༸རྒྱལ་བ་དགེ་འདུན་གྲུབ་པའི་འདུལ་བའི་གླེགས་འབུམ་ཆེན་མོ།

༸རྒྱལ་བ་དགེ་འདུན་གྲུབ་པའི་འདུལ་བའི་གླེགས་འབུམ་ཆེན་མོ།

༄༅། །ལེགས་པར་གསུངས་པའི་དམ་པའི་ཆོས་འདུལ་བའི་གླེང་གཞི་དང་རྟོགས་པ་བརྗོད་པ། ལུང་སྡེ་བཞི་ཀུན་ལས་བཏུས་པ་རིན་པོ་ཆེའི་མཛོད་ཅེས་བྱ་བ་བཞུགས་སོ། །

 

 

མཛད་པ་པོ། ༸རྒྱལ་བ་སྐུ་ཕྲེང་དང་པོ། རྗེ་དགེ་འདུན་གྲུབ་པ་མཆོག

 

དཀར་ཆག

ཀ༽ མཆོད་བརྗོད། 1

དང་པོ། སྡོམ་པ་མ་ཐོབ་པ་ཐོབ་པར་བྱེད་པའི་ཐབས།

ཀ༽ བསྙེན་པར་རྫོགས་པའི་དབྱེ་བ་བཤད་པ། 4
༡༽ ལྔ་སྡེ་ངེས་པ་ལ་འཇུག་པས་བསྙེན་པར་རྫོགས་པ། 6
༢༽ འོད་སྲུངས་ཆེན་པོ་སྟོན་པར་ཁས་བླངས་པས་བསྙེན་པར་རྫོགས་ཚུལ། 20
༣༽ དྲི་བས་མཉེས་པས་བསྙེན་པར་རྫོགས་པ། 49
༤༽ ཚུར་ཤོག་གིས་བསྙེན་པར་རྫོགས་པ། 49

༥༽ སྐྱབས་འགྲོ་ལན་གསུམ་བྱས་པས་བསྙེན་པར་རྫོགས་པ། 81
༦༽ ལྕི་བའི་ཆོས་ཁས་བླངས་པས་བསྙེན་པར་རྫོགས་པ། 82
༧༽ འཕྲིན་གྱིས་བསྙེན་པར་རྫོགས་པ། 85
ཁ༽ སྔོན་གྱི་ཆོ་ག་བཤད་པ། 91
ག༽ ད་ལྟར་གྱི་ཆོ་ག་བྱེ་བྲག་ཏུ་བཤད་པ། 91
༡༽ ཕྲན་ཚེགས་ཀྱི་སྐབས་ནས་འབྱུང་བ། 128
༢༽ ད་ཆོག་ཞུ་བ་ཕལ་ཆེར་སྐབས། 196

གཉིས་པ། སྡོམ་པ་ཐོབ་པ་མི་ཉམས་པར་སྲུང་བའི་ཐབས།

ཀ༽ གང་ཟག་གཞན་ལ་བརྟེན་ནས་བསྲུང་བ། 197
ཁ༽ རང་གི་བསམ་པ་ཕུན་སུམ་ཚོགས་པས་བསྲུང་བ། 197
ག༽ མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་བ། 197
༡༽ ཕམ་པའི་སྡེ་བཞི་ལས།
1) མི་ཚངས་སྤྱོད་ཀྱི་ཕམ་པ། 198
2) མ་བྱིན་པར་ལེན་པའི་ཕམ་པ། 244
3) སྲོག་གཅོད་པའི་ཕམ་པ་ལ་བཞི། 285
4) བརྫུན་དུ་སྨྲ་བའི་ཕམ་པ། 319
༢༽ ལྷག་མའི་སྡེ་ལས།
1) ལྷག་མ་བཅུ་གསུམ། 341
2) མ་ངེས་པ་གཉིས། 394
༣༽ ལྟུང་བྱེད་ཀྱི་སྡེར་སྤང་ལྟུང་ལ་བཅུ་ཚན་གསུམ་ལས།
བཅུ་ཚན་དང་པོ། 396
བཅུ་ཚན་གཉིས་པ། 445
བཅུ་ཚན་གསུམ་པ། 464
༤༽ ལྟུང་བྱེད་འབའ་ཞིག་པ་ལ་བཅུ་ཚན་དགུ་ལས།
བཅུ་ཚན་དང་པོ། 494
བཅུ་ཚན་གཉིས་པ། 527
བཅུ་ཚན་གསུམ་པ། 551
བཅུ་ཚན་བཞི་པ། 586
བཅུ་ཚན་ལྔ་པ། 621

༡༽ པར་བྱང་སྨོན་ཚིག 639

 

 

 

༄༅། །ལེགས་པར་གསུངས་པའི་དམ་པའི་ཆོས་འདུལ་བའི་
གླེང་གཞི་དང་རྟོགས་པ་བརྗོད་པ། ལུང་སྡེ་བཞི་
ཀུན་ལས་བཏུས་པ་རིན་པོ་ཆེའི་མཛོད་
ཅེས་བྱ་བ་བཞུགས་
སོ། །

མཆོད་བརྗོད།

ལེགས་པར་གསུངས་པའི་དམ་པའི་ཆོས་འདུལ་བའི་གླེང་གཞི་དང་རྟོགས་པ་བརྗོད་པ། ལུང་སྡེ་བཞི་ཀུན་ལས་བཏུས་པ་རིན་པོ་ཆེའི་མཛོད་ཅེས་བྱ་བ། ཐམས་ཅད་མཁྱེན་པའི་ཞབས་ལ་ཕྱག་འཚལ་ལོ། །གཅིག་ཏུ་དཀར་བའི་ལྷག་བསམ་ལན་གཅིག་མིན་པར་གོམས་མཛད་འགྲོ་ཀུན་བུ་གཅིག་ལྟར་དགོངས་ཐུགས་རྗེ་ཅན། །གཅིག་དང་དུ་མའི་ཆོས་ཀུན་གཅིག་དང་དུ་མ་དང་བྲལ་ཆོས་དབྱིངས་ངང་དུ་རོ་གཅིག་ཉིད་དགོངས་ཏེ། །སྐད་ཅིག་གཅིག་ཀྱང་གཡེལ་བ་མེད་པར་རྩེ་གཅིག་ཉིད་དུ་མཉམ་པར་བཞག་པས་སྲུང་བ་གཅིག་པུ་བ། །བདུད་དཔུང་གཅིག་ཏུ་མཐར་མཛད་ཉག་གཅིག་དཔའ་བ་མཚུངས་མེད་སྟོན་པ་གཅིག་པུ་དེ་ལ་འདུད། །བདེན་གཉིས་ནམ་མཁའི་ངོས་ལ་ཐབས་ཤེས་གཤོག་གཉིས་རབ་ཡངས་ཆེར་བསྐྱོད་མཐའ་གཉིས་གཡང་སས་མི་འཇིགས་ཤིང༌། །ལུང་དང་རིགས་པའི་མིག་གཉིས་དྲི་མེད་འབར་བས་ཐུབ་པ་གཉིས་སྐྱེས་གཉིས་སྐྱེས་(༢ན)གཞན་དག་ཟིལ་གྱིས་མནན། །སྒྲིབ་གཉིས་ལྟོ་འགྲོའི་སྲོག་ནི་ངེས་པར་བཅོམ་ནས་སྲིད་ཞི་གཉིས་ཀྱི་རྒྱ་མཚོའི་ཕ་རོལ་འཕུར་ལྡིང་རོལ། །རྐང་གཉིས་གཙོ་བོ་གཉིས་སྐྱེས་དབང་པོ་ལག་གཉིས་སྤྱི་བོར་ཐལ་སྦྱར་མགོ་འཛིན་དམའ་བས་ཕྱག་འཚལ་ལོ། །དུག་གསུམ་མེ་དཔུང་རབ་བསིལ་བསླབ་གསུམ་གངས་རིའི་སྤོ་ལ་སྡེ་སྣོད་གསུམ་གྱི་རལ་ཁུར་ཅི་ཡང་འཛིན། །གནས་གསུམ་ཤེས་བྱའི་ལམ་ནས་རིག་པ་གསུམ་གྱི་གད་རྒྱངས་རྒྱ་ཆེར་རབ་བསྒྲགས་སྐབས་གསུམ་དབང་པོ་དང༌། །མིག་གསུམ་པ་དང་གོམས་གསུམ་གནོན་སོགས་དྲེགས་པའི་ང་རོ་ཅན་གང་ས་གསུམ་ལྷན་ཅིག་འདར་བྱེད་པ། །སྲིད་གསུམ་བླ་མའི་བླ་མ་ཤཱཀྱ་སེངྒེར་སྒོ་གསུམ་གུས་པས་དུས་གསུམ་ཀུན་ཏུ་ཕྱག་བགྱིའོ། །གྲུབ་མཐའ་རྣམ་བཞིའི་གྲུ་ཆེན་རྫུ་འཕྲུལ་རྐང་པཞིའི་དར་གྱིས་རབ་མཛེས་ཡང་དག་སྤོང་བཞིའི་རླུང་གིས་བསྐྱོད། །ཆུ་བཞི་ལས་བརྒལ་རིན་ཆེན་གླིང་མཆོག་གང་དེར་བསམ་གཏན་བཞི་ཡི་རིན་ཆེན་རྩིག་པ་རྣམ་བཀྲ་ཞིང༌། །རྣམ་ཐར་སྒོ་བཞི་དང་ལྡན་སོ་སོར་རིག་བཞིའི་རིན་ཆེན་དྲ་མིག་བདེན་བཞི་རྟོགས་པའི་གྲོང་ཁྱེར་སྤྲུལ། །སླར་ཡང་ཚད་མེད་རྣམ་བཞིའི་ལམ་ནས་བསྡུ་བཞིའི་ནོར་ལྡན་རིགས་བཞིའི་དོན་མཐུན་སྐུ་བཞིར་འཁྲིད་ལ་འདུད། །དུག་ལྔའི་ས་བོན་ལས་བསྐྲུན་ཕུང་པོ་ལྔ་ཡི་ནགས་ཚལ་འཐུག་པོར་སྙིགས་མ་ལྔ་ཡི་གཅན་གཟན་དང༌། །སྒྲིབ་པ་ལྔ་ཡི་དུག་འཛིན་དང་བཅས་ཉམ་ཐག་འཁོར་བའི་འགྲོ་ལྔ་ཐར་ལམ་ལྔ་ལ་རིམ་གྱིས་འཁྲིད། །དབང་པོ་ལྔ་དང་སྟོབས་ལྔའི་སྟོབས་བྱིན་མངོན་ཤེས་ལྔ་དང་སྤྱན་ལྔ་ལ་སོགས་དགེ་ལེགས་ཀུན་སྩོལ་བ། །གནས་ལྔ་(༢བ)མཐར་སོན་ཡེ་ཤེས་ལྔ་ལྡན་ཀུན་མཁྱེན་དེ་ལ་ཡག་ལག་ལྔ་ཡིས་བཏུད་ནས་ཕྱག་འཚལ་ལོ། །ཕྲ་རྒྱས་དྲུག་གི་ཡལ་ག་རབ་འཛིངས་བདུད་དང་སྟོན་པ་དྲུག་སོགས་རྒོལ་བའི་ནགས་ཀུན་གྲུགས་མཛད་ཅིང༌། །ཕྱིན་དྲུག་མཆེ་བ་རབ་དཀར་མངོན་ཤེས་དྲུག་གི་དྲ་བས་རབ་མཛེས་ཤེས་བྱའི་ནགས་ལ་ཐོགས་མེད་རྒྱུ། །རྗེས་དྲན་དྲུག་གི་ལྕགས་ཀྱུས་དབང་པོ་དྲུག་ཐུལ་སྤྱོད་ཡུལ་དྲུག་ལ་མཉམ་པར་མ་བཞག་ཐུགས་མི་མངའ། །འགྲོ་དྲུག་སྒྲོལ་བའི་ཁུར་ཆེན་བསྣམས་ནས་ཕུལ་དུ་བྱུང་བའི་གོམ་སྟབས་མངའ་བ་ཐུབ་དབང་གླང་པོར་འདུད། །ཉིད་ཀྱི་བསོད་ནམས་ཀྱིས་ཐོབ་མཐོ་རིས་ཡོན་ཏན་བདུན་མཛེས་བཙུན་མོའི་འཁོར་སོགས་རིན་ཆེན་བདུན་ལ་དབང༌། །རིན་ཆེན་བདུན་གྱི་རྩིག་པ་རྣམ་བཀྲ་ཕོ་བྲང་ཁང་བརྩེགས་གང་དེའང་རབ་འབར་དམྱལ་བའི་གྲོང་ལྟར་གཟིགས། །སྲིད་པ་བདུན་གྱི་འཇིགས་སེལ་སླད་དུ་མནར་མེད་དུ་ཡང་པད་མཚོར་ངང་པ་ཇི་བཞིན་སྤྲོ་བས་ཞུགས། །འཕགས་ནོར་བདུན་དང་བྱང་ཆུབ་ཡན་ལག་བདུན་ལ་འགྲོ་ཀུན་སྦྱོར་མཛད་ཐུབ་དབང་སྙིང་རྗེའི་གཏེར་ལ་འདུད། །ཐོག་མར་ཚ་དམྱལ་བརྒྱད་སོགས་མི་ཁོམ་བརྒྱད་སྤངས་དལ་བརྒྱད་ཚང་བའི་རྟེན་ལ་འགྲོ་བ་ཀུན་བཀོད་ཅིང༌། །སླར་ཡང་སྡུག་བསྔལ་བརྒྱད་ཀྱི་སྡུག་བསྔལ་ཞི་ཕྱིར་འཕགས་ལམ་ཡན་ལག་བརྒྱད་ཀྱི་དམ་ཆོས་ལེགས་གསུངས་ཏེ། །བརྒྱད་པ་ལ་སོགས་འཕགས་པའི་གང་ཟག་བརྒྱད་དང་རང་རྒྱལ་ལ་སྦྱར་གཞན་དག་ཐེག་པ་མཆོག་ལ་བཀོད། །རྣམ་ཐར་བརྒྱད་དང་ཟིལ་གནོན་བརྒྱད་སོགས་ཡོན་ཏན་ཀུན་གྱི་དབང་ཕྱུག་སངས་རྒྱས་དེ་ལ་ཕྱག་འཚལ་ལོ། །སྲིད་པའི་ཕུན་ཚོགས་ཆུ་ཤིང་ལྟར་དགོངས་ས་དགུའི་ལམ་གྱིས་དགུ་ཕྲག་དགུ་ཡི་ཉོན་མོངས་དྲུངས་ཕྱུང་ཞིང༌། །སྙོམས་འཇུག་དགུ་སོགས་ཏིང་འཛིན་ཀུན་ལ་འདོད་དགུར་དབང་བསྒྱུར་སྐྱེ་དགུས་མཆོད་འོས་ཉན་ཐོས་རང་རྒྱལ་དང༌། །ས་བཅུའི་དབང་ཕྱུག་རྒྱལ་སྲས་ཀུན་གྱི་གཙོ་བོ་དབང་བཅུ་དག་དང་ཕ་རོལ་ཕྱིན་བཅུའི་མཐར་སོན་པ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་སྟོབས་བཅུ་མངའ་བ་ཕྱོགས་བཅུར་སྙན་གྲགས་ཁྱབ་པ་དེ་ལ་འདུད། །གཏིང་ཟབ་ཕ་རོལ་མི་མངོན་ཞིང༌། །དགག་སྒྲུབ་གནང་བའི་རླབས་ཕྲེང་འཁྲིགས། །འདུལ་བ་སྡེ་བཞིའི་རྒྱ་མཚོ་ལ། །བདག་འདྲས་བརྒལ་བར་ག་ལ་ནུས། །འོན་ཀྱང་མཁས་པའི་དེད་དཔོན་གྱི། །གསུང་གི་གྲུ་ཆེན་ལ་བརྟེན་ནས། །གླེང་གཞི་རྟོགས་པ་བརྗོད་པ་སོགས། །གང་ལ་གང་འོས་ཡིད་བཞིན་བླང༌། །བདག་ནི་གཡེང་མེད་གཅིག་པུར་གནས་ལ་དགའ། །སྙིགས་དུས་སྐྱེ་བོ་བསླབ་ལ་ཤིན་ཏུ་གཡེལ། །དེ་ཕྱིར་གཞན་ལ་ཕན་པར་དཀའ་ན་ཡང༌། །རང་གི་ཡིད་(༣ན)ལ་གོམས་ཕྱིར་ངས་འདི་བྱ། །

དང་པོ། སྡོམ་པ་མ་ཐོབ་པ་ཐོབ་པར་བྱེད་པའི་ཐབས།

དེ་ཡང་ཐར་པ་དང་ཐམས་ཅད་མཁྱེན་པ་དོན་དུ་གཉེར་བ་རྣམས་ཀྱིས་ལྷག་པ་ཚུལ་ཁྲིམས་ཀྱི་བསླབ་པ་ལ་ནན་ཏན་དུ་བྱ་དགོས་ཏེ། ལྷག་པ་ཚུལ་ཁྲིམས་ཀྱི་བསླབ་པ་ལ་བརྟེན་ནས་ལྷག་པ་ཏིང་ངེ་འཛིན་གྱི་བསླབ་པ་སྐྱེ། དེ་ལ་བརྟེན་ནས་ལྷག་པ་ཤེས་རབ་ཀྱི་བསླབ་པས་ཉོན་མོངས་པ་དང་ཤེས་བྱའི་སྒྲིབ་པ་མ་ལུས་པར་སྤངས་ནས་ཐར་པ་དང་ཐམས་ཅད་མཁྱེན་པ་ཐོབ་པར་བྱ་དགོས་པའི་ཕྱིར་རོ། །དེས་ན་འདིར་ལྷག་པ་ཚུལ་ཁྲིམས་ཀྱི་བསླབ་པ་ཚུལ་བཞིན་དུ་བླངས་ནས་རྣམ་པར་དག་པ་བྱེད་པ་ལ་གསུམ། སྡོམ་པ་མ་ཐོབ་པ་ཐོབ་པར་བྱེད་པའི་ཐབས་དང༌། ཐོབ་པ་མི་ཉམས་པར་བསྲུང་བའི་ཐབས་དང༌། ཉམས་ན་ཕྱིར་འཆོས་པའི་ཐབས་སོ། །དང་པོ་ལ་གསུམ། བསྙེན་པར་རྫོགས་པའི་དབྱེ་བ་དང༌། སྔོན་གྱི་ཆོ་ག་དང༌། ད་ལྟར་གྱི་ཆོ་ག་བྱེ་བྲག་ཏུ་བཤད་པའོ། །

ཀ༽ བསྙེན་པར་རྫོགས་པའི་དབྱེ་བ་བཤད་པ།

དང་པོ་ནི། ལུང་མ་མོ་ལས། བསྙེན་པར་རྫོགས་པར་འོས་པ་རྣམ་པ་བཅུའོ། །དེ་བཞིན་གཤེགས་པ་རང་བྱུང་དང༌། རང་སངས་རྒྱས་སློབ་དཔོན་མེད་པས་བསྙེན་པར་རྫོགས་པ་དང༌། ལྔ་པོ་རྣམས་ཡེ་ཤེས་ཁོང་དུ་ཆུད་པས་དང༌། ཚེ་དང་ལྡན་པ་འོད་སྲུངས་ཆེན་པོ་སྟོན་པར་ཁས་བླངས་པས་དང༌། ཚེ་དང་ལྡན་པ་འཆར་ལྡན་དྲིས་ནས་ལུང་བསྟན་པས་དང༌། དགེ་སློང་ཚུར་ཤོག་ཅེས་གསུངས་པས་དང༌། སྐྱབས་སུ་འགྲོ་བའི་ཚིག་གསུམ་གྱིས་དང༌། ཡུལ་མཐའ་འཁོབ་ཏུ་འདུལ་བ་འཛིན་པ་དང་ལྔའི་དགེ་འདུན་ལས་དང༌། ཡུལ་དབུས་སུ་བཅུ་འདུས་པའམ། དེ་བས་ལྷག་པ་ལས་དང༌། བླ་མའི་ཆོས་ཁས་བླངས་པས་དང༌། ཕོ་ཉས་དང༌། དགེ་འདུན་སྡེ་གཉིས་ལས་བསྙེན་པར་རྫོགས་པའོ། །ཞེས་དང༌། མཛོད་འགྲེལ་ལས། བྱེ་བྲག་ཏུ་སྨྲ་བ་འདུལ་བ་པ་རྣམས་ན་རེ། རྣམ་པ་བཅུས་བསྙེན་པར་རྫོགས་སོ་ཞེས་ཟེར་བ་བསྡུ་བའི་ཕྱིར་སོགས་པའི་སྒྲ་སྨོས་ཏེ། རང་བྱུང་གིས་ནི་སངས་རྒྱས་དང་རང་སངས་རྒྱས་རྣམས་སོ། །ངེས་པར་འཇུག་པས་ནི་རྟེན་ལྔ་པོ་རྣམས་སོ། །དགེ་སློང་ཚུར་ཤོག་ཅེས་གསུངས་པས་ནི་གྲགས་པ་ལ་སོགས་པ་རྣམས་སོ། །སྟོན་པར་ཁས་བླངས་པས་ནི་འོད་སྲུངས་ཆེན་པོའོ། །དྲི་བས་མཉེས་པས་ནི་ལེགས་སྦྱིན་ནོ། །བླ་མའི་ཆོས་ཁས་བླངས་པས་ནི་སྐྱེ་དགུའི་བདག་མོ་ཆེན་མོའོ། །ཕོ་ཉས་ནི་ཆོས་སྦྱིན་ནོ། །འདུལ་བ་འཛིན་པ་གཏོགས་པ་ལྔས་ནི་མཐའ་འཁོབ་ཀྱི་མི་རྣམས་སོ། །བཅུའི་ཚོགས་ཀྱིས་ནི་དབུས་ཀྱི་མི་རྣམས་སོ། །སྐྱབས་སུ་འགྲོ་བ་ལན་གསུམ་བཟླས་པས་ནི་སྡེ་བཟང་དྲུག་ཅུའི་ཚོགས་ཀྱིས་བསྙེན་པར་རྫོགས་པར་བྱས་པ་རྣམས་ཏེ། དེ་དག་གིས་སོ་སོར་ཐར་པའི་སྡོམ་པ་ནི་གདོན་མི་ཟ་བར་རྣམ་པར་རིག་བྱེད་ལ་རག་ལུས་པ་མ་ཡིན་ནོ། །ཞེས་བསྙེན་པར་རྫོགས་པ་བཅུ་གསུངས་སོ། །དེ་ལ་སངས་རྒྱས་རང་བྱུང་(༣བ)གིས་བསྙེན་པར་རྫོགས་ཚུལ་ནི། དང་པོར་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་བསགས། མཐར་རྡོ་རྗེ་གདན་གྱི་སྤོ་ལ་བཞུགས་ཏེ། ནམ་གྱི་ཐུན་དང་པོ་ལ་རྫུ་འཕྲུལ་གྱི་ཡུལ་ཤེས་པའི་མངོན་པར་ཤེས་པས་རྫུ་འཕྲུལ་གྱི་རྣམ་པ་དུ་མ་ཉམས་སུ་མྱོང་བར་མཛད། ལྷའི་རྣ་བའི་མངོན་པར་ཤེས་པས་ལྷ་དང་མི་རྣམས་ཀྱི་སྒྲ་ཉེ་རིང་རྣམས་གསན། ནམ་གྱི་གུང་ཐུན་ལ་གཞན་གྱི་སེམས་ཤེས་པའི་མངོན་པར་ཤེས་པས་གང་ཟག་གཞན་གྱི་རྟོག་དཔྱོད་རྣམས་ཇི་ལྟ་བ་བཞིན་མཁྱེན། སྔོན་གྱི་གནས་རྗེས་སུ་དྲན་པའི་མངོན་པར་ཤེས་པས་རང་དང་གཞན་གྱི་ཚེ་རབས་སྔ་མ་རྣམས་ཇི་ལྟ་བ་བཞིན་མཁྱེན། ནམ་གྱི་ཐུན་ཐ་མ་ལ་འཆི་འཕོ་བ་དང་སྐྱེ་བ་ཤེས་པའི་མངོན་པར་ཤེས་པས་སེམས་ཅན་རྣམས་ཀྱི་འཆི་འཕོ་བ་དང་སྐྱེ་བ་རྣམས་ཇི་ལྟ་བ་བཞིན་མཁྱེན། ཟག་པ་ཟད་པ་ཤེས་པའི་མངོན་པར་ཤེས་པས་བདེན་བཞི་མངོན་སུམ་དུ་མཁྱེན་ནས་མངོན་པར་རྫོགས་པར་སངས་རྒྱས་པས་བསྙེན་པར་རྫོགས་པ་ཡིན་ནོ། །

༡༽ ལྔ་སྡེ་ངེས་པ་ལ་འཇུག་པས་བསྙེན་པར་རྫོགས་པ།

ངེས་པ་མཐོང་ལམ་དང༌། འཇུག་པ་བསྐྱེད་པ་ཡིན་ལ། དེས་བསྙེན་པར་རྫོགས་པ་སྟེ། དེ་ཡང༌། གཞོན་ནུ་དོན་གྲུབ་རབ་ཏུ་བྱུང་ནས། རིམ་གྱིས་སྒྱུ་རྩལ་ཤེས་ཀྱི་བུ་རིང་འཕུར་ལས་ཅི་ཡང་མེད་པའི་སྐྱེ་མཆེད་དང༌། རེངས་བྱེད་ཀྱི་བུ་ལྷག་སྤྱོད་ལས་སྲིད་རྩེའི་སྐྱེ་མཆེད་མངོན་དུ་མཛད་ནས་གཅིག་པུར་གཤེགས་པ་ན། རྒྱལ་པོ་ཟས་གཙང་གིས་གཞོན་ནུ་རིམ་གྲོ་བ་མེད་པར་འཁྱམ་པ་ཐོས་ནས་རིམ་གྲོ་བྱེད་པ་སུམ་བརྒྱ་བཏང༌། ཤཱཀྱ་ལེགས་པར་རབ་སད་ཀྱིས་ཀྱང་དེ་བཞིན་དུ་ཐོས་ནས་རིམ་གྲོ་བྱེད་པ་ཉིས་བརྒྱ་བཏང༌། དེ་ནས་བྱང་ཆུབ་སེམས་དཔའ་དཀའ་ཐུབ་ཀྱི་ནགས་གང་བར་སྤྱོད་པས་བདུད་རྩི་འཐོབ་མི་ནུས་པར་དགོངས་ནས་ཡུམ་གྱི་ཕྱོགས་ནས་གཉིས། ཡབ་ཀྱི་ཕྱོགས་ནས་གསུམ་ཁྲིད་དེ་རིམ་གྲོ་པ་ལྔས་བསྐོར་ནས། ཆུ་བོ་ནཻ་རཉྫ་ནའི་དྲུང་དུ་ལོ་དྲུག་དཀའ་བ་སྤྱད་ཀྱང་དེ་ཙམ་གྱིས་བྱང་ཆུབ་མ་ཐོབ་པས། ལུས་ཉམ་ཆུང་བས་བྱང་ཆུབ་བསྒྲུབ་སླ་བ་མིན་པར་དགོངས་ནས། ཞལ་ཟས་རགས་པ་གསོལ་ཞིང་སྐུ་ལ་ཏིལ་མར་དང་མར་གསར་གྱིས་བྱུགས་ནས་ཆུ་འཇམ་པོས་ཁྲུས་མཛད་དོ། །དེ་ནས་རིམ་གྲོ་པ་ལྔ་པོ་འདི་སྙམ་དུ། དགེ་སྦྱོང་གོའུ་ཏ་མ་ནི་སྡོམ་པ་ལྷོད་པ། བྱ་བ་མང་བ། མང་པོས་འཚོ་བ། སྤོང་བ་ཉམས་པ་ཡིན་པས་འདིས་ཅུང་ཟད་ཀྱང་བདུད་རྩི་འཐོབ་པར་མི་ནུས་སོ་སྙམ་ནས་བྱང་ཆུབ་སེམས་དཔའ་བོར་ཏེ། ཝཱ་ར་ཎཱ་སཱིར་ཕྱིན་ནས་སྔ་པོ་དེ་བློ་མཐུན་པར་དྲང་སྲོང་སྨྲ་བ་རི་དྭགས་ཀྱི་ནགས་ན་གནས་པས་ལྔ་སྡེ་ཞེས་གྲགས། དེ་ནས་བྱང་ཆུབ་སེམས་དཔས་ལུས་ཀྱི་མཐུ་སྟོབས་བསྐྱེད་ནས། སྡེ་ཅན་གྱི་གྲོང་ཁྱེར་དུ་ཁྱིམ་བདག་སྡེ་ཅན་གྱི་བུ་མོ་དགའ་མོ་དང་དགའ་སྟོབས་མ་ལ་བ་སྟོང་གི་འོ་མ་ལན་བཅུ་དྲུག་ཏུ་ཉིང་ཁུར་བྱས་པ་(༤ན)བཞེས་ནས། རྡོ་རྗེ་གདན་དུ་མངོན་པར་རྫོགས་པར་སངས་རྒྱས་ཏེ། ཐོག་མར་སུ་ལ་ཆོས་བསྟན་སྙམ་དུ་དགོངས་པ་ན། ལྔ་སྡེ་ལ་ཐོག་མར་ཆོས་གསུང་བར་དགོངས་ནས་ཝཱ་ར་ཎཱ་སཱིར་བྱོན་པ་ན། ལྔ་སྡེས་བཅོམ་ལྡན་འདས་རྒྱང་རིང་པོ་ནས་མཐོང་ངོ༌། །མཐོང་ནས་ཀྱང་ཕན་ཚུན་ཁྲིམས་སུ་བཅས་པ། དགེ་སྦྱོང་གོའུ་ཏ་མ་ནི་སྡོམ་པ་ལྷོད་པ། བྱ་བ་མང་བ། མང་པོས་འཚོ་བ། སྤོང་བ་ཉམས་པ་སོགས་ཡིན་པ་དེ་འོང་གིས། དེ་འོངས་པ་ན། དེ་ལ་སྨྲ་བ་དང༌། ཕྱག་དང༌། ལྡང་བ་དང༌། སྟན་བསྟབ་པར་མི་བྱའོ་ཞེས་བཅས་སོ། །དེ་ནས་བཅོམ་ལྡན་འདས་ཉེ་བར་བྱོན་པ་ན། བཅོམ་ལྡན་འདས་ཀྱི་གཟི་བརྗིད་དང་དཔལ་མ་བཟོད་པར་སྟན་ལས་ལངས་ཏེ། ཁ་ཅིག་གིས་གདན་བཤམས། ཁ་ཅིག་གིས་ཞབས་བཀྲུ་བའི་ཆུ་དང་ཞབས་རྟེན་མཐའ་གཅིག་ཏུ་འཇོག །ཁ་ཅིག་གིས་བསུ་སྟེ། གོའུ་ཏ་མ་ཚུར་སྤྱོན། བྱོན་པ་ལེགས་སོ། །གདན་བཤམས་པ་ཉིད་ལ་བཞུགས་ཤིག་ཅེས་ཟེར་རོ། །
དེ་ནས་བཅོམ་ལྡན་འདས་ཀྱིས། བླུན་པོ་འདི་རྣམས་ཀྱིས་རང་གིས་ཁྲིམས་བཅས་པ་རང་གིས་བཤིག་གོ་སྙམ་དུ་དགོངས་ནས་གདན་བཤམས་པ་ལ་བཞུགས་སོ། །དེ་ནས་ལྔ་སྡེ་དེ་བཞིན་གཤེགས་པའི་མཚན་ནས་བརྗོད། གདུང་ནས་བརྗོད། ཚེ་དང་ལྡན་པ་ཞེས་བརྗོད་པ་ན། བཀའ་སྩལ་པ། ཁྱེད་དེ་བཞིན་གཤེགས་པའི་མཚན་ནས་བརྗོད་པ་དང༌། གདུང་ནས་བརྗོད་པ་དང༌། ཚེ་དང་ལྡན་པ་ཞེས་མ་རྗོད་ཅིག །དེ་བཞིན་གཤེགས་པའི་མཚན་ནས་བརྗོད་པ་སོགས་བྱས་ན་ཡུན་རིང་པོར་གནོད་པ་དང་སྡུག་བསྔལ་བར་འགྱུར་རོ། །གསོལ་བ། གོའུ་ཏ་མ། ཁྱོད་ཀྱིས་སྔོན་གྱི་སྤྱོད་ཚུལ་དང༌། དཀའ་བ་སྤྱད་པ་དེས་ཀྱང་མིའི་ཆོས་བླ་མ་མ་ཐོབ་ན། ད་ཁྱོད་མི་བརྟན་པ། བྱ་བ་མང་བ་སོགས་འདིས་ལྟ་ཅི་སྨོས། བཀའ་སྩལ་པ། ཁྱེད་ཀྱིས་དེ་བཞིན་གཤེགས་པའི་ཞལ་དང་དབང་པོ་རྣམས་སྔོན་ལས་མདངས་གསལ་བ་མཐོང་ངམ། དེ་དེ་བཞིན་ནོ། །བཀའ་སྩལ་པ། དགེ་སློང་དག །རབ་ཏུ་བྱུང་བས་འདོད་པ་བསོད་ཉམས་ཀྱི་མཐའ་དང༌། ངལ་ཞིང་དུབ་པའི་མཐའ་ལ་མི་བརྟེན་པར་དབུ་མའི་ལམ་འཕགས་ལམ་ཡན་ལག་བརྒྱད་ལ་བརྟེན་པར་བྱའོ་ཞེས་འདོམས་སོ། །ལྔ་སྡེ་ལས་གཉིས་ལ་སྔ་དྲོ་གདམས་ངག་འབོགས་པ་ན་གསུམ་གྱིས་གྲོང་ནས་བསོད་སྙོམས་བསྒྲུབས་ཏེ་དེས་དྲུག་ཀ་འཚོལ་བར་བྱེད། གསུམ་ལ་ཕྱི་དྲོ་འདོམས་པ་ན་གཉིས་ཀྱིས་གྲོང་ན་བསོད་སྙོམས་བསྒྲུབས་ཏེ་ལྔ་སྡེ་འཚོ་བར་བྱེད་ལ། དེ་བཞིན་གཤེགས་པ་ནི་སྔ་དྲོའི་དུས་ཁོ་ནར་གསོལ་ལོ། །དེ་ནས་ལྔ་སྡེ་ལ་བཀའ་སྩལ་པ། དགེ་སློང་དག་ང་སྔོན་མ་ཐོས་པའི་ཆོས་རྣམས་ལ། འདི་ནི་སྡུག་བསྔལ་འཕགས་པའི་བདེན་པའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང༌། རིག་པ་དང༌། བློ་དང༌། རྟོགས་(༤བ)པ་སྐྱེས་སོ། །དགེ་སློང་དག །ང་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང༌། རིག་པ་དང༌། བློ་དང༌། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ་ངས་མངོན་པར་ཤེས་པས་ཡོངས་སུ་ཤེས་པར་བྱའོ་ཞེས་ཚུལ་བཞིན་སོགས། དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་ངས་མངོན་པར་ཤེས་པས་སྤང་བར་བྱའོ་ཞེས་ཚུལ་སོགས། དགེ་སློང་དག །ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འཕགས་པའི་བདེན་པ་དེ་ངས་མངོན་པར་ཤེས་པས་མངོན་དུ་བྱའོ་ཞེས་དང༌། དེ་བཞིན་དུ། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེ་ངས་མངོན་པར་ཤེས་པས་བསྒོམ་པར་བྱའོ་ཞེས་དང༌། དེ་བཞིན་དུ། སྡུག་བསྔལ་ཤེས། ཀུན་འབྱུང་སྤངས། འགོག་པ་མངོན་དུ་བྱས། ལམ་བསྒོམས་སོ་ཞེས་ཚུལ་བཞིན་ཡིད་ལ་བྱེད་པ་ན་ཞེས་སོགས་ཆོས་ཀྱི་རྣམ་གྲངས་དེ་བཀའ་སྩལ་པ་ན་ཀོའུ་དི་ནྱ་དང༌། ལྷ་བརྒྱད་ཁྲི་ལ་མཐོང་ལམ་སྐྱེས་སོ། །
དེ་ནས་བཀའ་སྩལ་པ། ཀོའུ་དི་ནྱ། ཁྱོད་ཀྱིས་ཆོས་ཀུན་ཤེས་སམ་ཞེས་ལན་གཉིས་དྲིས་ལ། དེས་ཀྱང་ཀུན་འཚལ་ལོ་ཞེས་ཞུས་པས་ཀུན་ཤེས་ཀོའུ་དི་ནྱ་ཞེས་གྲགས་སོ། །དེ་ནས་བཅོམ་ལྡན་འདས་ཀྱིས་ལན་གཉིས་སུ་ཡང་བདེན་པ་བཞི་གསུངས་པས་ལྔ་སྡེ་ལྷག་མ་རྣམས་ཀྱི་རྒྱུད་ལ་མཐོང་ལམ་སྐྱེས་ལ། ཀུན་ཤེས་ཀོའུ་དི་ནྱས་དགྲ་བཅོམ་པ་ཐོབ་བོ། །དེ་ནས། དགེ་སློང་དག །གཟུགས་ནི་བདག་མ་ཡིན་ཞེས་སོགས་གསུངས་པས་ལྔ་སྡེ་ལྷག་མ་རྣམས་ཀྱིས་ཀྱང་དགྲ་བཅོམ་པ་ཐོབ་བོ། །ཀོའུ་དི་ནྱས་དགྲ་བཅོམ་པ་ཐོབ་པ་ན་སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་ལུང་བསྟན་པའི་ཚེ། དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་བཅོམ་ལྡན་འདས་ལ་ཞུས་པ། ཀོའུ་དི་ནྱས་ལས་ཅི་བགྱིས་ན་རྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་ལུང་བསྟན། བཀའ་སྩལ་པ། སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་སངས་རྒྱས་འོད་སྲུངསས་ཞེས་བྱ་བ་བྱུང་སྟེ། དེ་གྲོང་ཁྱེར་ཝཱ་ར་ཎཱ་སཱིར་ཉེ་བར་བརྟེན་ནས་རི་བོ་རིལ་བའི་དབྱིབས་ལ་བཞུགས་སོ། །
དེ་ནས་སངས་རྒྱས་འོད་སྲུངསས་ཝཱ་ར་ཎཱ་སཱིར་བསོད་སྙོམས་ལ་འབྱོན་པ་དགེ་འདུན་པ་ལྔ་བརྒྱ་ཙམ་གྱིས་མཐོང་ནས་དད་པ་སྐྱེས་ཏེ། བདག་ཅག་འདི་ལས་རབ་ཏུ་འབྱུང་ངོ་ཞེས་གྲོས་བྱས་པ་ལས། ཁ་ཅིག་རྒྱ་མཚོར་ཞུགས། ཁ་ཅིག་ཡུལ་གཞན་དུ་སོང༌། ཁ་ཅིག་དུས་བྱས་ལ། སྐྱེ་བོ་(༥ན)བཅུ་དྲུག་ལུས་པ་དེས་རི་བོ་རིལ་བའི་དབྱིབས་སུ་སོང་སྟེ། སངས་རྒྱས་འོད་སྲུངསས་ལས་རབ་ཏུ་བྱུང་ནས། བསམ་གཏན་དང་ཀློག་པ་ལ་གནས་སོ། །དེ་ནས་སངས་རྒྱས་འོད་སྲུངསས་ཝཱ་ར་ཎཱ་སཱིར་མྱ་ངན་ལས་འདས་པ་ན་དེ་དག་ལ་ལྷ་རྣམས་ཀྱིས་སྨྲས་པ། སངས་རྒྱས་འོད་སྲུངས་མྱང་ངན་ལས་འདས་ནས་ཞག་བདུན་ལོན་ཏེ་དེའི་བསྟན་པའང་ནུབ་ན། ཁྱེད་ཅག་འབྲས་བུ་མེད་པའི་སྦུན་པ་འདྲུ་འདྲ་ཞིང་འདུག་པས་ཅི་རུང་ཞེས་ཟེར་བ་ཐོས་ནས། ལྔ་ནི་དེ་མ་ཐག་ཏུ་རི་བོ་རིལ་བའི་དབྱིབས་ལས་བབས་ནས་ཝཱ་ར་ཎཱ་སཱིར་སོང༌། དྲུག་གིས་དེ་ཉིད་དུ་བརྩོན་འགྲུས་བརྩམས་ནས་རང་བྱང་ཆུབ་མངོན་དུ་བྱས། ཕྱི་ནས་ལྔའང་བབས་ནས་ཝཱ་ར་ཎཱ་སཱིར་ཆས་པ་ན། ཚོང་པ་དག་འགྲོ་བ་ལས་གཅིག་གིས་གླང་ཉམ་ཆུང་བས་འགྲོ་མི་ནུས་བཞིན་དུ་ལྕག་གིས་གཞུས་ནས་སྣ་ལ་འགྲོ་བ་དང༌། དེ་ལ་དགེ་སློང་དེ་རྣམས་ཀྱིས། ཁྱོད་ཀྱི་གླང་ཉམ་ཆུང་བ་འདི་འགྲོ་མི་ནུས་ན། དལ་བུས་འགྲོར་ཆུག་ལ་ཕྱི་ནས་སོང་ཞིག །དེས་སྨྲས་པ། དེ་ལྟར་བྱས་ན་ཚོང་པ་འདི་དག་གིས་བདག་བོར་ནས་འགྲོ་བར་འགྱུར་རོ། །དེ་རྣམས་མ་དགའ་ནས་གཅིག་ལ་གཅིག་སྨྲས་པ། སངས་རྒྱས་འོད་སྲུངས་མྱ་ངན་ལས་འདས་ནས་བདག་ཅག་ལུས་ན། འདིས་ཀྱང་སྐུལ་མ་བཏབ་ཀྱིས། བདག་ཅག་གིས་བརྩོན་འགྲུས་བརྩམ་པར་བྱའོ་ཞེས་སྨྲས་ནས་ཚིགས་སུ་བཅད་པ། ཐུབ་པ་ཆེན་པོ་འོད་སྲུངས་ཀྱི། །གལ་ཏེ་ཆོས་ནི་ནུབ་གྱུར་ཀྱང༌། །ཡང་དག་སངས་རྒྱས་ཀྱིས་བཤད་པའི། །བརྩོན་འགྲུས་དོར་བར་མི་བྱའོ། །བདག་ཅག་གི་ནི་ཟག་པ་ཡང༌། །གལ་ཏེ་ཟད་པར་མ་གྱུར་ན། །ཤཱཀྱ་སེངྒེ་སྐྱོབ་པ་ཡི། །ཉན་ཐོས་མཆོག་ཏུ་འགྱུར་བར་བྱ། །དེ་རྣམས་སླར་ཡང་རི་བོ་རིལ་བའི་དབྱིབས་ལ་གནས་པ་ལས། བཞི་ཤི་ནས་གཅིག་ལུས་པ་དེ་མི་དགའ་ཞིང་ཡིད་བྱུང་བས་བརྗོད་པ། བདག་གིས་སངས་རྒྱས་འོད་སྲུངས་ལ་བསྙེན་བཀུར་ཞིང་དེའི་དགེ་སློང་ཉི་ཁྲིའང་མཐོང་ན། བདག་གཅིག་པུ་འཛམ་བུ་གླིང་ན་སྣམ་སྦྱར་གྱི་རྒྱལ་མཚན་འཛིན་པ་ལྟ་སྙམ་ནས་སྨོན་ལམ་བཏབ་པ། བདག་གིས་སངས་རྒྱས་འོད་སྲུངས་ལས་ཇི་སྲིད་དུ་ཚངས་པར་སྤྱོད་པ་སྤྱད་ཀྱང་ཡོན་ཏན་གྱི་ཚོགས་ཅུང་ཟད་ཀྱང་མ་ཐོབ་ཀྱི། དགེ་བའི་རྩ་བ་འདིས་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་ཐོག་མར་དགྲ་བཅོམ་པ་མངོན་སུམ་དུ་བྱས་པ་ན་བཅོམ་ལྡན་འདས་ཤཱཀྱ་ཐུབ་པས་བདག་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་སྨོན་ལམ་འདེབས་པའི་དགེ་སློང་དེ་ནི་ཀུན་ཤེས་ཀོའུ་དི་ནྱ་འདི་ཉིད་ཡིན་ཏེ། སྨོན་ལམ་གྱི་དབང་གིས་ད་ལྟར་ངས་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་ལུང་བསྟན་ཏོ། །ཅིའི་ཕྱིར་བཅོམ་ལྡན་འདས་ཀྱིས་ཀོའུ་དི་ནྱ་ལ་ཆོས་གསུངས་ནས། (༥བ)ཀོའུ་དི་ནྱ། ཁྱོད་ཀྱིས་ཆོས་ཀུན་ཤེས་སམ་ཞེས་ཡང་དང་ཡང་དྲིས་ཏེ། དེས་ཀྱང་ཀུན་འཚལ་ལོ་ཞེས་གསོལ་ལགས། བཀའ་སྩལ་པ། སྔོན་ཝཱ་ར་ཎཱ་སཱིར་རྒྱལ་པོ་ཚངས་བྱིན་ཞེས་བྱ་བ་ཞིག་བྱུང་སྟེ། དེའི་བཙུན་མོ་སེམས་ཅན་དང་ལྡན་པར་གྱུར། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་གཟུགས་བཟང་ཞིང་མཛེས་པ། བལྟ་ན་སྡུག་པ། ཡན་ལག་གི་མཆོག་ཐམས་ཅད་དང་ལྡན་པ་ཞིག་བཙས་ནས་བཙས་སྟོན་རྒྱ་ཆེར་བྱས་ཏེ་མིང་འདོགས་པ་ན། ཀ་ཤི་མཛེས་དགའ་ཞེས་བཏགས་སོ། །དེ་མ་མ་བརྒྱད་ལ་གཏད་ནས་རྫིང་གི་པདྨ་བཞིན་དུ་མྱུར་དུ་བསྐྱེད་དོ། །
ཡང་དེའི་བཙུན་མོ་ལ་ཁྱེའུ་ཞིག་བཙས་ལ། དེའི་ཉིན་མོ་ཝཱ་ར་ཎཱ་སཱིར་འཐབ་མོ་ཆེན་པོ་བྱུང་བས་དེའི་མིང་འཐབ་མོ་སྐྱེས་ཞེས་བཏགས་སོ། །ཀ་ཤི་མཛེས་དགས་རྒྱལ་པོ་ཚངས་བྱིན་ཆོས་དང་ཆོས་མ་ཡིན་པས་རྒྱལ་སྲིད་བྱེད་པ་མཐོང་ནས། བདག་ཀྱང་ཡབ་འདས་ཏེ་ཆོས་དང་ཆོས་མ་ཡིན་པས་རྒྱལ་སྲིད་བྱས་ནས་དམྱལ་བར་གཞོལ་ན་མི་རུང་གིས། རབ་ཏུ་འབྱུང་ངོ་སྙམ་ནས་ཡབ་ལ་ཞུས་པས། གང་གི་དོན་དུ་མཆོད་སྦྱིན་དང་སྦྱིན་སྲེག་དང་དཀའ་ཐུབ་བྱེད་པའི་རྒྱལ་སྲིད་ལག་ཏུ་འོངས་ན། ཅིའི་ཕྱིར་དེ་སྤངས་ནས་རབ་ཏུ་འབྱུང༌། དེས་སྨྲས་པ། ནགས་ན་ཤིང་ཤུན་རྩྭ་གྱོན་ཞིང༌། །རྩ་བ་འབྲས་བུ་འཆའ་བ་དང༌། །རི་དྭགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་རོལ་འཇིག་བྱེད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་བཅིང་དང་རྡེག་པ་དག །བགྱིད་པ་དེ་ལྟ་མ་ལགས་སོ། །རྒྱལ་པོས་སྨྲས་པ། ཁྱོད་ངའི་བུ་གཅིག་པ་སྡུག་པ་ཡིད་དུ་འོང་བ་ཡིན་པས། ང་ཤི་ན་མི་འདོད་བཞིན་དུ་འབྲལ་གྱི། གསོན་བཞིན་དུ་ག་ལ་གཏང་། ཀ་ཤི་མཛེས་དགས་སྨྲས་པ། གནང་ན་ལེགས། མི་གནང་ན་འཚལ་མ་མི་འཚལ་ལོ་ཞེས་ཞག་གཅིག་ནས་དྲུག་གི་བར་དུ་ཟན་བཅད་དོ། །རྒྱལ་པོས་སྨྲས་པ། ཚངས་པར་སྤྱོད་པ་སྤྱད་དཀའ་འོ། །རབ་ཏུ་དབེན་པ་བྱ་དཀའ་འོ། །གཅིག་པུ་ཉིད་ལ་མངོན་པར་དགའ་བ་བྱ་དཀའ་འོ། །གནས་མལ་དགོན་པ་དང༌། །བས་མཐར་གནས་པ་དཀའ་འོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཇི་སྲིད་འཚོའི་བར་དུ་རི་དྭགས་གདུག་པ་རྣམས་དང་ལྷན་ཅིག་གནས་དགོས་སོ། །ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་དགོས་སོ། །མིའི་འདོད་པ་དག་ལས་དབེན་པར་བྱ་དགོས་སོ། །མིའི་དགའ་བ་དང༌། རྩེད་མོ་དག་ལས་དབེན་པར་བྱ་དགོས་སོ། །ཚུར་ཤོག །འདི་ཉིད་དུ་འདུག་ལ། རྒྱལ་ཚབ་གྱིས་ལ་འདོད་པ་ལའང་སྤྱོད། སྦྱིན་པ་དག་ཀྱང་བྱིན། བསོད་ནམས་དག་ཀྱང་བྱོས་ཤིག །གཞོན་ནུ་ཅི་ཡང་མི་སྨྲའོ། །བཙུན་མོ་དང༌། བློན་པོ་དང༌། གཞོན་ནུ་དང་ལྷན་ཅིག་རྩེ་བའི་བློན་པོའི་བུ་ལ་སོགས་པས་ཀྱང་དེ་བཞིན་དུ་བྱས་ཀྱང་ཅང་མི་སྨྲའོ། །དེ་ནས་བློན་པོའི་བུ་ལ་སོགས་པས་(༦ན)རྒྱལ་པོ་ལ། ལྷ། མཁྱེན་པར་མཛོད་ཅིག །གཞོན་ནུ་གུམ་ན་ཅི་རུང༌། རབ་ཏུ་བྱུང་བ་ནི་མཁས་པས་བསྔགས་པ་ལགས་ཏེ། དེ་ལ་མངོན་པར་དགའ་བར་གྱུར་ན་གསོན་པོར་གཟིགས་པར་འགྱུར་རོ། །གལ་ཏེ་མངོན་པར་མི་དགའ་ནས་སླར་ལོག་ནའང་བུའི་གནས་ནི་ཕ་མ་ཡིན་པས་འདི་ཉིད་དུ་མཆི་བར་འགྱུར་རོ། །རྒྱལ་པོས་སྨྲས་པ། འོ་ན་གནང་ངོ༌། །དེ་ནས་དེ་དག་གིས་གཞོན་ནུ་ལ། རབ་ཏུ་འབྱུང་བར་གནང་གིས་མཁྱེན་པར་མཛོད་ཅིག །དེ་ནས་གཞོན་ནུ་རིམ་གྱིས་ལུས་ཀྱི་མཐུ་སྟོབས་བསྐྱེད་དེ། དྲང་སྲོང་རྣམས་ཀྱི་ནང་དུ་རབ་ཏུ་བྱུང་ངོ༌། །དེས་འབད་པས་འདོད་ཆགས་དང་བྲལ་ནས། བྱམས་པ་དང་བརྩེ་བ་དང་ལྡན་པས་རི་དྭགས་གདུག་པ་རྣམས་ཀྱང་འདྲིས་ཏེ་གནོད་པ་མི་བྱེད་པས་དེའི་མིང་བཟོད་པ་སྨྲ་བ་ཞེས་བྱ་བར་བཏགས་སོ། །
དུས་གཞན་ཞིག་ན་རྒྱལ་པོ་ཚངས་བྱིན་ཤི་ནས་འཐབ་མོ་སྐྱེས་རྒྱལ་སྲིད་ལ་བཞག་གོ །བཟོད་པ་སྨྲ་བས་མཁན་པོ་ལ། བདག་གི་ལུས་འདི་ཟས་དང་བཏུང་བས་བསྐྱེད་པས་དགོན་པའི་སྨན་གྱིས་འཚོ་མི་ནུས་ཀྱིས། གྲོང་མཐར་གནས་སོ་ཞེས་གནང་བ་ཞུས་ནས། རིམ་གྱིས་ཕའི་སྐྱེད་མོས་ཚལ་དུ་སོང་སྟེ། དེར་ཞི་བའི་ཕྱོགས་ཤིག་མཐོང་ནས་དེ་ན་གནས་སོ། །དེ་ནས་རྒྱལ་པོ་འཐབ་མོ་སྐྱེས། སོས་ཀའི་དུས་ལ་བབ་པ་ན་མེ་ཏོག་གི་ཤིང་རྣམས་ཁ་འབུས་ཤིང༌། ངང་པ་དང༌། ཁྲུང་ཁྲུང་དང༌། རྨ་བྱ་དང༌། ནེ་ཙོ་དང༌། རི་སྐེགས་དང༌། ཁུ་བྱུག་དང༌། ཤང་ཤང་ཏེའུ་རྣམས་སྐད་འབྱིན་པའི་སྐྱེད་མོས་ཚལ་དེར་བཙུན་མོ་དང་ལྷན་ཅིག་དོང་སྟེ། སྐྱེད་མོས་ཚལ་གྱི་བདེ་བ་མྱོང་བས་དུབ་ནས་གཉིད་ལོག་ལ། བུད་མེད་ནི་མེ་ཏོག་དང་འབྲས་བུ་ལ་དགའ་བ་ཡིན་པས་སྐྱེད་མོས་ཚལ་དེ་ཉིད་དུ་བརྒྱུས་བརྒྱུགས་པ་ལ། དྲང་སྲོང་བཟོད་པ་སྨྲ་བ་སྤྱོད་ལམ་ཞི་བས་འདུག་པ་མཐོང་ནས། ཕྱག་བྱས་ཏེ་བསྐོར་ནས་འཁོད་དོ། །དེས་ཀྱང་བུད་མེད་དེ་རྣམས་ལ་སྤྱོད་ལམ་ཞི་བས་ཆོས་བཤད་དོ། །དེ་ནས་རྒྱལ་པོ་འཐབ་མོ་སྐྱེས་གཉིད་སད་པ་ན། བཙུན་མོ་རྣམས་མ་མཐོང་བས། རལ་གྲི་བླངས་ཏེ་བཙལ་བ་དང༌། དྲང་སྲོང་བཟོད་པ་སྨྲ་བའི་དྲུང་ན་འཁོད་པ་མཐོང་ནས་ཁྲོ་བའི་ཀུན་ནས་དཀྲིས་པས་དྲང་སྲོང་དེའི་དྲུང་དུ་སོང་བ་དང༌། རྒྱལ་པོ་ཁྲོས་པ་མཐོང་ནས་བཙུན་མོ་རྣམས་སྐྲག་སྟེ་བྲོས་སོ། །རྒྱལ་པོས་སྨྲས་པ། ཁྱོད་སུ་ཡིན། བདག་བཟོད་པ་སྨྲ་བའོ། །ཁྱོད་བཟོད་པ་སྨྲ་བ་ཡིན་ནམ་མ་ཡིན་བལྟའོ་ཞེས་དེའི་ལག་པ་གཉིས་བཅད་ནས་ཡང་དྲིས་པ། ཁྱོད་སུ་ཡིན། བདག་བཟོད་པ་སྨྲ་བའོ། །དེས་དེའི་རྐང་པ་བཅད་ཅིང་ཡན་ལག་དང་ཉིང་ལག་ཐམས་ཅད་བཅད་དོ། །དེས་སྨྲས་པ། གལ་ཏེ་བདག་གི་ལུས་ལ་ནི། །ཏིལ་འབྲུ་ཙམ་དུ་གཏུབ་པ་ཡིས། །ལུས་ནི་ཕྱེ་མ་བརྒྱར་གཏུབས་ནས། །ས་ལ་གཏོར་ཀྱང་བཟོད་མི་སྤོང༌། །ཞེས་སོགས་སྨྲས་ནས་སྨོན་ལམ་བཏབ་པ། རྒྱལ་པོ་འདིས་བདག་ལ་ཡང་དང་ཡང་(༦བ)དུ་དྲིས་ནས་ཡན་ལག་དང་ཉིང་ལག་བཅད་པ་དེ་བཞིན་དུ་བདག་བཟོད་པ་དང་ངེས་པར་གྱུར་པའི་དགེ་བའི་རྩ་བ་འདིས། སངས་རྒྱས་པ་ན་དེ་ལ་ཡང་དང་ཡང་དུ་དྲིས་ནས་ཤེས་རབ་ཀྱི་རལ་གྲིས་ཐོག་མར་དེའི་ཉོན་མོངས་པ་གཅོད་པར་གྱུར་ཅིག །དེ་ནས་བཟོད་པ་སྨྲ་བ་ལ་མངོན་པར་དད་པའི་ལྷ་ཞིག་གིས། རྒྱལ་པོ་སྡིག་ཅན་འདིས་དྲོང་སྲོང་ཉེས་པ་མེད་པར་རྐང་ལག་བཅད་ཀྱིས། བདག་གིས་ཀྱང་འདི་ལ་གནོད་པ་བྱའོ་སྙམ་ནས་ཡམས་ནད་བཏང་ཞིང་ཆར་མ་ཕབ་པས་སྐྱེ་བོའི་ཚོགས་རྣམས་ཤི་བ་དང༌། རྒྱལ་པོས་ལྟས་མཁས་རྣམས་ལ་སྨྲས་པ། ཅིའི་ཕྱིར་འདི་ལྟར་གྱུར། ལྷ། བཟོད་པ་སྨྲ་བ་ལ་དད་པའི་ལྷ་དེ་འཁྲུགས་ནས་དེ་ལྟར་བྱས་སོ། །དེ་ལ་ད་ཇི་ལྟར་བྱ། ལྷ། གཏོར་མ་དང༌། མེ་ཏོག་གི་ཕྲེང་བ་དང༌། ཡོ་བྱད་རྣམས་སྦྱར་ནས། ལྷ་དང༌། དྲང་སྲོང་ལ་བཟོད་པར་གསོལ་བར་བགྱིའོ། །དེ་ནས་གཏོར་མ་ལ་སོགས་པ་ལྟ་གོན་བྱས་ཏེ། རྒྱལ་པོ་དང་བཙུན་མོ་དང་བཅས་པ་སྐྱེད་མོས་ཚལ་དེར་སོང་ནས་ལྷ་དེ་ལ་བཟོད་པར་གསོལ་ཞིང༌། དྲང་སྲོང་དེའི་རྐང་པ་ལ་གཏུགས་ཏེ། དྲང་སྲོང་ཆེན་པོ། བདག་གིས་ཁྲོ་བའི་ཀུན་ནས་དཀྲིས་པས་ཁྱོད་ལ་གནོད་པ་བགྱིས་པ་བཟོད་པར་གསོལ་ལོ། །དེས་སྨྲས་པ། རྒྱལ་པོ་ཆེན་པོ་བཟོད་དོ། །སུས་འཚལ། དེས་སྨྲས་པ། ལུས་ལ་མཚོན་གྱིས་འདེབས་པ་ནའང༌། །བདག་ནི་སེམས་ཅན་ཀུན་ལ་བྱམས། །གལ་ཏེ་ཁྱོད་ཡིད་མ་ཆེས་ན། །བདག་གི་ཁྲག་འཛག་པ་ལ་ལྟོས། །དེའི་ཁྲག་འོ་མའི་ཐིགས་པར་འཛག་པའི་ཆོ་འཕྲུལ་བསྟན་ཀྱང༌། ཡིད་མ་ཆེས་པར། དྲང་སྲོང་ཆེན་པོ། བཟོད་པར་གསོལ་ལོ། །རྒྱལ་པོ་ཆེན་པོ། བཟོད་དོ། །སུས་འཚལ། དེ་ནས་དྲང་སྲོང་གིས་ཡན་ལག་དང་ཉིང་ལག་བཅད་པ་རྣམས་གནས་ཇི་ལྟ་བ་བཞིན་བཞག་ནས། རྒྱལ་པོ་ཁྱོད་ཀྱིས་བདག་གི་ལུས། །གཏུབས་ཀྱང་ཤིན་ཏུ་ཕྲ་བ་ཡི། །ཞེ་སྡང་འདི་ལྟར་ཡོད་མིན་ན། །བདག་ལུས་ཇི་ལྟར་སྔོན་བཞིན་ཤོག །ཅེས་བདེན་པའི་ཚིག་སྨྲས་པས་ལུས་སྔོན་བཞིན་དུ་གྱུར་པ་དང་རྒྱལ་པོ་ཡ་མཚན་གྱིས་མིག་ཕྱེ་ནས་སྨྲས་པ། ཀྱེ་མའོ་ཆོས་ལ་ལེགས་གནས་པས། །ཀྱེ་མ་བརྟུལ་ཞུགས་འདི་གྲུབ་སྟེ། །ལུས་ལ་གཏུབ་པར་བྱེད་པ་ནའང༌། །ཁྱོད་ལ་མི་དགའ་ཅི་ཡང་མེད། །རྒྱལ་པོ་འཁོར་བཅས་དྲང་སྲོང་དེའི་རྐང་པ་ལ་ཕྱག་བཙལ་ནས་སོང་ངོ༌། །དགེ་སློང་དག །དེའི་དུས་ཀྱི་དྲང་སྲོང་དེ་ནི་ང་ཡིན་ནོ། །རྒྱལ་པོ་འཐབ་མོ་སྐྱེས་གང་ཡིན་པ་དེ་ནི་ཀོའུ་དི་ནྱ་ཡིན་ཏེ། ངས་དེ་ལ་བྱམས་པའི་སེམས་ཀྱིས། དགེ་བའི་རྩ་བ་འདིས། བདག་གིས་དེ་ལ་ཡང་དང་ཡང་དུ་དྲིས་ནས། ཉོན་མོངས་པ་གཅོད་པར་གྱུར་ཅིག་ཅེས་སྨོན་ལམ་བཏབ་པའི་དབང་གིས་ད་ལྟར་ངས་དེ་ལ་ཆོས་བཤད་ནས་ཡང་དང་ཡང་དུ་དྲིས་སོ། །དགེ་སློང་རྣམས་ཀྱིས་ཞུས་པ། བཅོམ་ལྡན་འདས་ཀྱིས་ལྷ་བརྒྱད་ཁྲི་ཆོས་ཀྱི་རོས་ཡང་དག་པར་བསྡུས་ནས་བདེན་པ་ལ་བཀོད་པ་ལ་གཟིགས། དགེ་སློང་(༧ན)དག །ད་ལྟར་གྱི་འདི་འབའ་ཞིག་ཏུ་མ་ཟད་ཀྱི། འདས་པའི་དུས་ནའང་འདི་རྣམས་ཟང་ཟིང་གིས་བསྡུས་ནས་བརྟུལ་ཞུགས་ལྔའི་གཞི་ལ་བཀོད་པ་དེ་ཉོན་ཅིག །སྔོན་དེད་དཔོན་ཐམས་ཅད་སྐྱོབ་དང༌། ལེགས་གྲུབ་ཅེས་བྱ་བ་རེ་རེ་ལའང་ཚོང་པའི་འཁོར་བཞི་ཁྲི་པཞི་ཁྲི་ཡོད་པ་གཉིས་ཤིག་བྱུང་སྟེ། དེར་ལེགས་གྲུབ་དྲང་སྲོང་རྣམས་ཀྱི་དྲུང་དུ་རབ་ཏུ་བྱུང་ནས་བརྩོན་འགྲུས་བརྩམས་པས་རང་བྱང་ཆུབ་མངོན་དུ་བྱས་སོ། །དེའི་འཁོར་ཚོང་པ་རྣམས་ཀྱིས་དེད་དཔོན་བཙལ་ཡང་རྣམ་པ་ཐམས་ཅད་དུ་མ་རྙེད་པར་ཐམས་ཅད་སྐྱོབ་ཀྱི་དྲུང་དུ་ཕྱིན་ནས་སྨྲས་པ། དེད་དཔོན་དེས་བདག་ཅག་ལ་མ་བལྟས་པར་སོང་སྟེ། བཙལ་ཡང་མ་རྙེད་ན་ཇི་ལྟར་བྱ། དེས་སྨྲས་པ། ཡིད་མ་བློང་བར་འཁོད་ཅིག །དེ་བཙལ་ལོ། །
དེ་ནས་ཐམས་ཅད་སྐྱོབ་ཚོང་པ་བརྒྱད་ཁྲིས་བསྐོར་ནས་སྐྱེད་མོས་ཚལ་དང༌། འདུག་གནས་དང༌། དཀའ་ཐུབ་ཀྱི་ནགས་རྣམས་སུ་ལེགས་གྲུབ་བཙལ་བ་ན། དེས་དེ་མཐོང་ནས་དྲིས་པ། ཅིའི་ཕྱིར་ཚོང་པ་རྣམས་སྤངས་ནས་རབ་ཏུ་བྱུང༌། བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་འཆད་ཀྱི་ངག་གིས་མ་ཡིན་པས་དེད་དཔོན་འཁོར་བཅས་ལ་ཆོ་འཕྲུལ་བསྟན་ནས་དད་པར་བྱས་སོ། །དེ་ནས་དེད་དཔོན་གྱིས་ཚོང་པ་བརྒྱད་ཁྲི་པོ་དེ་དག་ཟང་ཟིང་གིས་བསྡུས་ནས། འདི་ལ་བྱ་བ་བྱོས་ཤིག །གདོན་མི་ཟ་བར་འབྲས་བུ་སྨིན་པར་འགྱུར་རོ། །དེ་རྣམས་ཀྱིས་ཀྱང་དེ་ལ་བྱ་བ་བྱས་སོ། །དགེ་སློང་དག །དེའི་དུས་ཀྱི་ཐམས་ཅད་སྐྱོབ་དེ་ནི་ང་ཡིན་ནོ། །ཚོང་པ་བརྒྱད་ཁྲི་པོ་དེ་དག་ནི་ལྷ་བརྒྱད་ཁྲི་པོ་འདི་དག་ཡིན་ཏེ། དེའི་དུས་ན་ངས་ཟང་ཟིང་གིས་བསྡུས་ནས་བརྟུལ་ཞུགས་ལྔའི་གཞི་ལ་བཀོད་ལ། ད་ལྟར་ངས་ཆོས་ཀྱི་རོས་ཡང་དག་པར་བསྡུས་ནས་བདེན་པ་ལ་བཀོད་དོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཅོམ་ལྡན་འདས་ཀྱིས་ལྡ་སྟེ་འཁོར་བའི་འབྲོག་དགོན་པ་ནས་བཏོན་ཏེ་དམ་པའི་ཆོས་ཀྱི་རོས་ཚིམ་པར་མཛད་པ་ལ་གཟིགས། བཀའ་སྩལ་པ། དགེ་སློང་དག །ང་ད་ལྟ་སྐྱོན་ཐམས་ཅད་སྤངས། ཐམས་ཅད་མཁྱེན་པ་བརྙེས་ནས་དེ་ལྟར་མཛད་པ་ངོ་མཚར་ཅི་ཆེ། ང་སྔོན་དུག་གསུམ་ལས་མ་གྲོལ་བའི་ཚེ། དེད་དཔོན་དུ་གྱུར་པ་ན་ལྔ་སྡེ་ཆུ་མེད་པའི་འབྲོག་དགོན་པར་སྐོམ་པས་ཉམ་ཐག་པ་ན་ཆུས་ཚིམ་པར་བྱས་པ་དེ་ཉོན་ཅིག །སྔོན་དེད་དཔོན་ཐམས་ཅད་སྐྱོབ་ཅེས་བྱ་བ་ཚོང་པ་ལྔ་བརྒྱ་དང་ལྷན་ཅིག་ཏུ་འབྲོག་དགོན་པའི་ལམ་ཆུ་ཆུང་བ་ཞིག་ཏུ་ཞུགས་ནས་རིམ་གྱིས་འབིགས་བྱེད་ཅེས་བྱ་བའི་དགོན་པར་ཕྱིན་པར་དང༌། ཚོང་པ་རྣམས་ཆུ་དང་བྲལ་ཡང་སོང་བ་ལས་ཚོང་པ་ལྔ་ཆུ་མ་རྙེད་པས་ལྷག་པར་ཡང་ཡིད་བློང་བར་གྱུར་པ་དེད་དཔོན་གྱིས་མཐོང་ནས་སྙིང་རྗེའི་སེམས་བསྐྱེད་པས་ཁ་གྱེན་དུ་བལྟས་ཏེ། ཞི་བ་དང༌། ཆུ་ལྷ་དང༌། ལུས་ངན་དང༌། ཁྱབ་འཇུག་ལ་སོགས་པའི་ལྷ་ཤེས་ལྡན་དག་གསོན་ཅིག །བདག་སེམས་ཅན་རྣམས་ལ་མཉམ་(༧བ)སེམས་པའི་བདེན་པ་དང་། བདེན་པའི་ཚིག་འདིས། དབང་ཕྱུག་ཆེན་པོའི་ལྷས་ཆར་འབེབས་པར་གྱུར་ཅིག །ཅེས་སྨྲས་པས་དབང་ཕྱུག་ཆེན་པོའི་གནས་གཡོས་པ་དང༌། བརྒྱ་བྱིན་གྱི་ཤེས་པ་ནི་འོག་ཏུ་འཇུག་པ་ཡིན་པས། སུ་ཞིག་གིས་དབང་ཕྱུག་ཆེན་པོའི་གནས་གཡོས་པར་བྱས་བསམས་པ་ན་བྱང་ཆུབ་སེམས་དཔའི་མཐུ་ཡིན་པར་ཤེས་ནས་ཆར་ཕབ། ཚོང་པ་རྣམས་ཚིམ་པར་བྱས་ཏེ་འབྲོག་དགོན་པའི་ལམ་ནས་བསྒྲལ་ཏོ། །དེའི་དུས་ཀྱི་དེད་དཔོན་ཐམས་ཅད་སྐྱོབ་དེ་ནི་ང་ཡིན་ནོ། །ཆུ་དང་བྲལ་བའི་ཚོང་པ་ལྔ་པོ་དེ་ནི་ལྔ་སྡེ་ཡིན་ཏེ། དེའི་དུས་སུ་ངས་ཆུས་ཚིམ་པར་བྱས་ནས་འབྲོག་དགོན་པ་ལས་བསྒྲལ། ད་ལྟར་ངས་དམ་པའི་ཆོས་ཀྱི་རོས་ཚིམ་པར་བྱས་ནས་འཁོར་བའི་འབྲོག་དགོན་པ་ལས་བསྒྲལ་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཅོམ་ལྡན་འདས་ཀྱིས་ལྔ་སྡེ་འཁོར་བའི་འབྲོག་དགོན་པ་ནས་བཏོན་ཏེ་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་གི་རིན་པོ་ཆེའི་བགོ་བཤའ་མཛད་པ་ལ་གཟིགས། བཀའ་སྩལ་པ། ང་སྐྱོན་ཐམས་ཅད་ལས་གྲོལ་ནས་ཐམས་ཅད་མཁྱེན་པ་བརྙེས་ཏེ་དེ་ལྟར་མཛད་པ་ངོ་མཚར་ཅི་ཆེ། ང་སྔོན་སྐྱོན་ལས་མ་གྲོལ་བཞིན་དུ་རང་གི་སྲོག་བཏང་ནས་འདི་དག་རྒྱ་མཚོ་ཆེན་པོ་ནས་བཏོན་ཏེ་རིན་པོ་ཆེ་བགོ་བཤའ་མཛད་པ་དེ་ཉོན་ཅིག །སྔོན་དེད་དཔོན་ནོར་གྱི་ཤིང་རྟ་ཞེས་བྱ་བ་ཞིག་བྱུང་སྟེ། དེ་ཚོང་པ་ལྔ་དང་ལྷན་ཅིག་རྒྱ་མཚོ་ཆེན་པོར་དོང་བ་ན་དེ་རྣམས་དེད་དཔོན་གྱི་བཤེས་པའི་གཏམ་གྱིས་ཕན་ཚུན་མཛའ་བར་གྱུར་ཏོ། །རྒྱ་མཚོའི་འགྲམ་དུ་ཕྱིན་ནས་གྲུ་སོ་སོར་སྟ་གོན་བྱས་ཏེ། འཇུག་པར་ཆས་པའི་ཚེ་དེ་རྣམས་ཀྱིས་དེད་དཔོན་ལ་སྨྲས་པ། བདག་ཅག་ཁྱོད་དང་བྲལ་ན་མི་དགའ་འོ། །དེ་ལྟར་ན་འདིར་ཞུགས་ཤིག །དེ་རྣམས་དེར་ཞུགས་པ་དང་རླུང་ལངས་ནས་སྐྲག་པར་གྱུར་ཏོ། །དེད་དཔོན་གྱིས་སྨྲས་པ། མ་འཇིགས་ཤིག །གྲུ་ཞིག་པའི་ཚེ་བདག་གི་མགུལ་དུ་འཇུས་ཤིག་དང་ཁྱེད་རྣམས་གདོན་ནོ། །དེད་དཔོན་དེས་རིན་པོ་ཆེ་ཆེན་པོ་ལ་འོས་པ་དག་མཆན་ཁུང་དུ་བཏགས་ནས། གྲུ་ཞིག་པ་ན་དེ་རྣམས་དེད་དཔོན་གྱིས་མགུལ་དུ་འཇུས་པས་རྒྱ་མཚོའི་འགྲམ་དུ་ཕྱིན་ཏོ། །དེ་རྣམས་སྐམ་ལ་ཕྱིན་ནས་དེ་བཏང་བ་དང༌། དེ་དབུགས་ཆད་ནས་ཤིའོ། །དེའི་མཆན་ཁུང་ན་རིན་པོ་ཆེ་ཆེན་པོ་ལ་འོས་པ་དག་མཐོང་ནས་དེ་རྣམས་ཀྱིས་ཁྱེར་རོ། །དེའི་དུས་ཀྱི་དེད་དཔོན་ནོར་གྱི་ཤིང་རྟ་དེ་ནི་ང་ཡིན་ནོ། །ཚོང་པ་ལྔ་པོ་དེ་ནི་ལྔ་སྡེ་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཅོམ་ལྡན་འདས་ཀྱིས་ཀོའུ་དི་ནྱ་ལ་བརྟེན་ནས་ལྷ་བརྒྱད་ཁྲི་དམ་པའི་ཆོས་ཀྱི་རོས་ཚིམ་པར་མཛད་པ་ལ་གཟིགས། བཀའ་སྩལ་པ། ང་སྐྱོན་ཐམས་ཅད་ལས་གྲོལ་ནས་ཐམས་ཅད་མཁྱེན་པ་བརྙེས་ཏེ་དེ་ལྟར་མཛད་པ་ངོ་མཚར་ཅི་ཆེ། སྔོན་དུད་འགྲོའི་ལུས་སུ་སྐྱེས་པ་ན། ཀོའུ་དི་ནྱ་ལ་བརྟེན་ནས་འདི་རྣམས་རང་གི་ཤས་ཚིམ་པར་བྱས་པ་ཉོན་ཅིག །སྔོན་བྱང་ཆུབ་སེམས་དཔའ་མ་ངེས་པའི་ཕུང་པོ་(༨ན)ལ་གནས་ཏེ་རྒྱ་མཚོ་ཆེན་པོར་རུས་སྦལ་གྱི་གཙོ་བོར་གྱུར་ཏོ། །
ཇི་ཙམ་ན་ཚོང་པ་ལྔ་བརྒྱ་གྲུ་བོ་ཆེ་བསྒྲུབས་ནས་རྒྱ་མཚོར་ཞུགས་པ་རིན་པོ་ཆེ་སྣ་ཚོགས་བླངས་ནས་སླར་ལོག་པ་ལས་ཆུ་སྲིན་ཉའི་རིགས་ཅན་གྱིས་གྲུ་བོ་ཆེ་ཕུག་སྟེ་ཀུ་ཅོ་ཆེན་པོ་བྱུང་བའི་སྒྲ་རུས་སྦལ་དེས་ཐོས་ནས་དེ་རྣམས་ལ་སྨྲས་པ། བག་ཚ་བ་བོར་ལ་ཁོ་བོའི་རྒྱབ་ཏུ་ཞོན་ཅིག་དང་ཁོ་བོས་བསྒྲལ་བར་བྱའོ། །དེ་ནས་ཚོང་པ་རྣམས་ཤི་བ་སོས་པ་ལྟར་ཐམས་ཅད་རུས་སྦལ་གྱི་རྒྱབ་ཏུ་ཞོན་ཏེ་རྒྱ་མཚོའི་འགྲམ་དུ་ཕྱིན་པ་ན། དེ་ལུས་དུབ་པས་མགྲིན་པ་བརྐྱངས་ནས་གཉིད་ལོག་གོ །དེ་དང་ཧ་ཅང་མི་རིང་བ་ན་སྲིན་བུ་ཀི་ཏ་ཀའི་ཚང་ཡོད་པས། དེ་ནས་ཀི་ཏ་ཀ་ཞིག་རྒྱུ་ཞིང་སོང་བ་ན་དྲི་ཚོར་ཏེ་དེའི་དྲུང་དུ་སོང་བ་དང༌། ལུས་ཆེན་པོ་དེ་གཉིད་ལོག་པར་མཐོང་ནས་རིངས་པར་སྲིན་བུ་ཀི་ཏ་ཀའི་ཚང་དུ་སོང་སྟེ། ཀི་ཏ་ཀ་རྣམས་ལ་གོ་བར་བྱས་ནས་སྲིན་བུ་ཀི་ཏ་ཀ་བརྒྱད་ཁྲི་དེད་དེ་རུས་སྦལ་གྱི་དྲུང་དུ་སོང་ངོ༌། །དེ་གཉིད་ལོག་སྟེ་ཤི་བ་བཞིན་དུ་གྱུར་པ་ལ་དེའི་ཤ་ཆེན་པོ་ལས་ཟོས་ཀྱང་གཉིད་མཐུག་པོས་ནོན་པས་མ་ཚོར་རོ། །གནད་སར་ཤ་ཟོས་པ་ན་གཉིད་སད་པའི་ཚེ། སྲིན་བུ་ཀི་ཏ་ཀས་ལུས་གཡོགས་པར་མཐོང་ནས་བསམ་པ། ལུས་བསྒུལ་ན་འདི་རྣམས་འཆི་བར་འགྱུར་ཏེ། གཞན་ལ་གནོད་པ་བས་རང་ཉིད་སྲོག་དང་བྲལ་ན་བླའོ་སྙམ་ནས། བདག་གིས་སྲིན་བུ་ཀི་ཏ་ཀ་བརྒྱད་ཁྲི་པོ་རྣམས་ཤ་ཁྲག་གིས་ཚིམ་པར་བྱས་པ་བཞིན་དུ། བདག་སངས་རྒྱས་པ་ན་འདི་རྣམས་ཆོས་ཀྱི་རོས་ཚིམ་པར་བྱེད་པར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་རུས་སྦལ་གྱི་གཙོ་བོ་དེ་ནི་ང་ཡིན་ནོ། །སྲིན་བུ་ཀི་ཏ་ཀ་རྣམས་ལ་ལམ་སྟོན་པ་དེ་ནི་ཀོའུ་དི་ནྱ་ཡིན་ནོ། །སྲིན་བུ་ཀི་ཏ་ཀ་བརྒྱད་ཁྲི་པོ་དེ་རྣམས་ནི་ལྷ་བརྒྱད་ཁྲི་པོ་འདི་དག་ཡིན་ནོ། །
དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཅོམ་ལྡན་འདས་ཀྱིས་ལྔ་སྡེ་དམ་པའི་ཆོས་ཀྱི་རོས་ཚིམ་པར་མཛད་ནས། འཁོར་བའི་འབྲོག་དགོན་པ་ལས་བཏོན་ཏེ་མྱང་འདས་ལ་བཀོད་པ་ལ་གཟིགས། བཀའ་སྩལ་པ། ང་སྐྱོན་ཐམས་ཅད་ལས་གྲོལ་ནས་ཐམས་ཅད་མཁྱེན་པ་བརྙེས་ཏེ་དེ་ལྟར་མཛད་པ་ངོ་མཚར་ཅི་ཆེ། ང་སྐྱོན་ལས་མ་གྲོལ་བཞིན་དུ་འདི་རྣམས་རང་གིས་ཤས་ཚིམ་པར་བྱས་ནས་བརྟུལ་ཞུགས་ལྔའི་གཞི་ལ་བཀོད་པ་ཉོན་ཅིག །སྔོན་ཝཱ་ར་ཎཱ་སཱིར་རྒྱལ་པོ་བྱམས་པའི་སྟོབས་ཞེས་བྱ་བ་སེམས་ཅན་ཐམས་ཅད་ལ་བྱམས་པ་དང་ལྡན་པ་ཞིག་ཡོད་དེ། དུས་གཞན་ཞིག་ན་རྒྱལ་པོ་རྣམ་ཐོས་ཀྱི་བུས། ཕོ་བྲང་ལྕང་ལོ་ཅན་ནས་མདངས་འཕྲོག་པའི་གནོད་སྦྱིན་ལྔ་ཉེས་པ་བྱས་པས་སྤྱུགས་ནས། དེ་རྣམས་རིམ་གྱིས་ཝཱ་ར་ཎཱ་སཱིར་ཕྱིན་པ་ན། སུས་ཀྱང་གཏོར་མ་དང༌། མེ་ཏོག་ཕྲེང་བ་དང༌། ཡོ་བྱད་མ་བྱིན་པས་ཁྲོ་ནས་ཡམས་ནད་བཏང་སྟེ་སྐྱེ་བོའི་ཚོགས་ཤི་བར་གྱུར་ཏོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ། སྐྱེ་བོའི་ཚོགས་གུམ་ལགས་(༨བ)སོ། །དེས་དེ་རྣམས་ལ་སྨྲས་པ། ཁྱེད་རྣམས་དེངས་ལ། རྒྱལ་པོ་བྱམས་པའི་སྟོབས་ཀྱི་བཀས། ང་སེམས་ཅན་ཐམས་ཅད་ལ་ཕན་པའི་བསམ་པ་ལ་བརྩོན་པའི་ཡིད་ཀྱིས་ཉིན་མཚན་འདའ་བར་བྱེད་ཀྱིས། ཁྱེད་ཅག་ཀྱང་སེམས་ཅན་ཐམས་ཅད་ལ་བྱམས་པའི་སེམས་གྱིས་ཤིག་དང༌། དེ་ལྟ་ན་ཞི་བར་འགྱུར་རོ། །དེ་རྣམས་ཀྱིས་བྱམས་པ་བསྒོམས་པས་མདངས་འཕྲོག་པའི་གནོད་སྦྱིན་རྣམས་ཀྱིས་ཝཱ་ར་ཎཱ་སཱིའི་ཉེ་འཁོར་དུ་འཇུག་མ་ནུས་པར་གླགས་མ་རྙེད་དོ། །དེ་ནས་བ་གླང་རྫི་དང༌། ལུག་རྫི་དང༌། རྩྭ་ཐུན་དང༌། ཤིང་ཐུན་དང༌། ལམ་དང་ལམ་གོལ་པས་འཚོ་བའི་མི་རྣམས་མཐོང་ནས། ཁྱེད་ཁོ་བོ་ཅག་གིས་མི་འཇིགས་སམ། །མི་འཇིགས་སོ། །ཅིའི་ཕྱིར། རྒྱལ་པོ་བྱམས་པའི་སྟོབས་དགོངས་པ་དེ་སེམས་པས་སོ། །དེ་ཅི་དགོངས། སེམས་ཅན་ཐམས་ཅད་ལ་བྱམས་པའོ། །དེ་རྣམས་ཀྱིས་བསམས་པ། རྒྱུ་འདིས་བདག་ཅག་གིས་གླགས་མ་རྙེད་དོ་སྙམ་ནས། རྒྱལ་པོ་བྱམས་པའི་སྟོབས་ནམ་ཞིག་མཐོང་སྙམ་མོ། །དུས་གཞན་ཞིག་ན་རྒྱལ་པོ་སྐྱེད་མོས་ཚལ་དུ་ཆས་པ་དང༌། དེ་རྣམས་བྲམ་ཟེའི་ཆ་བྱད་དུ་སྤྲུལ་ནས་སྤྱོད་ལམ་ཞི་བས་རྒྱལ་པོའི་དྲུང་དུ་སོང་སྟེ། རྒྱལ་བ་དང༌། ཚེ་སྤེལ་བ་བྱས་ནས། ལྷ། བདག་ཅག་བཀྲེས་ལགས་ན་ཁ་ཟས་ཀྱིས་རྗེས་སུ་གཟུང་དུ་གསོལ། དེས་བློན་པོ་རྣམས་ལ། བྲམ་ཟེ་འདི་རྣམས་ཁ་ཟས་བསོད་པས་ཚིམ་པར་གྱིས་ཤིག །དེ་རྣམས་ཀྱིས་སྨྲས་པ། ཤ་དང་ཁྲག་འཚལ་ལོ། །རྒྱལ་པོས་བློན་པོ་རྣམས་ལ། ཚོང་འདུས་ནས་ཆོས་བཞིན་གྱིས་རྙེད་པའི་ཤ་དང་ཁྲག་བྱིན་ཅིག །ལྷ། བདག་ཅག་ནི། མོད་ལ་བཀུམ་པའི་ཤ་དང་ཁྲག་འཚལ་བས་དེས་རྗེས་སུ་གཟུང་དུ་གསོལ། རྒྱལ་པོས་བསམས་པ། གཞན་ལ་གནོད་པ་མ་བྱས་པར། མོད་ལ་བསད་པའི་ཤ་དང་ཁྲག་མི་རྙེད་ཀྱིས། འདི་རྣམས་ལ་རང་གི་ཁྲག་སྦྱིན་པར་བྱའོ་སྙམ་ནས་དཔྱད་མཁན་བཀུག་སྟེ། ངའི་ཡན་ལག་གི་རྩ་ཐམས་ཅད་ཆོད་ཅིག་དང༌། སློང་མོ་བའི་སྐྱེ་བོ་ཚིམ་པར་བྱའོ། །ལྷ། མི་ཕལ་པ་རྣམས་ཀྱི་ཕྱིར་ལྷའི་སྐུ་ལ་མཚོན་གྱིས་མི་འདེབས་སོ། །བྱང་ཆུབ་སེམས་དཔའ་ནི་བཟོ་དང་ལས་ཀྱི་གནས་ལ་མཁས་པ་ཡིན་པས། རང་ཉིད་ཀྱིས་ཡན་ལག་ལྔ་མཚོན་གྱིས་གཏར་ཏེ། ཁྲག་གིས་ཚིམ་པར་བྱས་ནས་ཆོས་བཤད་དེ་བསླབ་པའི་གཞི་ལྔ་ལ་བཀོད་དོ། །དེའི་དུས་ཀྱི་རྒྱལ་པོ་བྱམས་པའི་སྟོབས་དེ་ནི་ང་ཡིན་ནོ། །མདངས་འཕྲོག་པའི་གནོད་སྦྱིན་ལྔ་པོ་དེ་ནི་ལྔ་སྡེ་ཡིན་ནོ། །

༢༽ འོད་སྲུངས་ཆེན་པོ་སྟོན་པར་ཁས་བླངས་པས་
བསྙེན་པར་རྫོགས་ཚུལ།

བྱང་ཆུབ་སེམས་དཔའ་དགའ་ལྡན་ན་བཞུགས་པ་ན། གྲོང་ཁྱེར་ནྱ་གྲོ་དྷ་ཅན་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ། ནྱ་གྲོ་དྷ་ཞེས་བྱ་བ། ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་ལ་(༩ན)འགྲན་པ་ཞིག་གནས་སོ། །དེ་ལ་བྲན་གྲོང་བཅུ་དྲུག་དང༌། ལས་ཀྱི་མཐའ་པའི་གྲོང་བཅུ་དྲུག་དང༌། བསྐྱེད་བསྒྱུར་བའི་གྲོང་དྲུག་ཅུ་དང༌། རྨོན་དོར་དགུ་བརྒྱ་དགུ་བཅུ་རྩ་དགུ་དང༌། གསེར་བྱེ་བ་དྲུག་ཅུ་དང༌། གསེར་གྱི་ནས་རྗང་བརྒྱད་ཅུ་ཡོད་དོ། །དེ་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མེད་ནས། ལྷ་ལ་གསོལ་བ་བཏབ་བོ། །འཇིག་རྟེན་ན་ལྷ་ལ་གསོལ་བ་བཏབ་པའི་རྒྱུ་ལས་བུ་དང་བུ་མོ་སྐྱེའོ་ཞེས་བྱ་བའི་གཏམ་དེ་ལྟ་བུ་ཡོད་མོད་ཀྱི། དེ་ནི་དེ་ལྟ་མ་ཡིན་ཏེ། དེ་ལྟར་འགྱུར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་རེ་རེ་ལའང་བུ་སྟོང་ཡོད་པར་འགྱུར་རོ། །འོན་ཀྱང་གནས་དྲུག་མངོན་དུ་གྱུར་ན་བུ་དང་བུ་མོ་སྐྱེ་སྟེ། ཕ་མས་བུ་རྙེད་པའི་ལས་བྱས་ཤིང་བསགས་པ་དང༌། བུས་ཀྱང་ཕ་མ་རྙེད་པའི་ལས་བྱས་ཤིང་བསགས་པ་དང༌། མ་རུང་ཞིང་ཟླ་མཚན་དང་ལྡན་པ་དང༌། ཕ་མ་ཆགས་པར་གྱུར་ཅིང་འདུས་པ་དང༌། དྲི་ཟ་ཉེ་བར་གནས་པ་དང༌། དྲི་ཟས་ཀྱང་རྗེས་སུ་ཆགས་པའམ་ཁོང་ཁྲོ་བའི་སེམས་ཐོབ་བོ། །དེ་ལྟར་ལྷ་ལ་གསོལ་བ་བཏབ་ཀྱང་བུ་མེད་ནས་དེ་ཁང་བཟང་གི་སྟེང་དུ་སོང་སྟེ། ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག་གོ །དེའི་དྲུང་དུ་ཉེ་དུ་རྣམས་ཀྱིས་ཕྱིན་ནས། ཅིའི་ཕྱིར་ཡིད་མ་བདེ། དེས་སྐབས་དེ་རྒྱ་ཆེར་སྨྲས་པ་དང༌། ལྷ་དང་འཇུག་ངོགས་སྟེན་ཅིག །དེའང་བསྟེན་མོད་བུའམ། བུ་མོ་མེད་དོ། །དེས་ནས་ནྱ་གྲོ་དྷའི་མ་འོངས་ནས། བུ། ཅིའི་ཕྱིར་ཡིད་མི་བདེ། ཡུམ། ཅི། ཡིད་མི་བདེ་བ་ཆུང་ངམ། བདག་གི་ཁྱིམ་གྱི་ཡོ་བྱད་རྒྱ་ཆེན་པོ་འདི་་བུ་མེད་པས་ལྷས་བཞེས་པར་འགྱུར་རོ། །མས་སྨྲས་པ། སྐྱེད་མོས་ཚལ་ན་ལྗོན་ཤིང་ནྱ་གྲོ་དྷ་ཆེན་པོ། ཡལ་ག་དང༌། མགོ་ལྕོགས་དང༌། འདབ་མ་དང༌། ལོ་མ་ཕུན་སུམ་ཚོགས་ཤིང་འདབ་མ་རྒྱ་ཆེ་ལ་ཡལ་ག་གཡུར་ཟ་བ་ཞིག་ཡོད་དེ། དེའི་མིང་གིས་གྲོང་ཁྱེར་ནྱ་གྲོ་དྷ་ཅན་ཞེས་བྱའོ། །ཁྱོད་ཀྱི་ཕ་ལའང་བུ་མེད་པས། ལྷ་བརྒྱ་སྟོང་ལ་གསོལ་བ་བཏབ་ཀྱང་བུ་མ་རྙེད་པར། དེ་ནས་ནྱ་གྲོ་དྷའི་ལྷ་ལ་གསོལ་བ་བཏབ་པས་ཁྱོད་བྱུང་གིས། ཁྱོད་ཀྱང་དེ་ལྟར་གྱིས་ཤིག །དེ་ནས་བྲམ་ཟེ་དེས་ཤིང་ནྱ་གྲོ་དྷའི་དྲུང་དུ་ཕྱིན་ནས་ཆག་ཆག་དང་ཕྱག་བདར་བྱས། སྤོས་དང་མེ་ཏོག་གིས་བཀང༌། རྒྱལ་མཚན་དང་བ་དན་སྒྲེང་དུ་བཅུག །བྲམ་ཟེ་བརྒྱད་བརྒྱ་ལ་ཟན་བྱིན་ཏེ་རས་ཡུག་ཆེན་བསྐོན་ནས། ཤིང་ལ་གནས་པའི་ལྷ་ལ་གསོལ་བ་བཏབ་པ། བདག་ལ་བུ་སྩོལ་ཅིག །བུ་བྱུང་ན་ལོ་རེ་ཞིང་མཆོད་པ་འདི་འདྲ་བྱེད་དོ། །བུ་མ་བྱུང་ན་ལྗོན་ཤིང་འདི་པུ་ཤེལ་ཙིའི་རྩ་བ་ཙམ་དུ་བཤགས་ཏེ་བསྲེགས་ནས་ཐལ་བ་རླུང་ལ་བསྐུར་རོ། །ལྷ་དེ་ཡང་དབང་ཆུང་བ་ཡིན་པས། མཆོད་པས་ནི་དགའ། བསྡིགས་པས་ནི་འཇིགས་ལ། དེ་རྒྱལ་པོ་ཆེན་པོ་(༩བ)བཞིས་ཟིན་པ་ཡིན་པས་རྒྱལ་པོ་ཡུལ་འཁོར་སྲུང་གི་དྲུང་དུ་ཕྱིན་ནས། ཉེ་དབང༌། བདག་གནས་ནས་བསྐྲད་པར་འགྱུར་དུ་མཆི་ཡིས། བྲམ་ཟེ་ནྱ་གྲོ་དྷ་ལ་བུ་སྩོལ་ཅིག །དེས་སྨྲས་པ། སྔོན་གྱི་ལས་ཀྱི་སྟོབས་ཀྱིས་བུ་འབྱུང་གི །བདག་གིས་བུ་སྦྱིན་མི་ནུས་སོ། །འོན་ཀྱང་འཕགས་སྐྱེས་པོའི་དྲུང་དུ་འདོང་ངོ༌། །དེ་གཉིས་ཀྱིས་དེའི་དྲུང་དུ་ཕྱིན་པ་དང༌། དེས་ཀྱང་བདག་གིས་བུ་སྦྱིན་མི་ནུས་སོ། །མིག་མི་བཟང་དང༌། རྣམ་ཐོས་ཀྱི་བུའི་དྲུང་དུ་ཕྱིན་པས། དེ་དག་གིས་ཀྱང་སྔར་བཞིན་སྨྲས་སོ། །ལྔ་པོ་དེས་བརྒྱ་བྱིན་གྱི་དྲུང་དུ་ཕྱིན་ནས། ཀོའུ་ཤི་ཀ་ལྷ་བུ་འདི་གནས་ནས་སྐྲོད་དུ་འོང་གིས། བྲམ་ཟེ་ནྱ་གྲོ་དྷ་ལ་བུ་སྩོལ་ཅིག །དེས་སྨྲས་པ། རང་གི་ལས་ཀྱིས་བུ་འབྱུང་གི །བདག་གིས་བུ་སྦྱིན་མི་ནུས་སོ། །འོན་ཀྱང་འདིར་ཚངས་པ་ཆེན་པོ་འབྱུང་གིས། འདུག་ཅིག །དེ་ནས་ཚངས་པ་ཆེན་པོ་གཙུག་ཕུད་ལྔ་པ་བྱུང་སྟེ་བརྒྱ་བྱིན་གྱི་པང་བར་འདུག་པ་དང༌། བརྒྱ་བྱིན་གྱིས་སྨྲས་པ། ཁྱོད་ཚངས་པ་དང༌། ཚངས་པ་ཆེན་པོ་དང༌། དབང་ཕྱུག་དང༌། བྱེད་པ་པོ་དང༌། འབྱིན་པ་པོ་དང༌། སྤྲུལ་པ་པོ་དང༌། གཙོ་བོ་དང༌། ཁྱད་དུ་འཕགས་པ་དང༌། འཇིག་རྟེན་གྱི་ཕ་ལགས་ན། བདག་ཅག་གི་འཁོར་དུ་གཏོགས་པ་ས་ལ་རྒྱུ་བ་ཞིག་མཆིས་པ་གནས་ནས་བསྐྲད་པར་འགྱུར་གྱིས། བྲམ་ཟེ་ནྱ་གྲོ་དྷ་ལ་བུ་སྩོལ་ཅིག །དེ་འདི་སྙམ་དུ། བདག་གིས་བུ་སྦྱིན་པར་མི་ནུས་སོ་ཞེས་སྨྲས་ན་བྱེད་པ་པོ་ལ་སོགས་པའི་མིང་དང་འགལ། སྦྱིན་ནོ་ཞེས་སྨྲས་ན་དབང་མེད་དོ་སྙམ་ནས་གསངས་ཏེ་སྨྲས་པ། ཁོ་བོས་འཇིག་རྟེན་མ་ཕྱུང་ངོ༌། །
དེས་སྨྲས་པ། འོན་ཀྱང་རང་གི་གནས་ནས་འཆི་འཕོ་བ་མཆིས་ན། དེའི་ཁྱིམ་དུ་སྐྱེ་བ་ལེན་དུ་སྩོལ་ཅིག །ཚངས་པས་སྨྲས་པ། ཅིའི་ཕྱིར་རང་གི་གནས་སུ་མི་ལྟ། གནས་འདི་ན་ལྷ་རྣམས་དབང་ཆུང་བར་གྲགས་པས་དེའི་ཁྱིམ་དུ་སྐྱེ་བ་ལེན་པར་མི་བཟོད་དོ། །ཚངས་པ་རང་གི་གནས་སུ་སོང་ནས། ལྷ་ཚེ་ཟད་པ་ཞིག་ལ། ཁྱོད་ཉིང་མཚམས་སྦྱོར་བར་འདྲ་བས། བྲམ་ཟེ་ནྱ་གྲོ་དྷའི་ཁྱིམ་དུ་ཉིང་མཚམས་སྦྱོར་ཞིག །དེ་སྙིང་མ་དགའ་ནས་སྨྲས་པ། ཐོང་ཞིག །བྲམ་ཟེ་ནི་ལོག་པར་ལྟ་བ་ཡིན་ལ། དེའི་ཁྱིམ་དུ་སྐྱེ་བ་ལེན་པ་ནི་གསེར་གྱི་སྒྲོག་ལ་ཆགས་པས་རྐང་པ་སྒྲོག་ཏུ་འཇུག་པ་དང་འདྲའོ། །བདག་ནི་བྱང་ཆུབ་སེམས་དཔའ་དགའ་ལྡན་ནས་འཕོས་ཏེ་འཚང་རྒྱ་བར་འགྱུར་བ་དེའི་བསྟན་པ་ལ་རབ་ཏུ་བྱུང་ནས་བདུད་རྩི་ཐོབ་པར་བྱ་དགོས་ལ། བྲམ་ཟེ་ཕྱུག་པོའི་ཁྱིམ་དུ་སྐྱེས་པ། བུ་གཅིག་པ་ནི་སུས་ཀྱང་རབ་ཏུ་འབྱུང་དུ་མི་སྟེར་རོ། །ཚངས་པས་སྨྲས་པ། དེར་སྐྱེ་བ་ལོངས་ཤིག་དང༌། ངས་ཁྱོད་ཀྱི་ཕ་མ་གཉིས་ལ་བསྐུལ་བར་བྱའོ། །དེས་ཀྱང་གནང་ནས། ལྷའི་བུ་དབང་ཆེ་བར་གྲགས་པ། སྔོན་གྱི་སངས་རྒྱས་ལ་དགེ་བའི་རྩ་བ་བསྐྱེད་པ། སྲིད་པ་ཐ་མ་པ། སྤྱོད་པ་འཚོལ་བ། འཆིང་བ་ཉམས་སྨད་པ། ཐར་པའི་ཚོགས་བཟུང་བ། (༡༠ན)མྱང་འདས་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་དང་སྐྱེ་བ་དོན་དུ་མི་གཉེར་བ། ལུས་ཐ་མར་འཛིན་པ་དེ་ཤི་འཕོས་ཏེ་དེའི་ཆུང་མའི་མངལ་དུ་ཉིང་མཚམས་སྦྱར་རོ། །འདི་ན་བུད་མེད་མཁས་པའི་རང་བཞིན་ཅན་ཁ་ཅིག་གིས་གནས་ལྔ་ཤེས་ཏེ། སྐྱེས་པ་ཆགས་པ་ཤེས་ཤིང་ཆགས་པ་དང་བྲལ་བ་ཤེས། དུས་ཤེས་ཤིང་ཟླ་མཚན་ཤེས། མངའ་དུ་ཞུགས་པ་ཤེས། གང་ལས་མངལ་དུ་ཞུགས་པའང་ཤེས། ཁྱེའུ་དང༌། བུ་མོར་འགྱུར་པ་ཤེས་ཏེ། ཁྱེའུ་ཡིན་ན་དཀུ་གཡས་པར་བརྟེན། བུ་མོ་ཡིན་ན་དཀུ་གཡོན་པར་བརྟེན་ཏོ། །བུད་མེད་དེས་ཀྱང༌། དཀུ་གཡས་པར་མི་བདེ་བས་བུ་རྙེད་པར་རིག་ནས་ཁྱིམ་ཐབ་ལ་སྨྲས་པ། རྗེའི་སྲས། ཁྱོད་ལ་གཏམ་སྙན་པ་ཞིག་གསོལ་ལོ། །བཟང་མོ། ལྷ་དང་མིའི་གཏམ་སྙན་པ་ཐོབ་པར་གྱུར་ཅིག །གཏམ་སྙན་པ་གང༌། བདག་གིས་བུ་རྙེད་དོ། །དེ་མགུ་ཞིང་དགའ་ལ་ཡིད་རབ་ཏུ་དགའ་སྟེ། ཡོ་བྱད་ཐམས་ཅད་ཀྱིས་བསྟབས་ནས་བདེ་བར་བསྐྱངས་པས། ཟླ་བ་བརྒྱད་དམ་དགུ་འདས་པ་ན་ཁྱེའུ་གཟུགས་བཟང་བ་ཞིག་བཙས་སོ། །དེ་ནས་ཞག་ཉེར་གཅིག་གི་བར་དུ་བཙས་སྟོན་བྱས། ཁྱེའུ་འདི་ཤིང་ནྱ་གྲོ་དྷ་ལ་མཆོད་ནས་རྙེད་པས་ནྱ་གྲོ་དྷ་སྐྱེས་ཞེས་མིང་བཏགས། ཁ་ཅིག་གིས་འདིའི་ཕ་འོད་སྲུངས་དང་རུས་གཅིག་པས། འོད་སྲུངས་ཞེས་མིང་བཏགས་སོ། །དེ་མ་མ་བརྒྱད་པོ་པང་ན་འཚོ་བའི་མ་མ་གཉིས། ནུ་མ་བསྣུན་པའི་མ་མ་གཉིས། དྲི་མ་འཕྱི་བའི་མ་མ་གཉིས། རྩེ་གྲོགས་ཀྱི་མ་མ་གཉིས་ལ་གཏད་ནས། འོ་མ་དང༌། ཞོ་དང༌། མར་གསར་དང༌། ཞུན་མར་དང༌། མར་གྱི་ཉིང་ཁུ་དང༌། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་དག་གིས་བསྲིངས་བསྐྱེད་དེ། རྫིང་ན་གནས་པའི་པདྨ་བཞིན་དུ་སྐྱེ་དྲག་པར་གྱུར་ཏོ། །
དེ་ཆེར་སྐྱེས་པའི་ཚེ་ཉི་མ་ཉུང་ཤས་ཀྱིས་ཡི་གེའི་ཕ་རོལ་ཏུ་སོན་ཅིང༌། བྲམ་ཟེའི་སྤྱོད་ཚུལ་དང༌། སྤྱོད་པ་དང༌། གཙང་སྦྲ་དང༌། ཀུན་ཏུ་སྤྱོད་པ་དང༌། ཐལ་བ་བླང་བ་དང༌། བྱ་མ་བུམ་བླང་བ་དང༌། ས་བླང་བ་དང༌། རབ་བསྔགས་བྱ་བ་དང༌། འཐོར་འཐུང་བྱ་བ་དང༌། བཟླས་བརྗོད་བྱ་བ་དང༌། ཡང་དག་པར་སྡོམ་པ་དང༌། ངེས་པར་བྱ་བ་དང༌། དུས་མཚམས་སུ་ཉེ་བར་སྤྱད་པར་བྱ་བ་དང༌། རིག་བྱེད་བཞི་དང༌། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང༌། མཆོད་སྦྱིན་བྱེད་དུ་འཇུག་པ་དང༌། ཀློག་པ་དང༌། ཀློག་ཏུ་འཇུག་པ་དང༌། སྦྱིན་པ་དང༌། ལེན་པ་ལ་མཁས་པར་གྱུར་ཏོ། །རིག་པའི་གནས་བཅོ་བརྒྱད་ལ་མཁས་པར་གྱུར་ཏེ། གསང་སྔགས་ཀྱི་རྒྱུད་དང༌། ཆོ་ག་ཞིབ་མོ་དང༌། གཏན་ཚིགས་རིག་པ་དང༌། རིག་བྱེད་དང༌། བརྡ་སྤྲོད་པ་དང༌། སྒྲ་ངེས་པར་སྦྱོར་བ་དང༌། ཤེས་གསལ་དང༌། ངེས་པའི་ཚིག་དང༌། སྡེབ་སྦྱོར་བསྡུས་པ་དང༌། སྐར་མའི་རིག་པ་དང༌། (༡༠བ)རྟོག་བྱེད་ཀྱི་རིག་པ་དང༌། ཆུར་ལྟུང་གི་རིག་པ་དང༌། ཆེར་སྤྱོད་ཀྱི་རིག་པ་དང༌། འཇིག་རྟེན་རྒྱང་འཕེན་པའི་རིག་པ་དང༌། བྱེ་བྲག་པའི་རིག་པ་དང༌། རྒྱུད་དྲུག་ཅུ་པ་དང༌། ཁྱུར་མིད་ཀྱི་རིག་པ་དང༌། གནས་འདུག་གི་རིག་པ་སྟེ་རིག་གནས་བཅོ་བརྒྱད་ལ་བློ་ཤིན་ཏུ་རྣོ་བར་གྱུར་ཏོ། །དེ་ནས་ཕའི་བསམ་པ་ལ། བྲམ་ཟེའི་ལུགས་ནི་ལོ་བཞི་བཅུ་རྩ་བརྒྱད་དུ་ཚངས་སྤྱོད་བསྲུངས་ནས་རྒས་པ་ན་བག་མ་ལེན་པ་ཡིན་ན། བདག་རིགས་རྒྱུད་མཐོ། འབྱོར་པ་ཆེ་བས་ཐོག་མ་ནས་བུ་ལ་བག་མ་བླང་བར་བྱའོ་སྙམ་ནས། བུ། རིགས་རྒྱུད་ཀྱི་ཕྱིར་བག་མ་བླང་བར་བྱའོ། །ཡབ། བདག་ལ་མཆིས་བྲང་ཅི་འཚལ། དཀའ་ཐུབ་ཀྱི་ནགས་སུ་མཆིའོ། །དེས་དེ་ལ་ཡང་དང་ཡང་དུ་བརྟུན་པ་དང༌། བུས་བསམས་པ། ཡབ་ཡུམ་གྱི་བཀའ་ཡང་མི་བཅག་ལ། བུད་མེད་ཀྱང་མི་རྙེད་པའི་ཐབས་བྱའོ་སྙམ་ནས། ཡབ། བདག་ལ་འཛམ་བུ་ཆུ་བོའི་གསེར་འཚལ་ལོ། །དེས་དཀོར་མི་བོས་ནས། འདི་ལ་འཛམ་བུ་ཆུ་བོའི་གསེར་ཇི་སྙེད་དགོས་པ་བྱིན་ཅིག །དེས་ཕའི་ཕག་ཏུ་མགར་བ་བོས་ནས་འཛམ་བུ་ཆུ་བོའི་གསེར་ལས་བྱས་པའི་བུད་མེད་ཀྱི་གཟུགས་ལེགས་པ་ཞིག་བྱེད་དུ་བཅུག་སྟེ། ཕ་ལ་ཕུལ་ནས་སྨྲས་པ། བུད་མེད་འདི་འདྲ་ཞིག་རྙེད་ན་བདག་གི་མཆིས་བྲང་ལགས་ཀྱི། གཞན་ནི་མི་དགོས་སོ། །ཕས་བསམས་པ། གསེར་ཐ་མལ་པའི་མདོག་ཅན་གྱི་བུ་མོའང་མེད་ན། འཛམ་བུ་ཆུ་བོའི་གསེར་ལས་བྱས་པ་ལྟ་བུ་ལྟ་ཅི་སྨོས་སྙམ་ནས་སེམས་ཁོང་དུ་ཆུད་ཅིང་འདུག་པ་དང༌། བྲམ་ཟེའི་ཁྱེའུ་རྣམས་ཀྱིས་མཐོང་ནས་དྲིས་པས། བུས་བདག་ལ་མ་བསམས་ཏེ། གསེར་ཕལ་པའི་མདོག་ཅན་གྱི་བུ་མོའང་མི་རྙེད་ན། འཛམ་བུ་ཆུ་བོའི་གསེར་ལས་བྱས་པ་ལྟ་བུ་ལྟ་ཅི་སྨོས། དེ་རྣམས་ཀྱིས་སྨྲས་པ། མི་དགྱེས་པ་མ་མཛད་ཅིག །ཇི་ལྟ་བུའི་སྐྱེས་བུ་ལ་དེ་ལྟ་བུའི་ཡོ་བྱད་འབྱུང་བ་ལགས་པས་ད་དུང་འདི་འདྲ་གསུམ་སྩོལ་ཅིག །བདག་ཅག་གིས་ཕྱོགས་བཞི་ནས་བུ་མོ་དེ་འདྲ་བཙལ་བར་བགྱིའོ། །དེས་དེ་རྣམས་ཀྱི་ངག་མཉན་ནས་གཟུགས་བརྙན་གཞན་གསུམ་ཡང་བྱེད་དུ་བཅུག་གོ །
དེ་ནས་ཁྱེའུ་རྣམས་ཀྱིས་བུ་མོའི་གཟུགས་བརྙན་རོལ་མོའི་སྒྲའི་ཆ་བྱད་དང་བཅས་ཏེ་ཕྱོགས་བཞིར་བརྒྱ་བརྒྱ་ཆས་སོ། །དེ་དག་གིས་ཐབས་བསམས་པ། བདག་ཅག་གིས་ཁྱིམ་ཀུན་ཏུ་རྒྱུ་བར་མི་ནུས་ཀྱིས་ཐབས་ཤིག་བྱའོ་སྙམ་ནས་ཐབས་ཤེས་ཏེ། གཟུགས་བརྙན་དེ་གྲོང་ཁྱེར་གྱི་དབུས་སུ་བཞག་ནས་ལྷ་མོ་འདི་ལ་བུ་མོ་རྣམས་བཀུར་སྟི་བྱས་ན། དེ་ལ་དམ་པ་ལྔ་པོ་རིགས་མཐོན་པོར་སྐྱེ་བ་དང༌། རིགས་མཐོན་པོའི་བག་མར་ལེན་པ་དང༌། ཁྱིམ་ཕུན་སུམ་ཚོགས་པར་འདུག་པ་དང༌། ཁྱིམ་བདག་ཀྱང་དེའི་དབང་དུ་འགྱུར་བ་དང༌། བུ་དང་ལྡན་པ་སྦྱིན་པར་བྱེད་དོ་ཞེས་སྨྲ་ཞིང་སོང་བས། བུད་མེད་ཀྱི་ཚོགས་ཐམས་ཅད་ཀྱིས་མཆོད་པ་དང་བཀུར་སྟི་(༡༡ན)བྱེད་དོ། །དེར་ཤར་དང་ལྷོ་དང་བྱང་ཕྱོགས་སུ་སོང་བ་དག་གིས་ནི་མ་རྙེད་པར་ལོག་པས་བྲམ་ཟེར་ནྱ་གྲོ་དྷ་སེམས་ཁོང་དུ་ཆུད་དོ། །ནྱ་གྲོ་དྷ་སྐྱེས་ནི་ཡིད་དགའ་སྟེ། མ་རྙེད་ན་ལེགས་སོ་ཞེས་སྨྲས་སོ། །ནུབ་ཕྱོགས་སུ་སོང་བ་དག་གིས་རིམ་གྱིས་སོང་བ་དང༌། ཀ་པི་ལའི་ལྗོངས་ན་གྲོང་ཁྱེར་ཀ་པི་ལ་ཞེས་བྱ་བར་བྲམ་ཟེ་སེར་སྐྱ་ཞེས་བྱ་བ། ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་པ་དེས་རིགས་མཉན་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་མོ་གཟུགས་བཟང་བ། ལྟ་ན་སྡུག་པ། མཛེས་པ་ཞིག་བཙས་ཏེ། ཕ་སེར་སྐྱ་ཡིན་ལ། གཟུགས་བཟང་བས་སེར་སྐྱ་བཟང་མོ་ཞེས་མིང་བཏགས། བསྐྱེད་བསྲིངས་པས་ཆེན་མོར་གྱུར་ཏོ། །བྲམ་ཟེའི་ཁྱེའུ་དེ་དག་གིས་གྲོང་ཁྱེར་དེའི་དབུས་སུ། ལྷ་མོ་མཆོད་ན་དམ་པ་ལྔ་སྦྱིན་པར་བྱེད་དོ། །ཞེས་བསྒྲགས་པ་དང་བུ་མོ་གཞོན་ནུ་མ་གཞན་རྣམས་ལྷ་མོའི་དྲུང་དུ་སོང་ནས་མཆོད་པར་བྱེད་དོ། །བཟང་མོའི་མས་བཟང་མོ་ལ། ཁྱོད་ཀྱང་ལྷ་མོ་ལ་མཆོད་པ་གྱིས་ཤིག །དེས་སྨྲས་པ། ལྷ་མོ་མཆོད་པས་ཅིར་འགྱུར། དམ་པ་ལྔ་སྦྱིན་པར་བྱེད་དོ། །ཡུམ། བདག་རིགས་མཐོན་པོར་སྐྱེས་ཀྱང་འདོད་པ་དོན་དུ་མི་གཉེར་རོ། །དེས་ཡང་ཡང་བསྐུལ་བས། མའི་སེམས་བསྲུང་བའི་ཕྱིར་མེ་ཏོག་ལ་སོགས་པ་ཁྱེར་ཏེ་ལྷ་མོ་ག་ལ་བ་དེར་སོང་ངོ༌། །དེ་དེ་དང་ཇི་ཙམ་ཉེ་བ་ལྟར་གཟུགས་བརྙན་དེ་ཇེ་སྔོ་ཇེ་སྔོར་སོང་ངོ༌། །དེ་དང་འཕྲད་པ་ན་གཟུགས་བརྙན་དེ་ལྕགས་ལས་བྱས་པ་བཞིན་སོང་ངོ༌། །དེ་རྣམས་ཀྱིས་དྲིས་པ། ཁྱོད་སུའི་བུ་མོ་ཡིན། བྲམ་ཟེ་སེར་སྐྱའི་བུ་མོ་བཟང་མོའོ། །དེ་ནས་བྲམ་ཟེའི་ཁྱེའུ་དེ་རྣམས་བྲམ་ཟེ་སེར་སྐྱའི་སྒོ་དྲུང་དུ་འཁོད་ནས། ཤེས་ལྡན་དག །སློང་མོ་བྱིན་ཅིག །བཟང་མོས་སློང་མོ་ཁྱེར་ཏེ་བྱིན་པ་དང༌། མི་ལེན་ནོ། །བྲམ་ཟེ་སེར་སྐྱས་ཐོས་ནས། ཅི་འདོད། བུ་མོ་སློང་གི །ཕྱེ་ནི་མ་ཡིན་ནོ། །ཁྱེད་ལ་མི་སྟེར་རོ། །རང་གི་དོན་དུ་བུ་མོའི་སློང་མོ་མི་འཚལ་ལོ། །འོ་ན་སུའི་དོན་དུ། ཡུལ་དབུས་ཀྱི་བྲམ་ཟེ་ནྱ་གྲོ་དྷ་སྐྱེས་ཀྱི་དོན་དུ་སློང་ངོ༌། །དེའི་ཡོན་ཏན་རྒྱ་ཆེར་ཐོས་མོད། ཐག་རིང་པོ་ན་འདུག་པས་ཇི་ལྟར་གཉེན་བྱ། དེ་དག་གིས་སྨྲས་པ། མེ་གང་ཡིན་དང་རླུང་གང་ཡིན། །ཁྲག་དང་ཕྲད་པའི་དུག་དང་ནི། །བྲམ་ཟེ་ངེས་པར་བྱས་པ་དང༌། །རྟ་གང་ཡིན་པ་དེ་མི་ཐོགས། །ཞེས་པ་མ་ཐོས་སམ། །བྲམ་ཟེ་དེ་དང་ཁྱོད་ཕྱུག་ཅིང་ནོར་ཆེ་བར་འདྲ་བ་ཡིན་ཞིང༌། འགྲོ་འོང་བྱེད་པའི་བཞོན་པ་དང་མི་དག་ཀྱང་ཡོད་ལ། གཞན་ཡང་རིང་པོ་ན་འདུག་པ་དང་གཉེན་བྱ་བ་དེ་ནི་བརྟན་པ་ཡིན་ནོ། །དེ་ནས་དེས་དེ་རྣམས་ལ་ཁྲུས་ཀྱི་ཡོ་བྱད་བྱིན་ནས་དེ་རྣམས་ཁྲུས་བྱེད་དུ་སོང་ངོ༌། །དེའི་བར་ལ་ཉེ་དུ་རྣམས་བསགས་ནས་དན་དེ་སྨྲས་པ་(༡༡བ)དང༌། དེ་རྣམས་ཀྱིས་སྨྲས་པ། དེ་མི་འདོད་བཞིན་དུའང་ནན་གྱིས་སྦྱིན་པར་བྱ་བ་ཡིན་ན། སློང་ན་ལྟ་ཅི་སྨོས། དེ་ནས་བུ་མོ་དེ་ཁྲུས་བྱས་ཏེ། གོས་དཀར་པོ་བསྐོན། དགེ་མཚན་དང་བཀྲ་ཤིས་བྱས་ཏེ་བྱིན་ནས། བྲམ་ཟེ་རྣམས་ཀྱི་དག་བྱེད་དུ་འགྱུར་བ་བཀླགས་སོ། །དེ་ནས་བྲམ་ཟེ་ཁྱེའུ་རྣམས་ཟླ་བ་དང༌། རྒྱུ་སྐར་དང༌། ཡུད་ཙམ་དག་བརྩིས་ནས། ཟླ་བ་དང་རྒྱུ་སྐར་དང་ཡུད་ཙམ་ཆེ་གེ་མོ་ཞིག་ནས་ཁྱེའུ་དང་ཉེ་བར་གནས་པར་འགྱུར་རོ་ཞེས་སྨྲས་ནས་སོང་སྟེ། ནྱ་གྲོ་དྷ་ལ་བརྗོད་པས་ཤིན་ཏུ་དགའ་ལ། དེ་ནྱ་གྲོ་དྷ་སྐྱེས་ཀྱིས་ཐོས་ནས་ཡི་ཆད་དེ། དེ་གཟུགས་བཟང་བ་ལྟ་ན། ལྷག་པར་འདོད་ཆགས་ཆེ་བ་ཡིན་གྱི། བདག་གིས་བརྟག་པར་བྱའོ་སྙམ་ནས། ཕ་མ་ལ། ཐོག་མར་འཇུག་ངོགས་སུ་ཉེ་རེག་བྱས་ནས་བག་མ་བླང་ངོ༌། །དེ་གཉིས་ཀྱིས་ཀྱང་གནང་སྟེ། བྲམ་ཟེའི་ཁྱེའུ་ཞིག་དང་ལྷན་ཅིག་རིམ་གྱིས་ཀ་པི་ལར་སོང་ནས་ལོ་མའི་ཕུར་མ་ཐོགས་ཏེ་བསོད་སྙོམས་ལ་ཞུགས་པ་དང༌། བྲམ་ཟེ་སེར་སྐྱའི་སྒོར་ཕྱིན་ཏོ། །
དེ་ནས་བཟང་མོ་སློངས་མོ་ཐོགས་ནས་ཕྱིར་བྱུང་བ་དང༌། བུ་མོ་དེ་ནི་འདི་ཡིན་ནོ་སྙམ་ནས། ཁྱོད་སུའི་བུ་མོ་ཡིན། སེར་སྐྱའི་བུ་མོའོ། །ཁྱོད་གཞན་ལ་བྱིན་ནམ། ནྱ་གྲོ་དྷ་སྐྱེས་ལ་བྱིན་པར་ཐོས་སོ། །འོ་ན་ཁྱོད་ལ་ཁྱིམ་ཐབ་མེད་པར་ཤེས་པར་གྱིས་ཤིག །དེ་ནི་འདོད་པ་དོན་དུ་གཉེར་བ་མ་ཡིན་ནོ། །དེས་སྨྲས་པ། རྗེའི་སྲས། ཁྱོད་ཀྱིས་བདག་དབུགས་ཕྱུང་ངོ༌། །བདག་ཀྱང་འདོད་པ་དོན་དུ་གཉེར་བ་མ་ཡིན་ནོ། །ཕྱུག་པོ་དང་ནི་དབུལ་པོ་ལ། །འདྲ་བར་ཁྱོད་མཐོང་བདེ་བ་འདི། །སྙིང་དང་མཐུན་པའི་ཕྱུག་པོ་སྟེ། །ཙན་དན་པུ་ཤེལ་ཙི་དག་མིན། །འོན་ཀྱང་བདག་ལ་དབང་མེད་དེ། །ཕ་མས་བྱིན་ན་ཇི་ལྟར་བྱ། །དེས་སྨྲས་པ། བརྟན་པ་དང་སྤུངས་ཆེར་གྱིས་ཤིག །ནྱ་གྲོ་དྷ་སྐྱེས་ནི་ཁོ་བོ་ཡིན་ནོ། །དེས་སྨྲས་པ། བྲམ་ཟེའི་ཁྱེའུ། བཞུད་ལ་དམ་བཅའ་བརྟན་པར་གྱིས་ཤིག་ཅེས་དེ་གཉིས་གྲོས་བྱས་ནས་ནྱ་གྲོ་དྷ་སྐྱེས་སླར་ལོག་སྟེ་གྲོང་ཁྱེར་ནྱ་གྲོ་དྷ་ཅན་དུ་སོང་ངོ༌། །དེའི་ཕས་ཁྱིམ་པའི་ཆོས་བཞིན་དུ་སེར་སྐྱ་བཟང་མོ་བག་མར་བླངས་སོ། །དེ་ནས་ཕ་མ་གཉིས་ཀྱིས་གནས་གཅིག་ཏུ་མལ་གཉིས་བཅས་ནས་བཞག་པ་དང༌། དེ་གཉིས་གཅིག་གིས་གཅིག །དམ་བཅས་པ་དྲན་པར་གྱིས་ཤིག་ཅེས་བསྐུལ་ཏེ། མ་དང་བུ་ཇི་ལྟ་བ་བཞིན་འཁོད་དོ། །ཕ་མས་དེ་གཉིས་ཀྱི་རིམ་གྲོ་མ་ལ་དྲིས་པ། དེ་གཉིས་ལྷན་ཅིག་ཏུ་ཇི་ལྟར་འདུག །མ་དང་བུ་ལྷན་ཅིག་པ་བཞིན་ནོ། །ཕ་མས། མལ་གཉིས་བཤམས་པས་ཉེས་སོ་སྙམ་ནས་མལ་དང་ཁྲིའུ་གཅིག་བཞག་གོ །དེ་ནས་ནམ་གྱི་ཆ་སྟོད་ལ་བཟང་མོ་མལ་དུ་ཉལ་ལོ། །ནྱ་གྲོ་དྷ་སྐྱེས་ཁྲིའུ་ལ་འདུག་གོ །ནམ་གྱི་གུང་ཐུན་ལ་ནྱ་གྲོ་དྷ་སྐྱེས་ཉལ། བཟང་མོ་ཁྲིའུ་ལ་གནས། ནམ་གྱི་ཆ་སྨད་ལ་བཟང་མོ་ཉལ། ནྱ་གྲོ་དྷ་སྐྱེས་ཁྲིའུ་ལ་(༡༢ན)གནས་སོ། །དེ་ནས་ཁྱིའུ་ཡང་ཕྱུང་བ་དང༌། དེ་གཉིས་ཐུན་རེས་ཀྱིས་གཅིག་ཉལ་བ་ན་གཅིག་འཆག་གོ །དེའི་སྤྱོད་ལམ་གྱིས་ལོ་བཅུ་གཉིས་སུ་གནས་ཀྱང་འདོད་ཆགས་ཀྱི་སེམས་མ་སྐྱེས་སོ། །
དེ་ནས་བརྒྱ་བྱིན་འདི་སྙམ་དུ། འདོད་ཆགས་དང་མ་བྲལ་བཞིན་དུ་འདོད་ཆགས་དང་བྲལ་བའི་ཚུལ་ཉམས་སུ་མྱོང་བར་བྱེད་པ་ནི་ངོ་མཚར་ཏེ། བདག་གིས་བགམ་པར་བྱའོ་སྙམ་ནས། རང་ཉིད་སྦྲུལ་གདུག་པ་ཞིག་ཏུ་སྤྲུལ་ཏེ་བཟང་མོའི་མལ་འོག་ཏུ་འདུག་པ་དང༌། ནྱ་གྲོ་དྷ་སྐྱེས་ཀྱིས་མཐོང་སྟེ། བཟང་མོའི་ལག་པ་ཕྱི་རོལ་ཏུ་འཕྱང་བ་ལ་དུག་གིས་ཟིན་གྱིས་དོགས་ནས་རྔ་ཡབ་ཀྱི་ནོར་བུའི་ཡུ་བས་བཏེག་སྟེ་བཞག་གོ །དེས་བཟང་མོ་སད་པ་དང༌། ཡིད་མ་དགའ་ནས། རྗེའི་སྲས། རེག་པར་བྱེད་པ་འདི་ཅི་ལགས། འདོད་ཆགས་ཀྱི་སེམས་ཀྱིས་མ་རེག་གམ། བཟང་མོ། མ་ཡིན་ནོ། །འོན་ཀྱང་སྤྲུལ་གདུག་པ་འདིས་ཟིན་ན་མི་རུང་ངོ་སྙམ་ནས་ལག་པ་བཏེག་སྟེ་བཞག་གོ །གང་གིས། རྔ་ཡབ་ཀྱི་ནོར་བུའི་ཡུ་བས་སོ། །རྗེའི་སྲས། སྦྲུལ་གདུག་པས་ཟིན་པ་བླ་ཡི། རྔ་ཡབ་ཀྱི་ནོར་བུའི་ཡུ་བས་རེག་ཏུ་མི་རུང་སྟེ། མ་ལུ་ཏ་ཡི་འཁྲི་ཤིང་འཁྲིས་པས་ལྗོན་ཤིང་བཟང་པོ་ཉམས། །བུད་མེད་དག་ལ་རེག་པའི་རྒྱུ་ཡིས་འཇིག་རྟེན་ཕུང་བར་འགྱུར། །དེ་ཡི་སླད་དུ་མགྱོགས་པར་འཆི་བའི་སྦྲུལ་གྱིས་ཟིན་བླ་ཡི། །སྐྱེས་པའི་ལག་པས་བུད་མེད་མཆོག་ལ་རེག་པ་མི་རུང་ངོ༌། །གཞན་ཡང༌། མི་དབང་བུ་མོའི་ལུས་ཀྱི་རེག་པ་ཡིས། །དཀའ་ཐུབ་ཆེན་པོ་རྭ་ཅན་དཀའ་ཐུབ་ཉམས། །ལྷག་སྤྱོད་རླུང་གིས་ལམ་ནས་མི་དབང་གི །ཁྱིམ་དུ་འོངས་ནས་ནགས་སུ་རྐང་པས་སོང༌། །དེ་ནས་དེ་ལྟར་འཁོད་པ་ལ། །དུས་གཞན་ཞིག་ན་ཕ་མ་གཉིས་ཤིའོ། །ཁྱིམ་གྱི་སོ་ཚིས་བསྒྲུབ་པའི་ཕྱིར་བཟང་མོ་ལ། ཁྱོད་ཀྱིས་ཁྱིམ་གྱི་ལས་ཀྱི་མཐའ་ལ་ལྟོས་ཤིག །ངས་ཞིང་ལས་ལ་བལྟའོ་ཞེས་སྨྲས་ནས་སོང་བ་དང༌། ཞིང་ལས་ལ་བལྟས་པ་ན། རྨོན་དོར་དགུ་བརྒྱ་དགུ་བཅུ་རྩ་དགུ་རྨོད་ཅིང༌། སྲོག་ཆགས་ཕྲ་མོ་རྣམས་ཞར་ལ་ཉོན་མོངས་པར་གྱུར་པ་དང༌། གླང་རྣམས་སྣ་ཕུག །ལྕག་གིས་རྐུབ་ཚོས་རྡོལ། མི་རྣམས་ཀྱང་རྐང་ལག་སེར་ཀར་སོང༌། །གསོ་རས་གྱོན། ལུས་ལ་རྡུལ་གྱིས་གཡོག །གཤོལ་ལ་སོགས་པའི་ཕྱིར་དུ་གཅིག་ལ་གཅིག་ཁ་ཟེར་ཞིང་རྡེག་གོ །ཁྱེད་སུ་ཡིན། ནྱ་གྲོ་དྷ་སྐྱེས་ཀྱི་ལས་བྱེད་པའོ། །ཁྱེད་སུས་བསྐོས། དེའི་ཕས་བསྐོས་སོ། །འོ་ན་ཅིའི་ཕྱིར་གཅིག་ལ་གཅིག་ཁ་ཟེར་ཞིང་རྡེག་པར་བྱེད། ཁྱེད་དེའི་རྣམ་པར་སྨིན་པས་ཡུན་རིང་པོར་སྡུག་བསྔལ་བར་འགྱུར་རོ། །དེས་བསམས་པ། འདི་ལ་བརྟེན་ནས་བདག་ལའང་བསོད་ནམས་མ་ཡིན་པ་སྐྱེའོ་སྙམ་དུ་ཡིད་བྱུང་ངོ༌། །བཟང་མོས་ཀྱང་ཁྱིམ་གྱི་ལས་ལ་བལྟས་པ་ན། བྲན་མོ་རྣམས་རྐང་ལག་སེར་ཀར་སོང༌། གསོ་(༡༢བ)རས་གྱོན། མགོ་ཡེགས། གཅིག་ལ་གཅིག་ཁ་ཟེར་རོ། །ཁྱོད་སུའི་ཡིན། བཟང་མོའི་ཡིན་ནོ། །སུས་བསྐོས། དེའི་སྒྱུག་མོས་བསྐོས་སོ། །དེ་ཡང་ཡིད་བྱུང་ངོ༌། །
དེ་གཉིས་ཀྱིས་ཚིགས་སུ་བཅད་པ། བྲེའུ་ཆུང་གང་གི་འབྲས་ཆན་རུང༌། །མལ་གཅིག་གིས་ནི་བདེ་བ་སྐྱེད། །རས་བཅོས་ཟུང་གཅིག་བཅང་བར་བྱ། །ལྷག་མ་གཏི་མུག་ཡོངས་སུ་འཛིན། །དེ་ནས་ནྱ་གྲོ་དྷ་སྐྱེས་ཀྱིས། བཟང་མོ། བག་ཡོད་པར་ཁྱིམ་སྒྲུབས་ཤིག །ཁོ་བོ་དཀའ་ཐུབ་ཀྱི་ནགས་སུ་འགྲོའོ། །བདག་ཀྱང་ལྷག་ཅིག་མཆིའོ། །བུད་མེད་དང་ལྷན་ཅིག་དཀའ་ཐུབ་ཀྱི་ནགས་སུ་འདུག་པ་ནི་ཆ་མ་ཡིན་ནོ། །འོ་ན་བདག་སྔོན་ལ་ཐོང་ཞིག །ཁྱོད་སྔར་བཞུད་ན། བུད་མེད་ནི་འབྲས་ཆན་ཚོས་པ་དང་འདྲ་བར་སྐྱེ་བོ་མང་པོས་དོན་དུ་གཉེར་བས་མི་རུང་ངོ༌། །བཟང་མོ། འོ་ན་ལྷན་ཅིག་འདོང་བར་བྱའོ། །དེའི་ཚེ་ད་དུང་སངས་རྒྱས་མ་བྱུང་བས། ལོངས་སྤྱོད་རྣམས་ཕྱི་རོལ་པ་དང༌། དབུལ་ཕོངས་རྣམས་ལ་བྱིན། བྲན་དང༌། གླ་མི་དང༌། མངག་གཞུག་པ་རྣམས་མ་བཀོལ་བར་བཞག །རྫས་རྣམས་གཉེན་བཤེས་རྣམས་ལ་བགོས་ནས་གཏད། གོས་ཀྱི་ཕྱི་གཡོགས་སྟོང་ཕྲག་བརྒྱ་རི་བ་གཅིག་རང་གིས་ཁྱེར། དེ་འདྲ་གཅིག་བཟང་མོ་ལ་བྱིན་ནས་ཐ་གི་ཙམ་གྱི་བར་དུ་ལྷན་ཅིག་སོང་སྟེ། བཟང་མོ། ཇི་ལྟར་འདོད་པར་གནས་པར་གྱིས་ཤིག་ཅེས་སྨྲས་ནས་སོ་སོར་གྱེས་སོ། །དེ་ནས་བཟང་མོ་ནི་གཅེར་བུ་པ་རྫོགས་བྱེད་ལས་རབ་ཏུ་བྱུང་སྟེ། གཅེར་བུ་མའི་ནང་དུ་ཞུགས་པ་དང༌། གཅེར་བུ་པ་རྣམས་ཀྱིས་མཐོང་ནས་སྨྲས་པ། བདག་ཅག་ལྷའི་འདོད་པའི་ཡོན་ཏན་ལྔའི་ཕྱིར་དུ་རབ་ཏུ་བྱུང་བ་ཡིན་ལ། བཟང་མོ་འདིའང་ལྷའི་བུད་མེད་འདྲ་ན། ལྷའི་འདོད་ཡོན་རྙེད་དམ་མི་རྙེད་གཏོལ་མེད་གྱིས། དང་པོར་བཟང་མོ་འདི་ལ་སྤྱད་པར་བྱའོ་ཞེས་གཅེར་བུ་པ་ལྔ་བརྒྱ་རྫོགས་བྱེད་ཀྱི་དྲུང་དུ་སོང་ངོ༌། །དེ་རྣམས་ཀྱིས་དོན་དེ་རྒྱས་པར་སྨྲས་ནས་བཟང་མོ་བསླངས་པས་དེས་ཀྱང་གནང་ངོ༌། །
དེ་ནས་ཉི་མ་རེ་རེ་ཞིང་གཅེར་བུ་པ་ལྔ་བརྒྱས་དགའ་མགུར་སྤྱད་དོ། །དེས་བཟང་མོ་ཡིད་བྱུང་ནས་རྫོགས་བྱེད་ལ་གསོལ་བ་དང༌། གང་ལ་རྒྱ་ཕོག་པ་དང་ཕྲད་པར་གྱིས་ཤིག་ཅེས་སྨྲས་སོ། །དེའི་ཚེ་བཅོམ་ལྡན་འདས་ལོ་ཉི་ཤུ་རྩ་དགུ་འདོད་པ་རྣམས་ལ་རོལ་ཏེ། རྒ་བ་དང༌། ན་བ་དང༌། ཤི་བ་གཟིགས་ནས་ཡིད་བྱུང་སྟེ། ནམ་ཕྱེད་ཀྱི་དུས་སུ་རྟ་བསྔགས་ལྡན་ལ་བཅིབས་ནས་ནགས་སུ་གཤེགས་ཏེ་ལོ་དྲུག་ཏུ་དཀའ་བ་སྤྱད་ནས་ཆུ་བོ་ནཻ་རཉྫ་ནར་ཁྲུས་མཛད་དེ། དགའ་མོ་དང་དགའ་སྟོབས་མ་ལས་ལན་བཅུ་དྲུག་ཏུ་ཉིང་ཁུར་བྱས་པའི་འོ་ཐུག་གསོལ། རྩྭ་འཚོང་བཀྲ་ཤིས་ལས་རྩྭ་དག་བཞེས་ཏེ་བྱང་ཆུབ་ཀྱི་ཤིང་དྲུང་དུ་མ་འཛིངས་པར་བཏིང༌། དཀྱིལ་མོ་ཀྲུང་བཅས། བྱང་ཆུབ་མ་ཐོབ་ཀྱི་བར་དུ་དཀྱིལ་ཀྲུང་མི་གཞིག་གོ་ཞེས་ཐུགས་བསྐྱེད། བདུད་ཀྱི་དམག་བྱེ་བ་ཕྲག་སུམ་ཅུ་རྩ་དྲུག་བཏུལ་ནས་མངོན་པར་རྫོགས་(༡༣ན)པར་སངས་རྒྱས་ཏེ། ཚངས་པས་བསྐུལ་ནས་ཝཱ་ར་ཎཱ་སཱིར་ཆོས་ཀྱི་འཁོར་ལོ་བསྐོར་ཏེ་ལྔ་སྡེ་དང༌། དེ་ནས་ཉེ་བའི་ལྔ་སྡེ་དང༌། གྲོང་གི་ཁྱེའུ་གཙོ་བོ་ལྔ་བཅུ་བཏུལ། ཤིང་བལ་ཅན་གྱི་ནགས་ཁྲོད་དུ་གཤེགས་ནས་སྡེ་བཟང་དྲུག་ཅུའི་ཚོགས་བཏུལ། དམག་ལྡན་གྱི་གྲོང་དུ་གཤེགས་ནས་དགའ་མོ་དང་དགའ་སྟོབས་མ་གཉིས་བདེན་པ་ལ་བཀོད། ལྟེང་རྒྱས་སུ་གཤེགས་ནས་ལྟེང་རྒྱས་འོད་སྲུངས་བཏུལ། ཡུལ་ག་ཡར་གཤེགས་ནས་ཆུ་ཀླུང་འོད་སྲུངས་དང་ག་ཡ་འོད་སྲུངས་བཏུལ། རལ་པ་ཅན་སྟོང་ཕྲག་རྣམས་ལ་ཆོ་འཕྲུལ་གསུམ་གྱིས་གདམས་པ་མཛད། འོད་མའི་ལྟང་བྲང་ཅན་དུ་གཤེགས་ཏེ་རྒྱལ་པོ་གཟུགས་ཅན་སྙིང་པོ་འཁོར་བཅས་དང༌། མ་ག་དྷའི་བྲམ་ཟེ་དང༌། ཁྱིམ་བདག་སྟོང་ཕྲག་དུ་མ་བཏུལ་ཏེ་འོད་མའི་ཚལ་བཞེས་ནས། བཅོམ་ལྡན་འདས་རྒྱལ་པོའི་ཁབ་བུ་མང་གི་མཆོད་རྟེན་ན་བཞུགས་སོ། །དེ་འོད་སྲུངས་ཀྱིས་མཐོང་སྟེ་སྟོན་པའོ་སྙམ་ནས་དྲུང་དུ་སོང༌། ཕྱག་བཙལ་ཏེ། བཅོམ་ལྡན་འདས་ནི་བདག་གི་སྟོན་པ་ལགས་སོ། །བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །སྟོན་པས་ཀྱང༌། དེ་དེ་བཞིན་ཏེ། དེ་དེ་བཞིན་ནོ། །ང་ནི་ཁྱོད་ཀྱི་སྟོན་པའོ། །ཁྱོད་ནི་ངའི་ཉན་ཐོས་སོ་ཞེས་སོགས་གསུངས་ནས་སྟོན་པ་གཤེགས་པ་དང༌། འོད་སྲུངས་བཅོམ་ལྡན་འདས་ཀྱི་ཞམ་རིང་དུ་འབྲང་ཞིང་སྟོན་པ་བཞུགས་པ་དེར་སྣམ་སྦྱར་གདིང་ངོ་སྙམ་སྟེ། རས་ཡུག་ཆེན་གྱི་རྣམ་སྦྱར་སྟོང་ཕྲག་བརྒྱ་རི་བ་བཏིང་བ་ལ་སྟོན་པ་བཞུགས་ནས། འོད་སྲུངས་ཁྱོད་ཀྱི་སྣམ་སྦྱར་ཡང་ངོ༌། །འཇམ་མོ། །གསོལ་བ། ཐུགས་བརྩེ་བའི་སླད་དུ་བདག་གི་སྣམ་སྦྱར་བཞེས་སུ་གསོལ། །སྟོན་པས་ཀྱང་བཞེས་ནས་ཕྱག་དར་ཁྲོད་ཀྱི་སྣམ་སྦྱར་དེ་ལ་གནང་ངོ༌། །འོད་སྲུངས་ལ་གདམས་ངག་གདམས་པས། ཉི་མ་བརྒྱད་ཀྱི་བར་དུ་བསླབ་པ་ལ་གནས་ནས། དགུ་པ་ལ་དགྲ་བཅོམ་པ། ཁམས་གསུམ་གྱི་འདོད་ཆགས་དང་བྲལ་བ། གསེར་དང་བོང་བར་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་སྤངས་པ་ལྟ་བུར་བསིལ་བ། མ་རིག་པའི་སྒོ་ངའི་སྦུབས་དང་བྲལ་བ། རིག་པ་དང༌། མངོན་པར་ཤེས་པ་དང༌། སོ་སོ་ཡང་དག་པར་རིག་པ་ཐོབ་པ། སྲིད་པ་དང༌། འདོད་པའི་རྙེད་པ་ལ་ཆགས་པ་དང༌། བཀུར་སྟི་ལས་ཕྱིར་ཕྱོགས་པ། དབང་པོ་དང༌། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པ་དང༌། ཕྱག་བྱ་བར་གྱུར་ཏོ། །དེའི་ཚེ་འོད་སྲུངས་ཀྱིས་ཁྱད་པར་ཆེན་པོ་འདི་རྟོགས་པས་འོད་སྲུངས་ཆེན་པོ་ཞེས་གྲགས་སོ། །དེ་ནས་བཅོམ་ལྡན་འདས་མཐར་གྱིས་ལྗོངས་རྒྱུ་ཞིང་གཤེགས་ནས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་རྒྱལ་པོའི་ཁབ་ཏུ་རི་བོ་དང་མཛེས་པ་འཕྲད་པའི་དུས་སྟོན་བྱེད་པ་ན་མུ་སྟེགས་ཅན་རྣམས་ངེས་པར་འདུ་བ་ཡིན་པས་(༡༣བ)གཅེར་བུ་པ་རྣམས་དོང་བ་དང༌། སེར་སྐྱ་བཟང་མོ་འདི་སྙམ་དུ། སུ་ཞིག་འདི་ལྟར་ཡུན་རིང་པོར་ཉོན་མོངས་པ་ཉམས་སུ་མྱོང་བར་བྱེད་སྙམ་དུ་དེ་ཉོན་མོངས་པས་ཡིད་བྱུང་ནས། སློང་མོ་ལ་སྙད་བཏགས་ཏེ་རྒྱལ་པོའི་ཁབ་ཏུ་སོང་ངོ༌། །
འོད་སྲུངས་ཆེན་པོའང་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ནས་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པས་བཟང་མོ་ཁ་དོག་རྒྱས་པ་མ་ཡིན་པར་གྱུར་པ་མཐོང་ནས་སྨྲས་པ། སྲིང་མོ། ཚངས་སྤྱོད་ཡོངས་སུ་བསྐྱངས་སམ། དེས་སྨྲས་པ། བདག་རང་གི་ཁྱིམ་ན་གནས་པ་ཁོ་ན་ཚངས་པར་སྤྱོད་ཀྱི། ད་ལྟ་ནི་མི་ཚངས་པ་ཁོ་ནར་བས་ཏེ། ཚངས་སྤྱོད་མ་མཆིས་སོ། །སྲིང་མོ། ཚངས་སྤྱོད་ལ་གནས་པའི་ཆོས་འདུལ་བ་ལ་རབ་ཏུ་འབྱུང་ངམ། དེས་སྨྲས་པ། ཁྱེད་ལའང་རྒྱས་གཏོད་པ་མེད་གྲང༌། སྲིང་མོ། མ་འཇིགས་ཤིག །བཅོམ་ལྡན་འདས་ཀྱི་བསྟན་པ་ནི་དྲི་ང་བ་མེད་པ། སྡིག་པ་མེད་པ་ཡིན་ནོ། །དེའི་ཉན་ཐོས་རྣམས་ནི་ལྷའི་འདོད་པའང་དོན་དུ་མི་གཉེར་ན་མིའི་འདོད་པ་ལྟ་ཅི་སྨོས། དེས་དེ་སྐྱེ་དགུའི་བདག་མོ་ཆེན་མོ་ལ་གཏད་ནས་རབ་ཏུ་བྱུང༌། བསྙེན་པར་རྫོགས་པར་བྱས་སོ། །དེ་བསོད་སྙོམས་ལ་ཞུགས་པ་ན། གཡོན་ཅན་དང༌། འཕྱོན་མ་དང༌། ཟོལ་པ་དག་འདི་ལྟ་བུའི་གཟུགས་སྡུག་པ་འདི་ལོངས་སྤྱོད་པ་མེད་པར་དགའ་བར་བྱེད་དོ་ཞེས་ཁ་ཟེར་རོ། །དུས་གཞན་ཞིག་ན་འོད་སྲུངས་ཆེན་པོ་བསོད་སྙོམས་ལ་ཞུགས་པ་དང༌། བཟང་མོ་མཐོང་ནས་སྨྲས་པ། སྲིང་མོ། ཁྱོད་བཅོམ་ལྡན་འདས་ཀྱི་བསྟན་པ་ལ་དགའ་འམ། སྨྲས་པ། བདག་ཅག་བཅོམ་ལྡན་འདས་ཀྱི་བསྟན་པ་ལ་དགའ་སྟེ་མི་དགའ་བ་མ་མཆིས་སོ། །འོན་ཀྱང་བདག་ནི་ལུག་ཚོན་པོ་དང་འདྲ་བར་གཟུགས་འདིས་གནོད་པ་བྱུང་སྟེ། གང་དང་གང་དུ་ཕྱིན་པ་དེར་སྐྱེ་བོ་དེ་བདག་ལ་ཁ་ཟེར་རོ། །འོད་སྲུངས་ཀྱིས་སྨྲས་པ། ཁྱོད་བསོད་སྙོམས་ཀྱི་ཕྱིར་ཉོན་མོངས་པར་མ་བྱེད་ཅིག །ངས་ཁྱོད་ལ་ཉིན་རེ་ཞིང་རང་གི་བསོད་སྙོམས་ལས་ཕྱེད་ཕྱེད་སྦྱིན་ནོ། །དེས་བསོད་སྙོམས་ལ་རྒྱུས་ནས་ཕྱེད་རང་གིས་སྤྱད། ཕྱེད་དེ་ལ་བྱིན་པ་དྲུག་སྡེ་རྣམས། འོད་སྲུངས་འདི་ཁྱིམ་ན་གནས་པ་ན་བཟང་མོ་དང་ལྷན་ཅིག་ཁྱིམ་གཅིག་ཏུ་ལོ་བཅུ་གཉིས་གནས་ཀྱང་འདོད་ཆགས་ཀྱི་སེམས་མ་སྐྱེས་སོ་ཞེས་ཐོས་ན། ད་ལྟར་ནི་དེ་ལ་བསོད་སྙོམས་ཕྱེད་སྦྱིན་པར་བྱེད་དོ་ཞེས་འཕྱ་བར་གྱུར་ཏོ། །
དེ་ནས་འོད་སྲུངས་ཆེན་པོས་བཟང་མོ་ལ་ཆོས་བསྟན། དེས་བརྩོན་པ་བྱས་པས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཐོབ་བོ། །རེ་ཞིག་ན་འོད་སྲུངས་ཆེན་པོས་དགེ་སློང་དག་འཕྱ་བ་ཐོས་ནས་བཟང་མོ་ལ་སྨྲས་པ། སྲིང་མོ། ངས་དགེ་བའི་བཤེས་གཉེན་གྱི་བྱ་བ་གང་ཡིན་པ་དེ་བྱས་ཟིན་ལ། རི་དྭགས་ཀྱིས་རི་དྭགས་མི་གསོས་ཀྱིས། ད་ནི་རང་གི་སྤྱོད་ཡུལ་སངས་རྒྱས་ཀྱིས་གནང་བ། ཕའི་ཡུལ་དུ་སྦྱངས་པའི་ཡོན་ཏན་བསོད་སྙོམས་(༡༤ན)སྤེལ་ཞིག །དེའི་ཚེ་མ་སྐྱེས་དགྲས་སྡིག་པའི་གྲོགས་པོ་ལྷས་བྱིན་ལ་བརྟེན་ནས་ཕ་སྲོག་དང་ཕྲལ་ཏེ། ཕའི་རྒྱལ་སྲིད་ལ་འདུག་གོ །འདུག་མ་ཐག་ཏུ་འགྱོད་པ་སྐྱེས་ནས་མྱ་ངན་གྱི་ཁང་པར་ཞུགས་སོ། །ཐབས་དུ་མས་མྱ་ངན་བསང་བའི་ཐབས་བྱས་ཀྱང་མ་སྐྱེས་དགྲའི་མྱ་ངན་བསང་མ་ནུས་སོ། །དུས་གཞན་ཞིག་ན་བཟང་མོ་སྤྱོད་ལམ་ཀུན་ནས་མཛེས་པས་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང༌། བློན་པོ་ངན་སེམས་ཅན་ཞིག་གིས་མཐོང་སྟེ། འདིས་རྒྱལ་པོའི་མྱ་ངན་སེལ་ནུས་སོ་སྙམ་ནས་དེས་བཟང་མོ་བཟུང་སྟེ་རྒྱལ་པོ་ལ་འོས་པའི་ཁྲུས་དང་རྒྱན་གྱིས་བརྒྱན་ནས་མ་སྐྱེས་དགྲ་ལ་ཕུལ་ལོ། །བཟང་མོའི་སྔོན་གྱི་ལས་ཀྱི་རྣམ་པར་སྨིན་པས། རྒྱལ་པོ་མ་སྐྱེས་དགྲས་བཟང་མོ་མཐོང་མ་ཐག་ཏུ་ཆགས་ནས་དེ་དང་ལྷན་ཅིག་དགའ་མགུར་སྤྱད་དོ། །དེ་ནས་གསོ་སྦྱོང་གི་ཚེ་བཟང་མོ་ཚོགས་ན་མི་སྣང་ངོ༌། །དེ་ནས་སྐྱེ་དགུའི་བདག་མོ་ཆེན་མོས་བསམས་པ་ན་བཟང་མོ་ཉམ་ང་བར་གྱུར་པ་མཐོང་ནས། ཨུཏྤ་ལའི་མདོག་ལ་སྨྲས་པ། ཕུ་ནུ་མོ། བཟང་མོ་ལ་སོམས་ཤིག །དེ་ནས་ཨུཏྤ་ལའི་མདོག་གིས་རྫུ་འཕྲུལ་གྱིས་མ་སྐྱེས་དགྲའི་ཁྱིམ་དུ་སྐར་ཁུང་གི་བུ་ག་ནས་ཞུགས་ཏེ་བཟང་མོ་ལ་སྨྲས་པ། ཁྱོད་ཀྱིས་ཐོག་མ་མེད་པ་ནས་གོམས་པའི་ཁམས་གསུམ་གྱི་ཉོན་མོངས་པ་རྣམས་སྤངས་ན། ཅིའི་ཕྱིར་རྫུ་འཕྲུལ་རོ་དང་འདྲ་བ་མུ་སྟེགས་ཅན་དང་ཐུན་མོང་བ་འདི་མངོན་དུ་མ་བྱས། བཟང་མོས་སྨྲས་པ། རྫུ་འཕྲུལ་གྱི་ལམ་མི་ཤེས་སོ། །དེས་དེ་ལ་རྫུ་འཕྲུལ་གྱི་ལམ་བསྟན་ནས་བསམ་གཏན་བཞི་ལ་བརྟེན་ཏེ་རྫུ་འཕྲུལ་བསྒྲུབས་ནས་བཟང་མོ་རྒྱན་ཐམས་ཅད་ཀྱིས་བརྒྱན་པ་དགེ་སློང་མའི་དབྱར་ཁང་དུ་སོང་ངོ༌། །དགེ་སློང་མ་བཅུ་གཉིས་སྡེས་མཐོང་ནས་སྐྱེ་དགུའི་བདག་མོ་ཆེན་མོ་ལ་སྨྲས་པ། བདག་ཅག་ནི་རྒྱལ་པོའི་ཆུང་མ་དང་ལྷན་ཅིག་གསོ་སྦྱོང་མི་བགྱིའོ། །སྐྱེ་དགུའི་བདག་མོ་ཆེན་མོས་བཟང་མོ་ལ་སྨྲས་པ། ཁྱོད་རྒྱལ་པོའི་གན་དུ་སོང་ནས་གོས་དང་རྒྱན་སླར་བྱིན་ལ་རྒྱལ་པོས་གནང་བར་གྱིས་ཏེ་གོས་ངུར་སྨྲིག་བགོས་ལ་བདག་ཅག་གི་དྲུང་དུ་ཤོག་ཅིག །
དེ་ནས་བཟང་མོ་མ་སྐྱེས་དགྲའི་ཁྱིམ་དུ་སོང་བ་དང༌། མ་སྐྱེས་དགྲས་འཁྱུད་པར་བརྩམས་པས། བཟང་མོ་ངང་པའི་རྒྱལ་པོ་འདབ་མ་བརྐྱངས་པ་ལྟར་སྟེང་གི་ནམ་མཁའ་ལ་འཕགས་སོ། །དེ་རྒྱལ་པོས་མཐོང་ནས་སུ་ཞིག་ཡིན་སྙམ་དུ་འཇིགས་ཤིང་སྐྲག་ནས་སྨྲས་པ། ཁྱོད་ཅི་ལྷ་མོའམ་ཀླུ་མོའམ། །གནོད་སྦྱིན་སྲིན་མོ་དྲི་ཟ་མོ། །བུད་མེད་འདྲ་མོའམ་ཅི་ཡིན་པ། །དྲིས་པ་དེ་ནི་བདག་ལ་གསུངས། །བཟང་མོས་སྨྲས་པ། བདག་ནི་ལྷ་མོ་ཀླུ་མོ་མིན། །དྲི་ཟ་གནོད་སྦྱིན་སྲིན་མོ་མིན། །མི་དབང་བདག་ནི་བདེ་གཤེགས་ཀྱི། །བྱ་བ་བྱས་པའི་ཉན་ཐོས་མའོ། །དེ་ནས་མ་སྐྱེས་དགྲ་ཟུག་རྔུ་གཉིས་པས་གནད་དུ་བསྣུན་ནས། ཀྱེ་མ་ཀྱི་(༡༤བ)ཧུད་སྡིག་པ་ཆེན་པོ་བྱས་སོ་སྙམ་དུ་སེམས་པ་ལས། བརྒྱལ་ནས་ས་ལ་འགྱེལ་བ་ལ་ཆུས་གཏོར་ནས་བསླང་ངོ༌། །དེ་ནས་མ་སྐྱེས་དགྲས་སེམས་རྙེད་དེ། འཕགས་མ། མར་གཤེགས། བདག་ཉེས་པར་སྤྱོད་པའི་འདམ་དུ་བྱིང་བ་སུག་པ་ནས་དྲང་དུ་གསོལ། དེ་ནས་བཟང་མོས་དེ་རྗེས་སུ་བཟུང་བའི་ཕྱིར་བབས་ནས་སྟན་བཤམས་པ་ལ་འདུག་གོ །དེ་ནས་མ་སྐྱེས་དགྲས་ལྗོན་ཤིང་རྩ་བ་ནས་བཅད་པ་བཞིན་དུ་བཟང་མོའི་རྐང་པ་གཉིས་ལ་གཏུགས་ནས། འཕགས་མ། བཟོད་པ་མཛད་དུ་གསོལ། རྒྱལ་པོ་ཆེན་པོ། བདག་བཟོད་དོ། །དེ་ནས་བཟང་མོས་གོས་དང་རྒྱན་རྒྱལ་པོ་ལ་བྱིན། རྒྱལ་པོས་བཟང་མོ་ལ་གོས་ངུར་སྨྲིག་དག་བྱིན་ནས་རྐང་པ་གཉིས་ལ་ཕྱག་བཙལ་ཏེ། འཕགས་མ། ཁྱོད་ལ་ཇི་སྲིད་འཚོའི་བར་དུ་ཆོས་གོས་དང༌། བསོད་སྙོམས་དང༌། ཡོ་བྱད་རྣམས་ཀྱིས་བསྟབ་པར་བགྱིའོ། །བཟང་མོས་སྨྲས་པ། ལྷ། ཕལ་ཆེར་བདག་གི་ལས་ཀྱིས་ཉེས་ཀྱི། ཁྱོད་ཀྱིས་མ་ཉེས་ཏེ། བཅོམ་ལྡན་འདས་ཀྱིས། གང་དུ་གནས་ནའང་ལས་ཀྱིས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ན་མེད། །རི་རྣམས་ཀྱི་ནི་གསེབ་ཏུ་ཞུགས་ནའང་མིན། །ཞེས་གསུངས་པས་སོ། །
གཞན་ཡང༌། ཇི་ལྟར་གྲིབ་མ་མི་ཡི་རྗེས་འབྲང་བ། །འདུག་ན་འདུག་ལ་འགྲོ་ན་འགུལ་བ་ལྟར། །དེ་བཞིན་དགེ་དང་མི་དགེ་གྲིབ་མ་ལྟར། །སངས་རྒྱས་སྨྲ་བ་བླ་ན་མེད་པ་གསུངས། །དེ་ནས་བཟང་མོས་རྒྱལ་པོ་ལ་ཚིག་སྙིང་སྡུད་པར་བྱེད་པ་དེ་ལྟ་བུའི་ཆོས་བསྟན་ནས་སྟེང་གི་ནམ་མཁའ་ལ་འཕགས་ཏེ་དགེ་སློང་མའི་དབྱར་ཁང་དུ་སོང་ངོ༌། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཙུན་པ། འོད་སྲུངས་ཆེན་པོ་དང་བཟང་མོ་འདོད་ཆགས་ཆུང་བ་ལ་གཟིགས། དགེ་སློང་དག །སྔོན་རྒྱལ་པོའི་ཕོ་བྲང་ཞིག་ན་ཞིང་པ་ཞིག་འདུག་པ་སྔར་ལངས་ནས་ཞིང་རྨོད་དུ་འགྲོ་ཁར་ཆུང་མ་ལ། ཉི་མ་ཤར་བ་ན་གཡར་ཚུས་ཁྱེར་ལ་ཤོག་ཅེས་བསྒོའོ། །དེའི་ཆུང་མས་གཡར་ཚུས་ཁྱེར་ཏེ་འོངས་པ་དང༌། རང་སངས་རྒྱས་བསེ་རུ་ལྟ་བུ་ཞིག་ཀྱང་འོངས་པ་ལ་དེ་གཉིས་ཀྱིས་བསོད་སྙོམས་ཕུལ་ནས། བདག་ཅག་གཉིས་ཚེ་རབས་ཐམས་ཅད་དུ་འདོད་ཆགས་ཆུང་བར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་ཞིང་པ་དེ་ནི་འོད་སྲུངས་ཡིན་ནོ། །དེའི་ཆུང་མ་དེ་ནི་བཟང་མོ་འདི་ཡིན་ཏེ། རང་སངས་རྒྱས་ལ་བསོད་སྙོམས་ཕུལ་ནས་སྨོན་ལམ་བཏབ་པས་འདོད་ཆགས་ཆུང་བར་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཙུན་པ། འོད་སྲུངས་ཆེན་པོ་དང་བཟང་མོས་ལས་ཅི་ཞིག་བགྱིས་པས་གཉིས་ཀ་རབ་ཏུ་བྱུང་བར་གྱུར། བཀའ་སྩལ་པ། སྨོན་ལམ་གྱི་དབང་གིས་སོ། །
དེ་ཡང་སྔོན་གྲོང་ཁྱེར་ཆེན་པོའི་ཕྱི་རོལ་གྱི་གྲོང་ན་རྫ་མཁན་གྱི་དཔོང་སའི་ཁང་པ་(༡༥ན)ཞིག་ཡོད་པ་དེར་རང་སངས་རྒྱས་ཤིག་སོང་ནས་རྫ་མཁན་ལ། བཞིན་བཟང༌། ཁྱོད་ལ་མི་བདེ་བ་མེད་ན་དཔོང་སའི་ཁང་པའི་ཕྱོགས་ཤིག་ཏུ་གནས་བཅའ་འོ། །རྫ་མཁན་གྱིས་སྨྲས་པ། ཅི་བདེར་བཞུགས་ཤིག །དེ་ནས་རང་སངས་རྒྱས་དེ་དཔོང་སའི་ཁང་པའི་ཕྱོགས་ཤིག་ཏུ་རྩྭའི་གདིང་བ་བཤམས་པ་ལ་སྐྱིལ་ཀྲུང་བཅས་ནས་འདུག་གོ །དེ་བཞིན་དུ། དེ་ནས་རང་སངས་རྒྱས་གཉིས་པ་ཞིག་ཀྱང་འོངས་ནས་སྔར་བཞིན་དུ་བརྙས་ཏེ་དཔོང་སའི་ཁང་པ་དེའི་གྲྭ་གཉིས་པར་འདུག་གོ །གསུམ་པ་ཞིག་ཀྱང་འོངས་ནས་གྲྭ་གསུམ་པར་འདུག །བཞི་པ་ཞིག་ཀྱང་འོངས་ནས་གྲྭ་བཞི་པར་འདུག་གོ །དེ་ནས་མཚན་མོ་རང་སངས་རྒྱས་བཞི་པོ་དེ་དག་མེའི་ཁམས་ལ་སྙོམས་པར་ཞུགས་པ་དང༌། རྫ་མཁན་གྱིས་སྒོ་གསེབ་ནས་དཔོང་སའི་ཁང་པ་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབུར་ཞིང་མེ་ལྕེ་གཅིག་ཏུ་གྱུར་པ་མཐོང་ནས། ཡོན་གནས་འདི་ལྟ་བུ་དག་བདག་གི་དཔོང་སའི་ཁང་པར་གནས་པ་ནི་བདག་དབང་ཐང་ཆེ་བ་དང༌། ཕན་འདོགས་དང་ལྡན་པ་ཡིན་ནོ་སྙམ་སྟེ། ཀྱེ་མའོ་ཡོན་གནས་བྱོན་པ་དག །རིང་མོ་ཞིག་ནས་མཐོང་གྱུར་པས། །འཇིག་རྟེན་འདི་དང་ཕ་རོལ་ཏུ། །བདག་ནི་བདེ་བ་ཉིད་དུ་འགྱུར། །ཞེས་སྨྲས་སོ། །རང་རྒྱལ་དེ་དག་ཀྱང་ཡོན་བདག་གི་དགེ་བའི་རྩ་བ་བསྐྱེད་པའི་ཕྱིར་བསམ་གཏན་དང༌། རྣམ་ཐར་དང༌། ཏིང་ངེ་འཛིན་དང༌། སྙོམས་འཇུག་གིས་མཚན་མོ་འདས་ནས་ཕན་ཚུན་ཀུན་དགའ་བར་འགྱུར་བ་རྩོམ་སྟེ། དེ་རྣམས་ཀྱིས་གཅིག་ལ་སྨྲས་པ། ཁྱོད་སུ་ཡིན། ཅིའི་ཕྱིར་རབ་ཏུ་བྱུང༌། དེས་སྨྲས༌པ། ཁྱེད་རྣམས་ཀྱིས་ཡུལ་ཀ་ལིང་ཀ་ན་རྒྱལ་པོ་ལག་ན་རྣ་ཅན་ཞེས་བྱ་བ་བྱུང་བ་ཐོས་སམ། ཐོས་སོ། །བདག་དེ་ཡིན་ཏེ། རྒྱལ་སྲིད་ཀྱི་ཉེས་དམིགས་མཐོང་ནས་རབ་ཏུ་བྱུང་ངོ༌། །དེ་རྣམས་ཀྱིས་སྨྲས་པ། ཉེས་དམིགས་ཅི་མཐོང་ནས་རབ་ཏུ་བྱུང༌། དེས་སྨྲས་པ། བདག་ཁང་བཟང་གི་ཐོག་ན་འདུག་པའི་ཚེ། དེ་ན་བྱ་ཞིག་གིས་ཤའི་དུམ་བུ་ཞིག་ཁྱེར་ནས་འཕུར་བ་ན་ཤ་དེའི་ཕྱིར་དུ་བྱ་དེ་བྱ་གཞན་མང་པོས་གཙེས་སོ། །བྱ་དེས་ཤ་དེ་བོར་བ་དང་བྱ་གཞན་ཞིག་གིས་བླངས་པས་ཤ་བོར་བ་དེ་བཏང་ལ། ཤ་གང་གིས་བླངས་པ་དེ་ཀུན་ནས་བསྐོར་ཏེ་ཕན་ཚུན་དུ་འཕྲོག་པ་ན་བདག་ཚུལ་བཞིན་ཡིད་ལ་བྱེད་པ་སྐྱེས་ཏེ། ཤ་ལེན་པ་དེ་བཅིངས་ནས་འདོར་བ་དེ་གཏོང་བར་བྱེད་པས་ན། བདག་ཀྱང་རྒྱལ་སྲིད་ལ་བརྟེན་ནས་ཉི་འོག་གི་རྒྱལ་པོ་དང་འཐབ་པ་དང་རྩོད་པར་གདོན་མི་ཟ་བས་བདག་ཀྱང་རྒྱལ་སྲིད་ཀྱི་བདེ་བས་ཆོག་གོ་སྙམ་ནས་ངེས་པར་བྱུང་སྟེ་རང་རྒྱལ་གྱི་བྱང་ཆུབ་མངོན་དུ་བྱས་སོ། །
ཡང་སྨྲས་པ། བྱ་ཡིས་ཤ་ཡི་དུམ་བུ་ཁྱེར་བ་ན། །བྱ་གཞན་ཀུན་ནས་བསྐོར་ཞིང་འབྲང་བ་མཐོང༌། །དེ་ལྟར་འདོད་པའི་ཡོན་ཏན་རིག་(༡༥བ)བྱས་ཏེ། །བསེ་རུ་ལྟ་བུ་གཅིག་པུར་སྤྱོད་པར་གྱུར། །ཡང་དེ་རྣམས་ཀྱིས་གཉིས་པ་ལ། ཁྱོད་སུ་ཡིན། ཇི་ལྟར་རབ་ཏུ་བྱུང༌། སྨྲས་པ། ཁྱེད་རྣམས་ཀྱིས་ཡུལ་མི་ཐི་ལིའི་རྒྱལ་པོ་གདོང་མ་ལེགས་བྱ་བ་དེ་ཐོས་སམ། ཐོས་སོ། །དེ་བདག་ཡིན་ཏེ། རྒྱལ་སྲིད་ཀྱི་ཉེས་དམིགས་མཐོང་ནས་རབ་ཏུ་བྱུང་ངོ༌། །ཉེས་དམིགས་ཅི་མཐོང༌། དེས་སྨྲས་པ། བདག་ཁང་བཟང་གི་ཐོག་ན་འདུག་པའི་ཚེ། གླང་གཉིས་འདོད་པའི་རྒྱུས་ཕན་ཚུན་བསྣད་ཅིང་རྨས་པ་མཐོང་ནས་བདག་ཚུལ་བཞིན་ཡིད་ལ་བྱེད་པ་སྐྱེས་ཏེ། དུད་འགྲོ་འདི་གཉིས་ཀྱང་འདོད་པའི་རྒྱུས་ཕན་ཚུན་བསྣད་པ་དང་རྨས་པར་གྱུར་ན། བདག་ཀྱང་འདོད་པའི་རྒྱུས་ཉི་འོག་གི་རྒྱལ་པོ་དང་ལྷན་ཅིག་འཐབ་པ་དང་རྩོད་པར་འགྱུར་བ་གདོན་མི་ཟ་བས་བདག་རྒྱལ་སྲིད་ཀྱིས་ཆོག་གོ་སྙམ་ནས་ངེས་པར་བྱུང་སྟེ་རབ་ཏུ་བྱུང་ནས་རང་རྒྱལ་བྱང་ཆུབ་མངོན་དུ་བྱས་སོ། །ཡང་སྨྲས་པ། འདོད་པའི་གཞི་དང་རྒྱུ་ཡིས་ནོག་གཡོ་ཞིང༌། །བསྣད་དང་ཅིག་ཤོས་རྨས་པར་གྱུར་མཐོང་བ། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུར་སྤྱོད་པར་གྱུར། །ཡང་དེ་རྣམས་ཀྱིས་གསུམ་པ་ལ་སྨྲས་པ། ཁྱོད་སུ་ཡིན། ཇི་ལྟར་རབ་ཏུ་བྱུང༌། བདག་ཝཱ་ར་ཎཱ་སཱིའི་རྒྱལ་པོ་ཚངས་བྱིན་ཡིན་ཏེ། རྒྱལ་སྲིད་ཀྱི་ཉེས་དམིགས་མཐོང་ནས་རབ་ཏུ་བྱུང་ངོ༌། །ཉེས་དམིགས་ཅི་མཐོང༌། དེས་སྨྲས་པ། སོ་གའི་དུས་ཤིང་རྣམས་མེ་ཏོག་ལེགས་པར་རྒྱས། བུང་འཕུར་བའི་ལང་ལིང་གིས་མེ་ཏོག་གི་མགོ་ལྕོགས་སྡུག་གུ་རྣམས་ནི་ལྡེམ། ཙན་དན་བསྟེན་པ་དང་མཐུན་པའི་ནགས་ཚལ་གྱི་ནང་ན་ངང་པ་ལ་སོགས་པ་སྐད་འབྱིན་པའི་ཚེ་བདག་བཙུན་མོ་དང་ལྷན་ཅིག་སྐྱེད་མོས་ཚལ་དུ་སོང་བ་དང༌། ཨ་མྲའི་ཤིང་གི་མེ་ཏོག་ཤིན་ཏུ་སྤ་བ་ལ་བཙུན་མོ་རྣམས་ཆགས་པས། སྐད་ཅིག་གིས་ཡལ་ག་རྣམས་བཅག་ནས་བཞག་གོ །དེ་ལ་བདག་ཚུལ་བཞིན་ཡིད་ལ་བྱེད་པ་སྐྱེས་ཏེ། ཕྱི་རོལ་གྱི་དངོས་པོ་རྣམས་ཕུན་སུམ་ཚོགས་པ་ན་མཛེས་ལ། ཉམས་པ་ན་མི་མཛེས་པ་ཡིན་ན། རྒྱལ་སྲིད་ཀྱང་དེ་ལྟར་ཡིན་སྙམ་ནས་རབ་ཏུ་བྱུང་སྟེ་རང་རྒྱལ་གྱི་བྱང་ཆུབ་མངོན་དུ་བྱས་སོ། །
ཡང་སྨྲས་པ། ཨ་མྲའི་ཤིང་རྩེ་མེ་ཏོག་ལེགས་རྒྱས་པ། །ཡིད་འོང་གཟུགས་ལྡན་ཆགས་པ་མཐོང་བ་ན། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུར་སྤྱོད་པར་གྱུར། །བཞི་པ་དེ་ལའང་དྲིས་པ། ཁྱོད་སུ་ཡིན། ཇི་ལྟར་རབ་ཏུ་བྱུང༌། དེས་སྨྲས་པ། བདག་ཡུལ་བྲང་གིས་ཉལ་ན་རྒྱལ་པོ་གཅེར་བུ་ཐུལ་ཞེས་བྱ་བ་དེ་ཡིན་ཏེ། རྒྱལ་སྲིད་ཀྱི་ཉེས་དམིགས་མཐོང་ནས་རབ་ཏུ་བྱུང་ངོ༌། །ཉེས་དམིགས་ཅི་མཐོང༌། བདག་ཁང་བཟང་གི་ཐོག་ན་འདུག་པའི་ཚེ་བཙུན་མོ་ཞིག་གསེར་གྱི་གདུ་བུས་བརྒྱན་ནས་ཚོན་རྩི་འཐག་པ་ན་སྒྲ་བྱུང་བས། བདག་འདི་སྙམ་དུ། ཕྱི་རོལ་གྱི་དངོས་པོ་(༡༦ན)འདི་སེམས་མེད་ཀྱང་བརྡུངས་པ་ན་སྒྲ་འབྱུང་ན། བདག་གི་རྒྱལ་སྲིད་ལ་བརྟེན་ནས་ཚིག་ངན་སྣ་ཚོགས་འབྱུང་བ་ལྟ་ཅི་སྨོས། རྒྱལ་སྲིད་ཀྱིས་ཆོག་གོ་སྙམ་ནས་རབ་ཏུ་བྱུང་སྟེ་རང་རྒྱལ་གྱི་བྱང་ཆུབ་མངོན་དུ་བྱས་སོ། །
ཡང་སྨྲས་པ། གསེར་མགར་གྱིས་ནི་ལེགས་པར་བརྡངས་པ་ཡི། །གསེར་གྱི་འོད་གསལ་ལག་པའི་མཁྲིག་མ་གཉིས། །རྡུང་བ་ཐོས་པ་དེ་ལྟར་བདག་དང་ནི། །གཞན་དག་ལྷན་ཅིག་གླེང་གཞི་འདི་ཡི་རྒྱུས། །ཚིག་ངན་སྣ་ཚོགས་འཐོན་ཅིང་སེམས་འཁྲུག་པ། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུར་སྤྱོད་པར་གྱུར། །དེ་ལྟར་དེ་དག་ཕན་ཚུན་སྨྲས་ནས་འདུག་གོ །རྫ་མཁན་དང་དེའི་ཆུང་མས་ཀྱང་དེ་ཐོས་ནས་བདག་ཉིད་ཆེན་པོ་འདི་དག་རྒྱལ་སྲིད་ཀྱང་སྤངས་ནས་རབ་ཏུ་བྱུང་ན། བདག་ཅག་ཅིའི་ཕྱིར་རབ་ཏུ་མི་འབྱུང༌། དེ་ནས་ནམ་ལངས་པ་དང་རྫ་མཁན་ཁྱོ་ཤུག་གིས་རང་རྒྱལ་དེ་དག་སྤྱན་དྲངས། བསོད་སྙོམས་ཕུལ་ནས་སྨོན་ལམ་བཏབ་པ། དགེ་བའི་རྩ་བ་འདིས་ནམ་དུའང་དབུལ་པོའི་ཁྱིམ་དུ་སྐྱེ་བར་མ་གྱུར་ཅིག །སྟོན་པ་ཁྱད་པར་དུ་འཕགས་པ་འདི་ལྟ་བུ་མཉེས་པར་བགྱིད་པར་གྱུར་ཅིག་ཅེས་བྱས་ནས། དེ་གཉིས་རབ་ཏུ་འབྱུང་བ་ལ་དགའ་བར་གྱུར་ཏོ། །རེ་ཞིག་ན་རྫ་མཁན་བུམ་པ་ཐོགས་ནས་ཆུ་ལེན་དུ་སོང་བ་ན་ཆུང་མ་རབ་ཏུ་བྱུང་བ་དང༌། དེའི་རྗེས་ལ་རྫ་མཁན་ཡང་རབ་ཏུ་བྱུང་ངོ༌། །དེའི་དུས་ཀྱི་རྫ་མཁན་དེ་ནི་འོད་སྲུངས་ཆེན་པོ་ཡིན་ནོ། །དེའི་ཆུང་མ་དེ་ནི་བཟང་མོ་ཡིན་ཏེ། དེའི་ཚེའང་ཡིད་བྱུང་བ་ཆུང་ངུས་རབ་ཏུ་བྱུང༌། དེ་ལྟར་ཡང་ཆུང་ངུས་སོ། །དེ་བས་ན་ངེས་འབྱུང་གི་རྒྱུ་བསྟེན་པས་འདི་ལྟ་བུའི་ཡོན་ཏན་ཅན་དུ་འགྱུར་ཏེ། འོད་སྲུངས་དང་བཟང་མོ་བཞིན་དུ་དགེ་སློང་རྣམས་ཀྱིས་བསླབ་པར་བྱའོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཙུན་པ། བཟང་མོས་ལས་ཅི་བགྱིས་ན་གཟུགས་བཟང་ཞིང་མཛེས་ལ་བལྟ་ན་སྡུག་པར་འགྱུར། དགེ་སློང་དག །སྔོན་རྒྱལ་པོའི་ཕོ་བྲང་ཞིག་ན་རྒྱལ་པོ་ཞིག་ཡོད་ལ། ཚོང་དཔོན་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་ཀྱང་གནས་པ་ལས། དེས་སྐྱེ་བོའི་ཚོགས་ལ་བལྟས་པ་ན། སེམས་ཅན་བརྒྱ་སྟོང་དུ་མ་སྡུག་བསྔལ་དང་ལྡན་པ་མཐོང་ལ། ཁ་ཅིག་ལུས་ལ་གོས་དང་རྒྱན་བཟང་པོས་བརྒྱན་པ། འབྱོར་པ་མཆོག་དང་ལྡན་པ་མཐོང་ནས། དེ་འདི་སྙམ་དུ། སེམས་ཅན་སྡུག་བསྔལ་བ་འདི་རྣམས་ཀྱིས་སྦྱིན་པ་མ་བཏང་བས་སྡུག་བསྔལ་བར་གྱུར་ལ། ད་ལྟར་ཡང་སྦྱིན་པ་གཏོང་མི་ནུས་པས་ཤི་ནས་དམན་པ་རྣམས་སུ་སྐྱེ་བར་འགྱུར་རོ། །སྦྱིན་པ་བཏང་བས་ནི་ལོངས་སྤྱོད་ཅན་འདི་དག་ཏུ་གྱུར་པ་ཡིན་ནོ། །བདག་གིས་ཀྱང་སྔོན་སྦྱིན་པ་བཏང་བས་འབྱོར་པ་རྙེད་པར་གྱུར་ལ། ད་ལྟར་ཡང་བྱིན་ནས་ཕྱི་མ་སྡུག་བསྔལ་བར་མི་འགྱུར་བར་བྱའོ་སྙམ་སྟེ། (༡༦བ)རང་གི་ཆུང་མ་ལ། བཟང་མོ། འཇིགས་རྟེན་ཕ་རོལ་ཏུ་ནོར་བསགས་པ་རྣམས་ཁྱེར་ལ་འདོང་ངོ༌། །དེས་སྨྲས་པ། དེ་ལྟར་བགྱི་ཡི། རྟ་དང༌། རྔ་མོ་དང༌། བོང་བུ་དག་སྟ་གོན་མཛོད་ཅིག །ཚོང་དཔོན་གྱིས་སྨྲས་པ། རྟ་ལ་སོགས་པས་འཇིག་རྟེན་ཕ་རོལ་ཏུ་ནོར་འཁྱེར་བར་མི་ནུས་ཀྱིས། ཕོངས་པ་དང་ཚོང་པ་ཁྱིམ་དུ་འོངས་པ་རྣམས་ལ་སྦྱིན་པར་བྱིན་ཅིག །དེ་བཞིན་དུ་བགྱིའོ། །
དེ་ནས་རང་སངས་རྒྱས་སྐེམ་ཞིང་ཉམ་ཆུང་བ། གོས་ཧྲུལ་པོ་ཅན་ཞིག་བསོད་སྙོམས་ལ་ཞུགས་ནས་ཚོང་དཔོན་དེའི་སྒོ་ན་འདུག་པ་དང༌། བྲན་མོ་ཆུ་འཆུ་བས་དེ་མཐོང་ནས། ཁྱིམ་དུ་བཞུད་དང༌། སློང་མོ་རྙེད་པར་འགྱུར་རོ། །དེ་སོང་བ་དང་ཚོང་དཔོན་གྱི་ཆུང་མས་མཐོང་ཡང༌། སྐེམ་ཞིང་ཉམ་ཆུང་ལ་ཆོས་གོས་ཧྲུལ་པོ་ཅན་ནོ་སྙམ་ནས་སློངས་པོ་མ་བྱིན་པར་ཕྱིར་བྱུང་ངོ༌། །བྲན་མོ་དེ་བུམ་པ་ཆུས་བཀང་ནས་སླར་འོངས་པ་དང༌། ལྷུང་བཟེད་སྟོང་པར་མཐོང་ནས་དྲིས་པ། ཁྱིམ་འདིར་མ་བྱོན་ནམ། འོངས་ཀྱང་སློངས་མོ་མ་རྙེད་དོ། །དེས་དེ་ཁྲིད་ནས་ཇོ་མོ་ལ་སྨྲས་པ། ཅིའི་ཕྱིར་འདི་ལ་བསོད་སྙོམས་མ་བྱིན། འདི་ལ་ང་མ་དད་པས་སོ། །ཅི། ཇོ་བོས་ཁང་དོག་བཟང་བ་དང༌། དད་ན་བྱིན་ཅིག་ཅེས་ཁྱོད་ལ་བསྒོ་འམ། དེས་སྨྲས་པ། འདི་ལ་ང་མ་དད་ཕན་ཆད་མང་དུ་སྨྲས་ཀྱང་ཅི་ཕན། དེ་ནས་བྲན་མོས་ཇོ་མོ་ལ། བདག་གི་འཚལ་མ་ནར་མ་དེ་བག་ལ་སྩོལ་ཅིག །དེས་ཀྱང་བྱིན་པ་དང༌། བྲན་མོས་ཟན་ཕྱེ་བྲེའུ་ཆུང་གང་རང་སངས་རྒྱས་དེ་ལ་ཕུལ་ནས་འདི་སྙམ་དུ་འཕགས་པ་འདི་ཆོས་གོས་ཧྲུལ་བས་ཁྱད་དུ་བསད་པ་ཡིན་པས་བདག་གིས་རས་ཡུག་དབུལ་ལོ་སྙམ་ནས་རས་ཡུག་དཀར་པོའང་ཕུལ་ལོ། །རང་སངས་རྒྱས་དེས་ཀྱང་བྲན་མོ་དེ་དད་པ་བསྐྱེད་པའི་ཕྱིར་དུ་ངང་པའི་རྒྱལ་པོ་འདབ་མ་བརྐྱངས་པ་ལྟར་ནམ་མཁའ་ལ་འཕགས་སོ། །དེས་དེ་མཐོང་མ་ཐག་ཏུ་སེམས་དད་པར་གྱུར་ནས་ཞབས་ལ་ཕྱག་བཙལ་ཏེ། འཕགས་པ་འདི་ཁ་དོག་ངན་པས་ཁྱད་དུ་བསད་པ་ཡིན་ནོ་སྙམ་ནས། སྨོན་ལམ་བཏབ་པ། བདག་གི་དགེ་བའི་རྩ་བ་འདིས་ཚེ་རབས་ཐམས་ཅད་དུ་གཟུགས་མཛེས་ཤིང་མདོག་བཟང་བ། བལྟ་ན་སྡུག་པར་གྱུར་ཅིག་ཅེས་བྱས་སོ། །དེའི་ཚེ་རྒྱལ་པོ་བློན་པོའི་ཚོགས་ཀྱིས་བསྐོར་ནས་འདུག་པའི་སྟེང་དུ། རང་སངས་རྒྱས་དེའི་གྲིབ་མ་བབས་པ་དང༌། དེས་སྟེང་དུ་བལྟས་པ་ན་རང་སངས་རྒྱས་ཆོས་གོས་དང་རས་ཡུག་དང་ལྷུང་བཟེད་ཐོགས་པ། མཛེས་པ་ཞིག་ནམ་མཁའ་ལ་འགྲོ་བ་མཐོང་ནས། བདག་ཉིད་ཆེན་པོ་འདི་ལྟ་བུ་ཡུལ་གྱི་བསོད་སྙོམས་ལེན་པ་དེ་ནི་བདག་དབང་ཐང་ཆེ་བ་དང༌། ཕན་འདོགས་དང་ལྡན་པ་ཡིན་ནོ་སྙམ་ནས། དེང་འདི་ལ་བསོད་སྙོམས་སྦྱིན་པར་བྱེད་པ་དེ་ལ་གྲོང་ཁྱེར་གྱི་མཆོག་སྦྱིན་པར་བྱའོ་ཞེས་སྨྲས་སོ། །ཚོང་དཔོན་དེ་ཡང་འཁོར་དེར་འདུག་པས། བདག་གིས། བསོད་སྙོམས་པ་ཐམས་ཅད་ལ་སྦྱིན་པ་བྱིན་ཅིག་ཅེས་བསྒོ་བས། (༡༧ན)ངེས་པར་བདག་གི་ཁྱིམ་ནས་བསོད་སྙོམས་ཕུལ་བ་ཡིན་གྱི་བརྟག་གོ་སྙམ་ནས་རིངས་པར་ཁྱིམ་དུ་སོང་ངོ༌། །ཆུང་མ་དེས་ཀྱང་དེའི་རྫུ་འཕྲུལ་མཐོང་སྟེ་དད་ནས། བྲན་མོ་ལ་སྨྲས་པ། བསོད་ནམས་ང་ཡིར་བྱའོ། །ཁྱོད་ལ་ཁ་ཟས་མཆོག་ཏུ་བསོད་པ་དག་སྦྱིན་ནོ། །བྲན་མོས་སྨྲས་པ། ཁྱོད་ཇོ་མོ་ཡིན་པས་བདག་གི་སྲོག་ལ་དབང་གི་བསོད་ནམས་ལ་མི་དབང་བས་མི་སྦྱིན་ནོ། །དེ་ཁྲོས་ནས་ལག་པའི་མཁྲིག་མ་གདུ་བུ་དང་བཅས་པ་བྲན་མོའི་མགོར་བརྒྱབ་པས་མགོ་བསྣད་དེ་ཁྲག་བྱུང་བ་ཚོང་དཔོན་གྱིས་མཐོང་ནས། ཅི་ཉེས་ཞེས་དྲིས་སོ། །དེས་ཀྱང་ཇི་ལྟར་གྱུར་པ་སྨྲས་པ་དང༌། ཚོང་དཔོན་གྱིས་བྲན་མོ་རྒྱན་ཐམས་ཅད་ཀྱིས་བརྒྱན་ཏེ། ཁྱིམ་བདག་ཏུ་བཅུག་ནས་ཇི་ལྟར་གྱུར་པ་རྒྱལ་པོ་ལ་གསོལ་བ་དང༌། རྒྱལ་པོས་སྨྲས་པ། དེ་ནི་ཇོ་མོར་འོས་ཏེ། ཁྱོད་ཀྱིས་དེ་ལྟར་མ་བྱས་ན་ངས་དེ་བྲན་མོ་མ་ཡིན་པར་བྱས་པས་འགྱུར་རོ། །འོན་ཀྱང་ངས་དེ་ལ་གྲོང་ཁྱེར་གྱི་མཆོག་སྦྱིན་ནོ། །དེ་དད་པ་ཐོབ། རྐྱེན་རྙེད་པས་སྦྱིན་པ་བྱིན། ཚུལ་ཁྲིམས་བསྲུངས་ནས་སུམ་ཅུ་རྩ་གསུམ་གྱི་ལྷའི་བུ་མོ་གཟུགས་ཕུན་སུམ་ཚོགས་པ། འོད་དང་གཟི་མདངས་དང་སྣང་བ་རྒྱ་ཆེན་པོ་དང་ལྡན་པ་ཞིག་ཏུ་སྐྱེས་པས་ལྷའི་ཚོགས་ཐམས་ཅད་ངོ་མཚར་དུ་གྱུར། དབང་པོ་དང༌། ཉེ་དབང་བཞི་ཡ་ཡ་པོར་གྱུར་ཏེ། འདི་བདག་གི་ཡིན་ནོ་ཞེས་སོ་སོ་ནས་སྨྲས་སོ། །
དེ་ནས་བརྒྱ་བྱིན་གྱིས་སྨྲས་པ། བདག་ཅག་འདོད་ཆགས་ཀྱིས་ལྷག་པར་གདུངས་པས་ཚིགས་བཅད་སྨྲ་བ་དེའི་ཡིན་པར་འགྱུར་རོ། །དེ་ནས་གཅིག་གིས་སྨྲས་པ། བློང་ཞིང་རབ་ཏུ་བློང་གྱུར་པས། །བདག་ལ་ཕྱོགས་ནི་སྣང་བ་མེད། །དེ་ལ་སེམས་ནི་གནས་གྱུར་པ། །དེ་ཕྱིར་གྲོགས་དག་འདི་འདོད་དོ། །གཉིས་པས་སྨྲས་པ། ཀྱེ་མའོ་ལྷ་དབང་གང་ཞིག་ནི། །ཚིགས་བཅད་སྨྲ་བ་དེ་རེ་བདེ། །གཡུལ་ངོའི་སྣ་ལ་རྔ་བརྡུངས་པ། །དེ་ལྟར་བདག་ནི་འདོད་ཆགས་སྐྱེས། །གསུམ་པས་སྨྲས་པ། རྔ་ཆེན་བརྡུངས་པར་གྱུར་ཀྱང་ནི། །དེ་དང་དེར་ནི་ངལ་གསོར་ཡོད། །ཆུ་ཀླུང་ཆེན་པོ་མི་བཟད་ལྟར། །དེ་ལྟར་བདག་ནི་འདོད་ཆགས་སྐྱེས། །བཞི་པས་སྨྲས་པ། མི་བཟད་པ་ཡི་ཁྱེར་གྱུར་ཀྱང༌། །དེ་དང་དེར་ནི་ཐོགས་འགྱུར་གྱི། །ཕྱེ་མ་ལེབ་ལྟར་བདག་གི་མིག །རྟག་ཏུ་འཛུམ་པ་མེད་པར་གྱུར། །བརྒྱ་བྱིན་གྱིས་སྨྲས་པ། ཚིགས་བཅད་རབ་ཏུ་སྨྲ་བའི་ཕྱིར། །ཁྱེད་ཅག་ཐམས་ཅད་བདེ་བ་ཡིན། །བདག་ནི་ཅི་ག་འཆི་འགྱུར་བའམ། །གསོན་པར་འགྱུར་བའང་མི་ཤེས་སོ། །དེ་ནས་དེ་དག་གིས། འདི་ནི་བརྒྱ་བྱིན་འདོད་པས་དེ་འདི་ནས་ཤི་འཕོས་ན་མི་རུང་ངོ་སྙམ་ནས་ལྷའི་བུ་མོ་དེ་བརྒྱ་བྱིན་ལ་བྱིན་ནོ། །དེའི་དུས་ཀྱི་བྲན་མོ་དེ་ནི་སེར་སྐྱ་བཟང་མོ་འདི་ཡིན་ཏེ། རང་སངས་རྒྱས་ལ་བསོད་སྙོམས་དང་རས་ཡུག་ཕུལ་ནས་སྨོན་ལམ་(༡༧བ)བཏབ་པས་གཟུགས་བཟང་བ་དང༌། མཛེས་པར་གྱུར་ཏོ། །ཡང་དགེ་སློང་རྣམས་ཀྱིས་ཞུས་པ། ལྷའི་བུ་མོ་དེས་ཉེ་དབང་བཞི་དང༌། བརྒྱ་བྱིན་ཡ་ཡ་པོར་བྱས་པ་ལ་གཟིགས། དགེ་སློང་དག །དེར་མ་ཟད། དེས་སྔོན་གྲོང་གི་བཀྲབས་པ་བཞི་དང༌། མཆོག་ཏུ་བཀྲབས་པའང་ཡ་ཡ་པོར་བྱས་པ་དེ་ཉོན་ཅིག །ལྷའི་བུ་མོ་དེ་ཉིད་རིགས་མཐོ་བ། ནོར་ཆེ་བ་ཞིག་ཏུ་སྐྱེས་པ་དང༌། དེ་ཚོང་དཔོན་ཞིག་གིས་ཆུང་མར་བླངས་པ་གྲོང་གི་བཀྲབས་པ་བཞི་དང་མཆོག་ཏུ་བཀྲབས་པ་དང་ལྔས་མཐོང་ནས་འདོད་ཆགས་ཀྱིས་ལྷག་པར་གདུངས་ཏེ། དེ་ལ་སོ་སོ་ནས་བང་མི་བཏང་བ་དང༌། དེ་ཁྱོ་ལ་རག་ལས་པས། དེ་རིང༌། སང་ཞེས་དེ་རྣམས་ཀྱི་སེམས་སྲུང་གིན་འདུག་གོ །དེ་ནས་ཉི་མའང་མང་ཞིག་ཐལ་བ་ན། དེས་དེ་དག་ལ། བདག་དེ་རིང་འོང་ངོ་ཞེས་དུས་བཏབ་པས། གར་འོང༌། འདི་ནས་ཧ་ཅང་མི་རིང་བ་ན་ཤིང་ནྱ་གྲོ་དྷ་དཔངས་མཐོ་ལ་ཡལ་ག་རྒྱ་ཆེ་བ། ལོ་མ་སྟུག་པོ་ཡོད་པ་དེར་དེངས་ལ། ཤིང་དེ་ལ་འཛེགས་ནས་འདུག་ཅིག །བདག་དེ་རུ་འོང་ངོ་ཞེ་སོ་སོར་བསྟན་པ་དང༌། དེ་ནས་མི་དེ་དག་གིས་སོ་སོར་ཤིང་དེའི་ཕྱོགས་བཞི་དང་དབུས་ཀྱི་ཡལ་ག་ལ་འཛེགས་ནས་འདུག་གོ །ཁྱོ་དེས་རིག་ནས་དེ་བརྡེགས་ཤིང་ཀ་བ་ལ་བཅིངས་སོ། །
དེ་ནས་མཚན་མོ་གཅིག་ཏུ་ལྷགས་པས་སྦྲེབས་བཞིན་དུ། བུད་མེད་དེ་འོང་ངམ་སྙམ་པ་ལས། ནམ་མ་ལངས་ཀྱི་བར་དུ་མ་བྱུང་བ་དང༌། ཤར་ཕྱོགས་ཀྱི་ཡལ་ག་ལ་འདུག་པ་དེས་སྨྲས་པ། འདི་ལྟར་ཉི་མ་ཤར་ཟིན་ལ། །ཞིང་པ་གྲོང་ནས་དོང་ཟིན་ཀྱང༌། །རྫུན་ཅན་མ་ནི་མ་འོངས་པར། །ནྱ་གྲོ་དྷ་ཡིས་ཤེས་པར་གྱིས། །ལྷོ་ཕྱོགས་ཀྱི་དེས་སྨྲས་པ། བུད་མེད་དེ་ནི་འོངས་གྱུར་ཏེ། །དེ་ནི་རྫུན་ཅན་མ་ཡིན་ཡང༌། །ལེགས་ལྡན་ཉི་མ་འདི་ཉིད་ནི། །ཤིན་ཏུ་མྱུར་བར་ཤར་བར་གྱུར། །ནུབ་ཀྱི་དེས་སྨྲས་པ། ཉི་མ་དུས་སུ་ཤར་བས་ན། །ཞིང་པ་རྣམས་ཀྱང་གྲོང་ནས་དོང༌། །བདག་གིས་དུས་ནི་མ་ཤེས་པས། །མཚན་གཅིག་མིག་གི་རྩེ་མ་སྦྱར། །བྱང་གི་དེས་སྨྲས་པ། བདག་གིས་འདིར་ནི་དུས་ཤེས་མ་གྱུར་པས། །མཚན་གཅིག་ཐོག་ཐག་ལྷགས་པས་དོ་སོད་དོ། །གང་ཞིག་གཞན་གྱི་བུད་མེད་ལ་ཆགས་ནས། །དེ་ནི་འདི་དང་གཞན་དག་ཐོབ་པར་འགྱུར། །མཆོག་ཏུ་བཀྲབས་པས་སྨྲས་པ། ཁྱེད་ཅག་ལྷགས་པས་དོ་སོད་ལ། །ཁོ་བོ་མྱ་ངན་མི་བྱེད་ཀྱི། །ནྱ་གྲོ་དྷ་ཡིས་ཉེས་མེད་པར། །བཅག་པ་ལ་ནི་མྱ་ངན་བྱེད། །དེ་དག་བུད་མེད་ལ་རེ་ཐག་ཆད་ནས་རང་རང་གི་ཁྱིམ་དུ་སོང་ངོ༌། །བུད་མེད་དེ་ཁྱིམ་ཐབ་ཀྱིས་བཀྲོལ་བས་ཤིང་དེའི་དྲུང་དུ་སོང་བ་ན་མི་དེ་དག་གིས་མཐོང་ནས། ཁྱོད་ཀྱིས་ངེད་ཅག་བསླུས་སོ། །བུད་མེད་དེས་ལོ་རྒྱུས་རྣམས་སྨྲས་ནས། སྐྱེས་པ་ལྔ་དང་ལྷན་ཅིག་ཁྱིའི་ཆོས་བྱ་བར་ག་ལ་ནུས་སྙམ་སྟེ། ཁྱེད་ཅག་ལས་(༡༨ན)གང་མེ་ཏོག་མཛེས་པ་ཁྱེར་འོང་བ་དེ་དང་ལྷན་ཅིག་དགའ་བ་ཉམས་སུ་མྱོང་བར་བྱའོ་ཞེས་སྨྲས་པ་དང༌། དེ་དག་རྒྱལ་པོའི་པདྨ་སྲུང་བ། རྣ་བ་དང་སྣ་བཅད་པ་ཞིག་ཡོད་པ་དེའི་གན་དུ་སོང་ནས། འདི་སྙམ་དུ། ཟོང་ཁྱེར་ཏེ་མ་འོངས་མོད། མི་འདིའི་བསྔགས་པ་བརྗོད་པས་དགའ་ནས་བདག་ཅག་ལ་མེ་ཏོག་སྟེར་རོ་སྙམ་སྟེ། གཅིག་གིས་སྨྲས་པ། ཇི་ལྟར་སྨྱུག་མ་འདམ་བུ་དག །བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ་ཞིག །མེ་ཏོག་སློང་གིས་སྩལ་བར་མཛོད། །གཉིས་པས་སྨྲས་པ། ཇི་ལྟར་ཀུ་ཤ་ཀ་ཤ་དག །བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ་ཞིག །མེ་ཏོག་སླིང་གིས་སྩལ་བར་མཛོད། །གསུམ་པས་སྨྲས་པ། ཇི་ལྟར་དུར་བ་འཇག་མ་དག །བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ་ཞིག །མེ་ཏོག་སློང་གིས་སྩལ་བར་མཛོད། །བཞི་པས་སྨྲས་པ། ཇི་ལྟར་སྐྲ་དང་ཨག་ཚོམ་དག །བྲེགས་ཤིང་ཕྱིར་ཡང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེ་ཞིག །མེ་ཏོག་སློང་གིས་སྩལ་བར་མཛོད། །ལྔ་པས་སྨྲས་པ། མི་གང་པདྨ་སློང་བྱེད་པ། །དེ་ཀུན་ཁྱོད་ལ་བཀྱལ་བ་ཟེར། །པདྨ་སྦྱིན་ནམ་མི་སྦྱིན་རུང༌། །ཁྱོད་ཀྱི་སྣ་ནི་སྐྱེ་མི་འགྱུར། །མེ་ཏོག་སྲུང་བའི་མི་དེས་བསམ་པ། མི་བཞི་པོས་ནི་བདག་ལ་གྱི་ན་ཞིག་སྨྲས་ཀྱི། ལྔ་པས་ནི་ཇི་ལྟ་བ་བཞིན་སྨྲས་པས་འདི་ལ་མེ་ཏོག་སྦྱིན་ནོ་སྙམ་ནས་མེ་ཏོག་བྱིན་ནོ། །དེས་མེ་ཏོག་བླངས་ཏེ་བུད་མེད་དེའི་གན་དུ་སོང་ནས་དགའ་མགུར་སྤྱད་དོ། །ད་བདག་འདོད་ཆགས་ཀྱི་སྡུག་བསྔལ་མི་འབྱུང་བར་ཇི་ལྟར་བྱ་སྙམ་ནས། དེ་དང་ཧ་ཅང་མི་རིང་བ་ན་སངས་རྒྱས་ཀྱི་མཆོད་རྟེན་ཞིག་ཡོད་པ་ལ་མེ་ཏོག་དེ་ཕུལ་ནས། དགེ་བའི་རྩ་བ་འདིས་ཚེ་རབས་ཐམས་ཅད་དུ་ཉོན་མོངས་ཆུང་བར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་མེ་ཏོག་ལེན་པའི་མི་དེ་ནི་འོད་སྲུངས་ཆེན་པོ་འདི་ཡིན་ནོ། །བུད་མེད་དེ་ནི་བཟང་མོ་འདི་ཡིན་ཏེ། །དེ་ལ་མེ་ཏོག་ཕུལ་བའི་རྣམ་པར་སྨིན་པས་འདོད་ཆགས་ཆུང་བར་གྱུར་ཏོ། །ཡང་དགེ་སློང་རྣམས་ཀྱིས་ཞུས་པ། བཙུན་པ། བཟང་མོས་ལས་ཅི་བགྱིས་པས་འཛམ་བུ་ཆུ་བོའི་གསེར་ལས་བྱས་པའི་གཟུགས་བརྙན་རང་གི་འོད་ཀྱིས་མོག་མོག་པོར་བྱས་པར་གྱུར། དགེ་སློང་དག །སྔོན་འདས་པའི་དུས་བསྐལ་པ་དགུ་བཅུ་རྩ་གཅིག་ན་སྐྱེ་དགུ་རྣམས་ཀྱི་ཚེ་ལོ་བརྒྱད་ཁྲི་པ་ལ་སངས་རྒྱས་རྣམ་གཟིགས་རྒྱལ་པོའི་ཕོ་བྲང་གཉེན་ལྡན་དུ་བྱོན་པ་དང༌། བུ་མོ་ཞིག་རྔ་ཡབ་འཛམ་བུ་ཆུ་བོའི་གསེར་གྱི་ཡུ་བ་ཅན་ཞིག་ཐོགས་ནས་གཡོབ་པ་ན། སངས་རྒྱས་ཀྱི་འོད་ཀྱིས་འཛམ་བུ་ཆུ་བོའི་གསེར་མོག་མོག་བྱས་སོ། །
དེ་ནས་བུ་མོ་དེ་རྔ་ཡབ་ལྕགས་ཀྱི་ཡུ་བ་ཅན་ཐོགས་སམ་སྙམ་དུ་ཐེ་ཚོམ་སྐྱེས་(༡༨བ)སོ། །སངས་རྒྱས་རྣམ་གཟིགས་གཤེགས་པ་ན་རྔ་ཡབ་དེ་འཛམ་བུ་ཆུ་བོའི་གསེར་གྱི་ཡུ་བ་ཅན་དུ་མཐོང་ངོ༌། །དེ་ནས་རྒྱལ་པོ་གཉེན་ལྡན་གྱིས་འཛམ་བུ་ཆུ་བོའི་གསེར་ལས་བྱས་པའི་སྐུ་གཟུགས་ཤིག་བྱས་ནས་དེ་བུ་མོ་དེས་ཁྱེར་ཏེ་འོངས་པ་དང༌། རྣམ་གཟིགས་ཀྱི་འོད་ཀྱིས་མོག་མོག་པོར་བྱས་ཏེ། ཁ་དོག་མི་འདྲ་བར་མཐོང་ནས། སྨོན་ལམ་བཏབ་པ། དགེ་བའི་རྩ་བ་འདིས་འདི་ལྟ་བུའི་ལུས་ཀྱི་འོད་ཅན་དུ་གྱུར་ནས་འཛམ་བུ་ཆུ་བོའི་གསེར་མོག་མོག་པོར་བྱེད་པར་གྱུར་ཅིག་ཅེས་བྱ་བའི་སྨོན་ལམ་གྱི་དབང་གིས་ང་མཉེས་པར་བྱས་ཏེ། དེ་བས་ན་སངས་རྒྱས་དང་ཆོས་དང་དགེ་འདུན་ལ་བྱ་བ་བྱས་ནས། ཡང་དག་པའི་སྨོན་ལམ་གདབ་པར་བྱའོ། །ཡང་སྔོན་ཚོང་དཔོན་ཞིག་གི་སྐྱེད་མོས་ཚལ་དུ་རང་སངས་རྒྱས་ནད་པ་ཞིག་བྱུང་བ་ལ་ཚོང་དཔོན་དེས་ཡོ་བྱད་ཐམས་ཅད་སྦྱར་ཏེ་ནད་སོས་པར་གྱུར་ཏོ། །དེ་མྱ་ངན་ལས་འདས་པའི་ཚེ་སྐུ་གདུང་གི་མཆོད་རྟེན་བྱས། རེ་ཞིག་ན་མཆོད་རྟེན་སྐྱ་བོར་གྱུར་པ་ལ་ཚོང་དཔོན་གྱི་ཆུང་མས་ཡུང་བས་བྱུགས་ནས་མེ་ཏོག་བཀྲམ་སྟེ། སྨོན་ལམ་བཏབ་པ། དགེ་བའི་རྩ་བ་འདིས་ཕྱུག་པ་དང་ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག །འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་པར་གྱུར་ཅིག་ཅེས་བྱས་སོ། །དེའི་དུས་ཀྱི་ཚོང་དཔོན་དེ་ནི་འོད་སྲུངས་ཆེན་པོ་ཡིན་ནོ། །དེའི་ཆུང་མ་དེ་ནི་བཟང་མོ་ཡིན་ཏེ། མཆོད་རྟེན་ལ་ཡུང་བས་བྱུགས་པས་གསེར་གྱི་མདོག་ཏུ་གྱུར་ཏོ། །
ཡང་དགེ་སློང་རྣམས་ཀྱིས་ཞུས་པ། བཙུན་པ། འོད་སྲུངས་ཆེན་པོས་ལས་ཅི་བགྱིས་པས་ནོར་མང་བ་དང་ལོངས་སྤྱོད་ཆེ་བའི་ཁྱིམ་དུ་སྐྱེས་ལགས། དགེ་སློང་དག །སྔོན་བསྟི་གནས་ཤིག་ན་དྲང་སྲོང་ལྔ་བརྒྱ་གནས་སོ། །དེ་དག་ཧ་ཅང་ཐག་མི་རིང་བ་ན་རང་སངས་རྒྱས་ཤིག་ཀྱང་གནས་སོ། །དྲང་སྲོང་དེ་དག་ཉིན་རེ་ཞིང་གནས་སྲུང་བའི་དྲང་སྲོང་བཞག་ནས་ཡམ་ཤིང་དང་འབྲས་བུའི་ཕྱིར་ཕྱོགས་བཞིར་འགྲོ་བ་ན། དྲང་སྲོང་གཅིག་རང་སངས་རྒྱས་དེ་དང་ཉེ་བ་ནས་ཡང་ཡང་འགྲོ་འོང་བྱེད་པས་རང་སངས་རྒྱས་དེ་ཉིན་པར་དཀྱིལ་ཀྲུང་མི་གཞིག་པར་འདུག་པ་མཐོང་ནས། ཁ་ཟས་གང་ནས་ཇི་ལྟར་བྱེད་དྲིའོ། །འོན་ཀྱང་ད་ལྟ་སོང་ན་དྲིས་ན་དྲང་སྲོང་དག་གིས་དགེ་སློང་དང་འགྲོགས་པ་མཐོང་ནས་འཕྱ་བར་འགྱུར་བས། བདག་བསྟི་གནས་སྲུང་བའི་ཚེ་དྲིའོ་སྙམ་ནས། དེ་ནས་དེ་བསྟི་གནས་སྲུང་བ་ལ་བབ་སྟེ། དྲང་སྲོང་དེ་དག་གཞན་དུ་སོང་བ་དང༌། རང་སངས་རྒྱས་དེའི་དྲུང་དུ་སོང་ནས་དྲིས་པ། བདག་ཉིན་རེ་ཞིང་ཁ་ཟས་ཀྱི་དོན་དུ་འགྲོ་བ་ན་ཁྱོད་དཀྱིལ་ཀྲུང་བཤིག་པ་དང༌། བསོད་སྙོམས་ལ་འགྲོ་བ་མ་མཐོང་བས། ཁྱོད་དགའ་བའམ། དེས་སྨྲས་པ། དགའ་བ་ཟ་བ་མ་ཡིན་གྱི། བསོད་སྙོམས་ལ་སོང་ནས་འདིར་ཁྱེར་(༡༩ན)ཏེ་ཟའོ། །དེས་དྲིས་པ། བསོད་སྙོམས་ལ་གང་དུ་འགྲོ། བྱང་སྒྲ་མི་སྙན་དུ་འགྲོ། དེར་མི་འགྲོ་བའི་ཚེ་སུམ་ཅུ་རྩ་གསུམ་དུ་འགྲོའོ། །སྒྲ་མི་སྙན་ཅི་འདྲ། དེས་སྨྲས་པ། བདག་གིར་འཛིན་པ་མེད་པ། ཚེས་ངེས་པ། ཤི་འཕོས་ནས་ཀྱང་གྱེན་དུ་འགྲོ་བའོ། །སུམ་ཅུ་རྩ་གསུམ་གྱི་ལྷ་རྣམས་ཅི་འདྲ། ཁ་དོག་དང་ལྡན་པ། བདེ་བ་མང་བ། གཞལ་མེད་ཁང་མཐོན་པོ་ཅན། ཚེ་རིང་བ་ཡུན་རིང་དུ་གནས་པ་ཡིན་ནོ། །དེས་འདི་ནི་བདག་ཉིད་ཆེན་པོའོ་སྙམ་ནས། རང་སངས་རྒྱས་ལ་སྨྲས་པ། འཕགས་པ། དེང་བདག་གིས་བསོད་སྙོམས་དབུལ་གྱིས། རྗེས་སུ་གཟུང་དུ་གསོལ། ཁྱོད་ཀྱང་ཁྱིམ་ནས་ངེས་པར་བྱུང་བ་ཡིན་པས། ང་ལ་བསོད་སྙོམས་ཇི་ལྟར་སྦྱིན། དེ་ལྟ་ལགས་མོད། འོན་ཀྱང་ངེས་པར་བདག་ལ་ཕན་གདགས་སུ་གསོལ། ཁྱོད་ནི་དཔལ་དང་བསོད་ནམས་ཞིང༌། །ཁྱོད་ནི་ཆོས་འཆད་རྣམས་ཀྱི་མཆོག །ཁྱོད་ཀྱི་བརྩོན་པས་འཇིག་རྟེན་འདི། །ཀུན་ནས་བརྒྱན་པ་བཞིན་དུ་གྱུར། །དེས་ཀྱང་ཁས་བླངས་སོ། །
དེ་ནས་དྲང་སྲོང་དེས། ཁྲེ་རྒོད་བྲེའུ་ཆུང་གང་འོ་མའི་ནང་དུ་བཙོས་ནས་རང་སངས་ལ་ཕུལ་ལོ། །དེས་ཀྱང་ལུས་ཀྱིས་ཆོས་བསྟན་པས་མཆོག་ཏུ་དད་ནས། སྨོན་ལམ་བཏབ་པ། དགེ་བའི་རྩ་བ་འདིས་བདག་ངན་སོང་གསུམ་དུ་སྐྱེ་བར་མ་གྱུར་ཅིག །ལྷ་རྣམས་ཀྱི་ནང་དུ་སྐྱེ་བ་དང༌། དེ་ནས་ཤི་འཕོས་ནས་བྱང་གི་སྒྲ་མི་སྙན་དུ་སྐྱེ་བ་དང༌། འདི་བས་ཁྱད་པར་འཕགས་པའི་སྟོན་པ་མཉེས་པར་བྱེད་པར་གྱུར་ཅིག །དེའི་དུས་ཀྱི་དྲང་སྲོང་དེ་ནི་འོད་སྲུངས་འདི་ཡིན་ཏེ། ཁྲེ་རྒོད་བྲེའུ་ཆུང་གང་ཕུལ་བའི་རྣམ་པར་སྨིན་པས་སྒྲ་མི་སྙན་དུ་ལན་སྟོང་སྐྱེས་སོ། །ལྷ་རྣམས་ཀྱི་ནང་དུ་ལན་སྟོང་སྐྱེས་སོ། །དེ་ནས་བྲམ་ཟེའི་རིགས་སུ་སྐྱེས་ནས་རང་སངས་རྒྱས་བརྒྱ་སྟོང་ལས་ཁྱད་པར་དུ་འཕགས་པའི་སྟོན་པ་མཉེས་པར་བྱས་སོ། །དེ་བས་ན་དཀོན་མཆོག་གསུམ་ལ་བཀུར་སྟི་དང་བསོད་ནམས་བྱས་ན་འདི་ལྟ་བུའི་ཡོན་ཏན་གྱི་ཚོགས་ཅན་དུ་འགྱུར་ཏེ། འོད་སྲུངས་ཇི་ལྟ་བ་བཞིན་དུ་ཁྱེད་ཀྱིས་བསླབ་པར་བྱའོ། །ཡང་དགེ་སློང་རྣམས་ཀྱིས་ཞུས་པ། བཙུན་པ། འོད་སྲུངས་ཆེན་པོས་ལས་ཅི་བགྱིས་པས་རབ་ཏུ་བྱུང་ཞིང་དགྲ་བཅོམ་པ་ཐོབ་ནས་བཅོམ་ལྡན་འདས་ཀྱིས་འདོད་པ་ཆུང་ཞིང་ཆོག་ཤེས་པ་དང༌། སྦྱངས་པའི་ཡོན་ཏན་སྨྲ་བ་རྣམས་ཀྱི་མཆོག་ཏུ་ལུང་བསྟན་ལགས། དགེ་སློང་དག །བསྐལ་པ་བཟང་པོ་འདི་ཉིད་ཀྱི་ཚེ་ལོ་ཉི་ཁྲི་པ་ན་འདི་རབ་ཏུ་བྱུང་སྟེ་ལོ་སྟོང་ཕྲག་བཅུར་ཚངས་པར་སྤྱད་ཀྱང་མཐར་ཐུག་པའི་ཡེ་ཤེས་མ་ཐོབ་པར་འཆི་བའི་ཚེ། བཅོམ་ལྡན་འདས་ཤཱཀྱ་ཐུབ་པ་མཉེས་པར་བྱེད་པར་གྱུར་ཅིག །དེས་འདོད་པ་ཆུང་ཞིང་ཆོག་ཤེས་པ་དང༌། སྦྱངས་པའི་ཡོན་ཏན་སྨྲ་བ་རྣམས་ཀྱི་མཆོག་ཏུ་ལུང་(༡༩བ)སྟོན་པར་གྱུར་ཅིག་ཅེས་སྨོན་ལམ་བཏབ་པས་དེ་ལྟར་ལུང་བསྟན་པར་གྱུར་ཏོ། །དེ་བས་ན་གུས་པར་ལུང་དབོག་པ་དང༌། ཀླག་པར་བྱ། ཕུང་པོ་དང༌། ཁམས་དང༌། སྐྱེ་མཆེད་དང༌། གནས་དང༌། གནས་མ་ཡིན་པ་དང༌། རྟེན་ཅིང་འབྲེལ་པར་འབྱུང་བ་ལ་མཁས་པར་བྱ། ཡང་དག་པའི་སྨོན་ལམ་གདབ་པར་བྱའོ། །

༣༽ དྲི་བས་མཉེས་པས་བསྙེན་པར་རྫོགས་པ།

བཅོམ་ལྡན་འདས་ཀྱིས། ལེགས་སྦྱིན་ལ། གཅིག་ཏུ་དགོས་པའི་ཆོས་གང་ཡིན་ཞེས་གསུངས་པས། ཐར་པའོ། །དེ་ལ་དགོས་པ་གང་ཡིན། དད་པའོ་ཞེས་དྲི་བ་དེའི་ལན་ཐེབས་པས་མཉེས་པ་ཙམ་གྱིས་བསྙེན་པར་རྫོགས་པ་ཐོབ་པའོ། །

༤༽ ཚུར་ཤོག་གིས་བསྙེན་པར་རྫོགས་པ།

བྱང་སེམས་དགའ་ལྡན་ན་བཞུགས་པ་ན། ཡུལ་ཨཾ་ག་ན་ཨཾ་གར་བྱུང་བ་ཞེས་བྱ་བའི་རྒྱལ་པོས་རྒྱལ་སྲིད་འབྱོར་པ། རྒྱས་པ། ལོ་ལེགས་པ། སྐྱེ་བོ་དང་མི་མང་པོས་གང་བ་བྱེད་དུ་བཅུག །མ་ག་དྷ་ན་རྒྱལ་པོ་པད་མ་ཆེན་པོས་རྒྱལ་སྲིད་བྱེད་དེ། རེས་དགའ་ནི་ཨཾ་གའི་རྒྱལ་པོ་དཔུང་དང་མཐུ་ཆེ་ལ། རེས་འགའ་རྒྱལ་པོ་པད་མ་ཆེན་པོ་དཔུང་དང་མཐུ་ཆེའོ། །ཨཾ་གའི་རྒྱལ་པོ་དཔུང་དང་མཐུ་ཆེ་བའི་ཚེ་དཔུང་ཚོགས་བཞི་གོ་བསྐོན་ཏེ། མ་ག་དྷའི་རྒྱལ་པོའི་ཁབ་མ་གཏོགས་པ་བཅོམ་ནས་ཕྱིར་ལྡོག་ལ། རྒྱལ་པོ་པད་མ་ཆེན་པོ་དཔུང་དང་མཐུ་ཆེ་བའི་ཚེ་དེས་དཔུང་ཚོགས་བཞི་གོ་བསྐོན་ཏེ། ཨཾ་གའི་ཙམ་པ་མ་གཏོགས་པ་བཅོམ་ནས་ཕྱིར་ལྡོག་གོ །རེ་ཞིག་ན་ཨཾ་གའི་རྒྱལ་པོ་མཐུ་དཔུང་ཆེ་བས། དཔུང་ཚོགས་ཡན་ལག་བཞི་གོ་བསྐོན་ཏེ་མ་ག་དྷ་གཞོམ་པར་བརྩམས་པ་དང༌། རྒྱལ་པོ་པད་མ་ཆེན་པོས་ཀྱང་དཔུང་ཚོགས་བཞི་གོ་བསྐོན་ཏེ་གཡུལ་སྤྲད་པའི་ཕྱིར་འཕགས་པ་ལས། ཨཾ་གའི་རྒྱལ་པོས་རྒྱལ་པོ་པད་མ་ཆེན་པོའི་དཔུང་གི་ཚོགས་འཕྲོགས་པས་རྒྱལ་པོ་པད་མ་ཆེན་པོ་སྐྲག་ནས་སྒོ་བཅད་དེ་ར་བའི་ཁར་སྦྲེངས་ནས་འདུག་པ་ལ། ཨཾ་གའི་རྒྱལ་པོས་ཕོ་ཉ་བཏང་སྟེ། ཕྱིར་འབྱུང་ན་ལེགས། མི་འབྱུང་ན་ནམ་མཁའ་ལ་འགྲོ་ན་མདའ་བརྒྱུས་པས་ལྟུང་བར་བྱ། ས་འོག་ཏུ་འགྲོ་ན་ལྕགས་ཀྱུས་དྲང་བར་བྱ། རི་རྩེར་ཕྱིན་ནའང་ཐར་པ་མེད་དོ་ཞེས་སྦྲིངས་པ་དེ་ཡིད་མ་བདེ་བར་བློན་པོ་རྣམས་ལ་དྲིས་པས། ཡུལ་དང་སྲོག་ལ་གནོད་གྱུར་ན། །སྐྱེས་བུས་ཀུན་ཏུ་སྲོག་བསྲུང་བྱ། །བློ་ཡིས་གཉིས་ཀ་དཔྱད་བྱས་ན། །ཡུལ་ནི་ཡང་རྙེད་སྲོག་རྣམས་མིན། །ལྷ། ཕྱིར་འབྱུང་བར་བགྱིའོ། །དེ་རལ་གྲི་མགུལ་དུ་བཏགས་ནས་ཕྱིར་བྱུང་བ་དང༌། ཨཾ་གའི་རྒྱལ་པོས་དེ་ལ་ལོ་ཐང་དང་དཔྱ་ཕབ་སྟེ་དེ་ཉིད་དུ་བཞག་གོ །གང་གི་ཚེ་བྱང་སེམས་དགའ་ལྡན་ནས་གཟིགས་པ་ལྔ་པོ་དག་ལ་གཟིགས་ནས་ཡུམ་གྱི་ལྷུམས་སུ་ཞུགས་པའི་ཚེ་འཇིག་(༢༠ན)རྟེན་གྱི་ཁམས་ཐམས་ཅད་སྣང་བ་ཆེན་པོས་ཁྱབ་པར་གྱུར་ཅིང༌། བྱང་སེམས་བལྟམས་པའི་ཚེ་རྒྱལ་པོའི་ཁབ་ཏུ་རྒྱལ་པོ་པད་མ་ཆེན་པོའི་བུ་གཟུགས་ཅན་སྙིང་པོ་དང༌། མཉན་ཡོད་དུ་རྒྱལ་པོ་རྩིབས་ཀྱིས་འཕུར་ཚངས་བྱིན་གྱི་བུ་གསལ་རྒྱལ་དང་། འཕགས་རྒྱལ་དུ་རྒྱལ་པོ་མུ་ཁྱུད་མཐའ་ཡས་ཀྱི་བུ་རབ་སྣང་དང༌། ཀོའུ་ཤཱམ་བཱིར་རྒྱལ་པོ་དམག་བརྒྱ་པའི་བུ་ཤར་བ་རྣམས་བཙས་སོ། །གཟུགས་ཅན་སྙིང་པོ་བཙས་པའི་ཉིན་མོ་བློན་པོའི་བུ་ལྔ་བརྒྱའང་བཙས་ནས་རིགས་དང་མཐུན་པར་མིང་བཏགས་སོ། །གཟུགས་ཅན་སྙིང་པོ། པང་ན་འཚོ་བའི་མ་མ་གཉིས་དང༌། ནུ་མ་བསྣུན་པའི་མ་མ་གཉིས་དང༌། དྲི་མ་འཕྱི་བའི་མ་མ་གཉིས་དང༌། རྩེ་གྲོགས་ཀྱི་མ་མ་གཉིས་ལ་གཏད་ནས། འོ་མ་དང༌། ཞོ་དང༌། མར་དང༌། ཞུན་མར་དང༌། མར་གྱི་ཉིང་ཁུ་དང༌། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་དག་གིས་བསྲིངས་བསྐྱེད་དེ། རྫིང་ན་གནས་པའི་པད་མ་བཞིན་དུ་མྱུར་དུ་བསྐྱེད་དོ། །དེ་ཆེར་སྐྱེས་པའི་ཚེ། ཡི་གེ་དང༌། གྲངས་དང༌། རྩིས་དང༌། ལག་རྩིས་དང༌། དབྱུང་བ་དང༌། གཞུག་པ་དང༌། གཞག་པ་ལ་ཉེ་བར་ཞུགས་ནས་ཡི་གེའི་མཐར་ཕྱིན་ཅིང༌། འབྱེད་པ་དང༌། ཀློག་པ་དང༌། མཁས་པ་དང༌། སྤྱོད་པ་གསལ་བ་དང༌། བརྟག་པ་བརྒྱད་པོ་རིན་པོ་ཆེ་དང༌། གཞི་དང༌། གོས་དང༌། ཤིང་དང༌། གླང་པོ་ཆེ་དང༌། རྟ་དང༌། བུད་མེད་དང༌། སྐྱེས་པ་བརྟག་པ་ལ་མཁས་པར་གྱུར་ཏོ། །རྒྱལ་རིགས་རྣམས་ཀྱི་བཟོ་དང་ལས་ཀྱི་གནས་གླང་པོ་ཆེའི་གཉར་ཞོན་པ་དང༌། རྟ་ཞོན་པ་དང༌། ཤིང་རྟའི་ཐབས་དང༌། རལ་གྲིའི་ཐབས་དང༌། འཕོང་དང༌། ཕྱིར་བསྣུན་པ་དང༌། མདུན་དུ་བསྣུར་བ་དང༌། ལྕགས་ཀྱུས་སྒྱུར་ཐབས་དང༌། ཞགས་པ་གདབ་པ་དང༌། མདའ་བོ་ཆེ་འཕེན་ཐབས་དང༌། འཛིང་སྟངས་དང༌། གོམས་སྟབས་དང༌། ཐོར་ཚུགས་དང༌། གཅད་པ་དང༌། འདྲལ་བ་དང༌། དབུག་པ་དང༌། གནས་ལྔ་པོ་རྒྱང་ནས་འཕོག་པ་དང༌། སྒྲ་གྲག་པར་འཕོག་པ་དང༌། གནད་དུ་འཕོག་པ་དང༌། མི་འཆོར་བར་འཕོག་པ་དང༌། ཚབས་ཆེ་བ་ལ་བྱང་བར་གྱུར་ཏོ། །བློན་པོའི་བུ་ལྔ་བརྒྱའང་གནས་དེ་དག་ལ་བྱང་བར་གྱུར་ཏེ། ཕས་བཟོ་སྦྱང་བ་བཅོ་བརྒྱད་ལ་བཅུག་པས་བཟོ་སྦྱངས་གཟུགས་ཅན་སྙིང་པོ་ཞེས་བྱ་བར་གྱུར་ཏོ། །
དེ་རེ་ཞིག་ན་ལྗོངས་སུ་ཕྱིན་པས། ཨཾ་གའི་རྒྱལ་པོའི་ཞོ་ཤས་འཚོ་བ་དག་ལོ་ཐང་དང་དཔྱ་སྡུད་པ་མཐོང་ནས། འདི་དག་སུའི་ཡིན། ཨཾ་གའི་རྒྱལ་པོའི་ལགས་སོ། ཅི། འུ་བུ་ཅག་དེ་ལ་ལོ་ཐང་འབུལ་ལམ། འབུལ་ལགས་སོ། །དེས་སྨྲས་པ། ཞོ་ཤས་འཚོ་བ་དེ་དག་བོས་ཤིག །དེ་དག་གིས་བོས་པ་དང༌། དེས་སྨྲས་པ། (༢༠བ)དེའང་རྒྱལ་པོ་ཡིན་ལ། ངེད་ཀྱང་རྒྱལ་པོ་ཡིན་ན་ཅིའི་ཕྱིར་ཁྱེད་ཅག་ལོ་ཐང་དང་དཔྱ་སྡུད། ཕྱིན་ཆད་མ་སྡུ་ཞིག །དེ་དག་གིས་བསམས་པ། གཞོན་ནུ་འདིས་མི་ཤེས་པ་ཡིན་པས་རྒྱལ་པོའི་གན་དུ་འགྲོའོ་སྙམ་ནས། རྒྱལ་པོ་པད་མ་ཆེན་པོ་ལ་སྨྲས་པ། བདག་ཅག་ཨཾ་གའི་རྒྱལ་པོའི་ལོ་ཐང་དང་དཔྱ་སྡུད་པ་གཞོན་ནུས་བཀག་ན། བསྡུ་འམ་འོན་ཏེ་སླར་མཆི་བར་འཚལ། དེས་སྨྲས་པ། གཞོན་ནུ་དེ་རྒྱུས་མི་ཤེས་པ་ཡིན་པས་སྔར་བཞིན་དུ་སྡུས་ཤིག །དེ་དག་གིས་ལོ་ཐང་དང་དཔྱ་བསྡུས་ནས་ཕྱིར་ལོག་པ་གཟུགས་ཅན་སྙིང་པོས་མཐོང་སྟེ། ངས་ཁྱེད་ལ་ཕྱིན་ཆད་མ་སྡུ་ཞིག་ཅེས་མ་བཟློག་གམ། རེ་ཞིག་འཁོད་ན་ལེགས། མི་འཁོད་ན་མཚམས་ཆེན་པོ་གཅད་དོ། །དེ་དག་སྐྲག་ནས་ཨཾ་གའི་རྒྱལ་པོ་ལ་ལོ་རྒྱུས་དེ་དག་སྨྲས་ཤིང༌། ཚིགས་སུ་བཅད་པ། ཇི་སྲིད་ཤིང་ནི་གཞོན་པའི་ཚེ། །སེན་མོ་དག་གིས་གཅད་ནུས་པ། །དེ་ཉིད་ཆེན་པོར་སྐྱེས་པ་ན། །སྟ་རེ་བརྒྱས་ཀྱང་གཅད་པར་དཀའ། །ཨཾ་གའི་རྒྱལ་པོས་པད་མ་ཆེན་པོ་ལ། གཞོན་ནུ་གཟུགས་ཅན་སྙིང་པོ་མགུལ་པ་ནས་ཐོགས་ལ་ཚུར་བཀྲི་བའམ། ཡང་ན་རྩྭ་དང་ཆས་སྟ་གོན་གྱིས་དང༌། ང་དེར་འོང་ངོ་ཞེས་སྤྲིངས་པས་རྒྱལ་པོ་ཡིད་མ་བདེ་ནས་གཟུགས་ཅན་སྙིང་པོ་ལ་སྨྲས་པ། འོ་སྐོལ་དེ་ལ་ལོ་ཐང་དང་དཔྱ་འབུལ་ལམ། འབུལ་ལོ། །ལྷ། དེ་ཡང་རྒྱལ་པོ་ལགས་ལ། འོ་སྐོལ་ཡང་རྒྱལ་པོ་ལགས་ན། ཅིའི་ཕྱིར་ལོ་ཐང་དང་དཔྱ་འབུལ། བདག་ལ་དཔུང་གི་ཚོགས་ཡན་ལག་བཞི་པ་སྩོལ་དང༌། ཨཾ་གའི་རྒྱལ་པོ་དང་གཡུལ་སྤྲད་པར་བགྱིའོ། །དེས་དེ་ལ་དཔུང་གི་ཚོགས་ཡན་ལག་བཞི་པ་བྱིན་ནོ། །གཟུགས་ཅན་སྙིང་པོས་བློན་པོའི་བུ་ལྔ་བརྒྱ་ལ་སྨྲས་པ། ང་ཨཾ་གའི་རྒྱལ་པོ་དང་གཡུལ་སྤྲོད་ན་ཁྱེད་ཅག་ཅི་བྱེད། དེ་དག་གིས་སྨྲས་པ། ཁྱོད་ཀྱི་གནས་སྐབས་གང་ལགས་པ་དེ་བདག་ཅག་གིའང་ལགས་སོ། །
དེ་ནས་དཔུང་གི་ཚོགས་གོ་བསྐོན་ཏེ། རྒྱལ་པོའི་ཁབ་ནས་བྱུང་བ་པད་མ་ཆེན་པོས་མཐོང་སྟེ། འདི་སུའི་ཡིན། གཟུགས་ཅན་སྙིང་པོའི་ལགས་སོ། །ཨེ་མ། འདི་དམག་མང་པོ་དང་ལྡན་ནོ་ཞེས་བརྗོད་པས་དམག་ལྡན་གཟུགས་ཅན་སྙིང་པོ་ཞེས་གྲགས་སོ། །དེ་ནས་གཟུགས་ཅན་སྙིང་པོས་བློན་པོའི་བུ་ལྔ་བརྒྱ་ལ་སྨྲས་པ། ཨཾ་གའི་རྒྱལ་པོ་འདི་དཔུང་དང་མཐུ་ཆེ་བས། འུ་བུ་ཅག་གིས་གཡུལ་སྤྲད་པར་མི་ནུས་ཀྱིས། དེ་བག་ཡངས་སུ་གོ་ཕུད་པའི་ཕྲུ་མ་བརྫི་ཞིང་བཞབས་ཏེ་གསད་པར་བྱའོ་ཞེས་བགྲོས་ནས། དེ་དག་གིས་ཨཾ་གའི་རྒྱལ་པོ་བཞབས་ཏེ་བསད་དོ། །དེའི་དཔུང་རྣམས་བྱེར་བ་དང༌། གཟུགས་ཅན་སྙིང་པོས་ཕྱོགས་བཞིར་ཕོ་ཉ་བཀྱེ་སྟེ། ཁྱེད་ཅག་ཕྱིར་ལོག་ཅིག་དང༌། འཚོ་བའི་རྒྱུ་སྦྱིན་པར་བྱའོ་ཞེས་སྨྲས་པ་དང་། ཕྱིར་ལོག་གོ །དེ་ནས་ཨཾ་གའི་རྒྱལ་པོས་གྲོང་ཁྱེར་ཙམ་པ་སྲུང་བར་(༢༡ན)བཞག་པ་དེས། རྒྱལ་པོ་བསད་པ་ཐོས་ནས་སྒོ་བཅད་དེ་ར་བའི་ཁར་སྦྲེངས་ནས་འདུག་གོ །གཟུགས་ཅན་སྙིང་པོའང་གྲོང་ཁྱེར་ཙམ་པར་ཕྱིན་ནས། ཤིང་རིང་པོ་ལ་ཨཾ་གའི་རྒྱལ་པོའི་མགོ་བཏགས་པ་བསྟན་ཏེ། ངས་ཁྱོད་ཀྱི་ཇོ་བོ་འདི་ལྟ་བུར་བྱས་ཀྱིས། གལ་ཏེ་ཕྱིར་འབྱུང་ན་ལེགས། ཕྱིར་མི་འབྱུང་ན་ཁྱོད་ཀྱང་འདི་ལྟ་བུར་བྱས་པར་འགྱུར་བའི་གནས་ཡོད་དོ། །དེས་ཐོས་ནས་བསམས་པ། ཡུལ་དང་སྲོག་ལ་གནོད་གྱུར་ན། །སྐྱེས་བུས་ཀུན་ཏུ་སྲོག་བསྲུང་བྱ། །སྙམ་ནས་རལ་གྲི་མགུལ་དུ་ཐོགས་ཏེ་ཕྱིར་བྱུང་ངོ༌། །དེ་ནས་གཟུགས་ཅན་སྙིང་པོས་པད་མ་ཆེན་པོ་ལ། བདག་གིས་ཨཾ་གའི་རྒྱལ་པོ་བསད་ནས་གྲོང་ཁྱེར་ཙམ་པ་ཐོབ་ན། མ་གྲུབ་པ་གཞན་མཆིས་ན་བཀའ་སྩོལ་དང་བསྒྲུབ་པར་བགྱིའོ། །ཞེས་སྦྲིངས་སོ། །དེ་མགུ་ནས། གདུགས་དང་ཅོད་པན་དང་ཐོད་བསྐུར་ཏེ། ཁྱོད་ཀྱིས་དེ་ཉིད་དུ་རྒྱལ་སྲིད་གྱིས་ཤིག །དུས་རེ་ཞིག་ན་པད་མ་ཆེན་པོ་དུས་ལ་བབ་ནས་གཟུགས་ཅན་སྙིང་པོས་ཨཾ་ག་དང་མ་ག་དྷའི་རྒྱལ་སྲིད་གཉིས་ཀ་བཟུང་ངོ༌། །དེའི་ཚེ་བྲམ་ཟེའི་ཁྱེའུ་གསང་ཚིག་འདོད་པ་ཞིག་ཡུལ་དབུས་ནས་ལྷོ་ཕྱོགས་སུ་སོང་ངོ༌། །
དེ་ནས་བྲམ་ཟེ་རིགས་བྱེད་ལ་མཁས་པ་ཞིག་འདུག་པ་དེའི་དྲུང་དུ་རིག་བྱེད་བཀླག་པར་ཞུས་པས། བུ། ལེགས་ཀྱིས། དེ་བཞིན་དུ་གྱིས་ཤིག །དེ་ནི་བྲམ་ཟེས་བྱ་བ་ཡིན་ནོ། །དེས་དེའི་དྲུང་དུ་རིག་བྱེད་བཀླགས་སོ། །བྲམ་ཟེའི་ཁྱེའུ་རྣམས་ཀྱི་ཀུན་སྤྱོད་ནི་མི་ཀློག་པའི་ཚེ་ན་རེས་འགའ་ཆུ་ངོགས་སུ་ཉེ་རེག་བྱེད། རེས་འགའ་གྲོང་ཁྱེར་དུ་འགྲོ། རེས་འགའ་ཡམ་ཤིང་འཐུར་འགྲོའོ། །རེ་ཞིག་ཡམ་ཤིང་འཐུར་སོང་བ་དང༌། སོ་སོ་ནས། ཁྱེད་ཅག་ཡུལ་གང་ནས་འོངས། སོ་སོ་ནས། ཡུལ་འདི་ནས་འོངས་སོ། །དབུས་པ་དེས་ཀྱང༌། དབུས་ནས་འོངས་སོ། །དེ་དག་གིས་སྨྲས་པ། ཤར་ན་བློ་ཅན་གནས་པ་སྟེ། །ལྷོ་ཕྱོགས་ན་ནི་གཡོན་བྱེད་འདུག །ནུབ་ཀྱི་ཡུལ་ན་ཕྲ་མ་ཅན། །བྱང་ཕྱོགས་ན་ནི་ཚིག་རྩུབ་པོ། །ཞེས་སྨྲས་ནས། ཡུལ་དབུས་དེ་ཅི་འདྲ། ཤེས་ལྡན་དག །ཡུལ་དབུས་ནི་ཡུལ་རྣམས་ཀྱི་མཆོག་ཡིན་ཏེ། ས་ལུ་དང༌། བུ་རམ་ཤིང་གི་ཕྲེང་བ་དང༌། བ་ལང་དང༌། མ་ཧེ་ཕུན་སུམ་ཚོགས་པ། སློང་མོ་བ་བརྒྱས་གང་བ། དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེས་བོས་སྤངས་པ། སྐྱེ་བོ་མཁས་པས་བསྟེན་པ། ཆུ་ཀླུང་གཾ་གཱ་ཆུ་དགུར་བཅོ་བརྒྱད་འབབ་པ་ཡོད་དེ། དེར་དྲང་སྲོང་རྣམས་ཀྱིས་དཀའ་ཐུབ་སྤྱད་ན་རང་གི་ལུས་ཉིད་ཀྱིས་མཐོ་རིས་སུ་འདོད་པ་ཡིན་ནོ། །ཅི། ཡུལ་དབུས་ན་བདག་ཅག་གི་མཁན་པོ་དང་འདྲ་བའི་མཁས་པ་དག་ཡོད་དམ། ཡུལ་དབུས་ན་བདག་ཅག་གི་མཁན་པོས་དེ་དག་གི་གདོང་དུ་ལྟ་བར་མི་ནུས་པ་དག་ཡོད་དོ། །
དེ་ནས་དེ་དག་ཡུལ་དབུས་སུ་འདོང་འདོད་པར་(༢༡བ)གྱུར་ཏེ། བྲམ་ཟེའི་ཁྱིམ་དུ་སོང་ནས་མཁན་པོ་ལ། ཡུལ་དབུས་ཀྱི་བསྔགས་པ་ཐོས་པས་དེར་མཆིའོ། །དེས་སྨྲས་པ། བུ་དག །ཇི་སྙེད་ཐོས་པ་དེ་སྙེད་བགྲོད་པར་བྱ་བ་ཡིན་ནམ། ཡུལ་དག་ནི་ཐོས་ན་དགའ་བར་འགྱུར་བ་ཡིན་པས་མཉན་པར་བྱ་ཡི། བགྲོད་པར་ནི་མི་བྱའོ། །དེ་དག་གིས་སྨྲས་པ། ཁྱེའུ་འདིའི་མཆིད་ནས། བདག་ཅག་གི་མཁན་པོས་གང་དག་གི་གདོང་དུ་བལྟ་བར་ཡང་མི་ནུས་པའི་མཁས་པ་དག་ཡོད་དོ་ཞེས་ཟེར་རོ། །བུ་དག །ཅི། ཁོ་བོ་ན་རེ། ས་སྟེང་ན་ཁོ་བོ་གཅིག་པུ་སྨྲ་བ་ཡིན་གྱི། གཞན་མེད་དོ་ཞེས་ཟེར་རམ། ས་ནི་རིན་པོ་ཆེ་མང་པོ་འཛིན་པ་ཡིན་པས་ས་གཞི་ནི་མཛེས་པ་མཛེས་པ་དག་གིས་གང་བ་ཡིན་ནོ། །མཁན་པོ། རེ་ཞིག་ཡུལ་དེའང་བལྟ་ཞིང་ཆུ་ངོགས་སུ་ཉེ་རེག་ཀྱང་བགྱི། སྨྲ་བའི་ཁྱུ་མཆོག་དེ་དག་ལའང་བསྙེན་བཀུར་བགྱི། རྒོལ་བའང་ཚར་བཅད། རང་གི་གྲགས་པའང་བསྒྲག །རྙེད་པའང་བསྒྲུབ་པར་བགྱི་ཡིས། ཡུལ་དབུས་སུ་མཆིའོ། །དེ་འཁོར་ལ་ཆགས་པ་དང༌། འཁོར་ཉུང་བ་ཡིན་པས། བུ་དག །དེ་ལྟ་ན་གཡང་གཞི་དང༌། ཤིང་ཤུན་དང༌། དབྱུ་གུ་དང༌། བླུགས་གཟར་དང༌། དགང་གཟར་དང༌། རིལ་བ་དག་ལོངས་དང་འདོང་ངོ༌། །དེས་དེ་དག་བླངས་ནས་ལམ་དུ་ཆས་པ་ན་རྒོལ་བ་ཁ་ཅིག་ཚར་བཅད་ནས་རྒོལ་བ་རྒོལ་བའི་ཤིང་རྟ་ལ་སྦྱོར། རྒོལ་བ་ཁ་ཅིག་གི་མགོར་ཐལ་བའི་བུམ་པས་བསྣུན། ཁ་ཅིག་འཕོང་གི་དཔོང་སར་ཁྭ་བཞིན་དུ་སྤངས། ཁ་ཅིག་གིས་བསུ། ཁ་ཅིག་གིས་སློབ་མ་ཉིད་དུ་བྱེད་ཅིང་མཐར་རྒྱལ་པོའི་ཁབ་ཏུ་ཕྱིན་ཏོ། །བྲམ་ཟེ་དེས་བསམས་པ། བདག་གིས་ཅིའི་ཕྱིར་རྩ་བ་སྤངས་ནས་ཡལ་ག་ལ་ཉུག་པར་བྱ། རྒོལ་བ་མཁས་པ་རྣམས་ནི་རྒྱལ་པོ་དང་ཉེ་བ་ཡིན་པས་བདག་ཀྱང་དེར་འགྲོའོ་སྙམ་ནས་དེ་རྒྱལ་པོ་གཟུགས་ཅན་སྙིང་པོ་ཅན་སོང་སྟེ། རྒྱལ་བ་དང་ཚེ་སྤེལ་བ་བྱས་ནས། ལྷ། བདག་ལ་བླ་མ་ལས་ཡི་གེ་ཉུང་ཆས་ཤིག་བླངས་པ་མཆིས་ཏེ། དེའི་སླད་དུ་ལྷའི་སྤྱན་སྔར་རྒོལ་བ་དག་དང་ལྷན་ཅིག་བཀའ་མཆིད་རྣམ་པར་གཏན་ལ་དབབ་པར་འཚལ་ལོ། །རྒྱལ་པོས་བློན་པོ་རྣམས་ལ། བྲམ་ཟེ་འདིའི་ལན་ཐེབས་པའི་རྒོལ་བ་ཡོད་དམ། གྲོང་ན་ལ་ད་ན་བྲམ་ཟེ་གནས་ལེན་གྱི་བུ་ཞེས་བྱ་བ། རིག་བྱེད་ཀྱི་ཕ་རོལ་ཏུ་སོན་པ། ཞུགས་ལྟ་བུའི་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་པ་ཞིག་མཆིས་སོ། །འོ་ན་དེ་བོས་ཤིག །བོས་ནས་རྒྱལ་པོ་ལ་རྒྱལ་བ་དང་ཚེ་སྤེལ་བ་བྱས་ནས་ཕྱོགས་གཅིག་ཏུ་འདུག་གོ །རྒྱལ་པོས། འོངས་པ་ལེགས་སོ། །ཁྱོད་ཁོ་བོའི་མདུན་དུ་བྲམ་ཟེ་འདི་དང་ལྷན་ཅིག་གཏམ་བྱེད་ནུས་སམ། རྔོ་ཐོགས་ཐོག་གོ །
དེ་ནས་རྒོལ་བའི་དཀྱིལ་འཁོར་བཤམས་ཤིང་ཕྱོགས་དང་གཞན་གྱི་ཕྱོགས་རྣམ་པར་བཞག་ནས། ཕྱོགས་(༢༢ན)སྔ་མ་གང་བགྱིད་དུ་སྩལ། བྲམ་ཟེ་འདི་འགྲོན་པ་ཡིན་པས་འདི་བྱེད་དུ་ཆུག་ཅིག །དེས་རྒྱུད་ཆགས་ལྔ་བརྒྱ་བཟླས་སོ། །གནས་ལེན་གྱི་བུས་ཕྱིར་བཟླས་ཏེ། ཁྱོད་ཀྱི་འདི་ནི་རིགས་པ་མེད་པ། འདི་ནི་མི་མཐུན་པ། འདི་ནི་མི་འཐད་པ་ཡིན་ནོ་ཞེས་སྐྱོན་བཏགས་པ་དང༌། བྲམ་ཟེ་དེ་ཅང་མི་སྨྲ་བར་འདུག་གོ །ཚར་བཅད་རྣམས་ཀྱི་ནང་ན་ལན་ལ་སྤོབས་པ་མེད་པ་འདི་ཐ་ཆད་ཡིན་ནོ། །རྒྱལ་པོ་ན་རེ། སུ་རྒྱལ། གནས་ལེན་གྱི་བུའོ། །དེ་ནས་རྒྱལ་པོ་ཡིད་དགའ་ནས་རོ་སྟོད་བསྲངས་ཏེ་ལག་པ་གཡས་པ་བརྐྱངས་ནས། བདག་གི་ཡུལ་ན་སྨྲ་བའི་ཁྱུ་མཆོག་འདི་ལྟ་བུ་ཡོད་པ་ནི་བདག་གིས་རྙེད་པ་ལེགས་པར་རྙེད་དོ་ཞེས་བརྗོད་ནས། མཁན་པོ་ཁྱོད་གང་ན་གནས། ལྷ། གྲོང་ན་ལ་ད་ནའོ། །སོང་ན་གྲོང་དེ་ཁྱོད་ཀྱི་རྒོལ་བའི་ལོངས་སྤྱོད་གྱིས་ཤིག །དེ་རངས་ནས་རིགས་མཉམ་པ་ལས་ཆུང་མ་བླངས་ཏེ། དགའ་མགུར་སྤྱད་པས་བུ་རོ་སྟོད་ཤིན་ཏུ་རིང་བ་ཞིག་བཙས་ཏེ། མིང་སྟོད་རིང་དུ་བཏགས། མ་མ་བརྒྱད་ལ་གཏད་དེ་བསྐྱེད་བསྲིངས། ཆེར་སྐྱེས་པ་ན་ཡི་གེ་ལ་སོགས་པ་ལ་བྱང་ཞིང༌། བྲམ་ཟེའི་ཀུན་སྤྱོད་ལ་མཁས་པ། རིག་བྱེད་བཞི་དང༌། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང༌། མཆོད་སྦྱིན་བྱེད་དུ་འཇུག་པ་དང༌། ཀློག་པ་དང༌། ཀློག་ཏུ་འཇུག་པ་དང༌། སྦྱིན་པ་དང༌། ལེན་པ་ལ་མཁས་པའི་བྲམ་ཟེའི་རིག་བྱེད་ཡན་ལག་དང་བཅས་པ་ལ་མཁས་པར་གྱུར་ཏོ། །ཡང་ཆུང་མ་ལ་དགའ་མགུར་སྤྱད་པས་བུ་མོ་མིག་གཉིས་བྱ་ཤཱ་རི་ཀ་འདྲ་བ་ཞིག་བཙས་ནས། རྒྱུ་མཚན་དེས་ཤཱ་རི་ཀ་ཞེས་མིང་བཏགས། ཆེར་སྐྱེས་པ་ན་ཡི་གེ་བསླབས་པ་མཐར་ཕྱིན་ཏེ། དེས་སྟོད་རིང་ཚར་བཅད་དོ། །དེ་ནས་ཕས་སྟོད་རིང་ལ། ཁྱོད་སྐྱེས་པ་ཡིན་ན། བུད་མེད་ཀྱིས་ཚར་བཅད་པས། ང་འདས་པ་དང་རྒོལ་བའི་ལོངས་སྤྱོད་འཕྲོག་པར་འགྱུར་རོ་ཞེས་སྨྲས་སོ། །
དེའི་ཚེ་བྲམ་ཟེའི་ཁྱེའུ་གསང་ཚིག་འདོད་པ་ཞིག་ལྷོ་ཕྱོགས་སུ་སོང་སྟེ། བྲམ་ཟེ་སྐར་རྒྱལ་ཞེས་བྱ་བ་རིག་བྱེད་ཡན་ལག་དང་བཅས་པ་ལ་མཁས་པ་དེའི་དྲུང་དུ་སོང་ནས་འཇིག་རྟེན་རྒྱང་པན་གཟུང་བར་བརྩམས་སོ། །དེ་དག་རེ་ཞིག་མི་ཀློག་པ་ན་ཡམ་ཤིང་འཐུར་སོང་བའི་སྐབས་སུ་སྔར་བཞིན། ཡུལ་གང་ནས་འོངས་དྲིས་པ་དང༌། རང་རང་གི་ཡུལ་སྨྲས། དེས་ཀྱང༌། ཡུལ་དབུས་ནས་སོ། །ཡུལ་དབུས་ཅི་འདྲ་སོགས་སྔར་བཞིན་བསྙད་ནས། སྐར་རྒྱལ་འཁོར་དང་བཅས་པ་རྒྱལ་པོའི་ཐད་དུ་སོང་སྟེ། སྔར་བཞིན་སྨྲས་པས། གནས་ལེན་གྱི་བུ་དང་སྤྲད་ནས། ཕྱོགས་སྔ་མ་གང་བགྱི། སྐར་རྒྱལ་ལོ། །སྐར་རྒྱལ་གྱིས་སྨྲས་པ། གནས་ལེན་གྱི་བུ་འདི་རྒན་པས་ཕྱོགས་སྔ་མ་བགྱིད་དུ་སྩོལ། དེ་བཞིན་གྱིས་ཤིག །གནས་ལེན་གྱི་བུས་བསམས་པ། (༢༢བ)སྐར་རྒྱལ་འདི་ནི་གཞུང་གསར་ལ་བྱེད་པ་གསལ་བས་ལྷན་ཅིག་སྨྲ་དཀའ་ཡི། ཚིག་འདྲེད་པ་ཞིག་བྱའོ་སྙམ་སྟེ་རྒྱུད་ཆགས་ལྔ་བརྒྱ་བཟླས་སོ། །སྐར་རྒྱལ་གྱིས་ཕྱིར་བཟླས་ཏེ། འདི་ནི་རིགས་པ་མེད་པ། མི་མཐུན་པ། མི་འཐད་པ་ཡིན་ནོ་ཞེས་སྐྱོན་བཏགས་པས་ལན་མ་ཐེབས་ཏེ། སྤོབས་པ་མེད་པའི་ཚར་བཅད་དུ་གྱུར། རྒྱལ་པོས། སུ་རྒྱལ། སྐར་རྒྱལ་ལོ། །དེ་ལ་རྒོལ་བའི་ལོངས་སྤྱོད་བྱིན་ཅིག །ལྷ། རྒོལ་བ་ལྷགས་དགུ་ལ་རྒོལ་བའི་ལོངས་སྤྱོད་སྩལ་ན་རིང་པོར་མི་ཐོགས་པར་ཨཾ་ག་དང་མ་ག་དྷ་དག་ཀྱང་རྒོལ་བའི་ལོངས་སྤྱོད་དུ་འགྱུར་བས། གྲོང་ན་ལ་ད་འདི་ཉིད་རྒོལ་བའི་ལོངས་སྤྱོད་ཀྱི་བ་དན་དུ་གྱིས་ལ། གནས་ལེན་གྱི་བུ་ལས་ཕྲོགས་ཏེ་བྲམ་ཟེ་འདི་ལ་སྩལ་ཅིང༌། འདི་བས་ཆེས་རྒྱལ་བ་མཆིས་ནའང་སྐར་རྒྱལ་ལས་འཔྲོགས་ནས་དེ་ལ་སྩལ་ལོ། །དེ་བཞིན་དུ་གྱིས་ཤིག །དེར་ན་ལ་ད་སྐར་རྒྱལ་ལ་བྱིན་པ་དང༌། གནས་ལེན་གྱི་བུས་བསམས་པ། བདག་གིས་རྒྱལ་པོ་འདི་ལ་ཕན་མང་དུ་བཏགས་ནའང་འདིས་ཁོ་བོ་མ་བསྲུངས་ཀྱིས། ཡུལ་གཞན་དུ་འགྲོའོ་སྙམ་སྟེ་ཆུང་མ་ལ་བསྒོ་ནས་སོ་ནམ་དག་བསྡུས་པ་དང༌། ཉེ་དུ་རྣམས་ཀྱིས་གཞན་དུ་མ་བཞུད་པར་ཉེ་དུའི་ནང་དུ་བཞུགས་ཤིག །དེས་སྨྲས་པ། མི་ནི་གཞན་གྱི་ཡུལ་ན་གནས་བླ་ཡི། །རང་གི་ཡུལ་ནི་ཟིལ་གནོན་གནས་པ་མིན། །མི་ནི་གང་ན་ཟིལ་གནོན་མེད་གནས་པ། །དེ་ཉིད་རང་ཡུལ་དེ་ན་གཉེན་ཡང་ཡོད། །སྐར་རྒྱལ་གྱིས་གཏམ་དེ་ཐོས་ནས་གནས་ལེན་གྱི་བུའི་གན་དུ་སོང་སྟེ་སྨྲས་པ། བདག་ནི་གློ་བུར་བ་ཡིན་པས་རིང་པོར་མི་ཐོགས་པར་འགྲོ་ཡིས། འདི་ཁྱོད་ཀྱི་རྒོལ་བའི་ལོངས་སྤྱོད་དུ་འགྱུར་གྱིས་གཞན་དུ་མ་འགྲོ་བར་འདུག་ཅིག །དེས་སྨྲས་པ། འགྲོའོ། །འོ་ན་གྲོང་འདིའི་ཕྱེད་སྣོམས་ཤིག །གནས་ལེན་གྱི་བུས་བསམས་པ། རྒོལ་བའི་ལོངས་སྤྱོད་ཀྱི་བགོ་བཤའ་བྱས་པ་ནི་ཕན་བཏགས་པ་ཡིན་གྱིས། ཤཱ་རི་ཀ་ལ་དེ་སྦྱིན་ནོ་སྙམ་ནས་ཆུང་མ་ལ་དྲིས་པས། སྟོད་རིང་ལ་དྲིའོ། །སྟོད་རིང་ལ་དྲིས་པས། དེས་བདག་ཅག་གི་ལོངས་སྤྱོད་ཉམས་པར་བགྱིས་ན། ཅིའི་ཕྱིར་ཤཱ་རི་ཀ་ཆུང་མར་སྦྱིན། བླུན་པོ་ཁྱོད་ཀྱིས་ཅི་ཤེས། ཞེས་དེ་གཉིས་ཀྱིས་དེའི་ཚིག་ཚིག་མ་ཡིན་པར་བྱས་ཏེ་སྐར་རྒྱལ་ལ་ཤཱ་རི་ཀ་ཆུང་མར་བྱིན་ནོ། །སྟོད་རིང་གིས་བསམས་པ། འདི་དག་གིས་བདག་བརྙས་པ་ནི་ཐོས་པ་ཉུང་བས་ཡིན་པས། སྐར་རྒྱལ་གྱིས་འཇིག་རྟེན་རྒྱང་པན་ཤེས་པ་ལྟར་འཇིག་རྟེན་རྒྱང་པན་གཟུང་བའི་ཕྱིར་ལྷོ་ཕྱོགས་སུ་ཀུན་ཏུ་རྒྱུ་དག་གི་གན་དུ་སོང་ནས། བདག་ཤེས་ལྡན་དག་གི་ཞབས་ལ་སྲི་ཞུ་བགྱི་བར་འཚལ་ལོ། །ཅིའི་ཕྱིར། འཇིག་རྟེན་རྒྱང་པན་གཟུང་བའི་ཕྱིར་རོ། །དེ་དག་གིས་སྨྲས་པ། ཁྱིམ་པ་ལ་མི་སྟོན་ནོ། །(༢༣ན)དེ་ལྟ་ན་རབ་ཏུ་འབྱུང་ངོ༌། །དེ་རབ་ཏུ་བྱུང་ནས། བདག་གིས་འཇིག་རྟེན་རྒྱང་པན་མ་ཟིན་གྱི་བར་དུ་སེན་མོ་མི་གཅད་དོ་ཞེས་སེན་མོ་རིང་པོར་བཞག་པས་ཀུན་ཏུ་རྒྱུ་སེན་རིང་ཞེས་བྱ་བར་གྱུར་ཏོ། །ཤཱ་རི་ཀ་སྐར་རྒྱལ་དང་ལྷན་ཅིག་རྩོད་པ་ན་དེ་སྐར་རྒྱལ་གྱིས་ཚར་བཅད་དོ། །སྐར་རྒྱལ་ཤཱ་རི་ཀ་དང་དགའ་མགུར་སྤྱད་པས། སེམས་ཅན་སྲིད་པ་ཐ་མ་པ། སྤྱོད་པ་ཚོལ་བ། ཐར་པའི་སྙིང་པོ་གཟུང་བ། མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་དང་སྐྱེ་བ་དོན་དུ་མི་གཉེར་བ། ལུས་ཐ་མ་འཛིན་པ་ཞིག་ལྷ་ལས་ཤི་འཕོས་ནས་ཤཱ་རི་ཀའི་མངལ་དུ་ཞུགས་སོ། །ཤཱ་རི་ཀའི་རྨི་ལམ་དུ་མི་ལག་ན་སྒྲོན་མེ་ཐོགས་པ་ཞིག་གིས་བདག་གི་དཀུ་དྲལ་ཏེ་ཞུགས་པ་དང༌། བདག་རི་ཆེན་པོའི་སྤོ་ལ་འཛེག་པ་དང༌། ནམ་མཁའ་ལ་འགྲོ་བ་དང༌། བདག་ལ་སྐྱེ་བོ་ཕལ་པོ་ཆེས། ཕྱག་འཚལ་ལོ་ཟེར་བ་རྨིས་ནས་སྐར་རྒྱལ་ལ་དེས་སྨྲས་སོ། །
སྐར་རྒྱལ་ཉིད་རྨི་ལྟས་ལ་མཁས་པ་ཡིན་མོད། རྨི་ལྟས་ཤེས་པ་གཞན་ལ་དྲིས་པས། རྨི་ལམ་དེ་ནི་བཟང་སྟེ། མི་ལག་ཏུ་སྒྲོན་མེ་ཐོགས་པས་བདག་གི་དཀུ་དྲལ་ཏེ་ཞུགས་པ་རྨིས་པ་ནི་བུ་བཙའ་ཞིང་དེས་ལོ་བརྒྱད་གཉིས་ཀྱིས་དཔའ་དབང་པོའི་བརྡ་སྤྲོད་པ་བཀླགས་ནས་རྒོལ་བ་ཐམས་ཅད་ཚར་གཅོད་པའི་ལྟས་སོ། །རི་ཆེན་པོ་འཛེག་པ་སོགས་ནི་རབ་ཏུ་བྱུང་ནས་བརྟུལ་ཞུགས་གྲུབ་པའི་བདག་ཉིད་ཆེན་པོར་འགྱུར་བའི་ལྟས་སོ། །དུས་རེ་ཞིག་ན་སྐར་རྒྱལ་ཤཱ་རི་ཀ་དང་ལྷན་ཅིག་རྩོད་པ་ན་ཤཱ་རི་ཀས་དེ་ཚར་བཅད་ནས། དེས་བསམས་པ། འདི་ནི་འདིའི་མཐུ་མ་ཡིན་གྱི། འདིའི་མངལ་དུ་ཞུགས་པ་དེའི་མཐུ་ཡིན་ནོ་སྙམ་མོ། །ཟླ་བ་བརྒྱད་དམ། དགུ་འདས་པ་ན། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་འདུགས་ལྟ་བུ། ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འབྱར་བ། སྣའི་གཟེངས་མཐོ་བ་ཞིག་བཙས་སོ། །ཁྱེའུ་དེའི་མེས་པོས། འདི་སྐར་རྒྱལ་གྱི་བུ་ཡིན་པས། ཉེ་རྒྱལ་ཞེས་བཏགས་སོ། །སྐར་རྒྱལ་གྱིས་བསམས་པ། མེས་པོས་ཕ་ལས་དྲས་ཏེ་ཁྱེའུ་འདིའི་མིང་བཏགས་ཀྱི། བདག་གིས་མ་ལས་དྲས་ཏེ་གདགས་སོ་སྙམ་ནས། འདི་ཤཱ་རི་ཀའི་བུ་ཡིན་པས་ཤཱ་རིའི་བུ་ཞེས་བཏགས་སོ། །དེ་མ་མ་བརྒྱད་ལ་གཏད་ནས་བསྲིངས་བསྐྱེད་དེ། །ཆེར་སྐྱེས་པའི་ཚེ་ཡི་གེ་ལ་སོགས་པའི་ཕ་རོལ་ཏུ་སོན་ཅིང་བྲམ་ཟེའི་སྤྱོད་ཚུལ་དང༌། སྤྱོད་པ་དང༌། གཙང་སྦྲ་དང༌། ཀུན་ཏུ་སྤྱོད་པ་དང༌། ཐལ་བ་བླང་བ་དང༌། བྱ་མ་བུམ་བླང་བ་དང༌། ས་བླང་བ་དང༌། ལག་སྟངས་དང༌། ཐོར་ཚུགས་དང༌། རབ་བསྔགས་བྱ་བ་(༢༣བ)དང༌། ཀྱེ་ཞེས་བྱ་བ་དང༌། རིག་བྱེད་བཞི་དང༌། བྲམ་ཟེའི་ལས་དྲུག་ལ་མཁས་པའི་བྲམ་ཟེའི་རིག་བྱེད་ཀྱི་ཕ་རོལ་ཏུ་ཕྱིན་པ། མེ་ལྟ་བུའི་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །དེས་ལོ་བརྒྱད་གཉིས་ཀྱིས་རིག་པའི་གནས་ཐམས་ཅད་བསླབས་ནས་རྒོལ་བ་ཐམས་ཅད་ཚར་བཅད་པར་གྱུར་ཏོ། །དེ་རེ་ཞིག་ན་ཕ་དང་ལྷན་ཅིག་རིག་བྱེད་འདོན་པ་ན། ཡབ། འདིའི་དོན་ཅི་ལགས། བུ། ཁོ་བོས་ཀྱང་འདིའི་དོན་མི་ཤེས་ཏེ། གསང་ཚིག་གི་གཞི་འདི་དག་ནི་སྔོན་གྱི་དྲང་སྲོང་རྣམས་ཀྱིས་བསྟོད་པ་བསྒྲགས་པ་ཙམ་མོ། །ཡབ། དེ་དག་ནི་དོན་མ་མཆིས་སྙམ་མམ། འདིའི་དོན་ནི་འདི་ལགས་སོ། །སྐར་རྒྱལ་དགའ་ནས། བུས་བྱ་བ་ནི་གཉིས་ཏེ། ཕའི་གཞུང་སྲོང་བའམ་ཁྱད་པར་ལྷག་པར་རྟོགས་པ་ཡིན་ན། འདིས་ནི་བདག་གིས་ཁྱད་པར་ལྷག་པར་རྟོགས་སོ་སྙམ་སྟེ། བྲམ་ཟེའི་ཁྱེའུ་ལྔ་བརྒྱ་ཙམ་གསང་ཚིག་ཀློག་ཏུ་འཇུག་པ་དེ་ལ་གཏད་དོ། །ཉེ་རྒྱལ་བྲམ་ཟེའི་ཁྱེའུ་ལྔ་བརྒྱ་ཙམ་གསང་ཚིག་ཀློག་ཏུ་འཇུག་པ་ན་དེས་རིག་བྱེད་རིང་པོ་རྣམས་ཐུང་ངུར་བཞག །ཐུང་ངུ་རྣམས་རིང་པོར་བཞག་སྟེ་ཚིག་དང་ཡི་གེ་ཕྲི་ཞིང་དོན་དང་ངེས་པའི་ཚིག་ཏུ་བཞག་གོ །གྲོང་ཤིང་ཐགས་ཅན་ན་བྲམ་ཟེ་མདུན་ན་འདོན་གྲུ་འཛིན་ཞེས་བྱ་བ། ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་ཀྱང་བུ་མེད་ནས། བུ་འདོད་པས་ཞི་བ་དང༌། ཆུ་ལྷ་དང༌། ལུས་ངན་དང༌། བརྒྱ་བྱིན་དང༌། ཚངས་པ་ལ་སོགས་པ་ལ་གསོལ་བ་འདེབས་ཤིང༌། ལྷའི་བྱེ་བྲག་གཞན་ཡང་ཀུན་དགའ་ར་བའི་ལྷ་དང༌། ཚལ་གྱི་ལྷ་དང༌། བཞི་མདོའི་ལྷ་དང༌། སུམ་མདོའི་ལྷ་དང༌། གཏོར་མ་ལེན་པའི་ལྷ་དང༌། ལྷན་ཅིག་སྐྱེས་པ་དང༌། ཆོས་མཐུན་པ་དང༌། རྟག་ཏུ་རྗེས་སུ་འབྲང་བའི་ལྷ་དག་ལ་གསོལ་བ་འདེབས་སོ། །འཇིག་རྟེན་ན་ལྷ་ལ་གསོལ་བ་བཏབ་པས་བུ་འབྱུང་ངོ་ཞེས་ཟེར་བ་མི་བདེན་ཏེ། དེ་ལྟ་ན་རེ་རེ་ལའང་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འོན་ཀྱང་གནས་གསུམ་མངོན་དུ་གྱུར་ན་བུ་འབྱུང་སྟེ། ཕ་མ་ཆགས་ཤིང་འདུས་པ་དང༌། མ་དུས་ལ་བབ་ཅིང་ཟླ་མཚན་དང་ལྡན་པ་དང༌། དྲི་ཟ་ཉེ་བར་གནས་ཏེ་འཇུག་འདོད་པའོ། །དེའི་ཚེ་སེམས་ཅན་སྲིད་པ་ཐ་མ་པ་ཞིག་གྲུ་འཛིན་གྱི་ཆུང་མའི་མངལ་དུ་ཞུགས་སོ། །བུད་མེད་མཁས་པ་ལ། མ་འདྲེས་པའི་ཆོས་ལྔ་ཡོད་དེ། སྐྱེས་པ་ཆགས་པ་ཤེས་ཤིང་ཆགས་པ་དང་བྲལ་བ་ཤེས་པ་དང༌། དུས་ཤེས་(༢༤ན)ཤིང་ཟླ་མཚན་ཤེས་པ་དང༌། མངལ་ན་གནས་པ་ཤེས་པ་དང༌། གང་ལས་མངལ་དུ་ཞུགས་པ་ཤེས་པ་དང༌། ཁྱེའུ་དང་བུ་མོར་འགྱུར་བ་ཤེས་ཏེ། བུ་ཡིན་ན་དཀུ་གཡས་པར་བརྟེན། བུ་མོ་ཡིན་ན་དཀུ་གཡོན་པར་བརྟེན་པ་ལ། བུར་ཤེས་ནས་ཁྱིམ་ཐབ་ལ། རྗེའི་སྲས་དགྱེས་པ་བསྐྱེད་དུ་གསོལ། དེ་ཡང་ཡིད་དགའ་ནས་རོ་སྟོད་བསྲངས་ཏེ་ལག་པ་གཡས་པ་བརྐྱངས་ནས། ཁོ་བོ་ཡུན་རིང་པོ་ནས་འདོད་པའི་བུའི་ངོ་མཐོང་བ་དང༌། ཁོ་བོ་དང་མཐུན་པར་སྐྱེ་བ་དང༌། ཁོ་བོའི་བྱ་བ་བྱེད་པ་དང༌། གསོས་པས་ཕྱིར་གསོ་བ་དང༌། བགོ་སྐལ་ལ་སྤྱོད་པ་དང༌། ཁོ་བོའི་རིགས་རྒྱུན་རིང་དུ་གནས་པར་བསྒྲུབ་པ་དང༌། བདག་ཅག་ཤི་བ་ན། སྦྱིན་པ་དག་བྱིན་ཞིང༌། བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་ཤིང་འགྲོ་བའི་ཕྱི་བཞིན་དུ་འགྲོ་བར་གྱུར་ཅིག་ཅེས་མིང་གིས་ཡོན་བསྔོ་བ་བྱེད་པར་གྱུར་ཅིག་ཅེས་བརྗོད་ནས། བདེ་བར་བསྐྱངས་པས་ཟླ་བ་བརྒྱད་དམ་དགུ་འདས་ནས་ཁྱེའུ་གཟུགས་བཟང་བ་ཞིག་བཙས། ཉི་མ་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས་ནས་ཁྱེའུ་འདི་ལྷ་པང་དུ་བླངས་ནས་ཐོབ་པས། པང་ནས་སྐྱེས་ཞེས་བཏགས་ཤིང༌། མོའུ་གལ་གྱི་རིགས་ཡིན་པས་མོའུ་གལ་གྱི་བུ་ཞེས་མིང་བཏགས་ནས་མ་མ་བརྒྱད་ལ་གཏད་དེ་བསྐྱེད་བསྲིངས། ཆེར་སྐྱེས་པའི་ཚེ་ཡི་གེ་ལ་སོགས་པའི་རིག་བྱེད་ལ་མཁས་པར་གྱུར་ཏོ། །དེ་ཕ་དང་ལྷན་ཅིག་རིག་བྱེད་འདོན་པ་ན། ཡབ། འདིའི་དོན་ཅི་ལགས་ཞེས་སོགས་སྔར་དང་འདྲ་ལ། བྲམ་ཟེའི་ཁྱེའུ་ལྔ་བརྒྱ་དེ་ལ་གཏད་དོ། །པང་ནས་སྐྱེས་ཀྱིས་བྲམ་ཟེའི་ཁྱེའུ་ལྔ་བརྒྱ་ཙམ་རིག་བྱེད་ཀློག་ཏུ་བཅུག་གོ །བྲམ་ཟེའི་ཁྱེའུ་རྣམས་མི་ཀློག་པའི་དུས་སུ་གྲོང་ཁྱེར་བལྟར་དོང་བ་དང༌། ཉེ་རྒྱལ་གྱི་སློབ་མ་དག་གསང་ཚིག་འདོན་ཞིང་མདུན་ནས་སོང༌། པང་ནས་སྐྱེས་ཀྱི་སློབ་མ་དག་གསང་ཚིག་འདོན་ཞིང་ཕྱི་བཞིན་སོང་བ་དང༌། པང་ནས་སྐྱེས་ཀྱི་སློབ་མ་རྣམས་ཀྱིས་ཉེ་རྒྱལ་གྱི་སློབ་མ་རྣམས་གསང་ཚིག་ཀློག་པ་ཐོས་ནས། ཅིའི་ཕྱིར་ཁྱེད་ཅག་གསང་ཚིག་གི་གཟི་ཉམས་པར་བྱས་ཏེ་ཀློག །དེ་དག་གིས་སྨྲས་པ། འོ་ན་ཇི་ལྟར་བཀླག །འདི་ལྟར་ཀློག་གོ །དེ་དག་གིས་སྨྲས་པ། ཁྱེད་ཅག་གིས་སུ་ལས་བཀླགས། དེ་མི་ཤེས་པ་དེས་ཉི་མ་དང་ཟླ་བ་མི་ཤེས་པ་ཡིན་ནོ། །སྐར་རྒྱལ་གྱི་བུ་ཉེ་རྒྱལ་ལས་བཀླགས་སོ། །ཁྱེད་ཅག་གིས་སུ་ལས་བཀླགས། གང་གིས་དེ་མི་ཤེས་པ་དེས་ཀྱང་ཉི་མ་དང་ཟླ་བ་མི་ཤེས་པ་ཡིན་མོད། གྲུ་འཛིན་གྱི་བུ་པང་ནས་སྐྱེས་ལས་བཀླགས་སོ། །
དེ་ནས་ཉེ་རྒྱལ་གྱི་སློབ་མ་རྣམས་སྤ་གོང་བཀོང་བས་ཉེ་རྒྱལ་ཅན་སོང་བ་དང༌། ཁྱེའུ་དག །ཅི་ཉེས། ཅང་མ་ནོངས་སོ། །དེས་སྨྲས་པ། བསམ་པ་ནང་ན་ཡོད་པ་ཀུན། །ཕྱི་རོལ་ནས་ནི་ཉེ་བར་(༢༤བ)གསལ། །སྐད་མདོག་དབང་པོའི་རྣམ་པ་དག །རྣམ་པར་སྦ་བར་མི་ནུས་སོ། །དེ་དག་གིས་སྐབས་དེ་རྒྱས་པར་བརྗོད་པ་དང༌། དེས་སྨྲས་པ། ཁྱེའུ་དག །དེ་བཞིན་ཏེ། བྲམ་ཟེའི་ཁྱེའུ་དེ་དག་གསང་ཚིག་ཀློག་པ་བཞིན་དུ་བཀླག་པར་བྱ་ཡིན་མོད། འོན་ཀྱང་ཁོ་བོས་རིག་བྱེད་རིང་པོ་རྣམས་ཐུང་ངུར་བཞག །ཐུང་ངུ་རྣམས་རིང་པོར་བཞག་སྟེ། ཚིག་དང་ཡི་གེ་ཕྲི་ཞིང་དོན་དང་ངེས་པའི་ཚིག་ཏུ་བཞག་གོ །དེར་ཁྱེའུ་རྣམས་སྤ་གོང་བ་མེད་པར་གྱུར་ཏོ། །པང་ནས་སྐྱེས་ཀྱི་སློབ་མ་རྣམས་ཀྱང་སྤ་གོང་ནས་པང་ནས་སྐྱེས་ཅན་སོང་བ་དང༌། ཁྱེའུ་དག་ཅི་ཉེས། ཅང་མ་ནོངས་སོ། །བསམ་པ་ནང་ན་ཡོད་པ། སོགས་སྔར་བཞིན་ནོ། དེས་སྨྲས་པ། ཁྱེའུ་དག །བདག་ཅག་ཀློག་པ་བཞིན་དུ་བཀླག་པར་བྱ་བ་ཡིན་མོད། བྲམ་ཟེའི་ཁྱེའུ་དེ་ཤེས་རབ་ཅན་ཡིན་པས་དེས་རིག་བྱེད་རིང་པོ་ཐུང་ངུ་དང༌། ཐུང་ངུ་རིང་པོར་བཞག་གོ་ཞེས་ཐོས་སོ། །དེར་དེ་གཉིས་ཕན་ཚུན་གཅིག་གིས་གཅིག་ཐོས་མ་ཐག་མཐོང་འདོད་པར་གྱུར་ཏེ། ཉེ་རྒྱལ་ཕའི་གན་དུ་སོང་ནས། ཡབ། བདག་གྲོང་ཤིང་ཐགས་ཅན་དུ་མཆིའོ། །ཅིའི་ཕྱིར་དུ། གྲུ་འཛིན་གྱི་བུ་པང་ནས་སྐྱེས་བལྟ་བའི་སླད་དུའོ། །བུ། དེ་ཁྱོད་པས་ཤེས་རབ་ཆེ་བ་ཞིག་ཡིན་ནམ། མ་ཡིན་མོད། ཆེས་ཕྱུག་པ་ལགས་སོ། །
སྨྲས་པ། མི་གང་རིགས་ཀྱིས་རྒན་པ་དང༌། །ན་ཚོད་རྒན་དང་ནོར་གྱིས་རྒན། །དེ་ཀུན་ཐོས་པས་རྒན་པ་ཡི། །སྒོ་ན་དོན་ཀུན་གཉེར་བས་སྡོད། །གལ་ཏེ་འོངས་ན་ཐོས་པས་བགོ་བཤའ་ཡི། །བགྲོད་པར་མི་བྱའོ། །པང་ནས་སྐྱེས་ཀྱང་ཕའི་གན་དུ་སོང་ནས། ཡབ། བདག་གྲོང་ན་ལ་དར་མཆིའོ། །ཅིའི་ཕྱིར་དུ། སྐར་རྒྱལ་གྱི་བུ་ཉེ་རྒྱལ་བལྟ་བའི་སླད་དུའོ། །བུ། དེ་ཁྱོད་པས་ཆེས་ཕྱུག་གམ་ཅི། མ་ཡིན་མོད། ཤེས་རབ་ཅན་ལགས་སོ། །སྨྲས་པ། མི་གང་རིགས་ཀྱིས་རྒན་པ་དང༌། །ན་ཚོད་རྒན་དང་ཐོས་པས་རྒན། །དེ་ཀུན་ནོར་གྱིས་རྒན་པ་ཡི། །སྒོ་ན་ཅི་བྱ་སྙམ་པས་སྡོད། །གལ་ཏེ་དེ་འོངས་ན་ནོར་གྱིས་བགོ་བཤའ་བྱ་ཡི། བགྲོད་པར་མི་བྱའོ། །དེ་ནས་དུས་རེ་ཞིག་ན་རྒྱལ་པོའི་ཁབ་ཏུ་ཀླུའི་རྒྱལ་པོ་རི་བོ་དང་ཡིད་འོང་གཉིས་ཀྱི་དུས་སྟོན་ལ་བབ་བོ། །རྒྱལ་པོ་གཟུགས་ཅན་སྙིང་པོ་ནི་དེ་གཉིས་ཀྱི་དུས་སྟོན་ལ་བབ་པའི་ཚེ་བདག་ཉིད་ཀྱིས་ཉམས་སུ་མྱོང་བའམ། མ་སྐྱེས་དགྲ་གཏོང་བར་བྱེད་པ་ལ། དེའི་ཚེ་གཟུགས་ཅན་སྙིང་པོ་ལ་བྱ་བ་ཅུང་ཞིག་བྱུང་ནས་མ་སྐྱེས་དགྲ་ལ། ཁྱོད་སོང་ལ་རི་བོ་དང་ཡིད་འོང་གཉིས་ཀྱི་དུས་སྟོན་ཉམས་སུ་མྱོང་བར་གྱིས་ཤིག །མ་སྐྱེས་དགྲ་དེའི་དཔོན་ལ་འོང་བར་ཐོས་ནས། གྲུ་འཛིན་གྱིས་བསམས་པ། མ་སྐྱེས་དགྲ་འདི་ཕ་འདས་ནས་རྒྱལ་པོར་འགྱུར་ལ། པང་ནས་སྐྱེས་ཀྱང་བདག་འདས་ནས་མདུན་ན་འདོན་དུ་འགྱུར་(༢༥ན)བས་དེ་བསྟེན་ན་དུས་སུ་འབྲས་བུ་སྟེར་བར་འགྱུར་རོ་སྙམ་ནས་པང་ནས་སྐྱེས་ལ་སྨྲས་པ། དུས་སྟོན་དེ་ལ་རྒྱལ་པོ་དང༌། མདུན་ན་འདོན་དང༌། རྒོལ་བ་དང༌། མཆོག་ཐོབ་པའི་སྟན་བཞི་ལས། རྒྱལ་པོའི་སྟན་གཅིག་པུ་ཞོག་ལ། མདུན་ན་འདོན་གྱི་སྟན་ལ་འདུག་ཅིག །དེས་ཀྱང་དེ་བཞིན་དུ་འདུག་གོ །སྐར་རྒྱལ་གྱིས་ཀྱང་གཏམ་དེ་ཐོས་ནས་ཉེ་རྒྱལ་ལ་སྨྲས་པ། དུས་སྟོན་དེ་ལ་སྟན་བཞི་ལས། མཆོག་ཐོབ་པའི་སྟན་ལ་དབྱི་གུ་དང་རིལ་བ་ཞོག་ལ། རྒོལ་བའི་སྟན་ལ་འདུག་ཅིག །ཉི་མ་ཤར་ནས་ནུབ་པའི་བར་ལ་ཁྱོད་དང་མཉམ་པའི་རྒོལ་བ་གཞན་མེད་དོ། །དེས་ཀྱང་དེ་བཞིན་དུ་འདུག་གོ །དེ་ནས་གར་མཁན་དག་གིས་ཏོ་ཌ་ཀའི་རྒྱུད་དུ་གླུ་བླངས་པ་དང༌། མི་དག་གིས་བྲོ་བརྡུང་བ་དང་གླུ་བླང་བར་བརྩམས་པ་དང༌། ཁྱེའུ་དེ་གཉིས་དབང་པོ་དང་ཕྱིར་བསླན་ཏེ་འཁོད་པར་སྐྱེ་བོ་ཕལ་མོ་ཆེས་མཐོང་ནས་སྨྲས་པ། འདི་གཉིས་ཡང་ན་བླུན་པོ་གཉིས་ཤིག་གོ །ཡང་ན་ཤེས་པ་མི་འཁྲུག་པ་གཉིས་ཤིག་གོ །པང་ནས་སྐྱེས་ཀྱིས་ཉེ་རྒྱལ་ལ་སྨྲས་པ། བྲོ་བརྡུང་བ་དང༌། གླུ་དང༌། རོལ་མོ་རྣམས་སྣང་ངམ། དེས་སྨྲས་པ། གང་གིས་མཐོང་བ་དང༌། ཐོས་པ་ལ་སྣང་ངོ༌། །དབང་པོ་ནང་དུ་བསྡུས་པས་མ་མཐོང་བ་ནི་བདེན་ན། ཇི་ལྟར་མ་ཐོས། དེས་སྨྲས་པ། ཤི་ལྤགས་ཤི་བའི་རྒྱུས་པ་དང༌། །འཆིར་འགྱུར་བཞད་གད་འཇོ་སྒེག་གིས། །འཆི་བའི་སྐྱེ་བོ་འདུས་པ་ལ། །མཁས་པ་སུ་ཞིག་བག་མེད་བྱེད། །དེས་སྨྲས་པ། ཁྱེད་ཉེ་རྒྱལ་ཡིན་ནམ། སྐྱེ་བོ་དག་གིས་དེ་ལྟར་ཤེས་སོ། །ཉེ་རྒྱལ་གྱིས་སྨྲས་པ། ཁྱོད་ལ་བྲོ་དང༌། གླུ་དང༌། རོལ་མོ་རྣམས་སྣང་ངམ། གང་གིས་མཐོང་བའམ། ཐོས་པ་ལ་སྣང་ངོ༌། །ཇི་ལྟར་མ་ཐོས། སྨྲས་པ། རྒྱན་རྣམས་ཐམས་ཅད་ཁུར་ཡིན་ཏེ། །གར་རྣམས་ཐམས་ཅད་མཐོ་འཚམ་པ། །གླུ་རྣམས་ཐམས་ཅད་བཀྱལ་པ་སྟེ། །གཟུགས་ཀུན་མི་རྟག་ཉིད་ཡིན་ནོ། །
དེས་སྨྲས་པ། ཁྱོད་པང་ནས་སྐྱེས་ཡིན་ནམ། སྐྱེ་བོས་དེ་ལྟར་ཤེས་སོ། །ཉེ་རྒྱལ་གྱིས་པང་ནས་སྐྱེས་ལ་སྨྲས་པ། ཚུར་ཤོག །རབ་ཏུ་འབྱུང་ངོ༌། །དེས་སྨྲས་པ། གང་གི་དོན་དུ་མཆོད་སྦྱིན་དང༌། སྦྱིན་སྲེག་དང༌། དཀའ་ཐུབ་བྱེད་པའི་མདུན་ན་འདོན་ནི་བདག་གི་ལག་མཐིལ་དུ་འོངས། གླང་པོ་ཆེས་འགྲོ་བའི་རིགས་སུ་སྐྱེས་ན། ཅིའི་ཕྱིར་རབ་ཏུ་འབྱུང༌། ཉེ་རྒྱལ་གྱིས་སྨྲས་པ། ལྗོན་ཤིང་རྡིབ་པར་གྱུར་པའི་ཚེ། །ཡལ་ག་འདབ་མས་ཅི་ཞིག་བྱ། །དེ་བཞིན་སྐྱེས་བུ་འཆི་བའི་ཚེ། །ཡོངས་སུ་གཟུང་བས་ཅི་ཞིག་བྱ། །ཚུར་ཤོག །རབ་ཏུ་འབྱུང་ངོ༌། །པང་ནས་སྐྱེས་ཀྱིས་སྨྲས་པ། ཕ་མ་ལ་དྲི་བར་བྱའོ། །པང་ནས་སྐྱེས་ཕ་མ་ཅན་སོང་སྟེ། ཡབ་ཡུམ་མཁྱེན་པར་མཛོད་ཅིག །བདག་(༢༥བ)རབ་ཏུ་འབྱུང་ངོ༌། །ཕ་མས་ཀྱང༌། མཆོད་སྦྱིན་སོགས་ནས། གླང་པོ་ཆེས་འགྲོ་བའི་རིགས་སུ་སྐྱེས་ན། ཅིའི་ཕྱིར་རབ་ཏུ་འབྱུང༌། པང་ནས་སྐྱེས་ཀྱིས་སྨྲས་པ། ནགས་ན་ཤིང་ཤུན་རྩྭ་གྱོན་ཞིང༌། །རྩ་བ་འབྲས་བུ་འཆའ་བ་དང༌། །རི་དྭགས་སྡུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་རོལ་འཇིག་བྱེད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་འཆིང་དང་རྡེག་པ་དག །བགྱིད་པ་དེ་ལྟ་མ་ལགས་སོ། །ཕ་མས་སྨྲས་པ། ཁྱོད་ངེས་ཀྱི་བུ་གཅིག་པུ། སྡུག་ཅིག་ཡིད་དུ་འོང་བ་ཡིན་པས་འབྲལ་མི་ཕོད་དོ། །ཡབ་ཡུམ། གནང་ན་ལེགས། མི་གནང་ན་ད་སླན་ཆད་འཚལ་མའང་མི་འཚལ། ཕྱག་ཀྱང་མི་འཚལ་ལོ། །མི་གནང་གིས། བྱ་བ་གཞན་མ་སེམས་ཤིག །དེ་ནས་དེས་ཉི་མ་དྲུག་གི་བར་དུ་ཟན་བཅད་དོ། །ཕ་མས་སྨྲས་པ། ཁྱོད་གཞོན་པས་སྡུག་བསྔལ་མི་ཤེས་པ་ཡིན་གྱི། ཚངས་པར་སྤྱོད་པ་སྤྱད་དཀའ། རབ་ཏུ་དབེན་པ་བྱ་དཀའ་ཞེས་སོགས་སྨྲས་ནས། འདི་ཉིད་དུ་འདུག་ལ་སྦྱིན་པ་དག་བྱིན། བསོད་ནམས་དག་གྱིས་ཤིག །དེ་ཅང་མི་སྨྲའོ། །
དེ་ནས་དེའི་ཉེ་དུ་རྣམས་བསགས་ནས་དེ་དག་གིས་ཀྱང་ལན་གསུམ་དུ་དེ་སྐད་སྨྲས་ཀྱང་ཅང་མི་སྨྲའོ། །དེ་ནས་དེའི་ནེའུ་ལྡངས་རྣམས་ལ་བསྒོ་ནས། དེ་དག་གིས་ཀྱང་ལན་གསུམ་དུ་སྨྲས་པས་ཀྱང་ཅང་མི་སྨྲའོ། །དེ་དག་གིས་ཕ་མའི་དྲུང་དུ་སོང་ནས་སྨྲས་པ། མཁྱེན་པར་མཛོད་ཅིག །པང་ནས་སྐྱེས་གུམ་པས་ཅི་བགྱི། རབ་ཏུ་འབྱུང་བ་ནི་མཁས་པས་བསྔགས་པ་ལགས་པས། གལ་ཏེ་རབ་ཏུ་བྱུང་ནས་མངོན་པར་དགའ་བར་གྱུར་ནའང་གསོན་པོ་ཉིད་དུ་གཟིགས་པར་འགྱུར་ལ། དགའ་བར་མ་གྱུར་ནའང་དྲང་སྲོང་དག་ནི་སླར་ལྡོག་པ་ལགས་ཏེ། བུའི་གནས་ནི་ཕ་མ་མ་གཏོགས་པ་གཞན་མེད་པས་རབ་ཏུ་བྱུང་ན་ལེགས་སོ། །ཕ་མས། གཞོན་ནུ་དེའི་དུས་ལ་བབ་པར་ཤེས་ནས་རབ་ཏུ་བྱུང་ཞིག །དེ་ནས་དེ་འབྲས་ཁུས་རིམ་གྱིས་ལུས་ཀྱི་མཐུ་སྟོབས་བསྐྱེད་ནས། རིམ་གྱིས་ཉེ་རྒྱལ་ཅན་སོང་སྟེ། རབ་ཏུ་འབྱུང་ངོ༌། །ཕ་མས་གནང་ངམ། གནང་ངོ༌། །ངས་ཀྱང་ཞུའོ། །ཁོ་བོ་ནི་དུས་དེ་སྲིད་ཀྱི་ཕ་མས་གནང་ན། ཁྱོད་ད་ཇི་སྲིད་ཀྱིས་གནང་བར་འགྱུར། སྨྲས་པ། ཁོ་བོ་ད་ལྟ་ཁོ་ན་གནང་བར་བྱས་ཏེ་འོང་ངོ༌། །དེ་ནས་ཉེ་རྒྱལ་གྱིས་ཕ་མ་གཉིས་ཀྱི་དྲུང་དུ་སོང་སྟེ། ཡབ་ཡུམ། བདག་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ༌། །དེ་གཉིས་ཀྱིས་སྨྲས་པ། བུ། ཁྱོད་ལ་རབ་ཏུ་བྱུང་བ་ལེགས་པ་ཡིན་ནམ། ལེགས་སོ། །བུ། འོ་ན་སོང་ལ་རབ་ཏུ་བྱུང་ཞིག །དེས་པང་ནས་སྐྱེས་ཀྱི་གན་དུ་སོང་ནས། ཚུར་ཤོག །བདག་ཅག་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ༌། །དེས་སྨྲས་པ། ཁྱོད་ཕ་མས་གནང་ངམ། གནང་ངོ༌། (༢༦ན)ཉེ་རྒྱལ། ཁོ་བོ་ནི་དེ་ཙམ་དུ་མ་གནང་ན། ཁྱོད་ཕ་མས་མྱུར་དུ་གནང་བའི་རྒྱུ་ཅི་ཡིན། ཁྱོད་ནི་འཆིང་བ་དམ་པོས་བཅིངས་པ་དང༌། ཁོ་བོ་ནི་དེ་ལྟ་མ་ཡིན་ཞིང༌། ཚེ་རབས་ལྔ་བརྒྱར་རབ་ཏུ་བྱུང་བ་དང༌། ཧ་ཅང་ཕྱུག་པོའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་སྐྱེ་འགྱུར་ཞིང༌། །རྟག་ཏུ་རབ་བྱུང་མང་བར་ཤོག །ཅེས་སྨོན་ལམ་བཏབ་པའི་ཕྱིར་རོ། །པང་ནས་སྐྱེས་ཀྱིས་ཉེ་རྒྱལ་ལ་སྨྲས་པ། བདག་ཅག་ནི་བྲམ་ཟེ་རབ་ཏུ་གྲགས་པ་ཡིན་པས། གང་ཡང་རུང་བ་ལས་རབ་ཏུ་མི་འབྱུང་གི །ལེགས་པར་བརྟགས་ནས་རབ་ཏུ་འབྱུང་ངོ་ཞེས་བགྲོས་ཏེ་མཐར་གྱིས་རྒྱལ་པོའི་ཁབ་ཏུ་ཕྱིན་ཏོ། །དེའི་ཚེ་སྟོན་པ་དྲུག་པོ་ཐམས་ཅད་མཁྱེན་པ་མ་ཡིན་བཞིན་དུ་ཐམས་ཅད་མཁྱེན་པར་ཁས་འཆེ་བ་དག་རྒྱལ་པོའི་ཁབ་ན་གནས་སོ། །དེ་གཉིས་ཀྱིས་འགྲོ་བ་སྐྱོང་གི་བུ་རྫོགས་བྱེད་ཅན་སོང་སྟེ་སྨྲས་པ། ཁྱོད་ཀྱི་ཆོས་ཀྱི་ཚུལ་ནི་གང༌། སློབ་མ་ལ་གདམས་པ་ནི་གང༌། ཚངས་པར་སྤྱོད་པའི་འབྲས་བུ་ནི་གང༌། ཕན་ཡོན་ནི་གང་ཡིན། དེས་སྨྲས་པ། ཁོ་བོ་འདི་ལྟར་སྨྲ་སྟེ། སྦྱིན་པ་དང༌། མཆོད་སྦྱིན་དང༌། སྦྱིན་སྲེག་དང༌། ལེགས་སྤྱད་དང༌། ཉེས་སྤྱད་དང༌། དེ་དག་གི་འབྲས་བུ་དང༌། རྣམ་སྨིན་མེད་དོ། །འཇིག་རྟེན་འདི་དང༌། ཕ་རོལ་དང༌། ཕ་མ་དང༌། སེམས་ཅན་རྫུས་ཏེ་སྐྱེ་བ་དང༌། དགྲ་བཅོམ་པ་མེད་དོ། །སྲོག་ནི་འདི་ཉིད་ལ་འཚོ་ཞིང༌། ཤི་བའི་འོག་ཏུ་མི་འབྱུང་ངོ༌། །སྐྱེས་བུའི་ལུས་ནི་འབྱུང་བ་ཆེན་པོ་ལས་གྱུར་པ་ཡིན་ཏེ། ཚེ་དུས་བྱེད་པ་ན་སའི་ལུས་ནི་སའི་བག་ལ་ཞ། ཆུའི་ཆུ་ལ། མེའི་མེ་ལ། རླུང་གི་ལུས་རླུང་གི་བག་ལ་ཞ་བར་འགྱུར་རོ། །དབང་པོ་རྣམས་ནི་ནམ་མཁའ་ལ་ཐིམ་པར་འགྱུར་རོ། །རོ་ནི་ཁྲི་དང་ལྔའི་མི་དག་གིས་ཁྱེར་ཏེ་དུད་ཁྲོད་དུ་འགྲོ་ཞིང་བསྲེགས་ནས་མི་མངོན་པར་ཐལ་བར་འགྱུར། རུས་པ་ཐི་བའི་མདོག་འདྲ་བར་གནས་སོ། །
འདི་ལྟར་རྨོངས་པས་ཉེ་བར་བསྟན་པ་ནི་སྦྱིན་པ། མཁས་པས་ཉེ་བར་བསྟན་པ་ནི་ལེན་པའོ། །གཞན་ཡོད་པར་སྨྲ་བ་དེ་དག་ཐམས་ཅད་ནི་གསོབ་གསོག་རྫུན་དུ་རྡོལ་བ་དག་ཡིན་ནོ་ཞེས་ཟེར་རོ། །དེ་གཉིས་འདི་སྙམ་དུ། འདི་ནི་ལམ་གོལ་བར་ཞུགས་པས་མཁས་པ་རྣམས་ཀྱི་སྤང་བར་བྱ་བ་ཡིན་ནོ་སྙམ་ནས་སྨྲས་པ། བློ་ངན་ལོག་པར་སྟོན་བྱེད༌པ། །དམན་པ་སྟོན་པར་གྲགས་པ་སྟེ། །གང་གི་ཆོས་ནི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྣོད་སྟོང་པ་བཞིན་དུ་བརྡབས་ཏེ་སོང་ངོ༌། །དེ་ནས་གནག་ལྷས་ཀྱི་བུ་ཀུན་ཏུ་རྒྱུ་ཅན་ཕྱིན་ནས། ཁྱོད་ཀྱི་ཆོས་ཀྱི་ཚུལ་གང་ཡིན་སོགས་དྲིས་པས། སེམས་ཅན་རྣམས་ཀུན་ནས་ཉོན་མོངས་པ་དང༌། རྣམ་བྱང་དང༌། ཤེས་པ་དང༌། མཐོང་བ་དང༌། སྟོབས་དང༌། བརྩོན་འགྲུས་(༢༦བ)སོགས་མེད་དོ་ཞེས་སྨྲས་ནས། སྔར་བཞིན་སྤངས་སོ། །དེ་ནས་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ཙ་ན་སོང་ནས། ཁྱོད་ཀྱི་ཆོས་ཀྱི་ཚུལ་ནི་གང་ཞེས་སོགས་དྲིས་པས། གཾ་གཱའི་ལྷོ་ནས་སྲོག་གཅོད་པ་དང༌། བྱང་ནས་སྦྱིན་པ་བྱེད་པ་གཉིས་ཀ་ལ་སྡིག་པའང་མེད། བསོད་ནམས་ཀྱང་མེད་པ་སོགས་སྨྲས་ནས། སྔར་བཞིན་སྤངས་སོ། །
དེ་ནས་མི་ཕམ་སྐྲའི་ལ་བ་ཅན་ཙ་ན་སོང་ནས། སྔར་བཞིན་དྲིས་པས། ས། ཆུ། མེ། རླུང༌། བདེ་སྡུག་གསོན་པ་སྟེ་ལུས་བདུན་པོ་ནི་མ་བྱས་ཤིང་མ་སྤྲུལ་པ་སྟེ། ཐེར་ཟུག་ཏུ་གནས་པ་ཡིན་ལ། དེ་ལ་མགོ་གཅོད་པ་སོགས་གང་གིས་ཀྱང་གནོད་པ་མེད་ལ། སེམས་ཅན་བྱིས་པ་དང་མཁས་པ་ནི་བསྐལ་ཆེན་བརྒྱད་ཁྲི་པཞི་སྟོང་དུ་མཚམས་སྦྱར་ནས་སྡུག་བསྔལ་མཐར་བྱེད་དོ། །དགེ་སྦྱོང་དང་བྲམ་ཟེ་ཚུལ་ཁྲིམས་དང་དཀའ་ཐུབ་ཀྱིས་ལས་བྱང་བ་མེད་དོ་ཞེས་སྨྲས་པས། སྣོད་སྟོང་པ་ཞིན་དུ་བརྡབས་ཏེ་སོང་ངོ༌། །དེ་ན་ཀ་ཏའི་བུ་ནོག་ཅན་ཙ་ན་སོང་ནས་སྔར་བཞིན་དྲིས་པས། ཁོ་བོའི་གན་དུ་འཇིག་རྟེན་ཕ་རོལ་ཡོད་དམ་ཟེར་ན་ཡོད་ཅེས་ལན་འདེབས། མེད་དམ་ཟེར་ནའང་མེད་ཅེས་ལན་འདེབས་ཞེས་སོགས་སྨྲས་པས། སྣོད་སྟོང་པ་བཞིན་བརྡབས་ཏེ་སོང་ངོ༌། །དེ་ནས་གཉེན་གྱི་བུ་གཅེར་བུ་ཅན་སོང་ནས་སྔར་བཞིན་དྲིས་པས། ཁོ་བོ་ནི་གང་ཟག་གིས་སོ་སོར་མྱོང་བ་ཅི་ཡང་རུང་སྔོན་བྱས་པའི་རྒྱུ་ལས་བྱུང་བ་ཡིན་ལ། ལས་རྙིང་པ་དཀའ་ཐུབ་ཀྱིས་བྱང་བར་འགྱུར་ཞིང༌། ལས་གསར་པ་མ་བྱས་པས་ལས་དང་སྡུག་བསྔལ་ཟད་པར་འགྱུར་རོ་ཞེས་སྨྲས་པས། སྣོད་སྟོང་པ་བཞིན་བརྡབས་ཏེ་སོང་ངོ༌། །དེའི་ཚེ་དེ་གཉིས་མུ་སྟེགས་ཀྱི་སྟོན་པ་ཡང་དག་རྒྱལ་བ་ཅན་བྱུང་ནས་རིང་པོ་མ་ལོན་པ་ཞིག་ཡོད་པ་དེ་འཚོལ་དུ་སོང་སྟེ། རྒྱལ་བ་ཅན་གང་ན། ནང་དུ་ཡང་དག་འཇོག་ལ་ཞུགས་སོ། །ཀྱེ་མ། བདག་ཅག་གིས་ནང་དུ་ཡང་དག་འཇོག་གི་སྒྲ་ཡུན་རིང་མོ་ནས་གདོད་ཐོས་སོ་སྙམ་སྟེ། དེ་ལས་སློང་བ་ནི་ཚུལ་དང་མི་མཐུན་པས། དེ་ལས་ལངས་པའི་ཚེ་འགྲོའོ་ཞེས་ཕྱོགས་གཅིག་ཏུ་འཁོད་དོ། །དེ་ལངས་པ་ན་བསམ་གཏན་གྱིས་དབང་པོ་ཚིམ་པ་མཐོང་ནས། གང་ལ་བཞིན་འདི་ལྟ་བུ་ཡོད་པ་དེ་ལ་ཡོན་ཏན་ཡོད་དོ་སྙམ་ནས་དེའི་གན་དུ་སོང་སྟེ། སྔར་བཞིན་དྲིས་པས། ཁོ་བོ་འདི་ལྟར་ལྟ་ཞིང་སྨྲ་སྟེ། བདེན་པ་དང་མི་འཚེ་བ་ནི་ཆོས་སོ། །ཞི་བ་དང་རྒ་ཤི་མེད་པ་ནི་ཚངས་པའོ། །དེའི་དོན་ཅི་ལགས། བདེན་པ་ནི་བདེན་པའི་བསམ་པས་རབ་ཏུ་བྱུང་བའོ། །མི་འཚེ་བ་ནི་ཆོས་ཐམས་ཅད་མི་འཚེ་བའི་གཞི་ལས་བྱུང་བའོ། །ཞི་བ་དང༌། རྒ་ཤི་མེད་པ་ནི་མྱ་ངན་ལས་འདས་པའོ། །དེ་ནས་དེ་གཉིས་དད་དེ། །དེ་ལས་རབ་ཏུ་བྱུང་ངོ༌། །དེའི་ཚེ་ཡང་དག་རྒྱལ་བ་ཅན་གྱིས་དེ་གཉིས་རབ་ཏུ་བྱུང་ངོ་ཞེས་ཐམས་ཅད་དུ་གྲགས་པས། དེ་ལ་རྙེད་བཀུར་མང་པོ་བྱུང་ནས། དེས་བསམས་པ། བདག་སྔར་ཤན་ཌི་ལའི་རིགས་ཡིན་ལ། ད་ལྟའང་དེ་ཡིན་ན། ཅིའི་ཕྱིར་ད་ལྟ་བདག་ལ་རྙེད་བཀུར་མང་པོ་བྱུང་སྙམ་པ་ལས། དེ་གཉིས་ཀྱི་མཐུ་ཡིན་ནོ་སྙམ་ནས་སློབ་མ་ལྔ་བརྒྱ་ཡོད་པ་ལས་དེ་གཉིས་ལ་ཉིས་བརྒྱ་ལྔ་བཅུ་རེ་གཏད་དོ། །
རེ་ཞིག་ན་ཡང་དག་རྒྱལ་བ་ཅན་ན་བར་གྱུར་ནས། ཉེ་རྒྱལ་གྱིས་པང་ནས་སྐྱེས་ལ་སྨྲས་པ། ཁྱོད་མཁན་པོའི་ནད་གཡོག་བྱེད་དམ། སྨན་འཚོལ། འདི་ཤེས་རབ་ཅན་ཡིན་པས་ནད་གཡོག་བྱེད་དུ་གཞུག་གོ་སྙམ་ནས། ཁོ་བོས་སྨན་བཙལ་ལོ། །པང་ནས་སྐྱེས་སྨན་འཚོལ་དུ་སོང་བ་ན། དེས་འཛུམ་བསྟན་པ་དང༌། ཁྱོད་ལྟ་བུའི་སྐྱེས་བུ་གཙོ་བོ་ནི་རྒྱུ་མ་མཆིས་པར་འཛུམ་པ་མི་མཛད་ན། དེའི་རྒྱུ་ཅི་ལགས། དེས་སྨྲས་པ། གསེར་གླིང་ན་རྒྱལ་པོ་གསེར་བདག་ཅེས་བྱ་བ་ཤི་ནས་དེའི་ཆུང་མ་མེ་ལ་མཆོངས་པ་ན། ཁོ་བོ་འདི་ལྟར་སེམས་ཏེ། འདོད་པའི་རྒྱུས་སྡུག་བསྔལ་མྱོང་ངོ་སྙམ་མོ། །མཁན་པོ། དུས་དང༌། ཟླ་བ་དང༌། ཉི་མ་གང་ལ། དེ་དག་ཆེ་གེ་མོ་ཞིག་ལའོ། །དེས་དེ་གླེགས་བུ་ལ་བྲིས་ནས། མཁན་པོ། བདག་རབ་ཏུ་བྱུང་བ་ནི་བདུད་རྩི་དོན་དུ་གཉེར་བ་ལགས་ན། མཁན་པོས་བདུད་རྩི་བརྙེས་ན་བདག་ལ་བགོ་བཤའ་མཛད་དུ་གསོལ། བུ། ཁོ་བོའང་བདུད་རྩི་དོན་དུ་གཉེར་བའི་ཕྱིར་རབ་ཏུ་བྱུང་བ་ཡིན་མོད། བདུད་རྩི་མ་རྙེད་དེ། འདི་ཉིད་ཀྱི་གསོ་སྦྱོང་བཅོ་ལྔ་པ་ལྷ་རྣམས་ན་རེ། ཆུ་ཀླུང་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཉེ་བར་ཤཱཀྱ་གཞོན་ནུ་བྱུང་སྟེ། དེ་མཚན་མཁན་རྣམས་ཀྱིས། ཕོ་བྲང་དུ་བཞུགས་ན་འཁོར་ལོས་སྒྱུར་རྒྱལ་དང༌། རབ་ཏུ་བྱུང་ན་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་པའི་སྒྲ་ཐོས་ཀྱིས། ཁྱེད་གཉིས་དེའི་བསྟན་པ་ལ་རབ་ཏུ་བྱུང་ནས། རིགས་དང༌། རུས་དང༌། བྲམ་ཟེའི་ཁྱེའུར་སྨྲ་བར་མི་བྱ། རྒྱགས་པ་དང༌། ང་རྒྱལ་བཅོམ་ནས་དེའི་དྲུང་དུ་ཚངས་པར་སྤྱོད་ཅིག་དང༌། ཁྱེད་གཉིས་ཀྱིས་བདུད་རྩི་ཐོབ་པར་འགྱུར་རོ་ཞེས་སྨྲས་ནས། བསགས་པ་ཀུན་གྱི་མཐའ་འཛད་ཅིང༌། །མཐོན་པོ་རྣམས་ཀྱི་མཐའ་ལྷུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དེ་འདས་ནས། དུར་ཁྲོད་དུ་བསྲེགས་ཏེ་མྱ་ངན་བསང་བ་བྱས་ནས་འཁོད་དོ། །དེར་གསེར་གླིང་ནས་བྲམ་ཟེའི་ཁྱེའུ་རལ་པ་གསེར་འདྲ་ཞེས་བྱ་བ་ཞིག་རིམ་གྱིས་རྒྱལ་པོའི་ཁབ་ཏུ་ཕྱིན་ནས་དེ་གཉིས་ཀྱི་འདུག་གནས་སུ་ཞུགས་པ་དང༌། ཉེ་རྒྱལ་གྱིས་སྨྲས་པ། གང་ནས་འོངས། གསེར་གླིང་ནས་སོ། །ཁྱོད་ཀྱིས་གསེར་གླིང་ན་ངོ་མཚར་བའི་ཆོས་ཅི་མཐོང༌། བདག་གིས་ངོ་མཚར་བའི་ཆོས་ཆེན་པོ་མ་མཐོང་སྟེ། འོན་ཀྱང་གསེར་གླིང་ན་གསེར་བདག་ཤི་བ་ན་དེའི་ཆུང་མ་མེ་ལ་མཆོངས་པ་མཐོང་ངོ༌། །དུས་དང༌། ཟླ་བ་དང༌། ཉི་མ་གང་ལ། དེ་དག་ཆེ་གེ་མོ་ཞིག་ལའོ། །དེས་གླེགས་བུ་ལ་བྲིས་པ་བལྟས་པ་དང༌། མཐུན་པར་མཐོང་ནས། པང་ནས་སྐྱེས་ལ་སྨྲས་པ། མཁན་པོས་ལྷའི་མིག་གིས་ཡུལ་གཞན་གྱི་གཟུགས་མཐོང་བ་དང༌། ལྷའི་རྣ་བས་སྒྲ་ཡིད་དུ་འོང་བ་ཐོས་པ་ལས་ན་བདུད་རྩི་རྙེད་ཀྱང༌། བདག་ཅག་ལ་མ་བགོས་སོ། །པང་ནས་སྐྱེས་ཀྱི་བསམ་པ་ལ། ཉེ་རྒྱལ་འདི་ཤེས་རབ་ཅན་ཡིན་པས་འདིས་ཀྱང་བདུད་རྩི་རྙེད་པ་བདག་ལ་མི་བགོ་བའི་གནས་ཡོད་སྙམ་ནས། ཉེ་རྒྱལ། ཚུར་ཤོག །བདག་ཅག་གཉིས་གང་གིས་དང་པོར་བདུད་རྩི་རྙེད་པ་དེ་ཕན་ཚུན་བསྙད་པར་བྱའོ་ཞེས་ཁྲིམས་བཅས་ནས་ལྗོངས་རྒྱུར་སོང་ངོ༌། །དེའི་ཚེ་བཅོམ་ལྡན་འདས་མངོན་པར་རྫོགས་པར་སངས་རྒྱས་ཏེ་རིམ་གྱིས་བྱོན་ནས་འོད་མའི་ཚལ་ན་བཞུགས་སོ། །
དེ་གཉིས་ཀྱང་རྒྱལ་པོའི་ཁབ་ཏུ་ཕྱིན་པ་དང༌། རྒྱལ་པོའི་ཁབ་ཆེམ་མེ་ཆེམ་མེ་འདུག་པ་མཐོང་ནས། དེ་གཉིས་ཀྱིས་བསམ་པ། འདི་ལ་རྒྱུ་གཉིས་ཡོད་དེ། ཕ་རོལ་གྱི་དམག་གིས་འཇིགས་པ་དང༌། དགེ་སྦྱོང་ངམ་བྲམ་ཟེ་བསོད་ནམས་དང་དབང་ཆེ་བར་གྲགས་པ་ཞིག་གནས་པའོ་སྙམ་ནས་རྒྱུ་སྐར་ལ་བལྟས་པས། ཕ་རོལ་གྱི་དམག་གི་འཇིགས་པ་མེད་པར་ཤེས་ནས། སང་ཤེས་པར་བྱའོ་སྙམ་སྟེ། དཔྲལ་རིས་གསུམ་བྱས་ནས་སྤྱོད་ཡུལ་དུ་སོང་བའི་ཚེ། སྔར་སྲོག་ཆགས་འབུམ་ཕྲག་དུ་མ་ཕྱི་བཞིན་འབྲང་བ་ལས་དེའི་ཉིན་པར་སེམས་ཅན་གཅིག་ཀྱང་ཕྱི་བཞིན་མི་འབྲང་བས། འདིའི་རྒྱུ་གང་ཡིན་སྙམ་མོ། །དེའི་ཚེ། བཅོམ་ལྡན་འདས་ལ་མི་མཁྱེན་པ་དང་མི་གཟིགས་པ་མི་མངའ་བས། སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་བ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་བརྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་སྦྱང་བ་མཛད་པ། བདེན་པ་བཞི་སྟོན་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་འདས་པ། ཕུང་པོ་ལྔ་པ་དག་མེད་པར་སྟོན་པ། ཡན་ལག་དྲུག་དང་ལྡན་པ། ཕར་ཕྱིན་དྲུག་རྫོགས་པ། དབང་པོ་དྲུག་གི་སྒོ་བསྡམས་པ། ཡང་ག་པར་དགའ་བའི་ཆོས་དྲུག་ལ་གོམས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། འཕགས་པའི་ནོར་བདུན་སྟོན་པ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ། ལམ་གྱི་(༢༨ན)ཡན་ལག་བརྒྱད་སྟོན་པ། སྙོམས་འཇུག་དགུ་ལ་མཁས་པ། ཀུན་ནས་མནར་སེམས་ཀྱི་དངོས་པོ་དགུ་ལ་མཁས་པ། སྟོབས་བཅུ་དང་ལྡན་པ། ཕྱོགས་བཅུར་སྙན་པ་ཡང་དག་པར་རྒྱས་པ། བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི། དུས་དྲུག་ཏུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ནས། སུ་གདུལ་བའི་དུས་ལ་བབ་སྙམ་དུ་གཟིགས་ཏེ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །དེའི་ཚེ་ཉེ་རྒྱལ་དང་པང་ནས་སྐྱེས་གཉིས་གདུལ་བའི་དུས་ལ་བབ་ཅིང༌། སྟོན་པས་འདུལ་ལམ་ཉན་ཐོས་ཀྱིས་འདུལ་ན། ཉན་ཐོས་ཀྱིས་འདུལ། རྫུ་འཕྲུལ་གྱིས་འདུལ་ལམ། སྤྱོད་ལམ་གྱིས་འདུལ་དགོངས་པ་ན། སྤྱོད་ལམ་གྱིས་འདུལ་བར་དགོངས། སྤྱོད་ལམ་གྱིས་འདུལ་བ་དེ་ལ་ཚེ་དང་ལྡན་པ་རྟ་ཐུལ་གཏོང་བར་མཛད་དེ། དེའི་སྤྱོད་ལམ་གྱིས་ལྷ་དང་མིའི་ཡིད་སྡུད་པར་བྱེད་པའི་ཕྱིར་རོ། །
དེ་ནས་བཅོམ་ལྡན་འདས་ཀྱིས་བཀའ་སྩལ་པ། རྟ་ཐུལ། ཁྱོད་ཀྱིས་ཉེ་རྒྱལ་དང་པང་ནས་སྐྱེས་ལ་སོམས་ཤིག །རྟ་ཐུལ་ནི་བཅོམ་ལྡན་འདས་ཀྱི་བཀའ་ལ་ལྷག་པར་བྱ་བ་བྱེད་པ་ཡིན་པས་ཞབས་གཉིས་ལ་ཕྱག་འཚལ་ནས་སོང་ངོ༌། །དེ་ནས་རྟ་ཐུལ་གྱིས། སྔ་དྲོ་ཤམ་ཐབས་བགོས། སྣམ་སྦྱར་དང༌། ཆོས་གོས་དང༌། ལྷུང་བཟེད་ཐོགས་པ་མཛེས་པས་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །དེའི་ཚེ་ཉེ་རྒྱལ་གྱིས་རྟ་ཐུལ་ཐག་རིང་པོ་ནས་མཐོང་སྟེ། རབ་ཏུ་བྱུང་བ་འདིའི་སྤྱོད་ལམ་ལྟ་བུ་ནི་བདག་གིས་སྔོན་ཆད་མ་མཐོང་བས། དེའི་གན་དུ་སོང་ནས། ཁྱོད་ཀྱི་སྟོན་པ་གང༌། གང་གི་ཕྱིར་རབ་ཏུ་བྱུང༌། སུའི་ཆོས་ལ་དགའ་ཞེས་དྲིའོ་སྙམ་སྟེ་དེ་ལྟར་དྲིས་པ་དང༌། ཤཱཀྱའི་རིགས་ལས་རབ་ཏུ་བྱུང་ནས་སངས་རྒྱས་པ་དེ་བདག་གི་སྟོན་པ། དེའི་ཕྱིར་རབ་ཏུ་བྱུང༌། དེའི་ཆོས་ལ་དགའ་འོ། །དགེ་སློང༌ཆོས་དེ་སྟོན་ཅིག །ཁོ་བོ་ན་གཞོན་ཞིང་རབ་ཏུ་བྱུང་བ་གསར་པས། དེའི་བསྟན་པ་རྒྱ་ཆེར་བསྟན་མི་ནུས་ཀྱིས། དོན་བསྟན་པར་བྱའོ། །དགེ་སློང༌ཁོ་བོ་ལ་ནི་དོན་དགོས་ཀྱིས། དོན་མ་ཡང་རུང༌། ཉུང་ཡང་རུང་སྟོན་ཅིག །རྟ་ཐུལ་གྱིས་སྨྲས་པ། ཆོས་རྣམས་གང་དག་རྒྱུ་ལས་བྱུང་བ་དང༌། །དེ་ཡི་རྒྱུ་དང་དེ་འགོག་གང་ཡིན་པའང༌། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་བའི་ཚུལ་ཅན་དགེ་སྦྱོང་ཆེ། །ཆོས་ཀྱི་རྣམ་གྲངས་འདི་བཤད་པ་ན། ཉེ་རྒྱལ་ཆོས་རྣམས་ལ་ཆོས་ཀྱི་མིག་རྡུལ་(༢༨བ)མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཉེ་རྒྱལ་ཆོས་མཐོང་བ་དང༌། ཆོས་ཐོས་པ་དང༌། ཆོས་རིག་པ་དང༌། ཆོས་ཀྱི་གཏིང་སླེབ་པ་དང༌། སོམ་ཉི་དང་ཐེ་ཚོམ་ལས་བརྒལ་བ་དང༌། གཞན་གྱི་དྲིང་མི་འཇོག་པ་དང༌། གཞན་གྱིས་མི་བཀྲི་བ་དང༌། སྟོན་པའི་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྨྲས་པ། སྐྱོབ་པ་རྣམས་ཀྱི་ཆོས་འདི་ཡིན། །བསྐལ་མང་བྱེ་བ་ཁྲག་ཁྲིག་ཏུ། །སྔན་ཆད་མ་མཐོང་མ་ཐོས་པ། །འཆི་མེད་མྱ་ངན་མེད་པ་ཡི། །གོ་འཕང་འདི་ལ་རྗེས་སུ་རྟོགས། །བཅོམ་ལྡན་འདས་དེ་ད་ལྟ་གང་ན་བཞུགས། རྒྱལ་པོའི་ཁབ་འོད་མའི་ཚལ་ནའོ། །དེ་ཡི་རང་སྟེ། རྟ་ཐུལ་ལ་ཕྱག་འཚལ། སྐོར་བ་བྱས་ནས། པང་ནས་སྐྱེས་ཅན་སོང་བ་དང༌། དེས་ཐག་རིང་པོ་ནས་འོང་བ་མཐོང་སྟེ། ཁྱོད་ཀྱི་དབང་པོ་རྣམས་དྭངས། བཞིན་གྱི་མདོག་ཡོངས་སུ་དག །པགས་པའི་མདོག་ཤིན་ཏུ་དཀར་ན། ཁྱོད་ཀྱིས་བདུད་རྩི་རྙེད་དམ་རྙེད་དོ། །ཆོས་དེ་སྟོན་ཅིག །སྔར་གྱི་ཚིགས་བཅད་བརྗོད་པས། ད་དུང་ལན་ཅིག་བརྗོད་ཅིག །ཡང་ལན་ཅིག་བརྗོད་པས། དེས་ཀྱང་བདེན་པ་མཐོང་ནས། སྔར་བཞིན་ཆེད་དུ་བརྗོད་དེ། བཅོམ་ལྡན་འདས་དེ་ད་ལྟ་གང་ན་བཞུགས། འོད་མའི་ཚལ་ནའོ། །ཚུར་ཤོག །དེའི་སྤྱན་སྔར་ཚངས་པར་སྤྱད་པར་བྱའོ། །
ཚེ་དང་ལྡན་པ། ཇེ་འཁོར་ལ་བལྟ་བར་བྱ་སྟེ། བདག་ཅག་ལྟ་བུ་གྲགས་པ་དང་ལྡན་པས་འཁོར་ལ་ལྟ་བ་ནི་ལེགས་པ་ཡིན་ནོ། །དེ་ནས་དེ་གཉིས་ཀྱིས་བྲམ་ཟེའི་ཁྱེའུ་རྣམས་ལ་སྨྲས་པ། ཁོ་བོ་ཅག་གཉིས་ནི་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་ན། ཁྱེད་རྣམས་ཅི་བྱེད། མཁན་པོ་གཉིས། བདག་ཅག་ཅི་འཚལ་བ་ཐམས་ཅད་ཁྱེད་གཉིས་ལ་བརྟེན་པ་ལགས་པས། བདག་ཅག་ཀྱང་ཁྱེད་གཉིས་ཀྱི་རྗེས་སུ་རབ་ཏུ་འབྱུང་བར་བགྱིའོ། །ཁྱེའུ་དག་དེ་དེའི་དུས་ལ་བབ་པར་ཤེས་པར་གྱིས་ཤིག །དེ་ནས་དེ་གཉིས་འཁོར་ལྔ་བརྒྱ་དང་བཅས་ནས་འོད་མའི་ཚལ་དུ་སོང་བ་དང༌། རྟ་ཐུལ་ཤིང་དྲུང་ཞིག་ན་འདུག་པ་མཐོང་ནས། ཉེ་རྒྱལ་གྱིས་པང་ནས་སྐྱེས་ལ་སྨྲས་པ། དང་པོར་བཅོམ་ལྡན་འདས་ལ་ཕྱག་བྱའམ། གང་ལས་ཆོས་ཐོས་པ་དེ་ལ་ཕྱག་བྱ། དང་པོར་ཆོས་ཐོས་པ་དེ་ལ་ཕྱག་བྱའོ། །དེ་གཉིས་རྟ་ཐུལ་ཅན་སོང་སྟེ། ཕྱག་བཙལ་བ་དང༌། བྲམ་ཟེ་ཟླ་བ་ལ་དགའ་བ་ཞིག་ཀྱང་ཟླ་བ་ལ་ཕྱག་བྱེད་དོ། །བཅོམ་ལྡན་འདས་ཀྱིས། རྒན་པ་དང་ནི་གཞོན་པའང་རུང༌། །གང་ལས་ཆོས་ནི་རྣམ་ཤེས་པ། །དེ་ལ་གུས་པར་ཕྱག་བྱ་སྟེ། །ཟླ་བ་ཚེས་ལ་ཇི་བཞིན་ནོ། །
དེ་ནས་དེ་གཉིས་བཅོམ་ལྡན་འདས་ཀྱི་དྲུང་དུ་སོང་བ་དང༌། བཅོམ་ལྡན་འདས་ཀྱིས་རྒྱང་རིང་པོ་ནས་དེ་གཉིས་གཟིགས་ཏེ་བཀའ་སྩལ་པ། དགེ་སློང་དག་ཁྱེད་ཀྱིས་དེ་གཉིས་མཐོང་ངམ། བཙུན་པ།(༢༩ན) མཐོང་ངོ༌། །འདི་གཉིས་ནི་ངའི་ཉན་ཐོས་ཤེས་རབ་ཅན་དང༌། རྫུ་འཕྲུལ་ཅན་གྱི་མཆོག་ཏུ་འགྱུར་རོ། །དེ་ནས་དེ་གཉིས་བཅོམ་ལྡན་འདས་ཀྱི་དྲུང་དུ་སོང་སྟེ་ཞབས་གཉིས་ལ་ཕྱག་བཙལ་ནས། བཙུན་པ། བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང༌། བསྙེན་པར་རྫོགས་པ་དགེ་སློང་གི་དངོས་པོ་གནང་ན། བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །བཅོམ་ལྡན་འདས་ཀྱིས་དེ་གཉིས་ལ། དགེ་སློང༌ཚུར་ཤོག །ཚངས་པར་སྤྱོད་ཅིག་ཅེས་བཀའ་སྩལ་པས། སྐྲ་དང་ཁ་སྤུ་བྲེགས་ནས་ཞག་བདུན་ལོན་པ་ཙམ་དང༌། ལག་ན་ལྷུང་བཟེད་དང་བྱ་མ་བུམ་ཐོགས་པ་དང༌། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གྱུར་ཏོ། །དེ་བཞིན་གཤེགས་པས་ཚུར་ཤོག་བཀའ་སྩལ་པས། སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང༌། །མོད་ལ་དབང་པོ་རབ་ཞི་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་དགེ་སློང་རྣམས་བསོད་སྙོམས་ལ་ཞུགས་པ་དང༌། རྒྱལ་པོའི་ཁབ་ཀྱི་མི་གང་དག་ཡང་དག་རྒྱལ་བ་ཅན་གྱི་མུ་སྟེགས་ཅན་གྱི་གནས་རབ་ཏུ་བྱུང་ཞིང་བསྙེན་པར་རྫོགས་ནས་རིང་པོ་མ་ལོན་པས་ཡིད་མི་དགའ་བ་དེ་དག་གིས། དགེ་སློང་རྣམས་མཐོང་ནས་ཅོ་འདྲི་བའི་ཚིག་སྨྲས་པ། སངས་རྒྱས་མ་ག་དྷ་དག་གི །གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་བའི་ཀུན་ཁྲིད་ན། །ཕྱིན་ཆད་ཅི་ཞིག་བཀྲི་བར་བྱ། །དེས་དགེ་སློང་རྣམས་སྤ་གོང་སྟེ་ཡིད་མ་བདེ་བས་བཅོམ་ལྡན་འདས་ཀྱི་དྲུང་དུ་ཕྱིན་ནས་ཕྱག་བཙལ་ཏེ། བཙུན་པ། བདག་ཅག་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང༌། ཡང་དག་རྒྱལ་བ་ཅན་གྱི་མུ་སྟེགས་ཅན་གྱི་གནས་རབ་ཏུ་བྱུང་ཞིང་བསྙེན་པར་རྫོགས་པས་ཡིད་མི་དགའ་བ་དེ་དག་གིས་དགེ་སློང་རྣམས་མཐོང་ནས་ཅོ་འདྲི་བའི་ཚིག་དེ་སྐད་སྨྲས་པས་སྤ་གོང་བར་གྱུར་ཏོ། །བཀའ་སྩལ་པ། དགེ་སློང་དག །རྒྱལ་པོའི་ཁབ་ཀྱི་མི་དེ་སྐད་ཟེར་བ་རྣམས་ལ། འདི་ན་དཔའ་ཆེན་བདེ་གཤེགས་དག །དམ་པའི་ཆོས་ཀྱིས་འཁྲིད་མཛད་དེ། །དེ་དག་ཆོས་ཀྱིས་འཁྲིད་མཛད་ལ། །མཁས་པ་སུ་ཞིག་མི་བཟོད་བྱེད། །ཅེས་བརྗོད་ན་མི་དེ་རྣམས་ཀྱི་སྤོབས་པ་ཐམས་ཅད་དུ་མེད་པར་འགྱུར་རོ། །དེ་ནས་དེ་རྣམས་བསོད་སྙོམས་ལ་ཞུགས་པ་དང༌། ཅོ་འདྲིའི་ཚིག་སྨྲ་བ་རྣམས་ལ་ཚེ་སྐད་བརྗོད་པས། སྤོབས་པ་ཐམས་ཅད་དུ་མེད་པར་གྱུར་ཏོ། །དེ་ནས་རེ་ཞིག་ན་གནས་ལེན་གྱི་བུ་ཆུང་མ་དང་བཅས་པ་དང༌། སྐར་རྒྱལ་ཆུང་མ་དང་བཅས་པ་དུས་ལ་བབ་བོ། །སྟོང་རིང་ཡང་འཇིག་རྟེན་རྒྱང་པན་བཟུང་ནས་གྲོང་ན་ལ་དར་ཕྱིན་པ་དང༌། དེ་སྒོ་བས་ཤེས་ནས། ཁྱོད་སྟོད་རིང་ཡིན་ནམ། ཡིན་ནོ། གནས་ལེན་གྱི་བུ་ལ་སོགས་པ་ག་རེ། དུས་ལ་བབ་བོ། །ཤཱ་རིའི་བུ་ག་རེ། ཡ་དག་རྒྱལ་བ་ཅན་གྱི་གན་དུ་རབ་ཏུ་བྱུང་ངོ༌། །དེས་མཐར་གྱིས་སོང་ནས། ཡང་དག་རྒྱལ་བ་ཅན་ག་རེ། དུས་ལ་བབ་བོ། དེའི་མུ་སྟེགས་ཀྱི་གནས་ག་རེ། གོའུ་ཏ་མའི་དྲུང་དུ་རབ་ཏུ་བྱུང་ངོ༌། །
དེ་ནས་ཀུན་ཏུ་རྒྱུ་སེན་ཞིང་བཅོམ་ལྡན་འདས་ཀྱི་དྲུང་དུ་སོང་ནས་འདི་སྐད་ཅེས་གསོལ་ཏོ། །གོའུ་ཏ་མ། བདག་ནི་ཐམས་ཅད་མི་བཟོད་དོ། །ཁྱོད་ཀྱིས་ཐམས་ཅད་མི་བཟོད་པར་ལྟ་བ་དེའང་མི་བཟོད་དམ། གོའུ་ཏ་མ་བདག་ནི་ཐམས་ཅད་མི་བཟོད་པའི་ལྟ་བ་དེའང་མི་བཟོད་དོ། །འོ་ན་ཁྱོད་ཀྱིས་དེ་ལྟར་ཤེས་ན་ལྟ་བ་དེའང་སྤོངས་ལ། ལྟ་བ་གཞན་ཡང་མཚམས་མི་སྦྱོར་བར་འགྱུར་རོ་ཞེས་སོགས་གསུངས་ཏེ། བདེན་པ་བཞི་བསྟན་པས། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་ནས། བདག་རབ་ཏུ་འབྱུང་བ་དང༌། བསྙེན་པར་རྫོགས་པར་གནང་ན། བདག་ཚངས་པར་སྤྱོད་པ་སྤྱད་པར་བགྱིའོ། །དེ་ལ། དགེ་སློང༌ཚུར་ཤོག །ཚངས་པར་སྤྱད་པ་སྤྱོད་ཅིག་ཅེས་གསུངས་པས་བསྙེན་པར་རྫོགས་པ་དང༌། གཅིག་པུ། དབེན་པ། བག་ཡོད་པ། བརྟུན་པར་གནས་པས་དགྲ་བཅོམ་པ་ཐོབ་པ་དང༌། དགེ་སློང་སྟོད་རིང་སོ་སོ་ཡང་དག་པར་རིག་པ་ཐོབ་པ་རྣམས་ཀྱི་མཆོག་ཏུ་ལུང་བསྟན་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། ཤཱ་རིའི་བུས་ལན་ཅི་བགྱིས་ན་ཤེས་རབ་རྣོ་བ་དང༌། ཤེས་རབ་ཟབ་པ་དང༌། ངེས་པར་འབྱེད་པའི་ཤེས་རབ་ཅན་དུ་གྱུར། དགེ་སློང་དག །རི་བྲག་ཅིག་ན་བྲམ་ཟེ་ཞིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བཙས་དེའི་མིང་ཞིབ་མ་ཞེས་བཏགས་སོ། །ཡང་དགའ་མགུར་སྤྱད་པས་བུ་མོ་ཞིག་བཙས་ནས་དེའི་མིང་ཞིབ་མ་མོ་ཞེས་བཏགས་སོ། །རེ་ཞིག་ན་དེ་གཉིས་ཀྱི་ཕ་མ་ཤི་ནས། ཞིབ་མ་དབེན་པ་ལ་དགའ་བས་སྲིང་མོ་ཁྲིད་དེ་ནགས་སུ་སོང་ངོ༌། །
ཞིབ་མ་མོ་ཆེན་མོར་གྱུར་པའི་ཚེ། ཉོན་མོངས་པས་གནོད་པར་གྱུར་ནས། སྨྲས་པ། བདག་དགོན་པའི་སྨན་གྱིས་འཚོ་བར་མིན་ནུས་ཀྱིས། གྲོང་མཐར་འདོང་ངོ༌། །དེ་གཉིས་ཅིག་ཅར་ཁྱིམ་ཞིག་ཏུ་སློང་མོ་ལ་ཞུགས་པ་དང༌། ནང་ན་འདུག་པའི་བྲམ་ཟེས་ཐོས་ནས་ཕྱིར་བྱུང་སྟེ། སྨྲས་པ། ཅི། དྲང་སྲོང་ཡང་ཆུང་མ་དང་ལྷན་ཅིག་རྒྱུའམ། འདི་ནི་ཁོ་བོའི་ཆུང་མ་མིན་གྱི། སྲིང་མོ་ཡིན་ནོ། །ཅི། གཞན་ལ་བྱིན་ནམ། མ་བྱིན་ནོ། །འོ་ན་ཁོ་བོ་ལ་ཆུང་མར་བྱིན་ཅིག །འདིས་སྡིག་པའི་ཆོས་སྤངས་སོ། །ཞིབ་མ་མོས་སྨྲས་པ། བདག་ཉོན་མོངས་པས་གནོད་པར་གྱུར་ཏོ། །འོ་ན་ཁྱོད་ཉིད་ཤེས་སོ། །དེས་དེ་བག་མར་བླངས་སོ། །ཞིབ་མ་མོས་སྨྲས་(༣༠ན)པ། མིང་པོ་ཚུར་ཤོག །ལྷན་ཅིག་འཁོད་དོ། །ཁོ་བོ་ནི་འདོད་པ་དོན་དུ་མི་གཉེར་པས་དགོན་པར་འགྲོའོ། །དེ་ལྟ་ན་ཁྱོད་ཀྱིས་ཡོན་ཏན་གྱི་ཚོགས་ཐོབ་ན་བདག་ལ་རྗོད་ཅིག །ཞིབ་མོ་མཐའ་གཅིག་ཏུ་སོང་སྟེ་རང་རྒྱལ་གྱི་བྱང་ཆུབ་མངོན་དུ་བྱས་སོ། །དེས་སྲིང་མོ་ལ་སྙིང་བརྩེ་བས་ངང་པའི་རྒྱལ་པོ་འདབ་མ་བརྐྱངས་པ་ལྟར་སྟེང་གི་ནམ་མཁའ་ལ་འཕགས་སོ། །སོ་སོ་སྐྱེ་བོ་ནི་རྫུ་འཕྲུལ་ལ་སེམས་མྱུར་དུ་གཏོད་པ་ཡིན་པས། ཞིབ་མ་མོས་དེའི་རྐང་པ་གཉིས་ལ་གཏུགས་ནས། ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །འཕགས་པ། ཁྱོད་ནི་བསོད་སྙོམས་བཞེད་ལ། བདག་ནི་བསོད་ནམས་འཚལ་བས་འདི་ཉིད་དུ་བཞུགས་ཤིག །བསོད་སྙོམས་བསྟབ་པར་བགྱིའོ། །སྲིང་མོ། ཁྱིམ་ཐབ་ལ་དྲིས་ཤིག །དེས་ཁྱིམ་ཐབ་ལ་དྲིས་པས། དེ་རབ་ཏུ་མ་བྱུང་ཡང་མི་འདོད་བཞིན་དུ་སྦྱིན་དགོས་ན། རབ་ཏུ་བྱུང་ནས་བརྟུལ་ཞུགས་གྲུབ་པ་བདག་ཉིད་ཆེན་པོར་གྱུར་པ་ལྟ་ཅི་སྨོས། བསོད་སྙོམས་སྟོབས་ཤིག །དེས་རང་སངས་རྒྱས་དེ་ལ་ཟླ་བ་གསུམ་དུ་བསོད་སྙོམས་བསྟབས། རས་ཡུག་ཆེན་པོ་ལ་འོས་པ་ཞིག་བསྐོན་ཏེ། གྲི་དང་ཁབ་སྐུད་ཀྱང་ཕུལ་ལོ། །དེས་དེ་དག་བླངས་ཏེ་དེའི་མདུན་དུ་དྲས་པས་གྲི་དེ་རྣོ་བར་གཅོད་ནས། ཞིབ་མ་མོས། གྲི་འདི་རྣོ་བར་གཅོད་པ་དེ་ལྟར་བདག་ཀྱང་ཤེས་རབ་རྣོ་བར་གྱུར་ཅིག་ཅེས་སྨོན་ལམ་བཏབ་བོ། །རང་སངས་རྒྱས་དེས་ཁབ་ཀྱིས་ཕུག་པ་ན་ཟབ་མོར་འབིགས་ནས། དགེ་བའི་རྩ་བ་འདིས། ཁབ་འདི་ཟབ་མོར་འབིགས་པ་ལྟར་བདག་ཀྱང་ཤེས་རབ་ཟབ་མོར་གྱུར་ཅིག །དེས་སྐུད་པས་དྲུབས་པས་སྐུད་པ་དེ་ཐལ་བྱུང་དུ་འགྲོ་ནས། དགེ་བའི་རྩ་བ་འདིས། སྐུད་པ་འདི་ཐལ་བྱུང་དུ་འགྲོ་བ་ལྟར་བདག་ཀྱང་ངེས་པར་འབྱེད་པའི་ཤེས་རབ་ཅན་དུ་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་ཞིབ་མ་མོ་དེ་ནི་ཤཱ་རིའི་བུ་ཡིན་ཏེ། དེས་རང་སངས་རྒྱས་ལ་མཆོད་པ་བྱས་ནས་སྨོན་ལམ་བཏབ་པས་ད་ལྟར་ཤེས་རབ་རྣོ་བ་དང༌། ཟབ་པ་དང༌། ངེས་པར་འབྱེད་པའི་ཤེས་རབ་ཅན་དུ་གྱུར་ཏོ། །དེ་བས་ན་ལས་གཅིག་ཏུ་གནག་པ་དང༌། འདྲེས་མ་སྤངས་ཏེ། ལས་གཅིག་ཏུ་དཀར་བ་ལ་བཙལ་བར་བྱ་སྟེ། ཁྱེད་ཀྱིས་དེ་ལྟར་བསླབ་པར་བྱའོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཙུན་པ། ཤཱ་རིའི་བུས་ལས་ཅི་བགྱིས་ན། ཁྱིམ་ཧ་ཅང་ཕྱུག་པ་དང་དབུལ་བར་མ་སྐྱེས་པར། འབྲིང་བར་སྐྱེས་ནས་རབ་ཏུ་བྱུང་བ་མང་བར་གྱུར། དགེ་སློང་དག །ཤཱ་རིའི་བུས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོང་བ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། དེས་ལས་བྱས་ཤིང་(༣༠བ)བསགས་པ་དག་གཞན་སུ་ཞིག་གིས་མྱོང་བར་འགྱུར། ལས་བྱས་ཤིང་བསགས་པ་དག་ཕྱི་རོལ་གྱི་ས་དང༌། ཆུ་དང༌། མེ་དང༌། རླུང་གི་ཁམས་ལ་སྨིན་པར་མི་འགྱུར་གྱི། ཟིན་པའི་ཕུང་པོ་དང༌། ཁམས་དང༌སྐྱེ་མཆེད་ལ་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །སྔོན་རྒྱལ་པོ་ཞིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བྱུང་ནས་བསྲིངས་བསྐྱེད་དེ་ཆེན་པོར་གྱུར་པ་དང༌། ཕ་ཆོས་དང་ཆོས་མ་ཡིན་པས་རྒྱལ་སྲིད་བྱེད་པ་མཐོང་སྟེ། བདག་ཀྱང་ཕ་འདས་ནས་རྒྱལ་པོར་གྱུར་པ་ན་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་ན། སེམས་ཅན་དམྱལ་བར་འགྲོ་བར་འགྱུར་རོ་སྙམ་ནས་རྒྱལ་པོའི་གན་དུ་སོང་སྟེ། བདག་རབ་ཏུ་འབྱུང་ངོ༌། །
སྨྲས་པ། གང་གི་དོན་དུ་མཆོད་སྦྱིན་སོགས་བྱེད་པའི་རྒྱལ་སྲིད་ལག་ཏུ་འོངས་ན། ཅིའི་ཕྱིར་རབ་ཏུ་འབྱུང་ཞེས་མ་གནང་ངོ༌། །རེ་ཞིག་ན་དེས་མི་དབུལ་པོ་འཁར་བ་དང༌། སློང་ཕོར་ཆག་པ་ཐོགས་ཏེ་སློང་མོ་ལ་རྒྱུ་བ་ཞིག་མཐོང་ནས་དེ་ལ་སྨྲས་པ། ཀྭ་ཡེ། ཁོ་བོ་ནི་འདི་ལྟ་བུའི་ཁྱིམ་དུ་སྐྱེས་པས་རབ་བྱུང་མ་ཐོབ་ན། ཁྱོད་ཅིའི་ཕྱིར་རབ་ཏུ་མི་འབྱུང༌། དེས་སྨྲས་པ། བདག་ལ་ལྷུང་བཟེད་དང༌། ཆོས་གོས་མ་མཆིས་པས་རབ་ཏུ་མ་བྱུང་ངོ༌། །ཚུར་ཤོག་ངས་ལྷུང་བཟེད་དང༌། ཆོས་གོས་སྦྱིན་ནོ་ཞེས་དེས་དེ་ཁྲིད་ནས་དྲང་སྲོང་མངོན་ཤེས་ལྔ་དང་ལྡན་པ་ཞིག་འདུག་པའི་གན་དུ་སོང་སྟེ། འདི་ཁྱོད་ལས་རབ་ཏུ་འབྱུང་བར་འདོད་ཀྱིས། རབ་ཏུ་བྱུང་དང༌། བདག་གིས་འདི་ལ་ཆོས་གོས་དང༌། ལྷུང་བཟེད་སྦྱིན་ནོ། །དྲང་སྲོང་དེས་དེ་རབ་ཏུ་བྱུང་ངོ༌། །རྒྱལ་བུས་དེ་ལ་ལྷུང་བཟེད་དང༌། ཆོས་གོས་བྱིན་ནས་སྨྲས་པ། ཁྱོད་ཀྱིས་ཡོན་ཏན་གྱི་ཚོགས་ཅུང་ཞིག་ཐོབ་ན་བདག་ལ་རྗོད་ཅིག །དེས་ཁས་བླངས་ནས་བསྒོམས་པས་རང་རྒྱལ་གྱི་བྱང་ཆུབ་ཐོབ་སྟེ། ངང་པའི་རྒྱལ་པོ་འདབ་མ་བརྐྱངས་པ་ལྟར་སྟེང་གི་ནམ་མཁའ་ལ་འཕགས་ནས། རྫུ་འཕྲུལ་བསྟན་པས། རྒྱལ་བུས་དེའི་རྐང་པ་གཉིས་ལ་གཏུགས་ཏེ། ཁྱོད་ཀྱིས་འདི་ལྟ་བུའི་ཡོན་ཏན་བརྙེས་སམ། ཐོབ་བོ། །དེས་བསམས་པ། འདིས་སྔོན་རབ་བྱུང་མ་ཐོབ་པ་ནི་དབུལ་པོར་སྐྱེས་པས་ཡིན་ལ། བདག་གིས་རབ་བྱུང་མ་ཐོབ་པ་ནི་ཁྱིམ་འདི་ལྟ་བུར་སྐྱེས་པས་ཡིན་ནོ་སྙམ་ནས། དགེ་བའི་རྩ་བ་འདིས། ཧ་ཅང་ཕྱུག་པོའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་སྐྱེ་འགྱུར་ཞིང༌། །རྟག་པར་རབ་བྱུང་མང་བར་ཤོག །ཅེས་སྨོན་ལམ་བཏབ་བོ། །དེའི་དུས་ཀྱི་རྒྱལ་བུ་དེ་ནི་ཤཱ་རིའི་བུ་ཡིན་ཏེ། རང་རྒྱལ་ལ་མཆོད་ནས་སྨོན་ལམ་བཏབ་པས་(༣༡ན)དེ་ལྟར་གྱུར་ཏོ། །དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ནི་གཅིག་ཏུ་དཀར་བ་ཡིན། ལས་འདྲེས་མ་རྣམས་ཀྱི་རྣམ་པར་སྨིན་པའང་འདྲེན་མ་ཡིན་ནོ། །དེ་བས་ན་ལས་གཅིག་ཏུ་གནག་པ་དང་འདྲེན་མ་སྤངས་ཏེ་གཅིག་ཏུ་དཀར་བ་ལ་བཙལ་བར་བྱ་སྟེ། དགེ་སློང་དག་དེ་ལྟར་བསླབ་པར་བྱའོ། །
ཡང་ཞུས་པ། ཤཱ་རིའི་བུས་ལས་ཅི་བགྱིས་པས་ཤེས་རབ་ཅན་གྱི་མཆོག་ཏུ་ལུང་བསྟན་པ་ལགས། བཀའ་སྩལ་པ། བསྐལ་པ་བཟང་པོ་འདི་ཉིད་ཀྱི་སྐྱེ་དགུའི་ཚེ་ལོ་ཉི་ཁྲི་པའི་དུས་ན་སངས་རྒྱས་འོད་སྲུང་གི་བསྟན་པ་ལ། འདི་རབ་ཏུ་བྱུང་སྟེ། འདི་རབ་ཏུ་འབྱིན་པའི་དགེ་སློང་དེ་སངས་རྒྱས་འོད་སྲུངས་ཀྱིས་ཤེས་རབ་ཅན་གྱི་མཆོག་ཏུ་ལུང་བསྟན་ཏོ། །འདིས་ཚེ་ཇི་སྲིད་དུ་ཚངས་པར་སྤྱད་ཀྱང་ཡོན་ཏན་མ་ཐོབ་པར། འཆི་ཁར་སྨོན་ལམ་བཏབ་པ། མཁན་པོ་འདི་སངས་རྒྱས་འོད་སྲུང་གིས་ཤེས་རབ་ཅན་གྱི་མཆོག་ཏུ་ལུང་བསྟན་པ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་སྟེ། ཤེས་རབ་ཅན་གྱི་མཆོག་ཏུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་པས་སོ། །
ཡང་དགེ་སློང་རྣམས་ཐེ་ཚོམ་སྐྱེས་ནས་ཞུས་པ། མོའུ་གལ་གྱི་བུས་ལས་ཅི་བགྱིས་ནས་རྫུ་འཕྲུལ་ཆེ་བར་གྱུར། སྔོན་ཝཱ་ར་ཎཱ་སཱི་ནས་ཧ་ཅང་མི་རིང་བའི་བསྟི་གནས་ཤིག་ན་དྲང་སྲོང་སེམས་ཅན་ཐམས་ཅད་ལ་བྱམས་པ་དང༌། སྙིང་རྗེ་དང་ལྡན་པ་ཞིག་འདུག་གོ །དེས་མི་དབུལ་པོ་ཤིང་ཁུར་ཐོགས་ཏེ་བསྟི་གནས་དེར་སོང་ནས་ངལ་གསོ་བ་ཞིག་མཐོང་སྟེ་དེ་ལ་སྙིང་རྗེ་སྐྱེས་ནས། བུ། ཁྱོད་སུ་ཡིན། བདག་ནི་མི་དབུལ་པོ་ཤིང་གིས་འཚོ་བ་སྦྱོར་བ་ལགས་སོ། །འོ་ན་ཁྱོད་ཅིའི་ཕྱིར་རབ་ཏུ་མི་འབྱུང༌། འཕགས་པ། བདག་ཚེགས་ཆེན་པོས་འཚོ་བ་ལགས་ན། སུ་ཞིག་གིས་རབ་ཏུ་འབྱིན་པར་འགྱུར། དེ་ལ་སྙིང་བརྩེ་བས། བུ། ཁྱོད་རབ་ཏུ་འབྱུང་བར་འདོད་དམ། འཚལ་གྱིས། བདག་རབ་ཏུ་དབྱུང་དུ་གསོལ། དེས་དེ་རབ་ཏུ་བྱུང༌། ཆོས་གོས་དང༌། ལྷུང་བཟེད་བྱིན་ནས་སྨྲས་པ། ཁྱོད་ཀྱིས་ཡོན་ཏན་གྱི་ཚོགས་ཅུང་ཟད་ཐོབ་ན་ཁོ་བོ་ལ་རྗོད་ཅིག །དེས་དེ་ལ་དེ་བཞིན་དུ་བགྱིའོ་ཞེས་ཁས་བླངས་ནས། ཕྱོགས་ཤིག་ཏུ་སོང་སྟེ་བསྒོམས་པས་རང་བྱང་ཆུབ་མངོན་དུ་བྱས་སོ། །དེས་བསམས་པ། བདག་གིས་དྲང་སྲོང་དེ་ལ་ཁས་བླངས་པ་བསྟན་པར་བྱའོ་སྙམ་ནས་སོང་སྟེ། ངང་པའི་རྒྱལ་པོ་འདབ་མ་བརྐྱངས་པ་ལྟར་སྟེང་གི་ནམ་མཁའ་ལ་མངོན་པར་འཕགས་ནས། འབར་བ་དང༌། གསལ་བ་དང༌། ཆར་འབེབས་པ་དང༌། གློག་འབྱིན་པའི་ཆོ་འཕྲུལ་དག་བསྟན་པས། (༣༡ན)དྲང་སྲོང་དེས་རང་སངས་རྒྱས་དེའི་རྐང་པ་གཉིས་ལ་གཏུགས་ནས་སྨྲས་པ། ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །དེས་དེའི་རྐང་པ་གཉིས་ལ་ཕྱག་འཚལ་ཏེ། དགེ་བའི་རྩ་བ་འདིས། འཕགས་པ་འདི་རྫུ་འཕྲུལ་ཆེ་བ་དེ་བཞིན་དུ་བདག་ཀྱང་རྫུ་འཕྲུལ་ཆེ་བར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་དྲང་སྲོང་དེ་ནི་མོའུ་གལ་གྱི་བུ་ཡིན་ཏེ། རང་སངས་རྒྱས་ལ་མཆོད་ནས་སྨོན་ལམ་བཏབ་པའི་ལས་ཀྱི་རྣམ་པར་སྨིན་པས་ད་ལྟར་རྫུ་འཕྲུལ་ཆེ་བར་གྱུར་ཏོ། །
ཡང་ཞུས་པ། མཽའུ་འགལ་གྱི་བུ་ཆེན་པོས་ལས་ཅི་བགྱིས་ན། རྫུ་འཕྲུལ་ཅན་གྱི་མཆོག་ཏུ་ལུང་བསྟན། དགེ་སློང་དག །སྔོན་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་པ་ལ་སངས་རྒྱས་འོད་སྲུང་གི་བསྟན་པ་ལ་འདི་རབ་ཏུ་བྱུང་སྟེ་འདི་རབ་ཏུ་འབྱིན་པར་བྱེད་པའི་དགེ་སློང་དེ་སངས་རྒྱས་འོད་སྲུང་གིས་རྫུ་འཕྲུལ་ཅན་གྱི་མཆོག་ཏུ་ལུང་བསྟན་ཏོ། །འདིས་ཚེ་ཇི་སྲིད་བར་ཚངས་པར་སྤྱད་ཀྱང་ཡོན་ཏན་མ་ཐོབ་པར། འཆི་ཁར་སྨོན་ལམ་བཏབ་པ། མཁན་པོ་འདི་སངས་རྒྱས་འོད་སྲུང་གིས་རྫུ་འཕྲུལ་ཅན་གྱི་མཆོག་ཏུ་ལུང་བསྟན་པ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་སྟེ་རྫུ་འཕྲུལ་ཅན་གྱི་མཆོག་ཏུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་པས་སོ། །དེ་བཞིན་དུ་སྟོད་རིང་ཡང་འོད་སྲུང་གི་བསྟན་པ་ལ་རབ་ཏུ་བྱུང་ནས། མཁན་པོ་བཞིན། བདག་ཀྱང་ཤཱཀྱ་ཐུབ་པའི་བསྟན་པ་ལ་སོ་སོ་ཡང་དག་པར་རིག་པ་ཐོབ་པ་རྣམས་ཀྱི་མཆོག་ཏུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་བོ། །

