བཞུད་བཞུད་འདྲ༔ ནམ་མཁའ་གཡོ་འགུལ་མེད་ལགས་ཏེ༔ འབྱུང་བཞི་མཐའ་རྒྱས་ལྷུན་གྱིས་གྲུབ༔ སློབ་དཔོན་གཤེགས་བཞུགས་མ་མཛད་ཀྱང་༔ འགྲོ་དོན་མཐའ་རྒྱས་ལྷུན་གྱིས་གྲུབ༔ སློབ་དཔོན་མི་གཤེགས་བཞུགས་པར་ཞུ༔ ཞེས་གསོལ་སློབ་དཔོན་ལན་བཏབ་པ༔ མཁའ་འགྲོ་དམ་ཅན་ཚུར་གསོན་དང་༔ ནམ་ཟླས་བསྐུལ་བས་རྩི་ཐོག་འབོ༔ གདུལ་བྱས་བསྐུལ་བས་ཐུགས་རྗེ་སྐྱེ༔ ལས་ཆོས་མཐོང་ནས་སྡོད་མི་ཁོམ༔ ཁྱུང་གཤོག་རྒྱས་པ་མཁའ་ལ་འཕྱོ༔ རང་དོན་ཕུན་ཚོགས་སྔོན་ལ་སོང་༔ ཕྱོགས་མེད་གཞན་དོན་དུས་ལ་བབ༔ མ་སྲིང་མཁའ་འགྲོ་གྲོགས་ལ་ཆོས༔ དེ་སྐད་གསུངས་ནས་མང་ཡུལ་བྱོན་པ་ལས༔ བལ་མོ་ཤཱཀྱ་དེ་བར་ལུང་བསྟན་ཏེ༔ ད་ནས་མི་རབས་ཉིས་བརྒྱ་ལྷག་སོང་ན༔ མངའ་རིས་སྐོར་གསུམ་སྤུ་རངས་མང་ཡུལ་དུ༔ གདུང་བརྒྱུད་རྒྱལ་པོ་མགོན་གསུམ་ཞེས་བྱ་འབྱུང་༔ ཁ་ཆེར་འཕགས་པ་མཆེད་གསུམ་སྟོད་ཧོར་གྲགས༔ བལ་ཡུལ་ཨེ་ཡི་གཙུག་ལག་ཁང་ནང་ནས༔ ཨུ་རྒྱན་སྦས་པའི་དམ་པའི་ཆོས་གཏེར་རྡོལ༔ གྲོང་ཁྱེར་སླད་ལར་གཙུག་ལག་དཔལ་དགེ་འབྱུང་༔ ཆོས་ཕྱོགས་དབུལ་ཕོངས་ལུས་སྲོག་མི་ལྟ་ན༔ སངས་རྒྱས་བསྟན་པའི་སྲོག་ཤིང་ཀ་བ་ཚུགས༔ ཞེས་གསུངས་བལ་མོ་ཤཱཀྱ་དེ་བ་ཡིས༔ ཆོས་ཕྱོགས་གཙོར་སྟོན་འཇིག་རྟེན་བྱ་བ་བཏང་༔ ཨུ་རྒྱན་ཆེན་པོའི་ཐུགས་ཀྱི་མངོན་མཁྱེན་ལ༔ ལས་འཕྲོའི་དབང་གིས་གདུལ་བྱ་དུས་བབ་སྙམ༔ བལ་ཡུལ་ཉི་མ་ཁུད་ཀྱི་མཚོ་ཀར་བྱོན༔ རྒྱལ་པོས་བསྐྱར་ཤོག་མི་བདུན་བཏང་དང་ཕྲད༔ ནམ་མཁའི་སྙིང་པོས་གཙོ་བྱས་གཡོག་པོ་བདུན༔ དབས་མང་རྗེ་གསལ་སྣང་སེང་གོང་ལྷ་ལུང་༔ དབས་མི་གྲུ་གཟིངས་ཅོག་རོ་དབལ་གཟུངས་མགོན༔ སྣ་ནམ་བདུད་འདུལ་ཤ་མི་པུ་ཏྲ་ཤྲཱི༔ བློན་པོ་སྟག་སྣ་གདོང་གཟིགས་དང་བཅས་རྣམས༔ མང་ཡུལ་ཁ་གནོན་གཏོང་བ་ཙུག་བྱས་ནས༔ ཡོངས་སུ་ཚོལ་བ་ཁོ་ན་ཉིད་ལ་དགོངས༔ ཆོས་ཀྱིས་ཀུན་དགའ་འཕེལ་བའི་དགའ་སྟོན་ཆར༔ བཀྲ་ཤིས་བཟང་ལྡན་ཡིད་ལ་རེ་བ་སྦྱོར༔ དེ་ཡིས་སྐྱེ་བོ་དམ་ཆོས་སྤྱོད་ལ་དད༔ ཅེས་པའི་དྲིལ་ཡིག་གསེར་ཕྱེ་བསྐུར་ནས་ཕྱིན༔ རྒྱ་གར་ཕ་རོལ་བལ་པོའི་ཚུ་རོལ་ཏུ༔ ཨུ་རྒྱན་ཆེན་པོ་པད་འབྱུང་ཉིད་དང་མཇལ༔ རྒྱལ་པོའི་དྲིལ་ཡིག་སྐྱེས་ནི་ཕྱག་ཏུ་ཕུལ༔ བར་མ་བདུན་པོ་བསམ་ཡས་སྔ་འགྲོས་བཏང་༔ ཨུ་རྒྱན་ཆེན་པོས་ནམ་མཁའ་ལ་བྱོན་ནས༔ མང་ཡུལ་གུང་ཐང་ཟླ་བ་གསུམ་དུ་བཞུགས༔ ཕུག་མདའི་ནང་དུ་ཡིད་བཞིན་གཏེར་ཅིག་སྦས༔ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས༔ སྐ་བ་དཔལ་བརྩེགས་རྡོ་རྗེ་བདུད་འཇོམས་དང་༔ ཅོག་རོ་ཀླུ་ཡི་རྒྱལ་མཚན་གསེར་བསྐུར་ནས༔ ལམ་ལ་ཉིན་བཤད་མཚན་བཤད་དུབ་པར་བརྫངས༔ སློབ་དཔོན་སྲུང་མ་རྣམས་ཀྱིས་ཐུགས་དམ་བསྐུལ༔ བང་ཆེན་མི་གསུམ་ཐང་ཆད་ཉོན་མོངས་པས༔ མང་ཡུལ་གུང་ཐང་ཙམ་དུ་གཤེགས་པར་ཞུས༔ མཇལ་ནས་མཁྱེན་བཞིན་ཁྱེད་རྣམས་སུ་ཡིན་དྲིས༔ ངེད་རྣམས་བོད་ཀྱི་སློབ་དཔོན་གདན་འདྲེན་ཡིན༔ ཞེས་སྨྲས་ཕྱག་བྱས་གསེར་ཕྱེ་བྲེ་གང་ཕུལ༔ པྲེ་ཏ་པུ་རིའི་རྒྱལ་པོའི་སྐུ་ཡོན་ནམ༔ ཞེས་གསུངས་མང་ཡུལ་བལ་ཡུལ་ཕྱོགས་ལ་གཏོར༔ ཕོངས་སེམས་སྐྱེས་པས་སློབ་དཔོན་ཞལ་ནས་ནི༔ ཐུ་བ་བཟེད་གསུངས་ས་དང་གསེག་མ་བླུགས༔ སོ་སོར་ཕྱིན་ནས་ཁ་ཕྱེ་བལྟས་པ་ཡིས༔ གསེར་དངུལ་གཡུ་དང་རིན་པོ་ཆེ་རྣམས་འདུག༔ ཡིད་ཆེས་སྐྱེས་ནས་སྐུ་ལ་མོས་པ་ཐོབ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་པོའི་བསྐྱར་ཤོག་པ་དང་མཇལ་བའི་ལེའུ་སྟེ་ང་དགུ་པའོ༔ ༔
པདྨ་བཀའ་ཐང་ལེའུ་༦༠། བོད་ཀྱི་ལྷ་འདྲེ་གདུག་པ་ཅན་རྣམས་བཏུལ་བ།
དེ་ནས་མང་ཡུལ་སྟོན་ལ་མཁར་དུ་བྱོན༔ ཞང་ཞུང་དགྲ་བླ་ཛ་མུན་ཞེས་བྱ་བས༔ སློབ་དཔོན་རི་བྲག་གཉིས་ཀྱི་བར་དུ་བཅར༔ བར་སྣང་བྱོན་པས་མོ་སྐྱེངས་སྲོག་སྙིང་ཕུལ༔ གསང་མཚན་རྡོ་རྗེ་གཡུ་བུན་མ་རུ་བཏགས༔ གཏེར་ཀ་ཆེན་པོ་ཞིག་གི་གཉེར་ཀ་གཏད༔ དེ་ནས་གནམ་ཐང་མཁར་ནག་ལ་གར་བྱོན༔ གངས་དཀར་གནམ་སྨན་དཀར་མོས་ཐོག་ཕབ་སྟེ༔ སློབ་དཔོན་ཕྱག་མཛུབ་ལ་དཀྲིས་མཚོར་དོར་བས༔ མོ་བྲེད་དཔལ་མོ་དཔལ་ཐང་མཚོ་ནང་བྲོས༔ མཚོ་བསྐོལ་ཤ་རུས་བྱེ་སྟེ་བྲལ་བ་ལས༔ སློབ་དཔོན་རྡོ་རྗེ་བརྒྱབ་པས་མིག་གཡས་བཅར༔ མཚོ་ཁར་ཡེར་བྱུང་ཞུ་བ་གསོལ་བ་ནི༔ སྟོན་པའི་ཞལ་སྐྱིན་རྡོ་རྗེ་ཐོད་ཕྲེང་རྩལ༔ བར་ཆད་མི་བགྱིད་ཐུགས་དམ་དགོངས་པ་གློད༔ ཅི་བགྱིའི་བཀའ་ཉན་སློབ་དཔོན་འབངས་སུ་མཆི༔ ཞེས་ཟེར་སྲོག་སྙིང་ཕུལ་ནས་དམ་ལ་བཏགས༔ གསང་མཚན་ཤ་མེད་རྡོ་རྗེ་གཡུའི་སྒྲོན་མ༔ གཏེར་ཀ་ཆེན་པོ་ཞིག་གི་གཉེར་བྱང་གཏད༔ དེ་ནས་འོ་ཡུག་བྲེ་མོ་ལ་གར་བྱོན༔ བརྟན་མ་བཅུ་གཉིས་ཐོག་སྨད་བཅུ་གཉིས་ཕབ༔ རི་ཡི་བར་དུ་བཙིར་བར་བྱས་པ་ལ༔ སོལ་དུམ་རེར་གྱུར་སྟོབས་ཟད་བྱིན་གྱིས་བརླབས༔
བརྟན་མ་བཅུ་གཉིས་སྐྱོང་མ་བཅུ་གཉིས་དང་༔ ཡ་མ་བཅུ་གཉིས་སྲོག་གི་སྙིང་པོ་ཕུལ༔ དམ་ལ་བཏགས་ནས་གཏེར་རེའི་གཉེར་ཀ་གཏད༔ དེ་ནས་འོ་ཡུག་བྱེའུ་ཚང་རྫོང་ཀར་སླེབས༔ དགེ་བསྙེན་ཆེན་པོ་རྡོ་རྗེ་ལེགས་པ་སྐྱོང་༔ མཆེད་ནི་སུམ་བརྒྱ་དྲུག་ཅུས་བསུ་བ་བྱུང་༔ དམ་ལ་བཏགས་ནས་གཏེར་གྱི་གཉེར་ཀ་གཏད༔ དེ་ནས་ཤམ་པོ་ལུང་དུ་བྱོན་ཙ་ན༔ ཤམ་པོས་གཡག་དཀར་རི་ལོགས་ཙམ་ཞིག་སྤྲུལ༔ ཁ་ང་སྣ་ང་ཁ་བ་བུ་ཡུག་འཚུབས༔ སློབ་དཔོན་ལྕགས་ཀྱུའི་ཕྱག་རྒྱས་སྣ་ནས་བཟུང་༔ ཞགས་པས་བཅིངས་ནས་ལྕགས་སྒྲོག་དམ་པར་བཅུག༔ དྲིལ་བུའི་ཕྱག་རྒྱས་ལུས་སེམས་བཙོགས་པ་ཡིས༔ སྲོག་སྙིང་ཕུལ་ནས་དམ་བཏགས་གཏེར་ཀ་གཏད༔ དེ་ནས་སྐུ་གཉན་ཐང་ལྷས་ཉམས་སད་ཕྱིར༔ མགོ་བོ་གྲུ་གུའི་ཡུལ་དུ་སླེབས་པ་ལ༔ གཞུག་མ་ཁམས་ཀྱི་སོག་ཆུ་གཡེར་ཐང་བརྐྱངས༔ སྦྲུལ་དཀར་ཞིག་གིས་ལམ་འཕྲང་བཅད་པ་ལ༔ སློབ་དཔོན་སྦྲུལ་གྱི་སྐེད་པར་ཕྱག་འཁར་བཙུགས༔ ཀླུ་ཡི་རྒྱལ་པོ་ནེ་ལེ་ཐོད་དཀར་ཁྱོད༔ དྲི་ཟའི་རྒྱལ་པོ་ཟུར་ཕུད་ལྔ་པ་ཞེས༔ ཁྱོད་རང་ཕར་སོང་ཚོགས་འཁོར་ཤོམས་དང་གསུངས༔ ཐང་ལྷས་གངས་ལ་བྲོས་པས་གངས་ཞུ་ནས༔ རྩེ་མོ་ནག་ཟང་གཡའ་སྔོན་ཉིལ་གྱིས་བྱུང་༔ མ་བཟོད་ཞལ་ཟས་སྣ་ཚོགས་ཚོགས་འཁོར་དྲངས༔ བྱིས་པ་གཡུ་ཡི་ཟུར་ཕུད་ཅན་དུ་གྱུར༔ དར་དཀར་རལ་གུ་ཞིག་གྱོན་ཕྱག་བསྐོར་བྱས༔ སྲོག་སྙིང་ཕུལ་ནས་དམ་བཏགས་གཏེར་རྒྱ་གཏད༔ གསང་མཚན་རྡོ་རྗེ་མཆོག་རབ་རྩལ་དུ་གསོལ༔ དེ་ནས་བྱང་ཐང་འཕན་ཡུལ་ལུང་པར་བྱོན༔ བྱང་གི་ཏིང་ཏིང་ཏིང་ལོ་སྨན་གདོང་གིས༔ བྱང་ཕུགས་རྣམས་ཀྱི་ལྷགས་པ་དུས་གཅིག་བསྡུས༔ སློབ་དཔོན་འཁོར་དང་བཅས་ལ་བརྒྱབ་པ་ཡིས༔ འཁོར་རྣམས་སྦྲེབས་ཤིང་སློབ་དཔོན་བསེར་ལ་ཁད༔ མེ་ང་མནན་པས་མར་ལ་ཉི་སོང་བཞིན༔ ཏིང་ལོ་སྨན་གཅིག་བཞུ་ནས་དམ་ལ་བཏགས༔ སྲོག་སྙིང་ཕུལ་ནས་གཏེར་གྱི་གཉེར་བྱང་གཏད༔ དེ་ནས་གནམ་གྱི་ཤུག་སྡོང་གླང་སྒྲོམ་དུ༔ བླ་མེད་དོན་རྫོགས་ཕོ་བྲང་ཞལ་ཕྱེ་ནས༔ སྒྲུབ་པ་ཞག་བདུན་ཕྱི་མའི་ནམ་དགུང་ལ༔ ཐུགས་སྔངས་ཡིད་ཀྱིས་བྱུང་ནས་གཟིགས་ཙ་ན༔ བདུད་ཀྱི་དམག་དཔོན་རུ་དར་རེ་རེ་ཕྱར༔ སློབ་དཔོན་ཐུགས་སྔངས་གྱུར་པ་བཟོད་པར་གསོལ༔ སྲོག་སྙིང་ཕུལ་ནས་དམ་བཏགས་གཏེར་ཀ་གཏད༔ དེ་ནས་ཁམས་ཀྱི་གླ་བ་རྐང་གཅིག་བྱོན༔ ཐེའུ་རང་མ་ལུས་ཐམས་ཅད་དམ་ལ་བཏགས༔ དེ་ནས་ཁམས་ཀྱི་སེང་གེ་བྲག་ཏུ་བཞུགས༔ མ་སངས་གཡའ་སྤང་སྐྱེས་གཅིག་བྱ་བ་ནི༔ རྒད་པོ་མགོ་ལ་སྤྲེའུའི་ཞྭ་གྱོན་པ༔ མགོ་བོ་སློབ་དཔོན་པང་དུ་བཞག་བྱས་ནས༔ རྐང་པ་ཁམས་ཀྱི་གཡེར་མོ་ཐང་ལ་བརྐྱངས༔ ལག་གཉིས་ཏི་སེ་མ་ཕམ་མཚོ་ལ་བསྐྱལ༔ མི་མ་ཡིན་ནི་བྱེ་བ་ཁྲག་ཁྲིག་སྟོང་༔ བསམ་གྱིས་མི་ཁྱབ་གང་དག་ལྷགས་པར་གྱུར༔ མཚོན་གྱི་རིགས་བྱེད་ཆར་པ་ཕབ་པ་ཡིས༔ གུ་རུས་དྲག་པོ་རིགས་ལྔར་ཁྲོས་ནས་སུ༔ གཡའ་སྤང་གཙོ་བྱས་ལྷ་འདྲེ་ཐམས་ཅད་བཏུལ༔ དེ་ནས་ཆུ་བོ་རི་དང་ཁ་རག་བྱོན༔ མ་མོ་བསེན་མོ་ཐམས་ཅད་དམ་ལ་བཏགས༔ དེ་ནས་གཙང་གི་གསིལ་མ་ལ་ཁར་བྱོན༔ སྨན་མོ་ལྷ་སྨན་ཐམས་ཅད་དམ་ལ་བཏགས༔ གོམ་པ་ཆུ་མིག་དགེ་བསྙེན་ཐམས་ཅད་བཏུལ༔ བྱེ་མ་རབ་ཀར་ལྷ་སྲིན་སྡེ་བརྒྱད་བཏུལ༔ རོ་ཧ་ལུང་པ་ཁྲ་མོར་མ་ཡམས་བཏུལ༔ རོང་དོང་ལུང་པ་ནག་པོར་སྲིན་པོ་བཏུལ༔ མལ་གྲོའི་ནང་དུ་ཀླུ་རིགས་དམ་ལ་བཏགས༔ གཡུ་འཛིན་ཕུག་མོར་ཕོ་རྒྱུད་དམ་ལ་བཏགས༔ དུང་མདོག་བྲག་དམར་དྲི་ཟ་དམ་ལ་བཏགས༔ གངས་དཀར་ཏི་སེར་རྒྱུ་སྐར་ཉེར་བརྒྱད་བཏུལ༔ གླང་ཆེན་སྦས་ཕུག་གཏེར་ཀ་ཞིག་ཀྱང་སྦས༔ སྟར་སྒོའི་གངས་སུ་གཟའ་ཆེན་བརྒྱད་སོགས་བཏུལ༔ གཏེར་ཁ་ཆེན་པོ་ཉི་ཤུ་རྩ་གཅིག་སྦས༔ བུ་ལེ་གངས་སུ་ལྷ་འདྲེས་ཚོགས་འཁོར་བཤམས༔ འཇིག་རྟེན་ཁམས་ཀྱི་ཟས་ནོར་ཐམས་ཅད་ཕུལ༔ བུ་ལེ་གངས་དང་སྟར་སྒོའི་གངས་མཚོར་སྦས༔ གློ་བོར་ལྡན་མ་སྤུན་དགུ་དམ་ལ་བཏགས༔ ཕོ་མ་གངས་ཇོས་གདན་དྲངས་དམ་ལ་བཏགས༔ གང་བ་བཟང་པོས་གདན་དྲངས་དམ་ལ་བཏགས༔ རྩེ་ལྷ་གངས་སུ་གདན་དྲངས་དམ་ལ་བཏགས༔ མཁའ་རི་ཅན་གྱིས་གདན་དྲངས་དམ་ལ་བཏགས༔ དེ་དག་ཀུན་ལ་གཏེར་ཀ་རེ་རེ་གཏད༔ དེ་ནས་མངའ་བདག་རྒྱལ་པོའི་བསྐྱར་ཤོག་བྱུང་༔ སྟོད་ཀླུང་གྲམ་བུ་ཚལ་དུ་འཛོམ་དུས་བཏབ༔ རྒྱལ་པོ་ང་ཆེ་ང་བཙན་ང་རྒྱལ་ཞིང་༔ ཕོ་ཉ་མང་བཏང་རྒྱལ་པོ་ཉིད་མ་བྱོན༔ ཁ་ལ་བྲག་རིར་དགུན་ཞིག་ངང་ཡོལ་བཞུགས༔ བཙན་རྣམས་དམ་ལ་བཏགས་ཤིང་གཏེར་ཀ་གཏད༔ དེ་ནས་ཟུལ་ཕུག་རྐྱང་བུ་ཚལ་དུ་བཞུགས༔ བདུད་གཟའ་དམ་སྲི་བཏུལ་ནས་གཏེར་ཀ་གཏད༔ དེ་ནས་གཡའ་རི་གོང་དུ་དཔྱིད་ཅིག་བཞུགས༔ ཇ་རོང་འགོང་པོ་སོ་ཤ་དམ་སྲི་བཏུལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཀྱི་ལྷ་འདྲེ་གདུག་པ་ཅན་རྣམས་བཏུལ་ཞིང་དམ་ལ་བཏགས་པའི་ལེའུ་སྟེ་དྲུག་ཅུ་པའོ༔ ༔
པདྨ་བཀའ་ཐང་ལེའུ་ ༦༡ བོད་ཀྱི་རྒྱལ་པོ་དང་ཕྱག་ལ་མ་འཆམས་པ།
དེ་ནས་ལྷ་སར་མཉེས་མཛད་སྟོད་ཀླུང་བྱོན༔ རྒྱལ་པོས་ལོ་ཧི་ཏ་འགྲམ་ཐབ་བཏེག་ནས༔ ལྷ་བཟང་ཀླུ་དཔལ་རྒྱལ་པོའི་ཚབ་མར་བཏང་༔ ལྕགས་ཅན་རྟ་ཞོན་ལྔ་བརྒྱ་དག་གིས་བསྐོར༔ སྟོད་ཀླུང་གཞོང་པ་མདའ་རུ་མཇལ་ཙ་ན༔ དྲོ་བར་འདེབས་པའི་ཇ་ཆུ་མ་རྙེད་ནས༔ ཨུ་རྒྱན་ཆེན་པོ་པདྨ་འབྱུང་གནས་ཀྱིས༔ སྟོད་ཀླུང་དོང་པའི་གདོང་ལ་ཕྱག་འཁར་བཙུགས༔ ལྷ་བཟང་ཆུ་བྱུང་གཞོང་པ་བཟེད་ཅིག་གསུངས༔ མིང་ཡང་གཞོང་པའི་ལྷ་ཆུ་ཞེས་སུ་ཐོགས༔ དེ་ནས་ཟུང་མཁར་ལོ་ཧི་ཏ་འགྲམ་ཚལ༔ མངའ་བདག་རྒྱལ་པོ་ཉིད་དང་མཇལ་ཕྲད་མཛད༔ བོད་ཀྱི་རྒྱལ་པོར་ཕོ་སྐྱེས་ཡོངས་ཀྱིས་བསྐོར༔ ཕུག་རོན་ཁྱུ་བཞིན་དཀར་ཁྲིགས་ཅེམ་ཅེམ་བྱུང་༔ བཙུན་མོ་གཉིས་ལ་མོ་སྐྱེས་ཡོངས་ཀྱིས་བསྐོར༔ ཟ་འོག་གུར་བཞིན་ཁྲ་ཤིག་ཅེམ་ཅེམ་བྱུང་༔ རྔ་ཤོན་གླུ་ཤོན་འབག་ཤོན་སེང་ཤོན་བསུ༔ ཨུ་རྒྱན་ཆེན་པོ་པདྨའི་ཐུགས་དགོངས་ལ༔ ང་ནི་མངལ་སྐྱེས་མ་ཡིན་བརྫུས་སྐྱེས་ཡིན༔
རྒྱལ་པོ་མངལ་སྐྱེས་སྐྱེ་བས་ང་ཉིད་ཆེ༔ ཨུ་རྒྱན་ཆོས་ཀྱི་རྒྱལ་པོའི་རྒྱལ་སྲིད་བཟུང་༔ བོད་ཡུལ་སྡིག་པའི་རྒྱལ་པོ་ཆོ་རིགས་ཆེ༔ ངེད་གཉིས་ངོ་གང་ཁོང་ནི་རྨོངས་པ་ཡིན༔ ང་ནི་རིག་པའི་གནས་ལྔ་ཀུན་ལ་མཁས༔ ཚེ་གཅིག་སངས་རྒྱས་སྐྱེ་ཤི་གཉིས་མི་མངའ༔ ཁོང་ལ་དགོས་པ་བྱུང་ནས་སྤྱན་དྲངས་ཡིན༔ སྔོན་ལ་རྒྱལ་པོས་ང་ལ་ཕྱག་འཚལ་ཡོང་༔ ཕྱག་ལན་འདེབས་སམ་མི་འདེབས་སྙམ་དུ་དགོངས༔ བཏབ་ན་སངས་རྒྱས་བསྟན་པའི་ཆེ་བ་འཆོར༔ མ་བཏབ་རྒྱལ་པོ་ཡིན་པས་མི་དགའ་ཡོང་༔ རྒྱལ་པོ་ཆེ་ཡང་ངའི་ཕྱག་མི་ཐུབ་སྙམ༔ རྒྱལ་པོ་ཁྲི་སྲོང་ལྡེའུ་བཙན་ཐུགས་དགོངས་ལ༔ ང་ནི་བོད་ཀྱི་མགོ་ནག་ཡོངས་ཀྱི་རྗེ༔ མཁན་པོ་བོ་དྷི་ས་ཏྭས་སྔོན་ཕྱག་འཚལ༔ དེ་བཞིན་སློབ་དཔོན་ང་ལ་ཕྱག་འཚལ་སྙམ༔ ཕྱག་ལ་མ་འཆམས་ཚོམ་མེ་ཚོམ་མེར་ལུས༔ སློབ་དཔོན་ང་ཆེ་ང་བཙན་མགུར་འདི་གསུངས༔ དུས་གསུམ་སངས་རྒྱས་མངལ་སྒོ་འགྲིམ༔ གྲངས་མེད་གསུམ་དུ་ཚོགས་གཉིས་བསགས༔ ང་སངས་རྒྱས་པདྨ་འབྱུང་གནས་ཡིན༔ ཆོས་ལྟ་བ་ཡས་འབེབས་ཀྱི་གདམས་ངག་བདོག༔ སྡེ་སྣོད་རྒྱུད་སྡེའི་ལུང་ལ་སྦྱངས༔ ཐེག་ཀུན་མ་འདྲེས་ཡོངས་རྫོགས་འཆད༔ ང་དམ་ཆོས་པདྨ་འབྱུང་གནས་ཡིན༔ ཆོས་སྤྱོད་པ་མས་འཛེག་གི་གདམས་ངག་བདོག༔ ཕྱི་ངུར་སྨྲིག་དགེ་སློང་གི་ཆ་ལུགས་འཛིན༔ ནང་བླ་མེད་གསང་སྔགས་རྣལ་འབྱོར་པ༔ ང་དགེ་འདུན་པདྨ་འབྱུང་གནས་ཡིན༔ ཆོས་ལྟ་སྤྱོད་ཟུང་འཇུག་གི་གདམས་ངག་བདོག༔ ལར་རྟོགས་པ་ནམ་མཁའ་བས་ཀྱང་མཐོ༔ ལས་རྒྱུ་འབྲས་བག་ཕྱེ་བས་ཀྱང་ཞིབ༔ ང་བླ་མ་པདྨ་འབྱུང་གནས་ཡིན༔ ཆོས་འབྲེལ་ཚད་དོན་ལྡན་གྱི་གདམས་ངག་བདོག༔ སྣང་སྲིད་འཁོར་འདས་ཀྱི་དཔེ་ཆ་ལ༔ དྲང་དོན་ངེས་དོན་གྱི་བཤད་པ་བྱེད༔ ང་དགེ་བཤེས་པདྨ་འབྱུང་གནས་ཡིན༔ ཆོས་དགེ་སྡིག་ཤན་འབྱེད་ཀྱི་གདམས་ངག་བདོག༔ ཡེ་ཤེས་ལྔ་ལྡན་གྱི་སྣམ་སྦྱར་གྱོན༔ སྐུ་ལྔ་ཡོངས་རྫོགས་ཀྱི་ལྷུང་བཟེད་ཐོགས༔ ང་མཁན་པོ་པདྨ་འབྱུང་གནས་ཡིན༔ མི་སངས་རྒྱས་སུ་གཏོང་བའི་གདམས་ངག་བདོག༔ ཞི་གནས་དང་ལྷག་མཐོང་ཟུང་དུ་འཇུག༔ སྒོམ་མེད་རྫོགས་ཆེན་གྱི་ལྟ་བ་སྐྱོང་༔ ང་སྒོམ་ཆེན་པདྨ་འབྱུང་གནས་ཡིན༔ ཆོས་མཉམ་གཞག་རྗེས་ཐོབ་ཀྱི་གདམས་ངག་བདོག༔ འཁོར་འདས་རྒྱལ་བའི་དཀྱིལ་འཁོར་ལ༔ བསྐྱེད་རྫོགས་སྤང་བླང་ཆ་མ་མཆིས༔ ང་སྔགས་པ་པདྨ་འབྱུང་གནས་ཡིན༔ ཆོས་བསྐྱེད་རྫོགས་ཟུང་འཇུག་གི་གདམས་ངག་བདོག༔ སྣང་བ་དཀར་དམར་གྱི་གབ་རྩེ་ལ༔ རྒྱུ་འབྲས་ཀྱི་སྤང་བླང་ཞིབ་ཏུ་བརྩི༔ ང་རྩིས་མཁན་པདྨ་འབྱུང་གནས་ཡིན༔ ཆོས་སྡོམ་གསུམ་དབྱེར་མེད་ཀྱི་གདམས་ངག་བདོག༔ མི་དུག་ལྔའི་ནད་ཀྱིས་ཟིན་པ་ལ༔ ཆོས་ཟག་མེད་སྨན་གྱིས་གསོ་བར་བྱེད༔ ང་སྨན་པ་པདྨ་འབྱུང་གནས་ཡིན༔ ཆོས་བདུད་རྩི་འཆི་གསོས་ཀྱི་གདམས་ངག་བདོག༔ ལར་འདི་ལྟར་སྣང་བའི་གྱང་ལོགས་ལ༔ གཉིས་སུ་མེད་པའི་ལྷ་སྐུ་བཞེང་༔ ང་ལྷ་བཟོ་པདྨ་འབྱུང་གནས་ཡིན༔ ཆོས་དབྱིངས་འོད་གསལ་གྱི་གདམས་ངག་བདོག༔ སེམས་ཉིད་ཀྱི་ཤོག་བུ་རྣལ་མ་ལ༔ དོན་ཚིག་དང་བྲལ་བའི་ཡི་གེ་འབྲི༔ ང་ཡིག་མཁན་པདྨ་འབྱུང་གནས་ཡིན༔ ཆོས་ཡི་གེ་མེད་པའི་གདམས་ངག་བདོག༔ གླིང་བཞིར་སྐྱེས་པའི་མི་རྣམས་ལ༔ དུས་གསུམ་མཁྱེན་པས་མངོན་ཤེས་འཆད༔ ང་མོ་མ་པདྨ་འབྱུང་གནས་ཡིན༔ ཆོས་གང་ལ་གང་འདུལ་གྱི་གདམས་ངག་བདོག༔ དུག་ལྔ་གདོན་ལྔ་དགྲར་ལངས་ཀྱང་༔ ཡེ་ཤེས་ལྔ་ཡི་ཁོང་དུ་འབྲུབ༔ ང་མཐུ་མཁན་པདྨ་འབྱུང་གནས་ཡིན༔ ཆོས་དུག་ལྔ་རྩད་གཅོད་ཀྱི་གདམས་ངག་བདོག༔ འདོད་ཡོན་མི་སྤོང་ལམ་དུ་ཁྱེར༔ ཡེ་ཤེས་ལྔ་ལ་ལོངས་སྤྱོད་པ༔ ང་བོན་པོ་པདྨ་འབྱུང་གནས་ཡིན༔ ཆོས་ལྟས་ངན་གཡང་བློན་གྱི་གདམས་ངག་བདོག༔ ལར་རིགས་དྲུག་སེམས་ཅན་བདེ་ལ་བཀོད༔ ལྷ་སྲིན་སྡེ་བརྒྱད་བྲན་དུ་ཁོལ༔ ང་རྒྱལ་པོ་པདྨ་འབྱུང་གནས་ཡིན༔ ཆོས་ཁམས་གསུམ་དབང་སྡུད་གདམས་ངག་བདོག༔ ལས་སྣ་འཁོར་བ་དོང་སྤྲུགས་འཛིན༔ བྱ་བ་རང་སེམས་ཅི་དུལ་བྱེད༔ ང་བློན་པོ་པདྨ་འབྱུང་གནས་ཡིན༔ ཅི་བྱས་ཆོས་འགྲོ་ཡི་གདམས་ངག་བདོག༔ འདུན་ཕུགས་ཕྱི་མ་དོན་དུ་གཉེར༔ ཁ་ངོ་དཀོན་ཅོག་གསུམ་ལ་ལྟ༔ ང་བཙུན་མོ་པདྨ་འབྱུང་གནས་ཡིན༔ འཆི་ཁར་སངས་རྒྱས་གདམས་ངག་བདོག༔ མི་དད་པ་ཆེ་བའི་འདུན་མ་བསྐྱངས༔ མི་ཚེ་ཕྱི་མའི་བདེ་སྐྱིད་བྱས༔ ང་གཙོ་བོ་པདྨ་འབྱུང་གནས་ཡིན༔ ཆོས་འཁྲུལ་པ་རྩད་གཅོད་ཀྱི་གདམས་ངག་བདོག༔ བྱང་སེམས་སྙིང་རྗེའི་མཚོན་ཐོགས་ནས༔ རྣམ་རྟོག་ལོག་ལྟའི་དགྲ་བོ་བསད༔ ང་དཔའ་བོ་པདྨ་འབྱུང་གནས་ཡིན༔ ཆོས་འཁོར་བ་གཡུལ་ཟློག་གི་གདམས་ངག་བདོག༔ སྦྱིན་པ་གསུམ་གྱི་ནོར་ཕོག་ནས༔ སྐལ་ལྡན་བུ་རྣམས་ཆོས་ལ་བཀོད༔ ང་རྒད་པོ་པདྨ་འབྱུང་གནས་ཡིན༔ ཆོས་རྒད་པོ་མཛུབ་བཙུགས་ཀྱི་གདམས་ངག་བདོག༔ ཚུལ་ཁྲིམས་གསུམ་གྱི་སྐྱེལ་མ་ཁྲིད༔ མཐོ་རིས་ཐར་པའི་ལམ་ལ་འགྲོ༔ ང་རྒན་མོ་པདྨ་འབྱུང་གནས་ཡིན༔ ཆོས་རྒན་མོ་མཛུབ་ཁྲིད་ཀྱི་གདམས་ངག་བདོག༔ བཟོད་པ་གསུམ་གྱི་གོ་ཆ་གྱོན༔ ཉོན་མོངས་འཁྲུལ་པའི་དགྲ་བོ་འཇོམས༔ ང་སྟག་ཤར་པདྨ་འབྱུང་གནས་ཡིན༔ ཆོས་བདུད་བཞི་ལམ་ལོངས་ཀྱི་གདམས་ངག་བདོག༔ བརྩོན་འགྲུས་གསུམ་གྱི་རྒྱན་ཆ་བཏགས༔ སེམས་ཅན་ཡོངས་ལ་བག་མར་འགྲོ༔ ང་སྨན་ཤར་པདྨ་འབྱུང་གནས་ཡིན༔ ཆོས་དྲང་དོན་ངེས་དོན་གྱི་གདམས་ངག་བདོག༔ བསམ་གཏན་གསུམ་གྱི་མཁར་རྫོང་བཟུང་༔ སྣ་ཚོགས་ཡུལ་ལ་རྩེད་མོ་རྩེ༔ ང་བྱིས་པ་པདྨ་འབྱུང་གནས་ཡིན༔ ཆོས་སྐྱོན་མཚང་སུན་འབྱིན་གྱི་གདམས་ངག་བདོག༔ ཤེས་རབ་གསུམ་གྱི་མིག་གིས་ལྟ༔ དབྱིངས་རིག་དབྱེར་མེད་ཀྱི་ནུ་ཞོ་འཐུང་༔ ང་བུ་ཆུང་པདྨ་འབྱུང་གནས་ཡིན༔ ཆོས་བསམ་གཏན་ཉལ་ཆོག་གི་གདམས་ངག་བདོག༔ ལར་ཁམས་གསུམ་སེམས་ཅན་མི་རྟག་འཆི༔ དཔལ་ཡོ་ག་ཚེ་ཡི་རིག་འཛིན་གྲུབ༔ ང་འཆི་མེད་པདྨ་འབྱུང་གནས་ཡིན༔ ཆོས་རྡོ་རྗེ་ཚེ་སྒྲུབ་ཀྱི་གདམས་ངག་བདོག༔ ཕྱི་འབྱུང་བ་བཞི་ལ་རག་མ་ལུས༔ ནང་ཤ་ཁྲག་ལུས་ལ་རྟེན་མི་འཆའ༔ ང་སྐྱེ་མེད་པདྨ་འབྱུང་གནས་ཡིན༔ ཆོས་ཕྱག་རྒྱ་ཆེན་པོའི་གདམས་ངག་བདོག༔ རྡོ་རྗེ་ཡི་སྐུ་ལ་བགྲེས་རྒུད་མེད༔ བྱང་ཆུབ་ཀྱི་སེམས་ལ་གསལ་འགྲིབ་མེད༔ ང་རྒས་མེད་པདྨ་འབྱུང་གནས་ཡིན༔ ཆོས་ཉོན་མོངས་ཞི་བྱེད་ཀྱི་གདམས་ངག་བདོག༔ ལུས་ལང་ཚོར་ལྡན་པ་ནད་ཀྱིས་འཇོམས༔ བཀྲག་མདངས་དང་ལྡན་པ་རྐྱེན་གྱིས་འཕྲོག༔ ང་ནད་མེད་པདྨ་འབྱུང་གནས་ཡིན༔ ཆོས་རྫོགས་པ་ཆེན་པོའི་གདམས་ངག་བདོག༔ མཐའ་འཁོབ་བོད་ཀྱི་རྒྱལ་པོ་ཁྱོད༔ མི་དགེའི་གླིང་གི་རྒྱལ་པོ་ལ༔ གདོལ་པ་ཤ་ཟན་སྲིན་པོས་བསྐོར༔ མུ་གེ་ཡི་འབངས་ལ་བརྟེན་པ་ནི༔ ཉམས་མི་དགའ་ཞིང་བག་མི་དྲོ༔ སྲིན་མོ་མི་གཟུགས་བཙུན་མོ་ལ༔ འདྲེ་མོ་དམར་ནག་མཚར་མོས་བསྐོར༔ དར་ཟབ་གསེར་གཡུས་བརྒྱན་པ་ནི༔ སྙིང་མི་སྡུག་ཅིང་ཡིད་མི་འོང་༔ རྒྱལ་པོ་ཡིན་པ་གློ་བ་དགའ༔ མངའ་ཐང་ཆེ་བ་མཆིན་པ་སྐྱིད༔ ཕྱག་ལ་འགྱིང་བ་ཕོ་བཟོ་མཐོ༔ ང་རྒྱལ་པོ་ཁྱོད་ལ་ཕྱག་མི་འཚལ༔ འོན་ཀྱང་སྨོན་ལམ་འབྲེལ་བ་ཡིས༔ བོད་ཡུལ་དབུས་སུ་འོངས་ནས་མཆིས༔ རྒྱལ་པོ་ཆེན་པོ་དེར་བྱོན་ནམ༔ ཞེས་གསུངས་ཕྱག་དེང་མཛད་པས་ཕྱག་སོར་ལས༔ རྫུ་འཕྲུལ་མེ་འབར་རྒྱལ་པོའི་ན་བཟའ་ཚིག༔ རྒྱལ་བློན་འཁོར་བཅས་ཀུན་གྱིས་མ་བཟོད་ནས༔ ཕྱག་ནི་གུག་རིལ་གྱང་འགྱེལ་བཞིན་དུ་བཙལ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཀྱི་རྒྱལ་པོ་དང་མཇལ་ཕྲད་མཛད་ཅིང་ཕྱག་ལ་མ་འཆམས་པའི་ལེའུ་སྟེ་རེ་གཅིག་པའོ༔ ༔
པདྨ་བཀའ་ཐང་ལེའུ་ ༦༢ དཔལ་གྱི་བསམ་ཡས་འབྱོངས་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ གནོང་ཞིང་འགྱོད་པས་གུས་པའི་ལྷ་ཕྱག་བཙལ༔ བཀུར་གནས་ཁྱོད་ལྟ་བུ་ལ་ཆེད་མ་བྱས༔ བདག་གི་སྒྲིབ་པ་ཇི་ལྟར་བྱས་ན་འདག༔ སློབ་དཔོན་ཞལ་ནས་གསོན་ཅིག་མངའ་བདག་གསུངས༔ སྐུ་ཡི་དམ་ཚིག་ཉམས་ཆག་སྐོང་བ་ལ༔ ངོ་མཚར་རྡོ་ཡི་མཆོད་རྟེན་ལྔ་བཞེངས་འདག༔ ཅེས་གསུངས་དབུས་སུ་པདྨས་བརྒྱན་པ་བཞེངས༔ ཨུ་རྒྱན་ཆེན་པོས་གཏེར་ཀ་རེ་རེ་སྦས༔ དེ་ནས་སྟོན་ཟླ་ར་བའི་ཚེས་གཅིག་ལ༔ བསམ་ཡས་ཆགས་ཕེབས་ཕོ་བྲང་གདན་དྲངས་ནས༔ རིན་ཅེན་གསེར་གྱི་ཁྲི་ལ་བཞུགས་སུ་གསོལ༔ མཁན་སློབ་གྲལ་ནི་ཞལ་སྤྲོད་བྱས་ནས་སུ༔ འཇིག་རྟེན་འདོད་ཡོན་སྣ་ཚོགས་མཉེས་པར་བྱས༔ ཕྱག་རྟེན་མང་པོ་ཕུལ་ནས་ཞུས་པ་ནི༔ བདག་ནི་མི་དགེའི་དཔོན་པོ་གདོང་དམར་རྗེ༔ བོད་ཀྱི་མི་ནི་ཉོན་མོངས་རགས་ཤིང་གྱོང་༔ གདུལ་དཀའ་འདུལ་ཞིང་ཆོས་ཀྱི་རྟེན་འཛུགས་པས༔ སྤྲུལ་སྐུས་ས་གཞི་བྱིན་གྱིས་བརླབ་ཏུ་གསོལ༔ ཞེས་གསོལ་སློབ་དཔོན་དགྱེས་པས་འདི་སྐད་གསུངས༔ བོད་ཁམས་སྐྱོང་བའི་མངའ་བདག་ཆེན་པོ་ལགས༔ མཐའ་འཁོབ་བོད་འདི་འདྲེ་ཡི་ཡུལ་དུ་འདུག༔ ལམ་ལ་ལྷ་འདྲེ་གདུག་པ་མང་ཞིག་བཏུལ༔ བོད་སྤྲུག་སྤྲེའུའི་ཚ་རྣམས་འདུལ་བའིཕྱིར༔ ལྷ་ཁང་བཞེངས་པ་རྒྱལ་པོ་ངོ་མཚར་ཆེ༔ གློ་བོ་སྲིན་མོ་གན་རྐྱལ་བཞག་འདྲ་བའི༔ སྙིང་གར་གཙུག་ལག་ཁང་ནི་དགུ་ཐོག་དགོས༔ ལྟེ་བའི་སྟེང་དུ་མཆོད་རྟེན་བཞེང་དགོས་སོ༔ སྲིན་མོའི་མགོ་ལ་དེའུ་ནག་པོ་དགོས༔ རྐང་ལག་བཞི་ལ་མཆོད་རྟེན་བརྒྱ་རྩ་བརྒྱད༔ མལ་གྲོའི་ནང་ན་བོད་ཁམས་དབང་བྱེད་པའི༔ ཀླུ་ཡིརྒྱལ་པོ་མལ་གྲོ་གཟི་ཅན་ཞེས༔ དེ་ལ་ཀླུ་གཏེར་འཇུག་ཅིང་སྲོག་ཆུ་དགོས༔ དེ་ནས་སློབ་དཔོན་མལ་གྲོའི་ནང་དུ་བྱོན༔ དམ་སྐོངས་དོང་སྤྲུག་འདུས་པའི་བཤགས་པ་མཛད༔ ཀླུ་གཏེར་ཀླུ་རྟེན་བཙུགས་ནས་སྲོག་ཆུ་བླངས༔ ཀླུ་ཡིད་དམ་ལ་མ་ཐོགས་ཁ་གནོན་ལ༔ གློ་བོ་དགེ་དཀར་གཙུག་ལག་ཁང་བཞེངས་ནས༔ དེ་ནས་ཧས་པོ་རི་ཡི་རྩེ་མོར་བྱོན༔ སྐམ་ཆས་ོན་ཆས་རྫས་ལ་འདུ་རུ་བཅུག༔ སྦོས་པ་བཞི་ལ་གཏར་ཀ་བཞི་བྱས་ཏེ༔ འགྲམས་པ་བཞི་ལ་མེ་བཙའ་བཞི་བརྒྱབ་ནས༔ རུས་སྦལ་མགོ་ལ་རྟ་མགྲིན་བཞེངས་སུ་བཅུག༔ ཧཱུྃ༔ ཉོན་ཅིག་པད་འབྱུང་བཀའ་ལ་ལྷ་འདྲེ་ཉོན༔ འཇིག་རྟེན་ཁམས་ན་མཚུངས་མེད་སྤྲུལ་པའི་སྐུ༔ མངལ་གྱིས་མ་གོས་མཚོ་སྐྱེས་རྡོ་རྗེ་ཡིན༔ ལུས་ལ་གང་གིས་མི་ཚུགས་འཆི་མེད་ཐོབ༔ འགྲོ་དྲུག་འཁོར་བའི་སྡུག་བསྔལ་འཇིགས་སུ་རུང་༔ དམུ་རྒོད་སེམས་ཅན་ཚེ་ཐུང་གཡེང་བ་ཆེ༔ ཁྲི་སྲོང་ལྡེའུ་བཙན་ལྷ་ཁང་བཞེངས་པ་འདི༔ རྒྱལ་མཚན་རྩེ་ལ་ནོར་བུ་ཕྱར་བ་འདྲ༔ བོད་དུ་དམ་ཆོས་བསྟན་པ་ཚུགས་པ་ན༔ ལྷ་འདྲེ་སུ་མ་མགུ་ཡང་རག་མ་ལུས༔ མགྲོན་པོར་རྒྱ་གར་པཎ་ཆེན་འབོད་པ་འདི༔ མུན་པའི་དཀྱིལ་དུ་སྒྲོན་མེ་ཁྱེར་བ་འདྲ༔ བོད་དུ་བདེ་སྐྱིད་དམ་ཆོས་དར་བ་ན༔ ལྷ་འདྲེ་ཡུལ་བུད་སོང་ཡང་རག་མ་ལུས༔ དེ་བས་ཡོན་བཞེས་ས་གཞི་གནང་བ་བྱིན༔ རྒྱལ་པོའི་ཁྲི་སྲོང་ལྡེའུ་བཙན་བསམ་པ་སྒྲུབས༔ ལྷ་ཁང་རྩིགས་ཤིག་ལྷ་འདྲེ་ལས་ལ་འདུ༔ སྔགས་འཆང་པདྨ་འབྱུང་གནས་བཀའ་མ་བཅག༔ ཅེས་གསུངས་ནམ་མཁའ་དག་ལ་འཕུར་ནས་སུ༔ རྡོ་རྗེའི་འགྲོས་མཛད་གྲིབ་མ་གར་བྱུང་དུ༔ མི་མིན་དགེ་བསྙེན་ཉི་ཤུ་རྩ་གཅིག་དང་༔ བསྟན་མ་བཅུ་གཉིས་གངས་རི་མོ་དང་ནི༔ གཡའ་རི་མོ་ལ་སོགས་པའི་ལྷ་འདྲེ་དང་༔ དྲི་ཟ་གྲུལ་བུམ་ཀླུ་དབང་གནོད་སྦྱིན་རྣམས༔ གཟའ་ཆེན་བརྒྱད་དང་རྒྱུ་སྐར་ཉི་ཤུ་བརྒྱད༔ རི་ཀླུང་ཀུན་ནས་ས་རྡོ་མང་པོ་བསྡུས༔ ས་ཕོ་སྟག་ལོ་སྟོན་ཟླ་འབྲིང་པོ་ཡི༔ ཚེས་བརྒྱད་ཕུར་བུ་དར་བ་འབྲུག་གི་ཉིན༔ སྐར་མ་ལག་སོར་ཉིན་པར་རྩིག་རྨང་བཅུག༔ རྒྱལ་པོ་ཉིད་ཀྱིས་བཞེངས་པའི་གཙུག་ལག་ཁང་༔ དབུ་རྩེ་རིགས་གསུམ་རི་རབ་ཚུལ་དུ་བྱས༔ འཁོར་ས་གསེར་གྱི་རི་བདུན་ཚུལ་དུ་བཀོད༔ ཡཀྴ་ལྟག་འོག་ཉི་མ་ཟླ་བའི་ཚུལ༔ གླིང་བཞི་གླིང་ཕྲན་བརྒྱད་ཀྱིས་ལེགས་བསྐོར་བའི༔ མཐའ་མར་ལྕགས་རི་ཆེན་པོ་གཅིག་གིས་བསྐོར༔ ལས་མི་ཁྲི་ཕྲག་དྲུག་གིས་གྱང་བཏང་བས༔ གྱང་འཁོར་གཅིག་ལས་མ་ཐོངས་ངལ་དུབ་ནས༔ སློབ་དཔོན་ལྷ་འདྲེ་དབང་བསྡུས་ལས་ཀ་བཅོལ༔ ཚངས་པ་དང་ནི་བརྒྱ་བྱིན་གྱང་མཁན་བྱས༔ རྒྱལ་ཆེན་བཞི་ཡིས་ལས་དཔོན་བྱས་ནས་སུ༔ ཕོ་རྒྱུད་མོ་རྒྱུད་ལྷ་འདྲེ་ཐམས་ཅད་ཀྱིས༔ ཀུ་ཅོའི་སྒྲ་དང་བཅས་ནས་གྱང་བཏང་བས༔ ཉིན་པར་གཟུགས་ཅན་མི་ཡིས་བརྩིགས་པ་བས༔ མཚན་མོ་ལྷ་སྲིན་སྡེ་བརྒྱད་བརྩིགས་པ་མཐོ༔ སློབ་དཔོན་མཆིམས་ཕུར་ཀླུ་འདུལ་དགོངས་པར་བཞུགས༔ ཀླུ་ཡིས་མ་བཟོད་ཐབས་ཀྱིས་རྒྱུད་བསྐུལ་ནས༔ ཤིང་བཟོ་བ་རྣམས་ཤིང་གིས་ལག་བརྡུགས་ཟེར༔ རྒྱལ་པོ་འདི་ཙམ་ཤིང་ནི་གར་འཚོལ་སྙམ༔ དེ་ནས་ཟུལ་ཕུག་རྐྱང་ཆུང་ཚལ་གྱི་ཀླུས༔ བར་ཆོད་བྱེད་དུ་རྒྱལ་པོའི་དྲུང་དུ་ཕྱིན༔ བདག་གིས་ཤིང་སྦྱིན་སློབ་དཔོན་དགོངས་པ་གློད༔ མནའ་བཀག་མཆིམས་ཕུ་བྲི་གུ་དགེ་འུར་བཏང་༔ སློབ་དཔོན་མ་མཐོང་ཁྱུང་ཆེན་སྦྲུལ་ཟ་མཐོང་༔ དགོངས་པ་ཀློད་དང་དངོས་གྲུབ་བདོག་ཅེས་སྨྲས༔ ཁྱུང་གི་ཁ་ནས་སྦྲུལ་ཤོར་སློབ་དཔོན་གྱུར༔ དེ་ཙམ་སྐད་སྒྲོག་དངོས་གྲུབ་ཅི་བདོག་གསུངས༔ རྒྱལ་པོས་ཤིང་གི་དངོས་གྲུབ་བདོག་ཅེས་ཞུས༔ སློབ་དཔོན་ཞལ་ནས་ཤིང་གིས་ག་ལ་འཐོག༔ ཀླུ་ཡིད་དམ་ལ་མ་ཐོགས་གནོད་པ་བྱེད༔ ནད་དུ་མཛེ་འོང་དགྲ་རུ་ཀླུ་ལྡང་གསུངས༔ ཀླུ་འདུལ་བསྐྱར་ནས་མ་ཞུས་རྒྱལ་པོ་འགྱོད༔ གཙུག་ལག་ཁང་ནི་ཕྱེད་ཙམ་འབྱོངས་པ་དང་༔ རྒྱལ་པོའི་ནོར་ཟད་ཇི་ལྟར་བྱ་ན་ཞུས༔ སློབ་དཔོན་ཞལ་ནས་ཐབས་ཤིག་ཡོད་ཀྱི་གསུངས༔ མི་ཡི་རྒྱལ་པོ་ཁྲི་སྲོང་ལྡེའུ་བཙན་དང་༔ ཀླུ་ཡི་རྒྱལ་པོ་གྲོགས་པོ་བྱེད་དགོས་གསུངས༔ ང་ཡིས་ཁྱོད་གཉིས་སྦྲེལ་བའི་འཕྲིན་པ་བྱེད༔ མཚོ་ཆེན་མལ་གྲོའི་འགྲམ་དུ་ཁྲིད་ནས་བྱོན༔ རྒྱལ་པོ་བློན་འབངས་ལུང་པ་ཡ་ཅིག་སྦས༔ སློབ་དཔོན་མཚོ་ཀར་དར་གྱི་སྦྲ་ཕུབ་ནས༔ ཞག་གསུམ་དགོངས་པ་མཛད་ཅིང་བཞུགས་པ་ལས༔ ནང་པར་བུད་མེད་ཤིན་ཏུ་མཛེས་པ་ཞིག༔ མཚོ་ཀར་བྱུང་ནས་སློབ་དཔོན་ཅི་མཛད་ཟེར༔ མི་ཡི་རྒྱལ་པོ་ཁྲི་སྲོང་ལྡེའུ་བཙན་དང་༔ ཀླུ་ཡི་རྒྱལ་པོ་དགའ་བའི་གྲོགས་པོ་བྱེད༔ རྒྱལ་པོའི་གཙུག་ལག་ཁང་ནི་མ་འབྱོངས་པས༔ ཀླུ་ལ་ནོར་སློང་གསུངས་ནས་འཕྲིན་བསྐུར་བས༔ གནངས་ཀྱི་ནངས་པར་སྦྲུལ་ཆེན་ཞིག་བྱུང་ནས༔ ཆུ་ཡི་འགྲམ་དུ་གསེར་ཕྱེ་ཉིལ་གྱིས་བྱུང་༔ རྗེ་འབངས་སྦྲན་ནས་གསེར་ཕྱེ་སྡུད་དུ་བཅུག༔ དེ་དུས་བྱང་ཁམས་སྣ་བརྒྱད་མི་དམངས་ཚོགས༔ ཡུལ་དེར་མི་སྣམས་ཐམས་ཅད་ལྟད་མོར་འདུས༔ ཚོགས་པའི་གསེབ་ཏུ་བུ་མོ་བཅུ་དྲུག་མ༔
ཡིད་འོང་ཤིན་ཏུ་མཛེས་པ་ཞིག་འདུག་ནས༔ རྒྱལ་པོ་འདི་ཉིད་བཙུན་མོར་ཁབ་ན་ཟེར༔ སྐྱེ་བ་སྔ་མའི་མ་ཡིན་རིགས་ངན་གསུངས༔ རིགས་ངན་བུ་མོ་ཕོ་གྱོང་བཟའ་ཞེས་ཟེར༔ འདི་ནི་ཕོ་གྱོང་བཟའ་བས་ཅི་ཡིན་ཀྱང་༔ ཁབ་ཏུ་བཞེས་དགོས་ཟེར་ནས་བཙུན་མོར་བསྐུར༔ མོ་ལ་གསེར་གྱི་བདག་མོར་བསྐོས་པ་ལས༔ དེ་ནས་མོ་ཡིས་གསེར་གྱི་བྱན་བྱས་ནས༔ དབུ་ཚལ་གསེར་ཁང་བཞེངས་ཏེ་གསེར་ཕྱེ་བཟང་༔ བཟོ་སྣ་བདུན་གྱིས་ཁྱད་འཕགས་དེ་གཙུག་ལགས༔ ཁམས་གསུམ་ཟངས་ཁང་དམར་རྒྱན་བཟའ་ཡིས་བཞེངས༔ དགེ་རྒྱས་འབྲོ་བཟའ་བྱང་ཆུབ་མ་ཡིས་བཞེངས༔ གླིང་བཞི་ཤར་སྒོ་འཕགས་པ་འཇམ་དཔལ་གླིང་༔ ལྷོ་ཕྱོགས་ཨཱརྱ་པ་ལོ་ནུབ་བྱམས་གླིང་༔ བྱང་གི་ཕྱོགས་ན་བྱང་ཆུབ་སེམས་བསྐྱེད་གླིང་༔ དེ་དག་འཁོར་དུ་གླིང་ཕྲན་བརྒྱད་ཀྱིས་བསྐོར༔ དག་བྱེད་ཁྲུས་ཁང་བརྡ་སྦྱོར་ཚང་མང་གླིང་༔ བདུད་འདུལ་སྔགས་པ་སྒྲ་བསྒྱུར་རྒྱ་གར་གླིང་༔ དཔའ་བོ་བཻ་ཙ་མི་གཡོ་བསམ་གཏན་གླིང་༔ རིན་ཅེན་སྣ་ཚོགས་པེ་ཀར་དཀོར་མཛོད་གླིང་༔ ཟུར་བཞིར་རྡོ་རྗེ་ཕུར་པའི་མཆོད་རྟེན་བཞི༔ དབུ་རྩེ་སུམ་ཐོག་ལུགས་ནི་གསུམ་དང་ལྡན༔ ཀ་བ་སྟོང་དང་རྩ་གཉིས་སྒོ་སོ་དྲུག༔ སྤྱི་རྩེ་ཞེ་གཉིས་སེང་གེ་བརྒྱ་རྩ་བརྒྱད༔ ལྕོག་ཆེན་བརྒྱད་དང་གྲུ་སྐས་ཆེན་པོ་དྲུག༔ མཆོད་རྟེན་དཀར་པོ་ཤུད་བུ་དཔལ་སེང་བཞེངས༔ དེ་ཡང་སེང་གེ་བཞི་ཡིས་ལེགས་པར་བརྒྱན༔ མཆོད་རྟེན་དམར་པོ་རྒྱལ་ཚ་ལྷས་གནང་བཞེངས༔ དེ་ཡང་པདྨ་སྟོང་གིས་ལེགས་པར་བརྒྱན༔ མཆོད་རྟེན་ནག་པོ་ཏ་ར་ཀླུ་གོང་བཞེངས༔ དེ་ཡང་སྐུ་གདུང་དག་གིས་ལེགས་པར་བརྒྱན༔ མཆོད་རྟེན་སྔོན་པོ་རྡོ་རྗེ་སྤྲེ་ཆུང་བཞེངས༔ དེ་ཡང་ལྷ་ཁང་བཅུ་དྲུག་དག་གིས་བརྒྱན༔ ཀླུ་བཏུལ་སྲོག་ཆུ་བུམ་གཏེར་རེ་རེ་སྦས༔ ལྕགས་རི་ནག་པོའི་སྒོ་བཞི་མགོན་ཁང་བཞི༔ སྒོ་བཞིའི་མདུན་ན་རྡོ་རིང་ཆེན་པོ་བཞི༔ ལྕགས་རིའི་རྩེ་ལ་མཆོད་རྟེན་སྟོང་རྩ་བརྒྱད༔ རྡོ་རིང་སྟེང་ན་ཟངས་ཀྱི་ཁྱི་མོ་བཞི༔ སྟག་ནས་ལོ་ལྔ་ཤིང་ཕོ་རྟ་ལ་འབྱོངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དཔལ་གྱི་བསམ་ཡས་འབྱོངས་པའི་ལེའུ་སྟེ་རེ་གཉིས་པའོ༔ ༔
པདྨ་བཀའ་ཐང་ལེའུ་ ༦༣ བསམ་ཡས་ཀྱི་དཀོར་སྲུང་སྤྱན་དྲངས་པ།
དེ་ནས་ལྷ་ཁང་ནང་དུ་ཅོང་འདོགས་པ༔ མི་མ་ཡིན་གྱིས་འདོགས་སུ་མ་སྟེར་བས༔ སློབ་དཔོན་མཆིམས་ཕུར་ཡང་དག་སྒྲུབ་པ་མཛད༔ རུ་ལུ་ཚངས་པའི་དབྱངས་ཀྱི་འདྲེན་སྟངས་བླངས༔ མི་མ་ཡིན་རྣམས་ཡེངས་ལ་བོར་ནས་སུ༔ གཞན་རྣམས་གཙུག་ལག་ཁང་དུ་ཅོང་འདོགས་བཅུག༔ སློབ་དཔོན་དགོངས་པ་ལྷ་འདྲེས་བཤིག་མ་ནུས༔ དེ་ནས་གཙུག་ལག་ཁང་གི་དཀོར་སྲུང་ལ༔ མཁན་སློབ་རྒྱལ་པོ་ཡོན་མཆོད་བཀའ་བགྲོས་མཛད༔ མཁན་ཆེན་བོ་དྷི་ས་ཏྭའི་ཞལ་ནས་ནི༔ བདུད་ལ་གཏད་ན་གསོད་པའི་རང་བཞིན་ཡིན༔ གཟའ་གཏུམ་ཀླུ་གདུག་བཙན་འཇམ་མ་མོ་འཇིགས༔
སློབ་དཔོན་ཆེན་པོ་པདྨའི་ཞལ་སྔ་ནས༔ རྗེ་ལ་ཞལ་ངོ་བདུད་ཀྱི་སྤྲུལ་པ་འབྱུང་༔ ཐུགས་ལ་གདོན་གསོལ་མི་འཚམ་སྣ་ཚོགས་བྱེད༔ ཡུམ་བརྟན་འོད་སྲུངས་ཞེས་བྱ་འཁྲུགས་པ་འབྱུང་༔ དེ་ཚེ་འདྲེ་ཡི་སྤྲུལ་པས་གླགས་རྙེད་ནས༔ གདུང་རབས་བརྒྱ་དང་བཅུ་ལྷག་སོང་ཙ་ན༔ ཧོར་ཡུལ་གནམ་ཐེའུ་དཀར་པོའི་རྒྱལ་པོ་འོང་༔ བོད་ཁམས་ཐམས་ཅད་ཧོར་གྱི་མངའ་འོག་འཇུག༔ ཧོར་གྱི་ཕོ་ལྷ་གནམ་ལྷ་བྱང་ཆུབ་ཡིན༔ རྒྱལ་པོ་ཤིང་བྱ་ཅན་ནི་སྤྱན་དྲངས་ནས༔ དེ་ལ་གཏད་ན་གཙུག་ལག་ཁང་མི་འཇིག༔ བྷ་ཏ་ཧོར་གྱི་སྒོམ་གྲ་བཅོམ་པ་ན༔ པེ་ཧར་ཀ་ཅའི་ཕྱི་ལ་འབྲངས་ནས་འོང་༔ ང་ཡིས་པེ་ཀར་གླིང་དུ་རྟེན་འཛུགས་གསུངས༔ དེ་ནས་བྷ་ཏར་དམག་བརྒྱབ་སྒོམ་གྲ་བཅོམ༔ ཟས་ནོར་མང་པོ་དྲངས་ནས་འོངས་པ་ལས༔ ལ་ལ་སྨྱོར་བཅུག་ལ་ལ་འབོག་ཏུ་བཅུག༔ དེ་ནས་ཨུ་རྒྱན་པདྨ་འབྱུང་གནས་ཀྱིས༔ པེ་ཀར་གླིང་དུ་རྒྱལ་པོའི་རྟེན་བཙུགས་ཏེ༔ ཕྱི་རྟེན་སྲོག་ཆགས་དཀར་པོ་རྟེན་དུ་བཙུགས༔ ནང་རྟེན་སྨྱུག་རྒོད་དར་སྣ་རྔ་མས་བརྒྱན༔ གསུང་རྟེན་སྐུ་འབག་མདོས་ལ་སོགས་པ་བཙུགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བསམ་ཡས་ཀྱི་དཀོར་སྲུང་སྤྱན་དྲངས་པའི་ལེའུ་སྟེ་རེ་གསུམ་པའོ༔ ༔
པདྨ་བཀའ་ཐང་ལེའུ་ ༦༤ བསམ་ཡས་རབ་གནས་མཛད་པ།
དེ་ནས་རྟ་ཡི་ལོ་གཞུག་དགུན་ཟླ་འབྲིང་༔ སྐར་མ་རྒྱལ་ལ་མཁན་སློབ་མེ་ཏོག་འཐོར༔ བོ་དྷི་ས་ཏྭས་རབ་གནས་ལན་གསུམ་མཛད༔ དེ་ནས་ལུག་ལོ་དགུན་ཟླ་ར་བ་ཡི༔ བཅོ་ལྔ་ནམ་གྲུ་ཟླ་བ་གཟས་བསྒྲིབས་ཉིན༔ རྡོ་རྗེ་དབྱིངས་ཀྱི་སྒྲུབ་པ་ཞག་བདུན་ཐོན༔ མངའ་བདག་རྒྱལ་པོར་དབང་བསྐུར་མཛད་ནས་སུ༔ སློབ་དཔོན་པདྨས་རབ་གནས་མེ་ཏོག་འཐོར༔ དབུ་རྩེ་རིགས་གསུམ་མེ་ཏོག་འཐོར་བའི་ཚེ༔ ནང་གི་ལྷ་རྣམས་ཕྱི་རུ་ཤར་གྱིས་འཐོན༔ ཕྱག་མཚན་ཐམས་ཅད་གདེངས་ཤིང་བསྒྱུར་བ་བྱུང་༔ རྒྱལ་པོའི་ཐུགས་ལ་ནང་དུ་མི་ཚུད་སྙམ༔ དབུ་རྩེ་མཆོད་རྟེན་བཅས་པར་ཐེངས་གསུམ་བསྐོར༔ སླར་ཡང་ལྷ་རྣམས་ལྷ་ཁང་ནང་དུ་བཞུད༔ སྒོ་སྲུང་ཁྲོ་བོར་མེ་ཏོག་འཐོར་བའི་ཚེ༔ ཁྲོ་བོའི་མེ་རུ་དུ་བ་སྔོ་ཕྱུར་བྱུང་༔ མེ་རི་དམར་ལམ་འབར་བ་ཀུན་གྱིས་མཐོང་༔ རྒྱལ་པོ་མེ་ཤོར་སྙམ་ནས་ཐུགས་གཟེག་བྱེད༔ ཇོ་མོ་གླིང་གསུམ་མེ་ཏོག་འཐོར་བའི་ཚེ༔ ཡ་མཚན་རྨད་དུ་བྱུང་བའི་ལྟས་བཟང་དང་༔ ལྷ་ཁང་ཐམས་ཅད་འོད་ཀྱིས་གང་བ་བྱུང་༔
པདྨའི་སྡོང་པོ་སྐྱེས་པ་ཀུན་གྱིས་མཐོང་༔ བྱམས་པ་གླིང་དུ་མེ་ཏོག་འཐོར་བའི་ཚེ༔ ལྷ་བྲན་སྤྲིན་གསེབ་འོངས་ནས་མཆོད་པ་ཕུལ༔ བཻ་ཙ་གླིང་དུ་མེ་ཏོག་འཐོར་བའི་ཚེ༔ ཚོན་སྣ་ལྔ་ཡི་འོད་ཟེར་དྲ་བར་འབྲེལ༔ འཇམ་དཔལ་གླིང་དུ་མེ་ཏོག་འཐོར་བའི་ཚེ༔ མེ་ཏོག་ཆར་པ་ལན་གསུམ་འབབ་པ་བྱུང་༔ ཚང་མང་གླིང་དུ་མེ་ཏོག་འཐོར་བའི་ཚེ༔ ལྷ་རྣམས་ཟབ་རྒྱས་ཆོས་ཀྱི་བགྲོ་བ་མཛད༔ སྔགས་པ་གླིང་དུ་མེ་ཏོག་འཐོར་བའི་ཚེ༔ ལྷ་རྣམས་ནམ་མཁའི་དབྱིངས་ལ་གཤེགས་བཞུད་བྱེད༔ ཁྲུས་ཁང་གླིང་དུ་མེ་ཏོག་འཐོར་བའི་ཚེ༔ ལྷ་རྣམས་གསུང་བྱོན་གདམས་པ་ཆོས་སུ་སྨྲས༔ བསམ་གཏན་གླིང་དུ་མེ་ཏོག་འཐོར་བའི་ཚེ༔ ཉི་ཟླ་དུས་གཅིག་ཤར་བ་ཀུན་གྱིས་མཐོང་༔ ཨཱརྱ་པ་གླིང་རྟ་མགྲིན་མེ་ཏོག་འཐོར༔ རྟ་སྐད་ཐེངས་གསུམ་བཏོན་པ་ཀུན་གྱིས་ཐོས༔ འོན་པ་བྱིང་བས་མ་ཐོས་དེར་མིང་བཏགས༔ འཁོར་སའི་སྨྱུག་རིང་སྐྱེས་པ་ཤར་གྱིས་བྱུང་༔ སྒྲ་བསྒྱུར་གླིང་དུ་མེ་ཏོག་འཐོར་བའི་ཚེ༔ རོལ་མོ་ཐམས་ཅད་རང་སྒྲ་དུས་གཅིག་འཁྲོལ༔ སེམས་བསྐྱེད་གླིང་དུ་མེ་ཏོག་འཐོར་བའི་ཚེ༔ མ་ཆགས་པདྨ་ཅན་ནི་བར་སྣང་བཞུགས༔ ལྕགས་དྲ་གླིང་དུ་མེ་ཏོག་འཐོར་བའི་ཚེ༔ ཡོ་བྱད་བལྡབ་ཏུ་འཕེལ་ཞིང་དྲི་ཞིམ་ལྡང་༔ པེ་ཀར་གླིང་དུ་མེ་ཏོག་འཐོར་བའི་ཚེ༔ པེ་ཀར་དབུ་རྩེའི་ཐང་འཆམས་ཟོར་གཉན་བླངས༔ མཆོད་རྟེན་བཞི་ལ་མེ་ཏོག་འཐོར་བའི་ཚེ༔ གདུགས་དང་རྒྱལ་མཚན་འཕན་དར་རང་ཕྱར་བྱུང་༔ མགོན་ཁང་བཞི་ལ་མེ་ཏོག་འཐོར་བའི་ཚེ༔ ལྡེར་ཚོས་ཁྲོམ་འུར་སྒོ་བཞིའི་ནང་དུ་སོང་༔ རྡོ་རིང་བཞི་ལ་མེ་ཏོག་འཐོར་བའི་ཚེ༔ ཟངས་ཀྱི་ཁྱི་མོ་བཞི་ཡིས་ཕྱོགས་བཞིར་མཆོངས༔ ཁྱི་སྐད་དགུ་སྟོན་རྡོ་རིང་རྩེ་ནས་ཉེར༔ ལྕགས་རི་སྐོར་གསུམ་མེ་ཏོག་འཐོར་བའི་ཚེ༔ ཨ་རུ་རློན་པའི་ཆར་པ་ལན་གསུམ་བབ༔ རྡོ་ཡི་མཆོད་རྟེན་མེ་ཏོག་འཐོར་བའི་ཚེ༔ མཆོད་རྟེན་ལྔ་ལ་འཇའ་སྣ་རེ་རེ་ཟུག༔ ལྷ་མི་ཐམས་ཅད་ངོ་མཚར་མཆོག་ཏུ་གླེང་༔ སྐྱིད་པའི་གླུ་ལེན་ཉམས་དགའི་རྐང་བྲོ་བརྡུངས༔ མཛེས་པའི་ལྷར་བལྟ་སྙན་པའི་གཏམ་དགུ་གླེང་༔ མི་རེས་གླུ་རེ་རྟ་རེས་བང་རེ་བརྒྱུགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བསམ་ཡས་རབ་གནས་མཛད་པའི་ལེའུ་སྟེ་རེ་བཞི་པའོ༔ ༔
པདྨ་བཀའ་ཐང་ལེའུ་ ༦༥ བསམ་ཡས་ལ་བཀུར་སྟི་བྱས་པ།
དེ་ནས་ལྷ་ས་ཁྲ་འབྲུག་ལ་སོགས་པ༔ གཙུག་ལག་ཁང་ནི་བརྒྱ་དང་རྩ་བརྒྱད་ལ༔ སློབ་དཔོན་ཆེན་པོ་པདྨ་འབྱུང་གནས་ཀྱིས༔ མེ་ཏོག་འཐོར་ཞིང་རབ་ཏུ་གནས་པ་མཛད༔ ཁྲི་གདུགས་འོག་ན་འགྲན་ཟླ་མ་མཆིས་པའི༔ རྒྱ་གར་རྡོ་རྗེ་གདན་མཚུངས་བསམ་ཡས་འདི༔ མིག་གིས་མཐོང་ཚད་ངན་སོང་སྐྱེ་སྒོ་གཅོད༔ གང་དག་འདི་ལ་བསྐོར་བ་སུས་བསྐོར་བ༔ བཤན་པ་ཡིན་ཀྱང་མཐོ་རིས་གནས་སུ་སྐྱེ༔ གང་ཞིག་བསམ་ཡས་འདི་ལ་ཕྱག་འཚལ་བ༔ ཐུན་མོང་ཁྱད་པར་ཆེས་ཆེར་རྒྱལ་པོར་འགྱུར༔ གང་ཞིག་བསམ་ཡས་རྣམ་ཐར་གཞན་བརྗོད་པ༔ གང་གིས་ཐོས་པས་ལས་རྣམས་ཀུན་ལས་གྲོལ༔ གང་ཞིག་བསམ་ཡས་དད་པས་པུས་འཛུགས་པ༔ ཆོ་རིགས་བཙུན་པ་རྒྱལ་རིགས་འཁོར་ལོས་སྒྱུར༔ གང་ཞིག་བསམ་ཡས་འདི་ལ་ཐལ་སྦྱོར་བ༔ མི་དེ་ཡང་དག་ལམ་ལ་གནས་པར་འགྱུར༔ གང་ཞིག་བསམ་ཡས་འདི་ལ་མཎྜལ་འབུལ༔ གནས་སྐབས་མཐར་ཐུག་འབྲས་བུ་མཆོག་ཀུན་ཐོབ༔ གང་ཞིག་བསམ་ཡས་འདི་ལ་མེ་ཏོག་འབུལ༔
མི་རྣམས་དགའ་ཞིང་རབ་ཏུ་སྐྱིད་པར་འགྱུར༔ བསམ་ཡས་མེ་ཏོག་ཉལ་ཉིལ་སུས་འཆག་པ༔ སྦྱིན་གནས་མཚུངས་མེད་སངས་རྒྱས་ཐོབ་པར་འགྱུར༔ གང་ཞིག་བསམ་ཡས་འདི་ལ་སྤོས་འབུལ་བ༔ བལྟ་བར་འོས་ཤིང་ནོར་ཆེན་ལྡན་པར་འགྱུར༔ གང་ཞིག་བསམ་ཡས་འདི་ལ་མར་མེ་འབུལ༔ བྱེ་བ་ཁྲག་ཁྲིག་ལྷ་ཞལ་ངེས་མཐོང་འགྱུར༔ གང་ཞིག་བསམ་ཡས་མར་མེའི་རྒྱུན་འཛུགས་པ༔ ཆོས་ཀྱི་འོད་ཟེར་བདག་ཉིད་གསལ་བར་འགྱུར༔ གང་ཞིག་བསམ་ཡས་འདི་ལ་དྲི་ཆབ་འབུལ༔ ཡི་དྭགས་མི་སྐྱེ་ལོངས་སྤྱོད་ཆེ་བར་འགྱུར༔ གང་ཞིག་བསམ་ཡས་འདི་ལ་ཞལ་ཟས་འབུལ༔ ནད་མུག་མེད་ཅིང་ཚེ་རིང་ལོངས་སྤྱོད་འཕེལ༔ གང་ཞིག་བསམ་ཡས་འདི་ལ་སིལ་སྙན་འབུལ༔ ཟབ་ཅིང་སྤོབས་པ་ཕུན་སུམ་ཚོགས་པར་འགྱུར༔ གང་ཞིག་བསམ་ཡས་འདི་ལ་གདུགས་འབུལ་བ༔ ཀུན་མཆོད་བཀུར་སྟི་བྱ་བའི་འོས་སུ་འགྱུར༔ གང་ཞིག་བསམ་ཡས་འདི་ལ་ན་བཟའ་འབུལ༔ མྱུར་དུ་བླ་མེད་བྱང་ཆུབ་ཐོབ་པར་འགྱུར༔ འཕྲེང་བ་བ་དན་ཁྲི་སྟན་འབུལ་བྱེད་པ༔ བདེ་བའི་ཡོ་བྱད་ཐམས་ཅད་དེ་ལས་འབྱུང་༔ གང་ཞིག་བསམ་ཡས་ཡི་དམ་ལྷར་བསྒོམ་པ༔ ཕྱག་རྒྱ་ཆེན་པོའི་རིག་འཛིན་ས་ལ་འགྲོ༔ བསམ་ཡས་སེར་ཀ་ཙམ་ཞིག་སུས་བསུབས་པ༔ མཚུངས་པར་བྱང་ཆུབ་མངོན་འཚང་རྒྱ་བར་འགྱུར༔ བསམ་ཡས་འདི་ལ་ཅོད་པན་སུས་འདོགས་པ༔ མི་དེ་ལྷ་མིའི་གོ་འཕང་ཐོབ་པར་འགྱུར༔ གང་ཞིག་བསམ་ཡས་འདི་ལ་ཞིག་གསོས་བྱེད༔ མྱ་ངན་མེད་པའི་བླ་མེད་བྱང་ཆུབ་འཐོབ༔ གང་ཞིག་བསམ་ཡས་རྗེས་སུ་ཡི་རང་བའི༔ དགེ་དེས་སྡིག་བྱང་འབྲས་བུ་བླ་མེད་འགྱུར༔ གང་ཞིག་བསམ་ཡས་འདི་ལ་ཉན་བཤད་བྱེད༔ སངས་རྒྱས་འཕྲིན་ལས་ཐམས་ཅད་རྒྱས་པ་ཡིན༔ གང་ཞིག་བསམ་ཡས་འདི་ལ་བཞུགས་སུ་གསོལ༔ ཟད་མི་ཤེས་པའི་དགེ་བ་ཐོབ་པར་འགྱུར༔ གང་ཞིག་བསམ་ཡས་འདི་ལ་མཆོད་བྱེད་པ༔ མི་ནོར་ཟས་གསུམ་གང་བསམ་འབྱུང་བར་འགྱུར༔ གང་ཞིག་བསམ་ཡས་འདི་ལ་ཐིགས་ཚགས་བྱེད༔ མི་དེ་དུས་མིན་འཇིགས་པ་བརྒྱད་དང་བྲལ༔ གང་ཞིག་བསམ་ཡས་མེ་ཡི་འཇིགས་པ་བསྲུང་༔ འདི་དག་ཐམས་ཅད་མྱུར་དུ་སངས་རྒྱས་འགྲུབ༔ གང་ཞིག་བསམ་ཡས་འདི་ལ་གནོད་བྱེད་བསྲུང་༔ ཁ་ལག་སྤྱོད་གསུམ་སུན་འབྱིན་སུས་སྤོབས་པ༔ ཕྱིར་མི་ལྡོག་ཅིང་བྱང་ཆུབ་སེམས་དཔར་འགྱུར༔ གང་ཞིག་བསམ་ཡས་འདི་ལ་རབ་གནས་སྐྱོར༔ དུག་གསུམ་ནད་ཞི་རྒྱལ་ཁམས་བདེ་བར་འགྱུར༔ དེ་བཞིན་ལྷ་ས་ཁྲ་འབྲུག་གཙུག་ལག་ཁང་༔ བསོད་ནམས་གསོག་པའི་ཞིང་མཆོག་དམ་པ་སྟེ༔ དད་པ་ཅན་རྣམས་བསོད་ནམས་ཨ་རེ་བསགས༔ བཀུར་སྟི་མཛོད་ཅིག་རྗེ་འབངས་འཁོར་བཅས་རྣམས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བསམ་ཡས་ལ་བཀུར་སྟི་བྱས་པའི་ལེའུ་སྟེ་རེ་ལྔ་པའོ༔ ༔
པདྨ་བཀའ་ཐང་ལེའུ་ ༦༦ སློབ་དཔོན་རྣམ་གཉིས་བཞུགས་པར་ཞུས་པ།
དེ་ནས་མཁན་པོ་བོ་དྷི་ས་ཏྭ་དང་༔ སློབ་དཔོན་ཆེན་པོ་པདྨ་འབྱུང་གནས་ཀྱིས༔ སླར་ཡང་རྒྱ་གར་ཡུལ་དུ་འབྱོན་དགོངས་ནས༔ མངའ་བདག་རྗེ་ལ་འདི་སྐད་བཀའ་སྩལ་ཏོ༔ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི༔ ཐུགས་བསྐྱེད་དག་པའི་མངའ་ཐང་བཀའ་དྲིན་ལ༔ བྲག་དམར་དཔལ་གྱི་བསམ་ཡས་གཙུག་ལག་ཁང་༔ སྟག་ལ་རྨང་བཏིང་རྟ་ཡིས་ལོ་ལྔར་འབྱོངས༔ རབ་གནས་ཚར་ཞིང་རྒྱལ་པོའི་ཐུགས་དགོངས་རྫོགས༔ ད་ནི་རང་ཡུལ་འགྲོ་བས་གནང་བ་ཞུ༔ རྒྱལ་པོས་སྤྱན་ཆབ་བཏོན་ནས་ཞུ་རྟེན་དུ༔ ཟ་འོག་དགུ་བརྩེགས་གདན་ལ་སློབ་དཔོན་བཞུགས༔ ལྔ་བརྩེགས་གདན་ལ་མཁན་པོ་བཞུགས་སུ་གསོལ༔ སྐུ་ལ་མཛེས་པ་ཞལ་དུ་བདའ་བ་དྲངས༔ ཐུགས་སུ་འབྱོན་པ་ཡིད་འཇུག་མཐའ་བརྟེན་ནས༔ གསེར་ཕྱེ་ཤ་བའི་ིད་བུ་བཀང་ནས་ཕུལ༔ བླ་གཡུ་སྙིང་འཁོར་ཞགས་པས་སྣ་དྲངས་ནས༔ ནོར་སྣ་ཁྱད་དུ་འཕགས་པའི་བརྒྱ་འབུལ་བྱས༔ ཕྱག་མང་བཙལ་ཞིང་ཐལ་མོ་སྦྱར་ནས་ཞུས༔ མཁན་སློབ་ཉི་ཟླ་ཟུང་ཅིག་དགོངས་མཛོད་དང་༔
བཅུ་གསུམ་ལོན་ནས་ཡབ་ཀྱིས་བོར་བའི་བུ༔ གདོང་དམར་བོད་ཀྱི་རྒྱལ་པོ་ཡུས་མི་ཆེ༔ བཅོ་ལྔ་ལོན་ནས་རྒྱལ་སྲིད་དམག་ཇག་བཟུང་༔ ལས་ཐབས་བྱ་ཕྱིར་བློན་པོར་གདམ་ཀ་བསྐུར༔ བཅུ་བདུན་ལོན་ནས་ཆོས་ཀྱི་བསམ་པ་སྐྱེས༔ ལྟོ་དཔྱད་བྱས་པས་མཁན་ཆེན་གདན་དྲོངས་ཟེར༔ བསོད་ནམས་མི་ཆུང་མཁན་ཆེན་བོད་དུ་ཁུགས༔ ས་འདུལ་མཛད་པས་བགེགས་ཀྱིས་བསྒྲུབ་མ་སྟེར༔ སློབ་དཔོན་སྤྱན་དྲོངས་འགྲུབ་ཅེས་ལུང་བསྟན་བྱུང་༔ ལས་འཕྲོ་མི་ཞན་སློབ་དཔོན་བོད་དུ་བྱོན༔ བསམ་ཡས་བརྩིགས་པ་མི་འདྲ་སྐྱེས་པ་འདྲ༔ སྐུ་དྲིན་ཡོད་དོ་རྩད་པོས་བརྗོད་མ་ཟད༔ ཁྲི་སྲོང་ལྡེའུ་བཙན་ཚེ་དུས་མ་བྱས་པར༔ སློབ་དཔོན་རྣམ་གཉིས་མི་བཞུད་བཞུགས་པར་ཞུ༔ སྐུ་རྟེན་གྲུབ་ཀྱང་གསུང་རྟེན་མ་འགྱུར་བས༔ སྔགས་དང་མཚན་ཉིད་བོད་དུ་གསུང་བར་ཞུ༔ བོད་ཡུལ་མུན་འོག་འཐིབས་པོ་ལམ་སྟོར་ལ༔ བསྟན་པ་གཉིས་ཀྱི་སྒྲོན་མེ་སྦར་བར་ཞུ༔ ཞེས་ཞུས་ཕྱག་བཙལ་མང་དུ་བཤུམ་པ་ཡིས༔ སློབ་དཔོན་གཉིས་ཀྱིས་བཀའ་བགྲོས་མཛད་པ་ལ༔ བོད་ཀྱི་མི་ལ་དད་མེད་ཆོས་སྣོད་མིན༔ བློན་པོ་ཆོས་ལ་གནག་ཅིང་གདུག་པ་ཆེ༔ རྒྱལ་པོའི་རིགས་ཆགས་ཙམ་ནི་འབྲིད་ཁར་ཡང་༔ སྔ་མ་ཡང་ནི་རྒྱལ་པོ་དགྱེས་པར་བྱས༔ ད་ཡང་ཕྱིན་ན་རྒྱལ་པོ་མི་དགྱེས་འདུག༔ འདྲི་ཀློག་སྒྲ་དང་རིག་པ་གཙོ་བོར་འདོན༔ བོད་དུ་ཆོས་བསྟན་ཚུགས་པར་ལྟ་ཅི་སྨོས༔ སློབ་དཔོན་གཉིས་ཀྱིས་མི་བཞུད་བཞུགས་པར་གནང་༔ རྒྱལ་པོས་ཆོས་ཁྲིམས་དམ་པར་སྡོམས་ཤིག་གསུངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སློབ་དཔོན་རྣམ་གཉིས་བཞུགས་པར་ཞུས་པའི་ལེའུ་སྟེ་རེ་དྲུག་པའོ༔ ༔
པདྨ་བཀའ་ཐང་ལེའུ་ ༦༧ བོད་ཀྱི་རྒྱལ་པོས་ཆོས་ཁྲིམས་བསྡམས་པ།
དེ་ནས་རྒྱལ་པོ་དགྱེས་ནས་ཕྱག་མང་བཙལ༔ ཆོས་ཁྲིམས་དར་གྱི་མདུད་པ་ལྟ་བུར་བསྡམས༔ རྒྱལ་ཁྲིམས་གསེར་གྱི་གཉའ་ཤིང་སྦྲམ་ལྕི་དང་༔ ཆོས་ཁྲིམས་དར་མདུད་འཇམ་དམ་གཉིས་སུ་སྦྲེལ༔ བོད་ཡུལ་རུ་བཞི་མངའ་འོག་འདུས་ཚད་བསྡུས༔ ཁྲིམས་ཤོག་མ་བུ་དཀར་ནག་ཚིག་བསྒྲགས་པ༔ ཁྲིམས་ལ་ཆོས་ཁྲིམས་རྒྱལ་ཁྲིམས་ཐང་ཁྲིམས་གསུམ༔ བོད་ཀྱི་རྒྱལ་པོ་ཁྲི་སྲོང་ལྡེའུ་བཙན༔ ད་ནས་ཆོས་ཀྱི་རྒྱལ་པོ་ང་ཡིན་པས༔ ང་ཡི་མངའ་འོག་ཡོད་པ་ཐམས་ཅད་རྣམས༔ ལེགས་བྱས་ཉེས་བྱས་རྣམ་སྨིན་འབྲས་བུ་བསྐྱེད༔ ལེགས་པར་བྱེད་པ་དམ་པའི་ཆོས་ཡིན་པས༔ རབ་བྱུང་སྡེ་འཛུགས་སྔགས་པའི་སྡེ་འཛུགས་ཤིང་༔ ཆོས་ལུགས་གཉིས་པོ་གང་མོས་ཅི་དགའ་གྱིས༔ མི་སྐྱེ་ཕོ་མོ་ཐམས་ཅད་ཡིག་རྩིས་སློབས༔ ཆོས་བྲིས་ཆོས་ཐོན་ཆོས་སློབས་ཆོས་བཤད་གྱིས༔ བྱིས་པ་བརྡ་འཕྲོད་འབྲི་ཀློག་ཡོན་ཏན་སློབས༔ བཙས་པར་བཙས་སྟོན་སྔགས་པའི་མཆོད་གནས་བསྟེན༔ ན་བར་སྨན་བཅོས་རིམ་གྲོ་ནད་གཡོག་གྱིས༔ རྒས་པ་ཡི་མུག་མ་འཇུག་བཀུར་སྟིས་སྐྱོངས༔
ཤི་བར་བུམ་ཆོག་ཆོས་སྟོན་སྔགས་སྟོན་གྱིས༔ ཡོད་པས་མེད་ལ་བུ་ལོན་སྐྱེད་འཕེལ་ཐོང་༔ མེད་པས་འཇོལ་ལ་སྨར་སྐྱིན་དྲིན་དུ་ཁུར༔ མ་འཁོར་བ་ལ་ཞུ་འཇལ་བྱེད་འཆག་གྱིས༔ དགྲ་ལ་ཟོན་ཆུག་གཉེན་ལ་ནང་གཤིན་གྱིས༔ གཞོན་པས་འཕམ་ལོང་རྒན་པའི་ངག་ལ་ཉོན༔ བུ་མང་རྒན་རིམ་གཞི་ཟུང་ནུ་ཆོས་གྱིས༔ བུ་མེད་པ་རྣམས་བུ་མོར་གོ་དམག་སུས༔ བཟའ་མི་ཁ་དུམ་མ་བྱེད་ཕ་མར་དྲིས༔ ཕོ་མོ་གང་མ་དགའ་ལ་ཕོག་རྫས་བར༔ སྔར་ལོངས་ཕྱིར་ཉོལ་བྱ་བ་མཐའ་རུ་ཐོན༔ བཟའ་མི་གྲོས་མེད་ཁྱོ་ཆུན་འཐེབ་མ་བསྟེན༔ གྲོས་བྱས་རབས་ཆད་ང་ཁྱེར་ནོར་མ་བསྲེལ༔ མི་ལ་མཐར་འདེད་མ་བཏང་བཟང་འགྲོགས་ཀྱིས༔ ཁྲེལ་གདོང་ངོ་ཚ་མེད་པའི་ཡ་མ་སྲོང་༔ ཁ་ཉེན་མི་རྣམས་སྡོད་ལུགས་མཁས་སུ་གྱིས༔ དྲག་པོ་དྲག་མོ་མ་ཐལ་རན་ཚོད་གཟུང་༔ མ་བརྐུ་མ་ཕྲོགས་མ་རྡུངས་མ་གསོད་ཅིག༔ རབ་བྱུང་མཁན་པོས་སྡོམ་ཕོག་ཁྲིམས་བཅས་བཞིན༔ སྡེ་སྣོད་གསུམ་ནས་ཇི་ལྟར་བཤད་བཞིན་གྱིས༔ དགེ་འདུན་སྐོམ་དུ་དཀར་དང་ཇ་གསོལ་ཅིག༔ ཟས་སུ་འབྲུ་དང་བུར་སྦྲང་མར་ཐུད་གསོལ༔ གོས་སུ་མཐང་ཤམ་ངུར་སྨྲིག་ཆས་མཛོད་ཅིག༔ གནས་སུ་གཙུག་ལག་ཁང་སྡེའི་ནང་དུ་བཞུགས༔ ཆང་ནག་ཤ་དང་ལྷད་ཟས་མ་བསྟེན་ཅིག༔ སྔགས་པ་བླ་མས་དམ་ཚིག་བསྒྲགས་པ་དང་༔ རྒྱུད་ནས་ཇི་ལྟར་བཤད་པ་བཞིན་དུ་གྱིས༔ སྐོམ་དུ་ཆང་གསོལ་དགེ་འདུན་དཀོར་མ་འབགས༔ ཟས་སུ་ཅི་དགར་ལོངས་སྤྱོད་དུག་མ་ཟ༔ གོས་སུ་དཀར་དམར་ནག་པོ་སྔགས་ཆས་གྱིས༔ གནས་སུ་སྒྲུབ་ཁང་གཟུང་ལ་ཡོན་ཏན་སྤེལ༔ བསྟན་པ་བསྲུང་ཕྱིར་སྒྲུབ་པ་དང་དུ་ལོང་༔ རབ་བྱུང་དགེ་བར་མདོ་སྡེ་སེར་སྟོན་གྱིས༔ སྔགས་པའི་དགེ་བར་དཀྱིལ་འཁོར་སྔགས་སྟོན་གྱིས༔ མི་ནག་དགེ་བར་བསྟན་གཉིས་སྡེ་ལ་ཐོང་༔ མ་ནུས་པ་ལ་ཐམས་ཅད་སྙིང་རྗེ་བསྐྱེད༔ དབུལ་བའི་མི་ལ་སྦྱིན་པ་ཙམ་ཐོངས་བྱིན༔ ཁ་ཉེན་མི་ལ་སྐྱབས་ཁ་ཚིག་གྲོན་ཐོགས༔ ཟེར་ལོ་འདུག་ལོ་མང་པོ་བཏང་སྙོམས་ཞོག༔ ཆོས་འཆད་གང་འདུག་མོས་ཕྱག་རྒྱང་ནས་འཚོལ༔ བསྟན་པ་མ་བསྲེ་རང་རང་ཆོས་ལུགས་གྱིས༔ བོན་འདི་མུ་སྟེགས་ཡིན་འདུག་སུས་མ་བྱེད༔ བོན་པོ་བསམ་ཡས་མི་མཐོང་ཡུལ་ཕུད་སོང་༔ བོན་པོས་སྐྱིད་ཤོད་ཕྱིན་པས་ཡོག་ཐང་བྱུང་༔ གཙང་དུ་ཕྱིན་པས་དབེན་ཙ་ཁ་ཞེས་གྲགས༔ ང་ཡིས་ཆོས་ཁྲིམས་བསྡམས་ལྟར་མ་བྱས་ན༔ ངེས་པར་གཅོད་པ་རྒྱལ་པོའི་ཁྲིམས་ཡིན་པས༔ སྡོམ་བུས་མཁན་པོ་སློབ་བུས་སློབ་དཔོན་དང་༔ གཡོག་པོས་དཔོན་པོ་བུ་ཚས་ཕ་དང་མ༔ ནུ་བོས་ཕུ་བོ་ཆུང་མས་ཁྱོ་པོ་ལ༔ མི་འཚམ་ལས་བྱས་བསད་དམ་དོ་བསྡོས་པ༔ འདིརྣམས་མེ་ལ་བསྲེག་གམ་ཆུ་ལ་བསྐྱུར༔ ངན་བྱས་ཨན་ལྕགས་བཙོན་དོང་ཁྲིམས་འཇིགས་འབེབས༔ ཡུལ་ཁྲིམས་མེད་ན་ངན་བྱེད་རྒྱགས་པས་འཇོམས༔ བེར་ཀ་ཤག་ཤག་གཅེར་ཕྱུང་རྐེ་ཐག་ཁྱིགས༔ གསུམ་ལྔ་བདུན་དགུ་བཅུ་གཅིག་བཅུ་གསུམ་ཁྲིམས༔ བཅོ་ལྔ་བཅུ་བདུན་བཅུ་དགུ་ཉེར་གཅིག་ཁྲིམས༔ རྩ་གསུམ་རྩ་ལྔ་རྩ་བདུན་རྩ་དགུ་ཁྲིམས༔ སོ་གཅིག་སོ་གསུམ་སོ་ལྔ་སོ་བདུན་དགུ༔ ཞེ་གཅིག་ཞེ་གསུམ་ཞེ་ལྔ་ཞེ་བདུན་དགུ༔ ང་གཅིག་ང་གསུམ་ང་ལྔ་ང་བདུན་དགུ༔ རེ་གཅིག་རེ་གསུམ་རེ་ལྔ་རེ་བདུན་དགུའོ༔ མེ་ཁྲིམས་ང་ཁྲིམས་ཆུ་ཁྲིམས་ལྕགས་ཁྲིམས་བཞི༔ ཤིང་ཁྲིམས་ས་ཁྲིམས་ནམ་མཁའི་ཁྲིམས་དང་བདུན༔ ཐོབ་བྱ་གང་ཡིན་གཟུགས་ཕུང་སྟེང་དུ་སྨིན༔ བསད་ན་སྟོང་འདོན་ཕྲོགས་ན་མིག་སྒྱིད་འདྲེག༔ བརྐུས་ན་འཇལ་འདོན་བྱི་བྱས་བྱི་རིན་ལེན༔ འཕྲ་མར་འབོད་འགེལ་འཐབས་པ་བཙོན་དོང་འཇུག༔ བརྡུངས་ན་གསོས་འདེད་མི་ཉན་རྣ་བ་འབྲེག༔ ཆོས་ལུགས་མཐུན་པར་མི་བྱེད་ཁྱུ་ནས་འབུད༔ རྫུན་གཏོང་མཐར་སྤྱུག་མི་འཇལ་གཏའ་མ་ལེན༔ མི་བདེན་པ་ལ་ཐམས་ཅད་ཡོ་ལོག་ཐོང་༔ མི་ཚོད་བྲེད་པས་འཛིན་ཆུག་ཅེས་སྒྲགས་སོ༔ ནས་ལ་བྲེ་ཚད་ལྗིད་ལ་སྲང་ཚད་ཚུགས༔ ཟོང་ལ་གོང་རྒྱོབ་གསེར་ལ་ན་རར་ཐེག༔ རྐུན་སྲུང་ཁྱི་གསོས་ནམ་ཚོད་བྱས་འཛིན་ཆུག༔ ཁ་འོག་ལུས་ཆུག་མི་ལ་མགོ་སྡུད་དགོས༔ ཆོས་སྲིད་སྔགས་སྲིད་བློན་སྲིད་སྲིད་དུ་བཅད༔ གཅིག་མགོ་གཅིག་ཐོན་མི་དགེ་བསྐྱར་ལ་ཐོན༔ ལ་དང་འཕྲང་འཇམ་ཡུལ་ན་མི་ངན་མེད༔ མི་དགེ་བཅུ་སྤོངས་དགེ་བ་བཅུ་པོ་སྤེལ༔ ཁ་ཉེན་ཆགས་བདེ་དུད་འགྲོ་གཉའ་ཡངས་མཛད༔ ཡོད་པ་བཞག་ཆོག་མེད་པ་ཚོལ་སླར་བཅུག༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཀྱི་རྒྱལ་པོ་ཁྲི་སྲོང་སྡེའུ་བཙན་གྱིས་ཆོས་ཁྲིམས་བསྡམས་པའི་ལེའུ་སྟེ་རེ་བདུན་པའོ༔ ༔
པདྨ་བཀའ་ཐང་ལེའུ་ ༦༨ ལོ་ཙཱ་བ་གསུམ་ལུང་བསྟན་ནས་རྒྱལ་པོའི་ཐུགས་གསོས་པ།
དེ་ནས་དམངས་ཀྱི་ཕྲུ་གུ་རིག་པ་ཅན༔ ཁ་སྤྲོ་བསང་ཞིང་སྐྱེ་མཆེད་དངས་པ་དང་༔ ཤེས་རབ་ཆེ་ཞིང་ཁ་ལྕེ་བདེ་བ་རྣམས༔ རྒྱ་གར་ཡུལ་དུ་སྒྲ་བསྒྱུར་སློབ་ཏུ་བཏང་༔ འཕྲལ་སྐད་ཆོས་སྐད་ཐམས་ཅད་སློབ་པ་ལ༔ མཁན་པོས་སྒྲ་བསླབས་བསྒྱུར་དུ་བཅུག་པ་ནི༔ ན་མོ་བུདྡྷཱ་ཡ༔ ན་མོ་དྷརྨྨཱ་ཡ༔ ན་མ༔ སངྒྷཱ་ཡ༔ བོད་སྤྲུག་ཁ་ལྕེ་མ་བདེ་ཡེ་མ་ཤེས༔ མ་མོ་སྦུད་པ་ཡ༔ མ་མོ་སྦང་མ་ཡ༔ མ་མོ་ཕ་པ་ཡ༔ སྒྲ་དེ་བོད་ཀྱི་སྐད་དུ་བསྒྱུར་བསླབས་པ༔ སངས་རྒྱས་ལ་ཕྱག་འཚལ་ལོ་སྐྱབས་སུ་མཆིའོ༔ ཆོས་ལ་ཕྱག་འཚལ་ལོ་སྐྱབས་སུ་མཆིའོ༔ དགེ་འདུན་ལ་ཕྱག་འཚལ་ལོ་སྐྱབས་སུ་མཆིའོ༔ བོད་སྤྲུག་ལྕེ་ཡིས་མ་འགྱུར་འདི་སྐད་ཟེར༔ ཕར་འགལ་ཡ་ཐག་ཐམ་མོ་སྤབས་ཧུ་ཧི༔ ཆོས་ལ་ཡ་ཐག་ཐམ་མོ་སྦབས་ཧུ་ཧི༔ འེ་འུན་ཡ་ཐག་ཐམ་མོ་སྦབས་ཧུ་ཧི༔ སློབ་དཔོན་ཆེན་པོ་པདྨས་སྒྲ་བསྒྱུར་བསླབས༔ ན་མོ་གྷུ་ར་བེ༔ ན་མོ་དེ་ཝཱ་ཡ༔
ན་མོ་ཌཱ་ཀཱིནྱཻ༔ བོད་སྤྲུག་ཇི་ཙམ་བསླབས་ཀྱང་མ་ཤེས་ཏེ༔ མ་མོ་སྤུའུ་ཡ༔ མ་མོ་འདྲེ་བྷ་ཡ༔ མ་མོ་བྷ་ཁྱི་ཡ༔ རྒྱ་སྐད་དེ་དག་བོད་སྐད་བསྒྱུར་ནས་བསླབས༔ བླ་མ་ལ་ཕྱག་འཚལ་ལོ་སྐྱབས་སུ་མཆིའོ༔ ཡི་དམ་ལ་ཕྱག་འཚལ་ལོ་སྐྱབས་སུ་མཆིའོ༔ མཁའ་འགྲོ་ལ་ཕྱག་འཚལ་ལོ་སྐྱབས་སུ་མཆིའོ༔ བོད་སྤྲུག་བྱིས་པས་དེ་ཡང་མ་ཤེས་ཏེ༔ མནའ་མ་ཡ་ཐག་ཐམ་མོ་སྦབས་ཧུ་ཧི༔ བྱི་བམ་ཡ་ཐག་ཐམ་མོ་སྦབས་ཧུ་ཧི༔ ཤ་འབོ་ཐང་ཐག་ཐམ་མོ་སྦབས་ཧུ་ཧི༔ སློབ་དཔོན་རྣམ་གཉིས་བཞད་ཅིང་ཕྱག་རྡེབ་མཛད༔ རྒྱལ་པོ་ཐུགས་མུག་མང་དུ་བཤུམས་པ་ཡིས༔ ཤ་ལྤགས་རུས་དིམ་བཞེས་པ་དུས་མི་འགྲོ༔ མཁན་སློབ་གཉིས་ལ་རྒྱལ་པོས་ཕྱག་ཕུལ་ནས༔ ཆོས་མེད་མཐའ་འཁོབ་བོད་ཡུལ་མུན་གླིང་འདིར༔ མི་ལ་སངས་རྒྱས་ཐོབ་པར་བྱ་དོན་དུ༔ སློབ་དཔོན་རྣམ་གཉིས་སྤྱན་དྲངས་ལྷ་ཁང་བཞེངས༔ བཞུད་པར་བཤོལ་བཏབ་ཆོས་གསུང་ཞུ་བ་ཕུལ༔ ཐུགས་རྗེས་དགོངས་ནས་བཞུགས་པར་བཀའ་ཡིས་གནང་༔ ཆོས་ཁྲིམས་བསྡམས་ནས་གང་འཚམ་བྱིས་པ་བསྡུས༔ སྒྲ་ཙམ་མི་ཤེས་ལོ་ཙཱ་མི་འཁྱུར་བས༔ ཆོས་བསྟན་མི་ཚུགས་ཇི་ལྟར་བྱ་ན་གསུངས༔ དུས་གསུམ་མཁྱེན་པ་སློབ་དཔོན་པདྨ་ཡིས༔ ཐབས་ཤིག་ཡོད་ཀྱི་རྒྱལ་པོ་ཐུགས་གློད་གསུངས༔ རྒྱ་གར་རྡོ་རྗེ་གདན་གྱི་ཆོས་གྲ་ནས༔ ཤཱཀྱ་ཐུབ་པའི་ཉེར་གནས་ཀུན་དགའ་བོ༔ ཚེ་འཕོས་ལོངས་སྐུའི་ཞིང་ཁམས་མང་ཉུལ་ནས༔ མི་ལུས་ཆོས་ལྡན་སྐྱེ་བདུན་ཐ་མ་ནི༔ གཙང་གི་སྙེ་མོ་བྱེ་མཁར་བྱ་བ་ཡི༔ གནས་གཞི་ཞིག་གི་བྲང་ཁང་དམིག་གུ་ན༔ ཕ་མིང་པ་གོར་ཧེ་འདོད་བྱ་བ་ལ༔ མ་མིང་བྲན་ག་བཟའ་སྒྲོན་སྐྱིད་ཀྱི་བུ༔ གན་ཇག་ཐང་ཏ་ཞེས་པ་ལོ་བརྒྱད་པ༔ ཕ་མ་གཉིས་ལ་བསླངས་ན་སྟེར་བར་མཆི༔ སྤྲུལ་པའི་ལོ་ཙཱ་རྩོད་མེད་གྲགས་པ་བྱུང་༔ དབུ་རུ་འཕན་ཡུལ་སྐ་བ་ས་ཞེས་བྱར༔ ཡབ་མིང་སྐ་བ་བློ་ལྡན་ཞེས་བྱ་དང་༔ ཡུམ་མིང་འབྲོ་བཟའ་རྡོ་རྗེ་ལྕམ་གྱི་བུ༔ ཤཱཀ་ཐུབ་ཉེར་གནས་ཙུནྡ་ཚེ་འཕོས་པ༔ སྐྱེས་མཆོག་སྐ་བ་དཔལ་བརྩེགས་ཞེས་བྱ་བ༔ ཕ་མ་གཉིས་ལ་བསླངས་ན་སྟེར་བར་མཆི༔ རུ་ལག་ཤངས་ཀྱི་དར་མ་སྒང་བྱ་བར༔ ཡབ་མིང་ཅོག་རོ་ཀླུ་ཡི་རྒྱལ་འབྱུང་དང་༔ ཡུམ་ནི་འབྲིང་བཟའ་མཛེས་མ་གཉིས་ཀྱི་བུ༔ དགེ་བསྙེན་ལིཙྪ་བྱི་ནི་ཚེ་འཕོས་པ༔ ཅོག་རོ་ཀླུ་ཡི་རྒྱལ་མཚན་ཞེས་བྱ་བ༔ ཕ་མ་གཉིས་ལ་བསླངས་ན་སྟེར་བར་མཆི༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལོ་ཙཱ་བ་གསུམ་ལུང་བསྟན་ནས་རྒྱལ་པོའི་ཐུགས་གསོས་པའི་ལེའུ་སྟེ་རེ་བརྒྱད་པའོ༔ ༔
པདྨ་བཀའ་ཐང་ལེའུ་ ༦༩ བཻ་རོ་ཙ་ན་གདན་དྲངས་པ།
དེ་ནས་རྒྱལ་བློན་དཔོན་གཡོག་བདུན་བྱས་ནས༔ རྐང་ཐང་ཉི་ཤུ་རྩ་ལྔ་རྟ་ཕྱིར་ཁྲིད༔ སྙེ་མོ་བྱེ་མཁར་གནས་གཞིའི་མདུན་དུ་བཞུགས༔ དེ་མིས་ཕྱག་དང་ཞེ་ས་མི་ཤེས་པས༔ མཇལ་བར་མ་ནུས་སྒོ་ཕྱིའི་རྒྱུ་འགྲུལ་ཆད༔ ཕྱེད་སྐད་དུས་ན་བྱིས་པ་ཐལ་སྐྱ་བྱུང་༔ ལུས་བསྐྱོད་ངག་གླུ་འབྲེང་པ་འཁོར་གཅིག་བཅིངས༔ རྒྱལ་པོའི་ཞལ་ནས་འདི་ལ་གཏམ་དྲིས་གསུངས༔ བློན་པོས་བྱིས་པའི་མདུན་ཕྱིན་ཁྲིད་ནས་འོངས༔ པ་གོར་ཧེ་འདོད་གཞི་རུ་ཡོད་དམ་དྲིས༔ ཡོད་པ་ཡོད་དེ་ད་ལྟ་གཏམ་ཚོལ་སོང་༔ བྲན་ཀ་བཟའ་སྒྲོན་སྐྱིད་དེ་ཤེས་སམ་དྲིས༔ ཤེས་པ་ཤེས་དེ་ད་ལྟ་མིག་ཚོལ་སོང་༔ སུའི་བུ་ཡིན་དྲིས་ཕ་ཡི་བུ་ཡིན་ཟེར༔ ཁྱོད་ཀྱི་ཕ་མའི་མིང་ལ་ཇི་སྐད་ཟེར༔ ཁྱོད་རང་མིང་ངོ་ཤེས་པ་དེ་ཀ་ཡིན༔ ཁྱོད་ཀྱི་ཁང་པ་གང་ཡིན་ཁྱིམ་ཡིན་ཟེར༔
དེ་ལ་རྒྱལ་པོ་དགྱེས་ཏེ་འདིར་ཤོག་གསུངས༔ ཕྱག་འཚོལ་བྱས་པས་ཁྱོད་ཀྱིས་སློབས་དང་ཟེར༔ བསླབས་པས་ཤེས་ནས་རྒྱལ་པོར་ཕྱག་བཙལ་ལོ༔ མགོ་ལ་ཕྱག་གིས་བྱིལ་བྱིལ་མཛད་ནས་སུ༔ སློབ་དཔོན་གསུངས་པའི་བུ་དེ་འདི་རང་ཡིན༔ ཁ་རྟགས་ལ་ཉེ་བཟང་ལ་སྤྱང་པོར་འདུག༔ ང་ཡི་ཕྱི་ལ་ཨེ་འགྲོ་གསུངས་པ་ཡིས༔ ཕྱིན་ཆོག་ཁྱོད་ཀྱི་རྟ་མཇུག་སྐྱོན་ཅིག་ཟེར༔ ཕ་དེས་ཆང་ཁུར་མ་དེས་མར་ནག་ཁུར༔ ཁྱིམ་དུ་སོང་བས་ཨ་ཏ་ཨ་མ་ཟེར༔ གཏམ་ཁུངས་ཆང་ཡིན་མུན་པ་མར་མེས་སེལ༔ གོ་བརྡ་འཕྲོད་ནས་བུ་དེ་རྟ་ལ་བསྐྱོན༔ རྐང་ཐང་ཉི་ཤུའི་དཀྱིལ་བཅུག་སྔོན་ལ་བཏང་༔ རྒྱལ་བློན་བཅུ་གཉིས་ཕྱི་ལ་ཐེན་བྱས་བསྡད༔ དེ་ནས་པ་གོར་ཧེ་འདོད་སྔོན་དུ་བྱུང་༔ རྒྱལ་བློན་འཁོར་བཅས་ནང་དུ་སྤྱན་དྲངས་ནས༔ ཞུགས་ཆེན་སྒྲོན་ནས་དྲུངས་མ་གསིངས་པོ་དྲངས༔ མངའ་བདག་འདིར་བྱོན་ཞབས་དོན་ཅི་བདོག་ཞུས༔ མངའ་བདག་རྒྱལ་པོས་འདིར་མཆིས་དོན་གཞན་མེད༔ ཁྱོད་ཀྱི་བུ་འདི་སློང་དུ་འོང་བ་ཡིན༔ ཅིས་ཀྱང་བུ་འདི་ང་ལ་བྱིན་ཅིག་གསུངས༔ ཕ་མ་གཉིས་ནི་ངུ་ཞིང་མ་དགའ་སྟེ༔ གཅིག་པུ་འདི་ལས་བུ་གཞན་ངེད་ལ་མེད༔ ལོ་ཡང་བརྒྱད་ལས་མ་ལོན་ཅི་མཛད་དགོངས༔ དེ་ནས་མངའ་བདག་རྒྱལ་པོས་བཀའ་སྩལ་པ༔ བོད་སྤྲུག་གཞན་གྱིས་ལོ་ཙཱ་མ་ཤེས་པས༔ ལོ་ཙཱ་བསླབས་ནས་བོད་དུ་ཆོས་བསྒྱུར་འཇུག༔ སློབ་དཔོན་ཆེན་པོ་པདྨས་ལུང་བསྟན་ཡིན༔ ཁྱོད་ཀྱི་བུ་འདི་མིན་པས་མི་འོང་གསུངས༔ པ་གོར་ཧེ་འདོད་ཤིན་ཏུ་སྔངས་ནས་སུ༔ རྒན་རྒོན་གཉིས་ལ་སྙིང་བརྩེ་གཅིག་པུ་འདི༔ རྒྱ་གར་ཡུལ་དུ་རྟོལ་ཀྱང་ག་ལ་རྟོལ༔ ལོ་བརྒྱད་ལོན་པས་ཆོས་བསྒྱུར་མི་འོང་ལགས༔ དེ་སྐད་མི་གསུང་ཞུ་ཞེས་ཕྱག་བཙལ་བས༔ རྒྱལ་པོའི་ཞལ་ནས་བུ་འདི་ལོ་གཞོན་ཡང་༔ ད་ལྟ་འདི་ཀ་བཞིན་དུ་གཏོང་བ་མིན༔ ལོངས་ནས་འགྲོ་བ་ཡོང་དུས་གཏོང་བ་ཡིན༔ རྒན་རྒོན་གཉིས་ཀྱི་སྐྱིད་སྡུག་ངས་ཤེས་གསུངས༔ བུ་འདི་ང་ལ་མི་སྦྱིན་མེད་ཐབས་མེད༔ དེ་ནས་བུ་བྱིན་ཡབ་ཡུམ་ཁྲིད་ནས་འོངས༔ ཡུལ་དབུས་གང་བཟང་འདོམས་ལ་སྡོད་ཅིག་གསུངས༔ ཡུལ་དབུས་གནམ་ལ་ཁ་བལྟས་ཡར་ཀླུངས་བཟང་༔ ཡབ་ཡུམ་ཡར་ཀླུངས་རོག་པ་རྩ་རུ་བཞག༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བཻ་རོ་ཙ་ན་གདན་དྲངས་པའི་ལེའུ་སྟེ་རེ་དགུ་པའོ༔ ༔
པདྨ་བཀའ་ཐང་ལེའུ་ ༧༠ སློབ་དཔོན་རྣམ་གཉིས་སོགས་ཀྱིས་ཆོས་བསྒྱུར་བ།
དེ་ནས་གན་ཇག་ཐང་ཏ་བསམ་ཡས་ཁྲིད༔ མཁན་སློབ་གཉིས་ཀྱི་དྲུང་དུ་བཞུགས་སུ་བཅུག༔ ལོ་བདུན་བར་དུ་དཀར་གསུམ་མངར་གསུམ་བྱིན༔ ཤེས་རབ་བསྐྱེད་ཐབས་བློ་འཕེལ་གཟུངས་སྒྲུབ་བཅུག༔ དེ་ནས་ལོ་ཙཱ་སྒྲ་རྣམས་མཁས་པར་བསླབས༔ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚན༔ རྒྱལ་པོས་འགུགས་པའི་ཕོ་ཉ་བཏང་ནས་བཀུག༔ ལོ་ཙཱ་སྒྲ་རྣམས་བསླབས་པས་མཁས་པར་ཤེས༔ དེ་ནས་རྒྱལ་པོས་སློབ་དཔོན་རྣམ་པ་གཉིས༔ བསམ་ཡས་སྒྲ་བསྒྱུར་གླིང་དུ་སྤྱན་དྲངས་ནས༔ གསེར་གྱི་ཁྲི་ལ་སློབ་དཔོན་པདྨ་བཞུགས༔ དངུལ་གྱི་ཁྲི་ལ་མཁན་ཆེན་བོ་དྷི་བཞུགས༔ གཡས་གྲལ་གཡོན་གྲལ་གབ་རྩེའི་གདན་གསུམ་ལ༔ བཻ་རོས་གཙོ་བྱས་ལོ་ཙཱ་རྣམ་གསུམ་བཞུགས༔ དགུང་གྲལ་གཞི་ལ་རྒྱལ་པོ་ཉིད་བཞུགས་ནས༔ སློབ་དཔོན་གཉིས་ལ་གསེར་གྱི་མཎྜལ་རེ༔ ཁྲུ་གང་པ་ལ་གསེར་གཡུའི་མེ་ཏོག་བཀོད༔ ལོ་ཙཱ་གསུམ་ལ་རཏྣའི་མཎྜལ་ཕུལ༔ རྒྱལ་པོས་ཕྱག་བཙལ་ཆོས་གསུང་ཞུ་བ་ཕུལ༔
ཨེ་མ་ཧོ༔ རྒྱ་གར་ཆོས་ཀྱི་ཡུལ་ནས་བྱོན་པ་ཡི༔ བོད་དུ་ཉི་ཟླ་ཟུང་ཞིག་ཤར་བ་གཉིས༔ མདོ་སྔགས་སྣོལ་མཚམས་མ་ལོག་གསུང་བར་ཞུ༔ ལོ་ཙཱ་གསུམ་གྱིས་བོད་སྐད་བསྒྱུར་བར་ཞུ༔ གསེར་ཕྱེ་ཀ་ཏོར་གང་གི་མེ་ཏོག་གཏོར༔ དེ་ནས་སློབ་དཔོན་པདྨ་འབྱུང་གནས་ཀྱིས༔ གླང་གི་ལོ་མཇུག་སྟག་གི་ལོ་འགོའི་བར༔ གསང་སྔགས་ཕྱི་པ་ཀྲཱྀ་ཡོག་སྡེ་གསུམ་རྒྱུད༔ ཅོག་རོ་ཀླུ་ཡི་རྒྱལ་མཚན་བསྒྱུར་ནས་གསུངས༔ གསང་སྔགས་ནང་པ་ཡོ་ག་རྣམ་གསུམ་རྒྱུད༔ བཻ་རོ་ཙ་ནས་ལོ་ཙཱ་བསྒྱུར་ནས་གསུངས༔ སྐུ་རིམ་ཕྱི་སྐོངས་རྒྱལ་པོའི་མདོ་བཅུ་བསྒྱུར༔ ཤེས་རབ་སྙིང་པོ་ཟབ་མོ་ལྟ་བའི་མདོ༔ འདའ་ཀ་ཡེ་ཤེས་ངེས་དོན་སྒོམ་པའི་མདོ༔ བཟང་པོ་སྤྱོད་པ་རྒྱ་ཆེན་སྨོན་ལམ་མདོ༔ རྡོ་རྗེ་རྣམ་པར་འཇོམས་པ་ཁྲུས་ཀྱི་མདོ༔ བྱང་ཆུབ་ལྟུང་བཤགས་ལས་སྒྲིབ་བཤགས་པའི་མདོ༔ གཙུག་ཏོར་ནས་བྱུང་གདུགས་དཀར་ཟློག་པའི་མདོ༔ གསང་བདག་གོས་སྔོན་ཅན་ནི་སྲུང་བའི་མདོ༔ མགོན་པོ་ཚེ་དཔག་མེད་པ་ཚེ་བསྲིང་མདོ༔ ནོར་གྱི་རྒྱུན་མ་ལོངས་སྤྱོད་སྤེལ་བའི་མདོ༔ ཡི་གེ་གཅིག་མ་སྙིང་པོའི་མདོ་རྣམས་བསྒྱུར༔ ནང་གི་སྐོངས་སུ་ན་རག་ཆ་ལག་དང་༔ གསང་བའི་སྐོངས་སུ་བསྙེན་བསྒྲུབ་ཆ་ལག་བསྒྱུར༔ དེ་ནས་རྒྱལ་པོའི་ཐུགས་དམ་མ་ཆག་པ༔ ཁ་ཏོན་དྲི་མེད་བཤགས་རྒྱུད་ཉིད་ལ་མཛད༔ ཟླ་རེ་བཞིན་དུ་དམ་སྐོངས་དོང་སྤྲུགས་མཛད༔ དགུང་ལོ་བཞི་བཅུ་ཞེ་དྲུག་ཚེ་དུས་ལ༔ མི་ལོ་བཅུ་གསུམ་སླར་ལ་བསྲིངས་པར་གྱུར༔ དེ་བར་ཆོས་ཀྱི་བསྒྱུར་ཚུལ་མང་ཡོད་ཀྱང་༔ འདི་རུ་ཡི་གེ་མངས་དོགས་མདོ་ཙམ་བསྡུས༔ བཀའ་འདུས་ཆོས་ཀྱི་རྒྱ་མཚོ་འཐུང་དུ་བཅུག༔ ཆོས་ཚན་བརྒྱ་དང་སུམ་ཅུ་སོ་བརྒྱད་བསྒྱུར༔ ཞི་བ་རྡོ་རྗེ་དབྱིངས་ཀྱིས་གཙོ་བྱས་ནས༔ བདེར་གཤེགས་འདུས་པ་བརྒྱ་དང་སུམ་ཅུ་ལྔ༔ གསང་སྔགས་ཕྱི་མདོ་བརྒྱ་དང་རྩ་གཅིག་བསྒྱུར༔ སྒྱུ་འཕྲུལ་སྡེ་བརྒྱད་བླ་མེད་དོན་རྫོགས་འདུས༔ གསང་སྔགས་བསྒྱུར་ཚུལ་མཁའ་ལ་ཉི་ཤར་འདྲ༔ དེ་ནས་མཁན་པོ་བོ་དྷི་ས་ཏྭ་དང་༔ སྐུ་གཅིག་མཚན་མང་བནྡེ་ཡེ་ཤེས་སྡེས༔ འདུལ་བ་ལུང་དང་ལུང་རྩ་སྡེ་བཞི་དང་༔ སྟོང་ཕྲག་བརྒྱ་པ་བྱམས་ཞུས་རྟག་ཏུ་ངུ་༔ མདོ་ཆོས་རྒྱས་འབྲིང་རྣམས་གསུམ་མ་ལུས་བསྒྱུར༔ ལངྐར་གཤེགས་པ་བམ་པོ་བཅོ་ལྔ་དང་༔ དཀོན་ཅོག་བརྩེགས་པ་སུམ་ཅུ་རྩ་ལྔ་དང་༔ ཕལ་པོ་ཆེ་ལ་བམ་པོ་ཉིས་བརྒྱ་བརྒྱད༔ མྱ་ངན་འདས་པ་བམ་པོ་བརྒྱ་བཅུ་གཉིས༔ ལས་འབྲས་དྲང་དོན་བསྟན་པའི་མདོ་རྣམས་བསྒྱུར༔ སྐ་བ་དཔལ་བརྩེགས་གསང་སྔགས་ཕྱི་པ་བསྒྱུར༔ བྱ་རྒྱུད་ཀྲཱྀ་ཡ་སྡེ་དྲུག་སྡེ་ལྔ་དང་༔ གཉིས་སྤྱོད་ཨུ་པ་ཡ་ཡི་རྒྱུད་བཞི་དང་༔ རྣལ་འབྱོར་ཡོ་གའི་རྒྱུད་སྐོར་མ་ལུས་བསྒྱུར༔ གཞུང་ཆེན་བམ་པོ་སུམ་བརྒྱ་མ་འགྱུར་རོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སློབ་དཔོན་རྣམ་གཉིས་དང་ལོ་ཙཱ་བ་གསུམ་གྱིས་ཆོས་བསྒྱུར་བའི་ལེའུ་སྟེ་བདུན་ཅུ་པའོ༔ ༔
པདྨ་བཀའ་ཐང་ལེའུ་ ༧༡ སད་མི་མི་བདུན་ལ་སོགས་རྒྱ་གར་དུ་བརྫངས་པ།
དེ་ནས་མངའ་བདག་རྒྱལ་པོའི་ཐུགས་དགོངས་ལ༔ སློབ་དཔོན་གཉིས་ཀྱིས་ལུང་གྲངས་མང་གསུངས་པས༔ དེ་དག་ཐམས་ཅད་བོད་དུ་ལེན་དགོས་བསམས༔ བློ་རྣོ་སྙིང་རུས་ཆེ་བའི་མཆོག་གྱུར་པ༔ ལོ་ཙཱ་བརྒྱ་དང་རྩ་བརྒྱད་ཚོལ་དགོས་སྙམ༔ མངའ་འོག་བོད་ཡུལ་རུ་བཞི་ཐམས་ཅད་ཀྱི༔ ལོ་བརྒྱད་ཡན་ཆད་བཅོ་བརྒྱད་མན་ཆད་ཀྱི༔ ལུས་ལ་སྐྱོན་མེད་སེམས་ལ་ཐག་མ་ཞུགས༔ བློ་གསལ་གཡེར་ཞིང་དྲན་པ་གཞུངས་མང་བསྡུས༔ འདི་དུས་ཙ་ན་བོད་ཁམས་ཐམས་ཅད་ཀྱི༔ སྐྱེ་མཆེད་དྭངས་པའི་ཕ་མ་སེམས་ཁྲལ་ཆེ༔ ལམ་འཇིགས་མང་ཞིང་སྲོག་མི་བརྟན་པས་བསུ༔ རྒྱ་གར་ཚད་པ་ཆུ་ནད་མིག་སེར་ཆེ༔ ལྐོག་རྔན་གཏོང་ཞིང་ཡུལ་འཁྱར་མཐའ་ལ་འབྲོས༔ དེ་དག་ཡུལ་གཞིས་རྒྱ་གར་འཁོར་ལ་སྟེར༔ ཡུལ་སྲེད་ཅན་རྣམས་རྒྱ་གར་མི་འཁོར་ཡང་༔ སྙིང་རུས་ཅན་གྱིས་རྒྱ་གར་འགྲོ་བ་ལ༔ ཡར་ཀླུངས་སྦ་མི་ཁྲི་གཞེར་སཾ་ཤི་ཏ༔
འཁོན་རྗེ་ཀླུ་དབང་སྲུང་བ་ཞང་སེ་བཙན༔ ཤུད་བུ་ཁོང་སླེབས་སྦ་ལོ་རཏྣ་དང་༔ རྨ་བན་རིན་ཅེན་མཆོག་དང་ཡར་ལྷ་བུ༔ འཕྱོས་ཀྱི་གཉགས་ཆེན་ཛྙཱ་ན་ཀུ་མཱ་ར༔ ཡོན་ཏན་སྙིང་པོ་ལེགས་སྦྱིན་ཉི་མ་དང་༔ ལྡན་མ་རྩེ་མང་ཨཱ་ཙཪྻ་ས་ལེ༔ བྲན་ཀ་མཱུ་ལ་ཀོ་ཥ་སྦས་ཐིར་ལེན༔ ཉང་བན་ཤ་མི་གོ་ཆ་ཨ་ནནྟ༔ གནུབས་སྟོན་ནམ་མཁའི་སྙིང་པོ་འདྲེ་རྒྱལ་བློ༔ རླངས་ཆེན་དཔལ་སེང་རུ་གྱོང་བཱི#་ར༔ གྲུ་གུ་ཨེ་བག་ལང་གྲོ་དཀོན་ཅོག་འབྱུང་༔ དྲན་པ་ནམ་མཁའ་མོན་བུ་རྒྱལ་བྱང་ཆུབ༔ བྱི་ཤྭ་མི་ཏྲ་ཁུ་བཙུན་འབྱུང་གནས་འོད༔ ཁྱུང་པོ་དབྱིག་བསོད་ངན་ལམ་རྒྱལ་མཆོག་དབྱངས༔ གནུབས་བན་སངས་རྒྱས་ཡེ་ཤེས་སྦས་གསལ་སྣང་༔ སྦ་ལོ་ཡེ་ཤེས་དབང་པོ་སྦ་དཔལ་དབྱངས༔ ཡེ་ཤེས་འཇམ་དབྱངས་ལྷ་ལུང་དཔལ་རྡོར་དང་༔ ཉང་ཁམས་གོ་ཆ་ལ་སུམ་རྒྱལ་བྱང་ཆུབ༔ སོག་པོ་དཔལ་ཡེ་ཨཱ་ཙར་ཡེ་ཤེས་དབྱངས༔ ཛྙཱ་ན་དེ་བ་ཀོ་ཥ་འགོས་ཆོས་གྲུབ༔ བྲན་ཀ་མུ་ཏི་ཀ་དང་ལོ་ཀི་ཆུང་༔ འོ་བྲན་དཔལ་གྱི་དབང་ཕྱུག་ཤམ་མེས་བཀོལ༔ ལྷ་ལུང་ཡུལ་སྐོང་མེ་ཏོག་བྱང་ཆུབ་འབར༔ ཞང་བན་ཛྙཱ་ན་ཤེས་རབ་ཡར་རྗེ་བརྩེགས༔ སྣ་ནམ་རྡོ་རྗེ་བདུད་འཇོམས་ཡེ་ཤེས་སྡེ༔ ཤཱཀྱ་པྲ་བྷ་ཨཱ་ཙར་དྷརྨཱ་ཤྲཱི༔ དེ་བ་སམྦྷ་དེ་བ་བྱང་ཆུབ་དང་༔ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚན༔ བཻ་རོ་ཙ་ན་ཆོས་ཀྱི་ལྷུན་པོ་དང་༔ རྩངས་བན་ལེགས་གྲུབ་དཔལ་འབྱོར་ལྷའི་ཟླ་བ༔ དེ་སོགས་བརྒྱ་རྩ་བརྒྱད་ལ་ལོ་ཙཱ་བསླབས༔ དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ ཐད་ཀ་ཐད་ཀར་མཐུན་རྐྱེན་ལགས་སྦྱར་ནས༔ བོད་ཀྱིས་སྡོམ་གསུམ་བསྲུང་བར་ཨེ་ཐུབ་སྙམ༔ ཁྲུས་ཁང་གླིང་དུ་མཁན་པོ་གདན་དྲངས་ནས༔ སྦ་མི་གསལ་སྣང་དཔལ་དབྱངས་རྒྱལ་མཆོག་དབྱངས༔ ལྷ་ལུང་དཔལ་རྡོར་རྨ་རིན་ལ་སུམ་རྒྱལ༔ མཁས་པ་བཻ་རོ་ཙ་ན་རབ་ཏུ་བྱུང་༔ སད་མི་མི་བདུན་བླ་ཡི་མཆོད་གནས་བཀུར༔ ནམ་མཁའི་སྙིང་པོ་གྲུ་གུ་ཨེ་བག་ཤ༔ རུ་གྱོང་བཱིརྱ་ངས་ཆེན་དཔལ་སེང་གེ༔ རྒྱལ་བའི་བློ་གྲོས་རྣམས་ཀྱང་རབ་ཏུ་བྱུང་༔ དབུ་ཡི་མཆོད་གནས་བཀུར་བར་བཀའ་ལ་བཏགས༔ སད་མི་མི་བདུན་དགེ་སློང་མི་ལྔ་ལ༔ དབུ་ལ་རིན་པོ་ཆེ་ཡི་པྲོག་ཞུ་བསྐོན༔ ཞལ་དུ་ལི་ཁར་ལྷ་ཡི་སྐྱེམས་དྲངས་ནས༔ འོ་སྐོལ་མཐའ་འཁོབ་བོད་ཀྱི་རྒྱལ་ཁམས་སུ༔ མདོ་སྔགས་བསྟན་པ་དར་བར་བྱ་བའི་ཕྱིར༔ རྒྱ་གར་ཡུལ་དུ་ཆོས་འཚོལ་གཏོང་བ་ཡིན༔ གསེར་གྱི་པ་ཏྲ་བདུན་དང་གསེར་བྲེ་དགུ༔ ཕྱག་ཏུ་སྣོམས་ལ་བོད་དུ་ཆོས་སྒྱུར་ཅིག༔ དེ་སྐད་གསུངས་ནས་རྒྱ་གར་ཡུལ་དུ་བརྫངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལོ་ཙཱ་བ་བརྒྱ་རྩ་བརྒྱད་བསྡུས་ཏེ་སད་མི་མི་བདུན་ལ་སོགས་རྒྱ་གར་དུ་བརྫངས་པའི་ལེའུ་སྟེ་དོན་གཅིག་པའོ༔ ༔
པདྨ་བཀའ་ཐང་ལེའུ་ ༧༢ བོད་ཀྱི་བཻ་རོ་ཙ་ན་མཇལ་ཕྲད་མཛད་པ།
དེ་ནས་ལྷོ་བྲག་རྩངས་རྗེ་ཐེ་ལེན་བུ༔ བློ་གསལ་རྩངས་སྔོན་ལེགས་གྲུབ་ཅེས་བྱ་བ༔ ཉི་ཤུ་རྩ་ལྔའི་ལོ་ལོན་སྒོམ་ཐོན་དང་༔ ཡ་རབས་བློ་དང་ལྡན་པའི་བཻ་རོ་གཉིས༔ སྔོན་ཞུགས་བྱས་པའི་སྔོན་ལ་རྒྱ་གར་ཕྱིན༔ ཟླ་བ་གཉིས་ན་རིགས་ངན་གཅན་འཕྲང་སླེབས༔ གཅན་འཕྲང་པ་ཡིས་མི་གསོད་གསེར་ཕྲོགས་པས༔ བཻ་རོ་ཙ་ནས་རྫུ་འཕྲུལ་བྱས་ནས་ཀྱང་༔ རིན་ཅེན་ཟ་མ་ཏོག་ཅིག་ནང་དུ་ནི༔ ལྕགས་ཀྱི་སྤུ་གྲི་ཞིག་ཏུ་སྤྲུལ་ནས་བསྡད༔ འཕྲང་སྲུང་ཀུ་མཱ་ར་ནི་ངོ་མཚར་སྐྱེས༔ ལེགས་གྲུབ་གསོད་འདོད་མཐའ་མི་སྤྱི་ཟླུམ་སྤྲུལ༔ གཅན་འཕྲང་པ་ཡིས་མ་སོད་ཀེ་རེ་ལུས༔ དེ་ནས་བཻ་རོ་ཙ་ནས་མགུར་གསུངས་པ༔ གསལ་ཁྱབ་ནམ་མཁའ་ལྟ་བུའི་ལུས་འདི་ལ༔ བསད་དང་མ་བསད་ཤི་དང་མ་ཤི་མེད༔ སྲོག་འདི་བཅད་ན་ཁྱོད་ལ་སྡིག་པ་འོང་༔ སྒྱུ་མའི་གསེར་ཕྱེ་རྔན་པ་འདི་བཞེས་ལ༔ ལམ་སྣ་ཇི་ལྟར་ཡིན་པ་བསྟན་དུ་གསོལ༔ དེ་སྐད་གསུངས་ནས་གསེར་ཕྱེ་ཚོམ་ཅིག་བྱིན༔ འཕྲང་སྲུང་དགའ་ནས་ས་ལམ་དྲང་པོར་བསྟན༔ དེ་ནས་རྒྱ་གར་རྡོ་རྗེ་གདན་དུ་བརྟོལ༔ རྒྱ་གར་ཡུལ་རྣམས་མ་ལུས་ཁྱི་བཞིན་འཁྱམས༔ ཕྲད་ཚད་མི་ལ་དམ་ཆོས་སུ་མཁས་དྲིས༔ རྒྱ་གར་མཁས་པ་ཉི་ཤུ་རྩ་ལྔ་རྙེད༔
པྲ་བརྟྟ་དང་ཤཱི་ལེནྡྲ་བོ་དྷི༔ ཛི་ན་མི་ཏྲ་ཛྙཱ་ན་སཱུ་ཏྲ་དང་༔ ཨཱ་ནནྟ་དང་སུ་རེནྡྲ་བོ་དྷི༔ དྷརྨཱ་ཤྲཱི་དཱ་ན་ཤྲཱི་ལ་དང་༔ ཙནྡྲ་གོ་མི་པཉྩ་ཛྙཱ་ན་དང་༔ ཀ་ན་ཀ་དང་ཤཱཀྱ་ཤྲཱི་པྲ་བྷ༔ པྲ་ཛྙཱ་ཝརྟྟ་ཀཱ་ལ་ག་ལ་བྷ༔ བི་མ་མི་ཏྲ་གུ་ཧྱ་བུདྡྷ་དང་༔ ཨཱརྱ་དེ་བ་ཀ་མ་ལ་ཤཱི་ལ༔ དྷརྨཱ་གཱིརྟི་ཤཱནྟ་དེ་བ་དང་༔ ཤྲཱི་བ་ལེ་དྷར་ཙི་ཏྲ་མ་ཎི་དང་༔ ཤཱནྟིདྒརྦྷ་ཤཱི་ལ་མཉྫུ་དང་༔ བུདྡྷ་གུཔྟ་ཉི་ཤུ་རྩ་ལྔ་འདི༔ སྐུ་ལ་ཁྲོ་བ་མི་མངའ་བྱང་ཆུབ་སེམས༔ པཎ་ཆེན་ཀུན་དང་མཇལ་ཚུལ་ཟུར་ཙམ་ནི༔ ཆུ་ལེན་པ་ལ་འཕྲིན་བསྐུར་ལན་མ་བྱུང་༔ ཏཱ་ལའི་ལོ་མར་སྒྲ་འདི་བྲིས་ནས་བསྐུར༔ མ་ཧཱ་ཀཱ་རུ་ཎ་བུདྡྷ་དྷརྨཱ་སངྒྷ་ཛྙཱ་ན་མོ་ཡ༔ བོ་དྷི་སཏྭ་ཀཱ་རུ་ཎ་ས་མ་ཡ༔ ཛྙཱ་ན་གརྦྷ་ཀུ་རུ་བྷ་སྨིན༔ ཞེས་བསྐུར་སྒྲ་ལ་མཁས་པ་རྣམས་ཀྱིས་བསྒྱུར༔ འཕགས་པའི་འཕགས་པ་བྱང་ཆུབ་སེམས་དཔའ་ཁྱོད༔ འགྲོ་བ་རིགས་དྲུག་བསོད་ནམས་མི་ལུས་སྐུ༔ རིན་ཅེན་འབར་བ་སྡེ་སྣོད་གསུམ་གྱི་དབྱིག༔ ཡིད་བཞིན་ནོར་ལྟར་ཐུགས་རྗེའི་སྟོབས་མཆོག་ཅན༔ གསལ་ཁྱབ་ཉི་མ་ལྟ་བུའི་སྐུ་ལུས་ལ༔ སྐྱེ་བ་བརྒྱུད་ནས་མི་ལུས་ཐོབ་པ་ཡི༔ བོད་ཀྱི་དགེ་སློང་དངོས་ངན་བདག་དངོས་ཀྱིས༔ སྒྲིབ་པ་སྦྱང་ཕྱིར་དཀོན་ཅོག་རིན་ཅེན་ལ༔ རྟག་པར་མཆོད་ཅིང་ཡུན་དུ་ཞབས་འཁོར་བས༔ མུན་པ་བསལ་ནས་བསོད་ནམས་ཚོགས་བསྐྱེད་ན༔ ཐུགས་རྗེ་མ་བསྐྱེད་སྨོན་ལམ་མ་དག་པས༔ འཕགསཔའི་བཞུགས་གནས་སེམས་ཅན་གནས་སུ་འགྱངས༔ སྟུག་པོའི་ཉི་ཞལ་འཕགས་པའི་འཐིབས་བསལ་འཁུམས༔ སྟོན་པའི་ཐུགས་རྗེའི་ཞགས་པས་གཟུང་གསོལ་གོ༔ དེ་ནས་སྒྲ་ལན་བསྐུར་བ་འདི་ལྟ་སྟེ༔ ས་མ་ཡ་ཨ་པཱ་ར་མི་ཏ་ཛྙཱ་ན༔ ཞེས་བྱ་བ་བསྐུར་བཻ་རོ་ཙ་ནས་བསྒྱུར༔ སྔོན་གྱི་དམ་ཚིག་ཆེན་པོས་བདག་བསྐུལ་ན༔ ཁྱོད་དང་མི་འཕྲད་པ་ཡི་རང་དབང་མེད༔ འགྲོ་བའི་སེམས་ཉིད་དེ་བཞིན་གཤེགས་པ་ཡིན༔ སྲིན་བུ་པདྨ་ཡན་ཆད་སངས་རྒྱས་རྒྱུ༔ རིགས་དྲུག་འགྲོ་བ་སངས་རྒྱས་མཉམ་གྱུར་ཡང་༔ འཕགས་པའི་འཕགས་པར་སྟོན་པ་ཁྱོད་ཀྱིས་རྙེད༔ དཀོན་ཅོག་རིན་ཅེན་བླ་མེད་མཆོད་གནས་ལ༔ བསྔགས་པ་མཐོང་ན་ཚིགས་རྣམས་སྐྱེ་བའི་རྒྱུ༔ སེམས་ཀྱི་རུས་པས་ཡན་ལག་ཐད་བཅད་ནས༔ དཀའ་བས་བྱོན་པ་བདག་ཀྱང་དགའ་བའི་མཆོག༔ ཤེས་པ་བསྡུར་ལ་ཁད་ཀྱིས་འཕྲད་བྱར་གོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱ་གར་གྱི་པཎ་ཆེན་ཉི་ཤུ་རྩ་ལྔ་དང་༔ བོད་ཀྱི་བཻ་རོ་ཙ་ན་མཇལ་ཕྲད་མཛད་པའི་ལེའུ་སྟེ་དོན་གཉིས་པའོ༔ ༔
པདྨ་བཀའ་ཐང་ལེའུ་ ༧༣ བཻ་རོ་ཙ་ནས་རྐང་མགྱོགས་བསྒྲུབས་པ།
དེ་ནས་གསེར་གྱི་པ་ཏྲ་གསེར་ཕྱེ་ཕུལ༔ བོད་ཀྱི་རྒྱལ་པོའི་ལོ་རྒྱུས་ཞིབ་ཏུ་བསྙད༔ དགེ་སློང་ཆེན་པོ་བོ་དྷི་སཏྭ་དང་༔ སྔགས་པ་པདྨ་འབྱུང་གནས་བོད་ན་བཞུགས༔ རྒྱུ་དང་འབྲས་བུ་གཉིས་ཀྱི་ཆོས་སྒོ་ནས༔ སངས་རྒྱས་བསྟན་པ་གཉིས་ལྡན་གསལ་བར་མཛད༔ རྒྱལ་པོ་རྒྱུ་འབྲས་ཆོས་ཀྱིས་མ་ཚིམ་ཞིང་༔ ཅི་ག་ལས་དང་ཉོ་ག་ཐོས་སོ་ལས༔ ལུང་དྲངས་པ་ཡི་ཆོས་ཚོ་ཚོལ་དུ་བཏང་༔ ཐུགས་ལ་གདགས་པར་ཞུས་པས་རབ་ཏུ་མཉེས༔ པཎ་ཆེན་རིམ་པ་བཞིན་དུ་ཆོས་བཀའ་བསྒོ༔ ལེགས་གྲུབ་ངོ་སོ་འདོད་ནས་སྔོན་ལ་སོང་༔ མ་དེ་མ་ཤིའི་གོང་དུ་ཆོས་འཆད་ཟེར༔ བསམ་པ་ལམ་ལུས་གཅན་འཕྲང་དམ་པོས་བསད༔ བཻ་རོ་ཙ་ནས་བསྡད་དེ་ཆོས་ལ་སྦྱངས༔ བླ་མས་ཚིམ་མམ་གསུངས་ཀྱང་མ་ཚིམ་ཞུས༔
ལག་པ་སྔས་བཅུག་ཁ་སྦུབས་ཉལ་ནས་བསྡད༔ ནའམ་གསུངས་པས་ན་ཞུས་ཅི་ན་གསུངས༔ བཻ་རོས་ན་བ་བཞི་ཡི་མགུར་འདི་གསུངས༔ བདག་ནི་མཐོང་སྟེ་མ་འཕྲད་རང་སེམས་ན༔ མྱོང་སྟེ་མ་ཚིམ་ད་དུང་རང་སེམས་ན༔ ཆ་ཙམ་ཐོས་ཏེ་མ་གོ་རང་སེམས་ན༔ ནད་ནི་རྫོགས་ཆེན་སེམས་སྡེ་མ་བུས་ན༔ ནད་དེ་མཐའ་རུ་ཕྱིན་པའི་སྨན་ཅིག་ཞུ༔ བླ་མ་དགྱེས་ཏེ་བདག་གིས་ཀུན་བསྟན་ན༔ ཁྱོད་ཀྱིས་ཅི་ལ་བརྡུགས་ནས་མ་བྱུང་གསུངས༔ བཻ་རོས་བརྡུགས་པ་བཅུ་ཡི་མགུར་འདི་གསུངས༔ ཕྱོགས་རིས་མེད་པའི་ལྟ་བ་དེ༔ ལ་ཤན་གཉིས་ཀྱི་འཕྲང་ལ་བརྡུགས༔ དུས་གསུམ་སངས་རྒྱས་དགོངས་པ་དེ༔ བྱིང་རྒོད་གཉིས་ཀྱི་འཕྲང་ལ་བརྡུགས༔ འབྲས་བུ་སྐུ་གསུམ་ལྷུན་གྲུབ་སྟེ༔ བརྡ་དོན་མ་འཕྲད་འཕྲང་ལ་བརྡུགས༔ རྫོགས་ཆེན་བྱ་བྲལ་ལྷུན་གྲུབ་སྟེ༔ དོན་དང་བྲལ་བའི་འཕྲང་ལ་བརྡུགས༔ སངས་རྒྱས་སྤྱོད་ཡུལ་རང་དབང་དེ༔ སྤྱི་བླུགས་ཚངས་པའི་དབང་ལ་བརྡུགས༔ སྤྱོད་པ་བླང་དོར་བྲལ་བ་དེ༔ འདོད་རྩོལ་གཉིས་ཀྱི་འཕྲང་ལ་བརྡུགས༔ ལམ་ལ་བགྲོད་དུ་མེད་པ་དེ༔ ལུང་རིགས་གཉིས་ཀྱི་འཕྲང་ལ་བརྡུགས༔ ཡེ་ཤེས་རང་བྱུང་ཟང་ཐལ་དེ༔ བག་ཆགས་འཐུག་པོའི་འཕྲང་ལ་བརྡུགས༔ མན་ངག་སེམས་སྡེ་མ་བུ་འདི༔ ཟུང་དུ་མ་འབྲེལ་འཕྲང་ལ་བརྡུགས༔ བཻ་རོ་ཙ་ན་འགྲོ་བ་ལ༔ འགྲོ་དང་འགྲོ་སྟེ་འཕྲང་ལ་བརྡུགས༔ ཞེས་གསུངས་བླ་མ་རབ་དུ་དགྱེས་པར་གྱུར༔ སྔར་གྱི་སྟེང་དུ་བྱང་སེམས་རྨད་བྱུང་བཤད༔ མདོ་རྩ་མདོ་ལུང་མདོ་འགྲེལ་ལ་སོགས་པ༔ རྫོགས་པ་ཆེན་པོ་སེམས་སྡེ་མ་བུ་བཤད༔ རྫོགས་པ་ཆེན་པོ་འཁོར་བ་རྩད་གཅོད་རྒྱུད༔ རྒྱ་མཚོ་ཀློང་དང་ཀློང་ཁྲ་ཀློང་ནག་བཤད༔ མན་ངག་ཐུགས་ཐག་ཆོད་པ་མང་པོ་གནང་༔ བློ་ལ་ཟིན་ཚད་བཟུང་ཞིང་མ་ཟིན་རྣམས༔ ཏ་ལའི་ལོ་མར་བྲིས་ནས་ཡང་ཆས་བྱས༔ དེ་ནས་བོད་དུ་འགྲོ་བར་དགོངས་པ་ལ༔ གུ་རུས་ཁྱོད་ཀྱི་གྲོགས་པོ་ལེགས་གྲུབ་གུམ༔ ཁྱོད་ཀྱང་བསད་འགྲོ་རྐང་མགྱོགས་སྒྲུབས་ཤིག་གསུངས༔ རྐང་མགྱོགས་མཁན་པོ་ཀུ་མཱ་ར་ལ་ཞུས༔ ཀུ་ཤ་ལྕགས་ཀྱི་སྡོང་པོ་ཅན་གནས་སུ༔ རེ་ཏཱི་ལྕགས་ཀྱི་དྲེའུ་རྟ་རྐང་གསུམ་བསྒྲུབས༔ ཡུལ་དེའི་མི་རྣམས་ཁྱོད་འདིར་ཅི་བྱེད་ཟེར༔ ལན་དུ་བཻ་རོ་ཙ་ནས་མགུར་འདི་གསུངས༔ བདག་ནི་ལོ་ཙཱ་བཻ་རོ་ཙ་ན་སྟེ༔ དམིགས་མེད་མཁའ་ལྟར་དག་པ་ཆོས་ཀྱིས་ཀྱི་དབྱིངས༔ བདེ་ཆེན་འདུ་འབྲལ་མེད་པའི་ཀློང་དཀྱིལ་ནས༔ ཡ་མཚན་རྨད་བྱུང་བདག་གི་ལུས་འདི་རྙེད༔ མཁའ་ཀློང་རྣམ་དག་ཆོས་ཀྱི་དབྱིངས་ནས་འོངས༔ འཇིག་རྟེན་འདི་ཡི་དགོས་པའི་གཏམ་བགྱིས་ཏེ༔ ཀུན་གཞི་མ་བཅོས་བདེ་ཆེན་ལྷུན་རྫོགས་པའི༔ མཁའ་ལྟར་དག་པའི་བྱང་ཆུབ་སེམས་ཉིད་འདི༔ རིག་པའི་ཀློང་ནས་ཐུགས་རྗེའི་ཉི་མ་ཤར༔ དུས་གསུམ་རྒྱལ་བའི་དགོངས་པ་བདག་གིས་རྙེད༔ སྐྱེ་མེད་མི་དམིགས་ཡི་གེ་ཨ་གཅིག་ལས༔ དགོངས་པའི་དོན་དུ་བྱ་བ་དེ་ལས་མེད༔ ཨ་ནི་ཡེ་ནས་མི་དམིགས་སྐྱེ་མེད་དེ༔ སྐྱེ་མེད་ཆོ་འཕྲུལ་དགོས་དགུ་འབྱུང་བའི་ཕྱིར༔ དེ་ལས་བྱུང་བའི་དོན་ནི་འདི་རྣམས་སོ༔ ནོར་ནི་མ་མཆིས་མཁས་པའི་མན་ངག་འཆང་༔ བླ་མ་མ་མཆིས་པཎ་ཆེན་ཉི་ཤུ་ལྔ༔ འཁོར་ནི་མ་མཆིས་ལྷ་སྲིན་སྡེ་བརྒྱད་བསྐོར༔ ཆུང་མ་མ་མཆིས་ཀུན་ཏུ་བཟང་མོ་ཡིན༔ གྲོགས་ནི་མ་མཆིས་མ་མོ་མཁའ་འགྲོའི་གྲོགས༔ རྟ་ནི་མ་མཆིས་ཚོགས་བརྒྱད་ཡིད་ཀྱི་རྟ༔ བུ་ནི་མ་མཆིས་རིག་པའི་ཡེ་ཤེས་བུ༔ ལྷ་ནི་མ་མཆིས་རང་སེམས་དོན་གྱི་ལྷ༔ མཐུ་ནི་མ་མཆིས་དུག་གསུམ་རྩད་ནས་གཅོད༔ རྟེན་ས་མ་མཆིས་དོ་ནུབ་རྟེན་ས་མཛོད༔ ཅེས་གསུངས་འདུས་པའི་ཚོགས་རྣམས་ཡི་རང་བྱུང་༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བཻ་རོ་ཙ་ནས་ཀུ་ཤ་ལྕགས་སྡོང་དུ་རྐང་མགྱོགས་བསྒྲུབས་པའི་ལེའུ་སྟེ་དོན་གསུམ་པའོ༔ ༔
པདྨ་བཀའ་ཐང་ལེའུ་ ༧༤ བཻ་རོ་ཙ་ན་བོད་དུ་འབྱོན་པར་ཆས་པ།
དེ་ནས་རྐང་མགྱོགས་གྲུབ་སྟེ་ཆས་རྣམས་ཁུར༔ ཡུལ་ད་ཀོ་ཤ་ཙནྡན་གླིང་དུ་བྱོན༔ ད་ཀོའི་རྒྱལ་པོ་རཱ་ཧུལ་བྱི་བྱི་འོངས༔ རས་ཀྱི་པར་ཀ་ཏ་ཞིག་གུས་ཕུལ་ནས༔ བོད་ཀྱི་བནྡེ་སྐྱེ་མེད་ཆོས་བྱ་བ༔ ཇི་ལྟ་བུ་ལ་ཟེར་བ་གསུངས་དང་ཟེར༔ པར་ཏ་སྐུ་ལ་གསོལ་ནས་མགུར་གསུངས་པ༔ བདག་ནི་རྣམ་པར་སྣང་མཛད་དེ༔ འགྲོ་བ་རྣམ་པ་སྣ་ཚོགས་ལ༔ གསལ་བྱའི་ཉི་མ་བྱ་དགོངས་ནས༔ དཀའ་བ་བཅུ་དྲུག་དཀའ་ལས་བགྱིས༔ སྒྱུ་མའི་ཕུང་པོ་ལུས་བཤིག་ནས༔ སྟོན་པའི་ཐུགས་རྗེ་བདག་ལ་ཤར༔ ཀུན་ལ་སྣང་བར་མཛད་པས་ན༔ མིང་ཡང་རྣམ་པར་སྣང་མཛད་ཡིན༔ མིང་དང་དོན་དུ་བདག་མཐུན་ཏེ༔ ཆོས་དབྱིངས་མཁའ་ལྟར་དག་པའི་གཏིང་རྫོགས་པས༔ སངས་རྒྱས་ངོ་བོར་མ་གྱུར་གཅིག་ཀྱང་མེད༔ སྟོན་པའི་ཞལ་སྐྱིན་བདག་གིས་བཤད་པ་འདི༔ རྒྱལ་པོའི་ཐུགས་ལ་དགོངས་ལ་བག་ཙམ་ཉོན༔ དམིགས་སུ་མེད་པའི་བྱང་ཆུབ་སེམས༔ གཟུང་དང་འཛིན་པ་གཉིས་དང་བྲལ༔ ཐ་སྙད་ཚིག་གི་སྒྲ་སྤངས་ནས༔ དེ་ཉིད་གསལ་ལ་མ་ཡེངས་པ༔ སྐྱེ་བ་མེད་པའི་ཆོས་དབྱིངས་ཡིན༔ དགོངས་པའི་དོན་དུ་དེ་བཞག་གོ༔ དེ་ཉིད་མ་ནོར་བསྒོམ་པ་ན༔ སྐྱེ་བ་ཕྱི་མ་མི་ལེན་ངེས༔ ཞེས་གསུངས་རྒྱལ་པོ་རབ་ཏུ་མཉེས་གྱུར་ནས༔ འཕགས་པ་བྱམས་སྐུ་གསེར་ལས་བྱས་ཤིག་ཕུལ༔ དེ་ནས་བོད་དུ་འགྲོ་བར་ཆས་པ་ལ༔ རྒྱལ་བློན་པཎྜི་ཏ་ཀུན་རྨི་ལྟས་ལོག༔ གྲོང་ཁྱེར་སེར་སྐྱའི་ཤཱི་ལ་ནཱ་ལེནྡྲའི༔ སྒོ་དྲུང་ཚོགས་ནས་བགྲོས་ཤིང་པྲ་མོ་ཕབ༔ ཡ་གི་རྫོགས་པ་ཆེན་པོ་མན་ཆད་ནས༔ མ་གི་ཉན་ཐོས་ཐེག་པ་ཡན་ཆད་ཀྱི༔ མདོ་སྔགས་ཆོས་རྣམས་བོད་དུ་ཁྱེར་བས་ལན༔ དེ་ནས་རྐང་མགྱོགས་བཏང་སྟེ་གསོད་པར་བྱས༔ རྐང་མགྱོགས་མཁན་པོས་བཻ་རོའི་གན་དུ་བརྒྱུགས༔ མཁས་པ་བདུན་པོའི་རྨི་ལམ་བཟླས་པ་ནི༔ ཀྱེ༔ གྲོགས་པོ་བྱང་ཆུབ་སེམས་དཔའ་སྙན་གསོན་དང་༔
རྒྱལ་པོ་ཀུཀྐུ་རཱ་ཛ་འདི་སྐད་ཟློ༔ ཐེག་པའི་རྒྱལ་པོ་མན་ངག་བདེ་ཆེན་འདི༔ རྡོ་རྗེའི་ཡང་ཐེག་མན་ངག་དོན་གྱི་བླ༔ ཚེ་གཅིག་འབྲས་བུ་ཐོབ་པའི་མན་ངག་ཆོས༔ གབ་པའི་མན་ངག་སེམས་ལ་སྦས་པ་ལས༔ དགོངས་པའི་ཉམས་སུ་བདག་ལ་འདི་ལྟར་བྱུང་༔ ཀུན་ལ་སྙོམས་པའི་ཉི་མ་མཆིས་པ་ལས༔ ས་བརྒྱད་བྱང་ཆུབ་སེམས་དཔའི་སྤྲུལ་པ་ནི༔ སྒྲིབ་པ་སྦྱངས་པའི་གནོད་སྦྱིན་མགོ་ཅན་གཉིས༔ འོ་སྐོལ་རྒྱ་གར་ཡུལ་དུ་མཆིས་པ་ལས༔ ཉི་མ་སྨིན་ཕྲག་བཅུག་ནས་ཁྱེར་བ་རྨིས༔ རྡོ་རྗེ་གདན་གྱི་མན་ངག་མ་ཤོར་རམ༔ པཎྜི་ཏ་ཡིས་རྐང་མགྱོགས་ལ་འུར་ཐོང་༔ དེ་སྐད་གསུངས་ནས་སྤྱན་སྔར་མཆིས་པ་ལགས༔ དངོས་གྲུབ་ཐོབ་ནས་ད་ནི་གཤེགས་པར་རིགས༔ འཇམ་པའི་དཔལ་བཟང་ནོར་བུ་ཁྱེར་བ་རྨིས༔ བདག་ཉིད་མ་ཡི་མིག་ཕྱུང་ཁྱེར་བ་རྨིས༔ ཤྲཱི་སིངྷའི་སྙིང་ཕྱུང་ཁྱེར་བ་རྨིས༔ ཀུན་དགའ་མོ་ཡིས་བྱང་ཆུབ་ཤིང་བཅད་ནས༔ བོད་དུ་ཁྱེར་བ་རྨིས་པ་ལ་སོགས་བཤད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བཻ་རོ་ཙ་ནས་རྐང་མགྱོགས་བསྒྲུབས་ནས་བོད་དུ་འབྱོན་པར་ཆས་པའི་ལེའུ་སྟེ་དོན་བཞི་པའོ༔ ༔
པདྨ་བཀའ་ཐང་ལེའུ་ ༧༥ བཻ་རོ་ཙ་ནས་ཆོས་གསུངས་པ་ལ་ཕྲ་མ་བྱུང་བ།
དེ་ནས་བཻ་རོ་ཙ་ནས་ལན་བཏབ་པ༔ མི་རུ་སྐྱེས་པས་སྐྱེ་བ་གཞན་ལས་འཕགས༔ སྨོན་ལམ་དག་པས་རྒྱ་གར་ཡུལ་དུ་བརྟོལ༔ དངོས་གྲུབ་ཐོབ་པས་རྫུ་འཕྲུལ་རྐང་མགྱོགས་གྲུབ༔ བླ་མ་མཆོད་ལས་ཆོ་རིགས་བཙུན་པར་སྐྱེས༔ དམ་ཚིག་བསྲུངས་པས་འདི་རུ་བསམ་དགུ་གྲུབ༔ སྒྲིབ་པ་བྱང་བས་མཁས་པའི་བཀའ་བགྲོས་པ༔ གཞུང་ལུགས་བཟང་པོ་ཀུན་གྱིས་བསྟན་པར་འཁུར༔ དགོས་དགུ་ལུས་ལ་ཚང་བས་བདག་གིས་གྲོགས་སུ་བཙལ༔ ལུས་སྲོག་ཕ་མས་བསྐྱེད་ཀྱང་སྲིད་སྲོག་གྲོགས་པོས་བཏོན༔ ཁྱོད་དང་འགྲོགས་པས་བདག་གིས་ཡང་དག་བྱང་ཆུབ་བརྙེས༔ བོད་ཀྱི་རྒྱལ་ཁམས་མ་རིག་མུན་པ་ཀུན་སེལ་བས༔ འགྲོ་བ་ཇི་ལྟར་སྨིན་ཅིང་གྲོལ་བར་བྱ་བའི་དོན༔ ཀུ་མཱ་ར་ལ་དགེ་བའི་རྩ་བ་ཡོངས་སུ་བསྔོ༔ རྐང་མགྱོགས་ལེགས་པར་གྲུབ་པས་ད་ནི་བདག་ཀྱང་འགྲོ༔ བལ་ཡུལ་ཙམ་དུ་སྙིང་གཏམ་བཟླ་ཡི་གྲོགས་པོས་སྐྱོལ༔ ཞེས་གསུངས་གསེར་གྱི་པ་ཏྲ་གཅིག་བྱིན་ནོ༔ དེ་ནས་ཀུ་མཱ་ར་ཡིས་གཅན་འཕྲང་བསྒྲལ༔ འཕྲང་སྲུང་པ་ལ་བརྔན་པ་བྱིན་ནས་བཀྲོལ༔ རྐང་མགྱོགས་བྱུང་ནས་བནྡེ་འདྲི་བ་ན༔ མ་མཐོང་གནོད་སྦྱིན་ཤ་བའི་ཡིབ་ཞུ་ཅན༔
གླང་འཁར་སྐྱ་བོ་ལག་ན་ཐོགས་ཤིག་སོང་༔ ད་ཙམ་བོད་ཡུལ་མཐིལ་དུ་སླེབ་བགྱིས་ཤིག༔ ཀུ་མཱས་མནའ་དག་བཅུག་ནས་སེར་སྐྱར་བརྒྱུགས༔ བོད་བན་གསོད་བྱས་རྐང་མགྱོགས་ཟླ་སྦྲན་འོངས༔ གཅན་འཕྲང་པར་དྲིས་ངག་བཅུག་བཞིན་དུ་ཟེར༔ དེ་ནས་བཻ་རོ་ཙ་ན་བལ་ཡུལ་སླེབས༔ གསེར་སྐུ་འཕགས་པ་ཤིང་ཀུན་ལ་ཕུལ་ནས༔ འབུལ་བ་བཞེས་པའི་ཆེད་དུ་མགུར་འདི་གསུངས༔ སྒྲིབས་རྐྱེན་མི་མངའ་དུས་གསུམ་རྒྱལ་བའི་སྐུ༔ ཐུགས་རྗེའི་བཀའ་བཙན་འཛམ་གླིང་ནམ་མཁའ་འདྲ༔ སྟོན་པའི་ཐུགས་རྗེ་ཕྱོགས་ལྷུང་མི་མངའ་ཡང་༔ འཁོར་བའི་ལམ་ནི་མཐའ་མེད་རྒྱ་མཚོ་འདྲ༔ ཐུགས་རྗེས་འཁོར་བའི་རྒྱ་མཚོ་སྐེམ་པའི་ཕྱིར༔ དུས་གསུམ་རྒྱལ་བའི་སྐུ་ལ་བཟོད་པར་གསོལ༔ ཞེས་པའི་མགུར་གསུངས་འཕགས་པའི་སྐུ་ཕུལ་ལོ༔ དེ་ནས་བོད་དུ་བྱོན་པའི་ལམ་ཀ་རུ༔ རྒྱ་གར་བརྟན་མ་རེ་ལྕམ་ཁ་བ་བཏང་༔ བཀའ་འདི་བདེན་བརྫུན་བརྟག་པའི་མགུར་གསུངས་པ༔ དུས་གསུམ་སངས་རྒྱས་རང་གི་སེམས་ཉིད་དེ༔ སྐྱེ་ཤི་མེད་པ་དུས་གསུམ་སངས་རྒྱས་སོ༔ ཡ་རབས་བློ་དང་ལྡན་པའི་སྐལ་ལྡན་ལ༔ སེམས་ཀྱི་ཉི་མ་གསལ་བར་བྱ་བའི་ཕྱིར༔ བསམ་པ་བཟང་པོ་གསེར་དང་འདྲ་བ་ཡིས༔ བོད་ཀྱི་ཡུལ་ནས་རྒྱ་གར་ཡུལ་བར་ལ༔ དཀའ་བ་བཅུ་དྲུག་བསྡོས་ནས་མན་ངག་བཙལ༔ དཀའ་བ་གཅིག་གིས་བར་དུ་མ་ཆོད་པས༔ བཀའ་འདི་བདེན་ན་ཁ་བ་འདི་ཆོད་ཅིག༔ ཅེས་གསུངས་རེ་ལྕམ་ལྷ་མོ་དམར་མོའི་ཚུལ༔ སྤྲིན་གསེབ་སྐུ་བསྟན་ཕྱག་བྱས་བྲན་ཁས་བླངས༔ དེ་ནས་བསམ་ཡས་བྱོན་པས་རྒྱལ་པོ་ཉིད༔ ཟ་འོག་གུར་ཁྱིམ་འདབ་ན་བཞུགས་པ་ལ༔ བཻ་རོས་རྗེ་དང་མཇལ་པའི་འཕྲིན་བསྐུར་བས༔ རྒྱལ་པོ་དགྱེས་ནས་ལམ་ལ་སྣ་ལེན་མཛད༔ བཻ་རོས་གུར་འདབ་བྱང་ངོས་སློག་ནས་བྱོན༔ རྗེ་ཡིས་བཀའ་སྩལ་དམ་ཆོས་ལོན་ནས་བདོག༔ རྒྱ་གར་ཕྲག་དོག་ཕྲ་མར་མི་གསན་ཞུ༔ གསོལ་བས་རྒྱལ་པོ་དམ་ཆོས་ལོན་པས་དགྱེས༔ དབུ་སྐྲ་ཐེམ་པར་བཀྲམ་ནས་ནང་སྤྱན་དྲངས༔ འབངས་ནས་ཡར་བཏོན་དབུ་ཡི་མཆོད་གནས་མཛད༔ རྒྱལ་པོའི་ཆིབས་པ་མཚའ་ལུ་མེ་སྟག་ལ༔ སྟག་ལྤགས་སྟན་སྟེང་སེང་ལྡེང་སྒ་བསྟད་ནས༔ གསེར་གྱི་སྲབ་བཅུག་གཡུ་ཡི་མཐུར་བཏགས་ཕུལ༔ རྒྱལ་པོ་ཁྲི་སྲོང་ལྡེའུ་བཙན་ཕྱག་བཙལ་ནས༔ ཀྱེ་ཧོ༔ དགོངས་ཤིག་སློབ་དཔོན་ལགས༔ མཚའ་ལུ་མེ་སྟག་འོད་ཟེར་འཕྲོ༔ ཁྲ་བོ་སྟག་གི་སྒ་སྟན་བསྟད༔ གསེར་གྱི་སྲབ་ལ་གཡུ་ཡི་མཐུར༔ ཁྲི་སྲོང་ལྡེའུ་བཙན་གུས་པས་འབུལ༔ བཻ་རོ་ཙ་ནས་རབ་བཞེས་ལ༔ ལྟ་བའི་རྒྱལ་པོ་བཤད་དུ་གསོལ༔ ཞེས་ཞུས་བཻ་རོ་ཙ་ན་ཡིས༔ ལྟ་བའི་རྒྱལ་པོ་ནམ་མཁའ་ཆེ༔ དུད་འགྲོའི་རྒྱལ་པོ་རྟར་མི་འཚོང་༔ དུད་འགྲོའི་རྒྱལ་པོ་རྟར་བཙོངས་ན༔ དུས་གསུམ་རྒྱལ་བའི་ཐུགས་ཀྱིས་ཁྲེལ༔ ཞེས་གསུངས་བཤད་པར་མ་བཞེས་སོ༔ དེ་ནས་གསེར་དངུལ་ཕྱག་མང་ཕུལ་ནས་ཞུས༔ ནམ་གྱི་གུང་ལ་གསང་སྔགས་ཆོས་རྣམས་གསུངས༔ ཉིན་པར་དུས་སུ་མདོ་ཆོས་མང་དུ་བསྒྱུར༔ བར་སྐབས་མན་ངག་ཟབ་དགུའི་ཆོས་རྣམས་གསུངས༔ དེ་ཡང་མན་ངག་ཆོས་རྣམས་གོས་དཔེར་བླངས༔ ནམ་མཁའ་ཆེ་ནི་ལེགས་པའི་སྟོད་གུར་ལ༔ ཡུལ་རྣམས་ཀུན་ལ་འཇུག་པའི་ཤམ་བུ་བཏགས༔ ཁུ་བྱུག་དང་ནི་རྩ་ཆེན་ཕུ་དུང་ལ༔ བྱང་སེམས་དོན་གྲུབ་གོང་བས་བརྒྱན་ནས་བཤད༔ རྒྱུད་ལུང་ཆོས་ལ་གཤིན་རྗེའི་གཏམ་རྒྱུད་དང་༔ རིན་ཅེན་འོད་རྒྱུད་དབང་བསྐུར་རྒྱལ་པོའི་རྒྱུད༔ ནམ་མཁའ་ཆེ་ལ་སོགས་པའི་རྒྱུད་ལྔ་དང་༔ རྨད་དུ་བྱུང་བ་ཀུན་བྱེད་རྒྱལ་པོ་དང་༔ མདོ་བཅུ་དང་ནི་རྒྱ་མཚོའི་ཀློང་རྣམས་བསྒྱུར༔ ནང་སྔགས་ཏནྟྲ་སྡེ་ནི་བཅོ་བརྒྱད་སོགས༔ མ་ཧཱ་ཡོ་གའི་རྒྱུད་སྡེ་བཅུ་དྲུག་བསྒྱུར༔ བཻ་རོ་ཙ་ན་ཉིད་ཀྱིས་མཛད་པའི་ཆོས༔ སྙན་བརྒྱུད་ཐུགས་ཀྱི་སྙིང་ཁུ་ལ་སོགས་གསུངས༔ དེ་ལྟར་ཆོས་གསུང་འདུག་པ་རྒྱ་གར་ཐོས༔ རྒྱ་གར་པཎྜི་ཏ་ཡིས་ཕྲག་དོག་བྱས༔ བོད་ལ་ཐེ་ཙོམ་སྐྱེད་པའི་ངན་སྒྲོག་བཏང་༔ བོད་ཀྱི་བནྡེས་དམ་ཆོས་མ་རྙེད་པར༔ ཁྲོ་ཆུ་ཕྲ་མེན་ངན་སྔགས་མང་པོ་ཁྱེར༔ བོད་ཕུང་འགྲོ་བས་བཀའ་ཁྲིམས་སྦྱོར་ཅིག་ཟེར༔ བོད་རྣམས་ཕྲ་མ་སྔ་བཙན་དགའ་བ་དང་༔ རྒྱལ་པོའི་བློན་ཕྱེད་བོན་བློན་ཡིན་པ་དང་༔ བོན་ཆོས་གཉིས་པོ་ཆགས་སྡང་ཆེ་བ་ཡིས༔ རྒྱལ་པོས་བོན་སྤྱུགས་ཆོས་ཀྱི་ཁ་བཟུང་བས༔ བོན་གྱི་བློན་པོ་ལི་སྟག་ཆེན་པོ་དང་༔ བོན་བློན་ཆེ་བ་ལི་ཐི་ཁྲ་མི་ཡིས༔ བློན་པོ་བསྡུས་ནས་རྗེ་ལ་གྲོས་བཏབ་བྱས༔ པ་གོར་གན་ཇག་ཐང་ཏ་བྱ་བ་འདིས༔ ཚོལ་དུ་བཏང་བའི་ཆོས་ནི་མ་རྙེད་པར༔ མི་གཉིས་བཏང་བས་ལེགས་གྲུབ་ལམ་དུ་བསད༔ བོད་ཡུལ་ཕུང་པའི་ངན་སྔགས་ཁྱོངས་འདུག་པས༔ རྒྱལ་པོ་ཕོ་བྲང་བཞུགས་ལ་དགྲ་མི་འོང་༔ བསླུ་བ་མཁན་གྱི་ནག་ཉེས་ཅན་འདི་སོད༔ མེ་ཆུ་ང་གི་ཁྲིམས་ཀྱིས་ཚར་གཅོད་ཞུ༔ རྒྱལ་པོས་མི་བདེན་ཕྲག་དོག་ཡིན་བརྗོད་པས༔ བོན་བློན་རྣམས་ཀྱིས་ཡང་ནས་ཡང་གཏུགས་ཏེ༔ རྒྱལ་པོས་ཆུ་ལ་བསྐུར་བར་ཞལ་གྱིས་བཞེས༔ གཡོར་ཕྱོགས་གྲ་བའི་ལྡོམ་བུ་པ་ཞིག་བཟུང་༔ བཻ་རོ་ཙ་ནའི་ཞྭ་གོས་ལྷམ་བསྐོན་ནས༔ འཕྲལ་ལ་དགོས་པའི་འཚོ་བ་ཟས་སྐོམ་བསྐུར༔ བསམ་ཡས་རྐ་ཆུའི་འོག་ནས་རྗེ་ཡིས་བོས༔ ཀྭའི༔ ང་ཡི་བོད་འབངས་ཐམས་ཅད་འདིར་འདུས་ཤིག༔ དེ་སྐད་བརྗོད་པས་ཐམས་ཅད་འདུས་པ་དང་༔ ཕྲ་མེན་ངན་སྔགས་མཁན་པོ་གསོད་བྱས་ཏེ༔ ཆུ་ལ་བསྐུར་བ་འདི་ཉིད་ཡིན་ནོ་གསུངས༔ དམངས་རྣམས་དྲུང་དུ་ཉེ་བར་མ་གྱུར་གོང་༔ ཟངས་གཉིས་ཁ་སྦྱར་ནང་དུ་སྤྲང་པོ་བཅུག༔ ཁ་ལ་ལྕགས་གཟེར་བཏབ་ནས་ཆུ་ལ་བསྐུར༔ དེ་ནས་བློན་འབངས་ཡིད་གཉིས་ཐེ་ཚོམ་ནས༔ བཻ་རོ་མིན་རིའི་དབུ་སྙུང་བཞེས་དགོས་ཟེར༔ དེ་ནས་ཆོས་རྒྱལ་ཁྲི་སྲོང་ལྡེའུ་བཙན་གྱིས༔ མི་དེ་བཻ་རོ་མིན་རི་བྲག་བཙན་དཔང་༔ དེ་ནས་བློན་པོ་ཐམས་ཅད་ཁོ་ཐག་ཆད༔ མཁས་པ་བཻ་རོ་ཙ་ནའི་ཐུགས་དགོངས་ལ༔ ང་ཡི་གླུད་དུ་མུ་ཏོ་སྡུག་གེ་སོང་༔ སྙིང་རྗེས་མ་བཟོད་སྨོན་ལམ་རྒྱ་ཆེར་བཏབ༔ བཻ་རོ་ཙ་ནས་སྦྱངས་པའི་ཡོན་ཏན་གང་༔ དེ་དག་སྤྲང་པོའི་ཡུལ་དུ་རྒྱས་པར་ཤོག༔ སྐབས་སུ་མཁས་པ་སྤྲུལ་སྐུར་འབྱོན་གྱུར་ཅིག༔ སྤྲང་པོ་མིས་བཟུང་བསྟེན་པའི་ཡུལ་ཕྱོགས་དེར༔ བཀྲ་ཤིས་བདེ་ལེགས་ལོངས་སྤྱོད་འབྱོར་ལྡན་ཤོག༔ སྤྲང་པོ་འོལ་ཀ་མཁར་ལྟག་ཁོལ་མར་ཆགས༔ དེ་ཉིད་ཁོལ་གྱི་བདག་པོ་ཞིག་གིས་རྙེད༔ ནང་དུ་ཅི་འདུག་བལྟས་པས་བཙུན་པ་བྱུང་༔ ཁོལ་བདག་ཁོ་རང་བུ་བྱས་ཁྱིམ་ཕོག་པས༔ འོལ་ཀ་རྒྱུག་ཐང་ལྡོམ་མིའི་གྲོང་ཚོ་ཆགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བཻ་རོ་ཙ་ནས་ཆོས་གསུངས་པ་ལ་ཕྲ་མ་བྱུང་བའི་ལེའུ་སྟེ་དོན་ལྔ་པའོ༔ ༔
པདྨ་བཀའ་ཐང་ལེའུ་ ༧༦ བཻ་རོ་ཙ་ནས་མགུར་གསུངས་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ བཻ་རོ་ཙ་ན་གཞན་གྱིས་མཐོང་དོགས་ནས༔ རྒྱལ་པོ་ཉི་མ་བསྲོ་བའི་གདུགས་ཁང་གི༔ བྱ་ཁང་ཀ་བའི་ལོགས་ལ་ཆོལ་བྲུས་ཏེ༔ དེ་ལ་ཕྱོགས་བཞིར་ཀ་བ་བཞི་བཙུགས་ནས༔ དེ་ཡི་ནང་དུ་བཻ་རོ་ཙ་ན་བཞུགས༔ དེ་ནས་འབངས་ལ་མར་ནག་ཁྲལ་བཀལ་ནས༔ མཚན་མོ་གསང་སྔགས་རྡོ་རྗེའི་ཐེག་པ་བསྒྱུར༔ ཉིན་པར་མཚན་ཉིད་ཐམས་ཅད་བསྒྱུར་དུ་བཅུག༔ དེ་ཡི་དུས་ན་མངའ་བདག་རྒྱལ་པོ་ཉིད༔ ནུབ་ཀྱི་རེས་ལ་གར་སོང་ཆ་མེད་ནས༔ ཇོ་མོ་ཚེ་སྤོང་བཟའ་བ་དམར་རྒྱན་གྱིས༔ མིག་སེར་ཆེ་བས་བུད་མེད་གཞན་ཡོད་བསམ༔ རྒྱལ་པོའི་ཕྱིར་འབྲངས་གང་དུ་གཤེགས་བལྟས་པས༔ གློ་འབུར་ནང་དུ་སློབ་དཔོན་ཚ་དྲོ་དྲངས༔ ཞྭ་ཐོད་ཕུད་ནས་བཀུར་སྟི་བྱེད་པ་མཐོང་༔ བཻ་རོ་ཙ་ནས་མདོ་བསྔོ་གསུང་བ་ཐོས༔ བཙུན་མོས་བལྟས་དང་རྒྱལ་པོའི་སྤྱན་ཟུར་འདྲེས༔ བཙུན་མོས་བློན་འབངས་ཀུན་ལ་བཤད་ཀྱིས་དོགས༔ རྒྱལ་པོས་བལྟས་བྱས་བདས་པས་མོ་མ་ཟིན༔ དེ་དུས་དམག་ལ་འགྲོ་ན་ཟངས་དུང་འབུད༔ ཚ་དྲོའི་དུས་སུ་དུང་དཀར་འབུད་པ་དང་༔ གཎྜཱི་བརྡུངས་ན་ཆོས་ལ་སྤྱོན་ཟེར་ཡིན༔ རྔ་བོ་ཆེ་བརྡུངས་འདུན་མར་འདུས་ཤིག་ཟེར༔ དམར་རྒྱན་རྔ་བོ་ཆེ་ལ་བརྡུངས་པ་ཡིས༔ ཕྱི་བློན་ནང་བློན་གྲོས་དབང་ཐམས་ཅད་འདུས༔ འདུས་པ་རྣམས་ལ་ཇོ་མོས་འདི་སྐད་བརྗོད༔ ཆུ་ལ་བསྐུར་དེ་སྤྲང་པོ་ཡིན་འདུག་པས༔ ངན་ཐབས་མཁན་དེ་ཕུགས་ན་སྦས་ནས་འདུག༔
བོད་ཕུང་མི་དགའ་རྗེ་ལ་གྲོས་ཐོབ་སོད༔ དེ་སྐད་ཟེར་བའི་རྒྱུ་མཚན་དམར་རྒྱན་གྱིས༔ བཻ་རོ་ཙ་ན་ནན་ཏར་མཚར་དྲགས་པས༔ ཇོ་མོས་དུས་བཏིང་སློབ་དཔོན་མ་བྱོན་ནས༔ དེ་ཡི་སྙིང་ནད་བྱས་པ་ཡིན་ནོ་སྐད༔ དེ་ནས་ཕྱི་བློན་ནང་བློན་བཅུ་བཞི་ཡིས༔ གྲོས་ལ་དབང་བའི་འདུན་གྲོས་མཁན་ཚོ་བསགས༔ འབངས་འཁོར་ཡོངས་ནི་ཇོ་མོ་བདེན་ཞེས་ཟེར༔ མངའ་བདག་དྲུང་དུ་ལྷ་བཟང་ཀླུ་དཔལ་བཏང་༔ འབངས་རྣམས་ཡོ་འབོག་ལྕང་མེའི་ཐང་ལ་ཚོགས༔ རྗེ་ལ་ཞུ་བ་བདོག་པས་སྐུ་བསྐྱོད་ཞུས༔ དེ་ནས་རྒྱལ་པོས་འབངས་ཀྱི་གསེབ་ཏུ་བྱོན༔ འབངས་རྣམས་རྗེ་ལ་ཞུ་བ་འདི་བཞིན་བྱེད༔ མངའ་བདག་རྒྱལ་པོ་ཉིད་ལས་ཅོལ་ཆུང་བ༔ ལྷ་ཁང་བཞེང་ཟེར་མི་ཚོ་སྡུག་ཏུ་འཇུག༔ ལྷ་ཡིན་ཟེར་ནས་གསེར་ཚོ་འཇིམ་པར་བྱུགས༔ ཆོས་བསྒྱུར་ཟེར་ནས་ངན་སྔགས་དུག་སྦྱོར་སློབ༔ བླ་མ་ཡིན་ཟེར་འབངས་ལ་ལྷ་ཕྱག་འཚལ༔ འཕན་གདུགས་མཛད་ཟེར་དར་ཟབ་དུམ་བུར་གཏུབས༔ ཆོས་མཛད་ཟེར་ནས་སྤྲང་པོ་ཆུ་ལ་བསྐུར༔ གདུགས་ཁང་ཡིན་ཟེར་བོད་ཕུང་སྦེད་ས་བྱེད༔ ཆོས་དང་ཅིའི་ཆོས་ད་དུང་བནྡེ་སོད༔ དེ་སྐད་གསོལ་བས་རྒྱལ་པོ་མ་དགྱེས་ཏེ༔ རྒྱ་བོད་ལོ་ཙཱ་མཁས་པ་གཅིག་པུ་འདི༔ བློན་འབངས་ཀུན་གྱིས་གསོད་དགོས་ཁར་ཐོན་པ༔ ཞེས་གསུངས་ས་རྡབ་རྡོ་རྡབ་ཐལ་མོ་བརྡབས༔ ཐུགས་བརྡུངས་ཞལ་དུ་ས་འགམས་སྨྲེ་སྔགས་བོས༔ ཀླུ་དཔལ་ལ་སོགས་གྲོས་དབང་གྲོས་བྱས་ནས༔ བོད་ཕུང་འཇུག་པའི་བནྡེ་མི་གསོད་ན༔ རྒྱལ་པོར་ཡོ་ལོག་བཏང་ནས་འདོན་པར་བྱས༔ གློ་འབུར་ནང་ནས་བཻ་རོ་སྒོར་ཕྱུང་སྟེ༔ རྒྱལ་པོས་སློབ་དཔོན་ཕྱག་ལ་འཇུས་ནས་བཤུམས༔ དེ་དུས་མཁས་པ་བཻ་རོ་ཙ་ན་ཡིས༔ དཀའ་བ་བཅུ་དྲུག་བཅད་པའི་མགུར་འདི་གསུངས༔ ཐུགས་རྗེ་ལྡན་པའི་ཁྲི་སྲོང་ལྡེའུ་བཙན་གྱིས༔ དམ་ཆོས་ཚོལ་བའི་བདག་པོར་བདག་བསྐོས་ནས༔ གྱོན་པར་དཀའ་བའི་གསེར་གྱི་པ་ཏྲ་གྱོན༔ བགྲོད་པར་དཀའ་བའི་རྒྱ་གར་ཡུལ་དུ་བགྲོད༔ འཛེག་པར་དཀའ་བའི་མཐའ་ལམ་གཟར་མོ་འཛེགས༔ གཤག་པར་དཀའ་བའི་ཁ་བ་བུ་ཡུག་གཤགས༔ སོས་པར་དཀའ་བའི་མཐའ་ནད་མིག་སེར་སོས༔ བཟའ་བར་དཀའ་བའི་མཐའ་ཟས་མང་པོ་ཟོས༔ མཐོང་བར་དཀའ་བའི་མཁས་པའི་ཞལ་རྣམས་མཐོང་༔ ཤེས་པར་དཀའ་བའི་སྡེ་སྣོད་མང་པོ་ཤེས༔ ཐོས་པར་དཀའ་བའི་བྱང་སེམས་རྣམ་ལྔ་ཐོས༔ གནང་བར་དཀའ་བའི་ཐུགས་ཀྱི་མན་ངག་གནང་༔ རྟོགས་པར་དཀའ་བའི་རང་བྱུང་ཡེ་ཤེས་རྟོགས༔ འཕྲད་པར་དཀའ་བའི་དྲག་སྔགས་ཀུན་དང་ཕྲད༔ འགྲུབ་པར་དཀའ་བའི་འཕགས་པ་འཇམ་དཔལ་གྲུབ༔ ཐོབ་པར་དཀའ་བའི་རྐང་མགྱོགས་དངོས་གྲུབ་ཐོབ༔ གྱོན་པར་དཀའ་བའི་ཟོམ་ལྷམ་ཕྱིར་ལོག་གྱོན༔ ཐར་བར་དཀའ་བའི་གཅན་འཕྲང་གསོད་ལས་ཐར༔ དོ་ཤི་དོ་ཆད་ཡང་ནས་ཡང་དུ་བྱས༔ རྟོལ་བར་དཀའ་བའི་བོད་ཡུལ་དབུས་སུ་བརྟོལ༔ འདི་ལ་སུ་མོས་ཐུགས་རྗེ་ཤར་བར་སྨོན༔ དེ་སྐད་གསུངས་པས་མངའ་བདག་རྒྱལ་པོ་ཡིས༔ བློན་འབངས་རྣམས་ཀྱི་དེ་ལྟར་མ་ཡིན་ཏེ༔ འུ་ཅག་སྔོན་ཡང་དེ་འདྲས་འཁོར་བར་འཁྱམས༔ བསད་པས་མི་འོང་མཐའ་ལ་སྤྱུགས་ཀྱི་ཟེར༔ སློབ་དཔོན་ཆིབས་པ་བཟང་པོ་ཞིག་ལ་བསྐྱོན༔ གསེར་དངུལ་ཇས་བཀང་ཆིབས་གོང་གཤེགས་སྐྱེམས་དྲངས༔ སློབ་དཔོན་གང་ལ་འབྱོན་པར་དགྱེས་ཞུས་པས༔ སློབ་དཔོན་ཞལ་ནས་རྒྱལ་མོ་ཚ་བའི་རོང་༔ ཚེ་རབས་སྔ་མའི་ལས་འཕྲོ་ཞིག་ཡོད་པས༔ རྒྱལ་མོ་ཚ་བའི་རོང་དུ་འགྲོ་བར་ཞུ༔ རྗེ་ཡིས་ག་པུར་ལ་སོགས་བསིལ་སྨན་བསྐུར༔ རྒྱལ་བློན་འཁོར་བཅས་ཀུན་གྱིས་སྐྱེལ་དུ་ཕྱིན༔ དབུ་རུ་ཀྱི་ཚང་ལ་ཀ་བརྒལ་བའི་དུས༔ སློབ་དཔོན་འགྱོད་མཆིས་བདུན་གྱི་མགུར་འདི་གསུངས༔ ཟ་ཧོར་ཡུལ་ནས་བྱོན་པའི་མཁན་པོ་ཞི་བ་འཚོ༔ ཨུ་རྒྱན་ཡུལ་ནས་བྱོན་པའི་པདྨ་འབྱུང་གནས་དཔལ༔ རྒྱ་གར་མཁས་པ་པཎ་ཆེན་ཉི་ཤུ་རྩ་ལྔ་ལ༔ འདི་ན་མཆིས་པའི་བཻ་རོ་ཙ་ནས་ཕྱག་འཚལ་ལོ༔ ལོ་བརྒྱད་ལོན་ནས་ལོ་ཙཱ་བསླབས་པའི་མཐའ་འདིར་མཆིས༔ བཅོ་ལྔ་མན་ཆད་སྐད་སྣ་སྟོང་དང་དྲུག་བརྒྱ་སྦྱངས༔ རྒྱ་གར་གསང་མཛོད་བརྟོལ་ནས་དམ་ཆོས་བོད་དུ་བསྒྱུར༔ བོད་ཀྱི་མུན་སེལ་ཁྲི་གདུགས་ཉི་མ་འདྲ་བ་སྤྱུགས༔ གོ་རྟོགས་བློའི་བདེ་འབྱེད་ཚེ་འགྱོད་པའི་དུས་ཤིག་མཆིས༔ བཅོ་ལྔ་ལོན་ནས་ལྔ་བཅུ་རྩ་བདུན་མ་ལོན་པར༔ འགྲོ་བ་མི་འདོར་ཕྱིར་དུ་རྒྱ་གར་ཡུལ་ཀུན་འགྲིམས༔ བོད་ཀྱི་རྒྱལ་ཁམས་ཐམས་ཅད་དཀར་པོར་ཡོངས་བསྒྱུར་ཏེ༔ ཕུང་པོ་ཡོན་ཏན་བརྒྱན་པ་བོད་ཀྱི་བནྡེ་སྤྱུགས༔ བོད་སྤྲུག་རྒྱ་གར་འཁོར་ཚེ་འགྱོད་པའི་དུས་ཤིག་མཆི༔ བོད་སྐད་མ་བྱང་ལོ་ཙཱ་ཤེས་པ་ག་ལ་སྲིད༔ རི་མཐོ་ས་གཙང་ཁ་བ་ཅན་གྱི་རྒྱལ་ཁམས་འདིར༔ མི་རྗེ་ལྷས་མཛད་འདོད་ཡོན་ཕུན་སུམ་ཚོགས་གྱུར་ཀྱང་༔ རིན་ཅེན་གསེར་གླིང་གསེར་གྱི་ངང་ཁྱུ་ཚོགས་པ་ན༔ དངོས་མཆིས་སྤྲུལ་སྐུ་ལྟ་བུའི་བྱང་ཆུབ་སེམས་དཔའ་འདི༔ ངང་མོ་གཅིག་པུར་རྒྱལ་མོ་ཚ་བའི་རོང་དུ་སྤྱུགས༔ མདོ་སྔགས་འཆད་ཉན་བྱེད་ཚེ་འགྱོད་པའི་དུས་ཤིག་མཆི༔ ཐུན་མོང་དངོས་གྲུབ་གྲུབ་པའི་ཡ་མཚན་མང་པོ་འབྱུང་༔ རྗེ་འབངས་ཐམས་ཅད་སྙན་གསང་སྤྱན་གསལ་ཐུགས་དངས་ཀྱང་༔ རྒྱ་གར་ཆོས་སྐད་སཾ་སྐྲྀ་ཏ་ཡི་སྐད་མི་གོ༔ ཆོས་གཞི་གཙུག་ལག་ཁང་ནི་རྒྱ་ཆེར་བཞེངས་གྱུར་ཀྱང་༔ སྦྱངས་པ་ཅན་གྱི་བཻ་རོ་ཙ་ན་མཐའ་ལ་སྤྱུགས༔ ཆེ་བའི་ཡོན་ཏན་དྲན་ཚེ་འགྱོད་པའི་དུས་ཤིག་མཆི༔ ལས་དཀར་སྤྱད་ཀྱང་ནག་པོར་འགྲོ་བའི་རྗེ་འབངས་རྣམས༔ དམ་ཆོས་སྤྱོད་ཀྱང་ོམ་པས་མ་ཁྱེར་བཻ་རོ་ཙ་ན་ཙམ༔ སངས་རྒྱས་འཕགས་པའི་ཐུགས་རྗེ་ཕུན་སུམ་ཚོགས་གྱུར་ཀྱང་༔ རང་རྒྱུད་མི་དགེས་རྒྱགས་པའི་བདུད་རིགས་རྒྱས་གྱུར་པས༔ ཡིད་ལ་ཅི་བསམ་འགྲུབ་བམ་རྗེ་འབངས་ཐུགས་ལ་ཞོག༔ དག་པའི་མཁན་སློབ་འབྱོན་ཚེ་འགྱོད་པའི་དུས་ཤིག་མཆི༔ བོད་དུ་དམ་ཆོས་ཉི་མ་ལན་ཅིག་ཤར་བ་འདི༔ ཕྱི་བློན་ནང་བློན་བཙུན་མོར་བཅས་པས་བསྣུབ་པར་བྱེད༔ མ་མྱོང་དགུ་མྱོང་ཤི་བ་མ་མྱོང་ཙམ་གྱི་མི༔ ཆགས་མེད་གཅིག་པུར་འགྲོ་བའི་བཻ་རོ་ཙ་ན་ང་༔ སྣང་ཚད་ཆོས་སྐུར་རྟོགས་པས་རྫོགས་ཆེན་དོན་དང་ལྡན༔ སྡོམ་གསུམ་རྒྱུ་འབྲས་ཤེས་པས་མདོ་སྔགས་དོན་དང་ལྡན༔ དགོས་འདོད་ཀུན་འབྱུང་རིན་ཆེན་ཕུང་པོ་འདྲ་བ་སྤྱུགས༔ སྐུ་ཕྱིར་མ་འཁོར་ཙ་ན་འགྱོད་པའི་དུས་ཤིག་མཆི༔ ཞེས་གསུངས་རྒྱལ་མོ་ཚ་རོང་གདུལ་བྱར་གཟིགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བཻ་རོ་ཙ་ནས་མགུར་གསུངས་པའི་ལེའུ་སྟེ་དོན་དྲུག་པའོ༔ ༔
པདྨ་བཀའ་ཐང་ལེའུ་ ༧༧ བཻ་རོ་ཙ་ན་རྒྱལ་མོ་ཚ་བའི་རོང་དུ་སྤྱུགས་པ།
དེ་ནས་རྒྱལ་པོས་ཕྱག་བཙལ་སྨྲེ་སྔགས་གདུངས༔ འབངས་ཚིས་བྱས་པས་ཡོན་མཆོད་འབྲལ་དགོས་བྱུང་༔ བདག་ལ་བརྩེ་བའི་ཞལ་ཏ་ཚིག་གསུམ་ཞུ༔ སློབ་དཔོན་ཞལ་ནས་རྗེ་ལ་ཕྱག་ཐོང་གསུངས༔ ང་ཡང་མ་ཤི་རྗེ་ཉིད་སྐུ་ཁམས་བཟང་༔ སྨོན་ལམ་དག་པས་མྱུར་དུ་མཇལ་དུས་འདེབས༔ རྒྱ་གར་ཡུལ་གྱི་གྲོང་ཁྱེར་སེར་སྐྱ་ན༔ རྒྱལ་པོ་ཨིནྡྲ་བོ་དྷིའི་བླ་མཆོད་པ༔ པཎ་ཆེན་ལྔ་བརྒྱའི་དབུས་ན་མཁས་པ་ནི༔ བི་མ་མི་ཏྲ་བུདྡྷ་གུ་ཧྱ་གཉིས༔ བོད་དུ་སྤྱན་དྲོངས་དད་མོས་གསོལ་བ་ཐོབ༔ དེ་དུས་ང་ཡིས་ཆོས་འདི་གཏུག་ཏུ་བཏང་༔ གཞན་ཡང་པཎྜི་ཏ་ནི་མང་དུ་བོས༔ ཆོས་ལ་བཟང་ངན་མ་བྱེད་ཐམས་ཅད་བསྒྱུར༔ ཞེས་གསུངས་རྒྱལ་མོ་ཚ་བའི་རོང་དུ་གཤེགས༔ ལུང་པ་ནགས་རོང་རྒྱལ་མོ་ཚ་བའི་ཡུལ༔ མི་ཀུན་བོད་ཀྱི་རྟོག་ཅན་བྱུང་ཟེར་ནས༔ རྒྱལ་པོ་མདོ་གཞེར་ནག་པོའི་བུ་ངག་བཅུག༔ སྲས་པོ་དཔལ་གཞེར་བཙན་པས་སྔན་བྱས་ཏེ༔ ཚ་བའི་ཤོད་དུ་སྦལ་པའི་དོན་དུ་བསྐྱུར༔ ༔ ཞག་གསུམ་ལོན་ནས་ཡུལ་མི་བལྟ་རུ་བྱུང་༔ དེ་དུས་བཻ་རོ་ཙ་ནས་མགུར་གསུངས་པ༔ ཡུལ་ཕྱོགས་འདིར་གནས་རྒྱལ་བློན་དྲ་མ་རྣམས༔ བཅོ་ལྔ་ལོན་ནས་ལྔ་བཅུ་རྩ་བདུན་དུ༔ ཐེག་པའི་རྒྱལ་པོ་འབྲས་བུ་སངས་རྒྱས་ཆོས༔ རྒྱ་གར་མཁས་པ་ཉི་ཤུ་རྩ་ལྔ་ཡིས༔ བསྟན་པའི་མན་ངག་བོད་དུ་མཆིས་ལགས་ཏེ༔ བོད་ཁམས་ཕུང་དུ་ཐོ་བའི་བློན་པོ་དང་༔ དམ་ཚིག་ཉམས་ཤིང་སྨྱོ་བའི་དམར་རྒྱན་གྱིས༔ བཙད་པོ་སྤྱོ་སླ་ཕྲ་མའི་ཚིག་གིས་སྤྱོས༔ བོད་ཀྱི་མི་ལ་མཁས་པ་བདག་སྤྱུགས་མོད༔ ཚེ་གཅིག་འབྲས་བུ་ཐོབ་པའི་མན་ངག་དང་༔ འགལ་བྱེད་ཆམ་ལ་འབེབས་པའི་དྲག་སྔགས་དང་༔ རིན་ཅེན་ཕུང་པོ་ཀུན་གྱི་བསྟན་བཅོས་རྣམས༔ བོད་ཀྱི་བནྡེའི་ལུས་ལ་མཆིས་ལགས་ཀྱིས༔ འཇིགས་སྐྲག་སྦལ་བའི་དོང་ནས་དབྱུང་དུ་གསོལ༔ ཞེས་གསུངས་རྒྱལ་པོ་མདོ་གཞེར་ནག་པོ་ཡིས༔ བོད་ཀྱི་རྒྱལ་པོ་སྤུར་རྒྱལ་བཙན་པོ་འདི༔ སྲ་ཚན་ཆུང་ལ་བྱ་ལས་མང་བ་སྟེ༔ ཆུང་མ་ལེན་ན་མཐའ་མའི་ཁོལ་མོ་ལེན༔ བཀའ་བློན་བྱེད་ན་ཉོན་མོངས་ཆེ་དགུས་བྱེད༔ ཟས་སུ་ཟ་ན་ཤ་ཆེན་སྣ་དགུ་ཟ༔ གོས་སུ་གྱོན་ན་མཐའ་ཡི་མོན་གོས་གྱོན༔ ནོར་དུ་བསྲེལ་ན་རྡོ་ལ་གཅེས་སྤྲས་འཛིན༔ ལས་སུ་བྱེད་ན་དམག་དང་ཇག་དཔོན་བྱེད༔ ལྷ་རུ་བསྟེན་ན་གནོད་སྦྱིན་སྲིན་པོ་བསྟེན༔ གྲོགས་པོ་ཚོལ་ན་གདུག་ཅན་ཀླུ་བདུད་ཚོལ༔ ཐོ་ཕྱི་མི་མཐོང་རྒྱང་མིག་ལྟ་བས་ན༔ སྲིན་པོ་གདོང་དམར་རྒྱལ་པོ་འདོད་པ་ཅན༔ གློ་བ་ཆེ་རྒྱུ་མ་མཆིས་བྷ་ཤི་ཁྱོད༔ བློན་པོ་ཆེ་བཙུན་རྣམས་ཀྱི་བཀའ་བགྲོས་ལ༔ སྦལ་པའི་དོང་ནས་ཤིག་གི་དོང་དུ་བསྐྱུར༔ ཞག་བདུན་ཚུན་ཆད་དམག་དཔུང་མ་བྱུང་ན༔ ཁྱོད་ཀྱི་བཀའ་སྩལ་གཙོར་བགྱི་སྤྱི་བོར་འཁུར༔ དེ་སྐད་ཟེར་ནས་སྦལ་པའི་དོང་ནས་བཏོན༔ ཚ་བའི་རོང་གི་ཤིག་དོང་ནང་དུ་བསྐྱུར༔ མི་ཤིག་ཁྱི་ཤིག་ར་ལུག་འདྲེ་ཤིག་པ༔ འཇུ་བ་བྱ་འཇུ་སྦྲང་ཆུང་དོང་དུ་བསྐྱུར༔ དེ་ནས་ཞག་བདུན་ཡུལ་མི་བལྟ་རུ་བྱུང་༔ ཅི་ཡང་མ་ཉེས་ཟིལ་པ་ཕྲོམ་མེར་འདུག༔ ཉེས་བྱས་བཟོད་པར་གསོལ་ཞིང་བཤགས་པ་བྱས༔ དེ་ནས་བཻ་རོ་ཙ་ནས་མགུར་གསུངས་པ༔ སྐྱེ་བ་འདི་ཡི་གོང་རོལ་ཏུ༔ ཡུལ་ཁམས་འདི་ཡི་ནེའུ་ལེར་སྐྱེས༔ སྦྲུལ་དང་སྦལ་པ་མང་པོ་འཆོས༔ དེ་ཡི་རྣམ་སྨིན་འདི་རུ་བྱུང་༔ ལན་ཆགས་དེ་ཡིས་འཁོར་གྱུར་ཅིག༔ སྐྱེ་བ་འདི་ཡི་གོང་རོལ་ཏུ༔ དགེ་སློང་པཱུརྞྞའི་ལུས་བླངས་ཏེ༔ ཆོས་གོས་ཤིག་ཟ་བྱ་འཐུར་བཅུག༔ དེ་ཡི་རྣམ་སྨིན་འདི་ལ་བྱུང་༔ ལན་ཆགས་དེ་ཡིས་འཁོར་གྱུར་ཅིག༔ ཅེས་གསུངས་ཡུལ་མི་རྣམས་ཀྱིས་སྐྱེ་བ་སྔོན༔ དགེ་སློང་པཱུརྞྞ་ཡིན་པར་ངོ་ཤེས་ནས༔ རྒྱལ་པོའི་ཕོ་བྲང་གདན་དྲངས་བཤགས་པ་བྱས༔ རྒྱལ་མོ་གཡུ་སྒྲ་རེ་མ་ཏཱིའི་སྤྲུལ་པ༔ རྣལ་འབྱོར་དུར་ཁྲོད་བདག་མོས་མགུར་བཞེངས་པ༔ བོད་ལ་མི་མེད་རྒྱལ་པོ་འདོད་པ་ཅན༔ སྐྱེ་མང་མཁྱེན་པའི་བྱང་ཆུབ་སེམས་དཔའ་ཁྱོད༔ འགྲོ་བའི་དོན་ལ་འཛམ་བུའི་གླིང་དུ་བྱོན༔ ཁྱད་པར་དུ་ཡང་སྲིན་པོ་གདོང་དམར་རྗེ༔ བོད་ཀྱི་དོན་མཛད་བློན་པོ་ནག་པོ་རྣམས༔ འདུལ་བའི་དུས་ལ་མ་བབ་འདིར་བྱོན་ཏེ༔ བྱང་ཆུབ་སེམས་དཔའ་འགྲོ་དོན་མཛད་པ་ལ༔ སྤྱོད་པ་གཉིས་མཛད་བྱང་ཆུབ་མཐར་ཕྱིན་པས༔ འགྲོ་བའི་དོན་ལ་ཅིར་ཡང་སྟོན་མཛད་པའི༔ བྱང་ཆུབ་སེམས་དཔའ་ཁྱོད་ལ་བཟོད་པར་གསོལ༔ ཞེས་བརྗོད་ཕྱག་ནི་གྱང་འགྱེལ་བཞིན་དུ་བཙལ༔ རྒྱལ་པོ་མདོ་གཞེར་ནག་པོ་ཡབ་སྲས་ཀྱིས༔ ཞབས་པད་སྤྱིར་བླངས་བཻ་རོས་ཆོས་གསུངས་པ༔ ཨ་ཨ་ཏྲ་ཀ་ལ་ལེ་ན་ཤ༔ ཞེས་གསུངས་ཇི་ལྟར་ལགས་ཞུས་པས༔ སྐྱེ་མེད་བྱང་སེམས་མན་ངག་རྣམས༔ བོད་ཀྱི་རྒྱལ་པོའི་སྙན་གསན་དུ༔ བསྟན་ཏེ་མི་གཅིག་བདག་སྤྱུགས་པས༔ ཟླ་གསུམ་འགུམས་པས་བདག་མི་དགའ༔ ཁྱོད་ཀྱང་དེ་ལྟར་མ་མཛད་གསུངས༔ ཁྲི་སྲོང་ལྡེའུ་བཙན་ཐུགས་ལ་འཕྲེང་བ་ཡིས༔ བཻ་རོ་ཙ་ནར་སྤྱན་ཆབ་ཤར་བྱུང་བས༔ རྒྱལ་པོ་འཁོར་བཅས་རྣམས་ཀྱང་མང་དུ་བཤུམ༔ དེ་ནས་སློབ་དཔོན་གབ་རྩེའི་སྟེང་བཞུགས་ནས༔ རྒྱལ་པོའི་སྲས་མོ་གཡུ་སྒྲས་ལོ་ཙཱ་བསྒྱུར༔ རྒྱལ་པོས་གསེར་གྱི་དོང་རྩེ་གྲངས་མེད་ཕུལ༔ རིགས་དྲུག་དོན་མཛད་བྱང་ཆུབ་སེམས་དཔའི་སྐུ༔ གང་ལ་གང་འདུལ་ཐེག་པ་སྟོན་པའི་གསུང་༔ ཡིད་བཞིན་ནོར་ལྟར་དགོས་འདོད་འབྱུང་བའི་ཐུགས༔ མི་སྣང་རྒྱལ་བའི་དགོངས་པ་ཕོ་བྲང་ན༔ སྡེ་སྣོད་གསུམ་གྱི་སྤྱི་མེས་ཆེན་པོ་ལ༔ དུས་གསུམ་རྒྱལ་བའི་སྐུ་གསུམ་ལྷུན་རྫོགས་པའི༔ གཉིས་མེད་མཉམ་ཉིད་འགྲོ་བའི་མགོན་པོ་ལ༔ གསེར་དང་དངུལ་གྱི་དོང་རྩེའི་མེ་ཏོག་འབུལ༔ ཐུགས་རྗེས་དགོངས་ནས་སྲིད་པའི་མཚོ་བསྒྲལ་འཚལ༔ ཡེ་ཤེས་ཐུགས་རྗེའི་ཞགས་པས་གཟུང་དུ་གསོལ༔ ཞེས་གསོལ་སྒྲ་བསྒྱུར་མང་པོ་བྱུང་ན་སྙམ༔ རྒྱལ་མོ་ཚ་བའི་ཕོ་ལུས་ཐོབ་ཚད་བསགས༔ རྡོ་རྗེ་སེམས་དཔའ་ནམ་མཁའ་ཆེ་གྱིས་དང་༔ གསུངས་པས་སྟོམས་སྟེ་སྟམས་སྟ་སྟོམས་སྟ་ཐ༔ ཞེས་པ་ལས་ནི་ཤེས་པ་མ་བྱུང་ནས༔ གྲལ་མཐར་མཆིས་པའི་སྤྲང་སྤྲུག་གཅིག་ལ་དྲིས༔ རྡོ་རྗེ་སེམས་དཔའ་ནམ་མཁའ་ཆེ་ཞེས་ཟེར༔ དེ་ཡིས་ཤེས་པས་ཕ་མ་སུ་ཡིན་དྲིས༔ ཕ་མ་གཉིས་ཀ་ཤི་ནས་མེད་ཅེས་ཟེར༔ འདི་ལ་སྒྲ་བསླབས་མྱུར་དུ་ཤེས་པར་འདུག༔ སྤུན་ཟླ་ལ་སོགས་གཉེན་ཚན་ཅི་ཡོད་གསུངས༔ ཁོ་རང་གཅིག་པུ་མིན་པ་སུ་ཡང་མེད༔ ལྟོ་གོས་ངེད་ཚོས་སྦྲན་གྱིས་སྒྲ་སློབས་ཞུས༔ བྱིས་པ་དེ་ཉིད་སློབ་དཔོན་དྲུང་དུ་ཕུལ༔ སློབ་དཔོན་སྒྲ་བསླབས་སྟེང་ཤོད་བྱས་ནས་བསྡད༔ རེ་ཞིག་དུས་ན་བྱིས་པ་ཚིག་ལབ་གཏོང་༔ སློབ་དཔོན་ལབ་ཟླ་སུ་ཡིན་སྙམ་ནས་གཟིགས༔ རྩངས་སྔོན་ལེགས་གྲུབ་དེ་ཡི་སྐྱེ་བར་ཤེས༔ མིང་ནས་བོས་པས་ཨ་ཟེར་ཞིབ་ཏུ་གླེངས༔ གཡུ་སྒྲ་སྙིང་པོར་མཚན་བཏགས་སྒྲ་ལ་མཁས༔ ཉིན་མོ་དཀོན་བརྩེགས་མཚན་མོ་གསང་སྔགས་ཆོས༔ ནམ་གྱི་དགུང་ལ་བྱང་སེམས་སྨད་ལྔ་བསྒྱུར༔ བཻ་རོས་ཅི་མཁྱེན་གཡུ་སྒྲ་སྙིང་པོས་མཁྱེན༔ རྒྱལ་མོ་གྲུ་ལ་སོགས་པས་མ་བསླབས་ཤེས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བཻ་རོ་ཙ་ན་རྒྱལ་མོ་ཚ་བའི་རོང་དུ་སྤྱུགས་ཤིང་ཡུལ་དེར་མདོ་སྔགས་ཀྱི་བསྟན་པ་དར་བར་མཛད་པའི་ལེའུ་སྟེ་དོན་བདུན་པའོ༔ ༔