༥༽ སྐྱབས་འགྲོ་ལན་གསུམ་བྱས་པས་བསྙེན་པར་རྫོགས་པ།

བཅོན་ལྡན་འདས་ཝཱ་ར་ཎཱ་སཱི་ནས་གྲོང་ཁྱེར་སྡེ་ཅན་དུ་བྱོན་ཏེ། དེ་ནས་རས་བལ་ཅན་གྱི་ནགས་ཚང་ཚིང་དུ་གཤེགས་ཏེ་ཤིང་དྲུང་ཞིག་ན་བཞུགས་སོ། །དེའི་ཚེ་སྡེ་བཟང་དྲུག་ཅུའི་ཚོགས་གྲོང་ཁྱེར་སྡེ་ཅན་གྱི་ཕྱི་རོལ་ཏུ་ཉི་མ་རེ་རེ་ཞིང་བུད་མེད་ཀྱིས་བྱས་པའི་རོལ་མོས་རྩེ་བར་བྱེད་པ་ན་བུད་མེད་ཅིག་དམ་བཅས་པ་དྲལ་ཏེ་བྲོས་སོ། །དེ་ནས་སྡེ་བཟང་དྲུག་ཅུའི་ཚོགས་བུད་མེད་དེ་འཚོལ་ཞིང་རས་བལ་ཅན་གྱི་ནགས་ཚང་ཚིང་དུ་སོང་བ་དང༌། བཅོམ་ལྡན་འདས་མཛེས་པ། དད་པར་འོས་པ། དབང་པོ་ཞི་བ། ཐུགས་ཞི་བ། ཐུགས་མཆོག་ཏུ་དུལ་བ། ཞི་བ་དང་དུལ་བ་དང་ལྡན་པ། གསེར་གྱི་མཆོད་སྡོང་ལྟ་བུར་གྱུར་པ། དཔལ་གྱིས་འབར་ཞིང་ཤིང་དྲུང་ན་བཞུགས་པ་མཐོང་ནས། བཅོམ་ལྡན་འདས། བུད་མེད་ཅིག་གཟིགས་སམ། གཞོན་ནུ་དག །བུད་མེད་དེ་ཁྱེད་ཀྱི་ཅིར་འོང༌། བདག་ཅག་བུད་མེད་ཀྱིས་བྱས་པའི་རོལ་མོས་རྩེ་བར་བྱེད་པ་ལས་བུད་མེད་ཅིག་དམ་བཅས་པ་དྲལ་ནས་བྲོས་པ་དེ་འཚོལ་ལགས་སོ། །གཞོན་ནུ་དག །བུད་མེད་འཚོལ་བ་དང༌། བདག་ཉིད་(༣༢ན)འཚོལ་བ་གང་འདམ། བཙུན་པ། བུད་མེད་ཀྱིས་ཅི་བགྱི། བདག་ཉིད་འཚོལ་བ་འདམ་ལགས་སོ། །དེའི་ཕྱིར་འདུག་དང༌། ཆོས་བཤད་དོ། །བཅོམ་ལྡན་འདས་ཀྱི་ཞབས་ལ་ཕྱག་བཙལ་ནས་ཕྱོགས་གཅིག་ཏུ་འདུག་པ་དང༌། དེ་དག་ལ་སྦྱིན་པ་དང༌། ཚུལ་ཁྲིམས་དང༌། མཐོ་རིས་ཀྱི་གཏམ་དང༌། འདོད་པའི་ཉེས་དམིགས་དང༌། ངེས་པར་འབྱུང་བ་དང༌། རབ་ཏུ་དབེན་པའི་བསྔགས་པ་དང༌། རྣམ་བྱང་གི་ཆོས་རྣམས་བཤད་དོ། །དེ་དག་དགའ་བ་དང༌། སྐལ་བ་དང་ལྡན་པར་གཟིགས་ནས་འཕགས་པའི་བདེན་པ་བཞི་རྒྱ་ཆེར་བཤད་པས་སྡེ་བཟང་དྲུག་ཅུའི་ཚོགས་ཀྱིས་སྟན་དེ་ཉིད་ལ་འདུག་བཞིན་དུ་བདེན་པ་མཐོང་ནས། བཙུན་པ། བདག་ཅག་འཕགས་སོ། །མངོན་པར་འཕགས་སོ། །བདག་ཅག་བཅོམ་ལྡན་འདས་དང༌། ཆོས་དང༌། དགེ་འདུན་ལ་སྐྱབས་སུ་མཆི་ལགས་ཀྱིས། བདག་ཅག་དགེ་བསྙེན་དུ་གཟུང་དུ་གསོལ། ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་སྡེ་བཟང་དྲུག་ཅུའི་ཚོགས་ཡི་རང་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་བྱས་ཏེ་སོང་ངོ༌། །ལུང་གཞི་ལས་དེ་ཙམ་ཞིག་གསུངས་ཀྱི། བསྙེན་པར་རྫོགས་ཚུལ་གསལ་བར་མ་གསུངས་ལ། མ་མོ་ལས། དེ་ལ་གང་གསོལ་བ་དང་བཞིའི་ལས་མ་བཅས་པ་ན་སྐྱབས་སུ་འགྲོ་བའི་ཚིག་གསུམ་གྱིས་བསྙེན་པར་རྫོགས་པ་ནི་ལེགས་པར་བསྙེན་པར་རྫོགས་པ་ཞེས་བྱའོ། །གང་གསོལ་བ་དང་བཞིའི་ལས་བཅས་པ་ན་སྐྱབས་སུ་འགྲོ་བའི་ཚིག་གསུམ་གྱིས་བསྙེན་པར་རྫོགས་པ་ནི་བསྙེན་པར་མ་རྫོགས་པའོ་ཞེས་གསུངས་པས། སྡེ་བཟང་དྲུག་ཅུའི་ཚོགས་ཀྱིས་སྐྱབས་སུ་འགྲོ་བ་བྱས་པའང་གསོལ་བཞིའི་ལས་མ་བཅས་པའི་དུས་ཡིན་པས་དེ་ཙམ་གྱིས་བསྙེན་པར་རྫོགས་པ་ཡིན་ནོ། །ཁ་ཅིག་ན་རེ། འདི་དགེ་བསྙེན་ལ་བསྙེན་པར་རྫོགས་པའི་མིང་གིས་བཏགས་པའོ་ཞེས་ཟེར་རོ། །

༦༽ ལྕི་བའི་ཆོས་ཁས་བླངས་པས་བསྙེན་པར་རྫོགས་པ།

བཅོམ་ལྡན་འདས་སེར་སྐྱའི་གནས་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །དེའི་ཚེ་སྐྱེ་དགུའི་བདག་མོ་ཆེན་མོ་བུད་མེད་ལྔ་བརྒྱ་དང་ལྷན་ཅིག་སྟོན་པའི་གན་དུ་སོང་སྟེ་ཕྱག་བཙལ་ནས་ཕྱོགས་གཅིག་ཏུ་འཁོད་དོ། །སྟོན་པས་དེ་ལ་ཆོས་ཀྱི་རྣམ་གྲངས་དུ་མ་བསྟན་ནས་དགའ་བར་བྱས་ཏེ་ཅང་མི་གསུང་བ་དང༌། སྐྱེ་དགུའི་བདག་མོས་གསོལ་བ། བཙུན་པ། བུད་མེད་ཀྱིས་དགེ་སྦྱོང་གི་འབྲས་བུ་བཞི་འཐོབ་པའི་སྐབས་མཆིས་ན། བུད་མེད་རྣམས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་སྟེ་བསྙེན་པར་རྫོགས་ནས་དགེ་སློང་མའི་དངོས་པོར་སྤྱོད་ཅིང་སྟོན་པའི་དྲུང་ན་ཚངས་པར་སྤྱོད་པ་སྤྱད་པར་གསོལ། གོའུ་ཏ་མི།(༣༢བ) ཁྱོད་ཁྱིམ་པ་མོ་གོས་དཀར་པོ་གྱོན་ལ། ནམ་འཚོའི་བར་དུ་དེ་འབའ་ཞིག་ལ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བར་ཚངས་པར་སྤྱད་པ་སྤྱོད་དང༌། དེས་ཁྱོད་ལ་ཡུན་རིང་པོར་ཕན་པ་དང༌། བདེ་བར་འགྱུར་རོ། །དེས་ལན་གསུམ་དུ་བསྐྱར་ནས་ཞུས་ཀྱང་མ་གནང་བ་དང༌། སྟོན་པ་ཕྱག་བཙལ་ནས་སོང་ངོ༌། །དེ་ནས་སྟོན་པ་སེར་སྐྱ་ནས་ཡུལ་ན་དི་ཀར་གཤེགས་པ་དང༌། སྐྱེ་དགུའི་བདག་མོས་དེ་ཐོས་ནས་བུད་མེད་ལྔ་བརྒྱ་དང་ལྷན་ཅིག་ཏུ་རང་གིས་སྐྲ་བྲེགས། ཆོས་གོས་གྱོན་ཏེ་སྟོན་པའི་དགོངས་མལ་དུ་རྗེས་བཞིན་འབྲངས་ནས་སོང་ངོ༌། །
དེ་ནས་སྟོན་པ་ན་དི་ཀའི་གུ་ཛིའི་གནས་ན་བཞུགས་སོ། །སྐྱེ་དགུའི་བདག་མོ་ཆེན་མོ་ལུས་ངལ་ཞིང་རྡུལ་གྱིས་ཕོག་བཞིན་དུ་སྟོན་པའི་སྤྱན་སྔར་སོང་སྟེ། ཕྱག་བཙལ་ནས་སྔར་བཞིན་ཞུས་པས། གོའུ་ཏ་མི། ཁྱོད་འདི་བཞིན་དུ་སྐྲ་བྲེགས། ཆོས་གོས་གྱོན་ལ། ནམ་འཚོའི་བར་དུ་དེ་འབའ་ཞིག་ལ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བར་ཚངས་པར་སྤྱོད་ཅིག །ཁྱོད་ལ་ཡུན་རིང་པོར་ཕན་པ་དང༌། བདེ་བར་འགྱུར་རོ། །སྐྱེ་དགུའི་བདག་མོས་ལན་གསུམ་དུ་བསྐྱར་ནས་ཞུས་ཀྱང་མ་གནང་བ་དང༌། ཕྱི་རོལ་གྱི་སྒོ་ཁང་གི་ཕྱོགས་ཤིག་ན་ངུ་ཞིང་མཆི་མ་འབྱིན་ནོ། །དེ་ཀུན་དགའ་བོས་མཐོང་ནས། ཅིའི་ཕྱིར་ངུ་ཞེས་སྨྲས་པ་དང༌། ཀུན་དགའ་བོ། བུད་མེད་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང༌། བསྙེན་པར་རྫོགས་པ་མ་གནང་ངོ༌། །གོའུ་ཏ་མི། དེ་ལྟ་ན་སྡོད་ཅིག་ངས་སྟོན་པ་ལ་ཞུའོ། །ཀུན་དགའ་བོས་སྟོན་པ་ལ་ཞུས་པས། བཀའ་སྩལ་པ། ཀུན་དགའ་བོ། ཁྱོད་བུད་མེད་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པར་མ་གསོལ་ཅིག །དེ་ཅིའི་ཕྱིར་ཞེ་ན། ཆོས་འདུལ་བ་འདི་ལ་བུད་མེད་རབ་ཏུ་བྱུང་ན་ཆོས་འདུལ་བ་འདི་ཡུན་རིང་དུ་གནས་པར་མི་འགྱུར་རོ། །དཔེར་ན། ཁྱིམ་གང་ན་བུད་མེད་མང་ཞིང་སྐྱེས་པ་ཉུང་བ་དེ་ན་རྐུན་པོ་དང་མི་ལ་རྐུ་བ་རྣམས་ཀྱིས་ཆོམས་པར་འགྱུར་ཞིང་རབ་ཏུ་ཆོམས་པར་འགྱུར་རོ། །
དེ་བཞིན་དུ་ཆོས་འདུལ་བ་འདི་ལ་བུད་མེད་རབ་ཏུ་བྱུང་ན་ཆོས་འདུལ་བ་འདི་ཡུན་རིང་དུ་གནས་པར་མི་འགྱུར་རོ། །འདི་ལྟ་སྟེ། དཔེར་ན། བུ་རམ་ཤིང་ལ་རྩྭའི་ནད་བྱུང་ན་བུ་རམ་ཤིང་དག་མ་རུང་བར་འགྱུར། ཆུད་ཟོས་པར་འགྱུར་རོ། །དེ་བཞིན་དུ་ཆོས་འདུལ་བ་འདི་ལ་བུད་མེད་རབ་ཏུ་བྱུང་ན་ཆོས་འདུལ་བ་འདི་ཡུན་རིང་དུ་གནས་པར་མི་འགྱུར་རོ། །འོན་ཀྱང་ངས་བུད་མེད་རྣམས་དགག་ཅིང་མི་འདའ་བའི་ཕྱིར། ལྕི་བའི་ཆོས་བརྒྱད་བཅས་པ་ལ་ནམ་འཚོའི་བར་དུ་བསླབ་པར་བྱའོ། །བརྒྱད་གང་ཞེ་ན། དགེ་སློང་གི་དགེ་འདུན་ལས་རབ་ཏུ་བྱུང་བ་དང་བསྙེན་པར་རྫོགས་པར་བྱ་བ་དང༌། དགེ་སློང་ལ་ཟླ་བ་ཕྱེད་ཕྱེད་ཅིང་གདམས་ངག་(༣༣ན)དང་རྗེས་སུ་བསྟན་པ་བཙལ་བ་དང༌། དགེ་སློང་མེད་པའི་གནས་སུ་དབྱར་གནས་པར་མི་བྱ་བ་དང༌། གཉིས་ཀའི་དགེ་འདུན་ལ་དགག་དབྱེ་བྱ་བ་དང༌། དགེ་སློང་ལ་ཉེས་པ་བཞིས་མི་གླེང་བ་དང༌། དགེ་སློང་ལ་ཁྲོ་བ་དང་ཚིག་རྩུབ་མི་བྱ་བ་དང༌། ལྕི་བའི་ཆོས་ལས་འདས་ན་གཉིས་ཀའི་དགེ་འདུན་ལ་ཟླ་བ་ཕྱེད་ཀྱི་བར་དུ་མགུ་བ་སྤྱོད་པ་དང༌། དགེ་སློང་མ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་དགེ་སློང་གསར་བུ་ལ་ཕྱག་བྱ་བ་སྟེ། འདི་བརྒྱད་གཟུང་ཞིང་ནན་ཏན་བྱས་ན་འདི་ཉིད་རབ་ཏུ་འབྱུང་བ་དང་བསྙེན་པར་རྫོགས་པར་བྱའོ་ཞེས་བཀའ་སྩལ་བ་དང༌། ཀུན་དགའ་བོ་ཡི་རང་སྟེ་སོང་ནས་སྐྱེ་དགུའི་བདག་མོ་ཆེན་མོ་ལ་སྨྲས་པ། རབ་ཏུ་འབྱུང་བ་དང་བསྙེན་པར་རྫོགས་པར་གནང་མོད་ཀྱི། འོན་ཀྱང་ལྕི་བའི་ཆོས་བརྒྱད་བཅས་པ་ལ་བསླབ་པར་བྱའོ། །བཙུན་པ་ཀུན་དགའ་བོ། །བཀའ་སྩལ་པ་དེ་མཉན་གྱིས། གསུངས་ཤིག །དེས་སྔར་བཞིན་དུ་སྨྲས་པ། ཀུན་དགའ་བོ། བཅོམ་ལྡན་འདས་ཀྱིས་བུད་མེད་རྣམས་ཀྱི་ཉེས་པ་དགག་པའི་ཕྱིར་དུ་ལྕི་བའི་ཆོས་བརྒྱད་བཅས་པ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བགྱི་བ་འདི་ནི་བདག་གིས་ལུས་དང་ངག་དང་ཡིད་ཀྱིས་ཀྱང་ནོད་དོ་ཞེས་སྨྲས་པས་བསྙེན་པར་རྫོགས་པར་གྱུར་ཏོ། །བུད་མེད་ལྔ་བརྒྱ་པོའང་ལྕི་བའི་ཆོས་ཁས་བླངས་པས་བསྙེན་པར་རྫོགས་སོ། །

༧༽ འཕྲིན་གྱིས་བསྙེན་པར་རྫོགས་པ།

བཅོམ་ལྡན་འདས་མཉན་ཡོད་ན་བཞུགས་སོ། །མཉན་ཡོད་ཀྱི་ཕྱོགས་ཤིག་ན་ཁྱིམ་བདག་བྱིན་པ་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱོད་དོ། །ཕྱོགས་གཞན་ཞིག་ན་ཁྱིམ་བདག་རི་དྭགས་སྒྲ་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་འདུག་པ་དེས་ཀྱང་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱོད་དོ། །དེ་གཉིས་གཅིག་ལ་གཅིག །ཁྱོད་ལས་བདག་ལོངས་སྤྱོད་ཆེའོ་ཞེས་འགྲན་པར་བྱེད་ལ། ཕྱིས་མཛའ་བར་གྱུར་ཏེ། བྱིན་པས། བདག་ཅག་འདས་ཀྱང་བུ་དང་ཚ་བོ་རྣམས་མཛའ་བ་རྒྱུན་མི་འཆད་པའི་ཐབས་གང༌། རི་དྭགས་སྒྲས་སྨྲས་པ། ལེགས་ཏེ། མ་བཙས་པའི་སྔ་ནས་གཉེན་བྱ་སྟེ། བདག་ཅག་གཅིག་ལ་བུ་མོ་བྱུང་ན་ཅིག་ཤོས་ཀྱི་བུ་ལ་སྦྱིན་ནོ། །དེ་ལྟར་བྱའོ་ཞེས་མ་བཙས་པར་གཉེན་བྱས་ཏེ་སོང་ངོ༌། །རེ་ཞིག་ན་ཁྱིམ་བདག་བྱིན་པའི་ཆུང་མ་ལ་བུ་མོ་གཟུགས་ལེགས་ཤིང་བལྟ་ན་སྡུག་པ་ཞིག་བཙས་ཏེ། རྟག་ཏུ་ངུའོ། །དེའི་ཁྱིམ་དུ་དགེ་སློང་དག་འོངས་ཏེ་ཆོས་བཤད་པ་དང༌། དེ་རྣ་བ་བྱོ་སྟེ་ཉན་ནོ། །ཉི་མ་ཉེར་གཅིག་ཏུ་བཙས་སྟོན་རྒྱ་ཆེར་བྱས་ནས། ཆོས་འདོད་ཅིང༌། བྱིན་པའི་བུ་མོ་ཡིན་པས་ཆོས་སྦྱིན་མ་ཞེས་བཏགས། དེ་མ་མ་བརྒྱད་ལ་གཏད་ནས་བསྐྱེད་བསྲིངས་སོ། །རི་དྭགས་(༣༣བ)སྒྲས་ཀྱང་དེ་ཐོས་ནས། བདག་གི་མནའ་མ་ཡིན་ནོ་སྙམ་དུ་གོས་དང་རྒྱན་བསྐུར་ཏོ། །བྱིན་པས་དེ་བླངས་ནས། མཛའ་བོས་དེ་ལྟར་བྱས་པ་ལེགས་ཀྱིས། ཁྱོད་ལ་བུ་བྱུང་ན་སྦྱིན་ནོ། །རི་དྭགས་སྒྲའི་ཆུང་མ་ལའང་བུ་ཞིག་བཙས་ནས་ཉི་མ་ཉེར་གཅིག་ཏུ་བཙས་སྟོན་རྒྱ་ཆེར་བྱས་ཏེ། སྐར་མ་ས་ག་ལ་བཙས་པས་ས་ག་ཞེས་བཏགས་སོ། །དེ་མ་མ་བརྒྱད་ལ་གཏད་ནས་བསྐྱེད་བསྲིངས་སོ། །བྱིན་པས་ཀྱང་དེ་ཐོས་ནས་དེ་བདག་གི་མག་པར་འགྱུར་རོ་སྙམ་སྟེ་གོས་དང་རྒྱན་བསྐུར་ཏོ། །ཆོས་སྦྱིན་མ་ཆེར་སྐྱེས་པ་དང་དེ་རབ་ཏུ་འབྱུང་བར་འདོད་ནས་ཕ་ལ་ཞུས་པས། ཁྱོད་ས་ག་ལ་སྔར་བཏང་ཟིན་ཏེ། དེ་ཁྱོད་ཀྱི་ཁྱིམ་ཐབ་ཡིན་པས་ངས་གནང་དུ་མི་རུང་ངོ༌། །ཁྱིམ་དེར་དགེ་སློང་མ་ཨུཏྤ་ལའི་མདོག་དུས་དུས་སུ་འོངས་ནས་ཆོས་སྟོན་པ་ལ། ཆོས་སྦྱིན་མས། འཕགས་མ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པར་འདོད་ན། ཕས་མ་གནང་སྟེ་ཕྱིར་འབྱུང་དུ་མི་སྟེར་ན། ཁྱོད་ཀྱིས་འདི་ཉིད་དུ་རབ་ཏུ་མི་དབྱུང་ངམ་ཞེས་སྨྲས་པས། བུ་མོ། ལེགས་ཏེ། བཅོམ་ལྡན་འདས་ཀྱིས་འདོད་པ་བསྟེན་པ་ལ་ཉེས་དམིགས་ལྔ་དང༌། རབ་ཏུ་བྱུང་བ་ལ་ཕན་ཡོན་ལྔ་གསུངས་པས། ངས་བཅོམ་ལྡན་འདས་ལ་ཞུའོ་ཞེས་སྨྲས་ནས། སྟོན་པའི་དྲུང་དུ་སོང་སྟེ་ཞུས་པས། སྟོན་པས་ཀུན་དགའ་བོ་ལ་བཀའ་སྩལ་པ། ཁྱོད་སོང་ལ་དགེ་སློང་མ་དག་ལ་འདི་སྐད་སྨྲོས་ཤིག །ཆོས་སྦྱིན་མ་ཁྱིམ་དེ་ཉིད་དུ་ཨུཏྤ་ལའི་མདོག་འཕྲིན་པར་བཏང་ནས་སྐྱབས་སུ་འགྲོ་བ་གསུམ་དང༌། བསླབ་པའི་གཞི་ལྔ་བྱིན་ལ། གནས་དེ་ཉིད་དུ་རབ་ཏུ་དབྱུང་བར་ངས་གནང་ངོ༌། །
དེ་ནས་ཀུན་དགའ་བོས་དགེ་སློང་མ་རྣམས་ལ་བསྒོ་བས། དགེ་སློང་མ་རྣམས་ཀྱིས་ཀྱང་ཨུཏྤ་ལའི་མདོག་འཕྲིན་པར་བཏང་སྟེ། དགེ་བསྙེན་མ་དང་དགེ་ཚུལ་མའི་བསླབ་པ་བྱིན་ནས། ཁྱོད་ཀྱིས་འདི་ལ་བསླབ་པར་བྱའོ་ཞེས་སྨྲས་པ་དང༌། དེ་རབ་ཏུ་དགའ་བ་སྐྱེས་སོ། །ཨུཏྤ་ལའི་མདོག་གིས་བདེན་བཞི་བསྟན་པ་ཆོས་སྦྱིན་མས་ཐོག་མ་ཐག་རྒྱུན་ཞུགས་ཐོབ། དེ་སྟོན་པ་ལ་གསོལ་བ་དང༌། ཀུན་དགའ་བོ། ཁྱོད་སོང་ལ་དགེ་སློང་མ་རྣམས་ལ། ཆོས་སྦྱིན་མ་ཨུཏྤ་ལའི་མདོག་འཕྲིན་པར་ཐོང་ལ། ལོ་གཉིས་སུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་གི་བསླབ་པ་བྱིན་ཅིག་ཅེས་སྒོས་ཤིག །དེས་དགེ་སློང་མ་རྣམས་ལ་བསྒོས་ནས། དེ་རྣམས་ཀྱིས་ཀྱང་ཨུཏྤ་ལའི་མདོག་འཕྲིན་པར་བཏང༌། དེས་ཁྱོད་དགེ་སློབ་མར་གྱུར་གྱིས་བསླབ་པ་ལ་སློབས་ཤིག་ཅེས་བརྗོད་ཅིང་ཆོས་བསྟན་པས་ལན་ཅིག་ཕྱིར་འོང་ཐོབ་བོ། །ཆོས་སྦྱིན་མས་ལོ་གཉིས་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལ་བསླབ་པས་གཞོན་ནུ་མར་གྱུར་ཏོ། །དེ་ནས་རི་དྭགས་སྒྲས་ཉི་མ་ནམ་བཟང་བ་ལ་བརྟགས་ནས། ཁྱེའུའི་བག་མར་བླང་ངོ་ཞེས་སྤྲིངས་པ་དང༌། བྱིན་པས་ཀྱང༌། འདི་ཙམ་ནའོ་ཞེས་ཁས་(༣༤ན)བླངས་སོ། །དེ་གཉིས་ཀྱི་ཉེ་འབྲེལ་དང་སྐྱེ་བོ་མང་པོ་ལྷགས་པས་མཉན་ཡོད་ཀྱི་ནང་ཐམས་ཅད་གང་ངོ༌། །རྒྱལ་པོ་གསལ་རྒྱལ་འཁོར་དང་བཅས་པས་དེ་ཐོས་ནས་བློན་པོ་རྣམས་ལ། དེ་གཉིས་ཀྱི་གྲོགས་གྱིས་ཤིག་ཅེས་བསྒོས་ཏེ་དུས་སྟོན་གྱི་སྟ་གོན་རྒྱ་ཆེར་བྱས་པ་ཆོས་སྦྱིན་མས་མཐོང་ནས། ནང་གི་སྐྱེ་བོ་ལ། དུས་མ་ཡིན་པའི་དུས་སྟོན་འདི་ཅི་ཡིན་ཞེས་དྲིས་པས། ཁྱོད་བག་མར་གཏང་བའི་དུས་སྟོན་ནོ་ཞེས་སྨྲས་པ་དང༌། སྐྲག་སྟེ། ཡབ། བདག་འདོད་པ་འཚལ་བ་མ་ལགས་པས་དབྱར་ཁང་དུ་མཆིར་ཅི་གནང༌། ཕས་སྨྲས་པ། ཁྱོད་མ་སྐྱེས་པ་ནས་ས་ག་ལ་བྱིན་པ་རྒྱལ་པོ་དང་བློན་པོ་དང་སྐྱེ་བོ་མང་པོས་ཀྱང་ཤེས་ན་ངས་ཁྱོད་ད་ཇི་ལྟར་གནང༌། བདག་ཅག་ཉེ་དུ་རྣམས་བཙོན་རར་བཅུག་སྟེ། འཆི་བར་འདོད་དམ། སང་བག་མར་འགྲོ་བར་གྱིས་ཤིག་ཅེས་བསྒོ་བ་དང༌། དེ་བརྩོན་པས་ལམ་ཡིད་ལ་བྱེད་པ་བསྒོམས་ཀྱང་འདོད་པ་དང་བྲལ་བར་བྱ་བའི་ཐབས་མ་རྙེད་དོ། །
དེ་ནས་བཅོམ་ལྡན་འདས་ཀྱིས་མཁྱེན་ནས་འཛུམ་པ་མཛད་པས་ཞལ་ནས་འོད་ཟེར་སྔོ་སེར་དཀར་དམར་བྱུང་སྟེ། འོག་ཏུ་སོང་བས་དམྱལ་བ་ཚ་གྲང་གི་སྡུག་བསྔལ་ཞི་བར་བྱས། བདག་ཅག་ཤི་འཕོས་སམ་སྙམ་མོ། །དེ་དག་དད་པ་བསྐྱེད་པའི་ཕྱིར་དུ་སྟོན་པས་སྤྲུལ་པ་བཏང་བ་མཐོང་སྟེ། འདིའི་མཐུའོ་སྙམ་དུ་དད་ནས་ཤི་འཕོས་ཏེ་ལྷ་མིར་སྐྱེས། སྟེང་དུ་སོང་བ་རྣམས་རྒྱལ་ཆེན་རིས་བཞི་ནས་འོག་མིན་གྱི་བར་དུ་སོང་སྟེ། མི་རྟག་སྡུག་བསྔལ་སྟོང་བདག་མེད་ཀྱི་སྒྲ་འབྱིན་ཅིང༌། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱ། །གང་ཞིག་ཆོས་འདུལ་འདི་ཉིད་ལ། །བག་ཡོད་པར་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བསྒྲགས་ནས། འོད་ཟེར་གྱིས་སྟོང་གསུམ་བསྐོར་ཏེ་བཅོམ་ལྡན་འདས་ཀྱི་ཕྱི་བཞིན་འབྲང་ཞིང་འོང་ངོ༌། །དེ་ལ་འདས་པ་ལུང་སྟོན་པར་བཞེད་ན་གནམ་ལོགས་སུ། །མ་འོངས་པ་རྣམས་མདུན་དུ། དམྱལ་བ་ཞབས་མཐིལ་དུ། བྱོལ་སོང་རྟིང་བར། ཡི་དྭགས་ཞབས་ཀྱི་མཐེ་བོང་དུ། མི་པུས་མོ་གཉིས་སུ། སྟོབས་ཀྱི་འཁོར་ལོས་སྒྱུར་བ་ཕྱག་གཡོན་པའི་མཐིལ་དུ། འཁོར་ལོས་སྒྱུར་བ་ཕྱག་གཡས་པའི་མཐིལ་དུ། ལྷ་ལྟེ་བར། ཉན་ཐོས་ཞལ་དུ། རང་སངས་རྒྱས་མཛོད་སྤུར། སངས་རྒྱས་སུ་ལུང་སྟོན་པར་བཞེད་ན་གཙུག་ཏོར་ཏུ་མི་སྣང་བར་འགྱུར་རོ། །འོད་ཟེར་དེ་བཅོམ་ལྡན་འདས་ལ་ལན་གསུམ་བསྐོར་ནས་ཞལ་དུ་མི་སྣང་བར་གྱུར་ཏོ། །ཀུན་དགའ་བོས་དེའི་རྒྱུ་ཞུས་པས། ཆོས་སྦྱིན་མ་འཕྲིན་གྱིས་དགེ་ཚུལ་མ་དང་དགེ་སློབ་མར་གྱུར་ནས། དེ་སང་བག་མར་གཏོང་འདོད་དེ། དེ་ནི་ཁྱིམ་དུ་གནས་པའི་སྐབས་མེད་དེ། དེ་ཕྱིར་(༣༤བ)མི་འོང་བ་དང༌། དགྲ་བཅོམ་པར་འགྱུར་རོ། །ཁྱོད་སོང་ལ་དགེ་སློང་མ་རྣམས་ལ། ཨུཏྤ་ལའི་མདོག་འཕྲིན་པར་བཏང་ནས་དེ་ལ་ཚངས་སྤྱོད་ཉེར་གནས་ཀྱི་སྡོམ་པ་བྱིན་ཅིག །དེས་སོང་སྟེ་དེ་རྣམས་ལ་བསྒོས་ནས། དེ་རྣམས་ཀྱིས་ཨུཏྤ་ལའི་མདོག་འཕྲིན་པར་བཏང་སྟེ། ཁྱོད་ལ་ཚངས་སྤྱོད་ཉེར་གནས་ཀྱི་སྡོམ་པ་གནང་གིས། ད་ཁྱོད་བསྙེན་པར་རྫོགས་པར་བྱའོ་ཞེས་བརྗོད་ཅིང༌། ཆོས་བཤད་པ་ཐོས་མ་ཐག་ཏུ་དེས་ཕྱིར་མི་འོང་ཐོབ་ནས་རྫུ་འཕྲུལ་བསྒྲུབས་སོ། །དེ་ནས་ཨུཏྤ་ལའི་མདོག་སོང་ནས། སྟོན་པ་ལ་གསོལ་བ་དང༌། ཀུན་དགའ་བོ། ཁྱོད་སོང་ལ་དགེ་འདུན་སྡེ་གཉིས་ཀྱིས་ཨུཏྤ་ལའི་མདོག་འཕྲིན་པར་ཐོང་སྟེ་ཆོས་སྦྱིན་མ་བསྙེན་པར་རྫོགས་པར་གྱིས་ཤིག་ཅེས་སྒོས་ཤིག །དེས་དགེ་སློང་མ་རྣམས་ལ་བསྒོས་པས་དེ་རྣམས་ཀྱིས་དགེ་འདུན་སྡེ་གཉིས་ཀ་བསྡུས་ནས་བསྙེན་པར་རྫོགས་པར་བྱས་ཏེ། ཨུཏྤ་ལའི་མདོག་འཕྲིན་པར་བཏང་ནས་དེས། བསྙེན་པར་རྫོགས་པར་བྱས་སོ་ཞེས་བརྗོད་ཅིང༌། ཆོས་བཤད་པས་དགྲ་བཅོམ་མར་གྱུར་ཏོ། །དེའི་ཚེ་ཕ་མ་ལ། བདག་གིས་དགྲ་བཅོམ་ཐོབ་ཀྱིས་དབྱར་ཁང་དུ་མཆིའོ་ཞེས་ཞུས་པ་དང༌། ཕ་མ་གཉིས་གྲོས་བྱས་ནས། བུ་མོ། དེ་ལྟར་བྱས་ན་བདག་ཅག་ལ་རྒྱལ་པོའི་ཆད་པ་འོང་གིས། དེ་ལ་རིམ་པ་བཞིན་དུ་བྱས་ཏེ། བཅོམ་ལྡན་འདས་དང་ལྷན་ཅག་སོང་ཞིག །དེས་སྨྲས་པ། ལེགས་ཀྱིས་དེ་ལྟར་བྱའོ། །དེ་ནས་ཁྱིམ་བདག་བྱིན་པས་བཅོམ་ལྡན་འདས་དགེ་འདུན་དང་བཅས་པ་ཡང་ཁྱིམ་དུ་སྤྱན་དྲངས། རི་དྭགས་སྒྲ་ལའང༌། ཆོས་སྦྱིན་མ་ཁྱིམ་དུ་གནས་སུ་མི་བཏུབ་ཀྱིས་ནན་གྱིས་ལོངས་ཤིག་ཅེས་སྤྲིངས་སོ། །རི་དྭགས་སྒྲས་ཀྱང་རྒྱལ་པོ་གསལ་རྒྱལ་ལ་གསོལ་ནས་སྟོན་མོའི་སྟ་གོན་ཆེར་བྱས་སོ། །
དེ་ནས་ཁྱིམ་བདག་བྱིན་པས་སྟོན་པ་འཁོར་བཅས་བསོད་སྙོམས་བསོད་པས་ཚིམ་པར་བྱས་ཏེ་སྟོན་པའི་སྤྱན་སྔར་ཆོས་ཉན། རི་དྭགས་སྒྲ་འཁོར་བཅས་ཀྱང་བག་མ་བླང་བའི་ཕྱིར་དེའི་སྒོ་དྲུང་ན་འཁོད་དོ། །སྟོན་པས་དེ་རྣམས་ལ་ཆོས་བཤད་མགུ་བར་བྱས་ཏེ་བཞེངས་པའི་ཕྱི་བཞིན་ཆོས་སྦྱིན་མའང་སོང་བ་དང༌། ཁྱེའུ་ས་གས་འཕྲལ་ལ་དཔུང་པ་བརྐྱངས་ཏེ་ཆོས་སྦྱིན་མའི་ལག་པ་ནས་གཟུང་བར་བརྩམས་པ་དང༌། ཆོས་སྦྱིན་མ་སེམས་ཅན་གྲངས་མེད་པས་མཐོང་བཞིན་དུ། ངང་པའི་རྒྱལ་པོ་འདབ་མ་བརྐྱངས་པ་བཞིན་དུ་ནམ་མཁའ་ལ་འཕུར་ཏེ་ཆོ་འཕྲུལ་བསྟན་པ་དང༌། དེ་དག་ངོ་མཚར་ཆེ་ནས་ཕྱག་འཚལ་ཏེ། སྲིང་མོ། འདི་འདྲ་བའི་ཡོན་ཏན་ཐོབ་ནས་འདོད་ཆགས་ལ་སྤྱོད་པ་གནས་མ་ཡིན་ཏེ། བཟོད་པར་གསོལ་ལོ། །
དེ་ནས་ཆོས་སྦྱིན་མས་ནམ་མཁའ་ལས་བབས་ཏེ་སྐྱེ་བོ་རྣམས་ལ་ཆོས་བཤད་པས་ཁ་ཅིག་གིས་རྒྱུན་ཞུགས། ཕྱིར་འོང༌། ཕྱིར་མི་འོང༌། དགྲ་བཅོམ་ཐོབ། ཁ་ཅིག་གིས་ཉན་ཐོས། (༣༥ན)རང་སངས་རྒྱས། བླ་ན་མེད་པའི་བྱང་ཆུབ་ཏུ་སེམས་བསྐྱེད། འཁོར་ཕལ་ཆེར་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་བབ་པར་བཀོད་དོ། །དེ་ནས་སྟོན་པའི་སྤྱན་སྔར་སོང་བ་དང༌། སྟོན་པས་ཆོས་སྦྱིན་མ་དགེ་སློང་མ་ཆོས་སྨྲ་བའི་ནང་ནས་མཆོག་ཏུ་ལུང་བསྟན་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཙུན་པ། ཆོས་སྦྱིན་མས་ལས་ཅི་བགྱིས་པས། ཁྱིམ་ན་མཆིས་བཞིན་དུ་འཕྲིན་གྱིས་རབ་ཏུ་བྱུང་ཞིང་བསྙེན་པར་རྫོགས་ནས་དགྲ་བཅོམ་པ་ཐོབ་སྟེ། བཅོམ་ལྡན་འདས་ཀྱིས་ཆོས་སྨྲ་བའི་ནང་ནས་མཆོག་ཏུ་ལུང་བསྟན་ལགས། དགེ་སློང་དག །སྐྱེ་དགུ་རྣམས་ཀྱི་ཚེ་ལོ་ཉི་ཁྲི་པ་ལ་སངས་རྒྱས་འོད་སྲུངས་ཡུལ་འཁོར་མོ་འཇིག་གི་གྲོང་ཁྱེར་ན་བཞུགས་སོ། །དེའི་ཚེ་ཁྱིམ་བདག་གི་བུ་མོ་ཞིག་རབ་ཏུ་འབྱུང་བར་འདོད་ཀྱང་ཕ་མས་མ་གནང་སྟེ། ཕྱིར་འབྱུང་དུའང་མི་སྟེར་རོ། །ཁྱིམ་དེར་དགེ་སློང་མ་རྒན་མོ་ཞིག་དུས་དུས་སུ་འོངས་ནས་ཆོས་སྟོན་པ་ལ་བུ་མོ་དེས། འཕགས་མ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པར་འདོད་ན་ཕ་མས་མ་གནང་སྟེ། ཕྱིར་འབྱུང་དུའང་མི་སྟེར་ན། གནས་འདི་ཉིད་དུ་རབ་ཏུ་འབྱུང་བར་ནུས་སམ། བུ་མོ། བཅོམ་ལྡན་འདས་ལ་ཞུའོ་ཞེས་སྨྲས་ནས་སངས་རྒྱས་འོད་སྲུངས་ལ་ཞུས་པ་དང༌། དེ་ཉིད་འཕྲིན་པར་བཏང་སྟེ། ཁྱིམ་ན་འདུག་བཞིན་དུ་རབ་ཏུ་བྱུང་བ་དང་བསྙེན་པར་རྫོགས་ཏེ། དགེ་སློང་མ་རྒན་མོ་དེས་ཆོས་བཤད་པས་དགྲ་བཅོམ་པ་ཐོབ་བོ། །དེ་ནས་དགེ་སློང་མ་རྒན་མོས་བསམས་པ། བུ་མོ་འདིས་བདག་ལ་བརྟེན་ནས་ཁྱིམ་ན་འདུག་བཞིན་དུ་རབ་ཏུ་བྱུང་བ་དང་བསྙེན་པར་རྫོགས་ཏེ་དགྲ་བཅོམ་པ་ཐོབ་ལ། བདག་གིས་ཚེ་ཇི་སྲིད་བར་ཚངས་པར་སྤྱད་ཀྱང་ཡོན་ཏན་གྱི་ཆོས་ཅི་ཡང་མ་ཐོབ་ཀྱིས། བྲམ་ཟེའི་ཁྱེའུ་བླ་མ་ཚེ་ལོ་བརྒྱ་པའི་དུས་སུ་སངས་རྒྱས་ཤཱཀྱ་ཐུབ་པར་འགྱུར་བར་ལུང་བསྟན་པ་དེའི་བསྟན་པ་ལ་བདག་ཁྱིམ་ན་འདུག་བཞིན་དུ། འཕྲིན་གྱིས་རབ་བྱུང་བསྙེན་རྫོགས་དང་དགྲ་བཅོམ་པ་ཐོབ་པ་དང༌། བདག་གི་མཁན་མོ་སངས་རྒྱས་འོད་སྲུང་གིས་ཆོས་སྨྲ་བའི་ནང་ནས་མཆོག་ཏུ་ལུང་བསྟན་པ་དེ་བཞིན་དུ་བདག་ཀྱང་ཤཱཀྱ་ཐུབ་པས་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་དགེ་སློང་མ་རྒན་མོ་དེ་ནི་ཆོས་སྦྱིན་མ་འདི་ཡིན་ཏེ། སྨོན་ལམ་བཏབ་པས་ཆོས་སྨྲ་བའི་ནང་ནས་མཆོག་ཏུ་ལུང་བསྟན་ཏེ། དེ་བས་ན་ལས་གཅིག་ཏུ་གནག་པ་ཞེས་སོགས་གསུངས་སོ། །

ཁ༽ སྔོན་གྱི་ཆོ་ག་བཤད་པ།

གཉིས་པ་སྔོན་ཆོག་ནི། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ་ན་ཕལ་ཆེར། དགེ་སློང་ཚུར་ཤོག་ཅེས་གསུངས་པ་ཙམ་གྱིས་བསྙེན་རྫོགས་མཛད་པས་གཞན་དག་གི་གན་དུ་རབ་ཏུ་འབྱུང་བར་འདོད་པ་འོངས་པ་རྣམས་ཀྱང་སྟོན་པའི་དྲུང་དུ་ཁྲིད་ནས། (༣༥བ)ཚུར་ཤོག་གི་བསྙེན་པར་རྫོགས་པར་མཛད་དོ། །དགེ་སློང་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་པ་ན། དེས་དེ་ཁྲིད་ནས་སྟོན་པའི་སྤྱན་སྔར་སོང་བ་དང་། ལམ་དུ་ཤི་ནས་རབ་ཏུ་འབྱུང་བ་དང་བསྙེན་པར་རྫོགས་པའི་བར་ཆད་དུ་གྱུར་པའི་སྐབས་དེ་སྟོན་པ་ལ་གསོལ་བ་དང༌། སྟོན་པས། ཀྱེ་མ་ངའི་ཉན་ཐོས་ཐག་རིང་པོ་ནས་འོང་བ་རྣམས་ངལ་བར་འགྱུར་སྙམ་དུ་དགོངས་ཏེ། དེང་ནས་དགེ་འདུན་གྱིས་རབ་ཏུ་དབྱུང་བ་དང་བསྙེན་པར་རྫོགས་པར་བྱ་བར་གནང་ངོ་ཞེས་བཀའ་སྩལ་ཏེ། ཇི་ལྟར་བྱ་བ་མ་ཤེས་པར་ཞུས་པ། རབ་ཏུ་འབྱུང་བར་འདོད་པ་འོངས་ན་དགེ་འདུན་ཐམས་ཅད་འདུས་པ་ན་ཞེས་སོགས་ཆོ་ག་དང་བཅས་པ་གསུངས་སོ། །

ག༽ ད་ལྟར་གྱི་ཆོ་ག་བྱེ་བྲག་ཏུ་བཤད་པ།

གསུམ་པ་ད་ལྟར་གྱི་ཆོ་ག་བྱེ་བྲག་ཏུ་བཤད་པ་ལ་གསུམ། གཞི། ཕྲན་ཚེགས། ཞུ་བའི་སྐབས་ནས་འབྱུང་བའོ། །དང་པོ་ནི། དེ་ལྟར་སྔོན་ཆོག་གིས་བསྙེན་པར་རྫོགས་པ་དག །མཁན་སློབ་མེད་པས་ལེགས་པར་མ་སྦྱངས་པ་དང༌། ལེགས་པར་མ་བགོས་པ་དང༌། སྒྲ་མཐོན་པོ་དང༌། སྒྲ་ཆེན་པོ་དང༌། རྒོད་བག་གི་སྤྱོད་ལམ་གྱིས་བྲམ་ཟེ་དང་ཁྱིམ་བདག་གི་ཁྱིམ་དུ་ཟས་དང་སྲན་ཚོད་སློང་བ་དང་སློང་དུ་འཇུག་ཅིང༌། བསྟན་པ་དང་འགལ་བར་བྱེད་པས་མུ་སྟེག་ཅན་རྣམས་སྨོད་པ་དང༌། ཕྱར་ཁ་གཏོང་བ་དང༌། ཁ་ཟེར་བར་བྱེད་དོ། །ནད་པ་ཞིག་ཀྱང་ནད་གཡོག་མེད་པས་ཤི་བའི་སྐབས་དེ་སྟོན་པ་ལ་ཞུས་པས་སྟོན་པས། ངས་ཉན་ཐོས་རྣམས་གཅིག་གིས་གཅིག་བསྡུ་བའི་ཕྱིར་དང༌། ནད་པ་རྣམས་ལ་རིམ་གྲོ་བྱ་བའི་ཕྱིར་མཁན་པོ་དང་སློབ་དཔོན་དག་གིས་རབ་ཏུ་དབྱུང་བ་དང་བསྙེན་པར་རྫོགས་པར་གནང་ངོ་ཞེས་བཀའ་སྩལ་ཏེ། དེ་དག་གིས་མཁན་སློབ་མི་ཤེས་ནས་ཞུས་པས། མཁན་པོ་གཉིས་སློབ་དཔོན་ལྔ་མཚན་ཉིད་དང་བཅས་པ་གསུངས། ཇི་ལྟར་རབ་ཏུ་དབྱུང་བ་དང་བསྙེན་པར་རྫོགས་པར་བྱ་བ་མི་ཤེས་ནས་ཞུས་པས། དང་པོར་བར་ཆད་དྲིས་ནས་སྐྱབས་སུ་འགྲོ་བ་དང་དགེ་བསྙེན་གྱི་སྡོམ་པ་སྦྱིན་པ་དང༌། དེའི་འོག་ཏུ་བསླབ་པ་བརྗོད་ནས་རབ་བྱུང་ཞུ་བའི་དགེ་སློང་ལ་གཏད་དེ། དེས་དགེ་འདུན་ལ་ཞུས། རབ་ཏུ་འབྱུང་བའི་མཁན་པོར་གསོལ་ནས་སྐྲ་དང་ཁ་སྤུ་བྲེགས། ཁྲུས་བྱས་ཏེ་མཁན་པོས་ཆོས་གོས་དང་ལྷུང་བཟེད་སྦྱིན་ཞིང་དེས་ཀྱང་རྐང་པ་གཉིས་ལ་གཏུགས་ནས་བླང་བར་བྱ། དེའི་འོག་ཏུ་མཁན་པོས་བསྐོན་ཞིང་མཚན་བརྟག་པར་བྱ་ཞེས་གསུངས་པ་དང༌། དགེ་སློང་རྣམས་ཀྱིས་དེ་སྒྲེན་མོར་ཕྱུང་སྟེ་བརྟགས་པས་ངོ་ཚ་ནས། དེ་ལྟར་མི་བྱ་བར། མ་ཚོར་བར་བརྟག་པར་བྱའོ་ཞེས་གསུངས། དེའ་འོག་ཏུ་སྐྱབས་འགྲོ་རྩོམ་པས་རབ་ཏུ་བྱུང་བ་ཉེ་བར་བསྒྲུབས་ནས་དགེ་ཚུལ་ཉིད་དུ་ཉེ་བར་སྒྲུབ་པའི་དགེ་སློང་ལ་གཏད་དེ། དེས་དགེ་ཚུལ་གྱི་སྡོམ་པ་སྦྱིན་པར་བྱ། དེ་ནས་དགེ་སློང་གཞན་ཞིག་གིས་གྲིབ་ཚོད་གཞལ་ཏེ་སྡོམ་པ་ཐོབ་དུས་བརྗོད། (༣༦ན)དེའི་འོག་ཏུ་བསླབ་པ་བརྗོད་པ་རྣམས་གསུངས། དེའི་འོག་ཏུ་དེས་ལོ་ཉི་ཤུ་ལོན་ན་མཁན་པོས་ཆོས་གོས་དང་ལྷུང་བཟེད་སྩལ་ཞིང་སློབ་དཔོན་གཉིས་དད་པའི་དགེ་འདུན་དང་བཅས་པ་ལ་གསོལ་བ་གདབ། དེ་དག་གིས་ཀྱང་བཤགས་པ་དང་བསྡམ་པ་དང་བྱིན་གྱིས་བརླབས་པས་ཕྱིར་བཅོས་ཏེ་འདུག །དེའི་འོག་ཏུ་ཡུལ་དབུས་དང་མཐའ་འཁོབ་ཀྱི་བྱེ་བྲག་གིས་དགེ་སློང་བཅུའམ་ལྔ་ལ་སོགས་པ་འདུས་པ་ན། དང་པོར་སྟོན་པ་དང༌། དེ་ནས་དགེ་སློང་རེ་རེ་ལ་ཕྱག་གསུམ་གསུམ་འཚལ་དུ་བཅུག །དེ་ནས་མཁན་པོར་གསོལ་བའི་འོག་ཏུ་ཆོས་གོས་དངོས་སམ་རྒྱུའི་བྱིན་རླབས་བྱས་ནས་དགེ་འདུན་ལ་ལྷུང་བཟེད་བསྟན་ཏེ་བྱིན་གྱིས་བརླབ་བོ། །
དེ་ནས་བསྒྲུབ་བྱ་དེ་ཐོས་པའི་ཉེ་འཁོར་ལས་བཀར་ཏེ། གསངས་ཏེ་གསང་སྟེ་སྟོན་པ་བསྐོས་ནས། དེས་བསྒྲུབ་བྱ་དེ་རང་ལ་ཕྱག་འཚལ་དུ་བཅུག་སྟེ་བར་ཆད་དྲིས་ནས་ནང་དུ་འོང་བ་ཞུ། དེ་ནས་བསྒྲུབ་བྱ་དེ་བཀུག །རྒན་པའི་མཐའ་ལོགས་སུ་འདུག་ཏུ་བཅུག་སྟེ། ལས་བྱེད་པས་བསྙེན་པར་རྫོགས་པར་གསོལ་ཏུ་གཞུག །དེའི་འོག་ཏུ་བར་ཆད་དྲི་བའི་ཕྱིར་གསོལ་བ་འབའ་ཞིག་གི་ལས་བྱས་ནས་བར་ཆད་དྲི་བར་བྱ། དེའི་འོག་ཏུ་གསོལ་བཞིའི་ལས་ཀྱིས་བསྙེན་པར་རྫོགས་པ་བསྒྲུབ་པར་བྱ། དེའི་འོག་ཏུ་གྲིབ་ཚོད་གཞལ་བར་བྱ་ཞེས་བཀའ་སྩལ་པས། དགེ་སློང་དག་ཤིང་རིང་པོས་གྲིབ་ཚོད་འཇལ་བར་བྱེད་ནས། ཤིང་རིང་པོས་གྲིབ་ཚོད་གཞལ་བར་མི་བྱའོ། །དགེ་སློང་དག་གོམས་པས་གྲིབ་ཚོད་འཇལ་བ་ན་ཧ་ཅང་ཐོགས་ནས། ཐུར་མ་དག་གིས་གཞལ་བར་བྱའོ། །ཐུར་མ་རིང་པོས་བཅལ་བས་ཀྱང་ཧ་ཅང་ཐོགས་ནས། ཐུར་མ་སོར་བཞི་ཙམ་གྱིས་གཞལ་ཅིང༌། ཐུར་མ་ཇི་ཙམ་ཡོད་པ་དེ་ལ་སྐྱེས་བུ་ཞེས་བརྗོད་པར་བྱའོ། །
དེ་ནས་ཉིན་མཚན་གྱི་ཆ་སྔ་དྲོ་དང༌། གུང་དང༌། ཕྱི་དྲོ་དང༌། མཚན་མོའི་ཐུན་དང་པོ་དང༌། ཐུན་དང་པོའི་ཕྱེད་དང༌། གུང་ཐུན་དང༌། གུང་ཐུན་གྱི་ཕྱེད་དང༌། ཐུན་ཐ་མ་དང༌། ཐུན་ཐ་མའི་ཕྱེད་དང༌། སྐྱ་རེངས་མ་ཤར་བ་དང༌། སྐྱ་རེངས་ཤར་བ་དང༌། ཉི་མ་མ་ཤར་བ་དང༌། ཉི་མ་ཤར་བ་དང༌། ཉི་མ་བརྒྱད་ཆ་ཤར་བ་དང༌། ཉི་མ་བཞི་ཆ་ཤར་བ་དང༌། གུང་ཚིགས་མ་ཡོལ་བ་དང༌། ཉི་མ་བཞི་ཆ་ལུས་པ་དང༌། ཉི་མ་བརྒྱད་ཆ་ལུས་པ་དང༌། ཉི་མ་མ་ནུབ་པ་དང༌། ཉི་མ་ནུབ་པ་དང༌། རྒྱུ་སྐར་རྣམས་མ་ཤར་བ་དང༌། རྒྱུ་སྐར་རྣམས་ཤར་བ་སྟེ། ཉིན་མཚན་གྱི་ཆ་བརྗོད་པར་བྱ། དེ་ནས་དུས་ཚིགས་བརྗོད་པར་བྱ། དེ་ནས་གདམས་ངག་བཅུ་གཅིག་བརྗོད་པ་རྣམས་གསུངས་སོ། །དེ་དག་རབ་ཏུ་བྱུང་ཞིང་བསྙེན་པར་རྫོགས་པ་ན། མཁན་སློབ་ལ་བྱ་བ་མི་ཞུ། གུས་པར་མི་བྱེད་པའི་སྐབས་དེ་སྟོན་པ་ལ་གསོལ་བ་དང༌། སྟོན་པས། ངས་ལྷན་ཅིག་གནས་པ་དང༌། ཉེ་གནས་ཀྱི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། གནས་པས་གནས་ལ་མ་ཞུས་པར་བྱ་བ་མི་བྱ་བ་ནས། ཞུ་བ་ནི་མ་གཏོགས་སོ་ཞེས་(༣༦བ)པའི་བར་གསུངས་སོ། །བཅོམ་ལྡན་འདས་མཉན་ཡོད་ན་དབྱར་གནས་པར་ཞལ་གྱིས་བཞེས་པའི་ཚེ། ཚེ་དང་ལྡན་པ་ཉེ་སྡེ་ལྗོངས་སུ་དབྱར་གནས་པར་ཁས་བླངས་ཤིང་ལོ་གཅིག་ལོན་པ་ན། ལྷན་ཅིག་གནས་པ་རབ་ཏུ་བྱུང་ཞིང་བསྙེན་རྫོགས་བྱས་སོ། །ཟླ་བ་གསུམ་འདས་པ་དང༌། ལྷན་ཅིག་གནས་པ་དང༌། ལྷན་ཅིག་ཆོས་གོས་དང་ལྷུང་བཟེད་ཐོགས་ཏེ། མཉན་ཡོད་དུ་ཕྱིན་ནས་ཆོས་གོས་དང་ལྷུང་བཟེད་འཁོས་སུ་ཕབ་སྟེ་རྐང་པ་གཉིས་བཀྲུས་ནས་སྟོན་པའི་དྲུང་དུ་སོང་སྟེ་ཞབས་ལ་ཕྱག་འཚལ་ནས་འདུག་གོ །སྟོན་པའི་ཆོས་ཉིད་ནི་གློ་བུར་དུ་འོངས་པ་རྣམས་ལ། ཁྱོད་ད་གཟོད་གང་ནས་འོངས། དབྱར་གང་དུ་གནས་ཞེས་སོ་སོར་ཀུན་དགའ་བར་མཛད་པ་ཡིན་པས། ཉེ་སྡེ་ལ། ཁྱོད་ད་གཟོད་གང་ནས་འོངས། དབྱར་གང་དུ་གནས། བཙུན་པ། བདག་ལྗོངས་ནས་མཆིས། དབྱར་ལྗོངས་སུ་གནས་སོ། །ཁྱོད་ཀྱི་རིགས་ཀྱི་བུ་འདི་སུ་ཡིན། བདག་གི་ལྷན་ཅིག་གནས་པའོ། །ཁྱོད་ཀྱིས་ལོ་དུ་ལོན། ལྷན་ཅིག་གནས་པས་ལོ་དུ་ལོན། བདག་གིས་ལོ་གཉིས། ལྷན་ཅིག་གནས་པས་ལོ་གཅིག་ལོན་ལགས་སོ། །
སྟོན་པས་བཀའ་སྩལ་པ། དགེ་སློང་དག །ཉེ་སྡེས་དང་པོ་ཁོ་ནར་ཚོགས་བསྡུ་བར་བསམས་སོ། །དེ་བས་ན་ལོ་གཅིག་ལོན་པར་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་སྦྱིན་པར་མི་བྱ། དགེ་ཚུལ་ཉེ་བར་བཞག་པར་མི་བྱ། བདག་ཉིད་ཀྱང་མི་གནས་པར་འདུག་པར་མི་བྱའོ། །ལོ་གཉིས་ལོན་པ་ན་དགུ་ལོན་པས་ཀྱང་དེ་རྣམས་མི་བྱ། ལོ་བཅུ་ལོན་པས་དེ་རྣམས་བྱའོ་ཞེས་པ། བསྙེན་པར་རྫོགས་ནས་སོགས་སོ། །དེ་དག་ལོ་བཅུ་གཉིས་ལོན་ནས་བྱིས་པ་རྨོངས་པ་མི་གསལ་བ་མི་མཁས་པས་ཀྱང་རབ་ཏུ་འབྱིན་པར་བྱེད་དེ། ཀྱེ་མ། བདག་ཉིད་མ་དུལ་བར་གཞན་དུལ་བར་བྱེད་པ་དང༌། བདག་ཉིད་མ་ཞི་བར་གཞན་ཞི་བར་བྱེད་པ་དང༌། བདག་ཉིད་མ་གྲོལ་བར་གཞན་གྲོལ་བར་བྱེད་པ་དང༌། བདག་ཉིད་མྱ་ངན་ལས་མ་འདས་པར་གཞན་མྱ་ངན་ལས་འདའ་བར་བྱེད་པ་དེ་ནི་གནས་མེད་དོ། །རྒན་ཞུགས་ཤིག་གིས་མུ་སྟེགས་ཅན་ཞིག་རབ་བྱུང་བསྙེན་རྫོགས་བྱས་ནས་དེ་དུས་སུ་གདམས་ངག་མ་ཐོབ་པས་བསླབ་པ་ཕུལ་ཏེ་ཉམས་པའི་སྐབས་དེ་གསོལ་བ་དང༌། ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་བཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། བསྙེན་པར་རྫོགས་ནས་ལོ་བཅུ་ལོན་པའམ། ལྷག་པ་དང༌། ལྷན་ཅིག་གནས་པ་དང་ཉེ་གནས་ཀྱི་ནད་གཡོག་བྱེད་དམ་བྱེད་དུ་འཇུག་ནུས་པ་དང་ཞེས་སོགས་གསུངས་པ་ནི། འོག་ནས་ཞེས་པ་ནས། རྒྱས་པ་ཐོན་པ་ཉིད་དོ་ཞེས་པའི་བར་རོ། །སྟོན་པ་ལ་ཉེ་བར་འཁོར་གྱིས་ཞུས་པ། ལོ་བཅུ་ལོན་པ་ཆོས་ལྔ་(༣༧ན)དང་ལྡན་པས་རབ་ཏུ་དབྱུང་བ་སོགས་བྱ་ན། བསྙེན་པར་རྫོགས་ནས་ལོ་དྲུག་ཅུ་ལོན་ལ་སོ་སོར་ཐར་པ་དང༌། རྒྱས་པ་མི་ཐོན་ན། དེས་གཞན་ལ་གནས་པར་བགྱིའམ། གནས་པར་བྱ་དགོས་ཏེ། དེ་ལ་གནས་བརྟན་བྱིས་པ་ཞེས་བྱའོ། །དེས་གང་ལ་གནས་པར་བགྱི། ཆེས་རྒན་པ་ཡོད་ན་དེ་ལ་གནས་བཅའ། རྒན་པ་མེད་ན་གཞོན་པ་ལ་གནས་བཅའ་འོ། །བཙུན་པ། དེས་དེ་ལ་ཐམས་ཅད་བགྱིའམ། ཐམས་ཅད་བྱ་སྟེ། འདུད་པ་འབའ་ཞིག་མ་གཏོགས་སོ། །བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་སུ་དབྱར་གནས་པར་ཞལ་གྱིས་བཞེས་པའི་ཚེ། གནས་བརྟན་དག་ནི་ཉུང༌། གསར་བུ་དག་ནི་མང་དུ་དབྱར་གནས་པར་ཁས་བླངས་སོ། །དབྱར་ཟླ་བ་གསུམ་འདས་ནས། ཀུན་དགའ་བོ་སོང་ལ། དེ་བཞིན་གཤེགས་པ་ལྷོའི་རི་ལ་ལྗོངས་རྒྱུར་གཤེགས་ཀྱིས། དེ་བཞིན་གཤེགས་པ་དང་ལྷན་ཅིག་ཏུ་ལྗོངས་རྒྱུར་འགྲོ་བ་དེ་དག་ཆོས་གོས་ཀྱི་ལས་གྱིས་ཤིག་ཅེས་སྒོས་ཤིག །ཀུན་དགའ་བོས་བསྒོས་པས་གནས་བརྟན་རྣམས། བདག་ཅག་རྒས་པས་ལྗོངས་རྒྱུར་འགྲོ་མི་ནུས་སོ། །གསར་བུ་རྣམས་ན་རེ། བདག་ཅག་གསར་བུ་ཡིན་ལ་མཁན་སློབ་མི་འགྲོ་བས་མྱུར་དུ་ལྡོག་དགོས་པ་དང༌། ཡང་དང་ཡང་དུ་གནས་བཙལ་དགོས་པས་ལྗོངས་རྒྱུར་འགྲོ་མི་ནུས་སོ་ཟེར་རོ། །སྟོན་པ་འཁོར་ཉུང་ཤས་དང་ལྷན་ཅིག་ལྗོངས་རྒྱུར་གཤེགས་ཏེ། གླང་པོ་ཆེའི་ལྟ་སྟངས་ཀྱིས་གཟིགས་པས་འཁོར་ཉུང་བར་མཁྱེན་ནས། མཁྱེན་བཞིན་དུ། འཁོར་ཉུང་བའི་རྒྱུ་གང་ཡིན། ཀུན་དགའ་བོས་ཇི་ལྟར་ཡིན་པ་བཞིན་ཞུས་པས། ཀུན་དགའ་བོ། དེ་བས་ན་ལོ་ལྔ་ལོན་ཅིང༌། ལྷན་ཅིག་སྦྱར་བ་ཐ་མ་དང་ལྡན་པས་གནས་མ་བཅས་པར་ལྗོངས་རྒྱུར་འགྲོ་བར་བྱའོ། །ཉེ་བར་འཁོར་གྱིས་ཞུས་པ། ལོ་ལྔ་ལོན་ཅིང༌། ལྷན་ཅིག་སྦྱར་བ་ཐ་མ་དང་ལྡན་པས། མི་གནས་པར་ལྗོངས་རྒྱུར་འགྲོ་བར་བྱའོ་ཞེས་གསུངས་ན། ལོ་དྲུག་ལོན་ལ་ལྔ་པ་ཐ་མ་དང་མི་ལྡན་པ་དང༌། ལོ་བཞི་ལོན་པ་ལྔ་པ་ཐ་མ་དང་ལྡན་པས་གནས་མ་བཅས་པར་ལྗོངས་རྒྱུར་རུང་ངམ། མི་རུང་སྟེ། ལོ་ལྔ་ལོན་པ་དང༌། ལྔ་པ་དང་ལྡན་པ་ལ་བཅའ་བ་བརྟེན་པའི་ཕྱིར་རོ། །བཙུན་པ། གསུམ་རིག་པ། དྲི་མ་གསུམ་སྤངས་ལ། ལོ་ལྔ་མ་ལོན་ཅིང༌། ལྔ་པ་དང་མི་ལྡན་ན། གནས་མ་བཅས་པར་ལྗོངས་རྒྱུར་རུང་ངམ། མི་རུང་ངོ་ཞེས་གསུངས་པ་ནི། གཞན་དུ་ན་གསུམ་རིན་པ་ཡིན་ཡང་མི་བྱའོ་ཞེས་སོ། །
སྟོན་པ་མཉན་ཡོད་ན་བཞུགས་པའི་ཚེ། རྒན་ཞུགས་ཤིག་གིས་མུ་སྟེགས་ཅན་ཞིག་རབ་ཏུ་བྱུང་ཞིང་བསྙེན་པར་རྫོགས་པར་བྱས་པ་ན། དགེ་སློང་རྣམས་དང་རྩོད་པ་འགའ་ཞིག་བྱུང་ནས་བསླབ་པ་ཕུལ་ཏེ། མུ་སྟེགས་ཅན་གྱི་(༣༧བ)གནས་དེ་ཉིད་དུ་སོང་བའི་སྐབས་དེ་གསོལ་བ་དང༌། ཁྱི་བཀྲེས་པ་བཟའ་བ་དང་བཅའ་བ་གྱ་ནོམ་པ་སྤངས་ནས་བཤང་གཅི་ཟ་བ་ལྟར། མི་གཏི་མུག་ཅན་དེས་ཆོས་འདུལ་བ་འདི་སྤངས་ནས་མུ་སྟེགས་ཅན་གྱི་གནས་སུ་སོང་ངོ༌། །དེ་བས་ན་ཉེ་དུ་ཤཱཀྱ་དང༌། མེ་པ་རལ་པ་ཅན་མ་གཏོགས་པ་སེམས་མགུ་བར་མ་གྱུར་པའི་མུ་སྟེགས་ཅན་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱའོ། །ཉེ་དུ་ཤཱཀྱ་མུ་སྟེགས་ཅན་གྱི་རྒྱལ་མཚན་ཅན་འོངས་ཤིང་རབ་བྱུང་བསྙེན་རྫོགས་འདོད་ན་དེ་རབ་ཏུ་དབྱུང་བ་དང་བསྙེན་རྫོགས་བྱ་སྟེ། དེ་ནི་ཉེ་དུ་ལ་ཉེ་དུའི་སྤང་བ་སྦྱིན་པའི་ཕྱིར་རོ། །མེ་པ་རལ་པ་ཅན་ཡང་རབ་ཏུ་དབྱུང་བར་བྱ་སྟེ། དེ་ནི་ལས་དང་བྱ་བ་དང་རྒྱུ་དང་བརྩོན་འགྲུས་སྨྲ་བའི་ཕྱིར་རོ། །གཞན་མུ་སྟེགས་ཅན་རབ་ཏུ་དབྱུང་བར་འདོད་ན། ཟླ་བ་བཞིར་གནས་པ་བྱིན་ནས་སེམས་མགུ་ན་རབ་ཏུ་བྱུང་བར་བྱའོ། །སེམས་མགུ་བ་གང་ལགས་ཞུས་པས། དཀོན་མཆོག་རྣམས་ཀྱི་སོགས་དང༌། གནས་པ་སྦྱིན་པ་མ་ཤེས་ནས་ཞུས་པས། ཆོ་ག་དང་བཅས་པ་གསུངས་སོ། །སྟོན་པ་མཉན་ཡོད་ན་བཞུགས་སོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པ་ལས་བུ་བཙས་ཏེ་ཆེར་སྐྱེས་པ་དང༌། དེའི་ཉེ་དུ་དང་ནོར་ཟད་ནས། བུ་ལ་སྨྲས་པ། ཁོ་བོ་རྒས་པས་ནོར་སྒྲུབ་པར་མི་ནུས་ཀྱི། རབ་ཏུ་འབྱུང་དུ་འགྲོའོ། །ཡབ། བདག་ཀྱང་རབ་ཏུ་འབྱུང་ངོ༌། །བུ། དེ་བཞིན་གྱིས་ཤིག་ཅེས་དེ་ཁྲིད་ནས་རྒྱལ་བྱེད་ཚལ་དུ་སོང་སྟེ། དགེ་སློང་ཞིག་ལ། འཕགས་པ། བདག་རབ་ཏུ་དབྱུང་བར་འཚལ་ལོ། །
དེས་སྨྲས་པ། ཁྱེའུ་འདིའང་རབ་ཏུ་འབྱུང་ངམ། འབྱུང་ངོ༌། །དེ་དེ་ལ་ཆགས་པས་གཉིས་ཀ་རབ་ཏུ་བྱུང་ངོ༌། །ཉི་མ་གཉིས་གསུམ་དུ་ཀུན་ཏུ་སྤྱོད་པའི་ཆོས་བསླབས་ནས། བཞིན་བཟང༌། རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་སྤྱོད་ཡུལ་ཡིན་གྱིས་བསོད་སྙོམས་སྒྲུབས་ལ་འཚོ་བར་གྱིས་ཤིག །དེ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ཏེ། དགེ་ཚུལ་དེ་དང་ལྷན་ཅིག་མཉན་ཡོད་དུ་བསོད་སྙོམས་ལ་ཞུགས་པ་དང༌། དགེ་ཚུལ་དེས་འཁུར་བ་སྲེག་པ་མཐོང་སྟེ། ཡབ། བདག་ལ་འཁུར་བ་སྦྱིན་དུ་ཆུག་ཅིག །དེས་བཞིན་བཟང༌། དགེ་ཚུལ་འདི་ལ་འཁུར་བ་བྱིན་ཅིག །དེས་འཕགས་པ། རིན་སྩོལ་ཅིག །ཁོ་བོ་རབ་བྱུང་ཡིན་པས་ཀརྵ་པ་ན་ག་ལ་ཡོད། དེས་སྨྲས་པ། དགེ་ཚུལ་འདི་ཁྱོད་རབ་ཏུ་བྱུང་ནས་བསྐྱེད་དམ་ཁྱིམ་པས་བསྐྱེད། ཁྱིམ་པས་སོ། །འོ་ན་དེའི་དུས་སུ་བསགས་པ་བྱིན་ཅིག །དེས། དགེ་ཚུལ་འདི་བགྲང་བ་མང་པོ་དག་སློང་བར་བྱེད་ཀྱིས་ཚུར་ཤོག །འདོང་ངོ་ཞེས་སོར་མོ་ནས་བཟུང་སྟེ་འཁྲིད་པ་དང༌། དེ་གན་རྐྱལ་དུ་འགྱེལ་ནས་ངུ་བ་སྐྱེ་བོའི་ཚོགས་(༣༨ན)ཀྱིས་མཐོང་ནས་སྨྲས་པ། འདིའི་དགེ་ཚུལ་འདི་སུ་ཡིན། བུ་ཡིན་ནོ། །ཁྲག་གི་ཐིགས་པ་འདི་རབ་ཏུ་བྱུང་ནས་ཅི་ཞིག་བྱ་ཞེས་སྨོད་པར་བྱེད། ཕྱར་ཁ་གཏོང་བར་བྱེད། ཁ་ཟེར་བའི་སྐབས་དེ་གསོལ་བ་དང༌། ཉེས་དམིགས་འདི་ལོ་བཅོ་ལྔ་མ་ལོན་པ་རབ་ཏུ་འབྱིན་པར་བྱེད་པ་ལས་གྱུར་པ་ཡིན་པས། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ། ལོ་བཅོ་ལྔ་ལོན་ནམ་ཞེས་དྲི་བར་བྱའོ། །སྟོན་པ་མཉན་ཡོད་ན་བཞུགས་སོ། །འཕགས་སྐྱེས་པོས་སེར་སྐྱའི་གནས་ན་གནས་པའི་ཤཱཀྱ་རྣམས་བསད་པའི་ཚེ། ཀུན་དགའ་བོའི་སྲིང་མོའི་བུ་གཉིས་ཕ་མས་བོར་ནས་འཁྱམ་པ་ལས། མཉན་ཡོད་ཀྱི་ཚོང་པ་ཟོང་ཐོགས་ཏེ་སེར་སྐྱར་སོང་བས་དེ་གཉིས་བཞིན་གཟུགས་ལས་ཤེས་ནས་སྨྲས་པ། ཁྱེད་གཉིས་ཀྱི་ཕ་མ་གང་ན། འཕགས་སྐྱེས་པོས་བསད་དོ། །མཉན་ཡོད་ན་ཁྱོད་གཉིས་ཀྱི་ཞང་པོ་ཀུན་དགའ་བོ་ཡོད་ན་དེར་ཅིའི་ཕྱིར་མི་འགྲོ། ཁོ་བོ་ཅག་སུས་འཁྲིད། ཁོ་བོ་ཅག་གིས་བཀྲིའོ་ཟེར་ནས། དེ་དག་གིས་ཟོང་བསྒྱུར་ཟིན་པ་དང༌། དེ་གཉིས་ཁྲིད་དེ། རྒྱལ་བྱེད་ཚལ་གྱི་སྒོར་བོར་བ་དང༌། ཀུན་དགའ་བོས་དེ་གཉིས་བྱད་གཟུགས་ལས་ཤེས་ཏེ་སྨྲས་པ། ཁྱེད་གཉིས་ཀྱི་ཕ་མ་གང་ན། འཕགས་སྐྱེས་པོས་བསད་དོ། །ཀུན་དགའ་བོ་ཉེ་དུ་ལ་མཉེས་གཤིན་པ་ཡིན་པས་དེ་གཉིས་ཉེ་དུ་དང་བྲལ་བ་ཐོས་ནས་མཆི་མས་བརྣངས་ཏེ་འདུག་གོ །དགེ་སློང་རྣམས་ཀྱིས། འདི་གཉིས་ཅི་ཡིན། སྲིང་མོའི་བུ་དག་གོ །ཅིའི་ཕྱིར་མི་སྡུད། ཁོ་བོ་ལྟོ་འགྲངས་ཙམ་གྱི་བསོད་སྙོམས་ལེན་ན་འདི་གཉིས་ལ་གང་སྦྱིན། འདི་གཉིས་ཀྱིས་དགེ་སློང་ལ་མེ་ཏོག་དང་འབྲས་བུ་འབུལ་ན་ལྷུང་བཟེད་ཀྱི་ལྷག་རོལ་སྦྱིན་ནོ། །དེས་དེ་གཉིས་བསྡུས་ནས་དགེ་སློང་ལ་མེ་ཏོག་དང་འབྲས་བུ་འབུལ་དུ་བཅུག་སྟེ་ཞག་ཉུང་ཤས་ཤིག་ལྷུང་བཟེད་ཀྱི་ལྷག་རོལ་བྱིན་ནས་ཡང་མི་སྦྱིན་པར་བརྩམས་པ་དང༌། ཀུན་དགའ་བོས་ལྟོ་འགྲངས་ཙམ་གྱི་བསོད་སྙོམས་བླངས་ནས་ཕྱེད་རང་ཟ། ཕྱེད་དེ་གཉིས་ལ་བྱིན་པས་ཀུན་དགའ་བོ་སྐྱ་བོ་སེང་སེང་པོ་རིད་ཅིང་ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་རྨེད་པར་མཛད་པ་དང༌། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་དུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས། དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེས་ན་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། དགེ་སློང་རྣམས་ལ། ཅིའི་ཕྱིར་ཀུན་དགའ་བོ་སྐྱ་བོ་དང་སེང་སེང་པོར་གྱུར། དགེ་སློང་རྣམས་ཀྱིས་དེ་གསོལ་བས། ཀུན་དགའ་བོ། ཁྱེའུ་གཉིས་རབ་ཏུ་མི་འབྱིན་ནམ། འབྱིན་ལགས་སོ། །རབ་ཏུ་འབྱུང་བར་འདོད་(༣༨བ)པ་ལ་དགེ་འདུན་གྱིསས་ཟན་སྦྱིན་པར་གནང་ངོ༌། །དགེ་འདུན་གྱིས་ཞག་ཉུང་ཤས་ཤིག་བྱིན་ནས། སྨོད་པར་བརྩམས་པ་དང༌། སྟོན་པས་ཀུན་དགའ་བོ་ལ། ཁྱེའུ་གཉིས་རབ་ཏུ་མི་འབྱིན་ནམ། བཙུན་པ། དེ་གཉིས་ཀྱིས་ལོ་བཅོ་ལྔ་མ་ལོན་ནོ། །དེ་གཉིས་ཀྱིས་དགེ་འདུན་གྱི་སྐོས་མལ་ནས་བྱ་རོག་སྐྲོད་ནུས་སམ། རྔོ་ཐོགས་སོ། །
དེ་བས་ན་ལོ་བདུན་ལོན་པ་བྱ་རོག་སྐྲོད་ནུས་པ་ཡོངས་སུ་སྤང་བས་རབ་ཏུ་འབྱུང་བར་གནང་ངོ༌། །ཀུན་དགའ་བོས་དེ་གཉིས་རབ་ཏུ་བྱུང་ནས་ཀློག་ཏུ་གཞུག་པར་བརྩམས་པ་དང༌། དེ་གཉིས་ཀྱིས་ཉུང་ཤས་ཤིག་བཀླགས་ནས་ཉི་ཉན་པར་བརྩམས་སོ། །མོའུ་གལ་གྱི་བུས་ཀུན་དགའ་བོ་ལ། འདི་གཉིས་ཅིའི་ཕྱིར་ཀློག་ཏུ་མི་འཇུག །བདག་ལ་མི་ཉན་ན་ཇི་ལྟར་བྱ། བདག་གིས་འདི་གཉིས་ཀློག་ཏུ་གཞུག་གོ །ལེགས་སོ། །དེས་དེ་གཉིས་ཀློག་ཏུ་བཅུག་པ་དང༌། ཉུང་ཤས་ཤིག་བཀླགས་ནས། ཡང་མི་ཉན་པར་བརྩམས་སོ། །ཀུན་དགའ་བོས། འདི་གཉིས་ཅིའི་ཕྱིར་ཀློག་ཏུ་མི་འཇུག་བདག་ལའང་མི་ཉན་ནོ། །རེ་ཞིག་ཡིད་འབྱུང་བར་གྱིས་ཤིག །མོའུ་གལ་གྱི་བུས་དེ་གཉིས་ལ། ཉིན་མོ་སྤྱོད་དུ་འདོང་ངོ༌། །སྟན་ཁྱེར་ཅིག །དེས་དེ་གཉིས་ཁྲིད་དེ་སོང་ནས་ཕྱོགས་ཤིག་ཏུ་སེམས་ཅན་དམྱལ་བ་དག་སྤྲུལ་ཏེ། དེར་གཅོད་འཆེག་བརྡེག་པའི་སྒྲ་དག་གྲག་པ་དང༌། འཕགས་པ། འདི་ཅི་ལགས། སོང་ལ་ལྟོས་ཤིག །དེ་གཉིས་སོང་བ་དང༌། ཁ་ཅིག་སོག་ལེས་འཆེག །ཁ་ཅིག་རང་འཐག་གིས་འཐག །ཁ་ཅིག་ཟངས་པོ་ཆེ་ཁོལ་བའི་ནང་དུ་འཇུག་པར་བྱེད་དོ། །ཕྱོགས་ཤིག་ན་ལྕགས་ཀྱི་ཟངས་པོ་ཆེ་གཉིས་ཁོལ་གྱིན་འདུག་ནས། དེ་གཉིས་ཀྱིས་སྨྲས་པ། འདི་གཉིས་སུ་སུའང་མི་འཇུག་གམ། དེ་དག་གིས་སྨྲས་པ། ཀུན་དགའ་བོའི་ཚ་བོ་གཉིས་རབ་ཏུ་བྱུང་ནས་ལེ་ལོས་འདའ་བ་དེ་གཉིས་ཤི་ནས་འདིར་སྐྱེ་བས་དེ་གཉིས་ཀྱི་དོན་དུ་བཞག་གོ །དེ་གཉིས་ཤིན་ཏུ་སྐྲག་སྟེ། ཤེས་ན་དེང་ཉིད་དུ་འཇུག་གོ་སྙམ་ནས་མོའུ་གལ་གྱི་བུའི་གན་དུ་ཕྱིན་པ་དང༌། ཁྱེད་གཉིས་ཀྱིས་ཅི་མཐོང༌། སེམས་ཅན་དམྱལ་བ་དག་མཆིས་སོ། །དེ་ན་ཅི་བྱེད། དེ་དང་དེ་དག་སྨྲས་པ། དགེ་ཚུལ་གཉིས། ཉེས་དམིགས་དེ་དང་གཞན་ཡང་ལེ་ལོ་ལས་འབྱུང་བས་བརྩོན་འགྲུས་གྱིས་ཤིག །དེ་གཉིས་བརྩོན་འགྲུས་ཀྱིས་བཀླག་པར་བརྩམས་པ་དང༌། སྔ་དྲོ་དམྱལ་བ་དྲན་ན་ཟན་མི་ཟ། ཕྱི་དྲོ་དྲན་ན་སྐྱུགས་པས། སྐྱ་བོ་དང་སེང་སེང་པོར་གྱུར་ནས། ཀུན་དགའ་བོས། གནས་བརྟན། ད་གཟེངས་བསྟོད་ཅིག །མོའུ་གལ་གྱིས་དེ་གཉིས་ལ། ཉིན་མོ་སྤྱོད་དུ་འདོང་ངོ༌། །འཕགས་པ་ས་ཕྱོགས་གཞན་དུ་བཞུད་ཀྱི། དེར་མི་བཞུད་དོ། །སྟན་ཁྱེར་ཅིག །དེས་དེ་གཉིས་ཁྲིད་ནས་སོང་བ་དང༌། དེས་ཕྱོགས་ཤིག་ཏུ་ལྷ་དག་སྤྲུལ་ནས་པི་ཝང་ལ་སོགས་པའི་སྒྲ་གྲག་པ་དང༌། འཕགས་(༣༩ན)པ། འདི་ཅིག་ལགས། སོང་ལ་ལྟོས་ཤིག །དེ་གཉིས་སོང་བ་དང༌། པི་ཝང་ལ་སོགས་པའི་སྒྲ་སྒྲོག་ཅིང༌། ཕྱོགས་ཤིག་ན་གཞལ་མེད་ཁང་མལ་སྟན་བཤམས་པ་ལྷའི་བུ་མོས་གང་བ་གཉིས་འདུག་ནས། ཅིའི་ཕྱིར་གཞལ་མེད་ཁང་འདི་གཉིས་ན་ལྷའི་བུ་སུའང་མི་འདུག །ཀུན་དགའ་བོའི་ཚ་བོ་གཉིས་རབ་ཏུ་བྱུང་ནས་བརྩོན་འགྲུས་བརྩམས་པ་ཤི་ནས་འདིར་སྐྱེ་བས་དེ་གཉིས་ཀྱི་དོན་དུ་བཞག་གོ །དེ་གཉིས་རབ་ཏུ་དགའ་སྟེ་མོའུ་གལ་གྱི་བུའི་གན་དུ་ཕྱིན་པ་དང༌། ཁྱེད་གཉིས་ཀྱིས་ཅི་མཐོང༌། འདི་དང་འདི་མཐོང་ངོ༌། །དགེ་ཚུལ་གཉིས། ཕན་ཡོན་འདི་དང་གཞན་དག་ཀྱང་བརྩོན་འགྲུས་བརྩམས་པ་ལས་འབྱུང་བས་བརྩོན་འགྲུས་གྱིས་ཤིག །དེ་གཉིས་བརྩོན་འགྲུས་རྩོམ་པས་གླེང་གཞིའི་རྒྱུད་དུ་གཏོགས་པ་བཀླགས་པས། སྟོན་པས་ཕྱག་གི་སེན་མོའི་རྩེ་མོས་རྡུལ་དག་བཞེས་ནས། དགེ་སློང་དག །ངས་སེན་མོའི་རྩེ་མོས་རྡུལ་དག་བླངས་པ་དང༌། ས་ལ་གནས་པའི་རྡུལ་གང་མང༌། ཕྱག་གི་རྩེ་མོས་བཞེས་པའི་རྡུལ་ཉུང་ལགས་ཏེ། དེས་ས་ལ་གནས་པའི་རྡུལ་གྱི་བརྒྱ་སྟོང་གི་ཆར་ཡང་མི་ཕོད་དོ། །
བཀའ་སྩལ་པ། བདེ་འགྲོ་ནས་བདེ་འགྲོ་དང༌། ངན་སོང་ནས་བདེ་འགྲོར་སྐྱེ་བ་ནི་སེན་མོའི་རྡུལ་དང་འདྲ། ངན་སོང་ནས་ངན་སོང་དང༌། བདེ་འགྲོ་ནས་ངན་སོང་དུ་སྐྱེ་བ་ནི་ས་ལ་གནས་པའི་རྡུལ་དང་འདྲའོ། །དེ་གཉིས་ཀྱིས་སྨྲས་པ། འཕགས་པ། བདག་ཅག་ཀྱང་ལྷ་དང་མིའི་ནང་ནས་ཤི་འཕོས་ནས་ངན་སོང་དུ་སྐྱེ་དགོས་སམ། བཞིན་བཟང་གཉིས། ཉོན་མོངས་པ་མ་ཟད་ཀྱི་བར་དུ་ཟོ་ཆུན་རྒྱུད་མོའི་ཚུལ་དུ་འཁོར་དགོས་སོ། །དེ་གཉིས་ཡིད་བྱུང་ནས་སྨྲས་པ། གང་ཕྱིར་མི་གནས་ལྷ་རྣམས་མི་བཟང་སྟེ། །འཚོ་བ་ཐུང་བའི་མི་རྣམས་མི་བཟང་ངོ༌། །གང་ན་ཞི་མེད་སྲིད་པ་མི་བཟང་སྟེ། །མྱ་ངན་འདས་པ་མཆོག་ཅེས་བདེ་གཤེགས་གསུངས། །འཕགས་པ། བདག་ཅག་སླན་ཆད་ཅི་ནས་ཀྱང་འཁོར་བར་མི་འགྱུར་བ་དེ་ལྟ་བུའི་ཆོས་བསྟན་དུ་གསོལ། དེས་དེ་གཉིས་ཀྱི་བསམ་པ་དང་བག་ལ་ཉལ་དང་ཁམས་དང་རང་བཞིན་ཤེས་ནས་ཆོས་བསྟན་པས་དེ་གཉིས་ཀྱིས་དགྲ་བཅོམ་པ་ཐོབ་སྟེ། དེ་གཉིས་རྫུ་འཕྲུལ་གྱིས་སྟེང་གི་ནམ་མཁའ་ལ་མེ་ཏོག་འཐུ་ཞིང་སོང་བ་དགེ་སློང་རྣམས་ཀྱིས་མཐོང་ནས། འདི་དག་སུ་ཡིན། ཀུན་དགའ་བོའི་ཚ་བོ་གཉིས་སོ། །དེ་དག་གིས་སྨྲས་པ། བདག་ཅག་ལྷུང་བཟེད་ནག་པོར་ཟོས་ནས་སོ་དག་ལྷུང་ཞིང་མགོ་སྐྱ་པོར་གྱུར་ཀྱང་སེམས་གནས་ཙམ་ཡང་མ་ཐོབ་ན། འདི་གཉིས་དང་པོ་ལོ་བདུན་ལོན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་པས། སྟོན་པས་བརྩོན་འགྲུས་ཀྱིས་བྱང་ཆུབ་འཐོབ་བོ་ཞེས་གསུངས་པ་ནི་ལེགས་པར་གསུངས་པའོ་སྙམ་མོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། འདི་གཉིས་ཀྱིས་ལས་ཅི་བགྱིས་པས་ལོ་བདུན་པ་ལ་རབ་ཏུ་བྱུང་སྟེ། འདི་གཉིས་ལ་བརྟེན་ནས་བསླབ་པ་བཅས་པ་བག་ཡངས་སུ་མཛད་ཅིང༌། དགྲ་བཅོམ་པ་ཐོབ་ལགས། སྔོན་ཚེ་ལོ་ཉི་ཁྲི་པ་ལ་སངས་རྒྱས་འོད་སྲུངས་འཁོར་ཉི་ཁྲི་དང་ལྷན་ཅིག་དྲང་སྲོང་སྨྲ་བ་ན་བཞུགས་སོ། །ཝཱ་ར་ཎཱ་སཱི་ན་ཁྱིམ་བདག་ཕན་ཚུན་བཤེས་པ་གཉིས་གཞོན་ནུ་ལ་རབ་ཏུ་འབྱུང་འདོད་ཀྱང་ཉེ་དུས་བཀག་ནས། ལང་ཚོ་ཡོལ་བའི་ཚེ་སངས་རྒྱས་འོད་སྲུངས་ཀྱི་བསྟན་པ་ལ་རབ་ཏུ་བྱུང་ངོ༌། །དགེ་སློང་རྣམས་གཞོན་རིམ་གྱིས་ལས་བྱེད་པ་ཡིན་པས། དགེ་སློང་རྣམས་ཀྱི་རྒན་གཞུགས་གཉིས་ལ་ལས་བཅོལ་བ་དང༌། གཅིག་སྤྲོ་ཐུང་བས་ཁྲོ་བར་བྱེད། གཅིག་སྤྲོ་རིང་བས། གཞོན་ནུ་ལ་རབ་ཏུ་མ་བྱུང་ན་ད་ཅིའི་ཕྱིར་ཁྲོ་ཟེར་རོ། །དེ་གཉིས་ཀྱིས་ཚེ་ཇི་སྲིད་པར་ཚངས་པར་སྤྱད་ཀྱང་ཡོན་ཏན་མ་ཐོབ་པར་འཆི་ཁར་སྨོན་ལམ་བཏབ་པ། ཚངས་པར་སྤྱད་པའི་དགེ་བའི་རྩ་བ་འདིས་སངས་རྒྱས་ཤཱཀྱ་ཐུབ་པའི་བསྟན་པ་ལ་བདག་ཅག་གཉིས་ལ་བརྟེན་ནས་བསླབ་པའི་གཞི་བཅའ་བ་བག་ཡངས་སུ་མཛད་ཅིང༌། དགྲ་བཅོམ་པ་ཐོབ་པར་གྱུར་ཅིག་ཅེས་སྨྲས་སོ། །དེའི་དུས་ཀྱི་རྒན་ཞུགས་གཉིས་ནི་དགེ་ཚུལ་འདི་གཉིས་ཡིན་ནོ། །སྟོན་པ་མཉན་ཡོད་ན་བཞུགས་སོ། །ཉེ་དགའི་དགེ་ཚུལ་ཚེར་མ་དང་ཆེན་པོ་པ་གཉིས་གཅིག་ལ་གཅིག་གཞོགས་སྟེགས་དང་ཕྱར་གཡེང་དང་ལུས་ལ་རྡེག་ཅིང༌། སྐྱེས་པ་དང་བུད་མེད་ཕན་ཚུན་རྡེག་པ་ལྟར་བྱེད་པའི་སྐབས་དེ་གསོལ་བ་དང༌། ཉེས་དམིགས་དེ་ནི་དགེ་ཚུལ་གཉིས་བཞག་པ་ལས་གྱུར་པ་ཡིན་པས། དགེ་ཚུལ་གཅིག་པས་ལྷག་པ་ཉེ་བར་བཞག་པར་མི་བྱའོ། །དེ་ལྟར་གསུངས་པའི་ཚེ་སྤུན་གཉིས། བདག་ཅག་གཉིས་ཅིག་ཅར་རབ་ཏུ་འབྱུང་བར་བྱའོ་ཞེས་ངེས་པར་བྱས་ཏེ་འོངས་པ་ན། དགེ་སློང་གིས་དེ་གཉིས་རབ་ཏུ་མ་བྱུང་བས་དེ་གཉིས་རབ་ཏུ་འབྱུང་བའི་བར་ཆད་དུ་གྱུར་པའི་སྐབས་དེ་གསོལ་བ་དང༌། གལ་ཏེ་སོ་སོར་རབ་ཏུ་འབྱུང་བར་མི་འདོད་ན། ཅིར་ཅར་རབ་ཏུ་བྱུང་ལ། རྒན་པ་བསྙེན་པར་རྫོགས་པར་བྱའོ་ཞེས་སོགས་གསུངས་སོ། །སྟོན་པ་མཉན་ཡོད་ན་བཞུགས་སོ། །མཉན་ཡོད་ན་ཁྱིམ་བདག་ཅིག་ལ་བྲན་མཁས་པ་སྒྲུབ་ཕོད་པ་འཕྲལ་གྱི་བྱ་བ་ཐམས་ཅད་ལ་སྔོན་དུ་འགྲོ་བ་ཞིག་ཡོད་པ་ལས། རེ་ཞིག་ན་དེས་བྲན་དེ་སྤྱོས་པ་དང༌། འདི་མགུ་དཀའ་བས་བདག་གིས་འདིའི་སེམས་སྲུང་མི་ནུས་པས་འབྲོས་སོ་སྙམ་ནས་བསམས་པ། ཡུལ་གཏོང་བ་ནི་དཀའ་བ་ཡིས། དགེ་སྦྱོང་འདི་དག་གིས་རྒྱལ་པོ་ལས་གཞོན་ནུའི་སྤང་བ་ཐོབ་པས་འདི་དག་གི་ནང་དུ་རབ་ཏུ་འབྱུང་ངོ་སྙམ་ནས་རྒྱལ་བྱེད་ཚལ་དུ་སོང་སྟེ་དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། དེས་དེ་རབ་བྱུང་བསྙེན་རྫོགས་བྱས། གདངས་ངག་བྱིན་ནས་བརྩོན་འགྲུས་བྱས་པས་དགྲ་བཅོམ་ཐོབ་བོ། །ཁྱིམ་བདག་དེ་འགྱོད་ནས། མཐོང་ན་བཟོད་པ་གསོལ་ལོ་སྙམ་སྟེ་མཉན་ཡོད་ཀྱི་སྒོར་བསྡད་པ་དང་། དགེ་སློང་(༤༠ན)དེའང་མཉན་ཡོད་དུ་བསོད་སྙོམས་ལ་ཞུགས་པ་དེས་མཐོང་ནས་སྨྲས་པ། བཞིན་བཟང༌། ཁྱོད་རབ་ཏུ་བྱུང་ན་ཁོ་བོའི་རིམ་གྲོ་སུས་བྱེད། ཚུར་ཤོག་འདོང་ངོ་ཞེས་ལག་པ་ནས་བཟུང་བར་བརྩམས་པ་དང༌། དེས་ངང་པའི་རྒྱལ་པོ་འདབ་མ་བརྐྱངས་པ་ལྟར་སྟེང་གི་ནམ་མཁའ་ལ་འཕགས་ནས་ཆོ་འཕྲུལ་བསྟན་པས། སོ་སོ་སྐྱེ་བོ་ནི་ཆོ་འཕྲུལ་ལ་མྱུར་དུ་སེམས་གཏོད་པ་ཡིན་པས། དེའི་རྐང་པ་གཉིས་ལ་ཕྱག་བཙལ་ནས། འཕགས་པ། ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །དེས་དེ་ལ་ཡོ་བྱད་ཐམས་ཅད་ཀྱིས་བསྟབས་པ་དང༌། བྲན་ཞིག་གིས་རབ་ཏུ་བྱུང་ནས་ཡོན་ཏན་དེ་ལྟ་བུ་ཐོབ་བོ་ཞེས་ཐམས་ཅད་དུ་གྲགས་པ་རྒྱལ་པོ་གསལ་རྒྱལ་གྱིས་ཐོས་ནས་བློན་པོ་རྣམས་ལ་བསྒོ་བ། ཤེས་ལྡན་དག །ང་ནི་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་བྱ་བ་ཐམས་ཅད་ཀྱི་མངའ་བདག་ཡིན་པས། དེང་ཕྱིན་ཆད་བྲན་རབ་ཏུ་འབྱུང་བར་འདོད་ན་མི་བཟློག་པར་བྱའོ་ཞེས་བསྒྲགས་སོ། །དེའི་ཚེ་ཁྱིམ་བདག་ཅིག་ལ་བྲན་སྔར་གྱི་ལྟ་བུ་ཞིག་ཡོད་པ་ལས། རེ་ཞིག་ན་དེས་བྲན་དེ་སྤྱོས་པ་དང༌། འདི་མགུ་དཀའ་བས་བདག་གིས་འདིའི་སེམས་སྲུང་བར་མི་ནུས་པས་འབྲོས་སོ་སྙམ་ནས་བསམས་པ། ཡུལ་གཏོང་བ་ནི་དཀའ་ཡིས། དགེ་སྦྱོང་འདི་དག་གིས་རྒྱལ་པོ་ལས་གཞོན་ནུའི་སྤང་བ་ཐོབ་པས་འདི་དག་གི་ནང་དུ་རབ་ཏུ་འབྱུང་ངོ་སྙམ་ནས། རྒྱལ་བྱེད་ཚལ་དུ་སོང་སྟེ་དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། དེས་དེ་རབ་ཏུ་བྱུང༌། བསྙེན་པར་རྫོགས་ནས་ཉི་མ་གཉིས་གསུམ་དུ་ཀུན་ཏུ་སྤྱོད་པའི་ཆོས་བསླབས་ཏེ། བཞིན་བཟང༌། རི་དྭགས་ཀྱི་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས། བསོད་སྙོམས་སྒྲུབས་ལ་འཚོ་བར་གྱིས་ཤིག །དེ་མཉན་ཡོད་དུ་བསོད་སྙོམས་ལ་ཞུགས་པ་དང༌། ཁྱིམ་བདག་དེས་ཀྱང་སྔར་བཞིན་བསམས་ནས་སྒོར་བསྡད་པས་དེ་མཐོང་ནས། ཁྱོད་རབ་ཏུ་བྱུང་ན་ཁོ་བོའི་རིམ་གྲོ་སུས་བྱེད། ཚུར་ཤོར་འདོང་ངོ་ཞེས་ལག་པ་ནས་བཟུང་བར་བརྩམས་པ་དང༌། དེས་སྨྲས་པ། ཁོ་བོ་ཅག་ལ་རྒྱལ་པོས་གཞོན་ནུའི་སྤང་བ་བྱིན་པས། རེག་པར་བྱེད་ན་ལག་པ་མཁྲིག་མ་ནས་གཅོད་དུ་གཞུག་གོ །དེས་ཤཱཀྱའི་དགེ་སྦྱོང་གི་ཚུལ་ནི་རབ་ཏུ་ཚིག་པ་ཡིན་ཏེ། འདི་ལྟར་བྲན་ཡང་རབ་ཏུ་འབྱིན་པར་བྱེད་དོ་ཞེས་སྨོད་པའི་སྐབས་དེ་གསོལ་བ་དང༌། ཉེས་དམིགས་དེ་ནི་བྲན་རབ་ཏུ་འབྱིན་པ་ལས་གྱུར་པ་ཡིན་པས། དགེ་སློང་གིས་བྲན་རབ་ཏུ་དབྱུང་བར་མི་བྱའོ་ཞེས་གསུངས་སོ། །སྟོན་པ་མཉན་ཡོད་ན་བཞུགས་སོ། །ཁྱིམ་བདག་ཅིག་ལ་བུ་ལོན་ཆགས་པ་ཞིག་གིས་དངོས་དང་བསྐྱེད་རིམ་གྱིས་འཇལ་ལོ། །
དུས་གཞན་ཞིག་ན་དེ་བཟུང་ནས་དངོས་དང་བསྐྱེད་ཅིག་ཅར་(༤༠བ)ཕུལ་ཅིག་ཅེས་དུས་ཅུང་ཟད་ཅིག་བཟུང་ནས་བཏང་བ་དང༌། དེས་བསམས་པ། ཁྱིམ་བདག་འདི་མགུ་དཀའ་བས་བདག་གིས་དངོས་དང་བསྐྱེད་ཅིག་ཅར་འབུལ་མི་ནུས་ཀྱིས་གཞན་དུ་འབྲོས་སོ་སྙམ་ནས་བསམས་པ། ཡུལ་གཏོང་བ་ནི་དཀའ་ཡིས་སོགས་སྔར་བཞིན་བསམས་ནས་དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། དེས་དེ་རབ་ཏུ་བྱུང༌། བསྙེན་པར་རྫོགས་ནས་གདམས་ངག་བྱིན། དེས་ཀྱང་བརྩོན་པས་བསྒོམས་པས་དགྲ་བཅོམ་པ་ཐོབ་ནས་བསོད་སྙོམས་ལ་ཞུགས་པ་དང༌། ཁྱིམ་བདག་དེ་འགྱོད་པ་སྐྱེས་ནས། ད་མཐོང་ན་བཟོད་པ་གསོལ་ལོ་སྙམ་སྟེ་མཉན་ཡོད་ཀྱི་སྒོར་བསྡད་པས་དེ་མཐོང་ནས། བཞིན་བཟང༌། ཁྱོད་རབ་ཏུ་བྱུང་ན་ཁོ་བོ་ལ་དུས་དུས་སུ་དངོས་དང་བསྐྱེད་སུས་འབུལ། ཚུར་ཤོག་འདོང་ངོ་ཞེས་ལག་པ་གཉིས་ནས་བཟུང་བར་བརྩམས་པ་དང༌། དེས་ནམ་མཁའ་ལ་འཕགས་ནས་ཆོ་འཕྲུལ་བསྟན་པས། སོ་སོ་སྐྱེ་བོ་ནི་རྫུ་འཕྲུལ་ལ་སེམས་གཏོད་པ་ཡིན་པས་ཁྱིམ་བདག་དེས་དགེ་སློང་དེའི་རྐང་པ་ལ་གཏུགས་ནས། འཕགས་པ། ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །དེས་དེ་ལ་ཡོ་བྱད་ཐམས་ཅད་ཀྱིས་བསྟབས་པ་དང༌། བུ་ལོན་པ་ཞིག་རབ་ཏུ་བྱུང་ནས་ཡོན་ཏན་ཐོབ་བོ་ཞེས་གྲགས་པ་རྒྱལ་པོ་གསལ་རྒྱལ་གྱིས་ཐོས་ནས་བློན་པོ་རྣམས་ལ་བསྒོ་བ། ཤེས་ལྡན་དག །ང་ནི་རྒྱལ་པོ་རྒྱལ་རིགས་ཀྱི་སྤྱི་བོ་ནས་དབང་བསྐུར་བ། བྱ་བ་ཐམས་ཅད་ཀྱི་མངའ་བག་ཡིན་པས། དེང་ཕྱིན་ཆད་བུ་ལོན་པ་རབ་ཏུ་འབྱུང་བར་འདོད་ན་མ་ཟློག་ཅིག །ཁྱིམ་བདག་ཅིག་ལ་བུ་ལོན་ཆགས་པ་ཡིན་ནས། བསྙེན་པར་རྫོགས་པའི་བར་སྔར་དང་འདྲ་བ་ལ། དེས་ཉི་མ་གཉིས་གསུམ་དུ་ཀུན་ཏུ་སྤྱོད་པའི་ཆོས་བསླབས་ནས། བཞིན་བཟང༌། རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང༌། ཡབ་ཀྱི་ཡུལ་ཡིན་གྱིས། བསོད་སྙོམས་སྒྲུབས་ལ་འཚོ་བར་གྱིས་ཤིག །དེས་བསོད་སྙོམས་ལ་ཞུགས་པ་དང༌། ཁྱིམ་བདག་དེ་འགྱོད་པ་སྐྱེས་ནས། ད་མཐོང་ན་བཟོད་པ་གསོལ་ལོ་སྙམ་སྟེ་མཉན་ཡོད་ཀྱི་སྒོར་བསྡད་པས་དེ་མཐོང་ནས། བཞིན་བཟང༌། ཁྱོད་རབ་ཏུ་བྱུང་ན་ཁོ་བོ་ལ་དུས་དུས་སུ་དངོས་དང་བསྐྱེད་སུས་འབུལ། ཚུར་ཤོག་འདོང་ངོ་ཞེས་ལག་པ་ནས་གཟུང་བར་བརྩམས་པ་དང༌། དེས་སྨྲས་པ། ཁོ་བོ་ཅག་ལ་རྒྱལ་པོས་གཞོན་ནུའི་སྤང་བ་བྱིན་པས། གལ་ཏེ་རེག་པར་བྱེད་ན་ཁྱོད་ཀྱི་ལག་པ་མཁྲིག་མ་ནས་གཅོད་དུ་གཞུག་གོ །དེས་ཤཱཀྱའི་དགེ་སྦྱོང་གི་ཚུལ་ནི་ཚིག་པ་ཡིན་ཏེ། བུ་ལོན་པ་ཡང་རབ་ཏུ་འབྱིན་པར་བྱེད་དོ་ཞེས་སྨོད་པའི་སྐབས་དེ་གསོལ་བ་དང༌། ཉེས་དམིགས་དེ་ནི་བུ་ལོན་ཅན་རབ་ཏུ་འབྱིན་པ་ལས་གྱུར་པ་ཡིན་པས་དགེ་སློང་དག་གིས་བུ་ལོན་ཅན་རབ་ཏུ་འབྱུང་བར་མི་བྱའོ། །(༤༡ན)སྟོན་པ་མཉན་ཡོད་ནའོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བྱུང་ནས་བསྲིངས་བསྐྱེད་ཆེན་པོར་གྱུར་ཏོ། །རེ་ཞིག་ན་དེས་བུ་དེ་སྤྱོས་པ་དང༌། ཕ་འདི་མགུ་དཀའ་བས་བདག་གིས་འདིའི་སེམས་སྲུང་མི་ནུས་ཀྱིས་འབྲོས་སོ་སྙམ་སྟེ། ཡུལ་གཏོང་བ་ནི་དཀའ་ཡིས་ཞེས་པ་ནས། དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། དེས་སྐྱབས་སུ་འགྲོ་བ་དང་བསླབ་པའི་གཞི་བྱིན། རབ་བྱུང་ཞུ་བའི་དགེ་སློང་དང༌། སྐྲ་དང་ཁ་སྤུ་འབྲེག་པ་དང༌། དགེ་ཚུལ་ཉིད་དུ་ཉེ་བར་སྒྲུབ་པའི་དགེ་སློང་ལ་གཏད་ནས་རབ་ཏུ་བྱུང༌། ལས་བྱེད་པ་དང༌། གསང་སྟེ་སྟོན་པ་དང༌། ལས་ཀྱི་གནས་སུ་འཇུག་པའི་དགེ་སློང་ལའང་གསོལ་བ་བཏབ་ནས། བསྙེན་རྫོགས་བྱེད་པ་ན་ཁྱིམ་བདག་དེ་འོངས་ནས། འཕགས་པ། ཁྱེའུ་འདི་འདྲ་ཞིག་གཟིགས་སམ། སྨྲས་པ། དེ་བསྙེན་པར་རྫོགས་པར་བྱེད་དོ་ཞེས་དེ་དག་གིས་དེ་བསྙེན་པར་རྫོགས་ནས་གྲིབ་ཚོད་ལ་སོགས་པ་དང་གདམས་ངག་བརྗོད་དེ་དགེ་སློང་རྣམས་ལངས་པ་དང༌། ཁྱིམ་བདག་དེ་འོངས་ནས། འཕགས་པ། ཅི་ཁྱེད་ཅག་སྤུ་གྲི་ཐོགས་ནས་ཁོ་ན་སྡོད་དམ། གལ་ཏེ་བདག་ལ་དད་པ་མ་མཆིས་ན་འདིའི་ཚངས་སྤྱོད་ཀྱི་བར་ཆད་དུ་འགྱུར་རོ། །ཀྱེ་མ་ཞག་བདུན་བརྒྱད་ཅིག་བསྲེལ་ན་ཅི་ནོངས་ཟེར་བའི་སྐབས་དེ་གསོལ་བ་དང༌། ཉེས་དམིགས་གང་ཅི་བྱུང་བ་དེ་ནི་རབ་ཏུ་འབྱུང་བར་འདོད་པ་ཕ་མས་མ་གནང་བ་ཞག་བདུན་མི་བསྲེལ་བ་ལས་གྱུར་པ་ཡིན་པས། རབ་ཏུ་འབྱུང་བར་འདོད་པ་ཕ་མ་གསོན་ཞིང་དེ་གཉིས་ཀྱིས་མ་གནང་བ་འོངས་ན་ཞག་བདུན་བསྲེལ་བར་བྱའོ། །
དེ་ལྟར་བཀའ་སྩལ་ནས་རབ་ཏུ་འབྱུང་བར་འདོད་པ་ཕ་མས་གནང་བ་འོངས་པ་དང༌། ཡུལ་ཐག་རིང་བ་ཕ་མས་གཏམ་མི་ཐོས་པ་དག་འོངས་པ་ན། དེ་དག་ཀྱང་ཞག་བདུན་བསྲེལ་བས་དེ་དག་རབ་བྱུང་མ་ཐོབ་པར་སོང་ནས། དེ་ཉིད་རབ་ཏུ་འབྱུང་བ་དང་བསྙེན་པར་རྫོགས་པའི་བར་ཆད་དུ་གྱུར་པའི་སྐབས་དེ་གསོལ་བ་དང༌། ཕ་མས་གནང་བ་དང༌། ཡུལ་ཐག་རིང་པོ་ཕ་མས་གཏམ་ཡང་མི་ཐོས་པ་ནས་འོངས་པ་ནི་རབ་ཏུ་དབྱུང་བར་བྱ་སྟེ་འགྱོད་པར་མི་བྱའོ། །སྟོན་པ་མཉན་ཡོད་ནའོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བྱུང་སྟེ། ཆུང་མ་ལ་སྨྲས་པ། བཟང་མོ། འུ་བུ་ཅག་གི་བུ་ལོན་འཇལ་བ་དང༌། ནོར་སྤྱོད་པ་སྐྱེས་ཀྱིས། ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །རྗེའི་སྲས། དེ་བཞིན་མཛོད་ཅིག །དེ་སོང་བ་དང་ཡུལ་གཞན་དུ་ཤིའོ། །མས་ཁྱེའུ་དེ་ཉེ་དུ་དང་ལག་མཐུས་བསྙོད་ཅིང་བསྐྱེད་ནས་ཡིག་དཔོན་ལ་ཡི་གེ་སློབ་ཏུ་བཏང་(༤༡བ)བས་དེའི་ན་ཟླ་རྣམས་ཀྱིས་ཡིག་འབྲུ་ལོབས་ནས་ཕྱི་རོལ་གྱི་བསྟན་བཀླག་པར་བརྩམས་པ་དང༌། དེས་མ་ལོབས་པར་མས་ཡིག་དཔོན་གྱི་གན་དུ་སོང་ནས། ཇོ་བོ། ཁྱེའུ་འདིའི་ན་ཟླ་དག་གིས་ཁྱོད་ལ་ཅི་འབུལ་བ་དེ་བདག་ཀྱང་ཁྱོད་ལ་འབུལ་ན། འདིའི་ན་ཟླ་དག་གིས་ཡིག་འབྲུ་ལོབས་ནས་ཕྱི་རོལ་གྱི་བསྟན་བཅོས་ཀློག་ན། འདི་ནི་ད་དུང་ཡིག་འབྲུ་དག་སློབ་པར་བགྱིད་དོ། །དེས་སྨྲས་པ། རྒྱུ་གཉིས་ཀྱིས་རིག་པ་ལོབས་ཏེ། ངོ་ཚ་ཤེས་པ་དང༌། ཁྲེལ་ཡོད་པའོ། །འདི་ནི་གཉིས་ཀ་མེད་པའོ། །ཁྱོད་ལའང་ཉེས་པ་ཡོད་དེ། ཁོ་བོས་བཞུས་པ་ན་ཁྱོད་ཀྱིས་ཤེད་བསྐྱེད་དོ། །
དེས་སྨྲས་པ། དེ་བཞིན་ཏེ། བདག་ལ་ནོངས་པ་དེ་མཆིས་སོ། །དུས་གཞན་ཞིག་ན་དེས་དེ་བཞུས་པ་དང༌། དེ་ངུ་ཞིང་མའི་གན་དུ་སོང་ངོ༌། །བུ། ཅིའི་ཕྱིར་ངུ༌། སློབ་དཔོན་གྱིས་བཞུས་སོ། །དེ་མས་ཀྱང་བཞུས་པ་དང༌། དེས་བསམས་པ། སྔོན་ནི་བདག་གནས་གཅིག་ཏུ་བཞུས་ན་ད་ནི་གནས་གཉིས་ཀར་བཞུས་པ་མི་བཟོད་པས་འབྲོས་སོ་སྙམ་ནས་རྒྱལ་བྱེད་ཚལ་དུ་སོང་བ་དང༌། དགེ་ཚུལ་མེ་ཏོག་འཐུ་བ་ཞིག་མཐོང་ནས། ཁྱོད་རེ་བདེ། ཅིའི་ཕྱིར། རབ་ཏུ་བྱུང་བས་སོ། །ཁྱོད་ཅིའི་ཕྱིར་རབ་ཏུ་མི་འབྱུང༌། བདག་སུས་ཀྱང་རབ་ཏུ་འབྱིན། ཚུར་ཤོག །མཁན་པོའི་དྲུང་དུ་འདོང་ངོ་ཞེས་དེ་ཁྲིད་ནས་མཁན་པོ་ལ། འདི་རབ་ཏུ་དབྱུང་དུ་གསོལ། དེས་དེ་རབ་ཏུ་བྱུང་ངོ༌། །དེའི་མ་ཡིག་དཔོན་གྱི་གན་དུ་སོང་ནས། ཁྱེའུ་དེ་གར་མཆིས། ངས་བཞུས་སོ། །བདག་གིས་ཀྱང་བཞུས་སོ། །དེ་བྲོས་ཀྱིས་འཚོལ་དུ་སོང་ཞིག །དེས་དཀའ་ཐུབ་ཀྱི་ཚལ་དང་མུ་སྟེགས་ཀྱི་གནས་དེ་དག་ཏུ་བུ་འདྲི་ཞིང་སོང་བ་ན་དེའི་གཏམ་ཐོས་པའང་སུའང་མེད་དོ། །དེ་མཉན་ཡོད་དུ་སོང་ནས་སྒོར་བསྡད་པ་ན་དགེ་ཚུལ་དེའང་མཉན་ཡོད་དུ་བསོད་སྙོམས་ལ་ཞུགས་པ་དང༌། མས་མཐོང་ནས་བྲང་བརྡུངས་ཏེ་སྨྲས་པ། བུ། ཁོ་མོས་དཀའ་ཐུབ་ཀྱི་ཚལ་དང་མུ་སྟེགས་ཀྱི་གནས་ལ་སོགས་པར་ཁྱོད་བཙལ་ཀྱང་ཁྱོད་ཀྱི་གཏམ་ཐོས་པའང་སུའང་མེད་ན། ཁྱོད་ཤཱཀྱའི་བུ་རྐུན་མ་རྣམས་ཀྱི་ནང་དུ་ཅིའི་ཕྱིར་རབ་ཏུ་འབྱུང༌། ཚུར་ཤོག་འདོང་ཞེས་ལག་པ་གཉིས་ནས་བཟུང་སྟེ་ཁྱིམ་དུ་ཁྲིད་དོ། །དེ་ཉིད་དེའི་རབ་ཏུ་བྱུང་བ་དང་བསྙེན་པར་རྫོགས་པའི་བར་ཆད་དུ་གྱུར་པའི་སྐབས་དེ་གསོལ་བ་དང༌། ཉེས་དམིགས་གང་བྱུང་བ་དེ་ནི་དགེ་འདུན་ལ་མ་ཞུས་པར་རབ་ཏུ་འབྱིན་པ་ལས་གྱུར་པ་ཡིན་པས། དེ་ཡུལ་ཐག་རིང་ནའང་དགེ་འདུན་ལ་མ་ཞུས་པར་རབ་ཏུ་དབྱུང་བར་མི་བྱའོ། །སྟོན་པ་རྒྱལ་པོའི་ཁབ་ནའོ། །རྒྱལ་པོའི་ཁབ་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་ཞིག་སྐྱེས་ནས་བསྲིངས་བསྐྱེད་དེ། ཆེན་པོར་གྱུར་པ་ན་ན་བར་གྱུར་ནས་སྨན་པ་ཐམས་ཅད་ཀྱིས་བོར་བ་དང༌། (༤༢ན)མས་སྨྲས་པ། བུ། འཚོ་བྱེད་གཞོན་ནུས་གསོས་འདི་ནི་སྨན་པའི་རྒྱལ་པོ་བླ་ན་མེད་པ་ཡིན་གྱིས་དེའི་གན་དུ་སོང་ཞིག །དེ་སོང་ནས། འཚོ་བྱེད། བདག་ལ་གསོས་མཛོད་ཅིག །བཞིན་བཟང༌། ཁྱོད་ནི་གསོ་དཀའ་ལ་ཁོ་བོའང་སངས་རྒྱས་ཉན་ཐོས་ཀྱི་དགེ་འདུན་དང་བཅས་པ་དང༌། རྒྱལ་པོ་འཁོར་བཅས་མ་གཏོགས་པའི་གསོས་མི་བྱེད་དོ། །དེས་མའི་གན་དུ་སོང་ནས་ཇི་ལྟར་ཟེར་བ་སྨྲས་པ་དང༌། བུ། དེ་ལྟ་ན་རབ་ཏུ་བྱུང་ཞིག །མ། བདག་རིགས་མཆོག་ཏུ་གྱུར་ནས་ཤཱཀྱའི་བུ་དགེ་སྦྱོང་རིགས་སྣ་ཚོགས་པ་ཅན་རྣམས་ཀྱི་ནང་དུ་ཅིའི་ཕྱིར་རབ་ཏུ་འབྱུང༌། བུ། ཁྱོད་ཀྱི་ཀླད་པར་རྩྭ་ཀུ་ཤ་སྐྱེ་བར་འགྱུར་རམ། ནད་སོས་པ་ན་བབས་པས་ཆོག་གོ །དེ་འོད་མའི་ཚལ་དུ་སོང་ནས་དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། དེས་དེ་རབ་ཏུ་བྱུང་བ་དང༌། དེ་འཁུན་ཞིང་འདུག་གོ །ཅིའི་ཕྱིར་འཁུན། བདག་བྲོ་འཚལ་ཏོ། །ཁྱོད་རབ་ཏུ་བྱུང་ནས་ནའམ། མ་ཡིན་ཏེ་ན་བཞིན་དུ་བྱུང་ངོ༌། །ཅིའི་ཕྱིར་ཁྱོད་ཀྱིས་ཁོ་བོ་ལ་མ་སྨྲས། མཁན་པོས་བདག་ལ་རྨས་སམ་ཅི། དེ་མི་དགའ་བར་གྱུར་པ་དང༌། ལྷན་ཅིག་གནས་པ་དང༌། ཉེ་གནས་དག་ལྷགས་ནས། ཁྱོད་ཅིའི་སླད་དུ་མི་དགྱེས། འདི་ན་བཞིན་དུ་རབ་ཏུ་བྱུང་བས་ཁོ་བོས་ནད་བྲང་བཞག་གོ །མཁན་པོ། སྐྱེས་བུ་དམ་པ་ནི་གཉིས་ཏེ། ཁུར་མི་ལེན་པ་དང༌། བླངས་པ་མཐར་ཕྱིན་པར་བྱེད་པའོ་ཞེས་གསུངས་པས། ཁུར་བླངས་པ་འདི་མཐར་ཕྱིན་པར་མཛོད་ཅིག །དེ་དག་ཕན་ཚུན་སྨྲ་ཞིང་འཁོད་པ་ན་འཚོ་བྱེད་ཀྱང་ཕྱོགས་དེར་འོངས་ནས་དེ་ལ་སྨྲས་པ། གཞོན་ནུ་འདིའི་ནད་ལྟོས་ཤིག་འདི་ནད་ལྕི་སྟེ། རྒྱལ་པོས་ཡོ་བྱད་སྦྱར། བདག་གིས་གསོས། འཕགས་པ་དག་གིས་བྲོ་གཡོག་མཛད་ན་སོས་སོ། །དེས་དེའི་གསོས་བྱས་པས་སོས་པར་གྱུར་ཏོ། །དེས། མཁན་པོ། བདག་གང་གི་དོན་དུ་རབ་ཏུ་བྱུང་བའི་དོན་དེ་བདག་གིས་ཐོབ་ཀྱིས་འགྲོའོ། །བུ། དགྲ་བཅོམ་པ་ཐོབ་བམ། མ་ཡིན་ནོ། །ཕྱིར་མི་འོང་ངམ། ཕྱིར་འོང་ངམ། རྒྱུན་ཞུགས་ཐོབ་བམ། མ་ཡིན་ཏེ། བདག་བྲོ་འཚལ་བས་རབ་ཏུ་བྱུང་ན། ད་གསོས་སོ། །བུ། གང་དུ་འགྲོ། མཁན་པོ། སྡུམ་པར་མཆིའོ། །བཞིན་བཟང༌། ཁྱོད་ཀྱིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་དགེ་སྦྱོང་གི་འབྲས་བུ་བཞི་ལས་གང་ཡང་རུང་བ་འཐོབ་པར་བྱ་བ་ཡིན་ན། དད་པས་བྱིན་པ་ཆུད་གསན་ནས་ཚུལ་མ་ཡིན་པས་སྡུག་བསྔལ་སྐྱེད་པར་བྱེད་དམ། དེས་དེའི་ཚིག་ཚིག་མ་ཡིན་པར་བྱས་ཏེ་སོང་ངོ༌། །དེས་བྱས་པས་ཤེས་པས་འཚོ་བྱེད་ལ་མེ་ཏོག་ལ་སོགས་པ་སྟོབ་པར་བྱེད་དོ། །
འཚོ་བྱེད་ཀྱིས་སྨྲས་པ། ཁྱོད་ཁོ་བོ་ལས་ཅི་འདོད། ཅིའང་མི་འཚལ་ཏེ་བདག་བྱས་པ་ཤེས་པས་སོ། །ཁྱོད་ལ་ཁོ་(༤༢བ)བོས་ཅི་བྱས། ནད་གསོས་སོ། །ཁོ་བོས་མི་དྲན་ནོ། །བདག་གིས་དགོངས་པར་བགྱིའི་ཞེས་དྲན་པར་བྱས་པ་དང༌། ཁྱོད་རབ་ཏུ་བྱུང་ནས་དགེ་སྦྱོང་གི་འབྲས་བུ་འཐོབ་པར་བྱ་བ་ཡིན་ན། དད་པས་བྱིན་པ་ཆུད་གསན་ནས་ཚུལ་མ་ཡིན་པར་སྡུག་བསྔལ་སྐྱེད་དམ། དེ་ནས་འཚོ་བྱེད་བཅོམ་ལྡན་འདས་ཀྱི་དྲུང་དུ་སོང་སྟེ་ཕྱག་བཙལ་ནས་མཐའ་ཞིག་ཏུ་འདུག་སྟེ། བཙུན་པ། འཕགས་པ་འདི་དག་ནད་པ་རབ་ཏུ་འབྱིན། བསྙེན་རྫོགས་བགྱིད་པས་རྒྱལ་པོའི་མཛོད་དང་བང་བ་དག་ཟད་པར་འགྱུར་ལ་བདག་ཀྱང་ལུས་ངལ། འཕགས་པ་དག་གི་དགེ་བའི་ཕྱོགས་ཀྱང་ཉམས་པར་འགྱུར་བས་ནད་པ་རབ་ཏུ་མི་འབྱིན་པའི་བཅའ་བ་མཛད་ན་ལེགས་སོ། །བཅོམ་ལྡན་འདས་ཀྱིས། ཅང་མི་གསུང་བས་གནང་ནས། ཉེ་བར་འོངས་པ་ལ། ནད་པ་མ་ཡིན་ནམ་ཞེས་དྲི་བར་བྱའོ། །སྟོན་པ་མཉན་ཡོད་ན་བཞུགས་སོ། །ཀླུ་རྣམས་ཀྱི་ཀུན་ཏུ་སྤྱོད་པ་ནི་ལུས་ལ་ཉིན་མོ་བྱེ་མ་མེའི་མདོག་ལྟ་བུ་ལན་གསུམ་འབབ་ཅིང༌། དེས་རུས་པའི་ཀེ་རུས་ཙམ་ཞིག་ལུས་པར་བྱེད་དོ། །ཀླུ་གཞོན་ནུ་སྐྱེས་ནས་རིང་པོ་མ་ལོན་པ་ཞིག་གི་ལུས་ལ་ཉིན་མོ་བྱེ་མ་མེའི་མདོག་ལྟ་བུ་ལན་གསུམ་འབབ་ཅིང་དེས་དེ་རུས་པའི་ཀེང་རུས་ཙམ་ལུས་པར་བྱས་པ་དང༌། དེས་མ་ལ་སྨྲས་པ། བདག་གིས་སྡུག་བསྔལ་འདི་ཡུན་ཇི་སྲིད་དུ་མནག་པར་བགྱི། བུ། རིགས་མཐུན་ཡོད་ཀྱི་བར་དུའོ། །དེ་ན་ཀླུ་རྫུ་འཕྲུལ་ཆེ་བ་རྣམས་ཀྱི་ལུས་ལ་དེ་མི་འབབ་ནས། དེས་སྨྲས་པ། མ། འདི་དག་ལ་ཅིའི་ཕྱིར་མི་འབབ། མས་སྨྲས་པ། འདི་དག་ནི་རྫུ་འཕྲུལ་ཆེ་བ། མཐུ་ཆེ་བ། བསྐལ་པར་གནས་པ། ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟང་གིས་དབྱུང་བར་མི་ནུས་པས་མི་འབབ་བོ། །ཀླུ་ཕྲ་མོ་གཞན་ལའང་མི་འབབ་ནས། མ། འདི་དག་ལ་རིགས་ན་འདི་དག་ལ་ཅིའི་ཕྱིར་མི་འབབ། འདི་དག་གིས་བཅོམ་ལྡན་འདས་ཀྱི་སྤྱན་སྔར་སྐྱབས་འགྲོ་དང་བསླབ་པའི་གཞི་བླངས་པས་སོ། །དེས་སྨྲས་པ། འོ་ན་བདག་ཀྱང་སྐྱབས་འགྲོ་དང་བསླབ་པའི་གཞི་ལེན་ནོ། །བུ། ཚེ་གཅིག་གི་སྡུག་བསྔལ་ནི་བླ་ཡི། ཚེ་རབས་མང་པོའི་ནི་མ་ཡིན་ཏེ། ཁྱོད་ཀྱིས་སྐྱབས་འགྲོ་དང་བསླབ་པའི་གཞི་བླངས་ནས་མ་བཟུངས་ན། ཡུན་རིང་པོར་དམྱལ་བའི་སྡུག་བསྔལ་མནག་དགོས་སོ། །དེས་བསམས་པ། སྡུག་བསྔལ་འདི་བས་ཆེ་བ་ཅི་ཞིག་ཡོད་ཀྱི། སྐྱབས་འགྲོ་དང་བསླབ་པའི་གཞི་བླང་ངོ་སྙམ་སྟེ་བྲམ་ཟེའི་ཆ་ལུགས་སུ་སྤྲུལ་ནས་རྒྱལ་བྱེད་ཚལ་དུ་སོང་བ་དང༌། དེས་དགེ་སློང་བསམ་གཏན་དང༌། ཀློག་པ་དང༌། རྣལ་འབྱོར་དང༌། ཡིད་ལ་བྱེད་པ་ལ་བརྩོན་པ་མཐོང་བས་དད་པ་སྐྱེས་ཏེ། བསམས་པ། དང་པོར་སྐྱབས་འགྲོ་དང༌། བསླབ་པའི་གཞི་བླང་ངམ། འོན་ཏེ་རབ་ཏུ་འབྱུང་སྙམ་པ་ལས། རབ་ཏུ་འབྱུང་ངོ་སྙམ་ནས། དགེ་སློང་ཞིག་གི་གན་དུ་སོང་སྟེ། བདག་རབ་ཏུ་དབྱུང་དུ་གསོལ། དེས། ཁོ་བོ་གསར་བུ་ཡིན་པས་གནས་བརྟན་གཞན་གྱི་དྲུང་དུ་སོང་ཞིག །བདག་གིས་གཞན་ངོ་མི་ཤེས་ཀྱིས། བདག་ཐོག་མར་ཁྱོད་ཀྱི་གན་དུ་མཆིས་པས་ཁྱོད་ཀྱིས་དགེ་སློང་འགའ་ཞིག་ལ་གཏོད་ཅིག །དེས་དེ་མཁན་པོའི་དྲུང་དུ་ཁྲིད་ནས་འདི་རབ་ཏུ་དབྱུང་དུ་གསོལ།
དེས་སྨྲས་པ། བཞིན་བཟང༌། བཅོམ་ལྡན་འདས་ཀྱིས་དགེ་སློང་དག་བཤན་པ་བྱེད་དུ་བཅུག་པ་ནི་བླ་ཡི་རབ་ཏུ་བྱུང་ཞིང་བསྙེན་པར་རྫོགས་པར་བྱས་ནས་ཡལ་བར་བོར་བ་ནི་མི་རུང་ངོ་ཞེས་གསུངས་པས། འདིའང་དམྱལ་བར་ལྟུང༌། ཁོ་བོའང་ལྟུང་བ་དང་བཅས་པས་འགྱུར་བས་རབ་ཏུ་མི་འབྱིན་ནོ། །མཁན་པོས་རབ་ཏུ་དབྱུང་བ་འབའ་ཞིག་མཛོད་དང༌། བདག་གིས་བསླབ་པར་བགྱིའོ། །དེས་དེ་རབ་ཏུ་བྱུང༌། བསྙེན་པར་རྫོགས་ནས། བཞིན་བཟང༌། འདི་ཁྱོད་ཀྱི་མཁན་པོ་གཅིག་པ་ཡིན་གྱིས། འདི་ཉིད་ལས་བསླབ་པར་བྱའོ། །དེས་དེ་ལ་གཅིག་ལས་འཕྲོས་པའི་ལུང་བཀླགས་པས་དེས་ཀྱང་བརྩོན་འགྲུས་བསྐྱེད་ནས་ཁ་ཏོན་ལྷོགས་པས་སློབ་དཔོན་དེ་མིག་གང་སྟེ། བཞིན་བཟང་། ལྷན་ཅིག་དུ་བསོད་སྙོམས་ལ་འཇུག་གམ། སོ་སོར་འཇུག །དེས། བདག་མིའི་ཟས་ཀྱིས་འཚོ་བར་མི་ནུས་ཀྱིས། ཀླུའི་གནས་སུ་བདུད་རྩི་ཟོས་ནས་ཕྱིར་འོང་ངོ་སྙམ་སྟེ། སློབ་དཔོན། སོ་སོར་འཇུག་གོ །དེ་ལྟར་གྱིས་ཤིག །དེ་ཀླུའི་གནས་སུ་བདུད་རྩི་ཟོས་ནས་ཕྱིར་འོང་ངོ༌། །ཀླུ་རྣམས་ནི་གཉིད་ཆེ་བ་ཡིན་པས། དེ་གཉིད་ལོག་ནས་ལངས་པའི་ཚེ་ན་དགེ་སློང་དེ་བསོད་སྙོམས་བླངས་ནས་ཕྱིར་འོང་ངོ༌། །རེ་ཞིག་ན་དགེ་སློང་དེས་བསོད་སྙོམས་གློ་བུར་བ་བླངས་ནས་འོངས་པ་དང༌། གནས་ཁང་ན་མགར་བའི་སྦུད་པ་འབུད་པ་ལྟ་བུའི་སྒྲ་ཐོས་ནས། དེས་གཏན་པའི་བུ་ག་ནས་བལྟས་པས། གནས་ཁང་དེ་ཐམས་ཅད་ཀླུའི་ལུས་འཁྱིལ་བས་གང་བ་མཐོང་ནས་དེས། སྤྲུལ་པ་སྤྲུལ་པ་ཞེས་སྨྲས་པ་དང༌། དེ་སྒྲ་ལ་མཁས་པས་མྱུར་བར་སད་ནས་རང་བཞིན་གྱི་ཆ་ལུགས་མི་གནང་བར་བྱས་ཏེ་སྤྲུལ་པའི་ཆ་ལུགས་སུ་འདུག་གོ །དགེ་སློང་དག་ལྷགས་ནས། འདི་ཅི་ཡིན། སྤྲུལ་པའོ། །དེ་ཁ་ཏོན་ལ་བརྩོན་པ་ཡིན་ནའང་ཁྱོད་སེར་སྣ་བྱེད་དམ། མི་བྱེད་དེ། འདི་ནི་སྤྲུལ་པའོ། །དེའི་ཚེ་བཅོམ་ལྡན་འདས་ཀྱང་ཕྱོགས་དེར་གཤེགས་ནས། འདི་ཅི་ཡིན། སྤྲུལ་པའོ། །དགེ་སློང་དག །སྤྲུལ་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་ལ། སྤྲུལ་པ་མ་ཡིན་ནམ་ཞེས་དྲི་བར་བྱའོ། །ཀླུའི་རང་བཞིན་ལྔ་པོ་འདི་དག་ཡིན་ཏེ། རང་བཞིན་གྱིས་སྐྱེ་བ་དང༌། འཆི་བ་དང༌། ཉལ་བ་དང༌། ཟ་བ་དང༌། འཁྲིག་པའི་ཆོས་སྟེན་པའོ། །བཅོམ་ལྡན་འདས་ཀྱིས་བཀའ་སྩལ་(༤༣བ)པ། བཞིན་བཟང༌། ཁྱོད་ཀྱི་ཕུང་པོ་འདིས་ཡོན་ཏན་འགའ་ཡང་མི་འཐོབ་ཀྱིས། དགེ་སློང་རྣམས་ལ་མ་འཚེ་བར་སོང་ཞིག །དེས་བསམས་པ། འབབ་པར་མི་བྱའོ་སྙམ་ནས། ས་ལའི་དགོན་པ་ཞིག་ཏུ་སོང་སྟེ། གཙུག་ལག་ཁང་རྟ་བབས་མཐོན་པོ་དང་ལྡན་པ། མཐོང་ཁུང་དང༌། སྐར་ཁུང་དྲ་བ་ཅན་དང༌། ལན་ཀན་གྱིས་བརྒྱན་པ། སྙིང་དང་མིག་འཕྲོག་པ། མཐོ་རིས་ཀྱི་ཐེམ་སྐས་སུ་གྱུར་པ། ཡོ་བྱད་ཕུན་སུམ་ཚོགས་པ་ཞིག་སྤྲུལ་ནས། དགེ་སློང་གློ་བུར་དུ་འོངས་པ་དང༌། འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབ་པར་བྱེད་དོ། །རྒན་ཞུགས་ཤིག་གཙུག་ལག་ཁང་དེར་དབྱར་གནས་ནས་མཉན་ཡོད་དུ་སོང་ངོ༌། །
དྲུག་སྡེ་དག་གི་ཀུན་ཏུ་སྤྱོད་པ་ནི། འདིར་བདག་ཅག་གིས་བྲམ་ཟེར་དང༌། ཁྱིམ་བདག་འོངས་ཤིང་ལྷགས་པ་རྣམས་ལའང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད། རང་གི་གྲགས་པའང་བསྒྲག་པར་བྱའོ་སྙམ་ནས། དྲུག་སྡེ་ལས་གང་ཡང་རུང་བས་རྒྱལ་བྱེད་ཚལ་གྱི་སྒོ་སྟོང་པར་མི་འཇོག་པས། ཉེ་དགའ་རྒྱལ་བྱེད་ཚལ་གྱི་སྒོ་ན་འཆག་ཅིང་འདུག་གོ །དེས་རྒན་ཞུགས་མགོ་སྤྲ་བའི་མེ་ཏོག་ལྟར་སྐྱ་བ། སྨིན་མ་འཕྱང་བ་ཞིག་ཐག་རིང་པོ་ནས་འོང་བ་མཐོང་སྟེ། འདི་ནི་གནས་བརྟན་ཞིག་གོ་སྙམ་ནས་བསུ་སྟེ། གནས་བརྟན་བྱོན་པ་ལགས་སོ་ཞེས་སྨྲས་པ་དང༌། དེས་སྨྲས་པ། སློབ་དཔོན། ཕྱག་འཚལ་ལོ། །ཉེ་དགས་བསམས་པ། ཀྱེ་མ་འདི་ནི་རྒན་ཞུགས་ཤིག་སྟེ། སློབ་དཔོན་ཡང་མི་ཤེས། མཁན་པོའང་མི་ཤེས་སོ་སྙམ་ནས། རྒན་ཞུགས། ཁྱོད་གང་ནས་འོངས། ས་ལའི་དགོན་པ་ནས་སོ། །དེ་ན་གཙུག་ལག་ཁང་ཡོད་དམ། ཡོད་དོ། །དེ་གཙུག་ལག་ཁང་ཡིན་ནམ། ཕོངས་པ་ཡིན། གཙུག་ལག་ཁང་ནི་ཅི་འདྲ། ཕོངས་པ་ནི་ཅི་འདྲ། ཡོ་བྱད་ཐམས་ཅད་དང་ལྡན་པ་ནི་གཙུག་ལག་ཁང་ཡིན་ལ། ཡོ་བྱད་ཐམས་ཅད་དང་བྲལ་བ་ནི་ཕོངས་པ་ཡིན་ནོ། །དེ་གཙུག་ལག་ཁང་ཡིན་ནོ། །དེ་ན་ཅི་ཡོད། དགེ་སློང་ཞལ་ཏ་བྱེད་པས་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱི་སྟོབ་པར་བྱེད་དོ། །
ཉེ་དགའ་གཙུག་ལག་ཁང་དུ་སོང་སྟེ་དྲུག་སྡེ་དག་ལ་སྨྲས་པ། བདག་ཅག་གིས་ཡུན་ཇི་སྲིད་ཀྱི་བྲེལ་བ་སྤང་བར་བྱ། ཁྱོད་ཀྱིས་ཐོས་པ་ཅུང་ཟད་ཅིག་ཡོད་དམ། ཡོད་དེ། ས་ལའི་དགོན་པའི་གཙུག་ལག་ཁང་ན་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབ་པར་བྱེད་ཀྱིས་དེར་འདོང་ངོ༌། །དེ་དག་དོང་བ་དང་དེས་མཐོང་ནས། གནས་ངན་ལེན་ཀུན་ཏུ་སྤྱོད་པ་དེ་དག་འདིར་འོང་མོད། ཡོ་བྱད་ཐམས་ཆད་ཀྱིས་བསྟབས་པས་འདི་དག་གིས་བདག་ལ་(༤༤ན)ཅི་བྱར་ཡོད་སྙམ་ནས། རྒན་རིམ་གྱིས་གནས་མལ་བསྐོས་ཤིང་ཡོ་བྱད་ཐམས་ཅད་ཀྱིས་བསྟབས་སོ། །དེ་དག་ཉི་མ་ཉུང་ཤས་ཤིག་འཁོད་ནས། དེ་ལ་སྨྲས་པ། རྒན་ཞུགས་ཁྱོད་ལ་འདུ་བ་དང་འགོད་པའང་མི་སྣང་བས་གྲངས་ཐོབ་ཅིག །ཅུང་ཟད་ཉམས་པའམ། གཅིག་ཏུ་མ་གྱུར་ཏམ། མ་གྱུར་མོད། ཚངས་པ་མཚུངས་པར་སྤྱོད་པ་རྣམས་ཀྱིས། དྲུག་སྡེ་གཙུག་ལག་ཁང་དེར་དབྱར་གནས་ན། འདུ་འགོད་མི་ཤེས་སོ་ཞེས་བདག་ཅག་སྨད་པར་འགྱུར་རོ། །དེ་ལྟ་ན་བགྱིའོ། །ཇི་ཙམ་ན། ལོ་བཅུ་གཉིས་ནའོ། །ལོ་བཅུ་གཉིས་ན་ཁྱོད་ཀྱིས་གཙུག་ལག་ཁང་འདིའི་སྒོ་འཕར་ཡང་ཟོས་པར་འགྱུར་རོ། །ལོ་བདུན་ནའོ། །མི་རུང་ངོ༌། །ཟླ་བ་བདུན་ནའོ། །མི་རུང་ངོ༌། །ཉིན་ཞག་བདུན་ནའོ། །དེ་བཞིན་དུ་བྱའོ། །དེས་བསམས་པ། ཞག་བདུན་ན་གཙུག་ལག་ཁང་འདི་མི་སྣང་བར་འགྱུར་རོ་སྙམ་ནས། དེས་ཚངས་པ་མཚུངས་པར་སྤྱོད་པ་དེས་པ་རྣམས་ལ་ཆོས་གོས་གསུམ་དང༌། རྔུལ་གཟན་དང༌། ལྷུང་བཟེད་དང༌། ལྷུང་བཟེད་ཆུང་ངུ་ཕུལ་ལོ། །དེ་དྲུག་སྡེས་མཐོང་ནས། འདི་ཕྱོགས་ཚོལ་གྱིས་ཞག་བདུན་ནས་ཕྱོགས་དང་བཅས་པ་གདོན་ནོ། །དེས་ཞག་བདུན་འདས་ནས་དེ་དག་ཉལ་བ་དང༌། གཙུག་ལག་ཁང་དེ་མི་སྣང་བར་བྱས་ནས་རྒྱ་མཚོའི་འགྲམ་དུ་སོང་ངོ༌། །དྲུག་སྡེས་སྒྲེ་བོ་ལ་ཉལ་ཞིང་འཁོད་ནས་སྨྲས་པ། དགའ་བོ་ཉེ་དགའ། ལོངས་ལ་རྡོ་རྒྱུས་ལོངས་ཤིག་དང་གྲངས་འདེབས་སུ་གཞུག་གོ །དེ་དག་གིས་ས་སྒྲེ་བོ་ལ་ཉལ་བར་མཐོང་ནས། དཀོན་མཆོག་གསུམ་ལ་མཆོད་པ་བྱེད་པ་ཞིག་བདག་ཅག་གིས་མཐོ་བཙམས་པས། གཙུག་ལག་ཁང་མི་སྣང་བར་བྱས་ཏེ་སོང་བ་དེ་ལྷའམ་ཀླུའམ་སུ་ཡིན་ཟེར་བའི་སྐབས་དེ་གསོལ་བ་དང༌། དགེ་སློང་དག །དགེ་སློང་ཞལ་ཏ་བྱེད་པ་དེ་ནི་སྤྲུལ་པ་དེ་ཉིད་ཡིན་ཏེ། དྲུག་སྡེས་མཐོ་མ་བཙམས་ན་བསྟན་པ་མཐར་ཐུག་གི་བར་དུ་དཀོན་མཆོག་གསུམ་ལ་མཆོད་པ་བྱེད་པར་འགྱུར་རོ། །ཉེས་དམིགས་གང་ཅི་བྱུང་བ་དེ་ནི་གཙུག་ལག་ཁང་འདུ་འགོད་མི་མངོན་པ་དེར་གྲངས་འདེབས་སུ་གཞུག་པ་ལས་གྱུར་པ་ཡིན་པས་འདུ་འགོད་མི་མངོན་པ་དེར་གྲངས་འདེབས་སུ་གཞུག་པར་མི་བྱའོ། །འདུ་བ་མངོན་ལ་འགོད་མི་མངོན་པ་དེར་ཡང་གྲངས་འདེབས་སུ་གཞུག་པར་མི་བྱའོ། །འགོད་པ་མངོན་ལ་འདུ་བ་མི་མངོན་པ་དེར་ཡང་གྲངས་འདེབས་སུ་གཞུག་པར་མི་བྱའོ། །འདུ་འགོད་མངོན་པ་དེར་ནི་དྲན་པ་དང་ཤེས་བཞིན་གྱིས་ཚོད་རིག་པར་བྱའོ། །དེའི་འོག་ཏུ་རྒྱ་མཚོའི་འགྲམ་དུ་གཙུག་ལག་ཞིག་སྤྲུལ་ཏེ། རྒྱ་མཚོ་ཆེན་པོའི་ཀླུ་རྣམས་བྲམ་ཟེ་དང་ཁྱིམ་བདག་གི་ཆ་བྱད་དུ་སྤྲུལ་ནས་དེ་ལ་ཆོས་ཉན་ཏོ། །ཆོས་ཐོས་ནས་གློ་བུར་དུ་འོངས་པ་དང་(༤༤བ)འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབ་པར་བྱེད་དོ། །རྒན་ཞུགས་ཤིག་དེར་དབྱར་གནས་ནས་མཉན་ཡོད་དུ་སོང་བ་སོགས་སྔར་དང་འདྲ་བ་ལ། དེས་དེ་དག་ཐག་རིང་པོ་ནས་མཐོང་ནས་གནས་ངན་ལེན་ཀུན་ཏུ་སྤྱོད་པ་དེ་དག་འདིར་འོང་མོད། འདི་དག་གིས་བདག་ལ་ཅི་བྱར་ཡོད་སྙམ་མོ། །
དེ་ནས་རྒྱ་མཚོ་ཆེན་པོའི་ཀླུ་བྲམ་ཟེ་དང་ཁྱིམ་བདག་གི་ཆ་ལུགས་སུ་བྱས་པ་དེ་དག་ལ་ཆོས་སྟོན་པ་ཐོས་ནས་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་བསྟབས་པ་དང༌། དྲུག་སྡེས་སྨྲས་པ། འདིས་ཅི་ཤེས། གཅིག་ལས་འཕྲོས་པའོ། །འདི་ནི་རྫུབས་པས་གཅིག་ལས་འཕྲོས་པའི་ཆོས་སྟོན་གྱི། འདི་དག་ནི་སྡེ་སྣོད་གསུམ་པ། ཆོས་སྒྲོག་པ། རིག་པ་དང༌། གྲོལ་བའི་སྤོབས་པ་ཅན་ཤ་སྟག་ཡིན་ན། ཅིའི་ཕྱིར་འདི་ལ་གསོལ་བ་མི་འདེབས། འཕགས་པ། བདག་གིས་བཟློག་གམ། ཁྱེད་ཅིའི་ཕྱིར་མི་སྟོན། དགའ་བོ་ཉེ་དགའ། རྒན་ཞུགས་འདི་བདག་ཅག་ལ་མི་མཐུན་པར་བྱེད་ཀྱིས་གནས་ནས་དབྱུང་ངོ༌། །དེས་བསམས་པ། བདག་གནས་དབྱུུང་བྱས་ན་ཀླུའི་གནས་སུའང་སྐབས་མི་རྙེད་དོ་སྙམ་ནས་དེ་དག་ཉལ་བ་དང་གཙུག་ལག་ཁང་དེའང་མི་སྣང་བར་བྱས་ཏེ་རྒྱ་མཚོ་ཆེན་པོར་ཞུགས་སོ། །དེ་དག་བྱེ་མའི་ཐང་ལ་ཉལ་ཞིང་འཁོད་ནས་སྨྲས་པ། སེངྒེའི་ཁྲི་ཤོམས་དང༌། ཆོས་བསྟན་པར་བྱའོ། །དེ་དག་གིས་བྱེ་མའི་ཐང་ལ་ཉལ་བ་མཐོང་ནས་སྨྲས་པ། དཀོན་མཆོག་གསུམ་ལ་མཆོད་པ་བྱེད་པ་ཞིག་བདག་ཅག་གིས་མཐོ་བཙམས་པས་གཙུག་ལག་ཁང་མི་སྣང་བར་བྱས་ནས་སོང་བ་དེ་ལྷའམ། ཀླུའམ། སུ་ཡིན་ཞེས་པའི་སྐབས་དེ་གསོལ་བ་དང༌། ཆོས་སྨྲ་བ་དེ་ནི་སྤྲུལ་པ་དེ་ཉིད་ཡིན་ཏེ། དྲུག་སྡེས་མཐོ་མ་བཙམས་ན་བསྟན་པ་མཐར་ཐུག་གི་བར་དུ་དཀོན་མཆོག་གསུམ་ལ་མཆོད་པ་བྱེད་པར་འགྱུར་རོ། །ཉེས་དམིགས་དེ་ནི་མ་གསོལ་བར་ཆོས་བསྟན་པ་ལས་གྱུར་པ་ཡིན་པས། མ་གསོལ་བར་ཆོས་བསྟན་པར་མི་བྱའོ། །སྟོན་པ་མཉན་ཡོད་ནའོ། །མཉན་ཡོད་ན་བྲམ་ཟེ་ཞིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་མ་ནིང་སྐྱེས་པ་འདྲ་བ་ཞིག་བྱུང་ནས་ཆེར་སྐྱེས་པ་ན་དེ་ཁྱེའུ་དག་དང་ལྷན་ཅིག་རྩེ་བ་ན་དེས་དེ་དག་ལ་མཚན་མ་བསྟན་པ་དང༌། ཁྱོད་ཅི་ཡིན། མ་ནིང་ངོ༌། །དེ་དག་གིས། ཁྱོད་བྲམ་ཟེ་ཡིན་པས་ཁྱིམ་དུ་མི་སྙན་པ་གྲགས་ན་མི་རུང་གིས་དེ་ལྟར་མ་བྱེད་ཅིག །ཕ་མ་ལའང་བསྒོ་ནས་ཕ་མས་བཟློག་ཀྱང་མི་ཉན་ནོ། །
དེ་རེ་ཞིག་ན་རྒྱལ་བྱེད་ཚལ་དུ་སོང་བ་དང༌། དགེ་སློང་གཞོན་ནུ་དག་མཐོང་ནས། འདི་དག་གི་ནང་དུ་རབ་ཏུ་བྱུང་ན་འདི་དག་གིས་བདག་ལ་སྐྱེས་པའི་བྱ་བ་བྱེད་པར་འགྱུར་རོ་སྙམ་ནས། དགེ་སློང་ཞིག་ལ། བདག་རབ་ཏུ་འབྱུང་བར་འཚལ་ལོ། །ཁྱོད་(༤༥ན)ཕ་མས་གནང་ངམ། མ་གནང་ངོ༌། །སོང་ལ་ཕ་མ་ལ་གསོལ་ཅིག །དེ་ཕ་མའི་གན་དུ་སོང་ནས། བདག་རབ་ཏུ་འབྱུང་བར་འཚལ་ལོ། །བདག་ཅག་འདི་དང་བྲལ་ན་རུང་གི་སྙམ་ནས་གནང་ངོ༌། །དེས་དགེ་སློང་གི་གན་དུ་སོང་ནས། ཕ་མས་གནང་གིས་རབ་ཏུ་དབྱུང་དུ་གསོལ། དེས་དེ་རབ་ཏུ་བྱུང་ཞིང་བསྙེན་པར་རྫོགས་པར་བྱས་པ་དང༌། དགེ་སློང་རྣམས་ཀྱི་མདུན་དུ་མཚན་མ་སྟོན་ནས། ཁྱོད་མ་ནིང་ཡིན་ནམ། ཡིན་ནོ་ཟེར་བའི་སྐབས་དེ་གསོལ་བས། མ་ནིང་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས་བསྙིལ་བར་བྱའོ། །ཉེ་བར་འོངས་པ་ལ། མ་ནིང་མ་ཡིན་ནམ་ཞེས་དྲི་བར་བྱའོ། །མ་ནིང་ནི་ལྔ་པོ་འདི་དག་ཡིན་ཏེ་ཞེས་པ་ནས། ཉམས་པ་མ་ནིང་ནི་རབ་ཏུ་མ་བྱུང་ན་རབ་ཏུ་དབྱུང་བར་མི་བྱ། རབ་ཏུ་བྱུང་ན་འགྱུར་བ་མི་བསྟེན་པ་བཏང་སྙོམས་སུ་བྱ། འགྱུར་བ་བསྟེན་ན་བསྙིལ་བར་བྱའོ། །སྟོན་པ་མཉན་ཡོད་ནའོ། །མཉན་ཡོད་ནས་ཁྱིམ་བདག་ཅིག་རྒྱལ་བྱེད་ཚལ་དུ་འོངས་སོ། །དགེ་སློང་དག་འདོད་ཆགས་དང་མ་བྲལ་བ་ན་དགེ་འདུན་ལྷག་མའི་ལྟུང་བ་འབྱིན་ཅིང༌། གཞོན་ནུའི་དུས་སུ་ལྟུང་བ་བྱུང་ནས་རྒས། ཁ་ཅིག་རྒན་པོའི་དུས་སུ་ལྟུང་བ་འབྱིན་ནོ། །དེ་དག་གིས་ཕྱིས་སྡེ་སྣོད་འཛིན་པ་རྣམས་ལས་ཐོས་ནས། སྤོ་མགུ་སྤྱོད་པའི་ཚེ། དགེ་འདུན་ལ་རིམ་གྲོ་བྱེད་པ་མཐོང་ཞིང༌། དགེ་འདུན་ལ་ཁ་ཟས་བསོད་པ་སྤྱི་བུངས་སུ་བཤམས་པ་མཐོང་ནས། འདི་དག་ཆོས་ནི་བཟང་ན་འདི་དག་ལ་སྐྱོན་ཡོད་དེ། རྗེ་ས་དང་གུས་པ་མེད་དེ། རྒན་པ་དག་ལས་བྱེད་དུ་འཇུག་གོ་སྙམ་ནས་དེ་སྐད་སྨྲས་པ་དྲུག་སྡེས་ཐོས་ནས། རྒན་པ་དག་ལའང་ལས་བྱེད་དགོས་པ་ཡོད་དོ། །ཁྱེད་ཀྱི་ནང་དུ་བདག་རབ་ཏུ་བྱུང་ནའང་ལས་བྱེད་དུ་འཇུག་གམ། ཁྱོད་པས་ཆེས་ཁྱད་པར་དུ་འཕགས་པ་རབ་ཏུ་བྱུང་ནའང་ལས་བྱེད་དུ་འཇུག་ན་ཁྱོད་ལྟ་ཅི་སྨོས། དེས་བསམས་པ། འདི་དག་གི་ནང་དུ་རབ་ཏུ་བྱུང་ན་ལས་བྱེད་དུ་འཇུག་གིས་ཐབས་ཤིག་བྱའོ་སྙམ་ནས། དེ་མཁས་པའི་རང་བཞིན་ཅན་ཡིན་པས། དེས་དགེ་སློང་གི་གན་དུ་ཀུན་སྤྱོད་བསླབས་ནས། མཐའ་འཁོབ་ཅིག་ཏུ་སྐྲ་དང་ཁ་སྤུ་བྲེགས། གོས་ངུར་སྨྲིག་བགོས་ཏེ་འདུག་པ་དང༌། དེ་དགེ་སློང་དག་གིས་མཐོང་ནས། མཉན་ཡོད་ན་ཆོས་ཀྱི་རྗེ་མངོན་སུམ་དུ་བཞུགས་ཤིང༌། དུས་དུས་སུ་ལྷའི་གཟུགས་མཐོང༌། སྒྲ་ཐོས། ཀུན་ཤེས་པ་བརྡ་སྤྲོད་པ་དག་ཀྱང་གྲག །ཆོས་དང་ཟང་ཟིང་གི་ལོངས་སྤྱོད་ཀྱང་ཡོད་ན་ཅིའི་ཕྱིར་མཉན་ཡོད་དུ་མི་འགྲོ། དེས་སྨྲས་པ། འདི་ཉིད་དུ་འདུག་གོ །
དེ་དག་གིས་ཡང་ཡང་བསྐུལ་བས་དེ་མཉན་ཡོད་དུ་སོང་བ་དང༌། དེ་གནས་མལ་བཟང་པོ་བཤམས་ཤིང༌། ཁ་ཟས་བསོད་པ་སྤྱི་བུངས་བཤམས་པ་མཐོང་ནས། གྲལ་གྱི་དང་པོར་འདུག་ན་ཡོན་བཤད་དགོས་པར་འགྱུར་རོ་སྙམ་སྟེ། སྟན་(༤༥བ)གཅིག་བོར་ནས་གཉིས་པ་ལ་འདུག་གོ །ཀུན་ཤེས་ཀོའུ་དི་ནྱ་འོངས་ནས། བཅོམ་ལྡན་འདས་ཀྱིས་བདག་སྣམ་སྦྱར་གྱི་རྒྱལ་མཚན་འཆང་བ་རྣམས་ཀྱི་མཆོག་ཏུ་ལུང་བསྟན་ན་འདི་སུ་ཡིན་བསམས་པ་དང༌། རྐུ་ཐབས་སུ་གནས་པ་ཡིན་པར་ཤེས་ནས་དེ་སེ་གོལ་གྱི་སྒྲས་བསྐྲད་དོ། །རྟ་ཐུལ་དང༌། བཟང་ལྡན་དང༌། རླངས་པ་དང༌། མིང་ཆེན་དང༌། གྲགས་པ་དང༌། གང་པོ་དང༌། དྲི་མེད་དང༌། བ་ལང་བདག་དང༌། ལག་བཟང་དང༌། ཤཱ་རིའི་བུ་དང༌། མོའུ་གལ་གྱི་བུ་དང༌། དགེ་སློང་གནས་བརྟན་རྣམས་ཀྱིས་ཀྱང་སེ་གོལ་གྱི་སྒྲས་བསྐྲད་དོ། །དྲུག་སྡེའི་གན་དུ་སོང་བ་དང༌། དེ་དག་གིས། གནས་བརྟན་ལོ་དུ་ལོན། དེས་ན་ཚོད་ཀྱི་དབང་དུ་བྱས་ཏེ་ལོ་དྲུག་ཅུ་ལོན་ནོ། །
དེ་དག་གིས་སྨྲས་པ། བཅོམ་ལྡན་འདས་ཀྱིས་ཀྱང་ལོ་དྲུག་ཅུ་མ་བཞེས་ན་འདིས་ག་ལ་ལོན། རྒན་ཞུགས། ཁྱོད་ཀྱི་མཁན་པོ་གང་ཡིན། དེས་དགེ་སྦྱོང་གོའུ་ཏ་མའི་མཁན་པོ་གང་ཡིན། དེ་དག་གིས། རྒན་ཞུགས་འདི་ནི་རང་གིས་རྟགས་བླངས་པ་ཡིན་ནོ་ཞེས་དེའི་རྐང་ལག་ནས་བཟུང་སྟེ་རྒན་པའི་མཐར་ཁྲིད་ནས། དགེ་འདུན་བཙུན་པ་རྣམས་གསན་དུ་གསོལ། འཇིག་རྟེན་ན་རང་བྱུང་གཅིག་ནི་བཅོམ་ལྡན་འདས་ལགས་ན་གཉིས་པ་ནི་རྒན་ཞུགས་འདི་ལགས་སོ། །འདི་ནི་གསོལ་བའོ་ཞེས་བསྐྲད་དོ། །སྟོན་པས། དགེ་སློང་དག །རྐུ་ཐབས་སུ་གནས་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས་བསྙིལ་བར་བྱའོ། །ཉེ་བར་འོངས་པ་ལ། རྐུ་ཐབས་སུ་གནས་པ་མ་ཡིན་ནམ་ཞེས་དྲི་བར་བྱའོ་ཞེས་སོགས་རྐུ་ཐབས་སུ་གནས་པའི་མཚན་ཉིད་དང་བཅས་པའོ། །སྟོན་པ་མཉན་ཡོད་ནའོ། །མུ་སྟེགས་ཅན་ཞིག་རྒྱལ་བྱེད་ཚལ་དུ་ཕྱིན་པ་དང༌། དེས་སྟན་བཟང་པོ་བཤམས་ཤིང་བཟའ་བཏུང་བསོད་པ་སྤྱི་བུངས་བཤམས་པ་མཐོང་ནས། ཟང་ཟིང་གི་ལོངས་སྤྱོད་འདི་དག་བཟང་ལ། ཆོས་ནི་བདག་ཅག་བཟང་བས། འདི་དག་གི་ནང་དུ་རབ་ཏུ་བྱུང་ལ་ཟང་ཟིང་གི་ལོངས་སྤྱོད་འདིར་བྱ། ཆོས་ནི་དེར་བྱའོ་སྙམ་ནས། དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། དེས་དེ་རབ་བྱུང་བསྙེན་རྫོགས་བྱས་སོ། །མུ་སྟེགས་ཅན་རྣམས་ཀྱི་གསོ་སྦྱོང་བཅུ་བཞི་པ་དང༌། དགེ་སློང་རྣམས་ཀྱི་བཅོ་ལྔ་པ་ཡིན་པས། བཅུ་བཞི་ལ་མུ་སྟེགས་ཅན་དང༌། བཅོ་ལྔ་ལ་དགེ་སློང་རྣམས་ཀྱི་ནང་དུ་གསོ་སྦྱོང་ལ་ཕྱིན་ཏོ། །རེ་ཞིག་ན་ཞག་བྲི་ནས་དགེ་སློང་རྣམས་ཀྱི་གསོ་སྦྱོང་བཅུ་བཞི་པ་ལ་བབ་པ་དང༌། དེས་གང་དུ་འགྲོ་བསམས་པ། དགེ་སློང་འདི་དག་ནི་དེས་པ། འགྲོགས་ན་བདེ་བ། བདག་གི་ཚངས་པ་མཚུངས་པར་སྤྱོད་པ་རྣམས་ནི་ངང་ཚུལ་ངན་པ་ཡིན་པས། བདག་གི་ཚུལ་ཤིང་ཡང་ཕྱུང་བར་འགྱུར། སྤང་ལེབ་ཀྱང་སྐྱུར་བར་འགྱུར། །སློང་ཕོར་ཁ་ཕུབ་བར་འགྱུར། འཁར་བའང་བོར་བར་འགྱུར། (༤༦ན)དེ་རྣམས་ཀྱི་ནང་ནས་ཀྱང་ཕྱུང་བར་འགྱུར་སྙམ་ནས་མུ་སྟགས་ཅན་རྣམས་ཀྱི་ནང་དུ་སོང་ངོ༌། །དགེ་སྐོས་ཀྱིས་དགེ་སློང་རྣམས་བསྔོས་པ་ན་དེ་མ་ཚང་བར་ཤེས་ནས་ཕྱོགས་བཞིར་བལྟས་ཀྱང་མ་རྙེད་པར་གསོ་སྦྱོང་བྱས་སོ། །
ཕྱི་དེ་ཉིན་པར་དེ་འོངས་པ་ན། ཁྱོད་གང་ནས་འོངས། ཚངས་པ་མཚུངས་པར་སྤྱོད་པ་དག་གི་གནས་ནས་སོ། །སུ་ཡིན། མུ་སྟེགས་ཅན་དག་ཡིན་ཏེ། ཁོ་བོ་ཟང་ཟིང་གི་ལོངས་སྤྱོད་འདིར་བྱེད་ལ། ཆོས་ཀྱི་ལོངས་སྤྱོད་དེར་བྱེད་དོ་ཞེས་ཟེར་བའི་སྐབས་དེ་གསོལ་བ་དང༌། འདི་ནི་མུ་སྟེགས་ཅན་ཞུགས་པ་ཡིན་ཏེ། མུ་སྟེགས་ཅན་ཞུགས་པ་ནི་མི་སྐྱེ་བའི་ཆོས་ཅན་ཡིན་པས་བསྙིལ་བར་བྱའོ། །ཉེ་བར་འོངས་པ་ལ། མུ་སྟེགས་ཅན་མ་ཡིན་ནམ་ཞེས་དྲི་བར་བྱའོ། །ཇི་ཙམ་གྱིས་མུ་སྟེགས་ཅན་ཞུགས་པ་ལགས་ཞེས་ཞུས་པས། རབ་ཏུ་བྱུང་བ་འདི་ཡང་དག་པར་བླངས་པ། ལྟ་བ་དེ་དང་ལྡན་པ། ཆོས་གོས་འདི་བོར་ཏེ་རྒྱལ་མཚན་དེས་དེར་སྐྱ་རེངས་ཤར་ན་དེ་ཉིད་ཡིན་ནོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བྱུང་ནས། ཆུང་མ་ལ། འུ་བུ་ཅག་གི་བུ་ལོན་འཁོར་བར་བྱེད་པ་བྱུང་གིས། ཟོང་ཐོགས་ཏེ་ཡུལ་གཞན་དུ་འགྲོའོ། །རྗེའི་སྲས། དེ་བཞིན་དུ་མཛོད་ཅིག །དེ་ཡུལ་གཞན་དུ་སོང་བ་དང་ཤི་ནས། མས་བུ་དེ་ཉེ་དུ་དང་ལག་མཐུས་བསྐྱེད་དེ་ཆེར་སྐྱེས་པ་ན། ནེའུ་ལྡངས་དང་ལྷན་ཅིག་ཁྱིམ་ཞིག་གི་དྲུང་དུ་སོང་བ་དང༌། ཁྱིམ་དེའི་སྟེང་ནས་བུ་མོ་ཞིག་གིས་དེའི་སྟེང་དུ་མེ་ཏོག་གི་ཆུན་པོ་འཕངས་པ་དེས་མཐོང་ངོ༌། །
ནེའུ་ལྡངས་དེས་སྨྲས་པ། ཁྱོད་ཀྱིས་ཁྱིམ་དེར་བརྡ་མ་བྱས་སམ། བྱས་སོ། །གྲོགས་པོ། ཁྱིམ་འདི་ནི་ཡ་ང་བ་ཡིན་གྱིས་མ་འཇུག་ཅེས་སྨྲས་ནས། ཉིན་ཐོག་ཐག་མཆན་དུ་བཅུག་སྟེ་མའི་གན་དུ་ཁྲིད་ནས། ཁྱོད་ཀྱི་བུ་འདིས་ཆེ་གེ་མོར་བརྡ་བྱས་ཀྱིས་སྲུངས་ཤིག །དེས། བུ། ཁྱོད་ཀྱིས་ཁོ་མོ་ལ་བསྙད་པ་ལེགས་སོ། །དེས་དེ་ཁྱིམ་དུ་མལ་བཅས་ནས་གྱོ་མོ་གཉིས་དང་ཆུ་དང་ས་བཞག་སྟེ། རང་ཉིད་སྒོར་ཁྲི་བཅས་ནས་ཉལ་ལོ། །དེས། མ། སྒོ་ཕྱེ་ཞིག །ཅིའི་ཕྱིར། གཅིར་འགྲོའོ། །གྱོ་མོ་བཞག་གིས་དེར་གཅིས་ཤིག །དེས་ཡུད་ཙམ་ཞིག་བསྡད་ནས་སྨྲས་པ། སྒོ་ཕྱེ་ཞིག །ཅིའི་ཕྱིར། བཤང་དུ་འགྲོའོ། །གྱོ་མོ་དང་ཆུ་དང་ས་བཞག་གིས་དེར་གཅིས་ཤིག །ཡང་ཡུད་ཙམ་ཞིག་བསྡད་ནས། མ། སྒོ་ཕྱེ་ཞིག །བུ། ཁྱོད་གང་དུ་འགྲོ་ཤེས་ཀྱིས་སྒོ་མི་དབྱེའོ། །མི་འབྱེད་ན་གསད་དོ། །བུ། ཁོ་མོ་ཤི་བ་བླ་ཡི། བུ་ཤི་བ་ལ་ལྟ་མི་ཕོད་དོ། །འདོད་པ་བསྟེན་པས་ནི་སྡིག་པ་མི་བྱ་བ་མེད་པས་འཇིག་རྟེན་ཕ་རོལ་བཏང་བ་དེས་རལ་གྲིས་མའི་མགོ་བཅད་དེ་ས་ལ་བསྒྱེལ་ལོ། །དེས་མ་བསད་ནས་སོང་བ་དང༌། སྡིག་པ་བྱས་པ་འདར་བས། བུ་མོ་དེས་སྨྲས་པ། རྗེའི་སྲས། གཞན་སུ་ཡང་མ་མཆིས་ཀྱིས་མ་འཇིགས་ཤིག །(༤༦བ)དེས་བསམས་པ། དེ་འདི་ལ་སྨྲས་ན་དགའ་བར་འགྱུར་སྙམ་ནས། ཁོ་བོས་ཁྱོད་ཀྱི་ཕྱིར་དུ་མ་བསད་དོ། །ཅི་མ་མའམ། སྐྱེད་མ་མོ། སྐྱེད་མ་མོའོ། །
དེས་བསམས་པ། འདི་ཡོན་ཏན་མི་ཤེས་པར་མ་བསད་པས། བདག་ལ་ཁྲོས་ན་སྐབས་ཅི་ཞིག་འབྱུང་བར་འགྱུར་སྙམ་ནས་སྨྲས་པ། རྗེའི་སྲས། བདག་ཁང་ཐོག་ཏུ་འཛེགས་ནས་སླར་མཆི་བའི་བར་དུ་ཡུད་ཙམ་བཞེས་ཤིག །དེ་བཞིན་གྱིས་ཤིག །དེ་ཁང་ཐོག་ཏུ་འཛེགས་ནས། ཆོམ་རྐུན་པ་ཆོམ་རྐུན་པ་ཞེས་སྒྲ་ཕྱུང་བ་དང༌། དེ་སྐྲག་ནས་བྲོས་ཏེ་རང་གི་ཁྱིམ་དུ་སོང་ནས་སྒོ་དྲུང་དུ་རལ་གྲི་བཞག་སྟེ། ཆོམ་རྐུན་མ་དེས་ཁོ་བོའི་མ་བསད་ནས་བྲོས་སོ་ཞེས་མའི་རོ་དེ་བཀུར་སྟི་བྱས་ནས་སོང་ངོ༌། །སྡིག་པའི་ལས་བྱས་པས་བརྟན་པ་མི་རྙེད་པས། དེ་མུ་སྟེགས་ཅན་གྱི་གནས་དང༌། དཀའ་ཐུབ་ཀྱི་གནས་སུ་སོང་ནས། ཅི་ཞིག་བྱས་ན་སྡིག་པ་ཟད་པར་འགྱུར། ཁ་ཅིག་ན་རེ། མེར་མཆོངས་ཤིག །དུག་ཟོ་ཞིག །གཡང་སར་མཆོངས་ཤིག །ཐག་པས་འགགས་ཏེ་ཤི་ཞིག་ཅེས་ཟེར་ཏེ་ཐམས་ཅད་ཀྱང་འཆི་བའི་ཐབས་སྟོན་གྱི། ངེས་འབྱུང་གི་ཐབས་སྟོན་པ་ནི་འགའ་ཡང་མེད་དོ། །དེ་རྒྱལ་བྱེད་ཚལ་དུ་སོང་བ་དང༌། དགེ་སློང་ཞིག །གང་གིས་སྡིག་པའི་ལས་བྱས་པ། །དགེ་བ་ཡིས་ནི་འགོག་བྱེད་དེ། །ཉི་ཟླ་སྤྲིན་ནས་བྱུང་བ་ལྟར། །འཇིག་རྟེན་འདིར་ནི་དེ་སྣང་འགྱུར། །ཞེས་ཁ་དོན་བྱེད་པ་ཐོས་ནས། དེས་བསམས་པ། སྡིག་པའི་ལས་ཀྱང་འགག་ནུས་ཀྱིས་འདི་དག་གི་ནང་དུ་རབ་ཏུ་འབྱུང་ངོ་སྙམ་ནས། དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། དེས་དེ་རབ་ཏུ་བྱུང་ནས་བསྙེན་པར་རྫོགས་པར་བྱས་ཏེ། བརྩོན་འགྲུས་བརྩམས་པས་སྡེ་སྣོད་གསུམ་དང་ལྡན་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །དེ་ལ་དགེ་སློང་རྣམས་ཀྱིས། ཁྱོད་བརྩོན་འགྲུས་འདིས་ཅི་ཞིག་དོན་དུ་གཉེར། དེས་སྨྲས་པ། སྡིག་པ་ཟད་པར་བྱའོ། །སྡིག་པ་ཅི་བྱས། མ་བསད་དོ། །ཅི། མ་མའམ་འོན་ཏེ་སྐྱེད་མ་མོ་ཡིན། སྐྱེད་མ་མོའོ་ཟེར་བའི་སྐབས་དེ་གསོལ་བ་དང༌། མ་བསད་པ་ནི་མི་སྐྱེ་བའི་ཆོས་ཅན་ཡིན་པས་བསྙིལ་བར་བྱའོ། །ཉེ་བར་འོངས་པ་ལ། མ་བསད་པ་མ་ཡིན་ནམ་ཞེས་དྲི་བར་བྱའོ། །དེས་བསམས་པ། ཅི། འབབ་བམ་མཐའ་འཁོབ་ཏུ་འགྲོ་སྙམ་ནས་མཐའ་འཁོབ་ཏུ་སོང་སྟེ། ཁྱིམ་བདག་ཅིག་དད་པར་བྱས་ནས། གཙུག་ལག་ཁང་རྩིག་ཏུ་བཅུག་སྟེ། དེ་ནས་གནས་པ་དང་ཕྱོགས་ཐ་དད་ནས་འོངས་པའི་དགེ་སློང་མང་པོ་དེའི་གདམས་ངག་གིས་དགྲ་བཅོམ་པ་ཐོབ་བོ། །རེ་ཞིག་ན་དེ་ན་ནས་རྩ་བའི་སྨན་ལ་སོགས་པས་གསོས་ཀྱང་ཉམས་དམས་ཏེ། དེས་ལྷན་ཅིག་གནས་པ་རྣམས་ལ། ཁོ་བོའི་ཕྱིར་དུ་དགེ་འདུན་ལ་བསྲོ་ཁང་གྱིས་ཤིག །དེ་རྣམས་ཀྱིས་དེའི་ཕྱིར་དུ་བསྲོ་ཁང་བྱས་སོ། །བསགས་པ་ཀུན་གྱི་མཐའ་(༤༧ན)འཛད་ཅིང༌། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས། དེ་ཤི་ནས་མནར་མེད་དུ་སྐྱེས་སོ། །དེའི་ལྷན་ཅིག་གནས་པ་དགྲ་བཅོམ་པ་ཞིག་གིས་དེ་གང་དུ་སྐྱེས་བལྟས་པ་ན་མནར་མེད་དུ་སྐྱེས་པར་མཐོང་ནས། མཁན་པོ་ཚུལ་ཁྲིམས་དང་ལྡན་པ། མང་དུ་ཐོས་པ་ཡིན་ན། ལས་ཅི་བྱས་པས་མནར་མེད་དུ་སྐྱེས་བསམས་པས་མ་བསད་པར་མཐོང་ངོ༌། །དེ་མནར་མེད་ཀྱི་མེའི་འོད་ཀྱིས་ཕོག་པ་དང༌། ཀྱེ། བསྲོ་ཁང་མེ་རེ་ཚ་ཞེས་སྨྲས་པ་དང༌། དམྱལ་སྲུང་གིས་ཐོ་བ་མགོར་བསྣུན་ནས། སྐལ་ཆད་ཁྱོད་ཀྱི་བསྲོ་ཁང་གང་ན་ཡོད། འདི་ནི་མནར་མེད་པ་ཡིན་ནོ་ཞེས་སྨྲས་སོ། །དེ་དགེ་བའི་སེམས་ཀྱིས་ཤི་ནས་རྒྱལ་ཆེན་རིས་བཞིའི་ལྷར་སྐྱེས་སོ། །ལྷའི་བུ་དང་བུ་མོ་ནི་སྐྱེས་ནས་རིང་པོ་མ་ལོན་པ་ན་སེམས་གསུམ་སྐྱེ་སྟེ། གང་ནས་ཤི། གང་དུ་སྐྱེ། ལས་གང་གིས་སྐྱེས་པའོ། །དེ་དམྱལ་བ་ནས་ཤི་འཕོས་པ་དང༌། རྒྱལ་ཆེན་རིས་བཞིའི་ལྷར་སྐྱེས་པ་དང༌། དགེ་འདུན་ལ་བསྲོ་ཁང་གི་ཁྲུས་བྱས་པས་སྐྱེས་པར་མཐོང་ནས། བདག་ཞག་ལོན་ཏེ་བཅོམ་ལྡན་འདས་ལ་ལྟ་བ་དང༌། བསྙེན་བཀུར་བ་ནི་ཚུལ་དང་མི་མཐུན་པས་ད་ལྟ་འགྲོའོ་སྙམ་ནས། ལྷའི་ཨུཏྤལ་དང༌། པད་མ་ལ་སོགས་པས་ཐུ་བ་བཀའ་སྟེ། བཅོམ་ལྡན་འདས་ལ་མངོན་པར་གཏོར་ནས་ཕྱག་འཚལ་ཏེ་འདུག་པ་དང༌། དེའི་འོད་ཀྱིས་རྒྱལ་བྱེད་ཚལ་ཐམས་ཅད་སྣང་བར་བྱས་སོ། །
བཅོམ་ལྡན་འདས་ཀྱིས་དེའི་བསམས་པ་དང༌། བག་ལ་ཉལ་དང༌། ཁམས་དང༌། རང་བཞིན་ཐུགས་སུ་ཆུད་ནས་སྟན་དེ་ཉིད་ལ་འདུག་བཞིན་དུ་བདེན་པ་བཞི་རྟོགས་པར་བྱེད་པའི་ཆོས་བསྟན་པས་བདེན་པ་མཐོང་སྟེ། བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་བདག་ལ་ཕས་ཀྱང་མ་བགྱིས། མས་ཀྱང་མ་བྱིན། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་དག་གིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱལ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་དག་ནས་ནི་རྐང་པ་ཕྱུང༌། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་དེ་ཚོང་པ་ཁེ་སྤོགས་རྙེད་པ་དང༌། ཞིང་པ་ལོ་ཏོག་འབྱོར་བ་དང༌། དཔའ་བོ་གཡུལ་ལས་རྒྱལ་བ་དང༌། ནད་པ་ནད་ལས་ཐར་པ་ལྟ་བུར་གྱུར་ཏེ། སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ༌། །(༤༧བ)དེའི་ལྷན་ཅིག་གནས་པ་དགེ་འདུན་གྱི་གནས་བརྟན་དགྲ་བཅོམ་པ་ཟས་ཀྱི་གྲལ་ན་འདུག་སྟེ། གཞན་ཞིག་གིས་ལག་ཆུ་གྲང་མོ་བྲིམས་པ་དང༌། བདག་ཅག་ཆུ་གྲང་མོ་འདི་ལྟ་བུ་འཐུང་ན། མཁན་པོ་ནི་མནར་མེད་ན་ཟངས་ཁུ་བསྐོལ་མ་འཐུང་ངོ་སྙམ་ནས། དེས་མནར་མེད་དུ་བལྟས་པ་ན་མི་སྣང་ངོ༌། །
དམྱལ་བ་གཞན་དང༌། དུད་འགྲོ་དང༌། ཡི་དྭགས་དང༌། མི་རྣམས་ཀྱི་ནང་ནའང་མི་སྣང་སྟེ། རྒྱལ་ཆེན་རིས་བཞི་པའི་ལྷར་སྐྱེས་ནས་སྟོན་པའི་སྤྱན་སྔར་བདེན་པ་མཐོང་སྟེ་ལྷ་རྣམས་ཀྱི་ནང་ན་འདུག་པ་མཐོང་ནས། འཛུམ་པ་སྔོན་དུ་བཏང་སྟེ། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ནི་ལེགས་པར་གསུངས་པ་ཉིད། སྡིག་པ་བྱེད་པ། ལོག་པར་ལྟུང་བ་དེ་ལྟ་བུས་ཀྱང་ཡོན་ཏན་ཚོགས་འདི་ལྟ་བུ་ཐོབ་བོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །ལག་ཆུ་འབྲིམ་པ་དེས། ཁྱོད་མཁན་པོ་འདས་པས་དགེ་འདུན་གྱི་གནས་བརྟན་དུ་གྱུར་ཏོ་སྙམ་ནས་དགའ་འམ། དེས་སྨྲས་པ། དགེ་འདུན་གྱི་ནང་དུ་དྲིས་ཤིག །དེར་ལན་གདབ་པར་བྱའོ། །དགེ་འདུན་ཚོགས་པའི་ཚེ་གནས་བརྟན་གྱིས་དེ་ལ། ཁྱོད་ཀྱིས་དེའི་ཚེ་ཅི་སྨྲས། དེས་སྔར་བཞིན་སྨྲས་པ་དང༌། དགྲ་བཅོམ་པ་དེས་སྐབས་དེ་དགེ་འདུན་གྱི་ནང་དུ་རྒྱ་ཆེར་བརྗོད་པ་དང༌། དེ་རྣམས་ཀྱང་ཡི་རང་ནས། ཀྱེ་མ་སངས་རྒྱས་ཞེས་སོགས་ཆེད་དུ་བརྗོད་དོ། །ཕ་བསད་པ་ནི། མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བྱུང་སྟེ་ཆེར་སྐྱེས་པ་ན་ནེའུ་ལྡངས་དང་ལྷན་ཅིག་ཁྱིམ་ཞིག་གི་དྲུང་དུ་སོང་བ་ན་ཞེས་སོགས་ཕ་མའི་མིང་བརྗེ་བ་མ་གཏོགས་སྔ་མ་དང་ཐམས་ཅད་འདྲའོ། །སྟོན་པ་མཉན་ཡོད་ན་བཞུགས་སོ། །
གང་གི་ཚེ་བཅོམ་ལྡན་འདས་ཀྱིས་ལྟང་བྲང་གི་ཚལ་གསེབ་ཏུ་གཟུགས་ཅན་སྙིང་པོ་ལྷ་བརྒྱད་ཁྲི་དང་བྲམ་ཟེ་དང་ཁྱིམ་བདག་འབུམ་ཕྲག་དུ་མ་དང་ལྷན་ཅིག་ཏུ་བདེན་པ་ལ་བཀོད་པ་ན། དེས་རང་གི་ཡུལ་དུ་དྲིལ་བསྒྲགས་ཏེ། ངའི་ཡུལ་དུ་ཆོམ་རྐུན་བྱེད་པ་ན་ངས་དེ་ཡུལ་མེད་པར་བྱ་ཞིང༌། སྐྱིན་པ་ནི་ངའི་མཛོད་ནས་སྦྱིན་པར་བྱའོ་ཞེས་བསྒོའོ། །ཀོ་ས་ལའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་བའི་ཚེ་ན་དེས་ཀྱང་དེ་ལྟར་དྲིལ་བསྒྲགས་པ་དང༌། ཡུལ་མ་ག་དྷའི་ཆོམ་རྐུན་པ་དང༌། ཀོ་ས་ལའི་ཆོམ་རྐུན་པ་རྣམས་ས་མཚམས་སུ་འཁོད་དེ་ཡུལ་དེ་གཉིས་ནས་འོང་བའི་དོན་མཐུན་འཇོམས་སོ། །རེ་ཞིག་ན་མ་ག་དྷ་ནས་དོན་མཐུན་བསེལ་པ་དང་བཅས་པ་ཀོ་ས་ལར་འཕགས་ནས་ས་མཚམས་ཀྱི་བར་དུ་ཕྱིན་པའི་ཚེ། དེད་དཔོན་གྱིས་སྨྲས་པ། རྒྱལ་པོ་གསལ་རྒྱལ་ནི་གདུག་པ། ཕ་རོལ་གནོན་པ་ཡིན་པས། བདག་ཅག་ལ་བསྐྱིན་པ་སྦྱིན་དུ་འཇུག་ནུས་པ་ཡིན་ན། ཅིའི་ཕྱིར་བསེལ་པ་ལ་གླ་སྦྱིན་ཞེས་དེ་དག་བཟློག་སྟེ་དོན་མཐུན་(༤༨ན)ཆས་པ་དང༌། ཆོམ་རྐུན་པ་དེ་དག་གིས་མཐོང་ནས་ཚོང་པ་ཁ་ཅིག་སྲོག་དང་ཕྲལ། ཁ་ཅིག་བྲོས་སོ། །དགྲ་བཅོམ་པ་ནི་མ་བསམས་པར་ཤེས་པ་མི་འཇུག་པས། དགྲ་བཅོམ་པ་དོན་མཐུན་པ་དང་འགྲོགས་པ་ཞིག་ཀྱང་བསད་དོ། །
དེ་ནས་དོན་མཐུན་པ་བྲོས་པ་དེ་དག་ཀུ་ཅོ་འདོན་ཅིང་རྒྱལ་པོ་གསལ་རྒྱལ་གྱི་དྲུང་དུ་ཕྱིན་ནས། ལྷ། ཁྱོད་ཀྱི་ཡུལ་དུ་བདག་ཅག་ཚོང་པར་མི་རུང་བར་བྱས་སོ། །ཅི་བྱས། ཆོམ་རྐུན་པས་བཅོམ་མོ། །རྒྱལ་པོས་འཕགས་སྐྱེས་པོ་ལ། རྐུན་རྫས་དང་ཆོམ་རྐུན་པ་རྣམས་མྱུར་དུ་ཁུག་ཅིག །དེ་དཔུང་ཚོགས་དང་བཅས་པ་ཕྱིར་བྱུང་བ་དང༌། ཆོམ་རྐུན་པ་རྣམས་གོ་ཕུད་ནས་བག་ཡངས་སུ་རྐུན་རྫས་བགོད་པ་ལས། ཕྱོགས་བཞི་ནས་བསྐོར་ཏེ་དུང་དང་རྔའི་སྒྲ་བསྒྲགས་པ་དང༌། དེ་རྣམས་ལས་ཁ་ཅིག་ནི་རྐུན་རྫས་བོར་ཏེ་བྲོས། ཁ་ཅིག་བསད། དྲུག་ཅུ་བཟུང་སྟེ་རྐུན་རྫས་དང་བཅས་པ་རྒྱལ་པོ་ལ་ཕུལ་བ་དང༌། རྒྱལ་པོས་དེ་རྣམས་ལ་སྨྲས་པ། ཁྱེད་ཀྱིས། ངའི་ཡུལ་དུ་སུས་ཀྱང་ཆོམ་རྐུན་མི་བྱའོ། །བྱས་ནས་དེ་གསད་ཅིང་བསྐྱིན་པ་ངའི་མཛོད་ནས་སྦྱིན་ནོ་ཞེས་བསྒྲགས་པ་མ་ཐོས་སམ། ལྷ། ཐོས་སོ། འོ་ན་ཅིའི་ཕྱིར་ཚོང་པ་བཅོམ། ལྷ། འཚོ་བ་མ་མཆིས་སོ། །ཅིའི་ཕྱིར་སྲོག་དང་ཕྲལ། འཇིགས་པ་བསྟན་པའི་སླད་དུའོ། །འོ་ན་ཁྱེད་ལངའ་སྔོན་སུས་ཀྱང་མ་མཐོང་བའི་འཇིགས་པ་བསྟན་པར་བྱའོ། །རྒྱལ་པོས་བློན་པོ་རྣམས་ལ། འདི་ཐམས་ཅད་སོད་ཅིག །དེ་དག་གིས་ལམ་པོ་ཆེ་ལ་སོགས་པར་སྒྲོག་ཅིང་བསད་སར་ཁྲིད་པ་ན་ཆོམ་རྐུན་པ་ཞིག་བྲོས་ནས་རྒྱལ་བྱེད་ཚལ་དུ་དགེ་སློང་གི་གན་དུ་སོང་སྟེ། བདག་རབ་ཏུ་དབྱུང་དུ་གསོལ། དེས་དེ་རབ་བྱུང་བསྙེན་རྫོགས་བྱས་སོ། །སྟོན་པས། དེ་སློང་དག །རང་གཞན་གྱི་འབྱོར་རྒུད་ལ་རྟོགས་ཤིག །དེ་ནི་སྐྱོ་བའི་གནས་ཡིན་པའི་ཕྱིར་རོ་ཞེས་གསུངས་པས། དགེ་སློང་རྣམས་དུར་ཁྲོད་རྒྱུར་སོང་བ་ན་དགེ་སློང་དེའང་སོང་བ་ལས་དེས་ཆོམ་རྐུན་པ་དེ་དག་བསད་པ་མཐོང་ནས་མཆི་མས་བརྣངས་ཏེ་འདུག་པ་དང༌། དགེ་སློང་རྣམས་ཀྱིས་སྨྲས་པ། འདི་གསར་དུ་རབ་ཏུ་བྱུང་བ་ཡིན་ན་ཡང་བསམ་པ་འདི་ལྟར་བཟང་ངོ༌། །དེས་སྐད་ཕྱུང་སྟེ་ངུས་པ་དང༌། ཅིའི་ཕྱིར་དུ། འདི་ནི་བདག་གི་ཕའོ། །འདི་ནི་ཕུ་ནུའོ། །འདི་ནི་ཁུ་བོའོ། །འདི་ནི་ཞང་པོའོ། །འདི་རྣམས་ཀྱིས་དགྲ་བཅོམ་པ་བསད་དམ། བསད་དོ། །ཟེར་བའི་སྐབས་དེ་གསོལ་བ་དང༌། འདི་ནི་དགྲ་བཅོམ་པ་བསད་པ་ཡིན་ཏེ། དགྲ་བཅོམ་པ་བསད་པ་ནི་མི་སྐྱེ་བའི་ཆོས་ཅན་ཡིན་པས་བསྙིལ་བར་བྱའོ། །རབ་ཏུ་འབྱུང་བའི་ཕྱིར་ཉེ་བར་འོངས་པ་ལ། དགྲ་བཅོམ་པ་བསད་པ་མ་ཡིན་ནམ་ཞེས་དྲི་བར་བྱའོ། །ཉེ་བར་འཁོར་གྱིས་ཞུས་པ། གང་གིས་སྔོན་རབ་ཏུ་བྱུང་ནས། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ཕྱེ་བ་དེ་གལ་ཏེ་(༤༨བ)རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན་རབ་ཏུ་དབྱུང་བར་བགྱིའམ། ཉེ་བར་འཁོར་མི་བྱའོ། །དེས་ན་རབ་ཏུ་འབྱུང་བའི་ཕྱིར་ཉེ་བར་འོངས་པ་ལ། དགེ་འདུན་གྱི་དབྱེན་བྱས་པ་མ་ཡིན་ནམ་ཞེས་དྲི་བར་བྱའོ། །ཉེ་བར་འཁོར་གྱིས་ཞུས་པ། གང་གིས་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན་རབ་ཏུ་དབྱུང་བར་བགྱིའམ། ཉེ་བར་འཁོར། མི་བྱའོ། །དེས་ན་རབ་ཏུ་འབྱུང་བའི་ཕྱིར་ཉེ་བར་འོངས་པ་ལ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ་ཞེས་དྲི་བར་བྱའོ། །སྟོན་པ་ཡུལ་ཀ་ཤིར་ལྗོངས་རྒྱུ་ཞིང་གཤེགས་ནས་ཕྱོགས་ཤིག་ཏུ་བྱོན་པ་ན་འཛུམ་པ་མཛད་པའི་ཞལ་ནས་འོད་ཟེར་བཀྱེ་སྟེ་ལས་གཉིས་མཛད་ནས་ཞབས་མཐིལ་དུ་ནུབ་བོ། །ཀུན་དགའ་བོས་རྒྱུ་ཞུས་པ། ཀུན་དགའ་བོ། ཕྱོགས་འདི་ཉིད་དུ་གཡོན་ཅན་རབ་ཏུ་མང་པོས་དགེ་སློང་མ་རབ་ཏུ་མང་པོ་ལུས་བསྐྱོད་པས་སུན་ཕྱུང་སྟེ་ཤི་འཕོས་ནས་དམྱལ་བར་སྐྱེ་བར་འགྱུར་རོ། །
དེ་ནས་དགེ་སློང་ཞིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། གཡོན་ཅན་རབ་ཏུ་མང་པོས་དགེ་སློང་མ་སུན་ཕྱུང་བ་དེ་དག་གི་ནང་ནས་གཅིག་བདག་ལགས་སོ། །མི་གཏི་མུག་ཅན་ཁྱོད་ཀྱིས་ཀྱང་དགེ་སློང་མ་སུན་ཕྱུང་ངམ། བཙུན་པ། ཕྱུང་ལགས་སོ། །སྟོན་པས། དགེ་སློང་དག །དགེ་སློང་མ་སུན་ཕྱུང་བ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཉིད་ཡིན་པས་བསྙིལ་བར་བྱའོ། །རབ་ཏུ་འབྱུང་བའི་ཕྱིར་ཉེ་བར་འོངས་པ་ལ། དགེ་སློང་མ་སུན་ཕྱུང་བ་མ་ཡིན་ནམ་ཞེས་དྲི་བར་བྱའོ། །ཉེ་བར་འཁོར་གྱིས་ཞུས་པ། སྔོན་རབ་ཏུ་བྱུང་བ་ན་ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་བྱུང་བ་དེ་གལ་ཏེ་རབ་ཏུ་འབྱུང་བ་དང་བསྙེན་པར་རྫོགས་པར་འཚལ་ན། རབ་ཏུ་དབྱུང་བར་བགྱིའམ། མི་བྱའོ། །དེས་ན་རབ་ཏུ་འབྱུང་བའི་ཕྱིར་ཉེ་བར་འོངས་པ་ལ། ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་བྱུང་བ་མ་ཡིན་ནམ་ཞེས་དྲི་བར་བྱའོ། །སྟོན་པ་མཉན་ཡོད་ན་བཞུགས་པའི་ཚེ་བཀའ་སྩལ་པ། གལ་ཏེ་མ་མཐོང་བ་གནས་ནས་ཕྱུང་བ་བབས་པ་ཞིག །ཡང་ཕྱིར་འོངས་ནས། ལྟུང་བ་མཐོང་གིས་བདག་རབ་ཏུ་དབྱུང་བར་གསོལ་ཟེར་ན་རབ་ཏུ་དབྱུང་བར་བྱའོ། །རབ་ཏུ་བྱུང་ནས། ལྟུང་བ་བཤགས་པར་བྱ་ཡི་བདག་བསྙེན་པར་རྫོགས་པར་མཛད་དུ་གསོལ་ཞེས་ཟེར་ན་བསྙེན་པར་རྫོགས་པར་བྱའོ། །བསྙེན་པར་རྫོགས་ནས། ལྟུང་བ་མ་མཐོང་ངོ་ཞེས་ཟེར་ན་དགེ་འདུན་ཚོགས་པ་ཡོད་ནའང་མ་མཐོང་བ་གནས་ནས་དབྱུང་བར་བྱའོ། །ཚོགས་པ་མེད་ལ་བསྙེན་པར་རྫོགས་ན་ལེགས་པར་བསྙེན་པར་རྫོགས་པ་ཡིན་ཏེ། གང་ཟག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་རྙེད་དཀའ་བའི་ཕྱིར་རོ། །དེ་བཞིན་(༤༩ན)དུ་ཕྱིར་མི་འཆོས་པ་དང་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་གནས་ནས་ཕྱུང་བ་ལའང་ངོ༌། །དྲུག་སྡེས་རབ་ཏུ་བྱུང་བ་དང༌། བསྙེན་པར་རྫོགས་པར་བྱས་པ་རྣམས། དེ་དག་གནས་ངན་ལེན་ཀུན་ཏུ་སྤྱོད་པར་མི་ཤེས་ཀྱི་བར་དུ་དེ་དག་དང་ལྷན་ཅིག་གནས་པར་བྱེད་ལ། ཤེས་པའི་ཚེ་དགེ་སློང་གཞན་དང་ལྷན་ཅིག་གནས་པར་བྱེད་དེ། སྟོན་པའི་བཀའ་ལུང་གིས་དུས་གསུམ་དུ་བལྟར་འགྲོ་བ་འབའ་ཞིག་བྱེད་དོ། །དེ་དག་གིས་གྲོས་བྱས་པ། ལྷུང་བཟེད་ནག་པོ་ཅན་འདི་དག་ནི་བཅས་འཕྲོག་པ་དང་འདྲ་སྟེ། བདག་ཅག་གིས་རབ་ཏུ་བྱུང་བ་རྣམས་འཕྲོག་པར་བྱེད་ཀྱིས། ད་ནི་དེ་དག་གིས་དབྲོག་པར་མི་ནུས་པ་དེ་འདྲ་རབ་ཏུ་དབྱུང་ངོ་ཞེས་ཟེར་ནས། ཉེ་དགས་མི་ལག་རྡུམ་ཞིག་མཐོང་སྟེ། སྨྲས་པ། བཞིན་བཟང༌། ཅིའི་ཕྱིར་རབ་ཏུ་མི་འབྱུང༌། བདག་ལག་པ་མ་ཚང་བ་སུ་ཞིག་གིས་རབ་ཏུ་འབྱིན། ཉེ་དགས། སྟོན་པའི་བསྟན་པ་ཐུགས་རྗེས་རབ་ཏུ་ཕྱེ་བ་ཡིན་གྱིས་ཁོ་བོས་རབ་ཏུ་དབྱུང་ངོ་ཞེས་དེ་རབ་བྱུང་བསྙེན་རྫོགས་བྱས་ནས་ཞག་གཉིས་གསུམ་དུ་ཀུན་ཏུ་སྤྱོད་པའི་ཆོས་རྣམས་བསླབས་ཏེ། རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་སྤྱོད་ཡུལ་ཡིན་པས་བསོད་སྙོམས་ཀྱིས་འཚོ་བར་གྱིས་ཤིག །མཁན་པོ། ཇི་ལྟར་བསོད་སྙོམས་བགྱི། ཁྱོད་ཀྱིས་དེ་ཙམ་ཡང་མི་ཤེས་སམ། ངས་བསྟན་པར་བྱའོ་ཞེས་དེའི་ཤམ་ཐབས་ནི་སྲད་བུས་བཅིངས། ཆོས་གོས་ནི་ཚེར་མས་གཏུམས་ཏེ་བསྐོན། དཔུང་པ་གཡོན་པར་ལྷུང་བཟེད་ཀྱི་སྣོད་བཞག །དཔུང་པ་གཡས་པར་འཁར་གསིལ་བཏགས་སོ། །དེ་མཉན་ཡོད་དུ་ཞུགས་པ་དང༌། བུད་མེད་ཀྱིས་བྲང་བརྡུངས་ནས། སུས་ཁྱོད་རབ་བྱུང་གི་ལག་པ་གཉིས་བཅད། སྲིང་མོ། ཁྱིམ་པའི་དུས་ཁོ་བོའི་ལག་པ་ཆད་ཀྱི། རབ་ཏུ་བྱུུང་ནས་ཆད་པ་མ་ཡིན་ནོ། །ཁྱོད་སུས་རབ་ཏུ་བྱུང༌། མཁན་པོ་ཉེ་དགས་སོ། །གནས་ངན་ལེན་ཀུན་ཏུ་སྤྱོད་པ་དེ་མ་གཏོགས་གཞན་སུས་འདི་རབ་ཏུ་འབྱིན་ཟེར་བའི་སྐབས་དེ་གསོལ་བ་དང༌། ཉེས་དམིགས་གང་བྱུང་བ་དེ་ནི་ལག་རྡུམ་རབ་ཏུ་འབྱིན་པ་ལས་གྱུར་པ་ཡིན་པས། ལག་རྡུམ་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱའོ། །
དེ་བཞིན་དུ་རྐང་རྡུམ་ནས། རྒན་ཆེས་པའི་བར་དེ་བཞིན་ནོ། །དགེ་སློང་དག་གིས་གཞོན་ཆེས་པ་རབ་ཏུ་བྱུང༌། དེ་དག་གིས་དགེ་འདུན་གྱི་གནས་མལ་བཤང་གཅིས་མ་རུང་བར་བྱས་པས། དེ་དག་ཀྱང་རབ་ཏུ་དབྱུང་བར་མི་བྱའོ། །དེ་བཞིན་དུ་འཐེང་བོ་དང༌། སྨད་འཆལ་དང༌། ཞར་བ་དང༌། ལག་སོར་རྡུམ་པོ་དང༌། སྒུར་པོ་དང༌། མིའུ་ཐུང་དང༌། ལྦ་བ་ཅན་དང༌། ལྐུགས་པ་དང༌། འོན་པ་དང༌། རྟེན་འཕྱེ་དང་སྟེ་རྐང་བམ་དག་རབ་ཏུ་འབྱིན་པར་བྱེད་ན། དེ་དག་ཀྱང་རབ་ཏུ་དབྱུང་བར་(༤༩བ)མི་བྱའོ། །བུད་མེད་ཀྱིས་དུབ་པ་དང༌། ཁུར་གྱིས་དུབ་པ་དང༌། ལམ་གྱིས་དུབ་པ་དང༌། ཡ་ཟ་མ་ལུག་དང༌། གཏའ་གམ་པ་རབ་ཏུ་འབྱིན་པར་བྱེད་ནས། དེ་དག་ཀྱང་རབ་ཏུ་དབྱུང་བར་མི་བྱའོ། །