པདྨ་བཀའ་ཐང་ལེའུ་ ༧༨ དགེ་སློང་མི་ལྔ་དངོས་གྲུབ་བརྙེས་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ ཟ་ཧོར་མཁན་པོ་བོ་དྷི་སཏྭ་ལ༔ བོད་ཀྱི་མི་ལྔ་རབ་ཏུ་བྱུང་བ་ཡི༔ ནམ་མཁའི་སྙིང་པོ་གྲུ་གུ་ཨེ་བག་ཤ༔ རུ་གྱོང་བཱིརྱ་ངས་ཆེན་དཔལ་སེང་དང་༔ འབྲེ་བཙུན་རྒྱལ་བའི་བློ་གྲོས་རྣམ་པ་ལྔ༔ དབུ་ཡི་མཆོད་གནས་བཀུར་བར་བཀའ་ལ་བཏགས༔ གསེར་ཕྱེ་བྲེ་རེ་བསྐུར་ནས་ཆོས་འཚོལ་བཏང་༔ དགེསློང་མི་ལྔས་དཀའ་བ་སྲོག་བསྡོས་ནས༔ རྒྱ་གར་ཡུལ་ཕྱིན་ཕྲད་ཚད་དྲི་བ་བྱས༔ གྲུབ་ཐོབ་གྲགས་པ་ཇི་སྐད་བྱ་བ་ཡོད༔ རོ་ལངས་བདེ་བ་ཧཱུྃ་ཀར་ཞེས་བྱ་བསྟན༔ རོ་ལངས་བདེ་བའི་སྤྱན་སྔར་ཕྱིན་པ་ཡིས༔ ངས་བོད་འདུལ་བའི་དུས་ལ་མ་བབ་གསུངས༔ རྒྱལ་པོ་ཀུཀྐུ་རཱ་ཛ་ཞེས་བྱ་བ༔ ཉིན་བཞིན་ཁྱི་མོ་ལྔ་བརྒྱའི་དབུས་སུ་ནི༔ དམ་ཆོས་ཁྱི་ཡི་སྐད་དུ་བསྒྱུར་ནས་འཆད༔ མཚན་བཞིན་ཁྱི་མོ་ལྷ་མོ་ལྔ་བརྒྱར་སྤྲུལ༔ མ་ཆགས་ཐབས་ཀྱི་སྦྱོར་བ་དེ་ལ་ཞུས༔ ཞེས་གསུངས་ལུང་བསྟན་ཞུས་པས་གོང་བཞིན་གསུངས༔ གསེར་བྲག་བྱ་སྐྱིབས་ཚལ་ཞེས་བྱ་བ་ན༔ སློབ་དཔོན་ཆེན་པོ་ཧཱུྃ་ཀར་བཞུགས་ཟེར་ཕྱིན༔ ཁང་སྲུང་རྒན་མོ་ཆུ་ལེན་ཞིག་དང་ཕྲད༔
ཧཱུྃ་ཀར་གར་བཞུགས་དྲིས་པས་ལན་མ་བྱིན༔ འདི་དེ་རྣ་བ་འོན་སྙམ་སྐད་ཆེར་བསྐྱར༔ རྩེ་རྒོད་ནག་པོ་བྱ་བ་ཞིག་ན་རེ༔ དེ་ལ་དྲིས་ཀྱང་ལན་མེད་སྨྲ་བཅད་ཡིན༔ བྱ་སྐྱིབས་ཚལ་ན་བཞུགས་ཟེར་གསེར་ཕྱེ་བྱིན༔ ནང་དུ་སྦ་འཚངས་ཕྱིན་པས་མ་དགྱེས་ཏེ༔ བོད་ཀྱི་གདུག་འདྲེ་བྱུང་ཞེས་ཧཱུྃ་ཧཱུྃ་གསུངས༔ ཤངས་ནས་འོད་ཟེར་མེ་སྟག་ཚ་ཚ་འཕྲོས༔ དགེ་སློང་མི་ལྔ་ས་ལ་བརྒྱལ་བར་འགྱུར༔ སྔོན་ལ་ནམ་མཁའི་སྙིང་པོ་བརྒྱལ་སངས་ནས༔ བདག་ཅག་བོད་ཀྱི་ལྷ་འདྲེ་གདུག་ཅན་མིན༔ བོད་ཀྱི་རྒྱལ་པོས་གསང་སྔགས་ཆོས་འཚོལ་བཏང་༔ ཚེ་འདི་ཉིད་ལ་རིག་འཛིན་སར་འགྲོ་བ༔ སློབ་དཔོན་གནང་དགོས་ཞུ་རྟེན་གསེར་འདི་ལགས༔ ཆོས་མ་རྙེད་ན་ངེད་ཚོ་ཁྲིམས་ལ་གཏུགས༔ ཐུགས་རྗེས་བཟུང་བྱས་གུས་ཕྱག་འཚལ་བ་ཡིས༔ ངས་བོད་འདུལ་བའི་དུས་ལ་བབ་མ་བབ༔ ཡེ་ཤེས་ལྷ་ལ་འདྲི་གསུངས་དགོངས་པ་མཛད༔ དར་ཅིག་ཙ་ན་དུས་ལ་བབ་འདུག་གསུངས༔ ང་དང་ཕྲད་པ་ཁྱེད་རྣམས་ཚོགས་རེ་བསགས༔ དཔེར་ན་སྣོད་ཀྱིས་བཅུད་ཐུབ་བྱེད་པ་ལ༔ བཟོ་གནས་དོད་པས་མི་ཆོག་སོ་བཏང་དགོས༔ དེ་བཞིན་སྔོན་ལ་དབང་བསྐུར་མ་བྱས་པར༔ གསང་སྔགས་བཤད་སྒྲུབ་གང་ཡང་བྱར་མི་རུང་༔ ཟླ་གམ་ལྔ་བཅུ་རྩ་བརྒྱད་ཞལ་ཕྱེ་ནས༔ ཁྲག་འཐུང་ལྷ་ཚོགས་ལྔ་བཅུ་རྩ་བརྒྱད་བསྟན༔ དང་པོ་སྒྲུབ་གཞི་ཡང་དག་རྩ་བ་བཤད༔ དེ་ཡི་ཆ་རྐྱེན་དོན་གྱི་ཆ་ལག་དགུ༔ རྟོག་པའི་བློ་བཅད་སེམས་ཀྱི་རྩ་བ་ལྔ་༔ སྒྲུབ་པར་འཇུག་པ་རྫས་ལ་བརྟེན་དགོས་པས༔ ཕྱི་པྲ་བརྟག་པ་བམ་རི་ཐོད་པ་མཁར༔ ནང་པྲ་བརྟགས་པ་ལྷ་མོ་གནས་མཁར་བཤད༔ སྒྲུབ་པ་ལ་འཇུག་ཐབས་ཤེས་འབྲེལ་དགོས་པས༔ མུ་དྲའི་བརྟག་ཐབས་ཀརྨ་ཤ་ཏཾ་བཤད༔ སྒྲུབ་པས་ལྷ་མཆོད་དངོས་གྲུབ་བླང་བའི་ཕྱིར༔ བདུད་རྩི་མཆོག་ལུང་སྨན་གྱི་སྒྲུབ་པ་བཤད༔ དེ་ལྟར་བསྒྲུབ་པའི་བར་ཆོད་ཟློག་པའི་ཕྱིར༔ མ་ཏྲཾ་བསྒྲལ་མནན་གསལ་ཤིང་ཆེ་ཆུང་བཤད༔ སྒྲུབ་པ་བྱིན་ཆེ་ཉམས་བག་ལྡན་པའི་ཕྱིར༔ འཕྲིན་ལས་གཞུང་སྲོང་བསྐྱེད་རྫོགས་མ་བུ་བཤད༔ སྒྲུབ་གཞི་བཟླས་བརྗོད་འཛབ་ལ་བསྡུ་བའི་ཕྱིར༔ བཟླས་བརྗོད་བྱེད་ཐབས་རུ་ལུ་གསེར་ཕྲེང་བཤད༔ སྒྲུབ་ལ་བར་ཆད་འོང་བ་བཟློག་པའི་ཕྱིར༔ ཕུར་པ་བིདྱོཏྟ་མ་འབུམ་སྡེ་བཤད༔ དེ་དུས་དངོས་གྲུབ་རེ་ཡང་བརྙེས་པར་གྱུར༔ ནམ་མཁའི་སྙིང་པོ་ཤེས་རབ་ཕུལ་དུ་ཕྱིན༔ བསོད་ནམས་སྙིང་རུས་གཉིས་ཀ་མཆོག་ཏུ་གྱུར༔ ས་ལ་ཆག་གང་མ་རེག་ཙམ་ལ་འགྲོ༔ དབང་ཕྱུག་ཉི་ཤུ་རྩ་བརྒྱད་བྲན་བཞིན་འཁོལ༔ ཡེ་ཤེས་ལྷ་མོ་བདུན་དང་དངོས་སུ་སྦྱོར༔ རུ་གྱོང་བཱིརྱས་རྫུ་འཕྲུལ་ཡ་མ་ཟུང་༔ གྲུ་གུ་ཨེ་བག་ཡེ་ཤེས་འོད་དང་འགྲོགས༔ རྒྱལ་བའི་བློ་གྲོས་དུས་མིན་འཆི་བ་ལྷོགས༔ རླངས་དཔལ་འབྲོང་རྭ་གཤིབས་བྱུང་སེ་གོལ་བཟློག༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ དགེ་སློང་མི་ལྔ་རྒྱ་གར་དུ་བརྫངས་ཤིང་དངོས་གྲུབ་བརྙེས་པའི་ལེའུ་སྟེ་དོན་བརྒྱད་པའོ༔ ༔
པདྨ་བཀའ་ཐང་ལེའུ་ ༧༩ ནམ་མཁའི་སྙིང་པོ་ལྷོ་བྲག་མཁར་ཆུར་སྤྱུགས་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་ལ༔ བོད་ཀྱི་བློན་པོ་ཕྲག་དོག་ཅན་རྣམས་ཀྱིས༔ ལོག་མན་སྙན་ཕྲའི་ཡི་གེ་བཅུ་རེ་བསྲིངས༔ འོ་སྐོལ་བནྡེ་ལྔ་པོ་དེས་ཀྱང་ནི༔ ཚོལ་དུ་བཏང་བའི་དམ་ཆོས་མ་རྙེད་པར༔ ཕྲ་མེན་ངན་སྔགས་མང་པོ་ཁྱེར་འོངས་ནས༔ བོད་ཕུང་བྱེད་ཟེར་བྲིས་པ་རྗེ་ཡིས་བརྫངས༔ རྒྱ་གར་དགེ་སློང་རྣམས་ཀྱི་ཕྱག་ཏུ་འཕྲོད༔ སློབ་དཔོན་ཧཱུྃ་ཀར་ཉིད་དང་བཀའ་བགྲོས་པས༔ སྒྲུབ་པའི་དལ་ཞལ་རེ་ཙམ་མ་ཕྱེ་བར༔ གསང་སྔགས་ཟབ་མོ་བོད་དུ་ཁྱེར་བ་ན༔ ཁྱེད་རྣམས་ཚེ་ལ་བར་གཅོད་འོང་གསུངས་ནས༔ དགེ་སློང་རྣམས་ཀྱིས་བསྒྲུབ་པའི་ལས་བྱས་པས༔ དཔལ་གྱི་སེང་གེ་ཉན་དུ་མ་བཏུབ་སྟེ༔ འོ་སྐོལ་རུ་འདི་ལྷོ་བལ་བྲག་ཏུ་འདུག༔ སྔ་མ་ཟས་ངོ་ནོར་ངོར་ཆོས་བཤད་ཡིན༔ ད་ནི་བོད་དུ་ཆོས་ཟབ་སྒྲོག་དགོས་པས༔ འོ་སྐོལ་བསད་པའི་ཉེན་ཡོད་ཕྱིན་པ་དྲག༔ མགྱོགས་པར་མྱུར་དུ་འདོང་ཟེར་མ་ཉན་ནོ༔
ནམ་མཁའི་སྙིང་པོས་དེ་སྐད་མ་ཟེར་གསུངས༔ ཕ་ཡིས་བུ་ལ་མ་ལེགས་མི་སློབ་ཅིང་༔ མ་ཡིས་བུ་ལ་དུག་མི་ལྡུད་པས་ན༔ བླ་མས་སློབ་མར་ལོག་པ་མི་སློབ་བོ༔ བསླབས་ཀྱང་བཀའ་བཅག་དམྱལ་བའི་གནས་སུ་འགྲོ༔ ང་ནི་མི་འགྲོ་ཁྱེད་རྣམས་འགྲོ་ན་སོང་༔ དཔལ་གྱི་སེང་གེ་བོད་དུ་འགྲོ་བ་ལ༔ སློབ་དཔོན་རྫོང་བར་གོང་བཤད་ཆོས་རྣམས་དང་༔ བར་ཆད་སེལ་བའི་སེང་ལྡེང་ཕུར་པ་བསྐུར༔ ཕུར་པ་འདི་ཉིད་ཉལ་དུས་སྔས་ཐོབ་གསུངས༔ གཡོག་པོ་མོན་བུ་སྤྱི་ཟླུམ་ཞིག་ཀྱང་བཏང་༔ བལ་ཡུལ་ཉི་མ་ཁུད་ཀྱི་མཚོ་འགྲམ་དུ༔ ས་རུབ་ལམ་མ་མཐོང་བར་ཞག་ས་བྱས༔ གཟིམས་ཏེ་སེང་ལྡེང་ཕུར་པ་སྔས་སུ་བཏབ༔ སློབ་དཔོན་མནལ་སོང་གཡོག་པོར་གཉིད་མ་བྱུང་༔ མཚོ་ནས་སྦྲུལ་ཆེན་ཞིག་བྱུང་སློབ་དཔོན་བསྐོར༔ གཡོག་པོ་བྲེད་ནས་སློབ་དཔོན་བོས་པ་ཡིས༔ སྦྲུལ་དེ་བྲོས་ནས་མཚོ་ནང་མཆོངས་ཏེ་སོང་༔ སང་ནུབ་མཚོ་འདི་བརྒལ་ན་རུང་སྟེ་སྙམ༔ སང་ནུབ་ཀྱང་ནི་མཚོ་འགྲམ་དེ་ཀར་ཉལ༔ སློབ་དཔོན་གཉིད་སོང་སྔས་ནས་ཕུར་པ་བཏོན༔ ཁོ་རང་སྔས་སུ་བཏབ་པས་སྦྲུལ་བྱུང་སྟེ༔ སློབ་དཔོན་སྐུ་ལ་འཁྲིལ་ནས་སྐད་ངན་ཤོར༔ མཚོ་དེའི་ཀླུ་ནག་འདམ་འཛིན་བྱ་བ་དེས༔ དཔལ་གྱི་སེང་གེའི་རྩེའུ་ཆུང་འཇིབས་ནས་བཀུམས༔ དེ་ནི་བླ་མའི་བཀའ་བཞིན་མ་བགྱིས་པར༔ བཀའ་བཅག་དམ་ཚིག་རལ་པའི་སྐྱོན་ཡིན་གསུངས༔ དགེ་སློང་མི་གསུམ་སྒྲུབ་པ་བྱས་པ་ཡིས༔ མེ་མར་རང་འབར་གཏོར་མ་ཞག་ཏུ་འཁྱིལ༔ བནྡྷ་བུམ་པ་ཙམ་སོང་དམ་རྫས་ཁོལ༔ དཔལ་ཆེན་ཡབ་དང་ཡུམ་གྱི་ཞལ་མཐོང་ངོ་༔ དེ་དུས་བོད་ཀྱི་རྒྱལ་པོ་བསྙུན་གྱིས་ཟིན༔ ཅི་བྱས་མ་ཕན་ཀག་བསྐོར་མོ་བཏབ་པས༔ ནམ་མཁའི་སྙིང་པོ་བྱོན་ན་ཕན་ཅེས་ཟེར༔ བང་ཆེན་བརྫངས་ནས་བོད་དུ་མ་བྱོན་ན༔ ཉེ་གཞི་རྩ་ལག་ཐམས་ཅད་ཁ་དག་གཏོང་༔ ཞེས་པའི་ཡི་གེ་བསྐུར་བས་མ་དགྱེས་ཏེ༔ ང་ཉིད་རྒྱ་གར་ཡོད་པས་མི་འཇིགས་རུང་༔ བོད་ཀྱི་གནུབས་རྣམས་ཁ་དག་སྙིང་རྗེ་བསམས༔ དེ་ནས་བོད་དུ་འབྱོན་དགོངས་སློབ་དཔོན་ཞུས༔ ཁྱོད་ཀྱིས་མ་ཕྱིན་འོ་སྐོལ་སྒྲིབ་པ་འོང་༔ བོད་དུ་སོང་གསུངས་དགེ་སློང་གསུམ་སྔོན་བཏང་༔ ལྟ་བ་འཕངས་སྨས་ཆོས་དབྱིངས་དོན་མ་རྟོགས༔ ཞེས་པ་ལ་སོགས་བཤགས་པ་བྱས་ནས་འོངས༔ གསུམ་པོའི་ཕྱི་ལ་ཕྱིན་པས་སྔོན་ལ་བརྟོལ༔ དེ་ནས་དགེ་སློང་མི་བཞི་རྗེ་དང་མཇལ༔ ནམ་མཁའི་སྙིང་པོས་བྱིན་བས་མཛད་པས་སོས༔ རྗེ་ཉིད་བཞེད་པའི་ཡང་དག་དོན་ལོན་ཡོད༔ རྒྱུ་ནི་སེམས་ཅན་འབྲས་བུ་ཕྱག་རྒྱ་ཆེ༔ དཔལ་ཆེན་ཡང་དག་གྲུབ་པ་གཅིག་པུ་ཉིད༔ སྣང་སྲིད་སངས་རྒྱས་བདེ་ཆེན་ཀུན་འདུས་པ༔ ཆུ་རྒྱུན་རྣལ་འབྱོར་ཟབ་མོ་སྐུ་གསུམ་རྫོགས༔ གསང་ཆེན་མཁའ་འགྲོ་སྒྱུ་མ་བདེ་མཆོག་བདེ༔ ཞེས་གསུངས་རང་གི་ཐུགས་ཀ་གྲིས་གཤགས་ཏེ༔ ཞི་བའི་ལྷ་ཚོགས་བཞི་བཅུ་རྩ་གཉིས་བསྟན༔ ཚིག་དོན་གསུམ་མཐུན་རྒྱལ་པོ་ངེས་ཤེས་སྐྱེས༔ ཕྱག་མང་དབུ་ཐོད་བུད་བུད་བཙལ་བར་གྱུར༔ དེ་ནས་རྗེ་ལ་ཡང་དག་དབང་བསྐུར་ནས༔ ཡང་དག་རྩ་རྒྱུད་འགྲེལ་ཆེན་སྒྲོན་མ་དང་༔ ཡང་དག་ལུས་དཔེ་མི་གཅིག་སྙིང་ལྟ་བུ༔ ཡང་དག་ཚོང་པ་ཕུར་པ་སྐྱེལ་མ་ལྟར༔ ཡང་ཕུར་སྦྲགས་མའི་བསྒྲུབ་ཐབས་རྗེ་ལ་གསུངས༔ མཁའ་དབྱིངས་དག་པ་སྦྱོར་བ་བཞི་བསྒྲུབ་པ༔ སྙིང་རྗེ་དག་པ་སྒྲོལ་བ་བཅུ་བསྒྲུབ་པ༔ སྦྱོར་སྒྲོལ་གཉིས་དང་ཞི་ཁྲོ་རྩ་འབུམ་གསུངས༔ རྗེ་འབངས་ཁ་ཅིག་སྒྲུབ་པ་བྱས་པ་ལ༔ ཚེ་སྤོང་བཟས་འཁུམས་བོན་བློན་རྣམས་ལ་བཤད༔ ཀ་པཱ་ལ་ཟེར་སྟེགས་ཁར་མི་མགོ་བཞག༔ བ་སུ་ཏ་ཡིན་ཟེར་ནས་རྒྱུ་མ་བྲེས༔ རྐང་གླིང་ཡིན་ཟེར་མི་ཡི་རྐང་དུ་འདུག༔ ཞིང་ཆེན་གཡང་གཞི་ཡིན་ཟེར་མི་ལྤགས་བཀྲམ༔ རཀྟ་ཡིན་ཟེར་གཏོར་མར་ཁྲག་བླུགས་འདུག༔ དཀྱིལ་འཁོར་ཡིན་ཟེར་ཁྲ་ཁྲ་ཤིག་ཤིག་འདུག༔ གར་པ་ཡིན་ཟེར་རུས་པའི་ཕྲེང་བ་གྱོན༔ གིང་པ་ཡིན་ཟེར་མི་རིང་གཅེར་རྒྱུགས་བྱེད༔ བྱིན་འབེབས་ཡིན་ཟེར་ཅི་འདྲའི་གསོབ་གྱོན་འདུག༔ ཞལ་བརྙན་ཡིན་ཟེར་སྣ་ཚོགས་འབག་གྱོན་འདུག༔ ཆོས་མིན་རྒྱ་གར་བོད་ལ་ངན་བསླབས་ཡིན༔ ཞེས་སྨྲས་པ་དམར་རྒྱན་གྱིས་གསང་བརྟོལ་ནས༔ བོན་བློན་རྣམས་ཀྱིས་རྗེ་ལ་ཡང་ཞུས་པ༔ ཕྲ་མེན་ངན་སྔགས་མཁན་དེ་ཕུགས་སུ་བཞག༔ ཅི་ཟེར་ཁ་ལ་ཉན་ནས་ཅི་བྱེད་པ༔ ལོག་ཆོས་བྱེད་པའི་སྒྲུབ་པ་དེ་ལྟ་བུ༔ དེ་འདྲ་དར་ན་མི་ལ་གསོན་སྒྲོལ་ཡོང་༔ ཆོས་མ་ཡིན་གྱི་ལོག་པ་བསླབས་ཏེ་མཆི༔ ཁོང་བཞིས་དཔལ་གྱི་སེང་གེ་བསད་བྱས་ནས༔ རྗེ་ལ་བརྙས་པ་ཡིན་པས་བསད་པ་དྲག༔ ཅེས་གསོལ་རྒྱལ་བློན་བློ་བསྡུར་བསམས་པ་ཡིས༔ རྒྱལ་པོ་ཉིད་ཀྱང་ཅུང་ཟད་ཐེ་ཚོམ་ནས༔ འོ་ན་བསད་པས་མི་འོང་སྤྱུག་གི་གསུངས༔ ནམ་མཁའི་སྙིང་པོ་ལྷོ་བྲག་མཁར་ཆུར་སྤྱུགས༔ གྲུ་གུ་ཨེ་བག་ཞང་ཞུང་ཡུལ་དུ་སྤྱུགས༔ རུ་གྱོང་བྱང་རྒྱུད་ཐོ་ཡོར་ནག་པོར་སྤྱུགས༔ རྒྱལ་བའི་བློ་གྲོས་ལི་ཡུལ་ལྕང་རར་སྤྱུགས༔ ནམ་མཁའི་སྙིང་པོས་བསྒྲུབ་པ་མཛད་ཅིང་བཞུགས༔ གྲུབ་རྟགས་བྲག་ལ་སྐུ་རྒྱབ་གཏད་པའི་རྗེས༔ མེ་ནི་རང་འབར་བྲག་ལ་ཕུར་པ་བཏབ༔ ཉི་མའི་ཟེར་ལ་ཆིབས་ནས་གཤེགས་བཞུད་མཛད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ནམ་མཁའི་སྙིང་པོ་ལྷོ་བྲག་མཁར་ཆུར་སྤྱུགས་པའི་ལེའུ་སྟེ་དོན་དགུ་པའོ༔ ༔
པདྨ་བཀའ་ཐང་ལེའུ་ ༨༠ པཎ་ཆེན་བི་མ་མི་ཏྲ་གདན་དྲངས་པ།
དེ་ནས་བོད་ཀྱི་རྒྱལ་པོའི་ཐུགས་དགོངས་ལ༔ བོད་ཁམས་འདི་དག་ཆོས་ལ་བཀོད་འདོད་པས༔ སྐུ་རྟེན་གཙུག་ལག་ཁང་ནི་ཁྱད་འཕགས་གྲུབ༔ གསུང་རྟེན་ཆོས་བསྒྱུར་ལོ་ཙཱ་མ་རྙེད་དེ༔ རྙེད་ནས་ཤེས་རབ་བློ་སྟོབས་ཅན་རྣམས་ཀུན༔ རྒྱ་གར་བཏང་བས་ཁྱད་འཕགས་ཆོས་རྙེད་ཀྱང་༔ བོན་བློན་རྣམས་ཀྱིས་ཆོས་ལ་ཕྲག་དོག་བྱས༔ ཆོས་ལ་དག་ཐེར་མ་ཐོན་སྤྱུགས་དགོས་བྱུང་༔ བོན་ཆོས་ཡིན་མིན་མེད་པར་བསྒྱུར་དགོས་བསམས༔ ཞང་ཞུང་ཡུལ་དུ་གཤེན་བོན་འབོད་དུ་བཏང་༔ གཤེན་བོན་ཤང་རིའི་དབུ་ཅན་ཞེས་བྱ་བའི༔ ལོ་ཙཱ་བ་ལ་ཐང་ནག་བོན་པོ་བཅུག༔ ཨཱརྱ་པ་ལོར་ཀླུ་འབུམ་པོད་བཞི་བསྒྱུར༔ བོན་གྱི་བསྟན་པ་འཛུགས་པ་ཡིན་ནོ་བསྒྲགས༔ བང་སོ་འདི་དག་བོན་ལུགས་ཡིན་འདུག་པས༔ དོན་མགར་མུ་རིར་ང་ཡི་བང་སོ་བརྩིགས༔ ཞེས་གསུངས་བོན་བློན་བང་སོ་བརྩིག་ཏུ་བཅུག༔ མཆོད་རྟེན་འདི་དག་ཆོས་ལུགས་ཡིན་འདུག་པས༔ གཙུག་སྣའི་རི་ལ་ང་ཡི་མཆོད་རྟེན་བརྩིགས༔ ཞེས་གསུངས་ཆོས་བློན་ཐམས་ཅད་བརྩིག་ཏུ་བཅུག༔ ད་ནི་རྒྱ་གར་མཁས་པ་པཎྜི་ཏ༔ བརྒྱ་དང་རྩ་བརྒྱད་བོད་དུ་གདན་དྲངས་ནས༔ ལོ་ཙཱ་སློབ་ཅིང་རབ་ཏུ་བྱུང་བར་བྱས༔ སྔར་གྱི་ཆོས་རྣམས་ཡིན་མིན་དེར་གསལ་སྙམ༔ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚན༔ རྨ་བན་རིན་མཆོག་གསུམ་ལ་གསེར་ཕྱེ་བསྐུར༔
ཨིནྡྲ་བོ་དྷི་དྷརྨཱ་རཱ་ཛ་ལ༔ པཎ་ཆེན་ལྔ་བརྒྱའི་ནང་ནས་མཁས་ཆེན་པོ༔ སྐྱེས་ལན་བོད་དུ་རྫོངས་ཞེས་ཤོག་འཕྲིན་བསྐུར༔ ལོ་ཙཱ་གསུམ་གྱིས་རྒྱ་གར་ཡུལ་དུ་ཕྱིན༔ རྒྱ་གར་ཡུལ་གྱི་སེར་སྐྱའི་གྲོང་ཁྱེར་དབུས༔ ཆོས་རྒྱལ་དྷརྨཱ་རཱ་ཛ་ཞེས་བྱ་བ༔ པཎྜི་ཏ་ནི་ལྔ་བརྒྱས་མཆོད་གནས་མཛད༔ དེ་ལ་རྒྱལ་པོའི་དྲིལ་ཡིག་གསེར་ཕྱེ་ཕུལ༔ སྔར་གྱི་འཕྲིན་བྱས་རྒྱལ་པོ་རབ་ཏུ་དགྱེས༔ བོད་ཀྱི་བྱང་ཆུབ་སེམས་དཔའ་འདིར་བཞུགས་གསུངས༔ པཎྜི་ཏ་རྣམས་དྲོ་ལ་ཕྱིན་པའི་དུས༔ གདུགས་ཚོད་གསོལ་བའི་གྲལ་ལ་རྒྱལ་པོས་གསུངས༔ ཀྱེ༔ པཎ་ཆེན་མཁས་པ་ཆེན་པོ་རྣམས༔ བདག་ལ་བོད་ཀྱི་རྒྱལ་པོ་ཡིས༔ ཤིན་ཏུ་བཟང་བའི་སྐྱེས་བསྐུར་ནས༔ སྐྱེས་ལན་པཎྜི་ཏ་བཟང་བ༔ ཁྱད་པར་གསང་སྔགས་ལ་མཁས་པ༔
ཐོང་ཞིག་ཟེར་བས་གཅིག་བཏང་འཚལ༔ ཞེས་གསོལ་སློབ་དཔོན་སངས་རྒྱས་གསང་བ་ཡིས༔ སྐྱེས་སྐྱེལ་མི་གསུམ་གང་ན་འདུག་གྱུར་པ༔ འདིར་ཁྲིད་ཤོག་གསུངས་རྒྱལ་པོས་ཁྲིད་ནས་འོངས༔ བི་མ་མི་ཏྲའི་སྐུ་ཡི་མཚན་བཟང་མཐོང་༔ མོས་པ་རབ་ཏུ་སྐྱེས་ནས་མཎྜལ་ཕུལ༔ ཡར་མར་དུས་གཅིག་བི་མ་ལ་ལ་བལྟ༔ དོན་གྱིས་སོང་ཞིག་བར་བསྐུལ་བི་མས་བཞེངས༔ མ་ནུ་དུ་རུ་ཀྲོ་ཧེ༔ ཞེས་པ་ལན་གསུམ་སྒྲ་བརྗོད་པས༔ ལོ་ཙཱ་གསུམ་ལ་གོ་ལུགས་རེ༔ ཅོག་རོ་ཀླུ་ཡི་རྒྱལ་མཚན་གྱིས༔ གཞུ་མོ་དག་ལ་བརྟེན་པའི་མདའ༔ སྐྱེས་བུའི་མཐེབ་མོས་རྩོལ་ཕོད་ན༔ མདའ་ཡིས་འབེན་དྲུང་ཕྱིན་པར་ནུས༔ ཞེས་དང་སྐ་བ་དཔལ་བརྩེགས་ཀྱིས༔ གྲུ་བོ་དག་ལ་བརྟེན་པའི་མི༔ མཉན་པའི་སྐྱ་བས་རྩོལ་ཕོད་ན༔ གྲུས་ཀྱང་ཆུ་བོ་སྒྲོལ་བར་ནུས༔ ཞེས་དང་རྨ་བན་རིན་མཆོག་གིས༔ ཡོན་ཏན་དག་ལ་བརྟེན་པའི་མི༔ རང་ཡུལ་མིན་པའི་ས་ཕྱོགས་སུ༔ ལུས་ཀྱི་བུམ་པ་གར་འདྲིལ་བར༔ སེམས་ཀྱི་ཆུ་བོ་དེ་རུ་འབོ༔ ཞེས་གསུངས་བོད་དུ་བཞུད་པར་གོ༔ དེ་ནས་བི་མ་མི་ཏྲ་ཡིས༔ རྒྱལ་པོ་ཁྱེད་ཀྱིས་གཏོང་ཕོད་ན༔ ང་ཡིས་བོད་ལ་ཕན་ཐོགས་འོང་༔ སྤྲེའུ་ཚ་བོད་ཀྱི་ས་ཆ་རུ༔ ཕྱི་ནང་ཆོས་མཁས་བི་མ་ལ༔ སྙིང་ཐིག་མ་བུ་ཚར་གཅིག་བཅས༔ བོད་ཡུལ་མི་བླུ་གདུལ་བྱར་འགོད༔ ཅེས་གསུངས་ཨཱ་ཙར་སའི་སྙིང་གཡོག་པོར་ཁྲིད༔ ལོ་ཙཱ་གསུམ་དང་བསྡེབས་ནས་བོད་དུ་བྱོན༔ དེ་ཡི་མཚན་མོ་རྨི་ལམ་ཐམས་ཅད་འཁྲུགས༔ མཁའ་འགྲོ་མ་རྣམས་ཆོ་ངེས་འདེབས་ཤིང་ངུ་༔ རྒྱལ་པོའི་ཆུ་ཚོད་དབྱུ་གུའི་རྩིས་ཀྱང་འཁྲུགས༔ ནང་པར་དུས་སུ་རྒྱལ་པོའི་ཕོ་བྲང་དུ༔ རྒྱ་གར་མི་རྣམས་ཐམས་ཅད་འདུས་བྱས་ནས༔ རྨི་ལམ་བསྡུར་བས་ཀུན་མཐུན་ཅིས་ལན་ཟེར༔ ལ་ལ་ཅང་ཟེར་ལ་ལ་ཅི་ཟེར་གླེང་༔ ལྷ་འདྲེས་བརླམས་པའི་བུད་མེད་ཅིག་ན་རེ༔ རྒྱལ་པོའི་བླ་མཆོད་བོད་དུ་མ་ཤོར་རམ༔ རྒྱལ་པོ་ལ་དྲིས་ཟེར་ནས་དྲིས་པ་དང་༔ མཁས་པ་བི་མ་ཏྲ་བོད་ཤོར་ཟེར༔ རྒྱ་གར་མི་ཡིས་རྐང་མགྱོགས་བརྫངས་པར་གྱུར༔ བོད་ཀྱི་ས་འགག་སྲང་མདོ་ཐམས་ཅད་དུ༔ བོད་ཀྱི་བནྡེ་གསུམ་གྱིས་མུ་སྟེགས་པ༔ ཕྲ་མེན་ངན་སྔགས་མཁན་པོ་ཁྲིད་ནས་སོང་༔ བོད་ཀྱི་རྒྱལ་ཁམས་ཐམས་ཅད་ཕུང་ནས་འགྲོ༔ ཞེས་པའི་ཡི་གེ་མདོ་བྱང་མང་པོ་བཏབ༔ དེ་ནས་བི་མ་མི་ཏྲས་བསམ་ཡས་བརྟོལ༔ རྒྱལ་པོ་རྗེ་འབངས་བསུ་བ་བྱས་པའི་ཚེ༔ ཕྱག་ནི་འཚལ་རེས་གང་ཡང་མེད་པ་ལ༔ ལོ་ཙཱ་གསུམ་གྱིས་ངོ་སོ་དང་བཅས་ནས༔ རྒྱལ་པོའི་སྙན་དུ་བི་མའི་བསྔགས་པ་བརྗོད༔ སྤྱིར་ན་མདོ་སྔགས་སྡེ་སྣོད་མང་པོ་མཁྱེན༔ ཁྱད་པར་མཆོག་ཏུ་འབྲས་བུ་གསང་སྔགས་མཁས༔ འདི་ལྟ་བུ་ལ་བཀུར་སྟི་ལེགས་པར་ཞུ༔ དེ་སྐད་གསོལ་བས་རྒྱལ་པོའི་ཞལ་ནས་ནི༔ དོ་ནུབ་དབུ་ཚལ་གསེར་གྱི་ལྷ་ཁང་གཟིམས༔ ནང་པར་དྲོ་གོང་གང་མོས་སྤྲོ་བར་བྱ༔ ཞེས་གསུངས་དཔོན་སློབ་དབུ་ཚལ་གསེར་ཁང་བཞུགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ པཎ་ཆེན་བི་མ་མི་ཏྲ་གདན་དྲངས་པའི་ལེའུ་སྟེ་བརྒྱད་ཅུ་པའོ༔ ༔
པདྨ་བཀའ་ཐང་ལེའུ་ ༨༡ པཎ་ཆེན་བི་མ་མི་ཏྲས་རྫུ་འཕྲུལ་བསྟན་པ།
དེ་ནས་བོད་ཀྱི་བློན་པོ་གདུག་པ་ཅན༔ བང་སོ་མཆོད་རྟེན་བརྩིག་པའི་ཁ་བརྒྱགས་ལ༔ བསམ་ཡས་པཎྜི་ཏ་ཞིག་བྱོན་ཟེར་ཐོས༔ མདོ་བྱང་བཏགས་པའི་ཡི་གེ་བཀྲོལ་ནས་ཕྱིན༔ བློན་པོ་ཐམས་ཅད་རྒྱལ་པོའི་སྤྱན་སྔར་འདུས༔ འོ་སྐོལ་འདི་ན་མཐའ་མི་ཕྲ་མེན་མཁན༔ བོད་ལ་ངན་བྱེད་མི་ཞིག་ཁྲིད་འོངས་འདུག༔ འདི་རུ་མ་བཞག་ཞུ་ཕུལ་ཡི་གེ་བསྟན༔ ནང་པར་ལོ་ཙཱ་གསུམ་གྱིས་སྔ་བར་ལངས༔ རྒྱལ་པོར་ཞལ་མཇལ་ཞུ་ཞེས་འཕྲིན་བསྲིངས་པས༔ བཞེངས་མ་ཟིན་ཟེར་ཉི་མ་ཤར་བར་འགོར༔ དེ་ནས་བློན་པོ་འགའ་ཞིག་དོན་བྱུང་བས༔ ལོ་ཙཱ་གསུམ་པོས་མ་ལེགས་མགྲིན་གཅིག་བརྗོད༔ རང་ལ་རང་གི་རིག་པའི་དོན་ཤར་ཏེ༔ རྒྱལ་པོ་མཇལ་བས་ཞལ་ནས་འདི་སྐད་གསུངས༔ པཎྜི་ཏ་དེ་གཤའ་མ་མིན་ཡོད་འདུག༔ མུ་སྟེགས་ཕྲ་མེན་མཁན་ཞིག་ཡིན་ཚོད་གདའ༔ ཞག་འགའ་མཚན་ཉིད་བརྟག་ཟེར་མཇལ་མ་གནང་༔
ལོ་ཙཱ་གསུམ་པོ་རབ་ཏུ་སྡུག་བསྔལ་ཞིང་༔ ཡི་དྭགས་མདོག་འདྲ་ཁ་སྣ་ཟགས་པར་གྱུར༔ བི་མས་མཁྱེན་ནས་ཞག་གསུམ་ནང་པར་དེ༔ རྣམ་པར་སྣང་མཛད་སྒྱུ་མ་གཟུགས་ཀྱི་ལྷར༔ བི་མ་མི་ཏྲ་ཡེ་ཤེས་ལྷ་ཡི་ལྷས༔ ཀུན་རྫོབ་གཟུགས་ཀྱི་ལྷ་ལ་ཕྱག་འཚལ་ལོ༔ ཞེས་གསུངས་ཕྱག་བཙལ་ལྡེར་ཚོ་ཐལ་ཕུང་སོང་༔ ལོ་ཙཱ་གསུམ་པོ་ངོ་མཚར་རབ་སྐྱེས་ནས༔ རྒྱལ་པོའི་སྙན་གསོལ་རྒྱལ་པོའི་ཞལ་ནས་ནི༔ དེ་ཀུན་ཕྲ་མེན་ངན་སྔགས་ཡིན་མོད་དེ༔ ང་ཡིས་ལྷ་དེ་བཞེངས་པར་དཀའ་ལས་བྱས༔ ལྷ་འཇིག་པ་ལ་གདན་དྲངས་པ་མིན་གསུངས༔ ལོ་ཙཱ་གསུམ་སེམས་རབ་ཏུ་མ་དགའ་ནས༔ གཅིག་ལ་གཅིག་བལྟ་བཞིན་གྱི་དཀྱིལ་འཁོར་ཉམས༔ བདག་ཅག་གསུམ་གྱིས་རྒྱ་གར་ཡུལ་དུ་ཕྱིན༔ དཀའ་བ་སྤྱད་ནས་བོད་ཡུལ་དབུས་སུ་འོངས་༔ ཐམས་ཅད་ཀུན་གྱི་བླ་རུ་ཕྱིན་པ་ཡི༔ མཁས་མཆོག་ངོ་མཚར་འདི་འདྲ་གདན་དྲངས་ན༔ རྒྱལ་པོ་ཅི་ཉེས་སྙམ་ནས་ཐུགས་རབ་མུག༔ དེ་ནས་ཞག་གསུམ་བི་མ་ལ་བཞེངས་ནས༔ རྣམ་པར་སྣང་མཛད་གཟུགས་སྐུ་བཅོས་མའི་ལྷ༔ བི་མ་མི་ཏྲ་ཡེ་ཤེས་ལྷ་ཡི་ལྷས༔ ཡེ་ཤེས་ལྔ་ལྡན་རྟགས་ཀྱི་དབང་བསྐུར་རོ༔ ཞེས་གསུངས་རྣམ་སྣང་སྤྱི་བོར་ཕྱག་བཞག་པས༔ སྐུ་གཟུགས་སྔ་མ་བས་ལྷག་རྒྱ་གར་ལུགས༔ འོད་ཟེར་འཕྲོས་པས་དབུ་རྩེ་འོད་ཀྱིས་ཁྱབ༔ དེ་ནས་བསམ་ཡས་ལྷ་ཁང་ཐམས་ཅད་ཁྱབ༔ ལོ་ཙཱ་གསུམ་གྱིས་རྒྱལ་པོའི་སྙན་དུ་གསོལ༔ དེ་ནས་རྒྱལ་པོ་ཐུགས་ཆེས་མངའ་འོག་ལ༔ ཟླ་གཅིག་རྐང་མགྱོགས་བརྫངས་ནས་ཚེས་བཅུའི་ཉིན༔ བོད་ཀྱི་རྒྱལ་བློན་མ་ལུས་ཐམས་ཅད་འདུས༔ དབུ་རྩེ་རིགས་གསུམ་སྒོ་མདུན་གཡས་ཕྱོགས་སུ༔ རྒྱལ་པོའི་གཡུ་ཁྲི་རབ་ཏུ་དཔངས་མཐོ་བརྩིགས༔ རྒྱལ་པོས་བི་མ་ལ་ལ་ཕྱག་མཛད་པས༔ རྒྱལ་པོའི་ཐུགས་ཀར་རིགས་གསུམ་མགོན་པོ་འདུག༔ དེ་ལ་བི་མས་རིན་ཆེན་པྲོག་ཞུ་ལ༔ ཨོཾ་ཨཱཿཧཱུྃ་སྭཱ་ཧཱ༔ ཞེས་གསུངས་སེ་གོལ་ལན་ལྔ་བརྡབས་པ་ལས༔ རིགས་ལྔའི་སངས་རྒྱས་བཀྲ་ལམ་ཀུན་གྱིས་མཐོང་༔ བོད་ཀྱི་རྒྱལ་ཁམས་ཀུན་གྱིས་བསྟོད་ཅིང་བསྔགས༔ དེ་དུས་བི་མ་མི་ཏྲ་གྱིས་དང་གསུངས༔ བྱེ་མ་མུ་ཏྲ་ལས་ནི་མ་ཤེས་སོ༔ ལོ་ཙཱ་གསུམ་བསྒྱུར་བི་མས་ཆོས་མང་གསུངས༔ དགུང་ལོ་གླང་ཡིན་སུམ་བརྒྱ་ལོན་ནས་བྱོན༔ དེ་དུས་སངས་རྒྱས་མྱ་ངན་ལས་འདས་ནས༔ ལོ་ནི་སྟོང་དང་བརྒྱད་ཅུ་ཐམ་པ་སོང་༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ པཎ་ཆེན་བི་མ་མི་ཏྲས་རྫུ་འཕྲུལ་བསྟན་པའི་ལེའུ་སྟེ་གྱ་གཅིག་པའོ༔ ༔
པདྨ་བཀའ་ཐང་ལེའུ་ ༨༢ རྒྱལ་པོས་པཎྜི་ཏ་བརྒྱ་རྩ་བརྒྱད་གདན་དྲངས་བོན་བསྣུབས་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ མི་ཕངས་གསེར་ལ་བྱས་ནས་གདན་དྲངས་པ༔ རྒྱ་གར་ཡུལ་ནས་བུདྡྷ་གུ་ཧྱ་དང་༔ སིངྒ་ལ་ནས་ཨཱརྱ་དེ་བ་དང་༔ མཱ་རུ་རྩེ་ནས་ཀ་མ་ཤཱི་ལ་དང་༔ རྒྱ་ནག་བྷ་སང་ཁྲི་གཞེར་སཾ་ཤི་དང་༔ རྗེའུ་རིགས་ཧྭ་ཤང་མ་ཧཱ་རཱ་ཛ་དང་༔ རྒྱ་ནག་ཡུལ་གྱི་ཧྭ་ཤང་དེ་བ་དང་༔ ཧྭ་ཤང་མ་ཧཱ་ཡཱ་ན་ཞེས་བྱ་དང་༔ རྒྱ་ནག་མཁས་པ་ཧ་ར་ནག་པོ་དང་༔ རྒྱ་ནག་ཧྭ་ཤང་མ་ཧཱ་སཱུ་ཏྲ་དང་༔ རྒྱ་གར་ཡུལ་ནས་ཨཱ་ཙར་གསལ་པ་དང་༔ ཙནྡྲ་ཀཱིརྟྟི་དྷརྨ་གཱི་ཏི་དང་༔ ཤཱནྟ་རཀྵི་ཏ་དང་གསལ་རྒྱལ་དང་༔ ཤཱནྟ་དེ་བ་བུདྡྷ་གུཔྟ་དང་༔ ཤྲཱི་བ་ལེ་དྷར་ཙྪིནྡྷ་མ་ཎི་དང་༔ ཤནྟིངྒརྦྷ་བི་ཤུདྡྷ་སིངྷ༔ རོཾ་བུ་གུ་ཧྱ་དེ་བ་ཙནྡྲ་དང་༔ དཱ་ན་ཤཱི་ལ་བྲམ་ཟེ་ཨཱ་ནནྡ༔ ཀ་ལྱཱ་མི་ཏྲ་སུ་རེནྡྲ་བོ་དྷི༔ ཛི་ན་མི་ཏྲ་ཤཱི་ལེནྡྲ་བོ་དྷི༔ བལ་པོ་ཤཱི་ལ་མཉྫུ་བ་སུ་དྷར༔ ཆོས་ཀྱི་བདག་པོ་ག་ག་ཀཱིརྟྟི་དང་༔ ཞང་ཞུང་ཡུལ་ནས་གཤེན་ལི་ཤི་སྟག་རིང་༔
ཐང་ནག་བོན་པོ་ཚེ་མི་གཡུང་དྲུང་འབྱུང་༔ གཤེན་བོན་དྲན་པ་ཁོང་སྤུངས་བྱ་བ་དང་༔ མི་ལུས་བསམ་ལྷག་སྟག་ལྷ་མེ་འབར་དང་༔ ཐར་བོན་གྲུ་བསྐྱིལ་རྟ་བོན་བྱོན་ཁྲི་ནག༔ འཕྲུལ་བོན་གསང་བ་ངང་རིངས་ལ་སོགས་བོས༔ ཨཱརྱ་པ་ལོའི་གླིང་བཞག་བོན་བསྒྱུར་བཅུག༔ དེ་དུས་རྒྱལ་པོའི་སྐུ་ཡི་རིམ་གྲོ་ལ༔ བོན་དུ་ཤ་བ་རྭ་རྒྱས་བྱེད་དགོས་ཟེར༔ བོན་པོས་ཤ་བ་གསོན་མ་བཟུང་ནས་གྱེར༔ ལྷ་ཆ་དགོས་ཟེར་བོན་པོས་གཡག་ལུག་གསོད༔ དེ་ལ་སོགས་པའི་སྡིག་པ་གང་ཞིག་ལ༔ ལོ་པཎ་རྣམས་ཀྱིས་བོན་པོའི་ལས་ལ་གཟིགས༔ པཎྜི་ཏ་རྣམས་གྲོས་མེད་བློ་གཅིག་ཏུ༔ ལོ་ཙཱ་བརྒྱུད་ནས་རྒྱལ་པོའི་སྙན་གསོལ་བ༔ ཆོས་ཀྱི་ཁྲིམས་དང་མི་མཐུན་བོན་ལུགས་འདི༔ མི་དགེ་ཕལ་གྱི་ཐུན་མོང་མ་ཡིན་གྱི༔ འདི་འདྲ་བྱེད་འཇུག་ངེད་རྣམས་རང་ཡུལ་འགྲོ༔ བསྟན་པ་གཅིག་ལ་སྟོན་པ་གཉིས་མི་འོང་༔ ཆོས་ལུགས་གཅིག་ལ་བྱེད་ལུགས་གཉིས་མི་རུང་༔ རྒྱལ་ས་གཅིག་ལ་རྒྱལ་པོ་གཉིས་མི་འཐད༔ སྡིག་པའི་གྲོགས་དང་བསྐལ་པར་འགྲོགས་མི་བྱེད༔ དེ་སྐད་བསྲིངས་པས་རྒྱལ་པོས་ལན་བསྐུར་བ༔ བོན་ཆོས་གཉིས་ནི་གཤེད་མ་འཕྲད་པ་བཞིན༔ གཅིག་ལ་གཅིག་ནི་དག་པ་མི་སྟེར་བས༔ ཆོས་ནི་དར་ཆ་ཆུང་ཞིང་བོན་ཁ་དྲག༔ ལོ་ཙཱ་མཁས་པ་མང་པོ་སྤྱུག་དགོས་བྱུང་༔ བོན་ཆོས་གཉིས་ཀ་དར་འཇུག་བཞུགས་ཞུས་པས༔ ཞེས་བསྲིངས་པཎྜི་ཏ་རྣམས་ལན་མི་སྟེར༔ ཆོས་གསུངས་ཞུ་བ་ཕུལ་ཀྱང་ཆོས་མི་གསུང་༔ དེ་དུས་རྒྱལ་བའི་བློ་གྲོས་ཨ་མ་དང་༔ བློན་པོ་ཏ་ར་ཀླུ་གོང་ཤི་བ་ལ༔ བོན་ཆོས་གཉིས་ཀས་བུམ་ཆོག་བྱས་པའི་ཚེ༔ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམ༔ དོན་མཁར་ཐང་ལ་ངག་ནུས་འགྲན་བཅུག་པས༔ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམ༔ སློབ་དཔོན་པདྨ་ཐང་ནག་བོན་པོ་གཉིས༔ གྲུབ་མཐའ་བཟུང་ནས་འགེགས་རེས་བྱེད་བཅུག་པས༔ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམ༔ བོ་དྷི་ས་ཏྭ་ཤ་རིའི་དབུ་ཆེན་གཉིས༔ གྲུབ་མཐའ་བཟུང་ནས་འགེགས་རེས་བྱེད་བཅུག་པས༔ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམ༔ བི་མ་མི་ཏྲ་ལི་ཤི་ལྟག་རིངས་གཉིས༔ གྲུབ་མཐའ་བཟུང་ནས་འགེགས་རེས་བྱེད་བཅུག་པས༔ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམ༔ བོན་གྱི་ཐེག་དགུ་ཆོས་ཀྱི་ཐེག་དགུ་གཉིས༔ ལོ་ཙཱ་རྣམས་ཀྱིས་འགེགས་རེས་བྱེད་བཅུག་པས༔ རྒྱལ་པོ་ཆོས་ལ་ཡིད་ཆེས་བོན་ཐེ་ཚོམ༔ རྒྱལ་པོའི་མངའ་འོག་བོན་པོ་ཐམས་ཅད་བསྡུས༔ ཁམས་གསུམ་ན་གར་བོན་པོའི་གྲལ་བྱས་ནས༔ བོན་པོའི་སྐྲ་བསྒོར་ཕ་ཇོའི་མིང་དུ་བཏགས༔ མགོ་ལ་ཝ་ཞྭ་ལག་པར་ཕྱེད་རྔ་གཏད༔ གོས་སུ་རས་སྔོན་ཟས་སུ་ལྷད་ཟས་བྱིན༔ བོན་ལུགས་སྡིག་དང་འདྲེས་པ་ཐམས་ཅད་བསྣུབས༔ འཇིག་རྟེན་འཕྲལ་རྐྱེན་ཟློག་པ་ཙམ་གྱི་བོན༔ ཤ་བ་ཤིང་མགོ་རྭ་རྒྱས་བྱེད་པ་དང་༔ གཡག་ལུག་ཟན་ལ་གཟུགས་བརྙན་བྱེད་དུ་བཅུག༔ ལྷ་གཡང་སྐོར་གསུམ་མིན་པ་ཐམས་ཅད་བསྣུབས༔ གཤེན་བོན་རྣམས་ལ་ཁལ་དུ་བོང་བུ་བྱིན༔ བ་ལང་གསོན་མར་གཡུང་དྲུང་བོན་རྣམས་བཀལ༔ འབངས་ཀྱི་གཙང་སྟོད་བྱེ་མ་གཡུང་དྲུང་བསྐྱལ༔ རྩྭ་མི་ཤིང་མི་ལྗང་མོ་མིག་དགུའི་ཡུལ༔ གླང་གི་གྱིམ་ཤོད་ཡུ་མོ་མགུལ་གྱི་ཡུལ༔ སོག་པོ་སྤྲེའུ་སླག་ཅན་གྱི་ཡུལ་དུ་སྤྱུགས༔ སེམས་ཅན་གསོད་ལ་བཤན་པའི་མིང་དུ་བཏགས༔ སྡིག་གླར་མགོ་བྱིན་མི་ཡི་ཁྱུ་ནས་ཕུད༔ གྲལ་དུ་སྒོ་རྒྱབ་སྐས་ཀའི་འོག་ཏུ་བཞག༔ ཟས་སུ་འབགས་ལྷག་སྐོམ་དུ་སྐྱོགས་ཞབས་བྱིན༔ ཁ་བསྲུངས་གོས་བསྲུངས་ཀུན་གྱིས་སྐྱུག་བྲོ་བལྟ༔ སྡིག་མཁན་ཡིན་ཟེར་རིས་སུ་བཅད་ནས་བཞག༔ དེ་དུས་བློན་པོས་ལྐོག་ཏུ་གླེང་བ་ལ༔ འདི་འདྲའི་རྟེན་འབྲེལ་མི་ཤོང་གཤིས་མི་དགེ༔ རྒྱལ་པོའི་མངའ་ཐང་ཆུང་དུ་འགྲོ་ཟེར་སྐད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཀྱི་རྒྱལ་པོས་རྒྱ་གར་ནས་པཎྜི་ཏ་བརྒྱ་རྩ་བརྒྱད་གདན་དྲངས་ནས་བོན་བསྣུབས་པའི་ལེའུ་སྟེ་གྱ་གཉིས་པའོ༔ ༔
པདྨ་བཀའ་ཐང་ལེའུ་ ༨༣ གཡུ་སྒྲ་སྙིང་པོས་བཻ་རོ་ཙ་ན་གདན་དྲངས་པ།
དེ་ནས་རྒྱལ་པོས་ཆོས་གསུང་ཞུ་བ་ཕུལ༔ ཨུ་རྒྱན་ཡུལ་ནས་སྤྱན་དྲངས་པདྨ་འབྱུང་༔ ཟ་ཧོར་ཡུལ་ནས་སྤྱན་དྲངས་ཞི་བ་འཚོ༔ ཁ་ཆེའི་ཡུལ་ནས་སྤྱན་དྲངས་བི་མ་ལ༔ སེང་གེའི་ཁྲི་ལ་ཁྲི་སྙན་པགས་པ་བཤམས༔ ཡོལ་བ་བླ་རེའི་འོག་ཏུ་གདུགས་ཕུབ་ནས༔ གཡས་སུ་རྒྱལ་མཚན་གཡོན་དུ་བ་དན་ཕྱར༔ མདུན་དུ་གསེར་གྱི་མཎྜལ་བརྒྱ་རྩ་བརྒྱད༔ གཡུ་དང་མུ་མེན་བྱུ་རུ་མརྐཏ་དང་༔ རིན་ཆེན་སྣ་ཚོགས་མཎྜལ་བཀོད་ནས་བཞག༔ སོ་སོར་ལོ་ཙཱ་བཙུགས་ནས་ཆོས་གསུང་བཅུག༔ བི་མ་མི་ཏྲ་བཻ་རོ་ཙ་ན་འདྲི༔ འབངས་ཀྱིས་རྒྱལ་མོ་ཚ་རོང་སྤྱུགས་ཞུས་པས༔ ཐལ་བརྡབས་བཻ་རོ་གསུང་ཞིང་སྤྱན་ཆབ་ཕྱུང་༔ མངོན་པ་པྲ་ཀ་ར་ཎ་སྡེ་བརྒྱད་གསུངས༔ དེ་དུས་བོད་དང་རྒྱལ་མོ་ཚ་རོང་གཉིས༔ ཚོང་འགྲོན་མང་པོ་ཡར་མར་འགྲོ་བ་ལས༔ རྒྱལ་རོང་ཚོང་པ་བོད་ཕྱིན་ལོག་བྱུང་བས༔ བོད་ཀྱི་གཏམ་དྲིས་ཇི་ལྟ་བ་བཞིན་སྨྲས༔ མཁས་པ་ཆེན་པོ་བཻ་རོ་ཙ་ན་ཡིས༔ རྣམ་ཐར་སྒོ་གསུམ་ཐང་གི་ཆོས་གྲྭ་རུ༔ གཡུ་སྒྲ་སྙིང་པོ་ལ་ཡོགས་འདོར་དུ་བཏང་༔ བནྡེ་ཕལ་པ་ཞིག་གི་ཆས་སུ་ཞུགས༔ ཞྭ་གོས་ལྷྭམ་ལ་ལྷན་པ་སྣ་ཚོགས་བརྒྱབ༔ སྦ་མཁར་རིང་མོ་ཕྱག་ཏུ་བསྣམས་ནས་ཕྱིན༔ གཡུ་སྒྲས་མཇལ་བའི་ཞུ་འཕྲིན་བསྲིངས་པ་ལས༔ ཆོས་ཀྱི་ཐུན་བབ་བག་ཙམ་བཞུགས་ཤིག་ཟེར༔ གཡུ་སྒྲ་ངང་ཐུངས་མ་བཞུགས་འཚངས་ཏེ་ཕྱིན༔ སྦ་མཁར་ལག་བཀབ་ཨོག་མཁར་བཙུགས་བྱས་ནས༔ བི་མ་ལ་ལ་ཕྱག་མི་འཚལ་བར་གཟིགས༔
ཀ་ཀ་པ་རི་ཀ་ཀ་པ་རི་གསུངས༔ བི་མས་བརྡ་ཐིམ་གསུངས་ནས་དབུ་འཕང་སྨད༔ གཡུ་སྒྲ་སྙིང་པོས་རྗེ་འབངས་ཡོངས་ལ་གཟིགས༔ སླར་ཡང་ཀ་ཀ་པ་རི་ཟེར་ནས་སོང་༔ རྒྱལ་པོ་ཁྲི་སྲོང་ལྡེའུ་བཙན་ཞལ་ན་རེ༔ སློབ་དཔོན་དབུ་འཕང་སྨ་ལ་གསུང་རེ་ཆུང་༔ བནྡེ་སྐྱ་མིན་སེར་མིན་སྐད་རེ་ཆེ༔ ཀ་ཀ་པ་རིའི་སྒྲ་དེ་ཅི་ཡིན་ཞུས༔ སློབ་དཔོན་བི་མ་མི་ཏྲའི་ཞལ་སྔ་ནས༔ ཝ་དང་སྤྲེའུ་ཇི་ལྟར་སྒྲ་བཟང་ཡང་༔ གཅན་གཟན་རྒྱལ་པོ་སེང་གེའི་སྒྲ་མི་འཁྱུར༔ ཕོ་རོག་རྡོ་རྗེ་འགྲོས་ནི་འགྲོ་མགྱོགས་ཀྱང་༔ སྟོང་གསུམ་ས་སྟེང་འཁོར་བ་ཅང་སྲིད་དམ༔ ཉན་ཐོས་བྱིས་པའི་ཆོས་ཀྱིས་འཚང་མི་རྒྱ༔ ཐེག་ཆེན་ངེས་དོན་བླ་མེད་མི་འཆད་པར༔ དེ་སྐད་ཟེར་བ་ཡིན་ནོ་རྒྱལ་པོར་གསུངས༔ བདག་གིས་བརྡ་ཐིམ་བྱས་པ་ཁ་རོག་སྡོད༔ ད་དུང་དུས་ལ་མ་བབ་བྱས་པ་ཡིན༔ རྗེ་འབངས་ཡོངས་ལ་བལྟས་ནས་ཟེར་བ་ནི༔ མཁས་བླུན་བྱེ་བྲག་མི་ཤེས་སྐྱོན་ཅན་ཚོ༔ རྨོངས་པ་འདུས་ནས་མཁས་པ་སུན་ཕྱུང་བཅུག༔ ངན་པ་གཞུང་ལོག་གླེན་འཐོམས་བྷ་ཀ་ར༔ ཐམས་ཅད་མཁྱེན་པ་རྒྱལ་མོ་ཚ་རོང་སྤྱུགས༔ དེ་སྐད་ཟེར་བ་ཡིན་ནོ་རྗེ་འབངས་རྣམས༔ དེ་ནས་སྐ་ཅོག་ཀུ་མཱ་ར་གསུམ་གྱིས༔ གཡུ་སྒྲ་སྙིང་པོ་ཚོལ་དུ་ཕྱིན་པ་ཡིས༔ གླིང་གསེབ་ཆང་མ་ཞིག་གི་ཁྱིམ་ན་འདུག༔ རེས་འགའ་དབྱངས་ལེན་རེས་འགའ་གསོལ་བ་འདེབས༔ ཆང་འཚོང་མ་དེ་ངུ་ཞིང་ཕྱག་འཚལ་འདུག༔ གཉགས་ཀྱིས་གྲོགས་པོ་གང་ནས་འོངས་བྱས་པས༔ རྒྱལ་མོ་ཚ་བའི་རོང་ནས་འོངས་སོ་ཟེར༔ སྐ་བས་བཻ་རོ་ཙ་ན་ཤེས་སམ་བྱས༔ ཤེས་ཤེས་ང་ཡི་བླ་མ་ཡིན་ནོ་ཟེར༔ ཅོག་རོས་སྐུ་ཁམས་བཟང་ནས་ཡོད་དམ་བྱས༔ སྐུ་ཁམས་བཟང་ཞིང་ང་ནི་ཆོས་གཏུགས་བཏང་༔ བཻ་རོ་ཙ་ནས་ཅི་མཁྱེན་ངས་ཤེས་ཟེར༔ གཉགས་ཆེན་ཀུ་མཱས་གདམས་ངག་ཞུ་བྱས་པས༔ ཡང་ན་རིག་དང་རིག་པ་བརྗེ་བར་བྱ༔ ཡང་ན་རིག་པ་མི་ཕངས་ནོར་གྱིས་བླུ༔ ཡང་ན་རིག་པ་བུ་ལ་སྦྱིན་པར་བྱ༔ ས་སེར་རྡོ་སྔོ་མཆུ་སྙུང་ལང་ལིང་དང་༔ སྐུ་ལ་མཛེས་པ་ཞལ་དུ་བདའ་བའི་བཅུད༔ ཐུགས་སུ་འབྱོན་པ་བཀོལ་ཉན་དུས་ལ་རུབ༔ དེ་བཞིན་མཆིས་ན་གདམས་ངག་སྦྱིན་ཆོག་ཟེར༔ གཉགས་ཀྱིས་བཀའ་བཞིན་བསྒྲུབས་ནས་གདམས་ངག་ཞུས༔ དེ་ནས་གཡུ་སྒྲ་ཁྲིད་ནས་ཕོ་བྲང་ཕྱིན༔ བི་མ་ལ་ཡིས་དྲི་བ་དྲིས་པ་ཡིས༔ བདག་ནི་པ་གོར་བཻ་རོ་ཙ་ནའི་བུ༔ སློབ་མ་གཡུ་སྒྲ་སྙིང་པོ་བྱ་བ་ལགས༔ དེ་སྐད་ཟེར་ནས་ཆོས་ལ་གླེང་བསླང་བྱས༔ སེམས་སྨད་ལྔ་ལ་མཁས་པ་ཞིག་འདུག་གསུངས༔ དེ་ནས་གཡུ་སྒྲས་ཀྱང་ནི་ཆོས་གྲ་བཙུགས༔ བར་སྐབས་བཅད་ནས་ཆོས་ནི་སོ་སོར་གསུངས༔ ལོ་ཙཱ་བ་ཡིས་སྐད་ཤོང་ཕྲག་ཏུ་ཉན༔ གཡུ་སྒྲས་སེམས་སྨད་སྔ་འགྱུར་ལྔ་གསུངས་ཤིང་༔ བི་མ་ལ་ཡིས་ཕྱི་འགྱུར་བཅུ་གསུམ་གསུངས༔ ཚིག་མ་མཐུན་ཀྱང་དོན་ནི་གཅིག་ཏུ་མཐུན༔ འདབ་ཆགས་མ་བུ་བསྡེབས་བཞིན་གཅིག་ཏུ་འགྲིལ༔ འགྱུར་གཉིས་གཅིག་བསྡོམས་སེམས་སྨད་བཅོ་བརྒྱད་བཏགས༔ དེ་དུས་བོད་ཀྱི་རྒྱལ་བློན་འབངས་བཅས་རྣམས༔ བཻ་རོ་ཙ་ན་སྤྱུགས་པས་འགྱོད་པ་སྐྱེས༔ བཻ་རོ་ཙ་ནའི་ཡོན་ཏན་ཐམས་ཅད་བགྲངས༔ འཕྲལ་ཞིབ་འགྲོགས་བདེ་དང་བ་འདྲེན་པའི་མི༔ སྐུ་ཡི་དཀྱིལ་འཁོར་ལྟ་བས་ཆོག་མི་ཤེས༔ ཚངས་པའི་གསུང་ནི་སྙན་པའི་དབྱངས་སུ་ལེན༔ དགུང་ལོ་བཅོ་ལྔ་ལས་ནི་མ་ལོན་པར༔ ལམ་རྒྱུས་མེད་པར་རྒྱ་གར་ཡུལ་དུ་བརྟོལ༔ འཇིགས་པ་གང་གིས་མ་ཚུགས་བོད་ཡུལ་སླེབས༔ བོད་སྤྲུག་སྒྲ་མ་ཤེས་པར་བཻ་རོས་ཤེས༔ རྒྱ་བོད་ལམ་ཞག་ཟླ་བ་བཅུ་གསུམ་ལ༔ ཟླ་བ་ཕྱེད་ཀྱིས་ཆོད་པའི་རྐང་མགྱོགས་གྲུབ༔ ཆོས་ནི་གང་ལའང་མ་རྨོངས་ཐམས་ཅད་མཁྱེན༔ ཐེག་པའི་རྣམ་གྲངས་མ་འདྲེས་སོ་སོར་ཕྱེད༔ རྫུ་འཕྲུལ་སྟོབས་ལྡན་སྟོན་པའི་ཞལ་སྐྱིན་མཆོག༔ ས་བརྒྱད་བྱང་ཆུབ་སེམས་དཔའ་འཛེར་ཞིང་སྨྲེང་༔ དེ་ནས་གཡུ་སྒྲས་རྒྱལ་མོ་ཚ་རོང་བྱོན༔ སྔར་གྱི་བཀའ་མཆིད་ཞིབ་ཏུ་གསོལ་བ་ཡིས༔ བཻ་རོ་ཙ་ན་དགྱེས་པའི་མགུར་འདི་གསུངས༔ བཻ་རོ་ཙ་ན་བདག་ཉིད་མཆིས་པ་འདི༔ ཡང་དག་བཅུ་གཅིག་དོན་དང་ཡེ་ནས་ལྡན༔ ཤེས་བྱའི་སྒྲིབ་པ་བག་ཙམ་མ་དག་པས༔ བོད་ཀྱི་སྤུ་རྒྱལ་བཙན་པོའི་ཡུལ་དུ་སྐྱེས༔ རྒྱ་གར་ཡུལ་ནས་དམ་པའི་ཆོས་བཙལ་ཡང་༔ མ་དག་བཙུན་མོ་བློན་པོ་ཀུན་བགྲོས་ནས༔ གདུལ་དཀའ་རྒྱལ་མོ་ཚ་བའི་རོང་དུ་སྤྱུགས༔ ཚ་བའི་རྒྱལ་ཁམས་ཐམས་ཅད་དཀར་པོར་བསྒྱུར༔ ད་ནི་སླར་ལོག་བོད་ཡུལ་དབུས་སུ་མཆི༔ མ་དག་སྒྱུ་མའི་ཕུང་པོ་དེར་བསྙིལ་ནས༔ ཟུང་འཇུག་འགྱུར་མེད་ནམ་མཁའི་མཐའ་བཞིན་རྒྱས༔ རྒྱལ་བློན་འབངས་བཅས་ཟོ་མདོག་བདེ་བར་བཞུགས༔ མཐར་ནི་ལོངས་སྐུའི་ཞིང་དུ་མཇལ་བར་སྨོན༔ ཞེས་གསུངས་དེ་ནས་བོད་ཡུལ་དབུས་བྱོན་པའི༔ ལམ་ཀར་སྤམ་རྒན་མི་ཕམ་མགོན་པོ་ཞེས༔ མགོ་དཀར་ལུས་འཁོགས་ལོ་བརྒྱ་ལོན་པའི་སར༔ ཞག་ས་ཕོག་པས་གང་འོངས་གར་འགྲོ་ཟེར༔ གཡུ་སྒྲས་རྒྱལ་རོང་ནས་འོངས་བོད་འགྲོ་བྱས༔ རྒད་པོ་ཧམས་ནས་འགྲོན་པོ་ཁྱེད་གཉིས་འཁྲུལ༔ ཚ་བའི་རོང་དུ་ཆོས་ཉན་མི་སྡོད་པར༔ མཁས་པ་བཻ་རོ་ཙ་ན་ཞེས་བྱ་བ༔ ཆོས་ཀྱི་ཉི་མ་ཤར་འདུག་ཟེར་བ་ཐོས༔ དེར་མི་སྡོད་པར་ཁྱེད་གཉིས་འདྲ་བ་ཟེར༔ བཻ་རོ་ཙ་ནས་དེ་ཉིད་ང་ཡིན་གསུངས༔ རྒད་པོས་མིག་ལ་འཁར་བ་བཙུགས་ནས་བལྟས༔ བཻ་རོ་ཙ་ནའི་མགུལ་པ་ལ་འཁྱུད་ནས༔ རྒད་པོས་ཡུན་ཅིག་ངུས་ནས་འདི་སྐད་ལོ༔ ང་ནི་རྒས་ཤིང་ཆོས་མེད་འཆི་མ་བཏུབ༔ ཉོན་མོངས་སྡུག་རྒན་ང་འདྲ་ཡོད་པ་སྙམ༔ ཁྱོད་དང་མཇལ་བ་སྐྱིད་རྒན་ཨ་རེ་དགའ༔ འཆི་ཀར་ཕན་པའི་ཆོས་ཤིག་ཞུ་དང་ཟེར༔ དེ་ནས་བཻ་རོས་སྒོམ་རྟེན་ལུས་ལ་བཙུགས༔ སྒོམ་ཐག་རྐེད་ལ་བསྡམས་ནས་གདམས་ངག་བཏབ༔ རྒད་པོ་ལུས་མ་བོར་བར་སངས་རྒྱས་སོ༔ དེ་ནས་བསམ་ཡས་ཆོས་གྲའི་གསེབ་ཏུ་བྱོན༔ ཕ་མ་རྒན་འཁོགས་གཉིས་ཀྱང་དེ་ན་འདུག༔ བཻ་རོས་ཞེ་བློ་བདེ་བའི་མགུར་འདི་གསུངས༔ ཞབས་ཏོག་རྣམ་གསུམ་བླ་མ་བསྟེན་པ་འདི༔ བཻ་རོ་ཙ་ན་པཎ་ཆེན་འཛོམས་པ་འདྲ༔ ཁོ་བོའི་གཏུགས་ས་འདི་རྣམས་དགྱེས་པ་ན༔ གཞན་དག་སུ་མ་མགུ་ཡང་ཞེ་བློ་བདེ༔ ཤེས་རབ་རྣམ་གསུམ་མདོ་རྒྱུད་བལྟ་བ་འདི༔ རིན་ཆེན་གླིང་དུ་ཚོང་དཔོན་ཕྱིན་པ་འདྲ༔ ལུས་སྲོག་ལོངས་སྤྱོད་ཆོས་ཕྱོགས་སོང་བ་ང་༔ ཚེ་འདིར་སྡུག་ཅིང་ཕོངས་ཀྱང་ཞེ་བློ་བདེ༔ བསླབ་པ་གསུམ་གྱིས་ལེགས་པར་བརྒྱན་པ་འདི༔ རྒྱལ་པོའི་ལྷ་གཅིག་བག་མར་ཕྱིན་པ་འདྲ༔ རང་གིས་ཆོས་ཚུགས་དྲང་པོར་ཟིན་པ་ང་༔ གཞན་གྱིས་ངན་སྨྲས་བརྗོད་ཀྱང་ཞེ་བློ་བདེ༔ སྡེ་སྣོད་གསུམ་ལ་ལྟད་མོ་ལྟ་བ་འདི༔ མུན་པའི་གླེང་དུ་སྒྲོན་མེ་བཏེགས་པ་འདྲ༔ རྐྱེན་སྐུལ་དགྲ་ལ་བཟོད་པ་སྒོམ་པ་ང་༔ གཞན་དོན་མ་ཕེར་ཟེར་ཡང་ཞེ་བློ་བདེ༔ ལུས་ངག་ཡིད་གསུམ་ཆོས་ལ་འཁོལ་བ་འདི༔ ཐག་རིང་འགྲོན་པོ་ཕ་ཡུལ་སླེབས་པ་འདྲ༔ རྟག་ཏུ་དགེ་སྦྱོར་དག་ལས་མ་ཡེངས་ང་༔ མི་རྗེས་མ་སླེབས་ཟེར་ཡང་ཞེ་བློ་བདེ༔ དུག་གསུམ་གཉེན་པོར་ཡེ་ཤེས་གཏོང་བ་འདི༔ ཚད་པའི་ནད་ལ་ག་བུར་ཐོངས་པ་འདྲ༔ བསམ་རྒྱུ་དམ་པའི་ཆོས་ལས་མེད་པ་ང་༔ བློ་ཤོ་རྒོད་དོ་ཟེར་ཡང་ཞེ་བློ་བདེ༔ ཐོས་བསམ་སྒོམ་པ་ཕྱོགས་མེད་བྱས་པ་འདི༔ ནམ་མཁའི་དཀྱིལ་དུ་མདུང་བསྐོར་བྱས་པ་འདྲ༔ ཕྱི་ནང་ཆོས་ཀྱི་སྒྲོ་འདོགས་ཆོད་པ་ང་༔ ཆོས་ཀུན་མི་ཤེས་ཟེར་ཡང་ཞེ་བློ་བདེ༔ ཨ་ཏི་རྟོགས་པའི་རྣལ་འབྱོར་འཕྱོ་བ་འདི༔ གཞན་དྲིང་མེད་པའི་ཁྲི་མུན་ཐར་བ་འདྲ༔ ཉན་འཆད་སྒོམ་ལ་མཁས་པར་གྱུར་པ་ང་༔ མི་ཆོས་མ་མཁས་ཟེར་ཡང་ཞེ་བློ་བདེ༔ རང་བས་གཞན་ལ་གཅེས་པར་འཛིན་པ་འདི༔ བྱང་ཆུབ་སེམས་དཔའི་དགེ་སྦྱོང་སྐྱེས་རབས་འདྲ༔ ངོ་བསྲུང་ཕྱོགས་སུ་གདམས་ངག་མི་སྟེར་ང་༔ མི་སེམས་མ་ཟིན་ཟེར་ཡང་ཞེ་བློ་བདེ༔ སྦྱིན་པ་གསུམ་གྱི་རྒྱགས་ཕྱེ་བསྒྲུབས་པ་འདི༔ དབུལ་པོས་ཡིད་བཞིན་ནོར་བུ་རྙེད་པ་འདྲ༔ ཅི་ཡོད་བླ་མའི་ཕྱོགས་སུ་འབུལ་བ་ང་༔ ལྟོགས་གྲི་འཁྱགས་གྲིར་ཤི་ཡང་ཞེ་བློ་བདེ༔ ཚུལ་ཁྲིམས་གསུམ་གྱི་སྐྱེལ་མ་ཁྲིད་པ་འདི༔ འཇིགས་པའི་འཕྲང་ལ་ལམ་རྒྱ་བཙུགས་པ་འདྲ༔ བཟང་ངན་འབྲིང་གསུམ་གོང་དུ་འཁུར་བ་ང་༔ འཁོས་མེད་སྙོམས་ཆུང་ཟེར་ཡང་ཞེ་བློ་བདེ༔ བཟོད་པ་གསུམ་གྱི་གོ་ཆ་གྱོན་པ་འདི༔ བཙན་པོའི་མཁར་ལ་རུ་སྦལ་འཛེགས་པ་འདྲ༔ འཇིག་རྟེན་བྱ་བ་ཐམས་ཅད་བློས་བཏང་ང་༔ ཁ་ཉེན་དབང་ཆུང་ཟེར་ཡང་ཞེ་བློ་བདེ༔ བརྩོན་འགྲུས་གསུམ་གྱི་རྟ་བཟང་རྒྱུག་པ་འདི༔ མཚང་ཆེན་མི་དང་ཡུས་ཆེན་འཕྲད་པ་འདྲ༔ སྤྱུགས་པའི་ཡུལ་དུ་མི་སྐྱོ་ཚུགས་པ་ང་༔ འགྲོ་ས་མ་བྱུང་ཟེར་ཡང་ཞེ་བློ་བདེ༔ བསམ་གཏན་གསུམ་གྱི་ས་མཁར་འཛིན་པ་འདི༔ སྤྲིན་མེད་མཁའ་ལ་ཉི་མ་ཤར་བ་འདྲ༔ སེམས་ཀྱི་གཞི་རྩ་ལེགས་པར་ཆོད་པ་ང་༔ ལྟ་ལོག་ཆོས་མིན་ཟེར་ཡང་ཞེ་བློ་བདེ༔ བསླབ་གསུམ་ལྡན་ཞིང་སྤོབས་པས་ཁྱོགས་པ་འདི༔ རི་རབ་རྩེ་ནས་རི་ཕྲན་མཐོང་བ་འདྲ༔ ཐེག་པའི་འཇུག་སྒོ་ཀུན་རྫོགས་རྫོགས་ཆེན་ང་༔ མུ་སྟེགས་ཕྲ་མེན་ཟེར་ཡང་ཞེ་བློ་བདེ༔ ཞེས་གསུངས་པཎ་ཆེན་བི་མ་མི་ཏྲ་ལ༔ སྤྱིར་ནི་སྒྲ་རིག་མཁས་པའི་པཎྜི་ཏ༔ ཁྱད་པར་གསང་སྔགས་མཁས་དང་ལྷན་ཅིག་འཛོམས༔ ངས་ལོ་བཅུ་གཅིག་བར་དུ་མདོ་སྡེ་ཉན༔ བཅུ་གཉིས་མདོ་སྔགས་ཐམས་ཅད་བོད་དུ་བསྒྱུར༔ ལོ་གཅིག་དབང་རྫོགས་ལག་ཏུ་ལེན་ཐབས་སྦྱངས༔ ཆུ་མ་འཕྲོད་པར་སྲོག་དང་དོ་བྲལ་བྱས༔ རྒྱུ་སྟོང་རྐེད་པར་དཀྲིས་ནས་བོད་དུ་འོངས༔ ཆོས་བཞིན་སྤྱད་ཀྱང་ཆོས་མིན་བློན་པོ་འགས༔ རྨོངས་པ་འདུས་ནས་མཁས་པ་སུན་འབྱིན་བྱེད༔ དམུན་པ་འདུས་ཤིང་བློ་བསྡུར་ང་ཉིད་སྤྱུགས༔ རྒྱ་གར་པཎ་ཆེན་བོད་དུ་བྱོན་པས་དགའ༔ ཟང་ཟིང་ཅང་མེད་རྒྱལ་རོང་ཆོས་ལ་འཁོད༔ དེ་ཉིད་སྒྲུབ་པའི་མཎྜལ་ཕྱག་གྱིས་འབུལ༔ ཞེས་གསུངས་བི་མ་ལ་ལ་ཕྱག་བཙལ་བས༔ བི་མ་མི་ཏྲས་བཞེངས་ནས་ཕྱག་ལན་མཛད༔ བོད་ཀྱི་པཎྜི་ཏ་གསུངས་སྤྱན་ཆབ་ཕྱུང་༔ རྗེ་འབངས་ཐམས་ཅད་བཻ་རོ་ཙ་ནར་ལྟ༔ རབ་ཏུ་ངུ་ཞིང་ཤིན་ཏུ་ངོ་མཚར་གྱུར༔ རྒྱ་གར་པཎྜི་ཏ་རྣམས་ཐལ་མོ་སྦྱོར༔ མཆི་མ་གཟགས་པར་མཆན་བསྐྱོར་ཕྱི་བར་མཛད༔ ཕ་མ་རྒན་འཁོགས་བུ་ལ་བལྟ་ཞིང་ངུ་༔ བཻ་རོ་ཙ་ནའང་ཕ་མ་སྙིང་རྗེར་དགོངས༔ མ་གཟིགས་པ་བཞིན་མཛད་ནས་སྤྱན་ཆབ་འབྱིན༔ རྒྱལ་བློན་འབངས་བཅས་ཕྱག་འཚལ་བཤགས་པ་བྱས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གཡུ་སྒྲ་སྙིང་པོ་ཆོས་གཏུག་ཏུ་བཏང་ཞིང་རྒྱལ་མོ་ཚ་བའི་རོང་ནས་བཻ་རོ་ཙ་གདན་དྲངས་པའི་ལེའུ་སྟེ་གྱ་གསུམ་པའོ༔ ༔
པདྨ་བཀའ་ཐང་ལེའུ་ ༨༤ སྒྲ་བསྒྱུར་གླིང་དུ་སྒྲ་བསྒྱུར་བ།
དེ་ནས་བསམ་ཡས་དབུ་རྩེའི་བར་ཁང་དུ༔ ལོ་པཎ་སྤྱན་དྲངས་ཆོས་བསྒྱུར་ཞུ་བ་ཕུལ༔ སློབ་དཔོན་པདྨའི་སྐུ་ལ་མངལ་དྲིས་དབེན༔ པད་སྡོང་སྐུ་འཁྲུངས་སྐྱེ་ཤི་གཉིས་མི་མངའ༔ ཁམས་གསུམ་དབང་བསྡུས་སྲིད་གསུམ་ཟིལ་གྱིས་མནན༔ ཆོས་མིང་སྨོས་པ་ཙམ་གྱིས་དོན་རྣམས་མཁྱེན༔ མདོ་སྔགས་ཆོས་སོ་ཅོག་ལ་མ་རྨོངས་ཤིང་༔ ཁྱད་པར་གསང་སྔགས་ནང་པའི་བདག་པོ་ཡིན༔ བོད་དུ་གདན་འདྲོངས་ས་བཏུལ་སྐུ་དྲིན་ཆེ༔ སེང་ཁྲི་སུམ་བརྩེགས་གདན་ལ་བཞུགས་སུ་གསོལ༔ པཎ་ཆེན་བི་མ་མི་ཏྲ་བཀའ་རྒྱ་མཚོ༔ སྡེ་སྣོད་གསུམ་དང་གསང་སྔགས་ཕྱི་ནང་སོགས༔ ཆོས་རྣམས་ཐུགས་མངའ་མི་བརྗེད་གཟུངས་ཐོབ་ཡིན༔ བོ་དྷི་ས་ཏྭ་བསྟན་པའི་གཞི་མ་སྟེ༔ དགེ་འདུན་མེད་ན་སངས་རྒྱས་བསྟན་པ་མེད༔ དེ་བས་དགེ་འདུན་རིན་ཆེན་མཆོག་ཏུ་གསུངས༔ སྡེ་སྣོད་གསུམ་དང་གསང་སྔགས་ཕྱི་པ་མཁས༔ གཡས་གཡོན་གཉིས་སུ་སེང་ཁྲི་གཉིས་བརྩེགས་ནས༔ གཡས་སུ་བི་མ་གཡོན་དུ་བོ་དྷི་བཞུགས༔ པཎ་ཆེན་གཞན་རྣམས་སེང་ཁྲི་རེ་རེ་བཞུགས༔ བཻ་རོ་ཙ་ནར་གབ་རྩེ་ཉིས་བརྩེགས་བཏིངས༔ ལོ་ཙཱ་གཞན་རྣམས་གབ་རྩེ་རེ་ལ་བཞུགས༔ རྒྱལ་པོས་གསེར་གྱི་མཎྜལ་རེ་རེ་ཕུལ༔ རྒྱ་ནག་ཇ་དང་བལ་པོའི་གོ་ལ་དང་༔ བོད་ཀྱི་འབྲུ་ཆང་རྒྱ་གར་འབྲས་ཆང་དང་༔ འཇིག་རྟེན་ཟས་སྣ་མང་པོ་ཀུན་བསགས་ནས༔ གང་ལ་གང་བཞེད་དྲངས་ནས་བསྐོར་ཕྱག་བཙལ༔ ཨེ་མ་ཧོ༔ ཨུ་རྒྱན་སློབ་དཔོན་པདྨ་འབྱུང་གནས་དཔལ༔ ཟ་ཧོར་མཁན་པོ་བོ་དྷི་ས་ཏྭ་དང་༔ ཁ་ཆེའི་པཎ་ཆེན་བི་མ་ལ་མི་ཏྲ༔ དབུ་ཡི་མཆོད་གནས་ལོ་པཎ་བརྒྱ་རྩ་བརྒྱད༔ བདག་ནི་ཆོས་སྐྱོང་རྒྱལ་པོར་ཁས་འཆེ་བས༔ རྒྱ་གར་ཡུལ་ན་བཞུགས་པ་དམ་པའི་ཆོས༔ བཀའ་དང་བསྟན་བཅོས་རྒྱུད་ལུང་མན་ངག་རྣམས༔ གཅིག་ཀྱང་མ་ལུས་བོད་དུ་བསྒྱུར་དུ་གསོལ༔ གུས་ལྡན་ཞེ་སར་བཅས་པས་བཀའ་ནན་ཞུས༔ དེ་ནས་ལོ་པཎ་ཁྲིམས་ཁང་གླིང་དུ་བྱོན༔ རྒྱལ་པོས་མོན་ལ་ཤོག་བུ་སྡུད་དུ་བཏང་༔ འབངས་རྣམས་རྒྱ་ནག་ཙནྡན་ཤིང་འདྲེན་བཅུག༔ མངའ་འོག་ཀུན་ལ་ཟངས་ལྕགས་ཀོ་བ་བསྡུས༔ ཡིག་མཁན་ཤིང་བཟོ་མགར་བ་མཉེད་མཁན་བཀོལ༔ ཐམས་ཅད་དུས་གང་གཅིག་ལ་ཟིན་པ་བྱས༔ ལོ་པཎ་དབུ་རྩེ་རིགས་གསུམ་ལྷོ་ནུབ་མཚམས༔ སྒྲ་བསྒྱུར་གླིང་དུ་སྒྲ་རྣམས་ཐམས་ཅད་བསྒྱུར༔ རྒྱ་གར་མཁན་པོ་དཱ་ན་ཤཱི་ལ་དང་༔ ཛི་ན་མི་ཏྲ་ཤཱི་ལེནྡྲ་བོ་དྷི༔ པྲ་ཝརྟ་དང་དྷརྨཱ་ཤཱི་ལ་དང་༔ སུ་རེནྡྲ་དང་དྷརྨཱ་ཤྲཱི་དང་༔ ཤཱཀྱ་ཤྲཱི་དང་ས་མནྟ་ཤྲཱི༔ ཤྲཱི་བ་ལེ་དྷར་བཅུ་ཡིས་མ་མོ་བྱས༔ ལོ་ཙཱ་ཞང་གི་བནྡེ་ཡེ་ཤེས་སྡེ༔ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚན༔ གཡུ་སྒྲ་སྙིང་པོ་དཀོན་མཆོག་འབྱུང་གནས་དང་༔ རཀྵི་ཏ་དང་ཤཱཀྱ་པྲ་བྷ་བ༔ ལྷ་ལུང་དཔལ་རྡོར་མཻ་ཏྲི་ཤྲཱི་བྷ་དྲ༔ ལོ་ཀཱི་ཆུང་དང་བཅུ་ཡིས་སྤྲུ་གུ་བྱས༔ ལོ་པཎ་ཉི་ཤུས་བཀའ་འཁོར་རིམ་གསུམ་བསྒྱུར༔ དང་པོ་དྲང་དོན་བསྟན་པའི་མདོ་བཅུ་བསྒྱུར༔ བར་པ་ངེས་དོན་ཡུམ་སྲས་བཅུ་བདུན་བསྒྱུར༔ ཕ་རོལ་ཕྱིན་པ་མངོན་པར་རྟོགས་པ་བརྒྱད༔ དོན་ཚན་བདུན་ཅུ་ལམ་ལྔ་ས་བཅུ་དང་༔ འགྲེས་རྐང་བརྒྱ་རྩ་བརྒྱད་ཀྱིས་གཞུང་རྣམས་བསྡུས༔ འཁོར་ལོ་ཐ་མ་ལངྐར་གཤེགས་པ་དང་༔ ཕལ་ཆེན་དཀོན་བརྩེགས་དགོངས་པ་ངེས་འགྲེལ་དང་༔ ལྷ་མོ་དཔལ་ཕྲེང་སེང་གེ་སྒྲ་སོགས་བསྒྱུར༔ མངོན་པ་གོང་འོག་གསུམ་ཀའི་བཀའ་ཆད་དེ༔ རྒྱ་གར་ན་མེད་བོད་དུའང་མ་འགྱུར་རོ༔ བསོད་སྐྱབས་བདུད་རྩི་ལྔ་པ་ཡེ་ཤེས་སྡེ༔ རྣམ་གཟིགས་ཆོས་ཀྱི་མེ་ལོང་ཀླུའི་རྒྱལ་མཚན༔ འོད་སྲུངས་སྟོང་པ་རབ་འབྱེད་ཡེ་ཤེས་སྡེས༔ བཻ་རོ་ཙ་ནས་བོན་ཆོས་འདྲེས་མར་བསྒྱུར༔ བཻ་རོ་ཙ་ནས་རྩིས་སྨན་འདྲེས་མར་བསྒྱུར༔ བཻ་རོ་ཙ་ནས་མདོ་སྔགས་འདྲེས་མར་བསྒྱུར༔ མདོ་བསྒྱུར་ནང་དུ་ཡེ་ཤེས་སྡེ་ཞེས་བྲིས༔ སྔགས་བསྒྱུར་ནང་དུ་བཻ་རོ་ཙ་ན་བྲིས༔ བོན་བསྒྱུར་ནང་དུ་གན་ཇག་ཐང་ཏ་བྲིས༔ རྩིས་བསྒྱུར་ནང་དུ་ཨིནྡྲ་བཻ་རོ་བྲིས༔ སྨན་བསྒྱུར་ནང་དུ་ཆོས་འབར་བྱ་བ་བཅུག༔ མདོ་ཆོས་དགོངས་འགྲེལ་དང་བཅས་ཕལ་ཆེར་བསྒྱུར༔ བོ་དྷི་ས་ཏྭ་སྦ་ལོ་ཁྲི་གཞེར་དང་༔ སྦ་ལོ་ཡེ་ཤེས་དབང་པོ་སྦ་རཏྣ༔ སྦ་མི་ཡེ་ཤེས་འཇམ་དབྱངས་སྦས་ཐིར་ལེན༔ ལོ་པཎ་མཆན་བུ་རྣམས་ཀྱིས་བསྒྱུར་བ་ལ༔ འདུལ་བ་ལུང་གཞི་དང་ནི་ལུང་རྣམ་འབྱེད༔ ལུང་གཞུང་བླ་མ་དང་ནི་ལུང་ཕྲན་ཚེགས༔ དེ་ལྟར་འདུལ་བའི་ལུང་ཆེན་སྡེ་བཞི་བསྒྱུར༔ ལུང་གཞིའི་སྟོད་ཆ་རབ་བྱུང་གནས་མལ་གཞི༔ གཞི་སྨད་གསོ་སྦྱོང་གཞི་སོགས་བཅུ་བདུན་སྟོན༔ རྣམས་འབྱེད་དགེ་སློང་ཕ་མའི་ཁྲིམས་རྣམས་སྟོན༔ བླ་མས་གཞི་དང་རྣམ་འབྱེད་ཞིབ་ཏུ་འཆད༔ ཕྲན་ཚེགས་ཀུན་གྱི་མ་ཚང་ཁ་སྐོངས་ཡིན༔ རྩ་བའི་ལུང་ལས་དགེ་སློང་སོ་ཐར་དང་༔ དགེ་སློབ་མ་ཡི་སོ་སོར་ཐར་པ་དང་༔ གཞན་ཡང་ལས་ཆོག་ཀརྨ་ཤ་ཏམ་དང་༔ ལག་ལེན་མདོ་རྩ་ཚིགས་བཅད་ཀཱ་རི་ཀ༔ དགེ་ཚུལ་བྱ་བའི་ལས་དང་ལོ་དྲི་བ༔ དེ་རྣམས་འགྲེལ་བཤད་ལག་ལེན་དང་བཅས་པ༔ ལོ་པཎ་དགུ་ཡིས་བསྒྱུར་ཅིང་གཏན་ལ་ཕབ༔ སྦ་བྱེད་འདི་རྣམས་གསང་སྔགས་ལ་མི་མོས༔ སློབ་དཔོན་པདྨའི་སྐུ་ལ་སྐྱོན་མང་བརྗོད༔ སྦ་བྱེད་དྲིལ་བའི་ཚིག་འཁྱམ་མང་དུ་བརྩམས༔ འདུལ་བ་མིན་པ་གཞན་ལ་དག་མི་སྟེར༔ ཨུ་རྒྱན་ཆེན་པོ་པདྨ་འབྱུང་གནས་དང་༔ སྒྲ་རིགས་མི་འདྲ་ཉེར་གཅིག་ཤེས་པ་ཡི༔ ལོ་ཙ་མཁས་པ་བཻ་རོ་ཙ་ན་ཡིས༔ གསང་སྔགས་ནང་རྒྱུད་འབྲས་བུའི་མདོ་བདུན་བསྒྱུར༔ དེ་ཡང་སྐུ་ལྔ་མི་འབྱེད་པ་ཡི་མདོ༔ གསུང་ལྔ་བྱེ་བྲག་མ་འདྲེས་པ་ཡི་མདོ༔ ཐུགས་ལྔ་ཡེ་ཤེས་དག་པ་སྒོ་ལྔའི་མདོ༔ ཡོན་ཏན་རྣམ་ལྔ་གོལ་ས་བཅད་པའི་མདོ༔ འཕྲིན་ལས་ལྔ་ཡི་རྣམ་གྲངས་ངེས་པའི་མདོ༔ ཁྲིམས་གསུམ་རྩ་བ་རབ་ཏུ་བརྟན་པའི་མདོ༔ ལས་བྱེད་ལས་ལ་བཀོལ་བའི་མདོ་བདུན་བསྒྱུར༔ གསང་སྔགས་རྒྱལ་པོ་བཀའ་འདུས་སྤྱི་རྒྱུད་བཅུ༔
སྒོས་རྒྱུད་ཉེར་གཅིག་གདམས་པར་བཅས་པ་བསྒྱུར༔ བདེ་གཤེགས་འདུས་པའི་རྩ་བའི་སྤྱི་རྒྱུད་ལྔ༔ སྒོས་རྒྱུད་བཅུ་དང་ལུང་ཆེན་ལྔ་སོགས་བསྒྱུར༔ བླ་མེད་དོན་རྫོགས་རྒྱུད་འགྲེལ་མན་ངག་བསྒྱུར༔ སྙིང་ཐིག་གསང་བའི་རྒྱུད་ཆེན་ཉི་ཤུ་བསྒྱུར༔ ཁ་ཆེའི་པཎ་ཆེན་བི་མ་མི་ཏྲ་དང་༔ ལོ་ཙཱ་གཉགས་ཆེན་ཛྙཱ་ན་ཀུ་མཱ་རས༔ རྡོ་རྗེ་སེམས་དཔའ་སྒྱུ་འཕྲུལ་དྲ་བ་དང་༔ ཡང་ཕུར་མ་གཤིན་རྒྱུད་འགྲེལ་བཅས་པ་དང་༔ སེམས་སྡེ་ཀློང་སྡེ་མན་ངག་སྙིང་ཐིག་བསྒྱུར༔ སངས་རྒྱས་གསང་བ་བཻ་རོ་ཙ་ན་ཡིས༔ སྒྱུ་འཕྲུལ་སྡེ་བརྒྱད་རྡོར་དབྱིངས་དགོངས་འདུས་དང་༔ ཨ་ནུའི་མདོ་བཞི་དེམས་ལྔ་ལ་སོགས་བསྒྱུར༔ པཎ་ཆེན་ས་མནྟ་ཤྲཱི་ཤཱཀྱ་ཤྲཱི༔ དྷརྨཱ་ཤྲཱི་དང་ལོ་ཙཱ་སྐ་ཅོག་གཉིས༔ ཡོན་ཏན་སྙིང་པོ་ལེགས་སྦྱིན་ཉི་མ་དང་༔ ཀླུའི་དབང་ཆོས་ཀྱི་ལྷུན་པོ་ལ་སོགས་པས༔ ལུས་སྤྱོད་གཙོ་བོར་སྟོན་པ་བྱ་བའི་རྒྱུད༔ ངག་སྤྱོད་གཙོ་བོར་སྟོན་པ་སྤྱོད་པའི་རྒྱུད༔ སེམས་སྤྱོད་གཙོ་བོར་སྟོན་པ་རྣལ་འབྱོར་རྒྱུད༔ གསུམ་ཀ་གཙོ་བོར་སྟོན་པ་བླ་མེད་རྒྱུད༔ ཕ་རྒྱུད་སྡེ་གསུམ་མ་རྒྱུད་སྡེ་ལྔ་བསྒྱུར༔ རྒྱ་ནག་ཧྭ་ཤང་མ་ཧཱ་སཱུ་ཏྲ་དང་༔ རྒྱ་ནག་མཁས་པ་སཾ་ཤི་ལ་སོགས་དང་༔ རྨ་བན་རིན་ཆེན་མཆོག་སོགས་ལོ་ཙཱ་ལྔས༔ སྤང་སྐོང་ཕྱག་བརྒྱ་མདོ་སྡེ་རྒྱ་ནག་མ༔ འདས་པ་པོད་གཅིག་ཕལ་ཆེན་རྒྱ་ནག་མ༔ གསེར་འོད་དམ་པ་བདུད་ལས་རྣམ་རྒྱལ་དང་༔ སྲི་གཟུངས་སྒྲོལ་མ་ལ་སོགས་མང་དུ་བསྒྱུར༔ དཱ་ན་ཤཱི་ལ་དྷརྨཱ་ཀཱིརྟྟི་དང་༔ སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚན༔ ཀླུ་དབང་སྲུང་བ་ཡེ་ཤེས་སྡེ་སོགས་ཀྱིས༔ འཇམ་དཔལ་རྩ་བའི་རྒྱུད་དང་རྣོན་པོ་དང་༔ མཚན་ཡང་དག་པར་བརྗོད་པ་གླུར་བླངས་རྒྱུད༔ སྤྱན་རས་གཟིགས་ཀྱི་རྩ་རྒྱུད་པདྨའི་དྲ༔ བཤད་རྒྱུད་དོན་ཡོད་ཞགས་པ་ལ་སོགས་དང་༔ ཕྱག་ན་རྡོ་རྗེ་འཁོར་ཆེན་རྒྱུད་སོགས་དང་༔ སྒྲོལ་མའི་རྒྱུད་ལ་སོགས་པ་མང་དུ་བསྒྱུར༔ ཁ་ཆེའི་སློབ་དཔོན་ཛི་ན་མི་ཏྲ་དང་༔ དཱ་ན་ཤཱི་ལ་སུ་རེནྡྲ་བོ་དྷི༔ འབྲུ་ཤའི་བྲམ་ཟེ་ཆེན་པོ་ཨཱ་ནནྡ༔ ལོ་ཙཱ་སྐ་ཅོག་ཞང་གསུམ་ལ་སོགས་པས༔ ཐེག་པ་ཆེན་པོའི་མདོ་སྡེ་ཕར་ཆེར་དང་༔ མདོ་སྡེ་གདམས་ངག་འབོགས་པའི་རྒྱལ་པོ་དང་༔ གསང་བ་ཆེན་པོ་བརྟག་སྣ་ལ་སོགས་པ༔ ཁ་ཆེའི་འགྱུར་དང་འབྲུ་ཤའི་འགྱུར་མང་བསྒྱུར༔ བལ་པོའི་པཎ་ཆེན་ཤཱི་ལ་མཉྫུ་དང་༔ བལ་པོ་བ་སུ་དྷ་ར་ལ་སོགས་དང་༔ ལོ་ཙཱ་བསྒྲགས་པ་སངས་རྒྱས་ཡེ་ཤེས་ཀྱིས༔ འཇམ་དཔལ་གཤིན་རྗེ་ཟླ་གསང་ནག་པོའི་རྒྱུད༔ དས་ཆད་ནག་པོ་སྲས་དགུ་ཁ་ཐུན་སོགས༔ མ་གཤིན་ཕྲ་མེན་དྲག་སྔགས་མང་དུ་བསྒྱུར༔ དེ་ཡི་དུས་ན་རྒྱལ་པོ་བསྙུང་གིས་ཟིན༔ ཕན་ཐབས་ཇི་ལྟར་བྱས་ཀྱང་མ་དངས་པར༔ ཀག་བསྐོར་མོ་དང་ཕྱྭ་རྩིས་པྲ་ཕབ་པས༔ སློབ་དཔོན་ནམ་མཁའི་སྙིང་པོ་སྤྱན་དྲངས་ནས༔ བྱིན་བརླབས་བྱས་ན་ཕན་པར་འགྱུར་ཞེས་ཟེར༔ ཨཱ་ཙར་ཡེ་ཤེས་དབྱངས་དང་གསལ་མཆོག་དབྱངས༔ དགེ་སློང་ནམ་མཁའི་སྙིང་པོ་སྤྱན་འདྲེན་བཏང་༔ ཁྱེད་རང་གཉིས་པོ་སྔོན་ལ་སོང་ཞིག་གསུངས༔ བང་ཆེན་མ་སླེབས་སློབ་དཔོན་བསམ་ཡས་བྱོན༔ སློབ་དཔོན་རྗེ་ལ་བསྙུང་ངམ་གསུངས་པ་ཡིས༔ ན་དང་ན་སྟེ་ཤི་ལ་ཐུག་ལ་ཁད༔ དགེ་སློང་ཕན་པའི་ཐབས་འདྲ་བདོག་གམ་གསུངས༔ བདོག་གོ་གསུངས་པས་ཡས་སྟགས་ཅི་འཚལ་ལགས༔ ཅི་ཡང་མི་འཚལ་གསོལ་ཐང་གང་དང་གང་༔ ང་ལ་ཚོགས་སུ་དྲོངས་ཤིག་གསུང་པས་དྲངས༔ སློབ་དཔོན་བཟའ་ཚོགས་བཏུང་བའི་རྣལ་འབྱོར་མཛད༔ མགོ་གསོལ་ཙམ་ན་བསྙུན་རྨེད་མཛད་པ་ལས༔ ད་ཅི་བས་ནི་ཅུང་ཟད་བདེའོ་གསུངས༔ སུམ་ཆ་གསོལ་ནས་ཡང་ནི་བསྙུན་རྨེད་པས༔ ཨེན་ཙམ་བདེ་བས་ལུས་པོ་ཡང་འདུག་གསུངས༔ རྒྱལ་པོའི་སྐུ་ཡི་དམ་ཚིག་ཉམས་པ་བསྐངས༔ སུམ་གཉིས་གསོལ་ནས་བསྙུན་རྨེད་མཛད་པས་ཡིས༔ སྦྲིད་པ་གསུམ་བསྟུད་ད་ནི་བདེར་སོང་གསུང་༔ རྒྱལ་པོའི་གསུང་གི་དམ་ཚིག་ཉམས་པ་བསྐངས༔ དེ་ནས་བཞེས་པ་ཀུན་གསོལ་ཟིན་པ་དང་༔ བཀའ་འབངས་ཕྱི་མ་ཞིག་གིས་བསྙུན་གསོལ་བས༔ མི་བདེ་མེད་དེ་མིག་གཉིས་ཟུར་ཚ་གསུང་༔ རྒྱལ་པོའི་ཐུགས་ཀྱི་དམ་ཚིག་ཉམས་པ་བསྐངས༔ གསོལ་ཐང་ལྷག་མ་མཛོ་ཞོར་རྒུན་འབྲུམ་དང་༔ སློབ་དཔོན་ཞལ་ཆབ་བཏབ་ནས་གསོལ་བས་དངས༔ རྒྱལ་པོའི་ཞལ་ནས་ལོ་མང་ན་བ་ཡིས༔ སྐྲ་འཁྲུ་མ་བྱུང་སྐྲ་འདི་འཁྲུ་དགོས་གསུང་༔ བློན་པོས་སྐྲ་བཀྲུས་མི་ཟིན་ཉི་ཐལ་ཟེར༔ སློབ་དཔོན་སེང་ལྡེང་ཕུར་པ་བྱིན་གྱིས་བརླབས༔ ཉི་གྲིབ་མཚམས་བཏབ་ཉི་མ་སྟོད་ལ་མནན༔ དབུ་བཀྲུས་ཟིན་ནམ་གསུངས་པས་ཟིན་ལགས་ཞུས༔ སློབ་དཔོན་ཞལ་ནས་བེའུ་ལུག་ནང་ཆུག་གསུང་༔ ཕུར་པ་བཏོན་པས་ཉི་མ་དམར་ཧྲིལ་སོང་༔ རྗེ་ཡིས་སྤྱང་དཀར་ཟ་འོག་བེར་ཀུན་ཕུལ༔ ནམ་སྙིང་བཀའ་འཁོར་དམ་པའི་རྒྱུད་ལྔ་དང་༔ ཁྲོ་བོ་སྨེ་བརྩེགས་མེ་ལྟར་འབར་བའི་རྒྱུད༔ འཇམ་དཔལ་གསང་རྒྱུད་གའུ་ནག་པོའི་རྒྱུད༔ རོ་ལངས་གསང་རྒྱུད་ཙིཏྟ་གསང་རྒྱུད་བསྒྱུར༔ མཁས་པ་ཆེན་པོ་སརྦ་ཛྙཱ་དེ་བ༔ ལོ་ཙཱ་སྐ་བ་དཔལ་བརྩེགས་རཀྵི་ཏས༔ བྱང་ཆུབ་སེམས་དཔའི་སྤྱོད་འཇུག་ལ་སོགས་བསྒྱུར༔ པཎ་ཆེན་པདྨ་ཀ་ར་བྷ་དྲ་དང་༔ ཛྙཱ་ན་གརྦྷ་སརྦ་ཛྙཱ་དེ་བ༔ ལོ་ཙཱ་སྐ་ཅོག་ཡེ་ཤེས་སྡེ་སོགས་ཀྱིས༔ དབུ་མ་ཚོགས་གསུམ་དགོངས་འགྲེལ་བཅས་སོགས་བསྒྱུར༔ ཤཱཀྱ་སིངྷ་པྲ་ཛྙཱ་ཝརྨ་དང་༔ ཛི་ན་མི་ཏྲ་ཤཱི་ལེནྡྲ་བོ་དྷི༔ ལོ་ཙཱ་ཆེན་པོ་བནྡེ་ཡེ་ཤེས་སྡེས༔ བྱམས་པའི་ཆོས་ལྔ་འགྲེལ་པར་བཅས་པ་དང་༔ ས་སྡེ་ལ་སོགས་བསྟན་བཅོས་མང་དུ་བསྒྱུར༔ ཛི་ན་མི་ཏྲ་ཤཱི་ལེནྡྲ་བོ་དྷི༔ མཁས་པ་ཆེན་པོ་དཱ་ན་ཤཱི་ལ་དང་༔ ཞུ་ཆེན་ལོ་ཙཱ་བཻ་རོ་ཙ་ན་ཡིས༔ བསྟན་བཅོས་བྱེ་བྲག་བཤད་མཛོད་ཆེན་མོ་ནི༔ སུམ་བརྒྱ་བསྒྱུར་བའི་དབུ་བཙུགས་བསྒྱུར་འཕྲོ་བཞག༔ རྒྱ་དཔེ་ཉིད་ནི་བསམ་ཡས་དབུ་རྩེར་བཞུགས༔ ལོ་པཎ་ད་ལྟ་བཞུགས་དང་ཕྱི་རབས་འབྱོན༔ བཟང་ངན་འགྲན་ཕྱིར་བཤད་མཛོད་ཆེན་མོ་བཞག༔ དེ་བཞིན་དགྱེས་རྡོར་འབུམ་ལྔ་བདེ་མཆོག་འབུམ༔ དུས་འཁོར་རྩ་རྒྱུད་སྟོང་ཕྲག་བཅུ་གཉིས་པ༔ ཕུར་པ་བིདྱོཏྟ་མ་འབུམ་སྡེའི་རྒྱུད༔ འཇིགས་བྱེད་རྟོག་པ་སུམ་བརྒྱ་སོགས་མ་འགྱུར༔ རྒྱས་པ་འབུམ་མཇུག་མ་ཚང་ཀླུ་ཡུལ་ལུས༔ འདས་པ་མེས་ཚིག་འགོ་མེད་མཇུག་མེད་བསྒྱུར༔ མདོ་སྔགས་འགའ་ཞིག་རྒྱ་གར་བཀའ་ཆད་ནས༔ བོད་འགྱུར་མཇུག་མ་ཚང་བ་རེ་ཙམ་ཡོད༔ དེ་བཞིན་རྩིས་སྨན་གྲངས་ལས་འདས་པར་བསྒྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྒྲ་བསྒྱུར་གླིང་དུ་སྒྲ་བསྒྱུར་བའི་ལེའུ་སྟེ་གྱ་བཞི་པའོ༔ ༔
པདྨ་བཀའ་ཐང་ལེའུ་ ༨༥ བོད་དུ་གསུང་རབ་དམ་ཆོས་དག་ཐེར་བཏོན་པ།
དེ་ནས་བྱམས་པ་གླིང་དུ་འཆད་ཉན་བྱས༔ ཤར་སྒོ་འཇམ་དཔལ་གླིང་དུ་རྩིས་སྨན་བསྒྱུར༔ རྒྱ་ནག་སློབ་དཔོན་ཧ་ར་ནག་པོ་དང་༔ ཧྭ་ཤང་མ་ཧྭ་ཡཱ་ན་སཱུ་ཏྲ་དང་༔ མ་ཧཱ་རཱ་ཛ་མ་ཧཱ་དེ་བ་དང་༔ ལོ་ཙཱ་བི་རྗེ་བཙན་པ་ཤི་ལ་སོགས༔ བོད་ཀྱི་མཁས་པ་མི་བཞིས་ནག་རྩིས་བསྒྱུར༔ སྔ་འགྱུར་རྒྱ་མོ་ཀོང་ཇོས་བསྒྱུར་བ་ཡིན༔ སྤང་རྒྱན་བླ་མའི་གཙུག་ལག་ལྷག་མ་བསྒྱུར༔ ཕྱི་འགྱུར་རྒྱལ་པོ་ཁྲི་ལྡེ་གཙུག་བརྟན་གྱིས༔ བི་རྗེ་བཙན་པ་ཤ་ལ་གདན་དྲངས་ནས༔ རྒྱ་ཡི་བསྟན་པ་བཅོ་བརྒྱད་བསྒྱུར་འཕྲོ་བསྒྱུར༔ བར་འགྱུར་ཕྱི་རྒྱུད་ནང་རྒྱུད་གསང་རྒྱུད་དང་༔ ཡང་གསང་ཐུགས་རྒྱུད་སྡེ་རུ་ལོངས་པའི་རྒྱུད༔ སྔོན་ཆད་མ་འགྱུར་འཕྲོ་རྣམས་ཐམས་ཅད་བསྒྱུར༔ ཡང་འགྱུར་སྣང་གསལ་མ་བུ་ཆ་ལྔ་དང་༔ སྡོང་པོ་དགུ་འདུས་གབ་པ་མངོན་ཕྱུང་དང་༔ ཚངས་པ་བཞི་འདུས་ལ་སོགས་མང་བསྒྱུར་བ༔ ལེའུ་སོ་ལྔ་པ་རུ་གསལ་ལྟར་བསྒྱུར༔ དེ་ཡི་དུས་ན་ལོ་པཎ་ཐམས་ཅད་ལ༔ བློན་པོ་འགོས་ཀྱིས་ཟ་འགྱོགས་བྱས་པའི་གྲལ༔ མདོ་སྔགས་རྩིས་སྨན་ཆོས་ཀྱི་བགྲོ་གླེང་མཛད༔ ཨུ་རྒྱན་སློབ་དཔོན་པདྨའི་ཞལ་སྔ་ནས༔ རྒྱ་ནག་ཡུལ་བྱོན་པཎྜི་ཏ་རྣམས་ལ༔ རྒྱ་ནག་རི་བོ་རྩེ་ལྔ་བྱ་བ་དེའི༔ རི་རེའི་མིང་རེ་ཡོད་པས་ཤོད་དང་གསུངས༔ སློབ་དཔོན་ཧ་ར་ནག་པོའི་ཞལ་ན་རེ༔ རྒྱ་ནག་གྷིའུ་དེ་ཤན་བྱ་བ་ལ༔ རི་བོ་རྩེ་མོ་ལྔ་རུ་ཡོད་པ་ལས༔ དབུས་ཀྱི་རི་ལ་བེ་ཏ་རྩེ་ཞེས་ཟེར༔ དེ་ན་འཇམ་དཔལ་གཞོན་ནུར་གྱུར་པ་བཞུགས༔ ཤར་ཕྱོགས་ཨ་ཁྲ་དྷ་རི་རྩེ་ཞེས་ཟེར༔ དེ་ན་འཇམ་དཔལ་ཡེ་ཤེས་སེམས་དཔའ་བཞུགས༔ ལྷོ་ཕྱོགས་གྷ་ན་རི་ཡི་རྩེ་ཞེས་ཟེར༔ དེ་ཡི་རྩེ་ལ་འཇམ་དཔལ་རྣོན་པོ་བཞུགས༔ ནུབ་ཕྱོགས་ཨ་པ་རི་ཡི་རྩེ་ཞེས་ཟེར༔ དེ་ན་འཇམ་དཔལ་སྨྲ་བའི་སེང་གེ་བཞུགས༔ བྱང་ཕྱོགས་སིག་ཏ་ཨ་ཁྲོ་རི་ཡི་རྩེ༔ དེ་ན་འཇམ་དཔལ་དྲི་མ་མེད་པ་བཞུགས༔ རྩིས་འདི་འཇམ་དཔལ་གཞོན་ནུར་གྱུར་པས་གསུངས༔ འཇིག་རྟེན་ཆོས་འཛུད་ཀུན་རྫོབ་ཐེག་པ་ཡིན༔ དེ་སྐད་གསུངས་པས་དེ་ཡིན་ལེགས་སོ་གསུངས༔ དེ་ནས་རྒྱ་ནག་ཧ་ར་ནག་པོ་ལ༔ བ་གོར་བཻ་རོ་ཙ་ནས་བོད་ཕན་ཕྱིར༔ ཤམ་ཐབས་བར་ནས་གསེར་སྲང་གང་ཕྱུང་ཕུལ༔ དམངས་པོ་སྲིད་ཀྱི་ཆབ་ཀ་སློང་དང་གཅིག༔ དབུལ་པོ་མི་ཟད་གཏེར་ལ་སྤྱོད་དང་གཉིས༔ ཚེ་ཟད་སྲོག་གི་ཀ་བ་འཛུགས་དང་གསུམ༔ མཛེ་ཤུ་དམེ་འཕྲོ་བཅད་དང་བཞི་ཞུས་སོ༔ གཞན་ཡང་སྨེ་བའི་སྒོ་བཞི་སྤར་ཁའི་སྐོར༔ གཙུག་ལག་རྩིས་ཀྱི་གནད་འགག་མང་པོ་ཞུས༔ རྒྱ་ནག་སྨན་པ་ཧྭ་ཤང་དེ་བ་དང་༔ བླ་སྨན་ཉང་བཙན་ཤི་ལ་ལ་སོགས་པས༔ ཡན་ལག་བརྒྱད་པ་བདུད་རྩི་སྙིང་པོ་དང་༔ སྨན་གྱི་བཅུད་ལེན་བྱེད་ཐབས་མང་པོ་བསྒྱུར༔ དེ་ནས་ཨུ་རྒྱན་པདྨ་འབྱུང་གནས་དང་༔ བོད་ཀྱི་ལོ་ཙཱ་མཁས་པ་བཅོ་ལྔ་ཡིས༔ ཨཱརྱ་པ་ལོའི་གླིང་དུ་ལུང་བསྟན་བསྒྱུར༔ འདས་དང་མ་འོངས་ད་ལྟར་བཞུགས་པ་ཡི༔ གང་ཟག་བཟང་ངན་འབྱུང་ཚུལ་ལུང་དུ་བསྟན༔ རྒྱ་བོད་ལོ་པཎ་མཁས་པ་ཐམས་ཅད་ཀྱིས༔ ཉི་མ་སྟེང་འོག་སྔ་དྲོ་ཕྱིམ་རེད་བྱས༔ འཇམ་དཔལ་གླིང་དུ་མདོ་སྔགས་འཆད་ཉན་བཙུགས༔ ཨཱརྱ་པ་གླིང་སྒྲིབ་སྦྱོང་ཚོགས་གཉིས་སྤེལ༔ བྱམས་པ་གླིང་དུ་ལུང་བསྟན་དབུགས་དབྱུང་མཛད༔ བྱང་ཆུབ་གླིང་དུ་ཐེག་ཆེན་སེམས་གཉིས་བསྐྱེད༔ རྣམ་དག་ཁྲིམས་ཁང་གླིང་དུ་ཆོས་ཁྲིམས་བཅས༔ བརྡ་སྦྱོར་ཚང་མང་གླིང་དུ་རབ་ཏུ་འབྱུང་༔ སྔགས་པ་གླིང་དུ་འགལ་རྐྱེན་བར་ཆད་བསྲུངས༔ སྒྲ་བསྒྱུར་གླིང་དུ་མདོ་སྔགས་ཆོས་རྣམས་བསྒྱུར༔ བཻ་ཙའི་གླིང་དུ་སྡེ་སྣོད་ཞུ་དག་བྱེད༔ བསམ་གཏན་གླིང་དུ་མི་གཡོ་ཏིང་འཛིན་བསྒོམས༔ སྣ་ཚོགས་གླིང་དུ་ཐེག་པའི་གོ་རིམས་འབྱེད༔ དཀོར་མཛོད་ཉི་ཤུ་ཆོས་ནོར་བཙས་ཀྱིས་གཏམས༔ དག་བྱེད་ཁྲུས་གང་དྲི་བཟང་ཁྲུས་ནས་འདོན༔ ཚང་མང་ཀེ་རུར་དགེ་འདུན་གདུགས་ཚོད་སྦྱོར༔ མཐུ་རྩལ་ཀླུ་གླིང་མཐུ་གཏད་ངན་སྔགས་བསྒྱུར༔ དེ་དུས་སྔགས་དང་མཚན་ཉིད་ལོ་ཙཱ་བ༔ ཆེ་གསུམ་ཆུང་གསུམ་འབྲིང་གསུམ་དགུ་རུ་ཕྱེས༔ རྒན་གསུམ་གཞོན་གསུམ་དྲུག་ཏུ་ཕྱེ་བ་ལ༔ བཻ་རོ་ཙ་ན་ཀླུའི་དབང་མེས་བཀོལ་གསུམ༔ ལོ་ཙཱ་ཆེ་གསུམ་ཡིན་ཏེ་ཆུང་གསུམ་ནི༔ སྐ་བ་རྨ་རིན་སྦ་མི་ཁྲི་གཞེར་གསུམ༔ འབྲིང་གསུམ་གཉགས་བན་ཛྙཱ་ན་ཀུ་མཱ་ར༔ ཞང་ལོ་སེ་བཙན་ཤུད་བུ་ཁོང་སླེབ་གསུམ༔ རྒན་པ་གསུམ་ནི་ལྷ་ལུང་ཡུལ་སྐོང་དང་༔ ཡེ་ཤེས་སྡེ་དང་ཅོག་རོ་ཀླུའི་རྒྱལ་མཚན༔ གཞོན་པ་གསུམ་ནི་གཡུ་སྒྲ་སྙིང་པོ་དང་༔ ལེགས་སྦྱིན་ཉི་མ་ནམ་མཁའི་སྙིང་པོའོ༔ མཆན་བུ་ཡོན་ཏན་སྙིང་པོ་རྩེ་མང་དང་༔ དེ་བ་བྱང་སྙིང་དམ་པ་འདུལ་ལ་སོགས༔ འདིར་མ་བཀོད་པ་གཞན་དག་ཐམས་ཅད་དོ༔ རྒྱ་ནས་བྱོན་པའི་པཎ་ཆེན་ཐམས་ཅད་ཀྱིས༔ བཻ་རོ་ཙ་ནའི་གླིང་དུ་བྱོན་པའི་ཚེ༔ འདས་དང་མ་འོངས་ད་ལྟ་ཐམས་ཅད་དུ༔ བཻ་རོ་ཙ་ན་འདྲ་བའི་ལོ་ཙཱ་བ༔ སྔར་ཡང་བྱོན་རི་ད་ཡང་འབྱོན་རི་སྐན༔ མ་འོངས་རྒྱ་གར་འཕྲལ་སྐད་ཤེས་ཙམ་ལ༔ ལོ་ཙཱར་བཞེད་སྲིད་བཻ་རོའི་ཆར་མི་ཉེ༔ ལོ་ཙཱར་བཏགས་ཀྱང་དོན་ལ་པཎྜི་ཏ༔ འདི་ཡི་ཆོས་དྲིན་ཡོད་དོ་ཕྱི་རབས་རྣམས༔ དེ་ནས་ཆོས་ཀྱི་རབ་གནས་བྱས་པའི་ཚེ༔ གླེགས་བམ་ཐམས་ཅད་ཚེ་དང་ལྡན་པས་ཁུར༔ ལྔ་ལྔའི་བར་དུ་མཆོད་ལྔ་ཁྱེར་མཁན་རེ༔ གདུགས་དང་རྒྱལ་མཚན་འོག་ལ་ཆོས་སྦྲེངས་བྱས༔ བསམ་ཡས་དབུ་རྩེ་གླིང་གསུམ་ལན་གསུམ་བསྐོར༔ རྔ་ཤོན་གར་འཆམས་འབག་པ་མི་རེ་རེ༔ ཕྱོགས་བཞི་མཚམས་བརྒྱད་ལྟད་མོས་རི་མགོ་ནོན༔ ལོ་པཎ་རེ་རེས་ཆོ་ག་མི་འདྲ་རེས༔ རབ་ཏུ་གནས་ཤིང་མེ་ཏོག་འཐོར་བར་གྱུར༔ རྒྱལ་པོ་ནམ་སྙིང་ལྟད་མོའི་གསེབ་བྱོན་པས༔ ཡོན་མཆོད་གཉིས་ནི་ཕྱག་ལ་མ་འཆམས་ཏེ༔ རྗེ་ནི་འགྲེང་བ་མགོ་ནག་ཡོངས་རྗེ་ཡིན༔ བདུད་རྔོག་ཆགས་ཀྱི་རྐྱེན་བྱེད་ང་ཡིན་པས༔ ནམ་མཁའི་སྙིང་པོས་ང་ལ་ཕྱག་འཚོལ་གསུངས༔ སློབ་དཔོན་ཆེན་པོ་ནམ་མཁའི་སྙིང་པོ་ཡིས༔ ང་ནི་རྣལ་འབྱོར་ཡོངས་ཀྱི་དབང་ཕྱུག་ཆེ༔ སྐུ་དང་ཡེ་ཤེས་བདག་ཉིད་ང་ཡིན་ཞིང་༔ རྒྱལ་པོ་ཉིད་ཀྱིས་ང་ལ་དབང་ཞུས་པས༔ བདག་ལ་ཕྱག་འཚོལ་གསུངས་ནས་མ་འཆམས་ཏེ༔ གནུབས་བན་ནམ་མཁའི་སྙིང་པོའི་ཞལ་སྔ་ནས༔ སངས་རྒྱས་བསྟན་པའི་རྩ་བ་མ་འཆུགས་པ༔ དམ་ཆོས་འདུལ་བའི་སྡེ་སྣོད་བོད་དུ་བསྒྱུར༔ སངས་རྒྱས་བསྟན་པའི་སྙེ་མ་མ་བསྐམས་པ༔ དམ་ཆོས་ཕ་རོལ་ཕྱིན་པ་བོད་དུ་བསྒྱུར༔ སངས་རྒྱས་བསྟན་པའི་ཉིང་ཁུ་མ་བསླད་པ༔ གསང་སྔགས་ཕྱི་ནང་རྒྱུད་རྣམས་བོད་དུ་བསྒྱུར༔ བསྟན་གཉིས་ཉི་ཟླ་ཟུང་གཅིག་ཤར་བར་བྱས༔ རྒྱ་བོད་བསགས་པ་ཅན་གྱི་ལོ་པཎ་ལ༔ རྒྱལ་པོས་ཕྱག་མི་འཚལ་ན་དབང་ཡོད་མོད༔ ཅེས་གསུངས་ཡིད་ལ་མི་འཚམ་ཐུགས་མུག་སྟེ༔ དེང་ནས་བཟུང་སྟེ་སྒྲུབ་པ་འབའ་ཞིག་ལས༔ རྒྱལ་པོའི་སློབ་དཔོན་དག་ནི་མི་བྱེད་དོ༔ ཞེས་གསུངས་ཐུགས་ཀྱི་དམ་བཅས་ཅི་བདེར་གནས༔ ལྷོ་བྲག་མཁར་ཆུར་འབྱོན་དུ་ཆས་པ་ལ༔ པཎ་ཆེན་རྣམས་ཀྱིས་རྒྱལ་པོར་མཚམས་སྦྱར་བ༔ རྗེ་ཉིད་དངོས་གྲུབ་ཐོབ་ཀར་དམ་མ་ཉམས༔ ནམ་མཁའི་སྙིང་པོ་བླ་མར་ཁུར་ཅིག་གསུངས༔ དེ་ཚེ་མི་རྣམས་ཐམས་ཅད་ཧ་ལས་ནས༔ ཕྱི་བློན་ནང་བློན་གྲོས་དབང་མ་ལུས་ཚོགས༔ ནམ་མཁའི་སྙིང་པོ་གསོད་པའི་ནང་ཁྲིམས་བཅས༔ བློན་པོ་རྣམས་ཀྱིས་ལྷོ་སྒོར་ཁྲི་གཉིས་བརྩིགས༔ གཅིག་ལ་རྗེ་བཞུགས་གཅིག་ལ་སློབ་དཔོན་བཞུགས༔ བློན་པོ་རྣམས་ཀྱིས་མདའ་རྩེ་མདུང་རྩེ་བདར༔ རྗེ་ཉིད་སྤྱང་ཀི་ལྟར་འདར་ཕཊ་ཕཊ་གསུངས༔ སློབ་དཔོན་གྷ་ཊ་ཤག་གསུང་ཐལ་མོ་ཕྲལ༔ བློན་པོ་རྣམས་ཀྱི་མཚོན་བྲུལ་ཧད་ཧད་ལུས༔ སློབ་དཔོན་ལྷ་མགོན་གཉིས་ཀྱི་དྲུང་དུ་བྱོན༔ ཞབས་རྡོ་བརྒྱབ་ནས་ཕར་ལོངས་འདོང་ངོ་གསུངས༔ རྟེན་གཉིས་ལངས་ཏེ་སློབ་དཔོན་ཕྱི་ལ་ཁྲིད༔ ཧཱུྃ་ཧཱུྃ་དྲག་པོ་གསུངས་ནས་ཐོག་ཕབ་སྟེ༔ མཛུབ་མོ་ལ་དཀྲིས་བར་སྣང་དམར་ཧྲིལ་བྱུང་༔ འུ་ཤང་རྡོ་ཡི་བྲག་ལ་བརྒྱབ་པ་ཡིས༔ བྲག་ཀྱང་ཆོ་ལོ་ཙམ་དུ་བཏང་ངོ་སྐད༔ སློབ་དཔོན་རྗེ་ལགས་མ་བསྙེམས་སམ་ཞུས་པས༔ འཇིགས་དང་འཇིགས་ཆེ་གནམ་ལྕགས་ཐོག་པས་ཀྱང་༔ བནྡེའི་ཧཱུྃ་སྒྲ་དེ་རང་འཇིགས་གསུངས་ནས༔ སློབ་དཔོན་ཉིད་ལ་རྒྱལ་པོས་ཕྱག་བཙལ་ལོ༔ མི་རྣམས་ཀུན་གྱིས་ཞལ་ལྕེ་བཅད་ནས་ནི༔ སློབ་དཔོན་ནམ་མཁའི་སྙིང་པོས་ཕྱག་བོར་ལ༔ རྒྱལ་པོས་བླ་མ་རྡོ་རྗེ་སློབ་དཔོན་དུ༔ བདག་ལ་ཡོན་ཏན་ཐམས་ཅད་སྐྱེད་བྱེད་པ༔ འདི་དག་ཕྱག་འཚལ་ཡུལ་གྱུར་ཡིན་སྙམ་དུ༔ རྗེ་ཡིས་ལྟད་མོའི་གསེབ་ཏུ་ཕྱག་འཚོལ་ཟེར༔ རྒྱལ་པོས་དུམ་ཞིག་ཐུགས་དགོངས་བཏང་མཛད་ནས༔ ལོ་ཙཱ་ཐམས་ཅད་ང་ལ་སྐུ་དྲིན་ཆེ༔ གཙུག་ལག་ཁང་དང་དཔེས་པའི་ཆོས་འགྱུར་སྙམ༔ རྒྱལ་པོ་དགྱེས་མཛད་བཤད་ཉན་གྲ་ཡང་བཙུགས༔ ལྷ་སར་དམ་ཆོས་འདུལ་བའི་སྟོན་མོ་བཙུགས༔ ཁྲ་འབྲུག་མངོན་པ་གསང་སྔགས་སྟོན་མོ་མཛད༔ མཐའ་འདུལ་ཡང་འདུལ་གཙུག་ལག་བརྒྱ་རྩ་བརྒྱད༔ འཆད་ཉན་དུས་སྟོན་ལྟད་མོ་རེ་རེ་མཛད༔ བསམ་ཡས་མཆིམས་ཕུ་ཡར་ཀླུངས་ཤེལ་གྱི་བྲག༔ ཡེར་པ་ཟླ་བ་ཕུག་སོགས་སྒྲུབ་གནས་ཀུན༔ སྒྲུབ་གྲ་སྒྲུབ་མཆོད་རྒྱུད་སྟོན་ཚེས་བཅུ་བཙུགས༔ སྒོམ་གྲ་བརྒྱ་དང་རྩ་བརྒྱད་བསྒོམ་ས་ལྔ༔ ཆོས་འཁོར་སྟོད་སྨད་ཆུ་ལ་དགེ་གྲུ་བཙུགས༔ སློབ་འཆད་གྲ་ལ་རྗེ་ཡིས་མཐུན་རྐྱེན་སྦྱོར༔ བོད་ཀྱི་བན་སྔགས་དབུ་ཟླུམ་ལྕང་ལོ་ཅན༔ དབང་ཆེ་ཁ་དྲག་ཤེ་མོ་ཡོད་དུ་བཅུག༔ གྲུ་ལ་གྲུ་བཙས་མི་དགོས་ལམ་འཕྲང་བདེ༔ ཕྱུག་པོ་ཐམས་ཅད་ཆོས་འདྲིའི་ཁྲིམས་ལ་བཙུད༔ ལྟོགས་པ་ཐམས་ཅད་འབྲི་ཀློག་ཁྲིམས་ལ་བཀོད༔ དགེ་བ་མཆོད་རྟེན་བརྒྱ་རྩ་བཞེང་དུ་བཅུག༔ མདོ་རྣམས་གཙུག་ལག་ཁང་དུ་བཞུགས་སུ་གསོལ༔ རྒྱུད་རྣམས་སྔགས་པའི་གླིང་དུ་བཞུགས་སུ་བཅུག༔ འཁོར་བའི་སྡུག་བསྔལ་སེལ་བ་དམ་པའི་ཆོས༔ བྱ་བ་ལེགས་འཆོས་ཉེས་སྤོང་གཙུག་ལག་རྩིས༔ ནད་པའི་ཟུག་གཟེར་གཅོག་པ་ཐུགས་རྗེའི་སྨན༔ ཐམས་ཅད་མ་ལུས་བོད་དུ་སྣང་བར་བྱས༔ མི་ལོ་བཅུ་གསུམ་བར་དུ་ཆོས་བསྒྱུར་རོ༔ འདི་དག་ཁྲི་སྲོང་ལྡེའུ་བཙན་ལག་རིས་ཡིན༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་དུ་གསུང་རབ་དམ་ཆོས་དག་ཐེར་བཏོན་པའི་ལེའུ་སྟེ་གྱ་ལྔ་པའོ༔ ༔
པདྨ་བཀའ་ཐང་ལེའུ་ ༨༦ བསམ་ཡས་སྐུ་རྟེན་ལྷའི་བཞུགས་བྱང་དཀར་ཆག་ཏུ་བཀོད་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ བསམ་ཡས་སྐུ་རྟེན་བཞུགས་བྱང་ཡི་གེར་བཏབ༔ དཀར་ཆག་རྒྱས་བསྡུས་གསུམ་ལས་འདི་རུ་བསྡུས༔ མི་འགྱུར་ལྷུན་གྱིས་གྲུབ་པའི་གཙུག་ལག་ཁང་༔ གཞི་ཆེ་དཔངས་མཐོ་རྒྱུ་བཟང་བཀོད་པ་ལེགས༔ འདུལ་བ་ལྟར་ན་གཙུག་ལག་ཁང་དུ་བཞེངས༔ མདོ་སྡེ་ལྟར་ན་ཞིང་ཁམས་གཅིག་གི་ཚུལ༔ མངོན་པ་ལྟར་ན་སྣོད་བཅུད་གཅིག་ཏུ་གྲུབ༔ གསང་སྔགས་ལྟར་ན་དཀྱིལ་འཁོར་གཅིག་ཏུ་རྫོགས༔ དབུ་རྩེ་རིགས་གསུམ་བཀོད་པའི་ཁྱད་པར་ནི༔ འོག་ཁང་རྒྱ་ནག་བར་ཁང་རྒྱ་གར་ལུགས༔ སྟེང་ཁང་ལི་ཡི་ལུགས་སུ་བཞེངས་པ་ཡིན༔ ལྕོག་བཞིར་སངས་རྒྱས་དགའ་བའི་རྒྱུད་རིས་བྲིས༔ ཆོས་སྐྱོང་ལག་ན་རྡོ་རྗེ་བཞི་ལ་གཏད༔ སྟེང་ཁང་གཙོ་བོ་རྣམ་སྣང་ཀུན་ཏུ་ཞལ༔ བྱམས་པ་སྤྱན་རས་གཟིགས་དང་ཀུན་ཏུ་བཟང་༔ འཇམ་དབྱངས་ནམ་མཁའི་སྙིང་པོ་རྡོ་རྗེ་འཛིན༔ ས་ཡི་སྙིང་པོ་སྒྲིབ་པ་རྣམ་པར་སེལ༔ ཉེ་བའི་སྲས་བརྒྱད་འཁོར་གྱིས་རབ་ཏུ་བསྐོར༔ ཕྱོགས་བཅུ་ནས་བྱོན་སེམས་དཔའ་ཉི་ཤུ་བཞི༔ སྒོ་སྲུང་བརྒྱད་དེ་བཞི་བཅུ་རྩ་གཅིག་བཞུགས༔ རི་མོར་རྡོ་རྗེ་དབྱིངས་ཀྱི་ལྷ་ཚོགས་བཀོད༔ ཆོས་སྐྱོང་གནོད་སྦྱིན་ཟངས་ཀྱི་འབེ་ལོག་ཅན༔ བར་ཁང་གཙོ་བོ་དུས་གསུམ་སངས་རྒྱས་ལ༔ ས་བཅུའི་བྱང་ཆུབ་སེམས་དཔའ་བཅུ་ཡིས་བསྐོར༔ ཀང་ཀིང་གཉིས་ཏེ་ལྷ་ཚོགས་བཅོ་ལྔ་བཞུགས༔ རི་མོར་རྒྱས་པ་འབུམ་གྱི་གླེང་གཞི་བྲིས༔ བསྐོར་ཁང་ཕྱི་བལྟས་མཆོད་རྟེན་བརྒྱད་པ་སྟེ༔ ནང་བལྟས་སྤྲིན་ཆེན་སྙིང་པོའི་རི་མོ་བྲིས༔ བསྐོར་ཁང་གདོང་ལ་རྒྱལ་ཆེན་རྣམ་གཉིས་བཞུགས༔ སྔ་ཁང་གདོང་ལ་ཕྱོགས་བཅུའི་སངས་རྒྱས་དང་༔ རྡོ་རྗེ་སེམས་དཔའ་གཤིན་རྗེའི་གཤེད་ཀྱི་ལྷ༔ ཆོས་སྐྱོང་རྣམས་ཀྱི་འབག་དང་བཅས་པ་བྲིས༔ ཆོས་སྐྱོང་རྒྱལ་པོ་ཤིང་བྱ་ཅན་ལ་གཏད༔ འོག་ཁང་གཙོ་བོ་དུས་གསུམ་སངས་རྒྱས་ཀྱིས༔ བྱིན་གྱིས་བརླབས་པའི་རྡོ་སྐུ་རང་བྱོན་ནི༔ བསྟན་པའི་བདག་པོ་བྱང་ཆུབ་ཆེན་པོ་ལ༔ བསྐལ་པ་བཟང་པོའི་སངས་རྒྱས་བཅུ་ཡིས་བསྐོར༔ ཁམས་གསུམ་རྣམ་རྒྱལ་ཁྲོ་བོ་མི་གཡོ་མགོན༔ སྒོ་སྲུང་བཅས་ཏེ་ལྷ་ཚོགས་བཅུ་གསུམ་བཞུགས༔ རི་མོར་སྙིང་པོ་ཕྱོགས་བཅུའི་སངས་རྒྱས་དང་༔ བསྐོར་ཁང་ཕྱི་བལྟས་པདྨ་དཀར་པོ་ལ༔ ནང་བལྟས་འདུས་པ་རིན་ཆེན་ཏོག་ཏུ་བྲིས༔ ཆོས་སྐྱོང་སེང་གེ་ཁྲི་ཡི་རལ་པ་ཅན༔ སྔ་ཁང་མདོ་སྡེ་དཀོན་མཆོག་སྤྲིན་དུ་བྲིས༔ འཁོར་ས་བར་བར་རྒྱ་ཆེར་རོལ་པ་དང་༔ ལྷོ་ཕྱོགས་མཛོད་གསུམ་རོལ་ཁང་ནོར་གྱི་མཛོད༔ ཆོས་སྐྱོང་གཤིན་རྗེ་ནག་པོ་མཆེད་གསུམ་གཏད༔ ནུབ་ཕྱོགས་མཛོད་གསུམ་གསུང་རབ་རྒྱུད་ཀྱི་མཛོད༔ ཆོས་སྐྱོང་ཨཱ་ཙར་ནག་པོ་མཆེད་གསུམ་ཡིན༔ བྱང་ཕྱོགས་མཛོད་གསུམ་རིན་ཆེན་གཏེར་གྱི་མཛོད༔ ཆོས་སྐྱོང་གནོད་སྦྱིན་ནག་པོ་མཆེད་གསུམ་བསྐོས༔ འཁོར་ས་ཆེན་མོར་སྡོང་པོ་བརྒྱན་པ་བྲིས༔ ཆོས་སྐྱོང་རྒྱལ་པོ་ཨཱ་ནན་ཨུ་ལི་ཀ༔ དེ་ལྟར་ལྷ་ཚོགས་དྲུག་ཅུ་རྩ་དགུ་བཞུགས༔ མདོ་སྡེའི་རྒྱུད་རིས་དག་ནི་བཅུ་བཞིས་བསྐོར༔ དེ་དག་དབུ་རྩེ་རིགས་གསུམ་བཞུགས་བྱང་ཡིན༔ ཉི་ཟླ་ལྷ་ཁང་གཉིས་ན་ལྷ་ཚོགས་ནི༔ བྱང་ཆུབ་ཆེན་པོ་གཙོ་འཁོར་ལྔ་ལྔ་བཞུགས༔ རི་མོར་བསྐལ་པ་བཟང་པོའི་སངས་རྒྱས་སྟོང་༔ ཆོས་སྐྱོང་གནོད་སྦྱིན་གང་བཟང་ནོར་བུ་བཟང་༔ གླིང་བཞི་གླིང་ཕྲན་སྐུ་རྟེན་བཞུགས་པ་ལ༔ ཤར་གྱི་འཇམ་དཔལ་གླིང་ན་ལྷ་ཚོགས་ནི༔ འཇམ་དཔལ་གཙོ་འཁོར་ལྔ་དང་སྒོ་སྲུང་ནི༔ གཤིན་རྗེ་ནག་པོ་གཉིས་ཏེ་རྣམ་པ་བདུན༔ རི་མོར་འཇམ་དཔལ་ཞིང་གི་ཡོན་ཏན་བཀོད༔ འཁོར་ཁྱམས་ཕལ་པོ་ཆེ་ཡི་རྒྱུད་རིས་བྲིས༔ ཆོས་སྐྱོང་གཤིན་རྗེ་མེ་ཡི་འཁོར་ལོ་ཅན༔ ཆོས་རྣམས་ཉན་དང་བཤད་པར་བྱེད་པའི་གླིང་༔ ཨཱརྱ་པ་ལོའི་གླིང་ན་ལྷ་ཚོགས་ནི༔ ཐུགས་རྗེ་ཆེན་པོ་གཙོ་འཁོར་རྣམ་པ་བདུན༔ གློ་འབུར་གཡས་ན་སྐུ་གསུང་ཐུགས་ཀྱི་རྟེན༔ རྒྱལ་པོའི་སྐུ་ཚབ་དངུལ་ལས་བཞེངས་པ་དང་༔ གསུང་གི་རྟེན་ལ་ཀླུ་འབུམ་པོད་བཞི་མ༔ ཐུགས་ཀྱི་རྟེན་ལ་ཕྲ་མེན་མཆོད་རྟེན་བཞུགས༔ གཡོན་ན་སེང་གེ་སྒྲ་ཡི་ལྷ་ཚོགས་བཞུགས༔ སྟེང་ན་ཨ་མི་ཏཱ་བྷའི་ལྷ་ཚོགས་ལྔ༔ སྔ་ཁང་ཟ་མ་ཏོག་གི་བཀོད་པ་དང་༔ བསེ་ཡི་ལྷ་མོ་སྟོང་དང་རྩ་གཉིས་བྲིས༔ འཁོར་སར་ས་ཡི་སྙིང་པོ་འཁོར་ལོ་བཅུ༔ གློ་འབུར་ནུབ་ན་རིགས་གསུམ་མགོན་པོ་བཞུགས༔ ཆོས་སྐྱོང་དབང་ཆེན་ཕོ་ཉ་རྣམས་ལ་གཏད༔ གང་ཟག་སྡིག་པ་བཤགས་པར་བྱེད་པའི་གླིང་༔ དགའ་ལྡན་བྱམས་པ་གླིང་ན་ལྷ་ཚོགས་ནི༔ བྱམས་པ་གཙོ་འཁོར་ལྔ་དང་སྒོ་སྲུང་གཉིས༔ སྟེང་ན་སངས་རྒྱས་སྣང་མཐའ་གཙོ་འཁོར་ལྔ༔ ལྟེ་བའི་ལོགས་ལ་སངས་རྒྱས་སུམ་ཅུ་ལྔ༔ སྒྲོལ་མའི་ལྷ་ཚོགས་ཉི་ཤུ་རྩ་གཅིག་བཞུགས༔ བསྐོར་ཁང་ཕྱི་ལྟ་ནང་ལྟ་གཉིས་ལ་ནི༔ གནས་བརྟན་བཅུ་དྲུག་བསམ་ཡས་ཉིད་ཀྱི་དཔེ༔ སྔ་ཁང་ལ་ནི་ཡ་ཐོག་རིང་མོ་དང་༔ མ་ཐོག་ཐུང་ངུ་ཁུག་པ་བཅོ་བརྒྱད་དང་༔ རྒྱ་ཆེ་ལྷས་གནང་སྐྱེས་པའི་རབས་ཀྱང་བཀོད༔ འཁོར་འཁྱམས་ཕལ་བོ་ཆེ་ཡི་རྒྱུད་རིས་བྲིས༔ ཆོས་སྐྱོང་མཁའ་འགྲོ་གུ་ལི་བེ་ཅོན་ཅན༔ གང་ཟག་ཁྱད་འཕགས་ལུང་རྣམས་སྟོན་པའི་གླིང་༔ བྱང་ཆུབ་སེམས་བསྐྱེད་གླིང་གི་ལྷ་ཚོགས་ནི༔ གཙོ་བོ་སངས་རྒྱས་མ་ཆགས་པདྨ་ཅན༔ ཕྱག་ན་རྡོ་རྗེ་སྒྲིབ་པ་རྣམ་པར་སེལ༔ ཁྲོ་བོ་བདུད་རྩི་འཁྱིལ་དང་ཀཱི་ལ་ཡ༔ ཕྱོགས་བཅུ་ནས་བྱོན་སེམས་དཔའ་བཞི་བཅུ་གཉིས༔ དེ་ལྟར་ལྷ་ཚོགས་བཞི་བཅུ་རྩ་བདུན་བཞུགས༔ རྒྱུད་རིས་མདོ་སྡེ་དཀོན་ཅོག་སྤྲིན་དང་ནི༔ འཁོར་ས་ལ་ནི་འཕགས་པ་རྟག་ཏུ་ངུ་༔ ཤེས་རབ་ཕ་རོལ་ཕྱིན་པ་འཚོལ་བ་བྲིས༔ ཆོས་སྐྱོང་རྒྱལ་པོ་བསེ་ཡི་ཁྲབ་ཅན་དང་༔ མཁའ་འགྲོ་སེང་གེའི་གདོང་ཅན་མ་ལ་གཏད༔ དེ་དག་གླིང་བཞིའི་ལྷ་ཡི་བཞུགས་བྱང་ཡིན༔ གླིང་ཕྲན་བརྒྱད་ལ་རྣམ་དག་ཁྲིམས་ཁང་གླིང་༔ ལྷ་ཚོགས་བྱང་ཆུབ་ཆེན་པོ་གཙོ་འཁོར་ལྔ༔ རི་མོར་ཏིང་འཛིན་རྒྱལ་པོའི་རྒྱུད་རིས་བྲིས༔ ཆོས་སྐྱོང་ཚངས་པ་དུང་གི་ཐོར་ཚུགས་ཅན༔ དད་ལྡན་འདུལ་ཁྲིམས་ལེན་པར་བྱེད་པའི་གླིང་༔ བརྡ་སྦྱོར་ཚང་མང་གླིང་ན་ལྷ་ཚོགས་ནི༔ ཤཱཀྱ་ཐུབ་པ་གཙོ་འཁོར་རྣམ་པ་བདུན༔ མདོ་སྡེ་རིན་ཆེན་སྣ་ཚོགས་རྒྱུད་རིས་བྲིས༔ འཁོར་ཁྱམས་བཙུན་པའི་གཡོས་ཁང་དག་ཏུ་བྱས༔ ཆོས་སྐྱོང་རྒྱལ་པོ་འབྲུག་གི་སླག་པ་ཅན༔ དགེ་འདུན་ཟས་ཀྱིས་འཚོ་བར་བྱེད་པའི་གླིང་༔ བདུད་འདུལ་སྔགས་པ་གླིང་ན་ལྷ་ཚོགས་ནི༔ བྱང་ཆུབ་ཆེན་པོ་ལུགས་མ་གཙོ་འཁོར་ལྔ༔ རི་མོར་ནམ་སྙིང་གཙུག་ན་རིན་ཆེན་མདོ༔ ཆོས་སྐྱོང་དབང་ཕྱུག་ཉི་ཤུ་བརྒྱད་ལ་གཏད༔ ཐོས་བསམ་སྒོམ་གསུམ་བར་ཆད་བསྲུང་པའི་གླིང་༔ སྒྲ་བསྒྱུར་རྒྱ་གར་གླིང་ན་ལྷ་ཚོགས་ནི༔ ཇོ་བོ་ཤཱཀྱ་ལུགས་མ་གཙོ་འཁོར་ལྔ༔ རྒྱུད་རིས་འདུལ་བ་རྣམ་དག་ཚེ་དཔག་མེད༔ མདུན་ན་ལོ་པཎ་བཞུགས་པའི་གཙང་ཁང་ཡོད༔ ཆོས་སྐྱོང་གནོད་སྦྱིན་ར་ཐོད་ཅན་ལ་གཏད༔ སྡེ་སྣོད་ཆོས་ཀྱི་སྒྲ་སྒྱུར་བྱེད་པའི་གླིང་༔ ལུང་བསྟན་བཻ་ཙའི་གླིང་ན་ལྷ་ཚོགས་ནི༔ ཟངས་ཀྱི་རྣམ་པར་སྣང་མཛད་གཙོ་བོ་ལ༔ འཁོར་ནི་གསང་བའི་ཡུམ་བཞི་དག་གིས་བསྐོར༔ རི་མོར་རྣམ་སྣང་མངོན་པར་བྱང་ཆུབ་པ༔ ཆོས་རྣམས་ཐེགས་པ་རིམ་པར་འབྱེད་པའི་གླིང་༔ མི་གཡོ་བསམ་གཏན་གླིང་ན་ལྷ་ཚོགས་ནི༔ རྣམ་པར་སྣང་མཛད་ཡབ་ཀྱི་ཐུགས་དམ་ནི༔ གཉེན་པོ་བྱིན་ཅན་ཞེས་ནི་གྲགས་པ་ཡིས༔ གཙོ་བོ་མཛད་པའི་རྒྱལ་བ་རིགས་ལྔ་ལ༔ བསྐལ་པ་བཟང་པོའི་སེམས་དཔའ་བཅུ་དྲུག་བསྐོར༔ རི་མོར་ངན་སོང་སྦྱོང་བའི་རྒྱུད་རིས་བྲིས༔ འཁོར་ཁྱམས་ཕལ་པོ་ཆེ་ཡི་རྒྱུད་རིས་བཀོད༔ ཆོས་སྐྱོང་རྒྱལ་པོ་དངུལ་གྱི་མགོ་ཅན་ཡིན༔ ཏིང་འཛིན་བསམ་གཏན་སྒོམ་པར་བྱེད་པའི་གླིང་༔ མི་ནུབ་རྒྱལ་མཚན་རིན་ཆེན་ཕྲེང་བ་བཀོད༔ རིན་ཆེན་སྣ་ཚོགས་གླིང་ན་ལྷ་ཚོགས་ནི༔ ཤཱཀྱ་ཐུབ་པ་གཙོ་འཁོར་རྣམ་པ་ལྔ༔ རྒྱུད་རིས་གསེར་འོད་དམ་པའི་མདོ་སྡེ་དང་༔ དགའ་ལྡན་ཡུལ་དུ་ཡུམ་ལ་ཆོས་གསུངས་ཚུལ༔ དྲིན་ལན་བསབ་པའི་མདོ་དང་རྣམ་གསུམ་བྲིས༔ ཆོས་སྐྱོང་རྒྱལ་པོ་གཡི་ཡི་སྦར་བ་ཅན༔ བྱང་ཆུབ་སྨོན་པ་སེམས་སྐྱེད་བྱེད་པའི་གླིང་༔ པེ་ཀར་དཀོར་མཛོད་གླིང་ན་ལྷ་ཚོགས་ནི༔ གཙོ་བོར་རྫོགས་པའི་སངས་རྒྱས་དགའ་བའི་དཔལ༔ འཁོར་ནི་ཉེ་བའི་སྲས་བརྒྱད་འཛུམ་བཅས་བཞུགས༔ རི་མོར་ཡབ་སྲས་མཇལ་བའི་རྒྱུད་རིས་བྲིས༔ སྔ་གདོང་གཉིས་ལ་རྒྱལ་ཆེན་རྣམས་གཉིས་བཀོད༔ དཀོར་མཛོད་རེ་ལ་ནོར་སྣ་རེ་རེ་བཞག༔ ཆོས་སྐྱོང་ཡང་ནི་ཟུང་རེ་དག་ལ་གཏད༔ དགྲ་བླ་ཆེན་པོ་འཁོར་དང་བཅས་པ་ཡིན༔ རྒྱལ་བློན་རྗེ་འབངས་འཚོ་བ་ནོར་གྱི་མཛོད༔ དེ་དག་གླིང་ཕྲན་བརྒྱད་ཀྱི་དཀར་ཆག་ཡིན༔ བཅུ་གཉིས་གླིང་ལ་མི་ཐེ་ཁྲུས་ཁང་གླིང་༔ འོག་ཁང་སོ་ཕག་ཐང་ལ་ཁྲུས་བྱེད་ས༔ སྟེང་ཁང་མི་རྟག་སྟོན་པའི་རྒྱུད་རིས་བྲིས༔ ཆོས་སྐྱོང་རྒྱལ་པོ་ལག་ན་བུམ་ཐོགས་ཡིན༔ གང་ཟག་ཁྲུས་ཀྱིས་དག་པར་བྱེད་པའི་གླིང་༔ ཚང་མང་ཀེ་རུའི་གླིང་གི་འོག་ཁང་ནི༔ སློབ་དཔོན་ཆོས་སྟོན་གསོལ་བའི་ཚང་མང་སྟེ༔ སྟེང་ཁང་ནང་ན་བ་སོའི་ལྷ་ཁང་བཞུགས༔ ལོགས་ལ་སློབ་དཔོན་པདྨའི་རྣམ་ཐར་བྲིས༔ ཆོས་སྐྱོང་གནོད་སྦྱིན་ལག་ན་དབྱིག་ཐོགས་ཡིན༔ མཁན་སློབ་ཆོས་སྟོན་གསོལ་བར་བྱེད་པའི་གླིང་༔ མཐུ་རྩལ་ཀླུ་གླིང་སོ་ཕག་ཁང་པའི་ནང་༔ མཚོ་ཐབས་ཆུ་ནི་རྟག་ཏུ་མེར་བ་འདྲ༔ པདྨའི་སྡོང་པོ་སྐྱེས་པའི་སྙིང་པོའི་དབུས༔ ཕྱག་ན་རྡོ་རྗེ་སྐུ་མདོག་དཀར་པོ་ནི༔ ཞི་བའི་ཚུལ་དུ་བཞུགས་པའི་ཡལ་ག་ལ༔ ཀླུ་ཆེན་བརྒྱད་ནི་འདུད་པའི་ཚུལ་དུ་བཞུགས༔ རྩིག་པའི་ལོགས་ལ་ཀླུ་དང་ས་བདག་གཉན༔ རི་མོར་བྲིས་པ་ཆུ་ནང་འགུལ་བ་བཞིན༔ ཆོས་སྐྱོང་རང་ཆགས་ས་བདག་རྒྱུ་འདལ་ཡིན༔ མཆོད་རྟེན་དཀར་པོ་སེང་གེ་བཞི་ཡིས་བརྒྱན༔ ཆོས་སྐྱོང་གནོད་སྦྱིན་སྐར་མདའ་གདོང་ལ་གཏད༔ མཆོད་རྟེན་དམར་པོ་པདྨ་སྟོང་གིས་བརྒྱན༔ ཆོས་སྐྱོང་སྲུང་མ་གཟའ་རྒོད་མིག་དམར་ཡིན༔ མཆོད་རྟེན་ནག་པོ་སྐུ་གདུང་དག་གིས་བརྒྱན༔ ཆོས་སྐྱོང་མཁའ་འགྲོ་ལྕགས་མཆུ་ཅན་ལ་གཏད༔ མཆོད་རྟེན་སྔོན་པོ་ལྷ་ཁང་བཅུ་དྲུག་བརྒྱན༔ ཆོས་སྐྱོང་གནོད་སྦྱིན་ཉི་མའི་གདོང་ལ་གཏད༔ ལྕགས་རི་ནག་པོའི་སྒོ་བཞིའི་མགོན་ཁང་ན༔ ཤཱཀྱ་ཐུབ་པ་གཙོ་འཁོར་ལྔ་ལྔ་བཞུགས༔ སྒོ་འགྲམ་ཕྱི་གཉིས་རྒྱལ་ཆེན་རིགས་བཞི་དང་༔ ནང་མ་གཉིས་ན་ལྷ་མགོན་ཟུང་རེ་བཞུགས༔ རི་མོར་བསྐལ་པ་བཟང་པོའི་སངས་རྒྱས་སྟོང་༔ ཆོས་སྐྱོང་རྒྱལ་པོ་ཆེན་པོ་བཞི་ལ་གཏད༔ ཕྱི་ཡི་ལྕགས་རི་ནག་པོའི་རྩེ་ལ་ནི༔ མཆོད་རྟེན་སྟོང་དང་རྩ་བརྒྱད་བསྐོར་བར་བྱས༔ ཆོས་སྐྱོང་རྒྱལ་པོ་ཉི་ཁྲི་ཆིག་སྟོང་དང་༔ དྲེགས་བྱེད་སྟོང་སྡེ་བཅོ་བརྒྱད་དག་ལ་གཏད༔ ལྕགས་རི་གཅིག་བསྐོར་ནང་གི་བཞུགས་བྱང་ཡིན༔ སྒོ་བཞིའི་མདུན་ན་རྡོ་རིང་ཆེན་པོ་བཞི༔ ལོ་པཎ་རྗེ་བློན་མཛད་པ་ཡི་གེར་བཀོད༔ བཙུན་མོས་བཞེངས་པའི་ལྷ་ཁང་རྣམ་གསུམ་ལ༔ ཚེ་སྤོང་བཟའ་ནི་སྟོང་དཀར་མས་བཞེངས་པ༔ ཁམས་གསུམ་མེ་ཏོག་སྒྲོལ་གྱི་བཀོད་པ་ནི༔ ཆེ་ཆུང་དབུ་རྩེ་ཉིད་ལས་ཆུང་བ་ལ༔ བཀོད་པ་དབུ་རྩེ་ཁོ་ན་འདྲ་བར་བཞེངས༔ དེ་ན་ལྷ་ཚོགས་བཀོད་པའི་བཞུགས་བྱང་ནི༔ འོག་ཁང་གཙོ་བོ་བྱང་ཆུབ་ཆེན་པོ་ལ༔ ས་ཡི་སྙིང་པོ་བྱམས་པ་སྤྱན་རས་གཟིགས༔ ནམ་མཁའི་སྙིང་པོ་ཀུན་བཟང་རྡོ་རྗེ་འཛིན༔ འཇམ་དབྱངས་སྒྲིབ་པ་རྣམ་པར་སེལ་བ་དང་༔ ཉེ་བའི་སྲས་བརྒྱད་འཁོར་ནི་འཛུམ་བཅས་གཟིགས༔ ཁམས་གསུམ་རྣམ་རྒྱལ་ཁྲོ་བོ་མི་གཡོ་མགོན༔ སྒོ་སྲུང་གཉིས་ཏེ་ལྷ་ཚོགས་བཅུ་གཅིག་བཞུགས༔ ལྟེ་བའི་རྒྱུད་རིས་སངས་རྒྱས་ལྔ་སྟོང་དང་༔ བཞི་བརྒྱ་ལྔ་བཅུ་རྩ་གསུམ་བྲིས་པ་ཡིན༔ བསྐོར་ཁང་ཕྱི་བལྟས་མདོ་སྡེ་དཀོན་ཅོག་སྤྲིན༔ ནང་བལྟས་ལངྐར་གཤེགས་པའི་རྒྱུད་རིས་བྲིས༔ སྔ་ཁང་ལ་ནི་ཕྱོགས་བཅུའི་སངས་རྒྱས་དང་༔ དྲི་མ་མེད་པར་གྲགས་པའི་རྒྱུད་རིས་བྲིས༔ ཆོས་སྐྱོང་དཔལ་ལྡན་ལྷ་མོ་ཉིད་ལ་གཏད༔ འཁོར་ས་བར་མ་དཀོར་མཛོད་དགུ་ཡིས་བརྒྱན༔ རྒྱུད་རིས་བྱང་ཆུབ་སེམས་དཔའི་སྡེ་སྣོད་བྲིས༔ ཆོས་སྐྱོང་ས་བདག་ཀླུ་གཉན་དག་ལ་གཏད༔ འཁོར་ས་ཆེན་མོ་གློ་འབུར་བཞི་ཡིས་བརྒྱན༔ རྒྱུད་རིས་སྡོང་པོ་བརྒྱན་པའི་མདོ་སྡེ་བྲིས༔ སྒོ་འགྲམ་གཉིས་ལ་རབ་གནས་མཛད་པའི་ཚེ༔ རྒྱལ་བློན་དགུང་བཞུགས་གླུ་གར་རོལ་མོ་དང་༔ སྒྱུ་མ་མཁན་དང་གྱད་ཀྱི་འགྲན་སྟོབས་དང་༔ བྲག་དམར་མཚོ་མོ་མགུལ་གྱི་དཀྱིལ་དུ་ནི༔ རང་བྱུང་པདྨའི་སྡོང་པོ་སྐྱེས་པ་སོགས༔ ཡ་མཚན་ཆེ་བའི་རྟགས་མཚན་མང་པོ་དང་༔ བོད་དུ་ངོ་མཚར་སྣ་ཚོགས་བྱུང་ཚུལ་བྲིས༔ སྐྱིད་པའི་བྲོ་མོ་ཆེ་དང་གླུ་མོ་ཆེ༔ ལོ་ནི་བཅུ་གཉིས་བར་དུ་བླངས་པ་བྲིས༔ ཆོས་སྐྱོང་རྒྱལ་པོ་འོད་ཅན་མཆེད་གསུམ་ཡིན༔ ཅོང་ཁང་ཆོས་སྐྱོང་གཟའ་དང་ཀླུ་ལ་གཏད༔ བར་ཁང་གཙོ་བོ་སངས་རྒྱས་མར་མེ་མཛད༔ ཉེ་བའི་སྲས་བརྒྱད་འཁོར་ལ་འཛུམ་བཅས་གཟིགས༔ ཀང་ཀིང་གཉིས་ཏེ་ལྷ་ཚོགས་བཅུ་གཅིག་བཞུགས༔ ལྟེ་བའི་ནང་གཟིགས་བུད་མེད་བུར་འགྱུར་བར༔ ལུང་དུ་བསྟན་པ་མདོ་ཡི་རྒྱུད་རིས་བྲིས༔ བསྐོར་ཁང་ཕྱི་བལྟས་གཙུག་ན་རིན་ཆེན་མདོ༔ ནང་བལྟས་ཕྱིར་མི་ལྡོག་པའི་འཁོར་ལོ་བྲིས༔ བསྐོར་ཁང་གདོང་ལ་རྒྱལ་ཆེན་རྣམ་གཉིས་བཀོད༔ སྟེང་ཁང་གཙོ་བོ་རྣམ་སྣང་ཀུན་ཏུ་ཞལ༔ ཉེ་བའི་སྲས་བརྒྱད་འཁོར་གྱིས་རབ་ཏུ་མཛེས༔ ཕྱོགས་བཅུ་ནས་བྱོན་སེམས་དཔའ་བཅུ་དྲུག་དང་༔ སྒོ་སྲུང་བརྒྱད་དེ་ལྷ་ཚོགས་སུམ་ཅུ་གསུམ༔ ལྟེ་བའི་ལོག་ལ་རི་མོ་བཀོད་པ་ནི༔ རིགས་ལྔའི་སངས་རྒྱས་ཕྱོགས་ཚོན་དག་དང་བསྟུན༔ སྒོ་བ་བཞི་དང་མཆོད་པའི་ལྷ་མོ་བྲིས༔ རིན་ཆེན་སྣ་ཚོགས་སྤྱི་གདུགས་མཛེས་པ་ལ༔ གསེར་གྱི་དྲིལ་ཆེན་འཕྱང་འཕྲུལ་རྣམས་ཀྱིས་བརྒྱན༔ བར་ཁང་དང་ནི་སྟེང་ཁང་སྲུང་མ་ནི༔ ཆོས་སྐྱོང་རྒྱལ་པོ་གནོད་སྦྱིན་མཆེད་གསུམ་ཡིན༔ ལྕོག་བཞི་ལག་ན་རྡོ་རྗེ་བཞི་ལ་གཏད༔ ཁམས་གསུམ་མེ་ཏོག་སྒྲོལ་གྱི་དཀར་ཆག་ཡིན༔ འཕན་ཡུལ་གྲུ་གསུམ་ཕོ་གྱོང་རྒྱལ་མོ་བཙུན༔ ཡུམ་ནས་སྐྱེ་བ་བཞེས་པས་ཁྱད་དུ་འཕགས༔ དེ་ཡི་ཐུགས་དམ་དགའ་ལྡན་བྱང་ཆུབ་སྒྲོལ༔ དབུ་ཚལ་གསེར་ཁང་བཞེངས་པའི་བཞུགས་བྱང་ནི༔ ལྷ་སྲས་མི་མངའ་ལྷ་ཁང་ཉིས་ཐོག་བཞེངས༔ ཟས་སྣ་བཅུ་གསུམ་བཟོ་བོ་རྣམས་ལ་དྲངས༔ བཟོ་སྣ་བཅུ་གསུམ་ཁྱད་དུ་འཕགས་ཟེར་ཏེ༔ བདུན་གྱིས་ཁྱད་དུ་འཕགས་པ་ཡིན་ནོ་སྐད༔ ཕྱི་ན་རྩིག་མེད་ནང་ན་ཀ་བ་མེད༔ མཐིང་གི་རྒྱ་ཕིབས་ཕྱི་ལྟ་ནང་ལྟ་དང་༔ གསེར་གྱི་རྟ་དང་སེང་གེ་གླང་ཆེན་སོགས༔ རྒྱ་བྱ་སྣ་ཚོགས་དག་གིས་ལེགས་པར་བརྒྱན༔ གླ་གོར་སྒོ་ལ་གསེར་གྱི་བྱིའུ་ཆུང་ནི༔ སྙན་པའི་སྒྲ་སྐད་ཡིད་འོང་སྒྲོག་པར་བྱེད༔ ཐང་དང་བད་ནི་སོ་ཕག་བཻ་ཌཱུཪྻ༔ ཆུ་སྲིན་ཁ་ནས་དྲི་ཞིམ་སྤོས་ཀྱི་ཆུས༔ སྐུ་ཁྲུས་གསོལ་ཏེ་རུ་སྦལ་སྟེང་དུ་འབབ༔ མཛད་པ་བཅུ་གཉིས་གཙོ་བོ་འབུར་དུ་དོད༔ གཙོ་བོ་དང་ནི་སེམས་དཔའ་ཐམས་ཅད་ལ༔ སྤྱི་གདུགས་སྒོས་གདུགས་དག་གིས་ལེགས་པར་བརྒྱན༔ གསེར་གྱི་གདུགས་ལ་མཆོད་པའིལྷ་མོ་ནི༔ ཉི་ཤུ་རྩ་བརྒྱད་དག་གིས་མཛེས་པར་བྲིས༔ ལྷ་ཡི་བུ་ནི་ཁྱུང་གི་སྒོ་ང་ནས༔ དེ་བཞིན་གཤེགས་པ་རྣམས་ལ་སྐུ་ཁྲུས་གསོལ༔ ཟུར་བཞི་དག་ན་གསེར་གྱི་སེང་གེ་ནི༔ ལུག་ཐོང་ཙམ་པ་བརྒྱད་ཀྱིས་ལེགས་པར་བརྒྱན༔ དེ་ལྟར་བཟོ་ཁྱད་བཅུ་གསུམ་ཁྱད་དུ་འཕགས༔ འོག་ཁང་གཙོ་བོ་རྒྱལ་བ་རིགས་ལྔ་ལ༔ གསུམ་ནི་གསེར་སྐུ་གཉིས་ནི་རི་མོར་བྲིས༔ ཉེ་བའི་སྲས་བརྒྱད་གཙོ་ལ་འཛུམ་བཅས་གཟིགས༔ རྡོ་རྗེ་གཏུམ་པོ་ཁྲོ་རྒྱལ་མི་གཡོ་མགོན༔ དེ་ལྟར་ལྷ་ཚོགས་བཅོ་ལྔ་བཞུགས་པ་ཡིན༔ ལྟེ་བའི་སྔ་གདོང་གཉིས་ལ་རྒྱུད་རིས་ནི༔ རྒྱལ་ཆེན་ཡུལ་འཁོར་སྲུང་དང་སྤྱན་མི་བཟང་༔ བཙུན་མོ་སྲས་དང་བློན་པོར་བཅས་པ་བྲིས༔ བསྐོར་ཁར་ཞལ་ནི་ཕྱི་རུ་གཟིགས་པ་ལ༔ འབུམ་གྱི་གླེང་གཞི་ཕྱོགས་བཅུའི་སངས་རྒྱས་བཀོད༔ སྒོ་འགྲམ་གདུང་མཚམས་གཉིས་ཀྱི་གཡས་གཡོན་དུ༔ བཀའ་འདུས་དང་ནི་བླ་མེད་དོན་རྫོགས་ཀྱི༔ དཀྱིལ་འཁོར་སྒོ་རྫོགས་ཕོ་བྲང་རེ་རེ་བྲིས༔ བསྐོར་ཁང་ཞལ་ནི་ནང་དུ་གཟིགས་པ་ཡི༔ བར་གྱི་ཁྱམས་ལ་མཛད་པ་བཅུ་གཉིས་ནི༔ འབུར་དང་རི་མོ་བསྲེས་ནས་རྒྱས་པར་བྲིས༔ བར་ཁྱམས་སྔ་གདོང་དག་ལ་དགེ་བསྙེན་ནི༔ ལིཙྪ་བྱི་དང་འཇམ་དཔལ་བགྲོ་མཛད་བྲིས༔ འཁོར་ཁྱམས་ཆེན་མོར་ཕལ་ཆེན་རྒྱུད་རིས་དང་༔ རཱུ་ཏྲ་ཐར་པ་ནག་པོའི་སྐྱེ་རྒྱུད་བྲིས༔ སྒོ་ཁང་ལ་ནི་གང་བ་བཟང་པོ་དང་༔ ནོར་བུ་བཟའ་པོ་སྲིད་པའི་འཁོར་ལོ་ཅན༔ འཇིག་རྟེན་གདགས་པའི་དཔེའུ་ཆུང་དག་ཏུ་བྲིས༔ དཀོར་མཛོད་དྲུག་དང་ཇོ་མོའི་ཁང་པ་དང་༔ གློ་འབུར་དག་གིས་འཁོར་ས་ཆེན་མོ་བརྒྱན༔ སྟེང་ཁང་གཙོ་བོ་རྣམ་སྣང་ཀུན་ཏུ་ཞལ༔ སེམས་དཔའ་བཅུ་དྲུག་དག་གིས་བསྐོར་ནས་བཞུགས༔ སྟེང་ཁང་རྒྱ་ཕིབས་འོག་ན་རི་མོ་ནི༔ བུ་མོ་བདུན་གྱི་རྟོག་པ་བརྗོད་པ་དང་༔ འཕགས་པ་དགེ་འདུན་སྐྱོང་གི་རྟོགས་བརྗོད་བྲིས༔ སྟེང་ཁང་བར་ཁྱམས་དག་ལ་རི་མོ་ནི༔ མདོ་སྡེ་པདྨ་དཀར་པོའི་རྒྱུད་རིས་བྲིས༔ སྤྱི་ཡི་ཆོས་སྐྱོང་མ་མགོན་ལྕམ་དྲལ་དང་༔ ཀླུ་རྒྱལ་ས་བདག་རུ་སྦལ་དག་ལ་གཏད༔ གློ་འབུར་བདུན་གྱི་ཆོས་སྐྱོང་སྲུང་མ་ནི༔ རྒྱལ་པོ་རྟ་མགོ་གནོད་སྦྱིན་ཀུཎྜ་ལི༔ གང་བ་བཟང་དང་ནོར་བུ་བཟང་ལ་གཏད༔ དེ་དག་དབུ་ཚལ་གསེར་ཁང་དཀར་ཆག་ཡིན༔ འབྲོ་བཟའ་བྱང་ཆུབ་རྗེ་ཡི་བཙུན་མོ་ཡི༔ ཐུགས་དམ་དགེ་བ་རྒྱས་པའི་ལྷ་ཁང་ནི༔ སྲས་དང་སྲས་མོ་མི་མངའ་ཐོག་གཅིག་མ༔ སོ་ཕག་ཁྲོ་ཆུས་ལེགས་པར་སྦྱར་བྱས་བཞེངས༔ སྣང་བ་མཐའ་ཡས་གཙོ་མཛད་ལུགས་མ་བདུན༔ འཇམ་དབྱངས་སྤྱན་རས་གཟིགས་དང་ཀུན་ཏུ་བཟང་༔ སྨན་པའི་རྒྱལ་པོ་དང་ནི་སེམས་དཔའ་བཞི༔ ཁྲོ་རྒྱལ་ཕྱག་ན་རྡོ་རྗེ་མི་གཡོ་མགོན༔ ལྡེར་ཚོ་རྡོ་རྗེ་སེམས་དཔའ་བྱམས་པ་སྟེ༔ དེ་ལྟར་གཙོ་འཁོར་རྣམ་པར་དགུ་བཞུགས་སོ༔ ལྟེ་བའི་སྔ་གདོང་གཉིས་ལ་རྒྱུད་རིས་ནི༔ གཡས་ན་དམ་པ་རིགས་བརྒྱའི་དཀྱིལ་འཁོར་དང་༔ གཡོན་ན་བསྒྲུབ་པ་བཀའ་བརྒྱད་ཕོ་བྲང་བྲིས༔ བསྐོར་ཁང་ཞལ་ནི་ཕྱི་རུ་ལྟ་བ་ལ༔ རིགས་ལྔའི་སྐྱེ་རྒྱུད་བོད་དུ་ཆོས་བྱུང་ཚུལ༔ ལོ་པཎ་གདན་དྲངས་ཆོས་ཀྱི་བསྒྱུར་ཚུལ་དང་༔ ཆོས་ཁྲིམས་བསྡམས་ཚུལ་ལོ་ཙཱ་བསླབས་པའི་ཚུལ༔ པཎྜི་ཏ་དང་རྒྱལ་པོ་མཇལ་ཚུལ་དང་༔ བོན་ཆོས་གྲུབ་མཐའ་འགེགས་རེས་བྱས་པའི་ཚུལ༔ བོན་བསྣུབས་ཆོས་ལ་དག་ཐེར་བྱེད་ལུགས་དང་༔ བཻ་རོ་ཙ་ན་ནམ་སྙིང་རྣམ་ཐར་བྲིས༔ ལྟེ་བའི་ཕྱེད་ནི་མན་ཆད་མ་བྲིས་སོ༔ བསྐོར་ཁང་ཞལ་ནི་ནང་དུ་གཟིགས་པ་ལ༔ ཨུ་རྒྱན་པདྨའི་རྣམ་ཐར་འདི་ཉིད་དང་༔ གསང་སྔགས་བོད་དུ་འགྱུར་ཚད་ཐམས་ཅད་ཀྱི༔ དཀྱིལ་འཁོར་སྒོ་རྫོགས་ལྷ་དང་བཅས་པ་བྲིས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བསམ་ཡས་སྐུ་རྟེན་ལྷའི་བཞུགས་བྱང་དཀར་ཆག་ཏུ་བཀོད་པའི་ལེའུ་སྟེ་གྱ་དྲུག་པའོ༔ ༔
པདྨ་བཀའ་ཐང་ལེའུ་ ༨༧ ཕྱི་མཚན་ཉིད་ཐེག་པའི་བཀའ་དང་བསྟན་བཅོས་འགྱུར་བྱང་།
དེ་ནས་གསུང་རྟེན་ཆོས་ཀྱི་འགྱུར་བྱང་ནི༔ དང་པོ་ཉན་རང་ཆོས་ཀྱི་འགྱུར་བྱང་ལ༔ མདོ་སྡེ་ལེགས་ཉེས་བསྟན་དང་ལས་བརྒྱ་པ༔ རྣམ་འབྱེད་རྣམ་པར་འཐག་པ་ལས་རྣམ་བརྗོད༔ གང་པོའི་རྟོགས་བརྗོད་བྲམ་ཟེ་ཚོམས་ཀྱི་མདོ༔ དྲིན་ལས་བསབ་མདོ་མཛངས་བླུན་དྲན་ཉེར་བཞག༔ ཚུལ་ཁྲིམས་ངན་པ་ཚར་གཅོད་པ་ཡི་མདོ༔ དེ་ལྟར་དྲང་དོན་བསྟན་པའི་མདོ་བཅུ་དང་༔ གཞན་ཡང་ཐེག་དམན་མདོ་སྡེ་དཔག་མེད་འགྱུར༔ འདུལ་བ་ལུང་གཞི་རྣམ་འབྱེད་གཞུང་བླ་མ༔ ཕྲན་ཚེགས་དང་ནི་སོ་ཐར་མདོ་གཉིས་སོ༔ བར་པ་བྱང་སེམས་ཆོས་ཀྱི་འགྱུར་བྱང་ལ༔ ཕ་རོལ་ཕྱིན་པ་ཡུམ་སྲས་བཅུ་བདུན་དང་༔ ཤེར་ཕྱིན་སྟོང་ཉིད་གཙོར་སྟོན་མདོ་མང་འགྱུར༔ ཐ་མ་ངེས་དོན་སྙིང་པོ་བསྟན་པའི་མདོ༔ སའི་སྙིང་འཁོར་ལོ་བཅུ་པ་ཡོན་ཏན་མདོ༔ ཕལ་ཆེན་དཀོན་བརྩེགས་ལང་གཤེགས་པདྨ་དཀར༔ མྱང་འདས་དགོངས་པ་ངེས་འགྲེལ་རྒྱན་སྟུག་པོ༔ གསེར་འོད་དམ་པ་ལ་སོགས་དཔག་མེད་འགྱུར༔ འཁོར་ལོ་གསུམ་གྱི་དགོངས་པ་འགྲེལ་པའི་ཕྱིར༔ མདོ་དང་མཐུན་པའི་བསྟན་བཅོས་འགྱུར་བྱང་ལ༔ བདེན་བཞི་ཉན་རང་ཐེག་པའི་བསྟན་བཅོས་ནི༔ འདུལ་བའི་གཞུང་འགྲེལ་རྣམ་པ་མང་པོ་དང་༔ དེ་དང་མཐུན་པའི་མདོ་འགྲེལ་མང་དུ་འགྱུར༔ བྱེ་བྲག་བཤད་མཛོད་ཆེན་མོའི་རྒྱ་དཔེ་བཞུགས༔ ཆོས་ཀྱི་ཕུང་པོ་གནས་བརྟན་ཤཱ་རིའི་བུས༔ གདགས་པའི་བསྟན་བཅོས་མཽངྒལ་གྱི་བུས༔ ཁམས་ཀྱི་ཚོགས་ནི་དགྲ་བཅོམ་གང་པོས་བྱས༔ རྣམ་པར་ཤེས་པའི་ཚོགས་ནི་ལྷ་སྐྱིད་ཀྱིས༔ སྒྲོལ་བའི་རྣམ་གྲངས་གསུས་པོ་ཆེ་ཡིས་བྱས༔ ཡེ་ཤེས་འཇུག་པ་ཀཱ་ཏྱཱ་ཡ་ནའི་བུས༔ དེ་ལྟར་ཆོས་མངོན་བསྟན་བཅོས་སྡེ་བདུན་དང་༔ དབྱིག་གཉེན་གྱིས་མཛད་ཕུང་པོའི་རབ་བྱེད་དང་༔ ཉི་ཤུ་པ་ཡི་རབ་ཏུ་བྱེད་པ་དང་༔ སུམ་ཅུ་པ་ཡི་རབ་ཏུ་བྱེད་པ་དང་༔ ལས་རྣམས་གྲུབ་པའི་རབ་ཏུ་བྱེད་པ་དང་༔ རྣམ་པར་བཤད་པ་རིག་པས་རང་རྒྱུད་ལྔ༔ ཆོས་མངོན་མཛོད་སོགས་གཞུང་འགྲེལ་མཐའ་ཡས་འགྱུར༔ ཐམས་ཅད་སྤྲོས་ན་ཡི་གེ་མངས་བས་བསྡུས༔ བྱང་ཆུབ་སེམས་དཔའི་ཐེག་པའི་བསྟན་བཅོས་ནི༔ དཔལ་མགོན་ཀླུ་སྒྲུབ་དབུ་མ་རིག་པའི་ཚོགས༔ བསྟོད་པའི་ཚོགས་དང་གཏམ་ཚོགས་ལ་སོགས་དང་༔ ཨཱཪྻ་དེ་བའི་དབུ་མ་བཞི་བརྒྱ་པ༔ སློབ་དཔོན་བྷ་བྱའི་རྟོག་གེ་འབར་བ་དང་༔ སངས་རྒྱས་བསྐྱངས་ཀྱི་བུདྡྷ་པཱ་ལི་དང་༔ ཟླ་བ་གྲགས་པའི་དབུ་མ་ལ་འཇུག་པ༔ ཡེ་ཤེས་སྙིང་པོའི་བདེན་གཉིས་རྣམ་འབྱེད་དང་༔ སློབ་དཔོན་ཞི་བ་འཚོ་ཡི་དབུ་མ་རྒྱན༔ ཀ་མ་ཤཱི་ལའི་དབུ་མ་སྣང་བ་སོགས༔ རྟ་དབྱངས་མདོ་སྡེའི་སྐྱེས་རབས་སྙན་ངག་བཅས༔ དགྲ་བཅོམ་ཆོས་སྐྱབས་ཆེད་དུ་བརྗོད་པའི་ཚོམས༔ ཕྱོགས་ཀྱི་གླང་པོའི་རབ་བྱེད་བརྒྱ་རྩ་བརྒྱད༔ ཆོས་ཀྱི་གྲགས་པའི་སྡེ་བདུན་རྣམ་འགྲེལ་སོགས༔ དབང་སྡེ་རབ་ཏུ་འབྱེད་པའི་གཏན་ཚིགས་དང་༔ ཞི་བ་ལྷ་ཡི་སྤྱོད་འཇུག་བསླབ་བཏུས་སོགས༔ ཐོགས་མེད་ཀྱིས་བླངས་བྱམས་པའི་ཆོས་ལྔ་དང་༔ ས་སྡེ་ལྔ་དང་སྡོམ་གསུམ་ལ་སོགས་པ༔ ཐེག་པ་ཆེན་པོའི་བསྟན་བཅོས་མང་དུ་འགྱུར༔ ངེས་པ་དོན་གྱི་མདོ་སྡེའི་འགྲེལ་བཤད་ནི༔ ས་བཅུའི་འགྲེལ་པ་དབྱིག་གཉེན་མཛད་པ་དང་༔ པད་དཀར་འགྲེལ་པ་ས་ཡི་རྩ་ལག་དང་༔ དགོངས་འགྲེལ་ཊཱི་ཀ་བམ་པོ་དྲུག་ཅུ་སོགས༔ ཚད་ལྡན་མཁས་པའི་གཞུང་ལུགས་མང་དུ་འགྱུར༔ དེ་ལྟར་བསྟན་བཅོས་རབ་ཏུ་མང་པོ་བཞུགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཕྱི་མཚན་ཉིད་ཐེག་པའི་བཀའ་དང་བསྟན་བཅོས་འགྱུར་བྱང་གི་ལེའུ་སྟེ་གྱ་བདུན་པའོ༔ ༔
པདྨ་བཀའ་ཐང་ལེའུ་ ༨༨ གསང་སྔགས་ཕྱི་ནང་གི་འགྱུར་བྱང་བསྡུས་པ།
དེ་ནས་གསང་སྔགས་ཐེག་པའི་འགྱུར་བྱང་ནི༔ ཟ་མ་ཏོག་བཀོད་ཙྪིནྡྷ་མ་ཎི་དང་༔ འདུས་པ་རིན་ཅེན་ཏོག་དང་གཟུངས་གྲ་ལྔ༔ གཟུངས་ཕྲན་བརྒྱ་དང་དྲུག་ཅུ་ལ་སོགས་འགྱུར༔ ཀྲཱྀ་ཡའི་འགྱུར་བྱང་སྐུ་རྒྱུད་གཙུག་གཏོར་དང་༔ གསུང་རྒྱུད་དོན་ཞགས་ཐུགས་རྒྱུད་རིག་པ་མཆོག༔ དཔུང་པ་ལས་བྱུང་བཤད་རྒྱུད་དཔུང་པ་བཟང་༔ ལྟེ་བ་དག་ལས་སུ་ཏི་ཀ་རིའི་རྒྱུད༔ པུས་མོ་གཉིས་ལས་མི་གཡོ་བའི་རྒྱུད་གཉིས༔ དེ་ལྟར་ཀྲཱྀ་ཡ་རྩ་བའི་སྡེ་དྲུག་འགྱུར༔ བྱ་བ་སྤྱི་རྒྱུད་འཇམ་དཔལ་རྩ་བའི་རྒྱུད༔ བྱེ་བྲག་ཆོ་ག་ཞིབ་མོ་སྟོན་པའི་རྒྱུད༔ ལྷ་རྒྱུད་གཟུངས་རིང་བསམ་གཏན་ཕྱི་མ་དང་༔ འོད་ཟེར་འཕྲོ་རྒྱུད་གསང་བ་སྤྱི་ཡི་རྒྱུད༔ དབང་བསྐུར་རྟོག་པ་རྒྱལ་པོའི་རྒྱུད་སོགས་དང་༔ རིགས་གསུམ་ལ་ནི་འཇམ་དཔལ་རྩ་བའི་རྒྱུད༔ འཇམ་དཔལ་གསང་རྒྱུད་འཇམ་དཔལ་རིགས་དྲུག་རྒྱུད༔ ཕྱི་མ་འཇམ་དཔལ་གསང་བ་བསྟན་པའི་རྒྱུད༔ བཤད་རྒྱུད་ཡི་གེ་བཀོད་པ་ལས་རྒྱ་མཚོ༔ དཔའ་བོ་གཅིག་སྒྲུབ་བསྟོད་པ་གླུར་བླངས་སོགས༔ སྤྱན་རས་གཟིགས་ལ་མདོ་རྒྱུད་ཉི་ཤུ་གཅིག༔ པདྨ་དྲ་བ་དོན་ཡོད་ཞགས་པ་དང་༔ ཡིད་བཞིན་འཁོར་ལོ་ཕྱག་སྟོང་སྤྱན་སྟོང་གཟུངས༔ སེང་གེ་སྒྲ་དང་པདྨ་ཅོད་པན་རྒྱུད༔ འཇིག་རྟེན་དབང་ཕྱུག་རྟོག་པ་ལ་སོགས་འགྱུར༔ ཕྱག་ན་རྡོ་རྗེ་གཏུམ་པོ་རྩ་བའི་རྒྱུད༔ ཕྱི་མ་ཕྱི་མའི་ཕྱི་མ་དང་བཅས་པ༔ རྡོ་རྗེ་ས་འོག་རྡོ་རྗེ་ས་གསུམ་འདུལ༔ རྡོ་རྗེ་བདེ་ཁྲོས་རྡོ་རྗེ་གདེངས་པའི་རྒྱུད༔ རྡོ་རྗེ་སྙིང་པོ་མེ་ལྕེ་དབབ་པ་སོགས༔
རྡོ་རྗེ་རྣམ་པར་འཇོམས་པ་རྩ་བའི་རྒྱུད༔ རྡོ་རྗེ་རི་རབ་ཁང་བུ་བརྩེགས་སོགས་འགྱུར༔ གཞན་ཡང་གཟི་ལྡན་སྒྲོལ་མ་འབར་བའི་རྒྱུད༔ ཙུནྡའི་རྒྱུད་དང་གཤིན་རྗེ་ནག་པོའི་རྒྱུད༔ རིག་པའི་གཟུངས་སྔགས་བསམ་གྱིས་མི་ཁྱབ་འགྱུར༔ གཉིས་སྤྱོད་ཨུ་པའི་རྒྱུད་ཀྱི་འགྱུར་བྱང་ལ༔ རྩ་རྒྱུད་རྣམ་སྣང་མངོན་པར་བྱང་ཆུབ་པ༔ བཤད་པའི་རྒྱུད་ཆེན་ཉི་མ་གཟི་བརྗིད་དང་༔ རྩ་བའི་རྒྱུད་དང་ཕྱི་མ་ཕྱི་མའི་རྒྱུད༔ ཁམས་གསུམ་རྣམ་རྒྱལ་སྲས་ཁོག་སྣང་བའི་རྒྱུད༔ འཇམ་དཔལ་མཚན་བརྗོད་ལེའུ་ཁྲི་དྲུག་སྟོང་༔ མེ་དཔུང་འབར་བ་དམ་ཚིག་གསུམ་བཀོད་རྒྱལ༔ ལག་ན་རྡོ་རྗེ་དབང་བསྐུར་རྒྱུད་སོགས་འགྱུར༔ རྣལ་འབྱོར་ཡོ་གའི་རྒྱུད་ཀྱི་འགྱུར་བྱང་ལ༔ རྩ་བའི་རྒྱུད་ཆེན་ཏ་ཐཱ་སཾ་གྲ་ཧ༔ ཡོ་གའི་བཤད་རྒྱུད་རྡོ་རྗེ་རྩེ་མོ་དང་༔ བྱིན་གྱིས་བརླབས་པ་ངན་སོང་སྦྱོང་བའི་རྒྱུད༔ ཁ་སྐོངས་དཔལ་མཆོག་དང་པོ་རིག་པ་མཆོག༔ འཇིག་རྟེན་གསུམ་རྒྱལ་འཇམ་དཔལ་སྒྱུ་དྲྭ་དང་༔ རྡོ་རྗེ་སྙིང་པོ་རྒྱན་གྱི་རྒྱུད་སོགས་འགྱུར༔ དེ་དག་རྣམས་ཀྱི་འགྲེལ་བཤད་སྒྲུབ་ཐབས་དང་༔ དབང་བསྐུར་གདམས་ངག་ལག་ལེན་དང་བཅས་པའི༔ མཐུན་པའི་བསྟན་བཅོས་དཔག་ཏུ་མེད་པ་འགྱུར༔ བསྡུ་ན་ཀྲཱི་ཡོག་རྣམ་པ་གསུམ་དུ་གྲགས༔ བསྐྱེད་པ་མ་ཧཱ་ཡོ་གའི་འགྱུར་བྱང་ལ༔ རྩ་བ་ཏནྟྲ་ཆེན་པོ་སྡེ་བཅོ་བརྒྱད༔ རྣམ་སྣང་ལ་སོགས་སྒྱུ་འཕྲུལ་སྡེ་བཞི་དང་༔ གསང་བ་རྡོར་སེམས་སྒྱུ་འཕྲུལ་སྡེ་ཚན་བརྒྱད༔ སྒྲུབ་པ་བཀའ་བརྒྱད་སྤྱི་རྒྱུད་སྒོས་རྒྱུད་དང་༔ འཇམ་དཔལ་སྐུ་སྒྱུད་ཟླ་གསང་ནག་པོ་དང་༔ པདྨ་གསུང་རྒྱུད་རྟ་མཆོག་རོལ་པ་དང་༔ ཡང་དག་ཐུགས་རྒྱུད་ཧེ་རུ་ཀ་གལ་པོ༔ བདུད་རྩི་ཡོན་ཏན་རོལ་པ་ཆེ་ཆུང་དང་༔ ཕུར་པ་ཕྲིན་ལས་བིདྱོཏྟ་མ་ལ༔ མ་མོ་འབུམ་ཏིག་ལ་སོགས་སྒྲུབ་སྡེ་དྲུག༔ སྦྱོར་སྒྲོལ་སྨན་རཀ་གཏོར་མའིརྒྱུད་སོགས་འགྱུར༔ ནང་ལུང་ཨ་ནུ་ཡོ་གའི་འགྱུར་བྱང་ནི༔ རྩ་རྒྱུད་ཡེ་ཤེས་ཕྱག་རྒྱ་རོལ་པའི་མདོ༔ དབང་བསྐུར་རྒྱལ་པོ་རིག་འཛིན་དྲུག་གི་མདོ༔ ཏིང་འཛིན་མཆོག་མདོ་གསང་སྒོ་འགྲེལ་པའི་མདོ༔ རྡོ་རྗེ་མ་གོལ་སྒྲོལ་མ་བརྩེགས་པའི་མདོ༔ དེ་དག་རྩ་བའི་མདོ་བདུན་འགྱུར་བྱང་ངོ་༔ ལུང་ཆེན་རྩ་བ་ནང་གི་མདོ་བདུན་ནི༔ སངས་རྒྱས་ཀུན་གྱི་དགོངས་པ་འདུས་པའི་མདོ༔ ཀུན་འདུས་རིག་པ་སེམས་ལུང་ཆེན་མོའི་མདོ༔ ཡེ་ཤེས་རྔམ་གློག་ཁུ་བྱུག་རོལ་པའི་མདོ༔ གལ་པོ་ཆེ་དང་འཇིག་རྟེན་འདས་པའི་མདོ༔ དེ་དག་ལུང་ཆེན་ནང་གི་མདོ་བདུན་ནོ༔ སྐུ་མཆོག་བསྐལ་པ་མེ་ལྟར་འབར་བའི་རྒྱུད༔ གསུང་དབྱངས་ཁྲོ་རྒྱལ་དབང་ཆེན་འདུས་པའི་རྒྱུད༔ ཐུགས་མཆོག་རྣམ་དག་པུཎྜ་རཱི་ཀའི་རྒྱུད༔ ཡོན་ཏན་ལྷུན་རྫོགས་ལྷ་མོ་མ་གོལ་རྒྱུད༔ ཕྲིན་ལས་མཐར་ཕྱིན་སྒོམ་དོན་དྲུག་པའི་རྒྱུད༔ བླ་མེད་དོན་རྫོགས་འདུས་པའི་རྒྱུད་རྣམས་དང་༔ སྤྱི་རྒྱུད་སྟོང་གིས་བརྒྱན་པ་ལ་སོགས་འགྱུར༔ སངས་རྒྱས་ཀུན་གྱི་དགོངས་པ་འདུས་པ་ནི༔ བཀའ་རྣམས་ཀུན་གྱི་དེམས་སུ་བཞག་པ་ཡིན༔ རྫོགས་པ་ཨ་ཏི་ཡོ་གའི་འགྱུར་བྱང་ལ༔ རྩ་རྒྱུད་སྡེ་ལྔ་ཡན་ལག་རྒྱུད་སྡེ་བདུན༔ བཤད་པའི་རྒྱུད་བཞི་ཡན་ལག་བཅས་པ་དང་༔ རྫོགས་པ་ཆེན་པོ་སེམས་སྨད་བཅོ་བརྒྱད་དང་༔ ཀློང་སྡེ་དཀར་ནག་ཁྲ་གསུམ་མ་བུའི་སྐོར༔ མན་ངག་སྡེ་ལ་བཀའ་གཏེར་སྙན་བརྒྱུད་གསུམ༔ དེ་དག་རེ་རེ་ལ་ཡང་སྐོར་ལྔ་ལྔ༔ ཕྱི་སྐོར་ནང་སྐོར་གསང་སྐོར་བླ་མེད་སྐོར༔ ཡང་གསང་ཐིག་ལེའི་སྐོར་ཏེ་སྔ་འགྱུར་ལྔ༔ ཕྱི་འགྱུར་བཅུ་གསུམ་བར་འགྱུར་བཅོ་བརྒྱད་དང་༔ ཡང་འགྱུར་ཉི་ཤུ་ལ་སོགས་མང་དུ་འགྱུར༔ སྤྱི་ཏི་ཡོ་ག་འབྲས་བུའི་མདོ་བདུན་དང་༔ རྫོགས་ཆེན་བཀའ་འདུས་རྒྱུད་བཅུ་ལ་སོགས་བསྒྱུར༔ དེ་དག་རྣམས་ཀྱི་འགྲེལ་བཤད་སྒྲུབ་ཡིག་དང་༔ ཕྱོགས་མཐུན་བསྟན་བཅོས་དཔག་ཏུ་མེད་པའང་འགྱུར༔ རྒྱ་དཔེ་ནཱ་ལེནྡྲ་ཡི་གཙུག་ལག་དང་༔ ལྷ་ཀླུ་གནོད་སྦྱིན་མཁའ་འགྲོའི་གནས་བཞུགས་པ༔ སློབ་དཔོན་རྣམས་ཀྱི་རྫུ་འཕྲུལ་གྱིས་བླངས་ནས༔ ད་ལྟ་བསམ་ཡས་དཀོར་མཛོད་རྣམས་སུ་བཞུགས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གསང་སྔགས་ཕྱི་ནང་གི་འགྱུར་བྱང་བསྡུས་པའི་ལེའུ་སྟེ་གྱ་བརྒྱད་པའོ༔ ༔
པདྨ་བཀའ་ཐང་ལེའུ་ ༨༩ འདུས་བྱས་མི་རྟག་པར་བསྟན་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ ཡོ་འབོག་ལྕམ་མེའི་ཐང་ལ་ཁྲི་བཤམས་ནས༔ བཀའ་དྲིན་གསོབ་ཕྱིར་ལོ་པཎ་གྲལ་ལ་བཀོད༔ གསོལ་ཟས་ན་བཟའ་ལུས་གང་འཐེབ་རེ་ཕུལ༔ ཕོ་མཛོ་མོ་མཛོ་རྟ་རེ་དྲེའུ་རེ༔ གསེར་ཕྱེ་བྲེ་རེ་གསེར་གྱི་པ་ཏྲ་རེ༔ ཇ་རེ་ཁྲབ་རེ་གོས་ཡུག་དར་ཡུག་རེ༔ ཕྲུག་ཆེན་དོས་རེ་ཐེར་སྲབ་དོས་རེ་ཕུལ༔ རྒྱལ་པོའི་མངའ་འོག་བློན་འབངས་ཐམས་ཅད་ཀྱིས༔ ཆེ་འབྱོར་ཆུང་འབྱོར་ནོར་སྤུས་དག་པར་ཕུལ༔ ལོ་ཙཱ་རྣམས་ལ་ཆོས་རྩིས་བྱར་དགའ་གནང་༔ གཙུག་གི་ནོར་བུར་གྱུར་པའི་བླ་མར་བཏོན༔ རྒྱལ་པོས་སྐུ་དྲིན་ཆེ་བའི་ལོ་རྒྱུས་གསུངས༔ པཎ་ཆེན་བརྒྱ་རྩ་བརྒྱད་ཀྱི་མཆོག་གྱུར་པ༔ སློབ་དཔོན་པདྨས་གཏམ་ལན་མདོ་བསྔོ་གསུངས༔ དེ་གོང་གཏམ་མེད་དེ་ནས་གཏམ་གཏོང་བྱུང་༔ ཡས་གཏམ་མས་གཏམ་གཉིས་ཀ་དེ་ནས་དར༔ བི་མ་མི་ཏྲ་རྒྱ་ནག་ཡུལ་དུ་བཞུད༔ རྒྱ་གར་པཎྜི་ཏ་རྣམས་རང་ཡུལ་གཤེགས༔ གཞན་ཡང་པཎྜི་ཏ་རྣམས་རང་ཡུལ་ལ༔ ལོ་ཙཱ་བ་དང་འབངས་ཀྱིས་སོ་སོར་བསྐྱལ༔ རྒྱ་གར་ཆོས་མི་སྡོམ་པར་བཀའ་བཀྲོལ་ཕུལ༔ སངས་རྒྱས་གཉིས་པ་སློབ་དཔོན་པདྨ་དང་༔ བྱང་ཆུབ་སེམས་དཔའ་བོ་དྷི་ས་ཏྭ་གཉིས༔ སྐྱེ་བ་སྔ་མའི་ལས་འབྲེལ་སྤུན་ཡིན་པས༔ བཞུད་པར་མ་གནང་བཞུགས་པར་ཞལ་གྱིས་བཞེས༔ མཁན་ཆེན་བྱང་ཆུབ་གླིང་དུ་དགོངས་པར་བཞུགས༔ སློབ་དཔོན་བསམ་ཡས་མཆིམས་ཕུར་དགོངས་པར་བཞུགས༔ དེ་ནས་རྒྱལ་པོས་ཆོས་ལ་ཉམས་ལེན་ཞུས༔ བྱིན་བས་བརྒྱུད་པ་མ་ཆད་ལོ་རྒྱུས་དང་༔ དབང་བསྐུར་ཆུ་བོ་མ་ནུབ་བསྐུར་བའི་ཐབས༔ གདམས་ངག་གཟར་ཁ་མ་ལོག་ཁྲིགས་ཆགས་དང་༔ སྲིད་སྡེ་དགྲ་ལ་མ་ཤོར་ཉམས་ལེན་གནད༔ སྤོ་ང་ཕུགས་ནས་མ་ལངས་ཆོས་ཀྱི་བདག༔ ལྷ་འདྲེ་འདྲེ་རུ་མི་གནོད་བསྟན་པའི་དབྱེ༔