༡༽ ཕྲན་ཚེགས་ཀྱི་སྐབས་ནས་འབྱུང་བ།

ཕྲན་ཚེགས་ཀྱི་སྐབས་ནས་འབྱུང་བ་ནི། སྟོན་པ་མཉན་ཡོད་ནའོ། །ཀོ་ས་ལའི་རྒྱལ་པོ་གསལ་རྒྱལ་ལ་ནང་མི་གཅུགས་པ་ཆེན་པོ་ཞེས་བྱ་བ་ཡོད་པ་རེ་ཞིག་ན་རྒྱལ་པོས་སྤྱོས་པས། །འདི་མགུ་དཀའ་ཡིས་རབ་ཏུ་འབྱུང་ངོ་སྙམ་ནས་རྒྱལ་བྱེད་ཚལ་དུ་སོང་ངོ༌། །དྲུག་སྡེ་གང་རུང་གིས་རྒྱལ་བྱེད་ཚལ་གྱི་སྒོ་མི་སྟོང་པ་ཡིན་པས་ཉེ་དགའ་སྒོ་ན་འདུག་གོ །དེས་དེ་སྔ་ནས་ངོ་ཤེས་པས། འོངས་པ་ལེགས་སོ། །ཆེནཔོ་ཁྱོད་ཟླ་བ་ལྟ་བུར་གནས་ན་རིང་མོ་ཞིག་ལོན་ཏེ་གང་ལས་འོངས། འཕགས་པ། ཡང་ཡང་མཐོང་བས་ནི་བརྙས་པར་འགྱུར་གྱིས། ཡུན་རིང་ཞིག་ལོན་ནས་མཐོང་བ་ནི་ལེགས་པ་ཡིན་ནོ། །ཆེན་པོ་གང་ལས་འོངས། རྒྱལ་པོ་མགུ་དཀའ་བས་མཉེས་པར་མི་ནུས་ཏེ་རབ་ཏུ་འབྱུང་ངོ༌། །ཁྱོད་ཀྱི་སེམས་བསྐྱེད་བཟང་སྟེ་རབ་ཏུ་བྱུང་བ་ནི་མཆོག་ཡིན་ཏེ། སྟོན་པས་ཕན་ཡོན་ལྔ་གསུངས་པས་སོ། །དེས་དེ་རབ་ཏུ་བྱུང་ནས་བསྙེན་རྫོགས་བྱས་སོ། །རྒྱལ་པོས་བློན་པོ་རྣམས་ལ། ཆེན་པོ་མི་སྣང་ན། མི་ནའམ། ལྷ། དེ་ན་བ་ནི་མ་མཆིས་མོད། ལྷས་ཅི་གསུངས་ན་རྒྱལ་བྱེད་ཚལ་དུ་རབ་ཏུ་བྱུང་ལགས། སུས། ཉེ་དགས་སོ། །རྒྱལ་པོ་ཁྲོས་ཏེ་ཕོ་ཉ་བཏང་ནས། བདག་གིས་སྤྱོས་པ་ཁྱོད་ཀྱིས་རབ་ཏུ་དབྱུང་ངམ། ཆེན་པོ་རབ་ཏུ་བྱུང་ན། ད་བདག་དང༌། འཕགས་སྐྱེས་པོ་དང༌། ཕྲེང་ལྡན་མ་དང༌། དབྱར་ཚུལ་མ་རྣམས་ཀྱང་རབ་ཏུ་བྱུང་ལ་ཁྱོད་རྒྱལ་སྲིད་གྱིས་ཤིག །དེས་དེ་ལ་ལན་སྤྲིངས་པ། ལྟོ་སྐྱེས་ཚུར་ཤོག །ཁྱོད་དང་འཕགས་སྐྱེས་པོ་སོགས་རབ་ཏུ་བྱུང་ལ་ང་རྒྱལ་སྲིད་བྱེད་དོ། །ངས་ཁྱོད་ཀྱི་ཆེན་པོའམ། གཞན་ཡང་བསླུས་ཏེ་རབ་ཏུ་བྱུང་ངམ། ངེད་ནི་རྒྱལ་བྱེད་ཚལ་དུ་འོངས་ནས་གསོལ་བ་འདེབས་པ་དེ་རབ་ཏུ་འབྱིན་ནོ། །རྒྱལ་པོས་ཐོས་ནས་མ་དད་པའི་སྐབས་དེ་གསོལ་བ་དང༌། ཉེས་དམིགས་དེ་ནི་རྒྱལ་པོས་བཀྲབས་པ་རབ་ཏུ་འབྱིན་པ་ལས་གྱུར་པ་ཡིན་ལ། རྒྱལ་པོས་བཀྲམས་པ་རབ་ཏུ་དབྱུང་བར་མི་བྱའོ། །ཉེ་བར་འོངས་པ་ལ། རྒྱལ་པོས་བཀྲབས་པ་མ་ཡིན་ནམ་ཞེས་དྲི་བར་བྱའོ། །རྒྱལ་པོས་བཀྲབས་པ་རབ་ཏུ་དབྱུང་བར་མི་བྱའོ་ཞེས་གསུངས་པ་དང༌། དགེ་སློང་རྣམས་ཡུལ་ཐག་རིང་བ་དང༌། རྒྱུས་མི་ཤེས་པའང་རབ་ཏུ་མི་འབྱིན་ནས། ཡུལ་ཐག་རིང་པོ་དང་རྒྱུས་མི་ཤེས་པ་དག་རབ་ཏུ་དབྱུང་བར་བྱ་སྟེ་འགྱོད་པར་མི་བྱའོ། །སྟོན་པ་མཉན་ཡོད་ནའོ། །ཆོམ་རྐུན་པར་གྲགས་པ་ཞིག་རྐུར་ཕྱིན་པ་མིས་ཚོར་བ་དང་ནོར་བོར་ནས་བྲོས་སོ། །དེ་ལམ་གྱིས་དུབ་ནས་རྒྱལ་བྱེད་ཚལ་གྱི་ལམ་ཤིང་དྲུང་ཞིག་ན་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་པ་(༥༠ན)དང༌། ཉེ་དགའ་མཉན་ཡོད་དུ་བསོད་སྙོམས་ལ་ཆས་པས་མཐོང་ནས། ཁྱོད་སུ། བདག་མགོན་མེད་པ་ཞིག་གོ །དེ་ལྟ་ན་ཅིའི་ཕྱིར་རབ་ཏུ་མི་འབྱུང༌། ཁྱོད་རབ་བྱུང་ལགས་པས་དྲང་པོར་སྨྲ་བར་བགྱི་སྟེ་བདག་ཆོམ་རྐུན་པར་གྲགས་པ་ལགས་ན་སུས་རབ་ཏུ་འབྱིན། བུ། སྟོན་པའི་བསྟན་པ་སྙིང་རྗེས་རབ་ཏུ་ཕྱེ་བ་ཡིན་པས། སེམས་སྟོན་ཅིག །ངས་རབ་ཏུ་དབྱུང་ངོ་། །ལེགས་ཏེ་རབ་ཏུ་འབྱུང་ངོ༌། །དེས་དེ་རབ་བྱུང་བསྙེན་བྱས་ནས། བཞིན་བཟང་རི་དྭགས་ཀྱིས་རི་དྭགས་མི་སོས། བསོད་སྙོམས་རྒྱུས་ལ་འཚོ་བར་གྱིས་ཤིག །དེ་བསོད་སྙོམས་ལ་ཞུགས་པ་དང༌། བྲམ་ཟེ་དང་ཁྱིམ་བདག་རྣམས་ཀྱིས་ངོ་ཤེས་ནས། ཁ་ཅིག་ན་རེ། འདི་ནི་ཆོམ་རྐུན་པར་གྲགས་པ་དེ་ཡིན་ན་རབ་ཏུ་བྱུང་ངོ་ཞེས་ཟེར་རོ། །ཁ་ཅིག་ན་རེ། ཤཱཀྱའི་དགེ་སྦྱོང་རྣམས་ནི་ཆོམ་རྐུན་པར་གྲགས་པའམ་རབ་ཏུ་འབྱིན་ཏེ། འདི་དག་ཉིན་མོ་བསོད་སྙོམས་སྤྱོད་པའི་ཆ་བྱད་ཀྱིས་གླགས་དཔྱད་ནས་མཚན་མོ་རྐུ་རུ་འོང་ངོ་ཟེར་བའི་སྐབས་དེ་གསོལ་བ་དང༌། ཉེས་དམིགས་དེ་ནི་ཆོམ་རྐུན་པར་གྲགས་པ་རབ་ཏུ་འབྱིན་པ་ལས་གྱུར་པ་ཡིན་པས། ཆོམ་རྐུན་པར་གྲགས་པ་རབ་ཏུ་དབྱུང་བར་མི་བྱའོ། །དེ་སྐད་གསུངས་པ་དང༌། དགེ་སློང་དག་གིས་ཆོམ་རྐུན་པ་ཡིན་པར་མི་མངོན་པའང་རབ་ཏུ་མ་བྱུང་བས་དེའི་རབ་བྱུང་བསྙེན་རྫོགས་ཀྱི་བར་ཆད་དུ་གྱུར་པའི་སྐབས་དེ་གསོལ་བ་དང༌། ཆོམ་རྐུན་པར་མངོན་པར་རབ་ཏུ་དབྱུང་བར་མི་བྱ་ཡི་མི་མངོན་པ་རབ་ཏུ་དབྱུང་བར་བྱའོ། །ཉེ་བར་འོངས་པ་ལ། ཆོམ་རྐུན་པར་གྲགས་པ་ཡིན་ནམ་ཞེས་དྲི་བར་བྱའོ། །ལྷམ་མཁན་དང་གདོལ་པ་དང་གཡུང་པོ་གསུམ་གྱི་གླེང་གཞི་འདིར་མི་སྣང་ངོ༌། །སྟོན་པ་མཉན་ཡོད་ནའོ། །སྟོན་པས་ཆོ་འཕྲུལ་ཆེན་པོ་བསྟན་པས་མུ་སྟེགས་ཅན་རྣམས་ཐག་བཅུག །ལྷ་དང་མི་རྣམས་དགའ་བར་མཛད་པའི་ཚེ་ཡུལ་ཐ་དད་ན་གནས་པའི་མི་མ་ཡིན་རྣམས་ཀྱང་འཇིག་རྟེན་གྱི་ཁམས་གཞན་ནས་མཉན་ཡོད་དུ་འོངས་སོ། །སྟོན་པ་ལ་དད་པའི་ལྷ་དང་ཀླུ་དང་གནོད་སྦྱིན་དང༌། རྒྱལ་པོ་གསལ་རྒྱལ་དང༌། བཙུན་མོ་ཕྲེང་ལྡན་མ་དང༌། རྒྱལ་རིགས་དབྱར་ཚུལ་མ་དང༌། ཕྱྭ་མཁན་དྲང་སྲོང་བྱིན་དང༌། རྙིང་པ་དག་དང༌། རི་དྭགས་འཛིན་གྱི་མ་ས་ག་དང༌། དད་པ་ཅན་མང་པོ་མཉན་ཡོད་དུ་འོངས་ནས་ཟང་ཟིང་གི་རྙེད་པ་དང་མཆོད་པས་སྐྱེ་བོའི་ཚོགས་རྣམས་ཚིམ་པར་བྱས་སོ། །
དེ་ལྟ་བུའི་འབྱོར་པ་མཆོག་མཐོང་ནས་མི་མ་ཡིན་ཁ་ཅིག་དེ་ཉིད་དུ་མངོན་པར་དགའ་ནས་འདུག་པ་དེ་དག་འདོད་ཆགས་ཀྱིས་ཀུན་ནས་དཀྲིས་པར་གྱུར་པའི་ཚེ། བུད་མེད་དག་གི་ཁྱོ་ཕྱི་རོལ་ཏུ་སོང་བའི་ཆ་ལུགས་སུ་བདག་ཉིད་སྤྲུལ་ནས་དེ་དག་དང་དགའ་མགུར་སྤྱད་པས་རྒྱུ་མཐུན་པ་ལས་ཁྱེའུ་དང་བུ་མོ་རྐང་ལག་དང༌། མིག་དང༌། ལུས་མི་སྡུག་པ་སྐྱེས་ཏེ། ཁ་ཅིག་ནག་ལ་མི་དམར། (༥༠བ)ཁ་ཅིག་མགོ་བོ་ཆེ་ལ་ལུས་ཆུང༌། ཁ་ཅིག་མགོ་སེར། ཁ་ཅིག་སྐྲ་ལྗང་གུའོ། །དེ་དག་མཐོང་བས། མ་དངངས་ཏེ་ཁྱིམ་གྱི་བར་དང༌། ཚང་ཚིང་བར་དུ་བོར་ནས་མི་མ་ཡིན་གྱི་མདངས་ཀྱིས་གསོའོ། །ཁ་ཅིག་མིའི་གཟུགས་སུ་གསལ་བར་སྐྱེ་ཞིང་ཆེར་སྐྱེས་པའི་ཚེ་འགྱུར་བ་སྟོན་པ་དག་ཀྱང་མས་ལམ་པོ་ཆེའི་ཁར་བོར་ནས་མི་མ་ཡིན་གྱི་མདངས་ཀྱིས་གསོའོ། །ཉེ་དགའ་མཉན་ཡོད་དུ་བསོད་སྙོམས་ལ་ཞུགས་པ་དང༌། སྐྲ་ལྗང་ཁུ་ཅན་མཐོང་ནས། འདི་ལྷུང་བཟེད་ནག་པོ་ཅན་འདི་དག་གིས་འཕྲོག་པར་མི་འགྱུར་བས་རབ་ཏུ་དབྱུང་ངོ་སྙམ་སྟེ། ཁྱོད་སུ་ཡིན། བདག་མགོན་མེད་པ་ཞིག་གོ །འོ་ན་ཅིའི་ཕྱིར་རབ་ཏུ་མི་འབྱུང༌། བདག་སྐྲ་ལྗང་ཁུ་ཅན་སུས་རབ་ཏུ་འབྱིན། བཞིན་བཟང༌། སྟོན་པའི་བསྟན་པ་སྙིང་རྗེས་རབ་ཏུ་ཕྱེ་བ་ཡིན་པས་ཚུར་ཤོག །ངས་རབ་ཏུ་དབྱུང་ངོ་ཞེས་དེ་རབ་ཏུ་བྱུང༌། བསྙེན་རྫོགས་བྱས་སོ། །
དེ་ནས་ཉིན་ཞག་གཉིས་གསུམ་དུ་ཀུན་ཏུ་སྤྱོད་པའི་ཆོས་བསླབས་ནས། བཞིན་བཟང༌། རི་དྭགས་ཀྱིས་རི་དྭགས་མི་སོས་ཀྱིས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཕའི་སྤྱོད་ཡུལ་ཡང་ཡིན་པས་བསོད་སྙོམས་རྒྱུས་ལ་འཚོ་བར་གྱིས་ཤིག །དེ་མི་དགའ་ནས་ཕྱི་དེ་ཉིན་བསོད་སྙོམས་ལ་ཞུགས་པ་བུད་མེད་ཅིག་གིས་བསོད་སྙོམས་ཁྱེར་ཏེ་ཕྱིར་བྱུང་བས་མཐོང་ནས་བྲང་བརྡུངས་ཏེ། ཁྱོད་སྐྲ་ལྗང་ཁུ་ཅན་ཡིན་ན་སུས་རབ་ཏུ་བྱུང༌། མཁན་པོ་ཉེ་དགས་སྙིང་རྗེས་རབ་ཏུ་བྱུང་ངོ༌། །གནས་ངན་ལེན་ཀུན་ཏུ་སྤྱོད་པ་དེ་མ་གཏོགས་པ་གཞན་སུ་ཞིག་བསྟན་པ་ཀུན་ནས་མཛེས་པ་སུན་འབྱིན་ཞེས་བྱས་པ་དང༌། གཞན་དག་ཀྱང༌། དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ཞིག་གོ །ཚངས་པའི་ཚུལ་ཡང་ཚིག་སྟེ་སྐྲ་ལྗང་ཁུ་ཅན་ཡང་རབ་ཏུ་འབྱིན་ནོ་ཞེས་འཕྱ་བའི་སྐབས་དེ་གསོལ་བ་དང༌། ཉེས་དམིགས་དེ་ནི་དེ་ལྟ་བུ་རབ་ཏུ་འབྱིན་པ་ལས་གྱུར་པ་ཡིན་པས་དགེ་སློང་གིས་དེ་ལྟ་བུ་རབ་ཏུ་དབྱུང་བར་མི་བྱའོ་སྙམ་དུ་དགོངས་ནས། དགེ་སློང་གིས་འཁོར་སུན་འབྱིན་པར་བྱེད་པའི་འཁོར་ཉེ་བར་བཞག་པར་མི་བྱའོ། །དགེ་སློང་རྣམས་ཀྱིས་དེ་མ་ཤེས་ནས་ཞུས་པ། འཁོར་སུན་འབྱིན་པར་བྱེད་པ་ལ་རྒྱུ་གཉིས་ཀྱིས་ཏེ། རིགས་དང༌། མཚན་མས་སོ། །རིགས་ཀྱིས་ནི། མ་རབས། དམན་པ། ཕོངས་པ། ཀོས་ཐག་པ། བཀྲེན་པའི་རིགས་སུ་སྐྱེས་པ་དག་རབ་ཏུ་འབྱིན་ན་རིགས་ཀྱིས་ཡིན་ནོ། །མཚན་མས་ནི། སྐྲ་སེར་དང་ནི་སྐྲ་སེར་སྐྱ། །ཞེས་སོགས་གསུངས་སོ། །སྟོན་པ་མཉན་ཡོད་ནའོ། །ཉེ་བར་འཁོར་གྱི་དགེ་ཚུལ་བྲན་ཅན་དང་སྐྱོང་བ་གཉིས་ཕན་ཚུན་གཏམ་འདྲེས་པ། ཕེབས་པར་སྨྲ་བ། སྨོན་འདྲིན་འགྲོགས་བཤེས་ཡིན་པས། གཅིག་གིས། ཁྱོད་བསྙེན་པར་རྫོགས་ཤིག །ངས་མཁན་བུ་དང་ཁྱོད་ཀྱི་རིམ་གྲོ་བྱའོ། །ཅིག་ཤོས་ཀྱང་དེ་བཞིན་དུ་ཟེར་ནས་གཉིས་ཀ་བསྙེན་པར་མ་རྫོགས་པ་དང༌། ཉེ་བར་འཁོར་གྱིས། སྟོན་པ་ལ། བཙུན་པ། (༥༡ན)མཁན་པོ་གཅིག་དང༌། སློབ་དཔོན་གཅིག་དང༌། ལས་གཅིག་གིས་གཉིས་བསྙེན་པར་རྫོགས་སུ་རུང་ངམ། རུང་ངོ༌། །གསུང་རུང་ངམ། རུང་ངོ༌། །དེ་དག་ལས་གང་རྒན་ལགས། གང་ཡང་མ་ཡིན་ནོ། །བཞི་རུང་ངམ། །མི་རུང་སྟེ། ཚོགས་ཀྱིས་ཚོགས་ཀྱི་ལས་དག་མི་བྱ་བས་བསྙེན་པར་རྫོགས་པར་བྱེད་ན་འགལ་ཚབས་ཅན་དུ་འགྱུར་རོ། །ཉེ་བར་འཁོར་གྱིས་དེ་གཉིས་ལས་གཅིག་གིས་བསྙེན་པར་རྫོགས་པར་བྱས་པ་དང༌། དེ་གཉིས་གང་ལ་ཕྱག་བྱ་བ་དང༌། ལས་སུ་ཇི་ལྟར་བསྐོ་བ་དང༌། རྙེད་པ་ཇི་ལྟར་བླང་བ་མ་ཤེས་པའི་སྐབས་དེ་གསོལ་བ་དང༌། གཅིག་ལ་གཅིག་ཕྱག་མི་བྱ། རྙེད་པ་ནི་སྔར་འོངས་པས་བླང་ངོ༌། །ཕྱིས་འོངས་པ་ནི་སྔར་ལས་སུ་བསྐོ་ཞིང་རྙེད་པ་ཕྱིས་སྦྱིན་པར་བྱའོ། །སྟོན་པ་མཉན་ཡོད་ནའོ། །ཚེ་དང་ལྡན་པ་བ་ལང་གནས་ཀོའུ་ཤཱམྦཱི་ན་རི་ཆུས་བསྐོར་ལ་བད་ས་ལའི་རྒྱལ་པོ་འཆར་བྱེད་ཀྱི་སྐྱེད་མོས་ཚལ་གྱི་ཕག་མོའི་ཕུག་ན་འདུག་གོ །དཔྱིད་ཀྱི་དུས་ལ་བབ་པའི་ཚེ། ཤིང་ལྗོན་པ་རྣམས་མེ་ཏོག་རྒྱས་ཤིང་ངང་པ་དང༌། ཁྲུང་ཁྲུང་ལ་སོགས་པ་སྒྲ་འབྱིན་པར་བྱེད་པ་ན། རྒྱལ་པོས་སྐྱེད་མོས་ཚལ་སྲུང་བའི་མི་བོས་ཏེ། ང་སྐྱེད་མོས་ཚུལ་དུ་འགྲོ་ཡིས། སྐྱེད་མོས་ཚལ་བྱི་དོར་གྱིས། ཚལ་རྟོགས་ལ། ལ་གཅན་པ་དག་ཀྱང་སྐོས་ཤིག །ལྷ། བཀའ་བཞིན་འཚལ་ཞེས་དེའི་ཚིག་ཉན་ནས་དེ་ལྟར་བྱས་ཏེ་རྒྱལ་པོ་ལ། ལྷ། མཁྱེན་པར་མཛད་དུ་གསོལ། དེ་ལྟར་བྱས་ལགས་སོ། །དེ་ནས་རྒྱལ་པོ་བཙུན་མོའི་ཚོགས་ཀྱིས་བསྐོར་ནས་སྐྱེད་མོས་ཚལ་དུ་སོང་སྟེ། རྩེ་བ་དང་དགའ་མགུར་སྤྱད་ནས་གཉིད་ལོག་གོ །བུད་མེད་རྣམས་ནི་མེ་ཏོག་དང་འབྲས་བུ་ལ་དགའ་བས། སྐྱེད་མོས་ཚལ་རྒྱུ་ཞིང་སོང་བས། ཚེ་དང་ལྡན་པ་བ་ལང་གནས་སྐྲ་དང་ཁ་སྤུ་རིང་ཞིང་ཆོས་གོས་རྙིང་པ་དང་ཤམ་ཐབས་ཧྲུལ་པོ་གྱོན་ནས་ཤིང་ལྗོན་པ་ཞིག་གི་དྲུང་ན་འདུག་པ་མཐོང་སྟེ། ཨ་ཙི་འདི་ན་འདྲེ་ཞིག་གདའོ་ཞེས་བྲེད་སྐད་ཕྱུང་བ་དང༌། དེ་ནས་བ་ལང་གནས་རིངས་པ་རིངས་པར་ཕག་མོའི་ཕུག་ཏུ་སོང་ངོ༌། །སྒྲ་དེས་རྒྱལ་པོ་གཉིད་སད་དེ་རལ་གྲི་ཤུབས་ནས་ཕྱུང་སྟེ་བརྒྱུགས་ནས། འདྲེ་གང་ན་འདུག །ལྷ། ཕག་མོའི་ཕུག་ཏུ་སོང་ངོ༌། །
དེ་ནས་རྒྱལ་པོ་མཚོན་ཐོགས་ཏེ་ཕུག་གི་སྒོར་བསྡད་ནས། ཀྭ་ཡེ་འབྱུང་པོ་ཁྱོད་སུ་ཡིན། ལྷ། དགེ་སྦྱོང་ལགས་སོ། །སུའི། ཤཱཀྱའི་སྲས་ཀྱི་དགེ་སྦྱོང་ལགས་སོ། །ཁྱོད་དགྲ་བཅོམ་པ་ཡིན་ནམ། མ་ལགས་སོ། །ཕྱིར་མི་འོང་དང༌། ཕྱིར་འོང་དང༌། རྒྱུན་ཞུགས་དང༌། བསམ་གཏན་བཞི་པ་ཐོབ་པ་དང༌། གསུམ་པ་དང༌། གཉིས་པ་དང༌། དང་པོ་ཐོབ་བམ། མ་ལགས་སོ། །རྒྱལ་པོ་བཙུན་མོའི་འཁོར་ལ་ཕྲག་དོག་ཟ་བས་ལྷག་པར་ཁྲོས་ཏེ། བློན་པོ་རྣམས་ལ། དགེ་སྦྱོང་འདིས་ངའི་བཙུན་མོའི་འཁོར་རྣམས་མ་རུང་བར་བྱས་ཀྱིས། (༥༡བ)རྔ་མོའི་གྲོག་མ་ཆེན་པོ་དག་འདིར་ལྷོགས་ཤིག །དེ་དག་གིས་ཕུག་འདི་ཁྱབ་པར་བཀང་སྟེ་དགེ་སྦྱོང་འདི་གསད་དོ། །ཕག་མོའི་ཕུག་གི་ལྷ་ཞིག་འདུག་པ་དེས་བསམས་པ། རྒྱལ་པོ་གཏུམ་པོ་འདིས་ང་ལ་སྐྱབས་སུ་འོངས་པའི་དགེ་སྦྱོང་ཉེས་པ་མེད་པ་བསད་ན་མི་རུང་གིས། འདི་ཐར་བའི་ཐབས་ལ་བརྩོན་པར་བྱའོ་སྙམ་ནས་ཕག་མོའི་གཟུགས་སུ་སྤྲུལ་ཏེ་སྒོར་བྱུང་བ་དང༌། རྒྱལ་པོ་དེ་ལིངས་ལ་དགའ་བས། ངའི་རྟ་དང་མདའ་གཞུ་ཁྱེར་ཏེ་ཤོག་ཟེར་བ་དང༌། རྟ་དང་མདའ་གཞུ་ཕུལ་ལོ། །ཕག་མོ་དེ་སྐྱེད་མོས་ཚལ་ནས་ཕྱིར་བྲོས་པ་དང༌། རྒྱལ་པོའང་དེའི་ཕྱི་བཞིན་བསྙེགས་ནས་ཐག་རིང་པོར་སོང་ངོ༌། །དེ་ནས་བཙུན་མོ་རྣམས་ཀྱིས་བ་ལང་གནས་ལ། རྒྱལ་པོ་འདི་གཏུམ་པོ་ལགས་པས་ཁྱོད་བཀྲོངས་ན་མི་རུང་གིས་མྱུར་བར་བཞུད་ཅིག །བ་ལང་གནས་ཀྱང་མྱུར་བ་མྱུར་བར་ལྷུང་བཟེད་དང་ཆོས་གོས་བླངས་ཏེ་མཉན་ཡོད་དུ་སོང་ངོ༌། །དེ་དགེ་སློང་དག་གིས་མཐོང་ནས། འོངས་པ་ལེགས་སོ། །གང་ནས་འོངས། ཀོའུ་ཤཱམྦཱི་ནས་སོ། །བདེ་བར་བརྒྱུས་སམ། ཇི་ལྟར་བདེ་བར་བརྒྱུས། རྒྱལ་པོ་འཆར་བྱེད་ཀྱིས་ཧད་པོར་དེའུ་བསད་དོ། །ཅིའི་ཕྱིར། དེས་རྒྱས་པར་སྨྲས་པའི་སྐབས་དེ་གསོལ་བ་དང༌། སྟོན་པས་དགེ་སློང་ཞིག་ལ། ཁྱོད་བ་ལང་གནས་ཅན་སོང་ལ། སྟོན་པའི་སྤྱན་སྔར་ཤོག་ཅེས་སྒོས་ཤིག །དེས། བཙུན་པ། བཀའ་བཞིན་འཚལ་ཞེས་བ་ལང་གནས་ལ་དེ་སྐད་བསྒོ་བ་དང༌། དེ་ཡང་སྟོན་པའི་སྤྱན་སྔར་སོང་ནས་ཕྱག་འཚལ་ཏེ་མཐའ་ཞིག་ཏུ་འདུག་གོ །སྟོན་པས། ཁྱོད་བད་སའི་རྒྱལ་པོ་འཆར་བྱེད་ཀྱིས་ཅིའི་ཕྱིར་དེའུ་བསད། དེས་སྐབས་དེ་རྒྱས་པར་གསོལ་བ་དང༌། མི་གཏི་མུག་ཅན་ཁྱོད་ཕུག་དེ་ལ་ལྷག་པར་ཆགས་པས་སྡུག་བསྔལ་བར་གྱུར་ཏོ། །ཉེས་དམིགས་དེ་ནི་སྐྲ་རིང་པོར་འཇོག་པ་ལས་གྱུར་པ་ཡིན་པས་སྐྲ་རིང་པོ་བཞག་པར་མི་བྱའོ། །དེ་སྐད་བཀའ་སྩལ་པ་དང༌། དགོན་པ་བ་དག་གིས་འབྲེག་མཁན་མ་རྙེད་ནས་དགོན་པའི་གནས་མལ་སྤངས་ཏེ་གྲོང་མཁར་འཁོད་དོ། །སྟོན་པས་མཁྱེན་བཞིན་དུ་རྨེད་པ་དང༌། དེ་རྒྱས་པར་གསོལ་བས། དེ་བས་ནས་དགོན་པ་བས་སྐྲ་སོར་གཉིས་ཀྱི་ཚད་དུ་བཞག་པར་རྗེས་སུ་གནང་ངོ༌། །གྲོང་མཐའ་བས་ནི་དེ་བས་ཐུང་ངུར་བྱའོ། །སྟོན་པ་མཉན་ཡོད་ནའོ། །མགོན་མེད་ཟས་སྦྱིན་གྱིས་ཕྱོགས་བཞིའི་དགེ་འདུན་ལ་རྒྱལ་བྱེད་ཚལ་ཕུལ་པའི་ཚེ། དེས། འཕགས་པ་རྣམས་ཀྱི་སྐྲ་དང་ཁ་སྤུ་བྲེགས་ཤིག་ཅེས་འབྲེག་མཁན་བཏང་བ་དང༌། ཉེ་དགའ་སྒོ་ན་འདུག་པས་མཐོང་ནས། བཞིན་བཟང༌། གང་ལ་འོངས། ཁྱིམ་བདག་གིས་འདི་ལ་བཏང་ངོ༌། །སྐྲ་ཆན་པས་འདྲེག་ཤེས་སམ། འདི་ནི་བདག་གི་བཟོ་ལགས་སོ། །དེ་ལྟར་ན་བྲེགས་ཤིག །དེས་ཆན་པས་བྲེགས་པ་དང༌། ཡང་བྲེགས་ཤིག །ཡང་བྲེགས་པ་དང༌། ད་དུང་ཡང་བྲེགས་ཤིག་ཅེས་ཉི་མ་ནུབ་ཀྱི་བར་དུ་མ་བཏང་བར། དེའི་འོག་ཏུ། བཀྲེན་པ།(༥༢ན) ཁྱོད་ཅི་ཡང་མི་ཤེས་པ་ཞིག་སྟེ། མཉམ་པར་བྱོས་ཏེ་སོང་ཞིག །ཅེས་པའི་སྐབས་དེ་གསོལ་བ་དང༌། སྐྲ་ཆན་བྲེག་པར་མི་བྱའོ། །
དེ་ནས་དགེ་སློང་གི་མགོ་ལ་རྨ་བྱུང་སྟེ་སྤུ་གྲིས་རེག་པ་ན་སྣད་པའི་སྐབས་དེ་གསོལ་བ་དང༌། རྨའི་ཐན་ཀོར་ནི་མ་གཏོགས་ཏེ་ལྷག་པ་སྤུ་གྲིས་བྲེག་པར་བྱའོ། །སྟོན་པ་མཉན་ཡོད་ན་བཞུགས་སོ། །མགོན་མེད་ཟས་སྦྱིན་གྱིས་དགེ་འདུན་ལ་རྒྱལ་བྱེད་ཚལ་ཕུལ་པའི་ཚེ། དེས་འདྲེག་མཁན་བཏང་བ་དང༌། ཉེ་དགས། བཞིན་བཟང༌། གཙུག་ཕུད་འཇོག་ཤེས་སམ། དེ་ཉིད་བདག་གི་སུག་ལས་ལགས་སོ། །བལྟ་ཡི་ཞོག་ཅིག །ཇི་ལྟར་བཞག །ཆེན་པོ་རོ། །ཆེན་པོ་བཞག་པ་དང༌། ཕྱོགས་གཅིག་ནས་བྲེགས་ཤིག །དེས་ཕྱོགས་གཅིག་བྲེགས་པ་དང༌། དེས། གཉིས་པ་ནས་བདུན་པའི་བར་བྲེགས་ཤིག་ཟེར་ནས། བྲེགས་པ་དང༌། བཀྲེན་པ། ཁྱོད་ཅིའང་མི་ཤེས་པ་ཞིག་གིས། སྔ་མ་བཞིན་དུ་བྱོས་ལ་སོང་ཞིག །ཅེས་པའི་སྐབས་དེ་གསོལ་བ་དང༌། དགེ་སློང་གིས་གཙུག་ཕུད་བཞག་པར་མི་བྱའོ། །ཡང་ཁྱིམ་བདག་གིས་འདྲེག་མཁན་བཏང་བ་དང༌། ཉེ་དགས། བཞིན། བཞིན་བཟང༌། འདོམས་ཀྱི་སྤུ་འདྲེག་ཤེས་སམ། དེ་ཉིད་བདག་གི་བཟོ་ལགས་སོ། །དེ་ལྟ་ན་བྲེགས་ཤིག །ཇི་ལྟར་འདྲེག །མཛེས་པར་བྲེགས་ཤིག །དེས་བྲེགས་པ་དང༌། འདི་ལྟར་བྲེགས་ཤིག །དེ་བཞིན་དུ་བྱས་པ་དང༌། འདི་ལྟར་ཡང་བྱོས་ཤིག་ཅེས་ཉི་མ་ནུབ་ཀྱི་བར་དུ་མ་བཏང་བས། ཤཱཀྱའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཉམས་ཏེ། གསང་བའི་སྤུའང་འདྲེག་པར་བྱེད་དོ་ཞེས་འཕྱ་བའི་སྐབས་དེ་གསོལ་བ་དང༌། དགེ་སློང་གིས་འདོམས་ཀྱི་སྤུ་བྲེག་པར་མི་བྱའོ། །དེ་སྐད་གསུངས་པ་དང༌། འདོམས་ཀྱི་ཕྱོགས་སུ་རྨ་བྱུང་བ་དང་སྲིན་བུ་བྱུང་བའམ་སྤུ་མི་འདྲེག་པས་སྣད་པའི་སྐབས་དེ་གསོལ་བ་དང༌། དགེ་སློང་གནས་བརྟན་གནས་བརྟན་དག་ལ་བསྟན་ནས། རྨའམ་སྲིན་བུའི་ཕྱིར་འདོམས་ཀྱི་སྤུ་བྲེག་པར་བྱའོ། །ཡང་ཁྱིམ་བདག་གིས་འདྲེག་མཁན་བཏང་བ་དང༌། ཉེ་དགས། བྱིན་སྤུ་འདྲེག་ཤེས་སམ། དེ་ཉིད་བདག་གི་བཟོ་ལགས་སོ། །དེ་ལྟ་ན་བྲེགས་ཤིག །ཇི་ལྟར་འདྲེག །མཛེས་པར་རོ། །དེས་བྲེགས་པ་དང༌། འདི་ལྟར་བྱོས་ཤིག །དེ་བཞིན་དུ་བྱས་པ་དང༌། འདི་ལྟར་ཡང་བྱོས་ཤིག་ཅེས་ཉི་མ་ནུབ་ཀྱི་བར་དུ་མ་བཏང་བས། སྨོད་པའི་སྐབས་དེ་གསོལ་བ་དང༌། བྱིན་སྤུ་བྲེག་པར་མི་བྱའོ། །སྟོན་ཡངས་པ་ཅན་ན་སྤྲེའུ་རྫིང་གི་འགྲམ་ཁང་བརྩེགས་པ་ན་བཞུགས་སོ། །བྱིན་སྤུ་མི་འདྲེག་པར་གསུངས་པ་དང༌། དགེ་སློང་རྣམས་བརླ་ལ་རྨ་དང་སྲིན་བུ་བྱུང་ནས་སྣད་པའི་སྐབས་དེ་གསོལ་བ་དང༌། རྨ་དང་སྲིན་བུའི་ཕྱིར་ནི་བྱིན་སྤུ་འདྲེག་པར་བྱའོ། །སྟོན་པ་མཉན་ཡོད་ནའོ། །ཁྱིམ་བདག་གིས་འདྲེག་མཁན་ལ། རྒྱལ་བྱེད་(༥༢བ)ཚལ་དུ་སོང་ལ། འཕགས་པ་རྣམས་ཀྱི་སྐྲ་དང་ཁ་སྤུ་བྲེགས་ཤིག །དེས་རྒྱལ་བྱེད་ཚལ་དུ་སོང་བ་དང༌། ཉེ་དགས་མཐོང་ནས། འོངས་པ་ལེགས་སོ། །ཅི་ལ་འོངས། ཁྱིམ་བདག་གིས་འཕགས་པ་རྣམས་ཀྱི་སྐྲ་དང་ཁ་སྤུ་བྲེག་པའི་སླད་དུ་བཏང་ངོ༌། །སེན་མོ་འདྲེག་ཤེས་སམ། དེ་ཉིད་བདག་གི་བཟོ་ལགས་སོ། །བལྟ་ཡི་ཚུར་ཤོག །དེ་ཉེ་བར་འོངས་པ་དང༌། ཉེ་དགས་ལག་པ་བརྐྱངས་སོ། །ཇི་ལྟར་འདྲེག །འབྲུའི་རྩེ་མོ་ལྟར་བྲེགས་ཤིག །དེ་ལྟར་བྲེགས་པ་དང༌། ད་ནི་ར་བའི་ཅོག་ལྟ་བུ་དང༌། སྤུ་གྲིའི་སོ་ལྟ་བུ་དང༌། སྟེའུ་ཁ་ལྟ་བུ་དང༌། ཟླ་བ་ཚེས་པ་ལྟར་གྱིས་ཤིག །དེས་ཇི་ལྟར་བསྒོ་བ་བཞིན་བྱས་པ་དང༌། མཇུག་ཏུ། བཀྲེན་པ་ཁྱོད་ཅིའང་མི་ཤེས་པ་ཞིག་གིས། མཉན་པར་གྱིས་ལ་སོང་ཞིག །དེ་ཉི་མ་ནུབ་ནས་ཁྱིམ་བདག་གི་དྲུང་དུ་སོང་བ་དང༌། ཀྱེ་ཁྱོད་ཀྱིས་འཕགས་པ་ཇི་སྙེད་ཅིག་གི་སྐྲ་དང་ཁ་སྤུ་བྲེགས། བདག་གིས་འཕགས་པ་རྣམས་ཀྱི་སྐྲ་དང་ཁ་སྤུ་ག་ལ་བྲེགས། གཟུ་ལུམས་ཅན་ཉེ་དགས་བགོར་ནས། འབྲུའི་རྩེ་མོ་དང་འདྲ་བ་སོགས་གྱིས་ཤིག་ཟེར་ཏེ། དེ་ལྟར་བྱས་པ་དང༌། བཀྲེན་པ་ཁྱོད་ཅིའང་མི་ཤེས་པ་ཞིག་གིས། མཉམ་པར་གྱིས་ལ་སོང་ཞིག །ཅེས་ཟེར་ན། ད་གཟོད་ཁོ་ན་ཤོར་ན་ཅི་བགྱི། ཁྱིམ་བདག་ཀྱང༌། དགེ་སློང་རྣམས་ཉེ་བར་མ་ཞི་བའོ་ཞེས་འཕྱ་བའི་སྐབས་དེ་གསོལ་བ་དང༌། ཉེས་དམིགས་དེ་ནི་སེན་མོ་འདྲེག་པ་ལས་གྱུར་པ་ཡིན་པས་སེན་མོ་བྲེག་པར་མི་བྱའོ། །
དེ་ལྟར་གསུངས་པ་དང་དགེ་སློང་རྣམས་སེན་མོ་རིང་པོར་འདུག་པ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས། འཕགས་པ་དག །ཅིའི་ཕྱིར་སེན་མོ་རིང་པོར་འཇོག །བཞིན་བཟང༌། སྟོན་པས་མ་གནང་ངོ༌། །ཁྱེད་སེན་མོ་བཅངས་པས་འདག་པར་འགྱུར་རམ། སྐབས་དེ་གསོལ་བ་དང༌། སྔ་མ་ནི་བཅས་པའོ། །འདི་ནི་གནང་བ་ཡིན་ཏེ། སེན་མོ་སྤུ་གྲིའི་སོ་ལྟ་བུའམ། སྟེའུའི་ཁ་ལྟ་བུར་བྲེག་པར་བྱའོ། །ཁྱིམ་བདག་གིས་སེན་མོ་འཆོས་མཁན་བཏང་བ་དང༌། ཉེ་དགས། སོན་སེན་མོ་འཆོས་ཤེས་སམ། དེ་ཉིད་བདག་གི་བཟོ་ལགས་སོ། །ཆོས་ཤིག །ཇི་ལྟར་བྱ། སེར་པོ་དང་དམར་པོ་དང་དཀར་པོ་དང་གསེར་གྱི་ཁ་དོག་ལྟ་བུར་གྱིས་ཤིག །དེ་བཞིན་དུ་བྱས་པ་དང༌། བཀྲེན་པ་ཁྱོད་ཅི་ཡང་མི་ཤེས་པ་ཞིག་གིས། མཉན་པར་གྱིས་ལ་སོང་ཞིག །ཅེས་དེ་ཉི་མ་ནུབ་ནས་ཁྱིམ་བདག་གི་དྲུང་དུ་སོང་བ་སོགས་སྔར་དང་འདྲ། སྐབས་དེ་གསོལ་བ་དང༌། ཉེས་དམིགས་དེ་ནི་སེན་མོ་བྱི་དོར་བྱེད་པ་ལས་གྱུར་པ་ཡིན་པས། དགེ་སློང་གིས་སེན་མོ་དག་བྱི་དོར་མི་བྱའོ། །དེ་གསུངས་པ་དང༌། ཚོན་རྩིའི་ལས་དང༌། ལྷུང་བཟེད་ཀྱི་ལས་བྱེད་པ་རྣམས་ཀྱི་སེན་མོ་དྲི་མ་ཆགས་ལ་མདོག་མི་སྡུག་པར་གྱུར་པས་བསོད་སྙོམས་ལ་ཞུགས་པ་དང༌། བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས། ཁྱེད་ཅིའི་ཕྱིར་སེན་(༥༣ན)མོ་དྲི་མ་ཆགས་ཤིང་མདོག་མི་སྡུག །དེ་དག་གིས་བསྙད་པ་དང༌། ཅིའི་ཕྱིར་དྲི་མ་མི་དབྱི། མ་གནང་ངོ༌། །ཁྱེད་ཅག་དྲི་མའི་འདམ་བཅངས་པས་འདག་པར་འགྱུར་རམ། སྐབས་དེ་གསོལ་བ་དང༌། དྲི་མ་བསལ་བའི་ཕྱིར་སེན་མོ་དྲུད་པར་བྱའོ། །སྟོན་པ་མཉན་ཡོད་ནའོ། །དགེ་སློང་རྣམས་ཆོས་གོས་གྱོན་བཞིན་དུ་སྐྲ་དང་ཁ་སྤུ་འདྲེག་པར་བྱེད་པ་དང༌། དེ་ཉིད་གྱོན་བཞིན་ཟན་ཟ། སྟོན་པ་ལ་ཕྱག་འཚལ་བ་དང༌། མ་དད་པ་རྣམས། ཤཱཀྱའི་དགེ་སྦྱོང་རྣམས་ནི་གཙང་སྦྲ་མེད་པའོ་ཞེས་འཕྱ་བའི་སྐབས་དེ་གསོལ་བ་དང༌། ཆོས་གོས་གྱོན་བཞིན་དུ་སྐྲ་དང་ཁ་སྤུ་བྲེག་པར་མི་བྱའོ། །འོན་ཀྱང་སྐྲ་བཟེད་ཀྱི་གོས་བཅང་བར་བྱ་ཞིང་དེ་བགོས་ནས་སྐྲ་བྲེག་པར་བྱའོ། །ཁ་ཅིག་ལ་འབྱོར་པ་མེད་ན། འབྱོར་པ་མེད་པ་དེ་དག་གིས་རྔུལ་གཟན་གྱིས་ལུས་དཀྲིས་ལ་སྐྲ་བྲེག་པར་བྱའོ། །སྟོན་པ་མཉན་ཡོད་ན་བཞུགས་པའི་ཚེ། དགེ་སློང་དག །ཉི་མ་ནི་ཤར། བྱ་རོག་ནི་སྐད་འབྱིན། ཞིང་པ་ནི་ཞིང་རྨོ། ཆོས་རྐུན་པ་ནི་ངུའོ། །དེའི་དོན་ཉི་མ་ཤར་བ་ནི་སངས་རྒྱས་བྱོན་པའོ། །བྱ་རོག་སྐད་འབྱིན་པ་ནི་ཆོས་འཆད་པའོ། །ཞིང་པ་ཞིང་རྨོ་བ་སྦྱིན་བདག་སྦྱིན་པར་བྱེད་པའོ། །ཆོམ་རྐུན་པ་ངུ་བ་ནི་བདུད་ཀྱི་འཁོར་རོ། །དེ་བས་ན། དགེ་སློང་དག །སྟོན་པ་ནི་ཉན་ཐོས་རྣམས་ལ་ཐུགས་བརྩེ་བས་ཐུགས་རྗེའི་དོན་སྟོན་པ། ཕན་པར་དགོངས་པ། ཐུགས་རྗེ་བཞིན་པས་ན་ངས་ཁྱེད་ལ་དོན་བྱས་ཀྱིས། ཁྱེད་ཀྱིས་དབྱེ་བའི་རིགས་སོ། །
དེ་ན་འདི་ལྟར། དགོན་པ་དང༌། ཤིང་དྲུང་དང༌། ཁང་སྟོང་དང༌། རི་དང༌། གྲོག་པོ་དང༌། རི་ཕུག་དང༌། སོག་མའི་ཕུང་པོ་དང༌། བླ་གབ་མེད་པ་དང༌། དུར་ཁྲོད་དང༌། ནགས་ཚལ་གྱི་ཕྱོགས་དང༌། བས་མཐར་གནས་པར་བྱ་སྟེ། དགེ་སློང་དག །བག་མེད་པར་མ་བྱེད་ཅིག །ཕྱིས་འགྱོད་པར་གྱུར་ཏ་རེ། ངས་བསྟན་པ་འདི་ནི་ངས་རྗེས་སུ་བསྟན་པའོ་ཞེས་གསུངས་པ་དང༌། དགེ་སློང་དག་དགོན་པ་དང༌། ནགས་ཚལ་སོགས་བས་མཐར་བསམ་གཏན་བྱེད་པ་ལ་ཞུགས་སོ། །ཁྱིམ་བདག་ཅིག་གིས་དགེ་སློང་གི་ཕྱིར་དགོན་པར་ཁང་པ་ཕུལ། དེར་དགེ་སློང་ཞིག་འདུག་པ་དེ་སྐྲ་དང་ཁ་སྤུ་རིང་པོར་གྱུར་ཏེ། སྐྲ་དང་ཁ་སྤུ་རིང་བ་ཁྱིམ་བདག་གིས་མཐོང་ནས། དགེ་སློང༌། སྐྲ་དང་ཁ་སྤུ་རིང་པོ་འཇོག་གམ་ཅི། འདྲེན་མཁན་མེད་དོ། །ཁོ་བོས་གཏང་ངོ༌། །དེས་འདྲེག་མཁན་བཏང༌། དེ་ལེ་ལོ་ཅན་ཞིག་པས་གདིང་བའི་སྟེང་དུ་འདུག་བཞིན་པས་སྐྲ་བྲེགས་པས་སྐྲ་གདིང་བའི་སྟེང་དུ་ལྷུང་སྟེ་ཟད་པར་དོར་མ་ནུས་སོ། །ཁྱིམ་བདག་དེ་ལྟར་སོང་ནས་གདིང་བའི་སྟེང་དུ་འདུག་པས་དེའི་གོས་ལ་སྐྲ་ཆགས་ཏེ། ཁྱིམ་དུ་སོང་བ་དང༌། ཆུང་མས། ཁྱོད་འདྲེག་མཁན་གྱི་ཁྱིམ་ན་འདུག་གམ། དེས་གོས་ལ་སྐྲ་ཆགས་པ་མཐོང་ནས་ལྟར་སོང་སྟེ་གདིང་བ་སྐྲས་གང་བ་མཐོང་ནས། དགེ་སློང༌། གདིང་བའི་སྟེང་དུ་སྐྲ་མི་འདྲེག་(༥༣བ)ཙམ་ཡང་མི་ཤེས་སམ། དེས་དེར་འཕྱས་པ་དེ་གསོལ་བ་དང༌། དེ་ཡུས་ཏེ། གདིང་བར་ཡང་མི་བྱའོ། །དགེ་སློང་དག་གིས་གནས་ཁང་དང༌། འཆག་ས་དང༌། སྒོ་ཁང་དུ་བྲེགས་པས་ཉེས་དམིགས་དེ་ཉིད་བྱུང་ནས། གང་དུ་དགེ་འདུག་ཕྱག་དར་འཆག་པར་ཡང་མི་བྱའོ། །ཁ་ཅིག་རྒས། ཁ་ཅིག་ན་ནས་འགྲོ་མ་ནུས། རེས་ཉི་མ་དང་ཆར་པས་གནོད་པ་དེ་གསོལ་བ་དང༌། རྒན་པོ་དང༌། ནད་པ་དང༌། རླུང་དང༌། ཉི་མ་དང༌། ཆར་པ་དག་ལ་ཁྱམས་ལ་སོགས་པར་འདྲེག་ཏུ་གཞུག་གོ་ཞེས་སོགས་སོ། །སྟོན་པ་མཉན་ཡོད་ནའོ། །དགེ་སློང་མ་དག་གཞོན་ནུས་སྐྲ་བྲེགས་པ་དང་ཆགས་པར་གྱུར་པ་དེ་གསོལ་བ་དང༌། སེམས་ནི་རྒོད་པ་སྟེ། དྲན་པ་ཉེ་བར་མ་བཞག་པས་བསླུས་པར་འགྱུར་རོ། །བུད་མེད་ཕལ་ཆེར་འདོད་ཆགས་རབ་ཏུ་ཆེ་བས། དེ་འདོད་ཆགས་དང་བྲལ་བ་མ་ཡིན་ན་དགེ་སློང་མས་ཞལ་ཏ་མ་བྱས་པར་སྐྱེས་པས་སྐྲ་མི་བྲེག་གོ །དགེ་སློང་མ་ཀུན་ཏུ་ཆགས་པར་གྱུར་ན་ཞལ་ཏེ་བྱེད་པ་མོས་རྗེས་སུ་བསྟན་པར་བྱ་སྟེ། དྲན་པ་ཉེ་བར་ཞོག་ཅིག །ཕུ་ནུ་མོ། ཁྱིམ་པའི་ལས་ནི་ཁྱོད་ཀྱིས་སྤངས་ན། བསྙེན་པར་རྫོགས་པའི་ཚེ་དགེ་འདུན་སྡེ་གཉིས་ལས་ཁྱོད་ཀྱིས་ཁས་བླངས་པ་དེ་སོམས་ཤིག །འདོད་པ་ནི་བདེ་བ་ཆུང་ཞིང་སྡུག་བསྔལ་མང་ལ་ཉེས་དམིགས་གང་བར་གསུངས་ཀྱིས་ཚུལ་བཞིན་མ་ཡིན་པ་ཡིད་ལ་བྱེད་པ་སྤོངས་ལ་རབ་ཏུ་བྱུང་བའི་སེམས་ཉེ་བར་ཞོག་ཅིག །འདྲེག་མཁན་དེ་ཆགས་ན་ནི། དགེ་སློང་མ་འདིའི་ལུས་ནི་རུས་པའི་འཁྲུལ་འཁོར། འདི་ནི་རྒྱན་མེད་ལ་ལུས་དྲི་མ་ཅན། འདི་རབ་ཏུ་བྱུང་བ་ཡིན་གྱིས་དེ་ལྟ་བུའི་སེམས་ཟློག་ཅིག་ཅེས་སོ། །དགེ་སློང་དག་གིས་སྐྲ་དང་ཁ་སྤུ་བྲེགས་ནས་ཁྲུས་མ་བྱས་པར་སོང་བ་དང༌། བྲམ་ཟེ་དང་ཁྱིམ་བདག་རྣམས། དགེ་སྦྱོང་རྣམས་སྤུ་གྲིའི་ལས་བྱས་ནས་ཁྲུས་མི་བྱེད་པས་གཙང་སྦྲ་མེད་པའོ་ཞེས་འཕྱ་བའི་སྐབས་དེ་གསོལ་བ་དང༌། སྤུ་གྲིའི་ལས་དེ་བྱས་ནས་ཁྲུས་བྱའོ། །ཁ་ཅིག་རྒས་པ་དང༌། ཁ་ཅིག་ན་ནས་ཁྲུས་མ་ནུས། ཁ་ཅིག་གིས་ཆུ་མ་རྙེད་ནས་གསོལ་བ་དང༌། དེ་དག་གིས་ནས། ཡང་ན་ཡན་ལག་ལྔའི་ཁྲུས་བྱའོ། །
སྟོན་པ་མཉན་ཡོད་ནའོ། །དྲུག་སྡེ་རྣམས་ཆུ་བོ་དྲེགས་ལྡན་ལ་གཅེར་བུས་ཁྲུས་བྱེད་པ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས། གཅེར་བུར་ཁྲུས་བྱེད་པ་འདི་དག་སུ་ཞིག །གཞན་དག་གིས། ཤཱཀྱའི་བུ་ཡིན་ནོ། །དེ་དག་འཕྱ་ཞིང༌། སྟོན་པ་ངོ་ཚ་ཤེས་པ་དེ་ལྟ་བུ་ལ་ངོ་ཚ་དང་ཁྲེལ་དང་བྲལ་བ་འདི་ལྟ་བུ་ག་ལ་ཡོད་ཟེར་བའི་སྐབས་དེ་གསོལ་བ་དང༌། ཉེས་དམིགས་དེ་ནི་སྒྲེན་མོར་ཁྲུས་བྱེད་པ་ལས་གྱུར་པ་ཡིན་པས་དགེ་སློང་གིས་སྒྲེན་མོར་ཁྲུས་མི་བྱའོ། །འོན་ཀྱང་ཁྲུས་རས་བཅང་བར་བྱའོ། །སྟོན་པ་མཉན་ཡོད་ནའོ། །སྦོམ་དགའ་མོས་སྐྱེས་པ་ཁྲུས་བྱེད་སར་ཁྲུས་བྱས་པ་དང༌། ཁྱེའུ་གཞོན་ནུ་དག་གིས་དེ་མཐོང་ནས། ཀྱེ་ལྟོས་ཤིག་དགེ་སློང་མ་མགོ་བྱི་མོ་དེའི་(༥༤ན)ལུས་ནི་ནགས་ཀྱི་མ་ཧེ་བཞིན་ནོ་ཞེས་ཟེར་བའི་སྐབས་དེ་གསོལ་བ་དང༌། དགེ་སློང་མས་སྐྱེས་པའི་ཆུ་ངོགས་སུ་ཁྲུས་མི་བྱའོ། །སྟོན་པ་མཉན་ཡོད་ནའོ། །མཉན་ཡོད་ན་བུད་མེད་ཅིག་ཆུ་བོ་ཨ་ཛི་ར་བ་ཏིའི་བུད་མེད་ཀྱི་ཁྲུས་སའི་འགྲམ་ན་སྐྲ་བཤད་ཀྱིན་འདུག་པ་དང༌། སྦོམ་དགའ་མོ་ཁྲུས་བྱེད་པར་འདོད་དེ། ཁྲུས་ཀྱི་ཕྱེ་མ་ཁྱེར་ནས་ཆུ་བོ་ཨ་ཛི་ར་བ་ཏིར་སོང་ངོ༌། །དེས་བུད་མེད་དེ་མཐོང་ནས་ཕྲག་དོག་གི་ཀུན་ནས་དཀྲིས་པས། འདིས་བདག་ལ་འགྲན་ཏེ། འདི་མི་དགའ་བར་འགྱུར་བ་དང༌། ཕྱིས་བདག་མཐོང་ན་སྐྲས་འགྲན་བར་མི་འགྱུར་བར་བྱའོ་སྙམ་ནས་སྐྱུ་རུ་རའི་ཕྱེ་མ་སྐྲ་ལ་གཏོར་རོ། །འཕགས་མ། བདག་གིས་ཉེས་པ་ཅི་བྱས་ན་ཁྲུས་བྱས་ཟིན་པ་ལ་ཕྱེ་མས་གཏོར། བུ་ཟན་མོ། ང་ལ་སྔོན་སྐྲ་ཡོད་མ་མྱོང་ངམ། དེས་ན་ཁྱོད་གཙེ་ཡིས། སོངས། ཁྲུས་བྱོས། ངས་ཁྱོད་ཀྱི་སྐྲ་ལ་མི་གཙང་བ་སྣ་ཚོགས་ཀྱིས་མ་རུང་བར་བྱས་སམ། དེ་འཕྱ་བའི་སྐབས་དེ་གསོལ་བ་དང༌། དགེ་སློང་མས་བུད་མེད་ཁྲུས་བྱས་ཟིན་པ་ལ་ཕྱེ་མ་མི་གཏོར་རོ། །སྟོན་པ་མཉན་ཡོད་ནའོ། །སྟོན་པས། སྟོངས་མོ་བྱའོ་ཞེས་གསུངས་པ་དང༌། དགེ་སློང་ཞིག་སྐས་ལ་འཛེག་པ་ན་འོག་ན་ཤིང་མཁན་ཞིག་འདུག་པས་དེ་འདོམས་དང་བ་མཐོང་ནས། ཁྱོད་སྐྱེས་པའི་དབང་པོ་དང་ལྡན་པས་ཕོ་ཡིན་པར་གདོད་ཤེས་སོ་ཞེས་སྨྲས་པས་དེ་གནོང་བའི་སྐབས་དེ་གསོལ་བ་དང༌། ཉེས་དམིགས་དེ་ནི་གོས་མདུད་པ་མ་བོར་བར་སྐས་ལ་འཛེག་པ་ལས་གྱུར་པ་ཡིན་པས་གོས་མདུད་པ་བོར་ནས་མཁར་ལན་བྱའོ། །དགེ་སློང་རྣམས་གོས་མདུད་པ་བོར་ནས་མཁར་ལན་བྱེད་པ་ན་མ་དད་པ་རྣམས་འཕྱ་སྟེ། ཅི་སྟོབས་འགྱེད་དམ། བཞིན་བཟང༌། མཁར་ལན་བྱེད་དོ། །དེ་དག་ཅིའང་མི་སྨྲ་བའི་སྐབས་དེ་གསོལ་བ་དང༌། སྐས་ལ་འཛེག་པ་ལས་གཞན་གྱི་དུས་སུ་དེ་ལྟར་མི་བྱའོ། །དགེ་སློང་ཞིག་གིས་ཁ་མ་བཀབ་པར་གླལ་བ་དང༌། གཟན་གིས་དེའི་ཁར་ཕོ་མཚན་བཅུག་པས། ཁ་མ་བཀབ་པར་གདང་བར་མི་བྱའོ། །ཁྲུས་རས་བཅང་བར་བྱའོ་ཞེས་གསུངས་པ་དང༌། ཉིས་རིམ་འཆང་ནས། ཆིག་རྐྱང་འཆང་གི་ཉིས་རིམ་ལ་ནི་སྲོག་ཆགས་ཀུན་ཏུ་འཆགས་པས་ཉིས་རིམ་ཡོད་པ་དེས་ཆུ་བརྟགས་ལ་བཀྲུའོ། །ཆོས་གོས་གསུམ་པ་རྣམས། མི་རུང་སྙམ་ནས་མི་འཆང་བ་དང༌། ཆོས་གོས་གསུམ་པས་ཀྱང་བྱིན་གྱིས་བརླབས་ཏེ་བཅང་ངོ༌། །ཁ་ཅིག་གིས་ཁྲུས་རས་མ་རྙེད་ནས། ཁྲུས་རས་མེད་ན་མདུན་དང་རྒྱབ་ནས་ལོ་མ་དག་གིས་གླན་ལ་དབེན་པའི་ཕྱོགས་སུ་ཁྲུས་བྱའོ། །ཁྲུས་རས་གཅུས་ཏེ་འགྱོད་པ་དང༌། རས་ཆིག་རྐྱང་ལ་ནི་སྲོག་ཆགས་མེད་ཀྱིས། སྲོག་ཆགས་ཆགས་ནས་བཤལ་ནས་གཅུས་པས་མེད་པར་འགྱུར་རོ། །དགེ་སློང་རྣམས་ཁང་(༥༤བ)བཟང་དུ་ཁྲུས་བྱས་པས་རི་མོ་བྱིད་ནས། དེར་མི་བྱ་ཡི། རྫིང་གི་གྲྭ་ཞིག་ཏུ་ཁྲུས་ཁང་བྱའོ། །འདམ་རྫབ་ཏུ་གྱུར་ནས། དེར་སོ་ཕག་གི་གཅལ་དགྲམ་མོ། །ཆུ་འཁྱིལ་ནས། གཏོར་ཁུང་གདོད་དོ། །དེའི་ཁ་འགགས་ནས་ལྗན་ལྗིན་བསལ་བར་བྱའོ། །གཏོར་ཁུང་དུ་ཁྲུས་བྱེད་ན་འདམ་རྫབ་མི་འབྱུང་ངོ༌། །སྟོན་པ་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པ་ན་བཞུགས་སོ། །དྲུག་སྡེ་རྣམས་ཡངས་པ་ཅན་དུ་བསོད་སྙོམས་ལ་ཞུགས་པ་དང༌། ཡངས་པ་ཅན་དང་ཁང་པ་བརྩེགས་པའི་འགྲམ་ན་ཡངས་པ་ཅན་གྱིས་ལི་ཙ་བྱི་རྣམས་ཀྱི་སྐྱེད་མོས་ཚལ་མེ་ཏོག་དང་འབྲས་བུ་དང་ཆུ་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ། དགའ་བའི་ཚལ་དང་འདྲ་བ་དེ་ན་དེ་དག་གིས་བརྩལ་བའི་ཡོ་བྱད་དང༌། གླུ་གར་དང༌། རོལ་མོའི་ཆ་བྱད་དང༌། ཁྲུས་ཀྱི་ཡོ་བྱད་སྣ་ཚོགས་བཞག་པ་དང༌། དྲུག་སྡེས་སྨྲས་པ། སྟོན་པས་ཡངས་པ་ཅན་གྱི་སྐྱེད་མོས་ཚལ་ནི་སུམ་ཅུ་རྩ་གསུམ་པའི་ལྷ་རྣམས་ཀྱི་དང་འདྲའོ་ཞེས་ཟེར་གྱིས་ལྟར་འདོང་ངོ་ཞེས་སྐྱེད་མོས་ཚལ་དུ་ཞུགས་པ་དང༌། ད་ན་བརྩལ་བའི་ཡོ་བྱད་མདའ་བོ་ཆེ་ལ་སོགས་པ་དང༌། རོལ་མོའི་ཆ་བྱད་པི་ཝང་ལ་སོགས་པ་དང༌། ཁྲུས་ཀྱི་ཡོ་བྱད་སོ་ཕག་ལ་སོགས་པ་མཐོང་བ་དང༌། དགའ་བོ་ཉེ་དགས། ཡོ་བྱད་ཕུན་སུམ་ཚོགས་པ་དུ་མ་ཡོད་ན། རེ་ཞིག་བརྩལ་བ་བྱའམ། གར་བྱའམ། གླུ་བླང་ངམ། རོལ་མོའི་སྒྲ་བྱའམ། ཁྲུས་བྱ། སྨྲས་པ། བདག་ཅག་ཁྲུས་བྱས་ནས་རིང་ཞིག་ལོན་གྱིས། ཁྲུས་བྱའོ། །དེ་དག་གློད་ནས་སོ་ཕག་གི་དུམ་བུས་དྲུད་ཅིང་ཁྲུས་བྱས་པས། དེ་དག་གཟོ་དང་ལས་ཀྱི་གནས་ལ་མཁས་པས་སིལ་སྙན་ཡན་ལག་ལྔ་པ་ལྟ་བུའི་སྒྲ་སྙན་པ་བྱུང་སྟེ། ལམ་དེ་ནས་འགྲོ་བའི་སྐྱེ་བོའི་ཚོགས་ཀྱིས་སྒྲ་དེ་ཐོས་ནས་ཡུད་ཙམ་ཉན་ཏེ། ལི་ཙ་བྱི་རྣམས་ཀྱི་སྐྱེད་མོས་ཚལ་ན་གར་མཁན་གར་བྱེད་པ་ལྟར་འདོང་ཞེས་མྱུར་བར་ཕྱིན་པ་དང༌། དྲུག་སྡེ་རྣམས་ཕྱིར་བྱུང་ངོ༌། །དེ་དག་གིས། ཕྱོགས་གང་ན་གར་མཁན་རྣམས་གར་བགྱིད། བཀྲེན་པ། གར་མཁན་གར་བྱེད་པ་ལ་སྒྲ་འདི་ལྟ་བུ་འབྱུང་ངམ། ཁོ་བོ་ཅག་ལུས་དྲུད་ནས་ཁྲུས་བྱས་པ་ཡིན་ནོ། །ཅི་དགེ་སྦྱོང་ཁྱེད་འདོད་པའི་ཡོན་ཏན་གྱིས་གཟིར་ཏམ། བཀྲེན་པ། ཁྱེད་ཀྱི་མགྲིན་པ་རྡོག་པས་མནན་ལ་ཁོ་བོ་ཅག་འདོད་པའི་ཡོན་ཏན་གྱིས་གཟིར་ཏོ། །ཁྱེད་ཁོ་བོ་ཅག་གི་རྗེས་སུ་སྟོན་པ་ཡིན་ནམ། མ་སྨྲ་བར་སོང༌། གནོད་པ་བྱས་པ་རེ་ཞིག་བསྡིགས་པ་དང་སྤ་གོང་ནས་སོང་སྟེ་འཕྱ་བའི་སྐབས་དེ་གསོལ་བ་དང༌། ཉེས་དམིགས་དེ་ནི་སོ་ཕག་གི་དུམ་བུས་ལུས་དྲུད་དེ་ཁྲུས་བྱེད་པ་ལས་གྱུར་པ་ཡིན་པས། སོ་ཕག་གིས་ལུས་དྲུད་དེ་ཁྲུས་མི་བྱའོ། །དགེ་སློང་དག་རྐང་པ་སེར་ག་བྱུང་ཞིང་དྲི་མ་དང་བཅས་བཞིན་དུ་བསོད་སྙོམས་ལ་ཞུགས་པ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས། ཅིའི་ཕྱིར་དྲི་མ་མི་སྦྱང་། སྟོན་པས་མ་གནང་ངོ༌། །(༥༥ན)ཁྱེད་དྲི་མའི་འདམ་བཅངས་པས་དག་པར་འགྱུར་རམ། །སྐབས་དེ་གསོལ་བ་དང༌། སྔ་མ་ནི་བཅས་པའོ། །འདི་ནི་གནང་བ་སྟེ། སོ་ཕག་གིས་རྐང་པ་དྲུད་པར་བྱ། ལུས་གཞན་ནི་མ་ཡིན་ནོ། །སོ་ཕག་གིས་ལུས་དྲུད་པར་མི་བྱའོ་ཞེས་གསུངས་པ་དང༌། དགེ་སློང་རྣམས་ཉ་ཕྱིས་ཀྱིས་འདྲུད་པར་བྱེད་པ་དང༌། བཀའ་སྩལ་པ། ཉ་ཕྱིས་ཀྱིས་དྲུད་པར་མི་བྱའོ། །མཉན་ཡོད་དུ་སྦོམ་དགའ་མོས་བྱིས་པ་གཞོན་ནུ་དག་ལུས་འཁྲུ་བའི་ནང་དུ་ཞུགས་ཏེ་སོ་ཕག་གི་དུམ་བུས་ལུས་དྲུད་ཅིང་ཁྲུས་བྱས་པ་དང༌། དེ་དག་ཆགས་པར་གྱུར་ཏེ། མགོ་རེག་མ་ཕ་བི་གྱད་ཆེན་པོ་གོ་ཆ་བགོས་པ་དང་འདྲ་བ་ཞིག །ལུས་ཕ་གུས་འཕྱི་ཞིང་འདུག་གོ་ཞེས་འཕྱ་བ་དེ་གསོལ་བ་དང༌། དགེ་སློང་མས་ལུས་ཕ་གུས་མ་འཕྱི་ཞིག །སྟོན་པ་མཉན་ཡོད་ནའོ། །དེ་བཞིན་དུ་རྡོ་ལེབ་དང༌། གོས་དཀྲིས་པ་དང༌། ཁུ་ཚུར་གྱིས་ཕྱིས་པས་ཉེས་དམིགས་སུ་གྱུར་ནས། དགེ་སློང་མས་ནི་གང་དུ་ཡང་ཁུ་ཚུར་དག་དང༌། གོས་དྲིལ་བ་དག་ཡན་ཆད་ཀྱིས་ཀྱང་དྲུད་པར་མི་བྱའོ། །མཉན་ཡོད་ནའོ། །དགེ་སློང་རྣམས་ཁྲུས་བྱས་ནས་ལུས་གཤེར་བཞིན་དུ་ཆོས་གོས་གྱོན་པས་ཁྲ་བོ་དང་དྲི་མི་ཞིམ་པར་གྱུར་ཏོ། །སྐབས་དེ་གསོལ་བ་དང༌། ལུས་ཕྱིས་བཅང་བར་བྱའོ། །ཁ་ཅིག་ལ་དེ་མེད་ནས། མེད་ན་ཡུད་ཙམ་ཞིག་ཙོག་པུར་འདུག་ལ་ཁྲུས་རས་ཀྱིས་ལུས་ཕྱིས་ཏེ་ཆོས་གོས་བགོ་བར་བྱའོ། །མཉན་ཡོད་ནའོ། །དགེ་སློང་ནད་པ་ཞིག་སྨན་པའི་གན་དུ་སོང་ནས། བཞིན་བཟང༌། བདག་ལ་སྨན་སྟོན་ཅིག །འཕགས་པ། བསྲོ་ཁང་སྟེན་དང་སོས་པར་འགྱུར་རོ། །
བཞིན་བཟང༌། ཁོ་བོས་འདོད་པ་དག་སྤྱད་པར་བྱའམ། ཁྱད་ཀྱི་སྨན་འདི་ལགས་ཀྱིས། གཞན་གྱིས་མི་འཚོའོ་ཟེར་བའི་སྐབས་དེ་གསོལ་བ་དང༌། དགེ་སློང་གིས་བསྲོ་ཁང་པསྟེན་པར་བྱའོ། །དགེ་སློང་དག་གིས་སྨན་པ་ལ། བཞིན་བཟང༌། སྟོན་པས་གནང་ངོ༌། །བསྲོ་ཁང་ཇི་ལྟ་བུ། འཕགས་པ། བདག་གིས་འཁོར་ལོས་བསྒྱུར་བའི་གསོ་བ་བཀླགས་པ་ལས་བསྲོ་ཁང་ཞེས་འབྱུང་བར་ཟད་ཀྱིས། བསྲོ་ཁང་ཇི་ལྟ་བུ་མ་འཚལ་ཏེ། སྟོན་པ་ཐམས་ཅད་མཁྱེན་པ་ལགས་པས་མཁྱེན་ཏོ་ཟེར་བའི་སྐབས་དེ་གསོལ་བ་དང༌། བསྲོ་ཁང་གི་ཁང་པ་ཟླུམ་པོ་བྱའོ། །དེ་དག་སྐར་ཁུང་མི་གདོད་ནས། སྐར་ཁུང་གདོད་པར་བྱའོ། །དེ་དག་སྐར་ཁུང་ཕྱི་ཡངས་ལ་ནང་དོག་པ་བྱེད་ནས། ཕྱི་རུབ་ལ་ནང་ཡངས་པ་རྒྱ་མཚོའི་རྣམ་པ་ལྟ་བུ་བྱའོ། །མཐོན་པོར་གཏོད་བ་ན་མུན་པ་ནག་པ་དང༌། དམའ་བར་གཏོད་བ་ན་དུ་བ་འཚང་དུ་མི་བཏུབ་ནས། དཀྱིལ་དུ་གདོད་པར་བྱའོ། །བྱེའུ་དང་ཕུག་རོན་འཇུག་ནས། སྐར་ཁུང་དྲ་བ་ཅན་བྱའོ། །རླུང་དང་ཆར་ཆུ་འོང་ནས། སྐར་ཁུང་ལ་སྒོ་གླེགས་བྱའོ། །རླུང་གིས་འདུག་ཏུ་མི་བཏུབ་ནས། འཁོར་གཏན་དང་གནམ་གཟེར་དང༌། (༥༥བ)འཕྲེད་གཏན་དང་བཅས་པ་གཞུག་གོ །དབྱེ་བ་དང་གཅད་དཀའ་ནས། དབྱུ་གུ་སྐམ་ཁའང་ཉེ་བར་གཞག་གོ །སྒོ་ལ་སྒོ་གླེགས་མི་འཇུག་ནས། སྒོར་སྒོ་གླེགས་དང༌། སྒོ་གཏན་དང༌། ཡང་མིག་དང༌། ལག་ཟུང་ལེགས་པར་བྱའོ། །ཆུ་དམའ་སར་བཞག་པས་གྲང་ནས། ཆུ་དྲོན་གཞག་པའི་ཕྱིར་ནང་གི་ཕྱོགས་སུ་གཞག་སྟེགས་བྱ་ཞིང་དེར་བུམ་པ་གཞག་པར་བྱའོ། །མེ་བུས་པས་ཞལ་བ་ཉམས་ནས། མེ་བུད་པའི་གནས་ཀྱི་སར་སོ་ཕག་གི་གཅལ་དགྲམ་པར་བྱའོ། །མེ་གདལ་བས་ཤི་ནས། མི་འཆི་བར་བྱ་བའི་ཕྱིར་སྦ་བར་བྱའོ། །ཅིས་བཅེར་བ་མི་ཤེས་ནས་དེའི་ཆེད་དུ་ལྕགས་ཀྱི་ཐལ་ཕྱགས་བཅང་བར་བྱའོ། །མེ་འབར་བ་ན་ཞུགས་པས་རྨྱ་བར་གྱུར་ནས། མེ་འབར་བ་ན་མི་རྨ་བར་བྱ་བའི་ཕྱིར་འཇུག་པ་བསྡད་པར་བྱའོ། །ཞུགས་པ་ན་མེའི་དུགས་ཀྱིས་བོག་བོགས་ནས་ས་ལ་འགྱེལ་བས། བོགས་བོག་པ་མི་འབྱུང་བར་བྱ་བའི་ཕྱིར་ཕྱེ་དང་ཉུངས་མར་དུ་བསྲེགས་པ་དག་མེར་བླུགས་སོ། །དེས་དྲི་མི་ཞིམ་ནས། དྲི་མི་ཞིམ་པ་ཉིད་བསལ་བའི་ཕྱིར་བདུག་སྤོས་བླུགས་སོ། །དུད་པས་མཆི་མ་འཛག་ནས། མཆི་མ་འཛག་ན་ནས་ཀྱི་བག་ཟན་གྱིས་གཅད་དོ། །འོན་ཀྱང་འཛག་ནས། སྐྱུ་རུ་རའི་ཕྱེ་མ་སྦྲུས་པའི་ཆང་བུས་ཀྱང་ངོ༌། །སྟན་མེད་ན་སྟན་ཁྱེར་ཏེ་སོང་ལ་སྣུམ་གྱིས་ཆུད་ཟོས་ནས། དེར་རྩྭ་བམ་གྱི་སྟན་གདིང་ངོ༌། །རྐང་པ་ལ་ས་རྡུལ་གོས་ནས། ས་གཞིར་རྩྭ་དག་དགྲམ་མོ། །སྐམ་པོ་བཏིང་བ་མེས་ཚིག་ནས། སྔོན་པོ་དགྲམ་མོ། །སྔོན་པོ་མ་རྙེད་ནས། ཆུས་སྦངས་ལ་དགྲམ་མོ། །འབྲུ་མར་གྱིས་སྣུམ་པ་ན་འཇག་མ་དང་གསེག་མས་ལུས་ལ་ཕྲུགས་པས་རྨ་བྱུང་ནས། གཡན་པ་འཕྲུག་པའི་ཆེད་དུ་ལྕགས་ཀྱི་འཕྲུག་སྤྱད་བྱའོ། །དེ་གར་བབ་བབ་ཏུ་བཞག་པས་མ་རུང་ནས། རྫས་ཀྱི་བླས་ལུང་མིག་ནས་ཐ་གུས་བཏགས་ཏེ་དབེན་པར་གཞག་གོ །དེ་སྣུམ་པས་ཡང་ཡང་སྦྱོང་ནས། དེ་ལ་དྲི་མ་མེད་པ་ཉིད་དུ་བསྒྲུབ་པའི་ཕྱིར་མེས་རུང་བར་བྱའོ། །དེར་ཁྲུས་བྱས་པས་འདམ་རྫབ་ཏུ་གྱུར་ནས། དེར་ཁྲུས་མི་བྱ་བར་དེའི་ཕྱི་རོལ་ཏུ་ཁྲུས་བྱའོ། །ཁྲུས་བྱེད་པ་ལ་ཆུས་གནོད་ནས། ཁྲུས་ཆུ་ལྡུགས་པའི་ཆོས་གོས་དག་མི་ཉམས་པར་བྱ་བའི་ཕྱིར་སོ་ཕག་གིས་སྒྲོན་པའི་ཁྲུས་དོང་བྱས་ལ་ཁྲུས་བྱེད་པ་དེ་ཁྲུས་དོང་དུ་ཞུགས། ཁྲུས་ཆུ་ལྡུགས་པ་ཁར་འདུག་ནས་ཁྲུས་ཆུ་བླུགས་སོ། །དེ་ཆུས་གང་ནས། དེ་ལ་གཏོར་ཁུང་གདོད་དོ། །ཆུ་ཧ་ཅང་ཚ་ན་ཕྱི་མ་རྣམས་ལ་སྦྲན་པར་བྱའོ། །དེར་གྲང་མོས་བསྲེའོ། །དགེ་སློང་རྣམས་ཁྲུས་བྱས་ནས་འདག་རྫས་སོགས་གཙུག་ལག་ཁང་དུ་ལེན་པས་འགོད་ནས། དེ་ཉིད་དུ་ཐལ་བ་དང༌། བ་ལང་གི་ལྕི་བ་དང༌། སོ་ཤིང་གིས་བཀང་བའི་གྱོ་མོ་དག་གཞག་པར་བྱའོ། །མེའི་དུགས་ཀྱིས་ཉམས་དམས་ནས། ཁྱེའུ་སུས་བྱའོ། །མཉན་ཡོད་ན་འཚོ་བ་པ་ཞིག་ན་ནས་སྨན་པ་ལ་དྲིས་པས། བསྲོ་ཁང་གི་ཁྲུས་གྱིས་ཤིག །བདག་ནི་སློང་(༥༦ན)མོས་འཚོ་བ་ཡིན་ན། ཇི་ལྟར་བསྲོ་ཁང་དུ་ཁྲུས་འབྱོར། དགེ་སློང་རྣམས་ཟླ་བ་ཕྱེད་ཅིང་ཁྲུས་བྱེད་ཀྱིས། དེར་སོང་ལ་ཁྲུས་གྱིས་ཤིག །དེས་གོས་ས་དམར་དུ་ཁ་བསྒྱུར་བ་གྱོན་ནས་དགེ་སློང་གི་ནད་དུ་ཞུགས་པ་དང༌། དགེ་སློང་རྣམས་ཀྱིས་དེའང་དགེ་སློང་ངོ་སྙམ་ནས་མ་བཀག་གོ །དེ་མྱུར་བར་ཁྲུས་བྱས་ཏེ། མི་ལྡེ་ཞིང་འདུག་པ་དང༌། དགེ་སློང་ཞིག་གིས་མཐོང་ནས། ཚུར་ཤོག་ཁྲུས་བྱའོ། །དེས་མགོ་དྲིལ་བ་དང༌། དེའི་དཔུང་བ་ནས་བཟུང་སྟེ་བསླང་པས། ཤཱཀྱའི་བུ་མི་གཙང་བ་ཁྲུས་མ་བྱས་པས་ཁྲུས་བྱས་པ་ལ་རེག་གོ །ངེད་ཤཱཀྱའི་བུ་ཡིན་ན། ཁྱོད་སུ། འཚོ་བ་པའོ། །སྐབས་དེ་གསོལ་བ་དང༌། དེར་ངོ་མི་ཤེས་པ་ཞིག་ཤན་བསྲེ་བས་ཉེ་བར་གནས་པར་གྱུར་ན། དེར་གཏོགས་པས་ངེས་པར་ཤེས་པར་བྱ་བའི་ཕྱིར་མིང་དྲི་བར་བྱ་ཞིང༌། དགེ་སློང་སྒོ་བ་བསྐོའོ། །མིང་ཤེས་པའང་དྲིས་པ་དང༌། ངོ་ཤེས་པ་མ་འདྲི་ཞིག །མཉན་ཡོད་དུ་ཁྱིམ་བདག་ཅིག་གིས་དགེ་འདུན་གྱི་ཕྱིར་དུ་དུགས་ཁང་བྱས་པ་དང༌། དེར་དགེ་སློང་དག་གིས་འབྲུ་མར་བྱུགས་ཏེ་རྐང་པ་ལ་རེག་ནས་མགོ་ལ་རེག །མགོ་ལ་རེག་ནས་ཁ་ལ་རེག །ཁ་ལ་རེག་ནས་ལག་པ་དང་རྐང་པ་ལ་རེག་ཅིང༌། སླར་ཡང་ཁ་ལ་རེག་སྟེ་གོས་ངན་པ་ཞིག་གིས་སྨད་གཡོགས་ནས་འདུག་པ་དང༌། ཁྱིམ་པ་མ་དད་པ་ཞིག་ཕྱོགས་དེར་འོངས་པས་མཐོང་ནས་འཕྱ་བའི་སྐབས་དེ་གསོལ་བ་དང༌། དེ་བས་ན་དུགས་ཁང་དུ་ཁྱིམ་པ་མ་དད་པ་འཇུག་ཏུ་མི་གཞུག་གོ །
དེ་ནས་རེ་ཞིག་ནས་དགེ་སློང་རྣམས་དུགས་ཁང་དུ་ཞུགས་པའི་ཚེ་ཁྱིམ་བདག་མགོན་མེད་ཟས་སྦྱིན་དེར་འོངས་པ་དང༌། སྒོ་བས། ཁྱིམ་བདག་ནང་དུ་མ་འགྲོ་ཞིག །སྟོན་པས་དུགས་ཁང་དུ་ཁྱིམ་པ་མ་བཏང་ཞིག་གསུངས་སོ། །དེས་ཁོ་བོའང་གཞན་དུ་འགྱུར་རམ། ཁོ་བོས་ངེས་པར་འཕགས་པ་དག་གི་ལས་བྱའོ། །དེ་གསོལ་བ་དང༌། དད་པ་ནི་དུགས་ཁང་དུ་ཐོངས། ལས་ཀྱང་བྱེད་དུ་ཆུག་ཅིག །དེ་ནས་མགོན་མེད་ཟས་སྦྱིན་ནང་དུ་འགྲོ་བ་དང་ལྷན་ཅིག་ཏུ་བྲམ་ཟེ་ཞིག་ཀྱང་འོངས་ནས་དེ་མ་བཏང་བ་དང༌། དེས་ཅིའི་ཕྱིར་ཁྱིམ་བདག་བཏང་ལ་བདག་མི་གཏོང༌། དེ་ལ་སྨྲས་པ། ཁྱིམ་བདག་ནི་དད་པས་ནང་དུ་བཏང་ངོ༌། །འོ་ན་བདག་ཀྱང་དད་ན་ནང་དུ་གཏོང་ངམ། དེ་གསོལ་བ་དང༌། དད་པར་གྱུར་ན་ནང་དུ་ཐོང་ཞིག །དེ་ནང་དུ་བཏང་བས། དགེ་སློང་རྐང་པ་རེག་ནས་ཁ་ལ་རེག་ཅིང་སྒྲེན་མོར་འདུག་པ་མཐོང་ནས་མ་དད་པར་འཕྱ་བའི་སྐབས་དེ་གསོལ་བ་དང༌། དད་པ་ཆུང་བ་མ་བཏང་ཞིག །བསྲོ་ཁང་དུ་བྱི་དོར་གྱི་ལས་བྱའོ་ཞེས་གསུངས་པ་དང༌། བྱི་དོར་གྱི་ལས་སུས་བྱ་བ་མ་ཤེས་ནས། བྱི་དོར་གྱི་ལས་ནི་ལྷན་ཅིག་གནས་པ་དང༌། ཉེ་གནས་དག་གིས་བྱའོ། །དེ་དག་གིས་ནི་གཅིག་གིས་གཅིག་(༥༦བ)ལའོ། །ཁྲིའུ་དང་ཞེས་སོགས་ནས། འཕགས་པའི་མི་སྨྲ་བ་ཉིད་ལ་དམིགས་པའོ་ཞེས་པའི་བར་མ་མོ་ལས་གསུངས་ཤིང༌། བསྲོ་ཁང་གནང་བའང་རྒྱགས་པའི་ཕྱིར་མ་ཡིན། དྲེགས་པའི་ཕྱིར་མ་ཡིན། བརྒྱན་པའི་ཕྱིར་མ་ཡིན། འཁྲུལ་བའི་ཕྱིར་མ་ཡིན་གྱི། ལུས་འདི་གསོ་བའི་ཕྱིར་རོ། །དུགས་ཁང་ལ་ཡོན་ཏན་ལྔ་སྟེ། རྡུལ་དང་དྲི་མ་འབྱང༌། པགས་པ་མདངས་གསལ། པགས་པ་ལ་ནད་ཡོད་པ་རྣམས་འབྱིན། རླུང་དང་བད་ཀན་སེལ། ནད་མེད་པར་བྱེད་པའོ། །མཉན་ཡོད་དུ་ཁྱིམ་བདག་ཅིག་གིས་དགེ་འདུན་གྱི་ཕྱིར་དུགས་ཁང་བྱས་སོ། །
དྲུག་སྡེས་གོས་གཅིག་པུས་སྨད་གཡོགས་བྱས་ཏེ་གཅིག་ལ་གཅིག་ལས་བྱས་ཏེ་འཁོད་པ་དང༌། བྲམ་ཟེ་དང་ཁྱིམ་བདག་དག་གིས་མཐོང་ནས། འདི་ལྟ་བུ་བྱེད་པ་སུ་ཞིག །ཁ་ཅིག་གིས། མུ་སྟེགས་སོ། །ཁ་ཅིག་གིས། མུ་སྟེགས་མ་ཡིན་གྱི། དགེ་སྦྱོང་ངོ༌། །སྟོན་པ་ངོ་ཚ་དང་ལྡན་ན། ཅིའི་ཕྱིར་འདི་དག་ངོ་ཚ་དང་ཁྲེལ་མེད། དེ་གསོལ་བ་དང༌། དེ་བས་ན་དུགས་ཁང་དུ་གོས་གཅིག་པས་བྱི་དོར་གྱིས་ལས་མི་བྱའོ། །ལུས་ཀྱི་དེ། མ་དད་པ་བྱེད་དུ་མི་གཞུག་གོ་ཞེས་པའི་གླེང་གཞི། དེར་མ་དད་པ་འཇུག་ཏུ་མི་གཞུག་པ་དང་གཅིག་གོ །མཉན་ཡོད་དུ་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་དུགས་ཁང་དུ་སྤྱན་དྲངས་པ་དང༌། དགེ་སློང་དགྲ་བཅོམ་པ་ཞིག་གིས་དགེ་སློང་ཉམས་པ་ཁ་ཅིག་གིས་ལས་བྱེད་པ་གཟིགས་ནས། ཁྱེད་ཅག་གིས་དགེ་སློང་འདི་ལ་དགེ་སློང་འདིས་ལས་བྱེད་པ་མཐོང་ངམ། བཙུན་པ། མཐོང་ངོ༌། །ལས་བྱེད་པ་འདི་ནི་དགྲ་བཅོམ་པའོ། །གང་ལ་ལས་བྱ་བ་འདི་ནི་ཚུལ་ཁྲིམས་ཉམས་པ། སྡིག་པའི་ཆོས་ཅན། ཁོང་རུལ་པ་སྟེ། དེ་བས་ན་སེངྒེ་ལྟ་བུས་ཝ་ལྟ་བུ་ལ་བསྙེན་བཀུར་མི་བྱའོ། །
དེ་ནས་མཉན་ཡོད་དུ་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་ཁྱེའུ་གཟུགས་བཟང་བ་ཞིག་བཙས་ཏེ་ཆེར་སྐྱེས་པ་དང༌། རབ་ཏུ་བྱུང་ནས་མཛོད་གསུམ་དང་ལྡན་པར་གྱུར་ཏེ་དེས་འདི་སྙམ་དུ། སྟོན་པས། ཕ་མ་ནི་བྱ་བ་བྱེད་པ། ཕན་པར་བྱེད་པའོ། །བུས་ཕྲག་པ་གཅིག་ལ་ནི་མ། གཉིས་པ་ལ་ནི་ཕ་ཁྱེར་ཏེ་ལོ་བརྒྱ་ཚང་གི་བར་དུ་ཁྱེར་ཏམ། ཡང་ན་ས་གཞི་ཆེན་པོ་རིན་པོ་ཆེ་སྣ་བདུན་གྱིས་བཀང་སྟེ་དེའི་དབང་ཕྱུག་ཏུ་བཅུག་ཀྱང་དེས་ནི་ཕ་དང་མ་ལ་ཕན་པར་མི་འགྱུར་གྱི། གང་གིས་ཕ་མ་དད་པ་མེད་པ་དད་པ་ཕུན་སུམ་ཚོགས་པར་བྱས་སམ། ཚུལ་ཁྲིམས་ངན་པ་ལས་ཚུལ་ཁྲིམས་ཕུན་སུམ་ཚོགས་པར། སེར་སྣ་ཅན་ལས་གཏོང་བ་ཕུན་སུམ་ཚོགས་པར། ཤེས་རབ་འཆལ་བ་ལས་ཤེས་རབ་ཕུན་སུམ་ཚོགས་པ་ལ་བཀོད་ན་ཕ་མ་ལ་ཕན་བཏགས་པར་འགྱུར་རོ་ཞེས་གསུངས་སོ། །བདག་གིས་ཀྱང་ཕ་མ་ལ་ཕན་པ་ཅུང་ཟད་ཅིག་བྱའོ་སྙམ་ནས་མཐར་གྱིས་མཉན་ཡོད་དུ་ཕྱིན་ཏེ་ཕ་མ་(༥༧ན)གཉིས་སྐྱབས་འགྲོ་དང་བསླབ་པའི་གཞི་ལ་བཀོད། ཕ་ལ་བསོད་ནམས་བྱ་བའི་དངོས་པོ་བདུན་གྱི་ཡོན་ཏན་རྒྱས་པར་བརྗོད་པ་དང༌། དེས། བདག་གིས་ཀྱང་བསོད་ནམས་ཀྱི་དངོས་པོ་ཅུང་ཟད་ཅིག་བྱའོ། །ལེགས་ཀྱིས། གྱིས་ཤིག །ཅི་ཞིག་བྱ། དུགས་ཁང་གྱིས་ཤིག །དེས་དུགས་ཁང་བྱས་ཏེ་ཁྱིམ་བདག་དེ་རང་གིས་དུགས་ཁང་དུ་ལས་བྱས་པས་ཤིན་ཏུ་ངལ་ནས། དེས། བུ། བདག་རབ་ཏུ་ངལ་གྱིས་ངའི་རྒྱ་ཅུང་ཞིག་མཉེས་ཤིག །སྟོན་པས། སེངྒེ་ལྟ་བུས་ཝ་ལྟ་བུ་ལ་བསྙེན་བཀུར་མ་བྱེད་ཅིག་ཅེས་མ་གནང་ངོ༌། །བུ། སེངྒེ་དང༌། ཝ་ལྟ་བུ་གང༌། ཡབ། བདག་ནི་སེངྒེ་ལྟ་བུ་སྟེ། ཚུལ་ཁྲིམས་དང་ལྡན་པའོ། །ཁྱོད་ནི་ཝ་ལྟ་བུ་སྟེ། ཚུལ་ཁྲིམས་ངན་པ་དང་ལྡན་ནོ། །བུ། ཝ་དང་འདྲ་བ་ང་ལྟ་བུ་ལས་སེངྒེ་དང་འདྲ་བ་ཁྱོད་ལྟ་བུ་སྐྱེས་སམ་ཞེས་ཟེར་བའི་སྐབས་དེ་གསོལ་བ་དང༌། གང་ན་ཕ་མ་ལ་ཡང་དག་པར་མགུ་བར་བྱེད། ཡང་དག་པར་མཆོད་པར་བྱེད། ཡང་དག་པར་སྐྱོང་བར་བྱེད་པའི་རིགས་དེ་ནི་ཚངས་པ་དང་བཅས་པ། སློན་དཔོན་དང་བཅས་པ། སྦྱིན་པར་རིགས་པ། མེ་དང་བཅས་པ། ལྷ་དང་བཅས་པའོ། །ཕ་དང་མ་གཉིས་ཚངས་པ་སྟེ། སློབ་དཔོན་སྔ་མའང་དེ་བཞིན་ནོ། །ཇི་ལྟར་མེ་ཡི་ལྷ་བྲན་བཞིན། །བུ་ཡི་སྦྱིན་པའི་གནས་ཡིན་ནོ། །དེ་བས་དེ་གཉིས་ཕྱག་བྱ་ཞིང༌། །ཕྱི་བར་བྱ་ཞིང་བཀྲུ་བ་དང༌། །རྐང་པ་གཉིས་ཀྱང་བཀྲུ་བར་བྱ། །དེ་བཞིན་མཁས་པས་བསྙེན་བཀུར་བྱ། །ཡང་ན་བཟའ་བ་ལྟུང་བ་དང༌། །བགོ་བ་མལ་སྟན་དེ་བཞིན་ཏེ། །དེས་ནི་ཕ་དང་མ་གཉིས་ལ། །མཁས་པས་བསྙེན་བཀུར་བཅས་བྱེད་ན། །འདིར་ནི་མནར་བར་མི་འགྱུར་ཏེ། །སོང་ནས་མཐོ་རིས་དགའ་བར་འགྱུར། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཅོམ་ལྡན་འདས་ཀྱིས་ཕ་མ་དང་བླ་མ་ལ་རིམ་གྲོ་བགྱིད་པའི་ཡོན་ཏན་བརྗོད་པ་ངོ་མཚར་ཆེའོ། །
བཀའ་སྩལ་པ། འདི་ལ་ངོ་མཚར་ཅི་ཆེ། ང་ཉོན་མོངས་པ་དང་བཅས་པའི་དུས་ནའང་མ་ལ་གནོད་པ་ཅུང་ཟད་བྱས་པས་སྡུག་བསྔལ་ཆེན་པོ་མྱོང་བ་དང༌། ཕན་པ་ཅུང་ཟད་བྱས་པས་བདེ་བ་ཆེན་པོ་མྱོང་བར་འགྱུར་ཏེ། དེ་དག་ལེགས་པར་ཡིད་ལ་གྱིས་དང་བཤད་པར་བྱའོ། །སྔོན་ཝཱ་ར་ཎཱ་སཱི་ན་དེད་དཔོན་མཛའ་བོ་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བྱུང་ཡང་ཤི་ནས་བུ་འདོད་པས་ལྷ་ལ་གསོལ་ཀྱང༌། བུ་མ་གསོས་པས། གཞན་ཞིག་གིས། ཁྱོད་ལ་བུ་བཙས་ན་བུ་མོའི་མིང་དུ་ཐོགས་ཤིག་རིང་དུ་འཚོ་བར་འགྱུར་རོ་ཞེས་བསྒོའོ། །རེ་ཞིག་ན་དེའི་ཆུང་མ་ལ་བུ་གཟུགས་བཟང་བ་ཞིག་བཙས་ཏེ་བཙས་སྟོན་བྱས་ནས་མིང་འདོགས་པ་ན། མཛའ་བོའི་བུ་ཡིན་ལ། (༥༧བ)བུ་མོའི་མིང་དུ་གདགས་པས་ན་མཛའ་བོའི་བུ་མོར་བཏགས་སོ། །དེའི་ཕ་རྒྱ་མཚོ་ཆེན་པོར་ཞུགས་ནས་དེ་ཉིད་དུ་ཤིའོ། །དེ་ནས་མཛའ་བོའི་བུ་མོས། མ་ལ། བདག་གི་ཕ་སྔོན་ལས་གང་གིས་འཚོ། བདག་ཀྱང་དེ་བཞིན་བསྒྲུབ་བོ། །མས་བསམས་པ། རྒྱ་མཚོ་ཆེན་པོར་འཇུག་པའི་ཚོང་པ་ཡིན་ཞེས་སྨྲས་ན། འདིའང་དེར་ཞུགས་ནས་ཤི་དོགས་ཏེ། ཁྱོད་ཀྱི་ཕ་འབྲུ་འཚོང་པ་སྟེ། ཁྱོད་ཀྱང་དགའ་ན་འབྲུ་འཚོང་པར་གྱིས་ཤིག །དེས་འབྲུའི་ཚོང་ཁང་བརྩིགས་ཏེ་ཐོག་མའི་ཉིན་པར་ཀརྵ་པ་ན་བཞི་རྙེད་དེ་དེ་དག་མ་ལ་བྱིན་ཏོ། །རེ་ཞིག་ན་གཞན་ཞིག་གིས། ཁྱོད་ཀྱི་ཕ་ནི་དྲི་འཚོང་པའོ་ཞེས་སྨྲས་པ་དང༌། དེས་འབྲུ་འཚོང་པ་བཏང་ནས་དྲིའི་ཚོང་བྱས་པའི་ཉི་མ་དང་པོ་ལ་ཀརྵ་པ་ན་བརྒྱད་རྙེད་དེ་དེ་དག་ཀྱང་མ་ལ་བྱིན་ཏོ། །ཡང་གཞན་ཞིག་གིས། ཁྱོད་ཀྱི་ཕ་གསེར་འཚོང་པའོ་ཞེས་སྨྲས་པ་དང༌། དེ་དྲི་འཚོང་པ་བཏང་ནས་གསེར་འཚོང་པའི་ཉི་མ་དང་པོ་ལ་ཀརྵ་པ་ན་བཅུ་དྲུག་རྙེད་དེ་མ་ལ་བྱིན་ཏོ། །དེའི་ཕྱི་ཉིན་ཀརྵ་པ་ན་སུམ་ཅུ་རྩ་གཉིས་རྙེད་དེ་དེ་དག་ཀྱང་མ་ལ་བྱིན་ཏོ། །
དེ་ནས་གསེར་འཚོང་ཕྲག་དོག་ཅན་དག་གིས། གྲོང་ཁྱེར་ཐམས་ཅད་ཀྱི་གསེར་འདིས་བསྡུས་སོ་སྙམ་ནས། མཛའ་བོའི་བུ་མོ་ལ། ཁྱོད་ཀྱི་ཕ་སྔོན་རྒྱ་མཚོ་ཆེན་པོར་འཇུག་པའི་ཚོང་པ་ཡིན་ན། ཁྱོད་སུས་འདི་འདྲ་ངན་པས་འཚོ་བ་ལ་འཇུག་ཏུ་བཅུག་ཅེས་སྨྲས་པ་དང༌། དེས་མ་ལ། བདག་གི་ཕ་རྒྱ་མཚོ་ཆེན་པོར་འཇུག་པའི་ཚོང་པ་ཡིན་པར་ཐོས་ཀྱིས། བདག་ཀྱང་རྒྱ་མཚོ་ཆེན་པོར་འཇུག་གོ །མས། བུ། དེ་ནི་བདེན་མོད། ཁྱོད་ནི་གཞོན་ལ་བུ་གཅིག་པུ་ཡིན་པས་ཁོ་མོ་བོར་ནས་རྒྱ་མཚོ་ཆེན་པོར་མ་འགྲོ་ཞིག །དེས་མའི་ཚིག་མ་ཉན་པར། རྒྱ་མཚོ་ཆེན་པོར་འགྲོ་འདོད་པ་རྣམས་འདོང་ངོ་ཞེས་བསྒྲགས་ནས་ཚོང་པ་ལྔ་བརྒྱས་བསྐོར་ཏེ་ཆས་པ་དང༌། མས་མཆི་མས་བརྣངས་བཞིན་དུ་དེའི་རྐང་པ་གཉིས་ལས་བཟུང་སྟེ། ཁོ་མོ་བོར་ནས་མ་འགྲོ་ཞིག་ཅེས་སྨྲས་པ་དང༌། ཁྲོས་ནས་མའི་མགོ་རྐང་པས་ཕུལ་ཏེ་སོང་ངོ༌། །མས། བུ། ཁྱོད་ལ་ལས་འདི་རྣམ་པར་སྨིན་པར་མ་གྱུར་ཅིག་ཅེས་བྱས་སོ། །དེ་རིམ་གྱིས་རྒྱ་མཚོའི་འགྲམ་དུ་ཕྱིན་པ་དང༌། དོང་ཚེ་རྙིང་པ་ལྔ་བརྒྱས་གྲུ་བོ་ཆེ་ཉོས་ནས་རྒྱ་མཚོའི་ནང་དུ་ཞུགས་པ་དང༌། ཆུ་སྲིན་ཉའི་རིགས་ཀྱིས་གྲུ་མ་རུང་བར་བྱས་ཏེ་མཛའ་བོའི་བུ་མོ་གྲུ་ཚལ་ཞིག་ལ་འཇུས་ནས་མཐར་ཕྱིན་ཏེ་སྐམ་ལ་སོང་བ་དང༌། དགའ་བ་ཞེས་བྱ་བའི་གྲོང་ཁྱེར་མཐོང་ནས་དེར་སོང་བ་ན་ལྷའི་བུ་མོ་གཟུགས་ལེགས་ཤིང་ལྟ་ན་སྡུག་པ་བཞི་བྱུང་སྟེ་བདེ་བར་འོངས་སམ། བདག་ཅག་གི་བཟའ་བཏུང་དང་གོས་དང་རིན་པོ་ཆེའི་ཁང་པ་འདི་དག་བཞེས་ལ་བདག་ཅག་དང་ལྷན་ཅིག་བཞུགས་ཤིག །དེས་དེ་དག་དང་ལྷན་ཅིག་ལོ་བརྒྱ་སྟོང་མང་པོར་བདེ་བ་མྱོང་ངོ༌། །
དེ་དག་གིས། ལྷོ་ཕྱོགས་ཀྱི་ལམ་དུ་མ་འགྲོ་ཞིག་ཅེས་བསྒོའང་མ་ཉན་པར་(༥༨ན)སོང་བ་དང༌། དེས་རྟག་ཏུ་ང་རོ་ཞེས་བྱ་བའི་གྲོང་ཁྱེར་མཐོང་ནས་དེའི་སྒོར་ཕྱིན་པ་དང༌། སྔར་གྱི་དེ་བས་གཟུགས་མཛེས་པའི་ལྷ་མོ་བརྒྱད་བྱུང་སྟེ། ཚུར་སྤྱོན། བདེ་བར་བྱོན་ཏམ། བདག་ཅག་གི་བཟའ་བཏུང་དང་གོས་དང་རིན་པོ་ཆེའི་ཁང་པ་འདི་དག་བཞེས་ལ་ལྷན་ཅིག་བཞུགས་ཤིག །དེས་དེ་དག་དང་ལྷན་ཅིག་ལོ་བརྒྱ་སྟོང་མང་པོར་བདེ་བ་མྱོང་ངོ༌། །དེ་དག་གིས་ཀྱང༌། ལྷོ་ཕྱོགས་སུ་མ་འགྲོ་ཞིག་ཅེས་བསྒོའང་འགྲོ་འདོད་ནས་སོང་བ་དང༌། དགའ་བ་ཅན་ཞེས་བྱ་བའི་གྲོང་ཁྱེར་མཐོང་ནས་དེའི་སྒོར་ཕྱིན་པ་དང༌། དེ་བས་ཀྱང་གཟུགས་མཛེས་པའི་ལྷའི་བུ་མོ་བཅུ་དྲུག་བྱུང་སྟེ། ཚུར་སྤྱོན། བདེ་བར་བྱོན་ཏམ། བདག་ཅག་གི་བཟའ་བཏུང་དང་གོས་དང་རིན་པོ་ཆེའི་ཁང་པ་འདི་དག་བཞེས་ལ་ལྷན་ཅིག་བཞུགས་ཤིག །དེས་དེ་དག་དང་ལྷན་ཅིག་ལོ་བརྒྱ་སྟོང་མང་པོར་བདེ་བ་མྱོང་ངོ༌། །དེ་དག་གིས་ཀྱང༌། ལྷོ་ཕྱོགས་སུ་མ་འགྲོ་ཞིག་ཅེས་བསྒོའང་འགྲོ་འདོད་ནས་སོང་བ་དང༌། བླ་མའི་ཚངས་པ་ཞེས་བྱ་བའི་ཁང་པ་བཟང་པོ་མཐོང་ནས་དེའི་སྒོར་ཕྱིན་པ་དང༌། དེ་བས་ཀྱང་གཟུགས་མཛེས་པའི་ལྷ་མོ་སུམ་ཅུ་རྩ་གཉིས་བྱུང་སྟེ། ཚུར་སྤྱོན། བདེ་བར་བྱོན་ཏམ། བདག་ཅག་གི་བཟའ་བཏུང་དང་གོས་དང་རིན་པོ་ཆེའི་ཁང་པ་འདི་དག་བཞེས་ལ་ལྷན་ཅིག་བཞུགས་ཤིག །དེས་དེ་དག་དང་ལྷན་ཅིག་ལོ་བརྒྱ་སྟོང་མང་པོར་བདེ་བ་མྱོང་ངོ༌། །དེ་དག་གིས་ཀྱང༌། ལྷོ་ཕྱོགས་སུ་མ་འགྲོ་ཞིག་ཅེས་བསྒོའང་འགྲོ་འདོད་ནས་སོང་བ་དང༌། ལྕགས་ཀྱི་ཁང་པ་ཞིག་མཐོང་ནས་དེའི་ནང་དུ་ཞུགས་པ་དང༌། ཞུགས་མ་ཐག་སྒོ་བཅད་དོ། །དེ་བཞིན་དུ་སྒོ་སུམ་རིམ་གྱི་ནང་དུ་ཞུགས་པ་དང་ཐམས་ཅད་སྒོ་བཅད་དོ། །དེ་ན་སྐྱེས་བུ་ལུས་རབ་ཏུ་ཆེ་བ་ཞིག་གི་མགོ་ལ་ལྕགས་ཀྱི་འཁོར་ལོ་འབར་བ་མེ་ལྕེ་གཅིག་ཏུ་གྱུར་པ་ཞིག་འཁོར་ཞིང་འདུག་སྟེ་མགོ་ལས་རྣག་ཁྲག་བྱུང་བ་ཟས་སུ་ཟ་བ་མཐོང་ནས། ཁྱོད་ཅིའི་ཕྱིར་འདི་ལྟར་གྱུར་ཅེས་དྲིས་པས། ངས་མ་ལ་གནོད་པ་བྱས་པའི་ཕྱིར་རོ། །མཛའ་བོའི་བུ་མོའི་ལས་ཀྱང་མངོན་སུམ་དུ་སྨིན་ཏེ། བདག་གིས་ཀྱང་མ་ལ་གནོད་པ་བྱས་པའི་ལས་ཀྱིས་ཁྲིད་ནས་འདིར་འོངས་སོ་སྙམ་པ་དང༌། དེ་མ་ཐག་ཏུ་ནམ་མཁའ་ལས། གང་བཅིངས་པ་དེ་ནི་ཐར། གང་མ་བཅིངས་པ་དེ་ནི་བཅིངས་པའོ་ཞེས་པའི་སྒྲ་བྱུང་མ་ཐག་ཏུ་མཛའ་བོའི་བུ་མོའི་སྤྱི་བོར་འཁོར་ལོ་དེ་བྱུང་ངོ༌། །
དེ་ནས་སྐྱེས་བུ་དེས་མཛའ་བོའི་བུ་མོ་སྡུག་བསྔལ་བར་མཐོང་ནས། རྟག་ཏུ་དགའ་དང་དྲེགས་བྱེད་ཅིང༌། །སྐྱིད་པ་བྱེད་པ་བོར་བྱས་ཏེ། །ཚངས་པ་བླ་མའི་ཁང་པ་ནས། །ཅི་ཡི་ཕྱིར་ནི་ཁྱོད་འདིར་འོངས། སྨྲས་པ། རྟག་ཏུ་དགའ་དང་དྲེགས་བྱེད་ཅིང༌། །སྐྱིད་པ་བྱེད་པ་བོར་བྱས་ཏེ། །ཚངས་པ་བླ་མའི་ཁང་པ་ནས། །འདིར་ནི་འོང་བར་འདོད་གྱུར་པ། །ཡུན་རིང་པོ་ཡི་ལས་ཀྱིས་གཉེར། །ལས་ཀྱིས་རིང་ནས་གཉེར་ནས་ཀྱང༌། །གང་དུ་(༥༨བ)ལས་ཀྱིས་གཉེར་བ་དེར། །ལས་ཀྱང་རྣམ་པར་སྨིན་པར་འགྱུར། །ལས་གང་རྣམ་པར་སྨིན་གྱུར་ནས། །འཁོར་ལོ་འབར་བ་རབ་འབར་བ། །བདག་གི་སྲོག་ལ་གནོད་གྱུར་ཏེ། །ཀླད་ལ་འཁོར་ལོ་འབར་བར་གྱུར། །མི་དེས་སྨྲས་པ། ཁྱོད་ཀྱིས་ངན་པའི་སེམས་བསྐྱེད་དེ། །དཀའ་བ་བྱེད་པའི་མ་ཡི་མགོར། །ཁྱོད་ཀྱིས་རྡོག་པས་བརྒྱབ་པས་ན། །དེ་ཡི་ལས་ཀྱི་འབྲས་བུ་ཡིན། །སྨྲས་པ། འཁོར་ལོ་འབར་བ་རབ་འབར་བ། །བདག་གི་སྲོག་ལ་གནོད་བྱེད་པ། །ལོ་གྲངས་སྟོང་ཕྲག་ཇི་སྲིད་དུ། །ང་ཡི་ཀླད་ན་འཁོར་བར་འགྱུར། །མི་དེས་སྨྲས་པ། ལོ་གྲངས་སྟོང་ཕྲག་དྲུག་ཅུ་དང༌། །ལོ་གྲངས་བརྒྱ་ཡི་བར་དུ་ནི། །འབར་བའི་ལྕགས་ཀྱི་འཁོར་ལོས་ཀྱང༌། །ཁྱོད་ཀྱི་མགོ་ལ་འཇོག་པར་བྱེད། །དེས་དེ་ལ། གཞན་ཡང་འདིར་འོང་བ་ཡོད་དམ། མི་དེས་སྨྲས་པ། གང་གིས་འདི་འདྲའི་ལས་བྱས་པ་རྣམས་འོང་བར་འགྱུར་རོ། །
དེ་ནས་མཛའ་བོའི་བུ་མོ་སྡུག་བསྔལ་གྱིས་གཟིར་བ་དང་སེམས་ཅན་རྣམས་ལ་སྙིང་རྗེ་བསྐྱེད་ནས། ངས་སེམས་ཅན་ཐམས་ཅད་ཀྱི་ཕྱིར་དུ་འཁོར་ལོ་འདི་བཟོད་པར་བྱ་ཡིས། གཞན་གང་གིས་ནི་འདི་འདྲའི་ལས་བྱས་པ་དེ་དག་འདིར་མ་འོང་ཞིག་ཅེས་སྨྲས་མ་ཐག་ཏུ་དེའི་མགོ་ལས་འཁོར་ལོ་དེ་ཤིང་ཏ་ལ་བདུན་ཙམ་དུ་ནམ་མཁའ་ལ་འཕགས་ནས་འདུག་པ་དང༌། དེའང་ཤི་འཕོས་ནས་དགའ་ལྡན་དུ་སྐྱེས་སོ། །དེའི་དུས་ཀྱི་མཛའ་བོའི་བུ་མོ་དེ་ནི་ང་ཡིན་ཏེ། མ་ལ་ཀརྵ་པ་ན་བྱིན་པས་གྲོང་ཁྱེར་ཆེན་པོ་བཞིར་བདེ་བ་མྱོང་ངོ༌། །མ་ལ་གནོད་པ་ཅུང་ཟད་ཅིག་བྱས་པས་དེ་ལྟ་བུའི་སྡུག་བསྔལ་མྱོང་ངོ༌། །དེ་བས་ན་ཕ་མ་ལ་ཕན་པར་བྱ་ཡི། གནོད་པར་མ་བྱེད་ཅིག །དེ་བས་ན་ཚུལ་ཁྲིམས་རབ་ཏུ་ཉམས་པར་གྱུར་ཀྱང་རྣམ་པ་ལྔ་ལ་བསྙེན་བཀུར་བྱ་སྟེ། ཕ་དང༌། མ་དང༌། མཁན་པོ་དང༌། སློབ་དཔོན་དང༌། ནད་པའོ། །མཉན་ཡོད་ནའོ། །དགེ་སློང་ནད་པ་ཞིག་གིས་སྨན་པ་ལ། བཞིན་བཟང༌། སྨན་སྟོན་ཅིག །ལེགས་སྦྱར་གྱི་ཁྲུས་མཛོད་ཅིག །མ་གནང་ངོ༌། །སྟོན་པ་ཐུགས་རྗེ་ཅན་ཡིན་པས་གནང་བར་འགྱུར་རོ། །སྐབས་དེ་གསོལ་བ་དང༌། སྨན་པས་བསྟན་ན་ལེགས་སྦྱར་གྱི་ཁྲུས་བྱའོ། །དེ་ཇི་ལྟར་ཡིན་པ་མ་ཤེས་ནས་སྨན་པའི་དྲུང་དུ་སོང་སྟེ། སྟོན་པས་གནང་ན། དེ་ཇི་ལྟར་ཡིན་པ་སྟོན་ཅིག །འཕགས་པ། འཁོར་ལོས་སྒྱུར་བའི་གསོ་བའི་སྤྱད་ལས་ལེགས་སྦྱར་གྱི་ཁྲུས་ཞེས་འབྱུང་ན་ཇི་ལྟ་བུ་ཡིན་པ་མི་ཤེས་སོ། །འོན་ཀྱང་སྟོན་པ་ཐམས་ཅད་མཁྱེན་པ་ཡིན་པས་ཞུས་ཤིག །དེ་གསོལ་བ་དང༌། རླུང་འདྲེན་པའི་རྩ་བ་དང་སྡོང་བུ་དང་ལོ་མ་དང་མེ་ཏོག་དང་འབྲས་བུ་སྐོལ་བས་ཁྲུས་བྱ་བ་ནི་དེའི་མིང་ཡིན་ནོ། །དེ་དག་སྐོལ་ནས་ཁྲུས་བྱས་པས་རྩུབ་པོར་གྱུར་ནས། བསྐུ་མཉེ་བྱས་ནས་ཏེ། མི་རྩུབ་པ་ཉིད་ཀྱི་ཕྱིར་རོ། །བསྐུ་མཉེ་བྱས་པ་དང༌། ཧ་ཅང་སྣུམ་ཆེས་པས་(༥༩ན)གནས་མལ་མ་རུང་བར་གྱུར་པ་དང༌། སྣུམ་དེ་དང་བྲལ་བའི་ཕྱིར་ཁྲུས་ཆལ་གྱིས་བཀྲུ་བར་བྱའོ། །ཡང་རྩུབ་པར་གྱུར་ནས། སྔ་མ་མི་རྩུབ་པའི་ཆེད་དུ་ཆུའི་བུམ་པ་ཕྱི་མར་སྣུམ་ཐིགས་པ་གཉིས་སམ་གསུམ་བླུགས་སོ། །སྟོན་པ་རྒྱལ་པོའི་ཁབ་ནའོ། །པི་ལེན་དའི་བུ་རབ་ཏུ་བྱུང་ཕྱིན་ཆད་རྟག་ཏུ་ནའོ། །ཚངས་པ་མཚུངས་པར་སྤྱོད་པ་རྣམས་ཀྱིས། གནས་བརྟན། བདེའམ། བཞིན་བཟང༌། ན་སྟེ་མི་བདེའོ། །གནས་བརྟན། ཁྱོད་ཀྱིས་སྔོན་ཅི་ཞིག་བཅངས། བཞིན་བཟང༌། ལྕགས་ཀྱི་གཞོང་རིང་ངོ༌། །ད་ཅིའི་ཕྱིར་མི་འཆང༌། མ་གནང་ངོ༌། །སྐབས་དེ་གསོལ་བ་དང༌། ལྕགས་ཀྱི་གཞོང་རིང་བཅང་བར་བྱའོ། །སྟོན་པ་མཉན་ཡོད་ནའོ། །དགེ་སློང་གར་བབ་བབ་ཏུ་རྐང་པ་འཁྲུ་བ་དེར་སྦྲང་བུས་གང་བ་ཁྱིམ་པ་དག་གིས་མཐོང་ནས། འཕགས་པ། སྦྲང་བུ་ཟི་ཟི་བས་གང་བའི་ཕྱོགས་འདི་ཅི་ཡིན། འདིར་རྐང་པ་བཀྲུས་སོ། །དེ་དག་འཕྱ་སྟེ། དགེ་སྦྱོང་རྣམས་ནི་གཙང་སྦྲ་མེད་པ། གར་བབ་བབ་ཏུ་རྐང་པ་འཁྲུའོ། །དེ་གསོལ་བ་དང༌། གར་བབ་བབ་ཏུ་རྐང་པ་མི་བཀྲུ་ཡི་གཙུག་ལག་ཁང་གི་སྟེང་གི་ཤར་ལྷོའི་མཚམས་སུ་རྐང་ཁྲུས་ཀྱི་གཞི་བྱའོ། །དེ་ཇི་ལྟ་བུ་བྱ་བ་མ་ཤེས་ནས། རུས་སྦལ་ལྟ་བུ་བྱའོ། །རབ་ཏུ་འཇམ་པོ་བྱེད་པ་དང༌། རྩུབ་པར་བྱའོ། །ཉམ་ཆུང་བ་དག་གིས་ཕྱོགས་དེར་འགྲོ་མ་ནུས་པ་དང༌། དེ་དག་གིས་གྱོ་མོ་བཞག་གོ །གྱོ་མོར་འཁྲུ་བ་ན་ཆག་ནས་མ་རུང་བར་གྱུར་པ་དང༌། ཆོལ་ཟངས་ཉེ་བར་གཞག་པར་བྱའོ། །དྲུག་སྡེ་རྣམས་ཀྱིས་གསེར་དངུལ་ལས་བྱས་པ་བཞག་པ་དང༌། ཁྱིམ་པ་རྣམས་ཀྱིས་མཐོང་ནས། འདི་ཅི་ཡིན། བཞིན་བཟང་དག །སྟོན་པས་ཆོལ་ཟངས་གནང་ངོ༌། །ཅི་ཁྱེད་འདོད་པའི་ཡོན་ཏན་གྱིས་གནོད་དམ། ཁྱེད་ཀྱི་མགྲིན་པ་རྡོག་པས་མནན་ཏེ་གནོད་དོ། །དེ་གསོལ་བ་དང༌། དེ་ལྟ་བུ་མི་གཞག་གི །ས་ལས་བྱས་པའི་ཆོལ་ཟངས་གཞག་པར་བྱའོ། །རྔ་མོ་ལྟ་བུ་འཇོག་པ་དང༌། དེ་ལྡེག་ནས༌། ཞབས་གླང་པོ་ཆེའི་རྨིག་མཐིལ་འདྲ་ལ། དབུས་ན་སྙིང་པོ་ཅན་ཡོད་པ། ཀ་དམ་པའི་མེ་ཏོག་འདྲ་བ་བྱའོ། །ཤིན་ཏུ་འཇམ་པ་བྱས་པ་དང༌། རྩུབ་པར་བྱའོ། །ཆོལ་ཟངས་གར་བབ་བབ་ཏུ་འཇོག་ནས། བཀྲུས་ཏེ་ཁས་ཕུབ་ཏུ་གཞག་གོ །དགེ་འདུན་གྱི་ནི་ཁང་ཐོག་ཏུའོ། །གང་ཟག་གི་ནི་གནས་ཁང་གི་སྒོ་གླེགས་ཀྱི་ཕག་ཏུའོ། །སྟོན་པ་མཉན་ཡོད་ནའོ། །དགེ་སློང་དག་གིས་ལྷུང་བཟེད་གར་བབ་བབ་ཏུ་བཀྲུས་པ་དང༌། ཕྱོགས་དེ་སྦྲང་མས་གང་ནས་མི་སྡུག་པར་གྱུར་པ་ཁྱིམ་པ་དག་གིས་མཐོང་སྟེ། ཕྱོགས་འདིར་བཤང་གཅི་བགྱིས་སམ། བཞིན་བཟང༌། ཕྱོགས་འདིར་སུས་ཀྱང་བཤང་གཅི་མ་བྱས་ཀྱི། ལྷུང་བཟེད་བཀྲུས་སོ། །
འཕགས་པ། (༥༩བ)ཁྱེད་ཀྱིས་འདིར་དཀྱིལ་འཁོར་བྱ་བའི་རིགས་སོ། །དེ་དག་སྤ་བཀོང་ནས་ཅང་མི་ཟེར་བར་འདུག་གོ །དེ་དག །དགེ་སློང་དག་གཙང་སྦྲ་མེད་པ། ལྷུང་བཟེད་གར་བབ་བབ་ཏུ་འཁྲུའོ་ཟེར་བའི་སྐབས་དེ་གསོལ་བ་དང༌། དེ་དག་འཕྱ་བ་ཡུས་ཀྱིས། གཙུག་ལག་ཁང་གི་ཕྱོགས་གང་དུ་ལྷུང་བཟེད་ཀྱི་བྱི་དོར་ལ་སོགས་པ་བྱས་པ་དེར་ཆུས་བྱུག་གོ །ཡང་ན་བསྐུའོ། །དེ་དག་གིས་ལྷུང་བཟེད་བཀྲུས་པའི་གནས་དེར་དཀྱིལ་འཁོར་ཟླུམ་པོ་བྱས་པ་དང༌། བྲམ་ཟེ་དང་ཁྱིམ་བདག་དག་གིས་མཐོང་ནས། འདི་དག་ནི་ཉི་མ་ལ་དད་དོ་ཞེས་འཕྱ་བ་དང༌། ཉི་མ་འདྲ་བའི་དཀྱིལ་འཁོར་མ་བྱེད་ཅིག །དེ་ནས་ཟླ་གམ་བྱས་པས། ཟླ་བ་ལ་དད་དོ་ཞེས་འཕྱ་བ་དང༌། ཟླ་བ་འདྲ་བའི་ཕྱིར་དཀྱིལ་འཁོར་ཡང་མ་བྱེད་ཅིག །གྲུ་བཞི་བྱས་པ་དང༌། བ་ལང་ལ་དད་དོ་ཞེས་འཕྱ་བ་དང༌། དེ་ལྟར་མ་བྱེད་པར་མདུང་རྩེའི་རྣམ་པ་ལྟ་བུའམ། རྫ་རྔའི་རྣམ་པ་ལྟ་བུར་གྱིས་ཤིག །ཅིས་བསྐུ་བ་མ་ཤེས་ནས། བ་ལང་གི་ལྕི་བའམ། འཇིམ་པས་བྱུགས་ཤིག །དཀོན་མཆོག་མཆོད་པའི་དོན་དུ་དཀྱིལ་འཁོར་དེ་འདྲ་བྱས་ཏེ་མགུ་བ་དང༌། དཀོན་མཆོག་གི་དོན་ཉིད་དུ་བསྐུ་བ་ལ་ནི་ཉི་མའམ། ཟླ་བའམ། ཇི་ལྟར་དད་པ་བྱ་སྟེ། རྣམ་པ་ངེས་པ་མེད་དོ། །མཉན་ཡོད་ནའོ། །ཉེ་དགས་ལྷུང་བཟེད་མེད་པ་ཞིག་རབ་ཏུ་བྱུང་ངོ༌། །དགེ་སློང་རྣམས་ཀྱིས་ལྷུང་བཟེད་བཀྲུས་ནས་ལྷུང་བཟེད་གཞི་ལ་བཞག་སྟེ་མཆོད་རྟེན་ལ་ཕྱག་བྱས་ནས་རང་རང་གི་ལྷུང་བཟེད་བླངས་ཏེ་ཟས་ཟ་བའི་གནས་སུ་དགེ་སློང་རྣམས་ཟས་ཟ་བའི་ཚེ། བཀྲུས་ནས་མཆོད་རྟེན་ལ་ཕྱག་བྱེད་པ་ལ་ཞུགས་པ་དང༌། གསར་དུ་བྱུང་བ་དེས། ལྷུང་བཟེད་མང་པོ་འདུག་པས་གང་དགོས་པ་དེ་བླངས་ནས་འདི་ཉིད་དུ་འཇོག་གིས། བདག་གིས་ཀྱང་བླང་ངོ་སྙམ་ནས་ལྷུང་བཟེད་ཅིག་བླངས་པ་དང༌། གནས་བརྟན་ཀུན་ཤེས་ཀོའུ་དི་ནྱའི་ཡིན་གྱིས་མ་ལེན་ཅིག །དེ་བཞིན་དུ་གང་པོ་དང༌། མིང་ཆེན་དང༌། མ་འགགས་པ་དང༌། ཤཱ་རིའི་བུ་དང༌། མོའུ་གལ་གྱི་བུ་ལ་སོགས་པའི་ལྷུང་བཟེད་བླངས་པ་དེ་དག་གིས་ཀྱང་བཟློག་པ་དང༌། དེ་མིག་མཆི་མས་གང་བཞིན་དུ་ཕྱོགས་གཅིག་ཏུ་འདུག་གོ །ཁྱོད་ལ་ལྷུང་བཟེད་མེད་དམ། མེད་དོ། །སུས་རབ་ཏུ་བྱུང༌། ཉེ་དགས་སོ། །དེ་མ་གཏོགས་པ་གཞན་སུ་ཞིག་གིས་རབ་ཏུ་འབྱིན། དེ་གསོལ་བ་དང༌། དགེ་སློང་གིས་ལྷུང་བཟེད་མེད་པར་རབ་ཏུ་དབྱུང་བ་དང༌། བསྙེན་པར་རྫོགས་པར་མི་བྱའོ། །ཉེ་བར་འཁོར་གྱིས། ལྷུང་བཟེད་མེད་པར་བསྙེན་པར་རྫོགས་པར་བགྱིས་ན་རྫོགས་ཞེས་བགྱིའམ། རྫོགས་ཞེས་བྱ་ལ། བྱེད་པ་ནི་འགལ་ཚབས་ཅན་དུ་འགྱུར་རོ། །ལྷུང་བཟེད་ཆུང་ངུའམ། ཆེན་པོའམ། སྐྱ་བོས་བསྙེན་པར་རྫོགས་པར་བགྱིས་ན་རྫོགས་ཞེས་བགྱིའམ། བྱ་སྟེ། བྱེད་པ་ནི་འགལ་ཚབས་ཅན་དུ་འགྱུར་(༦༠ན)རོ་ཞེས་གསུངས་པས། ཆུང་ངུ་དང་ཆེན་པོ་དང་སྐྱ་བོས་ཀྱང་མི་བྱའོ། །ལྷུང་བཟེད་ཀྱི་ཚད་ནི། ལྷུང་བཟེད་གསུམ་སྟེ། ཆེན་པོ་དང༌། འབྲིང་དང༌། ཆུང་ངུའོ། །དེ་ལ་ཆེན་པོ་ནི་གང་དུ་འབྲས་འཐུག་པོ་ཆེ་མ་ག་དྷའི་བྲེའུ་ཆུང་དོ་བཙོས་པ་སྲན་ཚོད་དང་བཅས། ཚོད་མ་དང་བཅས་པ་བླུགས་ན་ཁའི་ཆའི་མཐའ་ཁོ་ན་ནས་མཐེ་བོང་གི་ལྟོ་གང་གིས་མ་རེག་པའོ། །
ཆུང་ངུ་ནི་གང་དུ་འབྲས་འཐུག་པོ་ཆེ་མ་ག་དྷའི་བྲེའུ་ཆུང་གང་བཙོས་པ་སྲན་ཚོད་དང་བཅས། ཚོད་མ་དང་བཅས་བླུགས་ན་ཁའི་ཆའི་མཐའ་ཁོ་ན་ནས་མཐེ་བོང་གི་ལྟོ་གང་གིས་མ་རེག་པའོ། །འབྲིང་ནི་དེ་གཉིས་ཀྱི་བར་རོ། །མཉན་ཡོད་ན་ཁྱིམ་བདག་ཕྱུག་པོ་ཞིག་གིས་ཆུང་མ་བླངས་ནས་དེ་དང་རྩེ་བ་དང༌། བཟང་མོ། ང་ཟོང་ཐོགས་ཏེ་ཡུལ་གཞན་དུ་འགྲོ་ཡིས་ཁྱོད་མི་གཡེང་ཞིང་བག་ཡོད་པར་ཁྱིམ་སྲུངས་ཤིག །ཇོ་བོ། ལེགས་ཏེ་དེ་བཞིན་དུ་བགྱི་ཡིས། དུས་དུས་སུ་གཏམ་སྤྲིངས་ཤིག །དེ་ཟོང་ཁྱེར་ནས་ཡུལ་གཞན་དུ་སོང་བ་དང༌། དེའི་ཆུང་མ་གོས་ཟས་བཟང་བས་ཉོན་མོངས་པས་གཟིར་ཏེ། སྐྱེས་པ་གཞན་དང་སྤྱད་པས་སེམས་ཅན་ཅན་དང་ལྡན་པ་ལས་བསམས་པ། ཁྱོ་འོངས་པ་དང་མ་རུང་བར་བྱེད་དོ་སྙམ་ནས། མངལ་ན་གནས་པ་བསད་དེ་ཇི་ལྟར་དོར་བ་མ་ཤེས་པར་སེམས་ཁོང་དུ་ཆུད་ཅིང་འདུག་པ་དང༌། སྦོམ་དགའ་མོ་ཁྱིམ་དེར་བསོད་སྙོམས་ལ་ཞུགས་ནས། མཚན་བཟང་མ། བསོད་སྙོམས་བྱིན་ཅིག །དེས། བདག་མི་དགའ་བས་གཟིར་བས་བསོད་སྙོམས་སྦྱིན་པ་སུའང་མེད་ཀྱིས། བཞུད་ཅིག །མཚན་བཟང་མ། ཤིའམ་ཅི་མེད་དམ། མ་ཤི་མོད་ཀྱི། བདག་ལ་བུ་ཞིག་བྱུང་བ་གང་དུ་ཇི་ལྟར་དོར་མ་ཤེས་སོ། །མཚན་བཟང་མ། དེ་བདག་གིས་དོར་ན་བདག་ལ་བསོད་སྙོམས་སྦྱིན་ནམ། སྦྱིན་ནོ། །ཕྱི་བཞིན་འབྲང་བའི་དགེ་སློང་མ་དང༌། དགེ་སྐོས་ལའང་སྦྱིན་ནམ། སྦྱིན་ནོ། །དེས་དེ་ལྷུང་བཟེད་ཆེན་པོར་བཅུག་སྟེ་ཁང་པ་སྟོང་པར་ཁྱེར་ནས་དོར་བ་དང༌། དེར་སྔར་སྐྱེས་པ་ཞིག་ཞུགས་པས་མཐོང་ནས། མགོ་རེག་མ། ཅི་བྱེད་ཅེས་སྨྲས་པ་དང༌། ཁྱོད་ལྟ་བུ་ནལ་གྱི་བུ་དང༌། སུའི་བུ་གཏོལ་མེད་པས་རིགས་ཀྱི་བུད་མེད་ལ་འདི་འདྲའི་ལས་བྱས་ཏེ་འདོར་རོ། །དེས་དེ་ལ་བརྒྱད་བཀག་བྱས་ཏེ་སོང་ངོ༌། །དེ་དགེ་སློང་མ་ཞིག་དང་ཕྲད་པ་དང༌། སྦོམ་དགའ་མོས་འདི་ལྟ་བུ་བྱས་སོ་ཞེས་སྨྲས་པ་དང༌། ལན་མེད་པར་ཅང་མི་ཟེར་བར་འདུག་གོ །སྐབས་དེ་གསོལ་བ་དང༌། དགེ་སློང་མས་ལྷུང་བཟེད་ཆེན་པོ་མ་འཆང་ཞིག །དགེ་སློང་གི་ལྷུང་བཟེད་ཆུང་ངུ་ནི་དགེ་སློང་མའི་ལྷུང་བཟེད་ཆེན་པོའོ། །མཉན་ཡོད་ནའོ། །དགེ་སློང་མ་རྣམས་ཀྱིས་ལྷུང་བཟེད་གར་བབ་བབ་ཏུ་བཞག་པས་སྲིལ་གྱིས་ཟོས། བོང་བ་དང་དབྱུག་པ་ལྷུང་བས་ཀྱང་ཕོག་པའི་སྐབས་དེ་གསོལ་བ་དང༌། དགེ་སློང་མ་རྣམས་ཀྱིས་ལྷུང་བཟེད་གར་བབ་བབ་ཏུ་མི་བཞག་པར་ལྷུང་བཟེད་དེའི་གཞིར་ཞ་ཉེའི་དབྱར་འདབ་བཞག་པར་(༦༠བ)བྱའོ། །དེ་དག་གིས་ལྷུང་བཟེད་ཐམས་ཅད་ཞ་ཉེས་དཀྲིས་པ་དང༌། ཁྱིམ་པ་དག་གིས་མཐོང་ནས། ཅི་ཡིན། སྟོན་པས་གནང་ངོ༌། །ཨེ་མ། སྟོན་པས། ལྷུང་བཟེད་ཐམས་ཅད་ཞ་ཉེས་གཡོགས་ཤིག་ཅེས་གསུང་ངམ། བྱུང་རྒྱལ་དུ་མ་ཟེར། ཁྱེད་འདོད་པའི་ཡོན་ཏན་ལ་ཆགས་སམ་ཅི། དེ་དག་སྤོབས་པ་མེད་པར་ཅང་མི་ཟེར་བའི་སྐབས་དེ་གསོལ་བ་དང༌། དེ་བས་ན་ལྷུང་བཟེད་ཐམས་ཅད་ཞ་ཉེས་མི་དཀྲི་བར་ཞབས་ཉི་ཚེ་ཞ་ཉེས་དཀྲི་བར་བྱའོ། །དེ་དག་གིས་རིའི་རྩེ་མོ་དང༌། རྭ་བའི་ཅོག་འདྲ་བས་དཀྲིས་པ་དང༌། བྱང་ཆུབ་ཀྱི་ཤིང་གི་ལོ་མ་དང༌། ལག་མཐིལ་འདྲ་བས་དཀྲི་བར་བྱའོ། །མཉན་ཡོད་དུ་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་བུ་ཞིག་བཙས་ཏེ་བསྐྱེད་བསྲིངས་ཆེན་པོར་གྱུར་ཏོ། །རེ་ཞིག་ན་ཕས་སྤྱོས་པ་དང༌། འདི་མགུ་དཀའ་ཡིས། རྒྱལ་བྱེད་ཚལ་དུ་སོང་ལ་རབ་ཏུ་འབྱུང་ངོ་སྙམ་ནས། རྒྱལ་བྱེད་ཚལ་དུ་སོང་བ་དང༌། ཉེ་དགའ་སྒོ་ན་འདུག་པས་མཐོང་ནས། བཞིན་བཟང༌། འོངས་པ་ལེགས་སོ། །ཁྱོད་ཟླ་བ་ལྟར་གནས་པ་ཡིན་ན་གང་ལས་འོངས། རབ་ཏུ་འབྱུང་བར་འཚལ་གྱིས། རབ་ཏུ་བྱུང་ཞིག །བཞིན་བཟང༌། ཁྱོད་ཀྱི་སེམས་བསྐྱེད་བཟང་སྟེ། རབ་ཏུ་བྱུང་བ་ནི་མཆོག་གོ །འོན་ཀྱང་འདི་ལ་ཡོ་བྱད་དྲུག་དགོས་ན་ཡོད་དམ། དྲུག་པོ་གང་ལགས། ལྷུང་བཟེད་དང༌། ཆུ་ཚགས་དང༌། ཆོས་གོས་གསུམ་དང༌། གདིང་བའོ། །འཕགས་པ། མ་མཆིས་སོ། །ཁོ་བོ་ལའང་མེད་དེ། རེ་ཞིག་སོང་དང༌། ཁོ་བོས་བཙལ་ལོ། །དེས་ཕ་སྤངས་ནས་གཉེན་དག་གི་ཐད་དུ་སོང་བ་དང༌། དེ་དག་གིས་དེ་ལ་ཆུང་མ་བླངས་སོ། །ཉེ་དགས་ཡོ་བྱད་དྲུག་རྙེད་ནས་བསོད་སྙོམས་ལ་ཞུགས་པ་དང༌། ཁྱེའུ་དེ་མཐོང་ནས། ཁོ་བོས་ཡོ་བྱད་དྲུག་རྙེད་ཀྱིས་ཚུར་ཤོག །དེས་སྨྲས་པ། ཁོ་བོས་ཀྱང་ཡོ་བྱད་དྲུག་རྙེད་དོ། །ཇི་འདྲ་ཞིག་རྙེད། མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དོ། །དེ་ཅིའི་ཐ་ཚིག །བདག་ལ་ཉེ་དུ་རྣམས་ཀྱིས་ཆུང་མ་བླངས་ན་ད་ཅི་ལྟར་རབ་ཏུ་འབྱུང༌། དེ་ཉིད་དེའི་རབ་ཏུ་འབྱུང་བ་དང་བསྙེན་པར་རྫོགས་པའི་བར་ཆད་དུ་གྱུར་པའི་སྐབས་དེ་གསོལ་བ་དང༌། ཡོ་བྱད་དྲུག་པོ་བརྙས་ནས་རབ་ཏུ་དབྱུང་བ་དང་བསྙེན་པར་རྫོགས་པར་བྱའོ། །ཆོས་འདུལ་བ་དང་རབ་བྱུང་བསྙེན་རྫོགས་རྙེད་དཀའ་བས་སོ། །ཡོ་བྱད་དྲུག་རིམ་གྱིས་བཙལ་ནས་བརྙས་པ་སླར་བྱིན་ཅིག །ཉེ་དགས། ལྷུང་བཟེད་མེད་པ་ཞིག་རབ་ཏུ་བྱུང་སྟེ། དེ་དགེ་སློང་རྣམས་དང་ལྷན་ཅིག་ལྗོངས་རྒྱུར་སོང་ནས། ཡུངས་ཀར་སྤར་གང་ཀར་ཕྱིན་པ་དང༌། ཁྱིམ་བདག་ཅིག་གིས་དགེ་སློང་རྣམས་བསོད་སྙོམས་ལ་སྤྱན་དྲངས་པ་དང༌། དེ་ལ་ལྷུང་བཟེད་མེད་པས་ཁྱིམ་པ་འཕྱ་ནས། དབྱར་དག་ལྷུང་བཟེད་(༦༡ན)མེད་དུ་མི་རུང་ངོ༌། །ལྷུང་བཟེད་མེད་པར་ལྗོངས་རྒྱུ་ཞིང་འགྲོ་བར་མི་བྱའོ། །ཆོམ་རྐུན་པས་བཅོམ་ནས་གསོལ་བ་དང༌། འཇིགས་པ་དང་བཅས་པ་ཉིད་དུ་ལྷུང་བཟེད་བཞག་ནས་ལྷུང་བཟེད་ཆུང་ངུས་འགྲོ་བར་བྱའོ། །མཉན་ཡོད་དུ་དགེ་སློང་ཞིག་འགྲེང་བཞིན་དུ་ལྷུང་བཟེད་ཀྱི་སྣོད་ནས་ལྷུང་བཟེད་འབྱིན་པ་དང༌། དགེ་སློང་དག་གིས་དེ་ལ་སྨྲས་པ། འགྲེང་བཞིན་དུ་ལྷུང་བཟེད་མ་འབྱིན་ཅིག །དེས་སྨྲས་པ། ཅི་ཉེས། ལྷུང་བཟེད་དེ་འཆག་པར་འགྱུར་མོད། གཞན་ཅི་ཉེས་ཟེར་བའི་སྐབས་དེ་གསོལ་བ་དང༌། དགེ་སློང་གིས་འགྲེང་བཞིན་དུ་ལྷུང་བཟེད་དབྱུང་བར་མི་བྱའོ། །དེ་བཞིན་དུ་གཞུག་པ་དང༌། བཀྲུ་བ་དང༌། སྐམ་པ་དག་ལའང་རྒྱ་ཆེར་སྦྱར་རོ། །མཉན་ཡོད་ན་བྲམ་ཟེ་ཞིག་གི་བུ་ན་ནས། སྨན་པའི་གན་དུ་སོང་སྟེ། བཀྲ་ཤིས་པར་གྱུར་ཅིག །སྨན་པས་སྨྲས་པ། ཇོ་བོ། ཅི་བཞེད། བུ་ན་ཡིས། སྨན་སྟོན་ཅིག །སྨན་པ་དེ་དད་པ་ཅན་ཞིག་ཡིན་པས། བྲམ་ཟེ། འཕགས་པ་རྣམས་ཀྱི་དྲུང་དུ་བཞུད་ལ། ལྷུང་བཟེད་ཀྱི་ཆུ་སློངས་ལ་ཁྲུས་ཤིག །སོས་པར་འགྱུར་རོ། །བྲམ་ཟེ་དེ་རྒྱལ་བྱེད་ཚལ་དུ་སོང་བ་དང༌། ཉེ་དགའ་སྒོ་ན་འདུག་པས་མཐོང་ནས། བྲམ་ཟེ་ཆེན་པོ། འོངས་པ་ལེགས་སོ། །ཁྱོད་ཟླ་བ་ལྟ་བུར་གནས་པ་ཡིན་ན་གང་ལས་འོངས༌། འཕགས་པ། ཕྱག་འཚལ་ལོ། །རིང་མོ་ཞིག་ནས་མཐོང་བ་ནི་ལེགས་ཏེ། ཡང་ཡང་མཐོང་བས་ནས་བརྙས་པར་འགྱུར་རོ། །གང་ལ་འོངས། བུ་ནད་ཀྱིས་ཐེབས་ཏེ། སྨན་པས། འཕགས་པ་རྣམས་ཀྱི་ཐད་ནས་ལྷུང་བཟེད་ཀྱི་ཆུ་བསླངས་ཏེ་བཀྲུས་ན་སོས་པར་འགྱུར་རོ་ཞེས་བསྟན་པས། ཆུ་སྩོལ་ཅིག །དེ་ལྟ་ན་སྡོད་ཅིག །ཁོ་བོས་ལྷུང་བཟེད་ཀྱི་ཆུ་བླང་ངོ་ཞེས་སྨྲས་ནས། ནང་དུ་སོང་སྟེ་ཟན་ཟོས་ནས་ལྷུང་བཟེད་བཀྲུས་ཏེ། དེར་རུས་པ་དང༌། ཤའི་ཁམ་ཚད་དང༌། ཉའི་གྲ་མ་དང༌། འབྲས་ཆེན་གྱི་བྲུལ་མ་དང༌། ཕྱེ་དང༌། ཚོད་ཞོལ་དང༌། འཁུར་བ་ཅུང་ཟད་ཅིག་བླུགས་ནས། བྲམ་ཟེ། ལྷུང་བཟེད་ཀྱི་ཆུ་འདིར། ཁྱེར་ཅིག །བྲམ་ཟེས་མཐོང་ནས། བུ་གུམ་པ་བླ་ཡིས་ཆུ་མི་གཙང་བ་འདི་ལྟ་བུས་ཁྲུས་བགྱིད་པ་མི་རུང་ངོ༌། །
ཉེ་དགས་སྨྲས་པ། ཁྱོད་དད་པ་འདི་ལྟ་བུ་དང་ལྡན་པས་བུ་སོས་སུ་ཟད་དོ། །བྲམ་ཟེ་འཕྱ་བའི་སྐབས་དེ་གསོལ་བ་དང༌། ཉེས་དམིགས་དེ་ནི་ལྷུང་བཟེད་ནས་ལྷག་རོལ་དོར་བ་ལས་གྱུར་པ་ཡིན་པས། གཞན་གྱིས་སྤངས་པ་དེར་མི་བླུགས་སོ། །དགེ་སློང་ཞིག་གིས་དགེ་ཚུལ་ལ་ལྷུང་བཟེད་འཁྲུར་བཅུག་པས་ལག་ནས་ལྷུང་སྟེ་ཆག་གོ །དེ་ཕོངས་པར་གྱུར་པའི་སྐབས་དེ་གསོལ་བ་དང༌། དགེ་ཚུལ་འཁྲུར་མ་གཞུག་ཅིག །ཤཱ་རིའི་བུའི་དགེ་ཚུལ་ཙུན་དས། མཁན་པོ། ལྷུང་བཟེད་སྩོལ་ཅིག་བཀྲུའོ། །མ་(༦༡བ)གནང་གིས། ང་ཉིད་འཁྲུ་ཡིས་སོང་ཞིག །བདག་གིས་ཀྱང་ཉེས་དམིགས་སུ་འགྱུར་རམ། སྟོན་པ་ཆོས་ཀྱི་བདག་པོ་ཡིན་པས་ངས་ཇི་ལྟར་བྱ་ཞེས་པའི་སྐབས་དེ་གསོལ་བ་དང༌། དགེ་ཚུལ་བག་མེད་པའི་ཆོས་ཅན་བྱི་དོར་བྱེད་དུ་མི་གཞུག་གོ །དགེ་ཚུལ་དྲན་པ་ཉེ་བར་བཞག་པ་ལ་ནི་ཉེས་པ་མེད་དོ། །ལུང་མ་མོ་ལས། ལྷུང་བཟེད་ལངས་ནས་བཀྲུ་བར་མི་བྱ་བ་ནས། ཧ་ཅང་སྐམ་པར་མི་བྱ་བའི་བར་གསུངས་སོ། །མཉན་ཡོད་ན་དགེ་སློང་བསོད་སྙོམས་པ་ཞིག་འདུག་པ་དེ། སྔ་དྲོ་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་བསོད་སྙོམས་ལ་ཞུགས་པ་དང༌། ཆོས་གོས་ནར་བས་མྱུར་བར་ལྷུང་བཟེད་ས་ལ་བཞག་ནས་གོས་ཚགས་བྱས་པ་དང༌། བྲམ་ཟེ་དང་ཁྱིམ་བདག་དག་གིས་མཐོང་ནས། དགེ་སློང་རྣམས་གཙང་སྦྲ་མེད་དེ། ལྷུང་བཟེད་གར་བབ་ཏུ་འཇོག་གོ་ཞེས་འཕྱ་བའི་སྐབས་དེ་གསོལ་བ་དང༌། ལྷུང་བཟེད་གར་བབ་བབ་ཏུ་གཞག་པར་མི་བྱའོ། །དགེ་སློང་དག་ལྷུང་བཟེད་བབ་ཆོལ་དུ་འཇོག་པས་མ་རུང་བར་གྱུར་པའི་སྐབས་དེ་གསོལ་བ་དང༌། ལྷུང་བཟེད་བབ་ཆོལ་དུ་མི་བཞག་གི །ལྷུང་བཟེད་གཞག་པ་དེའི་ཆེད་དུ་ངོས་ཁུང་བྱའོ། །དགེ་སློང་དག་རྩིག་པ་རྐོ་བར་བྱེད་ནས། གཙུག་ལག་ཁང་དང་ཁང་ཁྱིམ་རྩིག་པའི་ཚེ་ལྷུང་བཟེད་གཞག་པའི་བུ་ག་བྱ་ཡི། རྩིག་པ་རྐོ་བས་ནི་མ་ཡིན་ནོ། །དགོན་པ་བ་ལ་ལྷུང་བཟེད་གཞག་པའི་བུ་ག་མེད་ནས། དགོན་པ་བ་རྣམས་ཀྱིས་ལྕུག་མའང་སྲད་བུ་ལས་བྱས་པའི་སྐོན་བུ་བྱས་ཏེ་བ་ལང་གི་ལྕི་བས་བྱུགས་པར་གཞག་གོ །དེ་རྡུལ་གྱིས་ཁྱེར་ནས། ཁ་གབ་རྣམ་པ་དེ་ལྟ་བུ་དང་བཅས་པའོ། །དེ་ས་ལ་བཞག་པས། དེ་ནི་ས་ལ་མི་བཞག་གི །གཟར་ཐག་གིས་ཤིང་གི་ཡལ་ག་ལ་དཔྱངས་ན་བཟང་ངོ༌། །ལྗོངས་རྒྱུ་བའི་ཚེ་དེ་ཁྱེར་བས། མ་དད་པ་རྣམས། ཅི་འདིར་ཁྱིམ་བྱའམ་སྤྲེའུ་ཁྱེར་ཞེས་འཕྱ་ནས། སྐོན་བུ་དེ་ནི་གཞན་དུ་མི་བཀུར་རོ། །དགེ་སློང་ཞིག་ལྷུང་བཟེད་ལག་ཏུ་ཐོགས་ཏེ་སོང་བ་དང༌། འགྱེལ་ནས་ལྷུང་བཟེད་ཆག་པའི་སྐབས་དེ་གསོལ་བ་དང༌། དེ་བས་ན་ལག་པས་མི་བཀུར་བར། སྣོད་དུ་བཅུག་སྟེ་བཀུར་བར་བྱའོ། །སྣོད་དུ་བཅུག་སྟེ་ལག་ཏུ་ཁྱེར་བས་ཉེས་དམིགས་དེ་ཉིད་དུ་གྱུར་པ་དང༌། ལྷུང་བཟེད་དེ་བཀུར་བ་ནི་སྣོད་ལག་ཏུ་མི་བཀུར་བར་ལུང་ཐག་བཏགས་ཏེ་མཆན་ཁུང་གིས་བཀུར་བར་བྱའོ། །སྟོན་པ་མཉན་ཡོད་ནའོ། །དགེ་སློང་རྣམས་དོན་མཐུན་དང་ལྷན་ཅིག་ལྗོངས་རྒྱུར་སོང་བ་དང༌། བྲམ་ཟེར་ཞིག་ན་ནས་སྨན་པ་ལ། སྨན་སྟོན་ཅིག །ཨ་རུ་ར་གསོལ་དང་གདངས་པར་འགྱུར་རོ། །ལམ་ཁ་འདི་ན་ཨ་རུ་ར་ག་ལ་ཡོད། དེས་སྨྲས་པ། དགེ་སློང་འདི་དག་མཁས་པ་ལགས་པས་འདི་དག་ལ་བསླངས་ན་ཡོད་དོ། །དེས་དེ་དག་ལ་སྨན་བསླངས་པས་དགེ་སློང་དེས་དེའི་ནང་(༦༢ན)དུ་ལྷུང་བཟེད་ཀྱི་སྣོད་ཕྱེ་བ་དང༌། སྙུང་དང༌། གྲི་དང༌། འབྲེང་བ་དང༌། སྨན་དག་འདུག་པ་བྲམ་ཟེས་མཐོང་ནས། ཁྱེད་ནི་ཀུན་སྤྱོད་མི་གཙང་སྟེ། བདག་ཤིའང་བླ་ཡིས་མི་གཙང་བ་ཟ་བ་ནི་དེ་ལྟ་མ་ཡིན་ནོ་ཟེར་བའི་སྐབས་དེ་གསོལ་བ་དང༌། ལྷུང་བཟེད་དང༌། སྨན་དང༌། ག་བུར་དག་སྣོད་ཐ་དད་པར་གཞུག་གོ །སྣོད་གསུམ་པོ་དེ་དག་བཅང་བར་བྱའོ། །
དགེ་སློང་དག་གིས་སྣོད་གསུམ་པོ་དེའི་ལུང་ཐག་མཉམ་པར་བཏགས་པས་མཆན་ཁུང་རློ་བར་གྱུར་པ་དང༌། མ་དད་པ་རྣམས། ཅི་ཁྱེད་རྫ་རྔ་ཐོགས་ཏེ་འགྲོའམ་ཞེས་ཅོ་འདྲི་བའི་སྐབས་དེ་གསོལ་བ་དང༌། སྣོད་གསུམ་པོ་དེ་དག་ལ་དཔྱང་བའི་ལུང་ཐག་མཉམ་པར་གདགས་པར་མི་བྱ་བར་ཅི་རིགས་པར་གདགས་པར་བྱའོ། །རས་ཕྲ་མོ་བཏགས་པས་ན་བར་གྱུར་ནས། སྡུག་བསྔལ་མི་འདོད་པས་ནི་ཞེང་ཆུང་ངུ་དག་ཀྱང་མི་གདགས་པར་ཞེང་ཆེན་པོར་གདགས་པར་བྱའོ། །ཞེང་ཆེན་པོ་བཏགས་པ་དང་ཞུམ་ནས། ཞུམ་པར་མི་འགྱུར་བྱ་བའི་ཕྱིར་དབུས་སུ་ཕྱིང་བུས་སྦྱར་ཏེ་དེ་གནས་པར་བྱ་བའི་ཕྱིར་མདོ་མདོར་བྱ་རོགས་རྐང་དྲུབ་པར་བྱའོ། །མཉན་ཡོད་ན་དགེ་སློང་ཞིག་ལྷུང་བཟེད་ལ་བཙའ་ཞུགས་ཀྱང་འཆོས་པར་མི་བྱེད་ནས་དྲིས་པ་དང༌། དགེ་སློང་ནད་པ་ཞིག་ལ་ལྷུང་བཟེད་བཟང་པོ་ཞིག་ཡོད་པས། དེ་བླངས་བར་བྱའོ་ཞེས་ཟེར་བའི་སྐབས་དེ་གསོལ་བ་དང༌། ལྷུང་བཟེད་མིག་བཞིན་དུ་བསྐྱང་བར་བྱའོ། །གླན་པར་འོས་པ་གླན། བསྲེག་པར་འོས་པ་བསྲེག་གོ །དགེ་སློང་ཞིག་ཆོས་གོས་རྙིང་ཞིང་རྡོལ་ཡང་ཕྱིར་མི་འཆོས་ནས་དྲིས་པ་དང༌། ནད་པ་ཞིག་ལ་སྣམ་སྦྱར་བཟང་པོ་ཞིག་ཡོད་པས་དེ་བླང་ངོ་ཟེར་བའི་སྐབས་དེ་གསོལ་བ་དང་། སྣམ་སྦྱར་པགས་པ་དང་འདྲ་བར་བསྐྱང་བར་བྱའོ། །མཉན་ཡོད་ན་དགེ་སློང་ཞིག་གི་ལྷུང་བཟེད་རྡོལ་ནས། དེ་མགར་བའི་གན་དུ་ཁྱེར་ཏེ་སོང་ནས། བཞིན་བཟང༌། ལྷུང་བཟེད་རྡོལ་པ་འདི་གློན་ལ་བྱིན་ཅིག །འདི་དག་ནི་ཁས་ལས་བྱེད་དུ་འཇུག་པ་ཡིན་གྱི་གླ་རྔན་ནི་མི་སྟེར་བས། ཡུན་རིང་དུ་བསྒྱངས་ན་ཕྱིར་ལེན་པར་འགྱུར་རོ་སྙམ་ནས། སང་ངམ་གནངས་སམ་བྱོན་ཅིག་ཅེས་བསྒྱངས་སོ། །དགེ་སློང་དེ་ཉིན་རེ་ཞིང་འགྲོ་བ་དང༌། དེའི་མཛའ་བོ་ཞིག་གིས་མཐོང་ནས། ཁྱོད་ཉིན་རེ་ཞིང་དེར་འགྲོ་ན། དེ་ཁྱོད་ཀྱི་ཉེ་དུའམ་སྦྱིན་བདག་གི་ཁྱིམ་ཡིན། མ་ཡིན་ཏེ། ཁོ་བོའི་ལྷུང་བཟེད་རྡོལ་ནས་དེ་གློན་དུ་བཅུག་པ་ན་འགྱོད་པར་བྱེད་པས་དེའི་ཕྱིར་འགྲོའོ། །དེས་སྨྲས་པ། ཁྱོད་ཀྱིས་ལག་བཟོ་བ་དེ་བདེན་པར་སྨྲ་བ་དཀོན་ནོ་ཟེར་བ་མ་ཐོས་སམ། ཁོ་བོས་བཟོ་ཤེས་མོད་ཀྱང་སྟོན་པས་མ་གནང་ངོ་ཟེར་བའི་སྐབས་དེ་གསོལ་བ་དང༌། གནང་གིས་ལྷུང་བཟེད་གླན་པ་ལ་ནན་ཏན་བྱའོ། །དབེན་པའི་ཕྱོགས་སུའོ། །དེ་དགེ་སློང་(༦༢བ)དེའི་གན་དུ་སོང་ནས། སྟོན་པས་གནང་གིས་ལྷུང་བཟེད་འདི་གློན་ཅིག །དེས་སྨྲས་པ། ལག་པ་འབའ་ཞིག་གིས་གླན་དུ་མི་རུང་གིས་མགར་དཔྱད་དག་ཀྱང་དགོས་སོ་ཟེར་བའི་སྐབས་དེ་གསོལ་བ་དང༌། དགེ་འདུན་གྱིས་མགར་དཔྱད་དག་བསྲེལ་བར་བྱའོ། །
དགེ་སློང་ཞིག་གི་ལྷུང་བཟེད་རྡོལ་ནས་དེ་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང༌། ཕྱེ་རྙེད་པ་ལྷུང་བཟེད་ཀྱི་སྣོད་དུ་བླངས། འབྲས་ཆན་གཤེར་བ་རྙེད་པ་ལྷུང་བཟེད་དུ་བླངས་པས་དེ་ཟགས་པས་ཕྱེ་གཤེར་བར་གྱུར་ཏེ། དེས་ལྷུང་བཟེད་ཀྱི་སྣོད་མ་རུང་བར་གྱུར་ནས། དེ་སྦྲང་བུ་དག་གིས་བསྐོར་བ་དང༌། དེ་ལ་ཁྱེའུ་དང་བུ་མོ་དག་གིས། འཕགས་པའི་ནོར་ཅན་དང༌། ཚོང་དཔོན་དང༌། དེད་དཔོན་དག་བཞིན་དུ་འཁོར་མང་པོར་འགྱུར་བའི་ལས་བྱས་པས་སྦྲང་བུ་དག་གིས་བསྐོར་ཅིང་བཞུད་དོ། །ཁྱིམ་བདག་མགོན་མེད་ཟས་སྦྱིན་གྱིས་དེ་མཐོང་ནས། ཅིའི་ཕྱིར་འཕགས་པ་ལ་མཐོ་འཚམ། ཁྱིམ་བདག་གིས་དགེ་སློང་དེ་ལ་སྨྲས་པ། སྟོན་པའི་བསྟན་པ་མཛེས་པ་ལ། ཁྱོད་ཅལ་ཅོལ་ཅི་བྱེད། ཁྱིམ་བདག །ཁྱོད་ཀྱིས་ཁོ་བོ་རོལ་མོ་མཁན་ལ་སོགས་པའི་ཁྱིམ་དུ་ཞུགས་པ་མཐོང་ངམ། འོ་ན་ཁྱོད་ཅིའི་ཕྱིར་བྱིས་པ་དག་གིས་བསྐོར། ཁྱིམ་བདག །ཁོ་བོའི་ལྷུང་བཟེད་ཟག་གོ །ཅིའི་ཕྱིར་གཞན་མི་འཚོལ། སྟོན་པས་ལྷུང་བཟེད་བདོག་བཞིན་དུ་གཞན་མི་བཙལ་བར་གསུངས་སོ། །ཁྱོད་ཀྱི་ལྷུང་བཟེད་འདི་འདྲ་བ་བདོག་པ་ཡིན་ནམ་ཟེར་བའི་སྐབས་དེ་གསོལ་བ་དང༌། ལྷུང་བཟེད་རྡོལ་བ་དེས་གླན་པར་བྱའོ། །དགེ་སློང་དག་ལྷན་པ་སྙི་བ་ལྔ་པོ་བུ་རམ་ལ་སོགས་པས་གློན་པར་བྱེད་ནས། དེ་དག་ཚ་བ་དང་ཕྲད་པས་ཟགས་པའི་སྐབས་དེ་གསོལ་བ་དང༌། བུ་གུའི་ལྷན་པར་བུ་རམ་དང༌། རྒྱ་སྐྱེགས་ཀྱི་ཚིགས་མ་དང༌། སྤྲ་ཚིལ་དང༌། རོ་ཉེ་དང༌། ཚོན་མོ་སྟེང་དེ་དག་མི་བཟང་བས་སྤངས་ཏེ། ལྷན་པ་སྲ་བ་ལྔས་གླན་པར་བྱའོ། །ལྔ་པོ་གང་ཡིན་མ་ཤེས་ནས། ལྷན་རིང་དང༌། ཐམ་ཕྲན་དང༌། ལྷན་པ་དང༌། ཆུ་སྲིན་གྱི་སོ་ལྟ་བུ་དང༌། ཕྱེ་མས་ཀྱང་ངོ༌། །ཕྱེ་མ་དུ་ཡོད་མ་ཤེས་ནས། ཕྱེ་མ་གཉིས་ཏེ། ལྕགས་ཀྱི་ཕྱེ་མ་དང༌། རྡོའི་ཕྱེ་མའོ། །ལྕགས་ཀྱི་ལྷུང་བཟེད་ལྕགས་ཀྱི་ཕྱེ་མ་དང༌། རྫའི་ལྷུང་བཟེད་རྡོའི་ཕྱེ་མས་གླན་ནོ། །དེ་དག་ཆུར་ཕྱེ་མ་བརྡར་ཏེ་གློན་པར་བྱེད་ནས་གོགས་པ་དང༌། འབྲུ་མར་དང་འདྲ་བ་སྤྲ་ཚིལ་འདྲ་བ་ལ་ཐུག་པར་འགྱུར་བས་གླན་ནོ། །ཧ་ཅང་བསྲེགས་པས་གོགས། ཧ་ཅང་ཆུང་ངུར་བསྲོས་པས་མི་འཆགས་ནས། རན་ཙམ་དུ་བསྲོའོ། །ཧ་ཅང་རྩུབ་ནས། བདར་རོ། །ཆུས་བདར་བས་གོགས་ནས། ས་ལས་བྱས་པའི་ལྷུང་བཟེད་རྡོལ་ནས། ས་ལས་བྱས་པའི་ལྷུང་བཟེད་ནི་བུ་རམ་དང༌། འཇིམ་པས་གླན་པར་བྱའོ། །
དགེ་སློང་རྣམས་ལྷུང་བཟེད་དུ་ཟན་ཟོས་ནས་(༦༣ན)མ་བཙོས་པས་བཙས་ཁྱེར་ཏེ་རྡོལ་བ་དེ་གསོལ་བ་དང༌། ལྷུང་བཟེད་དེ་བསྲེག་པར་བྱའོ། །ཤིང་གིས་བསྲེགས་པས་མ་རུང་བར་གྱུར་ནས། ཤིང་གིས་མ་སྲེག་ཅིག །རྩྭ་དང་སོག་མས་གཡོགས་ནས་བསྲེགས་པས་ཉེས་དམིགས་སུ་གྱུར་ནས། དེ་དག་གིས་མ་སྲེག་ཅིག །ཇི་ལྟར་བསྲེག་མ་ཤེས་ནས། ལྷུང་བཟེད་སྲེག་པས་དེའི་ཆེད་དུ་སྲེག་འགེབས་རྫ་བོ་བསྲེལ་བར་བྱའོ། །དེ་ཇི་ལྟར་སྦྱར་མ་ཤེས་ནས། སྲེག་འགེབས་གཉིས་ཏེ། སློབ་དཔོན་གྱིས་བྱས་པ་དང༌། བདག་གིས་བྱས་པའོ། །སློབ་དཔོན་གྱིས་བྱས་པ་ནི་བུམ་པ་ལྟ་བུའོ། །བདག་གིས་བྱས་པ་ནི་ཕྲུ་བའམ་རྫ་མའང་རུང་སྟེ། ཐལ་བས་བཀང་ལ། ཇི་ཙམ་རན་པ་ཕྲི་ཞིག །གྱོ་མོའི་ནང་དུ་བསྲེགས་པས་མ་རུང་བར་གྱུར་ནས། ཕུབ་མ་དང་འཇིམ་པ་སྦྱར་བས་ཕྱི་རོལ་བྱུགས་ལ། འབྲུ་མར་གྱི་ཚིགས་མའམ་བ་ལང་གི་ལྕི་བས་ནང་བྱུགས་ཏེ་བསྐམས་པ་དང༌། ས་གཞི་བྱི་དོར་བྱས་པར་ཕུབ་མ་དང་དུ་བ་འཚེར་བར་བྱེད་པ་འབྲུ་མར་གྱི་ཚིགས་མ་ལ་སོགས་པའི་རྫས་བཀྲམ་པའི་སྟེང་དུ་ལྷུང་བཟེད་ཁ་བུབ་ཏུ་བཞག་པ་ལ་ལྕི་བ་དང་སོག་མ་གཅེར་ཏེ། རྫ་བོ་དེས་དུ་བ་མི་འཆོར་བར་བཀབ་ལ་མེ་སྦར་རོ། །བསྲེགས་པ་དེ་གྲང་བ་དང་དབྱུང་སྟེ་ཁ་དོག་ཞེན་པར་གྱུར་གྱི་བར་དུ་བཟླས་པར་བྱའོ། །ཁྲུས་བྱས་ཏེ་གཞུག །སྲོག་ཆགས་དག་བདེ་བར་བྱ་བའི་ཕྱིར། དེའི་གཡས་གཡོན་ཆག་ཆག་ཐོབ་ལ་སྐྱང་ནུལ་གྱིས་ཤིག །དགེ་ཚུལ་ཕོ་ཞིག་ལོ་གྲངས་ནི་མི་ཤེས་བོངས་ཚོད་ནི་ཆེ་སྟེ། དགེ་སློང་རྣམས་ཐེ་ཚོམ་སྐྱེས་ཏེ་བསྙེན་པར་རྫོགས་པར་མི་བགྱིད་ནས། དེ་ལ་ཇི་ལྟར་བགྱི་ཞུས་པས། ལོ་ཚིགས་མི་ཤེས་ན་མཚན་གྱི་ཉེ་འཁོར་དུ་སྤུ་སྐྱེས་པ་བསྙེན་པར་རྫོགས་པར་ཁས་བླང་བར་བྱའོ། །དེ་གཅེར་བུར་ཕྱུང་སྟེ་མཚན་བརྟགས་པ་དང་དེ་ཤིན་ཏུ་ངོ་ཚ་ནས། དེ་ནི་སྒྱུ་ཐབས་ཀྱིས་བརྟག་པར་བྱའོ། །ཟུང་ང་དང་གོས་ཀྱི་གདང་མཐོན་པོ་ལ་འདུག་པའི་ལྷུང་བཟེད་དང་ཆོས་གོས་ཀྱི་སྣོད་དབབ་པ་ལ་སོགས་པས་སོ། །
སྟོན་པ་མཉན་ཡོད་ནའོ། །ཉེ་དགའི་དགེ་ཚུལ་བསྙེན་པར་རྫོགས་པར་འདོད་ནས། ལས་བྱེད་པ་དང༌། གསང་སྟེ་སྟོན་པ་དང༌། དགེ་སློང་རྣམས་ལ་གསོལ་བ་བཏབ་སྟེ། དེས་སྔར་སོང་ནས་ཕྱག་བདར་བྱས། སྟན་བཤམས་ཏེ་དགེ་སློང་རྣམས་མ་འོངས་པ་དང༌། ཉེ་དགས་མེ་ཏོག་གི་ཤིང་ཞིག་མཐོང་སྟེ། དགེ་ཚུལ། མེ་ཏོག་ལྷོགས་ལ་དགེ་སློང་རྣམས་ལ་བྲིམས་ཤིག །དེས་ཤིང་ལ་འཛེགས་པས་ལྷུང་ནས་ལག་པ་ཆག་སྟེ། དགེ་སློང་གི་བར་ཆད་དུ་གྱུར་པའི་སྐབས་དེ་གསོལ་བ་དང༌། འཁོར་ལོས་སྒྱུར་བའི་བུ་ཐུ་བོ་དབང་བསྐུར་བར་འོས་པ་དབང་མ་བསྐུར་བར་འདུག་ཅིང་འཚམས་ལ་བབ་པ་བསྲུང་བ་དང་བསྐྱང་བར་བྱ་བ་བཞིན་དུ། (༦༣བ)དགེ་ཚུལ་བསྙེན་པར་རྫོགས་པར་འདོད་པའང་བསྐྱང་བར་བྱ་བ་ཡིན་པས། དགེ་ཚུལ་བསྙེན་པར་རྫོགས་པར་འདོད་པ་ཤིང་ལ་འཛེག་ཏུ་མི་གཞུག་གོ །སྟོན་པ་མཉན་ཡོད་ནའོ། །དགེ་སློང་ཞིག་ལ་དགེ་ཚུལ་ཞིག་བསྙེན་པར་རྫོགས་པར་འདོད་ནས། དེས་དགེ་སློང་རྣམས་སྦྲན་ཏེ། དགེ་ཚུལ་ཁྲིད་ནས་དཀྱིལ་འཁོར་དུ་ཞུགས་པ་དང༌། དེ་མཚམས་ཀྱི་ཕྱི་རོལ་ཏུ་མངགས་ཏེ་བཏང་བས། གཉེན་གྱིས་ཁྲིད་དེ་དགེ་སློང་གི་བར་ཆད་དུ་གྱུར་པའི་སྐབས་དེ་གསོལ་བ་དང་། དེ་བས་ན་བསྙེན་པར་རྫོགས་པར་འདོད་པ་མཚམས་ཀྱི་ཕྱི་རོལ་ཏུ་མི་གཏང་ངོ༌། །དེ་ཚིག་མི་ཐོས་བལྟར་སྣང་བའི་ཉེ་འཁོར་དུ་ཚོགས་ལ་མངོན་དུ་ཕྱོགས་པར་ཐལ་མོ་སྦྱར་ཏེ་གཞག་པར་བྱའོ། །དེ་ལྟ་ན་ཉེས་དམིགས་སུ་མི་འགྱུར་རོ། །སྟོན་པ་མཉན་ཡོད་ནའོ། །བྲམ་ཟེ་རབ་ཏུ་འབྱུང་བར་འདོད་པ་ཞིག་རྒྱལ་བྱེད་ཚལ་དུ་སོང་བ་དང༌། དགེ་སློང་ལྷུང་བཟེད་དང་འཁར་གསིལ་ཐོགས་པ་མང་པོ་མཐོང་ནས། འཕགས་པ་དག །གང་དུ་བཞུད། བསོད་སྙོམས་ལ་འགྲོའོ། །དགེ་སློང་ཐམས་ཅད་བསོད་སྙོམས་ལ་རྒྱུའམ། དགེ་སློང་ཤེས་ཉེན་ཅན་རྣམས་ལ་བྲམ་ཟེ་དང་ཁྱིམ་བདག་རྣམས་ཀྱིས་གཙུག་ལག་ཁང་དུ་བསོད་སྙོམས་འབུལ་ལོ། །ཤེས་ཉེན་མེད་པ་རྣམས་བསོད་སྙོམས་ལ་འགྲོའོ། །དེས་བསམས་པ། བདག་ཀྱང་བསོད་སྙོམས་ལ་འགྲོའོ་སྙམ་མོ། །ཡང་བསམས་པ། དགེ་སློང་གཞན་ཞིག་ལའང་འདི་དག་བསོད་སྙོམས་ཁོ་ན་ལ་གནས་ཏེ་རབ་ཏུ་བྱུང་ངམ། གནས་གཞན་ཡང་ཡོད་དྲིའོ་སྙམ་ནས། དགེ་སློང་ཞིག་གི་དྲུང་དུ་སོང་བ་དང༌། དེས། བྲམ་ཟེ། ཅིའི་ཕྱིར་དུ་འོངས། ཁྱོད་བལྟ་བའི་ཕྱིར་འོངས་ཏེ། ཁྱོད་ཅི་ལ་གནས་ནས་རབ་ཏུ་བྱུང༌། བྲམ་ཟེ། ཁྱོད་ཀྱི་རྟོག་པ་ནི་བཟང་སྟེ། འདུག་ཅིག་གཏམ་བྱའོ། །དེས་ཕྱག་བྱས་ནས་འདུག་པ་དང༌། གོས་ཕྱག་དར་ཁྲོད་དང༌། ཟས་བསོད་སྙོམས་དང༌། གནས་མལ་ཤིང་དྲུང་དང༌། སྨན་བཀུས་ཏེ་བོར་བ་རྣམས་བརྗོད་པ་དང༌། བྲམ་ཟེས་སྨྲས་པ། སུ་ཞིག་གནས་འདི་དག་གིས་འཚོ་བར་ནུས། བདག་རབ་ཏུ་འབྱུང་ངོ་སྙམ་ནས་འདིར་འོངས་ན། དེའང་དཀའ་བ་ཞིག་པས་ཕྱག་འཚལ་ལོ་མཆིའི་ཞེས་སོང་ངོ༌། །དེ་ཉིད་དེའི་རབ་ཏུ་བྱུང་བ་དང་བསྙེན་པར་རྫོགས་པའི་བར་ཆད་དུ་གྱུར་པའི་སྐབས་དེ་གསོལ་བ་དང༌། ཉེས་དམིགས་དེ་ནི་ཁྱིམ་པ་ལ་གནས་རྣམས་བརྗོད་པ་ལས་གྱུར་པ་ཡིན་པས། ཁྱིམ་པ་ལ་གནས་རྣམས་བརྗོད་པར་མི་བྱའོ། །སྟོན་པ་མཉན་ཡོད་ནའོ། །རི་བྲག་ཅིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་དོ། །རེ་ཞིག་ན་ཉེ་དུ་དང་ནོར་ཟད་ནས། ཆུང་མ་ལ། བཟང་མོ། ང་རྒས་པས་ནོར་སྒྲུབ་ཀྱང་མི་ནུས། ཉེ་དུ་དང་ལོངས་སྤྱོད་ཀྱང་ཟད་པས། རབ་ཏུ་འབྱུང་ངོ༌། །དེ་དྲང་པོ་ཞིག་ཡིན་ལ། བུད་མེད་དེ་ནི་གཡོན་ཅན། རྟག་(༦༤ན)ཏུ་སྐྱེས་པ་གཞན་ལ་ལྟ་བ་ཞིག་ཡིན་པས། རྗེའི་སྲས། དེ་བཞིན་དུ་མཛོད་ལ་དུས་དུས་སུ་ལྟར་སྤྱོན་ཅིག །དེ་བཞིན་དུ་བྱའོ་ཞེས་སྨྲས་ནས་རྒྱལ་བྱེད་ཚལ་དུ་སོང་སྟེ། དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། བཞིན་བཟང༌། ཁྱོད་འཇིགས་པ་མེད་པ། སྤོབས་པ་དགེ་སྟེ། ལེགས་སོ། །ཕན་ཡོན་ལྔ་མཐོང་བའི་མཁས་པས་རབ་ཏུ་འབྱུང་བར་མོས་པས་འོས་ཏེ། རང་གི་དོན་མ་འདྲེས་པར་ཐོབ་པར་འགྱུར་བ་དང༌། བྲན་དང་མངག་གཞུག་པ་དང་བཀོལ་པ་དང་རང་དབང་མེད་པ་དང་དགའ་མགུར་འགྲོར་མེད་པ་དག་གིས་མཆོད་པ་དང་བསྟོད་པར་བྱ་བར་འགྱུར་བ་དང༌། མྱ་ངན་ལས་འདས་པ་གྲུབ་པ་དང་བདེ་བ་བླ་ན་མེད་པ་མ་ཐོབ་པ་ལས་ཉམས་པ་དང༌། ལྷར་སྐྱེས་པ་དང༌། སངས་རྒྱས་དང་སངས་རྒྱས་ཀྱི་ཉན་ཐོས་སྐྱེས་བུ་དམ་པ་ཡང་དག་པར་སོང་བ་མཆོག་རྣམས་ཀྱིས་རྣམ་གྲངས་དུ་མར་རབ་ཏུ་འབྱུང་བ་བསྔགས་པར་ཡང་དག་པར་མཐོང་བས་མཁས་པས་རབ་ཏུ་འབྱུང་བར་མོས་པར་བྱ་བར་འོས་པ་ཉིད་དོ་ཞེས་གསུངས་པས་རབ་ཏུ་བྱུང་ཞིག །དེ་རབ་བྱུང་བསྙེན་རྫོགས་བྱས་སོ། །
ཞག་གཉིས་གསུམ་དུ་ཀུན་ཏུ་སྤྱོད་པའི་ཆོས་བསླབས་ནས། བཞིན་བཟང༌། རི་དྭགས་ཀྱིས་རི་དྭགས་མི་སོས་ཀྱིས། མཉན་ཡོད་རྒྱ་ཆེ་ལ་རང་དང་ཕའི་སྤྱོད་ཡུལ་ཡིན་པས་བསོད་སྙོམས་ཀྱིས་འཚོ་བར་གྱིས་ཤིག །དེས་བསོད་སྙོམས་ལ་ཞུགས་པ་དང༌། རང་གི་ཆུང་མ་འདྲ་བའི་བུད་མེད་ཅིག་མཐོང་ནས། སྔར་དམ་བཅས་པ་དྲན་ཏེ་མཁན་པོ་ལ་སྨྲས་པ། བདག་ལ་སྔོན་གྱི་ཆུང་མ་ཞིག་མཆིས་ཏེ། དེ་ལ། རབ་ཏུ་བྱུང་ནས་ལྟར་མཆིའོ་ཞེས་དམ་བཅས་པས། གནང་བར་མཛོད་ཅིག་མཆིའོ། །བུ། སོང་ལ་སེམས་སྲུངས་ཤིག །བསྲུང་བར་བགྱིའོ་ཞེས་སྨྲས་ནས་སོང་བ་དང༌། དེས་དེ་རྒྱང་རིང་པོ་ནས་མཐོང་བ་དང་བསུ་ནས། རྗེའི་སྲས། བྱོན་པ་ལེགས་སོ། །ཞེས་སྨྲས་ནས་རེག་པར་བརྩམས་པ་དང༌། ཅི་བྱེད། ཆོས་གོས་དག་བླངས་ནས་ངལ་གསོར་གཞུག་མོད། སྨྲས་པ། མ་རེག་ཅིག །ཅིའི་ཕྱིར། མཁན་པོས་ང་ལ་སེམས་སྲུངས་ཤིག་ཅེས་བསྒོའོ། །
དེས་སྨྲས་པ། སེམས་སྲུང་ལ་རག་མོད། བདག་གིས་བཀག་གམ་ཅི། ཞེས་དེའི་ཆོས་གོས་བླངས་ནས་སྟན་བཏིང་སྟེ། རྐང་པ་བཀྲུས་ནས་བསྐུས། ཁྲུས་བྱས་ནས་ཟན་བྱིན། དེའང་ལྷན་ཅིག་ཟ་བའི་ཕྱིར་འདུག་པ་དང༌། ཅི་བྱེད། རྗེའི་སྲས། ཁྱོད་དང་ལྷན་ཅིག་ཟན་ཟོས་ནས་རིང་མོ་ཞིག་ལོན་ནོ། །མཁན་པོས་ང་ལ། སེམས་སྲུངས་ཤིག་ཅེས་བསྒོའོ། །སེམས་སྲུང་ལ་རག་མོད། བདག་གིས་བཀག་གམ་ཅི། ཁྱོད་དང་ལྷན་ཅིག་ཟན་ཟོས་ནས་རིང་མོ་ཞིག་ལོན་པས་ངེས་པར་བཟའ་འོ་ཞེས་དེ་དང་ལྷན་ཅིག་ཟན་ཟོས་སོ། །མལ་བཤམས་ནས་ཉལ་བ་དང༌། དེའང་ཉལ་བར་བརྩམས་སོ། །ཅི་བྱེད། ཁྱོད་(༦༤བ)དང་ལྷན་ཅིག་ཉལ་ནས་རིང་མོ་ཞིག་ལོན་པས་མ་བཀྱོན་ཅིག །མཁན་པོས་ང་ལ་སེམས་སྲུངས་ཤིག་ཅེས་བསྒོའོ། །ཁྱོད་སེམས་སྲུང་ལ་རག་མོད། བདག་གིས་བཀག་གམ་ཅི། ཁྱོད་དང་ལྷན་ཅིག་ཉལ་ནས་རིང་མོ་ཞིག་ལོན་པས་ངེས་པར་ཉལ་ལོ། །དེས་མ་བཏུབ་པ་དང༌། མགུལ་ནས་འཇུས་ནས་བདག་གི་དབང་དུ་འགྱུར་རོ་སྙམ་ནས། དེའི་མགུལ་ནས་འཇུས་པ་དང༌། བུད་མེད་ནི་རེག་པའི་དུག་ཅན་ཡིན་པས། རེག་པ་ཙམ་གྱིས་ལོག་པར་སྤྱད་དོ། །རིང་ཞིག་འདུག་ནས། བཟང་མོ། འགྲོའོ། །དེས་བསམས་པ། འདི་དང་བདག་ལྷན་ཅིག་གསང་བ་བྱས་པ་དེ་དགེ་སློང་རྣམས་ཀྱིས་མི་ཤེས་ཏེ་དེ་རྣམས་ཀྱིས་ཤེས་ནས་བསྐྲད་ན་འདིར་འོང་བར་འགྱུར་རོ་སྙམ་ནས། ལམ་རྒྱགས་ཀརྵ་པ་ན་སྣོམས་ཤིག །དགེ་སློང་རྣམས་དབྱིག་ལ་མི་རེག་ན་ཇི་ལྟར་བླང༌། བདག་གིས་མི་རེག་པར་བགྱི་ཡིས་སྣོམས་ཤིག་ཅེས་དབྱིག་ཐུམ་པོར་གཏུམས་ནས་མཁར་གསིལ་གྱི་རྩ་བ་ལ་བཏགས་སོ། །དྲེགས་པ་དང་སྲེད་པས་ལྡོངས་པ་རྣམས་ནི་མི་བྱེད་པ་མེད་པས་དེ་ཁྱེར་ཏེ་མཉན་ཡོད་དུ་ཕྱིན་པ་དང༌། དྲུག་སྡེའི་ཀུན་ཏུ་སྤྱོད་པ་ནི་དྲུག་སྡེ་གར་རུང་གིས་རྒྱལ་བྱེད་ཚལ་དུ་སྒོ་མི་སྟོང་པ་ཡིན་པས། ཉེ་དགས་སྒོ་ན་འདུག་པས་དེ་ཐག་རིང་པོ་ནས་མགོ་སྤྲ་བའི་མེ་ཏོག་ལྟ་བུ་སྨིན་མ་འཕྱང་བ་ཞིག་འོང་བ་མཐོང་ནས། གནས་བརྟན་ཞིག་འོང་གིས་བསུའོ་ཞེས་བསུ་སྟེ། གནས་བརྟན། བྱོན་པ་ལེགས་སོ་བྱས་པ་དང༌། དེས། སློབ་དཔོན། ཕྱག་འཚལ་ལོ་ཟེར་བས། འདི་ནི་རྒན་ཞུགས་ཏེ་སློབ་དཔོན་དང་མཁན་པོའང་མི་ཤེས་སོ་སྙམ་ནས། རྒན་ཞུགས། གང་ནས་འོངས། སློབ་དཔོན། བདག་སྔོན་གྱི་ཆུང་མ་ཞིག་ཡོད་པ་ལྟར་ཕྱིན་ཏེ། དེ་ནས་འོངས་སོ། །དེ་ལེགས་ཏེ་ཁྱོད་ནི་བྱས་པ་གཟོ་བ་ཞིག་གོ །སྔོན་གྱི་ཆུང་མ་མཐོང་ངམ། མཐོང་ངོ༌། །དེ་ཁམས་བདེའམ། །བདེའོ། །འཁར་གསིལ་གྱི་རྩ་བ་ལ་འཕྱང་བ་ནི་ཅི་ཡིན། དེ་བཤུལ་བརྒྱགས་ཀྱི་པ་ནའོ། །ཁྱོད་བསོད་ནམས་ཆེ་སྟེ། སྔོན་གྱི་ཆུང་མའང་མཐོང་ལ་རྙེད་པའང་གྲུབ་བོ། །འདི་ལས་གཞན་ཡང་འབྱུང་གིས་དྲིའོ་སྙམ་ནས་ཚིག་འཇམ་པོས་ཐམས་ཅད་དྲིས་པ་དང༌། དེ་དྲང་པོའི་རང་བཞིན་ཅན་ཞིག་ཡིན་པས་ཇི་ལྟར་གྱུར་པ་བསྙད་དོ། །རྒན་ཞུགས། དེ་ཐམས་ཅད་མཁན་པོ་ལ་སྨྲོས་ཤིག །ཡིད་དགའ་བར་འགྱུར་རོ། །དེས་མཁན་པོ་ལ་བསྙད་པའི་སྐབས་དེ་གསོལ་བ་དང༌། སྐྱེས་བུ་གཏི་མུག་ཅན་འདི་སྦྱོར་བ་ཉམས་ཀྱི། བསམ་པ་ནི་མ་ཉམས་སོ། །འདི་ལ་ཕས་ཕམ་པ་བྱུང་སྟེ། དེ་བས་ན་བསྙེན་པར་རྫོགས་མ་ཐག་པ་ལ་ཕམ་པར་འགྱུར་བའི་ཆོས་བཞི་མི་བརྗོད་པར་མི་བྱའོ། །སྟོན་པ་མཉན་ཡོད་ནའོ། །གནས་ཤིག་ན་དགེ་སློང་མང་པོ་ཞིག་གཅིག་ལ་གནས་བཅས་ཏེ་འདུག་པ་དང༌། གནས་ཀྱི་སློབ་དཔོན་དེ་ཤི་ནས་འཕྲལ་གྱི་བྱ་བ་ཞུ་བ་དང༌། གང་ལ་གནས་(༦༥ན)བཅས་ནས་འདུག་པ་མ་ཤེས་པའི་སྐབས་དེ་གསོལ་བ་དང༌། དེ་དག་གིས་དགེ་སློང་ཞིག་ལས་སུ་བསྐོ་བ་དང༌། གནས་ཁང་དང༌། མལ་སྟན་དང༌། ཉེ་གནས་ཀྱི་སྟ་གོན་གྱིས་བཙལ་བར་བྱའོ། །མ་རྙེད་ན་གང་ན་གནས་མེད་པ་དེར་གསོ་སྦྱོང་གཉིས་པ་ལ་བསྡད་པར་མི་བྱའོ། །དགེ་སློང་ཞིག་གནས་ཀྱི་སློབ་དཔོན་ཞིག་དང་དབྱར་ཁས་བླང་བར་འདོད་པ་ལས། གནས་ཀྱི་སློབ་དཔོན་དེ་ཤི་ནས། ཇི་ལྟ་བྱ་བ་མི་ཤེས་པའི་སྐབས་དེ་གསོལ་བ་དང༌། གནས་དང་ལས་དང་ཉེ་གནས་ཀྱི་སྟ་གོན་གྱིས་དེ་བཙལ་བར་བྱའོ། །མ་རྙེད་ན་གནས་དེར་དབྱར་སྔ་མ་གནས་པར་ཁས་བླང་བར་མི་བྱའོ། །
དགེ་སློང་དག་གནས་ཤིག་ཏུ་གནས་ཀྱི་སློབ་དཔོན་ཞིག་དང་དབྱར་སྔ་མར་གནས་པར་ཁས་བླངས་པ་དང༌། དེ་དག་གིས་སློབ་དཔོན་ཤི་ནས། ཇི་ལྟར་བྱ་བ་མི་ཤེས་པའི་སྐབས་དེ་གསོལ་བ་དང༌། གནས་དང་ལས་དང་ཉེ་གནས་ཀྱི་སྟ་གོན་གྱིས་དེ་བཙལ་བར་བྱའོ། །མ་རྙེད་ན་གནས་དེར་དབྱར་གནས་པར་ཁས་བླངས་པ་སྔ་མ་རྗེས་སུ་བསྲུང་བར་མི་བྱའོ། །དགེ་སློང་དག་གནས་ཤིག་ཏུ་གནས་ཀྱི་སློབ་དཔོན་ཞིག་དང་དབྱར་ཕྱི་མ་གནས་པར་ཁས་བླངས་པ་ལས། དེ་དག་གི་སློབ་དཔོན་དེ་ཤི་ནས། ཇི་ལྟར་བྱ་བ་མི་ཤེས་པའི་སྐབས་དེ་གསོལ་བ་དང༌། དེ་དག་གིས་ཕྱི་མ་ཟླ་བ་གཉིས་ཀྱི་བར་དུ་གཅིག་ལ་གཅིག་དྲི་ཞིང་སོ་སོར་བརྟགས་པས་གནས་པར་བྱའོ། །ཟླ་བ་གཉིས་འདས་ནས་གནས་དང་ལས་དང་ཉེ་གནས་ཀྱི་སྟ་གོན་གྱིས་དེ་བཙལ་བར་བྱའོ། །མ་རྙེད་ན་གནས་དེར་གསོ་སྦྱོང་གཉིས་པའི་བར་དུ་འདུག་པར་མི་བྱའོ། །མཁན་པོ་ལ་ཡང་སློབ་དཔོན་ཇི་ལྟ་བ་བཞིན་སྦྱར་རོ། །ཡོད་ནའང་རེ་ཞིག་གི་གནས་ཉིད་ཀྱིས་ཞུ་བ་ནི། མཁན་པོས་དེ་ལ། འདི་ནི་ཁྱོད་དང་མཁན་པོ་གཅིག་པ་ཡིན་གྱིས། ཁྱོད་ཀྱིས་འདི་ལ་ཞུ་བར་བྱའོ་ཞེས་སོ། །གནས་མ་བཅས་པ་ལ་རྙེད་པ་སྩལ་བར་བགྱིའམ། མང་ནའང་ཞག་ལྔའི་བར་དུ་གནས་བཅའ་བ་འཚོལ་ཞིང་སྦྱོར་བ་མ་བཏང་བའོ་ཞེས་པ། གནས་པར་འོས་པ་ཡོངས་སུ་འཚོལ་བ་ལ་ཞུགས་པ་སོགས་སོ། །སློབ་མ་དག་ལས་སུ་བསྐོས་ཏེ་འགྲོ་བ་ན་མཁན་སློབ་ལ་ཞུས་ཏེ་སོང་བས་དེར་ཕྱིན་པ་ན་ལས་གཞན་བྱུང་ནས། ཡང་ཕྱིར་འོངས་ཏེ་ཞུ་བྱེད་པ་དེ་གསོལ་བ་དང༌། ལས་སུ་བསྐོས་པར་སོང་བ་ན་དེ་གཞན་བྱུང་ན་ཡང་ཡང་མ་ཞུས་ཀྱང་ཉེས་པ་མེད་དེ། སྔར་ཞུས་པ་ཐམས་ཅད་ཞུས་པའོ། །
སྟོན་པས། གློ་བུར་དུ་ལྷགས་པའི་དགེ་སློང་གིས་གནས་བཅའ་བའི་ཕྱིར་གཙུག་ལག་ཁང་དུ་འོངས་ནས་གནས་མ་བཅས་ཀྱི་བར་དུ་རྐང་པའི་རྡུལ་མ་ཕྱི། ཆུ་སྣོད་མ་ལེན་ཅིག་ཅེས་གསུངས་པ་དང༌། གློ་བུར་དུ་ལྷགས་པ་ཞིག་གིས། བསླབ་པ་བཅས་པ་དེ་ཐོས་ནས། གནས་བཅའ་བའི་ཕྱིར་ལུས་ངལ་དུབ་བཞིན་དུ་ཕན་ཚུན་བརྒྱུགས་པས་འགྱེལ་(༦༥བ)ནས་ཤིའོ། །དེ་གསོལ་བ་དང༌། གློ་བུར་དུ་འོངས་པས་ནི་ངལ་བསོས་ནས་གནས་བཅའ་བར་བྱའོ་ཞེས་གསུངས་པ་དང༌། གར་བབ་བབ་ཏུ་གནས་བཅས་པས་དགེ་བའི་ཆོས་ཡལ་ནས། གང་ཡང་རུང་བ་ལ་གནས་བཅའ་བར་མི་བྱའོ། །ཞག་གསུམ་གྱི་བར་དུ་གང་ལ་གནས་འཆའ་བའི་དགེ་སློང་དེ་སྤྱོད་པ་དང༌། འཁོར་དང༌། ཕྱི་བཞིན་འབྲང་བའི་གྲོགས་དང༌། ལུང་བསྒོ་མི་བསྒོ། རྗེས་སུ་སྟོན་མི་སྟོན། དགེ་བའི་ཆོས་སྐྱེའམ་འབྲི་བསམས། བརྟགས། ཤིན་ཏུ་དཔྱོད་ལ་གནས་ཆོས་ཤིག །གནས་སྦྱིན་པའི་དགེ་སློང་གིས་ཀྱང་གང་ཡང་རུང་བ་རིངས་སྟབས་སུ་མ་སྦྱིན་པར་ཞག་གསུམ་གྱི་བར་དུ་དེའི་སྤྱོད་པ་དང༌། དེས་བདག་ལ་རིམ་གྲོ་བྱེད་མི་བྱེད། དགེ་བའི་ཆོས་འཕེལ་མི་འཕེལ་ཡོངས་སུ་བརྟགས་ནས་སྦྱིན་ནོ། །གནས་འཆའ་བ་ལེན་འདོད་པས་ཆོ་ག་ལན་གསུམ་ཐབས་ལེགས་དང་བཅས་པ། སྡོམ་པ་བཞིན་ནོ། །སྟན་ནས་ལངས་ཏེ་བླ་གོས་ཕྲག་པ་གཅིག་ཏུ་བྱས། ལག་པ་གཉིས་ཀྱིས་རྐང་མཐིལ་བཅངས་ནས་ལན་གཉིས་བཙིར་ལ་གནས་བཅའ་འོ། །སྟོན་པ་མཉན་ཡོད་ནའོ། །དགེ་སློང་ཞིག་གིས་གཞོན་ནུ་ཞིག་ལ་གནས་བྱིན་ནས་བུ་བཞིན་དུ་བསྐྱངས་སོ། །རེ་ཞིག་ན། སློབ་དཔོན། ཕྱག་འཚལ་ལོ་མཁྱེན་པར་མཛོད་ཅིག །ལྗོངས་རྒྱུར་མཆིའོ། །བུ། མི་བདེ་བ་མེད་དམ། མེད་དེ་ལྗོངས་རྒྱུར་སྤྲོ་བས་སླར་མཆིའོ། །དེ་ལྟ་ན་སོང་ལ་ལམ་དུ་འགྱོད་ན་སླར་ལོག་ཅིག །ལེགས་ཀྱིས་སླར་མཆིའོ་ཞེས་ཆས་པ་དང༌། ལམ་དུ་བསམས་པ་བདག་ལ་སློབ་དཔོན་གྱིས་ཡོ་བྱད་ཐམས་ཅད་སྦྱར་བ་ལས་སོང་བ་མི་ལེགས་སོ་སྙམ་ནས་སླར་ལོག་པ་དང༌། སློབ་དཔོན་གྱིས་མཐོང་ནས། ཅིའི་ཕྱིར་ལོག །ཅུང་ཟད་བརྗེད་པ་མེད་དམ། བརྗེད་པ་མ་མཆིས་མོད་བདག་ལ་སློབ་དཔོན་གྱིས་ཡོ་བྱད་སྦྱར་ན་ཅི་ལ་འགྲོ་སྙམ་ནས་སླར་ལོག་གོ །བུ། སླར་ལོག་ན་ལེགས་སོ། །ཁྱོད་ཀྱི་སློབ་དཔོན་ནི་ང་ཉིད་ཡིན་ནོ་ཞེས་སྨྲས་ནས་བསམས་པ། འདིའི་གནས་བཅས་པ་དེས་ཆོག་གམ། གདོད་སྦྱིན་དགོས་སྙམ་ནས། སྐབས་དེ་གསོལ་བ་དང༌། སློབ་དཔོན་གྱིས་མ་བཏང་ལ་ཉེ་གནས་ཀྱིས་བཏང་ན་གནས་བཅས་པ་མ་ཞིག་གོ །སློབ་དཔོན་གྱིས་བཏང་ལ་ཉེ་གནས་ཀྱིས་མ་བཏང་ན་གནས་བཅས་པ་མ་ཞིག་གོ །གཉིས་ཀས་མ་བཏང་ན་མ་ཞིག་གོ །དཔོན་སློབ་གཉིས་ཀ་ལ་མི་ལྟོས་པ་ཉིད་བྱུང་བ་ནི་གནས་བཅས་པ་འཇིག་པའི་རྒྱུ་ཡིན་ནོ། །སྟོན་པ་མཉན་ཡོད་ནའོ། །རབ་ཏུ་འབྱུང་བར་འདོད་པ་ཞིག་གེ་སློང་ཞིག་གི་དྲུང་དུ་སོང་བ་དང༌། དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པ་བྱས་ནས་དེ་བཞག་སྟེ་ལྗོངས་རྒྱུར་སོང་ངོ༌། །དེ་ཟང་ཟིང་གིས་བསྡུས་ཀྱང་ཆོས་ཀྱིས་མ་བསྡུས་པས་གཞན་ཞིག་ལ་གནས་ཏེ་འདུག་གོ །དེས་(༦༦ན)བསྡུ་བའི་དངོས་པོ་བཞིས་བསྡུས་པས་དེ་སློབ་དཔོན་དེ་ལ་རྟག་ཏུ་ལྟ་ཞིང་སེམས་འཛིན་ནོ། །རེ་ཞིག་ན་དེའི་མཁན་པོ་ལྗོངས་རྒྱུས་ནས་སླར་ཕྱིན་པ་དང༌། དེ་མཐོང་ནས་ཚངས་པ་མཚུངས་པར་སྤྱོད་པ་གསར་བུ་རྣམས་ནི་སྟན་ལས་ལྡང་བར་བྱེད། རྒན་པ་དག་གིས། འོངས་པ་ལེགས་སོ་ཞེས་བྱས་སོ། །དེའི་ལྷན་ཅིག་གནས་པ་དེ་སྟན་ལས་ལངས་པ་དང༌། དེ་ལ་དགེ་སློང་དག་གིས། ཚེ་དང་ལྡན་པ། ཁྱོད་ཀྱི་མཁན་པོ་འོངས་པ་ལ་ཁ་ཅིག་གིས་སྟན་ལས་ལངས། ཁ་ཅིག་གིས། འོངས་པ་ལེགས་སོ་ཞེས་བྱས་ན། ཁྱོད་ཀྱིས་དེ་མཐོང་བཞིན་དུ་སྟན་ལས་མ་ལངས་པ་ནི་རིགས་པ་མ་ཡིན་ནོ། །དེས་སྨྲས་པ། འདིས་བདག་རབ་ཏུ་ཕྱུང་ནས་ཟང་ཟིང་གིས་བསྡུས་སམ། ཆོས་ཀྱིས་བསྡུས། གང་དྲན་ནས་ལྡང་བར་བྱ། དེ་དག་གིས་སྨྲས་པ། དེ་སྐད་མ་ཟེར་ཅིག །སྟོན་པས་ཀྱང༌། གང་ཟག་གཅིག་གང་ཟག་གཅིག་ལ་བརྟེན་ནས་སྐྲ་དང་ཁ་སྤུ་བྲེགས། གོས་ངུར་སྨྲིག་བགོས་ཏེ། ཡང་དག་པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེས་ནི་དེ་ལ་ཇི་སྲིད་འཚོའི་བར་དུ་ཆོས་གོས་དང༌། བསོད་སྙོམས་དང༌། ནད་ཀྱི་གསོ་སྨན་དང༌། མལ་སྟན་དང༌། ཡོ་བྱད་དག་གིས་ལན་གླན་པར་སླ་བ་མ་ཡིན་ནོ་ཞེས་མ་གསུངས་སམ། ཁྱོད་དེ་སྐད་ཟེར་བ་ནི་མ་ལེགས་སོ་ཞེས་སྨྲས་པས་ཅང་མི་ཟེར་བའི་སྐབས་དེ་གསོལ་བ་དང༌། ལྷན་ཅིག་གནས་པ་དང་ཉེ་གནས་རྣམས་ཀྱིས་མཁན་པོ་མཐོང་མ་ཐག་ཏུ་སྟན་ལས་ལྡང་བར་བྱའོ། །
མཁན་པོས་མཐོང་མ་ཐག་ཏུ་གནས་བཅས་པའང་མེད་པར་འགྱུར་རོ། །དེ་སྐད་གསུངས་པ་དང༌། གཞན་ཞིག་གི་མཁན་པོ་འདུག་མི་ཕོད་པ་ཞིག་འོངས་ཤིང་ཅུང་ཟད་འདུག་ནས་འགྲོ་ལ། ཁ་ཅིག་ལ་ནི་མཁན་སློབ་རྣམས་གཤེ། ཁ་ཅིག་ལ་ནི་དགའ་ཞིང༌། གཤེ་བ་དེ་དག་ལ་ནི་སྔར་གནས་པ་ལའང་མི་སྟེར། བདག་ཉིད་ཀྱང་མི་སྡུད། དགའ་བ་དེ་དག་ནི་སྡུད་པར་བྱེད་ནས་སྔར་གྱི་སློབ་དཔོན་རྣམས་འཁྲུགས་པར་གྱུར་པའི་སྐབས་དེ་གསོལ་བ་དང༌། འདུག་མི་ཕོད་པ་དེ་དག་ལའང་ཐམས་ཅད་བྱ་ཞིང༌། སྔོན་གྱི་སློབ་དཔོན་རྣམས་ལའང་ཐམས་ཅད་བྱ་མོད། གཉིས་ཀའི་སེམས་མགུ་བ་ལྷུར་བླང༌། གཉིས་ཀ་ལའང་དྲི་བར་བྱའོ། །ཐམས་ཅད་དུ་མཁན་པོ་འདུག་ན་དེ་ཉིད་ལ་དྲི་བར་བྱའོ། །དགེ་སློང་ཞིག་གིས་གཞོན་ནུ་ཞིག་ལ་གནས་བྱིན་ནས། དེ་གསོ་སྦྱོང་གི་ཚེ་དེའི་ཐད་དུ་སོང་སྟེ། སློབ་དཔོན། ཕྱག་འཚལ་ལོ། །ཞུའོ། །གསོ་སྦྱོང་བྱིན་གྱིས་བརླབ་བོ། །
དེས་སྨྲས་པ། ང་ཇི་ལྟར་ཁྱོད་ཀྱི་སློབ་དཔོན་དུ་གྱུར། བདག་ཁྱོད་ལ་གནས་བཅས་ཏེ་མཆིས་པས་སོ། །ཁྱོད་ལྟ་བུ་མ་གུས་ཤིང་ཞེ་ས་མེད་པ་ལ་གནས་སྟེར་བ་དེ་ལ་གནས་ཆོས་ཏེ་དེ་ལ་ཞུས་ཤིག །དེ་ཅང་མི་ཟེར་བའི་སྐབས་དེ་གསོལ་བ་(༦༦བ)དང༌། ཉེས་དམིགས་དེ་ནི་དགེ་སློང་དག་དུས་གསུམ་དུ་མཁན་པོ་དང༌། སློབ་དཔོན་ལྟར་མི་འགྲོ་བ་ལས་གྱུར་པས། དེ་བས་ན་ལྷན་ཅིག་གནས་པ་དང་ཉེ་གནས་རྣམས་ཀྱིས་དུས་གསུམ་དུ་མཁན་པོ་དང་སློབ་དཔོན་བལྟ་བའི་ཕྱིར་འགྲོ་བར་བྱའོ། །ཨུ་པ་ལིས་ཞུས་པ། ལྷན་ཅིག་གནས་པ་དང་ཉེ་གནས་ཀྱིས་དུས་གསུམ་དུ་མཁན་སློབ་བལྟར་སོང་ཞིག །ཅེས་གསུངས་ལ། མཚམས་ཆེན་པོ་དཔག་ཚད་ཕྱེད་དང་གསུམ་དུ་ཆོད་ཅིག་ཅེས་ཀྱང་གསུངས་ན། མཁན་སློབ་དཔག་ཚད་ཕྱེད་དང་གསུམ་ན་མཆིས་ན་དེ་དག་གིས་ཇི་ཙམ་ན་བལྟ་བར་བགྱི། གསོ་སྦྱོང་གི་ཚེའོ། །དེ་དག་རྒྱང་གྲགས་ལྔ་ན་ཡོད་ན་ཞག་བདུན་ནམ་བརྒྱད་ན་བལྟར་སོང་ཞིག །འདོམ་ལྔ་བརྒྱ་ན་གནས་ན་དུས་གསུམ་དུ་བལྟར་སོང་ཞིག །སྟོན་པ་མཉན་ཡོད་ནའོ། །ཤཱ་རིའི་བུ་ལ་དགེ་ཚུལ་ཙུན་ད་དང༌། སྒྲ་གཅན་ཟིན་གཉིས་ཡོད་པ་ལས། རེ་ཞིག་ན་ཤཱ་རིའི་བུ་ལྗོངས་རྒྱུར་ཆས་ནས། དགེ་ཚུལ་དག །ང་ལྗོངས་རྒྱུར་འགྲོ་ན་ཁྱེད་འདུག་གམ་འགྲོ། ཙུན་དས། མཁན་པོ། བདག་ནི་ཁྱོད་དང་ལྷན་ཅིག་མཆིའོ། །སྒྲ་གཅན་ཟིན་གྱིས། འདི་ཉིད་ན་མཆིའོ། །དེ་ལྟ་ན་སུ་ལ་གཏད། བཙུན་པ་འཆར་ཀ་ལ་གཏད་དུ་གསོལ། དེ་ནི་གནས་ངན་ལེན་ཀུན་ཏུ་སྤྱོད་པ་ཡིན་པས་ཁྱོད་ལ་གནོད་པ་བྱེད་པར་མི་འགྱུར་གྲང༌། དེ་ནི་བདག་གི་ཕ་མ་དང་འདྲ་བས་གནོད་པ་ཅི་བགྱིད། དེས་དེ་ལ་གཏད་ནས་ལྗོངས་རྒྱུར་སོང་ངོ༌། །དེ་དང་སྒྲ་གཅན་ཟིན་ཡང་གཙུག་ལག་ཁང་ནས་བྱུང་ངོ༌། །སྒྲ་གཅན་ཟིན། འདི་དང་འདི་གྱིས་ཤིག །མི་བྱེད་དོ། །འཆར་ཀ་ཁྲོས་ནས། བླུན་པོ། འདི་ཙམ་ཡང་མི་བྱ་ན་གཞན་ཅི་བྱ། དེས་སྨྲས་པ། ཁྱོད་ངའི་སློབ་དཔོན་ཡིན་ནམ་མཁན་པོ་ཡིན། མི་བྱེད་དོ། །དེས་དེའི་མགུལ་ནས་བཟུང་སྟེ་གཙུག་ལག་ཁང་ནས་བསྐྲད་པ་དང༌། དེ་རྒྱལ་བྱེད་ཚལ་གྱི་སྒོ་ན་ངུ་ཞིང་འདུག་པ་དང༌། སྐྱེ་དགུའི་བདག་མོ་འཁོར་ལྔ་བརྒྱ་དང་བཅས་པས་མཐོང་ནས། ཅི་སྟེ་བཤུམ། བདག་བསྐྲད་དོ། །སུས། འཆར་ཀས་སོ། །དེས་བདག་སངས་རྒྱས་ཀྱི་སྲས་ལ་རྒྱབ་བསྟན་ནས་འགྲོ་བ་ཆ་མ་ཡིན་ནོ་སྙམ་སྟེ་དེ་དག་གིས་བསྐོར་ནས་འཁོད་དོ། །ཇི་ཙམ་ན་ཀོ་ས་ལའི་རྒྱལ་པོ་གསལ་རྒྱལ་འོངས་པ་དང༌། དེས་ཀྱང་དྲིས་པ། ཅི་སྟེ་བཤུམ། དེས་ཇི་ལྟར་གྱུར་པ་བསྙད་པ་དང༌། དེས་བདག་སངས་རྒྱས་ཀྱི་སྲས་དང་སངས་རྒྱས་ཀྱི་སྲུ་ལ་རྒྱབ་བསྟན་ནས་འགྲོ་བ་ཆ་མ་ཡིན་ནོ་སྙམ་སྟེ། དེས་ཀྱང་བསྐོར་ནས་འཁོད་དོ། །ཁྱིམ་བདག་མགོན་མེད་ཟས་སྦྱིན་འོངས་པ་དང༌། དེས་ཀྱང༌། ཅི་སྟེ་བཤུམ། དེས་ཇི་ལྟར་གྱུར་པ་བསྙད་པ་དང༌། དེས་བདག་སངས་རྒྱས་ཀྱི་སྲས་དང༌། སངས་རྒྱས་ཀྱི་སྲུ་དང༌། རྒྱལ་པོ་ལ་རྒྱབ་བསྟན་(༦༧ན)ནས་འགྲོ་བ་ཆ་མ་ཡིན་ནོ་སྙམ་སྟེ། དེས་ཀྱང་བསྐོར་ཏེ་འཁོད་དོ། །སྐབས་དེ་ཀུན་དགའ་ར་བར་སྐྱེ་བོའི་ཚོགས་ཕལ་པོ་ཆེའི་སྒྲ་བྱུང་བ་དང༌། སངས་རྒྱས་རྣམས་ནི་མཁྱེན་བཞིན་དུ་རྨེད་པར་མཛད་པས། ཀུན་དགའ་བོ་ལ་དྲིས་ནས། དེས་དེ་རྒྱས་པར་གསོལ་བ་དང༌། དགེ་སློང་དག །དགེ་སློང་གིས་དགེ་འདུན་གྱི་གཙུག་ལག་ཁང་ནས་སྐྲོད་དམ། སྐྲོད་དོ། །དགེ་སློང་ནི་རང་གི་གནས་ཁང་ལ་དབང་གིས་དགེ་འདུན་གྱི་གཙུག་ལག་ཁང་ལ་དབང་བ་མ་ཡིན་པས་དགེ་སློང་གིས་དགེ་འདུན་གྱི་གཙུག་ལག་ཁང་ནས་བསྐྲད་པར་མི་བྱའོ། །དེ་སྐད་གསུངས་པ་དང༌། དགེ་སློང་རྣམས་ཀྱིས་ལྷན་ཅིག་གནས་པ་དང༌། ཉེ་གནས་ལ་ཅུང་ཟད་ཀྱང་མ་སྨྲས་པས། དེ་དག་དབང་དུ་མ་གྱུར་ཅིང་མ་དུལ་བས། གནས་པ་ཆད་པས་གཅད་པར་འོས་པ་ཆད་པས་མི་གཅད་པར་མི་བྱའོ། །ཆད་པ་མ་ཤེས་ནས་ཞུས་པས། ཆད་པ་ནི་ལྔའོ། །གཏམ་འདྲེ་བར་མི་བྱ་བ་དང༌། གདམས་ངག་མི་སྦྱིན་པ་དང༌། བསྙེན་བཀུར་དང་ཆོས་དང་ཟང་ཟིང་དག་གིས་ལོངས་སྤྱོད་དུ་མི་གཞུག་པ་དང༌། དགེ་བའི་ཕྱོགས་བརྩམས་པ་རྒྱུན་གཅད་པ་དང༌། གནས་དགག་པར་བྱ་བའོ། །
དགེ་སློང་རྣམས་ཁྱད་པར་མེད་པར་ཆད་པས་གཅོད་ནས། ཆོས་ལྔ་དང་ལྡན་ན་ཆད་པས་གཅད་པར་བྱ་སྟེ། མ་དད་པ་དང༌། ལེ་ལོ་ཅན་དང༌། བཀའ་བློ་མི་བདེ་བ་དང༌། མ་གུས་པ་དང༌། སྡིག་པའི་གྲོགས་བྱེད་པ་ལ་དེ་དག་འོས་པ་ཉིད་དོ། །ཆོས་ལྔ་ཆར་དང་ལྡན་པ་ཆད་པས་གཅོད་ཀྱི། གང་རུང་དང་ལྡན་ན་ཆད་པས་མི་གཅོད་ནས། ལྔ་པོ་འདི་ལས་གང་རུང་དང་ལྡན་ནའང་ཆད་པས་གཅད་པར་བྱའོ། །ཆད་པས་བཅད་པ་གཞན་གྱིས་སྡུད་པར་བྱེད་ནས། ཆད་པས་བཅད་པ་གཞན་གྱིས་ལེན་པར་བྱེད་ན་དབྱེན་དང་ཉེ་བའི་ཉེས་པ་སྦོམ་པོར་འགྱུར་རོ། །དེར་སུས་ཀྱང་མ་བསྡུས་པས། ཤིན་ཏུ་མ་གུས་པར་གྱུར་ཏེ། ཁ་ཅིག་ཡུལ་གཞན་དུ་འགྲོ། ཁ་ཅིག་བསྟན་པ་ལས་འདའ་བར་བྱེད་ནས། གུས་པར་མི་བྱེད་ན། དྲང་པོར་བྱ་བའི་ཕྱིར་སྡུམ་བྱེད་པའི་དགེ་སློང་བསྐོའོ། །དེ་དག་གིས་མི་མཁས་པ་བསྐོས་ཏེ། དེ་སོང་ནས། མཁན་པོ་ན་རེ། ཚུར་ཤོག །བཟོད་པ་མཛོད་ཅིག་ཟེར་རོ་བྱས་པ་དང༌། དེ་ཁེངས་པར་གྱུར་ནས། སྡུམ་བྱེད་པའི་དགེ་སློང་ཤེས་ཉེན་ཅན་བསྐོ་བར་བྱའོ། །ཐམས་ཅད་ལ་ཁྱད་པར་མེད་པར་བཟོད་པ་གསོལ་བས་དེ་དག་དགེ་བའི་ཆོས་མི་འཕེལ་ཞིང༌། གསར་བུ་གཞན་དག་ཀྱང་བསྟན་པ་ལས་གྱེད་ནས། རྒྱུ་བཏང་བ་དད་པ་ལ་སོགས་པ་ལྔ་དང་ལྡན་པ་བཟོད་པ་གསོལ་བར་བྱེད་པ་ལ་བཟོད་པར་བྱའོ། །ཆོས་ལྔ་ཆར་དང་ལྡན་པ་ལ་བཟོད་པ་གསོལ་ནས། གང་རུང་དང་ལྡན་པ་ལ་བཟོད་པ་གསོལ་བར་བྱའོ། །ཆད་པ་གཅད་པར་མི་འོས་པ་ལ་ཆད་པ་གཅད་པར་(༦༧བ)མི་བྱའོ། །བཟོད་པ་གསོལ་བར་འོས་པ་ལ་མི་བཟོད་པར་མི་བྱའོ། །བཟོད་པ་མི་བྱེད་པ་ཉིད་ཡིན་ན་གནས་ཁང་ནས་བསྐྲད་པར་བྱའོ། །དགེ་ཚུལ་ལ་ནི་ཆུ་ཚགས་དང༌། རིལ་བ་སྤྱི་བླུགས་དང༌། མཐང་གོས་དང་བཅས་པའི་བླ་གོས་ཀྱང་བྱིན་ཏེའོ། །གལ་ཏེ་བསྙེན་པར་རྫོགས་པའམ། བསྙེན་པར་རྫོགས་པར་འདོད་པ་ཞིག་ཡིན་ན་ཡོ་བྱད་ལྔ་བྱིན་ཏེ་བསྐྲད་པར་བྱ་ཡི་སྒྲེན་མོར་ནི་མི་བྱའོ། །མཉན་ཡོད་ན་དགེ་སློང་རྒན་པོ་ཞིག་དང༌། གསར་བུ་ཞིག་ལྗོངས་རྒྱུར་སོང་བ་དང༌། རྒན་པོ་ནི་སྣོད་དང་ཡོ་བྱད་མང་ལ། གསར་བུ་ནི་ཆོས་གོས་གསུམ་ལས་ལྷག་པ་མེད་པ་ཞིག་པས། རྒན་པོས་སྨྲས་པ། ཁོ་བོ་ངལ་གྱིས་ཆོས་གོས་ཀྱི་གཏུར་བུ་ཁྱེར་ཏེ་ཤོག་ཅིག །གསར་བུས་སྨྲས་པ། གནས་བརྟན། བཀའ་མི་དབབ་ན་ཅུང་ཟད་གསོལ་བ་མཆིས་སོ། །
འདི་ལ་སུ་གཤེ། སྨྲོས་ཤིག །གནས་བརྟན། དཀོན་མཆོག་གསུམ་ལ་མ་གཟིགས་སམ། རྨོངས་པའི་ཡོ་བྱད་འདིས་ཅི་བགྱི། གལ་ཏེ་མི་བཀུར་བ་ནི་རུང་ན། ཁྱོད་ཁོ་བོའི་མཁན་སློབ་ཡིན་ནམ། ཅིའི་ཕྱིར་རྗེས་སུ་སྟོན། བཀྲེན་པ་འདི་མི་དགའ་བར་བྱའོ་སྙམ་ནས། དེ་གཉིས་གཙུག་ལག་ཁང་དུ་སོང་བ་དང༌། དེ་ན་ནུབ་གཅིག་ཀྱང་མི་གནས་པར་མི་འདུག་པའི་ཁྲིམས་ཡོད་དེ། དེ་གཉིས་ལ་གནས་མལ་གྱི་ཞལ་ཏ་བྱེད་པས། གནས་མལ་སྣོམས་ཤིག །ཅེས་སྨྲས་པ་དང༌། རྒན་པོས་ནི་བླངས། གསར་བུས། ཁོ་བོས་གནས་མ་བཅས་ཀྱིས། དང་པོར་གནས་བཅའ་འོ་ཞེས་དགེ་འདུན་གྱི་གནས་བརྟན་གྱི་གན་དུ་སོང་ནས་རྐང་པ་ལ་ཕྱག་འཚལ་ཏེ། གནས་བརྟན། བདག་གི་གནས་མཛད་དུ་གསོལ། བཞིན་བཟང༌། ཁྱོད་སུ་དང་ལྷན་ཅིག་འོངས། ཆེ་གེ་མོ་ཞིག་དང་ངོ༌། །དེ། དགེ་འདུན་གྱི་གནས་བརྟན་གྱིས་བདག་ལ་འཁོར་ཕྱེའོ་ཞེས་ཟེར་དུ་འོང་གིས། དེ་ཉིད་ལ་གནས་གསོལ་ཅིག །དེ་གཞན་དག་གི་གན་དུ་སོང་བ་དང༌། ཐམས་ཅད་ཀྱིས་དེ་བཞིན་དུ་སྤངས་ནས། ནམ་སྲོས་ཏེ་རྒན་པོ་དེ་ཉིད་ཀྱི་གན་དུ་སོང་ནས་སྒོ་ལ་བརྡབས་ཏེ་སྨྲས་པ། གནས་བརྟན། ཕྱག་འཚལ་ལོ། །ཁྱོད་སུ། འདི་ཞེས་བགྱི་བའོ། །འདི་ན་ཁྲིམས་འདི་ལྟ་བུ་མཆིས་ཀྱིས། བདག་གི་གནས་མཛད་དུ་གསོལ། བཞིན་བཟང༌། དགེ་འདུན་གྱིས་དེ་ལྟ་བུའི་ཁྲིམས་མཛད་པ་ལེགས་ཏེ། གལ་ཏེ་མ་མཛད་ན་ཁོ་བོས་འཆར་གཞུག་པ་ཞིག་གོ །སྔར་ནི་ཁོ་བོ་སྣོད་དང་ཡོ་བྱད་མང་བ་ཡིན་ལ། ད་ནི་གནས་བརྟན་ཡིན་ནམ། མ་གུས་པ་བྱས་ཀྱང་གནས་སྟེར་བ་དེ་ལ་གནས་ཆོས་ཤིག །དེ་ཅང་མི་ཟེར་བར་འདུག་སྟེ། དེའི་གནས་ཀྱི་བར་ཆད་དུ་གྱུར་པའི་སྐབས་དེ་གསོལ་བ་དང༌། གནས་མེད་པར་ལྗོངས་རྒྱུ་བར་མི་བྱ། དགེ་སློང་གིས་སེངྒེ་ལྟར་གྱ་ཚོམ་མི་བྱའོ། །དགེ་འདུན་གྱིས་ཀྱང་(༦༨ན)དགེ་སློང་རྣམས་ལ་གནོད་པར་འགྱུར་བའི་ཁྲིམས་སུ་བྱ་བ་མི་བྱའོ། །
སྟོན་པ་མཉན་ཡོད་ནའོ། །ཆུ་བོ་སྙན་ལྡན་གྱི་དགེ་སློང་རྣམས་ཀྱིས་དང་པོ་བུམ་པ་དང༌། ཕོ་ལོང་གི་སྦྱོར་བས་འབད་དེ་བསྒོམས་པས་དགྲ་བཅོམ་པ་ཐོབ་པའི་ཚེ་དེ་དག་གི་སྤྱོད་ལམ་ལ་སྐྱེ་བོ་མང་པོ་དད་དོ། །དེ་ནས་སྟོན་པས། དགེ་སློང་དག །གང་གིས་གྲོང་གི་ཞིང་ན་ཆུ་བོ་སྙན་ལྡན་གྱི་འགྲམ་གྱི་དགེ་སློང་རྣམས་གནས་པའི་མི་དེ་དག་ནི་རྙེད་པ་ལེགས་པར་རྙེད་དོ། །ཀུན་དགའ་བོས་སྟོན་པའི་དགོངས་པ་ཤེས་ནས། དེས་དེ་དག་ལ། སྟོན་པ་ནི་ཁྱོད་ཀྱི་བསྔགས་པ་བརྗོད་ཅིང༌། གཟིགས་པར་བཞེད་ཀྱིས། འོང་བའི་རིགས་སོ་ཞེས་སྤྲིངས་སོ། །དེ་དག་གིས་སྐྱེ་བོའི་ཚོགས་མང་པོ་སྦྲན་ནས་སོང་ངོ༌། །དེ་དག་གིས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག །ཤེས་པར་གྱིས་ཤིག །སྟོན་པ་བདག་ཅག་གི་ཡོན་ཏན་བརྗོད་ཅིང༌། གཟིགས་པར་བཞེད་དེ། ཁྱེད་ལ་བལྟས་ནས་འདོང་བ་ཡིན་ནོ། །དེ་དག་གིས་སྨྲས་པ། དེ་ལྟ་ན་བདག་ཅག་ཀྱང་འགྲོའོ། །དེ་ལྟར་གྱིས་ཤིག །དེ་རྣམས་དེ་དག་དང་ལྷན་ཅིག་ཆས་ཏེ་རིམ་གྱིས་མཉན་ཡོད་དུ་ཕྱིན་པ་དང༌། དེ་ནས་ཀུན་དགའ་ར་བར་དགེ་སློང་གློ་བུར་བ་དང༌། གཞི་བ་རྣམས་ཕན་ཚུན་དགའ་བར་བྱེད་པའི་སྒྲ་ཆེན་པོ་དང༌། སྐྱེ་བོའི་ཚོགས་ཕལ་པོ་ཆེའི་སྒྲ་སྐད་བྱུང་ངོ༌། །སྟོན་པས་ཀུན་དགའ་བོ་ལ་དྲིས་པས། ཆུ་བོ་སྙན་ལྡན་གྱི་འགྲམ་གྱི་དགེ་སློང་རྣམས་ཀྱིས་སྐྱེ་བོ་མང་པོ་སྦྲན་ནས་དགེ་སློང་མང་པོ་དང་ལྷན་ཅིག་འདིར་མཆིས་ཏེ། གཞི་བ་དང༌། གློ་བུར་བ་རྣམས་ཕན་ཚུན་དགའ་བར་བྱེད་པའི་སྒྲ་ཆེན་པོ་དང༌། སྐྱེ་བོའི་ཚོགས་ཕལ་པོ་ཆེའི་སྒྲ་སྐད་ལགས་སོ། །སྟོན་པས། ཀུན་དགའ་བོ། སོང་ལ། དགེ་སློང་དེ་དག་ལ། ཁྱེད་འདི་ན་མ་གནས་པར་དེངས་ཤིག་ཅེས་སྐྲོད་ཅིག་ཅེས་ལན་གསུམ་གྱི་བར་དུ་བསྐྲད་དོ། །ཡང་སྟོན་པས་དེ་དག་གི་བསྔགས་པ་བརྗོད་པ་དང༌། ཀུན་དགའ་བོས་དེ་དག་ལ། འོང་བའི་རིགས་སོ་ཞེས་སྤྲིངས་པ་དང༌། ཅིའི་ཕྱིར་སྟོན་པ་བདག་ཅག་གི་བསྔགས་པ་བརྗོད་ཅིང༌། གཟིགས་པར་ཡང་བཞེད་ལ། འོན་ཀྱང་སོང་དགུ་ན་སྟོན་པས་བསྐྲད། གདོན་མི་ཟ་བར། སྐྱེ་བོ་མང་པོ་སྦྲན་པས་བསྐྲད་ཀྱིས། ད་ནི་བདག་ཅག་གིས་མ་སྦྲན་པ་ཁོ་ནར་འདོང་ངོ་ཞེས་དེ་དག་ཉི་ཚེ་སོང་བ་དང༌། སྟོན་པའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །དེ་ནས་སྟོན་པས་ཀུན་དགའ་བོ་ལ། གཙུག་ལག་ཁང་གཅིག་ཏུ་དེ་བཞིན་གཤེགས་པ་དང༌། ཆུ་བོ་སྙན་ལྡན་གྱི་འགྲམ་གྱི་དགེ་སློང་དག་གི་ཁྲི་ཤོམས་ཤིག །ཀུན་དགའ་བོས་དེ་བཞིན་དུ་བཤམས་ནས་གསོལ་བ་དང༌། དེ་ནས་སྟོན་པས་གཙུག་ལག་ཁང་དེར་གཤེགས་ནས་ཕྱི་རོལ་ཏུ་ཞབས་བཀྲུས་ཏེ་ཁྲི་བཤམས་པ་ལ་བཞུགས་(༦༨བ)སོ། །དགེ་སློང་དེ་རྣམས་ཀྱིས་ཀྱང་དེ་བཞིན་དུ་བྱས་སོ། །དེ་ནས་སྟོན་པས་བསམ་གཏན་དང་པོ་ནས་སྲིད་རྩེའི་བར་དུ་སྙོམས་པར་ཞུགས་པ་དང༌། དགེ་སློང་དག་གིས་ཀྱང་དེ་བཞིན་དུ་ཞུགས་སོ། །ཡང་སྟོན་པས་སྲིད་རྩེ་ནས་བསམ་གཏན་དང་པོའི་བར་ལ་སྙོམས་པར་ཞུགས་པ་དང༌། དགེ་སློང་དེ་དག་གིས་ཀྱང་དེ་བཞིན་དུ་ཞུགས་སོ། །དེ་ནས་སྟོན་པས་ཉན་རང་ཐམས་ཅད་རྡུགས་པའི་བསམ་གཏན་དང་པོ་རྫོགས་པར་བྱས་ཏེ་བཞུགས་སོ། །དེ་དག་ཀྱང་རང་རང་གི་གནས་པས་གནས་སོ། །
དེ་ནས་སྟོན་པ་ནངས་པར་སྔ་བར་ཏིང་ངེ་འཛིན་དེ་ལས་བཞེངས་ཏེ། དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཀུན་དགའ་བོས་སྟོན་པ་ལ་གསོལ་བ། སྟོན་པ་ཡང་དང་ཡང་དུ་ཆུ་བོ་སྙན་ལྡན་གྱི་འགྲམ་གྱི་དགེ་སློང་དག་གི་བསྔགས་པ་བརྗོད་ཅིང་གཟིགས་པར་ཡང་བཞེད་ལ། འོན་ཀྱང་དེ་དག་ལ་སྟོན་པས་ཡང་དག་པར་དགའ་བར་ནི་མ་མཛད་དོ། །བཀའ་སྩལ་པ། དེ་རྣམས་ལ་འཕགས་པའི་ཡང་དག་པར་དགའ་བས་ཡང་དག་པར་དགའ་བར་བྱས་སོ། །དེ་ཉེ་འཁོར་ན་འཁོད་པའི་བྲམ་ཟེ་དང་ཁྱིམ་བདག་རྣམས་ཀྱིས་ཐོས་ནས་དེ་རྣམས་བལྟ་བའི་ཕྱིར་འོངས་པ་དང༌། དགེ་སློང་དེ་དག་ཉེ་བར་འོངས་པ་རྣམས་ལ་ཆོས་བསྟན་ནོ་སྙམ་པ་ན། ཁ་ནས་དྲི་མི་ཞིམ་པ་བྱུང་ནས། འཕགས་པ། དྲི་མི་ཞིམ་པ་འདི་སུ་ལས་བྱུང༌། ཁོ་བོ་ཅག་གི་ཁ་ནས་བྱུང་ངོ༌། །འཕགས་པ་དག །སོ་ཤིང་མི་འདོར་རམ། མི་འདོར་རོ། །ཅིའི་ཕྱིར། མ་གནང་ངོ༌། །ཅི་ཁྱེད་སོ་ཤིང་མ་ཟོས་པས་དག་པར་འགྱུར་རམ། དེ་དག་ཅང་མི་ཟེར་བའི་སྐབས་དེ་གསོལ་བ་དང༌། གནང་གིས་སོ་ཤིང་དོར་བར་བྱའོ། །དེ་ཅིའི་ཕྱིར་ཞེ་ན། སོ་ཤིང་ལ་ཡོན་ཏན་ལྔ་སྟེ། མཁྲིས་པ་འདྲེན་པར་བྱེད། བད་ཀན་འདྲེན། རླུང་འདྲེན། ཁའི་དྲི་མི་ཞིམ་པ་སེལ། ཡི་ག་འབྱེད་ཅིང༌། སོ་ཤིང་ནི་མིག་ལ་ཕན་པ་ཡིན་ནོ། །སོ་ཤིང་དོར་བར་བྱའོ་ཞེས་གསུངས་པ་དང༌། གཞོན་ནུ་དག་གིས་མི་དབེན་པར་འདུག་སྟེ་སོ་ཤིང་ཐུང་ངུ་ཞིག་འདོར་བར་བརྩམས་པ་ན་སྟོན་པའང་ཕྱོགས་དེར་གཤེགས་སོ། །དེས་སྟོན་པ་མཐོང་བས་སྤ་བཀོང་ནས་དེ་འདི་སྙམ་དུ། བདག་གིས་སྟོན་པའི་སྤྱན་སྔར་ཁ་གདངས་ཏེ་སོ་ཤིང་བཟའ་བ་ནི་ཆ་མ་ཡིན་ནོ་སྙམ་ནས་དེས་མིད་པ་དང་མགྲིན་པར་ཐོགས་སོ། །སྟོན་པ་ནི་བསྙེལ་བ་མི་མངའ་བའི་ཆོས་ཅན་ཡིན་ཏེ། དེ་ནས་སྟོན་པས་ཕྱག་གཡོན་པ་འཁོར་ལོ་དང་བཀྲ་ཤིས་དང་གཡུང་དྲུང་ཅན། བསོད་ནམས་བརྒྱ་ཕྲག་དུ་མ་ལས་སྐྱེས་པ། འཇིགས་པ་རྣམས་ལ་དབུགས་འབྱིན་པར་མཛད་པས་མགོ་ནས་མནན་ཏེ། ཕྱག་གཡས་པའི་མཛུབ་མོ་བཀུག་པས་ཁྲག་དང་བཅས་དེ་ཁ་ནས་ཕྱུང་སྟེ། འདི་ཅི་ཡིན། སོ་ཤིང་ངོ༌། །ཉེས་དམིགས་དེ་ནི་མི་དབེན་པར་སོ་ཤིང་ཟ་བ་ལས་གྱུར་པ་ཡིན་(༦༩ན)པས་སོ་ཤིང་དབེན་པར་དོར་རོ། །ཐུང་ངུར་ཡང་མི་བྱའོ། །གསུམ་ནི་དབེན་པར་བྱ་སྟེ། བཤང་བ་དང༌། གཅི་བ་དང༌། སོ་ཤིང་བཟའ་བའོ། །ལོངས་སྤྱད་དུ་རུང་བའི་ཤིང་ངམ། རྩིག་པའི་དྲུང་དུ་མི་དོར་རོ། །སོ་ཤིང་ཐུང་ངུ་བཟའ་བར་མི་བྱའོ་ཞེས་གསུངས་པ་དང༌། དྲུག་སྡེ་རྣམས་ལྕུག་མ་རིང་པོ་དག་ཟ་བ་དགེ་སློང་དག་གིས་མཐོང་ནས། ཅི་ལྷག་ཆད་དུ་བྱེད་དམ། འདི་ལ་ལྷག་ཆད་ཅི་ཡོད། ཁྱེད་ཀྱིས་སོ་ཤིང་ཐུང་ངུ་ཟོས་ཏེ། དེ་ཤི་བ་ལས་སྟོན་པས་བསྐྱབས་པ་མ་མཐོང་ངམ། ཅི་ཁྱེད་ཅག་ངེད་ཀྱི་ལྷུང་བཟེད་དང་ཆོས་གོས་འདོད་དམ། འདི་ལ་ཕན་ཡོན་གཞན་ཡང་ཡོད་དེ། རྫ་མའི་འོག་ཏུ་བུད་པ་དང༌། དགེ་སྦྱོང་བརྡབ་པའོ། །སྐབས་དེ་གསོལ་བ་དང༌། སོ་ཤིང་རིང་པོ་བཟའ་བར་མི་བྱའོ། །ཚད་ཇི་ཙམ་བཟའ་བ་མ་ཤེས་ནས། སོ་ཤིང་གསུམ་སྟེ། རིང་པོ་དང༌། འབྲིང་དང༌། ཐུང་ངུའོ། །དེའི་ཚད་ནི། རིང་པོ་ནི་སོར་བཅུ་གཉིས་སོ། །ཐུང་ངུ་ནི་སོར་བརྒྱད་དོ། །དེའི་བར་ནི་འབྲིང་བོའོ། །ནད་པ་དང་རྒན་པོ་དག་གིས་གནས་དབེན་པར་འགྲོ་མ་ནུས་ནས། གནས་ཁང་དུ་ཆོལ་ཟངས་ཀྱི་ནང་དུ་སོ་ཤིང་དོར་བ་ལ་མི་རིགས་པ་མེད་དོ། །
ཁ་ཅིག་གིས་ཆོལ་ཟངས་མ་རྙེད་ནས་སོ་ཤིང་དོར་བ་དེ་ལ་ཝ་ཁའང་མི་དབེན་པར་མི་འགྱུར་རོ། །ཝ་ཁ་ནས་ཧ་ཅང་ཐག་རིང་བ་ན་ཟ་བར་བྱེད་ནས། ཝ་ཁ་དེར་ཁྲུ་གང་ཁོ་ར་ཁོར་ཡུག་ཏུ་སོ་ཤིང་དོར་བ་རྣམ་པ་དེ་ལྟ་བུ་བྱར་རུང་བ་ཉིད་དོ། །སོ་ཤིང་ཟ་ཞིང་ལྕེ་མ་བཞར་བས་ཉེས་དམིགས་དེ་ཉིད་དུ་གྱུར་པ་དང༌། སོ་ཤིང་ཟོས་པ་དེའི་རྗེས་ལ་ལྕེ་བཞར་བར་བྱའོ། །གང་གིས་ལྕེ་བཞར་བ་མི་ཤེས་ནས། ལྕེ་བཞར་ཉེ་བར་གཞག་པར་བྱའོ། །དྲུག་སྡེ་རྣམས་ཀྱིས་གསེར་དངུལ་ལས་བྱས་པའི་ལྕེ་བཞར་བཅངས་པ་ཁྱིམ་བདག་དག་གིས་མཐོང་ནས། འདི་ཅི་ཡིན། སྟོན་པས་ལྕེ་བཞར་གནང་ངོ༌། །ཅི་ཁྱེད་འདོད་པའི་ཡོན་ཏན་གྱིས་གཟིར་ཏམ། དེ་དག་ཅང་མི་ཟེར་བའི་སྐབས་དེ་གསོལ་བ་དང༌། ལྕེ་བཞར་བཞི་བཅང་བར་བྱ་སྟེ། ཁབ་ཀྱི་རྫས་ར་གན་དང༌། ཟངས་དང༌། ལྕགས་དང༌། འཁར་བ་དག་ལས་བྱས་པའོ། །ཁ་ཅིག་གིས་མ་འབྱོར་ནས། དོན་འདི་ལ་སོ་ཤིང་གི་ཚལ་བ་དག་རུང་ངོ༌། །སོ་ཤིང་གི་ཚལ་བ་རྣོན་པོས་ལྕེ་བཞར་བར་བསྣད་ནས། དེ་མི་རྣོ་བར་བྱ་བའི་ཕྱིར་གཅིག་གིས་གཅིག་དྲུད་པར་བྱའོ། །མི་རྣོ་བས་སོ་དང་ལྕེ་དང་རྣ་བ་དྲུང་བཞར་བྱའོ། །དལ་གྱིས་མ་ཡིན་པར་མི་བྱའོ། །དེ་དག་གི་ཤ་ལ་མི་གནོད་པར་རོ། །སྟོན་པ་མཉན་ཡོད་ནའོ། །དེའི་ཚེ་ནགས་ན་སྦྲུལ་གདུག་པ་ཞིག་འདུག་པ་ནགས་དེར་བ་ལང་རྫིས་མེ་བཏང་བ་དང་སྦྲུལ་དེ་བསྲེགས་ནས་མ་ཤི་ཙམ་དུ་མེས་བསྲེགས་པ་ལས་མཆོངས་ཏེ། ཤིང་ཞིག་གི་དྲུང་(༦༩བ)དུ་བསྐྱིལ་ནས་འདུག་གོ །ཤཱ་རིའི་བུས་ཕྱོགས་དེར་སོང་བ་ན་དེ་མེས་ཚིག་སྟེ། སྡུག་བསྔལ་གྱི་ཚོར་བས་ཉམས་ཐག་པ་མཐོང་ནས། དེའི་རྒྱུད་ལ་དགེ་རྩ་ཅུང་ཟད་ཡོད་ཅིང་དེ་ཡང་བདག་ལ་རག་ལས་པར་མཐོང་སྟེ། ཆུ་བསིལ་བ་གཏོར་ནས། འདུས་བྱས་ཐམས་ཅད་མི་རྟག །ཆོས་ཐམས་ཅད་བདག་མེད། མྱ་ངན་ལས་འདས་པ་ཞི་བ་སྟེ། དེ་ལ་སེམས་རབ་ཏུ་དང་བར་གྱིས་ཤིག་དང་དུད་འགྲོའི་འདོད་ཆགས་དང་བྲལ་ནས་བདེ་འགྲོར་སྐྱེ་བར་འགྱུར་རོ་ཞེས་སྨྲས་ཏེ་སོང་བ་དང༌། དེ་མ་ཐག་ཏུ་ཁྭས་ཁྱེར་རོ། །ཤཱ་རིའི་བུས་བརྟགས་པས། སྦྲུལ་དེ་བྲམ་ཟེ་ལས་དྲུག་དང་ལྡན་པ་ཞིག་གི་ཁྱིམ་དུ་སྐྱེ་བར་མཐོང་ནས། དེའི་ཁྱིམ་དུ་སོང་སྟེ་བྲམ་ཟེ་ཆུང་མ་དང་བཅས་པ་སྐྱབས་འགྲོ་དང་བསླབ་པའི་གཞི་ལ་བཀོད་དོ། །
རེ་ཞིག་ན་གཅིག་པུ་དེའི་ཁྱིམ་དུ་སོང་བ་དང༌། འཕགས་པ། ཕྱི་བཞིན་འབྲང་བའི་དགེ་སྦྱོང་མ་མཆིས་སམ། བདག་གི་ཕྱི་བཞིན་འབྲང་བའི་དགེ་སྦྱོང་རྩྭ་ཀུ་ཤའམ་ཀ་ཤ་ལྟ་བུ་གཞན་ལས་སྐྱེ་བར་མི་འགྱུར་གྱི། ཁྱེད་ལྟ་བུ་ལས་ཐོབ་པ་དེ་བདག་གི་ཕྱི་བཞིན་འབྲང་བའི་དགེ་སྦྱོང་དུ་འགྱུར་རོ། །འཕགས་པ། བདག་གི་མཆིས་འབྲང་ལ་ཁྱེའུ་ཞིག་བཙས་ན་དེ་ཁྱེད་ཀྱི་ཕྱི་བཞིན་འབྲང་བའི་དགེ་སྦྱོང་དུ་དབུལ་ལོ། །ནད་མེད་པར་གྱུར་ཅིག་བླང་ངོ་ཞེས་སྨྲས་ནས་སོང་ངོ༌། །བྲམ་ཟེ་མོ་དེ་ལ་ཟླ་བ་དགུ་འདས་ཏེ་ཁྱེའུ་ཞིག་བཙས་ནས་ཉི་མ་ཉི་ཤུ་རྩ་གཅིག་ཏུ་བཙས་སྟོན་བྱས་ཏེ། རིགས་དང་མཐུན་པའི་མིང་བཏགས། དེ་འོ་མ་ལ་སོགས་པས་བསྐྱེད་དོ། །དེ་མའི་ནུ་མ་འཐུང་བ་ན་བག་མེད་པས་སོའམ་སེན་མོས་རེག་ན་སྐྲང་ངོ༌། །དེ་ཆེན་པོར་གྱུར་ནས་ཁྱེའུ་དང་བུ་མོ་རྣམས་དང་ལྷན་ཅིག་རྩེ་བའི་ཚེ་ཁྲོས་ནས་སོའམ་སེན་མོས་རེག་ན་སྐྲང་ངོ༌། །རེ་ཞིག་ན་ཤཱ་རིའི་བུས་དེ་རབ་ཏུ་འབྱུང་བའི་དུས་ཤེས་ནས་ཁྱིམ་དེར་སོང་སྟེ། བྲམ་ཟེ་མོ་དེ་ལ་ཆོས་བཤད་ནས། ཁྱེའུ་འདི་བདག་གི་ཕྱི་བཞིན་འབྲང་བའི་དགེ་སྦྱོང་ཡིན་ནོ་ཞེས་མཚན་མ་ཞིག་བསྟན་པ་དང༌། བྲམ་ཟེ་དེས། བུ། ཁྱོད་མ་སྐྱེས་པ་ནས་འཕགས་པ་ལ་ཕུལ་གྱིས་སོང་ཞིག །སྲིད་པ་ཐ་མ་པའི་སེམས་ཅན་དེ་ཤཱ་རིའི་བུའི་གདོང་དུ་རིང་ཞིག་བརྟགས་ནས་དེའི་ཕྱི་བཞིན་དུ་འབྲངས་པ་དང༌། དེ་རབ་ཏུ་བྱུང་ཞིང་བསྙེན་པར་རྫོགས་པར་བྱས་སོ། །དེས་སོ་ཤིང་ཟོས་ལྕེ་བཞར་ནས་མ་བཀྲུས་པར་དོར་བ་དང༌། དེ་ལ་སྦྲང་མ་ཞིག་གིས་ཟོས་ནས་ཤི། དེ་ལ་སྲོག་ཆགས་ཁྱིམ་སྦྱོང་གི་ཟོས་པས་ཤི། དེ་བྱ་སྣ་ཚོགས་ཀྱིས་ཟོས་པས་ཤི། དེ་ལ་བྱི་ལས་ཟོས་པས་ཤི། དེ་ལ་སྦྲང་བུ་དང་གྲོག་མ་དག་གིས་ཟོས་པས་ཐམས་ཅད་ཀྱང་ཤི་ནས་སྲོག་ཆགས་མང་པོ་ཤི་བའི་རོ་དངར་ཞིང་འདུག་པ་དང༌། ཕྱི་དེ་ཉིན་ཕྱོགས་དེར་དགེ་སློང་རྣམས་སོ་ཤིང་བཟའ་བར་འདོད་པ་དང་དེ་དག་མཐོང་ནས། ཅི་ཡིན། (༧༠ན)མི་ཤེས་སོ། །
གཞོན་ནུ་ཞིག་གིས་ཇི་ལྟར་གྱུར་པར་ཤེས་ནས་སྨྲས་པས། དེ་གསོལ་བ་དང༌། སོ་ཤིང་མ་བཀྲུས་པར་མི་དོར་རོ། །ལ་ལ་ཆུ་ཉུང་ནས་ཇི་ལྟར་བྱ་བ་མ་ཤེས་པ་དང༌། སོ་དང་ལྕེ་གཉིས་ཀྱི་དྲུད་བཞར་གྱི་ཕྱོགས་ཁའི་དྲི་མས་གོས་པ་མ་བཀྲུས་སམ་སས་མ་བསྐུས་པར་མི་དོར་རོ། །སོ་ཤིང་ཟོས་ནས་སྒྲ་མ་བྱས་པར་བོར་བ་དང༌། གཙུག་ལག་ཁང་ན་གནས་པ་དག་གིས་མགོར་ཕོག་པས་འཕྱ་ནས། སྒྲ་མ་བྱས་པར་མི་དོར་རོ། །དེ་དག་སོ་ཤིང་འདོར་བ་ན་སྒྲ་འབྱིན་གྱི། བཤང་གཅི་སོགས་འདོར་བ་ན་སྒྲ་མ་བྱས་པས་ཉེས་དམིགས་དེ་ཉིད་དུ་གྱུར་ནས། དེ་ནི་དཔེ་ཡིན་ནོ། །བཤང་བ་དང༌། གཅི་བ་དང༌། མཆིལ་མ་དང༌། སྣབས་དང༌། སྐྱུགས་པ་དང༌། རླུགས་པ་དང༌། གཞན་དག་ཀྱང་ངོ༌། །སོ་ཤིང་བཟའ་བར་གསུངས་པ་དང༌། ལམ་དུ་ཞུགས་པ་ཁ་ཅིག་གིས་སོ་ཤིང་མ་རྙེད་པར་ཟན་གཅོད་པར་བྱེད་པ་དང༌། ཟན་གཅད་པར་མི་བྱ་ཡི། སོ་ཤིང་དེ་ལས་བྱི་དོར་འབྱུང་བ་ཞིན་དུ་འདག་རྫས་དང་ལྕི་བ་ལས་ཀྱང་ཁ་རུང་བར་བྱས་ལ་ལན་གསུམ་བཤལ་ནས་བཟའ་བར་བྱའོ། །
སྟོན་པ་མཉན་ཡོད་ནའོ། །ཚེ་དང་ལྡན་པ་ངག་ལྡན་དགོངས་ཀ་ནང་དུ་ཡང་དག་འཇོག་ལས་ལངས་ནས་སྟོན་པའི་ཞབས་ལ་ཕྱག་འཚལ་ཏེ་འདུག་ནས་གསོལ་བ། བཙུན་པ། དགེ་སློང་ལྷན་ཅིག་གནས་པ་དང་ཉེ་གནས་རྣམས་མཁན་སློབ་ལ་ཇི་ལྟར་བསྒྲུབ་པར་བགྱི། ངག་ལྡན། ངས་ལྷན་ཅིག་གནས་པ་དང༌། ཉེ་གནས་རྣམས་ཀྱི་གནས་རྣམས་ཀྱི་ཀུན་ཏུ་སྤྱོད་པའི་ཆོས་བཅའ་བར་བྱའོ། །ལྷན་ཅིག་གནས་པ་དང་། ཉེ་གནས་རྣམས་ཀྱིས་ནངས་པར་སྔར་ལངས་ཏེ་བསྙུན་གསོལ་བ་ནས། ལྷམ་གཉིས་འཕྱི་བའི་བར་གོ་རིམ་ཅི་རིགས་པར་བསྟན་ལ། ལུང་མ་མོ་ལས་ཀྱང་གསུངས་སོ། །མཁན་སློབ་འཆགས་པའི་ཚེ་ཕྱག་བདར་བྱེད་པ་ན་སློབ་མ་ལག་པ་བརྐྱངས་ནས་འཁོད་པ་དེ་གསོལ་བ་དང༌། མཁར་ལན་སྒྲུབ་པར་བྱེད་པ་ཉིད་དུ་མ་བསྐོས་པར་ཕྱགས་མ་ཐོགས་པ་མཐོང་ན་མཁན་སློབ་ལས་ཆུང་བར་བྱའོ། །མཁན་སློབ་གོས་འཚེམ་པ་ན་སློབ་མ་སྙིང་ལས་ཆུང་བར་འདུག་པ་དེ་གསོལ་བ་དང༌། མཁན་སློབ་གོས་འཚེམ་པ་ཉིད་དུ་མ་བསྐོས་པར་ཁབ་ཐོགས་པའང་ངོ༌། །
དགེ་ཚུལ་གྱི་བྱ་བ་ནི། རུང་བར་བྱ་བ་དང༌། སྔོ་ཆུང་ངུ་བརྔ་བ་དང༌། མེ་ཏོག་དང་འབྲས་བུ་འཐོག་པ་དང༌། སོ་ཤིང་ཉེ་བར་སྒྲུབ་པ་ལ་སོགས་པའང་དགེ་ཚུལ་བསྐོའང་ངོ༌། །སྒོ་གླེགས་ཀྱི་བྱ་བ་གང་ཞེ་ན། སྒོ་ལེབ་ཅེས་བྱ་བ་ནི་སྒོའི་འཕར་མ་སྟེ། སྒོ་གླེགས་ལ་བརྡབས་པས་ནང་ན་གནས་པ་ལ་གོ་བར་བྱའོ། །དེ་ནི་དལ་བུ་དང་ཡུན་མི་རིང་བར་བྱའོ་ཞེས་པ་ནས། སྒོ་སྐྱེས་ལ་མི་དྲུད་པར་བྱའོ། །དེ་དགེ་སློང་དག་གིས་རབ་ཏུ་བྱུང༌། བསྙེན་པར་རྫོགས་པར་བྱས་ན་སློབ་དཔོན་ལ་(༧༠བ)རིམ་གྲོ་མི་བྱེད་ནས། གསོལ་བ་དང༌། ཉེ་གནས་ཀྱིས་སློབ་དཔོན་དེ་ལ་བཀུར་སྟི་བྱའོ། །བཞར་བར་བྱའོ། །དེ་དང་ཞེ་འགྲས་པ་ལ་མི་བཞར་རོ་ཞེས་སོགས་ནས། རྗེས་སུ་མཐུན་པའི་འཚོ་བའི་ཡོ་བྱད་སྒྲུབ་པ་ལ་བརྩོན་པར་བྱའོ། །
སྟོན་པ་མཉན་ཡོད་ནའོ། །དེའི་ཚེ་ཁྱིམ་བདག་ཅིག་གིས་སངས་རྒྱས་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་པ་ལས་དགེ་སློང་གི་དགེ་འདུན་ལྷགས། སྟོན་པ་ནི་རྫས་ཀྱིས་བསྒྲུབས་པ་ན་བཞུགས་ནས་བསོད་སྙོམས་ཀྱི་སྐུ་སྐལ་བཞེས་སོ། །སྟོན་པ་རྒྱུ་ལྔས་རྫས་ཀྱིས་བསྒྲུབས་པ་ན་བཞུགས་ནས་བསོད་སྙོམས་ཀྱི་སྐུ་སྐལ་བཞེས་ཏེ། ནང་དུ་ཡང་དག་འཇོག་པ་དང༌། ལྷ་རྣམས་ལ་ཆོས་འཆད་པ་དང༌། གནས་མལ་གཟིགས་པ་དང༌། ནད་པ་ལ་གཟིགས་པ་དང༌། བསླབ་པ་བཅའ་བར་བཞེད་པ་སྟེ། སྐབས་འདིར་ནི་ནད་པ་ལ་གཟིགས་པ་དང༌། བསླབ་པ་འཆའ་བར་བཞེད་ནས། དགེ་སློང་གི་དགེ་འདུན་དོང་ནས་རིང་པོ་མ་ལོན་པར་ལྡེ་མིག་བསྣམས་ཏེ་གཙུག་ལག་ཁང་རྣམས་གཟིགས་པས། དེ་ན་དགེ་སློང་ནད་ཚབས་ཆེ་བ་ཤེས་པ་ཆུང་བ་གཅིན་དང་ངན་སྐྱུགས་ཀྱི་ནང་དུ་ནུབ་པ་ཞིག་གིས་སྟོན་པ་མཐོང་ནས། བཅོམ་ལྡན་འདས། བདག་ལ་མགོན་མ་མཆིས་ཞེས་སྐད་ངན་བཏོན་པ་དང༌། ང་ཁམས་གསུམ་གྱི་མགོན་པོའི་རྗེས་སུ་ཁྱོད་རབ་ཏུ་བྱུང་ན། ཅིའི་ཕྱིར། བཅོམ་ལྡན་འདས། བདག་ལ་མགོན་མ་མཆིས་སོ་ཞེས་ངུ་སྐད་འདོན། བདག་ལ་ཚངས་པ་མཚུངས་པར་སྤྱོད་པ་འགའ་ཡང་རིམ་གྲོ་བགྱིད་པའམ་ལྟ་བ་མཆིས་སོ། །ཁྱོད་ཀྱིས་ཚངས་པ་མཚུངས་པར་སྤྱོད་པ་འགའ་ལ་རིམ་གྲོ་དང་བལྟས་པ་ཡོད་དམ། མ་མཆིས་སོ། །དེས་ན་ཁྱོད་འདི་ལྟ་བུར་གྱུར་ཏོ། །སྟོན་པས། ཀྱེ་མ་ལྷའི་དབང་པོ་བརྒྱ་བྱིན་གྱིས་མཚོ་ཆེན་པོ་མ་དྲོས་པ་ནས་ཆུ་ཁྱེར་ཏེ་འོང་ཞིང༌། རི་སྤོས་ངད་ལྡང་བ་ལས་ས་ཁྱེར་ཏེ་འོང་བར་གྱུར་ཅིག་ཅེས་འཇིག་རྟེན་པའི་ཐུགས་བསྐྱེད་པ་ཙམ་གྱིས། བརྒྱ་བྱིན་གྱིས་མ་དྲོས་པ་ནས་ཡན་ལག་བརྒྱད་དང་ལྡན་པའི་ཆུས་གསེར་གྱི་རིལ་བ་བཀང༌། རི་སྤོས་ངད་ལྡང་ལས་ས་བླངས་ནས་མྱུར་བར་སྟོན་པའི་སྤྱན་སྔར་འོངས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བཞུགས་ཤིག །དེའི་རིམ་གྲོ་བདག་གིས་བགྱིའོ། །ཀོའུ་ཤི་ཀ་འདི་ཁྱོད་ཀྱི་ཕྱིར་རབ་ཏུ་བྱུང་བ་མ་ཡིན་གྱི། ངའི་ཕྱིར་ཡིན་ནོ། །
གཞན་ཡང༌། ཁྱོད་ཀྱིས་འདི་སྔོན་མ་མཐོང་ལ། ལྷ་རྣམས་ནི་གཙང་སྦྲ་ལ་དགའ་བ་ཡིན་པས་འདུག་ཅིག །ངས་འདིའི་རིམ་གྲོ་བྱའོ། །དེ་ནས་སྟོན་པས་ན་བཟའ་ཆོས་གོས་བརྫེས་ནས། ཕྱག་བསོད་ནམས་བརྒྱ་ཕྲག་དུ་མ་བསྒྲུབས་པ་སྐྲག་པ་རྣམས་དབུགས་འབྱིན་པར་མཛད་པས་དགེ་སློང་དེ་བཟུང་སྟེ། གཅིན་དང་ངན་སྐྱུགས་དང་ལས་ཕྱུང་ནས་མཐའ་ཞིག་ཏུ་བཞག །སྙུ་གུའི་ཚལ་བས་བཞར། (༧༡ན)ས་དཀར་པོས་དྲིལ་ཕྱིས་ཏེ་བཀྲུས་སོ། །དེ་ནས་དཀྱིལ་མོ་ཀྲུང་འཆར་བཅུག་སྟེ། དེའི་ཆོས་གོས་རྣམས་བཀྲུས། ཕྱོགས་དེའང་བའི་ལྕི་བ་འཇམ་པོའི་བྱུག་པ་མཛད་དོ། །དེ་ནས་ཕྱག་དང་ཞབས་བསིལ་ཏེ་བརྒྱ་བྱིན་ལ་ནད་པ་ལ་རིམ་གྲོ་བྱ་བའི་ཆོས་བསྟན་ནས། གཙུག་ལག་ཁང་དུ་ཞུགས་སོ། །ཀུན་དགའ་བོས་བསོད་སྙོམས་ཀྱི་སྐུ་སྐལ་ཁྱེར་ཏེ་སྤྱན་སྔར་སོང་བ་དང་། ཅི་དགེ་སློང་གི་དགེ་འདུན་ཁ་ཟས་བསོད་པས་ལེགས་པར་ཚིམ་པར་བྱས་སམ། བཙུན་པ། དེ་བཞིན་དུ་དགེ་སློང་གི་དགེ་འདུན་ཞལ་ཟས་བསོད་པས་ལེགས་པར་ཚིམ་པར་བགྱིས་ལགས་སོ། །དེ་ནས་སྟོན་པས་བསོད་སྙོམས་ཀྱི་ཕྱེད་བཞེས་ཏེ། ཀུན་དགའ་བོ། སོང་ལ་གཙུག་ལག་ཁང་ཆེ་གེ་མོ་ན་དགེ་སློང་ནད་ཚབས་ཆེ་བ་ཞིག་ཡོད་པ་དེ་ལ་བསོད་སྙོམས་ཕྱེད་པོ་འདི་ཁྱེར་ལ་འདི་སྐད་ཅེས། ཁྱོད་ཀྱི་རིམ་གྲོ་སྟོན་པ་ཉིད་ཀྱིས་མཛད་དེ། བསོད་སྙོམས་ཕྱེད་ཀྱི་སྒོ་བཤའ་ཡང་མཛད་དོ་ཞེས་གྱིས་ཤིག །བཙུན་པ། བཀའ་བཞིན་དུ་འཚལ་ཞེས་དེ་ལ་བསོད་སྙོམས་བྱིན་ནས་དེ་སྐད་ཅེས་སྨྲས་སོ། །དེ་ནས་དགེ་སློང་དེ་འདི་སྙམ་དུ་བདག་ནི་ཁམས་གསུམ་གྱི་བླ་མ་ཉིད་ཀྱིས་རིམ་གྲོ་མཛད་དེ་བསོད་སྙོམས་ཕྱེད་ཀྱང་གནང་གིས། བདག་དད་པས་བྱིན་པ་ལོངས་སྤྱད་ནས་ལེ་ལོས་དུས་འདའ་བ་མི་རིགས་པས། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པར་བྱས་པས་དགྲ་བཅོམ་པ་ཐོབ་བོ། །སྟོན་པས། དགེ་སློང་དག །ནད་པ་འདི་དག་ལ་ཚངས་པ་མཚུངས་པར་སྤྱོད་པ་ཁྱེད་ཅག་ཁོ་ན་མ་གཏོགས་པ་ཕ་མེད། མ་མེད། རྩ་ལག་མེད་པས་ཚངས་པ་མཚུངས་པར་སྤྱོད་པ་རྣམས་ཀྱིས་ཕན་ཚུན་དུ་རིམ་གྲོ་བྱ་སྟེ། ལྷན་ཅིག་གནས་པ་དང༌། ཉེ་གནས་དང༌། མཁན་པོ་དང༌། སློབ་དཔོན་དང༌། མཁན་པོ་གཅིག་པ་དང༌། སློབ་དཔོན་གཅིག་པ་དང༌། གཏམ་འདྲེས་པ་དང༌། ཕེབས་པར་སྨྲ་བ་དང༌། སྨོན་འདྲིན་དང༌། འགྲོགས་བཤེས་ཀྱིས་ནད་གཡོག་བྱའོ། །འཁོར་དང་བྲལ་བ་ཤེས་པ་ཆུང་བ་ནི་དགེ་འདུན་གྱིས་ནད་ལ་བརྟགས་ནས་རིམ་གྲོ་བ་གཅིག་གམ། གཉིས་སམ། མང་པོ་སྦྱིན་ཏེ། མཐར་ན་དགེ་འདུན་ཀུན་གྱིས་ཀྱང་རིམ་གྲོ་བྱའོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། སྟོན་པ་ཉིད་ཀྱིས་དགེ་སློང་དེའི་རིམ་གྲོ་མཛད་ནས་དེས་དགྲ་བཅོམ་པ་ཐོབ་པ་ལ་གཟིགས། ད་ལྟ་འབའ་ཞིག་ཏུ་མ་ཟད་དེ། འདས་པའི་དུས་ནའང་ངས་འདིའི་རིམ་གྲོ་བྱས་ནས། དེ་མངོན་ཤེས་ལྔ་ཐོབ་པ་དེ་ཉོན་ཅིག །སྔོན་བསྟི་གནས་ཤིག་ན་དྲང་སྲོང་མངོན་ཤེས་ལྔ་དང་ལྡན་པ་ཞིག་གནས་པ་དེས་སློབ་མའི་རིམ་གྲོ་བྱས་ནས་སོས་པ་དང༌། དེས་མངོན་ཤེས་ལྔ་མངོན་དུ་བྱས་སོ། །དེའི་དུས་ཀྱི་དྲང་སྲོང་དེ་ནི་ང་ཡིན་ནོ། །སློབ་མ་དེ་ནི་དགེ་སློང་འདི་ཡིན་ཏེ། དེའི་ཚེའང་(༧༡བ)ངས་རིམ་གྲོ་བྱས། ད་ལྟར་ཡང་རིམ་གྲོ་བྱས་སོ། །
ཡང་ཞུས་པ། བཙུན་པ་བཅོམ་ལྡན་འདས་ལྷག་པར་ཡང་ནད་པ་རྣམས་ལ་བྱམས་པ་ལ་གཟིགས། ད་ལྟར་འབའ་ཞིག་ཏུ་མ་ཟད་ཀྱི། འདས་པའི་དུས་ནའང་ང་ལྷག་པར་ནད་པ་རྣམས་ལ་བྱམས་པ་དེ་ཉོན་ཅིག །སྔོན་ཤི་བིའི་དབྱངས་ཀྱི་ཕོ་བྲང་ན་རྒྱལ་པོ་ཤི་བི་ཞེས་བྱ་བ། སློང་བ་རྣམས་ལ་མི་གཏོང་བ་ཅུང་ཟད་ཀྱང་མེད་དེ། ནད་པ་ལ་ཁྱད་པར་དུ་བྱེད་དོ། །རེ་ཞིག་ན་ཁྱིམ་བདག་ནད་པ། སྨན་པ་ཐམས་ཅད་ཀྱིས་སྤངས་པ་ཞིག་རྒྱལ་པོའི་དྲུང་དུ་སོང་ནས། ལྷ། བདག་ལ་དཔྱད་མཛོད་ཅིག །དེས་སྨན་པ་རྣམས་བོས་ནས། དཔྱད་བྱོས་ཤིག །ལྷ། འདིའི་སྨན་ནི་དཀོན་ལགས་སོ། །དེ་ཅི་འདྲ་ཡིན། ལྷ། བཙས་ཚུན་ཆད་སུ་ལའང་ཁྲོ་མ་མྱོང་བའི་ཁྲག་ལས་ནས་ཐུག་བགྱིས་ཏེ་ཟླ་བ་དྲུག་ཏུ་སྩལ་ན་གསོས་སོ། །རྒྱལ་པོས་སྨྲས་པ། དེའི་སྨན་དཀོན་པ་བདེན་ནོ། །དེ་ནས་རང་གི་སྤྱོད་པ་ལ་བརྟགས་པ་ན་བརྟག་དཀའ་ནས། མ་མ་ལ་དྲིས་པ། ངས་སྔོན་འགའ་ལ་ཡང་ཁྲོས་པ་ཡོད་དམ། ཁྱོད་བདག་གི་པང་དུ་བྱོན་པ་དེ་ནས་བདག་ཀྱང་སུ་ལའང་ཁྲོ་མ་མྱོང་ན་ཁྱོད་ལྟ་ཅི་སྨོས། མའི་དྲུང་དུ་སོང་ནས་དྲིས་པ། ཡུམ། བདག་སུ་ལའང་ཁྲོ་བ་མ་མཆིས་སམ། ཁྱོད་བདག་གི་རུམ་དུ་ཞུགས་ནས་བདག་གིས་ཀྱང་ཁྲོ་མ་མྱོང་ན། ཁྱོད་ལྟ་ཅི་སྨོས། དེས་བསམས་པ། སྨན་རྙེད་དོ་སྙམ་ནས། སྨན་པ་ལ། ང་སྔོན་སུ་ལའང་ཁྲོ་མ་མྱོང་བས་ངའི་ཡན་ལག་ལྔའི་རྩ་གཏོར་ཞིག །ལྷ། བདག་ཅག་ནི་མི་ཕལ་པའི་དོན་དུ། ལྷའི་སྐུ་ལ་མཚོན་མི་འདེབས་སོ། །བྱང་ཆུབ་སེམས་དཔའ་བཟོ་དང་ལས་ཀྱི་གནས་ལ་མཁས་པ་ཡིན་པས་རང་ཉིད་ཀྱིས་རྩ་གཏར་ཏེ། ཁྲག་དེས་ཟླ་བ་རེ་རེ་ཞིང་ནས་ཐུགས་བླུད་པས་སོས་སོ། །དེའི་དུས་ཀྱི་རྒྱལ་པོ་དེ་ནི་ང་ཡིན་ནོ། །
ཡང་ཤི་བའི་རྒྱལ་པོའི་བུ་གཞོགས་ཕྱེད་བསྐམས་ནས། སྨན་པ་རྣམས་ལ། གཞོན་ནུའི་དཔྱད་གྱིས་ཤིག །ལྷ། བཅུད་ཐམས་ཅད་མར་དང་སྒྲོལ་ཅིག །ལོ་གཅིག་གཉིས་སུ་བཅུད་ཐམས་ཅད་བསགས་ཀྱང་ཤང་ཤང་ཏེའུའི་ཤ་མ་རྙེད་དོ། །སྨན་པས་བྱ་བ་ལ་བསྒོ་བ། མེ་ལོང་དང་བྱ་གག་ཁྱེར་ཏེ་རྒྱ་མཚོའི་འགྲམ་དུ་སོང་ལ་དེར་སྙི་ཚུགས་ཏེ་བྱ་གག་གི་མདུན་དུ་མེ་ལོང་ཞོག་དང༌། བྱ་གག་རང་གི་གཟུགས་བརྙན་མཐོང་ནས་འདི་བྱ་གག་ཡིན་སྙམ་སྟེ་སྐད་ཕྱུང་བ་དང༌། ཤང་ཤང་ཏེའུས་བྱ་གག་གི་སྐད་ཐོས་ནས་ངོ་མཚར་ཏེ་དེར་འོང་ངོ༌། །དེ་འཛིན་པའི་ཐབས་འདི་ཡིན་ནོ། །དེ་བཞིན་དུ་བྱས་པས་ལས་ཀྱི་ཞགས་པས་ཟིན་པའི་ཤང་ཤང་ཏེའུ་ཐོགས་པ་དེ་ཁྱེར་ཏེ་འོངས་སོ། །འཇིག་རྟེན་ཆགས་ནས་རིང་པོ་མ་ལོན་པ་ན་དུད་འགྲོ་རྣམས་ཀྱིས་སྨྲ་ཤེས་པས། ཤང་ཤང་ཏེའུས། བདག་གར་འཁྲིད། ཇི་ལྟར་གྱུར་པ་སྨྲས་པ་དང༌། བདག་ཐོང་ཞིག །ཤའི་མཐུ་ཡོད་(༧༢ན)པའི་སྨན་དང་རིན་པོ་ཆེ་རྣམས་སྨྲའོ། །ཁྱོད་ཀྱི་སྨན་པ་བལྟ་ཡི་སྟོན་ཅིག །དེས་སྨྲས་པ། བདག་གིས་ཁྲུས་བྱས་པའི་ཆུ་ནི་ཤའི་མཐུ་ཡོད་པ་ཡིན་པས་དེ་ཁྱེར་ལ་སོང་ཞིག །རིན་པོ་ཆེ་འདི་དག་ཡིན་ནོ། །དེ་དག་རྒྱལ་པོས་འཇིགས་ནས་རིན་པོ་ཆེ་རྣམས་བོར་ཏེ་ཤང་ཤང་ཏེའུ་ཁྱེར་ནས་རྒྱལ་པོ་ལ་ཕུལ་ཏེ། དེས་བསྟན་པའི་སྨན་ཡང་སྨྲས་སོ། །རྒྱལ་པོས་ཤང་ཤང་ཏེའུ་ལ་དྲིས་པ་དང༌། ལྷ། བདག་བཀྲུས་པའི་ཆུ་ཤའི་མཐུ་ཅན་དུ་བགྱིད་དོ། །རྒྱལ་པོས་ཆུ་སྣོད་བདུན་ཆུ་བཟང་པོས་བཀང་བར་བཞག་གོ །དེས་དེ་དག་ཏུ་ངལ་བསོས་ཀྱི་བར་དུ་ཁྲུས་བྱས་ནས་ལུས་ཀྱི་སྟོབས་ཤེས་པ་དང༌། མོད་ལ་འཕུར་ཏེ་ཁང་པའི་སྟེང་དུ་འདུག་ནས་འཇིགས་པ་དང་བག་ཚ་བ་མེད་པར་སྨྲས་པ། རེ་ཞིག་ཐོག་མར་བདག་བླུན་ཏེ། ཕྱི་ནས་བྱ་བ་འདི་དག་གོ །དེ་ནས་རྒྱལ་པོ་བླུན་པ་སྟེ། །བླུན་པོའི་དཀྱིལ་འཁོར་ཡོངས་སུ་རྫོགས། །ཞེས་སྨྲས་ནས་སོང་ངོ༌། །
དེ་ནས་རྒྱལ་པོས་སྨན་པ་ལ། ཤང་ཤང་ཏེའུས་ཁྲུས་བྱས་པའི་ཆུ་དེ་ཤའི་མཐུ་ཡོད་པ་བདེན་ནམ། ལྷ། མད་ཀྱི་མར་དང་སྒྲོལ་ཅིག །དེ་རྣམས་ཀྱིས་བཅུད་ཐམས་ཅད་མར་དང་བཙོས་ཏེ། རྒྱལ་པོའི་བུ་ལ་བླུད་པར་ཞུགས་པ་དང༌། གངས་རིའི་སུལ་ཞིག་ན་རང་སངས་རྒྱས་ལྔ་བརྒྱ་གནས་པ་ལས་གཅིག་གཞོགས་ཕྱེད་བསྐམས་སོ། །དེ་ལ་རང་སངས་རྒྱས་དེ་རྣམས་ཀྱིས་སྨྲས་པ། ལྗོངས་སུ་སོང་ལ་སྨན་སྟེན་ཅིག་སོས་པར་འགྱུར་རོ། །དེས་སྨྲས་པ། སེམས་ཅན་ཐམས་ཅད་ཀྱི་ཐུན་མོང་གི་ཆོས་འཆི་བ་དེ་འོང་སྟེ། བདག་ནད་དང་བཅས་ནས་འཁྱེར་ན་ཅིའི་ཕྱིར་གྲོང་ཁྱེར་གྱི་མཐར་འགྲོ། དེ་ལྟ་མོད་ཀྱི། ཚུལ་ཁྲིམས་དང་ལྡན་པ་ཡུན་རིང་དུ་འཚོ་བ་དེ་ཙམ་དུ་བསོད་ནམས་མང་པོ་གསོག་གོ །བསོད་ནམས་མང་པོ་བསགས་པ་དེ་ཙམ་དུ་མཐོ་རིས་སུ་ཡུན་རིང་དུ་དགའ་བར་འགྱུར་རོ་ཞེས་བསྐུལ་བས། རིམ་གྱིས་ཤི་བའི་དབྱངས་ཀྱི་རྒྱལ་པོའི་ཕོ་བྲང་དུ་སོང་ནས། སྨན་པ་ལ། ཁོ་བོ་འདི་འདྲའི་ནད་ཀྱིས་ཐེབས་ཀྱིས་སྨན་སྟོན་ཅིག །ཁྱོད་ཀྱི་ནད་འདི་ཅི་འདྲ་བ་རྒྱལ་པོའི་བུ་ལ་བྱུང་གི །ལོ་གཅིག་གཉིས་སུ་བཅུད་ཐམས་ཅད་མར་དང་བཙོས་པ་ཡོད་པས་བཞུད་ལ་སློངས་དང༌། ཐོབ་ན་འཚོ་བར་འགྱུར་རོ། །དེ་སོང་ནས་སྒོར་བསྡད་དོ། །རྒྱལ་པོ་དེའི་ཀུན་སྤྱོད་ནི། སློང་བ་པོ་སྦྲོན་དུ་གཞུག་པའི་ཕྱིར་སྒོར་རྒྱུན་དུ་དྲིལ་བུ་འདོགས་ཏེ། སློང་བ་པོ་སྒོ་ན་འདུག་པའི་ཚེ་དྲིལ་བུ་འཁྲོལ་ལོ། །རང་སངས་རྒྱས་དེས་དྲིལ་བུ་དཀྲོལ་བ་དང༌། རྒྱལ་པོའི་བུས་ཕ་མ་ལ་སྨྲས་པ། སློང་བ་པོ་ཞིག་མཆིས་ཀྱིས། ཅི་སློང་དྲིས་ཤིག །བུ། ལོ་གཅིག་གཉིས་སུ་བསགས་ཏེ་བཙོས་པའི་བཅུད་འདི་རེ་ཞིག་འཐུང་དང༌། ཕྱིས་སློང་བ་པོ་བཀུག་ནས་ཅི་སློང་དྲིའོ། །ཡབ་ཡུམ། སློང་བ་པོ་མ་བཀུག་གི་(༧༢བ)བར་དུ་མ་འཐུང་ངོ༌། །རྒྱལ་པོས་བསྒོ་བ་ལ། སློང་བ་པོ་ནང་དུ་ཐོང་ཞིག །དེ་ནང་དུ་ཞུགས་པ་དང༌། རྒྱལ་པོའི་བུས། ལུས་མཛེས་ཤིང་སེམས་དང་བ་དང༌། སྤྱོད་ལམ་ཞི་བས་ཞུགས་པ་མཐོང་ནས། འཕགས་པ། ཅི་བཞེད། དེས་རྒྱས་པར་སྨྲས་པ་དང༌། བཅུད་ནི་ཁྱོད་ཁོ་ན་ལ་འོས་ཀྱི། བདག་ལ་མ་ལགས་པས་བཞེས་ཤིག །དེས་ལྷུང་བཟེད་བཟེད་པ་དང༌། རྒྱལ་པོའི་བུས་བསམ་པ་དྲག་པོས་ལྷུང་བཟེད་དེར་བཅུད་བླུགས་སོ། །
བདག་ཉིད་ཆེན་པོ་དེས་ཀྱང་རྒྱལ་པོའི་བུ་ལ་ཕན་པའི་སེམས་བསྐྱེད་པ་དང༌། ཚུལ་ཁྲིམས་དང་ལྡན་པའི་སྨོན་ལམ་གྲུབ་པས། གཉིས་ཀ་སོས་སོ། །དེའི་དུས་ཀྱི་རྒྱལ་བུ་གཞོན་ནུ་དེ་ནི་ང་ཡིན་ནོ། །བཙུན་པ། རྒྱལ་བུ་དང་རང་སངས་རྒྱས་དེས་ལས་ཅི་བགྱིས་ན། གཉིས་ཀ་མཉམ་དུ་བྲོས་ཐེབས་ནས་མཉམ་དུ་སོས་པར་གྱུར། སྔོན་ཝཱ་ར་ཎཱ་སཱིར་རྒྱལ་པོ་ཚངས་བྱིན་ལ་བུ་གཉིས་ཡོད་པ་ལས། ནུ་བོ་དེ་རྒྱལ་སྲིད་ལ་དགའ། མདུན་ན་འདོན་ལ་བུ་གཉིས་ཡོད་པའི་ནུ་བོ་དེ་མདུན་ལ་འདོན་ལ་དགའ་འོ། ། དེ་གཉིས་ཕན་ཚུན་ཡིད་གཅུགས་པས་རྒྱལ་བུས་སྨྲས་པ། ཐབས་ཅི་བྱས་ན་ང་རྒྱལ་པོར་འགྱུར། བདག་མདུན་ན་འདོན་དུ་འཇུག་ན་ཐབས་མཆིས་སོ། །འཇུག་གིས་སྨྲོས་ཤིག །བདག་གིས་ཁྱོད་ཀྱི་གཅེན་ཞ་བོར་བགྱིས་ན་ཁྱོད་རྒྱལ་པོར་འགྱུར་རོ། །དེས། ཡི་རང་ངོ༌། །དེས་དེ་ལ་སྨན་མ་ཡིན་པ་བྱིན་པས་ཞའོ། །རེ་ཞིག་ན་རྒྱལ་པོ་ཤི་ནས། བློན་པོ་རྣམས་ཀྱིས། དེ་ཞ་བོར་གྱུར་པས་ནུ་བོ་རྒྱལ་པོར་དབང་བསྐུར་ཏོ། །དེས་ཀྱང་མདུན་ན་འདོན་གྱི་བུ་ནུ་བོ་མདུན་ན་འདོན་དུ་བཅུག་གོ །ཇི་ཙམ་ན་ཕུ་བོ་ཞ་བ་མཐོང་ནས་འགྱོད་དེ། བདག་གིས་རྒྱལ་སྲིད་ཀྱི་ཕྱིར་ཕུ་བོ་ཞ་བར་བྱས་པ་མ་ལེགས་སོ། །དེས། ལྷ། བདག་ཀྱང་འགྱོད་དེ་དགྱེས་ན་འདི་སྔོན་བཞིན་དུ་བགྱིའོ། །གྱིས་ཤིག །དེས་དེ་ལ་སྨན་བྱིན་པས་སོས་སོ། །དེ་ནས་དེ་གཉིས་ཀྱིས་རང་སངས་རྒྱས་ཤིག་ལ་བསོད་སྙོམས་ཕུལ་ནས་སྨོན་ལམ་བཏབ་པ། དགེ་བ་འདིས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་ཞིང༌། ཞ་བོར་བྱས་པའི་རྣམ་སྨིན་མྱོང་བར་མ་གྱུར་ཅིག །དེའི་དུས་ཀྱི་རྒྱལ་པོའི་བུ་དེ་ནི་ང་ཡིན་ནོ། །མདུན་ན་འདོན་དེ་ནི་རང་སངས་རྒྱས་དེ་ཡིན་ནོ། །དེ་གཉིས་ཀྱིས་གྲོས་བྱས་ནས་རྒྱལ་བུ་ལ་སྨན་མ་ཡིན་པ་བྱིན་པས་མཉམ་དུ་ཞ་ལ། ཡང་འགྱོད་ནས་གྲོས་བྱས་ཏེ་སྨན་བྱིན་པས་མཉམ་དུ་སོས་སོ། །དེ་བས་ན་ལས་གཅིག་ཏུ་གནག་པ་དང་འདྲེས་མ་རྣམས་སྤངས་ལ། ལས་གཅིག་ཏུ་དཀར་བ་རྣམས་ལ་བརྩོན་པར་བྱའོ། །
སྟོན་པ་མཉན་ཡོད་ནའོ། །མཉན་ཡོད་ན་དགེ་སློང་སྤོང་བ་པ་ཞིག་ལ་དགེ་སློང་གཞོན་ནུ་ཞིག་གིས་གནས་བཅས་པ་དང༌། སྟོན་པས། དགེ་(༧༣ན)སློང་དག །རབ་ཏུ་བྱུང་ཞིང་བསྙེན་པར་རྫོགས་པར་བྱས་ནས་གདམས་ངག་མ་བྱིན། རྗེས་སུ་མ་བསྟན་པ་བས་ནི་བཤན་པ་བྱེད་པ་བླའོ་ཞེས་གསུངས་ལ། འདིའང་སློབ་མ་ཡིན། བདག་ཀྱང་སྤོང་བ་པ་ཡིན་པས་སྦྱིན་པར་བྱེད་པ་གཞན་ཞིག་ལ་གཏང་ངོ་སྙམ་ནས། དགེ་སློང་ཞིག་ལ། འདི་ལ་སློབས་ཤིག །དེས་སྨྲས་པ། ཁྱོད་ཀྱིས་གཡོག་བྱེད་ན་བསླབ་བོ། །སློབས་ཤིག །བགྱིའོ། །དེས་དེ་ལ་བསླབས་པ་དང༌། དེ་ན་ནས། གནས་ཀྱི་སློབ་དཔོན་དེས་དེའི་ནད་གཡོག་བྱས་སོ། །རེ་ཞིག་ན་གནས་ཀྱི་སློབ་དཔོན་དེ་ན་བ་ལ་དེས་མ་བལྟས་ཤིང་ལན་གསུམ་གྱི་བར་དུ་ནའང་མ་བལྟས་པས། དེ་ལ་སྨྲས་པ། ཁྱོད་གཞན་ཞིག་གི་དྲུང་དུ་སོང་ལ་གནས་ཆོས་ཤིག །བདག་ཁྱོད་ཀྱི་དྲུང་དུ་མཆིས་ཏེ་ཕོངས་པ་ཅུང་ཟད་ཀྱང་མ་མཆིས་སོ། །ཁྱོད་ཕོངས་པ་མེད་པ་བདེན་ན། ཁོ་བོ་ཕོངས་ཏེ། ཁྱོད་ན་བ་ན་ཁོ་བོས་ནད་གཡོག་བྱས་ནས། ང་ལན་གསུམ་གྱི་བར་དུ་ནའང་ཁྱོད་ཀྱིས་མ་བལྟས་ཀྱིས། ཁྱོད་ལྟ་བུ་མ་གུས་པ་ལ་གནས་སྟེར་བ་དེ་ལ་གནས་ཆོས་ཤིག །དེ་སྤོབས་པ་མེད་པས་ཅང་མི་ཟེར་བའི་སྐབས་དེ་གསོལ་བ་དང༌། གནས་པས་སློབ་དཔོན་ལ་རིམ་གྲོ་བྱའོ། །རེ་ཞིག་ན་ཀློག་པའི་སློབ་དཔོན་ན་བ་ལ་དེས་མ་བལྟས་པར། སོས་པ་དང་དེའི་དྲུང་དུ་སོང་སྟེ། སློབ་དཔོན། བདག་ལ་ལུང་ཕོག་ཅིག །དེས་སྨྲས་པ། ཁོ་བོ་ན་བ་ཁྱོད་ཀྱིས་ལན་འགའ་ཡང་མ་བལྟས་ཀྱིས། ཁྱོད་ལྟ་བུ་མ་གུས་པ་ལ་ཀློག་ཏུ་འཇུག་པ་དེ་ལ་ལྷོགས་ཤིག །དེ་ཅང་མི་ཟེར་བའི་སྐབས་དེ་གསོལ་བ་དང༌། ཀློག་པའི་སློབ་དཔོན་ལ་རིམ་གྲོ་བྱའོ། །སྟོན་པས་དེ་ལྟར་གསུངས་པ་དང༌། རེ་ཞིག་ན་ཀློག་པའི་སློབ་དཔོན་དང༌། གནས་ཀྱི་སློབ་དཔོན་གཉིས་ཀ་ན་ནས། དེས་གང་གི་རིམ་གྲོ་བྱ་བ་མ་ཤེས་པའི་སྐབས་དེ་གསོལ་བ་དང༌། ནུས་ན་གཉིས་ཀའི་བྱའོ། །ཅིག་ཅར་མི་ནུས་ན་གནས་ཀྱི་སློབ་དཔོན་ལ་བྱ་སྟེ། ཀློག་པ་མེད་པར་འདུག་ཏུ་རུང་གི །གནས་མེད་པར་མ་ཡིན་ནོ། །གླེང་གཞི་ནི་མཉན་ཡོད་ནའོ། །མཉན་ཡོད་ན་ཁྱིམ་བདག་ཚོང་དཔོན་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ནས། བུ་མེད་ཅིང་བུ་འདོད་པས་ལྷ་རྣམས་ལ་གསོལ་བ་བཏབ་ཀྱང་བུ་མེད་པའི་ཚེ། ལྷ་རྣམས་སྤངས་ཏེ་སྟོན་པ་ལ་དད་ནས། དགེ་སློང་ཞིག་གི་དྲུང་དུ། འཕགས་པ། བདག་རབ་ཏུ་འབྱུང་བར་འཚལ་ལོ། །
བཞིན་བཟང༌། དེ་ལྟར་གྱིས་ཤིག་ཅེས་སྐྲ་བྲེགས་ནས་བསླབ་པའི་གཞི་རྣམས་སྦྱིན་པར་བརྩམས་པ་ལས། རིམས་ནད་ཀྱིས་ཐེབས་ནས་རབ་ཏུ་འབྱུང་བའི་བར་ཆད་དུ་གྱུར་པའི་སྐབས་དེ་(༧༣བ)གསོལ་བ་དང༌། སོས་ཀྱི་བར་དུ་བསླབ་པའི་གཞི་རྣམས་མི་སྦྱིན་པར་དེའི་རིམ་གྲོ་བྱའོ། །སུས་བྱ་བ་མ་ཤེས་ནས། དགེ་སློང་རྣམས་དང་སྨན་པས་སོ། །ཉིན་པར་སྨན་བྱས་ཀྱང་མཚན་མོ་ན་ནས། སྨན་པས། འདི་ཁྱིམ་དུ་སྐྱེལ་ན་བདག་ཅག་གི་ཉིན་མཚན་དུ་འདིའི་དཔྱད་བགྱིའོ་ཞེས་པའི་སྐབས་དེ་གསོལ་བ་དང༌། ཁྱིམ་དུ་སྐྱོལ་ལ་དེར་ཡང་དེའི་རིམ་གྲོ་བྱེད་པ་སྦྱིན་པར་བྱའོ་ཞེས་གསུངས་པས། འདིར་དེའི་རྟགས་བརྩམ་པ་ཡང་རབ་ཏུ་བྱུང་བ་དང་འདྲའོ། །དགེ་སློང་ནད་ཀྱིས་ཐེབས་པ། ནད་ཚབས་ཆེ་བ་ཞིག་ཡོད་པ་དེ་ཤེས་པ་ཆུང་བས་སྨན་མེད་ནས། དེས་ལུས་ལ་བརྟགས་ཏེ་ནད་གཡོག་ལ་སྨྲས་པ། བདག་ལ་ཅི་ཡང་མེད་ཀྱིས། བདག་གི་ཆེད་དུ་མཆོད་པ་གྱིས་ཤིག །དེས་ཁས་བླངས་ནས་མ་བྱས་པར། ཤི་ནས་ངན་སོང་དུ་སྐྱེས་སོ། །སྟོན་པས། དགེ་སློང་ཤི་བ་དེས་ནད་གཡོག་ལ་ཇི་སྐད་སྨྲས། ཇི་ལྟར་གྱུར་པ་གསོལ་བ་དང༌། དགེ་སློང་དག །དེ་ལོག་པར་ལྟུང་ངོ༌། །ཚངས་པ་མཚུངས་པར་སྤྱོད་པ་རྣམས་ཀྱིས་དེའི་ཆེད་དུ་དཀོན་མཆོག་གསུམ་ལ་མཆོད་པ་བྱས་ན་དད་པ་སྐྱེས་ནས་ལོག་པར་མི་ལྟུང་བ་ཞིག་གོ །དེ་བས་ན་ཚངས་པ་མཚུངས་པར་སྤྱོད་པ་ན་བ་ཡལ་བར་མི་དོར་རོ། །ནད་གཡོག་སྦྱིན་པར་བྱའོ། །དེ་ལ་སྨན་མེད་ན་ཡོན་བདག་ལས་བླང་ངོ༌། །མ་གྲུབ་ན་དགེ་འདུན་གྱི་ལས་སྦྱིན་ནོ། །དེ་ཡང་མ་འབྱོར་ན་དེ་བཞིན་གཤེགས་པའི་མཆོད་རྟེན་ནམ། དྲི་གཙང་ཁང་གི་གདུགས་སམ། རྒྱལ་མཚན་ནམ། རྒྱན་གང་ཡིན་པ་དེ་དགེ་འདུན་གྱིས་ཕོག་ལ། རིམ་གྲོ་པས་བསྒྱུར་ནས་རིམ་གྲོ་དང་སྟོན་པ་མཆོད་པར་བྱའོ། །སོས་ན་དེ་ལ། འདི་སངས་རྒྱས་ཀྱི་ཡིན་ཏེ་ཁྱོད་ཀྱི་ཡོ་བྱད་དུ་སྤྱད་དོ་ཞེས་བརྗོད་དོ། །འབྱོར་པ་ཡོད་ན་བསབ་པ་ཉིད་དུ་བྱའོ། །མེད་ན་དེ་ནི་ལེགས་པར་སྤྱད་པ་ཡིན་ཏེ། ཕའི་ནོར་ལ་བུ་བཞིན་དུ་རིགས་པ་ཡིན་པས་དེ་ལ་འགྱོད་པར་མི་བྱའོ། །
སྟོན་པ་མཉན་ཡོད་ནའོ། །དགེ་སློང་ནད་ཚབས་ཆེ་བ་ཚོར་བས་ཉེན་པ་ཞིག་ཡོད་པ་དེ་ལ་ལྷུང་བཟེད་བཟང་པོ་ཞིག་ཡོད་དེ། དེ་དེ་ལ་ལྷག་པར་ཆགས་ནས། ནད་གཡོག་ལ། ཁོ་བོའི་ལྷུང་བཟེད་འོན་ཅིག །དེས་མ་བྱིན་པ་དང༌། དེ་ལ་ངན་སེམས་སྐྱེས་ཤིང་ལྷུང་བཟེད་ལ་ལྷག་པར་ཆགས་པས་ཤི་ནས་དེ་ལྷུང་བཟེད་དེའི་ནང་དུ་སྦྲུལ་དུ་སྐྱེས་སོ། །དགེ་སློང་རྣམས་ཀྱིས་དེ་བསྲེགས་ནས་གཙུག་ལག་ཁང་དུ་འདུས་སོ། །གོས་འགྱེད་པས་ཤི་བའི་ཡོ་བྱད་རྒན་པའི་མཐར་སྤུངས་པ་དང༌། སྟོན་པས། ཀུན་དགའ་བོ། སོང་ལ་དགེ་སློང་སུས་ཀྱང་དེའི་ལྷུང་བཟེད་ཀྱི་སྣོད་ཁ་མ་འབྱེད་ཅིག །དེ་བཞིན་གཤེགས་པ་ཉིད་ཀྱིས་འབྱེད་པར་འགྱུར་རོ་ཞེས་བསྒོ་ཞིག །དེས་བསྒོའོ། །སྟོན་པས་ཕྱེ་བ་དང་སྦྲུལ་ཞིག་མགོའི་གདེངས་ཀ་ཆེར་བྱས་ནས་འདུག་གོ །སྟོན་པས་(༧༤ན)སེ་གོལ་གྱི་སྒྲས་བསླངས་ནས། གཏི་མུག་ཅན། ལྷུང་བཟེད་འདི་སྤོངས་ལ་སོང་ཞིག །དགེ་སློང་རྣམས་ཀྱིས་འགྱེད་པར་འགྱུར་རོ། །དེ་འཁྲུགས་ནས་ནགས་སྟུག་པོ་ཞིག་ཏུ་ཞུགས་ཏེ་ཁྲོས་པའི་མེ་སྦར་བས་ནགས་དེ་འབར་ནས་དེ་ཉིད་དུ་ཚིགས། དགེ་སློང་རྣམས་ལ་ངན་སེམས་སྐྱེས་པས་དམྱལ་བར་སྐྱེས་སོ། །སྟོན་པས། དགེ་སློང་དག །སྲིད་པ་ཐམས་ཅད་ལས་སྐྲག་པར་གྱིས་ཤིག །ཡོ་བྱད་གང་གི་ཕྱིར་སེམས་ཅན་གཅིག་ལུས་དེ་གནས་གསུམ་པོ་ནགས་སྟུག་པོར་ཁྲོས་པའི་མེ་དང༌། དམྱལ་བའི་དམྱལ་མེ་དང༌། དུར་ཁྲོད་དུ་མེ་ཕལ་པས་བསྲེགས་པ་ལས་ཡིད་བྱུང་བར་བྱའོ། །དེ་བས་ན་ཡོ་བྱད་ལ་ལྷག་པར་ཆགས་པ་བསྐྱེད་པར་མི་བྱ་ཞིང་གང་ལ་སྐྱེ་བ་དེ་ཡོངས་སུ་སྤང་བར་བྱའོ། །ནད་པ་རང་གི་ལྷག་པར་ཆགས་པའི་དངོས་པོ་འགུགས་ན་དགག་པར་མི་བྱའོ། །
ནད་པ་མ་ཚོར་བར་དགེ་འདུན་གྱིས་གནས་མལ་ལ་ཤི་ནས། དེས་དེ་འཆིར་དོགས་ན་དགེ་འདུན་གྱི་མལ་སྟན་ལས་བླངས་ཏེ་གང་ཟག་གི་ལ་བཞག་པར་བྱའོ། །སྐུ་མཉེ་དང་ཁྲུས་སྔར་བྱ་བའི་སྒྱུ་ཐབས་ཀྱིས་སོ། །དེའི་གནས་སྐབས་ཀྱི་ཡོངས་སུ་བརྟག་པ་ལ་འབད་པ་དང་ལྡན་པར་བྱའོ། །དེས་དམེ་པར་བྱས་པ་ཤི་བའི་གོས་དེ་དག་བཀྲུ་བ་ནི་དེས་བྱ་བ་ཉིད་ཡིན་ནོ། །དགེ་འདུན་འདུས་ན་དེའི་གནས་བརྟན་མདུན་དུ་འགྲོ་བར་བྱའོ་ཞེས་པ་ནས། གྲ་དག་པར་ཐུལ་འོག་ཏུ་གཞུག་པར་བྱའོ་ཞེས་པའི་བར་རྣམས་མ་མོའི་བྱ་བའི་ཕུང་པོ་ལས་གསུངས་ལ། བྱུང་བའི་གླེང་གཞི་མ་གསུངས་པས་འདིར་བདག་གིས་མ་བྲིས་སོ། །སྐྱེ་དགུའི་བདག་མོ་ལྕི་བའི་ཆོས་ཁས་བླངས་པས་བསྙེན་པར་རྫོགས་པའི་ཚེ། ཉེ་བར་འཁོར་གྱིས་ཞུས་པ། བུད་མེད་གཞན་རྣམས་ཇི་ལྟར་རབ་ཏུ་དབྱུང་བ་དང་བསྙེན་པར་རྫོགས་པར་བགྱི། རིམ་པ་བཞིན་དུ་རབ་ཏུ་དབྱུང་བ་དང་བསྙེན་པར་རྫོགས་པར་གྱིས་ཤིག །དེ་ཇི་ལྟར་བྱ་བ་མ་ཤེས་ནས་གསོལ་བ་དང༌། སྐྱེ་དགུའི་བདག་མོ་ལ་སོགས་པ་ཤཱཀྱ་མོ་ལྔ་བརྒྱ་ནི་བླ་མའི་ཆོས་ཁས་བླངས་པས་རབ་ཏུ་བྱུང་ཞིང་བསྙེན་པར་རྫོགས་སོ། །བུད་མེད་གཞན་ནི་རིམ་བཞིན་དུ་བྱ་སྟེ། དགེ་སློང་གང་ཡང་རུང་བ་ལ་རབ་ཏུ་འབྱུང་བར་འདོད་པ་འོངས་ན། དེས་བར་ཆད་ཀྱི་ཆོས་རྣམས་དྲིས་ལ་གཟུང་བར་བྱའོ། །སྐྱབས་འགྲོ་དང༌། དགེ་བསྙེན་མའི་བསླབ་པའི་གཞི་ལྔ་སྦྱིན། དེ་ནས་རབ་བྱུང་ཞུ་བའི་དགེ་སློང་མ་བསྐོས་ནས་དེས་ཞུ། དེ་ནས་སྐྲ་འདྲེག་པའི་དགེ་སློང་མ་བསྐོས་ནས་སྐྲ་བྲེགས་ཏེ་ཁྲུས་བྱ། དེས་ན་ཤམ་ཐབས་བསྐོན་ནས་མཚན་བརྟག །དེ་ནས་མཁན་མོས་དགེ་ཚུལ་མའི་བསླབ་པ་འབོག་པའི་དགེ་སློང་མ་གསོལ་ནས། དེས་བསླབ་པ་ཕོག་པ་དང༌། དེ་ནས་དགེ་སློབ་མ་དང༌། དེ་ལ་ལོ་གཉིས་སུ་བསླབས་ནས་ཚངས་སྤྱོད་ཉེར་གནས་ཀྱི་སྡོམ་པ་དང༌། དེའི་འོག་ཏུ་བསྙེན་པར་(༧༤བ)རྫོགས་པར་བྱེད་པའི་ཚུལ་རྣམས་རྒྱས་པར་གསུངས་སོ། །སྟོན་པ་མཉན་ཡོད་ནའོ། །དགེ་སློང་དག་གིས་དགེ་སློང་མའི་དགེ་འདུན་གྱི་དབུས་སུ། ཐུན་མོང་མ་ཡིན་པའི་བར་ཆད་དྲིས་པ་དང༌། དེ་ངོ་ཚ་ནས་གདོང་སྨད་དེ་འདུག་གོ །དེ་གསོལ་བ་དང༌། དགེ་སློང་གིས་དགེ་སློང་མ་ལ་ཐུན་མོང་མ་ཡིན་པའི་བར་ཆད་མ་དྲི་བར། དགེ་སློང་མས་དྲིས་ཤིག །དགེ་སློང་གིས་ཐུན་མོང་བའི་བར་ཆད་དྲིས་པས་ཀྱང་ངོ་ཚ་ནས་མ་སྨྲས་པ་དང༌། དགེ་སློང་མ་དྲུང་དུ་ཞོག་ལ་དྲིས་ཤིག །དེས་དགེ་སློབ་མ་ལ་དྲིས། དགེ་སློབ་མ་དེས་ཀྱང་དེ་ལ་ལན་ཐོབ་ཅིག །དེ་བར་ཆད་དྲི་བ་དགེ་སློང་མས་བསྒྲིབས་པ་ལ་བྱའོ། །སྟོན་པ་མཉན་ཡོད་ནའོ། །དགེ་སློང་མ་ཞིག་གིས་མཚན་གཉིས་པ་ཞིག་རབ་ཏུ་བྱུང་བ་དང༌། དེས་དགེ་སློང་དག་ལ་མཚན་མ་བསྟན་པས། ཁྱོད་ཅི་ཡིན། མཚན་གཉིས་པའོ། །དེ་གསོལ་བ་དང༌། མཚན་གཉིས་པ་དེ་སྐྲོད་ཅིག །མཚན་གཉིས་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས། རབ་ཏུ་འབྱུང་བར་འདོད་པ་འོངས་ན། མཚན་གཉིས་པ་མ་ཡིན་ནམ་ཞེས་དྲིས་ཤིག །མཉན་ཡོད་ན་དགེ་སློང་མ་ཞིག་གིས་གླེ་འདམས་མ་ཞིག་རབ་ཏུ་བྱུང་ནས། དེ་ཆབ་ཁུང་སར་གཅིས་པས་བཤང་གཤི་གཉིས་ཀ་བྱུང་བ་དང༌། དེ་ནས་དགེ་སློང་མ་གཞན་ཞིག་གིས་དེར་ཞུགས་པ་ན། ཆབ་ཁུང་བཤང་བས་མ་རུང་བར་བྱས་པ་མཐོང་ནས། དེས། ཆབ་ཁུང་ས་འདི་བཤང་བས་མ་རུང་བར་སུས་བྱས་ཞེས་དྲིས་པ་དང༌། དེས། བདག་གིས་བག་མེད་པས་མ་རུང་བར་བགྱིས་སོ། །
ཁྱོད་ཀྱིས་བག་མེད་ཅི་བྱས། བདག་གླེ་འདམས་མ་སྟེ། གཅི་བར་བསམས་པ་དང༌། བཤང་བའང་བྱུང་ན་ཇི་ལྟར་བགྱི། དེ་ཡང་བརྒྱུད་ནས་གསོལ་བ་དང༌། གླེ་འདམས་མ་སྐྲོད་ཅིག །མཉན་ཡོད་ན་དགེ་སློང་མ་ཞིག་གིས་རྟག་ཏུ་ཁྲག་འཛག་པ་ཞིག་རབ་ཏུ་བྱུང་སྟེ། དེའི་སྨད་གཡོགས་ཁྲག་གིས་མ་རུང་བར་གྱུར་ནས་སྦྲང་བུས་གང་བ་དང༌། དེ་ལ་དགེ་སློང་མ་ཞིག་གིས། ཁྱོད་རྟག་ཏུ་ཁྲག་འཛག་གམ། རྟག་ཏུ་ཁྲག་འཛག་པའོ། །དེ་གསོལ་བ་དང་། རྟག་ཏུ་ཁྲག་འཛག་པ་ནི་མ་ནིང་ཡིན་ཏེ་སྐྲོད་ཅིག །མཉན་ཡོད་ན་དགེ་སློང་མ་ཞིག་གིས་ཁྲག་མེད་མ་ཞིག་རབ་ཏུ་བྱུང་སྟེ། དེས་དགེ་སློང་མ་དག་ལ་དུས་དུས་སུ་ཁྲག་འཛག་པ་མཐོང་ནས། ཅི། ཁྱེད་ཅག་ལོག་པར་རྟོག་པ་ལ་རྟོག་གམ། ཅིའི་ཕྱིར་ཁྱེད་ཁྲག་འཛག །ཕུ་ནུ་མོ། ཅི་བྱར་ཡོད། དེ་ནི་བུད་མེད་ཀྱི་ཆོས་ཉིད་ཡིན་མོད། ཁྱོད་ཁྲག་མི་འཛག་གམ། དེས་བདག་ལ་ཁྲག་མེད་ན་འཛག་ཏུ་ཅི་ཡོད། དེ་གསོལ་བ་དང༌། ཁྲག་མེད་མ་ནི་མ་ནིང་ཡིན་པས་སྐྲོད་ཅིག །མཉན་ཡོད་དུ་དགེ་སློང་མ་ཞིག་གིས་མཚན་མ་ཙམ་ཡོད་པ་ཞིག་རབ་ཏུ་བྱུང་སྟེ། ཆབ་ཁུང་སར་རིང་ཞིག་ལོན་ནས་སླར་བྱུང་བ་དང༌། དེ་ལ་དགེ་སློང་མ་དག་གིས། རིང་ཞིག་ཐོགས་(༧༥ན)ཏེ་བྱུང་ན་ཅི་བྱེད། བདག་ནི་མཚན་མ་ཙམ་ཡོད་པ་སྟེ་མོ་མཚན་མ་ཚང་ན་ཇི་ལྟར་བགྱི། དེ་གསོལ་བ་དང༌། མཚན་མ་ཙམ་ཡོད་པ་ནི་མ་ནིང་ཡིན་ཏེ་སྐྲོད་ཅིག །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་མོ་ཞིག་བཙས་ཏེ། བཙས་མ་ཐག་ཕ་ཤིའོ། །དེ་ནས་མས་གསོས་ནས་ཆེན་པོར་གྱུར་པ་དང༌། མའང་ཤིའོ། །སྦོམ་དགའ་མོས་བསོད་སྙོམས་ལ་ཞུགས་པ་དང༌། དེ་མཐོང་ནས། ཁྱོད་སུའི་ཡིན། བདག་སུའི་ཡང་མ་ལགས་ཏེ་མགོན་མེད་པའོ། །འོ་ན་ཅིའི་ཕྱིར་རབ་ཏུ་མི་འབྱུང༌། སུ་ཞིག་གིས་རབ་ཏུ་འབྱིན། ངས་རབ་ཏུ་དབྱུང་གིས་ཚུར་ཤོག །དེ་དང་ལྷན་ཅིག་དབྱར་མོ་ཁང་དུ་སོང་ནས་དེས་དེ་རབ་ཏུ་བྱུང་བ་དང༌། དེ་ཉོན་མོངས་པས་གཟིར་ནས་སླར་བབས་སོ། །སྦོམ་དགའ་མོ་བསོད་སྙོམས་ལ་ཞུགས་པས་མཐོང་ནས། བུ་མོ། ཇི་ལྟར་འཚོ་ཞིང་འདུག །དེས་ཕྱག་བྱས་ཏེ། འཕགས་མ། སྡུག་བསྔལ་ཏེ་འཚོའོ། །འོ་ན་ཅིའི་ཕྱིར་རབ་ཏུ་མི་འབྱུང༌། སུ་ཞིག་བདག་སླར་བབས་པར་རབ་ཏུ་འབྱིན། ཁོ་མོས་རབ་ཏུ་དབྱུང་ངམ། ལེགས་སོ། །དེས་རབ་ཏུ་བྱུང་སྟེ་བསོད་སྙོམས་ལ་ཞུགས་པ་དང༌། ཁྱིམ་བདག་གིས་མཐོང་ནས། མ་ལེགས་སོ། །ཤཱཀྱའི་བུ་མོ་དག་ནི་ཆོས་ལ་ངལ་བསོ་ཞིང་ཆོས་ལ་སྤྱོད་དོ་ཞེས་འཕྱ་བ་དེ་གསོལ་བ་དང༌། ཉེས་དམིགས་དེ་ནི་དགེ་སློང་མ་དག་བབས་ཤིང་སླར་ཡང་རབ་ཏུ་འབྱུང་བ་ཡིན་ནོ་དགོངས་ནས། ཁྱིམ་པ་རྣམས་རིགས་པར་འཕྱ་སྟེ། ལན་གཅིག་བབས་པ་མཐུ་མེད་པ་རབ་ཏུ་མ་དབྱུང་ཞིག །རབ་ཏུ་འབྱིན་ན་འདས་པ་དང་བཅས་པར་འགྱུར་རོ། །

༢༽ ད་ཆོག་ཞུ་བ་ཕལ་ཆེར་སྐབས།

ཞུ་བ་ཕལ་ཆེ་བའི་སྐབས་ནས་འབྱུང་བ་ནི། ཞུ་བ་དང༌། གླེང་གཞི་དང༌། གཏམ་གྱི་གཞི་ལ་སོགས་པར། ཞུ་ལན་གྱི་སྒོ་ནས་གཏན་ལ་ཕབ་པ་མ་གཏོགས། བྱུང་བའི་གླེང་གཞི་གཞན་མི་སྣང་བས། འདིར་བདག་གིས་མ་བྲིས་སོ།། །།

གཉིས་པ། སྡོམ་པ་ཐོབ་པ་མི་ཉམས་པར་སྲུང་བའི་ཐབས།

༈ གཉིས་པ་ཐོབ་པ་མི་ཉམས་པར་སྲུང་བའི་ཐབས་ལ་ལྔ། གང་ཟག་གཞན་ལ་བརྟེན་ནས་བསྲུང་བ། རང་གི་བསམ་པ་ཕུན་སུམ་ཚོགས་པས་བསྲུང་བ། མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་བ། བསླབ་པ་ཡོངས་སུ་སྦྱོང་བའི་སྒོ་ནས་བསྲུང་བ། བདེ་བར་གནས་པའི་རྐྱེན་བསྟེན་པའི་སྒོ་ནས་བསྲུང་བའོ། །

ཀ༽ གང་ཟག་གཞན་ལ་བརྟེན་ནས་བསྲུང་བ།

དང་པོ་ནི། གནས་པས་གནས་པ་ལ་མ་ཞུས་པར་བྱ་བ་མི་བྱའོ་ཞེས་སོགས་དང༌།

ཁ༽ རང་གི་བསམ་པ་ཕུན་སུམ་ཚོགས་པས་བསྲུང་བ།

གཉིས་པ་ནི། རང་གི་དྲན་པ་དང་ཤེས་བཞིན་ལ་སོགས་པས་བསྲུང་བ་ཡིན་ལ། དེ་གཉིས་ནི་རབ་ཏུ་འབྱུང་བའི་གཞིའི་སྐབས་སུ་བཤད་ཟིན་ཏོ། །

ག༽ མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་བ།

གསུམ་པ་ནི། བསླབ་པ་འབུལ་བའི་ཆོ་ག་དང་རྣམ་འབྱེད་གཉིས་སྤྱིར་བསྟན་(༧༥བ)དང་བཅས་པས་བསྟན་པ་ཡིན་ལ། རྣམ་འབྱེད་ལ་ལྟུང་བ་སྡེ་ལྔ་ལས།

༡༽ ཕམ་པའི་སྡེ་བཞི་ལས། 1) མི་ཚངས་སྤྱོད་ཀྱི་ཕམ་པ།

ཕམ་པའི་སྡེ་ལ་བཞི་ཡོད་པའི་དང་པོ་མི་ཚངས་པར་སྤྱོད་པའི་ཕམ་པ་ལའང་བཞི་ལས། རྣམ་འབྱེད་ཀྱི་སྐབས་ནས་འབྱུང་བ་ནི། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལོ་བཅུ་གཉིས་སུ་སྐྱོན་མེད་ཅིང༌། ཆུ་བུར་མེད་ལ། བཅོམ་ལྡན་འདས་ཀྱིས་ཉན་ཐོས་རྣམས་ཀྱི་སོ་སོར་ཐར་པའི་མདོ་གདོན་པ་ཡང་མདོར་བསྡུས་ཏེ། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པའང་ལེགས་པ་ཡིན། །ཡིད་ཀྱི་སྡོམ་པའང་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་སྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང༌། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བཏོན་པར་གྱུར་ཏོ། །
ལོ་བཅུ་གསུམ་པ་ལ་བབ་པ་ན་སངས་རྒྱས་བཅོམ་ལྡན་འདས་ཡུལ་སྤོང་བྱེད་ན། ཀ་ལན་ད་ཀའི་གྲོང་ན་བཞུགས་སོ། །དེའི་ཚེ་ཀ་ལན་ད་ཀའི་གྲོང་ན་ཀ་ལན་ད་ཀའི་བུ་བཟང་སྦྱིན་ཞེས་བྱ་བ། ཕྱུག་ཅིང་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རེ་ཞིག་ན་དཀོན་མཆོག་གསུམ་ལ་དད་དེ། དཀོན་མཆོག་གསུམ་ལ་སྐྱབས་སུ་སོང་ཞིང༌། བསླབ་པའི་གཞི་ལྔ་བླངས་ཏེ། དེ་དད་པ་སྔ་མ་དེ་རྗེས་སུ་སྤེལ་ཞིང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ཉེ་དུ་རྣམས་དང་འདྲེ་ཞིང་གནས་པ་ལས། དེ་འདི་སྙམ་དུ། བདག་རབ་ཏུ་བྱུང་ནས་ཉེ་དུ་དང་འདྲ་ཞིང་གནས་པ་ནི་རྙེད་པ་མ་རྙེད་དོ་སྙམ་ནས། ཉེ་དུ་དང་འབྲལ་བའི་ཕྱིར་ལྷུང་བཟེད་དང་ཆོས་གོས་ཐོགས་ཏེ། ལྗོངས་རྒྱུར་སོང་ངོ༌། །དེའི་ཚེ་མུ་གེ་ཉམ་ང་བ་སློང་མོ་བ་སློང་མོ་བས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་ལ་ཟས་སྦྱིན་པར་དཀའ་ན་སློང་མོ་བ་ལྟ་ཅི་སྨོས་དགོས་པ་ཞིག་བྱུང་ནས། བཟང་སྦྱིན་འདི་སྙམ་དུ། བདག་གི་ཉེ་དུ་ལ་ལོངས་སྤྱོད་ཡོད་པས། དགེ་འདུན་ལ་ཟས་སྦྱོར་དུ་གཞུག་ཅིང༌། སྐྱོ་མ་དང༌། ཐུག་པ་དང༌། རྟག་རེས་འཁོར་དང༌། མགྲོན་དུ་བོས་པ་དང༌། བརྒྱད་སྟོན་དང༌། བཅུ་བཞི་(༧༦ན)སྟོན་དང༌། ཉ་སྟོན་དང༌། སྤྱན་གཟིགས་ཕྲན་ཚེགས་སྦྱོར་རུ་གཞུག་གོ་སྙམ་སྟེ། ལྗོངས་སུ་ཅི་དགར་འདུག་ནས་ལྷུང་བཟེད་དང་ཆོས་གོས་ཐོགས་ཏེ་རིམ་གྱིས་ཀ་ལན་ད་ཀའི་དགོན་པའི་སྤྱིལ་བུ་ན་འདུག་གོ །དེ་ནས་བཟང་སྦྱིན་ཉེ་དུ་རྣམས་ཀྱི་གན་དུ་སོང་ནས། དཀོན་མཆོག་གསུམ་གྱི་བསྔགས་པ་བརྗོད་དེ་དགེ་འདུན་ལ་ཟས་སྦྱོར་དུ་བཅུག་གོ །དེའི་ཚེ་བཟང་སྦྱིན་དགོན་པ་བ། ཆོས་གོས་གསུམ་པ། ཕྱག་དར་ཁྲོད་པ། བསོད་སྙོམས་པ་མཐར་ཆགས་ཀྱིས་རྒྱུ་བ་ཞིག་ཏུ་གྱུར་ཏོ། །དེས་དང་པོར་དགེ་འདུན་ཐུག་པས་ཚིམ་པར་བྱས་ནས་རིམ་གྱིས་བསོད་སྙོམས་ལ་རྒྱུ་བའི་ཚེ་རང་གི་ཁྱིམ་དུ་སོང་བ་དང༌། དེའི་མ་བྱ་བ་ཞིག་ལ་ཕྱི་རོལ་ཏུ་སོང་བས། རང་གི་ཁྱིམ་ནས་བསོད་སྙོམས་མ་ཐོབ་པར་མྱུར་བར་ཕྱིར་སོང་ངོ༌། །དེ་བྲན་མོ་རྙིང་པ་རྒན་མོ་ཞིག་གིས་མཐོང་ནས། བཟང་སྦྱིན་གྱི་མ་ལ་སྨྲས་པ། ཇོ་མོ། མཁྱེན་པར་མཛོད་ཅིག །བཟང་སྦྱིན་རང་གི་ཁབ་ཏུ་བྱོན་པ་ལས། རང་གི་ཁབ་ནས་སྦྱིན་པ་མ་རྙེད་པར་སླར་སོང་ངོ༌། །
དེ་ནས་དེའི་མ་འདི་སྙམ་དུ། ཀྱེ་མ་བཟང་སྦྱིན་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང༌། དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སློང་གི་ཚུལ་གྱིས་སྒྱིད་ལུག་པའམ། རྨུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་གཏོང་འདོད་པར་མ་གྱུར་གྲང་སྙམ་ནས། བཟང་སྦྱིན་ཅན་སོང་སྟེ་སྨྲས་པ། བུ། ཁྱོད་འདོད་པ་ནས། དགེ་སྦྱོང་གི་ཚུལ་གཏོང་འདོད་པ་ལྟ་ན། ཁྱོད་ཀྱི་ཕའི་དབྱིག་དང༌། གསེར་གྱི་ཕུང་པོ་གང་ལ་མཐའ་གཅིག་ན་འགྲེང་བའི་མིས་མཐའ་གཅིག་ན་འདུག་པའི་མི་མི་མཐོང་ལ། མཐའ་གཅིག་ལ་འགྲེང་བའི་མིས་མཐའ་གཅིག་ན་འགྲེང་བའི་མི་མི་མཐོང་བ་དང༌། ཕའི་དབྱིག་དང་གསེར་མཚན་མ་བཏབ་པའང་བརྒྱ་སྟོང་དུ་མ་ཡོད་ན། གཞན་དང་ཕལ་ལྟ་ཅི་སྨོས། བུ། ཚུར་ཤོག་འདོད་པ་ལ་ལོངས་སྤྱོད། སྦྱིན་པ་དག་ཀྱང་བྱིན། བསོད་ནམས་དག་ཀྱང་གྱིས་ཤིག །བཟང་སྦྱིན་གྱིས་སྨྲས་པ། མ། བདག་དེ་ལྟར་མ་ལགས་སོ། །མས་བསམས་པ། བདག་གིས་དེ་ལྟར་བྱས་ཀྱང༌། བཟང་སྦྱིན་ཕྱིར་བཟློག་མ་ནུས་ཀྱིས་འདིའི་བག་སར་རྦད་པར་བྱའོ་སྙམ་ནས། ཁྱིམ་དུ་སོང་སྟེ་མནའ་མ་ལ་སྨྲས་པ། སྲུ། ཁྱོད་དུས་ལ་བབ་ཅིང་ཟླ་མཚན་དང་ལྡན་པའི་ཚེ་ཁོ་མོ་ལ་སྦྲོན་ཅིག །ཡུམ། བཀའ་བཞིན་འཚལ། དེ་རེ་ཞིག་ན་དུས་ལ་བབ་ཅིང་ཟླ་མཚན་དང་ལྡན་པར་གྱུར་ནས། བཟང་སྦྱིན་གྱི་མ་ལ་སྨྲས་པ། ངན་བུ་དུས་ལ་བབ་ཅིང་ཟླ་མཚན་དང་ལྡན་ན། བདག་གིས་ཅི་བགྱི། སྲུ། བཟང་སྦྱིན་སྔོན་ཁྱིམ་པ་ཉིད་ན་དགའ་བའི་ཁྲུས་དང་སྐུ་མཉེ་གྱིས། (༧༦བ)རྒྱན་ཐོགས་ལ་ཤོག་ཅེས་བསྒོའོ། །དེས་ཀྱང་མཉན་ནས། ཡུམ། ངན་བུ་འདི་འདྲ་ན་བདག་གིས་ཅི་བགྱི། དེ་ནས་དེ་གཉིས་ཤིང་རྟ་གཅིག་ཏུ་ཞུགས་ནས་བཟང་སྦྱིན་གྱི་གནས་སུ། བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ། བཞོན་པ་ལས་བབས་ནས་རྐང་པས་བཟང་སྦྱིན་གྱི་དྲུང་དུ་སོང་སྟེ། དེའི་ཚེ་བཟང་སྦྱིན་གནས་ཀྱི་ཕྱི་རོལ་བླ་གབ་མེད་པའི་འཆག་ས་ན་འཆག་པ། མས་ཐག་རིང་པོ་ནས་མཐོང་ནས། དེའི་དྲུང་དུ་སོང་སྟེ་སྨྲས་པ། བུ། བག་སར་འདི་ལ་ས་བོན་གྱི་ཆོས་ཅུང་ཞིག་བྱིན་ཅིག །ཁྱོད་ལ་བུ་མེད་པས་རྫས་ཐམས་ཅད་རྒྱལ་པོས་དབང་དུ་བྱས་ན་མི་རུང་ངོ༌། །
དེ་ནས་བཟང་སྦྱིན་གྱིས། སྔར་བསླབ་པའི་གཞི་མ་བཅས་ཤིང་ཉེས་པ་མ་མཐོང་ལ། བུད་མེད་གཞོན་ནུ་ཁ་དོག་བཟང་བ་ཆགས་པར་འགྱུར་བ་མཐོང་ནས་འདོད་ཆགས་ཀྱིས་སེམས་ཟིལ་གྱིས་ནོན་པས། ཡུམ། བདག་གིས་དེ་ལྟར་བགྱིར་རུང་ངམ། བུ། ས་བོན་གྱི་ཆོས་ལ་བརྟེན་ནས་ཤིན་ཏུ་རུང་ངོ༌། །དེ་ནས་དེ་མ་ལ་ཉན་ཏེ་སྔོན་གྱི་ཆུང་མའི་ལག་པ་གཉིས་ནས་བཟུང་སྟེ་ཕྱོགས་ཤིག་ཏུ་སོང་ནས་ཆོས་གོས་བཞག་སྟེ། དེ་དང་ལྷན་ཅིག་ཏུ་ལན་གཉིས་ལན་གསུམ་དུ་མི་ཚངས་པར་སྤྱད་དོ། །སེམས་ཅན་སྲིད་པ་ཐ་མ་པ། སྤྱོད་པ་ཚོལ་བ། ཐར་པའི་སྙིང་པོ་བཟུང་བ། མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང་སྐྱེ་བ་དོན་དུ་མི་གཉེར་བ། ལུས་ཐ་མར་འཛིན་པ་ཞིག་ཀྱང༌། ལྷའི་རིས་བཟང་པོ་ཞིག་ནས་ཤི་འཕོས་ཏེ་དེའི་མངལ་དུ་ཞུགས་སོ། །བུད་མེད་མཁས་པའི་རང་བཞིན་ཅན་ལ་མ་འདྲེས་པའི་ཆོས་ལྔ་ཡོད་དེ། སྐྱེས་པ་ཆགས་པ་ཤེས་ཤིང་ཆགས་པ་དང་བྲལ་བ་ཤེས་པ་དང༌། དུས་ཤེས་ཤིང་ཟླ་མཚན་ཤེས་པ་དང༌། མངལ་ན་གནས་པ་ཞུགས་པ་ཤེས་པ་དང༌། གང་ལས་མངལ་ན་གནས་པ་ཞུགས་པ་ཤེས་པ་དང༌། ཁྱེའུ་ཤེས་ཤིང་བུ་མོ་ཤེས་པ་དང༌། ཁྱེའུ་ཡིན་ན་དཀུ་གཡས་པར་བརྟེན་ལ། བུ་མོ་ཡིན་ན་དཀུ་གཡོན་པར་བརྟེན་ནོ། །དེ་ཡིད་དགའ་ནས་སྒྱུག་མོ་ལ་སྨྲས་པ། ཡུམ། མཁྱེན་པར་མཛོད་ཅིག །བདག་ལ་སེམས་ཅན་ཞུགས་པ་ནི་དཀུ་གཡས་སུ་བརྟེན་པས་ངེས་པར་ཁྱེའུར་འགྱུར་རོ། །
དེ་ཡང་ཡིད་དགའ་ནས། ཁོ་མོ་ཡུན་རིང་པོ་ནས་འདོད་པའི་ཚ་བོའི་ངོ་མཐོང་བ་དང༌། ཁོ་མོ་དང་མཐུན་པར་སྐྱེ་བ་དང༌། ཁོ་མོའི་བྱ་བ་བྱེད་པ་དང༌། གསོས་པས་ཕྱིར་གསོ་བ་དང༌། བགོ་སྐལ་ལ་སྤྱོད་པ་དང༌། ཁོ་མོའི་རིགས་རྒྱུན་རིང་དུ་གནས་པར་འགྱུར་བ་དང༌། བདག་ཅག་ཤི་ཞིང་དུས་ལ་བབ་པ་ན། ཉུང་ངུའམ་མང་པོའང་རུང་བའི་སྦྱིན་པ་དག་བྱིན་ཅིང་བསོད་ནམས་བྱས་ནས། འདི་དེ་གཉིས་གང་(༧༧ན)དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བསྔོ་བ་བྱེད་པར་གྱུར་ཅིག་ཅེས་ཆེད་དུ་བརྗོད་དོ། །དེ་ལ་སེམས་ཅན་ཞུགས་པར་རིག་ནས་ལེགས་པར་བསྐྱངས་པས་ཟླ་བ་བརྒྱད་དམ་དགུ་འདས་པ་ན་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ། ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འབྱར་བ། སྣའི་གཟེངས་མཐོ་བ་ཞིག་བཙས་སོ། །དེའི་ཉེ་དུ་དག་ལྷགས་ནས་ཉི་མ་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས། ཁྱེའུའི་མིང་འདོགས་པ་ན། འདི་ས་བོན་གྱི་ཆོས་ལ་བརྟེན་ནས་རྙེད་པས་ན་ས་བོན་པ་ཞེས་མིང་བཏགས་སོ། །ཁྱེའུ་དེ་མ་མ་བརྒྱད་ལ་གཏད་ནས། འོ་མ་དང༌། ཞོ་དང༌། མར་དང༌། ཞུན་མར་དང༌། མར་གྱི་ཉིང་ཁུ་དང༌། གཞན་ཡང༌། ཡོ་བྱད་ཀྱི་བྱེ་བྲག་གཙོ་བོ་དག་གིས་བསྲིངས་བསྐྱེད་ཅིང༌། རྫིང་ན་གནས་པའི་པད་མ་བཞིན་དུ་མྱུར་དུ་བསྐྱེད་དོ། །དེ་ཆེན་པོར་གྱུར་པའི་ཚེ་ཡི་གེ་དང༌། གྲངས་དང༌། རྩིས་དང༌། ལག་རྩིས་དང༌། དབྱུང་བ་དང༌། གཞུག་པ་དང༌། གཞག་པ་ལ་ཉེ་བར་ཞུགས་ནས་ཡི་གེའི་མཐར་ཕྱིན་ཅིང༌། འབྱེད་པ་དང༌། ཀློག་པ་དང༌། མཁས་པ་དང༌། སྤྱོད་པ་གསལ་བ་དང༌། བརྟག་པ་བརྒྱད་པོ་རིན་པོ་ཆེ་དང༌། གཞི་དང༌། གོས་དང༌། ཤིང་དང༌། གླང་པོ་ཆེ་དང༌། རྟ་དང༌། བུད་མེད་དང༌། སྐྱེས་པ་བརྟག་པ་ལ་མཁས་པར་གྱུར་ཏོ། །དེ་རེ་ཞིག་ན་དཀོན་མཆོག་གསུམ་ལ་དད་ནས་སྐྱབས་སུ་སོང༌། དེ་ཕ་ལས་བྱུང་བའི་དད་པ་སྔ་མ་དེ་ཉིད་རྗེས་སུ་སྤེལ་ཏེ། ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས། གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་པས། གང་གི་ཕྱིར་དུ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ཡང་དག་པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་མངོན་སུམ་དུ་བྱས་ཏེ་བསྒྲུབས་ནས། བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང༌། དགྲ་བཅོམ་པ་ཁམས་གསུམ་ལས་འདོད་ཆགས་དང་བྲལ་བ། གསེར་དང་བོང་བར་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་སྤངས་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང༌། རིག་པ་དང༌། མངོན་པར་ཤེས་པ་དང༌། སོ་སོ་ཡང་དག་པར་རིག་པ་ཐོབ་པ། སྲིད་པ་དང༌། འདོད་པའི་རྙེད་པ་དང༌། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པ་དང་རྗེད་(༧༧བ)པ་དང༌། མངོན་དུ་སྨྲ་བར་བྱ་བར་གྱུར་ཏོ། །
དེ་ནས་ས་བོན་པས་དགྲ་བཅོམ་པ་ཐོབ་ནས་ཚིགས་སུ་བཅད་པ་སྨྲས་པ། ཆོས་རྣམས་ལས་ནི་སྐལ་བ་ཐོབ། །ཡབ་ཀྱི་དཀོར་གྱིས་བདག་མི་སྟོང༌། །བདག་གིས་ཧ་ཅང་འཕྱི་ནས་ཤེས། །བདག་ནི་ཆུང་ངུས་ཤིན་ཏུ་འདས། །དེའི་ཚེ་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་དབུས་ན་བཞུགས་ཤིང་། ཉན་ཐོས་རྣམས་ལ་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །ཞེ་སྡང་འདོད་ཆགས་དང་བྲལ་བར་བྱ་བ་དང༌། གཏི་མུག་འདོད་ཆགས་དང་བྲལ་བར་བྱ་བའི་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །དེའི་ཚེ་བཟང་སྦྱིན་འཁོར་དེ་ཉིད་ན་འདུག་པ་འགྱོད་པ་དང༌། རྣམ་པར་འགྱོད་པ་དང༌། རབ་ཏུ་འགྱོད་པར་གྱུར་ཅིང༌། ཅང་མི་སྨྲ་བར་གྱུར། ཡུལ་ཡུལ་པོར་གྱུར། ཕྲག་པ་གློད། གདོང་སྨད། སྤོབས་པ་མེད། སེམས་ཁོང་དུ་ཆུད་ཅིང་འདུག་གོ །དེ་དགེ་སློང་དག་གིས་མཐོང་ནས། ཁྱོད་དེ་ལྟར་གྱུར་པ་ལས། ལུས་ཀྱི་གནོད་པའམ་སེམས་ཀྱི་གདུང་བ་མེད་དམ། བདག་ལ་ད་ལྟར་ལུས་ཀྱི་གནོད་པ་ནི་མེད་མོད། སེམས་ཀྱི་གདུང་བ་ནི་ཡོད་དོ། །ཁྱོད་ཀྱི་སེམས་ཀྱི་གདུང་བ་གང་ཡིན། དེས་རྒྱས་པར་བརྗོད་པ་དང༌། དེ་དག་དེ་ལ་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་པར། སྟོན་པའི་དྲུང་དུ་སོང་ནས་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་ནས་སྐབས་དེ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག །ཟག་པའི་གནས་ལྟ་བུའི་ཆོས་མང་པོ་རྣམས་ཀྱི་དང་པོ་ནི་བཟང་སྦྱིན་གྱིས་མི་ཚངས་པར་སྤྱོད་པའི་རྐྱེན་གྱིས་བྱས་པར་གྱུར་ཏོ། །
དེ་ནས། བྱུང་བ་འདི་དང༌། གླེང་གཞི་འདི་དང༌། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང༌། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་མི་རྨེད་པས་དོན་དང་མི་ལྡན་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་བཟང་སྦྱིན་ལ། (༧༨ན)བཟང་སྦྱིན། ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །སྟོན་པས། དགེ་སློང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །བཟང་སྦྱིན། ངས་འདོད་ཆགས་འདོད་ཆགས་དང་བྲལ་བ་དང༌། ཞེ་སྡང་འདོད་ཆགས་དང་བྲལ་བ་དང༌། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བའི་ཆོས་བསྟན་པ་ལ་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ་དུག་དྲག་པ། དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླ་ཡི། མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ། དུག་དྲག་པ། དུག་རྣོ་བའི་ཁར་རང་གི་ཡན་ལག་གི་རྣམ་པར་བཅུག་པར་གྱུར་པ་ནི་བླ་ཡི། དེ་ལྟར་གྱུར་པས་བུད་མེད་ཀྱི་ཡུལ་ལ་ནི་མ་ཡིན་ནོ་ཞེས་སྨད་ནས། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དགཔར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། དགེ་འདུན་བསྡུ་བའི་ཕྱིར་དང༌། དགེ་འདུན་ལེགས་པར་བྱ་བའི་ཕྱིར་དང༌། དགེ་འདུན་བདེ་བར་གནས་པར་བྱ་བའི་ཕྱིར་དང༌། གནོང་མི་བཀུར་བའི་གང་ཟག་རྣམས་ཚར་གཅད་པའི་ཕྱིར་དང༌། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང༌། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང༌། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང༌། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང༌། ཚེ་རབས་ཕྱི་མའི་ཟག་པ་རྣམས་བཟློག་པར་བྱ་བའི་ཕྱིར་དང༌། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའི་ཕྱིར་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས། བསླབ་པ་མ་ཕུལ། བསླབ་པ་ཉམས་པར་མ་བྱས་པར། མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བཅའ་བ་མཛད་དོ། །སྟོན་པ་རྒྱལ་པའི་ཁབ་ན་འོད་མའི་ཚལ་ཀ་ལན་ད་ཀའི་གནས་ནའོ། །དེའི་ཚེ་དགེ་སློང་ཞིག་རྒྱལ་པོའི་ཁབ་ན་དགོན་པའི་སྤྱིལ་བུ་ན་འདུག་གོ །དེས་དགོན་པའི་སྤྲ་མོ་ཞིག་ཟས་ཀྱིས་བརྔོད་ནས་དེ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏོ། །དེ་སན་དགེ་སློང་མང་པོ་གནས་ཉུལ་ཞིང་རྒྱུ་བ་ན། དེའི་སྤྱིལ་བུར་ཕྱིན་དེ་དང་ལྷན་ཅིག་གཏམ་སྣ་ཚོགས་བྱས་ཏེ་འཁོད་པ་དང༌། སྤྲ་མོ་དེ་དེར་འོངས་ཏེ་དགེ་སློང་དེའི་གདོང་དུ་ལྟ། རོ་སྨད་སྟོབ་པར་བྱེད་ནས། དེ་དེ་དག་ལ་ངོ་ཚ་བས་ལན་(༧༨)གསུམ་དུ་བཟློག་གོ །
དེ་ནས་སྤྲ་མོ་དེ་ཁྲོས་འཁྲུགས་བརྔམས་ཡིད་མི་དགའ་ནས། དགེ་སློང་དེའི་གདོང་དང་སྣ་དང་ཆོས་གོས་རྐང་པའི་སེན་མོས་བྲད་དེ་མཐའ་ཞིག་ཏུ་སོང་ནས་ངུ་རུ་རུ་ཟེར་ཞིང་ཁྱི་ཚུགས་སུ་འདུག་གོ །དགེ་སློང་དེ་དག་གིས། ཅིའི་ཕྱིར་འདི་ལྟར་བྱེད། དེས་བཤད་དོ། །འོ་ན། སྟོན་པས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། མི་ལ་བཀག་གི་དུད་འགྲོ་ལ་མ་བཀག་གོ །སྐབས་དེ་གསོལ་བ་དང༌། ངས་མི་ལའང་བཀག་ན་དུད་འགྲོ་ལྟ་ཅི་སྨོས་ཏེ། མི་གཏི་མུག་ཅན་དེ་ནི་ཕམ་པར་གྱུར་ཏོ། །དེ་ནས་བྱུང་བ་འདི་དང༌། གླེང་གཞི་འདི་དང༌། སྐབས་འདི་ལ་དགེ་འདུན་བསྡུ་བ་མཛད་ནས། དགེ་སློང༌། ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ། དུག་དྲག་པ། དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པ་སླ་ཡི། དུད་འགྲོའི་སྐྱེ་གནས་སུ་སྐྱེས་པ་ལ་ནི་མ་ཡིན་ནོ་ཞེས་རྣམ་གྲངས་དུ་མས་སྨད་ནས། སྔ་མ་ནི་བཅས་པ་ཡིན་ལ། འདི་ནི་རྗེས་སུ་བཅས་པ་སྟེ། ངའི་ཉན་ཐོས་རྣམས་ཀྱི་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས། བསླབ་པ་མ་ཕུལ། བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ནས། དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །
ཡང་དགེ་སློང་གང་ཞེས་བྱ་བ་ནི། དགེ་སློང་བཞི་པོ་མིང་གི་དགེ་སློང་དང༌། ཁས་འཆེ་བའི་དགེ་སློང་དང༌། སློང་བའི་དགེ་སློང་དང༌། ཉོན་མོངས་པ་བཅོམ་པའི་དགེ་སློང་ལས། མིང་གི་དགེ་སློང་ནི་གང་གི་མིང་དང༌། མིང་དུ་བརྗོད་པ་དང༌། ཚིག་གཉིས་པ་དང༌། ཚིག་བླ་དྭགས་དང༌། འདུ་ཤེས་དང༌། བོད་པ་དང༌། གདགས་པ་དང༌། ཐ་སྙད་དགེ་སློང་ཞེའམ། དགེ་སློང་གི་རིགས་ཞེའམ། དགེ་སློང་དང་འདྲ་བར་གྱུར་པའོ། །ཁས་འཆེ་བའི་དགེ་སློང་ནི་དགེ་སློང་མ་ཡིན་བཞིན་དུ་བདག་ཉིད་དགེ་སློང་དུ་ཁས་འཆེ་བར་བྱེད་པའོ། །སློང་བས་དགེ་སློང་ནི་སློང་མོ་སྤྱོད་པས་འཚོ་བའོ། །ཉོན་མོངས་པ་བཅོམ་པའི་དགེ་སློང་ནི་དགྲ་བཅོམ་པའོ། །དོན་འདིར་ནི་གསོལ་བ་དང་བཞིའི་ལས་མི་གཡོ་བ་གཞག་པར་མི་འོས་པས་བསྙེན་པར་རྫོགས་པ་དེ་དགེ་སློང་དུ་དགོངས་སོ། །དགེ་སློང་རྣམས་དང་ལྷན་ཅིག་ཅེས་བྱ་བ་ནི་ཚངས་པ་མཚུངས་པར་སྤྱོད་པ་རྣམས་དང་ངོ༌། །བསླབ་པ་མཚུངས་པར་གྱུར་པས་ཞེས་བྱ་བ་ནི། བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་དེང་བསྙེན་པར་རྫོགས་(༧༩ན)པས་ཀྱང་ངོ་། །དེང་བསྙེན་པར་རྫོགས་པས་གང་ལ་བསླབ་པར་བྱ་བ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་ངོ་ཞེས་འདི་ལ་ཚུལ་ཁྲིམས་དང༌། བསླབ་པ་དང༌། སོ་སོ་ཐར་པའི་མདོ་འདོན་པ་ཉིད་ཀྱིས་མཉམ་པའོ། །བསླབ་པ་མ་ཕུལ་ཞེས་བྱ་བ་ལ་ཇི་ཙམ་གྱིས་བསླབ་པ་ཕུལ་བ་ཡིན་ཞེ་ན། དགེ་སློང་ཁྲོ་བས་ཟིལ་གྱིས་ནོན་པ་དང༌། སྨྱོས་པ་དང༌། སེམས་འཁྲུགས་པ་དང༌། ཚོར་བས་ཉེན་པས་བསླབ་པ་ཕུལ་ན་བསླབ་པ་མ་ཕུལ་བར་བརྗོད་པར་བྱའོ། །དེ་དག་ལ་མ་ཡིན་ནོ། །གླེན་པ་དང༌། ལྐུགས་པ་དང༌། འོན་པ་ལ་མ་ཡིན། དབེན་པར་མ་ཡིན། དབེན་པ་ལ་དབེན་པ་དང༌། མི་དབེན་པར་འདུ་ཤེས་པས་མ་ཡིན། དབུས་པས་མཐའ་འཁོབ་པའི་ཚིག་གིས་དབུས་པ་ལ་དང༌། མཐའ་འཁོབ་པས་དབུས་པའི་ཚིག་གིས་མཐའ་འཁོབ་པ་ལ་དང༌། མཐའ་འཁོབ་པས་མཐའ་འཁོབ་པའི་ཚིག་གིས་དབུས་པ་ལ་དང༌། དབུས་པས་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་ལམ་ཤེས་པ་ལ་མ་ཡིན། གཉིད་ལོག་པ་དང༌། སྙོམས་པར་ཞུགས་པ་དང༌། ལྷ་དང༌། སྤྲུལ་པ་དང༌། དུད་འགྲོ་དང༌། གཟུགས་བརྙན་ལ་མ་ཡིན། ཀླག་ཅོར་ཅན་གྱིས་ཀླག་ཅོར་ཅན་ལ་མ་ཡིན། གཏོང་སེམས་མེད་པ་དང༌། དགེ་སྦྱོང་གི་ཚུལ་འདོད་པ་དང༌། ཁྱིམ་ན་གནས་པ་མི་འདོད་པ་དང༌། མི་རང་བཞིན་དུ་གནས་པ་ཤེས་པ་འགའ་ལའང་རྣམ་པར་རིག་པར་མི་བྱེད་ན་བསླབ་པ་མ་ཕུལ་བའོ། །བསླབ་པ་ཉམས་པར་མ་བྱས་ཞེས་བྱ་བ་ནི། བསླབ་པ་ཕུལ་ཉམས་ལ་མུ་བཞི་སྟེ། ཕུལ་ལ་ཉམས་པར་མ་བྱས་པ་ནི། འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང༌། དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། རྨུས་བྱུང་བའམ། ཐེ་ཚོམ་ཟ་བའམ། དགེ་སྦྱོང་གི་ཚུལ་གཏོང་འདོད་པ་ན། དགེ་སློང་གི་དྲུང་དུ་སོང་སྟེ། ཚེ་དང་ལྡན་པ། དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་དབུལ་ལོ། །སངས་རྒྱས་དང༌། ཆོས་དང༌། དགེ་འདུན་དང༌། མདོ་སྡེ་དང༌། འདུལ་བ་དང༌། མ་མོ་དང༌། མཁན་པོ་དང༌། སློབ་དཔོན་དབུལ་ལོ། །བདག་ཁྱིམ་པའམ། དགེ་ཚུལ་ལམ། ཟ་མའམ། མ་ནིང་ངམ། དགེ་སློང་མ་སུན་ཕྱུང་བའམ། མ་བསད་པའམ། ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། རྐུ་ཐབས་སུ་གནས་པའམ། ཐ་དད་དུ་གནས་པའམ། གནས་པར་མི་བྱ་བར་གཟུང་དུ་གསོལ་ཞེའམ། བདག་ཚངས་པ་མཚུངས་པར་སྤྱོད་པ་ཁྱེད་ཅག་དང་ལྷན་ཅིག་(༧༩)གནས་པས་ཆོག་གོ་ཞེས་ཟེར་བའོ། །བསླབ་པ་ཉམས་པར་བྱས་ལ་མ་ཕུལ་བ་ནི། གཏོང་འདོད་པ་ན་དགེ་སློང་གི་དྲུང་དུ་སོང་སྟེ། ཚེ་དང་ལྡན་པ། མཁྱེན་པར་མཛོད་ཅིག །ཚངས་པ་སྤྱོད་པ་སྤྱད་དཀའོ། །རབ་ཏུ་དབེན་པ་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་དཀའ་འོ། །གནས་མལ་དགོན་པ་དང༌། ནགས་ཁྲོད་དང༌། རི་དྲུང་དང༌། བས་མཐར་གནས་པ་ཁོང་དུ་ཆུད་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཕ་མ་དང༌། ཕུ་ནུ་དང༌། བུ་སྲིང་དྲན་ནོ། །བདག་བཟོ་སློབ་ཏུ་ཆུག་ཅིག །བདག་གི་ལས་ཀྱི་མཐའ་སྩོལ་ཅིག །བདག་ཁྱིམ་བཟང་པོ་དག་ཏུ་གཏོད་ཅིག་ཅེས་ཟེར་ལ། བསླབ་པ་དབུལ་ལོ་ཞེས་སོགས་མི་ཟེར་བའོ། །
ཕུལ་ཉམས་གཉིས་ཀ་ཡིན་པ་ནི། གཏོང་འདོད་པས། ཚངས་པར་སྤྱོད་པ་སྤྱད་དཀའ་འོ་ཞེས་སོགས་ཀྱང་ཟེར་ལ། བསླབ་པ་དབུལ་ལོ་ཞེས་སོགས་ཀྱང་ཟེར་བའོ། །ཕུལ་ཉམས་གཉིས་ཀ་མ་ཡིན་པ་ནི། དེ་དག་མ་གཏོགས་པའོ། །མི་ཚངས་པར་སྤྱོད་པ་ན་གཉིས་ཀྱིས་གཉིས་སྤྲོད་པའོ། །དེ་ཉིད་འཁྲིག་པའི་ཆོས་སོ། །བསྟེན་པ་ནི་སྤྱད་པའོ། །ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། སྤྲ་མོའམ་དེ་དང་འདྲ་བར་རོ། །དགེ་སློང་ཞེས་བྱ་བ་ནི་བསྙེན་པར་རྫོགས་པ་དགེ་སློང་གི་དངོས་པོ་ཡོད་པའོ། །དེ་ཕམ་པར་གྱུར་པ་ཡིན་གྱིས་ཞེས་བྱ་བ་ནི་དེ་མཐར་གྱུར་པ་ལ་སོགས་པའོ། །ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང༌། ཤཱཀྱའི་སྲས་ཀྱིར་མི་རུང༌། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན། ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །གནས་པར་མི་བྱའོ་ཞེས་བྱ་བ་ནི། དགེ་སློང་རྣམས་ཀྱིས་དེ་དང་གསོ་སྦྱོང་དང༌། དགག་དབྱེ་དང༌། གསོལ་བ་དང༌། གསོལ་བ་དང་གཉིས་དང༌། གསོལ་བ་དང་བཞིའི་ལས་ལ་གནས་པར་མི་བྱའོ། །དེ་ལ་ལྟུང་བ་ཅིར་འགྱུར་ན། བཅུག་རེག་ཉམས་སུ་མྱོང་བར་བྱས་ནའོ། །ཟག་བྱེད་དོ། །དེར་རོ། །མ་ཉམས་པར་རོ། །ཁའམ་བཤང་བའི་ལམ་དུའོ་ཞེས་སོགས་གསུངས་སོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས། བུ་བྱི་ལ་ལྟར་རྒྱབ་མཉེན་པ་ཞིག་བཙས་པས། མིང་རྒྱབ་མཉེན་ཞེས་བཏགས་ཏེ་ཆེན་པོར་གྱུར་པའི་ཚེ་རབ་ཏུ་བྱུང་ནས། དེ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ཏེ། ལུས་མ་བསྲུངས། དབང་པོ་མ་བསྡམས། དྲན་པ་ཉེ་བར་མ་བཞག་པར། བསོད་སྙོམས་ལ་བརྒྱུས་ནས། ཟས་ཀྱི་བྱ་བ་བྱས་ཏེ། ལྷུང་(༨༠ན)བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་ནང་དུ་ཡང་དག་འཇོག་ལ་ཞུགས་སོ། །དེ་འདོད་ཆགས་ཀྱིས་དཀྲིས་པས་རང་གི་ཡན་ལག་གི་རྣམ་པ་ཁར་བཅུག་ནས་རྩོལ་བར་བྱེད་པ་དགེ་སློང་དག་གིས་མཐོང་ནས། ཚེ་དང་ལྡན་པ། ཅི་བྱེད། རེག་པ་བདག་གིར་བྱེད་དོ། །འོན་ན་སྟོན་པས་མ་བཀག་གམ། གཞན་གྱི་ལ་བཀག་གི །རང་གི་ལ་མ་བཀག་གོ །སྐབས་དེ་གསོལ་བ་དང༌། དགེ་སློང་དག །ངས་གཞན་གྱི་ལའང་བཀག་ན་རང་གི་ལ་ལྟ་ཅི་སྨོས། རང་གི་བསྟེན་པར་བྱ་བ་བཅུག་ན་ཕམ་པར་འགྱུར་རོ། །
མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས། ཁྱེའུ་ཡན་ལག་གི་རྣམ་པ་ཤིན་ཏུ་ཚད་ལས་འདས་པ་ཞིག་བཙས་པས་མིང་འཕྱང་བ་ཅན་ཞེས་བཏགས་སོ། །དེ་ཆེན་པོར་གྱུར་པའི་ཚེ་རབ་ཏུ་བྱུང་ནས་འདོད་ཆགས་ཀྱིས་ཀུན་ནས་དཀྲིས་པས་ཡན་ལག་གི་རྣམ་པར་རང་གི་བཤང་ལམ་དུ་བཅུག་སྟེ་རྩོལ་བར་བྱེད་པ་དགེ་སློང་དག་གིས་མཐོང་ནས། ཚེ་དང་ལྡན་པ། ཅི་བྱེད། རེག་པ་བདག་གིར་བྱེད་དོ། །སྟོན་པས་མ་བཀག་གམ། །གཞན་གྱི་ལ་བཀག་གི །རང་གི་ལ་མ་ཡིན་ནོ། །སྐབས་དེ་གསོལ་བ་དང༌། དགེ་སློང་དག །ངས་གཞན་གྱི་ལའང་བཀག་ན། རང་གི་ལ་ལྟ་ཅི་སྨོས། རང་གི་བསྟེན་པར་བྱ་བ་བཤང་ལམ་དུ་བཅུག་ནས་རྩོལ་བར་བྱེད་ན་ཕམ་པར་འགྱུར་རོ། །སྟོན་པ་མཉན་ཡོད་ནའོ། །འཕགས་རྒྱལ་ན་དེད་དཔོན་དགའ་བོ་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དང་དགའ་མགུར་སྤྱོད་ལ། དེ་ལ་བུ་དང་བུ་མོ་མེད་ཅིང༌། བུ་འདོད་པས་ལྷ་ལ་གསོལ་བ་འདེབས་སོ། །འཇིག་རྟེན་ན་ལྷ་ལ་གསོལ་བ་བཏབ་པས་བུ་སྐྱེའོ་ཞེས་བྱ་བའི་གཏམ་ཡོད་ཀྱང་དེ་ལྟ་མ་ཡིན་ཏེ། དེ་ལྟར་གྱུར་ན་རེ་རེ་ལའང་འཁོར་ལོས་སྒྱུར་པའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །
གནས་གསུམ་མངོན་དུ་གྱུར་པ་ལས་བུ་སྐྱེ་བར་འགྱུར་ཏེ། ཕ་མ་ཆགས་ཤིང་འདུས་པ་དང༌། མ་དུས་ལ་བབ་ཅིང་ཟླ་མཚན་དང་ལྡན་པ་དང༌། དྲི་ཟ་ཉེ་བར་གནས་པའོ། །དེ་དེ་ལྟར་གསོལ་བ་འདེབས་པ་ན། སེམས་ཅན་ཞིག་ཀྱང་ལྷའི་རིས་ནས་ཤི་འཕོས་ཏེ། དེའི་སྐྱེ་དགུའི་བདག་མོའི་མངལ་དུ་ཞུགས་སོ། །བུད་མེད་མཁས་པ་ལ། མ་འདྲེས་པའི་ཆོས་ལྔ་ཡོད་པས། ཁྱེའུར་འགྱུར་བ་ཤེས་ནས་ཁྱིམ་བདག་ལ་སྨྲས་པ། རྗེའི་སྲས། བདག་ལ་སེམས་ཅན་ཞུགས་པ་ནི་བདག་གི་དཀུ་གཡས་པར་བརྟེན་པས་ངེས་པར་ཁྱེའུར་འགྱུར་གྱིས་དགྱེས་པ་བསྐྱེད་དུ་གསོལ། (༨༠བ)དེ་ཡང་ཡིད་དགའ་ནས་རོ་སྟོད་བསྲངས། ལག་པ་བརྐྱང་ནས་འདི་སྐད་ཅེས། ཁོ་བོ་ཡུན་རིང་པོ་ནས་འདོད་པའི་བུའི་ངོ་མཐོང་བ་དང་ཞེས་སོགས་ནས། མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་དོ། །དེ་ལ་སེམས་ཅན་ཞུགས་པར་རིག་ནས་ལེགས་པར་བསྐྱངས་པས་ཟླ་བ་བརྒྱད་དམ་དགུ་འདས་པ་ན། ཁྱེའུ་གཟུགས་བཟང་བ་ཞིག་བཙས་སོ། །དེའི་ཉེ་དུ་རྣམས་ལྷགས་ནས་ཉི་མ་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས། མིང་འདོགས་པ་ན། ཡུལ་དབུས་ནས་གང་གཟུགས་བཟང་བ། ལྟ་ན་སྡུག་པ། མཛེས་པ་དེ་ལ་མཛེས་པ་ཞེས་དཔྱོད་ལ། ཁྱེའུ་དེ་ཡང་གཟུགས་བཟང་བ། ལྟ་ན་སྡུག་པ་དང་མཛེས་པ་ཡིན་ཞིང༌། དེད་དཔོན་དགའ་བོའི་བུ་ཡིན་པས། དེའི་མིང་མཛེས་དགའ་ཞེས་བཏགས་སོ། །དེ་མ་མ་བརྒྱད་ལ་གཏད་ནས་བསྲིངས་བསྐྱེད་དེ་ཆེན་པོར་གྱུར་པའི་ཚེ། ཡི་གེའི་མཐར་ཕྱིན་ཅིང༌། འབྱེད་པ་དང༌། ཀློག་པ་དང༌། མཁས་པ་དང༌། སྤྱོད་པ་གསལ་བ་དང༌། བརྟག་པ་བརྒྱད་ལ་མཁས་པར་གྱུར་ཏོ། །ཕས་དེའི་ཆུང་མའི་འཁོར་རབ་འབྲིང་ཐ་གསུམ་བཞག །དགུན་དཔྱིད་དབྱར་གསུམ་གྱི་གནས་གསུམ་བྱེད་དུ་བཅུག་གོ །དེ་སྟེང་གི་ཁང་བཟང་གི་གཞི་ན་སྐྱེས་པ་མེད་པར་སིལ་སྙན་གྱིས་རྩེ་བར་བྱེད་དོ། །དེད་དཔོན་དགའ་བོ་རྟག་ཏུ་རྩིས་ལ་ཆགས་ཤིང་འདུ་འགོད་སྦྱོང་བ་ལ། མཛེས་དགས། ཡབ། ཅིའི་ཕྱིར་རྩིས་ལ་ཆགས། བུ། རྩེ་བས་ནོར་སྒྲུབ་ནུས་སམ། ངས་ཁྱིམ་གྱི་བྱ་བ་ལོས་ཀྱང་བསམ་དགོས་སོ། །དོན་གྱིས་ཕས་བདག་ལ་བསྐུལ་ལོ་སྙམ་ནས། ཡབ། གལ་ཏེ་གནང་ན་ཡུལ་གཞན་དུ་ནོར་སྒྲུབ་ཏུ་མཆིའོ། །བུ། ནོར་མང་པོ་ཡོད་ན་ཅིའི་ཕྱིར་ཡུལ་གཞན་དུ་འགྲོ་འདུག་བྱེད། ཡབ། ངན་བུ་ངེས་པར་མཆིའོ། །དགའ་བོས་ལྡེ་མིག་བླངས་ཏེ། དབྱིག་དང་གསེར་བྱས་པ་དང་མ་བྱས་པའི་མཛོད་གང་བ་བདུན་བསྟན་ནས། བུ། ནོར་འདི་སྙེད་ཡོད་ཀྱིས་འདུག་ལ། འདོད་པ་ལ་ལོངས་སྤྱོད། སྦྱིན་པའང་བྱིན། བསོད་ནམས་དག་ཀྱང་གྱིས་ཤིག །ཡབ་བདག་ལ་སྟོན་པ་བཞིན་བདག་གིས་བུ་ལ་ཅི་ཞིག་བསྟན་ཞེས་སྨྲས་པས། དེ་དགའ་སྟེ། ལེགས་སོ་ཞེས་སྨྲས་ནས་དྲི་བསྒྲགས་ཏེ། མཛེས་དགའ་ཡུལ་གཞན་དུ་འགྲོ་ཡིས། ཁྱེད་ཅན་ལས་མཛེས་དགའ་དང་ལྷན་ཅིག་ཤོ་གམ་དང༌། ལ་གཅན་དང༌། གྲུ་བཙས་པ་མེད་པར་ཡུལ་གཞན་དུ་འགྲོ་བར་འདོད་པས་ཟོང་སྡོགས་ཤིག །ཚོང་པ་ལྔ་བརྒྱ་ཆས་པ་ན། དེ་དག་མགྲོན་དུ་བོས་ནས། མཛེས་དགའ་འདི་ཁོ་བོའི་བུ་ཡིན་པ་བཞིན་དུ་ཁྱེད་ཀྱིའང་ཡིན་གྱིས། ཚོང་པ་ཡུལ་གཞན་དུ་དོང་བའི་བར་ཆད་གསུམ་པོ་རྒྱན་པོ་དང༌། འཇུད་མཐུན་མ་དང༌། ཆང་གི་གནས་གསུམ་ལས་ལྡོག་ཅིང༌། ཕན་པ་ལ་སྦྱར་བར་བྱའོ། །མཛེས་དགའ་ལའང༌། (༨༡ན)འདི་དག་གི་ཚིག་དད་པས་ཉོན་ཅིག །ཡབ། བཀའ་བཞིན་འཚལ་ཞེས་དགེ་མཚན་དང༌། བཀྲ་ཤིས་དང༌། བདེ་ལེགས་སུ་འགྱུར་བ་དག་བྱས་ཏེ་ཟོང་མང་པོ་བླངས་ནས་ཚོང་པ་ལྔ་བརྒྱ་དང་ལྷན་ཅིག་ཡུལ་གཞན་དུ་འཕགས་སོ། །
དེ་མཐར་གྱིས་མཉན་ཡོད་དུ་ཕྱིན་པ་དང༌། དེ་སྨད་འཚོང་མ་བཟང་མོས་ཐོས་ཏེ། བདག་གིས་དེའི་ཟོང་ཐམས་ཅད་མ་ཕྲོགས་ན་བཟང་མོ་ཞེས་བྱ་བའི་མིང་མི་གཟུང་ངོ་སྙམས་ནས། དེས་བུ་མོ་མངག་གཞུག་མ་ལ། དེད་དཔོན་མཛེས་དགའ་འབྱོར་པ་རྒྱ་ཆེན་པོ་དང་ལྡན་པས་ཟོང་ཁྱེར་ཏེ་འོངས་ནས་མཛོད་ཆེ་གེ་མོ་ན་འདུག་གིས། དྲི་དང་ཕྲེང་བའི་རྒྱུ་ཐོགས་ཏེ། དེའི་དྲུང་དུ་སོང་ལ། ཇོ་མོ་བཟང་མོ་ཁྱོད་ཀྱི་ཞབས་ལ་ཕྱག་འཚལ་ཞིང༌། རྗེའི་སྲས་ཀྱིས་ཅིའི་སླད་དུ་རང་གི་ཕོ་བྲང་སྤངས་ཏེ། མི་ཕལ་པ་བཞིན་དུ་མཛོད་ན་བཞུགས། འདི་ནི་ཁྱོད་ཀྱི་ཕོ་བྲང་ལགས་ཀྱིས་ཚུར་སྤྱོན་ཅིག་ཅེས་ཀྱང་མཆིའོ་གྱིས་ཤིག །དེས་དེ་བཞིན་དུ་བྱས་པ་དང༌། མཛེས་དགས་སྨྲས་པ། བུ་མོ་སོང་ཞིག །ཁོ་བོ་དྲི་དང་ཕྲེང་བའི་རྒྱུ་འདི་བཏགས་ཏེ་འོང་ངོ༌། །དེ་ནས་བུ་མོ་དེས་བཟང་མོ་ལ་བསྙད་དོ། །བཟང་མོས་དེ་ཐོས་ནས་དགའ་བ་དང་ཡིད་བདེ་བ་སྐྱེས་ཏེ། ཁྱིམ་བྱི་དོར་བྱེད་དུ་བཅུག་ནས་མེ་ཏོག་སྣ་ཚོགས་བཀྲམ། བདུག་སྤོས་དྲི་ཞིམ་པོས་བདུགས་ཏེ། བླ་རེ་བྲེས་པ་དང་བཅས་པའི་མལ་བཤམས་ནས། མཛེས་དགའི་ཕྱིར་སྡོད་དོ། །མཛེས་དགའ་ཡང་དྲི་དང་རྒྱན་གྱིས་བཀླུབས་ཏེ་བཞོན་པ་ལ་ཞོན་ནས། ཁྱེའུ་མངག་གཞུག་པས་ཡོངས་སུ་བསྐོར་ཏེ། ལང་ཚོའི་གཟུགས་མཆོག་ཏུ་སྡུག་པས་མཛེས་ཤིང༌། བཟང་མོའི་གནས་སུ་སོང་བ་དང༌། བཟང་མོས་མཐོང་ནས། བྲན་མོ་ལ། འདི་མཛེས་དགའ་ཡིན་ནམ། ལགས་སོ། །
དེ་དགའ་ནས་སྨྲས་པ། རིགས་སྐྱེས་རིགས་མིན་སྐྱེས་པའམ། །ནོར་ཉམས་ནོར་གྱིས་འབྱོར་བའང་རུང༌། །གཟུགས་ཀྱིས་ཕྱུག་པ་མཐོང་བས་ནི། །བུད་མེད་རྣམས་ཀྱི་ཡིད་འཕྲོག་བྱེད། །མཛེས་དགའ་བཟང་མོའི་ཁྱིམ་དུ་ཞུགས་པ་དང༌། དེས་མྱུར་བར་ཁང་ཐོག་ནས་བབས་ཏེ། བསུ་ནས་ཡན་ལག་ཐམས་ཅད་ཀྱིས་འཁྱུད་དེ་ཁྱིམ་དུ་ཁྲིད་ནས་བུད་མེད་ཀྱི་ཁྲི་ལ་བཞག་སྟེ། རྗེའི་སྲས་ཀྱི་མཚན་ཅི། མཛེས་དགའ་འོ། །ཨེ་མ་ཁྱོད་ཀྱི་མཚན་ནི་གཟུགས་དང་འདྲ་ལ། གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་གྱིས་ཁྱོད་ཀྱི་མཚན་མཛེས་དགའ་ཞེས་གསོལ་བར་འགྱུར་རོ། །དེས་སྨྲས་པ། ཁྱོད་ཀྱི་མཚན་ཅི། བཟང་མོའོ། །ཨེ་མ་ཁྱོད་ཀྱི་མཚན་ནི་གཟུགས་དང་འདྲ་དང༌། གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་གྱིས་ཁྱོད་ཀྱི་མཚན་བཟང་མོ་ཞེས་མ་གསོལ་ན། དེང་བདག་གིས་ཁྱོད་ཀྱི་མཚན་(༨༡བ)བཟང་མོ་ཞེས་གསོལ་བར་འགྱུར་རོ། །
མཛེས་དགས་སྨྲས་པ། དགུང་གཅིག་གི་གླ་ཇི་ཅི་ཙམ། ཀརྵ་པ་ཎ་ལྔ་བརྒྱའོ། །ནུབ་རེ་བཞིན་ཀརྵ་པ་ཎ་ལྔ་བརྒྱ་བྱིན་ནས་དགའ་མགུར་སྤྱད་དོ། །འདོད་པ་དག་ནི་བསྟེན་པ་ན་ངོམས་པ་མེད་པས། དེ་ཉི་མ་མང་པོ་འདས་ཀྱང་ངོམས་པར་མ་གྱུར་ཏོ། །ཚོང་པ་དག་གིས་སྨྲས་པ། མཛེས་དགའ་མི་སྣང་ན། དེ་བདག་ཅག་ལ་གྲོགས་པོས་གཏད་པས་བཙལ་བར་བྱའོ། །དེའི་གཡོག་ལ། དེད་དཔོན་གར་བཞུད། མཉན་ཡོད་དུ་ཕྱིན་པའི་ཉི་མ་དེ་ཉིད་ལ་སྨན་འཚོང་མའི་ཁྱིམ་དུ་ཞུགས་ནས་འདུག་ན་ཁྱེད་ཅག་གིས་ད་དྲན་ནམ། ཡུ་བུ་ཅག་གིས་མཛེས་དགའ་ཡལ་བར་བོར་བ་ནི་མ་ལེགས་ཏེ་འདིའི་ཕས་ཀླན་ཀར་འགྱུར་རོ། །ཚོང་པ་དག་གིས་མཛེས་དགའ་ལ་བང་ཆེན་བཏང་ནས་མཛེས་དགས་འབྱུང་བར་བརྩམས་པ་དང༌། བཟང་མོས་གོས་ནས་བཟུང་སྟེ། ཁྱོད་གཟུགས་བཟང་བ་དང་ལང་ཚོ་བབ་པ་ལགས་ན། གཞོན་པའི་སྐབས་སུ་རྩེ་བ་དང་དགའ་མགུར་སྤྱོད་ལ་བགྲེས་པའི་སྐབས་སུ་ནོར་སྒྲུབས་མཛོད། མཛེས་དགས་བང་ཆེན་དེ་ལ། ཁྱོད་སོང་ཞིག་དང་འོང་ངོ༌། །དེ་སོང་ནས་ཚོང་པ་རྣམས་ལ་སྨྲས་པ། དེད་དཔོན་གྱི་ཞལ་ནས། སོང་ཞིག་དང་འོང་ངོ་ཞེས་གསུངས་སོ། །དེ་དག་འདུས་ནས་སྡོད་པ་ན་མཛེས་དགའ་ཐོགས་ནས། དེ་དག་གིས་འཇུད་མཐུན་མའི་ཁྱིམ་དུ་སོང་སྟེ་སྒོར་བསྡད་ནས། ཚོང་པ་རྣམས་སྒོ་ན་སྡོད་ཅིང་དེད་དཔོན་བལྟ་བར་འཚལ་ལོ་ཞེས་བྱས་པ་ན་མཛེས་དགའ་འབྱུང་བར་བརྩམས་པ་དང༌། ཡང་བཟང་མོས་གོས་ཀྱི་མཐའ་ནས་བཟུང་སྟེ། རྗེའི་སྲས། ཚོང་པ་དེ་དག་ཀྱང་བདག་དང་ལྷན་ཅིག་དགའ་མགུར་སྤྱོད་འཚལ་ཏེ་དེ་ག་ལ་རུང་བཞུགས་ཤིག །མཛེས་དགའ་མ་འོངས་པ་དང༌། ཚོང་པ་དག་གིས་སྨྲས་པ། དེ་བྱ་བ་མ་ཡིན་པ་ལ་ཞུགས་ཀྱིས་འདོང་ངོ་ཞེས་ཟོང་བསྒྱུར་ཏེ་སོང་ངོ༌། །དེ་ནས་ཀརྵ་པ་ཎ་ཟད་པ་ན། དེ་དེ་དང་ཉི་མ་གཉིས་གསུམ་དགའ་མགུར་སྤྱད་ནས། བདག་ལ་ཞིང་དང་ལས་ཀྱི་མཐའ་བགྱིད་པ་དང༌། ཟོང་མནོས་ཏེ་ཡུལ་གཞན་དུ་མཆི་བ་དག་ཀྱང་མ་མཆིས་ཏེ། ཁྱོད་ལྟ་བུའི་དྲུང་ནས་གང་ཐོབ་པ་དེས་བདག་འཚོ་བས་ཡང་ན་ཀརྵ་པ་ཎ་སྩོལ་ཅིག །ཡང་ན་སྐྱེས་པ་གཞན་གྱི་སྐབས་ཕྱེ་ཞིག །བཟང་མོ། ཁྱོད་ལ་སྡུག་པ་འགའ་ཡང་མེད་དམ། རྗེའི་སྲས། ཁྱོད་ཀྱིས། ཚོགས་ཅན་རྣམས་ལ་སྡུག་བསྔལ་མེད། །དེ་དག་རང་བཞིན་རིང་མི་གནས། །བྱ་རྣམས་འབྲས་མེད་ལྗོན་པ་བཞིན། །དེ་དག་རྙིང་པ་རྣམ་པར་སྤོང༌། །ཞེས་བྱ་བ་མ་གསན་ནམ། བཟང་མོ། ཁྱོད་ལ་ནོར་སྦྱིན་གྱི་བར་དུ་སྐྱེས་པའི་དབང་དུ་འགྱུར་རམ། ཇི་སྲིད་བརྒྱ་བྱིན་ཆར་འབེབས་པ། །དེ་སྲིད་རི་ཀླུངས་ཆུ་འབེབས་ལྟར། །ཇི་སྲིད་ནོར་ནི་སྦྱིན་བྱེད་པ། །དེ་སྲིད་འཇུད་མཐུན་སྐྱེས་བུ་དབང༌། །(༨༢ན)ཞེས་བྱ་བ་མ་གསན་ནམ། བཟང་མོ། ཁྱོད་སུ་ལའང་ཡིད་མི་འབེབས་སམ། རྗེའི་སྲས། ཁྱོད་ཀྱིས། འཇུད་མཐུན་དགོང་ཀར་རང་ལུས་བཞིན། །གཅུགས་དང་གཏམ་གྱིས་དགའ་བར་བྱེད། །དེ་ནས་ནམ་ཕྱེད་དབུས་གནས་ཤིང༌། །ནམ་ལངས་ཕན་ཆད་རྩྭ་བཞིན་སྤོང༌། །ཞེས་བྱ་བ་མ་གསན་ནམ། །བཟང་མོ། ཁྱོད་ནོར་དང་བཅས་པའི་མི་དག་ལ་སྤྱོད་དམ། རྗེའི་སྲས། ཁྱོད་ཀྱིས། ནོར་དང་བཅས་པའི་མི་དག་དང༌། །ནོར་མ་བཅས་པ་རྣམས་ལ་ཡང༌། །སར་བའི་རྩྭ་ལ་བ་ལང་བཞིན། །བདག་ཅག་རྣམས་ཀྱིས་སྤྱད་པར་བྱ། །ཞེས་བྱ་བ་མ་གསན་ནམ། དེ་འབྱུང་བར་བརྩམས་པ་དང༌། བཟང་མོས་བསམས་པ། འདི་གཟུགས་བཟང་བ་ཡིན་པས་གཞན་ཀརྵ་པ་ཎ་ཐོགས་ཏེ་མི་འོང་བ་དེ་སྲིད་དུ་འདི་དང་ལྷན་ཅིག་རྩེ་བར་བྱའོ་སྙམ་ནས། བདག་གིས་བཞད་གད་བགྱིས་པ་ལགས་ཀྱིས་མ་བཞུད་ཅིག །དེ་འདུག་པ་དང༌། སྐྱེས་པ་གཞན་ཞིག་ཀརྵ་པ་ཎ་ལྔ་བརྒྱ་ཐོགས་ཏེ་འོངས་པ་དང༌། བཟང་མོས་མཛེས་དགའ་ཉིད་ཀྱི་མདུན་དུ་ཡོལ་བས་བཅད་དེ་དེ་དང་དགའ་མགུར་སྤྱད་པས། མཛེས་དགས་དེ་རིག་ནས་སོང་ངོ༌། །དེ་ལམ་ལ་མི་མཁས་པས་གང་དུ་འགྲོ་མ་ཤེས་པར་དགེ་སློང་ཞིག་བསོད་སྙོམས་བརྒྱུས་ནས་ཕྱིར་བྱུང་བ་དེའི་ཕྱི་བཞིན་དུ་སོང་ནས། དགེ་སློང་དེ་ཟས་ཀྱི་བྱ་བ་བྱེད་པའི་མདུན་ན་འགྲེང་ངོ༌། །དེས་དེ་ལ། ད་ལྷུང་བཟེད་ཀྱི་ལྷག་མ་འཚལ་ལམ། འཚལ་ལོ། །དེས་བྱིན་ནས་ཟོས་སོ། །ཁྱོད་ག་ལས་འོངས། བདག་ཡུལ་སྲུང་བྱེད་ཀྱི་གྲོང་ཁྱེར་འཕགས་རྒྱལ་ན་དེད་དཔོན་དགའ་བོའི་བུ་མཛེས་དགའ་ལགས་ཏེ། ཟོང་མང་པོ་འཚལ་ཏེ་མཆིས་པ་ལས་འཇུད་མཐུན་མས་གནོད་པ་བགྱིས་སོ། །ཅིའི་ཕྱིར་རབ་ཏུ་མི་འབྱུང༌། མཛེས་དགས། བདག་འཕགས་རྒྱལ་དུ་སོང་ན་མཆིལ་མ་ས་ལ་མི་ལྟུང་བར་བདག་ཁོ་ནའི་སྟེང་དུ་འབབ་བོ་སྙམ་ནས། བདག་རབ་ཏུ་འབྱུང་ངོ༌། །
དེས་དེ་རབ་ཏུ་ཕྱུང༌། བསྙེན་པར་རྫོགས་པར་བྱས་ཏེ། ཉི་མ་གཉིས་གསུམ་དུ་ཀུན་ཏུ་སྤྱོད་པའི་ཆོས་བསླབས་ནས། བཞིན་བཟང༌། རི་དྭགས་ཀྱིས་རི་དྭགས་མི་སོས་ཀྱི། མཉན་ཡོད་རྒྱ་ཆེ་ལ་རང་དང་ཡབ་ཀྱི་ཡུལ་ཡིན་གྱིས། བསོད་སྙོམས་ཀྱིས་འཚོ་བར་གྱིས་ཤིག །དེ་མཉན་ཡོད་དུ་བསོད་སྙོམས་ལ་ཞུགས་སོ། །བཟང་མོའང་འགྱོད་དེ། བདག་གིས་ཀརྵ་པ་ཎ་འདོད་པས། མཛེས་དགའ་མཛེས་ཤིང་ལང་ཚོ་དར་ལ་བབ་པ་དེ་བསྐྲད་པ་མ་ལེགས་སོ་སྙམ་ནས། བྲན་མོ་ལ། དེ་མཐོང་ན་ཡང་འཇུག་ཏུ་ཆུག་ཅིག །མཛེས་དགའ་སྤྱོད་ཡུལ་ལ་མི་མཁས་པས་འཇུད་མཐུན་མའི་ཁྱིམ་དེ་ཉིད་དུ་ཕྱིན་པ་དང༌། བྲན་མོ་དེས་མཐོང་ནས་བཟང་མོ་ལ་སྦྲན་པས། འཇུག་ཏུ་ཆུག་ཅིག །དེ་རབ་ཏུ་བྱུང་ངོ༌། །རབ་ཏུ་བྱུང་(༨༢བ)ཡང་འཇུག་ཏུ་ཆུག་ཅིག །དེ་ནང་དུ་ཞུགས་པ་དང༌། བཟང་མོས་སྨྲས་པ། ཁྱོད་ཀྱིས་ཅིའི་ཕྱིར་ངན་བུ་སྤངས་ནས་རབ་ཏུ་བྱུང༌། སྐལ་ཆད་མ། ཁྱོད་ཁོ་བོའི་མདུན་དུ་སྐྱེས་པ་གཞན་དང་ལྷན་ཅིག་དགའ་མགུར་སྤྱོད་ན་ཁོ་བོ་ཇི་ལྟར་རབ་ཏུ་མི་འབྱུང༌། རྗེའི་སྲས། བུད་མེད་ནི་རྟག་ཏུ་ནོངས་པ་མཆིས་པས་བཟོད་པ་མཛོད་ཅིག །བདག་གི་རྫས་ཀྱང་ཁྱོད་ཀྱི་ལགས་ཀྱིས་ཚུར་སྤྱོན་དགའ་མགུར་སྤྱོད་ཅིག །ཁྱོད་ཀྱིས་ཁོ་བོ་སྔར་ནོར་དང་དོན་མཐུན་ལས་ཉམས་པར་བྱས་ན། ད་ཚུལ་ཁྲིམས་ལས་ཀྱང་ཉམས་པར་བྱེད་དམ། སླད་རོལ་ཏུ་དྲུད་ཅིང་ནད་དུ་ཕོ་ལ། ནང་དུ་དྲུང་ཅིང་སླད་རོལ་ཏུ་ཕོ་ཞིག །འདིས་ཚུལ་ཁྲིམས་འཆལ་བ་ཅི་མཆིས། མཛེས་དགའ། དགེ་སློང་གནས་བརྟན་ཡིན་ནོ་ཅོག་འདིར་བསོད་སྙོམས་ལ་འཇུག་པ་དེ་དག་ཀྱང་ངེས་པར་འདི་ལྟར་བྱེད་པས་འདི་སྐད་ཟེར་རོ་སྙམ་ནས་དེ་ལྟར་བྱས་སོ། །
དེ་ནས་བཟང་མོས་བཅའ་བ་དང་བཟའ་གཙང་མ་བསོད་པས་ལྷུང་བཟེད་བཀང་ནས། འཕགས་པ་ཡང་བཞེད་ན་སྤྱོད་ཅིག་དེ་བསོད་སྙོམས་བླངས་ནས་སོང་ངོ༌། །དེར་སྟོན་པ་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་ཤེས་རབ་རྣམ་པར་འགྲོལ་བའི་ཆོས་སྟོན་པ་ན། དེ་འགྱོད། རྣམ་པར་འགྱོད། རབ་ཏུ་འགྱོད་ཅིང་ཅང་མི་སྨྲ་བར་གྱུར། ཡུལ་ཡུལ་པོར་གྱུར། ཕྲག་པ་ཀློད། གདོང་སྨད། སྤོབས་པ་མེད། སེམས་ཁོང་དུ་ཆུད་ཅིང་འདམ་བུ་སྔོན་པོར་བརྔས་པ་བརྙིངས་པ་ལྟར་འདུག་གོ །དེ་ལ་དགེ་སློང་རྣམས་ཀྱིས་སྨྲས་པ། ཁྱོད་ལ་ལུས་ཀྱི་གནོད་པའམ། སེམས་ཀྱི་གདུང་བ་མེད་དམ། དེ་ངོ་ཚ་བས། ཅི་ཡང་མེད་དོ་ཞེས་ཟེར་རོ། །སྨན་པ་ལ། བཞིན་བཟང༌། གཞོན་ནུ་འདིའི་ནད་ཅི་ཡིན་ལྟོས་ཤིག །དེས་བརྟགས་པ་དང༌། དབང་པོ་གསལ་བ་མཐོང་ནས། འདི་ལ་ལུས་ཀྱི་ནད་མ་མཆིས་ཀྱི་སེམས་ཀྱི་གདུང་བ་ནི་ངེས་པར་མཆིས་སོ། །འདིའི་སེམས་ཀྱི་གདུང་བ་ཇི་ལྟ་བུ། བདག་ཅག་སྨན་པ་དག་ནི་ལུས་གསོ་བར་བྱེད་པ་ལགས་ཀྱི་སེམས་གསོ་བ་མ་ལགས་སོ། །འཕགས་པ་དག་སེམས་གསོ་བ་ལགས་པས་འཕགས་པ་དག་ཉིད་ཀྱིས་མཁྱེན་པར་འགྱུར་རོ། །དགེ་སློང་རྣམས་ཀྱིས་མཛེས་དགའ་ལ་སྨྲས་པ། འདི་ན་ཁྱོད་ཀྱི་ཕའང་མེད། མའང་མེད། རྩ་ལག་གཞན་ཡང་མེད་དེ། ཚངས་པ་མཚུངས་པར་སྤྱོད་པ་ངེད་ཅག་ཁོ་ནར་ཟད་པས། ངེད་ཀྱིས་རིམ་གྲོ་བྱ་ཡིས་ཇི་ལྟར་གྱུར་པ་སྨྲོས་ཤིག །དེས་སྐབས་དེ་རྒྱས་པར་བརྗོད་པ་དེ་གསོལ་བ་དང༌། དེས་ཀྱང་མི་གཏི་མུག་ཅན་དེ་ཕམ་པར་གྱུར་ཏོ། །སྔར་ཟག་བྱེད་ཀྱི་ཕྱི་རོལ་ཏུ་དྲུད་ཅིང་ནང་དུ་འབོ་བ་དང༌། ནང་དུ་དྲུད་ཅིང་ཕྱི་རོལ་ཏུ་འབོ་ན་ཕམ་པར་འགྱུར་རོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་པ་དང༌། ཆུང་མ་དེ་རང་གི་ལས་ཀྱིས་ཤིའོ། །(༨༣ན)དེ་བཞིན་དུ་བདུན་གྱི་བར་དུ་བླངས་པ་དང་དེའང་ཤིའོ། །ཁྱིམ་བདག་དེ་ཡང་སྐུར་བ་བཏབ་པའི་ལས་ཀྱིས་ཆུང་མ་གསོད་པ་ཞེས་གྲགས་སོ། །དེས་ཡང་བུ་མོ་བསླངས་པ་དང༌། ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང༌། མི་སྦྱིན་ནོ། །ཡུགས་ས་མོ་དག་བསླངས་པ་དང༌། དེ་དག་ཀྱང༌། ཁོ་མོ་ཅག་གིས་ཅིའི་ཕྱིར་བདག་ཡོངས་སུ་གཏང༌། ཁྱོད་ཀྱི་ཁྱིམ་དུ་མི་འཇུག་གོ་ཟེར་རོ། །དེ་ཡི་ཆད་ནས་རང་ཉིད་ཀྱིས་ཁྱིམ་གྱི་སོ་ཚིས་བྱེད་པ་ན། དེའི་ཆུང་པོ་གྲོགས་ཤིག་འོངས་ནས། ཅིའི་ཕྱིར་རང་ཉིད་ཀྱིས་ཁྱིམ་གྱི་སོ་ཚིས་བྱེད། ཆུང་མ་བདུན་གྱི་བར་དུ་བླངས་པས་ཤིའོ། །གཞན་དག་ཅིའི་ཕྱིར་མི་སློང༌། མི་སྟེར་རོ། །ཧ་ཅང་མི་རིང་བ་ན། ཚོགས་ཅན་མ་རྒན་མོ་ཞིག་འདུག་ནས་གྲོགས་པོ་དེས་སྨྲས་པ། ཚོགས་ཅན་མ་རྒན་མོ་དེ་བོས་ཤིག །ཅི། ཁོ་བོས་འཇུད་མཐུན་མའི་ཁྱིམ་བྱའམ། དེས་སྡིག་པ་ཅན་གྱི་ཆོས་དེ་སྤངས་ཀྱིས་བོས་ཤིག་ཅེས་ནན་གྱིས་སྨྲས་པ་དང༌། དེ་ཚོགས་ཅན་མ་རྒན་མོ་དེའི་གན་དུ་སོང་ནས། བདེ་ལེགས་ཞེས་སྨྲས་པ་དང༌། རྒན་མོས་སྨྲས་པ། ཅི་བཞེད། ཁྱོད་འདོད་ན། ཁྱོད་སུའི། བདག་ལ་ཟས་གོས་སྦྱིན་པ་དེའི་འོ། །ཁྱིམ་བདག་གིས་སྨྲས་པ། ཁྱོད་སྔོན་གྱི་ཉོན་མོངས་པ་མི་སྤྱོད་དམ། རྒན་མོས་སྨྲས་པ། ཅི། བདག་གིས་སྐྱེས་པ་མི་མཐོང་ངམ། བདག་སྡིག་པ་ཅན་གྱི་ཆོས་དེ་ལས་ནི་ལོག་གོ །ཚུར་སྤྱོན་ཁྱོད་ཀྱི་ཟས་གོས་སྦྱིན་གྱིས་ཁྱོད་ཀྱིས་ཁྱིམ་གྱི་སོ་ཚིས་མཛོད་ཅིག །དེས་དེའི་ཁྱིམ་གྱི་སོ་ཚིས་བྱས་ནས་ཟས་གོས་བཟང་པོས་ཡུན་མི་རིང་བར་ཤ་ཁྲག་དང་པགས་པ་བརྟས་ནས་བུ་མོ་མང་པོ་རྒྱལ་བྱེད་ཚལ་ལྟར་སོང་བའི་ཕྱི་བཞིན་དུ་སོང་ངོ༌། །བུ་མོ་དེ་དག་གཙུག་ལག་ཁང་དུ་ཞུགས་པ་ན། དེ་ན་དགེ་སློང་ཞིག་གནས་ཁང་སྒོ་མ་བཅད་པར་གཉིད་ལོག་པའི་གོས་འཐོར་ཞིང་ཡན་ལག་གི་རྣམ་པ་ལས་སུ་རུང་བ་དེ་དག་གིས་མཐོང་ནས་རྒོད་ཅིང་ཕྱིར་བྱུང་ངོ༌། །རྒན་མོས་བུ་མོ་དེ་དག་མཐོང་ནས། ཁྱེད་ཅི་རྒོད། བསྟི་གནས་སུ་རྒོད་པ་དེ་སོ་སྟོར་མོ་འགྱུར་རོ་ཞེས་མ་ཐོས་སམ། དེ་དག་ཅང་མི་སྨྲ་བར་སོང་ངོ༌། །དེས་རྟོག་ཅིང་ནང་དུ་ཞུགས་པ་དང༌། དགེ་སློང་དེ་ལྟར་གྱུར་པ་མཐོང་ནས། དེ་ལ་འདོད་པ་སྐྱེས་ཏེ་དེས་དགེ་སློང་དེའི་སྟེང་དུ་བགྲད་ནས་བརྩལ་བ་དང༌། དགེ་སློང་དེ་གཉིད་སྟུག་པོས་ནོན་པས་མ་སད་སོ། །རྒན་མོས་བདག་ཅག་གིས་སྒྱུ་རྩལ་དྲུག་ཅུ་རྩ་བཞི་ཤེས་ན་རབ་ཏུ་བྱུང་བ་འདིས་ནི་སྒྱུ་རྩལ་དྲུག་ཅུ་རྩ་ལྔ་ཤེས་ཏེ། རེག་པ་ནི་བདག་གིར་བྱེད་ལ་ཚིག་ནི་མི་སྟེར་རོ་སྙམ་ནས། དེ་ཀུན་ནས་དཀྲིས་པ་དང་བྲལ་བའི་ཚེ་དགེ་སློང་དེ་སད་ནས། བདག་གི་ཁྱིམ་ག་གེ་མོ་ན་མཆིས་ཀྱིས་ཡང་བཞེད་ན་སྤྱོན་ཅིག །སྐལ་ཆད་མ། བསྟི་གནས་སུན་པ་བྱེད་པ་དེ་ཡང་བདག་གིར་མི་(༨༣བ)བྱེད་ན་ཁྱིམ་དུ་འོང་རེ་སྐན། དགེ་སློང་དེ་བདག་ལ་ཕམ་པ་མ་བྱུང་ངམ་སྙམ་ནས་གསོལ་བ་དང༌། རེག་པ་བདག་གིར་མ་བྱས་སམ། མ་བགྱིས་ཏེ། གཉིད་སྟུག་པོས་ནོན་པས་བདག་གིར་ག་ལ་མཆིས། དེ་ལ་ལྟུང་བ་མེད་མོད། འོན་ཀྱང་མ་བསྲུངས་པར་ཉིན་མོ་གློས་ཕབ་སྟེ་གཉིད་ལོག་པར་མི་བྱའོ། །
མཉན་ཡོད་ན་དགེ་སློང་དགོན་པ་བ་བསམ་གཏན་བཞི་པ་ཐོབ་པ་ཞིག་འདུག་པ་དེ་ཡང་ཡང་སྟོན་པ་དང་གནས་བརྟན་རྣམས་ལ་ཕྱག་འཚལ་བའི་ཕྱིར་འགྲོ་བས་གསར་བུ་དག་གིས་ངོ་ཤེས་སོ། །རེ་ཞིག་ན་གཡན་པའི་ནད་བྱུང་ནས་དེ་ལ་གསར་བུ་དག་གིས་སྨྲས་པ། ཅིའི་ཕྱིར་སྨན་པ་ལ་མི་སྟོན། སྐྱེ་བོ་མང་པོ་མི་འདོད་པའི་འཆི་བ་འོང་བར་ཟད་མོད། བྱ་བ་བྱར་ཅི་ཡོད། གནས་བརྟན། ཚུལ་ཁྲིམས་དང་ལྡན་པ་ཡུན་རིང་པོར་འཚོ་བ་དེ་སྲིད་དུ་བསོད་ནམས་མང་པོ་འཕེལ་བས་དཔྱད་མཛོད་ཅིག །དེས་སྨན་པའི་གན་དུ་སོང་ནས། སྨན་སྟོན་ཅིག །འཕགས་པ། བཤོས་བསོད་པ་གསོལ་ལ་ཡུངས་མར་གྱིས་བསྐུས་ནས་ཉི་མ་ལ་བཞུགས་དང་སོས་པར་འགྱུར་རོ། །བཞིན་བཟང༌། ཡུངས་མར་སྩོལ་ཅིག །བདག་ཅག་སྨན་པ་དག་ནི་སྨན་སྟོན་པ་ལགས་ཀྱིས། འབུལ་བ་ནི་མ་ལགས་སོ། །འོན་ཀྱང་ཁྱིམ་བདག་ཆེ་གེ་མོ་ལ་གཡན་པའི་ནད་བྱུང་ནས། བདག་གིས་ནད་དེ་ཞི་བར་འགྱུར་བའི་ཡུངས་མར་སྐོལ་གྱིས་དེ་ལ་སློངས་ཤིག །མི་སྟེར་རོ། །བཞུད་དང་དེ་དད་པ་ཅན་ལགས་པས་འབུལ་ལོ། །ཨ་རོག་ཁྱ་དོན་གྱིས་ན་ཁྱོད་ཉིད་ཀྱིས་བྱིན་ནོ་ཞེས་སྨྲས་ནས་དེའི་ཁྱིམ་དུ་སོང་བ་དང༌། ཁྱིམ་བདག་དེས་མཐོང་ནས། ཁྱོད་ལ་གཡན་པའི་ནད་བྱུང་ངམ། དེ་བཞིན་ནོ། །ཡུངས་མར་གྱིས་བསྐུས་ནས་ཉི་མ་ལ་བཞུགས་དང༌། སོས་པར་འགྱུར་རོ། །ཁོ་བོ་དེའི་དོན་ཁོ་ནར་འོངས་ཀྱིས་དེ་བྱིན་ཅིག །ཁྱོད་ལ་བསོད་ནམས་སུ་འགྱུར་རོ། །བདག་ལས་བསོད་སྙོམས་གསོལ་ན་དབུལ་ལོ། །བཟའ་འོ། །དེས་དེ་ཟས་བསོད་པས་ཚིམ་པར་བྱས་ནས། ཡུངས་མར་གྱིས་ལྷུང་བཟེད་ཆུང་ངུ་བཀང་སྟེ་བྱིན་ནོ། །ཨ་རོག་ཁྱ་ཞེས་བརྗོད་དེ། དགོན་པར་སོང་ནས་ཡུངས་མར་གྱིས་ལུས་བསྐུས་ཏེ་ཉི་མ་ལ་འདུག་པ་དང༌། དེ་ལ་བདེ་བའི་འདུ་ཤེས་སྐྱེས་ནས་གཉིད་ལོག་པ་དང་དེའི་ཡན་ལག་གི་རྣམ་པ་ལ་སྲོག་ཆགས་ཨུ་ཙ་ཏིང་གས་ཟིན་ནས་ལས་སུ་རུང༌། གོས་ཀྱང་འཐོར་བ་དང༌། ལྕི་ཐུན་མ་ཆེན་མོ་ཞིག་གིས་མཐོང་ནས་དེས་དགེ་སློང་དེའི་སྟེང་ནས་བརྩལ་བ་དང༌། དགེ་སློང་དེ་སད་ཀྱང་ཉམ་ཆུང་བས་ཕྱིར་བཟློག་མ་ནུས་སོ། །
དེ་ཀུན་ནས་དཀྲིས་པ་དེ་དང་བྲལ་བའི་ཚེ། བདག་གི་ཁྱིམ་ག་གེ་མོ་ན་མཆིས་ཀྱིས་ཡང་བཞེད་ན་སྤྱོན་ཅིག །སྐལ་ཆད་མ། བསྟི་གནས་སུན་པར་བྱེད་པ་དེ་ཡང་བདག་གིས་མི་བྱེད་ན། ཁྱོད་ཀྱི་ཁྱིམ་དུ་འོང་རེ་སྐན། དེ་བདག་ལ་ཕམ་པ་མ་བྱུང་ངམ་སྙམ་ནས་གསོལ་བ་(༨༤ན)དང༌། རེག་པ་བདག་གིར་མ་བྱས་སམ། བདག་དང་པོ་ནས་འདོད་པ་ལས་འདོད་ཆགས་དང་བྲལ་བས་རེག་པ་བདག་གིར་ག་ལ་བགྱིད། དེ་ལ་ལྟུང་བ་མེད་ཀྱི། འོན་ཀྱང་དགོན་པ་བས་མ་བསྲུངས་པར་ཉིན་མོ་གློས་ཕབ་སྟེ་གཉིད་ལོག་པར་མི་བྱའོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། འདི་འདོད་པ་ལས་འདོད་ཆགས་དང་བྲལ་ན་ཅིའི་ཕྱིར་ཡན་ལག་གི་རྣམ་པ་ལས་སུ་རུང༌། འདོད་ཆགས་དང་མ་བྲལ་བའི་ཡན་ལག་གི་རྣམ་པ་ནི་རྒྱུ་ལྔས་ལས་སུ་རུང་སྟེ། བཤང་བ་དང༌། གཅི་བ་དང༌། རླུང་གིས་ནོན་པ་དང༌། སྲོག་ཆགས་ཨུ་ཙ་ཏིང་གས་ཟིན་པ་དང༌། འདོད་ཆགས་ཀྱིས་ཀུན་ནས་དཀྲིས་པའོ། །འདོད་ཆགས་དང་བྲལ་བའི་ཐ་མ་མ་གཏོགས་པ་བཞིའོ། །འདིའི་ཡན་ལག་གི་རྣམ་པ་ནི་སྲོག་ཆགས་ཨུ་ཙ་ཏིང་གས་ཟིན་པས་ལས་སུ་རུང་བའོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བཟང་བྱིན་གྱིས་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དང་པོར་མི་ཚངས་པ་སྤྱོད་པས་ཆུ་བུར་ཕྱུང་བ་ལ་གཟིགས། ད་ལྟར་དུ་མ་ཟད། སྔར་འཇིག་རྟེན་སྐྱོན་མེད་པ་ལ་འདིས་དང་པོར་མི་ཚངས་པ་སྤྱོད་པས་ཆུ་བུར་ཕྱུང་བ་དེ་ཉོན་ཅིག །འཇིག་རྟེན་འཇིག་པ་ན་སེམས་ཅན་ཕལ་ཆེར་འོད་གསལ་དུ་སྐྱེའོ། །འཇིག་རྟེན་འཆགས་པའི་ཚེ་ས་ཆེན་པོ་འདི་ཆུ་འབའ་ཞིག་ཏུ་གྱུར་པའི་སྟེང་དུ་རླུང་གིས་སྤྲིས་མ་ཀུན་ཏུ་འཆགས་པར་བྱེད་ལ། དེ་ནི་སའི་བཅུད་ཁ་དོག་དང་དྲི་རོ་ཕུན་སུམ་ཚོགས་པ། མདོག་མར་གསར་པ་ལྟ་བུ། རོ་སྦྲང་རྩི་མ་བསྐོལ་བ་ལྟ་བུས་ཁྱབ་པར་འགྱུར་རོ། །
དེའི་ཚེ་འོད་གསལ་གྱི་ལྷའི་རིས་ནས་སེམས་ཅན་ཚེ་དང་བསོད་ནམས་ཟད་པ་ཤི་འཕོས་ཏེ། འདི་ཉིད་དུ་མི་རྣམས་དང་སྐལ་བ་མཐུན་པར་སྐྱེ་ཞིང་གཟུགས་ཅན་ཡིད་ལས་བྱུང་བ། དབང་པོ་ཚང་བ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བའི་ཟས་དང་ལྡན་པ། ཚེ་ལོ་དཔག་ཏུ་མེད་པར་ཐུབ་པའོ། །དེའི་ཚེ་འཇིག་རྟེན་དུ་ཉི་ཟླ་དང་རྒྱུ་སྐར་དང་ཉིན་མཚན་དང༌། དུས་ཚིགས་ལ་སོགས་པ་མེད་དོ། །སྐྱེས་པ་དང༌། བུད་མེད་ཀྱང་མེད་དེ་སེམས་ཅན་ཞེས་ཟེར་རོ། །
དེ་ནས་རོ་ལ་བརྐམ་པ་ཞིག་གིས་སོར་མོའི་རྩེ་མོས་སའི་བཅུད་མྱངས་པས་ཇི་ལྟར་མྱངས་པ་བཞིན་དུ་འདོད་པར་བྱེད་དེ། དེ་ནི་ཁམ་ཟས་ཟ་བའི་དང་པོའོ། །གཞན་དག་གིས་ཀྱང་ཟོས་པས་ལུས་ལ་སྲ་བ་དང་ལྕི་བ་བྱུང་ཞིང་ཁ་དོག་གསལ་བ་མེད་ལ་མུན་པ་བྱུང་ངོ༌། །ཆོས་ཉིད་ཀྱིས་མུན་པ་བྱུང་བ་ན་ཉི་ཟླ་དང་རྒྱུ་སྐར་དང༌། ཉིན་མཚན་ལ་སོགས་པའང་འབྱུང་ངོ༌། །དེ་དག་གི་ནང་ནས་ཟས་ཆུང་ངུ་ཟོས་པས་ཁ་དོག་བཟང༌། ཆེར་ཟོས་པ་རྣམས་ཁ་དོག་ངན་པར་གྱུར་པ་ན། ང་ནི་ཁ་དོག་(༨༤བ)བཟང་ལ་ཁྱོད་ཁ་དོག་ངན་ནོ་ཞེས་ཁྱད་དུ་བསད་པས་སའི་བཅུད་མེད་པར་གྱུར་པ་ན། སེམས་ཅན་དེ་དག་འདུས་ནས། ཀྱེ་མ་སའི་བཅུད་ཅེས་མྱ་ངན་བྱེད་དེ། །དེའི་དོན་འདིའོ་ཞེས་མི་ཤེས་སོ། །དེའི་འོག་ཏུ་སའི་ཞག་ཕུན་སུམ་ཚོགས་པ། ཁ་དོག་དོང་ཀའི་མེ་ཏོག་ལྟ་བུ། རོ་སྦྲང་རྩི་མ་བསྐོལ་བ་ལྟ་བུ་བྱུང་སྟེ། དེ་དག་དེ་ཟ་ཞིང་ཡུན་རིང་དུ་གནས་སོ། །དེ་དག་ལས་ཆུང་ངུ་ཟོས་པ་ཁ་དོག་བཟང༌། ཆེར་ཟོས་པ་ཁ་དོག་ངན་པར་གྱུར་པས། ང་ནི་ཁ་དོག་བཟང༌། ཁྱོད་ནི་ཁ་དོག་ངན་ནོ་ཞེས་ཁྱད་དུ་བསད་པས། ས་ཞག་དེའང་མེད་ནས། དེ་དག་འདུས་ཤིང༌། ཀྱེ་མའོ་ཞེས་མྱ་ངན་བྱེད་དེ། སྨྲས་པའི་དོན་ནི་མི་ཤེས་སོ། །དེའི་འོག་ཏུ་མྱུ་གུའི་ཚལ་ཕུན་སུམ་ཚོགས་པ། ཁ་དོག་ཀ་དམ་བུ་ཀའི་མེ་ཏོག་ལྟ་བུ། རོ་སྦྲང་རྩི་མ་བསྐོལ་བ་ལྟ་བུ་བྱུང་ནས་དེ་དག་དེ་ཟ་ཞིང་ཡུན་རིང་དུ་གནས་སོ། །
དེ་དག་ལས་ཆུང་ངུ་ཟོས་པ་ཁ་དོག་བཟང༌། ཆེར་ཟོས་པ་ཁ་དོག་ངན་པར་གྱུར་པ་ན། ང་ནི་ཁ་དོག་བཟང༌། ཁྱོད་ནི་ཁ་དོག་ངན་ནོ་ཞེས་ཁྱད་དུ་བསད་པས་མྱུ་གུའི་ཚལ་དེའང་མེད་ནས། དེ་དག་འདུས་ཤིང་མྱ་ངན་བྱེད་ལ། ཕར་སོང་ཟེར་ཡང་དོན་ནི་མི་ཤེས་སོ། །དེའི་འོག་ཏུ་མ་རྨོས་མ་བཏབ་པའི་འབྲས་ས་ལུ་སོ་བ་དང་སྦུན་པ་མེད་པ། སོར་བཞི་པ། ནུབ་བརྔས་ན་ནངས་སྐྱེ། ནངས་བརྔས་ན་ནུབ་སྐྱེ་བ་ཞིག་བྱུང་ནས་དེ་དག་དེ་ཟ་ཞིང་ཡུན་རིང་པོར་གནས་སོ། །འབྲས་ས་ལུ་དེ་ཟོས་པས་ཕོ་མོའི་དབང་པོ་ཐ་དད་པ་བྱུང་སྟེ། གཅིག་ལ་གཅིག་མིག་ལྟ་བ་དང༌། དེ་ལས་ཆགས། དྲལ། ལོག་པར་ཞུགས་པ་དང༌། གཞན་དག་གིས་མཐོང་ནས་ས་དང་བོང་བ་ལ་སོགས་པ་འཐོར་ཞིང༌། ཀྱེ་མ། སེམས་ཅན་ངན་པ་བྱ་བ་མ་ཡིན་པ་བྱེད་དོ་ཞེས་ཟེར་ཏེ། དེང་སང་བག་མ་ལེན་པ་ན་ཕྱེ་མ་ལ་སོགས་པས་འཐོར་བ་བཞིན་ནོ། །སྔོན་ཆོས་མ་ཡིན་པ་དང་འདུལ་བ་མ་ཡིན་པར་གྲགས་པ་དེ་ནི་དེང་སང་ཆོས་དང་འདུལ་བར་གྲགས། སྔོན་སྨད་པ་དེ་ནི་ད་ལྟ་བསྟོད་པ་ཡིན་ནོ། །དེ་ཉི་མ་གཅིག་ནས་བདུན་ཙམ་སྤོང་བར་བྱེད་ཅིང༌། སླར་ཡང་བྱེད་འདོད་ནས་ཁྱིམ་བརྩིགས་ཏེ། བདག་ཅག་གིས་འདིར་བྱ་བ་མ་ཡིན་པ་བྱའོ་ཟེར་བས་ཁྱིམ་གྱི་མིང་བྱུང་ངོ༌། །འདི་ནི་ཁྱིམ་འབུབས་པའི་དང་པོ་ཡིན་ནོ། །དེའི་ཚེ་དང་པོར་མི་ཚངས་པར་སྤྱོད་པ་དེ་ནི་བཟང་སྦྱིན་ཡིན་ཏེ། འདིས་དེའི་ཚེའང་འཇིག་རྟེན་སྐྱོན་མེད་པ་ལ་དང་པོར་མི་ཚངས་པར་སྤྱོད་པས་ཆུ་བུར་ཕྱུང་ལ། ད་ལྟར་ཡང་དགེ་འདུན་སྐྱོན་མེད་པ་ལ་མི་ཚངས་པར་སྤྱོད་པས་ཆུ་བུར་ཕྱུང་ངོ༌། །དེ་བས་ན་དུག་གསུམ་སྤང་བའི་ཕྱིར་འབད་པར་བྱའོ། །ལས་དང་པོ་དང༌། སྨྱོས་པ་དང༌། སེམས་འཁྲུགས་པ་དང༌། ཚོར་བས་ཉེན་པ་ལ་ནི་ལྟུང་བ་མེད་དོ། །ཕྲན་ཚེགས་ཀྱི་སྐབས་ནས་འབྱུང་བ་ནི། མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་(༨༥ན)ནས་དགའ་མགུར་སྤྱད་པ་ལས་ཆུང་མ་ལ་སེམས་ཅན་ཞུགས་ནས་དེ་ཉིད་ཀྱི་ཉིན་མོ་ནས་མདངས་བཟང་བར་གྱུར་ཏོ། །ཟླ་བ་བརྒྱད་དམ་དགུ་འདས་པ་ན་བུ་མོ་གཟུགས་བཟང་བ། མཛེས་པ། ལྟ་ན་སྡུག་པ་ཞིག་བཙས་སོ། །དེ་བཙས་པའི་ཚེ་དེའི་ཁྱིམ་ཉི་མའི་འོད་བཞིན་དུ་སྣང་བར་གྱུར་ནས་མཉན་ཡོད་ཀུན་ཏུ་གྲགས་པ་དང༌། སྲོག་ཆགས་སྟོང་ཕྲག་མང་པོ་ངོ་མཚར་དུ་གྱུར་ནས་དེའི་ཁྱིམ་དུ་འདུས་སོ། །བྲམ་ཟེ་ལྟས་མཁན་ཡུལ་གཞན་ནས་འོངས་པ་ཞིག་གིས་དེ་ལ་བལྟས་ནས། བུ་མོ་འདི་ཅིས་ཀྱང་སྐྱེས་བུ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་འགྱུར་རོ་ཞེས་ལུང་བསྟན་ཏོ། །
ཞག་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས་ནས་མིང་འདོགས་པ་ན། འདི་བཙས་པའི་ཚེ་ཁྱིམ་ཉི་མའི་འོད་བཞིན་དུ་སྣང་བར་གྱུར་པས་འོད་བཟང་མ་ཞེས་མིང་བཏགས་ནས་མ་མ་བརྒྱད་ལ་གཏད་དེ་བསྐྱེད་བསྲིངས། ཆེན་མོར་གྱུར་པའི་ཚེ་གཟུགས་དང་ལང་ཚོ་མཛེས་པ་དང༌། གཡེར་བ་དང༌། སྒྱུ་རྩལ་གྱི་ཡོན་ཏན་དང་ལྡན་པས་ན་ནགས་ཚལ་མེ་ཏོག་རྒྱས་པའི་ནང་ན་ནགས་ཚལ་གྱི་ལྷ་བཞིན་དུ་ཁྱིམ་དེ་ན་མཛེས་སོ། །དེའི་གཟུགས་དང་ལང་ཚོས་འཇིག་རྟེན་པའི་ལམ་གྱི་འདོད་ཆགས་དང་བྲལ་བའི་དྲང་སྲོང་དག་ཀྱང་སེམས་འཕྲོག་ན་ཐོག་མ་མེད་པ་ནས་ཉོན་མོངས་པ་བསགས་པའི་མི་རྣམས་ལྟ་ཅི་སྨོས། རྒྱལ་པོ་གསལ་རྒྱལ་ལ་སོགས་པས་བསླང་བར་བསམས་ཀྱང་སྐྱེས་བུ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་མཚན་མཁན་གྱིས་ལུང་བསྟན་པས་འཇིག་རྟེན་གྱིས་དཔྱས་དོགས་ནས་སུས་ཀྱང་མ་བསླངས་སོ། །
དེ་ཡང་དེའི་ཁྱིམ་གྱི་སྐར་ཁུང་དང་ཁང་ཐོག་ཏུ་འདུག་ནས། བདག་སུ་སློང་སྙམ་ནས་སྐྱེས་པ་དག་ལ་ལྟའོ། །ཁྱིམ་བདག་དེས་དེའི་སྤྱོད་པ་མཐོང་ནས་གཞན་ལ་སྦྱིན་པར་བརྩམས་ཀྱང་འགའ་ཡང་ལེན་དུ་མ་བཏུབ་པས་ཡིད་མི་བདེ་བར་གྱུར་ཏོ། །དེའི་ཚེ་མཉན་ཡོད་ན་ཁྱིམ་བདག་ཕྱུག་པོ་ཞིག་གིས་རིགས་མཉམ་པ་ལས་ཆུང་མ་ལན་བདུན་གྱི་བར་དུ་བླངས་ཀྱང་རང་གི་ལས་ཀྱིས་ཤི་བ་ན། དེ་དག་གིས་ཀྱང་ཚེ་ཐུང་བའི་ལས་བྱས་ལ་དེས་ཀྱང་དཔྱ་བའི་ལས་བྱས་པས་དེའི་མིང་ཆུང་མ་གསོད་པ་ཞེས་ཆགས་སོ། །དེས་གཞན་བསླངས་པ་དང༌། ངེད་ཀྱི་བུ་མོ་ཅི་སྟེ་བསད་ཅེས་ཟེར། ཡུགས་མོ་བསླངས་པས། ངེད་ཀྱི་ལུས་ཅིའི་ཕྱིར་འདོར་ཟེར་ནས་མ་སྟེར་བ་དང་། ཆུང་མ་མེད་ཀྱང་བླ་ཞེས་རེ་ཐག་བཅད་ནས་ཀུན་ཏུ་རྒྱུ་རྣམས་དང་ལྷན་ཅིག་བསྟེན་པར་བརྩམས་སོ། །དེའི་ཕ་སངས་རྒྱས་པའི་དགེ་བསྙེན་ཡིན་པས། དེས་བསམས་པ། བདག་གི་ཕ་སངས་རྒྱས་པའི་དགེ་བསྙེན་ཡིན་ན་བདག་ལ་ཀུན་ཏུ་རྒྱུས་ཅི་བྱ། སྟོན་པའི་ཉན་ཐོས་རྣམས་ལ་བསྙེན་བཀུར་བྱས་ཏེ། དེ་ཉིད་དུ་རབ་ཏུ་འབྱུང་ངོ་སྙམ་ནས་ཡང་དང་ཡང་དུ་རྒྱལ་བྱེད་ཚལ་དུ་འགྲོ་བ་ན་མཛའ་བོ་ཞིག་གིས་(༨༥བ)མཐོང་ནས། གྲོགས་པོ། ཁྱོད་ཡང་ཡང་རྒྱལ་བྱེད་ཚལ་དུ་འགྲོ་ན་རབ་ཏུ་མི་འབྱུང་གྲང༌། བདག་རབ་ཏུ་བྱུང་ཟིན་ན་རབ་ཏུ་འབྱུང་ཅི་དགོས། བདག་གིས་ཆུང་མ་ལན་བདུན་གྱིས་བར་དུ་བླངས་ཀྱང་རང་གི་ལས་ཀྱིས་ཤི་སྟེ། དེ་དག་གིས་ཀྱང་ཚེ་ཐུང་བའི་ལས་བྱས། ཁོ་བོས་ཀྱང་དཔྱ་བར་འགྱུར་བའི་ལས་བྱས་པས་ཁོ་བོའི་མིང་ཆུང་མ་གསོད་པ་ཞེས་ཆགས་ནས་ཡི་ཆད་དོ། །དགེ་སློང་རྣམས་ལ་བསྙེན་བཀུར་བྱ་བ་ནི་བདག་གི་ཕའི་ལུགས་ཡིན་པས། འདི་མི་བྱ་ན་གཞན་སུ་ལ་བསྙེན་བཀུར་བྱ། དེས་སྨྲས་པ། དེ་ཡང་བདེན་མོད། ངེས་པར་བུ་མ་བསྐྱེད་ན་རབས་འཆད་པས་ཅི་སྟེ་གཞན་གྱི་བུ་མོ་མི་སློང༌། མི་སྟེར་རོ། །འོད་བཟང་མ་སློངས་ཤིག །མི་སྟེར་མོད། སློངས་དང་དེའི་ཕ་ཡང་དེས་སྐྱོ་ཞིང་འདུག་པས་སྟེར་རོ། །བསླངས་པས་བྱིན་ནས། ཁྱིམ་གྱི་བདག་མོར་བཅུག་སྟེ་སྨྲས་པ། ཁོ་བོའི་ཕའི་ལུགས་ཀྱིས་སྟོན་པ་དང་དགེ་སློང་རྣམས་སྦྱིན་གནས་ཡིན་པས་ཁྱོད་ཀྱིས་ཀྱང་དེ་དག་ལ་བྱ་བ་བྱོས་ཤིག །དེ་བཞིན་དུ་བགྱིའོ། །དེའི་ཁྱིམ་དུ་དགེ་སློང་རྣམས་ཉིན་རེ་ཞིང་ཟན་ཟ་བ་ལ་འོད་བཟང་མས་ལག་བདར་ཏེ་འབྲིམ་པ་ན་དགེ་སློང་གཟུགས་དང་ལང་ཚོ་ཕུན་སུམ་ཚོགས་པ་མཐོང་ནས་རྣམ་རྟོགས་སྐྱེས་པར་གྱུར་ཏོ། །ཁྱིམ་བདག་དེ་དོན་ཞིག་ལ་འགྲོ་བ་ན་བདག་དེར་འགྲོ་ཡིས་ཡོན་གནས་དག་སྔར་བཞིན་བཤོས་གསོལ་ཅིག །དགེ་སློང་རྣམས་ལའང་དེ་བཞིན་དུ་སྨྲས་ནས་སོང་ངོ༌། །དགེ་སློང་དག་དེའི་ཁྱིམ་དུ་ཟན་ཟ་བ་ན། འོད་བཟང་མས་ཁྱོ་མེད་དོ་སྙམ་ནས། བུད་མེད་ཀྱི་གཡོ་སྒྱུ་དང༌། ཚུལ་འཆོས་བསྟན་པས་ཕྱི་ཉིན་ནས་དེའི་ཁྱིམ་དུ་མ་འོངས་སོ། །
ཁྱིམ་བདག་དེ་སླར་འོངས་ནས། ཡོན་གནས་དག་བཤོས་གསོལ་ལམ་ཞེས་དྲིས་པས། ཉིན་གཅིག་བྱོན་ནས་དེ་ཕན་ཆད་མ་བྱོན་ནོ། །འདིས་དེ་དག་གི་མདུན་དུ་བུད་མེད་ཀྱི་གཡོ་བསྟན་པས་འཛེམ་ནས་མ་འོངས་སོ་སྙམ་སྟེ། དེས་དེ་དག་སྤྱན་དྲངས་པ་དང༌། ཁྱིམ་བདག །བདག་ཅག་བསོད་སྙོམས་པ་ཡིན་པས་བསོད་སྙོམས་ལ་རྒྱུའོ། །འཕགས་པ། བདག་གིས་འཚལ་གྱིས་གཤེགས་དང་ཉེས་དམིགས་མི་མཆིའོ། །དེ་དག་གིས་ཁས་བླངས་ནས། ཕྱི་དེ་ཉིན་དེའི་ཁྱིམ་དུ་འོངས་པ་དང༌། ཁྱིམ་བདག་དེས་འོད་བཟང་མ་ཁྱིམ་དུ་བཅུག །སྒོ་བཅད་དེ། དེ་དག་ལ་རང་གིས་ལག་བདར་ཏེ་འབྲིམ་པ་ན། འོད་བཟང་མ་ཁྱིམ་ན་འདུག་བཞིན་དུ་འཕགས་པ་ཆེ་གེ་མོའི་རྐང་པ་དང༌། བྱིན་པ་དང༌། བརླ་ནི་འདི་འདྲའོ་སྙམ་དུ་རྟོག་པ་ནས་བཅུ་པའི་འདོད་ཆགས་ཀྱི་མེ་རྣམ་རྟོག་གི་རླུང་བདོ་བས་སྦར་ནས་དེ་ཉིད་དུ་ཤིའོ། །དགེ་སློང་ཟན་ཟོས་ནས་སོང་བ་དང༌། ཁྱིམ་བདག་གིས་སྒོ་ཕྱེ་ནས། འོད་བཟང་མ། ཚུར་ཤོག་ཟན་ཟོ་ཞེས་སྨྲས་ན་དེ་ཤི་བས་སུ་ཞིག་ལན་འདེབས། དེ་ནང་དུ་ཞུགས་པ་དང་ས་ལ་འགྱེལ་བ་མཐོང་ནས་འདི་གཉིད་ལོག་གིས་བསླང་ངོ་སྙམ་ནས་དེ་(༨༦ན)བསྒུལ་བས་ཤི་བར་མཐོང་ནས། གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོས་ཁྱོགས་བརྒྱན་ཏེ་བཀུར་སྟི་ཆེན་པོས་དུར་ཁྲོད་དུ་ཁྱེར་བ་དང༌། མི་རྒོད་ལྔ་བརྒྱ་ཙམ་ཞིག་དུར་ཁྲོད་དེ་དང་ཧ་ཅང་མ་རིང་བར་འོངས་པ་མི་ཞིག་གིས་མཐོང་ནས་འོད་བཟང་མ་སྐྱེལ་བ་ལ་དུར་ཁྲོད་དུ་སོང་བ་རྣམས་མི་རྒོད་དེ་དག་གིས་བཅོམ་ན་མི་རུང་ངོ་སྙམ་ནས་མགྱོགས་པར་སོང་སྟེ་སྦྲན་པ་དང༌། དེ་དག་གིས་ཀྱང༌། སང་རིམ་གྲོ་བྱའོ་ཞེས་སྲུང་མ་བཞག་སྟེ་འོད་བཟང་མ་གོས་དང་རྒྱན་སྣ་ཚོགས་ཀྱིས་བརྒྱན་པ་བོར་ཏེ་མྱུར་བར་གྲོང་ཁྱེར་དུ་ཞུགས་སོ། །མི་རྒོད་དེ་དག་གིས་ཕྱོགས་དེར་ཕྱིན་པ་དང་སྲུང་མ་རྣམས་བྲོས་སོ། །མི་རྒོད་དེ་དག་གིས་དེ་རབ་ཏུ་བརྒྱན་པ་མཐོང་ནས་གོས་བཤུས་ཏེ་བལྟས་པ་དང༌། དེའི་གཟུགས་གཞོན་ལ་མཛེས་པ་མཐོང་བས་རབ་ཏུ་ཆགས་ནས་དེ་དག་གིས་དེ་ལ་དགའ་མགུར་སྤྱད་དེ་ཀརྵ་པ་ཎ་ལྔ་བརྒྱ་བཞག་པ་དང༌། འོད་བཟང་མའི་རོ་ལའང་སྐྱེས་བུ་ལྔ་བརྒྱས་ཀརྵ་པ་ཎ་བྱིན་ནས་དགའ་མགུར་སྤྱད་དོ་ཞེས་གྲགས་སོ། །
དགེ་སློང་རྣམས་ཐེ་ཚོམ་སྐྱེས་ནས་ཞུས་པ། འོད་བཟང་མས་ལས་ཅི་བགྱིས་པས་བཙས་མ་ཐག་ཏུ་ཁྱིམ་ཐམས་ཅད་འོད་ཀྱིས་སྣང་བ་དང༌། ཤི་ནས་ཀྱང་མི་རྒོད་ལྔ་བརྒྱས་ཀརྵ་པ་ཎ་ལྔ་བརྒྱ་བྱིན་ནས་དགའ་མགུར་སྤྱད་ལགས། སྔོན་སངས་རྒྱས་ཝཱ་ར་ཎཱ་སཱི་ན་བཞུགས་སོ། །དེའི་དུས་ན་རྒྱལ་པོ་ཀྲྀ་ཀྲྀས་རྒྱལ་སྲིད་ཆོས་བཞིན་དུ་བྱེད་དུ་བཅུག་གོ །སངས་རྒྱས་འོད་སྲུངས་མྱ་ངན་ལས་འདས་པ་ན་རྒྱལ་པོ་ཀྲྀ་ཀྲྀ་ཀི་འཁོར་དང་བཅས་པས་དེའི་སྐུ་གདུང་ལ་བཀུར་སྟི་ཆེན་པོས་མཆོད་པ་བྱས་ནས་རིན་པོ་ཆེ་སྣ་བཞིའི་མཆོད་རྟེན་ཁོ་ར་ཁོར་ཡུག་ཏུ་དཔག་ཚད་གཅིག་པ་དཔངས་སུ་དཔག་ཚད་ཕྱེད་པ་ཞིག་བརྩིགས་སོ། །དེ་ན་ཚོང་དཔོན་གྱི་བུ་མོ་དད་པ་སྐྱེས་ནས་སྲོག་ཤིང་ལ་མེ་ལོང་ཞིག་བཏགས་སོ། །དེའི་དུས་ཀྱི་ཚོང་དཔོན་གྱི་བུ་མོ་དེ་ནི་འོད་བཟང་མ་འདི་ཡིན་ཏེ། སངས་རྒྱས་འོད་སྲུངས་ཀྱི་མཆོད་རྟེན་ལ་མེ་ལོང་བཏགས་པས་སྐྱེས་མ་ཐག་ཏུ་ཁྱིམ་ཐམས་ཅད་འོད་ཀྱིས་སྣང་བར་གྱུར་པ་ཡིན་ནོ། །ཤི་ནས་སྐྱེས་བུ་ལྔ་བརྒྱས་ཀརྵ་པ་ཎ་ལྔ་བརྒྱ་བྱིན་ནས་དགའ་མགུར་སྤྱད་པ་དེ་ཡང་ཉོན་ཅིག །སྔོན་ཝཱ་ར་ཎཱ་སཱི་ན་རྒྱལ་པ་ཚངས་བྱིན་ཞེས་བྱ་བས་རྒྱལ་སྲིད་ཆོས་བཞིན་བྱེད་དུ་བཅུག་གོ །དེའི་དུས་ན་གཟུགས་ཀྱིས་འཚོ་བ་བཟང་མོ་ཞེས་བྱ་བ་གཟུགས་བཟང་བ་མཛེས་པ། བལྟ་ན་སྡུག་པ། སྐྱེས་པའི་ཡིད་དུ་འོང་བ། རྒྱལ་པོ་ཚངས་བྱིན་གྱི་ཞང་པོས་སྔོན་སྤྱད་པ་ཞིག་འདུག་གོ །རེ་ཞིག་ན་དགའ་འདུན་ལྔ་བརྒྱ་བཟའ་བ་དང་བཅའ་བ་མང་པོ་སྦྱར་ཏེ་སྐྱེད་མོས་ཚལ་དུ་སོང་ནས། བདག་ཅག་གིས་སྐྱེད་མོས་ཚལ་གྱི་ལོངས་སྤྱོད་ཐམས་ཅད་བཤམས་ན་བུད་མེད་མེད་ཀྱིས་སྨད་འཚོང་མ་འགའ་ཞིག་དགུག་གོ །སུ་དགུག །(༨༦བ)བཟང་མོའོ། །དེ་དག་བཟང་མོའི་གན་དུ་སོང་ནས། བཟང་མོ། ཚུར་ཤོག །སྐྱེད་མོས་ཚལ་དུ་འདོང་ངོ༌། །གལ་ཏེ་ཀརྵ་པ་ཎ་སྟོང་སྦྱིན་ན་འགྲོའོ། །དེ་དག་གིས་སྨྲས་པ། ཀརྵ་པ་ཎ་ལྔ་བརྒྱ་དང་པོར་ཁྱེར་ཅིག །ལྔ་བརྒྱ་ནི་དགའ་མགུར་སྤྱད་ནས་སྦྱིན་ནོ། །ལེགས་སོ་དེ་བཞིན་དུ་བྱིན་ཅིག །དེ་དག་གིས་ཀརྵ་པ་ཎ་ལྔ་བརྒྱ་བྱིན་ནས་སོང་ངོ༌། །དེ་འགྱོད་དེ། བདག་དགའ་འདུན་པ་ལྔ་བརྒྱ་དང་ལྷན་ཅིག་སྤྱད་ན་ཅི་འདྲ་བར་འགྱུར། བདག་གིས་ཀརྵ་པ་ཎ་ལྔ་བརྒྱའང་བླངས་ན་ད་ཇི་ལྟར་བྱ་སྙམ་པ་ལས། བདག་རྒྱལ་པོའི་ཞང་པོས་སྤྱད་པས་དེ་ལ་སྐྱབས་འཚལ་ལོ་སྙམ་ནས་བྲན་མོ་དེའི་གན་དུ་མངགས་པ་དང༌། དེས་དེ་དག་ལས་དེ་ཕྲོགས་སོ། །རང་སངས་རྒྱས་ཤིག་སྐྱེད་མོས་ཚལ་དེར་ཕྱིན་པ་དང༌། དགའ་འདུན་པ་དེ་དག་གིས་དེ་ལ་གཙང་ཞིང་བསོད་པའི་བསོད་སྙོམས་ལྷུང་བཟེད་བཀང་སྟེ་ཕུལ་ལོ། །བདག་ཉིད་ཆེན་པོ་དེས་སྟེང་གི་ནམ་མཁའ་ལ་མངོན་པར་འཕགས་ཏེ་ཆོ་འཕྲུལ་བསྟན་པ་དང༌། སོ་སོའི་སྐྱེ་བོ་ནི་རྫུ་འཕྲུལ་གྱིས་ཡིད་དད་པར་འགྱུར་བས་ཤིང་རྩ་བ་ནས་བཅད་པ་བཞིན་དུ་ཞབས་ལ་གཏུགས་ནས། དགེ་བ་འདིས་གཟུགས་ཀྱིས་འཚོ་བ་ལ་ཐ་ན་ཤིའང་ཀརྵ་པ་ཎ་བྱིན་ནས་དགའ་མགུར་སྤྱོད་པར་ཤིག་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་གཟུགས་ཀྱིས་འཚོ་བ་བཟང་མོ་དེ་ནི་འོད་བཟང་མ་ཡིན་ནོ། །དགའ་འདུན་པ་ལྔ་བརྒྱ་པོ་དེ་དག་ནི་མི་རྒོད་ལྔ་བརྒྱ་པོ་འདི་དག་ཡིན་ཏེ། རང་སངས་རྒྱས་ལ་བསོད་སྙོམས་ཕུལ་ནས་སྨོན་ལམ་བཏབ་པས་ཚེ་རབས་ལྔ་བརྒྱར་ཀརྵ་པ་ཎ་ལྔ་བརྒྱ་བྱིན་ནས་དགའ་མགུར་སྤྱད་དོ། །དགེ་སློང་དག །འོད་བཟང་མ་དགེ་སློང་མཐོང་ནས་རྟོག་པ་སྐྱེས་ཏེ་སྲོག་དང་བྲལ་བར་གྱུར་གྱིས། དེ་བས་ན་གང་དུ་བུད་མེད་ཀྱིས་བརྔོད་པ་དེར་འགྲོ་བར་མི་བྱའོ། །
རྒྱལ་པོའི་ཁབ་ན་དགེ་སློང་སྤོང་བ་པ་ཞིག་ཡང་ཡང་དགོན་པའི་གནས་སུ་སོང་ནས་བསམ་གཏན་བྱེད་པ་ལས། དེ་ལ་བདུད་ཀྱི་རིས་ཀྱི་ལྷ་མོ་ཞིག་གིས་ཚུལ་མ་ཡིན་པ་སྤྱད་པ་བསྒུགས་པ་ལས་དེ་མ་བཏུབ་པ་དང༌། དེས། ཁྱོད་མི་བཏུབ་ན་གནོད་པ་བྱའོ། །སྲིང་མོ། ང་ནི་ཚུལ་ཁྲིམས་དང་ལྡན་པ་ཡིན་པས་ཁྱོད་ཀྱིས་གནོད་པ་བྱར་ཅི་ཡོད། དེས། འཇལ། ཞེས་དེ་ལ་གླགས་འཚོལ་ཞིང་འདུག་གོ །དེས་རེ་ཞིག་ན་སྣམ་སྦྱར་པུས་མཁྱུད་ལྟར་མདུད་པ་བོར་ནས་གཉིད་ལོག་པ་དང༌། ལྷ་མོ་དེས་བླངས་ཏེ། རྒྱལ་པོ་གཟུགས་ཅན་སྙིང་པོ་ཁང་བཟང་གི་སྟེང་ན་གཉིད་ལོག་པའི་སྟེང་དུ་བོར་བས་དེ་གཉིད་སད་ནས། ཁྱོད་སུ་ཡིན། ཤཱཀྱའི་དགེ་སྦྱོང་ངོ༌། །ཁྱོད་འདིར་ཇི་ལྟར་འོངས། ཇི་ལྟར་གྱུར་པ་སྨྲས་པ་དང༌། ཁྱོད་ཅིའི་ཕྱིར་དེ་ལྟ་བུར་གནས། བདག་བཅོམ་ལྡན་འདས་ལ་དད་པར་མ་གྱུར་ན་ཁྱོད་སྲོག་དང་ཕྲལ་བར་འགྱུར་རོ་ཞེས་ཟེར་བའི་སྐབས་དེ་གསོལ་བ་དང༌། དགེ་སློང་དག །(༨༧ན)རྒྱལ་པོ་གཟུགས་ཅན་སྙིང་པོ་འཕྱ་བ་ནི་ཐོག་ཏུ་བབ་བོ། །དེ་བས་ན་གང་དུ་མི་མ་ཡིན་པས་གནོད་པའི་ཕྱིར་རྩོལ་བ་དེར་གནས་པར་མི་བྱའོ། །སྟོན་པ་སེར་སྐྱའི་གནས་ནྱ་གྲོ་དྷའི་ཀུན་དགའ་ར་བར་བཞུགས་སོ། །སྟོན་པའི་གཅུང་པོ་དགའ་བོ་ཞེས་བྱ་བ་ལུས་གསེར་གྱི་མདོག་འདྲ་ཞིང་སྐྱེས་བུ་ཆེན་པོའི་མཚན་སུམ་ཅུ་དང་ལྡན་པ། སྟོན་པ་ལས་སོར་བཞིས་ཐུང་བ་ཞིག་ཡོད་པ་དེ། དེའི་ཆུང་མ་མཛེས་མ་ཞེས་བྱ་བ། གཟུགས་བཟང་བ། མཛེས་པ། ལྟ་ན་སྡུག་པ། སྐྱེས་པའི་ཡིད་དུ་འོང་བ་ཞིག་ཡོད་པ་ལ་ལྷག་པར་ཆགས་སོ། །སྟོན་པས་དེ་གདུལ་བའི་དུས་ལ་བབ་པར་མཁྱེན་ནས། ཕྱི་བཞིན་འབྲང་བའི་དགེ་སློང་ཀུན་དགའ་བོ་དང་སེར་སྐྱའི་གནས་སུ་བསོད་སྙོམས་ལ་གཤེགས་སོ། །སྟོན་པ་དགའ་བོའི་སྒོར་བཞུགས་ཏེ་འོད་ཟེར་གསེར་གྱི་ཁ་དོག་ལྟ་བུ་བཏང་ནས་དེས་ཁྱིམ་དེ་གསེར་ཞུན་མ་ལྟ་བུར་སྣང་བར་གྱུར་ཏོ། །དེས་བསམས་པ། ངེས་པར་སྟོན་པ་གཤེགས་སོ་སྙམ་ནས། མི་ཞིག་ལ། ཁྱོད་སོང་ལ་སྒོ་ན་སུ་ཡོད་ལྟོས་ཤིག །དེ་ཕྱིར་བྱུང་བ་དང༌། སྟོན་པ་མཐོང་ནས་རིངས་པར་ནང་དུ་སོང་སྟེ། དེས་སྨྲས་པ། ཇོ་བོ། སྟོན་པ་གཤེགས་ཏེ་སྒོ་ན་བཞུགས་སོ། །དེ་གུས་པ་དང་བཅས་པས་འགྲོ་བར་བརྩམས་པ་དང༌། མཛེས་མས་བསམས་པ། འདི་སྟོན་པའི་སྤྱན་སྔར་སོང་ན་ངེས་པར་སྟོན་པས་རབ་ཏུ་དབྱུང་ངོ་སྙམ་སྟེ། གོས་ཀྱི་མཐའ་ནས་བཟུང་སྟེ། རྗེའི་སྲས། བཞུགས་ཤིག །ཐོང་ཞིག །སྟོན་པའི་ཞབས་ལ་ཕྱག་བཙལ་ནས་སླར་འོང་ངོ༌། །དེས་དེ་ལ་མཚན་མ་བཏབ་ནས། ཁྱོད་འདི་བསྐམས་ཏེ་གཤེགས་ནས་བདག་ཀརྵ་པ་ཎ་ལྔ་བརྒྱ་དབང་ངོ༌། །དེ་བཞིན་དུ་བྱ་ཡི་ཐོང་ཞིག །དེ་སོང་ནས་སྟོན་པའི་ཞབས་ལ་ཕྱག་བཙལ་ཏེ། སྟོན་པ་ལས་ལྷུང་བཟེད་བླངས་ནས་བཟའ་བ་དང་བཅའ་བ་གཙང་ཞིང་བསོད་པས་ལྷུང་བཟེད་བཀང་སྟེ་བྱུང་བ་དང༌། སྟོན་པས་མ་བཞེས་པར་གཤེགས་ཤིང༌། ཀུན་དགའ་བོ་ལའང༌། མ་ལེན་ཅིག་པའི་བརྡ་མཛད་དོ། །སྟོན་པ་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་པས། སྟོན་པ་ལ། བཞེས་ཤིག་ཅེས་སྨྲ་མ་ནུས་སོ། །ཀུན་དགའ་བོ་ལ་ཕུལ་བ་དང༌། གང་ལས་བླངས་པ་དེ་ཉིད་ལ་ཕུལ་ཅིག །དེ་སྤོབས་པ་མེད་པར་གྱུར་ནས། ལྷུང་བཟེད་ཁྱེར་ཏེ་སྟོན་པ་གཙུག་ལག་ཁང་དུ་གཤེགས་ཏེ་བཞུགས་པ་ལ་ལྷུང་བཟེད་ཕུལ་ལོ། །སྟོན་པས་ཞལ་ཟས་ཀྱི་མཛད་པ་མཛད་ནས་དགའ་བོ་ལ་ལྷུང་བཟེད་ཀྱིས་ལྷག་མ་སྩལ་ཏེ་དེས་ཟོས་སོ། །དགའ་བོ། ཁྱོད་ཅིའི་ཕྱིར་རབ་ཏུ་མི་འབྱུང༌། སྟོན་པས་ཡབ་ཡུམ་དང༌། མཁན་སློབ་དང༌། བླ་མའི་གནས་དག་གི་ཆོས་ལྡན་གྱི་ཚིག་འགའ་ཡང་མ་བཅག་པས། བདག་རབ་ཏུ་འབྱུང་ངོ༌། །ཀུན་དགའ་བོ་སོང་ལ་དགའ་(༨༧བ)བོའི་སྐྲ་དང་ཁ་སྤུ་བྲེགས་ཤིག །ཀུན་དགའ་བོས་འདྲེག་མཁན་གཉེར་ཏེ། འདྲེག་པར་བརྩམས་པ་དང༌། དགའ་བོས་འདྲེག་མཁན་ལ། ང་རིང་པོར་མི་ཐོགས་པར་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་བས། ཁྱོད་ཀྱིས་ངའི་སྐྲ་དང་ཁ་སྤུ་བྲེགས་ན་ངས་ཁྱོད་ཀྱི་ལག་པ་མཁྲིག་མ་མན་ཆད་གཅད་དོ་ཞེས་བསྡིགས་པས་དེ་སྐྲག་སྟེ་འདུག་པ་དང༌། ཀུན་དགའ་བོས་གསོལ་ཏོ། །
དེ་ནས་སྟོན་པ་དགའ་བོ་ག་ལ་བ་དེར་གཤེགས་ནས། དགའ་བོ། ཁྱོད་རབ་ཏུ་མི་འབྱུང་ངམ། བདག་རབ་ཏུ་འབྱུང་ངོ༌། །དེ་ནས་སྟོན་པས་མགོར་ཆུ་བླུགས་ཤིང༌། འདྲེག་མཁན་གྱིས་སྐྲ་དང་ཁ་སྤུ་བྲེགས་དང༌། དེས་བསམས་པ། རེ་ཞིག་སྟོན་པ་ལ་གུས་པར་བྱ་བའི་ཕྱིར་རབ་ཏུ་བྱུང་ལ། ནམ་སྲོས་ནས་འགྲོའོ་སྙམ་སྟེ་ནམ་སྲོས་ནས་སོང་བ་དང༌། སྟོན་པས་གཡང་ས་ཞིག་སྤྲུལ་ཏོ། །དགའ་བོས་བསམས་པ། མཛེས་མ་དང་ཐག་རིང་ཞིང༌། བདག་གཞན་དུ་འཆི་བར་འགྱུར་གྱིས། ནམ་ལངས་ཏེ་འགྲོའོ་སྙམ་ནས། དེ་བཟང་མོ་ལ་རྟོག་ཅིང་སྡུག་བསྔལ་བས་མཚན་མོ་འདས་སོ། །སྟོན་པས་དེའི་སེམས་མཁྱེན་ནས། ཀུན་དགའ་བོ་ཁྱོད་སོང་ལ། དགའ་བོ་ལ། ཁང་སྐྱོང་བྱོས་ཅིག་ཅེས་སྒོས་ཤིག །ཀུན་དགའ་བོས་དེ་ལ་བསྒོ་བ་དང༌། དེས་སྨྲས་པ། ཁང་སྐྱོང་ཞིང་བྱ་བ་ཅི་ལགས། དེར་ཇི་ལྟ་བུ་བགྱི། གཙུག་ལང་ཁང་ཕྱག་བདར་བྱ། བ་ལང་གི་ལྕི་བ་སར་བས་ཀྱང་སྐྱང་ནུལ་བྱ། གཙུག་ལག་ཁང་སྲུང་བ་དང༌། དགེ་འདུན་ལ་དྲི་དང༌། མེ་ཏོག་དང༌། བདུག་སྤོས་ལ་སོགས་པས་བྲིམ་པར་བྱ། མཚན་མོ་སྒོ་གཅད་ཅིང་ནངས་པར་དབྱེ་བར་བྱ། བཤང་བ་དང་གཅི་བའི་གནས་སྦྱང་བར་བྱ། གཞན་ཡང་གཙུག་ལག་ཁང་དང་འབྲེལ་བའི་བྱ་བ་རྣམས་བྱའོ། །དེས་སྨྲས་པ། དེ་བཞིན་འཚལ་ལོ། །དགེ་སློང་རྣམས་བསོད་སྙོམས་ལ་ཞུགས་པ་དང༌། དགའ་བོ་གཙུག་ལག་ཁང་ཕྱགས་ལ་འགྲོའོ་སྙམ་ནས་ཕྱག་བདར་བྱས་པ་དང༌། སྟོན་པས། ཁྱམས་གཅིག་ཕྱགས་པའི་ཚེ་གཉིས་པ་ཕྱག་བདར་གྱིས་གང་བར་བྱིན་གྱིས་བརླབས་སོ། །ཕྱག་དར་བོར་ལ་འགྲོའོ་སྙམ་ནས་ཕྱག་དར་དབོ་བས་ཟད་པར་མ་གྱུར་ནས། སྒོ་བཅད་ལ་འགྲོའོ་སྙམ་ནས་སྒོ་བཅད་པ་དང༌། གནས་ཁང་གཅིག་གི་སྒོ་བཅད་པའི་ཚེ་གཞན་ཕྱེ་བར་གྱུར་པ་དང༌། བདག་རྒྱལ་པོར་གྱུར་ནས་འདི་བས་ཆེས་ལྷག་པའི་གཙུག་ལག་ཁང་བྱ་ཡི་འགྲོའོ་སྙམ་ནས་དེས་གསེབ་ལམ་ནས་ཕྱིན་པ་དང༌། སྟོན་པས་དེའི་སེམས་མཁྱེན་ནས་ལམ་དེ་ཉིད་དུ་གཤེགས་སོ། །
དེས་སྟོན་པ་ཐག་རིང་པོ་ནས་མཐོང་ནས་དེ་དང་ཧ་ཅང་མི་རིང་བ་ན་ཤིང་ཡལ་ག་སྟུག་པོ་ཐུར་དུ་འཕྱང་བ་ཞིག་ཡོད་པར་དེ་མྱུར་དུ་སོང་སྟེ་དེའི་འོག་ཏུ་གབ་པ་དང༌། སྟོན་པས་ཤིང་དེའི་(༨༨ན)ཡལ་ག་རྣམས་གྱེན་དུ་འཕགས་པར་བྱིན་གྱིས་བརླབས་ནས། དགའ་བོ། ཁྱོད་གར་འགྲོ་ཚུར་ཤོག །དེ་སྤོབས་པ་མེད་ཅིང་ངོ་ཚ་བའི་ཡིད་ཀྱིས་སྟོན་པའི་ཕྱི་བཞིན་སོང་ངོ༌། །སྟོན་པས་དགོངས་པ། འདི་ཤིན་ཏུ་བཟང་མོ་ལ་ཆགས་པ་དེ་དང་དབྲལ་བར་བྱའོ་སྙམ་དུ་མཁྱེན་ནས། སེར་སྐྱའི་གནས་ནས་མཉན་ཡོད་དུ་གཤེགས་པ་དང༌། རི་དྭགས་འཛིན་གྱི་མ་ས་གས་སྟོན་པའི་གཅུང་དགའ་བོ་ལུས་གསེར་གྱི་མདོག་འདྲ་ཞིང་སྐྱེས་བུ་ཆེན་པོའི་མཚན་སུམ་ཅུ་ཅན་སྟོན་པ་བས་སོར་བཞིས་ཐུང་བ་དེ་སྟོན་པ་དང་ཐབས་གཅིག་ཏུ་འདིར་འོངས་སོ་ཞེས་ཐོས་ནས། དེ་བདག་གིས་ནམ་མཐོང་སྙམ་མོ། །དེ་ནས་རེ་ཞིག་ན་དགའ་བོ་བསོད་སྙོམས་ལ་ཞུགས་ནས་ཁད་ཀྱིས་རི་དྭགས་འཛིན་གྱི་མ་ས་གའི་ཁྱིམ་དུ་སོང་བ་དང༌། དེས། འདི་ནི་ངེས་པར་སྟོན་པའི་གཅུང་དགའ་བོ་ཡིན་ནོ་སྙམ་ནས་དད་པ་སྐྱེས་ཏེ་དེའི་རྐང་པ་ལ་གཏུགས་པའི་ཕྱག་བྱས་སོ། །དེས་དེའི་རྐང་པ་ལ་རེག་པ་དང༌། བུད་མེད་ཀྱི་རེག་པ་ནི་གདུག་པ་ཡིན་པས་དེ་འདོད་ཆགས་བདོ་བར་དེའི་ཁུ་བ་འཐོར་ནས་ས་གའི་མགོར་ལྷུང་བ་དང༌། སངས་རྒྱས་བཅོམ་ལྡན་འདས་ནི་བསྙེལ་བ་མི་མངའ་བའི་ཆོས་ཅན་ཡིན་པས། དེ་ཏུ་རུ་ཀའི་འབྲུ་མར་དུ་བྱིན་གྱིས་བརླབས་སོ། །དེས་བསམས་པ། འདི་ན་ཏུ་རུ་ཀའི་འབྲུ་མར་ག་ལ་འབྱུང༌། ངེས་པར་དགའ་བོས་མི་གཙང་བ་ཤོར་བ། སྟོན་པས་འབྲུ་མར་དུ་བྱིན་གྱིས་བརླབས་སོ་སྙམ་ནས། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ལེགས་པར་གསུངས་པ་ཉིད། འདི་ལྟར་དགའ་བོ་ལ་སོགས་པ་འདོད་ཆགས་ཆེས་ཆེ་བ་དག་ཀྱང་ཚངས་པར་སྤྱོད་དོ་ཞེས་ཆེད་དུ་བརྗོད་དོ། །
དེ་ནས་དགའ་བོ། བདག་ལ་དགེ་འདུན་ལྷག་མ་མ་བྱུང་ངམ་སྙམ་ནས་གསོལ་བ་དང༌། འདི་ལ་ལྟུང་བ་མེད་དེ། དེ་བས་ན་འདོད་ཆགས་ཤས་ཆེ་བས་འཛག་སྣོད་བཅང་བར་བྱའོ། །ཇི་ལྟ་བུ་འཆང་བ་མ་ཤེས་ནས། རའམ་རི་དྭགས་སམ་བྱི་བའི་པགས་པ་ལས་སོ། །དེ་དག་གིས་དེ་བཞིན་དུ་བཞག་པས་དྲི་ང་བར་གྱུར་ནས། དྲི་མི་ང་བར་བྱ་བའི་ཕྱིར་བསྐ་བས་བཀྲུ་བ་དང་བསྐམ་པར་བྱའོ། །བཀྲུས་ནས་སྐེམ་པའི་བར་དུ་བུད་མེད་མཐོང་ནས་ཁུ་བ་འཐོར་བས་ཤམ་ཐབས་དབྲེ་བོར་གྱུར་ནས། གཉིས་བྱས་ལ་གཅིག་སྐེམ་པ་དེ་འདུས་ཀྱི་ཆེད་དུ་གཞན་གདགས་པར་བྱའོ། །ཁུ་བ་ལྷག་པར་མང་བས་དེ་གཤེར་ནས། ཧ་ཅང་མང་བར་ལྡང་བར་གྱུར་ན་ཕྲུ་བླུགས་པར་བྱའོ། །སོ་ཕག་གི་ཕུར་མ་བླུགས་པས་སྡུག་བསྔལ་བར་གྱུར་ནས། བྱེ་མའམ་སའི་ཕྲུ་བླུགས་པར་བྱའོ། །དེ་བཏགས་བཞིན་དུ་ཟས་ཟ། མཆོད་རྟེན་ལ་ཕྱག་འཚལ་བར་བྱེད་ནས། ཟན་ཟ་བ་དང་མཆོད་རྟེན་ལ་ཕྱག་འཚལ་བའི་ཚེ་དབེན་(༨༨བ)པར་ཕོག་ལ་བཀྲུས་ཏེ་ཟན་ཟ་བ་དང་མཆོད་རྟེན་ལ་ཕྱག་བྱའོ། །སྟོན་པས་དགོངས་པ། དགའ་བོ་འདི་ད་དུང་བཟང་མོ་ལ་ཆགས་པས་འདི་ལ་ཐབས་ཤིག་བྱའོ་སྙམ་དུ་མཁྱེན་ནས། དགའ་བོ། ཁྱོད་ཀྱིས་རི་སྤོས་ཀྱི་ངད་ལྡང་མཐོང་ངམ། མ་མཐོང་ལགས་སོ། །
དེ་ལྟ་ན་དེ་བཞིན་གཤེགས་པའི་ཆོས་གོས་ཀྱི་ཐ་མ་ནས་ཟུང་ཞིག །དེས་དེ་བཟུང་བ་དང༌། སྟོན་པ་ངང་པའི་རྒྱལ་པོ་འདབ་མ་བརྐྱངས་པ་ལྟར་ནམ་མཁའ་ལ་འཕགས་ཏེ་རི་སྤོས་ངད་ལྡང་ལ་གཤེགས་པ་ན། ཤིང་ས་ཧཱ་ཀ་ར་ཞིག་དྲུང་ན་སྤྲ་མོ་ཞར་མ་ཞིག་འདུག་པ་དེས་སྟོན་པ་མཐོང་ནས་མི་གཡེང་བར་རྟོག་པར་བྱེད་དོ། །དགའ་བོ། ཁྱོད་ཀྱིས་སྤྲ་མོ་ཞར་མ་འདི་མཐོང་ངམ། མཐོང་ལགས་སོ། །འདི་དང་བཟང་མོ་གཉིས་གང་གཟུགས་བཟང༌། སྤྲ་མོ་འདིས་བཟང་མོའི་བརྒྱ་སྟོང་གི་ཆར་ཡང་མི་མཆིས་ཏེ། བཟང་མོ་ནི་ལྷའི་བུ་མོ་དང་འགྲན་པ་ལགས་སོ། །དགའ་བོ། དེ་ལྟ་ན་དེ་བཞིན་གཤེགས་པའི་ཆོས་གོས་ཀྱི་ཐ་མ་ནས་ཟུང་ཞིག །དེས་བཟུང་བ་དང༌། སྟེང་གི་ནམ་མཁའ་ལ་འཕགས་ཏེ་ཁད་ཀྱིས་སུམ་ཅུ་རྩ་གསུམ་གྱི་དགའ་བའི་ཚལ་གྱི་སྐྱེད་མོས་ཚལ་དུ་བཞུགས་ནས། དགའ་བོ། ཁྱོད་སོང་ལ་སུམ་ཅུ་རྩ་གསུམ་པའི་ལྷ་རྣམས་ལྟོས་ཤིག །དེས་སྐྱེད་མོས་ཚལ་རྣམས་བལྟས་པས་ན་གཅིག་པས་གཅིག་བཟང་བ་དག་ཏུ་གྱུར་པ་མཐོང་ནས་གྲོང་ཁྱེར་ལྟ་ན་སྡུག་ཏུ་སོང་སྟེ་བལྟས་པ་ན། པི་ཝང་དང་གླིང་བུ་ལ་སོགས་པ་སྣ་ཚོགས་བཞག་ཅིང༌། ལྷའི་བུ་དང་བུ་མོ་དག་ལྷན་ཅིག་རྩེ་བ་མཐོང་ངོ༌། །ཕྱོགས་ཤིག་ན་ལྷའི་བུ་མེད་ཅིང༌། ལྷའི་བུ་མོས་གང་བའི་གཞལ་མེད་ཁང་མཐོང་ནས་དྲིས་པ། གཞལ་མེད་ཁང་གཞན་ན་ལྷའི་བུ་དང་བུ་མོས་གང་བ། འདི་ལ་ལྷའི་བུ་མེད་པའི་རྒྱུ་ཅི་ཡིན། དེ་དག་གིས་སྨྲས་པ། །གཅུང་དགའ་བོ་སྟོན་པའི་སྤྱན་སྔར་ཚངས་པར་སྤྱོད་པ་དེ་ཤི་ནས་འདིར་འོང་བས་བདག་ཅག་དེ་ལ་སྡོད་དོ། །དེ་དགའ་ནས་རིངས་པར་སྟོན་པའི་སྤྱན་སྔར་སོང་བ་དང༌། ཁྱོད་ཀྱིས་སུམ་ཅུ་རྩ་གསུམ་པའི་ལྷ་རྣམས་མཐོང་ངམ། མཐོང་ལགས་སོ། །ཇི་ལྟར་མཐོང༌། ཇི་ལྟར་མཐོང་བ་གསོལ་བ་དང༌། བཟང་མོ་དང་ལྷའི་བུ་མོ་དག་གཟུགས་གང་བཟང༌། ལྷའི་བུ་མོ་དེ་དག་ལ་བཟང་མོས་བརྒྱ་སྟོང་གི་ཆར་ཡང་མི་མཆིའོ། །ཚངས་སྤྱོད་ལ་གནས་ན་ཕན་ཡོད་འདི་དང་གཞན་དག་ཀྱང་ཡོད་དེ། ཚངས་པར་སྤྱོད་ཅིག །ལྷའི་དཔལ་ཉམས་སུ་མྱོང་བར་འགྱུར་རོ། །དེ་སྟོན་པའི་བཀའ་ལ་ཡི་རང་ནས་ཅང་མི་སྨྲའོ། །དེ་ནས་མཉན་ཡོད་དུ་གཤེགས་པ་དང༌། དགའ་བོ་ལྷའི་འཇིག་རྟེན་ལ་དགའ་བས་ཚངས་པར་སྤྱད་པ་སྤྱོད་དོ། །སྟོན་པས་དེའི་སེམས་མཁྱེན་ནས། ཀུན་དགའ་བོ། སོང་ལ་དགེ་སློང་རྣམས་ལ་འདི་སྐད་ཅེས། ཁྱེད་སུས་ཀྱང་དགའ་བོ་དང་ལྷན་ཅིག་འདུག་པ་དང༌། འཆག་པར་(༨༩ན)མི་བྱ། གདང་བུ་གཅིག་ལ་ཆོས་གོས་མི་གཞག །གཞི་གཅིག་ལ་ལྷུང་བཟེད་མི་གཞག །བཀླག་པར་མི་བྱ། གདོན་པར་མི་བྱའོ་ཞེས་སྒོས་ཤིག །ཀུན་དགའ་བོས་དེ་སྐད་བསྒོ་བས་དགེ་སློང་རྣམས་ཀྱིས་དེ་སྤངས་པ་ན་ཤིན་ཏུ་གནོང་ཞིང་ངོ་ཚའོ། །དགེ་སློང་འདི་དག་གིས་བདག་སྤངས་ན། ཀུན་དགའ་བོ་བདག་གི་ཕུ་ནུ་བོ་ཡིན་ན་འདིས་ཀྱང་བདག་སྤོང་ངམ་སྙམ་ནས། དེས་ལྷན་ཅིག་ཏུ་འདུག་པ་དང༌། ཀུན་དགའ་བོ་མྱུར་བར་ལངས་སོ། །
དེས་སྨྲས་པ། ཚངས་པ་མཚུངས་པར་སྤྱོད་པ་འདི་དག་གིས་རེ་ཞིག་བདག་སྤོང་བར་རིགས་མོད། ཁྱོད་བདག་གི་ཕུ་ནུ་བོ་ཡིན་ན་བདག་ཅིའི་ཕྱིར་སྤོང༌། དགའ་བོ། དེ་ནི་བདེན་ན། འོན་ཀྱང་ཁྱོད་དང་ཁོ་བོ་ཅག་ལམ་གཞན་དུ་ཞུགས་པས་ཆེས་སྤང་དགོས་སོ། །ཀུན་དགའ་བོ། ཁྱེད་ལམ་གང་དུ་ཞུགས། བདག་གང་དུ་ཞུགས་གསུངས་ཤིག །ཁྱོད་ནི་ལྷའི་འཇིག་རྟེན་ལ་དགའ་བས་ཚངས་པར་སྤྱོད་ལ། ཁོ་བོ་ཅག་མྱ་ངན་ལས་འདའ་བའི་བསམ་པས་ཚངས་པར་སྤྱོད་དོ་ཞེས་སྨྲས་པ་དང༌། དེ་ཤིན་ཏུ་སྐྱོ་བར་གྱུར་ཏོ། །སྟོན་པས་དེའི་སེམས་མཁྱེན་ནས། དགའ་བོ། ཁྱེད་ཀྱིས་དམྱལ་བ་མཐོང་ངམ། མ་མཐོང་ལགས་སོ། །ངའི་ཆོས་གོས་ཀྱི་ཐ་མ་ནས་ཟུང་ཞིག་ཅེས་དེ་ཁྲིད་ནས་དམྱལ་བའི་གནས་སུ་གཤེགས་སོ། །སྟོན་པ་ཕྱོགས་ཤིག་ཏུ་བཞུགས་ནས། དགའ་བོ། སོང་ལ་དམྱལ་བ་རྣམས་ལྟོས་ཤིག །དེས་ཆུ་བོ་རབ་མེད་ལ་སོགས་པ་ལྷག་པའི་གནས་གཅིག་པས་གཅིག་སྡུག་བསྔལ་མི་བཟད་པ་མཐོང་ནས། དམྱལ་བའི་གནས་སུ་སོང་བ་ན། སོག་ལེས་གཤག་པ་དང༌། སྟ་རེས་གཅོད་པ་དང༌། མདུང་ཐུང་གིས་འབུགས་པ་དང༌། ཐོ་བས་རྡུང་བ་དང༌། ཟངས་པོ་ཆེ་སྐོལ་བའི་ནང་དུ་བཅུག་པ་མཐོང་ངོ༌། །ཕྱོགས་ཤིག་ན་ཟངས་པོ་ཆེ་ཁོལ་བ་ཞིག་མཐོང་ནས། ཟངས་པོ་ཆེ་གཞན་དག་ཏུ་སེམས་ཅན་བཅུག་ལ། འདིར་མ་བཅུག་པ་ཅི་ཡིན། དེ་དག་གིས་སྨྲས་པ། གཅུང་དགའ་བོ་ལྷའི་འཇིག་རྟེན་ལ་དགའ་བས་ཚངས་པར་སྤྱོད་པ་དེ་ཤི་ནས་འདིར་འོང་བས་འདི་བསྡོགས་ཤིང་ཁོ་བོ་ཅག་ཀྱང་དེ་ལ་སྡོད་དོ། །དེ་ཐོས་པས་འཇིགས་སྐྲག་ཅིང་སྤུ་ཟིང་བྱེད་ནས་ད་ལྟ་བཅུག་པར་འགྱུར་གྱིས་འབྲོས་སོ་སྙམ་ནས། རིངས་པར་བྲོས་ཏེ་རོད་ཉམས་ཤིང་ངོ་ཟུམ་ནག་པོར་སྟོན་པའི་སྤྱན་སྔར་སོང་བ་དང༌། དགའ་བོ། ཁྱོད་ཀྱིས་དམྱལ་བ་རྣམས་མཐོང་ངམ། དེ་སྲོ་ཤི། ལྕེ་ལྡིབ། སྙིང་རྗེ་རྗེ་སྐད་དུ་དལ་བུས་གཅོམ་ཆུང་ངུས་གསོལ་བ། མཐོང་ལགས་སོ། །ཇི་ལྟར་མཐོང༌། དེས་ཇི་ལྟར་མཐོང་བ་གསོལ་བ་དང༌། ལྷའི་འཇིག་རྟེན་ལ་སྨོན་པས་ཚངས་པར་སྤྱོད་པ་ལ་ཉེས་དམིགས་འདི་དང་གཞན་ཡང་ཡོད་པས་ཁྱོད་ཀྱིས་མྱང་འདས་ལ་དགའ་བར་བྱ་ཡི་ལྷའི་འཇིག་རྟེན་ལ་(༨༩བ)དགའ་བར་མི་བྱའོ། །
དེ་ནས་སྟོན་པ་གྲོང་ཁྱེར་ཙམ་པར་དྲང་སྲོང་གར་གའི་རྫིང་དྲུང་དུ་གཤེགས་སོ། །རེ་ཞིག་ན་དགའ་བོ་འཁོར་ལྔ་བརྒྱ་དང་ཕྱི་དྲོ་ནང་དུ་ཡང་དག་འཇོག་ལས་ལངས་ནས་སྟོན་པའི་སྤྱན་སྔར་སོང་སྟེ་ཞབས་གཉིས་ལ་ཕྱག་བཙལ་ནས་ཕྱོགས་ཤིག་ཏུ་འདུག་པ་དང༌། མངལ་དུ་འཇུག་པ་ཞེས་པའི་ཆོས་ཀྱི་རྣམ་གྲངས་བཤད་པས་དགའ་བོས་བདེན་པ་མཐོང༌། དགེ་སློང་ལྔ་བརྒྱས་དགྲ་བཅོམ་པ་ཐོབ་པོ། །དེ་ནས་སྟོན་པས་དགའ་བོ་མངལ་དུ་འཇུག་པའི་མདོས་གཏམས་ནས། འཁོར་བའི་དགོན་པ་ལས་བསྒྲལ་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བ་མྱ་ངན་ལས་འདས་པ་ལ་བཞག་ནས་དབང་པོའི་སྒོ་བསྡམས་པ་རྣམས་ཀྱི་མཆོག་ཏུ་ལུང་བསྟན་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། དགའ་བོས་ལན་ཅི་བགྱིས་པས། ལུས་གསེར་གྱི་ཁ་དོག་ལྟ་བུར་གྲུབ་ཅིང༌། མཚན་སུམ་ཅུས་བརྒྱན་པ་དང༌། ལྷག་པར་ཆགས་པ་ལས། སྟོན་པས་ནན་གྱིས་ཕྲལ་ནས་མྱང་འདས་ལ་བཞག་ལགས། སྔོན་སངས་རྒྱས་རྣམ་གཟིགས་འཁོར་དགེ་སློང་འབུམ་ཕྲག་དྲུག་ཅུ་རྩ་གཉིས་དང་ལྗོངས་རྒྱུ་ཞིང་རྒྱལ་པོའི་ཕོ་བྲང་གཉེན་ལྡན་དུ་བྱོན་ནས་གཉེན་ལྡན་གྱི་ཚལ་ན་བཞུགས་སོ། །དེའ་གཡས་ཁྱིམ་གྱི་གཅུང་འདོད་པ་ལ་ཤིན་ཏུ་ཆགས་པ་ལས་སངས་རྒྱས་རྣམ་གཟིགས་ཀྱིས་ནན་གྱིས་ཕྲལ་ནས་མྱང་འདས་ལ་བཞག་གོ །དེའི་ཚེ་ཕོ་བྲང་གཉེན་ལྡན་ན་རྒྱལ་པོ་གཉེན་ལྡན་གྱི་རྒྱལ་སྲིད་ཆོས་བཞིན་དུ་བྱེད་ལ། དེའི་གཡས་ཁྱིམ་གྱི་ནུ་བོ་ནི་འདོད་པ་ལ་ཤིན་ཏུ་ཆགས་སོ། །རྒྱལ་པོ་གཉེན་ལྡན་འཁོར་བཅས་སངས་རྒྱས་རྣམ་གཟིགས་ཀྱི་དྲུང་དུ་སོང་ནས། དེ་ལ་སངས་རྒྱས་རྣམ་གཟིགས་ཀྱིས་ཆོས་བསྟན་ཏོ། །དེའི་གཡས་ཁྱིམ་གྱི་ནུ་བོ་འདོད་པ་ལ་ལྷག་པར་ཆགས་པས་ཁྱིམ་ནས་མ་བྱུང་བ་དང༌། དེ་ལ་བློན་པོ་དང་མདུན་ན་འདོན་གྱི་བུ་དང༌། ཆུང་པོ་གྲོགས་རྣམས་ཀྱིས་སྨྲས་པ། རྒྱལ་པོ་འཁོར་བཅས་ནི་སངས་རྒྱས་རྣམ་གཟིགས་བལྟ་བའི་ཕྱིར་གཤེགས་ན། ཁྱོད་མི་ཉིད་ཤིན་ཏུ་རྙེད་དཀའ་བ་ཐོབ་ཀྱང་འདོད་པ་ལ་ཤིན་ཏུ་ཆགས་ནས་ཁྱིམ་ནས་མ་བྱུང་ངོ་ཞེས་སྨྲས་པ་དང༌། དེ་ངོ་ཚ་ནས་དེ་དག་དང་འགྲོགས་ཏེ་སངས་རྒྱས་རྣམ་གཟིགས་ཀྱི་དྲུང་དུ་སོང་བ་ན། སངས་རྒྱས་རྣམ་གཟིགས་ཀྱི་གཅུང་གིས་དེ་ཁྲིད་པ་མཐོང་ནས། ཅིའི་ཕྱིར་འདི་ལྟར་ཁྲིད། དེ་དག་གིས་རྒྱས་པར་བསྙད་པ་དང༌། ང་ཡང་སངས་རྒྱས་རྣམ་གཟིགས་ཀྱི་གཅུང་ཡིན་ཏེ་འདོད་པ་ལ་ལྷག་པར་ཆགས་པ་ལས་སངས་རྒྱས་རྣམ་གཟིགས་ཀྱིས་ནན་གྱིས་ཕྲལ་ནས་མྱང་འདས་ལ་བཀོད་དོ། །
དེ་བས་ན་གཏི་མུག་ཅན་ཁ་ཅིག་ལ་དེ་ལྟར་བྱ་དགོས་པས་ཁྱེད་ཀྱིས་ཁྲིད་དེ་འོངས་པ་ལེགས་ཀྱིས་དེང་ལ་སྟོན་པའི་སྤྱན་སྔར་ཁྲིད་དང༌། ངེས་པར་སྟོན་པ་ལ་དད་པ་རྙེད་པར་འགྱུར་རོ། །དེ་དག་གིས་སངས་རྒྱས་(༩༠ན)རྣམ་གཟིགས་ཀྱི་སྤྱན་སྔར་ཁྲིད་པ་དང༌། དེ་ལ་ཆོས་བཤད་པས་དད་པར་གྱུར་ཏེ། བཅོམ་ལྡན་འདས་དགེ་འདུན་དང་བཅས་པ་བདག་གི་སྡུམ་པར་ཁྲུས་ཁང་གི་ཁྲུས་མཛད་པར་ཅི་གནང༌། ཅང་མི་གསུང་བས་གནང་བར་རིག་ནས་རྒྱལ་པོ་གཉེན་ལྡན་གྱི་གན་དུ་སོང་སྟེ། ལྷ། བདག་གིས་སངས་རྒྱས་དགེ་འདུན་དང་བཅས་པ་བདག་གི་སྡུམ་པར་ཁྲུས་ཁང་གི་ཁྲུས་མཛད་པར་སྤྱན་དྲངས་པ་ལས་གནང་སྟེ། དེ་ནི་བཀུར་སྟི་བགྱི་བར་འོས་པ་ལགས་པས། དེ་གྲོང་ཁྱེར་དུ་གཤེགས་པའི་གྲོང་ཁྱེར་དང་ལམ་མཛེས་པར་བགྱི་བའི་རིགས་སོ། །སྟོན་པས་གདུལ་དཀའ་བ་འདི་ཡང་བཏུལ་བ་བལྟ་སྙམ་ནས་སྨྲས་པ། ནུ་བོ། ལེགས་ཀྱིས་ཁྱོད་སོང་ལ་རྫས་རྣམས་སྟ་གོན་གྱིས་ཤིག །ངས་གྲོང་ཁྱེར་དང་ལམ་མཛེས་པར་བྱའོ། །
དེ་ནས་རྒྱལ་པོས་གྲོང་ཁྱེར་དང་ལམ་མཛེས་པར་བྱེད་དུ་བཅུག་ནས། སངས་རྒྱས་རྣམ་གཟིགས་རྒྱལ་པོ་གཉེན་ལྡན་འཁོར་དང་བཅས་པས་ཞམ་རིང་བྱས་ཏེ། ཁྲུས་ཁང་གི་ནང་དུ་གཤེགས་ནས་ཁྲུས་མཛད་པར་བརྩམས་པ་དང༌། སངས་རྒྱས་རྣམ་གཟིགས་ཀྱི་སྐུ་གསེར་གྱི་མདོག་ལྟ་བུ། མཚན་སོ་གཉིས་ཀྱིས་བརྒྱན་པ་མཐོང་ནས་དད་པ་སྐྱེས་ཏེ། སྨོན་ལམ་བཏབ་པ། དགེ་བ་འདིས་བདག་ཀྱང་ལུས་གསེར་གྱི་མདོག་ལྟ་བུ་དང༌། འདིས་གཅུང་པོ་འདོད་པ་ལ་ཆགས་པ་ལས་ནན་གྱིས་ཕྲལ་ནས་མྱང་འདས་ལ་བཀོད་པ་བཞིན་དུ་བདག་ཀྱང་སྟོན་པའི་གཅུང་དུ་གྱུར་ཅིང༌། བདག་འདོད་པ་ལ་ཤིན་ཏུ་ཆགས་ནའང་སྟོན་པ་དེས་ནན་གྱིས་ཕྲལ་ནས་མྱང་འདས་ལ་འགོད་པར་གྱུར་ཅིག་ཅེས་བྱས་སོ། །དེའི་དུས་ཀྱི་རྒྱལ་པོ་གཉེན་ལྡན་གྱི་ནུ་བོ་དེ་ནི་དགའ་བོ་ཡིན་ཏེ། འདིས་སངས་རྒྱས་རྣམ་གཟིགས་ལ་ཁྲུས་བྱས་ནས་སྨོན་ལམ་བཏབ་པས་སྟོན་པའི་གཅུང་དུ་གྱུར་ཅིང་ལུས་གསེར་གྱི་མདོག་ལྟ་བུར་གྱུར་ལ། ངས་ནན་གྱིས་ཕྲལ་ནས་མྱང་འདས་ལ་བཀོད་དོ། །དགའ་བོས་ལས་ཅི་བགྱིས་པས་མཚན་སུམ་ཅུ་གྲུབ་ལགས། སྔོན་རི་བྲག་ཞིག་ན་ཁྱིམ་བདག་ཕྱུག་ཅིང་ནོར་མང་བ་ཞིག་གནས་ཏེ། དེ་ལ་སྐྱེད་མོས་ཚལ་ཕུན་སུམ་ཚོགས་པ་རབ་ཏུ་བྱུང་བའི་སྐྱེ་བོ་དང་མཐུན་པ་ཞིག་ཡོད་པ་དེར་རང་སངས་རྒྱས་ཤིག་གིས་ཕྱིན་པ་དང༌། སྐྱེད་མོས་ཚལ་སྲུང་མིས། བྱོན་པ་ལེགས་སོ་ཞེས་ཀུན་ཏུ་དཔྱད་ནས་ངལ་གསོར་བཅུག་གོ །དེ་མཚན་མོ་མེའི་ཁམས་ལ་སྙོམས་པར་ཞུགས་པ་དང༌། སྐྱེད་མོས་ཚལ་སྲུང་བའི་མི་དེས་མཐོང་ནས། རབ་ཏུ་བྱུང་བ་འདི་ནི་བདག་ཉིད་ཆེན་པོ་བརྟུལ་ཞུགས་གྲུབ་པའོ་སྙམ་སྟེ་ནམ་ལངས་པ་དང་ཁྱིམ་བདག་ལ་སྨྲས་པ། རྗེའི་སྲས། དགྱེས་པ་སྐྱེད་ཅིག །(༩༠བ)ཁྱོད་ཀྱི་སྐྱེད་མོས་ཚལ་དུ་རབ་ཏུ་བྱུང་བ་བདག་ཉིད་ཆེན་པོ་བརྟུལ་ཞུགས་གྲུབ་པ་ཞིག་དགོང་བཏབ་སྟེ། དེས་སྐྱེད་མོས་ཚལ་དེ་ཐམས་ཅད་མཚན་མོ་སྣང་བར་བགྱིས་སོ། །དེ་རབ་ཏུ་དགའ་བ་སྐྱེས་ཏེ། རིངས་པར་སོང་ནས་རྐང་པ་ལ་གཏུགས་ཏེ། ཁྱོད་ནི་བསོད་སྙོམས་དོན་དུ་གཉེར་ལ། བདག་ནི་བསོད་ནམས་དོན་དུ་གཉེར་བ་ལགས་ན་སྐྱེད་མོས་ཚལ་འདི་ཉིད་དུ་བཞུགས་སུ་གསོལ། བདག་གིས་བསོད་སྙོམས་སྦྱར་བར་བགྱིའོ། །དེས་ཁས་བླངས་ཏེ་དེར་བསམ་གཏན་དང་རྣམ་ཐར་དང་སྙོམས་འཇུག་གི་བདེ་བ་ཉམས་སུ་མྱོང་ཞིང་ཅུང་ཟད་ཅིག་འདུག་ནས་མྱ་ངན་ལས་འདས་སོ། །
དེ་ནས་ཁྱིམ་བདག་དེས་དེའི་རུས་པ་རྣམས་བུམ་པར་བཅུག་སྟེ་མཆོད་རྟེན་བྱས་ནས་གདུགས་དང༌། རྒྱལ་མཚན་དང༌། བ་དན་དག་བཙུགས་ནས་དད་པ་སྐྱེས་ཏེ། གུར་གུམ་གྱིས་བྱུགས་ཤིང༌། དྲིའི་ལག་རིས་སུམ་ཅུ་བྱས་སོ། །དེའི་དུས་ཀྱི་ཁྱིམ་བདག་དེ་ནི་དགའ་བོ་ཡིན་ཏེ། རང་སངས་རྒྱས་ཀྱི་མཆོད་རྟེན་ལ་གདུགས་ལ་སོགས་པ་བཙུགས་ཏེ་དད་པས་གུར་གུམ་གྱིས་བྱུགས་ཤིང༌། དྲིའི་ལག་རིས་སུམ་ཅུ་བྱས་པས་མཚན་སུམ་ཅུ་གྲུབ་པ་ཡིན་ནོ། །དགའ་བོས་ལས་ཅི་བགྱིས་པས་རབ་ཏུ་མ་བྱུང་ན་སྟོབས་ཀྱི་འཁོར་ལོས་བསྒྱུར་པའི་རྒྱལ་པོར་འགྱུར། སྔོན་སངས་རྒྱས་འོད་སྲུངས་མྱ་ངན་ལས་འདས་པའི་ཚེ། རྒྱལ་པོ་ཀྲྀ་ཀྲིའི་དེའི་སྐུ་གདུང་ལ་མཆོད་པ་བྱས་ནས་རིན་པོ་ཆེ་སྣ་བཞིའི་མཆོད་རྟེན་ཁོར་ཡུག་ཏུ་དཔག་ཚད་གཅིག་པ། དཔངས་སུ་དཔག་ཚད་ཕྱེད་པ་ཞིག་བརྩིགས་སོ། །དེ་ལ་རྒྱལ་པོ་ཀྲྀ་ཀྲིའི་བུ་འབྲིང་པོས་གདུགས་འབྲིང་ཞིག་བཏགས་སོ། །རྒྱལ་པོ་ཀྲྀ་ཀྲིའི་བུ་འབྲིང་པོ་དེ་ནི་དགའ་བོ་འདི་ཡིན་ཏེ། སངས་རྒྱས་འོད་སྲུངས་ཀྱི་མཆོད་རྟེན་ལ་གདུགས་འབྲིང་བཏགས་པས་སྟོབས་ཀྱི་འཁོར་ལོས་བསྒྱུར་པའི་རྒྱལ་སྲིད་ཉིས་སྟོང་ལྔ་བརྒྱ་བྱས་ལ། ད་ལྟར་ཡབ་རབ་ཏུ་མ་བྱུང་ན་སྟོབས་ཀྱི་འཁོར་ལོས་བསྒྱུར་པའི་རྒྱལ་སྲིད་བྱེད་པར་འགྱུར་རོ། །དགའ་བོས་ལས་ཅི་བགྱིས་པས་དབང་པོའི་སྒོ་བསྡམས་པ་རྣམས་ཀྱི་མཆོག་ཏུ་ལུང་བསྟན་ལགས། སྨོན་ལམ་གྱི་དབང་གིས་ཏེ། འདི་སངས་རྒྱས་འོད་སྲུངས་ཀྱི་བསྟན་པ་ལ་རབ་ཏུ་བྱུང་སྟེ། འདི་རབ་ཏུ་འབྱིན་པའི་མཁན་པོ་དེ་སངས་རྒྱས་འོད་སྲུངས་ཀྱིས་དབང་པོའི་སྒོ་བསྡམས་པ་རྣམས་ཀྱི་མཆོག་ཏུ་ལུང་བསྟན་ཏོ། །འདིས་ཚེ་ཇི་སྲིད་བར་ཚངས་པར་སྤྱད་ཀྱང་ཡོན་ཏན་གྱི་ཚོགས་འགའ་ཡང་མ་ཐོབ་པར། འཆི་བའི་ཚེ་སྨོན་ལམ་བཏབ་པ། དགེ་བ་འདིས་བདག་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་མངོན་དུ་བྱེད་པ་དང༌། སངས་རྒྱས་འོད་སྲུངས་ཀྱིས་བདག་གི་མཁན་པོ་དབང་པོའི་སྒོ་བསྡམས་པ་རྣམས་ཀྱི་མཆོག་ཏུ་ལུང་བསྟན་པ་དེ་བཞིན་དུ་བདག་ཀྱང་བཅོམ་ལྡན་འདས་ཤཱཀྱ་ཐུབ་པས་དབང་པོའི་སྒོ་བསྡམས་པ་རྣམས་ཀྱི་མཆོག་(༩༡ན)ཏུ་ལུང་སྟོན་པར་གྱུར་ཅིག་ཅེས་བྱས་སོ། །ཞུ་བའི་སྐབས་ནས་འབྱུང་བ་རྣམས་ཞུས་ལན་གྱིས་གཏན་ལ་ཕབ་པ་མ་གཏོགས་གླེང་གཞི་མི་སྣང་བས་མ་བྲིས་སོ། །
འདུལ་བྱེད་ཀྱི་སྐབས་ནས་འབྱུང་བ་ནི། སྨྱོན་པ་ལ་ཉེས་པ་མེད་དོ་ཞེས་གསུངས་ན། ཇི་ཙམ་གྱིས་ན་སྨྱོན་པ་ཞེས་བགྱི། ལྔ་སྟེ། གཉེན་བཤེས་ཟད་པ་དང༌། ལོངས་སྤྱོད་དང་ནོར་ཟད་པ་དང༌། ཁམས་མ་མཉམ་པ་དང༌། མི་མ་ཡིན་པས་བརླམས་པ་དང༌། སྔོན་གྱི་རྣམ་སྨིན་གྱིས་ཏེ། དགེ་སློང་གི་དངོས་པོར་ཤེས་ན་དངོས་པོ་ཇི་ལྟ་བ་བཞིན་ནོ། །དགེ་སློང་གི་དངོས་པོར་མི་ཤེས་ན་རང་བཞིན་ལས་ཉམས་པ་ཡིན་པས་ཉེས་པ་མེད་དོ། །སེམས་འཁྲུགས་པ་ནི་ལྔ་སྟེ། མི་མ་ཡིན་པས་དེའི་སེམས་འཁྲུགས་པ་དང༌། དེས་དེ་ལ་བརླམས་པ་དང༌། དེས་མདངས་འཕྲོགས་པ་དང༌། ཁམས་མ་མཉམ་པ་དང༌། རྣམ་སྨིན་གྱིས་སོ། །ནད་ཀྱིས་གཟིར་བ་ལྔ་སྟེ། རླུང་མཁྲིས་བད་ཀན་འདུས་པ་དང༌། དུས་གྱུར་པའོ། །དགེ་སློང་ཞིག་མི་རོ་ལ་བརྟག་པའི་དུར་ཁྲོད་དུ་སོང་བ་དང༌། བུད་མེད་རྒྱན་གྱིས་བརྒྱན་པའི་རོ་མཐོང་ནས་ཆགས་ཏེ་རྨ་ཁར་བཙུགས་པས་ནང་སྲིན་བུས་གང་བར་མཐོང་ནས། བདག་ལ་ཕམ་པ་མ་བྱུང་ངམ་ཞེས་ཐེ་ཚོམ་སྐྱེས་པ་དང༌། དགེ་སློང་དག །ཉམས་པ་ནི་གཉིས་ཏེ། ནང་ཉམས་པ་དང༌། ཕྱི་ཉམས་པ་སྟེ། ཕམ་པའི་ཉེས་པ་མེད་མོད་སྦོམ་པོའོ། །དགོན་པའི་དགེ་སློང་སྡིག་ཅན་ཞིག་གིས་དགེ་སློབ་མ་བྲིད་ནས། ཁྱོད་བསྙེན་པར་མ་རྫོགས་པས་མི་ཚངས་པར་སྤྱད་ན་བདག་ཅག་གཉིས་ཀ་ལ་ཉེས་པར་མི་འགྱུར་རོ་ཞེས་སྨྲས་པ་དང༌། དེས་ཀྱང་ཁས་བླངས་སོ། །ཁས་བླངས་ནས་འགྱོད་པ་སྐྱེས་པ་དང༌། དེས་དེ་མི་འདོད་བཞིན་དུ་བྱས་ནས་དགེ་སློབ་མ་དེ་འགྱོད་པ་དང༌། བསྟེན་པའི་ཕྱིར་གཞན་ལ་ཁས་བླངས་པ་ན་བསླབ་པ་འཁྲུགས་པ་ཉིད་དོ། །དེ་ལ་དེ་ཡང་སྦྱིན་པར་བྱའོ། །འོད་བཟང་མ་ཞེས་བྱ་བའི་དགེ་བསྙེན་མ་ཞིག་ཤི་ནས་རྒྱན་གྱིས་བརྒྱན་བཞིན་དུ་དུར་ཁྲོད་དུ་བོར་བ་དང༌། དགེ་སློང་ཞིག་མི་རོ་ལ་བརྟག་པའི་ཕྱིར་དུར་ཁྲོད་དུ་སོང་བས་མཐོང་ནས་ཆགས་ཏེ་རྨ་ཁར་བཙུགས་པས་དེ་ལངས་པས་སྐྲག་གོ །ཀླུ་མོ་ཞིག་དགེ་སློང་གི་དྲུང་དུ་འོངས་ནས། མི་ཚངས་པར་སྤྱད་ཀྱི་ཚུར་སྤྱོན། དེས་ཁས་བླངས་ནས་རྨ་ཁར་བཙུགས་པ་དང༌། དེ་ལུས་རིང་པོར་གྱུར་ནས་སྐྲག་སྟེ་འགྱོད་པ་དང༌། སྐྲག་པ་ལ་ཆགས་པ་མེད་པས་ཕམ་པའི་ཉེས་པ་མེད་དེ་སྦོམ་པོའོ། །དགེ་སློང་ཞིག་འདོད་ཆགས་ཀྱིས་གཟིར་བ་དང༌། མའི་དྲུང་དུ་སོང་ནས། བདག་འདོད་ཆགས་ཀྱིས་གཟིར་ཏོ་ཞེས་སྨྲས་པ་དང༌། མ་ན་རེ། བུ། ཁྱོད་འདི་ཉིད་ནས་བྱུང་བ་(༩༡བ)ཡིན་གྱིས། ད་ཡང་འདི་ཉིད་དུ་ཆུག་ཅིག །དེས་དེ་ཉིད་དུ་གཞུག་གོ་སྙམ་ནས་རྨ་ཁར་བཙུགས་པ་དང༌། ངོ་ཚ་བར་གྱུར་ཏེ། བདག་ལ་ཕམ་པ་མ་བྱུང་ངམ་སྙམ་དུ་ཐེ་ཚོམ་སྐྱེས་པ་དང༌། ངོ་ཚ་བ་ནི་ཆགས་པ་མེད་པས་ཕམ་པའི་ཉེས་པ་མེད་དེ་སྦོམ་པོའོ། །
དགེ་སློང་རང་བཞིན་གྱིས་དབང་པོ་ལས་སུ་མི་རུང་བ་ཞིག་གིས། ལས་སུ་རུང་བཞིན་དུ་བཅུག་ན་ཕམ་པར་འགྱུར་གྱིས་ལས་སུ་མི་རུང་བཞིན་དུ་བཅུག་པ་ལ་ཉེས་པ་མེད་དོ་སྙམ་ནས་བཅུག་པ་དང༌། ཐེ་ཚོམ་སྐྱེས་པས། ལས་སུ་མི་རུང་བ་བཅུག་ན་ཕམ་པའི་ཉེས་པ་མེད་ཀྱི་སྦོམ་པོའོ། །དགེ་སློང་གིས་བུད་མེད་གཉིད་ལོག་པ་ལ་བྱས་པ་དང༌། ཐེ་ཚོམ་སྐྱེས་ནས། ལག་པས་ལག་པར་དང༌། རྐང་པས་རྐང་པར་དང༌། ཚིགས་ཀྱིས་ཚིགས་སུ་དང༌། འདོམས་ཀྱིས་འདོམས་སུ་རུང་ན་ཕམ་པ། མི་རུང་ན་སྦོམ་པོའོ། །དེ་བཞིན་དུ་ར་རོ་བ་དང༌། ནད་ཀྱིས་གཟིར་བ་དང༌། མི་འདོད་བཞིན་པའོ། །དགེ་སློང་ཉལ་བ་ལ་བུད་མེད་ཀྱིས་བྱས་ཏེ་འགྱོད་པ་དང༌། དགེ་སློང༌། ཁྱོད་ཀྱིས་དགའ་བ་ཚོར་རམ། ཚོར་རོ། །ཤེས་སམ། མ་འཚལ་ཏེ། གཡོས་པ་ཙམ་དུ་གྱུར་ཏོ། །གཉིད་ཀྱིས་ལོག་པ་སྤྲད་པའི་གཡོ་བ་ཙམ་ཉིད་ལ་ཕམ་པའི་ཉེས་པ་མེད་དེ་སྦོམ་པོའོ། །དགེ་སློང་ཞིག་གིས་ལས་བྱས་པའི་བུད་མེད་ཀྱི་གཟུགས་བརྙན་ལེགས་པ་ཞིག་མཐོང་ནས་ཆགས་ཏེ་རྨ་ཁར་བཙུགས་པ་དང༌། དེས་མོ་མཚན་ཕྱེ་ནས་འགྱོད་པ་དང༌། ཤིང་ལས་བུ་མོའི་གཟུགས་བྱས་པ་ལ་བརྩལ་བ་ན་གལ་ཏེ་དབང་པོ་ཙམ་དོད་ན་སྦོམ་པོའོ། །ཡན་ལག་ཐམས་ཅད་དུ་རེག་པ་སྟེར་ན་དངོས་གཞིའོ། །བ་སོ་དང༌། རྡོ་དང༌། གོས་ལས་བྱུས་པ་རྣམས་ཀྱང་དེ་བཞིན་ནོ། །ཡི་དྭགས་མོ་ཞིག་དགེ་སློང་ལ། ཚུར་སྤྱོན་ཟེར་ནས་རྨ་ཁར་བཙུགས་པ་དང༌། དེས་མོ་མཚན་ཆེར་གྱུར་པ་དེར་རྐང་པ་བཅུག་ནས་འགྱོད་པ་དང༌། བསྟེན་པའི་དོན་དུ་རྩོལ་བས་ཡན་ལག་གི་རྣམ་པར་རྐང་པ་འཇུད་ན་ཕམ་པའི་ཉེས་པ་མེད་དེ་སྦོམ་པོའོ། །
བུད་མེད་ཅིག་ཤིང་ཐགས་ཀྱི་ནང་ན་སྒྲེན་མོར་ཁུ་ལེ་ལྟ་བུས་ཆུ་འཆུ་ཞིང་འདུག་པ་ལ་དགེ་སློང་ཞིག་གིས་ཤིང་ཐགས་ཀྱི་གསེབ་ནས་དེའི་མོ་མཚན་མཐོང་སྟེ་ཆགས་པ་དང༌། དེའི་མོ་མཚན་ལ་ཕོ་མཚན་གྱིས་རེག་པས་འགྱོད་པ་དང༌། བསྟེན་པར་བྱ་བ་ལ་ཡན་ལག་གི་རྣམ་པར་དེ་ཙམ་ལ་གཞོལ་བས་ཕྱི་རོལ་ཏུ་རེག་ན་སྦོམ་པོའོ། །དགེ་སློང་ཞིག་འདོད་ཆགས་ཀྱིས་གཟིར་ནས་དགེ་སློང་མཛའ་བོ་ཞིག་ལ། བདག་འདོད་ཆགས་ཀྱིས་གཟིར་ཏོ། །དེ་རེ་ན་རེ། སོང་ལ་མི་ཚངས་པར་སྤྱོད་ཅིག་ཅེས་བསྒོ་བ་དང༌། དེ་ཡང་སོང་ནས་མི་ཚངས་པར་སྤྱད་དོ། །དེ་ལ་བསྒོ་བ་དེ་བདག་ལ་ཕམ་པ་མ་བྱུང་ངམ་སྙམ་དུ་ཐེ་ཚོམ་སྐྱེས་ནས། བསྟེན་(༩༢ན)པའི་ཕྱིར་གཞན་ལ་བསྒོ་ན་སྦོམ་པོའོ། །དགེ་སློང་ཞིག་ཕོ་མཚན་སྒྲེང་བཞིན་དུ་ལས་སུ་རུང་ནས། བདག་གིས་མོ་མཚན་གྱི་ནང་དུ་བཅུག་ཀྱང་ཉེས་པ་མེད་དོ་སྙམ་དུ་དེས་བུད་མེད་ཀྱི་མོ་མཚན་གྱི་ནང་དུ་བཅུག་སྟེ། བདག་ལ་ཕམ་པ་མ་བྱུང་ངམ་སྙམ་དུ་ཐེ་ཚོམ་སྐྱེས་ནས། རང་བཞིན་གྱིས་ལས་སུ་རུང་བ་ཉིད་ཡིན་ན་ན་སྨད་པར་བྱ་བ་མེད་དོ། །ཁྱིམ་བདག་བཟང་སྐྱེས་ཀྱི་ཆུང་མ་ལ་དགེ་སློང་ཞིག་གིས་འདོད་ཆགས་ཀྱིས་གཟིར་ཏོ། །དེ་ན་རེ། འོག་མར་སྨྱུགས་ལ་སྟེང་མར་ཁུ་བ་ཐོང་ཞིག །སྟེང་མར་སྨྱུགས་ལ་འོག་མར་ཁུ་བ་ཐོང་ཞིག །དེ་ལ་ཁོ་མོས་མི་ཚངས་པར་སྤྱོད་པར་མི་ཤེས་སོ་ཞེས་ཟེར་བ་དང༌། དེས་ཀྱང་འདི་ནི་རུང་ངོ་སྙམ་ནས་འོག་མར་སྨྱུགས་ནས་སྟེང་མར་བཏང་བ་དང་ཐེ་ཚོམ་སྐྱེས་ནས། མདུན་མ་དང་ཕྱི་མ་གཉིས་གང་དུ་བརྩལ་བ་དེ་ལས་གཞན་དུ་གཏུགས་པ་ལ་མེད་དོ། །སྡིག་ཅན་གྱི་དགེ་སློང་གསུམ་པོས་བུད་མེད་བཟུང་སྟེ་ལམ་ཀུན་ཏུ་བྱས་ཀྱང་ཉེས་པ་མེད་དོ་སྙམ་ནས་ཀུན་ཏུ་བྱས་ཏེ། གསོལ་བས། ཕམ་པར་འགྱུར་རོ། །དགེ་སློང་ཞིག་མཉན་ཡོད་དུ་བསོད་སྙོམས་ལ་ཞུགས་པ་དང༌། ཕག་ཕྲུག་ཅིག་ཕུར་བ་ལ་བཏགས་ནས་འཁོར་ཞིང་འདུག་པ་ལ་སྙིང་རྗེ་སྐྱེས་ནས་ཕུར་བ་ལས་བཀྲོལ་བ་དང༌། ཁྱིམ་བདག་དེས་མཐོང་ནས་བརྒྱུགས་ཏེ་དགེ་སློང་དེའི་གོང་བ་ནས་བཟུང་སྟེ། ཁྱོད་ཀྱིས་ཁོ་བོའི་ཕག་ཕྲུག་བཏང་བས། ཁྱོད་ནི་རྐུ་བའོ། །གླེན་པའོ། །སྡིག་ཅན་ནོ་ཞེས་སྨྲས་པ་དང༌། བདག་གིས་ཕག་ཕྲུག་བཏང་བས་ཉམས་ཀྱི། སོང་ལ་མི་ཚངས་པར་སྤྱོད་དོ་སྙམ་ནས་མི་ཚངས་པར་སྤྱད་པ་དང༌། དེ་འདི་སྙམ་དུ་དགེ་སློང་དག་ལ་དྲིས་ལ་རབ་ཏུ་བྱུང་ནས་བསྙེན་པར་རྫོགས་པ་འཆགས་ན་བདག་རབ་ཏུ་འབྱུང་ངོ༌། །
མི་འཆགས་ན་འདི་ཉིད་དུ་གནས་སོ་སྙམ་ནས། དགེ་སློང་རྣམས་ལ་དྲིས་པས་སྐབས་དེ་གསོལ་བ་དང༌། སྔ་མ་ལ་ཉེས་པ་མེད། ཕྱི་མ་ལ་ཕམ་པའོ། །ཁྱིམ་བདག་ཅིག་གིས་ཤ་ཁྱེར་ཏེ་སོང་བ་འོལ་བས་ཕྲོགས་ཏེ་སོང་བ་འོལ་བའི་ཁ་ནས་ཤོར་ཏེ་དགེ་སློང་ཞིག་གི་ལྷུང་བཟེད་དུ་ལྷུང་ངོ༌། །དེ་ཁྱིམ་བདག་དེས་མཐོང་ནས་གོང་བ་ནས་བཟུང་སྟེ། ཁྱོད་ནི་རྐུ་བའོ་ཞེས་སོགས་སྔར་དང་འདྲ། དེས་ན་བདག་ནི་ཉམས་པའོ་སྙམ་པའི་བསམ་པ་ཅན་ལ་ཡང་མེད་དོ། །རྒྱལ་པོའི་ཁབ་ནའོ། །དགེ་སློང་ཞིག་ཕོ་མཚན་ནད་ཀྱིས་གཟིར་བ་དང༌། འཚོ་བྱེད་ཀྱི་ཕོ་མཚན་ནད་ཀྱིས་གཟིར་བ་ན་བུད་མེད་ཀྱི་ཁར་བཅུག་པས་ནད་ལས་ཐར་རོ་ཞེས་ཐོས་ནས། དེས་ནད་པའི་སྨན་སྤྱད་དུ་གནང་གིས་བུད་མེད་ཀྱི་ཁར་གཞུག་གོ་སྙམ་ནས་བུད་མེད་ཀྱི་ཁར་བཅུག་པས་ནད་ལས་ཐར་པ་དང༌། འགྱོད་ནས་གསོལ་བས། ནད་ལས་དབྲལ་བར་བྱ་བའི་དོན་ཉིད་ལ་ཡང་(༩༢བ)མེད་དོ། །དགེ་སློང་ཞིག་གིས་ལམ་ལ་ལམ་མ་ཡིན་པར་འདུ་ཤེས་ནས་སྤྱད་དེ། ཞུས་པས། ལམ་ལ་གཞན་ཉིད་དུ་འདུ་ཤེས་པ་དང༌། ཡིད་གཉིས་ཟ་བ་ལ་ཡང་མེད་དོ། །ལམ་མ་ཡིན་པ་ལ་ནི་དེ་གཉིས་སྦོམ་པོའི་དབང་དུ་བྱས་པ་ཉིད་དོ། །དགེ་སློང་ཕོ་བྲང་འཁོར་སྐྱོང་བ་ལང་གི་ནང་དུ་སོང་བ་གླང་མི་བསྲུན་པས་བརྡུངས་ནས་བུད་མེད་ཀྱི་སྟེང་དུ་འགྱེལ་བ་དང༌། འགྱོད་ནས་གསལ་བས། ཉེས་པ་མེད་དེ། བ་ལང་གི་ནང་དུའང་ཤེས་བཞིན་དུ་འགྲོ་བར་བྱའོ། །དགེ་སློང་ཞིག་ཁྲོན་པ་ཞིག་པ་ཞིག་ཏུ་བལྟས་པས་ལྷུང་ནས། དེར་སྔར་ལྷུང་བའི་བུད་མེད་ཅིག་གིས་དེའི་མགུལ་ནས་འཇུས་སོ། །ཁྱིམ་པ་དག་གི་ཐག་པ་བླངས་ཏེ་དགེ་སློང་དེ་ཕྱུང་བ་དང༌། དེའི་མགུལ་ནས་བུད་མེད་ཅིག་གིས་འཇུས་པ་མཐོང་ནས། བུད་མེད་ཁྱོད་གང་ལས་འོངས། དགེ་སློང་གིས། འདི་སྔར་ལྷུང་བ་ཁོ་བོའི་མགུལ་ནས་འཇུས་སོ། །དེ་འགྱོད་ནས་གསོལ་བ་དང༌། ཉམ་ཐག་པས་མགུལ་ནས་མི་འདོད་བཞིན་དུ་མཁྱུད་པ་ལ་ཉེས་པ་མེད་དེ། བག་ཡོད་པས་ཁྲོན་པའང་བརྟག་པར་བྱའོ། །དགེ་སློང་བསོད་སྙོམས་པ་ཞིག་སྒོ་ཁང་དོག་པ་ནས་བྱུང་བ་དང༌། བུད་མེད་ཅིག་ནང་དུ་འཇུག་པའི་མོ་མཚན་གྱིས་དེའི་ཕོ་མཚན་ལ་རེག་པས་འགྱོད་ནས་གསོལ་བ་དང༌། ཉེས་པ་མེད་དེ། བག་ཡོད་པས་བསོད་སྙོམས་ལ་གྲོང་དུ་རྒྱུ་བར་བྱའོ། །དགེ་སློང་ཞིག་གིས་ཁྱི་མོའི་མདུན་དུ་གཅི་བ་བྱས་པས། དེས་དེའི་ཕོ་མཚན་ཁར་བཅུག་ནས་ཁུ་བ་བྱུང་སྟེ་ལུས་ཀྱང་བཏུད་པས་འགྱོད་པ་དང༌། ཕམ་པའི་ཉེས་པ་མེད་དེ། ཕྱིན་ཆད་ཁྱིའི་མདུན་དུ་གཅི་བ་མི་བྱའོ། །དགེ་སློང་ཞིག་ནགས་སྟུག་པོ་ན་འདུག་པ་དང༌། དེ་མིའམ་ཅི་མོས་ཁྲིད་ནས་བྲག་ཕུག་ཏུ་བཅུག་ཅིང་འདུ་ཤེས་བསྒྱུར་ནས་སྤྱོད་ཡུལ་དུ་སོང་བ་དང༌། དགེ་སློང་དེ་འདུ་ཤེས་རྙེད་ནས་བྲོས་སོ། །འགྱོད་ནས་གསོལ་བ་དང༌། ཉེས་པ་མེད་དེ། ཕྱིན་ཆད་གང་དུ་སྲོག་གི་བར་ཆད་འབྱུང་བའི་དགོན་པར་གནས་པར་མི་བྱའོ། །དགེ་སློང་ཞིག་སྒྲེན་མོར་ཆུ་ཀླུང་བརྒལ་བས་དེའི་ཕོ་མཚན་ཉས་བཟུང་བ་དང༌། དེས་ཀྱང་ལུས་བཏུད་དེ་ཁུ་བ་བྱུང་ནས་འགྱོད་པ་དང༌། ཉེས་པ་མེད་དེ། ཕྱིན་ཆད་གང་ན་ཡན་ལག་གི་རྣམ་པ་འཛིན་པའི་འཇིགས་པ་ཡོད་པའི་ཆུ་ཀླུང་དེར་སྒྲེན་མོར་བརྒལ་བར་མི་བྱའོ། །དགེ་སློང་ཞིག་གྲུ་ལ་ཕྱིན་པ་དང༌། གྲུ་ཆུར་ནུབ་ནས་བུད་མེད་ཅིག་གིས་དགེ་སློང་གི་མགུལ་ནས་འཇུས་སོ། །དགེ་སློང་བརྒལ་བ་ན་འགྱོད་ནས་གསོལ་བ་དང༌། ཉེས་པ་མེད་དེ། ཆུ་ཀླུང་དེར་ཤེས་བཞིན་དུ་གྲུ་ལ་བརྒལ་བར་བྱའོ། །
སྐྱེས་པ་སེར་སྐྱ་ཞེས་བྱ་བ་ནས་དགེ་སློང་མའི་དྲུང་དུ་སོང་སྟེ། བདག་རབ་ཏུ་ཕྱུང་ཞིག །དེ་དག་གིས་མ་བརྟགས་པར་རབ་ཏུ་ཕྱུང་སྟེ། དེས་དགེ་སློང་མ་ལ་རེག་པ་དང༌། དེ་དག་འགྱོད་ནས་(༩༣ན)གསོལ་བ་དང༌། ཉེས་པ་མེད་དེ། ལེགས་པར་སོ་སོར་བརྟག་པར་བྱས་ནས་རབ་ཏུ་དབྱུང་བར་བྱའོ། །མཉན་ཡོད་ནའོ། །དགེ་སློང་ཞིག་གིས་ཉིན་མོ་སྤྱོད་པའི་གནས་སུ་སོང་སྟེ། སྟན་བཏིང་ནས་དཀྱིལ་ཀྲུང་བཅས་ཏེ་འདུག་པ་དང༌། ཚ་བའི་དུས་ཡིན་པས་འཕྲེས་ཏེ་གཉིད་དུ་སོང་ངོ༌། །དེའི་ཤམ་ཐབས་ཉིལ་ཞིང་ཕོ་མཚན་ལས་སུ་རུང་བ་བུད་མེད་ཤིང་ཐུན་མ་ཞིག་གིས་མཐོང་ནས་ཤིན་ཏུ་ཆགས་ཏེ། དེས་དགེ་སློང་ལ་ཉལ་བོ་བྱས་ནས་སོང་བ་དང༌། དགེ་སློང་ཡང་སད་དེ། དེས། འཕགས་པ། བཞེད་ན་བདག་གི་ཁྱིམ་ག་གེ་མོ་ན་མཆིས་ཀྱིས་སྤྱོན་ཅིག །འགྱོད་ནས་གསོལ་བ་དང༌། ཁྱོད་ཀྱིས་ཤེས་སམ། མ་འཚལ་ལོ། །ཉེས་པ་མེད་དེ། གཅིག་པུ་བླ་གབ་མེད་པར་གློས་མི་དབབ་བོ། །མཉན་ཡོད་ནའོ། །དགེ་སློང་མ་ཨུཏྤ་ལའི་མདོག་བསོད་སྙོམས་སྤྱད་ནས་རྐང་པ་བཀྲུས་ཏེ་ནང་དུ་ཡང་དག་འཇོག་ལ་ཞུགས་པ་དང༌། ཚ་བའི་དུས་ཡིན་པས་འཕྲེས་ཏེ་གཉིད་དུ་སོང་ངོ༌། །དེ་སྒོ་མ་བཅད་པ་གཡོན་ཅན་གྱིས་མཐོང་ནས། ཉལ་བོ་བྱས་ཏེ་སོང་བ་དང༌། དེ་ཡང་སད་ནས་འགྱོད་པ་དང༌། ཉེས་པ་མེད་དེ། ཕྱིན་ཆད་དགེ་སློང་མས་གནས་ཁང་སྒོ་མ་བཅད་པར་སྙོམས་པར་འཇུག་པར་ཡང་མི་བྱའོ། །