སློབ་དཔོན་བདུད་དུ་མ་བབས་ལུང་དུ་བསྟན༔ སྨན་འཐུངས་དུག་ཏུ་མ་སོང་སྒྲུབ་པའི་ཐབས༔ བློ་ཁེལ་ངེས་པ་མང་པོ་རྒྱལ་པོར་གསུངས༔ སྒྲ་བསྒྱུར་ཕུལ་ཕྱིན་བཻ་རོ་ཙ་ན་དང་༔ ཡིག་རིགས་ཉེར་གཅིག་ཤེས་པའི་ལེགས་སྦྱིན་ཉི༔ ཡིག་སྐྱེན་མཐར་ཕྱིན་ལྡན་མ་རྩེ་མང་དང་༔ ནམ་མཁའི་སྙིང་པོ་ཨཱ་ཙར་ཡེ་ཤེས་དབྱངས༔ སྙིང་སྟོབས་དང་ལྡན་རྒྱས་བསྡུས་མང་ཞིག་བསྒྱུར༔ སྨན་རྩིས་ཕོ་མདོས་མོ་མདོས་ཀླུ་ཆོག་དང་༔ བསྲུང་བའི་ཡན་ལག་བརྒྱ་དང་རྩ་བརྒྱད་བསྒྱུར༔ དེ་དུས་རྒྱལ་པོ་ཁྲི་སྲོང་ལྡེའུ་བཙན་གྱིས༔ ཚོགས་འཁོར་བརྒྱ་དང་རྩ་བརྒྱད་བྱས་པའི་དུས༔ རྒྱལ་པོའི་སྲས་མོ་པདྨ་གསལ་ན་སྟེ༔ ནང་དགུང་རྒྱལ་པོ་གདན་འདྲེན་ཕོ་ཉ་བྱུང་༔ རྒྱལ་པོས་བྱོན་པས་སྲིན་ནད་ཕོ་ལང་འདུག༔ བྱིན་བས་ཞུ་དགོངས་རྒོད་མ་དཀར་མོར་བཀལ༔ གུ་རུའི་དྲུང་དུ་བྱིན་བས་ཞུ་རུ་འོངས༔ དེ་དུས་ཡེ་ཤེས་མཚོ་རྒྱལ་སྒོམ་བྱེད་པའི༔ མཁུར་ཚོས་གཡས་པར་ཁུ་འཕངས་འཇའ་འོད་ཕོག༔ ལུས་པོ་འདར་ཡེང་བྱུང་ནས་བསྒོམ་བཤིག་བལྟས༔ རྣ་བར་རྟ་གཉིས་ཁྲོག་ཁྲོག་སོང་བ་ཐོས༔ མཉམ་གཞག་ལྟ་སྟངས་བྱས་ནས་བསྒོམས་པའི་དུས༔ གསེར་སྦྲམ་རྡོག་པོ་མགོ་ལ་ཕོག་ནས་བྱུང་༔ སློབ་དཔོན་དྲུང་གི་མཎྜལ་རྒྱན་དེར་འདུག༔ ང་ལ་ཤོག་གསུངས་ཡིན་འདུག་སྙམ་ནས་ཕྱིན༔ ཕུག་པའི་སྒོ་འགྲམ་གཡས་གཡོན་རྟ་རེ་བཏགས༔ སློབ་དཔོན་དྲུང་ན་ལྷ་ལྕམ་པདྨ་གསལ༔ དགུང་ལོ་བརྒྱད་ལོན་པ་དེ་ཤི་ནས་འདུག༔ དེ་ན་རྒྱལ་པོ་ཉིད་ཀྱང་བརྒྱལ་འདུག་པས༔ བློ་དམན་བུད་མེད་ཡེ་ཤེས་མཚོ་རྒྱལ་གྱིས༔ ནད་གདོན་ཉེན་ནམ་ཡབ་སྲས་ཅི་བྱུང་ཞུས༔ སློབ་དཔོན་ཞལ་ནས་དེ་ཙམ་མི་འོང་བར༔ མངའ་བདག་རྒྱལ་པོ་ཡར་ལ་སློང་དང་གསུངས༔ མཚོ་རྒྱལ་དར་དཀར་སླེ་འུས་དབུ་ནས་བསླངས༔ རྗེ་ལགས་བཞེངས་དང་ཞེས་པས་ཐུགས་གསོས་སོ༔ རྒྱལ་པོ་བརྒྱལ་སངས་ལྷ་ལྕམ་རོ་ལ་གཟིགས༔ མཆི་མས་གདོང་དག་བཤུམ་ཞིང་སྨྲེ་སྔགས་འདོན༔ སློབ་དཔོན་རྒྱལ་པོ་ཉིད་ལ་བཀའ་སྩལ་པ༔ འདུས་བྱས་རྟག་པ་མ་ཡིན་རྐྱེན་གྱིས་འཇིག༔ སྐྱེས་པའི་མཐའ་མཆི་འདུས་པའི་མཐའ་མ་འབྲལ༔ ས་སྟེང་འདུས་བྱས་ཐམས་ཅད་འདི་དང་འདྲ༔ ཉམས་ལེན་རང་ཐོག་དྲན་པ་གསལ་ཐོབ་མཛོད༔ སང་རེད་རྒྱལ་པོ་ཉིད་ཀྱང་གཤེགས་ན་གསུངས༔ དེ་ནས་རྒྱལ་པོས་ཨམ་གཙིགས་བསྡམས་ནས་བཞེངས༔ གསེར་སྐྱོགས་གཡུས་བཀང་སློབ་དཔོན་ཕྱག་ཏུ་ཕུལ༔ ཕྱག་ནི་དབུ་ཐོད་བུད་བུད་བཙལ་ནས་ཞུས༔ ཀྱེ་མ་རིག་འཛིན་སློབ་དཔོན་ཆེན་པོ་ལགས༔ འདུས་བྱས་ཆོས་རྣམས་ཐམས་ཅད་མི་རྟག་ན༔ བསྟན་གཞི་གཙུག་ལག་ཁང་ནི་ཇི་ལྟ་བུ༔ སྡུག་བསྔལ་འབྱུང་ཁུངས་རྒྱལ་ས་སུ་ཡིས་འཛིན༔ ང་ཡི་བུ་མོ་ལྷ་ལྕམ་པདྨ་གསལ༔ ཚེ་སྔོན་བསོད་ནམས་བསགས་ཏེ་ང་དང་འཕྲད༔ ཉིད་སོགས་ལོ་པཎ་མཁས་གྲུབ་རྣམ་དང་མཇལ༔ མ་བསགས་ཚེ་མཐར་མ་ཕྱིན་འགྲོགས་ཡུན་ཐུང་༔ ཚེ་དུས་བྱེད་པའི་རྒྱུ་རྐྱེན་ཅི་ལས་བྱུང་༔ ང་དང་ཕ་སྤད་ལས་འབྲེལ་ཇིལྟར་ལགས༔ ཕྱི་མའི་དུས་ན་སྐྱེ་བ་གང་དུ་ལེན༔ མཐོ་རིས་བྱང་ཆུབ་སྐབས་ནི་མཆིས་མ་མཆིས༔ མ་ཧཱ་གུ་རུ་རཏྣས་གསུང་བར་ཞུ༔ སློབ་དཔོན་དར་ཅིག་ཅི་ཡང་མི་གསུང་བཞུགས༔ དེ་ནས་མངའ་བདག་རྒྱལ་པོ་གསོན་ཅིག་གསུངས༔ རྒྱལ་པོས་བཞེངས་པའི་གཙུག་ལག་ཁང་འདི་ལ༔ ཞིག་རལ་བདག་ཏུ་འཛིན་པ་མང་དུ་འབྱུང་༔ དགག་སྒྲུབ་སྡུག་བསྔལ་མ་མཛད་ཡལ་དུ་ཆུག༔ མངའ་བདག་རྒྱལ་པོ་ཉིད་ཀྱི་རྒྱལ་ས་ཡང་༔ ད་ནས་གདུང་བརྒྱུད་མི་རབས་གཉིས་སོང་ནས༔ བོད་ཁམས་ཡོངས་ཀྱི་བསོད་ནམས་ཟད་པ་དང་༔ སྔོན་གྱི་གནོད་སྦྱིན་སྤུན་གསུམ་ཚེ་འཕོས་ནས༔ རྒྱལ་པོ་སེང་གེའི་མགོ་ཅན་དུད་འགྲོའི་མིང་༔ བློན་པོ་ཐེའུ་རང་སྤྲུལ་པ་སྤྲེའུ་མགོ་ཅན༔ ཞང་བློན་ཁྲ་ཡི་མགོ་ཅན་ཕུང་གསུམ་འབྱུང་༔ གཅེན་བཀྲོངས་གཅུང་སྤྱུག་དམ་པའི་ལྷ་ཆོས་བསྣུབས༔ ཆོས་པ་རབ་གསོད་འབྲིང་སྤྱུག་ཐ་མ་འཁོལ༔ གཙུག་ལག་ཁང་ཀུན་ཤ་ཁྲག་དམར་ལོང་འགེངས༔ ལྷ་ཡི་ཕྱག་ལ་པགས་པ་ནང་ཆ་འགེལ༔ བཟང་པོའི་སྤྱོད་ལམ་ན་བུན་བཞིན་དུ་ཡལ༔ ངན་པའི་སྤྱོད་ལམ་འཚུབ་མ་བཞིན་དུ་ལངས༔ རྒྱལ་ཁྲིམས་མདང་གི་རྨི་ལམ་བཞིན་དུ་སད༔ སྤྱི་གཅེས་དཀོན་ཅོག་མི་རོ་བཞིན་དུ་བོར༔ སྒོས་གཅེས་ཕ་མ་གྲི་མདུང་རྩེ་ལ་བསྐྱོན༔ སྤྱོད་ངན་རང་གིས་བྱས་ནས་དུས་ངན་ཟེར༔ རྗེ་ཡིས་བཞེངས་པའི་ཆོས་འཁོར་ཐམས་ཅད་འཇིག༔ མ་ཉེས་པ་ལ་སྐྱོན་འབེབས་མི་དགེ་སྤྱོད༔ མི་མགོ་བྲན་བྱེད་ཇག་ཆོམ་རྐུན་མ་དར༔ རི་ཀླུང་མེད་པའི་སེམས་ཅན་མི་སྐྱིད་སྡུག༔ སྐྱིད་མེད་གཤེད་མ་སྲོག་གི་སག་བདར་འབྱུང་༔ བདུད་ཀྱི་རྒྱལ་པོས་རྒྱལ་སྲིད་ལོ་ཟླ་གཅིག༔ བྱང་ཆུབ་སེམས་དཔས་ཐུགས་བསྐྱེད་གྲི་རུ་བཀུམས༔ གདུང་བརྒྱད་འོད་སྲུངས་ཡུམ་བརྟན་གྲགས་པ་འབྱུང་༔ གཅེན་ལ་མི་འཆམ་དབུ་རུ་གཡུ་རུ་འཁྲུག༔ ཉིན་འཁྲུག་མཚན་འཁྲུག་ལོ་ནི་བཅུ་གཉིས་འཁྲུག༔ མི་ལ་བསད་ཤི་གཉིས་ལས་མེད་པ་འབྱུང་༔ ཅེན་དགུ་ཡུམ་བརྟན་ཁྱེར་ཏེ་འབངས་རྣམས་འཁོལ༔ རྒྱལ་པོའི་གདུང་རབས་དགུ་བཅུ་གོ་བརྒྱད་ན༔ བསོད་ནམས་ཟད་པའི་རྒྱལ་པོ་ཞིག་ཀྱང་འབྱུང་༔ འབངས་རྣམས་ཁེངས་ལོག་རྗེ་ཡི་ལ་ཡོགས་འབྱུང་༔ སྟེང་ན་རྗེ་མེད་འོག་ན་འབངས་མེད་པ༔ མཐའ་ཤོར་དཀྱིལ་རྡོལ་འགྲིམ་འགྲུལ་སྐྱེལ་མ་དགོས༔ ལོ་ནི་བརྒྱའམ་བདུན་ཅུ་རྩ་ལྷག་འབྱུང་༔ ཁ་བ་ཅན་གྱི་བོད་ཡུལ་རྒྱལ་ཁམས་འདིར༔ གདུང་རབས་དྲུག་ཏུ་དམ་ཆོས་སྒྲ་མི་གྲག༔ ད་ལྟ་བསྒྱུར་བའི་མདོ་སྔགས་ཆོས་སོ་ཅོག༔ བརྒྱ་ཚར་སྟོང་ཚར་མང་པོ་བཞེངས་བྱས་ནས༔ ལ་ལ་གཏེར་སྦས་ལ་ལ་མཐའ་ལ་སྤྱུགས༔ དེ་ལྟར་མཛད་ན་ཕྱི་རབས་ཕན་ཆེར་ཐོགས༔ ལན་ཅིག་དམ་ཆོས་འདུལ་བའི་བསྟན་པ་ནི༔ མེ་རོ་ཙམ་ཞིག་མདོ་ཁམས་སྨད་ནས་འབྱུང་༔ འབྲས་བུ་གསང་སྔགས་ཆོས་ཀྱི་བསྟན་པ་ནི༔ གཞུ་རྒྱུད་ཙམ་ཞིག་སྟོད་ཀྱི་ཕྱོགས་ནས་འབྱུང་༔ དེ་ནས་མདོ་སྔགས་གཉིས་ཀྱི་བསྟན་པ་ནི༔ མ་ནུབ་ཙམ་ཞིག་མཐའ་ནས་དབུས་སུ་འབྱུང་༔ རྗེ་ཡི་གདུང་བརྒྱུད་མི་རབས་བརྒྱ་སོང་ནས༔ མངའ་རིས་སྐོར་གསུམ་མང་ཡུལ་སྤུ་རངས་སུ༔ གདུང་བརྒྱུད་རྒྱལ་པོ་མགོན་གསུམ་ཞེས་བྱ་འབྱུང་༔ དེ་འདས་ཕན་ཆད་རྒྱལ་ཁམས་མི་བདེ་སྟེ༔ རྩི་ཤིང་ནགས་བསྐམས་མི་ཡི་ཟ་ཐང་བྲི༔ བཅུད་རྣམས་སས་འཐུངས་སྨན་རྣམས་ནུས་པ་ཡལ༔ འབྲས་བུ་མི་སྨིན་ཆར་ཆུ་དུས་མི་འབབ༔ སྐྱེ་ཁུངས་ཞན་ཅིང་ཕྱུགས་རྣམས་ཞོ་ཤེ་ཆུང་༔ ནད་མང་ཚེ་ཐུང་མུ་གེ་སྐབས་སུ་འབྱུང་༔ དེ་ནས་མི་རབས་བདུན་བརྒྱད་ཚུན་ཆད་དུ༔ མེས་དབོན་རྣམ་གསུམ་བཞེངས་པའི་གཙུག་ལག་ཁང་༔ མཐའ་ཉམས་དབུས་ཀྱི་ལྟེ་བ་ལུས་པ་ལ༔ མངའ་ཐང་ཉམས་པས་ལྷ་ཁང་ཕུག་རོན་འཛིན༔ ལྷ་ཁང་ནང་དུ་བྱ་བྲུན་མང་པོ་འབྱུང་༔ ལྷ་ལ་ཕུག་རོན་ཚང་འཆའ་བྱ་སྐྱག་འབྱུག༔ སྐབས་ཤིག་གཙུག་ལག་ཁང་སྒོ་བརྩིགས་པ་འབྱུང་༔ སྐབས་འགར་སྤྲང་པོའི་ཚང་བཅས་འཛིན་པ་དང་༔ ལྷ་ཡི་ཕྱག་ལ་སྤྲང་པོའི་ཟོ་བ་འདོགས༔ ཆོས་ལ་སྤྲང་སྤྲུག་ཤོག་འབག་བྱེད་པ་འབྱུང་༔ གཙུག་ལག་ཁང་ལ་ཞབས་ཏོག་མེད་པ་ཡིས༔ དཀར་པོའི་ཕྱོགས་ཕམ་ནག་པོ་རྒྱལ་གྱུར་པས༔ ཧོར་ཡུལ་ཤིན་ཁུན་ཏའི་ཏུར་གྲགས་པ་འབྱུང་༔ གནམ་ཐེའུ་དཀར་པོའི་སྤྲུལ་པའི་རྒྱལ་པོ་ཞིག༔ ལྕགས་པོ་ཁྱི་ལ་འགོང་པོའི་སྤྲུལ་པ་འགྱེད༔ བོད་ཡུལ་མི་བདེ་མཚོན་གྱི་ཆར་པ་འབབ༔ བོད་རྣམས་ཀྱེ་མ་ཀྱི་ཧུད་སྙིང་རེ་རྗེ༔ བཅུ་ལོན་ཡན་ཆད་མགོ་མེད་ཇ་སིག་འདྲ༔ རྨོས་བརྐོ་ཐོང་མཁན་མི་རྙེད་མོ་གླིང་འདྲ༔ ཤ་མཁར་བརྩིག་ཅིང་ཁྲག་གི་རྫིང་བུ་བསྐྱིལ༔ ན་ཆུང་སྤྱོད་ཅིང་བུད་མེད་བྲན་དུ་བཀོལ༔ མཐའ་མི་དབུས་རྡིབ་བོད་ཁམས་སིལ་བུར་འགྲོ༔ དབུས་གཙང་ཁམས་གསུམ་ཐམས་ཅད་ཧོར་ཚང་འཆའ༔ གསེར་ཡིག་དངུལ་ཡིག་ཁ་བྱང་བཏབ་ནས་འགྲོ༔ དེར་ནི་རྒྱལ་པོ་ཐུགས་མུག་མང་དུ་བཤུམས༔ སློབ་དཔོན་སེམས་ཅན་ལས་ཡིན་མ་བཤུམས་གསུངས༔ མངའ་བདག་རྒྱལ་པོས་ཕྱག་བཙལ་ཞུས་པ་ནི༔ ཧོར་ཁྲིམས་ཙམ་གནས་ཇི་ཙམ་ན་འཇིག་ཞུས༔ སློབ་དཔོན་པདྨའི་ཞལ་ནས་རྒྱལ་པོ་ལགས༔ ཧོར་ཁྲིམས་བརྒྱ་དང་ཉི་ཤུ་རྩ་ལྷག་གནས༔ ཇིང་གིར་རྒྱལ་པོའི་ཁྲིམས་ཞེས་ཡུན་རིང་འབྱུང་༔ ཇིང་ནང་གྲུམ་ནས་རྒྱ་ནག་ཡུལ་ནས་འཇིག༔ སྨན་གྱི་ཡུལ་ནས་འཇམ་དཔལ་སྤྲུལ་པ་འབྱུང་༔ ས་ནང་གྲུམ་ནས་ཕག་གིས་ས་སློག་འཇིག༔ ཡར་ཀླུངས་ནང་ནས་ཕྱག་རྡོར་སྤྲུལ་པ་འབྱུང་༔ ལྕགས་ཕོ་ཁྱི་ལ་ཧོར་དམག་བོད་དུ་འོང་༔ མདོ་སྟོད་མདོ་སྨད་སོག་ཆུ་རི་བྲག་སོགས༔ ཞིབ་པར་མི་བཀོད་སྐྱོ་བ་སྐྱེ་བའི་རྒྱུ༔ ཡུལ་གྲུ་བཅུ་དྲུག་བཅོམ་ནས་ཅུང་ཟད་བདེ༔ ཏའི་ཤིའི་ཕོ་བྲང་འབྱུང་བཞིའི་འཇིགས་པས་འཇོམས༔ མི་ལ་ཚེ་མེད་སོས་ཀའི་སྦྲང་མ་འདྲ༔ ནོར་ལ་བདག་མེད་ཚོང་དུས་མགྲོན་ཁང་འདྲ༔ ད་ལྟ་བཞིན་དུ་ཧོར་རྣམས་བོད་འོག་འཁོལ༔ མི་རབས་བཅོ་བརྒྱད་བར་དུ་བརྟན་པར་འགྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ འདུས་བྱས་མི་རྟག་པར་བསྟན་པའི་ལེའུ་སྟེ་གྱ་དགུ་པའོ༔ ༔
པདྨ་བཀའ་ཐང་ལེའུ་ ༩༠ ལྷ་ལྕམ་པདྨ་གསལ་ལུང་བསྟན་པ།
དེ་ནས་སློབ་དཔོན་པདྨ་འབྱུང་གནས་ཀྱིས༔ རྒྱལ་པོ་ཁྲི་སྲོང་ཉིད་ལ་བཀའ་སྩལ་པ༔ ཁྱོད་ཀྱི་ལྷ་ལྕམ་ཚེ་དུས་བྱེད་པ་ནི༔ སྐྱེ་བ་འདི་གོང་རྒྱ་གར་ཡུལ་གྱི་ཤར༔ ཀ་མ་ཤྲི་ཏ་ཞེས་བྱའི་གྲོང་ཁྱེར་དུ༔ རྒྱལ་པོ་བྷི་ལ་ཀུ་ཏྲའི་བཙུན་མོར་སྐྱེས༔ ཆུན་མར་བུ་ཡོད་ཆེན་མར་བུ་མེད་ནས༔ ཆུན་མའི་བུ་ལ་ཕྲག་དོག་བྱས་ཏེ་བསད༔ དེ་ཡི་རྣམ་སྨིན་ཚེ་མཐར་མ་ཕྱིན་ཡིན༔ སྐྱེ་བ་འདི་ལ་ཡབ་སྲས་འབྲེལ་པ་ནི༔ སྐྱེ་བ་འདི་ཡི་ཡང་སྔ་བལ་པོའི་ཡུལ༔ པདྨ་བདག་དང་མངའ་བདག་རྒྱལ་པོ་དང་༔ བོ་དྷི་ས་ཏྭ་འོ་སྐོལ་མཆེད་གསུམ་གྱིས༔ མ་གུ་ཏ་ཡི་མཆོད་རྟེན་བྱ་རུང་ཁར༔ བུམ་པ་བཏགས་ནས་སྨོན་ལམ་སོ་སོར་བཏབ༔ དེ་དུས་ལྷ་ལྕམ་སྦྲང་བུ་ཏྲེ་མའི་ལུས༔ རྒྱལ་པོ་ཉིད་ཀྱི་རྩེའུ་ཆུང་ལ་ཟོས༔ དྲན་མེད་ཕྱག་གིས་བཤད་པས་སྦྲང་བུ་ཤི༔ རྒྱལ་པོ་ཉིད་འགྱོད་སྙིང་རྗེ་རབ་ཏུ་སྐྱེས༔ དེ་ལ་དམིགས་པའི་སྨོན་ལམ་དྲག་པོ་བཏབ༔ དེ་ཡི་ཕྱི་མར་ལོ་སྟོང་དུཿཁ་སྤྱད༔ དེ་ཚོ་བཤད་ན་རྒྱལ་པོ་ཐུགས་ཁྲལ་འགྱུར༔ རྒྱལ་པོས་ཅིས་ཀྱང་གསུང་བར་ཞུ་གསོལ་བས༔ རྒྱལ་པོར་དགྱེས་ནས་ལྷ་ལྕམ་པདྨ་འདི༔ སྐྱེ་བ་བདུན་གྱི་གོང་དུ་རྒྱ་གར་ཡུལ༔ ཀོ་ཏ་ལ་ཡི་གཙུག་ལག་ཁང་ཞེས་པར༔ བྲམ་ཟེའི་ཕྲུ་གུ་བྱ་ཏ་ལ་ཞེས་སྐྱེས༔ དགེ་སློང་བྱས་ནས་འཚོ་བ་ཀློག་འདོན་འཚོ༔ ཀོ་ཏ་ལ་ཡི་རྒྱལ་པོའི་བརྒྱ་ཚར་བཏོན༔ ཉི་མ་དུ་ཤར་ཕྱི་དྲོ་རྒྱལ་པོ་དང་༔ གཙུག་ལག་ཁང་གི་ཕྱི་རོལ་སྐུ་བསངས་འགྲོ༔ མེ་ཏོག་ལྡུམ་རར་ཀུཀྐུ་འཁྲིག་པ་མཐོང་༔ དགེ་སློང་ཆགས་པ་སྐྱེས་ནས་ཕོ་བྲང་ལོག༔ རྒྱལ་པོའི་བཙུན་མོར་སྤྱད་པས་ཚུལ་ཁྲིམས་ཉམས༔ ཆོས་ཀྱི་ཞལ་ཕྱེ་འདོན་གྱི་ཡོད་པའི་དུས༔ རྒྱལ་པོའི་སྤྱན་གཉིས་བླ་མཆོད་དག་ལ་གཟིགས༔ དུས་ངན་དགེ་སློང་སྤྱོད་པ་འདི་འདྲ་གསུངས༔ དགེ་སློང་ཀུཀྐུ་ར་ལ་ཞེ་སྡང་སྐྱེས༔ འབྲས་བགྲུའི་ཐོ་བས་ཀུཀྐུའི་རྡོ་རྗེ་བརྡུངས༔ ཀུཀྐུ་ཤི་བས་དགེ་སློང་མི་ཡིས་འཕྱས༔ ཁམས་འདུས་ཕོ་བྲང་རྩེ་ནས་ཕྱི་ལ་ལྕེབས༔ བྱོལ་སོང་མོ་ལུས་སྐྱེ་བ་ལྔ་བརྒྱ་བླངས༔ དུཿཁ་དཔག་ཏུ་མེད་པ་མྱོང་བར་གྱུར༔ གཙུག་ལག་ཁང་དེའི་མར་ཁུ་བརྐུས་བཙོངས་པས༔ ཡི་དྭགས་སྐྱེ་བ་ལྔ་བརྒྱ་དུཿཁ་མྱོང་༔ སྲོག་བཅད་དམྱལ་བའི་སྐྱེ་བ་ལྔ་བརྒྱ་བླངས༔ ཆོས་འཆད་པ་ལ་ཚིག་རྩུབ་སྨྲས་པ་ཡིས༔ ལྷ་མ་ཡིན་གྱི་སྐྱེ་བ་བརྒྱ་བླངས་གྱུར༔ གཙུག་ལག་ཁང་ལ་མེ་ཏོག་བསྐོར་བ་བྱས༔ ལྷ་ཡི་སྐྱེ་བ་བརྒྱ་བླངས་དུཿཁ་སྤྱད༔ གྲུབ་ཐོབ་གཏེར་སྟོན་རྣལ་འབྱོར་པ་ཞིག་ལ༔ བཀའ་རྒྱ་དབང་མེད་ནན་ཞུས་ཆོས་ཕྲོགས་པས༔ སྤྲིན་ཀྲ་མེ་འཁོར་སྐྱེ་བ་བརྒྱ་བླངས་ནས༔ དེ་ནས་པདྨ་གསལ་དུ་སྐྱེས་པ་ཡིན༔ སྐྱེ་བ་འདི་ཡི་ཕྱི་མར་ཡར་ཀླུངས་སུ༔ བུ་མོ་གཟུགས་མི་སྡུག་ཅིང་བསོད་ནམས་ཆུང་༔ སྤྲང་མོའི་རིགས་ཀྱི་སྐྱེ་བ་བཅུ་ལེན་གསུངས༔ དེ་ནས་འཕོས་ཏེ་བསམ་ཡས་མཐིལ་འདི་རུ༔ ཁྱི་མོ་དཀར་མོ་ལོང་མ་སྨད་འབུ་ཞུགས༔ ནུབ་ཀྱི་རེས་ལ་ཀེང་ཀེང་འདྲེ་ཟ་བྱེད༔ སྨད་ཁོག་འདྲད་པ་ཞིག་གི་སྐྱེ་བ་ལེན༔ དེ་ནས་འཕོས་ནས་ལྷ་སའི་ཚོང་དུས་སུ༔ ལུག་མ་སྨད་ཁོག་འདྲད་ཅིང་སྦྲང་བར་སྐྱེ༔
དེ་ནས་འཕོས་ནས་བསྒྲགས་ཀྱི་གྲོང་གསར་དུ༔ བུད་མེད་དབང་པོ་མ་ཚང་ལི་མགོ་མ༔ སྣ་ཉག་ཁ་ཆེ་ཤ་རྩུབ་མཆུ་ཤོར་བ༔ ཤིག་སྲོ་མང་ཞིང་གསེབ་དྲི་མནམ་པར་སྐྱེ༔ ལྷ་ས་བསམ་ཡས་གཉིས་བསྐོར་འབྲེལ་ཙམ་ཐོགས༔ དེ་ནས་འཕོས་ཏེ་ལྷོ་ནུབ་ལ་ཡག་ཏུ༔ བུ་མོ་སྤྲེའུ་ལོ་པ་ཤེས་རབ་ཅན༔ སྐྱེས་མ་ཐག་ཏུ་ཕ་མ་གཉིས་ཀ་འཆི༔ ང་ཡི་སྤྲུལ་པ་ཉང་རལ་ཞེས་དང་འཕྲད༔ དེ་ལ་མོས་གུས་བྱས་ཏེ་ལམ་སྣ་ཟིན༔ དེ་ནས་གཙང་གི་གཡས་རུ་གྲོང་དམར་དུ༔ བན་སྒོམ་ཕོ་མོ་གཉིས་ཀྱི་བུ་རུ་སྐྱེ༔ དེ་ཡང་བཞིན་མི་སྡུག་ཅིང་གཤིས་ངན་ཁྲོ༔ རབ་ཏུ་བྱུང་བའི་ཆ་ལུགས་ལོག་ལྟ་ཅན༔ ང་ཡི་སྤྲུལ་པ་ཆོས་དབང་ཞེས་དང་འཕྲད༔ གདམས་པ་བྱིན་པས་རིག་པའི་ངོ་བོ་མཐོང་༔ ཌཱ་ཀི་མ་ཡིས་རྗེས་སུ་འཛིན་པར་འགྱུར༔ སྐྱེ་བ་དེ་འཕོས་འདི་ནས་ཤར་ལྷོ་མཚམས༔ རྡོ་བོད་མཚམས་ཀྱི་འབྲིན་ཐང་ཞེས་བྱ་བར༔ སྔགས་བཙུན་ཕོ་མོ་གཉིས་ཀྱི་བུ་རུ་སྐྱེ༔ ལྕགས་མོ་ཡོས་ཀྱི་ལོ་པ་མི་གཅིག་པུ༔ སྒོ་བཟང་སྐྱེ་མཆེད་དངས་པ་ཤེས་རབ་ཅན༔ ཕ་མེད་མ་མེད་ཤིན་ཏུ་དབུལ་ཉོན་མོངས༔ གང་ན་ཉེ་བ་ཐམས་ཅད་དགྲ་བྱེད་པ༔ སྐྱེ་བ་སྔ་མའི་བག་ཆགས་རབ་ཏུ་བྱུང་༔ ཆུ་མོ་གླང་ལོར་ང་ཡི་ཟབ་གཏེར་འཕྲད༔ གཏེར་སྒོ་གསུམ་བཞི་འབྱེད་དེ་དོན་མི་འབྱུང་༔ སྦས་པའི་ཚུལ་དུ་ཉམས་ལེན་དུས་ཡིན་པས༔ ཨུ་རྒྱན་ང་ཡི་ཟབ་གཏེར་བདག་པོར་འགྱུར༔ དེ་ནས་ཚེ་འཕོས་མོན་ཡུལ་བུམ་ཐང་དུ༔ དགེ་གནས་རྩི་ལུང་ཐོ་སྐོར་སྐྱེ་བར་འགྱུར༔ སྤྲེའུའི་ལོ་པ་ཤེས་རབ་བློ་གསལ་ཅན༔ ང་སྤྲུལ་རིན་ཅེན་གླིང་འཕྲད་རྗེས་སུ་འཛིན༔ ཚེ་སྒྲུབ་རྡོ་རྗེ་རྒྱ་མདུད་ཉམས་བླངས་པས༔ ཚེ་ཡང་མཐར་ཕྱིན་སྐུ་ཚེའི་སྨད་ཉིད་ལ༔ བུམ་ཐང་སྨད་ནས་གཏེར་གྱི་སྒོ་ཡང་འབྱེད༔ དེ་དུས་དྲི་མེད་འོད་ཟེར་ཞེས་བྱར་གྲགས༔ གཏེར་སྒོ་ལྔ་འབྱེད་འགྲོ་དོན་དཔག་མེད་མཛད༔ དེ་ཕྱིར་མཚོ་རྒྱལ་དཀར་ཆག་ཡི་གེར་ཐོབ༔ ཞིབ་པར་ལོགས་སུ་ཐོབ་ལས་སྦོས་ཤིག་གསུངས༔ མངའ་བདག་དགྱེས་ནས་ཕྱག་བསྐོར་གྲངས་མེད་མཛད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལྷ་ལྕམ་པདྨ་གསལ་ལུང་བསྟན་པའི་ལེའུ་སྟེ་དགུ་བཅུ་པའོ༔ ༔
པདྨ་བཀའ་ཐང་ལེའུ་ ༩༡ བོད་དུ་གཏེར་སྦས་པ།
དེ་ནས་སློབ་དཔོན་མངའ་བདག་བཀའ་བགྲོས་ནས༔ ཡ་ཐོག་རིང་མོ་མ་ཐོག་ཐུང་ངུ་གཉིས༔ ཁུག་པ་བཅོ་བརྒྱད་སྐྱོ་ཤས་ཅན་ལ་གཟིགས༔ ཕུན་སུམ་ཚོགས་པ་ལྔ་ལྔ་འཛོམས་པའི་གཏེར༔ གཏེར་གྱི་རྩ་བ་མ་འཆུགས་གཞི་ཆེ་སྟེ༔ མེས་གཏེར་སྲས་གཏེར་དབོན་གཏེར་ཡང་གཏེར་བཞི༔ བཞི་པོ་རེ་རེར་བཅོ་བརྒྱད་བཅོ་བརྒྱད་བསྡུས༔ བཅོ་བརྒྱད་རེ་རེར་ཕུན་ཚོགས་ལྔ་ལྔ་བསྟན༔ དེ་ཡང་གཏེར་རྒྱ༔ སྦས་རྒྱ༔ གསང་རྒྱ༔ དང་༔ གཏེར་གནས་ཟབ་རྒྱ༔ གཏེར་རྒྱ༔ རྣམ་པ་ལྔ༔ གཏེར་རྒྱ༔ གཏེར་སྟོན་ཕུན་སུམ་ཚོགས་པ་ནི༔ ཆེ་བའི་ཡོན་ཏན་དགུ་དང་ལྡན་པ་སྟེ༔ རིགས་ཀྱི་ཆེ་བ་རྒྱལ་རིགས་རྗེའུར་འཁྲུངས༔ སྐུ་ཡི་ཆེ་བ་མཚན་བཟང་དཔེ་བྱད་ལྡན༔ ཡོན་ཏན་ཆེ་བ་ཤེས་བྱ་ཀུན་ལ་སྦྱངས༔ ཐོས་པ་ཆེ་བ་མདོ་སྔགས་ཐམས་ཅད་མཁྱེན༔ བསམ་གཞིག་ཆེ་བ་ཚིག་རྗེས་དོན་གྱིས་གསོབ༔ བསྒོམས་པས་ཆེ་བས་རྟོགས་པའི་ལྟ་བ་མཐོ༔
སྤོབས་པ་ཆེ་བ་གཞན་དག་ཟིལ་གྱིས་གནོན༔ རྩོད་བློ་ཆེ་བ་རྒོལ་བའི་ཚིག་རྣམས་འཛོམས༔ འཛིན་བློ་ཆེ་བ་ཆོས་དང་ཆོས་མིན་ཕྱེད༔ བསྲན་ཐུབ་རྒྱུད་དུལ་ཆེ་བ་ཕུན་སུམ་ཚོགས༔ སྦས་རྒྱ༔ དམ་ཆོས་ཕུན་སུམ་ཚོགས་པ་ནི༔ རྒྱལ་བའི་བཀས་གནང་འཕགས་པའི་ལུང་གིས་གྲུབ༔ རིགས་པས་འཐད་ཅིང་གཏན་ཚིགས་རྒྱ་ཡིས་ཐེབས༔ མདོ་ཡིན་དགོངས་པ་ཉི་ཤུ་རྗེས་དྲན་བཅུ༔ སྤྱི་མདོ་ཡིན་ནམ་སྒོས་མདོ་ཁྱད་པར་མདོ༔ རྒྱུད་ཡིན་དངོས་པོ་བཅུ་འམ་ལྔ་བཅུ་སྟེ༔ ལུང་ཡིན་མཐའ་བཞི་མན་ངག་དཔེ་དོན་རྟོགས༔ གསང་རྒྱ༔ གཏེར་སློབ་དག་པའི་ཡོན་ཏན་བཅུ༔ རིགས་དག་འབྱོར་པ་ལང་ཚོ་བྲི་ཀློག་མཁས༔ རྒྱུད་དག་དད་པ་ཤེས་རབ་སྙིང་རྗེ་ཆེ༔ ལས་དག་ཆོས་ཕྱིར་བརྩོན་འགྲུས་དཀའ་བ་སྤྱོད༔ འདྲིས་དག་སྒོ་གསུམ་རྐྱེན་ཁྱག་དམ་ཚིག་གནས༔ རྟེན་དག་གཞན་དང་མ་འཁོན་སེལ་མ་ཞུགས༔ གཏོང་དག་སྣ་ཚོགས་ཐབས་ཀྱིས་བདག་གཞན་བསྐུལ༔ སེམས་བསྐྱེད་དག་པས་ལུས་སྲོག་དོན་མི་གཉེར༔ དངོས་པོ་དག་པས་སྨར་བཞུན་སེར་སྣ་མེད༔ དབང་པོ་དག་པས་གཞན་གྱི་སེམས་མི་དཀྲུག༔ འདུན་པ་དག་པས་ཟོལ་འགྲོགས་ངོ་ཞལ་མེད༔ བཅུ་པོ་མ་ཚང་ཁ་ནི་ཐུར་ལ་སྦུབ༔ སྟོབས་དང་ལྡན་ཡང་དུག་གི་མེ་ཏོག་ཡིན༔ ཟབ་རྒྱ༔ གཏེར་གནས་ཕུན་སུམ་ཚོགས་པ་ནི༔ གནས་ཀྱི་ཟབ་ཁྱད་ཐུན་མོང་ཁྱད་པར་ལྔ༔ ཐུན་མོང་ལྔ་ལ་ས་ལ་ཟབ་པ་དང་༔ དེ་བཞིན་ཆུ་ལ་ཟབ་པ་བྲག་ལ་ཟབ༔ གཙུག་ལག་ཁང་ཟབ་ཤིང་ལ་ཟབ་པའོ༔ ཁྱད་པར་ལྔ་ལ་དབུས་གནས་ཟབ་པ་དང་༔ དེ་བཞིན་ཤར་གནས་ཟབ་དང་ལྷོ་གནས་ཟབ༔ ནུབ་གནས་ཟབ་དང་བྱང་གནས་ཟབ་པའོ༔ གཏད་རྒྱ༔ འདོན་དུས་ཕུན་སུམ་ཚོགས་པ་ནི༔ ས་རྟགས་གཡོ་འགུལ་སྐྱོ་ཤས་མར་འགྲིབ་གསུམ༔ ཞེ་སྡང་ལས་གྱུར་དམག་འཁྲུག་འབྱུང་བ་དང་༔ འདོད་ཆགས་ལས་གྱུར་མུ་གེ་འབྱུང་བ་དང་༔ གཏི་མུག་ལས་གྱུར་ནད་ཡམས་འབྱུང་བ་དང་༔ མི་རྣམས་སྐྱོ་ཤས་ཆེ་བས་གདུལ་བའི་ཞིང་༔ མི་འདོད་བཞིན་དུ་ཁབ་ལེན་རྡོ་ཉུལ་བཞིན༔ གཏད་རྒྱ༔ འབྱིན་པའི་གཏེར་སྟོན་གཅིག་འབྱུང་ཞིང་༔ ཆོས་དང་ངན་སྔགས་རྩིས་སྨན་ལ་སོགས་རྣམས༔ དབུས་གཏེར་ལྷོ་གཏེར་བྱང་གཏེར་ཤར་ནུབ་གཏེར༔ གཏེར་ཀ་བརྒྱ་དང་རྩ་བརྒྱད་བོད་དུ་སྦས༔ རྒྱལ་པོའི་བླ་གཏེར་དབུ་རྩེ་རིགས་གསུམ་དུ༔ རྗེ་ཡི་བླ་གཏེར་གཏེར་མཛོད་རེ་རེ་སྦས༔ ཁམས་གསུམ་ཟངས་ཁང་དབུ་ཚལ་གསེར་ཁང་གླིང་༔ དགེ་རྒྱས་བྱེ་མ་ཇོ་མོ་གླིང་གསུམ་དུ༔ རྒྱལ་པོའི་བླ་གཏེར་གཏེར་ཀ་རེ་རེ་སྦས༔ ཡཀྴ་ལྟག་འོག་གླིང་བཞི་གླིང་ཕྲན་བརྒྱད༔ ཁྲུས་ཁང་གླིང་དང་ཚང་མང་ཀེང་རུའི་གླིང་༔ མཐུ་རྩལ་གླིང་དང་སྒོ་བཞིའི་མགོན་ཁང་བཞིར༔ སློབ་དཔོན་པདྨའི་ཐུགས་གཏེར་རེ་རེ་སྦས༔ མཆོད་རྟེན་དཀར་པོར་དམ་པའི་ཆོས་གཏེར་སྦས༔ མཆོད་རྟེན་དམར་པོར་རྩིས་སྨན་མདོས་ཆོག་སྦས༔ མཆོད་རྟེན་ནག་པོར་མཐུ་དང་ངན་སྔགས་སྦས༔ མཆོད་རྟེན་སྔོན་པོར་བཟོ་གཏེར་རིགས་གནས་སྦས༔ ལར་གྱི་གཙུག་ལག་ཁང་གི་སྐོར་འདི་ལ༔ ཛམ་གླིང་སྤྱི་ལ་དགོས་པའི་གཏེར་ཀ་ལྔ༔ བོད་ཁམས་སྤྱི་ལ་དགོས་པའི་གཏེར་ཀ་ལྔ༔ འདོན་དུ་མི་བཏུབ་བཅུད་ལ་དགོངས་པ་ལྔ༔ བཏོན་ནས་གཏེར་ཚབ་འཇུག་དགོས་གཏེར་ཀ་ལྔ༔ མ་བཏོན་དངོས་གྲུབ་ཡལ་བའི་གཏེར་ཀ་ལྔ༔ མིང་ཅན་ཉེར་ལྔ་མིང་མེད་མང་དུ་སྦས༔ མཆིམས་ཕུའི་ཡང་དབེན་སློབ་དཔོན་ཐུགས་གཏེར་སྦས༔ གཡའ་མ་ལུང་དུ་ཚེ་སྒྲུབ་ཚེ་ཆུ་སྦས༔ རྡོ་ཡི་མཆོད་རྟེན་གསང་གཏེར་རེ་རེ་སྦས༔ པདྨ་ཅན་ལ་སྐོར་བཅུ་ཚེ་ཆུ་སྦས༔ རྣམ་སྣང་རྒྱབ་ཏུ་བཀའ་གཏད་རབ་འབྱམས་སྦས༔ ལྷོ་ཡི་སྐྱེར་ཆུ་ལྷ་ཁང་ཟབ་གཏེར་སྦས༔ བུམ་ཐང་རྩི་ལུང་རྗེ་གཏེར་སེམས་ཕྱོགས་སྦས༔ བུམ་ཐང་དགེ་གནས་ཡུམ་གཏེར་མ་མོ་སྦས༔ གློ་བོ་དགེ་དཀར་དགོངས་གཏེར་བསྟན་བཅོས་དང་༔ བཀའ་འགྱུར་བསྟན་འགྱུར་རྒྱུད་འབུམ་མགུར་འབུམ་དང་༔ ལུང་འབུམ་སྒྲུབ་འབུམ་གཟུངས་འབུམ་སྔགས་འབུམ་སྦས༔ གཙང་འཕྲད་ལྷ་ཁང་ཡབ་གཏེར་གཤིན་རྗེ་སྦས༔ གཡས་རུ་གཙང་འགྲམ་རྫས་གཏེར་སྣ་ཚོགས་སྦས༔ རྩིས་ཀྱི་ལྷ་ཁང་ཕྱི་གཏེར་མདོ་སྔགས་སྦས༔ བྱང་གི་པྲ་དུན་རྩེ་ཡི་ལྷ་ཁང་དུ༔ ནང་གཏེར་ངན་སྔགས་བརྒྱ་དང་རྩ་བརྒྱད་སྦས༔ ཁམས་ཀྱི་ཀློང་ཐང་སྒྲོལ་མའི་གཙུག་ལག་ཏུ༔ བར་གཏེར་མི་འདྲ་རྒྱུད་ལུང་བཅུ་གསུམ་སྦས༔ ཤར་ཀོང་བུ་ཆུ་མཐར་ལེགས་ལྷ་ཁང་དུ༔ རྒྱ་གཏེར་རྫུ་འཕྲུལ་སྒྱུ་མ་སྣ་ཚོགས་སྦས༔ རྒྱ་ལ་རྩེ་རྡུམ་གཤིན་རྗེ་དོང་ཁ་དང་༔ སེ་མོ་ཕུ་ལུང་བྲག་གསུམ་ཉོས་བྷ་ག༔ མདོར་ན་ལྷོ་ཀོང་བྱང་ཀོང་ཤར་ནུབ་ཀོང་༔ ཀོང་པོའི་ཡུལ་འདི་པད་འབྱུང་འདུལ་ཞིང་སྟེ༔ གཏེར་ཀ་ཆེན་པོ་བརྒྱ་དང་རྩ་བརྒྱད་སྦས༔ གཏེར་ཕྲན་སྟོང་ཕྲག་བདུན་ཅུ་རྩ་གཉིས་སྦས༔ སྦས་པའི་རྩྭ་ཆུ་ཡུལ་དགུ་དབེན་གནས་བརྒྱད༔ དེ་དག་རེ་རེ་བོད་གཏེར་བརྒྱ་རྩ་བརྒྱད༔ གཏེར་ཕྲན་བྱེ་བ་དགུ་ཁྲི་གཏེར་དུ་སྦས༔ གཡུ་རུ་ཁྲ་འབྲུག་རྫས་གཏེར་སྦུབས་གཅིག་སྦས༔ ཤེལ་གྱི་བྲག་ཕུག་གསང་གཏེར་བཀའ་འདུས་སྦས༔ ལྷོ་བྲག་ཁོ་མཐིང་བདེ་གཤེགས་འདུས་པ་སྦས༔ མཁར་ཆུ་གནམ་སྐས་ཅན་ལ་ཡོངས་རྫོགས་སྦས༔ གཏམ་ཤུལ་སྲིན་མོ་སྦར་རྗེས་གསང་གཏེར་སྦས༔ སྟག་ཚང་སེང་ཕུག་ཐུགས་གཏེར་སྐོར་དགུ་སྦས༔ མོན་ཁ་སྣ་རིངས་སེང་གེ་རྫོང་གསུམ་ལ༔ མ་ནིང་གཏེར་ཀ་འཕྲ་གཏེར་བཅོ་ལྔ་སྦས༔ སྤ་གྲོ་གནམ་ཐང་དཀར་པོ་ནས་འབྲི་མཚམས༔ མངའ་བདག་རྒྱལ་པོའི་ནོར་གཏེར་མང་དུ་སྦས༔ ཕོ་མ་རྫོང་ཕུག་གསང་གཏེར་ངན་སྔགས་སྦས༔ གཙང་གི་ཕུག་མོ་ཆེ་རུ་ཚེ་བདག་སྦས༔ ཡང་ཕུག་རིང་མོར་ཀླུ་བདུད་སྤུ་གྲི་སྦས༔ བསྒྲགས་ཀྱི་ཡང་རྫོང་ཕུར་པ་ཐམས་ཅད་སྦས༔ གྲ་ཡི་གཡུ་སྒོང་བྲག་ལ་གཏེར་སྨྱོན་སྦས༔ མུ་ཏིག་སྤ་མ་གོང་ལ་གསང་གཏེར་སྦས༔ ཟར་པོ་ཟངས་ཀྱི་མཚོ་བྲག་གཏེར་ཕྲན་སྦས༔ འཕྱོང་རྒྱས་བང་སོར་ནོར་གཏེར་ཆོས་གཏེར་སྦས༔ འཕྱིང་བར་སྟག་རྩེར་དགོངས་གཏེར་ཟུང་ཞིག་སྦས༔ ཤམ་པོའི་གངས་ལ་གསང་གཏེར་གཏེར་སྨྱོན་སྦས༔ གཉལ་གྱི་དོང་ཁ་བྲག་ནག་མདའ་སྒྲོ་ལ༔ སྨན་དཔྱད་གཙུག་ལག་བསྟན་སྲུང་མང་དུ་སྦས༔ གཉལ་སྨད་དགེ་རི་ནག་པོའི་བྲག་ལོགས་ལ༔ ནོར་དང་གཏེར་གྱི་ཁ་བྱང་མང་པོ་སྦས༔ གསལ་རྗེ་གངས་མཐར་ཕྲ་མེན་སྤུ་གྲི་སྦས༔ ཆོས་སྒྲོ་ཐོད་དཀར་སྦེ་གསར་ལུང་པ་ལ༔ དངུལ་སྤྱད་གསེར་སྤྱད་གསེར་སྦྲམ་སིལ་མ་སྦས༔ ཟ་ཆུ་འདུས་ལ་གཤིན་རྗེའི་ངན་སྔགས་སྦས༔ གཉལ་རོང་འདོམ་མཁར་གཡུ་དང་བྱུ་རུ་སོགས༔ ཕོ་གྱོང་བཟའ་ཡི་མགོ་རྒྱན་ཐམས་ཅད་སྦས༔ ལུག་སྟོད་བྲག་དཀར་གདོང་ལ་ནོར་གཡུ་སྦས༔ ཀོ་རོ་ངམ་གྲོག་ཐུགས་གཏེར་བརྒྱ་རྩ་སྦས༔ མཁལ་དཀར་ལྷ་ཡུལ་ཕུག་པར་གཏེར་ཕྲན་སྦས༔ བྱར་གྱི་སྟག་ཆུང་གཏེར་ཕྲན་གཏེར་སྨྱོན་སྦས༔ ཁྲ་མོ་ལྡང་ལྷར་ཟབ་གཏེར་ངེས་དོན་སྦས༔ བྱར་དྭགས་ཀོང་གསུམ་སློབ་དཔོན་དགོངས་གཏེར་སྦས༔ ལྷོ་མོན་ལོར་གཉལ་སློབ་དཔོན་གསང་གཏེར་སྦས༔ ཙ་རིའི་གནས་ལ་གསང་གཏེར་མ་བུ་སྦས༔ འོལ་ཀའི་མགར་ཕུག་ཡུམ་གཏེར་སྐོར་བཞི་སྦས༔ འོན་ཕུ་སྟག་ཚང་བསྟན་གཉིས་རྒྱ་མཚོ་སྦས༔ བྱ་ཕོ་ཟེ་བ་བྲང་ང་བྲག་རྣམས་ལ༔ ལྷ་བཟང་ཀླུ་དཔལ་ཕོ་ཆས་ཆ་ཅིག་དང་༔ ཟངས་སྤྱད་ལྕགས་ཆ་སྡེར་མ་བརྒྱ་ཙམ་སྦས༔ ཁྲབ་ལར་ནོར་གཏེར་ཆོས་གཏེར་མང་དུ་སྦས༔ ཕུག་པའི་ནང་དུ་ཐུགས་རྗེ་ཆེན་པོ་སྦས༔ ལོ་མོ་ལོ་ཆུང་ནོར་གཏེར་རྐྱང་པ་སྦས༔ ཡར་ཀླུང་ཁྲ་འབྲུག་མཆོད་རྟེན་མགོ་ལྔ་ལ༔ ཟབ་གཏེར་རྫས་གཏེར་སྤེལ་མ་མང་དུ་སྦས༔ དགོན་ཐང་གཙུག་ལག་ཁང་གི་བྲག་རི་ལ༔ ནོར་གཏེར་ཆོས་གཏེར་དམ་རྫས་མང་དུ་སྦས༔ འཕང་ཐང་གཙུག་ལག་ཁང་གི་རྒྱབ་རི་ལ༔ རྣམ་སྲས་ཡོན་ཏན་འབྱུང་བའི་རྒྱུད་སྐོར་སྦས༔ ཡུམ་བུ་བླ་སྒང་སྐོར་ལ་གསང་གཏེར་སྦས༔ བཙན་ཐང་གཡུ་ཡི་ལྷ་ཁང་བྲག་རི་ལ༔ གཏེར་ཆེན་ལྔ་དང་གཏེར་ཆུང་དགུ་སྦས་སོ༔ མོན་མཁར་མགོན་པོ་གདོང་ལ་ཐུགས་གཏེར་སྦས༔ ནོར་གཏེར་གཡུ་ཁྲབ་དབུལ་དང་བྲལ་བ་སྦས༔ གྲ་ཕྱིའི་བྲག་པོ་ཆེ་ལ་བོད་གཏེར་སྦས༔ གྲ་ཡི་སྣེ་གདོང་ཟུར་ལ་རལ་གྲི་སྦས༔ དོལ་གྱི་ལྕེ་ཏེའི་ཟུར་ལ་ཁྲབ་རྨོག་སྦས༔ གཞུང་གི་ར་སྐོང་རྒྱབ་ལ་གསེར་ཀ་སྦས༔ གཙང་གི་སིལ་མ་བྲག་ཕུག་སྤྱི་ཏི་སྦས༔ གཙང་གི་མང་མཁར་བྲག་ལ་མཐུ་འབུམ་སྦས༔ མང་ཡུལ་དཔལ་མོ་ཐང་གི་འདྲེ་ཕུག་ཏུ༔ བཀའ་སྲུང་འདུས་པ་ངན་སྔགས་སྐོར་ལྔ་སྦས༔ བྱམས་པ་སྤྲིན་དུ་སྒྲུབ་ཐབས་ཉི་ཤུ་སྦས༔ གཞུ་སྙེ་མཁར་དུ་མདོ་གཅོད་རྒྱུན་གཅོད་སྦས༔ ལ་སྟོད་སྲིན་པོ་རྫོང་ལ་ཞི་བྱེད་སྦས༔ ལ་སྟོད་དིང་རི་དིང་ཆུང་ཡོ་ག་སྦས༔ ལྷ་རྩེའི་བྲག་ལ་ཨ་ནུ་ཡོ་ག་སྦས༔ རྒྱང་པོ་ལུང་ལ་ཨུ་རྒྱན་རྣམ་ཐར་སྦས༔ ར་སོག་ཀླུ་གྲུར་ལུང་བསྟན་མང་དུ་སྦས༔ རྡོ་རྗེ་གངས་ཀྱི་དངུལ་ཕུག་གསང་གཏེར་སྦས༔ གྲོམ་པ་རྒྱང་དུ་ཕྱི་གཏེར་ནང་གཏེར་སྦས༔ ཟམ་བུ་ལུང་དུ་གསང་གཏེར་དགོངས་གཏེར་དང་༔ ཐུགས་གཏེར་གཏེར་ཀ་བརྒྱ་དང་རྩ་བརྒྱད་སྦས༔ འོ་ཡུག་གཡག་སྡེར་གཏེར་གྱི་ཡན་ལག་སྦས༔ སྤ་གྲོ་ཆུ་མོ་ཕུག་ཏུ་ཐུགས་གཏེར་སྦས༔ གཡུ་ཕུག་རྫ་ལྷུང་གཏེར་ཕྲན་རྫས་གཏེར་སྦས༔ ཡེར་བ་ཟླ་བ་ཕུག་ཏུ་ཟབ་གཏེར་སྦས༔ ཟང་ཡག་བྲག་ལ་ཐང་ཡིག་གསང་གཏེར་སྦས༔ གཞོ་སྟོད་ཏི་སྒྲོར་མཁའ་འགྲོའི་སྐོར་རྣམས་སྦས༔ སྟོད་ཀླུང་འཕར་བ་ཚང་དུ་ཕྱག་ཆེན་སྦས༔ ཤ་འུག་སྟག་སྒོར་མ་ནིང་གཏེར་བཅུ་སྦས༔ དོམ་ཚང་རོང་དུ་གཏེར་ཕྲན་འདྲེས་མ་སྦས༔ ལྷ་སར་གསང་གཏེར་གཏེར་ཕྲན་ཟུང་ཞིག་སྦས༔ མཆིམས་ཕུ་བློན་པོ་མགུལ་དུ་བཅུད་ལེན་སྦས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་དུ་གཏེར་སྦས་པའི་ལེའུ་སྟེ་གོ་གཅིག་པའོ༔ ༔
པདྨ་བཀའ་ཐང་ལེའུ་ ༩༢ ས་རྟགས་གཏེར་གྱི་འབྱུང་དུས་བསྟན་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ སངས་རྒྱས་གཉིས་པ་པདྨ་འབྱུང་གནས་ལ༔ གཏེར་ཀ་འདི་རྣམས་འབྱིན་དུས་ནམ་ཞིག་ཡིན༔ གཏེར་སྟོན་མཚན་ནི་ཇི་སྐད་འབྱུང་ཞེས་ཞུས༔ སློབ་དཔོན་ཆེན་པོ་པདྨས་བཀའ་སྩལ་པ༔ རྒྱལ་པོའི་གདུང་རབས་བརྒྱ་དང་བཅུ་ལྷག་ན༔ ལ་སྟོད་མཚོ་བར་གྱམ་ནག་ཅེས་བྱ་བར༔ མུ་གེ་ནད་ཡམས་མི་ཐོག་བུད་པ་འབྱུང་༔ གློ་བོ་དགེ་ཀར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་སངས་རྒྱས་བླ་མ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ བལ་བོད་མཚམས་ནགས་མེ་ཤོར་མི་མང་ཚིག༔ སྤུ་རྣ་རྫ་རིར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་རྒྱ་ལོ་ཙ་ཞེས་བྱ་བ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཁམས་ཀྱི་རྨེ་འདོར་བྱ་ཁྱི་ལྷ་ཁང་འཁྲུག༔ ཀློང་ཐང་སྒྲོལ་མར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་སྣ་ནམ་པ་ཞེས་བྱ་བ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ལ་སྟོད་གཅུང་པ་དྲེལ་ཆེན་ཆུ་ལྟར་འཁྲུག༔ གཡུ་ཕུ་རྫ་ལྷུང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་དུམ་རྒྱ་ཞང་ཁྲོམ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ མང་ཡུལ་ནམ་མཁའ་ཁྲག་མདོག་སྔོ་དམར་འགྲོ༔ ཁྲག་གི་ཆར་པ་ཟླ་བ་བཅོ་བརྒྱད་འབབ༔ བྱམས་པ་སྤྲིན་དུ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་་བསྟན་ནས་བྱུང་༔ གཏེར་སྟོན་སཱུཪྻ་སིངྷ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཤོད་གསུམ་ས་ལ་རོ་འདྲེན་འཇག་སྐྱ་འཕྱོ༔ མི་རེའི་ལག་ན་ཕུབ་རེ་མདའ་གཞུ་རེ༔ བྱང་གཏེར་གཏེར་ཕྲན་འགའ་ཞིག་སྦས་པ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་གཡུ་རུ་སྟོན་ཤཱཀ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སྤ་གྲོ་གནམ་ཐང་དཀར་པོ་སོག་དམག་འཇོམས༔ ལས་སུ་དམེ་འཁྲུག་བྱེད་ཅིང་ལྕགས་ཆ་གྱོན༔ བུམ་ཐང་རྩི་ལུང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་བོན་པོ་དྲག་རྩལ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ གཙང་གི་ཉང་སྟོད་ཉ་རི་འུག་པ་ལུང་༔ བསྟན་པ་གཉིས་འཁྲུག་ཆོས་ཀྱི་ངད་པ་ཡལ༔ ཆོས་དང་གང་ཟག་ཡ་བྲལ་ཆོམ་པོས་འཁྱེར༔ སྙིང་དྲུང་ཤངས་བྲག་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་སྙེ་མོ་ཞུ་ཡས་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ འཇིམ་གྱི་བྱ་ར་འདབས་འདྲ་དཀོན་མཆོག་མཚན༔ སྡེ་དགོན་ཟ་འོག་ཁ་ཆེ་འདྲ་བ་འབྱུང་༔ གཙང་གི་རི་བོ་ཆེར་སྦས་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་གྲུབ་ཐོབ་དངོས་གྲུབ་ཅེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔
རྒྱ་ནག་རྒྱལ་པོའི་རྒྱལ་ས་རྟ་རྫིས་འཕྲོག༔ བསྟན་པ་མཐའ་རྒྱས་མངའ་ཐང་ཇེ་ཆེར་འགྲོ༔ བལ་ཡུལ་ཨེ་ཡི་གཙུག་ལག་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་གཙུག་ལག་དཔལ་དགེ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ལ་སྟོད་བཙན་ཡུལ་མཚོན་ལ་སོ་ནམ་བྱེད༔ ཛམ་གླིང་རྒྱལ་པོའི་དཔོན་བརྒྱུད་འབངས་ཀྱིས་ནོན༔ ལྷོ་གཏེར་གཏེར་ཕྲན་འགའ་ཞིག་སྦས་པ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་སྐུ་ཚ་སྟོན་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ བྱང་གི་ཕྱི་གོང་རུ་བ་འཚུབ་མས་འཁྱེར༔ བོད་འདིར་དམ་ཆོས་བསྟན་པ་གསུམ་དུ་གྱེས༔ བཀའ་གཏེར་གཉིས་ཀྱིས་སངས་རྒྱས་བསྟན་པ་སྐྱོང་༔ གཙང་གི་རུ་མཚམས་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨ་ཡ་བོན་པོ་ལྷ་འབུམ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ དབུས་གཙང་ཁམས་སུ་དུག་ལྔའི་ཆོས་ཤིག་འབྱུང་༔ ལྟ་ལོག་ཆོས་སྟོན་བསྟན་པ་ཐབས་ཀྱིས་བསྣུབས༔ ཞབས་ཏོག་ཡིན་ཟེར་བསྟན་ཞབས་ཐག་པ་འདོགས༔ མོན་ཁ་བུམ་ཐང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་ཏེར་བསྟན་ནས་བྱུང་༔ གཏེར་སྟོན་ཁྱུང་པོ་དཔལ་དགེ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ བོད་ཀྱི་གནས་དགོན་ཀུན་ལ་འཐབ་ར་འཆའ༔ ལྷ་ས་དམར་པོ་རི་ལ་ལྷ་ཁང་འབྱུང་༔ ངང་ངུར་མཚོ་བསྐམས་ནེའུ་ཐང་བྱེ་མས་ནོན༔ དགེ་རྒྱས་ཧས་པོ་རིར་སྦས་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་འབྱུང་༔ གཏེར་སྟོན་ཤ་མི་རྡོར་རྒྱལ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ང་སྤྲུལ་ཡིན་ཟེར་གཏེར་མིན་གཏེར་འདྲ་སྟོན༔ དམ་ཉམས་གང་དུ་མི་བྲིམ་ཐམས་ཅད་འདུས༔ ཉ་མའི་མགོ་བསྐོར་འབྲེལ་མེད་ཆོས་བཤད་བྱེད༔ བསྟན་པའི་རྐུན་པོ་གཏེར་ཆོས་དཀྲུག་ཅིང་སྤེལ༔ བཀའ་ལོག་མང་པོ་ར་ཁྱུ་ཙམ་པ་འབྱུང་༔ པད་འབྱུང་བདག་ཀྱང་ཡི་མུག་ག་ཆད་དེ༔ ཞ་ཡི་ལྷ་ཁང་བི་མའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ལྡང་མ་ལྷུན་རྒྱལ་བི་མའི་སྤྲུལ་པ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཏའི་ཏུས་བརྩིགས་པའི་རྩིག་པ་སྡུག་པ་འོང་༔ ཇིང་དང་རྒྱ་རྣམས་གྲོག་མའི་ཚང་བཤིག་འདྲ༔ ཇོ་མོ་གླིང་གསུམ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་གྲ་པ་མངོན་ཤེས་བྱ་བ་འབྱུང་༔ ས་སྟེང་གནས་གཞི་བརྒྱ་དང་རྩ་བརྒྱད་འགེངས༔ གྲ་མདའ་འདི་ལ་གཙུག་ལག་ཁང་ཞིག་བྱུང་༔ རྒྱལ་པོས་བཞེངས་པའི་ལྷ་ཁང་བདག་པོ་བྱེད༔ དེ་ཉིད་མི་གནས་མྱ་ངན་འདས་འོག་ཏུ༔ ཨུ་རྒྱན་ང་ཉིད་གཉལ་སྨད་ལྷ་རྗེར་སྦྲུལ༔ དྭགས་སྒོམ་སྙིང་པོའི་དོན་བསྒོམ་ཁྱུ་ཅིག་བྱུང་༔ མཆིམས་ཕུ་ཁོ་མཐིང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ར་ཤག་གཏེར་སྟོན་མདོས་ལ་མཁས་པ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཡུལ་ཆེ་ས་ཡངས་འཁྲུག་པའི་བསྐལ་པ་འབྱུང་༔ སྔགས་པ་མཐུ་བསྒྲུབ་སྐྱེ་བོས་ཟློག་པ་སློབ༔ མི་བསད་སྟོང་ལ་སྐུ་དང་གསུང་རབ་འཇལ༔ གྲོང་སྟོད་གྲོང་སྨད་འགྲོ་ལ་སྐྱེལ་མ་འཁྲིད༔ སྲིན་མོ་སྦར་རྗེས་ཁོ་མཐིང་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ མངའ་བདག་སྤྲུལ་པ་ཉང་རལ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སྤུ་རངས་རྒྱལ་པོས་དབུས་ལ་གསེར་འདོད་འབྱུང་༔ སྡེ་བ་གྱེས་ཤིང་གནས་གཞིར་ཐོབ་ཤ་བྱེད༔ གྲོམ་པ་རྒྱང་ལ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་དབོན་གསས་ཁྱུང་ཐོག་ཅེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ རྒྱ་གར་མ་ཕྱིན་ཀུན་ཀྱང་ལོ་ཙཱ་ཞེས༔ བོད་ཀྱི་མཁས་བཙུན་ཐམས་ཅད་ས་མཐར་འཁྱེར༔ ཧོར་དང་ཡོན་མཆོད་ཁྲིམས་གསར་སྦྲེལ་བ་འོང་༔ ནང་གནག་ཕྱི་དཀར་དུང་དཀར་སྙེ་མ་བཞིན༔ བོད་ཀྱི་བསོད་ནམས་མར་མར་བྲི་བའི་དུས༔ པདྨ་ཤེལ་ཕུག་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་ར་མོ་ཤེལ་སྨན་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སྣ་ཐག་སས་བྱས་ཧོར་དམག་བོད་དུ་འོང་༔ ངན་སོང་ཟེར་ཡང་དེ་འདྲའི་སྡུག་བསྔལ་མེད༔ མི་ལ་སྲིད་བཅད་སྲིད་སྲུང་མང་དུ་ཡོད༔ སེམས་ཅན་ས་འོག་ནོན་པའི་དུས་ཙམ་ན༔ གནམ་སྐས་མཁར་ཆུར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་ཆོས་ཀྱི་དབང་ཕྱུག་ཅེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ བྱ་རོག་རྫོང་དུ་དམག་གིས་ཁྲིམས་རྔ་བརྡུང་༔ སྙིང་མེད་པོ་རྣམས་གསེར་ཕྱེ་ཆུ་ལ་འཕོད༔ ཟང་ཡག་བྲག་ལ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་གུ་རུ་ཇོ་ཚེ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ལྷ་ཁང་ནང་དུ་འབྲི་ལ་རྟ་ཆུ་ལྡུད༔ གཞོ་ཀླུང་ནང་དུ་མེ་ཡི་འཇིགས་པ་འབྱུང་༔ དཔལ་མོ་དཔལ་ཐང་མཚོན་གྱི་ཆར་པ་འབེབས༔ གངས་བར་ཕུག་མོར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་པདྨའི་དབང་ཕྱུག་ཅེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སིལ་མ་ལ་ཀར་འཇག་མའི་མི་ཆུང་སྐྱེ༔ སྨོན་ལ་ལ་ཀར་ཤེལ་གྱི་ཕ་བོང་རྡོལ༔ གཡའ་མ་སྤ་གོང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་དོ་བན་རྒྱ་མཚོ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ རྒྱལ་པོའི་མངའ་ཚུད་བོད་ཀྱི་མི་རྣམས་ཀུན༔ རང་གི་ལྟོ་གོས་བསྲན་ནས་ས་ཧོར་གསོ༔ གནས་བརྟན་དམག་དཔོན་ཧོར་ལས་བྱེད་པ་འབྱུང་༔ རྡོ་བོད་མཚམས་སུ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་རག་ཤི་སྟོན་པའི་མིང་ཅན་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ས་ཡི་ཡ་སོ་ཇིང་གིར་མ་སོ་བཅད༔ བྲོས་འཐོར་མང་ཞིང་ཡུལ་སྟོངས་རྒུད་པ་འབྱུང་༔ ལྷོ་མོན་ཕྱོགས་སུ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཇ་རོང་ཨེ་ཡི་སྨན་པ་ཉི་འོད་གསལ༔ ད་ལྟ་ཤི་ཡང་སྲོག་འཐུད་ཤེས་པ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ དུས་ནི་ལོ་རེ་ལོ་རེས་ངན་དུ་འགྲོ༔ མཁན་པོ་བྱས་ནས་གྲོང་དུ་ཚོགས་དབང་བསྐུར༔ ལྐོག་ཏུ་བུ་སྨད་ཁྱི་ཕག་ཙམ་པ་འབྱུང་༔ སྡེ་འཁྲུག་ནང་དམེ་རྒྱབ་བརྟེན་དུག་ལ་རེ༔ དབུ་ཚལ་གསེར་ཁང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གྲ་སྒོམ་ཆོས་ཀྱི་རྡོ་རྗེ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སངས་རྒྱས་བཀའ་ལ་འདྲ་ཆོས་འདྲ་མིན་བྱེད༔ རྫོགས་ཆེན་རྡེའུ་ཟེར་བའི་ལོག་ཆོས་དང་༔ རི་བོང་འཛིན་ཞེས་བསེ་སྦྱོར་སྨན་ལོག་འབྱུང་༔ བོད་རྩིས་དྲུག་ཅུ་སྐོར་ཟེར་གསལ་སྒྲོན་ཞེས༔ རྩིས་རྒྱུད་ཀུན་དང་མི་མཐུན་དར་བ་འབྱུང་༔ གཏེར་མ་ཡིན་ཟེར་བཅའ་གཞི་མ་ཚང་བར༔ གཏེར་མར་གྲགས་པའི་བསླུ་ཆོས་མང་ཞིག་འབྱུང་༔ འོ་ཡུག་གཡག་སྡེར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་གཡག་ཕྱར་སྔོན་མོར་གྲགས་པ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ བོད་ཁམས་ཡོངས་ཀྱི་ཆོས་ལུགས་དགོད་རེ་བྲོ༔ འཇིག་རྟེན་ཁྱིམ་པའི་ཁ་ནས་ཆོས་སྐད་རེ༔ ར་རོག་ཕད་རོག་ཁྱད་པར་མེད་ཅེས་ཟེར༔ རླུང་ལ་བསིལ་སྦྱར་ཡས་གདོན་ཡིན་ནོ་ཟེར༔ མཚང་མེད་པོ་རྣམས་ནད་པའི་སྔས་སྲུང་བྱེད༔ མི་རེའི་ལག་ན་རྩིས་ཀྱི་ཤོག་ཁྲ་རེ༔ རྨོངས་ཁྱུ་ཁ་འགྲིལ་མཁས་པ་བསྐྱར་ལ་འདོན༔ མོན་ཁ་སྤ་གྲོར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་གྲུབ་ཐོབ་མཁར་ནག་ཅེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ མི་ཐུབ་ལྔ་འབྱུང་རང་ལ་ཡིད་མི་ཆེས༔ དེ་འདྲའི་དུས་ན་འདྲེ་ནད་གདུག་པ་དར༔ ནད་དུ་མི་འོང་བྱ་བ་གཅིག་ཀྱང་མེད༔ ཆོས་སྤྱིའི་བྱིན་བས་སུམ་ཆ་ཡལ་ནས་འགྲོ༔ འུ་ཤང་རྡོ་ལ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་ལྷ་བཙུན་སྔོན་མོ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ མི་ལ་ལུས་ཆས་ཡ་མ་ཟུང་དུ་འོང་༔ བསྟན་པའི་ཆོས་ཀྱང་ཡ་མ་ཟུང་དུ་འགྲོ༔ དགེ་རྒྱས་བྲིས་པའི་རི་མོ་ཤུལ་རྗེས་འོང་༔ ཁམས་ཀྱི་སྲིན་མོ་རྫོང་གསུམ་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཁམས་པ་ཉི་མ་གྲགས་ཀྱི་མིང་ཅན་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ས་ནང་འཇིགས་བརྒྱད་ཤ་བའི་རྭ་ཅོ་འབྱུང་༔ བསོད་ནམས་ཟད་པས་དབུས་སུ་མི་གད་རྡིབ༔ དྭགས་པོ་ལྡང་ལྷ་བྲག་གི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ མངའ་བདག་སྲས་མོ་རིན་ཅེན་ཚུལ་རྡོར་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ དམ་སེལ་བརྒྱུད་པས་སློབ་འགའ་གྲི་རུ་འཆི༔ རྡོ་ཡི་མཆོད་རྟེན་གདུགས་དང་ཆོས་འཁོར་ཉམས༔ མོན་ཁ་ཆུ་ཕུག་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་ཚེ་བརྟན་རྒྱལ་མཚན་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ དབུས་པའི་འདུན་མ་གཅིག་དྲིལ་ས་ཧོར་སྐྲག༔ སྡིག་སྤྱོད་བདུད་སྤྲུལ་བསྟན་པ་རྒྱས་ཡུན་རིང་༔ འབྲིན་ཐང་ཀོ་རོ་བྲག་གི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་རིན་ཅེན་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཡར་ཀླུངས་མཐིལ་ནས་རྣམ་སྨིན་བསྐྱེད་རྒྱལ་འབྱུང་༔ ཕག་གིས་ས་སློག་དབུས་ཁམས་ས་ཧོར་ཟ༔ བཙན་རྫོང་བརྒྱ་དང་རྩ་བརྒྱད་ཕྱོགས་སུ་འབྱུང་༔ ཤེལ་གྱི་བྲག་ཕུག་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་ཨུ་རྒྱན་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ མཐའ་དམག་དབུས་རྡིབ་འབྲི་དང་ཕག་པ་འཐབ༔ དབུས་གཙང་སིལ་བུ་ཕག་ཁྱུ་ཚལ་བར་འགྲོ༔ སྟག་ཚང་ཟབ་ལུང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་རྡོ་རྗེ་གྲོ་ལོད་ཅེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ས་ཧོར་དུར་ས་དབུས་རྫོང་ཀུན་ལ་འདེབས༔ མཆོད་རྟེན་འོག་ནས་ཐོད་པ་ཁྱི་ཡིས་གཡེང་༔ བསམ་ཡས་མཆིམས་ཕུར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ གཏེར་སྟོན་དྲི་མེད་འོད་ཟེར་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ མཛའ་བོ་ནང་འཇུག་ཚེར་མས་མཐའ་མི་འབོད༔ ས་སྟེང་གཡོ་བའི་བདུད་ཀྱི་སྤྲུལ་པ་འབྱུང་༔ ཡུམ་བུ་བླ་སྒང་སྦས་པའི་གཏེར་ཀ་འདི༔ མི་བཞག་འདོན་པའིརྟགས་དེར་བསྟན་ནས་བྱུང་༔ ཨུ་རྒྱན་རོག་རྗེ་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཆོས་ལོག་ཁྲིམས་རལ་དམ་ཉམས་ལུང་པ་གང་༔ ལྷ་མིའི་གནས་སུ་གཏམ་ངན་གྲགས་པས་ཁྱབ༔ ཤ་འུག་སྟག་སྒོར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་གཏེར་བདག་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ འཕགས་པ་ལྷའི་བུ་རབ་རྩལ་ལུང་བསྟན་མདོར༔ དེ་དག་སེམས་ཅན་དོན་ཡང་རྟག་ཏུ་བྱེད༔ ཕྱིར་མི་ལྡོག་སྟེ་འགྲོ་བ་ཐལ་སྦྱར་འདུད༔ ཁ་རག་ལ་ཀར་སོ་པ་རེ་མོས་བྱེད༔ མཆོད་རྟེན་དཀར་པོར་སྦས་པའི་གཏེར་ཀ་འདི༔ མི་བཞན་འདོན་པའི་རྟགས་དེར་བསྟན་ནས་བྱུང་༔ ཨུརྒྱན་ཀུན་སྐྱོང་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཉང་སྨད་ཉི་མ་མདོ་རུ་རྫོང་ཅིག་འབྱུང་༔ དམག་དཔོན་བརྒྱ་དང་བཅུ་དྲུག་ཕྱ་ལུང་འཚོག༔ གཡས་རུ་གཙང་འགྲམ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་མདོ་སྔགས་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ ཡར་འབྲོག་མཚོ་གླིང་དགུ་ལ་དམག་སྒར་འབྱུང་༔ སྟག་ཐབ་ནང་དུ་གཙང་པ་སུམ་གཉིས་འཆི༔ རྩིས་ཀྱི་ལྷ་ཁང་སྦས་པའི་གཏེར་ཀ་འདི༔ མི་བཞག་འདོན་པའིརྟགས་དེར་བསྟན་ནས་བྱུང་༔ ཨུ་རྒྱན་བསྟན་གཉིས་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སྟོད་ཁུ་ཡུལ་དུ་ཕག་ཚང་ཁྱུ་ཅིག་འབྱུང་༔ ས་བཙན་རི་འགོས་རེ་ལ་རྫོང་ཆུང་རེ༔ ལ་རྩུབ་འཕྲང་རྩུབ་བསྙགས་མེད་ཁྱུ་ཡིས་འཚོ༔ ཀོང་པོ་བུ་ཆུར་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་རྡོ་རྗེ་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ གཙང་གི་དགྱེར་ཕུ་དོ་ཡ་གཉིས་སུ་འཐབ༔ རུ་ལག་ཚུད་ཕུར་ཕག་པའི་ཁྱུ་ཅིག་འབྱུང་༔ ཀོང་པོ་འཕྱིང་ཡུལ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་རིན་ཅེན་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ འགོས་ཀྱི་ཕག་རིར་གནས་གཞི་རྫོང་ལ་འགེབས༔ ལ་སྟོད་སྟག་གྲུར་དུག་གི་ཚོང་དུས་འོང་༔ མེ་འབར་མཚོ་ལ་སྦས་པའི་གཏེར་ཀ་འདི༔ མི་བཞག་འདོན་པའིརྟགས་དེར་བསྟན་ནས་བྱུང་༔ ཨུ་རྒྱན་པདྨ་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ རྒྱ་གར་གྷ་ལ་རུ་དང་བི་ན་ས༔ པཎྜི་ཏ་ནི་གཉིས་གསུམ་བོད་དུ་འབྱུང་༔ ལྷ་སའི་ཇོ་ཤཱཀ་འདི་ལ་མཆོད་པར་བྱེད༔ ལྷོ་ཀོང་བྱང་ཀོང་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་ལས་འཕྲོ་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ བོད་འདིར་རྒྱལ་པོའི་མིང་བཏགས་བརྒྱ་རྩ་བརྒྱད༔ གངས་དང་སེང་གེ་ལས་ཀྱིས་འབྲེལ་པ་ཡིས༔ འཇིག་རྟེན་པ་ལ་བདེ་བ་སྐད་ཅིག་མེད༔ དཔྱལ་གྱི་བྲག་ལ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་བསམ་གཏན་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སླེ་མ་མཚན་གྱི་རི་ལ་བྲོས་པོས་ཡིབ༔ གནུབས་ཀྱི་སྲེག་པ་ལུང་དུ་མུ་གེ་འབྱུང་༔ ཁྱུང་ཚང་བྲག་ལ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་ཞིག་པོ་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སྟར་སྒོའི་ཐང་ལ་དབུས་པའི་ཚོགས་འདུ་བྱེད༔ ཧས་པོ་རི་རྒྱུད་མེ་ཡར་རྫོང་ཞེས་འབྱུང་༔ ཁ་རག་ཕུག་ཏུ་སྦས་པའི་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨུ་རྒྱན་བདེ་ཆེན་གླིང་པ་ཞེས་བྱ་འབྱུང་༔ དེ་ཉིད་མི་གནས་མྱ་ངན་འདས་འོག་ཏུ༔ སྐབས་སུ་སྐབས་སུ་མཐོངས་སྐར་ཉི་ཞུར་བཞིན༔ སྔོན་གྱི་འཕྲིན་ལས་སད་པས་དམ་ཆོས་སྟོན༔ མི་ཐོག་རེ་སོང་གཏེར་སྟོན་རེ་རེ་འབྱུང་༔ རེས་འགའ་གཏེར་ཆེན་རེས་འགའ་གཏེར་ཆུང་འབྱིན༔ རེས་འགའ་གཏེར་སྨྱོན་རེས་འགའ་གསང་གཏེར་འབྱིན༔ རེས་འགའ་ཐུགས་གཏེར་རེས་འགའ་གཏེར་ཕྲན་འབྱིན༔ རེས་འགའ་མི་འབྱིན་གཏེར་རྙིང་བསྟན་པ་སྐྱོང་༔ ཞེས་གསུངས་ཛམ་གླིང་རྒྱལ་པོ་དགྱེས་པར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ས་རྟགས་གཏེར་གྱི་འབྱུང་དུས་བསྟན་པའི་ལེའུ་སྟེ་གོ་གཉིས་པའོ༔ ༔
པདྨ་བཀའ་ཐང་ལེའུ་ ༩༣ གཏེར་འཕྲད་རྣམས་ལ་ཞལ་གདམས་སྙིང་གཏམ་བཞག་པ།
དེ་ནས་ཨུ་རྒྱན་པདྨ་འབྱུང་གནས་ཀྱིས༔ གཏེར་དང་འཕྲད་པའི་སྐལ་ལྡན་ལས་ཅན་ལ༔ ཤ་ཚ་སྙིང་གཏམ་ཞལ་ཆེམས་ཞིབ་གསུངས་པ༔ ལས་འཕྲོས་ང་ཡི་གཏེར་དང་འཕྲད་པའི་ཚེ༔ ལྷ་འདྲེ་མི་གསུམ་འཇམ་རྩུབ་གཉིས་སུ་འོང་༔ རྒྱ་བོད་ལྷ་འདྲེ་མ་རུངས་ཐམས་ཅད་ཚོགས༔ ལེགས་པ་ལྟར་བྱས་ཉེས་པ་སྣ་ཚོགས་གཏོང་༔ མི་མཐུན་པ་ཡི་རྟེན་འབྲེལ་མང་འཛོམས་པས༔ རིག་པར་བཅག་ཆུག་ཁ་སྡོམས་ཆང་མ་འཐུངས༔ བདག་གིས་བདག་ཉིད་འཁོར་བར་མ་བསྐྱུར་བར༔ བརྩེ་བརྩེ་དུང་དུང་ཆོས་བཤོལ་སྒྲུབ་གཅོག་པའི༔ ཉེ་དུ་འབྲེལ་བ་ཐམས་ཅད་འགལ་རྐྱེན་ཡིན༔ ཕ་ཡུལ་མ་བསྡད་གར་སོང་ཆ་མེད་སོང་༔ འགལ་རྐྱེན་མེད་པའི་གནས་སུ་སྒྲུབ་པ་གྱིས༔ འགལ་རྐྱེན་ཀུན་དང་འབྲེལ་པ་བཙན་ཐབས་ཆོད༔ རང་གིས་རང་ཕུང་མ་འཇུག་སྙིང་གཏམ་ཡིན༔ བདེ་ཞིང་སྐྱིད་པ་མི་འདོད་གཅིག་ཀྱང་མེད༔ རང་ཉིད་དམར་འགྱུར་རྔན་ཅན་ནང་ནས་འོང་༔ མི་འོང་གཞན་དོན་བོར་ལ་རང་དོན་ཚོལ༔ བློ་སྣ་ནང་བསྟུངས་ལྟ་བའི་ཤོང་ཡངས་བསྐྱེད༔ སྣ་ཚོགས་འཆར་བའི་སེམས་ཉིད་ཚད་ལ་ཕོབ༔ རི་རབ་ལྟ་བུར་བློ་བརྟན་བསྒོམ་པར་གྱིས༔ བརྟན་པ་ཐོབ་ཅིང་འོད་གསལ་གཡོ་འགུལ་མེད༔ སུ་འགྲོགས་ཡོན་ཏན་མི་འབྱུང་གཅིག་པུར་སྡོད༔ ཡུན་རིང་འགྲོ་དོན་དངོས་གྲུབ་ངང་གིས་འབྱུང་༔ ལྟོ་གོས་གཡོག་བྱེད་ཕོངས་པ་ཞེར་མ་བཞག༔ ཀྱི་ན་སྲོག་འཚོ་ལྷགས་སྐྱོབ་ཙམ་ལ་བརྟེན༔ ནོར་གཏེར་ཐོན་ནས་ཆོས་གཏེར་སྐལ་བ་མེད༔ ཆོས་གཏེར་ཐོན་ནས་ནོར་གཏེར་སྐལ་བ་མེད༔ རྟོག་གཉིས་དུས་གཅིག་སྐྱེ་བ་མི་སྲིད་མོད༔ གཏེར་ནས་ཁྱི་རོ་མིན་པ་གང་ཡང་འབྱུང་༔ མི་ཚེ་རིང་ན་གང་འོང་ཆ་མི་ཆོད༔ གོ་ཆ་ཆེར་བགོས་ཤེས་པ་ཞིབ་ཏུ་གྱིས༔ མི་སླུ་ངེས་པ་པད་འབྱུང་བཀའ་ཡིན་གྱི༔ བདག་ཅག་བུད་མེད་མ་འཐུལ་ནོར་མ་བསྲེ༔ མི་ཡི་མཛངས་སྣོན་མ་བྱེད་མགོ་མ་སྟོང་༔ ཆོས་ཚུགས་མ་ཞིག་བྱེད་པ་སྙིང་གཏམ་ཡིན༔ མི་ཞེས་རི་མགོ་གང་མཐོའི་ཉི་མ་ཡིན༔ བློ་གཏད་ཁེལ་བ་སུ་ལའང་མེད་པས་ན༔ གཏེར་འཚོ་མ་ཤེས་འཕྲལ་རྐྱེན་ངན་དགུ་འོང་༔ མི་སེམས་འདྲེ་བས་སྤྱང་སྟེ་ཚོར་བ་རགས༔ གྱོང་ཞིག་ཡོད་ན་ཐོ་ཕྱིར་བསྟེན་དོགས་མེད༔ སངས་རྒྱས་བཀའ་ཡིས་བསླུ་བ་ཅང་སྲིད་དམ༔ དྲོད་རྟགས་མ་ཐོན་བར་དུ་སྒྲུབ་ལ་འབུངས༔ ཆོས་ཟབ་ཙ་ན་ནག་པོའི་བདུད་ཟབ་པས༔ རང་གིས་ཉམས་སུ་མ་བླངས་ཆོས་མ་བསྟན༔ ངོམ་པ་སྔས་ན་གཞན་གྱིས་ཕྲག་དོག་འོང་༔ སུ་ངོ་ཆེ་ཡང་མི་སྟོན་སྙིང་གཏམ་ཡིན༔ བསྒྲུབ་པའི་དུས་སུ་ལོ་གསུམ་མ་འབུངས་པར༔ གཏེར་ཆོས་ཐོན་ནས་གཅལ་དུ་བཀྲམ་པ་ན༔ སློབ་མ་མགོ་ལོག་མངན་བགྲང་སྐུར་འདེབས་འོང་༔ མི་ཟེར་བྲོད་ཁར་མ་ཉན་བློ་མ་བསྟུན༔ རང་མནོ་བཞིན་དུ་གཞན་མི་མནོ་བ་ཡིན༔ བཟོ་མ་ཚར་ལ་ཆག་ཚད་གཏན་ལ་ཕོབ༔ རྐྱེན་ཐེག་འདུན་མ་གཟབས་པ་སྙིང་གཏམ་ཡིན༔ བར་གཅོད་ཡིན་ཟེར་སྐད་ལོག་འདོན་མི་འོང་༔ བྱར་ཡོད་དུས་སུ་འཕེན་པའི་སྟོབས་མ་བྱས༔
རློམ་པ་མཆོར་ཆེས་གཞན་གྱི་ཚུལ་ངན་འོང་༔ དམ་ཚིག་མ་བསྲུངས་དམ་ཉམས་བློ་སེམས་བསྲེས༔ བྱེད་བློ་བྱས་པས་བསྟན་བླ་རིན་མེད་འཚོང་༔ མེད་དང་མི་ཤེས་རྒྱུས་མེད་ཚིག་གསུམ་པོ༔ བསྐོར་ལྡབ་བྱས་ནས་སྨྲ་བ་སྙིང་གཏམ་ཡིན༔ ཀུ་སྒྲ་དི་རི་ཧབ་ཤ་བྱེད་པ་འོང་༔ བརྟན་པ་མ་ཐོབ་དཔའ་གདེང་མི་ལྡན་པར༔ མེད་ན་མེད་དེ་ཡོད་ན་ཡོད་ཚད་བསྟན༔ ཞིམ་པོ་མི་ལ་བྱིན་ན་སྐྱུག་ཏུ་འོང་༔ གདམས་ངག་ཟགས་སུ་མ་འཇུག་སྙིང་གཏམ་ཡིན༔ དད་པ་དུང་དུང་མི་སྐྱེ་ངན་སྨྲས་ལྡིར༔ གསོལ་བ་ལྷང་ལྷང་མི་འདེབས་ལྐོག་ཤུབ་འོང་༔ སུ་དང་ལྟ་སྤྱོད་མ་བསྟུན་སྙིང་གཏམ་ཡིན༔ དམ་ཚིག་ཐུབ་ན་སུ་མ་མགུ་ཡང་ཆོག༔ ཚུལ་འཆོས་ལོ་འདོད་བྱས་པས་སྣང་མི་འགྱུར༔ མོས་གུས་ཁ་ཙམ་ཚིག་ཙམ་མ་ཡིན་པས༔ ཨུ་རྒྱན་བདག་ལ་སྙིང་ནས་གསོལ་བ་འཐོབ༔ བར་གཅོད་བདུད་ནི་ཅིར་ཡང་བརྫུས་འོང་བས༔ མི་ངོ་མ་སྲུངས་བཤད་པའི་དམ་ཚིག་སྲུངས༔ གཏེར་སྟོན་ལྟ་བ་ཁ་ལ་མ་འབྱམས་གྱིས༔ ལྟ་སྤྱོད་རྩིང་ན་ཆོས་ལ་བར་ཆད་འོང་༔ སྔོན་ལ་རང་སྨིན་གོ་ཆ་རྩིས་སུ་ཆེ༔ བློ་གཏད་བླ་མ་ལ་བྱེད་བརྒྱུད་པ་འཛིན༔ ལོ་གསུམ་དུས་བོར་མཚམས་སྤྱོད་སྦྱིན་པར་བྱ༔ ཆོས་ནི་སྤེལ་མ་དྲགས་ལ་བསྡམས་མ་དྲགས༔ སེམས་ལ་པྲ་མོ་དབབ་པ་སྙིང་གཏམ་ཡིན༔ ཆོས་ལ་རང་གིས་ཉམས་ལེན་མ་བྱས་ན༔ གཞན་མ་ཡིད་མི་ཆེས་ཤིང་རྩིས་མི་འོང་༔ མི་ཚེ་ཉམས་ལེན་ཆོས་ལ་དྲིལ་ལ་ཞོག༔ གཏེར་ཆོས་འདི་ཉིད་ཤིན་ཏུ་གཉན་པས་ཏེ༔ དཔེར་ན་དུག་སྦྲུལ་མགོ་ཡི་ནོར་བུ་འདྲ༔ ཐབས་ལ་མཁས་ན་ནོར་བུ་ལོན་པས་འཚེངས༔ ཐབས་མ་མཁས་ན་དུག་གིས་འཆི་བར་བྱེད༔ དེ་བཞིན་ཡང་ན་འཚེངས་ལ་ཡང་ན་ཕུང་༔ ཕུང་འཚེངས་ནུས་པ་རིན་ཅེན་ས་ཡི་གཏེར༔ ཁ་འོག་ལུས་ཆུག་ལུས་པོ་དབེན་པར་འདུག༔ ལས་སུ་དཔེ་བྲིས་ནོར་དུ་སྣག་ཤོག་བསྟེན༔ སངས་རྒྱས་རང་རྙེད་དགོས་དགུ་མི་ཡིས་སྟེར༔ བཀུར་སྟི་རྗེས་བྱེད་འཚོ་བ་ལྷ་ཡིས་སྦྱོར༔ བསམ་པ་ཡིད་འགྲུབ་སངས་རྒྱས་བརྒྱུད་པ་ཟིན༔ དཀོན་ཅོག་དབུ་བསྟོད་བསྟན་པའི་རྐང་ཡང་ཚུགས༔ གདུལ་བྱ་ཆུད་མི་ཟ་ཞིང་གཏམ་རེ་སྙན༔ ཨུ་རྒྱན་སྙིང་གཏམ་ཤ་ཚ་མི་ཚུད་ཅིང་༔ ཚེ་འདིའི་དབང་གྱུར་ཁེ་གྲགས་ལོ་འདོད་སྒྲུབས༔ མི་ངོ་དཀར་ནག་བལྟ་ཞིང་ངོ་སྲུང་བྱེད༔ ཆོས་ཉམས་མི་ལེན་ནོར་དང་ཟས་ངོར་གཏོང་༔ ཁ་ཚོན་འདོན་ཅིང་ཚོང་དུས་བཙོང་ས་འགྲིམ༔ རྨོངས་པ་འདུ་ཞིང་མཁས་པའི་ཟེར་མི་ཐུབ༔ བསྟན་པའི་ཆོམ་པོ་གཞན་ན་མི་བདོག་སྟེ༔ དམ་ཉམས་བཀའ་ལོག་བྱ་བ་སུ་ལ་ཟེར༔ དམ་ཅན་རྒྱ་མཚོས་ཁྲེལ་བའི་ཞལ་གདམས་ཡིན༔ བསྟན་པའི་བླ་འཚོང་དཀོན་ཅོག་རྐང་འདྲེན་པོ༔ སྤྱི་བཙན་ངན་དཔེ་སྡིག་པའི་སློབ་དཔོན་པ༔ དམྱལ་བའི་གྲོས་མཁན་ངན་སོང་ལམ་རྒྱུས་མཁན༔ རང་དོན་རྒྱབ་བསྐྱུར་དལ་འབྱོར་ཆུད་གསོན་མཁན༔ རབ་ཏུ་འཚོ་མ་ཤེས་པས་ཕུང་བར་འགྱུར༔ དེ་བས་ང་ཡི་གཏེར་ཆོས་ཤིན་ཏུ་གཉན༔ དུག་གི་ལྟོ་ཡོད་རྨ་བྱ་ཙམ་ལས་མེད༔ ཚོད་ཡོད་ཆེ་ཆུང་ཅུང་ཟད་བྱར་མི་བཏུབ༔ མི་དགའ་མ་ཆེ་བྲེ་མོའི་གཏམ་མ་མང་༔ དམའ་ས་ཟུང་ལ་མི་ལ་འཇིགས་པར་གྱིས༔ གཏེར་བདག་ཨེ་འོང་གང་ཟག་ཁྱོད་ལ་རག༔ ཨུ་རྒྱན་སློབ་དཔོན་པདྨ་འབྱུང་གནས་ངས༔ སྙིང་གི་ཁུ་བ་བཀའ་རྒྱས་བཏབ་ནས་སྦས༔ དགོས་འདོད་འབྱུང་བའི་ཡིད་བཞིན་ནོར་བུ་ལ༔ གསོལ་བ་ཐོབ་ཅིག་སྙིང་གཏམ་སྨྲས་པ་རྣམས༔ ང་ཡིས་བོད་ཁམས་གཏེར་གྱིས་བཀང་ནས་ཡོད༔ དངོས་གྲུབ་འདོད་ན་གཏེར་གནས་ཀུན་ནས་ལོང་༔ ང་ནི་མི་སྡོད་སྲིན་པོའི་ཡུལ་དུ་འགྲོ༔ གསོལ་བ་སྙིང་ནས་འདེབས་པའི་གང་ཟག་ལ༔ ང་ལ་འགྲོ་སྡོད་གཉིས་སུ་ག་ལ་ཡོད༔ ཨུ་རྒྱན་སྤྲུལ་པ་འབུམ་ཕྲག་འབུམ་ཀྱང་འབྱུང་༔ སྔར་ཡོད་ཕྱིས་མི་འོང་བའི་གུ་རུ་མིན༔ ང་འགྲོ་ལྷོ་ནུབ་སྲིན་པོ་འདུལ་དུ་འགྲོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གཏེར་དང་འཕྲད་པའི་གང་ཟག་རྣམས་ལ་ཞལ་གདམས་སྙིང་གཏམ་བཞག་པའི་ལེའུ་སྟེ་གོ་གསུམ་པའོ༔ ༔