2) མ་བྱིན་པར་ལེན་པའི་ཕམ་པ།

མ་བྱིན་པར་ལེན་པའི་ཕམ་པ་ལ་བཞི་ལས། རྣམ་འབྱེད་ནས་འབྱུང་བ་ནི། སྟོན་པ་རྒྱལ་པོའི་ཁབ་ཀྱི་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྫ་མཁན་དགེ་སློང་ནོར་ཅན་རྒྱལ་པོའི་ཁབ་ན་དགོན་པའི་སྤྱིལ་བུ་ན་གནས་སོ། །དེ་ནས་དགེ་སློང་ནོར་ཅན་རྒྱལ་པོའི་ཁབ་ཏུ་སྤྱོད་ཡུལ་ལ་ཞུགས་པ་དང༌། བ་ལང་རྫི་དང༌། ཕྱུགས་རྫི་དང༌། རྩྭ་ཐུན་དང༌། ཤིང་ཐུན་དག་གིས་སྤྱིལ་བུ་བཅོམ་སྟེ་རྩྭ་ཤིང་ཐམས་ཅད་ཁྱེར་རོ། །ཡང་སྤྱིལ་བུ་གཞན་བྱས་ནས་སྤྱོད་ཡུལ་ལ་ཞུགས་པ་དང༌། ལན་གསུམ་དུ་བ་ལང་རྫི་དང༌། ཕྱུགས་རྫི་དང༌། རྩྭ་ཐུན་དང༌། ཤིང་ཐུན་དག་གིས་སྤྱིལ་བུ་བཅོམ་སྟེ་རྩྭ་ཤིང་ཐམས་ཅད་ཁྱེར་རོ། །དེ་ནས་དགེ་སློང་ནོར་ཅན་འདི་སྙམ་དུ། བདག་སྤྱོད་ཡུལ་ལ་ཞུགས་པ་དང༌། བ་ལང་རྫི་དང༌། ཕྱུགས་རྫི་དང༌། རྩྭ་ཐུན་དང༌། ཤིང་ཐུན་དག་གིས་ལན་གསུམ་དུ་སྤྱིལ་བུ་བཅོམ་སྟེ། རྩྭ་ཤིང་ཐམས་ཅད་ཁྱེར་བ་ནི་ཀྱེ་མ་སྡུག་བསྔལ་ཏེ། བདག་ཕའི་བཟོ་དང༌། ལས་ཀྱི་གནས་ལ་མཁས་པས་གནས་ཁང་ཐམས་ཅད་ས་ལས་བྱས་པ་ཞིག་བྱའོ་སྙམ་ནས་ས་སྐྱེས་ཤིང་སྲོག་ཆགས་མེད་པའི་ཆུས་སྦངས་ཏེ། གནས་ཁང་གི་གཞིའི་རྨང་དང་ཐོག་དང་ཀ་བ་དང༌། སྟེང་རིམ་དང༌། ཆོས་གོས་ཀྱི་གདང་དང༌། སྟེགས་དང༌། ཁྲི་དང༌། ཁྲིའུ་(༩༣བ)དང༌། སྒོ་སྐྱེས་རྣམས་བྱས་ནས་བསྐམས་པ་ན་ཁ་དོག་ཅན་གྱིས་སྐུད་ཅིང་ཤིང་དང་ལྕི་བ་དང༌། རྩྭ་སྐམ་པོ་བཅེར་ཏེ། སོ་བཏང་ནས་གནས་ཁང་དེ་ཤིན་ཏུ་ཚོས་པ་དམར་བ་མེ་ཏོག་བན་དྷུ་ཛི་བ་ཀ་འདྲ་བ་ཞིག་གྲུབ་པས། ཁང་པའི་དུས་སྟོན་བྱའོ་སྙམ་ནས་དགེ་སློང་ཉེ་འཁོར་བ་རྣམས་ལ་གནས་ཁང་ལྟར་བཅུག་སྟེ། ལྗོངས་རྒྱུར་སོང་ངོ༌། །ཆོས་ཉིད་ཀྱིས་སྟོན་པ་ནི་གདུལ་བྱའི་དབང་གིས་དུས་དུས་སུ་དམྱལ་བ་བར་རྒྱུ་བ་དང༌། དུད་འགྲོ་དང༌། ཡི་དྭགས་དང༌། ལྷ་དང༌། ལྗོངས་དང༌། ཆུ་ཀླུང་དང༌། དགོན་པ་དང༌། དུར་ཁྲོད་དང༌། རི་དང༌། གཙུག་ལག་ཁང་རྒྱུར་གཤེགས་སོ། །དོན་འདིར་ནི་གཙུག་ལག་ཁང་རྒྱུར་གཤེགས་པར་བཞེད་ནས། ཀུན་དགའ་བོ། སོང་ལ་དགེ་སློང་རྣམས་ལ། དེ་བཞིན་གཤེགས་པ་གཙུག་ལག་ཁང་རྒྱུར་གཤེགས་ཀྱིས་དེ་བཞིན་གཤེགས་པ་དང་ལྷན་ཅིག་གཙུག་ལག་ཁང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོངས་ཤིག་ཅེས་སྒོས་ཤིག །དེས༌། བཀའ་བཞིན་འཚལ་ཞེས་མཉན་ནས་དགེ་སློང་རྣམས་ལ་དེ་སྐད་སྨྲས་པ་དང༌། དགེ་སློང་དེ་དག་ཆོས་གོས་བླངས་ཏེ་བཅོམ་ལྡན་འདས་ག་ལ་བ་དེར་སོང་ངོ༌། །དེ་ནས་སྟོན་པ་དགེ་སློང་རབ་ཏུ་མང་པོ་དང་ཐབས་ཅིག་ཏུ་གཙུག་ལག་ཁང་རྒྱུར་གཤེགས་ཏེ་མཐར་གྱིས་དགེ་སློང་ནོར་ཅན་གྱི་གཙུག་ལག་ཁང་དུ་གཤེགས་ནས། དགེ་སློང་དག །གནས་ཁང་འདི་སུའི་ཡིན། ནོར་ཅན་གྱི་ལགས་སོ། །དགེ་སློང་དག །ང་ལ་གཞི་འདིས་མུ་སྟེག་ཅན་དག །དགེ་སྦྱོང་གོའུ་ཏ་མ་འདུག་བཞིན་དུ་ཟག་པའི་གནས་ལྟ་བུའི་ཆོས་ཁ་ཅིག་བྱུང་ངོ་ཞེས་ཁ་ཟེར་བར་འགྱུར་གྱིས་གནས་ཁང་འདི་ཤིག་ཅིག །དེ་དག་གིས་གནས་དེ་བཤིག་གོ །སྟོན་པའང་གནས་ཁང་དེ་བཤིག་ནས་གཤེགས་སོ། །དགེ་སློང་ནོར་ཅན་འོངས་པ་དང༌། གནས་ཁང་པཤིག་པ་མཐོང་ནས་དགེ་སློང་ཉེ་འཁོར་བ་རྣམས་ལ། ཁོ་བོའི་གནས་ཁང་སུས་བཤིག །སྟོན་པའི་བཀའ་ལུང་གིས་དགེ་སློང་དག་གིས་བཤིག་གོ །གལ་ཏེ་ཆོས་ཀྱི་རྗེས་བཤིག་ན་ལེགས་སོ། །དེའི་ཚེ་རྒྱལ་པོའི་ཁབ་ན་ཤིང་སྲུང་བའི་མི་སྣ་ཆེན་པོ་ལ་གཏོགས་པ་དགེ་སློང་ནོར་ཅན་གྱི་གཏམ་འདྲེས་པ་ཕེབས་པར་སྨྲ་བ་ཞིག་འདུག་གོ །
དེ་ནས་དགེ་སློང་ནོར་ཅན་འདི་སྙམ་དུ། རྒྱལ་པོའི་ཁབ་ན་ཤིང་སྲུང་བའི་མི་སྣ་ཆེན་པོ་ལ་གཏོགས་པ་བདག་གི་གཏམ་འདྲེས་པ་ཕེབས་པར་སྨྲ་བ་ཞིག་ཡོད་ཀྱིས་བདག་གིས་གནས་ཁང་ཐམས་ཅད་ཤིང་ལས་བྱས་པ་ཤིག་བྱའོ་སྙམ་ནས། ཤིང་སྲུང་བ་དེའི་གན་དུ་སོང་སྟེ། ཀྱེ་ནང་པོ། ལུས་འཕགས་མའི་བུ་མ་ག་དྷའི་རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་འདྲེན་པར་འདོད་ཀྱིས་བདག་ལ་བྱིན་ཅིག །འཕགས་པ། དེ་ལྟ་ན་(༩༤ན)ལེགས་ཀྱིས་ཅི་བདེར་སྣོམས་ཤིག །དེ་ནས་དགེ་སློང་ནོར་ཅན་གྱིས་མ་སྐྱེས་དགྲའི་ཤིང་རྒྱལ་པོའི་ཁབ་རལ་བ་དང༌། གྲུམས་པ་བཅོས་པའི་དོན་དུ་བཞག་པ། སུ་ལའང་སྟེར་བར་སླ་བ་མ་ཡིན་པ་དེ་དག་ལས་ཁ་ཅིག་བཅད་ནས་དྲངས་སོ། །གྲོང་ཁྱེར་སྲུང་བའི་མི་སྣ་ཆེན་པོ་ལ་གཏོགས་པ་ཞིག་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་ཤིང་དེ་དག་ལས་ཁ་ཅིག་བཅད་ནས་དྲངས་པ་མཐོང་ངོ༌། །མཐོང་ནས་ཀྱང་མ་སྐྱེས་དགྲའི་རྒྱལ་པོའི་ཁབ་རལ་བ་དང་གྲུམས་པ་བཅོས་པའི་དོན་དུ་བཞག་པ་སུ་ལའང་སྟེར་བར་སླ་བ་མ་ཡིན་པ་དེ་དག་ལས་ཁ་ཅིག་བཅད་ནས་དྲངས་པ་ལས་ན། རྒྱལ་པོའི་ཁབ་ཏུ་ཐོང་མི་པའམ། ཆོམ་རྐུམ་པའམ། དགྲ་བོ་འགའ་ཞིག་ཞུགས་པར་མ་གྱུར་གྲང་སྙམ་དུ་འཇིགས་ཤིང་དངངས་སྤུ་ཟིང་ཞེས་བྱེད་ནས། ཤིང་སྲུང་བའི་མི་དེའི་གན་དུ་སོང་སྟེ་སྨྲས་པ། ཀྱེ་ནང་པོ། བདག་འདི་ན་རྒྱལ་པོའི་ཁབ་ཀྱི་མཁར་ཕྱིའི་ལམ་ཉུལ་བ་ན་རྒྱལ་པོ་མ་སྐྱེས་དགྲའི་ཤིང་རྒྱལ་པོའི་ཁབ་རལ་བ་དང་གྲུམས་པ་བཅོས་པའི་དོན་དུ་བཞག་པ་སུ་ལའང་སྟེར་བར་སླ་བ་མ་ཡིན་པ་དེ་དག་ལས་ཁ་ཅིག་བཅད་ཅིང་དྲངས་པ་མཐོང་ནས། འདི་སྙམ་དུ། རྒྱལ་པོའི་ཁབ་ཏུ་ཐོང་མི་པའམ། ཆོམ་རྐུམ་པའམ། དགྲ་བོ་འགའ་ཞིག་ཞུགས་པར་མ་གྱུར་གྲང་སྙམ་དུ་འཇིགས་དངངས་སྤུ་ཟིང་ཞེས་བྱེད་པར་གྱུར་ན། ཁྱོད་ཀྱིས་ཤིང་དག་སུ་ལའང་མ་བྱིན་ནམ། སུ་ལའང་མ་བྱིན་ཏེ། འོན་ཀྱང་དགེ་སློང་ནོར་ཅན་འོངས་ནས། རྒྱལ་པོ་མ་སྐྱེས་དགྲས་བདག་ལ་ཤིང་དག་བྱིན་པ་དེ་འདྲེན་པར་འདོད་ཀྱིས་བྱིན་ཅིག་ཟེར་བ་ལ། བདག་གིས། དེ་ལྟ་ན་ལེགས་ཀྱིས་ཅི་བདེར་སྣོམས་ཤིག་ཅེས་བརྗོད་པས་དེ་དྲངས་པ་མ་ཡིན་ནམ། དེ་ནས་གྲོང་ཁྱེར་སྲུང་བའི་མི་དེ་མ་སྐྱེས་དགྲའི་གན་དུ་སོང་སྟེ་སྐབས་དེ་རྒྱས་པར་བརྗོད་ནས། ལྷས་ཤིང་དག་སུ་ལ་སྩལ། སུ་ལའང་མ་བྱིན་ནོ། །དེ་ནས་མ་སྐྱེས་དགྲས་མི་ཞིག་ལ། ཤིང་སྲུང་བའི་མི་དེ་བོས་ཤིག །དེས། བཀའ་བཞིན་འཚལ་ཞེས་ཤིང་སྲུང་བའི་མི་དེ་བོས་པ་དང༌། དེའི་ཚེ་དགེ་སློང་ནོར་ཅན་བྱ་བ་འགའ་ཞིག་ལ་རྒྱལ་པོའི་ཁབ་ཏུ་འཕགས་པ་དང༌། ཤིང་སྲུང་བའི་མི་དེས་མཐོང་ནས། འཕགས་པ། བདག་ནི་ཤིང་དེ་དག་གིས་སླད་དུ་བཀུག་གོ །ཀྱེ། ཁྱོད་སོང་ཞིག །བདག་ཀྱང་འོང་ངོ༌། །
དེ་ནས་ཤིང་སྲུང་བའི་མི་དེ་དང༌། ནོར་ཅན་དང༌། མི་དེ་ཡང་དོང་ནས་མ་སྐྱེས་དགྲའི་སྒོར་བསྡད་དོ། །དེ་ནས་མི་དེས་མ་སྐྱེས་དགྲའི་གན་དུ་སོང་ནས། ལྷ། ཤིང་སྲུང་བའི་མི་དེ་སྒོ་ན་སྡོད་དོ། །རབ་ཏུ་བྱུང་བ་དེ་ཡང་མ་སྦྲན་པར་མཆིས་སོ། །ཀྭ་ཡེ་ནང་རྗེ། ཤིང་སྲུང་བའི་མི་དེ་རེ་ཞིག་ཞོག་(༩༤ན)ལ་རབ་ཏུ་བྱུང་བ་དེ་འཇུག་ཏུ་ཆུག་ཅིག །དེས་དེ་ལ་སྨྲས་ནས། མ་སྐྱེས་དགྲའི་གན་དུ་སོང་སྟེ། ཨ་རོག་ཁྱ་ཞེས་མཐའ་ཞིག་ཏུ་འདུག་པ་ལ། མ་སྐྱེས་དགྲས་སྨྲས་པ། འཕགས་པ། ཤིང་མ་བྱིན་པར་ལེན་དུ་རུང་ངམ། ལྷ། མི་རུང་ངོ༌། །འོ་ན་ཁྱོད་ཀྱིས་ཅིའི་ཕྱིར་བླངས། ལྷས་སྩལ་བ་དག་གོ །འཕགས་པ། མི་དྲན་ནོ། །བདག་གིས་ལྷས་དགོངས་པར་བགྱིའོ། །ལྷས་རྒྱལ་སྲིད་ཀྱི་དབང་ཕྱུག་བཞེས་ནས་རིང་པོ་མ་ལོན་པར། ངའི་མངའ་རིས་ན་དགེ་སྦྱོང་དང་བྲམ་ཟེ་རང་བཞིན་བཟང་བ། རྩྭ་དང༌། ཤིང་དང༌། ཆུ་མ་བྱིན་པར་མི་སྤྱོད་པ་དེ་དག་དེང་ཕྱིན་ཆད་ཅི་བདེར་སྤྱོད་ཅིག་ཅེས་ཁྱུ་མཆོག་གི་བཀའ་རྒྱ་ཆེན་པོ་བཏགས་ཏེ་དང་དུ་བཞེས་ཤིང་འཁོར་གྱི་གན་དུ་སེངྒེའི་སྒྲ་བསྒྲགས་པ་ལྷས་དགོངས་ཤིག །དེ་ནི་ཁོ་བོས་ཡོངས་སུ་མ་བཟུང་བ་ལ་བསམས་ལ། འདི་ནི་ཡོངས་སུ་བཟུང་བ་དང་བཅས་པ་ཡིན་ནོ། །
རེ་ཞིག་ཡོངས་སུ་མ་བཟུང་བ་ལ་ལྷས་ཅི་བགྱིར་མཆིས། དེ་ནས་མ་སྐྱེས་དགྲ་ཁྲོས་འཁྲུགས་རྔམས་ཡིད་མི་དགའ་ནས། དཔྲལ་བར་དཔྲལ་རྩ་གསུམ་སྒྲེང་ཞིང་ཁྲོ་གཉེར་བསྡུས། བཞིན་སྒྱུར། མིག་བགྲད་དེ་ལག་མཐིལ་གཉིས་འདྲིལ་ཞིང༌། དགེ་སྦྱོང་གསད་པའི་རིགས་ལ་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག །དེ་ནས་དགེ་སློང་ནོར་ཅན་གཙུག་ལག་ཁང་དུ་སོང་སྟེ་དགེ་སློང་རྣམས་ལ་སྨྲས་པ། མ་སྐྱེས་དགྲས་ཁོ་བོ་གྱོད་ལ་བསྐྲིན་ཞིང་སྲོག་དང་བྲལ་བར་དེའུ་བྱས་སོ། །ཅིའི་ཕྱིར། དེས་སྐབས་དེ་དགེ་སློང་རྣམས་ལ་བརྗོད་ནས་གསོལ་བ་དང༌། སྟོན་པས་ཀུན་དགའ་བོ་ལ། ཕྱི་བཞིན་འབྲང་བའི་དགེ་སློང་ཞིག་དང་སོང་ལ། རྒྱལ་པོའི་ཁབ་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དང༌། བཀའ་འདོགས་སའི་གནས་དག་ཏུ་འདུག་ལ། བྲམ་ཟེ་དང༌། ཁྱིམ་བདག་ལ་སོགས་པ་ལ། རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་བསྐྲིན་ཞིང་སྲོག་དང་བྲལ་བར་བྱེད་དྲིས་ཤིག །ཀུན་དགའ་བོས། བཙུན་པ། བཀའ་བཞིན་འཚལ་ཞེས་རྒྱལ་པོའི་ཁབ་ཀྱི་ལམ་པོ་ཆེ་ལ་སོགས་པར་བྲམ་ཟེ་དང་ཁྱིམ་བདག་ལ་སོགས་པ་ལ། རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་བསྐྲིན་ཞིང་སྲོག་དང་བྲལ་བར་བྱེད། དེ་དག་གིས་སྨྲས་པ། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པས་སོ། །དེ་ནས་ཀུན་དགའ་བོ་སྟོན་པའི་དྲུང་དུ་སོང་སྟེ་གསོལ་བ། བདག་ཕྱི་བཞིན་འབྲང་བའི་དགེ་སློང་ཞིག་དང་རྒྱལ་པོའི་ཁབ་ཀྱི་ལམ་པོ་ཆེ་ལ་སོགས་པར། རྒྱལ་པོ་མ་སྐྱེས་དགྲས་ཇི་ཙམ་ལ་མ་བྱིན་པར་བླངས་པས་གྱོད་ལ་བསྐྲིན་ཅིང་སྲོག་དང་བྲལ་བར་བྱེད་སྨྲས་ན། དེ་དག་གི་མཆིད་ནས། མ་ཤ་ཀ་ལྔའམ། (༩༥ན)མ་ཤ་ཀ་ལྔ་ལས་ལྷག་པས་སོ་ཞེས་མཆིའོ། །
དེ་ནས་སྟོན་པས། བྱུང་བ་འདི་དང༌། གླེང་གཞི་འདི་དང༌། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། ཉན་ཐོས་རྣམས་ཀྱིས་ཀུན་ཤེས་པར་བྱ་བ་དང༌། འདུལ་བ་ལ་བསླབ་པའི་གཞི་བཅའ་བར་འགྱུར་བའོ། །དེ་ལ་སྟོན་པ་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་ནོར་ཅན་ལ། ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །སྟོན་པས། དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ངས་དུག་གསུམ་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བའི་ཆོས་བསྟན་པ་ལ་ཅིའི་ཕྱིར་མི་མཛེས་པ་དེ་ལྟ་བུ་བྱས་ཞེས་རྣམ་གྲངས་དུ་མས་སྨད་ནས། དགེ་སློང་དག །དེ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། དགེ་འདུན་བསྡུ་བ་ནས། ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པར་རྐུ་བའི་གྲངས་སུ་གཏོགས་པ་བླངས་ན་ཇི་ཙམ་མ་བྱིན་པར་བླངས་པས་དེ་རྒྱལ་པོའམ། བློན་པོ་ཆེན་པོས་བཟུང་ནས་དེ་ལ་འདི་སྐད་ཅེས། ཁྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ། དགེ་སློང་དེ་ལྟར་མ་བྱིན་པར་ལེན་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་གསུངས་ནས་དེ་ཉིད་རྣམ་པར་དབྱེ་བ་རྒྱ་ཆེར་གསུངས་པ་ལས། རྐུའམ། རྐུར་བཅུག་པ་དག་གིས་སོ་ཞེས་པ་ནས། དེ་ནི་སྦྱོར་བ་ཉིད་དོའི་བར་རྒྱས་པར་ཕྱེ་ནས་སྟོན་པ་ཉིད་ཀྱིས་གསུངས་ཀྱི། བྱུང་བའི་བཅས་གཞི་གཞན་མེད་དོ། །གང་གི་ཚེ་སྟོན་པས་བླ་ན་མེད་པའི་ཡེ་ཤེས་ཐུགས་སུ་ཆུད་ཅིང་བསྟན་པ་རྒྱས་པར་མ་གྱུར་པའི་ཚེ། དགེ་སློང་དག་སྤ་གོང་སླ་ཞིང༌། ཁྱིམ་པ་སྤ་གོང་དཀའ་བའི་ཚེ་ན་དགེ་སློང་མང་པོ་ཚོང་པ་དང་ལྷན་ཅིག་དོང་ནས་ཤོ་གམ་པའི་གནས་སུ་ཕྱིན་པ་དང༌། དེ་དག་གིས་ཚོང་པ་རྣམས་ལ་སྨྲས་པ། ཁོ་བོ་ཅག་ལ་ཤོ་གམ་གཞལ་དགོས་པའི་རྫས་ཅུང་ཟད་ཅིག་ཡོད་པ་ཤོ་གམ་ལས་ཟློས་ལ་བྱིན་ཅིག །བགྱིའོ། །(༩༥བ)ཚོང་པ་རྣམས་ཀྱིས་ཤོ་གམ་གཞལ་དགོས་པའི་རྫས་དེ་ཤོ་གམ་གྱི་གནས་ནས་བཟླས་ཏེ་བྱིན་ནོ། །དགེ་སློང་དག་མཐར་གྱིས་ཕྱིན་པ་དང༌། འོངས་པ་ལེགས་སོ། །བདེ་བར་བརྒྱུས་སམ། ཤོ་གམ་པ་དང༌། ལ་གཅན་པ་དང༌། གྲུ་བཙས་གཅོད་པ་དག་གིས་མ་གཙེས་སམ། བདེ་བར་བརྒྱུས་ཏེ་སུས་ཀྱང་མ་གཙེས་སོ། །ཁྱེད་ལ་ཤོ་གམ་གཞལ་དགོས་པ་མེད་དམ། ཡོད་མོད་ཚོང་པ་དག་གིས་བཟླས་ཏེ་བྱིན་ནོ། །རུང་ངམ། རུང་ཡང་སྲིད་མི་རུང་ཡང་སྲིད་དེ། བདག་ཅག་གིས་ནི་བཟླས་སོ། །དེ་དག་བདག་ཅག་ལ་ཕམ་པ་མ་བྱུང་ངམ་སྙམ་ནས་གསོལ་བ་དང༌། རྐུ་སེམས་མེད་པ་ལ་ཤོ་གམ་དུ་གཏོགས་པའི་ཉེས་པ་འབྱུང་བར་དོགས་པར་མི་བྱའོ། །སར་ཕྱིན་པའི་ཤོ་གམ་ཟླར་མ་འཇུག་ཅིག །སྟོན་པས་རྒྱལ་པོ་གཟུགས་ཅན་སྙིང་པོ་བདེན་པ་ལ་བཀོད། རྒྱལ་པོ་གསལ་རྒྱན་གཞོན་ནུའི་དཔེའི་མདོ་སྡེས་བཏུལ་ནས། དེ་གཉིས་ཀྱིས་དགེ་སློང་རྣམས་ལ་གཞོན་ནུའི་སྤང་བ་བྱིན་ཅིང་དགེ་སློང་མ་རྣམས་ལ་བཙུན་མོའི་འཁོར་གྱིས་སྤང་བ་བྱིན་ཏེ། དགེ་སློང་རྣམས་ཤོ་གམ་དང༌། ལ་གཅན་དང༌། གྲུ་བཙས་མེད་པར་བཏང་བས་ཁྱིམ་པ་རྣམས་སྤ་གོང་སླ་ཞིང་དགེ་སློང་རྣམས་སྤ་གོང་དཀའ་བའི་དགེ་སློང་རབ་ཏུ་མང་པོ་དོན་མཐུན་དང་ལྷན་ཅིག་ལྗོངས་རྒྱུར་དོང་བ་ན་ཤོ་གམ་པའི་གནས་སུ་ཕྱིན་པ་དང༌། ཚོང་པ་དག་གིས་སྨྲས་པ། འཕགས་པ་དག །བདག་ཅག་ཚ་གྲང་དང༌། བཀྲེས་སྐོམ་གྱི་གནོད་པ་དང༌། ཤ་སྦྲང་དང༌། སྦྲང་བུ་དང༌། རླུང་དང༌། ཉི་མ་དང༌། སྡིག་སྦྲུལ་གྱི་རེག་པས་ཉེན་བཞིན་དུ་ལོངས་སྤྱོད་བསྒྲུབ་པའི་སླད་དུ་འབད་རྩོལ་བགྱིད་པ་ཐམས་ཅད་དཀོན་མཆོག་མཆོད་པའི་སླད་དུ་ལགས་པས། བདག་ཅག་ལ་ཤོ་གམ་གཞལ་དགོས་པའི་རྫས་མཆིས་པ་ཤོ་གམ་ལས་བཟླས་ཏེ་སྩལ་བར་རིགས་སོ། །དེ་དག་གིས་བཟླས་ནས་བྱིན་ནོ། །
དགེ་སློང་དག་རིམ་གྱིས་མཉན་ཡོད་དུ་ཕྱིན་པ་དང༌། དགེ་སློང་རྣམས་ཀྱིས། འོངས་པ་ལེགས་སོ། །བདེ་བར་བརྒྱུས་སམ། ཤོ་གམ་དང་གྲུ་བཙས་གཅོད་པ་དག་གིས་མ་གཙེས་སམ། སྨྲས་པ། གཞན་དག་ཀྱང་དགའ་བར་བྱས་ན་བདག་ཅག་ལྟ་ཅི་སྨོས་ཏེ་སུས་ཀྱང་མ་གཙེས་སོ། །ཇི་ལྟར་བྱས། དེ་དག་གིས་རྒྱས་པར་བརྗོད་པ་དང༌། ཁྱེད་ཅག་གིས་ཤོ་གམ་ཟླར་རུང་ངམ། རུང་ཡང་སྲིད་མི་རུང་ཡང་སྲིད་བདག་ཅག་གིས་ནི་བཟླས་སོ། །སྐབས་དེ་ལ་གསོལ་བ་དང༌། ལྟུང་བ་མེད་མོད་སར་ཕྱིན་པའི་ཤོ་གམ་བཟླ་བར་མི་བྱའོ། །རེ་ཞིག་ན་དགེ་སློང་རབ་ཏུ་མང་པོ་དོན་མཐུན་དང་ལྷན་ཅིག་ལྗོངས་རྒྱུར་དོང་ནས་ཤོ་གམ་པའི་གནས་སུ་ཕྱིན་པ་དང༌། ཚོང་པ་དག་གིས་སྨྲས་པ། བདག་(༩༦ན)ཅག་ཚ་གྲང་དང༌། བཀྲེས་སྐོམ་གྱི་གནོད་པ་དང༌། ཤ་སྦྲང་དང་སྦྲང་བུ་དང་རླུང་དང་ཉི་མ་དང་སྡིག་སྦྲུལ་གྱི་རེག་པས་ཉེན་བཞིན་དུ་ལོངས་སྤྱོད་བསྒྲུབས་པ་ཐམས་ཅད་དཀོན་མཆོག་མཆོད་པའི་སླད་དུ་ལགས་པ། བདག་ཅག་ལ་ཤོ་གམ་གཞལ་དགོས་པའི་རྫས་མཆིས་པ་ཤོ་གམ་ལས་བཟླས་ཏེ་སྩལ་བར་རིགས་སོ། །བཞིན་བཟང་དག །སྟོན་པས། ཤོ་གམ་བཟླ་བར་མི་བྱའོ་ཞེས་བསླབ་པའི་གཞི་བཅའ་བ་མཛད་པས་བདག་ཅག་གིས་བཟླ་བར་མི་བྱའོ། །ཚོང་པ་རྣམས་ཀྱིས་ཐབས་ཤིག་བྱའོ་སྙམ་ནས་གྲོས་བྱས་ཏེ། འཕགས་པ་དག །དེང་བདག་ཅག་བྲེལ་བས་བསོད་སྙོམས་འབུལ་བའི་རྔོ་མི་ཐོག་གི །གྲོང་དུ་བསོད་སྙོམས་མཛོད་ཅིག །དེ་དག་གྲོང་དུ་བསོད་སྙོམས་ལ་ཞུགས་པ་དང༌། ཚོང་པ་དག་གིས་དེ་དག་གཏུར་བུ་དང༌། ལྷུང་བཟེད་ཀྱི་སྣོད་དུ་ཤོ་གམ་གཞལ་དགོས་པའི་རྫས་བཅུག་གོ །ཤོ་གམ་གྱི་གནས་ནས་འདས་པའི་ཚེ་ཚོང་པ་དག་གིས་དགེ་སློང་གི་སྣོད་ལ་ནོམ་པ་དང༌། ཅིའི་ཕྱིར་ཁོ་བོ་ཅག་གི་སྣོད་ལ་ནོམ། བདག་ཅག་གིས་འདིར་ཤོ་གམ་གཞལ་དགོས་པའི་རྫས་བཅུག་པ་དེ་འབྱིན་ནོ། །
དགེ་སློང་དག་གིས་སྨྲས་པ། ཁྱེད་ཀྱིས་ཆེད་དུ་བསམས་ཏེ་ཁོ་བོ་ཅག་ལྟུང་བ་དང་བཅས་པར་བྱས་སོ། །འཕགས་པ་དག །འདི་ལ་ཁྱེད་ཀྱི་ལུས་དང་ངག་གི་ལས་མ་མཆིས་ན་ཇི་ལྟར་ལྟུང་བ་དང་བཅས་པ་ལགས། དེ་དག་འགྱོད་ནས་མཐར་གྱིས་མཉན་ཡོད་དུ་ཕྱིན་པ་དང༌། དེ་དག་ལ་དགེ་སློང་རྣམས་ཀྱིས། འོངས་པ་ལགས་སོ། །བདེ་བར་བརྒྱུས་སམ། ཤོ་གམ་པས་མ་གཙེས་སམ། མ་གཙེས་མོད། བདག་ཅག་བསོད་སྙོམས་ལ་ཞུགས་པའི་གཏུར་བུ་དང༌། ལྷུང་བཟེད་ཀྱི་སྣོད་དུ་ཚོང་པས་ཤོ་གམ་གཞལ་དགོས་པའི་རྫས་བཅུག་པ་བདག་ཅག་གིས་མ་ཤེས་པར་ཤོ་གམ་བཟླས་པས་ཕམ་པ་མ་བྱུང་ངམ་སྙམ་དུ་འགྱོད་པ་སྐྱེས་སོ། །སྐབས་དེ་གསོལ་བ་དང༌། མ་ཚོར་བར་འདའ་བར་བྱེད་པ་མི་འགྲུབ་པར་བྱ་བའི་ཕྱིར་མི་འབད་པར་མི་བྱའོ། །སྣོད་ཡལ་བར་བོར་ཏེ་མི་འགྲོ་བར་སྲུང་མ་དགེ་སློང་གཞག་པར་བྱའོ། །དེ་དག་གིས་དགེ་སློང་བཞག་སྟེ་བསོད་སྙོམས་ལ་ཞུགས་པ་ན། དགེ་སློང་དེ་བཤང་གཅི་དང་འཆག་ཏུ་འགྲོ་བའི་ཚེ་ཚོང་པས་གཏུར་བུ་དང་ལྷུང་བཟེད་ཀྱི་སྣོད་དུ་ཤོ་གམ་གཞལ་དགོས་པའི་རྫས་བཅུག་ནས་ཤོ་གམ་གྱི་གནས་ནས་འདས་པ་དང༌། དགེ་སློང་གི་སྣོད་ལ་ནོམ་པར་བྱེད་ནས། འགྱོད་པའི་སྐབས་དེ་གསོལ་བ་དང༌། ལྟུང་བ་མེད་མོད་སྲུང་མ་དགེ་སློང་གཉིས་གཞག་པར་བྱའོ། །དགེ་སློང་རབ་ཏུ་མང་པོ་དོན་མཐུན་དང་ལྷན་ཅིག་འདོང་བ་ན་སྲུང་མ་དགེ་སློང་གཉིས་བཞག་སྟེ་བསོད་སྙོམས་ལ་(༩༦བ)ཞུགས་པ་དང༌། དེ་གཉིས་ཀྱི་གཅིག་བཤང་གཅིའམ། འཆག་ཏུ་སོང་ནས། ཚོང་པ་དག་གིས་ཅིག་ཤོས་དེའི་རྐང་ལག་ལ་འཇུ་ཞིང་གཞན་གྱིས་སྣོད་དུ་བཅུག་གོ །དགེ་སློང་དེས་གྲོགས་ལ་བཟླས་པར་ཤེས་ནས། དགེ་སློང་དེ་དག་ལྷགས་པ་དང་དེ་གཉིས་ཀྱིས་དེ་དག་ལ་བརྗོད་མི་ནུས་པར་འགྱུར་བའི་ཀླག་ཅོར་བྱས་སོ། །ཤོ་གམ་གྱི་གནས་འདས་པའི་ཚེ། སྣོད་ལ་ནོམ་པ་དང༌། ཅིའི་ཕྱིར་ནོམ། འདིར་བདག་ཅག་གི་ཤོ་གམ་གཞལ་དགོས་པའི་རྫས་བཅུག་པ་འབྱིན་ནོ། །དགེ་སློང་རྣམས་ཀྱིས་སྲུང་མ་དེ་གཉིས་ལ། ཁྱེད་གཉིས་ཀྱིས་བདག་ཅག་ལྟུང་བ་དང་བཅས་པར་བྱས་སོ། །དེ་གཉིས་ཀྱིས་བྱུང་བའི་མཐའ་བརྗོད་དོ། །དེ་དག་ཕམ་པ་མ་བྱུང་ངམ་སྙམ་ནས་འགྱོད་པའི་སྐབས་དེ་གསོལ་བ་དང༌། ལྟུང་བ་མེད་མོད། ཤོ་གམ་གཞལ་དགོས་པའི་རྫས་དེ་ཁྱིམ་པའམ། དགེ་ཚུལ་གྱིས་ཕྱུང་སྟེ་ཚོང་པ་དེ་དག་ལ་གཏད་དོ། །གཞན་གྱིས་དོར་བ་མི་འགྲུབ་ན་རང་ཉིད་ཀྱིས་རེག་པ་ཉིད་དུ་བྱའོ། །མཉན་ཡོད་ན་དགེ་སློང་སྡེ་སྣོད་གསུམ་པ་ཞིག་འདུག་པ་དེས་རྒྱལ་པོའི་ཁབ་ཏུ་དབྱར་གནས་ནས་མཉན་ཡོད་དུ་སྟོན་པ་ལ་ཕྱག་འཚལ་དུ་འཕགས་པ་ན་དེད་དཔོན་ཞིག་དང་འཕྲད་ནས་དེ་ལ་ཆོས་བཤད་པས་དད་ནས་ཟན་བྱིན་ཏེ་རས་ཡུག་ཆེན་ཕུལ་ནས། བདག་གིས་ཅི་བགྱི་བ་བཀའ་སྩོལ་ཅིག །དགེ་སློང་གིས་སྨྲས་པ། བདག་སྟོན་པའི་ཞབས་ལ་ཕྱག་འཚལ་དུ་འགྲོ་འདོད་ཀྱིས་བདག་བྱམས་པས་སྐྱོངས་ཤིག །བཀའ་བཞིན་འཚལ། ཁྱེད་ནི་བསོད་སྙོམས་བཞེད་ལ། བདག་ནི་བསོད་སྙོམས་འཚལ་བས་རྒྱལ་པོའི་ཁབ་ནས་མཉན་ཡོད་ཀྱི་བར་དུ་ཆོས་གོས་དང་བསོད་སྙོམས་སོགས་ལ་ཐུགས་ལས་ཆུང་ངུར་མཛོད་ཅིང༌། དེས་དང་དུ་བླངས་ནས་ཤོ་གམ་གྱི་གནས་སུ་ཕྱིན་པ་དང༌། དེད་དཔོན་གྱི་རྫས་ཤོ་གམ་བཅད་ནས། དེས། བདག་གི་རྫས་ཤོ་གམ་བཅད་ཅིང༌། འཕགས་པའི་རས་ཡུག་ཆེན་ཤོ་གམ་མ་བཅད་པས་གལ་ཏེ་ཤོ་གམ་པ་རས་ཡུག་ཆེན་གྱི་ཤོ་གམ་འཚལ་ན་བདག་ཁོ་ནས་གཞལ་དགོས་པས། རས་ཡུག་ཆེན་སླར་སྩོལ་ཅིག །ཤོ་གམ་གྱི་གནས་ནས་བཟླས་ཏེ་དབུལ་བར་བགྱིའོ། །སྟོན་པས་ཤོ་གམ་གཞལ་དགོས་པའི་རྫས་ཤོ་གམ་གྱི་གནས་ནས་བཟླ་བར་མི་བྱའོ་ཞེས་བསླབ་པ་བཅས་པས་བདག་ལྟུང་བ་དང་བཅས་པར་གྱུར་ན་མི་རུང་ངོ༌། །འདི་མི་ཉན་ནོ་སྙམ་ནས། འཕགས་པ། བདག་བྲེལ་གྱིས་བསོད་སྙོམས་ལ་བཞུད་ཅིག །དེ་བསོད་སྙོམས་ལ་སོང་བ་དང༌། རས་ཡུག་ཆེན་དེ་བདག་ཉིད་ཀྱི་སྣོད་དུ་བཅུག་གོ །ཤོ་གམ་པས། འཕགས་པ། ཤོ་གམ་གཞལ་དགོས་པ་མེད་དམ། ཡོད་དོ། །གཏུར་བུ་བལྟས་པ་དང་རས་ཡུག་ཆེན་མི་སྣང་བས། དེ་བཞིན་སྒྱུར་ཅིང་ལག་པ་འདྲིལ་ལོ། །ཅིའི་ཕྱིར་དེ་ལྟར་མཛད། ཁོ་བོའི་(༩༧ན)རས་ཡུག་ཆེན་དེ་མ་བྱིན་པར་ལེན་པས་བརྐུས་སོ། །དེ་ནི་ཁྱོད་ཀྱིས་མ་རྐུས། བདག་གི་བརྐུས་ཏེ་བདག་གིས་ཤོ་གམ་མ་ཐོབ་པས་སོ། །ཤོ་གམ་གྱི་གནས་ནས་འདས་པའི་ཚེ་དེད་དཔོན་དེས། འཕགས་པ། ཅིའི་ཕྱིེར་སེམས་ཁོང་དུ་ཆུད། བཞིན་བཟང༌། ཁྱོད་ལ་བཏང་བའི་བསོད་ནམས་སྐྱེས་ཀྱི་ལོངས་སྤྱད་པ་ལས་བྱུང་བའི་བསོད་ནམས་མ་སྐྱེས་ཏེ། རས་ཡུག་ཆེན་དེ་མ་བྱིན་པར་ལེན་པ་དག་གིས་བརྐུས་སོ། །
དེད་དཔོན་གྱིས་སྨྲས་པ། དེ་ནི་མ་བྱིན་པར་ལེན་པས་མ་བརྐུས་ཏེ་བདག་གིས་ཤོ་གམ་གྱི་འཇིགས་པས་རང་གི་སྣོད་དུ་སྦས་སོ། །བརྐུས་ན་ལེགས་ཀྱི་བདག་ལྟུང་བ་དང་བཅས་པ་ནི་མ་ལེགས་སོ། །འདི་ལ་ཁྱོད་ཀྱི་ལུས་ངག་མེད་པས་ལྟུང་བ་ཅིའི་ཕྱིར་འབྱུང༌། འགྱོད་དེ་གསོལ་བ་དང༌། ལྟུང་བ་མེད་ཀྱི། ལམ་དུ་ཞུགས་པས་གྲོང་དུ་བསོད་སྙོམས་ལ་འཇུག་པ་ན་སྣོད་ལ་མཚན་མ་བཏབ་སྟེ་འགྲོ་བར་བྱ་ཞིང་ཕྱིར་འོངས་ནས་ཀྱང་སོ་སོར་བརྟག་གོ །མཉན་ཡོད་ན་དགེ་སློང་རྒན་གཞོན་གཉིས་ལྗོངས་རྒྱུར་འཕགས་སོ། །རྒན་པོ་ནི་ཤེས་པ་ཆེ་ཞིང་ཡོ་བྱད་མང་བ། གཞོན་པ་ཤེས་པ་ཆུང་ཞིང་ཆོས་གོས་གསུམ་ལ་འཆེལ་བ་ཡིན་པས་ཤོ་གམ་པའི་གནས་སུ་ཕྱིན་པ་དང༌། རྒན་པོས། བདག་ལ་ཤོ་གམ་གཞལ་དགོས་པ་ཡོད་པས། ཤོ་གམ་པས་ཡོད་མེད་དྲིས་པ་ན་མེད་ཅེས་སྨྲས་ན་བརྫུན་དུ་འགྱུར་ལ། ཡོད་ཅེས་སྨྲས་ན་འཇལ་དགོས་པ་འོངས་པས་ཐབས་ཤིག་བྱའོ་སྙམ་ནས། གཞོན་པ་ལ། ཡུད་ཙམ་ཞིག་ཆོས་གོས་དང་ལྷུང་བཟེད་ལོངས་ཤིག །དེས་གནས་བརྟན་ངལ་བས་བདག་ལ་གཏད་དོ་སྙམ་ནས་བླངས་ཏེ་སྔོན་ལ་སོང་བ་དང༌། ཤོ་གམ་པས་རྫས་ཅུང་ཟད་མེད་དམ། མེད་དོ། །རྒན་པོས་རྗེས་ལ་སྟོང་པར་འོངས་པ་ཤོ་གམ་པས་དེ་ལ་ནི་མ་དྲིས་སོ། །རྒན་པོས་ཤོ་གམ་གྱི་གནས་ནས་འདས་པ་དང༌། རྫས་ཁྱེར་ཤོག །ངལ་སོས་སམ། ཁོ་བོ་ངལ་བ་མིན་ཏེ་འདིའི་ཆེད་དུའོ། །
གཞོན་ནུས་སྨྲས་པ། གནས་བརྟན་གྱིས་བདག་ཉིད་ཐར་བར་མཛད་ལ། ངན་བུ་ལྟུང་བ་དང་བཅས་པར་བགྱིས་སོ། །ཁྱོད་ཀྱིས་མི་ཤེས་པས་ལྟུང་བ་ཅི་ཡོད། དེ་འགྱོད་ནས་མཉན་ཡོད་དུ་ཕྱིན་པ་དང༌། དགེ་སློང་རྣམས་ཀྱིས། འོངས་པ་ལེགས་སོ། །བདེ་བར་བརྒྱུས་སམ། ག་ལ་བདེ་བར་བརྒྱུས། ཅིའི་ཕྱིར། སྐབས་དེ་བརྗོད་དོ། །དགེ་སློང་རྣམས་ཀྱིས་གསོལ་བ་དང༌། ལྟུང་བ་མེད་མོད། ཁྱེར་ཏེ་འོངས་པ་ལ། ཤོ་གམ་གཞལ་དགོས་པའི་རྫས་མེད་དམ་ཞེས་དྲི་བར་བྱའོ། །ཤོ་གམ་གཞལ་དགོས་པའི་རྫས་ལམ་དུ་འདའ་བར་མི་བྱའོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་(༩༧བ)བླངས་ནས་དེ་དང་ལྷན་ཅིག་དགའ་མགུར་སྤྱད་པས་བུ་བྱུང་ནས་ཆེན་པོར་གྱུར་པའི་ཚེ་རབ་ཏུ་བྱུང་ངོ༌། །དེ་ལྗོངས་རྒྱུར་སོང་བས་རས་ཡུག་ཆེན་གཉིས་རྙེད་ནས། སྟོན་པས། རབ་ཏུ་བྱུང་བས་ཀྱང་ཕ་མ་ལ་མཁོ་བ་བསྟབ་པར་བྱའོ་ཞེས་གསུངས་པས་ཕ་མ་ལ་དབུལ་ལོ་སྙམ་ནས། མཉན་ཡོད་དུ་འགྲོ་བ་ན་ཤོ་གམ་གྱི་གནས་སུ་ཕྱིན་པ་དང༌། ཤོ་གམ་པས་སྨྲས་པ། ཤོ་གམ་གཞལ་དགོས་པ་མེད་དམ། མེད་དོ། །དེས་བལྟས་པས་རས་ཡུག་ཆེན་གཉིས་མཐོང་ནས། འཕགས་པ། ཆོས་འདུལ་བ་ལ་རབ་ཏུ་བྱུང་བས་རས་ཡུག་ཆེན་གཉིས་ཙམ་གྱི་སླད་དུ་བརྫུན་སྨྲའམ། འདི་གཉིས་ཁོ་བོ་མི་དབང་ངོ༌། །སུ་དབང༌། ཕ་མའོ། །བདག་གིས་ཡབ་ཡུམ་མ་འཚལ་གྱིས་ཤོ་གམ་སྩོལ་ལ་བཞུད་ཅིང་ཅེས་ཡུན་རིང་དུ་བགྱངས་ནས་འགྱངས་ནས་བཏང་བ་མཐར་གྱིས་མཉན་ཡོད་དུ་ཕྱིན་པ་དང་འགྱོད་པའི་སྐབས་དེ་གསོལ་བ་དང༌། ཤོ་གམ་པའི་མདུན་དུ་ཕ་མའི་བསྔགས་པ་བརྗོད་པར་བྱ་སྟེ། བཞིན་བཟང༌། སྟོན་པས། བུའི་ཕ་མ་བསྙོད་གསོ་སྐྱེད་ནུ་མ་སྣུན། འཛམ་བུ་གླིང་སྣ་ཚོགས་སྟོན་པར་བྱེད་པ་གཉིས་ནི་དཀའ་བ་བྱེད་པ་ཡིན་ཏེ། བུས་ཕྲག་པ་གཅིག་གིས་ཕ། ཅིག་ཤོས་ཀྱིས་མ་ལོ་བརྒྱར་ཡོངས་སུ་སྤང་བ་བྱས་སམ། ས་ཆེན་པོ་འདིར་ནོར་བུ་ལ་སོགས་པའི་དབང་ཕྱུག་གི་བདག་པོ་ལ་བཀོད་པ་ཙམ་གྱིས་བུས་ཕ་མ་གཉིས་ལ་བྱ་བ་བྱས་པར་མི་འགྱུར་གྱི། དེས་ཕ་མ་གཉིས་མ་དད་པ་དང་དད་པ་དང༌། ཚུལ་ཁྲིམས་འཆལ་བ་ཚུལ་ཁྲིམས་དང༌། སེར་སྣ་ཅན་གཏོང་བ་དང༌། ཤེས་རབ་འཆལ་བ་ཤེས་རབ་ཕུན་སུམ་ཚོགས་པ་ལ་བཀོད་ན་བུས་ཕ་མ་གཉིས་ལ་བྱ་བ་བྱས་པར་འགྱུར་རོ་ཞེས་གསུངས་སོ་ཞེས་བརྗོད་པར་བྱའོ། །
ཕ་མའི་བསྔགས་པ་བརྗོད་པ་ན་གཏོང་ན་ལེགས། མི་གཏོང་ན་ཤོ་གམ་གཞལ་ཏེ་འགྲོ་བར་བྱའོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་བུ་བྱུང་སྟེ་ཆེན་པོར་གྱུར་པའི་ཚེ་རབ་ཏུ་བྱུང་ངོ༌། །སྟོན་པས། བསོད་ནམས་དག་ནི་བྱ་བ་སྟེ། །བསོད་ནམས་མ་བྱས་སྡུག་བསྔལ་འགྱུར། །འཇིག་རྟེན་འདི་དང་ཕ་རོལ་ཏུ། །བསོད་ནམས་བྱས་པ་དགའ་བར་འགྱུར། །ཞེས་གསུངས་པ་ཐོས་ནས། དགེ་སློང་དག་གིས་སློང་མོ་བྱས་ཏེ་དཀོན་མཆོག་གསུམ་ལ་མཆོད་པ་བྱས་ཤིང་བསྟན་པ་རྒྱས་པ་ན། དགེ་སློང་དེས་དགེ་སློང་སློང་བ་མང་ཞིང་མཉན་ཡོད་ཁྱབ་པར་གྱུར་གྱི། བདག་ལྗོངས་སུ་སོང་ནས་ཡང་དག་པར་སྦྱོར་དུ་གཞུག་གོ་སྙམ་ནས། ལྗོངས་སུ་སོང་སྟེ་དཀོན་མཆོག་གསུམ་གྱི་དོན་དུ་གོས་ཁ་དོག་སྣ་ཚོགས་པ་གཏུར་བུ་གསུམ་སྦྱོར་དུ་བཅུག་ནས་མཉན་ཡོད་དུ་འགྲོ་བའི་ཚེ་ཤོ་གམ་གྱི་གནས་སུ་ཕྱིན་པ་དང༌། ཤོ་(༩༨ན)གམ་པས། ཤོ་གམ་གཞལ་དགོས་པ་མེད་དམ། མེད་དོ། །དེས་བལྟས་པས་གོས་ཁ་དོག་སྣ་ཚོགས་པ་གཏུར་བུ་གསུམ་མཐོང་ནས། འཕགས་པ། གོས་གཏུར་བུ་གསུམ་པོ་འདི་དག་ཉུང་བས་གལ་ཏེ་རྔ་མོའི་ཁལ་ལགས་པར་གྱུར་ན་ཁྱོད་ཀྱིས་ཤོ་གམ་དགོས་པར་འགྱུར་རོ། །བཞིན་བཟང༌། འདི་དག་ཁོ་བོ་མི་དབང་ངོ༌། །སུ་དབང༌། དཀོན་མཆོག་གསུམ་མོ། །བདག་གིས་དཀོན་མཆོག་གསུམ་མ་འཚལ་གྱིས་ཤོ་གམ་སྩོལ་ལ་བཞུད་ཅིག་ཅེས་ཡུན་རིང་བགྱངས་ཏེ་བཏང་ནས་མཐར་གྱིས་མཉན་ཡོད་དུ་ཕྱིན་པ་དང་འགྱོད་པའི་སྐབས་དེ་གསོལ་བ་དང༌། ལྟུང་བ་མེད་མོད། ཤོ་གམ་པའི་མདུན་དུ་དཀོན་མཆོག་གསུམ་གྱི་བསྔགས་པ་བརྗོད་པར་བྱའོ། །
འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་ཡིན་ནོ། །བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་སོ་སོ་རང་གིས་རིག་པར་བྱ་བ་ཡིན་ནོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ། རིག་པར་ཞུགས་པ། དྲང་པོར་ཞུགས་པ། མཐུན་པར་ཞུགས་པ་ནས། འཇིག་རྟེན་གྱི་ཡོན་གནས་ཡིན་ནོ་ཞེས་བསྔགས་པ་བརྗོད་པ་ན་གཏོང་ན་ལེགས། མི་གཏོང་ན་ཤོ་གམ་གཞལ་ཏེ་འགྲོ་བར་བྱའོ། །དགེ་སློང་དག་གིས་དཀོན་མཆོག་གསུམ་གྱི་ཕྱིར་ཤོ་གམ་གཞལ་དགོས་པའི་རྫས་ཁྱེར་ནས་ཕྱིན་པ་དང༌། ཤོ་གམ་པའི་གནས་སུ་བསྔགས་པ་བརྗོད་པས་མི་གཏོང་ནས་གཅིག་གི་སྐལ་བ་ལས་བྱིན་པ་དང་། གསུམ་ཆར་ལས་སྦྱིན་ནོ། །གསུམ་ཆར་ལས་བྱིན་པས་དོན་མཐུན་དང་བྲལ་ནས་གཅན་གཟན་དང་ཆོམ་རྐུན་པའི་གནོད་ནས། གཅིག་གི་ལས་བྱིན་ལ་སྐལ་བ་བསབ་པར་བྱའོ། །དགེ་སློང་དྲུག་ཅུ་ལྗོངས་རྒྱུ་ཞིང་རི་བྲགས་ཤིག་ཏུ་ཕྱིན་པ་ན་ཁྱིམ་བདག་ཕྱུག་པ་དད་པ་ཅན་ཞིག་གིས་དགེ་སློང་དེ་དག་ལ་ཟས་བྱིན་ནས་རེ་རེ་ལ་གོས་ཕྲུགས་རེ་བསྐོན་པ་དང༌། སྨྲས་པ། སྟོན་པས། ཤོ་གམ་གཞལ་དགོས་པའི་རྫས་ལམ་དུ་འདའ་བར་མི་བྱའོ་ཞེས་གསུངས་པས་མི་ལེན་ནོ། །དེ་དག་གིས་ཡོན་བཤད་པ་བྱས་ནས་མཐར་གྱིས་མཉན་ཡོད་དུ་ཕྱིན་པ་དང༌། དགེ་སློང་རྣམས་ཀྱིས་དེ་དག་ལ། འོངས་པ་ལེགས་སོ། །བདེ་བར་(༩༨བ)བརྒྱུས་སམ། བདེ་བར་བརྒྱུས་མོད། འོན་ཀྱང་ཁྱིམ་བདག་ཅིག་གིས་བདག་ཅག་ལ་ཟས་བྱིན་ནས་གོས་ཕྲུགས་རེ་བསྐོན་ན། དེ་ལ་བདག་ཅག་གིས། སྟོན་པས་བཀག་པས་མི་ལེན་ནོ་ཞེས་མ་བླངས་སོ། །སྐབས་དེ་གསོལ་བ་དང༌། བླང་བར་བྱ་ཞིང་བླངས་ནས་རུང་བར་བྱ་སྟེ་ལམ་དུ་བཟླ་བར་བྱའོ། །ཚོན་རྩི་དང༌། ཤིང་དང༌། ཟངས་ཚོལ་བས་དུབ་ཅིང་སྒྱིད་ལུག་པ་དང་དོན་མཐུན་དང་བྲལ་བས་གཅན་གཟན་དང༌། ཆོམ་རྐུན་པས་བགྲོད་པའི་སྐབས་དེ་གསོལ་བ་དང༌། མཐའ་ཆག་གམ་རང་ཆག་བྱས་ཏེ་འགྲོ་བར་བྱའོ། །ཉེས་དམིགས་དེ་ཉིད་བྱུང་ནས། བ་ལང་གི་ལྕི་བ་བཙིར་བས་རུང་བའམ། བཀྲུ་བར་བྱའོ། །ཉེས་དམིགས་དེ་ཉིད་བྱུང་ནས་ཐ་ན་ཁ་ཚར་དང་ཕུན་ཚར་གཅད་པར་བྱའོ། །སྟོན་པ་མཉན་ཡོད་ནའོ། །དགེ་སློང་ཞིག་རྒྱལ་པོའི་ཁབ་ཏུ་དབྱར་གནས་ནས་ཟླ་བ་གསུམ་འདས་པ་ན་ཆོས་གོས་མ་རྙེད་པ་ཁོ་ནར་མཉན་ཡོད་དུ་སྟོན་པ་ལ་ཕྱག་འཚལ་དུ་འཕགས་པ་དང༌། དགེ་སློང་རྣམས་ཀྱིས་སྨྲས་པ། ཆོས་གོས་ཀྱི་རྙེད་པ་མ་ཐོབ་ཀྱི་བར་དུ་ཁྱོད་མ་རིངས་ཤིག །དེ་མི་སྡོད་པ་དང༌། དེ་ལ་དགེ་སློང་ཞིག་གིས་རས་ཡུག་ཆེན་བྱིན་ནོ། །དེས་འདི་རུང་བར་བྱས་ནས་གྲོགས་མི་མཐོང་ངོ་སྙམ་ནས། བཤེས་པ་ཞིག་ལ་ཁོ་བོ་གྲོགས་ལ་ལྟ་བའི་བར་དུས་རས་ཡུག་ཆེན་འདི་རུང་བར་གྱིས་ལ་གཏུར་བུར་ཆུག་ཅིག །དེ་ལེ་ལོ་ཅན་ཡིན་པས་དེས་རུང་བ་མ་བྱས་པར་གཏུར་བུར་བཅུག་གོ །དགེ་སློང་དེས་མཐར་གྱིས་ཤོ་གམ་གྱི་གནས་སུ་ཕྱིན་པ་དང༌། ཤོ་གམ་པས། འཕགས་པ། ཤོ་གམ་གཞལ་དགོས་པའི་རྫས་མེད་དམ། མེད་དོ། །དེས་བལྟས་པ་དང་རས་ཡུག་ཆེན་མཐོང་ནས། འཕགས་པ། རབ་ཏུ་བྱུང་ནས་རས་ཡུག་ཆེན་གྱི་སླད་དུ་བརྫུན་སྨྲའམ། དགེ་སློང་གིས་སྨྲས་པ། ཁོ་བོ་འཕགས་ན་རས་ཡུག་ཆེན་འདི་རྙེད་ནས། ཁོ་བོས་བཤེས་པ་ལ། ཁོ་བོ་གྲོགས་ལ་ལྟ་བའི་བར་དུ་རས་ཡུག་ཆེན་འདི་རུང་བར་གྱིས་ལ་གཏུར་བུར་ཆུག་ཅིག་ཅེས་སྨྲས་ན། དེ་ལེ་ལོ་ཅན་ཞིག་པས་དེས་རུང་བ་མ་བྱས་པར་གཏུར་བུར་བཅུག་གོ །འཕགས་པ། དེ་ནི་ཁྱེད་ཀྱི་བཤེས་པ་ལ་མ་ལགས་ཀྱི། བདག་གི་བཤེས་པ་ལགས་ཏེ་དེས་ན་བདག་ལ་ཤོ་གམ་བྱུང་གིས་སྩོལ་ལ་བཞུད་ཅིག །དེ་འགྱོད་ནས་མཐར་གྱིས་མཉན་ཡོད་དུ་ཕྱིན་པ་དང༌། དགེ་སློང་རྣམས་ཀྱིས་དེ་ལ། འོངས་པ་ལེགས་སོ། །བདེ་བར་བརྒྱུས་སམ། ཇི་ལྟར་བདེ་བར་བརྒྱུས། ཅིའི་ཕྱིར་དེ་སྐད་ཟེར། སྐབས་དེ་རྒྱས་པར་བརྗོད་དོ། །དེ་གསོལ་བ་དང༌། ལྟུང་བ་མེད་མོད། མ་མཐོང་བ་ལ་བློ་དེ་མི་འཆགས་པས་མ་དྲིས་པར་བླང་བར་མི་བྱ་བར། ཁྱོད་ཀྱིས་རུང་བར་བྱས་སམ་མ་བྱས་དྲི་བར་བྱའོ། །
སྟོན་པ་མཉན་ཡོད་ནའོ། །དྲུག་སྡེས་(༩༩ན)སྨྲས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་གི་རྐང་པ་སྤྲེའུའི་ཞག་གིས་བསྐུས་ཏེ། འགྲོ་ནའང་འགྲོ་བར་ཆས་པའི་རྙེད་པ་སྒྲུབ། འོང་ནའང་གློ་བུར་དུ་འོངས་པའི་རྙེད་པ་སྒྲུབ་ཅིང་སྐྱེ་བོ་མང་པོ་དགའ་བ་དང་ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ཁྲོན་པའི་རུས་སྦལ་ལྟར་གར་ཡང་མི་འདོང༌། གང་ནས་ཀྱང་མི་འོང་བས་རྙེད་པ་འཐོབ་པ་དང༌། སྐྱེ་བོ་མང་པོ་དགའ་བ་དང་ཡིད་དུ་འོང་བར་ག་ལ་འགྱུར་གྱི། ཡུ་བུ་ཅག་ཀྱང་འདོང་ངོ༌། །གང་དུ། གང་དུ་དོན་མཐུན་འགྲུབ་པར་རོ། །དེ་དག་གིས་དོན་མཏུན་བཙལ་བས་བྱང་ལམ་དུ་འགྲོ་བ་དག་མཐོང་ནས། ཁྱེད་གང་དུ་འཕགས། བྱང་ལམ་དུའོ། །ཁོ་བོ་ཅག་ཀྱང་ཁྱེད་དང་ལྷན་ཅིག་འདོང་ངོ༌། །འཕགས་པ་དག །བྱང་ལམ་ནི་མཐོན་དམན་ཅན། ཁྱི་ཟ་བ། བུད་མེད་གནས་ངན་ལེན་ཀུན་ཏུ་སྤྱོད་པ་ལགས་པས་དེར་དགྱེས་པར་མི་འགྱུར་རོ། །དེ་ལྟར་ཡིན་ཡང་ཡུལ་བལྟའི་འདོང་ངོ་ཟེར་ནས་བྱང་ལམ་དུ་ཕྱིན་པ་དང༌། ཕྱིན་པའི་ཉི་མ་དེ་ཉིད་ལ་མི་དགའ་ནས། དེ་དག་ནངས་པར་སྔར་ལངས་ཏེ་སྲང་དུ་ཕྱིན་པ་དང༌། ཚོང་པས་ཕྱག་བཙལ་ཏེ། མི་དགྱེས་པར་མ་གྱུར་ཏམ། བྱང་ལམ་དུ་ཕྱིན་པའི་ཉི་མ་དེ་ཉིད་ལ་མི་དགའ་བར་གྱུར་ཏོ། །བདག་ཅག་གིས་ཁྱེད་ལ་དང་པོ་ནས། དེར་མི་དགྱེས་པར་འགྱུར་རོ་ཞེས་མ་བགྱིས་སམ། བཞིན་བཟང་དག །དེ་ལྟར་ན་འདོང་ངོ༌། །བདག་ཅག་གིས་ཟོང་མ་བསྒྱུར་གྱིས། བདག་ཅག་དང་བཤེས་པའི་ཚོང་པ་ཟོང་བསྒྱུར་བ་དེ་དག་ལ་གཏད་པར་བགྱིའི་དེ་དག་དང་ལྷན་ཅིག་སྤྱོན་ཅིག །དེ་བཞིན་དུ་བྱའོ། །དེ་དག་དོན་མཐུན་དང་ལྷན་ཅིག་སོང་བ་དང༌། དྲུག་སྡེ་ནི་རྡུལ་གྱིས་འཇིགས་པས་དོན་མཐུན་གྱི་མདུན་ནམ་ཕྱི་ནས་འགྲོ་བས། ཕྱི་ནས་སོང་བ་དང༌། ཡུལ་དབུས་ནས་ཕྱིར་འོང་བའི་དོན་མཐུན་འོངས་པ་ལ་ཚོང་པ་དེ་དག་གིས། ཁྱེད་ག་ལས་འོངས། ཡུལ་དབུལ་ནས་སོ། །ཡུལ་དབུས་སུ་ཁེ་སྤོགས་མང་པོ་གྲུབ་བམ། ཤོ་གམ་པ་དང་ལ་གཅན་པས་ཡི་ཆད་པ་མེད་དམ། ཡུལ་དབུས་སུ་ཁེ་སྤོགས་མང་པོ་གྲུབ་མོད། དེ་ན་གོས་དཀར་པོ་ཅན་ཆོམ་རྐུན་པ་ལྟ་བུ་ཤོ་གམ་དང༌། ལ་གཅན་གྱི་ལྕེ་རྟེན་གྱི་བདེན་པས་མི་མགུ་བ་དག་འཁོད་ནས་རྫས་ཐམས་ཅད་འཕྲོག་པས་ཤོ་གམ་དང༌། ལ་གཅན་གྱིས་ཡི་ཆད་པ་ཡོད་དོ། །དེ་དག་འཚེར་ཞིང་ཕྱོགས་ཤིག་དོང་ནས་སེམས་ཁོང་དུ་ཆུད་དེ་འདུག་པ་དང༌། དྲུག་སྡེས། ཅིའི་ཕྱིར་སེམས་ཁོང་དུ་ཆུད། བདག་ཅག་ཚ་གྲང་དང་བཀྲེས་སྐོམ་སོགས་ཀྱིས་ཉེན་བཞིན་དུ་ལོངས་སྤྱོད་སྒྲུབ་པའི་སླད་དུ་ཡུལ་དབུས་སུ་འཕགས་པ་ལེགས་ཏེ། ཡུལ་དབུས་སུ་ཁེ་སྤོགས་མང་པོ་འགྲུབ་མོད། དེ་ན་གོས་དཀར་པོ་ཅན་ཆོམ་རྐུན་པ་ལྟ་བུ་ཤོ་གམ་དང་ལ་(༩༩བ)གཅན་གྱི་ལྕེ་རྟེན་གྱི་བདེན་པས་མི་མགུ་བ་དག་འཁོད་པས་རྫས་ཐམས་ཅད་འཕྲོག་གོ་ཞེས་ཐོས་སོ། །ཁོ་བོ་ཅག་བཤེས་སུ་ཡོད་པས་མ་འཇིགས་ཤིག །ཅི་བདག་ཅག་གི་སླད་དུ་རྒྱལ་པོ་ལ་ཞུའམ། མིན་ཏེ། མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་ལ། དེ་ལ་སྒོ་བཅོ་བརྒྱད་སྒེའུ་ཆུང་སུམ་ཅུ་རྩ་དྲུག་ཡོད་པས་ཁྱེད་ཅག་སྒེའུ་ཆུང་ནས་འཇུག་ཏུ་གཞུག་གིས་འདོང་ངོ༌། །ཚོང་པ་དེ་དག་མགུ་ནས་མཉན་ཡོད་དང་མི་རིང་བ་ཞིག་ཏུ་ཕྱིན་པ་དང༌། དྲུག་སྡེས་སྨྲས་པ། རེ་ཞིག་ངལ་གསོས་མཉན་ཡོད་དུ་མཚན་མོ་འཇུག་པར་བྱའི་རྔ་མོ་དང༌། གླང་དང༌། བོང་བུ་དག་ཐོང་ཞིག །ནམ་སྲོས་པ་དང་སྒེའུ་ཆུང་ནས་ཞུགས་ཏེ། ནམ་ལངས་པ་དང་སྲང་དུ་སོང་སྟེ་ཟོང་བཀྲམ་མོ། །ཤོ་གམ་པ་དག་གིས་དོན་མཐུན་འོང་བ་ཐོས་ནས་སྒོ་མནན་ཅིང་འཁོད་ཀྱང་མ་བྱུང་ནས། མི་ཞིག་ལ་དྲིས་པས། སྔར་སོང་ཟིན་ནོ། །ཁོ་བོ་ཅག་སྒོ་མནན་ཅིང་འཁོད་ན་གང་ནས་ཞུགས། ཡིད་མ་ཆེས་ན་སྲང་དུ་ལྟོས་ཤིག །བལྟས་པས་མཐོང་ནས། ཤེས་ལྡན་དག །གང་གིས་ཞུགས། རྐང་པས་ཞུགས་སོ། །དེ་ཤེས་ཀྱི་སུས་འཇུག་ཏུ་བཅུག །སྨྲོས་དང༌། ཤེས་པར་བྱའོ། །དྲུག་སྡེས་སོ། །ཤོ་གམ་པ་ན་རེ། དགེ་སློང་རྣམས་ཀྱི་དགེ་སྦྱོང་གི་ཚུལ་ནི་ཚིག་པ་ཡིན་ཏེ། གཞན་གྱི་འཚོ་བ་ལའང་གནོད་པར་བྱེད་དོ་ཞེས་སྨོད། འཕྱར་ཁ་གཏོང༌། ཁ་ཟེར་བའི་སྐབས་དེ་གསོལ་བ་དང༌། གཞན་གྱི་འཚོ་བ་ལ་གནོད་པར་མི་བྱའོ། །ཤོ་གམ་པ་དག་གིས། དྲུག་སྡེ་འདི་དག་ནི་མི་བསྲུན་པ་ཡིན་པས་ངོ་བྱའོ་སྙམ་ནས། ཉེ་དགའ་ལ། ལྷུང་བཟེད་ན་ཅི་མཆིས། ཤོ་གམ་གཞལ་དགོས་པའི་རྫས་མེད་དོ། །
འཕགས་པ། སྡིག་པ་ཞི་བར་གྱུར་ཅིག །བདག་དེ་མི་སེམས་ཀྱིས་བཟའ་བ་དང་བཅའ་བ་ཅུང་ཟད་མཆིས་ན་བསླངས་ཏེ་འཚལ་སྙམ་མོ། །ཉེ་དགས་སྨྲས་པ། ཆུ་ཀླུང་རྒྱུན་ལས་ལྡོག་ཕྱོགས་སུ་འབབ་བམ། ཁྱོད་ཀྱིས་ཁོ་བོ་ལ་སྦྱིན་པར་བྱ་བ་ཡིན་གྱི་ཁོ་བོས་ཁྱོད་ལ་སྦྱིན་པར་བྱ་བ་མ་ཡིན་ནོ། །འཕགས་པ། བཞད་གད་བགྱིས་གྱི་ཚུར་སྤྱོན་ཁྱིམ་དུ་བཞུད་དོ། །དེས་དེ་ཁྲིད་ནས་བཅའ་བ་དང་བཟའ་བ་བསོད་པས་ལྷུང་བཟེད་བཀང་སྟེ་བྱིན་ནས། བདག་ལ་བཀའ་སྩོལ་དང་འཕགས་པས་བཀའ་སྩལ་པ་ཐམས་ཅད་བགྱིའོ། །ཉེ་དགས། ནད་མེད་པར་གྱུར་ཅིག་ཅེས་སྨྲས་ནས་སོང་ངོ༌། །དྲུག་སྡེའི་ཀུན་ཏུ་སྤྱོད་པ་ནི། འདིར་བདག་ཅག་གིས་བྲམ་ཟེ་དང་ཁྱིམ་བདག་ལྷགས་པ་རྣམས་ལ་ཆོས་བསྟན་པར་བྱ། རྒོལ་བ་དག་ཚར་གཅད་པར་བྱ། རང་གི་གྲགས་པ་བསྒྲག་པར་བྱ། རྙེད་པའང་བསྒྲུབ་པར་བྱའོ་ཞེས་སྒོ་དྲུང་ངམ་ལམ་དང་ཉེ་བར་གཙུག་ལག་ཁང་ནོད་པས་ཉེ་དགས་ལམ་དང་ཉེ་བར་གཙུག་ལག་ཁང་ནོད་ནས་(༡༠༠ན)དེའི་སྟེང་དུ་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པར་གནས་སོ། །རེ་ཞིག་ན་ཚོང་པ་ཤོ་གམ་འདྲལ་བ་དག་གཙུག་ལག་ཁང་དང་ཐག་མི་རིང་བ་ནས་འདོང་བ་དང༌། ཉེ་དགའ་སྒྲ་ལ་མཁས་པས། འདི་དག་སུ་ཡིན། དེ་དག་ཅང་མི་སྨྲ་བ་དང༌། དེ་མྱུར་བར་གཙུག་ལག་ཁང་གི་སྟེང་ནས་བབས་ཏེ། ཚོང་པ་དེ་དག་གི་གན་དུ་སོང་ནས། མཚན་མོ་ནོར་དང་བཅས་ནས་འདོང་བ་འདི་དག་སུ་ཡིན། བདག་ཅག་ཚོང་པ་ཤོ་གམ་འདྲལ་བ་ལགས་སོ། །བཀྲེན་པ་དག །ཁོ་བོ་ཅག་ལ་རྒྱལ་པོ་ཡོ་བྱད་ཐམས་ཅད་ཀྱིས་ཉེ་བར་གནས་པ་ཡིན་ཏེ། ཀུན་ཤེས་ཀོའུ་དི་ནྱ་ཡང༌། ཅི་ནས་ཀྱང་རྒྱལ་པོའི་ལོངས་སྤྱོད་མ་བྱུང་བ་དག་འབྱུང་བར་གྱུར་ཅིག །བྱུང་བ་དག་རྒྱས་པ་དང་འཕེལ་བར་གྱུར་ཅིག་ཅེས་ཡོན་བཤད་པ་བྱེད་པས། ཁྱེད་ཅག་དེ་དབང་བའི་ཤོ་གམ་འདྲལ་ན་ཁོ་བོས་ཅིའི་ཕྱིར་ཡལ་བར་འདོར། ཁྱེད་ལ་གནོད་པ་བྱེད་དུ་གཞུག་གོ །དེ་དག་སྐྲག་ནས། བཟོད་པར་མཛོད་དང༌། བཅའ་བའི་རིན་དབུལ་ལོ། །དེངས་ཤིག །དེ་དག་ཉེ་དགའ་དང་བྲལ་བ་དང༌། ཡུ་བུ་ཅག་རྒྱལ་པོ་གསལ་རྒྱལ་ལའང་ཤོ་གམ་མི་འཇལ་ན་དགེ་སྦྱོང་མགོ་རེག་ཉེ་དགའ་ལ་ལྟ་ཅི་སྨོས། ཉེ་དགའ་ཡང་མྱུར་བར་ཟས་ཀྱི་བྱ་བ་བྱས་ཏེ་སྒོ་དྲུང་ན་ལྷུང་བཟེད་འཁྲུ་ཞིང་ཕྱོགས་བཞིར་ལྟ་བ་གཞོན་ནུ་ཞིག་གིས་མཐོང་ནས། ཅིའི་སླད་དུ་ཕན་ཚུན་གཟིགས། ཁོ་བོའི་མཛའ་བཤེས་ཚོང་པ་དག་ཟོང་ཐོགས་ཏེ་མཉན་ཡོད་དུ་ཞུགས་པ་ལྟའོ། །ཁྱོད་ཟས་ཀྱི་བྱ་བ་མཛད་པ་ན་དེ་དག་སོང་ངོ༌། །དེ་མི་བཟོད་པ་སྐྱེས་ནས། ཁོ་བོ་དེ་དག་གིས་བསླུས་ཏེ། སྤུ་གྲི་ལ་ཁུ་ཚུར་གྱིས་བརྡེགས་ཤིང་རང་འཐག་གི་སོ་ལ་རྩྭས་ཕུག་གིས་ཁོ་བོས་དེ་དག་ལ་གང་བྱ་བ་ཤེས་སོ་སྙམ་མོ། །
རེ་ཞིག་ན་ཚོང་པ་དེ་དག་སྔར་བཞིན་དུ་འོངས་པ་དང༌། ཉེ་དགའ་བཟུང་སྟེ། ཁྱེད་ཀྱིས་ཁོ་བོ་བསླུས་སོ། །འཕགས་པ། བདག་ཅག་ལ་བྱ་བ་ཅུང་ཟད་བྱུང་བས་མ་ཞུས་པར་སོང་སྟེ། ད་དེ་དང་གཞན་ཡང་དབུལ་ལོ། །དེངས་ཤིག །དེ་དག་ཉེ་དགའ་དང་བྲལ་བ་ན། བདག་ཅག་རྒྱལ་པོ་གསལ་རྒྱལ་ལའང་ཤོ་གམ་མི་འཇལ་ན། ཉེ་དགའ་ལ་ལྟ་ཅི་སྨོས་ཟེར་རོ། །ཉེ་དགས་སྲང་དུ་སོང་ནས། ཚོང་པ་དེ་དག་ཟོང་བཀྲམ་སྟེ་འཚོང་པ་ལ་མཚན་མ་བསྟན་པས། ཟོང་བསྒྱུར་ཏེ་དབུལ་ལོ། །དེ་གཙུག་ལག་ཁང་དུ་ཟན་ཟ་བའི་བར་ལ་དེ་རྣམས་སོང་ངོ༌། །ཉེ་དགའ་ཆེར་ཁྲོས་ཏེ། དབྱུང་ན་སླན་ཆད་འཚོང་པར་མི་འགྱུར་བར་བྱའོ་སྙམ་མོ། །
ཡང་ཚོང་པ་དེ་དག་འོངས་པ་དང༌། ཉེ་དགས། ཁྱེད་ཀྱིས་ཡང་དང་ཡང་དུ་ཁོ་བོ་བསླུས་པས་ད་ནི་གང་བྱ་བ་དེ་ལྟོས་ཤིག །འཕགས་པ། བཟོད་པ་མཛོད་ཅིག་དང་ད་དབུལ་ལོ། །ཉེ་དགས་དེ་དག་(༡༠༠བ)ལ། རེ་ཞིག་སྡོད་ཅིག་ཅེས་སྨྲས་ནས། ཤོ་གམ་པ་ཅན་སོང་སྟེ། འདི་རྣམས་ནོར་དང་ཕྲོལ། མཉན་ཡོད་ནི་ཀུན་ཤེས་པའི་ཤོ་གམ་ཅན་ཡིན་གྱི་ཉེས་པ་བྱེད་པའི་ཤོ་གམ་མིན་ནོ་ཟེར་ན་རྒྱལ་པོ་ཅན་སོང་ལ། ལྷའི་ཡབ་ཀྱི་ཁྲིམས་བཙན་ནམ་ཞེས་དྲིས། བཙན་ཟེར་ན། མཛོད་ཆེ་གེ་མོའི་སྒྲོམ་ན་ཟངས་མའི་གླེགས་བུ་ལ་ཡི་གེ་བྲིས་པ་གཟིགས་སུ་གསོལ། དེ་ལྟར་བྱས་ནས་ཡི་གེ་བལྟས་པས། གནས་ཆེ་གེ་མོ་ནས་འཇུག་ན་ཀུན་ཤེས་པ། ཆེ་གེ་མོ་ནས་འཇུག་ན་གནོད་པའི་ཤོ་གམ་མོ་ཞེས་མཐོང་ནས་ཐམས་ཅད་ཕྲོགས་སོ། །ཚོང་པས་ཤོ་གམ་པ་ལ། ཁྱེད་ལ་སུས་བསླབས། ངེད་རང་གིས་ཤེས་ཀྱི། ཁྱེད་སྙིང་རྗེས་བོར་རོ། །ཁྱེད་ལ་སྙིང་རྗེ་ག་ལ་ཡོད། ཤོད་དང་མཛའ་བོ་བྱའོ། །དྲུག་སྡེས་སོ། །ཚོང་པ་དེ་དག །དགེ་སྦྱོང་གི་ཚུལ་ནི་ཚིག་གོ །བྲམ་ཟེའི་ཚུལ་ནི་ཚིག་སྟེ་གཞན་གྱི་འཚོ་བ་ལའང་གནོད་པ་བྱེད་དོ་ཞེས་སྨོད། འཕྱར་ཁ་གཏོང༌། ཁ་ཟེར་བའི་སྐབས་དེ་གསོལ་བ་དང༌། གཞན་གྱི་འཚོ་བ་ལ་གནོད་པར་མི་བྱའོ། །མཉན་ཡོད་ན་དགེ་སློང་གདོལ་པ་དང་བག་རྫངས་ཅན་གཉིས་བཤེས་པས་འཁོད་ལ། གདོལ་པ་ནི་གྲགས་པ་དང་བསོད་ནམས་ཆེ་བ། ལུས་ཆུང་ལ་ཆོས་གོས་དང་ལྷུང་བཟེད་ལྷག་པ་ཡོད་དོ། །བག་རྫངས་ཅན་ལུས་ཆེ་ལ་གྲགས་པ་དང་བསོད་ནམས་ཆུང༌། ཆོས་གོས་གསུམ་ངན་པ་ལ། དགེ་སློང་རྣམས་ཀྱིས། ཁྱོད་ཏེ་བོར་འདོད་པ་ཆུང་ན་ཅིའི་ཕྱིར་བདག་ཉིད་གཅེར་བུར་སྟོན། རྙེད་པས་སམ། མ་རྙེད་པས་ཡིན། མ་རྙེད་པས་སོ། །ཅིའི་ཕྱིར་མི་འཇུག །དཀོན་མཆོག་གསུམ་སྤངས་ནས་སུས་ཁོ་བོ་ལ་སྦྱོར། གདོལ་པ་དེ་ཁྱོད་ཀྱི་བཤེས་ཡིན་ལ། དེ་ལ་ཆོས་གོས་ལྷག་པ་ཡོད་པ་སློངས་ཤིག །མི་སྟེར་རོ། །ཁྱོད་ཀྱིས་སྔར་བསླངས་སམ། མ་བསླངས་སོ། །ཅི། ཆུའི་སྒྲ་ཁོ་ནས་ལྷམ་འབུད་དམ་སློངས་ཤིག །དེ་སོང་བ་དང་གདོལ་པ་མེད་ནས། བག་རྫངས་ཅན་གྱིས། གདོལ་པ་ནི་ལུས་ཆུང་བ་ཡིན་པས་ཆོས་གོས་གཞལ་ལ་རན་ན་བསླང་བར་བྱའོ་སྙམ་ནས་རན་མི་རན་བལྟས་པ་དང༌། གདོལ་པ་བྱུང་ནས། ཁྱོད་ཀྱིས་བརྐུས་སོ། །མིན་ཏེ་འདི་ལྟར་བསམས་སོ། །ཁྱོད་ལ་ཕམ་པ་བྱུང་ངོ་ཟེར་ནས་འགྱོད་དེ་གསོལ་བ་དང༌། ལྟུང་བ་མེད་མོད། ཡིད་གཅུགས་པ་མ་ཡིན་པ་ལ་ཡིད་གཅུགས་པ་ཉིད་དུ་མི་བྱའོ། །
མཛའ་བཤེས་ནི་གསུམ་སྟེ། ཐ་མ་དང་འབྲིང་དང་ཆེན་པོའོ། །དེ་ཉིད་ནི་འོག་མ་ལ་གོང་མའོ། །དགེ་སློང་དག་གིས་ལྕི་བ་སྐམ་པོ་དང་ཤིང་ཚོན་རྩིའི་ཚལ་མ་བཞིན་དུ་དོར་བ་སུས་ཀྱས་མ་བླངས་པས་ཆུད་ཟོས་པ་དེ་གསོལ་བས། ཡིད་གཅུགས་པ་ལྔས་ལེན་ན་ཉེས་པ་མེད་དེ། ལྔ་ནི་དེ་ལ་སྡུག་པ་དང༌། ཡིད་དུ་འཐད་(༡༠༡ན)པ་སོགས་སོ། །མཉན་ཡོད་ན་དགེ་སློང་མཚམས་བཟང་དང་ནོར་གྱིས་བྱིན་གཉིས་བཤེས་པས་འཁོད་དོ། །མཚམས་བཟང་ལ་ལྷུང་བཟེད་མཛེས་པ། གསལ་བ། ཟླུམ་པ། ལོངས་སྤྱད་བཟོད་པ་ཡོད་པ་ཡིན་ལ། ནོར་གྱིས་བྱིན་ལ་ལྷུང་བཟེད་ཆུང་ངུ་མཛེས་པ། གསལ་བ། ཟླུམ་པ། ལོངས་སྤྱད་བཟོད་པ་ཡོད་དོ། །དེ་གཉིས་ལྷུང་བཟེད་འཁྲུ་བའི་ཚེ་མཚམས་བཟང་གིས་ནོར་གྱིས་བྱིན་དབང་བའི་ལྷུང་བཟེད་ཆུང་ངུ་རང་གི་ལྷུང་བཟེད་ཀྱི་ནང་དུ་བཅུག་ནས། ནོར་གྱིས་བྱིན། ལྷུང་བཟེད་ཆུང་ངུ་འདི་ལྟ་བུ་ཡོད་པ་དེ་སྙིང་ལས་ཆུང་ངུས་དགེ་བ་འཕེལ་ལོ། །ནོར་གྱིས་བྱིན་ན་རེ། ཐོབ་ན་ཁྱེར་ཅིག །རེ་ཞིག་ན་ནོར་གྱིས་བྱིན་རི་བྲགས་སུ་བྱ་བ་ཞིག་བྱུང་ནས་མཚམས་བཟང་ལ། བྱ་བ་དེ་བྱེད་ན་ལྷུང་བཟེད་ཆུང་ངུ་སྦྱིན་ནོ། །སྦྱིན་ནམ། ཐབས་ཡིན་ནོ། །དེའི་བསམ་པ་ལ། གླ་རྔན་གྱིས་ལས་བྱེད་དོ་ཞེས་འཕྱར་འོང་སྙམ་ནས་མ་སོང༌། དུས་ཕྱིས་བྱ་བ་གཞན་ཞིག་གི་ཞོར་ལ་བྱས་ཏེ་འོངས་ནས་ལྷུང་བཟེད་ཆུང་ངུ་བྱིན་ཅིག །ཁོ་བོའི་དོན་ལ་སོང་བ་མིན་པས་མི་སྦྱིན་ནོ། །མི་སྦྱིན་ན་ང་རང་གིས་བླང་བར་བྱའོ། །ཐོབ་ན་ཁྱེར་ཅིག །ནོར་གྱིས་བྱིན་ཕྱིར་སོང་བ་ན་དེའི་ལྷུང་བཟེད་ཆུང་ངུ་བླངས་ཏེ་རང་གི་ལྷུང་བཟེད་དུ་བཅུག་གོ །དེ་འོངས་ནས། ངའི་ལྷུང་བཟེད་སུས་བླངས། མཚམས་བཟང་ན་རེ། སུ་དབང་བས་སོ། །སུ་དབང༌། ཁོ་བོ་དབང་ངོ༌། ཁྱོད་ཀྱིས་བརྐུས་པས་ཁྱེད་ལ་ཕམ་པ་བྱུང་ངོ༌། །
དེ་འགྱོད་ནས་གསོལ་བ་དང༌། བསམ་པ་ཇི་ལྟ་བུས་བླངས། ཇི་ལྟར་གྱུར་པ་གསོལ་བ་དང༌། ལྟུང་བ་མེད་དེ། ལག་པོད་ཀྱི་ལས་ཀྱིས་ལས་བྱ་ཞིང་བསོད་ནམས་ཀྱི་བློས་ཀྱང་སྟེ། གླ་རྔན་གྱིས་ནི་མ་ཡིན་ནོ། །མཉན་ཡོད་ན་དགེ་སློང་མ་ཤར་ནས་སྐྱེས་དང་ལྷོ་ནས་སྐྱེས་གཉིས་སྟོན་པའི་སྤྱན་སྔར་ཆོས་ཉན་ནས་ཤར་ནས་སྐྱེས་མདུན་དུ་སོང་བའི་སྣམ་སྦྱར་ཕྲག་པ་ལས་འཕྱང་བ་ལྷོ་ནས་སྐྱེས་ཕྱི་ནས་འོང་པས་མཐོང་ནས། འཕགས་མ། ཨ་བ་ས་ཐ། ཤར་ནས་སྐྱེས་ཆོས་ཀྱི་ཤུགས་ཐོབ་པས་མི་སེམས་པས་སྣམ་སྦྱར་ལྷུང་ངོ༌། །ལྷོ་ནས་སྐྱེས་ཀྱིས་བླངས་ནས། ད་ལྟ་ཕུལ་ན་འཕགས་མའི་དགེ་བའི་ཕྱོགས་ཉམས་པར་འགྱུར་གྱིས་གནས་ཁང་དུ་སླེབ་ནས་དབུལ་ལོ་སྙམ་ནས་སོང་བ་དང༌། ཤར་ནས་སྐྱེས་དེ་མ་ཐག་ཕྱི་རོལ་ཏུ་རྐང་པ་བཀྲུས་ནས་གཙུག་ལག་ཁང་དུ་ཞུགས་ཏེ་དཀྱིལ་ཀྲུང་ཕྱེད་ཀྱིས་འདུག་གོ །ལྷོ་ནས་སྐྱེས་ཀྱིས་ད་ལྟ་ཕུལ་ན་ཉེས་དམིགས་འོང་གིས་ཕྱིས་ལངས་པ་ལ་དབུལ་ལོ་སྙམ་ནས་སྣམ་སྦྱར་རང་གི་གནས་ཁང་དུ་ཁྱེར་རོ། །སང་ནམ་ལངས་པ་དང༌། ཤར་ནས་སྐྱེས་ཀྱིས། གཞོན་ནུ་མ། སྣམ་སྦྱར་ཁྱེར་ཤོག་བསོད་སྙོམས་ལ་འགྲོའོ། །གཞོན་ནུ་མ་དེས་ཆོས་(༡༠༡བ)གོས་ཀྱི་གདང་ལ་སྣམ་སྦྱར་མ་མཐོང་ནས། སྣམ་སྦྱར་མ་མཆིས་སོ། །ལྷོ་ནས་སྐྱེས་ཀྱི་གནས་ཁང་དུ་ལྟོས་ཤིག །དེས་ལྷོ་ནས་སྐྱེས་ཀྱི་གནས་ཁང་དུ་བལྟས་པས་མཐོང་ནས། འདི་སུས་ཁྱེར། ལྷོ་ནས་སྐྱེས་ཀྱིས། ཁོ་མོས་ཁྱེར་རོ། །ཅིའི་ཕྱིར། ཇི་ལྟར་གྱུར་པ་གོ་བར་བྱས་སོ། །དགེ་སློང་མ་དེ་དེ་ལ་ནང་དང་བཅས་པ་ཡིན་པས། ཁྱོད་ཀྱིས་བརྐུས་པས་ཕམ་པ་བྱུང་ངོ༌། །དེ་འགྱོད་ནས་གསོལ་བ་དང༌། དགེ་སློང་མ། ཁྱོད་ཀྱི་ཨ་བ་ས་ཐ་ཅིའི་ཐ་ཚིག །ཡུལ་དབུས་ན་ནར་བ་དང་ལྟུང་བ་ལ་ཨ་བ་ས་ཐ་ཞེས་ཟེར་རོ། །ཡུལ་གྱི་ངེས་པའི་ཚིག་དང༌། ལྗོངས་ཀྱི་ངེས་པའི་ཚིག་ནི་འདྲིད་པ་མ་ཡིན་ནོ། །ཉེས་དམིགས་དེ་ནི་གཞན་གྱི་དངོས་པོ་ལ་ལྷུང་བ་ཡུན་རིང་དུ་འཆང་བ་ལས་གྱུར་པས། ལྷུང་བ་བླངས་ན་ཡུན་རིང་དུ་མི་བསྲེལ་ལོ། །དགེ་སློང་ཞིག་གིས་གཞན་གྱི་དངོས་པོ་ལྷུང་བ་མཐོང་ནས། འདི་ཆེ་གེ་མོའི་ཡིན་ནོ་སྙམ་ནས་དེའི་གནས་ཁང་དུ་སོང་སྟེ་དལ་བུས་སྒོ་བརྡུངས་པ་དང༌། དེ་ཏིང་ངེ་འཛིན་ལས་ལངས་ནས། ཁྱོད་སུ་ཡིན། དེས་སྨྲས་པ། ཁྱོད་ཀྱི་དངོས་པོ་ལྷུང་བ་འདི་ཁོ་བོས་མཐོང་གིས་ལོངས་ཤིག །དངོས་པོ་དེ་མ་བྱིན་པར་ལེན་པས་བརྐུས་པ་བླའི་ཏིང་ངེ་འཛིན་གྱིས་མཚན་མ་བཟང་པོ་ལས་བསླངས་པ་ནི་མ་ཡིན་ནོ། །དེ་འགྱོད་ནས་གསོལ་བ་དང༌། ཏིང་ངེ་འཛིན་ལས་མི་བསླང་བར་དེའི་མངོན་སུམ་དུ་གཟར་ཐག་ལ་བཏགས་ལ་བཞག་གོ །
དགེ་སློང་ཞིག་གིས་གཞན་གྱི་དངོས་པོ་ལྷུང་བ་མཐོང་ནས། དེས་ཆེ་གེ་མོའི་ཡིན་པར་ངོ་ཤེས་ནས་གཏད་པས། དགེ་སློང་དེ་དེ་ལ་ནང་དང་བཅས་པ་ཡིན་པས། ཁྱོད་ཀྱིས་འདི་ལྷུང་བ་འདི་མཐོང་བ་མ་ཡིན་གྱི་བརྐུས་སོ། །དེ་འགྱོད་ནས་གསོལ་བ་དང༌། ལྟུང་བ་མེད་དེ། དགེ་སློང་གིས་ཡོ་བྱད་ལྷུང་བ་མཐོང་ན་དགེ་སྐོས་ལ་གཏད་པ་ཉིད་དུ་བྱའོ། །དེས་རབ་ཏུ་བྱུང་བའི་ཡིན་པར་དོགས་ནས་དགེ་འདུན་ལ་བསྟན་པར་བྱའོ། །བདག་པོ་མེད་ན་དགེ་འདུན་གྱིས་ཅི་བདེར་བྱའོ། །མཉན་ཡོད་ན་དགེ་སློང་མ་རི་མ་ཞེས་བྱ་བ་དགྲ་བཅོམ་མ་ཞིག་ལ་སྤོས་འཚོང་པའི་ཁྱེའུ་ཞིག་དད་ནས། འཕགས་མ་ལ་ཅི་འཚལ་བ་ཐམས་ཅད་བདག་གིས་བསྒྲུབ་བོ། །དེས། ཨ་རོག་ཁྱ་ཞེས་དང་དུ་བླངས་སོ། །རེ་ཞིག་ན་དགེ་སློང་མ་རི་མ་ན་ནས། དགེ་སློང་མ་དག་བསོད་སྙོམས་ལ་སོང་བ་དང༌། ཁྱེའུ་དེས་འཕགས་མ་རི་མ་གར་བཞུད། བསྙུང་ངོ༌། །དེ་ལ་བདག་གིས་ཡོ་བྱད་ཐམས་ཅད་ཀྱིས་བསྟབས་ན་ལགན་འགའ་ཡང་མ་བླངས་པས་དེ་ལ་འཚལ་བ་མཆིས་ན་སྤྱོན་ལ་སྣོམས་ཤིག །ཨ་རོག་ཁྱ་དེ་བཞིན་བྱའོ། །དེས་ལན་གསུམ་གྱི་བར་དུ་ཟེར་ནས་ཡང་དག་པ་ཡིན་མིན་བགམ་པའི་ཕྱིར་དུ་དེས་དེ་ལ། འཕགས་མ་རི་མ་ལ་འབྲུ་མར་དགོས་སོ། །དེས་འབྲུ་མར་གྱིས་ལྷུང་བཟེད་ཆུང་ངུ་བཀང་སྟེ་ཕུལ་ནས། ད་(༡༠༢ན)དུང་དགོས་ན་སྣོམས་ཤིག །དེས། ཨ་རོག་ཁྱ་ཞེས་སྨྲས་ཏེ་སོང་ནས། དེས་འབྲུ་མར་དེ་དགེ་སློང་མ་རི་མའི་སྐུ་མཉེ་དང༌། མར་མེའི་འབྲུ་མར་དུ་སྤྱད་དོ། །རིམས་ནད་སོས་ཏེ་བསོད་སྙོམས་ལ་ཞུགས་པ་དང༌། ཁྱེའུ་དེས་མཐོང་ནས། འཕགས་མ། ཧ་ཅང་ཡུན་རིང་བ་ཞིག་གིས་མཐོང་ངོ༌། །བུ། བདག་ནའོ། །འཕགས་མ། བདག་གིས་ཡོ་བྱད་ཐམས་ཅད་ཀྱིས་བསྟབས་ན། ལན་འགའ་ཡང་བཀའ་སྩལ་ལ། འོན་ཀྱང་འཕགས་མ་ཞིག་བྱོན་ཏེ། འཕགས་མ་རི་ལ་འབྲུ་མར་འཚལ་ཟེར་ནས་འབྲུ་མར་ལྷུང་བཟེད་གང་ཕུལ་ལོ། །ཨ་རོག་ཁྱ་ཞེས་བརྗོད་དེ་ནང་དུ་སོང་ནས། གཞོན་ནུ་མ། ཁྱོད་ཀྱིས་ཁོ་མོའི་མིང་གིས་ཁྱེའུ་ཞིག་ལ་འབྲུ་མར་བླངས་སམ། བླངས་སོ། །ངས་ལོངས་སྨྲས་སམ། མ་སྨྲས་སོ། །དེ་ལ་ནང་དང་བཅས་པའི་དགེ་སློང་མ་ཞིག་ན་རེ། དེར་མ་ཟད་འདིས་རི་ལ་རྒྱུར་བྱས་ནས། མཉན་ཡོད་ཐམས་ཅད་ཁྱབ་པར་བྱས་པས་ཕམ་པས་ལྟོ་གང་ངོ༌། །
དེ་འགྱོད་ནས་གསོལ་བ་དང༌། ཁྱོད་ཀྱིས་བསམ་པ་ཇི་ལྟ་བུས་འབྲུ་མར་བླངས། བགམ་པའི་བསམ་པས་སོ། །ནད་པས་མ་གནང་བ་དེ་ལ་སྨན་མི་བླང་བར་དགེ་འདུན་གྱི་ནད་པའི་སྨན་ཁང་ངམ། དད་པ་ཅན་ནམ། ཉེ་དུའམ། ཉེ་དུ་མང་བ་ཡིན་ན། གང་སྦྱོར་དུ་གཞུག་ཅེས་ནད་པ་ལ་དྲི་ཞིང་དེས་གང་བརྗོད་པ་དེ་ལས་བླང་ངོ༌། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། ནོར་ཅན་གྱིས་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དང་པོར་མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་བ་ལ་གཟིགས། བཀའ་སྩལ་པ། ད་ལྟར་དུ་མ་ཟད་འདས་པའི་དུས་ནའང་འདིས་འཇིག་རྟེན་སྐྱོན་མེད་པ་ལ་དང་པོར་མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་བ་དེ་ཉོན་ཅིག །འཇིག་རྟེན་འཇིག་རྟེན་པ་ན་སེམས་ཅན་ཕལ་ཆེར་འོད་གསལ་དུ་སྐྱེའོ་ཞེས་པ་ནས། འདི་ནི་ཁྱིམ་འབུབས་པའི་དང་པོ་ཡིན་ནོ་ཞེས་པའི་བར་སྔར་དང་འདྲའོ། །དེ་དག་ནངས་ཟ་བ་ནས་ས་ལུ་ནང་ལེན། དགོང་ཀ་ཟ་བ་ན་དགོང་ཀ་ལེན་པ་ལས། སེམས་ཅན་ལེ་ལོ་ཅན་ཞིག་གིས་ནངས་དགོང་གི་ས་ལུ་ཅིག་ཅར་བླངས་སོ། །དེ་ལ་གཞན་ཞིག་གིས་སྨྲས་པ། ཚུར་ཤོག་ས་ལུ་ལེན་དུ་འདོང་ངོ༌། །
དེས་སྨྲས་པ། ཁྱོད་ཉིད་སོང་ཞིག །ངས་ནངས་དགོང་གི་ས་ལུ་ཅིག་ཅར་བླངས་སོ། །གཞན་དེའི་བསམས་པ་ལ། དེ་ནི་ལེགས་ཏེ། བདག་གིས་ཀྱང་ཉི་མ་བདུན་གྱི་བར་གྱི་ས་ལུ་བླང་ངོ་སྙམ་ནས་བླངས་སོ། །དེ་ལ་སེམས་ཅན་ཞིག་གིས། ཚུར་ཤོག་ས་ལུ་ལེན་དུ་འདོང་ངོ༌། །དེས་སྨྲས་པ། ཁྱོད་ཉིད་སོང་ཞིག་ངས་ཉི་མ་བདུན་གྱི་ས་ལུ་བླངས་ཟིན་ཏོ། །དེས་བསམས་པ་ལ། དེ་ནི་ལེགས་ཏེ། བདག་གིས་ཟླ་བ་གཅིག་གི་ས་ལུ་བླང་ངོ་སྙམ་(༡༠༢བ)ནས་བླངས་སོ། །དེའི་ཚེ་ས་ལུ་དེ་ལ་སོ་བ་དང་སྦུན་པ་བྱུང་ཞིང་བརྔས་པ་ཕྱིར་མི་སྐྱེ་བར་བརྔས་པར་མངོན་པ་ན། སེམས་ཅན་དེ་དག་འདུས་ནས་མྱ་ངན་བྱེད་ཅིང༌། ཤེས་ལྡན་དག །བདག་ཅག་སྔོན་གཟུགས་ཅན་ཡིན་ལས་བྱུང་བ། དབང་པོ་ཚང་བ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བའི་ཟས་དང་ལྡན་པ། ཚེ་ལོ་དཔག་ཏུ་མེད་པ་ཐུབ་པ་ན། སའི་བཅུད་ཁ་དོག་དང་དྲི་རོ་ཕུན་སུམ་ཚོགས་པ་བྱུང་བ་ཟོས་པས་དེ་དག་གི་ལུས་ལ་སྲ་བ་དང༌། ལྕི་བ་བྱུང་ཞིང་མདོག་གསལ་བ་མེད་པར་མུན་པ་བྱུང་ངོ༌། །དེའི་ཚེ་ཟས་དེ་ཆུང་ངུ་ཟོས་པ་རྣམས་ཁ་དོག་བཟང་བ་ཆེར་ཟོས་པ་རྣམས་ཁ་དོག་ངན་པར་གྱུར་པ་ན། བདག་ནི་ཁ་དོག་བཟང་ལ་ཁྱོད་ནི་ངན་ངོ་ཞེས་ཁྱད་དུ་བསད་པས་སའི་བཅུད་དེ་མེད་པར་གྱུར་ཏོ། །དེའི་ཚེ་སའི་ཞག་ཁ་དོག་དང་དྲི་རོ་ཕུན་སུམ་ཚོགས་པ་བྱུང་ནས་དེ་ཟ་ཞིང་གནས་པ་ན། ཁ་དོག་བཟང་ངན་དུ་གྱུར་པ་ལ་སྔར་བཞིན་ཁྱད་དུ་བསད་པས་སའི་ཞག་དེ་ཡང་མེད་པར་གྱུར་ཏོ། །དེའི་ཚེ་མྱུ་གུའི་ཚལ་ཁ་དོག་དྲི་རོ་ཕུན་སུམ་ཚོགས་པ་བྱུང་ནས་དེ་ཟ་ཞིང་གནས་པ་ན། ཁ་དོག་བཟང་ངན་དུ་གྱུར་པ་ལ་སྔར་བཞིན་ཁྱད་དུ་བསད་པས་མྱུ་གུའི་ཚལ་དེ་ཡང་མེད་པར་གྱུར་ཏོ། །དེའི་ཚེ་མ་རྨོས་མ་བཏབ་པའི་འབྲས་ས་ལུའི་འབྲུ་ཕུབ་ཤུན་མེད་པ་སོར་བཞི་ཙམ་ནུབ་བརྔས་ན་ནངས་སྐྱེ་ལ། ནངས་བརྔས་ན་ནུབ་སྐྱེ་བ། བརྔས་པར་མི་མངོན་པ་བྱུང་ནས་ཡུན་རིང་གནས་པ་ན། འབྲས་ས་ལུ་གསོག་འཇོག་བྱས་པས། འབྲས་ས་ལུ་དེ་ལ་སོ་བ་དང་སྦུན་པ་བྱུང་ཞིང་བརྔས་པར་མངོན་པར་གྱུར་ཀྱིས། བདག་ཅག་འདུས་ནས་མཚམས་བཅད་ཅིང༌། འདི་ཁྱོད་ཀྱིའོ། །འདི་ངའི་འོ་ཞེས་མུ་ཐུག་བྱའོ། །ཞེས་དེ་དག་འདུས་ནས་དེ་ལྟར་བྱས་ཏེ། འདི་ནི་འཇིག་རྟེན་དུ་ཞིང་གི་མུ་ཐུག་བྱུང་བའི་དང་པོ་ཡིན་ནོ། །
དེ་ནས་སེམས་ཅན་ཞིག་གིས་གཞན་གྱི་ས་ལུ་མ་བྱིན་པར་བླངས་པ་དེ་གཞན་ཞིག་གིས་མཐོང་ནས། ཁྱོད་ཅིའི་ཕྱིར་རང་གི་ས་ལུ་ཡོད་བཞིན་དུ་གཞན་གྱི་ས་ལུ་མ་བྱིན་པར་ལེན། ཕྱིན་ཆད་དེ་ལྟར་མ་བྱེད་ཅིག་ཅེས་ལན་གསུམ་དུ་བཟློག་ཀྱང་གཞན་གྱི་ས་ལུ་མ་བྱིན་པར་བླངས་སོ། །གཞན་དེས་ཀྱང་དེ་མཐོང་ནས། ཁྱོད་ཅིའི་ཕྱིར་རང་གི་ས་ལུ་ཡོད་བཞིན་དུ་གཞན་གྱི་ས་ལུ་མ་བྱིན་པར་ལེན་ཞེས་སེམས་ཅན་དེ་དྲངས་ཤིང་ཁྲིད་ནས་འཁོར་གྱི་ནང་དུ། ཡང་འདིས་འདི་ལྟར་བྱས་སོ་ཞེས་སྨོད་པ་དང༌། དེ་དག་གིས་སེམས་ཅན་དེ་ལ། ཕྱིན་ཆད་དེ་ལྟར་མ་བྱེད་ཅིག་ཅེས་སྨྲས་སོ། །
དེ་ནས་སེམས་ཅན་དེ་དག་གིས། ས་ལུའི་ཕྱིར་དུ་འདི་ལྟ་བུ་བྱུང་བས། བདག་ཅག་འདུས་ནས་བདག་ཅག་གི་ནང་ནས་སེམས་ཅན་གང་གཟུགས་ཆེས་བཟང་བ། ལྟ་ན་སྡུག་པ། མཛེས་པ། (༡༠༣ན)ལུས་ཆེ་བ་དེ་བདག་ཅག་གིས་ཞིང་རྣམས་ཀྱི་བདག་པོར་བསྐོས་ནས། བདག་ཅག་ཆད་པས་གཅད་པར་འོས་པ་ལ་ཆད་པས་གཅོད་ཅིང༌། ཕན་གདགས་འོས་པ་ལའང་ཕན་འདོགས་པར་འགྱུར་ལ། དེ་ལ་བདག་ཅག་གིས་ཞིང་གི་ཐོག་ཤས་ཀྱང་དབུལ་ལོ་ཞེས་གྲོས་བྱས་ནས། དེ་དག་གི་ནང་ནས་ཆེས་གཟུགས་བ་དེ་ཞིང་རྣམས་ཀྱི་བདག་པོར་བསྐོས་ནས། ཁྱོད་ཀྱིས་བདག་ཅག་ཆད་པས་གཅད་པར་འོས་པ་ལ་ཆད་པས་ཆོད་ཅིག །ཕན་གདགས་པར་འོས་པ་ལའང་ཕན་ཐོགས་ཤིག །བདག་ཅག་གིས་ཁྱོད་ལ་ཞིང་གི་ཐོག་ཤས་དབུལ་ལོ་ཞེས་སྐྱེ་བོ་མང་པོས་བཀུར་བས་མང་པོས་བསྐུར་བ་ཞེས་བྱ་བ་དང༌། ཞིང་རྣམས་ཀྱི་བདག་པོ་དང༌། དམས་པ་ལས་སྐྱོབ་པར་བྱེད་པས་རྒྱལ་རིགས་ཞེས་བྱ་བའི་མིང་དུ་གྱུར་ཏོ། །ཚུལ་ཁྲིམས་དང་ཤེས་རབ་ཀྱི་སྤྱོད་པ་ཀུན་ཏུ་སྤྱོད་པས་ཆོས་ཀྱིས་སྐྱེ་དགུ་དགའ་བར་བྱེད་པས་རྒྱལ་པོ་ཞེས་བྱ་བའི་མིང་དུ་གྱུར་ཏེ། འདི་ནི་འཇིག་རྟེན་དུ་རྒྱལ་རིགས་བྱུང་བའི་དང་པོ་ཡིན་ནོ། །དེ་ནས་སེམས་ཅན་ཁ་ཅིག་གིས་ཡོངས་སུ་འཛིན་པ་ནི་ནད་དོ། །འབྲས་སོ། །ཟུག་རྔུའོ། །སྡུག་བསྔལ་གྱི་རྩ་བའོ་ཞེས་རིག་ནས། གྲོང་ནས་དགོན་པའི་གནས་སུ་སོང་སྟེ། ཡལ་ག་དང༌། ལོ་མའི་སྤྱིལ་བུ་བྱས་ནས་འཁོད་ཅིང༌། ནངས་དང་ནུབ་ཏུ་ཟས་འདོད་པས་གྲོང་དུ་བསོད་སྙོམས་ལ་ཞུགས་པ་དང༌། གཞན་དག་གིས་དེ་དག་ལ་སྦྱིན་པ་དག་བྱ་བར་སེམས་སོ། །
དེ་ནས་སེམས་ཅན་ཁ་ཅིག་བསམ་གཏན་དེ་དང་རབ་ཏུ་དབེན་པ་དེ་མངོན་པར་མ་རྟོགས་པ་ན་མཐའ་ཞིག་ཏུ་སོང་སྟེ། ཡལ་ག་དང་ལོ་མའི་སྤྱིལ་བུ་བྱས་ནས་དེར་གསང་སྔགས་ཀྱི་གཞུང་དག་བྱེད་དོ། །དེ་ནས་ཁ་ཅིག་གིས་གསང་སྔགས་དང་རིག་བྱེད་དེ་མངོན་པར་མ་རྟོགས་པས། ཡང་དགོན་པ་ནས་གྲོང་མཐར་ལྷགས་ཏེ་ཁང་ཁྱིམ་སྒོ་བཞི་པ་བརྩིགས་ནས། འདིར་བདག་ཅག་ཅག་གིས་སྦྱིན་པ་དག་སྦྱིན། བསོད་ནམས་དག་སྤེལ། མགྲོན་པོ་ལྷགས་པ་རྣམས་ལ་བཟའ་བཏུང་གིས་ཅི་ནུས་སུ་ཚིམ་པར་བྱའོ་ཞེས་དེ་ན་སྦྱིན་པ་དང༌། བསོད་ནམས་དང༌། མགྲོན་པོ་འོངས་པ་ལ་བཟའ་བཏུང་གིས་ཚིམ་པར་བྱེད་དོ། །གྲོང་ནས་ཕྱི་རོལ་ཏུ་བརྟེན་པས་བྲམ་ཟེ་ཞེས་བྱ་བའི་མིང་བྱུང་ངོ༌། །
ཡང་འདི་དག་ནི་བསམ་གཏན་མི་བྱེད་དོ་ཞེས་བྱ་བ་ལས་ཀློག་ཏུ་འཛུད་པ་ཞེས་བྱ་བའི་མིང་བྱུང་ངོ༌། །དགོན་པ་ནས་ཡང་ཕྱིར་གྲོང་མཐར་ལྷགས་པས་གྲོང་བ་ཞེས་བྱ་བའི་མིང་དུ་གྱུར་ཏེ། འདི་ནི་བྲམ་ཟེ་བྱུང་བའི་དང་པོའོ། །དེ་ནས་སེམས་ཅན་ཁ་ཅིག་བཟོ་དང་ལས་ཀྱི་གནས་ལ་བརྩོན་པ་དག་ལ། འདི་དག་བཟོ་དང་ལས་ཀྱི་གནས་སྒྲུབ་པར་བྱེད་དོ་ཞེས་བྱ་བ་ལས་རྗེའུ་རིགས་ཞེས་བྱ་བའི་མིང་དུ་གྱུར་ཏེ། འདི་རྗེའི་རིགས་འཇིག་རྟེན་དུ་བྱུང་བའི་དང་པོ་ཡིན་ནོ། །དེ་ནས་རྒྱལ་རིགས་དང་བྲམ་ཟེ་དང་རྗེ་རིགས་ཀྱི་(༡༠༣བ)ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ལ་རིགས་གསུམ་པོ་མངོན་དུ་སྨྲ་བ་དང༌། ཕྱག་དང༌། ལྡང་བ་དང༌། ཐལ་མོ་སྦྱར་བ་དང༌། འདུད་པའི་ལས་བྱ་བར་འོས་པ་ཡིན་པས་བཞི་པ་དགེ་སྦྱོང་ཡང་འཇིག་རྟེན་དུ་བྱུང་ངོ༌། །དགེ་སློང་དག །དང་པོར་རང་གི་ས་ལུ་ཡོད་བཞིན་དུ་གཞན་གྱི་ས་ལུ་མ་བྱིན་པར་ལེན་པ་དེ་ནི་ནོར་ཅན་འདི་ཡིན་ཏེ། དེའི་ཚེ་ཡང་འཇིག་རྟེན་སྐྱོན་མེད་པ་ལ་དང་པོ་མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་ངོ༌། །ད་ལྟར་ཡང་མ་བྱིན་པར་ལེན་པའི་རྐྱེན་གྱིས་དགེ་འདུན་སྐྱོན་མེད་པ་ལ་ཆུ་བུར་ཕྱུང་ངོ༌། །དེ་བས་ན་དུག་གསུམ་སྤང་བའི་ཕྱིར་བསླབ་པར་བྱའོ། །
ལས་དང་པོ་བ་དང༌། སྨྱོས་པ་དང༌། སེམས་འཁྲུགས་པ་དང༌། ཚོར་བས་ནེན་པ་ལ་ལྟུང་བ་མེད་དོ། །ཕྲན་ཚེགས་ཀྱི་སྐབས་ནས་འབྱུང་བ་ནི། དྲུག་སྡེས་བསིལ་བའི་ཚལ་གྱི་དུར་ཁྲོད་དུ་སོང་བ་དང༌། ཤི་བའི་ཡོ་བྱད་གདུགས་དང་ཤིང་དང་གོས་མང་པོ་བོར་བ་མཐོང་ནས་ཕྱག་དར་ཁྲོད་ཀྱི་གོས་རྙེད་ཀྱིས་བཀུར་རོ་ཞེས་བླངས་ནས་དོང་བ་དང༌། དུར་ཁྲོད་ཀྱི་སྲུང་མ་འོངས་པ་དང༌། ཅི་ཡང་མི་འདུག་པས། དེ་རྐུན་མས་བརྐུས་ཀྱིས་སླར་ཡང་བརྙོགས་ནས་འོང་སྙམ་དུ་ནགས་སྟུག་པོའི་ནང་དུ་གབ་པ་དང༌། དྲུག་སྡེས་ཞག་བདུན་བརྒྱད་ནས་དུར་ཁྲོད་དུ་ཕྱིན་ཏེ་གོས་ལ་སོགས་པ་བླང་བར་བརྩམས་པ་དང༌། སྲུང་མ་དེས་མཐོང་ནས། བདག་ཅག་རྒྱལ་པོའི་བཀའ་བཞིན་བྱེད་པའང་དུར་ཁྲོད་ཀྱི་གོས་འདིའི་ཕྱིར་ཡིན་ན། ཅིའི་ཕྱིར་ཁྱེད་ཀྱིས་བདག་པོ་ཡོད་པའི་དུར་ཁྲོད་ཀྱི་ཡོ་བྱད་དག་རྐུ། བཞིན་བཟང༌། ངེས་ཀྱིས་ཕྱག་དར་ཁྲོད་ཀྱི་གོས་བླངས་སོ། །དེ་དག་གིས། ཕྱག་དར་ཁྲོད་ཀྱི་གོས་མིན་པས་མ་ལེགས་སོ་ཞེས་སྨྲས་པ་དང༌། ལན་མེད་པར་གྱུར་པའི་སྐབས་དེ་གསོལ་བ་དང༌། དེ་དག་འཕྱ་བ་ཡུས་ཏེ། ཡོངས་སུ་བཟུང་བ་དང་བཅས་པ་གནང་བ་ལས་གཞན་པའི་ཐབས་ཀྱིས་བདག་གིར་མི་བྱའོ། །དད་པ་དང་ལྡན་པ་དག་གིས། ཅི་བདེར་ཁྱེར་ཅིག་ཅེས་སྨྲས་ཀྱང་ཐེ་ཚོམ་ཟ་ནས་མ་བླངས་པ་དང༌། ཅི་བདེར་ལོངས་ཤིག་ཟེར་ན་ལོངས་ཤིག་མཉན་ཡོད་ནའོ། །དྲུག་སྡེས་བཞོན་པ་མང་པོ་ཤིང་རྟ་དང་ལྷན་ཅིག་ལམ་དུ་སོང་བ་དང༌། ལམ་གྱི་ཕྱེད་དུ་ཤིང་རྟ་སྲོག་ཤིང་ཆག་སྟེ་ཚོང་པས་སྲོག་ཤིང་བརྗེས་ནས་ཆག་པ་བོར་རོ། །ཉེ་དགས་ཤིང་རྟའི་སྲོག་ཤིང་དེ་བླངས་ཏེ་ལམ་གྱི་བཞི་མདོར་བོར་ནས། འད་ནི་བདག་ཅག་གིས་སྲོག་ཤིང་གི་དབང་ཕྱུག་ཅེས་བྱ་བའི་ལྷ་རྟེན་དུ་བཙུགས་སོ་ཞེས་སྨྲས་ནས་སོང་བ་དང༌། གཞན་ཞིག་གིས་ཀྱང་དེར་སྟེགས་བུ་བརྩིགས། གཞན་ཞིག་གིས། བདག་གི་དོན་འདི་གྲུབ་ན་ཁང་པ་བརྩིགས་ལ་སྟོན་མོ་བྱའོ་ཞེས་སྨྲས་པས་གྲུབ་ནས་ཇི་ལྟར་དམ་བཅས་པ་ཐམས་ཅད་བསྒྲུབས་པས་དེ་ལོག་པའི་ལྷ་ཁང་དུ་གྱུར་ཏེ། ཚོང་པ་དག་གིས་དེར་གོས་དང༌། བལ་མང་པོ་ཕུལ་ལོ། །(༡༠༤ན)དྲུག་སྡེ་སླར་ལོག་པའི་ཚེ་ལྷ་ཁང་དེ་རྒྱས་པར་མཐོང་ནས་གོས་ལ་སོགས་པ་བླངས་པ་དང༌། ལྷ་ཁང་པ་དག་ལྷགས་ནས། འདིའི་ལས་དང་བྱི་དོར་བདག་ཅག་གིས་བགྱིས་ན། ཅིའི་ཕྱིར་གོས་རྣམས་འཕྲོགས། བཀྲེན་པ། འདི་ཇི་ལྟར་ཁྱེད་ཀྱི་ལྷ་ཁང་ཡིན། ངེད་ཅག་གིས་ཤིང་རྟ་སྲོག་ཤིང་ཆག་པ་ཞིག་རྟེན་ཐབས་སུ་བཙུགས་པའོ། །ལྷ་ཁང་པ་དེས་ཀུ་ཅོ་བཏོན་པ་དང༌། ཉེ་དགའ་ཁྲོས་ནས་རྡོག་པ་ཅིག་བརྒྱབ་སྟེ་བསྒྱེལ་ལོ། །དེ་སྤ་གོང་ནས། སུས་བཙུགས་ཀྱང་བདག་ཅག་འདི་ལ་བརྟེན་ནས་འཚོ་བ་ལགས་སོ་ཟེར་བའི་སྐབས་དེ་གསོལ་བ་དང༌། ཡོངས་སུ་བཟུང་བ་དང་བཅས་པ་གནང་བ་ལས་གཞན་པའི་ཐབས་ཀྱིས་བདག་གིར་མི་བྱའོ། །ལྷ་ཁང་པ་དད་པ་ཅན་ཞིག་གིས། ཅི་བདེར་སྤྱོད་ཅིག་ཅེས་བརྗོད་ཀྱང་མ་བླངས་པ་དང༌། ཅི་བདེར་བྱས་པ་ལོངས་ཤིག །མཉན་ཡོད་ནས་དགེ་སློང་མང་པོ་ལྗོངས་རྒྱུར་སོང་བ་དང༌། ཆོམ་རྐུན་པས་བཅོམ་ནས་རྒྱལ་བྱེད་ཚལ་དུ་བཙོངས་པ་དང༌། བཅོམ་པའི་དགེ་སློང་དག་ཀྱང་དེར་ཕྱིན་ཏེ། རང་གི་ལྷུང་བཟེད་དང་ཆོས་གོས་ངོ་ཤེས་ནས། འདི་དག་གིས་བདག་ཅག་གི་ལྷུང་བཟེད་དང་ཆོས་གོས་ཕྲོགས་ཀྱིས་རྐུན་མོ་ཟུང་ཞིག་བྱས་པ་དང་སྐྲག་ནས་བོར་རོ། །དགེ་སློང་དག་གིས་རང་རང་གི་ཆོས་གོས་དང་ལྷུང་བཟེད་བླངས་ནས། རུང་ངམ་མི་རུང་མི་ཤེས་པའི་སྐབས་དེ་གསོལ་བ་དང༌། བདག་གིར་བྱས་པ་དགུག་པར་མི་བྱའོ། །དེ་གསུངས་པ་དང༌། དགེ་སློང་གཞན་དག་ལྗོངས་རྒྱུར་སོང་བ་དང༌། རྐུན་པོ་རྣམས་ཀྱིས་ཆོས་གོས་དང་ལྷུང་བཟེད་ལ་ལག་པས་རེག་ཚད་ལ་མི་ལྟ་ནས་མི་དེ་རྣམས་ལྷུང་བཟེད་དང་ཆོས་གོས་ཀྱིས་ཕོངས་པའི་སྐབས་དེ་གསོལ་བ་དང༌། རྐུན་པོས་ཕྲོགས་ནས་སྦྱོར་བ་རྒྱུན་མ་བཅད་པ་དེ་སྲིད་དུ་ལྟ་བ་མེད་པར་མི་བྱའོ་ཞེས་གསུངས་པ་དང༌། རྐུན་པོས་ཆོས་གོས་ཕྲོགས་པ་མཉན་ཡོད་དུ་བཙོངས་པ་དང༌། དགེ་སློང་རྣམས་ཀྱིས་དེ་ངོ་ཤེས་ནས། རྐུན་པོ་རྣམས་རྒྱལ་པོའི་ཕོ་བྲང་དུ་ཁྲིད་དེ། བསད་པ་དང་བཅིང་བ་སོགས་བྱས་པ་དང༌། རྒྱལ་པོ་ལ་མི་སྦྲན་གྱི། དེ་ནི་ཆོས་བཤད་པས་བསླང་བར་བྱའོ། །མི་སྟེར་ན་རིན་ཕྱེད་དུ་ཉེ་བས་ཀྱང་བསླང་བར་བྱའོ། །
དེ་ལྟར་བྱས་ཀྱང་མི་སྟེར་ན་ལྷུང་བཟེད་དང་ཆོས་གོས་ནི་རིན་ཆེན་པོས་བླུས་ཀྱང་རུང་ངོ༌། །ལྷུང་བཟེད་དང་ཆོས་གོས་བྱས་པ་མཐར་ཕྱིན་པ་ནི་རྙེད་པར་དཀའ་བའི་ཕྱིར་རོ། །མཉན་ཡོད་ན་མུ་གེའི་དུས་ཀྱི་ཚེ་རྐུན་པོས་ཕག་བརྐུས་ནས་ནགས་གསེབ་ཏུ་བསད་དེ་ཤ་བཟང་པོ་རྣམས་ཟོས་ནས་མགོ་སུག་རྣམས་བོར་རོ། །དྲུག་སྡེའི་ཀུན་ཏུ་སྤྱོད་པ་ནི་ནངས་པར་སྔར་ལངས་ནས་ཁང་སྟེང་དུ་འཛེགས་ཏེ་ཕྱོགས་བཞིར་ལྟ་ཞིང་གང་ན་དུད་པ་འཐུལ་བ་དང༌། བྱ་རྒོད་ལྡིང་བ་མཐོང་བ་དེར་ཐམས་ཅད་འདུས་ཏེ་དོང་བ་ཡིན་པས། དེའི་(༡༠༤བ)ཚེ་ནགས་ན་དུ་བ་དང་བྱ་ལྡིང་བ་མཐོང་ནས། ཅུང་ཟད་ཀྱང་རྙེད་ཀྱང་སྲིད་པས་འདོང་ངོ༌། །དེ་དག་མྱུར་བར་སོང་བ་དང༌། རྐུན་པོས་ཕག་གི་མགོ་སུག་བོར་བ་མཐོང་ནས། ཕྱག་དར་ལྟ་བུ་རྙེད་ཀྱིས་བཙོས་ཏེ་བཟའ་བར་བྱའོ་ཞེས་འཚོད་པ་ན། ཕག་འཚོལ་བ་རྣམས་ཀྱིས་མཐོང་ནས། འཕགས་པ་དག །དྲང་སྲོང་གི་རྒྱལ་མཚན་ཐོགས་ནས་འདི་ལྟ་བུ་བྱེད་དམ། བཞིན་བཟང༌། ཁོ་བོ་ཅག་སྲོག་གཅོད་དུ་རུང་ན་རི་དྭགས་བཟང་པོ་བསད་ནས་ཤ་ཟ་མི་ནུས་སམ། རྐུན་པོས་བོར་བ་འདི་དག་བླངས་པར་ཟད་དོ། །ཁྱེད་རབ་ཏུ་བྱུང་བ་ཡིན་པས་དེའང་འཚམ་པ་མ་ཡིན་ནོ་ཟེར་བའི་སྐབས་དེ་གསོལ་བ་དང༌། དགེ་སློང་དག་གིས་དེ་ལྟ་བུའི་ཕྱག་དར་བླང་བར་མི་བྱའོ། །མཉན་ཡོད་ན་རྐུན་པོས་བུ་རམ་ཤིང་བརྐུས་ཏེ་ཟོས་ནས་རྩ་བ་དང་རྩེ་མོ་རོ་ཆུང་བ་བོར་བ་དང༌། དྲུག་སྡེས་མཐོང་ནས་ཟ་བ་ན། བུ་རམ་ཤིང་སྲུང་བ་རྣམས་ཀྱིས་མཐོང་ནས། འཕགས་པ་དག །དྲང་སྲོང་གི་རྒྱལ་མཚན་ཐོགས་ནས་འདི་ལྟ་བུ་བྱེད་དམ། བཞིན་བཟང༌། ཁོ་བོ་ཅག་མ་བྱིན་པར་ལེན་དུ་རུང་ན་བུ་རམ་ཤིང་བདམས་ནས་བུ་རམ་ཤིང་བཟང་པོའམ། ནོར་བུ་དང༌། མུ་ཏིག་ལ་སོགས་པ་དབྲོག་པར་མི་ནུས་སམ། རྐུན་པོས་བརྐུས་ཏེ་ཟོས་ནས་ཁོ་བོ་ཅག་གིས་རྩ་བ་དང་རྩེ་མོ་རོ་ཆུང་བ་དག་བསྡུས་པར་ཟད་དོ། །
དེ་ལྟ་ནའང་ཁྱེད་རབ་ཏུ་བྱུང་བ་ཡིན་པས་འདི་མི་འཚམ་མོ་ཟེར་བའི་སྐབས་དེ་གསོལ་བ་དང༌། དགེ་སློང་གིས་དེ་ལྟ་བུའི་ཕྱག་དར་བླང་བར་མི་བྱའོ། །མཉན་ཡོད་ན་རྐུན་པོས་ཤིང་ཏ་ལའི་འབྲས་བུ་བརྐུས་ནས་ནགས་གསེབ་ཏུ་བདམས་ཤིང་ཟོས་ཏེ་སྙིགས་མ་བོར་བ་དྲུག་སྡེས་མཐོང་ནས་ཟ་བ་ན་ཏ་ལའི་སྲུང་མས་མཐོང་ནས། འཕགས་པ་དག །དྲང་སྲོང་གི་རྒྱལ་མཚན་ཐོགས་ནས་འདི་ལྟ་བུ་བྱེད་དམ། བཞིན་བཟང༌། ཁོ་བོ་ཅག་མ་བྱིན་པར་ལེན་དུ་རུང་ན་ཏ་ལའི་འབྲས་བུ་བཟང་པོའམ། ནོར་བུ་དང་མུ་ཏིག་ལ་སོགས་པར་དབྲོག་པར་མི་ནུས་སམ། རྐུན་པོས་བརྐུས་པ་ལས་ཁོ་བོ་ཅག་གིས་ཉལ་ཉིལ་བསྡུས་པར་ཟད་དོ། །དེ་ལྟ་ནའང་ཁྱེད་རབ་ཏུ་བྱུང་བ་ཡིན་པས་མི་འཚམ་མོ་ཟེར་བའི་སྐབས་དེ་གསོལ་བ་དང༌། མི་སྙན་པ་འབྱུང་བར་འགྱུར་བ་ནི། བོར་བའོ་ཞེས་སྐྱེ་བོ་ཕལ་པོ་ཆེའི་མངོན་སུམ་དུ་མ་བབ་པར་བཀུར་བར་མི་བྱའོ། །མཉན་ཡོད་སྤོས་འཚོང་གི་ཁྱེའུ་ཞིག་ལ་ལྭ་བ་བཟང་པོ་ཞིག་ཡོད་པ་དེ་དེ་ལ་ཤིན་ཏུ་ཆགས་སོ། །དེ་ན་བ་ན་སྨན་གྱིས་ཀྱང་མ་ཕན་པའི་ཚེ་ཉེ་དུ་ལ། ཁོ་བོ་ཤི་བའི་ཚེ་མ་སྲེག་པར་ལྭ་བ་འདིས་དཀྲིས་ནས་བོར་ཅིག །དེ་ཤི་ནས་དེ་ལ་ཆགས་པས་ཡི་དྭགས་ལྭ་བ་ཅན་དུ་སྐྱེས་སོ། །ཉེ་དུ་རྣམས་ཀྱིས་ལྭ་བས་རི་དྲིལ་ནས་དུར་ཁྲོད་དུ་བསྐྱལ་བ་དགེ་སློང་དག་གིས་མཐོང་ནས། དུར་ཁྲོད་པ་གནག་དགའ་བོས་ལ་སྨྲས་པས། དེ་མྱུར་བར་སོང་ནས་ལྭ་བ་བླངས་པ་དང༌། མི་མ་ཡིན་དེས་སྨྲས་(༡༠༥ན)པ། འཕགས་པ། བདག་གི་ལྭ་བ་མ་སྣོམས་ཤིག །དུར་ཁྲོད་པ་ཕལ་ཆེར་སྙིང་སྟོབས་ཅན་ཡིན་པས། བཀྲེན་པ། ཁྱོད་ལྭ་བ་ལ་ཆགས་པས་ཡི་དྭགས་ལྭ་བ་ཅན་དུ་སྐྱེས་ལ། དེ་ཡང་དམྱལ་བར་སྐྱེ་འདོད་དམ་ཐོང་ཞིག །དེ་མ་བཏང་བ་དང༌། དེ་ལྷག་པར་ཆགས་པས་དེ་ལ་རྡོག་པས་བསྣུན་ནས་བཤུས་ཏེ་ཁྱེར་ནས་རྒྱལ་བྱེད་ཚལ་དུ་སོང་ངོ༌། །དེ་ཡང་ཆོ་ངེས་འདེབས་ཤིང་དེའི་ཕྱི་བཞིན་དུ་འབྲངས་ཏེ། འཕགས་པ་གནག་དགའ་བོ། ལྭ་བ་སྩོལ་ཅིག །དེ་ཁྱད་དུ་བསད་ནས་རྒྱལ་བྱེད་ཚལ་དུ་སོང་བ་དང༌། རྒྱལ་བྱེད་ཚལ་ན་སངས་རྒྱས་ལ་དད་པའི་ལྷ་དང༌། ཀླུ་དང༌། གནོད་སྦྱིན་དག་འདུག་པས། དེ་ནང་དུ་འཇུག་མ་ནུས་པར་སྒོ་ནས་ཆོ་ངེས་འདེབས་སོ། །
སྟོན་པས་ཀུན་དགའ་བོ་ལ་སྨྲས་པ། ཅིའི་ཕྱིར་རྒྱལ་བྱེད་ཚལ་གྱི་སྒོ་ན་མི་མ་ཡིན་ངུ༌། གནག་དགའ་བོས་དེའི་ལྭ་བ་བླངས་སོ། །ཀུན་དགའ་བོ། སོང་ལ་གནག་དགའ་བོ་ལ། མི་མ་ཡིན་འདི་ལ་ལྭ་བ་བྱིན་ཅིག །མ་བྱིན་ན་ཁྲག་སྐྱུགས་ནས་འཆི་བར་འགྱུར་རོ། །སྦྱིན་པའི་ཚེའང༌། མདུན་དུ་སོང་ཞིག་ཅེས་སྨྲས་ནས་དུར་ཁྲོད་དུ་སོན་པའི་ཚེ། ཉོལ་ཅིག་ཅེས་བརྗོད་ཅིང་ཉལ་བའི་ཚེ་དེའི་སྟེང་དུ་དགབ་པར་བྱའོ་ཞེས་གྱིས་ཤིག །ཀུན་དགའ་བོས་ཀྱང་གནག་དགའ་བོ་ལ་དེ་སྐད་བསྒོ་བ་ན། བཀའ་བཞིན་འཚལ་ཟེར་ནས་མི་མ་ཡིན་དེ་ལ། ཁྱོད་ལྭ་བ་འདོད་ན་མདུན་དུ་སོང་ཞིག་སྦྱིན་ནོ། །དེ་མདུན་དུ་སོང་བ་དང༌། ཁྱོད་ལྭ་བ་འདོད་ན་ཉོལ་ཅིག །དེ་ཉལ་བ་ན་དེའི་སྟེང་དུ་བཀབ་བོ། །མི་མ་ཡིན་དེས་དེ་ལ་རྡོག་པས་བསྣུན་པ་དང༌། དེ་སྟོབས་དང་ལྡན་པ་ཡིན་པས་བརྣགས་སོ། །སྐབས་དེ་གསོལ་བ་དང༌། གྱ་ཚོམ་དུ་རོའི་གོས་བླང་བའམ། སྦྱིན་པར་མི་བྱ་ཡི། ལེན་ན་རྐང་པའི་མཐའ་ནས་མགོ་བོའི་མཐར་སོང་སྟེ་བླང་བར་བྱའོ། །སྦྱིན་པ་དེས་ཀྱང་མགོའི་མཐའ་ནས་རྐང་པའི་མཐར་སོང་སྟེ་སྦྱིན་པར་བྱའོ། །རོའི་གོས་ལ་ཉེས་དམིགས་ལྔ་ཡོད་དེ། ཁ་དོག་ངན། དྲི་མི་ཞིམ། བརྙིངས། ཤིག་མང༌། གནོད་སྦྱིན་མི་བསྲུན་པ་མང་བའོ། །མ་རྨས་པ་ལས་རོའི་གོས་བླང་བར་མི་བྱའོ། །དྲུག་སྡེས་ཁྱི་ཁྲིད་དེ་དོང་བ་དང༌། མ་དད་པ་དག་གིས་མཐོང་ནས། ཁྱེད་ཁྱི་ཁྲིད་ནས་སྲོག་གཅོད་དམ། སྐབས་དེ་གསོལ་བ་དང༌། ཁྱི་ཁྲིད་དེ་འགྲོ་བར་མི་བྱའོ། །དེ་དག་གིས་མཚོན་གྱིས་རྨ་ཕྱུང་ནས་བླངས་པ་དང༌། རང་གིས་རྨས་པ་དང༌། རྨས་པར་བྱེད་དུ་གཞུག་པར་མི་བྱའོ། །སྲིན་བུ་དང་གྲོག་མས་ཟོས་ནས་བླང་བར་བྱའོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་ཀྱང་བུ་མེད་ལ་རྒས་པའི་གནས་སྐབས་སུ་ནོར་ཟད་ནས་ཆུང་མ་ལ་སྨྲས་པ། ཁོ་བོ་རྒས་ཤིང་(༡༠༥བ)བཀྲེན་ལ་བུ་ཡང་མེད་པས་རབ་ཏུ་འབྱུང་དུ་འགྲོའོ། །རྗེའི་སྲས། དེ་བཞིན་དུ་མཛོད་ཅིག །དེ་རྒྱལ་བྱེད་ཚལ་དུ་སོང་ནས་རབ་ཏུ་བྱུང་ངོ༌། །
རེ་ཞིག་ན་དེའི་ཆུང་མ་འོངས་པ་དང༌། དེ་སྦྲིད་པ་བྱུང་ནས་དགེ་སློང་རྣམས་ཀྱིས། སོས་ཞེས་མ་བྱས་པས། དེའི་སྔོན་གྱི་ཆུང་མས་ལག་པ་གཡོན་པས་ས་བླངས་ཏེ། ས་མཚམས་བཅད་པ་བྱས་ནས། ཡུན་རིང་དུ་འཚོ་བར་གྱུར་ཅིག །ཁྱོད་དགྲ་བོ་རྣམས་ཀྱི་ནང་དུ་རབ་ཏུ་བྱུང་སྟེ། རྒྱལ་བྱེད་ཚལ་འདི་གནོད་སྦྱིན་གོས་སྔོན་པོ་གྱོན་པ་ལྔ་བརྒྱས་མི་སྟོང་སྟེ། ངས་ཁྱོད་ལ། སོས་ཞེས་བྱས་པས་དེ་རྣམས་ཀྱིས་ཁྱོད་ཀྱི་མདངས་མ་ཁྱེར་ཏེ། དེ་བས་ཁྱིམ་དུ་བཞུད་ཟེར་ནས་ལག་པ་ནས་བཟུང་སྟེ་སོང་བ་དང༌། དགེ་སློང་རྣམས་ཀྱིས། རྒན་ཞུགས། མ་འགྲོ་བར་འདུག་ཅིག །དེ་འགྲོ་བ་ན་དགེ་སློང་དག་གིས་ལག་པ་ཡ་གཅིག་ནས་བཟུང་སྟེ་དྲངས་པ་དང༌། ནའོ་ཟེར་བའི་སྐབས་དེ་གསོལ་བ་དང༌། ལག་པ་གང་ན་དྲིས་ལ། ཁྱེད་ཀྱིས་བཟུང་བ་ནའོ་ཟེར་ན་འགྲོ་འདོད་པར་ངེས་ཀྱིས་ཐོང་ཞིག །ཆུང་མས་བཟུང་བ་ནའོ་ཟེར་ན་འགྲོ་མ་འདོད་པས་དེ་གཏང་བར་མི་བྱའོ། །ཞུ་བའི་སྐབས་ནས་འབྱུང་བ་ནི་འདིར་མ་བྲིས་སོ། །འདུལ་བྱེད་ཀྱི་སྐབས་ནས་འབྱུང་བ་ནི། གཞོངས་ཀོ་ས་ལར་གོས་རྣམས་བགོས་པའི་ཚེ་དགེ་སློང་ཞིག་ན་བ་དང༌། དེའི་ནད་གཡོག་གིས་གོས་མནོས་ནས་ཁྱེར་ཏེ་སོང་བ་དང༌། དགེ་སློང་དེའང་ཤི་ནས་ཇི་ལྟར་བྱ་བ་མ་ཤེས་པའི་སྐབས་དེ་གསོལ་བ་དང༌། སྔར་ཤི་ནས་ཕྱིས་མནོས་ན་དེ་ཉིད་དུ་སླར་ཕུལ་ཅིག །སྔར་མནོས་ནས་ཕྱིས་ཤི་ན་ཤི་བའི་ཡོ་བྱད་དུ་བྱོས་ཤིག །དགེ་སློང་གཞི་པ་ཞིག་དགེ་འདུན་གྱི་ཞིང་རྨེད་དུ་བཅུག་པ་དང༌། ཉེ་ལོགས་ན་ཁྱིམ་བདག་ཅིག་ཀྱང་ཞིང་རྨེད་པ་དེར་འོངས་ནས། ཁོ་བོའི་ཞིང་མ་རྨེད་ཅིག །འདི་ཁྱོད་ཀྱི་མ་ཡིན་པའི་དགེ་འདུན་གྱི་ཞིང་ངོ༌། །བཙུན་པ། ཁོ་བོའི་དཔང་དུ་མི་མ་ཡིན་པ་བསྟན་ཏོ་ཞེས་སྨྲས་ནས་དེས་སྔར་མཚམས་སུ་ཕུར་བ་བཏབ་པ་དེ་བརྐོས་ནས་བསྟན་པ་དང༌། དེས་ཐོང་བ་བོར་ནས་ཁྱིམ་བདག་དེ་སོང་བའི་འོག་ཏུ་དེས་ཕུར་བ་ནང་དུ་བསྣུར་ཏེ་ཞིང་རྨེད་པ་དང༌། ཁྱིམ་བདག་དེ་འོངས་ནས། ད་གཟོད་ཀྱང་ཁོ་བོ་རྒྱལ་ན་ཅིའི་ཕྱིར་ད་དུང་ཡང་ཞིང་རྨེད་ཅེས་སྨྲས་པས་འགྱོད་པའི་སྐབས་དེ་གསོལ་བ་དང༌། དངོས་པོ་ཚང་ན་ཕམ་པར་འགྱུར་རོ། །མེ་ཏོག་གི་ཤིང་དང་འབྲས་བུའི་ཤིང་ལའང་དེ་བཞིན་ནོ། །དེའི་དོན། དགེ་འདུན་ནི་ཕུ་ནུ་དང་འདྲ་བས་དེའི་ཆེད་དུ་སོགས་སོ། །
དགེ་སློང་གཞི་པ་ཞིག་གིས་ཕྱོགས་བཞིའི་དགེ་འདུན་གྱི་དཀོར་བརྐུ་སེམས་ཀྱིས་བརྐུས་ནས་འགྱོད་པ་དང༌། ཕམ་པར་མི་འགྱུར་གྱི་ཉེས་པ་སྦོམ་པོའོ་ཞེས་པའི་དོན། བདག་པོ་ཐ་དད་པ་མ་ཡིན་པ་ནི་རང་གི་དང་འདྲའོ། །དགེ་སློང་དག །ཚུར་ཤོག་རྐུ་རུ་འདོང་ཟེར་ནས་སོང་བ་དང༌། ལམ་གྱི་(༡༠༦ན)ཕྱེད་ནས་ངོ་ཚ་ནས་ལོག་གོ །ཡང་རྐུ་རུ་འདེང་ཟེར་ནས་སོང་བ་ལས་གཅིག་ངོ་ཚ་ནས། མ་སོང་ན་འདི་བས་གསོད། སོང་ལ་མ་བྱིན་པར་མི་བླང་ཞིང༌། སྐལ་བ་ཡང་མི་བླང་ངོ་སྙམ་སྟེ་སོང་ནས་འགྱོད་པའི་སྐབས་དེ་གསོལ་བས། ཕྱིར་ལོག་གམ་མི་བླང་བར་ངེས་པ་ན་ཞེས་སོགས་སོ། །དགེ་སློང་དག་རྐུར་སོང་ནས། ཕྱེད་ལས་བྱེད། ཕྱེད་ལམ་སྲུང༌། ལམ་སྲུང་བ་རྣམས་བདག་ཅག་གིས་མ་བླངས་པས་ཉེས་པ་མེད་དོ་སྙམ་ནས་གསོལ་བ་དང༌། ཆ་བདག་གིར་བྱ་བར་འདོད་པ་ན་མི་བླང་བའི་བསམ་པ་མ་ཡིན་ནོ། །དེར་གཏོགས་པའི་ལ་སོགས་སོ། །དགེ་སློང་ཞིག་གིས་གོས་འཚོང་བར་རོ་བ་ཞིག་གི་རས་བླངས་ནས་ཁྱེར་བ་དང༌། ཁོས་མཐོང་ནས། རས་མ་རྐུ་ཞེས་སྨྲས་པ་དང༌། བསྟན་ནས་ཁྱེར་ཏེ་འོང་ངོ་ཞེས་སྨྲས་སོ། །དེ་འགྱོད་ནས་གསོལ་བས། སྦོམ་པོའོ་ཞེས་པ། མངོན་སུམ་དུ་བླངས་པ་ཡང་སོགས་སོ། །དགེ་སློང་ཞིག་གི་སློབ་མ་རྐུན་པོས་ཁྲིད་པ་དེ་བྲོས་པས་ཐར་ནས་གསོལ་བས། ཉེས་པ་མེད་དེ། དེ་བདག་ཉིད་ནི་མ་ཡིན་ནོ། །དགེ་སློང་ཞིག་གིས་སེང་རས་བརྐུས་ནས་བཤིག་པ་དང༌། དེའི་ནང་ནས་དར་རིན་པོ་ཆེ་བྱུང་བས་འགྱོད་ནས་གསོལ་བས། སེང་རས་ཀྱི་རིན་ཐང་བརྩིའོ་ཞེས་པ། གང་བསམས་པ་དེ་དང་འབྲེལ་བས་མ་བསམས་པ་བླངས་པ་ནི་བརྐུས་པ་མ་ཡིན་ནོ། །
དགེ་སློང་ཁ་ཅིག །རྐུར་འདེང༌། གང་གིས་གང་ཐོབ་པ་དེ་དེ་ཉིད་དབང་ངོ་ཞེས་སྨྲས་ནས་རྐུར་སོང་བ་ལ་ཁ་ཅིག་གིས་ཐོབ། ཁ་ཅིག་གིས་མ་ཐོབ་ནས་གསོལ་བས། སྦོམ་པོའོ་ཞེས་པ། སྦོམ་པོ་ནི་གང་གིས་གང་ལེན་པ་དེ་ཞེས་སོགས་སོ། །བདག་པོ་ཡོད་པའི་དུར་ཁྲོད་ནས་གོས་བླངས་པ་དང༌། རིགས་ངན་རྣམས། བདག་ཅག་གི་ལས་སུ་བྱ་བ་རྣམས་འདིའི་ཕྱིར་དུ་བྱེད་པས། གོས་མ་རྐུ་ཞིག་ཅེས་པ་དང༌། མཉན་ཡོད་ན་གཞན་དག་རོ་ལ་གསོལ་བ་འདེབས་ཏེ། ཁྱིམ་པ་ཞིག་གིས་ཀྱང་དགོས་པ་ཞིག་གསོལ་ནས་དགོས་པ་དེ་གྲུབ་པ་དང༌། དེ་ལ་རས་དཀར་པོ་ཞིག་གིས་གཡོགས་པ་དེ། ནག་པོ་དགའ་བོས་བླངས་པ་དང༌། དེ་ལ་དགེ་སློང་རྣམས་ཀྱིས། ཁྱོད་ལ་ཕམ་པ་བྱུང་སྟེ། རོའི་རས་མ་བྱིན་པར་བླངས་པའི་ཕྱིར་རོ། །དེ་འགྱོད་ནས་གསོལ་བས། སྦོམ་པོའོ། གྲོང་ཁྱེར་ཡངས་པ་ཅན་ན་རོ་གསེར་གྱི་ཕྲེང་བ་བཏགས་པ་ཞིག་རང་ལ་སྲུང་ཞིང་འདུག་གོ་ཞེས་ནག་པོ་དགའ་བོས་ཐོས་ཏེ་དེར་སོང་ནས་རོ་དེ་ལ་འཐོག་པ་ལས་རོ་དེས། མ་ལེན་ཟེར་བ་ལས་དེས་གསེར་གྱི་ཕྲེང་བ་ཕྲོགས་ཏེ་ཁྱེར་བས་དགེ་སློང་རྣམས་ཀྱིས། ཕམ་པ་བྱུང་ངོ༌། །དེ་འགྱོད་ནས་གསོལ་བས། ཡོངས་སུ་འཛིན་པ་དང་བཅས་པའི་དུར་ཁྲོད་ནས་ལེན་ན་སྦོམ་(༡༠༦བ)པོའོ། །
མཉན་ཡོད་ན་ཁྱིམ་བདག་ཅིག་ལ་ལ་ཕུག་གི་ར་བ་ཡོད་པ་དེར་དགེ་སློང་ཞིག་སོང་ནས་ལ་ཕུག་བསླངས་པས། བཙུན་པ། རིན་སྩོལ་ཅིག །ཆོས་ཀྱི་ཕྱིར་རིན་མེད་པར་སྩོལ་ཅིག །བཙུན་པ། འདིར་འོང་ངོ་ཅོག་ལ་རིན་མེད་པར་བྱིན་ན་ཁོ་བོའི་ཟས་གོས་མེད་པར་འགྱུར་རོ། །ཅི་ཅུང་ཟད་ཀྱང་མི་སྦྱིན་ནམ། མི་གསོལ་ལོ། །དེས་ལ་ཕུག་གི་ར་བ་དེ་སྔགས་ཀྱིས་བསྐམས་པ་དང༌། སྦོམ་པོར་འགྱུར་རོ། །སྡོང་བུ་དང༌། ལོ་མ་དང༌། མེ་ཏོག་དང༌། འབྲས་བུའི་ཀུན་དགའ་ར་བ་རྣམས་ཀྱང་དེ་བཞིན་ནོ། །རྟ་རྩྭ་ཟ་ཞིང་འདུག་པའི་མདུན་དུ་དགེ་སློང་གིས་རྩྭ་ཆངས་པ་གང་སྦྲེངས་པས། དེ་དེའི་ཕྱི་བཞིན་དུ་འོང་བ་ལས། འདི་ལྟར་བརྐུའོ་སྙམ་དུ་ལུས་འགྱུར་བ་དང༌། འགྱོད་ནས་གསོལ་བས། ཆས་ཀྱིས་རྔོད་པས་རྟ་བཀྲི་བ་དང༌། དགེ་སློང་ཞིག་ཚོང་པ་མང་པོ་དང་ལྷན་ཅིག་ཀོ་ས་ལར་སོང་ནས་མྱ་ངམ་གྱི་ལམ་ཞིག་ཏུ་ཕྱིན་པ་དང་ཚོང་པས། བཙུན་པ། ལམ་འདི་འཇིགས་པ་དང་བཅས་ཀྱིས་རྟ་ལ་ཆིབས་ལ་མྱུར་བར་བཞུད། དགེ་སློང་གིས་རྟ་ལ་ཞོན་ཏེ། འདི་ལྟར་བརྐུའོ་སྙམ་ནས་ལུས་འགྱུར་བ་དང༌། འགྱོད་ནས་གསོལ་བས། ཞོན་ཏེ་འདི་བརྐུ་བར་བྱའོ་སྙམ་ནས་ལུས་འགྱུར་ན་སྦོམ་པོའོ། །
དགེ་སློང་ཞིག་རིན་པོ་ཆེས་གང་བའི་གྲུ་དང་ལྷན་ཅིག་བརྒལ་བ་ལས། དེས་འདི་ལྟར་བརྐུ་སྙམ་ནས་ལུས་འགྱུར་བ་དང་འགྱོད་ནས་གསོལ་བས། གྲུ་ཡང་ངོ༌། །འདི་ལས་འདི་ལྟར་སྙམ་པ་ཡང་ངོ༌། །དགེ་སློང་ཞིག་ལ་ཤོ་གམ་གཞལ་དགོས་པའི་རྫས་ཡོད་ཅིང༌། འདས་ན་ཕམ་པར་འགྱུར་སྙམ་སྟེ་ཕ་མ་སོགས་ལ་བསྔོས་ནས་འདས་པ་དང༌། ཕ་མ་དང༌། ཕུ་ནུ་དང༌། བུ་སྲིང་དང༌། མཁན་པོ་དང༌། སློབ་དཔོན་དང༌། མཆོད་རྟེན་དང༌། དགེ་འདུན་ལ་སོགས་པ་ལ་བསྔོས་པ་ཤོ་གམ་གཞལ་དགོས་པ་འདས་པའོ། །དགེ་སློང་ཞིག་གིས་ཁྲིའུ་བརྙས་ནས་མི་སྦྱིན་ནོ་སྙམ་པ་དང༌། གཅིག་གིས་གླེགས་བམ་བླངས་ནས་མི་སྦྱིན་ནོ་སྙམ་པ་དང༌། དགེ་སློང་ཞིག་གིས་ཚོང་པ་འདུས་པ་ལ་བསྐྱིན་པར་མང་ཞིག་བླངས་པ་དང༌། བསྐྱིན་པ་བདས་པས་མི་སྦྱིན་ནོ་སྙམ་ནས་འགྱོད་དེ་གསོལ་བས། བརྙས་པ་དང་བསྐྱིས་པ་མི་སྦྱིན་པར་སེམས་པའོ། །དགེ་སློང་ནད་པ་ཞིག་འཁུར་བ་གྲུ་གསུམ་དང་ཐུག་པ་ལ་དད་པས། ནད་གཡོག་ལ་རིན་བྱིན་ནས། འཁུར་བ་དང་ཐུག་པ་བྱས་ཏེ་དགེ་འདུན་ལའང་གསོལ། ང་ལའང་བྱིན་ཅིག །དེ་དག་གིས། བདག་ཅག་ལ་འཁུར་བ་གྲུ་གསུམ་དང་ཐུག་པ་ཅི་དགོས། འདི་གཅིག་པུ་ལ་སྦྱིན་ནོ་སྙམ་ནས་ནད་པ་ལ་འཁུར་བ་གྲུ་གསུམ་དང་ཐུག་པ་བྱིན་ཏེ་རིན་བགོས་པས་འགྱོད་ནས་གསོལ་བས། གཞན་གྱི་དོན་དུ་བྱིན་པ་འགོད་པ་ཡང་ངོ༌། །དགོན་པ་བ་ཞིག་གིས་བདག་པོ་མེད་པ་ལ་(༡༠༧ན)ཡོད་པར་འདུ་ཤེས་ནས་བླངས་པས་འགྱོད་དེ་གསོལ་བ་དང༌། ཡོངས་སུ་མ་བཟུང་བ་ལ་ཡོངས་སུ་བཟུང་བར་འདུ་ཤེས་པའོ། །དགེ་སློང་ཞིག་གིས་བསོད་སྙོམས་འབྲས་ཆན་མི་དབང་བ་བླངས་པ་དང་འགྱོད་དེ་གསོལ་བས། སྦོམ་པོའོ། །
དེ་བཞིན་དུ་ཕྱེ་དང༌། ཉ་ཤ་དང༌། བག་ཕྱེ་སོགས་ལའང་སྦྱར་རོ། །གཞོངས་ཀོ་ས་ལར་དགེ་འདུན་གྱི་ཆོས་གོས་བགོས་པ་དང༌། དགེ་སློང་ཞིག་གྲོང་གཞན་དུ་སོང་ནས་དེ་ལ་ལྷན་ཅིག་སྤྱོད་པ་གཉིས་ཡོད་པ་དེ་གཉིས་ཀྱིས་མཁན་པོའི་གོས་སོ་སོར་མནོས་ནས་དོང་བ་དང༌། གཅིག་ལ་གཅིག །ཁྱོད་ཀྱིས་མཁན་པོའི་གོས་མནོས་སམ་ཞེས་དྲིས་སོ། །ཁྱོད་ཀྱིས་ཀྱང་མནོས། ཁོ་བོས་ཀྱང་མནོས་ན་གང་གིས་མི་དབང་བར་མནོས་པས་ཕམ་པ་བྱུང་བ་ནི་མི་ཤེས་སོ་ཞེས་སྨྲས་པ་དང༌། ཉེས་པ་མེད་དེ། གཞན་གྱིས་བླངས་པར་མི་ཤེས་པ་ནི་གཞི་མེད་པ་ཉིད་མ་ཡིན་ནོ། །ཀོ་ས་ལར་དགེ་འདུན་གྱི་གོས་བགོས་པ་ན། དགེ་སློང་ཞིག་གྲོང་གཞན་དུ་སོང་ནས་དེའི་མཛའ་བོས་སྐལ་བ་བླངས་ཏེ་དེས་འོང་བ་དང༌། འདི་ཁྱོད་ཀྱི་གོས་ཡིན་ཏེ་ཁོ་བོས་མནོས་ནས་འོངས་སོ་ཞེས་སྨྲས་པ་དང༌། ངས་ཁྱོད་ལ་མ་བཅོལ་ལོ། །དེ་འགྱོད་ནས་གསོལ་བས། མ་བཅོལ་བས་མ་ཡིན་ནོ། །དགེ་སློང་ཞིག་མགྲོན་དུ་མ་བོས་པར་ཟན་ཟ་བས་འགྱོད་ནས་གསོལ་བས། མགྲོན་དུ་མ་བོས་པར་ཟན་ཟ་ན་ཉེས་བྱས་སོ། །དགེ་སློང་གཉིས་རྐུར་སོང་བ་དང༌། བདག་ཅག་གཉིས་རབ་བྱུང་ཡིན་པས་མི་རིགས་སྙམ་ལོག་ནས་གསོལ་བས། རྐུ་བའི་ཆེད་དུ་འགྲོ་བ་ཡང་ངོ༌། །རྐུན་པོས་ཆང་ཁྱེར་ནས་དགོན་པར་འཐུངས། ལྷག་མ་སྦས་པ་དགེ་སློང་ཞིག་གིས་རྙེད་ནས་ཚྭ་བྱའོ་སྙམ་སྟེ་ཁང་པར་བསྐྱལ་ལོ། །རྐུནཔོ་སྐོམ་ནས་དེར་སོང་སྟེ་བཙལ་ཀྱང་མ་རྙེད་པར་དགེ་སློང་དེ་དག་མཐོང་ནས། ཁྱེད་ཀྱིས་ཆང་མ་བསྣམས་སམ། ཁྱེར་རོ། །ཁོ་བོའི་ཆང་བརྐུས་པས་ཁྱོད་ནི་རྐུན་མའོ། །འགྱོད་ནས་གསོལ་བ་དང༌། ཡང་བཙོ་བླག་མཁན་ཞིག་གིས་གོས་ཐལ་ཆུའི་ནང་དུ་བཅུག་པ་བརྗེད་ནས་གྲོང་དུ་སོང་བ་ཡང་དྲན་ནས་སླར་ལོག་པ་དང༌། དགེ་སློང་ཕྱག་དར་ཁྲོད་ཀྱི་གོས་འཚོལ་བས་གོས་དེ་བླངས་པ་དེས་མཐོང་ནས། གོས་མ་རྐུ །ཁོ་བོ་ཕྱག་དར་ཁྲོད་ཀྱི་གོས་འཚོལ་བ་ལས་འདི་མཐོང་ན་ཁྱོད་ལ་ཅིར་དགོས། བཙོ་བླག་མཁན་གྱིས། ཁོ་བོས་གོས་འདི་ཐལ་སྐྱོར་བཅུག་པ་ལས་བརྗེད་དེ་འདི་ཁོ་བོའི་གོས་ཡིན་གྱིས་མ་རྐུ་ཞིག །ཡང་བཙོ་བླག་མཁན་གྱིས་གོས་བཀྲུས་པ་ཤིང་དྲུང་དུ་བཞག་པ་དང༌། དགེ་སློང་གིས་ཁྱེར་བ་བཙོ་བླག་མཁན་གྱིས་མཐོང་ནས། ཁོ་བོའི་གོས་མ་རྐུ་ཞིག །ཁྱོད་ཀྱི་ཡི་ན་ཁྱེར་ཅིག །ཁྱིམ་པ་ཞིག་གིས་གོས་བཞག་ནས་བཤང་བ་བྱེད་དུ་སོང་བའི་གོས་(༡༠༧བ)དགེ་སློང་གིས་མཐོང་ནས་ཁྱེར་བ་དང༌། ཁྱིམ་པ་དེས། ཁོ་བོའི་གོས་མ་རྐུ་ཞིག །ཁྱོད་ཀྱི་ཡིན་ན་ཁྱེར་ཅིག །མཛེ་ཏའི་ཚལ་ནས་མི་རིང་བ་ཞིག་ན་ཞིང་པ་གོས་བཞག་སྟེ་ཞིང་རྨེད་པའི་གོས་དགེ་སློང་གིས་ཁྱེར་བ་དང༌། ཞིང་བ་མཐོང་ནས། གོས་མ་རྐུ་ཞིག །དེས་མཉན་པ་དང༌། ཞིང་པས་བཟུང་ནས། བཙུན་པ། རིགས་སམ། གོས་དེ་མ་བྱིན་པར་མ་བླང་ཞིག །འདི་ཁོ་བོས་ཕྱག་དར་ཁྲོད་ཀྱི་གོས་འཚོལ་བ་ན་མཐོང་སྟེ་ཁྱོད་ལ་ཅིར་དགོས། བཙུན་པ། གོས་འདི་བཞག་ནས་བདག་ཞིང་རྨེད་དེ་འདི་ནི་བདག་གིའོ། །ཁྱོད་ཀྱི་ཡིན་ན་ཁྱེར་ཅིག །ཁྱེའུ་གོས་བཞག་ནས་རྩེད་མོ་རྩེ་བའི་གོས་བརྗེད་དེ་ཁྱིམ་དུ་སོང་བའི་གོས་དགེ་སློང་གིས་ཁྱེར་བ་དང༌། བུད་མེད་ཅིག་བྱུང་ནས། ཁྱེའུ་རྩེ་བའི་གོས་ཡིན་གྱིས་མ་རྐུ་ཞིག །ཁྱོད་ཀྱི་ཡིན་ན་ཁྱེར་ཅིག །དགེ་སློང་ཞིག་གིས་ཕྱག་དར་ཁྲོད་ཀྱི་གོས་སྦས་ནས་མཉན་ཡོད་དུ་བསོད་སྙོམས་ལ་ཞུགས་པ་དང༌། དགེ་སློང་གཞན་ཞིག་གིས་བླངས་ནས་བཀྲུས་པ་དང༌། དགེ་སློང་སྔ་མ་དེས་དེ་འཁྲུ་བ་མཐོང་ནས། ཁྱོད་ལ་ཕམ་པ་བྱུང་སྟེ། ཁོ་བོའི་ཕྱག་དར་ཁྲོད་ཀྱི་གོས་མ་བྱིན་པར་བླངས་པའི་ཕྱིར་རོ། །ལོག་པའི་ལྷ་ཁང་ནས་རས་རླུང་གིས་ཁྱེར་བ་དུར་ཁྲོད་དུ་ལྷུང་བ་དང༌། དགེ་སློང་ཕྱག་དར་ཁྲོད་ཀྱི་གོས་ཚོལ་བས་རས་དེ་རྙེད་ནས་ཁྱེར་བ་ན། ལོག་པའི་ལྷ་ཁང་ན་གནས་པས་མཐོང་ནས། བདག་གི་རས་འདི་ལྷ་ཁང་ནས་དུར་ཁྲོད་དུ་ལྷུང་བ་ཡིན་གྱིས་མ་རྐུ་ཞིག །ཁྱོད་ཀྱི་ཡིན་ན་ཁྱེར་ཅིག །ཁྱིམ་པ་ཞིག་གིས། དགེ་སློང་རྣམས་ལྷུང་བའི་གོས་རྣམས་ཕྱག་དར་ཁྲོད་ཀྱི་གོས་སོ་ཞེས་འཁྱེར་རོ་ཟེར་བ་ཐོས་པ་དང༌། དེ་བརྟག་པའི་ཕྱིར་རས་རིན་ཆེ་བ་ཞིག་ལ་ཀརྵ་པ་ཎ་བརྒྱད་བཏུམས་ཏེ་ཕྱག་དར་ཁྲོད་དུ་སྦས་ནས་ཁ་ཚར་སྣང་བར་བྱས་ཏེ་སོང་བ་དང༌། དགེ་སློང་ཕྱག་དར་ཁྲོད་ཀྱི་གོས་ཚོལ་བ་ཞིག་གིས་ཁ་ཚར་མཐོང་ནས་དྲངས་ཏེ་ཁྱེར་བ་དང༌། ཁྱིམ་པ་དེས་མཐོང་ནས། རས་མ་རྐུ་ཞིག །འདི་ནི་ངས་ཕྱག་དར་ཁྲོད་ཀྱི་གོས་འཚོལ་བ་ལས་རྙེད་ན་ཁྱོད་ལ་ཅིར་དགོས། ཁོ་བོས་རས་ལ་ཀརྵ་པ་ཎ་བརྒྱད་ཕུར་ཏེ་སྦས་སོ། །བལྟས་པས་ཀརྵ་པ་ཎ་བརྒྱད་པོ་དེ་མཐོང་ནས། ཁྱོད་ཀྱི་ཡིན་ན་ཁྱེར་ཅིག །དེ་རྣམས་འགྱོད་ནས་གསོལ་བས། ཉེས་པ་མེད་དེ། ཀུན་ཏུ་བཟུང་བ་མ་ཡིན་ནམ་ཞེས་ལེགས་པར་སོ་སོར་བརྟག་པར་བྱས་ཏེ་བླང་བར་བྱའོ། །
ཁྱིམ་བདག་ཅིག་དགེ་འདུན་གྱི་ཞིང་རྨེད་པ་ལ་དགེ་སློང་ཞིག་འོངས་ནས། ཡང་ན་ཤས་བྱིན་ཅིག །ཡང་ན་ཞིང་མ་རྨེད་ཅིག །དེས་མ་ཉན་པར་རྨོས་པ་དང༌། དགེ་སློང་དེས་ཐོང་བའི་རྩེ་མོར་ཉལ་ལོ། །ཁྱིམ་བདག་དེས་ཐོང་བ་བོར་ནས། དགེ་སྦྱོང་འདི་ལྟ་བུ་དང་བྲལ་བར་ཤོག་ཅིག་ཅེས་འཕྱ་ཞིང་མི་སྙན་པ་ཟེར་བ་དང་འགྱོད་ནས་གསོལ་བས། ཉེས་པ་མེད་དེ། (༡༠༨ན)ཕྱིན་ཆད་ལུས་བསྙལ་བར་མི་བྱའོ། །འཆག་སར་ཤིང་ཞིག་སྐྱེས་ཏེ་དེ་ལ་འོལ་བའི་ཚང་བཅས་ནས་དེས་དགེ་སློང་འཆག་པ་ལ་ཤིང་འདོར་ཞིང་སྐད་འབྱིན་པ་དང༌། དེས་དེའི་ཚང་བཤིག་ནས་སྐད་འབྱིན་པ་དང༌། སྟོན་པས་ཀུན་དགའ་བོ་ལ། ཅིའི་ཕྱིར་འོལ་བ་སྐད་འབྱིན། དགེ་སློང་གིས་འོལ་བའི་ཚང་བཤིག་པའི་སླད་དུའོ། །ཚང་བཤིག་པར་མི་བྱའོ། །ཉེ་དགས་དབྱར་ཟླ་ཐ་མ་ལ་གང་དུ་དགེ་སློང་ཇི་སྙེད་ཅིག་དབྱར་ཚུལ་དུ་ཞུགས། གང་དུ་དགེ་འདུན་གྱི་རྙེད་པ་ཇི་སྙེད་ཅིག་རྙེད་ཅེས་གཙུག་ལག་ཁང་དུ་རྒྱུ་ཞིང་ཕྱིན་པ་ན། དགེ་སློང་དེ་དག་གིས་ཚིག་སྙན་པས་བསུ་བ་དང༌། ཁྱེད་བདེ་བར་གནས་སམ་ཞེས་དྲིས་ཏེ་འདུག་ནས་དགེ་འདུན་གྱི་རྙེད་པ་ཅི་ཡོད་པ་འོན་ཅིག་དང་བགོས་ལ་ཁོ་བོའི་སྐལ་བ་ནི་བཀུར་རོ། །དེ་དག་གིས་ཁྱེར་འོངས་ནས་མདུན་དུ་བཞག་པ་དང༌། དེས་བགོས་ནས་གནས་བརྟན་གོས་ཀྱི་སྐལ་བ་ཁྱེར་ཏེ་ལངས་པ་དང༌། དེས། གནས་བརྟན། ད་དངུ་མ་བཞུད་པར་བཞུགས་ཤིག་ཅེས་སྨྲས་ནས། ཉེ་དགའ་གཏམ་སྙན་པ་སྣ་ཚོགས་དང༌། རིགས་པ་དང༌། གྲོལ་བ་ལ་སྤོབས་པས་དེས་གནས་བརྟན་དད་པར་འགྱུར་བའི་ཆོས་བཤད་པ་དང༌། དེས། གོས་ཀྱི་སྐལ་བ་ཅི་ཡོད་པ་བཞེས་ཤིག །དེ་བཞིན་དུ་གནས་བརྟན་གཉིས་པ་དང་གསུམ་པ་དང་དགེ་སློང་མང་པོས་གོས་བྱིན་ནས། དེས་གོས་དེ་དག་ཁུར་དུ་ཁྱེར་ཏེ་འཛེ་ཏའི་ཚལ་དུ་ཞུགས་པ་དང༌། དགེ་སློང་དག་གིས་ཉེ་དགའ་ལ། གོས་འདི་དག་ག་ལས་རྙེད་དྲིས་པ་དང༌། རྒྱས་པར་སྨྲས་སོ། །
དེ་ལྟ་བུ་བྱུང་མོད་ཀྱི་སྟོན་པས་ད་དུང་བསླབ་པ་མ་བཅས་སོ། །ཕྱིས་རྒན་ཞུགས་གཉིས་ལ་བརྟེན་ནས། མ་གནས་པ་དེས་ཆོས་གོས་ཀྱི་ཆ་མི་བླང་ངོ༌། །རྐུན་པོས་གྲོང་བཅོམ་ནས་བསྙེགས་པ་དང༌། སྐྲག་ནས་གཙུག་ལག་ཁང་དུ་སོང་སྟེ། གོས་དགེ་སློང་ལ་ཕུལ་ནས་བྲོས་སོ། །ར་མདའ་བས་གཙུག་ལག་ཁང་པསྐོར་བ་དང༌། གོས་དགེ་སློང་ལ་འདུག་པ་མཐོང་ནས། བདག་ཅག་གིའོ། །ཁོ་བོ་ལ་རྐུན་པོས་བྱིན་ནོ། །གསོལ་བས། ཉེས་པ་མེད་དེ། འོང་བ་རྐུ་ཐབས་ཅན་གྱི་ཆོམ་རྐུན་པར་གྲགས་པ་ལས་བླང་བར་མི་བྱའོ་ཞེས་པ་ནས། སྦྱིན་ནོ། །དགེ་སློང་དག་ལ་རྐུན་པོས་ཀྱང་བྱིན། ཐུན་མོང་བ་དང་སྲུང་བས་ཀྱང་བྱིན་པ་དང༌། དེ་དག་གིས་མ་བླངས་པ་དེ་གསོལ་བས། ཆོམ་རྐུན་པ་ལས་སྦྱིན་བདག་གི་སེམས་ཀྱིས་ལེན་པ་ལ་ཉེས་པ་མེད་དོ། །ཀུན་དགའ་བོའི་ལྷན་ཅིག་སྤྱོད་པ་སྤོང་བ་པོ་ཞེས་བྱ་བ་དེས་པ། ཚུལ་ཁྲིམས་དང་ལྡན་པ་ཞིག་སྟེ། དེ་ཁྱིམ་བདག་གཞན་ཞིག་གི་གྲོང་དུ་ཉེ་བར་འགྲོ་སྟེ། དེ་ལ་བུ་གཉིས་ཡོད་དེ། ཁྱིམ་བདག་དེ་ཡང་ནད་ཀྱིས་བཏབ་བོ། །དེ་དེ་ལ་ནད་འདྲིར་སོང་བ་དང༌། དེས་དེ་ལ་ནོར་བྱིན་ཏོ། །བུ་གཉིས་པོས་ནི་ཅི་(༡༠༨བ)ཡང་མ་ཐོབ་པས་དེས་ཀུན་དགའ་བོ་ལ་འཁངས་པ་དང༌། ཀུན་དགའ་བོས་སྤོང་བ་པོ་ཆད་པས་བཅད་དོ། །དེ་སྔོན་སློབ་མ་ལས་རབ་ཏུ་བྱུང་བས་ན་དེས་སློབ་མ་ལྔ་བརྒྱ་ཙམ་ཞིག་གཟེངས་བསྟོད་དེ། མཁན་པོ་ལ་བཟོད་པ་གསོལ་ཅིག་ཅེས་སྨྲས་པ་དང༌། མཁན་པོ་ལ་བཟོད་པ་ཇི་ལྟར་བྱ། ཁྱེད་ཀྱིས་ཁྱེའུ་དང་བུ་མོ་རྣམས་ཁྲིད་ནས་མཁན་པོའི་དྲུང་དུ་སོང་དང༌། དེས་ཁྱེད་ལ་ཆོས་འཆད་པར་འགྱུར་གྱིས། ཆོས་བཤད་ཟིན་པའི་ཚེ། ཁྱེའུ་དང་བུ་མོ་རྣམས་བོར་ལ་དེངས་ཤིག་དང་། དེ་དག་ངུས་པས། ཁྱེའུ་དང་བུ་མོ་དེ་དག་ཁྲིད་ལས་དེངས་ཟེར་ན་དེ་ལ། འོ་ན་སྤོང་བ་པོ་ལའང་བཟོད་པར་མཛད་དམ་ཞེས་སྨྲོས་ཤིག །དེ་དག་གིས་ཇི་ལྟར་བསྒོ་བ་བཞིན་ཆོས་བཤད་ཟིན་པའི་ཚེ་ཁྱེའུ་དང་བུ་མོ་རྣམས་བོར་བ་དང༌། དེ་དག་ངུས་པས། ཀུན་དགའ་བོས། འདི་དག་ཁྲིད་ལས་དེངས་ཅིའི་ཕྱིར་དོར། དེ་དག་གིས། སྤོང་བ་པོ་ལའང་བཟོད་པར་མཛད་ནས། བཟོད་པར་བྱའི། ཉེས་བྱས་བཤགས་པར་གྱིས་ཤིག །སྐབས་དེ་གསོལ་བས། གནད་ལ་བསྒྲེ་བར་མི་བྱའོ། །
ཁྱིམ་བདག་ཅིག་གིས་སངས་རྒྱས་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་ནས། དགེ་སློང་ཞིག་གིས་གཙུག་ལག་ཁང་དུ་འདུག་སྟེ་བསོད་སྙོམས་མནོས་སོ། །མགོན་མེད་ཟས་སྦྱིན་གྱི་ཁྱེའུ་རྣམས་རྩེ་བ་རྐུན་པོས་བརྐུས་པ་དགེ་སློང་དེས་ཐོས་ཏེ། དེས་སྔགས་བསླབས་ནས་རིང་པོ་མ་ལོན་པས་བདག་གིས་སྔགས་འདི་སད་སོ་སྙམ་ནས་སྔགས་བརྗོད་པ་དང༌། རྐུན་པོ་དེ་དག་དཔུང་ཚོགས་བཞིས་བསྐོར་བར་གྱུར་ནས་དེ་དག་གིས་ཁྱེའུ་རྣམས་བོར་ཏེ་བྲོས་སོ། །དེ་དགེ་སློང་དག་གིས་ཐོས་ནས། ཁྱོད་ལ་ཕམ་པ་བྱུང་ངོ༌། །དེ་འགྱོད་ནས་གསོལ་བས། ཁྱོད་ཀྱིས་བསམ་པ་ཇི་ལྟ་བུས་བྱས། སྔགས་སད་པར་བསམས་པས་སོ། །གསང་སྔགས་དག་གིས་གཏོང་བ་ལ་ཉེས་པ་མེད་དོ། །དགེ་སློང་མང་པོ་གཙུག་ལག་ཁང་དུ་འཁོད་པ་ལས་བྱི་བ་ཞིག་གིས་ནོར་དང་ཟས་བརྐུས་ནས་བྱི་ཁུང་དུ་སླར་སོང་བ་དང༌། དེ་དག །བདག་ཅག་ལ་རྐུ་བ་དེ་སུ་ཡིན་སྙམ་མོ། །དེ་དག་བསོད་སྙོམས་འཁོར་ནས་འདུག་པད་དང༌། བྱི་བ་དེས་ཁ་ཟས་ཁྱེར་ནས་བྱི་ཁུང་དུ་སླར་སོང་བ་དང༌། དེ་དག་གིས་དེ་བཟུང་ནས། བདག་ཅག་ལ་རྐུ་བ་ནི་འདི་ཡིན་ནོ། །ཁྱེད་ལ་ཕམ་པ་བྱུང་སྟེ། བྱི་བ་ལས་མ་བྱིན་པར་བླངས་པས་སོ། །དེ་དག་འགྱོད་ནས་གསོལ་བས། ཉེས་པ་མེད་དེ། དགེ་སློང་རང་གི་དེ་ལོངས་ཤིག །བྱི་བའི་དེ་ནི་མི་བླང་སྟེ། བྱི་བས་ཁྱེར་བ་བདག་པོས་བླངས་པ་ལ་ཡང་ངོ༌། །
བྱི་བས་བཅའ་བ་དང་བཟའ་བ་རྣམས་ཁྱེར་འོངས་ཏེ་དགེ་སློང་ཞིག་གི་མལ་སྟན་གྱི་འོག་ཏུ་བཞག་པ་དང༌། དགེ་སློང་དེས་ནངས་པར་སྔ་སོང་ཤིང་ཟོས། གདོང་བཀྲུས། བྱིན་ལེན་བྱས་ཏེ་ཟོས་སོ། །གཞན་གྱིས། ཁྱོད་རྐང་ལག་བཀྲུས་ཀྱང་བསོད་སྙོམས་(༡༠༩ན)ལ་མི་འགྲོ་བ་ཅི། བདག་ནི་བྱི་བས་བཅའ་བ་དང་བཟའ་བ་ཁྱེར་ཏེ་འོངས་ཏེ་མལ་སྟན་གྱི་འོག་ཏུ་འཇོག་པ་དེ་བྱིན་ལེན་བྱས་ནས་ཟོས་སོ། །ཁྱོད་ལ་ཕམ་པ་བྱུང་སྟེ། བྱི་བའི་བཅའ་བ་དང་བཟའ་བ་མ་བྱིན་པར་བླངས་པའི་ཕྱིར་རོ། །དེ་གསོལ་བས། དགེ་སློང་དེ་ཚེ་སྔ་མ་ལ་བྱི་བའི་ཕ་ཡིན་ཏེ། དེ་ཕ་ལ་བྱམས་པས་དགེ་སློང་དེ་ལ་ཁ་ཟས་ཁྱེར་འོངས་ཏེ་བྱིན་པས་ཉེས་པ་མེད་དོ། །བུད་མེད་མང་པོ་ཆུ་བོ་ཨ་ཛིར་བ་ཏིའི་ངོགས་སུ་གོས་དང་རྒྱན་རྣམས་བཞག་སྟེ་ཁྲུས་བྱེད་པ་ན་སྤྲེའུ་ཞིག་ཤིང་ལས་བབས་ནས་རྒྱན་རྣམས་ཁྱེར་ཏེ་ཤིང་ལ་འཛེགས་པ་དང༌། དེ་དག་གིས་སླར་གོས་བགོས་ཏེ་རྒྱན་མ་རྙེད་པར་སོང་ངོ༌། །དེ་ནས་སྤྲེའུ་དེས་མུ་ཏིག་གི་དོ་ཤལ་དེ་ཉིད་དུ་སླར་བོར་བ་དང༌། དགེ་སློང་ཞིག་གིས་མུ་ཏིག་གི་དོ་ཤལ་དེ་མཐོང་ནས་བླངས་ཏེ་བུད་མེད་དེ་དག་ལ་བྱིན་ཏོ། །བུད་མེད་དེ་དག་ན་རེ། ཁྱོད་ཀྱིས་མུ་ཏིག་གི་དོ་ཤལ་འདི་བརྐུས་སོ། །མ་བརྐུས་ཀྱིས། ཁྱེད་ཁྲུས་བྱེད་པ་ན་སྤྲེའུ་ཞིག་ཤིང་ལས་བབས་ནས་མུ་ཏིག་གི་དོ་ཤལ་འདི་བླངས་ཏེ་ཤིང་ལ་འཛེགས་སོ། །ཁྱེད་ཀྱིས་མ་རྙེད་པར་སོང་བའི་ཚེ་སླར་བབས་ནས་དེ་ཉིད་དུ་བཞག་གོ །དེ་འགྱོད་ནས་གསོལ་བས། དགེ་སློང་གཞན་གྱི་རྫས་ལ་དེའི་རྫས་སུ་ན་ཡང་ངོ༌། །རི་དྭགས་ཤིག་རྔོན་པས་བདས་ནས་གཙུག་ལག་ཁང་དུ་འོངས་པ་དང་རྔོན་པས། བདག་ཅག་གི་རི་དྭགས་དེ་གཙུག་ལག་ཁང་དུ་སོང་གིས་སླར་བྱིན་ཅིག །མ་བྱིན་པས་བོར་ཏེ་སོང་བ་དང༌། འགྱོད་ནས་གསོལ་བས། རྔོན་པ་དག་གིས་མངོན་པར་གཙེས་པའི་རི་དྭགས་གནས་ཁང་དུ་ཞུགས་པ་བླངས་པ་ལའང་ཉེས་པ་མེད་དོ། །རྔོན་པས་རི་དྭགས་ལ་མདའ་དུག་ཅན་ཕོག་པ་གཙུག་ལག་ཁང་དུ་འོངས་པ་དང་རྔོན་པས། རི་དྭགས་འདི་མདའ་དུག་ཅན་གྱིས་ཕོག་པས་ངེས་པར་འཆི་ཡིས་སླར་བྱིན་ཅིག །མ་བྱིན་པས་བོར་ཏེ་སོང་བའི་འོག་ཏུ་རི་དྭགས་དེ་ཤི་ནས་ཇི་ལྟར་བྱ་བ་མ་ཤེས་པར་གསོལ་བས། དེ་ཤི་ན་དེ་དག་ལ་སྦྱིན་པར་བྱ་བ་ཉིད་དོ། །

3) སྲོག་གཅོད་པའི་ཕམ་པ་ལ་བཞི།

༈ སྲོག་གཅོད་པའི་ཕམ་པ་ལ་བཞི་ལས། རྣམ་འབྱེད་ཀྱི་སྐབས་ནས་འབྱུང་བ་ནི། མཉན་ཡོད་ན་དགེ་སློང་བྲན་པ་དང༌། སྐྱོང་བ་ཞེས་བྱ་བ་མཐུན་པ་གཉིས་འཁོད་པ་ལས། སྐྱོང་བ་ན་ནས་བྲན་པས་ནད་གཡོག་བྱེད་པ་ན་སྐྱོང་བས་མཚན་མོ། བཀྲེས་སོ། །སྐོམ་མོ་ཞེས་སྒྲ་བསྒྲགས་པས། བྲན་པས། སྐྱོང་བ། རབ་ཏུ་བྱུང་བའི་སེམས་ཉེ་བར་ཞོག་ཅིག །ད་ལྟ་སྨན་ཡོད་ཀྱང་བྱིན་ལེན་སྟོབ་པའང་མེད་ན་སྨན་ལྟ་ཅི་སྨོས། སྐྱོང་བ་སོ་སོར་རྟོག་པ་མ་མངའ་བ་ཡིན་པས། ཁོ་བོ་བཀྲེས་སོ། །སྐོམ་མོ་ཞེས་སྒྲ་སྒྲོག་བཞིན་པ་ལས་ནམ་ལངས་པ་དང༌། བྲན་པས། སྐྱོང་བ། ཁོ་བོས་སྨན་པ་ལ་དྲིས་ཏེ་འོང་གི་བར་དུ་སོ་ཤིང་དོར་ཅིག་ཅེས་སྨྲས་ནས་སྨན་པའི་གན་དུ་སོང་སྟེ། གཞོན་ནུ་ཞིག་ན་བས་འཕྲོད་པའི་(༡༠༩བ)སྨན་སྟོན་ཅིག །སྨན་འདི་དང་འདི་ལྟ་བུ་ལགས་སོ། །དེའི་བར་ལ་སྐྱོང་བས་སོ་ཤིང་དོར་བ་དང༌། དེ་ལ་དགེ་སློང་རྣམས་ཀྱིས། ཅིའི་ཕྱིར་མཚན་མོ་སྒྲ་སྒྲོག །ཁོ་བོ་ཤིན་ཏུ་བཀྲེས་སྐོམ་མོ། །དགེ་སློང་ཞིག་གིས། ཁོ་བོ་ལ་ཆུའི་ཐུག་པ་ཡོད་ན་འཐུང་ངམ། འཐུང་ངོ་ཞེས་དེ་འཐུངས་སོ། །གཞན་དག་གིས། ཁོ་བོ་ཅག་ལ་འོ་ཐུག་དང༌། ཞོ་ཐུག་དང༌། འཁུར་བ་དང༌། ཤ་དང༌། སྤྱན་གཟིགས་ཡོད་ན་མི་ཟའམ། སྐྱོང་བས་ཚངས་པ་མཚུངས་པར་སྤྱོད་པ་སྲུང་བ་དང༌། བརྐམ་ཆགས་ཀྱིས་ཅུང་ཟད་ལོངས་སྤྱད་པས་འགྲངས་དྲགས་ནས་གློས་ཕབ་སྟེ་ཉལ་ལོ། །བྲན་པས་སྨན་པ་དྲིས་ནས་མྱུར་བར་འོངས་ཏེ་སྨན་སྦྱར་ནས། སྐྱོང་བ། ལོངས་ལ་སོ་ཤིང་དོར་ཅིག །བོར་ཟིན་ཏོ། །ལོངས་ལ་ཟོ་ཞིག །སྐྱོང་བས་དེ་རྗེས་སུ་སྲུང་བས་ལངས་སོ། །བྲན་པས་སྨན་བྱིན་ལེན་བྱས་ནས་ཕུལ་བས། ཁ་གཟར་དོ་གསུམ་ཟོས་ནས་གློས་ཕབ་སྟེ་ཉལ་ལོ། །སྐྱོང་བ། ཅིའི་ཕྱིར་མི་ཟ། ཁོ་བོ་མི་འདོད་དོ། །ཁྱོད་ཀྱིས་མཚན་ཐོག་ཐག །ཁོ་བོ་བཀྲེས་སོ། །སྐོམ་མོ་ཞེས་མཐོ་བཙམས་ནས་ད་ནི་མི་འདོད་དོ་ཟེར་ན་ཁྱོད་དུས་ལ་བབ་བོ། །དགེ་སློང་རྣམས་ཀྱིས་བྲན་པ་ལ་སྨྲས་པ། འདི་ལ་བག་བྱོས་ཤིག །འདིས་ཁོ་བོ་ཅག་ལས་ཆུའི་ཐུག་པ་སོགས་ཟོས་སོ། །
བྲན་པས་སྨྲས་པ། སྐྱོང་བ། ཁྱོད་ཀྱིས་དེ་ལྟར་བྱས་པ་བདེན་ནམ། སྐྱོང་བ་ཉེས་པ་དང་བཅས་པས་ཡི་གེ་བགྱངས་ཏེ། བྱས་སོ། །བྲན་པས། ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན། ཁྱོད་དུག་ཟོས་པ་བླའི་མི་མཐུན་པ་ཟོས་པ་ནི་དེ་ལྟ་མ་ཡིན་ནོ། །སྐྱོང་བས་དེ་བདེན་སྙམ་ནས་དུག་ཟོས་པས་སེམས་འཁྲུགས་ནས། བྲན་པ། ཁོ་བོ་ཤིའོ། །ཁོ་བོ་ཤིའོ་ཞེས་ཟེར་རོ། །བྲན་པས་ཐོས་ནས་མྱུར་བར། སྐྱོང་བ། ཅིའི་ཕྱིར་ཀུ་ཅོ་འདོན། སྐྱོང་བས་སྨྲས་པ། ཁྱོད་ན་རེ། ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་ཁྱོད་ཀྱི་ནད་གཡོག་བྱེད་ན། ཁྱོད་དུག་ཟོས་པ་བླའི་མི་མཐུན་པ་ཟོས་པ་ནི་དེ་ལྟ་མ་ཡིན་ནོ་ཟེར་བས། དེ་བདེན་སྙམ་དུ་དུག་ཟོས་སོ། །བྲན་པས་ཡི་ཆད་པའི་བཞིན་གྱིས། ཁྱོད་ཀྱིས་མ་ལེགས་པ་བྱས་སོ་ཞེས་སྨན་པའི་གན་དུ་སོང་བ་དང༌། དུག་དེ་རྣོ་བས་སྨན་པ་ཁྲིད་དེ་འོངས་པ་དང༌། ཤི་བ་མཐོང་ནས་འགྱོད་དེ་གསོལ་བས། ལྷུང་བ་མེད་ཀྱི། ནད་པ་ལ་འཆི་བའི་སེམས་པ་དང་རྗེས་སུ་མཐུན་པའི་ཉེ་བར་སྒྲུབ་པ་དེ་ཉེ་བར་བསྒྲུབ་པར་མི་བྱའོ། །
མཉན་ཡོད་ན་རྔོན་པ་ལས་རབ་ཏུ་བྱུང་བའི་དགེ་སློང་མཆུ་ཅན་དང༌། ཁྱིམ་བདག་ལས་རབ་ཏུ་བྱུང་བའི་དགེ་སློང་ཤི་རི་ཀ་གཉིས་འཁོད་པ་ལས། རེ་ཞིག་ན་མཆུ་ཅན་གྱི་ཚ་བོ་གཉིས་ཕ་མ་དང་བྲལ་ནས་འཁྱམ་པ་ན་རྒྱལ་བྱེད་(༡༡༠ན)ཚལ་དུ་ཕྱིན་ཏེ་སྒོ་ན་སྡོད་པ་མཆུ་ཅན་གྱིས་བཞིན་གཟུགས་ལས་ངོ་ཤེས་ནས། ཁྱེད་གཉིས་ཀྱི་ཕ་མ་གར་དོང༌། ཤིའོ། །དེ་ཉེ་དུ་ལ་མཉེས་གཤིན་པས་ཐོས་ནས་མཆི་མ་དང་བཅས་པའི་སྐད་ཀྱིས་འདུག་པ་དང་དགེ་སློང་རྣམས་ཀྱིས། མཆུ་ཅན། ཁྱེའུ་འདི་གཉིས་སུ། བདག་གི་ཚ་བོ་གཉིས་ཡིན་ནོ། །འདི་གཉིས་ཅིའི་ཕྱིར་མི་སྡུད། བདག་ཀྱང་དགའ་བས་བསོད་སྙོམས་སྒྲུབ་ན་འདི་གཉིས་ཅིས་སྡུད། དགེ་སློང་དག་གིས་སྨྲས་པ། འདི་གཉིས་དགེ་སློང་རྣམས་ལ་འདབ་མ་དང༌། མེ་ཏོག་དང༌། འབྲས་བུ་དང༌། སོ་ཤིང་འབུལ་དུ་ཆུག་དང་ལྷུང་བཟེད་ཀྱི་ལྷག་མ་སྦྱིན་ནོ། །མཆུ་ཅན་གྱིས་དེ་གཉིས་བླངས་ནས། དེ་གཉིས་ཀྱང་གྲིམས་པ། ལེ་ལོ་མེད་པ། སྒྲུབ་ཕོད་པ་ཡིན་པས་དགེ་སློང་རྣམས་ལ་འདབ་མ་དང་མེ་ཏོག་ལ་སོགས་པ་ཕུལ་བས་དེ་རྣམས་ཀྱིས་ཀྱང་དེ་གཉིས་ལ་ལྷུང་བཟེད་ཀྱི་ལྷག་མ་བྱིན་པས་གོས་ཟས་བཟང་པོས་པགས་པ་དང་ཤ་དང་ཁྲག་རྟས་ཤིང་སྟོབས་དང་། བསྙེམས་པ་དང་ལྡན་པར་གྱུར་ཏོ། །
དེ་གཉིས་རེ་ཞིག་ན་རྒྱལ་བྱེད་ཚལ་གྱི་སྒོ་ན་རྩེ་ཞིང་འཁོད་པ་དེ་གཉིས་ཀྱི་ཉེ་དུ་ལག་ན་མདའ་གཞུ་ཐོགས་ཤིང་རི་དྭགས་གཤོར་དུ་འདོང་བ་དག་གིས་མཐོང་ནས། ཁྱེའུ་གཉིས། ཁྱེད་གང་ལས་འདིར་འོངས། འདི་ན་བདག་ཅག་གཉིས་ཀྱི་ཞང་པོ་རབ་ཏུ་བྱུང་བ་དེའི་གན་ན་འཁོད་དོ། །དེ་དག་གིས་སྨྲས་པ། ཁྱེད་གཉིས་ཀྱི་ཞང་པོ་དེ་ཡང་དགེ་སྦྱོང་ལས་མེད་པ་རྣམས་ཀྱི་ནང་དུ་རབ་ཏུ་བྱུང་ན། ཁྱེད་གཉིས་ཀྱང་ལས་མེད་པར་བྱེད་དམ། ཚུར་ཤོག །ཕའི་ལས་སྒྲུབས་ཤིག །ཁོ་བོ་ཅག་གཉིས་ལ་ཞང་པོས་ཕན་བཏགས་པས་དང་པོར་དེ་ལ་དྲིའོ་ཞེས་དེ་གཉིས་ཀྱིས་མཆུ་ཅན་གྱི་གན་དུ་ཕྱིན་ནས། ཞང་པོ། བདག་ཅག་གཉིས་ཕའི་ལས་རྗེས་སུ་སྒྲུབ་ཏུ་མཆིའོ། །ཁོ་བོས་ཁྱེད་གཉིས་དད་པས་སྦྱིན་པར་བྱ་བས་བསྐྱེད་ན་ད་ཅིའི་ཕྱིར་འདི་ལྟ་བུ་བྱེད། ཞང་པོ། བདག་ཅག་གཉིས་མགོ་ལ་གསེར་གྱི་ཕྲེང་བས་བཅིང་བ་ནི་ངོ་ཚའི། ཕའི་ལས་རྗེས་སུ་སྒྲུབ་པ་ནི་དེ་ལྟ་མ་ལགས་ཀྱིས་མཆིའོ་ཞེས་དེ་གཉིས་ཀྱིས་དེའི་ཚིག་ཚིག་མ་ཡིན་པར་བྱས་ཏེ་སོང་ནས་དེ་གཉིས་རི་དྭགས་གསོད་ཅིང་འཚོའོ། །
རེ་ཞིག་ན་ཤི་རི་ཀ་ན་ནས་མཆུ་ཅན་གྱིས་ནད་གཡོག་བྱེད་པ་ནི་ཤི་རི་ཀ་སྡུག་བསྔལ་གྱིས་ཉེན་ནས། བདག་ཚུལ་ཁྲིམས་དང་ལྡན་པས་ཡུལ་གཞན་དུ་སོང་ན་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ནའང་ལྷ་རྣམས་ཀྱི་ནང་དུ་སྐྱེ་བས་བདག་ཉིད་གསད་དོ་སྙམ་པ་ལས། ཡང་བདག་ཉིད་གསོད་པ་སྡུག་བསྔལ་བ་ཡིན་གྱིས་གསོད་པར་བྱེད་པ་གཞན་སུ་ཡོད་སྙམ་དུ་དཔྱད་པ་དང༌། མཆུ་ཅན་གྱི་ཚ་བོ་གཉིས་དྲག་ཤུལ་ཅན། ལག་པ་དམར་བ། རབ་ཏུ་(༡༡༠བ)བསྣུན་པ་ལ་ཞུགས་པ། གཞན་གྱི་སྲོག་གཅོད་པས་འཚོ་བ་ཡིན་པས་དེ་གཉིས་ཀྱིས་བདག་གསོད་པར་ནུས་སོ་སྙམ་པའི་བློ་སྐྱེས་ནས་མཆུ་ཅན་ལ། ཁྱོད་ཀྱི་ཚ་བོ་གཉིས་མི་སྣང་ན་གར་སོང༌། དེས་སྨྲས་པ། ཁྱོད་དེ་གཉིས་ཀྱི་མིང་མ་འཛིན་ཅིག །ཁོ་བོས་དེ་གཉིས་དད་པས་སྦྱིན་པར་བྱ་བས་བསྐྱེད་ན་དེ་གཉིས་ད་ཉེས་པར་སྤྱོད་པའི་ལས་ལ་ཞུགས་ཤིང་ཕའི་ལས་རྗེས་སུ་སྒྲུབ་སྟེ། གཞན་གྱི་སྲོག་གཅོད་པས་འཚོའོ། །
ཤི་རི་ཀས་སྨྲས་པ། དེ་གཉིས་ལ་ཀུན་ནས་མནར་སེམས་མ་སྐྱེད་ཅིག །དེ་ནི་འདུ་འཛིའི་རིག་པ་ཡིན་ཏེ། དེ་གཉིས་རྒྱལ་བྱེད་ཚལ་ན་འཁོད་པའི་ཚེ་དེ་གཉིས་ཀྱིས་གྲོག་སྦུར་ཕྲ་མོའི་སྲོག་ཀྱང་མ་བཅད་དོ། །དེ་གཉིས་དེ་ལྟ་བུའི་ལས་བྱེད་ན་དེ་ལས་དབྲལ་བར་བྱ་ཞིང་ཁྱོད་ག་ཤེད་དུ་འགྲོ་བའི་ཚེ་ཁོ་བོ་བསྲུང་བ་གཞན་མེད་པས། དེ་གཉིས་སྣང་ན་ཁོ་བོའི་གན་དུ་ཐོངས་ལ་དེ་གཉིས་ཁོ་བོ་སྲུང་དུ་ཆུག་ཅིག །རེ་ཞིག་ན་མཆུ་ཅན་བསོད་སྙོམས་ལ་ཞུགས་པ་ན་ཚ་བོ་གཉིས་ཚོང་འདུས་ན་ཤ་འཚོང་འདུག་པས་མཐོང་ནས་ལངས་ཏེ་དེའི་རྐང་པ་གཉིས་ལ་གཏུགས་པ་དང༌། ཁྱེའུ་གཉིས། ཁོ་བོ་ཁྱོད་གཉིས་ཀྱི་ཅིར་འོང༌། ཞང་པོར་མཆིའོ། །ཤི་རི་ཀ་ཅིར་འོང༌། དེ་ཡང་ཞང་པོར་མཆིའོ། །དེ་ན་ན་ཁྱེད་གཉིས་དེ་ལ་ལྟར་མ་སོང་ངམ། བདག་ཅག་གིས་མ་འཚལ་ཏོ། །ད་སོང་ཞིག །བདག་ཅག་གིས་བྱ་བ་ཅི་བགྱི། དེ་ཅི་ཟེར་བ་བཞིན་གྱིས་ཤིག །དེ་གཉིས་ཤི་རི་ཀའི་གན་དུ་ཕྱིན་ནས་འཁོད་དོ། །ཤི་རི་ཀས་སྨྲས་པ། མཆུ་ཅན་ཁྱེད་གཉིས་ཀྱི་ཅིར་འོང༌། ཞང་པོར་མཆིའོ། །ཁོ་བོར་ཅིར་འོང༌། །ཞང་པོར་མཆིའོ། །ཁོ་བོ་ན་ན་ཁྱེད་གཉིས་ཀྱིས་མ་བལྟས་སོ། །བདག་ཅག་གཉིས་ཀྱིས་མ་འཚལ་ཏེ། ད་གཟོད་ཐོས་ནས་འོངས་སོ། །ཁྱེད་གཉིས་ཁོ་བོ་ལྷ་རྣམས་ཀྱི་ནང་དུ་སྐྱེ་བར་འདོད་དམ། གཞན་ཡང་ལྷ་རྣམས་ཀྱི་ནང་དུ་སྐྱེ་བར་འཚལ་ན། ཞང་པོ་ལྟ་ཅི་སྨོས། དེ་ལྟ་ན་ཁོ་བོ་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ནའང་ལྷ་རྣམས་ཀྱི་ནང་དུ་སྐྱེ་བར་འགྱུར་ན། བདག་ལ་རྩོམ་པར་བྱེད་པ་སྡུག་བསྔལ་བ་ཡིན་གྱིས་ཁྱེད་གཉིས་ཀྱིས་ཁོ་བོ་སོད་ཅིག །གལ་ཏེ་གཞན་ཞིག་གིས་ཁྱོད་གསོད་ནའང་བདག་ཅག་གཉིས་ཀྱིས་དེ་དགུམ་པར་བགྱི་ན་བདག་ཅག་གཉིས་ཀྱིས་ཞང་པོ་གསོད་པ་ལྟ་ཅི་སྨོས། མཆུ་ཅན་གྱིས་ཁྱེད་གཉིས་ལ་ཅི་བསྒོ། ཞང་པོ་ཅི་གསུང་བ་གྱིས་ཟེར་རོ། །
དེ་ལྟ་ན་ཁོ་བོ་འདི་སྐད་ཟེར་ཏེ། ཁོ་བོ་སྡུག་བསྔལ་གྱི་ཚོར་བས་ཉེན་གྱིས་ཁོ་བོ་སོད་ཅིག །དེ་གཉིས་ཀྱི་བསམ་པ་ལ་འདི་དང་ཞང་པོ་སྔར་གྲོས་བྱས་ནས་ཞང་པོས་འདིའི་གན་དུ་བཏང་ངོ་སྙམ་ནས་དེ་གཉིས་ལས་གཅིག་ཆེས་དྲག་ཤུལ་ཅན་ཡིན་པ་དེས་མཚོན་རྣོན་པོས་དེའི་མགོ་བཅད་ནས་རས་(༡༡༡ན)ཀྱིས་གཡོགས་ཏེ་འཁོད་དོ། །མཆུ་ཅན་འོངས་པའི་ཚེ་དེ་རས་ཀྱིས་གཡོགས་པ་ནས། ཁྱེད་གཉིས་འཁོད་བཞིན་དུ་འདི་ཉལ་ལམ། ནང་ཡང་མི་ལྡང་བ་དེ་ལྟར་ཉལ་ལོ། །འདི་གཉིས་སྔོན་མ་བྱུང་བའི་ཚིག་སྨྲ་བས་དྲིའོ་སྙམ་ནས་དེ་གཉིས་ལ་དྲིས་པ་དང་སྐབས་དེ་རྒྱས་པར་བརྗོད་དོ། །མཆུ་ཅན་ཡིད་མ་བདེ་ནས་རས་བཤུས་པས་དེ་མཐོང་ནས། དེ་ལ་བདག་གིས་མཚོན་ཐོགས་པ་གཉེར་བར་མ་གྱུར་ཏམ་སྙམ་ནས་གསོལ་བ། དགེ་སློང་དེ་ལ་ལྟུང་བ་མེད་དེ། མི་ཤེས་པ་ལ་འཆི་བའི་དགྲ་བོ་མ་སྨྲས་པར་དེའི་ནད་གཡོག་ཏུ་མི་བཞག་གོ་ཞེས་སོགས། མཉན་ཡོད་ན་དགེ་སློང་ཞིག་གི་ལྷུང་བཟེད་ལ་བཙའ་ཞུགས་ནས་དེ་ལ་དགེ་སློང་རྣམས་ཀྱིས། ཁྱོད་ཀྱི་ལྷུང་བཟེད་འདི་བཙའ་ཞུགས་ན་ཅིའི་ཕྱིར་མི་སྲེག །དེས་སྨྲས་པ། རྫ་བོ་དང༌། ལྕི་བ་དང༌། ཏིལ་གྱི་ཚིགས་མ་དང༌། ཡོ་བྱད་གཞན་ཡང་མང་དུ་དགོས་སོ། །ཅི་ལྷུང་བཟེད་མེད་པས་འགྲུབ་བམ། ལྷུང་བཟེད་མེད་པས་མི་འགྲུབ་སྟེ། ཁང་ཁྱིམ་ཆེ་གེ་མོ་ན་དགེ་སློང་ཞིག་ནད་ཀྱིས་བཏབ་ནས་ཡུན་མི་རིང་བར་དུས་བྱེད་པར་འགྱུར་བ་དེའི་ལྷུང་བཟེད་གསལ་བ། ཟླུམ་པ། ལོངས་སྤྱད་པར་བཟོད་པ་དེ་བླང་བར་བྱའོ། །ཁྱོད་ལྷུང་བཟེད་ཀྱི་ཕྱིར་དུ་འདི་ལྟ་བུའི་སེམས་བསྐྱེད་དུ་རུང་ངམ། དེ་ངོ་ཚ་ནས་ཅང་མི་སྨྲའོ། །མཉན་ཡོད་ན་དགེ་སློང་ཞིག་གི་སྣམ་སྦྱར་བརྙིངས་ཤིང་དྲི་མས་གོས་ལ་རྡོལ་བ་ན། ཅིའི་ཕྱིར་མི་འཁྲུ། མི་འཚེམ། ཁ་མི་སྒྱུར། འདི་ལ་ཟངས་དང༌། ཆུ་དང༌། ཤིང་དང༌། སྐུད་པ་དང༌། ཚོན་དང༌། ཡོ་བྱད་གཞན་ཡང་མང་དུ་དགོས་སོ། །ཅི་སྣམ་སྦྱར་མེད་པས་འགྲུབ་བམ། མི་འགྲུབ་སྟེ་ཁང་ཁྱིམ་ཆེ་གེ་མོ་ན་དགེ་སློང་ཞིག་ནད་ཀྱིས་བཏབ་ནས་ཡུན་མི་རིང་བར་དུས་བྱེད་པར་འགྱུར་བ་དེའི་སྣམ་སྦྱར་དམར་སེར་ཚོན་གསར་པས་ཁ་སྒྱུར་བ། ལོངས་སྤྱད་པར་བཟོད་པ་དེ་བླང་བར་བྱའོ། །ཁྱོད་སྣམ་སྦྱར་གྱི་ཕྱིར་དུ་འདི་ལྟ་བུའི་སེམས་སྐྱེད་དུ་རུང་ངམ། དེ་ངོ་ཚ་ནས་ཅང་མི་སྨྲའོ། །སྐབས་དེ་གསོལ་བས། རྫས་ཀྱི་ཕྱིར་གཞན་འཆི་བར་འདོད་པར་མི་བྱའོ། །
མཉན་ཡོད་ན་ཁྱིམ་བདག་སྟོབས་སྡེ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་ཆུང་མ་ལ་ཁྱེའུ་གཟུགས་བཟང་བ། ལྟ་ན་སྡུག་པ། མཛེས་པ་ཞིག་བྱུང་ངོ༌། །ཉི་མ་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས། མིང་འདོགས་པ་ན། ཁྱེའུ་འདི་ཁྱིམ་བདག་སྟོབས་སྡེའི་བུ་ཡིན་པས་སྡེ་པ་ཞེས་མིང་བཏགས་སོ། །ཡང་དེའི་ཆུང་མ་ལ་བུ་ཞིག་བཙས་ནས་ཉེ་སྡེ་ཞེས་མིང་བཏགས་སོ། །རེ་ཞིག་ན་(༡༡༡བ)དེའི་ཆུང་མ་ཤི་ནས་དེ་གོས་སྔོ་སེར་དཀར་དམར་གྱིས་ཁྱོགས་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ་མྱ་ངན་བསངས་ནས་འཁོད་དོ། །ཁྱིམ་བདག་སྟོབས་སྡེས། གལ་ཏེ་བདག་གིས་ཆུང་མ་གཞན་བླངས་ན་ཁྱེའུ་གཉིས་སྡུག་བསྔལ་བར་འགྱུར་གྱིས་སྡེ་བའི་ཁྱིམ་དབུབ་བོ་སྙམ་ནས་དེའི་ཁྱིམ་ཕུབ་བོ། །རེ་ཞིག་ན་ཁྱིམ་བདག་སྟོབས་སྡེ་ན་ནས་སྨན་གྱིས་མ་ཕན་པར་དེས་སྡེ་པ་དང་ཉེ་སྡེ་གཉིས་ལ་སྙིང་བཞོས་ནས། བསགས་པ་ཀུན་གྱི་མཐའ་འཛད་ཅིང༌། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་ཤི་བ་དང༌། ཁྱེའུ་གཉིས་ཀྱིས་གོ་སྔོ་སེར་དཀར་དམར་གྱིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ་མྱ་ངན་བསངས་ནས་འཁོད་དོ། །སྡེ་པས་ཉེ་སྡེ་ལ་སྨྲས་པ། བདག་ཅག་ཕ་གསོན་པའི་ཚེ་གཞན་གྱིས་སྲོག་གསོ་ན། ད་དེ་དུས་ལ་བབ་པས་ཁྱིམ་གྱི་བྱ་བ་དམའ་བ་ཡལ་བར་བོར་ན་ཉེ་དུ་རྣམས་ཀྱིས་ཁྲེལ་བར་འགྱུར་གྱིས། ཁྱོད་ཁྱིམ་གྱི་བྱ་བ་བྱོས་ཤིག །ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །ཉེ་སྡེས་སྨྲས་པ། དེ་ལྟར་མཛོད་ཅིག །སྡེ་པ་ཟོང་ཐོགས་ཏེ་ཡུལ་གཞན་དུ་སོང་བ་དང་དེས་ཁེ་སྤོགས་མང་པོ་གྲུབ་ནས་ཉེ་སྡེ་ལ། ཁོ་བོས་ཁེ་སྤོགས་མང་པོ་གྲུབ་སྟེ་རིང་པོར་མི་ཐོགས་པར་འོང་གིས་བརྟན་པ་དང༌། སྤུངས་ཆེར་གྱིས་ཤིག་ཅེས་སྤྲིང་ཡིག་བསྐུར་ཏོ། །དེས་ཕྱིར་ཞིང་ཁེ་སྤོགས་མང་པོར་གྲུབ་པས་ཡང་ཡང་ཡི་གེ་བསྐུར་ཏོ། །
ཆོས་ཉིད་ཀྱིས། གང་ཕྱིར་རྙེད་པ་དེ་ཕྱིར་ཆགས། །རྙེད་ལ་ཆགས་པ་སྐྱེ་བར་འགྱུར། །ཆགས་པས་ཟིལ་ནོན་མི་ཡིས་ནི། །བྱ་དང་བྱ་མིན་རྟོགས་མི་འགྱུར། །ཞེས་བྱ་བ་ཡིན་པས། དེ་ཤིན་ཏུ་ཐག་རིང་པོར་སོང་བས་ཡི་གེ་བསྐུར་བ་ཆད་དོ། །སྡེ་པའི་ཆུང་མ་གོས་དང་ཟས་བཟང་བས་ཉོན་མོངས་པས་གཟིར་ཏེ་ཉེ་སྡེ་ལ་མཚན་མ་སྟོན་པ་དང༌། ཉེ་སྡེས་དབང་པོ་ཕྱིར་བསླན་ཏེ་འདུག་གོ །སྡེ་པའི་ཆུང་མ་ངོ་ཚ་མེད་པར་གྱུར་ནས། ཉེ་སྡེ། ཚུར་སྤྱོན། འདི་དང་འདི་ལྟ་བུ་བྱའོ། །ཉེ་སྡེས་རྣ་བ་བཀག་སྟེ། ཁྱོད་ཁོ་བོའི་མ་དང་འདྲ་ཡིས་དེ་སྐད་མ་ཟེར་ཅིག །བུད་མེད་ནི་མ་བསླབས་པར་མཁས་པ་ཡིན་པས། དེ་ཉེ་དུའི་ཁྱིམ་དུ་སོང་ནས་གོས་དྲི་མ་ཅན་བགོས་ཏེ་ཁྲི་ཞིག་པ་ལ་འདུག་གོ །མ་དང་ནང་མི་དག་གིས། ཁྱོད་ཅིའི་ཕྱིར་འདི་ལྟར་འདུག །དེས་སྨྲས་པ། བུད་མེད་ཀྱི་ཡུལ་ལ་གང་གནོད་པ་དེ་མི་ཤེས་སམ། ཁོ་མོ་ཉོན་མོངས་པས་ཤིན་ཏུ་གནོད་དོ། །ཁྱོད་ཀྱི་སྐུད་པོ་ཉེ་སྡེ་གཟུགས་བཟང་བ། ལྟ་ན་སྡུག་པ། མཛེས་པ་ཡིན་ན། ཅིའི་ཕྱིར་དེ་ལ་མི་འཚོལ། བདག་གིས་དེ་ལ་བཅོལ་ཀྱང་མ་གྲུབ་བོ། །བུད་མེད་གཞན་དག་ཁྱིམ་ཐབ་ཆེས་ཡུན་རིང་པོ་ནས་སོང་སྟེ་དུས་སུ་མ་འཁོར་བ་དེ་དག་དཀའ་བ་བྱེད་པ་ཡིན་ནོ། །སྡེ་པའི་ཆུང་མས་སྨྲས་པ། དེ་དག་ལ་ཁྱིམ་ཐབ་ཀྱིས་དུས་སུ་གཏམ་རྨེད་པར་བྱེད་དེ། ཁོ་མོ་ལའང་(༡༡༢ན)ཁྱིམ་ཐབ་གསོན་པའི་ཚེ་དུས་སུ་སྤྲིང་ཡིག་བསྐུར་ལ། ད་མི་བསྐུར་བས་དུས་ལ་བབ་གོར་མ་ཆག་གོ །ཁོ་མོ་གཞནལ་མི་སྦྱིན་ན་ཁོ་མོས་རིགས་གཉིས་ཀ་ལ་མི་སྙན་པ་འབྱུང་བར་བྱའོ། །དེ་ནས་སྡེ་པའི་ཆུང་མའི་ཕ་མ་དང༌། ཉེ་དུ་དང༌། རྩ་ལག་དག་གིས་གྲོས་བྱས་ཏེ། འདི་བཟློག་ཏུ་མ་བཏུབ་པས་ངེས་པར་རིགས་གཉིས་ཀ་ལ་མི་སྙན་པ་འབྱུང་གིས་ཉེ་སྡེ་མགྲོན་དུ་བོས་ལ་དེ་ལ་འདི་སྦྱིན་ནོ་ཞེས་དེ་དག་གིས་ཉེ་སྡེ་མགྲོན་དུ་བོས་ནས། ཉེ་སྡེ། ཁྱོད་ཀྱི་ཕུ་བོའི་ཆུང་མ་འདི་ཉོན་མོངས་པས་ཤིན་ཏུ་དབྱེན་སྤྱོ་བར་གྱུར་པས་ངེས་པར་རིགས་གཉིས་ཀ་ལ་མི་སྙན་པར་འབྱུང་བས། ཁྱོད་འདི་དང་ལྷན་ཅིག་སྤྱོད་ན་ལེགས། མི་བྱེད་ན་འདི་གཞན་ལ་སྦྱིན་ནོ། །ཉེ་སྡེས་བསམས་པ། འདི་བདག་ཅག་གིས་བྱིས་པ་ནས་བསྐྱེད་པ་ཡིན་པས། གཞན་དུ་འགྲོ་ཞིང་རིགས་གཉིས་ཀ་ལ་མི་སྙན་པ་འབྱུང་ན་མ་ལེགས་ཀྱིས། བདག་གིར་བྱའོ་སྙམ་ནས་ཁས་བླངས་སོ། །
དེས་དེ་རང་གི་ཁྱིམ་དུ་ཁྲིད་ནས་དེ་དང་དགའ་མགུར་སྤྱད་པས་མངལ་ན་གནས་པའི་མཚན་མ་བྱུང་ནས། དེ་ལ་ན་ཟླ་དག་གིས། འདི་གང་ལས་འོངས། ཁོ་མོ་ཚུལ་ཁྲིམས་དང་ལྡན་པ་ཡིན་གྱིས་ཁོ་མོ་ལ་བརྫུན་གྱིས་སྐུར་བ་མ་འདེབས་ཤིག །དེའི་གྲོགས་མོ་ཆེས་མཛའ་བ་ཞིག་ཡོད་པ་དེས། ཅིའི་ཕྱིར་གསོང༌། འདི་ངེས་པར་གྲགས་པར་འགྱུར་གྱིས་སྨྲོས་ཤིག །སྡེ་པའི་ཆུང་མས་སྨྲས་པ། ཉེ་སྡེས་ལས་སོ། །ལེགས་ཏེ་ཁྱིམ་ཐབ་བམ་སྐུད་པོ་ལས་ཀྱང་རུང་འདི་ལ་ཉེས་པ་མེད་དོ། །དེ་ནས་སྡེ་པས་ཉེ་སྡེ་ལ། ནུ་བོ། བརྟན་པ་དང་སྤུངས་ཆེར་གྱིས་ཤིག །ཁོ་བོའང་ཡི་གེའི་རྗེས་བཞིན་ཁོ་ནར་འོང་ངོ་ཞེས་སྤྲིང་ཡིག་བསྐུར་རོ། །ཉེ་སྡེས་ཐོས་ནས་ཉམ་ང་སྟེ་བསམས་པ། བདག་ཕུ་བོ་དེ་ལ་སྤྲིན་བཞིན་དུ་ལྟ་འདོད་པའི་ཚེ་ནི་མ་འོངས་ལ། ད་བདག་གིས་ཉེས་པ་འདི་ལྟ་བུ་བྱས་པའི་ཚེ་འོང་བར་གྱུར་ཏེ་ཁོན་རྣམས་ཀྱི་ནང་ན་བུད་མེད་ཀྱི་ཁོན་ཐ་ཆད་ཡིན་པས་བདག་ལ་གནོད་པ་བྱེད་པའི་གནས་ཡོད་ཀྱིས་བྲོས་ཏེ་འགྲོའོ། །ཡང་བསམས་པ། ཡུལ་གཏོང་བ་ནི་དཀའ་ཡིས་དགེ་སྦྱོང་འདི་དག་རྒྱལ་པོ་གསལ་རྒྱལ་ལས་གཞོན་ནུའི་སྤང་བ་ཐོབ་པས། དེ་དག་གི་ནང་དུ་རབ་ཏུ་བྱུང་ན་དེས་ཅི་ཞིག་བྱ་སྙམ་ནས་ཉེ་སྡེ་རྒྱལ་བྱེད་ཚལ་དུ་སོང་སྟེ་དགེ་སློང་ཞིག་ལ། འཕགས་པ། བདག་རབ་ཏུ་འབྱུང་བར་འཚལ་ལོ། །བཞིན་བཟང༌། ལེགས་ཏེ། ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་བྱུང་ཞིག །དགེ་སློང་དེས་ཉེ་སྡེ་རབ་ཏུ་བྱུང༌། བསྙེན་པར་རྫོགས་པར་བྱས་ནས་ཉི་མ་གཉིས་གསུམ་དུ་ཀུན་སྤྱོད་བསླབས་ཏེ། བཞིན་བཟང༌། རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་ཀྱིས་འཚོ་བར་གྱིས་ཤིག །ཉེ་སྡེས་སྔ་དྲོ་ཤམ་ཐབས་བགོས། ལྷུང་བཟེད་དང་(༡༡༢བ)ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་སྤྱོད་ཡུལ་ལ་མི་མཁས་པས་རིམ་གྱིས་རང་གི་ཁྱིམ་དུ་ཞུགས་པ་དང༌། སྡེ་པའི་ཆུང་མས་མཐོང་ནས་བྲང་བརྡུངས་ཏེ་སྨྲས་པ། ཅིའི་སླད་དུ་ཁྱོད་ཀྱིས་ཁོ་མོ་སྤངས་ཏེ་རབ་ཏུ་བྱུང༌། ཁྱོད་ཀྱང་དེ་སྐད་ཟེར་རམ། བདག་ཕུ་བོ་དེ་ལ་སྤྲིན་བཞིན་དུ་ལྟ་འདོད་པའི་ཚེ་མི་འོངས་ལ། བདག་གིས་ཉེས་པ་འདི་ལྟ་བུ་བྱས་པ་ན་དེ་འོང་བར་གྱུར་ཏེ། ཁོན་རྣམས་ཀྱི་ནང་ན་བུད་མེད་ཀྱི་ཁོན་ཐ་ཆད་ཡིན་པས་བདག་ལ་གནོད་པ་བྱེད་པའི་གནས་ཡོད་དོ། །
སྡེ་པའི་ཆུང་མས་སྨྲས་པ། ཁྱོད་ཀྱིས་རང་ཉིད་ཐར་པར་བྱས་མོད། ཁོ་མོས་ཇི་ལྟར་བྱ། ཁྱོད་ཉིད་ཤེས་ཞེས་སྨྲས་ཏེ་སོང་ངོ༌། །ཉེ་སྡེའི་ཆུང་གྲོགས་སྔོན་སྨན་པ་སྤོས་འཚོང་གི་ཁྱེའུ་ཞིག་ཡོད་པ་དེ་སྡེ་པའི་ཆུང་མའི་ཁྱིམ་དུ་སོང་སྟེ། ཉེ་སྡེ་གར་སོང་དྲིས་པས། རབ་ཏུ་བྱུང་ངོ༌། །ཡིད་མི་ཆེས་ན་རྒྱལ་བྱེད་ཚལ་དུ་སོང་ལ་ལྟོས་ཤིག །དེ་རྒྱལ་བྱེད་ཚལ་དུ་སོང་བ་ན་རབ་བྱུང་ཐམས་ཅད་ཆ་ལུགས་འདྲ་བས་གང་ཡིན་མ་ཤེས་པར། དགེ་སློང་ཞིག་ལ། མཉན་ཡོད་པའི་ཁྱིམ་བདག་གི་བུ་ཉེ་སྡེ་འདིར་རབ་ཏུ་བྱུང་ན་གང་ན་མཆིས། དེས་བསྟན་ནས་དེ་ཉེ་སྡེའི་དྲུང་དུ་སོང་སྟེ། ཁྱོད་ཀྱིས་ཅི་ཞིག་བསྒྲུབས་ན་ཁོ་བོ་ལའང་མ་དྲིས་པར་རབ་ཏུ་བྱུང༌། ཁྱོད་ཀྱང་དེ་སྐད་ཟེར་རམ། བདག་ཕུ་བོ་ལ་སྤྲིན་བཞིན་དུ་ལྟ་འདོད་པའི་ཚེ་མ་འོངས་ལ། ད་ཉེས་པ་འདི་ལྟ་བུ་བྱས་པ་ན་དེ་འོང་བར་གྱུར་ཏེ། ཁོན་རྣམས་ཀྱི་ནང་ན་བུད་མེད་ཀྱི་ཁོན་ཐ་ཆད་ཡིན་པས་བདག་ལ་གནོད་པ་བྱེད་པའི་གནས་ཡོད་དོ། །སྤོས་འཚོང་ཁྱེའུ་ན་རེ། ཁོ་བོ་ཅག་སྨན་པའི་ཕྱེད་ཡིན་པས། ཁོ་བོས་མངལ་ན་གནས་པ་རླུགས་པར་བྱ་བ་དེ་ལྟ་བུ་བྱིན་ན། དེས་མངལ་ན་གནས་པ་དེ་དུམ་བུར་ཞིག་པར་འགྱུར་བས་ཁྱོད་ཀྱིས་ཁོ་བོ་ལ་ཅིའི་ཕྱིར་མ་སྨྲས། ད་ཡང་སྦྱིན་ནོ། །ཉེ་སྡེས་དང་དུ་བླངས་སོ། །དེ་ནས་དེས་རྫས་རྣོན་པོ་དག་ཕྱེ་མར་བྱས་ཏེ་བུ་མོ་ཞིག་ལ་གཏད་ནས། ཁྱོད་སྡེ་པའི་ཁྱིམ་དུ་སོང་ལ། སྡེ་པའི་ཆུང་མ་ལ། ཉེ་སྡེ་ན་རེ། ཕྱེ་མ་འདི་ཆུ་དྲོན་མོ་དང་སྦྱོར་ལ་ཐུངས་ཤིག །ཁྱོད་སོས་པར་འགྱུར་རོ་ཞེས་ཟེར་རོ་གྱིས་ཤིག །བུ་མོ་དེས་དེ་སྐད་བྱས་པས་སྡེ་པའི་ཆུང་མས་ཕྱེ་མ་དེ་ཆུ་དྲོན་དང་སྦྱར་ནས་འཐུངས་པས་མངལ་ན་གནས་པ་དེ་དུམ་བུར་ཞིག་ཅིང་མེད་པར་གྱུར་ཏོ། །
དེ་ན་ཟླ་དག་གིས་མཐོང་ནས། ཁྱོད་ཀྱི་མངལ་ན་གནས་པ་དེ་གར་སོང༌། སྡེ་པའི་ཆུང་མ་ན་རེ། ཁོ་མོས་དང་པོ་ཉིད་ནས། ཁོ་མོ་ཚུལ་ཁྲིམས་དང་ལྡན་པ་ཡིན་གྱིས་བརྫུན་གྱིས་སྐུར་བ་མ་འདེབས་ཤིག་ཅེས་མ་སྨྲས་སམ། དེའི་གྲོགས་མོ་ཆེས་མཛའ་བ་དེས། ཁྱོད་ཀྱི་མངལ་ན་གནས་པ་དེ་གར་སོང༌། ཉེ་སྡེས་ཕྱེ་མ་རྣོན་པོ་ཞིག་བྱིན་པས་མངལ་ན་གནས་པ་དེ་དུམ་བུར་ཞིག་གོ །དེ། ཤཱཀྱའི་སྲས་ཀྱི་དགེ་སྦྱང་གི་ཚུལ་ནི་ཚིག་སྟེ་མངལ་ན་གནས་པའང་རླུགས་པར་བྱེད་དོ་ཞེས་སྨོད་པར་(༡༡༣ན)བྱེད་དོ། །ཉེ་སྡེས་སྡིག་པའི་ལས་འདི་ལྟ་བུ་བྱས་སོ་ཞེས་པའི་སྒྲ་མཉན་ཡོད་ཀུན་ཏུ་གྲགས་པའི་སྐབས་དེ་གསོལ་བ་དང༌། སྟོན་པས་ཉེ་སྡེ་ལ། ཁྱོད་ཀྱིས་སྡིག་པའི་ལས་དེ་ལྟ་བུ་བྱས་པ་བདེན་ནམ། མ་བགྱིས་ཏེ། བདག་གིས་རྗེས་སུ་ཡི་རང་བར་ནི་བགྱིས་སོ། །ཉེ་སྡེ་ལ་ལྟུང་བ་མེད་དེ། བྱ་བ་མ་ཡིན་པ་བྱེད་པ་ལ་སེམས་ཀྱིས་རྗེས་སུ་ཡི་རང་བར་མི་བྱའོ། །དེར་སྡེ་པ་ལེགས་པར་དོན་གྲུབ་སྟེ་མཉན་ཡོད་དང་ཉེ་བར་ཕྱིན་པ་དང༌། ཁ་ཅིག་གིས་སྡེ་པའི་ཆུང་མ་ལ། ཁྱོད་ཀྱི་ཁྱིམ་ཐབ་དོན་གྲུབ་སྟེ་མཉན་ཡོད་དང་ཉེ་བར་འོངས་ཀྱིས་སྤྲོ་བ་བསྐྱེད་ཅིག །བུད་མེད་ནི་མ་བསླབས་པར་མཁས་པ་ཡིན་པས་ཡི་ཆད་པའི་སེམས་ཀྱིས་གོས་དྲི་མ་ཅན་གྱོན་ནས་འདུག་གོ །སྡེ་པ་ཁྱིམ་དུ་འོངས་པ་དང༌། ཁྱིམ་བྱི་དོར་མ་བྱས་པ་མཐོང་ནས་བུ་མོ་མངག་གཞུག་མ་ལ་དྲིས་པ། ཁྱིམ་བདག་གི་ཆུང་མ་གར་སོང༌། རྗེའི་སྲས། སྤྱོད་ལམ་བཅད་དེ་ཁྲི་ཞིག་པ་ལ་གནས་སོ། །དེ་ཆུང་མའི་གན་དུ་སོང་ནས། ཁྱོད་ཁོ་བོ་འོངས་པ་མི་བདེའམ། ཁྱོད་བྱོན་པས་མི་བདེ་བ་མ་མཆིས་ཏེ། ཁྱོད་ཀྱི་སྲུང་མ་དེ་ཉིད་རྐུན་མ་ལགས་ཏེ། བཀག་བཞིན་དུ་ཉེ་སྡེས་ནན་གྱིས་ཁོ་མོ་བདག་གིར་བགྱིས་སོ། །དེས་ཁྱོད་ཟིལ་གྱིས་མནན་པ་མ་ཡིན་གྱི་ཁོ་བོ་ཟིལ་གྱིས་མནན་པ་ཡིན་པས་ལོངས་ཤིག །ཁོ་བོས་དེ་ལ་མཚམས་གཅད་པར་བྱའོ། །ཉེ་སྡེ་གང་ན་འདུག །ཁྱོད་བྱོན་པ་ཐོས་ནས་རབ་ཏུ་བྱུང་ངོ༌། །གང་དུ། རྒྱལ་བྱེད་ཚལ་དུའོ། །དེ་མི་འཇིགས་པའི་གྲོང་ཡིན་ནམ་དེར་སོང་ལ་མཚམས་ཆེན་པོ་གཅད་དོ། །ཁ་ཅིག་གིས་ཉེ་སྡེ་ལ། ཁྱོད་ཀྱི་ཕུ་བོ་འོངས་སོ། །ཇི་སྐད་ཟེར། དེ་མི་འཇིགས་པའི་གྲོང་ཡིན་ནམ་དེར་སོང་ལ་མཚམས་ཆེན་པོ་གཅད་དོ་ཟེར་རོ། །ཉེ་སྡེས་བསམས་པ། བདག་ལ་རྒྱལ་པོས་གཞོན་ནུའི་སྤང་བ་བྱིན་མོད། འོན་ཀྱང་བདག་ཉེས་པ་དང་བཅས་པ་ཡིན་པས་འདིར་ཡང་གནོད་པ་བྱེད་པའི་གནས་ཡོད་ཀྱིས་འབྲོས་སོ་སྙམ་ནས་མཁན་པོ་ལ་སྨྲས་པས། བུ། གང་དུ་འགྲོ། རྒྱལ་པོའི་ཁབ་ཏུའོ། །
དེ་ན་ཁོ་བོའི་མཛའ་བཤེས་དགེ་སློང་ཞིག་ཡོད་པ་ལ་སྤྲིང་ཡིག་བསྐུར་གྱིས་སོང་ཞིག་ཟེར་ནས་དེས་དགེ་སློང་དེ་ལ། བདག་གི་ལྷན་ཅིག་གནས་པ་འདི་ཁྱོད་ཀྱི་གན་དུ་བཏང་གིས་བྱམས་པས་སྐྱོངས་ཤིག་ཅེས་བྲིས་ཏེ་ཉེ་སྡེས་སྤྲིང་ཡིག་དེ་ཁྱེར་ནས་སོང་བ་དང༌། དགེ་སློང་དེས་སྤྲིང་ཡིག་བཀླགས་ནས། འོངས་པ་ལེགས་སོ། །ཁྱོད་དེའི་ཉེ་གནས་ཡིན་པ་དེ་བཞིན་དུ་ཁོ་བོའི་ཡང་ཡིན་གྱིས་བསླབ་པ་གུས་པར་གྱིས་ཤིག །ཁོ་བོས་ལྷུང་བཟེད་དང་ཆོས་གོས་ཀྱིས་མི་བྲེལ་བར་བྱའོ། །དགེ་སློང་གི་ལས་གཉིས་ཡིན་ན་ཁྱོད་གང་འདོད། བསམ་གཏན་འཚལ་ལོ། །དེས་དེ་ལ་གདམས་ངག་བྱིན་ནས་བསིལ་བ་ཚལ་གྱི་དུར་ཁྲོད་དུ་སོང་སྟེ་བསྒོམས་པས་དགྲ་བཅོམ་པ་ཐོབ་བོ། །སྡེ་པའང་རྒྱལ་བྱེད་ཚལ་དུ་སོང་ནས་དྲིས་པས། (༡༡༣བ)རྒྱལ་པོའི་ཁབ་ཏུ་སོང་ཟེར་བ་ཐོས་ནས་བསམས་པ། རྒྱལ་པོའི་ཁབ་ཀྱང་མི་འཇིགས་པའི་གྲོང་མ་ཡིན་གྱིས། དེར་ཡང་སོང་ལ་དེ་ལ་མཚམས་ཆེན་པོ་གཅད་དོ་སྙམ་ནས་ལམ་རྒྱགས་མང་པོ་དང་ཀརྵ་པ་ཎ་དག་ཁྱེར་ཏེ་རྒྱལ་པོའི་ཁབ་ཏུ་སོང་ནས་དྲིས་པས། བསིལ་བ་ཚལ་གྱི་དུར་ཁྲོད་དུ་སོང་ངོ༌། །སྡེ་པས་བསིལ་བ་ཚལ་གྱི་དུར་ཁྲོད་དུ་སོང་བ་དང༌། དེས་ཉེ་སྡེ་བྱིས་པའི་གནས་སྐབས་ན་མཐོང་བ་ཆེན་པོར་གྱུར་པས་ངོ་མི་ཤེས་མོད། ཏེ་བོར་བརྟགས་པ་དང༌། བཞིན་གཟུགས་ལས་ངོ་ཤེས་ནས་བསམས་པ། འདིས་བདག་ངོ་ཤེས་ན་ངེས་པར་བདག་གསོད་པས་ཐབས་བྱའོ་སྙམ་ནས་རྔོན་པ་ཞིག་ལ། ཁྱོད་མདའ་གཞུ་ཐོགས་ནས་གར་འགྲོ། རི་དྭགས་གཤོར་དུའོ། །དེ་ལས་རྙེད་པ་ཇི་ཙམ་འགྲུབ། རེས་འགའ་འགྲུབ། རེས་འགའ་མི་འགྲུབ་བོ། །འགྲུབ་པའི་ཚེ་མང་ཉུང་ཇི་ཙམ། ཀརྵ་པ་ཎ་ལྔ་བརྒྱའོ། །སྡེ་པས་སྨྲས་པ། རབ་ཏུ་བྱུང་བ་དེ་སོད་ཅིག །ཀརྵ་པ་ཎ་ལྔ་བརྒྱ་བྱིན་ནོ། །རྔོན་པ་དེ་འདོད་པས་ཡིད་དྲངས་ནས་ཀརྵ་པ་ཎ་ལྔ་བརྒྱ་བླངས་ཏེ་བསམས་པ། རབ་ཏུ་བྱུང་བ་འདི་དག་རྒྱལ་པོས་གཞོན་ནུའི་སྤང་བ་བྱིན་པ་བྱིན་ལ། བདག་ནི་ཕྱོགས་འདིར་རྟག་ཏུ་རྒྱུ་བ་ཡིན་པས། འདི་བསད་ན་བདག་ཅག་རྩ་ལག་དང་བཅས་པ་བཙོན་རྭར་བཅུག་ནས་གསོད་པར་འགྱུར་རོ། །
ཁྱིམ་བདག་འདི་ནི་ན་ལེ་ཤམ་དཀར་པོ་དང་འདྲ་བར་གང་ནས་འོངས་སུས་ཀྱང་མི་ཤེས་པས་འདི་གསད་སོ་སྙམ་ནས། མདའ་དུག་ཅན་གྱིས་གཞུ་རྣ་དྲུང་དུ་བཀང་སྟེ་སྡེ་པའི་གནད་དུ་བསྣུན་པས་སྡེ་པ་སྡུག་བསྔལ་གྱིས་ཉེན་པས། ཉེ་སྡེས་རྔོན་པ་ལ་བརྡ་བྱས་ཀྱི་སྙམ་ནས། འདི་གསོད་པར་སྐྱེ་བར་གྱུར་ཅིག་ཅེས་སྨོན་ལམ་ལོག་པ་བཏབ་པས་ཉེ་སྡེའི་གནས་ཁང་གི་སྒོ་གླེགས་འདྲུད་པའི་འོག་ཏུ་སྦྲུལ་དུག་མྱུར་དུ་ཁྱབ་པ་ཞིག་ཏུ་སྐྱེས་ནས་སྒོ་ཕྱེ་བས་ཤིའོ། །དེ་ནས་སྒོ་གླེགས་འདྲུད་པའི་སྟེང་དུ་སྐྱེས་ནས་དེར་ཡང་ཤིའོ། །དེ་ནས་ཁྲིའི་རྐང་རྟེན་གྱི་འོག་ཏུ་སྐྱེས་ནས་དེར་ཡང་ཤིའོ། །རེ་ཞིག་ན་དེ་སྟེང་གི་སྤང་ལེབ་ཀྱི་བར་དུ་སྐྱེས་ནས་ཉེ་སྡེ་ནང་དུ་ཡང་དག་འཇོག་ལ་ཞུགས་པའི་ལུས་ལ་ལྷུང་ངོ༌། །དེས། ཁོ་བོའི་ལུས་ལ་སྦྲུལ་དུག་རྣོ་ལ་ཕྲ་བ་ལྷུང་གིས་དེ་ལོངས་ལ་ཕྱི་རོལ་ཏུ་ཕྱུང་ཞིག་ཅེས་སྨྲས་སོ། །དེའི་ཚེ་ཤཱ་རིའི་བུ་ཉེ་སྡེ་དང་ཧ་ཅང་མི་རིང་བ་ན་འདུག་པས་ཚིག་དེ་ཐོས་ནས། དེའི་གན་དུ་ཕྱིན་ཏེ། ཁྱོད་ཀྱི་བཞིན་དང་དབང་པོ་གཞན་དུ་གྱུར་པ་མ་མཐོང་ན་ཅིའི་ཕྱིར་དེ་སྐད་སྨྲ། བདག་ནི་མིག་སོགས་ལ་བདག་དང་བདག་གིར་འཛིན་པ་མེད་པས་བཞིན་གཞན་དུ་ག་ལ་འགྱུར། དེ་ནས་ཤཱ་རིའི་བུས་དེའི་ལུས་ལས་བླངས་ནས་ཕྱི་རོལ་ཏུ་བོར་རོ། །ཉེ་སྡེའི་ལུས་སྦུན་པའི་ཆངས་བུ་ལྟར་རྣམ་པ་བརྒྱར་ཞིག་གོ །ཤཱ་རིའི་བུས། ཚངས་སྤྱོད་ལེགས་པར་སྤྱད་པ་དང༌། །ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །ནད་དང་(༡༡༤ན)བྲལ་བ་ཇི་བཞིན་ནོ། །ཞེས་སོགས་སྨྲས་ནས་ཉེ་སྡེའི་ལུས་ལ་མཆོད་པ་བྱས་ཏེ་སྟོན་པ་ལ་ཞུས་པས། ཉེ་སྡེ་ལ་སྔགས་དང་ཚིགས་བཅད་འདི་མེད་པས་དེ་ལྟར་གྱུར་ཏོ། །སྔགས་དང་ཚིགས་བཅད་དེ་གང་ལགས་ཞུས་པ། དེ་དག་གསུངས་སོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། ཉེ་སྡེས་ལས་ཅི་བགྱིས་པས་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་བགྱིས་པས་རབ་ཏུ་བྱུང་ནས་དགྲ་བཅོམ་པ་ཐོབ་ཀྱང་དུག་གིས་གཟིར་ནས་མྱ་ངན་ལས་འདས། སྔོན་རི་བྲགས་ཤིག་ན་རྔོན་པ་ཞིག་གིས་རི་དྭགས་དང་བྱ་མང་པོ་བརྟེན་པའི་མཚེའུ་ཞིག་ཡོད་པ་དེར་རྙི་དང་རྙོང་མང་པོ་བཙུགས་པས་བྱ་དང་རི་དྭགས་མང་པོ་ཟིན་ཏོ། །ལན་ཅིག་རང་སངས་རྒྱས་ཤིག་རི་བྲག་དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་ཏེ་སྔ་དྲོ་རི་བྲག་དེར་བསོད་སྙོམས་ལ་བརྒྱུས་ནས། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་པས་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའ་འོ་སྙམ་ནས་མཚེའུ་དེར་སོང་སྟེ་ཟས་ཀྱི་བྱ་བ་བྱས་ནས་ཤིང་དྲུང་ཞིག་ཏུ་དཀྱིལ་ཀྲུང་བཅས་ཏེ་སྤྱོད་ལམ་ཞི་བས་འདུག་པ་དང༌། དེའི་ཉིན་མོ་མིའི་དྲིས་རི་དྭགས་གཅིག་ཀྱང་མ་ཟིན་ཏོ། །རྔོན་པ་དེས་ནངས་པར་སྔར་ལངས་ཏེ་མཚེའུ་དེར་སོང་བ་དང༌། རི་དྭགས་གཅིག་ཀྱང་མ་ཟིན་པར་མཐོང་ནས་འདིའི་རྒྱུ་ཅི་ཡིན་སྙམ་སྟེ་མཚེའུ་དེའི་མཐར་སྐོར་མྱུལ་བས་མིའི་རྐང་རྗེས་མཐོང་ནས་དེའི་རྗེས་བཞིན་སོང་བ་དང་རང་སངས་རྒྱས་དེ་མཐོང་ནས། འདི་མ་བསད་ན་འདིས་བདག་གི་འཚོ་བ་གཅོད་པས་གསད་དོ་སྙམ་ནས་གཞུ་རྣ་དྲུང་དུ་བཀང་སྟེ་མདའ་དུག་ཅན་གྱིས་རང་སངས་རྒྱས་དེའི་གནད་དུ་བསྣུན་པས་རང་སངས་རྒྱས་དེས་བསམས་པ། ཉོན་མོངས་པ་འདི་ཧ་ཅང་དམས་པ་དང་ཉམས་ན་མི་རུང་གིས་འདི་དྲང་ངོ་སྙམ་ནས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་འཕགས་ནས་ཆོ་འཕྲུལ་བསྟན་ཏོ། །
སོ་སོ་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་རྔོན་པ་དེས་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས། ཡོན་གནས་དམ་པ། མར་བྱོན། བདག་གི་སུག་པ་ནས་དྲང་དུ་གསོལ། དེ་དེ་ལ་སྙིང་བརྩེ་བས་ནམ་མཁའ་ལས་བབས་སོ། །རྔོན་པ་དེས་མདའ་བཏོན། རྨ་ལ་ལྷན་གྱིས་གླན་ནས། འཕགས་པ་སྡུམ་པར་གཤེགས་སུ་གསོལ། འདིར་གསེར་གྱི་ལྷན་པ་མཛད་ན་དེ་ཡང་བདག་གིས་སྦྱར་རོ། །དེ་རྔོན་པ་དེ་ཉིད་ཀྱི་མདུན་དུ། ཡང་ནམ་མཁའ་ལ་འཕགས་ཏེ་ཆོ་འཕྲུལ་སྣ་ཚོགས་བསྟན་ནས་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས་སྤོས་ཀྱི་ཤིང་གིས་བསྲེགས་ནས་འོ་མས་ཞི་བར་བྱས་ཏེ་རུས་པ་དེ་དག་གསེར་གྱི་བུམ་པར་བཅུག་ནས་ལམ་གྱི་བཞི་མདོར་མཆོད་རྟེན་བརྩིགས་ཏེ་གདུགས་དང་རྒྱལ་མཚན་ལ་སོགས་པས་(༡༡༤བ)མཆོད་ནས། བདག་གིས་འདི་ལ་གནོད་པ་བྱས་པའི་འབྲས་བུ་སྨིན་པར་མ་གྱུར་ཅིག །འདི་ལ་མཆོད་པས་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་ནས་འདི་བས་ཁྱད་པར་དུ་འཕགས་པའི་སྟོན་པ་མཉེས་པར་བྱས་ཏེ་ཡོན་ཏན་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་རྔོན་པ་དེ་ནི་ཉེ་སྡེ་འདི་ཡིན་ཏེ། རང་སངས་རྒྱས་ལ་མདའ་དུག་ཅན་གྱིས་གནད་དུ་བསྣུན་པས་བསྐལ་པར་མནར་མེད་དུ་སྐྱེས་ནས་ལས་དེའི་ལྷག་མས་ཚེ་རབས་ལྔ་བརྒྱར་དུག་གིས་ཤི་སྟེ་ད་ལྟར་དགྲ་བཅོམ་པ་ཐོབ་ཀྱང་དུག་གིས་མྱ་ངན་ལས་འདས་སོ། །མཆོད་ཅིང་སྨོན་ལམ་བཏབ་པས་ད་ལྟར་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་ནས་ང་མཉེས་པར་བྱས་ཏེ་དགྲ་བཅོམ་པ་ཐོབ་བོ། །སྟོན་པ་སྤོང་བྱེད་ན་ཆུ་ཀླུང་ཡིད་འོང་ལྡན་གྱི་འགྲམ་སྒྲོན་ཤིང་གི་ཚལ་གསེབ་ན་བཞུགས་སོ། །སྟོན་པས། དགེ་སློང་དག །མི་སྡུག་པ་སྒོམས་ཤིག །མི་སྡུག་པ་བསྟེན་གོམས་ནང་དུ་བྱས་ན་ཕན་ཡོན་ཆེན་པོར་འགྱུར་རོ་ཞེས་གསུངས་པ་དང་དགེ་སློང་དག་གིས་མི་སྡུག་པ་བསྒོམས་པས་རྣག་གི་ལུས་འདི་སྒྱིད་ལུག་པ་དང༌། དམུས་བྱུང་བ་དང༌། ཐེ་ཚོམ་ཟ་བ་དང༌། སྨོད་པ་ན་མཚོན་འབྱིན། དུག་ཟ། ཐག་པས་འཆིང༌། གཡང་སར་མཆོང་ཞིང་དགེ་སློང་གིས་ཀྱང་དགེ་སློང་ལ་རྩོལ་བར་བྱེད་དོ། །
དགེ་སློང་ཞིག་རྣག་གི་ལུས་འདིས་སྒྱིད་ལུག་ནས། རི་དྭགས་ཟློག་དགེ་སྦྱོང་སྦེད་ལ། ཚུར་ཤོག །ཁོ་བོ་སྲོག་དང་ཕྲོལ་དང༌། ཁོ་བོའི་ལྷུང་བཟེད་དང་ཆོས་གོས་ཁྱོད་ཀྱིར་འགྱུར་རོ། །དེས་དགེ་སློང་དེ་བསད་ནས་རལ་གྲི་ཁྲག་གིས་གོས་པ་ཁྱེར་ཏེ་ཆུ་ཀླུང་ཡིད་འོང་ལྡན་ལ་འཁྲུད་དུ་ཕྱིན་པས་བདུད་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་འདུག་པས་དགེ་སློང་སྦེད་ལ། ལེགས་སོ། །ཁྱོད་དགེ་སློང་ཚུལ་ཁྲིམས་དང་ལྡན་པ་དག་མ་བརྒལ་བར་བརྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་ཕྱིན་པར་བྱེད། མྱ་ངན་ལས་མ་འདས་པ་མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་འགྱུར་ཞིང༌། ལྷུང་བཟེད་དང་ཆོས་གོས་ཀྱི་རྙེད་པའང་འགྲུབ་བོ་ཞེས་སྨྲས་པས། དེ་བདེན་སྙམ་དུ་སྡིག་པ་ཅན་གྱི་ལྟ་བ་ཐོབ་ནས། དེ་རལ་གྲི་རྣོན་པོ་མཆན་ཁུང་གིས་ཁྱེར་ཏེ། དགེ་སློང་དག་མཐོང་བ་ན། མ་བརྒལ་བ་བརྒལ་བར་བྱ་བ་སོགས་གང་ཡིན། དགེ་སློང་ཞིག་རྣག་གི་ལུས་འདིས་སྒྱིད་ལུག་ནས། བདག་མ་བརྒལ་བ་ཡིན་གྱིས་སྒྲོལ་ཅིག །དེས་སྲོག་དང་བྲལ་བར་བྱས་ཏེ། དགེ་སློང་དྲུག་ཅུའི་བར་དུ་བསད་དོ། །དེར་དགེ་སློང་རྣམས་ཉུང་ཞིང་བསྲབ་པར་གྱུར་ཏེ་གསོ་སྦྱོང་གི་ཚེ་སྟོན་པ་གདན་བཤམས་པ་ཉིད་ལ་བཞུགས་ནས་འཁོར་རྣམས་ལ་གཟིགས་ཏེ། ཀུན་དགའ་བོ། གང་གིས་དགེ་སློང་རྣམས་ཉུང་བར་གྱུར། ཇི་ལྟར་གྱུར་པ་ཞུས་པས། དགེ་སློང་དག་ཀྱང་(༡༡༥ན)དགེ་སློང་ལ་རྩོལ་བར་བྱེད་དམ། རྩོལ་བར་བགྱིད་དོ། །སྟོན་པས། དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་གྲངས་དུ་མས་སྨད་ནས། དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང་ཞེས་པ་ནས། བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མིའང་མིར་ཆགས་པ་ལ་རང་གིས་ལག་བདར་ཏེ། སྲོག་གཅད་དམ། ཞེས་སོགས་གསུངས་སོ། །གཞི་དེ་ལས་གསོད་པ་ལ་འཇུག་པ་དང་དུ་ལེན་ནའོ་ཞེས་པ་ཉེ་སྡེའི་གླེང་གཞི་ལས་སོ། །
ཁྱིམ་ཐབ་ཡུལ་གཞན་དུ་སོང་བའི་བུད་མེད་ཅིག་ཉོན་མོངས་ཀྱིས་གཟིར་ནས་སྐྱེས་པ་གཞན་དང་ལྷན་ཅིག་འདུག་པ་ལས་མངལ་ཆགས་པ་དང༌། ཁྱིམ་ཐབ་འོང་བའི་གཏམ་ཐོས་ནས་སྦོམ་དགའ་མོ་ལ། ཁྱོད་ཀྱི་མིང་གིས་ཕྱེ་མ་སྦྱིན་ནོ་ཞེས་ཟེར་བ་དགེ་སློང་མས་དང་དུ་བླངས་པ་དང་སྐྱེ་བོས་འཕྱ་ནས་གསོལ་བས། ཁྱོད་ཀྱིས་མངལ་རླུགས་པར་བྱས་པ་བདེན་ནམ། རླུགས་པར་མ་བགྱིས་ཏེ། འོན་ཀྱང་དང་དུ་བླངས་སོ། །ཁྱོད་ཀྱི་མིང་གིས་འཆི་བའི་ཡོ་བྱད་སྦྱིན་ནོ་ཞེས་བ་ཡང་ངོ༌། །མཉན་ཡོད་ན་ཁྱིམ་བདག་ཕྱུག་པ་ནོར་མང་བ་ལོངས་སྤྱོད་ཆེ་བ་ཕན་ཚུན་བཤེས་པ་གཉིས་འཁོད་དོ། །རེ་ཞིག་ན་དེ་གཉིས་ཀྱི་ནོར་ཟད་ནས་གྲོས་བྱས་ཏེ་གཉིས་ཀ་རབ་ཏུ་བྱུང༌། གཅིག་ན་ནས་ཅིག་ཤོས་ཀྱིས་དེའི་ནད་གཡོག་བྱེད་དོ། །ནད་པ་དེ་ཉམས་དམས་པར་གྱུར་ནས་ནད་གཡོག་གིས་དྲིས་པ། ཁྱོད་ལ་སྔོན་ནད་འདི་ལྟ་བུ་བྱུང་ངམ། བྱུང་ངོ༌། །ཅིས་ཞི་བར་གྱུར། ལན་ཚྭའི་སྨན་བཙབས་ཀྱིས་སོ། །འོ་ན་ཅིའི་ཕྱིར་ད་ལན་ཚྭའི་སྨན་བཙབས་མི་འཐུང་ཞེས་ནད་པ་ལ་བླུད་པ་དང་ཤིའོ། །དགེ་སློང་དེས། བདག་གིས་འདི་ལ་སྨན་མ་ཡིན་པ་བྱིན་པར་མ་གྱུར་ཏམ་ཞེས་འགྱོད་དེ་གསོལ་བས། ལྟུང་བ་མེད་ཀྱི། དྲི་བར་བྱ་བ་ལ་མ་སྨྲས་པར་ནད་པ་ལ་སྨན་སྦྱིན་པར་མི་བྱའོ་ཞེས་སོགས་སོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། དགེ་སློང་དེ་ལ་སྨན་དེ་ཉིད་སྨན་མ་ལགས་པར་གྱུར་པའི་རྒྱུ་གང་ལགས། དེ་སྔོན་རླུང་དང་བད་ཀན་ཅན་དུ་གྱུར་ལ། ད་ལྟར་རླུང་དང་མཁྲིས་པ་ཅན་དུ་གྱུར་པས་སོ། །སྟོན་པས་རྒྱལ་པོ་གཟུགས་ཅན་སྙིང་པོ་ལྷ་བརྒྱད་ཁྲི་དང་བྲམ་ཟེ་དང་ཁྱིམ་བདག་བརྒྱ་སྟོང་དུ་མ་དང་ལྷན་ཅིག་བདེན་པ་ལ་བཀོད་པའི་ཚེ་རྒྱལ་པོས། ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །བྱས་ན་དེ་ཡུལ་མེད་པར་བྱས། བཅོམ་པ་རྣམས་ཀྱི་རྫས་ངའི་མཛོད་དང་བང་བ་ནས་(༡༡༥བ)སྦྱིན་ནོ་ཞེས་དྲིལ་བསྒྲགས་སོ། །
སྟོན་པས་ཀོ་ས་ལའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་བའི་ཚེ་རྒྱལ་པོ་གསལ་རྒྱལ་གྱིས་ཀྱང་དེ་ལྟར་དྲིལ་བསྒྲགས་པས་ཆོམ་རྐུན་པ་རྣམས་ས་མཚམས་སུ་འཁོད་ནས་དོན་མཐུན་འཇོམས་སོ། །རེ་ཞིག་ན་མ་ག་དྷ་ནས་དོན་མཐུན་སེལ་བ་དང་བཅས་པ་ཀོ་ས་ལར་འཕགས་ནས་མཚམས་འདས་ཏེ་ཀོ་ས་ལར་ཞུགས་པའི་ཚེ་དེད་དཔོན་གྱིས་སྨྲས་པ། རྒྱལ་པོ་གསལ་རྒྱལ་འདི་ནི་གཏུམ་པ། དྲག་ཤུལ་ཆེ་བ། དཔའ་བ། རྩལ་ཆེ་བས། དོན་མཐུན་ཆོམ་རྐུན་པས་བཅོམ་ནའང་དེས་བདག་ཅག་ལ་རྐུན་རྫས་སྦྱིན་པར་ནུས་ཀྱིས་བསེལ་བ་ཕྱིར་ཐོང་ཞིག །དེ་ལྟར་བགྱིའོ་ཞེས་དེ་དག་གིས་བསེལ་བ་ཕྱིར་བཏང་ངོ༌། །ཆོམ་རྐུམ་པའི་བྱ་བ་རྟས་མཐོང་ནས། བསེལ་བ་ཕྱིར་ལོག་གིས་དོན་མཐུན་གཞོན་མོ་ཞེས་བཅོམ་མོ། །ཚོང་པ་ཁ་ཅིག་བསད། ཁ་ཅིག་བྱེར་རོ། །བྱེར་བ་དེ་དག་གིས་རྒྱལ་པོ་གསལ་རྒྱལ་ལ། བདག་ཅག་ཚོང་པ་རྣམས་ཁྱོད་ཀྱི་ཡུལ་དུ་ཚོང་པར་མི་རུང་བར་བྱས་སོ། །ཅི་ཞིག་བྱས། བདག་ཅག་ཆོམ་རྐུན་པས་བཅོམ་མོ། །རྒྱལ་པོས་འཕགས་སྐྱེས་པོ་ལ་བསྒོ་བ། ཆོམ་རྐུན་པ་དང་རྐུན་རྫས་རྣམས་མྱུར་དུ་ཁུག་ཅིག །དེས་དཔུང་ཚོགས་བཞི་གོ་བསྐོན་ཏེ། ཆོམ་རྐུན་པ་དག་ས་ལའི་དགོན་པར་བག་ཕབ་སྟེ་རྐུན་རྫས་བགོད་པ་ལ་བརྫིས་ནས་ཆོམ་རྐུན་པ་ཁ་ཅིག་བསད། ཁ་ཅིག་བྱེར། ཆོམ་རྐུན་པ་དྲུག་ཅུ་གསོན་པོར་བཟུང་ངོ༌། །དེ་ནས་ཆོམ་རྐུན་པ་དང་རྐུན་རྫས་ཁྱེར་ཏེ་རྒྱལ་པོའི་དྲུང་དུ་སོང་ནས། ཆོམ་རྐུན་པ་དང་རྐུན་རྫས་འདི་དག་ལགས་སོ། །རྒྱལ་པོས་ཆོམ་རྐུན་པ་དག་ལ། ངས་དེ་ལྟར་དྲིལ་བསྒྲགས་པ་མ་ཐོས་སམ། ལྷ། ཐོས་སོ། །འོ་ན་ཅིའི་ཕྱིར་ཚོང་པ་འདི་དག་བཅོམ། འཚོ་བ་མ་མཆིས་སོ། །
དེ་ལྟ་ན་ཅིའི་ཕྱིར་གསོད། འཇིགས་པ་བསྟན་པའི་སླད་དུའོ། །ངས་ཀྱང་ཁྱེད་ལ་སྔོན་སུས་ཀྱང་མ་བསྟན་པའི་འཇིགས་པ་བསྟན་པར་བྱའོ། །རྒྱལ་པོ་དེ་གཏུམ་པས་བློན་པོ་རྣམས་ལ་བསྒོ་བ། ཆོམ་རྐུན་པ་འདི་དག་གསད་སར་ཁྲིད་ལ་རྐང་ལག་ཆོད་ཅིག །ཚོང་པ་འདི་དག་གི་ཅི་ཕྲོགས་པ། ངའི་བང་བ་དང་མཛོད་ནས་བྱིན་ཅིག །ཆོམ་རྐུན་པ་དེ་དག་དུར་ཁྲོད་དུ་ཁྲིད་ནས་རྐང་ལག་བཅད་དོ། །སྟོན་པས། དགེ་སློང་དག །རང་དང་གཞན་གྱི་འབྱོར་རྒུད་ལ་སོ་སོར་རྟོགས་ཤིག །ཅིའི་ཕྱིར་ཞེ་ན། རང་དང་གཞན་གྱི་འབྱོར་རྒུད་ནི་ཡིད་འབྱུང་བའི་གནས་ཡིན་པའི་ཕྱིར་རོ། །དགེ་སློང་ཕ་མ་རྣམས་ཀྱིས་དེ་དག་རྟོག་ཏུ་སོང་བ་དང༌། མི་གཞན་ཞིག་འདུག་པ་དེ་ན་རེ། འདི་དག་ལ་ལན་ཚྭའི་སྨན་བཙབས་བླུད་ནས་ཤི་ན་མ་གཞོན་ནུའི་ནུ་ཞོ་འཐུང་བར་འགྱུར་རོ་ཞེས་ཟེར་བ་དགེ་སློང་མ་སྐྱོང་མ་ཞེས་བྱ་བ་གླེན་མ་ཞིག་འདུག་པ་དེས་ཐོས་ནས་བསོད་ནམས་བྱའོ་སྙམ་སྟེ་དེ་དགེ་སློང་མ་རྣམས་ཀྱི་ནང་ནས་གནས་སུ་སོང་སྟེ་ལན་ཚྭའི་སྨན་བཙབས་ཀྱི་ཕྲུ་བ་དང་ཁམ་ཕོར་དྲུག་ཅུ་བླངས་ནས་བསོད་ནམས་ཀྱི་བློས་དེ་དག་ལ་བླུད་པས་ཐམས་ཅད་ཤིའོ། །(༡༡༦ན)ནམ་སྲོས་ནས་དབྱར་ཁང་གི་སྒོ་བཅད་པ་སྐྱོང་མ་འོངས་ནས་དེས་དལ་བུས་སྒོ་བརྡུངས་པ་དང༌། སུ་ཡིན། བདག་སྐྱོང་མའོ། །ནམ་སྲོས་ནས་གང་ལ་འོངས། རྗེས་སུ་ཡི་རང་བར་གྱིས་ཤིག །ཅི་ཁྱོད་ཀྱིས་འབྲས་བུ་བཞིན་མངོན་སུམ་དུ་བྱས་སམ། འོན་ཏེ་དགེ་འདུན་གྱི་གཙུག་ལག་ཁང་བྱེད་དུ་བཅུག་གམ། མ་ཡིན་ནོ། །འོ་ན་འབྲས་ཆེན་ནམ། སྐྱོ་མའམ། ཐུག་པའི་བཏུང་བའམ། རས་ཡུག་ཆེན་སྦྱོར་དུ་བཅུག་གམ། སྐྱོང་མ་ན་རེ། དེ་ལ་གཞན་མེད་དམ། འོ་ན་གཞན་ཅི་བྱས། ཆོམ་རྐུན་པ་དྲུག་ཅུ་པོ་དེ་དག་ལ་ལན་ཚྭའི་སྨན་བཙབས་འཐུང་དུ་བཅུག་ནས་ཤི་བས་མ་གཞོན་ནུའི་ནུ་ཞོ་འཐུང་དུ་བཅུག་གོ །སྐལ་ཆད་མ། ཁྱོད་ལྟོ་ཕམ་པ་དག་གིས་བཀང་ལ་ངེད་ཅག་རྗེས་སུ་ཡི་རང་བར་བྱེད་དུ་འཇུག་གམ། དེ་ཡང་འགྱོད་དེ་གསོལ་བས། ཕམ་པར་གྱུར་ཏོ། །
དེ་བས་ན་ཕམ་པར་འདོད་པ་ཉིད་ཀྱིས་འཆི་བའི་ཕྱིར་སྨན་མ་ཡིན་པ་བྱིན་པ་ལ་ནི་སྨད་པ་མེད་དོ། །འབྲོག་གནས་སུ་བསོད་སྙོམས་པ་ཞིག་གིས་ཁྱིམ་པ་དད་པར་བྱས་ནས་མེ་ཁང་རྩིག་ཏུ་བཅུག་པ་དང༌། དུས་སྟོན་ལ་གླ་མི་སོང་ནས་གླ་ཉིས་འགྱུར་སྦྱིན་བྱས་ཀྱང་མ་ཉན་ཏེ། ཁྱིམ་བདག་གིས། འདི་བདག་དང་ཉེ་དུའི་ཕྱིར་མ་ལགས། དགེ་སློང་གི་ཕྱིར་ལགས་ན། སྟོངས་མཛོད་ཅིག་ཞུས་པས། སྟོན་པས་གནང་ནས་དགེ་སློང་དག་ཕྱམ་ཕར་སྦེད་ཚུར་སྦེད་པ་ན་དགེ་སློང་གི་ལག་ནས་ཕྱམ་ཤོར་བས་འོག་ན་ཤིང་མཁན་ཞལ་ཏ་བྱེད་པའི་མགོར་ཕོག་སྟེ་ཤིའོ། །དགེ་སློང་དེ་དག །བསོད་སྙོམས་པ་ལས་མེད་པས་ལས་ཕྱུང་བས་བདག་ཅག་ལ་ཕམ་པ་བྱུང་ངོ་སྙམ་ནས་འགྱོད་དེ་གསོལ་བས། ལྟུང་བ་མེད་དེ། ཁུར་འདེག་པར་མི་ནུས་པ་ལ་གྲོགས་ཉིད་མི་བྱའོ། །གལ་ཏེ་དེ་ལྟ་བུའི་རྐྱེན་གྱིས་ན་ཁྱིམ་པ་དག་རུབ་པ་ཉིད་ལ་ཅིག་ཅར་འདེགས་པར་སྐད་སྦྱར་ཏེ་བྱའོ། །གཞག་པ་ལ་ཡང་ཅིག་ཅར་ཉིད་དུ་སྐད་སྦྱར་བར་བྱའོ། །དགེ་སློང་རྣམས་ཀྱིས་ཁུར་ཇི་ཙམ་གདེག་འདེག་པར་བཟོད་པ་མ་ཤེས་ནས་ཞུས་པས། ཁྱིམ་པ་གཅིག་གི་ཁུར་དགེ་སློང་གཉིས་ཀྱིས་གདེག་པར་བྱའོ། །
སྟོན་པ་འབྲོག་དགོན་ནའོ། །དགེ་སློང་བསོད་སྙོམས་པ་ཞིག་གིས་ཁྱིམ་བདག་ཅིག་ལ་ཆོས་བསྟན་ནས་སྐྱབས་འགྲོ་དང་བསླབ་པའི་གཞི་ལ་བཀོད་དེ། ཡང་རྫས་ལས་བྱུང་བའི་བསོད་ནམས་བྱ་བའི་གཞི་བདུན་གྱི་བསྔགས་པ་བརྗོད་པ་དང༌། བདག་གིས་ཀྱང་དགེ་འདུན་ལ་རྫས་ལས་བྱུང་བའི་བསོད་ནམས་བྱ་བའི་གཞི་འགའ་ཞིག་བགྱིད་དུ་སྩལ་ལོ། །བྱེད་དུ་ཆུག་ཅིག །ཅི་ཞིག་བགྱིད་དུ་སྩལ། དགེ་འདུན་ལ་སྲོ་གང་གི་ཁང་པ་བྱེད་དུ་ཆུག་ཅིག །བདག་ལ་ཀརྵ་པ་ཎ་མཆིས་མོད། གྲོགས་བགྱིད་པ་མ་མཆིས་སོ། །ཁོ་བོ་ཁྱོད་ཀྱི་གྲོགས་ཡིན་ནོ། །དེས་བསོད་སྙོམས་པ་དེ་ལ་ཀརྵ་པ་ཎ་དག་ཕུལ་ནས་བསོད་སྙོམས་པ་དེ་སྲོ་གང་བྱེད་དུ་འཛུད་པ་ལ་(༡༡༦བ)ཞུགས་པ་དང༌། དུས་སྟོན་བྱུང་ནས་གླ་མི་མ་འོངས་པ་དང༌། བསོད་སྙོམས་པས་དེ་དག་བོས་ནས། ཁྱེད་ཅིའི་ཕྱིར་མ་འོངས། འཕགས་པ། དེང་འཇིག་རྟེན་གྱི་དུས་སྟོན་ལགས་པས་མ་འོངས་སོ། །བསོད་སྙོམས་པས། བསོད་ནམས་ཀྱི་འབྲས་བུས་འཚོ་བ་དེ་དག་ལ་དུས་སྟོན་ཡོད་ཀྱིས། ཁྱེད་མཁར་ལན་གྱི་འབྲས་བུས་འཚོ་བ་ལ་དུས་སྟོན་ཅི་ཡོད། ཤོག་ལ་ལས་གྱིས་དང༌། གླ་ཉིས་འགྱུར་དུ་སྦྱིན་ནོ། །འཕགས་པ། བསོད་ནམས་ཀྱི་འབྲས་བུས་འཚོ་བ་དེ་དག་ལ་རྟག་པར་དུས་སྟོན་ཡོད་ཀྱི་བདག་ཅག་མཁར་ལན་གྱི་འབྲས་བུས་འཚོ་བ་ལ་བརྒྱ་ལམ་ན་དུས་སྟོན་འབྱུང་བས་གླ་སུམ་འགྱུར་དུ་སྩལ་ཡང་དེང་ནི་ལས་མི་བགྱིའོ་ཞེས་དེ་དག་དོང་ནས་བསོད་སྙོམས་པའང་སྙིང་ལས་ཆུང་ངུར་འདུག་གོ །ཁྱིམ་བདག་གིས་བལྟར་འོངས་པ་དང༌། འགའ་ཡང་ལས་བྱེད་པ་མ་མཐོང་ནས། འཕགས་པ། གླ་མི་དེ་དག་ཅིའི་ཕྱིར་ལས་མི་བྱེད། དེ་དག་ན་རེ། དེང་འཇིག་རྟེན་གྱི་དུས་སྟོན་ཡིན་པས་ལས་མི་བྱེད་ཟེར་རོ། །འཕགས་པ། དེ་དག་མཁར་ལན་གྱི་འབྲས་བུས་འཚོ་བ་ལགས་པས་གླ་མ་སྩལ་པས་མ་བཏུབ་གོར་མ་ཆག །ཁོ་བོས་གླ་ཉིས་འགྱུར་བྱིན་ཀྱང་མ་གྲུབ་སྟེ། བསོད་ནམས་ཀྱི་འབྲས་བུས་འཚོ་བ་དག་ལ་རྟག་ཏུ་དུས་སྟོན་ཡོད་ཀྱི། བདག་ཅག་མཁར་ལན་གྱི་འབྲས་བུས་འཚོ་བ་ལ་བརྒྱ་ལམ་ན་དུས་སྟོན་འབྱུང་བས་གླ་སུམ་འགྱུར་དུ་སྩལ་ཡང་དེང་ནི་ལས་མི་བགྱིད་དོ་ཟེར་རོ། །ཁྱིམ་བདག་ན་རེ། བདག་དང་ཉེ་དུ་རྣམས་ཀྱི་སླད་དུ་བགྱིད་དུ་མི་སྩོལ་གྱི། འཕགས་པ་རྣམས་ཀྱི་སླད་དུ་བགྱིད་དུ་སྩོལ་བ་ལགས་པས་མཁར་ལན་གྱི་སྟོངས་མཛོད་ཅིག །ཞུས་པས། སྟོན་པས། གཞི་མ་ཟིན་པ་ལ་དགེ་སློང་རྣམས་ཀྱིས་མཁར་ལན་གྱི་སྟོངས་བྱའོ། །
དགེ་སློང་དག་གིས་མཁར་ལན་གྱི་སྟོངས་བྱ་བར་བརྩམས་ནས་དགེ་སློང་ཞིག་གིས་དགེ་སློང་ལ་སོ་ཕག་འཕངས་པ་དང་ལག་ནས་ཤོར་ཏེ་དགེ་སློང་གི་མགོར་ཕོག་ནས་ཤིའོ། །དགེ་སློང་དག་ཡིད་མ་བདེ་ནས། བསོད་སྙོམས་པ་ལས་མེད་པས་ལས་བྱུང་སྟེ། བདག་ཅག་ལ་ཕམ་པ་བྱུང་ངོ་སྙམ་ནས་འགྱོད་དེ་གསོལ་བས། ལྟུང་བ་མེད་དེ། སོ་ཕག་མི་འཕང་བར་ལག་པས་ལག་པར་བརྒྱུད་པར་བྱའོ། །བྱེ་བ་དང་གས་པ་མ་བརྗོད་པར་དེ་ཉིད་སྦྱིན་པར་མི་བྱའོ། །སྟོན་པ་མཉན་ཡོད་ནའོ། །མཉན་ཡོད་ཀྱི་ཉེ་ལོགས་རི་བྲགས་ཤིག་ན་ཁྱིམ་བདག་ཕྱུག་པ་དད་པ་ཅན་ཞིག་གིས་གཙུག་ལག་ཁང་རྟ་བབས་མཐོན་པོ་དང༌། སྐར་ཁུང་དང༌། སྐར་ཁུང་དྲ་བ་ཅན་དང༌། ལན་ཀན་གྱིས་བརྒྱན་པ། སྙིང་དང་མིག་འཕྲོག་པ། མཐོ་རིས་ཀྱི་ཐེམ་སྐས་སུ་གྱུར་པ་ཞིག་བྱས་ཏེ། དེར་དགེ་སློང་དྲུག་ཅུ་དབྱར་གནས་ནས་དོང་བ་དང༌། ཁྱིམ་བདག་གིས་ཁྲི་དང་ཁྱིའུ་སྲུང་བའི་མི་ཞིག་བཞག་གོ །རེ་ཞིག་ན་དགེ་སློང་གཞན་དྲུག་ཅུ་ལྗོངས་རྒྱུ་ཞིང་རི་བྲག་དེར་ཕྱིན་ནས་བསྟི་གནས་ཚོལ་བ་དང༌། ཅིའི་ཕྱིར་(༡༡༧ན)གཙུག་ལག་ཁང་དུ་མི་གནས། གཙུག་ལག་ཁང་གང་ན་ཡོད། དགོན་པ་འདི་ནའོ། །དེ་དག་དེར་སོང་བ་སྲུང་མའི་མིས་མཐོང་ནས། འོངས་པ་ལེགས་སོ་ཞེས་གནས་ཁང་དང་གནས་མལ་གཡར་ནས། རེ་ཞིག་ཆབ་ཚོགས་ཤིག །བདག་གིས་ཁྱིམ་བདག་ལ་བརྗོད་པར་བྱའོ་ཞེས་དེས་ཁྱིམ་བདག་ལ་སྦྲན་པ་དང་ཁྱིམ་བདག་དེས་ལེགས་པར་སྦྱར་བའི་བཏུང་བ་ཁྱེར་ནས་འོངས་པ་དང༌། དེས་དགེ་སློང་དེ་དག་མཐོང་ནས་དད་པའི་ཤུགས་ཀྱིས། གྲོང་ངམ་ཡང་ན་དགོན་པའང་རུང༌། །གཤོང་ངམ་ཡང་ན་ཐང་ཡང་རུང༌། །གང་ན་འོས་པ་གནས་པ་ཡི། །ས་གཟི་དེ་ནི་དགའ་བྱེད་ཡིན། །ཟེར་ནས་སང་གདུགས་ཚོད་ལ་སྤྱན་དྲངས་ཏེ་སོང་ངོ༌། །ཁྱིམ་བདག་དེས་ཕྱི་དེ་ཉིན་པར་ཟས་བསོད་པས་དགེ་སློང་དག་ཚིམ་པར་བྱས་ཤིང་བཏུང་བ་བླུད་ནས། འདིར་དབྱར་གནས་པར་མཛོད་ཅིག་དང༌། ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ། །ཁྱིམ་བདག །མཉན་ཡོད་ན་ཆོས་ཀྱི་རྗེ་མངོན་སུམ་དུ་བཞུགས་པས་འབྲས་བུ་ཐོབ་པ་བརྡ་སྤྲོད་པ་དག་ཀྱང་ཐོས་པར་འགྱུར། རྒྱལ་པོ་དང༌། བཙུན་མོ་ཕྲེང་ལྡན་མ་དང༌། རྒྱལ་རིགས་དབྱར་ཚུལ་མ་ལ་སོགས་པ་དད་པ་ཅན་མང་དུ་ཡོད་པས། དེར་ཆོས་དང་ཟང་ཟིང་གི་ལོངས་སྤྱོད་ཆེན་པོ་འགྲུབ་པས་འགྲོའོ། །ཆོས་ཀྱི་ལོངས་སྤྱོད་ནི་ཁྱེད་རང་ལ་རག་ལས་ཀྱི། ཟང་ཟིང་གི་ལོངས་སྤྱོད་ཀྱིས་ཅུང་ཟད་ཀྱང་མི་བྲེལ་བར་བགྱིའོ། །གནས་བརྟན་གྱིས་སྨྲས་པ། སྟོན་པས། དད་པ་ཅན་གྱི་དད་པ་སྤེལ་བར་བྱ་ཞིང་སྦྱིན་བདག་ལ་རྗེས་སུ་སྙིང་བརྩེ་བར་བྱའོ་ཞེས་གསུངས་པས་འདི་ཉིད་དུ་འཁོད་པར་བྱའོ་ཞེས་དབྱར་ཕྱི་མ་གནས་པར་ཁས་བླངས་སོ། །
དེ་ན་གཙུག་ལག་ཁང་གཞན་མེད་པས་རྙེད་པ་མང་པོ་བྱུང་ངོ༌། །དེར་སྟོན་ཟླ་ཐ་ཆུང་གི་ཆོམ་རྐུན་པ་དག་དགག་དབྱེ་བྱས་མ་ཐག་འདུས་ནས། བདག་ཅག་ལོ་སྐོར་དུ་འཚོ་བའི་ཐབས་ཅི་ཡོད། དགེ་སློང་འདི་དག་གཞོམ་མོ། །གཞན་དག་ན་རེ། དེ་དག་ནི་སྒོ་འཕར་བརྒྱ་འདས་ཀྱང་ལྟོ་ཁེངས་པ་དཀའ་བས་དེ་དག་ལ་ཅི་ཡང་མེད་དོ། །དེ་ན་དགེ་སློང་གི་རྒྱུས་ཞེས་པ་ཞིག་གིས། དེ་དག་ལ་མང་དུ་ཡོད་ཀྱི། ཡིད་མི་ཆེས་ན་སོང་ལ་ལྟོས་ཤིག །དེ་ལྟ་ན་ཁྱོད་ཇེ་སོང་དང༌། ཁོ་བོ་ཅག་ཕྱིས་འོང་ངོ༌། །དེ་གོས་ཚགས་བཅོས་ཏེ་སོང་ནས་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་བཙལ་ཏེ་གཙུག་ལག་ཁང་དེར་ཞུགས་ནས་རྒན་ཞུགས་ཤིག་ལ་ཕྱག་བཙལ་ཏེ། གཙུག་ལག་ཁང་འདི་སུའི་ཡིན། ཁྱིམ་བདག་ཆེ་གེ་མོའོ། །ཅི་འདི་གཙུག་ལག་ཁང་ཡིན་ནམ། ཕོངས་པ་ཡིན། གཙུག་ལག་ཁང་ཇི་ལྟ་བུ། ཕོངས་པ་ནི་ཇི་ལྟ་བུ། ཡོ་བྱད་ཕུན་སུམ་ཚོགས་ན་གཙུག་ལག་ཁང་ངོ༌། །ཡོ་བྱད་མ་མཆིས་ན་ཕོངས་པའོ། །འོ་ན་གཙུག་ལག་ཁང་སྟེ་ཡོ་བྱད་ཕུན་སུམ་ཚོགས་པ་ཡོད་དོ། །
འཕགས་པ།(༡༡༧བ) ཟས་རྡུལ་མི་ཟ། གོས་ཤིང་ཤུན་མི་གྱོན་པས་ཁྱེད་ལ་གོས་ཅུང་ཟད་མཆིས་སམ། རྒན་ཞུགས་དེ་དྲང་པོའི་རང་བཞིན་ཡིན་པས་དེའི་ལག་པ་ནས་བཟུང་སྟེ་གནས་ཁང་དུ་ཁྲིད་ནས་གོས་རྣམས་བསྟན་ཏོ། །འདི་ཁྱོད་ཀྱི་ཡིན་ནམ། དགེ་འདུན་གྱི་ཡིན། ཁོ་བོའི་ཡིན་ནོ། །ཁྱོད་གནས་བརྟན་ནམ། ཆོས་སྒྲོག་པ་ཞིག་ཡིན་ནམ། མ་ཡིན་ཏེ་དགེ་ཚུལ་གསར་བུ་ཡིན་ནོ། །འཕགས་པ། འདི་ན་དགེ་འདུན་གྱི་གནས་མལ་ཅུང་ཟད་མཆིས་སམ། མང་དུ་ཡོད་དོ། །འདི་ན་འཚལ་མ་རྫའི་སྣོད་དུ་འཚོད་དམ། ཟངས་ཀྱི་སྣོད་དུ་འཚོད། གནས་ཁང་འདི་དག་ཟངས་ཀྱིས་གང་ངོ༌། །གཡོན་ཅན་དེས། འཕགས་པ། ཁྱོད་ཀྱི་དགེ་བའི་ཕྱོགས་ཉམས་པ་ནི་བདག་གི་དོན་ཉམས་པ་ལགས་པས་བདག་སླད་ཀྱིས་ཀྱང་མཆི་ཡིས་ད་འགྲོའོ་ཞེས་སོང་སྟེ་ཆོམ་རྐུན་པ་དེ་དག་གི་དྲུང་དུ་སོང་ནས། པདྨའི་མིག་ཅན་དག །རྫས་ཐམས་ཅད་ཀྱིས་གང་བའི་གྲུ་བོ་ཆེ་སྐམ་ས་ལ་འདུག་གིས་ཕྲོགས་ཤིག །དེ་ན་གཅིག་ན་རེད། དེར་འཁོད་པའི་རབ་བྱུང་དྲུག་ཅུ་པོ་ནི་འཕོང་གི་སློབ་དཔོན་ཤ་སྟག་ཡིན་ཞེས་གྲག་པས་དེ་བཞིན་དུ་གཞོམ་པར་མི་ནུས་པས་མཚན་མོ་ཆོས་ཉན་པའི་ཚེ་གཞོམ་མོ། །ཉི་མ་གང་ལ་ཆོས་ཉན་པ་འབྱུང༌། ཚེས་བརྒྱད་དང་བཅུ་བཞི་ལ་འབྱུང་སྟེ། ཚེས་བརྒྱད་ནི་ཐལ་ཟིན་པས་ཚེས་བཅུ་བཞི་ལ་འབྱུང་ངོ༌། །དེ་ནས་ཚེས་བཅུ་བཞི་ལ་བབ་སྟེ་གནས་བརྟན་ཁྲི་ལ་འཛེགས་ནས། མི་མཆོག་འདུལ་བ་ཁ་ལོ་སྒྱུར་མཛད་ཅིང༌། །ཞེས་སྨྲ་བར་བརྩམས་པ་དང་སྒོ་བརྡུངས་སོ། །སུ་ཡིན། རིགས་ཀྱི་བུ་དག་གོ །རི་བྲག་པའི་སྐྱེ་བོ་ཆོས་ཉན་པ་དག་ཡིན་སྙམ་ནས་སྒོ་ཕྱེ་བ་དང་དེ་དག་ཞུགས་ནས་བཅོམ་མོ། །ཁྱེད་ཅག་ན་རེ། བདག་ཅག་རིགས་ཀྱི་བུ་དག་གོ་ཟེར་ན། ངེད་འཇོམས་སམ། བདག་ཅག་ལ་མིང་གཉིས་ཡོད་དེ། ངེད་ཕྱི་རོལ་ཏུ་རིགས་ཀྱི་བུ། ནང་དུ་ཆོམ་རྐུན་པའོ་ཞེས་བཅོམ་ནས་སོང་ངོ༌། །
དགེ་སློང་དེ་དག་གིས་གྲོས་བྱས་པ། སྟོན་པས། ལྷག་མ་དང་བཅས་པར་གཞོའོ་ཞེས་གསུངས་པས་མཉན་ཡོད་དུ་འགྲོའོ་ཞེས་ཉིན་མོ་ཐིབས་པོར་ཞུགས། མཚན་མོ་སོང་སྟེ་མཉན་ཡོད་དུ་ཕྱིན་པ་དང༌། དགེ་སློང་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དག་གིས་དགེ་སློང་དེ་དག་སྒྲེན་མོར་རྒྱུ་བ་མཐོང་ནས། གཅེར་བུ་ཁྱེད་འདིར་ཅི་འདོད། འདི་ཁྱེད་ཀྱི་འདུག་གནས་མ་ཡིན་ནོ། །དེ་དག་གིས། བདག་ཅག་གཅེར་བུ་མ་ཡིན་ནོ། །འོ་ན་སུ་ཡིན། དགེ་སློང་དག་གོ །འདི་ལྟ་བུའི་དགེ་སློང་ཡོད་དམ། ཆོམ་རྐུན་པས་བཅོམ་པ་ན་ཡོད་དོ། །ཁྱེད་ཅག་གི་མིང་ཅི། སངས་རྒྱས་འཚོའོ། །ཆོས་འཚོའོ། །དགེ་འདུན་འཚོའོ། །འོངས་པ་ལེགས་སོ་ཞེས་སྒོ་ཕྱེ་ནས། ལ་ལས་ཆོས་གོས། ལ་ལས་ཤམ་ཐབས། ལ་ལས་རྔུལ་གཟན། ལ་ལས་ལྷུང་བཟེད་བྱིན་ནས་(༡༡༨ན)བགོ་བཤའ་བྱས་པའི་སྐབས་དེ་གསོལ་བས། མི་ཤེས་པ་ལ་གཙུག་ལག་ཁང་གི་སྒོ་གྱ་ཚོམ་དུ་མི་དབྱེ་བར་མིང་རུས་དྲིས་ནས་ངོ་ཤེས་ན་དབྱེའོ། །གཞན་ཡང་ཆོས་ཉན་པའི་ཚེ་དགེ་སློང་མེལ་ཚེ་བ་གཞག་པར་བྱ་ཞིང༌། ཆོམ་རྐུན་འོངས་ན། གཎྜི་འོན་ཅིག །གཎྜི་ཐེའུ་དང༌། དུས་ཀྱི་འཁོར་ལོ་འོན་ཅིག །སྣམ་སྦྱར་དང༌། བདུན་པ་དང༌། ལྔ་པ་དང༌། གཏུར་བུ་དང༌། རྒྱ་ཅང་དང་ཤུར་བུ་དང༌། ལྕག་པོད་དང༌། ཤུར་བུ་ཕྲེའུ་འོན་ཅིག་ཅེས་ཚམ་ངམ་བྱའོ། །དེ་ནས་ཆོམ་རྐུན་པས་བཅོམ་པའི་དགེ་སློང་དེ་དག་ལ་དགེ་སློང་རྣམས་ཀྱིས། ཁོ་བོ་ཅག་གིས་ཁྱེད་ཅག་ལ་སྒོ་བཤའ་བྱས་མོད། ད་དུང་ཁྱེད་ཅག་ཆོས་གོས་གིས་བྲེལ་བར་གྱུར་གྱིས། ཁྱེད་ཀྱི་ཡོན་བདག་དེ་དད་པ་ཅན་ཡིན་པས་དེའི་གཙུག་ལག་ཁང་དུ་དེངས་དང་དེས་ཁྱེད་ལ་ཆོས་གོས་དག་གིས་མི་བྲེལ་བར་འགྱུར་རོ། །དེ་དག་སོང་བ་དང༌། ཁྱིམ་བདག་དེ་ན་རེ། འཕགས་པ་དག །ཅིའི་ཕྱིར་བདག་ལ་མ་གཟིགས་པར་བཞུད། སྟོན་པས། ལྷག་མ་དང་བཅས་པར་གཞོའོ་ཞེས་གསུངས་པས་སོ། །བདག་གི་གཙུག་ལག་ཁང་པཅོམ་པས་ཁྱིམ་ཡང་བཅོམ་སྙམ་མམ། བྱོན་པ་ལེགས་སོ་ཟེར་ནས་རེ་རེ་ལ་ཡོ་བྱད་བཅུ་གསུམ་བཅུ་གསུམ་ཕུལ་ལོ། །ཡང་ཆོམ་རྐུན་པ་དེ་དག་འོངས་ཏེ་སྒོ་བརྡུངས་པ་དང༌། དགེ་སློང་རྣམས་ཀྱིས་ཚོར་ནས། གཎྜི་འོན་ཅིག་ཅེས་སོགས་བརྗོད་པས་བྲོས་སོ། །
དགེ་སློང་གི་རྒྱུས་ཤེས་པ་ཞིག་ན་རེ། ཅིའི་ཕྱིར་འབྲོས། འདི་དག་འཕོང་གི་སློབ་དཔོན་ཤ་སྟག་ཡིན་ལ། གཞན་ཡང་གཎྜི་ལ་སོགས་པའི་མཚོན་དེ་དག་གི་མིང་ཡང་སྔོན་མ་ཐོས་སོ། །སྨྲས་པ། དེ་དག་ནི་མཚོན་མ་ཡིན་ནོ། །འོ་ན་ཅི་ཡིན། གཎྜི་དང་གཎྜིའི་ཐེའུ་ནི་བརྡུང་བྱ་རྡུང་བྱེད་དང༌། དུས་ཀྱི་འཁོར་ལོ་ནི་དུས་ཡོངས་སུ་གཅོད་པར་བྱེད་པ་དང༌། སྣམ་སྦྱར་དང༌། བདུན་པ་དང༌། ལྔ་པ་ནི་ཆོས་གོས་དང༌། གཏུར་བུ་ནི་གོས་ཀྱི་སྣོད་དང༌། རྒྱ་ཅང་ལ་སོགས་པ་ནི་སྐེ་རགས་ཀྱི་མིང་ཡིན་གྱིས་མ་སྡར་བར་ཆོམས་ཤིག །དེ་དག་ཡང་ལོག་སྟེ་ཆོམ་རྐུན་པའི་དམག་དཔོན་གྱིས་ཡ་གད་བཙུགས་ཏེ་འཛེག་པར་བརྩམས་པ་དང༌། རྒན་ཞུགས་ཤིག་མེལ་ཚེ་བར་བཞག་པ་དེས་མཐོང་ནས། འདི་དག་ལ་བཏང་སྙོམས་བྱས་ན་ཡང་བདག་ཅག་གི་ལྷུང་བཟེད་དང་ཆོས་གོས་འཕྲོགས་ནས་སྒྲེན་མོར་འཇོག་པར་འགྱུར་བས་བསྡིགས་པར་བྱའོ་སྙམ་ནས་དལ་བུས་ཁད་ཀྱིས་སོང་སྟེ་དེའི་མགོར་གཎྜི་འཕངས་པ་དང༌། དེའི་ཀླད་པ་གཞོམས་ནས་ཚེགས་ཆེན་པོས་བབས་ཏེ་ཅུང་ཟད་སོང་ནས་ཤིའོ། །རྒན་ཞུགས་དེས། ཆོམ་རྐུན་པ་(༡༡༨བ)ཞེས་ཀུ་ཅོ་བཏོན་པ་དང་དགེ་སློང་རྣམས་ཆོས་ཉན་པ་བཅད་དེ་ཁང་སྟེང་དུ་འཛེགས་ནས། དེ་དག་གར་སོང༌། ཕྱོགས་འདིར་ཡ་གད་བཙུགས་ནས་འཛེག་པ་ན་ཁོ་བོས་བསྡིགས་པས་བྲོས་སོ། །སང་ནམ་ལངས་པ་དང༌། ཆོམ་རྐུན་པས་འཛེགས་པའི་ཕྱོགས་དེ་གང་ཡིན་བརྟགས་པ་ན་ཁྲག་མཐོང་ནས་དེའི་རྗེས་སུ་སོང་བ་དང་ཆོམ་རྐུན་པའི་དཔོན་བསད་པ་མཐོང་ནས་བསླབ་པ་འཁྲུགས་པའི་འཇིགས་པས་སྐྲག་སྟེ། བདག་ཅག་སྔོན་མ་བཅོམ་གྱི་ད་ཕམ་པ་བྱུང་བས་བཅོམ་མོ་ཞེས་འགྱོད་དེ་གསོལ་བས། ལྟུང་བ་མེད་དེ། བསྣུན་པའི་བསམ་པས་མི་འཕང་བར་གློའམ་རྒྱབ་ཏུ་འཕང་ཞིང་རྐུན་པོ་སྤ་བཀོང་བའི་ཕྱིར་ཚམ་ངམ་བྱའོ། །མཉན་ཡོད་ན་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ནས་དེ་དང་དགའ་མགུར་སྤྱད་པས་ཁྱེའུ་ཞིག་བྱུང་སྟེ་དེ་ཆེན་པོར་གྱུར་ཏོ། །
རེ་ཞིག་ན་ཁྱིམ་བདག་དེའི་ཉེ་དུ་དང་ནོར་ཟད་ཅིང་ཆུང་མའང་ཤི་ནས། བུ། ཁོ་བོས་རྒས་པའི་གནས་སྐབས་སུ་ནོར་སྒྲུབ་མི་ནུས་ཀྱིས་རབ་ཏུ་འབྱུང་ངོ༌། །ཡབ། དེ་ལྟ་ན་བདག་ཀྱང་རབ་ཏུ་འབྱུང་ངོ༌། །ལེགས་སོ་ཞེས་ཁྱེའུ་དེ་ཁྲིད་ནས་རྒྱལ་བྱེད་ཚལ་དུ་སོང་སྟེ་དགེ་སློང་ཞིག་ལ། འཕགས་པ། བདག་རབ་ཏུ་འབྱུང་བར་འཚལ་ལོ། །ཅི་ཁྱེའུ་འདི་ཡང་རབ་ཏུ་འབྱུང་ངམ། འབྱུང་ངོ༌། །ཆོས་ཉིད་ཀྱིས་རྒན་པའི་མཐའ་ནས་རྙེད་པ་འཐོབ་ལ། གཞོན་པའི་མཐའ་ནས་ལས་སུ་བསྐོ་བ་ཡིན་པས་རྒན་ཞུགས་ཀྱིས་བུ་རྟག་ཏུ་ལས་སུ་བསྐོས་པས། ཡབ། བདག་ཅག་གཉིས་ཅུང་ཟད་ཟིལ་གྱིས་ནོན་པ་དེ་ཐམས་ཅད་ཐོས་པ་ཉུང་བ་ལས་གྱུར་པས་བཞེངས་ཤིག །ཡུལ་གཞན་དུ་བཞུད་ལ་ཐོས་པ་གཟུང་ངོ༌། །དེ་གཉིས་ཡུལ་གཞན་དུ་སོང་བ་དང༌། འོན་ཀྱང་གཞོན་པའི་མཐའ་ནས་ལས་སུ་བསྐོས་པས། ཡབ། མཉན་ཡོད་ན་ལས་སུ་བསྐོ་བ་མཆིས་ཀྱང༌། དེ་ན་ཆོས་ཀྱི་རྗེ་མངོན་སུམ་བཞུགས་ཤིང༌། དུས་སུ་འབྲས་བུ་ཐོབ་པ་བརྡ་སྤྲོད་པའང་ཐོས་པར་འགྱུར། རྒྱལ་པོ་ལ་སོགས་པ་དད་པ་ཅན་མང་དུ་མཆིས་པས་ཆོས་དང་ཟང་ཟིང་གི་ལོངས་སྤྱོད་ཆེན་པོའང་མཆིས་ཀྱིས་དེར་བཞུད་དོ་ཞེས་དེ་གཉིས་མཉན་ཡོད་དུ་ཕྱིན་ནས་རྒྱལ་བྱེད་ཚལ་དང་ཉེ་བར་ཕྱིན་པ་ན་གཎྜི་ཡང་བརྡུངས་པས། བུ་ན་རེ། ཡབ། གཎྜི་བརྡུངས་ཀྱིས་མྱུར་བར་བཞུད་དོ། །
རྒན་ཞུགས་དེ་རྒས་པས་འགྲོ་མ་ནུས་པར་དལ་བུས་འགྲོ་བ་ན་བུས་དེའི་གཉའ་བ་ནས་བཟུང་སྟེ་ཕུལ་པས་རྒན་ཞུགས་དེས་མྱུར་བར་འགྲོ་བར་བརྩམས་སོ། །བུས་བསམས་པ། ཐབས་འདི་བཟང་གིས་ཡང་འཕུལ་སྙམ་ནས་ཡང་ཕུལ་བ་དང་དེ་ས་ལ་ཁས་བུབ་ཏུ་འགྱེལ་ནས་ཁ་སས་གང་སྟེ་ཤིའོ། །བུས་ངུ་ཞིང་རོ་དེ་ལམ་གྱི་མཐའ་ཞིག་ཏུ་བོར་ནས་ལྷུང་བཟེད་ཆོས་གོས་ཁྱེར་ཏེ་རྒྱལ་བྱེད་ཚལ་དུ་སོང་བ་དང་དགེ་སློང་རྣམས་ཀྱིས་དེ་ལ། འོངས་པ་ལེགས་སོ། །རྒན་ཞུགས་(༡༡༩ན)དེ་གང་ན་འདུག །བུས་དེས་ངུས་སོ། །ཅིའི་ཕྱིར་དུ། བདག་གི་ཕ་ཤིའོ། །བུ། འདུ་བྱེད་ཐམས་ཅད་དེ་ལྟ་བུ་ཡིན་ལ་ཁྱོད་རབ་བྱུང་ཡིན་པས་མྱ་ངན་མ་བྱེད་ཅིག །དེ་བདག་གིས་བསད་དོ། །འོ་ན་ད་ངུ་བར་རིགས་ཏེ། ཁྱོད་ཀྱིས་མཚམས་མེད་ཀྱི་ལས་བྱས་ལ་ཕམ་པའང་བྱུང་ནས་ཡུན་རིང་པོར་མནར་མེད་དུ་གནས་པར་འགྱུར་བས་སོ། །སྐབས་དེ་གསོལ་བས། དེ་ལ་ལྟུང་བ་མེད་དེ། དགེ་སློང་ངལ་བ་མི་འཕུལ་ལོ་ཞེས་སོགས་སོ། །
དགེ་སློང་རྣམས་ཐེ་ཚོམ་སྐྱེས་ནས་ཞུས་པ། རྒན་ཞུགས་ཀྱི་བུ་འདིས་ཕ་བསད་ཀྱང་མཚམས་མེད་དང་ཕམ་པ་མ་བྱུང་བ་ལ་གཟིགས། ད་ལྟ་འབའ་ཞིག་ཏུ་མ་ཟད་འདས་པའི་དུས་སུའང་འདིས་ཕ་བསད་ཀྱང་མཚམས་མེད་མ་བྱུང་བ་དེ་ཉོན་ཅིག །སྔོན་རི་བྲག་ཅིག་ན་བཙོ་བླག་མཁན་ཞིག་གིས་རིགས་མཉམ་པ་ལས་ཆུང་མ་བླངས་ནས་དེ་དང་དགའ་མགུར་སྤྱད་པས་བུ་བྱུང་ནས་ཆེན་པོར་གྱུར་ཏོ། །རེ་ཞིག་ན་དེར་དུས་སྟོན་བྱུང་ནས་དེ་ལ་གོས་བཀྲུ་དགོས་པ་མང་པོ་བྱུང་བས་བུ་ལ། གོས་མང་པོ་བཀྲུ་དགོས་པས་ཁོ་བོ་ཁྱིམ་དུ་ཟ་བ་མི་ཁོམ་གྱིས་ཟས་ཁྱེར་ཏེ་ཕྱིར་ཤོག་ཅིག །བུས་ཟས་ཁྱེར་བ་ཟོས་ནས། ཁོ་བོ་ངལ་བས་ཉལ་ལོ། །ཁྱོད་ཀྱིས་གོས་ཁྲུས་ཤིག །བུས། དེ་ལྟར་བགྱིའོ། །དེ་ཉལ་བ་དང༌། སྤྱི་གཅེར་ཡིན་པས་དེའི་མགོ་ལ་སྦྲང་བུ་ཆགས་སོ། །བུས་དེ་མཐོང་ནས་སྦྲང་བུ་བསྐྲད་པ་དང་སྦྲང་བུ་ཁྲག་གིས་མྱོས་པ་འཕུར་དུ་མ་བཏུབ་པས་བུ་དེ་ཁྲོས་ཏེ། འདིས་བདག་གི་ཕ་གསོན་བཞིན་དུ་ཁྲག་འཐུང་གིས་གསད་དོ་སྙམ་ནས་སྦྲང་བུ་ལ་སྤང་ལེབ་འཕངས་པས་སྦྲང་བུ་བྲོས་ཏེ་ཕ་ཤི་བ་དང༌། ལྷས། དགྲ་བོ་བློ་གྲོས་ལྡན་པ་མཆོག་ཡིན་ཏེ། །མཛའ་བཤེས་བློ་གྲོས་བྲལ་བ་དེ་ལྟ་མིན། །བློ་གྲོས་ཆུང་ངུས་སྦྲང་བུ་གསད་སྙམ་པས། །ཐོ་བས་ཕ་ཡི་ཀླད་པ་བཅོམ་པར་གྱུར། །དེའི་དུས་ཀྱི་བཙོ་བླག་མཁན་དེ་ནི་རྒན་ཞུགས་འདི་ཡིན་ནོ། །བཙོ་བླག་མཁན་གྱི་བུ་དེ་ནི་རྒན་ཞུགས་ཀྱི་བུ་འདི་ཡིན་ཏེ། དེའི་ཚེའང་ཕ་བསད་ཀྱང་མཚམས་མེད་མ་བྱུང་ལ། ད་ལྟའང་ཕ་བསད་ཀྱང་མཚམས་མེད་དང་ཕམ་པ་མ་བྱུང་ངོ༌། །ཕམ་པ་མ་བྱུང་ངོ༌། །
ཕྲན་ཚེགས་ནས་འབྱུང་བ་ནི། སྟོན་པ་མཉན་ཡོད་ཡོན་ནའོ། །དགའ་བོ་སྐྲ་བྲེགས་ནས་རིང་པོ་མ་ལོན་པར་མཉན་ཡོད་དུ་བསོད་སྙོམས་ལ་ཞུགས་ནས་རིམ་གྱིས་སྲང་དུ་སོང་བ་དང༌། བྲམ་ཟེ་ཞིག་བྲམ་ཟེའི་ཁྱེའུ་ལྔ་བརྒྱ་ལ་གསང་ཚིག་ཀློག་གོ །དེས་བྲམ་ཟེའི་ཁྱེའུ་ཞིག་ལ་སྨྲས་པ། ཁྱོད་དགེ་སྦྱོང་མགོ་རེག་འདིའི་མགོར་ལྟག་དབྱུག་བསྣུན་ནུས་སམ། །མཁན་པོ། ཤིན་ཏུ་རྔོ་ཐོག་གོ་ཞེས་དེའི་མགོར་ལྟག་དབྱུག་གིས་བརྒྱབ་བོ། །དགའ་བོ་ལོག་སྟེ་བྲམ་ཟེ་དེ་ལ་བལྟས་པ་དང༌། དེ་ཁྲོས་ནས། བྲམ་ཟེའི་ཁྱེའུ། ཡང་རྒྱོབ་ཅིག །དེས་དེ་ལ་ལན་གཉིས་སུ་ལྟག་དབྱུག་གིས་བརྒྱབ་བོ། །དགའ་བོས་རྒྱལ་བྱེད་ཚལ་(༡༡༩བ)དུ་ཕྱིན་ནས་ཟས་ཀྱི་བྱ་བ་བྱས་ཏེ་ལྷུང་བཟེད་བཀྲུས་ནས་དགེ་སློང་དག་ལ་སྨྲས་པ། སྲང་ཆེ་གེ་མོར་མ་འདོང་ཞིག །ཅིའི་ཕྱིར། དེ་ན་བྲམ་ཟེ་གཏུམ་པོ་ཞིག་བྲམ་ཟེའི་ཁྱེའུ་ལྔ་བརྒྱ་ཙམ་ལ་གསང་ཚིག་ཀློག་སྟེ་དེས་བདག་ལ་ལྟག་དབྱུག་གཉིས་བསྣུན་ནོ། །ཁྱོད་ཀྱིས་ཅི་ཉེས། གཅིག་ནི་ཉེས། གཉིས་པ་ནི་མ་ཉེས་སོ། །ཇི་ལྟར་ཉེས། གཅུགས་མེད་པར་དེས་ཁོ་བོ་ལ་ལྟག་དབྱུག་གིས་བསྣུན་ནས་ཁོ་བོས་ལོག་སྟེ་བལྟས་པ་དང་དེས་ལན་གཉིས་བསྣུན་པས། ཁོ་བོས་ལོག་སྟེ་བལྟས་པ་དེ་ནི་ཉེས་སོ། །སྔ་མ་ནི་མ་ཉེས་སོ། །ཉེ་དགས་ཐོས་ནས། ཅི་ཞིག་གསུང༌། ཆེན་པོ་མ་ལགས་སོ། །དེ་བདག་གིས་ཐོས་ཀྱིས་ཡང་གསུངས་ཤིག །དེས་ཇི་ལྟར་གྱུར་པ་སྨྲས་པ་དང༌། ཉེ་དགས་མགོ་ལན་གསུམ་གཅོགས་ནས། འཇལ་ཏོ་ཞེས་བྱས་ཏེ། སྐྲ་བཟླས་ཏེ་བྲེགས་ནས་ཏིལ་མར་གྱིས་བསྐུས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་རིམ་གྱིས་སྲང་དུ་ཕྱིན་པ་ན་བྲམ་ཟེ་དེ་གཞན་དུ་གཡེངས་པས་དེ་མ་མཐོང་ངོ༌། །
ཉེ་དགས་དེའི་མདུན་དུ་འཆག་པ་དང༌། བྲམ་ཟེ་དེས་མཐོང་ནས་བྲམ་ཟེའི་ཁྱེའུ་ཞིག་ལ། ཁྱོད་སོང་ལ་དགེ་སྦྱོང་མགོ་རེག་འདིའི་མགོ་ལྟག་དབྱུག་ཅིག་སྣུན་ཅིག །ཉེ་དགས་ཐོས་ནས། བཀྲེན་པ། དེ་བཏང་ཅི་དགོས། ཁྱོད་ཉིད་ཚུར་ཤོག །བྲམ་ཟེ་དེ་ཁྲོས་ནས་རང་ཉིད་ཀྱིས་ཉེ་དགའ་ལ་ལྟག་དབྱུག་གིས་བསྣུན་པས་ཉེ་དགས་དེའི་དཔུང་པ་ནས་བཟུང་སྟེ། བཀྲེན་པ། ཉེ་དགའ་ལའང་རྡེག་གམ། རྒྱལ་པོའི་ཕོ་བྲང་དུ་འདོང་ངོ་ཞེས་དྲངས་པ་དང༌། དེས་བྲམ་ཟེའི་ཁྱེའུ་རྣམས་བོས་ནས་དེ་དག་གིས་ཀྱང་དེའི་དཔུང་པ་ཡ་གཅིག་ནས་བཟུང་སྟེ་དྲངས་སོ། །ཉེ་དགའ་ཚན་པོ་ཆེའི་སྟོབས་དང་ལྡན་པས་བྲམ་ཟེའི་ཁྱེའུ་ལྔ་བརྒྱ་དང་བྲམ་ཟེ་དེ་དྲངས་ནས་རྒྱལ་པོའི་ཕོ་བྲང་གི་སྒོར་སོང་ངོ༌། །དྲུག་སྡེ་ཁྲོས་ནས་རྒྱལ་པོའི་ཕོ་བྲང་གི་སྒོ་ན་འདུག་པའི་ཚེ་རྒྱལ་པོ་གསལ་རྒྱལ་གྱི་ཕོ་བྲང་གཡོ་བར་འགྱུར་བས། རྒྱལ་པོས་ལྟས་དེ་མཐོང་ནས་མི་ཞིག་ལ་བསྒོ་བ། སྒོར་དྲུག་སྡེ་འགའ་ཞིག་བྱོན་པར་མ་གྱུར་གྲང༌། སོང་ལ་ལྟོས། བལྟས་པ་ན་ཉེ་དགའ་བྲམ་ཟེའི་ཁྱེའུ་ལྔ་བརྒྱ་ཙམ་དང་སྒོ་ན་འདུག་ནས། ལྷ། ཉེ་དགའ་སྒོ་ན་མཆིས་སོ། །དེ་ནང་དུ་སྤྱན་དྲོངས་ཤིག །དེ་ནང་དུ་འོངས་ནས། ལྷ། དགའ་བོ་རབ་ཏུ་མ་བྱུང་ན་ཅིར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར། འོ་ན་ཁྱོད་དེའི་ཅིར་འགྱུར། གཡོག་ཏུ་འགྱུར་རོ། །ལྷ། ཁྱོད་ཀྱིས་དགེ་སློང་རྣམས་ནི་གཞོན་ནུའི་ཐབས་སུ་གནང༌། དགེ་སློང་མ་རྣམས་ནི་བཙུན་མོའི་འཁོར་གྱི་ཐབས་སུ་གནང་སྟེ། བདག་ཅག་ལ་དེ་ལྟར་བྱམས་ན། བྲམ་ཟེ་ཞིག་གིས་ལྷ་ཁྱད་དུ་བསད་དེ། སློབ་དཔོན་དགའ་བོ་ལ་ལྟག་དབྱུག་གཉིས་བསྣུན། བདག་ལའང་ལྟག་དབྱུག་གིས་བརྒྱབ་བོ། །རྒྱལ་པོ་(༡༢༠ན)ཁྲོས་ཏེ། བློན་པོ་རྣམས་སོང་ལ་བྲམ་ཟེ་དེའི་ལག་པ་ཆོད་ཅིག །དེས་དེ་ཁྲིད་ནས་སྲང་དུ་སོང་བ་ན་དེའི་ཉེ་དུ་རྣམས་འོངས་ནས་བློན་པོ་རྣམས་ལ་སྨྲས་པ། ལྷ་ལ་ཉེས་པ་བྱས་པ་ལག་པ་གཅད་པའི་རིགས་ན། འདི་ལག་པས་འཚོ་བ་ལགས་པས་གཡོན་པ་གཅད་པའི་རིགས་སོ། །དེའི་ལག་པ་གཡོན་པ་བཅད་དོ། །
རེ་ཞིག་ན་ཉེ་དགའ་ཕྱིན་པ་དང་བྲམ་ཟེ་དེ་ལག་པ་གཡོན་པ་གཡོགས་ནས་གཡས་པས་ཀློག་པ་མཐོང་བས་ཤིན་ཏུ་ཁྲོས་ཏེ་རྒྱལ་པོའི་ཐད་དུ་སོང་ནས། རྒྱལ་པོ་རྣམས་བཀའ་བཙན་ན་དེ་ཡང་ལྷ་ལ་མེད་དོ། །ཅི་བྱས། བྲམ་ཟེ་དེའི་ལག་པ་མ་བཅད་དོ། །རྒྱལ་པོས་བློན་པོ་ལ། དེའི་ལག་པ་མ་བཅད་དམ། བཅད་དོ། །འོ་ན་ཉེ་དགའ་འདི་སྐད་ཟེར་རོ། །ཉེ་དགས་སྨྲས་པ། བྲམ་ཟེ་དེ་ལག་པ་གཡས་པས་སྒྱུར་ཅིང་ཀློག་གོ །བློན་པོ་ན་རེ། དེའི་ཕ་མ་དག་གིས། འདི་ལག་པས་འཚོ་བ་ལགས་པས་གཡོན་པ་ཆོད་ཅིག་ཟེར་ནས་བཅད་དོ། །རྒྱལ་པོས། ཕ་མས་གཡོན་པ་གཅོད་དུ་བཅུག་ན་ངས་གཡས་པ་གཅོད་དུ་གཞུག་གིས་ཆོད་ཅིག །དེས་དེའི་ལག་པ་གཡས་པ་བཅད་པས་གཉིས་ཀ་འཕྱང་ཞིང་འདུག་གོ །ཉེ་དགས། ཅི་ཁོ་བོ་ལ་ལྟག་དབྱུག་གིས་མི་རྡེག་པར་ལག་པ་དཔྱངས་ཏེ་འདུག །དེ་སྨ་བབ་ནས་ཅང་མི་ཟེར་བ་དང༌། ཁྱིམ་པ་རྣམས་ན་རེ། དགེ་སྦྱོང་རྣམས་ནི་སྙིང་རྗེ་མེད་པ་སྟེ། ཆད་པས་བཅད་ནས་ཀྱང་ཞེ་གཅོད་པར་བྱེད་དོ་ཞེས་འཕྱ་བའི་སྐབས་དེ་གསོལ་བས། མིའི་འགྲོ་བ་པའི་ལག་པ་གཅོད་ན་སྦོམ་པོའོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། བྲམ་ཟེ་དེ་དགའ་བོས་བསྲུངས། ཉེ་དགས་བཏང་བ་ལ་གཟིགས། ད་ལྟར་འབའ་ཞིག་ཏུ་མ་ཟད་འདས་པའི་དུས་ནའང་དགའ་བོས་བསྲུངས། ཉེ་དགས་བཏང་བ་དེ་ཉོན་ཅིག །སྔོན་སྐྱེད་མོས་ཚལ་མེ་ཏོག་དང་འབྲས་བུས་བརྒྱན་པ་ཞིག་ན་དྲང་སྲོང་ཞིག་ཤིང་བིལ་བའི་དྲུང་ན་འདུག་ཅིང་རང་གི་དོན་སེམས་པ་ལ་དེའི་སྟེང་ནས་སྤྲེའུ་ཞིག་གིས་བིལ་བའི་འབྲས་བུ་འཕངས་པས་དེའི་མགོ་སྣད་ནས་སྨྲས་པ། ཁྱོད་མེད་འགྱུར་བ་གང་ཡིན་པ། །དེ་ནི་ཁོ་བོ་མི་བྱེད་ཀྱི། །ཁྱོད་མེད་འགྱུར་བ་གང་ཡིན་པ། །དེ་ནི་ཁྱོད་ཉིད་བྱེད་ཅིང་འདུག །དྲང་སྲོང་དེའི་སྨོན་འདྲིན་རྔོན་པ་ཞིག་ཡོད་པ་དེས་རི་དྭགས་གཤོར་དུ་སོང་བ་ལས་བསྟི་གནས་དེར་འོངས་པས། དྲང་སྲོང་དེ་བྱ་བ་འགའ་ཞིག་གི་ཕྱིར་གཞན་དུ་སོང་བས་མི་སྣང་ནས། ཤིང་བིལ་བ་དེའི་དྲུང་ན་འདུག་པས་སྤྲེའུ་དེས་རྔོན་པའི་མགོར་བིལ་བའི་འབྲས་བུ་ཞིག་འཕངས་པ་དང་རྔོན་པ་དེ་སྤྱི་གཅེར་ཡིན་པས་ཀླད་པ་སྣད་ནས་གྱེན་དུ་བལྟས་པས་སྤྲེའུ་མཐོང་སྟེ་དུག་མདའ་ཞིག་བསྣུན་ནས་བསད་དོ། །དེའི་དུས་ཀྱི་དྲང་སྲོང་དེ་ནི་དགའ་བོ་ཡིན་ནོ། །སྤྲེའུ་དེ་ནི་བྲམ་ཟེ་འདི་ཡིན་ནོ། །རྔོན་པ་དེ་ནི་ཉེ་དགའ་འདི་ཡིན་(༡༢༠བ)ཏེ། །དེའི་ཚེའང་འདི་དགའ་བོས་བསྲུངས་ལ། ཉེ་དགས་བཏང་ངོ༌། །
མཉན་ཡོད་ན་དྲུག་སྡེ་རྣམས་རྒས་པའི་གནས་སྐབས་ནའང་དགོན་བག་བྱེད་པ་དང༌། དགེ་སློང་རྣམས་ཀྱིས། ཁྱེད་མགོ་སྐྱས་ཀྱང་ད་དུང་རྒོད་བག་མི་གཏོང་ངམ། །དེ་དག་མཐའ་ཞིག་ཏུ་སོང་ནས། དགའ་བོ་ཉེ་དགའ། ལྷུང་བཟེད་ནག་པོ་ཅན་འདི་དག་ལ་མི་དགའ་བ་ཞིག་བྱའོ་ཞེས་གླགས་འཚོལ་བ་དང༌། གནས་བརྟན་དག་ནགས་གསེབ་ཏུ་སོང་སྟེ་བསམ་གཏན་བྱེད་པ་ལ་དྲུག་སྡེས་གནས་གསུམ་ནས་ནགས་མེས་བཏང་སྟེ་ངོས་གཅིག་ཏུ་འདུས་ནས་བསྡད་པ་དང༌། གནས་བརྟན་རྣམས་རིངས་པར་བྲོས་སོ། །དྲུག་སྡེས་སྨྲས་པ། ཅིའི་སླད་དུ་རིངས་རིངས་བཞུད། ནགས་ཀྱི་མེ་མ་མཐོང་ངམ། སྟོན་པས་བདེ་བའི་གནས་སྐབས་སུ་ཚུལ་ཁྲིམས་གསུངས་སམ་ཞེས་ཅུད་ཟད་བགད་པ་དང༌། ཁྱོད་ཀྱིས་ཁོ་བོ་ཅག་ལ་བསམས་བཞིན་ཏུ་མ་བརྩམས་གྲང༌། བཀྲེན་པ་དག །ཁྱེད་དེ་ལྟར་མི་དགའ་བར་བྱའོ་ཞེས་ཟེར་བའི་སྐབས་དེ་གསོལ་བས། ནགས་མེས་གཏོང་ན་སྦོམ་པོའོ། །ཉེ་དགས་སྐྲ་ལྗང་ཁུ་ཅན་དེའི་སྐྲ་དག་ཀྱང་གར་མཁན་ལ་བཙོངས་པའི་སྐབས་དེ་གསོལ་བས། དགེ་སློང་གིས་སྐྲ་བཙོང་བར་མི་བྱའོ། །བྱེད་ན་ཉེས་པ་སྦོམ་པོར་འགྱུར་རོ། །གང་གིས་བརྐུས་པ་དེ་བླའི་གྲར་འབུལ་ནའོ་ཞེས་པའི་གླེང་གཞི་ནི། དེ་ནི་ཆོས་བཤད་པས་བླང་བར་བྱའོ་ཞེས་པའི་གླེང་གཞིར་འབྱུང་བ་ལྟར་རོ། །ཞུ་བའི་སྐབས་ནས་འབྱུང་བ་ནི་འདིར་མ་བྲིས་སོ། །འདུལ་བྱེད་ཀྱི་སྐབས་ནས་འབྱུང་བ་ནི། དགེ་སློང་ནད་པ་ཞིག་སྟན་གྱི་སྟེང་ན་འདུག་པ་ལ་ནད་གཡོག་གིས། ལོངས་ཞེས་སྨྲས་པས། དེས། ཁོ་བོ་མ་བསླངས་ཤིག །ཤིར་འོང་ངོ་ཞེས་བྱས་ཀྱང༌། ལོངས་ཤིག །དེ་ལངས་པས་ཤི་ནས་འགྱོད་དེ་གསོལ་བས། ཕམ་པའི་ཉེས་པ་མེད་དེ། ཁོ་བོ་འཆི་བར་འོང་ངོ་ཞེས་དེ་སྐད་ཟེར་བ་ལ་ཡིད་མི་ཆེས་ཤིང་དེ་བཞིན་ཉིད་དུ་སྒྲུབ་པར་བྱེད་ན་སྦོམ་པོའོ། །
དགེ་སློང་ཞིག་ནད་ཡུན་རིང་པོས་གཟིར་བས་ནད་གཡོག་སྐྱོ་སྟེ། ཁྱོད་མྱུར་དུ་འཆི་ཡིས་ནད་གཡོག་མི་བྱའོ་ཞེས་ནད་གཡོག་མ་བྱས་པས་ཤི་ནས་འགྱོད་དེ་གསོལ་བས། ཕམ་པའི་ཉེས་པ་མེད་དེ། ནད་པ་ཤི་བླའོ་ཞེས་གཡོག་མི་བྱེད་ནའོ། །དགེ་སློང་ཞིག་ན་བ་དང༌། འཕྲོད་པའི་ཟས་མ་རྙེད་པར་མི་འཕྲོད་པའི་ཟས་བྱིན་ནས། འདི་ལས་ཅི་ཡོག་པ་ཟོ་ཞིག །དེས་ཟོས་ཏེ་ཤི་ནས། སྦོམ་པོའོ། །དགེ་སློང་གིས་ཕོལ་མིག་མ་སྨིན་པར་བཏོལ་བས་ཤི་ནས། འབྲས་ཡོངས་སུ་མ་སྨིན་པ་བཏོལ་ནའོ། །ཁྱིམ་བདག་ཅིག་གསར་དུ་དད་ནས་འབྲུ་དང་འབྲས་བུ་གསར་པ་དག་དགེ་འདུན་ལ་ཕུལ་ཏེ་རང་ཉིད་ཕྱིས་ཟའོ། །དགོན་པ་བ་ཞིག་ཁྱིམ་དེར་སོང་བ་དང་ཁྱིམ་བདག་དེས། ད་ཕྱིན་ཆད་དགེ་འདུན་ལ་མི་དབུལ་བར་དགོན་པ་བ་འདི་ལ་དབུལ་ལོ་(༡༢༡ན)སྙམ་ནས་དེ་ལ་བྱིན་ནོ། །དགེ་སློང་དེ་དག་གིས། ཁྱིམ་བདག་དེ་སྔར་འབྲུ་དང་འབྲས་བུ་གསར་པ་དགེ་འདུན་ལ་ཕུལ་ནས་རང་ཉིད་ཕྱིས་ཟ་ན། ད་དེས་མ་བྱིན་པས་དགོན་པ་བ་དེས་བཀག་གིས་སོང་ལ་དེ་བོས་ཤིག །དེ་བོས་ནས། ཁྱོད་ཀྱིས་མ་བཀག་གམ། མ་བཀག་གོ །དེ་དག་གིས། འདིར་སྨྲར་མི་བཏུབ་ཀྱིས་དོང་དུ་ཆུག་ཅིག །དེ་དོང་དུ་བཅུག་པས་ཤི་ནས་འགྱོད་དེ་གསོལ་བས། དོང་དུ་འཇུག་ན་སྦོམ་པོའོ། །ཁྱིམ་བདག་ཅིག་དགེ་འདུན་དབྱར་གནས་པ་རྣམས་ལ་ཆོས་གོས་འབུལ་བ་ལས་དགེ་སློང་དགོན་བ་པ་ཞིག་ཁྱིམ་དེར་འོངས་ཏེ། ཁྱིམ་བདག་དེ། ད་ཕྱིན་ཆད་དགེ་འདུན་ལ་མི་དབུལ་བར་དགོན་པ་བ་འདི་ལ་དབུལ་ལོ་སྙམ་ནས་དགོན་པ་བ་ལ་བྱིན་པ་དང༌། དགེ་སློང་དེ་དག་གིས། ཁྱིམ་བདག་དེ་སྔར་དགེ་འདུན་དབྱར་གནས་པ་རྣམས་ལ་གོས་འབུལ་ན་དགོན་པ་བ་དེས་བཀག་གིས་སོང་ལ་བོས་ཤིག །དེ་བོས་ནས། ཁྱོད་ཀྱིས་མ་བཀག་གམ། བདག་གིས་མ་བཀག་གོ །འདི་སྨྲར་མི་བཏུབ་ཀྱིས་སྒོ་གླེགས་ཀྱི་བར་དུ་ཚིར་ཅིག །དེ་དག་གིས་སྒོ་གླེགས་ཀྱི་བར་དུ་བཙིར་བས་ཤི་ནས་འགྱོད་དེ་གསོལ་བས། སྒོ་གླེགས་ཀྱིས་འཚིར་བ་ལ་སོགས་པས་ཉོན་མོངས་པར་བྱེད་ན་སྦོམ་པོའོ། །
དགེ་སློང་ཞིག་ནད་ཡུན་རིང་པོས་སྒུར་པོར་སོང་བས་བདག་གསོན་ཏེ་ཅི་རུང་རང་ཉིད་གཡང་ས་ནས་མཆོང་ངོ་སྙམ་སྟེ་གཡང་ས་ནས་མཆོངས་པ་དང་ཝ་མི་རོ་ལ་ཟ་བ་ཞིག་གི་སྟེང་དུ་ལྷུང་ནས་ཝ་དེ་ཤི། དགེ་སློང་དེ་དྲང་པོར་གྱུར་པ་དང༌། ཡང་དགེ་སློང་ནད་པ་ཞིག་ནད་ཡུན་རིང་པོས་གཟིར་ནས། གསོན་ཏེ་ཅི་རུང་སྙམ་ནས་ཐག་པ་ཁྱེར་ཏེ་ནགས་སུ་སོང་ནས་ཤིང་ལ་འཛེགས་ཏེ་སྐེ་ལ་ཞགས་མིག་བཅུག་ནས་མཆོངས་པ་དང་ཐག་པ་ཆད་དེ་ཁྱི་མོ་བུ་བྱུང་བ་ཞིག་གིས་སྟེང་དུ་ལྷུང་ནས་ཁྱི་མོ་བུ་དང་བཅས་པ་ཤིའོ། །དེ་གཉིས་འགྱོད་དེ་གསོལ་བས། གཡང་ས་ནས་མཆོང་བ་དང་བཅིང་བ་ལ་སོགས་པ་འཆི་བའི་དོན་དུ་སྒྲུབ་པ་ཡང་ངོ༌། །དགེ་སློང་ཞིག་ཡུན་རིང་དུ་ནད་ཀྱིས་གཟིར་ནས་མཛའ་བོའི་དྲུང་དུ་སོང་སྟེ། གྲི་བྱིན་ཅིག །ཁྱོད་ལ་གྲི་ཅིར་དགོས། རེ་ཞིག་བྱིན་ཅིག །དེས་བྱིན་པ་དང༌། གནས་ཁང་དུ་ཞུགས་ནས་སྒོ་བཅད་དེ་གཏན་པ་བཅུག །སྐྱིལ་ཀྲུང་བཅས་ནས་རང་ཉིད་ཀྱི་སྲོལ་ཀོང་བཅད་དེ་ལག་ན་གྲི་ཐོགས་བཞིན་དུ་ཤིའོ། །དགེ་སློང་དེས་ཉི་མ་གཉིས་གསུམ་ནས་དེའི་གནས་ཁང་དུ་ལྟར་སོང་བས་ཤི་བ་མཐོང་ནས། ངས་གྲི་བྱིན་པས་ཕམ་པ་བྱུང་ངམ་སྙམ་པ་དང༌། ཡང་ནད་པ་ཞིག་ནད་མ་སོས་ནས། བདག་གསོན་ཏེ་ཅི་རུང་གིས་འཆིའོ་སྙམ་ནས་ནད་གཡོག་ལ། ཐག་པ་བྱིན་ཅིག །དེས་བྱིན་པ་དང༌། འགེགས་ནས་ཤིའོ། །དེ་གཉིས་འགྱོད་དེ་གསོལ་བས། ཉེས་པ་མེད་དེ། ནད་པ་ལ་བབ་ཅོལ་དུ་མཚོན་དང་(༡༢༡བ)ཐག་པ་སྦྱིན་པར་མི་བྱའོ། །
དགོན་པ་གསར་ཅན་ཞེས་བྱ་བར་གནས་ཁང་གསར་པ་རྩིག་པའི་གྲོགས་བྱེད་པའི་དགེ་སློང་གི་ལག་ནས་ཕ་གུ་ལྷུང་སྟེ་ལས་བྱེད་པའི་མགོར་ལྷུང་ནས་ཤི་བ་དང༌། སོ་ཕག་འཇོག་པའི་ལག་ནས་སྟེའུ་ལྷུང་སྟེ་རྩིག་མཁན་ལ་ཕོག་ནས་ཤི་བ་དང་། སེལ་བོ་འཇིམ་པས་བཀང་ནས་སྟེང་དུ་སྐྱེལ་བའི་ཐག་པ་ཆད་དེ་རྩིག་མཁན་གྱི་སྟེང་དུ་ལྷུང་ནས་ཤི་བ་རྣམས་འགྱོད་དེ་གསོལ་བས། ཉེས་པ་མེད་དེ། ཞལ་ཏ་པས་ཤེས་བཞིན་དུ་བྱའོ། །དགེ་སློང་ཐལ་མོའི་རིག་སྔགས་འདེབས་ཤིང་ལག་པས་བྱུགས་ཏེ་ཐལ་མོ་གཅིག་བསྣུན་པ་དང་ཤི་ནས་འགྱོད་དེ་གསོལ་བས། ཉེས་པ་མེད་དེ། གསང་སྔགས་ཀྱི་ཐལ་ལྕག་བྱ་བ་ཡང་ངོ༌། །དགེ་སློང་ཞིག་བརྣངས་ཏེ་ཤི་ལ་ཐུག་པ་དང༌། དེ་ལ་དགེ་སློང་ཞིག་གིས་ཁུ་ཚུར་ཞིག་བསྣུན་པས་བརྣངས་པ་དེ་ཁྲག་དང་བཅས་ཏེ་བྱུང་ནས་ཤིའོ། །དེ་འགྱོད་དེ་གསོལ་བས། ཉེས་པ་མེད་དེ། ཐོགས་པ་བསལ་བའི་ཕྱིར་བསྣུན་པ་ཡང་ངོ༌། །དགེ་སློང་ཞིག་རིའི་དྲུང་ན་དཀྱིལ་ཀྲུང་བཅས་ཏེ་འདུག་པ་དང༌། དགེ་སློང་ཞིག་གིས་རིའི་རྩེ་ནས་རྡོ་སྒྲིལ་བ་དགེ་སློང་དེའི་སྟེང་དུ་ལྷུང་ནས་ཤིའོ། །འགྱོད་དེ་གསོལ་བས། དེར་གྱུར་པས་ལེགས་པར་སོ་སོར་བརྟག་པར་བྱས་ཏེ་དྲིལ་བར་བྱའོ། །དགོན་པར་དགེ་འདུན་སྲོ་ཁང་གི་ཁང་པ་རྩིག་པའི་གདུང་སྟེང་དུ་འདྲེན་པ་ལས་དགེ་སློང་ཉུང་ལ་ཁུར་ལྕི་བས་ཤོར་ནས། འོག་ན་ཤིང་མཁན་ཤིང་གཞོག་པའི་སྟེང་དུ་ལྷུང་སྟེ་ཤིའོ། །འགྱོད་དེ་གསོལ་བས། ཉེས་པ་མེད་དེ། ཕྱོགས་ཉུང་ངུས་འདེགས་པ་ལྕི་བ་ལ་འབད་པར་མི་བྱའོ། །
མཉན་ཡོད་ན་ཁྱིམ་བདག་ཅིག་ལ་ཁྱེའུ་ཞིག་བཙས་ཏེ་ཆེན་པོར་གྱུར་པ་དང༌། མགོ་བོས་སོ་ཕག་བསྲེགས་པ་ཚོགས་པས་མིང་མགོ་བརྟན་དུ་བཏགས་སོ། །དེ་རབ་ཏུ་བྱུང་ནས་གྲོང་དུ་སོང་བ་དང་བུད་མེད་ཁྱེའུ་ཁྲིད་པ་ཞིག་དེའི་རྗེས་བཞིན་དུ་གློ་གཡས་གཡོན་ལྟ་ཞིང་སོང་ངོ༌། །དེ་ལ་ལུག་ཐུག་ཅིག་གིས་བསྙོགས་པ་དང་དགེ་སློང་དེས་མགོ་བཏུད་དེ་སོང་བས་ལུག་ཐུག་དེས་བདག་ལ་རྡུང་བར་ཤེས་ནས་ལུག་ཐུག་དེ་ལ་བརྡུངས་པས་དགེ་སློང་དེ་ཁྱེའུའི་སྟེང་དུ་འགྱེལ་ནས་ཁྱེའུ་ཤི་སྟེ་གསོལ་བས། ཉེས་པ་མེད་དེ། གཉའ་ཤིང་གང་ཙམ་དུ་ལྟ་ཞིང་འགྲོ་ཡི། སྤྱིའུ་ཚུགས་སུ་འགྲོ་བར་མི་བྱའོ། །སྨན་པ་ལས་རབ་ཏུ་བྱུང་བ་ཞིག་གིས་དགེ་སློང་ནད་པ་ཞིག་གི་དྲུང་དུ་འོངས་པ་དང༌། དེས་དེ་ལ། གཏར་ཀ་ཐོབ་ཅིག །དེས་ཀྱང་དེ་ལ་གཙགས་བུ་ཞིག་བཏབ་ནས་སླར་བྱུང་བས་དགེ་སློང་དེ་ཤི་ནས་གསོལ་བས། ཉེས་པ་མེད་དེ། མ་བསླབས་པར་བསླབ་པ་ལ་སྦྱར་བར་མི་བྱའོ། །དགེ་སློང་ཞིག་བསོད་སྙོམས་སྤྱོད་པ་ན་མདའ་གཞུ་ཐོགས་པ་ཞིག་འོངས་ནས། དགེ་སློང་དེས། ཁོ་བོ་མ་བསད་པར་འདི་ལ་འཕོངས་(༡༢༢ན)ཤིག །དེས་མདའ་འཕངས་ནས་བསད་དོ། །གསོལ་བས། ཉེས་པ་མེད་དེ། མཚོན་འཕང་བ་ལ་བསྒོ་བར་མི་བྱའོ། །དགེ་སློང་ཞིག་གིས་དགེ་སློང་ནད་སོས་ནས་རིང་པོ་མ་ལོན་པ་ཞིག་ཁྲིད་ནས་སོང་བ་དང༌། ལམ་དུ་རྐུན་པོས་སྐྲག་ནས་དེས་དེ་ལ། སྐྱེན་པར་འདོང་ངོ༌། །དེས། མི་ནུས་སོ། །ཚུར་ཤོག་བཅོམ་པ་རེ་ཞེས་ཁྲིད་པ་དང་ཤིའོ། །གསོལ་བས། ཉེས་པ་མེད་དེ། ནད་པ་མི་ནུས་པ་ལམ་དུ་མི་བཀྲིའོ། །