པདྨ་བཀའ་ཐང་ལེའུ་ ༩༤ གཏེར་སྟོན་བརྟག་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ བྲག་དམར་ལྷུན་གྲུབ་དཔལ་གྱི་བསམ་ཡས་སུ༔ མི་འཇིགས་སེང་གེ་བསྣོལ་བ་གསེར་ཁྲིའི་སྟེང་༔ བཀྲག་གསལ་ཟ་འོག་པཉྩའི་གདན་སྟེངས་སུ༔ འཇའ་རིས་འཕན་གདུགས་བྲེས་པའི་བསིལ་གྲིབ་ལ༔ རིན་ཅེན་སྤྱན་གཟིགས་བཀྲམ་པའི་སྟ་ཟུར་གྱི༔ ཕྱི་ནང་མཆོད་པ་བཤམས་པའི་མདུན་རོལ་ཏུ༔ ལྷ་མིའི་སྤྲིན་ཕུང་འཁྲིགས་པའི་དཀྱིལ་དབུས་ན༔ སངས་རྒྱས་གཉིས་པ་འགྲོ་བའི་དོན་བྱོན་པའི༔ སློབ་དཔོན་ཆེན་པོ་པད་འབྱུང་འཛུམ་བཅས་བཞུགས༔ དེ་དུས་ཛམ་གླིང་རྒྱལ་པོ་མངའ་བདག་གིས༔ གསེར་གྱི་མཎྜལ་གཡུ་ཡི་མེ་ཏོག་བཀོད༔ གཟི་དང་མུ་མིན་སྐྱོགས་སུ་འབྲས་ཆང་དང་༔ རྒུན་འབྲུམ་ཆང་བླུགས་སློབ་དཔོན་ཞལ་དུ་དྲངས༔ བཟའ་བཅའ་ཕྱི་ནང་མཆོད་པ་མང་ཕུལ་ནས༔
ཨེ་མ་ཧོ༔ སྤྲུལ་སྐུའི་མཆོག་གྱུར་འགྲོ་མགོན་པདྨ་འབྱུང་༔ བདག་གི་བོད་ཡུལ་མཐའ་འཁོབ་ཁ་བ་ཅན༔ གཅོང་རོང་གྲོག་པོ་མཚོན་ཆ་གཟིངས་པ་འདྲ༔ མ་རུངས་བློན་པོ་གདོང་དམར་སྲིན་པོའི་རིགས༔ དཀར་པོའི་སེམས་མེད་སྡིག་སྤྱོད་སེམས་ཅན་མང་༔ ཐུགས་རྗེས་གཟིགས་ནས་བཀའ་ལུང་མན་ངག་གནང་༔ ཕྱི་རབས་དོན་དུ་རིན་ཅེན་གཏེར་མང་སྦས༔ མ་འོངས་དོན་དུ་གཏེར་སྟོན་མང་འབྱུང་ན༔ སློབ་མའི་ཡིད་ཆེས་བཀུར་གནས་གང་ལ་བགྱི༔ ལས་ཅན་དོན་དུ་རི་བྲག་ལུང་པ་རྣམས༔ ཨུ་རྒྱན་ཉིད་ཀྱིས་སྒྲུབ་རིར་བྱིན་གྱིས་བརླབས༔ ཐུགས་རྗེས་བཟུང་བས་བར་ཆད་མི་འབྱུང་ཞིང་༔ གནས་རྣམས་ཀུན་ཏུ་སྒྲུབ་པ་འཕེལ་མོད་ཀྱང་༔ ཁྱད་པར་འཕགས་པའི་སྒྲུབ་གནས་གང་ལ་བགྱི༔ ཐམས་ཅད་མཁྱེན་པ་པདྨ་འབྱུང་གནས་ཀྱིས༔ ཕྱི་རབས་དོན་དུ་བདག་ལ་གསུང་བར་ཞུ༔ ཞེས་གསོལ་དབུ་ཐོད་བུད་བུད་ཕྱག་འཚལ་བས༔ སློབ་དཔོན་ཆེན་པོ་པདྨས་བཀའ་སྩལ་པ༔ གསོན་ཅིག་མངའ་བདག་ཛམ་གླིང་ཆོས་ཀྱི་རྒྱལ༔ རྒྱ་ཆེ་གྲངས་མངཆོས་རྣམས་གསུངས་པ་ཀུན༔ ཀུན་རྫོབ་དོན་དམ་གཉིས་སུ་ཤེས་པ་ཡིས༔ མདོ་སྔགས་སྤྱི་ལུང་ཡིད་ཆེས་དཔང་དུ་ཚུགས༔ གཏེར་སྟོན་རྣམ་ཐར་ཆ་ལུགས་ཅི་འདུག་དྲིས༔ ཆོས་རྣམས་ཐམས་ཅད་སྒྲིབ་པ་མེད་པའི་སྤྱན༔ མདོ་རྒྱུད་ཡིན་པས་ཚད་གཟུང་དཔང་པོ་བཏུབ༔ བསྟན་བཅོས་རྣམས་དང་གང་ཟག་ཚད་མི་གཟུང་༔ དཔང་པོ་མི་བཏུབ་ཁ་འཛིན་ཕྱོགས་ཆ་ཡིན༔ ཆོས་དང་ཆོས་མིན་གཉིས་ཕྱེ་བརྟག་པར་བྱ༔ ས་རྟགས་གང་ཤར་རྒྱལ་ཁམས་ཡོངས་སུ་ཉན༔ མང་པོའི་ནང་ནས་གཅིག་ནི་ཡིན་པར་གཟུང་༔ འགལ་བ་གཏེར་གཉིས་དུས་གཅིག་མི་འབྱུང་སྟེ༔ རིམ་པར་བྱུང་ན་མདོ་སྔགས་ལུང་གིས་ཟིན༔ དེ་ཡང་མྱ་ངན་འདས་པའི་མདོ་སྡེ་ལས༔ ཡུལ་གཅིག་འཁོར་ལོས་སྒྱུར་རྒྱལ་གཉིས་མི་འབྱུང་༔ འཇིག་རྟེན་ཁམས་ན་སངས་རྒྱས་གཉིས་མི་འབྱུང་༔ ཞེས་གསུངས་ང་ཡི་གཏེར་འབྱིན་དེ་འདྲའོ༔ བླ་མེད་དོན་རྫོགས་འདུས་པའི་རྩ་རྒྱུད་ལས༔ གསང་སྔགས་དར་དུས་སྔགས་པ་བདུད་ལས་བྱེད༔ བདེན་པ་མཐོང་བའི་སྤྲུལ་སྐུ་གཉིས་མི་འབྱུང་༔ འབྱུང་ན་མི་སྲིད་མདོ་རྒྱུད་ཀུན་དང་འགལ༔ ཞེས་གསུངས་ཇི་སྲིད་ཉིན་མོར་གྱུར་པའི་དུས༔ ཕྱོགས་བཞི་མཚམས་བརྒྱད་ཉི་མ་ཤར་བྱུང་ན༔ དེ་བཞིན་ང་ཡི་གཏེར་འབྱིན་དེ་འདྲའོ༔ གཞན་ཡང་སོ་སོར་འབྲང་བའི་མདོ་ལས་ཀྱང་༔ མེ་ལས་པདྨོ་སྐྱེ་བ་ངོ་མཚར་ཞིང་༔ འཇིག་རྟེན་སངས་རྒྱས་གཉིས་སྟོན་མཆོག་དེ་འདྲ༔ ཞེས་དང་ཇི་སྲིད་མཚན་མོར་གྱུར་པ་ན༔ ཕྱོགས་བཞི་མཚམས་བརྒྱད་ཟླ་བ་ཤར་བྱུང་ན༔ དེ་བཞིན་ང་ཡི་གཏེར་འབྱིན་དེ་འདྲའོ༔ བྱེ་བྲག་མ་འདྲེས་པ་ཡི་མདོ་ལས་ཀྱང་༔ ཡར་སྐྱེ་གཅིག་དང་མར་འགྲིབ་བཅོ་བརྒྱད་དེ༔ འཕེལ་འགྲིབ་གཉིས་ཀ་དུས་གཅིག་བྱེད་མི་སྲིད༔ མི་སྲིད་སྲིད་པའི་ཁྱད་འཕགས་དེ་འདྲ་བ༔ ས་སྟེང་བྱུང་ན་འཕགས་པའི་ལུང་གིས་བཀག༔ ཅེས་གསུངས་ཡུལ་གཅིག་འཁོར་ལོས་སྒྱུར་རྒྱལ་གཉིས༔ དེ་བཞིན་ང་ཡི་གཏེར་འབྱིན་དེ་འདྲའོ༔ འཕགས་པ་ཡོངས་སུ་མྱ་ངན་འདས་པ་ལས༔ ཁ་ཟས་བཟང་པོ་དུག་དང་འདྲེས་པ་ལ༔ ཡོན་ཏན་རོ་ཞིམ་འགྲངས་པ་སོགས་ཡོད་ལ༔ སྐྱོན་ནི་འཆི་བ་ཡོད་ཅེས་འཚོང་པ་ན༔ གླེན་པ་གཏི་མུག་ཅན་གྱིས་དེ་ཉོ་ཞིང་༔ མཁས་པ་ཤེས་རབ་རྣམས་མི་ཉོ་ཞེས༔ དམ་ཚིག་ཉམས་པའི་རྫུན་གཏེར་ཟོང་མ་ལ༔ ཉོ་བཙོང་བྱེད་པ་བསྟན་པའི་ལག་དམར་ཏེ༔ སྤེལ་སྒྲོགས་བྱེད་པ་ཤོ་གམ་ཅན་གྱི་གནས༔ དམ་པའི་ཆོས་མཆོག་པདྨ་དཀར་པོ་ལས༔ དེ་བས་འཇིག་རྟེན་སློབ་དཔོན་སངས་རྒྱས་ཀྱི༔ སྐྱོབ་པ་ལྡེམ་པོའི་ངག་ནི་ཤེས་པར་གྱིས༔ ཐེ་ཚོམ་ཆོད་ལ་སོམ་ཉི་རྣམས་སྤངས་ཏེ༔ སངས་རྒྱས་འགྱུར་གྱིས་དགའ་བ་རབ་ཏུ་བསྐྱེད༔ ཅེས་གསུངས་ཡིན་མིན་ཐེ་ཚོམ་སྒྲོ་འདོགས་ཆོད༔ འདམ་སེང་མང་སྟེ་གངས་ཀྱི་སེང་གེ་དཀོན༔ མེ་ཏོག་མང་སྟེ་ཨུ་དུམྺཱ་ར་དཀོན༔ ནགས་ཚལ་མང་སྟེ་བྱང་ཆུབ་ལྗོན་ཤིང་དཀོན༔ རྒྱ་མཚོ་མང་སྟེ་འོ་མ་ཅན་ནི་དཀོན༔ འདབ་ཆགས་མང་སྟེ་མཁའ་ལྡིང་ཁྱུང་ནི་དཀོན༔ རྒྱལ་པོ་མང་སྟེ་འཁོར་ལོས་སྒྱུར་རྒྱལ་དཀོན༔ རྫུས་སྐྱེས་མང་སྟེ་པད་སྡོང་སྐྱེས་པ་དཀོན༔ བདུད་རྩི་འབྱུང་བ་རྩ་བའི་རྒྱུད་ཆེན་ལས༔ ང་ཡི་བསྟན་པ་སྙིགས་མར་གྱུར་པ་ན༔ ཆོས་རྣམས་ཚོང་དུས་འོ་མ་ཇི་བཞིན་དུ༔ ངན་པས་བསླད་ནས་ཐུར་དུ་ལྟུང་བར་བྱེད༔ དེ་བཞིན་ལུང་པ་རེ་ན་གཏེར་སྟོན་རེ༔ ཡུལ་གྲུ་རེ་ན་གྲུབ་ཐོབ་གྲགས་འདོད་རེ༔ བསྟན་པའི་ཆོས་བཤས་ལག་དམར་ཁྲག་ཅན་རེ༔ ཀུན་རྫོབ་གཏེར་འདྲ་གཏེར་མའི་སེལ་བྱེད་རེ༔ ཡོན་ཏན་ཆེ་སྟེ་སྐྱོན་གྱི་གོང་པོ་རེ༔ ཡིན་ཡིན་མང་སྟེ་ཡིད་སྐྱོ་ཐེ་ཚོམ་མེད༔ དེ་ལ་མཁའ་འགྲོ་མ་དགྱེས་མི་དགེའི་རྟགས༔ མི་འཚམ་རྣམ་པ་མང་དུ་འབྱུང་བར་འགྱུར༔ དེ་དུས་བཀུར་གནས་ས་རྟགས་ཤར་ལ་བྱེད༔ གཏེར་ཀ་མ་མཐུན་ལུང་བསྟན་ཟིན་ལ་བྱེད༔ ཆང་དང་ཆུ་གཉིས་ངོས་རྟགས་འདྲ་བས་གསལ༔ ཆོས་ལ་རྣོ་བའི་ནུས་པ་འདུག་ལ་བྱེད༔ ཆོས་དེས་འདུལ་ཞིང་ཉམས་སུ་ལེན་ལ་བྱེད༔ ལྷ་དང་འདྲེ་གཉིས་བསྲེས་ཀྱང་མི་འདྲེ་སྟེ༔ ང་ཡིས་བཤད་དང་མཐུན་པ་ཞིག་ལ་བྱེད༔ ས་འོག་གསེར་སྦས་འོད་ནི་མཁའ་ལ་ལྡིང་༔ མདོ་སྔགས་ལུང་དང་མཐུན་པ་ཞིག་ལ་བྱེད༔ ང་ཡི་སྤྲུལ་པར་ཟོག་པོ་ཟེར་ཞིང་གཤེ༔ ཟོག་པོ་རྣམས་ལ་འདི་ཕྱིའི་བློ་རྟེན་འཆའ༔ དྲན་པ་གསལ་ཏེ་སྡིག་ངོ་མི་ཤེས་ན༔ ཤེས་པ་ཞིབ་སྟེ་ཆོས་ཀྱི་མཚང་མི་ལོན༔ དེ་ཕྱིར་བདུད་ཀྱི་བསྟན་པ་དར་བ་ཡིན༔ ང་ལ་རྣམ་ཐར་འདྲ་མིན་མང་པོ་འོང་༔ པདྨ་འབྱུང་གནས་ཆུང་བས་བསམ་ཡས་འོངས༔ ཆེན་པོས་མ་བྱོན་ཟེར་ནས་གྲུབ་མཐའ་རྩོད༔ ངའི་འདི་པད་འབྱུང་ཆེན་པོའི་ཆོས་ཡིན་ཟེར༔ བརྒྱུད་པ་དེ་ནས་བྱས་ཏེ་མི་མགོ་བསྐོར༔ དེ་བཞིན་ཀླུ་སྒྲུབ་ཨཱརྱ་གཉིས་གསུམ་ཟེར༔ མི་འདྲ་མང་པོ་ཡི་གེར་འདུག་པ་ནི༔ ཞི་དུལ་ཤེས་རབ་ཅན་གྱིས་གོ་བར་བྱ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ གཏེར་སྟོན་བརྟག་པའི་ལེའུ་སྟེ་གོ་བཞི་པའོ༔ ༔
པདྨ་བཀའ་ཐང་ལེའུ་ ༩༥ མ་འོངས་སྒྲུབ་གནས་བསྟན་པ།
དེ་ནས་སྒྲུབ་པ་བྱེད་པའི་གནས་གསུངས་པ༔ སྒྲུབ་གནས་ཀུན་གྱི་རྒྱལ་པོ་ཁྱད་འཕགས་ནི༔ མཁའ་འགྲོ་མ་བསྒྲུབས་རང་བཞིན་འདུ་བའི་གནས༔ སྐུ་ཡི་དབེན་གནས་བསྒྲགས་ཀྱི་ཡང་རྫོང་ཡིན༔ གསུང་གི་དབེན་གནས་བསམ་ཡས་མཆིམས་ཕུ་སྟེ༔ ཐུགས་ཀྱི་དབེན་གནས་ལྷོ་བྲག་མཁར་ཆུ་ཡིན༔ ཡོན་ཏན་དབེན་གནས་ཡར་ཀླུངས་ཤེལ་གྱི་བྲག༔ འཕྲིན་ལས་དབེན་གནས་མོན་ཁ་སེང་གེ་རྫོང་༔ ཁྱད་པར་ཡར་ཀླུངས་ཤེལ་བྲག་མཆིམས་ཕུ་གཉིས༔ རྒྱ་གར་དུར་ཁྲོད་བསིལ་བའི་ཚལ་དང་མཚུངས༔ ལུང་ལྔ་གླིང་གཅིག་ལྗོངས་གསུམ་གངས་ཉི་ཤུ༔ དེ་ཡང་དབུས་ན་ཤངས་ཀྱི་ཟབ་བུ་ལུང་༔ ཤར་ཕྱོགས་ཀོང་པོའི་ཡུལ་ན་ལྗོན་པ་ལུང་༔ ལྷོ་ཡི་ཕྱོགས་ན་མོན་གྱི་སྲིབས་བཙན་ལུང་༔ ནུབ་ཀྱི་ཕྱོགས་ན་འགོས་ཀྱི་ཕག་རི་ལུང་༔ བྱང་གི་ཕྱོགས་ན་སྐྱིད་ཀྱི་གྲོ་མ་ལུང་༔ ཤར་ལྷོ་མཚམས་ན་སྦས་ཡུལ་པདྨ་གླིང་༔ ལྷོ་ནུབ་མཚམས་ན་སྦས་ཡུལ་འབྲས་མོ་ལྗོངས༔ ནུབ་བྱང་མཚམས་ན་སྦས་ཡུལ་མཁན་པ་ལྗོངས༔ བྱང་ཤར་མཚམས་ན་སྦས་ཡུལ་ལུང་གསུམ་ལྗོངས༔ ཐང་ལྷ་ཏི་སེ་མང་མཁར་བུ་ལེ་གངས༔ སྟར་སྒོ་ཕོ་མ་མཁའ་རི་རྡོ་རྗེ་གངས༔ ཇོ་མོ་ཁ་རག་གང་བཟང་རྩེ་རྡུམ་གངས༔ ལ་ཕྱི་ཚེ་རིང་སྣ་ནམ་ཏེ་སྒྲོ་གངས༔ འོ་དེ་གུང་རྒྱལ་ཤམ་པོ་གསལ་རྗེ་གངས༔ ཧ་འོ་གངས་བཟང་ཙ་རི་ང་ལའི་གངས༔ ང་ཡི་ཞབས་ཀྱིས་བཅགས་པའི་གནས་ཆེན་དུ༔ ཁྱད་པར་འཕགས་པའི་སྒྲུབ་གནས་དེ་དག་ཀུན༔ དེ་ཡང་གང་ཟག་རབ་འབྲིང་ཐ་མ་གསུམ༔ གང་ཟག་དབང་པོར་རབ་ཀྱིས་བསྟེན་པ་ལ༔ བསམ་ཡས་མཆིམས་ཕུ་ཡར་ཀླུངས་ཤེལ་གྱི་བྲག༔ ཡེར་བ་ཟླ་བ་ཕུག་གི་གནས་འདི་གསུམ༔ བསམ་ཡས་ཁྲ་འབྲུག་ར་སའི་གཙུག་ལག་དང་༔ ཟུང་དུ་འབྲེལ་བའི་གནས་ཆེན་སྒྲུབ་པའི་གནས༔ ཞིང་མཆོག་དམ་པ་ཀུན་ལའང་དེ་ལས་མེད༔ འདི་གསུམ་གནས་ལ་མཆོག་ཐུན་གང་བསྒྲུབ་པ༔ སྒྲུབ་པ་བྱས་ན་མི་འགྲུབ་གང་ཡང་མེད༔ གནས་འབྲེལ་ཙམ་ཡང་རིག་འཛིན་གྲལ་ལ་ཚུད༔ ཕུང་པོ་བོར་ནས་མཁའ་སྤྱོད་གནས་སུ་འགྲོ༔ ཁྱད་པར་ཡར་ཀླུངས་ཤེལ་གྱི་བྲག་ཕུག་འདི༔ བདུད་རྩི་སྨན་སྒྲུབ་བྱས་པའི་གནས་ཡིན་པས༔ གསང་སྔགས་མཐར་ཕྱིན་ཨུ་རྒྱན་ཡུལ་ལྟ་བུ༔ ཡ་མཚན་སྒྲུབ་ཁང་བྲག་ཕུག་ཁྱད་འཕགས་ཡོད༔ ཞི་ཁྲོ་སོགས་ཀྱི་གཞལ་ཡས་ཁང་མང་བཞུགས༔ བོད་འབངས་དགའ་དང་སྤྲོ་བར་གྱུར་པའི་བྲག༔ ཡོན་ཏན་བརྒྱ་ལྡན་བསམ་ལས་འདས་པར་བརྗོད༔ དེ་ལ་གནས་ཚད་དུ་རུཥྐས་མི་ཕེབས༔ གངས་དཀར་ཏི་སེ་ཙ་རི་ཟམ་བུ་ལུང་༔ གནས་གཞན་ལ་ཡང་ཡོན་ཏན་ཡོད་མོད་ཀྱང་༔ བསམ་གྲུབ་ཤེལ་གྱི་བྲག་ཕུག་ཆར་མི་ཉེ༔ ཨུ་རྒྱན་ཧེ་རུ་ཀ་དང་མཚུངས་དཔེར་བཞག༔ འབྲིང་དང་ཐ་མས་སྦས་ཡུལ་གངས་ལ་བསྒྲུབ༔ སྒྲུབ་གནས་རི་བྲག་མང་པོ་བསམ་འདས་ཀྱང་༔ སྒྲུབ་གནས་གཙུག་ལག་ཁང་དང་ཟུང་འབྲེལ་བ༔ འདི་གསུམ་དགེ་བ་བརྒྱ་འགྱུར་འཐོབ་པའི་གནས༔ ཚོགས་འཁོར་བྱས་ཚད་ཆུད་ཟོས་སོང་རེ་སྐན༔ ཞེས་གསུངས་འཛམ་གླིང་རྒྱལ་པོ་དགྱེས་པར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ མ་འོངས་སྒྲུབ་གནས་བསྟན་པའི་ལེའུ་སྟེ་གོ་ལྔ་པའོ༔ ༔
པདྨ་བཀའ་ཐང་ལེའུ་ ༩༦ སངས་རྒྱས་བསྟན་པའི་འཕེལ་འགྲིབ་བསྟན་པ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིས༔ སློབ་དཔོན་ཆེན་པོ་པདྨ་འབྱུང་གནས་ལ༔ བསྟན་པའི་འགྲིབ་ཚུལ་ཇི་ལྟར་འགྲིབ་ཅེས་ཞུས༔ སློབ་དཔོན་ཆེན་པོ་པདྨས་བཀའ་སྩལ་པ༔ བསྐལ་པ་རྫོགས་ལྡན་གཉིས་ལྡན་གསུམ་ལྡན་དང་༔ རྩོད་ལྡན་ཡན་ཆད་སངས་རྒྱས་རེ་རེ་བྱོན༔ ཐུབ་པའི་བསྟན་པ་ལྔ་སྟོང་ལྔ་བརྒྱ་གནས༔ སྐྱེ་དགུའི་བདག་མོ་རབ་ཏུ་བྱུང་བ་ཡིས༔ བུད་མེད་བསོད་ནམས་ཆུང་བས་ལྔ་བརྒྱ་ནུབ༔ ལྷག་མ་བསྐལ་པ་ལྔ་སྟོང་གནས་པ་ལ༔ ལོ་ནི་བརྒྱ་བརྒྱ་དག་ལ་ལན་རེ་བྲི༔ ཚེ་ལོ་བཅུ་པ་དག་ལ་མཐིལ་དུ་ཐུག༔ དང་པོ་ཚེ་ལོ་བརྒྱ་ནས་དགུ་བཅུའི་བར༔ ལོ་ནི་སྟོང་དུ་སྟོན་པའི་བསྟན་པ་གནས༔ དེ་ནས་བསྟན་པའི་གཟུགས་བརྙན་འབྱུང་བ་ནི༔ ཚེ་ལོ་བརྒྱད་ཅུ་པ་ལ་མདོ་སྡེ་འབྱུང་༔ བདུན་ཅུ་པ་ལ་འདུལ་བའི་སྡེ་སྣོད་འབྱུང་༔ དྲུག་ཅུ་པ་ལ་མངོན་པའི་སྡེ་སྣོད་འབྱུང་༔ སྣང་སྲིད་ལྷ་འདྲེ་འཁྲུགས་ནས་མི་རུང་ལྟས༔ བསྟན་པའི་སྟོད་སྟོངས་སྨད་སྟོངས་བར་སྟོངས་འབྱུང་༔ བསྐལ་པ་ཕྲན་བུ་འཚེ་བ་མང་དུ་འབྱུང་༔ ལྔ་བརྒྱ་ཕྲག་བདུན་རྗེས་ནས་ལོ་བདུན་ན༔ རྟགས་ཙམ་འཛིན་གྱི་བསྟན་པའི་མགོ་གཡོ་འཛུགས༔ ཕེ་གྲུམ་དར་ཞིང་རྨོངས་པའི་ཁྱུ་གླིང་འབྱུང་༔ ཆོས་ཀྱི་ཐེར་ལ་ཁ་འཛིན་བསྟན་གཉིས་འཁྲུག༔ ལྔ་བརྒྱ་ཕྲག་གསུམ་རྟགས་ཙམ་འཛིན་གྱི་དུས༔ ཚེ་ལོ་ལྔ་བཅུ་པ་ལ་བཀའ་འདུས་འབྱུང་༔ ལོ་ཡི་སྙིགས་མ་གཉིས་ནག་མེ་ཕོ་སྟག༔ ཟླ་བའི་སྙིགས་མ་བདུན་དམར་ས་མོ་ཡོས༔ ཞག་གི་སྙིགས་མ་དྲུག་དཀར་ལྕགས་ཕོ་འབྲུག༔ དུས་ཚོད་སྙིགས་མ་གསུམ་མཐོན་ལྕགས་ཕོ་ཁྱི༔ མི་ཡི་སྙིགས་མ་ལྔ་བཅུ་ཁ་རལ་མི༔ མཐའ་དབུས་འཁྲུག་ཅིང་མ་སྨད་ཡིད་མི་ཆེས༔ ལུགས་བླུགས་བྲིས་བྲིས་གླེགས་བམ་མཆོད་རྟེན་འཇིག༔ ཆར་ཆུ་མི་སྙོམས་འབྲས་བུ་དུས་མི་སྨིན༔ གསོ་རུ་མི་བཏུབ་ནད་ཡམས་མང་པོ་འོང་༔ མུ་གེ་རབས་ཆད་ཡུགས་ས་མང་དུ་འབྱུང་༔ གྲོས་ཅི་རང་གི་སྙིང་ལའང་ཡིད་མི་ཆེས༔ ཉེ་བ་འཐབ་ཅིང་སོ་ཁ་ཐེམ་པར་གཏོད༔ གདོན་དུ་ཕོ་གདོན་བདུད་དང་ཁྱབ་འཇུག་དར༔ འདྲེ་རུ་གསོན་འདྲེ་མོ་གདོན་ཤི་ཚད་གནོད༔ མི་དགེའི་ལས་ཀྱི་ལམ་རྣམས་འཕེལ་བ་འབྱུང་༔ སྤྱང་ཀི་རྒྱབ་སེར་དགེ་སློང་ཚུལ་འཆོས་རྣམས༔ བདུད་དབང་གྱུར་པས་ཆོས་གསུམབསྟེན་པ་འབྱུང་༔ དེ་ནས་བསྟན་པའི་གཟུགས་བརྙན་བརྗེས་པ་དང་༔ ཚེ་ལོ་བཞི་བཅུ་པ་ལ་དགྲའི་བསྐལ་པ༔ མི་རྣམས་གློ་བུར་ཡེ་འདྲོག་གླང་ཐབས་འཆི༔ གདོན་དུ་ས་བདག་ཀླུ་ནད་གཉན་ནད་འབྱུང་༔ བུད་མེད་མོ་ལུས་ཐོབ་ཚད་གསོན་འདྲེར་གདོན༔ ཐོག་དང་ས་གཡོས་དམག་དང་མུ་གེ་འབྱུང་༔ པད་འབྱུང་སྤྲུལ་པ་ཤར་གྱིཕྱོགས་ནས་འོང་༔ ཚེ་ལོ་སུམ་ཅུ་པ་ལ་མུ་གེ་འབྱུང་༔ མཉམ་ལས་ཚེ་སྟོད་བཟང་པོས་ངན་པ་བསྟོད༔ ནད་དུ་འདུ་བ་མཐའ་དག་འཁྲུག་པ་འབྱུང་༔ གདོན་དུ་ཀླུ་བདུད་དམ་སྲི་འབྱུང་པོ་དར༔ འདྲེ་རུ་བྱིས་པ་ཐམས་ཅད་ཐེའུ་རང་གནོད༔ ཁྲིམས་འཇིག་ཡུལ་འཆུགས་གནམ་ས་གོ་ལོག་འོང་༔ པད་འབྱུང་སྤྲུལ་པ་ལྷོ་ནུབ་མཚམས་ནས་འབྱུང་༔ ཉི་ཤུ་པ་ལ་ནད་ཀྱི་བསྐལ་པ་འབྱུང་༔ མི་དང་ལྷ་བྱེ་སྡེ་བར་བུད་མེད་འོང་༔ ལོ་གཅིག་བར་དུ་ཆར་པ་ཐུལ་ཙམ་མེད༔ སྐབས་སྐབས་མུ་གེ་ཟླ་བ་དགུ་དགུ་འབྱུང་༔ ནད་དུ་འཆི་ནད་རིམས་ལྷོག་གག་གཟེར་འབྱུང་༔ གདོན་དུ་དམ་ལོག་རྒྱུ་བ་རྣམ་བཞི་དར༔ ཉི་མ་གཟས་ཟིན་ལམ་མི་མཐོང་བ་འབྱུང་༔ འདྲེ་རུ་གནམ་ནད་སྨྱོ་འབོག་བརྒྱལ་ནད་གནོད༔ པད་འབྱུང་སྤྲུལ་པ་བྱང་གི་ཕྱོགས་ནས་འོང་༔ ཚེ་ལོ་བཅུ་པར་མཚོན་གྱི་བསྐལ་པ་འབྱུང་༔ སྙིགས་མའི་མཐར་ཐུག་བསྐལ་པ་ངན་པ་སྟེ༔ བུ་ཚས་ལོ་བཅུ་ལོན་པར་སྨོན་ལམ་འདེབས༔ བུ་མོ་བཙས་པ་ལོ་ལྔར་ཁྱིམ་ཐབ་གཏོད༔ ལུས་ཀྱི་ཚད་ནི་མཐོ་གང་ཆག་གང་པ༔ ཁ་ཟས་མཆོག་གྱུར་ཀོ་ཊ་དཔའ་བོ་ཟ༔ ར་ལུག་འབྲི་གནག་གཅིག་ཀྱང་མི་འབྱུང་སྟེ༔ གོས་ཀྱི་མཆོག་གྱུར་སྐྲ་ཡི་ལྭ་བ་གྱོན༔ རྒྱན་ཆའི་མཆོག་གྱུར་མཚོན་ཆ་དག་ལ་བྱེད༔ དེ་དུས་རོ་མཆོག་རྣམ་པ་ལྔ་ནུབ་འགྱུར༔ སྦྲང་མ་ཡོད་ཀྱང་སྦྲང་རྩི་མི་འབྱུང་ཞིང་༔ འོ་ཞོ་ཡོད་ཀྱང་དཀྲོགས་ན་མར་མི་འབྱུང་༔ ཡུངས་ཀར་ཏིལ་ཡོད་བཙིར་ཀྱང་སྣུམ་མི་འབྱུང་༔ བུར་ཤིང་ཀར་ཤིང་ཡོད་ཀྱང་བཅུད་མི་འབྱུང་༔ ལན་ཚྭ་གཏན་ནས་རང་བསྐམས་མེད་པར་འགྲོ༔ དེ་དུས་ངན་བྱེད་བསྟོད་ཅིང་བཟང་བྱེད་སྨད༔ ཕ་མ་དགེ་སློང་བྲམ་ཟེ་དག་ཏུ་ནི༔ མི་འཛིན་ཀུན་གྱིས་སྐུར་པ་འདེབས་ཤིང་སྨད༔ ཚེ་ལོ་བཅུ་པ་བྱེད་པའི་རྐྱེན་ངན་གསུམ༔ མཚོན་དང་ནད་དང་མུ་གེ་བྱེད་པ་ཡིན༔ དང་པོ་མི་རྣམས་གནོད་སེམས་སྐྱེས་པས་ཏེ༔ སེམས་ཅན་གཅིག་གིས་གཅིག་མཐོང་ཤས་ཆེར་གསོད༔ གསོད་སེམས་སྐྱེས་པས་རྔོན་པས་དགོན་མཐོང་བཞིན༔ རྡོ་དང་ཤིང་དང་བོང་བ་གང་དག་བླངས༔ མཚོན་རྣོར་གྱུར་ནས་གཅིག་གིས་གཅིག་གསོད་ཅིང་༔ གང་དག་ཤི་བ་ཐམས་ཅད་དམྱལ་བར་ལྟུང་༔ དེ་དུས་སེམས་ཅན་དམྱལ་བ་ཤིན་ཏུ་མང་༔ མཚོན་གྱི་བསྐལ་པས་མཐའ་རུ་སྟོངས་པར་བྱེད༔ བསྟན་པའི་དམ་ཆོས་ནུབ་པར་གྱུར་ནས་ནི༔ བོད་ཀྱི་བསྟན་པ་ལི་ཡི་ཡུལ་དུ་སྡུད༔ རྟགས་ཙམ་འཛིན་གྱིས་བསྟན་པ་ཉམས་པའི་དུས༔ ལི་ཡུལ་རྒྱལ་པོ་ཆོས་སྐྱོང་རྨེ་བ་ཅན༔ རྒྱལ་པོ་དེ་ཡི་བླ་མཆོད་ལྔ་བརྒྱ་པོ༔ དྲོ་དུས་ཆོས་ཀྱི་རྒོལ་རྩོད་ཐེ་ཚོམ་གཅོད༔ གཅིག་ལ་གཅིག་རྒོལ་བཟོད་པའི་གོ་ཆ་ཤོར༔ དུག་ལྔ་རགས་པས་ཞེ་སྡང་རྦ་ཀློང་འཁྲུགས༔ མཐོ་དམན་ཚིག་གིས་ཀུན་བསླངས་ཁ་ལག་ཤོར༔ ཀུན་གྱིས་སྐ་རགས་གསེབ་ནས་གྲི་གུ་བཏོན༔ གཅིག་ལ་གཅིག་ཐེབས་བླ་མཆོད་ལྔ་བརྒྱ་བོ༔ མཚོན་གྱིས་གྲི་རུ་ཁྲག་གིས་འདམ་དུ་ཚུད༔ རྒྱལ་པོ་མྱ་ངན་ཁང་པར་ཞུགས་པའི་དུས༔ ཕྱི་བློན་ནང་བློན་རིག་པ་ཅན་རྣམས་ཀྱིས༔ བ་དམར་གླང་དམར་ཀོ་བ་ལུས་ལ་གྱོན༔ གྲོད་པས་མགོ་གཏུམས་གསེག་ཤང་ལག་ན་ཐོགས༔ རྒྱལ་པོའི་སྤྱན་གྱིས་ནོན་པའི་ས་ལ་རྒྱུ༔ ནང་བློན་ཕྱག་ཚང་རྒྱལ་མོ་ལ་སོགས་ཀྱིས༔ རྗེ་གཅིག་བཞེངས་དང་བླ་མཆོད་ས་མ་སྟོངས༔ རི་བྲག་སྐྱིབས་སུལ་སྒོམ་ཆེན་ཐེམས་སྤངས་རྣམས༔ རི་ཁྲོད་དབེན་པ་བསྟེན་པའི་ས་སྡེ་ཡོད༔ དེ་ཉིད་རྒྱལ་པོས་གཟིགས་པས་མྱ་ངན་ཞི༔ བཙུན་པ་གླང་དམར་ཤཱཀྱའི་ཚུལ་འཆོས་རྣམས༔ རྒྱལ་པོས་གཟིགས་ཕྱིར་ཆས་གཉིས་བསྟེན་པ་འབྱུང་༔ ས་ཡི་བཅུད་ཤོར་བཙོད་དང་ཆུ་སྤུན་རུལ༔ གོས་མདོག་བསྒྱུར་བའི་ཚོས་ལ་ནུས་པ་མེད༔ སྐྲ་འབྲེག་མི་འདོད་རབ་བྱུང་མཁན་སློབ་སྟོངས༔ གླེགས་བམ་ཐམས་ཅད་ཡི་གེ་རང་བྱིར་འཕྲོ༔ སྔ་མ་བྱི་ནས་ཕྱི་མ་འབྲི་མི་བཏུབ༔ ཆོས་ཀྱི་ཉན་བཤད་ན་བུན་བཞིན་དུ་ཡལ༔ སྒོམ་དང་སྒྲུབ་པ་ནམ་ལངས་སྐར་མ་བཞིན༔ གཅིག་ཀྱང་མེད་ཅིང་མི་དགེ་བཅུ་ལ་སྤྱོད༔ གཉིས་པ་ནད་ཀྱི་བསྐལ་པ་འབྱུང་བ་ནི༔ མི་རྣམས་མི་དགེ་ལོག་པར་སྤྱད་པ་ཡིས༔ ལྷ་འདྲེ་འཁྲུགས་ནས་ནད་རིམས་དུ་མ་གཏོང་༔ བཅོས་ཐབས་མེད་པའི་ནད་ཀྱིས་མང་པོ་འཆི༔ སྔ་དྲོ་ཕྱིམ་རེད་རོ་ལ་གྲངས་མི་ལོང་༔ མ་ཤི་བ་རྣམས་མིག་དྲེད་མྱ་ངན་ཆུང་༔ གསུམ་པ་མུ་གེའི་བསྐལ་པ་འབྱུང་བ་ནི༔ སེར་སྣས་ཀུན་བསླངས་མི་དགེ་སྤྱད་པ་ཡིས༔ ལྷ་ཀླུ་འཁྲུགས་ནས་ཆར་ཆུ་དུས་མི་ཕེབས༔ ལོ་ནི་བཅོ་བརྒྱད་ཐན་པ་འབྱུང་བར་འགྱུར༔ འབུ་སྲིན་བཙའ་དང་སད་སེར་གྲ་སྐྱ་དང་༔ ལྗང་པ་ལེགས་རྣམས་སྙེ་ནག་དུད་སྐྱར་འགྲོ༔ དེ་དག་རྐྱེན་བྱས་མུ་གེ་རྣམ་གསུམ་འབྱུང་༔ གབ་རྩེ་བ་དང་རུས་གོང་དཀར་པོ་དང་༔ ཐུར་མས་ཚོལ་བ་ཞེས་བྱ་འབྱུང་བར་འགྱུར༔ དང་པོ་གབ་རྩེ་བ་ནི་འདི་ལྟ་སྟེ༔ འབྲས་སམ་ནས་སམ་སྲན་མ་ལ་སོགས་པ༔ འབྲུ་རྙེད་གྱུར་ན་ཟ་མ་ཏོག་ཏུ་བཅུག༔ ཉིན་མཚན་མེད་པར་དེ་ལ་མེལ་ཚེ་བྱེད༔ བཀྲེས་པས་ཉམས་སྟོབས་ཆུང་བས་ས་ལ་འགྱེལ༔ ལྡང་བར་མི་ནུས་གཞན་གྱིས་བསླང་ནུས་མེད༔ གང་ཞིག་དེ་ཉིད་དུ་ནི་འཆི་བ་ཡིན༔ གཉིས་པ་རུས་གོང་དཀར་པོ་བསྟན་པ་ནི༔ སྔོན་དུས་ཤི་བའི་རུས་པ་མང་པོ་བསྡུས༔ འདི་ནི་ཁ་ཟས་ཟོས་པའི་རུས་པ་ཡིན༔ ཆུ་མང་ནང་དུ་བསྐོལ་ནས་ཁུ་བ་འཐུང་༔ གསུམ་པ་ཐུར་མས་འཚོལ་བ་བསྟན་པ་ནི༔ བང་བར་འབྲུ་བླུགས་ཤུལ་གྱི་ལུས་པ་བྲུས༔ ཆུ་མང་ནང་དུ་གདུ་ནས་ཁུ་བ་འཐུང་༔ འབྲུ་ནི་ཐུར་མས་སུས་ལོན་ཟ་བར་བྱེད༔ ལྟོགས་དྲགས་བུ་ཚ་བསད་ནས་ཟ་བ་དང་༔ མི་བདག་ངན་པ་བརྐུས་ནས་ཟ་བྱེད་ཅིང་༔ ས་ཟ་རྡོ་ཟ་ཤིང་ཟ་སྔོ་སྡད་ཟ༔ དེ་ཡང་མཚོན་གྱིས་གསོད་པ་ལོ་བདུན་འབྱུང་༔ ནད་ཀྱིས་གསོད་པ་ཟླ་བདུན་ཞག་བདུན་འབྱུང་༔ མུ་གེས་གསོད་པ་ལོ་བདུན་ཟླ་བདུན་འབྱུང་༔ འགའ་ཞིག་ལུས་པ་རེ་རེ་ཆུ་གླིང་ངམ༔ རི་བོའི་ལྗོངས་སམ་ཤིང་གི་ཁོང་གསེང་ཞུགས༔ ཞག་བདུན་བར་དུ་ཆུ་ཡིས་འཚོ་ཞིང་འདུག༔ དེ་ནས་གྲོང་ཡུལ་ཀུན་ཏུ་ཕྱིར་ལོག་ནས༔ གཅིག་གིས་གཅིག་མཐོང་བརྩེ་སེམས་ཉེ་བར་ལྡན༔ མ་ཤི་གསོན་པ་མཐོང་ཟེར་ཡ་མཚན་བྱེད༔ རབ་ཏུ་དགའ་བས་ཁ་གཏུགས་སྐེ་ལ་འཁྱུད༔ དེ་ནས་རྒྱལ་བ་བྱམས་པའི་སྤྲུལ་པ་ནི༔ བོངས་ཚད་ཁྲུ་དོ་ཡོད་པ་ཞིག་བྱུང་ནས༔ དེ་ལ་ངོ་མཚར་སྐྱེས་ནས་གཏམ་དྲིས་པས༔ ངས་ནི་དགེ་བཅུ་བླངས་ཤིང་སྡིག་བཅུ་སྤངས༔ འདོད་ཆགས་སྦྲང་མ་ལྟ་བུར་ཆོག་ཤེས་མེད༔ ཞེ་སྡང་སེང་གེ་ལྟ་བུར་ལྡོག་རྒྱུ་མེད༔ གཏི་མུག་ཁྱི་སྣ་བཞིན་དུ་མྱུལ་མྱུལ་པོ༔ དེ་གསུམ་སྤངས་པས་བསྟན་པ་ཡར་ལ་འཕེལ༔ ཞེས་གསུངས་བློ་སེམས་དགེ་ལ་གཞོལ་བར་མཛད༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སངས་རྒྱས་བསྟན་པའི་འཕེལ་འགྲིབ་བསྟན་པའི་ལེའུ་སྟེ་གོ་དྲུག་པའོ༔
པདྨ་བཀའ་ཐང་ལེའུ་ ༩༧ ལྷོ་ནུབ་སྲིན་པོའི་ཡུལ་དུ་འབྱོན་པར་དགོངས་པ།
དེ་ནས་གླང་གི་ཟླ་བའི་ཚེས་གཅིག་ལ༔ བོད་ཀྱི་ལོ་གསར་བྱེད་པའི་ཆས་བསྡུས་ནས༔ བསམ་ཡས་ཕྱོགས་བཞིར་འབངས་ཀྱི་སྲང་ལམ་བཙུགས༔ ནུབ་མོ་འབངས་རྣམས་སྒྲོན་མེ་འདེགས་སུ་བཅུག༔ རྒྱལ་པོས་ཕྱོགས་བཞིར་རྟ་རྒྱུག་བྱེད་པ་ལ༔ སློབ་དཔོན་ད་ལན་ལོ་གསར་མ་བྱེད་གསུངས༔ རྒྱལ་པོས་བློན་པོ་ཀུན་དང་གྲོས་བྱས་པས༔ ལོ་གསར་གཅོག་པ་གར་འཐད་གཟབས་བྱེད་ཟེར༔ སློབ་དཔོན་རྒྱལ་པོར་རྟ་རྒྱུག་མ་བཏང་གསུངས༔ རྒྱལ་པོའི་དབང་ཕྱེད་བློན་པོའི་ལག་ཤོར་བས༔ རྒྱལ་པོས་རྒྱན་བཏགས་རྟ་ཞོན་རྟ་རྒྱུག་བཏང་༔ ནུབ་ཕྱོགས་སྲངས་སུ་དཔག་མདའ་འབྱུང་ནས་བསྙུང་༔ ལ་ལ་སྲས་ཀྱིས་བརྒྱབ་པ་ཡིན་ནམ་ཟེར༔ ལ་ལ་བོན་བློན་གཅིག་གིས་བརྒྱབ་བམ་ཟེར༔ ལ་ལ་སྣ་ནམ་ཞང་གིས་བརྒྱབ་བམ་ཟེར༔ ལ་ལ་རྟས་བསྐྱུར་ཤིང་རྩ་ཟུག་གམ་ཟེར༔ སུས་བརྒྱབ་རྩད་མེད་ཁུངས་མེད་ངོ་མ་ཤེས༔ ཞལ་མ་བསྲུངས་པས་ཚད་པའི་ནད་དང་བསྡོངས༔ ལྔ་བཅུ་རྩ་དགུ་འབྲུག་ལ་ཟུང་མཁར་གཤེགས༔ གསང་ནས་སློབ་དཔོན་རྒྱལ་སྲིད་བཅུ་བཞིར་བཟུང་༔ དྲུག་ཅུ་རྩ་དགུ་སྟག་ལ་གསང་བརྟོལ་ནས༔ མུ་ནེ་བཙན་པོ་རྒྱལ་སར་བཏོན་པ་ལ༔ ཚེ་སྤོང་བཟའ་ལ་བཀྱོན་ཕབ་དུག་གིས་བཀྲོངས༔ དེ་ནས་མུ་ཏིག་བཙན་པོ་རྒྱལ་སར་བཏོན༔ ངང་བྱུང་དཔལ་གྱི་རྒྱལ་མོ་བཙུན་ལ་སོགས༔ བཙུན་མོ་གསུམ་བཞེས་རྒྱལ་སྲིད་ཆོས་ཀྱིས་བསྐྱངས༔ ཡབ་མེས་ཀུན་གྱི་སྲོལ་ལུགས་མ་ནུབ་མཛད༔ ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་ཉིད༔ འཛམ་གླིང་སུམ་གཉིས་རྒྱལ་པོའི་མངའ་འོག་འདུས༔ བསོད་ནམས་ཡང་རབ་འགྱུར་ཏེ་སྐུ་ཚེ་ཐུང་༔ ཨུ་རྒྱན་པདྨ་བཞུད་པར་དགོངས་པ་ལ༔ རྒྱལ་སྲས་མུ་ཏིག་བཙན་པོའི་སྡུག་མ་སངས༔ མ་ལ་སྐྱེས་ནས་སློབ་དཔོན་སྤྱན་སྔར་བསྡད༔ འགྲོགས་ཡུན་རིང་བས་སྙིང་རྗེས་འབྲལ་མ་ཕོད༔
སྐབས་སུ་སྐབས་སུ་དབུགས་རིང་འདོན་ཅིང་བཤུམ༔ ཡབ་ཀྱི་ཕྱག་བཞེས་གཙུག་ལག་ཁང་གིས་བསྐུལ༔ མྱ་ངན་ཆེ་དྲགས་ཧས་པོ་རི་རྩེ་ལ༔ ལྷ་སྲས་སྐུ་བསངས་ཁྲིད་ནས་ཆོས་གསུངས་པ༔ སྐྱེས་ནས་མ་ཤི་ས་སྟེང་མི་མི་ཤོང་༔ སུ་ལ་མི་འོང་ཡབ་ལ་བྱུང་བ་མིན༔ ཐམས་ཅད་ལ་ལ་སྐྱེ་ཞིང་ལ་ལ་འཆི༔ ཉམ་ཆུང་གྱི་ནའི་དལ་འབྱོར་ལུས་འདི་ལ༔ འཇིག་པའི་རྐྱེན་མང་འཚོ་བའི་རྐྱེན་ནི་ཉུང་༔ ཚ་རེག་གྲང་རེག་སྐད་ཅིག་མི་བཟོད་ལ༔ ལང་ཚོ་དར་བ་ནད་ཀྱི་ཕོ་ཉས་འཛིན༔ བཀྲག་མདངས་ལྡན་པ་གློ་བུར་རྐྱེན་གྱིས་འཕྲོག༔ དཔེར་ན་རྩྭ་མཆོག་ཁ་ཡི་ཟིལ་པ་ནི༔ ཉི་མ་རབ་ཏུ་འབར་བ་ཤར་བ་ན༔ སྐད་ཅིག་ཡུད་ཙམ་ཞིག་གིས་མེད་པར་བྱེད༔ དལ་འབྱོར་མི་ཡི་སྲོག་ཀྱང་དེ་བཞིན་ནོ༔ ཞག་རེ་སོང་ཞིང་འཆི་ལ་ཕར་ཕར་ཉེ༔ གསོན་པར་འདོད་ཀྱང་རང་དབང་ཅུང་ཟད་མེད༔ ཚེ་འདི་ཤིན་ཏུ་རིང་ཡང་འཆི་ངེས་ཏེ༔ རྒྱལ་ཁམས་གཞན་དང་རང་གི་ཡུལ་རྣམས་སུ༔ ཉེ་རིང་དགྲ་གཉེན་ཤི་བའི་དཔེ་མཐོང་ན༔ བདག་ཉིད་འཆི་བར་མི་ཤེས་འགྲོ་བ་བླུན༔ བསགས་པའི་ནོར་བཞག་འབྲེལ་བའི་གཉེན་བོར་ནས༔ རང་ཉིད་གཅིག་པུར་ཕ་རོལ་འགྲོ་བའི་དུས༔ དུས་མིན་འཆི་བ་བཅོ་བརྒྱད་ང་ལས་མགྱོགས༔ གློ་བུར་བརྒྱུད་ཅུ་རྩ་གཅིག་མེ་བས་ཚ༔ ཡེ་འདྲོགས་སུམ་བརྒྱ་དྲུག་ཅུ་ཆུ་བས་གྲང་༔ འགའ་ཞིག་མ་ཡི་མངལ་དུ་འཆི་བ་ཡོད༔ འགའ་ཞིག་ལང་ཚོ་རྒྱས་ནས་འཆི་བ་ཡོད༔ འགའ་ཞིག་གཞན་གྱིས་བསད་ནས་འཆི་བ་ཡོད༔ འགའ་ཞིག་རང་གིས་ལྕེབས་ནས་འཆི་བ་ཡོད༔ འགའ་ཞིག་སུབས་སམ་བརྣངས་ནས་འཆི་བ་ཡོད༔ ཐུགས་ཁྲལ་མ་མཛད་ལྷ་སྲས་བཙན་པོ་གསུངས༔ རྒྱལ་སྲས་མུ་ཏིག་བཙན་པོའི་ཐུགས་དགོངས་ལ༔ ཆོས་མིན་ཅིས་ཀྱང་དགོས་པ་མི་འདུག་བསམས༔ བསམ་ཡས་དབུ་རྩེའི་བར་ཁང་ཆེན་མོ་རུ༔ བཀའ་འདུས་སྙིང་ཐིག་ལོ་གསུམ་གསུང་བར་ཞུས༔ ཚེ་གཅིག་སངས་རྒྱས་ལྷག་མེད་གྲོལ་བའི་ཆོས༔ རྫོགས་ཆེན་པདྨ་སྙིང་ཐིག་འཕྲ་ཡིག་ཅན༔ དབང་པོའི་དངས་མ་ཁོང་གི་སྙིང་འདྲ་བ༔ ལུས་དང་མིག་ལ་བརྟེན་ནས་མངོན་སུམ་དུ༔ ཆོས་དབྱིངས་གཅེར་མཐོང་དབྱིངས་རིག་མ་བུ་ཐིམ༔ རྫོགས་ཆེན་སེམས་ཀློང་གང་དང་མི་འདྲ་བའི༔ མན་ངག་ངེས་པ་སྙིང་གི་ནོར་མཆོག་གནང་༔ འདས་དང་མ་བྱོན་ད་ལྟར་བཞུགས་པ་ཡི༔ སངས་རྒྱས་རྣམས་ཀྱིས་འདི་དོན་གསུངས་པ་མེད༔ གསུང་དང་གསུང་བར་འགྱུར་བ་གཏན་ནས་མེད༔ བདག་གིས་མན་ངག་ཀུན་ལ་ལོངས་སྤྱོད་ཀྱང་༔ འདི་འདྲ་སྟོན་པའི་མན་ངག་མིང་མ་ཐོས༔ སློབ་དཔོན་ཞལ་ནས་བདག་ལ་འདི་སྐད་གསུངས༔ བདག་འདྲ་པདྨ་འབྱུང་གནས་ཀྱིས༔ སུམ་སྟོང་ལོན་ནས་བོད་ཡུལ་འོངས༔ ཐུབ་པ་མྱ་ངན་འདས་འོག་ཏུ༔ ལོ་ནི་བཞི་གཉིས་ལོན་པ་ན༔ རྡོ་རྗེ་གདན་གྱི་ནུབ་ཕྱོགས་ངོས༔ ཨུ་རྒྱན་ཡུལ་གྱི་ནུབ་བྱང་མཚམས༔ དྷ་ན་ཀོ་ཤའི་མཚོ་གླིང་དུ༔ དྲི་མེད་མདངས་ལྡན་པདྨའི་དབུས༔ རྫུས་སྐྱེས་འཇའ་འོད་ལས་འཁྲུངས་པ༔ ཡ་མཚན་མཆོག་གི་ཁྱེའུ་ཆུང་ཞིག༔ རྒྱལ་པོ་ཨིནྡྲ་བོ་དྷིས་རྙེད༔ སྲས་སུ་བཟུང་ནས་རྒྱལ་སྲིད་གཏད༔ སྲིད་སྤངས་སེམས་ཅན་བདེར་བཀོད་ཕྱིར༔ བརྟུལ་ཞུགས་སྤྱོད་པས་སུན་འབྱིན་བསྐྱངས༔ རྒྱལ་པོའི་ཁབ་ཏུ་ལོ་ལྔ་སྟེ༔ བསིལ་བའི་ཚལ་དུ་དེ་བཞིན་ནོ༔ ཆོས་ལ་སྦྱངས་པ་ལོ་བཅུ་སྟེ༔ རྒྱ་གར་ཡུལ་དང་རྒྱ་ནག་ཡུལ༔ ཨུ་རྒྱན་ཡུལ་དང་ཟ་ཧོར་ཡུལ༔ མ་ག་དྷ་དང་མུ་སྟེགས་ཡུལ༔ ཁ་ཆེའི་ཡུལ་དང་སིངྒ་ལ༔ ལི་ཡི་ཡུལ་དང་མ་རུ་ཙེར༔ སྤྲུལ་སྐུས་ཉིས་བརྒྱ་ཉིས་བརྒྱ་བཞུགས༔ འ་ཤའི་ཡུལ་དུ་འབྲུ་ཤའི་ཡུལ༔ ཤམྦྷ་ལ་དང་ཞང་ཞུང་ཡུལ༔ ཏ་ཟིག་ཡུལ་དང་གེ་སར་ཡུལ༔ ཐོ་གར་ཡུལ་དང་རུག་མ་ལ༔ སྲིན་པོའི་ཡུལ་དང་ཀླུ་ཡི་ཡུལ༔ སྤྲུལ་སྐུས་དགུ་བཅུ་བརྒྱད་བརྒྱད་བཞུགས༔ བལ་ཡུལ་བཞུགས་པ་བཞི་བཅུ་སྟེ༔ བརྒྱ་དང་བཅུ་གཅིག་བོད་ཡུལ་དབུས༔ ལྷ་འདྲེ་བཏུལ་ཞིང་བོད་ཁམས་བསྐྱངས༔ འཛམ་གླིང་རྒྱལ་པོའི་ཐུགས་དགོངས་བསྒྲུབས༔ བསམ་ཡས་དབུ་རྩེར་དྲུག་ཅུ་སྟེ༔ བསམ་ཡས་མཆིམས་ཕུར་ལོ་ལྔའོ༔ བསྒྲགས་ཀྱི་ཡང་རྫོང་ལོ་གསུམ་བཞུགས༔ གཡའ་མ་ལུང་དུ་ལོ་བཞི་བཞུགས༔ ཤེལ་གྱི་བྲག་ཕུག་ལོ་གསུམ་སྟེ༔ སྤ་མ་གོང་དུ་ལོ་གཉིས་བཞུགས༔ ཤམ་པོའི་གངས་སུ་ལོ་གསུམ་མོ༔ གཡུ་སྒང་བྲག་ལ་ཟླ་བ་གཉིས༔ ལྷོ་བྲག་མཁར་ཆུར་ལོ་བདུན་བཞུགས༔ གསལ་རྗེ་འབྲིན་ཐང་ཟླ་བ་བཅུ༔ ཟམ་བུ་ལུང་དུ་ལོ་གཉིས་ཏེ༔ ཟང་ཡག་བྲག་ཕུག་ཟླ་བ་གསུམ༔ གཞོ་སྟོད་ཏེ་སྒྲོར་ལོ་བདུན་བཞུགས༔ འཕར་བ་ཚོང་དུ་ལོ་གཅིག་སྟེ༔ འོལ་ཀ་མགར་ཕུག་ཟླ་བ་གཅིག༔ ཡེར་བའི་བྲག་ལ་ལོ་གཅིག་བཞུགས༔ ཁ་རག་ཆུ་བོ་རིར་ལོ་གཅིག༔ ཨོ་དཀར་བྲག་ཕུག་ཟླ་བ་གཉིས༔ ཙ་རིའི་གནས་སུ་ཟླ་བ་དྲུག༔ ཁྱུང་ཚང་བྲག་ལ་ཟླ་བ་དྲུག༔ སྙེ་མོ་སྙིང་དྲུང་ཟླ་བ་དྲུག༔ བློན་པོ་མགུལ་དུ་ཟླ་བ་དྲུག༔ སྙིང་པོའི་རྫ་ལ་ཟླ་བ་གཉིས༔ མོན་ཁ་སྣ་རིང་ཟླ་བ་གསུམ༔ སྤ་གྲོ་སྟག་ཚང་ཟླ་བ་བཞི༔ ཆུ་མོ་ཕག་ཏུ་ཟླ་བ་གཉིས༔ ཁྲ་མོ་ལྡང་ལྷར་ཟླ་བ་གཉིས༔ ཤ་འུག་སྟག་སྒོར་ལོ་གཅིག་བཞུགས༔ མཁར་ཆེན་བྲག་ལ་ལོ་གཅིག་སྟེ༔ དཔྱལ་གྱི་བྲག་ལ་ལོ་གཅིག་བཞུགས༔ ལྷ་རིའི་གངས་ལ་ལོ་གཅིག་བཞུགས༔ གཡུ་ཕུ་རྫ་ལྷུང་ཟླ་བ་གསུམ༔ མོན་སྒོམ་བྲག་ཕུག་ཟླ་བ་གསུམ༔ འོན་ཕུ་སྟག་ཚང་ཟླ་བ་གསུམ༔ གཟར་མོ་རི་ལ་ཟླ་བ་གཉིས༔ དྭགས་རྫོང་ཕུག་པར་ལོ་གཅིག་བཞུགས༔ བྱར་གྱི་སྟག་ཚང་ཞག་གསུམ་སྟེ༔ དོམ་ཚང་རོང་དུ་ཞག་ལྔ་བཞུགས༔ སྟག་ཚང་རོང་དུ་ཞག་བདུན་ནོ༔ གཟིག་ཚང་རོང་དུ་ཞག་དགུ་བཞུགས༔ སྤྱང་ཚང་རོང་དུ་ཞག་དྲུག་བཞུགས༔ མཁའ་འགྲོ་ཕུག་པར་ཟླ་བ་བཞི༔ ལྷ་རྩེའི་བྲག་ལ་ཟླ་བ་བཞི༔ རོང་པའི་རྫ་ལ་ཟླ་བ་གཅིག༔ མཆིམས་ཀྱི་རྔོག་ལུང་ཟླ་བ་གཅིག༔ གོག་ཆུང་ལུང་དུ་ཟླ་བ་ཕྱེད༔ མགྲིན་བཟང་ཟླ་བ་ཕྱེད་དང་གཉིས༔ ལྷ་ས་ཁྲ་འབྲུག་ཟླ་བ་གསུམ༔ བོད་ཀྱི་གདུལ་བྱ་རྫོགས་པར་བྱས་ཟིན་ཏོ༔ སྔར་འདས་སངས་རྒྱས་བསྟན་པའི་སོ་ནམ་བྱས༔ ད་ལྟ་མདོ་སྔགས་བོད་དུ་དར་བར་མཛད༔ མ་འོངས་གཏེར་སྦས་བསྟན་པ་ལུང་དུ་བསྟན༔ བོད་ལ་དྲིན་ཆེར་བྱས་ཀྱང་དྲིན་མི་འདྲེན༔ འཛམ་བུའི་གླིང་ཉེ་སོག་ཀའི་ཡུ་བ་ལ༔ སྲིན་པོའི་ཡུལ་གླིང་ཆེན་པོ་ལྔ་ཡོད་དེ༔ དེ་ཉིད་ཨུ་རྒྱན་ཡུལ་དང་ཐག་ཉེ་ལ༔ དབུས་ན་ཟངས་མདོག་དཔལ་རི་ཞེས་བྱ་བ༔ སྲིན་པོའི་གྲོང་ཁྱེར་ལྔ་བརྒྱས་བསྐོར་བ་ཡི༔ ཤར་ན་ལངྐ་པཱུ་རི་བྱ་བ་ཡོད༔ ལྷོ་ན་སྲིན་པོའི་གྲོང་ཁྱེར་དགའ་བ་ཅན༔ ནུབ་ན་ཀོ་ཀ་ཐང་དམར་གླིང་ཞེས་དང་༔ བྱང་གི་ཕྱོགས་ན་སྲིན་ཡུལ་བྱན་ལག་ལྗོངས༔ ཤར་ལྷོ་མཚམས་ན་ཟོ་མ་པཱུ་རིའི་མཚོ༔ ལྷོ་ནུབ་མཚམས་ན་བམ་རི་ཐོད་པ་མཁར༔ ནུབ་བྱང་མཚམས་ན་མ་ལ་གནམ་ལྕགས་རྩེ༔ བྱང་ཤར་མཚམས་ན་ནལ་བྱིའི་དུར་ཁྲོད་རྣམས༔ སྲིན་པོའི་གྲོང་ཁྱེར་ལྔ་བརྒྱ་ལྔ་བརྒྱས་བསྐོར༔ དེ་མ་བཏུལ་ན་འཛམ་གླིང་སྲིན་པོས་འཁྱེར༔ སྲིན་པོས་མི་ཟ་མི་ཡུལ་སྟོངས་པར་འགྱུར༔ པད་འབྱུང་མིན་པ་སུས་ཀྱང་མི་ཐུལ་ཏེ༔ སྲིན་པོ་འདུལ་ཞིང་སོ་ཀ་བསྲུང་དུ་འགྲོ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལྷོ་ནུབ་སྲིན་པོའི་ཡུལ་དུ་འབྱོན་པར་དགོངས་པའི་ལེའུ་སྟེ་གོ་བདུན་པའོ༔ ༔
པདྨ་བཀའ་ཐང་ལེའུ་ ༩༨ རྒྱལ་སྲས་མུ་ཏིག་བཙན་པོར་ཞལ་ཆེམས་གསུངས་པ།
དེ་ནས་རྒྱལ་སྲས་མུ་ཏིག་བཙན་པོ་ཡིས༔ སློབ་དཔོན་ཨུ་རྒྱན་སྲིན་ཡུལ་བཞུད་པའི་དུས༔ ནུབ་གཅིག་ཚོགས་ཀྱི་འཁོར་ལོ་རྒྱ་ཆེར་བསྐོར༔ གཅེས་པའི་ནོར་བུ་དར་གྱིས་རབ་ཕྱིས་ནས༔ དངུལ་གཞོང་ཆེན་པོ་གསེར་གྱིས་བཀང་བའི་སྟེང་༔ ནོར་བུ་བཞག་ནས་སློབ་དཔོན་ཕྱག་ཏུ་ཕུལ༔ ཆིབས་པ་མཚའ་ལུ་བྱ་གདོང་སྣ་དྲངས་པའི༔ རྟ་དྲུག་སེང་ལྡེང་སྒ་ལ་ཟ་འོག་སྟན༔ གསེར་སྲབ་གཡུ་མཐུར་གཏད་ནས་ཕྱག་ཏུ་ཕུལ༔ གསེར་ཕྱེ་ཁལ་གཅིག་གཡུ་སྙིང་བྲེ་གསུམ་དང་༔ ལྷ་སྲས་ཉིད་ཀྱི་མགུལ་གཡུ་ལྟག་ཚར་ཕུལ༔ རབ་ཏུ་གུས་པའི་ལྷ་ཕྱག་མང་བཙལ་ནས༔ རྗེ་མ་རིག་མུན་པ་སེལ་མཛད་པའི༔ ཡེ་ཤེས་སྣང་བའི་སྒྲོན་མ་ཅན༔ རྟོག་པའི་དྲ་བ་གཅོད་མཛད་པའི༔ ཤེས་རབ་ཆེན་པོའི་རལ་གྲི་ཅན༔ ཉོན་མོངས་དགྲ་རྣམས་འཇོམས་མཛད་པའི༔ ཡང་དག་ལྟ་བའི་དམག་ཚོགས་ཅན༔ འཁོར་བའི་ཆུ་བོ་སྒྲོལ་མཛད་པའི༔ ཐུགས་རྗེ་ཆེན་པོའི་གྲུ་གཟིངས་ཅན༔ དགེ་བའི་བར་ཆད་ཞི་མཛད་པའི༔ གསང་སྔགས་ཐབས་ཀྱི་ཁྱད་པར་ཅན༔ འགྲོ་བ་ཐམས་ཅད་སྐྱོབ་མཛད་པའི༔ བསྡུ་བ་རྣམ་བཞིའི་འཕྲིན་ལས་ཅན༔ ཇི་སྐད་གསུངས་པ་ཇི་བཞིན་འབྱུང་༔ མངོན་པར་ཤེས་པའི་ངེས་དོན་ཅན༔ གདམས་ངག་གང་དང་གང་ཞུས་ཀྱང་༔ དགྱེས་ཤིང་གནང་བའི་བཀའ་དྲིན་ཅན༔ རྒོལ་བ་ཐམས་ཅད་ཚར་གཅོད་པའི༔ ཤཱཀྱ་སེང་གེའི་ཆ་ལུགས་ཅན༔ བསྟན་པའི་གཙོ་དང་ཐ་མི་དད༔ འཇིག་རྟེན་གསུམ་ན་རྙེད་མི་སྲིད༔ ཁྱོད་ཀྱི་བཀའ་ལུང་མ་ལགས་པ༔ སུ་ལ་ཡང་ནི་མི་རེ་མི་ལྟོས་པས༔ བདག་ནི་མ་གུམ་བར་དུ་བཞུགས་པར་ཞུ༔ སྲིན་པོ་འདུལ་ལ་ཕྱི་བཤོལ་མི་སྤོབས་པས༔ ཅིས་ཀྱང་ལོ་གཅིག་བཞུགས་པར་ཞུ་ཕུལ་ཚེ༔ སློབ་དཔོན་ཞལ་ནས་བདག་ལ་འདི་སྐད་གསུངས༔ ལོ་གཅིག་བསྡད་ཀྱང་འབྲལ་བར་འོང་མི་ཕོད༔ བདག་ཉིད་མིག་གཉིས་མཆི་མས་འགགས་པ་དང་༔ ནང་གི་དབུགས་ནི་སྣ་རུས་ནང་དུ་འཐུམས༔ ཡུས་ཀྱིས་བརྣངས་ནས་གདུང་བའི་ཤུགས་ཀྱིས་བརྒྱལ༔ སློབ་དཔོན་བཞུད་ནས་སྐྱབས་དང་བྲལ་ལོ་སྙམ༔ རྒྱབ་ནས་དྲོ་བའི་སློག་པ་བཤུས་སོ་སྙམ༔ མདུན་ནས་བརྟེན་པའི་འཁར་བ་མེད་དོ་སྙམ༔ འོད་ཀྱིས་དྲོས་པའི་ཉི་ཟླ་ནུབ་པོ་སྙམ༔ ཚེ་འདིར་གཅེས་པའི་མིག་དང་བྲལ་ལོ་སྙམ༔ དེ་ནས་རང་སེམས་བག་ཙམ་ངལ་བསོས་ནས༔ བག་ཙམ་དབུགས་ཕྱུང་བག་ཙམ་བདེ་བ་རྙེད༔ དེ་ཡང་སློབ་དཔོན་བྱིན་བས་ཡིན་ནོ་སྙམ༔ དེ་ནས་སློབ་དཔོན་ཞལ་ནས་འདི་སྐད་གསུངས༔ ལྷ་སྲས་བདག་ནི་ལུས་སྲོག་འདོར་བ་མིན༔ གཞན་དུ་སོང་ཡང་མྱུར་དུ་མཇལ་ལོ་གསུངས༔ སྐུ་དངོས་འདི་ལ་གདུང་བའི་འཕྲེང་སེམས་ཆོད༔ དུས་གཉན་བྱུང་རེས་དངོས་ཉམས་རྨི་ལམ་མཇལ༔ འདི་ནས་སྐྱེ་བ་བཅོ་བརྒྱད་ཁ་འཁོར་ཚེ༔ སྨོན་ལམ་དག་པས་ཅིས་ཀྱང་མཇལ་ལོ་གསུངས༔ གསེར་གཞོང་ནོར་བུ་དང་བཅས་ཚུར་གནང་ནས༔ བདག་ལ་གུས་པས་གསོལ་བ་ཐོབ་མཛོད་དང་༔ དུས་གསུམ་འབྲལ་མེད་བྱིན་གྱིས་བརླབ་བོ་གསུངས༔ ཡི་དམ་ཏིང་འཛིན་མ་གཡེལ་རྒྱུན་དུ་སྒོམས༔ གསང་སྔགས་བསྙེན་སྒྲུབ་ཚད་དུ་ཕྱིན་པར་སྐྱོལ༔ སྙིང་རྗེའི་གནས་ལ་བུ་ལྟར་བརྩེ་བས་སྐྱོངས༔ ཆོས་ཀྱི་ཕུ་ཐག་ཆོས་ཉིད་ཟད་སར་སྐྱོལ༔ རང་ལུས་ལང་ཚོ་ཡལ་བའི་དུས་སུ་ནི༔ གེ་སར་རྒྱལ་པོས་བབས་ལ་བཏང་བ་ཡི༔ ཡིད་བཞིན་ནོར་བུ་ཕ་རོལ་དཔུང་འཇོམས་འདི༔ ཡར་ཀླུངས་ཁྲ་འབྲུག་གཏེར་དུ་སྦོས་ཤིག་གསུངས༔ རྒྱ་ནག་རྒྱལ་པོས་བབས་ལ་བྱུང་བ་ཡི༔ ཡིད་བཞིན་ནོར་བུ་ཡིད་ལ་བསམ་འཕེལ་འདི༔ བསམ་ཡས་དབུ་རྩེར་གཏེར་དུ་སྦོས་ཤིག་གསུངས༔ རྒྱ་གར་རྒྱལ་པོ་དབང་ཕྱུག་སྡེས་ཕུལ་བའི༔ ཡིད་བཞིན་ནོར་བུ་དགོས་འདོད་འབྱུང་བ་འདི༔ ལྷ་སའི་ནང་དུ་གཏེར་དུ་སྦོས་མཛོད་དང་༔ བོད་སྤྱིའི་བསོད་ནམས་འདི་གསུམ་ལས་འབྱུང་ཞིང་༔ སྒོམ་གྲྭ་བཤད་གྲྭའི་བསྟན་པ་ཚུགས་སོ་གསུངས༔ ཕྱུག་པོ་རབས་ཆད་ཀ་ཅ་གཏེར་དུ་སྦས༔ དབུལ་པོ་འབུན་གཏེར་ནོར་གྱིས་ཁེངས་སོ་གསུངས༔ བདུན་ཅུ་རྩ་གྲངས་ལོ་ཡི་དུས་སུ་ནི༔ རྒྱལ་པོའི་སྐུ་ལ་རིམ་གྲོ་སྐྱེད་ཅིག་གསུངས༔ མཁའ་འགྲོ་ཆོས་སྐྱོང་འབྲལ་མེད་བསྟེན་མཛོད་ལ༔ ཚོགས་ཀྱི་འཁོར་ལོ་རྟག་ཏུ་སྐོར་ཅིག་གསུངས༔ སྤྱོད་པ་ཕྱི་ནང་གཉིས་སུ་རབ་ཕྱེ་ལ༔ ཚོགས་སུ་སྙོམས་ཆུང་རྣམས་དང་བསྟུན་ཅིག་གསུངས༔ དབེན་པར་སྣང་སྤྱོད་ཏིང་ངེ་འཛིན་དང་སྤེལ༔ རྩ་ཡི་རྒྱ་མདུད་ལས་ཀྱི་ཕྱག་རྒྱས་ཁྲོལ༔ ལུས་ཀྱི་བདེ་བ་སེམས་ལ་སྤོར་ཅིག་གསུངས༔ འདུ་འཛིའི་གནས་ལ་སུན་པའི་དུས་སུ་ནི༔ གཏད་མེད་ཆོས་དབྱིངས་ངང་ལ་ཞོག་ཅིག་གསུངས༔ འཁོར་ངན་བྱུར་གྱིས་ནོན་པའི་དུས་སུ་ནི༔ རྨི་ལམ་གནས་སྐབས་ཙམ་དུ་སོམས་ཤིག་གསུངས༔ ཏིང་འཛིན་ཉམས་མྱོང་འཕེལ་འགྲིབ་ཅི་བྱུང་ཡང་༔ ཐམས་ཅད་རོ་སྙོམས་ངང་དུ་ཆོད་ཅིག་གསུངས༔ བཟང་རྟོག་ངན་རྟོག་བཟང་ངན་ཅི་བྱུང་ཡང་༔ གང་སྣང་ཆོས་སྐུའི་ལམ་དུ་ཁྱེར་ཅིག་གསུངས༔ བསྟེན་མ་ཤེས་ན་ལྷ་ཡང་བདུད་དུ་འབབ༔ ཡུན་རིང་འགྲོགས་ན་སངས་རྒྱས་སྐྱོན་ཡང་རྙེད༔ ཕུ་བསམ་ལྷག་པའི་ཕོ་ཚོད་གཞན་ལ་མེད༔ རང་གིས་ཐག་ཆོད་གྲོས་མ་འདྲི་ཞིག་གསུངས༔ ཚེ་གཅིག་དོན་གྱི་སངས་རྒྱས་བསྒྲུབ་པ་ལ༔ མདོ་རྒྱུད་མང་པོའི་མཁྱེན་རྒྱ་མི་འཚལ་གྱི༔ ཏིང་འཛིན་ཟབ་མོ་རྩེ་གཅིག་སྒོམས་མཛོད་ཅིག༔ སེམས་ཅན་ཕན་བྱེད་མ་གཏོགས་ཆོས་གཞན་མེད༔ ཕྱག་དཔེ་ཐམས་ཅད་གཏེར་ཏུ་སྦོས་ཤིག་གསུངས༔ དམ་ཚིག་མེད་པ་ངན་སོང་གསུམ་ལས་འཇིགས༔ དུག་ལྔ་རགས་ལ་སྔར་ཟོན་གྱིས་ཤིག་གསུངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྒྱལ་སྲས་མུ་ཏིག་བཙན་པོས་བཤོལ་བཏབ་པས་ཞལ་ཆེམས་གསུངས་པའི་ལེའུ་སྟེ་གོ་བརྒྱད་པའོ༔
པདྨ་བཀའ་ཐང་ལེའུ་ ༩༩ མཁའ་འགྲོས་བརྡ་བསྟོད་མཛད་པ།
དེ་ནས་སློབ་དཔོན་པདྨ་འབྱུང་གནས་ཀྱིས༔ ལྷ་སྲས་དབུ་མཛད་རྗེ་འབངས་ཉི་ཤུ་གཅིག༔ ལོ་ཙཱ་དེ་བ་སམྦྷས་དབུ་མཛད་ནས༔ ལོ་ཙཱ་ཉི་ཤུ་རྩ་གཅིག་བཙུན་མོ་གསུམ༔ ཡོན་བདག་ཕོ་མོ་འབངས་འཁོར་ཐམས་ཅད་ལ༔ ཁྲ་འབྲུག་གཙུག་ལག་ཁང་གི་ཁྱམས་སྟོད་དུ༔ གསང་སྔགས་བཀའ་འདུས་དཀྱིལ་འཁོར་ཞལ་ཕྱེ་ནས༔ སྒྲུབ་པའི་དབང་ཟབ་ཉི་ཤུ་རྩ་གཅིག་མཛད༔ ནམ་ཕྱེད་སློབ་དཔོན་ལྷོ་ནུབ་མཁའ་ལ་གཟིགས༔ ལྕགས་ཀྱུའི་ཕྱག་རྒྱ་མཛད་ནས་ཛཿཧཱུྃ་གསུངས༔ དཀྱིལ་འཁོར་མདུན་དུ་འཇའ་སྣ་ཟུག་པ་ལ༔ ལྷ་ལྕམ་མནྡཱ་ར་བ་ཡིན་ཟེར་བའི༔ བུ་མོ་དཀར་མོ་རས་སྔོན་སྨད་གཡོགས་ཅན༔ ཐོད་པ་སྐམ་པོ་ལྔ་ཡི་དབུ་རྒྱན་གྱོན༔ ལག་གཡོན་བནྡྷ་ལྕང་ལོ་འགྲོན་རྒྱན་ཅན༔ གཡས་ན་ལྕགས་ཕུར་མགོ་ལ་དར་སྣ་བཏགས༔ མི་ལྤགས་གཡང་གཞིས་སྟོད་གཡོགས་བྱས་པ་ཞིག༔ དཀྱིལ་འཁོར་སྐོར་བ་བྱེད་པ་ཀུན་གྱིས་མཐོང་༔ དཔལ་ཆེན་ལྷ་ཚོགས་རྣམས་ཀྱི་ཞལ་བསྟན་ནས༔ ཁུ་སྒྲ་ཀུ་ཅོ་ཏུག་ཆོམ་འུར་རྒྱངས་གང་༔ ལ་ལ་བརྒྱལ་ཞིང་ལ་ལ་མགོ་ལྤགས་འདུས༔ བྱིན་ཆེ་དབྱངས་སྙན་སློབ་དཔོན་འདི་སྐད་བསྟོད༔ ཧཱུྃ༔ གུ་རུའི་ཐུགས་རྗེས་འགྲོ་དོན་མཛད་ཙ་ན༔ འདབ་ལྡན་རིགས་ལྔ་དབུ་ལ་གསོལ་བ་ནི༔ སྐུ་ལྔའི་དབང་རྫོགས་ཡེ་ཤེས་ལྔ་ལྡན་བརྡ༔ དེ་ལ་དབུས་མཐིང་ཕྱོགས་ཚོན་བརྒྱན་པ་ནི༔ འཕྲིན་ལས་རྣམ་བཞིས་འགྲོ་དོན་མཛད་པའི་བརྡ༔ ཐོད་སྐམ་སུམ་བརྩེགས་ཐེག་པ་བརྩེགས་པ་ནི༔ ཆོས་ཀུན་མ་འདྲེས་ཕྱི་ནང་སྟོན་པའི་བརྡ༔ དེ་ལ་རིན་ཅེན་དྲ་བས་བརྒྱན་པ་ནི༔ ཁམས་གསུམ་མ་ལུས་དབང་དུ་སྡུད་པའི་བརྡ༔ དེ་ལ་གསེར་གྱི་རྡོ་རྗེ་བཙུགས་པ་ནི༔ རྡོ་རྗེ་ལྟ་བུའི་ཏིང་འཛིན་བརྙེས་པའི་བརྡ༔ དར་སྣ་ལྔ་ཡི་ཅོད་པན་འཕུར་བ་ནི༔ རིག་པའི་གནས་ལྔས་འགྲོ་བ་འདུལ་བའི་བརྡ༔
གཡས་གཡོན་རྒོད་ཀྱི་ཐེའུ་ཆུང་སྤྲས་པ་ནི༔ ཐབས་དང་ཤེས་རབ་ཟུང་དུ་འབྲེལ་བའི་བརྡ༔ རྩེ་དབུས་རྨ་བྱའི་མདོངས་མདངས་གསལ་བ་ནི༔ སྣང་སེམས་དབྱིངས་རིག་འོད་དུ་འཁྱིལ་བའི་བརྡ༔ རིན་ཅེན་གསེར་གྱི་ཉི་ཟླ་གསལ་བ་ནི༔ འགྲོ་བའི་མ་རིག་མུན་པ་སེལ་བའི་བརྡ༔ གཡི་དཀར་པགས་པས་ཁ་འགྲིལ་བྱས་པ་ནི༔ བསྟན་གཉིས་ཟུང་འཇུག་གཏེར་གྱིས་སྐྱོང་བའི་བརྡ༔ མཛེས་པའི་སྣ་ལེན་ཐུར་དུ་འཕྱང་བ་ནི༔ སྦྱོར་སྒྲོལ་ལྟ་བ་དབྱིངས་སུ་དག་པའི་བརྡ༔ རྗེ་ཉིད་སྐུ་ལུས་བཀོད་པ་བསྟན་པ་ནི༔ ཞལ་གྱི་དཀྱིལ་འཁོར་ཆོག་མི་ཤེས་པ་ནི༔ དེ་བཞིན་གཤེགས་པའི་སྐུ་དངོས་བསྟན་པའི་བརྡ༔ རྡོ་རྗེའི་སྐུ་ལུས་དྲང་པོར་བཞུགས་པ་ནི༔ ཏིང་འཛིན་རྩེ་གཅིག་གཡོ་བ་མེད་པའི་བརྡ༔ སྐུ་མདོག་དཀར་ལ་དམར་མདངས་ལྡན་པ་ནི༔ བདེ་བ་ཐམས་ཅད་སྐུ་ལ་རྫོགས་པའི་བརྡ༔ ཡེ་ཤེས་སྤྱན་གཉིས་ཐད་དཀར་གཟིགས་པ་ནི༔ ཆོས་དབྱིངས་འོད་གསལ་མཆོག་ཏུ་སྤོར་བའི་བརྡ༔ འཛུམ་པའི་མདངས་ལྡན་ཞལ་ཚེམས་མཛེས་པ་ནི༔ གསང་སྔགས་མཛད་པ་མཐའ་རུ་ཕྱིན་པའི་བརྡ༔ ཚངས་པའི་གསུང་གིས་ཆོས་སྒྲ་སྒྲོགས་པ་ནི༔ འགྲོ་དྲུག་སེམས་ཅན་བདེ་ལ་བཀོད་པའི་བརྡ༔ ཤངས་ནས་ཡེ་ཤེས་ང་ལྔ་རྒྱུ་བ་ནི༔ སྤྲོས་མེད་ལྟ་བ་ཡོངས་སུ་དག་པའི་བརྡ༔ སྙན་ཆ་གསེར་གྱི་དྲིལ་ཆུང་བརྒྱན་པ་ནི༔ སངས་རྒྱས་རྣམས་དང་གསུང་གླེང་མཛད་པའི་བརྡ༔ དབུ་སྐྲ་ཁམ་ནག་ལྕང་ལོ་འཁྱིལ་བ་ནི༔ མ་ལུས་དགོངས་པའི་དོན་རྣམས་འགྲུབ་པའི་བརྡ༔ ཞབས་གཉིས་མཉམ་པའི་སྐྱིལ་ཀྲུང་བཞུགས་པ་ནི༔ ལམ་ལྔ་ས་བཅུ་སྐད་ཅིག་རྫོགས་པའི་བརྡ༔ ཕྱག་གཡོན་མཉམ་གཞག་བནྡྷ་འཛིན་པ་ནི༔ འདོད་ཡོན་ལྔ་ལ་ལོངས་སྤྱོད་རོལ་པའི་བརྡ༔ གཡས་པའི་ཕྱག་ན་རྡོ་རྗེ་བསྣམས་པ་ནི༔ བདེ་སྟོང་སྒོམ་ལ་རྒྱུན་ཆད་མེད་པའི་བརྡ༔ ཆུ་ཤིང་ནག་པོའི་ཕྱག་འཁར་བསྣམས་པ་ནི༔ ཆོས་རྣམས་ཐེག་པ་གཅིག་ཏུ་རྫོགས་པའི་བརྡ༔ དེ་ལ་ཆུ་སྲིན་རྒྱ་མདུད་བཅིངས་པ་ནི༔ བསྡུ་བ་རྣམ་བཞིས་བསྟན་པ་བསྲུང་བའི་བརྡ༔ དེ་ལ་རྡོ་རྗེ་རྩེ་ལྔ་བསྐྱོན་པ་ནི༔ སྐྱེ་བ་རྣམ་བཞི་སྦྱོར་བ་ལྔ་ལྡན་བརྡ༔ དེ་ལ་ཐོད་མཁར་དགུ་བརྩེགས་བསྐྱོན་པ་ནི༔ འཇིག་རྟེན་དུར་ཁྲོད་གླིང་དགུར་མཁྱེན་པའི་བརྡ༔ དར་སྣ་ལྔ་ཡིས་མགུལ་ཆིངས་བྱས་པ་ནི༔ སྟོང་གཟུགས་ཡེ་ཤེས་ལྔ་ལྡན་སྦྱོར་བའི་བརྡ༔ གསེར་དངུལ་ཟངས་ལྕགས་ཁྲོ་ཞལ་ལྡན་པ་ནི༔ གསང་སྔགས་སྒོ་མོ་བཞི་ནི་འབྱེད་པའི་བརྡ༔ དེ་ལ་ཁ་ཊྭཱཾ་རྩེ་གསུམ་སྐྱེས་པ་ནི༔ དུག་གསུམ་སྐུ་གསུང་ཐུགས་དང་སྦྱོར་བའི་བརྡ༔ རྭ་ལ་ལྕགས་ལུང་དགུ་ཡིས་བརྒྱན་པ་ནི༔ ཐེག་པའི་འཇུག་སྒོ་མ་ནོར་སྟོན་པའི་བརྡ༔ རྩེ་ལ་ལྕགས་ལུང་བརྒྱད་ཀྱིས་བརྒྱན་པ་ནི༔ རྣམ་ཤེས་ཚོགས་བརྒྱད་སྦྱོར་མཚམས་དག་པའི་བརྡ༔ ཟ་འོག་བེར་བརྩེགས་སྐུ་ལ་གསོལ་བ་ནི༔ སྣང་སྲིད་འཇའ་འོད་ཟེར་གསུམ་འཕྲོ་བའི་བརྡ༔ དམར་སེར་མཐིང་ནག་བེར་ཕྱམ་སྤྲུགས་པ་ནི༔ སྣ་ཚོགས་ཆོས་སྐུ་རང་ལ་ཤར་བའི་བརྡ༔ རྒྱ་མཚོར་པད་སྡོང་རྩེ་ལ་བཞུགས་པ་ནི༔ འཁོར་བའི་སྐྱོན་གྱིས་མ་གོས་བསྟན་པའི་བརྡ༔ ཕྱོགས་བཞི་མཚམས་བརྒྱད་འཇའ་འོད་འཁྲིགས་པ་ནི༔ ཕུང་པོ་ལྷག་མེད་ཡེ་སངས་རྒྱས་པའི་བརྡ༔ འཁོར་དུ་བཀའ་བརྒྱུད་བླ་མས་བསྐོར་བ་ནི༔ སྐལ་ལྡན་བུ་ལ་བྱིན་བས་འབེབས་པའི་བརྡ༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ཁྲ་འབྲུག་ཏུ་བཀའ་འདུས་སྒྲུབ་ཆེན་མཛད་དུས་མཁའ་འགྲོས་བརྡ་བསྟོད་མཛད་པའི་ལེའུ་སྟེ་གོ་དགུ་པའོ༔ ༔
པདྨ་བཀའ་ཐང་ལེའུ་ ༡༠༠ སྐུ་ཚབ་ལ་གསོལ་བ་བཏབ་པའི་ཕན་ཡོན་བསྟན་པ།
དེ་ནས་ལྷ་ལྕམ་མནྡཱར་བ་ཡིས༔ མཚན་བཟང་སུམ་ཅུ་རྩ་གཉིས་བསྟོད་པ་མཛད༔ ཨེ་མ་ཧོ༔ ལེགས་པའི་དཔེ་བྱད་མཚན་བཟང་སུམ་ཅུ་གཉིས༔ དུས་གསུམ་སངས་རྒྱས་པད་འབྱུང་སྐུ་ལ་རྫོགས༔ རི་རབ་ལྟ་བུར་སྐུ་ནི་ལྷུན་མདངས་མཐོ༔ རི་རྒྱལ་བུམ་པ་ལྟ་བུར་དབུ་ནི་ཟླུམ༔ བུང་པ་ཨུཏྤལ་ལྟ་བུར་དབུ་སྐྲ་མཛེས༔ ཟླ་བ་རྒྱས་པ་ལྟ་བུར་དཔྲལ་བའི་དབྱེས༔ སྐར་ཆེན་ཤར་འདྲ་སྤྱན་གཉིས་གནག་ལ་རིང་༔ འདི་ཡི་སྨིན་མ་ཁྱུང་ཆེན་ལྡིང་བ་འདྲ༔ ཁྲ་གཤོག་བརྒྱངས་པ་ལྟ་བུར་རྫི་མ་ལེགས༔ སྙན་ནི་གྲོ་ག་གཅུས་པ་ལྟ་བུ་འདྲ༔ ཤངས་ནི་ལེགས་ཤིང་བལྟ་ན་སྡུག་པའི་ཤངས༔ ཡ་མཆུ་མ་མཆུ་པདྨའི་ཟེ་བ་འདྲ༔ ལྗགས་རིང་སྲབ་མཉེན་པདྨའི་མདོག་ལྟར་དམར༔ དཀར་ཚེམས་ཐགས་བཟང་དུང་མདོག་གངས་རི་འདྲ༔ ཚེམས་ཕྲེང་ལྔ་བཅུ་རྩ་བརྒྱད་ཞལ་ལ་མཛེས༔ ཞི་བའི་ཞལ་མཐོང་ཨོས་ཀོ་ལྷམ་མེ་བ༔ ཀ་ལ་པིངྐ་ལྟ་བུར་ཚངས་པའི་དབྱངས༔ ཞལ་ཚོམས་དོམ་ནག་དཀྱུས་འདྲ་ལྟ་བུར་རིང་༔ སྐུ་མདོག་དུང་ལ་ཕོ་ཚོས་བསྐུས་པ་འདྲ༔ མགུལ་ནི་བུམ་པའི་མགྲིན་པ་ལྟ་བུར་ལེགས༔ འདི་ཡི་སྐུ་སྟོད་སེང་གེ་འགྱིང་བ་འདྲ༔ དཔུང་པའི་མགོ་ཟླུམ་ཕྲག་པ་རབ་ཏུ་རྒྱས༔ ཕྱག་ཞབས་སོར་རིང་དྲ་བས་འབྲེལ་བ་དང་༔ སེན་མོའི་མདོག་ནི་ཟངས་དམར་ཤེལ་འོད་དཀར༔ པདྨའི་སྦུ་གུ་ལྟ་བུར་ལྟེ་བ་མཛེས༔ སྦ་བ་སྦུབས་སུ་རྟ་གླང་ལྟ་བུར་ནུབ༔ བྱིན་པ་ཨེ་ན་ཡ་འདྲ་ཞབས་ལོང་འབུར༔ མཁའ་ལ་འཇའ་འགྱུས་ལྟ་བུར་འཕུར་རྩལ་འགྲོས༔ གཞོན་ནུའི་རྩལ་ལྡན་སྐུ་ལུས་ཡན་ལག་རྒྱས༔ འཛུམ་ཞིང་ཤིན་ཏུ་མཛེས་པའི་དྲི་མེད་ཞལ༔ གཟུགས་བལྟས་མི་ངོམས་སྐྱེ་བོས་ལྟ་ན་སྡུག༔ འོད་ཟེར་དུ་མ་འབར་བས་འོད་ཁྱིམ་འདྲ༔ རོ་མཆོག་འཇམ་ཞིང་དམ་པ་མཆོག་རབ་འཕགས༔ མི་ཤིགས་རྡོ་རྗེ་ལྟ་བུར་ཟག་པ་མེད༔ འདྲ་བ་འདི་དག་པད་འབྱུང་མཚན་བཟང་པོ༔ སུམ་ཅུ་རྩ་གཉིས་རྒྱལ་སྲས་སྐུ་ལ་བསྟོད༔ མོས་པའི་མ་ཕྱིར་བུ་འབྲངས་ལྟ་བུ་ཡི༔ སུན་པ་མེད་པའི་ལྷ་ལྕམ་མནྡཱ་རས༔ སྐྱོ་ངལ་མེད་པར་སྤྲུལ་སྐུའི་ཡོན་ཏན་ཞུས༔ ཉིད་དང་མ་མཇལ་མ་འོངས་སེམས་ཅན་རྣམས༔ མ་རིག་མུན་པའི་སྒྲོན་མེ་གང་གིས་བྱེད༔ དེ་བཞིན་སྦྱིན་པའི་བསོད་ནམས་གང་ལ་གསོག༔ ལུས་ཕུང་བདེ་བའི་མེ་ཏོག་གང་ལ་འབུལ༔ འཇིག་རྟེན་དག་ན་བདེ་བ་སྦྱིན་པའི་མཆོག༔ འཁོར་བའི་སྡུག་བསྔལ་རྒྱ་མཚོ་གང་གིས་སྐེམས༔ བདེ་སྟོང་བླ་མེད་བརྒྱུད་པ་སུ་ཡིས་འཛིན༔ པད་སྡོང་ལས་འཁྲུངས་དཀར་ལ་དམར་མདངས་ཅན༔ བཟང་པོའི་མཚན་གྱིས་སྐུ་ལ་བརྒྱན་པས་གསུངས༔ ཞེས་ཞུས་དེ་ནས་ཨུ་རྒྱན་བཀའ་སྩལ་པ༔ ཉོན་ཅིག་ལྷ་མོའི་གཟུགས་ཅན་ཡིད་འོང་མ༔ ང་དང་མ་འཕྲད་མ་འོངས་སེམས་ཅན་རྣམས༔ མ་རིག་མུན་པའི་སྒྲོན་མ་སྐུ་འདྲས་བྱེད༔ པད་འབྱུང་སྐུ་ཚབ་མཆོད་པའི་རྟེན་བཞེངས་པ༔ སྐུ་གསུམ་དོན་ལྡན་བསྟན་པའི་རྒྱལ་མཚན་འཛུགས༔ དེ་ལ་འདུན་ཅིང་མོས་གུས་སུས་བྱེད་པ༔ འདོད་པ་ཀུན་ཚོགས་རིན་ཅེན་ཕུང་པོ་འདྲ༔ འཕེལ་འགྲིབ་མེད་པར་འགྱུར་མེད་བདེ་བའི་ཞིང་༔ སྙིང་པོ་རྒྱུན་དུ་བཟླ་བར་གང་བྱེད་པ༔ མི་རྣམས་སྨོན་ལམ་ཇི་ལྟར་བཏབ་པ་བཞིན༔ ལེགས་པ་ཀུན་འབྱུང་ཨེ་མ་ངོ་མཚར་ཆེ༔ འབྱུང་བའི་བཅུད་ལས་བསམ་འཕེལ་ནོར་འབྱུང་བཞིན༔ ཇི་ལྟར་ཚོགས་པར་བཤམས་པའི་འདོད་ཡོན་ལྔ༔ བྱི་དོར་ལྡན་པས་བཀྲ་ཤིས་འཕེལ་བར་འགྱུར༔ སྨོན་ལམ་དག་པས་སྨན་ཆབ་ལྔ་གསོལ་བ༔ ཐུན་མོང་འདུ་བ་རྣམ་བཞིའི་ནད་ལས་གྲོལ༔ ཁྱད་པར་ཉོན་མོངས་འཁོར་བའི་གཅོང་ནད་ཞི༔ སྐྱོན་གྱི་གོང་པོ་རིགས་དྲུག་སེམས་ཅན་ལ༔ དར་ཅིག་བདེ་བའི་སྐབས་མེད་མི་ཡི་ལུས༔ པད་འབྱུང་སྐུ་ཚབ་དཀོན་གཉེར་སུས་བྱེད་པ༔ ངན་སོང་གསུམ་ལས་གཏན་དུ་ཐར་བ་དང་༔ ཕུན་སུམ་ཚོགས་པའི་ཡོན་ཏན་ཐོབ་པར་འགྱུར༔ པད་འབྱུང་སྐུ་ཚབ་གཞལ་ཡས་ཁང་བཞེངས་པ༔ ལྷ་ཡི་ཕོ་བྲང་ནང་དུ་སྐྱེ་བར་འགྱུར༔ པད་འབྱུང་སྐུ་བཞེངས་ལས་དཔོན་སུས་བྱེད་པ༔ ཆོས་སྨྲའི་འཁོར་ལོས་སྒྱུར་མཆོག་ཐོབ་པར་འགྱུར༔ པད་འབྱུང་སྐུ་འདྲའི་བཟོ་གནས་སུས་བྱས་པ༔ འདི་ཕྱིར་རིག་པའི་གནས་ལྔར་མཁས་པར་འགྱུར༔ པད་འབྱུང་སྐུ་བཞེངས་འདམ་རྫབ་སུས་སྦྱོར་བ༔ ས་ཡི་འབྲུ་བཞིན་བསོད་ནམས་འཕེལ་བར་འགྱུར༔ པད་འབྱུང་སྐུ་འདྲར་ན་བཟའ་གང་འབུལ་བ༔ ཡེ་ཤེས་རྒྱན་ལྡན་རང་བཅས་ཐོབ་པར་འགྱུར༔ པད་འབྱུང་སྐུ་འདྲར་པད་གདན་སུས་ཕུལ་བ༔ རེག་འཇམ་མཛེས་པའི་གདན་དང་ལྡན་པར་འགྱུར༔ པད་འབྱུང་སྐུ་འདྲར་རྡུལ་ཕྱིས་སུས་བྱས་པ༔ གཟུགས་བཟང་ཆས་ལེགས་མདོག་སྡུག་ཐོབ་པར་འགྱུར༔ པད་འབྱུང་སྐུ་འདྲར་ཁྲུས་ཆབ་སུས་གསོལ་བ༔ དྲི་མེད་ཡིད་འོང་མདོག་བཟང་ཐོབ་པར་འགྱུར༔ པད་འབྱུང་སྐུ་ཚབ་མཆོད་གཡོག་སུས་བྱས་པ༔ རྫུ་འཕྲུལ་རྐང་པའི་མྱུར་མགྱོགས་ཐོབ་པར་འགྱུར༔ པད་འབྱུང་སྐུ་འདྲར་མར་མེ་སུས་ཕུལ་བ༔ མུན་པ་མེད་ཅིང་བློ་རིག་གསལ་བར་འགྱུར༔ པད་འབྱུང་སྐུ་འདྲར་རིན་ཅེན་སུས་ཕུལ་བ༔ དབུལ་ཕོངས་ཀུན་བྲལ་དཀོར་ནོར་ཚོགས་པར་འགྱུར༔ པད་འབྱུང་སྐུ་འདྲར་སྤོས་ལྔ་སུས་ཕུལ་བ༔ དྲི་ཞིམ་ངད་ལྡན་ཡིད་དུ་འོང་བར་འགྱུར༔ པད་འབྱུང་སྐུ་འདྲར་སྨན་ལྔ་སུས་ཕུལ་བ༔ གདུག་པའི་ནད་ཞི་བདུད་རྩི་ཐོབ་པར་འགྱུར༔ པད་འབྱུང་སྐུ་འདྲར་སྙིང་པོ་ལྔ་ཕུལ་བ༔ སྡུག་བསྔལ་མེད་ཅིང་བདེ་བའི་མཆོག་ཐོབ་འགྱུར༔ པད་འབྱུང་སྐུ་འདྲར་དྲི་བཟང་སུས་ཕུལ་བ༔ གནས་གཙང་ཐོབ་ཅིང་དྲི་མ་མེད་པར་འགྱུར༔ པད་འབྱུང་སྐུ་འདྲར་ཚོགས་འཁོར་སུས་ཕུལ་བ༔ བཀྲེས་པ་མེད་ཅིང་བདེ་ལེགས་ཐོབ་པར་འགྱུར༔ པད་འབྱུང་སྐུ་འདྲར་འབྲུ་བཅུད་སུས་ཕུལ་བ༔ བདུད་རྩིའི་རྒྱ་མཚོ་མཆོག་ལ་སྤྱོད་པར་འགྱུར༔ པད་འབྱུང་སྐུ་འདྲར་མེ་ཏོག་སུས་ཕུལ་བ༔ སྒྲིབ་པ་བྱང་ཞིང་ཉོན་མོངས་ལྔ་ཞི་འགྱུར༔ པད་འབྱུང་སྐུ་འདྲར་དཀར་གསུམ་སུས་ཕུལ་བ༔ འདོད་འཇོའི་བ་དང་རྐང་འགྲོས་སྤྱོད་པར་འགྱུར༔ པད་འབྱུང་སྐུ་འདྲར་མངར་གསུམ་སུས་ཕུལ་བ༔ ཞལ་ཟས་བདའ་དགུའི་ལོངས་སྤྱོད་ཐོབ་པར་འགྱུར༔ པད་འབྱུང་སྐུ་འདྲར་སྤྱན་གཟིགས་སུས་ཕུལ་བ༔ བསོད་ནམས་ལོངས་སྤྱོད་ཡོ་བྱད་འཕེལ་བར་འགྱུར༔ པད་འབྱུང་སྐུ་འདྲར་འབྲུ་ལྔ་སུས་ཕུལ་བ༔ མ་རྨོས་བཏབ་མེད་ལོ་ཐོག་བཙའ་བར་འགྱུར༔ པད་འབྱུང་སྐུ་འདྲར་འཕན་གདུགས་སུས་ཕུལ་བ༔ ཆོས་བཤད་བླ་མེད་དོན་ཀུན་ཐོབ་པར་འགྱུར༔ པད་འབྱུང་སྐུ་འདྲར་དར་དཔྱངས་སུས་ཕུལ་བ༔ ལྷ་ཡི་ན་བཟའ་རྒྱན་བཟང་ཐོབ་པར་འགྱུར༔ པད་འབྱུང་སྐུ་འདྲར་སིལ་སྙན་སུས་ཕུལ་བ༔ དབྱངས་སྙན་ངག་བདེ་དབང་པོ་གསལ་བར་འགྱུར༔ པད་འབྱུང་སྐུ་འདྲར་རོལ་མོ་སུས་ཕུལ་བ༔ སྟོབས་ཆེ་གཟུགས་བཟང་ཡན་ལག་བདེ་བར་འགྱུར༔ པད་འབྱུང་སྐུ་འདྲར་བསྐོར་ཕྱག་སུས་བྱས་པ༔ འཁོར་བ་མེད་ཅིང་མྱ་ངན་འདས་པར་འགྱུར༔ སྐྱེས་བུ་བཟོ་ལ་རིག་པའི་རྩལ་རྫོགས་པས༔ པད་འབྱུང་སྐུ་ལ་གསེར་ཆབ་སུས་གསོལ་བ༔ རྒྱལ་པོ་རིན་ཅེན་ལྟ་བུ་ཐོབ་པར་འགྱུར༔ པད་འབྱུང་སྐུ་འདྲར་གཡུ་ཆབ་སུས་གསོལ་བ༔ བཙུན་མོ་རིན་ཅེན་ལྟ་བུ་ཐོབ་པར་འགྱུར༔ པད་འབྱུང་སྐུ་འདྲར་དངུལ་ཆབ་སུས་གསོལ་བ༔ བློན་པོ་རིན་ཅེན་ལྟ་བུ་ཐོབ་པར་འགྱུར༔ པད་འབྱུང་སྐུ་འདྲར་ལྕགས་ཆབ་སུས་གསོལ་བ༔ དམག་དཔོན་རིན་ཅེན་ལྟ་བུ་ཐོབ་པར་འགྱུར༔ པད་འབྱུང་སྐུ་འདྲར་དུང་ཆབ་སུས་གསོལ་བ༔ རྟ་མཆོག་རིན་ཅེན་ལྟ་བུ་ཐོབ་པར་འགྱུར༔ པད་འབྱུང་སྐུ་འདྲར་ཟངས་ཆབ་སུས་གསོལ་བ༔ གླང་པོ་རིན་ཅེན་ལྟ་བུ་ཐོབ་པར་འགྱུར༔ པད་འབྱུང་སྐུ་འདྲར་མཚལ་ཆབ་སུས་གསོལ་བ༔ ནོར་བུ་རིན་ཅེན་ལྟ་བུ་ཐོབ་པར་འགྱུར༔ སྐུ་འདྲར་ཤིང་ཕུད་སྣག་ཚ་སུས་གསོལ་བ༔ འཁོར་ལོ་རིན་ཅེན་ལྟ་བུ་ཐོབ་པར་འགྱུར༔ རིན་ཅེན་སྣ་བདུན་སྐུ་འདྲར་སུས་གསོལ་བ༔ ལོངས་སྤྱོད་རྫོགས་པའི་ཞིང་ཁམས་ཐོབ་པར་འགྱུར༔ པད་འབྱུང་རྣམ་ཐར་རི་མོར་སུས་བཀོད་པ༔ དབྱིངས་རིག་དོན་ལ་མ་ཡེངས་གནས་པར་འགྱུར༔ པད་འབྱུང་སྐུ་འདྲར་སྤྱན་འབྱེད་སུས་བྱས་པ༔ ཡེ་ཤེས་སྤྱན་གྱིས་སྣོད་བཅུད་གསལ་བར་འགྱུར༔ པད་འབྱུང་སྙན་ཤལ་དར་དཔྱངས་སུས་ཕུལ་བ༔ ལྷ་སྙན་དར་བུ་ཁས་ལ་གསང་བར་འགྱུར༔ པད་འབྱུང་ཤངས་ལ་དྲི་ཞིམ་རྒྱུན་མཆོད་པ༔ དྲི་ཞིམ་ངད་ལྡན་རྒྱུན་ལ་གནས་པར་འགྱུར༔ པད་འབྱུང་ཚེམས་ལ་དཀར་མདངས་སུས་བཏོན་པ༔ འཁོར་བ་དུག་གསུམ་རྩད་ནས་ཆོད་པར་འགྱུར༔ པད་འབྱུང་ལྗགས་ལ་རོ་མཆོག་སུས་ཕུལ་བ༔ ཐམས་ཅད་སྒྲོལ་བྱེད་ལྗགས་དང་ལྡན་པར་འགྱུར༔ པད་འབྱུང་སྐུ་ཚབ་རབ་གནས་སུས་སྦྱོར་བ༔ དམག་འཁྲུག་མུ་གེ་ནད་ཡམས་ཞི་བར་འགྱུར༔ པད་འབྱུང་སྐུ་ཚབ་རྟེན་བཤད་སུས་བྱས་པ༔ སེམས་བསྐྱེད་ཏིང་ངེ་འཛིན་ལ་གནས་པར་འགྱུར༔ དེ་ལྟར་གཞན་ལ་སྐུལ་བྱེད་སུས་འདེབས་པ༔ འགྲོ་བ་མང་པོའི་ལས་སྒྲིབ་དག་པར་འགྱུར༔ སྐྱེ་དགུའི་ཚེ་འཕེལ་པད་འབྱུང་སྐུ་འདྲ་འདི༔ ང་ཡི་ཐུགས་ལས་ཡེ་ཤེས་འོད་འཕྲོས་ནས༔ མ་འོངས་མོས་པའི་རྟེན་དུ་གཏད་པ་ཡིན༔ འདོད་དགུ་འབྱུང་བའི་ཡིད་བཞིན་ནོར་བུ་འདྲ༔ དམངས་པོ་བུ་མེད་ང་ལ་གསོལ་བ་ཐོབ༔ ལུས་སེམས་དཔང་ཚུགས་རྐང་པས་བསྐོར་བ་གྱིས༔ ལོག་འདྲེན་བར་གཅོད་དཔག་ཚད་རྒྱང་གྲགས་འབྲོས༔ ཡིད་འོང་ཉམས་དགའི་དངོས་པོ་པང་དུ་སྐྱེ༔ དབུལ་པོ་ནོར་མེད་ང་ལ་གསོལ་བ་ཐོབ༔ གསང་སྔགས་གསུང་རབ་པད་འབྱུང་བཀོད་པ་ལས༔ རོ་འབྱུང་བཅུད་བསྡུས་དོན་ལ་ཐིམ་པར་སྒོམས༔ འཇིག་རྟེན་ཟང་ཟིང་ནོར་གྱིས་ལག་མི་འབོར༔ དོན་དང་མི་ལྡན་ང་ལ་གསོལ་བ་ཐོབ༔ རིག་པའི་སེམས་ལ་འཁོར་བའི་སྐྱོན་མེད་དེ༔ ནོར་བུ་རིན་ཅེན་རང་ལ་ཡོད་མོད་ཀྱང་༔ བཀུར་སྟི་རིམ་གྲོ་མཆོད་པ་མ་བྱས་པས༔ འདོད་པའི་ཡོན་ཏན་གང་ཡང་འཕེལ་མ་གྱུར༔ སྨོན་ལམ་གང་བཏབ་དེ་ཡིས་དེ་ཐོབ་བྱེད༔ གསོལ་བཏབ་པད་འབྱུང་ང་ལས་དགོས་འདོད་འབྱུང་༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྐུ་ཚབ་ལ་གསོལ་བ་བཏབ་པའི་ཕན་ཡོན་བསྟན་པའི་ལེའུ་སྟེ་བརྒྱ་ཐམ་པའོ༔