4) བརྫུན་དུ་སྨྲ་བའི་ཕམ་པ།

བརྫུན་དུ་སྨྲ་བའི་ཕམ་པ་ལ་གསུམ་ལས། རྣམ་འབྱེད་ཀྱི་སྐབས་ནས་འབྱུང་བ་ནི། སྟོན་པ་ཡངས་པ་ཅན་ན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟང་ན་བཞུགས་སོ། །དེའི་ཚེ་ཉ་པ་ལྔ་བརྒྱ་ཆུ་ཀླུང་ཡིད་འོང་ལྡན་ལ་རྒྱ་མོ་སྤྱོད་པ་དང༌། སྤྱོད་པ་ཆེ་བ་གཉིས་རེས་མོས་སུ་འཇུག་ཅིང་འཁོད་དོ། །རེ་ཞིག་ན་ཡངས་པ་ཅན་དུ་དུས་སྟོན་བྱུང་ནས་ཉ་ཉོ་བ་མང་པོ་འོང་བར་ཤེས་ཏེ། ཉིས་བརྒྱ་ལྔ་བཅུས་ནི་རྒྱ་མོ་སྤྱོད་པ་བཅུག །ཉིས་བརྒྱ་ལྔ་བཅུས་ནི་རྒྱ་མོ་སྤྱོད་པ་ཆེ་བ་བཅུག་གོ །རྒྱ་མོ་སྤྱོད་པ་བཅུག་པ་དེ་དག་གིས་ཉ་དང་རུས་སྦལ་དང་ཆུ་སྲིན་བྱིས་པ་གསོད་ལ་སོགས་པ་འབྲུའི་ཕུང་པོ་བཞིན་དུ་བཞག་གོ །རྒྱ་མོ་སྤྱོད་པ་ཆེ་བ་བཅུག་པ་དེ་དག་གིས་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པའི་ཆུ་སྲིན་ཉའི་རིགས་བོངས་ཚོད་ཆེན་པོ་ཉལ་བ་ཟིན་ནས་དེ་དག་གིས་དྲངས་པ་ན་དེ་གཉིད་སད་ནས་ཉ་པ་ཉིས་བརྒྱ་ལྔ་བཅུ་རྒྱ་མོ་སྤྱོད་པ་ཆེ་བ་ཁྱེར་ཏེ་རྒྱུན་ཕྱོགས་སུ་ཞུགས་སོ། །དེ་དག་གིས་ར་མདའ་ལྡོག་པས་ཉ་པ་ཉིས་བརྒྱ་ལྔ་བཅུ་པོ་གཞན་དག་ཀྱང་ལྷགས་ཏེ་དེ་ལ་རུབ་པ་དང༌། དེས་ཉ་པ་ལྔ་བརྒྱ་དང་རྒྱ་མོ་སྤྱོད་པ་ཆེ་བ་ཁྱེར་ཏེ་རྒྱུན་ཕྱོགས་སུ་ཞུགས་ནས་བཟུང་མ་ཐུབ་པ་དང་ར་མདའ་ལྡོག་པས་བ་ལང་རྫི་དང་ཕྱུགས་རྫི་དང་རྩྭ་ཤིང་འཐུ་བ་དང༌། ལམ་དང་ལམ་གོལ་བས་འཚོ་བ་དང༌། གཞན་ཡང་མི་བརྒྱ་སྟོང་དུ་མ་ལོག་ནས་དྲངས་ཏེ་རྒྱ་མོ་རལ་རལ་འཐེན་ནས་ཆུ་སྲིན་དེ་ཆུ་ནས་སྐམ་ལ་ཕྱུང་བ་དང་དེ་ལ་མགོ་བཅོ་བརྒྱ་དང་མིག་སུམ་ཅུ་རྩ་དྲུག་ཡོད་དོ། །དེ་ཐོས་ནས་སྲོག་ཆགས་བརྒྱ་སྟོང་དུ་མ་ཆུ་ཀླུང་ཡིད་འོང་ལྡན་གྱི་འགྲམ་དུ་ལྷགས་ཏེ། ཁ་ཅིག་ལྟད་མོ། ཁ་ཅིག་སྔོན་གྱི་དགེ་བའི་རྩ་བས་བསྐུལ་ལོ། །
རྫོགས་བྱེད་ལ་སོགས་པའི་སྟོན་པ་དྲུག་ཡངས་པ་ཅན་ན་གནས་པ་དེ་དག་ཀྱང་ལྟད་མོ་ལ་ལྷགས་སོ། །དེར་སངས་རྒྱས་བཅོམ་ལྡན་འདས་ལ་མི་མཁྱེན་པ་དང་མི་གཟིགས་པ་ཅུང་ཟད་ཀྱང་མི་མངའ་བས། སྟོན་པ་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པ། སྲུང་བ་གཅིག་པུ་བ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། (༡༢༢བ)དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་བརྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་གནས་པ། བསྡུ་བའི་དངོས་པོ་ལ་ཡུན་རིང་པོ་ནས་སྦྱང་བ་མཛད་པ། མི་འཇིགས་པ་བཞིས་བརྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པ་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་དུ་འཕགས་པ་རྣམས་ཀྱི་ཆོས་ཉིད་ནི། ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས། གང་ནི་འཕེལ། ངས་གང་ངན་སོང་ནས་བསླངས་ཏེ་མཐོ་རིས་དང༌། ཐར་པ་དང༌། འབྲས་བུ་ལ་བཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་དྲང༌། འཕགས་པའི་ནོར་དང་བྲལ་བ་གང་འཕགས་པའི་ནོར་ལ་བཞག །གང་སངས་རྒྱས་འབྱུང་བ་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་མ་བསྐྱེད་པ་ནི་བསྐྱེད། བསྐྱེད་པ་ནི་སྨིན། སྨིན་པ་ནི་གྲོལ་བར་བྱ་ཞེས་མཁྱེན་པ་འཇུག་སྟེ། ཆུ་སྲིན་གནམ་གྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །སྟོན་པས་དགོངས་པ། ཆུ་སྲིན་ཉའི་རིགས་འདི་སྔོན་གྱི་སངས་རྒྱས་ལ་ལྷག་པར་བྱ་བ་བྱས་པ་ཡིན་གྱིས། ངས་ཆུ་སྲིན་ཉའི་རིགས་འདི་ལ་བརྟེན་ནས་འདུལ་བའི་རྒྱ་མོ་ཆེན་མོ་དྲང་བར་བྱའི། དེའི་ཕྱིར་ཆུ་ཀླུང་ཡིད་འོང་ལྡན་གྱི་འགྲམ་དུ་འབྱོན་པར་དགོངས་ནས། སྟོན་པའི་ཆོས་ཉིད་ནི་གདུལ་བྱ་ལ་ཐུགས་བརྩེ་བས་དུས་དུས་སུ་ངན་སོང་རྒྱུ་བ་དང༌། ལྷ་དང༌། ལྗོངས་དང༌། ཆུ་ཀླུང་དང༌། རི་དང༌། དུར་ཁྲོད་དང༌། གཙུག་ལག་ཁང་རྒྱུར་གཤེགས་པས། དོན་འདིར་ནི་ཆུ་ཀླུང་རྒྱུར་གཤེགས་པར་བཞེད་ནས་འཛུམ་པ་མཛད་པའི་ཚེ་ཞལ་ནས་འོད་ཟེར་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། བཙོད་ཁ་དང༌། ཤེལ་དང༌། དངུལ་གྱི་ཁ་དོག་ལྟ་བུ་བྱུང་ནས། སྟེང་དང་འོག་ཏུ་དོང་སྟེ། འོད་ཟེར་དེ་དག་གིས་སླར་སྟོན་པ་ལ་ལན་གསུམ་དུ་བསྐོར་ནས་ལྟེ་བར་ནུབ་བོ། །ཀུན་དགའ་བོས་རྒྱུ་ཞུས་པས། ཀུན་དགའ་བོ། སོང་ལ་དགེ་སློང་རྣམས་ལ། དེ་བཞིན་གཤེགས་པ་ཆུ་ཀླུང་རྒྱུར་གཤེགས་ཀྱིས་ཆོས་གོས་ལོངས་ཤིག་ཅེས་སྒོས་ཤིག །ཅེས་བསྒོས་ནས་སྟོན་པ་དུལ་བ་འཁོར་(༡༢༣ན)དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་བ་ལང་གི་ཚོགས་ཀྱིས་ཡོངས་སུ་བསྐོར་བ་ལྟ་བུ། གླང་པོ་ཆེ་གླང་པོ་ཆེའི་ཕྲུག་ཕྲུ་གུའི་ཚོགས་ཀྱིས་ཡོངས་སུ་བསྐོར་བ་ལྟ་བུ། སེངྒེ་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ་ལྟ་བུ། ངང་པའི་རྒྱལ་པོ་ངང་པའི་ཚོགས་ཀྱིས་ཡོངས་སུ་བསྐོར་བ་ལྟ་བུ། ནམ་མཁའ་ལྡིང་བྱའི་ཚོགས་ཀྱིས། བྲམ་ཟེ་སློབ་མའི་ཚོགས་ཀྱིས། སྨན་པ་མཁས་པ་ནད་པའི་ཚོགས་ཀྱིས། དཔའ་བོ་རུ་པའི་ཚོགས་ཀྱིས། ས་མཁན་ལམ་དུ་ཞུགས་པའི་ཚོགས་ཀྱིས། དེད་དཔོན་ཚོང་པའི་ཚོགས་ཀྱིས། ཚོང་དཔོན་འཁོར་གྱི་ཚོགས་ཀྱིས། མཁར་གྱི་རྒྱལ་པོ་བློན་པོའི་ཚོགས་ཀྱིས། འཁོར་ལོས་སྒྱུར་བ་བུ་སྟོང་གིས། ཟླ་བ་རྒྱུ་སྐར་གྱི་ཚོགས་ཀྱིས། ཉི་མ་འོད་ཟེར་སྟོང་གི་ཚོགས་ཀྱིས། ཡུལ་འཁོར་སྲུང་དྲི་ཟའི་ཚོགས་ཀྱིས། འཕགས་སྐྱེས་པོ་གྲུལ་བུམ་གྱི་ཚོགས་ཀྱིས། མིག་མི་བཟང་ཀླུའི་ཚོགས་ཀྱིས། ནོར་སྦྱིན་གནོད་སྦྱིན་གྱི་ཚོགས་ཀྱིས། ཐག་བཟང་རིས་ལྷ་མ་ཡིན་གྱི་ཚོགས་ཀྱིས། བརྒྱ་བྱིན་སུམ་ཅུ་རྩ་གསུམ་པའི་ཚོགས་ཀྱིས། ཚངས་པ་ཚངས་རིས་ཀྱི་ཚོགས་ཀྱིས་བསྐོར་བ་ལྟ་བུ། དབང་པོ་རྣམས་ཤིན་ཏུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ཆུ་དང་བཅས་པ་ལྟ་བུ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུས་རྣམ་པར་མཛེས་པ། འོད་འདོམ་གང་གིས་བརྒྱན་པ། ཉི་མ་སྟོང་པས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་དུ་བཟང་བ། སྟོབས་བཅུ་དང༌། མི་འཇིགས་པ་བཞི་དང༌། མ་འདྲེས་པའི་དྲན་པ་ཉེ་བར་བཞག་པ་གསུམ་དང༌། ཐུགས་རྗེ་ཆེན་པོ་དང་ལྡན་པ། ཀུན་ཤེས་ཀོའུ་དི་ནྱ་ལ་སོགས་པ་ཉན་ཐོས་ཆེན་པོ་དང༌། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ་ཆུ་ཀླུང་ཡིད་འོང་ལྡན་ལ་གཤེགས་པ་ན། མ་དད་པ་དག་ནི། དགེ་སྦྱོང་གོའུ་ཏ་མ་ལྟད་མོ་དང་བྲལ་ལོ་ཞེས་ཟེར་ན། དེ་ཡང་ལྟད་མོ་སྐྱེས་ཏེ་ཆུ་སྲིན་ཉའི་རིགས་བལྟ་བའི་ཕྱིར་འོངས་སོ་ཞེས་ཟེར་རོ། །དད་པ་དང་ནི་མ་དད་པ་དེ་དག་ལ། སྟོན་པ་ལྟད་མོ་དང་བྲལ་བ་ཁོ་ན་ཡིན་ཏེ། ཆུ་སྲིན་ཉའི་རིགས་ལས་བརྩམས་ཏེ་སྐྱེ་བོའི་ཚོགས་ལ་ངོ་མཚར་(༡༢༣བ)རྨད་དུ་བྱུང་བའི་ཆོས་སྟོན་པར་བཞེད་པ་གོར་མ་ཆག་སྟེ།
ཐུབ་པ་ལྟད་མོ་བྲལ་བའི་དགོངས་ལྡན་པ། །ལྟད་མོ་མེད་ལ་སྐྱེ་ངན་དོན་མེད་སྨྲ། །གཞན་ཕན་དེ་ལ་གཞོལ་བའི་རྒྱལ་བ་འདི། །ལུས་ཅན་ཕན་ཕྱིར་ངེས་པར་འདིར་གཤེགས་སོ། །དེ་ནས་འཁོར་དེས་སྟོན་པ་མཐོང་ནས་འཕྲལ་ལ་ལངས་ཏེ། སྟོན་པས་སྔོན་ཡབ་ཡུམ་དང༌། མཁན་སློབ་དང༌། བླ་མ་དང༌། བླ་མའི་གནས་ལྟ་བུ་ལ་མངོན་པར་བཞེངས་པ་མཛད་པའི་ཕྱིར་རོ། །དེ་ནས་སྟོན་པ་འཁོར་གྱི་དབུས་སུ་གདན་བཤམས་པ་ལ་བཞུགས་ནས་ཉ་པ་ལྔ་བརྒྱ་ལ་བཀའ་སྩལ་པ། ཁྱེད་ཅག་ཉེས་པར་བྱས་པའི་ལས་བྱེད་པ་ཡིན་ཏེ། དེས་ན་ད་ལྟ་ཉ་པའི་སྐྱེ་གནས་དམན་པར་སྐྱེས་ཤིང་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་རབ་ཏུ་ཉམས་པ་ཞེན་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་པས་འཚོ་བར་བྱེད་དེ། འདི་ནས་ཤི་འཕོས་ན་ཁྱེད་ཅག་གི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེ་དག་གིས་གསོལ་བ། བདག་ཅག་གིས་ཅི་བགྱི་བ་བཀའ་སྩལ་དུ་གསོལ། ཉ་དང་རུས་སྦལ་ལ་སོགས་པ་ཆུ་ནས་བཏོན་པ་འདི་དག་ཐོང་ཞིག །དེ་ད་གགིས་དེ་དག་བཏང་ངོ༌། །
དེ་ནས་སྟོན་པས་ཆུ་སྲིན་ཉའི་རིགས་མ་གཏོགས་པའི་སྲོག་ཆགས་དེ་དག་ཆུ་ཀླུང་ཡིད་འོང་ལྡན་དུ་འཇུག་པ་དང༌། ཆུ་སྲིན་ཉའི་རིགས་ཀྱང་སྔོན་གྱི་སྐྱེ་བ་དྲན་ཅིང་མིའི་སྐད་དུ། སྟོན་པ་དང་ལྷན་ཅིག་སྨྲ་ཤེས་པར་བྱིན་གྱིས་བརླབས་ནས་ཆུ་སྲིན་དེ་ལ། ཁྱོད་སེར་སྐྱ་ཡིན་ནམ། བདག་སེར་སྐྱ་ལགས་སོ། །ཁྱོད་ལ་ལུས་དང་ངག་དང་ཡིད་ཀྱི་ཉེས་སྤྱོད་ཡོད་དམ། ཡོད་དོ། །དེ་དག་གི་རྣམ་སྨིན་མྱོང་ངམ། མྱོང་ངོ༌། །ཁྱོད་ཀྱི་མི་དགེ་བའི་བཤེས་གཉེན་སུ་ཡིན། བདག་གི་མ་ལགས་སོ། །དེ་གར་སྐྱེས། དམྱལ་བ་རྣམས་སུ་སྐྱེས་སོ། །ཁྱོད་གང་དུ་སྐྱེས། དུད་འགྲོར་སྐྱེས་སོ། །འདི་ནས་ཤི་ནས་གང་དུ་སྐྱེ། དམྱལ་བར་རོ་ཞེས་ཟེར་ནས་ངུས་སོ། །ཁྱོད་ནི་དུད་འགྲོའི་སྐྱེ་གནས་སྐྱེས། །མི་ཁོམ་ཞུགས་པར་གྱུར་པ་ལ། །ད་ལྟ་ངས་ཀྱང་ཅི་བྱར་མེད། །དོན་མེད་ངུས་པས་ཅི་ལ་ཕན། །ཐུགས་རྗེ་ལྡན་རྒྱལ་ང་ལ་ནི། །ལེགས་པར་སེམས་ནི་དད་གྱིས་དང༌། །དུད་འགྲོའི་སྐྱེ་འདིར་ཆགས་བྲལ་ཞིང༌། །དེ་ནས་མཐོ་རིས་འགྲོ་བར་འགྱུར། །དེས་སྟོན་པ་ལ་སེམས་དད་པར་བྱས་ནས་སྟོན་པས་དེ་ལ། འདུ་བྱེད་ཐམས་ཅད་མི་རྟག །ཆོས་ཐམས་ཅད་བདག་མེད། མྱ་ངན་ལས་འདས་པ་ནི་ཞི་བའོ་ཞེས་ཚིག་གསུམ་གྱིས་ཆོས་བསྟན་ཏོ། །
དེ་ནས་འཁོད་དེ་དག་མཆོག་ཏུ་ངོ་མཚར་སྐྱེས་ནས། སྔོན་གྱི་སྐྱེ་བ་དྲན་ཅིང་མིའི་སྐད་དུ། སྟོན་པ་དང་ལྷན་ཅིག་སྨྲ་བ་འདི་སུ་ཡིན། སྟོན་པ་ནི་བསྟེན་པ་དང་བཟོད་པར་དཀའ་བ་ཡིན་པས་བདག་ཅག་གིས་(༡༢༤ན)དོན་དེ་ཞུ་མི་ནུས་ཀྱིས། ཀུན་དགའ་བོ་བསྐུལ་ཏེ་ཞུར་བཅུག་པས། འདི་ནི་ཆུ་སྲིན་ཉའི་རིགས་ཏེ། ཁྱོད་ཆུ་སྲིན་ཉའི་རིགས་ཀྱི་སྔོན་གྱི་ལས་ཀྱི་རྒྱུ་བ་ལས་བརྩམས་ཏེ་ཆོས་དང་ལྡན་པའི་གཏམ་ཉན་པར་འདོད་དམ། དེ་ནི་དུས་ལགས་སོ། །སྔོན་སངས་རྒྱས་འོད་སྲུངས་དགེ་སློང་ཉི་ཁྲིས་བསྐོར་ཅིང་ཝཱ་ར་ཎཱ་སཱིར་དྲང་སྲོང་སྨྲ་བ་རི་དྭགས་ཀྱི་ནགས་ན་བཞུགས་སོ། །དེའི་ཚེ་རྒྱལ་པོ་ཀྲྀ་ཀྲི་རྒྱལ་སྲིད་བྱེད་པ་ན་ཤེད་བུ་གསང་ཚིག་འདོད་པ་ཞིག་ཡུལ་དབུས་ནས་ལྷོ་ལམ་དུ་སོང་ཞེས་བྱ་བ་ནས། རྒྱལ་པོ་ལ་རྒྱལ་བ་དང་ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་གོ །ལྷ། བདག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ་ལྷའི་སྤྱན་སྔར་རྒོལ་བ་དག་དང་ལྷན་ཅིག་བཀའ་མཆིད་གཏན་ལ་དབབ་པར་འཚལ་ལོའི་བར་སྔར་བཞིན་ནོ། །རྒྱལ་པོས་བློན་པོ་ལ། ངའི་ཡུལ་ན་བྲམ་ཟེ་འདིའི་ལན་འདེབས་ནུས་པ་སུ་ཡོད། ལྷ། རི་བྲགས་ཆེ་གེ་མོ་ན་བྲམ་ཟེ་སེར་སྐྱ་ཞི་བ་ཞེས་བགྱི་བ་རིག་བྱེད་ཀྱི་ཡན་ལག་གི་ཕ་རོལ་ཏུ་སོན་པ། ཞུགས་ལྟ་བུའི་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་པ་ཞིག་མཆིས་སོ། །དེ་བོས་པས། དེ་རྒྱལ་པོ་ཀྲྀ་ཀྲིའི་གན་དུ་སོང་ནས་རྒྱལ་བ་དང་ཚེ་སྤེལ་བ་བྱས་མཐའ་གཅིག་ཏུ་འདུག་པ་དང༌། བློན་པོས། དེ་འདི་ལགས་སོ། །
རྒྱལ་པོས། ཁྱོད་ཁོ་བོའི་མདུན་དུ་བྲམ་ཟེ་འདི་དང་ལྷན་ཅིག་གཏམ་བྱ་བར་ནུས་སམ། བདག་གིས་རྔོ་ཅི་ཐོག་བགྱིའོ། །རྒྱལ་པོས་བློན་པོ་རྣམས་ལ། རྒོལ་བའི་དཀྱིལ་འཁོར་ཤོམས་ཤིག །ཕྱོགས་དང་གཞན་གྱི་ཕྱོགས་ཞོག་ཅིག །བློན་པོ་རྣམས་ཀྱིས་དེ་ལྟར་བྱས་ནས། ལྷ། ཕྱོགས་སྔ་མ་གང་བགྱིད་དུ་སྩལ། བྲམ་ཟེ་འདི་མགྲོན་པོ་ཡིན་པས་ཕྱོགས་སྔ་མ་བྱེད་དུ་ཆུག་ཅིག །བྲམ་ཟེ་དེས་ཕྱོགས་སྔ་མ་བྱས་ནས་རྒྱུད་ཆགས་ལྔ་བརྒྱ་བཟླས་སོ། །སེར་སྐྱ་ཞི་བས་ཕྱིར་བཟླས་ནས། འདི་ནི་རིགས་པ་མེད་པ། མི་མཐུན་པ། མི་འཐད་པ་ཡིན་ནོ་ཞེས་སྐྱོན་བཏགས་པ་དང་བྲམ་ཟེ་དེ་ཅང་མི་སྨྲ་བར་འདུག་གོ །ཚར་བཅད་པའི་གནས་ཀྱི་ནང་ན་ལན་ལ་སྤོབས་པ་མེད་པ་འདི་ཐ་ཆད་ཡིན་ནོ། །དེ་ནས་རྒྱལ་པོ་དགའ་ནས། ཁྱོད་གང་དུ་གནས། ལྷ། རི་བྲགས་ཆེ་གེ་མོ་ཞིག་ཏུའོ། །སོང་ན་རི་བྲགས་དེ་ཁྱོད་ཀྱི་རྒོལ་བའི་ལོངས་སྤྱོད་གྱིས་ཤིག །དེ་རངས་ནས་རི་བྲགས་དེར་སོང་ངོ༌། །འཇིག་རྟེན་ནི་འབྱོར་པ་འདོད་པ་ཡིན་པས། དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་ཆུང་མ་ལ་བུ་རལ་པ་སེར་སྐྱ་ཅན་ཞིག་བཙས་ནས་ཞག་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས་ཏེ། འདི་སེར་སྐྱ་ཞི་བའི་བུ་ཡིན་ཞིང༌། རལ་པ་ཡང་སེར་སྐྱར་འདུག་པས་མིང་སེར་སྐྱར་བཏགས་སོ། །
དེ་ཆེན་པོར་(༡༢༤བ)གྱུར་པའི་ཚེ་ཡི་གེ་དང༌། གྲངས་དང༌། རྩིས་ལ་སོགས་པ་ལ་སྦྱངས་ཏེ། རིག་བྱེད་ཡན་ལག་དང་བཅས་པའི་ཕ་རོལ་ཏུ་སོན་པ། མེ་ལྟ་བུའི་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །སེར་སྐྱ་ཞི་བས་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་འདོན་དུ་བཅུག་པ་ན་སེར་སྐྱས། ཡབ། རྀ་ཙ་ཞེས་བྱ་བའི་དོན་ཅི། མི་ཤེས་སོ། །བདག་གིས་འཚལ་ཏོ། །འདི་ང་བས་ལྷག་གོ་སྙམ་སྟེ་ཁྱེའུ་རྣམས་དེ་ལ་གཏད་ནས་ཀློག་ཏུ་བཅུག་གོ །སེར་སྐྱ་ཞི་བ་བྱ་བ་མེད་པས་ཅི་དགར་དྲང་སྲོང་སྨྲ་བར་སོང་ནས་དགེ་སློང་ཞིག་ལ་སྨྲས་པ། སློབ་དཔོན། ཚིག་འདིའི་དོན་ཅི་ལགས། དགེ་སློང་གིས་སྨྲས་པ། དེ་སྐད་དྲི་བར་མི་བྱ་སྟེ། དེ་སྐད་དྲིས་ན་ཡོངས་སུ་རྫོགས་པར་མི་འགྱུར་གྱི། འདི་སྐད་དྲིས་ན་འདིའི་དོན་འདི་ཡིན་ནོ་ཞེས་ཡོངས་སུ་རྫོགས་པར་འགྱུར་རོ། །སེར་སྐྱ་ཞི་བས་བསམས་པ། བདག་གིས་འདི་དག་ལ་དྲི་བ་ཡང་འདྲི་བར་མི་ནུས་ན་ལྷན་ཅིག་སྨྲ་བར་ག་ལ་ནུས་སྙམ་ནས་དགེ་སློང་རྣམས་ལ་དད་དེ་དུས་སུ་བསོད་སྙོམས་འབུལ་ལོ། །
དེ་རེ་ཞིག་ན་ན་ནས་སེར་སྐྱ་ལ་སྨྲས་པ། ཉི་མ་འཆར་བ་དང་ནུབ་པའི་བར་དུ་ཁྱོད་དང་འདྲ་བའི་སྨྲ་བ་གཞན་མེད་ཀྱིས་བག་ཚ་བར་མ་བྱེད་ཅིག །འོད་སྲུངས་ཀྱི་དགེ་སྦྱོང་རྣམས་ནི་མ་གཏོགས་ཏེ། དེ་དག་ནི་རྒྱུད་རྒྱ་ཆེན་པོ་དང་ལྡན་པ། རྒྱུད་ཟབ་མོ་དང་ལྡན་པ། རྒྱུད་བཟང་པོ་དང་ལྡན་པ། འཇིག་རྟེན་པས་ཕམ་པར་མི་ནུས་པ། འཇིག་རྟེན་ལས་འདས་པ་ལ་གཏིང་མེད་པ་ཡིན་ཏེ། དེ་དག་ནི་མང་བ་དང༌། མཐུན་པ་དང༌། ལོངས་སྤྱོད་དོན་དུ་མི་གཉེར་བ་ཡིན་ནོ་ཞེས་སྨྲས་ནས་སྨན་གྱིས་མ་སོས་པར་ཤིའོ། །ལྷོ་ཕྱོགས་ནས་ལྷགས་པའི་སྨྲ་བ་དེ་དག་གིས་སེར་སྐྱ་ཞི་བ་ཤི་བ་ཐོས་ནས་ཕན་ཚུན་སྨྲས་པ། བྲམ་ཟེ་དེ་ཤི་ཡིས་ད་ནི་འདོང་བར་བྱའོ་ཞེས་རྒྱལ་པོའི་གན་དུ་སོང་ནས་རྒྱལ་བ་དང་ཚེ་སྤེལ་བར་བྱས་ཏེ། ལྷ། བདག་ཅག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ། ལྷའི་སྤྱན་སྔར་གཏན་ལ་དབབ་པར་འཚལ་ལོ། །རྒྱལ་པོས་བློན་པོ་ལ། མཁན་པོ་དེ་བོས་ཤིག །ཤིའོ། །རྒྱལ་པོས་སྨྲས་པ། དེའི་ཕྱིར་འདི་དག་ཕུག་རོན་བཞིན་དུ་འདུས་ཏེ་ངའི་དྲུང་དུ་ལྷགས་ཀྱིས་བྲམ་ཟེའི་ནུ་བོའམ་བུ་ཅི་ཡོད། དེའི་བུ་ཤེད་བུ་སེར་སྐྱ་ཞེས་བགྱི་བ་མཆིས་སོ། །དེ་བོས་ཤིག་སོགས་སྔར་དང་འདྲ། ཤེད་བུ་སེར་སྐྱ་རྒྱལ་ནས་རྒྱལ་པོ་ངོ་མཚར་སྐྱེས་ཏེ། ཨེ་མ་ན་ཚོད་གཞོན་ནུ་ལ་ཤེས་རབ་ཀྱི་སྤོབས་པ་འདི་ལྟ་བུ་ཡོད་དོ་ཞེས་དད་པས་གླང་པོ་ཆེའི་བཤུལ་དུ་བསྐྱོན་ཏེ་སྨྲ་བའི་རྒྱལ་སྲིད་ལ་དབང་བསྐུར་ཏོ། །
སེར་སྐྱའི་མ་སེམས་ཁོང་དུ་ཆུད་ཅིང་སེར་སྐྱས་རྒོལ་བའི་ལོངས་སྤྱོད་འཕྲོག་ཏུ་བཅུག་སྟེ་འོང་བར་མི་འགྱུར་རམ་སྙམ་དུ་རྣམ་པར་རྟོག་ཅིང་འདུག་པ་ན་སེར་སྐྱ་སྨྲ་བའི་རྒྱལ་(༡༢༥ན)སྲིད་ལ་དབང་བསྐུར་ཏེ་སྐྱེ་བོ་མཁས་པས་ཡོངས་སུ་བསྐོར་ནས་རང་གི་ཁྱིམ་དུ་འོངས་པ་དང་དེའི་མས་གུས་པ་དང་བཅས་པས་སྨྲས་པ། ཁྱོད་ཀྱིས་སྨྲ་བ་ཐམས་ཅད་ཚར་བཅད་དམ། ཡུམ། ཚར་བཅད་དེ། འོད་སྲུངས་ཀྱི་དགེ་སྦྱོང་རྣམས་ནི་མ་གཏོགས་སོ། །དེའི་མ་བཞིན་སྒྱུར། ལག་མཐིལ་གཉིས་འདྲིལ་བར་བྱེད་དོ། །ཡུམ། ཅིའི་སླད་དུ་དེ་ལྟར་མཛད། བུ། ད་དུང་ཡང་ཁྱོད་འགྲན་ཟླ་དང་བཅས་པ་ཡིན་པས་འོད་སྲུངས་ཀྱི་དགེ་སྦྱོང་རྣམས་ཀྱིས་རྒོལ་བའི་ལོངས་སྤྱོད་འཕྲོག་པའི་གནས་ཡོད་ཀྱིས་སོང་ལ་དེ་དག་ཚར་ཆོད་ཅིག །བདག་ལ་ཕ་ན་རེ། བུ། ཉི་མ་འཆར་བ་དང་ནུབ་པའི་བར་དུ་ཁྱོད་དང་འདྲ་བའི་སྨྲ་བ་གཞན་མེད་ཀྱིས་བག་ཚ་བར་མ་བྱེད་ཅིག །འོད་སྲུངས་ཀྱི་དགེ་སྦྱོང་རྣམས་ནི་མ་གཏོགས་ཏེ། དེ་དག་ནི་རྒྱུད་རྒྱ་ཆེན་པོ་དང་ལྡན་པ་ནས། ལོངས་སྤྱོད་དོན་དུ་མི་གཉེར་བ་ཡིན་ནོ་ཞེས་ཟེར་རོ། །བུ། ཁྱོད་ཀྱི་ཕ་ནི་དགེ་སྦྱོང་རྣམས་ཀྱི་བྲན་ཡིན་ན་ཁྱོད་ཀྱང་དགེ་སྦྱོང་གི་བྲན་དུ་འགྱུར་རམ། སོང་ལ་དེ་དག་ཚར་ཆོད་ཅིག །དེ་མ་ལ་གུས་པས་སོང་བ་དང༌། དགེ་སློང་ཞིག་དང་ཕྲད་ནས། གང་ལས་འོངས། དྲང་སྲོད་སྲོང་སྨྲ་བ་ནས་སོ། །དེ་ན་དགེ་སློང་ཇི་ཙམ་ཡོད། ཉི་ཁྲི་ལྷག་ཙམ་མོ། །
དགེ་སློང་དག་ནི་མང་ན་བསྟན་བཅོས་ཀྱི་ཚད་ཇི་ཙམ། འབུམ་མོ། །ཁྱིམ་པས་གཟུང་དུ་རུང་ངམ། མདོ་སྡེ་དང་མངོན་པ་གཉིས་ནི་རུང་ངོ༌། །འདུལ་བ་ནི་ཆོ་གའི་གཞུང་ཡིན་པས་མི་རུང་ངོ༌། །དེ་ཁྱིམ་པ་ལ་མི་སྟོན་པར་རིག་ནས། དགེ་སློང༌ཚིག་ཅུང་ཞིག་སྨྲོས་ཤིག །འཇལ་ལམ་ཀུན་ཤེས་པར་འདོད་པས་འདྲི་བ་བརྟག་གོ་སྙམ་ནས། འཚོ་རྣམས་གང་དུ་ལྡོག་པར་འགྱུར། །ལམ་ནི་གང་དུ་ལྡོག་པར་འགྱུར། །གང་དུ་འཇིག་རྟེན་བདེ་སྡུག་བསྔལ། །མ་ལུས་བར་ནི་འགག་པར་འགྱུར། །བྲམ་ཟེ། འདིའི་དོན་སྨྲོས་ཤིག །དེས་རིག་པའི་གནས་ཐམས་ཅད་ལ་དཔྱད་ཀྱང༌། འཚོའང་མ་ཤེས། ལམ་ཡང་མ་ཤེས། ལྡོག་པའང་མ་ཤེས་ནས། བདག་ལ་ལས་མ་མཐོང་ངམ་སྙམ་དུ་ཕྱོགས་བཞིར་ལྟ་ཞིང༌། འདི་ན་གཟུ་བོ་ཡོད་ན་བདག་དེང་ཉིད་དུ་ཚར་གཅོད་དོ་སྙམ་ནས། ཚིགས་སུ་བཅད་པ་དེ་ནི་རྒྱུད་རྒྱ་ཆེན་པོ་དང་ལྡན་པ་ཡིན་ལ། ཁྱོད་ཀྱང་ཝཱ་ན་ཎཱ་སཱིར་འཕགས། ཁོ་བོའང་དྲང་སྲོང་སྨྲ་བར་འཕགས་པ་ཡིན་པས། དེའི་དོན་འཕྲལ་དུ་སྨྲ་བར་མི་ནུས་ཀྱི། སོང་དང་ཕྱིས་སྨྲ་བར་མི་དཀའོ་ཞེས་དྲང་སྲོང་སྨྲ་བར་སོང་བ་དང༌། དགེ་སློང་ཀློག་པ་དང་ཁ་དོན་དང་ཡིད་ལ་བྱེད་པ་དག་མཐོང་མ་ཐག་ཏུ་དད་ནས། སུ་ཞིག་འཇིག་རྟེན་ཕ་རོལ་བཏང་སྟེ་འདི་དག་ལ་སྡང་བའི་སེམས་བསྐྱེད་ཅིང་ལྷན་ཅིག་རྩོད་སྙམ་ནས་རང་གི་ཁྱིམ་དུ་སོང་བ་དང་མས་སྨྲས་པ། འོད་སྲུངས་ཀྱི་དགེ་སྦྱོང་རྣམས་ཚར་བཅད་དམ། ཡུམ། ཁྱོད་བདག་གི་(༡༢༥བ)རྒོལ་བའི་ལོངས་སྤྱོད་དག་འཕྲོག་བཞེད་པར་གདའོ། །གཟུ་བོ་ཡོད་ན་དེང་ཉིད་དུ་ཚར་གཅོད་པར་འགྱུར་རོ། །བུ། དེ་ལྟ་ན་སོང་ལ་སངས་རྒྱས་ཀྱི་བཀའ་ལྷོགས་ཤིག །ཁྱིམ་པ་ལ་མི་སྟོན་ནོ། །རབ་ཏུ་བྱུང་ལ་ལྷོགས་ཤིག །རིགས་མཆོག་ཏུ་གྱུར་ནས། རིགས་ཐ་དད་པ་རྣམས་ཀྱི་ནང་དུ་ཇི་ལྟར་རབ་ཏུ་འབྱུང༌། ཅི་ཁྱོད་ཀྱི་མགོ་ལ་སྨྱིག་པ་དང་རྩྭ་དག་སྐྱེ་བར་འགྱུར་རམ། ཡང་ཕྱིར་བོབས་ཤིག །དེ་མས་ནན་གྱིས་བསྐུལ་ནས་སོང་སྟེ་དགེ་སློང་ཞིག་ལ། བདག་རབ་ཏུ་འབྱུང་བར་འཚལ་ལོ། །ལེགས་ཀྱི་རབ་ཏུ་བྱུང་ཞིག །སེར་སྐྱས་སྨྲས་པ། བདག་བྲམ་ཟེ་རབ་ཏུ་ཤེས་པ་ལགས་པས་འདིར་རབ་ཏུ་འབྱུང་བར་རྔོ་མི་ཐོག་གི །ལྗོངས་སུ་རབ་ཏུ་འབྱུང་ངོ་ཞེས་ལྗོངས་སུ་རབ་ཏུ་བྱུང༌། བསྙེན་པར་རྫོགས་ཏེ། ཀློག་པ་དང་ཁ་ཏོན་བྱས་པ་དེ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ནས་ཆོས་འཆད་པའི་ཚེ་སེངྒེའི་ཁྲི་རིན་པོ་ཆེ་སྣ་ཚོགས་པས་བརྒྱན་པས་བཤམས་ནས། དུང་སྒྲིལ་མ་འབུད། རྔ་བོ་ཆེ་རྡུང་དུ་འཛུད་ཅིང་རྒྱལ་པོ་དང་བཅས་པའི་འཁོར་སྡུད། སྐྱེ་བོ་ཕལ་པོ་ཆེ་དད་པར་བྱེད་དོ། །སེར་སྐྱས་བསམས་པ། བདག་གིས་ཐོས་པ་ཐོབ་ཕྱིར། སོང་ལ་སངས་རྒྱས་འོད་སྲུངས་ལ་བསྙེན་བཀུར་བྱའོ་སྙམ་ནས་ཝཱ་ར་ཎཱ་སཱིར་སོང་བ་དང་མ་དང་ཕྲད་ནས། ཁྱོད་ཀྱིས་དགེ་སྦྱོང་རྣམས་ཚར་བཅད་དམ། ཡུམ། བདག་ནི་ལུང་ཙམ་དང་ལྡན་ལ། དེ་དག་ནི་ལུང་དང་རྟོགས་པ་དང་ལྡན་པས་དེ་དག་ཚར་གཅོད་པར་རྔོ་མི་ཐོག་གོ །བུ། ཁྱོད་ཀྱིས་ཅིས་ཀྱང་ཚར་ཆོད་ཅིག །དེ་མ་ལ་གུས་པས་ངོ་མ་ལྡོག་པར། ཆོས་སྟོན་པ་ན་སྤྱོན་ཅིག །བུ། ལེགས་ཀྱི་འོང་བར་བྱའོ། །
དེས་ཆོས་སྟོན་པའི་དུང་གི་སྒྲ་ཐོས་ནས་རིངས་པར་སོང་སྟེ་སེངྒེའི་ཁྲིའི་རྒྱབ་ལོགས་སུ་འཁོད་དོ། །སེར་སྐྱས་ཆོས་ཇི་ཙམ་ཞིག་བསྟན་ནས་ཆོས་མ་ཡིན་པར་བསྟན་པར་བརྩམས་པ་དང༌། དགེ་སློང་རྣམས་ཀྱིས་སྨྲས་པ། མདོ་སྡེའི་མཐའ་ལ་གནོད་པ་མ་བྱེད་ཅིག །ཆོས་ཀྱི་མངལ་ལ་རྟོལ་མ་ཅིག །ཆོས་ཀྱི་རྒྱལ་མཚན་མ་རྟིབ་ཅིག །བདུད་ཀྱི་རྒྱལ་མཚན་མ་སྒྲེང་ཞིག །དམྱལ་བ་ལ་གཞོལ་བར་མ་བྱེད་ཅིག །སེར་སྐྱ་ཉམ་ང་ནས་བབས་ཏེ་མ་ལ་སྨྲས་པ། ཡུམ། གཟིགས་སམ། མཐོང་ངོ༌། བདག་གིས་དང་པོ་ནས། བདག་ནི་ལུང་ཙམ་དང་ལྡན། དེ་དག་ནི་ལུང་དང་རྟོགས་པ་དང་ལྡན་པས་ཚར་གཅོད་མི་ནུས་ཞེས་མ་བགྱིས་སམ། བུ། ཁྱོད་ཀྱིས་ཆོས་ཇི་ཙམ་པ་ཞིག་བསྟན་ནས་ཆོས་མ་ཡིན་པ་སྟོན་ཅིག །མདོ་སྡེའི་མཐའ་ལ་གནོད་པ་མ་བྱེད་ཅིག་ཅེས་ཟེར་ན་ཚིག་གི་མཚོན་ཐོབ་ཅིག །དེ་དག་ནི་ཉེས་པས་འཇིགས་ནས་ཅང་མི་སྨྲ་བར་འདུག་པས་སྐྱེ་བོ་རྣམས་ཀྱིས་ཚར་བཅད་དོ་སྙམ་དུ་ཤེས་པར་འགྱུར་རོ། །ཡུམ། ཐབས་དེ་(༡༢༦ན)ནི་བཟང་སྟེ་ཁྱོད་ཀྱང་དེའི་ཚེ་སྤྱོན་ཅིག །དེ་བཞིན་དུ་བྱས་པ་དང་དགེ་སློང་དེ་སྐད་ཟེར་བ་ལ། སེར་སྐྱ་མས་བསླུས་པས་མ་བཟོད་པ་ཆེར་སྐྱེས་ནས། གླང་པོ་ཆེའི་མགོ་ཅན་ཁྱོད་ཀྱིས། རྟ་དང༌། རྔ་མོ་དང༌། བོང་བུ་དང༌། བ་ལང་དང༌། སྤྲེའུ་དང༌། སེངྒེ་དང༌། སྟག་དང༌། དོམ་དང༌། དྲེད་དང༌། གུང་དང༌། བྱི་ལ་དང༌། ར་དང༌། ལུག་དང༌། རི་དྭགས་དང༌། མ་ཧེ་དང༌། ཕག་དང༌། ཁྱིའི་མགོ་ཅན་ཁྱོད་ཀྱིས་ཆོས་སམ་ཆོས་མ་ཡིན་པའམ། འདུལ་བའམ་འདུལ་བ་མ་ཡིན་པ་ཅི་ཤེས་ཞེས་སྨྲས་པ་དང༌། དགེ་སློང་དེ་རྣམས་ན་རེ། འདིས་ཚིག་གི་མཚོན་གྱིས་གདབ་པར་བརྩམས་ཀྱིས་འགྲོའོ་ཞེས་ཟེར་ནས་སོང་ངོ༌། །
སེར་སྐྱས། ཡུམ། དགྱེས་སམ། དགའི་འདོང་ངོ༌། །བདག་ནི་སངས་རྒྱས་འོད་སྲུངས་ཀྱི་གསུང་རབ་ལ་དད་པས་མི་འགྲོའོ། །བུ། ཁྱོད་ཀྱིས། མའི་ཚིག་ཚིག་མ་ཡིན་པར་མི་བྱའོ་ཞེས་པ་མ་ཐོས་སམ། འདོང་ངོ༌། སེར་སྐྱས། ཁོ་བོ་འཁོར་བར་འཁོར་བ་ན་ཁྱོད་འདྲ་བའི་མ་ཡོད་པར་མ་གྱུར་ཅིག །དེང་མི་དགེ་བའི་བཤེས་གཉེན་ཁྱོད་ལ་བརྟེན་ནས་ཁོ་བོས་སློབ་མི་སློབ་དག་ལ་ཚིག་རྩུབ་བོ་བརྗོད་པས་རྣམ་སྨིན་མི་འདོད་པ་སོ་སོར་མྱོང་བར་འགྱུར་རོ། །དེའི་མ་དེས། དགེ་སློང་རྣམས་ཀྱིས་ཁོ་མོའི་བུ་ཕྲོགས་ཀྱིས་གྲོགས་གྱིས་ཤིག་ཅེས་ཀུ་ཅོ་འདོན་བཞིན་དུ་ཁྲག་ཚ་བ་སྐྱུགས་ནས་ཤི་སྟེ་དམྱལ་བར་སྐྱེས་སོ། །སེར་སྐྱའང་སློབ་མི་སློབ་རྣམས་ལ་ངག་གི་ཉེས་པ་བཅོ་བརྒྱད་བྱས་པས་འདིར་སྐྱེས་སོ་ཞེས་གསུངས་པས་འཁོར་དེ་དག །སེར་སྐྱེ་སྡེ་སྣོད་གསུམ་དང་ལྡན་པ། རིག་པ་དང་གྲོལ་བའི་སྤོབས་པ་ཅན་དེའང་ངག་གི་ཉེས་པས་དུད་འགྲོར་སྐྱེས་ན་བདག་ཅག་རྣམས་ཀྱི་འགྲོ་བ་ཅིར་འགྱུར་ཟེར་རོ། །སྟོན་པས་འཁོར་དེ་དག་གི་བསམ་པ་མཁྱེན་ནས་ཆོས་བསྟན་པས་ངེས་འབྱེད་བཞི་དང༌། འབྲས་བུ་བཞི་དང༌། བྱང་ཆུབ་ཏུ་སེམས་བསྐྱེད་པ་ལ་བཀོད་ནས་གཤེགས་སོ། །
ཆུ་སྲིན་ཉའི་རིགས་དེའང་བདག་གིས་སྟོན་པའི་སྤྱན་སྔར་ཆོས་ཐོས་ནས་ཟས་ཟ་བ་ནི་ཚུལ་དང་མི་མཐུན་ནོ་སྙམ་ནས་ཟས་མ་ཟོས་པར་བཀྲེས་པས་ཉམས་དམས་པ་ན་སྟོན་པ་ལ་སེམས་དད་པས་ཤི་ནས་རྒྱལ་ཆེན་རིས་བཞིའི་ལྷར་སྐྱེས་སོ། །ཆོས་ཉིད་ཀྱིས་ལྷའི་བུ་ནི་སྐྱེས་ནས་རིང་པོ་མ་ལོན་པར་སེམས་གསུམ་སྐྱེ་སྟེ། གང་ནས་གང་དུ་ལས་གང་གིས་སྐྱེས་པའོ། །དེས་དུད་འགྲོ་ནས་རྒྱལ་ཆེན་རིས་བཞི་བར་སྟོན་པ་ལ་སེམས་དད་པས་སྐྱེས་པར་མཐོང་ངོ༌། །དེ་འདི་སྙམ་དུ། བདག་ཡོངས་སུ་གནས་པ་མ་བསྟེན་པར་སྟོན་པ་ལ་བལྟ་བ་དང་བསྙེན་བཀུར་བའི་ཕྱིར་འགྲོའོ་སྙམ་ནས། ལྷའི་བུ་རྣ་ཆ་གདུབ་སྐོར་གཡོ་ཞིང་དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ཨུཏྤལ་ལ་དང་པདྨ་དང་ཀུ་མུ་(༡༢༦བ)ད་དང་པདྨ་དཀར་པོས་ཐུ་བ་བཀང་སྟེ་མཚན་མོ་སྟོན་པའི་དྲུང་དུ་སོང་སྟེ་མེ་ཏོག་གཏོར་ནས་ཞབས་གཉིས་ལ་ཕྱག་བཙལ་ཏེ་མཐའ་གཅིག་ཏུ་འདུག་པ་དང༌། དེའི་ཁ་དོག་གིས་ཁང་པ་བརྩེགས་པའི་ཁང་བཟང་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །
སྟོན་པས་དེའི་བསམ་པ་ཐུགས་སུ་ཆུད་ནས་ཆོས་བསྟན་པས་རྒྱུན་ཞུགས་ཐོབ་ནས་རང་གི་གནས་སུ་སོང་ངོ༌། །དགེ་སློང་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དག་གིས་སྟོན་པའི་སྤྱན་སྔར་སྣང་བ་རྒྱ་ཆེན་པོས་ཁྱབ་པ་མཐོང་ནས་ཐེ་ཚོམ་ཟ་བའི་ཡིད་ཀྱིས་ནམ་ནངས་པ་དང་ཞུས་པས། ཆུ་སྲིན་ཉའི་རིགས་དེ་ཤི་ནས་རྒྱལ་ཆེན་རིས་བཞི་པའི་ལྷར་སྐྱེས་ཤིང་མདང་ངའི་གན་དུ་འོངས་ནས་ཆོས་བསྟན་པས་བདེན་པ་མཐོང་སྟེ་རང་གི་གནས་སུ་སོང་ངོ༌། །དེས་ལས་ཅི་བགྱིས་པས་རྒྱལ་ཆེན་རིས་བཞིར་སྐྱེས་ནས་སྟོན་པའི་སྤྱན་སྔར་བདེན་པ་མཐོང་ལགས། ཆུ་སྲིན་དུ་གྱུར་པ་ན་ང་ལ་དད་པ་དང༌། འོད་སྲུངས་ཀྱི་བསྟན་པ་ལ་རབ་ཏུ་བྱུང་ནས་སྡེ་སྣོད་གསུམ་ལ་མཁས་པར་བྱས་པས་ལྷར་སྐྱེས་ནས་ངའི་སྤྱན་སྔར་བདེན་པ་མཐོང་ངོ༌། །དེ་ནས་ཉ་པ་ལྔ་བརྒྱ་པོ་དེ་དག །སེར་སྐྱའང་དེ་ལྟར་གྱུར་ན། བདག་ཅག་ད་ལྟར་དྲག་ཤུལ་ཅན། ལག་པ་དམར་བ། གཞན་གྱི་སྲོག་གཅོད་པས་འཚོ་བ་ཡིན་པས། བདག་ཅག་འདི་ནས་ཤི་འཕོས་ནས་འགྲོ་བ་ཅིར་འགྱུར། བདག་ཅག་རིགས་དམའ་བར་མ་སྐྱེས་ན་རབ་ཏུ་འབྱུང་བར་བྱེད་པ་ལ་སྙམ་པ་དང༌། ཤཱ་རིའི་བུས་མཁྱེན་ནས་དེ་དག་གི་གན་དུ་སོང་སྟེ། ཁྱེད་ཅག་ཅིའི་ཕྱིར་སེམས་ཁོང་དུ་ཆུད་ཅིང་འཁོད། འཕགས་པ། སེར་སྐྱའང་དེ་ལྟར་གྱུར་ན་བདག་ཅག་གི་འགྲོ་བ་ཅིར་འགྱུར། བདག་ཅག་རིགས་དམའ་བར་མ་སྐྱེས་ན་རབ་ཏུ་འབྱུང་བ་ཞིག་ན་སྙམ་པས་སེམས་ཁོང་དུ་ཆུད་དོ། །
བཞིན་བཟང་དག །ཐུབ་པའི་གསུང་རབ་འདི་ལ་ནི་རིགས་གཅེས་པ་མ་ཡིན། རུས་གཅེས་པ་མ་ཡིན་གྱི། སྒྲུབ་པ་གཅེས་པ་ཡིན་ནོ། །ཁྱེད་རབ་ཏུ་འབྱུང་བ་དང་བསྙེན་པར་རྫོགས་པར་འདོད་ན་ཚུར་ཤོག །སྟོན་པས་ཁྱེད་ཅག་རབ་ཏུ་འབྱིན་པར་འགྱུར་རོ། །དེ་ནས་ཤཱ་རིའི་བུས་དེ་དག་ཁྲིད་ནས་སྟོན་པའི་དྲུང་དུ་ཕྱིན་པ་དང༌། ཞབས་ལ་ཕྱག་བཙལ་ནས་མཐའ་གཅིག་ཏུ་འདུག་སྟེ། རིགས་ཀྱི་བུ་ལྔ་བརྒྱ་པོ་འདི་དག་རབ་ཏུ་བྱུང་བ་དང་བསྙེན་པར་རྫོགས་པར་འཚལ་ན། ཐུགས་བརྩེ་བའི་སླད་དུ་འདི་དག་རབ་ཏུ་བྱུང་བ་དང༌། བསྙེན་པར་རྫོགས་པར་མཛད་དུ་གསོལ། སྟོན་པས་དེ་དག་ཚུར་ཤོག་གིས་བསྙེན་རྫོགས་མཛད་དོ། །དེ་ནས་སྟོན་པ་འོད་མ་ཅན་གྱི་གྲོང་དུ་བྱོན་ནས་འོད་མ་ཅན་གྱི་གྲོང་གི་བྱང་ཕྱོགས་ཤིང་ཤ་པའི་ཚལ་ན་བཞུགས་སོ། །དེའི་མུ་གེ་ཉམ་ང་བ་སློང་མོ་བས་ཟས་རྙེད་པར་དཀའ་ཞིང་ཕ་མས་ཀྱང་རང་གི་བུ་ལ་ཟས་སྦྱིན་པར་དཀའ་ན་སློང་མོ་བ་དག་ལ་ལྟ་ཅི་སྨོས་པ་བྱུང་ངོ༌། །སྟོན་པས། ད་ལྟར་མུ་གེ་(༡༢༧ན)ཉམ་ང་བ་བྱུང་གིས། ཁྱེད་ཅག་སྨོན་འདྲིན་དང་འགྲོགས་བཤེས་ལ་བརྟེན་ནས་དབྱར་གནས་པར་ཁས་ལོངས་ཤིག །ང་ཡང་འོད་མ་ཅན་གྱི་གྲོང་འདི་ཉིད་དུ་ཀུན་དགའ་བོ་དང་དབྱར་གནས་པར་ཁས་ལེན་གྱིས། ཐམས་ཅད་བསོད་སྙོམས་ཀྱིས་ཉོན་མོངས་པར་གྱུར་ན་མི་རུང་ངོ༌། །དེ་ནས་དགེ་སློང་ལྔ་བརྒྱ་པོས་ཉ་པའི་ཡུལ་གྱི་ཉེ་འཁོར་དུ་སྤྱིལ་བུ་བྱས་ནས་དབྱར་གནས་པར་ཁས་བླངས་སོ། །དེ་དག་གིས་གྲོས་བྱས། བདག་ཅག་ཐོས་པ་ཉུང་བས་ཉེ་དུ་འོངས་པ་རྣམས་ལ་ཆོས་སྟོན་པ་མི་ནུས་ཀྱིས། ཉེ་དུ་འོངས་པ་དག་ལ། ཁྱེད་ནི་རྙེད་པ་ལེགས་པ་རྙེད་དེ། དགེ་སློང་འདི་ནི་མི་རྟག་པའི་འདུ་ཤེས་དང༌། མི་རྟག་པ་ལ་སྡུག་བསྔལ་བའི་འདུ་ཤེས་ནས། གཉིས་ཀའི་ཆ་ལས་རྣམ་པར་གྲོལ་བ་ཡིན་ནོ་ཞེས་བསྒྲགས་པས། ཁྱོད་ཀྱིས་ཐོབ་བམ། ཐོབ་བོ། །འཇིག་རྟེན་ནི་ཡོན་ཏན་ལ་དགའ་བ་ཡིན་པས་རང་གི་བུ་ལས་ཀྱང་ཕྲོགས་ཏེ་དེ་དག་ལ་བསོད་སྙོམས་བྱིན་ནོ། །
དེ་ནས་ཡངས་པ་ཅན་གྱི་གྲོང་གི་ཉེ་འཁོར་དུ་དབྱར་གནས་པར་ཁས་བླངས་པ་དེ་དག་དབྱར་ཟླ་བ་གསུམ་པོ་འདས་ནས་རིད་པ་དང༌། ཉམ་ཆུང་བ་དང༌། རྐེ་བ་དང༌། སྐེམ་པ་དང༌། ལུས་མ་ཐོབ་པས་ལྷུང་བཟེད་དང་ཆོས་གོས་ཐོགས་ཏེ་འོད་མ་ཅན་གྱི་གྲོང་དུ་ཕྱིན་པ་དང༌། ཀུན་དགའ་བོས་མཐོང་ནས། ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པའི་ཚིག་གིས་བསུས་ནས། འོངས་པ་ལེགས་སོ། །གང་ནས་འོངས། གང་དུ་དབྱར་གནས། བདག་ཅག་སྤོང་བྱེད་ཀྱི་གྲོང་ནས་སོ། །དེར་དབྱར་གནས་སོ། །དེར་བདེ་བ་ལ་རེག་གམ། བསོད་སྙོམས་ཀྱིས་མ་ངལ་ལམ། བདེ་བ་ལ་རེག་པར་དབྱར་གནས་མོད། བསོད་སྙོམས་ཀྱིས་ངལ་བར་གྱུར་ཏོ། །དེ་ཁོ་ན་ལྟར་སྣང་སྟེ། བསོད་སྙོམས་ཀྱིས་བྲེལ་བས་རིད་པ་དང༌། པགས་པ་དང་ཤ་ཁྲག་བྲི་བར་གྱུར་ཏོ། །ཉ་པའི་གྲོང་གི་ཉེ་འཁོར་དུ་དབྱར་གནས་པ་དེ་དག་ཀྱང་དབྱར་ཟླ་བ་གསུམ་འདས་ནས་ཚོ་བ་དང༌། པགས་པ་དང་ཤ་ཁྲག་རྒྱས་པས་ལྷུང་བཟེད་དང་ཆོས་གོས་ཐོགས་ཏེ་འོད་མ་ཅན་གྱི་གྲོང་དུ་ཕྱིན་པ་དང༌། ཀུན་དགའ་བོས་མཐོང་ནས་ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པའི་ཚིག་གིས་བསུས་ནས། འོངས་པ་ལེགས་སོ། །གང་ནས་འོངས། གང་དུ་དབྱར་གནས། ཉ་པའི་གྲོང་ནས་སོ། །དེར་དབྱར་གནས་སོ། །དེར་བདེ་བ་ལ་རེག་གམ། བསོད་སྙོམས་ཀྱིས་མ་བྲེལ་ལམ། བདེ་བ་ལ་རེག་གོ །བསོད་སྙོམས་ཀྱིས་ཀྱང་མ་ངལ་ལོ། །དེ་ཁོ་ན་ལྟར་སྣང་སྟེ། བསོད་སྙོམས་ཀྱིས་མ་བྲེལ་བས་ཚོ་བ་དང༌། པགས་པ་དང་ཤ་ཁྲག་རྒྱས་པར་གྱུར་ཏོ། །ད་ལྟར་མུ་གེ་ཉམ་ང་བ་བྱུང་ན་ཁྱེད་ཅག་བསོད་(༡༢༧བ)སྙོམས་ཀྱིས་མ་བྲེལ་བའི་རྒྱུ་གང་ཡིན། ཉེ་དུ་རྣམས་ཀྱི་མདུན་དུ་གཅིག་གིས་གཅིག་གི་ཡོན་ཏན་བསྒྲགས་སོ། །ཡང་དག་པས་སམ། མ་ཡིན་ནོ། །ཁྱེད་ཟང་ཟིང་ཅུང་ཟད་ཙམ་གྱི་ཕྱིར་དུ་མི་ཆོས་བླ་མ་མེད་བཞིན་དུ་སྨྲར་རུང་ངམ། །རུང་ཡང་སྲིད། མི་རུང་ཡང་སྲིད་དེ་སྨྲས་སོ། །དགེ་སློང་དོན་ཉུང་ངུང་དག་འཕྱ་བའི་སྐབས་དེ་གསོལ་བས། བྱུང་བ་འདི་དང༌། གླེང་གཞི་འདི་དང༌། སྐབས་འདི་ལ་དགེ་འདུན་བསྡུ་བ་མཛད་དེ། ལྔ་བརྒྱ་པོ་རྣམས་ལ་བཀའ་སྩལ་པ། ཁྱེད་ཀྱིས་ཟས་ཅུང་ཟད་ཙམ་གྱི་ཕྱིར་དུ་མི་ཆོས་བླ་མ་མེད་བཞིན་དུ་སྨྲས་པ་བདེན་ནམ། བཙུན་པ། མད་དོ། །དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །དགེ་སློང་དག །གསུམ་པོ་འདི་དག་ནི་འཇིག་རྟེན་ན་ཡོད་ཅིང་སྲིད་པའི་རྐུན་པོ་ཆེན་པོ་ཡིན་ཏེ། རྐུན་པོ་འཁོར་བརྒྱའམ་སྟོང་དང་ལྡན་པ་དེ་བརྒྱའམ་སྟོང་གི་མདུན་དུ་སོང་སྟེ། ཁྱིམ་འབུགས། མདུད་པ་འགྲོལ། རིལ་གྱིས་འཕྲོག །ལམ་སྒུག །མེ་གཏོང༌། ལམ་པ་འཇོམས། རྒྱལ་པོའི་མཛོད་རྐུ། གྲོང་དང་གྲོང་ཁྱེར་དང་ཡུལ་འཇོམས་པ་དེ་ནི་རྐུན་པོ་ཆེན་པོ་དང་པོ་ཡིན་ནོ། །རྐུན་པོ་བརྒྱ་སྟོང་དང་ལྡན་པའང་མ་ཡིན་ལ། བརྒྱའམ་སྟོང་གི་མདུན་དུ་སོང་སྟེ་ཁྱིམ་འབུགས་པ་སོགས་མི་བྱེད་ཀྱང༌། དགེ་འདུན་གྱི་རྩྭའམམ། ཤིང་ངམ། མེ་ཏོག་གམ། འབྲས་བུའམ། འོད་མའམ། གཞལ་བ་གང་ཡང་རུང་བ་དེ་བཙོངས་ཤིང་འཚོ་བ་དང༌། དེས་ཁྱིམ་མི་གསོ་བ་དེ་ནི་རྐུན་པོ་ཆེན་པོ་གཉིས་པ་ཡིན་ནོ། །དེ་དག་མི་བྱེད་ཀྱང༌། མི་ཆོས་བླ་མ་མེད་བཞིན་དུ་སྨྲ་བ་འདི་ནི་རྐུན་པོ་ཆེན་པོ་གསུམ་པ་ཡིན་ནོ། །དང་པོ་གཉིས་པོ་དེ་ཅུང་ཟད་ཙམ་ཡིན་གྱི། མི་ཆོས་བླ་མ་མེད་བཞིན་དུ་སྨྲ་བ་དེ་ནི་འཇིག་རྟེན་ལྷ་དང་བཅས། བདུད་དང༌། ཚངས་པ་དང༌། དགེ་སྦྱོང་དང༌། བྲམ་ཟེ་བཅས་པའི་སྐྱེ་དགུའི་ནང་ན་ཆོམ་རྐུན་ཆེན་པོ་ཡིན་ནོ་ཞེས་རྣམ་གྲངས་དུ་མས་སྨད་ནས། དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་ཞེས་བྱ་བ་ནས་བསྟན་པ་ཡུན་རིང་དུ་གནས་པར་བྱ་བའི་བར་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང༌། འཕགས་པ་དང༌། བྱེ་བྲག་ཐོབ་པ་དང༌། ཤེས་པ་དང༌། མཐོང་བ་དང༌། རེག་པར་སྤྱོད་པ་མེད་ལ། མེད་བཞིན་དུ་འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པ་འདོད་ནས། དུས་གཞན་ཞིག་ན་དྲིས་ཀྱང་རུང༌། མ་དྲིས་ཀྱང་རུང༌། འདི་སྐད་ཅེས། ཚེ་དང་ལྡན་པ་དག་བདག་གིས་མི་ཤེས་པར་ཤེས་སོ་ཞེས་སྨྲས། མ་(༡༢༨བ)མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བསླབ་པའི་གཞི་བཅས་སོ། །
དེའི་ཚེ་དགེ་སློང་མང་པོ་དབེན་པར་རྣལ་འབྱོར་ལ་གནས་པས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ལ་བརྟེན་ནས་འདོད་ཆགས་དང་གནོད་སེམས་མི་འབྱུང་ནས་དགྲ་བཅོམ་པ་ཐོབ་བོ་སྙམ་སྟེ་ཕན་ཚུན་བརྗོད་ཅིང་གྲོང་མཐར་སོང་བ་དང༌། བུད་མེད་མཐོང་བས་འདོད་ཆགས་སྐྱེས་ཏེ། བརྫུན་སྨྲས་པས་ཕམ་པ་བྱུང་ངམ་སྙམ་ནས་འགྱོད་དེ་གསོལ་བས། བསླབ་པ་ལ་གུས་པའི་བསྔགས་པ་བརྗོད་དེ། སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། མངོན་པའི་ང་རྒྱལ་མ་གཏོགས་ཞེས་གདོན་ནོ། །སྟོན་པ་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟང་ན་བཞུགས་སོ། །དེའི་ཚེ་མ་སྐྱེས་དགྲ་དང་ཡངས་པ་ཅན་གྱི་ལི་ཙ་བྱི་རྣམས་ཕན་ཚུན་ཞེ་འགྲས་ནས་མ་སྐྱེས་དགྲས་དཔུང་ཚོགས་བཞི་གོ་བསྐོན་ཏེ་ཡུལ་སྤོང་བྱེད་གཞོམ་པར་བརྩམས་པ་དང༌། ལི་ཙ་བྱི་རྣམས་ཀྱིས་ཀྱང་ཐོས་ནས་དཔུང་ཚོགས་བཞི་གོ་བསྐོན་ཏེ་ཡངས་པ་ཅན་ནས་བྱུང་བ་དང༌། དེ་དག་གིས་མོའུ་གལ་གྱི་བུ་ཆེན་པོ་བསོད་སྙོམས་ལ་བྱོན་པ་མཐོང་ནས། མ་སྐྱེས་དགྲ་དང་བདག་ཅག་གཡུལ་སྤྲོད་ན་གང་རྒྱལ་བར་འགྱུར། ཁྱེད་ཅག་རྒྱལ་བར་འགྱུར་རོ། །དེ་དག་དགའ་ནས་མ་སྐྱེས་དགྲའི་སྟེང་དུ་བརྟུལ་བ་དང༌། མ་སྐྱེས་དགྲ་སྐྲག་ནས་ཆུ་ཀླུང་གངྒཱའི་འགྲམ་དུ་ཕྱིན་པ་དང་ཕྱི་བཞིན་བསྙེགས་པས། མ་སྐྱེས་དགྲ། བདག་ཤི་བ་ལེགས་ཀྱི་སྙམ་ནས་དཔུང་ཕྱིར་ལོག་པས་ལི་ཙ་བྱི་རྣམས་སྐྲག་ནས་ཡངས་པ་ཅན་དུ་ཞུགས་ཏེ་སྒོ་བཅད་ནས་འདུག་གོ །མ་སྐྱེས་དགྲ་གཡུལ་ལས་རྒྱལ་ཏེ་ཡུལ་སྤོང་བྱེད་བཅོམ་ནས་སོང་ངོ༌། །
དེ་ནས་ལི་ཙ་བྱི་རྣམས། མོའུ་གལ་གྱི་བུ་ཆེན་པོས་བདག་ཅག་རྒྱལ་བར་ལུང་བསྟན་ན། ཅི་བདག་ཅག་གི་ཡངས་པ་ཅན་ཕྲོགས་ན་རྒྱལ་བར་འགྱུར་རམ་ཞེས་སྨོད་པ་དྲུག་སྡེས་ཐོས་ནས། ཁྱེད་སུ་ལ་སྨོད། ཁྱེད་ལའོ། །ཅི་བྱས། འདི་བྱས་སོ། །དང་པོ་སུ་རྒྱལ། ཁོ་བོ་ཅག་གོ །འོ་ན་ཅིའི་ཕྱིར་མི་ལྡོག །མ་ག་དྷ་བཅོམ་སྟེ་རྒྱལ་པོའི་ཁབ་ལེན་འདོད་དམ། ཁྱེད་ཅག་གིས། ཧ་ཅང་མནན་ན་ཝ་ཡང་སེངྒེ་ལྟ་བུར་འགྱུར་རོ་ཞེས་པ་མ་ཐོས་སམ། དེ་དག་ཅང་མི་སྨྲའོ། །དེ་ནས་དྲུག་སྡེས་མོའུ་གལ་གྱི་བུ་ཆེན་པོའི་གན་དུ་ཕྱིན་ནས། གནས་བརྟན། ཕྱག་འཚལ་ལོ། །ཚེ་དང་ལྡན་པ། ཨ་རོག་ཁྱ། སྐབས་ཕྱེ་ཞིག །ལྟུང་བ་སྡེ་ལྔ་ལའོ། །ལི་ཙ་བྱི་རྣམས་རྒྱལ་བར་ལུང་བསྟན་ཏམ། བསྟན་ཏོ། །ཅི་དེ་དག་གི་ཡངས་པ་ཅན་ཕྲོགས་ན་རྒྱལ་བར་འགྱུར་རམ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱིས། ལྟུང་བ་ཆོས་(༡༢༨བ)བཞིན་དུ་སླར་མཛོད་ཅིག །ལྟུང་བ་མ་མཐོང་ངོ༌། །མ་མཐོང་བ་གནས་ནས་དབྱུང་བའི་ལས་བྱའོ་ཞེས་གསུངས་པས། ཅིའི་ཕྱིར་བཏང་སྙོམས་སུ་བྱ། ཁང་སྐྱོང་བོས་ནས། གཎྜི་རྡུངས་ཤིག །མོའུ་གལ་གྱི་བུ་ཆེན་པོ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་མ་མཐོང་བ་གནས་ནས་དབྱུང་བའི་ལས་བྱའོ། །གན་དྷི་བརྡུངས་པ་ན། དེའི་ཚེ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། ཅིའི་ཕྱིར་གཎྜི་རྡུང༌། དྲུག་སྡེས་སྨྲས་པ། འདི་ལྟར་རོ། །གནས་བརྟན་ལ་མཐོ་མ་འཚམ་པར་སྟོན་པ་ལ་ཞུས་ཤིག །ཞུས་པས། དང་པོར་མི་མ་ཡིན་གཡུལ་འགྱེད་ཅིང་དེའི་འོག་ཏུ་མི་རྣམས་གཡུལ་འགྱེད་དེ། མི་མ་ཡིན་རྣམས་རྒྱལ་བ་དེར་མི་རྣམས་ཀྱང་རྒྱལ་བར་འགྱུར་བས། མོའུ་གལ་གྱི་བུས་ལུང་བསྟན་པའི་ཚེ་ཡངས་པ་ཅན་གྱི་མི་མ་ཡིན་རྣམས་རྒྱལ་ལ། གངྒཱའི་འགྲམ་དུ་ཕྱིན་པའི་ཚེ་ཡངས་པ་ཅན་པའི་མི་མ་ཡིན་རྣམས་ཕམ་མོ། །མོའུ་གལ་གྱི་བུ་ལ་དེ་ཡང་དྲིས་ན་ལུང་སྟོན་པར་འགྱུར་བས་ལྟུང་བ་མེད་དོ། །
ཡང་མུ་སྟེགས་ཅན་རྣམས་ཀྱིས་ལོ་གཅིག་གཉིས་སུ་ཐན་པ་འབྱུང་བར་བསྟན་ཏོ། །མོའུ་གལ་གྱི་བུ་ཆེན་པོ་བསོད་སྙོམས་ལ་སོང་བ་དང༌། ཡངས་པ་ཅན་པས། ཇི་ཙམ་ན་ལྷས་ཆར་འབེབས། ཉི་མ་བདུན་ནས་སོ། །དེ་དག་གིས་ཁྱིམ་དང༌། བང་བ་ན་འདུག་པའི་འབྲུ་གང་ཡིན་ཁྱེར་ཏེ་བཏབ་པ་དང༌། ཉི་མ་བདུན་ནས་ལྷས་འབྲུག་བསྒྲགས། སྒྲ་བྱུང་ནས་ས་རྒྱས་བཏབ་སྟེ་བཏང་བ་དང༌། དེ་དག །མུ་སྟེགས་ཅན་རྣམས་དམ་པ་ཡིན་གྱི། ཤཱཀྱའི་དགེ་སྦྱོང་རྣམས་ནི་དེ་ལྟ་མ་ཡིན་ནོ་ཞེས་འཕྱ་བ་དྲུག་སྡེས་ཐོས་ནས། ཁྱེད་ཅག་སུ་ལ་སྨོད། ཁྱེད་ལའོ། །ངེད་ཀྱིས་ཅི་བྱས། མོའུ་གལ་གྱི་བུ་དེས་དེ་ལྟར་ལུང་བསྟན་ནས་བདག་ཅག་གིས་འབྲུ་གང་ཡིན་བཏབ་ན། ལྷས་ཆར་མ་ཕབ་བོ། །དྲུག་སྡེས་སྨྲས་པ། ལྷས་དལ་བུས་ཆར་ཅུང་ཟད་འབེབས་པའི་ཚེ་འཇིག་རྟེན་པ་དག །ལྷས་ངེས་པར་ཆར་འབེབས་སོ་ཟེར་ན། ཆར་ཆེར་འབབ་ཅིང་ས་རྒྱས་བཏབ་ན་ལྟ་ཅི་སྨོས། མོའུ་གལ་གྱི་བུ་ཆེན་པོས་ལོ་ཏོག་ཐམས་ཅད་འགྲུབ་པར་ལུང་བསྟན་ཏམ། དེ་དག་ཅང་མི་སྨྲའོ། །དྲུག་སྡེས་མོའུ་གལ་གྱི་བུ་ཆེན་པོའི་གན་དུ་ཕྱིན་ནས། སྐབས་ཕྱེ་ཞིག །ལྟུང་བ་སྡེ་ལྔ་ལའོ། །མུ་སྟེགས་ཅན་རྣམས་ཀྱིས་ལོ་གཅིག་གཉིས་སུ་ཐན་པ་འབྱུང་བར་བསྟན་ན། ཁྱོད་ཀྱིས་ཆར་འབབ་པར་ལུང་བསྟན་གྱིས། ཆོས་གོས་ཀྱི་གྲྭ་རྫབ་ཀྱིས་མ་རུང་བར་གྱུར་ན་མི་རུང་གིས་ཐེག་ཅིག །ཁྱོད་ཀྱིས་སྤྱོད་ཡུལ་བསྲེགས་པས། བདག་ཅག་གིས་བསོད་སྙོམས་ཀྱང་མི་རྙེད་ཀྱིས། ལྟུང་བ་ཆོས་བཞིན་དུ་སླར་མཛོད་ཅིག་སོགས་འདྲ། སྟོན་པ་ལ་ཞུས་པས། ལྟས་མཁན་དག་གིས། ལྷས་ཆར་འབེབས་པར་སྟོན་ཀྱང་མི་རྟོགས་པ་ཐན་པ་འབྱུང་བའི་རྒྱུ་ལྔ་སྟེ། ས་གཞི་ལས་མེའི་ཁམས་མངོན་པར་འཕགས་(༡༢༩ན)ནས་ཆར་བ་བར་མ་དོར་བསྐམས་པ་དང༌། ནམ་མཁའ་ལ་མི་མཉམ་པའི་རླུང་གིས་ཆར་བ་དན་ད་ཀའི་དགོན་པ་སོགས་སུ་འབེབས་པ་དང༌། ལྷའི་བུ་ཆར་གྱི་ཤུགས་ཅན་མྱོས་པས་མི་འབེབས་པ་དང༌། མི་རྣམས་ཆོས་མ་ཡིན་པ་སྤྱོད་པ་དང༌། ལྷ་མ་ཡིན་གྱི་དབང་པོ་སྒྲ་གཅན་རྒྱ་མཚོ་ཆེན་པོ་ནས་འཕགས་ཏེ་ཆར་བ་དེ་ལག་པ་གཉིས་ཀྱིས་བཟེད་ཅིང་རྒྱ་མཚོར་ལྡུགས་པའོ། །དེའི་ཚེ་ལྷས་ཆར་ཕབ་མོད་ཀྱི། སྒྲ་གཅན་གྱི་ལག་པས་བཟེད་ནས་རྒྱ་མཚོར་བླུགས་སོ། །དེ་དག་གིས། ལོ་ཏོག་ཐམས་ཅད་འགྲུབ་པར་འགྱུར་རམ་ཞེས་དྲིས་པས། དྲིས་ན་དེ་ཡང་སྟོན་པར་འགྱུར་བས་ལྟུང་བ་མེད་དོ། །ཡང་ཡངས་པ་ཅན་ན་གཅེར་བུ་བའི་ཉན་ཐོས་ཤིག་གིས་མོའུ་གལ་གྱི་བུ་ཆེན་པོ་ལ། བདག་གི་མཆིས་བྲང་གི་མངལ་ན་ཅི་མཆིས། ཁྱེའུའོ། །དེ་དགའ་ནས་བསོད་སྙོམས་བསོད་པ་ཕུལ་ལོ། །དེའི་ཁྱིམ་དང་ཧ་ཅང་མི་རིང་བ་ན་གཅེར་བུ་བ་ཞིག་འདུག་པ་དེས་མོའུ་གལ་གྱི་བུ་ལྷུང་བཟེད་བཀང་སྟེ་སོང་བ་མཐོང་ནས། བདག་གི་སློང་མོ་སྟེར་བའི་ཁྱིམ་གཅིག་པུ་དེར་ཤཱཀྱའི་དགེ་སྦྱོང་རྒྱུ་བ་མ་ལེགས་ཀྱིས་ཁྱིམ་བདག་དེའི་གན་དུ་སོང་ལ་དེས་ཁྱིམ་བདག་དང་ལྷན་ཅིག་གཏམ་ཅི་བྱས་དྲིའོ་སྙམ་ནས། དེ་མྱུར་བར་སོང་སྟེ། ཁྱིམ་བདག །མོའུ་གལ་གྱི་བུ་ཆེན་པོ་འོངས་སམ། འོངས་སོ། །དེ་ལ་ཅི་དྲིས། བདག་གི་མཆིས་བྲང་གི་མངལ་ན་ཅི་མཆིས་ཞེས་དྲིས་པས། དེ་ན་རེ། ཁྱེའུའོ་ཞེས་ཟེར། གཅེར་བུ་བ་དེ་རྟོག་གེའི་ཤེས་པ་ལ་མཁས་པས། རྩིས་བྱས་པ་དང༌། བུ་མོར་མཐོང་ནས་དེ་བཞིན་སྒྱུར། ལག་པ་གཉིས་འདྲིལ་ལོ། །ཅིའི་ཕྱིར་དེ་ལྟར་བྱེད། ཁོ་བོས་བུ་མོར་མཐོང་ངོ༌། །ཁྱིམ་བདག་དེས་སྤྱོས་ནས། གཅེར་བུ་བ་སྒྲེ་བྱི་ཁྱོད་ཅི་ཤེས། ཁྱོད་ལས་མོའུ་གལ་གྱི་བུ་ཆེན་པོ་མཁྱེན་པ་དྲི་མ་ཅན་ཡིན་ནམ། དེས་ཁྱེའུར་ལུང་བསྟན་ན། ཁྱོད་བུ་མོའོ་ཟེར་རམ། དེས་ཡང་བརྩིས་པ་དང༌། བུ་མོར་མཐོང་ནས། དེས་ལུང་བསྟན་ཀྱང་འདི་ནི་བུ་མོའོ་ཞེས་ཟེར་རོ། །ཕྱིས་བུ་མོ་ཞིག་བཙས་ནས་ཁྱིམ་བདག་དེ་ནང་མི་དང་བཅས་པ། གཅེར་བུ་བ་དམ་པ་ཡིན་གྱི། ཤཱཀྱའི་དགེ་སྦྱོང་རྣམས་ནི་དེ་ལྟ་མ་ཡིན་ནོ་ཞེས་སྨོད་པ་དྲུག་སྡེས་ཐོས་ནས། ཁྱེད་ཅག་སུ་ལ་སྨོད། ཁྱེད་ལའོ། །ངེད་ཀྱིས་ཅི་བྱས། མོའུ་གལ་གྱི་བུ་ཆེན་པོས་གཅེར་བུ་བའི་ཉན་ཐོས་ཀྱི་ཆུང་མའི་མངལ་ན་ཁྱེའུ་ཡོད་པར་ལུང་བསྟན་ལ། དེ་ལས་བུ་མོ་བཙས་སོ། །འཇིག་རྟེན་ཐམས་ཅད་ཤེས་པ་རྒྱ་མཚོ་ལ་འཁྲུལ་པ་ཡོད་ཀྱི། སྟོན་པ་ཉག་གཅིག་སྐྱོབ་པའོ། །
གཞན་ཡང་མིའི་སྐྱེ་དགུ་ལ་ཁྱེའུའམ་བུ་མོ་བཙས་པར་ཟད་ཀྱི། ཁྱི་གུའམ། སྤྲེའུ་ཞིག་བཙའ་སྙམ་མམ། དེ་དག་ཅང་མི་སྨྲའོ། །དེ་དག་གིས་མོའུ་གལ་གྱི་བུ་ཆེན་པོའི་དྲུང་དུ་(༡༢༩བ)སོང་ནས། སྐབས་ཕྱེ་ཞིག །ལྟུང་བ་སྡེ་ལྔ་ལའོ། །གནས་བརྟན་གྱིས་གཅེར་བུ་པའི་ཉན་ཐོས་ཀྱི་ཆུང་མའི་མངལ་ན་ཁྱེའུ་ཡོད་པར་བསྟན་ཏམ། བསྟན་ཏོ། །བཞུད་དང་དགའ་བ་འཕེལ་བ་ཉམས་སུ་མྱོང་ཞིང་འབྲུ་མར་དང་བུ་རམ་ཡང་ཐོབ་པར་འགྱུར་རོ། །ཁྱོད་ཀྱིས་སྤྱོད་ཡུལ་བསྲེགས་པས་ཁོ་བོ་ཅག་གིས་བསོད་སྙོམས་ཀྱང་མི་རྙེད་ཀྱི། ལྟུང་བ་ཆོས་བཞིན་དུ་སླར་མཛོད་ཅིག་སོགས་སྔར་བཞིན། སྟོན་པ་ལ་ཞུས་པས། དགེ་སློང་དག །གནས་བཞི་ནི་བསམ་པར་མི་བྱ་སྟེ། བདག་ལ་སེམས་པ་དང༌། འཇིག་རྟེན་ལ་སེམས་པ་དང༌། སེམས་ཅན་གྱི་ལས་ཀྱི་རྣམ་པར་སྨིན་པ་དང༌། སངས་རྒྱས་རྣམས་ཀྱི་སངས་རྒྱས་ཀྱི་ཡུལ་ལོ། །དེས་ལུང་བསྟན་པའི་ཚེ་ཁྱེའུ་ཡིན་ལ། ཕྱིས་ལས་ཀྱིས་མཚན་གྱུར་ཏོ། །མོའུ་གལ་གྱི་བུ་ལ་དེ་ཡང་དྲིས་ན་ལུང་སྟོན་པར་འགྱུར་རོ། །
སྟོན་པ་རྒྱལ་པོའི་ཁབ་འོད་མའི་ཚལ་ནའོ། །ཁྱིམ་བདག་ཅིག་གིས། དགེ་འདུན་ལ་ཟས་བྱིན་པས་འཕྲལ་དུ་ཕྱུག་པོར་འགྱུར་རོ་ཞེས་ཐོས་ནས་དེ་ནོར་སྒྲུབ་པའི་ཐབས་བཟང་པོ་ཡིན་གྱིས་བདག་གིས་ཀྱང་བྱའོ་སྙམ་ནས་ཤ་དང་ཞུན་མར་སྦྱར་བའི་ཐུག་པ་བསྐོལ་ནས་སྒོ་བ་ལ། དགེ་སློང་བསོད་སྙོམས་ལ་འཇུག་ན་དེ་ཁོ་བོའི་ཁྱིམ་དུ་ཐོང་ཞིག །སྒོ་བས་དགེ་སློང་ལ་བརྗོད་པས། དེའི་ཁྱིམ་དུ་སོང་ནས། ཁྱིམ་བདག་དེས་ཤ་ཐུག་གི་སོ་སོའི་ལྷུང་བཟེད་བཀང་སྟེ་བྱིན་ཏོ། །དེའི་ཉིན་མོ་ནམ་མཁའ་སྤྲིན་གྱིས་ཁེབས་ཤིང༌། ཡུལ་ངན་བྱུང་ནས་དེ་དག་ཆུ་དྲོན་ལ་འཁྲུད་དུ་སོང་བ་དང༌། གཞོན་ནུ་ཞིག་གིས་ཉེ་དགའ་ལ། ཆུ་དྲོན་འདི་ག་ལས་འོངས། འདི་ལ་དྲིས་ཤིག་ཅེས་མོའུ་གལ་གྱི་བུ་ཆེན་པོའི་གན་དུ་བཏང་བ་དང༌། དེ་ལ་དྲིས་པས། མཚོ་མ་དྲོས་པ་ནས་སོ། །ཉེ་དགས་ཐོས་ནས། མདོ་སྡེའི་མཐའ་ལ་གནོད་པ་མ་བྱེད་ཅིག །ཁོ་བོ་རྟོགས་པ་མེད་ཀྱང༌། ལུང་ཡང་མེད་དམ། མ་དྲོས་པའི་ཆུ་ནི་ཡན་ལག་བརྒྱད་ལྡན་ཡིན་ཏེ། བསིལ་བ་དང༌། མངར་བ་དང༌། ཡང་བ་དང༌། འཇམ་པ་དང༌། དང་བ་དང༌། དྲི་ང་བ་མེད་པ་དང༌། འཐུངས་ན་མགུལ་བ་ལ་མི་གནོད་པ་དང༌། འཐུངས་ན་ལྟོ་བ་ལ་མི་གནོད་པའོ་ཞེས་གསུངས་ན། ཡན་ལག་དང་པོས་བསླུས་སམ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱི། ལྟུང་བ་ཆོས་བཞིན་དུ་སླར་མཛོད་ཅིག་སོགས་སྔར་བཞིན། སྟོན་པ་ལ་ཞུས་པས། ཆུ་དྲོན་ནི་མཚོ་མ་དྲོས་པ་ནས་འོངས་ཏེ། ཉི་ཚེ་བའི་དམྱལ་བ་ལྔ་བརྒྱའི་སྟེང་ནས་འབབ་པས་དྲིའོ། །
མོའུ་གལ་གྱི་བུ་ལ་དྲིས་ན་དེ་ཡང་ལུང་སྟོན་པར་འགྱུར་རོ། །སྟོན་པ་མཉན་ཡོད་ནའོ། །མོའུ་གལ་གྱི་བུ་ཆེན་པོས། ཁོ་བོ་ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པས་རྫིང་བུ་དལ་གྱིས་འབབ་ཀྱི་འགྲམ་ན་གླང་པོ་ཆེའི་སྒྲ་ཐོས་སོ། །དེ་ཉེ་དགས་(༡༣༠ན)ཐོས་ནས། མདོ་སྡེའི་མཐའ་ལ་གནོད་པ་མ་བྱེད་ཅིག །ཁོ་བོ་ལ་རྟོགས་པ་མེད་ཀྱང༌། ལུང་ཡང་མེད་དམ། སྟོན་པས། ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པའི་ཚེ་གཟུགས་ཀྱི་འདུ་ཤེས་བཤིག་ཅིང༌། སྒྲའི་འདུ་ཤེས་དང་བྲལ་ལོ་ཞེས་གསུངས་པས། དེའི་ཚེ་སྒྲ་ཐོས་པའི་གནས་མེད་དོ། །ཁྱོད་ཀྱིས་སྤྱོད་ཡུལ་བསྲེགས་པས་སོགས་སྔར་བཞིན་ནོ། །སྟོན་པ་ལ་ཞུས་པས། དེ་དེ་བཞིན་ཏེ། མོའུ་གལ་གྱི་བུ་ནི་མྱུར་དུ་སྙོམས་པར་འཇུག་ཅིང་ལྡང་བས་དེས་སྙོམས་པར་ཞུགས་པའི་སེམས་རྟོགས་ཤིང༌། ལངས་པའི་སེམས་མ་རྟོགས་ཏེ། ལངས་པས་སྒྲ་དེ་ཐོས་ནས་བསྟན་པས་ལྟུང་བ་མེད་ཀྱི། མ་བསམས་པར་ལུང་བསྟན་པར་མི་བྱའོ། །ཞུ་བའི་སྐབས་ནི་འདིར་མ་བྲིས་སོ། །འདུལ་བྱེད་ནས་འབྱུང་བ་ནི། ཁྱིམ་བདག་ཅིག་གིས་དགེ་སློང་ཞིག་ལ། ཁྱོད་དགྲ་བཅོམ་པ་ལགས་ཀྱིས། ཆོས་གོས་ལ་སོགས་པས་མཆོག་འོས་པ་ལགས་སོ་ཞེས་དང༌། ཡང༌། ཁྱོད་སྡིག་པ་མེད་པའི་ཆོས་ཚངས་པ་དང་ལྡན་ནམ་ཞེས་པ་དང༌། ཡང་དགེ་སློང་ཞིག་ལ། ཁྱོད་དབང་པོ་བསྡམས་ཤིང་བསྲུངས་པའོ་ཞེས་པ་ལ་ཅང་མི་སྨྲ་བས་དང་དུ་བླངས་པ་རྣམས་ལ་སྦོམ་པོ་ནི། བཙུན་པ་ནི་དགྲ་བཅོམ་པ་སོགས་སོ། །ཡང་དགེ་སློང་ཞིག་ལ། དེ་སྟེ་དགྲ་བཅོམ་པ་ལགས་ན་ནང་དུ་གཤེགས་ཤིག་ཅེས་དང༌། དེ་བཞིན་དུ། སྟན་ལ་འདུག་ལ་ལག་ཆུ་ཟེད་ཅིག་ནས། ཕྱིར་བྱུང་ཞིག་གི་བར་ལ་ཅང་མི་སྨྲ་བས་དང་དུ་ལེན་ན། སྦོམ་པོ་ལ། ཁོ་བོ་ཅག་དགྲ་བཅོམ་པ་མིན་ཏེ། བཟོད་ན་ཁྱིམ་དུ་འཇུག་གོ་ནས་ཕྱིར་འབྱུང་ངོའི་བར་ལ་ལྟུང་བ་མེད་དོ་ཞེས་གསུངས་པས། བཙུན་པ། གལ་ཏེ་དགྲ་བཅོམ་པ་ཡིན་ན་སོགས་སོ། །

༢༽ ལྷག་མའི་སྡེ་ལས། 1) ལྷག་མ་བཅུ་གསུམ།

དགེ་འདུན་ལྷག་མའི་སྡེ་ལ་བཅུ་གསུམ་ལས། ཁུ་བ་ཕྱུང་བའི་ལྷག་མ་ལ་གསུམ་ལས། རྣམ་འབྱེད་ནས་འབྱུང་བ་ནི། མཉན་ཡོད་ན། འཆར་ཀའི་ཀུན་ཏུ་སྤྱོད་པ་ནི། ནངས་པར་སྔར་ལངས་ཏེ་གཙུག་ལག་ཁང་དུ་ཆག་ཆག་འདེབས། ཉུག །བ་ལང་གི་ལྕི་བ་གསར་པས་སྐུད་ཅིང༌། ཕྱི་རོལ་ཏུ་རྐང་པ་བཀྲུས་ནས་ལག་པ་བསྙལ། སོ་ཤིང་བོར་ཏེ་གྲོང་ངམ་གྲོང་རྡལ་དུ་ལུས་མ་བསྲུངས། དབང་པོ་མ་བསྡམས། དྲན་པ་ཉེ་བར་མ་བཞག་པར་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ལྷུང་བཟེད་དང་ཆོས་གོས་མཁོས་སུ་ཕབ་སྟེ། རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་འཇུག་གོ །དེའི་སེམས་འདོད་ཆགས་ཀྱིས་དཀྲིས་པ་ན། རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། ལག་པ་གཉིས་ཀྱིས་བཟུང་ནས་ཁུ་བ་འབྱིན་ནོ། །དགེ་སློང་དག་གིས་འཆར་ཀ་ལ། ཁྱོད་བདེ་བ་ལ་རེག་པར་གནས་སམ། གནས་ཏེ་འདི་ལྟར་བྱས་པས་སོ། །(༡༣༠བ)སྐབས་དེ་གསོལ་བ་དང༌། བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་འདུན་བསྡུ་བ་མཛད་དེ། འཆར་ཀ ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །མི་གཏི་མུག་ཅན་ཁྱོད་ཀྱིས་བྲམ་ཟེ་དང་ཁྱིམ་བདག་དད་པ་ཅན་ལས་དད་པས་སྦྱིན་པར་བྱ་བ་ལེན་པའི་ལག་པ་དེ་ཉིད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་བྱས། ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པར་བྱེད་པ་ལག་པ་གཉིས་ཀྱིས་བཟུང་བ་ནི་བླའི། དེ་ལྟར་གྱུར་པས་རང་གི་ཡན་ལག་གི་རྣམ་པ་བཟུང་བ་ནི་དེ་ལྟ་མ་ཡིན་ནོ་ཞེས་སྨད་ནས། དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་ནས། བསྟན་པ་ཡུན་རིང་དུ་གནས་པར་འགྱུར་པའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བསམས་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ་ཞེས་བཅའ་བ་མཛད་དོ། །དགེ་སློང་རབ་ཏུ་མང་པོ་ཉལ་བའི་རྨི་ལམ་ན་ཁུ་བ་ཤོར་ཏེ། དེ་དག་ལ་འདུ་ཤེས་ཀྱང་ཡོད། སེམས་པའང་ཡོད་པས་འགྱོད་ནས། ཀུན་དགའ་བོ་ལ། སྟོན་པས་བསམས་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ་ཞེས་བཅའ་བ་མཛད་ན། བདག་ཅག་ཉལ་བའི་རྨི་ལམ་ན་ཁུ་བ་བྱུང་སྟེ། བདག་ཅག་ལ་འདུ་ཤེས་ཀྱང་ཡོད། སེམས་པའང་ཡོད་པས་བདག་ཅག་ལ་ལྷག་མ་བྱུང་བར་མ་གྱུར་ཏམ། ཀུན་དགའ་བོས་སྟོན་པ་ལ་ཞུས་པས། འདི་དག་ལ་འདུ་ཤེས་ཀྱང་ཡོད། སེམས་པའང་ཡོད་མོད་ཀྱི། དེ་ནི་ཐ་སྙད་དུ་བྱ་བ་མ་ཡིན་ནོ། །
དེ་ནས་བསླབ་པ་ལ་གུས་པའི་བསྔགས་པ་བརྗོད་ནས། སྔ་མ་ནི་བཅས་པ་ཡིན་ལ་འདི་ནི་རྗེས་སུ་གནང་བ་ཡིན་ཏེ། བསམས་བཞིན་དུ་ཁུ་བ་ཕྱུང་ན་རྨི་ལམ་གྱི་མ་གཏོགས་ཏེ། དགེ་འདུན་ལྷག་མའོ་ཞེས་པ། རྨི་ལམ་ནི་མེད་པ་དང་འདྲའོ་སོགས་སོ། །འདུལ་བྱེད་ནས་འབྱུང་བ་ནི། དགེ་སློང་ཞིག་གིས་རྣམ་པར་བསྔོས་པ་ནས། ཀེང་རུས་ཀྱི་བར་ལ་ཕྱུང་བ་དང༌། གཅིག་གིས་རྩིབ་ལོགས་ནས། སྐྲའི་བར་ལ་ཕྱུང་བ་དང༌། གཅིག་གིས་ལག་པ་དང༌། རྐང་པའི་བར་དང༌། གཅིག་གིས་རྐེད་པ་ནས། བྱིན་པའི་བར་ལ་ཕྱུང་བ་སོགས་དངོས་གཞིར་གསུངས་པ་ནི། རྣམ་པར་བསྔོས་པ་ལ་སོགས་པ་དང་སོགས་སོ། །དགེ་སློང་ཞིག་གིས་ལྭ་བ་ནས། སྔས་ཀྱི་བར་དང༌། གཅིག་གིས་ཁྲི་ནས་ཁྲིའི་གསེབ་ཀྱི་བར་དང༌། གཅིག་གིས་བུམ་པ་ནས། ཆོལ་ཟངས་ཀྱི་བར་དང༌། རྡོ་བ་ནས། ཤ་མེར་མེར་པོའི་བར་ལ་ཕྱུང་བས། སྦོམ་པོ་ནི་ལྭ་བ་དང་སོགས་སོ། །དགེ་སློང་ཞིག་གིས་སྦུ་གུར་ཕྱུང་བ་དང༌། ནམ་མཁའ་ལ་བསྐྱོད་པ་དང༌། ནམ་མཁའ་ལས་ཕྱུང་བ་དང༌། ཕོ་མཚན་མནམས་སམ་བཙིར་ཏེ་དགའ་བ་ཚོར་བ་དང༌། འཕགས་པ་ལས་བཏང་ངམ། བརྩམས་(༡༣༡ན)ནས་སླར་བཏང་ཡང་རུང་སྦོམ་པོར་གསུངས་པ་ནི། རྨ་འཚིར་ནའོ། །དགེ་སློང་ཞིག་བསོད་སྙོམས་ལ་སོང་བ་ན་ན་ཆུང་ཞིག་འདོམས་གདངས་ནས། ཚུར་སྤྱོན། འདིར་མཛོད་ཅིག །དེར་འཛུབ་མོ་བཙུད་པས་འགྱོད་དེ་གསོལ་བས། དེར་མཐེ་བོང་འཛུད་ནའོ། །དགེ་སློང་ཞིག་གནས་ནས་གནས་སུ་འཆག་པ་ན་ཁུ་བ་ཕྱུང་ནས་གསོལ་བས། གནས་ནས་གནས་སུ་འཕོ་བ་ལའང་ངོ༌། །ཚུལ་མིན་ཡིད་བྱེད་ལའང་དེ་དང་འདྲའོ། །དགེ་སློང་ཞིག་གིས་ཕོ་མཚན་ལ་བཟུང་བ་དང་ཁུ་བ་ཕྱུང་ནས། ཡན་ལག་གི་རྣམ་པ་འཛིན་པ་ལས་སོ། །གཅུང་དགའ་བོས་འཛག་སྣོད་བཅངས་པས་དེ་ལ་དྲུད་དེ་ཁུ་བ་འཛགས་ཏེ་གསོལ་བས། འཛག་སྣོད་ལ་འདྲུད་པ་ལས་ནི་ལྟུང་བ་མེད་དོ། །དགེ་སློང་ཞིག་གིས་མ་སྲིང་དང༌། སྔོན་གྱི་མཛའ་ན་མོ་སོགས་ཀྱི་མགུལ་ནས་འཁྱུད་པས་ཁུ་བ་ཕྱུང་ནས་གསོལ་བས། སྔོན་གྱི་ཆུང་མས་འཁྱུད་པ་ལའང་ངོ༌། །དགེ་སློང་ལ་བུད་མེད་ཅིག་གིས་རྐང་པ་ནས་འཛུབ་མོའི་བར་གྱིས་བཟུང་བས་ཁུ་བ་ཤོར་ནས་གསོལ་བས། རྐང་པ་དང་སོགས་སོ། །
རེག་པའི་ལྷག་མ་ལ། རྣམ་འབྱེད་ནས་འབྱུང་བ་ནི། སྟོན་པ་མཉན་ཡོད་ནའོ། །དྲུག་སྡེའི་ཀུན་ཏུ་སྤྱོད་པ་ནི། འདིར་བྲམ་ཟེ་དང་ཁྱིམ་བདག་འོངས་པ་རྣམས་ལའང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད། རང་གི་གྲགས་པའང་བསྒྲག་པར་བྱའོ་སྙམ་ནས་དྲུག་སྡེ་གང་རུང་གིས་རྒྱལ་བྱེད་ཚལ་གྱི་སྒོ་སྟོང་པར་མི་འཇོག་པས། འཆར་ཀ་ནངས་པར་སྔར་ལངས་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཚལ་གྱི་སྒོ་ན་འཆག་ཅིང་འདུག་གོ །མཉན་ཡོད་ཀྱི་བྲམ་ཟེ་དང་ཁྱིམ་བདག་གི་ཆུང་མ་རྣམས་ནི་སྐྱེད་མོས་ཚལ་དུ་སོང་ནས་རྒྱལ་བྱེད་ཚལ་དུ་འཇུག་པ་དང༌། གཙུག་ལག་ཁང་ལྟ་བ་དང༌། སྟོན་པ་དང་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་བས་དེ་དག་སྐྱེད་མོས་ཚལ་དུ་བྱུང་སྟེ་གཙུག་ལག་ཁང་ལྟ་འདོད་པས་རྒྱལ་བྱེད་ཚལ་དུ་སོང་ངོ༌། །དྲུག་སྡེས་གྲོང་ཁྱེར་ཆེན་པོ་དྲུག་གི་མི་རྣམས་མི་ཤེས་པ་འགའ་ཡང་མེད་པས། འཆར་ཀས་དེ་དག་འོང་བ་མཐོང་ནས། ཆེ་གེ་མོའི་མ། ཆུང་མ། མནའ་མ། བུ་མོ། ཆེ་གེ་མོའི་སྲིང་མོ་འོངས་པ་ལེགས་སོ། །ཁྱེད་ཅག་ཅིའི་ཕྱིར་ཡུན་རིང་མོ་ནས་ཟླ་བ་ལྟར་རྒྱུ། བཙུན་པ་འཆར་ཀ །སྟོན་པས་མི་ཁོམ་པ་བརྒྱད་ནི་གང་ཟག་གི་ཚངས་པར་སྤྱད་པའི་དུས་མ་ལགས་སོ་ཞེས་གསུངས་ན། བདག་ཅག་ནི་ཁྱིམ་གྱི་འདུ་འཛི་དང་ལྡན་པས་མི་ཁོམ་པ་དགུ་པ་ལགས་སོ། །སྲིང་མོ་དག །ཁྱེད་ཀྱིས། དུག་ཅག་ལ་སོགས་རྒྱལ་པོ་ཡིས། །བྱ་བ་དག་ནི་མ་བྱས་པར། །དེ་དག་ཉིད་དང་བྱ་བ་རྣམས། །ཞིག་པ་ཉིད་དུ་གྱུར་པ་ཡིན། །བྱ་བ་དེ་དག་ཉིད་ཀྱང་ནི། །ཡོངས་སུ་རྫོགས་པར་མ་གྱུར་པར། །འཇིག་རྟེན་དགྲ་བོ་འཆི་(༡༣༡བ)བདག་དེ། །འོང་བ་ཉིད་དུ་འགྱུར་བ་ཡིན། །ཞེས་པ་མ་ཐོས་སམ། བཙུན་པ། དེའི་སླད་དུ་བདག་ཅག་སྐྱེད་མོས་ཚལ་དུ་མཆིས་ཏེ་རྒྱལ་བྱེད་ཚལ་དུ་འཇུག་པ་དང༌། གཙུག་ལག་ཁང་ལྟ་བ་དང༌། སྟོན་པ་དང༌། གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་མཆིས་ལགས་སོ། །ཁྱེད་དེའི་ཕྱིར་འོངས་ན། སྟོན་པས་ཀྱང༌། སྙིང་པོ་མེད་པའི་ལུས་ལས་སྙིང་བོ་བླང་བར་བྱའོ་ཞེས་གསུངས་པས་ལེགས་སོ། །སྲིང་མོ་དག །གང་དུ་འཇུག །བདག་ཅག་ཀུན་དགའ་ར་བར་འཇུག་ཅིང་གཙུག་ལག་ཁང་པལྟའོ། །སྟོན་པས། མཁས་པ་གང་ཞིག་རབ་ཏུ་སེམས་དང་བས། །སངས་རྒྱས་མཆོད་རྟེན་དག་ལ་གོམ་འདོར་ན། །འཛམ་བུ་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་གསུངས་པས་ལེགས་སོ། །
ཁྱེད་ཀྱིས་གཙུག་ལག་ཁང་སྟོན་པའི་དགེ་སློང་འགའ་ཞིག་བཙལ་ལམ། ཅི་བདག་ཅག་སྒྲོན་མ་སུག་པ་ན་ཐོགས་བཞིན་དུ་ཞུགས་གཞན་ནས་འཚོལ་ལམ། བཙུན་པ་འཆར་ཀ་སྤངས་ཏེ་དགེ་སློང་གཞན་ག་ལ་ཚོལ། ཁྱོད་ཀྱིས་བསྟན་དུ་གསོལ། དེས་མཆོད་པ་སྣ་ཚོགས་ཐོགས། སྤོས་ཕོར་ལག་ཏུ་བླངས་ནས་གོ་རིམ་བཞིན་དུ། སྲིང་མོ་དག །འདི་ནི་སྟོན་པའི་དྲི་གཙང་ཁང་སྟེ། སྟོན་པ་ཉིན་ལན་གསུམ། མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས། གང་ནི་ཉམས། གང་ནི་འཕེལ། གང་ནི་གནོད་པ་དང༌། ཉམ་ང་བ་དང༌། མི་བདེ་བར་གྱུར། གང་ནི་ངན་སོང་ལ་གཞོལ་ཞིང་འབབ། གང་ནི་ངན་སོང་གི་ལམ་ནས་བསླངས་ཏེ་མཐོ་རིས་དང༌། ཐར་པ་དང༌། འབྲས་བུ་ལ་གཞག །གང་འདོད་པའི་འདམ་དུ་བྱིང་བའི་ལག་པ་ལས་དྲང༌། འཕགས་པའི་ནོར་དང་བྲལ་བ་གང་འཕགས་པའི་ནོར་གྱི་དབང་ཕྱུག་ལ་བཞག །གང་སངས་རྒྱས་འབྱུང་བ་དོན་དང་བཅས་པར་བྱ། གང་གི་དགེ་བའི་རྩ་བ་མ་བསྐྱེད་པ་ནི་བསྐྱེད། བསྐྱེད་པ་ནི་སྨིན། སྨིན་པ་ནི་གྲོལ་བར་བྱ་ཞེས་མཁྱེན་པ་འཇུག་ཅིང༌། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་བཅུའི་སྟོབས་དང་ལྡན་པ། མི་འཇིགས་པ་བཞིས་བསྙེངས་པ་མི་མངའ་བ། ཁྱུ་མཆོག་རླབས་པོ་ཆེའི་གནས་སུ་དམ་འཆའ་བ། འཁོར་གྱི་ནང་དུ་སེངྒེའི་སྒྲ་ཡང་དག་པར་སྒྲོག་པ་དེའི་དྲི་གཙང་ཁང་ཡིན་གྱིས། འདིར་ཞབས་ལ་ཕྱག་ཚོལ་ཅིག །འདི་ནི་ཀུན་ཤེས་ཀོའུ་དི་ནྱ། སྟོན་པས་འཇིག་རྟེན་མི་ཤེས་པའི་མུན་པ་དང༌། འདྲེན་པ་མེད་པ་དང༌། ཡོངས་སུ་འདྲེན་པ་མེད་པ་ན། དང་(༡༣༢ན)པོར་ཡེ་ཤེས་ཀྱི་མིན་སྨན་གྱི་ཐུར་མས་ཆོས་ཀྱི་མིག་སྦྱངས་ལ། སྟོན་པས་གནས་བརྟན་རྣམས་དང༌། རྒྱལ་ཚབ་ལྟ་བུ་རྣམས་དང༌། ཡུན་རིང་པོ་ནས་རབ་ཏུ་བྱུང་བ་རྣམས་དང༌། ཚངས་པར་སྤྱོད་པ་མངོན་པར་སྤྱད་པ་རྣམས་དང༌། སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་ལུང་བསྟན་པ། གང་གི་རྒྱུད་ལ་ཆོས་ཀྱི་འཁོར་ལོ་ཐོག་མར་བསྐོར་བ་དེའི་གཙུག་ལག་ཁང་ཡིན་གྱིས། འདིར་ཡང་ཕྱག་ཚོལ་ཅིག །འདི་ནི་འོད་སྲུངས་ཆེན་པོ། བྲམ་ཟེ་ཤིང་སཱ་ལ་ཆེན་པོ་ལྟ་བུ་རྨོན་པ་དོར་སྟོང་དུ་གཅིག་གིས་མ་ཆོག་པ་སྤངས་ཏེ་རབ་ཏུ་བྱུང་བ། དབྱིག་བྱེ་བ་དྲུག་ཅུ་དང་ལྡན་པ། གསེར་གྱི་ནས་བང་ཆུང་བརྒྱད་ཅུ་བདོག་པ། བྲན་གྱི་གྲོང་བཅོ་བརྒྱད་དང༌། སྦྱོར་བའི་གྲོང་བཅུ་དྲུག་བདོག་པ། སེར་སྐྱ་བཟང་མོ་ལུས་གསེར་བས་ལྷག་པ་དང་ལྡན་པ་མཆིལ་མའི་ཐལ་བ་སྨིན་པ་ལྟར་སྤངས་ཏེ་མཚན་མོའི་ཐུན་ཐ་མ་ལ་རས་སྦྱར་མའི་སྣམ་སྦྱར་རིན་ཐང་འབུམ་རི་བ་ཐོགས་ཏེ་འཇིག་རྟེན་ན་དགྲ་བཅོམ་པ་གང་དག་བཞུགས་པ་དེ་དག་གི་ཕྱིར་རབ་ཏུ་བྱུང་བ། བསམ་གཏན་དང༌། རྣམ་ཐར་དང༌། ཏིང་ངེ་འཛིན་དང༌། སྙོམས་འཇུག་བསྐྱེད་པའི་ཕྱིར་ནགས་ན་བརྟེན་པ། གང་མཐོང་ན་སྤོས་ཀྱི་གླང་པོ་ཆེ་དག་ཀྱང་རྒྱགས་པ་དང་བྲལ་བར་འགྱུར་བ། བུ་མང་གི་མཆོད་རྟེན་དུ་སྟོན་པར་ཁས་བླངས་པས་དགེ་སློང་གི་སྡོམ་པ་ཐོབ་པ། སྟོན་པས་ཀྱང་འདོད་པ་ཆུང་ཞིང་ཆོག་ཤེས་པ། སྦྱངས་པའི་ཡོན་ཏན་སྨྲ་བ་རྣམས་ཀྱི་མཆོག་ཏུ་ལུང་བསྟན་པ་དེའི་ཡིན་གྱིས། འདིར་ཡང་ཕྱག་ཚོལ་ཅིག །འདི་ནི་ཤཱ་རིའི་བུ། མཆོག་ཐོབ་པའི་བུ། ལོ་བརྒྱད་གཉིས་སུ་དབང་པོའི་བརྡ་སྤྲོད་པ་བསླབས་པས་རྒོལ་བ་ཐམས་ཅད་ཚར་བཅད་པ། སྟོན་པའི་བསྟན་པ་ལ་རབ་ཏུ་བྱུང་ནས་ཤེས་རབ་དང་སྤོབས་པ་ཆེན་པོ་རྣམས་ཀྱི་མཆོག་ཏུ་ལུང་བསྟན་པ། སྟོན་པས། དེ་བཞིན་གཤེགས་པ་མ་གཏོགས་པར། །འཇིག་རྟེན་ཀུན་གྱི་ཤེས་རབ་དང༌། །ཤཱ་རིའི་བུ་ཡི་ཤེས་རབ་ཀྱི། །བཅུ་དྲུག་ཆར་ཡང་མི་ཆོག་གོ །གལ་ཏེ་ལྷར་བཅས་འཇིག་རྟེན་འདི། །ཤཱ་རིའི་བུ་དང་མཉམ་གྱུར་པས། །དེ་བཞིན་གཤེགས་པའི་ཡེ་ཤེས་ཀྱི། །བཅུ་དྲུག་ཆར་ཡང་མི་ཆོག་གོ །ཞེས་གསུངས་པ་དེའི་ཡིན་གྱིས། འདིར་ཡང་ཕྱག་ཚོལ་ཅིག །འདི་ནི་མོའུ་གལ་གྱི་བུ་ཆེན་པོ། མདུན་ན་འདོན་གྱི་བུ། ཅོད་པན་མེད་པའི་རྒྱལ་སྲིད་སྤངས་ཏེ་རབ་ཏུ་བྱུང་བ། ལྷའི་དབང་པོ་བརྒྱ་བྱིན་གྱི་ཁང་བཟང་རྣམ་པར་རྒྱལ་བྱེད་རྐང་པ་གཡས་པའི་མཐེ་བོས་ལན་གསུམ་དུ་བསྒུལ་བ། རྫུ་འཕྲུལ་གྱིས་སྟོན་པ་འཇིག་རྟེན་གྱི་ཁམས་འོད་ཟེར་ཅན་དུ་ཉིན་མཚན་བདུན་གྱིས་གཤེགས་པ། རྫུ་འཕྲུལ་དང་མཐུ་ཆེ་བ་རྣམས་ཀྱི་མཆོག་ཏུ་ལུང་བསྟན་པ་དེའི་ཡིན་གྱིས། འདིར་ཡང་(༡༣༢བ)ཕྱག་ཚོལ་ཅིག །འདི་ནི་མ་འགགས་པ། མི་སྐལ་བ་བཟང་པོ་ལས་རབ་ཏུ་བྱུང་བ། སྟོན་པའི་ཡབ་ཀྱི་མཆེད་ཀྱི་སྲས། གང་གི་མིང་ཡང་དག་པར་བསྒྲགས་པས་ཚོང་པ་དག་རྒྱ་མཚོ་ཆེན་པོ་ནས་བཞོན་པའི་སྣོད་ལེགས་པར་གྲུབ་ཅིང་འོང་བར་འགྱུར་བ། ལྷའི་མིག་ཅན་རྣམས་ཀྱི་མཆོག་ཏུ་ལུང་བསྟན་པ་དེའི་ཡིན་གྱིས། འདིར་ཡང་ཕྱག་ཚོལ་ཅིག །འདི་ནི་ཀུན་དགའ་བོ། ཡུན་རིང་པོ་ནས་སྟོན་པའི་བསྙེན་བཀུར་བ། ཞ་འབྲིང་ན་ཉེ་བར་སྤྱོད་པ། སྟོན་པས་ཡང་དག་པར་བསྔགས་པ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་ཡང་དག་པར་བཀུར་བ། སྟོན་པའི་ཡབ་ཀྱི་མཆེད་ཀྱི་སྲས་ལས་རབ་ཏུ་བྱུང་བ། མང་དུ་ཐོས་པ་རྣམས་ཀྱི་མཆོག་ཏུ་ལུང་བསྟན་པ་དེའི་ཡིན་གྱིས། འདིར་ཡང་ཕྱག་ཚོལ་ཅིག །འདི་ནི་མཛེས་དགའ། སྟོན་པའི་གཅུང་པོ། སྲུའི་སྲས་ལས་རབ་ཏུ་བྱུང་བ། གལ་ཏེ་རབ་ཏུ་མ་བྱུང་ན་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་བ། དབང་པོའི་སྒོ་བསྡམས་པ་རྣམས་ཀྱི་མཆོག་ཏུ་ལུང་བསྟན་པ་དེའི་ཡིན་གྱིས། འདིར་ཡང་ཕྱག་ཚོལ་ཅིག །འདི་ནི་སྒྲ་གཅན་འཛིན། སྟོན་པའི་སྲས་ལས་རབ་ཏུ་བྱུང་བ། གལ་ཏེ་རབ་ཏུ་མ་བྱུང་ན་མཐུ་དང་ལྡན་པའི་རྒྱལ་པོར་འགྱུར་བ། རབ་ཏུ་བྱུང་ན་མང་པོས་བཀུར་བའི་རྒྱལ་པོའི་རྒྱུད་གཅིག་ནས་གཅིག་ཏུ་བརྒྱུད་པ་རྒྱུན་འཆད་པ། བསླབ་པ་འདོད་པ་ཅན་རྣམས་ཀྱི་མཆོག་ཏུ་ལུང་བསྟན་པ་དེའི་ཡིན་གྱིས། འདིར་ཡང་ཕྱག་ཚོལ་ཅིག །འདི་ནི་དགའ་བོའི་འོ། །འདི་ནི་ཉེ་དགའི་འོ། །འདི་ནི་འདུན་པའིའོ། །འདི་ནི་འགྲོ་མགྱོགས་ཀྱིའོ། །འདི་ནི་ནབ་སོའི་འོ། །འདི་ནི་ཁོ་བོའི་གཙུག་ལག་ཁང་ངོ༌། །འདི་ཡང་ལྟ་འདོད་དམ། འཚལ་ལོ། །
དེ་དག་ཁྲིད་ནས། སྲིང་མོ་དག །ཁྱེའུ་སུས་བྱེད་དམ། བཏུང་བ་འཐུང༌། ཅི་ཆུ་ཀླུང་བཟློག་ཕྱོགས་སུ་འབབ། བདག་ཅག་གིས་འཕགས་པ་ལ་གསོལ་བར་བགྱི་བ་དེ་འཕགས་པས་བདག་ཅག་ལ་སྩོལ་ལམ། བདག་ཅག་ལ་དཀོན་པ་དེ་སྩོལ་ཅིག །ཅི་དཀོན། ཆོས་སོ། །ལེགས་སོ་ཟེར་ནས་ཆོས་བསྟན་པས་ཀུན་ཏུ་འཆགས་ཤིང་དྲལ་ནས་དེ་དག་གི་ཡན་ལག་དང་ཉིང་ལག་ལ་ཉུག་པར་བརྩམས་པས། བདག་གིར་བྱེད་པ་དེ་དག་ནི་དེ་དང་ལྷན་ཅིག་གཞོགས་སྟེགས་དང༌། འཕྱར་གཡེང་དང༌། མཚོ་འཚམ་པ་དང༌། ཀུན་ཏུ་རྩེ་བ་དང༌། ཅ་ཅོ་དང༌། དགོད་པ་དང༌། དྲེགས་པ་དང༌། ལུས་སྒྱུར་བར་བྱེད་དོ། །བདག་གིར་མི་བྱེད་པ་དེ་དག་ནི་ཕྱིར་བྱུང་སྟེ། གང་ལས་ཆུ་འབྱུང་དེ་ལས་འབར། །གང་ལས་སྐྱོབ་པ་དེ་ལས་འཇིགས། །འཇིགས་པ་མེད་ལས་འཇིགས་པ་སྐྱེས། །སྐྱབས་ལས་འཇིགས་པ་སྐྱེས་པར་གྱུར། །ཅེས་སྨོད་ཅིང་དོང་བ་ན། དགེ་སློང་དག་གིས་ཐོས་ནས། སྲིང་མོ། ཁྱེད་ཅག་སུ་ལ་སྨོད། ཁྱེད་ལའོ། །(༡༣༣ན)ངེད་ཀྱིས་ཅི་བྱས། བདག་ཅག་གི་ཡན་ལག་དང་ཉིང་ལག་ཁྱིམ་ཐབ་ཀྱིས་ཀྱང་མ་བྱུགས་པ་དེ་དག་འཆར་ཀས་བྱུགས་སོ། །གལ་ཏེ་བདག་གི་ཕ་མའམ། ཕུ་ནུ་མོ་དག་གིས་ཐོས་ན་རྒྱལ་བྱེད་ཚལ་ལྟར་ཡང་མི་སྟེར་ན་འོང་བ་ལྟ་ཅི་སྨོས། སྲིང་མོ་དག །ཁ་རོག་ཅིག །དེ་ནི་ཚུལ་ཁྲིམས་དང་ལྡན་པ་ཡིན་མོད་ཀྱི། འདོད་ཆགས་ཤས་ཆེ་བས་རྩོམ་པ་དེས་ཉོན་མོངས་པ་སེལ་ལོ། །འཕགས་པ་དག །གླང་བུ་རྭ་རྣོན་པོ་གཉིས་མཆིས་པ་དེས་བདག་ཉིད་ཀྱི་དཀུ་འདྲལ་བར་བགྱིད་དམ། དེ་ནི་མི་རིགས་སོ། །སྲིང་མོ་དག །ཁ་རོག་ཅིག་དང་བཟློག་པར་བྱའོ། །ཟློག་ན་ལེགས། མི་ཟློག་ན་སླན་ཆད་རྒྱལ་བྱེད་ཚལ་དུ་མི་མཆིའོ། །དེ་ནས་ལྷག་མ་རྣམས་ཀྱང་གཙུག་ལག་ཁང་ནས་བྱུང་སྟེ་དོང་ངོ༌། །འཆར་ཀའང་དགོད་བཞིན་དུ་བྱུང་བ་དང༌། འཆར་ཀ །ཁྱོད་ཀྱིས་མི་མཛེས་པ་དེ་ལྟ་བུ་བྱས་ནས་ད་ཅི་དགོད། ཁོ་བོས་ཆང་འཐུངས་སམ། ཀུན་དོང་ཟོས། ཅི་དེ་ཡང་བྱས་སམ། གཞན་ཅི་བྱས། བྲམ་ཟེ་དང་ཁྱིམ་བདག་གི་ཆུང་མ་རྣམས་འཕྱ་ཞིང་དོང་ངོ༌། །འཆར་ཀས་སྨྲས་པ། ལྷུང་བཟེད་ནག་པོ་ཅན་རྣམས་སེར་སྣས་གང་ལའང་ཚིགས་སུ་བཅད་པ་གཅིག་ཙམ་ཡང་མི་སྟོན་པར། གཞན་སྟོན་པ་ལ་འཕྱ་བར་བྱེད་དོ། །ཅི་ཁྱོད་ཀྱིས་དེ་དག་བདེན་པ་ལ་བཀོད་དམ། དེས་སྨྲས༌པ། ཇེ་དེ་དག་གི་དབང་པོ་སྨིན་པར་བྱས་ན། རིམ་གྱིས་བདེན་པའང་མཐོང་བར་འགྱུར་རོ། །
ཡན་ལག་གང་གི་ངོ་ཚ་བའི་ཡན་ལག་དེས་ཁེངས་པར་བྱེད་ཅེས་སྨོད་པའི་སྐབས་དེ་གསོལ་བ་དང༌། བྱུང་བ་འདི་དང་གླེང་གཞི་འདི་ལ་དགེ་འདུན་བསྡུ་བ་མཛད་དེ་ཞེས་སོགས་སྔར་བཞིན་ནོ། །འཆར་ཀ་ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །སྟོན་པས། དགེ་སྦྱོང་གི་ཚུལ་མ་ཡིན་པ་ཞེས་སྨད་ནས། དེ་ལྟ་བས་ན་ཕན་ཡོན་བཅུ་ཞེས་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་དང་ལྷན་ཅིག་ལུས་རེག་པར་བྱེད་དམ། ལག་པ་ནས་བཟུང་ངམ། དཔུང་པ་ནས་བཟུང་ངམ། ལན་བུ་ནས་བཟུང་ངམ། ཡན་ལག་དང་ཉིང་ལག་གང་ཡང་རུང་བ་ལ་ནོམ་པ་དང་ཉུག་པ་བདག་གིར་བྱེད་ན་དགེ་འདུན་ལྷག་མའོ། །རྒྱལ་པོའི་ཁབ་ཏུ་གར་མཁན་གྱིས་མི་མང་པོའི་མདུན་དུ་དྲུག་སྡེ་ལ་དབྱེས་པའི་ཚེ། འདི་སྦོམ་དགའ་མོས་དེ་དག་ལ་ལྷུང་བཟེད་དང་ཆོས་གོས་བྱིན་པས་ཉེས་ཀྱིས་དེ་བརྡེག་པར་བྱའི་འདོང་ངོ༌། །སོང་བ་དང༌། གཙོ་མོ་འདི་ཡིན་གྱིས་ཟེར་ནས་སྦོམ་དགའ་མོ་ལ་ཐལ་མོ་དང༌། དབྱུག་པ་དང༌། རྡོ་དང༌། ཁུ་ཚུར་གྱིས་བརྡེགས་སོ། །དེ་ལུས་འབྲུ་མར་གྱིས་བྱུགས་ནས་ཁྲིའུའི་སྟེང་དུ་འདུག་པ་དགེ་སློང་མས་(༡༣༣བ)མཐོང་ནས། ཅི་ཉེས། བདག་བརྡེགས་སོ། །སུས། དྲུག་སྡེས་སོ། །ཁྱོད་ཀྱིས་ཅི་བྱས། བདག་ཕུ་ནུ་མོ་ཆོས་ཀྱི་མིང་པོ་དེ་དག་ལ་ངན་དུ་བརྗོད་པར་མི་རིགས་ཏེ། སྲིང་མོ་ལ་བསླབ་ཅིང་བསྟན་པའང་ལྟ་ག་ལ་ཡོད་མོད་ཅེས་འཕྱ་བའི་སྐབས་དེ་གསོལ་བ་དང༌། དགེ་སློང་མ་ལ་རེག་པར་མི་བྱའོ། །དྲུག་སྡེ་རྣམས་ཆུ་བོ་ཨ་ཛི་ར་བ་ཏི་ལ་ཕར་རྐྱལ་ཚུར་རྐྱལ་བྱེད་པ་ན་ཕྱུགས་རྫིའི་བུད་མེད་མཐོང་ནས། སྲིང་མོ། ངེད་ཀྱིས་བསྒྲལ་ལོ་ཚུར་ཤོག །དེ་དག་བསྒྲལ་བ་དང་ཡན་ལག་དང་ཉིང་ལག་ལ་རེག་གོ །ཡང་ཡང་བསྒྲལ་ལོ། །ཁྱེད་ཀྱིས་ཁྱིམ་ཐབ་ཀྱིས་མ་རེག་པ་ལའང་རེག་ན་སླར་ག་ལ་མཆིས་ཞེས་འཕྱ་བ་དེ་གསོལ་བས། བུད་མེད་ལ་ཡང་ངོ༌། །
གྲོང་ཁྱེར་གྱི་མི་རྣམས་སྐྱེད་མོས་ཚལ་ལ་དགའ་བས་སྐྱེད་མོས་ཚལ་དུ་སོང་བ་དང༌། བུད་མེད་ཅིག་ཆུ་ལེན་དུ་སོང་བ་ན་འདྲེད་ནས་ཆུར་འགྱེལ་ལོ། །དེ་འཚོལ་དུ་སོང་བའི་མི་དེས། བུད་མེད་ཆུས་ཁྱེར་བ་གཟིགས་སམ། མཐོང་སྟེ་ཕ་བི་ཡིན་ནོ། །ཕ་བི་ཤི་ལ་ཐུག་ན་ཉིན་ཐོག་ཐག་ཆུ་ལ་ལྟ་ཞིང་འཁོད་དམ་ཟེར་བ་དེ་གསོལ་བས། ཆུར་ཉམ་ཐག་པ་བསྒྲལ་བའི་ཕྱིར་ནི་རེག་པར་བྱའོ། །གཞན་དག་ཐོང་ཞིག་ཟེར་ན། མཐུ་ཡོད་ན་བཏང་བར་བྱའོ། །གཞན་ཞིག་གིས། གཡོ་བ་མེད་པར་གྱུར་ནས་བྱེ་མ་ལ་ཁས་བུབ་ཏུ་བཞག་སྟེ་ཝས་ཟོས་པ་དེ་གསོལ་བས། ཁྲིའུ་བཞིན་དུ་བསྲུང་བར་བྱའོ། །དྲོ་ཡོལ་དུ་དོགས་ན་བ་ལང་རྫི་དང་ཕྱུགས་རྫི་དག་ལ་གཏད་ནས་ཟན་ལ་འགྲོ་བར་བྱའོ། །སྟོན་པ་ཨོ་ཏ་ལར་ཀུན་དགའ་བོ་དང་ལྷན་ཅིག་བསོད་སྙོམས་ལ་ཞུགས་པ་དང༌། བྲན་མོ་རྒན་མོ་ཀ་ཙང་ཀ་ལ་ཆུ་འཆུར་ཁྲོན་པའི་དྲུང་དུ་སོང་བ་དང༌། ཀུན་དགའ་བོས། སྟོན་པ་ལ་སྐྱེམས་ཀྱི་ཆུ་ཕུལ་ཅིག །ཅེས་སྨྲས་པས་དེས་ཆུས་བུམ་པ་བཀང་སྟེ་འོངས་པ་དང༌། སྟོན་པ་མཐོང་མ་ཐག་ཏུ་བུའི་འདུ་ཤེས་སྐྱེས་ཏེ། བུ་བུ། ཞེས་འཁྱུད་པར་བརྩམས་པ་དགེ་སློང་གིས་ཟློག་པར་བརྩམས་པ་དང༌། མ་ཟློག་ཅིག །འདི་ངའི་ཚེ་རབས་ལྔ་བརྒྱའི་ཡུམ་ཡིན་ནོ། །དེས་འཁྱུད་པས་ཆགས་པ་དང་བྲལ། ཆོས་ཉན་པས་བདེན་པ་མཐོང་བས། སེམས་དག་པས་སྙིང་བརྩེ་བས་བུད་མེད་འཁྱུད་པ་ལ་ལྟུང་བ་མེད་དོ། །དགེ་སློང་ཞིག་གིས་བུད་མེད་ཅིག་མེ་དང་ཆུ་དང་གཡང་ས་དང་མཚོན་དང་གཅན་ཟན་དང་མི་མ་ཡིན་ལས་ཐར་བར་བྱས་སོ། །འགྱོད་ནས་གསོལ་བ། སྙིང་བརྩེ་བས་སྡུག་བསྔལ་ལས་ཐར་བར་བྱས་པ་ལ་ལྟུང་བ་མེད་དོ། །འདུལ་བྱེད་ནས་འབྱུང་བ་ནི། དགེ་སློང་ཞིག་བསོད་སྙོམས་ལ་སོང་བས་བུད་མེད་ཅིག་འགྲོངས་གདངས་ཏེ། ཚུར་སྤྱོན་ཅིག །འདིར་མཛོད་ཅིག །དགེ་སློང་གིས་དེར་བོང་བ་དང༌། བསོད་སྙོམས་བཅུག་སྟེ་བཙངས། འཁར་བས་བཙོགས་པས་འགྱོད་དེ། གསོལ་བས། ཟས་དང་ས་དང་བོང་བ་ལ་སོགས་པ་མོའི་དབང་པོར་(༡༣༤ན)འཛུད་ན་སྦོམ་པོའོ། །དགེ་སློང་གིས་བུད་མེད་ལ་ཕྲག་པ་དང་རྐང་པས་ཕུལ་ནས། གསོལ་བས། རྐང་པ་དང་ཕྲག་པ་ལ་སོགས་པས་བུད་མེད་ལ་འཕུལ་ན་ཉེས་བྱས་སོ། །དགེ་སློང་ཞིག་ལ་བུད་མེད་ཀྱིས་ཆོས་ཉན་པ་དང༌། དེའི་སྟན་ལ་རྐང་པ་ལ་སོགས་པས་ཕུལ་བས། དེའི་སྟན་ལ་ཡང་ངོ༌། །
བུད་མེད་ཅིག་འདྲེད་དེ་བརྡེག་འཆོས་པ་དགེ་སློང་གིས་བསླང་བས་འགྱོད་དེ་གསོལ་བས། འདྲེད་པ་འགྱེལ་བའི་བུད་མེད་སློང་བའོ། །དགེ་སློང་འདྲེད་ནས་བུད་མེད་ཀྱིས་བསླང་པ་དང༌། ཕྲག་པས་ཕུལ་བ་དང༌། དེ་འདུག་པའི་སྟན་ལ་ཕུལ་བས། བུད་མེད་ཀྱིས་དེ་གསུམ་བྱེད་པ་ལ་ནི་ལྟུང་བ་མེད་དོ། །དགེ་སློང་ཞིག་ལ་བུད་མེད་ཅིག་གིས་སོར་མོས་བཟུང་བ་དང༌། ཡང་གཅིག་གིས་རྐང་པ་དང་བྱིན་པས་བཟུང་བ་གསོལ་བས། བཟུང་བ་ལ་ཡང་ངོ༌། །དགེ་སློང་ཞིག་ལ་མས་མགུལ་ནས་འཁྱུད་དེ། གསོལ་བས། མས་འཁྱུད་པ་ལ་ཡང་ངོ༌། །རྒན་ཞུགས་ཤིག་གིས་བུ་མོ་ལྟར་སོང་བ་དང་དེ་པང་བར་འདུག་པས། པང་པར་བུ་མོ་འདུག་པ་ལའང་ངོ༌། །དགེ་སློང་ཞིག་ནམ་ཕྱེད་ན་གཅིན་གཅི་ཞིང་འདུག་པ་དང༌། བུད་མེད་ཅིག་ཀྱང་ཕྱིར་བྱུང་བ་དང་མུན་ནང་དུ་གདོང་ཐུག་ཏུ་ཕྲད་དེ། དེ་བརྡེག་འཆོས་ནས་དགེ་སློང་གི་སྟེང་དུ་འགྱེལ་བ་གསོལ་བས། བུད་མེད་འཁྲུལ་པ་སྟེང་དུ་འགྱེལ་བ་ལའང་ངོ༌། །
འཁྲིག་པ་སྨྲ་བའི་ལྷག་མ་ལ། རྣམ་འབྱེད་ནས་འབྱུང་བ་ནི། སྔར་ཡན་ལག་ལ་བྱུགས་པའི་གནས་སུ། ཚོགས་པར་མི་དབྱུང་བའི་ཚིག་སྨྲས་པ་དང༌། སྔར་ཁྱིམ་ཐབ་ཀྱི་གནས་སུ། དྭ་དང་རྒྱན་པོ་བ་དང་ནལ་གྱི་བུས་ཀྱང་མ་སྨྲས་པ་སྨྲས་སོ་ཞེས་འདོན་པ་སྤོ། གཞན་སྔར་བཞིན་ཏེ། ཡང་དགེ་སློང་ཞིག་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ། འཁྲིག་པ་དང་ལྡན་པ་དག་སྐྱེས་བུས་ན་ཆུང་ལ་ཇི་ལྟ་བ་བཞིན་དུ་སྨྲས་ན་དགེ་འདུན་ལྷག་མའོ། །འདུལ་བྱེད་ནས་འབྱུང་བ་ནི། རྫུ་འཕྲུལ་དང་ཆོ་འཕྲུལ་གྱི་ཆོས་སུ་སྨྲ་ན་སྦོམ་པོའོ། །ཆོ་འཕྲུལ་མེད་པའི་ཆོས་སུ་སྨྲ་ན་ལྷག་མའོ་ཞེས་པ་དེ་བཞིན། དགེ་སློང་ཞིག་བུད་མེད་ཀྱི་དྲུང་དུ་སོང་ནས། བྱིན་ཅིག །དེས་གོ་ནས། སྟ་གོན་བགྱིས་ལགས་སོ། །དེ་འགྱོད་དེ་གསོལ་བས། སྲུ། ཁོ་བོ་ལ་ནས། བྱིན་ཅིག །དགེ་སློང་ཞིག་གིས་བསོད་སྙོམས་ལ་སོང་བ་དང༌། དེས་ཁྱིམ་བདག་གི་ཆུང་མ་ལ། སྲིང་མོ། ཁོ་བོ་ལ་བྱིན་ཅིག །ཁྱོད་ལ་ཅི་གསོལ། ཁོ་བོ་ལ་དེ་བྱིན་ཅིག །མོས་གོ་ནས། སྟ་གོན་བགྱི་ཡིས་སྤྱོན། ཡང་གཞན་ཞིག་ལ། སྲིང་མོ། ཁྱོད་ལ་གང་མཐོང་བ་དེ་བྱིན་ཅིག །བདག་ལ་ཅི་གཟིགས། ཁྱོད་ལ་གང་མཐོང་བ་དེ་བྱིན་ཅིག །དེས་གོ་ནས། མོས་གོ་ནས། སྟ་གོན་བགྱིས་སོ། །སྲིང་མོ། ཁྱོད་ཀྱི་(༡༣༤བ)མདུན་ན་མོ་གང་ཡིན་པ་དེ་བྱིན་ཅིག །མོས་གོ་ནས། སྟ་གོན་བགྱིའོ། །དགེ་སློང་ཞིག་བསོད་སྙོམས་ལ་སོང་བ་དང༌། ཁྱིམ་བདག་གི་ཆུང་མ་ལ། སྲིང་མོ། ཁྱོད་ཀྱི་ཡིད་དུ་འོང་བ་གང་ཡིན་པ་དེ་བྱིན་ཅིག །མོས་གོ་ནས། སྟ་གོན་བགྱིའོ། །ཁྱིམ་བདག་དེས་ཆུང་མ་ལ། དགེ་སློང་དེ་ཅི་དགའ་བ་བྱིན་ཅིག་ཅེས་སྨྲས་ནས་སོང་ངོ༌། །
དགེ་སློང་དེ་ཁྱིམ་དེར་སོང་བ་དང༌། བུད་མེད་དེས། བཙུན་པ། ཁྱིམ་བདག་གི་མཆིད་ནས། དགེ་སློང་དེ་ཅི་དགྱེས་པ་སྩོལ་ཅིག་ཅེས་མཆི་ན། ཁྱོད་ཅི་ལ་དགྱེས། སྲིང་མོ། བདག་ནི་ཁྱོད་ལ་དགའ་འོ། །མོས་གོ་ནས། སྟ་གོན་བགྱིའོ། །ཡང་དགེ་སློང་ཞིག་བསོད་སྙོམས་ལ་སོང་བ་དང༌། དེས་ཁྱིམ་བདག་གི་ཆུང་མ་ལ། སྲིང་མོ། ཁོ་བོ་ལ་ཆུ་བྱིན་ཅིག །ཆབ་བཅུས་ཏེ་མཆི་ཡིས་བཞེས་ཤིག །ཁྱོད་ཉིད་ཆུ་ཡིན་ནོ། །ཡང༌། སྲིང་མོ། བདག་ལ་བཅའ་བ་བྱིན་ཅིག །ཆོས་ཀྱི་བར་དུ་བཞེས་ཤིག །ཁྱོད་ཉིད་བཅའ་བའོ། །ཐུག་པ་བྱིན་ཅིག །ཟན་བྱིན་ཅིག །བསྒྲལ་གྱི་བར་དུ་བཞེས་ཤིག །ཁྱེད་ཉིད་དེ་དག་ཡིན་ནོ། །དེ་རྣམས་ཀྱིས་གོ་ནས། སྟ་གོན་བགྱིའོ། །དགེ་སློང་ཞིག་གྲོང་དུ་སོང་བ་དང༌། བུད་མེད་ཅིག་འགྲོངས་གདངས་ཏེ་འདུག་ནས། འཕགས་པ། འདི་བཞིན་མཛོད་ཅིག་ཅེས་ཟེར་བ་ལ། ཁྱོད་ཀྱི་ལུས་འདི་ལྟ་བུ་དང་སྐལ་བ་མཐུན་པས་བོང་བུ་དང་འདི་བཞིན་བྱོས་ཤིག །དགེ་སློང་མ་ཞིག་ནངས་པར་སྔར་ཁྲུས་བྱས། མིག་སྨན་གྱིས་བསྐུས། མགོ་བཤད་དེ་ཆོས་གོས་རྙིང་པ་ཆགས་བྱས་པ་གྱོན་ནས་མཉན་ཡོད་དུ་སོང་བ་དང༌། དགེ་སློང་ཞིག་གིས་མཐོང་ནས། ཁྱོད་སྐྱེས་པ་ལ་སྟེག་ཅིང་སྤྱད་པ་སྤྱོད་དོ། །དེ་འགྱོད་དེ་གསོལ་བས། སྲུ། སྐྱེས་བུ་འཕྱོན་མ་དག་ལ་བསོད་སྙོམས་སྤྱོད་དམ་ཞེས་ན་ཡང་ངོ༌། །རྒན་ཞུགས་ཤིག་བུ་མོ་ལྟར་སོང་བ་དང༌། དེ་ལོག་པར་སྤྱོད་པ་མཐོང་ནས། ཁྱོད་ཁྱིམ་གཉིས་འཇིག་པར་མ་བྱེད་ཅིག །དེས། མི་ཐུབ་པ་ན་ཇི་ལྟར་བགྱི། མི་ཐུབ་ན་དེར་འགལ་འདུལ་ཆུག་ཅིག །དེ་གསོལ་བས། དེར་འགལ་དུམ་དག་ཆུག་ཅིག་ཅེས་ན་ཡང་ངོ༌། །དགེ་སློང་རང་བཞིན་གྱིས་གནས་ངན་ལེན་གྱི་ཚིག་སྨྲ་བ་ཞིག་གིས་བུད་མེད་ལ་གནས་ངན་ལེན་གྱི་ཚིག་བརྗོད་པར་འགྱོད་དེ། གསོལ་བས། དགེ་འདུན་ལྷ་མའི་ཉེས་པ་མེད་དེ། སྦོམ་པོའོ། །
བསྙེན་བཀུར་བསྔགས་པའི་དགེ་འདུན་ལྷག་མ་རྣམ་འབྱེད་ནས་འབྱུང་བ་ནི། གཞན་སྔར་དང་འདྲ་བ་ལ་འཁྲིག་ཚིག་སྨྲ་བའི་གནས་སུ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན། སྲུ། འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་པ་དང༌། (༡༣༥ན)ཁྱིམ་ཐབ་ལས་ཀྱང་མ་ཐོས་ཞེས་སྤོ། ཡང་དགེ་སློང་གང་བྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་གྱི་མདུན་དུ་བདག་ཉིད་ཀྱི་ལུས་ཀྱི་བསྙེན་བཀུར་གྱི་ཕྱིར་འདི་ལྟ་སྟེ། ང་ལྟ་བུ་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན། སྲུ། འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བསྔགས་པ་བརྗོད་ན་དགེ་འདུན་ལྷག་མའོ། །
སྨྱན་བྱེད་པའི་དགེ་འདུན་ལྷག་མ་ལ་རྣམ་འབྱེད་ནས་འབྱུང་བ་ནི། མཉན་ཡོད་ན་རི་དྭགས་འཛིན་གྱི་བུ་ནག་པོ་ཞེས་བྱ་བ་ཞིག་ལ། བུ་མོ་སྦྱིན་བྱ་ཡོད་པ་རྣམས་དེའི་གན་དུ་སོང་སྟེ། ཁྱོད་ཀྱིས་ཁྱིམ་ཆེ་གེ་མོ་ཤེས་སམ། དེས། ཤེས་སོ། །དེའི་ཁྱེའུ་དེ་མཁས་པ་དང༌། ལེ་ལོ་མེད་པ་དང༌། སྒྲུབ་ཕོད་པ་དང༌། བུ་མོ་ལ་བཟའ་བ་དང་བགོ་བ་མང་པོ་སྦྱིན་ནུས་པ་དང༌། ལས་ཆུང་བ་ཡིན་ནམ་ཞེས་འདྲི། དེས། ཡིན་ཟེར་ན་སྟེར། མིན་ཟེར་ན་མི་སྟེར་རོ། །བུ་མོ་སློང་བ་རྣམས་ཀྱང་དེའི་གན་དུ་སོང་སྟེ། ཁྱོད་ཀྱིས་ཁྱིམ་ཆེ་གེ་མོ་ཤེས་སམ། དེས། ཤེས་སོ། དེའི་བུ་མོ་དེ་མཁས་པ་དང༌། ལེ་ལོ་མེད་པ་དང༌། སྒྲུབ་ཕོད་པ་དང༌། བག་ཡོད་པར་ཁྱིམ་ན་གནས་པར་ནུས་པ་ཡིན་ནམ་ཞེས་འདྲི། དེས། ཡིན་ན་སློང༌། མིན་ཟེར་ན་མི་སློང་ངོ༌། །དེས་དེ་ལྟར་བསྟན་ནས་ལེགས་ན་བསྔགས་པ་དང༌། ཉེས་ན་བསྔགས་པ་མ་ཡིན་པ་བརྗོད་པར་བྱེད་དོ། །ཕྱིས་དེ་རབ་ཏུ་བྱུང་ནས་ཀྱང་དེ་ལྟར་བྱེད་དེ། དེ་ནི་བྱུང་བ་ཡིན་གྱི། རེ་ཞིག་སངས་རྒྱས་བཅོམ་ལྡན་འདས་ཀྱིས་བསླབ་པ་བཅའ་ནི་མ་མཛད་དོ། །སྟོན་པ་མཉན་ཡོད་ནའོ། །དྲུག་སྡེས་བུད་མེད་ལ་སྐྱེས་པའི་ཚིག་དང༌། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ་མཛའ་ན་མོ་ཉིད་དུ་སྨྱན་བྱས་པས། མུ་སྟེགས་དག །ཤཱཀྱའི་དགེ་སློང་འདི་དག་ནི་ཁྱིམ་པ་དང་ཁྱད་པར་ཅི་ཡོད། དགེ་སྦྱོང་མགོ་རེག་འདི་དག་ལ་སུ་ཞིག་བསོད་སྙོམས་སྦྱིན་པར་བྱ་བར་སེམས་ཞེས་སྨོད་པའི་སྐབས་དེ་གསོལ་བ་དང༌། བྱུང་བ་འདི་དང༌། གླེང་གཞི་འདི་དང༌། སྐབས་འདི་ལ་དགེ་འདུན་བསྡུ་བ་མཛད་དེ། དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་འདུན་སྡུད་པར་མཛད་དེ། ངའི་ཉན་ཐོས་རྣམས་ཀྱིས་ཀུན་ཤེས་པར་བྱ་བའི་ཕྱིར་དང༌། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སྟོན་པས་དྲུག་སྡེ་ལ། ཁྱེད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །དགེ་སྦྱོང་གི་ཚུལ་མ་ཡིན་ཞེས་སོགས་སྨད་ནས། དེ་ལྟ་བས་ན་ཕན་ཡོན་བཅུ་ཞེས་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་(༡༣༥བ)ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ལ་སྐྱེས་པའི་ཚིག་དང༌། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་ན། ཐ་ན་ཐང་འགའ་ཕྲད་པ་ལའང་རུང་སྟེ་དགེ་འདུན་ལྷག་མའོ། །འདུལ་བྱེད་ནས་འབྱུང་བ་ནི། ཁྱིམ་བདག་མཛའ་བོ་གཉིས་ཀྱི་ཆུང་མ་སྦྲུམ་པར་གྱུར་ནས། དེ་གཉིས་ཕན་ཚུན་སྟེར་བར་བྱས་སོ། །དེ་ནས་གཅིག་ལ་ཁྱེའུ་ཞིག །གཅིག་ལ་བུ་མོ་ཞིག་བཙས་པ་དང༌། ཁྱིམ་བདག་དེ་ཤི་བས་ཁྱིམ་སྲིད་དམས་པར་གྱུར་ཏེ། ཁྱིམ་བདག་གཞན་དེས། བུ་མོ་མི་སྦྱིན་ཟེར་བ་ཁྱེའུ་དེས་ཐོས་ནས། དེས་དགེ་སློང་ཞིག་ལ། འཕགས་པ། བུ་མོ་འདི་ཞེས་བགྱི་བ་ལ། ཁྱོད་རང་གི་ཕ་མ་གཉིས་ཀྱིས་མ་བཙས་པར་བདག་ལ་བྱིན་ན། བདག་ཀྱང་ལོངས་སྤྱོད་དམས་པར་གྱུར་མོད། ལོངས་སྤྱོད་ད་དུང་ཡང་རྙེད་ཀྱིས་ཁོ་བོ་མ་གཏང་ཞིག་ཅེས་འཕྲིན་བགྱིད་ནུས་སམ། དེས། ནུས་སོ་ཞེས་སོང་ནས་བསྒོ་བ་དང༌། བུ་མོ་དེ་ཕ་མའི་གན་ནས་བྲོས་ཏེ་དེའི་དྲུང་དུ་སོང་ནས་འདུས་སོ། །དེ་འགྱོད་དེ། གསོལ་བས། བྱིན་པ་ལས་དོར་བྱས་པ་སྤྲད་པས་ནི་སྦོམ་པོའོ། །དགེ་སློང་ཞིག་ལ་བུད་མེད་ཅིག་གིས། ཁྱིམ་བདག་འདི་ཞེས་བགྱི་བ་ལ། ཚུར་སྤྱོན་ཞེས་འཕྲིན་བགྱི་བར་ནུས་སམ། དགེ་འདུན་ལ་བཤོས་སྦྱོར་ན་ནུས་སོ། །དེས་རྒྱུ་བྱིན་ནས་དགེ་སློང་དེས་བཤོས་སྦྱར་ཏེ། ཁྱིམ་བདག་དེ་བོས་པས་དེ་གཉིས་ཕྲད་དོ། །འགྱོད་དེ། གསོལ་བས། ཆོས་ཀྱི་ཕུང་པོ་སྔོན་དུ་བཏང་སྟེ་བོས་པས་སོ། །ཁྱིམ་བདག་གི་ཆུང་མ་གཟུགས་མཛེས་པ་ཞིག་ལ་གྱད་གནས་ཞེས་བྱ་བའི་བློན་པོ་ཆེན་པོ་ཞིག་གིས་བཏུས་ཏེ། དེས་དེ་ལ་ཕྲིན་པ་དུ་མ་བཏང་ཡང་བུད་མེད་དེ་མ་བཏུབ་ནས་ཁྱིམ་བདག་དེ་ཤིའོ། །ཉེས་པ་ཅུང་ཟད་ཀྱི་ཕྱིར་བློན་པོ་ཆེན་པོ་དེས་བདག་ཅག་ལ་གནོད་པ་མེད་པར་བདེ་བར་འགྱུར་བའི་ཐབས་ཡོད་དམ་ཞེས་སྨྲས་པ་དང༌། ཡོད་དེ། བློན་པོ་དེས་ཁོ་མོ་ལ་འཕྲིན་པ་དུ་མ་བཏང་ཡང་ཁོ་མོ་མ་བཏུབ་བོ། །འོ་ན་ཁྱོད་སྤྲོ་བར་གྱིས་དང༌། ཁྱོད་གཅིག་པུའི་མཐུས་སྐྱེ་བོ་འདི་རྣམས་བདེ་བར་འགྱུར་རོ། །མོས། འོ་ན་འཕྲིན་པ་སུ་གཏང༌། དགེ་སློང་ངོ༌། །དགེ་སློང་དེ་ལ། འཕགས་པ། བློན་པོ་ཆེན་པོ་འདི་ཞེས་བགྱི་བ་ལ་ཁོ་མོའི་ཁྱིམ་དང༌། ནོར་དང༌། རྫས་འདི་ཐམས་ཅད་དབུལ་གྱིས་ཚུར་སྤྱོན་ཞེས་བགྱི་བར་ནུས་སམ། ནུས་སོ་ཞེས་དེ་སོང་ནས་དེ་ལ་བསྒོ་བས་དེ་གཉིས་དུམ་ནས་འགྱོད་དེ། གསོལ་བས། དོན་གཞན་དང་ལྡན་པས་ཀྱང་ངོ༌། །
ཁང་པའི་དགེ་འདུན་ལྷག་མ་ནི། སྟོན་པ་མཉན་ཡོད་ནའོ། །དགེ་སློང་རྣམས་ལ་ཁང་པ་མང་པོར་གྱུར་ཏེ། ཁ་ཅིག །འདི་ཧ་ཅང་རིངས་སོ་ཞེས་དེ་བོར་ནས་གཞན་བྱེད་དུ་འཇུད་དོ། །འདི་ཧ་ཅང་ཐུང་ངོ༌། །ཧ་ཅང་ཡངས་སོ། །ཧ་ཅང་དོག་གོ །ཧ་ཅང་བརྙིངས་སོ། །ཧ་ཅང་(༡༣༦ན)སྟོབས་ཆུང་ངོ༌། །ཧ་ཅང་རྩིག་ཉེས་སོ་ཞེས་བོར་ནས་གཞན་བྱེད་དུ་འཇུག་པས་བྱ་བྱེད་མང་སྟེ། ཀློག་པ་དང་བསམ་གཏན་ལ་གནོད་པས་ཁྱིམ་པ་རྣམས་མ་དད་པར་གྱུར་ཏོ། །དེའི་ཚེ་འོད་སྲུངས་ཆེན་པོ་མཉན་ཡོད་ན་ཤར་གྱི་ཀུན་དགའ་ར་བ་རི་དྭགས་འཛིན་གྱི་མའི་ཁང་བཟང་ན་བཞུགས་པ་དེ་ཐོས་ཏེ་ཕྱི་དྲོ་ནང་དུ་ཡང་དག་འཇོག་ལས་ལངས་ནས་སྟོན་པའི་སྤྱན་སྔར་སོང་སྟེ་ཞབས་གཉིས་ལ་ཕྱག་བཙལ་ནས་མཐའ་གཅིག་ཏུ་འདུག་སྟེ་གསོལ་བ། དགེ་སློང་རྣམས་ལ་ཁང་པ་མང་པོར་གྱུར་ཏེ་བྱ་བྱེད་མང་བས་ཀློག་པ་དང་བསམ་གཏན་ལ་གནོད་པས་ཁྱིམ་པ་རྣམས་ཁ་བགྱིད་པར་གྱུར་ན། ཐུགས་བརྩེ་བའི་སླད་དུ་དགེ་སློང་རྣམས་ལ་ཁང་པ་དང༌། ཁང་པའི་གཞི་ལེགས་པར་བསྟན་དུ་གསོལ། ཅང་མི་གསུང་བས་གནང་ངོ༌། །དེ་ནས་འོད་སྲུངས་ཆེན་པོ་དེ་ཉིད་ཀྱི་མཚན་མོ་འདས་པ་དང༌། ཚངས་པ་མཚུངས་པར་སྤྱོད་པ་རྣམས་ཀྱི་སེམས་བསྲུང་བའི་ཕྱིར་ལྷུང་བཟེད་དང་ཆོས་གོས་ཐོགས་ཏེ་ལྗོངས་རྒྱུར་སོང་ངོ༌། །དེ་ནས་སྟོན་པས། བྱུང་བ་འདི་དང་སྔར་བཞིན། དགེ་སློང་དག །ཁྱེད་ཅག་ལ་ཁང་པ་མང་པོར་གྱུར་ཏེ། ཁ་ཅིག་ནི། འདི་ཧ་ཅང་རིང་ངོ་ཞེས་བོར་ནས་གཞན་དུ་འཇུག །ཁ་ཅིག་ནི། ཧ་ཅང་ཐུང་ངོ༌། །ཡངས་སོ། །དོག་གོ །བརྙིངས་སོ། །རྩིག་ཉེས་སོ་ཞེས་དེ་བོར་ནས་གཞན་བྱེད་དུ་འཇུག་པ་བདེན་ནམ། བཙུན་པ། མད་དོ། །སྟོན་པས་འདོད་པ་ཆེ་དང་ཆོག་མི་ཤེས་པ་སྨད། འདོད་པ་ཆུང་བ་དང་ཆོག་ཤེས་པའི་བསྔགས་པ་བརྗོད་ནས། དེ་བས་ན་ཕན་ཡོན་བཅུ་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་བདག་གིས་བླངས་པ་བདག་པོ་མེད་པ། བདག་གི་ཕྱིར་ཁང་པ་རྩིག་ཏུ་འཇུག་ན་དགེ་སློང་དེས་ཁང་པ་ཚད་བཞིན་དུ་བྱེད་དུ་ཆུག་ཅིག །དེ་ལ་ཁང་པའི་ཚད་ནི་འདི་ཡིན་ཏེ། ནང་སྲིད་དུ་བདེ་བར་གཤེགས་པའི་མཐོའི་མཐོ་བཅུ་གཉིས། ཞེང་དུ་མཐོ་བདུན་ནོ། །གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་མི་རུང་བའམ། །རྩོད་པ་དང་བཅས་པའམ། བརྩམ་དུ་མི་རུང་བར་བདག་གིས་བླངས་པ་བདག་པོ་མེད་པ་བདག་གི་ཕྱིར་ཁང་པ་རྩིག་ཏུ་འཇུད་དམ། གཞི་ལྟ་བའི་དགེ་སློང་དག་ཀྱང་མི་འཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ནམ། ཚད་ལས་འདས་ན་དགེ་འདུན་ལྷག་མའོ། །
གཙུག་ལག་ཁང་གི་དགེ་འདུན་ལྷག་མ་ནི། སྟོན་པ་ཀོའུ་ཤཱམྦཱི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གཞན་གྱི་(༡༣༦བ)གཙུག་ལག་ཁང་ན་གནས་ཏེ། གཙུག་ལག་ཁང་འདི་ནི་གྱོང་གྲུགས་སུ་གྱུར་པ། གས་པ། མཚམས་ཉམས་པ། ངོས་ཉམས་པ། མ་མོའི་ཁྱིམ་འདྲ་བ་ཡིན་ནོ་ཞེས་འཕྱ་བ་དང༌། དགེ་སློང་རྣམས་ཀྱིས། ཁྱེད་ཅག་གིས་རྡོ་ཡང་སྦྲེང་མི་ནུས་ལ། གཞན་གྱི་གཙུག་ལག་ཁང་ལ་འཕྱའོ་ཞེས་སྨྲས་པ་དང༌། དེ་དག་ང་རྒྱལ་གྱིས་ཁེངས་ནས་ཕན་ཚུན་གྲོས་བྱས་པ། ལྷུང་བཟེད་ནག་པོ་ཅན་དག་གིས་བདག་ཅག་ཟིལ་གྱིས་མནན་གྱིས་ཚུར་ཤོག །སྔོན་ལྷུང་བཟེད་ནག་པོ་ཅན་དག་གིས་མ་བྱས་པའི་གཙུག་ལག་ཁང་ཞིག་བརྩིག་གོ །གལ་ཏེ་བདག་ཅག་ཐམས་ཅད་ཀྱིས་ལག་གི་བླ་ལ་ཞུགས་ན་འཕྱ་བར་འགྱུར་གྱིས། བདག་ཅག་གི་ནང་ན་མཁས་པ། སྤྱོད་པ་གསལ་བ། ཁབ་འཇུག་སར་གཏུན་བུ་འཇུག་ནུས་པ་དེའི་གན་དུ་སོང་ལ་སྤྲོ་བ་བསྐྱེད་པར་བྱ་ན། བདག་ཅག་གི་ནང་ན་འདུན་པ་མཁས་པ། སྤྱོད་པ་གསལ་བ། ཁབ་གཞུག་སར་གཏུན་བུ་འཇུག་ནུས་པ་ཡིན་པས་བསྐོའོ་སྙམ་ནས་བསྐོས་སོ། །འདུན་པས། ཐབས་ཡིན་གྱིས་དེ་ལྟར་བྱའོ། །དེ་དག་དགའ་ནས་སོང་ངོ༌། །
འདུན་པས་དེའི་ཐབས་བསམས་ཏེ། རེ་ཞིག་འཇིག་རྟེན་ལྷ་དང་བཅས་པ་ནི་སྟོན་པ་ལ་མངོན་པར་དད་པ་ཡིན། ཁྱིམ་ཆེ་གེ་མོ་ནི་ཀུན་ཤེས་ཀོའུ་དི་ནྱ་ལ། ཆེ་གེ་མོ་ནི་འོད་སྲུངས་ལ། ཆེ་གེ་མོ་ནི་ཤཱ་རིའི་བུ་ལ། ཆེ་གེ་མོ་ནི་མོའུ་གལ་གྱི་བུ་ལ། ཆེ་གེ་མོ་ནི་མ་འགགས་པ་ལ། ཆེ་གེ་མོ་ནི་རྟ་ཐུལ་ལ། ཆེ་གེ་མོ་ནི་བཟང་ལྡན་སོགས་དེ་དག་ལ་དད་པས་སྦྱོར་དུ་གཞུག་མི་ནུས་ཀྱིས། ཀོའུ་ཤཱམྦཱི་ན་བྲམ་ཟེ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ་ཞིག་འདུག་ན། དེ་ནི་སེར་སྣ་ཅན། མིག་ཕྲ་བ། བྱ་རོག་ལའང་གཏོར་མ་མི་སྟེར་བ། ཡོ་བྱད་ཀུན་འཛིན་པ་ཡིན་ལ། དེ་ལ་དབྱིག་དང་གསེར་མང་པོ་ཡོད་པས། དེ་རྗེས་སུ་འཇུག་པར་བྱེད་ནུས་ན་གཙུག་ལག་ཁང་འགྲུབ་པར་འགྱུར་རོ་སྙམ་དུ་སེམས་པས་ཚེགས་ཆེན་པོས་ནམ་ལངས་ཏེ། སྔ་དྲོ་ཀོའུ་ཤཱམྦཱིར་བསོད་སྙོམས་ལ་ཞུགས་ནས་ཕྱེ་ཉུང་ཤས་ཤིག་ཁྱེར་ཏེ། བྲམ་ཟེ་དེའི་ཁྱིམ་དུ་ཞུགས་པ་དང་སྒོ་བས་བཀག་གོ །བཞིན་བཟང༌། སྟོན་པས་ཁོ་བོ་ཅག་གི་སྤྱོད་ཡུལ་མ་ཡིན་པ་ལྔ་གསུངས་ཏེ། རོལ་མོ་མཁན་དང༌། འཇུད་མཐུན་མ་དང༌། ཆང་མ་དང༌། གདོལ་པའི་གནས་དང༌། རྒྱལ་པོའི་ཕོ་བྲང་ཡིན་ན། ཁྱིམ་འདི་དེ་དག་གང་ཡིན། སྒོ་བས་སྨྲས་པ། ཁྱོད་མང་དུ་བཀྱོན་མོད་དེ་དག་གང་ཡང་མ་ཡིན་གྱི། བྲམ་ཟེ་ཆེ་གེ་མོའི་ཁྱིམ་ཡིན་ནོ། །འདུན་པ་སེམས་ཁོང་དུ་ཆུད་ཅིང་འདུག་པ་ན། ཁྱིམ་བདག་ཅིག་གི་བུ་བྱུང་བ་དེར་གཅིག་གཉིས་འདུས་པའི་དགའ་འདུན་པ་གར་བྱེད་པ་དང༌། སྒོ་བ་ཡེངས་པ་ནས་འདུན་པས་ཞུགས་ཏེ་སྤྱོད་ལམ་ཞི་བས་ཕྱིན་པ་བྲམ་ཟེ་དེས་མཐོང་(༡༣༧ན)ནས། བཙུན་པ་འདུན་པར་བྱོན་པ་ལེགས་སོ། །གདན་འདི་ལ་བཞུགས་ཤིག །འདུན་པ་དང་གཏམ་གྱི་སྐབས་མ་རྙེད་ནས། ཁོ་བོའི་ཕྱེ་ཉུང་ཤས་འདི་འཚག་ཏུ་ཆུག་ཅིག །བྲམ་ཟེས་བུ་མོ་ལ། འཕགས་པའི་བསོད་སྙོམས་ཀྱི་ཕྱེ་ཚོགས་ལ་ཕུལ་ཅིག །དེས་བཙགས་པ་དང༌། འདུན་པས་ཕྱེ་ལ་བརྟགས་སོ། །འཕགས་པ། ཅི་རྟོག །སྲོགས་ཆགས་སོ། །ཡོད་ན་ཅི་བྱེད། བཟའ་བར་མི་བྱའོ། །ཟོས་ན་ཅི་ནོངས། སྟོན་པས་སྲོད་གཅོད་པ་ཀུན་ཏུ་བསྟེན་གོམས་ལན་མང་དུ་བྱས་པས་ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་ཞིང༌། གལ་ཏེ་མི་རྣམས་སྐལ་བ་མཉམ་པར་འོངས་ནའང་ཚེ་ཐུང་བར་འགྱུར་རོ་ཞེས་སོགས་མི་དགེ་བ་དང༌། དགེ་བ་བཅུའི་ལས་ཀྱི་ལམ་རྒྱས་པར་བརྗོད་པ་དང༌། བྲམ་ཟེ་དེ་དད་ནས་རང་ཉིད་ཀྱིས་བཟའ་བ་དང་བཅའ་བ་བསོད་པས་སྣོད་བཀང་སྟེ་ཕུལ་བ་དང༌། འདུན་པས་བསམས་པ། གལ་ཏེ་བླངས་ན་ཤིང་གི་སྣོད་དུ་སྐོལ་བ་དང་འདྲ་བར་དང་པོ་འདི་ཉིད་ཐ་མར་འགྱུར་རོ་སྙམ་ནས། ཁོ་བོས་བསོད་སྙོམས་ཀྱི་ཕྱེ་ཉུང་ཤས་རྙེད་པ་འདི་ཉིད་ལོངས་སྤྱད་པར་བྱའི། དད་པས་སྦྱིན་པར་བྱ་བ་བླངས་ཏེ་དོར་དུ་ག་ལ་རུང༌། བདག་ཅག་བྲམ་ཟེ་རྣམས་ནི་ངན་པ་རྙེད་ནས་བཟང་པོ་རྙེད་ན་ངན་པ་སྤངས་ནས་བཟང་པོ་ལོངས་སྤྱོད་ན། ཁྱེད་ལ་ཅི་ནོངས། ཁོ་བོ་ཅག་བསླབ་པ་བླངས། ཁྱེད་ཅག་བསླབ་པ་མ་བླངས་པས་ཅི་དགར་འཇུག་གོ །
ཁོ་བོ་ཅག་ལ་སྟོན་པས་རིགས་བཞི་བཀའ་སྩལ་ཏེ། ཆོས་གོས་དང༌། བསོད་སྙོམས་དང༌། གནས་མལ་གང་ཡང་རུང་བས་ཆོག་ཤེས་པ་འཕགས་པའི་རིགས་དང༌། སྤོང་བ་དང་སྒོམ་པ་ལ་དགའ་བ་འཕགས་པའི་རིགས་སོ། །དེ་དད་ནས། འདི་ཁྱོད་ཀྱི་ཁབ་ལགས་ཀྱིས་དུས་དུས་སུ་གཤེགས་ཤིག །ཁྱོད་ཀྱི་སྒོ་བ་འདི་ནི་གཤིན་རྗེའི་དབྱུག་པ་དང་འདྲ་བས་སུའང་འཇུག་ཏུ་མི་སྟེར་གྱིས་སྒོས་ཤིག །སྒོ་བ་བཀུག་ནས། ཁྱིམ་འདི་འཕགས་པ་འདུན་པའི་ཡིན་གྱིས་མ་དགག་ཅིག །ནང་མི་ལའང༌། ཁྱེད་ཀྱིས་འཕགས་པ་འདུན་པ་ལ་གུས་པར་བྱའོ། །འདུན་པས་བསམས་པ་འདི་ནི་དད་ན་འོན་ཀྱང་འདིར་ལྷུང་བཟེད་ནག་པོ་ཅན་འཇུག་ན་དེས་འདི་འཁྲུག་པར་བྱེད་པར་འགྱུར་བས། ཐབས་བྱའོ་སྙམ་ནས། སྒོ་བ་དེ་ལ། ཀྭའི་ནང་རྗེ། ཁྱོད་ཀྱིས་བྲམ་ཟེ་འདི་ཁོ་བོ་ལ་དད་པ་མཐོང་ངམ། མཐོང་ངོ༌། །དེས་ཁོ་བོ་འབའ་ཞིག་འཇུག་ཏུ་གནང་གི །ལྷུང་བཟེད་ནག་པོ་ཅན་གཞན་འཇུག་ཏུ་མ་གཞུག་ཅིག །འཕགས་པ། ཤིན་ཏུ་བག་ཡངས་སུ་བཞུད་ཅིག །ཁྱོད་ཉིད་ཀྱང་རེ་ཞིག་དེའུ་མ་ཆུད་ན་གཞན་ལྟ་ཅི་སྨོས། འདུན་པ་དུས་དུས་སུ་དེའི་ཁྱིམ་དུ་སོང་བ་དང༌། བྲམ་ཟེས་ཀྱང་ཡང་(༡༣༧བ)ཡང་སྟོབ་པ་ན། དང་དུ་མི་ལེན་པར་ཆོས་བསྟན་ནས་འགྲོའོ། །རེ་ཞིག་ན་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་གྱི་བསྔགས་པ་བརྗོད་པ་དང༌། བྲམ་ཟེས། བདག་ཅག་གིས་ཀྱང་གཅིག་བགྱིའོ། །དེ་བཞིན་གྱིས་ཤིག །གང་བགྱི། གཙུག་ལག་ཁང་ངོ༌། །བྲམ་ཟེས་བསམས་པ། བདག་གིས་འདུན་པ་ལ་ཡང་ཡང་བསྟབས་ཀྱང་དང་དུ་མ་བླངས་ལ། དེ་དང་དུ་བླངས་པ་འདི་ཡང་དགེ་འདུན་གྱི་ཕྱིར་རོ་སྙམ་ནས་ངོ་མཚར་སྐྱེས་ཏེ། བདག་ལ་ཀརྵ་པ་ཎ་མཆིས་ན། ས་གཞི་མ་མཆིས་སོ། །ཁྱོད་སྙིང་ལས་ཆུང་ངུར་གྱིས་ཤིག །ཁོ་བོས་ས་བསླང་བར་བྱའོ། །དེ་ལྟ་ན་ལེགས་སོ། །འདུན་པས་བསམས་པ། དང་པོར་རྒྱལ་པོ་ལ་བརྟེན་ནས། བློན་པོ་ལ་བརྟེན་སྙམ་ནས། དེས་བློན་པོ་ལ་བརྟེན་པ་དང༌། འཕགས་པ། བཀའ་སྩལ་པ་ཅི་མཆིས། བྲམ་ཟེ་ཞིག་དགེ་འདུན་གྱི་ཕྱིར་གཙུག་ལག་ཁང་རྩིག་ན། ས་གཞི་སློང་བས་གྲོགས་གྱིས་ཤིག །རྒྱལ་པོ་ཚོགས་ཉུང་ངུ་དང་དབེན་པ་ན་བཞུགས་པའི་ཚེ་སྦྲན་གྱིས་སྤྱོན་ཅིག །དུས་ལ་བབ་པའི་ཚེ་སྦྲན་པས། འདུན་པ་འོངས་ནས་རྒྱལ་པོ་ལ། ཨ་རོག་ཁྱ་ཞེས་མཐའ་གཅིག་ཏུ་འདུག་གོ །བློན་པོས། ལྷ། འདི་ནི་འཕགས་པ་འདུན་པ་ཞེས་བགྱི་བ་སྟེ། ཤཱཀྱ་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་དང་ལྡན་པ་ལགས་སོ། །དེས། བྱོན་པ་ལེགས་སོ། །ཅིའི་ཕྱིར་བྱོན། བྲམ་ཟེ་ཞིག་གིས་གཙུག་ལག་ཁང་བགྱིད་དུ་སྩལ་ན། ས་གཞི་རྒྱལ་པོ་དབང་བས་ཞུའོ། །
རྒྱལ་པོའི་ཕོ་བྲང་མ་གཏོགས་པ་གང་དུ་བཞེད་པར་རྩིགས་ཤིག །ཨ་རོག་ཁྱ་ཞེས་སྨྲས་ནས་དྲུག་སྡེ་གཞན་དག་གི་གན་དུ་སོང་སྟེ། དགའ་བོ་ཉེ་དགའ། བྲམ་ཟེ་ཆེ་གེ་མོ་ཞིག་གིས་གཙུག་ལག་ཁང་བྱེད་དུ་བཅུག་ནས་ཁོ་བོས་རྒྱལ་པོ་ལ་ས་གཞི་བསླངས་ན། རྒྱལ་པོ་ན་རེ། རྒྱལ་པོའི་ཕོ་བྲང་མ་གཏོགས་པ་གང་དུ་འདོད་པར་གཙུག་ལག་ཁང་རྩིགས་ཤིག་ཟེར་བས་ས་གཞི་དོམས་ཤིག །བྲམ་ཟེ་ལའང༌། ལྷས་གནང་གིས། པ་ན་འོན་ཅིག །དེས་པ་ན་བྱིན་ཏོ། །དེ་དག་གིས། ཕྱོགས་གང་དུ་བརྩིག་ཅེས་གླེང་ངོ༌། །ཀོའུ་ཤཱམྦཱི་དང་གདངས་ཅན་གྱི་ཀུན་དགའ་ར་བའི་བར་ན་ཤིང་ལྗོན་པ་ཞིག་གི་དྲུང་ན་བྲམ་ཟེ་ཞིག་ཁྱེའུ་ལྔ་བརྒྱ་ལ་བྲམ་ཟེའི་གསང་ཚིག་ཀློག་པའི་ཁྱེའུ་དེ་དག་དྲུག་སྡེ་བསོད་སྙོམས་ལ་འཇུག་པ་དང་འབྱུང་བ་ན་ཡང་ཡང༌། ཀྱེ་དྲུག་སྡེ་དག །བསོད་སྙོམས་མཆོག་ཐོབ་བམ། སྣོད་ཁེངས་སམ་ཞེས་ཅོ་འདྲི་བས། དེ་དག་མི་དགའ་བར་བྱ་ཞིང༌། ཤིང་ལྗོན་པ་དེ་གཅོད་དུ་བཅུག་སྟེ། དེར་གཙུག་ལག་ཁང་བརྩིགས་ན་ཕྱིན་ཆད་ཅོ་འདྲི་བར་མི་བྱེད་དོ་ཞེས་ཀརྵ་པ་(༡༣༨ན)ཎ་ཁྱེར་ཏེ་གླ་མིའི་སྲང་དུ་སོང་ནས། གླ་སྦྱིན་གྱིས། གཙུག་ལག་ཁང་དུ་ལས་གྱིས་ཤིག་ཅེས་གླ་མི་བོས་ཏེ་དེ་དག་ལ་ཁྱེའུ་སུས་དང༌། ལུས་དང་མགོ་བསྐུ་བ་ཡང་བྱིན་པས་མགུ་ནས། བདག་ཅག་ལ་སུག་ལས་ཕོག་ཅིག །ལས་འབྱུང་བར་འགྱུར་གྱིས་རེ་ཞིག་སྡོད་ཅིག །ཉི་མ་ནུབ་པ་དང༌། གླ་སྩོལ་ཅིག །ཁྱེད་ཅག་གིས་ལས་མང་པོ་ཅི་བྱས་པས་གླ་འདེད། ཁྱེད་ཅག་གིས་བདག་ཅག་ལ་གྱིས་གསུངས་པ་གང་མ་བགྱིས། བཞིན་བཟང་དག །སྟ་རེ་དང་གཞོར་དང་སླེ་བོ་དག་ལོངས་ཤིག །ལས་བྱེད་དུ་འདོང་ངོ༌། །དེ་དག་ཐོགས་ཏེ། མིག་ལམ་ཆད་པ་དང༌། ཤིང་ལྗོན་པ་དེའི་གན་དུ་སོང་ནས། འདི་ཆོད་ཅིག །དེ་དག་གིས་སྨྲས་པ། འདི་ནི་གནས་ཀྱི་ཤིང་ལྗོན་པ་ཡིན་པས་བདག་ཅག་ལ་མགོ་བོ་གཉིས་མཆིས་སམ། མི་གཅོད་དོ། །བཀྲེན་པ་དག །ས་གཞི་ནི་རྒྱལ་པོ་དབང་བས། ཁོ་བོ་ཅག་ལ། རྒྱལ་པོའི་ཕོ་བྲང་མ་གཏོགས་པ་གང་དུ་འདོད་པར་གཙུག་ལག་ཁང་རྩིག་ཏུ་ཆུག་ཅེས་དམ་པ་བྱིན་པས་སུས་ཁྱེད་ཀྱིས་མགོ་བོ་གཅོད། ཆོད་ཅིག །དེ་དག་གིས་ཤིང་ལྗོན་པ་བཅད་དེ་རྩ་བ་ནས་ཕྱུང༌། ས་ཕྱོགས་དེ་ཡང་ཤིང་ལྗོན་པ་དེ་ཕྱོགས་གང་ན་འདུག་མི་ཤེས་པ་དེ་ལྟར་མཉམ་པར་བྱས་ཏེ། འདིར་ནི་དྲི་གཙང་ཁང་བྱའོ། །འདིར་སྒོ་ཁང་བྱའོ། འདིར་མེ་ཁང་བྱའོ། །འདིར་རུང་ཁང་བྱའོ། །འདིར་ནི་ཉེ་བར་གནས་པའི་ཁང་པ་བྱའོ་ཞེས་མཚན་མ་བྱས་ཏེ་སོང་ངོ༌། །
ཁྱེའུ་དེ་དག་རེས་ཀྱིས་ཤིང་ལྗོན་པ་དེའི་དྲུང་དུ་ཆག་ཆག་འདེབས། ལེགས་པར་སྐུད། བ་ལང་གི་ལྕི་བ་གསར་པས་ཉུག་པས། གཅིག་ནངས་པར་སྔར་ལངས་ཏེ་སོང་བ་དང༌། དེས་ཤིང་ལྗོན་པ་དེ་མ་མཐོང་བས་མཁན་པོའི་གན་དུ་འོངས་ནས། ཤིང་ལྗོན་པ་དེ་མ་མཆིས་སོ། །བྲམ་ཟེས། ཀྭའི་ཁྱོད་ལོག་པར་མ་སོང་ངམ། མཚན་མོ་ཤིང་ལྗོན་པར་གར་འགྲོ། ཁྱེའུ་གཞན་ཞིག་གད་མོས་འདེབས་ཤིང༌། འདིས་མདང་འབྲས་ཁུའི་རྩ་བས་འཚལ་པས་མ་མཐོང་ངོ་ཞེས་ཟེར་རོ། །བྲམ་ཟེ་དེས་ཁྱེའུ་ཆེས་སྒྲིན་པ་གཞན་ཞིག་བཏང་བས་དེས་ཀྱང་མ་མཐོང་ནས་འོངས་ཏེ་སྨྲས་པ། ཤིང་ལྗོན་པ་དེ་ཡེ་མ་མཆིས་སོ། །དེ་ནས་ཐམས་ཅད་འདུས་ཏེ་སོང་བ་དང་དེ་དག་གིས་མ་མཐོང་བ་དང༌། ཁྱེའུ་དྲན་པ་དང་ལྡན་པ་ཞིག་ན་རེ། ཕྱོགས་འདི་ན་མཁན་པོ་གསང་ཚིག་འདོན་ནོ། །འདི་ན་བདག་སྦྱོང་ན་དེ་ཇི་ལྟར་གྱུར་པ་མ་འཚལ་ལོ་ཞེས་ཟེར་རོ། །དེ་དག་སེམས་ཁོང་དུ་ཆུད་པ་ན། མི་ཞིག་འོངས་ནས། འཁོར་དང་བཅས་པ། ཅིའི་ཕྱིར་སེམས་ཁོང་དུ་ཆུད། ཀྱེ་ནང་པོ། ཕྱོགས་འདི་ན་ཤིང་ལྗོན་པ་ཞིག་ཡོད་པ་དེ་མཚན་མོ་གར་སོང་མ་ཤེས་སོ། །བྲམ་ཟེ། ཁོ་བོས་མིག་ལམ་ཆད་པ་ན་ཕྱོགས་འདིར་དྲུག་(༡༣༨བ)སྡེ་དག་སྟ་རེ་དང༌། གཞོར་དང༌། གླེ་བ་ཐོགས་པ་དག་དང་ལྷན་ཅིག་འདུག་པ་མཐོང་བས་དེ་དག་གིས་མ་བཅད་དམ། དེ་ནས་དྲུག་སྡེ་དག་ལྷགས་ནས། བྲམ་ཟེ་དག །ཅིའི་ཕྱིར་སེམས་ཁོང་དུ་ཆུད། ཤིང་དེ་མ་མཆིས་སོ། །དེ་དག་གིས་བགད་པ་དང༌། ཁྱེད་ཅག་གིས་མ་བཀུམ་མམ། བཀྲེན་པ་དག །ཁྱེད་ཅག་རྟག་ཏུ་དེའི་དྲུང་དུ་འཁོད་ཅིང༌། ཁོ་བོ་ཅག་ལ་ཅོ་འདྲི་བས་ཁྱེད་ཅག་མི་དགའ་བར་བྱའོ། །དེ་དག །དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ །བྲམ་ཟེའི་ཚུལ་ནི་ཚིག་སྟེ། འདི་ལྟར་གནས་ཀྱི་ཤིང་ལྗོན་པའང་གཅོད་པར་བྱེད་དོ་ཞེས་སྨོད་པའི་སྐབས་དེ་གསོལ་བས། བྱུང་བ་འདི་དང་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་བདག་པོ་ཡོད་པར་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུག་ན་གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང༌། རྩོད་པ་མེད་པ་དང༌། བརྩམ་དུ་རུང་བ་བལྟ་བར་བྱའོ། །གལ་ཏེ་དགེ་སློང་གིས་མི་རུང་བའམ། རྩོད་པ་དང་བཅས་པའམ། བརྩམ་དུ་མི་རུང་བ་བདག་པོ་ཡོད་པར་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུད་དམ། གཞི་བལྟ་བའི་ཕྱིར་དགེ་སློང་དག་ཀྱང་མི་འཁྲིད་དམ། དགེ་སློང་ཁྲིད་པ་དག་ལ་མི་སྟོན་ན་དགེ་འདུན་ལྷག་མའོ། །
གཞི་མེད་ཀྱི་དགེ་འདུན་ལྷག་མ་ནི། སྟོན་པ་རྒྱལ་པོའི་ཁབ་ནའོ། །དེའི་ཚེ་སྡིག་བྱུང་ན་གྱད་ཀྱི་སྣ་ཆེན་པོ་ལ་གཏོགས་པ། ནོར་མང་བ་ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། ནོར་གྱིས་རྣམ་ཐོས་ཀྱི་བུ་ལ་འགྲན་པ། གྱད་རྣམས་ཅོད་པན་མེད་པའི་རྒྱལ་སྲིད་བྱེད་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱོད་ཀྱང་བུ་མེད་ཅིང༌། བུ་འདོད་པས་སོགས། མོའུ་གལ་གྱི་སྐབས་དང་འདྲ་བ་ལ། ཉི་མ་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས་ནས་མིང་འདོགས་པ་ན། ཁྱེའུ་དེ་མལ་ནས་མ་ཕབ་པར་བཤང་གཅི་མི་བྱ་ལ། ཡུལ་དབུས་ན་མཁས་པ་སྤྱོད་པ་གསལ་བ་དེ་ནོར་ལྟ་བུ་ཟེར་བས། ཁྱེའུ་འདི་གྱད་རྒྱལ་སྡེའི་བུའང་ཡིན་ལ་ནོར་ལྟ་བུའང་ཡིན་པས། གྱད་བུ་ནོར་ཞེས་མིང་བཏགས་སོ། །གྱད་བུ་ནོར་བཙས་པའི་ཉི་མ་དེ་ལ་བློན་པོ་ལྔ་བརྒྱ་ལ་བུ་བཙས་ནས་ཁྱིམ་དང་མཐུན་པའི་མིང་བཏགས་སོ། །དེ་མ་མའི་པང་ན་འདུག་པ་ན་མཚན་མཁན་ཞིག་གིས་མཐོང་ནས་བརྟགས་པས་ཁྱེའུ་འདི་ནི་རྐང་གཉིས་པའི་བསོད་ནམས་ཀྱི་ཞིང་ཡིན་ཏེ། འདི་ལ་མཆོད་པ་བྱས་ན་འབྲས་བུ་དང་ཕན་ཡོན་ཆེན་པོར་འགྱུར་རོ་སྙམ་ནས། དེས། ཁྱེའུ་འདི་ཁོ་བོ་ལ་ཡུད་ཙམ་བྱིན་ཅིག །ཁོ་བོས་འདི་ལ་མཆོད་པ་བྱའོ། །ཁོ་མོ་ལ་(༡༣༩ན)ཁྱེའུ་སྦྱིན་པའི་དབང་མེད་ཀྱི། ཁྱོད་ཁྱེའུ་འདོད་ན་དམག་དཔོན་གྱི་གན་དུ་སོང་ཞིག །དེས་སོང་ནས་དྲིས་པས་གནང་སྟེ། དེས་ཁྱེའུ་དེ་རང་གི་ཁྱིམ་དུ་ཁྱེར་ནས་མཆོད་པ་ཆེར་བྱས་ཏེ་སླར་བསྐྱལ་ལོ། །དེ་ཆེན་པོར་གྱུར་པའི་ཚེ་ཡི་གེ་སོགས་ལ་བསླབ་པ་མཐར་ཕྱིན་ནས། ཕས་དེའི་ཆུང་མའི་འཁོར་རབ་འབྲིང་ཐ་མ་གསུམ་བཞག་གོ །
དགུན་དང༌། དཔྱིད་དང༌། དབྱར་གྱི་སྐྱེད་མོས་ཚལ་གསུམ་བྱེད་དུ་བཅུག་གོ །དེ་སྟེང་གི་ཁང་བཟང་གི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱིས་རྩེ་བ་དང་དགའ་མགུར་སྤྱོད་དོ། །རེ་ཞིག་ན་ནེའུ་ལྡངས་ལྔ་བརྒྱ་པོ་དེ་དག་ནངས་པར་སྔར་ལངས་ནས་རི་དྭགས་གཤོར་དུ་སོང་བ་དང༌། དེ་དག་གིས་དེའི་ཉིན་མོ་རི་དྭགས་གཅིག་ཀྱང་མ་སོད་པར་དེའི་ནུབ་མོ་དེར་འཁོད་ནས་ཕྱི་དེ་ཉིན་པར་རི་དྭགས་བསད་དེ་མཚན་མོ་མིག་ལམ་ཆད་པ་ན་རང་རང་གི་ཁྱིམ་དུ་དོང་ངོ༌། །དེ་དག་སང་ནམ་ལངས་པ་དང་གྱད་བུ་ནོར་ལྟར་སོང་བ་དང༌། ཁྱེད་ཀྱིས་གར་ཕྱིན། རི་དྭགས་གཤོར་དུའོ། །ཁྱེད་ཅག་གིས་དེར་ཅི་བྱས། རི་དྭགས་བསད་དོ། །རི་དྭགས་དེ་དག་ཅི་ཟ། ཅི་འཐུང༌། རན་དང་ཆབ་འཚལ་ལོ། །དེ་ལྟ་ན་དེ་དག་གིས་ཁྱེད་ལ་གནོད་པ་ཅི་བྱས་ནས་ཁྱེད་དེ་དག་གསོད། བདག་ཅག་དེ་གློ་བ་དགའ་བ་ཉིད་དུ་འགྱུར་རོ། །དགའ་བ་དེ་ནི་མི་བཟང་སྟེ། གཞན་ལ་གནོད་པས་དགའ་བ་དེ་ཐོང་ཞིག །དེ་དག་ཅང་མི་སྨྲ་བར་ཕྱིར་བྱུང་ནས། ཤེས་ལྡན་དག །གཞོན་ནུ་འདི་ཆུང་མའི་འཁོར་སྤངས་ནས་འགྲོ་མི་འདོད་པས་བདག་ཅག་ལ་སྨོད་ཀྱིས། དམག་དཔོན་ལ་གོ་བར་བྱས་ནས་འདི་བདག་ཅག་དང་ལྷན་ཅིག་རི་དྭགས་གཤོར་དུ་འགྲོ་བར་འགྱུར་བའི་ཐབས་བྱའོ་ཞེས་གྲོས་བྱས་ནས་དམག་དཔོན་གྱི་གན་དུ་སོང་སྟེ། གཞོན་ནུ་གྲིབ་མར་སྐྱེས་པར་གྱུར་པ་དེ་དག་ནི་ངེས་པར་ཉི་འོག་གི་རྒྱལ་པོས་ཟིལ་གྱིས་གནོན་པར་འགྱུར་བས། ཅིའི་ཕྱིར་གཞོན་ནུ་གྲིབ་མར་བསྐྱེད་ཅིང་བདག་ཅག་དང་ལྷན་ཅིག་རི་དྭགས་གཤོར་དུ་མི་གཏོང༌། བདག་ཅག་དང་ལྷན་ཅིག་མཆིས་ན་གདུག་པ་དང༌། རྩལ་ཆེ་བ་དང༌། ཉི་འོག་གི་རྒྱལ་པོ་དག་གིས་ཟིལ་གྱིས་ནོན་པར་མི་འགྱུར་རོ། །
དེ་ལྟ་ན་གཞོན་ནུ་གཏང་གིས་དེངས་ཤིག །དམག་དཔོན་གྱིས། གཞོན་ནུ། ཁྱོད་ཀྱི་ནེའུ་ལྡངས་དག་དང་ལྷན་ཅིག་རི་དྭགས་གཤོར་དུ་སོང་ཞིག །ཡབ། བདག་གཞན་གྱི་སྲོག་ལ་གནོད་པ་མི་བགྱིད་དོ། །གཞོན་ནུ། བདག་ཅག་རྒྱལ་རིགས་དག་ནི་མཚོན་གྱིས་འཚོ་བ་ཡིན་པས་འདི་རྒྱལ་རིགས་དང་མི་འགལ་གྱིས་སོང་ཞིག །དེ་ཕ་ལ་གུས་པས་ཁས་བླངས་ཏེ་ཕྱི་དེ་ཉིན་པར་དེ་དག་དང་ལྷན་ཅིག་རི་དྭགས་གཤོར་དུ་སོང་བ་དང༌། ཁྱེའུ་རྣམས་ཀྱིས་དེའི་སེམས་བསྲུང་བའི་ཕྱིར་འཕན་ཁར་བཞག་ནས། (༡༣༩བ)རི་དྭགས་མང་པོ་བཀུག་སྟེ་དེའི་མདུན་ན་ཕར་བཏང་བ་དང༌། དེ་དག་འཆི་བའི་འཇིགས་པས་ལུས་དམས་བཞིན་དུ་ལྕེ་ཕྱུང་སྟེ་གཞོན་ནུའི་དྲུང་དུ་ལྷགས་སོ། །གཞོན་ནུས་དེ་དག་མཐོང་ནས་སྙིང་རྗེ་སྐྱེས་ཏེ་ཕྱོགས་བཞིར་བལྟས་པ་དང༌། མི་ཞིག་གིས་དེའི་སེམས་བསྲུང་བའི་ཕྱིར་རི་དྭགས་དེ་དག་གི་རྭ་བར་དང་རྐང་ལག་གི་བར་དུ་མདའ་གཉིས་གསུམ་འཕངས་ནས་བཏང་བ་དང༌། རི་དྭགས་དེ་དག་བྱེར་ཏེ་སོང་ངོ༌། །བློན་པོའི་བུ་རྣམས་ཀྱིས། གཞོན་ནུ་ནི་གནས་ལྔ་ལ་བྱང་བ་ཡིན་པས་རི་དྭགས་མང་པོ་བསད་ཀྱིས་མྱུར་དུ་འདོང་ངོ་སྙམ་ནས་ལྷགས་པ་དང༌། རི་དྭགས་གཅིག་ཀྱང་མ་སོད་པར་མཐོང་ནས། རི་དྭགས་དེ་དག་གར་མཆིས། ཤེས་ལྡན་དག །རི་དྭགས་ག་རེ། རི་དྭགས་དག་སུའི་ཡིན། དེ་དག་ནི་རི་དྭགས་ཉིད་ཡིན་མོད། དེ་དག་སྤྱོད་པ་དང་ཤུགས་དེ་ལྟ་བུས་བརྒྱུགས་པས་དེ་དག་གིས་ཁོ་བོ་ཉིད་ཀྱང་དེའུ་བསད་དོ། །མི་དེས་སྨྲས་པ། ཁྱེད་ཀྱིས་འདི་འཕན་ཁར་བཞག་པས་རི་དྭགས་ག་ལ་སོད། འདི་འདོད་ན་རི་དྭགས་གཅིག་ཀྱང་བྲོས་པར་མི་འགྱུར་རོ། །དེ་དག་ཁྲོས་ནས་མཐའ་ཞིག་ཏུ་སོང་སྟེ་སྨྲས་པ། འདིས་རི་དྭགས་དག་མ་བསད་པར་ཡལ་བར་བོར་བས་འདི་གསད་དོ། །
ཡང་བསམས་པ། དམག་དཔོན་གྱིས་ཐོས་ན་མི་རུང་གིས། འདི་མི་གསད་པར་འདི་ཉིད་དུ་བསྐྱུར་ལ་བདག་ཅག་འདོང་ངོ་ཞེས་དེ་ལ་མ་བལྟས་པར་སོང་ངོ༌། །གཞོན་ནུས་བསམས་པ། དེ་དག་བདག་གི་ནེའུ་ལྡངས་ལྷན་ཅིག་རྩེ་བ་ཡིན་ན་རི་དྭགས་ཙམ་གྱི་ཕྱིར་དེ་དག་གིས་བདག་བསྐྱུར་ནས་དོང་བ་ལས་ན། བདག་གི་ཕ་འདས་ནས་བདག་དམག་དཔོན་དུ་གྱུར་པའི་ཚེ་བདག་གིས་སེམས་ཅན་ལ་ཉེས་སྤྱོད་མང་པོ་བྱ་དགོས་པར་འགྱུར་རོ་སྙམ་ནས་སྙིང་སྟོང་ཞིང་ཟུག་རྔུས་ཟུག་པ་བཞིན་དུ་ཁྱིམ་དུ་སོང་སྟེ་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག་སྟེ། དེའི་གན་དུ་ཆུང་མས་འོངས་པ་མཐོང་བ་དང་དབང་པོ་ཕྱིར་སློན་པར་བྱེད་དོ། །དེ་དག་གིས་གཅིག་ནས་གཅིག་ཏུ་བརྒྱུད་དེ་ཕ་ལ་སྨྲས་པས། ཕས། ཁྱོད་ཅིའི་ཕྱིར་སེམས་ཁོང་དུ་ཆུད། ཡབ་ཀྱིས་བདག་རྔོན་པ་དྲག་ཤུལ་ཅན་ལག་པ་དམར་བ། གཞན་གྱི་སྲོག་གཅོད་པས་འཚོ་བའི་ལས་ལ་སྦྱར་ན་ཅིའི་ཕྱིར་བདག་སེམས་ཁོང་དུ་མི་ཆུད། བུ། བདེ་བར་འདུག་ལ་ཕྱིན་ཆད་མ་འགྲོ་ཞིག །
དེ་ནས་གཞོན་ནུ་དེ་ཡིད་དགའ་ནས། དགེ་བ་གང་ཡིན་ཞེས་འཚོལ་ཞིང་ཕ་དང་ཆུང་མའི་འཁོར་ལ་མ་བལྟས་པར་སྟོན་པ་དྲུག་གི་གན་དུ་སོང་སྟེ་འོད་སྲུངས་རྫོགས་བྱེད་ལ། ཁྱོད་ཀྱི་ཆོས་ཀྱི་ཚུལ་ནི་གང་ཡིན་སོགས་མཆོག་ཟུང་གཅིག་དང་འདྲའོ། །དེ་ནས་གྱད་བུ་ནོར་རང་གི་ཁྱིམ་དུ་སོང་ནས་སེམས་ཁོང་དུ་ཆུད་དེ། ཀྱེ་མ་འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེ་བཅས་(༡༤༠ན)པའི་སྐྱེ་དགུ་དང༌། ལྷ་དང་མིར་བཅས་པའི་ནང་ན་བདག་འཁོར་བ་ལས་ཐར་བར་བྱེད་པའི་དགེ་སྦྱོང་ངམ་བྲམ་ཟེ་དེ་ལྟ་བུ་སུ་ཡོད་སྙམ་དུ་སེམས་སོ། །དེའི་ཚེ། སངས་རྒྱས་བཅོམ་ལྡན་འདས་ལ་མི་མཁྱེན་པ་དང་མི་གཟིགས་པ་ཅུང་ཟད་ཀྱང་མི་མངའ་བས། སྟོན་པ་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་བ་ཞེས་པ་ནས། དུས་ལས་འདའ་བར་མི་འགྱུར་རོ། །
དེ་ལྟར་སྟོན་པས་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་པ་ན། གྱད་བུ་ནོར་རྒྱུད་སྨིན་པ། སྔོན་སངས་རྒྱས་ལ་ལྷག་པར་བྱ་བ་བྱས་པ་དེ་གདུལ་བའི་དུས་ནི་འབྲས་སྨིན་པ་མཚོན་གྱིས་གཏོལ་བ་ལ་སྡོད་པ་ལྟ་བུ་ཡིན་པར་གཟིགས་ནས། སྟོན་པས་འདུལ་ལམ་ཉན་ཐོས་ཀྱིས་འདུལ་ན་ཉན་ཐོས་ཀྱིས་འདུལ་བར་གཟིགས། རྫུ་འཕྲུལ་གྱིས་འདུལ་ལམ་སྤྱོད་ལམ་གྱིས་འདུལ་དགོངས་ན་སྤྱོད་ལམ་གྱིས་འདུལ་བར་གཟིགས། སྤྱོད་ལམ་གྱིས་འདུལ་བ་དེ་ལ་རྟ་ཐུལ་གཏོང་བར་མཛད་དེ། དེའི་སྤྱོད་ལམ་གྱིས་ལྷ་དང་མིའི་ཡིད་སྡུད་པར་བྱེད་པའི་ཕྱིར་རོ། །
དེ་ནས་སྟོན་པས་རྟ་ཐུལ་ལ། ཁྱོད་ཀྱིས་གྱད་བུ་ནོར་ལ་སོམས་ཤིག །དེས་ཅང་མི་སྨྲ་བས་དང་དུ་བླངས་ནས་མཐར་གྱིས་སྡིག་བྱུང་དུ་ཕྱིན་ཏེ། པད་པའི་ནགས་ཁྲོད་དུ་འདུག་གོ །དེ་ནས་དེས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། འགྲོ་བ་དང༌། ལྡོག་པ་དང༌། ཅུང་ཟད་ལྟ་བ་དང༌། རྣམ་པར་ལྟ་བ་དང༌། བསྐུམ་པ་དང༌། བརྐྱང་པ་དང༌། སྣམ་སྦྱར་དང་ཆོས་གོས་དང་ལྷུང་བཟེད་ཐོགས་པ་མཛེས་པས་སྡིག་བྱུང་དུ་བསོད་སྙོམས་ལ་ཞུགས་པ་དང་གྱད་བུ་ནོར་གྱིས་མཐོང་ནས། འདིར་རབ་ཏུ་བྱུང་བ་ཇི་སྙེད་ཅིག་ལྷགས་ཀྱང༌། འདིའི་སྤྱོད་ལམ་ལྟ་བུ་ནི་སྔོན་ཆད་མ་མཐོང་ངོ༌། །འོན་ཀྱང་རབ་ཏུ་བྱུང་བ་དག་གྲོང་དུ་སྤྱོད་ལམ་འཆོས་ལ། དགོན་པར་ཅི་དགར་སྤྱོད་པ་དག་ཡོད་པས་བརྟག་གོ་སྙམ་ནས་མི་ཞིག་ལ། ཀྭའི་ནང་རྗེ། རབ་ཏུ་བྱུང་བ་འདིའི་ཕྱི་བཞིན་དུ་སོང་ལ། འདི་གྲོང་དུ་སྤྱོད་ལམ་ཞི་བ་ལྟར་དགོན་པར་ཡང་ཡིན་མིན་རྟོགས་ཤིག །མི་དེས་ཀྱང་རྟ་ཐུལ་གྱི་ཕྱི་བཞིན་སོང་ངོ༌། །རྟ་ཐུལ་བསོད་སྙོམས་བརྒྱུས་ནས་པད་པའི་ནགས་ཁྲོད་དུ་སོང་སྟེ་ཟས་ཀྱི་བྱ་བ་བྱས། ལག་པ་གཉིས་བསྙལ། ལྷུང་བཟེད་དང་ཆུ་ཚགས་མཐའ་ཞིག་ཏུ་བཞག །རྐང་པ་གཉིས་བཀྲུས་ཏེ་ཤིང་ལྗོན་པ་ཞིག་གི་དྲུང་དུ་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་དཀྱིལ་ཀྲུང་བཅས་ཏེ་སྤྱོད་ལམ་ཞི་བས་འདུག་གོ །མི་དེ་རྟ་ཐུལ་གྱི་སྤྱོད་ལམ་ཞི་བས་ཡིད་བསྡུས་ནས་གྱད་བུ་ནོར་གྱི་གན་དུ་སོང་སྟེ། ཁྱོད་ཀྱིས་རབ་ཏུ་བྱུང་བ་དེ་སྤྱོད་ལམ་ཇི་ལྟ་བུ་གྲོང་དུ་རྒྱུ་བ་(༡༤༠བ)གཟིགས་པ་དེ་བས་བརྒྱ་སྟོང་གིས་ལྷག་པའི་སྤྱོད་ལམ་གྱིས་དགོན་པར་མཆིས་སོ། །དེ་རྟ་ཐུལ་གྱི་སྤྱོད་ལམ་ཕུན་སུམ་ཚོགས་པ་ཐོས་པས་ཡིད་བསྡུས་ནས་མི་དེ་ལ། མྱུར་དུ་བཞོན་པ་བདེ་བ་ཞིག་གཏོད་དང་དེ་ལ་ཞོན་ནས་རབ་ཏུ་བྱུང་བ་དེ་བལྟར་འགྲོའོ་ཞེས་དེ་དང་ལྷན་ཅིག་བཞིན་པའི་ས་ཇི་སྲིད་བར་བཞོན་པས་སོང་སྟེ། བཞོན་པ་ལས་བབས་རྐང་པ་གཉིས་ཀྱིས་པད་པའི་ནགས་ཁྲོད་དུ་ཞུགས་པ་དང༌། གྱད་བུ་ནོར་གྱིས་རྟ་ཐུལ་མཉམ་པར་བཞག་ཅིང་སྤྱོད་ལམ་ཞི་བས་འདུག་པ་མཐོང་ནས། བདག་གིས་འདི་ཏིང་ངེ་འཛིན་ལས་བསླང་བ་ནི་ཚུལ་དང་མི་མཐུན་གྱིས། ཏིང་ངེ་འཛིན་ལས་ལངས་པའི་ཚེ་དྲུང་དུ་འགྲོའོ་སྙམ་ནས་མཐའ་ཞིག་ཏུ་འདུག་གོ །
དེ་ནས་རྟ་ཐུལ་ཕྱི་མ་བྲེད་ནང་དུ་ཡང་དག་འཇོག་ལས་ལངས་པ་དང༌། གྱད་བུ་ནོར་སོང་སྟེ་དེ་དང་ལྷན་ཅིག་ཡང་དག་པར་དགའ་བ་དང་མགུ་བའི་གཏམ་སྣ་ཚོགས་བྱས་ནས་རྟ་ཐུལ་ལ། ཁྱོད་སྟོན་པའམ་ཉན་ཐོས་ཡིན། ཁོ་བོ་ནི་ཉན་ཐོས་སྟོན་པའི་ལམ་དུ་ཞུགས་པའོ། །དེ་གཉིས་ལ་ཁྱད་པར་ཅི་མཆིས། རི་རྒྱལ་ཉུངས་ཀར་གཉིས་ལ་ཁྱད་པར་གང་ཡོད་དང༌། །དུག་ཅན་གླང་རྗེས་ཆུ་ལ་ཁྱད་པར་གང་ཡོད་དང༌། །ཉི་མ་མེ་ཁྱེར་སྲིན་ལ་ཁྱད་པར་གང་ཡོད་དང༌། །ནམ་མཁའ་པདྨའི་བུ་གར་ཁྱད་པར་གང་ཡོད་པ། ། །སངས་རྒྱས་ཉན་ཐོས་བྱང་ཆུབ་ཁྱད་པར་དེ་ཡོད་དོ། །འདི་སྟོན་པ་ལ་བསྟོད། བདག་ལ་སྨོད་པས། སངས་རྒྱས་དང་ཆོས་ཀྱང་དམ་པ་མ་ཡིན་པར་མི་འགྱུར་རོ་སྙམ་ནས། བདག་རབ་ཏུ་དབྱུང་དུ་གསོལ། བཞིན་བཟང༌། ཁྱོད་ཕ་མས་གནང་ངམ། མ་གནང་ངོ༌། །དེ་བཞིན་གཤེགས་པ་དང་དེའི་ཉན་ཐོས་ནི་ཕ་མས་མ་གནང་བ་རབ་ཏུ་མི་འབྱིན་ནོ། །བདག་ཕ་མས་གནང་བ་དེ་ལྟར་བགྱིའོ་ཞེས་སྨྲས་ཏེ་ཁྱིམ་དུ་སོང་ནས། ཡབ་ཡུམ། བདག་ལེགས་པར་གསུངས་པའི་ཆོས་འདུལ་བ་ལ་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ༌། །གཞོན་ནུ། །ཁྱོད་ངེད་ཀྱི་བུ་གཅིག་པ། སྡུག་པ། ཡིད་དུ་འོང་བ་ཡིན་པས་ཤི་ན་མི་འདོད་བཞིན་དུ་འབྲལ་གྱི། གསོན་བཞིན་དུ་མི་གཏོང་ངོ༌། །ཡབ་ཡུམ། གནང་ན་ལེགས། མི་གནང་ན་ཕྱིན་ཆད་འཚལ་མའང་མི་འཚལ་ཞེས་སོགས་མོའུ་གལ་གྱི་སྐབས་དང་འདྲ། དེ་ནས་གྱད་བུ་ནོར་གྱིས་རྟ་ཐུལ་གྱི་གན་དུ་སོང་ནས། བདག་ཕ་མས་གནང་གིས་རབ་ཏུ་དབྱུང་བ་དང་བསྙེན་པར་རྫོགས་པར་མཛད་དུ་གསོལ། རབ་ཏུ་བྱུང་བའི་ཡོན་ཏན་ལྔ་བཤད་ནས་རབ་བྱུང་བསྙེན་རྫོགས་བྱས་ཏེ། བུ། དགེ་སློང་གི་ལས་ནི་གཉིས་ཏེ། ཀློག་པ་དང་བསམ་གཏན་ཡིན་ན་གང་འདོད། མཁན་པོ། གཉིས་ཀ་བགྱི་སྟེ། གདུགས་ལ་ཀློག་པ་དང༌། དགུང་ལ་བསམ་གཏན་བགྱིའོ། །དེས་ཉིན་མོ་བཀླག་པ་དང་ཁ་ཏོན་བྱས་པས་(༡༤༡ན)སྡེ་སྣོད་གསུམ་ལྷོགས་སོ། །
མཚན་མོ་བསམ་གཏན་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས། འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང༌། ལྟུང་བ་དང༌། རྣམ་པར་འཐོར་བ་དང༌། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་རབ་ཏུ་བྱུང་བ་ཚངས་པར་སྤྱོད་པའི་མཐའ་བླ་ན་མེད་པ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ། བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང༌། དགྲ་བཅོམ་པ་ཁམས་གསུམ་ལ་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང༌། རིག་པ་དང༌། མངོན་པར་ཤེས་པ་དང༌། སོ་སོ་ཡང་དག་པར་རིག་པ་ཐོབ་པ། སྲེད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པ་དང༌། རྗེད་པ་དང༌། མངོན་དུ་སྨྲ་བར་གྱུར་ཏོ། །
དེ་ནས་རྟ་ཐུལ་གྱི་ལྷན་ཅིག་གནས་པ་དང༌། ཉེ་གནས་ལྗོངས་སུ་དབྱར་གནས་པ་དེ་དག་དབྱར་ཟླ་བ་གསུམ་འདས་ནས་རྟ་ཐུལ་གྱི་གན་དུ་སོང་སྟེ་ཕྱག་བཙལ་ནས་ཁ་ཅིག་ནི་ཇི་ལྟར་ཐོབ་པ་བརྗོད། ཁ་ཅིག་ནི་སྡེ་སྣོད་གསུམ་གྱི་ཁ་ཏོན་འདྲི་བ་ཚོལ་ལོ། །དེས་དེ་དག་གི་སྡེ་སྣོད་གསུམ་དང༌། བསམ་གཏན་གྱི་ལམ་ལ་ཐེ་ཚོམ་བཅད་ནས། དེ་དག་གིས་ཕན་ཚུན་དུ། བདག་ཅག་གིས་མཁན་པོ་མཐོང་ཞིང༌། བསྙེན་བཀུར་བྱས་ཟིན་གྱིས། ད་ནི་སྟོན་པ་ལ་བསྙེན་བཀུར་བྱེད་དུ་འདོང་ངོ་ཟེར་བ་གྱད་བུ་ནོར་གྱིས་ཐོས་ནས། ཀྱེ་མ་བདག་ཀྱང་སྟོན་པ་ལ་བལྟའོ་སྙམ་དུ་རྟ་ཐུལ་གྱི་གན་དུ་སོང་ནས། མཁན་པོ། བདག་གིས་སྟོན་པ་ཆོས་ཀྱི་སྐུའི་སྒོ་ནས་མཐོང་ན། གཟུགས་ཀྱི་སྐུའི་སྒོ་ནས་མ་མཐོང་བས་བལྟ་བར་འཚལ་ལོ། །དེ་བཞིན་དུ་གྱིས་ཤིག །དེས་དགེ་སློང་རྣམས་དང་ལྷན་ཅིག་རྒྱལ་པོའི་ཁབ་ཏུ་སོང་བ་དང༌། སྟོན་པ་འཁོར་བརྒྱ་ཕྲག་དུ་མའི་མདུན་ན་ཆོས་སྟོན་པས་གྱད་བུ་ནོར་ཐག་རིང་པོ་ནས་གཟིགས་ཏེ། ཚུར་ཤོག །འོངས་པ་ལེགས་སོ། །ཁྱོད་དུས་སུ་ཕྱིན་ཏོ། །དེས་སྟོན་པའི་ཞབས་གཉིས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་གོ །དེའི་ཚེ་དགེ་སློང་རྣམས་གནས་མལ་མི་མཐུན་པ་ཁ་ཏོན་པ་དང་སྤོང་བ་པ་ལྷན་ཅིག་འབོགས་པས་དགེ་བའི་ཕྱོགས་ཆུ་མེད་པའི་ཨུཏྤ་ལ་བཞིན་དུ་མི་འཕེལ་བ་དང༌། (༡༤༡བ)སྟོན་པས་དགོངས་པ། གྱད་བུ་ནོར་འདི་སངས་རྒྱས་འོད་སྲུངས་ཀྱི་སྤྱན་སྔར། བདག་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ལ་གནས་མལ་འབོགས་པ་རྣམས་ཀྱི་མཆོག་ཏུ་གྱུར་ཅིག་ཅེས་སྨོན་ལམ་བཏབ་པས་འདི་གནས་མལ་འབོགས་པར་སྐོར་གཞུག་གོ་སྙམ་ནས། དགེ་སློང་དག །ཁྱེད་ཀྱིས་གྱད་བུ་ནོར་རམ་གཞན་ཡང་ཆོས་ལྔ་ལྡན་གནས་མལ་འབོགས་པར་བསྐོ་བར་བྱའོ་ཞེས་གསུངས་ནས། དེ་བསྐོས་པའི་ཚེ། དེས་ཆོས་སྒྲོག་པ་རྣམས་ལྷན་ཅིག །སྤོང་བ་པ་རྣམས་ལྷན་ཅིག་གནས་མལ་མཐུན་པར་ཕོག་པས་དགེ་བའི་ཕྱོགས་རྣམས་ཆུ་ནང་གི་པདྨ་བཞིན་དུ་འཕེལ་ལོ། །
དེ་ན་མཚན་མོ་འོངས་པ་དེ་དག་ལ་གྱད་བུ་ནོར་གྱིས་རྫུ་འཕྲུལ་གྱིས་སོར་མོ་གཅིག་ལས་འོད་སྦར་ཏེ་གནས་མལ་འབོག །མཚན་མོ་ཆེས་འཕྱི་བ་ན་འོང་བ་དེ་དག་ལ་ནི་རྫུ་འཕྲུལ་གྱིས་སོར་མོ་གཉིས་ལས་འོད་སྦར་ཏེ་གནས་མལ་འབོག་གོ །གྱད་བུ་ནོར་གྱི་རྫུ་འཕྲུལ་བལྟ་འདོད་ནས་ཆེད་དུ་བསམས་ཏེ་མཚན་མོ་འོང་བ་དེ་དག་ལ་རྫུ་འཕྲུལ་གྱིས་སོར་མོ་ལྔ་ཆར་ལས་འོད་སྤར་ཏེ་གནས་མལ་འབོག་གོ །དེ་དག་འདི་སྙམ་དུ། སྟོན་པ་དང་འདྲ་བའི་ཉན་ཐོས་ཆེན་པོ་འདི་ལྟ་བུས་གནས་མལ་ཕོག་པ་ལ་གློས་ཕབ་སྟེ་གཉིད་ལོག་པ་ནི་ཚུལ་དང་མི་མཐུན་གྱིས། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པར་བྱའོ་སྙམ་ནས་བརྩོན་པར་བྱས་པས། མ་ཐོབ་པ་ཐོབ་ཅིང༌། ཐོབ་པ་ལས་མི་ཉམས་པར་གྱུར་ཏོ། །སྟོན་པས། ངའི་ཉན་ཐོས་གནས་མལ་འབོགས་པ་རྣམས་ཀྱི་ནང་ན་གྱད་བུ་ནོར་འདི་མཆོག་ཡིན་ནོ། །
སྟོན་པའི་བསྟན་པ་རྒྱས་པའི་ཚེ་བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱི་ཁྱིམ་དུ་དགེ་འདུན་གྱི་ཟས་བཤམས་པ་ན་དྲུག་སྡེ་དག་ཟས་བསོད་པ་ཡོད་པ་དེར་སོང་སྟེ་སྤྱོད་ལ། ཁྱེད་འབའ་ཞིག་ཉིན་རེ་ཞིང་བྱོན་ན་ཅིའི་ཕྱིར་དགེ་སློང་གནས་བརྟན་དེ་དག་མི་འབྱོན། དྲུག་སྡེས་སྨྲས་པ། དེ་དག་ཟས་འདི་ལྟ་བུ་ལ་མི་སྤྱོད་དོ། །འོ་ན་ཇི་ལྟ་བུ་ལ་སྤྱོད། བསོད་པ་དག་ལའོ། །སྟོན་པས་བདག་ཅག་བསོད་པ་སྦྱིན་པ་རྣམས་ཀྱི་མཆོག་ཏུ་ལུང་བསྟན་ན་ཅིའི་ཕྱིར་དེ་སྐད་གསུང༌། སྟོན་པས་རིགས་བཞི་གསུངས་ན། ཁྱེད་ཅག་ཆོས་འདུལ་བ་ལ་རབ་ཏུ་བྱུང་ནས་ཅིའི་ཕྱིར་བྱུང་རྒྱལ་དུ་སྨྲ། བཞུད་ལ་སླར་མ་འབྱོན་ཅིག །དེ་དག་སྤོབས་པ་མེད་ནས་ཅང་མི་སྨྲ་བར་སོང་ངོ༌། །དེ་གཅིག་ནས་གཅིག་ཏུ་བརྒྱུད་དེ་གསོལ་བས། དགེ་སློང་དག །ཁྱེད་ཀྱིས་གྱད་བུ་ནོར་རམ། གཞན་ཡང་ཆོས་ལྔ་ལྡན་ཟས་ལ་བསྐོ་བར་བྱའོ་ཞེས་གསུངས་ནས་བསྐོས་པ་ན། དེས་དགེ་འདུན་ལ་ཟས་རྣམ་པ་གསུམ་བཤམས་ཏེ། བསོད་པ་དང༌། འབྲིང་དང༌། ངན་པའོ། །དགེ་སློང་གློ་བུར་དུ་ལྷགས་པ་དེ་དག་ལ་ཉི་མ་དང་པོ་ལས་ཟས་བསོད་པ་དག་ཏུ། གཉིས་པ་ལ་འབྲིང་དུ། (༡༤༢ན)གསུམ་པ་ལ་ངན་པར་སྐོ། བཞི་པ་ལ་དེ་དག་རང་གི་སྤྱོད་ཡུལ་ཤེས་པས་བསོད་སྙོམས་ལ་འཇུག་གོ །གྱད་བུ་ནོར་དང༌། མཛའ་བོ་དང་ས་ལས་སྐྱེས་གཉིས་ཚེ་རབས་སུ་ཁོན་ཡོད་པས། དེ་གཉིས་ལྷོའི་རི་བོ་དག་ཏུ་ལྗོངས་རྒྱུ་ཞིང་རྒྱལ་པོའི་ཁབ་ཏུ་ཕྱིན་ནས། དགེ་འདུན་གྱི་གནས་ལམ་འབོག་པར་བསྐོས་པ་སུ་ཡིན། གྱད་བུ་ནོར་རོ། །དེ་གཉིས་ཀྱིས་གྱད་བུ་ནོར་ལ། ཁོ་བོ་ཅག་གཉིས་ཀྱི་གནས་མལ་ཕོག་ཅིག །
དེའི་ཚེ་མལ་ཆ་བཟང་པོ་དག་གནས་བརྟན་རྣམས་ལ་ཕོག་ཟིན་པས་ལྷག་མ་ངན་པ་ལུས། གཙུག་ལག་ཁང་གི་ཉེ་འཁོར་དག་གནས་བརྟན་རྣམས་ལ་བསྐོས་ཟིན་པས་མཐའི་གནས་ཁང་ངན་པ་འབའ་ཞིག་ལུས་ནས། དེས་དེ་གཉིས་ལ་མལ་ཆ་ངན་པ་ཕོག་ཅིང་གནས་ཁང་མཐའ་ཞིག་ཏུ་བསྐོས་སོ། །དེ་གཉིས་ཀྱིས། དགེ་འདུན་གྱི་ཟས་ལ་བསྐོ་བ་སུ་ཡིན། བདག་གྱད་བུ་ནོར་རོ། །ཁོ་བོ་ཅག་གཉིས་ཀྱི་ཟས་སྐོས་ཤིག །དེས་ཉི་མ་དང་པོ་ལ་དེ་གཉིས་ཟས་བསོད་པ་དག་ཏུ་བསྐོས་པ་དང༌། ཁྱིམ་བདག་དད་པ་དག་གིས། སང་བདག་ཅག་གི་འདིར་མགྲོན་སུ་འོང༌། མཛའ་བོ་དང་ས་ལས་སྐྱེས་གཉིས་སོ། །དེ་དག་གིས་བསམས་པ། དེ་གཉིས་ནི་གནས་ངན་ལེན་ཀུན་ཏུ་སྤྱོད་པ་ཡིན་པས་སུ་ཞིག་དེ་གཉིས་ལ་གུས་པར་འགྱུར། ཅི་ཡང་རུང་བ་ཟོས་ཤིང་འགྲོ་བར་གྱུར་ཅིག་སྙམ་ནས། དེ་གཉིས་ལ་ཟས་ངན་པ་བྱིན་ཏོ། །ཉི་མ་གཉིས་པ་ལ་འབྲིང་དུ་བསྐོས་པ་དང༌། དེ་དག་གིས་ཀྱང་ཟས་ངན་པ་བྱིན་ཏོ། །ཉི་མ་གསུམ་པ་ལ་དེ་གཉིས་རང་བཞིན་གྱིས་ཟས་ངན་པར་བསྐོས་སོ། །དེ་ནས་དེ་གཉིས་འདི་སྙམ་དུ། ཀྱེ་མ་སྡུག་བསྔལ་ངོ༌། །མི་བཟད་དོ། །གྱད་བུ་ནོར་གྱིས་བསམས་བཞིན་དུ་བདག་ཅག་གཉིས་ལན་གསུམ་གྱི་བར་དུ་གང་ཟོས་ན་སྡུད་པར་འགྱུར་བའི་ཟས་ངན་པ་ཡིད་དུ་མི་འོང་བས་མཐོ་བཙམས་ཀྱིས་འདི་ལ་གནོད་པ་ཞིག་བྱའོ་སྙམ་ནས། དེའི་ཚེ་དེ་གཉིས་ཀྱི་སྲིང་མོ་དགེ་སློང་མ་མཛའ་མོ་ཞེས་བྱ་བ་རྒྱལ་པོའི་ཁབ་ན་དགེ་སློང་མའི་དབྱར་ཁང་ན་འདུག་པ་དེ་དེ་གཉིས་ཀྱི་གན་དུ་སོང་ནས་ཕྱག་བཙལ་ཏེ་མཐའ་ཞིག་ཏུ་འདུག་པ་དང༌། དེ་གཉིས་དེ་ལ་ལྟ་བར་མི་བྱེད་དོ། །དེས། ཁྱེད་གཉིས་ཅིའི་ཕྱིར་བདག་ལ་མི་ལྟ། གྱད་བུ་ནོར་གྱིས་ལན་གསུམ་དུ་མཐོ་བཙམས་ན་དེ་ཁྱོད་ཀྱིས་ཡལ་བར་འདོར་རམ། འོ་ན་བདག་གིས་ཅི་བགྱི། སྲིང་མོ། ཁྱོད་སྟོན་པའི་དྲུང་དུ་སོང་ལ། འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པ་སྤྱད་དེ་ཕམ་པར་གྱུར་པ་དེ་ནི་མི་མཛེས་ཤིང་ཚུལ་དང་མཐུན་པ་མ་ལགས་སོ་ཞེས་སྨྲོས་དང༌། ཁོ་བོ་ཅག་གཉིས་ཀྱིས་ཀྱང༌། བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་པ། དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་བ་དེ་ཁོ་ན་བཞིན་དུ་བདག་ཅག་གཉིས་ཀྱིས་འཚལ་ལོ་ཞེས་(༡༤༢བ)སྨྲ་བར་བྱའོ། །
བདག་གིས་ཇི་ལྟར་དགེ་སློང་དག་པ་ལྟུང་བ་མ་མཆིས་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་བ་གདབ། དེ་སྐད་མི་ཟེར་ན་ལྟ་བ་སོགས་མི་བྱེད་དོ། །དེ་ཡུད་ཙམ་ཞིག་ཅང་མི་སྨྲ་བར་འདུག་ནས། དེ་ལྟ་ན་བདག་གིས་དེ་སྐད་བགྱིའོ། །སྲིང་མོ། ཁོ་བོ་ཅག་སྟོན་པའི་སྤྱན་སྔར་སོན་པ་ན་ཕྱི་བཞིན་ཤོག་ཅིག་ཅེས་བསྒོ་ནས་སོང་ངོ༌། །དེའི་ཕྱི་བཞིན་མཛའ་མོ་ཡང་ཕྱིན་ནས། སྟོན་པ་ལ། གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་ལགས་སོ། །དེ་གཉིས་ཀྱང༌། དེ་བཞིན་ཏེ། སྲིང་མོས་ཇི་སྐད་གསོལ་བ་དེ་བཞིན་ནོ། །སྟོན་པས། གྱད་བུ་ནོར། ཁྱོད་ཀྱིས་ཐོས་སམ། ཐོས་སོ། །དེ་ལ་ཁྱོད་ཇི་སྙམ་དུ་སེམས། སྟོན་པས་བདག་ལ་ཇི་ལྟར་མཁྱེན་པ་ལགས་སོ། །གྱད་བུ་ནོར། ཁྱོད་ཟེར་བ་དེ་ནི་དུས་མ་ཡིན་གྱི། དྲན་ནའང་དྲན་ཞེས་བརྗོད། མི་དྲན་ནའང་མི་དྲན་ཞེས་རྗོད་ཅིག །མི་དྲན་ནོ། །དེའི་ཚེ་སྒྲ་གཅན་ཟིན་སྟོན་པའི་གནམ་ལོགས་ན་བསིལ་ཡབ་གཡོབ་པས་ཞུས་པ། དེ་དག་དེ་སྐད་གསོལ་བ་ལ་གྱད་བུ་ནོར་ལ་རྨ་ཅི་འཚལ། སྒྲ་གཅན་ཟིན། ཁྱོད་ཉིད་ལ་དྲི་ཡིས་ཇི་ལྟར་བཟོད་པ་བཞིན་དུ་ལན་ཐོབ་ཅིག །ཁྱོད་ལ་དེ་སྐད་ཟེར་ནས་རྨས་ན་ཁྱོད་ལན་ཇི་སྐད་འདེབས། བདག་དྲན་ནའང་དྲན། མི་དྲན་ནའང་མི་དྲན་ཞེས་གསོལ་ལོ། །མི་གཏི་མུག་ཅན་ཁྱོད་ཀྱིས་དོན་དེ་འཐོབ་ན། གྱད་བུ་ནོར་དག་པ་ལྟུང་བ་མེད་པས་ཅིའི་ཕྱིར་དེ་སྐད་མི་འཐོབ། དགེ་སློང་དག །ཁྱེད་ཀྱིས་གྱད་བུ་ནོར་ནི་དྲན་པ་དང་ལྡན་པར་ཟུང་ཞིག །མཛའ་མོ་ནི་རང་གིས་ཁས་བླངས་པས་བསྙིལ་ཅིག་མཛའ་བོ་དང་ས་ལས་སྐྱེས་གཉིས་ལ། ཅི་ཞིག་ཇི་ལྟར་གང་དུ་མཐོང༌། ཁྱེད་གཉིས་དོན་ཅི་ལ་སོན་པས་མཐོང་ལེགས་པར་གླེངས་ཤིག་ཅེས་གསུངས་ནས་སྟོན་པ་གདན་ལས་བཞེངས་ཏེ་ནང་དུ་ཡང་དག་འཇོག་གི་སླད་དུ་གཤེགས་སོ། །
དགེ་སློང་དེ་དག་གིས་ལེགས་པར་དྲིས་པས། གྱད་བུ་ནོར་ལ་ཕམ་པ་མ་བྱུང་སྟེ། དེས་བདག་ཅག་གཉིས་ལ་ལན་གསུམ་དུ་མཐོ་བཙམས་པས་སྨྲས་པར་ཟད་དོ། །དེ་གསོལ་བས། དགེ་སློང་དག །མི་གཏི་མུག་ཅན་དེ་གཉིས་ཀྱིས་ཅིའི་ཕྱིར་ཟང་ཟིང་ཅུང་ཟད་ཙམ་གྱི་ཕྱིར་ཤེས་བཞིན་དུ་བརྫུན་གྱི་ཚིག་སྨྲས་པར་གྱུར། ལུས་ཅན་བརྫུན་དུ་སྨྲ་བ་ཡིས། །ཆོས་གཅིག་ལས་ནི་འདས་གྱུར་ཅིང་། །འཇིག་རྟེན་ཕ་རོལ་དྲལ་བ་ཡིས། །འདི་ལ་སྡིག་པ་མི་བྱ་མེད། །ལྕགས་གོང་མེ་ལྕེ་འདྲ་བ་དག །ཟོས་པར་གྱུར་པ་མཆོག་ཡིན་གྱི། །ཚུལ་འཆལ་ཡང་དག་མི་སྡོམ་པས། །ཡུལ་འཁོར་བསོད་སྙོམས་ཟ་བ་མིན། །ཞེས་དང་། ལྷས་ཀྱང་། འཇིག་རྟེན་དག་ན་འཁོར་བ་ལ། །བློ་ལྡན་སུ་ཞིག་དགའ་བར་བྱེད། །(༡༤༣ན)སྲིད་གསུམ་གྲོལ་བའི་ནོར་གྱིས་ཀྱང་། །སྐུར་བ་ཐོབ་པར་གྱུར་ཕྱིར་རོ། །དེ་ནས་སྟོན་པས། བྱུང་བ་འདི་དང་སོགས་སྔར་བཞིན། མཛའ་བོ་དང་ས་ལས་སྐྱེས་གཉིས་ལ། མི་གཏི་མུག་ཅན་ཁྱེད་གཉིས་ཀྱིས་དགེ་སློང་དག་པ་ལྟུང་བ་མེད་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱི་སྐུར་བ་བཏབ་པ་བདེན་ནམ། བཙུན་པ། མད་དོ། །དགེ་སྦྱོང་གི་ཚུལ་མ་ཡིན་པ་ཞེས་སོགས་རྣམ་གྲངས་དུ་མས་སྨད་ནས། གང་ཟག་གསུམ་ནི་མ་སྤངས་ན་དམྱལ་བར་འགྲོ་བ་སྟེ། རང་འདོད་པ་བསྟེན་པ་སྡིག་པ་བྱེད་པ་དང༌། རང་ཉིད་ཚུལ་ཁྲིམས་འཆལ་ཞིང་གཞན་ལ་ཚུལ་ཁྲིམས་ཀྱི་དབང་དུ་བྱས་ཏེ་སྨྲ་བ་དང་། རང་ཉིད་མི་ཚངས་པར་སྤྱོད་ཅིང་གཞན་ལ་གཞི་མེད་པར་མི་ཚངས་པར་སྤྱོད་པས་སྐུར་བ་འདེབས་པའོ། །ཚིག་གི་ཉེས་སྨྲས་རྗོད་བྱེད་ན། །སྐྱེས་བུ་སྐྱེས་པའི་ཁ་ནས་ནི། །སྟ་རེ་སྐྱེ་ཞིང་དེ་ཡིས་ནི། །བདག་ཉིད་གཅོག་པར་བྱེད་པར་འགྱུར། །ཞེས་པ་ནས། འཕགས་པས་སྨད་པ་མ་ཡིན་སྡིག་བརྟེན་ནས། །བྱེ་བ་བརྒྱ་ཕྲག་སྟོང་དང་དུང་ཕྱུར་ཕྲག །སུམ་ཅུ་དྲུག་དང་ལྔ་པོ་ཇི་སྙེད་པར། །སེམས་ཅན་དམྱལ་བ་རྣམས་སུ་འགྲོ་བར་འགྱུར། །དེ་བས་ན་ཕན་ཡོན་བཅུ་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་ནས། ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་དག་པ་ལྟུང་བ་མེད་པ་ལ་གཞི་མེད་པས་ཕམ་པར་གྱུར་པའི་ཆོས་ཀྱིས་སྐུར་བ་ལས་དེ་དུས་གཞན་ཞིག་ན་དྲིས་ཀྱང་རུང༌། མ་དྲིས་ཀྱང་རུང༌། རྩོད་པ་དེ་ཡང་གཞི་མེད་པ་ཡིན་ལ། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན་དགེ་འདུན་ལྷག་མའོ། །
དགེ་སློང་རྣམས་ཐེ་ཚོམ་སྐྱེས་ནས་ཞུ་པས། གྱད་བུ་ནོར་གྱིས་ལས་ཅི་བགྱིས་པས་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང༌། རབ་ཏུ་བྱུང་ནས་དགྲ་བཅོམ་པ་མངོན་སུམ་དུ་བྱས། ལས་ཅི་བགྱིས་ན་དགྲ་བཅོམ་ཐོབ་ཀྱང་ཡང་དག་པ་མ་ཡིན་པས་སྐུར་བར་གྱུར། ལས་ཅི་བགྱིས་པས་གནས་མལ་འབོག་པ་རྣམས་ཀྱིས་མཆོག་ཏུ་ལུང་བསྟན། སྔོན་རི་བྲགས་ཤིག་ན་དེད་དཔོན་རྒྱལ་ཆེན་ཅན་ཞེས་བྱ་བ་ཟོང་ཐོགས་ཏེ་དོན་མཐུན་དང་ལྷན་ཅིག་རྒྱ་མཚོ་ཆེན་པོར་འཕགས་སོ། །རང་སངས་རྒྱས་ཤིག་དེད་དཔོན་དེ་དང་ལྷན་ཅིག་ལྗོངས་རྒྱུར་འཕགས་ནས་དེ་མཚན་མོ་མེའི་ཁམས་ལ་སྙོམས་པར་ཞུགས་སོ། །དེ་མེལ་ཚེ་བས་མཐོང་ནས་དེད་དཔོན་ལ་སྨྲས་པ། རབ་ཏུ་བྱུང་བ་འདི་བརྟུལ་ཞུགས་གྲུབ་པ་བདག་ཉིད་ཆེན་པོ་ལགས་ཏེ། བདག་གིས་མཚན་མོ་ཞུགས་ཀྱི་ཕུང་པོ་ལྟར་འབར་(༡༤༣བ)བ་མཐོང་ངོ༌། །དེད་དཔོན་དེ་དགའ་བ་སྐྱེས་ནས་དེའི་གན་དུ་སོང་སྟེ། ཁྱོད་ནི་བསོད་སྙོམས་བཞེད་པ་ལགས་ལ། བདག་ཀྱང་བསོད་ནམས་འཚལ་བ་ལགས་པས་བདག་གི་བསོད་སྙོམས་གསོལ་ཞིང་གཤེགས་སུ་གསོལ། དེས་དང་དུ་བླངས་ཏེ་མཐར་གྱིས་རྒྱ་མཚོ་ཆེན་པོའི་འགྲམ་དུ་ཕྱིན་ནས། རང་སངས་རྒྱས་དེ་ལ། འཕགས་པ། བདག་ནི་རྒྱ་མཚོ་ཆེན་པོར་འཇུག་ན་འཕགས་པ་འཇུག་གམ། དེས་སྨྲས་པ། ཁྱོད་ནི་ཕ་མ་ལ་སོགས་པ་འི་དོན་དུ་འཇུག་གི །ཁོ་བོ་ནི་ཁྱིམ་གྱི་ལས་ཀྱི་མཐའ་སྤངས་པ། སྲིད་པ་དང་ལོངས་སྤྱོད་ལ་མི་ཕྱོགས་པ་གཅིག་པུ་ཡིན་པས་མི་འཇུག་གོ །དེད་དཔོན་གྱིས་བསམས་པ། བདག་གིས་འདི་ལ་བསོད་སྙོམས་ཕུལ་ན། གོས་མ་བསྐོན་གྱིས། རས་ཡུག་ཆེན་བསྐོན་པར་བྱའོ་སྙམ་ནས་ཟས་བསོད་པས་ཚིམ་པར་བྱས་ཏེ་ཆེན་པོ་ལ་འོས་པའི་རས་ཡུག་ཆེན་བསྐོན་ནོ། །དེ་ནས་རང་སངས་རྒྱས་དེས་དེ་ལ་སྙིང་བརྩེ་བས་སྟེང་གི་ནམ་མཁའ་ལ་འཕགས་ནས་ཆོ་འཕྲུལ་བསྟན་ཏོ། །
སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས། དེད་དཔོན་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པའི་དྲུང་དུ་འགྱེལ་ནས། དགེ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག །འདི་བས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཡོན་ཏན་གྱི་རྣམ་པ་འདི་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་པས་དེ་ལྟར་གྱུར་ཏོ། །དེས་དགྲ་བཅོམ་པ་ཐོབ་ཀྱང་ཡང་དག་པ་མ་ཡིན་པས་སྐུར་བར་གྱུར་པ་དེ་ཉོན་ཅིག །སྔོན་རི་བྲགས་ཤིག་ན་ཁྱིམ་བདག་ཕྱུག་པོ་ཞིག་གིས་ཆུང་མ་བླངས་ནས་དགའ་མགུར་སྤྱད་ཀྱང་བུ་མེད་པས། བདག་ཤི་ནས་བུ་མེད་པས་ཐམས་ཅད་རྒྱལ་པོས་དབང་དུ་བྱས་པར་འགྱུར་རོ་སྙམ་སྟེ་སེམས་ཁོང་དུ་ཆུད་ཅིང་འདུག་པ་དང༌། ཆུང་མས་མཐོང་ནས། ཅིའི་ཕྱིར་སེམས་ཁོང་དུ་ཆུད། སྔར་ལྟར་ཟེར་བས། ཆུང་མས་བསམས་པ། བདག་ཅག་གཉིས་སུ་ལ་སྐལ་བ་མེད་ཀྱང༌། འདི་ནི་བདག་ལ་སྐྱོན་འདོགས་ཤིང་ཆུང་མ་གཞན་ལེན་པར་འདོད་པས་དེ་སྐད་ཟེར་ཞིང་སེམས་ཁོང་དུ་ཆུད་འདུག་པས། རང་ཉིད་ཐར་པར་བྱའོ་སྙམ་ནས་སྨྲས་པ། རྗེའི་སྲས། བདག་ལ་སྐལ་བ་མེད་པས་ཁྱོད་ལ་སྲས་མ་མངའ་ན། ཆུང་མ་གཞན་ལོངས་དང་ཁྱོད་ལ་བུ་མཆིས་པར་འགྱུར་རོ། །བཟང་མོ། ཁྱོད་ཀྱིས། གང་ན་ཆུང་མ་གཉིས་ཡོད་པ་དེའི་ཁྱིམ་ན་རྟག་ཏུ་འཐབ་ཅིང༌། རང་གི་ལས་སྒྲུབ་པ་ལྷུར་ལེན་པར་ཡང་མི་འགྱུར་རོ་ཞེས་པ་མ་ཐོས་སམ། བཞེས་དང༌། བདག་གིས་ཕུ་ནུ་མོའམ་བུ་ལྟར་བསྐྱང་ངོ༌། །
དེས་གཞན་ཞིག་བླངས་པ་དང༌། དེའི་ཆུང་མ་སྔ་མ་དེ་ཕྲག་དོག་གིས་མངལ་དག་ནས་དེའི་མངལ་དུ་སེམས་ཅན་ཞུགས་པ་(༡༤༤ན)དང་དེ་དགའ་ནས་ཁྱིམ་ཐབ་ལ་སྨྲས་པ། བདག་ལ་སེམས་ཅན་ཞུགས་ཀྱིས་དགྱེས་པ་སྐྱེད་ཅིག །བཟང་མོ། ལེགས་ཏེ་ཁྱེའུ་སྐྱེས་ན་ཁོ་བོ་ཤི་ནས་ཁྱིམ་གྱི་བདག་པོར་འགྱུར་རོ། །རྗེའི་སྲས། ཁྱད་ཀྱི་བག་གསར་གྱིས་མངལ་མ་བླུགས་ན་ཁྱེའུར་སྐྱེ་བར་འགྱུར་རོ། །དེ་ལ་ཁྱེའུ་ཞིག་བཙས་ནས་ཆེན་པོར་གྱུར་པའི་ཚེ་ཚིག་ཐམས་ཅད་བདེན་པར་སྨྲ་ཞིང་བརྫུན་མི་སྨྲ་བས་བདེན་སྨྲ་ཞེས་གྲགས་ཤིང་ཁ་ནས་ཨུཏྤ་ལ་སྔོན་པོའི་དྲི་འབྱུང་ངོ༌། །དེའི་མ་ཕྲག་དོག་གི་ཀུན་ནས་དཀྲིས་པས། མ་ཡར་མོ་སུན་འབྱིན་གྱིས། ཆེ་བཞི་གྱིས་ཤིག །ཡུམ། ཡང་དག་པས་སམ། ཡང་དག་པ་མ་ཡིན་པས། བུ། ཡང་དག་པ་མ་ཡིན་པས་སོ། །བདག་འཇིག་རྟེན་ན་བདེན་སྨྲ་ཞེས་གྲགས་ན་ཇི་ལྟར་བརྫུན་སྨྲ། བུ། ཁོ་མོས་ཟླ་བ་དགུར་ལྟོ་ན་བསྲེལ་ན་དེ་ཙམ་ཡང་སྨྲ་མི་ནུས་ཏེ། དེ་ལྟ་ན་ཁྱོད་ཚིག་ཏུ་མ་སྨྲ་བར་ཁྱོད་ལ་ཕས་དྲིས་པའི་ཚེ་ན་ཁྱོད་ཀྱིས་མགོ་ལྕོགས་ཅིག །དེས། མའི་ཚིག་ཚིག་མ་ཡིན་པར་བྱར་མི་རུང་ངོ་སྙམ་ནས། ཡུམ། དེ་ལྟ་ན་མ་ནོངས་ཀྱིས་མགོ་ལྕོག་པར་བགྱིའོ། །དེས་ཁྱིམ་བདག་གི་གན་དུ་སོང་ནས། རྗེའི་སྲས། ཁྱོད་ཀྱི་བག་གསར་གྱིས་སྐྱེས་པ་གཞན་དང་ལྷན་ཅིག་དགའ་མགུར་སྤྱད་དོ། །སྡིག་ཅན་མ། ཁྱོད་ཀྱིས་བཙམས་སོ། །ཁྱོད་བདེན་སྨྲ་ལའང་ཐུགས་མི་ཆེས་སམ། ཡིད་ཆེས་ཏེ། དེ་འཇིག་རྟེན་ཐམས་ཅད་ལ་བདེན་སྨྲ་ཡིན་ན་ཁོ་བོ་ལ་ཇི་ལྟར་བརྫུན་དུ་སྨྲ། རྗེའི་སྲས། དེ་ལྟ་ན་དེ་རྩེ་ཞིང་མཆིས་ཀྱིས་བོས་ཤིག །ཁྱིམ་བདག་དེས་བུ་བོས་ནས་པང་བར་བཞག་སྟེ་སྨྲས་པ། ཁྱོད་ཀྱི་མ་ཡར་འདིས་སྐྱེས་པ་གཞན་དང་ལྷན་ཅིག་དགའ་མགུར་སྤྱད་པ་བདེན་ནམ། བུད་མེད་ནི་མ་བསླབས་པར་མཁས་པ་ཡིན་པས་དེའི་ལག་པས་བཀག་ནས་སྨྲས་པ། བུ། དེ་ཁྱོད་ཀྱི་མ་དང་འདྲ་བ་ཡིན་གྱིས་ཚིག་ཏུ་མ་སྨྲ་ཞིག །བདེན་པ་ཡོད་ན་མགོ་ལྕོགས་ཤིག །ཁྱེའུ་དེས་མགོ་ལྕོགས་པས་ཁྱེའུ་དེའི་ཁ་ནས་དྲི་ང་བ་བྱུང་ཞིང་བརྫུན་སྨྲ་ཞེས་གྲགས་སོ། །ཁྱིམ་བདག་དེས་ཆུང་མ་ལ་སྨྲས་པ། ཁྱོད་ཉེས་པར་སྤྱོད་པ་ཡིན་གྱིས་ཁོ་བོའི་ཁྱིམ་དུ་མ་འདུག་ཅིག །དེ་ཁྱིམ་ནས་བསྐྲད་ནས་མིང་པོ་གཉིས་ཀྱི་ཁྱིམ་དུ་སོང་ངོ༌། །སྲིང་མོ། ཁྱོད་ཅིའི་ཕྱིར་འདིར་འོངས། བདག་ཁྱིམ་བདག་གིས་བསྐྲད་དོ། །ཅིའི་ཕྱིར། ཉེས་པར་སྤྱད་ཟེར་རོ། །འོ་ན་ཁྱོད་འདིར་མ་འདུག་ཅིག །ཁོ་མོས་ཉེས་པར་མ་སྤྱད་དེ། བདེན་སྨྲ་མས་བསླུས་པས་ཡང་དག་པ་མ་ཡིན་པས་སྐུར་ཏེ་དེ་ནི་བདེན་སྨྲ་མ་ཡིན་གྱི་བརྫུན་སྨྲ་ཡིན་ནོ། །
དེ་ཇི་ལྟར་ཤེས། ཁྱེད་གཉིས་ཡིད་མི་ཆེས་ན་ཁྱིམ་མཚེས་ལ་དྲིས་ཤིག །(༡༤༤བ)དྲིས་པས། དེ་ནི་བདེན་སྨྲ་མ་ཡིན་གྱི་བརྫུན་སྨྲ་ཡིན་ནོ་ཞེས་ཟེར་རོ། །དེའི་ཚེ་རང་སངས་རྒྱས་ཤིག་ལ་བུད་མེད་དེས་བསོད་སྙོམས་ཕུལ་ནས། བདེན་སྨྲ་འདིས་བདག་ལ་སྐུར་བ་བཏབ་པས། བདག་འདིའི་སྐྱེ་བ་ནམ་སྐྱེ་བར་དགྲ་བཅོམ་གྱི་བར་དུ་ཡང་དག་པ་མ་ཡིན་པས་སྐུར་བ་འདེབས་པར་གྱུར་ཅིག །མིང་པོ་གཉིས་ཀྱིས་དྲིས་པ། སྲིང་མོ། ཁྱོད་ཀྱིས་སྨོན་ལམ་ཅི་བཏབ། འདི་ལྟ་བུ་ཞིག་གོ །དེ་གཉིས་ཀྱིས་དྲིས་པ། དེ་ལྟ་ན་ཁོ་བོ་ཅག་གཉིས་ཀྱང་ཁྱོད་ཀྱི་མིང་པོ་ཡིན་པས་ཆེ་བཞི་དབྱེ་བར་བྱའོ། །དེའི་དུས་ཀྱི་བདེན་སྨྲ་དེ་ནི་གྱད་བུ་ནོར་ཡིན་ནོ། །དེའི་མ་ཡར་མོ་དེ་ནི་མཛའ་མོ་འདི་ཡིན་ནོ། །དེའི་མིང་པོ་གཉིས་པོ་དེ་ནི་མཛའ་བོ་དང༌། ས་ལས་སྐྱེས་ཡིན་ནོ། །དེས་མ་ཡར་མོ་ལ་ཡང་དག་པ་མ་ཡིན་པས་སྐུར་བ་བཏབ་པས་ལོ་བརྒྱ་སྟོང་མང་པོར་དམྱལ་བར་སྐྱེས་ནས། ལས་ཀྱི་ལྷག་མས་ཚེ་རབས་ལྔ་བརྒྱ་དེ་ལ་འདིར་སྐུར་བ་བཏབ་ཅིང༌། དེ་གཉིས་ཀྱིས་ཀྱང་ཆེ་བཞི་ཕྱེའོ། །ད་ལྟ་དགྲ་བཅོམ་པ་ཐོབ་ཀྱང་མཛའ་མོས་སྐུར་བ་བཏབ་ཅིང༌། འདི་གཉིས་ཀྱིས་ཆེ་བཞི་ཕྱེའོ། །གནས་མལ་འབོགས་པའི་མཆོག་ཏུ་ལུང་བསྟན་པ་ནི། སྔར་འོད་སྲུངས་ཀྱི་བསྟན་པ་ལ་སྨོན་ལམ་བཏབ་པས་སོ། །
བག་ཙམ་གྱི་དགེ་འདུན་ལྷག་མ་ནི། སྟོན་པ་རྒྱལ་པོའི་ཁབ་ནའོ། །གྱད་བུ་ནོར་བྱ་རྒོད་ཕུང་པོའི་རི་ལ་འདུག་སྟེ། དེ་དང་ཧ་ཅང་མི་རིང་བ་ན་རྫིང་བུ་རྡོ་རྩིག་ཅན་ཞེས་བྱ་བའི་འགྲམ་ན་ཉིན་མོ་གནས་སོ། །ཨུཏྤ་ལའི་མདོག་མོའུ་གལ་གྱི་བུ་ཆེན་པོ་ལ་བརྟེན་ནས་རབ་ཏུ་བྱུང་ཞིང་དགྲ་བཅོམ་ཐོབ་པའི་ཚེ་ཤེས་ནས་དད་པ་དང་ལྡན་པས་སྟོན་པ་དང་དགེ་སློང་གནས་བརྟན་རྣམས་ལ་ཡང་དང་ཡང་དུ་བལྟ་བའི་ཕྱིར་འགྲོ་ཞིང༌། ལྷག་པར་དུ་གྱད་བུ་ནོར་འདི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པར་གྱུར་ཀྱང་བསམ་གཏན་གྱི་བདེ་བ་སྤངས་ནས་དགེ་འདུན་གྱི་ཆོས་དང་ལྡན་པའི་ཞལ་ཏ་ལ་བརྩོན་པ་ནི་དཀའ་བ་བྱེད་པ་ཡིན་ནོ་སྙམ་སྟེ་གྱད་བུ་ནོར་གྱི་གན་དུ་སོང་ནས་ཕྱག་བཙལ་ཏེ་ཆོས་ཉན་པའི་ཕྱིར་མདུན་དུ་འདུག་གོ །དེའི་ཚེ་མཛའ་བོ་དང་ས་ལས་སྐྱེས་གཉིས་ཕྱག་དར་ཁྲོད་ཅིག་རྙེད་ཅིང༌། དེ་གཉིས་གྱད་བུ་ནོར་དང་ཚེ་རབས་སུ་ཁོན་བྱུང་སྟེ་རྟག་ཏུ་གླན་ཀ་འཚོལ་བ་ལ་བརྩོན་པ་ཡིན་པས་མཛའ་བོས་ས་ལས་སྐྱེས་ལ། ཕྱག་དར་ཁྲོད་འདི་གང་དུ་འཁྲུ། རྫིང་བུ་རྡོ་རྩིག་ཅན་དུའོ། །དེ་གཉིས་ཀྱིས་རྫིང་བུ་རྡོ་རྩིག་ཅན་དུ་ཕྱག་དར་ཁྲོད་འཁྲུར་བཅུག་ནས་ཉི་མ་ལ་བཏིང་བ་དང༌། རི་དྭགས་ཁྱུ་ཞིག་བྱུང་ནས་ཆུ་འཐུངས། རི་དྭགས་ཤིག་གིས་རི་དྭགས་མོ་ཞིག་གི་རྒྱབ་ཏུ་བརྒལ་ནས་མི་ཚངས་པར་སྤྱད་པ་མཛའ་བོས་མཐོང་ནས་ས་ལས་སྐྱེས་ལ། གྱད་བུ་ནོར་ཨུཏྤ་ལའི་མདོག་ལ་མི་ཚངས་པར་སྤྱོད་ཀྱི། སོང་ལ་དགེ་སློང་རྣམས་ལ་བརྗོད་པར་བྱའོ། །ས་ལས་སྐྱེས་ན་རེ། (༡༤༥ན)དེའི་ཚེའང་གནས་ནས་དབྱུང་བའི་ལས་བྱས་ན་ད་ཡང་བྱེད་དུ་འཇུག་གམ། ས་ལས་སྐྱེས། དེའི་ཚེ་ན་ཡང་དག་པ་མ་ཡིན་པས་ཡིན་གྱི། ད་ནི་བག་ཙམ་ལས་བསམས་པ་ཡོད་དེ། གྱད་བུ་ནོར་དང༌། ཨུཏྤ་ལའི་མདོག་དང༌། མི་ཚངས་པར་སྤྱོད་པ་མ་མཐོང་ངམ། བརྫུན་དུ་སྨྲ་བ་ག་ལ་ཡོད། དེ་གཉིས་སོང་སྟེ་དགེ་སློང་རྣམས་ལ་སྨྲས་པ། བདག་ཅག་གཉིས་ཀྱིས་གྱད་བུ་ནོར་དང་ཨུཏྤ་ལའི་མདོག་དང་མི་ཚངས་པར་སྤྱོད་པ་མཐོང་ངོ་། །ཅི་ཁྱེད་གཉིས་ལྷ་དང་མི་རྣམས་བཏང་ཞིང་ངན་སོང་གསུམ་དུ་གནས་སམ། ཡང་སྐུར་བ་འདེབས་སམ། བདག་ཅག་གཉིས་ཀྱིས་མ་ཉེས་ཀྱིས། མིག་གིས་མཐོང་བས་མིག་དབྱུང་བར་བྱ་གྲང༌། སྟོན་པས། དེ་གཉིས་ལ། ཅི་ཞིག་མཐོང་། ཇི་ལྟར་མཐོང་། གང་དུ་མཐོང་། དོན་ཅི་ལ་དེར་སོན་པས་མཐོང་ཞེས་རྟོགས་ཤིག །བརྟགས་པས་སྔར་བཞིན་ཟེར་ནས། དགེ་སློང་དོན་ཉུང་ངུ་དག །ཅིའི་ཕྱིར་དགེ་སློང་དག་དགེ་སློང་དག་པ་ལྟུང་བ་མེད་པ་ལ་གཞན་གྱི་ཆ་མ་ཡིན་པ་དང་མཐུན་པ་ཕམ་པར་འགྱུར་བའི་ཆོས་ཀྱིས་སྐུར་བ་འདེབས་ཞེས་སྨོད་པའི་སྐབས་དེ་གསོལ་བས། བྱུང་བ་འདི་དང་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་པས། ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་དག་པ་ལྟུང་བ་མེད་པ་ལ་གཞན་གྱི་ཆ་མ་ཡིན་པ་དང་མཐུན་པ་ཕམ་པར་འགྱུར་བའི་ཆོས་ཀྱིས་སྐུར་བ་ལས་དེ་དུས་གཞན་ཞིག་ན་དྲིས་ཀྱང་རུང༌། མ་དྲིས་ཀྱང་རུང༌། རྩོད་པ་དེ་ཡང་གཞན་གྱི་ཆ་མ་ཡིན་པ་དང་མཐུན་པ་ཡིན་ལ། རྩོད་པ་དེ་གཞན་གྱི་ཆ་མ་ཡིན་པ་དང་མཐུན་པས་བག་ཙམ་ལས་བསམས་པ་ཙམ་གྱིས་ཆོས་འབའ་ཞིག་བླངས་པར་གྱུར་ལ། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན་དགེ་འདུན་ལྷག་མའོ། །
དགེ་འདུན་དབྱེན་གྱི་ལྷག་མ་ནི། དགེ་ཚུལ་ཞིག་ལ་སློབ་དཔོན་གྱིས་ནན་ཏུར་བྱས་པས་ངུ་ཞིང་འདུག་པ་ཉེ་དགས་མཐོང་ནས། ཅིའི་ཕྱིར་ངུ༌། མཁན་པོས་ནན་ཏུར་བགྱིས་སོ། །བུ། ཚུར་ཤོར་ཁྱོད་ལྷུང་བཟེད་སོགས་གང་གིས་ཀྱང་མི་ཕོངས་པར་བྱའོ་ཞེས་ཟེར་ནས་གནས་ཁང་དུ་ཁྲིད་པ་དང༌། དགེ་སློང་དེས། ནན་ཏུར་བྱས་ནས་ཡལ་བར་མི་འདོར་གྱི་སླར་དགུག་གོ་ཞེས་པའི་སྐབས་བཞིན་དུ་བར་མི་དགེ་སློང་མངགས་ནས་དེས་དེ་ལ་སྨྲས་པ་དང༌། མཁན་པོ་ཅི་དགོས། ཉེ་དགས་ཡོ་བྱད་ཐམས་ཅད་སྦྱར་བས་མི་འགྲོ་ཟེར་ནས་འཕྱ་བའི་སྐབས་དེ་གསོལ་བས། གཞན་གྱི་འཁོར་ཁ་འདྲེན་ན་སྦོམ་པོའོ། །སྟོན་པ་རྒྱལ་པོའི་ཁབ་ནའོ། །དེའི་ཚེ་མུ་གེ་ཉམ་(༡༤༥བ)ང་བ་བྱུང་ངོ༌། །རྫུ་འཕྲུལ་ཐོབ་པ་དེ་དག་ནི་ཤིང་འཛམ་བུའི་འབྲས་བུ་དང༌། བྱང་སྒྲ་མི་སྙན་ནས་མ་རྨོས་མ་བཏབ་པའི་འབྲས་ས་ལུའི་འབྲུ་དང༌། རྒྱལ་ཆེན་རིས་བཞི་དང་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སོང་སྟེ། ལྷའི་བདུད་རྩིས་ལྷུང་བཟེད་བཀང་སྟེ་ཁྱེར་ནས་རང་ཡང་ལོངས་སྤྱོད། ལྷག་མ་དགེ་སློང་དག་ལའང་བགོ་བཤའ་བྱེད་དོ། །ཡུལ་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ་དེ་དག་ཏུའང་སོང་སྟེ། བཅའ་བ་དང་བཟའ་བ་གཙང་བ་བསོད་པས་ལྷུང་བཟེད་བཀང་སྟེ་ཁྱེར་ནས། རང་ཡང་ཟ། ལྷག་མ་དགེ་སློང་དག་ལའང་བགོ་བཤའ་བྱེད་དོ། །
དེ་ནས་ལྷས་བྱིན་གྱིས་བསམས་པ། བདག་གིས་ཀྱང་རྫུ་འཕྲུལ་ཐོབ་ན་དེ་ལྟར་བྱའོ་སྙམ་ནས་སྟོན་པའི་དྲུང་དུ་སོང་སྟེ། བདག་ལ་རྫུ་འཕྲུལ་གྱི་ལམ་བསྟན་དུ་གསོལ། སྟོན་པས་ལྷས་བྱིན་ལ་སྡིག་པ་ཅན་གྱི་འདོད་པ་དེ་ལྟ་བུ་བྱུང་བར་ཐུགས་སུ་ཆུད་ནས། ཁྱོད་ཀྱིས་ལྷག་པའི་ཚུལ་ཁྲིམས་དང༌། ལྷག་པའི་སེམས་དང༌། ལྷག་པའི་ཤེས་རབ་ལ་བརྩོན་པར་གྱིས་དང༌། རྫུ་འཕྲུལ་དང་གཞན་ཡང་འབྱུང་བར་འགྱུར་རོ། །སྟོན་པས་རྫུ་འཕྲུལ་གྱི་ལམ་མི་སྟོན་པར་རིག་ནས་ཀོའུ་དི་ནྱ་ཅན་སོང་སྟེ། བདག་ལ་རྫུ་འཕྲུལ་གྱི་ལམ་བསྟན་དུ་གསོལ། དེས་སྟོན་པའི་ཐུགས་ལའང་བལྟས། ལྷས་བྱིན་ལ་སྡིག་པ་ཅན་གྱི་འདོད་པ་བྱུང་བར་རིག་ནས། ཕུང་པོ་ལྔ་ཚུལ་བཞིན་ཡིད་ལ་གྱིས་དང༌། རྫུ་འཕྲུལ་དང་གཞན་ཡང་འབྱུང་བར་འགྱུར་རོ། །དེས་ཀྱང་མི་སྟོན་པར་རིག་ནས། རྟ་ཐུལ་དང༌། བཟང་པོ་དང༌། རླངས་པ་དང༌། མིང་ཆེན་དང༌། གྲགས་པ་དང༌། གང་བོ་དང༌། དྲི་མེད་དང༌། བ་ལང་བདག་དང༌། ལག་བཟང་ལ་སོགས་པ་ལ་ཞུས་པས་མ་བསྟན་པ་དང༌། དེ་ནས་ལྷས་བྱིན་འདི་སྙམ་དུ། གནས་བརྟན་ལྔ་བརྒྱ་པོ་དེ་དག་གིས་སྔར་སྟོན་པ་དང་ལྷན་ཅིག་བགྲོས་པས་བདག་ལ་རྫུ་འཕྲུལ་གྱི་ལམ་མི་སྟོན་ན། བདག་ལ་རྫུ་འཕྲུལ་གྱི་ལམ་སྟོན་ནུས་པ་སུ་ཡོད་སྙམ་པ་དང༌། འོད་སྲུངས་སྟོབས་བཅུ་པ་འདི་ནི་ཡུན་རིང་པོ་ནས་གཡོ་སྒྱུ་མེད་པ། དྲང་པོའི་རང་བཞིན་ཅན། བདག་གི་ནུ་བོ་ཀུན་དགའ་བོའི་མཁན་པོ་ཡིན་པས་དེས་བདག་ལ་རྫུ་འཕྲུལ་གྱི་ལམ་སྟོན་ནོ་སྙམ་ནས་ཞུས་པས། འོད་སྲུངས་སྟོབས་བཅུ་པས་མ་བརྟགས་པར་ལྷས་བྱིན་ལ་རྫུ་འཕྲུལ་གྱི་ལམ་བསྟན་ཏོ། །
དེ་ནས་ལྷས་བྱིན་གྱིས་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པས་བསམ་གཏན་དང་པོ་ལ་བརྟེན་ནས་འཇིག་རྟེན་པའི་ལམ་གྱིས་རྫུ་འཕྲུལ་བསྒྲུབས་ཏེ་གཅིག་ཏུ་གྱུར་ནས་མང་པོར་གྱུར། མང་པོར་གྱུར་ནས་གཅིག་ཏུ་གྱུར། ཤེས་པ་དང༌། མཐོང་བས་སྣང་བ་དང༌། མི་སྣང་བའང་ཉམས་སུ་མྱོང་བར་བྱེད། རྩིག་པ་(༡༤༦ན)དང༌། ར་བ་དང༌། རི་ལའང་ལུས་ཀྱིས་མི་ཐོགས་པར་འགྲོ་སྟེ། དཔེར་ན། ནམ་མཁའ་ལ་བྱ་བ་བཞིན་ནོ། །ས་ལའང་སྟེང་དུ་འབྱུང་བ་དང་བྱེའུ་ཟུལ་བྱེད་དེ། ཆུ་ལ་བྱ་བ་བཞིན་ནོ། །ཆུ་ལའང་མི་ནུབ་པར་འགྲོ་སྟེ། ས་ལ་བྱ་བ་བཞིན་ནོ། །ནམ་མཁའ་ལའང་དཀྱིལ་ཀྲུང་གིས་འགྲོ་སྟེ། འདབ་ཆགས་བྱ་བཞིན་ནོ། །དུ་བ་འཐུལ་ཞིང་འབར་བར་བྱེད་དེ། མེའི་ཕུང་པོ་བཞིན་ནོ། །ལུས་ལས་ཆུའི་རྒྱུན་འབྱིན་ཏེ། སྤྲིན་བཞིན་ནོ། །ཉི་མ་དང་ཟླ་བ་མཐུ་དང༌། རྫུ་འཕྲུལ་དང༌། གཟི་བརྗིད་ཆེ་བ་ལའང་ལག་པས་ནོམ་ཉུག་བྱེད་དོ། །དེ་ནས་ལྷས་བྱིན་འདི་སྙམ་དུ། འཛམ་བུའི་འབྲས་བུ་ལ་སོགས་པ་བླངས་ནས་རང་ཡང་ལོངས་སྤྱོད་ཅིང་ལྷག་མ་དགེ་སློང་ལ་བགོ་བཤའ་བྱ་བས་ཅི་བྱ། མ་སྐྱེས་དགྲ་འདི་རྗེས་སུ་འཇུག་པར་བྱའོ་སྙམ་ནས་གླང་པོ་ཆེ་དང༌། རྟ་དང༌། དགེ་སློང་དུ་བསྒྱུར་ཏེ་དེ་མ་སྐྱེས་དགྲའི་སྒོ་ནས་ཞུགས་ཏེ་སྒེའུ་ཁུང་ནས་ཕྱིར་བྱུང་ཞིང་སྒེའུ་ཆུང་ནས་ཞུགས་ཏེ་སྒོ་ནས་ཕྱིར་འབྱུང་ངོ༌། །ཁྱེའུ་གསེར་གྱི་འོག་པག་ཅན་དུ་བསྒྱུར་ནས་མ་སྐྱེས་དགྲའི་པང་པ་ན་འགྲེ་ལྡོག་བྱེད་ཅིང༌། མ་སྐྱེས་དགྲའང་དེ་ལ་འཁྱུད་ཁ་སྦྱོར་ཞིང་དེའི་ཁར་མཆིལ་མའང་ལྡུག་པར་བྱེད་པ་ན་ལྷས་བྱིན་རྙེད་བཀུར་གྱིས་ཟིལ་གྱིས་ནོན་པས་དེ་ཡང་མིད་དོ། །མ་སྐྱེས་དགྲས་ཀྱང༌། འདི་ནི་ལྷས་བྱིན་ཡིན་ནོ་སྙམ་དུ་ཤེས་ཤིང༌། ལྷས་བྱིན་ནི་སྟོན་པ་བས་ཀྱང་ཆེས་རྫུ་འཕྲུལ་ཆེའོ་སྙམ་ནས་ནངས་པར་དང་དགོང་ཀར་ཤིང་རྟ་ལྔ་བརྒྱ་ཙམ་དང་ལྷན་ཅིག་འབྱུང་ཞིང་བསྙེན་བཀུར་བྱེད་ལ། སྣོད་དུ་བཙོས་པ་ལྔ་བརྒྱ་ཙམ་གྱི་ཟས་ཀྱི་ཚོམ་བུ་དག་ཀྱང་འབུལ་ལོ། །
ལྷས་བྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་ཟས་ཀྱི་གྲལ་དུ་བཀང་པར་བྱེད་དོ། །དེ་དགེ་སློང་རྣམས་ཀྱིས་ཤེས་ནས་གསོལ་བ་དང༌། དགེ་སློང་དག །ཁྱེད་ལྷས་བྱིན་གྱི་རྙེད་བཀུར་ལ་དགའ་བར་མ་བྱེད་ཅིག །ཅིའི་ཕྱིར་ཞེ་ན། ལྷས་བྱིན་གྱི་རྙེད་བཀུར་ནི་གསོད་པ་དང༌། ཟིལ་གྱིས་གནོད་པར་འགྱུར་བའི་ཕྱིར་རོ། །ཆུ་ཤིང་འབྲས་བུས་གསོད་པར་བྱེད། །འོད་མ་འདམ་བུ་འབྲས་བུས་གསོད། །དྲེའུ་མོ་རང་གི་མངལ་གྱིས་ལྟར། །མི་ངན་བཀུར་སྟིས་གསོད་པར་བྱེད། །བྱིས་པ་ཇི་ཙམ་གྲགས་གྱུར་པ། །དོན་མེད་ཉིད་དུ་འགྱུར་བ་ཡིན། །བྱིས་པའི་དཀར་ཆ་གསོད་བྱེད་ཅིང༌། །རྩེ་མོ་ལས་ཀྱང་ལྟུང་བར་འགྱུར། །དེ་ནས་ལྷས་བྱིན་རྙེད་བཀུར་གྱིས་ཟིལ་གྱིས་ནོན་ནས་སྡིག་པ་ཅན་གྱི་འདོད་པ་འདི་ལྟ་བུ་བྱུང་སྟེ། བཅོམ་ལྡན་འདས་ནི་རྒས་འཁོགས་སུ་གྱུར་པས་འཁོར་བཞི་པོ་ལ་འདོམས་པ་ངལ་བར་འགྱུར་གྱིས། སྟོན་པས་དགེ་སློང་གི་དགེ་འདུན་བདག་ལ་གཏད་ན་བདག་གིས་བླང་བར་བྱ་ཞིང་སྟོན་པའང་ཚེ་འདི་ལ་བདེ་ཞི་ཐུགས་ལས་ཆུང་ངུར་(༡༤༦བ)གནས་པར་འགྱུར་རོ་སྙམ་དུ་སེམས་བསྐྱེད་མ་ཐག་ཏུ་རྫུ་འཕྲུལ་ཉམས་ཀྱང་བདག་ཉམས་སོ་སྙམ་དུ་མི་ཤེས་སོ། །
དེའི་ཚེ་དགེ་སློང་ནོག་ཅན་ཚངས་པར་སྐྱེས་པ་དེས་མོའུ་གལ་གྱི་བུ་ཆེན་པོ་ཆུ་སྲིན་བྱིས་པ་གསོད་ཀྱི་རི་ལ་འདུག་པ་དེར་རྫུ་འཕྲུལ་གྱིས་སོང་ནས། འཕགས་པ། མཁྱེན་པར་མཛོད་ཅིག །ལྷས་བྱེན་རྙེད་བཀུར་གྱིས་ཟིལ་གྱིས་ནོན་པས་སྡིག་པ་ཅན་གྱི་འདོད་པ་འདི་ལྟ་བུ་བྱུང་གིས། སྟོན་པའི་དྲུང་དུ་བཞུད་ནས་དོན་དེ་རྒྱས་པར་གསོལ་ན་ལེགས་སོ། །དེ་ནས་མོའུ་གལ་གྱི་བུ་ཆེན་པོས་ཅང་མི་སྨྲ་བས་དང་དུ་བླངས་ནས། སྐྱེས་བུ་སྟོབས་དང་ལྡན་པས་ལག་ངར་བསྐུམས་པ་ལས་རྐྱོང་བའམ། བརྐྱངས་པ་ལས་བསྐུམ་པ་བཞིན་དུ་ངན་སྤོང་གི་བུ་ནས་མི་སྣང་བར་རྒྱལ་པོའི་ཁབ་ཏུ་གནས་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་ཞུགས་ནས་སྟོན་པའི་དྲུང་དུ་སོང་སྟེ་ཞུས་པས། ཁྱོད་ཀྱིས་ཆེས་སྔར་ལྷས་བྱིན་གྱི་སེམས་ལ་ཁྱབ་པར་བྱས་ནས་དེའི་འོག་ཏུ་ཚངས་པ་ནོག་ཅན་གྱིས་བརྗོད་དམ། བཙུན་པ། དེ་ལགས་སོ། །དེའི་སྐབས་སུ་ལྷས་བྱིན་འཁོར་བཞི་པོ་ཀོ་ཀ་ལི་ཀ་དང༌། ཁན་ད་དྲ་བ་བྱ་དང༌། ཀ་ཏ་མོ་ར་ཀ་ཏི་ཤྱ་དང༌། རྒྱ་མཚོས་བྱིན་དང་ལྷན་ཅིག་འོང་བ་གཟིགས་ནས། ལྷས་བྱིན་གཏི་མུག་ཅན་དེ་འོང་ཞིང་ངའི་མདུན་དུ་བདག་ཉིད་ཀྱིས་བདག་ཉིད་ལུང་སྟོན་གྱིས་ད་ཚིག་སྲུངས་ཤིག །མོའུ་གལ་གྱི་བུ་རང་གནས་སུ་སོང་ངོ༌། །
དེ་ནས་ལྷས་བྱིན་གྱིས་སྟོན་པ་ལ་ཕྱག་འཚལ་ནས། བཅོམ་ལྡན་འདས་ནི་སྐུ་བགྲེས་པས་འཁོར་བཞི་པོ་ལ་འདོམས་པ་མཉེལ་གྱིས་བདག་ལ་གཏད་ན་བདག་གིས་དྲང་ཞིང་སྟོན་པ་ཐུགས་ལས་ཆུང་ངུས་གནས་པར་འགྱུར་རོ། །མི་གཏི་མུག་ཅན། ཤཱ་རིའི་བུ་དང་མོའུ་གལ་གྱི་བུ་ཚངས་པ་མཚུངས་པར་སྤྱོད་པ་དེ་དག་ལའང་རེ་ཞིག་དགེ་སློང་གི་དགེ་འདུན་མི་གཏོད་ན། རོ་འདྲ་བ་མཆིལ་མ་ཟ་བ་ཁྱོད་ལ་གཏོད་རེ་སྐན། ལྷས་བྱིན་འདི་སྙམ་དུ། སྟོན་པས་ཤཱ་རིའི་བུ་དང་མོའུ་གལ་གྱི་བུ་གཉིས་ཀྱི་བསྔགས་པ་བརྗོད་ཅིང༌། བདག་ལ། རོ་འདྲ་བ་མཆིལ་མ་ཟ་བ་ཞེས་སྨད་དོ་སྙམ་ནས་མི་བཟོད་པ་སྐྱེས་ཏེ། སྡོད་ཅིག་ཅེས་བྱས། མགོ་ལན་གསུམ་ལྕོགས་ནས་སོང་ངོ༌། །
དེ་ནས་སྟོན་པས་ཀུན་དགའ་བོ་ལ། འོད་མའི་ཚལ་ན་དགེ་སློང་ཇི་སྙེད་གནས་པ་ཐམས་ཅད་དཔོང་སའི་ཁང་པར་སྡུས་ཤིག་གསུངས་ནས་བསྡུས་པ་དང༌། སྟོན་པས། དགེ་སློང་དག །ལྔ་པོ་འདི་དག་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་སྟེ། ཚུལ་ཁྲིམས་དང༌། འཚོ་བ་དང༌། ཤེས་མཐོང་མ་དག་པ་དང༌། བརྡ་སྤྲོད་པ་ཕུན་སུམ་མ་ཚོགས་པ་དང༌། ཉེས་པར་བཤད་པའི་ཆོས་འདུལ་བ་ལ་གནས་བཞིན་དུ། དེ་དག་དག་པ་དང་ཕུན་སུམ་ཚོགས་པར་ཁས་འཆེ་བ་ལ་ལྷན་ཅིག་འགྲོགས་པ་དག་གིས་དེ་ལྟར་ཤེས་ཀྱང༌། གཞན་(༡༤༧ན)ལ་བརྗོད་ན་ཡིད་མི་དགའ་བར་འགྱུར་བས། འདི་རང་ཉིད་ཤེས་པར་ཟད་དོ། །འདི་བདག་ཅག་ལ་ཆོས་གོས་ལ་སོགས་པས་སེམས་པར་བྱེད་པས་དེའི་སེམས་བསྲུང་ངོ༌། །ང་ནི་དེ་དག་དག་པ་ཁོ་ན་དམ་འཆའ་སྟེ། ངའི་ཉན་ཐོས་རྣམས་སེམས་སྲུང་བར་མི་སེམས་ཤིང་ང་ཡང་ཉན་ཐོས་རྣམས་ལ་སྲུང་བ་མི་རེའོ། །ད་ནི་ཁྱེད་ལ་ཚར་བཅད་ཅིང་སྨྲ། ཟིལ་གྱིས་མནན་ཅིང་སྨྲའི། ངའི་ཚིག་གི་ལམ་ལ་བཟོད་པར་གྱིས་ཤིག །
དེ་ནས་ལྷས་བྱིན་གྱིས་འཁོར་བཞི་པོ་ལ། ཚུར་ཤོག །དགེ་སྦྱོང་གོའུ་ཏ་མ་འདུག་བཞིན་དུ་དགེ་འདུན་མཐུན་པ་དབྱེ་ཞིང་འཁོར་ལོའང་དབྱེ་བར་བྱ་སྟེ། དེས་ན་བདག་ཅག་ཤི་བའི་རྗེས་སུ། དགེ་སྦྱོང་གོའུ་ཏ་མ་རྫུ་འཕྲུལ་དང་མཐུ་ཆེ་བ་འདུག་བཞིན་དུ་ལྷས་བྱིན་དང་ཀོ་ཀ་ལི་ཀ་ལ་སོགས་པས་ཉན་ཐོས་ཀྱི་དགེ་འདུན་མཐུན་པ་ཕྱེའོ་ཞེས་སྙན་པའི་གྲགས་པ་འབྱུང་བར་འགྱུར་རོ། །ལྷས་བྱིན། བདག་ཅག་གིས་དབྱེ་བར་མི་ནུས་ཏེ། སྟོན་པའི་ཉན་ཐོས་མཐུ་དང་རྫུ་འཕྲུལ་ཆེ་བ། ལྷའི་མིག་དང་ལྡན་པ། གཞན་སེམས་ཤེས་པ་དེ་དག་ནི་རིང་པོའང་མཐོང་ཞིང༌། དེ་དག་གིས་བདག་ཅག་རིག་པར་བྱེད་པས། བདག་ཅག་འཕགས་པ་ཉིད་ཀྱང་ཤེས་པར་འགྱུར་བའི་ཕྱིར་རོ། །ཀོ་ཀ་ལི་ཀ་ཐབས་བྱའོ། །ཐབས་གང༌། གནས་བརྟན་རྣམས་ཀྱི་དྲུང་དུ་སོང་སྟེ། ཐུགས་ལས་ཆུང་ངུར་མཛོད་ཅིག །བདག་ཅག་གིས་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ་ཞེས་ཡོ་བྱད་ཐམས་ཅད་བསྟབ་པར་བྱའོ། །གཞོན་པ་རྣམས་ལྷུང་བཟེད་ལ་སོགས་པ་ཟང་ཟིང་གིས་བསྡུ་བར་བྱའོ་ཞེས་དགེ་འདུན་དབྱེ་བའི་ཕྱིར་བརྟུལ་བ་དང༌། དགེ་སློང་གནས་བརྟན་རྣམས་ཀྱིས་དེ་ཤེས་ནས་གསོལ་བ་དང༌། ལྷས་བྱིན་དང༌། གཞན་ཡང་དེ་ལྟ་བུ་ལ་བཞམས་ཏེ་བསྒོ་བར་བྱའོ་ཞེས་གསུངས་ནས། བཞམས་ཏེ་བསྒོ་ཡང༌། འདི་ནི་བདེན་གྱི། གཞན་ནི་བརྫུན་པའོ་ཟེར་ནས་གཏོང་དུ་མ་འདོད་དེ་གསོལ་བས། གསོལ་བཞིའི་ལས་ཀྱིས་བསྒོ་བར་བྱའོ་ཞེས་གསུངས་ནས། བྱས་ཀྱང་གཏོང་དུ་མ་འདོད་དོ། །དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བའི་རྗེས་སུ་ཕྱོགས་པ་བཞི་པོ་དེ་དག་ཀྱང་དགེ་སློང་རྣམས་ལ། ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅང་མ་སྨྲ་ཞིག །འདི་ནི་ཆོས་དང་འདུལ་བ་སྨྲ་བ་སྟེ། འདི་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཟེར་བའི་སྐབས་དེ་གསོལ་བས། བཞམས་བསྒོ་དང༌། གསོལ་བཞིའི་ལས་ཀྱིས་ཟློག་ཅིག །བཟློག་ཀྱང་དེ་ཉིད་ལ་ནི་ཞེན་ནས་སྔར་བཞིན་དུ་ཟེར་བའི་སྐབས་དེ་གསོལ་བས། ལྷས་བྱིན་གྱིས་ངའི་དགེ་འདུན་མཐུན་པ་དབྱེ་བར་ནུས་ཏེ། དེའི་གྲོགས་བྱེད་པའི་དགེ་སློང་བཞི་ཡོད་པའི་ཕྱིར་རོ། །ལྷས་བྱིན་གྱིས་དེ་ཐོས་ནས་འཁོར་(༡༤༧བ)བཞི་པོ་ལ་སྨྲས་པ། དགེ་སྦྱོང་གོའུ་ཏ་མས། ད་ནི་དབྱེན་ནུས་པར་ལུང་བསྟན་གྱིས་དབྱེ་བར་བྱའོ་ཞེས་པའི་སྐབས་དེ་གསོལ་བ་དང༌། བྱུང་བ་འདི་དང་སོགས་སྔར་བཞིན། ལྷས་བྱིན། ཁྱོད་ཀྱིས་དགེ་འདུན་མཐུན་པ་དབྱེ་བའི་ཕྱིར་བརྟུལ་ཅིང༌། དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་བདེན་ནམ། བཙུན་པ། མད་དོ། །དགེ་སྦྱོང་གི་ཚུལ་མ་ཡིན་པ་ཞེས་སོགས་སྨད་ནས། དེ་ལྟ་བས་ན་ཕན་ཡོན་བཅུ་ཞེས་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ་ཞེས་པ་ནས། ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །
རྗེས་སུ་ཕྱོགས་པའི་དགེ་འདུན་ལྷག་མ་ནི། དེ་ནས་སྟོན་པས་སྟན་དེ་ཉིད་ལ་བཞུགས་བཞིན་དུ་འདུལ་བ་ལ་བསླབ་པའི་གཞི་གཉིས་པ་འཆའ་བར་བཞེད་ནས། དགེ་འདུན་གྱི་བྱ་བ་ཅུང་ཞིག་ཡོད་ཀྱིས་སྟན་ལས་མ་ལྡང་ཞིག །སྟོན་པས། ཀོ་ཀ་ལི་ཀ །ཁན་ད་དྲ་བ་བྱ། ཀ་ཏ་མོ་ར་ཀ་ཏི་ཤྱ། རྒྱ་མཚོས་བྱིན། ཁྱེད་ཤེས་བཞིན་དུ་དགེ་སློང་གི་དགེ་འདུན་མཐུན་པ་དབྱེ་བའི་ཕྱིར་བརྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པ་བདེན་ནམ། བཙུན་པ། མད་དོ། །བརྗོད་པ་གསུམ་པའི་མཐའ་ལ་མི་གཏོང་ན་དགེ་འདུན་ལྷག་མའོ། །
ཁྱིམ་སུན་འབྱིན་པའི་དགེ་འདུན་ལྷག་མ་ནི། སྟོན་པ་མཉན་ཡོད་ནའོ། །རེ་ལྡེ་རི་ལ་ནབ་སོ། འགྲོ་མགྱོགས། དམར་ཅན་གསུམ་བུད་མེད་དང་ལྷན་ཅིག་མཐོ་འཚམ། ཀུན་ཏུ་རྩེ། ཅ་ཅོ་འདོན། སྟན་གཅིག་ལ་འདུག །སྣོད་གཅིག་ཏུ་ཟ། ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་འཐུང༌། མེ་ཏོག་འཐོག །འཐོག་ཏུ་འཇུད། བྲོ་རྡུང༌། རྡུང་དུ་འཇུད། གླུ་ལེན། ལེན་དུ་འཇུད། རོལ་མོའི་སྒྲ་འབྱིན། འབྱིན་དུ་འཇུད། བྲོ་དང༌། གླུ་དང༌། རོལ་མོ་མཁས་པ་ལ་ངོ་སོ་ལས་བྱུང་བ་སྦྱིན་པར་བྱེད། ཆོས་གོས་བརྫེས་ཏེ་རྒྱུག་པ་སོགས་དགེ་སྦྱོང་གི་ལས་མ་ཡིན་པ་དག་བྱེད་དེ། དེ་དག་གི་སྤྱོད་ཚུལ་དེས་རེ་ལྡེའི་རི་ལ་དགེ་སློང་མ་འོངས་པ་དག་མི་འོང་ཞིང་འོངས་པ་དག་ཀྱང་འགྲོའོ། །ཁྱིམ་པ་རྣམས་མ་དད་པས་གཉུག་མར་གནས་པ་ལའང་བསོད་སྙོམས་མི་སྟེར་ན་གློ་བུར་བ་ལ་ལྟ་ཅི་སྨོས་པར་གྱུར་ཏོ། །རེ་ཞིག་ན་ཀུན་དགའ་བོ་དེར་སོང་ནས་བསོད་སྙོམས་ལ་ཞུགས་པ་དང༌། བསོད་སྙོམས་གཅིག་ཀྱང་མ་ཐོབ་ནས་བསམས་པ།(༡༤༨ན) རེ་ལྡེའི་རི་འདི་སྔོན་འབྱོར་པ་དང༌། རྒྱས་པ་དང༌། བདེ་བ་དང༌། ལོ་ལེགས་པ་དང༌། སྐྱེ་བོ་དང་མི་མང་པོས་གང་ལ། སློསང་མོ་བས་ཀྱང་བསོད་སྙོམས་རྙེད་སླ་བ་ཡིན་ན། ད་ལྟར་ཡང་འདི་འབྱོར་པ་དང༌། རྒྱས་པ་དང༌། བདེ་བ་དང༌། ལོ་ལེགས་པ་དང༌། སྐྱེ་བོ་དང་མི་མང་པོས་གང་ཡང་བསོད་སྙོམས་གཅིག་ཀྱང་མ་ཐོབ་པས་ན། འདིར་ཉན་ཐོས་བྱིས་པ། བླུན་པ། མི་གསལ་བ། མི་མཁས་པ་འགའ་ཞིག་གིས་བུད་མེད་དམ། གཞོན་ནུ་མ་དག་ལ་ཀུན་ཏུ་སྨྲས་པའམ། ནོམ་ཉུག་བྱས་པར་མ་གྱུར་ཏམ་སྙམ་ནས། ཁྱིམ་པ་ལྔ་བརྒྱ་ཙམ་འདུས་པའི་དཔོང་སར་སོང་སྟེ། ཤེས་ལྡན་དག །འདིར་སྔོན་བསོད་སྙོམས་རྙེད་ན། ད་ལྟ་མི་རྙེད་པ་ཅི་ཡིན། གཞན་རྣམས་ཅང་མི་སྨྲའོ། །དེའི་ནང་ནས་དགེ་བསྙེན་ཆུ་རྒྱུན་ཅན་གྱིས་ཀུན་དགའ་བོའི་ལག་པ་ནས་བཟུང་སྟེ་མཐའ་ཞིག་ཏུ་ཁྲིད་ནས། རེ་ལྡེའི་རི་ལ་འདི་གསུམ་གྱིས་འདི་འདྲའི་སྤྱོད་པ་བྱས་པ་ལན་གྱིས། སྟོན་པ་ལ་ཞུས་ཤིག་ཟེར་ནས་བསོད་སྙོམས་ཕུལ་ཏེ་ཆོས་ཉན་ནོ། །ཀུན་དགའ་བོས་ཆོས་བསྟན་ནས་སོང་སྟེ་སྟོན་པ་ལ་གསོལ་བས། ཀུན་དགའ་བོ། ཁྱོད་དགེ་སློང་གནས་བརྟན་རྣམས་དང་ལྷན་ཅིག་རེ་ལྡེའི་རི་ལ་སོང་ལ། འགྲོ་མགྱོགས་དང་ནབ་སོ་ལ་བསྐྲད་པའི་ལས་གྱིས་ཤིག །དེ་དག་སོང་བ་དང༌། དམར་སེར་ཅན་གྱིས་ཐོས་ནས། དེ་དག་བསྐྲད་པའི་ལས་བྱས་ན་ཁོ་བོ་ལའང་བྱེད་ཀྱིས་འབྲོས་སོ་སྙམ་པ་དང་དེ་དག་འོངས་ཏེ་དེ་གཉིས་ལ་གླེངས་པ་དང་དེ་གཉིས་ཀྱིས་སྐབས་ཕྱེ་ནས་གླེངས་པས། ལྟུང་བ་མཐོང་ངོ༌། །དེའི་ཕྱིར་དགེ་འདུན་གྱིས་ཁྱེད་གཉིས་ལ་བསྐྲད་པའི་འཕྲིན་ལས་མཛད་དོ། །
དེ་ནས་ཀུན་དགའ་བོ་དང་གནས་བརྟན་རྣམས་སྒོ་གཅིག་ནས་ཞུགས་པ་དང༌། དམར་སེར་ཅན་གཏུར་བུ་ཁུར་ཏེ་སྒོ་གཞན་ནས་མཉན་ཡོད་དུ་སོང་སྟེ་བཤགས་པ་བསྡམ་བྱས་ནས་རང་བཞིན་དུ་གནས་པ་ཐོབ་བོ། །དེ་གཉིས་ལ་བསྐྲད་པའི་ལས་བྱས་པ་དང༌། ས་ལ་འགྱེལ་བ་དང་དགེ་འདུན་ལ་བཟོད་པ་གསོལ་ལོ་སྙམ་ནས་ཕྱིན་པ་དང༌། དགེ་སློང་རྣམས་དེ་གཉིས་ལ་གཏམ་མི་འདྲེའོ། །དམར་སེར་ཅན་ཡང་དེ་གཉིས་ལ་གཏམ་མི་འདྲེ་ནས། དམར་སེར་ཅན་ལ་སྨྲས་པ། གནས་བརྟན་རྣམས་ཁོ་བོ་ཅག་གཉིས་ལ་གཏམ་མི་འདྲེ་བ་རིགས་མོད། ཁྱོད་ཅིའི་ཕྱིར་ཁོ་བོ་ཅག་གཉིས་ལ་གཏམ་མི་འདྲེ། ངེད་གཉིས་དང་ཁྱོད་ལ་ཁྱད་པར་ཅི་ཡོད། དེ་ཡང་བདེན་མོད། ཁོ་བོ་ཅག་གིས་ལྟུང་བ་བཤགས་པ་བསྡམ་བྱས་ཏེ། ད་ལྟར་དགེ་སློང་རང་བཞིན་དུ་གནས་པ་དག་དང་ལྷན་ཅིག་གནས་ཤིང་དགེ་འདུན་གྱི་བྱ་བའང་བསྲུང་བས། ཁོ་བོ་ཅག་དེང་ཕྱིན་(༡༤༨བ)ཆད་གནས་ངན་ལེན་ཀུན་ཏུ་སྤྱོད་པ་དང་ལྷན་ཅིག་ལོངས་མི་སྤྱོད་དོ། །དེ་གཉིས་ཀྱིས། འདི་ན་དགེ་སློང་ཁ་ཅིག་འདུན་པས་འགྲོ། ཞེ་སྡང་གིས། གཏི་མུག་གིས། འཇིགས་པས་འགྲོ་བ་དག་ཡིན་ཏེ། ལྟུང་བ་འདྲ་བ་ཁོ་ན་ལས་ཁ་ཅིག་སྐྲོད། ཁ་ཅིག་མི་སྐྲོད་དོ་ཞེས་འཕྱ་བ་དང༌། དགེ་སློང་རྣམས་ཀྱིས་དེ་གཉིས་ལ། སུ་ལ་འཕྱ། བདག་ཅག་སྐྲོད་པའི་དགེ་སློང་ལའོ། །གསོལ་བས། དེ་དག་འདུན་པས་འགྲོ་བ་སོགས་མ་ཡིན་གྱི། ཁྱེད་ཉིད་ཁྱིམ་སུན་འབྱིན་པ་ཡིན་པས་དེ་ཐོངས། འགྲོ་བ་བཞིས་སྐུར་བ་འདེབས་པའང་ཐོངས་ཞེས་བཞམས་བསྒོ་བྱས་ཀྱང་འདི་ཉིད་བདེན་གྱི་ཞེས་སོགས་ཟེར་ནས། གསོལ་བས། གསོལ་བཞིའི་ལས་ཀྱིས་ཟློག་ཅིག །བཟློག་ཀྱང༌། འདི་ཉིད་བདེན་སོགས་ཟེར་ནས་གསོལ་བས། བྱུང་བ་འདི་དང་སོགས་སྔར་བཞིན། བརྗོད་པ་གསུམ་པའི་མཐར་མི་གཏོང་ན་དགེ་འདུན་ལྷག་མའོ། །
བཀའ་བློ་མི་བདེ་བའི་དགེ་འདུན་ལྷག་མ་ནི། སྟོན་པ་ཀོའུ་ཤཱམྦཱིར་གདངས་ཅན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་འདུན་པ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་ནས། དེ་ལ་དགེ་སློང་དོན་འདོད་པ། ཕན་པ་འདོད་པ། བདེ་བ་འདོད་པ། བདེ་བ་ལ་རེག་པ་འདོད་པ། གྲུབ་པ་དང་བདེ་བ་འདོད་པ་རྣམས་ཀྱིས། ལྟུང་བ་ཆོས་བཞིན་དུ་ཕྱིར་གྱིས་ཞེས་གླེངས་པ་དང༌། སུ་ལ་ལྟུང་བ་བྱུང་བ་དེ་ཕྱིར་འཆོས་པར་འགྱུར་རོ། །ཁྱོད་ལ་ལྟུང་བ་བྱུང་བ་སུས་ཕྱིར་འཆོས་པར་འགྱུར། སུ་འགྱོད་པར་འགྱུར་བའོ། །ཁྱོད་ལ་ལྟུང་བ་བྱུང་བ་ལ་སུ་འགྱོད་པར་འགྱུར། ཁྱེད་ཅག་དགེ་ཡང་རུང་སྡིག་ཀྱང་རུང༌། བདག་ལ་ཅི་ཡང་མ་སྨྲ་ཞིག །བདག་ཀྱང་དགེ་ཡང་རུང་སྡིག་ཀྱང་རུང༌། ཚེ་དང་ལྡན་པ་དག་ལ་ཅང་མི་སྨྲའོ། །ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཞིག །ཁྱེད་ལ་ཡང་བདག་གིས་སྨྲས་པས་ཅི་ཞིག་བྱ། ཁྱེད་ཅག་རིགས་རུས་ཁྱིམ་སྣ་ཚོགས་ལས་རབ་ཏུ་བྱུང་བ་སྟེ། ཤིང་ལོ་སྣ་ཚོགས་རླུང་གིས་སླགས་པ་དག་གཅིག་ཏུ་བསྡུས་པ་བཞིན། ཁོ་བོའི་འཕགས་པས་ནི་བྱང་ཆུབ་ཐུགས་སུ་ཆུད་པ་ཡིན་ནོ། །དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། ཁྱེད་ཀྱིས་འདུན་པ་དང༌། གཞན་ཡང་དེ་ལྟ་བུ་ལ་བཞམས་བསྒོ་གྱིས་ཤིག །བསྒོ་ཡང༌། འདི་ཉིད་བདེན་གྱི་སོགས་ཟེར་ནས། གསོལ་བས། གསོལ་བཞིའི་ལས་ཀྱིས་ཟློག་ཅིག །བཟློག་ཀྱང་མི་གཏོང་བ་དེ་གསོལ་བས། བྱུང་བ་འདི་དང་སོགས་སྔར་བཞིན། བརྗོད་པ་གསུམ་པ་ལ་མི་གཏོང་ན་དགེ་འདུན་ལྷག་མའོ། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། འདུན་པ་འདི་ཚངས་པ་མཚུངས་པར་སྤྱོད་པ་དེས་པ་རྣམས་ཀྱི་མདུན་དུ་སྟོན་པ་ཉེ་དུར་སྟོན་པ་ལ་གཟིགས། ད་ལྟར་དུ་མ་ཟད་འདས་པའི་(༡༤༩ན)དུས་ནའང༌། འདིས་ཁྱིམ་པ་རྣམས་ཀྱི་མདུན་དུ་ང་ཉེ་དུར་སྟོན་པ་དེ་ཉོན་ཅིག །སྔོན་རྡོ་འཇོག་ན་བྲམ་ཟེ་ཟླ་གྲགས་ཞེས་བྱ་བས་རིགས་མཉམ་པ་ལས་ཆུང་མ་བླངས་ནས་དེ་དང་དགའ་མགུར་སྤྱད་པས་བུ་བཙས་ནས་མིང་ཉི་ཟླ་ཞེས་བཏགས་ཏེ་ཆེན་པོར་གྱུར་པའི་ཚེ་བྲམ་ཟེ་ཟླ་གྲགས་ན་ནས་དེ་ཆུང་མ་དང་བུས་ཡལ་བར་བོར་ཞིང་མ་གསོས་པ་ལ་བུ་མོ་མངག་གཞུག་མ་ཞིག་ཡོད་པ་དེས། འདི་ཡལ་བར་བོར་བ་ནི་ཚུལ་མ་ཡིན་ནོ་སྙམ་ནས། དགེ་བའི་བསམ་པ་དང༌། རྗེ་བོ་དང་སྙིང་ཉེ་བའི་བསམ་པས་སྨན་པའི་གན་དུ་སོང་ནས། ཁྱོད་ཀྱིས་བྲམ་ཟེ་ཟླ་གྲགས་ཤེས་སམ། ཤེས་ཏེ་དེ་ཅི་ཉེས། དེ་ན་ནས་ཆུང་མ་དང་བུས་ཡལ་བར་བོར་བས་དེའི་སྨན་སྟོན་ཅིག །གལ་ཏེ་ཆུང་མ་དང་བུས་ཡལ་བར་དོར་ན་གཡོག་སུས་བྱེད། སྨན་སྟོན་དང་བདག་གིས་གཡོག་བྱའོ། །
སྨན་པས་སྨན་བསྟན་ནས་བུ་མོ་དེས་བྲམ་ཟེ་ཟླ་གྲགས་ཀྱི་གཡོག་བྱས་པས་ནད་ལས་སོས་སོ། །བྲམ་ཟེས་བསམས་པ། བདག་ནད་དེ་ལྟ་བུས་བཏབ་ན་ཆུང་མ་དང་བུས་ཡལ་བར་བོར་ཡང་སྲོག་དང་མ་བྲལ་བ་དེ་བུ་མོ་འདིའི་མཐུ་ཡིན་ནོ་སྙམ་ནས། ཁོ་བོས་ཁྱོད་ལ་དམ་པ་ཞིག་སྦྱིན་གྱིས་སྨྲོས་ཤིག །ཇོ་བོ། གལ་ཏེ་ཁྱོད་བདག་ལ་དགྱེས་ན་ཁྱོད་དང་ལྷན་ཅིག་མཇལ་བར་འཚལ་ལོ། །བུ་མོ། ཁྱོད་ལ་ཁོ་བོ་དང་ལྷན་ཅིག་ཕྲད་པས་ཅི་བྱ། ཁོ་བོས་ཁྱོད་ལ་ཀརྵ་པ་ཎ་ལྔ་བརྒྱ་སྦྱིན་ཞིང་བྲན་མོ་ལས་གཏང་ངོ༌། །ཇོ་བོ། བདག་ཤིན་ཏུ་རིང་དུ་མཆིས་ཀྱང་བྲན་མོ་ཉིད་ལགས་ཀྱིས་ཁྱོད་བདག་ལ་དགྱེས་ན་བདག་དང་ལྷན་ཅིག་མཇལ་བར་འཚལ་ལོ། །འོ་ན་ཁྱོད་དུས་ལ་བབ་ཅིང་ཟླ་མཚན་དང་ལྡན་པའི་ཚེ་ཁོ་བོའི་གན་དུ་ཤོག་ཅིག །དེ་ཡིད་དགའ་ནས་ཟླ་མཚན་འཛག་པའི་ཉི་མ་བགྲང་ཞིང་ཟླ་མཚན་དང་ལྡན་པའི་ཚེ་བྲམ་ཟེའི་གན་དུ་སོང་བ་དང་དགའ་མགུར་སྤྱད་པས་སེམས་ཅན་ཞུགས་སོ། །
ཇོ་མོས་རིག་ནས་རྟག་ཏུ་རྡེག་ཅིང་ཟས་གོས་ངན་པ་སྟེར་རོ། །ཕྱིས་ཁྱེའུ་ཞིག་བཙས་པ་དང༌། དེས་བསམས་པ། འདི་བདག་གི་མངལ་དུ་ཞུགས་ནས་བདག་ལ་འདི་འདྲ་བྱུང་གིས། འདི་སྐྱེས་ནས་ཐམས་ཅད་དུ་མེད་པར་འགྱུར་རོ་སྙམ་ནས་ཆོལ་ཟངས་སུ་བཅུག་སྟེ་འདོར་བར་བརྩམས་པ་དང༌། བྲམ་ཟེས་མཐོང་ནས། དེ་ཅི་ཡིན། ཅང་མ་ལགས་སོ། །དེས་ཆོལ་ཟངས་བལྟས་པས་ཁྱེའུ་ཞིག་མཐོང་ནས་སྨྲས་པ། ཅིའི་ཕྱིར་འདི་འདོར། འདི་མངལ་དུ་ཞུགས་ནས་བདག་ཇོ་མོས་ཁུ་ཚུར་དང་ཐལ་ལྕག་གིས་རྡེག་ཅིང་འཚལ་མ་དང་རད་པ་ངན་པ་སྩལ་པས། འདི་སྐྱེས་ན་བདག་ཐམས་ཅད་དུ་མེད་པར་འགྱུར་རོ། །བུ་མོ། དེས་མ་ཉེས་ཏེ། ཁོ་བོས་ཉེས་ཀྱིས་འདི་སྐྱེད་ཅིག །བྲམ་ཟེས་བྲན་མོ་ལ། ཁོ་བོ་ན་བ་ན་ཁྱོད་དང་བུས་ཡལ་བར་བོར་བའི་ཚེ་བུ་མོ་འདིས་(༡༤༩བ)སྨན་དང་ནད་གཡོག་གིས་གསོས་པར་ཁོ་བོས་ཤེས་ཀྱིས། འདི་ལ་མཁོ་བ་སྟོབས་ཤིག །མི་བྱེད་ན་ཁོ་བོས་འདི་ཁྱིམ་བདག་མོར་བཞག་ཅིང་ཁྱོད་འདིའི་བྲན་མོར་བསྐོའོ། །བྲམ་ཟེ་མོ་དེ་སྐྲག་ནས་སྨྲས་པ། ཁྱོད་ཀྱིས་བུ་མོ་འདི་ལ་དགའ་མགུར་སྤྱད་པ་དང༌། ཁྱེའུ་འདི་ཁྱོད་ཀྱི་སྲས་ཡིན་པར་བདག་གིས་མ་འཚལ་ཏེ། སླན་ཆད་ཅུང་ཟད་ཀྱང་མཐོ་མི་འཚམ་མོ། །ཁྱེའུ་དེ་ཆོལ་ཟངས་སུ་བཅུག་པས་ཆོལ་ཟངས་ཞེས་ཆགས། བྲམ་ཟེ་དེ་ཆོལ་ཟངས་པ་ལ་ཤིན་ཏུ་བྱམས་ཤིང་དེ་དང་ལྷན་ཅིག་དུ་ཟ། གང་དུ་མགྲོན་དུ་བོས་པར་འགྲོ་བ་དེར་ཡང་དེ་དང་ལྷན་ཅིག་འགྲོའོ། །རེ་ཞིག་ན་བྲན་ཟེ་དེ་འཆི་བའི་ཚེ་བུ་ཉི་ཟླ་བཀུག་གནས་སྨྲས་པ། ང་ཤི་ནས་ཁྱོད་ནི་མྱ་ངན་བྱ་བ་མ་ཡིན་གྱི། ནུ་བོ་ཆོལ་ཟངས་པ་འདི་མྱ་ངན་བྱ་བར་འགྱུར་བས་ཁྱོད་ཀྱིས་འདི་སྐྱོངས་ཤིག་ཅེས་སྨྲས་ནས་ཤིའོ། །རེ་ཞིག་ན་ཉི་ཟླས་ཟན་གྱི་དུས་སུ། ཆོལ་ཟངས་པ། ཚུར་ཤོག །འདིར་ཟན་ཟོ་ཞིག་ཅེས་སྨྲས་པ་དང༌། མ་ན་རེ། ཁྱོད་བྲན་མོའི་བུ་དང་ཇི་ལྟར་ལྷན་ཅིག་ཟ། མ། བདག་གིས་དུས་ཐམས་ཅད་དུ་ནུ་བོ་འདི་དང་ལྷན་ཅིག་ཏུ་ཟོས་ཤིང་འཐུངས་ན། ད་ཇི་ལྟར་བྲན་མོའི་བུ་ཞེས་བྱ། བུ། ཁྱོད་ཀྱི་ཕ་གཏུམ་པས་དེ་ལ་ཅུང་ཟད་སྨྲ་བར་སུས་ནུས། འདི་ནི་བྲན་མོའི་བུ་ཡིན་ནོ། །ཆོལ་ཟངས་པས་ཐོས་ནས་མའི་གན་དུ་སོང་སྟེ། བདག་བྲན་མོའི་བུ་ཡིན་ནམ། འཇིག་རྟེན་རང་གི་ལས་འབྲས་ལ་སྤྱོད་པས་སུ་ཞིག་སུའི་བྲན་ཡིན། བུ། ཡུལ་གཞན་དུ་སོང་ལ་ཐོས་པ་ཟུང་ཞིག །དེ་ཡུལ་གཞན་དུ་སོང་ནས་རང་གི་མིང་ཆོལ་ཟངས་པ་ཞེས་བྱ་བ་བཏང་སྟེ། ཟླ་བ་ཞི་བ་ཞེས་བསྒྱུར་ནས་མཐར་གྱིས་མཉན་ཡོད་དུ་བྲམ་ཟེ་མདུན་ན་འདོན་ཞིག་གི་གན་དུ་སོང་སྟེ་ཆ་ལུགས་དུལ་བ་དང༌། སྤྱོད་ལམ་ཞི་བས་གུས་པར་སྨྲས་ཏེ་མཐའ་ཞིག་ཏུ་འདུག་གོ །དེས། འོངས་པ་ལེགས་སོ། །ཁྱོད་ག་ལས་འོངས། རྡོ་འཇོག་ནས་སོ། །རྡོ་འཇོག་གི་སྐྱེ་བོ་རྣམས་ཤེས་སམ། འཚལ་ལོ། །དེ་ན་བྲམ་ཟེ་ཟླ་གྲགས་ཀྱི་གཏམ་ཅི་གྲག །ཁྱེའུ་དེ་ངུ་བར་བརྩམས་པ་དང༌། ཅིའི་ཕྱིར་དུ། དེ་བདག་གི་ཕ་ལགས་སོ། །འོ་ན་ཅིའི་ཕྱིར་ངུ༌། དེ་གུམ་མོ། །ཁྱེའུ། སྐྱེས་པ་ནི་གདོན་མི་ཟ་བར་འཆི་དགོས་ཀྱི། ཁོ་བོ་ཁྱོད་ཀྱི་ཕའི་ཆུང་པོ་གྲོགས་ཡིན་གྱིས་བག་ཕོབ་ཅིག །ཐམས་ཅད་བྱའོ། །མཁན་པོ། རིག་བྱེད་བཀླག་པར་བགྱིའོ། །བུ། མཉེས་ཏེ། དེ་ནི་བྲམ་ཟེས་བྱ་བ་ཡིན་ནོ། །དེ་བློ་རྣོ་བ་དང༌། བརྟན་པ་དང༌། བརྩོན་འགྲུས་བརྩམས་པ་ཡིན་པས་དུས་ཅུང་ཞིག་གིས་རིག་བྱེད་བཞི་ཤེས་པ་དང༌། དེ་དགའ་ནས་བུ་མོ་རྒྱན་ཐམས་ཅད་ཀྱིས་བརྒྱན་ཏེ་དེའི་ཆུང་མར་བྱིན་ནོ། །དེ་བྲན་ཟེ་མདུན་ན་འདོན་གྱི་མག་པར་གྱུར་ཅིང༌། རིག་བྱེད་བཞི་དང་ལྡན་པ་ཞེས་འཇིག་(༡༥༠ན)རྟེན་ཐམས་ཅད་ལ་གྲགས་ཤིང་ཁྱིམ་འབྱོར་པར་གྱུར་ཏོ། །
དེ་ལྟར་གྱུར་པ་ཚོང་པས་ཉི་ཟླ་ལ་བཤད་པས། དེ་ཡིད་དགའ་ནས་མ་ལ་བཤད་པས། མ་ན་རེ། བྲན་མོའི་བུ་དེ་ལ་སུ་ཞིག་བསྙེན་བཀུར་བྱེད་པར་འགྱུར། རེ་ཞིག་ན་ཉི་ཟླ་ལོངས་སྤྱོད་བསྲབས་པར་གྱུར་ནས། མས་སྨྲས་པ། བུ། ནུ་བོའི་གན་དུ་སོང་དང༌། ལོངས་སྤྱོད་ཀྱི་བགོ་བཤའ་བྱེད་པར་འགྱུར་རོ། །མ། སྔར་དེ་བྲན་མོའི་བུ་ཡིན་ན་ད་ཇི་ལྟར་ནུ་བོར་འགྱུར། མ་ན་རེ། དེ་ལྟ་ནའང་སོང་ལ། དེ་ལས་བླང་མ་ཟློག་ཅིག །དེ་སོང་བ་དང༌། ཆོལ་ཟངས་པས་ཐོས་ཏེ་བསུ་ནས། འོངས་པ་ལེགས་སོ། །བདག་ཟླ་བ་ཞི་བ་ཞེས་མིང་བཏགས་ཀྱིས། བདག་ལ་ཆོལ་ཟངས་པ་ཞེས་མ་འབོད་ཅིག །ཉི་ཟླ་ན་རེ། ཁྱོད་ཟླ་བ་ཞི་བ་ཡིན་ན་སུ་ཞིག་གཞན་དུ་འབོད། དེས་ཉི་ཟླ་ཁྱིམ་དུ་ཁྲིད་དེ། བཀུར་སྟི་ཆེན་པོ་བྱས་ནས། ཆུང་མ་ལ། འདི་ཁོ་བོའི་ཕུ་བོ་ཉི་ཟླ་ཡིན་གྱིས། འདི་ལ་མཁོ་བ་ཐམས་ཅད་བསྟབ་ཅིང་གུས་པར་གྱིས་ཤིག །ཉི་ཟླ་ནི་དེས་ཤིང་འགྲོགས་ན་བདེ་བ་ཡིན་ལ། ནུ་བོ་ནི་གཏུམ་ཞིང་དྲག་ཤུལ་ཅན་ཡིན་པས་ཆུང་མ་ལ་ཉེས་པ་ཅུང་ཟད་ཙམ་གྱིས་རྡེག་པར་བྱེད་པས། བྲམ་ཟེ་མོས་ཉི་ཟླ་ལ་སྨྲས་པ། ཁྱེད་གཉིས་མཆེད་ལགས་ན། ཁྱོད་ནི་དེས་ཤིང་འགྲོགས་ན་བདེ་ལ། གཅུང་བོ་འདི་གཏུམ་པའི་རྒྱུ་ཅི་ཡིན། སྲུ། འདིས་ཁྱིམ་གྱི་རིག་པ་མ་བཀླགས་སོ། །ཇོ་བོ། བདག་ལ་ཁྱིམ་གྱི་རིག་པ་དེ་སྩོལ་ཅིག །ཉི་ཟླས་སྨྲས་པ། རིག་པ་སུ་ལའང་སྦྱིན་བྱ་མིན། །རིག་དང་བཅས་ཏེ་འཆི་བར་འགྱུར། །རིག་པ་རིག་དང་གུས་པ་དང༌། །ནོར་གྱིས་སྦྱིན་པར་བྱ་བ་ཡིན། །ནོར་ཇི་ཙམ་གྱིས་སྩོལ། ཀརྵ་པ་ཎ་ལྔ་བརྒྱས་སོ། །དེས་ཀརྵ་པ་ཎ་ལྔ་བརྒྱ་ཐོགས་ཏེ་དེའི་རྐང་པ་ལ་གཏུགས་ནས། ཁྱིམ་གྱི་རིག་པ་སྩོལ་ཅིག །སྲུ། ཁོ་བོ་རྫོངས་ཤིག །འགྲོ་བའི་ཚེ་སྦྱིན་ནོ། །དེས་ཁྱིབ་ཐབ་ཀྱི་གན་དུ་སོང་ནས། ཁྱོད་ཀྱི་གཅེན་འདི་ཁྱིམ་སེམས་ཀྱིས་ཐོང་ཞིག །བཟང་མོ། དེ་ལྟ་ན་འདིའི་ལམ་བརྒྱགས་སྟ་གོན་གྱིས་ཤིག །ཁོ་བོས་དོན་མཐུན་བཙལ་ལོ། །དེས་རྡོ་འཇོག་ཏུ་འགྲོ་བའི་དོན་མཐུན་བཙལ། བྲམ་ཟེ་མོས་དེའི་ལམ་བརྒྱགས་སྟ་གོན་བྱས་ནས་ཀརྵ་པ་ཎ་ལྔ་བརྒྱ་ཐོགས་ཏེ། ཕྱག་བཙལ་ནས། ཁྱོད་བརྫང་བའི་དུས་འདི་ལགས་ཀྱིས། ཁྱིམ་གྱི་རིག་པ་དེ་སྩོལ་ཅིག །སྲུ། ཟླ་བ་ཞི་བ་ཁྱོད་ལ་རྡེག་པའི་ཚེ་ཁྱོད་ཀྱིས་རིག་པ་འདི་བཀླག་པར་བྱའོ། །སྐྱེ་བོ་མང་པོ་གཞན་དག་དང༌། །གཞན་གྱི་ཁྱིམ་དུའང་ཤེས་གྱུར་ཅིང༌། །འོད་སྲུངས་རིགས་ཀྱིས་ཤེས་གྱུར་གྱིས། །ཁ་རོག་འདུག་ཅིག་ཆོལ་ཟངས་པ། །ཞེས་སྨྲོས་ལ། འདིའི་དོན་ཅི་ཟེར་(༡༥༠བ)ན། བརྡེག་ན་དོན་ཡང་བཤད་པར་བྱའོ་ཞེས་སྨྲོས་ཤིག །སྲུ། གསང་སྔགས་ཀྱི་ཚིག་དོན་དང་ལྡན་པ་འདི་བརྗོད་པ་ཙམ་གྱིས་དོན་དང་བཅས་པར་འགྱུར་གྱིས། ལེགས་པར་ཟུང་ཞིག །དེས་ཡི་གེ་དེ་དག་ལེགས་པར་བཟུང་ནས། ཟླ་བ་ཞི་བ་ཕུ་བོ་སྐྱེལ་དུ་སོང་བའི་ཤུལ་དུ། སྔགས་འདི་བདེན་བརྫུན་སད་དོ་སྙམ་ནས་བཟའ་བཏུང་ཅི་ཡང་སྟ་གོན་མ་བྱས་པ་དང༌། ཟླ་བ་ཞི་བ་བྱུང་ནས། ཆུ་ཁྱེར་ཤོག་ཁྲུས་བྱའོ། །ཆབ་སྟ་གོན་མ་བགྱིས་སོ། །དེ་ལྟ་ན་ཟས་ཁྱེར་ཤོག་བཟའ་འོ། །དེ་ཡང་སྟ་གོན་མ་བགྱིས་སོ། །དེ་ཁྲོས་ཏེ། ངའི་ཕུ་བོ་འདུག་པའི་ཚེས་ངས་རེ་ཞིག་ཁྱོད་བསྟོངས་སུ་བཞག་པར་ཟད་ཀྱིས། ཁྱོད་མ་བརྡེགས་ཀྱི་བར་དུ་བྱེད་དུ་མི་བཏུབ་བོ་ཞེས་བརྡེག་པར་བརྩམས་པ་དང༌། རྗེའི་སྲས། རེ་ཞིག་ཁྱིམ་གྱི་རིག་པ་གསོན་ཅིག་ཅེས་ཚིགས་བཅད་དེ་སྨྲས་པས། དེའི་དོན་ཅི། གལ་ཏེ་བརྡེག་ན་དོན་ཡང་བཤད་པར་བྱའོ། །དེ་རི་དྭགས་གནད་དུ་ཕོག་པ་བཞིན་གྱུར་ནས། མི་བརྡེག་གི་དོན་མ་སྨྲ་ཞིག་ཟེར་རོ། །དེའི་དུས་ཀྱི་ཟླ་གྲགས་དེ་ནི་ང་ཡིན་ནོ། །ཆོལ་ཟངས་པ་དེ་ནི་འདུན་པ་འདི་ཡིན་ཏེ། དེའི་ཚེའང་འདིས་ཁྱིམ་པ་དེས་པ་དག་གི་མདུན་དུ་ང་ཉེ་དུར་བརྗོད་དོ། །དེས་ན་ང་ལ་ཉེ་དུར་བརྗོད་པ་རྣམས་ཀྱིས་ཚངས་པ་མཚུངས་པར་སྤྱོད་པ་གནས་བརྟན་རྣམས་དང༌། བར་མ་རྣམས་དང༌། གསར་བུ་རྣམས་ལ་གུས་པ་དང༌། རྗེ་ས་དང༌། འཇིགས་པ་དང་བཅས་པས་གནས་པར་བྱའོ། །

2) མ་ངེས་པ་གཉིས།

མ་ངེས་པ་དང་པོ་ནི། སྟོན་པ་མཉན་ཡོད་ནའོ། །འཆར་ཀ་མཉན་ཡོད་དུ་བསོད་སྙོམས་ལ་ཞུགས་ནས་མཐར་གྱིས་ཁྱིམ་བདག་གི་ཆུང་མ་སྦེད་མའི་ཁྱིམ་དུ་སོང་བ་དང༌། སྦེད་མས་འཆར་ཀ་ཐག་རིང་པོ་ནས་མཐོང་སྟེ། འཆར་ཀའི་ཆེད་དུ་སྟན་གཤོམ་ཞིང༌། བཙུན་པ་འཆར་ཀ །ཚུར་སྤྱོན། བྱོན་པ་ལེགས་སོ། །གདན་བཤམས་པ་ལ་བཞུགས་ཤིག་ཟེར་ནས་སྟན་ལ་འདུག་པ་དང༌། དེས་ཕྱག་བཙལ་ཏེ། པུས་མོ་གཉིས་ལ་པུས་མོ་གཉིས་གཏད་དེ་འདུག་པ་ལ་འཆར་ཀས་ཆོས་བསྟན་པ་དང༌། རི་དྭགས་འཛིན་གྱི་མ་ས་ག་ཁྱིམ་དེའི་ཉེ་འཁོར་ན་འགྲོ་བས་ཐོས་ནས། ཀྱེ་མ་འཆར་ཀ་སྐད་ཀྱི་གདངས་ཀྱིས་སྦེད་མ་ལ་སྦྲང་བུ་སྦྲང་རྩི་འབྱིན་པ་དང་འདྲ་བར་ཆོས་སྙན་པ་དག་སྟོན་གྱིས་བདག་ཀྱང་ཆོས་མཉན་ནོ་སྙམ་ནས་སོང་བ་དང༌། སྦེད་མ་འཆར་ཀའི་པུས་མོ་གཉིས་ལ་པུས་མོ་གཉིས་གཏད་དེ་ཆོས་ཉན་པ་མཐོང་ནས། འདི་མ་དད་པ་འགའ་ཞིག་གིས་མཐོང་ན་འདིས་འདི་དང་ལྷན་ཅིག་དབེན་པ་སྐྱབས་ཡོད་པར་སྡིག་པའི་ལས་ཅུང་ཞིག་བྱས་སམ། བྱེད་པར་སེམས་སོ་སྙམ་དུ་ངེས་པར་མཐར་ཐུག་པར་འགྱུར་བས་འདི་བདག་གི་བྱ་བ་ཡིན་ནོ་སྙམ་ནས། སྟོན་པའི་དྲུང་དུ་སོང་སྟེ་ཞུས་པས་གནང་ནས། བྱུང་བ་འདི་དང་སོགས་སྔར་བཞིན། འཆར་(༡༥༡ན)ཀ །ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །དགེ་སྦྱོང་གི་ཚུལ་མ་ཡིན་པ་ཞེས་སོགས་སྨད་ནས། དེ་ལྟ་བས་ན་ཕན་ཡོན་བཅུ་ཞེས་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་ལྷན་ཅིག་དབེན་པ་སྐྱབས་ཡོད་པ། འདོད་པ་བྱར་རུང་བ་སྟན་ལ་འདུག་པར་བྱེད་ཅིང༌། དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས། ཆོས་གསུམ་པོ་ཕམ་པར་འགྱུར་བའམ་དགེ་འདུན་ལྷག་མའང་ལྟུང་བྱེད་ལས་གང་ཡང་རུང་བས་སྨྲས་པར་གྱུར་ལ་དགེ་སློང་གིས་འདུག་པར་ཁས་བླངས་ནས་ཆོས་གསུམ་པོ་ཕམ་པར་འགྱུར་བའམ་དགེ་འདུན་ལྷག་མའམ་ལྟུང་བྱེད་ལས་ཆོས་གང་ཡང་རུང་བས་བྱེད་དུ་གཞུག་ཅིང༌། དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་འགྱུར་པའི་ཆོས་དེ་དང་དེས་དགེ་སློང་དེ་བྱེད་དུ་གཞུག་སྟེ། དེ་ནི་མ་ངེས་པའི་ཆོས་སོ། །མ་ངེས་པ་གཉིས་པ་ནི། སྟོན་པ་རྒྱལ་པོའི་ཁབ་ན་བཞུགས་པའི་ཚེ་དགེ་སློང་ཤི་རི་ཀ་བསོད་སྙོམས་ལ་སོང་བ་དང༌། མཐར་གྱིས་ཁྱིམ་བདག་གི་ཆུང་མ་གསོ་སྦྱོང་འཕགས་ཀྱི་ཁྱིམ་དུ་སོང་བ་དང༌། གསོ་སྦྱོང་འཕགས་ཀྱིས་ཐག་རིང་པོ་ནས་མཐོང་སྟེ། ཤི་རི་ཀའི་ཆེད་དུ་སྟན་གཤོམ་ཞིང༌། བཙུན་པ་ཤི་རི་ཀ །ཚུར་སྤྱོན། བྱོན་པ་ལེགས་སོ། །གདན་བཤམས་པ་ལ་བཞུགས་ཤིག་ཟེར་ནས། སྟན་ལ་འདུག་པ་དང༌། དེས་ཕྱག་འཚལ་ཏེ་པུས་མོ་གཉིས་ལ་པུས་མོ་གཉིས་མ་རེག་ཙམ་དུ་འདུག་པ་ལ་ཤི་རི་ཀས་ཆོས་བསྟན་པ་དང༌། དགེ་བསྙེན་མ་ལེགས་སྐྱེས་དེའི་ཉེ་འཁོར་ན་འགྲོ་བས་ཐོས་ནས། ཀྱེ་མ་འཕགས་པ་ཤི་རི་ཀས་སྐད་ཀྱི་གདངས་ཀྱིས་གསོ་སྦྱོང་འཕགས་ལ་སྦྲང་བུ་སྦྲང་རྩི་འབྱིན་པ་དང་འདྲ་བར་ཆོས་སྙན་པ་དག་སྟོན་གྱིས་བདག་ཀྱང་ཆོས་མཉན་ནོ་སྙམ་ནས་སོང་བ་དང༌། གསོ་སྦྱོང་འཕགས་ཤི་རི་ཀའི་པུས་མོ་གཉིས་ལ་པུས་མོ་གཉིས་མ་རེག་ཙམ་དུ་ཆོས་ཉན་པ་མཐོང་ནས། འདི་མ་དད་པ་འགའ་ཞི་གིས་མཐོང་ན་འདིས་འདི་དང་ལྷན་ཅིག་དབེན་པ་སྐྱབས་ཡོད་པར་སྡིག་པའི་ལས་ཅུང་ཞིག་བྱས་སམ། བྱེད་པར་སེམས་སོ་སྙམ་དུ་ངེས་པར་མཐར་ཐུག་པར་འགྱུར་བས་འདི་བདག་གི་བྱ་བ་ཡིན་ནོ་སྙམ་ནས། སྟོན་པའི་དྲུང་དུ་སོང་སྟེ་ཞུས་པས་གནང་ནས། བྱུང་བ་འདི་དང་སོགས་སྔར་བཞིན། ཤི་རི་ཀ །ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །དགེ་སྦྱོང་གི་ཚུལ་མ་ཡིན་སོགས་སྨད་ནས། དེ་ལྟ་བས་ན་ཕན་ཡོན་བཅུ་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་(༡༥༡བ)བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ། འདོད་པ་བྱར་མི་རུང་བར་སྟན་ལ་འདུག་པར་བྱེད་ཅིང༌། དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གཉིས་པོ་དགེ་འདུན་ལྷག་མའམ་ལྟུང་བྱེད་ལས་གང་ཡང་རུང་བས་སྨྲས་པར་གྱུར་ལ། དགེ་སློང་གིས་འདུག་པར་ཁས་བླངས་ན་ཆོས་གཉིས་པོ་དགེ་འདུན་ལྷག་མའམ་ལྟུང་བྱེད་ལས་གང་ཡང་རུང་བས་བྱེད་དུ་གཞུག་ཅིང༌། དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་དེ་བྱེད་དུ་གཞུག་སྟེ། དེ་ཡང་མ་ངེས་པའི་ཆོས་སོ། །