པདྨ་བཀའ་ཐང་ལེའུ་ ༡༠༡ རྗེས་འཇུག་བདེ་སྟོང་ལ་སྤྱོད་པ།
ལུས་ཕུང་བདེ་བའི་མེ་ཏོག་གང་ཕུལ་བ༔ བདེ་སྟོང་གཉིས་མེད་བསྒོམ་པའི་པད་འབྱུང་སྐུ༔ གཡོ་འཁྲུག་མེད་པའི་བདེ་སྟེར་ལྷ་མོ་ཁྱོད༔ རང་བཞིན་མེད་པར་རང་ལུས་ཡབ་ཡུམ་གསལ༔ འཁོར་བ་མི་བདེའི་སྡུག་བསྔལ་བྱུང་ཚོར་ལ༔ སྡུག་བསྔལ་ཤེས་པས་བདེ་བ་བཙལ་དུ་ཡོད༔ ལམ་ལ་གསལ་ཡོད་འབྲས་བུ་བསྒྲུབ་ཏུ་ཡོད༔ གསང་སྔགས་ཡོན་ཏན་ཐམས་ཅད་དེ་ལས་འབྱུང་༔ བཟོད་པའི་བསྲན་ཅན་གཉེན་པོ་གང་བསྟེན་པ༔ དོན་གཉིས་མཐར་ཕྱིན་ཚོགས་གཉིས་རྫོགས་རེ་སྐན༔ འཁྲུལ་པའི་བློ་ཡིས་འཁོར་བའི་ས་བོན་འདེབས༔ ཕྱིན་ཅི་ལོག་སྤྱོད་ལས་སྤྱོད་ཀུན་སྤངས་ནས༔ དགའ་བའི་མདངས་ཕྱུང་སྙན་པའི་གསུང་བསྒྲགས་ཀུན༔ སྨིན་ཅིང་དྲོད་འབེབས་འཇུ་དང་བསྲེག་ཅིང་དཀྲུག༔ གསོ་བསྐྱེད་བརྟན་དང་མཐའ་ལ་སྟོབས་པར་བྱེད༔ ཡོན་ཏན་ཟག་མེད་སྟོང་པ་ཉིད་དུ་གསལ༔ བརྩོན་འགྲུས་གཡེལ་མེད་བཏང་སྙོམས་ལེ་ལོ་མེད༔ འདོད་ཆགས་ལས་ཀྱི་དུག་མཚོ་ཁོལ་མའི་ནང་༔ སྟོང་ཉིད་ཡེ་ཤེས་བདེ་བ་རྙེད་པར་འགྱུར༔ ཆགས་མེད་སྦྱིན་པ་ཡོངས་སུ་བཏང་དུ་ཡོད༔ འགྲོ་དོན་མ་འགགས་རྣམ་ཀུན་ལམ་བགྲོད་འགྲོ༔
ཐབས་ཆེན་སྟོབས་ཀྱིས་བླ་མེད་དོན་ཐོབ་ནས༔ དབྱིངས་ལ་རོལ་ཞིང་ཐབས་ཀྱིས་གང་འདུལ་བ༔ མཚན་མ་ཐམས་ཅད་ཤེས་རབ་ཉིད་ལ་གསལ༔ དེ་ཕྱིར་གསང་སྔགས་བླ་མེད་སྤྱོད་ལ་ཕུལ༔ གང་ལ་རང་བཞིན་མེད་པའི་དོན་ཤེས་ལ༔ ཉེས་སྤངས་ལས་སྤྱོད་འབྲས་བུ་དེ་ཉིད་དོ༔ སྤྱོད་ཡུལ་སྦྱོར་སྒྲོལ་མཚན་མེད་འཁོར་ལོས་སྒྱུར༔ བླ་མེད་རྫོགས་པའི་འབྲས་བུ་དེ་ལ་ཕུལ༔ སྤུངས་ཆུང་ཉོན་མོངས་ལྔ་ཡིས་དབང་བྱས་ལ༔ བདེ་སྟོང་ཐབས་ཀྱིས་ལོག་པ་ཟིལ་གྱིས་ནོན༔ དབང་རྒྱ་མ་ཆད་ལས་རྒྱ་སྦྱོར་སྒྲོལ་རིག༔ སྒྲོ་སྐུར་ཐམས་ཅད་ཡོན་ཏན་འབྱུང་ལ་ཕུལ༔ ཤེས་རབ་དད་སྟོབས་ལྡན་པའི་སྐྱེས་བུ་ལ༔ འདི་ལྟར་ཅི་ཡང་མེད་པར་གཏོང་ཤེས་ན༔ སྙིང་པོ་འོད་ཟེར་རང་ལ་ཤར་བ་བཞིན༔ རང་རིག་རྩལ་གྱི་བོགས་ཐོན་དེ་ལ་ཕུལ༔ བདེ་ཆེན་རྣམ་དག་འབྲས་བུའི་དྲོད་ཚད་རྙེད༔ དཀའ་བ་སྣ་ཚོགས་སྟོབས་ཀྱིས་དོན་ཆེད་དུ༔ གཉིས་མཐར་མ་ལྷུང་ཀློང་དུ་ཡེ་སངས་རྒྱས༔ ཤོང་ཡངས་དགོས་མེད་བརྡུལ་ཞུགས་ཅན་ལ་ཕུལ༔ པད་འབྱུང་བརྒྱུད་འཛིན་ཁྱད་པར་མི་ཡི་མཆོག༔ ཅི་མཛད་ཐབས་མཁས་འགྲོ་བ་འདྲེན་པའི་དཔལ༔ བཅིངས་དགྲོལ་སྦྱོར་བས་མཚན་མའི་དྲོད་ཚད་རྙེད༔ མྱ་ངན་འདས་པ་ཕྱིར་མི་ལྡོག་ལ་ཕུལ༔ དུག་ལྟའི་ནད་སེལ་སྐྱེས་བུ་སྨན་པའི་མཆོག༔ ཐིག་ལེ་བདེ་ཆེན་ཀློང་དུ་ཡེ་སངས་རྒྱས༔ མ་རིག་མུན་སེལ་སྣང་གསལ་སྒྲོན་མེའི་འོད༔ མཛེས་པའི་ཆ་ལུགས་བསྟན་གཉིས་མཐུན་ལ་ཕུལ༔ རྒོལ་བ་ཚར་གཅོད་སྨྲ་བའི་སེང་གེའི་སྒྲ༔ བྱེད་པའི་སྟོབས་ལྡན་ཁྱུ་མཆོག་རླབས་པོ་ཆེ༔ ཉི་ཟླའི་ཞལ་ནི་ཀུན་ལ་མཛེས་པར་སྟོན༔ བདེན་པའི་ཚིག་ནི་རང་བཞིན་མེད་པར་སྒྲོག༔ ཡེ་དག་ཐུགས་ཉིད་ཆུ་ཟླ་བཞིན་དུ་གསལ༔ དོགས་པའི་སྐྱོན་མེད་ཡོན་ཏན་རྫོགས་ལ་ཕུལ༔ མུན་པའི་གླིང་འཇོམས་སྒྲོན་མ་གསལ་བའི་འོད༔ ཏིང་འཛིན་བརྒྱ་བཅུ་བསམ་གཏན་བྱམས་སྙོམས་ལྡན༔ ནམ་མཁའི་ཀློང་བཞིན་ཁྱབ་གདལ་ཟག་མེད་ཐུགས༔ མཁྱེན་པའི་ཡེ་ཤེས་ཉི་ཟླ་གསལ་བའི་འོད༔ ཞིང་མཆོག་དེ་འདྲ་མི་གཟུགས་བྱོན་ལ་ཕུལ༔ བདེ་སྟོང་གསང་སྔགས་བརྒྱུད་པ་དེ་ཡིས་འཛིན༔ ནམ་མཁའི་དབྱིངས་དང་རྒྱ་མཚོའི་ཚུལ་བཞིན་དུ༔ གཏིང་དཔག་བརྟག་དཀའ་ཤིན་ཏུ་ཚོད་མི་ཟིན༔ སྐལ་ལྡན་སྣོད་བཟང་སྦྱངས་པའི་ལས་འཕྲོ་ཅན༔ འདི་ཐོས་འདི་ཡི་ཡོན་ཏན་ལ་སྤྱད་ནས༔ བྱི་དོར་དག་ཅིང་གཙང་མའི་དངོས་གྲུབ་གཏེར༔ ཆེ་བའི་ཡོན་ཏན་ཁྱད་པར་འཕགས་ལ་ཕུལ༔ ཨུརྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྗེས་འཇུག་བདེ་སྟོང་ལ་སྤྱོད་པའི་ལེའུ་སྟེ་བརྒྱ་དང་གཅིག་པའོ༔
པདྨ་བཀའ་ཐང་ལེའུ་ ༡༠༢ སྐྱེ་བདུན་ཤའི་ཕན་ཡོན་བསྟན་པ།
དེ་ནས་ནང་པར་སྒྲུབ་པ་ཐོན་པའི་ཚེ༔ སློབ་དཔོན་ཞལ་ནས་ལྷ་སྲས་བཙན་པོ་ལགས༔ རྒྱལ་སྲས་ལྷ་རྗེ་སྔོན་དུ་ཁྲིད་ཤོག་གསུངས༔ སྲས་འདི་སྐྱེ་བ་ཡང་སྔ་ད་བར་དུ༔ བདག་གིས་བྱིན་གྱིས་བརླབས་པའི་སྲས་ཡིན་གསུངས༔ ལྟ་བ་རྫོགས་ཆེན་པདྨ་སྙིང་ཐིག་དང་༔ ཡི་དམ་བཀའ་འདུས་ཆོས་ཀྱི་རྒྱ་མཚོ་དང་༔ བླ་མ་བསྟན་གཉིས་སྐོར་གསུམ་ལ་སོགས་པ༔ རྩིས་སྨན་ཀུན་གྱི་བདག་པོ་འདི་ཡིན་པས༔ ཡར་ཀླུངས་གཏེར་ཀ་འདི་ལ་གཏད་དོ་གསུངས༔ གསང་མཚན་སྔགས་པ་མཆོག་གྲུབ་རྒྱལ་པོར་གསོལ༔ བཟང་སེམས་ཆེ་ཞིང་ཀུན་ལ་བྱམས་པའི་བུ༔ དུག་ལྔ་མི་རགས་འཁོར་བར་མི་རྒྱུ་ཡང་༔ བསྟན་གཉིས་གུས་ཤིང་འགྲོ་ལ་བརྩེ་བའི་ཕྱིར༔ ང་དང་གདན་འཛོམ་ལུང་ནི་ཡང་ཡང་བསྟན༔ ཆོས་ལས་འདས་པ་ངེས་པའི་དོན་འདི་གསུངས༔ དེ་ནས་སངས་རྒྱས་མཛད་སྲོལ་མཁྱེན་པར་མཛོད༔ སྟོབས་མེད་མུན་པ་ནང་གི་མཛུབ་གཡུགས་བཞིན༔ ཕལ་པ་རྣམས་ཀྱང་འགྲོ་དོན་བྱ་བློ་རྩོམ༔ བསྟན་པ་བྱེར་ཟུག་སྐབས་སུ་ངའི་སྤྲུལ་པ༔ ཟ་ཧོར་རྒྱལ་པོ་གཙུག་ལག་འཛིན་རྗེས་བཟུང་༔ སེམས་ཅན་གང་གི་དོན་བྱེད་མ་འོངས་དུས༔ དེ་བ་ཨ་ཀར་ཙནྡྲ་རི་རྒྱལ་གླིང་༔ དེ་ནས་ཚེ་འཕོས་ཡིད་གཉིས་ཆ་མ་མཆིས༔ ཕྱི་རབས་འབྱུང་འགྱུར་སངས་རྒྱས་བླ་མ་སྟེ༔ དེ་ནས་ཚེ་འཕོས་རྒྱ་ཡི་ལོ་ཙཱ་ཞེས༔ དེ་ནས་ཉི་མ་སེང་གེ་སྟོད་གཏེར་དབང་༔ གཤེད་མ་བརྒྱ་ཡིས་མཐའ་བསྐོར་ཉམ་མི་ང་༔ གཏེར་སྟོན་རྐྱང་པའི་སྐྱེ་བ་བཅུ་གསུམ་འབྱུང་༔ འཇམ་པའི་གོས་གྱོན་སྔོ་སྨིན་གསེབ་ཕྱིན་བཞིན༔ མ་རིག་འཁྲུལ་བའི་སེམས་ཅན་གདུལ་དཀའ་བའི༔ འགྲོ་བ་མང་པོ་སངས་རྒྱས་ཞིང་དུ་ཁྲིད༔ སྙན་པས་ས་སྟེང་ཐམས་ཅད་ཁྱབ་པར་འགྱུར༔ སྐྱེ་བ་གཅིག་ནི་བོད་ཡུལ་གྲ་ནུབ་མདའ༔ རྒྱལ་སྲས་ལུང་པ་འདི་ནས་ནུབ་ཏུ་སྐྱེ༔ སྔགས་པ་མཐུ་མཁན་སྔགས་རྩིས་སྨན་སྐྱོང་རིགས༔ ཆོས་དབྱིངས་མདངས་ཅན་ཡེ་ཤེས་ཁ་དོག་ཅན༔ ཡར་རྗེ་ཨུ་རྒྱན་གླིང་པ་ཞེས་བྱ་བ༔ མེ་ཁམས་ཆུ་མོ་ཕག་གམ་ཁྱི་ལོ་པ༔ སྤྲུལ་པའི་སྲས་འདི་འདམ་སྐྱེས་པདྨ་འདྲ༔ ཕ་ཤི་མས་བོར་དམྱལ་བའི་སེམས་ཅན་འདྲ༔ ལྟོ་གོས་མ་ཁྱོགས་ཡི་དྭགས་ལམ་ཟན་འདྲ༔ བཀོལ་སྤྱོད་མི་ཁེངས་བསམ་མེད་དུད་འགྲོ་འདྲ༔ གང་ཉེ་ངོ་ཚ་མཛེ་ཕོ་ཁྱུ་བུད་འདྲ༔ མི་ལ་བདག་མེད་རི་ཤོ་ང་ཁྱེར་འདྲ༔ མཉམ་པོས་ཁྱད་གསོད་ཁ་ཉེན་ལྷ་མིན་འདྲ༔ བསོད་ནམས་ཆུང་ཞིང་སྙིང་རུས་སྡུག་སྲན་ཅན༔ བརྩོན་འགྲུས་ཤེས་རབ་ཆེ་ཞིང་ཆགས་སེམས་ཆུང་༔ ང་ལ་མོས་ཤིང་འགྲོ་ལ་ཕན་སེམས་ཆེ༔ དད་པ་ཆེ་ཞིང་བློ་བརྟན་སྤོབས་པ་མཐོ༔ དུག་ལྔ་མི་རགས་སྒྲུབ་ལ་རབ་ཏུ་བརྩོན༔ བློ་གསལ་རྟོགས་པ་མཐོ་ཞིང་རྒྱུ་འབྲས་ཞིབ༔ ཞི་དུལ་ཆེ་ཞིང་མདོ་སྔགས་ཆོས་རྒྱུས་ཆེ༔ སྐྱོ་ཤས་ཆེ་ཞིང་སྤྱོད་ལམ་གཞན་མི་བསྲེ༔ བློ་སྣ་ཐུང་ཞིང་སེམས་དཔངས་རིག་པ་གཡེལ༔ མདོག་དཀར་དྲི་ཞིམ་བལྟ་སྡུག་ཁྲོ་བོའི་དབྱིབས༔ གཟུགས་མཛེས་བོངས་འཚམ་ལྕེ་རིང་གདོང་བར་ཚུགས༔ མང་ཚོགས་གསེབ་ཏུ་གཟི་མདངས་གཞན་ལས་ཆེ༔ སྐྱེ་མཆེད་དངས་ཤིང་ཆོས་ཕྱིར་དཀའ་སྤྱད་ནུས༔ སྤྲུལ་པའི་སྐུ་མཆོག་ཉ་རྒྱས་ཟླ་བ་འདྲ༔ གཏེར་ཀ་ཉེར་བརྒྱད་གཞན་ཡང་འབྱེད་པར་འགྱུར༔ དེ་དུས་བསྲུང་བའི་དམ་ཚིག་འདི་ཡང་གནད༔ ཕ་ཡུལ་མ་སྡོད་བུ་ལོན་སྐྱེད་མ་སྤེལ༔ དགོས་དུས་མི་བསྟོངས་གཉེན་ཚན་དགྲ་ཡིན་པས༔ ལོང་བའི་མིག་བཞིན་མི་མཐོང་ཡུལ་དུ་གྱིས༔ དགྲ་ཡ་མ་སྲོང་གཉེན་ལ་སྐྱོང་མ་བྱེད༔ རྨོ་རྐོ་མ་བྱེད་ཚོང་ཁེ་འཕྲོག་མ་བསྟེན༔ གྲོང་ཆོག་མ་བྱེད་སྔས་སྲུང་སྲི་མ་གསོ༔ ཆོས་ལུགས་མི་མཐུན་པ་དང་གྲོགས་མ་འགྲོགས༔ འགལ་རྐྱེན་བྱེད་པའི་བུད་མེད་རྩར་མ་བསྟེན༔ ཉིན་པར་མང་གསེབ་བག་མེད་ཆང་མ་འཐུངས༔ སྲོད་འགྲོས་ཐོ་རངས་མ་འགྲིམས་རྐང་མ་ཡང་༔
མངོན་མཚན་མ་ཆེ་གཏེར་འདྲ་སློབ་མ་སྟེན༔ ཆོས་ཀྱི་ཁ་འཛིན་མ་བྱེད་མཐུ་མ་ངོམ༔ སྤྱོད་ལམ་ཤུགས་འགོ་ཐ་མལ་གསེབ་མ་སྡོད༔ རི་དྭགས་བཞིན་དུ་རི་སུལ་བཙན་སར་སྡོད༔ མི་ཚེ་ཆོས་དྲིལ་ཚེ་འདིའི་འཁྲི་བ་ཆོད༔ སུ་ངོ་ཆེ་ཡང་མ་སྲུང་སྟབས་མ་བཏང་༔ ཏུག་ཏུག་མ་བྱེད་སྙུགས་བསྲིངས་ཆམ་མེར་ཞོག༔ རྒྱབ་རྟེན་སྲུང་མ་མཐུ་དང་ཆོས་ལ་གྱིས༔ ཚེས་བཅུ་བྱུང་རེས་ང་ཉིད་བོད་དུ་འོང་༔ རླུང་ཁྱེར་རྫས་བཞིན་ཅི་ཡོད་ཚོགས་སུ་བསྐོར༔ མི་རྗེས་མི་སློབ་ཆོས་བརྒྱུད་མི་འཛིན་པས༔ བུ་ཚ་ཡོད་ཀྱང་རང་ཕུང་མིས་འཕྱ་བས༔ ཞྭ་འཕྱེའི་མི་བཞིན་འགྲོ་འདུག་ཉུང་ངུ་གྱིས༔ མི་མཛའ་མཐོ་འགྲོགས་བར་ཆད་ལོགས་ན་མེད༔ ཕུང་འདྲེའི་ནང་དབྱེན་གར་ཡོད་ཆ་མེད་པས༔ ལྐུགས་པའི་ཁ་བཞིན་སྨྲ་བ་ཉུང་ངུ་གྱིས༔ བྱ་བྱེད་སྤྱོད་པ་འདུན་མ་མ་མཁས་ན༔ དགྲ་རུ་སུ་འོང་མི་ཤེས་སྲིད་དེ་འོང་༔ ཁ་ཉེན་མི་བཞིན་སྡོད་ལུགས་མཁས་སུ་གྱིས༔ མི་ཡི་བརྒྱུད་རིགས་མ་བརྟགས་བློ་མ་གཏོད༔ མ་བཅོལ་རྟོག་ཅན་མ་ཆེ་བཞག་སར་སྡོད༔ ཆེ་གཏོར་བྲོད་ཁར་མ་ཉན་སླུ་བ་འོང་༔ ཕ་བོང་བཞིན་དུ་སྒྱུར་ཁ་ལྗི་རུ་གྱིས༔ ཁྱོད་ཀྱི་གདུང་བརྒྱུད་བརྒྱ་དང་ཉེར་གཅིག་པར༔ ཆོས་མ་བྱས་ཀྱང་སངས་རྒྱས་ཚེ་ཚོམ་མེད༔ ཅེས་གསུངས་བཀའ་གཏད་གཟེངས་བསྟོད་ལུང་བསྟན་པས༔ རྒྱལ་སྲས་ལྷ་རྗེས་མང་དུ་བཤུམས་ཏེ་བརྒྱལ༔ ཡུན་ཅིག་དྲན་པ་རྙེད་ནས་ཕྱག་བཙལ་ཏེ༔ འཁོར་བའི་སྡུག་བསྔལ་དེ་ཙམ་དང་ལེན་པས༔ སྐྱེ་བ་འདི་ཡིས་ཆོད་པར་ཐུགས་རྗེས་ཟུངས༔ ཞེས་གསོལ་ཡབ་ཡུམ་སྲས་གསུམ་ཕྱག་བཙལ་བས༔ སློབ་དཔོན་པདྨའི་ཞལ་ནས་འདི་སྐད་གསུངས༔ ཁྱོད་ཀྱིས་ང་ལ་སེམས་བསྐྱེད་ཉམས་འཇུག་གམ༔ མི་དགའ་མི་དགོས་དམྱལ་བ་ངོ་མཚར་ཆེ༔ སངས་རྒྱས་ཀུན་གྱི་བླ་མ་དམྱལ་བ་ཡིན༔ བསྟན་པའི་བདག་པོ་ཤཱཀྱ་ཐུབ་པས་ཀྱང་༔ དག་པའི་སྐྱེ་བ་ལྔ་བརྒྱ་བླངས་པ་དང་༔ མ་དག་སྐྱེ་བ་ལྔ་བརྒྱ་བླངས་ཚུལ་བསྟན༔ བྱང་ཆུབ་སེམས་དཔའ་སྤྱན་རས་གཟིགས་ཀྱིས་ཀྱང་༔ འཁོར་བ་མ་སྟོངས་བར་དུ་སེམས་བསྐྱེད་ནས༔ སེམས་བསྐྱེད་ཉམས་པས་དབུ་ཚལ་སྟོང་དུ་གས༔ འོད་དཔག་མེད་པས་བཅུ་གཅིག་ཞལ་བྱིན་བརླབས༔ སངས་རྒྱས་བྱང་ཆུབ་སེམས་དཔའི་མཛད་པ་ནི༔ རང་གི་འདུག་སར་ཞི་བདེ་མི་སྒྲུབ་ཅིང་༔ འགྲོ་བ་མང་པོའི་དོན་དུ་དཀའ་བ་སྤྱད༔ ཐུབ་པའི་སྐྱེས་རབས་པད་འབྱུང་རྣམ་ཐར་ལྟོས༔ སེམས་ཅན་ཐུགས་རྗེས་མི་འཛིན་བློས་གཏོང་ངམ༔ དད་པ་ཚོལ་ཕྱིར་སྡུག་བསྔལ་བཟོད་པར་གྱིས༔ མི་མཇེད་འཇིག་རྟེན་བྱེ་བ་ཕྲག་ས་ཡའི༔ ཞིང་ཁམས་ཀུན་ཏུ་མཆོག་གྲུབ་དེ་བཞིན་ནོ༔ ལེགས་སོ་ལེགས་སོ་ཡེ་ཤེས་མཆོག་གྲུབ་རྒྱལ༔ ཀུན་དང་ཡིད་མཐུན་འགྲོ་ཀུན་བསམ་པ་འགྲུབ༔ སྐྱེ་བ་མི་བགྲང་མངོན་པར་རྫོགས་འཚང་རྒྱ༔ དེ་དུས་སེམས་ཅན་ལས་འཕྲོ་བཟང་པོ་རྣམས༔ སྲིད་པ་མི་ཡི་བུ་རུ་སྐྱེས་པ་ལ༔ ཨུ་རྒྱན་ངས་ཀྱང་ཕྱིར་མི་ལྡོག་ལུང་བསྟན༔ ཞིང་ཁམས་འདི་ཡི་སྐྱེས་རབས་མང་ན་ཡང་༔ བོད་དུ་འབྱུང་ཚུལ་ཟུར་ཙམ་བསྟན་པ་ཡིན༔ རྒྱལ་སྲས་ཕུང་པོ་འདི་ཡང་དོན་ཆེན་ཏེ༔ དབང་པོ་ལྔ་དང་ཟག་ཆུ་ཤ་ཁྲག་རུས༔ ཤིག་གི་སྙིང་ཙམ་སུ་ཡི་ལྟོར་སོང་བ༔ དམངས་པོའི་ལྟོར་སོར་མི་ཡི་དངོས་གྲུབ་འབྱུང་༔ དབུལ་པོའི་ལྟོར་སོང་ཟས་ནོར་དངོས་གྲུབ་འབྱུང་༔ འཆི་འགྲོའི་ལྟོར་སོང་ཚེ་ཡི་དངོས་གྲུབ་འབྱུང་༔ དད་ཅན་ལྟོར་སོང་ཆོས་ཀྱི་དངོས་གྲུབ་འབྱུང་༔ དེ་ལ་སོགས་པའི་ཡོན་ཏན་མང་ཡོད་ཀྱང་༔ ལོག་ལྟ་ཅན་གྱིས་ཡོན་ཏན་སྐྱོན་དུ་མཐོང་༔ དེ་ཡང་འབྲེལ་པ་སྣ་གཅིག་ཐོགས་པ་ཡིས༔ སྒྲིབ་པ་དག་སྟེ་ཆོས་ཀྱི་ལས་སད་འགྱུར༔ དེ་ཕྱིར་མཆོག་གྲུབ་སྐྱེ་བ་བཅུ་གསུམ་པར༔ མཐོང་ཐོས་དྲན་རེག་དོན་དང་ལྡན་པ་སྟེ༔ གྲིབ་མས་རེག་གམ་ཏིལ་འབྲུ་ཙམ་ཞིག་ཉེ༔ ངན་སོང་འགྲོ་ངེས་ཤེས་ཀྱང་མཐོ་རིས་སྐྱེ༔ དགེ་རྒྱུ་ཉུང་འབྲུ་ཙམ་ཞིག་ས་བོན་ཐེབས༔ དྲང་སྲོང་གཟའ་ནད་གདོན་བགེགས་འབྱུང་པོའི་ནད༔ འདྲེ་ཡི་གཙེར་བ་རྣམས་ཀྱང་སྒྲིབ་པར་འགྱུར༔ མཚམས་མེད་ལྔ་སྤྱད་ལྟོར་སོང་རིག་འཛིན་གྲལ༔ ལས་ཀྱིས་དུད་འགྲོའི་ལུས་སུ་སྐྱེས་གྱུར་ཀྱང་༔ ཡུལ་བདག་བྱམས་ཤིང་བརྡུང་བཙོག་མེད་པར་འགྱུར༔ དེ་སོགས་ཡོན་ཏན་མང་ཡོད་ཟུར་ཙམ་ཡིན༔ ད་ལྟའི་ཡེ་ཤེས་མཆོག་གྲུབ་རྒྱལ་པོ་ཁྱོད༔ བཅོ་ལྔའི་ལོ་ལ་ཚེ་དུས་བྱེད་པའི་ཚེ༔ ཕུང་པོ་འདི་ཉིད་གཏེར་དུ་སྦོས་ཤིག་གསུངས༔ འདི་ཉིད་ས་ཡི་སྟེང་དུ་ཐོན་པའི་ཚེ༔ བསོད་ནམས་ཆུང་བའི་དུད་འགྲོ་ཡིན་ཀྱང་རུང་༔ མི་ཚེ་སྡིག་བསྒྲིལ་བཤན་པ་ཡིན་ཀྱང་རུང་༔ སྐྱེ་བ་དམན་པའི་བུད་མེད་ཡིན་ཀྱང་རུང་༔ ལས་ཀྱི་འཕྲོ་མེད་མི་ལུས་ཙམ་ཡང་རུང་༔ ཆུ་ལ་གནས་པའི་སེམས་ཅན་ཡིན་ཀྱང་རུང་༔ མཁའ་ལ་གནས་པའི་འདབས་ཆགས་ཡིན་ཀྱང་རུང་༔ སྡིག་པ་དག་ཅིང་མི་ལུས་གཙང་མ་འཐོབ༔ དད་དང་ཤེས་རབ་བརྩོན་འགྲུས་སྤོབས་པ་འབྱུང་༔ སྐྱེ་བདུན་ཤ་ཡིས་འདུལ་བའི་དུས་ཚོད་ཀྱང་༔ སངས་རྒྱས་བསྟན་པ་ལྔ་བརྒྱ་ཕྲག་གསུམ་ནུབ༔ དུས་མ་འགྱུར་ཏེ་ས་སྟེང་མི་སྤྱོད་འགྱུར༔ རྒྱལ་ཁྲིམས་ཞིག་པས་བོད་ཁྲིམས་རྒྱ་ཆེ་ཆད༔ སི་ལུ་ནི་ལུར་སོང་ནས་འཁྲུག་འཐབ་བྱེད༔ ཁྱད་པར་ཉོན་མོངས་དུག་ལྔ་རང་དགར་སྤྱོད༔ ཐམས་ཅད་འཁྲུགས་ནས་མཚོན་གྱི་བསྐལ་པ་དར༔ རྟགས་ཙམ་འཛིན་གྱི་བསྟན་པའི་མགོར་ཉེ་སྟེ༔ བཙུན་པ་ཁྲིམས་མེད་སྡོམ་པ་རྒྱབ་ཏུ་བོར༔ བུ་སྤྲུག་མདུན་དུ་བླངས་ནས་སྔགས་པ་ཟེར༔ སྔགས་པས་མགོ་སྤུ་བྲེགས་ནས་བཙུན་ཆས་བྱེད༔ དགེ་བཤེས་ཧོར་ལས་གྲི་མདུང་དམག་དཔོན་བྱེད༔ གཏམ་དུ་དམག་ལབ་གོས་སུ་གོ་མཚོན་གྱོན༔ ལས་སུ་རྫོང་རྩིག་ནོར་དུ་སྡིག་པ་གསོག༔ ལྷ་ཆོས་མི་བྱེད་སྡིག་པ་མཆོར་དུ་བྱེད༔ དམག་དང་མུ་གེ་ནད་ཡམས་དུས་གཅིག་འབྱུང་༔ བཀའ་ཁྲིམས་ཞིག་པས་འདུན་མ་བུད་མེད་བཟང་༔ མཚོན་ཁ་ནང་བསྟན་སྤྱི་འདུན་ཆེན་མོ་ཞིག༔ ཤེས་པ་ཕྱིར་ལོག་གསལ་བས་གླིང་ལོག་འབྱུང་༔ གནག་པའི་ལས་དུབ་ལུས་སེམས་གཉིས་ཀ་བྲེལ༔ གནས་གཞི་ལྷ་ཁང་བཤུས་ནས་རྫོང་ལ་འགེབས༔ རིགས་མི་མཐུན་པ་ཀུན་དང་འགྲོགས་དགོས་འབྱུང་༔ སྐྱེ་འགྲོ་མི་བཟོད་ཟུག་རྔུ་སུས་མི་ཟློག༔ ལས་སུ་ཤེས་པའི་སེམས་ཅན་ཨ་རེ་སྡུག༔ གཏེར་ལ་མོས་ཤིང་འདྲི་བ་མང་དུ་འབྱུང་༔ དེ་དུས་སྐྱེ་བདུན་ཤ་འདི་ལྟོར་སོང་བས༔ དུག་གསུམ་ནད་ཞི་བདུད་རྩིའི་མཆོག་ཏུ་གསུངས༔ ལྷ་སྲས་ཡབ་ཡུམ་སྲས་གསུམ་དགྱེས་པར་གྱུར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ ལྷ་རྗེ་ལུང་བསྟན་ཅིང་སྐྱེ་བདུན་ཤའི་ཕན་ཡོན་བསྟན་པའི་ལེའུ་སྟེ་བརྒྱ་དང་གཉིས་པའོ༔
པདྨ་བཀའ་ཐང་ལེའུ་ ༡༠༣ སྐལ་ལྡན་བུད་མེད་གསུམ་ལ་ཞལ་གདམས་གསུངས་པ།
དེ་ནས་ངང་བྱུང་དཔལ་གྱི་རྒྱལ་མོ་བཙུན༔ ཐུགས་དམ་བཞེངས་པ་གཡུ་ཡི་ལྷ་ཁང་དུ༔ སློབ་དཔོན་སངས་རྒྱས་གཉིས་པ་སྤྱན་དྲངས་ནས༔ རིན་ཅེན་ཁྲི་ལ་དར་ཟབ་གབ་རྩེ་བརྩེགས༔ དགྱེས་པའི་འདོད་ཡོན་མང་པོ་ཞལ་དུ་དྲངས༔ གུས་པའི་ཕྱག་བཙལ་བཙུན་མོས་ཞུས་པ་ནི༔ བདག་ལ་ཚིག་ཉུང་དོན་ཆེ་ཉམས་ལེན་བདེ༔ འཇིག་རྟེན་མ་སྤངས་ཕྱི་མ་འཚང་རྒྱ་བའི༔ ཆོས་ཤིག་ཐུགས་ལ་འདོགས་པ་ཞུ་ཞུས་པས༔ སློབ་དཔོན་ངང་བྱུང་རྒྱལ་མོ་ཉོན་ཅིག་གསུངས༔ དང་པོར་མི་རྟག་པ་ནི་ནན་ཆེར་སྒོམས༔ དེ་ནས་སྐྱབས་འགྲོ་སེམས་བསྐྱེད་རེམ་དུ་གྱིས༔ དེ་ནས་བླ་མ་རྣམས་ལ་གསོལ་བ་ཐོབ༔ དེ་དག་སྔོན་འགྲོ་ཡིན་པས་མེད་ཐབས་མེད༔ དེ་ནས་ལུས་ཀྱིས་མཉམ་གཞག་ལྟ་སྟངས་ཀྱིས༔ ཡུན་ཐུང་གྲངས་མང་ཁང་སྟོང་ཐིགས་པ་བཞིན༔ ལུས་སེམས་མ་བསྒྲིམས་ལྷོད་དེ་ཤིག་གེ་ཤོག༔ མ་གཞི་སྟོང་པ་ཉིད་ཀྱི་ཞི་གནས་སུ༔ རྣམ་རྟོག་མཐར་འདེད་སྟོང་སྐོར་རེམ་ལ་གྱིས༔ ཉམས་ལ་འདི་འབྱུང་བྱ་བ་མེད་དེ་འབྱུང་༔ བསྒོམ་ལ་མ་ཞེན་ཡང་ནས་ཡང་དུ་ཤིག༔ བཟང་རྟོག་ངན་རྟོག་གང་ཤར་གཅེར་གཅེར་ལྟོས༔ བུ་ལམ་རིག་པ་མ་ཚུགས་སྣ་ཚོགས་པ༔ སྐྱོན་དུ་མི་བལྟ་ཐུག་ཕྲད་ལམ་དུ་ཁྱེར༔ མ་བུ་གཉིས་མེད་ལྷག་མཐོང་འཇམ་སྐོར་དུ༔ ཚོགས་དྲུག་སྐྱར་ཐོན་སྣང་སྟོང་གཉིས་མེད་བསྲེས༔ དེ་དག་དངོས་གཞི་ཡིན་པས་མེད་ཐབས་མེད༔ སྒོམ་ཚེ་ཅི་ཡང་མེད་དེ་སྟོང་པ་ཡིན༔ ཡེངས་ན་སྣང་ཕྱིར་ཞེན་པ་འབྲངས་པས་འཁྲུལ༔ བརྟགས་ཤིང་དཔྱད་ནས་བླང་དོར་མེད་པར་སྐྱོངས༔ གང་བྱུང་གང་བབས་བདེ་བ་ཁོང་དུ་འབར༔ བསྒོམ་དུ་མེད་དེ་རྩལ་སྦྱངས་བསྟན་དུ་ཡོད༔
དེ་ནི་བྱས་ཤིང་གྲུབ་པ་མི་གདའ་སྟེ༔ ཡེ་ནས་ཐོག་མར་རང་ལ་གནས་པར་གདའ༔ དེའི་ངང་ཅི་བྱེད་སེམས་ཅན་དོན་དུ་གྱིས༔ བྱ་ཅ་ཆོས་སྤྱོད་རྒྱུན་མི་འཆད་པར་བསྟེན༔ སྒྲིབ་པ་དག་ནས་རྟོགས་པ་ངང་གིས་འཆར༔ གཞན་དོན་བསྔོ་བ་སྨོན་ལམ་རྒྱས་གདབ་བྱ༔ རྗེས་ཀྱི་བྱ་བ་ཡིན་པས་མེད་ཐབས་མེད༔ བྱིང་རྒོད་སྐྱོན་དུ་མ་བཏང་བློ་གཏད་གྱིས༔ ཚིག་ཉུང་དོན་ཆེ་སྦྱོར་དངོས་རྗེས་གསུམ་ཚང་༔ འདི་ཕྱི་གཉིས་དོན་བསྟན་པའི་ཉིང་ཁུ་ཡིན༔ ཞེས་གསུངས་ངང་བྱུང་རྒྱལ་མོ་གྲོལ་བར་གྱུར༔ དེ་ནས་ཡར་ཀླུངས་ཤེལ་གྱི་བྲག་ཕུག་ཏུ༔ མོན་གྱི་བུ་མོ་བཀྲ་ཤིས་ཁྱེ་འདྲེན་དང་༔ བདེ་ཆེན་མཁའ་འགྲོ་ཡེ་ཤེས་འཚོ་རྒྱལ་གྱིས༔ སློབ་དཔོན་སྤྱན་དྲངས་ཚོགས་འཁོར་བརྒྱ་རྩ་བསྐོར༔ རྗེ་ཉིད་སྲིན་པོའི་ཡུལ་དུ་བཞུད་ཙ་ན༔ བདག་ཅག་གཉིས་ནི་ཇི་ལྟར་བྱེད་ན་ཞུས༔ སློབ་དཔོན་ཞལ་ནས་འདི་ལྟར་གྱིས་ཤིག་གསུངས༔ ལུས་ངག་ཡིད་གསུམ་ཞེན་པ་ནང་དུ་ལོག༔ མི་མི་མགུ་ལ་རང་་སྡུག་སློབ་དཔོན་བཏང་༔ ཉམས་སུ་མི་ལེན་ཡིག་རིས་དཔེ་ཆ་བཏང་༔ འགྲན་སེམས་ཟག་པ་གསོག་པའི་འཁོར་སློབ་བཏང་༔ སེམས་དཀྲུག་དགྲ་སེམས་འཛིན་པའི་བུད་མེད་བཏང་༔ འཕྲལ་ཕུགས་གཉིས་ཀ་མི་ལྟར་ཞེན་པ་ལོག༔ མི་ཡི་གྲལ་ནས་ཅི་བུད་ཅི་དོན་གྱིས༔ ཡོངས་སུ་འཛིན་པ་ཁབ་སྐུད་ཅིག་མི་བྱ༔ ཕྱི་རུ་མཆོག་གསུམ་རྩ་བ་གསུམ་ལ་ཕུལ༔ ནང་དུ་ཞིང་ས་དག་ལ་བརྒྱ་འབུལ་གྱིས༔ བར་དུ་ཚོགས་ཀྱི་འཁོར་ལོ་ཅི་མང་བསྐོར༔ མ་ནུས་མ་ལྕོགས་སྙིང་རྗེའི་ཡུལ་ལ་བྱིན༔ འཁོར་བའི་སྡུག་བསྔལ་ཁམ་པོ་ཆེ་ལ་སོམས༔ བདུད་དབང་མ་གཏོང་གཞན་བསྐུལ་རང་ལ་ཐོབ༔ ཡིད་ནི་ནང་གསོད་ཞེན་པ་ཕྱི་ནས་ལྡོག༔ མགོ་ཐོན་བྱ་རྒྱུ་དམ་པའི་ཆོས་ལ་མེད༔ སུས་ཀྱང་མི་བསྟོངས་གཅིག་པུར་འགྲོ་བ་སོམས༔ ཤོམ་ར་བློ་སྣ་མ་མང་རི་ལ་བརྟེན༔ མཛའ་བཤེས་ཉེ་དུ་བྱ་ལས་ལྟོ་གོས་རྣམས༔ ཕྱི་ནང་བར་གསུམ་ཞེན་པ་ལོག་བྱས་ནས༔ ལྷག་ནོར་མེད་ཅིང་རང་འཚོ་གྱི་ནར་བརྟེན༔ མཛེ་ཕོ་བཞིན་དུ་དམའ་ས་བཟུང་ལ་སྒོམས༔ ཆོས་རྣམས་ཀུན་ལ་བློ་གཏད་མི་ཐུབ་པས༔ མཛའ་བོ་གཡོ་སྒྱུ་ཅན་གྱིས་བསླུས་པ་འདྲ༔ མ་ཤིའི་བར་དུ་དགོས་པ་མིན་པ་མེད༔ མི་དགོས་པ་ནི་གཅིག་ཀྱང་མི་འོང་བས༔ སེམས་ནི་སྤོས་རྒྱའི་རི་མོ་མཐའ་ལ་བརྡུགས༔ འཕོངས་རུལ་གདན་རྡོལ་ཤི་ཡང་རྫོགས་ཆེན་སྒོམས༔ ང་དང་གཏན་དུ་མཇལ་གྱིས་ཡི་མ་མུག༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྐལ་ལྡན་བུད་མེད་གསུམ་ལ་ཞལ་གདམས་གསུངས་པའི་ལེའུ་སྟེ་བརྒྱ་དང་གསུམ་པའོ༔ ༔
པདྨ་བཀའ་ཐང་ལེའུ་ ༡༠༤ སྲོག་བདག་གཟའ་ཀླུ་གསུམ་གྱི་མཚང་དྲིས་པ།
དེ་ནས་སློབ་དཔོན་པདྨ་འབྱུང་གནས་ཀྱིས༔ བསམ་འགྲུབ་ཤེལ་གྱི་བྲག་ཕུག་དགོངས་པར་བཞུགས༔ ཞག་གསུམ་སོང་བའི་ཕྱི་མའི་ནུབ་ཐོ་རངས༔ བསམ་ཡས་ལ་སོགས་བོད་ཀྱི་གཙུག་ལག་ཁང་༔ དཀོར་སྲུང་རྒྱལ་པོ་པེ་ཀར་ཞེས་ཀྱང་བྱ༔ དགེ་བསྙེན་ཆེན་པོ་རྒྱལ་པོ་ཤིང་བྱ་ཅན༔ བདུད་ཕོ་ཡབ་རྗེ་ནག་པོ་ཞེས་བྱ་བ༔ སེང་གེ་དཀར་མོ་ཞིག་ལ་ཞོན་ནས་སུ༔ གཡས་ཀྱི་རུ་འདྲེན་དཔའ་བོ་སྟག་ཆས་བརྒྱ༔ གཡོན་གྱི་རུ་འདྲེན་ཉན་ཐོས་དགྲ་བཅོམ་བརྒྱ༔ སླད་ཀྱི་རྗེས་མྱུལ་བནྡེ་ནག་པོ་བརྒྱ༔ སྔོན་གྱི་ཤུལ་སེལ་བུད་མེད་ནག་མོ་བརྒྱ༔ ཕྱི་ཡི་བློན་པོ་མོན་བུ་བྷཊ་བརྒྱ༔ ནང་གི་བློན་པོ་མོན་བུ་པུ་ཊ་བརྒྱ༔ སྐུ་ཡི་སྐྱོ་རོགས་འབག་སེང་གར་མཁན་བརྒྱ༔ སྤྲུལ་པ་ཡང་སྤྲུལ་སྤྲ་དང་སྤྲེའུ་བརྒྱ༔ སློབ་དཔོན་དྲུང་དུ་ཉམས་སད་བྱེད་དུ་བྱུང་༔ གནམ་རྡོ་ལུག་ཙམ་སྤྱི་བོའི་གཙུག་ཏུ་ཕབ༔ སློབ་དཔོན་བརྒྱལ་ཞིང་དལ་གྱིས་རྫས་རྣམས་དཀྲུགས༔ བརྒྱལ་སངས་ཙ་ན་ཏིང་ངེ་འཛིན་གྱིས་བཀུག༔ དགེ་བསྙེན་གཞོན་ནུ་མ་ཞིག་བཙངས་ཀྱིས་བྱུང་༔ ལག་ན་ཤེལ་ཕྲེང་ཐོགས་ནས་མདུན་ན་འདུག༔ སློབ་དཔོན་ཁྱོད་ནི་གནོད་སྦྱིན་རིགས་འདྲ་བ༔ དགེ་བསྙེན་ཚུལ་དུ་སྟོན་པ་སུ་ཡི་བུ༔ དགེ་བསྙེན་ན་རེ་ང་ནི་བདུད་ཀྱི་བུ༔ བདུད་ཀྱི་བུ་དང་དམ་ཚིག་བསྲེ་ནུས་སམ༔ སློབ་དཔོན་ཞལ་ནས་དམ་ཚིག་བསྲེ་ནུས་ན༔ ཁྱོད་ཀྱིས་སངས་རྒྱས་བསྟན་པ་བསྲུང་ནུས་སམ༔ པེ་ཀར་ན་རེ་མ་འོངས་བོད་ཁམས་ཀུན༔ ལྷ་ཁང་མཆོད་རྟེན་ང་ལ་གཏད་པ་ན༔ བསྟན་པ་བསྲུང་ནུས་མ་གཏད་གནོད་པ་བྱེད༔
ང་ནི་འཁུ་ཞིང་དམ་འདའ་ལྡོག་པར་འགྱུར༔ དེ་ནས་སློབ་དཔོན་པདྨ་འབྱུང་གནས་ཀྱིས༔ ཕྱི་རབས་ལྷ་ཁང་མཆོད་རྟེན་བཞེངས་པ་རྣམས༔ སྐུ་གསུང་ཐུགས་རྟེན་པེ་ཀར་གཏོད་པར་བྱས༔ དགེ་བསྙེན་བསྟན་པ་བསྲུང་བར་ཁས་བླངས་སོ༔ སློབ་དཔོན་ངན་སྔགས་བརྒྱ་དང་རྩ་བརྒྱད་མཛད༔ ཁྱོད་ནི་དམ་ལས་འདའ་ན་ཇི་ལྟར་འོང་༔ འཁུ་དང་བཟློག་ན་ཇི་ལྟར་འོང་ཞེས་གསུངས༔ དགེ་བསྙེན་ཆེན་པོ་དེ་ཡི་ཞལ་ན་རེ༔ ང་འཁུ་བ་ལ་འཁུ་ལུགས་གསུམ་དུ་ཡོད༔ རྣལ་འབྱོར་པ་ཡི་ཆུང་མ་བུ་ཚར་འཁུ༔ ཞིང་ཁང་དུད་འགྲོ་ནོར་རྫས་ཀུན་ལ་འཁུ༔ ཉེ་འབྲེལ་འཁོར་གཡོག་ཡོན་བདག་རྣམས་ལ་འཁུ༔ རྣལ་འབྱོར་ཆུང་མ་བུ་ཚར་འཁུ་ཙ་ན༔ ཆུང་མ་སྨྱོ་དང་འབོག་དང་བརྒྱལ་དུ་འཇུག༔ དགྲ་དང་བྱི་བྱེད་ཕག་གཡོས་མང་དུ་འབྱུང་༔ དགྲ་བོར་སྤྲུལ་ཞིང་དགྲ་ཡུལ་འགྲོ་བ་དང་༔ རང་གི་དགྲ་དང་དགའ་འདུན་བྱས་ནས་འགྲུལ༔ ནང་མཚང་ཕྱིར་བླུག་གསང་གྲོས་གཞན་ལ་སྤེལ༔ སྙིང་གཏམ་དགྲར་འཆད་བར་གཅོད་གཡབ་གཡུགས་བྱེད༔ ལྷ་ཡིན་སྐད་ཟེར་འདྲེ་ཡིན་སྐད་ཟེར་འབབས༔ སྙིང་མི་དགའ་ཞིང་ངུ་སྙིང་འདོད་པ་དང་༔ བྲང་བརྡུང་འཐབ་དང་ལྕེབ་སྙིང་འདོད་པ་འབྱུང་༔ དེ་ནི་ཆུང་མ་དག་ལ་འཁུ་བའོ༔ བུ་ཚར་འཁུ་བ་བུ་ཚ་མི་སོས་ཤིང་༔ སོས་པ་སྨྱོ་དང་བརྒྱལ་དང་འབོག་པ་འབྱུང་༔ མགོ་ལོག་བྱེད་ཅིང་གཞན་དུ་འབྲོས་པ་དང་༔ བུ་ཚ་མང་པོ་འཆི་བ་བུ་ཚར་འཁུ༔ ཞིང་ཁང་ནོར་རྫས་རྣམས་ལ་འཁུ་བ་ནི༔ ཞིང་ལ་ལོ་མི་སྐྱེ་ཞིང་མི་ལ་འཆོར༔ དཔྱིད་ཀ་འབུ་འབྱུང་སྟོན་ཀ་སེར་བ་འབྱུང་༔ ཁང་པ་འཇིག་ཅིང་ཐོག་འཚེག་ཞིག་རལ་མང་༔ དུད་འགྲོར་རྐུན་མ་མང་ཞིང་གཅན་གཟན་འཁྱེར༔ རྨིག་ཟླུམ་ཁ་བྲག་དུས་གཅིག་འཆི་བར་བྱེད༔ ཟས་ནོར་བྱར་མི་བཏུབ་ན་ང་འཁུ་ཡིན༔ ཉེ་འབྲེལ་འཁོར་གཡོག་རྣམས་ལ་ང་འཁུ་ན༔ ཉེ་འབྲེལ་ནང་དུ་མི་འཆམ་ནང་ཞིག་འོང་༔ དྲག་དྲག་འཆི་ཞིང་ཞན་ཞན་ལུས་པར་བྱེད༔ ཡོན་བདག་ནང་འཁྲུག་འཁོར་གཡོག་སྙིང་རིང་བྱེད༔ དེས་ཉེས་དེས་ལན་མ་ལེགས་བཀྲ་མི་ཤིས༔ ངུ་འབོད་ཆོང་བརྒྱངས་དམག་འཁྲུག་གསོད་གཅོད་འོང་༔ ང་འདའ་བ་ལ་འདའ་ལུགས་གསུམ་དུ་ཡོད༔ ཡི་དམ་ལྷ་བསྒོམ་ཏིང་ངེ་འཛིན་པ་འདའ༔ བཟླས་བརྗོད་བསྙེན་པ་བྱེད་ཚེ་སྔགས་ལ་འདའ༔ བསྒྲུབ་གཞི་འཛབ་སྟེ་བརྟེན་པའི་རྫས་ལ་འདའ༔ བསྒོམ་པ་ཏིང་ངེ་འཛིན་ལ་འདའ་ཙ་ན༔ ཡི་དམ་བསྒོམ་སྙིང་མི་འདོད་སྒོམ་པ་འཆོར༔ སྒོམ་པའི་དུས་ན་རྣམ་རྟོག་ཕྲ་མོ་ལྡང་༔ བདག་བསྐྱེད་མདུན་བསྐྱེད་གཅིག་བསྒོམས་གཅིག་བརྗེད་འགྲོ༔ སྒོམ་སྒྲུབ་ནམ་བྱེད་དུས་སུ་བར་གཅོད་འོང་༔ ཅི་སྙད་ཅིར་བཏགས་འཇམ་རྩུབ་གཉིས་སུ་འོང་༔ བསྟན་བཅོས་ཚིགས་བཅད་རྩོམ་པ་ཡིད་ལ་བྱེད༔ འདུག་སར་སྡོད་པ་མི་ཚུགས་མྱུག་མྱུག་མང་༔ རང་འཁོན་ནང་འཐབ་སྙིང་རུལ་སྙིང་འཚངས་འོང་༔ སྙིང་ནི་མི་དགའ་སྟོངས་སྟོངས་ངུ་སྙིང་འདོད༔ གཡང་ས་རྦབ་སར་ཕྱིན་ནས་མཆོང་སྙིང་འདོད༔ སེམས་ནི་ཡེང་ཡེང་བུན་བུན་ཆོད་ཆོད་འབྱུང་༔ གདམས་པ་བློ་མི་ཁེལ་ཞིང་ཡིད་གཉིས་ཟ༔ ནང་རྟགས་བཟང་པོ་བྱུང་ན་དགའ་སེམས་བྱེད༔ ནང་རྟགས་ངན་པ་བྱུང་ན་སྙིང་མི་དགའ༔ ཉམ་ང་བག་ཚ་རེ་དོགས་དམ་ལས་འདས༔ བཟླས་བརྗོད་བསྙེན་པ་སྔགས་ལ་འདའ་ཙ་ན༔ སྔགས་ཟློས་དུས་སུ་སྔགས་ལ་ལྷག་ཆད་འོང་༔ ལྕེ་བསྒྱུར་མི་ཤེས་སྔགས་ཟློས་མི་ཤེས་ཤིང་༔ སྔགས་བཟླས་ཙ་ན་དམིགས་པ་བསྒོམ་མི་ཤེས༔ རྒྱལ་པོའི་ཆོ་འཕྲུལ་འཇིགས་སྐྲག་སྣ་ཚོགས་འབྱུང་༔ ཇི་ཙམ་སྔགས་བཟླས་དགྲ་ལ་མཐུ་མི་འོང་༔ རང་ལ་གློ་བུར་ནད་དང་འཚེ་བ་འོང་༔ ངག་ནུས་བྱིན་བས་ཉམས་པ་སྔགས་ལ་འདའ༔ སྒྲུབ་གཞི་བརྟེན་པའི་རྫས་ལ་འདའ་ཙ་ན༔ ཕྱི་རྟེན་ལ་འདའ་གཉེན་ཚན་མང་པོ་འཆི༔ ནང་རྟེན་ལ་འདའ་བུ་སྨད་ནང་འགྲམས་འབྱུང་༔ གསང་རྟེན་ལ་འདའ་མི་འདོད་སྣ་ཚོགས་འོང་༔ ང་ནི་འཇིག་རྟེན་ཡ་ཀས་སྐབས་སུ་སྤྲུལ༔ གང་ནས་འོང་དང་འདིར་ནས་འོངས་ནི་མེད༔ ང་བཟློག་པ་ལ་བཟློག་ལུགས་གསུམ་བྱས་འོང་༔ རང་གི་ལུས་སྲོག་བསོད་ནམས་ཁ་རྗེར་བཟློག༔ བུ་སྨད་མི་ནོར་ཟས་གསུམ་ཀུན་ལ་བཟློག༔ ཉེ་འབྲེལ་འཁོར་གཡོག་མཐུན་རྐྱེན་བསྒྲུབ་ལ་བཟློག༔ རང་གི་ལུས་སྲོག་ཁ་རྗེར་བཟློག་ཙ་ན༔ ལུས་ལ་ནད་མང་སེམས་ལ་སྡུག་བསྔལ་མང་༔ སྲོག་ལ་ཧུར་ཐུམས་འགག་གྲི་སྦོས་གྲིར་འཆི༔ དགྲ་ལ་ཕར་རྦད་རང་ལ་ཚུར་ལོག་འོང་༔ འཁོར་འཐོར་ཐག་ཐུག་མང་ཞིང་སོ་མི་གསོད༔ དགྲ་སྔོན་མ་སོད་ཕྱི་མ་ང་འཚུབ་ལྡང་༔ བྱད་འཇུག་རྦོད་གཏོང་བྱེད་སྙིང་མི་འདོད་ཅིང་༔ དམོད་བཅོལ་མི་བྱེད་ཟུག་འཕྲོ་བཅད་ནས་འཇོག༔ མི་ཁ་མང་པོ་ཟུག་ཟེར་རང་ལ་གླེང་༔ ཡུལ་མེད་དགྲར་ལྡང་སྙིང་དུ་རྒྱལ་འགོང་འཇུག༔ དམ་རྫས་འབོག་དང་སྒྲུབ་རྫས་གཅོག་སྙིང་འདོད༔ ལྟ་སྤྱོད་མི་མཐུན་གྲོགས་བསྲེལ་རང་ལ་ལྡོག༔ བུ་སྨད་མི་ནོར་ཀུན་ལ་བཟློག་ཙ་ན༔ སྔོན་ལ་ཆུང་མ་དེ་ནས་བུ་ཚ་འཆི༔ བཟའ་མི་ནང་འཐབ་ནུབ་འཐབ་འཁོན་པ་འོང་༔ དམ་ཉམས་དགྲ་ལ་རྟགས་འོང་སྐད་ཟེར་ནས༔ རང་གི་འཁོར་དུ་ཉེས་འགྱོད་མང་པོ་བྱུང་༔ བུ་སྨད་ལྕེབ་པར་མཁར་གཡང་མཐོན་པོར་འཆོར༔ རི་ཀ་མཐོན་པོར་ཕྱིན་ནས་ཁུས་འདེབས་ཤིང་༔ རང་ལ་ལྟས་ངན་སྣ་ཚོགས་འོང་བ་དང་༔ དགྲ་དར་གཉེན་རྒུད་འདྲེ་ཡིས་ལོག་མིན་སློབ༔ རྨི་ལམ་བཟང་བ་ལྟར་བསྟན་ཉེས་པ་འོང་༔ ནོར་ཕྱུགས་པེ་ཀར་ཆགས་ནས་ལན་མི་ལོན༔ ཅི་ཡོད་ནོར་རྫས་ཐམས་ཅད་མི་ལག་འགྲོ༔ རང་ལ་བེ་ཀར་སྙིང་དུ་ཞུགས་ནས་ཀྱང་༔ ལུས་ངག་ཡིད་གསུམ་འདྲེ་ཡི་སྤྱོད་པ་བྱེད༔ སྣོད་སྤྱད་ཐམས་ཅད་གཅོག་དང་རྡེབ་པ་འོང་༔ རང་དབང་མི་ཐོབ་ཁྱི་སྨྱོན་བཞིན་དུ་འཁྱམ༔ ཆང་འཐུངས་སེམས་ལ་ཅི་ཡོད་ཁ་རུ་འདོན༔ རེས་འགའ་ངུ་ཞིང་བྲང་བརྡུང་འོ་དོད་འབོད༔ ཉེ་འབྲེལ་འཁོར་གཡོག་ཀུན་ལ་བཟློག་ཙ་ན༔ རྒྱལ་པོ་པེ་ཀར་ཁྱི་བཞིན་ཕྱི་ལ་འབྲང་༔ མ་དང་སྲིང་མོ་ཞང་པོ་ཚ་བོའམ༔ རང་གི་བླ་མ་སློབ་དཔོན་འཁོར་ཕྱིར་འབྲང་༔ ཉེ་འབྲེལ་ཕུང་འཇུག་བུ་སྲིང་སྒབ་འདྲེ་བྱེད༔ དམར་མལ་སྟོན་ཅིང་ལྷ་འདྲེའི་ཚོགས་འདུ་འོང་༔ བུ་སྲིང་མོ་རྣམས་བདག་བྱེད་ཁྱོ་ཕོ་གསོད༔ བུ་ཚ་སྐྱེས་ཚད་འཆི་དང་རོ་སྣོད་འཆོས༔ བུ་སྲིང་ཡུག་ས་འབབ་དང་བྱུར་ཡུགས་འོང་༔ རང་གིས་ནད་པ་གསོའམ་སྲིའུ་གསོ༔ གང་དུ་བྱིན་ཕྱིན་ཕྱི་ལ་པེ་ཀར་འབྲང་༔ ས་གཞི་གཤག་ཅིང་རྒྱ་མཚོ་དཀྲུག་པར་བྱེད༔ བན་སྔགས་འདྲེ་ཅན་འགྲོ་བའི་དགེ་འདུན་འབྱུང་༔ སྒྲུབ་ཁང་འདྲེ་ཅན་སོང་ནས་བཀྲ་མི་ཤིས༔ ང་ནི་ལྷ་ཁང་མཆོད་རྟེན་གསུང་རབ་བདག༔ ན་ཆུང་ཀུན་གྱི་ལུས་ཕུང་སྡུད་ཅིང་སྤྱོད༔ ང་འཁུ་དུམ་བུར་ཤག་ལ་ནན་ཏན་བསྐྱེད༔ ང་འདའ་རཱཀྴའི་ཙིཏྟ་ཕྱུང་ཐབས་ཀྱིས༔ ང་བཟློག་རཱཀྴའི་ཙིཏྟ་གཏུབས་ཐབས་ཀྱིས༔ འཁུ་དང་འདའ་དང་བཟློག་པ་གང་བྱུང་ཡང་༔ སློབ་དཔོན་སྐྱེས་རབས་རྣམ་ཐར་ཞིབ་རྒྱས་པ༔ ཉིན་ནུབ་ཐུན་བཟུང་གསུང་མི་འཆད་དུ་སྒྲོགས༔ ཞེས་གསོལ་སྲོག་སྙིང་ཕུལ་ནས་དམ་ལ་བཏགས༔ དེ་ནས་བཅུན་པ་གནད་ལ་འབེབས་པ་དང་༔ ཨར་གཏད་ཤི་ས་བསྟན་དང་བསྲུང་བ་དང་༔ འཆིང་བ་བཀར་བ་མནན་གཟིར་མདོས་ལ་སོགས༔ ཕྱི་ནང་གསང་བ་ལ་སོགས་མང་དུ་མཛད༔ བསྟན་པའི་དགྲ་བོ་ཟས་སྐལ་ཞིང་དུ་དངོས༔ དེ་ནས་སློབ་དཔོན་བསམ་ཡས་བྱོན་པའི་ལམ༔ ལོ་ཧི་ཏའི་འགྲམ་དགོངས་པར་བཞུགས་པའི་དུས༔ དྲང་སྲོང་ཆེན་པོ་སྨུག་ནག་འོད་འཕྲོ་བ༔ སྔགས་པ་དར་བབ་ཅིག་གི་ཆ་ལུགས་བྱས༔ མོག་རོ་རྟ་ཞོན་སླར་བབས་ཁྲིད་ནས་བྱུང་༔ དེ་ཡི་ངད་ངས་སློབ་དཔོན་སྐུ་ལ་ཕོག༔ ཅུང་ཟད་གྲིབ་བྱུང་མེ་ལོང་ཧས་བཏབ་བཞིན༔ གྲིབ་བཙན་སྲིན་པོ་འདྲ་བ་སྔགས་པའི་ཆས༔ རྟ་ནི་མོག་རོ་ཁྲིད་ཁྱོད་སུ་ཡིན་གསུངས༔ ཞྭ་མོ་སྐྱ་ལྷེབ་ཕུད་ནས་འདི་སྐད་ཟེར༔ དྲག་ཅིང་ཁྲོ་གཏུམ་གཟུགས་ཅན་སྲོག་ལེན་པ༔ ཕ་ནི་སྲིན་པོ་མ་ནི་ཀླུ་མོ་ཡིན༔ སློབ་དཔོན་ཞལ་ནས་དྲང་སྲོང་འོད་འཕྲོ་ཁྱོད༔ ང་ཡི་དགེ་བསྙེན་བཀོལ་བདེ་ཡིན་འདུག་པ༔ མགོ་དགུ་ཡོད་པའི་རྒྱུ་མཚན་ཇི་ལྟར་ཡིན༔ སྤྱི་གཙུག་བྱ་རོག་མགོ་ཡོད་ཇི་ལྟར་ཡིན༔ རོ་སྟོད་མི་རུ་ཡོད་པ་ཇི་ལྟར་ཡིན༔ རོ་སྨད་སྦྲུལ་དུ་ཡོད་པ་ཇི་ལྟར་ཡིན༔ གཡས་པའི་རྭ་ཡི་འདའ་གཞུ་ཇི་ལྟར་ཡིན༔ གཡོན་པ་སྦྲུལ་ཞགས་ཐོགས་པ་ཇི་ལྟར་ཡིན༔ མགོ་ལུས་མེད་པར་མིག་ཡོད་ཇི་ལྟར་ཡིན༔ སྐུ་མདོག་དུད་ཁར་འོང་བ་ཇི་ལྟར་ཡིན༔ ཞལ་ནས་ཐོག་སེར་འོང་བ་ཇི་ལྟར་ཡིན༔ སྤྱིར་ན་གཟའ་ལ་ཕོ་མོ་དུ་ཡོད་པ༔ མ་ནིང་གཟའ་ཞེས་བྱ་བ་ཅི་ལ་ཟེར༔ དྲང་སྲོང་ཟེར་ནས་སེམས་ཅན་ལ་གནོད་ཅི༔ གཟའ་ལ་འབྱུང་བ་ལྔ་ཀ་ཚང་ལགས་སམ༔ ཞེས་གསུངས་སྨུག་ནག་འོད་ཟེར་འཕྲོ་ན་རེ༔ ང་ལ་མགོ་དགུ་ཡོད་པའི་རྒྱུ་མཚན་ནི༔ ཀིང་ཀང་ཆེན་པོ་བརྒྱད་ནི་དུས་གཅིག་རྒྱུ༔ སྤྲུལ་པ་ལྷ་སྲིན་སྡེ་བརྒྱད་ཡིན་པའི་རྟགས༔ སྤྱི་གཙུག་བྱ་རོག་མགོ་ཡོད་རྒྱུ་མཚན་ནི༔ ང་ནི་འདོད་ཆགས་གྲང་བའི་ནད་དང་བསྡོངས༔ སྟེང་ལྷའི་འཇིག་རྟེན་ཀུན་ལ་དབང་སྒྱུར་རྟགས༔ རོ་སྟོད་མི་རུ་ཡོད་པའི་རྒྱུ་མཚན་ནི༔ ཡབ་ཀྱི་ཆ་འཛིན་ལྷ་མིན་དབང་བསྒྱུར་རྟགས༔ རོ་སྨད་སྦྲུལ་དུ་ཡོད་པའི་རྒྱུ་མཚན་ནི༔ ང་ནི་ཞེ་སྡང་ཚ་བའི་ནད་དང་བསྡོངས༔ ཡུམ་གྱི་ཆ་འཛིན་འོག་ཀླུར་དབང་བསྒྱུར་རྟགས༔ གཡས་ན་རྭ་ཡི་མདའ་གཞུ་བསྣམས་པ་ནི༔ ང་ནི་གཏི་མུག་འདུས་པའི་ནད་དང་བསྡོངས༔ ལྷ་དང་ལྷ་མིན་འཐབ་པའི་བར་བྱེད་རྟགས༔ གཡོན་ན་སྦྲུལ་གྱི་ཞགས་པ་བསྣམས་པ་ནི༔ ང་ཡི་ལུས་ལ་རེག་དུག་མཐོང་བའི་དུག༔ གང་མ་ཉན་པ་དུག་སྦྲུལ་འཆིང་བའི་རྟགས༔ མགོ་ལུས་མེད་པར་མིག་གིས་གང་བ་ནི༔ ཚེ་འདིར་ལེགས་པར་བྱས་དང་ཉེས་པར་བྱས༔ འཇིག་རྟེན་གསུམ་ལ་བྱ་ར་བྱེད་པའི་རྟགས༔ སྐུ་མདོག་དུད་ཁར་འོང་པའི་རྒྱུ་མཚན་ནི༔ དུག་ལྔ་ལུས་ལ་རང་བཞིན་རྒྱས་པ་དང་༔ ཉི་མའི་ཟེར་ཕོག་ཚད་པ་སངས་པའི་རྟགས༔ ཞལ་ནས་ཐོག་སེར་འོང་བའི་རྒྱུ་མཚན་ནི༔ ཚ་གྲང་མ་སྙོམས་བསྒུལ་བསྐྱོད་བྱས་པ་དང་༔ ཁས་བླངས་སངས་རྒྱས་བསྟན་པ་བསྲུང་བའི་རྟགས༔ ཕོ་གཟའ་མོ་གཟའ་དུ་ཡོད་ཅེས་པ་ནི༔ གདུག་ཅན་ཕོ་གཟའ་བརྒྱད་ཡོད་མོ་གཟའ་བཞི༔ བྱང་སེམས་ཕོ་གཟའ་གསུམ་དང་མོ་གཟའ་གསུམ༔ མ་ནིང་གཟའ་གཅིག་ངོ་མི་ཤེས་པ་ཡོད༔ དྲང་སྲོང་ཟེར་ནས་སེམས་ཅན་གནོད་པ་ནི༔ ང་ཡིས་གནོད་པ་བསྐྱལ་བ་ཅུང་ཟད་མེད༔ ལོ་གཅིག་ལན་གཉིས་ལྷ་དང་ལྷ་མིན་འཁྲུག༔ བཅོ་ལྔར་ལྟད་མོ་བལྟས་པས་ཟླ་འོད་འགྲིབ༔ ང་དང་རྒྱང་ཐག་རིང་ཞིང་མཐོ་དམན་ཆེ༔ སྐྱེན་པོས་མདའ་འཕངས་ལྟ་བུར་རྒྱུ་བ་ཡིན༔ སེམས་ཅན་ཀུན་ལ་ང་ཡི་དུག་ངས་ཕོག༔ གཟའ་ལ་འབྱུང་བ་ལྔ་ཀ་ཚང་ཡོད་དེ༔ ཡབ་ནི་སྲིན་པོ་ཞེ་སྡང་མེ་ཡི་དུག༔ ཡུམ་ནི་ཀླུ་མོ་འདོད་ཆགས་ཆུ་ཡི་དུག༔ སྲས་ནི་སྒྲ་གཅན་གཏི་མུག་ས་ཡི་དུག༔ འཁོར་ནི་བསྡོངས་ཟླ་ཕྲག་དོག་ང་གི་དུག༔ ཐམས་ཅད་ཡོ་ལོག་ང་རྒྱལ་ནམ་མཁའི་དུག༔ སེམས་ཅན་བསོད་ནམས་དམན་ལ་འཕོག་པ་ཡིན༔ ཁྱོད་ཀྱི་དུག་ཕོག་ཇི་ལྟར་འོང་ཞེས་གསུངས༔ དྲང་སྲོང་སྨུག་ནག་འོད་འཕྲོའི་ཞལ་ནས་ནི༔ དུག་ཕོག་མདོག་སེར་མེ་ལྕེ་རིས་སུ་ཡོད༔ ཁ་ལྐུགས་སྦུ་སྐྱུག་བྱོལ་སོང་སྐད་ཀྱང་འདོན༔ ཡན་ལག་མཉེན་དང་རེངས་དང་སྟོབས་ཆུང་ཡོང་༔ ངོ་སྦེད་གྲོད་པ་ཆེ་ཞིང་ལུས་བཅུད་ཤོར༔ འོན་ལྐུགས་ཐོལ་སྨྲ་དགོད་དང་མཆོང་པ་ཡོང་༔ གཞོགས་བཤལ་མིག་རྩ་གྲུང་དང་དབང་པོ་ཉམས༔ ཁ་མིག་ལག་པ་མི་ཟུག་བྱ་བྱེད་མང་༔ ཨིག་དང་གློ་འབྱུང་ཁ་མིག་ལྟག་པར་ཡོ༔ ཁ་ཁྲག་སྣ་ཁྲག་སྦྲིད་དང་ངུ་བ་འབྱུང་༔ ཞ་འཕྱེ་ལྕེ་བསྐམས་དྲི་མི་ཞིམ་པ་མནམ༔ ཁ་ནས་ཅལ་ཅོལ་གཏམ་ནི་ངེས་མེད་ཟེར༔ དེ་རྣམས་ང་ཡི་དུག་ཟེར་ཕོག་པའི་རྟགས༔ ངའི་དུག་ཕོག་ན་རྫས་སྔགས་ཏིང་ངེ་འཛིན༔ མདོས་དང་འཁོར་ལོས་དུག་ནི་དབྱུང་བར་བྱས༔ ང་ཞུད་འཁོར་དང་མི་གཙང་གྲིབ་ལ་གཟབ༔ རྫས་དང་སྨན་དང་འབྱུང་བ་ལྔ་ཡི་ཁྲུས༔ ཕས་ཀྱིས་རྦད་དང་སྒྲུབ་ལས་བྱེད་མི་འདོད༔ ངའི་དུག་ཕོག་ནས་བྱེར་ན་བཙོན་དུ་གཟུང་༔ ཚ་ཞིང་བསྲེག་པ་མེ་དུག་བཙོན་དུ་གཟུང་༔ ཡང་ཞིང་གཡོ་བ་ང་དུག་བཙོན་དུ་གཟུང་༔ གྲང་ཞིང་བསིལ་བ་ཆུ་དུག་བཙོན་དུ་གཟུང་༔ ལྕི་ཞིང་འཐིབས་པ་ས་དུག་བཙོན་དུ་གཟུང་༔ སློབ་དཔོན་རྣམ་ཐར་སྐྱེས་རབས་གསུང་དུ་སྒྲོགས༔ ཞེས་ཟེར་སློབ་དཔོན་རྡོ་རྗེ་མགོ་ཐོག་བཞག༔ ལྕེ་ལ་བདུད་རྩི་བཞག་ནས་དམ་ཚིག་བྱིན༔ ངན་སྔགས་མི་འདྲ་བརྒྱ་དང་རྩ་བརྒྱད་མཛད༔ ཤེས་ལ་མཚན་ཆེ་རྣོ་མྱུར་ཐོག་འདྲ་བ༔ སངས་རྒྱས་བསྟན་པ་སྲུང་བའི་གཉེར་ཆེན་གཏད༔ ཕན་ཐབས་བཅོས་ཐབས་རྫས་སྲུང་སྔགས་སྲུང་དང་༔ འབོད་རྦད་བསད་པ་ཕྱི་རབས་ཆ་རྐྱེན་སྦས༔ ཁྱབ་འཇུག་གཟའ་ཡིས་ཁས་བླངས་དམ་བཅས་སོ༔ དེ་ནས་འཛིན་ཤེས་གཏོང་མི་ཤེས་ཀྱི་ཀླུ༔ རྒྱལ་རིགས་རྗེའུ་རིགས་དམངས་རིགས་བྲམ་ཟེའི་རིགས༔ གདོལ་པ་ནག་སོགས་སློབ་དཔོན་དྲུང་དུ་བྱུང་༔ སངས་རྒྱས་བསྟན་པ་འཇིག་པའི་དམ་ཉམས་ལ༔ ནད་དུ་མཛེ་ཕོལ་གཉན་ལྷོག་ཀླུ་ནད་གཏོང་༔ སློབ་དཔོན་དྲུང་དུ་ཁས་བླངས་དམ་བཅའ་མནོས༔ སློབ་དཔོན་གཏད་རིགས་མི་འདྲ་བརྒྱ་རྩ་མཛད༔ མཐུ་མཐའ་གཏད་ལ་ཐུབ་པའི་དུས་འབྱུང་སྦས༔ བོད་ཀྱི་ལྷ་འདྲེ་ཆེ་དགུ་ཐམས་ཅད་ཚོགས༔ མ་འོངས་སློབ་དཔོན་བརྒྱུད་འཛིན་ལ་གནོད་པའི༔ དམ་ཉམས་དགྲ་བོ་སྒྲོལ་བར་ཁས་བླངས་སོ༔ སློབ་དཔོན་དགྲ་མནན་མི་འདྲ་བརྒྱ་རྩ་མཛད༔ མཐུ་གཏད་བུ་ལོན་བཞིན་དུ་བསྙེག་དུས་འབྱུང་༔ བསྟན་པ་སྲུངས་ཤིག་ཕྱི་རབས་སྔགས་པ་རྣམས༔ སྔགས་པའི་ལས་ཀ་འདི་མིན་གཞན་མ་ཡིན༔ དགྲ་མགོ་ཡན་པར་བཏང་ན་དམ་ཚིག་ཉམས༔ ལྷ་འདྲེ་མ་རུངས་ཡིད་ཀྱི་གཟུགས་ཅན་ལ༔ ཤ་ཡི་མི་ངན་མཐིལ་བརླག་གཏོང་བྱེད་ན༔ སངས་རྒྱས་བསྟན་པ་དཀར་འཇམ་རྒྱས་པར་འགྱུར༔ སྔགས་པ་མཐུ་མེད་གྲོང་སྟོང་ཁྱི་དང་འདྲ༔ སུས་བརྡུང་འདིས་བརྡུང་མེད་དེ་རྫས་མི་ཐུབ༔ ལས་སུ་མཐུ་བསྒྲུབས་བྲན་དུ་ལྷ་འདྲེ་བཀོལ༔ ནོར་དུ་རྫས་བསོགས་མཚོན་དུ་ཀླུ་གཏད་རྒྱོབ༔ སྲིད་དུ་ལིངྒ་ཆོས་ལ་མནན་པ་གྱིས༔ ལྟོ་རུ་དགྲ་ཟོ་གོས་སུ་སྒྲུབ་ཁང་གྱོན༔ གྲོགས་སུ་མཁའ་འགྲོ་ཆོས་སྐྱོང་དམ་ཅན་གསོས༔ མཐུ་དང་ཆོས་སུ་ལྡན་པས་འགྲོ་དོན་གྱིས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ སྲོག་བདག་གཟའ་ཀླུ་གསུམ་གྱི་མཚང་དྲིས་པའི་ལེའུ་སྟེ་བརྒྱ་དང་བཞི་པའོ༔ ༔
པདྨ་བཀའ་ཐང་ལེའུ་ ༡༠༥ མང་ཡུལ་གུང་ཐང་ལ་ཀར་སྔ་འགྲོས་བཏང་བ།
དེ་ནས་བསམ་ཡས་དབུ་རྩེ་ཆེན་མོར་བྱོན༔ སློབ་དཔོན་ཞལ་ནས་ལྷ་སྲས་བཙན་པོ་གསུངས༔ ཁོ་ཐག་མ་ཆོད་པད་འབྱུང་དྲུང་དུ་བཞུགས༔ ནན་ཏན་དྲི་བ་ད་ལྟའི་དུས་སུ་གྱིས༔ ནན་ཆགས་མཛད་ན་ཁོ་ཐག་ཆོད་དེ་མཆི༔ བློ་སྙིང་བྲང་གསུམ་པདྨ་ང་ལ་གཏོད༔ བསླུས་ན་པདྨ་ཞན་ནོ་རྗེ་འབངས་རྣམས༔ དྲང་པོར་སྨྲས་ན་ཡིད་མི་ཆེས་པ་སྐྱེ༔ ཚིག་གྲོན་བཅུག་ནས་ཆོས་མིན་ལས་མང་གསོག༔ བླ་མ་བསྟེན་ཡུན་བསྲིངས་ཤིག་རྗེ་འབངས་རྣམས༔ ན་སོ་གཞོན་དུས་དམ་ཆོས་རེམ་ལ་གྱིས༔ རྒས་ནས་བྱེད་འདོད་འབྱུང་བས་འཆུན་པར་དཀའ༔ ད་ལྟ་སྐད་ཅིག་ཡིན་ནོ་རྗེ་འབངས་རྣམས༔ རྟོག་པ་རགས་དུས་ནང་དུ་མཁན་པོ་ཚོལ༔ ཆེད་དུ་སྤང་བླང་མི་དགོས་རང་སར་ཞོག༔ ལྟ་བ་ཐག་ཆོད་དགོས་སོ་རྗེ་འབངས་རྣམས༔ ཉོན་མོངས་ཟད་ན་ཆོས་ལ་བྱ་རྒྱུ་མེད༔ སྙིང་རྗེ་མེད་ན་ཆོས་ཀྱི་རྩ་བ་རུལ༔ འཁོར་བའི་སྡུག་བསྔལ་ཡང་ནས་ཡང་དུ་སོམས༔
ཆོས་ལ་ཕྱི་བཤོལ་མ་མཛད་རྗེ་འབངས་རྣམས༔ མོས་གུས་ཅན་གྱིས་རང་དོན་འགྲུབ་པ་ཡིན༔ གཞན་ལ་ཆོས་ཡུས་དྲིན་བཞག་བྱ་རུ་མེད༔ སྙིང་རུས་མ་ཆུང་སྒྲུབ་པ་རེམ་ལ་གྱིས༔ ཚེ་གང་དུས་བརྒྱའི་ཟ་མ་ལན་ཅིག་ཡིན༔ ལོ་རེ་བཞིན་དུ་དབང་བསྐུར་བྱིན་བས་ཞུས༔ ལོ་བརྒྱ་ལོན་ན་དབང་བརྒྱ་ཐོབ་པ་ཡིན༔ ཕྱི་མ་དུད་འགྲོར་སྐྱེས་ཀྱང་དབང་ཆེར་སྐྱེ༔ དྲི་གོས་མདུན་དུ་ཆོས་བཤད་ཅི་ལ་ཕན༔ བེམ་རིག་མ་བྲལ་ཆོས་ལ་ཉན་བཤད་གྱིས༔ མཚན་བྱང་མགོ་ལ་དབང་བསྐུར་བྱེད་ཙ་འཕྱིས༔ རྣམ་ཤེས་བར་དོར་ཁྱི་གླེན་བཞིན་དུ་འཁྱམ༔ མཐོ་རིས་འདྲེན་ཏེ་དེ་ལ་དཀའ་ལས་ཡོད༔ གཟུགས་མེད་བག་ཆགས་ལུས་དེ་རྐྱེན་ཁར་ཡང་༔ གར་འཁྱོགས་མི་ཤེས་བྲང་འོག་བསམ་གཞིག་ཐོང་༔ སྒྲུབ་པ་ལོ་རུ་བསགས་ན་དངོས་གྲུབ་འབྱུང་༔ དམ་བཅའ་ཀྱིས་ལ་ཆོས་ཕྱོགས་འབད་པ་ཐོན༔ བོད་ཡུལ་ཕྱོགས་ཀྱི་ཉི་མ་ཟེར་ལ་ཁད༔ བརྡ་དེ་གོ་བར་གྱིས་ཤིག་རྗེ་འབངས་རྣམས༔ གདུང་སེམས་ཅན་ལ་པད་འབྱུང་འཕགས་པ་མེད༔ གསོལ་བ་འདེབས་ལ་པད་འབྱུང་སྒོ་ཉལ་ཡོད༔ ཚེ་ཟད་ནད་ལ་སྨན་པས་ཕན་པར་དཀའ༔ ཞག་ནི་གཅིག་སོང་གཉིས་སོང་མི་ཚེ་སོང་༔ ལོང་ཡོད་པོ་ཚོ་འཆི་ཀར་ཕྲས་ཕྲས་བྱེད༔ ཨ་རེ་འགྱོད་དེ་བག་ཙམ་འཕྱིས་པ་འདྲ༔ སྡིག་པའི་སུན་མ་སྔོན་ལ་སོང་ཉེན་ཡོད༔ ངུས་པས་མི་ཕན་སྙིང་ལ་རུས་པ་གྱིས༔ འཁོར་བའི་སྐྱོན་མཐོང་དམ་ཆོས་མི་བྱེད་པ༔ དོན་སྙིང་ནང་ཁྲོལ་རུལ་ལོརྗེ་འབངས་རྣམས༔ ལམ་འགྲུལ་ལུས་པ་ཟླ་བོ་བསྙེག་པ་བཞིན༔ པད་འབྱུང་འགྲོ་ས་ལྷོ་ནུབ་རྔ་ཡབ་གླིང་༔ གོས་ཟད་དུག་པོ་གསར་བར་མི་འགྲོ་བཞིན༔ པདྨ་འབྱུང་གནས་བཤོལ་ཀྱང་བཤོལ་མི་ཐེབས༔ འཆི་ཀའི་ནད་པ་སྣུམ་ཟད་མར་མེ་འདྲ༔ ཚེ་ཡི་འཕེལ་སྐྱེན་ཟད་པས་བསྡད་དབང་མེད༔ དོང་མོ་བསྐམས་པའི་ཡུར་བ་བཞིན་དུ་ནི༔ བོད་དུ་མི་སྡོད་པད་འབྱུང་སྲིན་ཡུལ་འགྲོ༔ ལྗོན་ཤིང་ཁ་ནས་བྱ་ཚོགས་འཕུར་བ་བཞིན༔ སྐད་ཅིག་མི་སྡོད་པད་འབྱུང་སྐྱེས་ཤིག་འདེགས༔ ཡོན་མཆོད་དགྱེས་སོ་ལྷ་སྲས་བཙན་པོ་གསུངས༔ དེ་ནས་རྒྱལ་སྲས་མུ་ཏིག་བཙན་པོ་ཡིས༔ སློབ་དཔོན་སྲིན་པོའི་ཡུལ་དུ་བཞུད་པ་ལ༔ གསེར་སོགས་ནོར་སྣ་མང་པོ་ཕུལ་བ་རྣམས༔ རྟ་ཁལ་དྲེའུ་ཁལ་མཛོ་ཁལ་མང་པོ་བཀལ༔ གྱད་ཀྱི་མི་བརྒྱ་རྟ་བརྒྱ་ཁྲལ་བཅུག་ནས༔ མང་ཡུལ་གུང་ཐང་ལ་ཀར་སྡོད་ཅིག་གསུངས༔ སྦྲ་དང་ཆ་ཐེར་ཕུབ་ལ་ཐབ་ཀ་ཚུགས༔ བཟའ་བཏུང་གཡོས་ལ་ཆེ་རུ་ཤོམས་ཤིག་གསུངས༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ མང་ཡུལ་གུང་ཐང་ལ་ཀར་སྔ་འགྲོས་བཏང་བའི་ལེའུ་སྟེ་བརྒྱ་དང་ལྔ་པའོ༔ ༔
པདྨ་བཀའ་ཐང་ལེའུ་ ༡༠༦ འཁོར་བའི་ཉེས་དམིགས་སོགས་གསུངས་པ།
དེ་ནས་ལྷ་སྲས་མུ་ཏིག་བཙན་པོ་ཡིས༔ སྤྲེའུ་ལོ་སྤྲེའུ་ཟླ་བའི་ཚེས་བཅུའི་ཉིན༔ ཆིབས་པ་ཅང་ཤེས་རྟ་ཕོ་ནག་པོ་ལ༔ སེང་ལྡེང་སྒ་བསྟད་གསེར་སྲབ་གཡུ་མཐུར་བཅུག༔ སློབ་དཔོན་པདྨ་འབྱུང་གནས་ཆིབས་ཁར་ཐོན༔ བསམ་ཡས་ཟུར་མཁར་བར་གྱི་ནེའུ་ཚལ༔ རྒྱལ་སྲས་མུ་ཏིག་བཙན་པོ་རྗེ་འབངས་དང་༔ བོད་ཀྱི་ཕོ་ལུས་མོ་ལུས་ཐོབ་ཚད་རྣམས༔ སློབ་དཔོན་བཞུད་པའི་སྐྱེལ་ཐུང་ལ་འོངས་ནས༔ ཆིབས་པ་བབས་ནས་རྡོ་ཡི་མཆོད་རྟེན་བཞུགས༔ ཕྱག་རྟེན་འབུལ་བ་བཞེས་ཤིང་བྱིན་བས་མཛད༔ རྒྱས་སྲས་མུ་ཏིག་བཙན་པོས་ཞུ་ཕུལ་བ༔ སློབ་དཔོན་བཞུད་པས་རྗེ་འབངས་སེམས་མ་དགའ༔ ཉིད་ལ་གསོལ་འདེབས་ཉིད་ལ་མོས་གུས་བྱེད༔ བོད་ཡུལ་ཤཱཀ་ཐུབ་ཞབས་ཀྱིས་མ་བཅགས་ཤིང་༔ བོད་ཀྱི་བླ་མའི་སྐལ་བ་གུ་རུ་ཉིད༔ ཆོས་སྐལ་ཇོ་བོ་ཐུགས་རྗེ་ཆེན་པོར་འདུག༔ ཚོགས་པ་རྣམས་ལ་ཆོས་ཤིག་གསུང་བར་ཞུ༔ གསེར་གྱི་མཎྜལ་ཕུལ་ནས་ཕྱག་བཙལ་ཞུས༔