༣༽ ལྟུང་བྱེད་ཀྱི་སྡེར་སྤང་ལྟུང་ལ་བཅུ་ཚན་གསུམ་ལས།
བཅུ་ཚན་དང་པོ།

སྤང་ལྟུང་ལ་བཅུ་ཚན་གསུམ་ལས། དང་པོ་ལ། འཆང་བའི་སྤང་བ་ནི། སྟོན་པ་མཉན་ཡོད་ནའོ། །དགེ་སློང་རྣམས་ལ་ཆོས་གོས་མང་པོ་བྱུང་སྟེ། ཆོས་གོས་ལ་ལ་གྱོན་ཏེ་ཆག་ཆག་འདེབས། ལ་ལས་སྤོས་དང་བྱུག་པ་བྱེད། ལ་ལས་འཁྲུད། ལ་ལས་བསོད་སྙོམས་ལ་འགྲོ། ལ་ལས་ཟས་ཀྱི་གྲལ་དུ། ལ་ལས་ཆོས་ཉན། ལ་ལས་མཚན་མོ་ཉལ། དེ་དག་གྱོན་པ་དང་འབུད་པ་ན་བྱ་བ་མང་བས་ལུང་ནོད་པ་དང༌། བཀླག་པ་དང༌། ཁ་ཏོན་དང༌། རྣལ་འབྱོར་དང༌། ཡིད་ལ་བྱ་བ་དང༌། ནང་གི་སེམས་ཀྱི་ནི་གནས་གཏོང་བར་བྱེད་དོ། །དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས་སྔར་བཞིན་ནོ། །དགེ་སློང་དག །ཁྱེད་ལ་ཆོས་གོས་མང་པོ་བྱུང་སྟེ། དེ་དག་གྱོན་འབུད་ཀྱིས་ལུང་ནོད་པ་སོགས་གཏོང་བར་བྱེད་པ་བདེན་ནམ། བཙུན་པ། མད་དོ། །སྟོན་པས། གསོ་དཀའ་བ་དང༌། དགང་དཀའ་བ་དང༌། འདོད་པ་ཆུང་བ་དང༌། ཆོག་མི་ཤེས་པ་ལ་སྨད། གསོ་སླ་བ་དང༌། དགང་སླ་བ་དང༌། འདོད་པ་ཆུང་བ་དང༌། ཆོག་ཤེས་པའི་བསྔགས་པ་བརྗོད་ནས། དེ་བས་ན་ཕན་ཡོན་བཅུ་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་ཆོས་གོས་གསུམ་བཅང་བར་བྱའོ། །དེ་ལས་ལྷག་པར་འཆང་ན་སྤང་བའི་ལྟུང་བྱེད་དོ། །སྟོན་པ་འོད་མའི་ཚལ་ན་བཞུགས་པའི་ཚེ་འོད་སྲུངས་ཆེན་པོ་རྒྱལ་པོའི་ཁབ་ན་དགོན་པའི་སྤྱིལ་བུ་ན་འདུག་གོ །སྟོན་པ་འོད་མའི་ཚལ་ན་བཞུགས་པའི་ཚེ་འོད་སྲུངས་ཆེན་པོ་དགེ་འདུན་ལ་གཏད་པའི་ཚེ་ཁྱིམ་བདག་ཅིག་གིས་ཡུན་རིང་པོ་ནས། ཀྱེ་མ་བདག་གིས་འོད་སྲུངས་ཆེན་པོ་ལྷ་དང་མིས་མཆོད་པ་ལ་བཤོས་གསོལ་ཏེ་རས་ཡུག་ཆེན་ཞིག་བསྐོན་ན་ཅི་མ་རུང་སྙམ་ནས་ཁྱིམ་བདག་དེས་རས་ཡུག་ཆེན་ཐོགས་ཏེ་ཀུན་དགའ་བོ་ལ། འོད་སྲུངས་ཆེན་པོ་གང་ན་བཞུགས། དགོན་པའི་སྤྱིལ་བུ་ནའོ། །ཇི་ཙམ་ན་འབྱོན། གསོ་སྦྱོང་གི་ཚེའོ། །བདག་ཅག་ཁྱིམ་པ་བྱ་བ་མང་བ་ལགས་(༡༥༢ན)ཀྱིས། ཀུན་དགའ་བོས་བདག་ལ་ཐུགས་བརྩེ་བའི་སླད་དུ་འོད་སྲུངས་ཆེན་པོ་ལ་རས་ཡུག་ཆེན་འདི་བསྐོན་དུ་གསོལ། ཀུན་དགའ་བོས་བསམས་པ། བདག་གིས་ཁྱིམ་བདག་ལས་རས་ཡུག་ཆེན་བླངས་ན་ནི་བསླབ་པའི་གཞི་རལ་བར་འགྱུར། མ་བླངས་ན་ཁྱིམ་བདག་གི་བསོད་ནམས་དང་འོད་སྲུངས་ཆེན་པོའི་རྙེད་པའི་བར་ཆད་དུ་འགྱུར་ན། བདག་གིས་བླངས་ན་གནང་བའི་སྐབས་ཀྱང་ཡོད་གྲང་སྙམ་ནས་བླངས་ཏེ་ཞུས་པས། ལེགས་སོ། །ངས་གནང་བ་ཁྱོད་ཀྱིས་ཤེས་ཏེ། དེ་བས་ན་དགེ་སློང་གིས་ཞག་བཅུའི་བར་དུ་གོས་ལྷག་པ་རུང་བ་མ་བྱས་པ་བཅང་བར་རྗེས་སུ་གནང་ངོ༌། །སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ནོ། །
འབྲལ་བའི་སྤང་བ་ནི། མཉན་ཡོད་དུ་དགེ་སློང་རྣམས་གདིང་བ་མེད་པར་ཡུལ་གཞན་དུ་སོང་ནས་འགྱོད་དེ་གསོལ་བས། ངས་ཆོས་གོས་གསུམ་ལ་འབྲལ་ལྟུང་གསུངས་ཀྱི། གདིང་བ་ལ་ནི་མ་ཡིན་ཏེ། བསམས་བཞིན་དུ་མི་འགྲོ་ཡི། བརྗེད་པ་ལ་ནི་ཉེས་པ་མེད་དོ་ཞེས་པ། གདིང་བ་དང་བྲལ་བ་སོགས་སོ། །དགེ་སློང་ཞིག་བྱ་བ་ཞིག་གི་ཆེད་དུ་གཙུག་ལག་ཁང་གཞན་དུ་སོང་བ་དང་ནམ་སྲོས་ནས་ཞལ་ཏ་བས། གནས་མལ་ནོས་ཤིག །གདིང་བ་མེད་དོ། །ཁྲི་པརླིང་བ་ནོས་ཤིག །མནོས་ནས་ཉལ་བས་གྲང་ནས་ན་བའི་སྐབས་དེ་གསོལ་བས། གདིང་བ་མེད་པར་མི་འགྲོའོ། །དགེ་སློང་དེང་ཉིད་ལྡོག་པ་དང༌། འགྲོ་བ་དང༌། འཆག་པས་ཀྱང་གདིང་བ་ཁྱེར་བས་རྒན་པོ་དང་ནད་པ་རྣམས་ཉམ་ཐག་ནས། གསོལ་བས། ཉེ་འཁོར་དུ་འཆག་པ་དང༌། ཉིན་མོ་སྤྱོད་དུ་འགྲོ་བ་དང༌། དེང་ཉིད་སོགས་སོ། །དགེ་སློང་དེང་ལྡོག་པའི་བསམ་པས་སོང་བ་ན་བྱ་བ་འགའ་ཞིག་གི་དབང་གིས་ནམ་སྲོས་ནས། དེ་བསླབ་པ་ལ་གུས་པས་ཕྱིར་ལོག་པས་སྟག་དང་ཆོམ་རྐུམ་གྱིས་བཅོམ་ནས། གསོལ་བས། དེ་ལྟར་བསམས་ཞེས་པ་ནས། མི་ཉལ་བར་རོ། །དགེ་སློང་ཀུན་དགའ་མཆིན་ནད་ཅན་དགེ་སློང་མེད་པའི་གནས་སྒོ་འཕར་མེད་པ་ཞིག་ཏུ་དབྱར་གནས་པ་དང༌། དེས་ཕྱིར་སོང་བས་རྐུན་པོས་སྣམ་སྦྱར་ཁྱེར་ནས། གསོལ་བས། དགེ་སློང་མེད་པའི་གནས་སྒོ་འཕར་མེད་པར་དབྱར་མི་གནས་ཤིང༌། སྣམ་སྦྱར་མེད་པར་འགྲོ་བར་མི་བྱའོ། །ཀུན་དགའ་མཆིད་ནད་ཅན་ན་བའི་ནད་གཡོག་ཀུན་དགའ་བོས་བྱེད་པ་ན་ཆར་བབ་སྟེ་སྣམ་སྦྱར་གྱོན་ཅིང་འགྲོ་བར་མི་སྤྲོ་ནས། གསོལ་བས། བླ་གོས་དང་མཐང་གོས་ཀྱིས་འགྲོ་ཡི། སྣམ་སྦྱར་གཞག་ཏུ་རུང་བའི་གནས་ནི་ལྔ་སྟེ། དགེ་སློང་དང་བཅས་པའི་གནས་སྒོ་འཕར་དང་བཅས་པ་དང༌། ཆར་འབབ་པ་དང༌། ཆར་འབབ་ཀྱིས་དོགས་པ་དང༌། ཆུ་ཀླུང་གི་ཕ་རོལ་ཏུ་འགྲོ་བ་དང༌། སྲ་བརྐྱང་བཏིང་བ་དང༌། གནང་བ་ཐོབ་པའོ། །དགེ་སློང་དག་དེང་ཕྱིར་ལྡོག་པའི་བསམ་པས་སོང་ནས་བྱ་བའི་དབང་(༡༥༢བ)གིས་ནམ་སྲོས་པ་དང༌། བསླབ་པ་ལ་གུས་པས་མཚན་མོ་ལོག་པ་ན་སྟག་དང་ཆོམ་རྐུན་གྱིས་བཅོམ་ནས། གསོལ་བས། གནས་སུ་སོགས་སོ། །སྟོན་པ་མཉན་ཡོད་ནའོ། །དགེ་སློང་རྣམས་ཀྱིས་དབྱར་གོས་མང་པོ་རྙེད་ནས་བམ་པོར་སྦྲེས་ཏེ་གཉུག་མར་གནས་པ་རྣམས་ལ་གཏད་ནས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུ་རུ་སོང་བ་ན་གཉུག་མར་གནས་པ་རྣམས་ཆོས་གོས་དེ་དག་སྐེམས་པ་དང་གསེང་བ་དང་གདིང་བ་དང་སྤྲུག་པ་དང་བརྟུལ་བ་དང་སྦེད་པས་བྱ་བ་མངས་ཏེ། ལུང་ནོད་པ་དང་བསམ་གཏན་ལ་གནོད་ནས་དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། དགེ་སློང་དག །ཁྱེད་ལ་ཆོས་གོས་མང་པོ་བྱུང་སྟེ་ལུང་ནོད་པ་སོགས་ལ་གནོད་པ་བདེན་ནམ། བཙུན་པ། མད་དོ། །གསོ་དཀའ་བ་སོགས་སྨད། གསོ་སླ་བ་སོགས་ཀྱི་བསྔགས་པ་བརྗོད་ནས། དེ་ལྟ་བས་ན་ཕན་ཡོན་བཅུ་སོགས། འདུལ་བ་ལ་ཉན་ཐོས་རྣམས་ཀྱིས་བསླབ་པའི་གཞི་འདི་ལྟར་བཅའ་བར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་གལ་ཏེ་ནུབ་གཅིག་ཀྱང་ཆོས་གོས་གསུམ་ལས་ཆོས་གོས་གང་ཡང་རུང་བ་དང་མཚམས་ཀྱི་ཕྱི་རོལ་ཏུ་འབྲལ་བར་བྱེད་ནས་སྤང་བའི་ལྟུང་བྱེད་དོ། །སྟོན་པ་འོད་མའི་ཚལ་ནའོ། །དེའི་ཚེ་འོད་སྲུངས་ཆེན་པོ་རྒྱལ་པོའི་ཁབ་སྡེ་ཅན་མའི་ཕུག་ན་གསོ་སྦྱོང་གཅིག་པའི་གནས་ཀྱི་སྡོམ་པས་དགེ་འདུན་དང་མཐུན་པར་འདུག་གོ །དགེ་སློང་རྣམས་གསོ་སྦྱོང་གི་ཚེ་གསོ་སྦྱོང་གི་གནས་སུ་འདུག་ཅིང་གཙོ་ཆེར་འོད་སྲུངས་ཆེན་པོ་འོང་བ་ལ་སྡོད་དོ། །དེས་གསོ་སྦྱོང་གི་ཚེ་ཆུ་ཀླུང་དབྱར་བཟང་ལྡན་བརྒལ་བ་དང༌། ཆུ་རླབས་ཆེན་པོས་སྣམ་སྦྱར་གཤེར་བར་གྱུར་ནས་དེ་འཚིར་བ་དང་གདིང་བ་དང་སྐེམས་པས་ཡུན་རིང་པོ་ཐོགས་ཏེ་སོང་བ་དང༌། དགེ་སློང་རྣམས་ཀྱིས། འོད་སྲུངས་ཆེན་པོ། མཁྱེན་པར་མཛོད་ཅིག །འདི་ན་བདག་ཅག་རྣམས་གསོ་སྦྱོང་གི་གནས་སུ་འདུག་ནས་གཙོ་ཆེར་ཁྱེད་ལ་སྡོད་ན་འོན་ཀྱང་འཕྱིས་པར་གྱུར་ཏོ། །དེས། དོན་འདི་ལ་ཡུན་རིང་དུ་ཐོགས་ཏེ། བདག་རྒས། སྣམ་སྦྱར་ནི་ལྕི་བས་སྐྱོད་པར་རྔོ་མི་ཐོག་ན། བདག་གིས་ཇི་ལྟར་བགྱི་ཟེར་བའི་སྐབས་དེ་གསོལ་བས། དགེ་སློང་དག །ཁྱོད་ཀྱིས་འོད་སྲུངས་ཆེན་པོ་རྒན་པོ་རྒས་པ་དང༌། གཞན་ཡང་དེ་ལྟ་བུ་ལ་སྣམ་སྦྱར་དང་མི་འབྲལ་བའི་གནང་བ་བྱིན་ཅིག །བྱིན་ན་དེས་སྟོད་གཡོགས་དང་སྨད་གཡོགས་དང་བཅས་པས་ལྗོངས་རྒྱུར་འགྲོ་བར་བྱ་སྟེ་འདི་ལ་འགྱོད་པར་མི་བྱའོ། །དེའི་ཚེ་ཤཱ་རིའི་བུས་དགེ་སློང་རྣམས་ལ། ད་ལྟར་བདག་རླུང་ནད་ཅན་ལགས་ལ། བདག་གི་སྣམ་སྦྱར་ལྕི་བས་སྐྱོད་པར་རྔོ་མི་ཐོག་ན། བདག་གིས་ཇི་ལྟར་བགྱི་ཟེར་བའི་སྐབས་དེ་གསོལ་བས། དགེ་སློང་དག །ཁྱེད་ཀྱིས་ཤཱ་རིའི་བུ་རླུང་ནད་ཅན་དང༌། གཞན་ཡང་དེ་ལྟ་བུ་ལ་སྣམ་སྦྱར་དང་མི་འབྲལ་(༡༥༣ན)བའི་གནང་བ་བྱིན་ཅིག །སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ནོ། །
ཟླ་འཇོག་གི་སྤང་བ་ནི། སྟོན་པ་མཉན་ཡོད་ནའོ། །དགེ་སློང་མང་པོ་གོས་སྔོན་པོ་ཞིག་རྙེད་ནས། འདི་དང་འདྲ་བ་ཞིག་རྙེད་པའི་ཚེ་གོས་བྱའོ་སྙམ་དུ་རེ་བས་འཇོག །སེར་པོ་དང་དམར་པོ་དང་སྟུག་པོ་དང་སྲབ་མོའང་དེ་བཞིན་ནོ། །དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ནས། དུས་མ་ཡིན་པའི་གོས་ཤིག་རྙེད་ལ་འདོད་ན་དགེ་སློང་དེས་གོས་དེ་བླང་བར་བྱའོ། །བླངས་ནས་གལ་ཏེ་ལྡངས་ནས་མྱུར་བ་ཁོ་ནར་གོས་སུ་བྱས་ཏེ་བཅང་བར་བྱའོ། །གལ་ཏེ་མི་ལྡངས་ལ། ལྡངས་པ་ཁ་སྐོང་བའི་གོས་ལ་རེ་བ་ཡོད་ན་དགེ་སློང་དེས་གོས་དེ་ཟླ་བ་གཅིག་གི་མཐར་གཞག་པར་བྱའོ། །དེ་ལས་འདས་པར་འཇོག་ན་སྤང་བའི་ལྟུང་བྱེད་དོ། །ཉེ་བར་འཁོར་གྱིས། བཙུན་པ། ཁྲུ་ཐུང་ལ་ལུས་རིང་བ་དང༌། ལུས་ཐུང་ལ་ཁྲུ་རིང་བས་ཆོས་གོས་ཁྲུ་ཚད་དུ་བགྱིའམ། ལུས་ཀྱི་ཚད་དུ་གྱིས་ལ། ལུས་ཀྱང་ཆེ་ཁྲུ་ཡང་ཆེ་ན་ཁྲུའི་ཚད་དུ་གྱིས་ཤིག །བཙུན་པ། གང་ལ་ཆོས་གོས་ཀྱི་ཚད་མི་ལྡངས་ན་ཇི་ལྟར་བགྱི། གོང་ལུགས་སུ་གྱིས་ལ་ཆོངས་ཞེས་པ། མི་ཡོགས་ན་རལ་ག་དཔུང་ཆད་བྱའོ། །
འཁྲུར་འཇུག་གི་སྤང་བ་ནི། བྱང་ཆུབ་སེམས་དཔའ་དགའ་ལྡན་ན་བཞུགས་པས། རིགས་དང༌། ཡུལ་དང༌། དུས་དང༌། རུས་དང༌། བུད་མེད་ལ་གཟིགས་པ་དག་གིས་འཇིག་རྟེན་ལ་གཟིགས་ནས་གླང་པོ་ཆེར་སྣང་བར་བསྒྱུར་ཏེ་ཡུམ་གྱི་ལྷུམས་སུ་ཞུགས་པའི་ཚེ་ས་གཡོས་ཤིང་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །ཟླ་བ་བཅུ་འདས་ནས་བལྟམས་པའི་ཚེའང་ས་གཡོས་ཤིང་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །བྱང་ཆུབ་སེམས་དཔའ་བལྟམས་པ་དེའི་ཉིན་མོ་མཉན་ཡོད་དུ་རྒྱལ་པོ་རྩིབས་ཀྱིས་འཕུར་ཚངས་བྱིན་གྱི་བུ་གསལ་རྒྱལ་དང༌། རྒྱལ་པོའི་ཁབ་ཏུ་པད་མ་ཆེན་པོའི་བུ་གཟུགས་ཅན་སྙིང་པོ་དང༌། ཀོའུ་ཤཱམྦཱིར་རྒྱལ་པོ་དམག་བརྒྱ་བའི་བུ་ཤར་པ་དང༌། འཕགས་རྒྱལ་དུ་རྒྱལ་པོ་མུ་ཁྱུད་མཐའ་ཡས་ཀྱི་བུ་རབ་སྣང་རྣམས་བཙས་སོ། །རྒྱལ་པོ་རེ་རེས་ཀྱང༌། འདི་ནི་བདག་གི་བུའི་མཐུ་ཡིན་ནོ་སྙམ་མོད། དེ་ལྟ་མ་ཡིན་ཏེ། དེ་ཐམས་ཅད་བྱང་ཆུབ་སེམས་དཔའི་མཐུ་ཡིན་པའི་ཕྱིར་རོ། །བྱང་ཆུབ་སེམས་དཔའ་བལྟམས་པའི་ཉིན་མོ་ཤཱཀྱ་གཞོན་ནུ་བཟང་ལྡན་ལ་སོགས་པ་ལྔ་བརྒྱའང་བཙས་སོ། །བསྙེན་བཀུར་བ་འདུན་བྱེད་ལ་སོགས་པ་ལྔ་བརྒྱའ་བཙས་སོ། །རྒོད་མ་ལྔ་བརྒྱ་ལས་ཀྱང་རྟེའུ་བསྔགས་ལྡན་ལ་སོགས་པ་ལྔ་བརྒྱ་འབྲངས་སོ། །ལྷ་རྣམས་ཀྱིས་ཀྱང་གཏེར་ལྔ་(༡༥༣བ)བརྒྱ་ཉེ་བར་བསྟན་ཏོ། །བྱང་ཆུབ་སེམས་དཔའ་དེ་བྲམ་ཟེ་ལྟས་པ་དང༌། མཚན་མཁན་དག་གིས་ལུང་བསྟན་པ། གཞོན་ནུ་ཕོ་བྲང་གི་ནང་ན་བཞུགས་ན་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་རོ། །འདི་ལ་བུ་དཔའ་བ། བརྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡོད་པར་འགྱུར་རོ། གལ་ཏེ་རབ་ཏུ་བྱུང་ན་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །
དེ་ལྟར་བསྟན་པ་ཐམས་ཅད་དུ་གྲགས་ནས། ཉི་འོག་གི་རྒྱལ་པོ་དག་འདི་སྙམ་དུ། འདི་འཁོར་ལོས་སྒྱུར་པའི་རྒྱལ་པོར་འགྱུར་བས་ད་ལྟ་བསྟེན་ན་དུས་སུ་འབྲས་བུ་སྟེར་རོ་སྙམ་མོ། །རྒྱལ་པོ་ཟས་གཙང་བསྟེན་ན་གཞོན་ནུ་བསྟེན་པར་འགྱུར་རོ་སྙམ་ནས། རྒྱལ་པོ་ཟས་གཙང་ལ་དུས་དུས་སུ་བདུད་པས་ཕོ་ཉ་དང༌། དཀོན་སྒྲོམ་དག་འབུལ་ལོ། །རྒྱལ་པོ་ཟས་གཙང་འདི་སྙམ་དུ། བདག་གི་བུ་བཙས་པ་ན་དོན་ཐམས་ཅད་གྲུབ་པས་གཞོན་ནུའི་མིང་དོན་ཐམས་ཅད་གྲུབ་པ་ཞེས་གདགས་སོ་སྙམ་ནས་དེ་ལྟར་བཏགས་སོ། །བྱང་ཆུབ་སེམས་དཔའ་ཆེན་པོར་འཁྲུངས་ཤིང༌། རྒན་པོ་དང༌། ནད་པ་དང༌། ཤི་བ་གཟིགས་པས་ཐུགས་བྱུང་སྟེ་ནགས་ཀྱི་ནང་དུ་གཤེགས་པའི་ཚེ་ཉི་འོག་གི་རྒྱལ་པོ་དག་གིས་གཞོན་ནུ་དོན་ཐམས་ཅད་གྲུབ་པ་རབ་ཏུ་བྱུང་བ་ཐོས་ནས། ཀོ་ས་ལའི་རྒྱལ་པོ་གསལ་རྒྱལ་མ་གཏོགས་པས་འདུད་པ་རྒྱུན་བཅད་དོ། །རྒྱལ་པ་གསལ་རྒྱལ་ལ་བློན་པོའི་མཆོག་སྦེད་པ་ཞེས་བྱ་བ་ཡོད་ལ། ཟས་གཙང་ལ་མདུན་ན་འདོན་གྱི་བུ་འཆར་ཀ་ཞེས་བྱ་བ་ཡོད་དེ། གསལ་རྒྱལ་ཟས་གཙང་གི་གན་དུ་ཕོ་ཉ་གཏོང་བའི་ཚེ་སྦེད་པ་གཏོང་ཞིང་བྱ་བ་བྱས་ནས་འཆར་ཀའི་ཁྱིམ་དུ་འཇུག་གོ །ཟས་གཙང་གིས་གསལ་རྒྱལ་གྱི་གན་དུ་ཕོ་ཉ་གཏོང་བའི་ཚེ་འཆར་ཀ་གཏོང་ཞིང་དེས་ཀྱང་བྱ་བ་བྱས་ནས་སྦེད་པའི་ཁྱིམ་དུ་འཇུག་གོ །སྦེད་པ་ལ་ཆུང་མ་སྦེད་མ་ཞེས་བྱ་བ། གཟུགས་བཟང་བ། བལྟ་ན་སྡུག་པ། མཛེས་པ། སྐྱེས་བུ་དགའ་བ་ཞིག་ཡོད་པ་དང་འཆར་ཀ་ལྷན་ཅིག་ཁ་དུམ་པར་གྱུར་ཏོ། །དེ་སྦེད་པས་ཤེས་ནས་གསད་དམ་སྙམ་པ་དང༌། འདི་བསད་ན་ཡུལ་འཁོར་གཉིས་འཁྲུག་པ་ཆེན་པོར་འགྱུར་བས་བདག་གིས་བུད་མེད་ཀྱི་ལུས་ཀྱི་ཕྱིར་ཅིའི་ཕྱིར་བྲམ་ཟེ་གསད་སྙམ་ནས་བཏང་སྙོམས་སུ་བཞག་གོ །འཆར་ཀས། བདག་སྦེད་པས་འཕྲིགས་སོ་སྙམ་ནས་སྐྲག་སྟེ་ཁྱིམ་གཞན་ན་འདུག་པ་དང༌། སྦེད་པས། ཁྱོད་ཅིའི་ཕྱིར་རང་གི་ཁྱིམ་སྤངས་ཏེ་གཞན་དུ་འདུག །ཚུར་ཤོག །འདི་ཁྱོད་ཀྱི་ཁྱིམ་ཡིན་གྱིས་ཅི་བདེར་འདུག་ཅིག །འཆར་ཀའི་བསམ་པ་ལ། དོན་གྱིས་ན་འདིས་བདག་ལ་རྗེས་སུ་གནང་ངོ་སྙམ་ནས་དེ་ཉིད་ན་འདུག་གོ །རེ་ཞིག་ན་སྦེད་པ་ཤི་ནས་གསལ་རྒྱལ་གྱིས། དེ་ལ་བུ་མེད་པས་ནོར་ཐམས་ཅད་རང་གི་བང་བར་བཅུག་(༡༥༤ན)གོ །སྦེད་མས་འཆར་ཀ་ལ། བདག་གི་ཁྱིམ་ཐབ་གསོན་པའི་ཚེ་ཁྱོད་རྟག་པར་འབྱོན་ན། ད་དེ་ཤི་ནས་བུ་མེད་པས་ནོར་ཐམས་ཅད་རྒྱལ་པོའི་བང་བར་བཅུག་ན་ཡི་གེ་ཙམ་ཡང་མི་སྤྲིང་ངམ་ཞེས་ཡི་གེ་སྤྲིངས་པ་དང༌། བདག་དེར་སོང་ན། འཆར་ཀ་བུད་མེད་ཀྱི་ཕྱིར་དེར་སོང་ངོ་ཞེས་ཁ་ཟེར་བར་འགྱུར་བས་ཐབས་ཤིག་བྱའོ་སྙམ་སྟེ་ཟས་གཙང་གི་གན་དུ་ཕྱིན་ནས། ལྷ། གཞོན་ནུ་དོན་ཐམས་ཅད་གྲུབ་པ་བལྟམས་པའི་ཚེ་ཉི་འོག་གི་རྒྱལ་པོ་ཐམས་ཅད་འདུད་ལ། གཞོན་ནུ་ནགས་སུ་གཤེགས་པའི་ཚེ་གཞན་གྱིས་སྐྱེས་བཀུར་བ་ཆད། གསལ་རྒྱལ་གྱིས་མ་ཆད་པས་འོ་སྐོལ་གྱིས་ཡལ་བར་བོར་བ་མི་རིགས་སོ། །
དེ་ལྟ་ན་ཁྱོད་ཉིད་ཕོ་ཉར་སོང་ཞིག །ལྷ། བཀའ་བཞིན་འཚལ་ཟེར་ནས་མཉན་ཡོད་དུ་ཕྱིན་ཏེ། དང་པོར་བློན་པོ་རྣམས་ལྟ་ཞིང་དེའི་འོག་ཏུ་རྒྱལ་པོ་བལྟས་ཏེ་སྦེད་མའི་ཕྱིར་རྒྱལ་པོ་ལ་གསོལ་ལོ་སྙམ་ནས་དེས་བློན་པོ་རྣམས་ལ་སྨྲས་པ། ཁྱེད་ཀྱིས་ཁོ་བོ་སྦེད་མ་དང་ལྷན་ཅིག་བཞེས་པ་དེ་མི་ཤེས་སམ། དེའི་ཁྱིམ་ཐབ་ཤི་ནས་བུ་མེད་པས་ནོར་ཐམས་ཅད་རྒྱལ་པོའི་བང་བར་བཅུག་པས་ཁོ་བོ་རྒྱལ་པོ་ལ་གསོལ་གྱིས་གྲོགས་གྱིས་ཤིག །དེ་དག་གིས་ཁས་བླངས་སོ། །དེ་ནས་འཆར་ཀས་རྒྱལ་པོའི་གན་དུ་སོང་ནས། རྒྱལ་པོ་ལ། རྒྱལ་བ་དང་ཚེ་སྤེལ་བ་བྱས་ཏེ། མཐའ་གཅིག་ཏུ་འདུག་ནས་རྒྱལ་པོའི་བྱ་བ་དག་བྱས་ཏེ། ལྷ། བདག་གི་གནས་སྩོལ་ཅིག །ཁྱོད་སྔོན་གང་དུ་ཞུགས། སྦེད་པའི་ཁྱིམ་དུའོ། །སོང་ལ་དེ་ཉིད་དུ་ཞུགས་ཤིག །དེ་ཤིའོ། །དེ་ཤི་ན་དེའི་ཁྱིམ་ཡང་ཤིའམ། དེའི་ཁྱིམ་ནི་མ་ཤི་མོད། དེ་ན་སྟན་ཙམ་ཡང་མ་མཆིས་སོ། །རྒྱལ་པོས་བློན་པོ་རྣམས་ལ། འཆར་ཀའི་གནས་བྱིན་ཅིག །དེ་ཕྱིར་ཕྱུང་བ་དང༌། བློན་པོ་རྣམས་ཀྱིས། ལྷ། འཆར་ཀ་ལ་གནས་མ་མཆིས་སྙམ་མམ། དོན་གྱིས་ན་འཆར་ཀས་སྦེད་མའི་སླད་དུ་ལྷ་ལ་གསོལ་གྱིས། འདི་ཟས་གཙང་གི་མདུན་ན་འདོན་ཡིན་པས་འདི་བཟུང་ན་རྒྱལ་པོ་ཟས་གཙང་བཟུང་བར་འགྱུར་རོ། །
དེ་ནས་རྒྱལ་པོས་འཆར་ཀ་ལ་སྦེད་མ་ནོར་དང་བཅས་པ་བྱིན་ནོ། །འཆར་ཀ་སྦེད་མའི་ཁྱིམ་དུ་སོང་བ་དང་སྦེད་མས་ཐོས་ནས་སྒོ་ཁང་དུ་འདུག་སྟེ་ངུས་པ་དང་འཆར་ཀས། ཁྱོད་ཅིའི་ཕྱིར་ངུ་། བདག་གི་ཁྱིམ་ཐབ་ཤི་ན་ཁྱོད་ཀྱིས་ཀྱང་བཏང་ངམ། མཐུན་པར་སྨྲས་ན་ཤིན་ཏུ་ཡང་ངུ་བས་ཚར་གཅད་དོ་སྙམ་ནས་བྱང་ཆུབ་སེམས་དཔའ་དཀའ་བོ་སྤྱོད་པས་གྲགས་འཛིན་མ་དང་ས་འཚོ་མ་ལ་སོགས་པ་བུད་མེད་དྲུག་ཁྲི་སྤངས་ཏེ་རབ་ཏུ་བྱུང་བ་དེ་དག་གི་རྐང་པའི་རྡུལ་ཙམ་དུའང་ཁྱོད་ཀྱིས་མི་ཕོད་དོ། །དེ་ཅང་མི་སྨྲ་བ་དང༌། ཁོ་བོས་ཁྱོད་མ་བཏང་བས་ཁྱོད་ཀྱི་ཕྱིར་འདིར་འོངས་ཤིང་རྒྱལ་པོ་ལས་ཁྱོད་(༡༥༤བ)ནོར་དང་བཅས་པ་ཐོབ་ན་ཁྱོད་འདི་ཉིད་དུ་འདུག་གམ། སེར་སྐྱའི་གནས་སུ་འགྲོ། སེར་སྐྱར་སོང་ན་བྲམ་ཟེ་མོ་ལས་སྲོག་ཀྱང་མི་འཐོབ་བོ་སྙམ་ནས། འདི་ཉིད་དུ་མཆིས་སོ་ཞེས་སྨྲས་ནས་དེ་ཉིད་དུ་འདུག་གོ །དེའི་ཚེ་འཆར་ཀ་ལ་ཁྱིམ་གཉིས་ཡོད་དོ། །བྱང་ཆུབ་སེམས་དཔས་ལོ་དྲུག་ཏུ་དཀའ་བ་སྤྱད་དེ། དཀའ་བ་བྱེད་པ་དེ་ཅི་ཡང་མེད་པར་རིག་ནས་ཅི་བདེར་དབུགས་དབྱུང་རྔུབ་མཛད། ཞལ་ཟས་རྒྱ་ཆེན་པོ་གསོལ། གྲོང་སྡེ་འདོད་དུ་གཤེགས་ནས་དགའ་མོ་དང་དགའ་སྟོབས་མ་གཉིས་ཀས་ལན་བཅུ་དྲུག་བཟླས་པའི་འོ་མ་སྦྲང་རྩི་དང་བསྲེས་པ་གསོལ་ཏེ་ཀླུའི་རྒྱལ་པོ་ནག་པོས་མངོན་པར་བསྟོད་པ་ན་རྩྭ་འཚོང་བཀྲ་ཤིས་ལས་རྩྭ་གསེར་གྱི་མདོག་ལྟ་བུ་བཞེས་ནས་བྱང་ཆུབ་ཀྱི་གཞིར་གཤེགས་ཏེ་རྩྭ་མ་འཁྲུགས་པའི་གདན་ལ་སྐྱིལ་ཀྲུང་བཅས། སྐུ་དྲང་པོར་བསྲངས་ནས། ཇི་སྲིད་ཟག་མེད་མ་ཐོབ་པ། །དེ་སྲིད་སྐྱིལ་ཀྲུང་གཞིག་མི་བྱ། །དེ་ཡིས་ཇི་སྲིད་ཟག་མེད་པ། །མ་བརྙེས་སྐྱིལ་ཀྲུང་འཇིག་མི་མཛད། །ཅེས་གསུངས་ནས། གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང་བྱེ་བ་དྲུག་གི་འཁོར་དང་བཅས་པ་བྱམས་པས་བཏུལ་ཏེ་བླ་ན་མེད་པའི་མཁྱེན་པ་ཐུགས་སུ་ཆུད་ནས་ཚངས་པས་གསོལ་ཏེ་ཝཱ་ར་ཎཱ་སཱིར་ཆོས་འཁོར་བསྐོར་ནས། ལྔ་སྡེ་དང༌། ཉེ་བའི་ལྔ་སྡེ་དང༌། གྲོང་བའི་ཁྱེའུ་མཐོ་བ་ལྔ་བཅུ་བཏུལ། ཀར་པ་སིའི་ཚལ་གསེབ་ཏུ་གཤེགས་ནས་བཟང་སྡེའི་ཚོགས་དྲུག་ཅུ་བདེན་པ་ལ་བཀོད། གྲོང་སྡེ་འདོད་དུ་དགའ་མོ་དང་དགའ་སྟོབས་མ་གཉིས་བདེན་པ་ལ་བཀོད། ལྟེང་རྒྱས་སུ་རལ་པ་ཅན་སྟོང་རབ་ཏུ་བྱུང་ཞིང་བསྙེན་རྫོགས་མཛད། ག་ཡ་མགོའི་མཆོད་རྟེན་དུ་སྟོང་པོ་དེ་དག་ལ་ཆོ་འཕྲུལ་གསུམ་གྱིས་གདམས་ནས་མྱང་འདས་ལ་བཀོད། ཤ་པའི་ཚལ་གསེབ་ཏུ་གཟུགས་ཅན་སྙིང་པོ་ལྷ་བརྒྱད་ཁྲི་དང༌། བྲམ་ཟེ་དང་ཁྱིམ་བདག་འབུམ་ཕྲག་དུ་མ་དང་ལྷན་ཅིག་བདེན་པ་ལ་བཀོད། རྒྱལ་པོའི་ཁབ་ཏུ་འོད་མའི་ཚལ་བཞེས་ནས་མཆོག་ཟུང་འཁོར་ཉིས་བརྒྱ་ལྔ་བཅུ་དང་བཅས་པ་རབ་བྱུང་བསྙེན་རྫོགས་མཛད། མཉན་ཡོད་དུ་རྒྱལ་བྱེད་ཚལ་བཞེས་ནས་རྒྱལ་པོ་གསལ་རྒྱལ་གཞོན་ནུའི་དཔེའི་མདོས་བཏུལ་ཏེ་མཉན་ཡོད་ན་བཞུགས་སོ། །
དེ་ནས་གསལ་རྒྱལ་གྱིས་ཟས་གཙང་གི་གན་དུ་ཕོ་ཉ་བཏང་སྟེ། ལྷ། དགྱེས་པ་སྐྱེད་ཅིག །ཁྱོད་ཀྱི་སྲས་ཀྱིས་བདུད་རྩི་ཐུགས་སུ་ཆུད་དེ་བདུད་རྩིས་འགྲོ་བ་ཚིམ་པར་མཛད་ཅིང་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ་ཞེས་སྤྲིངས་སོ། །ཟས་གཙང་གིས་ཐོས་ནས་ཕོ་ཉ་བཏང་སྟེ། བདག་གིས་གཞོན་ནུ་རིང་དུ་མ་མཐོང་བས་མཐོང་འདོད་དོ་ཞེས་གསོལ་བ་དང༌། ཕོ་ཉ་དེ་ཉིད་དུ་རབ་ཏུ་བྱུང་ངོ༌། །སྟོན་པའི་ཆོས་འདུལ་བ་ནི་ལེགས་པར་གསུངས་པ་ཡིན་པས་ཕོ་ཉར་བཏང་བ་ཐམས་ཅད་དེ་ཉིད་དུ་རབ་ཏུ་(༡༥༥ན)བྱུང་ངོ༌། །དེ་ཟས་གཙང་གིས་ཐོས་ནས་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་པ་འཆར་ཀས་མཐོང་ནས། ཅིའི་སླད་དུ་དེ་ལྟར་མཛད། འདིའི་ཕྱིར་རོ། །འཆར་ཀས་སྨྲས་པ། ལྷ། བདག་ལ་བཀའ་སྩལ་དུ་གསོལ། ཁྱོད་ཀྱང་དེར་འདུག་པར་འགྱུར་རོ། །བདག་གིས་ལྷའི་སྤྱན་སྔར་བཀའ་མཆིད་འཚལ་ཏེ་མཆིའོ། །ཟས་གཙང་གིས། མངལ་རུམ་བཞུགས་པ་ཚུན་ཆད་ནས། །བདག་གིས་ལེགས་པར་ཁྱོད་བསྲུངས་ཏེ། །ཉོན་མོངས་གདུགས་ཀྱིས་རབ་གདུངས་པས། །རྒྱལ་པོའི་ལྗོན་ཤིང་སྡོད་ཅིང་མཆིས། །སློབ་མའི་ཡལ་ག་རྩ་ལག་གིས། །ད་ལྟར་ཁྱོད་ནི་རྒྱས་གྱུར་པས། །གཞན་དག་བདེ་བས་དགའ་མཛད་ན། །བདག་ནི་སྡུག་བསྔལ་བསྟེན་པར་གྱུར། །གང་ཚེ་དང་པོ་ཁྱོད་བསྲུངས་ཚེ། །ཤིན་ཏུ་དོན་ཆེན་མཛད་ནས་ནི། །ཉེ་དུ་རྗེས་སུ་གཟུང་མཛད་ཅེས། །དེ་ཚེ་ཁྱོད་ཀྱིས་ཐུགས་དམ་བཅས། །དེ་སླད་གོ་འཕང་ཞི་བརྙེས་ཁྱོད། །བདག་དང་ཉེ་དུའི་ཚོགས་རྣམས་ལ། །རྗེས་སུ་ཐུགས་བརྩེ་ཉེར་བཟུང་སྟེ། །འབྱོན་པའི་བློ་གྲོས་མཛད་དུ་གསོལ། །ཞེས་བྲིས་པ་ཁྱེར་ནས་སྟོན་པ་ལ་ཕུལ་པ་དང༌། སྟོན་པ་ཉིད་ཀྱིས་འཕྲིན་ཡིག་ཀློག་པ་མཛད་ནས། འཆར་ཀས་གསོལ་བ། སྟོན་པ་སེར་སྐྱའི་གནས་སུ་གཤེགས་སམ། འོང་ངོ༌། །འཆར་ཀ་སྔོན་གྱི་གཅུགས་པ་དེ་ཉིད་ཀྱིས་གསོལ་བ། སྟོན་པ་མི་གཤེགས་ན་བདག་གི་མཐུས་བཀྲིའོ། །སྟོན་པས། གང་ལ་འཁྲིད་བྱེད་སྲེད་པ་ཡི། །དྲ་བཀྲམ་གང་ལ་ཡོད་མིན་པ། །སྤྱོད་པས་གཞི་མེད་སངས་རྒྱས་དེ། །གང་གི་གཞིར་ནི་འཁྲིད་པར་བྱེད། །ཅེས་སོགས་གསུངས་སོ། །
འཆར་ཀས། བདག་ཟས་གཙང་ལ་རྗོད་དུ་མཆིའོ། །རྒྱལ་བའི་ཕོ་ཉ་ནི་དེ་ལྟ་བུ་མ་ཡིན་ནོ། །འོ་ན་ཇི་ལྟ་བུ་ལགས། རབ་ཏུ་བྱུང་བ་ཡིན་ནོ། །བདག་གིས་ཟས་གཙང་ལ་སླར་མཆི་བར་ཁས་བླངས་སོ། །རབ་ཏུ་བྱུང་སྟེ་སོང་ཞིག །སྟོན་པས་སྔོན་ཡབ་ཡུམ་མཁན་སློབ་ཀྱི་ཚིག་མ་བཅག་པས། བཀའ་སྩལ་མ་ཐག་ཏུ་འཆར་ཀས། བདག་རབ་ཏུ་འབྱུང་ངོ༌། །སྟོན་པས་ཤཱ་རིའི་བུ་ལ། འཆར་ཀ་རབ་ཏུ་བྱུང་ཞིག །དེ་ནི་འདི་ལ་ཡུན་རིང་པོར་ཕན་པ་དང་བདེ་བར་འགྱུར་རོ། །དེས་དེ་རབ་བྱུང་བརྙེན་རྫོགས་བྱས་ཏེ། འདི་ནི་བྱ་བ། འདི་ནི་བྱ་བ་མ་ཡིན་ནོ། །ཁྱོད་ཀྱིས་དེང་ཕྱིན་ཆད་བུད་མེད་དང་ལྷན་ཅིག་ཁྱིམ་གཅིག་ཏུ་ཉལ་བར་མི་བྱའོ་ཞེས་སོགས་ཀུན་ཏུ་སྤྱོད་པའི་ཆོས་ཐམས་ཅད་བརྗོད་དོ། །འཆར་ཀས་སྟོན་པའི་དྲུང་དུ་སོང་ནས། བདག་སེར་སྐྱར་མཆིའོ། །ཁྱོད་ཀྱིས་ཚམ་ཚོམ་མེད་པར་ཕོ་བྲང་དུ་མ་འཇུག་པར་སྒོར་འགྲེང་སྟེ། ཤཱཀྱའི་དགེ་སློང་འོངས་སོ་ཞེས་རྗོད་ཅིག །ཤཱཀྱའི་དགེ་སློང་གཞན་དག་ཀྱང་ཡོད་དམ་ཞེས་འདྲི་ན། ཡོད་དོ་ཞེས་བརྗོད། གལ་ཏེ་(༡༥༥བ)ཞུགས་ཤིག་ཟེར་ན་འཇུག་པར་བྱའོ། །གལ་ཏེ། གཞོན་ནུ་དོན་གྲུབ་ཀྱང་ཆ་ལུགས་འདི་འདྲ་ཡིན་ནམ་ཟེར་ན། ཡིན་ནོ་ཞེས་རྗོད་ཅིག །ཁྱོད་ཀྱིས་རྒྱལ་པོའི་ཕོ་བྲང་དུ་མ་གནས་ཤིག །གཞོན་ནུ་དོན་གྲུབ་ཀྱང་ཕོ་བྲང་དུ་གནས་མི་འཆའ་འམ་ཟེར་ན། མི་འཆའ་འོ་ཞེས་བརྗོད། འོ་ན་གང་དུས་གནས་འཆའ་ཞེས་འདྲི་ན། དགོན་པའམ་གཙུག་ལག་ཁང་དུའོ་ཞེས་བརྗོད། གཞོན་ནུ་དོན་གྲུབ་འོང་ངམ་ཞེས་འདྲི་ན། འོང་ངོ་ཞེས་བརྗོད། ཇི་ཙམ་ནས་འོང་ཞེས་འདྲི་ན། ཞག་བདུན་འདས་ནས་སོ་ཞེས་རྗོད་ཅིག །དེ་ནས་འཆར་ཀ་སྟོན་པའི་སྤྱན་སྔར་སོང་ངོ༌། །འོང་བའི་ཚེ་མཉན་ཡོད་དུ་ཉི་མ་མང་པོས་ཕྱིན་ཀྱང་ཕྱིར་འགྲོ་བའི་ཚེ་སངས་རྒྱས་དང་ལྷའི་མཐུས་ཉི་མ་གཅིག་གིས་སེར་སྐྱའི་གནས་སུ་ཕྱིན་ཏེ། ཇི་སྐད་བསྒོ་བ་བཞིན་བྱས་ནས། གཙུག་ལག་ཁང་ཅི་འདྲ། མཉན་ཡོད་ན་གཙུག་ལག་ཁང་མཐོང་བ་དེ་བརྗོད་དོ། །དེའི་ཚེ་ཟས་གཙང་ལ་སྐྱེད་མོས་ཚལ་ལྔ་བརྒྱ་ཡོད་པས། བློན་པོ་རྣམས། ཁྱེད་རྣམས་དེང་ལ་སྐྱེ་ཡོད་དང༌། ནྱ་གྲོ་དྷའི་ཀུན་དགའ་ར་བ་དང༌། ཚངས་པའི་གནས་ཀྱི་སྐྱེད་མོས་ཚལ་རྣམས་སུ་རྒྱལ་བྱེད་ཚལ་འདྲ་བའི་གཙུག་ལག་ཁང་བྱེད་དུ་ཆུག་ལ། སེར་སྐྱའི་གནས་ཐམས་ཅད་རྡོ་བ་དང་གསེག་མ་དང་གྱོ་མོ་མེད་པར་གྱིས་ཤིག །རྒྱལ་པོ་རྣམས་ནི་ཚིག་གིས་འགྲུབ་པ་ཡིན་པས་དེ་ལྟར་བྱས་སོ། །
སངས་རྒྱས་རྣམས་ལ་ངེས་པར་བགྱི་བ་བཅུ་མངའ་སྟེ། ཇི་སྲིད་དུ་སངས་རྒྱས་སུ་ལུང་བསྟན་པ་དང༌། སེམས་ཅན་གཞན་གྱིས་ཕྱིར་མི་ལྡོག་པའི་སེམས་མ་བསྐྱེད་པ་དང༌། གདུལ་བྱ་མ་བཏུལ་བ་དང༌། སྐུ་ཚེའི་ལྔ་ཆ་མ་ལུས་པ་དང༌། མཚམས་མ་བཅད་པ་དང༌། མཆོག་ཟུང་གཅིག་ལུང་མ་བསྟན་པ་དང༌། ལྷ་ལས་བབས་པ་མ་བསྟན་པ་དང༌། ཆོ་འཕྲུལ་ཆེན་པོ་མ་བསྟན་པ་དང༌། སྔོན་གྱི་ལས་ཀྱི་རྒྱུ་བ་ལུང་མ་བསྟན་པ་དང༌། ཡབ་ཡུམ་བདེན་པ་ལ་བཀོད་པ་དེ་སྲིད་དུ་མྱ་ངན་ལས་མི་འདའ་འོ། །དེ་ནས་སྟོན་པས་ཟས་གཙང་དང་ཤཱཀྱ་འབུམ་ཕྲག་དུ་མ་གདུལ་བའི་དུས་ལ་བབ་ཅིང་ཡབ་ཡུམ་བདེན་པ་ལ་འགོད་པ་ནི་དེ་བཞིན་གཤེགས་པས་ངེས་པར་མཛད་པ་ཡིན་ནོ་སྙམ་དུ་དགོངས་ནས། མོའུ་གལ་གྱི་བུ། ཁྱོད་སོང་ལ་དགེ་སློང་རྣམས་ལ། དེ་བཞིན་གཤེགས་པ་སེར་སྐྱའི་གནས་སུ་གཤེགས་ཀྱིས། ཁྱེད་ཅག་ལ་དེ་བཞིན་གཤེགས་པ་དང་ཐབས་གཅིག་ཏུ་སེར་སྐྱའི་གནས་སུ་འགྲོ་བ་དང༌། ཡབ་སྲས་མཇལ་བ་ལྟ་བར་སྤྲོ་བ་དེས་ཆོས་གོས་དག་ལོངས་ཤིག་ཅེས་བསྒོ་ཞིག །དེས་དེ་ལྟར་བསྒོ་བ་དང༌། སྟོན་པ་དུལ་ཞེས་པ་ནས། ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པ། སྲུང་བ་གཅིག་པུ་བ་ཞེས་པ་ནས། བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ། འཁོར་ཉན་ཐོས་ཆེན་པོ་ལྟེང་རྒྱས་འོད་སྲུངས་ལ་སོགས་པ་སྔོན་གྱི་རལ་པ་ཅན་སྟོང་དང༌། ཤཱ་རིའི་བུ་དང་མོའུ་གལ་གྱི་བུ་ལ་སོགས་(༡༥༦ན)པ་དགེ་སློང་གི་དགེ་འདུན་མང་པོས་མདུན་དུ་བདར་ཏེ་སེར་སྐྱའི་གནས་ཐམས་ཅད་རྡོ་བ་དང་གསེག་མ་དང་གྱོ་མོ་མེད་པར་བྱས། བདུག་པ་དང་ཕྱེ་མ་དང་མེ་ཏོག་སྣ་ཚོགས་བཀྲམ་པ་དང༌། རྒྱལ་མཚན་དང་བ་དན་ལ་སོགས་པ་མཆོད་པ་རྒྱ་ཆེན་པོ་བཤམས་ཤིང༌། ནྱ་གྲོ་དྷའི་ཀུན་དགའ་ར་བར་ས་ཕྱོགས་ཡངས་པར་གདན་ཐམས་ཅད་ཟླ་གམ་དུ་བཤམས་ཏེ། ཟས་གཙང་ཉིད་ཀྱང་རྒྱལ་པོའི་འབྱོར་པ་དང་མཐུ་ཆེན་པོས་ནྱ་གྲོ་དྷའི་ཀུན་དགའ་ར་བ་ན་སྟོན་པ་ལ་སྡོད་ཅིང་འདུག་གོ །དེ་ནས་སྟོན་པ་མཐར་གྱིས་ཆུ་ཀླུང་རོ་ཧི་ཀའི་འགྲམ་དུ་གཤེགས་ནས། དེ་བཞིན་གཤེགས་པ་ཞབས་ཀྱིས་གཤེགས་ན་ཤཱཀྱ་ང་རྒྱལ་ཅན་དག །གཞོན་ནུ་དོན་གྲུབ་ཀྱི་ས་ཆེན་པོས་མ་རྙེད། སྔོན་སེར་སྐྱའི་གནས་ནས་ལྷ་འབུམ་ཕྲག་དུ་མས་བསུ་སྟེ་སྟེང་གི་ནམ་མཁའ་ལ་སོང་ན། ད་བླ་ན་མེད་པའི་ཡེ་ཤེས་བརྙེས་ཀྱང་རྐང་པས་འོངས་སོ་ཞེས་མ་དད་པར་འགྱུར་བས་བདག་རྫུ་འཕྲུལ་གྱིས་འཇུག་པར་བྱའོ་སྙམ་དུ་དགོངས་ནས། དགེ་སློང་དག །ཁྱེད་ནི་རྐང་པས་ཆུ་ཀླུང་རོ་ཧི་ཀ་རྒོལ་ཞིག །དེ་བཞིན་གཤེགས་པ་རྫུ་འཕྲུལ་གྱིས་གཤེགས་སོ། །
བཀའ་བཞིན་འཚལ་ཞེས་རྐང་པས་ཆུ་ཀླུང་བརྒལ་ནས་ནྱ་གྲོ་དྷའི་ཀུན་དགའ་ར་བར་སོང་ངོ༌། །སྟོན་པས་རྫུ་འཕྲུལ་གྱིས་ནམ་མཁའ་ལ་བྱོན་ནས་ཕྱོགས་བཞིར་རྫུ་འཕྲུལ་དཔག་མེད་བསྟན་ཏོ། །སྟོན་པས་འདི་སྙམ་དགོངས་པ། དེ་བཞིན་གཤེགས་པས་ཟས་གཙང་གི་ཞབས་ལ་གཏུགས་ན་ནི་དེའི་སྤྱི་བོ་ཚལ་བ་བདུན་དུ་འགས་པར་འགྱུར་ལ། ཟས་གཙང་གི་དེ་བཞིན་གཤེགས་པའི་ཞབས་ལ་གཏུགས་ན་ནི་ཤཱཀྱ་ང་རྒྱལ་ཅན་དག །ཅིའི་ཕྱིར་ཡབ་ཀྱིས་སྲས་ཀྱི་རྐང་པ་གཉིས་ལ་གཏུག་ཅེས་མ་དད་པར་འགྱུར་བས། ཅི་ནས་ཀྱང་ཟས་གཙང་གིས་ལུས་མ་བཏུད་བཞིན་དུ་དེ་བཞིན་གཤེགས་པའི་ཞབས་ལ་ཕྱག་འཚལ་བར་འགྱུར་བའི་རྫུ་འཕྲུལ་མངོན་པར་འདུ་བྱའོ་སྙམ་དུ་དགོངས་ནས་ཏ་ལ་བདུན་སྲིད་ཙམ་གྱི་སྟེང་གི་ནམ་མཁའ་ལ་འཕགས་ཏེ། ཏ་ལ་དྲུག་དང༌། ལྔ་དང༌། བཞི་དང༌། གསུམ་དང༌། གཉིས་དང༌། གཅིག་སྲིད་ཙམ་དུ་བཞུགས་སོ། །དེ་ནས་ཟས་གཙང་གིས་མ་བཏུད་བཞིན་དུ་དེ་བཞིན་གཤེགས་པའི་ཞབས་ལ་ཕྱག་འཚལ་ནས། ཤཱཀྱ་རྣམས་ལ་གོ་བར་བྱ་བའི་ཕྱིར། གང་ཚེ་ཁྱོད་བལྟམས་དོག་ས་རབ་གཡོས་དང༌། །འཛམ་བུའི་གྲིབ་མས་ཁྱོད་སྐུ་མ་བཏང་དང༌། །འདི་དང་ལན་གསུམ་ཀུན་གཟིགས་མཁྱེན་ལྡན་པ། །སངས་རྒྱས་ཁྱོད་ཀྱི་ཞབས་ལ་བདག་ཕྱག་འཚལ། །དེ་ནས་རྫུ་འཕྲུལ་བསྡུས་ནས། ནྱ་གྲོ་དྷའི་ཀུན་དགའ་ར་བར་གདན་བཤམས་པ་ཉིད་ལ་བཞུགས་སོ། །
དེ་ནས་རྒྱལ་པོ་ཟས་གཙང་དང༌། བྲེ་བོ་(༡༥༦བ)ཟས་དང༌། ཟས་དཀར་དང༌། བདུད་རྩི་ཟས་དང༌། ཤཱཀྱ་འབུམ་ཕྲག་དུ་མས་སྟོན་པའི་ཞབས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེ་ནས་སྟོན་པས་སྐྱེ་བོ་ཕལ་པོ་ཆེ་དེའི་བསམ་པ་དང་བག་ལ་ཉལ་དང་ཁམས་དང་རང་བཞིན་ཐུགས་སུ་ཆུད་ནས་ཟས་གཙང་དང་ལྷས་བྱིན་མ་གཏོགས་པ་ཟས་དཀར་ལ་སོགས་པ་ཤཱཀྱ་བདུན་ཁྲི་བདུན་སྟོང་གིས་བདེན་པ་མཐོང་བར་འགྱུར་བའི་ཆོས་བསྟན་པས་ཁ་ཅིག་གིས་རྒྱུན་ཞུགས། ཕྱིར་འོང༌། ཕྱིར་མི་འོང༌། ཁ་ཅིག་རབ་ཏུ་བྱུང་སྟེ་དགྲ་བཅོམ་པ་ཐོབ། འཁོར་དེ་ལས་ཕལ་ཆེར་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་བབ་པར་མཛད་དོ། །ཟས་གཙང་ནི་བདག་གི་རྫུ་འཕྲུལ་དང་མཐུ་ཆེའོ་སྙམ་དུ་ཧ་ཅང་དགའ་བས་བདེན་པ་མ་མཐོང༌། ལྷས་བྱིན་ནི་ང་རྒྱལ་ཆེ་བས་བདེན་པ་མ་མཐོང་ངོ༌། །ལྷས་བྱིན་ཁྲོ་བས་ཟིལ་གྱིས་ནོན་པས་སྨྲས་པ། བདག་གིས་ཀྱང་འདི་ལྟར་སྒྱུ་མ་ཤེས་ན་འཇིག་རྟེན་རྗེས་སུ་འཇུག་པར་བྱེད་ལ་རག་གོ །ཤཱཀྱ་གཅུགས་པ་དག་གིས་དེ་ལ། ལྷས་བྱིན། ཐོང་ཞིག །སྟོན་པ་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་གྱིས། དེ་སྐད་མ་ཟེར་ཅིག །དེ་ནས་ཅང་མི་སྨྲའོ། །ཉི་མ་གཉིས་པ་ལ་སྐྱེད་མོས་ཚལ་སྐྱེ་ཡོད་དུ། ཉི་མ་གསུམ་པ་ལ་སྐྱེད་མོས་ཚལ་ཚངས་པའི་གནས་སུ་ཆོས་བསྟན་ཏོ། །
སྟོན་པས། ཟས་གཙང་གིས་བདེན་པ་མི་མཐོང་བའི་རྒྱུ་གཉིས་ཏེ། སེམས་ཧ་ཅང་མཐོ་བ་དང༌། ཞུམ་པས་སོ། །ཟས་གཙང་གི་སེམས་ལ། གཞོན་ནུ་དོན་གྲུབ་སྔོན་ཆད་ལྷ་དང་མིས་མཆོད་ན། ད་མིས་མཆོད་ཅིང་ལྷས་མ་མཆོད་དོ་སྙམ་དུ་ཧ་ཅང་ཞུམ་པར་ཐུགས་སུ་ཆུད་དེ། ཟས་གཙང་གདུལ་བའི་ཕྱིར་ལྷའི་འཁོར་འབའ་ཞིག་ལ་ཆོས་བསྟན་པར་དགོངས་ནས་འཇིག་རྟེན་པའི་ཐུགས་བསྐྱེད་པ་དང༌། ཚངས་པ་དང་བརྒྱ་བྱིན་ལ་སོགས་པས། སྟོན་པ་ཡབ་གདུལ་བའི་ཕྱིར་ལྷ་འབའ་ཞིག་ལ་ཆོས་སྟོན་བཞེད་པར་མཐོང་ནས། འདོད་པ་དང་གཟུགས་ན་སྤྱོད་པའི་ལྷ་རྣམས་སྟོན་པའི་སྤྱན་སྔར་ལྷགས་སོ། །སྟོན་པས་རིན་པོ་ཆེ་སྣ་བཞི་ལས་བྱས་པའི་ཁང་བཟང་སྒོ་བཞི་པ་སྤྲུལ་ནས་གཟུགས་ཀྱི་ལྷ་རྣམས་གཡས་དང༌། འདོད་པའི་ལྷ་རྣམས་གཡོན་ཕྱོགས་སུ་འཁོད་ཅིང༌། འཇིག་རྟེན་སྐྱོང་བ་བཞི་སྒོ་བཞིར་འཁོད་དོ། །
དེ་ནས་ཟས་གཙང་གིས་ནངས་པར་སྔར་ལངས་ཏེ་ཁང་བཟང་གི་ཤར་སྒོར་སོང་བ་དང༌། ཡུལ་འཁོར་སྲུང་གིས་སྨྲས་པ། མ་འཇུག་པར་སྡོད་ཅིག །ཅིའི་ཕྱིར། སྟོན་པ་ལྷའི་འཁོར་འབའ་ཞིག་ལ་ཆོས་སྟོན་པས་འདིར་མི་ཙམ་གྱིས་མི་ཆུད་དོ། །ཁྱོད་སུ་ཡིན། ཁོ་བོ་ཡུལ་འཁོར་སྲུང་ངོ༌། །དེ་ནས་ཟས་གཙང་གིས་ལྷོ་སྒོར་སོང་བ་དང༌། འཕགས་སྐྱེས་པོས། མ་འཇུག་ཅིག །ནུབ་སྒོར་སོང་བ་དང༌། མིག་མི་བཟང་གིས། མ་འཇུག་ཅིག །བྱང་གི་སྒོར་སོང་བ་དང༌། རྣམ་ཐོས་ཀྱི་བུས། མ་འཇུག་(༡༥༧ན)པར་སྡོད་ཅིག །ཅིའི་ཕྱིར། སྟོན་པ་ལྷའི་འཁོར་འབའ་ཞིག་ལ་ཆོས་སྟོན་པས་འདིར་མི་ཙམ་གྱིས་མི་ཆུད་དོ། །ཁྱོད་སུ་ཡིན། ཁོ་བོ་ནི་རྣམ་ཐོས་ཀྱི་བུ་ཡིན་ནོ། །
དེ་ནས་ཟས་གཙང༌། སྟོན་པའི་ལྷའི་འཁོར་འབའ་ཞིག་ལ་ཆོས་སྟོན་པ་མཐོང་ན་སྙམ་དུ་འདོད་པ་སྐྱེས་སོ། །སྟོན་པས་དེའི་སེམས་མཁྱེན་ནས་ཁང་བཟང་ཤེལ་གྱི་རང་བཞིན་དུ་སྤྲུལ་པ་དང༌། ཟས་གཙང་གིས་སྟོན་པ་ལྷའི་འཁོར་འབའ་ཞིག་ལ་ཆོས་སྟོན་པ་མེ་ལོང་གི་གཟུགས་ཀྱི་ནང་ན་འདུག་པ་ལྟར་མཐོང་ནས། སུ་ལའང་ད་ལྟ་བདག་གི་དོན་གྲུབ་ལྟ་བུའི་བུ་མེད་དོ་སྙམ་དུ་ཧ་ཅང་སེམས་མཐོ་བར་གྱུར་ཏོ། །དེ་ནས་སྟོན་པས་རྫུ་འཕྲུལ་བསྡུས་ནས་ཟས་གཙང་ལ་ཆོས་བསྟན་ཀྱང་བདེན་པ་མ་མཐོང་བས། དེའི་རྒྱུ། ད་ལྟར་སུ་ལའང་བདག་གི་བུ་དོན་གྲུབ་ལྟ་བུའི་བུ་མེད་དོ་སྙམ་དུ་ཧ་ཅང་སེམས་མཐོ་བར་ཐུགས་སུ་ཆུད་ནས། མོའུ་གལ་གྱི་བུ་ཆེན་པོ་ལ། ཁྱོད་ཀྱིས་ཟས་གཙང་ལ་སོམས་ཤིག །བཙུན་པ། བཀའ་བཞིན་འཚལ་ཞེས་ཟས་གཙང་གི་གན་དུ་སོང་སྟེ་ཕྱོགས་བཞིར་རྫུ་འཕྲུལ་བསྟན་ནས་སྟན་ལ་འདུག་གོ །ཟས་གཙང་གིས། སྟོན་པའི་ཉན་ཐོས་རྫུ་འཕྲུལ་ཆེ་གཞན་ཡང་མཆིས་སམ། མོའུ་གལ་གྱིས། ཐུབ་པའི་ཉན་ཐོས་མཐུ་ཆེ་བ། །གསུམ་རིག་སེམས་ཀྱི་རྣམ་གྲངས་ཤེས། །ཟག་པ་ཟད་པར་གྱུར་པ་དང༌། །དགྲ་རྣམས་བཅོམ་པ་མང་དུ་ཡོད། །དེ་ནས་ཟས་གཙང༌། སྟོན་པ་ཉག་ཅིག་ཏུ་མ་ཟད་ཉན་ཐོས་རྣམས་ལའང་རྫུ་འཕྲུལ་ཆེ་བ་ཡོད་དོ་སྙམ་ནས་སེམས་རྒྱུད་སྙོམས་པར་གྱུར་ཏོ། །
དེ་ནས་སྟོན་པས་ཟས་གཙང་ལ་ཆོས་བསྟན་པས་བདེན་པ་མཐོང་ནས། སྤུན་གསུམ་ལ། ངས་བདེན་པ་མཐོང་གིས་རྒྱལ་སྲིད་ཟུང་ཞིག །ལྷས་ནམ་གཟིགས། དེང་ཉིད་དོ། །ལྷས་དེང་གཟིགས་ཀྱི། བདག་ཅག་གིས་ཆེས་སྔར་མཐོང་ངོ༌། །འོ་ན་གཞོན་ནུ་རྣམས་ཀྱིས་ཐུ་བོ་གང་ཡིན། བཟང་ལྡན་ནོ། །ཟས་གཙང་གིས་བཟང་ལྡན་ཤཱཀྱའི་རྒྱལ་པོར་དབང་བསྐུར་ཏོ། །དེ་ནས་སྟོན་པ་ཉན་ཐོས་དང་བཅས་པ་ཉིན་རེ་ཞིང་ཕོ་བྲང་དུ་གདུགས་ཚོད་གསོལ་བ་དང༌། ཟས་གཙང་གིས། རལ་པ་ཅན་ལས་རབ་ཏུ་བྱུང་བ་དཀའ་ཐུབ་ཀྱིས་ལུས་མི་སྡུག་པར་སྣང་བ་དག་མཐོང་ནས། བདག་ཉིད་ཆེན་པོ་འདི་དག་སེམས་བཟང་ཡང་ལུས་མི་བཟང་ངོ༌། །སྟོན་པ་ཅི་འདྲ་བར་འཁོར་ཡང་དེ་འདྲ་བར་གྱུར་ན་མཛེས་སོ་སྙམ་ནས་ཤཱཀྱ་རྣམས་ལ་སྨྲས་པ། གལ་ཏེ་གཞོན་ནུ་དོན་གྲུབ་རབ་ཏུ་མ་བྱུང་ན་ཅིར་འགྱུར། ལྷ། འཁོར་ལོས་སྒྱུར་བའི་རྒྱལ་པོར་འགྱུར་རོ། །ཁྱེད་ཀྱི་བུ་དག་ཅིར་འགྱུར། ཞམ་རིང་བར་འགྱུར་རོ། །འོ་ན་གཞོན་ནུ་དོན་ཐམས་ཅད་གྲུབ་པ་བདུད་རྩི་ཐུགས་སུ་ཆུད་དེ། བདུད་རྩིས་འགྲོ་བ་ཚིམ་པར་མཛད་ན། ཁྱེད་ཀྱི་བུ་དག་ཅིའི་ཕྱིར་ཞམ་རིང་མི་བྱེད། ལྷ། དེ་དག་རབ་ཏུ་དབྱུང་ངམ། ཕྱུང་ཞིག །(༡༥༧བ)ཤཱཀྱའི་རིགས་རྒྱུད་ཆད་པར་འགྱུར་རོ། །ཁྱིམ་རེ་ནས་རེ་རེ་རབ་ཏུ་ཕྱུང་ཞིག །དེའི་ཚེ་བཟང་ལྡན་དང༌། མ་འགགས་པ་དང༌། ནམ་གྲུ་ལ་སོགས་པ་ཤཱཀྱ་གཞོན་ནུ་ལྔ་བརྒྱ་རབ་ཏུ་བྱུང་ངོ༌། །རིགས་མཐོན་པོ་ལས་རབ་ཏུ་བྱུང་བ་ནི་རྙེད་པའི་ཕྱིར་དང་ཉེ་བ་ཡིན་ནོ་ཞེས་གསུངས་པས་དེ་དག་ལ་རྙེད་པ་དང་བཀུར་སྟི་ཆེན་པོ་བྱུང་བ་དང༌། སྟོན་པས། འདི་དག་གཞན་གྱི་ཕྱིར་རབ་ཏུ་བྱུང་བ་ཡིན་ན་གཞན་ཁོ་ན་ལས་ཆགས་སོ་སྙམ་དུ་དགོངས་ནས། དེ་དག་ལ་རྙེད་བཀུར་གཅད་བཞེད་དེ་མཐར་གྱིས་མཉན་ཡོད་དུ་བྱོན་ནས་རྒྱལ་བྱེད་ཚལ་ན་བཞུགས་སོ། །
དེ་ནས་འཆར་ཀ་མཉན་ཡོད་དུ་བསོད་སྙོམས་ལ་ཞུགས་ནས་མཐར་གྱིས་སྦེད་མའི་ཁྱིམ་དུ་སོང་བ་དང༌། སྦེད་མས་མཐོང་ནས་བྲང་བརྡུངས་ཏེ་སྨྲས་པ། འཆར་ཀ །ཅིའི་ཕྱིར་བདག་སྤངས་ཏེ་རབ་ཏུ་བྱུང༌། བྱང་ཆུབ་སེམས་དཔས་བཙུན་མོ་གྲགས་འཛིན་མ་ལ་སོགས་པ་བུད་མེད་དྲུག་ཁྲི་སྤངས་ཏེ་རབ་ཏུ་བྱུང་བ་དེ་ཤིན་ཏུ་དཀའ་བ་ཡིན་གྱི། རྡུལ་གྱི་རྫབ་འདྲ་བ་ཁྱོད་ལ་མི་བྲ་བ་ཅི་ཡོད། བདག་ཀྱང་རབ་ཏུ་འབྱུང་ངོ༌། །དེ་ལྟར་གྱིས་ཤིག །ཁྱིམ་གྱི་བྱ་བ་བསྡུ་བར་བགྱིའོ། །འཆར་ཀ་དུས་སུ་འོང་ཞིང༌། སྦེད་མ། རབ་ཏུ་མི་འབྱུང་ངམ། ད་དུང་ཁྱིམ་གྱི་བྱ་བ་མ་བསྡུས་སོ། །འཆར་ཀས་སྨྲས་པ། དུས་དེ་ཙམ་གྱིས་ཀོ་ས་ལར་བྱུང་བའི་ཁྱིམ་གྱི་བྱ་བ་ཡང་ལེགས་པས་བསྡུས་པར་འགྱུར་རོ། །འཆར་ཀ །དེང་བསྡུས་ཏེ། སང་རབ་ཏུ་འབྱུང་ངོ༌། །འཆར་ཀའི་བསམས་པ་ལ། སྔོན་ཡང་ལྷུང་བཟེད་ནག་པོ་ཅན་རྣམས་ཀྱིས་བདག་ཟིལ་གྱིས་མནན་ན། བདག་གིས་དགེ་སློང་མ་རབ་ཏུ་ཕྱུང་ན་དྲུག་སྡེས་བུད་མེད་རབ་ཏུ་ཕྱུང་ངོ་ཞེས་རྒྱ་ཆེར་ཟིལ་གྱིས་གནོན་པར་འགྱུར་སྙམ་དུ་འགྱོད་དེ་རྒྱལ་པོའི་ཁབ་ཏུ་ཕྱིན་ནས་དབྱར་གནས་པར་ཁས་བླངས་ཏེ་འདུག་གོ །སྦེད་མས་ཕྱི་དེ་ཉིན་པར་ཁྱིམ་གྱི་བྱ་བ་རྣམས་བསྡུས་ཏེ་རྒྱལ་བྱེད་ཚལ་དུ་འོངས་ནས་དགེ་སློང་རྣམས་ལ་དྲིས་པ། འཆར་ཀ་གར་མཆིས། རྒྱལ་པོའི་ཁབ་ཏུ་སོང་ངོ༌། །སྦེད་མས་ངུས་པ་དང༌། ཅིའི་ཕྱིར་ངུ༌། འཆར་ཀ་ན་རེ། ཁྱིམ་གྱི་བྱ་བ་སྡུས་ཤིག །ཁོ་བོས་རབ་ཏུ་དབྱུང་ངོ་ཟེར་ནས། བདག་གིས་ཁྱིམ་གྱི་བྱ་བ་བསྡུས་ཏེ་འོངས་ན། དེ་རྒྱལ་པོའི་ཁབ་ཏུ་སོང་བས། ད་ནི་བདག་ཁྱིམ་པའང་མ་ལགས། རབ་བྱུང་ཡང་མ་ལགས་སོ། །དགེ་སློང་རྣམས་ཀྱིས་དེ་ལ་སྨྲས་པ། འཆར་ཀ་སྤུ་གྲིའི་ཕྱིར་རྒྱལ་པོའི་ཁབ་ཏུ་སོང་བས་སྤུ་གྲི་གསར་པས་ཁྱོད་ཀྱི་སྐྲ་འདྲེག་པར་འགྱུར་རོ། །དགེ་སློང་མ་གསོ་སྦྱོང་འབུལ་བ་དག་གིས་མཐོང་ནས། སྦེད་མ། ཅིའི་ཕྱིར་ངུ༌། འདི་ལྟར་རོ། །གཡེངས་མ། དགེ་སློང་སུ་ཞིག་བུད་མེད་རབ་ཏུ་འབྱིན། དགེ་སློང་མ་རྣམས་ཀྱིས་འབྱིན་གྱིས་ཚུར་ཤོག །དེ་དག་གིས་སྐྱེ་དགུའི་བདག་མོ་ཆེན་མོའི་གན་དུ་ཁྲིད་ནས། དེས་རབ་བྱུང་བསྙེན་རྫོགས་བྱས་སོ། །མཉན་(༡༥༨ན)ཡོད་ནས་རྒན་ཞུགས་ཤིག་གིས་རྒྱལ་པོའི་ཁབ་ཏུ་ཕྱིན་པ་དང༌། འཆར་ཀས་མཐོང་ནས། གནས་བརྟན། བྱོན་པ་ལེགས་སོ། །
དེས་སྨྲས་པ། སློབ་དཔོན། ཕྱག་འཚལ་ལོ། །འཆར་ཀས། འདི་ནི་རྒན་ཞུགས་ཤིག་སྟེ། སློབ་དཔོན་ཡིན་མིན་ཡང་མ་ཤེས་སོ་སྙམ་ནས་དེ་གཙུག་ལག་ཁང་དུ་བཅུག་སྟེ་སྨྲས་པ། ཁྱོད་གང་ནས་འོངས། མཉན་ཡོད་ནས་སོ། །འཆར་ཀས་བསམས་པ། དང་པོ་ཁོ་ནར་སྦེད་མའི་གཏམ་དྲིས་ན་འཕྱ་བར་འགྱུར་བས་སྔ་ཕྱིར་བྱས་ཏེ་དྲིའོ་སྙམ་ནས་སྨྲས་པ། བཅོམ་ལྡན་འདས་གནོད་པ་ཆུང་བ་དང༌། ཉམ་ང་བ་ཆུང་བ་དང༌། བདེ་བ་དང༌། སྙུན་མི་མངའ་བ་དང༌། སྟོབས་དང་ལྡན་པར་མཉན་ཡོད་དུ་དབྱར་གནས་པར་ཞལ་གྱིས་བཞེས་སམ། དེ་བཞིན་ནོ། །འཁོར་བཞི་པོ་གནོད་པ་ཆུང་བ་དང༌། ཉམ་ང་བ་ཆུང་བ་དང༌། བདེ་བ་དང༌། ནད་མེད་པ་དང༌། སྟོབས་དང་ལྡན་པར་མཉན་ཡོད་ན་གནས་སམ། གནས་སོ། །གནས་བརྟན་ཀུན་ཤེས་ཀོའུ་དི་ནྱ་དང༌། འོད་སྲུངས་ཆེན་པོ་དང༌། ཤཱ་རིའི་བུ་དང༌། མོའུ་གལ་གྱི་བུ་དང༌། གཞན་ཡང་དགེ་སློང་གནས་བརྟན་དག་དེ་ལྟར་གནས་སམ། གནས་སོ། །རྒྱལ་པོ་གསལ་རྒྱལ་དང༌། བླ་མཁྱེན་དྲང་སྲོང་བྱིན་དང༌། རྙིང་པ་དང༌། རི་དྭགས་འཛིན་གྱི་མ་ས་ག་དང༌། ལེགས་སྐྱེས་དག་ཤེས་སམ། ཤེས་སོ། །འོ་ན་ཁྱིམ་བདག་གི་ཆུང་མ་སྦེད་མ་ཤེས་སམ། ཤེས་ཏེ་དེ་ནི་བཙུན་པ་འཆར་ཀའི་སྔོན་གྱི་ཆུང་མ་ཡིན་ནོ། །རྒན་ཞུགས། གཏམ་ཤེས་སོ། །དེ་ད་དུང་ཡང་ཁྱོད་ཀྱི་ཁྱིམ་བདག་གི་ཆུང་མ་ཡིན་སྙམ་མམ། དེ་ནི་རབ་ཏུ་བྱུང་ངོ༌། །སུས། སྐྱེ་དགུའི་བདག་མོས་སོ། །རྒན་ཞུགས། ཚུར་ཤོག །རྐང་པ་ཁྲུས་ཤིག་ཅེས་དེ་ལ་རྐང་པ་དང་ལག་པ་བསྐུ་བ་མང་པོ་བྱིན་ནས་ལྷུང་བཟེད་དང་ཆོས་གོས་ཟུང་ང་མཐོན་པོ་ལ་བཞག་སྟེ། གཙུག་ལག་ཁང་འདི་ནི་ཟས་དང་རྙེད་པ་དང་བཅས་པ་ཡིན་གྱིས་འདིར་མངོན་པར་དགའ་བར་གྱིས་ཤིག །
དེས་སྨྲས་པ། བདག་མཆོད་རྟེན་ལ་ཕྱག་འཚལ་ནས་འགྲོ་བ་ཡིན་གྱིས། གནས་འདི་མི་འདོད་དོ། །འཆར་ཀས་དེའི་མདུན་དུ་སྒོ་ལྕགས་དང་ལྡེ་མིག་བཞག་སྟེ། སྟོན་པས། དགེ་སློང་གིས་གཙུག་ལག་ཁང་གནས་པ་དང་བཅས་པར་བྱའི། མི་གནས་པར་མི་བྱའོ་ཞེས་གསུངས་སོ་ཞེས་སྨྲས་ནས། མཐར་གྱིས་མཉན་ཡོད་དུ་ཕྱིན་ཏེ། རང་གི་གཙུག་ལག་ཁང་ཆག་ཆག་བཏབ། ལེགས་པར་བྱུགས། ལྕི་བ་གསར་པའི་བྱུག་པས་བྱུགས་ཏེ་སྒོ་བཅད་ནས། ཁྲིའི་སྟེང་ན་ཕྱི་བཀན་དུ་ཉལ་ཞིང་སྐད་ཀྱི་གདངས་ཀྱིས་ཁ་ཏོན་བྱེད་ཅིང་འདུག་གོ །དགེ་སློང་མ་འདུན་པ་འབུལ་བ་དག་གིས་དེའི་སྐད་ཀྱི་གདངས་ཐོས་ནས་ཕྱག་འཚལ་ཏེ། ཁྱོད་གར་བཞུད། རྒྱལ་པོའི་ཁབ་ཏུའོ། །དེ་དག་དབྱར་ཁང་དུ་སོང་ནས་སྦེད་(༡༥༨བ)མ་ལ། དགའ་བ་སྐྱེད་ཅིག །ཁྱོད་ཀྱི་སློབ་དཔོན་འོངས་སོ། །སུ། འཆར་ཀའོ། །དེ་ཇི་ལྟར་ཁོ་མོའི་སློབ་དཔོན་ཡིན། ཁོ་མོས་དེའི་གན་ནས་བཀླགས་སམ། གཡེངས་མ། ཁྱོད་ཀྱིས་མི་ཤེས་ཀྱིས། དགེ་སློང་མ་རྣམས་ནི་དགེ་སློང་ལ་མང་དུ་རག་ལས་པས་སོང་ལ་ལྟོས་ཤིག །སྦེད་མས་ནས་ཀྱི་ངར་ཕྱེ་དང༌། ཁྲུལ་ཆལ་དང༌། འབྲུ་མར་ཐོགས་ཏེ་འཆར་ཀའི་གཙུག་ལག་ཁང་དུ་སོང་ནས་སྒོ་བརྡུངས་པ་དང༌། སུ་ཡིན། བདག་སྦེད་མའོ། །ཁྱིམ་བདག་གི་ཆུང་མ་སྦེད་མ། འོངས་པ་ལེགས་སོ། །བདག་ད་དུང་ཡང་ཁྱོད་ཀྱི་ཁྱིམ་བདག་གི་ཆུང་མ་ཡིན་ནམ། འོ་ན་ཅི་ཡིན། རབ་ཏུ་བྱུང་ངོ༌། །སུས། སྐྱེ་དགུའི་བདག་མོས་སོ། །ཁོ་བོ་བྱ་བ་ཞིག་བྱུང་ནས་རྒྱལ་པོའི་ཁབ་ཏུ་སོང་ན། ཁྱོད་ལ་བརྟད་པ་ཅི་བྱུང་ནས་རབ་ཏུ་བྱུང༌། ཁྱོད་ཀྱི་ཞལ་ནས། ཁྱིམ་གྱི་བྱ་བ་སྡུས་ཤིག །ཁོ་བོས་ཁྱོད་རབ་ཏུ་དབྱུང་ངོ་ཞེས་གསུངས་ནས། བདག་གིས་ཁྱིམ་བསྡུས་ཏེ་འོངས་ནས་རྒྱལ་པོའི་ཁབ་ཏུ་བཞུད་དེ། བདག་འཕགས་མས་རབ་ཏུ་མ་ཕྱུང་ན། བདག་ཁྱིམ་པའང་མ་ལགས། རབ་ཏུ་བྱུང་བའང་མ་ལགས་པར་འགྱུར་རོ། །སྦེད་མ། ཁྱོད་རང་ཉིད་ཀྱི་ལག་ངར་ལ་སོས་འདེབས་སམ། སྐྱེ་དགུའི་བདག་མོའམ་ཁོ་བོས་རབ་ཏུ་ཕྱུང་ཡང་རུང་ལེགས་ཀྱིས་ནང་དུ་ཞུགས་ཤིག །ཆོས་བསྟན་པར་བྱའོ། །དེས་དེ་ལ་ཆོས་ཅུང་ཟད་བསྟན་ནས། བདག་ཅག་གཉིས་ཀྱིས་སྐྱེད་མོས་ཚལ་དང༌། མདུན་ས་དང༌། ལྷའི་གནས་ག་གེ་མོ་ཞིག་ཏུ་ཟས་དང་བཅའ་བ་དང་བཏུང་བ་འདི་ལྟ་བུ་ལ་སྤྱད་པ་དྲན་ནམ་ཞེས་སྨྲས་པ་དང༌། འཆར་ཀ་ཀུན་ཏུ་ཆགས་ཤིང་དྲལ་ལོ། །བུད་མེད་མཁས་པ་ལ་མ་འདྲེས་པའི་ཆོས་ལྔ་ཡོད་དེ། སྐྱེས་པ་ཆགས་པ་ཤེས་ཤིང་ཆགས་པ་དང་བྲལ་བ་ཤེས་པ་དང༌། དུས་ཤེས་ཤིང་ཟླ་མཚན་ཤེས་པ་དང༌། མངལ་ན་གནས་པ་ཞུགས་པ་ཤེས་པ་དང༌། གང་ལས་མངལ་ན་གནས་པ་ཞུགས་པ་ཤེས་པ་དང༌། ཁྱེའུ་དང་བུ་མོ་ཤེས་པའོ། །སྦེད་མས་འཆར་ཀ་ཆགས་པར་ཤེས་ནས་སྨྲས་པ། ཕྱི་རོལ་ཏུ་ཕྱིན་ནས་འོང་ངོ༌། །འདི་བཤང་གཅི་བྱེད་འདོར་གོར་མ་ཆག་སྙམ་ནས། སོང་ཞིག །དེ་ཕྱིར་སོང་ནས་ཤིང་ང་དཔུང་བཅད་བརྫེས་ཏེ་བརྒྱུགས་པ་དང༌། འཆར་ཀ་སྒྲ་ལ་མཁས་པས་དེའི་སྒྲ་ཐོས་ནས། དགེ་སྦྱོང་མ་མགོ་རེག་མོ། །གར་འབྲོས་ཞེས་དེའི་ཕྱི་བཞིན་བརྒྱུགས་པས་བརླའི་རེག་པས་ཁུ་བ་བྱུང་ནས་དེ་ཆགས་པ་དང་བྲལ་ཏེ་གཞི་དེ་ཉིད་ན་འདུག་གོ །
སྦེད་མས་དེ་ཕྱིར་ལོག་ཅིང་ཀུན་ནས་དཀྲིས་པ་དང་བྲལ་བར་རིག་ནས། དྲུང་དུ་སོང་སྟེ་སྨྲས་པ། གལ་ཏེ་བདག་གིས་དང་དུ་བླངས་ན་བདག་ཀྱང་དགེ་སློང་མར་མི་རུང་ལ། ཁྱོད་ཀྱང་དགེ་སློང་དུ་མི་རུང་བར་འགྱུར་རོ། །སྲིང་མོ། སྟོན་པས་ཀྱང༌། བདག་ཉིད་སྲུང་ན་གཞན་སྲུང་བར་བྱེད་ལ། གཞན་བསྲུང་ན་བདག་ཉིད་སྲུང་བར་བྱེད་དོ་ཞེས་ལེགས་པར་གསུངས་(༡༥༩ན)སོ། །འཕགས་པ། ཤམ་ཐབས་འདི་ཚུར་གསོལ། བཀྲུ་བར་བགྱིའོ། །དེས་དེ་སྦེད་མ་ལ་བྱིན་ནོ། །སྦེད་མས་ཁུ་བ་དེ་མཐོང་ནས། བདག་གི་ལུས་ཀྱི་ཕྱོགས་འཆར་ཀས་སྔོན་མ་མཐོང་བའམ། མ་བསྣམས་པའམ། མ་བྱུགས་པ་ཅི་ཡོད་ན། བདག་གིས་དང་དུ་མ་བླངས་པ་ནི་མ་ལེགས་སོ་སྙམ་དུ་རྣམ་པར་རྟོག་པ་ན་སྦེད་མ་ཆགས་ཤིང་དྲལ་བའི་སེམས་ཀྱིས་ཁུ་བ་དེ་ལ་སེམས་ཅན་ཞུགས་པ་དང༌། དགེ་སློང་མ་རྣམས་ཀྱིས་མཐོང་ནས། ཁྱོད་ཆོས་བཟང་པོས་འཆར་ཀའི་གན་དུ་འགྲོ་བར་སེམས་ཀྱིས། དེས་ཁྱོད་གནས་སྐབས་འདི་ལྟ་བུར་བྱས་པར་མི་སེམས་སོ། །སྦེད་མས་སྨྲས་པ། དགེ་སློང་དེ་ནི་ཚུལ་ཁྲིམས་དང་ལྡན་པ་ཡིན་ཏེ། རབ་ཏུ་བྱུང་ནས་དེས་ཁོ་མོ་ལག་གིས་ཀྱང་མ་བྱུགས་སོ། །དེ་དག་གིས་སྨྲས་པ། མ་བྱུགས་ནའང་དེས་ཁྱོད་གནས་སྐབས་འདི་ལྟ་བུར་བྱས་ན། གལ་ཏེ་བྱུགས་ན་དེས་ཁྱོད་གནས་སྐབས་ཇི་ལྟ་བུར་བྱས་པར་འགྱུར་ཞེས་འཕྱ་བའི་སྐབས་དེ་གསོལ་བས། དགེ་སློང་མ་དེ་ནི་ཕམ་པར་མ་གྱུར་གྱི། སྦྲུམ་མ་དབེན་པར་གཞག་གོ །དགེ་སློང་མ་རྣམས་ཀྱིས་ཡལ་བར་མི་དོར་རོ། །དེ་ལ་ཟན་སྦྱིན་པར་བྱའོ། །བུ་གཞོན་ནུ་འོད་སྲུངས་ཞེས་བྱ་བ་བཙའ་ཞིང་ངའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་འཐོབ་སྟེ། ངའི་གཏམ་སྣ་ཚོགས་དང༌། གཏམ་སྙན་པ་དང༌། སྤོབས་པ་དགེ་བ་ཅན་རྣམས་ཀྱི་མཆོག་ཏུ་འགྱུར་རོ། །ཉེས་དམིགས་དེ་ནི་དགེ་སློང་མ་ཉེ་དུ་མ་ཡིན་པ་ལ་གོས་རྙིང་པ་འཁྲུར་འཛུད་པ་ལས་གྱུར་པ་ཡིན་ནོ་སྙམ་དུ་དགོངས་ནས། བྱུང་བ་འདི་དང་སོགས་སྔར་བཞིན། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་ལ་གོས་རྙིང་པ་འཁྲུར་འཛུད་དམ། འཚེད་དུ་འཛུད་དམ། འཆག་ཏུ་འཛུད་ན་སྤང་བའི་ལྟུང་བྱེད་དོ། །
སྟོན་པ་མཉན་ཡོད་ནའོ། །རིགས་མཐོན་པོ་ལས་རབ་ཏུ་བྱུང་བ་ནི་རྙེད་པའི་ཆེད་དང་ཉེ་བ་ཡིན་ནོ་ཞེས་གསུངས་པས། ཤཱཀྱའི་ཁྱིམ་ནས་རབ་ཏུ་བྱུང་བ་དེ་དག་ལ་རྙེད་བཀུར་ཆེན་པོ་བྱུང་ནས་གོས་ཀྱིས་ཆ་བ་ལ་བརྩོན་ཞིང༌། ལྷུང་བཟེད་དང་ཆོས་གོས་མང་པོ་འཆང་བས་སྟོན་པས་ཆོས་བསྟན་ཀྱང་བདེན་པ་མ་མཐོང་ངོ༌། །སངས་རྒྱས་བཅོམ་ལྡན་འདས་རྣམས་ནི་གདུལ་བ་ལ་མཁས་པ་བླ་ན་མེད་པ་ཡིན་པས། དགེ་སློང་དག །ང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་བཞེད་ཀྱིས་ངའི་སྤྱན་སྔར་དགེ་སློང་བསོད་སྙོམས་སྟོབ་པ་གཅིག་དང༌། འདི་ཉིད་ཀྱི་གསོ་སྦྱོང་བཅོ་ལྔ་པའི་ཚེ་མ་གཏོགས་པ་གང་གིས་ཀྱང་ཉེ་བར་འོང་བར་མི་བྱའོ། །དགེ་འདུན་གྱིས་ཀྱང༌། དབྱར་གྱི་ནང་དུ་དེ་ལྟར་འགྲོ་ན་བདག་ཅག་གིས་ལྟུང་བྱེད་ཀྱི་ལྟུང་བ་བྱེད་དུ་(༡༥༩བ)གཞུག་གོ་ཞེས་ཁྲིམས་སུ་བཅས་སོ། །དེའི་ཚེ་ཉེ་སྡེ་ཟླ་བ་བཤོལ་མ་བོར་བས་ལྗོངས་སུ་དབྱར་གནས་པར་ཁས་བླངས་ལ། སྟོན་པ་ནི་ཟླ་བ་བཤོལ་བོར་བས་ལྗོངས་སུ་དབྱར་གནས་པར་ཞལ་གྱིས་བཞེས་སོ། །
དེ་ནས་ཉེ་སྡེས་དབྱར་གནས་ཐོན་ནས་སྟོན་པའི་སྤྱན་སྔར་སོང་བ་དྲུག་སྡེས་མཐོང་ནས། དགེ་འདུན་གྱི་ཁྲིམས་སུ་བྱ་བ་འདྲལ་བར་འགྱུར་རོ་ཞེས་ཟེར་རོ། །ཉེ་སྡེས་སྟོན་པའི་གཙུག་ལག་ཁང་དུ་དལ་བུས་སྒོ་བརྡུངས་པ་དང༌། སྟོན་པས་སྒོ་དབྱེ་བ་མཛད་ནས། ཁྱོད་གང་ལས་འོངས། དབྱར་གང་དུ་གནས། བདག་ད་ལྟར་ལྗོངས་ནས། ལྗོངས་སུ་དབྱར་གནས་སོ། །དགག་དབྱེ་བྱས་སམ། བགྱིས་སོ། །ཁྱོད་མཛེས་པ་འཁོར་མཛེས་པའི་རྒྱུ་གང་ཡིན། བདག་རབ་བྱུང་ཞུ་བ་ཞིག་བྱུང་ན། དགོན་པ་བ་ཚོལ་ཅིག །བསོད་སྙོམས་པ་དང༌། ཆོས་གོས་གསུམ་པ་དང༌། ཕྱག་དར་ཁྲོད་པ་དང༌། ཤིང་དྲུང་པ་ཚོལ་ཅིག་ཅེས་དེ་དག་གི་བསྔགས་པ་རྗོད་པར་བགྱིད་དོ། །དེ་ལྟར་བགྱིའོ་ཞེས་ཟེར་ན་དེ་རབ་ཏུ་འབྱིན་པར་བགྱིད་དོ། །བསྙེན་རྫོགས་དང༌། ཁ་ཏོན་དང༌། ཀློག་པ་དང༌། ཡིད་ལ་བྱེད་པ་ལའང་དེ་བཞིན་བགྱིད་དོ། །བདག་མཛེས་པ་འཁོར་མཛེས་པའི་རྒྱུ་དེ་ལགས་སོ། །ཉེ་སྡེ། ཁྱོད་སྐྱེ་བོ་མང་པོ་ལ་ཕན་པ་དང༌། བདེ་བ་དང༌། འཇིག་རྟེན་ལ་སྙིང་བརྩེ་བ་དང༌། ལྷ་དང་མི་རྣམས་ཀྱི་དོན་དང༌། ཕན་པ་དང༌། བདེ་བའི་ཕྱིར་ཞུགས་པ་ལེགས་སོ། །སྦྱངས་པའི་ཡོན་ཏན་དེ་དག་གི་བསྔགས་པ་མི་བརྗོད་པ་དེ་ནི་ངའི་བསྔགས་པ་མི་བརྗོད་པ་ཡིན་ནོ། །སྦྱངས་པའི་ཡོན་ཏན་དེ་དག་གི་བསྔགས་པ་བརྗོད་པ་དེ་ནི་ངའི་བསྔགས་པ་བརྗོད་པ་ཡིན་ཏེ། ངས་སྦྱངས་པའི་ཡོན་ཏན་དེ་དག་ཡུན་རིང་པོ་ནས་བསྟོད་བཀུར་བསྔགས་པའི་ཕྱིར་རོ། །ཉེ་སྡེ། ཁྱོད་དགེ་འདུན་གྱི་ཁྲིམས་མི་བསྲུང་ངམ། བདག་གིས་དགེ་འདུན་གྱི་ཁྲིམས་གང་ལགས་མ་འཚལ་ལོ། །འདི་དང་འདིའོ། །བདག་གློ་བུར་བ་ལགས་ཏེ། །དོན་དེ་ནི་གཉུག་མར་གནས་པ་རྣམས་ཀྱིས་བསྲུང་བར་བགྱི་བ་ལགས་སོ། །དགེ་འདུན་གྱི་ཁྲིམས་སུ་བྱ་བ་བསྲུང་བར་བྱའོ། །གློ་བུར་དུ་འོངས་པས་ཀྱང་དེ་ལས་མི་འགལ་བ་ཉིད་དུ་བྱའོ། །ངས་གློ་བུར་བ་རྣམས་ཀྱི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། གནས་འདི་ན་ཁྲིམས་སུ་བྱ་བ་ཡོད་དམ་མེད་པ་ཉིད་དང༌། ཇི་ལྟ་བུ་ཡོངས་སུ་ཤེས་པར་བྱ་བའི་ཕྱིར་དེས་དེ་དྲི་བར་བྱའོ། །ཧ་ཅང་ཡུན་མི་རིང་བར་རོ། །དེ་ལྟ་མོད་ཀྱི། ངས་དགོན་པ་བ་སོགས་བཅུ་གཉིས་ལ་སྤང་བ་སྦྱིན་པར་བྱ་སྟེ། དེ་དག་དེ་བཞིན་གཤེགས་པ་བལྟ་བའི་དུས་མ་ཡིན་པ་མེད་དོ། །ཉེ་སྡེ་ཡི་རང་སྟེ་སྟོན་པའི་སྤྱན་སྔ་ནས་སོང་བ་དང༌། དྲུག་སྡེས་ཉེ་སྡེ་ལ། སྐབས་ཕྱེ་ཞིག །ལྟུང་བ་སྡེ་ལྔ་ལ་སྐབས་ཕྱེའོ། །ཁྱོད་ལ་ལྟུང་བ་བྱུང་བ་ཆོས་བཞིན་དུ་སླར་གྱིས་ཤིག །ལྟུང་བ་མ་མཐོང་ངོ་། །ཁྱོད་ཀྱིས་དགེ་འདུན་གྱི་ཁྲིམས་མ་དྲལ་ལམ། ཁྲིམས་(༡༦༠ན)གང༌། སྐབས་དེ་རྒྱས་པར་བརྗོད་པ་དང༌། ཉེ་སྡེས་སྨྲས་པ། སྟོན་པས། དེ་ལྟ་མོད་ཀྱི། དགོན་པ་བ་ལ་ཡོངས་སུ་སྤང་བ་སྦྱིན་པར་བྱ་སྟེ། དགོན་པ་བ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་བལྟར་འགྲོ་བའི་དུས་མ་ཡིན་པ་མེད་དོ་ཞེས་སོགས་གསུངས་སོ་ཞེས་པ། སངས་རྒྱས་ཀྱིས་གསུངས་པ་དགེ་འདུན་ལ་གཡོ་བ་མེད་དོ། །
ཤཱཀྱ་རབ་ཏུ་བྱུང་བ་དེ་དག་འདི་སྙམ་དུ། འདོད་པ་ཆེ་བ་ལ་སྨད། ཆུང་བ་ལ་བསྔགས་པ་ནི་དོན་གྱིས་སྟོན་པས་བདག་ཅག་སྨད་པ་ཡིན་གྱིས། ལྷུང་བཟེད་དང༌། ཆོས་གོས་ལྷག་པ་རྣམས་ཀུན་དགའ་བོ་ལ་གཏད་ནས་རྒྱུད་དག་པས་སྟོན་པའི་དྲུང་དུ་འགྲོ་སྙམ་ནས། ཀུན་དགའ་བོ་ལ། ལྷུང་བཟེད་དང༌། ཆོས་གོས་ལྷག་པ་འདི་དག་བཞེས་ཤིག །སྟོན་པ་ལ་ཞུ་ཡིས་དེའི་བར་དུ་སྡོད་ཅིག །སྟོན་པ་ལ་ཞུས་པས། ལྷུང་བཟེད་དང༌། ཆོས་གོས་དང༌། དྲ་བ་དང༌། ཕོར་བུ་དང༌། སྐ་རགས་ལྷག་པ་འབུལ་བ་ན་དགེ་འདུན་གྱི་ཉེ་བར་བཞག་པའི་དོན་དུ་བླང་བར་བྱའོ། །དེ་ལྟར་ཉེ་བར་བཞག་པ་ནི་དེ་དག་མེད་པ་དག་གིས་ཅི་དགར་བཀུར་རོ། །དེ་ནས་སྟོན་པས་ཤཱཀྱ་རབ་ཏུ་བྱུང་བ་དེ་དག་ལ་ཆོས་བསྟན་པས་བདེན་པ་མཐོང་ངོ༌། །དགེ་སློང་རྣམས་ཐེ་ཚོམ་སྐྱེས་ནས་ཞུས་པ། ཤཱཀྱ་གཞོན་ནུ་ལྔ་བརྒྱ་པོ་དག་ཉེ་སྡེ་ལ་བརྟེན་ནས་འདོད་པ་ཆེ་བ་ལས་ཕྲལ། འདོད་པ་ཆུང་བ་ལ་བཀོད་དེ་མྱང་འདས་ལ་བཞག་པ་ངོ་མཚར་རོ། །
ང་ད་ལྟ་སྐྱོན་ཐམས་ཅད་སྤངས་པས་དེ་ལྟར་མཛད་པ་ངོ་མཚར་ཅི་ཆེ། སྔོན་ང་དུག་གསུམ་དང་བཅས་པའི་ཚེ་འདི་དག་ཉེ་སྡེ་ལ་བརྟེན་ནས་འདོད་པ་ཆེ་བ་དང་ཕྲལ། འདོད་པ་ཆུང་བ་ལ་བཀོད་དེ་མངོན་ཤེས་ལྔ་ལ་བཞག་པ་དེ་ཉོན་ཅིག །སྔོན་ཝཱ་ར་ཎཱ་སཱི་ན་རྒྱལ་པོ་ཚངས་བྱིན་ཞེས་བྱ་བ་རྒྱལ་སྲིད་སྐྱོང་བ་ན་དེ་ལ་བཙུན་མོ་ཚངས་ལྡན་ཞེས་བྱ་བ་དང༌། རྫིང་བུ་ཚངས་ལྡན་ཞེས་བྱ་བ་ཡོད་དེ། བུ་མེད་ནས་ཞི་བ་དང་ཆུ་ལྷ་ལ་སོགས་པ་ལ་གསོལ་བ་འདེབས་སོ། །འཇིག་རྟེན་ན་གསོལ་བ་བཏབ་པས་བུ་དང་བུ་མོ་སྐྱེ་བའི་གཏམ་ཡོད་ཀྱང༌། དེ་ན་མི་བདེན་ཏེ། དེ་ལྟར་གྱུར་ན་རེ་རེ་ལའང་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་སྟོང་ཡོད་པར་འགྱུར་རོ། །གནས་གསུམ་མངོན་དུ་གྱུར་པ་ལས་མའི་མངལ་དུ་བུ་འཇུག་སྟེ། ཕ་མ་ཆགས་ཤིང་ཕྲད་པ་དང༌། མ་དུས་ལ་བབ་ཅིང་ཟླ་མཚན་དང་ལྡན་པ་དང༌། དྲི་ཟ་ཉེ་བར་གནས་པའོ། །དེ་དེ་ལྟར་སྨོན་ལམ་འདེབས་པ་ན་སེམས་ཅན་རྫོགས་པའི་བྱང་ཆུབ་ཏུ་སྨོན་ལམ་བཏབ་པ། ཡི་དམ་བརྟན་པ་ཞིག་དམྱལ་བ་ནས་ཤི་འཕོས་ནས་བཙུན་མོ་ཚངས་ལྡན་གྱི་མངལ་དུ་ཞུགས་སོ། །དེས་རྒྱལ་པོ་ལ། ལྷ། དགྱེས་པ་སྐྱེད་དུ་གསོལ། བདག་ལ་སེམས་ཅན་ཞུགས་པ་ནི་བདག་གི་དཀུ་གཡས་པར་བརྟེན་པས་ངེས་པར། (༡༦༠བ)ཁྱེའུར་འགྱུར་རོ། །
དེ་ནས་བཙུན་མོ་ཚངས་ལྡན་གྱི་བསམ་པ་ལ། ལྷས་གྲོང་ཁྱེར་གྱི་ཕྱོགས་བཞི་དང་དབུས་ཀྱི་བཞི་མདོར་སྦྱིན་པ་སྦྱིན། བསོད་ནམས་དག་བྱེད་ཅིང་བཙོན་ཐམས་ཅད་ཐར་བར་བྱེད་པར་གྱུར་ཅིག་སྙམ་མོ། །དེ་རྒྱལ་པོས་ཐོས་ནས་དེ་ལྟར་བྱས་སོ། །ཡང་དེའི་བསམ་པ་ལ། བདག་ལྷ་དང་ལྷན་ཅིག་སྐྱེད་མོས་ཚལ་དང༌། དཀའ་ཐུབ་ཀྱི་ནགས་སུ་རྩེ་དགའ་དང༌། དགའ་མགུར་སྤྱོད་པར་གྱུར་ཅིག་སྙམ་མོ། །རྒྱལ་པོས་དེ་ཐོས་ནས་དེ་བཞིན་དུ་བྱས་སོ། །ཡང་དེའི་བསམ་པ་ལ། བདག་ལྷ་དང་ལྷན་ཅིག་གྲུར་ཞུགས་ཏེ་རྫིང་བུ་ཚངས་ལྡན་དུ་རྩེ་དགའ་སྤྱོད་པར་གྱུར་ཅིག་སྙམ་མོ། །དེ་ལྟར་རྒྱལ་པོས་ཐོས་ནས་དེ་ལྟར་བྱས་སོ། །གྲུ་དེ་ཉིད་ཀྱི་ནང་དུ་ཁྱེའུ་ཚེ་རབས་དྲན་པ་གཟུགས་བཟང་བ་ཞིག་བཙས་སོ། །ཉི་མ་ཉི་ཤུ་རྩ་གཅིག་ཏུ་བཙས་སྟོན་རྒྱ་ཆེར་བྱས་ནས། ཁྱེའུ་འདི་ཆུའི་ནང་དུ་བཙས་པས་ན། མིང་ཆུ་སྐྱེས་ཞེས་བཏགས་སོ། །གཞོན་ནུ་ཆུ་སྐྱེས་སྔོན་ལོ་དྲུག་ཅུར་རྒྱལ་སྲིད་བསྐྱངས་པས་དམྱལ་བར་སྐྱེས་ཏེ། ད་ལྟ་རྒྱལ་པོའི་རིགས་སུ་སྐྱེས་པར་ཤེས་ནས། བདག་ཡང་རྒྱལ་སྲིད་བྱས་ན་དམྱལ་བར་སྐྱེ་ན་མ་ལེགས་ཀྱིས། བདག་གིས་སྒྱུ་ཐབས་ཅུང་ཞིག་བྱའོ་སྙམ་སྟེ། བདག་ཉིད་བདག་འཕྱེ་བོར་བསྟན་ནས་འདུག་གོ །ཆུ་སྐྱེས་བཙས་པའི་ཉིན་མོ་བློན་པོའི་བུ་ལྔ་བརྒྱའང་བཙས་ནས་དེ་དག་མཆོངས་པ་དང་དཀྱུས་མོ་བྱེད་པའི་ཚེ། རྒྱལ་པོའི་བསམ་པ་ལ། ཆུ་སྐྱེས་ཀྱང་འཕྱེ་བོར་མ་གྱུར་ན་ད་ཙམ་མཆོངས་པ་དང༌། དཀྱུས་མོ་བྱེད་ནུས་པར་འགྱུར་གྱི། དེ་འཕྱེ་བོ་ཡིན་ཡང་བླའི་རྒྱལ་སྲིད་ལ་གཞག་པར་བྱའོ་སྙམ་མོ། །ཆུ་སྐྱེས་ཀྱིས་དེ་ཐོས་ནས། རྒྱལ་པོ་འདི་ནི་གཅུགས་མེད་པར་གནོད་པ་བྱེད་པ་ཡིན་གྱིས་བདག་གིས་ལྐུགས་པ་ཉིད་དུ་བསྟན་པར་བྱའོ་སྙམ་ནས། ཆེད་དུ་བསམས་ཏེ་ལྐུགས་པ་ཉིད་དུ་བསྟན་ཏོ། །རེ་ཞིག་ན་གཞོན་ནུ་ལྔ་བརྒྱ་པོ་དེ་དག་སྨྲ་ནུས་པར་གྱུར་པའི་ཚེ་རྒྱལ་པོའི་བསམ་པ་ལ། ཆུ་སྐྱེས་ཀྱང་མ་ལྐུགས་ན་ད་ཙམ་སྨྲ་ནུས་པར་འགྱུར་རོ། །ཆུ་སྐྱེས་ཀྱི་མིང་ཆུ་སྐྱེས་ཞེས་བྱ་བ་དེ་ནུབ་ཅིང༌། ལྐུགས་འཕྱེ་ཞེས་བྱ་བའི་མིང་ཆགས་སོ། །རེ་ཞིག་ན་རྒྱལ་པོ་སེམས་ཁོང་དུ་ཆུད་པ་བློན་པོས་མཐོང་ནས། ཅིའི་སླད་དུ་ཐུགས་ཁོང་དུ་ཆུད། བུ་གཅིག་ཡོད་པ་དེ་ཡང་ལྐུགས་འཕྱེར་གྱུར་ན། ཇི་ལྟར་སེམས་ཁོང་དུ་མི་ཆུད། བློན་པོ་རྣམས་ཀྱིས་དེ་སྨན་པ་ལ་བསྟན་པས། གཞོན་ནུ་འདིའི་དབང་པོ་གསལ་ཏེ། ནད་ཀྱི་རྣམ་པ་ཅུང་ཟད་ཀྱང་མ་མཆིས་པས་བསྡིགས་པར་གྱིས་ཤིག །རྒྱལ་པོས་གཤེད་མ་དག་བཀུག་སྟེ་གསང་ནས། ངས་ལྐུགས་འཕྱེ་འདི་སྐྱེ་བོ་ཕལ་པོ་ཆེའི་མངོན་སུམ་དུ་གཏང་བར་བྱའི། ཁྱེད་ཀྱིས་མ་གསད་ཅིག །ལྷ། བཀའ་བཞིན་འཚལ། རྒྱལ་པོ་འཁོར་གྱི་ནང་དུ་སོང་སྟེ། གཤེད་མ་རྣམས་ལ་ངས་གཞོན་ནུ་འདི་གཏང་གིས་བོར་ཅིག །
དེ་ནས་གཤེད་(༡༦༡ན)མ་རྣམས་ཀྱིས་གཞོན་ནུ་ཤིང་རྟར་བཅུག་སྟེ་ཕྱིར་ཁྲིད་པ་དང༌། གཞོན་ནུས་ཝཱ་ན་ཎཱ་སཱི་འབྱོར་པ་དང་རྒྱས་པ་མཐོང་ནས། ཅི་ཝཱ་ན་ཎཱ་སཱི་འདི་སྟོངས་པ་ཡིན་ནམ་གནས་པ་ཡིན། གཤེད་མ་རྣམས་ཀྱིས་དེ་རྒྱལ་པོ་ལ་ཕུལ་ནས། གཞོན་ནུས་ཚིག་འདི་སྐད་བརྗོད་དོ། །དེ་ནས་རྒྱལ་པོས་ལྐུགས་འཕྱེ་པང་དུ་བཞག་སྟེ། གཞོན་ནུ། གང་ཆད་པས་གཅད། གང་ལ་ཅི་སྦྱིན་པར་བྱ། དེ་ཅང་མི་སྨྲའོ། །དེས་ཡང་གཤེད་མ་རྨས་ལ། ངས་གཞོན་ནུ་འདི་གཏང་གིས་བོར་ཅིག །དེ་རྣམས་ཀྱིས་ཡང་གཞོན་ནུ་ཤིང་རྟར་བཅུག་སྟེ་ཕྱིར་ཁྲིད་པ་དང༌། གཞོན་ནུས་མི་བཞིས་རོ་ཞིག་ཁྱེར་བ་མཐོང་ནས་སྨྲས་པ། ཅི་རོ་འདི་ཤི་བའི་རོའམ་གསོན་པོའི་རོ་ཡིན། ཡང་གཤེད་མ་རྣམས་ཀྱིས་དེ་རྒྱལ་པོ་ལ་ཕུལ་ནས། གཞོན་ནུས་ཚིག་འདི་ལྟ་བུ་བརྗོད་དོ། །རྒྱལ་པོས་ཡང་ལྐུགས་འཕྱེ་པང་དུ་བཞག་སྟེ། གང་ཆད་པས་གཅད། གང་ལ་ཅི་སྦྱིན་དྲིས་པས། དེ་ཅང་མི་སྨྲའོ། །ཡང་རྒྱལ་པོས་གཤེད་མ་རྣམས་ལ། ངས་གཞོན་ནུ་འདི་གཏང་གིས་བོར་ཅིག །དེ་རྣམས་ཀྱིས་ཡང་གཞོན་ནུ་ཤིང་རྟར་བཅུག་སྟེ་ཕྱིར་ཁྲིད་པ་དང༌། གཞོན་ནུས་འབྲུའི་ཕུང་པོ་ཆེན་པོ་ཞིག་མཐོང་ནས། འབྲུའི་ཕུང་པོ་འདི་དང་པོ་ཉིད་ནས་དྲུངས་མ་ཟོས་ན་ཆེན་པོར་འགྱུར་རོ། །དེ་རྣམས་ཀྱིས་ཡང་དེ་རྒྱལ་པོ་ལ་ཕུལ་ནས། གཞོན་ནུས་ཚིག་འདི་ལྟ་བུ་བརྗོད་དོ། །རྒྱལ་པོས་ཡང་ལྐུགས་འཕྱེ་པང་དུ་བཞག་སྟེ། སྔར་བཞིན་བརྗོད་པས་ཅང་མི་སྨྲའོ། །ཡང་རྒྱལ་པོས་གཤེད་མ་རྣམས་ལ། ངས་གཞོན་ནུ་འདི་གཏང་གིས་སོང་ལ་གཞོན་ནུ་ནགས་ཁྲོད་དུ་མྱུར་དུ་ས་ཐམས་སུ་ཆུག་ཅིག །དེ་ནས་གཤེད་མ་རྣམས་ཀྱིས། གཞོན་ནུ་ཤིང་རྟར་བཅུག་སྟེ་ནགས་ཁྲོད་དུ་སོང་ནས་དོང་བརྐོས་པ་དང༌། གཞོན་ནུས་སྨྲས་པ། བརྟད་དང་བཅས་པས་དོང་རྐོ་བྱེད། །ཅི་ཕྱིར་ཁྱེད་ཅག་དོང་བརྐོ་བ། །དྲིས་པ་ང་ལ་མྱུར་དུ་སྨྲོས། །ཁ་ལོ་སྒྱུར་པས་སྨྲས་པ། རྒྱལ་པོའི་སྲས་བུ་མི་སྨྲ་བ། །ལྐུགས་འཕྱེ་བཙས་ནས་དེ་ཡིས་ནི། །མྱུར་བར་འདི་ནི་ནགས་ཁྲོད་དུ། །དོང་དུ་ཆུག་ཅེས་བཀའ་སྩལ་ཏོ། །
དེ་ནས་གཞོན་ནུའི་བསམ་པ་ལ། འདི་དག་ནི་དྲག་ཤུལ་ཅན། ལག་པ་དམར་བ། གཞན་གྱི་སྲོག་གཅོད་པས་འཚོ་བ་ཡིན་པས། བདག་གསོད་དོ་སྙམ་དུ་སྐྲག་ནས། གལ་ཏེ་ལྷས་བདག་ལ་དམ་པ་གཅིག་སྩོལ་ན། བདག་རྐང་པས་གྲོང་ཁྱེར་དུ་འཇུག་ཅིང་ཚིག་ཀྱང་སྨྲའོ། །གཤེད་མ་རྣམས་ཀྱིས་རྒྱལ་པོའི་གན་དུ་སོང་ནས་རྒྱས་པར་བརྗོད་པ་དང༌། གལ་ཏེ་རྒྱལ་སྲིད་འདོད་ནའང་གཞོན་ནུ་ལ་སྦྱིན་ནོ། །དེ་ནས་རྒྱལ་པོ་ཡིད་དགའ་ནས་བློན་པོ་རྣམས་ལ། དེང་ལ་གྲོང་ཁྱེར་ཐམས་ཅད་མྱུར་དུ་རྡོ་བ་དང་གསེག་མ་དང་གྱོ་མོ་མེད་པར་གྱིས་ལ། བདུག་སྤོས་དང༌། ཕྱེ་མ་དང༌། རྒྱལ་མཚན་དང༌། (༡༦༡བ)བ་དན་དང༌། མེ་ཏོག་སྣ་ཚོགས་ཁྲོམ་ཞིག །རྒྱལ་པོ་རྣམས་ནི་ཚིག་གིས་འགྲུབ་པས་དེ་ལྟར་བྱས་པ་དང༌། ལྗོངས་ཀྱི་མི་འབུམ་ཕྲག་དུ་མའང་ལྐུགས་འཕྱེ་རྐང་པས་གྲོང་ཁྱེར་དུ་འཇུག་ཅིང་ཚིག་སྨྲ་བར་འགྱུར་རོ་ཞེས་ཡ་མཚན་སྐྱེས་ནས་འདུས་སོ། །གཞོན་ནུ་རྐང་པས་གྲོང་ཁྱེར་དུ་ཞུགས་ཏེ་རྒྱལ་པོའི་ཞབས་ལ་ཕྱག་འཚལ་ནས་སྨྲས་པ། བདག་ལྐུགས་མ་ལགས་འཕྱེ་མ་ལགས། །གླེན་པ་མ་ལགས་བློ་མེད་མིན། །གསལ་བར་བགྱིད་པའི་ཚིག་རྣམས་ཀྱིས། །སྨྲ་བ་བདག་ལགས་མི་དབང་པོ། །བདག་ལྐུགས་མ་ལགས་འཕྱེ་མ་ལགས། །གླེན་པ་མ་ལགས་བློ་མེད་མིན། །དབང་པོ་ཚང་བ་གསལ་བ་དང༌། །ལྡན་པ་བདག་ལགས་མི་དབང་པོ། །བུ། ཁྱོད་ཅིའི་ཕྱིར་ཚིག་མི་སྨྲ་ཞིང་རྐང་པས་མི་འགྲོ། བདག་གིས་སྔོན་གྱི་ཚེ་རབས་སུ། །དགུང་ལོ་དྲུག་ཅུར་བདག་གིས་ནི། །མི་རྣམས་ནང་དུ་རྒྱལ་ཚབ་ཀྱིས། །རྒྱལ་སྲིད་རིགས་མཐུན་བགྱིད་སྩལ་བས། །དགུང་ལོ་སྟོང་ཕྲག་དྲུག་ཅུ་རུ། །སེམས་ཅན་དམྱལ་བར་རབ་ཏུ་བསྲེགས། །སེམས་དམྱལ་སྡུག་བསྔལ་མི་བཟད་པ། །དྲག་པོ་འཇིགས་རུང་དྲན་གྱུར་ནས། །རྒྱལ་སྲིད་མངོན་པར་མི་འཚལ་ཞིང༌། །སླན་ཆད་སེམས་དམྱལ་མཆི་མི་བགྱི། །ཡབ་ཀྱིས་བདག་ནི་རབ་འབྱུང་བར། །རྗེས་སུ་གནང་བ་མཛད་དུ་གསོལ། །བུ། རྒྱལ་སྲིད་ཀྱི་ཕྱིར་དྲང་སྲོང་དག་དཀའ་ཐུབ་སོགས་བྱེད་ན། ཅིའི་ཕྱིར་ལག་མཐིལ་ན་འདུག་པ་སྤངས་ནས་རབ་ཏུ་འབྱུང༌། ཁོན་གཅུགས་འཐབ་རྩོད་བགྱིད་པ་ཡི། །འདོད་ལ་སྤྱོད་པ་བདག་མི་འཚལ། །ཁོན་གཅུགས་འཐབ་རྩོད་འཇིག་བགྱིད་པའི། །ཚངས་སྤྱོད་བདག་གིས་སྤྱད་པར་བགྱི། །ཀིམ་པའི་འབྲས་བུ་འདྲ་བ་ཡི། །འདོད་པ་སྤྱོད་པ་བདག་མི་འཚལ། །འབྲས་བུ་བདུད་རྩིའི་རོ་བདའ་བའི། །ཚངས་སྤྱོད་བདག་གིས་སྤྱད་པར་བགྱི། །བདེ་བ་ཉམས་སུ་མྱོང་བ་དེ་དག་ཐམས་ཅད་ནི་རྒྱལ་པོ་ཉིད་ཡིན་ན་ཅིའི་ཕྱིར་རྒྱལ་སྲིད་སྤངས་ཏེ་རབ་ཏུ་འབྱུང༌། གང་ལས་སྡུག་བསྔལ་སྐྱེ་འགྱུར་བའི། །བདེ་བ་དེ་ལ་བདེར་མི་སེམས། །གང་ལས་བདེ་བ་སྐྱེ་འགྱུར་བའི། །སྡུག་བསྔལ་དེ་ལ་བདེ་བར་སེམས། །ཡབ་ཀྱིས་བདག་ནི་དཀའ་ཐུབ་ཀྱི། །ནགས་སུ་འཆི་བ་གནང་བར་མཛོད། །བུ། འདི་ན་གནས་མལ་འཇམ་པོ་ལ་འཇིགས་པ་མེད་པར་ཉལ་ཞིང་སིལ་སྙན་གྱི་སྒྲ་སྙན་པས་སད་པ་དང༌། གོས་འཇམ་པོ་གྱོན། བཟའ་བཏུང་ཞིམ་པོ་ལ་སྤྱད་པར་བྱ་བ་ཡིན་ན། རབ་ཏུ་བྱུང་བས་ཤིང་དྲུང་དུ་རྩྭའམ་ལོ་མ་བཏིང་བ་ལ་འཇིགས་པ་དང་བཅས་པས་རི་དྭགས་གདུག་པ་དང་ལྷན་ཅིག་ཉལ་ཞིང༌། ཝའི་སྐད་ཀྱིས་སད་པ་དང༌། གཡང་གཞི་དང་ཤིང་ཤུན་གྱོན་པ་དང༌། རྩ་བ་འབྲས་བུ་ཟ་བ་དང༌། །ཆུ་དྲོན་རྙོག་པ་ཅན་དུ་བཏུང་དགོས་ན་ཅིའི་ཕྱིར་རྒྱལ་སྲིད་སྤངས་ནས་རབ་ཏུ་འབྱུང་། ནགས་ན་ཤིང་ཤུན་རྩྭ་གྱོན་ཞིང་། (༡༦༢ན)རྩ་བ་འབྲས་བུ་འཆའ་བ་དང་། །རི་དྭགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་རོལ་འཇིག་བགྱིད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་འཆིང་དང་བརྡེག་པ་དང༌། །བགྱིད་པ་དེ་ལྟ་མ་ལགས་ཀྱིས། །ཡབ་ཀྱིས་བདག་ནི་དཀའ་ཐུབ་ཀྱི། །ནགས་སུ་མཆི་བ་གནང་བར་མཛོད། །
རྒྱལ་པོས་སྨྲས་པ། དང་པོར་ཁོ་བོའི་ཐེ་ཚོམ་གསུམ་པོ་འདི་ཆོད་དང༌། དེའི་འོག་ཏུ་ཁྱོད་རབ་ཏུ་འབྱུང་བ་མི་དཀའོ། །ཁྱོད་ཀྱིས་གྲོང་ཁྱེར་ཝཱ་ར་ཎཱ་སཱི་འབྱོར་པ་དང༌། རྒྱས་པ་མཐོང་ནས། ཅི་འདི་སྟོངས་པ་ཡིན་ནམ། འོན་ཏེ་གནས་པ་ཡིན་ཞེས་སྨྲས་པ་དེ་ཅི་ལ་བསམས། ལྷས་བདག་རྒྱུ་མ་མཆིས་པར་ཁུམ་ཅིག་ཅེས་གསུངས་ན། འགའ་ཡང༌། ཅིའི་ཕྱིར་གཞོན་ནུ་དགུམ་ཞེས་ཆོས་ལྡན་གྱི་ཚིག་མི་སྨྲ་བས་དེ་ལ་བསམས་སོ། །ཁྱོད་ཀྱིས་མི་བཞིས་རོ་ཁྱེར་བ་མཐོང་ནས། ཅི་ཤི་བའི་རོའམ། གསོན་པའི་རོ་ཡིན་ཞེས་སྨྲས་པ་དེ་ཅི་ལ་བསམས། ནོངས་པ་བྱས་པའི་རོ་དེ་ནི་ཤི་བའི་རོ་དང༌། ལེགས་པ་བྱས་པའི་རོ་དེ་ནི་གསོན་པའི་རོ་ལགས་པས་དེ་ལ་བསམས་སོ། །ཁྱོད་ཀྱིས་འབྲུའི་ཕུང་པོ་ཆེན་པོ་ཞིག་མཐོང་བ་ན། འབྲུའི་ཕུང་པོ་འདི་དང་པོ་ཉིད་ནས་དྲུངས་མ་ཟོས་ན་ཆེན་པོས་འགྱུར་རོ་ཞེས་སྨྲས་པ་དེ་ཅི་ལ་བསམས། ཞིང་བ་དག་འབྲུ་སྐྱིན་པོ་བགྱིས་ཏེ་ཟོས་ནས་ལས་བྱེད་པ་དེ་ནི་འབྲུ་སྨིན་པ་ན་བུ་ལོན་པ་ལ་འཇལ་དགོས་པས་དེ་དག་གིས་ནི་དང་པོ་ནས་དྲུངས་ཟོས་པ་ལགས་སོ། །དེ་བཞིན་དུ་དགེ་བ་བཅུའི་ལས་ཀྱི་ལམ་དག་གིས་མི་ཉིད་རྙེད་ནས་དགེ་བའི་ལས་མི་བྱེད་པ་དེའི་སྔོན་གྱི་དགེ་བ་དེ་རྒྱུན་འཆད་ཅིང་བདེ་འགྲོ་ལས་ཉམས་ནས་ངན་འགྲོ་ལ་བརྟེན་པར་འགྱུར་བས་དེ་ལ་བསམས་སོ། །རྒྱལ་པོས་ཚིག་དེ་ཐོས་ནས་མཆི་མས་བརྣངས་པས་སྨྲས་པ། བརྟུལ་ཞུགས་དེས་འཆང་རང་གི་ཆོས་སྤྱོད་ཅིག །བདག་ཀྱང་ཁྱོད་ཀྱི་སློབ་མར་ཁས་ལེན་ནོ། །རྒྱལ་པོས་བློན་པོ་རྣམས་ལ། གཞོན་ནུ་རབ་ཏུ་མ་བྱུང་ན་ཅིར་འགྱུར། རྒྱལ་པོར་འགྱུར་རོ། །ཁྱེད་ཀྱི་བུ་དག་ཅིར་འགྱུར། ཞམ་རིང་བར་འགྱུར་རོ། །འོ་ན་དེ་རབ་ཏུ་འབྱུང་ན་ཁྱེད་ཀྱི་བུ་དག་ཅིའི་ཕྱིར་རབ་ཏུ་མི་འབྱུང༌། བཀའ་བཞིན་འཚལ་ལོ། །
དེའི་ཚེ་ཝཱ་ར་ཎཱ་སཱིའི་ཉེ་ལོགས་ན་བསྟི་གནས་ཤིག་ཡོད་པ་དེ་ན་དྲང་སྲོང་བྱས་པ་དང་སྙིང་རྗེ་དང་ལྡན་པ་ཞིག་འདུག་པ་དེའི་དྲུང་དུ་ལྐུགས་འཕྱེ་འཁོར་ལྔ་བརྒྱ་དང་བཅས་པ་རབ་ཏུ་བྱུང་ངོ༌། །དྲང་སྲོང་དེས་ལྐུགས་འཕྱེ་ལ་གདམས་ངག་བྱིན་ནས་བསྒོམས་པས་མངོན་ཤེས་ལྔ་ཐོབ་བོ། །རེ་ཞིག་ན་དྲང་སྲོང་དེ་འདས་ནས་ལྐུགས་འཕྱེས་ཁྱེའུ་ལྔ་བརྒྱ་པོ་བསྐྱངས་པས་གཞོན་ནུ་ལྐུགས་འཕྱེའི་མིང་ནུབ་ནས་སྟོན་པ་ལྐུགས་འཕྱེ་ཞེས་མིང་ཆགས་སོ། །རེ་ཞིག་ན་སྟོན་པ་ལྐུགས་འཕྱེས་ཁྱེའུ་ལྔ་བརྒྱ་པོ་དེ་(༡༦༢བ)དག་གཡང་གཞི་དང༌། ཤིན་ཤུན་དང༌། དབྱུ་གུ་དང༌། རིལ་བ་དང༌། བླུགས་གཟར་དང༌། དགང་གཟར་ལྷག་པོར་འཆང་ཞིང༌། ལོ་མ་དང༌། ཁྲེ་རྒོད་དང༌། ཨུཏྤལའི་རྩ་བ་ལ་སྦྱོར་བའི་རྗེས་སུ་བརྩོན་པས་མངོན་ཤེས་ལྔ་མ་ཐོབ་པར་རིག་ནས། བྱང་ཆུབ་སེམས་དཔའ་རྣམས་ནི་འདུལ་བ་ལ་མཁས་པས་ཁྱེའུ་རྣམས་ལ། ང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་འདོད་ཀྱིས། ངའི་གན་དུ་བྲམ་ཟེའི་ཁྱེའུ་རྩ་བ་དང་འབྲས་བུ་སྟོབ་པ་གཅིག་དང༌། འདི་ཉིད་ཀྱི་གསོ་སྦྱོང་བཅོ་ལྔ་པའི་ཚེ་མ་གཏོགས་པ་གང་གིས་ཀྱང་ཉེ་བར་འོང་བར་མི་བྱའོ། །ཁྱེའུ་རྣམས་ཀྱིས་ཀྱང་དབྱར་གྱི་ནང་དུ་དེ་མ་གཏོགས་པ་མཁན་པོའི་དྲུང་དུ་མི་འགྲོ་བའི་ཁྲིམས་བཅས་སོ། །སྟོན་པ་ལྐུགས་འཕྱེས་ཐག་རིང་པོ་ནས་རི་དྭགས་མཐོང་སྟེ་སྨྲས་པ། ཚུར་ཤོག །འོངས་པ་ལེགས་སོ། །ཁྱོད་དང་ཁོ་བོ་མཚུངས་ཏེ། ཁྱོད་ཀྱང་ལྟོ་ཁེངས་པའི་ཟས་ཀྱིས་ཆོག་ཤེས་ལ། ཁོ་བོའང་ལྟོ་ཁེངས་པའི་བསོད་སྙོམས་ཀྱིས་ཆོག་ཤེས་སོ། །དེ་དག་གི་བསམ་པ་ལ། མཁན་པོའི་བརྟུལ་ཞུགས་རྫོགས་ཏེ། རི་དྭགས་དང་ལྷན་ཅིག་ཕེབས་པར་སྨྲའོ་སྙམ་ནས། དེའི་དྲུང་དུ་ཕྱིན་ཏེ་ཕྱག་འཚལ་ནས་མཐའ་གཅིག་ཏུ་འདུག་པ་དང༌། སྟོན་པ་ཅང་མི་སྨྲའོ། །དེ་དག་གི་བསམ་པ་ལ། མཁན་པོ་དུད་འགྲོ་རྣམས་དང་ལྷན་ཅིག་ཕེབས་པར་སྨྲའི། མི་རྣམས་དང་མ་ཡིན་སྙམ་ནས་སོང་ངོ༌། །
དེ་ནས་སྟོན་པ་ལྐུགས་འཕྱེས་རི་དྭགས་ཀྱི་བརྟུལ་ཞུགས་ཅན་ཞིག་ཐག་རིང་པོ་ནས་འོང་བ་མཐོང་སྟེ། ཚུར་ཤོག །འོངས་པ་ལེགས་སོ། །ཁྱོད་དང་ཁོ་བོ་མཚུངས་ཏེ། ཁྱོད་ཀྱང་གཡང་གཞི་གཅིག་དང༌། ཤིང་ཤུན་དང༌། དབྱུ་གུ་ལ་སོགགས་པ་གཅིག་འཆང་ལ། ཁོ་བོའང་དེ་དག་གཅིག་ཁོ་ན་འཆང་ངོ༌། །ཁྱོད་དང་ཁོ་བོས་བསོད་སྙོམས་ལྟོ་ཁེངས་པས་ཆོག་ཤེས་ལ། དེ་ན་ཁ་ཅིག་གཡང་གཞི་ལ་སོགས་པ་ལྷག་པར་འཆང་བ་དག་ནི་མ་ཡིན་ནོ། །དེ་ནས་ཁྱེའུ་དེ་དག་མཁན་པོས་འདོད་པ་ཆེ་བ་སྨད་ཅིང་ཆུང་བ་བསྟོད་པ་ནི་དོན་གྱིས་ན་མཁན་པོས་བདག་ཅག་སྨད་དོ་སྙམ་ནས་གཡང་གཞི་ལ་སོགས་པ་ལྷག་པོ་རྣམས་ཆུ་ཀླུང་ཟློག་བྱེད་དུ་བོར་ཏེ་རྒྱུད་དག་པས་སྟོན་པ་ལྐུགས་འཕྱེའི་གན་དུ་ཕྱིན་ནས་ཕྱག་འཚལ་ཏེ་མཐའ་གཅིག་ཏུ་འཁོད་པ་དང༌། ཆོས་བསྟན་པས་དེ་དག་གིས་མངོན་ཤེས་ལྔ་ཐོབ་བོ། །དེའི་དུས་ཀྱི་སྟོན་པ་ལྐུགས་འཕྱེ་དེ་ནི་ང་ཡིན་ནོ། །དེའི་དུས་ཀྱི་བྲམ་ཟེ་ཁྱེའུ་ལྔ་བརྒྱ་པོ་དེ་དག་ནི་ཤཱཀྱ་གཞོན་ནུ་ལྔ་བརྒྱ་པོ་འདི་དག་ཡིན་ནོ། །རི་དྭགས་ཀྱི་བརྟུལ་ཞུགས་ཅན་དེ་ནི་ཉེ་སྡེ་ཡིན་ཏེ། །དེའི་ཚེའང་ངས་འདི་དག་ཉེ་སྡེ་ལ་བརྟེན་ནས་འདོད་པ་ཆེ་བ་དང་ཕྲལ་ཅིང་ཆུང་བ་ལ་བཀོད་དེ་མངོན་ཤེས་ལྔ་ལ་བཞག་ལ། ད་ལྟར་ཡང་ངས་འདི་དག་ཉེ་སྡེ་ལ་བརྟེན་ནས་འདོད་པ་ཆེ་བ་དང་ཕྲལ་ཅིང་ཆུང་བ་ལ་བཀོད་དེ་མྱང་འདས་ལ་བཞག་གོ །(༡༦༣ན)
ལེན་པའི་སྤང་བ་ནི། །སྟོན་པ་མཉན་ཡོད་ནའོ། །དགེ་སློང་མས་དགོན་པར་གནས་པས་མ་བཀག་པའི་ཚེ་དགེ་སློང་མ་རྣམས་ཀྱང་དགོན་པར་སོང་སྟེ་བསམ་གཏན་དང་སྙོམས་འཇུག་གི་བདེ་བ་ཉམས་སུ་མྱོང་བར་བྱེད་དོ། །དེ་ནས་ཨུཏྤ་ལའི་མདོག་འཁོར་ལྔ་བརྒྱ་དང་བཅས་པ་ནགས་མུན་པ་ཅན་དུ་དཀྱིལ་ཀྲུང་ཕྱེད་ཀྱིས་བསམ་གཏན་ལ་ཞུགས་སོ། །དགེ་སློང་མ་དེ་དག་ཕྱི་འབྲང་མཉན་ཡོད་དུ་འཇུག་འདོད་ནས། ཨུཏྤ་ལའི་མདོག་སློང་ཞིང༌། ཁ་ཅིག་ན་རེ། ཨུཏྤ་ལའི་མདོག་རྫུ་འཕྲུལ་ཆེ་བས་དང་པོར་དབྱར་ཁང་དུ་འགྲོ་བའི་གནས་ཡོད་དོ་ཟེར་ནས་མ་བསླང་བར་སོང་ངོ༌། །ཨུཏྤ་ལའི་མདོག་ལངས་པ་ན། དགེ་སློང་མ་ཐམས་ཅད་སོང་འདུག་ནས། དེ་ཉིད་དུ་འགོག་པ་ལ་སྙོམས་པར་ཞུགས་སོ། །གཡོན་ཅན་ལྔ་བརྒྱ་ཙམ་གྱིས་ལས་བྱས་ནས་ནགས་མུན་པ་ཅན་དུ་འོངས་ཏེ། །ཉིས་བརྒྱ་ལྔ་བཅུས་སྐལ་བ་བགོས། ཉིས་བརྒྱ་ལྔ་བཅུས་ནགས་ཉུལ་བས་ཨུཏྤ་ལའི་མདོག་མཐོང་ནས། ཁ་ཅིག་ན་རེ། ཐོ་ཡོར་ཡིན་ནོ་ཟེར། ཁ་ཅིག་ན་རེ། མི་ཞིག་གོ །ཁ་ཅིག་ན་རེ། དགེ་སློང་ངོ༌། །དེ་ན་དགེ་སློང་གི་རྒྱུས་ཤེས་པ་ཞིག་འདུག་པ་དེ་ན་རེ། འདི་ནི་དགེ་སློང་མ་ཞིག་ཡིན་ཏེ། དགེ་སློང་ནི་དཀྱིལ་ཀྲུང་གིས་འདུག་ལ། དགེ་སློང་མ་ཡིན་དཀྱིལ་ཀྲུང་ཕྱེད་ཀྱིས་སོ། །དེ་དག་ངོ་མཚར་ནས་དམག་དཔོན་ལ། འདི་ལྟ་བུའི་ནགས་འཇིགས་སུ་རུང་བའི་ནང་ན་དགེ་སློང་མ་གཅིག་པུ་མཚན་མོ་གནས་སོ། །དེ་ལྟའི་འདོང་ངོ་ཞེས་སོང་བ་དང༌། དམག་དཔོན་གྱིས་ཨུཏྤ་ལའི་མདོག་གཟུགས་བཟང་བ་མཛེས་པ་མཐོང་བས་དད་ནས། འདི་སློང་ཞིག་ཟས་སྦྱིན་ནོ། །རྒྱུས་ཤེས་པ་ཞིག་ན་རེ། དུས་མ་ཡིན་པར་མི་ཟའོ། །འདི་ལ་ཆང་གླུད་བླུད་པར་བྱའོ། །མི་འཐུང་ངོ༌། །དེས་རག་ཡུག་ཆེན་པོ་ལ་འོས་པ་གཅིག་དང༌། བསོད་སྙོམས་ཀྱི་ཕུད་ཅིག་ཤིང་ལྗོན་པའི་ཡག་ག་ལ་བཏགས་ནས། ཁྱོད་ལ་མི་མཁྱེན་པ་ཅི་ཡང་མི་མངའ་བས་བདག་གིས་ཁྱོད་ལ་བསོད་སྙོམས་དང་ན་བཟའ་འདི་དབུལ་ལོ་ཞེས་སྨྲས་ནས་སོང་ངོ༌། །ཨུཏྤ་ལའི་མདོག་གིས་ནངས་པར་སྔར་ལངས་པས་སྐྱེ་བའི་ཤུལ་མཐོང་ནས་བསམས་པ་དང༌། གཡོན་ཅན་ལྔ་བརྒྱ་ཉེ་བར་འོངས་པར་མཐོང་ནས། མི་མཛེས་པ་འགའ་ཞིག་རིག་པར་མ་བྱས་སམ་སྙམ་ན་འགའ་ཡང་མ་བྱས་པར་མཐོང་ངོ༌། །རས་དང་བསོད་སྙོམས་བཞག་པ་མཐོང་ནས། འདི་ནི་དད་པས་ཕུལ་བ་ཡིན་ཏེ། བྱིན་ལེན་སྟོབས་པ་ལ་བསྡད་ན་བྱའམ་སྤྲེའུས་ཆུད་གསོན་ལ། དགེ་སློང་མ་ལ་མི་རུང་བ་དེ་ནི་དགེ་སློང་རྣམས་ལ་རུང་བ་ཡིན་པས། རང་ཉིད་ཀྱིས་ཁྱེར་ཏེ་དགེ་འདུན་ལ་བསོད་སྙོམས་ཀྱི་ཕུད་དབུལ་དུ་འགྲོའོ་སྙམ་ནས་རྒྱལ་བྱེད་ཚལ་དུ་སོང་བ་དང༌། ཉེ་དགའ་རྒྱལ་བྱེད་ཚལ་གྱི་སྒོ་ན་འདུག་པས་མཐོང་ནས། སྲིང་མོ། ཅིའི་(༡༦༣བ)ཕྱིར་ནངས་པར་སྔར་མཉན་ཡོད་ཀྱི་སྒོ་ཕྱེ་སྟེ་འོངས། བདག་མཉན་ཡོད་དུ་མ་གནས་ཀྱི། མདང་ནགས་མུན་པ་ཅན་དུ་གནས་སོ། །
ཉེ་དགས་སྨྲས་པ། ཉེ་དགའ་ནི་ཉིན་མོ་ནགས་མུན་པ་ཅན་དུ་ཞུགས་ནའང་སྤུ་དག་གྱེན་དུ་འགྲེང་བར་འགྱུར་རོ། །སྲིང་མོ། ཁྱེར་བ་འདི་ཅི་ཡིན། ཆོམ་རྐུན་པ་ལྔ་བརྒྱ་ཙམ་དེར་མཆིས་ནས་དད་པས་བདག་ལ་སྩལ་ལོ། །སྲིང་མོ། ཁྱོད་ནི་ཆོམ་རྐུན་པས་ཀྱང་དད་པར་བྱ་བ་ཡིན་གྱི། གལ་ཏེ་ཉེ་དགའ་དེ་དག་གིས་མཐོང་ན་ལྕག་རྒོད་མང་པོས་བརྡབས་ཏེ་ཁུར་ཙ་བར་འགྱུར་རོ། །འདི་ལྟར་རས་ཡུག་ཆེན་འདི་ལྟ་བུ་ཡོད་པ་དེ་ནི་གོས་གསར་པ་ལས་སྣམ་སྦྱར་ཉིས་རིམ་བྱས་ཏེ་སེམས་ལས་ཆུང་ངུས་དགེ་བའི་ཕྱོགས་ལ་ཏྲོན་བྱེད་པར་འགྱུར་རོ། །འཕགས་པ། རས་ཡུག་ཆེན་འདི་བཞེད་དམ། ལྷའི་གནས་ཀྱི་ལྷག་མ་བཞིན་དུའོ། །བདག་གིས་དགེ་འདུན་ལ་བསོད་སྙོམས་ཀྱི་ཕུད་ཕུལ་ཏེ་སླར་འོང་གི་བར་དུ་བཞུགས་ཤིག །དེའི་འོག་ཏུ་ཁྱོད་ལ་རས་ཡུག་ཆེན་དབུལ་ལོ། །ཉེ་དགས་བསམས་པ། ལྷུང་བཟེད་ནག་པོ་ཅན་འགའ་ཞིག་གིས་འདི་བསླངས་ན་དེ་ལ་བྱིན་པར་འགྱུར་རོ་སྙམ་ནས། བདག་གིས་བསོད་སྙོམས་ཀྱི་ཕུད་ལེན་པ་ཁྲིད་འོང་གི་བར་དུ་འདི་ཉིད་དུ་སྡོད་ཅིག །ཉེ་དགའ་རྒྱལ་བྱེད་ཚལ་དུ་སོང་བ་དང༌། བསོད་སྙོམས་ཀྱི་ཕུད་ལེན་པ་སྙིང་ལས་ཆུང་ངུར་འཁོད་པ་མཐོང་བས། སྦྱིན་བདག་དག་ནི་ཁུར་གྱིས་ངལ་ཞིང་སྡོད་ལ། ཁྱེད་སྙིང་ལས་ཆུང་ངུས་འཁོད་ན་ཚུར་ཤོག །བསོད་སྙོམས་ཀྱི་ཕུད་ལོངས་ཤིག །དེ་དག་གིས་གཞོང་བུ་ཐོགས་ཏེ་དོང་བ་དང༌། ཨུཏྤ་ལའི་མདོག་གིས་དེ་ལ་བསོད་སྙོམས་ཀྱི་ཕུད་ཕུལ་ནས། རས་ཡུག་ཆེན་སྤྲུགས་ཏེ་ཉེ་དགའ་ལ་ཕུལ་ལོ། །ཉེ་དགས། ཁྱོད་སྦྱིན་པ་འདིས་སེམས་ཀྱི་རྒྱན་དང༌། སེམས་ཀྱི་ཡོ་བྱད་དང༌། རྣལ་འབྱོར་གྱི་ཚོགས་དང༌། དོན་གྱི་མཆོག་དང༌། ལྷ་དང་མི་རྣམས་ཀྱི་གོས་དག་ཐོབ་པར་གྱུར་ཅིག །དེ་ནས་ཨུཏྤ་ལའི་མདོག་སྟོན་པའི་དྲུང་དུ་སོང་ནས་ཕྱག་འཚལ་ཏེ་མཐའ་གཅིག་ཏུ་འདུག་གོ །དེའི་ཆོས་གོས་ལྔ་ངན་ཞིང་སྣམ་སྦྱར་ཡང་བརྙིངས་ནས། སྟོན་པས་ཀུན་དགའ་བོ་ལ། དགེ་སློང་མ་རྣམས་ཀྱིས་དབྱར་གྱི་གོས་རྙེད་པ་མ་གྲུབ་བམ། །གྲུབ་བོ། །འོ་ན་ཅིའི་ཕྱིར་ཨུཏྤ་ལའི་མདོག་གི་ཆོས་གོས་ལྔ་བརྙིངས། བཙུན་པ། འདི་ནི་དད་པ་དང་ལྡན་ཞིང་དགེ་བའི་བསམ་པ་ཅན་ལགས་ཏེ། འདིས་དཀོན་མཆོག་གསུམ་མམ། དགེ་སློང་ཡིད་དུ་འཐད་པ་ལ་མ་ཕུལ་བའམ། མ་བཏང་བ་ཅི་ཡང་མ་མཆིས་ཏེ། དེང་ཡང་རས་ཡུག་ཆེན་རྙེད་ནས་ཉེ་དགའ་ལ་བྱིན་ནོ། །དགེ་སློང་དག་དགེ་སློང་མ་ཡིན་པ་ལས་གོས་ལྷག་པ་ལེན་ནམ། །ལེན་ནོ། །དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་ཆོས་གོས་ལྔ་ཚང་ངམ་མ་ཚང་མི་སེམས་པར་ཐོབ་ཚད་ལེན་གྱི། ཉེ་དུ་ལས་ནི་བྱིན་ཡང་མི་ལེན་ནོ། །ཀུན་དགའ་བོ། ཨུཏྤ་ལའི་མདོག་ལ་(༡༦༤ན)གཙུག་ལག་ཁང་ཆེན་པོ་ནས་ཆོས་གོས་ལྔ་བྱིན་ཅིག །དེས་བྱིན་ནོ། །བྱུང་བ་འདི་དང་སོགས་སྔར་བཞིན། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན་སྤང་བའི་ལྟུང་བྱེད་དོ། །མཉན་ཡོད་ན་ཁྱིམ་བདག་ཅིག་གིས་བདག་ནོར་དང་ལྡན་ཡང་འཇིག་རྟེན་ཕ་རོལ་གྱི་ལམ་བརྒྱགས་ཅུང་ཟད་ཀྱང་མ་ཁྱེར་རོ་སྙམ་ནས་སེམས་ཁོང་དུ་ཆུད་པ་དང༌། ཆུང་མས་དྲིས་པས་རྒྱུ་མཚན་བཤད་ནས། སངས་རྒྱ་དགེ་འདུན་དང་བཅས་པ་ལ་བཤོས་གསོལ་ནས་རས་ཟུང་རེ་དབུལ་ལམ་སྙམ་མོ། །ལེགས་ཀྱིས་མཛོད་ཅིག །དེས་སྟོན་པ་ཅན་སོང་ནས་ཆོས་ཉན། གསོལ་ནས། སང་གདུགས་ཚོགས་བསོད་པ་དྲངས། སངས་རྒྱས་ལ་སོགས་པ་དགེ་འདུན་རེ་རེ་ལ་རས་བཅོས་བུ་གསར་པ་ཕྲུགས་རེ་གསོལ་ནས། ཆུང་མ་ལ། རྗེས་སུ་ཡི་རང་བར་གྱིས་ཤིག །རྗེའི་སྲས་ཀྱིས་ནི་འཇིག་རྟེན་ཕ་རོལ་གྱི་ལམ་བརྒྱགས་བསྣམས་ན་བདག་གིས་མ་འཚལ་ལོ། །
བཟང་མོ། བདག་ཅག་གཉིས་ཀྱི་ལོངས་སྤྱོད་ཐུན་མོང་བ་མ་ཡིན་ནམ། ལགས་མོད། བདག་གིས་ཀྱང་སྐྱེ་དགུའི་བདག་མོ་ཆེན་མོ་ལ་སོགས་པ་དགེ་སློང་མའི་དགེ་འདུན་ལ་བཤོས་གསོལ་ཏེ། ཆེན་པོ་ལ་འོས་པའི་གོས་དག་ཕུལ་ན་བདག་གིས་ཀྱང་འཇིག་རྟེན་ཕ་རོལ་གྱི་ལམ་བརྒྱགས་འཚལ་བར་འགྱུར་རོ། །ཁྱིམ་བདག་གིས་སྨྲས་པ། སྔར་བྱིན་པས་ཕྱིས་སྦྱིན་པར་བྱར་མེད་དམ། དེ་བཞིན་གྱིས་ཤིག །དེས་སྐྱེ་དགུའི་བདག་མོ་དགེ་སློང་མའི་དགེ་འདུན་དང་བཅས་པ་སྤྱན་དྲངས། བསོད་སྙོམས་བསོད་པ་དྲངས་ནས་ཆེན་པོ་ལ་འོས་པའི་གོས་དག་ཕུལ་བ་དང་སྐྱེ་དགུའི་བདག་མོའི་བསམ་པ་ལ། སྟོན་པ་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་པས། བླངས་ན་ནི་བསླབ་པའི་གཞི་འཁྲུགས་པར་འགྱུར་ལ། མ་བླངས་ན་ཁྱིམ་བདག་གི་ཆུང་མའི་བསོད་ནམས་ཀྱི་བར་ཆད་དང༌། དགེ་སློང་མའི་དགེ་འདུན་གྱི་རྙེད་པའི་བར་ཆད་དུ་འགྱུར་རོ་སྙམ་མོ། །དགེ་སློང་མ་རྣམས་ཀྱང༌། སྐྱེ་དགུའི་བདག་མོ་ཆེན་མོས་ཆེན་པོ་ལ་འོས་པའི་གོས་དག་བླངས་ན་གནང་བའི་དུས་སྲིད་དོ་སྙམ་མོ། །དེས་གོས་དག་བླངས་ནས་ཡོན་བཤད་དེ་སོང་ནས་སྟོན་པའི་ཞབས་ལ་ཕྱག་འཚལ་ཏེ་མཐའ་གཅིག་ཏུ་འདུག་ནས་སྐབས་དེ་རྒྱས་པར་གསོལ་བ་དང༌། ངས་གནང་བ་ཁྱོད་ཀྱིས་ཤེས་པ་ལེགས་ཏེ། དགེ་སློང་མས་གོས་རིན་ཆེན་པོ་བརྗེ་བའི་ཕྱིར་བླང་བར་བྱའོ། །དེ་ནས་དགེ་སློང་མ་བཅུ་གཉིས་སྡེས་གོས་དེ་དག་ཁྱེར་ཏེ་དྲུག་སྡེའི་གན་དུ་སོང་ནས། འཕགས་པ་དག །སྟོན་པས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་དེ། བདག་ཅག་གིས་ཆེན་པོ་ལ་འོས་པའི་གོས་རྙེད་པ་འདི་དག་ཁྱེད་བཞེས་ལ་བདག་ཅག་ལ་ངན་པ་(༡༦༤བ)སྩོལ་ཅིག །སྲིང་མོ་དག །བདག་ཅག་ལ་དགེ་སློང་མའི་རས་མ་དགོས་པ་མེད་དེ། དེའི་ཚེ་ཡང་བདག་ཅག་བྱིས་པ་རྨོངས་པ་མི་གསལ་བ་མི་མཁས་པ་དག་གིས་ཁུར་བླང་པར་གྱུར་གྱིས་མི་ལེན་ནོ། །དགེ་སློང་མ་གཞན་དག་གནས་བརྟན་རྣམས་ཀྱི་དྲུང་དུ་སོང་ནས། འདི་དག་བཞེས་ལ་བདག་ཅག་ལ་ངན་པ་དག་སྩོལ་ཅིག །སྟོན་པ་ལ་ཞུའོ་ཟེར་ནས་སྐབས་དེ་གསོལ་བ་དང༌། བསླབ་པ་ལ་གུས་པའི་བསྔགས་པ་བརྗོད་ནས། དགེ་སློང་མ་དང་ལྷན་ཅིག་བརྗེ་བར་བྱའོ། །མཉམ་པས་སོ། །ཡང་ན་དེ་དགའ་བ་ཉིད་ཀྱིས་སོ། །དགེ་འདུན་ལ་གོས་འབུལ་བ་དང་སོགས་སོ། །
སློང་བའི་སྤང་བ་ནི། མཉན་ཡོད་ན་ཁྱིམ་བདག་ཅིག་གིས་ཆུང་མ་ལ། ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །རྗེའི་སྲས། གཞོན་པའི་གནས་སྐབས་སུ་རོལ་བ་དང༌། དགྱེས་དགུར་སྤྱོད་ལ། བགྲེས་པའི་སྐབས་སུ་ནོར་སྒྲུབས་མཛོད་ཅིག །བཟང་མོ། གཞོན་དུས་སུ་ཚ་གྲང་བཟོད་པས་ནོར་བསྒྲུབ་ཅིང༌། རྒས་ནས་བདེ་བ་སྤྱད་དོ། །ཆུང་མས་བསམས་པ། བདག་གིས་བསྐུལ་བར་བྱ་བ་དེ་རང་ཉིད་བྱེད་དོ་སྙམ་ནས། དེ་ལྟར་མཛོད་ཅིག །དེས་ཆུང་མ་ལ་ཟས་ཙམ་བྱིན་ནས་ཟོང་ཁྱེར་ཏེ་ཡུལ་གཞན་དུ་སོང་ངོ༌། །དེའི་ཆུང་མས་བསམས་པ། བདག་གི་ཁྱིམ་ཐབ་ཚ་གྲང་དང་བཀྲེས་སྐོམ་གྱིས་ཉེན་བཞིན་དུ་ལོངས་སྤྱོད་དག་སྒྲུབ་པ་ནི་བདག་གི་ཕྱིར་ཡིན་པས། བདག་ལས་མེད་པར་འདུག་པ་ནི་ཚུལ་དང་མི་མཐུན་ནོ་སྙམ་ནས། རས་བལ་ཉོས་ཏེ་དོག་པ་བཀལ་ནས་ཐ་ག་པ་མཁས་པ་ལ་རས་ཟུང་བཟང་པོ་འཐག་ཏུ་བཅུག་ནས་རས་དེ་སྤོས་སྣ་ཚོགས་ཀྱིས་བསྒོས་ཏེ་གོས་ཀྱི་ཟ་མ་ཏོག་དུ་བཅུག་ནས་བཞག་གོ །ཁྱིམ་བདག་དེས་ཀྱང་དོན་གྲུབ་ནས་འོངས་པ་དང༌། དེས་ཁྱིམ་བདག་ཁྲུས་བྱས་ནས་རས་ཟུང་དེ་ཕུལ་ལོ། །འདི་ག་ལས་རྙེད། རྒྱས་པར་བསྙད་དོ། །བཟང་མོ། ལེགས་སོ། །ཁོ་བོས་བསྒྲུབས། ཁྱོད་ཀྱིས་སྦེད་ན་ལོངས་སྤྱོད་རིང་པོ་མི་ཐོགས་པར་འཕེལ་བར་འགྱུར་རོ། །རྗེའི་སྲས། འདི་ནི་བདག་གིས་དཀའ་བས་བསྒྲུབས་པ་ལགས་ཀྱིས། སུ་ལའང་མ་སྟེར་ཅིག །ཁྱིམ་བདག་དེ་དད་པ་དང་ལྡན་པ། དགེ་བའི་བསམ་པ་ཅན་ཡིན་པས། སྟོན་པ་ལ་ཕྱག་འཚལ་དུ་འགྲོ་བ་ན། སྒོ་བས་མཐོང་ནས། འདི་རས་ཟུང་འདི་ལྟ་བུ་གྱོན་པ་ལས་ན་འདིས་རྙེད་པ་མང་པོ་རྙེད་དོ་སྙམ་མོ། །ཉེ་དགའ་རྒྱལ་བྱེད་ཚལ་གྱི་སྒོ་ན་འདུག་པས་མཐོང་ནས། བདག་གིས་འདི་མ་འཕྲོགས་ན་ཉེ་དགའི་མིང་མི་གཟུང་ངོ་སྙམ་ནས། ཁྱིམ་བདག་འོངས་པ་ལེགས་སོ། །ཡུན་རིང་མོ་ནས་ཟླ་བ་བཞིན་དུ་ག་ལས་འཁོར། བདག་ཟོང་ཐོགས་ཏེ་ཡུལ་གཞན་དུ་མཆིས་སོ། །རྙེད་པ་མང་པོ་གྲུབ་བམ། ཅུང་ཟད་ཙམ་མོ། །ཚུར་ཤོག །ཆོས་བསྟན་པར་བྱ། དྲུགས་སྡེས་ཚུལ་ཁྲིམས་ཀྱི་གཏམ་བྱས་ན་ཉན་པ་པོ་རྣམས་(༡༦༥ན)བདག་ཅག་ལྷ་རྣམས་སུ་སྐྱེས་སོ་སྙམ་དུ་སེམས་ལ། སྦྱིན་པའི་གཏམ་བྱེད་ན་ཉན་པ་པོ་དག་རང་གི་ཤ་ཡང་གཅད་ཅིང་སྦྱིན་པར་བྱའོ་སྙམ་དུ་སེམས་སོ། །ངན་སོང་གི་གཏམ་བྱེད་ན་ཉན་པ་པོ་དག་བདག་ཅག་ངན་སོང་དུ་སྐྱེས་སོ་སྙམ་དུ་སེམས་པར་འགྱུར་བ་ཡིན་ནོ། །དེ་ལ་ཆོས་བསྟན་པས་དད་ནས། ན་བཟའ་ཕྲུགས་གཅིག་དབུལ་ལོ། །ཨ་རོག་ཁྱ། སྦྱིན་པ་འདིས་ཁྱོད་སེམས་ཀྱི་རྒྱན་དང༌། སེམས་ཀྱི་ཡོ་བྱད་དང༌། རྣལ་འབྱོར་གྱི་ཚོགས་དང༌། དོན་གྱི་མཆོག་དང༌། ལྷ་རྣམས་ཀྱི་གོས་དག་ཐོབ་པར་གྱུར་ཅིག །བཞིན་བཟང༌། སྟོན་པས་ཀྱང༌། སང་དག་འཆིའམ་སུས་ཤེས་ཀྱི། དེ་རིང་ཉིད་དུ་བརྟུལ་ཏེ་བྱ། །འཆི་བདག་སྡེ་ཆེན་དེ་དང་ནི། །ཁྱེད་ཅག་བཤེས་པ་མ་ཡིན་ནོ། །ཞེས་གསུངས་ཀྱིས། རས་ཟུང་བཟང་པོ་གྱོན་པ་འདི་ཉིད་ཁོ་བོ་ལ་བྱིན་ཅིག །ཁོ་བོས་འདི་ལས་སྣམ་སྦྱར་ཉིས་རིམ་བྱས་ཏེ་སེམས་ལས་ཆུང་ངུས་དགེ་བའི་ཕྱོགས་ལ་ཏྲོན་བྱའོ། །
འཕགས་པ། ཁྱོད་འདི་བཞེད་དམ། ལྷའི་གནས་ཀྱི་ལྷག་མ་བཞིན་དུའོ། །བདག་ཁྱོད་ལ་མི་འབུལ་བ་ནི་མ་ལགས་ན། འདི་ནི་མཆིས་བྲང་གིས་བདག་ལ་སྩལ་བ་ལགས་སོ། །ཁོ་བོས་ཁྱོད་གཞན་ལ་དད་པར་བྱས་ན་ཁྱོད་བུད་མེད་ཁོ་ནའི་དབང་ཡིན་ནམ་ཞེས་ཉེ་དགས་དེའི་གོས་བླངས་ནས་ལག་པ་གཉིས་འདྲིལ། བཞིན་སྒྱུར་རོ། །འཕགས་པ། འདི་ཅིའི་ཐ་ཚིག །ཁྱོད་ལ་བཏང་བ་ལས་བྱུང་བའི་བསོད་ནམས་ཡོད་ན་ལོངས་སྤྱད་པ་ལས་བྱུང་བའི་བསོད་ནམས་མེད་དེ། ནམ་ཞིག་ན་འདི་འདྲ་རྙེད་ན་འདི་ལས་ཆོས་གོས་བྱེད་པར་འགྱུར་བས་འདི་ཆོས་གོས་ཀྱི་གདང་ཁོ་ན་ལ་ཟད་པར་འགྱུར་རོ། །འཕགས་པ། བདག་སྒྲེན་མོར་མཆིའམ། ཁྱིམ་བདག །ཁྱོད་ལ་གོས་གྱོན་པས་ཅི་ཞིག་བྱ། ཚུལ་ཁྲིམས་དང༌། རིགས་དང༌། སྤྱོད་པ་གྱོན་པས་ཆོག་མོད། གཅེར་བུ་པ་ངོ་ཚ་དང་ཁྲེལ་ཉམས་པ་དེ་དག་སྒྲེན་མོར་འགྲོ་ན་མི་སྡུག་གི །ཁྱོད་ལྟ་བུ་ངོ་ཚ་ཤེས་པ་དང་ཁྲེལ་ཡོད་དང་ལྡན་པ་ལ་སྒྲེན་མོར་འགྲོ་བ་མི་སྡུག་པ་ཅི་ཡོད། ཁྱོད་དོར་ཐུང་མི་གྱོན་ནམ། འཚལ་ལོ། །ཁྱིམ་བདག་རྣམས་དོར་ཐུང་གྱོན་ཏེ་ཤིང་ཚལ་ཐོགས་ནས་བ་ལང་གི་ཕྱི་བཞིན་འགྲོ་བ་ཡིན་ན། ཁྱོད་ཀྱང་ཤིང་ཚལ་ཐོགས་ལ་བ་ལང་གི་ཕྱི་བཞིན་སོང་བ་དང༌། སྐྱེ་བོས་བ་ལང་བསུ་བ་ཕྱིར་འགྲོ་བ་ཞིག་ཡིན་པར་ཤེས་པར་འགྱུར་རོ་ཞེས་དེའི་སྨད་གཡོགས་ཀྱང་བླངས་སོ། །དེ་ཤིང་ཚལ་ཐོགས་ཏེ་བ་ལང་གི་ཕྱི་བཞིན་ཞུགས་པ་དང་སྒོ་བས་མཐོང་ནས། ཁྱོད་ད་ཅི་ཁོ་ན་ཆེན་པོ་ལ་འོས་པའི་རས་ཟུང་གྱོན་པར་མཐོང་ན། དེ་དག་ཆོམ་རྐུམ་པས་བཅོམ་མམ། ཁོ་བོ་ཆོམ་རྐུན་པས་མ་བཅོམ་མོད། ཉེ་དགས་ཁའི་ཆོས་ཀྱིས་བཅོམ་མོ། །
དེ་ནས་མགོན་མེད་ཟས་སྦྱིན་ནངས་པར་སྔར་ལངས་ཏེ་འཁོར་ལྔ་བརྒྱ་དང་ལྷན་(༡༦༥བ)ཅིག་མཉན་ཡོད་ནས་འགྲོ་བ་སྒོ་བ་དེས་མཐོང་ནས་སྨྲས་པ། ཁྱོད་ཀྱིས་དོན་མཐུན་མང་དུ་ཁྲིད་འོངས་ཀྱིས་མི་ཆོམས་པར་བག་གྱིས་ཤིག །ཀྱཻ་ནང་རྗེ། རྒྱལ་བྱེད་ཚལ་དང་མཉན་ཡོད་ཀྱི་བར་ན་ཆོམ་རྐུན་འཁོད་དམ། ལམ་ན་མ་ཡིན་གྱི་རྒྱལ་བྱེད་ཚལ་ཉིད་ན་འཁོད་དོ། །ཀྱེ་ནང་རྗེ། ཁྱོད་ནི་བལ་གྱི་རིགས་ནག་པོ་དང་འདྲ་སྟེ། སྒོ་འདི་ནས་སྟོན་པ་དང་གནས་བརྟན་དག་གཤེགས་པ་གང་གིས་ཀྱང་ཁྱོད་དཀར་པོར་མཛད་མ་སྤྱོད་དོ། །སྟོན་པ་དང་གནས་བརྟན་རྣམས་ཀྱི་ཞབས་ཀྱི་རྡུལ་ནི་བདག་གི་མགོས་བླངས་པ་ཡིན་ན། ཁ་སང་ཉིན་མོ་ཁྱིམ་བདག་ཅིག་རས་ཟུང་གྱོན་སོང་བ་ཉེ་དགའི་ཁས་ཆོས་ཀྱིས་ཕྲོགས་ནས་ཁྱིམ་བདག་དེ་སྨོད་ཅིང་དོར་ཐུང་གིས་ཞུགས་སོ། །ཁྱིམ་བདག་དེ་རྒྱལ་བྱེད་ཚལ་དུ་སོང་བ་དང༌། ཉེ་དགས་མཐོང་ནས། ཁྱིམ་བདག །ཨ་རོག་ཁྱ། ཨ་རོག་མི་ཁྱ་ཡང་རུང་ངོ༌། །ཁྱིམ་བདག །ཁྱོད་ཁོ་བོ་ལ་སྔན་ཆད་དུ་བར་འཐུལ་ན་ད་མེ་ཁོ་ནར་འབར་རོ། །ཁོ་བོ་མེར་མི་འབར་དུ་ཇི་ལྟར་རུང༌། གཞན་དག་རབ་ཏུ་བྱུང་བ་ནི་འདོད་པ་སྤང་བའི་ཕྱིར་ཡིན་ན། ཉེ་དགའ་ནི་འདོད་པ་མངོན་པར་སྤེལ་བའི་ཕྱིར་ཡིན་ནོ། །ཁོ་བོས་ཅི་བྱས། ཁྱོད་ཀྱིས་ཁྱིམ་བདག་རྒྱལ་བྱེད་ཚལ་བལྟར་འོངས་པའི་རས་ཟུང་ཕྲོགས་ནས་དེ་སྨོད་པར་བྱེད་དོ། །ཉེ་དགས་སྨྲས་པ། དེ་ནི་འཇིག་རྟེན༌ན། ལྷ་ནི་སྦྱིན་པར་བྱེད་ལ། ཡི་དྭགས་ནི་ཟློག་པར་བྱེད་དོ་ཞེས་ཟེར་བ་ཡིན་ནོ། །ཅི་དེས་ཁྱོད་ལ་རིལ་བ་བྷིང་ག་ར་ཐོགས་ཏེ་ཕུལ་ལམ། མི་བཟོད་ན་བསླབ་པ་འཆར་ཆུག་ཅིག །ཁོ་བོས་དེ་ཡལ་བར་བོར་དུ་རེའམ། ཁྱིམ་བདག་གིས། བཙུན་པ། འཕགས་པ་འདི་དག་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་ལ་གོས་སློང་བར་བགྱིད་ན། ཁྱིམ་བདག་གམ་དེའི་ཆུང་མ་ཉེ་དུ་མ་ཡིན་པ་ལས་གོས་སློང་བར་མི་འགྱུར་བར་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བར་མཛད་པའི་རིགས་སོ། །ཅང་མི་གསུངས་པས་གནང་ངོ༌། །
དེ་ནས། བྱུང་བ་འདི་དང་སོགས། ཡང་དགེ་སློང་གང་ཁྱིམ་བདག་གམ། ཁྱིམ་བདག་གི་ཅུང་མ་ཉེ་དུ་མ་ཡིན་པའི་གན་དུ་སོང་སྟེ་གོས་སློང་ན་སྤང་བའི་ལྟུང་བྱེད་དོ། །སྟོན་པ་མཉན་ཡོད་ནའོ། །གྲོང་ཕྲེང་བ་ཅན་པའི་དགེ་སློང་བཞི་བཅུ་དོན་མཐུན་དང་ལྷན་ཅིག་ལྗོངས་རྒྱུར་སོང་བ་ན་ཆོམ་རྐུན་པས་བཅོམ་ནས་འདི་སྙམ་དུ། སྟོན་པས་ཁྱིམ་པ་ཉེ་དུ་མ་ཡིན་པ་ལ་གོས་སློང་ན་སྤང་བའི་ལྟུང་བྱེད་བཅས་པས་འདི་ན་བདག་ཅག་ལ་ཉེ་དུ་མེད་ཀྱིས་མཉན་ཡོད་དུ་སོང་ན་དགེ་སློང་གིས་སྟེར་རོ་སྙམ་ནས། ཉིན་མོ་ཚང་ཚིང་གི་ནང་དུ་ཞུགས་ནས་འཁོད་ཅིང་མཚན་མོ་འགེབས་པས་རྒྱལ་བྱེད་ཚལ་དུ་སོང་བ་དང༌། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དག་གིས་མཐོང་ནས། གཅེར་བུ་དག །འདི་ཁྱེད་ཀྱི་འདུག་གནས་མ་ཡིན་ན་ག་ལས་འོངས། བདག་(༡༦༦ན)ཅག་གཅེར་བུ་མ་ཡིན་ནོ། །འོ་ན་སུ། དགེ་སློང་ངོ༌། །དགེ་སློང་འདི་ལྟ་བུ་ཡོད་དམ། ཆོམ་རྐུན་པས་བཅོམ་པ་ན་ཡོད་དོ། །ཁྱེད་ཅག་གི་མིང་ཅི། གྲོང་ཕྲེང་བ་ཅན་པའི་དགེ་སློང་བཞི་བཅུའོ། །འོངས་པ་ལེགས་སོ་ཞེས་ལ་ལས་སྣམ་སྦྱར། ལ་ལས་མཐང་གོས། ལ་ལས་རྔུལ་གཟན་བྱིན་པའི་སྐབས་དེ་གསོལ་བས། བསླབ་པ་ལ་གུས་པའི་བསྔགས་པ་བརྗོད་ནས། སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ཡང་དགེ་སློང་གང་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ། གོས་སློང་ན་དུས་མ་གཏོགས་ཏེ་སྤང་བའི་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། གོས་བརླག་གམ། གོས་ཚིག་གམ། གོས་རླུང་གིས་ཁྱེར་རམ། ཆུས་ཁྱེར་ན་དེ་ལ་དེ་ནི་དུས་ཡིན་ནོ། །
སློང་བར་རིགས་པའི་སྤང་བ་ནི། སྟོན་པ་མཉན་ཡོད་ནའོ། །དེའི་ཚེ་ཉེ་དགའ་ལ་བློ་སྐྱེས་པ། འདི་ཐམས་ཅད་ཁྱིམ་བདག་མགོན་མེད་ཟས་སྦྱིན་གྱིས་ཞུས་ནས་བསླབ་པ་བསྡམས་པས་ཕྱིན་ཆད་གང་ནས་ཀྱང་བཅའ་བའི་རིན་ཙམ་ཡང་བསླང་མི་ནུས་ན། སྟོན་པས་ཕྲེང་བ་ཅན་པའི་དགེ་སློང་བཞི་བཅུ་ལ་བརྟེན་ནས་བསླབ་པའི་གཞི་བག་ཡངས་སུ་མཛད་པས་དེ་དག་སྔོན་དུ་བཏང་སྟེ་རྙེད་པ་བསྒྲུབ་བོ་སྙམ་ནས་དེ་དག་གི་གན་དུ་སོང་བ་དང༌། རྙང་རྙིང་འཚེམ་པ་མཐོང་ནས་སྨྲས་པ། བདག་གིས་གཞན་ཐོས་ལ། གཞན་མཐོང་སྟེ། ཁྱེད་ཅག་བསམ་གཏན་གྱི་བདེ་བ་མྱོང་བར་སེམས་ཀྱི། རྙང་རྙིང་འཚེམ་ཞིང་འཁོད་པར་མི་སེམས་སོ། །བདག་ཅག་ཆོམ་རྐུན་པས་བཅོམ་མོ། །ཀྱེ་མ་མ་ལེགས་སོ། །མ་ལེགས་སོ། །གནས་བརྟན། སུའི་མྱ་ངན་བྱེད། ཁོ་བོ་ཅག་གིའམ། མིན་ཏེ། ཁྱེད་ཅག་བཅོམ་པའི་མ་བྱིན་པར་ལེན་པ་དེ་དག་སྒྲེན་མོ་ཁོ་ནར་སྐྱེ་ཞིང༌། སྒྲེན་མོ་ཁོ་ནར་འཆི་བར་འགྱུར་བས་དེ་དག་གི་མྱ་ངན་བྱེད་དོ། །ཁྱེད་ཅིའི་ཕྱིར་གོས་མི་སློང༌། སུ་ཞིག་དཀོན་མཆོག་གསུམ་བཏང་ནས་ཁོ་བོ་ཅག་ལ་སྟེར། ཁྱེད་ཅག་སྟོན་པས་མདོ་སྡེའི་མཐའ་དེ་དང་དེ་དག་ཏུ་ངེས་པར་བསྟོད་པ་དང༌། བཀུར་བ་དང༌། བསྔགས་པས་སྟེར་རོ། །སུ་ལ་སློང་མི་ཤེས་སོ། །ཤེས་པ་ལ་ཅིའི་ཕྱིར་མི་འཆོལ། སུ་ཞིག་དགེ་བའི་ཕྱོགས་ཉམས་པར་བྱས་ཏེ་ཁོ་བོ་ཅག་གི་དོན་དུ་གོས་སློང༌། ཁོ་བོ་ལ་ཐབས་ཡོད་དོ། །ཁྱེད་ཅག་ལ་མི་གནོད་ན་ཁོ་བོ་ཅག་ཀྱང་གཞོན་ནུ་དག་གི་དོན་དུ་རས་ཡུག་ཕྲན་དང༌། རས་ཡུག་ཆེན་སློང་ངོ༌། །དེ་ལ་ཁོ་བོ་ཅག་ལ་གནོད་པ་ཅི་ཡོད། རེ་རེས་ཆོས་གོས་གསུམ་གསུམ་སློང་ལ་རག་གོ །ཁོ་བོ་ཅག་གིས་བསོད་སྙོམས་རྒྱུ་བ་དང་གོས་སློང་བ་གཉིས་ཀ་མི་ནུས་ཀྱིས། ཕྱི་རོལ་ཏུ་ཟས་ལ་བོས་པའི་ཚེ་བསླང་བར་བྱའོ་ཞེས་ཉེ་དགའ་ནང་དུ་ཞུགས་ཏེ། ཐབས་ཅི་བྱས་ན་མཉན་ཡོད་(༡༦༦བ)ཐམས་ཅད་ཆུབ་པར་བྱ་སྙམ་ནས་བསམས་པ། དང་པོར་དབུལ་པོའི་སྲང་དུ་འགྲོ་ཞིང་དེའི་འོག་ཏུ་ཕྱུག་པོའི་སྲང་དུ་འགྲོ། དེ་ནས་རྒྱལ་པོ་གསལ་རྒྱལ་ལ་སོགས་པའི་ཁྱིམ་དུ་འགྲོའི་སྙམ་ནས་སོ། །སང་སངས་རྒྱས་ཉན་ཐོས་དང་བཅས་པ་ཁྱིམ་བདག་ཅིག་གིས་གདུགས་ཚོད་ལ་སྤྱན་དྲངས་པ་དང༌། ཉེ་དགས་གཞོན་ནུ་ཞིག་ཕྲེང་བ་ཅན་པའི་དགེ་སློང་བཞི་བཅུའི་གན་དུ་བཏང་སྟེ། ཆོས་གོས་བསླང་གིས་ཤོག་ཅིག་ཅེས་སྤྲིངས་སོ། །
གཞོན་ནུ་དེ་དེར་སོང་བ་དང༌། དེ་དག་སྙོམས་པར་ཞུགས་པ་མཐོང་ནས་ཏིང་ངེ་འཛིན་ལས་སློང་མ་ནུས་པར་ཉེ་དགའི་གན་དུ་སོང་ནས། དེ་དག་སྙོམས་པར་ཞུགས་པས་སུས་ཀྱང་སློང་བར་མི་ནུས་སོ། །བཀྲེན་པ། ཁྱོད་བརྩོན་འགྲུས་འདིས་ཟག་པ་ཟད་པ་མངོན་དུ་བྱེད་དམ། ཉེ་དགའ་རང་ཉིད་འགྲོའོ་ཞེས་སོང་ནས་དཔོང་སའི་ཁང་པར་སྒོ་གླེགས་ལ་རྟིང་བས་བརྡུངས་པ་དང༌། དཔོང་སའི་ཁང་པ་ཐམས་ཅད་འགུལ་བས་དེ་དག་ཏིང་ངེ་འཛིན་ལས་ལངས་པ་དང༌། ཆོས་གོས་གསུམ་བསླང་དགོས་ན་ཁྱེད་ཅག་སྙིང་ལས་ཆུང་ངུས་འཁོད་དམ། ཚུར་ཤོག་འདོང་ངོ༌། །སོ་ཤིང་བོར་ནས་འདོང་ངོ༌། །ལམ་ཀར་དོར་ཅིག །དེ་དག་འཕགས་པ་དང༌། ཉེ་དགས་སྨྲས་པ། ཁོ་བོ་ཅག་དྲུག་སྡེ་དག་ནི་བྱ་རོག་དཀར་པོ་དང་འདྲ་བས་རྒན་རིམ་དུ་མི་འཁོད་པར། བར་བར་དུ་འཁོད་པར་བྱའོ། །དབུལ་པོའི་སྲང་དུ་སོང་སྟེ་དངར་ཁ་བྱས་ནས་བསྡད་པ་དང་དེ་དག་གིས་མཐོང་ནས་ཉམ་ང་སྟེ་སྨྲས་པ། ཉེས་པ་འགའ་ཞིག་མ་བྱུང་ངམ། བྱུང་ངོ༌། །ཅི་ནོངས། ཁྱེད་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་བོ་སྟོན་པས་མདོ་སྡེར་བསྔགས་པ་དེ་དག་ཐོས་སམ། ཐོས་སོ། །དེ་དག་ཆོམ་རྐུན་པས་བཅོམ་མོ། །ཀྱེ་མདའ་གཞུ་དང་ཕུབ་དང་དབྱུག་པ་ལོངས་ཤིག །ཆོམ་རྐུན་པ་འཛིན་དུ་འདོང་ངོ༌། །བཅོམ་ནས་ཡུན་རིང་དུ་ལོན་ནོ། །འོ་ན་ཅི་བགྱི། གོས་དག་བྱིན་ཅིག །དེ་དག་གིས་གོས་གསར་པ་དང་རྙིང་པ་དག་བྱིན་ནོ། །གོས་དེ་ཁུར་དུ་དྲགས་ཏེ་གཞོན་ནུ་དག་ལ་གཏད་ནས། སོང་ལ་འདི་དག་གཙུག་ལག་ཁང་དུ་སྐྱོལ་ཅིག །དེ་བཞིན་དུ་ཕྱུག་པོའི་སྲང་དུ་སོང་ནས་རས་ཡུག་ཆེན་དང༌། རྒྱལ་པོ་གསལ་རྒྱལ་གྱིས་རེ་རེ་ལ་ཡོ་བྱད་བཅུ་གསུམ་བཅུ་གསུམ་བྱིན་ནོ། །
དགེ་སློང་བཞི་བཅུ་པོས། ད་ཆོག་གི་ཐོང་ཞིག །དྲུག་སྡེ་ན་རེ། ཧ་ཅང་སྟབས་མ་སྔ་ཞིག །ཁྱེད་ཅག་ལ་དང་པོ་ཉིད་ནས། ཁྱེད་ལ་མི་གནོད་ན་ཁོ་བོ་ཅག་ཀྱང་གཞོན་ནུ་དག་གི་དོན་དུ་རས་ཡུག་ཕྲན་དང༌། རས་ཡུག་ཆེན་དག་བསླང་ངོ་ཞེས་མ་སྨྲས་སམ། དེ་དག་དབང་ཆེ་བས་ཅང་མི་སྨྲའོ། །དེ་ནས་བཙུན་མོ་དབྱར་ཚུལ་མ་དང༌། ཕྲེ་ལྡན་མ་དང༌། མགོན་མེད་ཟས་སྦྱིན་དང༌། བླ་མཁྱེན་དྲང་སྲོང་བྱིན་དང༌། རྙིང་པ་དང༌། ས་ག་དང༌། ལེགས་སྐྱེས་མའི་ཁྱིམ་དུ་སོང་ནས་ཀྱང་རེ་རེ་(༡༦༧ན)ལ་བཅུ་གསུམ་བཅུ་གསུམ་བྱིན་ནོ། །དེ་ནས་དྲུག་སྡེ་ན་རེ། དགེ་སློང་བརྒྱ་གྲལ་ལ་མ་འཁོད་ན་གྲལ་སྟོངས་པར་འགྱུར་གྱིས་སོང་ལ་གྲལ་དུ་འཁོད་ཅིག །མ་ཉེས་ཏེ། བདག་ཅག་ཀྱང་བསོད་སྙོམས་བསླངས་ཏེ་འོང་ངོ༌། །དྲུག་སྡེ་གཙུག་ལག་ཁང་དུ་སོང་སྟེ་རྙང་རྙིང་དག་ལས་བཞི་བཅུ་ཕུང་པོར་བྱས་ཏེ་བཞག་གོ །བཞི་བཅུ་པོ་ཟས་ཀྱི་བྱ་བ་བྱས་ནས་འོངས་པ་དང༌། བོས་ནས། ཅི་ཁོ་བོ་ཅག་ཁྱེད་ཀྱི་ཆོས་གོས་བསྲུང་བ་ཡིན་ནམ། རང་གི་གོས་དག་ལོངས་ཤིག །བཞི་བཅུ་པོས་ཕན་ཚུན་གདོང་དུ་ལྟ་བར་བརྩམས་པ་དང༌། ཅིའི་ཕྱིར་ཕན་ཚུན་གདོང་དུ་ལྟ། ཐམས་ཅད་རྙང་རྙིང་ཤ་སྟག་གོ །འདི་དག་མདུད་པ་བོར་དང་སྣམ་སྦྱར་ཡིན་ནོ། །འདི་དག་དྲུབས་དང་བླ་གོས་དང་མཐང་གོས་ཡིན་ནོ། །གལ་ཏེ་མི་དགའ་ན་འདོང་དང་ཡང་བསླང་ངོ༌། །ཀྱེ་མ་འདི་དག་ཀྱང་མ་བསླངས་ནའང་རུང་ངོ༌། །དེ་དག་གིས་རྙང་རྙིང་དེ་དག་ཁྱེར་ཏེ་དགོན་པར་སོང་ནས་འཚེམ་ཞིང་འཁོད་དོ། །དེའི་ཚེ་ཕྲེང་བ་ཅན་པའི་དགེ་སློང་བཞི་བཅུ་པོ་རེ་རེས་ཀྱང་ཡོ་བྱད་བཅུ་གསུམ་བདུན་བདུན་རྙེད་དོ་ཞེས་གྲགས་སོ། །
དེ་དག་དགེ་སློང་གིས་མཐོང་ནས་སྨྲས་པ། བདག་ཅག་གིས་གཞན་ཐོས་ལ་གཞན་མཐོང་སྟེ། ཁྱེད་རེ་རེས་ཀྱང་ཡོ་བྱད་བཅུ་གསུམ་བདུན་བདུན་རྙེད་དོ་ཞེས་ཐོས་ན། ཁྱེད་ཅག་རྙང་རྙིང་དག་འཚེམ་ཞིང་འཁོད་དོ་ཟེར་བའི་སྐབས་དེ་གསོལ་བས། བྱུང་བ་འདི་དང་སོགས། དགེ་སློང་དག །ཁྱེད་ལེན་པའི་དྲོད་མི་ཤེས་པ་བདེན་ནམ། བཙུན་པ། མད་དོ། །མི་བརྩོན་པ་དང༌། མི་སྦྱོར་བ་དང༌། མ་བརྟགས་པར་སྤྱོད་པ་སྨད། བརྩོན་པ་དང༌། སྦྱོར་བ་དང༌། བརྟགས་ཏེ་སྤྱོད་པའི་བསྔགས་པ་བརྗོད་ནས། དེ་ལྟ་བས་ན་ཕན་ཡོན་བཅུ་སོགས། དགེ་སློང་གོས་ཕྲོགས་སམ། བརླག་གམ། ཚིག་གམ། རླུང་གིས་ཁྱེར་རམ། ཆུས་ཁྱེར་ན་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་ལ་གོས་བསླང་བར་བྱའོ། །གལ་ཏེ་དེ་ལ་བྲམ་ཟེའམ། ཁྱིམ་བདག་དད་པ་ཅན་ཞིག་གིས་དུས་ཀྱི་གོས་མང་པོ་སྟོབས་པར་འདོད་ན་དགེ་སློང་དེས་དེ་ལས་སྟོད་གཡོགས་དང་སྨད་གཡོག་དང་བཅས་པའི་མཐར་ཐུག་པར་བླང་བར་བྱའོ། །དེ་ལས་ལྷག་པར་ལེན་ན་སྤང་བའི་ལྟུང་བྱེད་དོ། །
དཔགས་པ་སློང་བའི་སྤང་བ་ནི། སྟོན་པ་མཉན་ཡོད་ནའོ། །ཁྱིམ་བདག་བཟའ་མི་གཉིས་འདུག་པའི་ཁྱིམ་བདག་དེ་གཞན་གྱི་ཆུང་མ་ལ་ཆགས་ནས་དེ་ལ་ཆུང་མས། རྗེའི་སྲས། དེ་ལྟར་མ་མཛད་ཅིག་ཅེས་བཟློག་ཀྱང་མ་ཉན་པས། ཆུང་མ་དེ་ཡང་སྐྱེས་པ་གཞན་དང་ལྷན་ཅིག་འཁྲུལ་པ་རྩོམ་མོ། །སྐྱེས་པས་བུད་མེད་གཞན་ལ་བྱིན། བུད་མེད་དེས་ཀྱང་སྐྱེས་པ་གཞན་ལ་བྱིན་པས་ཁྱིམ་རྒུད་ནས་ཁྱིམ་བདག་དེས་བུ་མོ་མངག་(༡༦༧བ)གཞུག་མ་ལ། འདིས་ཁྱིམ་རྒུད་པར་བྱས་སོ་ཞེས་ཁུ་ཚུར་དང་ཐལ་ལྕག་གིས་བརྡེག་གོ །བུ་མོ་ན་རེ། བདག་གིས་ཁྱིམ་རྒུད་པ་ཅི་ལས་གྱུར་ཤེས་མོད། འོན་ཀྱང་རྗེ་ལ་བསྔགས་པ་མིན་པ་བརྗོད་དུ་ཇི་ལྟར་རུང་ཟེར་བ་ཉེ་དགས་ཚོར་ནས། དེ་གཉིས་ཀ་ལ་ཚུལ་ཁྲིམས་ཀྱི་བསྔགས་པ་དང༌། ཚུལ་ཁྲིམས་འཆལ་བའི་བསྔགས་པ་མིན་པ་བརྗོད་དེ་སྐྱབས་འགྲོ་དང་བསླབ་པའི་གཞི་ལ་བཀོད་དོ། །ཁྱིམ་བདག་དེ་གཏུམ་པས་བུ་མོ་དེ་ལ་བརྡེག་པར་བརྩམས་པ་དང༌། ཆུང་མ་ན་རེ། རྗེའི་སྲས། བདག་ཅག་སྔར་ལས་འབྲས་མི་ཤེས་པས་བརྡེག་གི །ད་དགེ་བའི་བཤེས་གཉེན་ཉེ་དགའ་ལ་བརྟེན་ནས་ལས་འབྲས་ཤེས་པས་སུ་ཞིག་སུའི་བྲན་ཡིན། བུ་མོ་འདི་ལ་མ་བརྡེག་ཅིག །བཟང་མོ། ཁྱོད་ཟེར་བ་མ་ཉེས་སོ། །བུ་མོ། ཁྲུས་གྱིས་ལ་ཤོག་ཅིག །དེ་ཁྲུས་བྱས་ནས་འོངས་པ་དང༌། དེས་དེ་ལ་གོས་བསྐོན་ནས། བུ་མོ། དགའ་བཞིན་ལས་བྱོས་ཤིག །བུ་མོས་བསམས་པ། ཁྱིམ་བདག་ཁྱོ་ཤུག་འདིས་སྔར་ཡང་ཡང་བརྡེག་ཅིང་ཟས་གོས་ངན་པ་སྟེར་ན། ད་ནི་ཕ་མ་དང་འདྲ་སྟེ། ཉེ་དགའི་དྲིན་ཡིན་པས་ཉེ་དགའ་ཅིས་དགའ་བར་བྱ། བརྐུས་ནས་ཕུལ་ན་ནི་སྔར་གྱི་གནས་སུ་འཇོག་པར་འགྱུར་སྙམ་མོ། །དེའི་ཆུང་མས་ཁྱིམ་བདག་དེ་ལ། རྗེའི་སྲས། ཉེ་དགས་བདག་ཅག་དྲི་མ་དང་ཕྲལ་ནས་སྐྱབས་འགྲོ་དང་བསླབ་པའི་གཞི་ལ་བཀོད་དེ་ཆོས་ཀྱིས་བསྡུས་པས་བདག་ཅག་གིས་ཀྱང་དེ་ལ་ཟང་ཟིང་ཅུང་ཟད་ཀྱིས་བསྙེན་བཀུར་བར་བྱའོ། །དེ་བཞིན་བྱའོ། །ཅི་ཞིག་བྱ། རས་ཡུག་ཆེན་ཞིག་དབུལ་ལོ། །བུ་མོ་དེས་དེ་ཐོས་ཏེ། ཉེ་དགའ་མཐོང་བ་དང་ཕྱག་འཚལ་ནས་སྨྲས་པ། བདག་གིས་འཕགས་པ་ལ་དགེས་པ་སྦྲན་པར་བགྱིའོ། །ཁྱིམ་བདག་འདི་ཁྱོད་ལ་རས་ཡུག་ཆེན་འབུལ་བར་འགྱུར་རོ། །བདག་འདོད་པ་ཅན་དུ་འདིས་ཀྱང་འཕྲིགས་སོ་སྙམ་ནས། གལ་ཏེ་བདེན་ན་ལེགས། མི་བདེན་ན་རྡེག་བཙོག་མང་པོ་བྱེད་དུ་བཅུག་སྟེ་སྔར་གྱི་གནས་སུ་གཞག་གོ །གཞུག་ཅིང་དང་མཁྱེན་པར་འགྱུར་རོ། །དེ་སོང་ནས་སྟན་ལ་འདུག་པ་དང༌། ཁྱིམ་བདག་ཆུང་མ་དང་བཅས་པས་ཕྱག་འཚལ་ནས་ཆོས་མཉན་པའི་ཕྱིར་མདུན་དུ་འདུག་གོ །ཉེ་དགས། ཁོ་བོ་ལ་བསྐོན་པར་བྱ་བའི་རས་ཡུག་ཆེན་དེ་བལྟའོ། །བདག་ཅག་གིས་གསང་སྟེ་སྨྲས་པ་སུས་བཤད། ཅི་འཕགས་པས་གཞན་གྱི་སེམས་ཀྱང་མཁྱེན་ནམ། ཁོ་བོ་ལྷུང་བཟེད་དུ་ཟོས་ཤིང་སོ་ལྷགས་པ་དང༌། སྐྲ་དཀར་པོར་གྱུར་ན་ཁོ་བོ་ལ་དེ་ཙམ་ཡང་མི་སྲིད་དམ། དེས་རས་ཡུག་ཆེན་བླངས་ནས་ཕུལ་བ་དང༌། ལག་པ་འདྲིལ། བཞིན་བསྒྱུར་རོ། །ཅིའི་ཕྱིར་དེ་ལྟར་མཛད། ཁྱོད་ལ་འདི་བཏང་བ་ལས་བྱུང་བའི་བསོད་ནམས་ཡོད་ཀྱི། ལོངས་སྤྱད་པའི་བསོད་ནམས་མེད་དེ། འདི་ནི་མཆིལ་ལྷམ་(༡༦༨ན)ཕྱི་བའམ་སྐར་ཁུང་གླན་པར་རུང་སྟེ། ཆོས་གོས་ཀྱི་གདང་ལ་ཟད་པ་དང་མཐར་ཐུག་པར་འགྱུར་རོ། །འོ་ན་ཇི་ལྟར་བགྱི། རས་ཡུག་ཆེན་བཟང་པོ་གཞན་བྱིན་ཅིག །མེད་དོ། །ཉོས་ལ་བྱིན་ཅིག །རིན་མེད་དོ། །
དུས་ཐོབ་ལ་བྱིན་ཅིག །ཆུང་མས། རྗེའི་སྲས། བདག་ཅག་ལ་ཉེ་དགས་ཕན་བཏགས་ཀྱིས་ཉོས་ལ་ཕུལ་ཅིག །དེ་ཉེ་དགའ་དང་ལྷན་ཅིག་ཚོང་ཁང་དུ་ཕྱིན་པ་དང༌། ཉེ་དགས། འདི་ང་རྒྱལ་བསྐྱེད་ན་རས་ཡུག་ཆེན་བཟང་པོ་སྟེར་རོ་སྙམ་ནས། ཁྱིམ་བདག །ཚོང་པ་འདི་ནི་གཅམ་བུ་ཞིག་ཡིན་པས་རས་བཟང་པོ་མེད་ཀྱིས་གཞན་དུ་འདོང་ངོ༌། །ཚོང་པས་ཐོས་ནས་ཆེན་པོ་ལ་འོས་པའི་རས་ཡུག་ཆེན་བསྟན་ཏེ། འཕགས་པ། རས་ཡུག་ཆེན་ལ་གཟིགས། འདི་བཟང་ན། རིན་ཇི་ཙམ། འདི་ཙམ་མོ། །ཁྱིམ་བདག་འཇལ་ལམ། འཇལ་ལོ། །དུས་ཇི་ཙམ་ན། འདི་ཙམ་ནའོ། །ཚོང་པས་ཁྱིམ་བདག་ལ་གཏད། དེས་ཉེ་དགའ་ལ་ཕུལ་བ་དང༌། ཨ་རོག་ཁྱ། ཁྱོད་སྦྱིན་པ་འདིས་སོགས། ཁྱིམ་བདག་དེ་ལོངས་སྤྱོད་བསྲབས་ནས་རིན་དུས་སུ་མ་ཁྱེར་བར་ཚོང་པས་ཁྱིམ་བདག་དེ་ཉི་མ་ལ་བཏགས་པ་དང༌། དེ་ཆུང་པོ་གྲོགས་ཀྱིས་མཐོང་ནས། ཅི་ཁྱོད་ཞུན་མར་འཐུངས་སམ་རིམས་ཀྱིས་བཏབ། བུ་ལོན་པས་བཟུང་ངོ༌། །ཕ་མེས་ཀྱིས་བུ་ལོན་ཡོད་པར་མ་བྱས་ན། བུ་ལོན་པ་ག་ལས་བྱུང༌། ཤཱཀྱའི་དགེ་སྦྱོང་དག་ལ་དད་པ་དེ་དག་འདི་ལྟར་འགྱུར་ཏེ། གང་བྱིན་པ་དེ་མི་ལེན་པར་ལྷག་པར་སློང་ངོ་ཞེས་པའི་སྐབས་དེ་གསོལ་བས། བྱུང་བ་འདི་དང་སོགས། ཉེ་དགའ། ཁྱོད་གང་བྱིན་པས་མི་མགུ་ཞིང་ལྷག་པ་སློང་བ་བདེན་ནམ། བཙུན་པ། མད་དོ། །སྟོན་པས་སྨད་ནས། དེ་ལྟ་བས་ན་ཕན་ཡོན་བཅུ་སོགས། དགེ་སློང་གི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་དག་དཔགས་ནས། བདག་གི་གོས་ཀྱི་རིན་འདི་དག་གིས་གོས་འདི་དང༌། འདི་ལྟ་བུ་ཞིག་ཉོས་ལ་དགེ་སློང་མིང་འདི་ཞེས་བྱ་བ་འོངས་པ་དང་དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས་དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་སྟེ། བཟང་པོ་འདོད་པའི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་དེའི་གན་དུ་སོང་ནས་འདི་སྐད་ཅེས། ཚེ་དང་ལྡན་པས་བདག་གི་ཕྱིར་གོས་ཀྱི་རིན་གང་དག་དཔགས་པའི་གོས་ཀྱི་རིན་དེ་དག་གིས་ཚེ་དང་ལྡན་པས་གོས་འདི་དང་འདི་ལྟ་བུ་ཞིག་ཉོས་ལ་བདག་ལ་གོས་རུང་བ་དུས་སུ་ལེགས་པར་བསྐོན་ཅིག་ཅེས་སྨྲས་ཏེ་གོས་གྲུབ་ན་སྤང་བའི་ལྟུང་བྱེད་དོ། །
སོ་སོ་ནས་དཔགས་པ་སློང་བའི་སྤང་བ་ནི། གཞན་སྔར་དང་འདྲ་བ་ལས། བདག་དག་སོ་སོ་ནས་རས་ཡུག་ཆེན་དབུལ་ལོ་སོགས་དང་། གོས་ཀྱི་རིན་སོ་སོ་བ་དག་དཔགས་ནས་བདག་ཅག་གཉིས་ཀྱིས་སོགས།
བསྐུར་བའི་(༡༦༨བ)སྤང་བ་ནི། སྟོན་པ་རྒྱལ་པོའི་ཁབ་ནའོ། །ཉེ་དགའ་ལ་བློ་སྐྱེས་པ། འདི་ཐམས་ཅད་མགོན་མེད་ཟས་སྦྱིན་གྱིས་ཞུས་ནས་བསླབ་པ་བསྡམས་པས་ཕྱིན་ཆད་རས་ཡུག་ཕྲན་སྒྲེ་བོ་ལས་ཀྱང་བསླང་མི་ནུས་ཀྱིས། ཡི་གེ་སློབ་པའི་གྲོགས་པོ་དབྱར་ཚུལ་ཅན་སོང་ན་ཅུང་ཟད་ཐོབ་སྲིད་སྙམ་ནས་དེའི་ཁྱིམ་དུ་སོང་བ་དང་སྒོ་བས་བཀག་གོ །སྟོན་པས་བདག་ཅག་གི་སྤྱོད་ཡུལ་མ་ཡིན་པ་ལྔ་གསུངས་ན་འདི་གང་ཡིན། དེ་དག་གང་ཡང་མ་ཡིན་གྱི། བྲམ་ཟེ་དབྱར་ཚུལ་གྱི་ཁྱིམ་མོ། །ཀྭ་ཡེ་ནང་རྗེ། ཁྱོད་སོང་ལ་བྲམ་ཟེ་དབྱར་ཚུལ་ལ། ཉེ་དགའ་སྒོ་ན་སྡོད་དོ་ཞེས་གྱིས་ཤིག །སྒོ་བས་སྨྲས་པ། ཁྱོད་གཟུགས་ཅན་སྙིང་པོའི་སྙིང་ཚོམས་པ་མཆིས་པ་ཡིན་སྙམ་མམ། བཀྲེན་པ། སྦྲོན་ན་སྦྲོན་ཅིག །མི་སྦྲོན་ན་ཁྱོད་ལ་མཚམས་ཆེན་པོ་གཅད་དོ། །མ་སྦྲན་ན་གནོད་པ་བྱས་ཀྱི་དོགས་ནས་སོང་སྟེ་སྦྲན་པས། ཉེ་དགའ་ལ་སུ་འགོག །འཇུག་ཏུ་ཆུག་ཅིག །ཉེ་དགའ་ཞུགས་པ་དང༌། དབྱར་ཚུལ་གྱིས། བྱོན་པ་ལེགས་སོ། གདན་ལ་བཞུགས་ཤིག །དེའི་མདུན་དུ་སྒྲ་ཡིད་དུ་འོང་བ་ཟབ་མོས་སྦྱིན་པའི་བསྔགས་པ་བརྗོད་དོ། །ཉེ་དགའ་ཡིད་དགའ་ནས་སྦྱིན་པའི་བསྔགས་པ་བརྗོད་པའི་ཚེ་ཁྱིམ་པ་དད་པ་ཅན་རྣམས། ཀྱེ་མ་རང་གི་ཤ་དག་ཀྱང་བཅད་ཅིང་སྦྱིན་པར་བྱའོ་སྙམ་དུ་སེམས་པས། ཉེ་དགའ། དབྱར་གནས་པ་ལ་ཀརྵ་པ་ཎ་དྲུག་ཅུ་དབུལ་ལོ། །ཨ་རོག་ཁྱ། སྦྱིན་པ་འདིས་ཁྱོད་སེམས་ཀྱི་རྒྱན་སོགས་ཟེར་ནས་སོང་ངོ༌། །སྟོན་པས། ཀུན་དགའ་བོ། ཁྱོད་སོང་ལ་དགེ་སློང་རྣམས་ལ། དེ་བཞིན་གཤེགས་པ་ཀོ་ས་ལར་ལྗོངས་རྒྱུར་གཤེགས་ཀྱིས་ཁྱེད་ཅག་ལས་དེ་བཞིན་གཤེགས་པ་དང་ཐབས་གཅིག་ཏུ་ལྗོངས་རྒྱུར་འགྲོ་བ་སྤྲོ་ན་དེས་ཆོས་གོས་ཀྱི་ལས་གྱིས་ཤིག་ཅེས་སྒོས་ཤིག །མཉན་ཡོད་ནས་འོངས་པའི་དགེ་སློང་གཉིས་ཀྱིས་དེ་ཐོས་ནས། བདག་ཅག་ཀྱང་མཉན་ཡོད་དུ་འགྲོའོ། །
ཉེ་དགས་ཐོས་ཏེ། བདག་ལ་བརྒྱ་ལམ་ན་རྙེད་པ་བྱུང་བ་དེའི་བར་ཆད་བྱུང་ངོ་སྙམ་ནས་དབྱར་ཚུལ་ཅན་སོང་སྟེ། སྒྲ་དམའ་བ། ཡིད་དུ་མི་འོང་བ། ཞུམ་པས་སྦྱིན་པའི་བསྔགས་པ་བརྗོད་པ་དང༌། དབྱར་ཚུལ་གྱིས། ཁྱོད་སྔོན་སྒྲ་མཐོན་པོ་ཡིད་དུ་འོང་བ་དང༌། ད་སྒྲ་དམའ་བ་ཡིད་དུ་མི་འོང་བས་སྦྱིན་པའི་བསྔགས་པ་བརྗོད་པའི་རྒྱུ་ཅི། བདག་ཅག་བརྒྱ་ལམ་ན་ཕྲད་པ་དེའང་མྱུར་དུ་འབྲལ་བར་འགྱུར་བའི་ཕྱིར་རོ། །མ་ག་དྷ་པ་ཟུར་གྱིས་སོ། །ཀོ་ས་ལ་པ་བརྗོད་ནས་ཤེས། །བཉྩ་ལ་པ་ཡིག་ཕྱེད་ཀྱིས། །ནུབ་མི་མ་སྨྲས་མི་ཤེས་སོ། །ཞེས་བྱ་བ་ཡིན་པས། དབྱར་ཚུལ་གྱི་བསམ་པ་ལ། འདི་ནི་ཤཱཀྱའི་རིགས་རྒྱ་ཆེན་པོ་སྤངས་ཏེ་རབ་ཏུ་བྱུང་བ་ཡིན་པས་འདི་བདག་དང་འབྲལ་བ་ལ་མྱ་ངན་མི་བྱེད་ཀྱི། ཀརྵ་པ་ཎ་དྲུག་ཅུ་འཆོར་བའི་མྱ་ངན་བྱེད་དོ་སྙམ་ནས། གང་དུ་གནས་པ་དེར་(༡༦༩ན)ཀརྵ་པ་ཎ་དབུལ་བར་བགྱིའོ། །ཨ་རོག་ཁྱ། དེ་ལྟ་ན་ཕན་ཕུན་མེད་པ་དང༌། ཀུན་ནས་ཉོན་མོངས་པ་མེད་པའི་སྦྱིན་པ་དག་སྦྱིན་ཞིང་བསོད་ནམས་བྱེད་པ་ཡིན་ནོ་ཞེས་སྨྲས་ནས་སོང་ངོ༌། །དེ་ནས་སྟོན་པ་དུལ་བ། འཁོར་དུལ་བ་དང་ལྡན་པ། ཞེས་པ་ནས། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ། ཀུན་ཤེས་ཀོའུ་དི་ནྱ་ལ་སོགས་པ་དགེ་སློང་གི་དགེ་འདུན་མང་པོས་བསྐོར་ནས་ཀོ་ས་ལར་ལྗོངས་རྒྱུར་གཤེགས་ཏེ་རྒྱལ་བྱེད་ཚལ་ན་བཞུགས་སོ། །དབྱར་ཚུལ་གྱིས་མཉན་ཡོད་པའི་ཚོང་པ་ལ་པ་ཎ་དྲུག་ཅུ་གཏད་ནས། ཉེ་དགའ་ལ་ཕུལ་ཅིག །ཚོང་པ་དེས། དབྱར་ཚུལ་གྱིས་དད་པར་བྱ་བའི་དགེ་སློང་དེ་ངེས་པར་གྲགས་པ་ཡིན་པས། བདག་གིས་ཀྱང་དེ་ལ་དགའ་བ་ཅུང་ཟད་བྱ་ཡིས་གོས་བསྐོན་ནོ་སྙམ་ནས་འོད་མའི་ཚལ་དུ་སོང་སྟེ། དགེ་སློང་ལ་དྲིས་པ། དགེ་སྦྱོང་གི་ཚུལ་དང་མཐུན་པའི་གོས་ཇི་ལྟ་བུ་ལགས། ཅི་དགེ་འདུན་རས་ཡུག་འབུལ་ལམ། མིན་ཏེ། དབྱར་ཚུལ་གྱིས་ཉེ་དགའ་ལ་པ་ཎ་དྲུག་ཅུ་བསྐུར་བ་དག་གོས་སུ་བསྒྱུར་ཏེ་མཆིའོ། །དགེ་སློང་དེ་ན་རེ། གོས་ལེན་ཅིང༌། ཀརྵ་པ་ཎ་དྲུག་ཅུའང་འབུལ་དུ་འཇུད་པའི་གནས་ཡོད་དོ། །འདི་དེ་དང་ཁོན་ཡོད་པ་ཞིག་གོ་སྙམ་ནས། གཞན་ཞིག་ལ་དྲིས་པས་ཀྱང་དེ་ལྟར་ཟེར་བས་དེ་དང་འདི་གཉིས་མཐུན་ནོ་སྙམ་ནས་དབྱར་ཚུལ་གྱི་གན་དུ་སོང་སྟེ། པ་ཎ་འདི་དག་རྒྱས་ཐོབ་ཅིག །ཡིད་ཆེས་ཀྱིས་ཁྱེར་ཅིག །ཁྱེད་བདག་ལ་ཡིད་ཆེས་མོད། བདག་གིས་ལེགས་པར་བྱ་བ་བྱས་པར་འགྱུར་རོ། །དེས་རྒྱས་བཏབ་པ་དང༌། དེས་ཁྱེར་ཏེ་རྒྱལ་བྱེད་ཚལ་དུ་སོང་ནས། དགེ་སློང་རྣམས་ལ་དྲིས་པ། ཉེ་དགའི་གཙུག་ལག་ཁང་གང་ཡིན། འདིའོ། །དེར་སོང་བ་དང་ཉེ་དགའ་མི་སྣང་ནས་དགེ་སློང་ཞིག་ལ། ཉེ་དགའ་གར་བཞུད། ཉིན་མོ་སྤྱོད་པར་རོ། །ཚོང་པ་དེས། དབྱར་ཚུལ་གྱིས་དེ་ལ་པ་ཎ་དྲུག་ཅུ་བསྐུར་བ་འདི་དེ་བྱུང་ན་སྩོལ་ཅིག །ཁྱོད་ཀྱིས་སྒྲོན་མ་རབ་ཏུ་འབར་བ་མགོ་བོས་འཛིན་པ་འགའ་མཐོང་ངམ། འདི་དེ་དང་ཁོན་ཡོད་པ་ཞིག་གོ་སྙམ་ནས་གཞན་ཞིག་གི་གན་དུ་སོང་སྟེ་དེ་སྐད་བརྗོད་པས། ཁྱོད་ཀྱིས་རྒྱས་མ་བཏབ་པར་འོངས་ན་ཡུལ་གྱི་ཁེ་སྤོགས་འཇལ་དུ་འཇུད་པའི་གནས་ཡོད་དོ། །འདི་དང་དེ་གཉིས་མཐུན་ནོ་སྙམ་ནས་ཉེ་དགའ་ལ། བདག་གི་ཁྱིམ་ཕྱོགས་ག་གེ་མོ་ན་ཡོད་ཀྱིས་ཀརྵ་པ་ཎ་བཞེད་ན་གཤེགས་ཤིག་ཅེས་གསུངས་ཤིག་ཅེས་སྨྲས་ནས་སོང་ངོ༌། །ཉེ་དགའ་འོངས་པ་དང་དགེ་སློང་རྣམས་ཀྱིས། ཉེ་དགའ། སྟོན་པས། ཚུལ་ཁྲིམས་དང་ལྡན་པ་སྨོན་པས་འགྲུབ་སྟེ། དེའང་ཚུལ་ཁྲིམས་དང་རྣམ་པར་དག་པའི་ཕྱིར་རོ་ཞེས་བྱ་བ་དེ་ལེགས་པར་གསུངས་ཏེ། ཁྱོད་དེང་ཉིན་མོ་སྤྱོད་དུ་སོང་བས་དེང་ཉིད་དུ་ཀརྵ་པ་ཎ་དྲུག་ཅུ་གྲུབ་བོ། །སྟོང་ཉིས་བརྒྱ་ལྔ་བཅུ་རེ་རེ་ལ་པ་ཎ་(༡༦༩བ)དྲུག་ཅུ་དྲུག་ཅུ་བྱིན་པ་དེ་གང་ཡིན། ཁྱོད་གཅིག་པུ་ལའོ། །ཉེ་དགའ་ལ་དེ་བྱིན་པ་དེ་གང་ཡིན། དབྱར་ཚུལ་གྱིས་བསྐུར་རོ། །
དེ་ནི་ཕྱི་རོལ་གྱི་རྙེད་པ་ཁོ་ན་ཡིན་ན་རྒྱ་མ་བྱིད་དམ། སྒྱུ་མ་ཞུགས་སམ། སུས་བརྟགས། མ་བརྟགས་པར་བླངས་སམ། སུས་བླངས། ཁོ་བོ་དགྲ་བོ་ཤ་སྟག་གི་ནང་ན་འདུག་གོ །ཉེ་དགའ། ཡི་ཆད་ཅི་དགོས། དེ་ན་རེ། བདག་གི་ཁྱིམ་ཕྱོགས་ག་གེ་མོ་ན་ཡོད་ཀྱིས་པ་ཎ་བཞེས་ན་དེར་གཤེགས་ཟེར་རོ། །ཉེ་དགའ་སྣམ་སྦྱར་བླངས་ཏེ་གོམ་པ་བསྐྱེད་ནས་སོང་བ་དང༌། ཁྱིམ་བདག་དེས་མཐོང་ནས། དགེ་སྦྱོང་ཧྲལ་པོ་གོམ་པ་འདི་ལྟ་བུས་འོང་བ་འདི་ནི་ཉེ་དགའ་ཡིན་པ་གོར་མ་ཆག་སྙམ་སྟེ། ཁྱོད་ཉེ་དགའ་མ་ཡིན་ནམ། ཡིན་ནོ། །དབྱར་ཚུལ་གྱིས་པ་ཎ་དྲུག་ཅུ་བསྐུར་བ་འདི་ལགས་ཀྱིས། བཞེས་ཤིག །ཨ་རོག་ཁྱ། སྦྱིན་པ་འདིས་སོགས། ཅིའི་ཕྱིར་བདག་གི་མིང་གིས་ཡོན་བཤད་པ་མཛད། དབྱར་ཚུལ་གྱི་མིང་གིས་ཡོན་བཤད་པ་མཛོད་ཅིག །བཀྲེན་པ། འདི་ལ་འགོད་པ་ཅི་ཡོད། ཁྱོད་ཀྱིས་ཁྱེར་འོངས་པའི་ཕྱིར་རོ། །འདི་ཁྱེར་ནས་སྲང་དུ་འགྲོ་བའི་ཁྱེའུ་ཞིག་རྙོས་ཤིག །མ་མཆིས་སོ། །རྒྱལ་པོའི་ཁབ་ནས་ཐག་རིང་པོ་འདི་སྲིད་དུ་ཁྱེར་འོངས་ན་སྲང་དུ་སྐྱེལ་མི་ནུས་སམ། དེས་ཁྱེའུ་ཞིག་ལ། ཀརྵ་པ་ཎ་ཁྱེར་ནས་འཕགས་པའི་ཕྱི་བཞིན་སོང་ལ་ཕྱི་རོལ་ཏུ་མ་འབྱུང་ཞིག །ཁྱེའུ་དེས་དེ་ཁྱེར་ཏེ་དེའི་ཕྱི་བཞིན་དུ་སོང་ནས་ཚོང་རྡལ་དང་པོར་ཕྱིན་པ་དང༌། དེས། འཕགས་པ། ཀརྵ་པ་ཎ་འདི་དག་འདིར་འཇོག་ཏུ་སྩོལ། ཁྱོད་ལེགས་པར་བསླབས་སོ་ཞེས་སྤོས་འཚོང་གི་ཁྱེའུ་ཞིག་ལ། འདི་དག་རེ་ཞིག་ཞོག་ཅིག །འཕགས་པ། བདག་བླ་མ་ལ་རག་ལས་པ་ལགས་སོ། །ཁྱོད་ནམ་ཡང་རང་ལ་རག་ལས་པར་མ་གྱུར་ཅིག །དེས་སྤོས་འཚོང་གི་ཁྱེའུ་གཞན་ཞིག་ལ། པ་ཎ་འདི་དག་རེ་ཞིག་ཞོག་ཅིག །བདག་གི་བླ་མ་ཕྱི་རོལ་ཏུ་མཆིས་སོ། །ནམ་ཡང་འཇུག་པར་མ་གྱུར་ཅིག །དེས་སྤོས་འཚོང་གི་ཁྱེའུ་དད་པ་གསར་པ་དང་ལྡན་པ་ཞིག་ཡོད་པ་དེའི་གན་དུ་སོང་ནས། པ་ཎ་འདི་དག་རེ་ཞིག་ཞོག་ཅིག །བདག་མ་ལ་རག་ལས་པ་ལགས་སོ། །ཁོ་བོས་ཁྱོད་དད་པ་དང་ལྡན་པར་ཤེས་ཀྱིས། ཇི་ལྟར་རྟུག་པ་ལ་དད་པར་ནི་མི་ཤེས་སོ། །ཁྱོད་ཀྱིས་དད་པ་མ་ཐོབ་ན་ཤིང་ཚལ་ཐོགས་ཏེ་དགེ་སློང་སྐྲོད་པར་ཡང་འགྱུར་རོ། །དེ་སྐྱེངས་ནས། འཕགས་པ། གཞག་ཏུ་གསོལ། དེས་དེ་དག་བཞག་ནས་སོང་ངོ༌། །ཚོང་པ་དེ་དག་གིས། བདག་ཅག་ལས་ཉི་མ་ཤར་ནས་འོངས་པ་དེ་པ་ཎ་དྲུག་ཅུ་འཇལ་དུ་གཞུག་གོ་ཞེས་ཁྲིམས་བཅས་ནས། ཁྱེའུ་དེ་ལ་མས། བུ། ཅི་ནས་ཀྱང་ཀརྵ་པ་ཎ་དྲུག་ཅུ་འཇལ་མི་དགོས་པར་གྱིས་ཤིག །ཉེ་དགའ་མཚན་མོ་འགྱོད་དེ། ཁྱེའུ་དད་པ་གསར་པ་ཡིན་པས་པ་ཎ་དེ་དག་བསྙོན་པར་འགྱུར་བའི་(༡༧༠ན)གནས་ཡོད་སྙམ་ནས། ནངས་པར་སྔར་ལངས་ཏེ་ཁྱེའུ་ཞིག་ཁྲིད་ནས་ཚོང་རྡལ་དུ་སོང་སྟེ་སྤོས་འཚོང་གི་ཁྱེའུ་དེ་ལ། པ་ཎ་དེ་དག་བྱིན་ཅིག །ཚོང་པའི་ཚོགས་ཀྱིས་ཁྲིམས་བཅས་པས་བདག་ཚོང་པའི་ནང་དུ་མཆིས་ཏེ་སླར་འོངས་ཀྱི་བར་དུ་ཡུད་ཙམ་ཞིག་བཞུགས་ཤིག །བཀྲེན་པ། སུ་ཞིག་བྱིན་པ་གཉིས་སྐྲངས་སྐྲངས་སུ་སྡོད། མ་བྱིན་པར་འགྲོ་ན་རྒྱལ་པོ་གསལ་རྒྱལ་གྱིས་ཀརྵ་པ་ཎ་དྲུག་ཅུ་འཇལ་དགོས་པའི་གྱོད་ལ་བཀྲིའོ། །དེ་ཁྲོས་ནས་ཀརྵ་པ་ཎའི་ཐུམ་པོ་དེ་འཕངས་པ་དང༌། དེའི་རྒྱ་གོགས་སོ། །
ཉེ་དགས། རྒྱ་མ་བྱིད་དམ། སྒྱུ་མ་ཞུགས་སམ་བལྟའོ། །ཅི་ཁྱོད་ཀྱི་བརྟགས་ཏེ་གཏད་དམ། ཁྱོད་ཀྱིས་བརྟགས་ནས་བླངས་ན་ཅིའི་ཕྱིར་རྒྱ་གཅོག །ཉེ་དགས་དེ་བགོར་གྱི་བར་དུ་ཚོང་པའི་ཚོགས་ཀྱིས་དེའི་ཁྱིམ་ནས་ཀརྵ་པ་ཎ་དྲུག་ཅུའི་གཏད་བཅད་པས། དེ་ལ་མས། ཁྱོད་ཀྱིས་ལས་ཅི་བྱས་ན་དེ་ལྟར་གྱུར། ཁྱེའུ་ན་རེ། ཤཱཀྱའི་དགེ་སྦྱོང་རྣམས་ལ་དད་པ་དེ་དག་འདི་ལྟར་འགྱུར་ཏེ། དེ་དད་པའི་མྱུ་གུ་སྐྱེས་མ་ཐག་ཉམས་སོ་ཟེར་བའི་སྐབས་དེ་གསོལ་བ་དང༌། བྱུང་བ་འདི་དང་སོགས། ཉེ་དགའ། ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ། མད་དོ། །དགེ་སྦྱོང་གི་ཚུལ་མིན་པ་སོགས་སྨད་ནས། དེ་ལྟ་བས་ན་ཕན་ཡོན་བཅུ་སོགས་སྔར་བཞིན། བསྐུར་བ་རུང་བ་མ་ཡིན་པ་སོགས་སོ། །

བཅུ་ཚན་གཉིས་པ།

བཅུ་ཚན་གཉིས་པ་ལ་བཅུ་ལས། སྲིན་བལ་གྱི་སྤང་བ་ནི། སྟོན་པ་མཉན་ཡོད་ནའོ། །དེའི་ཚེ་དགེ་སློང་དག་སྲིན་བལ་གྱི་སྟན་གསར་པ་བྱེད་པ་དང་བྱེད་དུ་འཇུག་པ་ན། སྲིན་བལ་དཀོན་ཞིང་རིན་ཆེ་བས། བྱ་བ་དང་བྱེད་པ་མང་ལ། ཀློག་པ་དང་བསམ་གཏན་ལ་གནོད་ཅིང༌། མུ་སྟེགས་དག །དགེ་སྦྱོང་འདི་དག་སྲོག་གཅོད་པ་མ་སྤངས་པ་སྟེ། སུ་ཞིག་འདི་དག་ལ་བསོད་སྙོམས་སྟེར་བར་བྱེད་ཅེས་སྨོད་པའི་སྐབས་དེ་གསོལ་བས། བྱུང་བ་འདི་དང་སོགས། དགེ་སློང་དག །ཁྱེད་སྲིན་བལ་གྱི་སྟན་གསར་པ་བྱེད་པ་བདེན་ནམ། བཙུན་པ། མད་དོ། །འདོད་པ་ཆེ་བ་སྨད། འདོད་པ་ཆུང་བའི་བསྔགས་པ་བརྗོད་ནས། དེ་ལྟ་བས་ན་ཕན་ཡོན་བཅུ་སོགས། ཡང་དགེ་སློང་གང་སྲིན་བལ་གྱི་སྟན་གསར་པ་བྱེད་ན་སྤང་བའི་ལྟུང་བྱེད་དོ། །
བལ་ནག་པོ་འབའ་ཞིག་གི་སྤང་བ་ནི། མཉན་ཡོད་དུ་དགེ་སློང་དག་བལ་ནག་པོ་དཀོན་ཞིང་རིན་ཆེ་བས་སྟན་བྱས་པས་བྱ་བྱེད་མང་ནས་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ཡང་དགེ་སློང་གང་ལུག་བལ་ནག་པོ་འབའ་ཞིག་གི་སྟན་བྱེད་ན་སྤང་བའི་ལྟུང་བྱེད་དོ། །
ཆ་གཉིས་བསྲེ་བའི་སྤང་བ་ནི། དེ་ལྟར་བཅས་པ་དང༌། དཀར་པོ་དང་འཁོབ་བལ་ཅུང་ཞིག་བཅུག་ནས་བལ་ནག་པོ་དཀོན་པས་སྟན་བྱས་པས་སྔར་བཞིན་འཕྱ་བའི་སྐབས་དེ་(༡༧༠བ)གསོལ་བ་དང༌། བྱུང་བ་འདི་དང་སོགས། དགེ་སློང་གིས་སྟན་གསར་པ་བྱེད་ན་ཆ་གཉིས་ནི་ལུག་བལ་ནག་པོ་འབའ་ཞིག་ལས་གཞུག་པར་བྱ། གསུམ་པ་ནི་དཀར་པོ་ལས། བཞི་པ་ནི་འཁོབ་བལ་ལས་གཞུག་པར་བྱའོ། །གལ་ཏེ་དགེ་སློང་གིས་ཆ་གཉིས་ལུག་བལ་ནག་པོ་འབའ་ཞིག་ལས་མ་བཅུག་གམ། གསུམ་པ་ནི་དཀར་པོ་ལས། བཞི་པ་ནི་འཁོབ་བལ་ལས་མ་བཅུག་པར་སྟན་གསར་པ་བྱེད་ན་སྤང་བའི་ལྟུང་བྱེད་དོ། །
ལོ་དྲུག་ཏུ་འཆང་བའི་སྤང་བ་ནི། སྟོན་པ་མཉན་ཡོད་ནའོ། །དེའི་ཚེ་དགེ་སློང་རྣམས་ལ་སྟན་མང་པོ་བྱུང་སྟེ། སྟན་འདི་ནི་ཧ་ཅང་རིངས་སོ། །འདི་ནི་ཧ་ཅང་ཐུངས་སོ། །འདི་ནི་ཧ་ཅང་དོག་གོ །ཡངས་སོ། །བུག་རྡོལ་དང༌། ཤ་ཟད་པ་དང༌། བཅོས་དཀའོ་ཞེས་བོར་ནས་གཞན་བྱེད་དུ་འཇུད་པས་བྱ་བྱེད་མང་ཞིང༌། ལུང་ནོད་པ་དང་བསམ་གཏན་ལ་གནོད་པས་དོན་ཉུང་ངུ་དག་འཕྱ་བའི་སྐབས་དེ་གསོལ་བ་དང༌། བྱུང་བ་འདི་དང་སོགས། དགེ་སློང་གིས་སྟན་གསར་པ་བྱེད་ན་མི་འདོད་བཞིན་དུ་ལོ་དྲུག་ཏུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་སྤངས་ཀྱང་རུང༌། མ་སྤངས་ཀྱང་རུང༌། སྟན་གསར་པ་གཞན་བྱེད་ན་སྤང་བའི་ལྟུང་བྱེད་དོ་ཞེས་བཅའ་བ་མཛད་དོ། །སྟོན་པ་འབྲོག་གནས་ཀྱི་ནགས་ན་བཞུགས་སོ། །འབྲོག་ནས་གྲང་ཞིང་རླུང་ཆེ་བས་ལག་གི་བླ་ལོ་དྲུག་ཏུ་སྟན་གྱིས་མི་ཐུབ་པ་དེ་དག་གྲང་བས་ལས་གསར་པ་རྒྱུན་ཆད་པར་གྱུར་ཏོ། །སྟོན་པས་ཀུན་དགའ་བོ། ཅིའི་ཕྱིར་ལག་གི་བླས་ལས་གསར་པ་རྒྱུན་ཆད། སྟོན་པས་ལོ་དྲུག་ཏུ་སྟན་གསར་པ་གཞན་བྱེད་ན་སྤང་བའི་ལྟུང་བྱེད་བཅས་པས་ལག་གི་བླ་ལོ་དྲུག་གི་བར་དུ་སྟན་གྱིས་མི་ཐུབ་པ་དེ་དག་གྲང་བས་ལས་གསར་པ་རྒྱུན་ཆད་པར་གྱུར་ཏོ། །ལག་གི་བླས་ལོ་དྲུག་ཏུ་སྟན་གྱིས་མ་ཐུབ་ན་དགེ་འདུན་ལ་སྟན་གྱི་གནང་བ་ཞུ་བའི་ཕྱིར་གསོལ་བ་གདབ་བོ། །བཏབ་ནས་དེ་ལ་དད་པས་མི་འགྲོ་བར་དགེ་འདུན་ཐམས་ཅད་དམ། བསྐོས་པའི་དགེ་སློང་དག་གཏང་ཞིང་སྟན་དེ་རང་གི་མིག་སྔར་བབ་པར་བྱ་བའམ། དགེ་འདུན་གི་དབུས་སུ་ཕྱུང་སྟེ། ཆུ་དང་ཞེང་གཉིས་ཀར་ལྷག་པ་ཉིད་ཡིན་ན་གཅད་པར་བྱའོ། །ཐུང་བ་ཉིད་དང་དོག་པ་ཉིད་དག་ནི་བསྐྱེད་པར་བྱའོ། །རལ་ན་བཙེམ་པར་བྱའོ། །བུག་རྡོལ་དུ་གྱུར་ཏམ། ཤ་ཟད་པ་དག་ནི་སྦྱར་བར་བྱའོ། །བཅོས་དཀའ་བ་ཉིད་ཡིན་ན་གསོལ་གཉིས་ཀྱི་ལས་ཀྱིས་གནང་བ་སྦྱིན་ནོ། །སྔ་མ་ནི་བཅས་པ་ཡིན་ལ་འདི་ནི་གནང་བ་སྟེ། གནང་བ་ཐོབ་བམ་གཏོགས་ཏེ། སྤང་བའི་ལྟུང་བྱེད་དོ། །
མཐོ་གང་གི་སྤང་བ་ནི། སྟོན་པ་མཉན་ཡོད་ནའོ། །སྟོན་པ་སངས་རྒྱས་པའི་ཚེ་ཐམས་ཅད་དུ། ཡུལ་དབུས་སུ་སངས་རྒྱས་བྱུང་ངོ་ཞེས་གྲགས་སོ། །བྱང་ལམ་ན་ཚོང་པ་དག་གིས། ཡུལ་དབུས་སུ་སངས་རྒྱས་བྱུང་སྟེ། དེ་ལ་མཆོད་པ་བྱས་ནས་ཕན་ཡོན་ཆེན་པོར་འགྱུར་རོ་ཞེས་(༡༧༡ན)ཐོས་ནས་ཟོང་ཐོགས་ཏེ་མཉན་ཡོད་དུ་འདོང་ཞིང་དེར་ཁེ་སྤོགས་ཀྱང་བསྒྲུབ། སྟོན་པ་ལའང་བསྙེན་བཀུར་བྱའོ་སྙམ་ནས་ཟོང་ཐོགས་ཏེ་ཡུལ་དབུས་སུ་འཕགས་སོ། །དེ་དག་མཐར་གྱིས་མཉན་ཡོད་དུ་ཕྱིན་ནས་ཟོང་འཁོས་སུ་ཕབ་སྟེ། མགོན་མེད་ཟས་སྦྱིན་གྱི་གན་དུ་སོང་ནས། བདག་ཅག་གི་སྟོན་པ་བལྟ་བར་འདོད་དོ། །ཤེས་ལྡན་དག །སངས་རྒྱས་བཅོམ་ལྡན་འདས་ནི་བལྟ་བར་བྱ་བ་རིན་པོ་ཆེ་ཁོ་ན་ཡིན་ཏེ། ཨུ་དུམ་ཝཱ་རའི་མེ་ཏོག་ལྟར་བལྟ་བ་དང་འབྱུང་བ་དཀོན་པ་ཡིན་ནོ། །དེ་ནས་ཚོང་པ་ལྔ་བརྒྱ་པོ་དེ་དག་ཁྲིད་ནས་སྟོན་པའི་དྲུང་དུ་སོང་སྟེ་ཕྱག་བཙལ་ནས་མཐའ་གཅིག་ཏུ་འདུག་པ་དང༌། དེ་དག་ལ་ཆོས་དང་ལྡན་པའི་གཏམ་གྱིས་དགའ་བར་མཛད་དོ། །དེ་ནས་ཚོང་པ་རྣམས་ཀྱིས་སྟོན་པ་ལ་བསྙེན་བཀུར་བྱས་ནས། གནས་བརྟན་རྣམས་ཀྱི་གཙུག་ལག་ཁང་བལྟས་པ་དང༌། དེ་དག་གི་མལ་ན་གདིང་བ་དབུས་རྡོལ་བ་མཐོང་ནས། ཁྱིམ་བདག་ལ། ཅིའི་ཕྱིར་འདི་དག་གིས་གདིང་བ་དབུས་རྡོལ། དེས་སྨྲས་པ། འདི་དག་ནི་ཕལ་ཆེར་མཚན་མོ་དཀྱིལ་ཀྲུང་གིས་འདའ་བར་བྱེད་དོ། །དེ་དག་དད་ནས་དགེ་སློང་རྣམས་ལ་རས་ཡུག་ཆེན་ལྔ་བརྒྱ་ཕུལ་ལོ། །དགེ་སློང་རྣམས་ཀྱིས་གདིང་བ་རྙིང་པ་དེ་དག་ཁང་པ་ཆེན་པོའི་གཙུག་ལག་ཁང་བླ་གམ་མེད་པ་ཞིག་ཏུ་བཞག་གོ །དེའི་ཚེ་ཁྱིམ་བདག་ཅིག་གིས་སངས་རྒྱས་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་པ་དང་དགེ་འདུན་ནི་བཞུད་དོ། །སྟོན་པ་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་བསྒྲུབས་སོ། །རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་སྒྲུབ་པ་མཛད་དེ། ནང་དུ་ཡང་དག་འཇོག་བཞེད་པ་དང༌། ལྷ་རྣམས་ལ་ཆོས་སྟོན་པ་དང༌། ནད་པ་ལ་ལྟ་བ་དང༌། གནས་མལ་རྟོག་པ་དང༌། བསླབ་པ་འཆའ་བར་བཞེད་པའོ། །དོན་འདིར་ནི་ཐ་མ་གཉིས་བཞེད་པའོ། །དེ་ནས་སྟོན་པས་དགེ་འདུན་རྣམས་སོང་ནས་རིང་པོ་མ་ལོན་པར་མཁྱེན་ནས་ལྡེ་མིག་བསྣམས་ཏེ། ཀུན་དགའ་ར་བ་དང༌། གཙུག་ལག་ཁང་དང༌། ཁང་ཁྱིམ་དང༌། འཆག་ས་དང༌། གོལ་བར་བཤེགས་ཤིང་མཐར་གྱིས་ཁང་པ་ཆེན་པོའི་གཙུག་ལག་ཁང་དེར་གཤེགས་པ་ན། གདིང་བ་རྙིང་པ་རྡོལ་བ་དང་རལ་བ་ས་རྡུལ་གྱི་ཕྱེ་མ་དང་འདྲེས་པ་མང་པོ་ས་ལ་བཀྲམ་འདུག་པ་གཟིགས་ནས། ཨེ་མ་ཞེས་གསུང་ཞིང་སྨད་ནས། ཁྱིམ་པ་དད་པ་ཅན་དག་གིས་པགས་པ་དང༌། ཤ་དང༌། ཁྲག་དག་བཙིར་ཞིང༌། སྦྱིན་པ་དག་སྦྱིན། བསོད་ནམས་དག་བྱེད་པ་དེ་ལ་དགེ་སློང་རྣམས་དྲོད་མི་ཤེས་པ་དང༌། སོ་སོར་མི་རྟོག་པར་ལོངས་སྤྱོད་དོ་སྙམ་དུ་དགོངས་ནས། གདིང་བ་རྙིང་པ་དེ་དག་ལེགས་པར་བསྡུས་སྤྲུགས་ནས་བཏིང་ཞིང་བསྐམས་ཏེ་རྩིག་པ་ལ་མི་རེག་པར་མཛད་ནས་གཙུག་ལག་ཁང་དུ་(༡༧༡བ)གཤེགས་སོ། །དེ་ནས་དགེ་སློང་རྣམས་ལ། དྲོད་རན་པར་སྤྱོད་པ་ལ་སོགས་པའི་བསྔགས་པ་བརྗོད་ནས། དེ་ལྟ་བས་ན་ཕན་ཡོན་བཅུ་སོགས། དགེ་སློང་གིས་གདིང་བ་གསར་པ་བྱེད་ན། གསར་པ་ཁ་དོག་མི་སྡུག་པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་གླན་པར་བྱའོ། །གལ་ཏེ་དགེ་སློང་གིས་གསར་པ་ཁ་དོག་མི་སྡུག་པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་མ་གླན་པར་གདིང་བ་གསར་པ་སྤྱོད་ན་སྤང་བའི་ལྟུང་བྱེད་དོ། །
བལ་ཐོགས་པའི་སྤང་བ་ནི། སྟོན་པ་མཉན་ཡོད་ནའོ། །དྲུག་སྡེས་སྨྲས་པ། དགའ་བོ་ཉེ་དགའ། ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུའི་ཞག་གིས་བསྐུལ་ཏེ། འགྲོ་ནའང་འགྲོ་བར་ཆས་པའི་རྙེད་པ་སྒྲུབ། འོང་ནའང་གློ་བུར་དུ་འོངས་པའི་རྙེད་པ་སྒྲུབ་ཅིང༌། སྐྱེ་བོ་མང་པོ་དགའ་བ་དང༌། ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང༌། གང་ནས་ཀྱང་མི་འོང་བས་རྙེད་པ་འཐོབ་པ་དང༌། སྐྱེ་བོ་མང་པོ་དགའ་བ་དང་ཡིད་དུ་འོང་བར་མི་འགྱུར་གྱིས། ཡུ་བུ་ཅག་ཀྱང་འདོང་ངོ༌། །གང་དུ་འདོང༌། གང་དུ་དོན་མཐུན་གྲུབ་པར་འགྱུར་རོ། །ཐམས་ཅད་དོང་ན་བདག་ཅག་གི་ཉེ་བར་སྤྱོད་པའི་ཁྱིམ་གང་ཡིན་པ་དེ་དག་ཀྱང་ལྷུང་བཟེད་ནག་པོ་ཅན་དག་གིས་འཇུག་པར་འགྱུར་གྱིས། བདག་ཅག་གིས་གཅིག་བཞག་སྟེ་འདོང་ན་སུ་བཞག །འཆར་ཀའོ། །འཆར་ཀ །ཁྱོད་འདི་ཉིད་དུ་འདུག་ཅིག །ཁོ་བོ་ཅག་འདོང་ངོ༌། །ལྔ་པོས་དོན་མཐུན་བཙལ་བས་བལ་ཡུལ་དུ་འགྲོ་བའི་དོན་མཐུན་མཐོང་ནས། ཁྱེད་གང་དུ་འགྲོ། བལ་ཡུལ་དུའོ། །ཁོ་བོ་ཅག་ཀྱང་ཁྱེད་དང་ལྷན་ཅིག་འདོང་ངོ༌། །བལ་ཡུལ་ནི་རྔ་མོའི་རྒྱབ་དང་འདྲ་བས་དེར་དགྱེས་པར་མི་འགྱུར་རོ། །དེ་ལྟར་ཡིན་ཡང་ཡུལ་མཐོང་བར་འགྱུར་བས་འདོང་ངོ༌། །དེ་ལྟར་ན་ཚུར་སྤྱོན་བཞུད་དོ། །དེ་དག་བལ་ཡུལ་དུ་ཕྱིན་པ་དང༌། ཕྱིན་པའི་ཉི་མ་དེ་ཉིད་ལ་མི་དགའ་ནས། ནངས་པར་སྔར་ལངས་ཏེ་ལམ་སྲང་དུ་སོང་བ་དང༌། ཚོང་པ་དག་གིས་མཐོང་ནས། འཕགས་པ་དག །བལ་ཡུལ་ཅི་འདྲ། མི་དགྱེས་པར་མ་གྱུར་ཏམ། མི་དགའ་བར་གྱུར་ཏོ། །བདག་ཅག་གིས་ཁྱེད་ལ་དང་པོ་ནས། བལ་ཡུལ་ནི་རྔ་མོའི་རྒྱབ་དང་འདྲ་བ་ལགས་པས་དེར་དགྱེས་པར་མི་འགྱུར་རོ་ཞེས་མ་བགྱིས་སམ། བཞིན་བཟང་དག །དེ་ལྟ་ན་འདོང་ངོ༌། །བདག་ཅག་གིས་ཟོང་མ་བསྒྱུར་མོད། བདག་ཅག་དང་བཤེས་པའི་ཚོང་པ་གཞན་མཆིས་པ་དེ་དག་གིས་ཟོང་བསྒྱུར་ཟིན་པས་དེ་དག་ལ་གཏད་ཀྱིས། བཞུད་ཅིག །དེ་བཞིན་དུ་བྱའོ། །བལ་ཡུལ་ན་བལ་དང་ལྡོང་རོས་མོད་པས། དོན་མཐུན་དེ་དག་གིས་བལ་གྱིས་ཤིང་རྟ་བཀང་སྟེ་ཆས་པ་དང༌། དྲུག་སྡེའང་འཕགས་སོ། །
རེ་ཞིག་ན་ཚོང་པའི་ཤིང་རྟའི་སྲོག་ཤིང་ཆག་ནས། གལ་ཏེ་བཅོས་ན་སྒྲས་ཆོམ་རྐུན་(༡༧༢ན)པ་འོང་ཞིང་དེ་དག་གིས་བདག་ཅག་བསད་ནས་ནོར་འཕྲོག་པར་འགྱུར་བས་གཅེས་པ་དག་ཁྱེར་ནས་འགྲོའོ་སྙམ་དུ་ཡིད་མི་དགའ་ཞིང་འཁོད་པ་དང༌། དྲུག་སྡེས། ཅིའི་ཕྱིར་ཡིད་མི་དགའ། འདི་ལྟར་སྙམ་ནས་སོ། །ཁྱེད་ཀྱིས་བལ་རྣམས་བཏང་ངམ། བཏང་ངོ༌། །ཁྱེད་ཅག་ལ་མི་གནོད་ན་ཞྭ་ལ་སོགས་པའི་དོན་དུ་ཅུང་ཞིག་བཀུར་རོ། །བདག་ཅག་ལ་འདིས་ཅི་བྱེད། ཏམས་ཅད་སྣོམས་ཤིག །དྲུག་སྡེས་སྨྲས་པ། དགའ་བོ་ཉེ་དགའ། ཕྱག་དར་ཁྲོད་པ་རྙེད་དོ་ཞེས་ལྔ་ཆར་གྱི་ལྷུང་བཟེད་དང་ཆོས་གོས་གཅིག་གིས་ཁུར་ནས། མི་བཞིས་ཐག་པ་བཀལ་ཏེ། ཁུར་ཆེན་པོ་བཞི་དྲགས་ནས་ཁུར་ཏེ་སོང་ངོ༌། །དེ་དག་གིས་ཁུར་དེ་དག་ཁྱེར་ཏེ་འཕགས་པ་དང༌། ཚོང་པ་དེ་དག་གིས་མཐོང་ནས་སྨྲས་པ། བདག་ཅག་གིས་གླ་མི་དག་ཁྲིད་དེ་འོང་སྙམ་དུ་བསམས་ན། ཁྱེད་ཅག་གིས་བལ་ཐམས་ཅད་བསྣམས་ཏེ་བྱོན་པས། ཁྱེད་ཅག་ལ་གླ་དབུལ་ལོ། བཀྲེན་པ་དག །ཁོ་བོ་ཅག་ཁྱེད་ཀྱི་གླ་མི་ཡིན་ནམ། འཕགས་པ་དག །མད་ཀྱང་ཀུ་རེ་བགྱིས་སོ། །དོན་མཐུན་དེའི་ནང་ན་མུ་སྟེགས་ཅན་ཞིག་འདུག་པ་དེས་དྲུག་སྡེ་ལ། ཁྱེད་ཅག་གང་དུ་ཁུར་འཇིག །གང་དུ་རྙེད་པ་འགྲུབ་པར་འགྱུར། ཁྱོད་ཀྱི་མའི་ལྟོ་དྲལ་ཏེ་དེར་ཁུར་འཇིག་ཅིང་རྙེད་པ་གྲུབ་པར་འགྱུར་རོ། །དོན་མཐུན་དང་ལྷན་ཅིག་སོང་ན་མཐོ་འཚམ་པ་མང་དུ་འབྱུང་གིས། མདུན་དུ་འདོང་ངོ་ཞེས་མདུན་དུ་སོང་བ་དང༌། རི་བྲགས་ཤིག་ན་ཆོམ་རྐུན་པ་གཅོད་པའི་མི་མང་པོ་འཁོད་པས་མཐོང་ནས། གླང་པོ་ཆེའི་དམག་བྱུང་ངོ་ཞེས་བྲོས་སོ། །དེ་དག་གི་ནང་ནས་ཁ་ཅིག་གིས། འདི་དག་ནི་གླང་པོ་ཆེའི་དམག་མ་ཡིན་གྱི་རྔ་མོ་དག་འོང་བ་ཡིན་ནོ། ཁ་ཅིག་ན་རེ། འདི་དག་རྔ་མོ་མ་ཡིན་གྱི་གླང་དག་ཡིན་ནོ། །ཁ་ཅིག་ན་རེ། གླང་མ་ཡིན་གྱི་ཁུར་ཐོགས་པ་དག་ཡིན་ནོ། །ཐག་ཉེར་ཕྱིན་པ་དང༌། ཁྱེད་ལ་ངེད་ཐམས་ཅད་སྐྲག་ནས་བྲོས་སོ། །བཀྲེན་པ་དག །གལ་ཏེ་ཆོམ་རྐུན་པ་དག་གིས་ཁྱེད་ཅག་བྲེད་ངས་པར་ཤེས་ན་བཅིངས་ཏེ་ནགས་ཁྲོད་དུ་ཁྲིད་པར་འགྱུར་རོ། །གལ་ཏེ་ལམ་དུ་སོང་ན་མཐོ་འཚམ་པ་མང་དུ་འབྱུང་གིས་ལམ་གོལ་བར་འདོང་ངོ་ཞེས་ལམ་གོལ་བར་སོང་བ་དང༌། ཤོ་གམ་སྒུག་པའི་མིས་མཐོང་ནས། ཅིའི་ཕྱིརཤོ་གམ་འདྲལ། བཀྲེན་པ་དག །ཁོ་བོ་ཅག་ཁྱེད་ཀྱི་ཚོང་པ་ཤོ་གམ་འདྲལ་བ་དག་ཡིན་ནམ། སུ་ཡིན་འཕགས་པ་དྲུག་སྡེ་དག་ཡིན་ནོ། །བཞུད་ཅིག །དགའ་བོ་ཉེ་དགའ། རྒྱལ་བྱེད་ཙལ་གྱི་སྒོ་ནས་ཞུགས་ན་ལྷུང་བཟེད་ནག་པོ་ཅན་དག་གིས་མཐོ་འཚམ་པ་མང་དུ་འབྱུང་གིས། སྒེའུ་ཆུང་ནས་འཇུག་པར་བྱའོ་ཞེས་དེ་ནས་ཞུགས་པ་དང༌། རྒན་ཞུགས་ཤིག་གིས་མཐོང་ནས། ཨེ་མ་ཁུར་ཙ་བ་དག །ཅིའི་ཕྱིར་གོང་དྲལ་ཏེ་འཇུག །རྒན་ཞུགས།(༡༧༢བ) ཁོ་བོ་ཅག་ཁྱོད་ཀྱི་ཁུར་ཙ་བ་ཡིན་ནམ། འོ་ན་སུ་ཡིན། དྲུག་སྡེ་དག་གོ །བྱོན་པ་ལེགས་སོ། །དེ་དག་ནང་དུ་ཞུགས་ནས་བལ་གྱི་ཁུར་དེ་དག་བཤིག་པ་དང༌། རི་རབ་འདྲ་བའི་ཕུང་པོ་ཆེན་པོར་གནས་སོ། །
དེ་དག་ལ་དགེ་སློང་རྣམས་ཀྱིས། ཁྱེར་ཁུར་འདི་ལྟ་བུ་ཐོགས་ནས་མཐོ་འཚམ་པ་དག་མི་འབྱུང་ངམ། ཅི་ཁོ་བོ་ཅག་གིས་བཟའ་བ་ཁོ་ནའི་ཕྱིར་ཁ་བསྒྲུབས་སམ། མཐོ་འཚམ་པ་དེ་ལ་ཁོ་བོ་ཅག་གིས་ཀྱང་ཉིས་འགྱུར་སྦྱིན་པར་བྱའོ། །དོན་ཉུང་ངུ་དག །ཡན་ལག་གང་གིས་ངོ་ཚ་བའི་ཡན་ལག་དེ་ཉིད་ཀྱིས་ཁེངས་པར་བྱེད་ཅེས་སྨོད་པའི་སྐབས་དེ་གསོལ་བས། བྱུང་བ་འདི་དང་སོགས། དྲུག་སྡེ་ལ། ཁྱེད་ཀྱིས་མི་མཛེས་དེ་ལྟ་བུ་བྱས་པ་བདེན་ནམ། མད་དོ། སྨད་ནས། དེ་ལྟ་བས་ན་ཕན་ཡོན་བཅུ་སོགས། དགེ་སློང་ལམ་དུ་ཞུགས་པས་ལུག་བལ་དག་རྙེད་པ་འདོད་ན་དགེ་སློང་དེས་བླང་བར་བྱའོ། །བླངས་ནས་འཁྱེར་བ་མེད་ན་དཔག་ཚད་གསུམ་གྱི་མཐའི་བར་དུ་བདག་ཉིད་ཀྱིས་བཀུར་བར་བྱའོ། །དེ་ལས་འདས་པར་འཁྱེར་ན་སྤང་བའི་ལྟུང་བྱེད་དོ། །དྲུག་སྡེས་ལུས་ཀྱིས་ཁུར་འཁྱེར་བ་ཁྱིམ་པས་མཐོང་ནས། བདག་ཅག་རྣམས་ཕ་མ་དང་ཆུང་མའི་དོན་དུ་ཁུར་འཚལ་ན་ཁྱེད་སུའི་སླད་དུ་ཁུར་བསྣམས། ངེད་ལའང་སྟོན་པ་མཆོད་པ་དང༌། དགེ་འདུན་ལ་གསོལ་བ་དང༌། ནད་པའི་རིམ་གྲོ་སོགས་བྱ་བ་མང་པོ་ཡོད་དོ། །ཅང་མི་སྨྲ་བའི་སྐབས་དེ་གསོལ་བས། ལུས་ཀྱིས་ཁུར་མི་བཀུར་རོ། །དེ་བཀའ་སྩལ་པ་དང་དྲུག་སྡེ་རྣམས་རྒྱབ་དང༌། གློ་དང༌། རྐེད་པ་དང༌། མགོ་བོས་ཁུར་ནས་འཕྱ་བ་དེ་གསོལ་བས། གློ་དང་། རྒྱབ་དང་། རྐེད་པ་དང་། མགོ་བོ་དག་གིས་མི་བཀུར་རོ། །ཉེ་བར་འཁོར་གྱིས། དགེ་སློང་མས་ཀྱང་གློ་ལ་སོགས་པས་ཁུར་བཀུར་རམ། མ་འཁུར་ཅིག་ཅེས་པ། འདི་ལ་ཐུན་མོང་མ་ཡིན་པ་ཉིད་དུ་དོགས་པར་མི་བྱའོ། །
བལ་རྨེལ་དུ་འཇུག་པའི་སྤང་བ་ནི། སྟོན་པ་མཉན་ཡོད་ནའོ། །དེའི་ཚེ་དྲུག་སྡེས། བལ་བགོ་བར་བྱའོ། །ཆ་དུ་བྱ། འཆར་ཀ་འདི་ན་འདུག་པ་ལ་ཅིའི་ཕྱིར་སྐལ་བ་སྦྱིན། ཆ་ལྔར་བྱའོ། །འཆར་ཀས་དེ་ཐོས་ནས་སྨྲས་པ། ཁྱེད་ཀྱིས་དེར་རྙེད་པ་གང་གྲུབ་པ་དེའང་ཁྱེད་ཀྱིར་གྱིས་ཤིག །ཁོ་བོ་འདི་ན་འདུག་པས་རྙེད་པ་གྲུབ་པ་དེའང་ཁོ་བོ་ཉིད་ཀྱིར་བྱའོ། །ཉེ་དགས་བསམས་པ། འདིས་རྙེད་པ་མང་པོ་གྲུབ་པ་གོར་མ་ཆག་སྙམ་ནས། བདག་ཅག་དུས་ཐམས་ཅད་དུ་དྲུག་སྡེ་ཡིན་ན། ད་ཅིའི་ཕྱིར་ལྔ་སྡེར་བྱ། ཆ་དྲུག་ཏུ་བྱའོ། །སུས་བགོ། འཆར་ཀ་མ་དུབ་པས་བགོས་ཤིག །འཆར་ཀས་དྲུག་ཏུ་བྱས་ཏེ་རང་གི་སྐལ་བ་རང་གིས་གནས་ཁང་དུ་བཅུག་གོ །དེ་དག་གིས། འཆར་ཀ །ཁྱོད་ཀྱིས་རྙེད་པ་དེ་ཁྱེར་ཤོག་བགོའོ། །འཆར་ཀ་ན་རེ། ཁོ་བོས་དེའི་བར་དུ་ཀ་ཀ་ཎི་གཅིག་ཙམ་ཡང་མ་རྙེད་དོ། །ཁྱོད་ཀྱིས་ཁོ་བོ་ཅག་བསླུས་སོ། །འཆར་ཀས་བསམས་པ། བདག་(༡༧༣ན)གིས་བལ་ཉུང་ངུ་ཞིག་རྙེད་པ་འདི་སུ་རྨེལ་དུ་གཞུག །གལ་ཏེ་ཁྱིམ་པ་དག་ལ་བཅོལ་ན་ནི། བསླབ་པ་མ་བླངས་པས་ཐམས་ཅད་བརྐུས་པར་འགྱུར་རོ། །བཅུ་གཅིག་སྡེ་ལ་བཅོལ་ན་ནི་བཅའ་བའི་རིན་དུ་འཇོག་གོ །ཆོས་སྦྱིན་འཁོར་བཅས་ནི་མདོ་སྡེའི་མཐའ་པ་ཡིན་པས། མདོ་སྡེའི་ཚིག་དག་སེམས་པ་ན་དུས་འགྱངས་པར་འགྱུར་རོ། །གོའུ་ཏ་མ་སྐེམ་མོ་འཁོར་བཅས་འདུལ་བ་འཛིན་པ་ཡིན་པས། འདི་ནི་ལྟུང་བའོ། །འདི་ནི་ལྟུང་བ་མ་ཡིན་ནོ་ཞེས་སེམས་པ་ན་དུས་འགྱང་ངོ༌། །སྐྱེ་དགུའི་བདག་མོ་འཁོར་བཅས་སྤོང་བ་པ་ཡིན་པས་སེམས་རྩེ་གཅིག་ཏུ་འཇོག་པ་བལ་རྨེལ་བ་མི་གནོད་ཀྱིས་དེ་ལ་གཞོལ་ལོ་སྙམ་དུ་སེམས་པ་ན་སྐྱེ་དགུའི་བདག་མོ་འོངས་པ་མཐོང་ནས། སྨྲས་པ། ཚུལ་ཁྲིམས་ལྡན་པ་སྨོན་པས་འགྲུབ་བོ་ཞེས་གསུངས་པ་དེ་བདེན་ཏེ། བདག་སྐྱེ་དགུའི་བདག་མོ་འོངས་ན་ཅི་མ་རུང་སྙམ་ན། ཁྱོད་ཀྱང་འདིར་འོངས་པས་སོ། །བདག་གིས་བལ་ཆུང་ངུ་ཞིག་རྙེད་པ་དེ་ཁྱོད་ཀྱིས་རྨེལ་དུ་ཆུག་ལ་བྱིན་ཅིག །བདག་སྟོན་པའི་ཞབས་ལ་ཕྱག་འཚལ་ཏེ་འོངས་ནས་དགེ་སློང་མ་གཉིས་གཏང་གིས་དེ་གཉིས་ལ་བསྐུར་མཛོད། དེས་བལ་དེ་དག་གཟར་ཐག་གིས་བམ་པོ་གཉིས་སུ་དམ་པོར་བཅིངས་ཏེ་སྒོ་གླེགས་ཀྱི་ཕག་ཏུ་བཞག་གོ །དེས་དགེ་སློང་མ་གཉིས་བཏང་བ་དང༌། དེ་གཉིས་སོང་ནས། གོའུ་ཏ་མིའི་མཆིད་ནས། བལ་དེ་དག་བསྐུར་དུ་གསོལ་ཞེས་མཆིའོ། །སྒོ་གླེགས་ཀྱི་ཕག་ནས་ལོངས་ཤིག །དེ་གཉིས་གནས་ཁང་དུ་ཞུགས་ཏེ་འདེགས་པར་བརྩམས་པ་དང༌། སྒུལ་ཡང་མ་ནུས་ནས། ཅི་འདིར་རང་འཐག་དག་བཅུག་གམ། ཅི་ཁྱེད་གཉིས་གཞོན་ནུ་མ་གཏའ་གམ་པ་ཡིན་ནམ། ཞེས་དེས་མཐེའུ་ཆུང་གིས་བཏེགས་ཏེ་གཅིག་མགོར་བསྐུར། གཅིག་ནི་རྐེད་དུ་བསྐུར་རོ། །དེ་གཉིས་ན་རེ། མགོ་ཆག་ལ་ཐུག་གོ །རྐེད་པ་ཆག་ལ་ཐུག་གོ་ཞེས་ཟེར་ཞིང་དབྱར་ཁང་དུ་སོང་ནས་ཁུར་ས་ལ་བཞག་སྟེ་འགྱེལ་འདུག་གོ །དགེ་སློང་མ་རྣམས་ཀྱི། ཁྱེད་གཉིས་གཏའ་གམ་པ་ཡིན་ནམ། དེ་གཉིས་ན་རེ། ཁྱེད་ཅག་སྟོབས་དང་ལྡན་པ་དེས་འདི་ཐེག་ཅིག །དེ་དག་གིས་དེ་གདེག་པར་བརྩམས་པས་སྒུལ་ཡང་མ་ནུས་ནས། ཅི་འདིར་རང་འཐག་གི་རྡོ་དག་བཅུག་གམ། ཞེས་བམ་པོ་དེ་གཉིས་བཤིག་པ་ན་ཕུང་པོ་ཆེན་པོར་གྱུར་ནས་རྟ་བགད་ཀྱིས་བཏབ་སྟེ་སྨྲས་པ། འཆར་ཀ་ན་རེ། བལ་ཅུང་ཞིག་ཟེར་ན། གལ་ཏེ་མང་པོ་ཡོད་ན་ཇི་ལྟར་འགྱུར། སྐྱེ་དགུའི་བདག་མོས། ནུ་མོ་དག །སྐྲ་བྲེགས་ཤིག་མཆན་ཁུང་རལ་བུ་ཅན་ཡིན་ན་དགོད་དུ་ཅི་ཡོད། དེ་ནི་གནས་ངན་ལེན་ཀུན་ཏུ་སྤྱོད་པ་ཡིན་པས་བསྟན་པ་ལ་འདྲུམས་པ་ལྟུང་བས་ལྟུང་བར་བྱེད་དོ། །
སྟོན་པས། སྐྱེས་བུ་དམ་པ་ནི་གཉིས་ཏེ། ཁུར་མི་ལེན་པ་དང༌། བླངས་པ་མཐར་ཕྱིན་པར་བྱེད་པའོ་ཞེས་གསུངས་པས་(༡༧༣བ)འདི་ཁུར་བླངས་པ་ཡིན་པས་མཐར་ཕྱིན་པར་བྱ་དགོས་ཀྱི། ཇི་ཙམ་སྤྲོ་བ་དེས་རྨེལ་ལ་དེ་ལ་བྱིན་ཅིག །དེ་ནས་སྐྱེ་དགུའི་བདག་མོ་སྟོན་པོའི་དྲུང་དུ་སོང་ནས་ཕྱག་འཚལ་ཏེ་མཐའ་གཅིག་ཏུ་འཁོད་པ་དང༌། དེའི་ལག་པ་གཉིས་བཙོ་བླག་མཁན་གྱི་ལག་པ་ལྟར་ཤིན་ཏུ་དམར་བར་གྱུར་པ་ལ། ཅིའི་ཕྱིར་ཁྱོད་ཀྱི་ལག་པ་ཤིན་ཏུ་དམར་བར་གྱུར། འདི་ན་བགྱི་བ་གཞན་ལགས་ན་གཞན་བགྱིད་དོ། །ཇི་ལྟར་གྱུར། འཆར་ཀས་བལ་རྨེལ་དུ་སྩལ་ཏོ། །དེ་ནས་བྱུང་བ་འདི་དང་སོགས། འཆར་ཀ །ཁྱོད་དགེ་སློང་མ་ཉེ་དུ་མ་ཡིན་པ་ལ་ལུག་གི་བལ་རྨེལ་དུ་འཇུག་པ་བདེན་ནམ། བཙུན་པ། མད་དོ། །སྨད་ནས། དེ་ལྟ་བས་ན་ཕན་ཡོན་བཅུ་སོགས། ཡང་དགེ་སློང་གང་དགེ་སློང་མ་ཉེ་དུ་མ་ཡིན་བལ་ལུག་བལ་འཁྲུལ་འཛུད་དམ། འཚེད་དུ་འཛུད་དམ། རྨེལ་དུ་འཛུད་ན་སྤང་བའི་ལྟུང་བྱེད་དོ། །
གསེར་དངུལ་ལ་རེག་པའི་སྤང་བ་ནི། སྟོན་པ་རྒྱལ་པོའི་ཁབ་ནའོ། །གྲོང་དཔོན་གཙུག་ན་ནོར་བུས་སྟོན་པ་ལ་ཞུས་པ། རྒྱལ་བློན་རྣམས་ཀྱི་གཏམ་ལ། དགེ་སློང་རྣམས་ལ་མངོན་ཚན་ཅན་རུང་ཞིང་གསེར་བདག་གིར་བགྱིད་ཅེས་ཁ་ཅིག་ཟེར། མི་བྱེད་ཅེས་ཁ་ཅིག་ཟེར་ན་འདི་གང་ལགས། རུང་ཞིང་བདག་གིར་བྱེད་དོ་ཞེས་ཟེར་བ་སྐུར་བ་འདེབས་པའོ། །དེ་ངོ་མཚར་ཏེ། བདག་ཀྱང་དེ་སྙམ་མོ་ཟེར་ནས་སོང་ངོ༌། །དེ་ནས་དགེ་འདུན་བསྡུས་ཏེ། གྲོང་དཔོན་འདི་སྐད་ཟེར་གྱིས། ཁྱེད་ཀྱིས་རྩྭ་ཤིང་སོགས་བདག་གིར་བྱའི། གསེར་བདག་གིར་མི་བྱའོ། །འདི་ནི་བྱུང་བའོ། །སྟོན་པ་མཉན་ཡོད་ནའོང༌། །དེའི་ཚེ་དྲུག་སྡེ་དག་རང་གི་ལག་གིས་གསེར་དངུལ་ལེན་ཅིང་འཇོག་པར་བྱེད་ནས། མུ་སྟེགས་དག །ཤཱཀྱའི་དགེ་སྦྱོང་དག་ནི་མ་ལོག་པ་མ་སྤངས་པ་སྟེ། རང་གི་ལག་གིས་གསེར་ལེན་པར་བྱེད། ལེན་དུ་འཇུད་པར་བྱེད་དེ། འདི་རྣམས་དང་ཁྱིམ་པ་ཁྱད་པར་ཅི་ཡོད་ཟེར་ནས་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ཡང་དགེ་སློང་གང་རང་གི་ལག་གིས་གསེར་དང་དངུལ་ལེན་ནམ། ལེན་དུ་འཇུད་ན་སྤང་བའི་ལྟུང་བྱེད་དོ། །སྟོན་པ་མཉན་ཡོད་ནའོ། །ཙམ་པ་ན་ཁྱིམ་བདག་ཅིག་གིས་དགེ་འདུན་གྱི་ཕྱིར་གཙུག་ལག་ཁང་སྙིང་དང་མིག་འཕྲོག་པ་ཞིག་བྱེད་དུ་བཅུག་ནས། དེར་དགེ་སློང་མང་པོ་དབྱར་གནས་པར་ཁས་བླངས་ཏེ་དབྱར་ཐོན་པ་དང་ཁྱིམ་བདག་ལ། བདག་ཅག་སྟོན་པ་དང་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་ཡིས། བདག་ཅག་ལ་གོས་བྱིན་ཅིག །གོས་བཟང་པོ་མ་མཆིས་པས་ཚོང་པ་བྱུང་བ་དང་ཉོས་ཏེ་བཟང་པོ་དབུལ་ལོ། །གོས་བཟང་པོ་མེད་ན་ངན་པ་བྱིན་ཅིག །བདག་ནི་བཟང་པོ་སྦྱིན་པ་ལགས་ན་ཇི་ལྟར་ངན་པ་དབུལ། ཁྱེད་རིངས་ན་གོས་ཀྱི་རིན་ཀརྵ་པ་ཎ་སྣོམས་ཤིག །སྟོན་པས་མ་གནང་ངོ་ཞེས་མ་བླངས་པར་(༡༧༤ན)མཉན་ཡོད་དུ་ཕྱིན་པ་དང༌། དེ་དག་ལ་དགེ་སློང་རྣམས་ཀྱིས། ཁྱེད་ཀྱིས་དབྱར་གོས་ཀྱི་རྙེད་པ་མ་རྙེད་དམ། མ་རྙེད་དོ། །ཁྱེད་གང་དུ་དབྱར་གནས་པར་ཁས་བླངས། ཙམ་པར་རོ། །ཡོན་བདག་གང༌། ཆེ་གེ་མོའོ། །དེ་བཟང་པོ་སྦྱིན་ཞེས་གྲག་གོ །དེའི་ཕྱིར་མ་རྙེད་དོ། །སྐབས་དེ་རྒྱས་པར་བརྗོད་པ་དང༌། སྟོན་པས། དད་པ་ཅན་ནི་གོས་ཀྱི་རིན་འབུལ་ལ། ངའི་ཉན་ཐོས་རྣམས་ཀྱང་གོས་ཀྱི་རིན་འདོད་ཀྱིས་གནང་ངོ་སྙམ་དུ་དགོངས་ནས། བླང་བར་བྱ་ཞིང་བླངས་ནས་ཀྱང་སྦྱིན་བདག་དེ་ཉིད་ལ་ཡིད་གཏད་དེ་བཅང་བར་བྱའོ། །ཞལ་ཏ་བྱེད་པ་ཀུན་དགའ་ར་བ་པའམ། དགེ་བསྙེན་བསྐོ་བར་བྱའོ། །དགེ་སློང་རྣམས་ཆོས་གོས་ཀྱི་རིན་རྙེད་ལ། སྦྱིན་བདག་མེད་ནས་མི་ལེན་པའི་སྐབས་དེ་གསོལ་བ་དང༌། བླང་བར་བྱ་ཞིང་བླངས་ནས་ཀྱང་དགེ་སློང་གི་མདུན་དུ་འགྲེང་སྟེ་བྱིན་གྱིས་བརླབ་པར་བྱའོ། །ཡུལ་གཞན་དུ་སོང་ནས། འདི་ན་སྦྱིན་བདག་མེད་དོ་སྙམ་དུ་འགྱོད་པ་དང༌། སྦྱིན་བདག་དེ་གསོན་གྱི་བར་དུ་བདག་པོ་རིང་བ་ཉིད་ཡིན་ནའང་ཉམས་པ་མེད་དོ། །ཁྱིམ་པ་དད་པ་ཅན་དག་གིས་མཐའ་འཁོབ་ཏུ་གཙུག་ལག་ཁང་བྱེད་དུ་བཅུག་ནས་དེར་སྐྲག་པ་བྱུང་བས་གཙུག་ལག་ཁང་བོར་བ་ན། མ་བྱིན་པར་ལེན་པས་བཅོམ་པ་དང༌། དགེ་འདུན་ནམ། མཆོད་རྟེན་གྱི་དབྱིག་དང་གསེར་སྦས་ཏེ་འགྲོའོ། །གང་གིས་སྦ་མ་ཤེས་ནས། ཀུན་དགའ་ར་བ་པའམ། དགེ་བསྙེན་གྱིས་སྦའོ། །དེ་དག་རྐུ་ནས། དགེ་བསྙེན་དད་པ་ཅན་གྱིས་སྦའོ། །མེད་ན་དགེ་ཚུལ་གྱིས་སོ། །འཆར་ཀ་བསོད་སྙོམས་ལ་བརྒྱུས་ནས་ཕྲེང་ལྡན་མ་ཅན་སོང་སྟེ་ཆོས་སྟོན་པ་དང༌། རི་དྭགས་འཛིན་གྱི་མ་ས་གས་དགེ་འདུན་གྱི་ན་བའི་སྨན་ཁྱེར་ནས་གླུ་དང་རོལ་མོ་དང་བཅས་ཏེ་ཆས་པ་དང༌། དེས་ཐོས་ནས་འདི་ཅི་ཡིན། འདི་ལྟར་རོ། །འོ་ན་བདག་གིས་ཀྱང་དགེ་འདུན་གྱི་ན་བའི་སྨན་སྦྱར་བར་རིགས་སོ། །ལེགས་སོ། །འཆར་ཀས། གཙུག་ལག་ཁང་དུ་ཕྲེང་ལྡན་མས་དགེ་འདུན་གྱི་སྨན་སྦྱོར་བར་ཡོད་པས་དགོས་པ་རྣམས་ལོངས་ཤིག །དགེ་སློང་རྣམས་ཀྱིས། འཆར་ཀ །རྒྱལ་པོའི་ཕོ་བྲང་དུ་འགྲོ་བ་ལ་ཉེས་དམིགས་བཅུ་ཡོད་པར་མ་གསུངས་སམ། སྨན་གྱི་ཕྱིར་བསླབ་པ་ལས་འདའ་འམ། དེ་ཅང་མི་སྨྲའོ། །དེར་དགེ་སློང་འགའ་ཡང་སྨན་སློང་དུ་མ་བྱུང་བ་དང༌། འཆར་ཀ་ལ་དྲིས་པས། སྟོན་པས་རྒྱལ་པོའི་ཕོ་བྲང་དུ་འགྲོ་བ་ལ་ཉེས་དམིགས་བཅུ་ཡོད་པར་གསུངས་པས་མི་འོང་ངོ༌། །འོ་ན་ཇི་ལྟར་བགྱི། ཚོང་པའི་ལག་ཏུ་པ་ཎ་བྱིན་ནས། དེ་ནས་དགེ་འདུན་གྱིས་བླང་ངོ༌། །འོ་ན་དེ་བཞིན་བགྱིའོ་ཟེར་ནས་ཚོང་པ་ཞིག་ལ་པ་ཎ་གཏད་ནས། དགེ་སློང་རྒྱལ་པོའི་ཕོ་བྲང་དུ་མི་འོང་གིས། དེ་ལ་སྨན་ཅི་འདོད་པ་བྱིན་ཅིག་ཅེས་བསྒོ་ནས། དེས་པ་ཎ་བླངས་ཏེ་བཞག་པ་(༡༧༤བ)དང༌། དགེ་སློང་གིས་དེ་ཐོས་ཏེ་སོང་ནས། གཅིག་གིས། ཁོ་བོ་ལ་འཁུར་བ་དང༌། འཁུར་སྐམ་དང༌། ཤ་ཁུ་དག་བྱིན་ཅིག །གཅིག་གིས། ཁོ་བོ་ལ་འཁུར་བ་དང༌། ཁྲོལ་བུ་དག་བྱིན་ཅིག །གཅིག་གིས། ཁོ་བོ་ལ་ཤ་ཁུ་ཁོལ་བུ་དང་འཚོགས་པ་བྱིན་ཅིག །ཅེས་སྨྲས་པས། དེ་ན་རེ། བདག་འཁུར་མཁན་ཡང་མ་ལགས། ཤ་གཡོས་མཁན་ཡང་མ་ལགས། དབྱིག་འདི་སྣོམས་ཏེ་བཞུད་ལ་གང་དགོས་པ་ཉོས་ཤིག །དབྱིན་ལེན་དུ་མ་གནང་ངོ༌། །བདག་སྤོས་འཚོང་སྟེ་ཚོང་འདུས་ཀྱིས་འཚོ་བ་ལགས་ཀྱིས་བདག་གི་འཚོ་བ་འཆད་དོ་ཟེར་བ་དེ་གསོལ་བས། སྦྱིན་བདག་ལ་ཡིད་གཏད་དེ་པ་ཎ་བླངས་ལ་སྤྱད་ཅེས་པ། དེ་བྱེད་པ་ལ་དབུལ་བའི་ཕྱིར་ཀརྵ་པ་ཎ་བླང་བ་ཡང་ངོ༌། །སྟོན་པས་ཁྱིམ་བདག་ལུག་བཏུལ་ཏེ་གཤེགས་པ་ན། ཁྱིམ་བདག་ལུག་གིས་བཤུལ་གྱི་སྙུན་བརྒྱགས་ཀྱི་ཟོང་པ་ཎ་བཞེས་ཤིག །བླང་བར་བྱའོ། །སུས་བླང་མི་ཤེས་ནས་ཞུས་པས། རུང་བར་བྱེད་པས་སོ། །རུང་བར་བྱེད་པ་མེད་ནས་གསོལ་བ་དང༌། དགེ་ཚུལ་གྱིས་བླང་བར་བྱའོ། །དགེ་སློང་གི་ལམ་བརྒྱགས་ནི་བཟའ་བ་ལྔ་དང༌། བཟའ་བར་སྨོས་པ་ལྔ་དང༌། རིན་པོ་ཆེ་ལྔ་དང༌། རིན་པོ་ཆེར་སྨོས་པ་ལྔའོ། །མཉན་ཡོད་དུ་ཁྱིམ་བདག་གཅིག་གིས་དགོན་པར་སྤྱིལ་བུ་བྱེད་དུ་བཅུག་སྟེ་དགེ་སློང་ཞིག་གནས་སོ། །དེ་དགུན་ལྷགས་པས་ཉེན་ནས་རྒུད་པ་དང༌། ཁྱིམ་བདག་དེ་ལ། ཤེས་པར་གྱིས་ཤིག་གཞན་དུ་འགྲོའོ། །ཅུང་ཟད་མི་བྲེལ་ལམ། མིན་ཏེ། ལྷགས་པས་སྐྱོའོ། །བཞུགས་ཤིག །མེ་ཤེལ་སྟོན་ཅིག །མ་གནང་ངོ༌། །དེ་གསོལ་བས། མེའི་དོན་དུ་མེ་ཤེལ་ཉེ་བར་བཞག་པར་བྱའོ། །རྐུན་པོ་ལྔ་བརྒྱ་དེར་ཕྱིན་ནས་དགེ་སློང་ལ། ལྷགས་པས་ཉེན་ན་མེ་ཡོད་དམ། མེད་དོ། །ཁྱོད་མེའི་བྱ་བ་ཇི་ལྟར་བྱེད། མེ་ཤེལ་ལས་སོ། །ག་རེ། འདི་ནའོ། །དེ་དག་གིས་མཐོང་ནས་ཕྲོགས་སོ། དགེ་སློང་དེས་ཁྱིམ་བདག་ལ་སྔར་བཞིན་བརྗོད་པས། མེ་ཤེལ་མ་བྱིན་ནམ། བྱིན་ཏེ་རྐུན་པོས་ཕྲོགས་སོ། །དེ་དབེན་པར་བཞག་མོད་ཟེར་བ་དེ་གསོལ་བས། དེ་མ་སྦས་པར་གཞག་པར་མི་བྱའོ་སོགས་སོ། །དྲུག་སྡེས། རྒྱ་གནང་བ་ན་རིན་པོ་ཆེ་ལས་བྱས་པའི་རྒྱ་བྱས། འཁར་བ་གནང་བ་རིན་པོ་ཆེ་ལས་བྱས་པ་སོགས་ཡོ་བྱད་གང་གནང་བ་དེ་རིན་པོ་ཆེ་ལས་བྱས་པས། ཡོ་བྱད་རྗེས་སུ་གནང་བར་རིན་པོ་ཆེ་བདག་གིར་བྱ་བའི་ཤན་བསྲེ་བར་མི་བྱ་བ་ཉིད་དོ། །འོད་སྲུངས་སྟོབས་བཅུ་པས་ཁྱིམ་བདག་མེ་སྐྱེས་ཀྱི་ཙནྡན་ས་མཆོག་གི་ལྷུང་བཟེད་རྫུ་འཕྲུལ་གྱིས་བླངས་པ་དང༌། དེ་གསོལ་བས། གསེར་དངུལ་བཻཌཱུརྱ་ཤེལ་ལས་བྱས་པ་བཞི་ནི། མ་བླངས་པ་བླང་བར་མི་བྱ། བླངས་པ་དོར་བར་བྱའོ། །གཞན་བཞི་ནི། ར་གན་དང་སོགས་ནས། ས་ལས་བྱས་(༡༧༥ན)པའོ། །ལོངས་པའི་གཞིར་གཏོགས་ནས་རིན་པོ་ཆེ་ཞེས་བྱ་བ་ནི། ནོར་བུ་དང་ནས། གཡས་སུ་འཁྱིལ་བའི་བར་རོ། །
མངོན་ཚན་ཅན་གྱིས་སྤྱོད་པའི་སྤང་བ་ནི། །སྟོན་པ་མཉན་ཡོད་ནའོང༌། །ཡུལ་དབུས་སུ་སངས་རྒྱས་བྱུང་ངོ་ཞེས་གྲགས་པའི་ཚེ་ཉན་ཐོས་རྣམས་ཆོ་འཕྲུལ་བྱེད་པས་དེ་དག་ལ་མཆོད་ན་ཕན་ཡོན་ཆེན་པོར་འགྱུར་རོ་ཞེས་ཐོས་ནས་བྱང་ལམ་པའི་ཚོང་པ་དག་ལྷགས་པ་དང༌། མཉན་ཡོད་ན་རྩིས་མཁན་ཞིག་འདུག་པ་དེས་དེར་སོང་ནས། དེད་དཔོན་ལ་མིང་དང་རུས་ནས་བརྗོད་དེ། འོངས་པ་ལེགས་སོ། །ཁྱོད་ཀྱི་ཕ་མའི་མིང་ནི་འདི་ཞེས་བྱ། ཁྱོད་ཀྱི་རྫས་འདི་སྙེད་ཅིག་འོངས་སོ། །ཉི་མ་མང་གེ་མོ་ཁལ་འཇིག་གོ །ཁེ་སྤོགས་ནི་འདི་སྙེད་ཅིག་འགྲུབ་པར་འགྱུར་རོ་ཞེས་སྨྲས་པ་དང༌། ཉན་ཐོས་ཆོ་འཕྲུལ་བྱེད་པ་འགའ་ཞིག་ཡིན་སྙམ་ནས། དེས་དེ་ལ་བྱང་ལམ་གྱི་ནགས་ཀྱི་འབྲས་བུས་སློང་ཕོར་བཀང་སྟེ་བྱིན་ནས་ལྭ་བ་སྲིན་བུའི་མདོག་ལྟ་བུ་ཞིག་ཀྱང་བསྐོན་ནོ། །དེས་གྱོན་ནས་གྲོགས་རྣམས་ཀྱི་གན་དུ་སོང་བ་དང༌། འདི་ག་ལས་རྙེད། འདི་ལས་སོ། །
དེ་དག་གིས་སྨྲས་པ། ཤཱཀྱའི་དགེ་སྦྱོང་རྣམས་བདག་ཅག་ལ་རྟག་ཏུ་མཐོ་འཚམ་གྱི། ཁྱོད་ལྭ་བ་འདི་གྱོན་དེ་སོང་ལ། དགེ་སྦྱོང་དེ་དག་གི་སྙིང་གས་པར་གྱིས་ཤིག །དེ་ལྟར་བྱའོ་ཞེས་དེ་ལྭ་བ་གྱོན་ནས་རྒྱལ་བྱེད་ཚལ་དུ་སོང་བ་དང་ཉེ་དགས་མཐོང་ནས། གཅེར་བུ་པ་འདི་ལྭ་བ་བཟང་པོ་གྱོན་ཏེ་འོངས་ཀྱིས་བདག་གིས་འདི་མ་ཕྲོགས་ན་ཉེ་དགའ་ཞེས་བྱ་བའི་མིང་མི་གཟུང་ངོ་སྙམ་ནས། ཁྱོད་གཅེར་བུ་པ་ཡིན་ན། ལྭ་བ་འདི་ལྟ་བུ་གྱོན་པས་ཕྱིར་བབས་སམ། ཁོ་བོ་མ་བབས་ཏེ། ཚོང་པས་བྱིན་ནོ། །མ་ལེགས་སོ། །ཁྱོད་ཀྱིས་རྒས་པའི་གནས་སྐབས་སུ་ཚུལ་ཁྲིམས་འཆལ་བ་ཀུན་ཏུ་སྤྱད་དོ། །ཚུར་ཤོག་ཆོས་བསྟན་པར་བྱའོ། །དེ་ལ་སྦྱིན་པའི་བསྔགས་པ་རྒྱ་ཆེར་བརྗོད་དེ། ཁྱོད་ཀྱེ་སྟོན་པ་ནི་ངན་པ་ལ་མོས་པ་ཡིན་ཏེ། དེ་བཟང་པོ་འདོད་ན་དེས་ཁྱེད་ལ་གོས་འབུམ་རི་བ་དང༌། ཟས་རོ་བརྒྱ་དང་ལྡན་པ་དང༌། ཁང་པ་བརྩེགས་པ་མིག་ལྔ་བརྒྱ་པའང་གནང་བར་འགྱུར་བ་ཞིག་ནམ་གནང་ངོ༌། །ཁོ་བོ་ཅག་གི་སྟོན་པ་ནི་བཟང་པོ་ལ་མོས་པས་དེས་ཁོ་བོ་ཅག་ལ་གོས་འབུམ་རི་བ་སོགས་གནང་ངོ༌། །ཁྱོད་ལྭ་བ་འདི་ལྟ་བུ་གྱོན་ཏེ་སློང་མོ་ལ་འགྲོ་ན། ཁྱིམ་པ་དད་པ་ཅན་དག་གིས། ཤེས་པ་ཅན་འདིས་ཚུལ་ཁྲིམས་འཆལ་བ་སྤྱད་དོ་སྙམ་ནས་སློང་མོའང་མི་རྙེད་ཀྱིས། ཁྱོད་ཀྱི་ལྭ་བ་འདི་ཁོ་བོ་ལ་བྱིན་དང་། ཁོ་བོས་ཁྱོད་ལ་ལྭ་བ་གཞན་ཞིག་སྦྱིན་ནོ། །ཁོ་བོས་ལྭ་བ་འདི་གྱོན་ཏེ་བསོད་སྙོམས་ལ་ཞུགས་པ་ན་ཁྱིམ་པ་དད་པ་ཅན་དག་གིས་ཁོ་བོ་མཐོང་ནས། ཉེ་དགས་ལྭ་བ་འདི་ག་ལས་རྙེད་ཟེར་ན། ཤེས་པ་ཅན་ཆེ་གེ་མོ་ཞིག་གིས་བྱིན་ནོ་ཞེས་བརྗོད་པས་དེ་དག་གིས་ཁྱོད་དད་པ་ཅན་དུ་ཤེས་ནས་ཁྱོད་(༡༧༥བ)སློང་མོ་ལ་ཞུགས་པ་ཆང་དང་ནུ་རྫིས་སློང་ཕོར་བཀང་སྟེ་སྟེར་བར་འགྱུར་རོ། །ཉེ་དགའ། བཞེས་ཤིག །ཉེ་དགའ་ན་རེ། ཁྱོད་ཀྱི་གྲོགས་དག་ཚུལ་ཁྲིམས་འཆལ་བ་ཡིན་པས་ཁྱོད་དེ་དག་གི་ཚིག་ཐོས་ནས་ཡང་མི་འཕྲོག་གམ། ཅི་ཁོ་བོའི་ལྭ་བ་འདིའང་དེ་དག་དབང་བ་ཡིན་ནམ། ཁོ་བོ་ཉིད་དབང་བ་ཡིན་གྱིས་བཞེས་ཤིང་སླར་མི་འཕྲོག་གོ །དེས་དེ་ལས་དེ་བླངས་ཏེ་ལྭ་བ་རྩུབ་པོ་ཞིག་བྱིན་ནས་སོང་བ་དང༌། འདི་ག་ལས་རྙེད། ཉེ་དགའ་ལ་དེ་ཕུལ་པས་འདི་བྱིན་ནོ། །དེ་དག་གིས་སྤྱོས་ཏེ། ཤཱཀྱའི་དགེ་སྦྱོང་རྣམས་ནི་ཡུ་བུ་ཅག་གསོན་ནའང་མི་དགའ་ལ། དྲུག་སྡེ་དག་ཇི་ལྟ་བར་གཞན་ཡིན་ཞིང༌། ཉེ་དགའ་ཇི་ལྟ་བར་གཞན་མིན་ནོ། །ཁྱོད་ཀྱིས་གནས་བརྟན་གཞན་ཞིག་ལ་བྱིན་ན་ཁོ་བོ་ཅག་གིས་ཀྱང་ཡི་རང་བྱེད་ན། ཉེ་དགའ་ལ་བྱིན་ཏེ། དེ་ནི་བདག་ཅག་ལས་གཟོང་གིས་ཀྱང་ཁྲག་གི་ཕྱིས་བུ་ལེན་འདོད་ཀྱི། ལྭ་བ་ཁྱེར་འོང་ན་ལེགས། མི་འོང་ན་ཁྱོད་ཁོ་བོ་ཅག་གི་ནང་ནས་དབྱུང་ངོ༌། །དེ་སྐྲག་ནས་ཉེ་དགའ་ཅན་སོང་བ་དང༌། ཉེ་དགས་མཐོང་ནས་གཙུག་ལག་ཁང་གི་སྒོ་བཅད་དོ། །དེས་སྒོ་བརྡུངས་ཏེ། ཉེ་དགའ། ཞེས་བོས་ཀྱང་ཅང་མི་སྨྲའོ། །
དགེ་སློང་རྣམས་ཀྱིས་དེ་ལ། ཉེ་དགས་ཁྱོད་ལ་ཅི་བྱ། དེས་ཁོ་བོའི་ལྭ་བ་ཁྱེར་རོ། །ཁྱོད་ལྭ་བ་འདོད་ན་སོང་ལ་བཅོམ་ལྡན་འདས་ལ་སྐྱབས་སུ་སྒྲུབས་ཤིག །དེ་སྟོན་པའི་དྲུང་དུ་སོང་ནས། ཉེ་དགས་བདག་གི་ལྭ་བ་ཁྱེར་བ་དེ་བཅོམ་ལྡན་འདས་ཀྱིས་བདག་ལ་སླར་སྩལ་དུ་གསོལ། མ་སྩལ་ན་བདག་གྲོགས་རྣམས་ཀྱི་ནང་ནས་གནས་དབྱུང་བྱེད་པར་འགྱུར་རོ། །སྟོན་པས། ཀུན་དགའ་བོ། ཉེ་དགའི་གན་དུ་སོང་སྟེ། འདིའི་ལྭ་བ་ཕྱིར་བྱིན་ཅིག །མ་བྱིན་ན་འདི་ཁྲག་ཚ་བ་སྐྱུགས་ནས་འཆི་བའི་གནས་ཡོད་དོ་ཞེས་གྱིས་ཤིག །ཀུན་དགའ་བོ་སོང་ནས་དེ་སྐད་བརྗོད་པ་དང༌། ཉེ་དགའ་ན་རེ། སྟོན་པའི་བཀའ་ཉན་པར་ཟད་ཀྱི། གཞན་དུ་ན་གཅེར་བུ་འདི་ཁྲག་ཚ་བ་སྐྱུགས་ནས་འཆི་བ་བས། ཤེས་པ་ཅན་ཤ་སྟག་གིས་འཛམ་བུ་གླིང་འདི་བུ་རམ་ཤིང་གི་ཚལ་ལམ། འདམ་བུའི་ཚལ་ལམ། འོད་མའི་ཚལ་བཞིན་དུ་གང་ལ། དེ་དག་ཐམས་ཅད་ཁྲག་ཚ་བ་སྐྱུགས་ནས་དུས་བྱེད་ཀྱང༌། ཉེ་དགའི་སྤུའི་རྩེ་མོ་ཙམ་ཡང་མི་གཡོ་སྟེ། འོན་ཀྱང་བཞུད་ཅིག་སྦྱིན་ནོ། །དེ་ནས་ཉེ་དགས། ཀྭ་ཡེ་གཅེར་བུ་པ། ཉོན་ཅིག །ཁྱོད་ཀྱི་སྟོན་པ་བརྫུན་མ་དེས་འཇིག་རྟེན་བསླུས་པས་དམྱལ་བར་སྐྱེས་ནས་དེའ་ལྕེ་ལ་ཐོང་གཤོལ་ལྔ་བརྒྱས་རྨེད་ན། ཁྱོད་དེ་བས་ཀྱང་བརྫུན་མ་ཆེན་པོ་ཡིན་པས། ཁྱོད་ཀྱི་ལྕེ་ལའང་ཐོང་གཤོལ་སྟོང་གིས་རྨོ་བར་འགྱུར་རོ། །གཞན་ཡང་ཁོ་བོའི་ལྭ་བ་ཁྱོད་ཀྱིས་སྤྱད་ན། ཁོ་བོས་ཀྱང་ཁྱོད་ཀྱི་ལྭ་བ་སྤྱད་སྙམ་མམ། མ་ལགས་སོ། །ཉེ་དགས་དེའི་ལྭ་བ་དེས་འདོམས་ཀྱི་ཕྱོགས་ཐམས་ཅད་ཕྱིས་ནས་བཞི་བལྟབ་བྱས་ཏེ་ལག་པ་གཡོན་པའི་སྟེང་དུ་(༡༧༦ན)བཞག་ནས། གཡས་པས་ཐལ་ལྕག་གིས་བསྣུན་པས་རིམ་པ་ཐམས་ཅད་རྡོལ་ནས། ལག་པ་རྐྱོངས་ཤིག །བརྐྱང་བ་དང༌། དེ་ལས་བུབ་ཏུ་འགྱེལ་བར་འགྱུར་བའི་ཤུགས་ཀྱིས་ལྭ་བ་བྱིན་པ་དང༌། དེ་ཁས་བུབ་ཏུ་འགྱེལ་བ་ལ་རྡོག་པས་བསྣུན་ནས། བཙུག་ལག་ཁང་སླ་ཙས་མ་གཏལ་བར་སོང་ཞིག །མ་གུམ་ན་མཆི་སྟེ་སླན་ཆད་རྒྱལ་བྱེད་ཚལ་དུ་མི་མཆིའོ། །དེ་ནི་རེ་ཞིག་བྱུང་བའོ། །སྟོན་པ་མཉན་ཡོད་ནའོ། །དེའི་ཚེ་དྲུག་སྡེས་མངོན་ཚན་ཅན་གྱི་སྤྱོད་པ་བུན་བསྐྱེད་བྱས་པ་དང༌། མུ་སྟེགས་ཅན་དག །ཤཱཀྱའི་དགེ་སྦྱོང་རྣམས་ནི་མ་ལོག་པ་མ་སྤངས་པ་སྟེ། མངོན་ཚན་ཅན་གྱི་སྤྱོད་པ་སྣ་ཚོགས་བྱེད་པས་ཁྱིམ་པ་དང་ཁྱད་པར་ཅི་ཡོད་ཅེས་ཟེར་བའི་སྐབས་དེ་གསོལ་བས། བྱུང་བ་འདི་དང་སོགས། ཁྱེད་མངོན་ཚན་ཅན་གྱི་སྤྱོད་པ་རྣམ་པ་སྣ་ཚོགས་བྱེད་པ་བདེན་ནམ། བཙུན་པ། མད་དོ། ཡང་དགེ་སློང་གང་མངོན་ཚན་ཅན་གྱི་སྤྱོད་པ་རྣམ་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །སྟོན་པ་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟང་ན་བཞུགས་སོ། །ལི་ཙ་བྱི་རྣམས་ཀྱིས་ཁང་པ་དྲུག་བརྩེགས་བདུན་བརྩེགས་བྱེད་པ་བཞིན་དུ་གཙུག་ལག་ཁང་ཡང་བྱས་པས་ཡང་ཡང་རྡིབ་ནས། སྦྱིན་བདག་གིས་བསམས་པ། བདག་ཅག་རྣམས་གསོན་ནའང་འདི་ལྟར་འགྱུར་ན་ཤི་ན་ཇི་ལྟར་འོང་སྙམ་ནས། མཁར་ལན་གྱི་རྒྱུར་མི་ཟད་པ་དབུལ་ལོ་སྙམ་སྟེ་ཕུལ་བས་མི་ལེན་པའི་སྐབས་དེ་གསོལ་བས། བླང་བར་བྱའོ། །དགེ་སློང་གི་གཙུག་ལག་ཁང་སུམ་བརྩེགས་དང༌། དགེ་སློང་མའི་དབྱར་ཁང་ཉིས་བརྩེགས་བྱའོ། །དགེ་སློང་རྣམས་ཀྱིས་མི་ཟད་པ་བླངས་ནས་མཛོད་དུ་བཞག་གོ །སྦྱིན་བདག་འོངས་ནས། མཁར་ལན་མི་བྱེད་དམ། ཀརྵ་པ་ཎ་མེད་དོ། །བདག་གིས་མི་ཟད་པ་མ་ཕུལ་ལ། མཛོད་ན་འདུག་གོ །དེ་ལྟར་ན་མི་ཟད་པར་མི་འགྱུར་གྱིས། ཟད་པར་འགྱུར་རོ། །ཅིའི་ཕྱིར་རབ་ཏུ་མི་སྦྱོར། མ་གནང་ངོ༌། །སྐབས་དེ་གསོལ་བས། དགེ་འདུན་གྱི་ཕྱིར་མཁར་ལན་གྱི་རྒྱུ་མི་ཟད་པ་སྦྱར་བར་བྱའོ། །དེ་བཞིན་དུ་ཁྱིམ་པ་དད་པ་ཅན་དག་དཀོན་མཆོག་གསུམ་གྱི་ཕྱིར་མི་ཟད་པ་འབུལ་ནས་ཀྱང༌། རབ་ཏུ་སྦྱར་ཞིང་བསྐྱེད་ཀྱིས་མཆོད་པ་བྱའོ་ཞེས་པ། ཀུན་དགའ་ར་བ་པའམ། དགེ་བསྙེན་དག་ཡོད་ན་དཀོན་མཆོག་གི་དོན་དུ་བསྐྱེད་པར་བྱའོ། །དེ་དག་གིས་དེ་དག་ཉིད་ལ་བྱིན་ནས་བདས་པས་རྩོད་པ་བྱུང༌། ཕྱུག་པོ་ལས་མ་ཁུགས། དབུལ་པོས་འཇལ་མ་ནུས་པས། གཏའ་ཉི་རིར་བླང་བར་བྱའོ་སོགས་སོ། །
ཉོ་ཚོང་བྱེད་པའི་སྤང་བ་ནི། སྟོན་པ་མཉན་ཡོད་ནའོ། །དྲུག་སྡེ་དག་ཉོ་ཚོང་སྣ་ཚོགས་བྱེད་དེ། ལྗོངས་ལོ་ལེགས། གྲོང་ཁྱེར་བ་ལོ་ཉེས་པའི་ཚེ་ལྗོངས་ནས་གྲོང་ཁྱེར་དུ་ལེན། བཟློག་པའི་ཚེ་(༡༧༦བ)གྲོང་ཁྱེར་ནས་ལྗོངས་སུ་གཏོང༌། རིན་ཆེ་བའི་ཚེ་ན་འཚོང༌། ཆུང་བའི་ཚེ་ན་ཉོ་བར་བྱེད་པས་མུ་སྟེགས་ཅན་རྣམས། ཁྱིམ་པ་དང་ཁྱད་པར་ཅི་ཡོད་ཅེས་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ཡང་དགེ་སློང་གང་ཉོ་ཚོ་རྣམ་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །བྱང་ལམ་པའི་ཚོང་པ་དག་གིས་གཙུག་ལག་ཁང་བཟང་པོ་དག་མཐོང་སྟེ། བདག་ཅག་གིས་དགེ་འདུན་ལ་མཆོད་སྟོན་བགྱིའོ། །ཡོ་བྱད་ཁྱེར་ཤོག་ཅིག །རིན་དབུལ་གྱིས་འབྲལ་སྩོལ་ཅིག །མ་གནང་ངོ༌། །གསོལ་བས། དགེ་འདུན་གྱི་བཤོས་ཀྱི་ཕྱིར་དགེ་འདུན་གྱི་འབྲས་རིན་གྱིས་ཉོ་བ་ལ་སྦྱིན་པར་བྱའོ། །རིན་ཙམ་བྱིན་པས། གལ་ཏེ་དེ་ཉིད་ཀྱིས་ན་འཐེབ་དང་བཅས་པར་རོ། །ཐམས་ཅད་ལ་བྱིན་པས་ཟད་དེ་སྤྱི་སྤུང་ཆད་པས། ཟད་ན་དགེ་འདུན་གྱིས་ཉོ་བར་བྱའོ། །གལ་ཏེ་སྲོག་ཆགས་མེད་ན་རྙིང་པ་བཙོང་བར་བྱའོ། །དྲུག་སྡེ་རྣམས་འཇིག་རྟེན་ན་གྲགས་ཏེ། ཉོ་ཚོང་བྱེད་པ་རྣམས་འདྲིའོ། །མཉན་ཡོད་དུ་ཁྱིམ་བདག་གཉིས་གཅིག་གིས་འཚོང༌། གཅིག་ཉོ་སྟེ། རིན་ཐང་གཏམ་པ་ན། ཉེ་དགས་བཅད་པ་བཙན་ནོ་ཟེར་ནས་དྲིས་པས། རེ་རེ་ལ་ཉོའམ་འཚོང་ཞེས་དྲིས་པས་གསང་སྟེ། ཉོ་མཁན་ལ། ཉི་ཤུ་དང༌། འཚོང་མཁན་ལ། བཞི་བཅུ་རིའོ་ཞེས་བརྗོད་ནས། གཉིས་ཀས་མངོན་སུམ་དུ། ཇི་ལྟར་ལེགས་པ་གྱིས་ཞེས་བརྗོད་པ་དང༌། དེ་གཉིས་མ་འཆམ་པར། ཡིད་ཆེས་པའི་ཚིག་ལས། འདི་རིའོ་ཞེས་ཐོས་སོ། །སུ་ལས། ཉེ་དགའ་ལས་སོ། །དེས་ཤེས་བཞིན་དུ་བདག་ཅག་གཉིས་བསླུས་ཀྱིས་སླན་ཆད་མི་འདྲིའོ་ཞེས་པའི་སྐབས་དེ་གསོལ་བས། རིན་ཐང་མི་གདབ་བོ། །དེ་ལྟར་གསུངས་པ་དང༌། དགེ་སློང་གོས་ཉོ་བར་འདོད་པས། ཁྱིམ་པ་ལ་པ་ཎ་གཅིག་དང༌། བཞི་ཆ་དང༌། བརྒྱ་ཆ་དང༌། བཅུ་དྲུག་ཆས་བསྐྱེད་པ་ན་དེ་ཁྲོས་ནས། ངེད་ནི་སྤོགས་པ་ཡིན༌། ཁྱོད་དེ་བས་ཀྱང་སྤོགས་པ་ཆེན་པོའོ་ཟེར་ནས་འཕྱ་བ་གསོལ་བས། དགེ་སློང་རང་གིས་ཁྱིམ་པའི་ཉོ་ཚོང་དག་ཏུ་ལག་གཞུག་པར་མི་བྱའོ། །ཇི་ལྟར་ཉོ་མ་ཤེས་ནས། ཁྱིམ་པ་ཉོར་གཞུག་མ་གོ །ཉོ་འདོད་ཅིང་ཁྱིམ་པ་མེད་ན་ལན་གསུམ་གྱི་བར་དུ་ཚིག་བརྗོད་པར་བྱའོ། །ཟོང་ལ་རྩེག་པ་ནི་གཞན་གྱི་དོན་དུ་ཡང་མི་བྱ་སྟེ། དཀོན་མཆོག་གསུམ་ནི་མ་གཏོགས། དྲུག་སྡེ་དག་ལྷུང་བཟེད་དང་ཆོས་གོས་སོགས་དགེ་སྦྱོང་གི་ཡོ་བྱད་སྐུགས་སུ་འཇུག་པ་ཁྱིམ་པས་མཐོང་ནས། དེ་ནི་འཚམ་པ་མ་ཡིན་ནོ། །ཅི་ཆང་འཐུངས་སམ། སྒོག་སྐྱ་ཟོ། མི་འཚམ་པ་ཅི་ཡོད་ཟེར་བ་དེ་གསོལ་བས། འཕྱ་བ་ཐོག་ཏུ་བབ་སྟེ། གཏའ་གཞུག་པར་མི་བྱའོ། །ཞལ་ཏ་བས་དགེ་འདུན་གྱི་ཕྱིར་ནོར་བསྐྱིས་ནས་ཞལ་ཏ་བ་ཤི་བ་དང༌། ཁྱིམ་པ་དེས། དགེ་སློང་དེ་ག་རེ། ཤིའོ། །བདག་གི་ནོར་བསྐྱིས་སོ། །སོང་ལ་ལོངས་ཤིག །དགེ་(༡༧༧ན)འདུན་གྱི་ཕྱིར་ཁྱེར་གྱི། ཕ་མ་དང་རང་གི་ཕྱིར་མ་ལགས་པས་ཁྱོད་ཀྱིས་སྩོལ་ཅིག །གསོལ་བས། དགེ་འདུན་གྱི་ཕྱིར་ཁྱེར་བར་ཤེས་ན་བྱིན་ཅིག །ངས་ལག་གི་བླའི་ཆོས་བཅའ་སྟེ། རྒན་རབས་རྒན་རབས་དག་ལ་མ་ཞུས་པར་དགེ་འདུན་གྱི་དོན་དུ་བརྩོན་པར་མི་བྱའོ་སོགས།

བཅུ་ཚན་གསུམ་པ།
བཅུ་ཚན་གསུམ་པ་ལ་བཅུ་ལས། ལྷུང་བཟེད་འཆང་བའི་སྤང་བ་ནི། སྟོན་པ་མཉན་ཡོད་ནའོ། །ཉེ་དགའ། འདི་ཐམས་ཅད་ཁྱིམ་བདག་གིས་ཞུས་ནས་བསླབ་པའི་གཞིས་ཁྱབ་པར་བྱས་པས་རྙེད་པ་སྒྲུབ་མི་ནུས་སོ་སྙམ་པ་དང༌། དགའ་འདུན་པ་དྲུག་ཅུ་སྐྱེད་མོས་ཚལ་དུ་སོང་བ་མཐོང་ནས། འདི་ལས་རྙེད་པ་མ་གྲུབ་ན་ཉེ་དགའི་མིང་མི་གཟུང་ངོ་སྙམ་ནས། ལྷུང་བཟེད་གསལ་བ། ཟླུམ་པ། ལོངས་སྤྱད་པར་བཟོད་པ་ཞིག་མཆན་ཁུང་དུ་ཁྱེར་ཏེ་སོང་ནས། དགའ་འདུན་པ་ཞིག་ལ་སྦྱིན་པའི་གཏམ་བྱས་པས་དད་ནས། ཅི་ལ་བྱོན། ལྷུང་བཟེད་དགོས་སོ། །ལྷུང་བཟེད་མ་མཆིས་ཏེ་རིན་དབུལ་ལོ། །ལྷུང་བཟེད་བསྟན་ནས། འདིའང་རིན་གྱིས་རྙེད་དོ། །འདིའི་རིན་ཅི་ཙམ། ཀརྵ་པ་ཎ་དྲུག་ཅུའོ། །དེས་ཕུལ་ལོ། །སྦྱིན་པ་འདིས་སོགས་ནས། ལྷ་དང་མི་རྣམས་ཀྱི་ནང་དུ་སྣོད་དུ་འགྱུར་བར་གྱུར་ཅིག །དེ་བཞིན་དུ་ཐམས་ཅད་ཀྱིས་ཀརྵ་པ་ཎ་དྲུག་ཅུ་དྲུག་ཅུ་སྦྱོར་དུ་བཅུག་ནས་སོང་ངོ༌། །དེ་དག་འདུས་པ་ན། ཁོ་བོས་ཉེ་དགའ་ལ་ལྷུང་བཟེད་ཕུལ་གྱིས་ཡི་རང་བར་གྱིས་ཤིག །གཞན་ཞིག་ན་རེ། ཁོ་བོས་ཀྱང་ཕུལ་ལོ། །དེ་བཞིན་དུ་ཐམས་ཅད་ཀྱིས་ཁོ་བོས་ཀྱང་ཕུལ་ལོ། །དེ་དག་ཕན་ཚུན་བལྟས་ཏེ། དགེ་སློང་གཅིག་ལ་ལྷུང་བཟེད་དུ་དགོས་ཞེས་དགེ་སློང་ཞིག་ལ་དྲིས་པ། དགེ་སློང་གཅིག་ལ་ལྷུང་བཟེད་དུ་འཚལ། གཅིག་ཁོ་ན་དགོས་སོ། །དགེ་སྦྱོང་རྣམས་ནི་རྙེད་པ་འདོད་པས་ཟིལ་གྱིས་ནོན་ནོ་ཞེས་སྨོད་དོ། །འདི་ནི་རེ་ཞིག་བྱུང་བའོ། །དྲུག་སྡེས་ལྷུང་བཟེད་རྙེད་ཚད་བྱིན་གྱིས་མི་རློབ་པར་འཆང་ནས། དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། དགེ་སློང་གིས་ལྷུང་བཟེད་ལྷག་པ་ཞག་བཅུའི་བར་དུ་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །རབ་ཏུ་བྱུང་བ་ལ་ལྟོས་པའི་དོན་ཉིད་དུ་ངེས་པར་བྱས་པ་ནི་སྤངས་པ་ཉིད་ཡིན་ནོ་སོགས་སོ། །
ལྷུང་བཟེད་འཚོལ་བའི་སྤང་བ་ནི། སྟོན་པ་མཉན་ཡོད་ནའོ། །ཁྱིམ་བདག་ཅིག་གིས་གྲོང་དང་དགོན་པར་གཙུག་ལག་ཁང་གཉིས་བརྩེགས་ཏེ། དེར་དབྱར་གནས་པའི་དགེ་འདུན་ལ་རས་ཡུག་རེ་རེ་ཕུལ་ལོ། །ཉེ་དགས་ཁྱིམ་བདག་དེ་དགོན་པའི་གཙུག་ལག་ཁང་དུ་རས་ཡུག་ཁྱེར་སོང་བ་ཐོས་ནས། དགའ་བོ་ལ། འདིར་རྙེད་པ་འབུལ་ན་སྐལ་བ་ནོས་ཤིག་ཅེས་བསྒོས་ནས། དགོན་པའི་གཙུག་ལག་ཁང་དུ་སོང་བ་ཁྱིམ་བདག་དེས་མཐོང་ནས། འདིའི་གོམ་སྟབས་དང་སྦྱར་ན་དགོན་པར་སོང་མོད་ཀྱི། ཇི་ལྟར་ཡང་རུང་སྔོན་ལ་གྲོང་དུ་ཕུལ་ལ། ཕྱིས་དགོན་པར་(༡༧༧བ)དབུལ་སྙམ་ནས་ལོག་སྟེ། རས་ཡུག་བྲིམས་པས་དགའ་བོ་ལ་རས་ཡུག་བྱིན་པ་དང༌། ཡང་ལག་པ་བཟེད་ནས། ཕུལ་ན་ཡང་བཞེད་དམ། ཉེ་དགའི་སྐལ་བའོ། །སྟོན་པས་རང་གི་ལག་ནས་བྱིན་པའི་བསྔགས་པ་བརྗོད་པས། རང་གིས་དབུལ་ལོ་ཟེར་ནས་སོང་ངོ༌། །ཉེ་དགས། དེ་རིང་དུ་ཐོགས་པས་གྲོང་མཐར་མ་སོང་གྲང་སྙམ་ནས་སོང་སྟེ། དགའ་བོ་ལ་དྲིས་པས། ཇི་ལྟར་གྱུར་པ་སྨྲས་པ་དང༌། དེ་དགོན་པར་བརྒྱུགས་ཏེ་ཕྱིན་པས་བྲིམས་ཚར་ནས་གཉི་ག་མ་ཐོབ་པར་ཡི་མུག་པ་དེ་གསོལ་བས། སྔོན་ཆུ་ཕར་འགྲམ་ཚུར་འགྲམ་གཉིས་ན་གཅིག་ན་དགེ་འདུན་གྱི་རྙེད་པ། གཅིག་ན་བསོད་སྙོམས་ཀྱི་རྙེད་པ་ཡོད་པས་དེར་ཁྱི་གཎྜིའི་སྒྲ་ཤེས་པ་ཞིག་གིས་གཙུག་ལག་ཁང་དུ་ཕྱིན་ནས་ལྷུང་བཟེད་ཀྱི་ལྷག་མ་ཟོས་ཏེ། ཡང་ཅི་དགར་འགྲོའོ། །
དུས་གཅིག་ན་བསོད་སྙོམས་པ་ལ་གློ་བུར་བའི་རྙེད་པ་བྱུང་ནས་སྔར་གཎྜི་བརྡུངས་པ་དང་ཁྱི་དེས་ཆུ་བརྒལ་ནས་ཕྱིན་པ་ན་ཕྱོགས་གཅིག་གི་གཎྜིའི་སྒྲ་བྱུང་ནས་ལོག་པས། ཆུའི་རྒྱུན་གྱིས་ཡུན་རིང་དུ་ཁྱེར་བས་གཉི་ག་མ་ཐོབ་སྟེ། དེའི་དུས་ཀྱི་ཁྱིམ་དེ་ནི་ཉེ་དགའ་ཡིན་ནོ། །དེ་ལྟར་ཆགས་པར་གྱུར་པས་སྡུག་བསྔལ་བར་འགྱུར་གྱིས། ཧ་ཅང་ཆགས་པར་མི་བྱའོ། །མཉན་ཡོད་དུ་མུ་གེ་མི་བཟོད་པ་སློངས་མོ་མི་རྙེད་པ་ཞིག་བྱུང་བ་ན་ཁྱིམ་བདག་ཅིག་གི་སྒོག་སྐྱའི་ར་བར་ཚོད་སྔོན་མང་དུ་སྐྱེ་བ་ཞིག་ལ་དགེ་སློང་མས་བསླངས་པས། སྒོག་སྐྱ་མ་འདོན་པ་ཚོད་སྔོན་ཅི་བདེར་སྤྱོད་ཅིག །དེར་སྦོམ་དགའ་མོས་ཕྱིན་ནས། ཚོད་སྔོན་དང་སྒོག་སྐྱ་ལྷན་ཅིག་བཏོན་ནོ། །བདག་པོ་དེས་ལྡུམ་ར་གཞན་ལ་བཙོངས་པ་ན། དེས་ཀྱང་ཁྱེའུ་ཞིག་གཉེར་ལ་བཞག་ནས། ཚོད་སྔོན་ཅི་བདེར་མཛོད་ཅིག །སྦོམ་དགའ་མོས་དེར་འོངས་ནས་སྒོག་སྐྱ་དང་ཚོད་སྔོན་ལྷན་ཅིག་བཏོན་པ་དང་ཁྱེའུས་བསྲུངས་པས་ཁྱེའུ་བརྡེགས་སོ། །དེས་ཕ་ལ་སྨྲས་པས་ཕས་གབ་ནས་བསྡད་དེ། སང་དེ་བཞིན་བྱེད་པ་དང་ཁྱིམ་བདག་དེས་སྦོམ་དགའ་མོ་བརྡེགས་པས་དེའི་མིག་ཕུབས་སྐྲངས་ཤིང་དབྱར་ཁང་དུ་སོང་བ་དང༌། སྦོམ་དགའ་མོ་སྒོག་སྐྱ་ལ་ཆགས་པས་བརྡེགས་པ་ལ་གཟིགས། སྔོན་ཡང་རྐུན་པོ་ཞིག་གིས་རྒྱལ་པོའི་ཕོ་བྲང་ཕུག་ནས་བརྐུས་པས་བུག་སྒོར་དངུལ་ཕོར་ལུས་ཏེ་བརྗེད་ནས། ལེན་དུ་ཕྱིན་པས་བཟུང་ནས་སྡུག་བསྔལ་ལོ། །དེས་ན་ཧ་ཅང་ཆགས་པར་མི་བྱའོ། །དགེ་སློང་ནད་པ་ཞིག་ལ་ལྷུང་བཟེད་བཟང་པོ་ཞིག་ཡོད་པས་དེ་ལ་ཆགས་ནས། ཁོ་བོའི་ལྷུང་བཟེད་འོན་ཅིག །དེས་མ་བྱིན་པ་དང་ངན་སེམས་སྐྱེས་ཏེ། ལྷུང་བཟེད་ལ་ཆགས་པས་ཤི་ནས་ལྷུང་བཟེད་དེ་ཉིད་དུ་སྦྲུལ་དུ་སྐྱེས་སོ། །དགེ་སློང་རྣམས་ཀྱིས་དེའི་རོ་བསྲེགས་ཏེ་ཡོ་བྱད་རྒན་པའི་མཐར་སྤུངས་པ་དང་སྟོན་པས། དགེ་སློང་སུས་ཀྱང་དེའི་ལྷུང་བཟེད་ཀྱི་སྣོད་མ་དབྱེ་ཞིག་ཅེས་གསུངས་ནས་སྟོན་པས་དེའི་ལྷུང་བཟེད་ཁ་ཕྱེ་བ་དང༌། སྦྲུལ་ཞིག་མགོའི་གདེངས་ཀ་ཆེར་བྱས་ཏེ་འདུག་(༡༧༨ན)པ་དང༌། གཏི་མུག་ཅན། ཁྱོད་ལྷུང་བཟེད་ལོང་ལ་སོང་ཞིག །དེ་ནགས་གསེབ་ཏུ་སོང་བ་དང༌། དེའི་ཞེ་སྡང་གི་མེ་འབར་བས་ནགས་ལ་མེ་འབར་ནས་ཚིག་སྟེ། དགེ་སློང་ལ་ངན་སེམས་སྐྱེས་པས་དམྱལ་བར་སྐྱེས་སོ། །སྟོན་པས། སྲིད་པ་ལ་སྐྲག་པར་གྱིས་ཤིག །ཡོ་བྱད་ལ་ཆགས་པས་སེམས་ཅན་གཅིག་གི་ལུས་གསུམ་གནས་གསུམ་དུ་བསྲེགས་པས་ཡིད་འབྱུང་བར་བྱའོ་ཞེས་པ། ཡོ་བྱད་ལ་ཧ་ཅང་ཆགས་པར་མི་བྱའོ། །གང་ལ་ཞེན་པ་དེ་བཅང་བར་མི་བྱའོ། །མཉན་ཡོད་ན་སྤོས་འཚོང་གི་ཁྱེའུ་ཞིག་གིས་ལྷུང་བཟེད་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་ནས་བསོད་སྙོམས་པ་ཞིག་ལ། བདག་གིས་ལྷུང་བཟེད་བཟང་པོ་ཞིག་རྙེད་ཀྱིས་བཞེས་ན་སྣོམས་སིག །བདག་ལ་ལྷུང་བཟེད་ཡོད་དོ། །གཞན་ལྷུང་བཟེད་འཚལ་བ་མཆིས་ན་དེ་ལ་གཏང་དུ་གསོལ། གཏང་བར་བྱའོ། །དེ་རྒྱལ་བྱེད་ཚལ་དུ་སོང་ནས་ལྷུང་བཟེད་འཁྲུ་བ་ན་དགེ་སློང་རྣམས་ལ། སྲང་ག་གེ་མོ་ན་སྤོས་འཚོང་གི་ཁྱེའུ་ཞིག་གིས་ལྷུང་བཟེད་བཟང་པོ་ཞིག་རྙེད་ཀྱིས་འདོད་ན་སོང་ཞིག །དེ་དང་ཐག་རིང་བ་ན་ཉེ་དགའ་འདུག་པས་ཐོས་ནས། དེ་འགའ་ཞིག་གིས་ཐོས་ནས་བརྒྱུགས་ན་མི་རུང་གིས་སྨད་པར་བྱའོ་སྙམ་ནས་དེ་ལ་སྨྲས་པ། ཁྱོད་དད་པས་བྱིན་པ་ཟོས་ན་ལྷུང་བཟེད་དང་ཆོས་གོས་ཀྱི་གཏམ་ལས་གཞན་པའི་གཏམ་མེད་དམ། དེས་བསམས་པ། འདོད་པ་ཅན་འདིས་ཀྱང་བདག་སྨད་ན་གཞན་གྱིས་ཐོས་ན་རྒྱ་ཆེར་སྨོད་པར་འགྱུར་རོ་སྙམ་ནས་ཅང་མི་སྨྲ་བར་འདུག་གོ །ཉེ་དགས་དེ་བཀར་ནས། ཁྱོད་ཀྱི་མཁན་པོ་དང་ཁོ་བོ་བཤེས་པས་ཁྱོད་སྨད་ཀྱིས་མ་གཤེ་ཞིག །གལ་ཏེ་བདག་ཡང་སྨྲ་ན་ཁྱོད་ཀྱིས་བདག་སྨད་པར་མཛོད་ཅིག །ཁོ་བོ་ཡང་ཉེ་བར་མ་ཞི་བ་ཙམ་དུ་ཟད་ཀྱི། ཅི་ལྷུང་བཟེད་མ་ཡིན་ནམ། སྔ་མ་ཉིད་ཀྱང་སྨྲ་བར་མི་བྱ་བ་ལགས་ཀྱིས་འཚལ་ཏོ། །དེ་ལྟ་མོད་ཀྱིས་རེ་ཞིག་སྨྲོས་ཤིག །སྲང་ཆེ་གོ་ན་སྤོས་འཚོང་གི་ཁྱེའུ་ཞིག་གིས་ལྷུང་བཟེད་བཟང་པོ་ཞིག་རྙེད་ནས། དེ་ན་རེ། ལྷུང་བཟེད་འཚལ་བ་ཡོད་ན་དེ་ཐོངས་ཟེར་རོ། །
ཉེ་དགས་སྣམ་སྦྱར་གྱོན་ནས་འགྲོས་བསྐྱེད་དེ་སོང་བ་དང་སྤོས་འཚོང་གི་ཁྱེའུ་དེས་དེ་ཐག་རིང་པོ་ནས་མཐོང་སྟེ། དགེ་སྦྱོང་ཧྲལ་པོ་འགྲོས་འདི་ལྟ་བུས་འོང་བ་འདིས་བདག་གི་ལྷུང་བཟེད་འཕྲོག་ཏུ་འོང་སྙམ་ནས་ལྷུང་བཟེད་འཇོད་ཚེའི་འོག་ཏུ་བཅུག་སྟེ་བཞག་པ་དང་དེ་ཉེ་དགས་མཐོང་ནས། ཅི་ལྷུང་བཟེད་འདི་ནལ་གྱི་བུ་ཡིན་ནམ། ཅིའི་ཕྱིར་སྦེད་ཅེས་ལག་པ་བརྐྱངས་ཏེ་ལྷུང་བཟེད་བླངས་ནས། ཨ་རོག་ཁྱ། སྦྱིན་པ་འདིས་ཁྱོད་སེམས་ཀྱི་རྒྱན་དང་ཞེས་སོགས་བརྗོད་པ་དང༌། རིན་མེད་པར་མི་དབུལ་ལོ། །ཅི་ཁྱོད་དྲང་སྲོང་གི་སྣོད་འཚོང་ངམ། གལ་ཏེ་སྐྱེས་བུས་སྣོད་ཀྱིས། །གསེར་གྱི་སྣོད་ནི་ཐོབ་འགྱུར་ན། །དེ་ཡིས་མྱ་ངན་ཅི་ཕྱིར་བྱ། །བསླུས་པ་མེད་པར་ཁོ་བོས་མཐོང༌། །(༡༧༨བ)ཁྱོད་མང་དུ་གསུང་མོད། རིན་མེད་པར་མི་དབུལ་ལོ། །ཁྱོད་ལྷུང་བཟེད་ལ་ཆགས་པས་ཡི་དྭགས་ལྦ་ཅ་ཅན་སྐྱེ་དགོས་སོ། །
དེའི་ཚེ་ཁྱིམ་བདག་ཅིག་ཕྱོགས་དེར་འོངས་ནས། འཕགས་པ། ཕྱག་འཚལ་ལོ། །ཁྱོད་ཀྱི་ཕྱག་སྐམ་པོ་འདིས་ཅི་བྱ། བདག་ལ་ཉེ་དགས་བཀའ་སྩལ་བ་ཅི་མ་བསྒྲུབས། ལྷུང་བཟེད་འདི་ཉོས་ཏེ་བྱིན་ཅིག །ཁྱིམ་བདག་དེས་སྤོས་འཚོང་ཁྱེའུ་དེ་ལ། ལྷུང་བཟེད་འདིའི་རིན་ཇི་ཙམ། འདི་ཙམ་མོ། །ཁོ་བོས་ཁྱོད་ལ་སྦྱིན་ནོ། །དེས་ལྷུང་བཟེད་དེ་ཁྱིམ་བདག་དེ་ལ་བྱིན་ནས། ཁྱིམ་བདག་དེས་ཀྱང་ཉེ་དགའ་ལ་ཕུལ་ལོ། །ཉེ་དགས། ཨ་རོག་ཁྱ་སོགས། ཁྱིམ་བདག་དེ་སོང་བ་དང་ཉེ་དགས་སྤོས་འཚོང་གི་ཁྱེའུ་དེ་ལ། བཀྲེན་པ། ཁྱོད་ཉེ་དགས་ལྷུང་བཟེད་ཀྱི་རིན་སྦྱོར་དུ་འཇུག་མི་ནུས་སྙམ་མམ། འཕགས་པ། ཅི་ཞིག་སྦྱོར་ཡོད། ཁྱེད་ཀྱིས་ལྷུང་བཟེད་ཐོབ། ཁོ་བོས་རིན་ཐོབ་ཀྱིས་བཞུད་ཅིག །དེས་ལྷུང་བཟེད་ཁྱེར་ཏེ་གཙུག་ལག་ཁང་དུ་སོང་ནས་དགེ་སློང་རྣམས་ལ་བསྟན་ཏེ། ལྟོས་ཤིག །ཁོ་བོའི་ལྷུང་བཟེད་ཅི་འདྲ། གཞོན་ནུ་ཞིག་གིས། ཅི་ལྷུང་བཟེད་གཞན་མེད་དམ། ཡོད་དོ། །འོ་ན་ལྷུང་བཟེད་ཡོད་བཞིན་དུ་གཞན་བཙལ་དུ་རུང་ངམ། དགྲ་བོ་རྣམས་ཀྱི་གྲེ་བར་རྐང་པས་མནན་ནས་རུང་ངོ༌། །གནས་བརྟན་ལ་དགྲ་བོ་ཡོད་དམ། ཁྱོད་ཁོ་བོའི་ལྷུང་བཟེད་གཉིས་པའང་མི་བཟོད་པས་དགྲ་བོའི་ཐུ་བོ་ཡིན་ནོ། །དོན་ཉུང་ངུ་དག་འཕྱ་བ་ན་གསོལ་བས། བྱུང་བ་འདི་དང་སོགས། དགེ་སློང་དག །དེ་ལྟ་བས་ན་དགེ་སློང་གིས་ལྷུང་བཟེད་ཡོད་བཞིན་དུ་ལྷུང་བཟེད་གཞན་བཙལ་བར་མི་བྱའོ་ཞེས་གསུངས་ནས། བསོད་སྙོམས་པ་ཞིག་གི་ལྷུང་བཟེད་རྡོལ་ནས་མཉན་ཡོད་དུ་བསོད་སྙོམས་ལ་ཞུགས་པ་དང་ཕྱེ་རྙེད་ནས་ལྷུང་བཟེད་ཀྱི་སྣོད་ཀྱིས་མནོས། འབྲས་ཆན་གཤེར་བ་རྙེད་ནས་ལྷུང་བཟེད་ཀྱིས་མནོས་པས་ཟགས་ནས་ཕྱེ་གཤེར་པས་ལྷུང་བཟེད་ཀྱི་སྣོད་མ་རུང་བས་དེ་སྦྲང་བུ་དག་གིས་བསྐོར་བ་དང་ཁྱེའུ་དང་བུ་མོ་རྣམས། འཕགས་པས་འཁོར་མང་བའི་ལས་བྱས་པས་སྦྲང་བུ་དག་གིས་བསྐོར་ཅིང་བཞུད་དོ། །མགོན་མེད་ཟས་སྦྱིན་གྱིས་དེ་མཐོང་ནས། ཅིའི་ཕྱིར་འཕགས་པ་ལ་མཐོ་འཚམ། ཁྱིམ་བདག་གིས་དགེ་སློང་དེ་ལ། བསྟན་པ་མཛེས་པ་ལ་ཅི་ཅལ་ཅོལ་བྱེད། འདི་ལ་ཅལ་ཅོལ་ཅི་ཡོད། ཁྱོད་ཀྱིས་ཁོ་བོ་ལ་རོལ་མོ་མཁན་ལ་སོགས་པའི་ཁྱིམ་དུ་ཞུགས་པར་མཐོང་ངམ། འོ་ན་ཅིའི་ཕྱིར་བྱིས་པ་དག་གིས་བསྐོར། ཁོ་བོའི་ལྷུང་བཟེད་ཟག་གོ །ཅིའི་ཕྱིར་གཞན་མི་འཚོལ། །མ་གནང་ངོ༌། །ཁྱོད་ཀྱི་ལྷུང་བཟེད་འདི་འདྲ་བ་ཡོད་པ་ཡིན་ནམ་ཟེར་བའི་སྐབས་དེ་གསོལ་བས། ལྷུང་བཟེད་རྡོལ་བ་དེས་གླན་པར་བྱའོ་ཞེས་སོགས་གསུངས། བསོད་སྙོམས་པ་ཞིག་གིས་རྫའི་ལྷུང་བཟེད་ལག་ནས་ཤོར་ཏེ་གྱོ་དུམ་ལྔར་གྱུར་ཏོ། །དེས་སྦུ་གུ་ཕུག་སྟེ་སྐུད་པས་བརྒྱུས་ནས་བསོད་སྙོམས་ལ་འགྲོའོ། །དེ་འཁྲུད་པ་ན་བཤིག་(༡༧༩ན)ནས་འཁྲུད་ཅིང་བརྒྱུད་པས་སྔ་དྲོ་ཟད་ནས། ཁྱོད་ཀྱི་དགེ་བའི་ཕྱོགས་བཅིངས་པས་འགྲོལ་བ་འདི་ཁོ་ན་ཡིན་ནམ། སྟོན་པས་ལྷུང་བཟེད་ཆག་པ་ལ་ལྷན་པ་སྲ་བ་ལྔ་པོ་དག་གིས་གླན་པར་བྱའོ་ཞེས་བཅའ་བ་མཛད་དོ་ཟེར་བའི་སྐབས་དེ་གསོལ་བས། བསླབ་པ་ལ་གུས་པའི་བསྔགས་པ་བརྗོད་ནས། ལྷུང་བཟེད་ལྷན་པ་ལྔ་མེད་པ་སྤྱད་བཟོད་པ་ཡོད་བཞིན་དུ་འཚོལ་ན་སྤང་བའོ་ཞེས་པ། ལྷན་པ་བཞི་མན་ཆད་ནས་སོགས་དང༌། འདི་ན་དགེ་འདུན་ལ་སྤང་ངོ་ནས། བྱི་དོར་ཡང་དང་པོར་བྱའོ། །
འཐག་ཏུ་འཇུག་པའི་སྤང་བ་ནི། སྟོན་པ་མཉན་ཡོད་ནའོ། །ཉེ་དགས་བསམས་པ། འདི་ཐམས་ཅད་ཁྱིམ་བདག་གིས་བསླབ་པའི་གཞིས་བསྡམས་པས། ཕྱིན་ཆད་རས་ཡུག་ཕྲན་སྦོམ་པོ་གཅིག་གི་རིན་ཡང་བསླང་བར་མི་ནུས་ཀྱིས། སོང་སྟེ་བལྟའོ་སྙམ་ནས་བསོད་སྙོམས་ལ་ཞུགས་པ་དང༌། སྐྱེད་མོས་ཚལ་ཞིག་ན་ཡུགས་མོ་ལྔ་བརྒྱ་ཙམ་དོག་པ་འཁལ་བ་མཐོང་ནས། སྲིང་མོ་དག །ཨ་རོག་ཁྱ། དེ་དག་ཅང་མི་སྨྲ་བ་དང༌། སྲིང་མོ་དག །སྐྱེ་བོ་མང་པོ་མི་འདོད་པའི་འཆི་བ་དེ་འོང་བས་ཁྱེད་ཅག་དེའི་ཚེ་ཚིག་སྨྲར་ནི་དང་པོ་ཉིད་ནས་མི་ནུས་པར་འགྱུར་རོ། །དེ་ན་གཞོན་ནུ་མ་བསོད་ནམས་འདོད་པ་ཞིག་འདུ་གཔ་དེས་སྟན་ལས་ལངས་ཏེ་ཉེ་དགའི་སྟན་བཏིང་བ་དང༌། དེ་ལ་འདུག་ནས། སྲིང་མོ་འདིས་ང་ལ་དད་པས་ལངས་ཏེ་སྟན་བཏིང་བས་རིགས་མཐོན་པོར་སྐྱེ་བའི་ལས་བསགས་སོ། །ཁྱེད་ཀྱིས་སྐྱེ་བ་ཕྱི་མའི་ལམ་བརྒྱགས་ཁྱེར་བ་ཡོད་དམ། མ་མཆིས་སོ། །སྲིང་མོ་དག །མ་ལེགས་སོ། །སུ་ལ་ཐུགས་ངན་མཛད། ཁྱེད་ཅག་ལ་སྟེ། ཁྱེད་ཅག་ཕ་རོལ་ནས་བཅོམ་བཞིན་དུ་འདིར་འོངས་ལ། འདི་ནས་བཅོམ་བཞིན་དུ་ཕ་རོལ་ཏུ་འགྲོ་བས་སོ། །ཐབས་ཅི་མཆིས། གལ་ཏེ་ཁྱེད་ཀྱིས་ཤཱཀྱའི་རིགས་(༡༧༩བ)ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་དང་ལྡན་པ་དེ་དག་ལ་རས་ཡུག་ཆེན་བསྐོན་ན་འཇིག་རྟེན་ཕ་རོལ་གྱི་ལམ་བརྒྱགས་མང་པོ་ཁྱེར་བར་འགྱུར་རོ། །བདག་ཅག་གིས་དགེ་སློང་དེ་ལྟ་བུ་ག་ལས་རྙེད། ཁྱོད་ཀྱིས་ཁོ་བོ་དེ་ལྟ་བུ་ཡིན་པར་མི་ཤེས་སམ། བདག་ཅག་ལ་རས་ཡུག་ཆེན་གྱི་འབྱོར་བ་ག་ལ་མཆིས། སྲིང་མོ་དག །ཁྱེད་ཀྱིས། བསོད་ནམས་ཆུང་ཡང་བརྙས་མི་བྱ། །དེ་ནི་བདག་ལ་མི་འོང་མིན། །ཆུ་ཡི་ཐིགས་པ་འཛག་པ་ཡིས། །སྣོད་ཆེན་གང་བར་འགྱུར་བ་བཞིན། །བརྟན་པ་རྣམས་ཀྱི་བསོད་ནམས་ནི། །ཅུང་ཟད་ཅུང་ཟད་བསགས་ན་རྫོགས། །ཞེས་བྱ་བ་དེ་མི་ཤེས་སམ། རེ་ཞིག་དོག་པ་སྲང་གཅིག་སྦྱིན་ནུས་སམ། རྔོ་ཐོག་གོ །གཞན་ཞིག་གིས་སྲང་ཕྱེད། གཞན་ཞིག་གི་བཞི་ཆ། དེ་བཞིན་དུ་ཐམས་ཅད་ཀྱིས་ཤས་ཤས་ཀྱིས་དབུལ་བར་ཁས་བླངས་སོ། །སྲིང་མོ་དག །དོག་པ་ཕྲ་མོ་དག་བྱིན་ཅིག །བདག་ཅག་ཐམས་ཅད་སྦོམ་པོ་འཁལ་པ་ལགས་སོ། །
བདག་ཅག་གི་ནང་ན་བདེ་གནས་མ་ཞིག་ནི་ཕྲ་མོ་འཁལ་ལོ། །དེ་བོས་ཤིག །བོས་པ་དང༌། ཉེ་དགའ་དེ་ལ། བུ་མོ། དོག་པ་ཕྲར་ཁོལ་ཅིག །དེས་ཕྲར་བཀལ་བ་དང༌། དེ་བས་ཀྱང་ཕྲར་ཁོལ་ཅིག །དེས་དེ་བས་ཀྱང་ཕྲལ་བཀལ་བ་དང༌། དེས་ཡང་དང་ཡང་དུ། དེ་བས་ཀྱང་ཆེས་ཕྲར་ཁོལ་ཅིག །འདི་ལས་ཕྲ་བར་ནི་རྔོ་མི་ཐོག་གོ །འདི་བཞིན་ལག་པོད་གྱིས་ལ་བྱིན་ཅིག །ཟིན་ནས་ཕུལ་བས། ཨ་རོག་ཁྱ་ཟེར་ནས་དོག་པ་དེ་དག་ཁྱེར་ཏེ་དགེ་སློང་རྣམས་ལ་བསྟན་ནས། ཁོ་བོའི་དོག་པ་ཅི་འདྲ། དོག་པ་བཟང་ངོ༌། །རས་ཡུག་ཆེན་འཐག་པའི་ཐ་ག་པ་འགའ་བཙལ་བ་མཆིས་སམ། ཅི་ཁྱེད་ཀྱིས་ཉེ་དགའ་ཟིལ་གྱིས་གནོན་ནམ། རབ་ཏུ་མ་བྱུང་ན་རང་ཉིད་འཐག་པར་འགྱུར་རོ། །བདག་ཅག་གིས་གནས་བརྟན་ག་ལ་ཟིལ་གྱིས་གནོན། ར་བ་ག་གེ་མོ་ན་ཐ་ག་པ་སྤྱི་གཅེར་ཁྱོ་ཤུག་མཆིས་པ་དེས་དོག་པ་འདི་ལྟ་བུ་ལ་ཆེན་པོ་ལ་འོས་པའི་རས་ཡུག་འགྲུབ་པར་འགྱུར་རོ། །བུ་དག །ཨ་རོག་ཁྱ། དོན་གྱིས་ཁྱེད་ཀྱིས་ཁོ་བོའི་རས་ཡུག་ཆེན་འཐག་ཏུ་བཅུག་གོ་ཞེས་དོག་པ་ཁྱེར་ནས་ཐ་ག་པའི་ཁྱིམ་དུ་སོང་བ་དང༌། དེས་ཐ་ག་པ་དེ་ཐག་རིང་པོ་ནས་མཐོང་སྟེ་སྨྲས་པ། མཁས་པ་རིང་ནས་རབ་སྣང་བ། །གངས་དང་ལྡན་པའི་རི་བོ་བཞིན། །མི་མཁས་རབ་ཏུ་མི་སྣང་བ། །མུན་པའི་ནང་དུ་མདའ་འཕངས་བཞིན། །ཁྱོད་ཀྱི་གྲགས་པས་མཉན་ཡོད་ཐམས་ཅད་ཁྱབ་པ་ནི་ཁྱོད་ཀྱིས་རྙེད་པ་ལེགས་པར་རྙེད་པ་ཡིན་ནོ། །དོག་པ་འདི་ཅི་འདྲ་ལྟོས་ཤིག །དོག་པ་བཟང་སྟེ། དོག་པ་འདི་ལ་ཐ་ག་པ་བདག་ལགས་ན་ཆེན་པོ་ལ་འོས་པའི་རས་ཡུག་ཆེན་དུ་འགྱུར་རོ། །
བཞིན་བཟང༌། ཐོགས་ཤིག །བདག་ལ་ཐགས་གླ་སུས་སྩོལ། ཁྱོད་རྟག་པར་ཐགས་གླས་མི་ངོམས་སམ། འཇིག་རྟེན་ཕ་རོལ་ཏུ་འགྲོ་བའི་ལམ་བརྒྱགས་ཀྱང་བཀུར་བར་གྱིས་ཤིག །ཆུང་མ་ན་རེ། རྗེའི་སྲས། འདིས་ཐག་རིང་པོ་ནས་བདག་ཅག་གི་བསྔགས་པ་བརྗོད་ཀྱིས་འདིའི་རས་ཡུག་ཆེན་ཐོགས་ཤིག །དོག་པ་འདི་ཕྲ་བ་དང་ཆེ་བ་ལགས་ཀྱིས་ཡུན་འདི་ཙམ་ན་སྤྱོན་ཅིག །དེ། ཨ་རོག་ཁྱ་ཞེས་སྨྲས་ནས་སོང་ངོ༌། །དུས་དེ་ཙམ་ནས་དེས་དེ་ལ་རས་ཡུག་ཆེན་དེ་ཕུལ་ལོ། །ཉེ་དགས་དེ་ཁྱེར་ཏེ་དགེ་སློང་རྣམས་ལ་བསྟན་ནས། ཁོ་བོའི་རས་ཡུག་ཆེན་ཅི་འདྲ་ལྟོས། རས་ཡུག་ཆེན་བཟང་ངོ༌། །འདི་འདྲ་གཉིས་ཡོད་ན་སྣམ་སྦྱར་ཉིས་རིམ་བྱས་ཏེ་དགེ་བའི་ཕྱོགས་ལ་སྙིང་ལས་ཆུང་ངུས་ཏྲོན་བགྱིད་པར་འགྱུར་རོ། །ཁྱེད་ཀྱི་སྙིང་ལམ་ན་ཉེ་དགས་དེ་མི་ནུས་སྙམ་མམ། དེ་མཉན་ཡོད་དུ་ནུབ་སྒོ་ནས་བསོད་སྙོམས་ལ་ཞུགས་པ་དང་ཡུགས་མོ་ལྔ་བརྒྱ་ལས་སྔར་བཞིན་དོག་པ་རྙེད་ནས། ཐ་ག་པ་སྤྱི་གཅེར་ལ་འཐག་ཏུ་བཅུག་པས། འཕགས་པ། རས་ཡུག་ཆེན་སྔ་མ་དེ་འཐག་པ་ན་བདག་གིས་བུ་ལོན་བླངས་པ་དེ་དག་(༡༨༠ན)ཀྱང་ད་དུང་མ་འཁོར་རོ། །དེས་ཆུང་མའི་གདོང་དུ་བལྟས་པ་དང༌། ཆུང་མ་ན་རེ། གལ་ཏེ་འདི་འཚལ་ཡང་བདག་མི་འཚལ་ལོ། །ཉེ་དགས་སྤྱོས་ཏེ། ཀྭ་ཡེ་ཐ་ག་པ་སྤྱི་གཅེར། ཉོན་ཅིག །ཁོ་བོས་གལ་ཏེ་ཁྱོད་རས་ཡུག་ཆེན་འདི་འཐག་ཏུ་མ་བཅུག་ན་སྤྱི་གཅེར་གྱི་མགོ་འདིས་མནའ་འདོར་རོ། །ཐ་ག་པ་དེས་ཀྱང་སྤྱོས་ཏེ། ཀྭ་ཡེ་དགེ་སྦྱོང་མགོ་རེག །ཉོན་ཅིག །ཁོ་བོ་ཁྱོད་ཀྱི་རས་ཡུག་ཆེན་འཐག་ན་མགོ་འདིས་མནའ་འདོར་རོ། །དེ་ནས་ཉེ་དགའ་གསལ་རྒྱལ་གྱི་བློན་པོ་ཆེ་བ་ཅན་སོང་བས། ཅི་ལ་བྱོན། དོག་པ་ཅུང་ཞིག་རྙེད་པ་འདིས་རས་ཡུག་འཐག་ཏུ་ཆུག་ཅིག །བདག་གིས་ཉེ་དགའ་ལ་རས་ཡུག་ཆེན་ཉིད་དབུལ་ལོ། །དེ་ཡང་བཀུར་ན་འདི་འཐག་ཏུ་ཆུག །ཆེ་བས་མི་ཞིག་ལ། ཀྱེ་ནང་རྗེ། ཐ་ག་པ་སྣ་བོའི་གན་དུ་སོང་ལ། ཉེ་དགའི་རས་ཡུག་ཆེན་འདི་ཐོགས་ལ་ཕུལ་ཅིག་ཅེས་གྱིས་ཤིག །
ཉེ་དགས་སྨྲས་པ། འདི་ཐ་ག་པའི་སྣ་བོ་འཐག་ཏུ་མ་གཞུག་པར། ཐ་ག་པ་སྤྱི་གཅེར་འཐག་ཏུ་ཆུག་ཅིག །ཆེ་བས་མི་དེ་ལ། དེ་ལྟར་གྱིས་ཤིག །མི་དེས་དོག་པ་དེ་ཁྱེར་ནས་དེ་སྐད་བསྒོ་བ་ན། དེས་དོག་པ་དེ་ངོ་ཤེས་ནས། བདག་གི་རེས་འཁོར་རོ། །མི་དེ་སོང་ནས་ཆེ་བ་ལ་སྨྲས་པ། སྤྱི་གཅེར་བ་ན་རེ། བདག་གི་རེས་འཁོར་ཟེར་རོ། །ཆེ་བས་སྨྲས་པ། སྤྱི་གཅེར་བའི་གན་དུ་སོང་ལ། རེས་གཞན་བྱེད་དུ་མི་གཞུག་གོ་ཞེས་གྱིས་ཤིག །མི་དེ་སོང་ནས་དེ་སྐད་བསྒོ་བ་ན། སྤྱི་གཅེར་ན་རེ། ཆེ་བ་མཉན་ཡོད་དུ་དབང་བྱེད་ན། ཁོ་བོ་མཉན་ཡོད་དུ་མི་གནས་པར་ཟད་མོད། ཁོ་བོ་སྐལ་བ་མ་ཡིན་པའི་ལས་མི་བྱེད་དོ། །ཆེ་བས། ཐ་ག་པའི་སྣ་བོའི་གན་དུ་སོང་ལ། འདི་ཐོགས་གྱིས་ཤིག །ཉེ་དགས་སྨྲས་པ། སྤྱི་གཅེར་འཐག་ཏུ་ཆུག་ཅིག །ཆེ་བས་མི་དེ་ལ། སྤྱི་གཅེར་གྱི་གན་དུ་སོང་ལ། སྐོམ་ཟོང་སྦྱིན་གྱིས་རས་ཡུག་ཆེན་ཐོགས་ཤིག་གྱིས་ཤིག །དེ་འཕགས་པ་དང༌། ཉེ་དགའ་ན་རེ། བཀྲེན་པ། ཁྱོད་སུ་ཞིག་གིས་རྒྱལ་པོའི་མིར་བཞག །ལྕག་རྒོད་ཀྱིས་བརྡབས་ཏེ། ས་དང་ཤིང་སྐྱེད་དུ་གཞུག་པར་བྱ་བ་ཡིན་ནོ། །སྤྱི་གཅེར་གྱི་གན་དུ་སོང་ནས། ཆེ་བའི་ཞལ་ནས། རས་ཡུག་ཆེན་ཐོགས་ཤིག་ཟེར་ཞེས་མི་ནུས་སམ། མི་འཐག་གོ་ཟེར་ན། ཐོར་ཏོ་ནས་ཟུངས་ལ་ཁུ་ཚུར་གྱིས་གཏོགས་ལ་ཐགས་མི་མཐུན་པ་དྲིལ་ཅིག །དེའི་ཆུང་མ་ངུ་ན་ལན་བུ་ནས་བཟུང་སྟེ་དྲང་ཞིང༌། ཁྱེད་གཉིས་ཀྱིས་ཆེ་བའི་ངག་བཅག་པས་རྒྱལ་པོ་གསལ་རྒྱལ་ལ་ཀརྵ་པ་ཎ་ལྔ་བརྒྱ་གཞལ་དགོས་པའི་གྱོད་ལ་བཀྲིའོ་ཞེས་རྗོད་ཅིག །དེས་དེ་ལྟར་བྱས་ཏེ་ཁྲིད་པ་དང༌། ཆུང་མ་ན་རེ། བདག་ཅག་གཉིས་བཙོན་རར་བཅུག་ན་བདག་ཅག་ལ་ཐར་པར་བྱེད་པ་མེད་པས་བཙོན་རར་འཆི་དགོས་ཀྱིས་རས་ཡུག་ཆེན་ཐོགས་ཤིག །སྤྱི་གཅེར་གྱིས་མི་དེ་ལ། ཁོ་བོ་རྒྱལ་པོའི་ཕོ་བྲང་དུ་མ་བཀྲི་བར། དོག་པ་(༡༨༠བ)ཞོག་ལ་བཞུད་དང༌། རས་ཡུག་ཆེན་བཏག་ཅིང་ཁྱོད་ལའང་སུག་མང་པོ་དབུལ་ལོ། །བཏགས་ཟིན་པ་དང་ཉེ་དགའ་ལ་ཕུལ་ནས། སྐོམ་ཟོང་སྩོལ་ཅིག །བཀྲེན་པ། ཁོ་བོ་ཁྱེད་ཀྱི་སྐོམ་ཟོང་འབུལ་བ་ཡིན་ནམ། དུག་ཅིའི་ཕྱིར་མི་སྐུད། དེ་འཕྱ་བའི་སྐབས་དེ་གསོལ་བ་དང༌། བྱུང་བ་འདི་དང་སོགས། ཉེ་དགའ། ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། མད་དོ། །ཡང་དགེ་སློང་གང་རང་གིས་བསླངས་པའི་དོག་པས་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུད་ན། གོས་གྲུབ་ན་སྤང་བའི་ལྟུང་བྱེད་དོ། །
འཐག་པ་བསྐྱེད་པའི་སྤོང་བ་ནི། སྟོན་པ་མཉན་ཡོད་ནའོ། །ཁྱིམ་བདག་བཟའ་མི་གཉིས་སྐྱེས་པ་དེ་བུད་མེད་གཞན་ལ་ཆགས་སོགས་སྔར་དང་འདྲ། ཆུང་མ་ན་རེ། ཉེ་དགའ་ཟང་ཟིང་ཅུང་ཟད་ཀྱིས་བསྡུའོ། །དེ་བཞིན་བྱའོ། །བདག་གིས་དོག་པ་འཇམ་པོ་བཀལ་ཏེ། དོག་པ་དེ་ཐ་ག་པ་ལ་འཐག་ཏུ་བཅུག་ནས་རས་ཡུག་བསྐོན་པར་བྱའོ། །ཁྱིམ་བདག་དེས་དོག་པ་དེ་ཐ་ག་པ་ལ་བྱིན་ནས། ཁྱོད་ཀྱིས་དོག་པ་འདི་ལས་རས་ཡུག་ཆེན་ཐོགས་ཤིག །ཉེ་དགའ་ལ་དབུལ་བར་བྱའོ། །དེ་ལྟར་བྱའོ། །དེ་བུ་མོས་ཐོས་ནས་ཉེ་དགའ་ལ་སྦྲན་པས། སྔར་བཞིན་ཏེ། ཐུགས་མ་ཆེས་ན་བཞུད་ལ་ལྟོས་ཤིག །མཁྱེན་པར་འགྱུར་རོ། །དེ་དེར་སོང་སྟེ་ཐ་ག་པ་ལ། འདི་སུའི་ཡིན། ཉེ་དགའི་འོ། །ཁྱོད་ཀྱིས་ཉེ་དགའ་ཤེས་སམ། མི་ཤེས་སོ། །དེ་ཁོ་བོ་ཡིན་ནོ། །སྲིད་དུ་འདི་ཙམ་ཞིག །ཞེང་དུ་འདི་ཙམ་ཞིག་སྐྱེད་ཅིག །དོག་པ་སུས་སྩོལ། དེ་ཉིད་ཀྱིས་སོ། །ཉེ་དགས་ཕྲེང་ལྡན་མའི་སར་ཕྱིན་ཏེ་ཆོས་བསྟན་ནས། དེང་སྤྱན་དྲངས་སམ། བསོད་སྙོམས་མཛད། བསོད་སྙོམས་བགྱིད་དོ། །དེས་དེ་ལ་ཧྭགས་ཀྱི་ལ་ཐུ་དག་གིས་ལྷུང་བཟེད་བཀང་སྟེ་ཕུལ་ལོ། །ཉེ་དགས་དེ་དག་བླངས་ཏེ་ཐ་ག་པའི་གན་དུ་སོང་ནས། ལག་པ་གཉིས་ཟེད་ཅིག །དེས་ལག་པ་གཉིས་བཟེད་པ་དང༌། དེས་དེ་ལ་ཐུ་གཅིག་བྱིན་ནས། དང་པོར་ཟོ་ཞིག །དེས་ཟོས་པ་དང༌། རོ་ཅི་འདྲ། བདའོ། །ཁྱོད་ཀྱིས་སྔོན་ལ་ཐུ་འདི་འདྲ་ཟོས་སམ། མ་འཚལ་ལོ། ཐུ་བ་ཟེད་ཅིག །བཟེད་པ་དང༌། དེའི་ཐུ་བར་ལ་ཐུ་ཐམས་ཅད་བླུགས་ཏེ། ཁོ་བོའི་རས་ཡུག་འདི་ལེགས་པར་ཐོགས་ཤིག །ཕྱིས་ཀྱང་ལ་ཐུ་ཅུང་ཟད་ཉེ་བར་བསྒྲུབ་པར་བྱའི། ཞེང་འདི་ཙམ་དུ་སྐྱེད་ཅིག །དོག་པ་ཟད་ནས་སུས་སྩོལ། དེ་ཉིད་ཀྱིས་སོ། །དེས་རས་ཡུག་ཆེན་དེ་འཐག་པ་ན་དོག་པ་ཟད་ནས་ཁྱིམ་བདག་དེའི་གན་དུ་སོང་བ་དང༌། དེའི་ཆུང་མ་མེད་པར་ཁྱིམ་བདག་དེ་འདུག་པ་ལ། དོག་པ་ཟད་ཀྱིས་བྱིན་ཅིག །དེས་བྱིན་ནོ། །ཡང་ཟད་ནས་དེའི་ཁྱིམ་དུ་སོང་བ་དང༌། ཁྱིམ་བདག་མེད་པར་དེའི་ཆུང་མ་འདུག་པ་ལ། དོག་པ་ཟད་ཀྱིས་བྱིན་ཅིག །དེས་བྱིན་ནོ། །ཡང་ཟད་ནས་དེའི་ཁྱིམ་དུ་སོང་བ་དང༌། ཁྱིམ་བདག་གཟའ་མི་གཉིས་ཀ་འདུག་ནས། དོག་པ་ཟད་ཀྱིས་བྱིན་ཅིག །(༡༨༡ན) ཆུང་མ་ན་རེ། ཅི་རས་ཡུག་ཆེན་དེ་བསྐྱེད་དམ། ཁྱིམ་བདག་གིས་ཆུང་མ་ལ། ཁྱོད་ཀྱིས་ཀྱང་དོག་པ་བྱིན་ནམ། བྱིན་ནོ། །ཁྱིམ་བདག་གིས། ཅི་རས་ཡུག་ཆེན་དེ་བསྐྱེད་དམ། ཐ་ག་པ་ན་རེ། ཉེ་དགས་ཞེང་དང་སྲིད་དུ་འདི་ཙམ་སྐྱེད་ཅིག་ཟེར་ནས་བསྐྱེད་དོ། །ཆུང་མས་རས་ཡུག་ཆེན་དེ་ཅི་འདྲ་བལྟའོ་སྙམ་ནས་དེར་སོང་བ་དང༌། ཆེན་པོ་ལ་འོས་པའི་རས་ཡུག་མཐོང་ནས། དེའི་མིག་ཁྲག་གིས་གང་སྟེ། ཁོ་མོས་རས་ཡུག་ཆེན་འདི་ཉེ་དགའ་ལ་མི་སྦྱིན་ནོ་ཟེར་ནས་སོང་ངོ༌། །ཉེ་དགའ་དེར་དུས་སུ་འོངས་ནས། ཀྱེ་ཐ་ག་པ། རུང་ངམ། བདག་གི་ནི་རུང་ན་ཁྱོད་ཀྱི་ནི་མི་རུང་སྟེ། ཁྱིམ་བདག་གི་ཆུང་མ་འོངས་ནས་འདི་སྐད་ཟེར་རོ། །ཀྱེ་ཐ་ག་པ། ཁྱོད་ལ་ཁོ་བོས་ཅུང་ཟད་བྱས་པ་ཤེས་སམ། ཤེས་ཏེ། བདག་ད་དུང་ཡང་ཁྱོད་ཀྱི་ལ་ཐུ་ཟའོ། །ཁོ་བོ་ཁྱིམ་དེར་འོངས་པའི་ཚེ་ན་ཁྱོད་ཀྱིས་རས་ཡུག་ཆེན་འདི་ཁྱེར་ཤོག་ཅིག །བཞུད་ཅིག །བདག་གིས་ཀྱང་ཁ་ཚར་བཀལ་ཏེ་མཆིའོ། །ཉེ་དགའ་དེའི་ཁྱིམ་དུ་སོང་སྟེ་སྒོའི་ཐད་ཀར་འདུག་པ་དང༌། ཁྱིམ་བདག་གི་ཆུང་མ་དེས་རྐང་པ་ལ་ཕྱག་འཚལ་ཏེ། ཁ་སྒོར་ལྟ་ཞིང་མདུན་དུ་འདུག་གོ །ཐ་ག་པ་དེས་ཀྱང་རས་ཡུག་ཁྱེར་ཏེ་སོང་བ་དང༌། ཆུང་མ་དེས་དེ་ཐག་རིང་པོ་ནས་མཐོང་སྟེ་ལག་བརྡས་མ་འོང་ཞེས་བྱས་པ་དང༌། ཐ་ག་པ་དེས་ཕྱོགས་བཞིར་བལྟས་ནས་ལྟོས་བཟུང་བས་མགོ་སྨད་དུ་ནང་དུ་ཞུགས་ནས་རས་ཡུག་ཆེན་དེ་ཁྱིམ་བདག་གི་ཆུང་མའི་པང་དུ་བཞག་པ་དང༌། ཉེ་དགས་ཚམ་ཚོམ་མེད་པར་བླངས་ཏེ། ཨ་རོག་ཁྱ་སོགས་བརྗོད། ཆུང་མ་ན་རེ། ཁྱིམ་བདག་གིས་རང་གི་སུག་པ་ནས་དབུལ་གྱིས་སླར་སྩོལ་ཅིག །ཉེ་དགས་སྨྲས་པ། ཁོ་བོས་རུང་བར་བྱའི། དེའི་འོག་ཏུ་ཁྱིམ་བདག་དྲང་སྲོང་གི་རྒྱལ་མཚན་བསྐོན་དུ་གཞུག་གོ་ཞེས་སྨྲས་ནས་ལངས་ཏེ་སོང་ངོ༌། །
ཐ་ག་པས། བདག་ལ་གླ་བྱིན་ཅིག །ཁོ་མོའི་རས་ཡུག་ཆེན་འཕྲོག་ཏུ་བཅུག་ནས་གླ་གཞན་ཡང་འདེད་དམ། ཉེ་དགའ་ལ་དོས་ཤིག །དེ་ཉེ་དགའི་གན་དུ་སོང་ནས། བདག་ལ་གླ་སྩོལ་ཅིག །ཁྱིམ་བདག་གི་ཆུང་མ་ལ་དོས་ཤིག །དེ་ཁ་ཟེར་ཞིང་གང་ལ་རས་ཡུག་ཆེན་བྱིན་པ་དེ་ཉིད་ལ་གླ་དོས་ཤིག་ཟེར་རོ། །སོང་དང་སྟེར་བར་འགྱུར་རོ། །དེས་དེའི་གན་དུ་སོང་ནས། གླ་བྱིན་ཅིག །དེ་ན་རེ། ཀྭ་ཡེ་ཁྱོད་འདུག་མི་ཕོད་དམ། མི་འདུག་ན་ཁོ་མོས་ཁྱོད་ཀྱི་མགྲིན་པར་ཆོལ་ཟངས་བཏགས་ཏེ་མཉན་ཡོད་ཐམས་ཅད་བསྐོར་བར་བྱའོ། །ཐ་ག་པ་དེ་ཡང་ཉེ་དགའི་གན་དུ་སོང་ནས། ཁྱིམ་བདག་གི་ཆུང་མ་འདི་སྐད་ཟེར་གྱིས་བདག་ལ་གླ་བྱིན་ཅིག་ཉེ་དགས་སྨྲས་པ། ཁོ་བོའི་རས་ཡུག་ཆེན་འཐག་ཏུ་བཅུག་ཚད་ཀྱི་གླ་ཁོ་བོས་བཅལ་ན་ཁོ་བོའི་ལྷུང་བཟེད་དང་ཆོས་གོས་ཀྱང་མེད་པར་འགྱུར་རོ། །གཞན་ཡང༌། ཚུར་ཤོག་རྩིས་བྱའོ། །ཁྱོད་ཀྱིས་ཁོ་བོ་ལས་བག་(༡༨༡བ)ཕྱེའི་རིན་དང༌། ཞུན་མར་དང༌། ཧྭགས་ལ་སོགས་པ་ཇི་ཙམ་ཁྱེར་བ་དག་ཁོད་ཅིག་ཅེས་རྩིས་བྱས་པ་དང༌། ཆེས་ལྷག་པ་ཁྱེར་ནས། ཐ་ག་པ་དེ་ཡུད་ཙམ་ཞིག་ཉི་མ་ལ་བཏགས་ཏེ་བཏང་ངོ༌། །དེ་འཕྱ་བའི་སྐབས་དེ་གསོལ་བ་དང༌། བྱུང་བ་འདི་དང་སོགས། ཉེ་དགའ། ཁྱོད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། མད་དོ། །དགེ་སློང་གི་ཕྱིར་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པས་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་བཅུག་པ་ལས། དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་ནས་ཐ་ག་པ་ཉེ་དུ་མ་ཡིན་པའི་གན་དུ་སོང་སྟེ་འདི་སྐད་ཅེས། ཚེ་དང་ལྡན་པ་ཐ་ག་པ། ཤེས་པར་གྱིས་ཤིག །གོས་འདི་ཁོ་བོའི་ཕྱིར་འཐག་གིས། ཚེ་དང་ལྡན་པ་ཐ་ག་པས་གོས་འདི་ཞེང་ཆེ་བ་དང༌། ཁྲུན་རིང་བ་དང༌། ཐར་གྱིས་ཞག་པ་དང༌། ཐག་རན་བཟང་བར་ལེགས་པར་གྱིས་ཤིག །ཚེ་དང་ལྡན་པ་ཐ་ག་པ། འདི་ལྟར་ཁོ་བོས་གླ་རྔན་འདི་ལྟ་སྟེ། བཟའ་བའམ། བཟའ་བ་ཙམ་མམ། བཟའ་རྒྱུ་ཅུང་ཟད་སྦྱིན་ནོ་ཞེས་སྨྲས་ནས། དེ་ལ་གལ་ཏེ་དགེ་སློང་དེས་གོས་བསྒྲུབ་པའི་ཕྱིར་གླ་རྔན་འདི་ལྟ་སྟེ། བཟའ་བའམ། བཟའ་བ་ཙམ་མམ། བཟའ་རྒྱུ་ཅུང་ཟད་ཅིག་བྱིན་ཅིང་གོས་གྲུབ་ན་སྤང་བའི་ལྟུང་བྱེད་དོ། །
འཕྲོག་པའི་སྤང་བ་ནི། སྟོན་པ་མཉན་ཡོད་ནའོ། །དགའ་བོ་ལ་ལྷན་ཅིག་གནས་པ་ཆོས་ཞེས་བྱ་བ། ངོ་ཚ་ཤེས་པ། འགྱོད་པ་དང་ལྡན་པ། བསྡམས་པ། བསླབ་པ་འདོད་པ་ཞིག་ཡོད་པ་དེས་དེ་གནས་ངན་ལེན་ཀུན་ཏུ་སྤྱོད་པར་མི་ཤེས་པ་དེ་སྲིད་དུ་དེ་དང་ལྷན་ཅིག་གནས་སོ། །དེ་གནས་ངན་ལེན་ཀུན་ཏུ་སྤྱོད་པར་ཤེས་པའི་ཚེ་དགེ་སློང་རང་བཞིན་དུ་གནས་པ་རྣམས་དང་ལྷན་ཅིག་གནས་ཏེ། སྟོན་པའི་བཀས་དུས་གསུམ་དུ་ཕྱག་འཚལ་དུ་འགྲོ་བ་འབའ་ཞིག་བྱེད་དོ། །དེ་ནས་སྟོན་པས། ཀུན་དགའ་བོ། སོང་ལ། དེ་བཞིན་གཤེགས་པ་ཀོ་ས་ལར་ལྗོངས་རྒྱུར་གཤེགས་ཀྱིས། ཁྱེད་ཅག་ལ་དེ་བཞིན་གཤེགས་པ་དང་ཐབས་ཅིག་ཏུ་ཀོ་ས་ལར་ལྗོངས་རྒྱུ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་སྒོས་ཤིག །དེས་དེ་སྐད་བསྒོས་པ་དང༌། དགའ་བོས་ཐོས་ནས་ཉེ་དགའ་ལ་སྨྲས་པ། དེ་སྐད་ཟེར་ན། བདག་ཅག་འདི་ཉིད་དུ་འདུག་ན་ནི་སྒོ་འཕར་བརྒྱ་དག་འདས་ཏེ་ཅི་ནས་ཀྱང་ལྟོ་དགང་དགོས་སོ། །ཅི་སྟེ་སྟོན་པ་དང་ཐབས་གཅིག་ཏུ་འགྲོ་ན་ནི་སངས་རྒྱས་གཤེགས་པ་ལ་ཕན་ཡོན་བཅོ་བརྒྱད་ཡོད་པར་གསུངས་པས་སྲོག་ཆགས་བརྒྱ་སྟོང་དུ་མ་སྟོན་པ་དང་ཐབས་གཅིག་ཏུ་འགྲོ་བས། ཆུའང་རྙོག་མ་ཅན་བཏུང་དགོས་ལ། ཤིང་ལྗོན་པའི་དྲུང་དུའང་གོ་མི་ཐོབ་པས་བདག་ཅག་གིས་དགེ་སློང་རབ་ཏུ་བཤེས་པ་འགའ་ཞིག་ཁྲིད་དེ་དཀོན་མཆོག་གསུམ་གྱི་བསྔགས་པ་བརྗོད་ཅིང་མདུན་དུ་དོང་ན་བདེ་བར་རྒྱུ་ཞིང༌། རྙེད་པ་མང་པོའང་(༡༨༢ན)འགྲུབ་པར་འགྱུར་རོ། །ཉེ་དགའ་ན་རེ། རེ་ཞིག་གསེར་སྣོད་སྤངས་ཏེ་རྫའི་སྣོད་ཀྱིས་བསོད་སྙོམས་རྒྱུའམ། ཁྱོད་ཀྱི་ལྷན་ཅིག་གནས་པ་ཆོས་ལྟ་བུ་སུ་ལ་ཡོད། དེས་ཁོ་བོ་མཐོང་བར་ཡང་མི་འདོད་དོ། །སློབ་དཔོན་གྱིས་བསྡུ་བ་བཞི་གང་རུང་གིས་བསྡུས་སམ། མ་བསྡུས་སོ། །
དེས་ན་ཁྱོད་ཀྱི་གནས་སྐབས་དེ་ལྟར་གྱུར་ཏོ། །ཆོས་ཀྱི་སྣམ་སྦྱར་བརྙིངས་ཤིང་རས་ཡུག་ཆེན་ཞིག་རྙེད་ནས། མཁན་པོ་ལ་ཞུས་ཏེ་སྣམ་སྦྱར་བཙེམ་མོ་སྙམ་ནས་དགའ་བོའི་གན་དུ་འཕགས་པ་དང༌། བསོད་སྙོམས་པ་ཞིག་གིས་མཐོང་ནས། གར་འགྲོ། ཁོ་བོའི་སྣམ་སྦྱར་བརྙིངས་ཤིང་རས་ཡུག་ཆེན་འདི་རྙེད་པས་མཁན་པོ་ལ་ཞུས་ཏེ་སྣམ་སྦྱར་བཙེམ་མོ། །བསོད་སྙོམས་པ་ན་རེ། ཁྱོད་གསར་པ་འཚེམ་ན་སྣམ་སྦྱར་རྙིང་པ་འདི་ཁོ་བོ་ལ་བྱིན་ཅིག །དེ་བཞིན་དུ་བྱའོ། །དེ་དགའ་བོའི་གན་དུ་སོང་ནས་ཞུས་པས། ཉེ་དགས། སློབ་དཔོན། འདི་ནི་དེའི་དུས་ལགས་སོ། །དགའ་བོས། ཆོས། ཁོ་བོ་ལ་སྣམ་སྦྱར་ཞིག་ཡོད་པ་དེ་ཁྱོད་ལ་སྦྱིན་ནོ། །མཁན་པོ། མི་འཚལ་ཏེ། བདག་གི་རས་ཡུག་ཆེན་འདི་ལས་སྣམ་སྦྱར་དྲུབས་ཏེ་བཅང་བར་བགྱིའོ། །ཉེ་དགའ་ན་རེ། ཁོ་བོས་གཞན་དུ་ཐོས་ལ་གཞན་དུ་མཐོང་སྟེ། ཁོ་བོས་ཁྱོད་ངོ་ཚ་ཤེས་པ། བསླབ་པ་འདོད་པར་ཤེས་ཀྱི། མཁན་པོའི་ཆོས་ལྡན་གྱི་ཚིག་གཅོག་པར་མི་ཤེས་སོ། །དེ་དབང་ཆེ་བས། ཅང་མི་སྨྲ་བར་འདུག་པ་དང༌། དགའ་བོས་དེ་ལ་སྣམ་སྦྱར་བྱིན་ནོ། །དེས་དེ་བླངས་ནས། མཁན་པོ། རས་ཡུག་ཆེན་འདི་བཞེས་ཤིག །ཆོས། ཁོ་བོས་བརྗེ་བའི་ཕྱིར་སྣམ་སྦྱར་བྱིན་ནམ། རས་ཡུག་ཆེན་ཡང་ཁྱོད་ཉིད་ཁྱེར་ཅིག །དེས། བདག་ལ་ཡོ་བྱད་དོན་མེད་པ་འདིས་ཅི་བྱ། རས་འདི་དགེ་འདུན་ལ་དབུལ་ཞིང་སྣམ་སྦྱར་རྙིང་པ་འདིའང་བསོད་སྙོམས་པ་དེ་ལ་སྦྱིན་ནོ་སྙམ་ནས་དེ་ལྟར་བྱས་སོ། །ཕྱི་དེ་ཉིན་པར་སྣམ་སྦྱར་གྱོན་ནས་མཁན་པོ་ལ་ཕྱག་འཚལ་དུ་འོངས་པ་དང་དགའ་བོས། ཆོས། ཁོ་བོ་ཅག་སྟོན་པའི་མདུན་དུ་འགྲོའོ། །མཁན་པོ། སྟོན་པས་སངས་རྒྱས་གཤེགས་པ་ལ་ཕན་ཡོན་བཅོ་བརྒྱད་ཡོད་པར་གསུངས་པ་དེ་དག་མཁན་པོ་ལ་ཉེས་དམིགས་སུ་འགྱུར་རམ། བདག་ནི་སྟོན་པ་དང་ཐབས་གཅིག་ཏུ་མཆིའོ། །དགའ་བོས། ངན་པ། ཅི་ཁོ་བོས་ཁྱོད་ལ་བཟང་པོས་སྣམ་སྦྱར་བྱིན་སྙམ་མམ། ཁོ་བོ་དང་ལྷན་ཅིག་མི་འགྲོ་ན་སྣམ་སྦྱར་འོན་ཅིག །སྣམ་སྦྱར་ཕྲོགས་པ་བླའི་གནས་ངན་ལེན་ཀུན་ཏུ་སྤྱོད་པ་དང་ལྷན་ཅིག་འགྲོར་མི་རུང་ངོ་སྙམ་ནས་དེ་ལ་སྣམ་སྦྱར་ཕྱིར་བྱིན་ནོ། །དེ་ནས་སྟོན་པ་དུལ་བ། འཁོར་དུལ་བ་དང་ལྡན་པ་ནས། བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ། འཁོར་ཉན་ཐོས་ཆེན་པོ་རྣམས་ཀྱིས་མདུན་དུ་བདར་ཏེ་ཀ་ས་ལར་གཤེགས་པ་ན། སྟོན་པས་གཡས་ཕྱོགས་སུ་གླང་པོ་ཆེའི་ལྟ་སྟངས་ཀྱིས་གཟིགས་པའི་ཚེ་ཆོས་ལ་སྣམ་སྦྱར་མེད་པར་གཟིགས་ནས། ཀུན་དགའ་བོ། ཆོས་ཀྱིས་རྙེད་པ་མ་གྲུབ་(༡༨༢བ)བམ། གྲུབ་བོ། །རྒྱུ་ཅི། འདིས་སོ། །དགེ་སློང་དག །དགེ་སློང་ལ་གོས་བྱིན་ནས་འཕྲོག་པར་བྱེད་དམ། བགྱིད་དོ། །བྱུང་བ་འདི་དང་སོགས། ཡང་དགེ་སློང་གང་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་པར་རྔམ་པར་གྱུར་ཏེ། ཡི་མ་རང་ནས་འཕྲོག་གམ་འཕྲོག་ཏུ་འཇུད་ཅིང༌། དེ་ལ་འདི་སྐད་ཅེས། དགེ་སློང༌། ཁྱོད་ལ་གོས་མི་སྦྱིན་གྱིས་ཕྱིར་བྱིན་ཅིག་ཅེས་ཟེར་ནས། དགེ་སློང་དེས་ལྷག་མ་ཡོད་པ་ཕྱིར་སྦྱིན་པར་བྱས་ཤིང་བཏང་ན་སྤང་བའི་ལྟུང་བྱེད་དོ། །
ཞག་བདུན་ན་འབྲལ་བའི་སྤང་བ་ནི། མཉན་ཡོད་ཀྱི་རི་བྲགས་ཤིག་ན་ཞེས་བྱ་བ་ནས། ལ་ལས་ཆོས་གོས་བྱིན་པའི་བར། རྐུན་པོ་སྤ་བཀོང་བའི་ཕྱིར་ཚམ་ངན་བྱའོ་ཞེས་པའི་སྐབས་དང་འདྲ་ལ། སྐབས་དེ་གསོལ་བས། དགོན་པ་བས་ཆོས་གོས་གསུམ་ལས་གང་ཡང་རུང་བ་ཁྱིམ་གཞན་དུ་གཞག་པར་བྱའོ། །བཞག་ནས་དེ་ཉིད་དུ་ཉལ་བ་དང༌། ཅིའི་ཕྱིར་གཟིམ། ཁོ་བོ་ཅག་གིས་ཆོས་གོས་འདིར་བཞག་གོ །ཅི་ཁྱེད་ཀྱི་ཆོས་གོས་རྐུ་སྙམ་མམ། ཐུགས་མི་ཆེས་ན་སྣོམས་ལ་བཞུད་ཟེར་བའི་སྐབས་དེ་གསོལ་བས། དེར་ཉལ་བར་མི་བྱའོ། །དེ་དག་སྔ་བར་འོངས་ཏེ་སྐྱ་རེངས་འཆར་བར་བྱེད་པ་དང༌། བུད་མེད་སྒྲེན་མོར་ཉལ་བ་དག་གིས། ཅིའི་ཕྱིར་མཚན་མོ་ཉིད་ལ་འདིར་འབྱོན། ཁོ་བོ་ཅག་གི་ཆོས་གོས་བཞག་གོ །ཐུགས་མི་ཆེས་ན་སྣོམས་ཤིག །དེ་གསོལ་བས། དེར་སྐྱ་རེངས་འཆར་བར་མི་བྱའོ། །དེ་དག་སྔ་བར་སོང་ནས་བང་རིམ་དུ་སྐྱ་རེངས་འཆར་བར་བྱེད་པ་དང༌། ཆོམ་རྐུན་པ་དང་སྟག་ལ་སོགས་པས་བཅོམ་པ་དེ་གསོལ་བས། གཙུག་ལག་ཁང་ཉིད་དུ་སྐྱ་རེངས་འཆར་བར་བྱའོ། །དགེ་སློང་རྣམས་དགེ་འདུན་དང༌། མཆོད་རྟེན་དང༌། གང་ཟག་གི་ཕྱིར་མཚམས་ཀྱི་ཕྱི་རོལ་ཏུ་འགྲོ་དགོས་པ་ན། བདག་ཅག་གིས་ཁྱིམ་གཞན་ཆོས་གོས་བཞག་གོ་ཞེས་མི་འགྲོ་བའི་སྐབས་དེ་གསོལ་བས། དགོན་པ་པས་ཞག་དྲུག་གི་མཐའ་ཚུན་ཆད་དུ་ཆོས་གོས་དེ་དང་མཚམས་ཀྱི་ཕྱི་རོལ་ཏུ་འབྲལ་བར་བྱའོ། །དྲུག་སྡེས་བསམས་བཞིན་དུ་ཞག་བདུན་དུ་འབྲལ་བར་བྱེད་ནས་གསོལ་བས། བྱུང་བ་འདི་དང་སོགས། ངས་དགེ་སློང་དགོན་པ་བས་ཞག་དྲུག་གི་མཐའ་ཚུན་ཆད་དུ་ཆོས་གོས་དེ་དང་མཚམས་ཀྱི་ཕྱི་རོལ་ཏུ་འབྲལ་བར་བྱའོ་ཞེས་གསུངས་ན། ཁྱེད་བསམས་བཞིན་དུ་ཞག་བདུན་དུ་མཚམས་ཀྱི་ཕྱི་རོལ་ཏུ་འབྲལ་བར་བྱེད་པ་བདེན་ནམ། མད་དོ། །དགེ་སློང་རབ་ཏུ་མང་པོ་དག་གནས་དགོན་པ་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་ཏུ་དབྱར་ཕྱི་མར་གྱུར་ལ་དགེ་སློང་དགོན་པ་བ་འདོད་ན། ཆོས་གོས་གསུམ་ལས་ཆོས་གོས་གང་ཡང་རུང་བ་ཁྱིམ་གཞན་དུ་བཞག་པར་བྱའོ། །དགེ་སློང་དགོན་པ་བ་ལ་མཚམས་ཀྱི་ཕྱི་རོལ་ཏུ་འགྲོ་དགོས་པ་དེ་ལྟ་བུའི་རྐྱེན་ཞིག་བྱུང་ན་དགེ་སློང་དགོན་པ་བ་དེས་ཞག་དྲུག་(༡༨༣ན)གི་མཐའ་ཚུན་ཆད་དུ་ཆོས་གོས་དེ་དང་མཚམས་ཀྱི་ཕྱི་རོལ་ཏུ་འབྲལ་བར་བྱའོ། །དེ་ལས་འདས་པར་འབྲལ་ན་སྤང་བའི་ལྟུང་བྱེད་དོ། །
དབྱར་གྱི་རས་ཆེན་གྱི་སྤང་བ་ནི། སྟོན་པས་དབྱར་གྱི་གོས་རས་ཆེན་བཅང་བར་བྱའོ་ཞེས་གསུངས་པ་དང༌། དགེ་སློང་དབྱར་སྔ་མར་ཁས་ལེན་པས་ཀྱང༌། རང་གི་དུས་ཡིན་ནོ་ཞེས་འཚོལ་བར་བྱེད་ཅིང་འཆང་བར་བྱེད། ཕྱི་མར་ཁས་ལེན་པས་ཀྱང་དེ་ལྟར་བྱེད་ནས་མྱུར་དུ་ཚོལ་བ་དང༌། རིང་དུ་འཆང་བས་དོན་དང་བྱ་བ་མང་བ་དེ་གསོལ་བས། བྱུང་བ་འདི་དང་སོགས། དགེ་སློང་གིས་སོ་ག་རྣམས་ཀྱི་ཟླ་བ་གཅིག་ལུས་པ་ན་དབྱར་གྱི་གོས་རས་ཆེན་བཙལ་བར་བྱའོ། །དབྱར་ཟད་ནས་འོག་ཏུ་ཟླ་བ་ཕྱེད་ཀྱི་བར་དུ་བཅང་བར་བྱའོ། །གལ་ཏེ་དགེ་སློང་གིས་སོ་ག་རྣམས་ཀྱིས་ཟླ་བ་གཅིག་ལུས་པའི་སྔོན་རོལ་ཏུ་དབྱར་གྱི་གོས་རས་ཆེན་ཚོལ་བར་བྱེད་དམ། དབྱར་ཟད་ནས་འོན་ཏུ་ཟླ་བ་ཕྱེད་ལས་འདས་པར་འཆང་ན་སྤང་བའི་ལྟུང་བྱེད་དོ། །
བརྟད་པ་ལས་བྱུང་བའི་སྤང་བ་ནི། སྟོན་པ་མཉན་ཡོད་ནའོ། །རི་བྲགས་ཤིག་ན་ཁྱིམ་བདག་དད་པ་ཅན་ཞིག་གིས་གཙུག་ལག་ཁང་ཕུན་སུམ་ཚོགས་པ་ཞིག་བྱས་ཏེ། དགེ་སློང་དྲུག་ཅུ་ལ་ཆོས་གོས་དང་བསོད་སྙོམས་སྟོབས་སོ། །དེ་ཤི་ནས་དེའི་བུ་ལ། བཞིན་བཟང༌། ཕས་དགེ་སློང་དྲུག་ཅུ་ལ་མཁོ་བ་སྟོབ་ན། ཁྱོད་ཀྱིས་ཀྱང་ནུས་སམ། འཕགས་པ་དག །ལ་ལ་བརྒྱ། ལ་ལ་ནི་སྟོང༌། ལ་ལ་ནི་འབུམ་ལ་བསྙེན་བཀུར་བྱེད། ལ་ལས་ནི་རང་ཉིད་ཀྱང་གསོ་དཀའ་བས་བདག་གིས་རྔོ་མི་ཐོག་གོ །དེ་ནས་དགེ་སློང་རྣམས་གཞན་དུ་སོང་ལ། རྒན་ཞུགས་གཉིས་གཙུག་ལག་ཁང་དེ་ཉིད་དུ་འཁོད་ནས་བསོད་སྙོམས་ཀྱིས་འཚོའོ། །བྱང་ལམ་ནས་ཚོང་པ་ལྷགས་ནས་གཙུག་ལག་ཁང་དེ་མཐོང་སྟེ་ནང་དུ་ཞུགས་པ་དང་སྟོང་པར་མཐོང་ནས། ཡོངས་སུ་བསྐོར་བ་ན་རྒན་གཞུགས་གཉིས་མཐོང་སྟེ། དགེ་སློང་གར་སོང༌། དེ་གཉིས་ཀྱིས་བཤད་དོ། །དེད་དཔོན་ན་རེ། བདག་ཅག་གིས་གཙུག་ལག་ཁང་བྱེད་དུ་བཅུག་ནས་ཀྱང་བསྙེན་བཀུར་བྱའོ་སྙམ་ན། བྱས་ཟིན་པ་འདིར་མཁོ་བ་བསྟབ་ཀྱི། ཅི་སྤྲོ་བ་ཕུལ་ཅིག་ཅེས་རས་ཡུག་ཆེན་བཏིང་བ་དང༌། དེ་དག་གིས་ཅི་འབྱོར་བ་ཕུལ་བས་རྙེད་པ་མང་པོ་བྱུང་ངོ༌། །དེ་ནས་དེད་དཔོན་གྱིས་དེ་གཉིས་ལ། འདི་ནི་དགེ་སློང་དྲུག་ཅུའི་ཟླ་བ་གསུམ་གྱི་བསོད་སྙོམས་ལགས་སོ། །འདི་ནི་བརྒྱད་སྟོན་དང༌། བཅུ་བཞི་སྟོན་དང༌། ཉ་སྟོན་གྱི་བསོད་སྙོམས་ལགས་སོ། །འདི་ནི་ན་བའི་རྐྱེན་དང༌། སྨན་གྱི་ཡོ་བྱད་ལགས་སོ། །འདི་ནི་རྙེད་པ་ལགས་སོ། །འདི་ནི་ཆོས་གོས་ཀྱི་ཟོང་ལགས་ཀྱིས་དགེ་སློང་བཟང་པོ་དག་སྤྱན་དྲོངས་ཤིག །བདག་ཅག་དབྱར་འདས་ནས་འདིར་འོངས་ཏེ། དགེ་སློང་བརྒྱ་ལ་མཁོ་བ་བསྟབ་པར་བགྱིའོ་ཞེས་སྨྲས་ནས་སོང་ངོ༌། །དེ་ནས་གཞོན་པས་རྙེད་པ་སྦས་ནས། རྒན་པས་མཉན་ཡོད་དུ་དགེ་སློང་སྦྲོན་དུ་སོང་བ་དང༌། (༡༨༣བ)ཉེ་དགའ་རྒྱལ་བྱེད་ཚལ་གྱི་སྒོ་ན་སའདུག་པས་མཐོང་ནས། གནས་བརྟན་ཞིག་འོངས་པ་འདི་བསུའོ་སྙམ་ནས། གནས་བརྟན། བྱོན་པ་ལེགས་སོ། །དེ་ན་རེ། སློབ་དཔོན། ཕྱག་འཚལ། ཉེ་དགས་འདི་ནི་རྒན་ཞུགས་ཤིག་སྟེ། མཁན་སློབ་ཀྱང་མི་ཤེས་སོ་སྙམ་ནས། རྒན་ཞུགས་ག་ལས་འོངས། རི་བྲགས་ཀྱི་གཙུག་ལག་ཁང་ནས་སོ། །དེ་གཙུག་ལག་ཁང་ཡིན་ནམ། ཕོངས་པ་ཡིན། སྔོན་ཕོངས་པ་ཡིན་ལ། ད་ལྟ་གཙུག་ལག་ཁང་ངོ༌། །ཇི་ལྟར་གྱུར། རྒྱས་པར་བརྗོད་པ་དང༌། ཁྱོད་དགེ་སློང་བརྐུར་འོངས་མོད། ལགས་སོ། །
འདི་ན་ཆོས་ཀྱི་རྗེ་མངོན་སུམ་དུ་ཆོས་སྟོན་ཅིང་རྒྱལ་པོ་གསལ་རྒྱལ་ལ་སོགས་པས་བསྙེན་བཀུར་བྱེད་པས་ཆོས་དང་ཟང་ཟིང་གི་ལོངས་སྤྱོད་ཕུན་སུམ་ཚོགས་པ་ཡིན་པས། དགེ་སློང་རྣམས་ཀྱིས་ཁྱོད་དགེ་སློང་བརྐུ་རུ་འོངས་པར་ཤེས་ན་ཁྱོད་ལ་གནས་དབྱུང་གི་ལས་བྱེད་པར་འགྱུར་གྱིས་གཞན་ལ་མ་ཟེར་ཅིག །ཁོ་བོ་ཅག་མི་དྲུག་ལ་འཁོར་བཅུ་བཅུ་ཡོད་པས་ཁྱོད་ལ་སྙིང་བརྩེ་བས་འོང་ངོ༌། །བདག་སྟོན་པའི་ཞབས་ལ་ཕྱག་འཚལ་དུ་འགྲོའོ། །ཉེ་དགས་ལྷུང་བཟེད་ནག་པོ་ཅན་འགའ་ཞིག་གིས་འདི་མཐོང་ཞིང་ཐོས་ནས་དང་པོར་འགྲོ་བར་གྱུར་ན་མི་རུང་ངོ་སྙམ་ནས། ཆོས་རྣམས་ཡིད་ཀྱིས་འདྲེན་བྱེད་ཅིང༌། །ཡིད་གཙོ་ཡིད་ཀྱི་འགྲོས་ཅན་ཡིན། །ཞེས་གསུངས་ཀྱི། འདི་ཉིད་ནས་སྟོན་པའི་ཞབས་ལ་ཕྱག་ཚོལ་ཅིག་ཅེས་དེའི་གཉའ་བ་ནས་བཟུང་སྟེ། རྒན་ཞུགས་སངས་རྒྱས་ལ་ཕྱག་འཚལ་ལོ། །ཆོས་ལ། དགེ་འདུན་ལ་ཕྱག་འཚལ་ལོ། །ཞེས་འདུད་དུ་བཅུག་གོ །སྐོམ་འཐུང་དུ་མཆིའོ། །དེས་ཕུར་བུ་བཀང་སྟེ་བླུད་ནས་སོང་ཞིག་ཅེས་རིང་དུ་བསྐྱལ་ལོ། །དྲུག་སྡེའི་ཀུན་སྤྱོད་ནི། གང་ཅུང་ཟད་ཐོས་པ་དེ་ཕྱེ་མ་རེད་ཚོགས་ནས་ཕན་ཚུན་བརྗོད་པ་ཡིན་པས། ཉེ་དགས་སྐབས་དེ་བརྗོད་པ་དང༌། དེ་ཉིད་དུ་དབྱར་གནས་པར་བྱའམ། མི་བྱ་སྟེ་དབྱར་གྱི་གནང་དུ་དེ་དག་ཟོས་ཏེ། འདིར་འོངས་ནས་དབྱར་ཕྱི་མ་ཁས་བླང་ངོ༌། །དེ་དག་དེར་སོང་བ་དང་རྒན་ཞུགས་ཀྱིས་མཐོང་ནས། འོངས་པ་ལེགས་སོ་ཞེས་དེ་དག་གི་གནས་མལ་ཕོག་གོ །དེ་དག་གིས། བདག་ཅག་དོན་གང་གི་ཕྱིར་ལྷགས་པ་དེ་བརྟག་གོ་སྙམ་ནས། རྒན་ཞུགས། རྙེད་པ་ཅི་ཡོད་བལྟའི་འོན་ཅིག །དེ་གཉིས་དྲང་པོའི་རང་བཞིན་ཅན་ཡིན་པས་ཐམས་ཅད་བསྟན་ནས། འདི་ནི་དགེ་སློང་དྲུག་ཅུའི་ཟླ་བ་གསུམ་གྱི་བསོད་སྙོམས་སོ་ཞེས་སོགས་བརྗོད་པ་དང༌། རྒན་ཞུགས་སེར་སྣ་ཅན་ཡིན་པས་ཟས་བསོད་པ་སྦྱིན་མི་ནུས་ལ། ལྟོ་འདུན་ཅན་ཞིག་ལ་བཅོལ་ན་དགེ་འདུན་ལ་ཉི་མ་རེ་རེ་ཞིང་བཅའ་བ་རྣམ་པ་བཅོ་བརྒྱད་དང༌། ཚོད་མ་སྣུམ་བག་ཅན་མང་པོ་དང༌། ལེགས་པར་སྦྱར་བའི་བཏུང་བའང་འབྲིམ་པར་འགྱུར་རོ་ཞེས་ལྟོ་འདུན་ཅན་ཞིག་ལ་བཅོལ་ནས་དེ་ལྟར་བྱས་པས་ཟད་པ་དང༌། དགེ་སྐོས་ཀྱིས་རྒན་པའི་མཐའ་ལོགས་སུ་འདུག་སྟེ། དགེ་འདུན་གྱི་གདུགས་གཅིག་ཁོ་(༡༨༤ན)ནའི་སྤྱི་བུངས་ཤིག་མཆིས་སོ། །
བདག་ཅག་བསླབ་པ་བླངས་པ་ཡིན་པས་བརྒྱར་སྟོན་སོགས་མི་བྱེད་ཀྱི། དེ་ཡང་བཟའོ་ཞེས་ཟོས། ཕུང་པོ་ལྔ་ཇི་སྲིད་འཚོ་བ་དེ་སྲིད་དུ་བདག་ཅག་ནད་པ་ཡིན་པས། ན་བའི་སྨན་དེ་ཡང་བཟའོ་ཞེས་ཟོས་ནས། ཁུར་ཡ་གཅིག་ནི་འདུག་པར་དཀའ་བ་ཡིན་གྱིས། གོས་ཀྱི་རྙེད་པ་འདི་ཡང་བགོས་ལ་ཁུར་རོ་སྙམ་པས་བདེ་བར་འདོང་ངོ་ཞེས་དེ་ཡང་བགོས་པ་དང༌། དགེ་སྐོས་ཀྱིས། ད་ནི་གདུགས་གཅིག་གི་སྤྱི་བུངས་ལས་མ་མཆིས་སོ། །དེ་དག་གིས། རྒན་ཞུགས་ཁྱེད་གཉིས་ན་རེ། དགེ་སློང་དྲུག་ཅུའི་ཟླ་བ་གསུམ་གྱི་བསོད་སྙོམས་ཡོད་ཟེར་ན་དབྱར་དུ་ཟད་དོ། །དེ་གཉིས་ཀྱིས་སྨྲས་པ། དེ་དག་གིས་བཅའ་བ་བཅོ་བརྒྱད་ལ་སོགས་པ་ཤ་སྟག་བྲིམས་ཤིག་ཅེས་སྨྲས་སམ། འདི་སྨོད་ཀྱིས་གནས་དབྱུང་གྱིས་ཤིག །ཁ་ཅིག་གིས། མྱུར་དུ་བཟོད་པ་མ་གསོལ་ན་ལྟག་པའི་སྤུ་འབྱི་ཡིས་བཟོད་པ་གསོལ་ཅིག །དེ་གཉིས་ཀྱིས་བཟོད་པ་གསོལ་བ་དང༌། འདི་གཉིས་དྲང་པོའི་རང་བཞིན་ཅན་ཡིན་པས་བཟོད་པ་བྱའོ་ཟེར་ནས་སོང་སྟེ། མཉན་ཡོད་དུ་དབྱར་ཕྱི་མ་ཁས་བླངས་ནས་འདུག་གོ །དབྱར་འདས་པ་དང་ཚོང་པ་དག་འོངས་པ་ན་དགེ་སློང་མ་མཐོང་བར། ཡོངས་སུ་བསྐོར་བ་ན་དེ་གཉིས་མཐོང་ནས། དགེ་སློང་དག་གར་དོང༌། འདི་ན་དགེ་སློང་རྣམས་མི་འཁོད་དོ། །
བདག་ཅག་གིས་དགེ་སློང་དྲུག་ཅུའི་ཟླ་བ་གསུམ་གྱི་བསོད་སྙོམས་མ་ཕུལ་ལམ། དེ་གཉིས་ན་རེ། དགེ་སློང་རྣམས་ལྷགས་ནས་དེ་དག་གིས་དབྱར་གྱི་ནང་ཉིད་དུ་ཐམས་ཅད་ཟོས་ནས་སོང་ངོ༌། །ཁྱེད་གཉིས་ཀྱིས་དགེ་སློང་གང་ཁྲིད་འོངས། དྲུག་སྡེའོ། །ཁྱེད་གཉིས་རྒྱ་མཚོ་ཆེན་པོར་སོང་ནས་མཆིང་བུ་ཁྱེར་འོངས་སོ། །དད་པའི་མྱུ་གུ་སྐྱེས་མ་ཐག་ཏུ་བསྐམས་སོ་ཞེས་སྨོད་པའི་སྐབས་དེ་གསོལ་བས། བྱུང་བ་འདི་དང་སོགས། ཁྱེད་ཀྱིས་དབྱར་གྱི་རྙེད་པ་དབྱར་གྱི་ནང་དུ་བགོས་པ་བདེན་ནམ། མད་དོ། །དགེ་སློང་རྣམས་ཀྱི་དབྱར་གྱི་རྙེད་པ་དབྱར་གྱི་ནང་དུ་བགོ་བར་མི་བྱའོ། །དགེ་སློང་རྣམས་ཀྱིས་དབྱར་གྱི་རྙེད་པ་དབྱར་གྱི་ནང་དུ་བགོ་བར་བྱེད་ན་འགལ་ཚབས་ཅན་དུ་འགྱུར་རོ། །སྟོན་པ་མཉན་ཡོད་ནའོ། །སྐྱེ་དགུའི་བདག་མོ་འཁོར་སྤོང་བ་མ་དང་ལྡན་པ་ཡིན་ལ། ཆོས་སྦྱིན་མ་འཁོར་མདོ་སྡེའི་མཐའ་བ་དང་ལྡན་པ་ཡིན་ཏེ། དེ་གཉིས་དབྱར་ཁང་གཅིག་ཏུ་གནས་ནས། ཆོས་སྦྱིན་གྱིས་རང་གི་འཁོར་ལ། ནུ་མོ་དག །སྟོན་པས་དགེ་སློང་མ་རྣམས་ལ་རབ་བྱུང་བསྙེན་རྫོགས་གནང་བ་དེ་ཐམས་ཅད་སྐྱེ་དགུའི་བདག་མོ་ཆེན་པོ་ལ་བརྟེན་པ་ཡིན་ལ། སྟོན་པས་ཀྱང༌། གཞན་གྱི་སེམས་སྲུང་བའི་གང་ཟག་ནི་བསོད་ནམས་མང་དུ་བསྐྱེད་དོ་ཞེས་གསུངས་ཀྱིས། རེ་ཞིག་མི་རྟག་པ་ཡིད་ལ་བྱ་བ་སྒོམ་སཤིག་ཅེས་འདོམས་ཤིང་དེ་དག་ཀྱང་མི་རྟག་པ་བསྒོམ་མོ། །སྐྱེ་དགུའི་བདག་མོའང་རང་གི་འཁོར་ལ། ནུ་མོ་དག །སྟོན་པས་བསྐལ་པ་གྲངས་མེད་གསུམ་གྱི་དཀའ་བ་བརྒྱ་(༡༨༤བ)སྟོང་དུ་མས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་དེ། བླ་ན་མེད་པའི་མཁྱེན་པ་ཐུགས་སུ་ཆུད་པ་དེ་ཐམས་ཅད་ལ་ཕན་པའི་རྒྱུ་ཡིན་ལ། སྟོན་པས་ཀྱང༌། གཞན་གྱི་སེམས་བསྲུང་བའི་གང་ཟག་ནི་བསོད་ནམས་མང་དུ་བསྐྱེད་དོ་ཞེས་གསུངས་ཀྱིས། རེ་ཞིག་མི་རྟག་པ་ཉིད་དང་ལྡན་པའི་མདོ་སྡེ་ཁ་ཏོན་གྱིས་ཤིག་ཅེས་འདོམས་ཤིང༌། དེ་དག་ཀྱང་མི་རྟག་པ་ཉིད་དང་ལྡན་པའི་མདོ་སྡེ་ཁ་ཏོན་དུ་བྱེད་དོ། །དེ་དག་ཕན་ཚུན་སེམས་རྗེས་སུ་བསྲུང་བས་དགེ་བའི་ཕྱོགས་མི་འཕེལ་ལོ། །ཆོས་སྦྱིན་མས་དགེ་བསྙེན་ས་ག་ལ་དེ་ལྟར་གྱུར་ན་ཁྱོད་ཀྱིས་དབྱར་ཁང་བྱེད་དུ་འཇུག་ནུས་སམ། བདག་ལ་ཀརྵ་པ་ཎ་མཆིས་ཏེ། ས་གཞི་རྒྱལ་པོ་དབང་བས་རྒྱལ་པོ་ལ་གསོལ་བ་མཛོད་དང༌། དེར་དབྱར་ཁང་བགྱིད་དུ་སྩལ་ལོ། །ཆོས་སྦྱིན་མ་བཙུན་མོ་ཕྲེང་ལྡན་མའི་གན་དུ་སོང་བ་དང༌། བྱོན་པ་ལེགས་སོ། །དོན་ཅི་ལ་བྱོན། དོན་དེ་བསྙད་པས། བདག་གིས་ཞུའོ། །དེས་རྒྱལ་པོ་ལ་ཞུས་པས། གནས་འདི་ཉིད་བཞེད་ནའང་འདིར་བཞུགས། ངའི་ཕོ་བྲང་གཞན་དུ་བྱའོ། །མི་བཞེད་ན་གང་དགྱེས་པར་མཛོད་ཅིག །དེས་ཆོས་སྦྱིན་ལ་སྨྲས་སོ། །གསལ་རྒྱལ་ལ་རལ་གྲི་མཐུ་ཅན་དང༌། རྒྱལ་རིགས་བཟང་པོ་བ་ཞེས་བྱ་བའི་ཁྲོམ་གཉིས་ཡོད་པ་ལས། རལ་གྲི་མཐུ་ཅན་གྱི་ཁྲོམ་དམག་གི་གནས་སུ་སོང་བ་དང༌། དེ་དག་གི་ཆུང་མ་རྣམས་སྐྱེས་པ་གཞན་དང་དགའ་མགུར་སྤྱོད་པར་བྱེད་པས། ཕྱོགས་དེར་དབེན་པར་གྱུར་ནས། ཆོས་སྦྱིན་གྱིས། ཕྱོགས་འདིར་དབྱར་ཁང་བྱེད་དུ་ཆུག་ཅིག །ས་གས་དེར་དབྱར་ཁང་བྱེད་དུ་བཅུག་ནས་དགེ་སློང་མ་རྣམས་དེར་གནས་སོ། །རལ་གྲི་མཐུ་ཅན་གྱི་ཁྲོམ་དེ་དམག་གི་གནས་ནས་ཕྱིར་འོངས་ཏེ། དེ་དག་གིས་ཆུང་མ་རྣམས་བཀུག་ཅིང་བརྡེགས་པ་དང༌། སྲང་དག་ན་དེ་དག་ངུ་བའི་སྒྲ་སྐད་ཆེན་པོ་བྱུང་ངོ༌། །དགེ་སློང་མ་རྣམས་ཀྱིས་སྨྲས་པ། བདག་ཅག་ཆར་གྱིས་འཇིགས་པ་ས་དང༌། ལ་ཁའི་འོག་ཏུ་ཞུགས་སོ། །ཆོས་སྦྱིན་གྱིས་དེ་དག་ཁ་ཅིག་ལ་དགེ་བའི་རྩ་བ་ཡོད་ཅིང༌། བདག་ཉིད་ལ་རག་ལས་པར་མཐོང་ནས། ནུ་མོ་དག །གདུལ་བ་ལ་ལྟོས་པས་ཐམས་ཅད་བཟོད་པར་བྱའོ། །ཆོས་སྦྱིན་གྱིས་ཕྱོགས་གཅིག་ཏུ་གྱོ་མོ་གསར་པ་བཞག་ནས། ཁྱེད་ཅག་ལ་སྡེར་ལྷག་ཡོད་པ་དེ་ཐམས་ཅད་གྱོ་མོ་འདིར་ཆུག་ཅིག་ཅེས་བྱས་ནས། བྱིས་པ་དག་བྱུང་ན་འབྲུ་མར་བྱིན་ནས་གཅིག་གིས་གཅིག་མགོ་སྐུད་དེ་བཅུག་སྟེ། རང་གི་ལག་གིས་བཅའ་བ་བྱིན། བུ་མོ་བྱུང་བ་ལ་ནི་བདག་ཉིད་ཀྱིས་འབྲུ་མར་གྱིས་མགོ་བསྐུས་ནས་རང་གི་ལག་གིས་བཅའ་བ་བྱིན་ནོ། །དེ་དག་ཁྱེར་ཏེ་ཁྱིམ་དུ་སོང་བ་དང༌། མ་དག་གིས་དྲིས་པ། སུས་བྱིན། ཆོས་སྦྱིན་གྱིས་སོ། །དེ་དག་དད་པར་གྱུར་ཏེ། བདག་ཅག་གི་ཁྱིམ་ཐབ་དམག་ལ་སོང་བའི་ཚེ་འཕགས་མ་ཆོས་སྦྱིན་ལ་བསྙེན་བཀུར་བྱའོ་སྙམ་མོ། །རེ་ཞིག་ན་དེའི་ཁྱིམ་ཐབ་དམག་ལ་སོང་བའི་ཚེ་(༡༨༥ན)ཆོས་སྦྱིན་གྱིས་དེ་དག་གདུལ་བའི་དུས་ཤེས་ནས་གཙུག་ལག་ཁང་བྱི་དོར་བྱས། ཆུ་དང༌། དྲི་དང༌། བདུག་སྤོས་ལ་སོགས་པ་བཞག་ནས་དགེ་སློང་མ་སྐད་སྙན་པ་དག་བསྐོས་ཏེ་བསྡད་པ་དང༌། བུད་མེད་དེ་དག་ཀྱང་ཆོས་སྦྱིན་གྱི་དྲུང་དུ་ལྷགས་པ་ལ་ཆུ་ལ་སོགས་པ་བྱིན་ནས་ཚིགས་སུ་བཅད་པའི་སྐད་ཀྱིས་མཆོད་རྟེན་ལ་ཕྱག་འཚལ་ཏེ་དགེ་སློང་མའི་དགེ་འདུན་གྱི་གོང་དུ་གདན་བཤམས་པ་ལ་འདུག་གོ །
བུད་མེད་དེ་དག་གིས་དེའི་རྐང་པ་ལ་ཕྱག་འཚལ་ནས་མདུན་དུ་འདུག་པ་དང༌། ཆོས་སྦྱིན་མས་དེ་དག་གི་བསམ་པ་དང་བག་ལ་ཉལ་དང་ཁམས་ཤེས་ནས་ཆོས་བསྟན་པས་རྒྱུན་དུ་ཞུགས་པ་ཐོབ་སྟེ། བདག་ཅག་དཀོན་མཆོག་གསུམ་ལ་སྐྱབས་སུ་མཆི་ཡིས། དགེ་བསྙེན་མར་གཟུང་དུ་གསོལ། དེ་དག་དད་ནས་རང་རང་གི་ཁྱིམ་དུ་སོང་སྟེ་བྱི་དོར་བྱས། སྤྱོད་ལམ་ཞི་བས་འཁོད་དོ། །དེ་དག་གི་ཁྱིམ་ཐབ་དམག་གི་གནས་ནས་འོང་བ་ན། བདག་ཅག་གི་ཆུང་མ་སུ་ཞིག་དང་དགའ་མགུར་སྤྱོད་སྙམ་མོ། །དེ་དག་གིས་ཁྱིམ་ཐབ་འོངས་པ་ན་བཤེས་པའི་ཚིག་གིས་བསུ་ནས་བསྐུ་མཉེ་དང༌། དྲིལ་ཕྱི་བྱ། ཁྲུས་བྱས་ནས་ཟས་བྱིན་ནོ། །དེ་དག་གིས། སྤྱོད་ལམ་འདི་ལྟ་བུ་ནི་སྔོན་མ་བྱུང་ངོ་སྙམ་ནས། བཟང་མོ་དག །ཁྱེད་ཀྱི་སྤྱོད་ལམ་འདི་ལྟ་བུ་སྔོན་མ་བྱུང་ན། ཅི་ལས་ཀྱང་། སྨྲས་པ། རྗེའི་སྲས་དག །འཕགས་མ་ཆོས་སྦྱིན་གྱིས་སླན་ཆད་ཉོན་མོངས་པ་དེ་ལྟ་བུ་འབྱུང་བ་རམི་འགྱུར་བའི་ཆོས་བསྟན་པས་སོ། །
དེ་དག་གིས་བསམས་པ། ཆོས་སྦྱིན་ནི་མ་དུལ་བ་འདུལ་བར་མཛད་པ་ཡིན་ཏེ། བདག་ཅག་གིས་འདི་དག་གསད་པ་དང༌། བཅིང་བ་དང༌། བརྡེགས་པས་འདུལ་བར་མ་ནུས་པ་དེ་ཆོས་སྦྱིན་གྱིས་ཆོས་བསྟན་པས་བཏུལ་བས་དེས་བདག་ཅག་ལ་ཕན་བཏགས་ཀྱིས། བདག་ཅག་གིས་ཀྱང་ཆོས་སྦྱིན་ལ་བསྙེན་བཀུར་བྱའོ་སྙམ་མོ། །དེ་དག་གདུལ་བའི་དུས་ཤེས་ནས་ཆོས་བསྟན་པས་དེ་དག་གིས་ཀྱང་རྒྱུན་ཞུགས་ཐོབ་བོ། །དེ་དག་དད་ནས་སྨྲས་པ། འཕགས་མ། བདག་ཅག་གིས་ད་ནི་སྲོག་ཆགས་གྲོག་སྦུར་ཡང་མི་གསོད་ན། བདག་ཅག་ནི་མཚོན་ཚས་འཚོ་བ་ལགས་པས་ཇི་ལྟར་བགྱི། ཆོས་སྦྱིན་གྱིས་སྨྲས་པ། གཞུ་རྒྱུད་མེད་པ་དང༌། མདའ་མདེའུ་མེད་པ་དང༌། ཤིང་གི་རལ་གྲི་ཐོགས་ཤིག །དེ་དག་གིས་དེ་ལྟར་བྱས་སོ། །དེ་དག་གིས་བདེན་པ་མཐོང་ནས་རྒྱན་པོ་རྩེ་བ་དང༌། ཆང་དང༌། བུད་མེད་གཞན་དང་འགྲོགས་པ་སྤངས་པས་ཕྱུག་ཅིང་ལོངས་སྤྱོད་ཆེ་ལ་གླང་པོ་ཆེ་དང་རྟ་དག་མ་སྤྱད་པས་ཚོ་ཞིང་ཤ་ཁྲག་རྒྱས་པར་གྱུར་ཏོ། །དེའི་ཚེ་རི་བྲགས་པ་ཞིག་ལོག་ནས་དེར་དམག་བཏང་བ་རྣམས་བཅོམ་སྟེ། བློན་པོས་རྒྱལ་པོ་ལ་སྨྲས་པ། རི་བྲགས་པའི་དཔུང་སྐྱེས་ཤིང་ལྷའི་དཔུང་ཉམས་པས་ལྷ་ཉིད་དེར་མ་གཤེགས་ན་སྒྲུབ་དཀའ་བར་འགྱུར་རོ། །རྒྱལ་པོས་དྲིལ་བསྒྲགས་ཏེ། ངའི་ཡུལ་ན་མཚོན་ཆས་འཚོ་བ་ཐམས་ཅད་(༡༨༥བ)འགྲོ་བར་བྱའོ་ཞེས་རྒྱལ་པོ་དཔུང་ཚོགས་བཞི་དང་བཅས་པ་ཆས་སོ། །རལ་གྲི་མཐུ་ཅན་གྱི་ཁྲོམ་ནི་མདུན་དུ་འགྲོ་ལ། རྒྱལ་རིགས་བཟང་པོ་བའི་ཁྲོམ་ནི་ཕྱི་ནས་འོང་བ་ཡིན་པས། རྒྱལ་པོས་མདུན་དུ་འགྲོ་བ་རྣམས་ཚོ་ཟིང་གླང་པོ་ཆེ་དང་རྟ་རྣམས་ཀྱང་ཤ་ཁྲག་རྒྱས་པར་མཐོང་ལ། ཕྱི་ནས་འོང་བ་རྣམས་རྗུད་པར་མཐོང་ནས་བློན་པོ་རྣམས་ལ་དྲིས་པ། འདི་དག་ལ་དབང་ཐང་མཉམ་པར་མ་བྱིན་ནམ། བྱིན་ནོ། །དེ་དག་བོས་ནས། ཁྱེད་ཅག་ལ་དབང་ཐང་མཉམ་པར་མ་བྱིན་ནམ། ལྷ། མཉམ་པར་སྩལ་ལོ། །འོ་ན་རལ་གྲི་མཐུ་ཅན་གྱི་ཁྲོམ་འདི་འབྱོར་པ་དང༌། རྒྱལ་རིགས་བཟང་པོ་བའི་ཁྲོམ་ཁྱེད་རྒུད་པ་ཅི་ཡིན། ལྷ། བདག་ཅག་ཀྱང་གཞུ་རྒྱུད་མེད་པ་དང༌། མདའ་མདེའུ་མེད་པ་དང༌། ཤིང་གི་རལ་གྲི་ཐོགས་ཤིང༌། མཚོན་ཆ་བཙོངས་ནས་ཟོས་ན་འབྱོར་པར་འགྱུར་རོ། །
གཞན་ཡང་འདི་དག་གི་རྟ་དང་གླང་པོ་ཆེ་མ་སྤྱད་ལ། བདག་ཅག་གིས་རྟ་དང་གླང་པོ་ཆེ་སྤྱད་པས་སོ། །རྒྱལ་པོ་དེ་དག་ལ། ཁྱེད་དེ་ལྟར་གྱུར་པ་བདེན་ནམ། མད་དོ། །ཅི་ཁྱེད་ཅག་ད་དེར་ཁྲིད་ནས་རི་བྲགས་སུ་གསད་པར་འདོད་དམ། དེ་དག་གིས་སྨྲས་པ། ཅི་མཚོན་ཆས་གཡུལ་སྤྲོད་དམ། མིས་གཡུལ་སྤྲོད། རྒྱལ་པོ་ཁྲོས་ནས། མཚོན་ཆས་གཡུལ་མི་སྤྲོད་ན་ཁྱེད་ཅག་ཉིད་སོང་ལ་རི་བྲགས་པ་དེ་ཕོབ་ཅིག་ཅེས་སྨྲས་ནས་རྒྱལ་པ་དེ་ནས་ཕྱིར་ལོག་གོ །དེ་དག་གིས་ཆོས་སྦྱིན་གྱི་གན་དུ་སོང་ནས། འཕགས་མ། བདག་ཅག་རྒྱལ་པོས་དམག་ལ་བསྐོས་ན་ཇི་ལྟར་བགྱི། ཆོས་སྦྱིན་གྱིས་སྨྲས་པ། ཁྱེད་རྣམས་སོང་ཞིག །ཉེས་དམིགས་མི་འབྱུང་གི །གང་དུ་བྲང་འདེབས་པ་དེར་རྒྱུན་ཆགས་གསུམ་པ་ཐོན་ཅིག །རི་བྲགས་པ་བསྐོར་བའི་ཉི་མ་དེ་ལ། མཚན་ཐོག་ཐག་ཆོས་ཤོད། ཚངས་པ་དང༌། བརྒྱ་བྱིན་དང༌། འཇིག་རྟེན་སྐྱོང་པ་བཞི་དང༌། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང༌། གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་དང༌། ཀླུ་དགའ་བོ་དང༌། ཉེ་དགའི་མིང་སྨོས་ལ་ཡོན་བཤད་པ་གྱིས་ཤིག །དེ་དག་གིས་དེ་བཞིན་དུ་བྱས་པ་དང༌། རྒྱལ་པོ་ཆེན་པོ་རྣམ་ཐོས་ཀྱི་བུས་ཡོན་བཤད་པ་དེ་ཐོས་ནས། སུ་ཡིན་བསམས་པ་དང༌། ཆོས་ཀྱི་སྤུན་དག་གནས་མ་ཡིན་པར་བསྐོས་པ་མཐོང་ནས་ལྔས་རྩེན་ལ་སྨྲས་པ། ངའི་ཆོས་ཀྱི་སྤུན་འདི་དག་གནས་མ་ཡིན་པར་བསྐོས་ཀྱིས། སོང་ལ་རི་བྲགས་པ་དེ་ཕོབ་ལ་འདི་དག་ལ་བྱིན་ནས་སེམས་ཅན་འགའ་ལའང་མི་གནོད་པར་གྱིས་ཤིག །དེས་དེ་ལ་མཉན་ནས། རིའི་རྩེ་མོ་ལྟ་བུའི་གླང་པོ་ཆེ་དང༌། རྔ་མོ་ལྟ་བུའི་རྟ་དང༌། གཞལ་མེད་ཁང་ལྟ་བུའི་ཤིང་རྟ་དང༌། གནོད་སྦྱིན་ལྟ་བུའི་མི་སྤྲུལ་པས་རི་བྲགས་པས་མཐོང་ནས་སྐྲག་སྟེ་རལ་གྲི་མགུལ་དུ་བཏགས་ནས་བྱུང་བ་དང་དཔྱ་དང་བཅས་པ་བདས་ཏེ་རྒྱལ་པོ་ལ་ཕུལ་བས་དགའ་ནས། ཁྱེད་ཅག་ཉིད་ཁྱེར་ཅིག །དེ་དག་གིས་ཆོས་སྦྱིན་ལ་ཕུལ་བ་དང༌། དེས་(༡༨༦ན)སྨྲས་པ། ལྷ་རྣམས་ཀྱི་ནང་ནའང་ལྷ་དབུལ་པོ་ཡོད་ཀྱིས། དཀོན་མཆོག་གསུམ་ལ་མཆོད་པ་གྱིས་ཤིག །དེས་ཁྱེད་ཅག་གི་ཡུན་རིང་པོའི་དོན་དུ་འགྱུར་རོ། །དེ་དག་གིས་སངས་རྒྱས་དགེ་འདུན་དང་བཅས་པ་ཟླ་བ་གསུམ་དུ་སྤྱན་དྲངས་ནས་སྔ་དྲོ་མཆོད་པ་བྱེད། ཕྱི་དྲོ་ཆོས་ཉན་ནོ། །དུས་གཞན་ཞིག་ན་རི་བྲགས་པ་གཞན་ཞིག་ལོག་ནས་རྒྱལ་པོས་རྒྱལ་རིགས་བཟང་པོ་བའི་ཁྲོམ་ལ། ཁྱེད་ཀྱིས་རི་བྲགས་པ་དེ་ཕོབ་ཅིག །ལྷ། བདག་ཅག་རྒུད་ལ་རལ་གྲི་མཐུ་ཅན་པ་འབྱོར་ལགས་ན། དེ་དག་ལ་བཀའ་སྩོལ་ཅིག །བདག་ཅག་རེས་གཞན་ལ་མཆིའོ། །རྒྱལ་པོས་རལ་གྲི་མཐུ་ཅན་པ་ལ་བསྒོ་བས། བདག་ཅག་གི་རེས་འཁོར་རོ། །སོང་ཞིག་རེས་གཞན་ལ་མི་གཏོང་ངོ༌། །
དེ་དག་གིས་བསམས་པ། སྔར་ནི་ལྔས་རྩེན་གྱི་མཐུས་རི་བྲགས་པ་ཕབ་ཀྱི། ད་དེ་ཉིད་དུ་འཆི་དགོས་པས་འཕགས་པ་དག་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་སྤྱན་དྲངས་པ་རྣམས་ལ་ཆོས་གོས་དག་ཕུལ་ཏེ་འགྲོའོ་སྙམ་ནས་ཆོས་གོས་ཐོགས་ཏེ་དགེ་སློང་རྣམས་ལ་སྨྲས་པ། བདག་ཅག་རྒྱལ་པོས་དམག་ལ་བཏང་སྟེ། དེ་ཉིད་དུ་འགུམ་པའི་གནས་ཀྱང་ཡོད་པས་ཆོས་གོས་འདི་དག་བཞེས་སུ་གསོལ། སྟོན་པས་དབྱར་གྱི་ནང་དུ་ཆོས་གོས་བགོ་བ་བཀག་པས་མི་ལེན་ནོ། །བཞེས་ཏེ་ཞོག་ལ་དགག་དབྱེ་མཛད་ནས་བགོས་ཤིག་ཅེས་དེ་དག་གི་གནས་ཁང་དུ་བཅུག་སྟེ་སོང་ངོ༌། །དེ་དག་སོང་བ་ཁྱིམ་བདག་མགོན་མེད་ཟས་སྦྱིན་གྱིས་མཐོང་ནས། གར་འགྲོ། དམག་ལའོ། །རེས་མ་འཁོར་རམ། འཁོར་རོ། །འོ་ན་ཅིའི་ཕྱིར་འགྲོ། ལྷའི་ཞལ་ནས། སོང་ཞིག །རེས་གཞན་ལ་མི་གཏོང་ངོ་ཟེར་རོ། །ཁོ་བོས་ཞུ་ཡིས་ཡུད་ཙམ་ཞིག་སྡོད་ཅིག །དེས་རྒྱལ་པོས་གན་དུ་སོང་ནས། རལ་གྲི་མཐུ་ཅན་གྱི་ཁྲོམ་གང་དུ་བཏང༌། རི་བྲགས་པ་འབེབས་སུའོ། །གཞུ་རྒྱུད་མེད་པ་དང༌། མདའ་མདེའུ་མེད་པ་དང༌། ཤིང་གི་རལ་གྲི་ཐོགས་པས་རི་བྲགས་པ་མི་ཕོབས་པར་མི་མཁྱེན་ནམ། དེ་དག་ནི་སངས་རྒྱས་ཀྱི་སྲས་ཤ་སྟག་ཡིན་པས་སྲོག་ཆགས་གྲོག་སྦུར་ཡང་དགུམ་པའི་རྔོ་མི་ཐོག་གོ །དེའི་ཚེའང་ལྔས་རྩེན་གྱི་མཐུས་རི་བྲགས་པ་ཕབ་བོ། །དེ་དག་དེར་བཏང་ན་ཉེས་དམིགས་འབྱུང་ཞིང༌། ལྷ་ལའང་མ་ལེགས་པར་འགྱུར་རོ། །དེ་དག་སངས་རྒྱས་ཀྱི་སྲས་ཡིན་ནམ། ལྷ། དེ་ལགས་ཏེ། འཕགས་མ་ཆོས་སྦྱིན་ལ་བརྟེན་ནས་རྒྱུན་ཞུགས་ཐོབ་བོ། །འོ་ན་དེང་ཕྱིན་ཆད་དེ་དག་ལ་མི་བསྒོ་བར་འཕགས་སྐྱེས་པོ་ལ་བསྒོ་བར་བྱའོ། །དེ་ནས་རལ་གྲི་མཐུ་ཅན་པ་ཕྱིར་ལོག་པ་དང་དགེ་སློང་རྣམས་ཀྱིས་དགག་དབྱེ་བྱས་ནས། དགག་དབྱེ་བྱས་ཀྱིས། ཆོས་གོས་དག་བྱིན་ཅིག །སྔར་ཕུལ་བ་དེ་དག་བཞེས་ཤིག །དགེ་སློང་རྣམས་སོང་ནས་སྒོ་ཕྱེ་བ་དང༌། ས་ཕྱོགས་དེ་སྣུམ་ཞིང་མངར་བས་ཆོས་གོས་ལ་སྲིལ་དག་གིས་རྨུགས་ཏེ་རྡུལ་དུ་བརླགས་པའི་སྐབས་དེ་གསོལ་བས། གོས་(༡༨༦བ)སྦེད་པའི་དགེ་སློང་བསྐོ་བར་བྱའོ་ཞེས་གསུངས་ནས། དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་སྟོན་ཟླ་ཐ་ཆུང་ཉར་ཞག་བཅུས་མ་ཚང་བ་ཚུན་ཆད་དུ་བརྟད་པ་ལས་བྱུང་བའི་གོས་ཤིག་རྙེད་ལ་འདོད་ན་བླང་བར་བྱའོ། །བླངས་ནས་གོས་བྱིན་པའི་དུས་ཀྱི་བར་དུ་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །
བསྔོས་བསྒྱུར་གྱི་སྤང་བ་ནི། སྟོན་པ་ཤཱཀྱའི་གྲོང་རྡལ་ཝ་ཚོངས་ཅན་ན་བཞུགས་སོ། །ཁྱིམ་བདག་ཅིག་གིས་གཙུག་ལག་ཁང་བརྩིགས་ནས་སྒྲ་གཅན་ཟིན་ལ་གང་ཟག་གིར་ཕུལ་ལོ། །སྒྲ་གཅན་ཟིན་ལྗོངས་རྒྱུར་སོང་བ་དང་ཁྱིམ་བདག་དེས་ཐོས་ནས་གཙུག་ལག་ཁང་དེ་དགེ་འདུན་ལ་ཕུལ་ལོ། །སྒྲ་གཅན་ཟིན་གྱིས་ལྗོངས་བརྒྱུས་ནས་འོངས་པའི་ཚེ། གཙུག་ལག་ཁང་དེ་དགེ་འདུན་ལ་ཕུལ་ལོ་ཞེས་ཐོས་ནས། སྟོན་པའི་དྲུང་དུ་སོང་སྟེ། བདག་གི་གཙུག་ལག་ཁང་དགེ་འདུན་ལ་ཕུལ་ན་ཇི་ལྟར་བགྱི། ཁྱོད་སོང་ལ་ཁྱིམ་བདག་དེ་ལ། ཁོ་བོའི་ལུས་སམ་ངག་ལ་སྨོད་པར་མི་བྱེད་དམ་ཞེས་སྨྲོས་ཤིག །དེས་སྟོན་པའི་བཀའ་མཉན་ནས་ཁྱིམ་བདག་དེ་ལ། ཁྱོད་ཁོ་བོའི་ལུས་སམ་གང་ལ་སྨོད་པར་མི་བྱེད་དམ། བདག་ཁྱོད་ཀྱི་སྐུའམ་གསུང་ལ་ཅུང་ཟད་ཀྱང་མི་སྨོད་དོ། །དེ་སྟོན་པ་ལ་གསོལ་བས་དགེ་འདུན་ཐམས་ཅད་དཔོང་སའི་ཁང་པར་བསྡུས་ནས། དགེ་སློང་དག །གང་གིས་གང་ཟག་གཅིག་ལ་བྱིན་ནས་གཞན་ཞིག་ལ་སྦྱིན་པ་ནི་ཆོས་དང་ལྡན་པའི་སྦྱིན་པ་མིན་ཞིང༌། ཆོས་དང་ལྡན་པའི་ལེན་པ་མིན་ལ། ལོངས་སྤྱོད་དུ་རུང་བ་མ་ཡིན་ནོ། །གཞན་གཉིས་སམ། མང་པོའམ། དགེ་འདུན་ལ་སྦྱིན་པའང་ཆོས་དང་ལྡན་པའི་སྦྱིན་པ་མིན་ཞེས་སོགས་གསུངས་ནས། དེ་ལྟ་བས་ན་སྔ་མ་ནི་སྦྱིན་པ་ཡིན་ལ། ཕྱི་མ་ནི་མ་ཡིན་ནོ། །རྒྱལ་པོ་ནི་ས་གཞི་ལ་དབང༌། བདག་པོ་ནི་གནས་མལ་ལ་དབང༌། དགེ་སློང་ནི་ལྷུང་བཟེད་དང་ཆོས་གོས་ལ་དབང་ངོ༌། །སྦྱིན་པ་པོ་དང་སྦྱིན་བདག་ནི་རང་གི་སྦྱིན་པར་བྱ་བའི་ཆོས་འདུ་བར་བྱ་བར་རུང་གི །གཞན་ལ་སྦྱིན་དུ་མི་རུང་ངོ༌། །
དགེ་སློང་དག །སྒྲ་གཅན་ཟིན་ལ་གཙུག་ལག་ཁང་དེ་ཕྱིར་བྱིན་ཅིག །དེ་དག་གིས་དེ་ལ་གཙུག་ལག་ཁང་དེ་ཕྱིར་བྱིན་ནོ། །འདི་ནི་རེ་ཞིག་བྱུང་བ་ཡིན་གྱི། བསླབ་པའི་གཞི་འཆའ་བར་ནི་མི་མཛད་དོ། །སྟོན་པ་མཉན་ཡོད་ནའོ། །བསོད་སྙོམས་པ་ཞིག་གིས་ཁྱིམ་བདག་ཅིག་སྐྱབས་འགྲོ་དང་བསླབ་པའི་གཞི་ལ་བཀོད་ནས། ཕྱིས་རྫས་ལས་བྱུང་བའི་བསོད་ནམས་བྱ་བའི་གཞི་བདུན་གྱི་བསྔགས་པ་བརྗོད་པས། བདག་གིས་ཀྱང་གཅིག་བྱའོ། །གྱིས་ཤིག །གང་བགྱི། དགེ་སློང་གི་དགེ་འདུན་ལ་མཆོད་སྟོན་གསོལ་ཅིག །དེ་བཞིན་བགྱིའོ། །ན་བཟའ་དབུལ་བ་ཅུང་ཟད་ཡོད་དམ། བདག་ལོངས་སྤྱོད་སྲབ་མོད། རས་ཟུང་གཅིག་དབུལ་ལོ། །འཕགས་པས་བདག་(༡༨༧ན)གི་མིང་གིས་སང་སྟོན་པ་འཁོར་བཅས་གདུགས་ཚོད་ལ་སྤྱན་དྲང་དུ་གསོལ། དེས་ཚོགས་པའི་དུས་སུ་གསོལ་བ་དང༌། དགེ་སློང་རྣམས་ན་རེ། ཡོན་ཡོད་དམ་མེད། དེ་ལོངས་སྤྱོད་སྲབ་པས་རས་ཟུང་གཅིག་དབུལ་ལོ། །ཉེ་དགས་ཐོས་ནས། རས་དེ་ཆེན་པོ་ལ་འོས་པ་ཞིག་འབྱུང་བས་དེ་མ་ཕྲོགས་ན་ཉེ་དགའི་མིང་མི་གཟུང་ངོ་སྙམ་ནས། དེའི་ཕྱི་དེ་ཉིན་བར་ཁྱིམ་བདག་དེའི་ཁྱིམ་དུ་སོང་ནས། ཁྱིམ་བདག །ཅི་བྱེད། མཆོད་སྟོན་སྦྱོར་རོ། །གོས་སྦྱིན་པ་ཅུང་ཟད་ཡོད་དམ། རས་ཟུང་གཅིག་དབུལ་ལོ། །རས་ཡུག་དེ་ཅི་འདྲ་བལྟའོ། །དེས་བསྟན་པ་དང་བཟང་བར་མཐོང་ནས། ཁྱོད་ལ་བཏང་བའི་བསོད་ནམས་ཡོད་ཀྱི། ལོངས་སྤྱད་པའི་བསོད་ནམས་ནི་མེད་དོ། །སྟོན་པས། ཟས་ཀྱི་རྙེད་པ་ནི་པུ་ས་ལའི་འདབ་མས་ཀྱང་བགོ་བར་བྱ། གོས་ཀྱི་རྙེད་པ་ནི་མར་མེའི་སྙིང་པོར་རུང་བས་ཀྱང་བགོ་བར་བྱའོ་ཞེས་གསུངས་ན། མི་འགྱེད་ན་ལོངས་སྤྱོད་པར་མི་འགྱུར་རོ། །འོ་ན་ཇི་ལྟར་བྱ། ཤཱཀྱའི་རིགས་ལས་རབ་ཏུ་བྱུང་བ། སྡེ་སྣོད་གསུམ་པ། ཆོས་སྒྲོག་པ། རིག་པ་དང་གྲོལ་བར་སྨྲ་བའི་སྤོབས་པ་ཅན་ལ་རས་འདི་བསྐོན་ན་བཏང་བ་དང་ལོངས་སྤྱད་པའི་བསོད་ནམས་སུ་འགྱུར་རོ། །
དེས་སྨྲས་པ། དེ་ལྟ་བུ་སུ་ཡིན། ཁོ་བོ་ཡིན་ནོ། །དེས་དེ་ལ་ཕུལ་བ་དང༌། ཉེ་དགས་སྨྲས་པ། སྦྱིན་པ་སྦྱིན་ཡང་མི་ཤེས་སམ། སངས་རྒྱས་ལ་སོགས་པ་མཆོད་སྟོན་གསོལ་བའི་ཚེ། རྒན་པའི་མཐའ་ལོགས་སུ་རྗེས་སུ་ཡི་རང་དུ་ཆུག་ལ་བདག་ལ་བྱིན་ཅིག །དེས་དེ་ལྟར་བྱས་ནས་ཉེ་དགའ་ལ་བྱིན་ནོ། །དགེ་སློང་རྣམས་ཀྱིས་དགེ་སྐོས་ལ་སྨྲས་པ། ཉེ་དགའ་ལས་རས་ཟུང་དེ་ལོངས་ཤིག །དགེ་སྐོས་ཀྱིས་ཉེ་དགའ་ལ། རས་ཟུང་དེ་འོན་ཅིག །ཅི་གཙུག་ལག་ཁང་དུ་ཁྱེར་ཏེ་སྦྱིན་ནམ། མིན་ཏེ། འདི་དགེ་འདུན་ལ་ཕུལ་བ་ཡིན་ནོ། །ཉེ་དགས་སྨྲས་པ། ཁྱོད་རང་གི་ལྷུང་བཟེད་དང་ཆོས་གོས་དགེ་འདུན་ལ་ཕུལ་ཅིག །འདི་ཁོ་བོ་ལ་བྱིན་པ་ཡིན་ནོ། །སྟོན་པས་ཡོན་བཤད་ནས་གཤེགས་པའི་ཚེ་བསོད་སྙོམས་པ་དེས། ཁྱིམ་བདག །ཁྱོད་ཀྱིས་གཞན་དུ་འབྲུག་བསྒྲགས་ལ། གཞན་དུ་ཆར་ཕབ་བོ། །ཉེ་དགའ་དེ་སྐད་ཟེར་བས་བདག་གིས་དེ་བཞིན་དུ་བགྱིས་སོ། །བསོད་སྙོམས་པ་དེ་གཙུག་ལག་ཁང་དུ་སོང་ནས་འཕྱ་བའི་སྐབས་དེ་གསོལ་བ་དང༌། ཉེ་དགའ། ཁྱོད་དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་གང་ཟག་ལ་བསྔོར་འཇུག་པ་བདེན་ནམ། མད་དོ། །ཡང་དགེ་སློང་གང་དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་གང་ཟག་བདག་ལ་སྒྱུར་དུ་འཇུག་ན་སྤང་བའི་ལྟུང་བྱེད་དོ་ཞེས་པ་ནས། གཡར་པོར་སྦྱིན་དུ་རུང་ངོ༌ཞེས་པའི་བར་གསུངས་སོ། །མཚམས་ཀྱི་ཕྱི་རོལ་ཏུ་སོང་སྟེ་ཞེས་པ་ནས། བརྐུས་པ་ཉིད་ཡིན་ནོ་ཞེས་པའི་བར་བྲམ་ཟེའི་བུ་མོའི་ཞུས་པ་ལས་འབྱུང་ངོ༌། །ཁྱིམ་བདག་ཅིག་གིས་གཙུག་ལག་ཁང་ཡོ་བྱད་དང་ལྡན་པ་ཞིག་དགེ་འདུན་ལ་ཕུལ་ལོ། །
རེ་(༡༨༧བ)ཞིག་ན་ཡོན་བདག་དེ་རྒྱལ་པོའི་ཕོ་བྲང་དུ་བཟུང་བ་དང༌། དེ་ཐོས་ནས་དགེ་སློང་རྣམས་ཀྱིས་གཙུག་ལག་ཁང་དེ་བོར་ཏེ་བྲོས་པས་དཀོན་མཆོག་གསུམ་གྱི་དཀོན་རྣམས་རྐུན་པོས་བརྐུས་སོ། །ཁྱིམ་བདག་དེ་ཐོངས་པ་དང་དགེ་སློང་རྣམས་ཀྱིས་དེའི་དྲུང་དུ་སོང་བ་དང༌། ཁྱེད་རྣམས་ཅི་སྟེ་བྲོས། འདིའི་དོན་ནོ། །བདག་བཟུང་ཡང་ཉེ་དུ་རྣམས་མ་བཟུང་བས་དེས་ཡོ་བྱད་མི་སྦྱོར་རམ། ཅང་མི་སྨྲ་བའི་སྐབས་དེ་གསོལ་བས། གྱ་ཚོམ་དུ་གཙུག་ལག་ཁང་དོར་བར་མི་བྱའོ་ཞེས་པ་ནས། གཉུག་མར་གནས་ན་སྦྱིན་པར་བྱའོ་ཞེས་པའི་བར་གསུངས། མཉན་ཡོད་དུ་ཁྱིམ་བདག་ཅིག་གིས་ཡོ་བྱད་ཐམས་ཅད་དང་ལྡན་པའི་གཙུག་ལག་ཁང་ཞིག་བརྩིགས་ནས་དགེ་སློང་འཁོར་མང་པོ་དང་ལྡན་པ་ཞིག་ལ་ཕུལ་ལོ། །དགེ་སློང་དེས་དེར་འཁོར་དྲུག་ཅུ་དང་བཅས་པ་དབྱར་གནས་སོ། །དབྱར་གནས་ཐོན་ནས་དེ་དག་ཕྱོགས་ཕྱོགས་སུ་འགྲོ་བ་ན། འདིར་ཁྱིམ་བདག་གིས་མགྲོན་དུ་བོས་ཀྱིས་འཁོད་ཅིག །མཁན་པོ། འགྲོའོ། །འོ་ན་ཟས་ཟོ་ལ་སོང་ཞིག །ཟས་དང་ཡོ་བྱད་གཞན་དུ་ཁྱེར་ཏེ་བཟའོ། །དེ་ལྟར་གྱིས་ཤིག །དེ་རྣམས་ཀྱིས་ཟས་དང་ཡོ་བྱད་ཐམས་ཅད་ཁྱེར་བས་གཙུག་ལག་ཁང་གི་དེ་ཡོ་བྱད་ཀྱིས་བྲེལ་བར་གྱུར་ནས། ཁྱིམ་བདག་གི་གན་དུ་སོང་སྟེ། ཡོ་བྱད་ཟད་དོ། །དེར་མང་དུ་ཕུལ་ན་ཅིའི་ཕྱིར་ཟད། རྒྱས་པར་བསྙད་པ་དང༌། དེར་བཞུགས་པའི་ཕྱིར་ཕུལ་ན་ཅིའི་ཕྱིར་གཞན་དུ་གནས་ཤིང་གཞན་དུ་སྤྱོད་ཅེས་འཕྱ་བའི་སྐབས་དེ་གསོལ་བས། གནས་གཞན་གྱི་རྫས་གཞན་དུ་མི་སྦྱིན་ནོ་ཞེས་སོགས་གསུངས་སོ། །བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་དགེ་སློང་མཆོད་རྟེན་ལ་ཕྱག་འཚལ་དུ་འགྲོ་བ་ལ་གདུགས་དང་རྒྱལ་མཚན་ལ་སོགས་པ་བསྐུར་སར་མ་འཕྲོད་ནས་ཞུས་པ། བཞི་པོ་མ་གཏོགས་པ་གཞན་ལ་བསྔོས་པ་གཞན་ལ་བསྒྱུར་དུ་རུང་ལ། བྱང་ཆུབ་ཆེན་པོ་དང༌། ཆོས་ཀྱི་འཁོར་ལོ་དང༌། ཆོ་འཕྲུལ་ཆེན་པོ་དང༌། ལྷ་ལས་བབས་པ་རྣམས་ཀྱི་དེ་དག་ལས་གཞན་པ་ནི་མ་གཏོགས་སོ། །
གསོག་འཇོག་གི་སྤང་བ་ནི། སྟོན་པ་འོད་མའི་ཚལ་ནའོ། །པི་ལིན་དའི་ལྷན་ཅིག་གནས་པ་དང་ཉེ་གནས་རྣམས་སྨན་ལག་ཉར་བླངས་པ་བྱིན་ལེན་བྱས་ནས་ཟས་ཀྱི་ཕྱེ་མ་དང་འདྲེས་པ་རང་གི་རྒྱུད་ཀྱིས་མྱགས་པ་རྣམ་པར་དབྱེར་མི་མངོན་པ་དུས་དང་དུས་མིན་པར་ཟ་བ་ལ་དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས་ཏེ། པི་ལིན་དའི་བུའི་ལྷན་ཅིག་གནས་པ་དང་ཉེ་གནས་རྣམས་ལ། དེ་ལྟར་བྱས་པ་བདེན་ནམ། མད་དོ། །གསོ་དཀའ་བ་དང༌། དགང་དཀའ་བ་དང༌། འདོད་པ་ཆེ་བ་དང༌། ཆོག་མི་ཤེས་པ་སྨད། གསོ་སླ་བ་དང༌། དགང་སླ་བ་དང༌། འདོད་པ་ཆུང་བ་དང༌། ཆོག་ཤེས་པ་དང༌། དྲོད་རིག་པའི་བསྔགས་པ་བརྗོད་ནས། སྟོན་པས་དགེ་སློང་ན་བ་རྣམས་ལ་ཕན་པ་སོ་སོར་བསྟེན་པར་བྱ་བའི་སྨན་གང་དག་བཀའ་སྩལ་པ་འདི་ལྟ་སྟེ། ཞུན་མར་དང༌། འབྲུ་མར་དང༌། སྦྲང་རྩི་དང༌། (༡༨༨ན)བུ་རམ་གྱི་དབུ་བ་དེ་དག་ལས་དགེ་སློང་ན་བས་འདོད་ན་རང་གིས་ཞག་བདུན་བར་བྱིན་གྱིས་བརླབས་ཏེ། གསོག་འཇོག་གི་ཡོངས་སུ་ལོངས་སྤྱོད་པས་ཡོངས་སུ་ལོངས་སྤྱད་པར་བྱའོ། །དེ་ལས་འདས་པར་ཡོངས་སུ་ལོངས་སྤྱོད་པར་བྱེད་ན་སྤང་བའི་ལྟུང་བྱེད་དོ། །

༤༽ ལྟུང་བྱེད་འབའ་ཞིག་པ་ལ་བཅུ་ཚན་དགུ་ལས།
བཅུ་ཚན་དང་པོ།

ལྟུང་བྱེད་འབའ་ཞིག་པ་ལ་བཅུ་ཚན་དགུ་ལས། དང་པོ་ནི། སྡོམ་ལས། བརྫུན་སྐྱོན་དགེ་སློང་ཕྲ་མ་དང༌། །སྐྱོ་སྔོགས་བྱེད་དང་སྟོན་པ་དང༌། །འདོན་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། །བརྫུན་སྨྲ་བའི་ལྟུང་བྱེད་ནི། སྟོན་པ་འོད་མའི་ཚལ་ནའོ། །སྒྲ་གཅན་ཟིན་རྒྱལ་པོའི་ཁབ་ན་ཆུ་དྲོན་གྱི་ཀུན་དགའ་ར་བ་ན་འདུག་པ་ལ་བྲམ་ཟེ་དང་ཁྱིམ་བདག་དད་པ་ཅན་དག་འོངས་ནས་སྟོན་པ་གང་ན་བཞུགས་ཞེས་དྲིས་པས། སྟོན་པ་འོད་མའི་ཚལ་ན་བཞུགས་ན། བྱ་རྒོད་ཕུང་པོ་ལ་བཞུགས་ཟེར། དེ་ན་བཞུགས་ན། འོད་མའི་ཚལ་ན་བཞུགས་ཟེར། བིབ་པ་ལའི་ཕུག་ན་བཞུགས་ན། སྡེ་ཅན་མའི་ཕུག་ན་བཞུགས་ཟེར། དེ་ན་བཞུགས་ན་བིབ་པ་ལའི་ཕུག་ན་བཞུགས་ཟེར་ནས། དེ་དག་གིས་སྟོན་པ་བཙལ་ཡང་མ་རྙེད་པས་ལུས་ངལ་བ་དང་དུབ་པས་སྒྲ་གཅན་ཟིན་གྱི་གན་དུ་སོང་བ་དང༌། སྒྲ་གཅན་ཟིན་གྱིས་དེ་དག་ལ་སྨྲས་པ། སྟོན་པ་མཐོང་ངམ། མ་མཐོང་ངོ༌། །དེས་དགོད་པ་དང༌། དེ་དག་གིས་སྨྲས་པ། བདག་ཅག་ལ་བསམས་བཞིན་དུ་མཐོ་མ་བཙམས་སམ། དེ་ཡིན་ནོ། །དེ་དག་སྨོད་པའི་སྐབས་དེ་གསོལ་བ་དང༌། དེ་ནས་སྟོན་པས་ཆུ་དྲོན་གྱི་ཀུན་དགའ་ར་བར་བྱོན་ནས་ཞབས་བསིལ་ཏེ་ཆུ་སྣོད་དུ་ཆུའི་ལྷག་མ་ཉུང་ངུ་ཞིག་བཞག་ནས། སྒྲ་གཅན་ཟིན་ལ་བཀའ་སྩལ་པ། ངས་ཆུ་སྣོད་དུ་ཆུའི་ལྷག་མ་ཉུང་ངུ་ཞིག་བཞག་པ་ཁྱོད་ཀྱིས་མཐོང་ངམ། བཙུན་པ། མཐོང་ངོ༌། །དེ་བཞིན་དུ་ང་ནི་མི་གཏི་མུག་ཅན་ལ་ལ་ཤེས་བཞིན་དུ་བརྫུན་སྨྲ་ཞིང་ངོ་ཚ་མེད་པ། འཛེམ་པ་མེད་པ། འགྱོད་པ་མེད་པ་དེའི་དགེ་སྦྱོང་གི་ཚུལ་ཆུང་བར་སྨྲའོ། །
དེ་ནས་ཆུའི་ལྷག་མ་ཉུང་ངུ་དེ་ས་ལ་ཕོ་ནས། ངས་ཆུའི་ལྷག་མ་ཉུང་ངུ་ས་ལ་ཕོ་བ་མཐོང་ངམ། མཐོང་ངོ༌། །དེ་བཞིན་དུ་ང་ནི་མི་གཏི་མུག་ཅན་ལ་ལ་ཤེས་བཞིན་དུ་བརྫུན་སྨྲ་བ་དེའི་དགེ་སྦྱོང་གི་ཚུལ་ཕོ་བར་སྨྲའོ། །དེ་ནས་ཆུ་སྣོད་དེ་ས་ལ་བཟུར་ནས། ངས་ཆུ་སྣོད་ས་ལ་བཟུར་བ་ཁྱོད་ཀྱིས་མཐོང་ངམ། །མཐོང་ངོ༌། །དེ་བཞིན་དུ་ང་མི་གཏི་མུག་ཅན་ཤེས་བཞིན་དུ་བརྫུན་སྨྲ་བ་དེའི་དགེ་སྦྱོང་གི་ཚུལ་བཟུར་བར་སྨྲའོ། །དེ་ནས་ཆུ་སྣོད་དེ་ས་ལ་ཁ་ཕུབ་ནས། ངས་ཆུ་སྣོད་ས་ལ་ཁ་ཕུབ་པ་མཐོང་ངམ། མཐོང་ངོ༌། །དེ་བཞིན་དུ་ང་ན་མི་གཏི་མུག་ཅན་ཤེས་བཞིན་དུ་བརྫུན་དུ་སྨྲ་བ་དེའི་དགེ་སྦྱོང་གི་ཚུལ་ཁ་ཕུབ་པར་སྨྲའོ། །དཔེར་ན། རྒྱལ་པོའི་གླང་པོ་ཆེ་དྲེགས་པ་མ་ཏང་ཀ་ནས་བྱུང་བ་སྣས་ལས་བྱེད་པས་མི་བྱ་བ་ཅི་ཡང་མེད་པ་བཞིན་དུ། ཤེས་བཞིན་དུ་བརྫུན་སྨྲ་བས་སྡིག་པའི་ལས་མི་བྱ་བ་ཅུང་ཟད་ཀྱང་མེད་དོ། །ལུས་ཅན་(༡༨༨བ)བརྫུན་དུ་སྨྲ་བ་ཡིས། །ཆོས་གཅིག་ལས་ནི་འདས་གྱུར་ཅིང༌། །འཇིག་རྟེན་ཕ་རོལ་བྲལ་བ་ཡིས། །འདི་ལ་སྡིག་པ་མི་བྱ་མེད། །ལྕགས་གོང་མེ་ལྕེ་འདྲ་བ་དག །ཟོས་པར་གྱུར་པ་མཆོག་ཡིན་གྱི། །ཚུལ་འཆལ་ཡང་དག་མི་སྡོམ་པས། །ཡུལ་འཁོར་བསོད་སྙོམས་ཟ་བ་མིན། །ཞེས་སོགས་རྒྱ་ཆེར་གསུངས་ནས། ཡང༌། སངས་རྒྱས་བསྟན་པ་དྲན་བྱེད་ན། །ལུས་ཀྱི་ལས་དང་ངག་ལས་དང༌། །ཡིད་ཀྱི་ལས་ལ་མང་དུ་ནི། །སོ་སོར་རྟོགས་ཤིག་སྒྲ་གཅན་ཟིན། །འདི་ནི་དགེ་སྦྱོང་ལས་ཡིན་ཏེ། །འདི་ལ་སློབས་ཤིག་སྒྲ་གཅན་ཟིན། །འདི་ལ་ཁྱོད་ནི་སློབ་བྱེད་ན། །དགེ་བར་འགྱུར་ཞིང་སྡིག་མེད་ཡིན། །ཞེས་གསུངས་ཏེ། འདི་ནི་བྱུང་བ་ཡིན་གྱི་བསླབ་པ་བཅས་པ་ནི་མེད་དོ། །སྟོན་པ་མཉན་ཡོད་ནའོ། མཉན་ཡོད་ན་དགེ་སློང་ལག་བརྒྱུད་ཅེས་བྱ་བ་ཤིན་ཏུ་སྨྲ་བ་དང༌། གཞན་གྱི་སྨྲ་བའི་རྗེས་སུ་བརྩོན་པ་ཞིག་གནས་སོ། །
དེ་ནས་བྲམ་ཟེའི་ཁྱེའུ་གསང་ཚིག་འདོད་པ་ཞིག་ཡུལ་དབུས་ནས་ལྷོ་ལམ་དུ་སོང་ངོ་ཞེས་བྱ་བ་ནས། ཁ་ཅིག་སློབ་མ་ཉིད་དུ་བྱེད་ཅིང༌། མཐར་གྱིས་མཉན་ཡོད་དུ་ཕྱིན་པ་ན། བྲམ་ཟེ་འཁོར་ཤིན་ཏུ་མང་བ་ཞིག་གིས། ལྷོ་ལམ་ན་བྲམ་ཟེ་རྒོལ་བ་ཞིག་འོང་ངོ་ཞེས་ཐོས་ནས་རང་གི་འཁོར་རྣམས་ལ། རིག་པའི་གནས་དེ་དང་དེ་ལ་དྲིས་ལ་ཚར་བཅད་ནུས་ན་ལེགས། མ་ནུས་ན་དགེ་སློང་རྣམས་ཀྱི་ནང་དུ་གཏང་བར་བྱ་སྟེ། དགེ་སློང་རྣམས་ཀྱིས་ཚར་བཅད་ན། ལྷོ་ལམ་ནས་རྒོལ་བ་ཞིག་འོངས་པ་དེ་མཉན་ཡོད་པས་ཚར་བཅད་དོ་ཞེས་གྲགས་པ་འབྱུང་ལ། དགེ་སློང་རྣམས་ཚར་བཅད་ན་བྲམ་ཟེ་མཆོག་ཏུ་འགྱུར་རོ། །ལྷོ་ལམ་ནས་འོངས་པའི་བྲམ་ཟེ་དེས་ནངས་པར་སྔར་ལངས་ཏེ་གོས་ཀྱིས་གློ་དཀྲིས་ནས་རྩྭའི་སྒྲོན་མ་ཐོགས་ཏེ་མཉན་ཡོད་དུ་ཞུགས་པ་དང༌། མཉན་ཡོད་པའི་བྲམ་ཟེའི་ཁྱེའུ་རྣམས་ཀྱིས་སྨྲས་པ། ཅིའི་ཕྱིར་གོས་ཀྱིས་གློ་དཀྲིས། ཁོ་བོས་ཐོས་པ་བཟུང་བ་གློ་མི་རྡོལ་བའི་ཕྱིར་རོ། །དེ་ལྟ་ན་ཟངས་མའི་གླེགས་བུས་དཀྲི་བར་རིགས་སོ། །ཅིའི་ཕྱིར་རྩྭའི་སྒྲོན་མ་ཐོགས། མི་ཤེས་པའི་མུན་པ་ཅན་གྱི་ནང་དུ་ཤེས་པའི་སྒྲོན་མས་འཇུག་པའོ། །དེས་དེ་དག་ཚར་བཅད་པ་དང༌། ཅི་རང་ཕྱོགས་ཁོ་ན་འཇོམས་སམ། དེས་སྨྲས་པ། ཁོ་བོ་ལ་གཞན་ཕྱོགས་སུ་ཡོད། དགེ་སློང་དག་ཡོད་དོ། །དེ་དག་གང་ན་ཡོད། རྒྱལ་བྱེད་ཚལ་ནའོ། །དེ་དག་གི་སྨྲ་བའི་ཁྱུ་མཆོག་གང་ཡིན། ཐམས་ཅད་ཀྱང་མཁས་པ་ལགས་མོད། འོན་ཀྱང་དེ་དག་གི་སྨྲ་བའི་ཁྱུ་མཆོག་དགེ་སྦྱོང་ལག་བརྒྱུད་ཡིན་ནོ། །དེ་གང་ན་འདུག །རྒྱལ་བྱེད་ཚལ་ནའོ། །དེ་གཏམ་འདྲེ་བ་ན་ལག་བརྒྱུད་ཀྱང་དེར་ཕྱིན་ནས། ལག་བརྒྱུད་བསྟན་པས་དེས་མཐོང་ནས། འདི་ལ་སློབ་དཔོན་གྱི་མཚན་ཡོད་པས་འདི་ནི་སྨྲ་བའི་ཁྱུ་མཆོག་ཡིན་ནོ་ཞེས་དེའི་གན་དུ་སོང་ནས། ཀྱེ་དགེ་སློང༌། བདག་གིས་བླ་མ་ལས་ཡི་གེ་ཅུང་ཟད་བླངས་པ་ཞིག་ཡོད་དེ། ཁྱོད་དང་(༡༨༩ན)ལྷན་ཅིག་གཏམ་བྱ་བར་འདོད་དོ། །བྲམ་ཟེ། ལེགས་ཏེ། ཁོ་བོ་ལའང་རྒོལ་བའི་བསྟན་བཅོས་རྣོན་པོར་བྱ་སྙམ་པའི་བློ་སྐྱེས་ན། ཁྱོད་ཀྱང་འདིར་འོངས་པས་དེ་བཞིན་དུ་བྱའོ། །ཉི་མ་གང་ལ་བྱ། སང་བྱའོ། །ཕྱོགས་གང་དུ། སྐྱེད་མོས་ཚལ་ག་གེ་མོ་ཞིག་ཏུའོ་ཞེས་སྨྲས་ནས་སོང་ངོ༌། །
དེ་ནས་བྲམ་ཟེ་དེ། ཁོ་འདི་སྐད་ཟེར་ན་བདག་འདི་སྐད་ཟེར་རོ་སྙམ་དུ་སེམས་པས་མཚན་འདས་སོ། །ལག་བརྒྱུད་ཀྱི་བསམ་པ་ལ། བདག་གིས་བྲམ་དེ་ཚར་བཅད་ཀྱང་སྒོ་འཕར་བརྒྱ་འདས་ཏེ་ལྟོ་དགང་དགོས་ལ། བྲམ་ཟེས་ཚར་བཅད་ན་ནི་བདག་གི་གྲགས་པའི་ཕྲེང་བ་མེད་པར་འགྱུར་རོ་སྙམ་ནས་མ་སོང་ངོ༌། །བྲམ་ཟེས་སྐྱེད་མོས་ཚལ་དུ་བསྒུགས་ཀྱང་མ་འོངས་པས། མཉན་ཡོད་དུ་ཞུགས་པ་དང༌། ལག་བརྒྱུད་ཀྱང་རྩོད་པའི་དུས་ཡོལ་ནས་མཉན་ཡོད་དུ་བསོད་སྙོམས་ལ་ཞུགས་པ་བྲམ་ཟེ་དེས་མཐོང་ནས་སྨྲས་པ། ཁྱོད་སྐྱེད་མོས་ཚལ་དེར་མ་འོངས་སོ། །ཁོ་བོ་སྐྱེད་མོས་ཚལ་གང་དུ་བོས་ནས་མ་འོངས། སང་སྐྱེད་མོས་ཚལ་ག་གེ་མོ་ཞིག་ཏུའོ་ཞེས་མ་སྨྲས་སམ། བྲམ་ཟེ། ཁོ་བོས་ཡེ་བརྗེད་དོ། །དེའི་བསམ་པ་ལ། བདག་ནི་མཚན་ཐོག་ཐག་ཕྱོགས་དང་གཞན་གྱི་ཕྱོགས་སེམས་པས་ནམ་ནངས་ན། འདི་ནི། ཁོ་བོས་ཡེ་བརྗེད་དོ་ཞེར་ཟེར་བ་ལས་ན། ཡང་ན་བླུན་པོ་ཞིག་གོ །ཡང་ན་ཤེས་པ་མི་འཁྲུག་པ་ཞིག་གོ་སྙམ་ནས་སྨྲས་པ། དགེ་སློང༌། སང་བྱའོ། །དེ་ལྟར་བྱའོ། །བྲམ་ཟེ་དེ་ཕྱི་དེ་ཉིན་པར་སྐྱེད་མོས་ཚལ་དེར་འོངས་ནས་ཡུན་རིང་དུ་བསྒུགས་ཀྱང་དེ་མ་འོངས་པས་མཉན་ཡོད་དུ་ཞུགས་པ་དང༌། ལག་བརྒྱུད་ཀྱང་བསོད་སྙོམས་ལ་འོངས་པ་མཐོང་ནས། དགེ་སློང༌། ཁྱོད་སྐྱེད་མོས་ཚལ་དེར་མ་འོངས་སོ། །ལགས་བརྒྱུད་ཀྱིས་སྨྲས་པ། ཅི་ཁོ་བོའི་བྱ་བ་དེ་ཁོ་ནར་ཟད་དམ། ཁོ་བོས་སྟོན་པ་བསྙེན་བཀུར་བ་དང༌། ཐོས་པ་གཟུང་བ་དང༌། ཚོགས་ཀློག་ཏུ་གཞུག་པ་དང༌། ཁྱིམ་པ་རྣམས་ལའང་ཆོས་བསྟན་དགོས་སོ། །བྲམ་ཟེས་སྨྲས་པ། ཁྱོད་ཆེད་དུ་བསམས་ནས་མཐོ་མི་འཚམ་མམ། དེ་ཡིན་ནོ། །མུ་སྟེགས་ཅན་རྣམས། དགེ་སློང་དག་བརྫུན་སྨྲའོ་ཞེས་འཕྱ་བའི་སྐབས་དེ་གསོལ་བ་དང༌། བྱུང་བ་འདི་དང་སོགས་ཏེ། ཤེས་བཞིན་དུ་བརྫུན་སྨྲ་ན་ལྟུང་བྱེད་དོ། །དྲུག་སྡེ་རྣམས་གང་དང་གང་དགོས་པར་དཀོན་མཆོག་དང་མཁན་པོ་ལ་མནའ་འདོར་བས། ཁྱིམ་པ་རྣམས། བདག་ཅག་ཁྱིམ་པ་ལགས་ཀྱང་ཁྱིམ་པ་ལ་མནའ་མི་འདོར་ན། རབ་ཏུ་བྱུང་བ་མནའ་འདོར་བར་འཚམ་པ་མ་ཡིན་ནོ་ཞེས་འཕྱ་བའི་སྐབས་དེ་གསོལ་བས། རབ་ཏུ་བྱུང་བ་ནི་བདེན་པའི་བསམ་པ་ཅན་ཡིན་པས་མནའ་འདོར་བར་མི་བྱའོ། །
སྐྱོན་ནས་སྨྲ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །དྲུག་སྡེས་དགེ་སློང་རྣམས་ལ། ཞར་བ་དང༌། ཐེང་པོ་དང༌། སྨད་འཆལ་སོགས་སྐྱོན་ནས་སྨྲས་པས། དེ་དག་སྤ་བཀོང་སེམས་ཞུམ་ནས་ཀློག་པ་དང༌། བསམ་གཏན་གཏོང་ཞིང་སྡུག་(༡༨༩བ)བསྔལ་དང་ཡིད་མི་བདེ་བར་གནས་པས་དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས་ཏེ། དྲུག་སྡེ་ལ། ཁྱེད་ཀྱིས་དགེ་སློང་རྣམས་ལ་དེ་ལྟར་སྨྲས་པ་བདེན་ནམ། མད་དོ། །སྟོན་པས། དགེ་སྦྱོང་གི་ཚུལ་མ་ཡིན་པ་སོགས། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་སྨད་དོ། །སྔོན་རི་བྲགས་ཤིག་ན་ཁྱིམ་བདག་ཅིག་གིས་ཆུང་མ་བླངས་ནས་དེ་དང་དགའ་མགུར་སྤྱད་པས་བུ་མོ་ཞིག་བྱུང་ངོ༌། །དེ་ཞིང་པ་ཡིན་པས་རང་ཉིད་ཀྱིས་ཞིང་རྨེད་པ་ན། ཕ་མ་ཤི་བའི་བུ་ཞིག་དགོན་པ་ནས་ཤིང་ཁུར་ཐོགས་ཏེ། དེ་དང་ཉེ་བར་ཤིང་ཁུར་བཞག་ངལ་བསོ་ནས་སྨྲས་པ། ཅིའི་ཕྱིར་རང་གིས་ཞིང་རྨེད། ཁོ་བོ་ལ་བུ་དང་ནུ་བོའང་མེད་དོ། །ཞང་པོ། ཁོ་བོས་རྨོའི་ཁྱོད་རེ་ཞིག་ངལ་གསོས་ཤིག་ཅེས་དེས་ཞིང་རྨོས་པ་དང༌། ཁྱིམ་བདག་དེས་ཟན་ཁྱེར་འོངས་ནས། ཚ་བོ། ཚུར་ཤོག །ཟན་བཟའོ། །དེ་གཉིས་ཀྱིས་ཟན་ཟོས་ནས་བུ་དེས་སྨྲས་པ། ཁྱོད་ཀྱི་ཁྱིམ་མི་ཤེས་ཀྱིས་དགོང་ཀ་བསུར་ཤོག་ཅིག་ཅེས་ཟེར་ནས་དེས་ཞིང་རྨོས། ཞིང་ཚིགས་ལ་གླང་གཉིས་ཟར་བཅུག་སྟེ་དགོང་ཀ་རྩྭ་ཁུར་ཞིག་ཐོགས་ནས་རི་བྲགས་དེར་ཕྱིན་པ་དང༌། ཁྱིམ་བདག་དེས་བསུ་ནས་ནང་དུ་ཁྲིད་དོ། །བུ་དེས་གླང་བྲགས་སུ་བཏགས། རྩྭ་བཀྲམ་པ་དང༌། ཁྱིམ་བདག་དེ་མགུ་ནས། ཚ་བོ། དགའ་བཞིན་དུ་ལས་གྱིས་ཤིག་དང་བུ་མོ་འདི་ཆུང་མར་སྦྱིན་ནོ། །དེའི་གླང་གཅིག་ཞིང་ལ་བྲོས་པ་བཟློག་ཀྱང་མ་བཟློགས་ནས་ཤིང་ཚལ་ཞིག་འཕངས་པས་རྭ་ཆག་ནས། རུ་ཆག་ཅེས་བཏགས། ཡང་ཞིང་ལ་ཤོར་ནས་ཟོར་བ་འཕངས་པས་དེའི་མཇུག་མ་ཆད་ནས། ཆག་རྡུམ་ཞེས་མིང་བཏགས་སོ། །ཕྱིས་བུ་དེས་ཁྱིམ་བདག་ལ། ཞང་པོ། ཁས་བླངས་པ་བཞིན་གྱིས་ཤིག །དེས་ཆུང་མ་ལ་བག་རྫོང་སྟ་གོན་གྱིས་ཤིག །བུ་མོ་བག་མར་གཏང་བར་བྱའོ། །ཆུང་མ་ན་རེ། སུ་ལ་བྱིན། བུ་འདི་ལའོ། །ན་ལེ་ཤམ་དཀར་པོ་བཞིན་དུ་ཇི་ལྟར་བྱུང་གཏོལ་མེད་པ་འདི་ལ་བུ་མོ་སྦྱིན་རེ་སྐན། དེས་བསམས་པ། ཁྱོད་ལ་བུ་མོ་མི་སྦྱིན་ནོ་ཞེས་སྨྲས་ན་དེང་ཉིད་དུ་འགྲོ་བས་བདག་སྡུག་བསྔལ་བར་འགྱུར་རོ་སྙམ་ནས། དེ་ལ་བརྒྱང་བ་བྱས་སོ། །བུ་དེས་ཁྱིམ་བདག་ལ་ཡང་སྨྲས་པ། ཞང་པོ། ཁས་བླངས་པ་བཞིན་གྱིས་ཤིག །
དེས་སྨྲས་པ། ཉེ་དུའི་འཁོར་རྒྱ་ཆེན་པོ་ལ་ཟན་སྦྱར་དགོས་ཀྱིས་ས་ལུ་དག་སྒྲུབས་ཤིག །དེས་ས་ལུ་བསྒྲུབས་ནས། ཞང་པོ། བག་མ་རྫོངས་ཤིག །དེས་སྨྲས་པ། དེ་ལ་བུ་རམ་ཡང་དགོས་པས་སྒྲུབས་ཤིག །དེ་བསྒྲུབས་ནས། ད་བག་མ་རྫོངས་ཤིག །དེས་སྨྲས་པ། འཁུར་བའང་དགོས་པས་གྲོ་སྒྲུབས་ཤིག །དེ་བསྒྲུབས་ནས། ད་བག་མ་རྫོངས་ཤིག །དེས་སྨྲས་པ། ས་ལུ་སྔ་མ་རྣམས་ཟད་པས་ཡང་ས་ལུ་སྒྲུབས་སིག །དེས་རྒྱོང་པར་རིག་ནས། སྐྱེ་བོ་ཕལ་པོ་ཆེའི་ནང་དུ། ཞང་པོ། བག་མ་རྫོངས་ཤིག །ལྟོ་གོལ་བ་ཁྱོད་ལ་(༡༩༠ན)བུ་མ་སྦྱིན་རེ་སྐན། དེས་བསམས་པ། བདག་གིས་ཀརྵ་པ་ཎའང་མ་ཐོབ། བུ་མོའང་མ་ཐོབ་པས། འདི་ལ་གནོད་པ་ཞིག་བྱས་ཏེ་འགྲོའོ་སྙམ་ནས། གླང་དེ་དག་ཞིང་རྨོས། ལྕག་གིས་གཞུས་ཏེ་ཤིང་སྐམ་ལ་བཏགས་ནས་སོང་ངོ༌། །ཆོས་ཉིད་ཀྱིས་འཇིག་རྟེན་ཆགས་ནས་རིང་པོ་མ་ལོན་པའི་ཚེ་དུད་འགྲོས་ཀྱང་སྨྲ་ཤེས་པས། གླང་དེ་དག་གིས་སྨྲས་པ། ཀྱེ་ཁྱོད་ཁོ་བོ་ཅག་གི་ཕ་མ་འདྲ་བར་བདག་ཅག་རྟག་ཏུ་བདེ་བས་སྐྱོང་བར་བྱེད་ན། ད་ཅིའི་ཕྱིར་འདི་ལྟར་བྱེད། ཁོ་བོ་ཅག་གིས་ཉེས་པ་ཅི་བྱས། ཁྱེད་ཅག་གིས་ཉེས་པ་མ་བྱས་མོད། ཁྱེད་ཅག་གི་བདག་པོས་ཉེས་པ་བྱས་སོ། །ཅི་བྱས། བུ་མོ་སྦྱིན་པར་ཁས་བླངས་ནས་མ་བྱིན་ནོ། །འོ་ན་རྒྱལ་པོའི་ཕོ་བྲང་དུ་ཅིའི་ཕྱིར་མི་འགྲོ། ཆེ་བཞི་མེད་དོ། །ཁོ་བོ་ཅག་གིས་ཆེ་བཞི་བྱའོ། །ཅི་མིའི་སྐད་དུ་སྨྲའམ། མིན་གྱི་བདེན་པ་གསོལ་བར་བྱ་སྟེ། ཁོ་བོ་ཅག་ཞག་བདུན་དུ་བྲགས་སུ་བཏགས། རྩྭ་དང་ཆུ་མ་བྱིན་ཞིང༌། ཉི་མ་བདུན་པ་ལ་རྩྭ་དང་ཆུ་ཕུན་སུམ་ཚོགས་པ་ལ་བཏང་སྟེ། དེའི་ཚེ་ཁྱོད་ཀྱིས་རྒྱལ་པོའི་མདུན་དུ། ང་བདེན་ན་གླང་འདི་དག་རྩྭའང་མི་ཟ། ཆུའང་མ་འཐུང་བར་གྱུར་ཅིག་ཅེས་བདེན་ཚིག་རྗོད་ཅིག །རྒྱལ་པོ་ཡིད་ཆེས་ཀྱི་བར་དུ་ཁོ་བོ་ཅག་གིས་རྩྭའང་མི་ཟ་ཆུའང་མི་འཐུང་ངོ༌། །དེ་ནས་བུ་དེས་རྒྱལ་པོའི་ཕོ་བྲང་དུ་སོང་སྟེ། ལྷ། ཁྱིམ་བདག་ཆེ་གེ་མོས་བདག་ལ་བུ་མོ་སྟེར་བར་ཁས་བླངས་ནས་མ་བྱིན་ནོ། །རྒྱལ་པོས་སྨྲས་པ། ཁྱོད་ལ་ཆེ་བཞི་ཡོད་དམ། མཆིས་སོ། །ཅི་མི་ཡོད་དམ་མི་མ་ཡིན་ཡོད། གླང་དག་ཡོད་དོ། །ཅི་མིའི་སྐད་དུ་སྨྲའམ། མིན་ཏེ། བདེན་པ་གསོལ་ལོ། །འོ་ན་དེ་ལྟར་གྱིས་ཤིག །དེས་གླང་དེདག་བྲགས་སུ་བཏགས་པ་དང༌། ཆག་རྡུམ་གྱིས་སྨྲས་པ། ནུབ་ཕྱོགས་ནས་ཉི་མ་ཤར་རམ། གང་གིས་ན་བདག་མི་གཏོང༌། གཞན་དེས་སྨྲས་པ། མིན་གྱི་ཆེ་བཞི་བྱ་བར་ཁས་བླངས་པས་སོ། །
ཆག་རྡུམ་གྱིས་སྨྲས་པ། ཁོ་བོ་ནི་བཏང་ན་རྡོ་བའང་བཟའ་ན། རྩྭ་ལྟ་ཅི་སྨོས། ཁྱིམ་བདག་གི་བུ་དེ་བདག་ཅག་གི་ཕ་མ་དང་འདྲའི་དེ་ལྟར་མ་བྱེད་ཅིག །དེ་བདག་ཅག་གིས་ཕ་མ་དང་འདྲ་བར་འདུག་པ་བདེན་མོད་ཀྱི། འོན་ཀྱང༌། དེ་ཁོ་བོ་ལ་ཆག་རྡུམ་ཞེས་འབོད་པས་ཁོ་བོ་ནི་དེ་ལྟར་མི་འདོད་དོ། །བུ་དེས་གླང་དེ་དག་གི་གན་དུ་སོང་ནས། གླང་ཁྱེད་ཅག་རུང་ངམ། དེ་དག་གིས་སྨྲས་པ། ཁོ་བོ་ཅག་ནི་རུང་ན། ཁྱོད་མི་རུང་ངོ༌། །ཅི་ཉེས། ཆག་རྡུམ་ན་རེ། ཁོ་བོ་ནི་བཏང་ན་རྡོ་བའང་བཟའ་ན། རྩྭ་ལྟ་ཅི་སྨོས་ཟེར་རོ། །འོ་ན་ང་འབྲོས་སམ། མ་འབྲོས་པར་ཆག་རྡུམ་གྱི་སྣ་ཕུག་དང༌། འདི་རྩྭ་ཟ་ན་ཁོ་བོ་ཅག་གི་རྭས་འདིའི་སྣ་གྱེན་དུ་བླངས་ཏེ་ཁ་གྱེན་དུ་གཟུང་གི །དེའི་ཚེ་ཁྱོད་ཀྱིས་ཀྱང༌། འདི་དག །འཇིག་རྟེན་སྐྱོང་བ་ལྔ་པ་ཉི་མའང་ཆེ་བཞིར་ཡོད་ཅེས་ཉི་མ་སྟོན་པར་བྱེད་དོ་ཞེས་སྨྲོས་ཤིག །(༡༩༠བ)དེས་དེའི་སྣ་ཕུག་པ་དང༌། དེས་སྨྲས་པ། ཁོ་བོ་ལ་མཐོ་འཚམ་པ་ལ་ལྟོས་ཤིག །གཞན་དག་གིས་སྨྲས་པ། འདི་ཁྱོད་ལ་རྒྱན་འདོགས་ཀྱིས་ཁ་རོག་འདུག་ཅིག །དེ་ནས་ཉི་མ་བདུན་པ་ལ་རྒྱལ་པོ་དང་བློན་པོ་རྣམས་ཚོགས་ནས་གླང་དེ་རྣམས་རྩྭ་ཕུན་སུམ་ཚོགས་པའི་ཕྱོགས་སུ་བཏང་ན་ཆག་རྡུམ་གྱིས་རྩྭའི་ཁམ་བླང་བར་བརྩམས་པ་དང༌། གླང་དེ་དག་གི་རྭ་དག་གིས་དེའི་སྣ་བླངས་ཏེ་ཉི་མ་ལ་ལྟ་ཞིང་བཟུང་བས། རྒྱལ་པོས་སྨྲས་པ། ཅིའི་ཕྱིར་གླང་དེ་དག་ཉི་མ་ལྟ། དེ་ན་བློན་པོ་ཞིག་གིས་སྨྲས་པ། འདི་དག་དོན་གྱིས་ལྷ་ལ་གསོལ་ཏེ། བདག་ཅག་འབའ་ཞིག་ཆེ་བཞི་མིན་གྱི། འཇིག་རྟེན་སྐྱོང་བ་ལྔ་པ་ཉི་མ་འདིའང་ཆེ་བཞི་ལགས་སོ་ཞེས་མཆིའོ། །རྒྱལ་པོ་ངོ་མཚར་ནས། མི་མ་ཡིན་པ་དག་གིས་ཆེ་བཞི་ཕྱེ་ཡིས་འདི་ལ་བུ་མོ་བྱིན་ཅིག །བུ་དེས་ཁྱིམ་བདག་དེ་ཕམ་པར་བྱས་ནས་དེ་ལ་བུ་མོ་བྱིན་ནོ། །རེ་ཞིག་དུད་འགྲོའི་སྐྱོན་ནས་བརྗོད་ནའང་གསོད་པར་སེམས་ན་མི་རྣམས་ལྟ་ཅི་སྨོས། དེ་བས་ན་དགེ་སློང་ལ་སྐྱོན་ནས་སྨྲ་བར་མི་བྱའོ། །
ཡང་རི་བྲགས་ཤིག་ན་ཁྱིམ་བདག་ཤིང་རྟ་སྤྱོད་པ་ཞིག་ལ་བ་དགའ་བྱེད་དང་ས་རི་ཞེས་བྱ་བ་གཉིས་ཡོད་པ་ལ་བེའུ་ཁྲ་བོ་དང་ཉེ་ཁྲ་གཉིས་འབྲངས་སོ། །དགའ་བྱེད་ཀྱི་བེའུ་ནི་རུ་འབྲེལ་དང༌། ས་རིའི་བེའུ་ནི་ཁུ་ཡུ་ཡིན་པས། དགའ་བྱེད་རུ་འབྲེལ་དང༌། ས་རི་ཁུ་ཡུ་ཞེས་བཏགས་སོ། །དེ་གཉིས་གླང་ཆེན་པོར་གྱུར་པ་ན་ཤིང་རྟ་སྤྱོད་པ་དག་ཚོགས་ཏེ། བདག་ཅག་སུའི་གླང་བཟང་ཟེར་བ་ན། གཅིག་ན་རེ། ཁོ་བོའི་གླང་བཟང་ངོ༌། །ཤིང་རྟ་སྤྱོད་པ་དེ་ན་རེ། ཁོ་བོའི་གླང་བཟང་ཟེར་རོ། །ཇི་ལྟར་ཤེས། དེས་སྨྲས་པ། ལམ་དམའ་བ་ནས་ཤིང་རྟར་ཁལ་འདི་ཙམ་ཞིག་བཞག་སྟེ་ཀརྵ་པ་ཎ་ལྔ་བརྒྱ་སྐུགས་སུ་བཙུགས་ལ་གླང་གཉིས་བདའ་བར་བྱའོ། །དེ་དག་གིས་དེ་ལྟར་བྱས་ནས་ཤིང་རྟ་སྤྱོད་པ་དེས། དགའ་བྱེད་རུ་འབྲེལ་སོང་ཞིག །ས་རི་ཁུ་ཡུ་སོང་ཞིག་ཅེས་བདས་པས་གླང་དེ་གཉིས་འགྲོར་མ་འདོད་པ་ལ་ཁབ་ཀྱིས་གཙགས་པས་གཞན་དག་ན་རེ། ཁྱོད་ཕམ་གྱིས་གླང་མ་གསོད་པར་སྐུགས་གཞོལ་ཅིག་ཟེར་ནས་ཀརྵ་པ་ཎ་ལྔ་བརྒྱ་འཇལ་དུ་བཅུག་གོ །དེས་གླང་གཉིས་ལྕག་མང་པོས་གཞུས། ཉི་མ་ལ་ཤིང་སྐམ་ལ་བཏགས་སོ། །འཇིག་རྟེན་ཆགས་ནས་རིང་པོ་མ་ལོན་པ་ན་དུད་འགྲོས་ཀྱང་མིའི་སྐད་དུ་སྨྲ་ཤེས་པས། དེ་གཉིས་ཀྱིས་སྨྲས་པ། ཉེས་པ་ཅི་བྱས། ཁྱེད་གཉིས་ཤེས་བཞིན་དུ་སྒྱུ་བྱས་ནས་ཁོ་བོ་ཀརྵ་པ་ཎ་ལྔ་བརྒྱའི་སྐུགས་འཇལ་དུ་བཅུག་གོ །དེ་གཉིས་ཀྱིས་སྨྲས་པ། ཁྱེད་རང་གི་ལྕེས་སྐུགས་འཇལ་དུ་བཅུག །ཇི་ལྟར་བཅུག །བདག་ཅག་གཉིས་ཀྱི་མིང་དགའ་བྱེད་དང་ས་རི་ཞེས་བྱ་ན། ཁྱོད་ཅིའི་ཕྱིར་ཁོ་བོ་ཅག་གཉིས་ལ་རུ་འབྲེལ་དང༌། ཁུ་ཡུ་ཞེས་མིང་མི་སྙན་པ་བརྗོད། འོན་ཀྱང་ད་ལམ་ཆེས་དམའ་བ་ནས་ཤིང་རྟར་ཁལ་ཉིས་འགྱུར་ཞོག་ལ། ཀརྵ་པ་ཎ་དེ་ཉིས་འགྱུར་སྐུགས་སུ་ཚུགས་ལ་ངེད་(༡༩༡ན)གཉིས་བོས་ཤིག །ཅི་ཁྱེད་གཉིས་ཡང་སྐུགས་འཇལ་དུ་གཞུག་གམ། ངེད་གཉིས་ལ་མིང་མི་སྙན་པ་མ་རྗོད་དང༌། ཁྱོད་སྐུགས་ལེན་དུ་གཞུག་གོ །ཡང་གླང་ང་བཟང་ལ་མ་འཆམ་པར་སྐུགས་ཉིས་འགྱུར་དུ་བཙུད་ནས། ཤིང་རྟ་སྤྱོད་པ་དེས་དགའ་བྱེད་སོང་ཞིག །ས་རི་སོང་ཞིག་ཅེས་བདས་པ་དང༌། དེ་གཉིས་ཀྱིས་ཁལ་མྱུར་བར་ཐང་ལ་བསྐྱལ་བས་ཀརྵ་པ་ཎ་སྟོང་ཐོབ་བོ། །ལྷས་ཀྱང༌། གང་ཚེ་ཁལ་ནི་ཆེས་ལྕི་ཞིང༌། །གང་ཚེ་ལམ་ཡང་ཆེས་དམའ་བ། །དེ་ཚེ་དེ་གཉིས་ཁལ་ཁྱེར་ཞིང༌། །དེ་ཚེ་ཤིང་རྟ་འདྲེན་པར་བྱེད། །ཡིད་དུ་འོང་བ་བརྗོད་བྱས་ན། །ཤིན་ཏུ་ལྕི་བའི་ཁལ་ཁྱེར་ཞིང༌། །དེ་ཡང་རྙེད་དང་ལྡན་གྱུར་ལ། །དེ་གཉིས་ཀྱང་ནི་ཡིད་དགར་གྱུར། །དེ་བས་ཡིད་འོང་བརྗོད་བྱ་ཞིང༌། །ཡིད་དུ་མི་འོང་ནམ་ཡང་མིན། །ཡིད་དུ་འོང་བ་རྗོད་བྱེད་ན། །དགེ་བར་འགྱུར་ཞིང་སྡིག་མེད་ཡིན། །རེ་ཞིག་དུད་འགྲོའང་སྐྱོན་ནས་བརྗོད་པས་བྱམས་པ་རྒྱུན་གཅོད་ན། མི་རྣམས་ལྟ་ཅི་སྨོས། དེ་བས་ནས་མིའི་སྐྱོན་ནས་སྨྲ་བར་མི་བྱའོ། །མིའི་སྐྱོན་ནས་སྨྲ་ན་ལྟུང་བྱེད་དོ། །
ཕྲ་མ་བྱེད་པའི་ལྟུང་བྱེད་ནི། སྟོན་པ་མཉན་ཡོད་ནའོང༌། །དྲུག་སྡེས་དགེ་སློང་རྣམས་ལ་ཕྲ་མ་བྱས་ནས་སྤ་བཀོང་ཞིང་ཞུམ་པས་ཀློག་པ་དང་བསམ་གཏན་གཏོང་ཞིང༌། ཡུན་རིང་པོ་ནས་བསགས་པའི་གཙུགས་པའང་རྒྱུན་གཅོད་པ་ལ་འཕྱ་བའི་སྐབས་དེ་གསོལ་བ་དང༌། བྱུང་བ་འདི་དང་སོགས། དྲུག་སྡེ་ལ། ཁྱེད་དགེ་སློང་རྣམས་ལ་ཕྲ་མ་བྱེད་པ་བདེན་ནམ། མད་དོ། །དགེ་སློང་གི་ཚུལ་མ་ཡིན་པ་སོགས། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་དོ། །སྔོན་ནགས་ཚལ་ཞིག་ན་སེངྒེ་མོ་སྦྲུམ་མ་ཞིག་འདུག་པ་དེས་བ་ལང་གི་ཚོགས་ཆེན་པོ་ཞིག་གི་ཕྱི་བཞིན་དུ་སོང་ནས་བ་བེའུ་འབྲངས་ནས་རིང་པོ་མ་ལོན་པ་ཞིག་བསད་དེ་རང་གི་ཚང་དུ་སོང་ངོ༌། །བེའུ་དེའང་མའི་ནུ་མ་འཐུང་འདོད་པས། དེའི་ཕྱི་བཞིན་སོང་བ་དང༌། སེངྒེ་མོས་བསམས་པ། བེའུ་འདིའང་གསད་པར་བྱའོ་སྙམ་ནས། ཡང་བསམས་པ། འདི་ངའི་བུའི་ཆུང་གྲོགས་སུ་འགྱུར་རོ་སྙམ་ནས་བཞག །དེ་ལ་ཕྲུ་གུ་ཕོ་ཞིག་བྱུང་བ་དང༌། རང་གི་ཕྲུ་གུ་དང་བེའུ་དེ་གཉིས་ཀ་ལ་ནུ་མ་བསྣུན་པས་ཆེན་པོར་གྱུར་ཏེ། དུས་གཞན་ཞིག་ན་སེངྒེ་མོ་དེ་ན་ནས། འཆི་བའི་ཚེ་སྨྲས་པ། བུ་གཉིས་ནུ་མ་གཅིག་ལ་ནུ་བའི་སྤུན་ཡིན་ལ། ཕྲ་མ་ཅན་གནོད་པ་བྱེད་པས་འཇིག་རྟེན་གང་བར་སྤྱོད་ཀྱིས། ཁོ་མོ་འདས་པའི་འོག་ཏུ་ཁྱེད་གཉིས་ཀྱིས་འགའ་ཡང་མཉན་པར་མི་བྱའོ་ཞེས་སྨྲས་ནས་ཤིའོ། །སེངྒེ་དེ་རི་དྭགས་བཟང་པོའི་ཤ་ཁྲག་སྤྱད་པས་ཆེན་པོར་གྱུར། ཁྱུ་མཆོག་དེའང་སེངྒེས་བསྲུངས་པའི་རྩྭ་ཆུ་ལ་སྤྱད་པས་ཆེན་པོར་གྱུར་ཏོ། །སེངྒེ་དེ་ལ་ཝ་རྒན་པོ་ཞིག་ལྷག་མ་ཟ་ཞིང་རྗེས་སུ་འབྲངས་ནས། སེངྒེའི་དྲུང་དུ་གཅན་གཟན་ཕྲ་མོ་གཞན་གྱིས་ཉེ་མི་ཕོད་པས་སེངྒེས་རི་དྭགས་བསད་ནས་ཟོས་པའི་ཤ་ཁྲག་ལྷག་མ་ཝས་ཟོས་པས་(༡༩༡བ)པགས་པ་དང་ཤ་ཁྲག་རྒྱས་པར་གྱུར་ཏོ། །སེངྒེ་དེ་མྱུར་བར་ཤ་ཟོས་ནས་ཚང་དུ་སོང་སྟེ་ཁྱུ་མཆོག་དེ་དང་ལྷན་ཅིག་རྩེ་བ་དང་ལྷག་མ་གཞན་གྱིས་ཟོས་ནས་ཝས་མ་ཐོབ་བོ། །
ཝ་དེས་བསམས་པ། སེངྒེ་དེ་གང་དུ་འགྲོ་བལྟའོ་སྙམ་ནས་དེའི་ཕྱི་བཞིན་དུ་སོང་བ་དང༌། ཁྱུ་མཆོག་དང་རྩེ་བ་དང་མཐོང་ནས། ཁྱུ་མཆོག་འདི་བདག་གི་ལྟོའི་དགྲ་ཡིན་གྱིས། འདི་གཉིས་དབྱེའོ་སྙམ་ནས་ཁྱུ་མཆོག་དེའི་མདུན་དུ་རྣ་བ་ཕབ་སྟེ་འདུག་པ་དང༌། ཁྱུ་མཆོག་གིས་སྨྲས་པ། ཞང་པོ། རླུང་ཚ་བ་མི་ལྡང་ངམ། ཝས་སྨྲས་པ། རླུང་རབ་ཏུ་འབར་བ་དག་ལྡང་ངོ༌། །ཅི་ཉེས། སེངྒེ་ན་རེ། ཁོ་བོའི་ཤ་ཚོགས་ཁྱུ་མཆོག་དེ་གར་སོང༌། ཤ་གཞན་མ་རྙེད་ན་ཁྱུ་མཆོག་འདི་བཟའོ་ཞེས་ཟེར་རོ། །ཞང་པོ། ཁོ་བོ་ཅག་གཉིས་ལ་མས་ཁ་ཆེམས་བཞག་གིས་དེ་སྐད་མ་ཟེར་ཅིག །ཝས་སྨྲས་པ། ཁྱོད་ཕན་པའི་ཚིག་མི་ཉན་ན་ཆུད་ཟོས་པར་འགྱུར་རོ། །ཁྱུ་མཆོག་གིས་སྨྲས་པ། གོ་རིམ་ཇི་ལྟར་འོང༌། སེངྒེ་འདི་ཚང་ནས་བྱུང་ནས་བྱ་མྱང་བྱེད་ཅིང་གླལ་ནས་ཕྱོགས་བཞིར་བལྟས། སྐད་ཐེངས་གསུམ་ཕྱུང་སྟེ་ཁྱོད་ཀྱི་མདུན་དུ་འོང་ན་གསོད་པར་ཤེས་པར་གྱིས་ཤིག །དེ་ནས་ཝ་དེས་སེངྒེའི་མདུན་དུ་རྣ་བ་ཕབ་ནས་འདུག་པ་དང༌། སེངྒེས་སྨྲས་པ། ཞང་པོ། རླུང་ཚ་བ་མི་ལྡང་ངམ། ལྡང་ངོ༌། །ཅི་ཉེས། ཁྱུ་མཆོག་འདི་ན་རེ། ཁོ་བོའི་རྩའི་སེངྒེ་དེ་གར་སོང༌། འདིའི་མས་ཁོ་བོའི་མ་བསད་ཀྱིས་འདིའི་ལྟོ་ངེས་པར་དྲལ་བར་བྱའོ་ཞེས་ཟེར་རོ། །ཞང་པོ། ཁོ་བོ་ཅག་གཉིས་ལ་མས་འཆི་ཁར་ཁ་ཆེམས་དེ་ལྟ་བུ་བཞག་གིས་དེ་སྐད་མ་ཟེར་ཅིག །ཕན་པའི་ཚིག་མི་ཉན་ན་ཆུད་ཟོས་པར་འགྱུར་རོ། །
གོ་རིམ་ཇི་ལྟར་འོང༌། ཁྱུ་མཆོག་འདི་ལྷས་ནས་བྱུང་སྟེ་བྱ་རྨྱང་བྱས་འབུ་སྒྲ་འབྱིན་ཞིང༌། ཕྲུག་ཕྲིག་དང༌། རྔམ་པ་བྱས་ཏེ་འོང་ན་གསོད་པར་ཤེས་པར་གྱིས་ཤིག །དེ་གཉིས་རང་བཞིན་གྱིས་རྟག་ཏུ་དེ་ལྟར་བྱེད་མོད། ལན་འགའ་ཡང་མཚན་མར་མ་བཟུང་ངོ༌། །དབྱེན་གྱིས་མཚན་མར་བཟུང་ནས། ཕན་ཚུན་གསོད་པར་ཤེས་ཏེ། སེངྒེས་ཁྱུ་མཆོག་གི་བྱད་ལ་སྡེར་མོ་བཏབ། ཁྱུ་མཆོག་གི་རྭས་སེངྒེའི་ལྟོ་དྲལ་ནས་གཉིས་ཀ་ཤི་བ་དང༌། ལྷས་སྨྲས་པ། བཟང་པོ་དག་ལ་ལྟ་བའི་མིས། །སྐྱེ་བོ་ངན་པ་བསྟེན་མི་བྱ། །སེངྒེ་ཁྱུ་མཆོག་མཛའ་བ་ལ། །ཝ་ཡིས་ཐ་དད་ཕྱེ་ལ་ལྟོས། དུད་འགྲོའང་ཕྲ་མས་གསོད་པར་སེམས་ན་མི་རྣམས་ལྟ་ཅི་སྨོས། དེ་བས་ན་དགེ་སློང་ལ་ཕྲ་མ་མི་བྱའོ། །བྱེད་ན་ལྟུང་བྱེད་དོ། །སྔོན་ནགས་ཚལ་ཞིག་ན་སེངྒེ་མོ་ཕྲུ་གུ་དང་བཅས་པ་ཞིག་དང༌། སྟག་མོ་ཕྲུ་གུ་དང་བཅས་པ་ཞིག་འདུག་སྟེ། སེངྒེ་མོ་སྤྱོད་ཡུལ་དུ་སོང་བ་དང་དེའི་ཕྲུ་གུ་འཁྱམ་པ་སྟག་མོས་མཐོང་ནས། འདི་གསད་དོ་སྙམ་པ་ལས། འདི་བདག་གི་བུའི་ཆུང་གྲོགས་སུ་འགྱུར་རོ་སྙམ་ནས་དེ་ལ་ནུ་མ་བསྣུན་ནོ། །སེངྒེ་མོས་ཕྱིར་འོངས་པ་ན་ཕྲུ་(༡༩༢ན)གུ་མི་སྣང་བས་བཙལ་བ་དང༌། སྟག་མོས་ནུ་མ་བསྣུན་པར་མཐོང་ངོ༌། །སྟག་མོ་སྐྲག་ནས་བྲོས་པ་དང༌། སེངྒེ་མོས་སྨྲས་པ། མ་འབྲོས་ཤིག །ལྷན་ཅིག་གནས་པར་བྱ་སྟེ། ཁྱོད་ཀྱིས་ཁོ་མོའི་བུ་ལ་མཁོ་བ་བསྟབས་པས། ཁྱོད་སྤྱོད་ཡུལ་དུ་འགྲོ་བ་ན་ཁོ་མོས་ཁྱོད་ཀྱི་བུ་ལ་མཁོ་བ་བསྟབ་པར་བྱའོ། །དེ་གཉིས་ཀྱིས་ལྷན་ཅིག་འཁོད་ནས། སེངྒེའི་ཕྲུ་གུ་ལ་མཆེ་བཟང་དང༌། སྟག་ཕྲུག་ལ་དཔུང་བཟང་ཞེས་མིང་བཏགས་ནས་ཆེན་པོར་གྱུར་པ་དང༌། མ་གཉིས་ན་ནས་འཆི་བའི་ཚེ། སྔར་བཞིན་ཁ་ཆེམས་བཞག་གོ །སེང་གེས་རི་དྭགས་བཟང་པོ་བསད་ནས་ཤ་ཁྲག་ལ་ལོངས་སྤྱད་དེ་མྱུར་དུ་ཚང་དུ་འགྲོ་ལ། སྟག་གིས་ཚེགས་ཆེན་པོས་རི་དྭགས་བསད་ནས་ཤ་ཁྲག་ལོངས་སྤྱད་དེ་ཡུན་རིང་པོས་ཕྱིར་འོང་ངོ༌། །
དུས་གཞན་ཞིག་ན་སྟག་གིས་ལྷག་མ་སྦས་པ་དེ་ཟོས་ནས་མྱུར་དུ་ཕྱིར་འོངས་པ་དང༌། སེངྒེས་སྨྲས་པ། ཁྱོད་སྔོན་ཆད་ཡུན་རིང་ལ་ད་རེས་མྱུར་བ་ཅི་ཡིན། སྟག་གིས་སྨྲས་པ། ལྷག་མ་སྦས་པ་དེ་ཟོས་ནས་ཕྱིར་འོངས་སོ། །ཁྱོད་ལྷག་མ་སྦེད་དམ། སྦེད་དོ། །ཁོ་བོ་ནི་རི་དྭགས་བཟང་པོ་བསད་དེ་ཤ་ཟོས་ཁྲག་འཐུངས་ནས་ལྟོས་པ་མེད་པར་འགྲོའོ། །ཁྱོད་ནི་སྟོབས་དང་ལྡན་པ་ཡིན་ལ། ཁོ་བོས་དེ་ལྟར་བྱེད་མི་ནུས་སོ། །འོ་ན་བདག་ཅག་གཉིས་ལྷན་ཅིག་འགྲོའོ། །དེ་གཉིས་ལྷན་ཅིག་དོང་བ་དང༌། སེངྒེའི་ལྷག་མ་ཟ་བའི་ཝ་དེས་ལྷག་མ་མ་ཐོབ་པས། སྟག་འདི་བདག་གི་ལྟོའི་དགྲ་ཡིན་གྱིས་འདི་གཉིས་དབྱེའོ་སྙམ་ནས། དེ་སེངྒེའི་མདུན་དུ་རྣ་བ་ཕབ་སྟེ་འདུག་པ་དང༌། ཞང་པོ། རླུང་ཚ་བ་མི་ལྡང་ངམ། ལྡང་ངོ༌། །ཅི་ཉེས། སྟག་འདི་ན་རེ། སེངྒེ་འདིས་བདག་ལྷག་མ་ཟར་བཅུག་པས་གསད་དོ་ཟེར་རོ། །ཁོ་བོ་ཅག་གཉིས་ལ་མ་གཉིས་ཀྱིས་འཆི་ཁར་ཁ་ཆེམས་དེ་སྐད་བཞག་གིས་ཁྱོད་དེ་སྐད་མ་ཟེར་ཅིག །ཕན་པའི་ཚིག་མི་ཉན་ན་ཁྱོད་ཆུད་ཟོས་པར་འོང་ངོ༌། །ཞང་པོ། གོ་རིམ་ཇི་ལྟར་འོང༌། སྟག་འདི་ཚང་ནས་བྱུང་སྟེ་བྱ་རྨྱང་བྱས། གླང་ཞིང་ཕྱོགས་བཞིར་བལྟས་ནས་སྐད་ལན་གསུམ་བྱུང་སྟེ་ཁྱོད་ཀྱི་མདུན་དུ་འོང་ན་གསོད་པར་ཤེས་པར་གྱིས་ཤིག །
དེ་ནས་སྟག་ལའང་དེ་བཞིན་དུ་སྨྲས་སོ། །དེ་གཉིས་རང་བཞིན་གྱིས་རྟག་ཏུ་དེ་ལྟར་བྱེད་མོ། །ལན་འགའ་ཡང་མཚན་མར་མ་བཟུང་ངོ༌། །ཕྲ་མས་མཚན་མར་བཟུང་ནས་ཕན་ཚུན་མཐོང་བས་གསོད་པར་ཤེས་ཏེ། སེངྒེས། བདག་སྟོབས་དང་ལྡན་པ་ཡིན་པས་བརྟག་གོ་སྙམ་ནས་སྨྲས་པ། ཆུ་ཞེང་ཕུན་སུམ་ཚོགས་པ་དང༌། །རྩལ་དང་ཤུགས་དང་ལྡན་པ་ཡི། །མཆེ་བ་བཟང་ལ་རྒོལ་བྱེད་པ། །དཔུང་བཟང་དེ་ནི་རིགས་པ་མིན། །སྟག་གིས་ཀྱང་སྨྲས་པ། ཆུ་ཞེང་ཕུན་སུམ་ཚོགས་པ་དང༌། རྩལ་དང་ཤུགས་དང་ལྡན་པ་ཡི། །དཔུང་བཟང་ལ་ནི་རྒོལ་བྱེད་པ། །མཆེ་བཟང་དེ་ནི་རིགས་པ་ཡིན། །སེངྒེས་སྨྲས་པ། ཁྱེད་ལ་སུས་སྨྲས། ཝ་འདིས་སོ། །སྟག་(༡༩༢བ)གིས་སྨྲས་པ། ཁྱོད་ལ་སུས་སྨྲས་པ། ཝ་འདིས་སོ། །སེངྒེས་བསམས་པ། འདིས་བདག་ཅག་འབྱེད་དོ་སྙམ་སྟེ། ཝ་དེ་ཐལ་མོས་བསྣུན་ནས་བསད་དོ། །ལྷས་སྨྲས་པ། ཝ་སྐྱེས་གྲོང་པ་བརྫུན་དུ་སྨྲ་བྱེད་པ། །མཛའ་བཤེས་འབྱེད་པར་བྱེད་པས་བསྐྱེས་ཏོ་རེ། །ཕྲ་མ་སྨྲ་བ་དེ་ནི་བསད་གྱུར་ནས། །བདེ་བས་མཛའ་བཤེས་དགའ་བར་བྱེད་ལ་ལྟོས། །དུད་འགྲོའང་ཕྲ་མས་གསོད་པར་སེམས་ན། མི་རྣམས་ལྟ་ཅི་སྨོས། ཕྲ་མ་བྱེད་ན་ལྟུང་བྱེད་དོ། །
སྐྱོ་སྔོགས་བྱེད་པའི་ལྟུང་བྱེད་ནི། སྟོན་པ་མཉན་ཡོད་ནའོ། །དྲུག་སྡེས་དགེ་འདུན་མཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ། རྩོད་པ་འདི་ནི་ཤད་ཀྱིས་མ་བྱང༌། ལེགས་པར་ཤད་ཀྱིས་མ་བྱང་གིས། སླར་ཤད་ཀྱི་སྦྱང་བར་བྱའོ་ཞེས་སོགས་ལས་ཀྱི་སྐྱོ་སྔོགས་བྱས་ནས། ཡང་ཡང་རྩོད་པར་གྱུར་པས་བྱ་བྱེད་མང་བར་གྱུར་ནས་ཀློག་པ་དང་བསམ་གཏན་གཏོང་བ་ལ་དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། དྲུག་སྡེ་ལ། ཁྱེད་ཀྱིས་དགེ་འདུན་མཐུན་པས་ཆོས་བཞིན་དུ་རྩོད་པ་སྦྱང་པར་ཤེས་བཞིན་དུ་ཡང་ལས་ཀྱི་སྐྱོ་སྔོགས་བྱེད་པ་བདེན་ནམ། མད་དོ། །དགེ་སྦྱོང་གི་ཚུལ་མ་ཡིན་པ་སོགས། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་དོ། །ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །
ཆོས་སྟོན་པའི་ལྟུང་བྱེད་ནི། སྟོན་པ་མཉན་ཡོད་ནའོ། །འཆར་ཀས་ཤ་མཚན་གྱི་རིག་པ་ཤེས་ཏེ། མཉན་ཡོད་དུ་བསོད་སྙོམས་ལ་ཕྱིན་ཏེ་ཆོས་བསྟན་ནས་མནའ་མ་ལ། ཁྱོད་ཀྱི་སྒྱུག་མོ་ཅི་འདྲ། རི་བོང་མ་འདས་ཕོག་འདྲའོ། །དེ་ལ་གཏུམ་པའི་མཚན་ནུ་མ་དང༌། འདོམས་དང༌། རྐེད་པའི་བར་ན་ཤ་རྨེན་དང༌། མཛེར་བུ་དང༌། རྨེ་བ་དམར་པོ་དང༌། སྤུ་འཁྱིལ་བ་ཡོད་པའི་ཉེས་པ་ཡིན་ནོ། །སྒྱུག་མོ་ལ། མནའ་མ་ཅི་འདྲ། དེའི་སྐྱོན་ནི་སེ་བདར་གྱིས་བདར་འཚལ་ཏེ། ལེ་ལོ་ཅན། སྒྲུབ་མི་ཕོད་པ་ལགས་སོ། །དེ་ལ་ནུ་མ་དང༌། འདོམས་དང༌། རྐེད་པའི་བར་ན་ཤ་རྨེན་ལ་སོགས་པ་ཡོད་པའི་ཉེས་པའོ། །ཡང་སོང་སྟེ་ཆོས་བསྟན་ནས། སྒྱུག་མོ་ལ་དྲིས་པ། ཁྱོད་ཀྱི་མནའ་མ་ཅི་འདྲ། བུ་མོའམ། ནུ་མོ་འདྲའོ། །དེ་ལ་དེས་མཚན་ནུ་མ་དང༌། འདོམས་དང༌། རྐེད་པའི་བར་ན་དཔལ་བེའུ་དང༌། བུམ་པ་གང་བ་དང༌། བཀྲ་ཤིས་དང༌། གཡུང་དྲུང་དག་ཡོད་པའི་ཡོན་ཏན་ཡིན་ནོ། །དེའི་མནའ་མ་ལ་དྲིས་པ། ཁྱོད་ཀྱི་སྒྱུག་མོ་ཅི་འདྲ། མའམ་ཕུ་ནུ་མོ་འདྲའོ། །དེ་ལ་ངེས་པའི་མཚན་ནུ་མ་དང༌། འདོམས་དང༌། རྐེད་པའི་བར་ན་དཔལ་བེའུ་ལ་སོགས་པ་ཡོད་པའི་ཡོན་ཏན་ཡིན་ནོ། །དེ་ནས་བུད་མེད་དེ་དག་ཕན་ཚུན་བསྐུ་མཉེ་དང༌། དྲིལ་ཕྱི་དང༌། ཁྲུས་བྱེད་པ་ན་གཅིག་ལ་གཅིག་གསང་གནས་ཀྱི་མཚན་མ་བརྟགས་པས། འཆར་ཀས་བསྟན་པ་བཞིན་དུ་མཚན་མ་བཟང་ངན་དག་མཐོང་ངོ༌། །དེ་དག་འཐབ་མོ་བྱུང་བའི་ཚེ། ཁྱོད་ཀྱང་ཁོ་མོ་དང་ལྷན་ཅིག་སྨྲའམ། ཁྱོད་སྐྱེས་པ་གཞན་(༡༩༣ན)དང་ལྷན་ཅིག་འདི་ལྟར་བྱེད་དོ། སྡིག་པ་ཞིའོ། །འོ་ན་ཁྱོད་ཀྱི་འདོམས་ན་མཚན་དག་ཡོད་པ་སྐྱེས་པ་གཞན་གྱིས་ཇི་ལྟར་ཤེས། འོ་ན་ཁྱོད་ཀྱང་ཁོ་མོ་དང་ལྷན་ཅིག་སྨྲའམ། ཁྱོད་སྐྱེས་པ་གཞན་དང་ལྷན་ཅིག་འདི་ལྟར་བྱེད་དོ། །སྡིག་པ་ཞིའོ། །འོ་ན་ཁྱོད་ཀྱི་འདོམས་ཀྱི་བར་ན་མཚན་ངན་པ་ཡོད་པ་སྐྱེས་པ་གཞན་གྱིས་ཇི་ལྟར་ཤེས། དེ་དག་བཟོད་པ་གསོལ་ནས་གཅིག་གིས་གཅིག་ལ་དྲིས་པ། ཁྱོད་ལ་སུས་སྨྲས། འཆར་ཀས་སོ། །ཁྱོད་ལའང་སུས་སྨྲས། འཆར་ཀས་སོ། །འཆར་ཀས་བསམས་བཞིན་དུ་བདག་ཅག་འཐབ་ཏུ་བཅུག་གོ་ཞེས་སྨོད་ཅིང༌། དེ་དག་ཐེ་ཚོམ་ཟ་ནས། དགེ་སློང་གནས་བརྟན་དག་བསོད་སྙོམས་ལ་ཕྱིན་པ་ན། འཕགས་པ་དག་འཆར་ཀ་ཇི་ལྟ་བུ་ལགས། དེ་ན་དགེ་སློང་ཚུལ་ཁྲིམས་དང་ལྡན་པ་ཡིན་ནོ། །དེ་ཚུལ་ཁྲིམས་དང་ལྡན་ན་དེས་བུད་མེད་ཀྱི་གསང་བའི་ཕྱོགས་ཀྱི་ཤ་རྨེན་ཡོད་པ་ཇི་ལྟར་ཤེས། སྲིང་མོ་དག །དེས་ཤ་མཚན་བརྟག་པའི་རིག་པ་ཤེས་པས་སོ། །ཇི་ཙམ་ཤེས་པ་ཐམས་ཅད་བསྟན་པར་བགྱིའམ་ཞེས་སྨོད་པའི་སྐབས་དེ་གསོལ་བས། ཉེས་དམིགས་དེ་བུད་མེད་ལ་ཆོས་བསྟན་པ་ལས་གྱུར་པ་ཡིན་གྱིས། དེས་ན་བུད་མེད་ལ་ཆོས་བསྟན་པར་མི་བྱའོ། །དགེ་སློང་དག་བསོད་སྙོམས་ལ་ཞུགས་པ་ན་བུད་མེད་དག་གིས་སྨྲས་པ། ཆོས་བསྟན་དུ་གསོལ། སྟོན་པས་མ་གནང་ངོ༌། །གལ་ཏེ་ཆོས་མི་སྟོན་ན་བདག་ཅག་ཀྱང་བསོད་སྙོམས་མི་དབུལ་ལོ་ཞེས་ཟེར་བའི་སྐབས་དེ་གསོལ་བས། ཚིག་ལྔས་ཆོས་བསྟན་ནོ། །
དགེ་སློང་བསོད་སྙོམས་ལ་ཞུགས་པ་ན། བུད་མེད་ཀྱིས། ཆོས་སྟན་དུ་གསོལ། སྲིང་མོ་དག །གཟུགས་མི་རྟག་པའོ། །ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མི་རྟག་པའོ། །ད་དུང་སྟོན་ཅིག ། མ་གནང་ངོ༌། །ལེགས་ཀྱི་བདག་ཅག་ཀྱང་བསོད་སྙོམས་ཅུང་ཟད་ཅིག་དབུལ་ལོ། །དེ་གསོལ་བས། ཚིག་དྲུག་བསྟན་ནོ། །དགེ་སློང་བསོད་སྙོམས་ལ་ཞུགས་པ་དང༌། ཆོས་སྟན་དུ་གསོལ། མིག་ནས་ཡིད་ཀྱི་བར་མི་རྟག་གོ །ད་དུང་སྟོན་ཅིག །སྟོན་པས་མ་གནང་ངོ༌། །ལེགས་ཀྱི་བདག་ཅག་ཀྱང་བསོད་སྙོམས་ཅུང་ཟད་ཅིག་དབུལ་ལོ། །དེ་གསོལ་བས། སྐྱེས་པ་བཞག་སྟེ་ཇི་ཙམ་འདོད་པར་ཆོས་བསྟན་པར་བྱའོ། །ཡང་བསོད་སྙོམས་ལ་ཞུགས་པ་ན། བུད་མེད་དག་གིས། ཆོས་སྟན་དུ་གསོལ། སྐྱེས་པ་འགའ་ཞིག་ཁྲིད་དེ་ཤོག །སྐྱེས་པས་ཅི་བགྱི། སྟོན་པས། སྐྱེས་པ་བཞག་ནས་ཆོས་ཇི་ཙམ་འདོད་པ་བསྟན་པར་གནང་ངོ༌། །ལེགས་ཏེ། བདག་ཅག་ཀྱང་སྦས་པ་དང༌། བསྲུངས་པར་གྱུར་ལ། འཕགས་དག་ཀྱང་མི་བསྙེངས་པར་འགྱུར་རོ། །དེ་དག་གིས་སྐྱེས་པ་ཁྲིད་ནས་ཇི་ཙམ་འདོད་པར་ཆོས་བསྟན་ནས་སོང་ངོ༌། །དྲུག་སྡེས་བུད་མེད་དག་ལ། འཁོད་ཅིག་ཆོས་བསྟན་པར་བྱའོ། །(༡༩༣བ)སྐྱེས་པ་འགའ་ཞིག་ཁྲིད་འོང་གི་བར་དུ་རེ་ཞིག་བཞུགས་ཤིག །ཁྱི་དང༌། སྤྲེའུ་དང༌། བེའུ་དང༌། ཁྱེའུ་འདུག་པ་འདི་ལས་གཞན་པའི་སྐྱེས་པ་ཅི་དགོས་ཞེས་ཆོས་བསྟན་ནས་སོང་ངོ༌། །ཕྱིས་གནས་བརྟན་དག་གིས་བསོད་སྙོམས་ལ་ཞུགས་པ་ན། བུད་མེད་དག་གིས། ཆོས་སྟན་དུ་གསོལ། སྐྱེས་པ་ཁྲིད་ཤོག་ཅིག །ཁྱི་ལ་སོགས་པ་འདི་དག་བདོག་གོ །ཁྱེད་ལ་སྐྱེས་པ་འདི་ལྟ་བུ་དང་སུས་ཆོས་སྟོན། དྲུག་སྡེས་སོ། །དེའི་ཕྱིར་དེ་དག་གི་གནས་སྐབས་དེ་འདྲའོ་ཞེས་ཟེར་བའི་སྐབས་དེ་གསོལ་བས། རིགས་པའི་སྐྱེས་པ་བཞག་སྟེ་ཇི་ཙམ་འདོད་པར་ཆོས་བསྟན་པར་བྱའོ། །བུད་མེད་ལ་ཚིག་ལྔའམ་དྲུག་གིས་ཆོས་བསྟན་པར་བྱའོ་ཞེས་གསུངས་པ་ན་དྲུག་སྡེ་དག །ཚིག་ལྔར་རུང་བ་དེ་ལ་དྲུག་ཀྱང་རུང་ལ། དྲུག་རུང་བ་དེ་ལ་བདུན་པ་ཡང་རུང་སྟེ། བདུན་པས་ཀུན་དོང་ཟོས་ནས། ཆང་འཐུངས་ཟེར་བའི་སྐབས་དེ་གསོལ་བས། བྱུང་བ་འདི་དང་སོགས། དྲུག་སྡེ་ལ། ངས་བུད་མེད་ལ་ཚིག་ལྔའམ་དྲུག་གིས་ཆོས་བསྟན་པར་བྱའོ་ཞེས་བསྟན་ན། བསམས་བཞིན་དུ་ཚིག་བདུན་པ་ལ་འཇུག་པ་བདེན་ནམ། མད་དོ། །དགེ་སྦྱོང་གི་ཚུལ་མིན་པ་སོགས། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་དོ། །བུད་མེད་ཀྱི་ཡུལ་ལ་ཚིག་ལྔའམ་དྲུག་ལ་སོགས་པའི་ཆོས་སྟོན་ན་རིགས་པའི་སྐྱེས་པ་མ་གཏོགས་ཏེ་ལྟུང་བྱེད་དོ། །
འདོན་པའི་ལྟུང་བྱེད་ནི། སྟོན་པ་མཉན་ཡོད་ནའོ། །དྲུག་སྡེ་དག་བསྙེན་པར་མ་རྫོགས་པ་དང་ཚིག་གིས་ཆོས་འདོན་པའི་སྒྲ་མཐོན་པོ། །དཔེར་ན། བྲམ་ཟེ་གསང་ཚིག་འདོན་པ་ལྟ་བུ་དང༌། རྩིས་མཁན་རྩིས་ཀྱི་གནས་ན་སྨྲ་བ་ལྟ་བུ་གྲགས་པར་གྱུར་པ་སྟོན་པས་གསན་ནས། ཀུན་དགའ་བོ་ལ། འདི་ཅི་ཡིན། དྲུག་སྡེ་དག་བསྙེན་པར་མ་རྫོགས་པ་དང་ཚིག་གིས་ཆོས་འདོན་པར་བགྱིད་དོ། །བྱུང་བ་འདི་དང་སོགས། གང་ཟག་བསྙེན་པར་མ་རྫོགས་པ་དང་ཚིག་གིས་ཆོས་འདོན་ན་ལྟུང་བྱེད་དོ། །
གནས་ངན་ལེན་བརྗོད་པའི་ལྟུང་བྱེད་ནི། སྟོན་པ་མཉན་ཡོད་ནའོ། །དགེ་སློང་དགེ་འདུན་ལྷག་མའི་ལྟུང་བ་འབྱིན་པ་དང༌། ལམ་གོལ་བར་རྒས་པས། སྡེ་སྣོད་འཛིན་པ་རྣམས་ལས་ཐོས་ནས་སྤོ་མགུ་སྤྱོད་པས་དགེ་འདུན་ལ་ཆུ་འབྲིམ་པ་བྲམ་ཟེ་དང་ཁྱིམ་བདག་དད་པ་ཅན་དག་གིས་མཐོང་ནས། རིན་པོ་ཆེ་རྟོག་པ་རྣམས་བརྟགས་ནས་རིན་པོ་ཆེ་སྡུད་དེ། གནས་བརྟན་འདི་དག་ཀྱང་དགེ་འདུན་ལ་ཆུ་འབྲིམ་པའི་བསོད་ནམས་གསོག་ལ། དྲུག་སྡེ་ཚོན་པོ་འདི་དག་ཟ་ཞིང་འཁོད་དོ། །དེ་དྲུག་སྡེས་ཐོས་ནས། ཅི་འདི་དག་བཟང་པོའི་ཆོས་ཀྱིས་དགེ་འདུན་ལ་ཆུ་འབྲིམ་སྙམ་མམ། ལག་པས་བྱ་བ་མ་ཡིན་པ་བྱས་པའི་ཆད་ལས་ཡིན་ནོ། །གནས་བརྟན་དག་ཀྱང་དེ་འདྲ་ན་བར་མ་དང་གསར་བུ་དག་ཅི་འདྲ་བར་འགྱུར་ཞེས་སྨོད་དོ། །སྤོ་བ་བྱེད་པ་དག་ལྕི་བ་འཇམ་པོས་མཆོད་རྟེན་ལ་བྱུག་པ་བྱེད་པ་ན། དྲུག་སྡེས་དེ་དག་གིས་ལྷན་ཅིག་གནས་པ་དང་ཉེ་གནས་ལ། ཁྱེད་ཀྱི་མཁན་སློབ་གར་(༡༩༤ན)སོང༌། བསོད་ནམས་བྱེད་དུ་སོང་གིས་ཁྱེད་ཀྱང་དེ་ལྟ་བུའི་བསོད་ནམས་གྱིས་ཤིག །དེ་དག་བཟང་པོའི་ཆོས་ཡིན་སྙམ་མམ། ལག་པས་བྱ་བ་མ་ཡིན་པ་བྱས་པའི་ཆད་ལས་སོ། །སྤོ་བ་བྱས་ཟིན་ནས་དགེ་ཚུལ་དག་ལ། འདི་དང་འདི་གྱིས་ཤིག །ཁྱེད་རང་ཅིའི་ཕྱིར་མི་བྱེད། ཁོ་བོ་ཅག་གིས་བྱར་མི་རུང་ངོ༌། །འདི་ལྟ་བུ་བྱར་རུང་ན་འདི་ཅིའི་ཕྱིར་བྱར་མི་རུང༌། དེ་ལྟ་བུའང་ཡོད་ཀྱི། ཁོ་བོ་ཅག་གིས་ཕྱིར་བཅོས་བྱས་ཟིན་ནོ། །ཁྱེད་ལ་སུས་སྨྲས། དྲུག་སྡེས་སོ། །དགེ་སློང་དོན་ཉུང་ངུ་དག །ཅིའི་ཕྱིར་བསྙེན་པར་མ་རྫོགས་པ་ལ་གནས་ངན་ལེན་གྱི་ལྟུང་བ་རྗོད་པར་བྱེད་ཅེས་སྨོད་པའི་སྐབས་དེ་གསོལ་བས། བྱུང་བ་འདི་དང་སོགས། དྲུག་སྡེ་ལ། ཁྱེད་བསྙེན་པར་མ་རྫོགས་པ་ལ་གནས་ངན་ལེན་གྱི་ལྟུང་བ་རྗོད་པར་བྱེད་པ་བདེན་ནམ། མད་དོ། །སྨད་ནས། གང་ཟག་བསྙེན་པར་མ་རྫོགས་པ་ལ་གནས་ངན་ལེན་གྱི་ལྟུང་བ་བརྗོད་ན་ལྟུང་བྱེད་དོ། །མཉན་ཡོད་ན་དགེ་སློང་འཕྲལ་བ་དང༌། དགེ་སློང་མ་གསར་མ་ཞེས་བྱ་བ་སྐྱེ་བོ་ཕལ་པོ་མོ་ཆེ་མ་དད་པར་རིག་པར་འགྱུར་བ་དེ་ལྟར་ཁྱིམ་རྣམས་སུ་སྤྱོད་པར་བྱེད་པའི་སྐབས་དེ་གསོལ་བ་དང་། ཁྱེད་ཀྱིས་དགེ་སློང་འཕྲལ་བ་དང་། དགེ་སློང་མ་གསར་མ་ཁྱིམ་རྣམས་སུ་སོ་སོར་གོ་བར་བྱེད་པའི་དགེ་སློང་བསྐོ་བར་བྱའོ་ཞེས་སོགས་གསུངས་ནས། བསྐོས་པ་དེས་ཁྱིམ་རྣམས་སུ་གོ་བར་བྱེད་དུ་སོང་བ་དང༌། འཕྲལ་བས་ཐོས་ནས་དེ་དེའི་གན་དུ་སོང་སྟེ། ཁྱོད་ཁྱིམ་རྣམས་སུ་ཁོ་བོ་སུན་འབྱིན་དུ་འགྲོའམ། དགེ་འདུན་གྱི་ཆོས་ལྡན་གྱི་བཀའ་བསྒྲུབ་བོ། །ཁོ་བོས་དེ་དང་དེ་བྱར་རུང་ན་ཁྱོད་ཀྱི་ལྟོ་དྲལ་ཏེ། རྒྱུ་མས་རྒྱལ་བྱེད་ཚལ་དཀྲི་བ་དང༌། མགོ་རྒྱལ་བྱེད་ཚལ་གྱི་སྒོར་འབྲུ་མར་གྱི་སྣོད་བཞིན་དུ་དཔྱང་ལ་གདགས་པར་མི་རུང་བ་ཅི་ཡོད་ཅེས་བསྡིགས་པས་སྐྲག་ནས། དགེ་སློང་རྣམས་ཀྱི་གན་དུ་སོང་སྟེ། འཕྲལ་བ་འདི་བཞིན་ཟེར་གྱིས་བདག་ཁྱིམ་རྣམས་སུ་གོ་བར་བྱེད་པར་མི་སྤྲོའོ། །དེ་གསོལ་བས། མི་གཏི་མུག་ཅན་དེས་གང་ཟག་གསོད་ནུས་ཀྱི་དགེ་འདུན་ནི་མི་ནུས་པས། དགེ་འདུན་གྱིས་གོ་བར་བྱ་བའི་ཕྱིར་དུ་གསོལ་བ་འབའ་ཞིག་གི་ལས་བྱའོ། །ལས་བྱས་ནས་སོ་སོར་རིག་པ་དང་མ་རིག་པའི་ཁྱིམ་ཐམས་ཅད་དུ་གོ་བར་བྱས་པས་དེ་གཉིས་བསོད་སྙོམས་ཀྱིས་ཕོངས་ནས། རིག་པའི་ཁྱིམ་དུ་གོ་བར་བྱའི། མ་རིག་པའི་ཁྱིམ་དུ་གོ་བར་མི་བྱའོ། །དེ་ལྟ་བས་ན་དགེ་འདུན་གྱིས་གནང་བ་མ་གཏོགས་སོ། །
མི་ཆོས་བླ་མ་སྨྲ་བའི་ལྟུང་བྱེད་ནི། བརྫུན་སྨྲ་བའི་ཕམ་པ་དང་ཕལ་ཆེར་འདྲ་བ་ལ། བདག་ཅག་གིས་སྔར་ནི་ཉེ་དུ་རྣམས་ལ་གཅིག་གིས་གཅིག་གི་ཡང་དག་པ་མ་ཡིན་པའི་ཡོན་ཏན་བསྒྲགས་ལ། ད་ནི་ཡང་དག་པའི་ཡོན་ཏན་བསྒྲག་གོ་སྙམ་ནས། བདེན་པར་སྨྲས་པས་བསོད་སྙོམས་བསོད་པ་ཐོབ་ནས་ལུས་རྒྱས་པར་གྱུར་ཏོ། །གཞན་ཐམས་ཅད་སྔར་དང་འདྲ་བ་ལ། ཁྱེད་ཅན་བསྙེན་པར་མ་རྫོགས་པ་ལ་མི་ཆོས་བླ་མ་(༡༩༤བ)བདེན་པ་བརྗོད་དུ་རུང་ངམ། རུང་ཡང་སྲིད། མི་རུང་ཡང་སྲིད། བདག་ཅག་གིས་སྨྲས་སོ། །དོན་ཉུང་ངུ་དག་སྨོད་པའི་སྐབས་དེ་གསོལ་བས། བྱུང་བ་འདི་དང་སོགས། ཆུ་ཀླུང་ཡིད་འོང་ལྡན་གྱི་འགྲམ་ན་གནས་པའི་དགེ་སློང་རྣམས་ལ། ཁྱིམ་གྱིས་བསྙེན་པར་མ་རྫོགས་པ་ལ་མི་ཆོས་བླ་མ་བདེན་པར་སྨྲས་པ་བདེན་ནམ། མད་དོ། །བསྙེན་པར་མ་རྫོགས་པ་ལ་མི་ཆོས་བླ་མ་བདེན་པ་བརྗོད་ན་ལྟུང་བྱེད་དོ། །རྒྱལ་པོའི་ཁབ་ན་ཁྱིམ་བདག་རབ་ཏུ་བཟང་པོ་ཞེས་བྱ་བ་ཕྱུག་ཅིང་ལོངས་སྤྱོད་ཆེ་བ་ཞིག་གིས་རིགས་མཉམ་པ་ལས་ཆུང་མ་བླངས་ཏེ་དགའ་མགུར་སྤྱད་པས་སེམས་ཅན་ཞིག་ཞུགས་སོ། །སྟོན་པ་བསོད་སྙོམས་ལ་ཞུགས་པ་དང་ཁྱིམ་བདག་དེས། བདག་གི་མཆིས་བྲང་ལ་སེམས་ཅན་ཞིག་ཞུགས་ན་ཁྱེའུ་དང་བུ་མོ་གང་བཙའ་ཞེས་ཞུས་པས། བུ་ཕོར་བཙའ་ཞིང་རིགས་གསལ་བར་བྱེད། ལྷ་དང་མིའི་དཔལ་ཉམས་སུ་མྱོང་སྟེ་ངའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་པར་འགྱུར་རོ་ཞེས་ལུང་བསྟན་ཏོ། །དེས་བཟའ་དང་བཅའ་བ་བསོད་པས་ལྷུང་བཟེད་བཀང་སྟེ་ཕུལ་ལོ། །དེའི་ཉེ་ལོགས་ན་གཅེར་བུ་བ་ཞིག་འདུག་པ་དེས། བདག་ལ་བསླང་བའི་ཁྱིམ་གཅིག་ཡོད་པ་དེ་གོའུ་ཏ་མས་ཁ་དྲངས་ཀྱིས་སོང་ལ་བལྟའོ་སྙམ་ནས། དགེ་སློང་གོའུ་ཏ་མ་འོངས་སམ། བྱོན་ནོ། །
ཅི་ལུང་བསྟན། འདི་ལྟར་བསྟན་ཏོ། དེ་རྩིས་ལ་མཁས་པས། རྡོ་རྒྱུས་དཀར་པོ་བླངས་ནས་བརྩིས་པས་ཐམས་ཅད་བདེན་པར་མཐོང་ནས། དེ་ཁོ་ན་བཞིན་དུ་སྨྲས་ན་ཆེས་དད་པར་འགྱུར་གྱི། ཅུང་ཟད་བསྔགས་ལ་ཅུང་ཟད་སྨད་དོ་སྙམ་ནས་བཞིན་བསྒྱུར་ནས། ཅི་ཡིན། ཅུང་ཟད་བདེན། ཅུང་ཟད་བརྫུན་ནོ། །བུ་ཕོར་བཙའ་བ་དང༌། རིགས་གསལ་བར་བྱེད་པ་ནི་བདེན་ཏེ། གསལ་བ་ནི་མེའི་མིང་ཡིན་པས་བཙས་མ་ཐག་ཏུ་ཁྱོད་ཀྱི་ཁྱིམ་མེས་འཚིག་གོ །ལྷ་དང་མིའི་དཔལ་མྱོང་བ་ནི་མི་བདེན་ཏེ། མིས་ལྷའི་དཔལ་མྱོང་བ་སུ་ཡོད། རབ་ཏུ་འབྱུང་བ་ནི་བདེན་ཏེ། དེ་བཟའ་རྒྱུ་མེད་ནས་རབ་ཏུ་འབྱུང་བར་འགྱུར་རོ། །དགྲ་བཅོམ་འཐོབ་པ་ནི་མི་བདེན་ཏེ། གོའུ་ཏ་མ་ལའང་དགྲ་བཅོམ་པ་མེད་ན་དེའི་ཉན་ཐོས་ལ་ལྟ་ཅི་སྨོས། རབ་ཏུ་བཟང་མི་དགའ་ནས། ད་ཇི་ལྟར་བསྒྲུབ། བདག་བསླབ་པ་བླངས་པས་ཁྱོད་ཉིད་ཤེས་སོ། །དོར་བར་བྱའོ་སྙམ་ནས་སྨན་མ་ཡིན་པ་བྱིན་པས། སྲིད་པ་ཐ་མ་བ་ཡིན་པས་སྨན་དུ་གྱུར་ཏོ། །དཀུ་མཉེས་པས་གཡས་དང་གཡོན་དུ་བྲོས་ཤིང་མས་ངུས་པས། ཁྱིམ་མཚེས་འོངས་ནས། ཅིའི་ཕྱིར་དུ། བུ་བཙའ་འོ་ཞེས་སྨྲས་པས་སོང་ངོ༌། །དེས་དགོན་པར་ཁྲིད་ནས་ཤི་ཤིར་བརྩལ་ནས་སྦས་ཏེ་ཁྱིམ་དུ་ཁྱེར་ནས། ཁོ་བོའི་ཆུང་མ་ཤིའོ་ཞེས་ངུ་ཞིང་དུར་ཁྲོད་དུ་ཁྱེར་རོ། །གཅེར་བུ་བ་དགའ་སྟེ། གོའུ་ཏ་མས་ལུང་བསྟན་པ་དེ་ཤི་ནས་དུར་ཁྲོད་དུ་ཁྱེར་རོ། །ཤིང་རྩ་བ་མེད་པ་ལ་ཡན་ལག་ག་ལས་འབྱུང་ཞེས་ཟེར་རོ། །སྟོན་པས་མི་མཁྱེན་པ་མེད་པས་འཛུམ་པ་མཛད་པས་འོད་ཟེར་བཀྱེ་སྟེ་(༡༩༥ན)ལས་གཉིས་མཛད་ནས་ཞལ་དུ་ནུབ་བོ། །དེའི་རྒྱུ་ཞུས་པས། སྟོན་པ་དུར་ཁྲོད་དུ་གཤེགས་ཀྱིས་ཆོས་གོས་ལོངས་ཤིག །ལྷ་མི་བརྒྱ་སྟོང་དང་བཅས་ཏེ་བསིལ་བའི་ཚལ་དུ་གཤེགས་པ་དང༌། བྲམ་ཟེའི་ཁྱེའུ་ཞིག་ན་རེ། གོའུ་ཏ་མས་འདི་ལྟར་ལུང་བསྟན་པ་བརྫུན་དུ་མ་གྱུར་གྲང༌། རྒྱལ་རིགས་ཀྱི་ཁྱེའུས། ཟླ་བ་སྐར་མའི་ཚོགས་བཅས་ས་ལ་ལྷུང་ཡང་སྲིད། ས་འདི་རི་དང་ནགས་བཅས་མཁའ་ལ་འགྲོ་ཡང་སྲིད། རྒྱ་མཚོ་ཆེན་པོའི་ཆུ་ནི་བསྐམས་པར་འགྱུར་སྲིད་ཀྱི། དྲང་སྲོང་ཆེན་པོ་བརྫུན་གསུང་འགྱུར་བ་སྲིད་པ་མིན། དེ་ལྟར་ན་དུར་ཁྲོད་དུ་བལྟར་འདོང་ངོ༌། །དེ་གཉིས་ཕྱིན་པ་དང༌། རྒྱལ་རིགས་ཀྱི་ཁྱེའུ་དེས་སྟོན་པ་མཐོང་ནས་དད་པའི་ཚིགས་སུ་བཅད་པ་སྨྲ་ཞིང༌། རྒྱལ་པོས་ཀྱང་དེ་ཐོས་ནས། སྟོན་པ་དོན་མེད་པར་དེར་མི་གཤེགས་ཀྱིས་བལྟར་འགྲོའོ་སྙམ་ནས་འཁོར་དང་བཅས་པ་འོངས་སོ། །སྟོན་པ་གདན་ལ་བཞུགས་ནས་འཛུམ་པ་མཛད་པ་གཅེར་བུ་བས་མཐོང་ནས། ཁྱིམ་བདག་ལ། སྐལ་ཆད་དེ་མ་ཤིའོ། །ཇི་ལྟར་བྱ། ཁྱོད་ཉིད་ཤེས་སོ། །དེས་ཤིང་བཅེར་ནས་མེ་སྦར་ཏེ་བསྲེགས་པ་དང༌། གཞན་ཐམས་ཅད་ཚིག་ནས་ལྟོའི་ཉེ་འཁོར་མ་ཚིག་གོ །
དེ་ནས་ལྟོའི་ཉེ་འཁོར་དེ་བརྟོལ་བ་དང༌། པདྨའི་སྙིང་བོ་ལས་གཞོན་ནུ་གཟུགས་བཟང་ལ། བལྟ་ན་སྡུག་པ་ཞིག་བྱུང་ངོ༌། །སྐྱེ་བོ་རྣམས་ངོ་མཚར་ཞིང༌། གཅེར་བུ་བའི་ང་རྒྱལ་ཉམས་སོ། །སྟོན་པས། ཁྱིམ་བདག་གཞོན་ནུ་ལོངས་ཤིག །གཅེར་བུ་བ་ལ་བལྟས་པས། ཚིག་པར་མི་འགྱུར་རམ། མ་བླངས་སོ། །འཚོ་བྱེད་ལ། གཞོན་ནུ་ལོངས་ཤིག །དེས་ཐེ་ཚོམ་མེད་པར་མེ་ནང་དུ་ཞུགས་ནས་བླངས་སོ། །འཚོ་བྱེད། མེས་མ་གནོད་དམ། བདག་རྒྱལ་པོའི་ཕོ་བྲང་དུ་སྐྱེས་ཀྱང༌། ཙན་དན་ས་མཆོག་ལྟར་བསིལ་བ་འདི་ལྟ་བུ་སྔར་མ་མྱོང་ལགས་སོ། །ཁྱིམ་བདག །གཞོན་ནུ་ལོངས་ཤིག །གཅེར་བུ་བའི་གདོང་དུ་བལྟས་པས། སྐལ་ཆད་འདི་མེས་མ་ཚིག་པས་ཁྱོད་ཀྱི་ཁྱིམ་འཚིག་ཅིང་ཁྱོད་ཀྱང་སྲོག་དང་འབྲལ་ལོ། །དེས་མ་བླངས་པ་དང་གཟུགས་ཅན་སྙིང་པོ་ལ། གཞོན་ནུ་ལོངས་ཤིག །བླངས་ནས། མིང་ཅིར་གདགས། མེ་སྐྱེས་སོ། །དེ་ནས་སྟོན་པས་སྐྱེ་བོ་ཚོགས་ལ་ཆོས་བཤད་པས་ཕལ་ཆེར་གྱིས་འབྲས་བུ་བཞི་ལ་སོགས་པ་ཐོབ་བོ། །མེ་སྐྱེས་མ་མ་བརྒྱད་ལ་གཏད་ནས་བསྐྱེད་བསྲིངས་པ་དང་། དེའི་ཞིང་པོ་ཡུལ་གཞན་དུ་སོང་བས། ལུང་བསྟན་པ་དང་མ་ཤི་བ་ཐོས་ནས་ཁྱིམ་མཚེས་ལ། ལུང་བསྟན་པ་བརྫུན་དུ་མ་སོང་ངམ་དྲིས་པས། ཇི་ལྟར་གྱུར་པ་བསྙད་པ་དང་དེས་ཁྱིམ་བདག་རབ་ཏུ་བཟང་པོ་ལ། ངའི་སྲིང་མོ་བསད། ཁྱེའུ་ཡང་སྤངས་འདུག་པས། ད་བླངས་ན་ལེགས། མི་ལེན་ན་གཉེན་དུ་མི་རྩི་བའི་དྲིལ་བསྒྲག །རྒྱལ་པོ་ལ་ཞུའོ། །དེ་སྐྲག་སྟེ་རྒྱལ་པོའི་གན་དུ་སོང་ནས། གཞོན་ནུ་བདག་ལ་ཞུའོ། །ང་ལ་(༡༩༥བ)སྟོན་པས་གཏད་པ་ཡིན་པས་སྟོན་པ་ལ་ཞུས་ཤིག །སྟོན་པས་ཀུན་དགའ་བོ་བཏང་ནས་རྒྱལ་པོ་ལ་བསྒོས་པས། རྒྱལ་པོ་ན་རེ། འདི་ངས་བསྐྱེད་པ་ཡིན་པས་ཉིན་རེ་ལ་དུས་གསུམ་གསུམ་དུ་ང་བལྟ་བའི་ཕྱིར་འོང་ན་སྦྱིན་ནོ། །དེ་ལྟར་འཚལ་ལོ། །
རྒྱལ་པོས་གཞོན་ནུ་རྒྱན་ཐམས་ཅད་ཀྱིས་བརྒྱན་ཅིང་གླང་པོ་ཆེ་ལ་བསྐྱོན་ནས་བཏང་ངོ༌། །འཇིག་རྟེན་ན་ཕ་མ་ཤི་བའི་བར་དུ་བུའི་མིང་མི་སྒྲོག་ལ། དེའི་ཚེ་ཕ་ཤི་ནས་མེ་སྐྱེས་ཁྱིམ་བདག་ཏུ་གྱུར་པ་དང༌། གསུམ་ལ་སྐྱབས་སུ་སོང་ཞིང༌། མ་བསད་པའི་སར་གཙུག་ལག་ཁང་བརྩིགས་ཏེ་ཡོ་བྱད་ཕུན་སུམ་ཚོགས་པ་ཕུལ་བས། དཀུ་མཉེའི་ཚལ་ཞེས་གྲགས་སོ། །དེའི་ཞོ་ཤས་འཚོ་བ་ཡུལ་གཞན་དུ་སོང་བ་དག་གིས་དེ་ཐོས་ནས། ཙན་དན་ས་མཆོག་གི་ལྷུང་བཟེད་རིན་པོ་ཆེས་གང་བ་ཞིག་དེ་ལ་སྐྱེས་སུ་བསྐུར་ཏོ། །དེས་ཤིང་རིང་པོའི་རྩེ་མོ་ལ་བཏགས་ནས། འདི་སྐས་དང་ཡ་གད་དང་ལྕགས་ཀྱུས་མི་བླང་གིས། དགེ་སྦྱོང་ངམ། བྲམ་ཟེ་རྫུ་འཕྲུལ་ཆེ་བ་ཞིག་གིས་ཅི་བདེར་ཁྱེར་ཅིག་ཅེས་དྲིལ་བསྒྲགས་པས། མུ་སྟེགས་ཀྱིས་མཐོང་ནས། ཁྱོད་དགེ་སྦྱོང་ལ་དད་པས་དེས་ལེན་ནོ་ཟེར་རོ། །གནས་བརྟན་གྱིས་དྲིས་པས་དེ་བཤད་པ་དང༌། སྟོན་པས་ཡོན་ཏན་བཅབ་སྟེ་སྦ་བར་བྱའོ་ཞེས་གསུངས་པས་ལྷུང་བཟེད་ཙམ་གྱི་ཆེད་དུ་བདག་ཉིད་བསྟན་ནམ་ཞེས་ཟེར་རོ། །འོད་སྲུངས་སྟོབས་བཅུ་པས་མཐོང་ནས་དྲིས་པས། བཤད་པ་དང༌། བདག་ཐོག་མ་མེད་པའི་དུས་ནས་བསགས་པའི་ཉོན་མོངས་པ་སྤངས་ཤིང་བོར་བ་དང༌། མུ་སྟེགས་བྱེད་རྫུ་འཕྲུལ་སྒྲུན་པར་ཆད་ཀྱིས་དེའི་ཡིད་མགུ་བར་བྱའོ་སྙམ་སྟེ། ལག་པ་གླང་པོ་ཆེའི་སྣ་ལྟ་བུ་བླངས་ནས་ཁྱེར་སོང་ངོ༌། །དགེ་སློང་དག་གིས། འདི་ག་ལས་རྙེད། འདི་ལས་སོ། །ལྷུང་བཟེད་ཙམ་གྱི་ཆེད་དུ་ཁྱིམ་པའི་མདུན་དུ་རྫུ་འཕྲུལ་བསྟན་དུ་རུང་ངམ། རུང་ཡང་བླ། མི་རུང་ཡང་བླ་སྟེ་བྱས་ཟིན་ནོ་ཞེས་པའི་སྐབས་དེ་གསོལ་བས། ཁྱིམ་པའི་མདུན་དུ་རྫུ་འཕྲུལ་བསྟན་པར་མི་བྱའོ། །
དེའི་ཚེ་མེ་སྐྱེས་ཀྱིས་ལྷའི་དཔལ་ཉམས་སུ་མྱོང་ལ། རྒྱལ་པོའི་ཁབ་དང་ཙམ་པའི་བར་གྱི་ཤོ་གམ་གྱི་གནས་ཤིག་ན་ཤོ་གམ་པ་ཞིག་ཤི་བ་གནོད་སྦྱིན་དུ་སྐྱེས་ནས་དེའི་རྨི་ལམ་དུ། གནས་འདིར་གནོད་སྦྱིན་གྱི་གཟུགས་ཤིག་གྱིས་ལ། དེའི་སྐེར་དྲིལ་བུ་ཐོགས་ཤིག །སུ་ཤོ་གམ་མི་འཇལ་བར་འགྲོ་ན་དྲིལ་བུ་སྒྲ་འབྱིན་པར་བྱེད་དོ་ཞེས་བསྟན་པ་བཞིན་བྱེད་དོ། །ཙམ་པ་ན་བྲམ་ཟེ་བཟའ་མི་གཉིས་ཀྱི་ཆུང་མས་རས་བལ་ཉོས་ནས་བཀལ་ཏེ་འཐག་ཏུ་བཅུག་ནས། འདི་ཚོང་འདུས་སུ་ཁྱེར་ལ་ཀརྵ་པ་ཎ་སྟོང་སྟེར་ན་བྱིན། མ་ཡིན་ན། ཚོང་འདུས་མ་ཡིན་ནོ་ཞེས་སྒྲོགས་ཤིག །བྲམ་ཟེས་ཚོང་འདུས་སུ་ཕྱིན་ནས་ཉོ་བ་མ་བྱུང་བ་དང༌། ཚོང་འདུས་མ་ཡིན་ནོ་ཞེས་བསྒྲགས་ནས། གདུགས་ཀྱི་ཡུ་བར་བཅུག་སྟེ་རྒྱལ་པོའི་ཁབ་ཏུ་ཕྱིན་པ་དང༌། དྲིལ་བུ་སྒྲ་འབྱིན་པས་བཀུག་ནས་བཙལ་བས་འགའ་(༡༩༦ན)ཡང་མ་རྙེད་དོ། །ལན་གསུམ་དུ་བཙལ་ཡང་མ་རྙེད་པར། ལྷས་ནི་བྱིན་གྱིས་བརླབས་ན། ཤོ་གམ་མི་ལེན་གྱིས་སྟོན་ཅིག །རས་དེ་བསྟན་པས་ལྷའི་བྱིན་རླབས་འདི་འདྲའོ་ཞེས་ཟེར་ནས་རས་ཡ་གཅིག་ལྷ་ལ་བསྟན་ཏོ། །མི་ལེན་ནོ་ཟེར་ནས་མི་འཕྲོག་གམ། མིན་གྱི་ལྷ་ལ་བསྟན་པར་ཟད་དེ་ལོང་ལ་སོང་ཞིག །དེས་སོང་སྟེ་བསྟན་པས་ཉོ་བ་སུ་ཡང་མ་བྱུང་བས། ཚོང་འདུས་མིན་ནོ་ཞེས་བསྒྲགས་པ་དང༌། མེ་སྐྱེས་ཀྱིས་དེ་ཐོས་ནས། ཅིའི་ཕྱིར། འདིའི་ཕྱིར་རོ། །བལྟའི་ཁྱེར་ཤོག །བལྟས་ནས། མ་སྤྱད་པ་འདིས་ལྔ་བརྒྱ་རི། སྤྱད་པ་འདིས་ཉིས་བརྒྱ་ལྔ་བཅུ་རིའོ། །ཁྱད་མེད་དོ། །མངོན་སུམ་དུ་བསྟན་གྱིས་ཟེར་ནས། མ་སྤྱད་པ་དེ་ནམ་མཁའ་ལ་བོར་བ་ལྡིང༌། སྤྱད་པ་དེ་ནམ་མཁའ་ལ་བོར་བས་ལྷུང༌། མ་སྤྱད་ཚེར་མའི་སྟེང་དུ་བོར་བ་མ་ཐོགས། སྤྱད་པ་ཚེར་མའི་སྟེང་དུ་བོར་བས་ཐོགས་སོ། །ཁྱེད་མཐུ་ཆེ་བ་ཞིག་ཡིན་གྱིས་རིན་ཇི་ཙམ་བཞེད་པས་སྣོམས་ཤིག །ཁྱེད་མགྲོན་པོ་ཡིན་པས་མཆོད་པའི་ཕྱིར་སྟོང་སྦྱིན་ནོ། །མེ་སྐྱེས་ཀྱིས་མ་སྤྱད་པ་དེས་ཁྲུས་རས་བྱས། སྤྱད་པ་དེ་ཁྱེའུ་ཞིག་ལ་བྱིན་ནོ། །དེས་ཁྲུས་རས་བསྐམས་པ་རླུང་གིས་ཁྱེར་ནས་གཟུགས་ཅན་སྙིང་པོའི་པང་དུ་ལྷུང་བ་དང༌། འདི་ག་ལས་འོངས། བློན་པོ་ན་རེ། ང་ལ་ནུ་བཞིན་དུ་ན་བཟའི་ཆར་བབས་པས་རིན་པོ་ཆེའི་ཆར་ཡང་འབབ་བོ། །
རྒྱལ་པོས། མེ་སྐྱེས་ལ་ལྷ་མིའི་དཔལ་མྱོང་བར་ལུང་བསྟན་གྱིས་དེ་བོས་ཤིག །བོས་ནས་བྱིན་པས་ཅུང་ཟད་བགད་ནས། འདི་ལྟར་རོ། །ཅི་ལྷ་མིའི་དཔལ་མྱོང་ངམ། མྱོང་ངོ༌། །ང་སྤྱན་མི་འདྲེན་ནམ། འདྲེན་ནོ། །རྒྱལ་པོ་དེར་སོང་བ་དང༌། བུད་མེད་ཀྱི་འཁོར་ཕྱི་པ་མཐོང་ནས་དབང་པོ་ཕྱིར་སློན་པར་བྱེད་དོ། །ཅིའི་ཕྱིར་འདི་ལྟར་བགྱིད། མནའ་མའོ། །མ་ལགས་ཏེ་ཕྱི་པའི་འཁོར་རོ། །དེ་བཞིན་དུ་བར་མ་ལའང་ངོ༌། །བར་སྒོ་ནས་རྫིང་ཆུས་གང་བ་ལ་ཉ་རྒྱུ་བ་ལྟ་བུའི་འཁྲུལ་འཁོར་མཐོང་ནས་ལྷམ་འབུད་པ་ན། ཅིའི་ཕྱིར། ཆུ་འབོག་པའོ། །ཆབ་མ་ལགས་ཏེ། རིན་པོ་ཆེའི་ས་གཞི་ཡིན་ལ། ཉ་ནི་འཁྲུལ་འཁོར་རོ། །ཐུགས་མ་ཆེས་ནས་སོར་གདུབ་བསྐྱུར་པས་ཀོ་ལ་ལ་ཟེར་ནས་སོང་བ་དང་ཡིད་ཆེས་ཏེ་རིན་པོ་ཆེའི་ཁྲི་ལ་བསྡད་པ་དང༌། མནའ་མས་ཕྱག་འཚལ་བས་མཆི་མ་བྱུང༌། ཅིའི་ཕྱིར་དུ། མིན་ཏེ་ཤིང་དུད་མནན་པས་སོ། །དེ་ལྟར་ལྷ་མིའི་དཔལ་ལ་སྤྱོད་ཅིང་འདུག་པ་ན་རྒྱལ་པོའི་བྱ་བ་ཉམས་ནས་མ་སྐྱེས་དགྲས་སྦྲོན་དུ་བཏང་བས། ཁྱོད་ཀྱིས་ཞག་གཅིག་ཙམ་རྒྱལ་སྲིད་བྱེད་མི་ནུས་སམ། བདག་གིས་དགུང་བདུན་དུ་འཚལ་ལོ། །མེ་སྐྱེས་ན་རེ། དེ་ལགས་ཏེ། མེ་ཏོག་ཁ་བྱེ་འཛུམ། ནོར་བུ་འོད་འབར་མི་འབར། བྱ་སྐད་འབྱིན་མི་འབྱིན་ལས་ཤེས་སོ། །མ་སྐྱེས་དགྲས་ནོར་བུ་ཞིག་བརྐུས་ནས་ཁྱེའུ་ཞིག་ལ་གཏད་པས། དེ་རང་གནས་སུ་སོང་ནས་བརྡེགས་པ་དང༌། ཅི་ལ་བརྡེག །ང་རྐུན་མ་ཡིན་ན་འདི་དེ་(༡༩༦བ)བས་ཀྱང་རྐུན་ཆེན་ནོ། །མ་ལགས་ཏེ་རང་གནས་སུ་སོང་བ་ལགས། གཞོན་ནུ། ཅི་དགོས་པ་སྣོམས་ཤིག །དེ་སྐྱེངས་ནས། ཕ་ཤི་བ་དང་དབང་ངོ་སྙམ་མོ། །མ་སྐྱེས་དགྲས་ཕ་སྲོག་དང་ཕྲལ། རང་རྒྱལ་པོར་སོང་བའི་ཚེ་ན། མེ་སྐྱེས། ཁྱོད་དང་ང་སྤུན་ཡིན་པས་བགོའོ། །དེ་སྐྲག་ནས། ཁྱོད་མངའ་ན་མགོ་ཅི་འཚལ་དེར་གཤེགས་སུ་གསོལ། ལེགས་ཟེར་ནས་བརྗེས་པས་ལྷའི་ལོངས་སྤྱོད་དེ་མི་སྣང་བར་གྱུར་ནས་མེ་སྐྱེས་ཅན་དུ་སོང༌། དེ་ལྟར་ལན་བདུན་དུ་གྱུར་པས་རྐུན་པོ་བཏང་ནས་འཛེགས་པ་དང་སྒྲ་བྱུང་ནས་མེ་སྐྱེས་ཀྱིས། འདུག་པར་གྱུར་ཅིག་ཅེས་བསམས་པས་དེ་ཉིད་ན་འཁོད་དོ། །མ་སྐྱེས་དགྲས། ཐོང་ཞིག་ཟེར་བས། འགྲོ་བར་གྱུར་ཅིག་ཅེས་བསམས་པས་སོང་ངོ༌། །
དེ་ནས། འདིས་ཕའང་བསད་པས་གསོད་ངེས་སྙམ་ནས་ལོངས་སྤྱོད་རྣམས་སྦྱིན་པར་བཏང༌། སྟོན་པའི་དྲུང་དུ་ཕྱིན། ཚུར་ཤོག་གིས་བསྙེན་པར་རྫོགས་ནས་དགྲ་བཅོམ་པ་ཐོབ་བོ། །དེའི་རྒྱུ་ཞུས་པས། སངས་རྒྱས་རྣམ་གཟིགས་ཀྱི་ཚེ་ཕོ་བྲང་རྩ་བ་ཅན་ན་རྒྱལ་པོ་མཉེན་ལྡན་ཞེས་བྱ་བ་རྒྱལ་སྲིད་བྱེད་དོ། །ཁྱིམ་བདག་ཉེས་མེད་ཅེས་བྱ་བས་སྟོན་པ་ལ་ཟླ་བ་གསུམ་དུ་བསྙེན་བཀུར་བ་ཞུས་པས་གནང་ངོ་། །དེའི་རྗེས་སུ་རྒྱལ་པོས་སྟོན་པ་ལ་ཟླ་བ་གསུམ་དུ་བསྙེན་བཀུར་བ་ཞུས་པས། ཉེས་མེད་ཀྱིས་སྤྱན་དྲངས་ཟིན་ནོ། །སྟོན་པས་གནང་ན་ཉེས་མེད་འདྲང་བར་བགྱིའོ། །དེ་ལྟར་བྱའོ། །རྒྱལ་པོས་ཉེས་མེད་བོས་ནས། ངས་དང་པོར་གསོལ་ནས། ཁྱོད་ཕྱིས་གསོལ་ན་གནོད་པ་མེད་དམ། བདག་གིས་སྤྱན་དྲངས་ཟིན་པས་སྔོན་ལ་གསོལ་ལོ། །འོ་ན་གང་བཟང་བས་སྔོན་ལ་གསོལ་ལོ། །བགྱིའོ། །དེ་ནས་སང་ཉེས་མེད་ཀྱིས་གདུགས་ཚོད་བསོད་པས་ཚིམ་པར་བྱས། དེའི་རྗེས་ལ་རྒྱལ་པོས་དྲངས་པས་མཉམ་པས་འཕམ་རྒྱལ་མེད་པས་རྒྱལ་པོ་ཡིད་ཁོང་དུ་ཆུད་པ་དང༌། བློན་པོས་དྲིས་པས་བཤད་ནས། ལྷ། ཤིང་འཚོང་བ་དགག་དང༌། བཀག་ནས་དེ་ལ་ཤིང་འཚོང་བ་མེད་པ་དང༌། སྤོས་ཀྱི་ཤིང་གིས་གདུགས་ཚོད་གཡོས། འབྲུ་མར་དྲི་ཞིམ་པོས་བརླན་པའི་རས་ཀྱིས་བག་ཚོས་བཙོས་པས་དྲི་ཞིམ་པོས་གྲོང་ཁྱེར་ཐམས་ཅད་ཁྱབ་པ་རྒྱས་པོས་དྲིས་པས། འདི་ལྟར་རོ། །ངའང་བྱེད་དོ། །ལྷ། ཁྱིམ་བདག་འདི་ནི་བུ་མ་མཆིས་པས་ཤི་མ་ཐག་ནོར་ཁྱེར་མངའ་བར་འགྱུར་གྱིས། ཤིང་འཚོང་བ་གནང་མཛོད་ཅིག །གནང་བ་དང་ཉེས་མེད་ཀྱིས་ཐོས་ནས། རྒྱལ་པོ་མ་དང་ལྷན་ཅིག་སྲེག་ཀྱང་ཆོག་པའི་ཤིང་ཡོད་དོ་ཞེས་བརྗོད་དོ། །
རྒྱལ་པོ་ཡིད་ཁོང་དུ་ཆུད་པ་དང་བློན་པོས། དེ་ལྟར་མ་མཛད། ལྷའི་གྲོང་ཁྱེར་དང་འདྲ་བའི་གཞལ་ཡས་ཁང་བཀོད་པ་བཤམས་ནས་སྟོན་པ་སྤྱན་དྲངས་ཏེ། སྟོན་པའི་སྟེང་དུ་གླང་པོ་ཆེའི་གཙོ་བོས་རྩིབས་བརྒྱ་དང་ལྡན་པའི་གདུགས་བཟུང༌། དགེ་སློང་གཞན་གྱི་སྟེང་ནས་གླང་པོ་ཆེ་གཞན་གྱིས་གདུགས་བཟུང༌། སྟོན་པའི་སྤྱན་སྔར་བཙུན་མོ་དམ་པས་བསིལ་ཡབ་གཡོབ། (༡༩༧ན)དགེ་སློང་གཞན་ལ་བཙུན་མོ་གཞན་གྱིས་གཡོབ་བོ། །དེ་ཉེས་མེད་ཀྱིས་རྟོག་ཅན་དང་རང་གིས་བརྟགས་པས་ཤེས་ནས། གཞན་ནུས་ཏེ་གླང་པོ་ཆེ་དང་བཙུན་མོ་མི་འབྱོར་སྙམ་དུ་མྱ་ངན་བྱེད་པ་དང་བརྒྱ་བྱིན་གྱིས་དེ་ཤེས་ནས། ཅིའི་ཕྱིར་མྱ་ངན་བྱེད། མྱ་ངན་སེལ་མི་ནུས་པས་མི་བརྗོད་དོ། །ནུས་སོ། །བརྗོད་པས་ལས་ཐམས་ཅད་པ་གྲོགས་ལ་བཏང་ངོ༌། །དེས་སྔར་བས་ཆེ་ཁྱད་པར་དུ་འཕགས་པའི་གྲོང་ཁྱེར་དང་ཞལ་ཟས་བཤམས། སྟོན་པའི་དབུའི་སྟེང་དུ་གླང་པོ་ཆེ་ས་སྲུང་གིས་རྩིབས་བརྒྱ་དང་ལྡན་པའི་གདུགས་འཛིན་དུ་བཅུག །དགེ་སློང་གཞན་རྣམས་ལ་ལྷའི་གླང་པོ་ཆེ་གཞན་གྱིས་གདུགས་འཛིན་དུ་བཅུག །སྟོན་པའི་སྤྱན་སྔར་བརྒྱ་བྱིན་གྱི་བཙུན་མོ་བདེ་སོགས་མས་བསིལ་ཡབ་གཡོབ། གཞན་ལ་ལྷའི་བཙུན་མོ་གཞན་གྱིས་གཡོབ་ཏུ་བཅུག་གོ །རྒྱལ་པོས་ལྟ་རུ་བཏང་བ་ཐམས་ཅད་ཡ་མཚན་ནས་དེ་ཉིད་དུ་བསྡད་པ་དང༌། རྒྱལ་པོ་སོང་སྟེ་སྒོར་བསྡད་པས། སྟོན་པས། ཁྱོད་ཀྱིས་རྒྱལ་པོ་བདེན་པ་མཐོང་བ་ལ་ཚིག་རྩུབ་སྨྲས་ཀྱིས། རྒྱལ་པོ་སྒོ་ན་འདུག་གིས་སོང་ལ་བཟོད་པ་གསོལ་ཅིག །དེས་བཟོད་པ་གསོལ་ནས། ལྷ། ནང་དུ་གཤེགས་ནས་ཉིད་ཀྱི་ཕྱག་ནས་བྲིམ་པར་མཛོད་ཅིག །དེ་ནང་དུ་སོང་ནས་བལྟས་པས་ལྷའི་འབྱོར་པ་མཐོང་བས་ངོ་མཚར་ཏེ། ཁྱོད་གཅིག་པུས་གདུགས་ཚོད་གསོལ་བར་རིགས་ཀྱི། ཁོ་བོ་མ་ཡིན་ནོ་ཞེས་ཟེར་རོ། །ཉེས་མེད་ཀྱིས་སྟོན་པ་ལ་ཕྱག་འཚལ་ནས། དགེ་བ་འདིས་བདག་ཕྱུག་ཅིང་ལོངས་སྤྱོད་ཆེ་བར་སྐྱེ་ཞིང༌། ཆོས་ཚུལ་འདི་ལྟ་བུ་ཐོབ་ནས་འདི་ལྟ་བུའི་སྟོན་པ་མཉེས་པར་བྱེད་པར་གྱུར་ཅིག་ཅེས་སྨོན་ལམ་བཏབ་པས་ད་ལྟ་ཕྱུག་པོར་སྐྱེས་པ་སོགས་ཡིན་ལ། རྒྱལ་པོ་ལ་ཚིག་རྩུབ་སྨྲས་པས་ཚེ་རབས་ལྔ་བརྒྱར་མ་དང་ལྷན་ཅིག་བསྲེགས་ཤིང་ད་ལྟའང་བསྲེགས་སོ། །སྟོན་པས་ཆོ་འཕྲུལ་ཆེན་པོ་བསྟན་ནས་མུ་སྟེགས་ཅན་རྣམས་སྨ་བབ་པ་དང༌། ལྷ་དང་མི་རྣམས་དགའ་བས་བསྙེན་བཀུར་མང་པོ་བྱུང་ནས་དེ་གཅད་པའི་ཕྱིར་དུ་སུམ་ཅུ་རྩ་གསུམ་དུ་གཤེགས་ཏེ། ཤིང་ཡོངས་འདུ་ས་བརྟོལ་དང་ཀོ་བི་ད་ར་ཀ་དང་ཉེ་བར་ཚུལ་དུ་ཞུགས་སོ། །དེར་ཡུམ་དང་ལྷ་རྣམས་ལ་ཆོས་འཆད་དོ། །
མོའུ་གལ་གྱི་བུ་མཉན་ཡོད་དུ་ཚུལ་དུ་ཞུགས་སོ། །དེ་ནས་འཁོར་བཞིས་མོའུ་གལ་གྱི་བུ་ལ། སྟོན་པ་གང་དུ་ཚུལ་དུ་ཞུགས་གསན་ནམ། སུམ་ཅུ་རྩ་གསུམ་དུའོ། །དེ་ནས་ཟླ་བ་གསུམ་འདས་པ་དང་འཁོར་རྣམ་བཞིས་འོངས་ནས། བདག་ཅག་གིས་སྟོན་པ་མ་མཐོང་ནས་ཡུན་རིང་དུ་སོང་བས་ཤིན་ཏུ་སྐོམ་གྱིས། ཁྱེད་བཞུད་ལ་སྟོན་པ་ལ་སྙུན་ཞུས་ལ། བདག་ཅག་བལྟ་བར་འཚལ་ན་བདག་ཅག་ལ་ནི་དེར་འོང་བའི་རྫུ་འཕྲུལ་མེད། ལྷ་ལ་འདིར་འོང་བའི་རྫུ་འཕྲུལ་མ་མཆིས་སོ་ཞེས་ཞུས་ཤིག །དེ་ནས་མོའུ་གལ་གྱི་བུ་རྫུ་འཕྲུལ་གྱིས་སོང་ནས། སྟོན་པ་ལ། འདི་ནའང་ལྷ་མང་པོ་(༡༩༧བ)ལ་ཆོས་སྟོན་པ་འཛམ་བུའི་གླིང་བཞིན་ནོ། །སྟོན་པས་བསམ་པ་མཁྱེན་ནས། རང་གི་འདུ་བྱེད་པ་ནི་མ་ཡིན་གྱི། ནམ་འོང་བར་བསམས་པའི་ཚེ་འོང༌། འགྲོ་བའི་ཚེ་འགྲོའོ་ཞེས་གསུངས། དེས། ལྷའི་འཁོར་འདི་དག་ཤེས་ནས་དད་པ་དང༌། འཕགས་པ་དགྱེས་པའི་ཚུལ་ཁྲིམས་དང་ལྡན་པས་འདིར་སྐྱེས་སོ། །སྟོན་པས། དེ་བཞིན་ནོ་ཞེས་བསྔགས་ནས། བརྒྱ་བྱིན་དང་ལྷ་གཞན་དག་གིས་ཀྱང་དེ་བཞིན་དུ་གསོལ་ཏོ། །དེ་ནས་ལྷ་རྣམས་སོང་བ་དང་མོའུ་གལ་གྱི་བུས་ཞུས་པས། ཁྱོད་སོང་ལ། ཞག་བདུན་ནས་གྲོང་ཁྱེར་པ་ཀ་ཤའི་ཨ་པ་ར་ཛིའི་ནགས་ཤིང་ཨུ་དུམ་ཝ་རའི་དྲུང་དུ་གཤེགས་སོ་ཞེས་བསྒོ་ཞིག །དེས་འོངས་ཏེ་འཁོར་བཞི་ལ་བསྒོས་པས། གྲོང་ཁྱེར་དེ་བས་ས་ཕྱོགས་དེར་མཆོད་པའི་བཀོད་པ་བཤམས་སོ། །
སྟོན་པས་སུམ་ཅུ་རྩ་གསུམ་པའི་ལྷ་ལ་ཆོས་བསྟན་ནས། རིམ་གྱིས་མཚེ་མ་ནས་འོག་མིན་གྱི་བར་དུ་བྱོན་ཏེ་དེ་རྣམས་ལ་ཆོས་བསྟན་ནས། རིམ་གྱིས་སུམ་ཅུ་རྩ་གསུམ་དུ་བབས་པ་དང༌། བརྒྱ་བྱིན་གྱིས། འཛམ་བུ་གླིང་དུ་གཤེགས་སམ། འབབ་བོ། །རྫུ་འཕྲུལ་ལམ་ཞབས་ཀྱིས་གཤེགས། རྐང་པས་སོ། །དེས་ལས་ཐམས་ཅད་པ་ལ་བསྒོས་ནས་གསེར་དང་བཻཌཱུརྱ་དང་ཤེལ་གསུམ་གྱིས་སྐས་བཟོས་སོ། །སྟོན་པས་དབུས་ནས་བཻཌཱུརྱའི་སྐས་ལ། གཡས་གསེར་གྱི་སྐས་ལ་ཚངས་པ་རྔ་ཡབ་ཐོགས་ནས་གཟུགས་ཀྱི་ལྷ་དང་ལྷན་ཅིག་འབབ། གཡོན་ཤེལ་གྱི་སྐས་ལ་བརྒྱ་བྱིན་རྩིབས་བརྒྱ་པའི་གདུགས་ཐོགས་ནས་འདོད་པ་ན་སྤྱོད་པའི་ལྷ་དང་ལྷན་ཅིག་འབབ་བོ། །སྟོན་པས། རྐང་པས་བབས་ན་མུ་སྟེགས་རྣམས་ཀྱིས། རྫུ་འཕྲུལ་ཉམས་སོ་ཞེས་ཟེར་དུ་འོང༌། རྫུ་འཕྲུལ་གྱིས་བབས་ན་ལྷ་སྐས་སྤྲུལ་པ་དགོས་མེད་དུ་འགྱུར་བས་ཕྱེད་རྫུ་འཕྲུལ་གྱིས། ཕྱེད་སྐས་ལ་བབས་ནས་བྱོན་པ་དང༌། དཔག་ཚད་བཅུ་གཉིས་མན་ཆད་མིའི་དྲི་མནན་པ་ལྷས་མ་བཟོད་པར་ཙན་དན་གོར་ཤི་ཤའི་དྲིར་སྤྲུལ། མིའི་སྐྱེས་པས་ལྷ་མོ་རྣམས་མི་མཐོང༌། བུད་མེད་རྣམས་ཀྱིས་ལྷ་ཕོ་རྣམས་མི་མཐོང་བར་བྱིན་གྱིས་བརླབས་ནས་བབས་སོ། །དེའི་ཚེ་རབ་འབྱོར་ཤིང་དྲུང་ཞིག་ན་འདུག་པ་དེ་རྣམས་མཐོང་སྟེ། ལྷ་རྣམས་ཀྱང་སྟོན་པ་བོར་ནས་རང་གི་གནས་སུ་འགྲོ། མི་འདི་དག་ཐམས་ཅད་ལོ་བརྒྱ་ན་འཆི། སྟོན་པའང་མྱ་ངན་ལས་འདའ་བས་ཐམས་ཅད་མི་རྟག་གོ་སྙམ་དུ་བསྒོམས་པས་བདེན་པ་མཐོང་ངོ༌། །དེའི་ཚེ་དགེ་སློང་མ་ཨུཏྤ་ལའི་མདོག་གིས། དགེ་སློང་མའི་གཟུགས་ཀྱིས་ཕྱིན་ན་སྟོན་པའི་སྤྱན་སྔར་མི་གཏོང་ངོ་སྙམ་ནས་འཁོར་ལོ་སྒྱུར་བའི་རྒྱལ་པོར་སྤྲུལ་ཏེ་སོང་བ་དང་འཁོར་རྣམས་ཡ་མཚན་དུ་གྱུར་ཏེ་མིག་ཚུགས་སུ་ལྟ་ཞིང་རྟོག་པ་སྣ་ཚོགས་སུ་གྱུར་ནས་གོ་ཕྱེའོ། །འཆར་ཀས། འདི་འཁོར་ལོས་བསྒྱུར་བ་མིན་ཏེ། ཨུཏྤ་ལའི་མདོག་གོ །ཅིའི་ཕྱིར། ཨུཏྤ་ལའི་དྲི་ལས་སོ། །དེས་རྫུ་འཕྲུལ་བསྡུས་ནས་ཕྱག་འཚལ་ཏེ་འདུག་པ་དང༌། (༡༩༨ན)ངའི་དྲུང་དུ་མ་སྡོད། དགེ་སློང་མས་སྟོན་པའི་སྤྱན་སྔར་རྫུ་འཕྲུལ་བསྟན་པར་མི་བྱའོ། །དེའི་འཁོར་ལོས་སྒྱུར་པའི་རྫུ་འཕྲུལ་མཐོང་བས་ཁ་ཅིག་མིར་ཆགས་པ་སྐྱེས། ཁ་ཅིག་ལྷར་ཆགས་པ་སྐྱེས་པ་དང༌། སྟོན་པས་དེ་བཟློག་པའི་ཕྱིར་དུ་ཆོས་བཤད་པས་འབྲས་བུ་བཞི་དང༌། སོ་སོའི་བྱང་ཆུབ་ཏུ་སེམས་བསྐྱེད་ནས། ས་རྣམས་གཅིག་གིས་ཐོབ་པ་དང༌། །ལྷ་རྣམས་སུ་ཡང་འགྲོ་བ་དང༌། །ཡང་ན་ཏིང་འཛིན་ཐོབ་བ་པས། །རྒྱུན་དུ་ཞུགས་པའི་འབྲས་བུ་མཆོག །ཅེས་གསུངས་སོ། །དགེ་སློང་རྣམས་ཀྱིས། འཆར་ཀས་ཨུཏྤ་ལའི་མདོག་དྲི་ལས་རྟོགས་པའི་རྒྱུ་ཞུས་པས། སྔོན་འཁོར་མོ་འཇིག་ན་དེད་དཔོན་ཞིག་གི་ཆུང་མ་སེམས་ཅན་དང་ལྡན་ནོ། །
དེད་དཔོན་རྒྱ་མཚོར་འཇུག་པར་ཆས་པ་ན་ཆུང་མ་ན་རེ། ངའང་ཁྲིད་ཟེར། ཁྱོད་ཀྱི་གཡོག་སུས་བྱེད། འདུག་ཅིག །འཁོར་རྣམས་ན་རེ། བདག་ཅག་གིས་གཡོག་བྱའི་ཁྲིད་ཅིག་ཟེར་ནས་ཁྲིད་པ་དང༌། རྒྱ་མཚོར་ཆུ་སྲིན་གྱིས་གྲུ་བཤིག་ནས་དུས་ལས་འདས། ཆུང་མས་ཤིང་ལེབ་ཅིག་ལ་འཇུས་པས་ཀ་ཤེ་རུའི་གླིང་དུ་ཕྱིན་ཏོ། །དེ་ན་བྱའི་རྒྱལ་པོ་གཤོག་བཟང་གནས་སོ། །དེའི་ཆུང་མར་བྱས་ཏེ། དེད་དཔོན་གྱི་བུ་གཟུགས་བཟང་བ་ཞིག་སྐྱེས་སོ། །དེའི་འོག་ཏུ་འདབ་ཆགས་ཀྱི་བུ་འདབ་གཤོག་བཟང་བ་ཞིག་བཙས་ཏེ། འདབ་བཟང་ཤི་ནས་དེ་བྱའི་རྒྱལ་པོར་བཅུག་གོ །མས། ཁྱོད་ཕའི་ཚབ་ཏུ་རྒྱལ་པོར་བཅུག་ན། ཕུ་བོ་འདིའང་འཁོར་མོ་འཇིག་ཏུ་རྒྱལ་པོར་ཆུག་ཅིག །དེ་ལྟར་བྱའོ་ཟེར་ནས་འཁོར་མོ་འཇིག་གི་རྒྱལ་པོ་ཚངས་བྱིན་སྤར་མོས་བཏབ་སྟེ་རྒྱ་མཚོར་བོར་ནས་ཕུ་བོ་རྒྱན་གྱིས་བརྒྱན་པ་ཁྲི་ལ་བཞག་སྟེ། འདི་ལ་གནོད་པ་ཅུང་ཟད་བྱས་ན་ངས་འདི་ལྟར་བྱའོ་ཞེས་བསྒོའོ། །དེ་རྣམས་ཀྱིས་སྐྲག་སྟེ་གསང་བས་འཇིག་རྟེན་པ་རྣམས་ཀྱིས་ཚངས་བྱིན་ཡིན་པར་ཤེས་སོ། །དེས་བྱའི་རྒྱལ་པོ་ལ། ང་དུས་དུས་སུ་ལྟོས་ཤིག་དེ་ལྟར་བྱའོ། །དེའི་ཚེ་རྒྱལ་པོ་ཚངས་བྱིན་གྱི་བ་ལང་མོ་བེའུ་བྱུང་བ་མངལ་སྒོར་ཐོགས་པས་རྒྱལ་པོས་བཙུན་མོ་རྣམས་ལ། བདེན་ཚིག་བརྗོད་ཅིག་ཅེས་ཟེར་ནས། བརྗོད་ཀྱང་མ་ཐོན་པས་སྒྲ་ཆེན་པོ་གྲག་པ་བ་ལང་གི་རྫི་མོ་ཞིག་གིས་ཐོས་ན། དེས། བདག་ལ་ཁྱོ་གཅིག་པུར་ཟད་ཀྱི་སྐྱེས་པ་གཉིས་པ་མེད་པའི་བདེན་པས་བ་ལང་མོ་ཟུག་རྔུ་དང་བྲལ་བར་གྱུར་ཅིག་ཅེས་བརྗོད་པས་བེའུ་བྱུང༌། མཇུག་མ་ཐོགས་ནས་མོས་བགད་དེ། འདི་ཙམ་ཡང་མི་བཟོད་དོ། །དེ་ཅི་ཡིན་དྲིས་པས། ཁྱེའུ་ཆུང་ངུ་ཞིག་པང་དུ་བླངས་པས་དེས་གཅིན་གཅིས་པས་མཚན་མར་སོང་བས་དགའ་བ་ཚོར་བ་དེས་མཇུག་མ་ཐོགས་སོ་ཞེས་སྨྲས་པ་དང༌། མཇུག་མའང་བྱུང་ངོ༌། །དེ་རྒྱལ་པོ་ལ་སྨྲས་པས། འདི་འདྲ་བའི་ཚུལ་ཁྲིམས་ཅན་ལ་བུ་མོའང་ཚུལ་ཁྲིམས་དེ་འདྲར་འགྱུར་རོ་སྙམ་ནས། ཁྱོད་ལ་བུ་མོ་ཡོད་དམ། ཤོ་ཤུམ་པ་ཞེས་བྱ་བ་མཆིས་སོ། །སུ་ལ་བྱིན། (༡༩༨བ)སུ་ལའང་མ་བྱིན་ནོ། །ང་ལ་ཕུལ་ཅིག་ཟེར། དེས་བག་མར་བླངས་ནས། འདི་བཙུན་མོའི་འཁོར་དུ་བཞག་ན་ཚུལ་ཁྲིམས་ངན་པར་འགྱུར་རོ་སྙམ་དུ་འདབ་བཟང་ལ། འདི་ཉིན་པར་ཀ་ཤེ་རུའི་གླིང་དུ་ཁྲིད་ལ་མཚན་མོ་ཁྲིད་དེ་ཤོག་ཅིག །དེས་དེ་བཞིན་དུ་བྱས་སོ། །ཀ་ཤེ་རུའི་གླིང་ན་མེ་ཏོག་དྲི་མི་རི་ཞེས་བྱ་བ་དྲི་ཞིམ་པ་ཞིག་ཡོད་པ་དེས་ཕྲེང་བར་བརྒྱུས་ཏེ་རྒྱལ་པོ་ལ་བསྐུར་རོ། །འཁོར་མོ་འཇིག་ན་བྲམ་ཟེ་ཞིག་ནགས་གསེབ་ཏུ་ཤིང་འཐུ་རུ་སོང་བ་མིའམ་ཅི་མོ་ཞིག་གིས་བཟུང་སྟེ་བྲག་ཕུག་ཏུ་བཅུག་ནས་དེ་དང་དགའ་མགུར་སྤྱོད་ཅིང༌། མིའམ་ཅི་མོ་གཞན་དུ་འགྲོ་བའི་ཚེ་དེའི་སྒོ་རྡོ་ལེབ་ཆེན་པོས་འགེབས་སོ། །ཕྱིས་དེ་ལ་བྲམ་ཟེའི་བུ་ཞིག་བཙས་ཏེ། འགྲོས་མྱུར་བར་མྱུར་འགྲོར་བཏགས་སོ། །ཕས་དེའི་གན་དུ་འཁོར་མོ་འཇིག་གི་ཡོན་ཏན་འབའ་ཞིག་བརྗོད་པ་དང༌། ཕའི་ཡུལ་དེ་ཡིན་ན་ཅིའི་ཕྱིར་མི་འབྲོས། ཁྱོད་ཀྱི་མས་འདི་ལྟར་བྱས་པས་སོ། །ཕ། བདག་གིས་སྒོ་དབྱེའོ་ཞེས་ཟེར་ནས་རིམ་གྱིས་རྡོ་ལ་བསླབས་ཏེ་ལོབས་པ་དང༌། མས་འབྲས་བུ་ཁྱེར་འོངས་པ་བོར་ནས། ཐག་རིང་པོ་ནས་འབྲས་བུ་ལེན་དགོས་པའི་ཐབས་བྱས་པས་སོང་བ་དང༌། དེ་གཉིས་ཀྱིས་བྲོས་སོ། །དེའི་མ་ངུ་བ་གྲོགས་མོས་མཐོང་སྟེ། བུ་མི་ཡིན་པས་དེ་མིའི་ནང་ན་བདེ་ཡིས་མྱ་ངན་མ་བྱེད་ཅིག་བདག་གིས་ནོར་མ་བྱིན་ནོ། །ཅི་སྟེར་ངས་སྦྱིན་ནོ། །པི་ཝང་ཞིག་བསྐུར་ནས། འདིས་འཚོ་བར་གྱིས། རྒྱུད་ཡང་ཐོག་མ་ལ་མ་རེག་ཅིག །དེས་དེ་ལ་པི་ཝང་བྱིན་ནས་དེ་སྐད་བསྒོའོ། །ཕས་དེ་བྲམ་ཟེ་ཞིག་ལ་ཀློག་ཏུ་བཅུག་པ་དང༌། དེ་ལ་ཁྱེའུ་ཟླ་བོས། པི་ཝང་ལོང་ཞིག །དེས་བླངས་པས། རྒྱུད་ལྷག་མ་ལ་མི་རེག་པ་ཅི་ཡིན། ཉེས་དམིགས་འོང་ངོ༌། །ཅི་འོང་རེག་ཅིག །རེག་པས་ཐམས་ཅད་མཆོང་བརྒལ་གར་བྱེད་དོ། །དེ་དག་ནང་དུ་སོང་བ་དང་མཁན་པོས་དྲིས་ནས། དེས་ཀྱང་ནན་གྱི་ལེན་དུ་བཅུག་པ་དང༌། མཆོང་བརྒལ་ཏེ་རྫ་སྤྱད་ཐམས་ཅད་བཅག་པས་ཁྲོས་ནས་བསྐྲད་དོ། །
ཚོང་པ་ལྔ་བརྒྱ་རྒྱ་མཚོར་ཆས་པ་དེ་རྣམས་ཀྱིས་མྱུར་འགྲོ་ཁྲིད་ནས་རྒྱ་མཚོར་པི་ཝང་ལེན་ཅིང་གླུ་བླངས་པ་དང༌། རྒྱུད་ལྷག་མ་ལ་མི་རེག་པ་ཅི་ཡིན། ཉེས་དམིགས་འོང་ངོ༌། །ཅི་འོང་རེག་ཅིག །རེག་པ་དང་གྲུ་བུབ་ནས་ཚོང་པ་རྣམས་ཤི། དེས་ཤིང་ལེབ་ཅིག་ལ་འཇུས་པས་ཀ་ཤེ་རུར་ཕྱིན་པ་དང་ཤོ་ཤུམ་པ་མཐོང་ནས་ལྷན་ཅིག་ཉལ་ལོ། །དེས་གཏམ་བསྙད་ནས། ངའང་འཁོར་མོ་འཇིག་ཏུ་ཁྲིད་ཅིག །བྱའོ་ཞེས་སྨྲས་ནས། དེས་རྡོ་ལ་རིམ་གྱིས་བསླབས་ནས་ལོབས་པ་དང༌། དེར་མྱུར་འགྲོ་དང་ལྷན་ཅིག་འདབ་བཟང་ལ་ཞོན་ནས། ཇོ་བོ། མིག་མ་འབྱེད་ཅིག །བྱུང་ཏ་རེ། དེར་སྐྱེ་བོའི་ཅ་ཅོའི་སྒྲ་ཐོས་པ་དང༌། ད་ཕྱིན་གྱིས་བལྟའོ་སྙམ་ནས་མིག་ཕྱེ་བ་དང་མིག་འཐོན་ནོ། །ལོང་བ་སྐྱེད་མོས་ཚལ་དུ་བཞག་ནས་མོ་བཙུན་མོའི་ནང་དུ་སོང་ངོ༌། །དེ་ནས་རྒྱལ་པོ་བཙུན་མོ་དང་བཅས་པ་སྐྱེད་མོས་ཚལ་དུ་སོང་བ་དང་ལོང་བས་(༡༩༩ན)མེ་ཏོག་དྲི་མི་རིའི་དྲི་ཚོར་ནས་གླུ་བླངས་པ། རླུང་གིས་སུ་ནི་བསྐྱོད་པས་ན། །དྲི་མི་རི་ཡི་དྲི་མནམ་མོ། །གང་ན་ཤོ་ཤུམ་པ་གནས་པ། །ཀ་ཤེ་རུ་ཡི་གླིང་དག་གོ །རྒྱལ་པོས་ཐོས་ནས། ཚོལ་ཅིག །བཙལ་ནས་དྲིས་ཏེ་སྔར་གྱི་གླུ་བླངས་པས། ཤོ་ཤུམ་པ་ཁྱོད་ཀྱིས་མཐོང་ན་དེའི་ལུས་ལ་མཚན་ཅི་ཡོད། སྭསྟི་ག་ནི་བརླ་ལ་ཡོད། །དེ་ཡི་ནུ་མར་འཁྱིལ་བ་སྟེ། །དྲི་མི་རི་ཡི་མེ་ཏོག་རྣམས། །བརྒྱུད་པ་ཁྱོད་ཀྱི་ཕྱིར་ཡིན་ནོ། །རྒྱལ་པོས། འདི་ཡང་ངན་པར་སྤྱོད་དོ་སྙམ་སྟེ། ལོང་བ་དང་ཤོ་ཤུམ་པ་བོང་བུ་ལ་བསྐྱོན་ནས་བསྐྲད་དོ། །དེས་འཁྱམ་བཞིན་དུ་ལྷ་ཁང་སྟོང་པ་ཞིག་ཏུ་ཕྱིན་པ་དང༌། རྐུན་པོ་ལྔ་བརྒྱས་གྲོང་འཇོམས་སུ་ཕྱིན་པས་གྲོང་པས་ཚོར་ནས་དེ་རྣམས་བཅོམ་སྟེ་དཔོན་པོས་ལྷ་ཁང་དེར་བྲོས་སོ། །རི་བྲགས་པས་དེ་བསྐོར་ནས། འདི་ན་སུ། ལོང་བས། འགྲོན་པོའོ། །མི་རྒོད་དེ་ཕྱིར་ཕྱུང་ཞིག །མི་རྒོད་ཀྱི་དཔོན་དེས་ཤོ་ཤུམ་པ་ལ། ལོང་བ་འདིས་ཅི་བྱ། འདི་བསྐྲད་ལ་བདག་ཅག་གཉིས་དགའ་མགུར་སྤྱད་དོ། །ལེགས་སོ་ཟེར་ནས་ལོང་བ་རྩིག་པའི་ཁ་ནས་བོར་བས་གྲོང་མིས་དེའི་མགོ་བོ་བཅད་ནས་སོང་ངོ༌། །མི་རྒོད་ཀྱི་དཔོན་དང་དེ་གཉིས་ཆུ་བོ་ཀ་ར་དོའི་བར་དུ་ཕྱིན་པ་དང་བརྒལ་དུ་གྲུ་མེད་ནས། འདི་ལ་རྒོལ་བ་ལ་ཁྱོད་རྒྱན་དང་བཅས་པ་བརྒལ་མི་ནུས་ཀྱིས། སྔོན་ལ་རྒྱལ་བསྐྱལ་ལ་དེ་ནས་ཁྱོད་བརྒལ་བར་བྱའོ་ཞེས་ཟེར་ནས་གོས་དང་རྒྱན་རྣམས་དེས་ཁུར་ཏེ་སོང་བ་དང༌། ཆུའི་དབུས་སུ་ཕྱིན་པ་དང་མོ་འགྱོད་ནས། ང་མི་བསླུའམ་ཞེས་སྨྲས་པས། དེས། མི་ཤེས་ཁྱོད་ཀྱིས་བཤེས་རྙིང་པསད། །སྐྱེས་བུ་དེ་ནི་དོན་མེད་དོ། །དེ་བས་ཁྱོད་ལ་ཡིད་བརྟན་དཀའ། །བདག་ཀྱང་ཁྱོད་ཀྱིས་མི་བསད་དམ། །ཞེས་ཟེར་ནས་བྲོས་སོ། །དེ་སྒྲེན་མོར་ནགས་གསེབ་ཏུ་འདུག་པ་དང༌། ཝ་རྒན་པོ་ཞིག་གིས་ཤ་ཞིག་ཁྱེར་ནས་ཆུ་འགྲམ་དུ་འདུག་པ་དང༌། ཉ་ཞིག་རྒྱགས་ཆེས་ནས་ཆུ་ལ་འཕར་བས་སྐམ་ལ་ལྷུང་བ་ན། ཝས་ཤ་བཞག་སྟེ་དེ་ལ་བརྒྱུགས་པ་དང༌། ཉ་དེར་ཆུར་སོང༌། ཤ་དེ་འོལ་བས་ཁྱེར་རོ། །ཤོ་ཤམ་པས་མཐོང་ནས། ཤ་དུམ་དེ་ནི་འོལ་བས་ཕྲོགས། །ཉ་ནི་ཆུ་བོའི་ནང་དུ་བྲོས། །གཉི་ག་ལས་ནི་བྲལ་བར་གྱུར། །ཝས་ནི་མྱ་ངན་ཅི་ཞིག་བྱ། །དེས་བལྟས་པས་མོ་མཐོང་ནས། ཁྱོད་སུ་ཡིན། ཤོ་ཤུམ་པའོ། །དེ་ཁྲོས་ནས། ཁྱོ་ནི་ཁྱོད་ཀྱིས་བསད་པ་ན། །བྱི་བོ་དེ་ནི་བྲོས་པས་ན། །གཉི་ག་ལས་ནི་བྲལ་བར་གྱུར། །སྦྱར་མ་མྱ་ངན་ཅི་ཕྱིར་བྱེད། །མོས། ད་ཁྱོད་རྙེད་ན་དེ་ལྟར་མི་བྱའོ་ཞེས་སྨྲས་པ་དང༌། དེས་སྤྱོ་བའི་ཚིགས་བཅད་སྨྲས་ནས། དེ་ནི་དེར་ཟད་ན། ངས་ཁྱོད་སྔོན་གྱི་གནས་སུ་བཞག་ན་ཅི་སྦྱིན། ཉིན་རེ་ཞིང་ཤ་སྦྱིན་ནོ། །དེ་བྱའི། ཁྱོད་ཆུ་ཀླུང་དུ་ཞུགས་ལ་ལྐོག་མ་མན་ཆད་ཆུར་ཆུག །ཁ་ཤར་དུ་ལྟོས་ལ་སྡོད་ཅིག་ཟེར་ནས། ཝས་རྒྱལ་པོའི་ཕོ་(༡༩༩བ)བྲང་དང་ཉེ་བར་སོང་སྟེ། ཤོ་ཤུམ་པ་དགེ་ཞིང་དཀའ་ཐུབ་སྤྱོད་ཀྱིས་མྱུར་དུ་བོས་ཤིག །རྒྱལ་པོ་དེ་ཝའི་སྐད་ལ་མཁས་པས། དེ་བཀུག་ནས་སྔར་གྱིས་གནས་སུ་བཞག །དེས་ཀྱང་ཉི་མ་རེ་རེ་ཞིང་ཝ་ལ་ཤ་དུམ་བྱིན་ནོ། །དུས་ཅུང་ཞིག་ནས་ཤ་དུམ་མ་བྱིན་པ་དང༌། བྱིན་ན་དགེའོ། །མ་བྱིན་ན་སྔར་གྱི་གནས་སུ་བཞག་གོ །དེ་སྐྲག་ནས་ཤ་མ་ཆད་པར་བྱིན་ནོ། །དེའི་དུས་ཀྱི་ཤོ་ཤུམ་པ་ནི་ཨུཏྤ་ལའི་མདོག་ཡིན་ལ། མྱུར་འགྲོ་ནི་འཆར་ཀའོ། །
སྐུར་བ་འདེབས་པའི་ལྟུང་བྱེད་ནི། སྟོན་པ་འོད་མའི་ཚལ་ན་བཞུགས་པའི་ཚེ་གྱད་བུ་ནོར་གནས་མལ་དང་ཟས་ལ་བསྐོས་པས་ཆོས་དང་ལྡན་པའི་ཞལ་ཏེ་བྱེད་དེ། ཡོ་བྱད་ཐམས་ཅད་དཀོན་མཆོག་གསུམ་ལ་ཕུལ་པས་ཆོས་གོས་གསུམ་ངན་ཞིང་སྣམ་སྦྱར་བརྙིངས་ནས། དགེ་སློང་རྣམས་ཀྱིས་སྨྲས་པ། དགེ་འདུན་གྱིས་རས་ཡུག་ཆེན་ཞིག་རྙེད་ན་གྱད་བུ་ནོར་ལ་སྦྱིན་ནོ་ཞེས་བགྲོས་ནས། དགེ་འདུན་གྱིས་ཀྱང་རས་ཡུག་ཆེན་རྙེད་པའི་སྐབས་དེ་གསོལ་བས། གསོལ་བའི་ལས་བྱས་ནས་བྱིན་ན་མི་གཡོ་བར་འགྱུར་རོ། །ལས་བྱས་ནས་བྱིན་པ་དང༌། མཛའ་བོ་དང་ས་ལས་སྐྱེས་གྱད་བུ་ནོར་དང་ཚེ་རབས་ནས་འབྲེལ་བའི་འཁོན་ཡོད་པས་དེ་གཉིས་དགེ་འདུན་གྱི་མདུན་ན། དགེ་འདུན་གྱི་རྙེད་པ་རྙེད་དོ་ཅོག་ཅིག་གང་ཟག་ལ་བསྔོས་ན་དགེ་འདུན་གྱི་རྙེད་པ་གྲུབ་པར་ག་ལ་འགྱུར་ཞེས་སྨོད་དོ། །ཁྱེད་གཉིས་དེར་མ་འདུས་སམ། འདུས་སོ། །འོ་ན་ཅིའི་ཕྱིར་སྨོད། ངེད་གཉིས་ངུར་ཡང་མི་གནང་ངམ་ཞེས་ཟེར་བའི་སྐབས་དེ་གསོལ་བས། བྱུང་བ་འདི་དང་སོགས། མཛའ་བོ་དང་ས་ལས་སྐྱེས་གཉིས་ལ། ཁྱོད་ཀྱིས་དེ་ལྟར་སྨྲས་པ་བདེན་ནམ། མད་དོ། །བཤེས་དོར་བྱས་ཏེ་དགེ་འདུན་གྱི་རྙེད་པ་གང་ཟག་ལ་སྔོ་བར་བྱེད་དོ་ཞེས་ཟེར་ན་ལྟུང་བྱེད་དོ། །
ཁྱད་དུ་གསོད་པའི་ལྟུང་བྱེད་ནི། སྟོན་པ་མཉན་ཡོད་ནའོ། །སྟོན་པས་ཟླ་བ་ཕྱེད་ཕྱེད་ཅིང་སོ་སོ་སོར་ཐར་པའི་མདོ་འདོན་པ་ན། དྲུག་སྡེ་དག །ཕམ་པ་བཞི་པོ་འདོན་པ་ན་ཅང་མི་སྨྲ་བར་འཁོད་དོ། །དགེ་འདུན་ལྷག་མ་འདོན་པ་ན། ཚེ་དང་ལྡན་པ་དག་གཞི་ངེས་པ་དང༌། གང་ཟག་ངེས་པར་ཤེས་པ་ཡོད་བཞིན་དུ་ཅིའི་ཕྱིར་བདག་ཅག་གི་རྨ་སོས་པ་དག་འདྲལ་བར་བྱེད། གང་གིས་དགེ་སློང་རྣམས་འགྱོད་ཅིང་ཡིད་ལ་གཅགས་པ་དང༌། གནོད་པར་འགྱུར་བའི་བསླབ་པའི་གཞི་ཕྲན་ཚེགས་འདི་དག་སྟོན་པས་ཅི་བྱ་ཞེས་ཟེར་རོ། །དེ་བཞིན་དུ་མ་ངེས་པ་ནས། རྩོད་པ་ཞི་བྱེད་ཀྱི་ཆོས་འདོན་པའི་ཚེ་ནའང་ཟེར་ནས། དགེ་སློང་དག་གིས་སྨྲས་པ། ཁྱེད་ཀྱི་ཕྱིར་བདག་ཅག་ཟླ་བ་ཕྱེད་ཕྱེད་ཅིང་སོ་སོ་ཐར་པའི་མདོ་འདོན་པ་མིན་གྱི། སྟོན་པའི་བཀས་འདོན་ནོ། །ཁྱེད་ཅག་སྡུག་བསྔལ་དང་ཡིད་མི་བདེ་སྐྱེས་ན་ཅིའི་ཕྱིར་ལྷག་པར་སྤྱོད་ཟེར་ནས་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། དྲུག་སྡེ་ལ། ཁྱེད་ཅག་གིས་དེ་ལྟར་སྨྲས་པ་བདེན་ནམ། མད་དོ། །(༢༠༠ན)བསླབ་པ་ཁྱད་དུ་གསོད་ན་ལྟུང་བྱེད་དོ། །

བཅུ་ཚན་གཉིས་པ།

བཅུ་ཚན་གཉིས་པ་ལ་སྡོམ་ནི། ས་བོན་འཕྱ་བ་བསྒོ་བ་དང༌། །ཁྲི་དང་གདིང་དང་སྐྲོད་པ་དང༌། །ཕྱིས་མནོན་འབྱུང་བ་འདེབས་པ་དང༌། །རིམ་པ་གཉིས་སུ་རྩིག་པའོ། །
ས་བོན་དང་སྐྱེ་བ་གཅོད་པའི་ལྟུང་བྱེད་ནི། སྟོན་པ་མཉན་ཡོད་ནའོ། །སྔོན་ཤིང་མཁན་རྒན་ཞུགས་ཤིག་གིས་ཤིང་ལྗོན་པ་བཅད་ནས་གཙུག་ལག་ཁང་བྱེད་དོ། །དེ་ནས་ཤིང་ལྗོན་པ་དེ་ལ་གནས་པའི་ལྷ་དེ་མཚན་མོ་སྟོན་པའི་སྤྱན་སྔར་འོངས་པ་དང༌། དེའི་ཁ་དོག་གི་མཐུས་རྒྱལ་བྱེད་ཚལ་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །བཙུན་པ། ཤིང་མཁན་རྒན་ཞུགས་དེས་བདག་གི་གནས་ཤིང་ལྗོན་པ་དེ་བཀུམ་ནས་གཙུག་ལག་ཁང་བགྱིད་དུ་བཅུག་ན། དགུན་གྱི་དགུང་ནི་རིང༌། དགུན་སྨད་ཀྱི་དུས་ཀྱི་ཚེས་བརྒྱད་ཀྱི་བར་ལ་འོད་མ་འགས་པའི་བསེར་མ་ལྡང་ཞིང་བདག་ནི་བུ་དང་ཕྲུ་གུ་དག་ནི་ཆུང་ན་ཇི་ལྟར་བགྱི། སྟོན་པས་ལྷ་གཞན་ཞིག་ལ། ཁྱོད་ཀྱི་གནས་སུ་ལྷ་འདི་ལ་གནས་བྱིན་ཅིག་དེས་རང་གི་གནས་སུ་ལྷ་དེའི་གནས་བྱིན་ནོ། །དེ་ནས་སང་དགེ་འདུན་གྱི་གོང་དུ་གདན་བཤམས་པ་ལ་བཞུག་སཏེ། དགེ་སློང་རྣམས་ལ་ཇི་ལྟར་གྱུར་པ་གསུངས་ནས། ཉེས་དམིགས་དེ་ནི་ཤིང་ལྗོན་པ་བཅད་པ་ལས་གྱུར་པ་ཡིན་པས་ཤིང་ལྗོན་པ་གཅད་པར་མི་བྱའོ། །སྟོན་པ་འབྲོག་གནས་ན་བཞུགས་པའི་ཚེ་དགེ་སློང་དག་ཤིང་མེད་པས་འཁར་ལན་བཏང་བ་ན་སྟོན་པས་ཀུན་དགའ་བོ་ལ། ཅིའི་ཕྱིར་དགེ་སློང་ལག་གི་བླས་མཁར་ལན་བཏང་བར་གྱུར། ཤིང་ལྗོན་པ་གཅད་པར་མི་བྱའོ་ཞེས་གསུངས་པས་སོ། །ངས་དགེ་སློང་ལག་གི་བླའི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། ལག་གི་བླས་མཆོད་རྟེན་དང་དགེ་འདུན་གྱི་དོན་དུ་ཤིང་ལྗོན་པ་གཅད་པར་བྱའོ་ཞེས་པ་ནས། མི་གཏོང་ན་གཅད་པར་མི་བྱའོ་ཞེས་བྱ་བའི་བར་གསུངས་ཏེ། དེ་ནི་རེ་ཞིག་བྱུང་བའོ། །ཕྱིས་དྲུག་སྡེ་དག་རང་གི་ལག་གིས་ཤིང་ལྗོན་པ་གཅོད་ཅིང་རྩྭ་སྔོན་པོ་རྔ་ལ་མེ་ཏོག་འཐོག་ནས། མུ་སྟེགས་ཅན་རྣམས། དགེ་སྦྱོང་འདི་དག་ཁྱིམ་པ་དང་བྱེ་བྲག་ཅི་ཡོད་ཟེར་ནས་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ས་བོན་དང་འབྱུང་བོའི་གནས་གཅོད་ན་ལྟུང་བྱེད་དོ། །དགེ་སློང་དག་ཡུལ་བེའུ་ཞེས་བྱ་བར་ལྗོངས་རྒྱུར་སོང་བ་ཆོམ་རྐུན་པས་མཐོང་ནས། འདི་དག་གསད་དོ། །དགེ་སློང་གི་རྒྱུས་ཤེས་པ་ཞིག་གིས་མཐོང་ནས་སྙིང་རྗེ་སྐྱེས་ཏེ། རྩྭ་མ་བརྔས་པ་ལ་བཅིངས་ནས་རྫས་ཕྲོགས་ལ་འདོང་དང་དེ་ཉིད་རང་འཆིའོ། །ལེགས་སོ་ཟེར་ནས་དེ་ལྟར་བྱས་ཏེ་སོང་ངོ༌། །རྒྱལ་པོ་འཆར་པོ་རི་དྭགས་ལ་སོང་བས་མཐོང་ནས། ཕ་བི་ཅི་ཡིན། གཅེར་བ་ཡིན་ནམ། དགེ་སློང་གི་རྒྱུས་ཤེས་པ་ཞིག་ན་རེ། ལོགས་གཅིག་གནག །གཅིག་དཀར་བས་དགེ་སློང་ངོ༌། །ཅིའི་ཕྱིར་འདི་ལྟར་འདུག །རྐུན་པོས་བཅོམ་མོ། །ཅིའི་ཕྱིར་བཅད་ནས་མི་འགྲོ། བསླབ་པ་བཅས་སོ། །དེས་བཀྲོལ་ཏེ་རེ་རེ་ལ་(༢༠༠བ)ཆོས་གོས་གསུམ་གསུམ་བསྐོན་ནས་བཏང་ངོ༌། །དེ་དག་གཙུག་ལག་ཁང་དུ་ཕྱིན་པ་དང༌། བདག་ཅག་གིས་རྒྱལ་པོའི་མདུན་དུ་ལྟུང་བ་སྨྲས་སོ་ཞེས་པ་དེ་གསོལ་བས། རྒྱལ་པོ་འཇིག་རྟེན་གྱི་གཙོ་བོ་ཡིན་པས་ལེགས་པར་སྨྲས་ཀྱི་ལྟུང་བ་མེད་དོ་ཞེས་པ། ཕོངས་པའི་ཚེ་རྩྭ་ཀུ་ཤ་ལ་སོགས་པས་བཅིངས་པ་དེས་མི་ཐར་ན་བཅད་ནའང་ངོ༌། །
ཁྱིམ་པ་དད་པ་ཅན་གྱིས་ཤིང་ཏོག་འབུལ་བ་ན་དགེ་སློང་རྣམས་མི་ལེན་ནས། སངས་རྒྱས་འཇིག་རྟེན་དུ་བྱོན་ནས་བདག་ཅག་ལག་པ་སྟོང་པར་འགྲོའམ་ཞེས་ཟེར་ནས། གསོལ་བས། བླང་བར་བྱ་ཞིང༌། བླངས་ནས་རུང་བར་བྱས་ཏེ་བཟའ་བར་བྱའོ། །རུང་བ་དུ་ཡོད་མ་ཤེས་པར་ཞུས་པས། མེས་རེག་པ་ནས་སྙིང་པའི་བར་དང་། ཡང་ལྔ་སྟེ། ཕྱུང་བ་ནས་བཅད་པའི་བར་བཞི་དང༌། ས་བོན་གྱི་ཆོས་མེད་པ་དང་ལྔའོ། །འཕགས་པ་ནམ་གྲུས་སྲན་མ་ལ་ཐེ་ཚོམ་ཟོས་ནས་མ་ཟོས་པ་དེ་གསོལ་བས། དགེ་སློང་དག །ས་བོན་གྱི་རིགས་མི་ཚོས་པ་ཞེས་བྱ་བ་ཡོད་པས་དེའི་ཕྱིར་རླངས་པས་བརླན་ཏེ་བཟའ་བར་རྗེས་སུ་གནང་གིས་འདི་ལ་འགྱོད་པར་མི་བྱའོ་ཞེས་པ། འདི་ལ་རླངས་པ་ནི་མེ་མ་ཡིན་པ་མ་ཡིན་ནོ། །ཤིང་ཏོག་རེ་རེ་ནས་རུང་བ་བྱས་པས་ཡུན་རིང་ཐོགས་ནས་གསོལ་བས། འབྲས་བུ་དག་མེས་རུང་བར་བྱས་བ་ལ་སྤྱིའི་ཚོགས་ནི་གཙོ་བོར་བྱ་བ་ཡང་དག་པའི་གྲངས་ཉིད་དོ། །སྤྲེའུ་ཞིག་གིས་སྟོན་པའི་ལྷུང་བཟེད་བླངས་ཏེ་ཤིང་ཁར་སོང་ནས་སྦྲང་རྩིས་བཀང་སྟེ་ཕུལ་བ་སྲོག་ཆགས་ཡོད་པས་མ་བཞེས་པ་དང་། དེས་དབེན་པར་སོང་སྟེ་སྲོག་ཆགས་རྣམས་བསལ་ནས་ཕུལ་བས་མ་བཞེས་པ་དང་། སྤྲེའུ་དེས་ཕྱོགས་གཅིག་ཏུ་སོང་སྟེ་སྦྲང་རྩི་དེ་ཆུ་གྲང་མོས་གཏོར་ནས་ཕུལ་བ་དང༌། སྟོན་པས་དེ་བཞེས་ཏེ། རུང་བར་བྱས་པའི་ཕྱིར་རོ་ཞེས་པ། ཞག་བདུན་པ་དང་སོགས་སོ། །
འཕྱ་བའི་ལྟུང་བྱེད་ནི། སྟོན་པ་འོད་མའི་ཚལ་ནའོ། །གྱད་བུ་ནོར་དགེ་འདུན་གྱི་གནས་མལ་དང་ཟས་ལ་བསྐོས་པའི་ཚེ། མཛའ་བོ་དང་ས་ལས་སྐྱེས་གཉིས་ཉེ་དགའ་དང་ལྷན་ཅིག་འདུ་འཛིའི་གཏམ་གྱིས་འཁོད་པ་ན་གྱད་བུ་ནོར་ཕྱོགས་དེར་འོངས་པ་དང་ཉེ་དགའ་ལ་སྨྲས་པ། ཁྱོད་ཀྱང་དགེ་འདུན་གྱིས་གནས་མལ་དང་ཟས་ལ་བསྐོས་ན་ཁྱོད་ཀྱང་ཁོ་བོ་ཅག་ལ་གྱད་བུ་ནོར་བཞིན་དུ་མཐོ་མཚམ་པར་འགྱུར་རོ། །དེ་གཉིས་ལ་སྨྲས་པ། ཁྱེད་གཉིས་དགེ་འདུན་མཐུན་པས་དགེ་སློང་གནས་མལ་དང་ཟས་ལ་བསྐོས་པ་ཤེས་བཞིན་དུ་ངོར་འཕྱའམ། ཁོ་བོ་ཅག་གཉིས་ངུར་ཡང་མི་དབང་ངམ། དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། དེ་གཉིས་སམ། གཞན་ཡང་ངོར་འཕྱ་བ་དེ་ངོར་འཕྱ་བའི་གྲངས་སུ་ཆུག་ཅིག །དེ་གཉིས་ངོར་འཕྱ་བའི་གྲངས་སུ་བཅུག་པ་དང༌། དེ་གཉིས་ཀྱིས་སྨྲས་པ། ཉེ་དགའ། ཁྱོད་ཀྱང་དགེ་འདུན་གྱིས་གནས་མལ་དང་ཟས་ལ་བསྐོས་ན་ཁོ་བོ་ཅག་ལ་ཁ་ཅིག་བཞིན་དུ་མཐོ་འཚམ་པར་འགྱུར་རོ། །ཁྱེད་གཉིས་དགེ་(༢༠༡ན)འདུན་མཐུན་པས་དགེ་སློང་གནས་མལ་དང་ཟས་ལ་བསྐོས་པར་ཤེས་བཞིན་དུ་དེ་ལ་གཞོགས་འཕྱས་བྱེད་དམ། ཅི་ཁོ་བོ་ཅག་གཉིས་ཀྱིས་འགའ་ཞིག་གི་མིང་རུས་ནས་སྨོས་སམ། ཉེ་དགས་སྨྲས་པ། མིང་རུས་ནས་མ་སྨོས་པར་གཞོགས་འཕྱས་བྱེད་དུ་རུང་ན་ཉེ་དགས་ཀྱང་འཇིག་རྟེན་ཐམས་ཅད་ལ་གཞོགས་འཕྱས་བྱེད་པར་འགྱུར་རོ། །དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བ་དང༌། དེ་གཉིས་སམ། གཞན་ཡང་དེ་ལྟ་བུ་དེ་གཞོགས་འཕྱས་བྱེད་པའི་གྲངས་སུ་གཞུག་གོ །དེ་གཉིས་གཞོགས་འཕྱས་བྱེད་པའི་གྲངས་སུ་བཅུག་ཀྱང་གྱད་བུ་ནོར་ལ་ངོར་འཕྱ་བ་དང་གཞོགས་འཕྱེས་བྱེད་ནས། དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བ་དང༌། བྱུང་བ་འདི་དང་སོགས། འཕྱའམ་གཞོགས་འཕྱས་བྱེད་ན་ལྟུང་བྱེད་དོ། །སྔར་བཤད་པའི་སྦྲུལ་ལས་ཚེ་འཕོས་པའི་དགེ་སློང་དེ་བཙོ་བླག་གི་ལས་བྱེད་པ་ན་ཉེ་དགའ་འོངས་ནས། ཁོ་བོས་བྱའོ་ཞེས་ཟེར་ཏེ། གསར་པ་རྣམས་གྲིབ་མ་བསྐམས། རྙིང་པ་རྣམས་ཉི་མ་བསྐམས། གཤེར་བ་རྣམས་གྲིབ་མ་ལ་བཞག་པ་དང༌། གནས་བརྟན། དེ་ལྟར་མ་མཛད་ཅིག་ཅེས་ཡང་ཡང་བཟློག་ཀྱང་མ་ཉན་པ་དང༌། དེ་ཀུན་ནས་དཀྲིས་ཏེ་ཉེ་དགའི་སྟེང་དུ་བརྒྱུགས་པས་བྲོས་སོ། །ཤཱ་རིའི་བུ་དེར་འོངས་ནས། ཅི་བྱེད། ཅི་བྱས་ཀྱང་སྡོད་དུ་མ་བཏུབ་བོ། །ཉེ་དགས། ནྱ་གྲོ་དྷའི་ཤིང་གིས་བརྡེག་པར་བརྩམས་ནའང་སྡོད་དུ་མ་བཏུབ་པ་དང༌། ཤཱ་རིའི་བུས་བཟུང་བས་དེས་ནྱ་གྲོ་དྷའི་ཤིང་ལ་སོ་བཏབ་པ་ན་འདབ་མ་ལྷགས་སོ། །དེ་གསོལ་བས། དེ་ལྟ་བུར་ཁྲོ་བར་མི་བྱའོ། །དུས་གཞན་ཞིག་ན་ཉེ་དགའ་ལ་དགེ་སྐོས་བབ་ནས་དེས་དེའི་དྲུང་དུ་སོང་སྟེ། ལས་འདི་ལྟ་བུ་གྱིས་ཤིག་ཅེས་བསྒོ་བ་དང༌། དེ་མཐོང་མ་ཐག་ཏུ་ཀུན་ནས་དཀྲིས་པའི་སྐབས་དེ་གསོལ་བ་དང༌། ཞེ་སྡང་བར་གྱུར་པ་དེ་རང་གིས་ལས་སུ་བསྐོ་བར་མི་བྱའོ། །བརྒྱུད་པས་ནི་བསྐོ་བར་བྱའོ། །དགེ་སློང་དེས་ཀྱང་བརྩོན་འགྲུས་དྲག་པོས་བསྒོམས་པས་དགྲ་བཅོམ་པ་ཐོབ་བོ། །དགེ་སློང་རྣམས་ཀྱིས་དེའི་རྒྱུ་ཞུས་པས། འདི་སྔོན་སངས་རྒྱས་འོད་སྲུངས་ཀྱི་བསྟན་པ་ལ་རབ་ཏུ་བྱུང་བའི་དགེ་སློང་བྱམས་པ་ཞེས་བྱ་བར་གྱུར་པ་ན་དགེ་སློང་རྣམས་ཀྱིས། བྱམས་པ་ལ་གནས་པ་ཞེས་རབ་ཏུ་བགད་པ་དང༌། དེས་དེ་དག་ལ་བཀབ་ནས། ཡང་འདུག་ཏུ་མ་བཏུབ་པ་དང་ཁྲོས་ཏེ། ང་ནི་བྱམས་པ་ལ་གནས་ཀྱི་ཁྱེད་ཅག་ནི་གདུག་པའོ་ཞེས་ཚིག་རྩུབ་པོ་སྨྲས་པས་ཚེ་རབས་ལྔ་བརྒྱར་སྦྲུལ་གདུག་པར་སྐྱེས་ཤིང་ད་ལྟའང་འདི་ལྟ་བུའི་གདུག་པར་གྱུར་ཏོ། །
བསྒོ་བ་རྣ་ལ་གཟོན་པའི་ལྟུང་བྱེད་ནི། སྟོན་པ་ཀོའུ་ཤཱམྦཱི་ནའོ། །དེའི་ཚེ་འདུན་པ་ལྟུང་བ་ཕྱིར་བཅོས་མི་བྱེད་ནས། དགེ་སློང་དོན་འདོད་པ། ཕན་པ་འདོད་པ་རྣམས་ཀྱིས་དེ་ལ། ཚེ་དང་ལྡན་པ། ལྟུང་བ་ཆོས་བཞིན་དུ་ཕྱིར་གྱིས་ཤིག །དེས་སྨྲས་པ། སུ་ལ་(༢༠༡བ)ལྟུང་བ་བྱུང་བ་དེ་ཕྱིར་བྱེད་པར་འགྱུར་རོ། །ཁྱོད་ལ་ལྟུང་བ་བྱུང་བ་གཞན་སུ་ཞིག་ཕྱིར་བྱེད་པར་འགྱུར། སུ་འགྱོད་པར་གྱུར་པའོ། །ཁྱོད་ལ་ལྟུང་བ་བྱུང་བ་ལ་གཞན་སུ་འགྱོད། ཁྱེད་ཅག་ལ་ལྟུང་བ་བྱུང་ནའང་ཁོ་བོའི་མདུན་དུ་མ་འཆགས་པར་གཞན་གྱི་མདུན་སུ་ཤོགས་ཤིག །ཁྱེད་ཅག་ནི་རིགས་རུས་ཁྱིམ་སྣ་ཚོགས་ལས་རབ་ཏུ་བྱུང་བ་ཡིན་ཏེ། ཤིང་ལོ་སྣ་ཚོགས་རླུང་གིས་གཅིག་ཏུ་བསྡུས་པ་བཞིན། ཁོ་བོའི་འཕགས་པས་ནི་བྱང་ཆུབ་ཐུགས་སུ་ཆུད་དོ་ཞེས། བསྒོ་བ་རྣ་ལ་གཟོན་པ་དེ་གསོལ་བས། འདུམ་པའམ། གཞན་ཡང་དེ་ལྟ་བུ་དེ། བསྒོ་བ་རྣ་ལ་གཟོན་པའི་གྲངས་སུ་ཆུག་ཅིག །བཅུག་པ་དང༌། བདག་ལ་ཉེས་པ་བྱུང་བ་དེ་བདག་གིས་ཚིག་སྨྲས་པས་ཉེས་ཏེ། སྐྱེས་བུ་མཁས་དང་ལྡན་པ་ཡིས། །ངག་རྣམ་བཞི་པོ་བསྲུང་བྱ་སྟེ། །ནགས་ཀྱི་ནང་དུ་གོང་མ་སྲེག །སྒྲ་འབྱིན་པས་ནི་ཟིན་ལ་ལྟོས། །ཞེས་ཟེར་བ་བདེན་ནོ་སྙམ་ནས། དགེ་སློང་རྣམས་ཀྱིས་སྨྲས་པ་ན་ཅང་མི་སྨྲ་བར་བསྒོ་བ་རྣ་ལ་གཟོན་པ་དེ་གསོལ་བས། དེ་ཅང་མི་སྨྲ་བས་བསྒོ་བ་རྣ་ལ་གཟོན་པའི་གྲངས་སུ་ཆུག་ཅིག །བཅུག་ཀྱང་བསྒོ་བ་རྣ་ལ་གཟོན་ནས། གསོལ་བས། བྱུང་བ་འདི་དང་སོགས། བསྒོ་བ་རྣ་ལ་གཟོན་ན་ལྟུང་བྱེད་དོ། །དགེ་སློང་རྣམས་ཀྱིས་ཞུས། འདུན་པ་ཚངས་པ་མཚུངས་པར་སྤྱོད་པ་རྣམས་ཀྱི་ངག་མ་ཉན་པས་བསྒོ་བ་རྣ་ལ་གཟོན་པའི་གྲངས་སུ་བཅུག་པ་ལ་གཟིགས། ད་ལྟར་དུ་མ་ཟད། འདས་པའི་དུས་ནའང་དགེ་བའི་བཤེས་གཉེན་གྱི་ངག་མ་ཉན་པས་སྡུག་བསྔལ་བར་གྱུར་པ་དེ་ཉོན་ཅིག །སྔོན་རྫིང་ཞིག་ན་རུས་སྦལ་གཅིག་དང༌། ངང་པ་གཉིས་འདུག་པ་ལས། ལོ་བཅུ་གཉིས་སུ་ཐན་པ་བྱུང་ནས་རྫིང་དེ་བསྐམས་པ་དང༌། འཇིག་རྟེན་ཆགས་ནས་རིང་པོ་མ་ལོན་པ་ན་དུད་འགྲོས་ཀྱང་སྨྲ་ཤེས་པས། ངང་པ་གཉིས་ཀྱིས་རུས་སྦལ་ལ། ཁོ་བོ་ཅག་གཉིས་རྫིང་གཞན་དུ་འགྲོའོ། །གྲོགས་པོ་གཉིས། ཁོ་བོའང་ཁྲིད་ཅིག །ཇི་ལྟར་འཁྲིད། རུས་སྦལ་གྱིས་སྨྲས་པ། ཁོ་བོས་ཤིང་གི་དབུས་སུ་ཁས་བཟུང་གིས་ཁྱེད་གཉིས་ཀྱིས་རྩེ་མོ་གཉིས་ཟུངས་ལ་དེངས་ཤིག །ངང་པ་གཉིས་ན་རེ། ཁྱོད་སྨྲ་འདོད་པ་ཡིན་པས་ཚིག་སྲུང་མི་ནུས་ཀྱིས་ཁྱོད་ཁྱེར་ཏེ་མི་འགྲོའོ། །ཚིག་བསྲུང་བར་བྱའོ། །ངང་པ་གཉིས་ཀྱིས་རུས་སྦལ་དེ་ཁྱེར་ནས་ནམ་མཁའ་ལ་སོང་བ་དང༌། རི་བྲགས་ཤིག་ཏུ་བྱིས་པ་རྣམས་ཀྱིས་མཐོང་ནས། ཤེས་ལྡན་དག །ལྟོས་ཤིག །ངང་པ་གཉིས་ཀྱིས་རུས་སྦལ་གཅིག་ཁྱེར་སོང་ངོ་ཟེར་བ་ན་རུས་སྦལ་དེས་ཀྱང་དང་དུ་བླངས་སོ། །དེ་ནས་རི་བྲགས་གཞན་ཞིག་ཏུ་སོང་བ་དང༌། ཡང་བྱིས་པ་རྣམས་ཀྱིས་མཐོང་ནས་སྔར་བཞིན་སྨྲས་པ་དང༌། ངང་པ་གཉིས་ཀྱིས་ཁོ་བོ་ཁྱེར་བ་མིན་གྱི། ང་རང་འགྲོའོ་ཞེས་སྨྲས་པས་ཤིང་ཤོར་ནས་ས་ལ་ལྷུང་བས་བྱིས་པས་བཟུང་ནས་སྡུག་བསྔལ་བར་བྱས་པ་དང༌། ལྷས། མཛའ་བཤེས་ཕན་པར་འདོད་རྣམས་(༢༠༢ན)ཀྱིས། །སྨྲས་པ་གང་ཞིག་མི་འཛིན་པ། །རུས་སྦལ་གྱིས་ནི་ཤིང་བཏང་བས། །དེ་ནི་ལྷུང་ཞིང་ལུས་པར་གྱུར། །དེའི་དུས་ཀྱི་ངང་པ་རྒན་པ་ནི་ང་ཡིན་ནོ། །གཅིག་ནི་ཀུན་དགའ་བོའོ། །རུས་སྦལ་ནི་འདུན་པའོ། །རྒྱལ་བྱེད་ཚལ་གྱི་སྒོར་ཁྱིམ་པ་རྣམས་འཐབས་ཏེ། འདུན་པ་དཔང་དུ་བཙུགས་ནས་རྒྱལ་པོའི་ཕོ་བྲང་དུ་ཆེ་བཞི་ཕྱེ་བས་གཅིག་ཆད་པས་བཅད་ནས་འཕྱ་བ་དེ་གསོལ་བས། གང་དུ་ཆེ་བཞི་ཉིད་བྱ་དགོས་པར་འགྱུར་བའི་གནས་དེར་བསྟེན་པར་མི་བྱའོ། །
གནས་མལ་གྱི་ལྟུང་བྱེད་ནི། སྟོན་པ་མཉན་ཡོད་ནའོ། །ཁྱིམ་བདག་ཅིག་གིས་སྟོན་པ་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་པ་དང་དགེ་སློང་གི་དགེ་འདུན་ནི་ཞུགས་སོ། །སྟོན་པ་རྫས་ལས་བྱུང་བ་ན་བཞུགས་ནས་བསོད་སྙོམས་བསྒྲུབས་སོ། །སྟོན་པ་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་བསྒྲུབས་ཏེ། ནང་དུ་ཡང་དག་འཇོག་དང༌། ལྷ་ལ་ཆོས་སྟོན་པ་དང༌། ནད་པ་བལྟ་བ་དང༌། གནས་མལ་རྟོག་པ་དང༌། བསླབ་པ་འཆའ་བཞེད་པའོ། །འདིར་ནི་ཕྱི་མ་གཉིས་ཀྱི་དོན་ནོ། །དགེ་སློང་རྣམས་སོང་ནས་རིང་པོ་མ་ལོན་པ་ན་ལྡེ་མིག་བསྣམས་ནས་གཙུག་ལག་ཁང་གཟིགས་ནས། ཁང་པ་ཆེན་པོའི་གཙུག་ལག་ཁང་ཞིག་ན་གནས་མལ་མང་པོ་བླ་གབ་མེད་པར་བཞག་ཅིང༌། དུས་མ་ཡིན་པའི་སྤྲིན་ཆེན་པོའང་འདུས་པ་གཟིགས་ནས། ཨེ་མ་ཞེས་གསུང་ཞིང་སྨད་དེ། བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་པགས་པ་དང་ཤ་ཁྲག་བཙིར་ཞིང་བྱིན་པ་ལ་དྲོད་མི་ཤེས་པར་སྤྱོད་དོ་སྙམ་དུ་དགོངས་ནས། དུ་མ་ཡིན་པའི་སྤྲིན་ཆེན་པོ་དེ་དགག་པ་མཛད་པས་དེ་སྟེང་གི་ནམ་མཁའ་ལ་ཆུ་ལོན་ལྟ་བུར་འདུག་གོ །དེ་ནས་གནས་མལ་དེ་དག་སྐྱབས་ཡོད་པར་བྲུབས་ནས། དབྱར་གྱི་ན་བཟའ་རས་ཆེན་བསྣམས་ཏེ་སྐུ་བསིལ་བར་བཞེད་ནས་བང་རིམ་ན་བཞུགས་སོ། །
དེ་ནས་དུས་མ་ཡིན་པའི་སྤྲིན་ཆེན་པོ་དགག་པའི་རྫུ་འཕྲུལ་དེ་སླར་བསྡུས་པ་འབྲུག་གྲག་ཅིང་གཤོང་དང་ཐང་མཉམ་པར་གྱུར་ཏོ། །སྐུ་དང་ཞབས་བསིལ་ནས་གཙུག་ལག་ཁང་དུ་གཤེགས་པ་ན་བསོད་སྙོམས་ཀྱི་སྐུ་སྐལ་འདྲེན་པའི་དགེ་སློང་ལ། བསོད་སྙོམས་བསོད་དམ། དགེ་འདུན་ཚིམ་མམ་ཞེས་སོ་སོར་ཀུན་དགའ་བར་མཛད་པས། དེས་ཀྱང༌། ཟས་བསོད་ཅིང་དགེ་འདུན་ཚིམ་པར་བགྱིས་སོ། །དེ་ནས་ཞལ་ཟས་ཀྱི་བྱ་བ་མཛད། ཕྱི་རོལ་ཏུ་ཞབས་བསིལ། ནང་དུ་ཡང་དག་འཇོག་ལས་བཞེངས་ཏེ་གདན་བཤམས་པ་ལ་བཞུགས་ནས། གནས་མལ་དྲོད་མི་ཤེས་པར་སྤྱོད་པའི་ཉེས་དམིགས་གསུངས་ཏེ། གནས་མལ་བསྡུས་སམ་སྡུད་དུ་མ་བཅུག་པར་འདོར་ན་ལྟུང་བྱེད་དོ། །དགེ་སློང་མང་པོ་དོན་མཐུན་དང་ལྷན་ཅིག་ལྗོངས་རྒྱུར་སོང་ནས་རི་བྲགས་ཤིག་ཏུ་ཕྱིན་པ་དང་གནས་བཙལ་བ་ན། དེའི་གཙུག་ལག་ཁང་ན་གནས་པའི་མི་ཞིག་(༢༠༢)ན་རེ། འཕགས་པ་དག །གཙུག་ལག་ཁང་དུ་མི་གནས་སམ། ཁོ་བོ་ཅག་དོན་མཐུན་ལ་རག་ལས་པ་ཡིན་པས་གཙུག་ལག་ཁང་དུ་གནས་ན་དོན་མཐུན་གྱིས་ཁོ་བོ་ཅག་བོར་ཏེ་འགྲོ་བར་འགྱུར་རོ། །དེས་སྨྲས་པ། གཙུག་ལག་ཁང་དུ་གཟིམས་ཤིག །དོན་མཐུན་ཆ་བའི་ཚེ་བདག་གིས་སྐད་གཏང་ངོ༌། །དེ་དག་གིས་གཙུག་ལག་ཁང་དུ་གནས་མལ་བཤམས་ནས་ཉལ་བ་དང༌། དོན་མཐུན་ཆས་ཏེ་གླང་ཐ་མ་བཀལ་ཟིན་པ་དང་མི་དེ་གཉིད་སད་ནས། དོན་མཐུན་ཆས་ཀྱིས་མྱུར་སྤྱོན་ཅིག །དེ་དག་ལག་པ་བསྙལ་བ་དང༌། སོ་ཤིང་དོར་བ་དང༌། གནས་མལ་གཏོད་པའི་བར་དུ་ཐལ་ནས། ཕྱི་བཞིན་དོང་བ་ན་ཆོམ་རྐུན་པས་བཅོམ་སྟེ། མཐར་གྱིས་གཙུག་ལག་ཁང་དུ་ཕྱིན་པ་དང༌། འོངས་པ་ལེགས་སོ། །བདེ་བར་བརྒྱུས་སམ། བདེ་བར་བརྒྱུས་རེ་སྐན། ཅི་ཉེས། ཆོམ་རྐུམ་པས་བཅོམ་མོ། །དེ་གསོལ་བས། དགེ་སློང་འཁོད་པ་ལ་གཞོལ་བར་བྱའོ། །མཉན་ཡོད་ན་ཁྱིམ་བདག་འཁོན་ཡོད་པ་གཉིས་འདུག་པ་ལས། གཅིག་ནི་དད་པ་ཅན། གཅིག་ནི་མ་དད་པའོ། །དད་པ་ཅན་དེའི་བསམ་པ་ལ། འཁོན་སྤེལ་བས་ཅི་བྱ་རབ་ཏུ་འབྱུང་ངོ་སྙམ་ནས། རྒྱལ་བྱེད་ཚལ་དུ་རབ་ཏུ་བྱུང་ངོ༌། །མ་དད་པ་དེས། དེ་གར་སོང༌། རབ་ཏུ་བྱུང་ངོ༌། །གང་དུ། ཤཱཀྱའི་དགེ་སློང་རྣམས་ཀྱི་ནང་དུའོ། །ཅི་དེ་མི་འཇིགས་པའི་གྲོང་ཁྱེར་ཡིན་ནམ། དེར་ཡང་སོང་ལ་གནོད་པ་བྱའོ། །འཇིག་རྟེན་ནི་མཛའ་བཤེས་དང༌། དགྲ་བོ་དང༌། ཐ་མལ་པ་ཡིན་པས། གཞན་ཞིག་དེའི་གན་དུ་སོང་ནས། ཁྱོད་ལ་ཁྱིམ་བདག་བདག་དེ་གཤེའོ། །དེས་མཁན་པོ་ལ་ཞུས་ནས་རྒྱལ་པོའི་ཁབ་ཏུ་སོང་བ་དང༌། ཁྱིམ་བདག་དེ་ཡང་རྒྱལ་བྱེད་ཚལ་དུ་སོང་ནས་དགེ་སློང་ལ་དྲིས་པ། ཁྱིམ་བདག་འདི་ཞེས་བྱ་བ་རབ་ཏུ་བྱུང་ངམ། བྱུང་ངོ༌། །དེ་གར་སོང༌། རྒྱལ་པོའི་ཁབ་ཏུའོ། །
དེར་ཡང་སོང་ལ་གནོད་པ་བྱའོ་སྙམ་དུ་རྒྱལ་པོའི་ཁབ་ཏུ་སོང་བ་དང༌། དགེ་སློང་དེ་རི་བྲགས་ཀྱི་གཙུག་ལག་ཁང་ཞིག་ཏུ་ཞུགས་པ་དེས་མཐོང་སྟེ། དགེ་སློང་དག་གིས་བདག་ལ་གནོད་པ་བྱེད་པར་འགྱུར་རོ་སྙམ་ནས་མ་སོང་ངོ༌། །དགེ་སློང་དེ་སང་སྔ་བར་ལངས་ཏེ་གནས་མལ་གཏད་པས། གར་འགྲོ། རྒྱལ་པོའི་ཁབ་ཏུའོ། །ལམ་འདི་ནི་དོགས་པ་དང་བཅས་པ་ཡིན་པས་ལམ་གཞན་འདི་ནས་སོང་ཞིག །ལམ་དེ་ནས་སོང་བ་དང༌། ཁྱིམ་བདག་དེས་ཀྱང་ཕྱི་བཞིན་སོང་བ་དགེ་སློང་དེས་མཐོང་ནས་དེ་ལ། བཞིན་བཟང༌། འཁོན་ཞི་བར་གྱུར་ཅིག །ད་ཞི་བར་བྱའོ་ཞེས་ཤིན་ཏུ་བརྡུངས། ལྷུང་བཟེད་བཅག །ཆོས་གོས་དྲལ། མ་ཤི་ཙམ་ཞིག་བྱས་ནས་བཏང་བ་དང༌། དབུགས་དེའུ་ཆད་པ་ལས་ཕྱིར་ལོག་ནས་གཙུག་ལག་ཁང་དེར་ཕྱིན་པ་དང༌། དགེ་སློང་རྣམས་ཀྱིས་མཐོང་ནས། ཅིའི་ཕྱིར་འདི་ལྟར་གྱུར། རྒྱས་པར་བརྗོད་ནས། ཁྱེད་ཀྱིས་ལམ་བསྟན་པས་ཉེས་སོ་ཟེར་བའི་སྐབས་དེ་གསོལ་བས། སྔ་མ་ནི་བཅས་པ་ཡིན་ལ། འདི་ནི་རྗེས་སུ་(༡༠༣ན)གནང་བ་སྟེ་དེ་འདྲ་བའི་རྐྱེན་མ་གཏོགས་སོ་ཞེས་པ། ཉམ་ང་བ་དང་འཕྲད་པ་ལ་ཡང་མི་འབྱུང་ངོ༌། །ཁྲི་གཅིག་ལ་གཉིས་མཆིས་ན་གང་གིས་བྲུབ། གཉི་ག་ཅིག་ཅར་སྤྱོད་སྤྱོད་པ་ལ་ནི་ཕྱིས་ལངས་པས་བྱ་བ་དང་ལྡན་པ་མིན་ནོ་སོགས། དྲུག་སྡེ་ནད་པ་བལྟར་དོང་བ་ན་དེ་ཉིད་དུ་འདུ་འཛིའི་གཏམ་གྱིས་ཡུན་རིང་དུ་འཁོད་ནས། ནད་གཡོག་གིས། ཁྱེད་དེང་ཞིག །ནད་པའི་བྱ་བ་ཉམས་པར་འགྱུར་རོ། །
དེ་དག་གིས་སྨྲས་པ། དེ་ཡང་གྱིས་ལ་གནས་མལ་ཡང་ལྟོས་དང༌། དེ་ལྟར་ན་ནད་པ་ཤི་བའི་ཡོ་བྱད་དྲུག་ཐོབ་པར་འགྱུར་རོ། །གཞན་ཡང་ཁོ་བོ་ཅག་གིས་བལྟ་བར་བྱའོ། །ནད་གཡོག་སོང་བ་དང་དྲུག་སྡེའང་སོང་ནས། རླུང་དང་ཆར་བས་ནད་པའི་གནས་མལ་མ་རུང་བར་གྱུར་པའི་སྐབས་དེ་གསོལ་བས། ལྔ་པོ་འདི་དག་ལ་བཅོལ་བར་མི་བྱ་སྟེ། ངོ་ཚ་མེད་པ་དང༌། ནང་དང་བཅས་པ་དང༌། རྒས་པ་དང༌། ནད་པ་དང༌། བསྙེན་པར་མ་རྫོགས་པ་ཐམ་ཅད་ལའོ། །ཁྱིམ་བདག་ཅིག་གིས་སྟོན་པ་དགེ་འདུན་དང་བཅས་པ་བཤོལ་ལ་སྤྱན་དྲངས་པ་ན། གཞོན་ནུ་ཞིག་དགེ་བའི་ཕྱོགས་ལ་ཤིན་ཏུ་བརྩོན་ནས་བསམས་པ། དེང་བསོད་སྙོམས་ལ་འཇུག་མ་དགོས་པས་གདུགས་ཚོད་ལ་མ་བབ་ཀྱི་བར་དུ་དགེ་བའི་ཕྱོགས་ལ་ཏྲོན་བྱའོ་སྙམ་ནས་སྟན་ཁྱེར་ཏེ་ཕྱི་རོལ་ཏུ་སོང་བ་དང༌། དགེ་སློང་རྣམས་སྔ་ཚོགས་སུ་གཙུག་ལག་ཁང་གི་སྒོ་བཅད་དེ་སོང་ངོ༌། །དེས་ཀྱང་དུས་ལ་འོངས་པ་ན་སྒོ་བཅད་པ་མཐོང་ནས། བདག་ཟན་བཅད་པ་ནི་བླའི། ལྟུང་བ་དང་བཅས་པ་ནི་མི་རུང་ངོ་སྙམ་ནས་ཟན་བཅད་དེ་ལུས་ལ་མདངས་ཡོད་ཀྱི་བར་དུ་དགེ་བའི་ཕྱོགས་ལ་ཏྲོན་བྱས་ནས། ལུས་ལ་མདངས་ཡལ་བའི་ཚེ་གློས་ཕབ་ནས་ཉལ་བ་དང༌། དེ་ལ་དགེ་སློང་རྣམས་ཀྱིས། ཟན་གཞན་གྱི་ཡིན་ཞེས་ཏེ་ལྟོའང་གཞན་གྱི་ཡིན་སྙམ་མམ། དགེ་བའི་ཕྱོགས་ལ་ཏྲོན་ཀྱང་བྱེད་མི་ནུས་པ་དེ་ཙམ་དུ་ཟའམ། སུས་ཟོས། ཁྱོད་ཀྱིས་མ་ཟོས་སམ། མ་ཟོས་སོ། །ཅིའི་ཕྱིར། སྐབས་དེ་བརྗོད་ནས། གསོལ་བས། གལ་ཏེ་འོངས་པ་ན་ཁྱིམ་གཞན་དུ་མགྲོན་དུ་བོས་ཤིང་སྒོ་བཅད་པར་གྱུར་ན་རྩིག་དྲུང་ངམ་ཤིང་ལྗོན་པའི་དྲུང་དུ་སྟན་བཞག་སྟེ་འཇུག་པར་བྱའོ། །ཁྱིམ་པ་དད་པ་ཅན་དག་གིས་དགེ་སློང་རྣམས་ཁྱིམ་གཞན་དུ་བོས་པ་ན་དང་དུ་མི་ལེན་ནས། དེ་དག་གིས་སྨྲས་པ། སངས་རྒྱས་འཇིག་རྟེན་དུ་མ་བྱུང་བའི་ཚེ་མུ་སྟེགས་ཅན་དག་སྦྱིན་གནས་ལགས་མོད། ད་ནི་ཁྱེད་ཅག་སྦྱིན་གནས་ལགས་ཏེ། ཁྱེད་ཅག་དང་དུ་མི་བཞེས་ན་བདག་ཅག་དགེ་བའི་ལམ་བརྒྱགས་མེད་པར་འཇིག་རྟེན་ཕ་རོལ་ཏུ་འགྲོའམ། དེ་གསོལ་བས། དང་དུ་བླང་བར་བྱའོ། །དེ་དག་སྟན་གཡར་པོ་བྱེད་པ་དགེ་སློང་རྣམས་མི་སྟེར་ནས། དེར་སྟན་དག་གཡར་པོར་སྦྱིན་ནོ། །ཟན་ཟོས་ནས་སྟན་ཁྱེར་དོང་བ་ན་ཁྱིམ་པས། (༢༠༣བ)ཁྱེད་ཅག་བཞུད་ཅིག་བདག་ཅག་གིས་བསྐྱལ་ལོ་ཟེར་ཡང་མི་འཇོག་པ་དང༌། བདག་ཅག་གིས་བསྐྱལ་ལོ་ཟེར་ན་བཞག་སྟེ་འདོང་བར་བྱའོ། །
ཁྱིམ་པ་རྣམས་རྐྱེན་བྱུང་བས་སྟན་མི་སྐྱེལ་བ་དང༌། བླང་བར་བྱའོ། །སུས་བླང་མ་ཤེས་ནས། དེ་དག་གིས་མ་བསྐྱལ་ན་གནས་པར་བྱེད་པ་དག་གིས་བླང་བར་བྱའོ་སོགས། ཡོན་བདག་གིས་སྟན་གཡར་བས་མི་སྟེར་ནས། ཡོན་བདག་གིས་རང་གི་དོན་དུ་སྟན་དག་གཡར་པོར་བྱེད་ན་སྦྱིན་པར་བྱའོ། །དེ་དག་གིས་དེ་ཉིད་དུ་བོར་ནས་སོང་བ་དང་རྐུན་པོས་བརྐུས་ནས། དེ་དག་བསྲུང་བའི་དགེ་སློང་ཡང་བཞག་པར་བྱའོ། །དགེ་སློང་གིས་དེ་དག་གི་ནང་དུ་ཞུགས་པ་དང༌། ཅི་ཁྱེད་ཡང་བཞེད་དམ། མི་འདོད་དེ་སྟན་བསྲུང་ངོ༌། །ཐུགས་མ་ཆེས་ན་སྣོམས་ལ་བཞུད་ཅིག །དེས་ན་དུ་མི་འཇུག་པར་ཕྱོགས་གཅིག་ཏུ་འདུག་པར་བྱའོ་སོགས། དེ་དག་གིས་ཆང་དང༌། སྣུམ་དང༌། བཤང་གཅིས་མ་རུང་བར་གྱུར་པ་ན་འདོར་བར་བྱེད་ནས། མ་རུང་བ་དག་བྱི་དོར་བྱའོ། །ཁྱིམ་པ་སྟན་ལ་འདུག་ནས་བོར་ཏེ་སོང་བ་སུས་ཀྱང་མ་བྲུབས་པས་མ་རུང་བར་གྱུར་ནས། ཁྱིམ་པ་འདུག་འདུག་པའི་སྟན་མ་བརྟུལ་བ་མཐོང་ན་བརྟུལ་བར་བྱ་བ་ཉིད་ཡིན་ནོ། །རྒན་པ་དང་ནད་པས་མཐོང་ཡང་བྲུབས་མ་ནུས་པས། གལ་ཏེ་རྒན་པ་དང་ན་བ་ཡིན་ན་དགེ་སྐོས་ཀྱིས་སོ། །དགེ་སློང་ན་བར་གྱུར་པ་ལ་སུའང་མི་ལྟ་ནས། ཐམས་ཅད་ཀྱིས་ནད་པ་བལྟ་བར་བྱའོ། །གནས་བརྟན་དག་འགྲེང་བཞིན་དུ་ནད་པ་ལྟ་བས་ནད་པ་ཉམ་ང་བར་གྱུར་ནས། འདུག་སྟེའོ། །རང་རང་གི་སྟན་ཁྱེར་ནས་དོང་བས། མ་དད་པ་དག །རོལ་མོ་བལྟར་འདོད་ངམ་ཟེར་ནས། དེར་སྟན་ཐོགས་ཏེ་འགྲོ་བར་མི་བྱའོ། །མཁན་སློབ་འཆག་ཏུ་སོང་བ་ན་སློབ་མ་རྣམས་དགེ་བ་མི་འཕེལ་ནས། མཁན་པོའམ་སློབ་དཔོན་དགེ་བའི་ཕྱོགས་ལ་འགྲོ་ན། གལ་ཏེ་གཞན་གྱིས་དགེ་བའི་ཕྱོགས་མི་འཕེལ་ན་ཕྱི་བཞིན་འགྲོ་བར་བྱའོ། །མཁན་སློབ་སྟན་ཁྱེར་ནས་འགྲོ། སློབ་མ་ལག་པ་བརྐྱངས་ནས་འགྲོ་བས། དེའི་ཕྱིར་རང་གིས་སྟན་བཀུར་བར་བྱའོ། །སློབ་མས་ཕར་ཁྱེར་བ་ཚུར་ཁྱེར་ཏེ་མི་འོང་ནས། དེ་ཁྱེར་ཏེ་འོང་བར་བྱའོ། །དེ་དག་གིས་ཆེས་སྔར་སྟན་ཁྱེར་ཏེ་སོང་བ་དང་མཁན་སློབ་རྐྱེན་བྱུང་བས་མི་འགྲོ་ནས། འགྲོ་བ་མ་ཞུས་པར་མི་བཀུར་རོ། །ཆོས་ཉན་སར་རླུང་དང་ཆར་བྱུང་ནས་གནས་མལ་དོར་ཏེ་དོང་བས་མ་རུང་བར་གྱུར་ནས། བླ་གབ་མེད་པར་ཆོས་ཉན་པ་ན་རླུང་དང་ཆར་བྱུང་ན་བརྟུལ་བར་བྱའོ། །རྒན་པའི་མཐར་གནས་མལ་བཟང་པོ་བཤམས་པ་ན་དེ་དག་གིས་མ་ཐེག་ནས། རྒན་པོ་རྣམས་ཀྱི་ལྕི་བ་ཉིད་ཀྱི་ཕྱིར་རང་གིས་མི་ནུས་ན་གཞོན་ནུ་རྣམས་དང་ལྷན་ཅིག་བརྗེ་བར་བྱའོ། །བྲུབས་ནས་ཚོམ་གཅིག་ཏུ་བྱས་པས་ཆུད་ཟོས་ནས། འཐུན་པ་དང་འཐུན་པར་གཞག་པར་བྱའོ། །ཁྱིམ་བདག་ཅིག་ལ་གཙུག་ལག་ཁང་དགོན་པ་དང་གྲོང་མཐའ་པ་(༢༠༤ན)གཉིས་ཡོད་པ་ལས། གྲོང་མཐའ་པ་ནི་གནས་མལ་མང༌། དགོན་པ་བ་ནི་གནས་མལ་ཉུང་ངོ༌། །དགོན་པའི་གཙུག་ལག་ཁང་དུ་དུས་སྟོན་བྱུང་ནས་གྲོང་མཐའ་པ་ལ་གཡར་བས་མ་སྟེར་ནས། གཙུག་ལག་ཁང་གཞན་དུ་གདན་ཆ་དང་རྫས་བརྙན་ན་བཀུར་བར་བྱའོ་ཞེས་སོགས། ནགས་ནང་གི་གཙུག་ཁང་ཞིག་འདུག་པ་ལ་མེ་ཤོར་ནས། མེས་གྲོང་དང་གྲོང་ཁྱེར་ནས་གཙུག་ལག་ཁང་གི་བར་ཚིག་པ་ལ་ཐུག་པ་ན་དགེ་སློང་རྣམས་ཀྱིས་རང་རང་གི་ཆོས་གོས་དང་ལྷུང་བཟེད་ཕྱུང༌། དགེ་འདུན་གྱི་གནས་མལ་ཚིག་གོ །ཁྱིམ་དག་འོངས་ཏེ། མ་ཚིག་གམ། ཅིའང་མ་ཚིག་གོ །དགེ་འདུན་གྱི་གནས་མལ་ག་རེ། ཚིག་གོ །མ་ཚིག་པ་དེ་འདྲའོ། །དགེ་འདུན་གྱི་གནས་མལ་ཙམ་འབྱིན་མ་ཕོད་ཟེར་བ་དང༌། མེ་ཤོར་ཏམ་ཆུ་བྱུང་ན་དགེ་འདུན་གྱིའང་གདོན་པར་བྱའོ། །དགེ་འདུན་གྱི་སྔོན་ལ་ཕྱུང་བས་གང་ཟག་གི་ཚིག་པར་གྱུར་པ་དེ་གསོལ་བས། གང་ཟག་ཕོངས་པར་འགྱུར་གྱི་དགེ་འདུན་ཕོངས་པར་མི་འགྱུར་བས། རང་གི་ལྷུང་བཟེད་དང་ཆོས་གོས་ཐོན་ཟིན་ནའོ། །ཕྱུང་སྟེ་བཞག་པ་རྣམས་རྐུན་པོས་བརྐུས་ནས་སྲུང་མ་བཞག་གོ །མཐུ་ཆེན་པོ་བཞག་པས། བཏོན་ཟིན་པ་བསྲུང་བའི་ཕྱིར་དགེ་སློང་ཆེན་པོ་མི་ནུས་པ་བཞག་པར་བྱའོ། །མེ་དང་ཆུ་མ་བཟོད་པར་འཇུག་པར་བྱེད་ནས། མི་བཟོད་པ་ཉིད་དུ་འཇུག་པར་མི་བྱའོ། །
གདིང་བའི་ལྟུང་བྱེད་ནི། སྟོན་པ་མཉན་ཡོད་ནའོ། །ལྷོ་ལམ་ནས་དགེ་སློང་རྒན་གཞོན་གཉིས་སྟོན་པ་ལ་ཕྱག་འཚལ་དུ་འོངས་ནས། རྒན་ཤོས་གཙུག་ལག་ཁང་གནས་མལ་དང་བཅས་པ་ཞིག་ཏུ་བསྐོས། གཞོན་ཤོས་གཙུག་ལག་ཁང་གནས་མལ་མེད་པ་ཞིག་ཏུ་བསྐོས་པ་དང༌། དེ་སྒྲུབ་ཕོད་པ་ཡིན་པས་རྩྭ་མང་པོ་བླངས་ནས་པུས་མོ་ནུབ་ཙམ་གྱི་གདིང་བ་བཤམས་སོ། །རྒན་པས་གཞོན་པའི་གཙུག་ལག་ཁང་བལྟར་སོང་བ་དང༌། གདིང་བ་བཟང་པོ་བཤམས་པ་མཐོང་སྟེ། སང་གནས་མལ་གཏོད་ན་འགྲོ་བ་འཕྱིས་པར་འགྱུར་སྙམ་ནས་གནས་མལ་དེ་ཉིད་གཏད་དེ། དེ་གཉིས་གཙུག་ལག་ཁང་དེར་གནས་ནས་ནངས་པར་སྔར་ལངས་ཏེ་དོང་ངོ༌། །ཕྱོགས་དེ་སྣུམ་ཞིང་དངར་བ་ཡིན་པས་རྩྭ་བཏིང་བ་ལ་སྲིལ་ཆགས་ནས་དེའི་ཕྱི་ནང་ཐམས་ཅད་སྲིལ་གྱིས་ཁྱབ་བོ། །དེའི་ཚེ་ཁྱིམ་བདག་ཅིག་གིས་དགེ་འདུན་བསོད་སྙོམས་ལ་སྤྱན་དྲངས། སྟོན་པ་བསླབ་པ་འཆའ་བར་བཞེད་ནས་མ་བྱོན་པར་ལྡེ་མིག་བསྣམས་ནས་གཙུག་ལག་ཁང་རྣམས་གཟིགས་པས་གཙུག་ལག་ཁང་དེ་སྲིལ་གྱིས་ཁྱབ་པར་གཟིགས་ནས། ཡོན་བདག་གིས་པགས་པ་དང་ཤ་ཁྲག་བཙིར་ནས་བྱིན་པ་ལ་དྲོད་མི་ཤེས་པར་མི་རིགས་པར་སྤྱོད་དོ་སྙམ་སྟེ། རྫུ་འཕྲུལ་གྱིས་སྲིལ་ཕྱོགས་གཅིག །ས་དག་ཕྱོགས་གཅིག་ཏུ་འགྱུར་བར་མཛད་ནས། འཁོར་ལོ་དང་བཀྲ་ཤིས་དང་གཡུང་དྲུང་གི་ལྕགས་ཀྱུ་དང་ལྡན་པའི་ཕྱག་དྲ་བས་འབྲེལ་བ། བསོད་ནམས་བརྒྱ་ཕྲག་དུ་མས་བསྒྲུབས་པ་(༢༠༤བ)གཉིས་ཀྱིས་སྲིལ་དེ་དག་བསིལ་བའི་ཕྱོགས་སུ་བཞག་གོ །དེ་ནས་གཙུག་ལག་ཁང་དེ་ཆག་ཆག་བཏབ་སྟེ་ཕྱག་བདར་མཛད་ནས་ཉལ་ཉིལ་རྣམས་བོར་ཏེ་བཞུགས་སོ། །བསོད་སྙོམས་ཀྱི་སྐུ་སྐལ་ཕུལ་བས་དྲི་བ་མཛད་ནས། དགེ་འདུན་གྱི་གཙུག་ལག་ཁང་དུ་རྩྭ་དང་ལོ་མའི་གདིང་བ་བཏིང་ནས་མ་བསྡུས་པར་སོང་ན་ལྟུང་བྱེད་དོ། །
དགེ་སློང་རབ་ཏུ་མང་པོ་དོན་མཐུན་དང་ལྷན་ཅིག་ལྗོངས་རྒྱུར་སོང་བ་ན་རི་བྲགས་ཤིག་ཏུ་ཕྱིན་ནས། ཁོ་བོ་ཅག་ལ་གནས་ཁང་གཡོར་ཅིག །དམ་ཚིག་གིས་གཡར་ཏེ། བདག་གི་བསོད་སྙོམས་གསོལ་ནའོ། །ཁོ་བོ་ཅག་དོན་མཐུན་ལ་རག་པས་དོན་མཐུན་སྡོད་ན་བཟའོ། །འདི་ན་ཁྲིའམ་ཁྲིའུ་ཡོད་དམ། མ་མཆིས་སོ། །དེ་དག་གིས་ཁྱིམ་པ་དང་དགེ་ཚུལ་གྱིས་རྩྭ་མང་པོ་བླངས་ཏེ། པུས་མོ་ནུབ་ཙམ་གྱི་གདིང་བ་བཤམས་སོ། །དོན་མཐུན་སྔ་བར་སོང་བས་དགེ་སློང་རྣམས་ཀྱིས་ཀྱང་གདིང་བ་མ་བོར་བར་དོང་ངོ༌། །ཁྱིམ་བདག་གིས། བསོད་སྙོམས་དབུལ་ལོ་སྙམ་ནས་སོང་བ་དང༌། དེ་ནམ་མ་ལངས་པར་སོང་བ་མཐོང་ནས། ཁྱིམ་བདག་ཆུང་མ་དང་བཅས་པས་གདིང་བ་འདོར་བ་ལ་སྔ་དྲོ་རིལ་སོང་ངོ༌། །ཡང་དགེ་སློང་མང་པོ་དོན་མཐུན་དང་ལྷན་ཅིག་ལྗོངས་རྒྱུར་དོང་བ་ན། རི་བྲགས་དེར་ཕྱིན་ནས། གནས་ཁང་གཡོར་ཅིག །རན་གྱི་གདིང་བ་མི་འདིང་ན་གཡར་རོ། །ཁྲི་དང་ཁྲིའུ་ཡོད་དམ། མ་མཆིས་སོ། །འོ་ན་ས་སྒྲེ་བོ་ལ་ཇི་ལྟར་ཉལ། དགེ་སློང་སྔ་མས་འདི་ལྟར་བགྱིས་སོ། །དེ་དག་ས་སྒྲེ་བོ་ལ་ཉལ་ནས་མཐར་གྱིས་མཉན་ཡོད་དུ་ཕྱིན་པ་དང༌། འོངས་པ་ལེགས་སོ། །བདེ་བར་བརྒྱུས་སམ། ཇི་ལྟར་བདེ། ས་སྒྲེ་བོ་ལ་མཚན་ཐོག་ཐག་འགྲེ་ལྡོག་བྱས་སོ། །གཞན་ཞིག་ན་རེ། དེར་ཁོ་བོ་ཅག་གིས་རྩྭའི་གདིང་བ་ལ་ཉལ་ལོ། །ཁྱེད་ཀྱིས་གདིང་བ་དེ་གར་བོར། དེ་ཉིད་དུ་བོར་རོ། །དེའི་ཕྱིར་ཁྱིམ་བདག་གིས་སྨོད་དོ་ཞེས་པའི་སྐབས་དེ་གསོལ་བས། ཁྱིམ་གཞན་དུ་གདིང་བ་བྱས་པ་དོར་བར་བྱའོ། །
ཡང་དགེ་སློང་མང་པོ་དོན་མཐུན་དང་ལྷན་ཅིག་ལྗོངས་རྒྱུར་སོང་བ་ན་རི་བྲགས་ཤིག་ཏུ་ཕྱིན་ནས་ཁྱིམ་བདག་ལ། གནས་གཡོར་ཅིག །བདག་གིས་གློ་བུར་དུ་ལྷགས་པ་རྣམས་ཀྱི་དོན་དུ་ཐག་རིང་པོ་ནས་རྩྭ་མང་པོ་བླངས་ཀྱིས་འདིར་གཟིམས་ཤིག །དེ་དག་དེར་ཉལ་ནས་ནམ་མ་ལངས་པར་ཁྱིམ་བདག་ལ་མ་དྲིས་པར་གདིང་བ་བོར་ཏེ་སོང་ངོ༌། །ཁྱིམ་བདག་གིས་དེ་བོར་བ་མཐོང་ནས། ཕྱོགས་གཙང་མར་བོར་ནས་བླང་ངོ་སྙམ་པ་ལས་མི་གཙང་བར་བོར་བ་མཐོང་ནས་མ་བླངས་སོ། །ཡང་དགེ་སློང་གཞན་དག་ཕྱིན་ནས། གནས་གཡོར་ཅིག །བཞུགས་སུ་གསོལ། འདི་ན་ཁྲིའམ་ཁྲིའུ་ཡོད་དམ། མ་མཆིས་སོ། །ས་སྒྲེ་བོ་ལ་ཇི་ལྟར་ཉལ། བདག་གིས་གདིང་བ་བཤམས་པས་ཁྱེད་ཀྱིས་གྲོགས་པོས་འདི་ལྟར་བགྱིས་སོ། །དེ་དག་ས་སྒྲེ་བོ་ལ་ཉལ་ནས་མཉན་ཡོད་དུ་ཕྱིན་པ་སོགས་སྔར་དང་འདྲ། ཁྱེད་ཀྱིས་གདིང་བ་གར་བོར། ཕྱིར་དོར་རོ། །(༢༠༥ན)དེའི་ཕྱིར་ཁྱིམ་བདག་སྨོད་དོ་ཞེས་པའི་སྐབས་དེ་གསོལ་བས། ཁྱིམ་གཞན་དུ་གདིང་བ་བྱས་པ་ཁྱིམ་བདག་ལ་དྲིས་ཏེ་དོར་བར་བྱའོ། །དགེ་སློང་མང་པོ་དོན་མཐུན་དང་ལྷན་ཅིག་ལྗོངས་རྒྱུར་དོང་བ་ན་ཁྲོན་པའི་དྲུང་ཞིག་ཏུ་མཚན་མོ་རྩྭའི་གདིང་བ་ལ་འདུག་གོ །དེའི་ཉེ་ལོགས་ན་བྲམ་ཟེ་ཞིག་ཀྱང་འདུག་གོ །དེ་དག་སྔ་བར་ལངས་ཏེ་སོང་བ་དང༌། དོན་མཐུན་ཕྱིར་འོང་བ་དག་དེར་ཉལ། བྲམ་ཟེ་དེའང་ཉལ་ལོ། །དོན་མཐུན་གྱི་གསེབ་ན་གཅེར་བུ་བ་ཞིག་ཉལ་བ་དང༌། ཁོ་བོ་ཅི་ཞིག་གིས་ཟིན། གཅིག་ན་རེ། ཆང་གི་ཚིགས་མ་མང་དུ་ཟོས་པས་ཁྱོད་འདོད་པའི་རྣམ་རྟོག་གིས་ཟིན་ཏོ། །དེས་བལྟས་པ་དང་སྲིལ་དག་མཐོང་ནས། འདི་ལ་སུས་ཉལ། བྲམ་ཟེ་དེ་ན་རེ། དགེ་སློང་གིས་ཉལ་ལོ། །དགེ་སྦྱོང་དག་འཇིག་རྟེན་ན་རང་ཉིད་མཁས་པར་བགྲང་ན། དགོན་པར་གདིང་བ་འདོར་བའང་མི་ཤེས་སོ་ཟེར་བ་དེ་གསོལ་བས། དགོན་པར་ཡང་རྩྭའི་གདིང་བ་དོར་བར་བྱའོ། །དགེ་སློང་མང་པོ་ལྗོངས་རྒྱུར་སོང་བ་ན་དགོན་པའི་གནས་ཤིག་ཏུ་བསྡད་ནས་དོན་མཐུན་ནམ་མ་ལངས་པ་ལ་འཕགས། དགེ་སློང་དག་གིས་གདིང་བ་དོར་བས་དོན་མཐུན་ཐལ་ནས་ཕྱི་བཞིན་སོང་བ་ཆོམ་རྐུན་པས་བཅོམ་མོ། །མཐར་གྱིས་མཉན་ཡོད་དུ་ཕྱིན་པ་ན། འོངས་པ་ལེགས་སོ། །བདེ་བར་བརྒྱུས་སམ། ཇི་ལྟར་བདེ་བར་བརྒྱུས། ཆོམ་རྐུན་པས་བཅོམ་མོ། །ཇི་ལྟར་གྱུར། སྐབས་དེ་བརྗོད་ནས་གསོལ་བ་དང༌། ཡང་ན་གློངས་ཏེ་འགྲོ་བར་བྱའོ། །དགེ་སློང་དག་ཚོན་གྱི་ལས་བྱེད་པ་ན་དང་ར་རུ་རྩྭ་བཀྲམ་གོས་བསྐམས་ནས་མ་དོར་བས་སྲིལ་བྱུང་ནས། གོས་དག་བསྐམ་པའི་ཕྱིར་རྩྭ་བཏིང་བ་ཡང་དོར་བར་བྱ་བ་ཉིད་དོ། །གཞན་ཚོན་རྩིའི་ལས་བྱེད་པར་འདོད་ནས། མ་དོར་ཅིག་ཁོ་བོས་ཀྱང་གོས་བསྐམ་མོ། །དེ་མི་སྟེར་བ་དང༌། སྦྱིན་པར་བྱའོ། །དེ་དག་གིས་གོས་བསྐམས་ནས། ཁོ་བོ་ཅག་གིས་མ་བཏིང་ངོ་ཞེས་མ་དོར་བས། སློང་བ་ལ་དོར་བར་ཁས་ལེན་ན་སྦྱིན་ནོ། །དགེ་སློང་འཆག་སར་འཆག་པ་ན་རྩུབ་པས་རྐང་མཐིལ་ཚ་ནས། འཆག་ས་དག་ཏུ་རྐང་མཐིལ་གཉིས་ལ་རྩྭ་དག་གདིང་བར་བྱའོ། །དེར་སྲིལ་བྱུང་ནས། དེ་དག་ཀྱང་དོར་བར་བྱ་བ་ཉིད་དོ། །དེ་དག་ཉི་མ་རེ་རེ་ཞིང་འདོར་བར་བྱེད་ནས། གཏོང་ན་དོར་བར་བྱ་བ་བྱ་བ་མ་ཡིན་པ་ཉིད་དུ་མ་གྱུར་པ་དོར་བར་བྱའོ་སོགས། འཆག་སར་རྩྭའི་ཆུན་པོ་བཞག་པས་སྲིལ་བྱུང་ནས། འཆའ་ས་དག་ཏུ་རྩྭའི་ཆུན་པོ་དག་ཐག་པས་བཅིངས་ཏེ་ཤིང་ལྗོན་པ་ལ་དཔྱངས་ཤིང་གཞག་པར་བྱའོ། །ལྕི་བ་ས་ལ་བཞག་པས་སྲིལ་བྱུང་ནས། ལྕི་བ་གྱོ་མོར་གཞག་པར་བྱའོ། །
སྐྲོད་པའི་ལྟུང་བྱེད་ནི། སྟོན་པ་མཉན་ཡོད་ནའོ། །འཆར་ཀས་གསར་བུ་དག་ལ། ལྗོངས་རྒྱུར་འདོང་དང༌། དེར་བདག་ཅག་གིས་རྒོལ་བ་དག་ཚར་གཅད། རང་གི་གྲགས་པའང་(༢༠༥བ)བསྒྲག །རྙེད་པའང་བསྒྲུབ་ཅིང་ཁྱེད་ཀྱང་ལྷུང་བཟེད་དང་ཆོས་གོས་ཀྱི་མི་བྲེལ་བར་བྱའོ། །དེ་དག་གིས་མཁན་སློབ་ལ་ཞུས་པས། དེ་གནས་ངན་ལེན་ཀུན་ཏུ་སྤྱོད་པ་ཡིན་གྱིས་ཁྱེད་ལ་མཐོ་འཚམ་པར་འགྱུར་རོ། །འཆར་ཀ་བདག་ཅག་གི་ཕ་མ་དང་འདྲའོ་ཞེས། དེའི་ཚིག་ཚིག་མ་ཡིན་པར་བྱས་ནས་སོང་བ་དང༌། མཚམས་ལས་འདས་པའི་ཚེ་འཆར་ཀས་སྨྲས་པ། ཅིའི་ཕྱིར་གནས་མ་བཅས་པར་ལྗོངས་རྒྱུར་འགྲོ། གནས་ཆོས་ཤིག་ཅེས་གནས་འཆར་བཅུག་སྟེ། ལ་ལ་ལ་གཏུར་བུ། ལ་ལ་ལ་ལྷུང་བཟེད། ལ་ལ་ལ་བར་བུར་དང༌། ལ་ལ་ལ་རིལ་བ་སྤྱི་བླུགས་གཏད། དེ་ལག་པ་གཉིས་བརྐྱང༌། རྔུལ་གཟན་ལས་གཞན་མེད་པར་འཇིག་རྟེན་ལ་མཐོ་འཚམ་ཞིང་འགྲོ་བ་ན། རི་བྲགས་ཀྱི་ཁྲོན་པ་ཞིག་གི་དྲུང་དུ་ངལ་གསོ་བ་ན་རི་བྲགས་ཀྱི་གཙུག་ལག་ཁང་དེར་གཎྜི་བྱུང་བས། གཎྜི་བྱུང་གིས་བཞུད་དོ། །ལྷུང་བཟེད་ནག་པོ་ཅན། ལས་མེད་པ་དག་གིས་ལས་ཀྱི་གཎྜི་བརྡུངས་ནས་ཁོ་བོ་ཅག་ལ་ལས་བཅོལ་ན་ངལ་བར་འགྱུར་རོ། །རྙེད་པའི་གཎྜི་མ་ལགས་སམ། ཡིན་ན་མཚམས་སུ་ཕྱིན་པས་འཐོབ་བོ། །སློབ་དཔོན་གྲགས་པ་བསོད་ནམས་ཆེ་བས་འཐོབ་ཀྱི་བདག་ཅག་ལ་སུས་སྩོལ། དོང་ལ་ཁོ་བོའི་ཡང་མནོས་ཤིག །ཕྱིན་པས་གནས་མལ་འགོད་དེ། གནས་མལ་མནོས་སིག །བདག་ཅག་ལས་ཆེས་རྒན་པའང་ཡོད་དོ། །སུ། འཆར་ཀའོ། །དེའི་ཡང་མནོས་ཤིག །དེ་དག་གིས་གནས་མལ་མནོས་སོ། །འཆར་ཀ་དེ་ན། རི་བྲགས་འདི་སུའི་ཡིན། གཙུག་ལག་ཁང་འདི་སུའི་ཡིན་ཞེས་སོགས་འདུ་འཛིའི་གཏམ་གྱིས་འདུག་གོ །དེ་དག་གིས་འཆར་ཀའི་མལ་བཤམས། རྐང་པའི་ཆུ་དང་རྐང་པ་བསྐུ་བ་དག་ལྷན་ཅིག་བཞག་ནས། གཅིག་ལ་གཅིག་ཞུས་ཏེ་མེ་ཁང་དུ་ཉལ་ལོ། །འཆར་ཀ་གཏམ་གྱི་ཟླ་མེད་པ་དང་འོངས་ཏེ། གཞོན་ནུ་དག་ཅེས་བོས་པས། དགེ་སློང་དག་གིས། འདམ་བུ་ཐིབས་པོའི་གསེབ་ཏུ་ཞུགས་པ་བཞིན་དུ་ཅི་འབོད། ཁོ་བོའི་གཞོན་ནུ་དག་གོ །དེ་དག་གིས་ཐོས་ནས། སློབ་དཔོན། མ་འབོད་པར་འུ་ནིར་གཟིམས་ཤིག །ཁྱེད་ཀྱིས་སུ་ལ་ཞུས། སློབ་དཔོན་ཡུན་རིང་དུ་ཐོགས་ནས་གཅིག་ལ་གཅིག་ཞུས་སོ། །འཆར་ཀས་སྨྲས་པ། ཁྱེད་གཙུག་ལག་ཁང་ནས་ཕྱིར་བྱུང་ལ། མ་གུས་པ་ལ་གནས་སྦྱིན་པ་ལ་གནས་ཆོས་ཤིག་ཟེར་ནས་ཕྱིར་བསྐྲད་དོ། །དེ་དག་མཚན་ཐོག་ཐག་བླ་གབ་མེད་པར་ལྷགས་པས་ཉེན་ནས་ནངས་པར་སྔར་ལངས་ཏེ། སློབ་དཔོན། ཕྱག་འཚལ་ལོ། །བདག་ཅག་མཆིའོ། །གར་འདོང༌། མཉན་ཡོད་དུའོ། །སྡོད་དང་ཁོ་བོས་ན་བ་རྣམས་ཀྱི་ནད་གཡོག་བྱའོ། །བདག་ཅག་མི་ན་བའང་ན་བར་བྱས་པས་ནད་གཡོག་བྱས་རེ་སྐན་ཞེས་མཉན་ཡོད་དུ་སོང་བ་དང༌། འོངས་པ་ལེགས་སོ། །བདེ་བར་བརྒྱུས་སམ། འཆར་ཀས་མཚན་ཐོག་ཐག་(༢༠༦ན)ལྷགས་པས་མཐོ་བཙམས་སོ་ཞེས་འཕྱ་བ་དེ་གསོལ་བས། བྱུང་བ་འདི་དང་སོགས། དགེ་འདུན་གྱི་གཙུག་ལག་ཁང་ནས་དགེ་སློང་དག་སྐྲོད་དམ་སྐྲོད་དུ་འཇུག་ན་ལྟུང་བྱེད་དོ། །གཙུག་ལག་ཁང་ཞིག་ན་དགེ་སློང་ནད་པ་ཞིག་འདུག་ནས། ཆར་ཆེན་པོ་འབབ་པས་གཙུག་ལག་ཁང་རྡིབ་པར་འགྱུར་གྱིས་ཕྱིར་ཕྱུང་ཞིག །ཁོ་བོ་རང་འབྱུང་མི་ནུས་སོ། །དགེ་སློང་རྣམས་བསྐྲད་པའི་ལྟུང་བ་བྱུང་དོགས་ནས་མ་ཕྱུང་བ་དང༌། ཆར་བབ་སྟེ་གཙུག་ལག་ཁང་རྡིབ་ནས་དེ་ཤི་བ་དེ་གསོལ་བས། བསླབ་པ་ལ་གུས་པའི་བསྔགས་པ་བརྗོད་ནས་སྔ་མ་ནི་བཅས་པ་ཡིན་ལ། འདི་ནི་གནང་བ་སྟེ། གལ་ཏེ་དེ་ལ་གནོད་པ་དང་སོགས་སོ། །
ཕྱིས་གནོན་བྱེད་པའི་ལྟུང་བྱེད་ནི། མཉན་ཡོད་ནའོ། །འཆར་ཀས་གསར་བུ་དག་ལ་ཞེས་པ་ནས། གཅིག་ལ་གཅིག་ཞུས་ཏེ་ཉལ་ལོའི་བར་སྔ་མ་དང་འདྲ། ཁོ་བོ་ཁྱོད་དང་ལྷན་ཅིག་བྱ་བ་ཅུང་ཟད་ཡོད་ཀྱིས་སྒོ་ཕྱེ་ཞིག །དེ་དག་གིས་སྒོ་མ་ཕྱེ་པ་དང༌། དེས་སྒོ་གླེགས་ལ་རྡོག་པས་བརྡབས་ནས་མེ་ཁང་ཐམས་ཅད་འགུལ་ལོ། །འདི་སྟོབས་དང་ལྡན་པ་ཡིན་པས་གཙུག་ལག་ཁང་རྡིབ་ན་མི་རུང་ངོ་སྙམ་ནས་སྒོ་ཕྱེ་བ་དང༌། དེ་ནང་དུ་ཞུགས་ནས་དེ་དག་དབུས་སུ་བསྒྱེལ་ཏེ་ཁ་ཅིག་ལ་གྲུ་མོས་བསྣུན། ཁ་ཅིག་ལ་པུས་མོས་བསྣུན་པ་དང༌། སློབ་དཔོན། སྣད་དོ། །སྣད་དོ། །སུ་ལ་གནོད་པ་དེ་འགྲོ་བར་འགྱུར་རོ། །འདི་སྟོབས་དང་ལྡན་པ་ཡིན་པས་བསད་ན་མི་རུང་ངོ་ཞེས་ཕྱིར་བྱུང་ནས་མཚན་ཐོག་ཐག་ལྷགས་པས་ཉེན་ནོ། །ནངས་པར་སྔར་ལངས་པ་སོགས་འདྲ། འཕྱ་བ་དེ་གསོལ་བས། བྱུང་བ་འདི་དང་སོགས། དགེ་འདུན་གྱི་གཙུག་ལག་ཁང་གི་གནས་སུ་དགེ་སློང་ཞུགས་པ་ཉིད་དུ་ཤེས་བཞིན་དུ་ཕྱིས་གནོན་བྱེད་ན་ལྟུང་བྱེད་དོ། །ཡང་འཆར་ཀས་གསར་བུ་དག་ལ་ཞེས་པ་ནས། འུ་ནིར་གཟིམས་ཤིག་གི་བར་འདྲ། བདག་ཅག་དེང་ཁ་ཟས་ངན་པ་འཚལ་བས་ཁ་ཏོན་རྔོ་མི་ཐོག་གིས་བསམ་གཏན་བགྱིད་དོ། །སྟོན་པས། མི་ཀློག་པ་ལ་ཤེས་རབ་མེད་དོ་ཞེས་མ་གསུངས་སམ། ཚུར་ཤོག་ཁ་ཏོན་གྱིས་ཤིག་ཅེས་མཚན་ཐོག་ཐག་ཁ་ཏོན་བྱེད་དུ་བཅུག་གོ །ནངས་པར་སྔར་ལངས་པ་སོགས་འདྲ། དགེ་སློང་ལ་མཐོ་འཚམ་ན་ལྟུང་བྱེད་དོ། །ཡང་གཞན་འདྲ་བ་ལ། བདག་ཅག་བསོད་པ་འཚལ་བས་ཁ་ཏོན་བགྱིའོ། །བསམ་གཏན་མེད་ན་ཤེས་རབ་མེད་དོ་ཞེས་མ་གསུངས་སམ། བསམ་གཏན་གྱིས་ཤིག་ཟེར་ནས་སྤོང་ཁང་དུ་བཅུག །དཀྱིལ་ཀྲུང་འཆར་བཅུག་ནས་མཚན་ཐོག་ཐག་བསྲེལ་ལོ། །ནངས་པར་སྔར་ལངས་པ་སོགས་འདྲ། ཡང་གཞན་འདྲ་བ་ལ། བདག་ཅག་གྲང་དུས་ལགས་པས་མེ་ཁང་དུ་ཉལ་ལོ། །ཁྱེད་ཅག་ལ་ཁྲག་ནད་དམ་མཁྲིས་ནད་བྱུང་ན་ཡུན་དེ་སྲིད་དུ་ཁྱེད་ཀྱི་ནད་གཡོག་བྱེད་ག་ལ་ནུས་ཞེས་བླ་གབ་མེད་པར་བཏོན་ཏེ་ཆུ་གྲང་མོས་བཏབ་ནས་མཚན་ཐོག་(༢༠༦བ)ཐག་བསིལ་ཡབ་ཀྱིས་གཡབས་སོ། །ནངས་པར་སྔར་ལངས་པ་སོགས་འདྲ།
ཡང་གཞན་འདྲ་བ་ལ། བདག་ཅག་དྲོ་བའི་དུས་ལགས་པས་སྤོང་ཁང་དུ་ཉལ་ལོ། །ཁྱེད་ཅག་ལ་རླུང་དང་བད་ཀན་གྱི་ནད་བྱུང་ན་དེ་སྲིད་དུ་ནད་གཡོག་བྱེད་ག་ལ་ནུས་ཞེས་དེ་དག་ནང་དུ་བཅུག་ནས་སྐར་ཁུང་བཅད་མེ་སྦར་ནས་སྒོ་བཅད། ལྭ་བ་ཇི་སྙེད་ཡོད་པས་དཀྲིས་ཏེ་སྟེང་ནས་མནན་ནོ། །ནངས་པར་སྔར་ལངས་པ་སོགས་འདྲ། འཆར་ཀ་གནས་ངན་ལེན་ཀུན་ཏུ་སྤྱོད་པར་ཤེས་པའི་ཚེ་དེ་དང་ལྷན་ཅིག་ལྗོངས་རྒྱུར་སྤྲོ་བ་མེད་ནས་དེ་གཅིག་པུ་ལྗོངས་རྒྱུར་སོང་བ་ན་གཙུག་ལག་ཁང་དུ་ཕྱིན་ཏོ། །དེ་ན་བཤང་གཅིའི་སྐྱབས་མེད་པས་གྱོ་མོར་བཤང་གཅི་འདོར་རོ། །དགེ་སློང་རྣམས་ཀྱིས། འདི་གནས་ངན་ལེན་ཀུན་ཏུ་སྤྱོད་པའོ་ཟེར་ནས་སུས་ཀྱང་མཁོས་སུ་མ་ཕབ་པ་དང༌། འདི་དག་མི་དགའ་བར་བྱའོ་སྙམ་ནས་གྱོ་མོ་དེ་དག་རྐང་པའི་མཐེ་བོས་བཟུང་སྟེ་ཕྱི་རོལ་ཏུ་བོར་རོ། །དགེ་སློང་རྣམས་ཀྱིས་མཚན་མོ་གྱོ་མོ་མ་རྙེད་པར་ཝ་ཁར་བཤང་གཅི་བྱས་སོ། །ནངས་པར་ཁྱིམ་པ་ལྷགས་པ་དང༌། གནས་ངན་ལེན་ཀུན་ཏུ་སྤྱོད་པ་འདི་དག་གིས་གཙུག་ལག་ཁང་བཤང་གཅིས་མ་རུང་བར་བྱས་པ་ལ་ལྟོས་ཞེས་ཟེར་བ་དེ་གསོལ་བས། དགེ་སློང་ལ་མཐོ་འཚམ་པར་བྱེད་ན་ལྟུང་བྱེད་དོ། །ཡང་འཆར་ཀ་གཅིག་པུས་གཙུག་ལག་ཁང་དུ་ཕྱིན་པ་ན་སུས་ཀྱང་མཁོས་སུ་མ་ཕབ་པ་དང༌། བཀྲུ་སྨན་གྱི་རིལ་བུ་ཟོས་ནས་མེ་ཁང་དུ་ཉལ་བས་འཁྲུས་སོ། །ནད་པ་བལྟའོ་ཞེས་གནས་བརྟན་དག་ལྷགས་ནས། རུང་ངམ། མ་རུང་ངོ༌། །ཡུད་ཙམ་ཞིག་འཁོད་ནས་འདོང་བར་བརྩམས་པ་དང༌། ད་དུང་བཞུགས་ཤིག །བསམ་བཞིན་དུ་མཐོ་མི་འཚམ་མམ། ཁྱེད་མི་དགའ་བར་བྱའོ་ཞེས་པའི་སྐབས་དེ་གསོལ་བས། མཐོ་འཚམ་ན་ལྟུང་བྱེད་དོ། །
ཡང་འཆར་ཀ་གཅིག་པུ་གཙུག་ལག་ཁང་ཕྱེད་ཟིན་པ་ཞིག་ཏུ་ཕྱིན་པ་དང་སུས་ཀྱང་མཁོས་སུ་མ་ཕབ་པ་དང༌། དེའི་ཡོན་བདག་གི་གན་དུ་སོང་སྟེ། ཅིའི་ཕྱིར་གཙུག་ལག་ཁང་ཟིན་པར་མི་བྱེད། སྟོན་པས། མྱུར་བར་དགེ་ལ་འཇུག་བྱ་ཞིང༌། །སྡིག་ལས་སེམས་ཀྱང་བཟློག་པར་བྱ། །བསོད་ནམས་བུལ་བར་བྱས་གྱུར་ན། །ཡིད་ནི་སྡིག་ལ་དགའ་བར་འགྱུར། །ཞེས་མ་གསུངས་སམ། པ་ཎ་མཆིས་ཏེ་གླ་མི་མེད་དོ། །དགེ་སློང་གིས་མཁར་ལན་བྱའོ་ཞེས་གསུངས་ཀྱི་ཟེར་ནས་གཎྜི་བརྡུངས་ཏེ་ཉིན་རངས་སོ་ཕག་སྐྱེད་དུ་བཅུག་པས། དེ་དག་གིས་སྨྲས་པ། གཙུག་ལག་ཁང་འདི་སྔར་རྣལ་འབྱོར་དང་མཐུན་ལ། ད་ནི་མཁར་ལན་དང་མཐུན་པས་འདོང་ངོ་ཟེར་ནས་མཉན་ཡོད་དུ་དོང་བ་དང༌། འོངས་པ་ལེགས་སོ། །ཁྱེད་མཐོང་བར་དགའ་འོང་བར་ནི་མི་དགའོ། །གཙུག་ལག་ཁང་དེ་རྣལ་འབྱོར་(༢༠༧ན)དང་མཐུན་པ་ཡིན་ན། ཅིའི་ཕྱིར་དེ་བོར་ནས་འདིར་འོངས། དེ་ནི་མཁར་ལན་དང་མཐུན་ནོ། །ཇི་ལྟར་གྱུར། འཆར་ཀ་འོངས་ནས་མཁར་ལན་ཕྱུང་ངོ༌། །དེ་གསོལ་བས། མཐོ་འཚམ་ན་ལྟུང་བྱེད་དོ། །
ཡང་གཞན་འདྲ་བ་ལ། ཁ་ཏོན་པ་གན་སཔའི་སར་ཕྱིན་ནས། ཉིན་རངས་སོ་ཕག་སྐྱེད་དུ་བཅུག་པས། སྔར་ཁ་ཏོན་དང་མཐུན་ལ། ད་མཁར་ལན་དང་མཐུན་པས་འདོང་ངོ་ཟེར་ནས་མཉན་ཡོད་དུ་ཕྱིན་པ་སོགས་འདྲའོ། །ཡང་འཆར་ཀ་གཅིག་པུ་རི་བྲགས་ཀྱི་གཙུག་ལག་ཁང་འཇིགས་པ་དང་བཅས་པ་ཞིག་ཏུ་ཕྱིན་པ་དང་སུས་ཀྱང་མཁོས་སུ་མ་ཕབ་པས་སྒོ་ཁང་དུ་ཉལ་ལོ། །ཁོ་བོ་སྒོ་གཅོད་ཀྱིས་ཁྱོད་ཕྱོགས་འདིར་འདུག་ཅིག །ཁྱོད་རང་གི་གནས་ཁང་གི་སྒོ་ཆོད་ཅིག་ཟེར་ནས་སྒོ་གཅོད་དུ་མ་བཅུག་པ་དང་འཇིགས་ནས་མཚན་ཐོག་ཐག་ཏྲོན་བྱེད་པས་ཉམ་ཐག་པ་དེ་གསོལ་བས་སྔར་བཞིན་ནོ། །ཡང་འཆར་ཀ་གཅིག་པུ་གཙུག་ལ་ཁང་འཇིགས་པ་མེད་པ་ཞིག་ཏུ་ཕྱིན་པས་སུས་ཀྱང་མཁོས་སུ་མ་ཕབ་པ་དང༌། དགེ་སློང་རྣམས་མཚན་མོ་བཤང་གཅི་བྱེད་པ་ལ་ཕྱིར་འགྲོའོ། །འཆར་ཀས་སྒོ་བཅད་ནས་སྒོ་ཁང་དུ་ཉལ་ལོ། །མཚན་མོ་བཤང་གཅི་བྱེད་འདོད་ནས། འཆར་ཀ །ཁོ་བོ་བཤང་གཅི་བྱེད་ཀྱིས་ཕྱོགས་འདི་ཉིད་དུ་ཉོལ་ཅིག །ཁྱེད་རང་གནས་ཁང་གི་གློ་ཕུག་ལ་དེང་ཞིག །དེ་དག་གིས་ཁྱམས་དང་རྫིང་དྲུང་དུ་བཤང་གཅི་བྱས་པས་ནངས་པར་ཁྱིམ་པ་དག་ལྷགས་པ་ན། འདི་དག་གིས་གཙུག་ལག་ཁང་ཐམས་ཅད་མ་རུང་བར་བྱས་སོ་ཟེར་བའི་སྐབས་དེ་གསོལ་བས། དེ་ཐམས་ཅད་ལྟུང་བྱེད་དོ། །
རྩ་བ་འབྱུང་བ་ལ་འདུག་པའི་ལྟུང་བྱེད་ནི། །ཉེ་དགས་གསར་བུ་དག་ལ་ཞེས་སོགས་འདྲ་བ་ལ། གཞན་འགྲོ་བ་མེད་ནས་དགེ་སློང་བསོད་སྙོམས་པ་ཞིག་ལ་བྱས་པ་དང༌། དེས་འགྲོ་བར་ཁས་བླངས་སོ། །གྲོགས་པོས། ཁྱེད་ལའང་དེས་མཐོ་འཚམ་པར་འགྱུར་རོ། །ཁོ་བོ་ལོ་ལོན་པས་དེ་ལ་གནས་བཅའ་བ་དང་ལུང་ནོད་པ་ལ་མི་ལྟོས་པས་ཅི་བྱར་ཡོད་ཟེར་ནས་དེའི་ཚིག་ཚིག་མ་ཡིན་པས་བྱས་ཏེ་སོང་ངོ༌། །མཚམས་འདས་པ་དང་ཉེ་དགས་སྨྲས་པ། གཏུར་བུ་འདི་ཁྱེར་ཅིག །ཅི་ཁྱོད་ཀྱིས་དཀོན་མཆོག་གསུམ་མ་མཐོང་ངམ། ཡོ་བྱད་དོན་མེད་པ་འདིས་ཅི་བྱ། ཁྱོད་མེ་འཁྱེར་བ་ཡུས་ན། ཁྱོད་ཁོ་བོ་བས་མཁས་པ་ཡིན་སྙམ་མམ། ཅིའི་ཕྱིར་དེ་སྐད་ཟེར། མཁས་པ་མིན་ཡང་རིགས་པ་ཙམ་སྨྲའོ། །འདི་མི་དགའ་བར་བྱའོ་སྙམ་ནས། རི་བྲགས་ཤིག་ཏུ་ཕྱིན་པ་དང་ཁྲོན་པའི་དྲུང་དུ་ངལ་གསོ་བ་སོགས་འདྲ། བསོད་སྙོམས་པ། ཞེས་བོས་པ་དང༌། ཁྱོད་ཀྱི་མལ་ཁང་ཐོག་ཏུ་བཤམས་ཀྱིས་དེ་ན་རྐང་པ་བཀྲུ་བའི་ཆུ་དང༌། བསྐུ་བའང་བཞག་གིས་དེར་ཉོལ་ཅིག །བསོད་སྙོམས་པ། འཐམ་པ་ཅུང་ཞིག་ཡོད་ཀྱིས་སྒོ་ཕྱེ་ཞིག །ཁོ་བོ་ཆད་ཀྱིས་སང་འཐམ་མོ། །ཁོ་བོ་ཁྱོད་དང་མཚན་རངས་འཐམ་(༢༠༧བ)པར་བྱའོ། །ཁོ་བོ་ཆད་ཀྱིས་སྒོ་མི་དབྱེའོ། །སྟེང་དུ་སོང་ནས། བསོད་སྙོམས་པ། ཞེས་བོས་པ་དང༌། ཉེ་དགའ། ཅི་ཟེར། ཉེ་དགའ་སྒྲ་ལ་མཁས་པས། དེའི་དཔྲལ་བའི་ཐད་ཀར་ཁྲི་རྐང་གཏད་དེ་ཤུགས་དྲག་པོས་མནན་པ་དང་བསོད་སྙོམས་པ་དེའི་དཔྲལ་བར་ཕོག་སྟེ་ཞོམ་མོ། །བསོད་སྙོམས་པས་སྨྲས་པ། ཁོ་བོ་སྣད་དོ། །ཁོ་བོ་སྣད་དོ། །བསོད་སྙོམས་པ། ཅི་ཟེར། དེ་སྐྲག་ནས་ཅང་མི་སྨྲའོ། །སང་སྔ་བར་ལངས་པ་སོགས་འདྲ། མཉན་ཡོད་དུ་ཕྱིན་པ་དང༌། བདེ་བར་བརྒྱུས་སམ། ཅི་ལྟར་བདེ་བར་བརྒྱུས། ཉེ་དགས་དཔྲལ་བ་བཅོམ་མོ། །ཇི་ལྟར་བཅོམ། སྐབས་དེ་བརྗོད་ནས་གསོལ་བ་དང༌། དགེ་འདུན་གྱི་གཙུག་ལག་ཁང་གི་སྟེང་གི་ནམ་མཁའ་ལ་ཐོག་བོར་བས་ཁྲིའམ་ཁྲིའུ་རྩ་བ་འབྱུང་བ་ལ་ཤེས་བཞིན་དུ་ལྕིད་ཀྱིས་ཕབ་སྟེ་འདུག་གམ་ཉལ་ན་ལྟུང་བྱེད་དོ། །
སྲོག་ཆགས་དང་བཅས་པ་ལ་སྤྱོད་པའི་ལྟུང་བྱེད་ནི། སྟོན་པ་ཀོའུ་ཤཱམྦཱི་ནའོ། །འདུན་པ་ཤེས་བཞིན་དུ་སྲོགས་ཆགས་དང་བཅས་པའི་ཆུས་རྩྭ་དང་ལྕི་བ་དང་ས་ལ་འདེབས་པར་བྱེད་ནས། འདུན་པ། ཁྱོད་དེ་ལྟར་མ་བྱེད་ཅིག །ཅི་ཁོ་བོ་ལ་འགའ་ཞིག་གིས་བགྲངས་ཏེ་གཏད་དམ། ཤར་གྱི་རྒྱ་མཚོ་ཆེན་པོར་དོང་བ་ན་ཅི་ཉེས། འབབ་ཆུ་དང་མཚོ་དང་ལྟེང་ཀ་དག་ཏུ་སོང་ན་ཅི་ཉེས། དགེ་སློང་དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ཤེས་བཞིན་དུ་སྲོག་ཆགས་དང་བཅས་པའི་ཆུས་རྩྭའམ་ལྕི་བའམ་ས་ལ་འདེབས་སུ་འཇུག་ན་ལྟུང་བྱེད་དོ། །
གཙུག་ལག་ཁང་གི་ལྟུང་བྱེད་ནི། སྟོན་པ་ཀོའུ་ཤཱམྦཱི་ནའོ། །དྲུག་སྡེ་དག་གཞན་གྱིས་བྱས་པའི་གཙུག་ལག་ཁང་ན་གནས་ཤིང་ཞེས་པ་ནས། ཀརྵ་པ་ཎ་མཆིས་ན་གྲོགས་མ་མཆིས་སོའི་བར་ཁང་ཆེན་སྐབས་དང་འདྲ་བ་ལ། ཁོ་བོས་གྲོགས་བྱའི་ཁོ་བོ་དགེ་འདུན་གྱིས་ལག་གི་བླར་སྐོར་ཆུག་ཅིག །ཁྱིམ་བདག་དེས་དགེ་འདུན་ལ་ཞུས་པས། དེའི་ཚེ་ཤཱ་རིའི་བུ་དགེ་འདུན་གྱི་གནས་བརྟན་བྱེད་པས་བསམས་པ། དྲུག་སྡེ་ལས་སུ་མ་བསྐོས་ནའང་དགེ་འདུན་ལ་མཐོ་འཚམ་ན། ལག་གི་བླར་བསྐོས་ན་རྒྱ་ཆེར་མཐོ་འཚམ་མོ་སྙམ་ནས་འདུན་པ་ལ་སྨྲས་པ། ཁོ་བོས་རྒྱལ་བྱེད་ཚལ་བརྩིགས་པ་དང༌། སྐུལ་བྱེད་ཆེན་པོས་གདངས་ཅན་གྱི་ཀུན་དགའ་ར་བ་བརྩིག་པའི་ཚེའང་སུས་ཀྱང་ལག་གི་བླར་མ་བསྐོས་པས། ཁྱོད་ཀྱང་འདོད་ན་མ་བསྐོས་པར་གྱིས་ཤིག །དེས། ལྷུང་བཟེད་ནག་པོ་ཅན་དག་བདག་ཅག་མཐོང་བར་ཡང་མི་དགའ་ན་ལག་གི་བླར་བསྐོ་བ་ལྟ་ཅི་སྨོས་སྙམ་སྟེ་བྲམ་ཟེ་དེ་ལ་ཀརྵ་པ་ཎ་བླངས་ནས། སོ་ཕག་མཁན་གྱི་གན་དུ་སོང་སྟེ། བཞིན་བཟང༌། ཉི་མ་གཅིག་ཁོ་ན་ལ་གཙུག་ལག་ཁང་སུམ་བརྩེགས་འཚིག་པའི་སོ་ཕག་སྦྱིན་ནུས་སམ། ཀརྵ་པ་ཎ་སྩོལ་དང་དབུལ་བར་བྱའོ། །ཕྱྭ་མཁན་གྱི་གན་དུ་སོང་ནས། ཉིན་གཅིག་ཁོ་ན་ལ་གཙུག་ལག་ཁང་སུམ་བརྩེགས་བརྩིག་ནུས་སམ། ཀརྵ་པ་ཎ་སྩོལ་ཅིག་ལོག་སྟེ་བགྱིའོ། །ཤིང་མཁན་གྱི་(༢༠༨ན)གན་དུ་སོང་ནས། ཉིན་གཅིག་ཁོ་ན་ལ་གཙུག་ལག་ཁང་སུམ་བརྩེགས་ཀྱི་ཤིང་འཇོག་ནུས་སམ། ཀརྵ་པ་ཎ་སྩོལ་ཅིག་ལོག་སྟེ་བགྱིའོ། །ཞལ་མཁན་གྱི་གན་དུ་སོང་ནས། ཉིན་གཅིག་ཁོ་ན་ལ་གཙུག་ལག་ཁང་སུམ་བརྩེགས་ཀྱི་ཞལ་བ་བསྐུ་ནུས་སམ། ཀརྵ་པ་ཎ་སྩོལ་ཅིག་ལོག་སྟེ་བགྱིའོ། །རི་མོ་མཁན་གྱི་གན་དུ་སོང་ནས། ཉིན་གཅིག་ཁོ་ན་ལ་གཙུག་ལག་ཁང་སུམ་བརྩེགས་ཀྱི་རི་མོ་བྲི་བར་ནུས་སམ། ཀརྵ་པ་ཎ་སྩོལ་ཅིག་ལོག་སྟེ་བྲི་བར་བགྱིའོ། །དེ་དག་ལ་ཀརྵ་པ་ཎ་དག་བྱིན་ནོ། །དེས་བླ་མི་མང་པོ་བཀུག་ནས་ཉི་མ་གཅིག་ཁོ་ན་ལ་གཙུག་ལག་ཁང་སུམ་བརྩེགས་སྒོའི་སྦུབས་དང་གཏན་པའི་གནས་སྐར་ཁུང་དང་ཆུ་ཁུང་མེད་པར་སྦྱང་འདྲ་བར་བརྩིགས་སོ། །བྲམ་ཟེའི་གན་དུ་སོང་ནས། གཙུག་ལག་ཁང་ཟིན་གྱིས་དགེ་འདུན་ལ་ཕུལ་ཅིག །དེ་རིང་ཟས་སྟ་གོན་མ་བགྱིས་པས་སང་དབུལ་ལོ། །སྟོན་པས་དེང་ཉིད་དུ་རྡིབ་པར་འགྱུར་བར་མཁྱེན་ནས། དེང་ཉིད་དུ་ལོངས་མ་སྤྱད་ན་བྲམ་ཟེ་དེ་ཁྲག་ཚ་བ་སྐྱུགས་ནས་འཆི་བར་འགྱུར་རོ་སྙམ་དུ་དགོངས་ཏེ། ཀུན་དགའ་བོ་ལ། སོང་ལ་དགེ་སློང་རྣམས་ལ་ངས་དགེ་བ་མི་སྤྱོམས་པ་དང༌། སྡིག་པ་བཤགས་པས་བྱའོ་ཞེས་གསུངས་མོད་ཀྱི། དགེ་སློང་སྙོམས་འཇུག་ཐོབ་པ་རྣམས་དེར་ཐུན་དང་པོ་འདའ་བར་གྱིས་ཤིག །དེ་བཞིན་དུ་བྱས་སོ། །
དེ་ནས་གུང་ཐུན་ལ་སྟོན་པས་འཇིག་རྟེན་པའི་ཐུགས་བསྐྱེད་ནས་བརྒྱ་བྱིན་དང་ཚངས་པ་ལ་སོགས་པའི་ལྷ་རྣམས་ལ་ཆོས་བསྟན་ཏོ། །སྟོན་པའང་གུང་ཐུན་འདས་ནས་གཤེགས་སོ། །མཚན་མོའི་ཐུན་ཐ་མ་ལ་ཆར་ཆེན་པོ་བབ་ནས་སྦྱང་བཞིན་དུ་གང་སྟེ་རྡིབ་བོ། །སང་བྲམ་ཟེས་བཟའ་བ་དང་བཅའ་བ་བསོད་པས་ཤིང་རྟ་བཀང་སྟེ་འོངས་ནས། བདག་གི་གཙུག་ལག་ཁང་གང་ཡིན། དྲུག་སྡེ་དང་འཁོན་པ་ཞིག་ན་རེ། ཁྱོད་ཀྱི་གཙུག་ལག་ཁང་རྔ་མོ་འགྱེལ་བ་དང་འདྲ་བ་འདི་ཡིན་གྱིས་སྒོ་སྐྱེས་ཀྱིས་དཔྲལ་བ་མི་བཅོམ་པར་བག་གྱིས་ལ་ཞུགས་ཤིག །བདག་གིས་ནོར་འདི་སྙེད་ཅིག་བཏང་ན་གཙུག་ལག་ཁང་དེ་མ་སྤྱད་པར་རྡིབ་བོ་ཞེས་བརྒྱལ་ནས་ས་ལ་འགྱེལ་ལོ། །སྟོན་པས། ཀུན་དགའ་བོ། ཁྱོད་སོང་ལ། ལྷ་དང་མི་མང་པོས་དེ་བཞིན་གཤེགས་པ་ལ་བསྔོས་ནས་གཙུག་ལག་ཁང་འདི་ནི་མཚན་མོའི་ཐུན་དང་པོ་ལ་གནས་བརྟན་དག་གིས་སྤྱད། གུང་ཐུན་ལ་སྟོན་པ་དང་བརྒྱ་བྱིན་དང་ཚངས་པ་ལ་སོགས་པས་སྤྱད་པས་ཁྱོད་ཀྱིས་རྙེད་པ་ལེགས་པར་རྙེད་དོ་ཞེས་གྱིས་ཤིག །དེས་སོང་སྟེ་དེ་ལྟར་སྨྲས་པས། བྲམ་ཟེས་སྨྲས་པ། ཀུན་དགའ་བོ། སྤྱད་དམ། སྤྱད་དོ། །འོ་ན་གདུགས་རེ་རེ་ཞིང་ཡང་གཙུག་ལག་ཁང་བགྱིད་པར་སྤྲོའོ། །བདག་གི་དགེ་བའི་བཤེས་གཉེན་དེ་དག་གར་མཆིས། དྲུག་སྡེས་ཐོས་ནས་མྱུར་བར་ལྷགས་པ་དང༌། རས་ཡུག་ཆེན་རེ་བསྐོན་ནས་ཡོ་བྱད་ཐམས་ཅད་ཀྱིས་བསྟབས་སོ། །(༢༠༨བ)དྲུག་སྡེས། ཁོ་བོ་ཅག་གིས་བྲམ་ཟེ་དེའི་ནོར་དེ་རྙེད་ཆུད་ཟོས་ཀྱང་དེས་རས་ཡུག་ཆེན་རེ་བསྐོན་ནས་ཡོ་བྱད་ཐམས་ཅད་ཀྱིས་བསྟབས་པ་དེ་ལྟར་བྲམ་ཟེ་དེ་དད་པར་བྱའོ་ཟེར་བ་ལ། དགེ་སློང་དོན་ཉུང་ངུ་དག །ངོ་ཚ་བའི་གནས་ཀྱིས་རློམ་པར་བྱེད་དོ་ཞེས་པའི་སྐབས་དེ་གསོལ་བས། བྱུང་བ་འདི་དང་སོགས། དགེ་སློང་གིས་གཙུག་ལག་ཁང་ཆེན་པོ་ཞིག་བརྩིག་ཏུ་འཇུག་ན་སྒོའི་སྦུབས་དང༌། གཏན་པ་དང༌། སྣང་བའི་གནས་ཇི་ཙམ་པའི་འདུ་ཤེས་ཀྱིས་ས་བརྟག་པ་ནས་བཟུང་སྟེ་ཕ་གུའི་རིམ་པ་འཇིམ་པ་དང་བཅས་པ་གཉིས་སམ་གསུམ་བརྩིག་པར་བྱའོ། །དེ་ལས་ལྷག་པར་བརྩིག་ན་ལྟུང་བྱེད་དོ། །དགེ་སློང་རྣམས་ཀྱིས་ཞུས་པ། ཤཱ་རིའི་བུས་འདུན་པ་ལག་གི་བླར་བསྐོས་པ་བཟློག་པ་ལ་གཟིགས་ཤིག །ད་ལྟར་དུམ་ཟད་སྔོན་ཡང་འདིས་དེ་བྱའི་རྒྱལ་པོར་དབང་བསྐུར་བ་བཟློག་པ་དེ་ཉོན་ཅིག །སྔོན་གངས་ཀྱི་སེར་ཀ་ན་བྱའི་ཚོགས་མང་པོ་འཁོད་པའི་བྱའི་རྒྱལ་པོ་ཤི་ནས། འུག་པ་རྒན་པོ་ཤིག་བྱའི་རྒྱལ་པོར་དབང་བསྐུར་བའི་ཕྱིར། ནེ་ཙོ་རྒན་པ་ཞིག་འདུག་པ་ལ་དྲིས་པ་དང༌། བྱ་རྣམས་འུག་པ་དབང་བསྐུར་དུ། །བདག་ནི་མོས་པ་མ་ཡིན་ཏེ། །མ་ཁྲོས་པ་ཡི་བཞིན་ལ་ལྟོས། །ཁྲོས་ན་ཇི་ལྟར་བྱེད་པར་འགྱུར། །དེ་དག་གིས་དབང་མ་བསྐུར་བར་ནེ་ཙོ་དེ་ཉིད་བྱའི་རྒྱལ་པོར་དབང་བསྐུར་ཏོ། །དེའི་དུས་ཀྱི་ནེ་ཙོ་ནི་ཤཱ་རིའི་བུ། འུག་པ་ནི་འདུན་པའོ། །