སློབ་དཔོན་པདྨའི་ཞལ་ནས་འདི་སྐད་གསུངས༔ ད་ལྟ་བཞུགས་དང་མ་འོངས་འབྱོན་པ་ཡི༔ པད་འབྱུང་ང་ལ་མོས་གུས་བྱེད་པ་རྣམས༔ ཐམས་ཅད་ཐུགས་ལ་འདི་བཞིན་བཞག་པར་ཞུ༔ དོན་མེད་ལས་ལ་སྡུག་བསྒུར་མ་འཛུགས་པར༔ འདིཕྱི་གཉིས་ཀར་བདེ་སྐྱིད་ཆོས་མཛོད་ཅིག༔ སྡིག་པ་མེ་དགེས་ངན་སོང་གསུམ་དུ་སྐྱེ༔ དགེ་བ་བྱས་པས་མཐོ་རིས་གནས་སུ་སྐྱེ༔ སངས་རྒྱས་མ་ཐོབ་བདེ་བ་གང་ནའང་མེད༔ དམྱལ་བའི་གནས་ནི་འཛམ་གླིང་ས་ཡི་འོག༔ ཏི་སེའི་ཐད་ནས་དཔག་ཚད་ཉི་ཁྲི་ན༔ སེམས་ཅན་དམྱལ་བ་ཆེན་པོའི་གནས་ཡོད་དེ༔ ལྕགས་ཀྱི་ཁང་པ་དཔངས་དང་རྒྱ་རུ་ནི༔ དཔག་ཚད་ཉི་ཁྲི་ཉི་ཁྲི་ཡོད་པ་ལ༔ དེ་སྟེང་ཚ་དམྱལ་བརྒྱད་ཀྱི་ས་གཞི་ཡོད༔ རབ་ཏུ་ཚ་བ་དང་ནི་ཚ་བ་དང་༔ ངུ་འབོད་ཆེན་པོ་ངུ་འབོད་ཆུང་ངུ་དང་༔ བསྡུས་འཇོམས་ཐིག་ནག་ཡང་སོས་མནར་མེད་རྣམས༔ རིམ་པར་བར་བར་དཔག་ཚད་བཞི་སྟོང་ཡོད༔ རབ་ཏུ་ཚ་ན་གནོད་པའི་སྔུག་བསྔལ་གསུམ༔ གསལ་ཤིང་བཤད་པའི་གླང་རྗེས་རྫ་བུམ་ཡོད༔ ཚ་བ་ན་ནི་གནོད་པའི་སྔུག་བསྔལ་བཞི༔ དོང་དང་ལྕགས་དང་དབུག་དང་འཚེད་པ་དང་༔ ངུ་འབོད་ཆེན་པོ་གནོད་པའི་སྡུག་བསྔལ་གསུམ༔ ཤལ་མ་ལི་དང་ཐག་རྒྱངས་ཨ་ཆུ་དང་༔ ངུ་འབོད་ཆུང་ངུར་གནོད་པའི་སྡུག་བསྔལ་ལྔ༔ ཕུར་རྒྱངས་ཤིང་རྟ་ཁྲབ་དང་ཁྲབ་རི་དང་༔ བསྡུས་འཇོམས་ན་ནི་གནོད་པའི་སྔུག་བསྔལ་བརྒྱད༔ ས་གཞི་མཐོ་བ་གཞོང་ཁུ་ནགས་ཚལ་དང་༔ རི་སུལ་དབང་དང་འཛིན་འཆང་བྱེད་དང་ནི༔ ཐིག་ནག་ན་ནི་གནོད་པའི་སྔུག་བསྔལ་དགུ༔ རལ་གྲི་ཤང་ལང་ཆུ་གྲི་སེན་མོ་དང་༔ མདུང་ཐུང་སྟེའུ་སྟྭ་རེ་སོག་ལེས་འཇིག༔ ཡང་སོས་ན་ནི་གནོད་པའི་སྡུག་བསྔལ་ལྔ༔ མནན་བཙིར་བཅར་དང་ཡང་ཤི་ཡང་སོས་དང་༔ མནར་མེད་ན་ནི་གནོད་པའི་སྔུག་བསྔལ་གསུམ༔ པགས་བཤུ་ནུ་མ་གཅན་གཟན་འདྲད་པ་དང་༔ གློ་སྙིང་དག་ལ་མེ་ཆེན་འབར་བ་ཡོད༔ གྲང་དམྱལ་བརྒྱད་ནི་དམྱལ་བ་ཡང་སོས་ནས༔ བྱང་དུ་དཔག་ཚད་ཉི་ཤུ་གཞལ་བ་ན༔ ཆུ་བུར་ཅན་དང་ཆུ་བུར་རྡོལ་བ་དང་༔ སོ་ཐམས་པ་དང་ཀྱི་ཧུད་ཟེར་བ་དང་༔ ཨ་ཆུ་ཟེར་དང་ཨུཏྤལ་ལྟར་གས་པ༔ ཆེར་གས་པ་དང་པདྨལྟར་ཆེར་གས༔ རིམ་པར་བར་བར་དཔག་ཚད་ཉིས་བརྒྱ་ཡོད༔ ཆུ་བུར་ཅན་ན་གནོད་པའི་སྡུག་བསྔལ་གསུམ༔ འཁྱགས་དང་ཆུ་བུར་ཆུ་བུར་ཐུག་ཐུག་གསུམ༔ ཆུ་བུར་རྡོལ་ན་གནོད་པའི་སྡུག་བསྔལ་བཞི༔ གས་དང་ཆུ་སེར་རྨ་དང་ཕྱིད་པའོ༔ སོ་འཐམས་པ་ན་གནོད་པའི་སྡུག་བསྔལ་ལྔ༔ སྐད་མི་ཐོན་དང་སོ་སྒྲ་འདོན་པ་དང་༔ མཁྲེགས་དང་རེངས་དང་ཡན་ལག་འདར་བའོ༔ ཀྱི་ཧུད་ཟེར་ན་གནོད་པའི་སྡུག་བསྔལ་གསུམ༔ ལུས་འཁྱགས་སེམས་དུབ་ངག་ཏུ་སྨྲེ་སྔགས་འདོན༔ ཨ་ཆུ་ཟེར་ན་གནོད་པའི་སྔུག་བསྔལ་གཉིས༔ ལུས་བསྐམས་དབང་པོ་ལྔ་ནས་ཆུ་སེར་འཛག༔ ཨུཏྤལ་ལྟར་གས་གནོད་པའི་སྔུག་བསྔལ་བཞི༔ ལུས་ནི་ཚལ་པ་བཞི་རུ་གས་པའོ༔ ཆེར་གས་པ་ན་གནོད་པའི་སྡུག་བསྔལ་བརྒྱད༔ ལུས་ནི་ཚལ་པ་བརྒྱད་དུ་གས་པའོ༔ པདྨ་ལྟར་གས་སྡུག་བསྔལ་བཅུ་དྲུག་སྟེ༔ ལུས་ནི་ཚལ་པ་བཅུ་དྲུག་གས་པའོ༔ ཉི་ཚེར་ཉིན་རེ་ལན་རེ་འཆི་བ་དང་༔ འགའ་ཞིག་ཉིན་བརྒྱ་མཚན་བརྒྱ་སྐྱེ་བ་སྟེ༔ སྐྱེ་དང་འཆི་སོགས་སྡུག་བསྔལ་ཡུན་དུ་སྤྱོད༔ ཉེ་འཁོར་དམྱལ་ཁམས་བཅོ་བརྒྱད་བར་མཚམས་རེར༔ འདོད་ཆགས་ཚ་མྱོང་དམྱལ་བ་ཞེས་བྱ་དང་༔ སྤྲིན་ཀྲ་མེ་འཁོར་ཅན་གྱི་དམྱལ་བ་ཞེས༔ མེ་འབར་འོབས་ལ་པུས་ནུབ་འགྲོ་བ་དང་༔ རོ་མྱགས་འདམ་ལ་རྗེས་ནུབ་འགྲོ་བ་དང་༔ སྤུ་གྲིའི་ལམ་གྱིས་ཤ་རུས་གཅོད་པ་དང་༔ རལ་གྲིའི་ཆར་འབབ་ལྕགས་ཀྱི་ཤལ་མ་ལི༔ ཐལ་ཚན་ཆུ་བོ་རབ་མེད་ནང་དུ་ནི༔ ཤ་རུས་ཚིག་ཅིང་ཁར་འགྲོ་གཏིང་འགྲོ་བྱེད༔ ཁྲོ་ཆུ་ཁོལ་མ་བྷ་གའི་ནང་དུ་ལྡུགས༔ ཕོ་མཚན་ལྕགས་བསྲེགས་དམར་པོའི་བར་དུ་འཚིར༔ དེ་དག་ཐུན་མོང་སྤྱི་ཡི་དམྱལ་ཁམས་བརྒྱད༔ དེ་ལས་སྡུག་བསྔལ་བདུན་འགྱུར་ཆེ་བ་ནི༔ ཁྱད་པར་སྒོས་ཀྱི་རྡོ་རྗེའི་དམྱལ་བ་ཞེས༔ པདྨ་ལྟ་བུར་གས་པའི་ལྷོ་ནུབ་ཏུ༔ དཔག་ཚད་བརྒྱ་འཇལ་ལྕགས་སྲེག་ས་གཞི་ཡོད༔ མི་ཤིགས་རྡོ་རྗེ་ཚ་བའི་དམྱལ་ཁམས་བརྒྱད༔ ཚ་དམྱལ་བརྒྱད་བས་བདུན་འགྱུར་ཚ་བ་ལ༔ རིམ་པར་བར་བར་དཔག་ཚད་ལྔ་སྟོང་ཡོད༔ ཤར་ལྷོ་མཚམས་ན་རྡོ་རྗེའི་གྲང་དམྱལ་བརྒྱད༔ གྲང་དམྱལ་བརྒྱད་ཀྱི་བདུན་འགྱུར་གྲང་བ་ལ༔ རིམ་པར་བར་བར་དཔག་ཚད་བཞི་སྟོང་ཡོད༔ ནུབ་བྱང་མཚམས་ན་ཉི་ཚེ་ཉེ་འཁོར་བ༔ དམྱལ་བ་གོང་མས་བདུན་འགྱུར་མང་བ་ལ༔ རིམ་པར་བར་བར་དཔག་ཚད་སུམ་སྟོང་ཡོད༔ བྱང་ཤར་དམྱལ་བ་ཤམ་པ་ལ་ཞེས་པ༔ དམྱལ་བ་གཞན་གྱི་བདུན་གྱུར་གནོད་པ་ལ༔ སྤྲུལ་པའི་དམྱལ་བ་ཚ་གྲང་འཐབ་པ་ཡོད༔ ཇི་སྲིད་ནམ་མཁའ་མ་ཞིག་བར་དུ་ནི༔ མི་འཇིག་པ་ནི་རྡོ་རྗེའི་དམྱལ་བ་སྟེ༔ དེ་དག་སེམས་ཅན་དམྱལ་བའི་སྡུག་བསྔལ་ཡིན༔ ཡི་དྭགས་ལ་ཡང་བསྡུ་ན་རྣམ་པ་གཉིས༔ འཇིག་རྟེན་དག་ན་རྒྱུ་བའི་ཡི་དྭགས་དང་༔ ཡི་དྭགས་ཡུལ་ན་གནས་པའི་ཡི་དྭགས་སོ༔ འཇིག་རྟེན་དག་ན་རྒྱུ་བའི་ཡི་དྭགས་ནི༔ མཚན་མོ་རྒྱུ་བ་མི་འགའ་ཞིག་གིས་མཐོང་༔ རང་དབང་མེད་པར་མི་ལ་ཅི་གནོད་བྱེད༔ འདྲེ་འདུལ་མཁན་གྱིས་བསྲུངས་མནན་སྡུག་བསྔལ་ཡོད༔ རྒྱབ་རྟེན་སྔོན་ལ་རྫོང་ཞིང་འདྲེ་རུ་རྡུང་༔ སྐྱབས་གནས་འཁྲིས་བྱེད་ཟས་གོས་མི་ལ་འཚོལ༔ དམ་སྲི་འདྲེ་རྒོད་ལས་ཀྱི་སྡུག་བསྔལ་ཡོད༔ ཡི་དྭགས་ཡུལ་ན་གནས་པའི་ཡི་དྭགས་ནི༔ ས་འོག་དཔག་ཚད་ལྔ་བརྒྱ་འདས་པ་ན༔ ཡི་དྭགས་ཁང་པ་ཡངས་པ་ཅན་ཞེས་ན༔ དཔག་ཚད་སུམ་སྟོང་དྲུག་བརྒྱ་ཡོད་པ་ན༔ ཡི་དྭགས་ཕྱི་ཡི་སྒྲིབ་པ་ཅན་ཞེས་པ༔ ཟས་ལ་མེ་དཔུང་མེ་འདག་མེ་དམར་མཐོང་༔ སྐོམ་ནི་རྣག་ཁྲག་མི་གཙང་ཁྲོ་ཆུར་མངོན༔ དེ་དག་དབྱུག་ཏོ་ཅན་གྱིས་སྲུང་བར་མཐོང་༔ རྒྱ་མཚོ་དག་ལ་བསྲུང་བ་ཡེ་མེད་དེ༔ སྐྱེས་བུ་གོ་མཚོན་ཅན་གྱིས་བསྲུང་བར་མཐོང་༔ རི་བོ་དག་ལ་གཡོ་འགུལ་ཡེ་མེད་དེ༔ འགུལ་ཞིང་རྒྱུག་དང་ཕྱི་ནས་འདེད་པར་མཐོང་༔ ཡི་དྭགས་ནང་གི་སྒྲིབ་པ་ཅན་ཞེས་པ༔ མགོ་བོ་རྒྱ་རྫ་ཁ་ནི་ཁབ་མིག་ཙམ༔ མགྲིན་པ་རྟ་རྔ་གསུས་པ་ཡུལ་ལྗོངས་ཙམ༔ རྐང་ལག་རྒྱ་ཁབ་ཙམ་གྱིས་མི་ཐེག་ཡོད༔ དང་པོར་ཟས་སྐོམ་བཙལ་གྱིས་མི་རྙེད་དང་༔ རྙེད་ཀྱང་ཁ་ཡི་ནང་དུ་མི་ཚུད་དང་༔ ཚུད་ཀྱང་མགྲིན་པའི་ལམ་ལ་མི་ཤོང་དང་༔ ཤོང་ཡང་ལྟོ་བ་ཡུལ་ལྗོངས་མི་ཁེངས་ཡོད༔ ཡི་དྭགས་བར་གྱི་སྒྲིབ་པ་ཅན་ཞེས་པ༔ ཤིན་ཏུ་བཀྲེས་སྐོམ་སྡུག་བསྔལ་མ་བཟོད་ནས༔ མི་གཙང་བ་དང་སྣབ་ལུད་རྙེད་གྱུར་ཀྱང་༔ གཞན་གྱིས་ཕྲོགས་ནས་སྤྱོད་དབང་མེད་པ་དང་༔ ཆུ་ཡི་མིང་ཡང་མི་གྲག་སྨིག་སྒྱུ་ལ༔ སྐོམས་ནས་ཆུ་ཡིན་སྙམ་ནས་འཐུང་དུ་འགྲོ༔ ཤ་ལྤགས་མེད་པའི་ཀེང་རུས་སྐམ་པོ་ནི༔ ཉི་མའི་གྲིབ་སོ་ནག་ངམ་བྱུང་བ་དང་༔ དགོངས་ཀ་ས་གཞི་ཁེངས་སྙམ་བྱེད་པ་ཡོད༔ ཡི་དྭགས་སྒོས་ཁུར་སྒྲིབ་པ་ཅན་ཞེས་པ༔ ཟས་སྐོམ་འཚོལ་ཕྱིར་བཀོལ་བས་ཁར་མེ་འབར༔ ཟས་ཟོས་ཁྲོ་ཆུ་ཁོལ་མར་སོང་ནས་ནི༔ ཁོང་པ་བསྲེགས་ནས་ལུས་ལས་མེ་སྟག་འཕྲོ༔ ཡི་དྭགས་སྤྱི་མཐུན་སྒྲིབ་པ་ཅན་ཞེས་པ༔ ཟས་སྐོམ་ཕུན་སུམ་ཚོགས་པས་མཐའ་བསྐོར་ནས༔ རང་ལ་སྤྱོད་དབང་མེད་པར་བཀྲེས་སྐོམ་ཉེན༔ གཞན་གྱིས་ཁྱེར་དོགས་སྒྲིམས་པར་བསྲུང་བ་ཡོད༔ ཡི་དྭགས་བྱིན་བུ་སྐྱེས་ཞེས་བྱ་བ་ནི༔ ལོངས་སྤྱོད་དཀྱིལ་དུ་རྐེད་པ་ནུབ་བྱས་ནས༔ སྐྱེས་བུ་གོ་མཚོན་ཐོགས་པས་སྲུང་བར་མཐོང་༔ ཡི་དྭགས་མེ་ལྕེ་འཁོར་ལོ་ཅན་ཞེས་པ༔ ཟོས་ཚད་འཐུངས་ཚད་མེ་ལྕེར་འགྲོ་བ་དང་༔ རུས་པ་འཁྲོགས་ནས་མེ་རུ་འབར་བ་ཡོད༔ དེ་དག་སེམས་ཅན་ཡི་དྭགས་སྡུག་བསྔལ་ཡིན༔ དུད་འགྲོ་ལ་ཡང་མདོར་བསྡུས་རྣམ་པ་བཞི༔ གཉའ་ཤིང་འཛིན་རི་ཡན་ཆད་ཉི་ཟླ་མེད༔ གླིང་བར་དག་ན་གནས་པའི་དུད་འགྲོ་ནི༔ སོས་ཀའི་ཉི་རྡུལ་བས་ཀྱང་མང་བ་ཡོད༔ རང་གཟུགས་མི་མཐོང་ཉིང་ཤ་ཉིང་གིས་ཟ༔ གཡང་དང་རྦབ་ཏུ་ལྷུང་བའི་སྡུག་བསྔལ་ཡོད༔ གཉིས་པ་བྱིངས་གནས་ཕྱི་ཡི་རྒྱ་མཚོ་ན༔ ཆང་འགགས་སྦང་མ་བཞིན་དུ་གནས་པ་སྟེ༔ ཆེ་ཆེས་ཆུང་ཆུང་ཐམས་ཅད་ཟ་བ་དང་༔ གཅིག་ལ་གཅིག་གིས་གཤེད་མའི་སྡུག་བསྔལ་ཡོད༔ གསུམ་པ་སྐྱབས་མེད་དུད་འགྲོ་ཕྲན་བུ་ནི༔ སྐྱེ་བ་རྣམ་པ་བཞི་ལས་སྐྱེས་པ་ཡི༔ རི་དྭགས་གཅན་གཟན་གྲོག་སྦུར་སྲིན་བུ་དང་༔ རྐང་མང་རྐང་མེད་འདབ་ཆགས་སྡེར་ཆགས་དང་༔ ཀླུ་ཡི་རིགས་བྱེད་དུད་འགྲོ་ཕྲ་སྦོམ་སོགས༔ ས་ཡི་སྟེང་ན་བསམ་གྱིས་མི་ཁྱབ་སྟེ༔ གཅིག་ལ་གཅིག་གིས་ཟ་བའི་སྡུག་བསྔལ་ཡོད༔ རྔོན་པས་རྒྱ་དང་འགག་རྙེི་བཙུགས་པ་ཡིས༔ རྒྱུ་ཤེ་སྐྱེད་ཚད་ལོག་པར་འགྲོ་བ་དང་༔ འགའ་ཞིག་ཞོར་ལ་འགའ་ཞིག་འཆི་བ་ཡོད༔ བཞི་པ་དུད་འགྲོ་ཁ་འཐོར་སྡུག་བསྔལ་ནི༔ མི་ལ་བརྟེན་པའི་དུད་འགྲོ་འདི་དག་ནི༔ ལས་སུ་ཁལ་འགེལ་རྨོ་རྨོས་ཞོ་བཞོས་དང་༔ སྤུ་འབྲེག་ཤ་འབྱིན་ཁྲག་འདོན་བཙོག་པ་དང་༔ ཞོ་ཤ་མི་བསྲི་སྒལ་བ་རྡོལ་རྡོལ་འཁུར༔ ཁོལ་ཙེ་མ་ལུས་རྭ་ཅོ་བྱང་བྱང་འདྲད༔ པགས་པ་བཤུ་བར་འདུག་ཀྱང་ན་ཚ་བསྲན༔ ལུས་པོ་འགས་པར་མཆིས་ཀྱང་སྙིང་རུས་བྱེད༔ སྐྲོད་གཟིར་གསོད་པའི་སྡུག་བསྔལ་དཔག་མེད་ཡོད༔ དེ་དག་སེམས་ཅན་དུད་འགྲོའི་སྡུག་བསྔལ་ཡིན༔ མཐོ་རིས་རྣམ་གསུམ་བདེའོ་སྐད་དེ་ཡང་༔ དངོས་ལ་མཐོ་རིས་ན་ཡང་བདེ་བ་མེད༔ དགེ་བཅུ་སྤྱད་པས་ལྷ་ལུས་ལེན་ན་ཡང་༔ སྔ་ལྟས་ལོག་པ་བཅུ་གསུམ་སྡུག་བསྔལ་ཡོད༔ གཞལ་ཡས་ཁང་གི་འོད་ཤོར་ཁ་དོག་ཉམས༔ དཔག་བསམ་ཤིང་འགྱེལ་ཁྲུས་ཀྱི་རྫིང་བུ་བསྐམས༔ མེ་ཏོག་སད་ཁྱེར་མ་རྨོས་ལོ་ཐོག་མེད༔ ཅང་ཤེས་རྟ་ཤི་འདོད་འཇོའི་བ་ཡང་སྟོར༔ ལུས་ཀྱི་འོད་ཉམས་དྲི་མི་ཞིམ་པ་ལྡང་༔ རྒྱན་ཆ་མེ་ཏོག་ཕྲེང་བ་རྣམས་ཀྱང་རྙིངས༔ མཆན་ཁུང་གཉིས་རུལ་ཆུང་མས་ཀླེས་ལ་བོར༔ ལྷ་གྲོགས་མི་ཉེ་རིང་དུ་གནས་པ་དང་༔ འཆི་བར་ཤེས་ནས་སྡུག་བསྔལ་དཔག་ཏུ་མེད༔ མི་ལོ་ལྔ་བཅུ་ཕྲག་གཅིག་ལྟས་བྱུང་འཆི༔ ཕྱི་མ་གར་སྐྱེ་ལྷ་ཡི་མིག་གིས་མཐོང་༔ བསགས་པའི་བསོད་ཟད་སྡིག་འཕེལ་ངན་སོང་སྐྱེ༔ སྡུག་བསྔལ་སྔ་མ་མ་སངས་ཕྱི་མས་ནོན༔ གར་སྐྱེ་ལུས་ཀྱི་སྡུག་བསྔལ་མངོན་ཤེས་ཡོད༔ ལྷ་མ་ཡིན་གྱི་གནས་སུ་སྐྱེས་ན་ཡང་༔ འཐབ་རྩོད་སྡུག་བསྔལ་བརྗོད་ཀྱིས་མི་ལང་སྟེ༔ ཕྲག་དོག་ཀུན་བསླངས་མི་དགེ་བཅུ་སྤྱད་པས༔ ལྷ་མ་ཡིན་དུ་མཚམས་སྦྱོར་སྐྱེ་བ་ལེན༔ ལྷ་རྣམས་བསོད་ནམས་ལོངས་སྤྱོད་ཆེ་བ་ལ༔ ལྷ་མ་ཡིན་རྣམས་ཕྲག་དོག་སྐྱེས་ནས་འཐབ༔ ལྷ་དང་ལྷ་མིན་གཡུལ་བཤོམ་འཁྲུག་པའི་དུས༔ ཕན་ཚུན་འཐབ་རྩོད་ལས་སུ་གོ་མཚོན་བསྟེན༔ མཚོན་ཆའི་འཁོར་ལོས་གནོད་པ་འབའ་ཞིག་སྐྱེལ༔ ལུས་ནི་རྨས་ནས་འདྲད་དང་ཤི་བ་དང་༔ ངག་ཏུ་མི་སྙན་རྒྱོབ་སོད་སྒྲ་མང་སྒྲོག༔ མ་ཤི་བ་ལ་མེར་བསྲེགས་ཆུ་ལ་བསྐྱུར༔ མགོ་འབྲེག་སྙིང་འདོན་ནང་ལྟོ་བླུགས་པ་དང་༔ ཉིན་འཁྲུག་མཚན་འཁྲུག་ལས་ཀ་དམག་ལ་བྱེད༔ འཐབ་རྩོད་སྡུག་བསྔལ་མི་བཟད་དཔག་མེད་ཡོད༔ མི་ཡི་གནས་འདི་སྐྱིད་ཤོས་ཡིན་གྱུར་ཀྱང་༔ བརྒྱད་དང་འགྱུར་བའི་སྡུག་བསྔལ་དཔག་མེད་ཡོད༔ དང་པོ་ཕོ་མོ་རྒྱུ་རྐྱེན་ཕྲད་པའི་ཚེ༔ ཕ་མའི་ས་བོན་ཁུ་ཁྲག་འདྲེས་པ་དེ༔ རུལ་སུངས་མི་སྡོདསྟོབས་ལྡན་འཕེལ་བར་བྱེད༔ རིམ་པར་ཆགས་ནས་ལྟེ་བའི་རྩ་མདུད་ནི༔ གྲུ་གསུམ་མ་རྩ་རྒྱལ་པོ་བ་ལང་མིག༔ སྦལ་པའི་སྒོ་ང་ཙམ་ཞིག་ཆགས་པའི་དུས༔ མ་ལ་ལྟོ་ནད་མིག་ལོའི་ན་ཚ་ནི༔ སྙིང་ང་ཅན་ལ་སྦྲང་སྨྱོན་བླུད་པ་འདྲ༔ མགོ་བོ་ལྗི་ལ་ལུས་པོ་གཙེ་ཤུམ་བྱེད༔ ཡར་སྐྱུགས་མར་འབྱངས་སྐད་འགགས་མི་ཡིད་འདོད༔ ཟླ་བ་དགུ་ན་ལུས་ཟུངས་བདུན་རྫོགས་ཏེ༔ མ་ཉིད་ལྟོགས་དུས་གཡང་ལ་བཏང་བ་ལྟར༔ ལུས་འདར་ལང་ལིང་ཕྱད་ཕྱོད་སྔངས་སྐྲག་ཡོད༔ འགྲངས་པའི་དུས་ན་བྲག་ལ་བཅར་བ་ལྟར༔ བསྒུལ་བསྐྱོད་མི་ཤེས་ལུས་པོ་ཆ་ཆར་བསྡམས༔ ཕོ་མོ་འཁྲིག་དུས་མེ་ཉོར་བཙོས་པ་ལྟར༔ ལུས་པོ་ཚ་ཡལ་གཙེ་ཞུམ་ཚ་ཙག་བྱེད༔ མ་ཡིས་ཕྱིན་དུས་ང་གིས་བསྐྱོད་པ་ལྟར༔ མཐོ་ལིང་དམའ་ལིང་བསྒོར་བསྒོར་ཐོམ་ཐོམ་བྱེད༔ མ་ཡིས་ཉལ་དུས་རི་བོས་མནན་པ་ལྟར༔ ཁོལ་ཙེ་མ་ལུས་གང་ན་འདིར་ན་མེད༔ མ་ཡིས་ལྟོ་ཟོས་ཐིབས་འོག་ཚུད་པ་ལྟར༔ ནག་ཐོམ་བྱེད་ཅིང་དབང་པོ་ལུས་སྐྱོན་ཡོད༔ མ་ཡིས་དྲག་ཤུལ་ལྡང་འདུག་བྱས་ཙ་ན༔ ལུས་འགས་སྙིང་བཏོན་རྦབ་ལ་བསྐྱུར་སྙམ་བྱེད༔ མ་ལ་བཟའ་མེད་ལྷད་ཟས་འབག་འབོག་ཟོས༔ གོས་མེད་མལ་གྲང་སྡུག་བསྔལ་དམྱལ་བ་འདྲ༔ ཟླ་ངོ་བཅུ་སོང་ལུས་ཟུངས་རྫོགས་གྱུར་ཏེ༔ མགོ་ཞབས་ལོག་ནས་སྐྱེ་བར་གྱུར་པའི་ཚེ༔ བཙའ་སྒོ་ཡངས་དོག་བྱེ་བྲག་ཐ་དད་གྱིས༔ མ་དང་བུ་གཉིས་གཤིན་ཡུལ་གོམ་ཕྱེད་བོར༔ མ་བུ་གཉིས་ཀ་ན་ཚའི་སྡུག་བསྔལ་ཆེ༔ མ་ཡི་ཁ་རུས་མ་གཏོགས་རུས་མཚམས་བྱེ༔ ལུས་ནི་ཚལ་པ་སྟོང་དུ་གས་སྙམ་བྱེད༔ བུ་ཆུང་སུབས་ཁད་པགས་པ་བཤུས་པ་ཙམ༔ ནུས་པ་ཡོད་ཚད་ཕྱི་རུ་བསྐྱེད་པ་ཡིས༔ སེམས་དང་ལུས་དུབ་གཏུན་ཁུང་བརྡུངས་པ་འདྲ༔ སྟན་ཁར་བྲུལ་དུས་ཚེར་ཕུང་གསེབ་བསྐྱུར་ལྟར༔ གོས་སུ་དྲོ་འཇམ་པགས་པ་བསྐོན་གྱུར་ཀྱང་༔ མ་ཡི་མངལ་གནས་དྲོ་འཇམ་མ་ལགས་ཏེ༔ ལུས་ལ་འབྲད་དང་ཟུག་དང་ན་ཚ་འོང་༔ མ་ཡིས་པང་བླངས་བྱེ་ཕྲུག་ཁྲས་ཁྱེར་ལྟར༔ ལྟེ་བ་བྲེགས་པས་སྙིང་ལ་ཚེར་ཟུག་འདྲ༔ དེ་ནས་ཞག་སྐྱེད་ཟླ་སྐྱེད་ཆེར་གྱུར་ཀྱང་༔ འོག་ན་དྲི་ཆུ་འབྱིན་དང་སྟབས་མ་བདེ༔ ཁ་སྐོམ་གྲོད་ལྟོགས་ལུས་འཁྱགས་ཡན་ལག་སྦྲིད༔ དབང་པོ་ལྔ་རུ་རྡུལ་དང་སེམས་ཅན་ཞུགས༔ བུ་རྫིས་ཉར་ཅག་མ་བྱས་ཉན་གྱུར་རྣམས༔ འདི་བྱུང་འཆད་པར་མི་ཤེས་ངུ་བ་ལས༔ མ་དེ་བརྩེ་ཞིང་བུ་ལ་བྱམས་ན་ཡང་༔ ནུ་སྐོགས་དེ་ཉིད་ཁར་བརྫངས་ཨ་པོ་ལས༔ ཁོ་ཡི་རེ་བ་སྐོང་བར་མི་འགྱུར་རོ༔ དེ་ནས་ཆེར་སོང་ལང་ཚོ་དར་ལ་བབ༔ ཡོད་པ་སྣ་ལེན་མེལ་ཚེ་བྱེད་བྱེད་ནས༔ བྲེལ་ལ་ཁ་སྐོམ་ལུས་སེམས་གཉིས་ཀ་དུབ༔ དོགས་ཆུང་ཚི་སྦྱར་བསྲུངས་ཀྱིས་མི་ལང་སྟེ༔ དགྲ་མང་གཉེན་ཉུང་སྙིང་ན་གཉིད་ཡར་ནས༔ བལྟོས་པ་མ་འཁྱོངས་དོགས་ནས་སེམས་ཁྲལ་བྱེད༔ ཉེ་འབྲེལ་རགས་ཤིང་མཐུན་དང་བྲལ་གྱིས་དོགས༔ ཐག་རིང་ཞག་གསུམ་སྡོད་ཀྱང་བློ་མི་བདེ༔ ཞག་གཅིག་ན་ཡང་སེམས་འཚུབ་སྙིང་མི་དགའ༔ ཤི་ན་གསོན་པོ་མྱ་ངན་ཡུས་ཀྱིས་བརྒྱལ༔ དྭ་ཕྲུག་ཡུགས་ས་བཅོས་མེད་སྡུག་བསྔལ་ཆེ༔ ཟས་གོས་ནོར་མེད་ཐ་མ་བུ་ལོན་འཁོར༔ སྔ་མའི་སྡུག་བསྔལ་ཕྱི་མ་ཕྱི་མས་ལེན༔ སྡུག་བསྔལ་གྲ་རྒྱས་དང་བླངས་སྦྱིན་སྦྱར་དམ༔ མི་འཆམ་ཉེ་འབྲེལ་གཅིག་ཡུས་གཅིག་ལ་ཆེ༔ འགྲོགས་བཤེས་མེད་པའི་འགྲས་ཡུས་ཆེན་པོས་འཁོན༔ ནང་འཐབ་ནུབ་འཐབ་ཁ་ངན་སུན་ཚིག་འབྱིན༔ རང་ལ་མེད་པས་གཞན་ཡོདསྡུག་བསྔལ་ཆེ༔ ལ་ལའི་ནོར་རྫས་ལ་ལས་ཧབ་ཐོབ་བྱེད༔ མེད་པར་དབུལ་ཕོངས་ཡོ་བྱད་ལག་བོར་ཏེ༔ ནོར་གྱིས་ཤེད་བསྐྱུངས་ཟས་ཀྱིས་གཉའ་བཅག་ནས༔ བཙལ་གྱིས་མི་རྙེད་ལྟོགས་ལ་ཐང་ཆད་ནས༔ མཉམ་པོས་མཉམ་པོའི་ཁ་ངོ་བལྟ་དགོས་ལ༔ གོས་ངན་ལྷད་ཟས་བྲན་གཡོག་རང་ཡི་མུག༔ བཟའ་མེད་གོས་མེད་སྤྲུག་མང་བསྙས་པས་སྡུག༔ རང་མགོ་དྲག་ན་རྒྱལ་པོའི་འཇིགས་པས་སྡུག༔ རང་མགོ་ངན་ན་ཁ་ཉེན་དབང་ཆུང་སྡུག༔ ཞ་འཐེང་འོན་ལོང་ལྐུགས་གླེན་ལུས་ཉམས་སྡུག༔ འགའ་ཞིག་མི་ལ་ཕྱུགས་བཞིན་ཉོ་བཙོང་སྡུག༔ འཇིག་རྟེན་པ་རྣམས་བོད་འབྲོག་སོ་ནམ་སྡུག༔ ཨར་ཇག་རྐུན་མ་སྲོག་དང་ནོར་བསྡོ་སྡུག༔ འགའ་ཞིག་རྗེ་ཡི་དབང་དུ་སོང་ནས་སྡུག༔ ཁ་མང་རང་གི་ཁ་ཡིས་ཕུང་ནས་སྡུག༔ ཁྱོ་ཆུན་བར་སེང་གཟའ་འཐབ་གླེས་བོར་སྡུག༔ ལ་ལ་ནད་ལ་ཕན་མེད་བཅོས་ཀྱིས་སྡུག༔ ནད་དུ་མཛེ་བྱུང་མི་ཁྱུ་བུད་པས་སྡུག༔ ཉམ་ཐག་སྤྲང་པོ་རྒྱལ་ཁམས་བསྐོར་བས་སྡུག༔ ལ་ལ་འདྲེ་རྒོད་མི་མ་ཡིན་གཙེར་སྡུག༔ ལ་ལ་མི་དབང་འབངས་ཆོད་ཤོར་དོགས་སྡུག༔ མཁས་བཙུན་ཆོས་ལ་དྲག་ཞན་བྱུང་དོགས་སྡུག༔ དགོན་ཆུང་སློབ་དཔོན་མི་ཆོས་བྱེད་དགོས་སྡུག༔ བན་སྔགས་བོན་པོ་ཕྱྭ་རེས་ཤོར་དོགས་སྡུག༔ ལ་ལ་མཐུ་བྱེད་དགྲ་དང་མི་འབྲལ་སྡུག༔ བན་བཙུན་ཕོ་མོ་བུ་ཆུང་ཆེ་དོགས་སྡུག༔ འཕྱོན་མ་སྒེག་མོ་ཀུན་སེམས་འཛིན་དགོས་སྡུག༔ ན་ཆུང་བུ་མོ་གོ་རྒས་ལུས་དོགས་སྡུག༔ ཁྱོ་ཆུང་མ་རྙེད་ཕོ་རེང་མོ་རེང་སྡུག༔ ཁ་དྲག་པོ་རྣམས་ཁ་ཉེན་སོང་དོགས་སྡུག༔ ཁ་ཉེན་པོ་རྣམས་ཁ་དྲག་རེ་བས་སྡུག༔ བུ་མེད་པོ་རྣམས་བུ་ཡོད་རེ་བས་སྡུག༔ བུ་ཡོད་པོ་རྣམས་ཉན་དུ་མ་བཏུབ་སྡུག༔ ཁྲིམས་མ་ཆགས་ལ་སུ་ཐུ་མི་ཤེས་སྡུག༔ ཁྲིམས་ཆགས་པ་ལ་སྤུ་ལོ་བཟང་ངན་སྡུག༔ ཕོ་མོ་སྒོ་ཐལ་བ་ལ་མིག་སེར་སྡུག༔ ཡང་སྒོས་སྤྱི་ལ་དམག་དང་མུ་གེས་སྡུག༔ ཆར་ཆེས་ཐན་པ་མི་ནད་ཕྱུགས་ནད་སྡུག༔ མེས་འཇིགས་ཆུས་འཇིགས་གཅན་གཟན་དུག་སྦྲུལ་དང་༔ དུས་འགྱུར་ལིང་ལོག་གང་སྟོངས་ཡུལ་འཁྲུག་སྡུག༔ གཉིས་པ་རྒས་པའི་སྡུག་བསྔལ་བསྟན་པ་ཡང་༔ ལོ་མང་ལོན་པས་འབྱུང་བ་བརྙིངས་ཏེ་སྡུག༔ མཛེས་པའི་བཀྲག་ཤོར་སྡུག་པའི་མདངས་ཡལ་ཉམས༔ དྲང་པོར་སྐྱེས་པའི་ལུས་ནི་སྒུར་བོར་སོང་༔ ཡན་ལག་ཚིགས་ཀྱོག་རྩ་དང་ཆུ་རྒྱུས་གསལ༔ ལུས་ཀྱི་སྟོབས་ཤོར་སེམས་ཀྱི་དཔའ་ཞི་ཞིང་༔ བསོད་ནམས་འཕེན་པ་ཟད་པས་མི་མི་བྱམས༔ ལེགས་པའི་ལང་ཚོ་རྒུད་པས་སྐྱུག་བྲོ་ལྟ༔ གཟིར་བའི་ནུས་པ་མེད་པས་རྔན་ཅན་བྱེད༔ མཐོང་བྱེད་ཀྱིས་མ་ཁྱོགས་པས་མིག་མི་གསལ༔ འབྱུང་བའི་དངས་མ་རུལ་བས་རྣ་བ་འོན༔ ཤ་བྲོས་མཁུར་ཚོས་ཁྲག་གི་མེ་ཏོག་ཡལ༔ རྩ་ཞར་འབུར་སར་འབུར་དོད་ཁུང་སར་ཁུང་༔ འགྲིག་པོར་སྐྱེས་པའི་སོ་དོན་ཁ་ལྕེ་ལྡིབ༔ མགོ་བོ་དཀར་མདོག་ཐོན་ཞིང་གདོང་སྤུ་སྐྱེས༔ ཁ་མཚུལ་བཞིན་ནག་སྤོས་རྒྱའི་རི་མོ་ཤར༔ བྲང་ལ་སྡོང་སྐས་བྱུང་བས་སྐེ་རྩ་ཁྲེང་༔ རྐང་ལག་ཐང་ཤིང་བཞིན་དུ་སྦོམ་ཕྲ་བྱེད༔ ལུས་ལ་གར་བལྟས་ཧེལ་གེ་གཅུས་བཞིན་སོང་༔ ནོམ་ཞིང་ཁ་མི་གཙོ་བས་ངོ་ཚ་བྱེད༔ ལངས་པས་མི་ཐེག་སྡོད་ན་ལུས་ནི་རྡེབ༔ བཤུས་འདེབས་ཧུས་འདེབས་ཡ་ཡ་ཕ་མ་འབོད༔ མཚན་མོ་གཉིད་ཡར་ནམ་ལ་ལངས་དུས་མེད༔ ཉིན་པར་བྱིང་རྨུགས་ཚ་གྲང་རྐྱེན་མི་ཐེག༔ བདེ་བར་བཞག་ཀྱང་ལྷུ་ཚིགས་ཁོལ་བུར་ན༔ དྲི་ཆུ་མདོ་རུ་མི་འཁྱོལ་གདན་ཁར་འཆོར༔ མི་སྙིང་མི་སྡུག་གཞོན་པས་བརྙས་བཅོས་བྱེད༔ གོས་ཕུད་གྱོན་པར་མི་ནུས་འཁྱགས་པ་བསྲན༔ ངོ་ཚའི་གནས་རྣམས་སྦེད་པར་མི་ཤེས་སྟོན༔ གཞོན་ནུ་ཀུན་གྱིས་ལྟད་མོ་ཆེ་ཞིང་དགོད༔ བསགས་པའི་ཟས་ནོར་མནའ་མའི་དབང་དུ་ཤོར༔ སྐོམ་ལྟོགས་འོ་དོད་བོས་ཀྱང་བཅོས་མ་ཟེར༔ སྤྱིར་གྱིས་སྡུག་རྒན་ཕུང་རྒན་ཅེས་མིང་འདོགས༔ འཆི་དུས་མི་འདུག་ཟེར་གྱིན་བློས་མི་ལོན༔ བརྩེ་བ་རྣམས་ཀྱང་སུན་ནས་འཆི་རན་ཟེར༔ རྒན་འཁོགས་ཡི་མུག་ག་ཆད་ལྕེབ་སྙིང་འདོད༔ སེམས་ལ་མ་ལྡན་པ་རྣམས་མི་ལ་འཆད༔ ངུ་ཞིང་ཡི་མུག་ལྟོ་དང་གོས་ཀྱིས་བཀྲེན༔ མེ་ཆུ་མི་འདུས་ལྟོ་གོས་གཡོག་མི་སོས༔ རྒས་པའི་སྡུག་བསྔལ་སྨོན་ན་འཆི་བར་འདེབས༔ གསུམ་པ་ན་བའི་སྔུག་བསྔལ་བསྟན་པ་ནི༔ ལུས་ཀྱི་འབྱུང་བཞི་ཆ་མ་སྙོམས་པ་ཡིས༔ རླུང་དང་མཁྲིས་པ་བད་ཀན་འདུས་པའི་ནད༔ མ་རིག་པས་ནི་རྒྱུ་བྱས་ཡི་དྭགས་རྐྱེན༔ འབྲུམ་པ་རིམས་དང་རྒྱུ་གཟེར་གག་ལྷོག་དང་༔ མཚོན་གྱིས་གཙེས་དང་གཅོང་ནད་སྡེ་བཞི་སོགས༔ བརྗོད་ཀྱིས་མི་ལང་ན་ཚའི་རིགས་བྱེད་རྣམས༔ ཚབས་ཆེན་བཏབ་པས་ཉམ་ཐག་ནད་པ་དེ༔ ན་ཚའི་ཟུག་གཟེར་བསྲན་ཐབས་མ་ཚུགས་པས༔ སོ་དྲེག་མཆུ་དྲེག་རྐང་དྲེག་ལག་དྲེག་ཆགས༔ མིག་ཕུགས་རྡིབ་ཅིང་བ་སྤུ་གྱེན་ལ་གཟིངས༔ འཁུན་བརྒྱངས་སྐད་ངན་འདོན་ཅིང་མལ་ཚིག་ཟ༔ མཛེས་པའི་བཞིན་མདངས་ཉམས་པས་ཡི་དྭགས་འདྲ༔ རྒྱུ་མ་སྒལ་འབྱར་ཤ་ཁྲག་རུས་མིག་དིམ༔ ཟས་སྐོམ་ཁར་བཅུག་ལྕེ་ལ་བྲོ་བ་མེད༔ ལུས་ཀྱི་ཟུངས་ཟད་ཡིད་ཀྱི་དྲན་པ་སྟོར༔ ལྡང་དང་རྒྱུ་བར་མི་ནུས་གདན་ལ་འབྱར༔ འབོལ་བར་བཏིང་བའི་གདན་ནི་རྡོ་བས་མཁྲེགས༔ བདེ་མོར་བཅུག་པའི་སྔས་ནི་ཤིང་བས་རེངས༔ འཇམ་པོར་གཡོགས་པའི་གོས་ནི་ཚེར་ལས་རྩུབ༔ བསླངས་ན་ཉལ་ཟེར་བསྙལ་ན་ཡར་སློང་ཟེར༔ ནད་དབང་སོང་བས་ངོ་ཚ་ཁྲེལ་འཛེམ་ཤོར༔ སྐྲ་ཉག་རེ་ལས་རྔུལ་ཐིགས་རེ་རེ་འཛག༔ ཉིན་མོ་ཉིན་རིང་མཚན་མོ་མཚན་ཡང་རིང་༔ ཉི་མར་རྒས་དུས་ནམ་ལ་ལངས་དུས་མེད༔ ཟས་སྐོམ་མ་བྱིན་མཐོང་བ་ཙམ་གྱིས་སྐྱུག༔ ཟས་དང་བྲལ་བས་མནམ་ཞིང་ཡིད་མི་འོང་༔ སྨན་དཔྱད་མི་འཛུག་ཅི་བྱས་གནོད་པར་འགྱུར༔ འདྲེ་བཅོས་རིམ་གྲོ་བྱས་ཀྱང་ནད་མི་སོས༔ སྐོམ་ཀྱང་ཟས་ཚོད་འཐུང་ཚོད་སྨན་པས་འཛིན༔ གཉིད་བསྲུངས་ཟས་བསྲུངས་འགྲུལ་བསྲུང་རེལ་མ་ཤོར༔ རྒན་པས་གཡོག་བྱས་གཞོན་པས་འདྲེ་བརྡུང་ཟེར༔ ནད་ཉམས་ཅན་གྱིས་ནད་ཀྱི་མཚང་བཤད་ནས༔ བྱ་ཐབས་འདུག་ཚད་མ་ལེན་མི་འགྱོད་བྱས༔ ཆོས་ཀྱི་ཐུན་བཟུང་བན་ཆོག་བོན་ཆོས་གྱེར༔ སྔས་སྲུང་སྨན་པ་མོ་མ་མགྲོན་དུ་བསགས༔ གཉེན་བཤེས་གྲོགས་པོ་མང་པོས་མཐའ་མ་བསྐོར༔ ན་ཚ་འགོགས་དང་བགོ་རུ་མ་བཏུབ་སྟེ༔ སུས་ཀྱང་མི་སྟོངས་སྡུག་བསྔལ་གཅིག་པུས་མྱོང་༔ གཏར་སྲེག་དཔྱད་བྱས་འཆི་ཡང་ན་ཚ་བསྲན༔ སེམས་ཅན་ན་བའི་སྡུག་བསྔལ་བསམ་མི་ཁྱབ༔ བཞི་པ་འཆི་བའི་སྡུག་བསྔལ་བསྟན་པ་ནི༔ ཞག་རེ་སོང་ཞིང་ན་ལུགས་ཇེ་མི་མགུ༔ རྩ་སྡོད་དབུགས་རྒོད་ཅིས་ཀྱང་མ་ཕན་ནས༔ སྨན་པ་ངོ་ནག་འཆི་དུས་འདིངས་སུ་ཡོད༔ སྒོས་སུ་མི་གཅེས་མི་ནི་མི་འབྱུང་སྟེ༔ རང་བས་ཤུལ་དུ་དྲན་གསལ་སྡུག་བསྔལ་ཆེ༔ གཅེས་དགུ་བཞག་ནས་འགྲོ་ལ་ཐུག་ཙ་ན༔ འཆི་བ་མ་བཤོལ་ཚེ་ལ་གདན་འདྲེན་བྱུང་༔ མགོ་མི་ཐེག་ཅིང་རྐང་པས་ལུས་མི་ཐེག༔ ལག་པས་ཟས་སྣོད་མི་ཐེག་འོར་དུ་ལྷུང་༔ ནམ་རིང་ཉི་མ་ཤར་བར་ངང་ཐུང་སྐྱེ༔ ནད་པ་གོས་སེལ་ལག་པ་ཕྱི་རུ་འདོན༔ ང་ཐེག་སློང་ཟེར་མིག་ནི་མཐོང་སྐར་ལྟ༔ སུ་ཞིག་ཉོག་གེ་མོ་ལ་ཤོག་ཀྱིས་དང་༔ ང་འཆི་བསླབ་བྱ་ཚིག་གསུམ་བྱའོ་ཟེར༔ རང་རེ་འཆི་ཡང་བློ་སྲོ་ཕར་ལ་བྱེད༔ བརྒྱ་ལ་ཤི་དོགས་ཡིན་མོད་དགའ་རབ་ཡོང་༔ ལག་པ་བཅངས་ནས་མ་ངུ་སྙིང་རུས་ཀྱིས༔ ཁ་སྐོམ་ང་ལ་སྐོམ་ཞིག་བསླང་དང་ཟེར༔ ཁ་རུ་བཏུངས་པས་སྣ་བུག་ནང་ལ་ལོག༔ ཞག་མིག་སྔོ་ལིང་མཆི་མ་ཕྲོམ་ཕྲོམ་འདོན༔ གཅེས་པར་བྱས་པའི་ལུས་པོ་འབོར་བའི་རྟགས༔ བྱད་ཀྱི་མདངས་ཡལ་ཧམ་པ་རིང་གི་འགྲོ༔ སོ་དྲེག་ནག་པོ་ཆགས་ཏེ་ལྕེ་གཞུང་ནག༔ ལུས་ཀྱི་ཤེས་པ་གཏིང་བྱིང་གྲང་ཤུམ་བྱེད༔ ཁ་ཆུ་སྣ་ཆུ་འཛག་ཅིང་ཡར་འཐེན་ཟེར༔ མལ་ཚུགས་མ་ཐུབ་ཡར་སློང་མར་སྙོལ་ཟེར༔ ས་ཆུ་མེ་ང་འབྱུང་བ་ཐིམ་པའི་རྟགས༔ ཤེས་པ་བྱིང་ནས་དམའ་དིམ་ཡར་ཁྱོག་ཟེར༔ རིག་པ་འཁྲུལ་ནས་ཁ་འཆལ་བླ་བརྡོལ་སྨྲ༔ དབུགས་ནི་ཁར་འཚངས་ཕྱི་ནང་འཕུལ་མི་ནུས༔ རྩ་ཞིག་འབྱུང་བ་ཐིམ་པས་རྐན་ལྕེ་ལྡིབ༔ བཞིན་མདངས་ཉམས་ཤིང་ཁ་སྣ་གྲེ་ཕུགས་བསྐམས༔ སྣ་ཞོམ་ནག་ཧམས་བལ་དུད་ཚངས་ཀྱི་འགྲོ༔ རྣམ་ཤེས་སྙིང་འཐུམས་མི་ངོ་མི་ཤེས་ཤིང་༔ དབུགས་སྡུད་མི་ཤེས་བོས་ཀྱང་ལན་མི་འོང་༔ ཕྱི་རྒྱུ་ནང་རྒྱུ་ངར་ངར་ཁག་ཁག་ཟེར༔ ལྕེ་བསྐམས་ཕུགས་བྲོས་སེམས་ནི་ཚིག་པ་ཟ༔ སྣ་སྒོ་ཕྱི་ནང་དབུགས་ནི་རྒྱུ་འགྲུལ་ཆད༔ ནད་པ་ཤོར་ཟེར་བྲང་རྡུང་འོ་དོད་འབོད༔ ལུས་ལ་འཇུས་ནས་བརྩེ་བས་ཁ་གཏུགས་ཀྱང་༔ ཁོ་ལ་ཉན་དང་ལྟ་བའི་དབང་མེད་པར༔ རྣམ་པར་ཤེས་པ་སྙིང་གི་དཀྱིལ་དུ་བརྒྱལ༔ གློ་བས་སྙིང་གཡོགས་དབུགས་ནི་ཕྱི་རུ་ཤོར༔ ཞག་གསུམ་ནག་ཐུམ་དྲན་མེད་བྱ་བཞིན་བརྒྱལ༔ མཆན་འོག་གཉིས་ན་དྲོད་ནི་ཨེ་ན་ཙམ༔ གཞན་རྣམས་གྲང་ཐག་ཆད་དེ་ས་རྡོ་བཞིན༔ ནད་གཡོག་ཉེ་འཁོར་སྡུག་བསྔལ་རོས་ནོན་ནས༔ ཤི་བར་བྱེད་ཅིང་གྲོས་འདུན་བློ་བསྡུར་བྱེད༔ རོ་དེ་མ་མཁོ་ཅི་བྱེད་ལ་དོར་ནས༔ སར་སྦེད་རིར་སྐྱེལ་མེར་བསྲེག་ཆུ་ལ་བསྐྱུར༔ མེད་པར་བྱས་ནས་བློ་ཡི་བདེ་ཤོས་བྱེད༔ བླ་སློབ་ཟབ་མོ་གཏམ་གླེང་མི་ཡི་མཐའ༔ རྗེ་འབངས་དགའ་བའི་མཐུན་འཇུག་མི་ཡི་མཐའ༔ ཁྱོ་ཆུང་མཐུན་པོར་འགྲོགས་པ་མི་ཡི་མཐའ༔ སྨན་པའི་རྒྱལ་པོ་དངོས་སུ་བྱོན་གྱུར་ཀྱང་༔ ཚེ་ཡི་འཕེན་ཟད་སྲོག་ལ་མཐུད་མི་ཤེས༔ དབང་པོ་ཆེ་ཡིས་ཁྲིམས་ལ་གཏུག་ཏུ་མེད༔ མི་ལག་རགས་པས་ར་མདའ་བྱ་རྒྱུ་མེད༔ ངག་ནུས་ཅན་གྱིས་མཐུ་གཏད་བརྡེག་ཏུ་མེད༔ མི་ཕོངས་ནོར་གྱིས་བླུས་མ་བཏང་དུ་མེད༔ སྡར་མས་ཡུལ་ཕྱོགས་གཞན་ལ་འབྲོས་སུ་མེད༔ སྨྲ་ཚན་ཅན་གྱིས་ཡུས་ཤགས་འདེབས་སུ་མེད༔ མི་འཐེབ་ཡོད་པས་བླུས་མ་གཏང་དུ་མེད༔ ཟས་ནོར་དྲོ་ཟན་གཅིག་དང་འགྲོགས་སུ་མེད༔ མར་གྱི་དཀྱིལ་ནས་སྤུ་བཏོན་བཞིན་དུ་འགྲོ༔ གནས་སྐབས་སུ་ཡང་འགྱུར་བའི་སྡུག་བསྔལ་ཏེ༔ དགྲ་སྡང་ཕྲད་ཀྱིས་དོགས་པའི་སྡུག་བསྔལ་ཆེ༔ གཉེན་བྱམས་བྲལ་གྱིས་དོགས་པའི་སྡུག་བསྔལ་ཆེ༔ ཡོད་པ་མེལ་ཚེ་མེད་པ་འཚོལ་སྐྱོང་སྡུག༔ བུ་འབོགས་བུ་མོ་རྫོང་བས་སེམས་ཁྲལ་ཆེ༔ དེ་ལྟར་འགྲོ་བ་རིགས་དྲུག་སེམས་ཅན་རྣམས༔ སྡུག་བསྔལ་རང་བཞིན་ལས་ནི་མ་འདས་པས༔ ཅིས་ཀྱང་དགོས་མེད་བླ་མའི་རྣལ་འབྱོར་སྒོམས༔ སྙིང་པོ་གུ་རུ་པདྨ་སིངྔྷི་བགྲོངས༔ གུ་རུ་དམྱལ་བའི་གུ་རུ་རྣམ་པར་གནོན༔ སྐུ་མདོག་དམར་ནག་སྡིག་པ་རྡོ་རྗེ་བསྣམས༔ དམྱལ་བ་ཚ་གྲང་སྡུག་བསྔལ་སྐྱོབ་པར་བྱེད༔ པད་ནི་ཡི་དྭགས་གུ་རུ་རྣམ་སྣང་བྱེད༔ སྐུ་མདོག་སྨུག་ནག་རྡོ་རྗེ་ལྕགས་ཕུར་བསྣམས༔ ཡི་དྭགས་བཀྲེས་སྐོམ་སྡུག་བསྔལ་སྐྱོབ་པར་བྱེད༔ མ་ནི་བྱོལ་སོང་གུ་རུ་སེང་རབ་བརྟན༔ སྐུ་མདོག་མཐིང་ནག་ཅང་ཏེའུ་དྲིལ་བུ་བསྣམས༔ བྱོལ་སོང་བཀོལ་སྤྱོད་སྡུག་བསྔལ་ཞི་བར་བྱེད༔ སིད་ནི་མི་ཡི་གུ་རུ་པདྨ་འབྱུང་༔ སྐུ་མདོག་དཀར་དམར་རྡོ་རྗེ་བྷནྡྷ་བསྣམས༔ མི་རྣམས་སྐྱེ་རྒས་ན་འཆིའི་སྡུག་བསྔལ་སྐྱོབ༔ དྷི་ནི་ལྷ་མིན་གུ་རུ་རྣམ་པར་རྒྱལ༔ སྐུ་མདོག་དུད་ཁ་ཁ་ཊྭཱཾ་ཀལྤི་བསྣམས༔ ལྷ་མིན་འཐབ་རྩོད་སྡུག་བསྔལ་སྐྱོབ་བར་བྱེད༔ ཧཱུྃ་ནི་ལྷ་ཡི་གུ་རུ་སྲིད་ཐུབ་འཛིན༔ སྐུ་མདོག་དཀར་སེར་རྡོར་དྲིལ་ཕྱག་ན་བསྣམས༔ ལྷ་རྣམས་ལྟུང་བའི་སྡུག་བསྔལ་སྐྱོབ་བར་བྱེད༔ རིགས་དྲུག་སྡུག་བསྔལ་གུ་རུ་དྲུག་གིས་སྐྱོབ༔ སྒྲུབ་ཐག་ཉེ་ཞིང་བྱིན་བས་མྱུར་བ་ཡིན༔ དད་པ་ཅན་གྱི་གང་ཟག་ཕོ་མོ་ལ༔ པད་འབྱུང་གང་དུའང་མ་བཞུད་སྒོ་ཉལ་ཡོད༔ ཆོས་ལུགས་པདྨ་འབྱུང་གནས་ལུགས་སུ་གྱིས༔ ལྟ་བ་ཡས་ཕུབ་སྤྱོད་པ་མས་ནས་འཛེགས༔ ཡིད་ཆེས་དཔང་པོ་མདོ་སྔགས་ལུང་ལ་ཆོལ༔ དབེན་གནས་རི་ཐང་མཚམས་སུ་མ་བྱེད་པར༔ ང་ཡིས་བསྒྲུབས་པའི་སྒྲུབ་གནས་ཀུན་ཏུ་གྱིས༔ པདྨ་འབྱུང་གནས་བདག་ནི་ད་འགྲོ་བས༔ ང་དང་མ་མཇལ་མོས་གུས་བྱེད་པ་རྣམས༔ གསེར་དངུལ་སྣག་ཚས་པད་འབྱུང་རྣམ་ཐར་བྲིས༔ སྐྱིད་སྡུག་གང་བྱུང་བདག་གཞན་འགྲོ་དོན་མཛོད༔ ཉམས་དགའ་དལ་བ་མི་ཡི་ལུས་སྐྱེས་ནས༔ གོ་ལྟ་མེད་པའི་བ་ལང་ཁྱུ་མ་ཆེ༔ ལྷ་ས་བསམ་ཡས་ཁྲ་འབྲུག་རྩར་སྐྱེས་ཀྱང་༔ གཙུག་ལག་མི་མཐོང་སྐོར་བ་མི་བསྐོར་ན༔ དུས་དང་རྣམ་པར་ཤིན་ཏུ་སྡུག་བསྔལ་ཡོད༔ ལུས་ངག་ཐ་མལ་མ་བསྡད་ཆོས་གྱིས་དང་༔ ངན་སོང་སྐྱེས་ཀྱང་ང་རང་བླུ་རུ་འོང་༔ ང་ཡི་ཚེ་ལ་འདས་གྲོངས་ཡོད་མ་ཡིན༔ དད་ལྡན་མི་རེའི་མདུན་དུ་པད་འབྱུང་རེ༔ ཞེས་གསུངས་རྗེ་འབངས་རྣམས་ཀྱིས་ངུད་མོ་ལྡིར༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ རྗེ་འབངས་རྣམས་ལ་འཁོར་བའི་ཉེས་དམིགས་དང་བླ་མའི་རྣལ་འབྱོར་གསུངས་པའི་ལེའུ་སྟེ་བརྒྱ་དང་དྲུག་པའོ༔ ༔
པདྨ་བཀའ་ཐང་ལེའུ་ ༡༠༧ བོད་ཡུལ་ནས་ལྷོ་ནུབ་སྲིན་པོ་འདུལ་དུ་བཞུད་པ།
དེ་ནས་སློབ་དཔོན་པདྨ་འབྱུང་གནས་ཀྱིས༔ ལྷ་ས་ར་མོ་ཆེ་དང་འཕྲུལ་སྣང་བྱོན༔ སྤྲུལ་པའི་དགེ་སློང་ཨ་ཀར་མ་ཏི་ལ༔ རྒྱལ་པོ་ཨད་མ་ཏོག་གིས་ཕུལ་བ་ཡི༔ ཡིད་བཞིན་ནོར་བུ་དགོས་འདོད་འབྱུང་བ་ནི༔ ཁ་དོག་ལྕུང་ཀའི་སྒོ་ང་འདྲ་བ་ལ༔ བཟོ་གནས་སྲིན་བྱའི་མགོ་འམ་མཇིང་པ་འདྲ༔ ཆེ་ཆུང་ཚད་ནི་ལ་ཞིའི་ས་བོན་ཙམ༔ སྤྱན་རས་གཟིགས་ཀྱི་ཐུགས་ཀའི་རྟ་མགོ་ཡི༔ སྣ་བུག་གཡས་པའི་ནང་ནས་བཏོན་ནས་ནི༔ རྒྱལ་སྲས་ལྷ་རྗེར་ཕྱག་ཏུ་སྣོམས་ཤིག་གསུངས༔ དཀའ་བ་དང་དུ་བླངས་ན་དགོས་དགུ་འབྱུང་༔ མདོ་མེད་ཆལ་པ་བྱེད་ན་གླེན་པ་ཡིན༔ ཡིད་བཞིན་ནོར་བུ་གཏེར་དུ་སྦོས་ཤིག་གསུངས༔ དེ་ནས་རྒྱལ་སྲས་མུ་ཏིག་བཙན་པོ་ནི༔ རྗེ་འབངས་ཉི་ཤུ་རྩ་ལྔས་བསྐོར་བ་དང་༔ མཁན་པོ་ཤཱཀྱ་བསོད་ནམས་གཙོ་བྱས་པའི༔ བོད་ཀྱི་རབ་ཏུ་བྱུང་བ་ཐམས་ཅད་དང་༔ བཻ་རོ་ཙ་ན་སྐ་ཅོག་སྣ་དྲངས་པའི༔ བོད་ཀྱི་ལོ་ཙཱ་མཁས་པ་ཐམས་ཅད་དང་༔ མཐུ་མཁན་སངས་རྒྱས་ཡེ་ཤེས་སྣ་དྲངས་པའི༔ བོད་ཀྱི་སྔགས་ནག་མཐུ་མཁན་ཐམས་ཅད་དང་༔ སྔགས་པ་རྡོ་རྗེ་བདུད་འཇོམས་སྣ་དྲངས་པའི༔
བོད་ཀྱི་རྔ་བརྡུང་ཕྲེང་ཐོགས་ཐམས་ཅད་དང་༔ བླ་སྨན་ཉང་བཙན་ཤི་ལས་སྣ་དྲངས་པའི༔ བོད་ཀྱི་སྨན་དཔྱད་བྱེད་པ་ཐམས་ཅད་དང་བླ་མཁྱེན་ལྗང་སྟོན་ཁུ་ལུས་སྣ་དྲངས་པའི༔ བོད་ཀྱི་གབ་རྩེ་འདིངས་པ་ཐམས་ཅད་དང་༔ ཡོན་བདག་མཁར་ཆེན་རྒྱལ་གྱིས་སྣ་དྲངས་ནས༔ བོད་ཀྱི་ཕོ་སྐྱེས་ཡོན་བདག་ཐམས་ཅད་དང་༔ མཁའ་འགྲོ་ཡེ་ཤེས་མཚོ་རྒྱལ་སྣ་དྲངས་པའི༔ བོད་ཀྱི་བུད་མེད་བུ་མོ་ཐམས་ཅད་ཀྱིས༔ དཔལ་མོ་དཔལ་ཐང་སྐྱེལ་ཐུང་ཞམ་རིང་བྱས༔ སྟོད་ཀྱི་མངའ་རིས་ཅོག་གེའི་ཡུལ་ཞེས་པ༔ བྲག་ནི་སྲིན་པོ་ཁྲོས་འདྲའི་ཡུལ་ཚུགས་བསྐྱལ༔ སློབ་དཔོན་ཐུགས་རྗེ་ཆེན་པོའི་སྒོམ་ལུང་དང་༔ མི་རེ་ལ་ནི་ཞལ་གདམས་ཆོས་རེ་གསུངས༔ དེ་ནས་བོད་ཁམས་ཡོངས་ལ་འདི་སྐད་གདམས༔ ད་ལྟ་བཞུགས་དང་མ་འོངས་འབྱོན་པ་ཡི༔ བོད་རྣམས་ཐུགས་ལ་འདི་ལྟར་བཞག་པར་ཞུ༔ ངག་འཁྱལ་ཀུ་རེའི་གསེབ་ནས་དོན་དམ་འོང་༔ གྱ་ཚོམས་ཚིག་གིས་སྙིང་ནའི་མེ་ལོང་བྱེད༔ སོར་གྱིས་སླེབ་པར་འདོམ་གྱིས་མི་འགྱངས་འགྲོ༔ ཚོད་ལ་གསེར་སྲབ་ཆུག་ཅིག་རྗེ་འབངས་རྣམས༔ བསྟན་པ་ཡོངས་ལ་གནོད་པའི་དཔེ་མ་འཛུགས༔ འཕྲལ་ཕུགས་གཉིས་ཀ་མེད་པའི་མགོ་མ་སྟོང་༔ སྲོལ་ངན་རྟེན་འབྲེལ་ལོག་པའི་བློ་མ་བསྲལ༔ བྱ་བ་བརྟགས་ནས་གྱིས་ཤིག་རྗེ་འབངས་རྣམས༔ རང་ལ་མི་ཕན་གཞན་གནོད་ཁ་མ་ཟེར༔ མིས་འཕྱ་རང་ཕུང་ཆང་ནག་གྲོས་མ་འདྲི༔ འགྱོད་པ་ཕྱི་ལ་མ་སྐྱེ་སྔོན་བསམ་ཐོང་༔ རང་གིས་རང་ཉིད་མ་བསླུ་རྗེ་འབངས་རྣམས༔ དཔལ་འབྱོར་ཡོད་དུས་ཚ་བྱུག་དྲིན་འོག་ཆུག༔ སུ་ལ་སུ་རེ་མི་ཤེས་སྙིང་མ་རིང་༔ སྔོན་ལས་ཚེ་འདིར་རྡོལ་ཀྱང་རང་མི་འགྱོད༔ དྭ་སྤྲུག་སུན་འབྱིན་མ་བྱེད་རྗེ་འབངས་རྣམས༔ མིའི་མཐའ་ཅི་འགྱུར་མི་ཤེས་ལས་ཀྱིས་བྱེད༔ རང་མ་ཕམ་ན་རྒྱལ་ཁ་གཞན་ལ་བྱིན༔ མི་དྲག་སྟོབས་ཆེ་ཁ་དྲག་ཁ་ཉེན་དགའ༔ མི་ལ་རྔན་ཅན་མ་བྱེད་རྗེ་འབངས་རྣམས༔ མི་ལ་གོ་མེད་མི་ཡོད་ནང་ན་བཀྲ༔ སུ་ལ་དབང་ཡོད་ཕྱག་ཚད་མིས་མི་འཇོག༔ བཟང་ལན་དཀའ་སྟེ་ངན་ལན་འཇལ་བ་སླ༔ སྡུག་པོ་རིན་གཞལ་མ་ཉོ་རྗེ་འབངས་རྣམས༔ ཕན་སྒོ་མ་བཏགས་མི་ལ་རེ་མ་ཆེ༔ མི་ལ་སྐྱིད་སྡུག་ཐམས་ཅད་རེ་མོས་ཡིན༔ རང་གིས་མ་བྱུང་སུ་ལ་རེ་ཡང་བརྡུགས༔ ལ་ཡོགས་རྣམ་སྨིན་སོམས་ཤིག་རྗེ་འབངས་རྣམས༔ སྤྱིར་ནི་སེམས་ཅན་ཡོངས་ལ་ཕན་བཏགས་ཤིང་༔ ཡང་སྒོས་བོད་ཁམས་ཡོངས་ལ་དྲིན་ཆེར་བྱས༔ དྲིན་ནི་མི་འདྲེན་ཁྱོད་རྣམས་ང་རང་ཤེས༔ ལྔ་བརྒྱ་དུས་ངན་ཤར་ཚེ་པད་འབྱུང་ངས༔ དུག་ལྔས་བསླུས་པ་འཁོར་བའི་སེམས་ཅན་ལ༔ མཐོངས་སྐར་ཉི་ཞུར་མུན་མགོ་རང་མཐོང་ཙམ༔ ཆོས་ཀྱི་གཏེར་ཀ་ས་སྟེང་ཁྱབ་པར་སྦས༔ ལས་ཅན་གཏེར་སྒོ་འབྱེད་པ་འགའ་ཡང་འབྱུང་༔ ང་ཡི་སྤྲུལ་པས་འགྲོ་བ་མ་ལུས་འདུལ༔ སེམས་ཅན་སྨིན་གྲོལ་བདེ་ལ་འགོད་པར་སྲིད༔ ཉམས་དམས་བསྟན་པ་འགྲིབ་ལ་ཉེ་བ་ན༔ དག་པས་ང་རང་དངོས་སུ་མཐོང་ཡང་སྲིད༔ དགོས་འདོད་རེ་བ་སྐོང་བའི་ནོར་བུ་འབྱུང་༔ རྗེ་འབངས་འཁོར་བཅས་འདི་ནས་ལོག་ཅིག་གསུངས༔ རྗེ་འབངས་ཡོན་མཆོད་ཐམས་ཅད་མ་དགའ་སྟེ༔ མི་རེའི་ཁོང་ནས་སྙིང་རེ་བཏོན་སྙམ་བྱེད༔ གདོང་པ་མཆི་མས་གང་བས་ལམ་མི་མཐོང་༔ ཀུན་གྲོས་མ་བྱས་བློ་མཐུན་བཤོལ་བཏབ་སྟེ༔ འཇིག་རྟེན་ཟས་ནོར་སློབ་དཔོན་དྲུང་དུ་སྤུངས༔ བསྐོར་བ་གྲངས་མེད་བསྐོར་ནས་མདུན་དུ་འོངས༔ ལག་མཐིལ་དཔྲལ་བ་རྡོལ་རྡོལ་ཕྱག་བཙལ་ནས༔ ཨུ་རྒྱན་ཆེན་པོའི་ཆིབས་སྣ་བརྟེན་ཏེ་གསོལ༔ ཀྱེ་མ་གུ་རུ་རིན་པོ་ཆེ༔ མུན་གླིང་བོད་ཀྱི་ཉི་གཅིག་པུ༔ འོད་གསལ་སྒྲོན་མ་གང་དུ་གཤེགས༔ དོན་ལ་གཤེགས་བཞུད་མི་མངའ་ཡང་༔ སྲིན་པོ་འདུལ་དུ་གཤེགས་ཙ་ན༔ བོད་ཁམས་ལྷ་མི་ཐམས་ཅད་ཀྱི༔ མི་རེའི་ཁོང་ནས་ཉི་རེ་ནུབ༔ བསེར་མས་གདུངས་ཚོ་སུ་ཡིས་བསྲོ༔ མི་རེའི་དཔྲལ་ནས་མིག་རེ་ཕྱུང་༔ ཅེ་རེ་ལོང་ཚོ་སུ་ཡིས་ཁྲིད༔ མི་རེའི་ཁོང་ནས་སྙིང་རེ་བཏོན༔ སྨྲ་ཤེས་རོ་ཚོ་སུ་ཡིས་བསྲེལ༔ འགྲོ་བའི་དོན་ལ་བོད་བྱོན་ནས༔ གཏན་དུ་མི་སྐྱོང་སྙིང་མི་དགའ༔ བོད་ཁམས་ལྷ་མི་ཐམས་ཅད་ཀྱི༔ བློ་སེམས་གུ་རུའི་ཕྱོགས་སུ་ཤོར༔ གོམ་པ་བགྲོད་ཀྱང་ཐོམ་ཐོམ་ལུས༔ ངན་སོང་གཡང་ལས་སུ་ཡིས་སྐྱོབ༔ རྗེས་འཇུག་ཐང་ལ་མ་བོར་མཛོད༔ རྗེ་ཉིད་སྲིན་ཡུལ་གཤེགས་ཙ་ན༔ རྒྱལ་པོའི་བླ་མཆོད་སུ་ཡིས་བྱེད༔ མཁས་བཙུན་འདུ་ས་གང་དུ་བགྱིད༔ སྒོམ་ཆེན་ཉམས་རྟོགས་སུ་ལ་འབུལ༔ སྒོམ་སྐྱོན་བར་ཆད་སུ་ཡིས་སེལ༔ སྣོད་ལྡན་གང་ཟག་སུ་ཡིས་འདྲེན༔ སངས་རྒྱས་བསྟན་པ་སུ་ཡིས་འཛིན༔ དད་ལྡན་འཚོགས་ས་གང་དུ་བགྱིད༔ འདི་ལྟར་ཇོ་མོ་བདུན་པོས་ཀྱང་༔ རང་སྐྱེས་ཕ་ཡུལ་སྤངས་སྤངས་ནས༔ ཡིད་རྟེན་བློ་གཏད་སུ་ལ་འཆའ༔ ཡ་གི་རྗེ་རྒྱལ་མན་ཆོད་ནས༔ མ་གི་སྤྲང་པོ་ཡན་ཆོད་དུ༔ བོད་ཁམས་ལྷ་མི་ཐམས་ཅད་ཀྱི༔ མོས་གུས་སེམས་རྟེན་སུ་ལ་འཆོལ༔ ཀྱི་ཧུད་གུ་རུ་རིན་པོ་ཆེ༔ ད་དུང་བོད་ཁམས་སྐྱོང་བར་ཞུ༔ སློབ་དཔོན་ཞལ་ནས་འདི་སྐད་གསུངས༔ ཀྱཻ༔ རྒྱལ་པོས་དབུ་མཛད་ལྷ་མི་རྣམས༔ དར་ཅིག་ཨུ་རྒྱན་ངག་ལ་ཉོན༔ ལས་དང་སྨོན་ལམ་ཐུགས་རྗེའི་མཐུས༔ སངས་རྒྱས་སྐུ་གསུང་ཐུགས་བསྟན་པ༔ ད་ལྟ་བོད་ན་ཉི་འོད་གསལ༔ ཨུ་རྒྱན་བརྒྱུད་འཛིན་འགའ་ཡང་བཞུགས༔ ལྷ་མི་ཀུན་གྱིས་ཆོས་བཞིན་སྤྱོད༔ རྒྱལ་སྲིད་དམ་ཆོས་མངའ་ཐང་རྒྱས༔ ཆོས་བྱེད་རྣམས་ཀྱང་རང་ས་ཟིན༔ ལྷ་ས་བསམ་ཡས་ལ་སོགས་པའི༔ དད་འདུན་རྟེན་མཆོད་བོད་ན་བཟང་༔ ཨུ་རྒྱན་བཞུགས་དང་ཁྱད་པར་མེད༔ གདམས་པས་ས་འོག་ས་སྟེང་གང་༔ སྐུ་གསུང་ཐུགས་རྟེན་རང་བྱུང་ལྡན༔ ཇོ་མོ་རྣམས་ཀྱང་རང་དབང་ཐོབ༔ ད་ལྟ་སྨྲེ་སྔགས་འདོན་མི་འཚལ༔ ཁྱོད་རྣམས་ཟོ་མདོག་བདེ་དུས་འདིར༔ ང་འགྲོ་སྲིན་པོའི་ཡུལ་དུ་འགྲོ༔ ལྔ་བརྒྱའི་དུས་སུ་སྨྲེ་སྔགས་འདོན༔ བོད་ཁམས་སྡུག་པའི་དུས་ཤིག་མཆི༔ དེ་ཡང་བོད་ཁམས་རང་བཞིན་ངན༔ ཆོས་བྱེད་ཀུན་སྨོད་སྡིག་བྱེད་བསྟོད༔ ལས་ངན་དེ་ཡི་འབྲས་སྨིན་ནས༔ བོད་ཁམས་བསོད་ནམས་མར་མར་འགྲིབ༔ ཨུ་རྒྱན་ངས་ཀྱང་སྐྱོབ་དཀའ་སྟེ༔ འོན་ཀྱང་གནས་སྐབས་བདེ་བ་ཀུན༔ ང་ཡི་སྤྲུལ་པས་འགྲུབ་པར་འགྱུར༔ མ་དག་སེམས་ཅན་གདུལ་དཀའ་བས༔ དངོས་ཀྱིས་བསྡད་ཀྱང་ཐུལ་མི་འགྱུར༔ འགྲོ་དོན་ཐེབས་གཅིག་བྱས་ཟིན་གསུངས༔ བཤོལ་མ་ཐེབས་པར་གུང་ཐང་ལ་ཀར་བྱོན༔ ལྷ་སྲས་རྗེ་འབངས་རྣམས་ཀྱིས་ཕྱི་ཕྱག་མཛད༔ གུང་ཐང་ལ་ཀར་ཞག་ས་མཛད་པའི་དུས༔ ནམ་མཁའ་སྤྲིན་དཀར་དམར་སེར་འཇའ་འོད་འཁྱིལ༔ སྤྲིན་གྱི་གསེབ་ནས་རྟ་རྒྱལ་བ་ལ་ཧ༔ ཅང་ཤེས་རྟ་སྔོན་རིན་ཅེན་སྒ་སྲབ་སྤྲས༔ རྣ་མཆོག་ཀྲོང་ངེ་ཨི་ཧའི་སྒྲ་ཆེན་སྒྲོག༔ སྔ་ཕྱི་ལྷ་དང་ལྷ་མོའི་ཚོགས་ཀྱིས་བསྐོར༔ རྒྱལ་སྲིད་སྣ་བདུན་བཀྲ་ཤིས་རྫས་བརྒྱད་དང་༔ རོལ་མོ་སྣ་ཚོགས་མཁའ་འགྲོའི་ཚོགས་ཀྱིས་བསུས༔ སློབ་དཔོན་རྗེ་འབངས་རྣམས་ལ་མགུར་འདི་གསུངས༔ ང་འགྲོ་མེ་ལོང་ཡེ་ཤེས་ཡུལ་དུ་འགྲོ༔ མེ་ལོང་ཡེ་ཤེས་ཡུལ་དུ་འགྲོ་ཙ་ན༔ ཞེ་སྡང་དགྲ་ལ་མི་ཁྲོ་འོད་གསལ་ཐང་༔ དབྱིངས་རིག་མ་བུ་འབྲལ་མེད་འགྲོགས་ནས་འགྲོ༔ ང་འགྲོ་མཉམ་ཉིད་ཡེ་ཤེས་ཡུལ་དུ་འགྲོ༔ མཉམ་ཉིད་ཡེ་ཤེས་ཡུལ་དུ་འགྲོ་ཙ་ན༔ འཁོར་འདས་གཉིས་སུ་མི་དབྱེ་ཆོས་དབྱིངས་ཐང་༔ ཡེ་གྲུབ་སངས་རྒྱས་ཁྱུ་དང་འགྲོགས་ནས་འགྲོ༔ ང་འགྲོ་སོར་རྟོག་ཡེ་ཤེས་ཡུལ་དུ་འགྲོ༔ སོར་རྟོག་ཡེ་ཤེས་ཡུལ་དུ་འགྲོ་ཙ་ན༔ འདོད་ཆགས་གཉེན་ལ་མི་ཆགས་བདེ་ཆེན་ཐང་༔ བྱར་མེད་ལྟ་བའི་གྲོགས་དང་འགྲོགས་ནས་འགྲོ༔ ང་འགྲོ་བྱ་གྲུབ་ཡེ་ཤེས་ཡུལ་དུ་འགྲོ༔ བྱ་གྲུབ་ཡེ་ཤེས་ཡུལ་དུ་འགྲོ་ཙ་ན༔ ཕྲག་དོག་གཡུལ་ལ་མ་ཆགས་འཕྲེང་བྲལ་ཐང་༔ སྣང་སྲིད་ཟད་སར་སྐྱེལ་དང་འགྲོགས་ནས་འགྲོ༔ ང་འགྲོ་ཆོས་དབྱིངས་ཡེ་ཤེས་ཡུལ་དུ་འགྲོ༔ ཆོས་དབྱིངས་ཡེ་ཤེས་ཡུལ་དུ་འགྲོ་ཙ་ན༔ གཏི་མུག་གཉིད་དུ་མི་ལོག་སྒོམ་མེད་ཐང་༔ འཇའ་འོད་ཟེར་གསུམ་གྲོགས་དང་འགྲོགས་ནས་འགྲོ༔ ང་འགྲོ་ལྟ་བའི་ལ་ལ་བུད་ནས་འགྲོ༔ ལྟ་བའི་ལ་ལ་བུད་ནས་འགྲོ་ཙ་ན༔ ཉིན་མཚན་སྒོམ་དུ་མེད་པར་ཡེངས་མེད་འགྲོ༔ ང་འགྲོ་སྒོམ་པའི་ལ་ལ་བུད་ནས་འགྲོ༔ སྒོམ་པའི་ལ་ལ་བུད་ནས་འགྲོ་ཙ་ན༔ སྒོམ་གེགས་བྱིང་རྒོད་གཉིས་ལས་གྲོལ་ནས་འགྲོ༔ ང་འགྲོ་སྤྱོད་པའི་ལ་ལ་བུད་ནས་འགྲོ༔ སྤྱོད་པའི་ལ་ལ་བུད་ནས་འགྲོ་ཙ་ན༔ ཤེས་བྱར་མ་རྨོངས་ཐམས་ཅད་མཁྱེན་ནས་འགྲོ༔ ང་འགྲོ་འབྲས་བུའི་ལ་ལ་བུད་ནས་འགྲོ༔ འབྲས་བུའི་ལ་ལ་བུད་ནས་འགྲོ་ཙ་ན༔ རྟོགས་པ་མངོན་གྱུར་སངས་རྒྱས་ཐོབ་ནས་འགྲོ༔ ང་འགྲོ་ལྷོ་ནུབ་སྲིན་པོའི་ཡུལ་དུ་འགྲོ༔ གདོང་དམར་སྲིན་པོ་འདུལ་དུ་འགྲོ་ཙ་ན༔ སེམས་ཅན་ཐམས་ཅད་བདེ་ལ་བཀོད་དུ་འགྲོ༔ ང་འགྲོ་ཟངས་མདོག་དཔལ་རིའི་ཕོ་བྲང་འགྲོ༔ ཟངས་མདོག་དཔལ་རིའི་ཕོ་བྲང་འགྲོ་ཙ་ན༔ སྲིན་པོ་ཐམས་ཅད་ཆོས་ལ་འཛུད་དུ་འགྲོ༔ རྗེ་འབངས་ཡུན་དུ་སྐུ་ཁམས་བདེ་བར་བཞུགས༔ ཐུགས་རྗེ་རྒྱུན་ཆད་མེད་དོ་གསོལ་བ་ཐོབ༔ ཅེས་གསུངས་ང་འགྲོ་གསུངས་ནས་སེང་ལྡེང་སྒའི༔ སྔ་རུའི་སྟེང་དུ་ཞབས་གཉིས་མཉམ་བཞེངས་ནས༔ འདོམ་གང་ཙམ་གྱི་ནམ་མཁར་འཕགས་ནས་བཞུགས༔ རྗེ་འབངས་ཡོངས་ནི་འབའ་དིར་ཆོང་བརྒྱངས་བཏོན༔ ཞལ་ནི་ཕྱིར་ལོག་གཟིགས་ནས་འདི་སྐད་གསུངས༔ ཉོན་དང་བོད་ཀྱི་རྗེ་འབངས་རྣམས༔ ཁ་ཡེངས་མིག་ཡེངས་བདལ་བ་ཆེ༔ སྡུག་བསྔལ་བྱུང་ཡང་ཆོས་མ་དྲན༔ དྲན་རྒྱུའི་བློ་སྣ་དེ་ཡིན་ཏེ༔ ཚེ་འདིའི་འདུན་མ་བཤོལ་ལ་ཐོང་༔ འཁོར་བ་སྤོང་ན་ང་ཕྱིར་ཤོག༔ སྐྱིད་པའི་འདུན་མ་དེ་ལས་མེད༔ བོད་ཀྱི་དད་པ་ཁེ་ཁོལ་ཅན༔ ཉིན་པར་འཇིག་རྟེན་བྱ་བས་གཡེངས༔ མཚན་མོ་གཏི་མུག་གཉིད་དུ་སོང་༔ བར་སྐབས་ལྟོ་གོས་གཡོག་གིས་བྲེལ༔ མ་ལྡང་མ་ཕྱིད་མི་ཚེ་ཟད༔ ང་དང་ལྟ་སྤྱོད་ཡེ་མ་མཐུན༔ བྱ་བ་ཐོངས་ན་ང་ཕྱིར་ཤོག༔ ཆོས་ཀྱི་བྱེད་ཐབས་དེ་ལས་མེད༔ བོད་ཀྱི་བརྩོན་འགྲུས་ཚེ་འདི་ཆེ༔ སང་བྱ་གནང་བྱར་མི་ཚེ་ཟད༔ ད་ལྟ་འཆི་ཡང་ཆོས་མ་དྲན༔ དགོས་ངོ་ཤེས་པ་དེ་ཡིན་ནོ༔ ཟས་ནོར་གསོག་འཇོག་བརྗེད་ནས་སོང་༔ བཞག་འགྲོར་གོ་ན་ང་ཕྱིར་ཤོག༔ སེར་སྣ་འགྲོལ་ཐབས་དེ་ལས་མེད༔ བོད་ཀྱི་བྱ་བློ་མི་བཟད་མང་༔ དགྲ་འདུལ་གཉེན་སྐྱོང་ཡུལ་སྒྲོག་བཅུག༔ མི་ཚེ་རྒས་ཀྱང་ཆོས་མ་དྲན༔ བསྟོངས་ངོ་ཤེས་པ་དེ་ཡིན་ཏེ༔ ངོ་ཚ་ཁེ་གྲགས་ལས་ལ་འབྱམས༔ ཕ་ཡུལ་སྤོང་ན་ང་ཕྱིར་ཤོག༔ ཆོས་ཀྱི་གེགས་སེལ་དེ་ལས་མེད༔ བོད་ཁམས་འདོད་པའི་དོང་རིང་ཚོ༔ མི་གཅིག་ཁ་གཅིག་མ་སོས་པས༔ གཅེས་དགུ་ཤི་རུང་ཆོས་མ་དྲན༔ འཁྱེར་རྒྱུའི་ནོམ་པ་དེ་ཡིན་ཏེ༔ དོན་མེད་ལས་ལ་སྡུག་བསྒུར་འཛུགས༔ སྐྱོ་བ་སྐྱེས་ན་ང་ཕྱིར་ཤོག༔ ཞེན་ཆགས་བསྐྱུང་ཐབས་དེ་ལས་མེད༔ སྣང་བ་ཡུལ་ཕྱིར་མ་འབྲངས་བར༔ རིག་པ་ཚད་ཕོབ་ང་ཕྱིར་ཤོག༔ བདེ་བ་ཆེན་པོའི་ཕོ་བྲང་དུ༔ པདྨ་འབྱུང་གནས་འགྲོ་བ་ལ༔ སྐྱེལ་ཐུང་མི་འཚལ་ལོག་ནས་བྱོན༔ འདུ་འབྲལ་མེད་དོ་ཐུགས་མ་ཆད༔ ང་དང་འཕྲད་ཀྱིས་ཕྱི་ལ་ལྟོས༔ མ་མཐོང་ཙ་ན་མཉམ་པར་ཞོག༔ ཡང་ལྟོས་ཡང་ལྟོས་མ་ཡེངས་ལྟོས༔ ཉིན་པར་བྱུང་རེས་ཐུགས་རྗེ་ཆེན་པོ་སྒོམས༔ མཚན་མོ་བྱུང་རེས་པདྨ་ང་ཉིད་སྒོམས༔ མི་ཆོས་བྱས་པས་ལྷ་ཆོས་མི་འབྱུང་བས༔ ཚེ་འདིའི་བྱ་བ་ཐོང་ཞིག་རྗེ་འབངས་རྣམས༔ ཞེས་གསུངས་རྟ་མཆོག་རིན་ཅེན་སྟེང་དུ་ཆིབས༔ དཔའ་བོ་སྡེ་བཞིས་ཆིབས་ཀྱི་སྣ་དྲངས་ནས༔ འཇའ་ཚོན་འོད་དུ་ཁྱིལ་ལེ་ནམ་མཁར་བཞུད༔ རྗེ་འབངས་ཉ་མོ་བྱེ་ཚན་བོར་བ་ལྟར༔ ལྟོགས་སྐོམ་མ་དྲན་གུང་ཐང་ལ་ཀར་ལུས༔ དེ་ནས་རྒྱལ་བློན་རྗེ་འབངས་འཁོར་བཅས་ཀྱིས༔ མང་ཡུལ་གྱི་གྲོང་རོང་ཐང་ཤོ་རྫིང་མཐར༔ ཉི་ཤུ་ལྔ་བར་མཉམ་པར་བཞག་ནས་སུ༔ ཉི་ཟེར་སློབ་དཔོན་བཞུད་པའི་ཕྱི་ལ་བལྟས༔ ཉི་ཟེར་གསེབ་ནས་ཕར་ལ་བྱ་རོག་ཙམ༔ ཕྲིག་ཕྲིག་འོད་དུ་ལམ་ལམ་བྱས་ནས་བཞུད༔ དེས་ན་ཕུག་རོན་ཙམ་དང་བྱེའུ་ཙམ༔ སྦྲང་བུ་ཙམ་དང་སྲོ་མ་ཙམ་སོང་ནས༔ དེ་ནས་བལྟས་ཀྱང་མིག་གིས་མ་མཐོང་སྟེ༔ མཉམ་པར་བཞག་ཅིང་བལྟས་ཀྱང་མ་མཐོང་བར༔ དགོངས་ཀ་མཉམ་གཞག་ཉི་མ་ཟེར་ཙམ་ན༔ རྒྱ་གར་ཕར་བརྒལ་ཨུ་རྒྱན་མ་སླེབས་པར༔ འཛམ་བུ་ཟ་རིའི་ཁར་གཤེགས་བཞུགས་པ་མཐོང་༔ དེ་ནས་ནང་པར་མཉམ་གཞག་བལྟས་པ་ཡིས༔ སིངྒ་ལ་གླིང་ལྕགས་ཀྱི་གྲོང་ཁྱེར་འགྲམ༔ ལྗོན་ཤིང་ཙམ་པ་ཀ་ཡི་བསིལ་གྲིབ་བཞུགས༔ ཅང་ཤེས་རྟ་མཆོག་གསེར་གྱི་བྱེ་མ་འགྲེ༔ སྨན་གྱི་རྒྱལ་པོ་སི་ཏ་ཟ་བ་མཐོང་༔ སློབ་དཔོན་དྲུང་ན་སྲིན་པོའི་བུ་མོ་ནི༔ རབ་མཛེས་གཞོན་ནུ་སྟོང་ཕྲག་གཅིག་འདུས་ནས༔ ཆོས་ཀྱི་འོད་ཟེར་ཕོག་ནས་མོས་པ་མཐོང་༔ སྲིན་པོ་སྲིན་མོ་ལྕགས་ཁང་སྒོ་མེད་དུ༔ སྲིན་པོའི་རྒྱལ་པོ་ཐོད་འཕྲེང་རྩལ་དུ་བཞུགས༔ སྲིན་པོ་ཐམས་ཅད་འདུད་ཅིང་གུས་པར་མཐོང་༔ དེ་ནས་རྒྱལ་བློན་རྗེ་འབངས་འཁོར་བཅས་ཀྱིས༔ ཕྱི་ལ་ཕྱག་འཚལ་རང་རང་ཁབ་ཏུ་ཆས༔ དཔལ་མོ་དཔལ་ཐང་ཚུགས་ལ་སླེབ་པའི་ཚེ༔ རྒྱལ་སྲས་མུ་ཏིག་བཙན་པོའི་ཞལ་ན་རེ༔ མཐོང་ཐོས་དྲན་རེག་དོན་ལྡན་པའི༔ གུ་རུ་ཨུ་རྒྱན་ཡུལ་དུ་བཞུད༔ བོད་ཡུལ་ལུང་པ་སྟོངས་པར་བཏང་༔ ཡབ་རྗེ་རྒྱལ་པོ་དགུང་དུ་གཤེགས༔ བདག་ནི་ལུས་སེམས་སྣང་བ་སྐྱོ༔ ཁྱེད་རྣམས་སྐྱོ་བ་མི་སྐྱེའམ༔ རང་རེ་རྗེ་འབངས་ཐམས་ཅད་ཀུན༔ ཤོང་གྱི་ཟམ་བུ་བསྐོར་དུ་འདོང་༔ རྒྱལ་པོས་དེ་སྐད་བཀའ་སྩལ་པས༔ བློན་པོའི་ཚོགས་ཀྱིས་ལན་གསོལ་བ༔ གསོན་དང་མངའ་བདག་ཆོས་ཀྱི་རྒྱལ༔ ཟམ་བུས་ཅི་བྱེད་ཁབ་ཏུ་གཤེགས༔ ཤུལ་ན་ཡོད་པའི་རྗེ་འབངས་རྣམས༔ མངའ་བདག་ཆར་འདོད་ཚད་པས་སྐོམ༔ གཙུག་ལག་ཆེན་པོར་མྱུར་བར་གཤེགས༔ ཞེས་ཞུས་རྗེ་འབངས་རང་ཡུལ་ལོག༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ བོད་ཡུལ་ནས་ལྷོ་ནུབ་སྲིན་པོ་འདུལ་དུ་བཞུད་པའི་ལེའུ་སྟེ་བརྒྱ་དང་བདུན་པའོ༔ ༔
པདྨ་བཀའ་ཐང་ལེའུ་ ༡༠༨ མོས་གུས་བརྗེད་བྱང་དཀར་ཤོག་ལ་བཏབ་པ།
དེ་ནས་བུད་མེད་ཡེ་ཤེས་མཚོ་རྒྱལ་གྱིས༔ ཨེ་མ་ཧོ༔ ཡོན་ཏན་དུ་མས་བརྒྱན་པའི་པདྨ་འབྱུང་༔ བསྐལ་པ་གྲངས་མེད་སངས་རྒྱས་མཛད་ཚུལ་བསྐྱངས༔ སྐྱེ་བ་དུ་མར་སྤྲུལ་པའི་སྐུ་རུ་བརྒྱུད༔ འདིར་འཁྲུངས་གོང་དུ་མཱ་རི་རཱ་ཛར་འཁྲུངས༔ འཛམ་གླིང་རྒྱལ་པོ་ཁྲི་སྲོང་ལྡེའུ་བཙན༔ འཇམ་དཔལ་སྤྲུལ་པའི་ཞིང་ཁམས་འདི་རུ་དྲངས༔ བོད་བྱོན་མི་ལོ་བཅུ་གསུམ་སོང་ཙ་ན༔ བསྒྲགས་པ་ནམ་མཁའ་ཡེ་ཤེས་ཡབ་ཀྱི་མཚན༔ གནུབས་མོ་དགེ་བ་འབུམ་ཞེས་ཡུམ་གྱི་མཚན༔ ཤིང་མོ་བྱ་ཡི་ལོ་ལ་མཚོ་རྒྱལ་འཁྲུངས༔ མེ་མོ་བྱ་ཡི་ལོ་ལ་རྗེ་དང་མཇལ༔ མི་བརྗེད་གཟུངས་ཐོབ་ཆོས་རྣམས་སློབ་མ་དགོས༔ བརྒྱད་ཅུ་རྩ་ལྔའི་བར་དུ་ཞབས་ཏོག་བསྒྲུབས༔ སྤྲུ་གུ་ཕོ་མོ་གང་ཡང་བདག་ལ་མེད༔ དགེ་སློང་མ་ཡིན་འཁོར་བའི་སྐྱོན་མ་གོས༔ སྐུ་གསུམ་བླ་མ་པདྨ་འབྱུང་གནས་དེ༔ བོད་ཁམས་ཡོངས་ལ་ཐུགས་རྗེས་ཁྱབ་པར་གཟིགས༔ རྗེ་འབངས་ཡོངས་ལ་བཀའ་དྲིན་ཆེ་བར་མཛད༔ རི་བྲག་ཐམས་ཅད་སྒྲུབ་གནས་བྱིན་གྱིས་བརླབས༔ སྐལ་ལྡན་རྣམས་ལ་ཆོས་ཀྱི་ཆར་པ་ཕབ༔ ཤེས་རབ་ཅན་ལ་ཐེག་པ་མཐའ་དག་བསྟན༔
སྣོད་ལྡན་རྣམས་ལ་གདམས་ངག་རྫོགས་པར་གནང་༔ མོས་གུས་ཅན་ལ་བྱིན་བས་ཉི་མ་ཤར༔ ལས་འཕྲོ་ཅན་ལ་མ་འོངས་ལུང་དུ་བསྟན༔ ཐུགས་རྗེ་ཕྱོགས་རིས་མེད་པའི་པད་འབྱུང་དེ༔ རྔ་ཡབ་གླིང་དུ་སྲིན་པོ་འདུལ་དུ་བཞུད༔ དཔའ་བོ་མཁའ་འགྲོ་འདུ་བའི་ཚེས་བཅུའི་ཉིན༔ སྤྲིན་ནམ་འཇའ་ཚོན་བཞིན་དུ་མཁའ་ལ་ཡལ༔ མོས་གུས་ཅན་གྱི་མཚོ་རྒྱལ་གང་དགར་བཞག༔ སྙིགས་མའི་སྐྱབས་མགོན་པདྨ་འབྱུང་གནས་བཞུད༔ འཛམ་གླིང་སྐྱབས་མེད་སེམས་ཅན་ཤུལ་དུ་བཞག༔ སངས་རྒྱས་གཉིས་པ་པདྨ་འབྱུང་གནས་བཞུད༔ དད་གུས་ཅན་གྱི་མཚོ་རྒྱལ་ཤུལ་དུ་བཞག༔ ལྷ་མིའི་མཆོད་འོས་པད་འབྱུང་དགུང་ལ་ཡལ༔ རྗེ་འབངས་དད་གུས་ཅན་རྣམས་ཤུལ་དུ་བཞག༔ འདི་ཕྱིའི་རེ་སའི་སྡོང་པོ་སྲིན་ཡུལ་བཞུད༔ རེ་ལྟོས་མེད་པའི་མཚོ་རྒྱལ་ཤུལ་དུ་བཞག༔ མེད་ཐབས་མེད་པའི་རྒྱན་པད་འབྱུང་བཞུད༔ ཀྱེ་མ་ཀྱི་ཧུད་ཨུ་རྒྱན་རིན་པོ་ཆེ༔ ཁྱོད་འདྲའི་སྤྲུལ་སྐུ་བཞུད་པ་ཅང་བདེན་ནམ༔ བོད་དུ་བྱོན་ནས་གཏན་དུ་མི་བཞུགས་པར༔ ཡེ་ཤེས་རྟ་མཆོག་ཆིབས་པ་ཅང་བདེན་ནམ༔ འཛམ་གླིང་རྒྱལ་པོའི་བླ་མཆོད་མི་མཛད་པར༔ བོད་ཡུལ་སྟོང་པར་བཞག་པ་ཅང་བདེན་ནམ༔ ལོ་ཙཱ་རྣམས་ལ་མདོ་སྔགས་མི་གསུང་པར༔ རྗེ་འབངས་ཕྱོགས་སུ་གྱེས་པ་ཅང་བདེན་ནམ༔ ཆོས་ཀྱི་ཉིང་ཁུ་གསང་སྔགས་མི་གསུང་པར༔ མཚོ་རྒྱལ་སྟོང་ལོག་བྱེད་པ་ཅང་བདེན་ནམ༔ ཉམས་ལེན་མཐར་ཐུགས་རྫོགས་ཆེན་མི་གསུང་པར༔ གདམས་ངག་ཞུ་ས་མེད་པ་ཅང་བདེན་ནམ༔ ཀྱེ་མ་ཀྱི་ཧུད་ཨུ་རྒྱན་རིན་པོ་ཆེ༔ གསལ་བྱེད་ཉི་མའི་འོད་ཀྱི་དཀྱིལ་འཁོར་ནུབ༔ ཉོན་མོངས་གདུང་སེལ་ཆུ་ཤེལ་ཟླ་བ་འདས༔ དུག་ལྔའི་ནད་སེལ་སྨན་གྱི་སྡོང་པོ་བསྐམས༔ ཐུགས་རྗེའི་ཉེ་རིང་མེད་པའི་ཕ་དེ་བཞུད༔ འཁོར་བའི་རྒྱ་མཚོ་སྒྲོལ་བའི་གཉན་པ་འདས༔ མ་རིག་མུན་པ་སེལ་བའི་སྒྲོན་མ་ཤི༔ ཐམས་ཅད་གསོལ་བ་འདེབས་པའི་རྟེན་དེ་མེད༔ སྣོད་ལྡན་སྨིན་མཛད་དབང་གི་བུམ་པ་ཆག༔ ཐེག་པ་ཀུན་ལ་མཁས་པའི་པད་འབྱུང་བཞུད༔ རང་སེམས་ཆོས་སྐུར་སྟོན་པའི་བླ་མ་བཞུད༔ སྡོམ་པ་གསུམ་གྱིས་བརྒྱན་པའི་བླ་མ་བཞུད༔ བླ་མ་ཁྱོད་ཀྱི་མཛད་པ་དྲན་ཙ་ན༔ མིག་ནས་མཆི་མ་རང་དབང་མེད་པར་ཤོར༔ དབུགས་ཁར་མ་ཤོང་བྱང་ཁོག་སྟོད་དུ་བརྒྱངས༔ གློ་སྙིང་ཁོང་པར་མ་ཤོང་ཁ་རུ་འཚངས༔ རྐང་པ་ས་ལ་མ་ཚུགས་ཐང་ལ་འགྱེལ༔ མཚོ་རྒྱལ་བསམ་པའི་སེམས་ལ་ཚུགས་ཐབས་མེད༔ ཀྱེ་མ་ཀྱི་ཧུད་སྙིང་ནས་བླ་མ་དྲན༔ མ་འོངསསེམས་ཅན་དོན་དུ་མི་བཞུགས་པར༔ ཆོས་རྣམས་གཏེར་དུ་སྦེད་པའི་དུས་ཀྱང་བྱུང་༔ སྐུ་གསུང་ཐུགས་ཡོན་ཕྲིན་ལས་དབེན་གནས་སུ༔ སྒྲུབ་པའི་རྒྱལ་མཚན་བོད་དུ་མི་འཛུགས་པར༔ དབེན་གནས་སྟོང་པར་འཇོག་པའི་དུས་ཀྱང་བྱུང་༔ སྐྱེ་དམན་བུད་མེད་ཡེ་ཤེས་མཚོ་རྒྱལ་འདི༔ མ་ཁྲིད་བོར་ནས་ཨུ་རྒྱན་པད་འབྱུང་བཞུད༔ མོས་གུས་ཅན་གྱི་བུ་སློབ་སྐྱོང་འཕྲོ་བཅད༔ ཀྱེ་མ་ཀྱི་ཧུད་ད་ནི་སུ་ལ་རེ༔ ཨུ་རྒྱན་པད་འབྱུང་བཞུད་པའི་དུས་ཀྱང་བྱུང་༔ རྒྱལ་ཁམས་ཐམས་ཅད་ཕ་མེད་དྭ་ཕྲུག་གང་༔ ཉིན་མཚན་མེད་པར་གདུང་བའི་སྒྲ་ཡིས་འབོད༔ གུང་ཐང་ལ་ཀར་ཐམས་ཅད་རོ་བཞིན་འགྱེལ༔ རྒྱུན་ཆད་མེད་པར་མཆི་མ་ཁྲག་ཏུ་འཛག༔ རྐང་པས་གར་ཕྱིན་དོན་མེད་ས་ལ་འགྱེལ༔ བསྡད་པས་མ་ཚུགས་ཕྱིན་ནས་དོན་མ་མཆིས༔ བསམས་པས་རྗེ་དྲན་ཉལ་བས་གཉིད་མ་བྱུང་༔ གང་ལ་བསམས་ཀྱང་པད་འབྱུང་མེད་ཐབས་མེད༔ ཀྱེ་མ་ཀྱི་ཧུད་ཨུ་རྒྱན་རིན་པོ་ཆེ༔ སྐྱེ་དམན་མཚོ་རྒྱལ་སྙིང་ནི་མི་རྗེའམ༔ སྤྲིན་གྱི་གསེབ་ནས་བྱུང་བའི་རྟ་སྔོན་ཁྱོད༔ བདག་གི་བླ་མ་གང་དུ་གདན་འདྲེན་ན༔ བར་སྣང་དཀར་དམར་ལྷ་དང་ལྷ་མོས་གང་༔ ཨུ་རྒྱན་པད་འབྱུང་ནམ་མཁའི་དབྱིངས་སུ་གཤེགས༔ མཚོ་རྒྱལ་གདུང་བ་ཞི་བར་མ་གྱུར་ནས༔ སྨྲེ་སྔགས་གདུང་བས་ཕྱོགས་བཅུར་བོས་ལགས་ཀྱང་༔ སྐད་ཅིག་ཙམ་ཡང་རྗེ་ཉིད་མ་བྱོན་ན༔ ས་སྟེང་འགྲོ་བ་མི་ཡི་གནས་འདི་ན༔ བདག་ལས་སེམས་པ་སྐྱོ་བ་སུ་ཞིག་ཡོད༔ བོད་ཀྱི་ས་གཞི་ཐམས་ཅད་སྟོང་པར་སོང་༔ རྗེ་འབངས་བུ་སློབ་ཐམས་ཅད་ཆོ་ངེ་འདེབས༔ གང་དུ་ཕྱིན་ཀྱང་ཨུ་རྒྱན་པད་འབྱུང་དྲན༔ ཉིན་དྲན་མཚན་དྲན་ཅི་ལ་བསམས་ཀྱང་དྲན༔ བུད་མེད་ངན་མ་མཁར་ཆེན་མཚོ་རྒྱལ་གྱིས༔ གཞོན་ནུའི་དུས་ནས་སློབ་དཔོན་གཟུང་མ་བྱས༔ བསམ་པ་རྙེད་ནས་བླ་མ་མིག་བཞིན་བསྟེན༔ དམ་ཚིག་གཙང་བས་ཆོས་རྣམས་མ་ལུས་གནང་༔ ད་ལྟའི་དུས་ན་ཆོས་རྣམས་ཉམས་ལེན་བདེ༔ རྒས་པའི་དུས་བྱུང་ཤི་ཡང་འགྱོད་མེད་བྱས༔ གུ་རུའི་ཡོན་ཏན་བརྗོད་ཀྱིས་མི་ལང་ཡང་༔ མ་འོངས་སེམས་ཅན་མོས་གུས་རྟེན་ཙམ་ལ༔ ལྷུན་པོའི་དྲུང་དུ་རི་ཕྲན་ཙམ་ཞིག་བཀོད༔ འདི་བཀོད་དགེ་བས་འགྲོ་དྲུག་སེམས་ཅན་རྣམས༔ ཨུ་རྒྱན་པད་འབྱུང་ཞབས་དྲུང་སྐྱེ་བར་ཤོག༔ སྐྱེས་ནས་གཞན་དོན་དཔག་མེད་འགྲུབ་པར་ཤོག༔ སྐྱེ་ཤི་གཉིས་སྤངས་ཁྱོད་ཀྱི་བྱིན་བས་ཀྱིས༔ བདག་གིས་སྨོན་ལམ་གང་བཏབ་འགྲུབ་པར་ཤོག༔ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལས༔ མོས་གུས་བརྗེད་བྱང་དཀར་ཤོག་ལ་བཏབ་པའི་ལེའུ་སྟེ་བརྒྱ་དང་བརྒྱད་པའོ༔ ༔
དབྱངས་ཅན་སྤྲུལ་པ་ཡེ་ཤེས་མཚོ་རྒྱལ་གྱིས༔ མི་བརྗེད་གཟུངས་ཐོབ་མ་འོངས་ཕྱི་རབས་དོན༔ པདྨ་བཀའ་ཡི་ཐང་ཡིག་ཅེས་ཀྱང་བྱ༔ རྣམ་ཐར་སྐྱེས་རབས་རྒྱས་པ་ཞེས་ཀྱང་བྱ༔ ཁྲི་སྲོང་ལྡེའུ་བཙན་བཀའ་ཆེམས་ཞེས་ཀྱང་བྱ༔ ལོ་པཎ་དཀར་ཆག་ཆོས་ཀྱི་འགྱུར་བྱང་འདི༔ ཡི་གེར་བཏབ་ནས་རིན་ཆེན་གཏེར་དུ་སྦས༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ སཱ་མཱ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ ཟབ་རྒྱ༔ གཏད་རྒྱ༔ རྒྱ་རྒྱ་རྒྱ༔ ཝཔཊཐཔཀུདཐཏྲཐཀཾརཾཀཾརཐཐ༔ ཆུ་འབྲུག་ཟླ་བ་བཞི་པའི་ཚེས་བརྒྱད་གཟའ་ཟླ་བ་དང་སྐར་མ་དབོ་འཛོམས་པའི་ཉིན་ཡར་ཀླུང་ཤེལ་གྱི་བྲག་རྫོང་པདྨ་བརྩེགས་པའི་ངོས་པདྨ་ཤེལ་ཕུག་གི་སྒོ་སྲུང་ཁྱབ་འཇུག་ཆེན་པོའི་ཐུགས་ཀ་ནས་གུ་རུ་ཨུ་རྒྱན་གླིང་པས། ལས་ལྡན་གྱི་གྲོགས་གཞུ་ཀུན་རབ་ཧོར་བ་སྒོམ་ཤཱཀ་དང་བཅས་གཏེར་ནས་སྤྱན་དྲངས་པའོ། །ཤོག་སེར་ཤོག་དྲིལ་གཅིག་འདུག་ཅིང་། ཡི་གེ་སཾ་སྐྲྀ་ཏའི་ལུགས་སུ་འདུག་པ་ལས་མ་དག་པ་ཚིག་གཅིག་ཀྱང་མེད་པར་ཕབ་ཡོད།།
༈ དཔལ་ཨོ་ཌི་ཡ་ནའི་སློབ་དཔོན་ཆེན་པོ་པདྨ་འབྱུང་གནས་དེ་ཉིད་ཀྱི་ངོ་མཚར་རྨད་དུ་བྱུང་བའི་རྣམ་པར་ཐར་པ་གདུལ་བྱའི་སྣང་ངོ་དང་མཐུན་པར་མཛད་པའི་ཚུལ་བསམ་གྱིས་མི་ཁྱབ་པ་ཞིག་མཆིས་པ་ལས། བྱེ་བྲག་ཏུ་པདྨ་བཀའི་ཐང་ཡིག་ཅེས་ཡོངས་སུ་གྲགས་པ། ཟ་ཧོར་གྱི་རྒྱལ་པོ་གཙུག་ལག་འཛིན་གྱི་སྐུའི་སྐྱེ་བ་གཏེར་སྟོན་ཨུ་རྒྱན་གླིང་པས། ལས་ལྡན་གྱི་སྐྱེས་བུ་ས་ཧོ་རའི་རྒྱལ་བརྒྱུད་འདི་ཉིད་གཞུ་ཀུན་དགའ་ར་བར་བཞུགས་པའི་སྐབས་ཧོར་སྒོམ་པ་ཤཱཀྱ་ཞེས་བྱ་བ་དང་བཅས་ཏེ། ཡར་ཀླུང་ཤེལ་གྱི་བྲག་རིའི་རྫོང་པདྨ་བརྩེགས་པའི་ངོས་ཕོ་བྲང་པདྨ་ཤེལ་གྱི་ཕུག་པ་ནས་གདན་དྲངས་པ་འདི་ཉིད་དར་རྒྱས་ཆེ་བར་འདུག་པས། རིག་འཛིན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་འཕྲིན་ལས་དང་། གསང་ཆེན་རྡོ་རྗེའི་ཐེག་པའི་སྔ་འགྱུར་གྱི་བསྟན་པ་རིན་པོ་ཆེ་ཕྱོགས་ཀུན་ཏུ་དར་ཞིང་རྒྱས་པ་དང་སྐྱེ་རྒུ་རྣམས་ལ་ཕན་བདེ་འབྱུང་བའི་ཕྱིར། ཟ་ཧོར་མི་དབང་བསོད་ནམས་སྟོབས་ཀྱི་རྒྱལ་པོས་ཆོས་སྦྱིན་མི་ཟད་པའི་པར་དུ་སྤེལ་བ་ལ། ཡིད་ཆེས་པའི་ཕྱི་མོ་ནི་ཚིགས་སུ་བཅད་པ་ཁོ་ན་ཡིན་པ་ལ། ཕལ་ཆེར་གྱིས་ཡིག་ཆ་ཆོད་གང་ཆེ་བྱས་པས་གོང་འོག་གི་གཅོད་མཚམས་ཉམས་པ་དང་། གོ་བ་ཕྱིན་ཅི་ལོག་ཏུ་སོང་བ་དང་། བྲིས་ནོར་གྱི་རྒྱུན་འབྱམས་པ་དང་། ལ་ལར་བླུན་པོ་གཟུ་ལུམས་ཅན་གྱིས་རང་བཟོའི་ལྷད་བཅུག་པ་ཡང་འགའ་རེ་སྣང་བས། ཕྱི་མོའི་རིགས་ཇི་སྙེད་པ་བསགས། ཁྱད་པར་དུ་གཏེར་སྟོན་གྱི་ཕྱག་བྲིས་ལས་བཤུས་ཟེར་བ་ཞིག་དང་། ཡིག་རྙིང་བ་ལ་རིས་ཀྱི་དབུ་ལྷ་ཡོད་པ་ཞིག་དང་། ཨུ་རྒྱན་གླིང་པའི་གདུང་བརྒྱུད་ཀྱིས་བཞེངས་པ་ཨེའི་པར་མ་གསུམ་ཅུང་ཟད་དག་པར་འདུག་པས་གོ་བསྟུན། བརྡ་རྙིང་དང་ཡུལ་གྲུ་ཐ་དད་པའི་སྐད་བག་ཙམ་སྣང་བ་རང་སོར་བཞག སྐབས་འགར་གོ་བ་ཕྱིན་ཅི་ལོག་ཅི་རིགས་འདུག་པས། མངའ་བདག་ཉང་གི་གཏེར་མ་རྣམ་ཐར་ཟངས་གླིང་མར་གྲགས་པ་སོགས་དང་ཡང་བསྟུན་ནས་གྱ་ཚོམས་སུ་མ་བརྒལ་བར་ནན་གྱིས་ཞུས་ཏེ་དག་པར་བྱས་ཡོད་པས་རྣམ་དཔྱོད་ཀྱི་བློ་གྲོས་དང་ལྡན་པ་རྣམས་ཀྱིས་ཡིད་ཆེས་པའི་གནས་སུ་རིག་པར་བྱའོ།། །།
བཀྲིས་བདེ་ལེགས། པདྨ་བཀའ་ཐང་དེའི་ནང་ལ་ཡིག་འབྲུ་རེ་ཙམ་ཆད་ལུས་འདུག་པས་ཕྲན་ནས་རང་ནུས་གང་ལྕོཌ་ཀྱིས་ཞུ་དག་ཞུས་ཁུལ་ཞུས་ཡོད་པས་སྐྱར་དུ་དྲྭ་འཇུག་གནང་ཐུབ་ན་བཀྲིན་ཆེ་་ཞུ་རྒྱུ་མཁྱེན་མཁྱེན།
utsangrigzod@gmail.com
ཐུགས་རྗེ་ཆེ། དེ་ལྟར་བྱུང་ན་ཧ་ཅང་ཡག་པོ་ཡོང་བ་འདུག གོང་གསལ་གློག་འཕྲིན་ཐོག་གནང་སྐྱབས་ཡོང་བ་ཞུ།