བཅུ་ཚན་གསུམ་པ།

བཅུ་ཚན་གསུམ་པའི་སྡོམ་ནི། མ་བསྐོས་ཉི་མ་ནུབ་པ་དང༌། །ཟས་དང་ཆོས་གོས་གཉིས་དག་དང༌། །དོན་མཐུན་གཉིས་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །
མ་བསྐོས་པར་སྟོན་པའི་ལྟུང་བྱེད་ནི། སྟོན་པ་མཉན་ཡོད་ནའོ། །དགེ་སློང་མ་ཉན་ཐོས་ཆེན་མོ་གནས་བརྟན་མང་པོ་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བར་དབྱར་གནས་ནས་སྐྱེ་དགུའི་བདག་མོ་སྟོན་པའི་དྲུང་དུ་ཆོས་ཉན་ནས་སོང་བ་དང༌། དགེ་སློང་དག །ང་རྒས་པས་འཁོར་རྣམ་བཞི་ལ་སྟོན་པ་ངལ་བར་འགྱུར་གྱིས་དགེ་སློང་གནས་བརྟན་རྣམས་ཀྱིས་རེས་ཀྱིས་དགེ་སློང་མ་ལ་སྟོན་ཅིག །དགའ་བྱེད་ནི་རེས་བབ་ཀྱང་མི་སྟོན་ནོ། །སྐྱེ་དགུའི་བདག་མོ་སྟོན་པ་ལ་ཆོས་ཉན་ནས་སོང་བ་དང༌། ཀུན་དགའ་བོ། དགེ་སློང་རྣམས་དགེ་སློང་མ་ལ་རེས་ཀྱིས་ཆོས་མི་སྟོན་ནམ། ཕལ་ཆེར་ནི་སྟོན་ལ། དགའ་བྱེད་ནི་མི་སྟོན་ནོ། །དགའ་བྱེད་ལ་བཀའ་སྩལ་པ། ཁྱོད་ཀྱིས་དགེ་སློང་མ་ལ་ཆོས་སྟོན་ཅིག །ངའམ་ཁྱོད་ཀྱིས་དགེ་སློང་མ་ལ་ཆོས་བསྟན་དུ་རུང་བའི་ཕྱིར་རོ། །དེ་ནས་དགའ་བྱེད་བསོད་སྙོམས་བྱས། ཕྱེམ་རེད་ནང་དུ་ཡང་དག་འཇོག་ལས་ལངས་ནས་སྣམ་སྦྱར་ཐོགས་ཏེ། ཕྱི་བཞིན་འབྲང་བའི་དགེ་སློང་དང་བཅས་པ་དབྱར་ཁང་དུ་སོང་བ་དགེ་སློང་མ་རྣམས་ཀྱིས་བསུ་ནས་སྟན་ལ་འདུག་སྟེ། སྲིང་མོ་དག །རྣམ་པར་སེལ་བ་དྲིས་ཤིག །ཆོས་དང་ལྡན་པའི་གཏམ་བྱའོ། །ཀུན་ཤེས་པས། ཤེས་སོ་ཞེས་རྗོད་ཅིག །མི་ཤེས་པས། མི་ཤེས་སོ་ཞེས་རྗོད་ཅིག་ཅེས་(༢༠༩ན)སྨྲས་པ་དང༌། ལེགས་སོ། །དེ་བཞིན་དུ་བགྱིའོ། །སྲིང་མོ་དག །ཁྱེད་ཀྱིས་ནང་གི་སྐྱེ་མཆེད་མིག་ལ། འདི་ནི་བདག་གིའོ། །འདི་ནི་བདག་གི་བདག་གོ་ཞེས་ཡང་དག་པར་རྗེས་སུ་མཐོང་ངམ། མ་མཐོང་ངོ༌། །
དེ་བཞིན་དུ་རྣ་བ་ལ་སོགས་ལ་རྒྱས་པར་སྦྱར་ནས་སོང་ངོ༌། །དེ་ནས་སྐྱེ་དགུའི་བདག་མོ་སྟོན་པ་ལ་ཆོས་ཉན་ནས་སོང་བ་དང༌། དགེ་སློང་དག །དགའ་བྱེད་ཀྱིས་དགེ་སློང་མ་ལ་ཆོས་བསྟན་པས་རྣལ་གྲོལ་མ་ཐོབ་ཀྱང༌། འཆི་བའི་དུས་ན་འཇིག་རྟེན་འདིར་འོང་བའི་ཀུན་སྦྱོར་གཅིག་མ་སྤངས་པར་ཡང་དག་པར་རྗེས་སུ་མཐོང་བ་ལ་ལྟོས། ཕྱིར་མི་འོང་དུ་ལུང་བསྟན་ཏོ། །དེ་ནས་དགའ་བྱེད་ལ་ལན་གཉིས་སུ། ཁྱོད་ཀྱིས་དགེ་སློང་མ་ལ་ཆོས་སྟོན་ཅིག་ཅེས་སྔར་བཞིན་གསུངས། དེས་ཀྱང་དེ་བཞིན་དུ་ཆོས་བསྟན་པས་དགྲ་བཅོམ་པར་འགྱུར་བ་ལུང་བསྟན་པ་སྟེ། འདི་ནི་རེ་ཞིག་བྱུང་བའོ། །དྲུག་སྡེས་དགེ་སློང་མ་ལ་སྟོནཔའི་རེས་བབ་པ་ན་ཆོས་བསྟན་པའི་རྗེས་ལ་ལྷན་ཅིག་མཐོ་འཚམ་པ་དང༌། རྩེ་བ་དང༌། ཅ་ཅོ་དང༌། གཞོགས་སྟེགས་དང༌། འཕྱར་གཡེང་བྱེད་ནས། བདག་གིར་བྱེད་པ་དག་ལྷན་ཅིག་དེ་ལྟར་བྱེད་ལ། བདག་གིར་མི་བྱེད་པ་དག་འཆག་ས་དང་སྒོ་ཁང་ན་འདུག་ནས། གནས་ངན་ལེན་ཀུན་ཏུ་སྤྱོད་པ་འདི་ལྟ་བུ་དག་བདག་ཅག་ལ་སྟོན་པར་བྱེད་དོ་ཟེར་བ་དེ་གསོལ་བ་དང༌། དྲུག་སྡེ་དགེ་སློང་མའི་སྟོན་པར་མ་བསྐོ་ཞིག་ཅེས་གསུངས་པ་དང༌། དེ་དག་གཅིག་གིས་གཅིག་བསྐོས་ནས་བསྟན་པས་ཉེས་དམིགས་དེ་ཉིད་དུ་གྱུར་ཏེ། མ་བསྐོས་པར་དགེ་སློང་མ་ལ་བསྟན་པར་མི་བྱའོ། །མཚམས་ཀྱི་ཕྱི་རོལ་ཏུ་སོང་སྟེ་གཅིག་གིས་གཅིག་བསྐོས་ནས་བསྟན་པས་ཉེས་དམིགས་དེ་ཉིད་དུ་གྱུར་ཏེ། མཚམས་ཀྱི་ཕྱི་རོལ་ཏུ་སྟོན་པ་མི་བསྐོའོ། །དྲུག་སྡེས་མཚམས་ནང་དུ་ནད་པའི་འདུན་པ་བླངས། གཞན་རྣམས་བྲེལ་བར་བྱས་ཏེ་བསྐོས་པ་དང༌། དེ་ལྟར་མི་བྱ་བར་ཚེས་བཅོ་ལྔ་ལ་དགེ་འདུན་ཐམས་ཅད་མཐུན་པ་ལ་བསྐོ་བར་བྱའོ། །མཁས་རྨོངས་སུའང་རུང་བ་བསྐོས་པ་དང༌། ཕམ་པར་གྱུར་པ་མ་བྱུང་བ། མདོ་སྡེ་དང་འདུལ་བ་དང་མ་མོ་འཛིན་པ། ལོ་ཉི་ཤུ་ལས་མི་ཉུང་བ། གྲོང་ཁྱེར་བའི་སྐད་སྨྲ་བ། དགེ་སློང་མ་ལ་ལུས་ཉེ་བར་གཞོལ་བ་ཉིད་ཕྱིར་བཅོས་པ་བྱས་པ་དགེ་སློང་མའི་སྟོན་པར་བསྐོ་བར་བྱའོ། །དེ་ལྟར་བྱས་ཀྱང་དྲུག་སྡེ་མ་བསྐོས་པར་སྟོན་པ་དང༌། དགེ་སློང་རྣམས་འཕྱ་བ་དེ་གསོལ་བས། བྱུང་བ་འདི་དང་སོགས། མ་བསྐོས་པར་དགེ་སློང་མ་ལ་སྟོན་ན་ལྟུང་བྱེད་དོ། །
སྟོན་པ་མཉན་ཡོད་ནའོ། །བྲམ་ཟེ་ཞིག་གིས་ཆུང་མ་བླངས་ནས་བུ་བྱུང་ངོ་ཅོག་ཤིའོ། །ཡང་ཆུང་མ་ལ་སེམས་ཅན་ཞུགས་པས་དེ་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་པ་དང༌། བུད་མེད་རྒན་མོ་ཞིག་གིས་མཐོང་ནས། ཅིའི་ཕྱིར། དེ་བཤད་པ་དང༌། ནམ་བཙའ་བའི་ཚེ་ཁོ་མོ་སྦྲོན་ཅིག །སྦྲན་པ་དང༌། ཁྱེའུ་ཁྲུས་བྱས། རས་(༢༠༩བ)དཀར་པོས་དཀྲིས། དེའི་ཁ་ཞུན་མར་གྱིས་བཀང་སྟེ་བུ་མོ་ཞིག་གི་ལག་ཏུ་བྱིན་ནས། ཁྱེའུ་འདི་ལམ་པོ་ཆེའི་བཞི་མདོར་ཟུང་ལ། དགེ་སྦྱོང་ངམ་བྲམ་ཟེ་བྱུང་བ་ལ། ཁྱེའུ་འདི་འཕགས་པའི་ཞབས་ལ་ཕྱག་འཚལ་ལོ་གྱིས་ཤིག །ཉི་མ་ནུབ་པ་ན་གསོན་ན་ཁྱེར་ཤོག །ཤི་ན་དོར་ཅིག །བུ་མོ་དེ་གྲིམས་པ་ཡིན་པས་ལམ་པོ་ཆེའི་བཞི་མདོར་སོང་ནས་དེ་སྐད་བྱས་པ་དང༌། ཡུན་རིང་དུ་འཚོ་བར་གྱུར་ཅིག །ཚེ་རིང་དུ་སྐྱོང་བར་གྱུར་ཅིག །ཕ་མ་གཉིས་ཀྱི་ཡིད་ལ་བསམས་པ་རྫོགས་པར་གྱུར་ཅིག །བུ་མོ་དེས་ཁྱེའུ་དེ་རྒྱལ་བྱེད་ཚལ་གྱི་ལམ་གར་ཁྱེར་བ་དང་སྟོན་པ་བྱོན་ནས། ཁྱེའུ་འདི་སྟོན་པའི་ཞབས་ལ་ཕྱག་འཚལ་ལོ། །སྟོན་པས། ཡུན་རིང་དུ་འཚོ་བར་གྱུར་ཅིག །ཚེ་རིང་བར་གྱུར་ཅིག །ཕ་མའི་ཆོས་དང་ལྡན་པའི་བསམ་པ་རྫོགས་པར་གྱུར་ཅིག །ཉི་མ་ནུབ་པ་དང་གསོན་པར་མཐོང་ནས་ཁྱིམ་དུ་ཁྱེར་འོངས་པ་དང༌། འདི་ལམ་པོ་ཆེར་བཟུང་བས་ལམ་ཆེན་པ་ཞེས་མིང་བཏགས་སོ། །དེ་ཆེན་པོར་གྱུར་ཏེ། བྲམ་ཟེའི་རིག་བྱེད་ཡན་ལག་དང་བཅས་པ་ལ་མཁས་པར་གྱུར་ཏེ་བྲམ་ཟེའི་ཁྱེའུ་ལྔ་བརྒྱ་ཙམ་ལ་གསང་ཚིག་ཀློག་གོ །ཡང་དེའི་ཆུང་མ་ལ་སེམས་ཅན་ཞུགས་ནས་དེ་བཙའ་བའི་ཚེ་བུད་མེད་རྒན་མོ་དེ་བོས་ནས་སྔར་བཞིན་བྱས་ཏེ་སོང་བ་དང༌། བུ་མོ་དེ་ལེ་ལོ་ཅན་ཡིན་པས་ཁྱེའུ་དེ་ལམ་ཕྲན་དུ་ཁྱེར་ཏེ་སྔར་བཞིན་བྱས་པས་སོས་ནས་མིང་ལ་ལམ་ཕྲན་པ་ཞེས་བཏགས་སོ། །དེ་ཆེན་པོར་གྱུར་ནས་ཡི་གེ་བསླབས་པས། སིད་བརྗོད་ན་དྷཾ་བརྗེད། དྷཾ་བརྗོད་ན་སིད་བརྗེད་པས་སློབ་དཔོན་དེས་བྲམ་ཟེ་ལ་སྨྲས་པ། ཁོ་བོ་བྲམ་ཟེའི་ཁྱེའུ་མང་པོ་ཀློག་ཏུ་གཞུག་དགོས་པས་ལམ་ཕྲན་པ་ལ་ཀློག་མི་ནུས་སོ། །བྲན་ཟེས་བསམས་པ། བྲམ་ཟེ་ཐམས་ཅད་ཡིག་འབྲུ་ལ་མཁས་པ་མ་ཡིན་ཏེ། འདི་རིག་བྱེད་ཀྱི་བྲམ་ཟེར་འགྱུར་རོ་སྙམ་ནས། རིག་བྱེད་ཀློག་མཁན་ལ་གཏད་དེ། ཨོཾ་བཟུང་བས་བྷུ་བརྗེད། བྷུ་བཟུང་བས་ཨོཾ་བརྗེད་པས་ཀློག་མཁན་གྱིས་བྲམ་ཟེ་ལ་སྨྲས་པ། ཁོ་བོ་བྲམ་ཟེའི་ཁྱེའུ་མང་པོ་ཀློག་ཏུ་གཞུག་དགོས་པས་ལམ་ཕྲན་པ་ལ་ཀློག་མི་ནུས་སོ། །དེས་བསམས་པ། རིག་བྱེད་མི་ཤེས་ཀྱང་བྲམ་ཟེར་འགྱུར་རོ་སྙམ་མོ། །དེ་བུལ་བ། མཆོད་ཏུ་བུལ་བ། ཆུང་བ། མཆོག་ཏུ་ཆུང་བ་ཡིན་པས་ལམ་ཆུང་བ་ཞེས་བྱ་བར་གྱུར་ཏོ། །དེ་ཕ་མགྲོན་ལ་གང་འགྲོ་སར་འཁྲིད་དོ། །བྲམ་ཟེ་འཆི་ཁར་ལམ་ཆེན་པ་ལ། ཁོ་བོ་འདས་ནས་ཁྱོད་མྱ་ངན་བྱ་མི་དགོས་ཀྱི། ལམ་ཆུང་བ་ལ་མཁོ་བ་སྟོབས་ཤིག་ཟེར་ནས་ཤིའོ། །ལམ་ཆེན་པ་མཉན་ཡོད་དང་རྒྱལ་བྱེད་ཚལ་གྱི་བར་ན་ཤིང་ལྗོན་པ་ཤིག་གི་དྲུང་ན་བྲམ་ཟེའི་ཁྱེའུ་ལྔ་བརྒྱ་ཙམ་ལ་གསང་ཚིག་ཀློག་གོ །
ཤཱ་རིའི་བུ་དང་མོའུ་གལ་གྱི་བུ་གཉིས་ཀྱིས་གདུལ་བྱའི་བྱ་བ་བྱས་ཏེ་ཀོ་ས་ལར་ལྗོངས་བརྒྱུད་ནས་མཉན་ཡོད་དུ་ཕྱིན་པ་ན་སྐྱེ་བོ་ཕལ་པོ་ཆེ་དེ་གཉིས་ལྟར་སོང་བ་ལམ་ཆེན་པས་མཐོང་ནས། གར་འདོང༌། མཆོག་ཟུང་གཉིས་བལྟར་འདོང་ངོ༌། །དེ་གཉིས་(༢༡༠ན)རིགས་མཆོག་སྤངས་ནས་དགེ་སྦྱོང་གོའུ་ཏ་མ་ལས་རབ་ཏུ་བྱུང་བ་ཡིན་པས་དེ་གཉིས་མཐོང་བས་ཅི་བྱ། བྲམ་ཟེའི་ཁྱེའུ་དད་པ་ཅན་ཞིག་ན་རེ། དེ་སྐད་མ་གསུང་ཞིག །དེ་གཉིས་ནི་བདག་ཉིད་ཆེན་པོ་ལགས་པས་དེ་གཉིས་ལ་ཆོས་གསན་ན་མཁན་པོའང་དད་པར་འགྱུར་རོ། །ལམ་ཆེན་པས་བསམས་པ། བརྟག་པར་བྱ་སྟེ། བྲམ་ཟེའི་ཁྱེའུ་དག་མི་ཀློག་པའི་ཚེ་བདག་ཀྱང་འགྲོའོ་སྙམ་ནས། བྲམ་ཟེའི་ཁྱེའུ་རྣམས་ཡམ་ཤིང་ཐུར་སོང་བ་ན་དེ་སོང་བ་དང་། དགེ་སློང་ཞིག་རྒྱལ་བྱེད་ཚལ་གྱི་སྒོ་ན་ལྗོན་པའི་དྲུང་ན་འཆག་པ་མཐོང་ནས་དེ་ལ། ཀྱེ་དགེ་སློང༌། སངས་རྒྱས་ཀྱི་བཀའ་ཅུང་ཞིག་སྨྲོས་ཤིག །དེས་དེ་ལ་དགེ་མི་དགེའི་ལས་ལམ་རྒྱ་ཆེར་བསྟན་ཏོ། །བྲམ་ཟེས་སྨྲས་པ། ཁོ་བོའང་བྱ་བ་ཉམས་ལ་ཁྱོད་ཀྱང་དགེ་བའི་ཕྱོགས་ཉམས་ན་མ་ལེགས་ཀྱིས་ཁོ་བོ་འགྲོའི་ཕྱིས་ཀྱང་འོང་ངོ༌། །
ཡང་ཕྱིས་བྲམ་ཟེའི་ཁྱེའུ་རྣམས་མི་ཀློག་པ་ན་ཕྱིན་པས་སྔར་གྱི་དགེ་སློང་དང་ཕྲད་ནས་དེས་རྟེན་འབྲེལ་ལུགས་འབྱུང་ལུགས་བཟློག་གི་ཆོས་བཤད་པས་དད་ནས། བདག་རབ་ཏུ་འབྱུང་སྟེ། བདག་གྲགས་པ་ཅན་ཡིན་པས་འདིར་རབ་ཏུ་མི་འབྱུང་གིས་ལྗོངས་སུ་བཞུད་དོ། །དེས་དེ་ལྗོངས་སུ་ཁྲིད་དེ་རབ་ཏུ་ཕྱུང་བསྙེན་པར་རྫོགས་ནས། དགེ་སློང་གི་ལས་ནི་བསམ་གཏན་དང་ཀློག་པ་ཡིན་ན། ཁྱོད་གང་འདོད། གཉིས་ཀའང་བགྱི་སྟེ། གདུགས་ལ་ནི་བཀླག །དགུང་ལ་ནི་བསམ་གཏན་ནོ། །དེས་ཉིན་མོ་ཀློག་པ་དང་ཁ་ཏོན་བྱས་པས། སྡེ་སྣོད་གསུམ་པ། ཆོས་སྒྲོགས་པ། རིམ་པ་དང་གྲོལ་བའི་སྤོབས་པ་ཅན་དུ་གྱུར། མཚན་མོ་བསམ་གཏན་བྱས་པས་དགྲ་བཅོམ་པ་ཐོབ་བོ། །ལམ་ཆེན་པ་རབ་ཏུ་བྱུང་བས་ལམ་ཆུང་བའི་ལོངས་སྤྱོད་བསྲབས་ནས་ཚེགས་ཆེན་པོས་འཚོའོ། །ལམ་ཆེན་པ། བདག་གིས་ཐོབ་པར་བྱ་བ་ཐོབ་ཀྱི་མཉན་ཡོད་དུ་སོང་ལ་སྟོན་པ་ལ་བསྙེན་བཀུར་བྱའོ་སྙམ་ནས་འཁོར་ལྔ་བརྒྱ་དང་བཅས་པ་སོང་བ་ན་སྐྱེ་བོའི་ཚོགས་རྣམས་ཀྱང་སོང༌། འདི་དག་འགྲོ་ན་ངའང་ཅིའི་ཕྱིར་མི་འགྲོ་སྙམ་ནས་ལམ་ཆུང་བའང་སོང་བ་ལམ་ཆེན་པས་མཐོང་ནས། ལམ་པ། འཚོའམ། འཚོའོ། །ཇི་ལྟར་འཚོ། ཚེགས་ཆེན་པོས་སོ། །རབ་ཏུ་མི་འབྱུང་ངམ། །བདག་མཆོག་ཏུ་བུལ་བ་ལགས་ན། སྟོན་པའི་བསྟན་པ་ལ་རབ་ཏུ་འབྱུང་བར་འགྱུར་རམ། དེ་ལ་དགེ་བའི་རྩ་བ་ཅུང་ཟད་ཡོད་དམ་བལྟས་ན། ཡོད་པར་མཐོང༌། སུ་ལ་རག་ལས་བལྟས་ན་བདག་ལ་རག་ལས་པར་མཐོང་ནས། ལམ་པ། ཐུབ་པའི་བསྟན་པ་ལ་རིགས་རུས་ཐོས་པ་གཅེས་པ་མིན་གྱི་སྒྲུབ་པ་གཅེས་པ་ཡིན་པས་འདོད་ན་རབ་ཏུ་བྱུང་ཞིག །འཕགས་པ། རབ་ཏུ་འབྱུང་ངོ༌། །དེས་དེ་རབ་ཏུ་ཕྱུང༌། བསྙེན་པར་རྫོགས་ནས། ལུས་ངག་ཡིད་ཀྱིས་སྡིག་པ་མི་བྱ་(༢༡༠བ)ཞིང༌། །འཇིག་རྟེན་ཀུན་ལ་ཡོངས་འཛིན་འདོད་བྲལ་བ། །དྲན་དང་ལྡན་ཞིང་ཤེས་བཞིན་ཅན་གྱིས་ནི། །གནོད་ལྡན་སྡུག་བསྔལ་གང་ཡིན་བསྙེན་མི་བྱ། །ཞེས་པ་འདི་ཟླ་བ་གསུམ་དུ་མི་ལོབས་པར། བ་ལང་རྫི་དང་ཕྱུགས་རྫིས་ཐོས་ནས་ལོབས་པ་དང༌། དེ་དག་གི་གན་དུ་སོང་ནས་དེ་དག་གིས་ཀྱང་བསྟན་ཏོ། །དགེ་སློང་རྣམས་དབྱར་གནས་ཐོན་ནས་ཁ་དོན་དང་དྲི་བ་དོན་དུ་གཉེར་བར་བྱེད་དོ། །དེའི་ཚེ་ལམ་ཆེན་པའི་སློབ་མ་བུལ་བ་རྣམས་དྲུག་སྡེ་ལ་བརྟེན་པས་ལམ་ཆུང་བའང་དྲུག་སྡེ་ལ་བརྟེན་པ་ན་ཉེ་དགས་ལམ་ཆུང་བ་ལ། མཁན་པོ་ལ་ཁ་ཏོན་ཞུས་ཤིག །ལམ་ཆུང་བ་སོང་ནས། མཁན་པོ། བདག་ལ་ཁ་ཏོན་སྩོལ་ཅིག །ལམ་ཆེན་པས་བསམས་པ། འདི་རང་གི་བློས་གསོལ་ལམ་གཞན་གྱིས་བཏང་སྙམ་པ་ན་གཞན་གྱིས་བཏང་བར་ཤེས། སྨད་པས་འདུལ་ལམ་བསྟོད་པས་འདུལ་ན་སྨད་པས་འདུལ་བར་ཤེས་ནས་རྒྱལ་བྱེད་ཚལ་གྱི་ཕྱི་རོལ་ཏུ་བསྐྲད་དེ། ཁྱོད་མཆོག་ཏུ་བུལ་བ་ཡིན་ན་རབ་ཏུ་བྱུང་སྟེ་ཅི་བྱ། འདི་ཉིད་ན་འདུག་ཅིག །དེས། ད་ནི་བདག་དགེ་སྦྱོང་ཡང་མ་ཡིན། བྲམ་ཟེའང་མ་ཡིན་ནོ་སྙམ་ནས་ངུས་པ་དང༌། དེ་ནས་སྟོན་པ་ཐུགས་རྗེ་ཆེན་པོས་བསྐུལ་ཏེ་དེར་བྱོན་ནས། ལམ་པ། ཁྱོད་ཅིའི་ཕྱིར་རྒྱལ་བྱེད་ཚལ་གྱི་ཕྱི་རོལ་ཏུ་ངུ༌། བདག་མཁན་པོས་རྒྱ་ཆེར་སྨད་དོ། །བྱིས་པས་བསྟོད་པ་གང་ཡིན་དང༌། །མཁས་པ་སྨོད་པ་གང་ཡིན་པ། །འདིར་ནི་མཁས་སྨོད་མཆོག་ཡིན་གྱི། །བྱིས་པས་བསྟོད་པ་མ་ཡིན་ནོ། །བུ། ཁྱོད་ཀྱི་མཁན་པོས་ནི་བསྐལ་པ་གྲངས་མེད་གསུམ་དུ་དཀའ་བ་དུ་མས་ཕར་ཕྱིན་དྲུག་རྫོགས་ཏེ་གསུང་རབ་འདི་བསྒྲུབས་པ་མ་ཡིན་གྱི། ངས་ནི་དེ་ལྟར་ཡིན་ན། ཁྱོད་དེ་བཞིན་གཤེགས་པ་ལས་ཀློག་ནུས་སམ། བདག་མཆོག་ཏུ་བུལ་བ་ལགས་སོ། །
སྟོན་པས་གསུངས་པ། གང་གིས་བྱིས་པ་བྱིས་ཉིད་རིག །དེ་ལ་དེས་ན་དེ་མཁས་ཡིན། །བྱིས་པ་མཁས་པར་རློམ་བྱེད་པ། །དེ་འདིར་ཤིན་ཏུ་བྱིས་པ་ཡིན། །སྟོན་པས་ཆོས་རེ་རེ་ནས་ཀློག་ཏུ་འཇུག་པ་ནི་གནས་མ་ཡིན་པས། ཀུན་དགའ་བོ། ཁྱོད་ཀྱིས་ལམ་པ་ཀློག་ཏུ་ཆུག་ཅིག །དེས་བཅུག་པས་མ་ནུས་ནས། བཙུན་པ། བདག་གིས་སྟོན་པ་ལ་བསྙེན་བཀུར་དང༌། ཐོས་པ་གཟུང་བ་དང༌། ཚོགས་ཀྱང་ཀློག་ཏུ་འཇུག་པ་དང༌། ཁྱིམ་པ་རྣམས་ལ་ཆོས་བསྟན་པར་བགྱི་འཚལ་བས་ལམ་པ་ཀློག་ཏུ་འཇུག་པའི་རྔོ་མི་ཐོག་གོ །སྟོན་པས་དེ་ལ། རྡུལ་སྤང་ངོ༌། །དྲི་མ་སྤང་ངོ་ཞེས་བྱ་བའི་ཚིག་གཉིས་སྩལ་པས་མ་ཟིན་ནས། འདིའི་ལས་སྦྱང་བར་བྱའོ་སྙམ་དུ་དགོངས་ཏེ། དགེ་འདུན་གྱི་མཆིལ་ལྷམ་དབྱི་བར་ནུས་སམ། རྔོ་ཐོག་གོ །སོང་ལ་དགེ་སློང་རྣམས་ཀྱི་མཆིལ་ལྷམ་དང༌། ལྷམ་སྒྲོ་གུ་ཅན་ཡང་ཕྱིས་ཤིག །དེས་ཕྱི་བར་བརྩམས་པ་དང༌། དགེ་སློང་རྣམས་ཀྱིས་དེ་ལ་མི་སྟེར་བར། འདིའི་ལས་སྦྱང་བའི་ཕྱིར་དུ་(༢༡༡ན)འཕྱིར་ཆུག་ཅིག །ཚིག་གཉིས་ཀྱི་ཁ་ཏོན་ཡང་སློབས་ཤིག །དེས་ཁ་ཏོན་གཉིས་པོ་ལོབས་སོ། །ལམ་པས་བསམས་པ། སྟོན་པས། རྡུལ་སྤང་ངོ༌། །དྲི་མ་སྤང་ངོ་ཞེས་པ་དེ་ནང་གི་རྡུལ་ལ་དགོངས་སམ་ཕྱིའི་རྡུལ་ལ་དགོངས་སྙམ་པ་ན། སྔོན་མ་ཐོས་པའི་ཚིགས་བཅད་གསུམ་པོ་འདི་བློ་ལ་སྣང་སྟེ། རྡུལ་འདིར་འདོད་ཆགས་དེ་ནི་ས་རྡུལ་མིན། །རྡུལ་ནི་འདོད་ཆགས་མིང་སྟེ་རྡུལ་གྱི་མིན། །མཁས་པ་དག་གིས་རྡུལ་དེ་རྣམ་སྤངས་པ། །དེ་དག་བདེ་གཤེགས་བསྟན་ལ་བག་ཡོད་འགྱུར། །ཞེ་སྡང་དང་གཏིག་མུག་ལའང་འགྲེའོ། །དེས་འབད་དེ་བསྒོམས་པས་དགྲ་བཅོམ་པ་ཐོབ་བོ། །
ལམ་པ་དཀྱིལ་ཀྲུང་གིས་འདུག་པ་ལམ་ཆེན་པས་མཐོང་ནས། དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས། ལག་པ་གཉིས་ཀྱིས་ལམ་པ་བཟུང་ནས། རེ་ཞིག་ཁ་ཏོན་གྱིས་དང༌། དེའི་འོག་ཏུ་བསམ་གཏན་པར་འགྱུར་རོ། །ལམ་པས་གླང་པོ་ཆེའི་སྣ་འདྲ་བའི་ལག་པ་བརྐྱང་བ་དང༌། ལམ་ཆེན་པས་རྒྱབ་ཏུ་བལྟས་པས་མཐོང་སྟེ། ཁྱོད་ཀྱིས་ཡོན་ཏན་ཚོགས་དེ་ལྟ་བུ་ཐོབ་བམ། ཐོབ་བོ། །ཐམས་ཅད་དུ་ལམ་ཆུང་བ་རབ་ཏུ་ཕྱུང་ངོ་ཞེས་གྲགས་པ་དང༌། འཚོ་བྱེད་ཀྱིས། སྟོན་པ་རྒྱལ་པོའི་ཁབ་ཏུ་བྱོན་ན་ལམ་པ་མ་གཏོགས་པ་གདུགས་ཚོགས་ལ་སྤྱན་དྲང་ངོ་སྙམ་མོ། །མུ་སྟེགས་ཅན་རྣམས། གོའུ་ཏ་མའི་ཆོས་ཟབ་ཅིང་རྟོགས་དཀའ་ཟེར་ན། ལམ་ཆུང་བའང་རབ་ཏུ་བྱུང་ན་ཇི་ལྟར་ཟབ་ཅེས་སྨོད་པར་བྱེད་དོ། །སྟོན་པས། ཉན་ཐོས་ཆེན་པོ་རི་རབ་དང་འདྲ་བ་ལ་སྐྱེ་བོ་ཕལ་པོ་ཆེའི་ཚོགས་སྨྲའི། འདིའི་ཡོན་ཏན་བསྒྲག་གོ་སྙམ་དུ་དགོངས་ནས། ཀུན་དགའ་བོ། སོང་ལ་ལམ་པ་ལ། དགེ་སློང་མ་ལ་སྟོན་ཅིག་ཅེས་སྒོ་ཞིག །དེས་བསྒོ་བ་དང༌། གནས་བརྟན་དག་བཞག་ནས་བདག་ལ་བསྒོ་བ་ནི་བདག་གི་ཡོན་ཏན་བསྒྲག་པར་བཞེད་དོ་སྙམ་སྟེ། བཀའ་བཞིན་འཚལ་ལོ། །དགེ་སློང་མ་གསོ་སྦྱོང་འབུལ་བ་གཉིས་རྒྱལ་བྱེད་ཚལ་དུ་འོངས་ནས། བདག་ཅག་གི་སྟོན་པ་སུ་བསྐོས། ལམ་པའོ། །ལམ་ཆེན་པ་ཡིན་ནམ། མིན་གྱིས་ལམ་པའོ། །དེ་གཉིས་ཀྱིས་སྨྲས་པ། ཇི་ལྟར་བུད་མེད་ཀྱི་ཡུལ་ལ་བརྙས་པ་ལ་ལྟོས། དེས་ཟླ་བ་གསུམ་དུ་ཚིགས་བཅད་གཅིག་ཀྱང་མ་ལོབས་ལ། དགེ་སློང་མ་རྣམས་ནི་སྡེ་སྣོད་གཉིས་པ་དང༌། གསུམ་པ་དང༌། ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་ཡིན་ན། དེས་དགེ་སློང་མ་ལ་ཇི་ལྟར་སྟོན། ཇི་ལྟར་བྱེད་བལྟའི་འོང་ངོ་ཟེར་ནས་ལམ་པ་གན་དུ་སོང་སྟེ་ཕྱག་འཚལ་ནས། བཙུན་པ་ལམ་པ། དགོངས་སུ་གསོལ། རྒྱལ་པོའི་ཀུན་དགའ་ར་བའི་དགེ་སློང་མའི་དགེ་འདུན་མཐུན་པ་རྒྱལ་བྱེད་ཚལ་གྱི་དགེ་སློང་གི་དགེ་འདུན་མཐུན་པའི་ཞབས་ལ་ཕྱག་འཚལ་ལོ། །གནོད་པ་ཉུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། (༢༡༡བ)འཚོའམ། སྟོབས་དང་ལྡན་ནམ། བདེའམ། ཁ་ན་མ་ཐོ་བ་མ་མཆིས་སམ། བདེ་བ་ལ་རེག་པར་གནས་སམ་ཞེས་སྙུན་གསོལ་ལོ། །ཟླ་བ་ཕྱེད་ཕྱེད་ཅིང་གདམས་ངག་དང༌། རྗེས་སུ་བསྟན་པ་གསོལ་ལོ། །འདུན་པ་དང་གསོ་སྦྱོང་བགྱི་བར་གསོལ་བ་འདེབས་སོ། །གསོལ་བའང་མཁྱེན་པར་གསོལ་ལོ། །ཐབས་མིན་ནོ། །
དེ་གཉིས་ཀྱིས་སྨྲས་པ། ཐབས་ཡིན་ནོ་ཞེས་བྱ་བ་ཙམ་ཡང་ཤེས་པ་ལྟ་ཞེས་དེ་གཉིས་དབྱར་ཁང་དུ་ཞུགས་པ་དང་དགེ་སློང་མ་རྣམས་ཀྱིས་མཐོང་ནས། སྟོན་པ་སུ་འབྱོན། ལམ་པའོ། །ལམ་ཆེན་པའམ། མིན་ཏེ་ལམ་ཆུང་བའོ། །ཕུ་ནུ་མོ་དག་བུད་མེད་ཀྱི་ཡུལ་ལ་བརྙས་པ་ལ་ལྟོས། སྟོན་པས་ཟིལ་གྱིས་མནན་པ་ལྟར་ཡ་མཚན་ཅན་དགུ་བཅུ་རྩ་དྲུག་གིས་ཀྱང་བུད་མེད་ཀྱི་ཡུལ་ཟིལ་གྱིས་མ་མནན་ཏོ། །བཅུ་གཉིས་སྡེ་ན་རེ། བདག་ཅག་གིས་ཅི་ནས་ཀྱང་ཕྱིན་ཆད་ཐོས་པ་ཉུང་ངུ་སུའང་དགེ་སློང་མ་ལ་སྟོན་པར་མི་འགྱུར་བ་དེ་ལྟར་བུ་ཟན་མོའི་བུ་དེ་མི་དགའ་བར་བྱའོ་ཞེས། དྲུག་གིས་ནི་ཡལ་ག་ཁྲུ་བཅུ་གཉིས་པ་ལས་སེངྒེའི་ཁྲི་ཤོམས་ཤིག །དྲུག་གིས་མཉན་ཡོད་དུ་ཞུགས་ལ་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་ཏུ་སྐྱེ་བོ་ཕལ་པོ་ཆེ་ལ། སང་བདག་ཅག་ལ་ཉན་ཐོས་ཆེན་པོ་ཞིག་ཆོས་སྟོན་པར་འགྱུར་གྱིས། ཁྱེད་ཅག་ལས་དེར་བདེན་པ་མ་མཐོང་བ་དེས་ཡུན་རིང་པོར་འཁོར་བར་འཁྱམ་དགོས་སོ་ཞེས་སྒྲོགས་ཤིག་ཟེར་ནས་དེ་ལྟར་བྱས་པས་སྲོག་ཆགས་འབུམ་ཕྲག་དུ་མ་དག་ཁ་ཅིག་ནི་ལྟད་མོ། ཁ་ཅིག་ནི་དགེ་བའི་རྩ་བས་བསྐུལ་ནས་དེར་འདུས་སོ། །དེ་ནས་སང་ལམ་པས་བསོད་སྙོམས་བྱས། ནང་དུ་ཡང་དག་འཇོག་ལས་ལངས་ནས་ཕྱི་བཞིན་འབྲང་བའི་དགེ་སློང་ཞིག་དང་ལྷན་ཅིག་དབྱར་ཁང་དུ་སོང་ངོ༌། །དེ་སྐྱེ་བོ་ཕལ་པོ་ཆེས་མཐོང་ནས། དགེ་སློང་མའི་སྟོན་པ་སྔ་མའམ་ཕྱི་མ་གང་ཡིན། ཅི་ཕྱི་བཞིན་འབྲང་བའི་དགེ་སློང་དགེ་སློང་མ་ལ་སྟོན་ནོ་ཞེས་ཐོས་སམ། སྔ་མ་ཡིན་ནོ། །
འདིས་ཟླ་བ་གསུམ་དུ་ཚིགས་བཅད་གཅིག་ཀྱང་མ་ལོབས་ན་དགེ་སློང་མ་ལ་ཇི་ལྟར་སྟོན། དགེ་སྦྱོང་མ་སྦྲེ་ཕྱི་མོ་འདི་དག་གིས་བདག་ཅག་བྲིད་ཀྱི་ཚུར་ཤོག་འདོང་ངོ༌། །བལྟའི་རེ་ཞིག་སྡོད་ཅིག །དེ་ནས་ལམ་པ་འཁོར་དེའི་ནང་དུ་སོང་བ་དང་ཁྲི་དེ་མཐོང་ནས། ཅི་དད་པས་སམ་མཐོ་འཚམ་པས་ཡིན་བལྟས་པ་ན་མཐོ་འཚམ་པར་ཤེས་ནས་གླང་པོ་ཆེའི་སྣ་ལྟ་བུའི་ལག་པ་བརྐྱངས་ཏེ་ཁྲི་མནན་ནས་ལ་ལས་མཐོང་ལ་ལས་མ་མཐོང་བར་ཁྲི་ལ་འདུག་གོ །དེ་ནས་ཏིང་ངེ་འཛིན་ལ་མཉམ་པར་བཞག་སྟེ། ཕྱོགས་བཞིའི་ནམ་མཁའ་ལ་འཕགས་ནས་སྤྱོད་ལམ་བཞི་བྱེད་པ་དང༌། མེའི་ཁམས་ལ་སྙོམས་པར་ཞུགས་པ་དང༌། འོད་ཟེར་འགྱེད་པ་དང༌། སྟོད་ནས་མེ་འབར། སྨད་ནས་ཆུ་འབྲུབ་པ་ལ་སོགས་པའི་རྫུ་འཕྲུལ་སྣ་ཚོགས་བསྟན་ཏེ་དེ་བསྡུས་ནས་ཁྲི་ལ་འདུག་སྟེ། སྲིང་མོ་དག །ཁོ་བོས་ཟླ་བ་གསུམ་དུ་ཚིགས་བཅད་(༢༡༢ན)གཅིག་བཟུང་བ་དེ་ཉིད་ཉིན་མཚན་བདུན་གྱི་བར་དུ་ཚིག་གཞན་དང་ཡི་གེ་གཞན་གྱིས་འབྱེད་པར་སྤྲོའོ། །ལུས་ཞེས་པ་ལུས་ཀྱི་ཉེས་སྤྱོད་གསུམ་དང༌། ངག་ཅེས་པ་ངག་གི་ཉེས་སྤྱོད་བཞི། ཡིད་ཅེས་པ་ཡིད་ཀྱི་ཉེས་སྤྱོད་གསུམ་མི་བྱ་བ་སྟེ། སྡིག་པ་མི་བྱ་ཞེས་པས་སྡིག་པ་ཐམས་ཅད་མི་བྱ་བར་བསྟན་ཏོ། །འཇིག་རྟེན་དག་ན་ཞེས་པས་ཉེར་ལེན་གྱི་ཕུང་པོ་ལྔ། ཡོངས་འཛིན་ཞེས་པས་འདོད་ཆགས་དང་ཞེ་སྡང་དང་གཏི་མུག་གི་ཡོངས་འཛིན་གསུམ་བསྟན་ཅེས་ཚིགས་བཅད་ཕྱེད་ཀྱི་དོན་ཡང་མ་ཕྱེ་བ་ཙམ་གྱིས་ཁྲི་ཉིས་སྟོང་གིས་བདེན་པ་མཐོང་ནས་འབྲས་བུ་བཞི་མངོན་དུ་བྱས། སོ་སོའི་བྱང་ཆུབ་སེམས་བསྐྱེད་དོ། །
དེ་ནས་ལམ་པས་འོངས་པ་དང༌། དགེ་སློང་དག་རྒྱལ་བྱེད་ཚལ་གྱི་སྒོ་ཁང་ན་འཆག་པ་དག་གིས་མཐོང་ནས། ལམ་པས་དེང་སྐྱེ་བོ་ཕལ་པོ་ཆེ་མ་དད་པར་བྱས་གོར་མ་ཆག་ན། མངོན་སུམ་དུ་མི་དགའ་བ་བརྗོད་པ་ནི་སྡུག་བསྔལ་བ་ཡིན་པས་ཕྱི་བཞིན་འབྲང་བའི་དགེ་སྦྱོང་ལ་དྲིའོ་ཞེས། དེ་ལ་དྲིས་པས། ལམ་པས་སྐྱེ་བོ་ཇི་སྙེད་མ་དད་པར་བྱས། དེས་སྨྲས་པ། སུས་མ་དད་པར་བྱས། སྟོན་པས་ཝཱ་ར་ཎཱ་སཱིར་ཆོས་ཀྱི་འཁོར་ལོ་བསྐོར་ཅེས་ཐོས་པ་དེ་ལམ་པས་དེང་བསྐོར་རོ། །ཇི་ལྟར་བསྐོར། ཚིགས་བཅད་ཕྱེད་ཀྱི་དོན་མ་ཕྱེ་བ་ཙམ་གྱིས་སྲོག་ཆགས་ཁྲི་ཉིས་སྟོང་གིས་བདེན་པ་མཐོང་ནས་འབྲས་བུ་བཞི་མངོན་དུ་བྱས། སོ་སོའི་བྱང་ཆུབ་ཏུ་སེམས་བསྐྱེད་ནས་དཀོན་མཆོག་གསུམ་ལ་དད་པར་བྱས་སོ། །དེ་ནས་སྟོན་པས། ལམ་པ་འདི་ངའི་ཉན་ཐོས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཡིན་ནོ་ཞེས་ལུང་བསྟན་ཏོ། །སྔ་མ་ནི་བཅས་པ་ཡིན་ལ། འདི་ནི་གནང་བ་སྟེ། ཆོས་བླ་མའི་མཐུ་དང་ལྡན་པ་མ་གཏོགས་པ་མ་བསྐོར་བར་དགེ་སློང་མ་ལ་ཆོས་སྟོན་ན་ལྟུང་བྱེད་དོ། །དགེ་སློང་རྣམས་ཀྱིས་ཞུས་པ། བཅུ་གཉིས་སྡེས་ལམ་པ་ལ་གནོད་པ་བྱའོ་སྙམ་པ་ལས་ཕན་པ་ཉིད་བགྱིས་པ་གཟིགས། དེ་ལྟར་དུ་མ་ཟད་སྔོན་ཡང་གནོད་པ་བྱའོ་སྙམ་པ་ལས་ཕན་པ་བྱས་པ་ཉོན་ཅིག །སྔོན་རི་བྲགས་ཤིག་ན་བྲམ་ཟེ་ཞིག་གིས་ཆུང་མ་བླངས་ནས་དགའ་མགུར་སྤྱད་པས་བུ་བཅུ་གཉིས་བྱུང་སྟེ། དེ་དག་ཁྱིམ་འབུབས་སུ་བཅུག་གོ །རེ་ཞིག་ན་དེའི་ཆུང་མ་ཤི། བྲམ་ཟེ་དེའང་རྒས་ནས་མྱ་ངན་གྱིས་མིག་ལོང་ངོ༌། །དེའི་མནའ་མ་བཅུ་གཉིས་པོ་དེ་ཁྱིམ་ཐབ་ཕྱི་རོལ་ཏུ་སོང་བའི་ཚེ་སྐྱེས་པ་གཞན་དང་འགྲོགས་པས། དེ་སྒྲ་ལ་མཁས་པས་སྐྱེས་པ་གཞན་གྱི་སྒྲ་ཐོས་ནས་མནའ་མ་རྣམས་བསྡིགས་པ་དང༌། དེ་དག་གིས་དེ་ལ་འབྲས་ཆན་རྩུབ་པོ་དང་རྩ་བས་བསྐོལ་བ་བྱིན་ནོ། །དེས་བུ་རྣམས་ལ་སྨྲས་པ། འདི་དག་གིས་ཁོ་བོ་ལ་འབྲས་ཅན་རྩུབ་པོ་དང་རྩ་བ་བསྐོལ་བ་བྱིན་ནོ། །དེ་དག་གིས་ཆུང་མ་ལ། ཅིའི་ཕྱིར་དེ་ལྟར་བྱེད། དེ་དག་ན་རེ། ཡབ་ཀྱི་བསོད་ནམས་ཟད་པས་སྣོད་དུ་འབྲས་འཐུག་པོ་ཆེ་སྩལ་ན་(༢༡༢བ)འབྲས་ཆན་རྩུབ་པོ་དང༌། ཞོ་སྩལ་ན་རྩ་བས་བསྐོལ་བར་འགྱུར་རོ། །ཅིའི་ཕྱིར་དེ་ལྟར་འགྱུར། ཐུགས་མི་ཆེས་ན་མངོན་སུམ་དུ་བགྱིའོ། །དེ་དག་གིས་རྫ་མཁན་ལ། རྫེའུ་ཁ་གཅིག་ལ་ནང་གཉིས་ཡོད་པ་ནུས་སམ། ནུས་སོ་ཞེས་རྫེའུ་ཁ་གཅིག་ནང་གཉིས་ཡོད་པ་བྱས་ནས། དེ་དག་གིས་རྫེའུའི་ནང་གཅིག་ཏུ་འབྲས་རྩུབ་པོ་བླུགས། ནང་གཅིག་ཏུ་འབྲས་འཐུག་པོ་ཆེ་བླུགས། རྫེའུ་ཁ་ཅིག་ཤོས་ཀྱི་ནང་གཅིག་ཏུ་ཞོ་བླུགས། ནང་གཅིག་ཏུ་རྩབས་མོ་བླུགས་ཏེ། གཡོས་བྱས་ནས་ཁྱིམ་ཐབ་ལ་སྨྲས་པ། རྗེའི་སྲས། དང་པོར་ཡབ་ལ་གསོལ་ལམ། ཁྱེད་ཅག་གསོ། ཡབ་ལ་གསོལ་ཅིག །འབྲས་ཆན་རྩུབ་པོ་དང་རྩབས་གྱོས་པོ་ལ་བྱིན། འབྲས་མཐུག་པོ་ཆེའི་ཆན་དང་ཞོ་ཁྱིམ་ཐབ་ལ་བྱིན་ནོ། །བུ་རྣམས་ཀྱིས་སྨྲས་པ། ཡབ་ཀྱི་བསོད་ནམས་ཟད་དེ། མངོན་སུམ་དུ་རྫེའུ་གཅིག་གི་ནང་དུ་བཙོས་པ་ལ། ཡབ་ཀྱི་ཞབ་དུ་འབྲས་ཆན་རྩུབ་པོ་དང་རྩབས། བདག་ཅག་གི་ཁར་འབྲས་འཐུག་པོ་ཆེའི་ཆན་དང་ཞོ་མཆིས་པས་བུད་མེད་ཀྱིས་མ་ནོངས་སོ། །
ཁོ་བོས་ལག་པ་བཅལ་བ་བརྒྱ་དག་གིས་ལོངས་སྤྱོད་བསྒྲུབས་ན་ཅིའི་ཕྱིར་བསོད་ནམས་ཟད་སྙམ་ནས། དེ་དག་གིས་མ་ཚོར་བར་ལྐོག་ཏུ་ཚང་མང་དུ་སོང་སྟེ་ལག་ནོམས་བྱས་པས། རྫེའུ་ཁ་གཅིག་ལ་ནང་གཉིས་ཡོད་པ་དག་རྙེད་ནས་དེ་དག་སྦས་ཏེ། བུ་རྣམས་འོངས་པ་ན། བུ་དག །ཁོ་བོའི་བསོད་ནམས་ཟད་པ་ལ་ལྟོས་ཞེས་རྫེའུ་དེ་དག་བསྟན་ནས། བུ་རྣམས་གཞན་གྱི་ཁྱིམ་དག་ན། །རྫེའུ་གཅིག་ལ་ནི་ཁ་གཅིག་ཡོད། །བདག་ཅག་སྐལ་བ་མེད་རྣམས་ཀྱི། །རྫེའུ་ནང་གཉིས་ལའང་ཁ་གཅིག་ཡོད། །དེ་དག་གིས་ཆུང་མ་དེ་དག་ཤིན་ཏུ་བརྡེགས་པ་དང༌། དེ་ནས་ཆུང་མ་རྣམས་ཀྱིས། འདི་གསད་དོ་སྙམ་ནས། སྦྲུལ་ཁས་བསྡིགས་པ་ཞིག་འོངས་པ་ལ། སྦྲུལ་ཡོད་དམ། ཤི་བའམ་གསོན་པོ། ཤི་བའོ། །དེས་བསམས་པ། འདི་དག་ལ་སྦྲུལ་ཤི་བས་ཅི་བྱ། བྲམ་ཟེ་འདི་གསོད་འདོད་དོ་སྙམ་ནས། སྦྲུལ་ཁྲོས་པའི་དུག་ནི་མགོ་བོ་དང་མཇུག་མ་གཉིས་སུ་འཕོ་བས། དེས་སྦྲུལ་ནག་པོ་ཁྲོས་པར་བྱས་ཏེ་མགོ་མཇུག་བཅད་ནས་རྐེད་པའི་ཆ་དེ་དག་ལ་བྱིན་ནོ། །དེ་དག་གིས། ཡབ། ཕོ་ཤའི་ཁུ་ཤ་གསོལ་ལམ། དེས་བསམས་པ། འདི་དག་གིས་བདག་ལ་ཅིའི་ཕྱིར་ཕོ་ཤའི་ཁུ་བ་ལྡུད། དུག་བྱིན་ནས་གསོད་འདོད་དོ་སྙམ་ནས་བསམས་པ། ཤིའང་བླའི་བཏུང་ངོ་སྙམ་ནས་འཐུངས་པ་དང༌། དེའི་རླངས་པས་ལིང་ཐོག་བྱིད་ནས་མིག་གིས་མཐོང་ངོ༌། །སྣོན་དུ་གཞུག་པའི་ཐབས་བྱའོ་སྙམ་ནས། ས་ལ་འགྱེལ་ཏེ། ཁོ་བོ་ཤི་ལ་ཐུག་གོ་བྱས་པས། དེ་དག་གིས་མྱུར་དུ་ཤི་ན་སྙམ་ནས། ཡབ། ཡང་གསོལ་དང་སོས་པར་འགྱུར་རོ། །དེས་ཡང་འཐུངས་པ་དང༌། དེའི་རླངས་པས་ལིང་ཐོག་བྱིད་དེ། སྔ་མ་ཁོ་བཞིན་དུ་(༢༡༣ན)གསལ་བར་མཐོང་ནས་ཅང་མི་སྨྲའོ། །མནའ་མ་རྣམས་ཀྱིས་སྔར་བཞིན་བག་མེད་པར་བྱས་པ་དང༌། དེ་དབྱུག་པ་ཐོགས་ཏེ། ཁོ་བོས་མི་མཐོང་སྙམ་མམ། སྔར་བཞིན་གསལ་བར་མཐོང་གིས་ཕྱིན་ཆད་བག་ཡོད་པར་སྤྱོད་ཅིག །དེའི་དུས་ཀྱི་བྲམ་ཟེ་ནི་ལམ་པ། མནའ་མ་བཅུ་གཉིས་ནི་བཅུ་གཉིས་སྡེའོ། །དེའི་ཚེའང་གནོད་པ་བྱའོ་སྙམ་པ་ལས་ཕན་པ་བྱས་སོ། །
སྟོན་པས་གདམས་ངག་ཉུང་ངུས་ལམ་པ་གྲོལ་བ་ལ་གཟིགས། དེ་ལྟར་དུ་མ་ཟད་སྔོན་ཡང་གདམས་ངག་ཉུང་ངུས་དབང་ཕྱུག་གི་བདག་པོ་ལ་བཞག་པ་ཉོན་ཅིག །སྔོན་རི་བྲགས་ཤིག་ན་ཁྱིམ་བདག་ཅིག་ལ་བུ་བྱུང་ནས། ཆུང་མ་ལ། བཟང་མོ། བདག་ཅག་ལ་བུ་ལོན་འཕྲོག་པ་བྱུང་གིས། ཁོ་བོ་ཟོང་ཐོགས་ཏེ་རྒྱ་མཚོར་འཇུག་གོ །དེ་བཞིན་དུ་མཛོད་ཅིག །ཆུང་མ་འདི་ལ་ཀརྵ་པ་ཎ་མང་པོ་གཏད་ན་སྐྱེས་པ་གཞན་དང་འགྱུར་བ་བསྟེན་པར་འགྱུར་རོ་སྙམ་ནས་ཀརྵ་པ་ཎ་ཅུང་ཟད་ཅིག་བྱིན། དེའི་ཆུང་གྲོགས་ཚོང་དཔོན་ཞིག་ལ་ཀརྵ་པ་ཎ་མང་པོ་གཏམས་ནས། ཁོ་བོའི་ཆུང་མ་ཟས་གོས་ཉམས་ན་བྱིན་ཅིག་ཟེར་ནས་རྒྱ་མཚོར་ཞུགས་པ་དང་ཤིའོ། །བུ་དེ་ཆུང་མས་ཉེ་དུ་དང་ལག་མཐུས་བསྐྱེད་ནས་ཆེར་སྐྱེས་པ་དང༌། མ། བདག་གི་ཕའི་ལས་གང་ཡིན། དེས། བཤད་ན་རྒྱ་མཚོར་སོང་དོགས་ནས། འདི་ཉིད་ན་ཚོང་བྱེད་པའོ། །ཀརྵ་པ་ཎ་བྱིན་ཅིག་བདག་གིས་ཀྱང་ཚོང་བྱའོ། །ཁྱོད་ཀྱང་ཉེ་དུ་དང་ལག་མཐུས་བསྐྱེད་ཀྱི། ཁོ་མོ་ལ་ཀརྵ་པ་ཎ་ག་ལ་ཡོད། ཚོང་དཔོན་འདི་ཁྱོད་ཀྱི་ཕའི་ཆུང་གྲོགས་ཡིན་གྱིས་འདི་ལས་པ་ཎ་ལོངས་ལ་ལས་གྱིས་ཤིག །དེ་ཚོང་དཔོན་གྱི་གན་དུ་སོང་བ་དང༌། ཚོང་དཔོན་དེ་ཡང༌། མི་ཞིག་གིས་ལན་གསུམ་དུ་ཚོང་ལ་དོར་བྱས་པས་དེ་ལ་ནན་ཏུར་བྱེད་ཅིང་འདུག་པ་ན། དེའི་ཁྱིམ་ནས་བུ་མོ་མངག་གཞུག་མས་ཕྱག་དར་གྱི་སྟེང་དུ་བྱི་བའི་རོ་ཞིག་བཞག་སྟེ། དོར་བར་བརྩམས་པ་དང༌། ཚོང་དཔོན་གྱིས་མི་དེ་ལ་སྨྲས་པ། གང་ནུས་པ་ཡིན་ན་བྱི་རོ་འདིས་ཀྱང་བདག་ཉིད་འཛིན་པར་ནུས་སོ། །ཁྱེའུ་དེས་དེ་ཐོས་ནས་འདི་བདག་ཉིད་ཆེན་པོ་ཡིན་པས་བྱུང་རྒྱལ་དུ་མི་སྨྲའོ་སྙམ་སྟེ་བྱི་རོ་ཁྱེར་ནས་ཚོང་འདུས་སུ་སོང་ངོ༌། །
ཚོང་ཁང་དེ་ན་བྱི་ལ་ཞིག་བཏགས་འདུག་པ་ལ་བྱི་རོ་དེ་བསྟན་པས། དེས་མཆོང་བར་བརྩམས་པ་དང༌། ཚོང་པ་དེ་ན་རེ། བྱི་བའི་རོ་དེ་བྱི་ལ་འདི་ལ་བྱིན་ཅིག །རིན་དགོས་སོ། །དེས་དེ་ལ་སྲན་མ་དག་གིས་སྙིམ་པ་བཀང་ནས་བྱིན་ནོ། །བདག་གིས་འདི་འཆོས་ན་གཞི་འཆད་པར་འགྱུར་སྙམ་སྟེ། སྲན་མ་བརྔོས་ནས། ཆུ་གྲང་མོས་རིལ་བ་བཀང་སྟེ་ཤིང་ཐུན་ངལ་གསོལ་བའི་ཕྱོགས་སུ་བསྡད་པ་དང༌། ཤིང་ཏུན་དག་ལྷགས་པ་ལ། ཤིང་ཁུར་ཞོག་ལ་ཡུད་ཙམ་ཞིག་ངལ་སོས་ཤིག །དེ་དག་གིས་ཤིང་ཁུར་བཞག་པ་དང༌། དེས་དེ་དག་ལ་སྲན་མ་ཉུང་ཟད་རེ་བྱིན་ནས་ཆུ་གྲང་མོའང་འཐུང་དུ་བཅུག་གོ །ཤིང་(༢༡༣བ)ཐུན་རྣམས་ཀྱིས་སྨྲས་པ། ཁྱོད་གར་འགྲོ། ཤིང་འཐུ་རུ་འགྲོའོ། །ཁོ་བོ་ཅག་སྔར་དོང་ནའང་ད་འཁོར་བ་ཡིན་ན། ཁྱོད་སོང་ན་ནམ་འཁོར་བར་འགྱུར་ཞེས་དེ་དག་གིས་དེ་ལ་ཤིང་རེ་རེ་བྱིན་ནོ། །ཤིང་རེ་རེ་པོ་དེས་དེའི་ཤིང་ཁུར་ལོངས་ནས་བཙོངས་ཏེ་སྲན་མ་ཉོས་ནས་བརྔོས་ཏེ། ཆུ་གྲང་མོས་བུམ་པ་བཀང་ནས་ཡང་ཕྱོགས་དེར་བསྡད་པ་དང་ཤིང་ཐུན་པ་ལྷགས་པ་ལ་སྲན་མ་དང་ཆུ་བྱིན་པས། ཤིང་ཐུན་པ་རྣམས་ན་རེ། ཁྱོད་སྲན་མ་དང་ཆུ་ཐོགས་ལ་འདིར་སྡོད་ཅིག །ཁོ་བོ་ཅག་གིས་གོང་ཤིང་ཁྱེར་ཏེ་འོང་ངོ༌། །དེས་ཉི་མ་རེ་རེ་ཞིང་དེ་བཞིན་དུ་བྱས་ནས། ཁྱེད་ཅག་ཤིང་ཁུར་ཚོང་འདུས་སུ་མ་འཁྱེར་བར་ཁོ་བོའི་ཁྱིམ་དུ་ཞོག་ཅིག །རིན་བསྡོམས་ཏེ་སྦྱིན་ནོ། །དེ་དག་གིས་ཤིང་ཁུར་དེའི་ཁྱིམ་དུ་བཞག་གོ །
དུས་གཅིག་ན་ཉི་མ་བདུན་དུ་ཡུལ་ངན་བྱུང་སྟེ་དེས་ཤིང་བཙོངས་པས་ཁེ་སྤོགས་མང་པོ་གྲུབ་བོ། །དེས་བསམས་པ། ཤིང་འཚོང་པ་ནི་ཐ་ཆད་ཡིན་ཏེ། ཙན་དན་གྱིས་འཚོ་ནའང་ཤིང་གིས་འཚོ་བར་ཟད་པས་བཟའ་བཅའ་བཙོང་ངོ་སྙམ་ནས་བཙོངས་པས་ཁེ་སྤོགས་མང་པོ་གྲུབ་བོ། །དེ་བཞིན་དུ་སྤོས་དང༌། དབྱིག་བཙོངས་པས་དབྱིག་འཚོང་པ་ཐམས་ཅད་ཟིལ་གྱིས་མནན་པས། མིང་བྱི་དབྱིག་པ་ཞེས་བྱ་བར་གྱུར་ཏོ། །དེའི་ཚེ་དབྱིག་འཚོང་པ་དག་ན་རེ། མི་གླང་པོ་ཆེའི་གཉའ་བར་ཞོན་ནས་རྟའི་རྒྱབ་ཏུ་ཞོན། དེ་ནས་རྐང་དག་གིས་འགྲོ་བ་བཞིན་དུ་བྱི་དབྱིག་པ་འདིའང་ཕ་མེས་རྒྱ་མཚོར་གྲུ་བོ་ཆེ་སྤྱོད་པ་ལས། ད་ལྟ་དབྱིག་འཚོང་ངོ་ཞེས་ཟེར་བ་བྱི་དབྱིག་པས་ཐོས་ནས་མ་ལ་དྲིས་པས། འདིས་འགའ་ཞིག་ལས་ཐོས་ཀྱི། བདག་གིས་བརྫུན་དུ་སྨྲ་བ་ཚུལ་མིན་སྙམ་ནས། བདེན་ནོ། །བདག་ཀྱང་རྒྱ་མཚོ་ཆེན་པོར་འཇུག་གོ །བུ། འདི་ཉིད་དུ་འདུག་ཅིག །ཡང་ཡང་ཞུས་པས་གནང་བ་དང༌། བྱི་དབྱིག་པས་ཚོང་པའི་ཚོགས་ལ། ཁྱེད་ཅག་ཤོ་གམ་དང༌། ལ་གཅན་དང༌། གྲུ་བཙས་མེད་པར་རྒྱ་མཚོར་འཇུག་པར་སྤྲོ་བ་དེས་རྒྱ་མཚོར་འགྲོ་བའི་ཟོང་སྟ་གོན་གྱིས་ཤིག་ཅེས་དྲིལ་བསྒྲགས་སོ། །དེ་ནས་ཚོང་པ་ལྔ་བརྒྱས་སྟ་གོན་བྱས་ནས་དགེ་མཚན་དང་བཀྲ་ཤིས་དང་དགེ་བར་འགྱུར་བ་བྱས་ཏེ། ཁལ་པ་མང་པོ་ལ་ཁལ་བཀལ་ནས་རྒྱ་མཚོར་འཕགས་སོ། །དེ་ལ་མི་ལྔ་ཡོད་དེ། བཟའ་བཏུང་སྦྱོར་བ་སྡུད་པར་བྱེད་པ་དང༌། རྩོད་པ་ཞི་བར་བྱེད་པ་ཚར་གཅོད་པ་དང༌། གྲུ་འཆོས་པ་བྱི་དོར་བ་དང༌། རླུང་གཡོར་ཐོགས་པ་དང༌། རྒྱུ་སྐར་ལ་ལྟ་བ་སྟེ་ལྔའོ། །མཐར་གྱིས་རྒྱ་མཚོའི་འགྲམ་དུ་ཕྱིན་པ་དང་ཚོང་པ་དེ་དག་གིས་རྒྱ་མཚོ་ཆེན་པོ་མཐོང་ནས་སྐྲག་སྟེ་གྲུ་བོ་ཆེར་འཇུག་མི་སྤྲོ་ནས། དེད་དཔོན་གྱིས། རླུང་གཡོར་ཐོགས་པ་ལ། རྒྱ་མཚོའི་བསྔགས་པ་ཇི་ལྟ་བ་བཞིན་དུ་སྒྲོགས་ཤིག །དེས། འཛམ་བུ་གླིང་བའི་ཚོང་པ་ཤེས་ལྡན་དག་ཉོན་ཅིག །རྒྱ་མཚོ་ཆེན་པོ་འདི་ན་ནོར་བུ་དང༌། བཻཌཱུརྱ་དང༌། མན་ཤེལ་དང༌། བྱི་རུ་དང༌། དངུལ་དང༌། ས་ལེ་སྦྲམ་(༢༡༤ན)དང༌། རྡོའི་སྙིང་པོ་དང༌། སྤུག་དང༌། དམར་པོ་དང༌། གཡས་སུ་འཁྱིལ་བ་དག་ཡོད་ཀྱིས་སུ་ཕ་མ་ལ་སོགས་པ་ལེགས་པར་བདེ་བས་ཚིམ་པར་བྱ་བ་དང༌། དགེ་སྦྱོང་དང་བྲམ་ཟེ་ལ་ཡོད་དབུལ་བར་འདོད་པ་དེས་རྒྱ་མཚོ་ཆེན་པོར་ཞུགས་ཤིག །འཇིག་རྟེན་ན་འབྱོར་པ་འདོད་པ་མང་བས་ཕལ་ཆེར་ཞུགས་ནས་གྲུས་མི་བཟོད་པར་གྱུར་པ་དང༌། རྒྱ་མཚོའི་བསྔགས་པ་མ་ཡིན་པ་རྗོད་ཅིག །དེས། ཀྭ་ཡེ་ཤེས་ལྡན་དག་ཉོན་ཅིག །རྒྱ་མཚོ་ཆེན་པོ་ན་ཉ་ཆེན་དང༌། ཉ་ཆེན་མིད་དང༌། ཉ་ཆེན་མིད་མིད་དང༌། ཆུ་རླབས་དང༌། རྦ་ཀློང་དང༌། ཆུ་སྲིན་ཀུམྦིར་དང༌། ཆུ་སྲིན་བྱིས་པ་གསོད་དང༌། ཆུའི་རི་ལ་ཐུག་པ་དང༌། རླུང་ནག་པོ་དང༌། ཆོམ་རྐུན་པ་ནོར་འཕྲོག་པ་དག་གིས་ཁྱེད་ཅག་སྲོག་དང་འབྲལ་བར་འགྱུར་གྱིས། བདག་དང༌། ཕ་མ་དང༌། གཉེན་འདོད་པ་དེ་མ་འཇུག་ཅིག །འཇིག་རྟེན་ན་སྡར་མ་མང་བས་ཕལ་ཆེར་ཕྱིར་བྱུང་བ་དང༌། དེ་ནས་གྲུས་བཟོད་ནས། ཉེས་ཐག་དཀྲོལ་ཏེ། གྲུ་བོ་ཆེ་རླུང་གཡོར་ཆེན་པོ་ཐོགས་པས་ལེགས་པར་བཟུང་བ། རླུང་གི་སྟོབས་ཀྱིས་བསྐྱོད་པ་སྤྲིན་ཆེན་པོ་བཞིན་དུ་སོང་སྟེ། རྗེས་སུ་མཐུན་པའི་རླུང་གིས་ཕུལ་ནས་རིན་པོ་ཆེའི་གླིང་དུ་ཕྱིན་པ་དང༌། རླུང་གཡོར་ཆེན་པོ་ཐོགས་པས། ཤེས་ལྡན་དག །ཉོན་ཅིག །འདི་ན་ནོར་བུ་འཆིང་བུ་རིན་པོ་ཆེ་འདྲ་བ་དག་ཡོད་པས། བརྟགས་ཤིང་བརྟགས་ཤིང་ཕྱིས་འགྱོད་པར་མི་འགྱུར་བར་རིན་པོ་ཆེ་ལོངས་ཤིག །འདི་ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་ཡོད་པ་དེས་སྐྱེས་པ་རྣམས་མ་རུང་བར་བྱེད་པས་བསྙེན་པར་མི་བྱའོ། །མྱོས་པར་འགྱུར་བའི་འབྲས་བུ་དག་ཡོད་པས། དེ་ཟོས་ན་ཞག་བདུན་མྱོས་པར་འགྱུར་བས་མི་བཟའོ། །འདིར་ཞག་བདུན་ལས་འདས་པར་འཁོད་ན་མི་མ་ཡིན་གྱིས་མི་བཟོད་པས་གྲུ་བོ་ཆེ་རླུང་གིས་འཁྱེར་བས་དེ་ལ་མ་ཐུག་པར་བྱའོ། །ཚོང་པ་རྣམས་ཀྱིས་བག་ཡོད་པས་རིན་པོ་ཆེ་ལེགས་པར་བརྟགས་ཤིང་གྲུ་བོ་ཆེ་བཀང་ནས་མཐུན་པའི་རླུང་གིས་བདས་ཏེ་འཛམ་བུ་གླིང་དུ་ཕྱིན་ཏོ། །
དེ་ལྟར་ལན་བདུན་དུ་གྲུབ་ནས། མས། ཁྱིམ་ཕུབ་ཅིག །བུ་ལོན་བཅད་ནས་དབུབ་བོ། །ཕ་དང་མེས་པོ་ནས་བུ་ལོན་མེད་ན། བུ་ལོན་པ་གང་ནས་བྱུང༌། མ། ཁོ་བོ་ཉིད་ཤེས་སོ་ཞེས་རིན་པོ་ཆེ་སྣ་བཞི་ལས་བྱས་པའི་བྱི་བ་བཞི་བྱེད་དུ་བཅུག །སྤྲོག་མ་གསེར་གྱིས་བཀང་སྟེ་བྱི་བ་བཞི་པོ་ཕྱོགས་བཞིར་བཞག་ནས་ཚོང་དཔོན་གྱི་གན་དུ་སོང་བ་དང༌། དེ་བྱི་དབྱིག་པའི་བསྔགས་པས་བརྗོད་ཅིང་འདུག་སྟེ། དེས་རྩྭ་དང་བོང་བ་ལ་སོགས་པ་བླངས་པ་ཐམས་ཅད་གསེར་དུ་འགྱུར་ཏེ། བསོད་ནམས་དང་དབང་ཆེ་བར་གྲགས་པ་ལ་ལྟོས་ཟེར་རོ། །དེ་སྒོ་ན་འདུག་པ་སྒོ་བས་བརྗོད་པ་དང༌། ནང་དུ་ཐོང་ཞིག །དེས་ནང་དུ་ཞུགས་ནས། ཚོང་དཔོན། འདི་ནི་གཞི་ལགས། འདི་ནི་ཁེ་སྤོགས་ལགས་ཀྱིས་བཞེས་ཤིག །ངས་ཅིའང་བྱིན་པ་མི་དྲན་ནོ། །དེས་དྲན་(༢༡༤བ)པར་བྱས་པ་དང༌། ཁྱོད་སུའི་བུ་ཡིན། ཆེ་གེ་མོའི་བུའོ། །འོ་ན་དེ་ངའི་ཆུང་གྲོགས་ཡིན་པས། དེས་ང་ལ་པ་ཎ་བཅོལ་བ་ཡོད་ཀྱི་ཟེར་ནས། གསེར་གྱི་རིལ་བ་ཆུས་བཀང་བའི་མཆོད་ཡོན་གྱིས་བསུ་སྟེ། དེ་ལ་བུ་མོ་རྒྱན་གྱིས་བརྒྱན་པ་ཆུང་མར་བྱིན་ནོ། །དེའི་དུས་ཀྱི་ཚོང་དཔོན་ནི་ངའོ། །བྱི་དབྱིག་པ་ནི་ལམ་པ་ཡིན་ཏེ། དེའི་ཚེ་གདམས་ངག་ཅུང་ཞིག་གིས་དབང་ཕྱུག་གི་བདག་པོ་ལ་བཞག་ལ། ད་ལྟ་གདམས་ངག་ཅུང་ཟད་བྱིན་པས་མྱང་འདས་ལ་བཞག་གོ །ལམ་པ་བུལ་བའི་རྒྱུ་ཞུས་པས། འདི་འོད་སྲུངས་ཀྱི་བསྟན་པ་ལ་དགེ་སློང་སྡེ་སྣོད་གསུམ་པར་གྱུར་ཏེ། ཆོས་ཀྱི་སེར་སྣས་ཆོས་ཚིག་གཅིག་ཙམ་ཡང་མ་བསྟན་ཏོ། །ཡང་རི་བྲགས་ཤིག་ན་ཕག་འཚོང་ཞིག་འདུག་སྟེ། ཆུ་ཀླུང་གི་ཕར་ཚུར་དུ་དུས་སྟོན་བྱུང་སྟེ། ཕག་འཚོང་དེས་བསམས་པ། ཕག་དག་བསད་ན་ཤ་དེ་སྙེད་ཉོ་མི་མི་འོང་བས། གསོན་པོར་ཁྱེར་ནས་འཕྲལ་ལ་བསད་ཅིང་བཙོང་ངོ་སྙམ་སྟེ། ཕག་མང་པོ་སྦྲེལ་ནས་གྲུར་བཙུད་པ་དང༌། དེ་དག་གིས་བསྐྱོད་པས་གྲུ་རྡིབ་ནས་ཕག་འཚོང་ཡང་ཆུས་ཁྱེར་བ་དེའི་ཕར་འགྲམ་ན་རང་རྒྱལ་ལྔ་བརྒྱ་ཙམ་འཁོད་པའི་གཅིག་གིས་དེ་དྲངས་ཏེ། བྱེ་མ་བརྡལ་བའི་སྟེང་དུ་ཁས་བུབ་ཏུ་བཞག་པས་སོས་ཏེ་དྲན་པ་རྙེད་ནས་ལངས་པ་དང༌། མིའི་རྐང་རྗེས་མཐོང་ནས་དེའི་རྗེས་སུ་སོང་བ་དང༌། རང་སངས་རྒྱས་ལྔ་བརྒྱ་མཐོང་ནས་དེ་དག་ལ་ལོ་མ་དང་འབྲས་བུ་དང་སོ་ཤིང་གིས་བསྙེན་བཀུར་བས་དེ་དག་གིས་ལྷུང་བཟེད་ཀྱི་ལྷག་མ་བྱིན་ནོ། །རང་སངས་རྒྱས་དེ་དག་སྐྱིལ་ཀྲུང་བཅས་ཏེ་བསམ་གཏན་བྱེད་པ་ན། དེ་ཡང་མཐའ་གཅིག་ཏུ་འདུག་ནས་སྐྱིལ་ཀྲུང་བཅས་ཏེ་བསམ་གཏན་བྱས་པས་འདུ་ཤེས་མེད་པའི་སྙོམས་འཇུག་བསྐྱེད་ནས་ལྷར་སྐྱེས་སོ། །ཆོས་ཀྱི་སེར་སྣ་དང༌། ཕག་བསད་པ་དང༌། འདུ་ཤེས་མེད་པའི་ལྷ་ནས་སྐྱེས་པས་བུལ་བ་ཡིན་ནོ། །དེ་བས་ན་གདམས་ངག་མེད་པ་ལ་ཉེས་དམིགས་འདི་དང་གཞན་དག་ཀྱང་ཡོད་པས་གདམས་ངག་མེད་པར་བསྒོམ་པར་མི་བྱའོ། །
དེ་ནས་སྟོན་པ་མཉན་ཡོད་ནས་རྒྱལ་པོའི་ཁབ་ཏུ་གཤེགས་སོ། །དེ་འཚོ་བྱེད་ཀྱིས་ཐོས་ནས། སྟོན་པའི་སྤྱན་སྔར་སོང་སྟེ། སང་བདག་གི་སྡུམ་པར་བསོད་སྙོམས་གསོལ་བར་ཅི་གནང༌། སྟོན་པ་ནི་བསྙེན་པར་དཀའ་བ་དང༌། བཟོད་པར་དཀའ་བ་ཡིན་པས་མ་ནུས་པར། ཀུན་དགའ་བོ་ལ། ལམ་པ་མ་གཏོགས་སོ་ཞེས་ཞུས་སོ། །ཀུན་དགའ་བོས་ཀྱང་ལམ་པ་ལ་དེ་གོ་བར་བྱས་སོ། །སང་སྤྱན་དྲངས་ནས་གདན་ལ་བཞུགས་པ་ན། ཀུན་དགའ་བོ། ལམ་པའི་བྱུག་རིས་ཞོག་ཅིག །འཚོ་བྱེད་གསེར་གྱི་རིལ་བ་ཐོགས་ཏེ་རྒན་པའི་མཐར་འདུག་པ་དང་སྟོན་པས་ཆབ་མ་བཞེས་སོ། །ཅིའི་སླད་དུ། དགེ་འདུན་མ་ཚོགས་སོ། །སུ། ལམ་པའོ། །དེ་བདག་གིས་གཡར་མ་དྲངས་སོ། །ཁྱོད་ཀྱིས་སངས་རྒྱས་ལ་སོགས་པ་དགེ་སློང་གི་དགེ་(༢༡༥ན)འདུན་སྤྱན་མ་དྲངས་སམ། སྤྱན་དྲངས་ལགས་སོ། །ཅི་ལམ་པ་དགེ་འདུན་ལས་ཕྱི་རོལ་ཏུ་གྱུར་པ་ཡིན་ནམ། མ་ལགས་སོ། །སོང་ལ་བོས་ཤིག །བོས་ལ་གུམ་པར་བྱའོ་སྙམ་ནས་འབོད་དུ་བཏང་བས། མངགས་པས། ལམ་པ། ཞེས་བོས་པ་དང༌། ལམ་པས་སྟོང་ཉིས་བརྒྱ་ལྔ་བཅུར་སྤྲུལ་ནས་ཐམས་ཅད་ཀྱིས། ཨང་ཞེས་ལན་བཏབ་བོ། །མི་དེ་འོངས་ཏེ་འཚོ་བྱེད་ལ་སྨྲས་པ། བདག་གིས་ཕྱིན་ནས། ལམ་པ། ཞེས་བོས་པ་ན་འོད་མའི་ཚལ་ན་སྔར་དགེ་སློང་གང་ཞིག་འཁོད་པ་བཞིན་དུ་དགེ་སློང་དག་གིས་གང་ཞིང་འཁོད་ནས། ཨང་ཞེས་ཟེར་ན་གང་འབོད། འཚོ་བྱེད་ཀྱིས་སྟོན་པ་ལ་གསོལ་བ་དང༌། སོང་ལ། ལམ་པ་ཡང་དག་པར་གང་ཡིན་པ་དེ་ཤོག་གྱིས་ཤིག །དེ་སོང་ནས། ལམ་པ་ཡང་དག་པ་དེ་གཤེགས་སུ་གསོལ། ལམ་པས་རྫུ་འཕྲུལ་བསྡུས་ནས་སོང་སྟེ་རང་གི་བྱུག་རིས་སུ་འདུག་གོ །འཚོ་བྱེད་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཟས་བྲིམས་ནས། ལམ་པ་ལ་མ་གུས་པར་བྲིམས་སོ། །སྟོན་པས། ཉན་ཐོས་ཆེན་པོ་རི་རབ་དང་འདྲ་བ་ལ་བརྙས་ཀྱིས་འདིའི་ཡོན་ཏན་བསྒྲག་གོ་སྙམ་ནས། ཀུན་དགའ་བོ་ལ་ལྷུང་བཟེད་ལེན་པ་ལ་མ་ཕྱིན་ནོ། །སྟོན་པའི་ལྷུང་བཟེད་མ་བླངས་པར་གནས་བརྟན་དག་གི་ལྷུང་བཟེད་མི་ལེན་པས། ལམ་པས་རང་གི་ཡོན་ཏན་བསྒྲག་པར་ཤེས་ནས། སྟན་ཕྱེད་ལས་འཕགས་ཏེ། ལག་པ་གླང་པོ་ཆེའི་སྣ་ལྟ་བུ་བརྐྱངས་ནས་སྟོན་པའི་ལྷུང་བཟེད་བླངས་པ་དང་འཚོ་བྱེད་ཀྱིས་མཐོང་སྟེ། རྫུ་འཕྲུལ་སྟོན་པ་འདི་སུ་ཡིན་སྙམ་ནས་ལྷུང་བཟེད་ཀྱི་རྗེས་བཞིན་སོང་བ་དང་ལམ་པ་ཡིན་པར་མཐོང་སྟེ། དེ་བརྒྱལ་ནས་ས་ལ་འགྱེལ་བ་དང༌། ཆུས་བཏབ་པས་དྲན་པ་སོས་ནས་ལམ་པའི་རྐང་པ་གཉིས་ལ་གཏུགས་ཏེ་བཟོད་པར་གསོལ་ལོ། །ལམ་པས། འཚོ་བྱེད། བཟོད་དོ། །དགེ་སློང་རྣམས་ཀྱིས་ཞུས་པ། འཚོ་བྱེད་ཀྱིས་ལམ་པའི་ཡོན་ཏན་མ་ཤེས་ཀྱི་བར་དུ་མ་གུས་ལ། ཤེས་ནས་རྐང་པ་གཉིས་ལ་གཏུགས་ཏེ་བཟོད་པ་གསོལ་བ་ལ་གཟིགས། ད་ལྟར་དུ་མ་ཟད་དེ། སྔོན་བྱང་ལམ་ནས་དེད་དཔོན་ཞིག་གིས་རྟ་ལྔ་བརྒྱ་བདས་ནས་ཡུལ་དབུས་སུ་ཕྱིན་ཏོ། །དེའི་རྒོད་མའི་མངལ་དུ་རྟ་ཅང་ཤེས་ཤིག་ཞུགས་པ་ཕྱིན་ཆད་རྟ་དེ་དག་སྐད་མི་འབྱིན་པས་དེད་དཔོན་གྱི་བསམ་པ་ལ། རྟ་རྣམས་ལ་ནད་འགའ་ཞིག་བྱུང་ངམ་ཅི་ཡིན་སྙམ་མོ། །
དེ་ནས་རྒོད་མ་དེ་ལ་རྟེའུ་ཕོ་ཞིག་བྱུང་ནས་རྟ་དེ་དག་སྣ་སྒྲ་མི་འབྱིན་པས་དེད་དཔན་གྱིས། རྟེའུ་སྐལ་ཆད་འདི་བྱུང་བས་ཉེས་ཏེ་རྟ་ལ་ནད་བྱུང་ངོ་སྙམ་ནས། རྒོད་མ་དེ་རྟག་ཏུ་ཞོན་ཞིང༌། རྩྭ་དང་ཆག་ཀྱང་མི་སྦྱིན་ནོ། །དེ་རིམ་གྱིས་མཆོད་གྱུར་ཅེས་ཞེས་བྱ་བའི་གནས་སུ་ཕྱིན་པ་དང་དབྱར་ལ་བབ་ནས། ད་སོང་ན་རྟའི་རྨིག་པ་འདྲུལ་བས་དབྱར་འདི་ཉིད་དུ་འདུག་གོ་སྙམ་སྟེ་དེ་ཉིད་དུ་འདུག་གོ །དེ་ན་གནས་པའི་བཟོ་བོ་དག་གིས་དེ་ལ་རང་རང་གི་བཟོས་བསྙེན་བཀུར་བྱས་(༢༡༥བ)སོ། །དེ་འགྲོ་བའི་ཚེ་བཟོ་བོ་དག་ལ་བགོ་བཤའ་བྱས་སོ། །རྫ་མཁན་ཞིག་ཀྱང་དེའི་གན་དུ་སོང་བ་དང༌། དེད་དཔོན་དེས་མཐོང་ནས། ཁྱོད་ཧ་ཅང་འཕྱིས་པས་ངའི་པ་ཎ་ཐམས་ཅད་བྱིན་ཟིན་ཏོ། །རྟེའུ་དེ་ལ་བཀྲ་མི་ཤིས་པའི་བློ་སྐྱེས་པས། རྟེའུ་འདི་འདོད་ན་ཁྱེར་ཅིག །མ་ནོངས་ཏེ་འདིས་རྫ་མ་གཅོག་གོ །རྟེའུ་དེས་རྫ་མཁན་གྱི་རྐང་པ་གཉིས་ལ་བལྡགས་པ་དང༌། རྟེའུ་དེ་ལ་ཆགས་ནས་རང་གི་ཁྱིམ་དུ་ཁྲིད་དོ། །ཆུང་མས་སྨྲས་པ། རྗེའི་སྲས། ཁྱོད་ཀྱིས་དེ་ལ་ཅུང་ཟད་ཐོབ་བམ། རྟེའུ་འདི་ཐོབ་བོ། །འདིས་རྫ་མ་གཅོག་གོ་བྱས་པས། རྟེའུ་དེས་དེའི་རྐང་པ་གཉིས་ལ་བལྡགས་པ་དང༌། དེ་ཡང་ཆགས་སོ། །རྟེའུ་དེ་རྫ་སོ་བཏང་བ་ང་མ་བཏང་བ་དག་གི་ནང་དུ་འགྲོ་བ་ན་འགའ་ཡང་མི་གཅོག་པ་དང༌། རྫ་མཁན་གྱིས་ཆུང་མ་ལ་སྨྲས་པ། རྟེའུ་བཟང་པོ་ཞིག་སྟེ་ཤེས་བཞིན་དུ་འགྲོའོ། །རྫ་མཁན་དེ་ས་ལེན་དུ་སོང་བ་དང་རྟེའུ་དེ་ཡང་ཕྱི་བཞིན་འབྲངས་ཏེ་འོང་ངོ༌། །
དེས་སས་སྒྲོ་བ་བཀང་བ་དང༌། རྟེའུ་དེས་རྒྱབ་བཟེད་ནས་ས་བཀལ་ཏེ་འོངས་པ་དང༌། དེས་ཆུང་མ་ལ་སྨྲས་པ། རྟེའུ་འདི་བཟང་པོ་ཞིག་སྟེ། ཁོ་བོས་ཕྱིན་ཆད་ས་འཁུར་དགོས་པར་མ་འགྱུར་རོ། །ཁོ་བོས་ས་དགལ་བར་བྱའི་ཁྱོད་ཀྱིས་འདིར་ཕོག་ཅིག་ཟེར་ནས་ཕུབ་མ་དང་སྲན་ཕུབ་བྱིན་ནོ། །དེའི་ཚེ་ཝཱ་ར་ཎཱ་སཱི་ན་རྒྱལ་པོ་ཚངས་བྱིན་ཞེས་བྱ་བ་རྒྱལ་སྲིད་བྱེད་པ་ན་དེའི་རྟ་ཅང་ཤེས་ཤི་ནས་ཉི་འོག་གི་རྒྱལ་པོ་རྣམས་ཀྱིས་ཐོས་པ་དང༌། རྒྱལ་པོ་ཚངས་བྱིན་ལ། ཡང་ན་རྒྱུ་དཔྱ་འཇོལ། ཡང་ན་ཕྱི་རོལ་ཏུ་མ་འབྱུང་ཞིག །དེ་ལྟར་མི་བྱེད་ན་གཉའ་བ་ནས་བཏགས་ཏེ་བཀྲིའོ་ཞེས་སྤྲིངས་པས། རྒྱལ་པོ་ཚངས་བྱིན་དཔྱ་འཇལ་བར་ཡང་མི་བྱེད། ཕྱི་རོལ་ཏུ་ཡང་མི་འགྲོའོ། །དེད་དཔོན་དེའང་ཝཱ་ར་ཎཱ་སཱིར་ཕྱིན་པ་རྒྱལ་པོས་ཐོས་ནས་བློན་པོ་རྣམས་ལ་སྨྲས་པ། རྟ་ཅང་ཤེས་ཚོལ་ཅིག །དེད་དཔོན་གྱི་གན་དུ་སོང་ནས་རྟ་དེ་དག་མཐོང་བ་ན། གཅིག་ལ་གཅིག་སྨྲས་པ། རྟ་འདི་དག་ཅང་ཤེས་ཀྱིས་བཏུལ་བ་ཤ་སྟག་ཡིན་ན། འདི་ན་རྟ་ཅང་ཤེས་ནི་མི་སྣང་ངོ༌། །
དེ་དག་གིས་རྒོད་མ་དེ་མཐོང་ནས། རྒོད་མ་འདི་ལས་རྟ་ཅང་ཤེས་བྱུང་ན་དེ་མི་སྣང་ངོ༌། །དེད་དཔོན་ལ། ཁྱོད་ཀྱིས་རྟ་འགའ་ཞིག་བཙོངས་པའམ། གཞན་ལ་ཕྱིན་པ་ཡོད་དམ། མ་བཙོངས་མོད། མཆོད་གྱུར་གྱི་གནས་སུ་རྟེའུ་ཞིག་བཀྲ་མི་ཤེས་སོ་སྙམ་ནས་རྫ་མཁན་ཞིག་ལ་བྱིན་ནོ། །དེ་དག་གིས་གཅིག་ལ་གཅིག་སྨྲས་པ། དེད་དཔོན་འདི་ནི་བླུན་པོ་ཞིག་སྟེ། སྙིང་པོ་བོར་ནས་སྙིགས་མ་དག་དེད་དཔོན་དེ་འདིར་འོངས་སོ། །དེ་དག་གིས་རྒྱལ་པོ་ལ་ཞུས་ཏེ་མཆོད་གྱུར་དུ་ཕྱིན་ནས་རྫ་མཁན་ལ། ཁྱོད་ལ་རྟེའུ་འདིས་ཅི་བྱ། ཁོ་བོ་ས་འགེལ་ལོ། །ཁོ་བོ་ཅག་གིས་བོང་བུ་སྦྱིན་གྱིས། ཁོ་བོ་ཅག་ལ་འདི་བྱིན་ཅིག །ཁོ་བོ་ལ་འདི་ཉིད་མཁོའོ། །གླང་བཞི་དང་ལྡན་པའི་ཤིང་རྟ་སྦྱིན་ནོ། །འདི་ཉིད་མཁོའོ། །དེ་དག་གིས་སྨྲས་པ། གྲོས་གྱིས་ཤིག །བདག་ཅག་སང་འོང་ངོ་ཟེར་ནས་སོང་ངོ༌། །འཇིག་རྟེན་(༢༡༦ན)ཆགས་ནས་རིང་པོ་མ་ལོན་པའི་ཚེ་དུད་འགྲོས་ཀྱང་སྨྲ་ཤེས་པས། རྟེའུ་དེས་རྫ་མཁན་ལ་སྨྲས་པ། དེ་དག་ཅི་འདོད། ཁྱོད་འདོད་དོ། །ཅིའི་ཕྱིར་མི་སྦྱིན། ཁྱོད་ཀྱི་སྙིང་ལམ་ན་ཁོ་བོ་ཇི་སྲིད་འཚོའི་བར་དུ་ཁྱོད་ཀྱི་ས་ཁལ་བྱེད་ཅིང་ཕུབ་མ་དང་སྲན་ཕུབ་ཟ་སྙམ་མམ། ཁོ་བོས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་བཀུར་ཞིང༌། གསེར་གྱི་སྣོད་ནས་བཟའ་བཅའི་ཟིལ་མངར་གྱིས་གཅིན་པ་དག་བཟའ་བར་བྱ་དགོས་སོ། །དེ་དག །རྟེའུ་ཟེར་ན་དེ་དག་ལ། རྟ་ཅང་ཤེས་བརྗོད་པ་ངོ་ཚའམ་ཞེས་རྗོད་ཅིག །རིན་གྱི་ཕྱིར་བྱིན་ཅིག་ཟེར་ན། ཡང་ན་གསེར་འབུམ་བྱིན་ཅིག །ཡང་ན་འདིའི་བླ་གཡས་པས་གསེར་ཇི་ཙམ་འདྲེན་ནུས་པ་བྱིན་ཅིག་ཅེས་རྗོད་ཅིག །ནང་པར་བློན་པོ་བྱུང་བ་ལ་དེ་ལྟར་བྱས་པས། དེ་དག་གིས་བསམས་པ། གླེན་པ་འདིས་འདི་རྟ་ཅང་ཤེས་སམ་རྟེའུ་ཡིན་ཡང་རུང་གི་རིན་གྱི་ཕྱིར་བྱིན་ཅིག །ཡང་ན་གསེར་འབུམ་བྱིན་ཅིག །ཡང་ན་འདིའི་བརླ་གཡས་པས་ཇི་ཙམ་འདྲེན་ནུས་པའི་གསེར་བྱིན་ཅིག །གསེར་འབུམ་བྱིན་ནས་རྟ་དེ་ཁྲིད་དེ་རྟ་བྲེས་ཀྱི་དང་པོར་བཏགས་ནས་རྩྭ་དང་ཆག་བྱིན་པ་དང་མི་ཟའོ། །རྒྱལ་པོས་སྨྲས་པ། འདི་མི་ནའམ། ན་བ་མ་ལགས་ཏེ་འདི་ཉིད་ལ་དྲིའོ་ཞེས་འདུལ་སྦྱོང་བས་སྨྲས་པ། མགྱོགས་འགྲོ་གང་ཚེ་རན་ཆས་ཆུ་མེད་པའི། །རྫ་མཁན་བྲེས་ན་མགོ་བསྐམས་རུས་པགས་ཙམ། །རང་སོས་གཏུབས་པའི་རྩྭ་དག་ཟ་བ་སོམ། །དེ་ཚེ་མང་པོས་ཁྱོད་ལ་བསམས་མ་གྱུར། །འདི་ན་མགྱོགས་པ་སྟོང་གི་ཐོག་འདྲེན་ཞིང༌། །རྒྱལ་པོས་ཆིབས་རན་མཆོག་དག་ཉེར་བསྟབས་པ། །ཅི་ཕྱིར་མི་ཟ་དྲིས་པ་བདག་ལ་སྨྲོས། །རྟས་སྨྲས་པ། འདིར་ཁྱོད་ཁོ་བོའི་ཡོན་ཏན་དེ་ཉིད་ཤེས། །ཁོ་བོ་ཇི་བཞིན་ཁྱོད་ཀྱིས་མ་རིག་མིན། །མཁས་པས་བརྙས་ན་ས་སྟེང་མི་རྒྱུ་ཞིང༌། །ཁོ་བོ་འདིར་ནི་མྱུར་དུ་ཤི་ཡང་བླ། །སྐྱེ་བོ་ངན་པས་ཡུན་རིང་བརྙས་གྱུར་ཀྱང་། །ཞི་བ་གལ་ཏེ་ཡོན་ཏན་དེ་བརྙས་ཡིན། །འདུལ་སྐྱོང་བས་རྒྱལ་པོ་ལ་སྨྲས་པ། འདི་བྲོ་འཚལ་བ་མ་ལགས་ཀྱི། རིམ་པ་མ་བགྱིས་པའམ་རན་དང་ཆས་མི་ཟའོ། །
རིམ་པ་ཇི་ལྟར་བྱ། དཔག་ཚད་ཕྱེད་དང་གསུམ་ཚུན་ཆད་མཛེས་པར་བགྱི། །རྒྱལ་པོ་དཔུང་ཚོགས་དང་བཅས་པས་བསུ་བར་བགྱི། དེ་བཞག་པའི་ཕྱོགས་དེ་ཟངས་མའི་གླེགས་བུས་གཡོག་པར་བགྱི། སྲས་ཐུ་བོས་གདུགས་སྲོག་ཤིང་བརྒྱ་པ་གཟུང་བར་བགྱི། སྲས་མོ་ཐུ་མོས་གསེར་གྱི་རྔ་ཡབ་ཀྱིས་སྦྲང་མ་བསྐྱབ་པར་བགྱི། བཙུན་མོ་དམ་པས་གསེར་གྱི་སྣོད་ནས་ཟིལ་མངར་གྱིས་གཅིན་པའི་བཟང་ཆས་ཀྱིས་བསྟབ་པར་བགྱི། བློན་པོ་དམ་པས་གསེར་གྱི་ཆོལ་ཟངས་སུ་རྟུག་པ་བོར་(༢༡༦བ)བར་བགྱིའོ། །རྒྱལ་པོས་སྨྲས་པ། ཅི་འདི་རྒྱལ་པོ་ཡིན་ནམ། དུས་ཐམས་ཅད་དུ་བགྱི་མི་འཚལ་ཏེ། དགུང་བདུན་གྱི་བར་དུའོ། །དེ་ནས་བཀའ་ཉན་པར་འགྱུར་རོ། །འདས་པ་གང་ལགས་པ་དེ་མི་བགྱིད་ཀྱང་ལྷག་མ་དེ་མཛད་དུ་གསོལ། དེ་ནས་རྒྱལ་པོས་ཟངས་མའི་གླེགས་བུས་དཀྲི་བ་མན་ཆད་བྱས། རྒྱལ་པོ་སྐྱེད་མོས་ཚལ་དུ་འགྲོ་བ་ལ་ཅང་ཤེས་ཕུལ་པས་དེས་རྒྱབ་སྨད་ནས་རྒྱལ་པོ་ན་རེ། འདི་ནའམ། མིན་ཏེ་རྒྱལ་པོ་ཆིབས་དཀའ་སྙམ་པའོ། །
རྒྱལ་པོས་ཞོན་ཏེ་སོང་བ་དང་ཆུ་བྱུང་ནས་དེ་ལ་མི་འགྲོ་བ་དང༌། འདི་མི་འཇིགས་སམ། མིན་ཏེ། ཆབ་ཀྱིས་རྒྱལ་པོ་བཤེས་ན་མི་རུང་སྙམ་པའོ། །དེའི་རྔ་མ་གསེར་གྱི་སྦུབས་སུ་བཅུག་པ་དང་ཆུ་ལ་བརྒལ་ཏོ། །སྐྱེད་མོས་ཚལ་དུ་ཕྱིན་པ་དང་ཉི་འོག་གི་རྒྱལ་པོས་ཐོས་ནས་གྲོང་ཁྱེར་གྱི་སྒོ་དག་བཟུང་ངོ༌། །དེ་ཐོས་ནས་ཅང་ཤེས་ལ་ཞོན་པ་དང༌། ཝཱ་ར་ཎཱ་སཱི་དང་སྐྱེད་མོས་ཚལ་གྱི་བར་ན་རྫིང་བུ་ཚངས་ལྡན་ཞེས་བྱ་བ་ཨུཏྤལ་དང་ཀུ་མུ་དས་གང་བ་ཞིག་གིས་ཆོད་ནས་ཅང་ཤེས་ཀྱིས་བསམས་པ། རྒྱལ་པོ་གནོད་པ་དང་ཉམ་ང་བར་གྱུར་ན་མི་རུང་ངོ་སྙམ་ནས་པདྨའི་འདབ་མ་དག་གི་སྟེང་དུ་རྐང་པ་བཞག་སྟེ་སྒེའུ་ཆུང་ནས་ཝཱ་ར་ཎཱ་སཱིར་ཞུགས་སོ། །རྒྱལ་པོ་དགའ་ནས། འདི་ལ་ཅི་སྦྱིན། རྒྱལ་སྲིད་ཀྱི་ཕྱེད་སྦྱིན་ནོ། །འདི་དུད་འགྲོ་ཡིན་པས་འདི་ལ་རྒྱལ་སྲིད་ཀྱི་ཕྱེད་ཀྱིས་ཅི་བྱ་སྟེ། འདི་ལ་བརྟེན་ནས་ཞག་བདུན་དུ་སྦྱིན་པ་དག་སྦྱིན། བསོད་ནམས་དག་བྱ་ཞིང༌། དུས་མ་ཡིན་པར་ཀུ་མུ་དའི་དུས་སྟོན་བྱའོ་ཞེས་བྱས་པས། དེད་དཔོན་དེས་མི་ལ་དྲིས་པ། ཅིའི་ཕྱིར་དུས་སྟོན་མིན་པར་ཀུ་མུ་དའི་དུས་སྟོན་བྱུང༌། རྒྱལ་པོས་མཆོད་གྱུར་གྱི་གནས་ནས་རྫ་མཁན་ཞིག་ལས་གསེར་འབུམ་གྱིས་ཅང་ཤེས་ཉོས་པ་དེས་རྒྱལ་པོའི་སྲོག་བཏོན་པས་དེ་ལ་བརྟེན་ནས་བྱས་སོ། །དེད་དཔོན་གྱི་བསམ་པ་ལ་རྟེའུ་དེ་རྟ་ཅང་ཤེས་སུ་གྱུར་པ་ཡིན་ནམ་བལྟའོ་སྙམ་ནས་སོང་བ་དང༌། ཅང་ཤེས་ཀྱིས་སྨྲས་པ། ཀྭ་ཡེ་ནང་རྗེ། ཁྱོད་ཀྱི་རྟ་ལྔ་བརྒྱས་ཅི་ཐོབ། གསེར་འབུམ་མོ། །ཁོ་བོ་གཅིག་པུས་ཀྱང་རྫ་མཁན་དེ་ལ་གསེར་འབུམ་བྱིན་ནོ། །དེ་བརྒྱལ་ནས་ས་ལ་འགྱེལ་བ་དང༌། ཆུས་བཏབ་པས་སོས་ནས་རྟ་ཅང་ཤེས་ཀྱིས་རྐང་པ་གཉིས་ལ་གཏུགས་ཏེ་བཟོད་པ་གསོལ་ཏོ། །དེའི་དུས་ཀྱི་དེད་དཔོན་ནི་འཚོ་བྱེད་དོ། །རྟ་ཅང་ཤེས་ནི་ལམ་པའོ། །དགེ་སློང་རྣམས་ཀྱིས་ཞུས་པ། ལམ་པས་ལས་ཅི་བགྱིས་པས་སྟོན་པས་སེམས་སྒྱུར་བ་ལ་མཁས་པའི་མཆོག་ཏུ་ལུང་བསྟན། སྨོན་ལམ་གྱི་དབང་གིས་ཏེ། འདི་སངས་རྒྱས་འོད་སྲུངས་ཀྱི་བསྟན་པ་ལ་རབ་ཏུ་བྱུང་བ་ན། འདིའི་མཁན་པོ་དེ་སེམས་སྒྱུར་པ་ལ་མཁས་པའི་མཆོག་ཏུ་ལུང་བསྟན་ཏོ། །འདིས་ཚེ་ཇི་སྲིད་བར་ཚངས་པར་སྤྱད་ཀྱང་ཡོན་ཏན་གྱི་ཚོགས་མ་ཐོབ་བར། འཆི་བའི་ཚེ། བདག་གིས་ཚེ་ཇི་སྲིད་པར་ཚངས་པར་སྤྱད་པའི་དགེ་བ་འདིས་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་(༢༡༧ན)ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཐོབ་ཅིང༌། སེམས་སྒྱུར་བ་ལ་མཁས་པའི་མཆོག་ཏུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་པས་སོ། །
ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད་ནི། དགའ་བྱེད་ཀྱིས་དགེ་སློང་མ་ལ་ཆོས་སྟོན་དུ་ཕྱིན་པས། ཨུཏྤ་ལའི་མདོག་འཁོར་ལྔ་བརྒྱ་དང་བཅས་པ་ཕྱག་འཚལ་ཏེ་འདུག་གོ །དེས་བུད་མེད་ཀྱི་ལུས་ནི་ཤེས་རབ་ཆུང་ངོ་སྙམ་ནས་མདོར་བསྡུས་ཏེ་གསུངས་པ་དང༌། ཨུཏྤ་ལའི་མདོག་ཤེས་རབ་ཆེ་བས། གོང་ནས་གོང་དུ་དྲི་བ་བྱེད་ཅིང༌། ལན་བཏབ་པས་ཉི་མ་ནུབ་ནས། དེ་དག་ལངས་ཏེ་སོང་བ་དང༌། མཉན་ཡོད་ཀྱི་སྒོ་བཅད་ནས་སྒོ་བ་ལ། སྒོ་ཕྱེ་ཞིག །ལྡེ་མིག་རྒྱལ་པོའི་ཕོ་བྲང་དུ་ཁྱེར་རོ། །དེ་དག་གིས་མཉན་ཡོད་དང་ཐག་ཧ་ཅང་མི་རིང་བའི་ཀུན་དགའ་ར་བ་ཞིག་ཏུ་ཤིང་ལྗོན་པ་རྒན་རིམ་བཞིན་དུ་བསྐོས་ནས་འདུག་པ་དང༌། ཨ་ཡེ་ཨ་ཡེ་ཞེས་སྒྲ་མཐོན་པོས་བྱུང་བ་གཡོན་ཅན་ལྔ་བརྒྱ་ཙམ་གྱིས་ཐོས་ཏེ་བཙུན་མོའི་འཁོར་དུ་ཤེས་ནས་གཞོམ་པར་འདོད་པ་དེ་ཨུཏྤ་ལའི་མདོག་གིས་ཤེས་ནས། འཕགས་སྐྱེས་པོའི་དཔུང་སྤྲུལ་ཏེ་རྔ་པ་ཊ་ཧ་བརྡུངས་པ་དང་བྲོས་སོ། །ཨུཏྤ་ལའི་མདོག་གིས་དགེ་སློང་མ་རྣམས་ལ་སྨྲས་པ། འདི་ལྟར་གྱུར་གྱིས་ཁད་ཀྱིས་དལ་བུ་དལ་བུས་ལག་བརྡས་སྐོས་ཤིག །ནངས་པར་སྔར་ལངས་ཏེ་སོང་བ་དང་ཁྱིམ་པ་རྣམས། ཤཱཀྱའི་བུ་རྣམས་ཀྱི་ཆོས་འདྲེ་བ་དང༌། ལྷག་པར་འདྲེ་ཞིང་ཚངས་པར་སྤྱོད་པ་བཟང་ངོ་ཟེར་རོ། །དགེ་སློང་དོན་ཉུང་ངུ་དག་འཕྱ་ནས་གསོལ་བས། བྱུང་བ་འདི་དང་སོགས། ཉི་མ་ནུབ་ཀྱི་བར་དུ་ཆོས་སྟོན་ན་ལྟུང་བྱེད་དོ། །ཨུཏྤ་ལའི་མདོག་གིས་དགེ་སློང་མ་ལྔ་བརྒྱ་གཡོན་ཅན་གྱི་འཇིགས་པ་ལས་བསྐྱབས་པ་ལ་གཟིགས། ད་ལྟར་དུ་མ་ཟད་དེས་སྔོན་ཡང་དོན་མཐུན་མང་པོ་སེངྒེའི་འཇིགས་པ་ལས་བསྐྱབས་པ་ཉོན་ཅིག །སྔོན་རི་བྲགས་ཤིག་ན་ཁྱིམ་བདག་ཅིག་གིས་ཆུང་མ་ལ། ཁོ་བོ་ཟོང་ཐོགས་ནས་ཡུལ་གཞན་དུ་འགྲོའོ། །རྗེའི་སྲས། བདག་ཀྱང་མཆིའོ། །ལམ་དུ་ཁྱོད་ཀྱི་གཡོག་སུས་བྱེད་འདིར་འདུག་ཅིག །དེ་ངུ་བ་དང༌། ཞོ་ཤས་འཚོ་བ་དག་གིས། ཇོ་བོ། འདི་ཅིའི་ཕྱིར་ངུར་བཅུག །འདིའི་ཕྱིར་རོ། །ཅིའི་ཕྱིར་མི་འཁྲིད། འདིའི་གཡོག་སུས་བྱེད། བདག་ཅག་གིས་བགྱིའོ། །དོན་མཐུན་རྣམས་དགོན་པ་ཞིག་ཏུ་མཚན་མོ་བཏབ་པ་དང༌། དོན་མཐུན་དེ་དག་ལམ་གྱིས་དུབ་པས་ཉལ་ནས་ཆུང་མ་དེས་མེལ་ཚེ་བྱེད་པ་ན་སེངྒེ་འོངས་ནས། དེས་མགལ་དུམ་ཐོགས་ཏེ་བསྡིགས་པས་བྲོས་སོ། །ལྷས། གང་ཕྱིར་བྱ་བ་ཐམས་ཅད་ལ། །སྐྱེས་པ་འབའ་ཞིག་མཁས་པ་མིན། །དེ་དང་དེ་ལ་བུད་མེད་ཀྱང༌། །ཟིན་ལ་མཁས་པ་ཉིད་དུ་འགྱུར། །དེའི་དུས་ཀྱི་ཁྱིམ་བདག་གི་ཆུང་མ་ནི་ཨུཏྤ་ལའི་མདོག་ཡིན་ལ། དོན་མཐུན་པ་ལྔ་བརྒྱ་ནི་དགེ་སློང་མ་ལྔ་བརྒྱ་(༢༡༧བ)པོ་འདི་ཡིན་ནོ། །
ཟས་ཅུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་ནི། སྟོན་པ་མཉན་ཡོད་ནའོ། །དགའ་བྱེད་སྐྱེ་དགུའི་བདག་མོ་ཅན་སོང་སྟེ། དེ་ལ་དོན་དང༌། ཚིག་དང༌། ཡི་གེ་ཟབ་པས་ཆོས་བསྟན་ཏོ། །བུད་མེད་ནི་ཤེས་རབ་འཆལ་བའི་ཕྱིར་མ་གོ་སྟེ་དྲི་མ་ནུས་སོ། །དེ་ནས་སྐྱེ་དགུའི་བདག་མོས་སྟོན་པ་ལ་དེ་ཞུས་ཏེ། སྟོན་པས་སྦྱིན་པ་ནི་མི་འཇིགས་པའི་རྒྱུར་གསུངས་ན། སྟོན་པས་གནང་ན་དགེ་སློང་མ་རྣམས་ཀྱིས་དགེ་སློང་ལ་ཀུན་དགའ་བར་འགྱུར་བ་དག་བགྱིའོ། །གནང་གི་དེ་ལྟར་གྱིས་ཤིག །ཇི་ལྟར་བྱ་བ་མ་ཤེས་ནས། བཅའ་བ་ལྔ་དང༌། བཟའ་བ་ལྔ་དང༌། ལྷུང་བཟེད་དང༌། ཆོས་གོས་དང༌། དྲ་བ་དང༌། ཕོར་བུ་སོགས་ཀྱིས་བྱའོ། །དགེ་སློང་མ་ཞིག་གིས་འོ་ཐུག་ཁྱེར་ཏེ་རྒྱལ་བྱེད་ཚལ་དུ་སོང་བ་དང༌། ཉེ་དགའ་སྒོ་ན་འདུག་པས་མཐོང་ནས། ཁྱེར་ཏེ་འོངས་པ་འདི་ཅི་ཡིན། འོ་ཐུག་གོ །སུ་ལ་ལྡུད། དགའ་བྱེད་ལའོ། །ཉེ་དགས་ཀྱང་འོ་ཐུག་རྙེད་ན་རྟག་པར་དགེ་སློང་མ་ལ་སྟོན་པར་འགྱུར་རོ། །དེ་བཞིན་དུ་ཁ་ཅིག་གིས་ཞོ་དང༌། ཁ་ཅིག་གིས་ཧྭགས་ཀྱི་ལ་དུ་ཁྱེར་འོངས་པ་དང༌། དགའ་བྱེད་བཟང་པོའི་ཆོས་ཀྱིས་དགེ་སློང་མ་ལ་སྟོན་གྱི། ཟས་ཅུང་ཟད་ཙམ་གྱི་ཕྱིར་སྟོན་པར་མི་སེམས་སོ། །དགེ་སློང་དོན་ཉུང་དུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ནོ་ཞེས་སྨྲ་ན་ལྟུང་བྱེད་དོ། །
གོས་སྦྱིན་པའི་ལྟུང་བྱེད་ནི། སྟོན་པ་མཉན་ཡོད་ནའོ། །ཚོང་དཔོན་ཞིག་རྒས་ནས་ནོར་ཟད་དེ་ཆུང་མ་ལ། ཁོ་བོས་ནོར་སྒྲུབ་མི་ནུས་པས་རབ་ཏུ་འབྱུང་ངོ༌། །བདག་ཀྱང་རབ་ཏུ་འབྱུང་ངོ༌། །དེས་དེ་སྐྱེ་དགུའི་བདག་མོ་ཆེན་མོའི་དྲུང་དུ་ཁྲིད་ནས། འདི་རབ་ཏུ་དབྱུང་དུ་གསོལ། དེས་དེ་རབ་ཏུ་ཕྱུང་ཞིང་བསྙེན་པར་རྫོགས་སོ། །དེས་ཚོང་དཔོན་ལ། བུད་མེད་ནི་སྲེད་པ་སྤྱད་པ་ལགས་པས་དུས་དུས་སུ་སྤྱོན་ཅིག །དེའང་རྒྱལ་བྱེད་ཚལ་དུ་དགེ་སློང་ཞིག་གི་གན་དུ་རབ་ཏུ་བྱུང་ངོ༌། །ཚོང་དཔོན་རབ་ཏུ་བྱུང་ངོ་ཞེས་དེ་གྲགས་ཤིང་བསོད་ནམས་ཆེ་བས་དེས་ཆོས་གོས་དང་བསོད་སྙོམས་དང་རྙེད་པ་མང་པོ་གྲུབ་བོ། །དེ་དུས་གཅིག་ན་སྣམ་སྦྱར་དམར་སེར་གྱོན་ཏེ་དབྱར་ཁང་དུ་སོང་བ་དང༌། དགེ་སློང་མ་དེས་ཕྱག་འཚལ་ནས་སྣམ་སྦྱར་དེ་ལ་ཡང་ཡང་རྟོག་གོ །སྲིང་མོ། སྣམ་སྦྱར་འདི་འདོད་དམ། ལྷའི་གནས་ཀྱི་ལྷག་མ་བཞིན་དུའོ། །དེས་དེ་ལ་བྱིན་ནོ། །སྟོན་པས། ཀོ་ས་ལར་ལྗོངས་རྒྱུར་གཤེགས་ཀྱིས་ཆོས་གོས་ཀྱི་ལས་གྱིས་ཤིག་གསུངས་ནས་དགེ་སློང་དང་བཅས་པ་ཀོ་ས་ལར་གཤེགས་ཏེ་འཁོར་ལ་གཟིགས་པས་དགེ་སློང་དེ་སྣམ་སྦྱར་མེད་པར་གཟིགས་ནས་ཀུན་དགའ་བོ་ལ། དགེ་སློང་དབྱར་གནས་པ་དག་གིས་ཆོས་གོས་ཀྱི་རྙེད་པ་མ་གྲུབ་བམ། གྲུབ་བོ། འོ་ན་ཅིའི་ཕྱིར་དགེ་སློང་འདི་སྣམ་སྦྱར་མེད་པར་ལྗོངས་རྒྱུར་འགྲོ། སྐབས་དེ་རྒྱས་པར་གསོལ་བ་དང༌། དགེ་སློང་དག་དགེ་(༢༡༨ན)སློང་མ་ཉེ་དུ་མ་ཡིན་པ་ལ་གོས་སྦྱིན་ནམ། སྩོལ་ལོ། །དགེ་སློང་མ་ཉེ་དུ་མ་ཡིན་པ་ནི། འདིའི་ཆོས་གོས་གསུམ་ཚང་ངམ་མ་ཚང་སྙམ་དུ་མི་སེམས་པར་ཐོབ་ཚད་ལེན་གྱི། ཉེ་དུ་མ་ནི་བྱིན་ཡང་མི་ལེན་ནོ། །བྱུང་བ་འདི་དང་སོགས། དགེ་སློང་མ་ཉེ་དུ་མ་ཡིན་པ་ལ་གོས་སྦྱིན་ན་ལྟུང་བྱེད་དོ། །
གོས་བྱེད་པའི་ལྟུང་བྱེད་ནི། སྟོན་པ་མཉན་ཡོད་ནའོ། །སྦེད་མའི་ཆོས་གོས་ལྔ་ངན་ཞིང་བརྙིངས་ནས་རས་ཡུག་ཆེན་ཞིག་རྙེད་དེ། འདི་སུས་འཚེམ་སྙམ་དུ་སེམས་ཁོང་དུ་ཆུད་པ་དང་དགེ་སློང་མ་རྣམས་ཀྱིས། ཅིའི་ཕྱིར་སེམས་ཁོང་དུ་ཆུད། ཁོ་མོའི་རྣམ་སྦྱར་སུས་འདྲུབ་མི་ཤེས་སོ། །སྦེད་མ། ཁྱོད་གསེར་གྱི་སྣོད་ཀྱིས་སློངས་མོ་ལ་རྒྱུའམ། འཆར་ཀ་མཁས་སོ། །དེས་མི་འདྲུབ་བོ། །དེ་ལ་སྔར་བཅོལ་ལམ། མ་བཅོལ་ལོ། །ཅིའི་ཕྱིར་ཆུའི་སྒྲ་ཁོ་ན་ལ་ལྷམ་འབུད་དམ། ཚོལ་ཞིག །སྦེད་མ་འཆར་ཀའི་གན་དུ་སོང་བ་དང་འཆར་ཀས་རས་ཡུག་ཆེན་མཐོང་བ་དང་། གོང་ལ་རས་ཡུག་ཆེན་འདི་འདྲའི་སྣམ་སྦྱར་ཡོད་ན་སྙིང་ལས་ཆུང་ངུས་དགེ་བ་ལ་ཏྲོན་བྱེད་པར་འགྱུར་རོ། །བདག་རས་མི་འབུལ་བ་མ་ལགས་ཏེ། བདག་གིས་ཆོས་གོས་ལྔ་བརྙིངས་པས་ཚེམས་ཏེ་སྩོལ་ཅིག །འཆར་ཀས་བསམས་པ། འདི་བཙེམས་ན་བཅུ་གཉིས་སྡེའང་འཚོལ་ལ། མ་བཙེམས་ན་ཚིགས་པའི་གཡར་ཚུས་ཀྱང་མི་སྟེར་བས། ཤིང་སྣོད་དུ་བསྐོལ་བ་བཞིན་དུ་དང་པོ་གང་ཡིན་པ་དེ་ཉིད་ཐ་མར་འགྱུར་བ་དེ་ལྟར་བཙེམ་མོ་སྙམ་ནས། ཞོག་ལ་སོང་ཞིག །དྲུག་སྡེས་མཐོང་ནས། རས་འདི་སུའི་ཡིན། སྦེད་མའིའོ། །འོ་ན་འཁོད་དེ་ཅི་རུང་བ་བཙེམ་མོ་ཟེར་ནས་དྲུབས། འཆར་ཀས་ཚོན་སྣ་ལྔའི་སྐུད་པ་ཁྱེར་ཏེ་འཆག་ཏུ་སོང་ནས་སྣམ་སྦྱར་དེ་ལ་ཚོན་སྣ་ལྔ་པའི་སྐུད་པས་བདག་ཉིད་སྦེད་མའི་མགུལ་ནས་འཁྱུད་པ་བཞིན་སྐུད་རིས་སུ་བཙེམས་ཏེ་ཆོས་གོས་ཀྱི་གདང་ལ་བཞག་གོ །སྦེད་མ་འོངས་པ་དང༌། སྣམ་སྦྱར་བལྟབ་བཞིན་དུ་སྦེད་མའི་ཕྲག་པ་ལ་བཀལ་ཏེ། འདི་ཚོན་གྱིས་མ་བཅལ་བར་དུ་མ་དབྱེ་ཞིག །ལྟུང་བ་དང་བཅས་པར་གྱུར་ཏ་རེ། དེ་དབྱར་ཁང་དུ་སོང་བ་དང༌། དགེ་སློང་མ་རྣམས་ན་རེ། འཆར་ཀས་སྣམ་སྦྱར་ཇི་ལྟར་བཙེམས་བལྟའི་འོན་ཅིག །འཆར་ཀ་ན་རེ། ཚོན་གྱིས་མ་བཅལ་བར་དུ་མ་དབྱེ་ཞིག །ལྟུང་བར་གྱུར་ཏ་རེ་ཟེར་རོ། །དེ་ལ་ལྟུང་བ་ཅི་ཡོད་ཅེས་དེའི་རྒྱབ་ལོགས་སུ་འདུག་སྟེ་སྣམ་སྦྱར་ཧུར་ཅེས་ཕྲོགས་ནས་བལྟས་པས་རི་མོ་མཐོང་སྟེ་རྟ་བགད་བྱས་པས་སྐྱེ་དགུའི་བདག་མོས་ཐོས་ནས། ཅི་དགོད། དེ་དག་གིས་སྨྲས་པ། འཆར་ཀས་མི་མཛེས་པ་བྱས་པ་ལ་གཟིགས། དྲུག་སྡེས་བསྟན་པ་འཇིག་པར་བྱེད་དོ་ཞེས་པའི་སྐབས་དེ་གསོལ་བས། བྱུང་བ་འདི་དང་སོགས། དགེ་སློང་མ་ཉེ་དུ་མ་ཡིན་པའི་གོས་བྱེད་ན་ལྟུང་བྱེད་དོ། །
ལམ་དུ་འགྲོ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །དྲུག་སྡེས། ལྷུང་བཟེད་ནག་པོ་ཅན་འདི་དག་རྐང་པ་(༢༡༨བ)སྤྲེའུའི་ཞག་གིས་སོགས་སྔར་དང་འདྲ། བཅུ་གཉིས་སྡེ་ཅན་སོང་ནས། སྲིང་མོ་དག །ཁྱེད་ཅག་བལྟས་ཀྱིས་ཁོ་བོ་ཅག་ལྗོངས་རྒྱུར་འདོང་ངོ༌། །དེ་དག་ངུས་པ་དང༌། ངུར་ཅི་ཡོད། ཁྱེད་ལྗོངས་རྒྱུར་བཞུད་ན་བདག་ཅག་ལ་རྒྱལ་བྱེད་ཚལ་སྟོངས་པར་འགྱུར་རོ། །སྟོན་པ་འཁོར་བཅས་བཞུགས་ན་ཁྱེད་བདག་ཅག་ལ་དེ་སྐད་ཟེར་རམ། དེ་དག་བདག་ཅག་མཐོང་བར་ཡང་མི་དགའ་ན། ཆོས་སྟོན་པར་ག་ལ་འགྱུར། ཉེ་དགའ་ན་རེ། སྲིང་མོ་དག །འོ་ན་ལྷན་ཅིག་འདོང་ངོ༌། །སྦོམ་དགའ་མོས་སྨྲས་པ། དགེ་སློང་མ་དགེ་སློང་དང་ལྷན་ཅིག་འགྲོར་རུང་ངམ། ལེགས་པར་རུང༌། ཤིན་ཏུ་རུང་ངོ༌། །སུས་བཀག །ལམ་བརྒྱགས་མང་པོ་སྟ་གོན་གྱིས་ཤིག །སྟ་གོན་བྱས་པ་དང༌། དྲུག་སྡེ་དག་དབྱར་ཁང་དུ་སོང་བ་ལ། ཞལ་ཚུས་གསོལ་ཅིག །དེ་དག་གིས་དབྱར་ཚུས་བྱས་པས་ལམ་བརྒྱགས་ཐམས་ཅད་དུ་ཟད་ནས། སྲིང་མོ་དག །ལམ་བརྒྱགས་ཇི་ཙམ་སྟ་གོན་བྱས་བལྟའི་འོན་ཅིག །ཁྱེད་ཀྱིས་གསོལ་བ་དེ་དག་ལགས་སོ། །ལམ་བརྒྱགས་དེ་ཙམ་གྱིས་ལྗོངས་རྒྱུ་ག་ལ་ནུས། ལམ་དུ་ལྷག་པར་བཀྲེས་པར་འགྱུར་གྱིས་ལམ་བརྒྱགས་མང་པོ་ལྟ་གོན་གྱིས་ཤིག །ལམ་བརྒྱགས་མང་པོ་སྟ་གོན་བྱས་ནས་ལྗོངས་རྒྱུར་འཕགས་སོ། །བསོད་སྙོམས་པ་ཞིག་ཀྱང་དེ་དག་དང་ལྷན་ཅིག་ལྗོངས་རྒྱུར་འཕགས་པ་ལ་དགེ་སློང་རྣམས་ཀྱིས། འདི་དག་གིས་མཐོ་འཚམ་པར་འགྱུར་གྱིས་མ་འགྲོ་ཞིག །ཁོ་བོ་ལ་ཐལ་བས་མི་གནོད་དོ་ཟེར་ནས་སོང་ངོ༌། །དེ་དག་མཚམས་ཀྱི་ཕྱི་རོལ་ཏུ་སོན་པའི་ཚེ། དགའ་བོ་ཉེ་དགའ། བདག་ཅག་གིས་ཡུན་ཅི་སྲིད་དུ་གཞན་གྱི་སྤྱོད་ལམ་གྱིས་འཁོད་པར་བྱས། ཚུར་ཤོག །རང་རང་གི་སྤྱོད་ལམ་གྱིས་འཁོད་པར་བྱའོ་ཞེས་དང་པོར་དགའ་བོ་འདུག་ནས། དེའི་འོག་ཏུ་དགའ་མོ། དེ་ནས་དགའ་བོའི་ལྷན་ཅིག་གནས་པ། དེ་ནས་དགའ་མོའི་ལྷན་ཅིག་གནས་པ། དེ་བཞིན་དུ་ཉེ་དགའ་དང་གཙུག་དགའ་མོ་ལ་སོགས་པའང་སྤེལ་མར་བཀོད་དེ་དོང་ངོ༌། །བྲམ་ཟེ་ཞིག་ན་རེ། འདི་ནི་དགེ་སྦྱོང་ངོ༌། འདི་དེའི་ཆུང་མ། འདི་དེའི་བུ། འདི་དེའི་མནའ་མ། འདི་དེའི་ཚ་བོ། འདི་དེའི་ཚ་བོའི་ཆུང་མ་ཡིན་པར་ཤེས་སོ། །ཉེ་དགས་ཐོས་ནས། བཀྲེན་པ། ཁྱོད་ཀྱི་གཉའ་བ་རྡོག་པས་མནན་ནས་འདི་ཁོ་བོའི་ཆུང་མ་ལ་སོགས་པ་ཡིན་ནོ། །བསོད་སྙོམས་པ་དེས། བདག་ཤི་བ་ནི་བླའི། འདི་དག་དང་འགྲོགས་པ་ནི་དེ་ལྟ་མ་ཡིན་ནོ་ཞེས་ཕྱིར་ལོག་པ་དང༌། བདེ་བར་བརྒྱུས་སམ། ཇི་ལྟར་བདེ་བར་བརྒྱུས། དྲུག་སྡེས་བསྟན་པ་འཇིག་པར་བྱེད་དོ་ཟེར་བའི་སྐབས་དེ་གསོལ་བ་དང༌། བྱུང་བ་འདི་དང་སོགས། དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་ལྟུང་བྱེད་དོ། །སྟོན་པ་མཉན་ཡོད་ནའོ། །
དགེ་སློང་མ་མང་པོ་རྒྱལ་པོའི་ཁབ་ཏུ་(༢༡༩ན)དབྱར་གནས་ནས། སྟོན་པ་ལ་ཕྱག་འཚལ་བའི་དོན་མཐུན་བཙལ་བ་དང་དགེ་སློང་དང་བཅས་པའི་དོན་མཐུན་མཐོང་སྟེ། དགེ་སློང་མེད་པའི་དོན་མཐུན་བཙལ་ལོ་ཟེར་ནས་བཙལ་ཡང་མ་རྙེད་པ་དང༌། དོན་མཐུན་འདི་ཉིད་དང་མགོ་སྣང་ཙམ་གྱིས་འདོང་ངོ་ཟེར་ནས་སོང་བས་ཆོམ་རྐུན་པས་བཅོམ་ནས་མཉན་ཡོད་དུ་ཕྱིན་པ་དང༌། བདེ་བར་བརྒྱུས་སམ། ཅིའི་ཕྱིར་བདེ་བར་བརྒྱུས། ཆོམ་རྐུན་པས་བཅོམ་མོ། །སྟོན་པས་བདག་ཅག་བཏང་བ་ལྟར་ཡ་མཚན་དགུ་ཅན་དགུ་བཅུ་རྩ་དྲུག་གིས་ཀྱང་མ་བཏང་ངོ་ཟེར་བ་དེ་གསོལ་བས། དེ་ལྟ་བས་ན་དུས་མ་གཏོགས་སོ། །དགེ་སློང་དག་དོན་མཐུན་དང་ལྷན་ཅིག་ལྗོངས་རྒྱུར་དོང་བ་ན་བསོད་སྙོམས་ཀྱིས་ཕོངས་ནས་གསོལ་བས། ལམ་བརྒྱགས་བཀུར་བར་བྱའོ་ཞེས་པ་ནས། གཅིག་གིས་གཅིག་གི་བྱིན་ལེན་ཡང་ངོ་ཞེས་པའི་བར་གསུངས། དགེ་སློང་དག་ལྗོངས་རྒྱུ་ཞིང་སོང་བ་དང་ན་ནས་དགེ་སློང་མས་བོར་ཏེ་སོང་བ་དང༌། གསོལ་བས་གྲོགས་ཚངས་པ་མཚུངས་པར་སྤྱོད་པ་ན་བ་ཡལ་བར་མི་དོར་རོ། །དགེ་སློང་མས་རྐང་པ་ལོགས་ནས་བཟུང་། དགེ་སློང་གིས་མགོ་ལོགས་ནས་བཟུང་བས་དགེ་སློང་མ་འདོད་ཆགས་སྐྱེད་ནས། དགེ་སློང་གིས་རྐང་པ་ལོགས་ནས། དགེ་སློང་མས་མགོ་ལོགས་ནས་བཟུང་བས་སོ། །གྲོང་དུ་ཕྱིན་ནས་ཐམས་ཅད་སྡོད་པ་ན་བསོད་སྙོམས་ཀྱིས་ཕོངས་ནས། གྲོང་དུ་ཕྱིན་པ་ཉིད་ཡིན་ན་སོང་ཡང་ཉེས་པ་མེད་དོ་སོགས།
དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་ནི། དྲུག་སྡེས་སྔར་བཞིན་དུ་བཅུ་གཉིས་སྡེ་ལ། ལྷན་ཅིག་འདོང་ངོ༌། །མ་བཀག་གམ། སྐམ་གྱི་ལམ་ལ་བཀག་པས་གྲུ་ལ་འདོང་ངོ༌། །རུང་ངམ། རུང་གིས་ལམ་བརྒྱགས་མང་པོ་སྟ་གོན་གྱིས་ཤིག །སྟ་གོན་བྱས་པས་དྲུག་སྡེས་གཡར་ཚུས་བྱས་པས་ཟད། མང་པོ་སྟ་གོན་གྱིས་ཤིག །བྱས་ནས་བསོད་སྙོམས་པ་ཞིག་ཀྱང་བཀག་ཀྱང་མ་ཉན་པར་སོང་ངོ༌། །དེ་དག་མཚམས་ཀྱི་ཕྱི་རོལ་ཏུ་སོན་པའི་ཚེ་སོགས་ནས། དྲུག་སྡེས་བསྟན་པ་འཇིག་པར་བྱེད་དོ་ཟེར་བ་དེ་གསོལ་བས། དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིང་གྱེན་དུ་འགྲོའམ་ཐུར་དུ་འགྲོ་ན་ལྟུང་བྱེད་དོ། །སྟོན་པ་མཉན་ཡོད་ནའོ། །ཁྱིམ་བདག་ཅིག་གིས་ཆུ་ཀླུང་གནས་ཅན་གྱི་ཕ་རོལ་ཐི་བ་ཅན་གྱི་ཀུན་དགའ་ར་བར་གཙུག་ལག་ཁང་བརྩིགས་ནས། གཉིས་ཀའི་དགེ་འདུན་སྤྱན་དྲངས་སོ། །དགེ་སློང་མ་ཞིག་དགེ་བ་ལ་བརྩོན་པས། གདུགས་ཚོད་ལ་བབ་ཀྱི་བར་དུ་དགེ་བ་ལ་ཏྲོན་བྱའོ་སྙམ་སྟེ་དེ་སྲིད་དུ་དགེ་བ་ལ་ཏྲོན་བྱས་ནས་ཆུ་འགྲམ་དུ་སོང་བ་དང་དགེ་སློང་གྲུར་ཞུགས་ནས། གྲུ་པས། འཕགས་མ། གྲུར་ཞུགས་ཤིག །ཇེ་སོང་ཞིག་དང༌། གྲུ་གཞན་བཀང་བ་ན་འགྲོའོ། །ཡང་ཡང་དེ་ལྟར་ཟེར་བ་དང་མ་སོང་བས་གྲུ་པས་ཆུའི་(༢༡༩བ)ཕ་རོལ་ཏུ་གྲུ་ཕུར་པ་ལ་བཏགས་ནས་སྐྱེ་བོའི་ཚོགས་ཀྱི་ནང་ན་འདུག་གོ །དགེ་སློང་མ་དེས་བོས་ཀྱང་ཚིག་ཀྱང་མི་སྟེར་བས་དེ་ན་སྡོད་སྡོད་ནས་གདུགས་ཚོད་ཡོལ་ཏེ་དབྱར་ཁང་དུ་སོང་ནས་མདངས་མ་ཡལ་གྱི་བར་དུ་དགེ་བ་ལ་ཏྲོན་བྱས་ནས་ཉལ་ལོ། །དགེ་སློང་མ་རྣམས་ཀྱིས་མཐོང་ནས། ཟས་གཞན་གྱི་ཡིན་ན། ལྟོ་ཡང་གཞན་གྱི་ཡིན་སྙམ་མམ། ཅི་བྱས། གློས་ཕབ་སྟེ་ཉལ་དགོས་པའི་ཟས་ཟོས་སོ། །སུ། ཁྱོད་ཀྱིས་སོ། །ཁོ་མོས་མ་ཟོས་སོ། །འོ་ན་ཅི་ཡིན། རྒྱས་པར་བརྗོད་དེ་གསོལ་བས། ཐད་ཀར་ཕ་རོལ་ཏུ་འགྲོ་བ་མ་གཏོགས་སོ། །
གཅིག་པུ་འདུག་པའི་ལྟུང་བྱེད་ནི། སྟོན་པ་མཉན་ཡོད་ནའོ། །འཆར་ཀ་མཉན་ཡོད་དུ་བསོད་སྙོམས་ལ་ཞུགས་ཏེ་མཐར་གྱིས་སྦེད་མའི་ཁྱིམ་དུ་སོང་ངོ༌། །སྦེད་མས། སྟན་ལ་བཞུགས་ཤིག །འཆར་ཀ་ཁ་ནང་དུ་བལྟས་ཏེ་འདུག །སྦེད་མ་ཁ་ཕྱིར་བལྟས་ཏེ་འདུག་ནས་ཆོས་བསྟན་ཏེ་སྔོན་གྱི་གཏམ་དག་བྱ་བར་བརྩམས་པ་དང་བསོད་སྙོམས་པ་ཞིག་དེར་འོངས་པ་སྦེད་མས་མཐོང་ནས། མ་འོང་གི་བརྡ་བྱས་སོ། །ཁྱོད་ཁོ་བོ་འདུག་བཞིན་དུ་སྐྱེས་པ་གཞན་ལ་བརྡ་བྱེད་དམ། བདག་སྐྱེས་པ་གཞན་དང་བརྡ་མི་བགྱིད་དེ། བསོད་སྙོམས་པ་ཞིག་མཆིས་ནས། བསོད་སྙོམས་ཕུལ་ན་འཕགས་པའི་མབཀའ་མཆིད་སྤངས་པར་འགྱུར་སྙམ་ནས་དེ་ལ། སོང་ཞིག་གི་བརྡ་བགྱིས་སོ། །སྦེད་མ། ཁྱོད་ཀྱི་སྙིང་ལམ་ན་ཁོ་བོས་ཁྱོད་ལ་བདེན་བཞིའི་གཏམ་བྱས་སྙམ་མམ། བསོད་སྙོམས་བྱིན་ཅིག །དེས་བཟའ་བཅའ་བསོད་པས་ལྷུང་བཟེད་བཀང་སྟེ་བྱིན་ནོ། །འཆར་ཀས་ཟས་ཀྱི་བྱ་བ་བྱས་ནས་གཙུག་ལག་ཁང་དུ་སོང་བ་དང་། བསོད་སྙོམས་པ་ན་རེ། དོན་གྱིས་ན་བདག་གིས་ཁྱོད་ཀྱི་བསོད་སྙོམས་ཟོས་སོ། །ཤེས་ཏེ་དེས་དང་པོར་ཁྱོད་བོས་སྙམ་མམ། དེས། ཁྱོད་སོང་ཞིག་ཅེས་ལག་བརྡ་བྱས་ནས་ཁོ་བོས་དེའི་འོག་ཏུ་ཁྱོད་འབོད་དུ་བཅུག་གོ །ཅི་བྱིན། བཟའ་བཅའ་བསོད་པས་ལྷུང་བཟེད་བཀང་སྟེ་བྱིན་ནོ། །དེའི་ཚེ་འཆར་ཀ་དེ་ཉིད་ན་འདུག་གམ། འདུག་གོ །ཁྱོད་བུད་མེད་དང་ལྷན་ཅིག་སྟན་གཅིག་ལ་འདུག་ཏུ་རུང་ངམ། རུང་ཡང་སྲིད་མི་རུང་ཡང་སྲིད་བསྡད་དོ། །ཁོ་བོའི་བསོད་སྙོམས་ཟ་ཞིང་མི་བཟོད་ན་ཁོ་བོ་ལ་བརྟེན་ནས་བསླབ་པ་འཆར་ཆུག་ཅིག །ཅི་དེ་ཁོ་བོས་ཡལ་བར་དོན་དུ་རེའམ་ཟེར་བ་དེ་གསོལ་བས། བྱུང་བ་འདི་དང་སོགས། བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ན་ལྟུང་བྱེད་དོ། །
གཅིག་པུ་འགྲེང་བའི་ལྟུང་བྱེད་ནི། སྟོན་པ་མཉན་ཡོད་ནའོ། །སྦེད་མ་རབ་ཏུ་བྱུང་ནས་དགེ་སྐོས་བྱེད་པ་ན་དགེ་སློང་མ་རྣམས་བསོད་སྙོམས་ལ་སོང་ནས་ཕྱག་བདར་བྱེད་ཅིང་འདུག་གོ །འཆར་ཀ་བསོད་སྙོམས་ལ་ཞུགས་ནས་དབྱར་ཁང་དུ་སོང་བ་དང་སྦེད་མས་ཕྱག་འཚལ་(༢༢༠ན)ནས་ཕྱགས་མ་ཕྱོགས་གཅིག་ཏུ་བཞག་སྟེ་འགྲེང་ངོ༌། །འཆར་ཀས་ཆོས་བསྟན་ནས་སྔར་བཞིན་དུ་གཏམ་བརྗོད་པ་དང༌། དགེ་སློང་མ་རྒན་མོ་ནད་མ་ཞིག་འདུག་པས་ཐོས་ནས། འདི་གཉིས་ཅིའི་ཕྱིར་བག་མར་བླངས་པ་ཚུན་ཆད་ཀྱང་གཅིག་ལ་གཅིག་བརྗོད་སྙམ་མོ། །སྦེད་མས། ད་བཞུད་ཅིག །ཕྱག་བདར་མ་ཟིན་ན་སྨོད་པར་འགྱུར་རོ། །དེ་སོང་ནས་ཕྱག་བདར་བྱ་བར་བརྩམས་པ་དང་དགེ་སློང་མ་རྣམས་ལྷགས་ནས། ཁྱོད་ཀྱིས་ཅི་བྱས་ན་དབྱར་ཁང་ཕྱག་དར་དང་བཅས། སྦེད་མས་སྨྲས་པ། ཁྱེད་དོང་བ་ཚུན་ཆད་ནས་ཁོ་མོ་ས་ལ་མ་འདུག་གོ །ནད་མ་དེ་ན་རེ། བདེན་ཏེ། འཆར་ཀ་དང་ལྷན་ཅིག་འགྲེང་ནས་བག་མར་བླངས་པ་ཚུན་ཆད་བརྗོད་དོ། །དེ་བརྒྱུད་དེ་གསོལབ་ས། བྱུང་བ་འདི་དང་སོགས། དགེ་སློང་མ་དང་ཞེས་སོགས་སོ། །
དགེ་སློང་མས་སྦྱོར་དུ་བཅུག་པ་ཟ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །འོད་སྲུངས་ཆེན་པོ་མཉན་ཡོད་ཀྱི་ཀུན་དགའ་ར་བ་ན་རི་དྭགས་འཛིན་གྱི་མའི་ཁང་བཟང་ན་འདུག་གོ །དེ་ནས་སྟོན་པའི་སྤྱན་སྔར་ཕྱག་འཚལ་བ་དང༌། སྟོན་པས། ཁྱོད་རྒས་ཏེ་ངའི་སྨད་གཡོགས་ཤ་ནའི་གོས་ཕྱག་དར་ཁྲོད་ནི་ལྕིའམ། དགེ་འདུན་གྱི་གཙུག་ལག་ཁང་དུ་ཤོག་ལ་གང་ཟག་གིས་མགྲོན་དུ་བོས་པ་བདག་གིར་གྱིས་ཤིག །གོས་མཚོན་གྱིས་དྲས་པ་དག་ཀྱང་ཁ་དོན་ངན་པར་གྱིས་ལ་ཆོངས་ཤིག །དེས་ཅང་མི་སྨྲ་བས་ཉན་ནོ། །མཉན་ཡོད་ན་ཁྱིམ་བདག་ཅིག་འདུག་པ་དེ་ཡུན་རིང་པོ་ནས། ཀྱེ་མ་བདག་གིས་འོད་སྲུངས་ཆེན་པོ་ལྷ་དང་མིས་མཆོད་པ་ཁྱིམ་དུ་སྤྱན་དྲངས་ཏེ་བཤོས་གསོལ་ན་ཅི་མ་རུང་སྙམ་དུ་སྨོན་ཏེ། དེས། སྟོན་པས་འོད་སྲུངས་ཆེན་པོ་དགེ་འདུན་ལ་གཏད་པ་ཐོས་ནས། དེ་དང་བཞི་གདུགས་ཚོད་ལ་སྤྱན་དྲངས་སོ། །དེས་ཀྱང་སྔ་བར་སོང་སྟེ་ཁྱིམ་བདག་དེ་ལ་ཆོས་བསྟན་ནས་འདུག་པ་དང༌། སྦོམ་དགའ་མོ་ཁྱིམ་དེར་འོངས་ནས། མཚན་བཟང༌། ཨ་རོག་ཁྱ། བསོད་སྙོམས་བྱིན་ཅིག །དེང་འོད་སྲུངས་ཆེན་པོ་སྤྱན་དྲངས་ནས་ཞལ་ཟས་སྟ་གོན་བགྱིད་པས་བྲེལ་གྱིས་བཞུད་ཅིག །སྦོམ་དགའ་མོ་ན་རེ། དེ་ནི་མུ་སྟེགས་ཅན་ལས་རབ་ཏུ་བྱུང་བ། བུལ་བ་མཆོག་ཏུ་བུལ་བ་ཡིན་ལ། ཁོ་མོ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་པ་ཡིན་ན། དེ་ལ་ཟན་སྦྱོར། ཁོ་མོ་ལ་བསོད་སྙོམས་མི་སྟེར་མོད། འོད་སྲུངས་ཀྱིས་དེ་ཐོས་ནས་མགུལ་བསལ་བའི་སྒྲ་ཕྱུང་བས། དེ་དབྱིག་གི་གདངས་ཅན་ཡིན་པས་ཁྱིམ་ཐམས་ཅད་ཁྱབ་སྟེ། མོས་ཐོས་ནས། ཀླུའི་མིང་ཅན་འདི་ཉིད་ན་བཞུགས་སོ། །ཁྱིམ་བདག་གིས། སྔར་ནི་མུ་སྟེགས་ཀྱི་རིགས་ཅན་བུལ་བ་ཟེར་ཞིང༌། ད་ནི་ཀླུའི་མིང་ཅན་ཟེར་རོ་ཞེས་བར་གྱི་ས་གཞི་ལ་བབས་པའི་སྒྲ་ཐྲིག་ཐྲིག་ཟེར་བ་ཐོས་ནས། སྦོམ་དགའ་མོས་ཤིང་ང་དཔུང་ཆད་བརྫེས་(༢༢༠བ)ཏེ་བྲོས་པ་དང༌། དགེ་སྦྱོང་མགོ་རེག་མོ། མ་འབྲོས་པར་སྡོད་ཅིག །ཁྱོད་ཁོ་བོའི་ཁྱིམ་དུ་འཇུག་པར་མི་བྱའོ། །སྦོམ་དགའ་མོ་ན་རེ། ཁྱོད་ཀྱི་ཁྱིམ་རྟུག་ཁུང་དང༌། བཙོན་རྭར་གྱུར་ཅིག །ཁྱོད་ཀྱི་ཁྱིམ་དུ་གདོལ་པ་འཇུག་པར་གྱུར་ཅིག །ཁོ་མོ་རྒྱལ་པོ་ལས་བཙུན་མོའི་སྤང་བ་ཐོབ་པས་རེག་ན་ལག་པ་གཅོད་དུ་གཞུག་གོ །དེས་སྨྲས་པ། དགེ་སློང་མ་གནས་བརྟན་མོ་དག་གིས་རྒྱལ་པོ་ལས་བཙུན་མོའི་འཁོར་གྱི་སྤང་བ་ཐོབ་ཀྱི། གནས་ངན་ལེན་ཀུན་ཏུ་སྤྱོད་པ་ཁྱོད་ཀྱིས་ནི་མ་ཐོབ་བོ། །
དེ་ནས་ཁྱིམ་བདག་དེ་ཕྱིར་ལོག་སྟེ་འོད་སྲུངས་ཆེན་པོ་ལ་བཟའ་བ་དང་བཅའ་བ་གཙང་ཞིང་བསོད་པས་ཚིམ་པར་བྱས་ནས་ཆོས་ཉན་ནོ། །འོད་སྲུངས་ཀྱིས་དེ་ལ་ཆོས་བསྟན་ནས་སྟོན་པའི་སྤྱན་སྔར་སོང་སྟེ། སྟོན་པས་བདག་དེང་ཁོ་ན་དགེ་འདུན་ལ་གཏད་ན་བདག་དེང་ཁོ་ན་མུ་སྟེགས་ཅན་ལས་རབ་ཏུ་བྱུང་བ་མཆོག་ཏུ་བུལ་བ་དང༌། ཀླུའི་མིང་ཅན་ཞེས་བགྱི་བར་ཡང་གྱུར་ཏེ། བདག་ནི་ཡུན་རིང་པོ་ནས་དགོན་པ་བ། བསོད་སྙོམས་པ། ཕྱག་དར་ཁྲོད་པ་ལགས་ཤིང༌། དེ་དག་གིས་བསྔགས་པ་བརྗོད་དོ། །འོད་སྲུངས། ཁྱོད་ཀྱིས་དོན་གྱི་དབང་དུ་ཞིག་མཐོང་ནས་དེ་དག་གིས་བསྔགས་པ་བརྗོད། གཉིས་ཏེ། ཚེ་འདི་ལ་བདེ་བར་གནས་པ་དང༌། ཕྱི་མའི་སྐྱེ་བོ་ལ་སྣང་བ་བགྱིས་པར་འགྱུར་བའི་སླད་དུའོ། །འོད་སྲུངས༌། ལེགས་སོ། སྦྱངས་པའི་ཡོན་ཏན་དེ་དག་གི་བསྔགས་པ་མ་ཡིན་པ་བརྗོད་པ་དེ་ནི་ངའི་བསྔགས་པ་མ་ཡིན་པ་བརྗོད་པ་ཡིན་ལ། སྦྱངས་པའི་ཡོན་ཏན་དེ་དག་གི་བསྔགས་པ་བརྗོད་པ་དེ་ནི་ངའི་བསྔགས་པ་བརྗོད་པ་ཡིན་ཏེ། ངས་ཡུན་རིང་པོ་ནས་སྦྱངས་པའི་ཡོན་ཏན་དེ་དག་བསྟོད་ཅིང་བཀུར་ལ་བསྔགས་པའི་ཕྱིར་རོ། །འདི་ནི་བྱུང་བའོ། །སྟོན་པ་མཉན་ཡོད་ནའོ། །མུ་གེ་བྱུང་ནས་ཁྱིམ་བདག་དད་པ་ཅན་གྱིས་གནས་བརྟན་གནས་བརྟན་དག་གི་བསོད་སྙོམས་སྦྱར་རོ། །དྲུག་སྡེས་བསོད་སྙོམས་ལ་ཞུགས་ནས་བཅུ་གཉིས་སྡེའི་གན་དུ་སོང་བ་དང༌། ཞལ་ཚུས་གསོལ་ཅིག །སུས་སྦྱིན། བདག་ཅག་གིས་སོ། །སང་སུས་སྦྱིན། བདག་ཅག་གིས་སོ། །སྲིང་མོ་དག །དེ་ཙམ་གྱི་ཁོ་བོ་ཅག་འཚོ་བར་མི་འགྱུར་གྱིས། ཁྱིམ་པ་དག་གིས་གནས་བརྟན་ལ་བསོད་སྙོམས་སྦྱར་བ་དེ་ཁྱེད་ཀྱིས་ཁོ་བོ་ཅག་གི་ཕྱིར་སྦྱོར་དུ་བཅུག་ན་ཁོ་བོ་ཅག་འཚོ་བར་ནུས་སོ། །སྦོམ་དགའ་མོ་ན་རེ། རུང་ངམ། ཁོ་བོ་ཅག་ལྟོགས་ཏེ་འཆིའམ་ལེགས་པར་རུང་ངོ༌། །སུས་བཀག །དེ་ནས་སྦོམ་དགའ་མོ་བསོད་སྙོམས་ལ་ཞུགས་ནས། ཀུན་ཤེས་ཀོའུ་དི་ནྱའི་བསོད་སྙོམས་སྦྱོར་བའི་ཁྱིམ་དེར་སོང་སྟེ། སུའི་བསོད་སྙོམས་སྦྱོར། ཀོའུ་དི་ནྱའིའོ། །ཁྱོད་ཀྱིས་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་ཅན་ལ་བསོད་སྙོམས་དྲངས་ནས་བསོད་ནམས་ཆེའོ། །དེ་སུ་ཡིན། དགའ་བོའོ། །དེ་བགྱིའོ་ཟེར་ནས། ཀོའུ་དི་ནྱའི་(༢༢༡ན)བསོད་སྙོམས་དེ་དགའ་བོ་ལ་སྦྱར་རོ། །
དེ་བཞིན་དུ་དྲུག་སྡེ་ཐམས་ཅད་ལ་བྱས་པས། ལྷུང་བཟེད་སྣོད་ཁས་བཏགས་པའི་བསོད་སྙོམས་རྙེད་ནས། འདི་ག་ལས་རྙེད། འདི་སྦྱོར་དུ་བཅུག་པའི་སྲིང་མོ་དག་ནད་མེད་པར་གྱུར་ཅིག །རུང་ངམ། རུང་ཡང་སྲིད་མི་རུང་ཡང་སྲིད་དེ་ཁོ་བོ་ཅག་ལྟོགས་ཏེ་འཆི་བར་བྱའམ་ཟེར་བ་དེ་གསོལ་བས། བྱུང་བ་འདི་དང་སོགས། ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་ན་ལྟུང་བྱེད་དོ། །མཉན་ཡོད་ན་ཁྱིམ་བདག་ཅིག་གིས་དགོན་པར་ཞིང་རྨོས་ནས་ས་བོན་བཏབ་སྟེ། དེར་སྤྱིལ་བུ་བྱས་ནས་ཟོང་ཐོགས་ཏེ་ཡུལ་གཞན་དུ་སོང་ངོ༌། །བསོད་སྙོམས་པ་ཞིག་གིས་སྤྱིལ་བུ་དེ་མཐོང་ནས། དབེན་པ་ཡིན་ནོ་སྙམ་སྟེ་དེ་ཉིད་དུ་འདུག་གོ །མིའི་དྲིས་བྱ་དང་རི་དྭགས་མི་འོང་ཞིང་ལྷས་དུས་སུ་ཆར་ཕབ་པས་ཞིང་དེ་ཕུན་སུམ་ཚོགས་པར་གྱུར་ཏོ། །ཁྱིམ་བདག་དེ་དོན་གྲུབ་ནས་འོངས་པ་དང་ལོ་ཏོག་ཕུན་སུམ་ཚོགས་པར་གྱུར་པ་མཐོང་ནས། བདག་གིས་འདིར་རིབ་མའང་མ་བྱས། སྲུང་མའང་མ་བཞག་ན་ལོ་ཏོག་ཕུན་སུམ་ཚོགས་པའི་རྒྱུ་ཅི་ཡིན་སྙམ་ནས་སྤྱིལ་བུ་དེར་སོང་བ་དང༌། དགེ་སློང་ཞིག་སྐྱིལ་ཀྲུང་གིས་འདུག་པ་མཐོང་ནས། འདིའི་མཐུས་ལོ་ཏོག་ཕུན་སུམ་ཚོགས་པ་ཡིན་ནོ་སྙམ་སྟེ། འཕགས་པ། སྤྱིལ་བུ་འདི་ན་བཞུགས་སམ། ཡིན་ནོ། །ཞིང་འདི་བདག་གི་ལགས་ཀྱིས་ལོ་ཏོག་དང་འབྲས་བུ་ཅི་བདེར་ལོངས་སྤྱད་དུ་གསོལ། སང་བདག་གི་སྡུམ་པར་བསོད་སྙོམས་གསོལ་བར་ཅི་གནང༌། ཁོ་བོ་བསོད་སྙོམས་པ་ཡིན་པས་བསོད་སྙོམས་ལ་རྒྱུའོ་ཞེས་དང་དུ་མ་བླངས་སོ། །དེ་ཁྱིམ་དུ་སོང་སྟེ་ཆུང་མ་ལ། བང་བ་སྟ་གོན་གྱིས་ཤིག །ཞིང་དེ་ལེགས་སོ། །འདི་བདག་ལ་ཀུ་རེ་ཟེར་རོ་སྙམ་ནས། དེར་རིབ་མའང་མ་བྱས། སྲུང་མའང་མ་བཞག་ན་བདག་ལ་ཀུ་རེའོ། །ཅི་ཁྱོད་ལ་ཀུ་རེ་བྱེད་སྙམ་མམ་ཡིད་ཆེས་པར་གྱིས་ཤིག །ཞིང་དེའི་དྲུང་དུ་སྤྱིལ་བུ་བྱས་པ་དེར་དགེ་སློང་བསོད་སྙོམས་པ་ཞིག་འདུག་པ་དེའི་མཐུས་ལོ་ལེགས་སོ། །འོ་ན་དེ་ཅིའི་ཕྱིར་བསོད་སྙོམས་ལ་སྤྱན་མ་དྲངས། དེས་དང་དུ་མ་བླངས་སོ། །དེ་དག་ནི་ཞབས་ལ་ཕྱག་འཚལ་ནས་སྤྱན་དྲང་བ་ལགས་སོ། །དེ་སོང་སྟེ་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ། སང་བདག་གི་སྡུམ་པར་བསོད་སྙོམས་གསོལ་བར་ཅི་གནང༌། ཁོ་བོ་བསོད་སྙོམས་འགའ་ཞིག་ལ་རྒྱུའོ། །ཁྱོད་ཀྱིས་བདག་གི་སྡུམ་པར་བསོད་སྙོམས་མི་གསོལ་དུ་མི་རུང་ངོ༌། །དེས་དང་དུ་བླངས་སོ། །སྦོམ་དགའ་མོ་ཁྱིམ་དེར་ཞུགས་ནས། བསོད་སྙོམས་བྱིན་ཅིག །ཁྱིམ་བདག་གི་ཆུང་མས་སྨྲས་པ། བསོད་སྙོམས་པ་ཞིག་སྤྱན་དྲངས་པ་དེ་མཆིས་ཏེ་ཟན་བཅད་ན་མི་རུང་བས་བདག་བྲེལ་གྱིས་རེ་ཞིག་བཞུད་ཅིག །བསོད་སྙོམས་པ་དེ་ཁྲིད་དེ་འོངས་ན་སྦྱིན་ནམ། སྦྱིན་ནོ། །ཕྱི་བཞིན་འབྲང་མ་དང་ཁང་སྐྱོང་ལའང་སྦྱིན་ནམ། སྦྱིན་ནོ། །བསོད་(༢༢༡བ)སྙོམས་པ་དེས་འོངས་པ་དང་སྦོམ་དགའ་མོས་མཐོང་ནས། སྡུམ་པ་ག་གེ་མོར་སྤྱན་དྲངས་སམ། དྲངས་སོ། །བདག་གིས་ཁྱིམ་དེར་ཁྱོད་ཀྱི་བསྔགས་པ་བརྗོད་དོ། །སྲིང་མོ། ཁོ་བོས་ཁྱོད་ལ། ཁོ་བོའི་བསྔགས་པ་རྗོད་ཅིག་བྱས་སམ། མ་གསུངས་སོ། །འདི་ནི་དགེ་སློང་མས་སྦྱོར་དུ་བཅུག་པའི་ཟས་ཡིན་ནོ་སྙམ་ནས་ཕྱིར་ལོག་པ་དང༌། བདག་གིས་ཁྱོད་ཀྱི་གདུང་ངམ་མཚན་མི་ཤེས་པས་བསྔགས་པ་བརྗོད་རེ་སྐན། སྲིང་མོ། ཁྱོད་ཀྱི་ཚིག་སྔ་མ་བདེན་ན་ཕྱི་མ་བརྫུན་ལ། ཕྱི་མ་བདེན་ན་སྔ་མ་བརྫུན་ནོ་ཞེས་དེ་ཕྱིར་ལོག་སྟེ་སྤྱིལ་བུ་དེ་ཉིད་དུ་སོང་ནས་ལུས་མདངས་མ་ཡལ་གྱི་བར་དུ་དགེ་བ་ལ་ཏྲོན་བྱས་པ་སོགས་འདྲ། དེ་གསོལ་བས། སྔར་ཁྱིམ་དུ་བོས་པ་མ་གཏོགས་སོ། །

བཅུ་ཚན་བཞི་པ།

བཅུ་ཚན་བཞི་པ་ལ་སྡོམ་ནི། ཡང་ཡང་དང་ནི་འདུག་གནས་གཅིག །ཕྱེ་དང་བཅའ་དང་སྟོབ་པ་དང༌། །འདུས་དང་དུས་མིན་གསོག་འཇོག་དང༌། །ཁ་ནས་མིད་དང་བསོད་པ་ཉིད། །
ཡང་ཡང་ཟ་བའི་ལྟུང་བྱེད་ནི། དགེ་སློང་རྣམས་ཁྱིམ་པས་མགྲོན་གཞན་དུ་འབོད་པ་ན་དང་དུ་མི་ལེན་ནས། དེ་དག་སངས་རྒྱས་འཇིག་རྟེན་དུ་མ་བྱུང་བའི་སོགས་ཟེར་ནས་གསོལ་བས། ཁྱིམ་གཞན་དུ་ཡང་ཟན་ལ་བོས་པ་དང་དུ་བླང་བར་བྱའོ། །ཁྱིམ་བདག་གཅིག་གིས་སངས་རྒྱས་དགེ་འདུན་དང་བཅས་པ་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་ན། གཞོན་ནུ་ཞིག་དགེ་བའི་ཕྱོགས་ལ་ཤིན་ཏུ་བརྩོན་ནས། དེས་བསམས་པ། བདག་བསོད་སྙོམས་ལ་འགྲོ་མི་དགོས་པས་གདུགས་ཚོད་ལ་བབ་ཀྱི་བར་དུ་དགེ་བ་ལ་ཏྲོན་བྱའོ་སྙམ་ནས་སྟན་ཁྱེར་ཏེ་ཕྱི་རོལ་ཏུ་སོང་བ་དང༌། དགེ་སློང་རྣམས་སྔ་ཚོགས་སུ་གཙུག་ལག་ཁང་གི་སྒོ་བཅད་དེ་སོང་ངོ༌། །དེས་དུས་ཤེས་པར་བྱས་ཏེ་འོངས་པ་དང༌། གཙུག་ལག་ཁང་སྒོ་བཅད་པ་མཐོང་ནས། དེས། བདག་ཟན་བཅད་པ་བླའི། ལྟུང་བ་དང་བཅས་པ་མི་རུང་སྙམ་ནས། ཟན་བཅད་དེ་ལུས་ལ་མདངས་ཡོད་ཀྱི་བར་དུ་དགེ་བ་ལ་ཏྲོན་བྱས། མདངས་ཡལ་བ་དང་ཉལ་ལོ། །དགེ་སློང་རྣམས་ཀྱིས། ཟན་གཞན་གྱི་ཡིན་ན་ལྟོའང་གཞན་གྱི་ཡིན་སྙམ་མམ། ཅི་འདུག །དགེ་བ་ལ་ཏྲོན་བྱེད་མི་ནུས་པ་ཙམ་དུ་ཟོས་སོ། །མ་ཟོས་སོ། །དེ་གསོལ་བས། དུས་ཤེས་པར་བྱས་ཏེ་འཇུག་པར་བྱའི། སྔ་ཚོགས་སུ་མི་བྱའོ་ནས། ཟན་གཅད་པར་མི་བྱའོ། །ཁྱིམ་པ་རྣམས། འཕགས་པ་རྣམས་སྐོམ་བསྣམས་ཏེ་གཤེགས་ཀྱི་བར་དུ་རེ་ཞིག་བཞེས་ཤིག་ཟེར་ཡང་དགེ་སློང་རྣམས་མི་སྡོད་ནས། གསོལ་བས། སྐོམ་གྱི་ཕྱིར་གསོལ་བ་འདེབས་ན་བསྡད་པར་བྱའོ། །སྟོན་པ་རྒྱལ་པོའི་ཁབ་ནའོ། །ཤཱ་རིའི་བུ་དང་མོའུ་གལ་གྱི་བུ་གཉིས་དུས་དུས་སུ་དམྱལ་བ་དང༌། དུད་འགྲོ་དང༌། ཡི་དྭགས་དང༌། ལྷ་དང༌། མི་རྒྱུར་ཕྱིན་ནས་འོངས་ཏེ་འཁོར་བཞི་ལ། སེམས་ཅན་དམྱལ་བའི་གཅོད་པ་དང༌། གཏུབ་པ་དང༌། (༢༢༢ན)གཤེག་པ་ལ་སོགས་པའི་སྡུག་བསྔལ་དང༌། དུད་འགྲོའི་གཅིག་ལ་གཅིག་ཟ་ལ་སོགས་པའི་སྡུག་བསྔལ་དང༌། ཡི་དྭགས་ཀྱི་བཀྲེས་སྐོམ་ལ་སོགས་པའི་སྡུག་བསྔལ་དང༌། ལྷའི་འཆི་འཕོ་དང་ལྟུང་བ་ལ་སོགས་པའི་སྡུག་བསྔལ་དང༌། མིའི་ཆོལ་བ་དང་ཆགས་པ་ལ་སོགས་པའི་སྡུག་བསྔལ་རྣམས་བརྗོད་པས། ལ་ལའི་ལྷན་ཅིག་གནས་པ་དང་ཉེ་གནས་ཚངས་སྤྱོད་ལ་མི་དགའ་བ་དག་ཀྱང་དེ་གཉིས་འདོམས་པ་བཅོལ་ནས་དེ་གཉིས་ཀྱིས་གདམས་པས་ཚངས་སྤྱོད་ལ་དགའ་བར་གྱུར་ཏེ། དེ་གཉིས་འཁོར་བཞི་པོས་ཀུན་ཏུ་བསྐོར་རོ། །
སྟོན་པས་ཀུན་དགའ་བོ་ལ་དེའི་རྒྱུ་དྲིས་པས། རྒྱས་པར་ཞུས་སོ། །ཐམས་ཅད་དུ་ཤཱ་རིའི་བུ་དང་མོའུ་གལ་གྱི་བུ་ལྟ་བུ་མི་འབྱུང་བས་སྒོ་ཁང་དུ་འཁོར་བའི་འཁོར་ལོ་ཆ་ལྔ་པ་བྲིའོ། །ཇི་ལྟར་བྲི་མ་ཤེས་ནས། ངན་སོང་གསུམ་དང༌། ལྷ་དང༌། མིའི་འགྲོ་བ་བྲིའོ། །གང་དུ་བྲི་མ་ཤེས་ནས། མཐར་ངན་སོང་གསུམ་དང༌། མིའི་གནས་སུ་གླིང་བཞི་དང༌། དབུས་སུ་དུག་གསུམ་དང༌། རྫུས་ཏེ་སྐྱེ་བའི་སེམས་ཅན་ཟོ་ཆུན་རྒྱུད་མོའི་ཚུལ་གྱིས་འཆི་འཕོ་བ་དང་སྐྱེ་བ་བྲི། ཁོར་ཡུག་ཏུ་རྟེན་འབྲེལ་ཡན་ལག་བཅུ་གཉིས་བྲི་ཞིང༌། ཐམས་ཅད་མི་རྟག་པས་བཟུང་བར་བྲིའོ། །སྟེང་དུ་སངས་རྒྱས་ཀྱི་སྐུ་གཟུགས་མྱ་ངན་ལས་འདས་པའི་དཀྱིལ་འཁོར་དཀར་པོ་སྟོན་པ་བྲིའོ། །བརྩམ་པར་བྱ་ཞིང་དབྱུང་བར་བྱ། །ཞེས་པའི་ཚིགས་བཅད་གཉིས་ཀྱང་བྲིའོ། །དེ་བྲིས་པ་དང༌། ཁྱིམ་པ་རྣམས་ལྷགས་ནས། བྲིས་པ་འདི་ཅི་ལགས་དྲིས་པས་མ་ཤེས་ནས། དེ་སྟོན་པའི་དགེ་སློང་བསྐོའོ། །བྱེ་བྲག་མེད་པར་བསྐོས་པས། ནུས་པ་བསྐོའོ། །རྒྱལ་པོའི་ཁབ་ཏུ་ཁྱིམ་བདག་བཟའ་མི་གཉིས་ལ་བུ་བྱུང་ནས། བཟང་མོ། བདག་ཅག་གི་ནོར་འཕྲོག་པ་བྱུང་གིས་ཁོ་བོ་ཟོང་ཐོགས་ཏེ་རྒྱ་མཚོར་འཇུག་གོ །རྗེའི་སྲས། དེ་ལྟར་མཛོད་ཅིག །དེ་རྒྱ་མཚོར་སོང་བ་དང་ཤི་ནས་ཆུང་མས་བུ་དེ་ཉེ་དུ་དང་ལག་མཐུས་བསྐྱེད་དེ། ཡི་གེ་བསླབས་པས་གཏམ་རྒྱུད་ལ་ཤིན་ཏུ་མཁས་པར་གྱུར་ཏོ། །དེ་ནེའུ་ལྡངས་དང་ལྷན་ཅིག་འོད་མའི་ཚལ་དུ་སོང་བས་སྒོ་ཁང་ན་སྲིད་པའི་འཁོར་ལོ་བྲིས་པ་མཐོང་ནས། འདི་ཅི་ལགས། འགྲོ་བ་ལྔའོ། །ལས་ཅི་བགྱིས་པས་དམྱལ་བར་ལྟུང༌། མི་དགེ་བ་བཅུ་ཆེར་སྤྱད་པས་དམྱལ་བར་སྐྱེའོ། །ལས་ཅི་བགྱིས་པས་དུད་འགྲོར་འགྱུར། མི་དགེ་བ་བཅུ་ཆུང་ངུ་སྤྱད་པས་སོ། །ཅི་བགྱིས་པས་ཡི་དྭགས་སུ་འགྱུར། སེར་སྣ་ཀུན་ཏུ་སྤྱད་པས་སོ། །ལས་ཅི་བགྱིས་པས་ལྷར་སྐྱེས་ནས་བདེ་བ་མྱོང༌། དགེ་བ་བཅུ་ཆེར་སྤྱད་པས་སོ། །ལས་ཅི་བགྱིས་པས་མིར་སྐྱེས་ནས་བདེ་བ་ཆུང་ངུ་མྱོང༌། དགེ་བ་བཅུ་ཆུང་ངུ་སྤྱད་པས་སོ། །འཕགས་པ། བདག་ངན་སོང་གསུམ་མི་འཚལ། ལྷ་དང་མི་འཚལ་བས། ལྷར་སྐྱེ་བའི་ཐབས་མཆིས་སམ། ཡོད་དེ། རབ་ཏུ་བྱུང་ལ་ཚངས་པར་སྤྱོད་ཅིག །ཡུན་ཇི་སྲིད་དུ་(༢༢༢བ)ཇི་སྲིད་འཚོའི་བར་དུའོ། །དེ་རྔོ་མི་ཐོག་གི །གཟན་མཆིས་སམ། ཡོད་དེ། ལྔ་པ་ཚངས་སྤྱོད་དོ། །ཡུན་ཇི་སྲིད་དུ། ཇི་སྲིད་འཚོའི་བར་དུའོ། །དེའང་རྔོ་མི་ཐོག་གི །གཞན་ཅི་མཆིས། ཡོད་དེ། སངས་རྒྱས་དགེ་འདུན་དང་བཅས་པ་ལ་གདུགས་ཚོད་གསོལ་ཅིག །དེ་ལ་ཀརྵ་པ་ཎ་དུ་འཚལ། ལྔ་བརྒྱའོ། །དེ་རྔོ་ཐོག་གོ་ཟེར་ནས། མ་ལ། ཡུམ། ངན་བུ་ལྷར་སྐྱེ་བར་འདོད་དམ། བུ། ཁོ་མོ་སེམས་ཅན་ཐམས་ཅད་ལྷ་རྣམས་སུ་སྐྱེ་བར་འདོད་ན། ཁྱོད་ལྟ་ཅི་སྨོས། ཡུམ། ཀརྵ་པ་ཎ་ལྔ་བརྒྱ་སྩོལ་ཅིག །བུ། ཁྱོད་ཀྱང་ཉེ་དུ་དང་ལག་མཐུས་བསྐྱེད་ན། ཁོ་མོ་ལ་ཀརྵ་པ་ཎ་ལྔ་བརྒྱ་ག་ལ་ཡོད། ཡུམ། གླ་རྔན་བགྱིའོ། །གཞོན་པས་མི་ནུས་སོ། །རྔོ་ཐོག་གོ་ཟེར་ནས་གླ་མིའི་སྲང་དུ་སོང་སྟེ་བསྡད་པས་དེ་སུས་ཀྱང་མི་ཁྲིད་དོ། །ཉི་མ་ནུབ་ནས་ཁྱིམ་དུ་འོངས་པ་དང༌། མས། ལས་བྱས་སམ། ཡུམ། སུས་ཀྱང་མ་ཁྲིད་དོ། །བུ། གླ་མི་དག་ནི་སྐྲ་ཡེགས་ཤིང་གོས་དྲི་མ་ཅན་གྱོན་ནས་གླ་མིའི་སྲང་དུ་སོང་སྟེ་སྡོད་ཀྱིས་དེ་ལྟར་གྱིས་ཤིག །དེས་ཕྱི་དེ་ཉིན་པར་དེ་ལྟར་བྱས་པ་དང༌། ཚོང་དཔོན་ཞིག་ཁྱིམ་བརྩིག་པའི་གླ་མི་གཞན་ཁྲིད་དེ། ཁྱེའུ་དེ་མ་ཁྲིད་དོ། །ཡབ། བདག་གིས་ཀྱང་ལས་བགྱིའོ། །བུ། གཞོན་པས་མི་ནུས་སོ། །བདག་གིས་དེང་ལས་བགྱིའི་མཉེས་ན་གླ་རྔན་སྩོལ་ཅིག །དེས་ཁྲིད་དེ་ལས་བྱེད་དུ་བཅུག་པ་དང༌། གླ་མི་གཞན་གཡོས་ལས་བྱེད་པ་ན་ཁྱེའུ་དེ་མྱུར་བར་ལས་བྱེད་ནས། ཁྱོད་ཅིའི་ཕྱིར་གཡོས་ལས་མི་བྱེད། ཁོ་བོ་སྔོན་ཉེས་པར་སྤྱད་པས་དབུལ་པོའི་ཁྱིམ་དུ་སྐྱེས་ཤིང་ད་ལྟར་གླ་རྔན་གྱིས་ལས་བྱེད་ན། ད་ལྟ་གཡོ་བྱས་ན་འགྲོ་བ་ཇི་འདྲ་འགྱུར། ཁྱོད་གསར་བུ་ཡིན་པས་ཐམས་ཅད་ཀྱི་ཐ་མར་ལུས་པར་འགྱུར་བའི་གནས་ཡོད་དོ། །ཁྱེའུ་དེ་གཏམ་རྒྱུད་ལ་མཁས་པ་ཡིན་པས་གླ་མི་དེ་དག་ལ་གཏམ་རྒྱུད་སྨྲ་ཞིང་མྱུར་བར་སོང་བ་དང༌། དེ་དག་ཀྱང་གཏམ་རྒྱུད་མ་ཐོས་ཀྱིས་དོགས་ནས་དེའི་ཕྱི་བཞིན་དུ་ལྷགས་ཏེ་དེའི་ཉིན་མོ་གླ་མི་དེ་དག་གིས་ལས་ཉིས་འགྱུར་དུ་བྱས་པས་ཁྱིམ་བདག་གིས་མཐོང་ནས་ལག་དཔོན་ལ། ཁྱོད་ཀྱིས་གླ་མི་གཞན་དག་ཀྱང་བཀུག་གམ། མ་བཀུག་གོ །
འོ་ན་ཅིའི་ཕྱིར་དེ་རིང་ལས་མང་དུ་ཟིན། ཁྱེའུ་འདིས་འདི་ལྟར་བྱས་པས་སོ། །དེས་ཁྱེའུ་ལ་གླ་ཉིས་འགྱུར་དུ་བྱིན་པ་དང༌། གདུགས་གཉིས་ཀྱི་གླ་རྔན་ཅིག་ཅར་སྩལ་ལམ། མིན་ཏེ། ཁྱོད་ལ་དགའ་བས་བྱ་དགའ་སྦྱིན་ནོ། །ཁྱོད་བདག་ལ་དགྱེས་ན་ལས་ཚར་གྱི་བར་དུ་གླ་རྔན་ཁྱོད་ཀྱི་ཕྱག་ཏུ་བཞག་ཏུ་གསོལ། དེ་ལྟར་གྱིས་ཤིག །དེས་ལས་ཟིན་པ་དང་གླ་རྔན་བརྩིས་པས་ཀརྵ་པ་ཎ་ལྔ་བརྒྱར་མ་ཆོག་ནས་ཁྱེའུས་ངུས་པ་དང༌། བུ། ཅིའི་ཕྱིར་ངུ་། ཁྱོད་ཁོ་བོས་མ་བྲིད་དམ། མིན་ཏེ། བདག་ལྷར་སྐྱེ་བའི་ཕྱིར་དུ་སངས་རྒྱས་དགེ་འདུན་དང་བཅས་པ་ལ་གདུགས་ཚོད་གསོལ་བ་ལ་ཀརྵ་པ་ཎ་ལྔ་བརྒྱ་དགོས་ན་མ་ཚང་བས་གཞན་(༢༢༣ན)དུ་ལས་བགྱི་འཚལ་བར་འགྱུར་རོ། །ཁྱིམ་བདག་དེ་དད་པ་ཅན་ཞིག་ཡིན་པས། ཁོ་བོས་ཁ་བསྐང་བར་བྱའོ། ཡབ། བདག་ལྷ་རྣམས་ཀྱི་ནང་དུ་མི་སྐྱེ་སྙམ་མོ། །ཁྱོད་སྟོན་པ་ལ་དད་དམ། དད་དོ། །སོང་ལ་སྟོན་པ་ལ་ཞུས་ཤིག །ཞུས་པས། ལོངས་ཤིག །ལྷར་སྐྱེའོ། །དེ་བླངས་ནས་མའི་གན་དུ་སོང་སྟེ། ཡུམ། ཀརྵ་པ་ཎ་འདི་དག་གིས་ཞལ་ཟས་སྟ་གོན་མཛོད་ཅིག་དང་སངས་རྒྱས་དགེ་འདུན་དང་བཅས་པ་ལ་གདུགས་ཚོད་གསོལ་ལོ། །བུ། ཁོ་མོ་ལ་སྣོད་སྤྱད་དང་གནས་མལ་མེད་ཀྱིས་ཚོང་དཔོན་དེ་ཉིད་ལ་གྱིས་ཤིག །དེས་དེ་ལ་བྱས་པས། དེ་དད་པ་ཅན་ཡིན་པས། ལེགས་ཀྱི་སྤྱན་དྲོངས་ཤིག །དེས་སྤྱན་དྲངས་པས་གནང་ནས་སངས་རྒྱས་དགེ་འདུན་དང་བཅས་པ་གཤེགས་སོ། །དྲུག་སྡེས། སུའི་ཁྱིམ་དུ་སྤྱན་དྲངས། བུ་ཆེ་གེ་མོའིའོ། །དེ་གླ་མི་ཡིན་པས་ཅི་སྦྱིན། ཁྱིམ་དུ་འགྲོ་བའི་ཁྱིམ་དུ་དོང་ལ་བཟའོ་ཟེར་ནས་དེར་གདན་ཆུད་ཟོས་ཏེ་སོང་ངོ༌། །ཁྱེའུས་བཟའ་བཅའ་བསོད་པ་རང་གི་ལག་གིས་བྲིམས་པ་ན། དྲུག་སྡེ་གུས་པས་མི་ཟ་བ་མཐོང་ནས། སྟོན་པའི་སྤྱན་སྔར་སོང་སྟེ། འདི་ན་འཕགས་པ་ཁ་ཅིག་མི་འཚལ་ན། བདག་ལྷར་སྐྱེ་བར་མི་འགྱུར་རམ། གནས་མལ་གྱི་ལོངས་སྤྱོད་ཀྱིས་ཀྱང་ལྷར་སྐྱེ་ན། ཟས་ཀྱིས་ལྟ་ཅི་སྨོས། དེ་ནས་ཁྱེའུ་དེ་ལ་ཆོས་བསྟན་ནས་གཤེགས་སོ། །ཚོང་པ་ལྔ་བརྒྱ་རྒྱ་མཚོ་ཆེན་པོ་ནས་ལྷགས་ཏེ་རྒྱལ་པོའི་ཁབ་ཏུ་དུས་སྟོན་བྱུང་བས་ཟ་མ་འཚོང་པ་མ་རྙེད་ནས། ཚོང་པ་དགེ་སློང་གི་རྒྱུས་ཤེས་པ་ཞིག་ན་རེ། སངས་རྒྱས་དགེ་འདུན་དང་བཅས་པ་གདུགས་ཚོད་གསོལ་བའི་ཁྱིམ་དེ་ན་ངེས་པར་བཟའ་བཏུང་ལྷག་ཡོད་ཀྱིས་རིན་གྱིས་བཙལ་ལོ། །
དེ་དག་ཁྱིམ་བདག་དེའི་ཁྱིམ་དུ་སངས་རྒྱས་དགེ་འདུན་དང་བཅས་པས་གདུགས་ཚོད་གསོལ་བ་ཐོས་ནས་དེར་དོང་སྟེ་སྨྲས་པ། བདག་ཅག་ལྟོགས་པར་གྱུར་ན། ཁྱོད་ཀྱི་ཁྱིམ་དུ་སངས་རྒྱས་དགེ་འདུན་དང་བཅས་པ་གདུགས་ཚོད་གསོལ་བའི་བཟའ་བཏུང་ལྷག་མ་ཡོད་ན་རིན་གྱི་ཕྱིར་བྱིན་ཅིག །དེས་ཁྱེའུ་ལ་དྲིས་པས། རིན་གྱི་ཕྱིར་མི་སྦྱིན་གྱི་སྦྱིན་པའི་ཕྱིར་སྦྱིན་པས་སྤྱོན་ཅིག །ཁྱེའུ་དེས་དེ་དག་བཟའ་བཏུང་གིས་ཚིམ་པར་བྱས་སོ། །ཚོང་པ་དེ་དག་གིས་ཁྱིམ་བདག་དེ་ལ་བསྔགས་པ་བརྗོད་པས། ཁོ་བོའི་ཟས་མ་ཡིན་གྱི་ཁྱེའུ་འདིའི་ཟས་སོ། །འདི་སུའི་བུ་ཡིན། ཆེ་གེ་མོའིའོ། །དེད་དཔོན་ན་རེ། འོ་ན་འདི་བདག་གི་ཆུང་གྲོགས་ཀྱི་བུའོ། །ཁ་ཅིག་ན་རེ། བདག་གི་ཞང་པོའོ། །ཁ་ཅིག་ན་རེ། ཚ་བོའོ། །དེད་དཔོན་ན་རེ། མང་པོས་གཅིག་དབྱུང་བར་ནུས་ཀྱི། གཅིག་གིས་མང་པོ་དབྱུང་མི་ནུས་སོ་ཞེས་གཞི་བཏིང་སྟེ་རིན་པོ་ཆེ་བཞག་ནས། ཁྱེད་གང་གིས་ཅི་ཡོངས་སུ་བཏང་བ་དེ་གཞི་འདིའི་སྟེང་དུ་ཞོག་ཅིག །ལ་ལས་རེ་རེ། ལ་ལས་གཉིས། ལ་(༢༢༣ན)ལས་མང་པོ་བཞག་སྟེ་རིན་པོ་ཆེའི་ཕུང་པོར་གྱུར་ནས་དེད་དཔོན་གྱིས་ཁྱེའུ་ལ། ལོང་ཞིག །རིན་མི་འདོད་དོ། །ཁྱོད་ལ་རིན་སྦྱིན་པ་མ་ཡིན་ཏེ། རིན་པོ་ཆེ་གཅིག་གིས་ཀྱང་ཟས་འདི་ལྟ་བུ་བརྒྱ་སྙེད་འགྲུབ་པས་དགའ་བའི་དབང་གིས་ཡིན་ནོ། །བདག་ལྷ་རྣམས་ཀྱི་ནང་དུ་མི་སྐྱེའམ་སྙམ་མོ། །ཞུས་ཤིག །ཞུས་པས། དེ་ནི་མེ་ཏོག་ཡིན་གྱིས་ལོངས་ཤིག །འབྲས་བུ་གཞན་འབྱུང་ངོ༌། །དེས་རིན་པོ་ཆེ་དེ་དག་བླངས་སོ། །དེའི་ཚེ་རྒྱལ་པོའི་ཁབ་ཀྱི་ཚོང་དཔོན་བུ་མེད་པ་ཞིག་ཤི་ནས་ཚོང་པ་རྣམས་འདུས་ཤིང༌། བདག་ཅག་གིས་ཚོང་དཔོན་དུ་སུ་དབང་བསྐུར། བསོད་ནམས་ཆེ་བའོ། །ཇི་ལྟར་ཤེས་པར་བྱ། ས་བོན་ཁ་དོག་སྣ་ཚོགས་རྫ་སོ་མ་བཏང་བའི་ནང་དུ་བླུག་ཅིང༌། ཁ་དོག་གཅིག་པ་ཤ་སྟག་ཟིན་པ་དེ་དབང་བསྐུར་རོ་ཟེར་ནས་བྱས་པས་གཞན་རྣམས་ཀྱིས་ཁ་དོག་སྣ་ཚོགས་ཟིན། ཁྱེའུ་དེས་ས་བོན་ཁ་དོག་གཅིག་པ་ཤ་སྟག་ཟིན་པས། གླ་མི་ཚོང་དཔོན་དུ་ཇི་ལྟར་དབང་བསྐུར་ཞེས་ལན་གསུམ་གྱི་བར་དུ་བྱས་པས་ཁྱེའུ་དེས་ཟིན་ནས། མི་མ་ཡིན་གྱིས་ཆེ་བཞི་ཕྱེ་ཡིས་འདི་ཉིད་དབང་བསྐུར་རོ་ཞེས་དེ་ཚོང་དཔོན་དུ་དབང་བསྐུར་རོ། །
སྔར་གྱི་ཚོང་དཔོན་དེས་ཀྱང་བུ་མོ་རྒྱན་ཐམས་ཅད་ཀྱིས་བརྒྱན་པ་བྱིན་ནས་དེའི་ཁྱིམ་ནོར་མང་ཞིང་ལོངས་སྤྱོད་དག་གིས་འཕྲལ་ལ་མཐོ་བས། དེའི་མིང་འཕྲལ་ལ་མཐོ་ཞེས་བཏགས་སོ། །དེས། བདག་གི་དཔལ་འབྱོར་ཕུན་སུམ་ཚོགས་པ་ཐམས་ཅད་སྟོན་པ་ལ་བརྟེན་ནས་བྱུང་ངོ་སྙམ་ནས་སྟོན་པའི་སྤྱན་སྔར་སོང་སྟེ། ཆོས་ཉན་ནས་གདུགས་ཚོད་ལ་སྤྱན་དྲངས། གདུགས་ཚོད་བསོད་པས་ཚིམ་པར་བྱས་ནས། ཆོས་ཉན་པས་དེ་ཁྱོ་ཤུག་གཉིས་ཀྱིས་བདེན་པ་མཐོང་སྟེ། རེ་ཞིག་བྱུང་བའོ། །སྟོན་པ་ཡངས་པ་ཅན་གྱི་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟང་ན་བཞུགས་པའི་ཚེ་ཁྱིམ་བདག་དྲག་ཤུལ་ཅན་གྱིས་སངས་རྒྱས་དགེ་འདུན་དང་བཅས་པ་བསོད་སྙོམས་ལ་སྤྱན་དྲངས། དྲུག་སྡེས་ཁྱིམ་དུ་འགྲོ་བའི་ཁྱིམ་དག་ཏུ་སོང་ནས། ཞལ་ཚུས་གསོལ་ཅིག །མགྲོན་དུ་བོས་སོ། །ཨ་མྲའི་འཁུར་བ་གསོལ་ཅིག །ཟོས་སོ། །གྲོགས་བསོད་སྙོམས་པ་དེ། སྟན་གཅིག་པའོ་ཟེར་ཞིང་མི་ཟ་ནས། སྣོམས་ལ་བཞུད་ཅིག །དེས་ལྷུང་བཟེད་ཆུང་ངུ་བཀང་སྟེ་སོང་བ་དང༌། དགེ་འདུན་ནི་བཞུགས། སྟོན་པ་ནི་བསླབ་པ་འཆའ་བར་བཞེད་ནས་རྫས་ལས་བྱུང་བ་ན་བཞུགས་སོ། །ཁྱིམ་བདག་གིས་བཟའ་བ་དང་བཅའ་བ་བསོད་པ་རང་གི་ལག་གིས་བྲིམས་པ་དང༌། བསོད་སྙོམས་པ་དེས་བསམས་པ། འདིས། ཨ་མྲའི་འཁུར་བ་ཟོས་སོ་ཞེས་རིག་པར་འགྱུར་གྱིས་འདིས་བདག་ལ་ཀླན་ཀ་མ་རྙེད་པའི་སྔར་བདག་གིས་བརྗོད་དོ་སྙམ་ནས། ཁྱིམ་བདག །བདག་འབའ་ཞིག་མ་ཡིན་གྱི། དྲུག་སྡེས་ཀྱང་ཨ་མྲའི་འཁུར་བ་ཟོས་སོ། །ཅིའི་ཕྱིར་དེ་སྐད་ཟེར་ཞེས་སྤྱོས་ནས་སྨྲས་པ། ཅི་ཁོ་བོ་ལ་(༢༢༤ན)ཨ་མྲའི་འཁུར་བ་མེད་སྙམ་མམ་ཞེས་ཨ་མྲའི་འཁུར་བའི་སྤྲོག་མ་ཁ་ཕྱེའོ། །སྟོན་པའི་སྐུ་སྐལ་དྲངས་པ་དང༌། ཟས་བསོད་དམ། དགེ་འདུན་ཚིམ་པར་བྱས་སམ། ཟས་བསོད་ཅིང་དགེ་འདུན་ཚིམ་མོད། ཁྱིམ་བདག་གིས་དགེ་འདུན་སྤྱོས་སོ། །དོན་གང་ལ། འདི་ལའོ། །བྱུང་བ་འདི་དང་སོགས། ཡང་ཡང་ཟ་ན་ལྟུང་བྱེད་དོ། །དགེ་སློང་ན་བ་ཞིག་གིས་སྨན་པ་ལ་བསྟན་པས། ཞལ་ཚུས་གསོལ་ཅིག །མ་གནང་ངོ༌། །སྟོན་པ་ཐུགས་རྗེ་ཅན་ལགས་པས་དེ་ཉིད་རྐྱེན་དུ་མཛད་ནས་གནང་བར་འགྱུར་རོ། །གསོལ་བས། ན་བའི་དུས་མ་གཏོགས་སོ། །དགེ་སློང་མཆོད་རྟེན་དང་དགེ་འདུན་གྱི་ལས་བྱས་པ་དག་བཀྲེས་ནས་ཉལ་ཞིང་དགེ་བ་ལ་ཏྲོན་བྱེད་པར་མ་ནུས་པ་ན་ཁྱིམ་པ་དག་ལྷགས་ནས། བསྟན་པ་ལ་གཅིག་ཏུ་བརྩོན་པར་བགྱིས་པ་ལགས་ན་ཅིའི་ཕྱིར་གཟིམས། བཀྲེས་སོ། །ཞལ་ཚུས་གསོལ་ཅིག །བསླབ་པ་བཅས་སོ། །དགེ་སློང་ལམ་དུ་ཞུགས་ནས་བཀྲེས་པས་ཉལ་བ་དང་སྔར་བཞིན་ཟེར་བ་གསོལ་བས། ལམ་གྱི་དུས་མ་གཏོགས་སོ། །
སྟོན་པ་ཡངས་པ་ཅན་ནས་མཉན་ཡོད་དུ་བྱོན་པ་དང༌། མཉན་ཡོད་ན་ཁྱིམ་བདག་ཅིག་ཡོད་པ་ཚེས་བརྒྱད་དང་བཅུ་བཞི་ལ་བསྙེན་གནས་བྱེད་ཅིང༌། དགེ་འདུན་བཀྲབས་པའི་ཟས་མ་ཟོས་ཀྱི་བར་དུ་མི་ཟ་བ་ཞིག་ཡོད་དོ། །ཁྱིམ་བདག་གཞན་ཞིག་གིས་སངས་རྒྱས་དགེ་འདུན་དང་བཅས་པ་སྤྱན་དྲངས་ནས་གཤེགས་སོ། །ཁྱིམ་བདག་དེས་དགེ་འདུན་སྤྱན་འདྲེན་དུ་བཏང་བ་དང༌། གཙུག་ལག་ཁང་ན་དགེ་འདུན་མི་སྣང་བས་ཕྱིར་ལོག་པ་ན། གཞན་དུ་སྤྱན་དྲངས་པ་དེ་ནས་སྤྱན་དྲོངས་ཤིག །དེ་སོང་ནས་སྤྱན་དྲངས་པས། ཁོ་བོ་ཅག་གིས་ཟན་ཟོས་ཟིན་ནོ། །མི་དེས་ཁྱིམ་བདག་ལ་སྨྲས་པ། དགེ་སློང་དག་གི་ཞལ་ནས། ཟན་ཟོས་ཟིན་ཟེར་རོ། །ཀྭ་ཡེ་ནང་རྗེ། སོང་ལ། གདུགས་ཚོད་གསོལ་དང་རས་ཡུག་ཆེན་དབུལ་ལོ་གྱིས་ཤིག །དེ་ལྟར་བྱས་པས། ཁོ་བོ་ཅག་གིས་སྤངས་སོ། །དེས་ཁྱིམ་བདག་དེ་ཟན་བཅད་དོ། །དེའི་ཁྱིམ་མཚེས་དག །དགེ་སྦྱོང་འདི་དག་གོས་བྱིན་ཡང་ལོངས་སྤྱོད་དུ་མི་བཏུབ་པས་ཁྱིམ་བདག་གི་ཟན་བཅད་དོ་ཞེས་སྨོད་པ་དེ་གསོལ་བས། གོས་སྦྱིན་པའི་དུས་མ་གཏོགས་སོ། །དེ་རྣམས་ལ་བསླབ་པ་ལ་གུས་པའི་བསྔགས་པ་བརྗོད་ནས། སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ཡང་ཡང་ཟ་ན་དུས་མ་གཏོགས་ཏེ་ལྟུང་བྱེད་དོ། །བཤམས་པ་ནི་ཞེས་པ་ནས། མི་རུང་བ་ལ་བོས་པ་ཡང་ངོའི་བར་ཞུ་བ་ལས་སོ། །དེའི་ཕྱིར་མ་ཡིན་པར་དགེ་འདུན་ཡང་ངོ་ཞེས་པ་ནི་ལེགས་འོངས་ཀྱི་ཕྱིར་དགེ་འདུན་མགྲོན་དུ་བོས་པ་ན་ལེགས་འོངས་ཀྱིས་གཞན་ལ་ཁས་མ་བླངས་པས་སོ། །སྟོན་པས། ལྔ་ནི་སེམས་བསྐྱེད་པས་(༢༢༤བ)འགྲུབ་བོ་ཞེས་གསུངས་པ་དང༌། དགེ་སློང་གཞན་དུ་མགྲོན་དུ་བོས་པ་དེས། དེ་ལས་གཞན་དུའང་མགྲོན་དུ་བོས་སམ། དེ་ལས་ལྷག་པར་ཡང་རུང་སྟེ། གཅིག་ཏུ་ནི་བདག་ཉིད། གཉིས་སུ་ནི་བདག་གི་སེམས་གཏད་ནས་གཞན་བཏང་བའོ། །དེའི་ཚེ་མུ་གེའི་དུས་ལ་བབ་ནས་བསོད་སྙོམས་ཀྱིས་ཕོངས་པ་དང༌། སྟོན་པས། མུ་གེ་བྱུང་ན་མགྲོན་དུ་བོས་པ་ཇི་སྙེད་བྱུང་བ་དག་བདག་གིར་བྱའོ་ནས། རུང་ངོ༌། །གནས་བརྟག་དག་གིས་གཞན་བཏང་བ་དང༌། ཁྱོད་མ་བོས་ཀྱི། གནས་བརྟན་ཆེ་གེ་མོ་སྤྱན་དྲངས་སོ། །དེ་གསོལ་བས། བདག་ཉིད་སོང་སྟེ་སྦྱིན་ལེན་བྱས་ནས། སྦྱིན་པ་པོ་སོགས།
འདུག་གནས་སུ་ཟ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །རི་བྲགས་ཤིག་ན་ཁྱིམ་བདག་གཅིག་འདུག་པ་དེས་ཕྱོགས་བཞིའི་དགེ་འདུན་དང་བྲམ་ཟེ་རྣམས་ཀྱི་དོན་དུ་འདུག་གནས་བྱེད་དུ་བཅུག་སྟེ། དེར་འདུག་པ་ལ་བསོད་སྙོམས་སྟོབ་བོ། །སྟོན་པས་ཆོ་འཕྲུལ་ཆེན་པོ་བསྟན་ནས་མུ་སྟེགས་ཅན་ཚར་བཅད་པའི་ཚེ་མུ་སྟེགས་ཅན་རྣམས་མཐའ་འཁོབ་ན་གནས་སོ། །དེའི་ཚེ་གཅེར་བུ་པ་དྲུག་ཅུ་རི་བྲགས་དེར་ལྷགས་ནས་བསོད་སྙོམས་སྟོབ་བོ། །མཉན་ཡོད་ནས་ཁྱིམ་བདག་ཅིག་རི་བྲགས་དེར་སོང་བ་དང༌། ཡོན་བདག་དེས་དེ་རྣམས་ལ་ཟན་བྱིན་ནས། ཞིང་དང་ས་བོན་བཟང་ངམ། གྲོགས་པོ། ས་བོན་བཟང་ན། ཞིང་ནི་གཅེར་བུ་པ་ངོ་ཚ་དང་ཁྲེལ་བོར་བ་ཤ་སྟག་གོ །གྲོགས་པོ། ཞིང་བཟང་པོ་གཞན་ཡོད་དམ། ཡོད་དོ། །སུ། སྟོན་པའི་ཉན་ཐོས་དག་གོ །དེ་དག་འདིར་བྱོན་ན་བདག་གིས་བསོད་སྙོམས་དབུལ་ལོ། །དེ་ཚོང་ཟིན་ནས་རྒྱལ་བྱེད་ཚལ་དུ་ཕྱིན་པ་དང༌། ཉེ་དགའ་སྒོ་ན་འདུག་པས་མཐོང་ནས། ཁྱིམ་བདག །ཅི་ལ་འོངས་རི་བྲགས་ག་གེ་མོ་ན་ཁྱིམ་བདག་ཆེ་གེ་མོ་ཞིག་མཆིས་པའི་དགེ་སློང་དག་མཐོང་བར་འཚལ་ལོ། །ཉེ་དགས་གཞན་ལ་བརྗོད་ཀྱིས་དོགས་ནས། ཁྱོད་ཀྱི་སྙིང་ལམ་ན་ཁོ་བོ་ཅག་ཟན་དང་གོས་སུས་སྦྱིན་སྙམ་པ་ལས་གཞན་བསམ་གཏན་དང་ཀློག་པ་མི་སེམས་སྙམ་མམ། དེས། འདོད་པ་ཅན་འདིས་ཀྱང་བདག་སྨད་ན་གཞན་གྱིས་ལྟ་ཅི་སྨོས་སྙམ་ནས་ཅིའང་མི་སྨྲའོ། །ཉེ་དགས་དྲུག་སྡེའི་གན་དུ་སོང་ནས། བདག་ཅག་གིས་ཡུན་ཇི་སྲིད་ཀྱིས་ཕོངས་པ་སྤང་བར་བྱ། ཁྱོད་ཀྱིས་ཅུང་ཟད་ཐོས་སམ། ཐོས་ཏེ། རི་བྲགས་ག་གེ་མོ་ན་ཁྱིམ་བདག་ཆེ་གེ་མོས་འདུག་གནས་བྱས་ནས་དེ་ན་འདུག་པ་ལ་ཆོས་གོས་དང་བསོད་སྙོམས་སྟོབ་ཀྱིས་འདོང་ངོ༌། །ཅི་ཐམས་ཅད་འདོང་ངམ། ཉེ་དགའ་ན་རེ། དྲུག་ཁོ་ན་འདོང་ངོ་ཞེས་སོང་བ་དང༌། གཅེར་བུ་པ་དེ་དག་གིས་སྲུང་མ་གཅིག་བཞག་ནས་གཞན་དུ་སོང་ངོ༌། །དྲུག་སྡེས་རི་བྲགས་དེར་ཕྱིན་པ་ན། ཁྱིམ་བདག་གིས། ཁྱེད་སུ་ཡིན། སྟོན་པའི་ཉན་ཐོས་དག་གོ །མ་ནོངས་ཏེ་བདག་ཀྱང་སྟོན་པའི་(༢༢༥ན)ཉན་ཐོས་དག་མཐོང་འདོད་ན་ཁྱེད་ཀྱང་བྱོན་ནོ། །བདག་གིས་འདུག་གནས་བགྱིས་པ་དེར་བཞུགས་དང༌། བསོད་སྙོམས་བསྟབ་བོ། །གནས་མལ་ཡོད་དམ། མ་མཆིས་སོ། །ཁོ་བོ་ཅག་ས་ལ་མལ་མི་འཆའོ། །དེས། གནས་མལ་བཙལ་ནས་བསྐུར་རོ། །
གཅེར་བུ་པ་དེ་ན་རེ། འདི་ཁྱེད་ཀྱི་གཙུག་ལག་ཁང་མིན་གྱིས་མ་འཇུག་ཅིག །དེ་སྐད་མ་ཟེར་ཅིག་འདུག་ན་འདུག་ཏུ་ཟད། མི་འདུག་ན་མཚམས་ཆེན་པོ་གཅད་དོ། །དེས་བསམས་པ། འདི་དག་ནི་མི་དྲུག་ཡོད་ལ། བདག་གཅིག་པུ་ཡིན་པས་གནོད་པ་བྱས་ན་མི་རུང་ངོ་སྙམ་ནས་བྲོས་སོ། །དྲུག་སྡེ་ཉི་མ་རེ་རེ་ཞིང་དེའི་ཁྱིམ་དུ་སོང་སྟེ་ཟའོ། །དུས་གཞན་ཞིག་ན་ཁྱིམ་བདག་དེ་བྱ་བ་གཞན་ཞིག་ལ་སོང་སྟེ། བདག་མ་འཁོར་གྱི་བར་ལ་སྔར་བཞིན་དུ་གསོལ་ཅིག །དེ་ལྟར་བྱའོ། །ཉི་མ་རེ་རེ་ཞིང་དེར་སོང་ནས་ཟ་བ་ན། བདག་ཅག་ཡུན་ཇི་སྲིད་དུ་གཞན་སྤྱོད་ཀྱིས་འཁོད། རང་སྤྱོད་བསྟན་པར་བྱའོ་ཟེར་ནས། བུད་མེད་འདིའི་མིག་དང་རྣ་བ་སོགས་མཛེས་པ་ལ་ལྟོས་ཤིག །བུད་མེད་དེ་ངོ་ཚ་ནས་གནས་ཁང་དུ་ཞུགས་སོ། །དེ་འཁོར་ནས། སྦྱིན་གནས་ལ་སྔར་བཞིན་གསོལ་ལམ། འདི་འདྲའི་སྦྱིན་གནས་མི་འདོད་དེ་འགའ་ལས་ཀྱང་མ་ཐོས་པའི་ཚིག་ཐོས་སོ། །དེས་བསམས་པ། བུད་མེད་ནི་སྐྱེས་པ་ལ་སེམས་པ་ཡིན་པས་གཅེར་བུ་ལ་དགའི། སྟོན་པའི་ཉན་ཐོས་ཆོས་གོས་ལེགས་པར་བགོས་པ་ལ་མི་དགའོ་སྙམ་ནས། ཁྱོད་གཅེར་བུ་སྒྲེན་མོ་ལ་དགའི། ཉན་ཐོས་ཆོས་གོས་གྱོན་པ་ལ་ག་ལ་དགའ། ཐུགས་མི་ཆེས་ན་མངོན་སུམ་དུ་བགྱིའོ། །ཁྱིམ་བདག་དེས་སྔར་བཞིན་འགྲོ་བ་སྐད་བྱས་ནས་ཁྱིམ་དུ་བསྡད་དོ། །དྲུག་སྡེ་ལ་དེའི་ཆུང་མས་ཟས་བྲིམས་པ་དང༌། སྔར་བཞིན་ཟེར་ནས། ཁྱིམ་བདག་དེས་འཁུར་བ་གཅིག་ཕྲི་བ་དང༌། དྲུག་སྡེ་ན་རེ། སྤྱོད་ཡུལ་ཚིག་གོ །མུ་ལྟོ་བ་ལ་སྦྱིན་རྒྱུའང་མེད་དོ། །ཕྱི་དེ་ཉིན་པར་འཁུར་བ་གཉིས་པ་ཕྲི་བ་དང༌། ལྷུང་བཟེད་ཀྱི་གཞི་དོར་རྒྱུའང་མེད་དོ་ཟེར་རོ། །རིམ་གྱིས་འབྲས་ཆན་རྩུབ་བོ་དང༌། རྩབས་མོ་བསྐོལ་བ་བྱིན་པས། སྤྱོད་ཡུལ་ཚིག་གོ །ཡང་སྨྲས་པ། བདག་ཅག་སྒོ་འཕར་བརྒྱ་ཉིད་འདས་ཀྱང་ལྟོ་ཁེངས་པ་སྒྲུབ་དཀའ་ན། འདིར་གྲིབ་མ་བསིལ་བ་ལ་འབྲས་ཆན་རྩུབ་པོ་དང་རྩབས་བསྐོལ་བ་མི་འདོད་དམ། གཅེར་བུ་པ་དེའང་འཁོར་ནས་གྲོགས་དག་ལ། བདག་ཅག་གི་སྤྱོད་ཡུལ་ཕྲོགས་ཀྱིས་ཕྱིར་ཁུར་ཅིག །ཁྱོད་འདུག་གནས་བོར་ནས་གར་སོང༌། དགེ་སྦྱོང་གིས་བསྐྲད་དོ། ཇི་སྙེད་ལྷགས། མི་དྲུག་གོ །བདག་ཅག་དྲུག་ཅུ་ཡོད་ན་ཤིན་ཏུ་བརྡེགས་ཏེ་སྐྲོད་མི་ནུས་སམ་འདོང་ངོ༌། །བདག་ཅག་གིས། ཤེས་པ་ཅན། རེམ་ཞེས་བརྗོད་པ་ན་དྲུག་སྡེ་རེ་རེ་ལ་ཁོ་བོ་བཅུ་བཅུ་རུབ་སྟེ་ཤིན་ཏུ་བརྡེག་པར་བྱའོ། །ཇེ་ཁྱིམ་(༢༢༥བ)བདག་ལ་དྲིའོ་ཞེས་སོང་ནས། ཁྱིམ་བདག །ཁྱོད་ཀྱི་འདུག་གནས་སུ་ལ་ཕུལ། སུ་ལའང་མ་ཕུལ་ཏེ་དེ་ན་འདུག་པ་ལ་བསོད་སྙོམས་སྟོབ་བོ། །ཁྱིམ་བདག་ནི་དབུས་ན་གནས་པ་ཡིན་ནོ་ཟེར་ནས་འདུག་གནས་སུ་སོང་སྟེ། ཀྱེ་དགེ་སྦྱོང༌། ཕྱིར་བྱུང་ཞིག །མི་འབྱུང་ན་མཚམས་གཅད་དོ། །དྲུག་སྡེས་ཀྱང་སྔར་བཞིན་བརྗོད་དོ། །
གཅེར་བུ་པས། ཤེས་པ་ཅན། རེམ་ཞེས་བརྗོད་ནས་དྲུག་སྡེ་རེ་རེ་ལ་བཅུ་བཅུ་རུབ་སྟེ་བརྡེགས་པ་དང༌། དྲུག་སྡེས། ཚངས་པ་མཚུངས་པར་སྤྱོད་པ་དག་གིས་སྨད་ན་མི་རུང་གིས་མིག་དང་རྣ་བ་སྲུངས་ཤིག་ཅེས་སྨྲས་ནས། སྒྲེ་བྱི་དག །ཕོད་ཡང་དག་ན་འདིར་སྣུན་ཅིག་ཅེས་རྐུབ་ཚོས་བསྟན་ནས་རྡེག་ཏུ་བཅུག་གོ །གཅེར་བུ་པ་དག་ངལ་ནས་རྡེག་མི་ནུས་པའི་ཚེ། དྲུག་སྡེས། ཤིན་ཏུ་རེམ་ཞིག་ཟེར་ནས། རེ་རེས་ལག་ངར་བརྐྱངས་པས་ཀྱང་གཅེར་བུ་པ་ལྔ་ལྔ་ས་ལ་བརྡབས། ལག་རང་བསྐུམས་པས་ཀྱང་ལྔ་ལྔ་ས་ལ་བརྡབས་ནས། དགའ་བོ་ཉེ་དགའ། ཕམ་པ་བྱུང་ན་མི་རུང་གིས་རྩ་བའི་ལྟུང་བ་སྲུངས་ཤིག་ཟེར་ནས། ཐལ་ལྕག་དང་ཁུ་ཚུར་དང་རྡོག་པ་དང་ལྕུག་མས་ཤིན་གཏལ་ཅིང༌། གཅེར་བུ་པ་དག་རྡེག་བཞིན་དུ་ནང་ནས་ཕྱི་རོལ་ཏུ་འཛིངས་ཏེ་བྱུང་བ་དང་ཁྱིམ་པས་མཐོང་ནས། དགེ་སྦྱོང་གཡུལ་འགྱེད་པའི་ཆར་འབབ་པ་ལ་ལྟོས། དྲུག་སྡེ། སྤྱོད་ཡུལ་ཚིག་ཅིང་མེ་མདག་མ་ཞི་ཡིས་འདོང་དོ་ཟེར་ནས་མཉན་ཡོད་དུ་སོང་ངོ༌། །ལྷོ་ནས་རྒྱང་པན་པའི་རྒོལ་བ་འཆར་ཀ་ཞེས་བྱ་བ་མཉན་ཡོད་དུ་འོངས་ནས་རྩོད་པའི་ཕྱིར་དུ་ཀུན་ཤེས་ཀོའུ་དི་ནྱའི་དྲུང་དུ་སོང་སྟེ། ཀྱེ་དགེ་སློང༌། ཁོ་བོས་བླ་མ་ལས་ཡི་གེ་ཉུང་ཤས་ཤིག་བླངས་ཏེ། ཁོ་བོ་ཁྱོད་དང་ལྷན་ཅིག་གཏམ་གཏན་ལ་དབབ་པར་འདོད་དོ། །ཁོ་བོ་ཁྱོད་དང་འགྱེད་པར་མི་འདོད་ཀྱིས་སོང་ཞིག །དེ་ནས་དེས་རྟ་ཐུལ་དང་བཟང་ལྡན་དང་རླངས་པ་དང་མིང་ཆེན་སོགས་ལ་སྨྲས་པས་ཀྱང༌། ཁོ་བོ་ཁྱོད་དང་འགྱེད་པར་མི་འདོད་ཀྱིས་སོང་ཞིག །དེས་ཤཱ་རིའི་བུའི་གན་དུ་ཕྱིན་ནས་སྔར་བཞིན་སྨྲས་པ་དང༌། དེ་ལ་དགེ་བ་ཅུང་ཟད་ཡོད་ཅིང་བདག་ཉིད་ལ་རག་པར་མཐོང་ལ། དེའང་རྩོད་པས་འདུལ་བ་དང་ཞག་བདུན་ནས་འདུལ་བར་མཐོང་ནས། བྲམ་ཟེ། ཚུར་ཤོག་དེ་ལྟར་བྱའོ་ཞེས་ཉི་མ་དང་པོ་ནས་བདུན་གྱི་བར་དུ་འགྱེད་པ་ལྷག་མ་དང་བཅས་པར་བཏང་ངོ་། །ཐམས་ཅད་དུ། འཆར་ཀ་ཞེས་བྱ་བ་དང་ཤཱ་རིའི་བུ་ཉི་མ་བདུན་གྱི་བར་དུ་བརྩད་ན་ཕན་ཚུན་ཚར་མ་ཆོད་དོ་ཞེས་གྲགས་ན་སྐྱེ་བོ་འབུམ་ཕྲག་དུ་མ་འདུས་པ་དང་ཤཱ་རིའི་བུས་རྒྱང་པན་པ་དེ་ཕམ་པར་བྱས་ནས་དེ་རབ་ཏུ་ཕྱུང་བ་བསྙེན་པར་རྫོགས་པར་བྱས་ཏེ་དགྲ་བཅོམ་པ་ཐོབ་བོ། །
དེ་ནས་འཁོད་དེ་རྣམས། ཤཱ་རིའི་བུས་རྒོལ་བ་ཚར་བཅད་དོ་ཞེས་ཡ་མཚན་སྐྱེས་པ་དང་དེ་དག་གི་བསམ་པ་ཤེས་ནས་ཆོས་བསྟན་པས་སྲོག་ཆགས་འབུམ་ཕྲག་དུ་མས་བདེན་པ་མཐོང་ཞིང་འབྲས་བུ་བཞི་ཐོབ་བོ། །ཤཱ་རིའི་བུས་(༢༢༦ན)རྒྱང་པན་པ་སྔ་དྲོ་ཚར་བཅད་ནས་ཕྱི་དྲོ་དྲུག་སྡེ་སླེབ་སྟེ་དགེ་སློང་རྣམས་ཀྱིས་ཤཱ་རིའི་བུའི་བསྔགས་པ་བརྗོད་པ་དང༌། ཤཱ་རིའི་བུ་ཚོགས་ཅན་གཉིས་པ། ཆོས་ཀྱི་དམག་དཔོན། ཆོས་ཀྱི་འཁོར་ལོ་རྗེས་སུ་བསྐོར་པས་རྒོལ་བ་གཅིག་ཚར་བཅད་པ་ངོ་མཚར་ཅི་ཆེ། གལ་ཏེ་ཤཱ་རིའི་བུས་ཚར་མ་བཅད་ནའང་སྟོན་པ་ཀླད་ན་བཞུགས་པས་དེ་ངོ་མཚར་མི་ཆེའི། ཁོ་བོ་ཅག་མི་དྲུག་གིས་གཅེར་བུ་པ་དྲུག་ཅུ་ཚར་བཅད་པ་ངོ་མཚར་ཆེའོ། །རིགས་པ་གང་གིས། དབྱུག་པའི་རིགས་པས་ལུས་ལ་ཆོས་བཤད་པས་སོ། །ཤིའམ་མ་ཤི། དེའི་ཚེ་ན་མ་ཤི་ལ་ད་གཏོལ་མེད་དོ། །དགེ་སློང་དོན་ཉུང་ངུ་དག །ངོ་ཚ་བའི་ཡན་ལག་དེས་རློམ་པར་བྱེད་དོ་ཞེས་པ་དེ་གསོལ་བས། བྱུང་བ་འདི་དང་སོགས། འདུག་གནས་གཅིག་ཏུ་ཞག་ལོན་པའི་དགེ་སློང་གིས་བསོད་སྙོམས་གཅིག་བཟའ་བར་བྱའོ། །དེ་ལས་ལྷག་པར་ཟ་ན་ལྟུང་བྱེད་དོ། །དེ་ནས་ཁྱིམ་བདག་དེ་ཟོང་ཐོགས་ཏེ་རི་བྲགས་དེ་ཉིད་དུ་ཕྱིན་ནས། ཁྱིམ་བདག་དེའི་ཚོང་ཁང་དུ་ཞུགས་པ་དང༌། དེས་གཅེར་བུ་ལ་ཟས་བྲིམས་ནས། གྲོགས་པོ། ཞིང་དང་ས་བོན་བཟང་ངམ། ས་བོན་བཟང་སྟེ་ཞིང་ངན་ངོ༌། །བཟང་པོ་སུ་ཡོད། ཉན་ཐོས་སོ། །དེ་དག་གི་མིང་ཡང་མ་སྨྲོས་ཤིག །ཅི་ལྷགས་སམ། ལྷགས་སོ། །གང༌། དྲུག་སྡེའོ། །དེ་དག་གིས་ཅི་བྱས། འདི་དང་འདིའོ། །ཁྱོད་ཀྱིས་རྒྱ་མཚོ་ཆེན་པོ་ནས་མཆིང་བུ་བླངས་སོ། །ཉན་ཐོས་བཟང་པོའང་ཡོད་དེ། ཤཱ་རིའི་བུ་ལ་སོགས་པ་ཁྱོད་ཀྱིས་མཐོང་ན་དད་པར་འགྱུར་རོ། །
དེ་དག་འདིར་བྱོན་ན་བདག་གིས་བསོད་སྙོམས་བསྟབ་བོ། །དེས་ཟོང་བསྒྱུར་ཏེ་འོངས་ནས་སྟོན་པ་ལ་ཞུས་པས་གནང་ངོ༌། །དེ་དག་ཤཱ་རིའི་བུས་འདུལ་བར་དགོངས་ནས། ཤཱ་རིའི་བུ། ཁྱོད་ཀྱིས་རི་བྲགས་ཆེ་གེ་མོའི་ཁྱིམ་བདག་ཆེ་གེ་མོ་དང༌། དེའི་སྐྱེ་བོའི་ཚོགས་ལ་སོམས་ཤིག །བཀའ་བཞིན་འཚལ་ཞེས་ཤཱ་རིའི་བུ་འཁོར་ལྔ་བརྒྱ་དང་བཅས་པ་དེར་སོང་ནས་འདུག་གནས་དེར་ཞུགས་པ་དང༌། ཁྱིམ་བདག་གིས་ཐོས་ནས་སོང་སྟེ་བསོད་སྙོམས་ལ་སྤྱན་དྲངས་ཏེ་བཟའ་བཅའ་བསོད་པས་ཚིམ་པར་བྱས་ནས། ཆོས་སྟན་དུ་གསོལ། ཁྱོད་ཀྱིས་ས་ཕྱོགས་ཡངས་པར་སྟན་ཤོམས་ལ་རི་བྲགས་པ་རྣམས་བོས་ཤིག །དེས་དེ་ལྟར་བྱས་པ་དང་ཤཱ་རིའི་བུས་དེ་རྣམས་ཀྱི་བསམ་པ་ཤེས་ནས་ཆོས་བསྟན་པས་སྲོག་ཆགས་ཁྲི་ཉིས་སྟོང་གིས་བདེན་པ་མཐོང་ནས་འབྲས་བུ་བཞི་ཐོབ་བོ། །ཤཱ་རིའི་བུས་ཡུན་རིང་དུ་ཆོས་བསྟན་པས་གདུགས་ཚོད་ཡོལ་ཅིང་རླུང་གིས་རྒྱབ་ན་ནས། ཁྱིམ་བདག་དེས། བདག་གི་འདུག་གནས་སུ་བཞུགས་ཤིག་བསོད་སྙོམས་བསྟབ་བོ། །ཁྱོད་ཉིད་ལ་བརྟེན་ནས་བསླབ་པ་བཅས་པས་འགྲོའོ་ཟེར་ནས་མཉན་ཡོད་དུ་ཕྱིན་པ་དང༌། ཤཱ་རིའི་བུའི་ལྷན་ཅིག་(༢༢༦བ)གནས་པ་དང་ཉེ་གནས་ལ་དགེ་སློང་རྣམས་ཀྱིས་དྲིས་པ། བདེ་བར་བརྒྱུས་སམ། ཅུང་ཟད་བདེ་བར་ཡང་བརྒྱུས། ཅུང་ཟད་སྡུག་བསྔལ་བར་ཡང་བརྒྱུས་སོ། །ཅི་བདེ་བར་བརྒྱུས། མཁན་པོས་གདུལ་བྱའི་དོན་འདི་སྙེད་མཛད་པས་སོ། །ཅི་ཞིག་སྡུག་བསྔལ་བར་བརྒྱུས། མཁན་པོ་སྙུང་བཞིན་དུ་གདུགས་ཚོད་བཅད་དེ་རི་བྲགས་དེ་ནས་བཞུད་པས་སོ། །དེ་གསོལ་བས། ན་བ་མ་གཏོགས་ཏེ། སྔ་མ་ནི་བཅས་པ་ཡིན་ལ་འདི་ནི་གནང་བ་སྟེ། འདུག་གནས་གཅིག་ཏུ་ཞག་ལོན་པའི་དགེ་སློང་མིན་བས་བསོད་སྙོམས་གཅིག་བཟའ་བར་བྱའོ། །ལྷག་པར་ཟ་ན་ལྟུང་བྱེད་དོ། །
ལྷུང་བཟེད་དོ་གསུམ་ལས་ལྷག་པར་ལེན་པའི་ལྟུང་བྱེད་ནི། སྟོན་པ་མཉན་ཡོད་ནའོ། །བྱང་ལམ་ནས་དོན་མཐུན་དག་ལྷགས་པ་དྲུག་སྡེས་མཐོང་ནས། ཅུང་ཟད་ཐོབ་སྲིད་ཀྱིས་སོང་ལ། བསོད་སྙོམས་ཟོ་ཟེར་ན། ལྟོ་གང་བས་ཆོག་གོ་ཞེས་བརྗོད་ཅིང་།གོས་སྟེར་ན་བླང་ངོ་ཞེས་གྲོས་བྱས་ནས་སོང་སྟེ་དེ་དག་ལ་ཆོས་བསྟན་པས། བསོད་སྙོམས་གསོལ་ཅིག །ཆོག་གོ །ཡང་ཡང་དེ་ལྟར་བྱས་སོ། །དེ་ནས་ཚོང་པ་རྣམས་གླང་གསོར་སོང་བའི་ཕྱི་བཞིན་འབྲངས་ནས་ཆོས་བསྟན་པས། བསོད་སྙོམས་གསོལ་ཅིག །ཆོག་གོ །དེད་དཔོན་ན་རེ། འདི་དག་ཡང་ཡང༌། ལྟོ་གང་བས་ཆོག་གོ་ཞེས་གསུངས་པ་ལས་ན་བཟའ་མེད་གོར་མ་ཆག་གིས་དབུལ་ལོ་ཞེས་ལྭ་བ་སྲིན་བུའི་མདོག་ཅན་རེ་རེ་བསྐོན་ནོ། །ཁྱེད་ཅག་ཡང་ཡང༌། བསོད་སྙོམས་ཟོ་ཟེར་བས་བལྟའི་འོན་ཅིག་ཅེས་དྲུག་སྡེའི་གཅིག་གིས་ཐབ་སྣོད་ལྟ་བུ་ཞིག་བཟེད་ནས། འདིར་བླུགས་ཤིག །དོན་མཐུན་དག་གིས་བསམས་པ། སྣོད་འདི་རེ་ཆེ་ཞིག་སྟེ། འདི་བཀང་བས་འདི་དག་ཐམས་ཅད་ཀྱི་ལྟོ་ཁེངས་པར་འགྱུར་རོ་སྙམ་ནས་ཕུལ་བས། རེ་རེས་དེ་འདྲ་རེ་བཟེད་ནས་བཀང་བས་ལམ་བརྒྱགས་ཐམས་ཅད་ཟད་ནས། འཕགས་པ་དག །བདག་ཅག་གི་ལམ་བརྒྱགས་ཅུང་ཟད་དེ་ཟད་ཀྱིས་མི་འདི་ལ་པ་ཎ་བསྐུར་ནས་གཏང་གིས་ལམ་བརྒྱགས་གཞོལ་ལ་བསེལ་བ་དང་བཅས་པས་གཏང་དུ་གསོལ། དེ་ལྟར་བྱའོ། །དེ་དག་གིས་མི་དེ་ཁྲིད་ནས་ཉིན་རངས་ལས་བྱེད་དུ་བཅུག་ཉི་མ་ཡོལ་བ་དང༌། ད་ཉོས་ལ་རྒྱུགས་ཤིག་ཟེར་ནས་ཕྱིན་པས་ཆོམ་རྐུན་པས་བཅོམ་པ་དང༌། བསེལ་བ་མ་བཏང་ངམ། དེ་ཉིད་ཀྱིས་བཅོམ་མོ། །དེ་དག །ཕན་པ་བྱ་ཟེར་ནས་གནོད་པ་བྱེད་དོ་ཞེས་ཁ་ཟེར་རོ། །འདི་ནི་རེ་ཞིག་བྱུང་བའོ། །མཉན་ཡོད་ན་ཁྱིམ་བདག་ཅིག་ལ་བུ་མོ་གཡས་ཞར་བ་ཞིག་བྱུང་བ་ཆེར་སྐྱེས་པ་ན་དེ་གཡས་ཞར་ཡིན་པས་སུས་ཀྱང་མ་བླངས་སོ། །ཁྱིམ་བདག་ཅིག་གིས་ཆུང་མ་བདུན་གྱི་བར་དུ་བླངས་པས་རང་རང་གིས་ལས་ཀྱིས་ཤིའོ། །ཁྱིམ་བདག་དེ་ཡང་སྐུར་བ་བཏབ་པའི་ལས་ཀྱིས། ཆུང་མ་གསོད་པ་ཞེས་གྲགས་སོ། །དེས་བུ་མོ་བསླངས་པ་དང༌། ཅིའི་ཕྱིར་བུ་མོ་གཏང་ཞེས་(༢༢༧ན)མི་སྦྱིན་ནོ། །ཡུགས་ས་མོ་བསླངས་པས་ཀྱང༌། ཁོ་མོ་ཅག་གིས་ཅིའི་ཕྱིར་བདག་གཏང་ཟེར་རོ། །དེ་ཡི་ཆད་ནས་རང་གིས་ཁྱིམ་གྱི་སོ་ཚིས་བྱེད་པ་ན་དེའི་ཆུང་གྲོགས་ཤིག་གིས་འོངས་ནས། ཅིའི་ཕྱིར་རང་གིས་ཁྱིམ་གྱི་སོ་ཚིས་བྱེད། འདི་ལྟར་རོ། །གཡས་ཞར་མ་ལོང་ཞིག ། མི་སྟེར་རོ། །དེ་བུ་མོས་དུབ་པས་སྟེར་རོ། །དེས་གཡས་ཞར་མའི་ཕའི་ཁྱིམ་དུ་སོང་སྟེ། བདེ་ལེགས་ཞེས་བརྗོད་པས། ཅི་སློང༌། བུ་མོ་གཡས་ཞར་མའོ། །དེ་དག་དེས་སྐྱོ་བས། སྦྱིན་གྱི་ཉི་མ་མང་གེ་མོ་ལ་ཤོག་ཅིག །དེའི་ཆུང་གྲོགས་དེ། བདག་གིས་གཡས་ཞར་མ་སློངས་ཤིག་ཅེས་བསྐུལ་བ་དེ་ནི་མ་ལེགས་ཏེ། དེ་མཚན་ངན་ཡིན་པས་གྲོགས་པོ་བསད་ན་མི་རུང་ངོ་སྙམ་ནས་དེའི་གན་དུ་སོང་སྟེ། ཁྱོད་ཀྱིས་གཡས་ཞར་མ་ཐོབ་བམ། ཐོབ་བོ། །དེས། རྒྱ་སྐྱེགས་ཤིང་གི་སོ་ཤིང་དང༌། །ནུབ་ཏུ་སྔས་བསྟན་ཉལ་བ་དང༌། །ཤིན་ཏུ་གཉིད་ཆེ་ཞོ་འཐུང་དང༌། །ཆུང་མ་གཡས་ཞར་ལེན་བྱེད་ན། །ཞི་བའང་གནས་ནས་ཉམས་པར་འགྱུར། །འགོག་ལ་འགོག་བྱེད་བབ་པ་དང༌། །རྡོ་ལ་ལྕགས་ནི་བཏབ་པ་ལྟར། །ཁྱོད་ཀྱང་ཆུང་མ་གསོད་བྱེད་ལ། །དེ་ཡང་གཡས་ཞར་ཡིན་པས་ན། །ཁྱེད་གཉིས་གང་རྒྱལ་གང་ཕམ་བལྟའོ། །གྲོགས་པོ། བུད་མོ་དེ་མཚན་ངན་ཡིན་པས་ཁྱོད་ཤི་ན་མི་རུང་གིས་དེ་བོར་ལ། ངའི་སྲིང་མོ་ཡུགས་ས་མོ་ལོང་ཞིག །ད་འདོར་མི་ནུས་སོ། །འོན་ཀྱང་ཐབས་ཤིག་བྱའོ། །གཡས་ཞར་མའི་མས་ཀྱང་བག་རྫོངས་སྟ་གོན་བྱས་སོ། །
དྲུག་སྡེ་ཁྱིམ་དེར་སོང་བ་དང་འཁུར་བ་སྲེག་པ་མཐོང་ནས། དུས་སྟོན་བྱེད་དམ་ཅི། ཁྱེད་ཀྱི་ལྕམ་མོ་བག་མར་འགྲོ་བ་ལ་ཐུག་པས་བག་རྫོངས་སྟ་གོན་བགྱིད་དོ། །ཁོ་བོ་ཅག་གིས་ཅུང་ཟད་མི་འཐོབ་བམ། སུས་སྦྱིན་དགོས། ཁྱེད་ཀྱི་ལགས་མོད། དྲུག་སྡེས། ཕུགས་ན་ཡོད་པ་ཞོག་ཅིག །འཕྲལ་དུ་ཅི་སྦྱིན་བལྟའི་འོན་ཅིག་ཟེར་ནས་ལྷུང་བཟེད་ཐམས་ཅད་འཁུར་བས་བཀང༌། ཟས་ཐམས་ཅད་བསྡུས་ཏེ་སོང་ངོ༌། །ཁྱིམ་བདག་དེ་འོངས་པ་དང་ཆུང་མ། སྦྱིན་གནས་ཀྱིས་ཟས་བསྣམས་ཀྱིས། བཞུད་ལ་ཁྱོ་ག་དེ་ལ། བག་རྫོངས་སྟ་གོན་བྱེད་ཀྱི་བར་དུ་ཉི་མ་ཉུང་ཤས་སྡོད་ཅིག་གསུངས་ཤིག །དེ་མི་སྡོད་ཀྱིས་བག་མར་བཏང་ལ་ཉེ་དུའི་ཟན་ཕྱིས་སྦྱིན་པར་བྱའོ། །དེ་ལ་གཞན་སུས་ཀྱང་བུ་མོ་མི་སྟེར་བས་སྡོད་ཀྱིས་བཞུད་ཅིག །ཕྱིན་ནས་དེ་ལྟར་བྱས་པས། མི་སྡོད་དེ། དེང་སྦྱིན་ན་བླངས། མི་སྟེར་ན་དོར་རོ། །དེས་གྲོགས་པོའི་སྲིང་མོ་ཡུགས་ས་མོ་དེ་བླངས་སོ། །གཡས་ཞར་གྱི་ཕས། བག་མ་ལོང་ཞིག །མི་ལེན་ནོ། །དེས་དེ་བཟུང་ནས་རྒྱལ་པོའི་ཕོ་བྲང་དུ་གཤགས་ལ་བཀུག་པས་ཕམ་པར་བྱས་ཤིང༌། མའང༌། བུ་མོ་མ་ལོ་མ་མོ་ཟེར་ནས་ངུ་བ་ཁྱིམ་པ་རྣམས་ཀྱིས་ཐོས་ནས། ཀྱེ་མ་དགེ་སྦྱོང་གི་ཚུལ་(༢༢༧བ)ནི་ཚིག་གོ་ཟེར་བའི་སྐབས་དེ་གསོལ་བས། བྱུང་བ་འདི་དང་སོགས། དགེ་སློང་རབ་ཏུ་མང་པོ་དག་ཁྱིམ་རྣམས་སུ་དོང་བ་ལས་གལ་ཏེ་དེ་དག་ལ་བྲམ་ཟེ་དང་ཁྱིམ་བདག་དད་པ་ཅན་དག་གིས་ཕྱེ་དག་དང༌། འཁུར་བ་དག་དུས་ཀྱིས་སྟོབ་པར་གྱུར་ལ་འདོད་ན་དགེ་སློང་དེ་དག་གིས་ལྷུང་བཟེད་གང་བ་གཉིས་སམ་གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ། །
སྤངས་པ་ཟ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །དགེ་སློང་དག །ང་ནི་སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང༌། གནོད་པ་དང་ཉམ་ང་བ་ཆུང་བ་དང༌། བདེ་བ་ལ་གནས་སོ། །ཁྱེད་ཀྱང་སྟན་གཅིག་པའི་ཟས་ཟ་ན་དེ་ལྟར་འགྱུར་རོ། །ཞེས་གསུངས་པས་དགེ་སློང་རྣམས་སྟན་གཅིག་པ་བྱེད་དོ། །དེ་དག་ཟ་བ་ན་མཁན་སློབ་མཐོང་བས་ལྡང་བ་བྱེད་ཅིང༌། དེ་དག །བདག་ཅག་གིས་སྤངས་སོ་ཞེས་མ་ཟོས་པས་རིད་ཅིང་ཉམ་ཆུང་བ་གཟིགས་ནས་ཀུན་དགའ་བོ་ལ་རྨེད་པས་དེ་གསོལ་བ་དང༌། ཇི་ཙམ་གྱིས་ཆོག་པ་བཟའ་བར་བྱའོ། །ཟས་ཀྱི་གནས་སུ་རྒན་རིམ་དུ་འདུག་ཅིག་ཅེས་གསུངས་པས། དྲུག་སྡེ་ཕྱིས་འོངས་ཤིང་སྔ་མ་ཟ་ཞིང་བྲེལ་བ་བསླང་པས། དགེ་སློང་ཟ་ཞིང་བྲེལ་བ་མ་བསླང་བར་གུང་དུ་འདུག་ལ་ཟོ་ཞིག །ཇི་ཙམ་གྱིས་ཟས་ཟ་ཞིང་བྲེལ་བ་ལགས། ཐ་ན་ལན་ཚྭ་ཡན་ཆད་སོགས། དེ་ལྟར་གསུངས་པ་དང༌། ལོ་མ་དང་སྲན་ཚོད་དང་ལྡམ་ལྡུམ་དང་སྐམ་ཚོད་ཀྱིས་ཀྱང་སྤོང་བར་བྱེད་ཅིང་མ་ཟོས་པས་རིད་ཅིང་ཉམ་ཆུང་བར་གྱུར་ནས། རྨེད་ཅིང་གསོལ་བས། བཟའ་བ་སྤངས་པས་བཅའ་བ་སྤངས་པར་འགྱུར་གྱི། བཅའ་བ་སྤངས་པས་བཟའ་བ་སྤངས་པར་མི་འགྱུར་རོ་ཞེས་པ། རྩ་བ་དང་སྡོང་བུ་སོགས། དེ་གསུངས་པ་དང༌། དེས་འབགས་པའི་ལག་པ་དང་ལྷུང་བཟེད་དག་གིས། བདག་ཅག་གིས་སྤངས་སོ་ཞེས་མི་ཟ་བས་རིད་པར་གྱུར་ནས། རྨེད་དེ་གསོལ་བས། རྒྱུ་ལྔས་ཟས་སྤངས་པར་བརྗོད་པར་བྱ་སྟེ། ཟས་ཡོད་པ་དང༌། ཟས་སྟོབ་པ་ཡོད་པ་དང༌། ཟས་བརྩམས་པ་ཡོད་པ་དང༌། ཟས་སྤངས་པ་ཡོད་པ་དང༌། སྤྱོད་ལམ་ལས་ཉམས་པས་སོ་ཞེས་པ། སྤངས་པ་ནི་གནས་བཏང་བའོ་ཞེས་པ་ནས། སོང་ཞིག་ཅེས་བྱ་བ་ཡང་ངོ༌། །ཉེ་བར་འཁོར་གྱིས་ཞུས་པ། ཐུག་པ་ཇི་ལྟ་བུ་སྤང་འཚལ། ཁ་གཟར་གྱེན་དུ་འགྲེང་དུ་མི་བཏུབ་པས་སོ། །སྐྱོ་མ་ཇི་ལྟ་བུ་སྤང་འཚལ། སོར་མོ་ལྔ་མི་མངོན་པ་སོགས། མགུལ་དུ་བཏུང་བ་ལ་ནི་སྤངས་པ་མེད་དོ། །སྟོན་པས། སྤངས་པ་བཟའ་བར་མི་བྱའོ་ཞེས་གསུངས་ན། དྲུག་སྡེ་སྤངས་པའང་ཟ། མ་སྤངས་པའང་ཟ་ན་དོན་ཉུང་དུ་དག་འཕྱ་བ་དེ་གསོལ་བས། བྱུང་བ་འདི་དང་སོགས། སྤངས་པ་ཟོས་ན་ལྟུང་བྱེད་དོ། །སྟོན་པ་མཉན་ཡོད་ནའོ། །ཁྱིམ་བདག་ཅིག་གིས་སངས་རྒྱས་དགེ་འདུན་པ་དང་བཅས་པ་ཁྱིམ་གཞན་དུ་སྤྱན་དྲངས་སོ། །དགེ་སློང་ནད་པ་མང་པོའི་ནད་གཡོག་མང་པོས་རང་ཉིད་ཀྱིས་(༢༢༨ན)ཟོས་ནས་ནད་པའི་སྐལ་བ་མནོས་ཏེ་འོངས་པ་དང་ནད་པས་ཟ་མ་ནུས། ནད་གཡོག་གིས་ཀྱང༌། བདག་ཅག་གིས་སྤངས་སོ་ཞེས་མ་ཟོས། ཀུན་དགའ་ར་བ་པ་དང་དགེ་ཚུལ་ཡང་མེད་ནས་ཟས་ཀུན་དགའ་ར་བའི་ནང་དུ་སྤུངས་ཏེ་བཞག་པ་དང་བྱ་རོག་གིས་ཟ་བའི་སྒྲ་ཆེན་པོ་བྱུང་བ་སྟོན་པས་རྨེད་དེ་ཀུན་དགའ་བོས་གསོལ་བས། ངས་དགེ་སློང་རྣམས་བདེ་བ་ལ་རེག་པར་གནས་པའི་ཕྱིར་དང་སྦྱིན་བདག་གི་སྦྱིན་པར་བྱ་བའི་ཆོས་ལ་ལོངས་སྤྱད་པའི་ཕྱིག་ལྷག་པོར་བྱ་བར་གནང་ངོ་སྙམ་དུ་དགོངས་ནས། ལྷག་པོར་བྱས་ཏེ་བཟའ་བར་རྗེས་སུ་གནང་ངོ༌། །ལྷག་པོར་ཇི་ལྟར་བྱ་བ་མ་ཤེས་ནས། མཚམས་ཀྱི་ཕྱི་རོལ་དང་སོགས། དེ་དག་ལ་བསླབ་པ་ལ་གུས་པའི་བསྔགས་པ་བརྗོད་ནས། སྔ་མ་ནི་བཅས་པ་ཡིན་ལ། འདི་ནི་གནང་བ་སྟེ། ཟས་ཟོས་ཟིན་ཅིང་སྤངས་པ་ལས་ལྷག་པོར་མ་བྱས་པར་བཅའ་བའམ་བཟའ་བ་འཆའ་འམ་ཟ་ན་ལྟུང་བྱེད་དོ། །
སྤངས་པ་ལ་སྟོབ་པའི་ལྟུང་བྱེད་ནི། སྟོན་པ་མཉན་ཡོད་ནའོ། །ཁྱིམ་བདག་བཟའ་མི་གཉིས་ཡོད་པ་རྒས། ཉེ་དུ་དང་ནོར་ཟད་ནས་ཆུང་མ་ལ། ང་རྒས་ནོར་ཟད་པས་རབ་ཏུ་འབྱུང་ངོ༌། །མཛོད་ཅིག །དེས་རྒྱལ་བྱེད་ཚལ་དུ་སོང་སྟེ་དགེ་སློང་ཞིག་ལ། བདག་རབ་ཏུ་དབྱུང་དུ་གསོལ། ཁོ་བོ་གསར་བུ་ཡིན་པས་རབ་ཏུ་འབྱིན་དུ་མི་རུང་ངོ༌། །བདག་དང་པོ་ཁོ་ནར་ཁྱོད་ཀྱི་གནས་སུ་ཕྱིན་པས་ཁྱོད་ཀྱིས་གཞན་ལ་གཏོད་ཅིག །དེས་རང་གི་མཁན་པོ་སྤོང་བ་པ་ལ། འདི་རབ་ཏུ་དབྱུང་དུ་གསོལ། བུ། སྟོན་པས། བཤན་པའི་གནས་སུ་བཏང་བ་ནི་བླའི། རབ་ཏུ་ཕྱུང༌། བསྙེན་པར་རྫོགས་ནས་འདོམས་པར་མི་བྱེད་པ་ནི་མི་རུང་ངོ་ཞེས་གསུངས་སོ། །མཁན་པོས་རབ་ཏུ་ཕྱུང་དང་བདག་གིས་བཀླག་གོ །དེས་དེ་རབ་ཏུ་ཕྱུང་བསྙེན་པར་རྫོགས་པར་བྱས་ནས། འདི་ཁྱོད་ཀྱི་སློབ་དཔོན་ཡིན་གྱིས་འདི་ལ་ཀུན་སྤྱོད་དྲིས་ཤིག །དེས་ཀློག་ཏུ་བཅུག་པ་ན་རྒན་ཞུགས་དེ་བརྗེད་ངེས་པས་ཡང་ཡང་ལྟུང་བ་འབྱིན་ནས་བཤགས་པ་བྱེད་དུ་བཅུག་པས། འདིས་ཡང་ཡང་འཆགས་སུ་བཅུག་གིས་འདིའང་འཆགས་སུ་འཇུག་པའི་ཅི་ཡོད་བསམས་པས། སངས་རྒྱས་དགེ་འདུན་དང་བཅས་པ་ཁྱིམ་བདག་ཅིག་གིས་གདུགས་ཚོད་ལ་སྤྱན་དྲངས་སོ། །སངས་རྒྱས་གདུགས་ཚོད་གསོལ་ནས་ཆོས་སྟོན་པ་དང་དགེ་སློང་དེས། རྒན་ཞུགས། ཚུར་ཤོག་ཁྱིམ་ལྟ་རུ་འདོང་ངོ་ཟེར་ནས་སོང་བ་དང༌། གདུགས་ཚོད་གསོལ་ཅིག །ཟོས་ཟིན་ནོ། །སྣོམས་ལ་ལྷག་པོར་མཛད་དེ་གསོལ་ཅིག །དེས་རྒན་ཞུགས་ལ་བལྟས་ཏེ། འདོད་དམ། འཚལ་ལོ། །བྱིན་ལེན་བྱས་ནས་རྒྱལ་བྱེད་ཚལ་དུ་ཕྱིན་པ་དང༌། ཆུ་འཚག་གམ། ལྷག་པོར་བྱེད། ལྷག་པོར་བགྱིའོ། །ངས་རང་གི་ལ་ལྷག་པོར་བྱས། སློབ་དཔོན་གྱི་ལ་མ་བྱས་སོ། །དེ་བྱུང་བ་དང༌། ལྷག་པོར་བྱས་སམ། འཚལ་(༢༢༨བ)ལོ། །ཟོས་པ་དང༌། སློབ་དཔོན། སྐབས་ཕྱེ་ཞིག །ཕྱེའོ། །ལྷག་པོར་མ་བྱས་པར་ཟོས་སོ། །ཁོ་བོས། ལྷག་པོས་བྱས་སམ་ཞེས་མ་དྲིས་སམ། ང་རང་གི་ལ་བྱས་སོ། །ཁོ་བོ་ལྟུང་བ་མི་འཆགས་ཀྱི། ཁྱོད་ལྟུང་བ་དང་བཅས་པའི་གནས་ཡོད་དོ་ཞེས་དགེ་སློང་ལ་བརྗོད་པ་དེ་གསོལ་བས། བྱུང་བ་འདི་དང་སོགས། སྟོབ་ནའོ། །
འདུས་ཤིང་ཟ་བའི་ལྟུང་བྱེད་ནི། སྟོན་པ་འོད་མའི་ཚལ་ན་བཞུགས་པའི་ཚེ་ལྷས་བྱིན་དགེ་སློང་མང་པོ་དང་ལྷན་ཅིག་ཀུན་དགའ་ར་བའི་ནང་དུ་འདུས་ཤིང་ཟ་བ་ལ་དོན་ཉུང་ངུ་དག་འཕྱ་བ་དེ་གསོལ་བས། བྱུང་བ་འདི་དང་སོགས། ཤེས་གཙོ་བོ་ནས། དགེ་སློང་རྣམས་ཀྱིའོ། །དགེ་སློང་མང་པོ་ན་བ་སྨན་པའི་གན་དུ་སོང་སྟེ། སྨན་སྟོན་ཅིག །ཞལ་ཚུས་གསོལ་ཅིག །སུས་སྦྱིན། བདག་གིས་སོ། །ཐམས་ཅད་ལའམ། མིན་ཏུ་བསྙུན་པ་རྣམས་ལའོ། །འདུས་ཤིང་ཟ་བ་བཀག་གོ །ཐུགས་རྗེ་ཅན་ཡིན་པས་གནང་ངོ༌། །གསོལ་བས། ན་བའི་དུས་མ་གཏོགས་སོ། །དགེ་སློང་མང་པོས་མཆོད་རྟེན་དང་དགེ་འདུན་གྱི་ལས་བྱས་པས་བཀྲེས་ནས་ཉལ་བ་དང་ཁྱིམ་པ་དག་ལྷགས་ནས། ཅིའི་ཕྱིར་གཟིམས། བཀྲེས་སོ། །ཞལ་ཚུས་གསོལ་ཅིག །སུས་སྦྱིན་སོགས་སྔར་དང་འདྲ་བ་ལ། ལས་ཀྱི་དུས་མ་གཏོགས་སོ། །དགེ་སློང་མང་པོ་དོན་མཐུན་དང་ལྷན་ཅིག་ཏུ་སོང་བ་ན་རི་བྲགས་ཤིག་ཏུ་ཕྱིན་པ་དང༌། རེ་ཞིག་སྡོད་ཅིག་ཁོ་བོ་ཅག་བསོད་སྙོམས་ལ་འགྲོའོ། །དོན་མཐུན་ན་རེ། ལམ་འདི་ན་ཆོམ་རྐུན་ཡོད་ཀྱིས་ཁོ་བོ་ཅག་གིས་གསོལ་ལོ། །ཐམས་ཅད་ལའམ། ལ་ལས། བཞི་ལ། ལ་ལས། ལྔ་ལའོ། །བཀག་གོ་ཟེར་ནས་ཟན་བཅད་པའི་སྐབས་དེ་གསོལ་བས། ལམ་གྱི་དུས་མ་གཏོགས་སོ། །ཡང་དགེ་སློང་རྣམས་དོན་མཐུན་དང་ལྷན་ཅིག་གྲུར་ཞུགས་པ་ལའང་དེ་བཞིན་ཏེ། གྲུར་ཞུགས་པ་མ་གཏོགས་སོ། །སྟོན་པས། དུས་སྟོན་བྱའོ་ཞེས་གནང་བ་དང་འདུས་པ་ཆེན་པོར་གྱུར་ནས། ཁྱིམ་བདག་གིས། གདུགས་ཚོད་གསོལ་ཅིག །ཐམས་ཅད་ལའམ། འདི་ཙམ་ལ་འབྱོར་བ་ག་ལ་མཆིས། ཉི་ཤུའམ། སུམ་ཅུ་ལའོ། །བསླབ་པ་བཅས་སོ་ཞེས་པའི་སྐབས་དེ་གསོལ་བས། འདུས་པ་ཆེན་པོའི་དུས་མ་གཏོགས་སོ། །གཟུགས་ཅན་སྙིང་པོས་བདེན་པ་མ་མཐོང་བའི་ཚེ་འོད་མའི་ཚལ་ཀུན་ཏུ་འཚོ་བ་བདག་ལ་ཕུལ་ལ། བདེན་པ་མཐོང་བའི་ཚེ་དགེ་འདུན་ལ་ཕུལ་ནས། གཟུགས་ཅན་སྙིང་པོའི་ཞང་པོ་ཀུན་ཏུ་འཚོ་ལས་རབ་ཏུ་བྱུང་བ་དེ། འདི་བདག་གི་ཞང་པོ་ལགས་ཀྱིས་གཅིག་པུ་འགྱུར་བ་མི་སྟེན་གྱི་བར་དུ་གཞག་ཏུ་གསོལ། སྟེན་ན་བདག་གིས་བསྐྲད་པར་བགྱིའོ། །ཀུན་ཏུ་འཚོས་དགེ་སློང་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་མཐོང་བས་དད་དེ། དགེ་སློང་རྣམས་ལ། གདུགས་ཚོད་བགྱིའོ། །གྱིས་(༢༢༩ན)ཤིག །ཐམས་ཅད་ལའང་། དེ་ཙམ་ལ་ག་ལ་འབྱོར། ཉི་ཤུའམ། ཉི་ཤུ་རྩ་ལྔ་ལའོ། །དེ་བཀག་གོ་ཞེས་པའི་སྐབས་དེ་གསོལ་བས། དགེ་སྦྱོང་གི་ཟས་ཀྱི་དུས་མ་གཏོགས་སོ། །སྔ་མ་ནི་བཅས་པ་ཡིན་ལ། འདི་ནི་གནང་བ་སྟེ། འདུས་ཤིང་ཟ་ན་དུས་མ་གཏོགས་ཏེ་ལྟུང་བྱེད་དོ། །མཉན་ཡོད་དུ་སངས་རྒྱས་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་པ་དང༌། དགེ་སློང་རྣམས་གཞན་ལ་མ་བསྡད་པར་སྡེ་སྡེར་ཆད་ནས་འོངས་ཏེ། བྲིམས་ཤིག་བཟའ་འོ་ཞེས་ཟོས་ནས་སོང་བ་དང༌། ཡང་དགེ་སློང་གཞན་བྱུང་ནས་དེ་བཞིན་དུ་བྱས་པས་བྲེལ་བར་གྱུར་ཏེ། ཁྱེད་ལྷན་ཅིག་ཚོགས་ཏེ་བྲིམ་མོ་ཟེར་བ་དེ་གསོལ་བ་དང༌། ཁྱིམ་པ་བྲེལ་བར་མི་བཟའི་སྒོ་དྲུང་དུ་བསྡད་ལ་ཚོགས་པ་དང་འཇུག་པར་བྱའོ། །དེ་གསུངས་པ་དང་ནད་པའི་ནད་གཡོག་ཟན་ལེན་དུ་སོང་བ་རིང་ཞིག་ཐོགས་པ་དེ་གསོལ་བས། ལྔས་འདུག་ཅིང་ཟ་བར་གནང་སྟེ། འགྲོ་བར་ཆས་པ་དང་སོགས་སོ། །
དུས་མ་ཡིན་པར་ཟ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །མོའུ་གལ་གྱི་བུས་ཉེ་བར་འཁོར་ལ་སོགས་པ་སྐྱེས་ཕྲན་གཞོན་ནུ་བཅུ་བདུན་སྡེ་རབ་ཏུ་ཕྱུང་བ་བསྙེན་པར་རྫོགས་པར་བྱས་ཏེ་བསོད་སྙོམས་ལ་སོང་བ་དང༌། བུད་མེད་ནི་སྲེད་པ་སྤྱད་པ་ཡིན་པས་དེ་དག་མཐོང་བ་དང་བྲང་བརྡུངས་ཏེ། འདི་དག་སྐྱེས་པ་དག་གིས་སྐྱེས་མ་ཐག་ཁ་ལན་ཚྭས་འགེངས་མ་ནུས་པ་དང༌། བརླ་བྲག་ཏུ་ཁྲོན་པ་བཅུག་ནས་འབྲང་བར་མ་ནུས་པ་དེ་དག་གིས་ཅི་ཐོབ་ཟེར་བ་དང་བཅུ་བདུན་སྡེ་ཉམ་ང་ནས། ཟན་ཆད་པ་ནི་བླའི། ཚིག་ངན་ཐོས་པ་ནི་དེ་ལྟ་མ་ཡིན་ནོ་སྙམ་ནས་སླར་ལོག་སྟེ། ལུས་ལ་མདངས་ཡོད་པ་སོགས་སྔར་དང་འདྲ། གྲོང་ཁྱེར་གྱི་སྒབ་མོ་དག་ནི་སྐྱེད་མོས་ཚལ་ལ་དགའ་བས་དེར་བཟའ་བཏུང་ཁྱེར་ནས་བཟའ་བཏུང་བྱེད་པ་བཅུ་བདུན་སྡེས་མཐོང་སྟེ་ལྟོ་བ་ལ་ཉུག་ཅིང༌། མགོན་པོ་ཁྱོད་ཀྱིས་ལེགས་གསུངས་མང་པོ་དག །རྒྱུ་དང་མི་རྒྱུའི་འཇིག་རྟེན་འདི་ན་སྤྱོད། །བཀྲེས་སྙམ་ལུས་ཀྱི་ཚོར་བ་མ་མཆིས་པ། །ཐུབ་པ་དེ་ནི་ཁྱོད་ཀྱིས་ལེགས་གསུངས་མཆོག །ཅེས་སྨྲས་པས། གསོལ་ན་བཞེད་དམ། འདོད་དོ། །དེ་དག་གིས་བཟའ་བཏུང་བྱིན་ནས་ལོངས་སྤྱད་དེ། ཟུང་དུ་བསྡེབས་ནས་འཆག་ཅིང་ཁ་ཏོན་བྱེད་པ་ཉེ་དགས་མཐོང་ནས། ཁྱེད་ཀྱིས་ཤིན་ཏུ་བརྩོན་འགྲུས་བརྩམས་སོ། །སྟོན་པས། སྦྱིན་པ་དག་གིས་ལེན་པ་པོ་ལ་ཟས་སྦྱིན་པ་ནི་གནས་ལྔ་སྦྱིན་པར་བྱེད་དེ། ཚེ་དང༌། ཁ་དོག་དང༌། སྟོབས་དང༌། བདེ་བ་དང༌། སྤོབས་པ་སྦྱིན་པར་འགྱུར་རོ་ཞེས་གསུངས་པ་ནི་ལེགས་པར་གསུངས་པ་ཡིན་ཏེ། ཟས་ཟོས་ན་སྤོབས་པ་དང་ལྡན་པར་འགྱུར་རོ། །ཟོས་སམ། ཟོས་སོ། རུང་ངམ། དུས་སུ་མ་རྙེད་ན་ལྟོགས་ཏེ་འཆིའམ་ཅི། དོན་ཉུང་དུ་དག་འཕྱ་ནས་གསོལ་བས། བྱུང་བ་འདི་(༢༢༩བ)དང་སོགས། རང་གི་ཕྱེད་ཡོལ་ནས་སྐྱ་རེངས་འཆར་བའི་བར་དུ་ནི་དུས་མ་ཡིན་ནོ། །
གསོག་འཇོག་གི་ལྟུང་བྱེད་ནི། སྟོན་པ་མཉན་ཡོད་ནའོ། །དགེ་སློང་ནག་པོ་ནི་བསོད་སྙོམས་ལ་འཇུག་པ་ན་འབྲས་ཆན་གཤེར་བ་རྙེད་ན་ལྷུང་བཟེད་ཀྱིས་ལེན། སྐམ་པོ་རྙེད་ན་ལྷུང་བཟེད་ཀྱི་སྣོད་ཀྱིས་ལེན་ཅིང༌། གཤེར་བ་ནི་ཟ། སྐམ་པོ་ནི་རྫའི་ནང་དུ་འཇོག་ཅིང་ཡུལ་ངན་བྱུང་བའི་ཚེ་ན་ཟའོ། །སྟོན་པས་དུས་དུས་སུ་དེ་དམྱལ་བ་དང༌། དུད་འགྲོ་དང༌། ཡི་དྭགས་དང༌། ལྷ་དང༌། ལྗོངས་དང༌། ཆུ་ཀླུང་དང༌། རི་དང༌། དུར་ཁྲོད་དང༌། གཙུག་ལག་ཁང་རྒྱུར་གཤེགས་པ་ལས། དོན་འདིར་ནི་གཙུག་ལག་ཁང་རྒྱུར་གཤེགས་པ་ན་ནག་པོའི་གཙུག་ལག་ཁང་གི་འབྲས་སྐམ་པོ་འདུག་པ་གཟིགས་ནས། ཀུན་དགའ་བོ། འདི་སུའི་ཡིན། ནག་པོའི་ལགས་ཏེ། དེའི་ཀུན་ཏུ་སྤྱོད་པ་ནི་འདི་ལྟ་བུའོ་ཞེས་གསོལ་བས། བྱུང་བ་འདི་དང་སོགས། གསོག་འཇོག་བྱས་པ་ཟ་ན་ལྟུང་བྱེད་དོ། །ཨ་མྲ་ཞིམ་པོ་ལོགས་ཤིག་ཏུ་བྲིམས་ཤིག་གསུངས་པ་དང༌། དྲུག་སྡེས་ཨ་མྲ་ཞིམ་པོ་རང་རེས་བླངས་ཏེ་བྱིན་ལེན་བྱས་ནས་ཟོས་སོ། །དགེ་སློང་གིས། ཨ་མྲ་ཟད་དམ་ཞེས་དྲིས་པས། བྲིམ་དུ་ག་ལ་ཡོད། དྲུག་སྡེས་འདི་ལྟར་བྱས་སོ། །སྔར་བླངས་ནས་ཕྱིས་བྱིན་ལེན་བྱེད་ན་ཉེས་དམིགས་འདི་ཡོད་དོ་སྙམ་ནས། དགེ་སློང་དག །ལག་ཉར་བླངས་པ་མིད་པར་མི་བྱའོ། །སྟོན་པ་ཡུལ་ཀ་ཤི་ནས་ལྗོངས་རྒྱུ་ཞིང་གཤེགས་ཏེ་གྲོང་མཚམས་མ་བཅད་པ་ཞིག་ཏུ་བཞུགས་སོ། །དེས་སྟོན་པ་རླུང་ནད་ཀྱིས་བསྙུངས་ནས་ཀུན་དགའ་བོས་སྔར་རང་གི་བློས་རིམ་གྲོ་མང་དུ་བྱས་ཀྱི། སྨན་པ་ལ་མ་དྲིས་སོ། །ད་རེས་འདྲིའོ་སྙམ་ནས་དྲིས་པས། གྲུ་གསུམ་ཆབ་མར་མང་པོ་བཙལ་བ་སྒྲོལ་ལ་གསོལ་ཅིག །དེས་རང་ཉིད་ཀྱིས་བཙོས་པ་ཕུལ་བ་དང༌། མཁྱེན་བཞིན་དུ། འདི་ཅི་ཡིན། བདག་གི་གློ་བ་ལ་འདི་ལྟར་གྱུར་ནས་བསྒྲལ་བ་ལགས་སོ། །གང་དུ་བཙོས། མཚམས་ཀྱི་ནང་དུའོ། །གང་དུ་བཞག །མཚམས་ཀྱི་ནང་དུའོ། །སུས་བཙོས། བདག་གིས་མཚམས་ཀྱི་ནང་དུའོ། །མཚམས་ཀྱི་ནང་དུ་བཙོས་ལ་ནང་དུ་ཞག་ལོན་པ་དང༌། ནང་དུ་བཙོས་ལ་ཕྱིར་ཞག་ལོན་པ་དང༌། ཕྱིར་བཙོས་ལ་ནང་དུ་ཞག་ལོན་པ་དང༌། ཕྱིར་བཙོས་ལ་ཕྱིར་ཞག་ལོན་པ་དང༌། ཕྱི་ནང་གང་དུའང་རུང་སྟེ་དགེ་སློང་གིས་བཙོས་པ་ནི་ལོངས་མི་སྤྱད་ཅེས་པ། མཚམས་ཀྱི་ནང་དུ་བཙོས་པ་སོགས་སོ། །
མཉན་ཡོད་དུ་ཁྱིམ་བདག་ཅིག་གིས་དགེ་འདུན་གདུགས་ཚོད་ལ་སྤྱན་དྲངས་ཏེ་སྟོན་པ་མ་བྱོན། ཁྱིམ་བདག་དེས་འབྲས་ཆན་མ་ཚོས་པ་ཞིག་ཕོག་པ་དང༌། ཀུན་དགའ་བོས། སྟོན་པ་གདངས་ནས་ཡུན་རིང་པོ་མ་སོང་བས་འདིས་སྙུང་ལྡང་སྲིད་ཀྱིས། མ་གནང་ཡང་འདི་ལ་བརྟེན་ནས་གནང་བའི་སྐབས་ཡོད་སྙམ་ནས། ཆུས་བཏབ་ཚོས་པར་བཙོས་ཏེ་(༢༣༠ན)དྲངས་སོ། །དགེ་སློང་ཐམས་ཅད་ཀྱི་འདི་འདྲའམ། མིན་ཏེ། མ་དྲལ་ལགས་སོ་ཞེས་རྒྱས་པར་གསོལ་བས། ངས་གནང་བ་ཁྱོད་ཀྱིས་ཤེས་པ་ལེགས་ཏེ། མ་ཚོས་པ་བྱིན་ལེན་བྱས་ཏེ་བཙོས་པ་ལོངས་སྤྱད་དོ་ཞེས་གསུངས་པ་དང༌། དྲུག་སྡེས་འབྲས་སྐམ་པོ་ལ་བྱིན་ལེན་བྱས་ཏེ་བཙོས་ནས་ཟོས་པ་དེ་གསོལ་བས། དེ་ལྟར་མི་བྱའི། འདིར་རྗེན་པ་བཙོས་པ་སོགས་ནས། ཉིད་ཀྱིའོ། །མཉན་ཡོད་དུ་ནམ་གྲུས་ཆབ་ཁུང་སར་ཞུགས་པ་དང་མོན་སྲན་གྲེའུའི་ཞ་ལུ་ཞིག་མཐོང་ནས། བདག་གིས་ས་བོན་གྱི་ཆོས་མ་རུང་བར་བྱས་སོ་སྙམ་མོ། །ཕྱིས་དགེ་འདུན་ལ་མོན་སྲན་གྲེའུའི་བཟའ་བ་ཞིག་གྲུབ་པ་དང་དེ་ལྷུང་བཟེད་བཀབ་ནས་མི་ཟའོ། །ཅིའི་སླད་དུ་མ་གསོལ། ཁོ་བོས་ས་བོན་གྱི་ཆོས་མ་རུང་བར་བྱས་སོ། །ཅི་བགྱིས། འདིའོ། །དེ་མི་ཟ་བ་དང་གཞན་རྣམས་ཀྱང་མི་ཟ་ནས་གསོལ་བས། ས་བོན་གྱི་རིགས་ཚོས་དཀའ་བ་ཞེས་བྱ་སྟེ། དེའང་རླངས་པ་བྱུང་ན་ཚོས་སོ་ཞེས་བརྗོད་ནས་བཟའ་བར་བྱའོ་ཞེས་པ། མེས་རུང་བར་བྱས་པ་མ་ཚོས་པ་མ་ཡིན་ནོ། །བཙུན་པ། རུང་བའི་སར་ཤིང་འཁྲུངས་ལ། མི་རུང་བའི་སར་འབྲས་བུ་ལྷགས་ན་ལོངས་སྤྱད་དུ་རུང་ངམ། ཞག་མ་ལོན་ན་རུང་ངོ༌། །མི་རུང་བའི་སར་ཤིང་འཁྲུངས་ལ། རུང་བའི་སར་འབྲས་བུ་ལྷགས་ན་ལོངས་སྤྱད་དུ་རུང་ངམ། མི་རུང་ངོ༌། །རུང་བའི་སར་ཤིང་འཁྲུངས་ལ། རུང་བའི་སར་འབྲས་བུ་ལྷགས་ན་ལོངས་སྤྱད་དུ་རུང་ངམ། རུང་ངོ༌། །རུང་བའི་ས་ན་ས་བོན་ལྔ་དང་མེ་ཡོད་ལ། མི་རུང་བའི་སར་རུང་བ་བགྱིད་པ་གནས་ཏེ་མེའམ་མཚོན་ནམ་སེན་མོས་རུང་བར་བྱས་ནས་རུང་བར་བགྱིས་སམ། བྱས་སོ། །བཟར་རུང་ངམ། མི་རུང་ངོ༌། །རུང་བའི་ས་ན་དགེ་སློང་མཆིས་ཏེ། རུང་བའི་སར་ས་བོན་ལྔ་ལ་གསུམ་གྱིས་རུང་བར་བགྱིས་ན་འཚལ་དུ་རུང་ངམ། རུང་བ་བྱས་ཞེས་བྱ་སྟེ། མེས་རུང་བ་བྱས་པ་མ་གཏོགས་པ་བཟར་རུང་ལ། མེས་རུང་བར་བྱས་པ་ལ་ཉེས་པར་འགྱུར་རོ་ཞེས་པ། འདུག་པའི་འགྲུབ་པ་སོགས་ནས། མ་ཡིན་ནོའི་བར་རོ། །བཙུན་པ། ཡངས་པ་ཅན་དུ་མི་རུང་བ་བཅུ་སྤོངས་ལ་རུང་ཁང་བྱིན་གྱི་རློབས་ཤིག་གསུངས་ན། འོག་བྱིན་གྱིས་བརླབས་པས་སྟེང་ཡང་བྱིན་གྱིས་བརླབས་པར་འགྱུར་རམ། སྟེང་བཞིན་དུ་ངོས་ཡང་བརྗོད་པར་བྱའོ་ཞེས་པ། ནང་ཡང་ངོ༌། །
སྟེང་གི་སོགས། གཞན་གནས་པ་སོགས་ཞུ་བ་ནས་སོ། །ལག་ཉར་བླངས་པ་དང་སོགས། ཉིད་ཀྱི་རྣམ་བཤད་ནས། ཞུ་བ་ལས་བཤད་ཟེར་རོ། །སྟོན་པས། དགེ་སློང་གིས་ཁ་ཁྲུས་ཤིག་གསུངས་པས། བཀྲུ་མ་ཤེས་ནས། དེའི་ཕྱི་རོལ་སོགས་སོ། །ཇི་ཙམ་གྱིས་ན་ཁ་བཀྲུས་པ་ཞེས་བགྱི། ཁ་དང་རྨ་གཉིས་མཚུངས་ཏེ་རྟག་ཏུ་ཟག་པས་མ་འབགས་པར་མི་ནུས་མོད་ཀྱི་ཆུ་མཁུར་བ་དོའམ་གསུམ་གྱིས་བཤལ་ནའོ། །དགེ་སློང་ཞིག་གིས་ལྷུང་(༢༣༠བ)བཟེད་བཀྲུས་ནས་མཐེ་བོས་བརྡབས་པས་སྒྲ་མི་གསང་ནས་ཐེ་ཚོམ་སྐྱེས་ཏེ་ཞུས་པས། ལྷུང་བཟེད་ནི་སོགས། དགེ་སློང་ཞིག་གིས་ལྷུང་བཟེད་བཀྲུས་ཏེ་བུ་གུ་ནས་ཟས་ཀྱི་ཚིགས་མ་མཐོང་བས་ཐེ་ཚོམ་ཟ་ནས་གསོལ་བས། དེ་ལ་ཤིང་བུས་ལན་གསུམ་དུ་བྲུས་ནས་བཀྲུས་ཏེ་ཐེ་ཚོམ་མི་བྱའོ་ཞེས་པ། འབགས་པའི་ཕྱོགས་དེ་ཉི་ཚེ་བཀྲུ་བར་བྱ་བ་ཉིད་དོ། །དགེ་སློང་ཞིག་གིས་ལྷུང་བཟེད་གས་པ་ཞིག་གི་ནང་དུ་ཁུ་བ་དྲོན་མོ་བླངས་པས་དེའི་འཕྲོ་ནས་སྣུམ་བྱུང་སྟེ་ཞག་སྟེང་དུ་བྱུང་བ་དང་ཐེ་ཚོམ་ཟ་ནས་གསོལ་བས། སྟེང་གི་ཞག་ཞོམས་ལ་འཐུང་ཞིག །དགེ་སློང་ནད་པ་ཞིག་རླུང་ནད་ཀྱིས་བཏབ་ནས་ཕྱི་དྲོ་ཁུ་བ་ཞིག་འཐུངས། ནུབ་ཁ་སྐོམ་ནས་འཐུང་སྙམ་པ་དང༌། ལྷུང་བཟེད་ཀྱི་སྣུམ་ལངས་ནས་ཞག་ཆགས་པ་དེ་མ་འཐུངས་པ་དང༌། ལག་པ་དང་ཁ་བཀྲུས་ཏེ་སྣུམ་ཞོམས་ལ་ཐུངས་ཤིག་ཅེས་པ། ལངས་པ་བསལ་བར་བྱ་བ་ཉིད་དོ། །འབྲུ་མར་དང་མར་གྱི་བུམ་པ་ནི་མེར་བསྲེགས་ལ་ལྕི་བའི་རིལ་བུའམ་བ་ལང་གི་ལྕི་བས་རུང་བར་གྱིས་ཞེས་པ། བསྲེགས་པས་ཀྱང་སྣུམ་མེད་པ་ཉིད་དུ་འགྱུར་རོ། །ཆུ་བ་ཚྭ་ཅན་ཞིག་ལ་དགེ་སློང་དག་ཐེ་ཚོམ་སྐྱེས་ནས། ལན་ཚྭའི་བྱ་བ་བྱེད་ནུས་ན་བྱིན་ལེན་གྱིས་ལ་འཐུང༌། མི་ནུས་ན་འཐུང་ཞིག །དུས་སྟོན་ཆེན་པོའི་ཚེ་ཆུའི་ཁོ་ར་ཁོར་ཡུག་ཏུ་སྐྱེ་བོ་མང་པོས་དཀྲུགས་པས་ཐམས་ཅད་རྙོག་མས་གང་སྟེ་གདོང་གི་གཟུགས་བརྙན་ཡང་མི་སྣང༌། ཆུ་ཚགས་ཀྱང་རྙོག་མས་འགགས་པས་མི་འཛག་པ་དེ་གསོལ་བས། གཟུགས་བརྙན་མི་སྣང་ན་སྣོད་གཞན་གྱིས་ཆུས་ལ་ཀེ་ཏ་ཀའི་འབྲས་བུས་ཆུ་ཤིན་ཏུ་དང་བར་འགྱུར་རོ། །དེ་མེད་ན་ཟན་གྱིས་ཀྱང་ངོ༌། །དེ་ཞིག་པ་དང༌། དེ་མི་འཇིག་པར་བྱ་བའི་ཕྱིར་སྣུམ་གྱིས་བསྐུའོ། །ཁྲོན་པའི་ནང་ནས་ཆུ་བཅུས་ཏེ་བཙགས་པ་དང་འབྲས་ཆན་རུལ་བ་དང་འཁུར་བའི་དུམ་བུ་བྱུང་ནས་གསོལ་བས། དེས་ཁ་ཟས་ཀྱི་བྱ་བ་བྱེད་མི་ནུས་ཀྱིས་འོར་ལ་ཚོགས་ཤིག །རྫིང་ནས་ཆུ་བཅུས་པས། གཞན་གྱིས་སྦྲང་རྩིའི་བུམ་པའང་བཀྲུས། དགེ་སློང་གིས་ལྷུང་བཟེད་ཀྱང་བཀྲུས་པས་སྣུམ་གྱིས་ཆུའི་སྟེང་དུ་ཞག་ཆགས། ཞོའི་དུམ་བུའང་སྣང་བ་དང་ཐེ་ཚོམ་ཟ་ནས་མ་བཅུས་པས། དེས་ཁ་ཟས་ཀྱི་བྱ་བ་བྱེད་མི་ནུས་ཀྱི་ཆུས་ཤིག །ཕྱི་དྲོ་མི་འཐུང་ནས། འཐུང་ཞིག །མཆོད་རྟེན་གྱི་དུས་སྟོན་ཆེན་པོའི་ཚེ་མང་པོ་འདུས་ནས་རྫིང་བུའི་ནང་དུ་ལྷུང་བཟེད་མང་པོ་བཀྲུས། དགེ་བསྙེན་དག་གིས་ཀྱང་ཞོ་དང་སྦྲང་རྩིའི་བུམ་པ་སོགས་བཀྲུས་པས་སྣུམ་གྱི་ཞག་གིས་ཆུའི་སྟེང་ཁེངས་ནས་གསོལ་བས། དེས་ཟས་ཀྱི་བྱ་བ་བྱེད་མི་ནུས་ཀྱིས་དཀྲུགས་ལ་འཐུང་ཞིག་ཅེས་པ། འབྱུང་ཁུངས་དག་ཏུ་བཏབ་པ་སོགས་སོ། །
དགེ་སློང་ལམ་དུ་སོང་བ་དང་ཆུ་མེད་ནས་ཁྱིམ་བདག་གིས་སྣོད་ནས་འགྲོན་པོ་མང་པོ་ལ་ཆུ་བྱིན་པ་དང་དགེ་སློང་དག་གིས་མ་འཐུངས་པ་དེ་གསོལ་(༢༣༡ན)བས། གཞན་ནེད་ན་རྟོགས་ལ་འཐུང་ཞིག །བུམ་པར་མི་ལྡུགས་ནས། ལྷུག་ཅིག །ཕྱི་དྲོ་མི་འཐུང་ནས། འཐུང་ཞིག །ཡང་ལམ་ན་རྡོའི་ཆུ་སྒྲོམ་ཡོད་པ་ནའང་ཐེ་ཚོམ་སྐྱེས་པ་དང༌། རྡོའི་ཆུ་སྒྲོམ་ནི་བཀྲུ་བཀྲུ་བ་ཡིན་གྱིས་རྟོགས་ལ་འཐུང་ཞིག །ཤིང་སྒྲོམ་དང་རྐྱལ་པ་ལའང་དེ་བཞིན་ནོ། །དགེ་སློང་ཟན་ཟ་བ་ལ་བྱིན་ལེན་མ་བྱས་པར་ལྷུང་བཟེད་དུ་ལྷུང་ནས་མ་ཟོས་པས། བྱིན་ལེན་གྱིས་ལ་ཟོ་ཞིག །བྱེད་མཁན་མེད་ནས་གསོལ་བས། ཕྱོགས་གཅིག་ཏུ་འདྲེས་པར་གྱུར་ན་དེ་ཉིད་ཚེ་བསལ་བ་ཉིད་ཡིན་ནོ། །
དེ་བཞིན་དུ་ཁུ་བའི་ནང་དུ་སོང་བ་དང༌། རླུང་དང༌། ཆར་བའི་ནང་དུ་སོང་བ་ལའང་དེ་བཞིན་ནོ། །དགེ་འདུན་གྱི་བཀད་སར་བྱ་རོག་གི་མཆུས་ཟས་ལ་རེག་སྟེ་མ་ཟོས་པ་དང༌། དགེ་སློང་གི་ལྷུང་བཟེད་ཀྱི་ཟས་ལ་བྱ་རོག་གི་མཆུས་རེག་སྟེ་མ་ཟོས་པ་དེ་གསོལ་བས། ཁྭའི་མཆུས་རེག་པ་ཉིད་ལ་ནི་ཐན་ཀོར་ཡང་ངོ༌། །ནམ་གྲུས་བཤང་སར་སྦྲང་མ་ཞིག་མཐོང༌། ཕྱིས་དེ་འདྲ་ཞིག་ཟས་ཀྱི་སྟེང་དུ་བྱུང་བས། བཤང་བའི་སྦྲང་མས་འབགས་སོ་ཞེས་ཟེར་ནས་མི་ཟ་བ་དེ་གསོལ་བས། སྦྲང་མ་ནི་མཐོ་དམན་ཀུན་ལ་རྒྱུ་ཡིས་ཐན་ཀོར་བོར་ལ་ཟོ་ཞིག །དགེ་སློང་གིས་དགེ་འདུན་ལ་ཆུ་བྲིམས་པ་དང་ཆུ་རྒྱུན་མི་ཆད་པས། གསོག་འཇོག་ཏུ་འགྱུར་རོ་ཞེས་མ་བླངས་པ་དེ་གསོལ་བས། དེ་དང་འབྲེལ་བའི་རྒྱུན་གྱིས་རེག་པ་ནི་དེ་ལ་རེག་པ་ཉིད་མ་ཡིན་ནོ། །དེ་བཞིན་དུ་འོ་མ་དང༌། ཞོ་དང༌། ཞོའི་ཆུ་དང༌། དར་བ་དང༌། རྩབས་མོ་དང༌། ཚྭ་ལའང་འགྲེའོ། །དགེ་སློང་དག་ཚོན་རྩིའི་ལས་བྱེད་པ་ན་ཚོན་རྩིའི་བུམ་པ་ཡིན་སྙམ་ནས་མར་དང་འབྲུ་མར་གྱི་བུམ་པ་བཏེག་སྟེ་ཁྱེར། ངོ་ཤེས་ནས་བོར་བས་ཆག་པ་དེ་གསོལ་བས། སྐས་ལ་ཅུང་ཟད་འཛེགས་པ་ཡིན་ན་བབས་ལ་བདེ་བར་ཞོག །མང་དུ་འཛེགས་ན་སྟེང་དུ་འཛེགས་ལ་བདེ་བར་ཞོག །དེ་ལ་ཉེས་པ་མེད་པས་ཟོ་ཞེས་པས། ནོར་བ་དང་སོགས། བཞག་པ་དུ་འཚལ་དུ་རུང༌། ཨུད་པ་ལི། གཉིས་ཏེ། ངོ་ཚ་མེད་ཅིང་བསླབ་པ་ལ་མི་མོས་པ་དང༌། ཡོད་ཀྱང་དྲན་པ་ཉམས་པ་སྟེ་གཉིས་ཀྱིས་བཞག་པ་ཟོ་ཞེས་པ། གཡེལ་བས་སོགས། དགེ་སློང་དག་ལྗོངས་རྒྱུ་ཞིང་དོང་བ་ལས་དེ་དག་གི་བརྒྱགས་དགེ་ཚུལ་ལ་བསྐུར་བ་དང་དེ་དག་གིས་མ་ཐེག་ནས། ཐེག་ལ་སྐུར་ཅིག །དགེ་སློང་གིས་མ་བཏེག་པ་དེ་གསོལ་བས། ཐེག་ཅིག །དགེ་ཚུལ་གྱིས། ཕོག་ཅིག་ཅེས་བསྐུལ་བས་མ་ཕོག་པ་དང༌། ཕོག་ཅིག །དགེ་ཚུལ་གྱིས་མ་བཟུང་བཞིན་དུ་གདེག་དབབ་བྱས་པས། མ་བཟུང་བར་མ་བྱེད་ཅིག ། དགེ་ཚུལ་ཆད་ནས། ཁྱེད་ཀྱིས་ཅུང་ཟད་ཁྱེར་ཅིག་ཟེར་བ་ལ་མ་ཁྱེར་བ་དེ་གསོལ་བས། ཐག་(༢༣༡བ)གུས་ཆིངས་ལ་ཐག་གུའི་རྩེ་མོ་ནས་དགེ་ཚུལ་གྱིས་ཟུངས་ལ་ཕྱི་བཞིན་འབྲང་དུ་ཆུག་ལ་ཁྱེར་ཅིག་དགེ་སློང་ཐེ་ཚོམ་སྐྱེས་ཏེ་མི་ཟ་བ་དང༌། ཟོ་ཞིག་ཅེས་པ། བྱིན་ལེན་སྟོབས་པར་འོས་པ་སོགས་ནས། ཉིད་ཡིན་ནོ། །སྡོམ་པ་མཉམ་པ་སོགས་དང༌། མཆོག་དང་སོགས་གཉིས་ཞུ་བ་ནས་སོ། །ཚོང་དཔོན་ལས་རབ་ཏུ་བྱུང་བའི་དགེ་སློང་གིས་གསོག་འཇོག་བྱས་པའི་ཟས་དེ། རུང་ན་དགེ་སློང་མ་ལ་སྦྱིན་ནོ། །བརྒྱུད་དེ་གསོལ་བས། དགེ་སློང་གིས་གསོག་འཇོག་བྱས་པ་དགེ་སློང་མས་བྱིན་ལེན་བྱས་ཏེ་བཟའ་བར་བྱའོ། །དེ་བཞིན་དུ་བཟློག་པ་དང༌། དགེ་སློང་གིས་ཀྱང་དགེ་སློང་མ་ལ་བྱིན་ལེན་བྱའོ། །དགེ་སློང་མས་ཀྱང་དགེ་སློང་ལ་བྱིན་ལེན་བྱའོ་ཞེས་པ། སྐྱེས་པ་དང་སོགས། སྟོན་པས། ལོ་ལྔ་སོགས་ཀྱི་དུས་སྟོན་བྱའོ་ཞེས་གསུངས་པ་དང༌། ཡོན་བདག་རྣམས་ཡུལ་སོ་སོ་ནས་འདུས་པས་དགེ་སློང་རྣམས་ལ་ཁྱིམ་པ་དག་གིས་བཟའ་བཅའ་མང་དུ་བྱིན་པ་དང༌། ཅུང་ཟད་ཟོས་ནས་ལྷག་མ་དགེ་ཚུལ་ལ་བྱིན་ནོ། །སང་དགེ་སློང་དེ་དག་ཉིད་ལ་བྱིན་ལེན་བྱས་པ་དང༌། བཟའ་བ་འདི་གང་ནས་འོངས། ཁར་སང་ཁྱེད་ཀྱིས་བྱིན་པ་དེའོ། །དེ་དག་ཐམས་ཅད་ཐེ་ཚོམ་ཟ་ནས་མི་ལེན་པ་དེ་གསོལ་བས། རེ་བ་ཡོད་བཞིན་དུ་བྱིན་ལ་རེ་བ་ཡོད་བཞིན་དུ་ཟོས་ན་བྱིན་པ་ལ་ཉེས་བྱས། ཟོས་པ་ལ་ལྟུང་བ། རེ་བ་ཡོད་བཞིན་དུ་བྱིན་ལ་མེད་བཞིན་དུ་ཟོས་ན་བྱིན་པ་ལ་ཉེས་བྱས། ཟོས་པ་ལ་ལྟུང་བ་མེད་དོ། །རེ་བ་མེད་བཞིན་དུ་བྱིན་ལ་ཡོད་བཞིན་དུ་ཟོས་ན་བྱིན་པ་ལ་ཉེས་པ་མེད། ཟོས་པ་ལ་ལྟུང་བ། གཉིས་ཀ་ལ་རེ་བ་མེད་ན་ཉེས་པ་མེད་པ། བལྟོས་པ་དང་བཅས་པས་བྱིན་པ་ནི་བཏང་བ་ཉིད་མ་ཡིན་ནོ་སོགས། གཟུགས་ཅན་སྙིང་པོས་ཕུལ་པའི་ཞིང་གི་ཐོག་ཤས་སྐྱེལ་བའི་ཤིང་རྟ་ཆག་པའི་གྲོགས་མ་བྱས་པས་མ་དགའ་ནས། འདི་ཁྱེད་ཀྱི་ཡིན་ན་ཅིའི་ཕྱིར་གྲོགས་མི་མཛད། མ་གནང་ངོ༌། །གནང་གི་ཤིང་རྟ་ལ་སོགས། དགེ་སློང་ན་ནས་ཤིང་རྟ་པས། ཤིང་རྟ་ལ་ཞོན་ཅིག །ཐེ་ཚོམ་ཟ་བ་དང༌། ནད་པ་ཞོན་པ་ལ་ཡང་ངོ༌། །གྲུས་ཐོག་ཤས་སྐྱེལ་བའི་གྲུ་ཆག་པའི་གྲོགས་མ་བྱས་པས་སྔར་བཞིན་ཟེར་ནས་གསོལ་བས། གྲུའི་གདོང་མ་གཏོགས་པ་ཕུལ་བའི་གྲོགས་གྱིས་ཤིག །དགེ་སློང་ན་ནས་གྲུ་པས། འདིར་ཞུགས་ཤིག །ཐེ་ཚོམ་ཟ་བ་དང༌། གྲུ་ལ་ནི་རུས་སྐྱའོ། །ཁུར་གྱིས་བསྐྱས་པ་ན་དེ་ཆད་ནས། འདི་ཕོབ་ཅིག །མ་ཕབ་པས། ཕོབ་ཅིག །ཡང་ཐེག་ཅིག །མ་བཏེག་པས། ཐེག་ཅིག །དེ་སྒོར་བོར་བས་བརྐུས་ནས། ནང་དུ་སྐྱོས་ཤིག །ཁྱིམ་པ་དང་དགེ་ཚུལ་མེད་ནས། རང་གིས་སྐྱོས་ཤིག །དེ་དག་མ་ཟོས་པས། ཉེས་པ་མེད་ཀྱིས་ཟོ་ཞིག་ཅེས་པ་ཤས་ནོད་པ་དང་སོགས། དགེ་འདུན་གྱི་ཟངས་སུ་འོ་མ་བསྐོལ་བས་མེ་(༢༣༢ན)ཆེས་ནས་ལུད་པ་ན་རུང་བར་བྱེད་པ་ཕྱིར་སོང་བ་དང༌། དང་པོར་ཤིང་དབྲི་བ་སོགས་དང༌། འོན་ཀྱང་ལུད་པ་ན། བསྐྱམ་པ་སོགས། དགེ་སློང་འགྲོན་པོ་མང་པོ་དང་ལྷན་ཅིག་ལམ་དུ་ཞུགས་པ་ན་འགྲོན་པོ་རྐུན་པོས་བཅོམ། དགེ་ཚུལ་གྱིས་བརྒྱགས་བོར་ནས་བྲོས་སོ། །
རྐུན་པོས་དགེ་སློང་གི་བརྒྱགས་མ་ཁྱེར་བ་དེ་ཉིད་ན་བོར་འདུག་པ་འགྲོན་པོས་མཐོང་ནས་སྨྲས་པ་དང༌། དགེ་སློང་གིས་དགེ་ཚུལ་ལ། བརྒྱགས་ལོངས་ཤིག །དེ་དག་སྐྲག་ནས། ཁྱེད་ཅིའི་ཕྱིར་མི་འགྲོ་ངེད་རྐུན་པོས་བསད་མོད་ཟེར་བ་དེ་གསོལ་བས། ལོང་ལ་གཟོད་དགེ་ཚུལ་ལ་བྱིན་ཅིག །དེ་ཐེ་ཚོམ་སྐྱེས་ནས་མ་ཟོས་པས། ཟོ་ཞིག །ཆུ་ཀླུང་བརྒལ་བ་ན་གསོལ་བས། དགེ་ཚུལ་ལ། ཁྱོད་ཀྱིས་ཁུར་ནས་བརྒལ་ནུས་སམ་ཞེས་དྲིས་ལ། ནུས་ཟེར་ན་ལེགས། མི་ནུས་ཟེར་ན་བརྒྱགས་དགེ་སློང་གིས་བཀུར་རོ། །དགེ་ཚུལ་གྱིས་རང་སྒྲོལ་ནུས་མི་ནུས་རྟོགས་ལ། མི་ནུས་ན་དགེ་སློང་གིས་བརྒྱགས་ཕ་རོལ་ཏུ་སྒྲོལ་ལ། དེའི་རྗེས་ལ་དགེ་ཚུལ་སྒྲོལ་ཅིག །གཉིས་ཀ་ལྷན་ཅིག་སྒྲོལ་ནུས་ན་སྒྲོལ་ཅིག །དགེ་སློང་གིས་གཉིས་ཀ་བསྒྲལ་བས་ཐེ་ཚོམ་ཟ་ནས་མ་ཟོས་པས། ཟོ་ཞིག་ཅེས་པ། ཆུ་ཀླུང་བརྒལ་བའི་ཕྱིར་རས་སོགས། དགེ་སློང་གིས་བརྒྱགས་ཁྱེར་ཅིག་གསུངས་ན་ཁྱིམ་པ་དང་དགེ་ཚུལ་མེད་ནས་གསོལ་བས། ཁུར་ཚ་བ་མེད་ན་སོགས། སྦྱིན་བདག་ཀྱང་མེད་ན་རང་གིས་ཁུར་ལ་ཁྱིམ་པ་དང་རྗེས་ལ་ཟོ་ཞིག །ཁོ་ལ་མེད་ན་སྐལ་བ་གཉིས་སུ་ཆོད་ལ་ཁྱིམ་པ་ལ་བྱིན་ཏེ། དེ་ནས་དེའི་སྐལ་བ་ལོང་ལ་ཟོ། རང་གི་སྐལ་བ་དེ་ལ་སྦྱིན་ནོ། །དེའང་མ་གྲུབ་ན་དེ་བཟའ་བར་བྱ་བ་ཉིད་དོ་ནས། གསུམ་པ་ནི་ཇི་ཙམ་གྱིས་ཆོག་པའོ། །བརྒྱགས་མེད་ན་ཤིང་ཐོག་རང་ལྷུང་བ་ལོངས་ལ་གདུགས་ཚོད་ལ་བབ་ཀྱི་བར་དུ་ཁྱེར་ཏེ། ཁྱིམ་པ་དང་ཕྲད་ན་སྐལ་བ་གཉིས་སུ་ཆོད་ལ། གཅིག་དེ་ལ་བྱིན་ལ། དེའི་སྐལ་བ་བདག་གིས་བླངས་ལ་བཟའ། བདག་གི་དེ་ལ་བྱིན་ཅིག །དེའང་མེད་ན། ཤིང་ཐོག་ནས། རྩ་བ་དག་ཀྱང་ངོའི་བར་རོ། །ཤིང་ཐོག་རང་ལྷུང་བ་མེད་ན་ཤིང་ལ་འཛེགས་ཏེ་བཏོག་པའམ། སྤྲུགས་ལ་བྱང་ཕྱོགས་ཀྱི་དུས་སུ་བསྡོས་ཏེ་ཟོ་ཞིག །དེ་བཞིན་དུ་རྩ་བ་ལ་སོགས་པ་ལའང་ངོ་ཞེས་པ། རང་གིས་ཀྱང་ནས། ཡིད་ལ་བྱེད་པ་བྱའོ། །དགེ་སློང་ཞིག་གིས་བུམ་པའི་ནང་ནས་ཆུ་འཐུངས་པ་དང༌། བུང་བས་ཟོས་པ་དེ་གསོལ་བས། བུམ་པའི་ནང་ནས་ཆུ་མ་འཐུང་བར་ལག་པ་སྙོལ་ལ་ཁ་ཁྲུས་ལ་འཐུང་ཞིག །ལམ་དུ་ཞུགས་པ་ན་ཆུ་བཏུད་དེ་འཐུངས་ནས་གསོལ་བས། འདབ་མ་རང་ལྷགས་པ་ཚོལ་ལ་དེའི་ནང་ནས་འཐུང་ཞིག་ཅེས་པ། ལག་པ་བསྙལ་བ་དང་སོགས། དེའང་མེད་ན་སོགས། ཆུ་སྣོད་དེ་ཆུ་དང་བཅས་པ་སོགས། ཁ་དགབ་ཇི་ལྟ་བུ་བཅད་མ་ཤེས་ནས། དེའི་(༢༣༢བ)ཁ་དགབ་པ་ནི་སོགས། འདབ་མ་རང་ལྷགས་མ་རྙེད་ནས། བག་ཡོད་བཞིན་དུ་ཤིང་ལ་ཆགས་པ་ལས་འཐུང་ཞིག །འདི་ལ་བརྔས་པ་དང་སོགས།
བྱིན་ལེན་མ་བྱས་པར་ཟ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །དགེ་སློང་ནག་པོ་ཆེན་པོ་ནི། ལྷུང་བཟེད་དང༌། ཆོས་གོས་དང༌། བསོད་སྙོམས་དང༌། གནས་མལ་རྣམས་དུར་ཁྲོད་པ་ཡིན་ཏེ། དུས་ཁྲོད་དུ་བོར་བའི་རྫ་ཁ་ཤོགས་ནས་ལྷུང་བཟེད་བྱེད། རོ་གོས་ལ་ཆོས་གོས་བྱེད། ཤི་བའི་ཟས་ལྔ་ལ་བསོད་སྙོམས་སུ་བྱེད། དུར་ཁྲོད་ན་གནས་ཏེ། མི་ངས་བྱུང་བ་ན་ཚོ་ཞིང་ལུས་རྒྱས། གྲོང་དུ་བསོད་སྙོམས་ལ་མི་འགྲོ། མི་ངས་མ་བྱུང་བའི་ཚེ་རིད་ཅིང་ཉམ་ཆུང་ལ་བསོད་སྙོམས་ལ་འཇུག་གོ །སྒོ་བས་དེ་མཚན་མར་བཟུང་ནས་མི་ཤ་ཟའམ་སྙམ་སྟེ། ཐམས་ཅད་དུ་ནག་པོ་ཆེན་པོ་མི་ཤ་ཟའོ་ཞེས་སྒྲ་གྲགས་སོ། །བྲམ་ཟེ་བཟའ་མི་གཉིས་ལ་བུ་མོ་ཞིག་བཙས་ནས་ཆེར་སྐྱེས་པའི་ཚེ་ཕ་ཤི་ནས་དེའི་རོ་དུར་ཁྲོད་དུ་བསྲེགས་ཏེ། མ་སྨད་གཉིས་ཕྱོགས་གཅིག་ཏུ་བསྡད་པ་དང༌། ནག་པོ་ཆེན་པོ་དེའི་གདོང་དུ་ལྟ་བ་མཐོང་ནས། མ་ལ། ནག་པོ་ཆེན་པོ་འདི་ནི་བྱ་རོག་ཞར་མ་བཞིན་དུ་ངེས་པར་ཟློག་ཅིང་སྡོད་དོ། །དེ་སྟོན་པས་གསན་ནས། བུ་མོ་དེ་སྐྱེ་བ་ལྔ་བརྒྱར་བྱ་རོག་མོ་ཞར་མར་འགྱུར་རོ། །བུ་མོའི་མས་ཐོས་ནས་སྟོན་པའི་སྤྱན་སྔར་སོང་སྟེ། བུ་མོ་འདི་ལ་བཟོད་པ་མཛད་དུ་གསོལ། འདིས་སྡང་བའི་སེམས་ཀྱིས་མ་སྨྲས་སོ། །ཅི་ངས་འགའ་ཞིག་ལ་མནའ་འདོར་བར་བྱའམ། སྡང་བའི་སེམས་ཀྱིས་སྨྲས་ན་དམྱལ་བར་སྐྱེ་བར་འགྱུར་རོ། །
བྲམ་ཟེའི་ཁྱེའུ་དག་གིས། ནག་པོ་ཆེན་པོ་མི་ཤ་ཟའོ་ཞེས་ཐོས་ནས་བདེན་མི་བདེན་བརྟག་པའི་ཕྱིར་དུ་གྲོས་བྱས་ནས་གཅིག་ཤི་བའི་ཆ་ལུགས་སུ་བྱས། ཡུང་དང་འབྲུ་མར་གྱིས་བསྐས་ཏེ་ཁྱོགས་སྤྱིལ་དུ་བཞག་ནས་ཕྱིར་བཏོན་པ་དང་ནག་པོ་ཆེན་པོ་བསོད་སྙོམས་ལ་ཞུགས་པས་མཐོང་ནས། བདག་དགང་དཀའ་བ་འདིའི་དོན་དུ་བསོད་སྙོམས་ལ་ཞུགས་ནས་ཅི་བྱ། དུར་ཁྲོད་ཀྱི་ཟས་བཟའོ་སྙམ་ནས་ཕྱིར་ལོག་གོ །ཁྱེའུ་དེས་སྨྲས་པ། ནག་པོ་ཆེན་པོ་ཕྱིར་ལོག་པས་ཁོ་བོ་མི་ཟའམ། ཁོ་བོ་ཅག་འཁོད་བཞིན་དུ་ཇི་ལྟར་ཟ། དེ་དུར་དུ་བོར་ནས་མཐའ་གཅིག་ཏུ་སོང་སྟེ་ཚང་ཚིང་གི་ནང་དུ་མགོ་བསྲིངས་ཏེ་བསྡད་དོ། །ཝ་ཞིག་སོང་བ་དང་ནག་པོ་ཆེན་པོས་བསམས་པ། འདིས་ཟས་ལྔ་པོ་ཟོས་ནས་བདག་གི་ཟན་འཆད་དོ་སྙམ་ནས་མྱུར་བ་མྱུར་བར་སོང་བ་དང་ཁྱེའུ་དེ་སྐྲག་སྟེ། ཁོ་བོ་ཟོས་སོ། །ཁོ་བོ་ཟོས་སོ་ཞེས་ངུས་ཁྱེའུ་དེ་དག་དབྱིག་པ་ཐོགས་ཏེ་མྱུར་བར་སོང་ནས། དྲང་སྲོང་གི་རྒྱལ་མཚན་ཐོགས་ནས་སྡིག་པའི་ལས་འདི་ལྟ་བུ་སྤྱོད་དམ། ཅི་བྱས། མི་ཤ་ཟའོ། །ཤ་བཅད་ཅིང་ཟ་བ་མཐོང་ངམ། འོ་ན་ཅིའི་སླད་དུ་མྱུར་བར་བྱོན། ཝ་འདིས་ཟས་ལྔ་པོ་ཟོས་ན་བདག་གི་ཟན་འཆད་དོ་སྙམ་ནས་མྱུར་བར་འོངས་སོ། །ཟས་ལྔ་གསོལ་(༢༣༣ན)ལམ། མི་ཤ་གསོལ་ནི་མ་འཚལ་གྱི། ཐམས་ཅད་དུ། འཕགས་པ་ནག་པོ་མི་ཤ་གསོལ་ལོ་ཞེས་གྲགས་སོ་ཞེས་པ་དེ་གསོལ་བས། ཉེས་དམིགས་དེ་བྱིན་ལེན་མ་བྱས་པར་ཟ་བ་ལས་བྱུང་བས་བྱིན་ལེན་བྱས་ཏེ་བཟའོ། །བསོད་སྙོམས་པས་བསོད་སྙོམས་བླངས་ནས་གནས་ཁང་དུ་བཞག་སྟེ་ཕྱི་རོལ་ཏུ་ཕྱིན་པ་དང་ཁྱིམ་བདག་ཅིག་གིས་དེའི་སྟེང་དུ་ཟས་བཞག་གོ །དེ་ནང་དུ་འོངས་པ་དང་མཐོང་ནས་ཐེ་ཚོམ་ཟ་ཞིང་མ་ཟོས་པ་དེ་གསོལ་བས། བྱིན་ལེན་བྱེད་པ་ཡོན་བྱིན་ལེན་གྱིས་ལ་ཟོ། བྱིན་ལེན་མེད་ན་རང་གིས་གསར་པ་དེ་བླངས་ལ་ཟོ་ཞེས་པ། གཞན་དང་སོགས། བྱིན་ལེན་དུ་ཡོད་མ་ཤེས་ནས། བྱིན་ལེན་ལྔ་སྟེ། ལུས་ཀྱིས་ལུས་དང་སོགས། མངོན་སུམ་དུ་ཞེས་པ་ནས། ཡང་ངོའི་བར་རོ། །
དགེ་སློང་ཟ་བ་ན་ལྷུང་བཟེད་ཀྱི་སྟེང་དུ་ལྷུང་བཟེད་ཀྱི་གཞི་བཟེད་པས་ལྷུང་བཟེད་ཀྱི་སྟེང་དུ་ལྷུང་ནས་མི་ཟ་བ་དེ་གསོལ་བས། དེ་གཉིས་ཀྱང་བྱིན་ལེན་བྱས་པ་ཞེས་བྱ། ལྷུང་བཟེད་བཟེད་པས་དེར་ལྷུང་བ་དང༌། གཟི་བཟེད་པས་དེར་ལྷུང་བའང་བྱིན་ལེན་བྱས་པ་ཞེས་བྱ་སྟེ། འོན་ཀྱང་བྱིན་ལེན་གྱི་སེམས་ཉེ་བར་གཞག་གོ །གླང་པོ་ཆེ་དང་སྤྲེའུ་དང་དོམ་ཅང་ཤེས་རྣམས་ཀྱིས་དགེ་སློང་རྣམས་ལ་ཤིང་ཐོག་འབུལ་བ་ནི་མི་ལེན་ནས། གང་ལ་ལེན་པ་ཡོད་པ་དེ་ལ་སྟོབ་པའང་ཡོད་པས་དེ་དག་གིས་བསྟབས་པ་ནི་བྱིན་ལེན་བྱས་པར་བརྗོད་པར་བྱའོ་ཞེས་པ། སྤྲེའུ་རྣམས་ཀྱིས་སོགས། ཤིང་ཐོག་བྱིན་ལེན་བྱས་ཏེ་བཟའོ་ཞེས་གསུངས་པ་དང༌། བྱིན་ལེན་དུ་ཡོད་མ་ཤེས་ནས། ལག་པ་བཀན་པར་བྱིན་ལེན་ལྔ་སྟེ། ཤིང་ཐོག་དག་སོགས། ཨ་མྲའི་འབྲས་བུ་སྨིན་པ་དགེ་འདུན་ལ་བྲིམས་ཤིག་གསུངས་པ་དང༌། དེ་དག་སྨིན་པ་སྤྲེའུས་ཟོས་ནས་གསོལ་བས། གནས་པས་རྟོགས་ཤིག །རྟོག་པ་ན་ཅ་ཅོ་ཆེན་པོ་བྱུང་བ་དགེ་སློང་གིས་བཟློག་ཀྱང་མ་ཐུབ་པས། དེ་དག་གནས་པ་དག་གིས་ཅང་མི་སྨྲ་བས་སོ་སོར་བརྟག་པར་བྱའོ། །ཁྱིམ་པ་རྣམས་ཤིང་ཐོག་མི་སྙོམས་པར་འབྲིམ་ནས། དགེ་ཚུལ་འབྲིམ་དུ་ཆུག་ཅིག་ཅེས་པ། སྙོམས་པར་སོགས། ཨ་མྲ་སུས་བྲིམ་མ་ཤེས་ནས་གསོལ་བས། རུང་བར་བྱེད་པས་བྲིམ་མོ། །རུང་བར་བྱེད་པ་མེད་ན་དགེ་ཚུལ་གྱིས་བྱོས་ཤིག །དགེ་ཚུལ་མེད་ན་དགེ་སློང་གིས་ལག་པ་བཀྲུས་ཏེ་བྱིན་ལེན་གྱིས་ལ་སོ་སོར་རུང་བ་བྱོས་ཤིག་ཅེས་གསུངས་པ་དང༌། འབྲས་བུ་མང་པོས་གང་བའི་སྐོན་བུ་གཅིག་གིས་མ་ཐེག་ནས་གསོལ་བས། ཁྱིམ་པས་ཀྱང་གྲོགས་བྱས་ལ་གཉིས་ཀས་བྲིམ་པར་བྱ། ཁྱིམ་པས་བྲིམས་པ་དེ་ནི་བྱིན་ལེན་བྱའོ། །
དགེ་སློང་གིས་བྲིམ་པ་ལ་བྱིན་ལེན་མི་དགོས་སོ་ཞེས་པ། དགེ་སློང་བྱིན་ལེན་བྱས་པས་སོགས། དེས་ཀྱང་མི་མཉམ་པར་འབྲིམ་ནས། དགེ་སློང་གིས་ལག་པ་བསྙལ་ནས་བྱིན་ལེན་གྱིས་ལ་བྲིམས་ཤིག །འོན་(༢༣༣བ)ཀྱང་མ་སྙོམས་ནས། བྲིམ་པར་བྱ་བ་གཅེས་པ་དང་སོགས། ཁྱིམ་པ་དད་པ་ཅན་དག་ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི་བུམ་པ་འབུལ་བ་དག་མི་ལེན་ནས། ལོང་ལ་བྲིམས་ཤིག །བྲིམས་པས་ཆོས་གོས་ལ་སྣུམ་ཤོར་ནས། ཞུན་མར་དང་སོགས། ཨ་མྲ་ཞིམ་པོར་གྲགས་པ་རྣམས་བསྲེས་ཏེ་བྲིམས་པས་ཐམས་ཅད་ཀྱིས་མ་ཐོབ་ནས་གསོལ་བས། ཨ་མྲ་ཞིམ་པོ་རྣམས་སོགས། འབྲིམ་མཁན་གྱིས་སྐལ་བ་ཐ་ཆད་ཐོབ་ནས་གསོལ་བས། འབྲིམ་པར་བྱེད་པའི་ནི་སོགས། དེ་དག་གིས་བཟང་པོ་དག་ཐོབ་ནས། མི་འཐོབ་པ་ཐོབ་ན་སོགས། དེ་དག་ལངས་ཤིང་སྐལ་བ་ལེན་ནས། དུ་མ་ཉིད་ཡིན་ན་སྟན་ལས་མ་འཕགས་པས་ཇི་ཙམ་ལེན་ནུས་པའོ། །འདྲིལ་བ་ན་དེ་དག་བྱིན་ལེན་སྐྱར་མ་བྱེད་དུ་འཇུག་ནས། འདྲིལ་བ་ནི་སོགས། དགེ་སློང་བྱིན་ལེན་བྱས་པས་འབྲིམ་པ་ན་ཁྱིམ་པ་དག །བདག་ཅག་གིས་ཀྱང་མབྲིམ་མོ་ཞེས་ཟེར་བ་ན་དགེ་སློང་དག་མི་བཏུབ་སྟེ། འབྲིམ་དུ་ཆུག་ཅིག །དེ་དག་དང་པོར་འཛིན་ཅིང་དགེ་སློང་རྣམས་ཕྱིས་འཛིན་ནས། དང་པོར་དགེ་སློང་གིས་ཟུང་ཞིག །དགེ་སློང་རྣམས་དགེ་སློང་གིས་བླངས་པ་ལའང་བྱིན་ལེན་བྱེད་དུ་འཇུག་ནས། དགེ་སློང་ལས་བླངས་པ་ལ་བྱིན་ལེན་དེ་ཉིད་ཡིན་གྱི། ཁྱིམ་པ་ལས་བླངས་པ་ནི་བྱིན་ལེན་བྱའོ། །གཏོང་བ་ན་དང་པོར་ཁྱིམ་པས་བཏང༌། ཕྱིས་དགེ་སློང་གིས་བཏང་བས། གསོག་འཇོག་ཏུ་གྱུར་ཏོ་ཞེས་འདོར་བར་བྱེད་ནས། དང་པོར་དགེ་སློང་གིས་གཏང་ལ་ཕྱིས་ཁྱིམ་པས་གཏང་ཞིང་ཕྱི་དེ་ཉིན་དགེ་འདུན་ལ་བྲིམ་པར་བྱའོ་ཞེས་པ། དགེ་སློང་གིས་མ་བཏང་བ་སོགས། དྲུག་སྡེ་དག་བྱིན་ལེན་བྱས་མ་བྱས་གཉིས་ཀ་ཟ་བ་ལ་འཕྱ་ནས་གསོལ་བས། མ་བྱིན་པའི་ཟས་ཁ་ནས་མིད་པར་བྱེད་ན་ལྟུང་བྱེད་དོ། །དགེ་སློང་དགོན་པ་བ་རྣམས་ཆུ་དང་སོ་ཤིང་གི་བྱིན་ལེན་སྟོབ་པ་མེད་ནས་དགོན་པ་བོར་ཏེ། གྲོང་མཐའི་གནས་མལ་ན་འདུག་གོ །དེ་རྨེད་དེ་གསོལ་བས། བསླབ་པ་ལ་གུས་པའི་བསྔགས་པ་བརྗོད་ནས། སྔ་མ་ནི་བཅས་པ་ཡིན་ལ་འདི་གནང་བ་སྟེ། ཆུ་དང་སོ་ཤིང་མ་གཏོགས་སོ། །
གནས་བརྟན་དག་ན་བས་རང་གིས་བྱིན་ལེན་བྱས་པ་བཟའ་མ་ནུས་ནས་གསོལ་བས། ནད་གཡོག་གིས་ལག་པ་བསྙལ་ཏེ་བྱིན་ལེན་བྱས་པ་ལྷན་ཅིག་བཟའོ། །གཞོན་པ་ཡིན་ཡང་ལྷན་ཅིག་བཟའོ། །བསྙེན་པར་རྫོགས་པ་མེད་ནས་གསོལ་བས། ནད་པས་སོགས། རྒན་པ་ལ་གཞོན་པས་བྱེད་པ་བཞིན་དུ་གཞོན་པ་ལའང་རྒན་པས་བྱའོ་ཞེས་པ། བསྙེན་པར་མ་རྫོགས་པས་བཟའ་བར་བྱའོ། །ནག་པོ་ཆེན་པོ་ལས་ཅི་བགྱིས་ནས་དགྲ་བཅོམ་པ་ཐོབ་ནས་ཀྱང་ཡང་དག་པ་མ་ལགས་པས་སྐུར་བར་གྱུར། སྔོན་ཝཱ་ར་ཎཱ་སཱི་ན་རང་སངས་རྒྱས་བླ་མ་ཞེས་བྱ་བ་ཞིག་འཁོར་འབུམ་ཕྲག་དུ་མས་བསྐོར་ནས་དུར་ཁྲོད་ཆེན་པོར་ཕྱིན་ཏོ། །དེ་ན་གནོད་སྦྱིན་གདུག་པ་ཞིག་མི་རོ་མྱགས་པ་ཟའོ། །རང་སངས་རྒྱས་བླ་མ་དེར་ཕྱིན་པ་ན་ལྷའི་མཐུས་(༢༣༤ན)གནོད་སྦྱིན་གདུག་པ་དེ་བྲོས་ནས་མི་རོ་མྱགས་པ་དེ་ཝ་ལ་སོགས་པས་ཟོས་སོ། །
གནོད་སྦྱིན་དེས་བསམས་པ། རབ་བྱུང་འདི་བདག་གི་ལྟོའི་དགྲར་གྱུར་གྱིས་འདི་ལ་བསྙེན་བཀུར་མ་ཡིན་པ་བྱའོ་སྙམ་ནས་དེའི་ལྷུང་བཟེད་དུ་མིའི་ལག་པ་བཅུག་པ་དང་ཝཱ་ར་ཎཱ་སཱིར། རབ་ཏུ་བྱུང་བ་དེ་མི་ཤ་ཟའོ་ཞེས་གྲགས་སོ། །རང་སངས་རྒྱས་དེས། གནོད་སྦྱིན་འདི་ཧ་ཅང་ཉམས་ན་མི་རུང་གིས་འདི་དྲང་ངོ་སྙམ་ནས་རྫུ་འཕྲུལ་བསྟན་པས་འགྱོད་ནས་བཤགས་པ་བྱས། དེས་དེའི་ལྷུང་བཟེད་ནས་མིའི་ལག་པ་ས་ལ་བོར་ཏེ་ཕྱག་བཙལ་ནས། ཡོན་གནས་ཡང་དག་པ་འདི་ལྟ་བུ་ལ་གནོད་པ་བྱས་པའི་ལས་དེའི་ཆ་དང་མཐུན་པར་མ་གྱུར་ཅིག །མཆོད་པ་བྱས་པའི་དགེ་བས་འདི་བས་ལྷག་པའི་སྟོན་པ་མཉེས་པར་བྱེད་ཅིང་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དེས་རང་སངས་རྒྱས་ལ་སྐུར་བ་བཏབ་པས་ཚེ་རབས་མང་པོར་དམྱལ་བར་སྐྱེས་ནས་ལས་དེའི་ལྷག་མས་ཚེ་རབས་ལྔ་བརྒྱ་དང་ད་ལྟའང་སྐུར་བ་ཐོབ་ལ། དུར་ཁྲོད་ན་གནས་པའི་བག་ཆགས་ཀྱིས་དུར་ཁྲོད་པར་གྱུར་ལ། སྨོན་ལམ་བཏབ་པས་དགྲ་བཅོམ་པར་གྱུར་ཏོ། །
བསོད་པ་སློང་བའི་ལྟུང་བྱེད་ནི། སྟོན་པ་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བར་བཞུགས་སོ། །དེ་མིང་ཆེན་གྱིས་ཐོས་ནས་སངས་རྒྱས་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་སོ། །སངས་རྒྱས་ལ་སོགས་པ་གདུགས་ཚོད་ཀྱིས་ཚིམ་པར་བྱས་ནས། ཆོས་བསྟན་ཏེ་གཤེགས་སོ། །མིང་ཆེན་གྱིས་རེ་ཞིག་སྟོན་པའི་ཞམ་འབྲིང་བྱས་ནས་སླར་ལོག་སྟེ་སྟེང་གི་ཁང་བཟང་གི་གཞིར་གཏོང་བ་རྗེས་སུ་དྲན་པ་བསྒོམ་མོ། །ཞོ་ཤས་འཚོ་བ་དག་གིས་ཀྱང་གནས་མལ་བརྟུལ་ཞིང་ཁ་ཟས་བསྡུས་སོ། །དྲུག་སྡེས་ཁྱིམ་དུ་འགྲོ་བའི་ཁྱིམ་དུ་སོང་སྟེ། དེར་ཕྱིན་པ་དང་ཟས་དང་གནས་མལ་མ་མཐོང་བས། ཤེས་ལྡན་དག །སངས་རྒྱས་ལ་སོགས་པ་སྤྱན་དྲངས་ནས་སྙིང་ལས་ཆུང་ངུར་འཁོད་ཅིང་གདུགས་ཚོད་སྟ་གོན་མ་བྱེད་ན་སངས་རྒྱས་ལ་སོགས་པའི་གདུགས་ཚོད་གཅོད་པར་བྱེད་དམ། དེ་དག་གིས་སྨྲས་པ། ཁྱེད་ཅག་མནལ་ལམ་ཅི། སངས་རྒྱས་ལ་སོགས་པ་གདུགས་ཚོད་གསོལ་ཏེ་གཤེགས་སོ། །ཁོ་བོ་ཅག་གི་ཟན་གཅད་དམ་ཅི། མིང་ཆེན་ལ་དྲིའོ་ཟེར་ནས་དྲིས་པས། ལྷག་རོལ་ཅུང་ཟད་ཡོད་པ་བྱིན་ཅིག །དེ་དག་གིས་བྲིམས་པ་དང༌། མིང་ཆེན་གྱིས་ཁ་ཤིན་ཏུ་ཆེན་པོས་སངས་རྒྱས་ལ་སོགས་པ་སྤྱན་དྲངས་ན། ཟན་འདི་འདྲ་བས་སངས་རྒྱས་ལ་སོགས་པ་སྤྱན་འདྲེན་དུ་རུང་ན་ཉེ་དགས་ཀྱང༌། ཉི་མ་རེ་རེ་ཞིང་སངས་རྒྱས་ལ་སོགས་པ་སྤྱན་འདྲེན་པར་འགྱུར་རོ། །བཀྲེན་པ་འདི་ལ་ཅི་ཡོད། སོང་ཁྱིམ་བདག་ཆེ་གེ་མོའི་ཁྱིམ་ནས་ཞོ། ཆེ་གེ་མོའི་ཁྱིམ་ནས་འོ་མ། མར། ཤ །ཉ་ཤ །ཤ་སྐམ་ལོངས་ལ་ཤོག་ཅིག་ཟེར་ནས་དེ་དག་བླངས་ཏེ་དེར་ཟོས་(༢༣༤བ)ནས་གཙུག་ལག་ཁང་དུ་སོང་བ་དང༌། དགེ་སློང་རྣམས་ཀྱིས་སྨྲས་པ། ཁྱེད་ཀྱིས་གང་དུ་ཟོས། དེ་ཉིད་དུའོ། །ཁྱེད་དེར་མ་མཐོང་ངོ༌། །ཕྱིས་ལྷགས་སོ། །ཁྱེད་ཀྱིས་ཟན་ཇི་ལྟ་བུ་ཟོས། འོ་མ་ལ་སོགས་པའོ། །ཁོ་བོ་ཅག་གིས་དེ་ལྟ་བུ་མ་ཐོབ་བོ། །བཀྲེན་པ་དེ་ལ་ག་ལ་ཡོད། ཁྱིམ་གཞན་ནས་བླངས་ཏེ་ཟོས་སོ། །རུང་ངམ། རུང་ཡང་སྲིད། མི་རུང་ཡང་སྲིད། ཅི་ཁོ་བོ་ཅག་ལྟོགས་ཏེ་འཆིའམ། དོན་ཉུང་ངུ་དག་འཕྱ་བ་དེ་གསོལ་བས། བྱུང་བ་འདི་དང་སོགས། འོ་མ་དང་ཞོ་དང་སོགས། དགེ་སློང་ནད་པ་ཞིག་གིས་སྨན་པ་ལ་སྨན་དྲིས་པས། འོ་མ་གསོལ་ཅིག །སུས་སྦྱིན། ཁྱིམ་ནས་སློངས་ཤིག །བསླབ་པ་བཅས་སོ། །གནང་བའི་གནས་ཡོད་དོ། །གསོལ་བས། ན་བའི་དུས་མ་གཏོགས་སོ། །ཞོ་དང༌། མར་དང༌། ཉ་ཤ་དང༌། ཤ་དང༌། ཤ་སྐམ་པའང་དེ་བཞིན་ནོ། །དེ་དག་ལ་བསླབ་པ་ལ་གུས་པའི་བསྔགས་པ་བརྗོད་ནས། སྔ་མ་ནི་བཅས་པ་ཡིན་ལ་འདི་ནི་གནང་བ་སྟེ་སོགས། མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་ཀྱི་སྐབས་ནས། ངན་པའམ་སོགས་ནས། ཉིད་ཡིན་ནོའི་བར་རོ། །

བཅུ་ཚན་ལྔ་པ།

བཅུ་ཚན་ལྔ་པ་ལ་སྡོམ་ནི། སྲོག་ཆགས་བཅས་དང་ཉལ་སར་འདུག །འགྲེང་དང་གཅེར་བུ་དམག་དང་ནི། །ཞག་གཉིས་བཤམས་དཀྲུག་འགྲོ་བ་དང༌། །བརྡེག་དང་གཟས་དང་གནས་ངན་ལེན། །
སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་ནི། སྟོན་པ་ཀོའུ་ཤཱམྦཱི་ནའོ། །འདུན་པ་ཤེས་བཞིན་དུ་སྲོག་ཆགས་དང་བཅས་པའི་ཆུ་ལ་སྤྱོད་ནས་དགེ་སློང་རྣམས་ཀྱིས། དེ་ལྟར་མ་བྱེད་ཅིག་ཅེས་སྨྲས་པས། ཁོ་བོ་ལ་འགའ་ཞིག་གིས་བགྲངས་ཏེ་གཏད་དམ་ཅི། ཕྱོགས་བཞིའི་རྒྱ་མཚོ་དང༌། འབབ་ཆུ་དང༌། མཚོ་དང༌། ལྟེང་ཀ་དག་ཏུ་ཅིའི་ཕྱིར་མི་འགྲོ་ཟེར་ནས་དོན་ཉུང་ངུ་དག་འཕྱ་བ་དེ་གསོལ་བས། རང་སྤྱོད་པའི་དོན་ཉིད་ལ་སོགས། ཆུ་བཙག་པར་བྱའོ་ཞེས་གསུངས་པ་དང༌། ལག་པས་ཆུ་ཚགས་འཛིན་པ་ངལ་ནས་གསོལ་བས། ཤིང་ལ་བཏགས་ཏེ་བཙག་གོ །དེ་ལའང་ངལ་ནས། དབྱུ་གུ་གསུམ་བཅང་ངོ༌། །འདུག་ཏུ་མ་བཏུབ་ནས། ཕུག་ལ་གཟེར་གྱི་སྦྲེལ་སོགས་གསུངས་པ། དཔྱང་ཚགས་བཅང་བར་བྱའོ་སོགས། །ཆུ་བླུགས་པ་དང་ཕྱེད་ས་ལ་བོ་ནས། དྲན་པ་བཞག་སྟེ་བླུག་གོ །བུམ་པ་ཞབས་རྟེན་མེད་པར་བཞག་པས་འདྲིལ་ནས། ཞབས་རྟེན་གཞུག་གོ །ཆུ་བླང་བར་བརྩམས་པ་དང་ཆུ་མ་ཆགས་ནས། ཆུ་གནས་པར་བྱ་བའི་ཕྱིར་ཆུ་ཚགས་སུ་གཅལ་གཞུག་པར་བྱའོ། །ཅི་ཞིག་གཞུག་མ་ཤེས་ནས། བྱེ་མའམ་ལྕི་བའི་འོ། །དེའང་མ་ཆགས་ནས། ཡང་ན་སོགས། ཇི་འདྲ་བཅང་མ་ཤེས་ནས། ས་དང་སོགས། དེ་ལག་པས་འཛིན་པ་ངལ་ནས། དེ་ནི་སོགས། ལ་ལ་ཆུ་མ་ཐོན་ནས། མི་འཛག་(༢༣༥ན)ན་སོགས། དགེ་འདུན་གྱི་ཆུའང་ཆུ་ཚགས་ཀྱིས་བཙགས་པས་དགེ་འདུན་ཕལ་ཆེ་བ་སྐྱོ་ནས། ཆུ་ཚགས་མང་པོ་བཅང་བའམ། ཡང་ན་བུམ་ཚགས་སོགས་དེ་ཅི་ལས་བྱ་མ་ཤེས་ནས། སའམ་སོགས། དེ་དག་བསྡུ་བའི་ཕྱིར་སྟེང་དུ་བུ་ག་ཆེན་པོ་ཞིག་གདོད། དེ་ཉིད་བསྡུ་བའི་ཕྱིར་འོག་ཏུ་གཅེའུ་གཞུག །སྟེང་ནས་རས་ཀྱིས་གཡོགས་ལ་བཙག་ཅིང༌། རས་དེའང་བཤལ་བ་དང༌། བཀྲུ་བ་དང༌། བསྐམ་པར་བྱའོ། །
ལྷོ་ལམ་ནས་དགེ་སློང་གཉིས་སྟོན་པ་ལ་ཕྱག་འཚལ་དུ་འོངས་པས་ལམ་དུ་ཆུ་ཟད་ནས་སྐོམ་སྟེ་རྫིང་ཞིག་གི་དྲུང་དུ་ཕྱིན་ནས་ཆུ་བརྟགས་པས་མ་དག་པར་མཐོང་ནས། གཅིག་གིས་སྨྲས་པ། བསྐལ་པ་འབུམ་ཕྲག་སྟོང་དག་ཏུ། །གང་ཞིག་མཐོང་བར་རབ་དཀའ་བས། །བདག་གིས་ཆུ་དག་འཐུངས་ནས་ནི། །དེ་ནས་འདྲེན་པ་བལྟ་བར་བྱ། །ཞེས་ཆུ་འཐུངས་ནས་སོང་ངོ༌། །ཅིག་ཤོས་ན་རེ། གང་ཞིག་སེམས་ཅན་རྣམས་ལ་ཀུན་ནས་ཐུགས་རྗེ་ཞིང༌། །སྲིད་པ་ཀུན་ནས་ཆགས་པ་གཏན་ནས་སྤངས་གྱུར་པ། །དེ་ཡི་བསྟན་མཆོག་འདི་ལ་བསླབ་པ་བླངས་པ་ཡིས། །སྲོག་ཉིད་སྤང་གི་སྲོག་ཆགས་གསད་པར་བྱ་བ་མིན། །ཟེར་ནས་ཆུ་མ་འཐུངས་པར་ཇི་སྲིད་ལུས་ཀྱི་མཐུ་ཡོད་ཀྱི་བར་དུ་དགེ་བ་སྤྱད་དེ། ཤི་ནས་རྒྱལ་ཆེན་རིགས་བཞིའི་ལྷར་སྐྱེས་སོ། །ལྷའི་བུ་དང་བུ་མོ་སྐྱེས་མ་ཐག་སེམས་གསུམ་མངོན་དུ་འགྱུར་བ་སོགས་སྔར་དང་འདྲ། སྔོན་དགེ་སློང་ལྷའི་བུ་རྣ་ཆ་གདུབ་སྐོར་གཡོ་ཞིང་དྲི་མ་མེད་པ་ཐོགས་ཏེ་སྟོན་པའི་དྲུང་དུ་སོང་ནས་མེ་ཏོག་གཏོར་ཕྱག་བྱས་ཏེ་འདུག་པས་རྒྱལ་བྱེད་ཚལ་ཐམས་ཅད་འོད་ཀྱིས་ཁྱབ་བོ། །སྟོན་པས་དེ་ལ་ཆོས་བསྟན་པས་བདེན་པ་མཐོང་ནས། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་བཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་བཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང༌། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་བརྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང༌། །དགེ་སློང་ཅིག་ཤོས་དེས་ཀྱང་རིམ་གྱིས་མཉན་ཡོད་དུ་ཕྱིན་ནས་སྟོན་པ་ལ་ཕྱག་འཚལ་ཏེ་འདུག་པ་དང༌། སྟོན་པས། གང་ནས་འོངས། དབྱར་གང་དུ་གནས་སོགས་དྲིས་ནས་དེས་རྒྱས་པར་ཞུས་པ་དང༌། ང་ཡི་བསྟན་ལ་མ་གུས་གང༌། །དེས་ནི་ང་མཐོང་ཅི་(༢༣༥བ)ཞིག་ཕན། །དེས་ནི་ང་ལ་བལྟས་ན་ཡང༌། །མཐོང་བ་མ་ཡིན་མཆོད་པ་མིན། །ང་ཡི་བསླབ་ལ་གང་སློབ་པའི། །དགེ་སློང་དེས་ནི་ང་མཐོང་སྟེ། །ཤེས་རབ་དམན་པ་ཁྱོད་ཀྱིས་ཀྱང༌། །སངས་རྒྱས་མངོན་སུམ་མ་མཐོང་ངོ༌། །དེ་ནས་སྟོན་པས་སྐུ་བླ་གོས་ཕྱེ་ནས། ལྟོས་ཤིག་དགེ་སློང་ལུས་འདི་ལ། །གཙང་ཞིང་གསེར་གྱི་མདོག་འདྲ་བ། །སྔོན་གྱི་ལས་ཀྱི་རྣམ་སྨིན་དང༌། །ཕ་དང་མ་ལས་བྱུང་བས་སོ། །གང་གིས་ཆོས་ཉིད་མ་མཐོང་བ། །རྫོགས་པའི་སངས་རྒྱས་དེས་མི་མཐོང༌། །གང་གིས་ཆོས་ཉིད་མཐོང་གྱུར་པ། །དེ་ཡིས་ཐུབ་པ་ཆེན་པོ་མཐོང༌། །ཉེས་དམིགས་འདི་ཆུ་ཚགས་མི་འཆང་བ་ལས་གྱུར་གྱི། དེས་ན་དགེ་སློང་གིས་ཆུ་ཚགས་ཉེ་བར་གཞག་པར་བྱའོ། །
ཆུ་ཚགས་དུ་ཡོད་མ་ཤེས་ནས། ལྔ་སྟེ་ཆུ་ཚགས་གྲུ་གསུམ་སོགས། དགེ་སློང་ཞེ་འགྲས་པ་གཉིས་ལྗོངས་རྒྱུར་སོང་འི་གཅིག་ལ་ཆུ་ཚགས་ཡོད། གཅིག་ལ་ཆུ་ཚགས་མེད་ནས། ཡོད་པ་དེས་ཆུ་བཙགས་ཏེ་འཐུངས་པ་དང་དེས། གཡོར་ཅིག །མ་སྟེར་ནས་ཕོངས་པ་དེ་གསོལ་བས། ནད་དང་སོགས། དགེ་སློང་གཉིས་ལྗོངས་རྒྱུར་འགྲོ་བ་ན། ཁྱོད་ལ་ཆུ་ཚགས་ཡོད་དམ། ཡོད་དོ། །དེར་གཅིག་གིས་འཐུངས་ནས་གཡར་བས། ཡོད་མེད་དྲིས་ཀྱི། སྦྱིན་མི་སྦྱིན་མ་དྲིས་སོ་ཟེར་ནས་མ་གཡར་བ་དེ་གསོལ་བས། ཡོད་མེད་དང་སྦྱིན་མི་སྦྱིན་དྲིའོ། །ཡང་ཡོད་མེད་དང༌། སྦྱིན་མི་སྦྱིན་དྲིས་ནས་སོང་བ་དང༌། ལམ་ཁར་འགྲོན་པོ་ཞིག་དང་ཕྲད་པས་དེའི་བྱ་བ་གྲུབ་སྟེ་ལྡོག་པར་ཆས་པ་དང༌། ཆུ་ཚགས་གཡོར་ཅིག །ཆུ་འཚག་ན་སྦྱིན་གྱི། ཐམས་ཅད་དུ་མི་བྱིན་ནོ་ཟེར་ནས་ཕོངས་པ་དེ་གསོལ་བས། ལྡོག་ན་སྦྱིན་མི་སྦྱིན་དྲིས་ལ་མི་སྦྱིན་ན་མི་འགྲོའོ། །ཉེ་བར་འཁོར་གྱིས། ཆུ་ཚགས་མ་མཆིས་པར་གྲོང་གཞན་དང་གཙུག་ལག་ཁང་གཞན་དུ་འགྲོར་གནང་ངམ། དགེ་སློང་ལ་ཕོངས་པར་མི་འགྱུར་ན་གནང་ཞེས་པ། ཕོངས་པར་མི་འགྱུར་སོགས། ཆུ་ཚགས་གཅིག་གིས་གཉིས་སམ་དུ་མར་དགེ་འདུན་རྣམས་ལྗོངས་རྒྱུར་གནང་ངམ། ཕོངས་པར་མི་འགྱུར་ན་གཅིག་གིས་སོགས། ཆུ་ཚགས་མེད་པར་ཆུ་ཀླུང་གི་འགྲམ་ནས་འགྲོར་གནང་ངམ། རྒྱུན་མགྱོགས་པ་ན། དེ་ཉིད་ཡིན་ནོའི་བར་རོ། །ཆུ་མ་བཙགས་ན་བརྟག་པར་འཚལ་དུ་གནང་ངམ། མི་གནང་ངོ༌། །མ་བཙགས་པར་འཚལ་དུ་གནང་ངམ། གནང་སྟེ་མིག་གིས་དག་པའོ། །བཙགས་པ་མ་བརྟགས་པར་རུང་ངམ། མི་རུང་ངོ༌། །བུམ་པ་མ་གང་བ་ལ་བརྟགས་པས་མ་རྟོགས་ཤིང༌། བཀང་བ་དང་སྟེང་དུ་རྡུལ་གྱིས་གཡོགས་ནས་མ་རྟོགས་པར་གསོལ་བས། མི་གཡོ་བ་སོགས། ཧ་ཅང་ཡུན་རིང་ནས་འཁྲུལ་བས། བ་ལང་དྲུག་གི་ཤིང་རྟ་སྨིག་མས་བཀང་བ་འཁོར་བ་ཙམ་མམ། ཇི་ཙམ་གྱིས་ཡིད་ཆེས་པ་བརྟག་གི །དེ་ལ་བྱ་བ་སོགས། (༢༣༦ན)མཛུབ་མོའི་རྩེ་མོས་བསྟན་པས་ཆུ་འགུལ་ནས་མིག་གིས་མ་བཟོད་པ་དང༌། རྩེ་མོ་སོགས་སོ། །དགེ་སློང་ཆུ་དང་གོས་ཀྱི་ཤིག་སོགས། གཡང་ས་ཆེན་པོར་འདོར་བ་དེ་གསོལ་བས། ཆུའི་སྲོག་ཆགས་དེ་དག་སོགས་དང༌། ཤིག་ལ་སོགས་པ་གཞན་ཡང་སོགས། སྟོན་པས། མཚན་མོ་ཆོས་ཉན་པ་སྦྱིན་ནོ་ཞེས་གསུངས་པས་མཚན་མོ་ཆོས་བསྟན་པའི་ཚེ་སྦྲུལ་ཞིག་འོངས་པ་གཞོན་ནུ་ཞིག་གིས་མཐོང་ནས། རྒྱབ་རིང་རྒྱབ་རིང་ཞེས་སྨྲས་པས་སོ་སོའི་སྐྱེ་བོ་དག་སྐྲག་ནས་ཆོས་ཉན་པ་བར་ཆད་དོ། །
ཆོས་ཉན་པ་མི་གཅད་ཀྱི། མར་མེ་བུས་ལ་ཆོས་མཉན་པར་བྱའོ། །དབྱར་མར་མེ་སྦར་ཏེ་ཆོས་ཉན་པ་དང་དེར་སྲོག་ཆགས་སོང་ནས་གསོལ་བས། མར་མེའི་ཁང་བུ་བྱའོ་ཞེས་པ། གལ་ཏེ་མར་མེའི་སོགས། ཇི་ལྟར་བྱ་མ་ཤེས་ནས། སྨིག་མའི་སོགས། རས་དཀར་མ་རྙེད་ནས། ལྷང་ཚེར་སོགས། དེའང་མ་རྙེད་ནས། མིག་བརྒྱ་བ་སོགས། ཇི་ལྟར་བྱ་མ་ཤེས་ནས། རྫ་མཁན་གྱིས་དང་པོ་ནས་སོགས། རྫ་མཁན་མ་རྙེད་ནས། བུམ་པ་སོགས། སྟོན་པ་དྲང་སྲོང་གངྒཱའི་རྫིང་འགྲམ་ན་བཞུགས་པའི་ཚེ་ཡུལ་ཙམ་པའི་ཀླུ་མོ་དད་པ་ཅན་ཞིག་ལ་བུ་མ་དད་པ་ཞིག་ཡོད་པ་དེ་ལ། བུ། འཕགས་པ་རྣམས་ལ་ཆོས་ཉོན་ཅིག་བསོད་ནམས་སུ་འགྱུར་རོ། །དེ་རང་གི་ཆ་ལུགས་ཀྱིས་ཆོས་ཉན་དུ་སོང་བ་དང་གཞོན་ནུ་ཞིག་གིས་མཐོང་ནས་དངངས་ཏེ། རྒྱབ་རིང་ཞེས་བརྗོད་པས་སོ་སྐྱེ་དག་སྐྲག་ནས། དེའི་སྐེ་ནས་རྔ་མའི་སྲད་བུས་བཏགས་ཏེ་ཁང་སྟེང་ནས་འཕངས་སོ། །མས། ཆོས་ཐོས་སམ། དེ་འདྲའི་འཕགས་པར་སུའང་མ་གྱུར་ཅིག །ཅི་བྱས། དེས་ཇི་ལྟར་གྱུར་པ་བསྙད་པས། བུ། དེ་ལྟར་ན་འཕགས་པ་ཡིན་མོད། གཞན་ཡིན་ན་གསོད་དོ། །དེར་དེའི་ནེའུ་ལྡངས་རྣམས་ཀྱིས། མགྲིན་གནད་ཅེས་ཅོ་དྲིས་པས་དེ་རིད་པར་གྱུར་པ་མ་ལ་བསྙད་པས། སྤྲུལ་པའམ། རང་གིས་གནས་སུ་སྡོད་ལ་ཉོན་ཅིག །དེས་ཁས་མ་བླངས་སོ། །ཀླུ་མོ་དེས་སྟོན་པའི་སྤྱན་སྔར་སོང་ནས་རྒྱས་པར་གསོལ་བས། སང་སྟོན་པས། དགེ་སློང་གིས་དེ་ལྟར་བྱས་ན་འཕྱ་བར་འགྱུར་གྱིས་སྐྲའི་རྙིས་སོགས། དགེ་སློང་གིས་དེ་ལྟར་བྱས་ཏེ་ནགས་སུ་བོར་བ་དང་དེ་ཁྲོས་པའི་མེས་ནགས་ཚིག་སྟེ་དེའང་ཚིག་པས། ཚང་ཚིང་སོགས། སྣང་བའི་གནས་སུ་བོར་བས་སྐད་ཅིག་ལ་འོལ་བས་ཁྱེར་ནས། ཁུང་དུ་སོགས། ཤིག་དང་རྩྭ་ཤིག་དང་སྲོག་ཆགས་དག་གཡང་ས་ནས་བོར་བས་དྲན་པ་ཉམས་ཤིང་གནོད་ནས། གཡང་ས་ནས་མི་དོར་རོ། །གར་བབ་ཏུ་དོར་བ་དང༌། ཤིག་རྣམས་ནི་སོགས། གསིང་མ་མ་རྙེད་ནས། ཡང་ན་སོགས། སྲོག་ཆགས་གཞན་ཡང་རང་གི་གནས་སུ་གཏང་ངོ༌། །ཆུ་ཚགས་ཉིད་ནས་ཆུ་ཁྲོན་པར་ཕོ་བས་སྲོག་ཆགས་རྣམས་ས་ལ་བཏབ་བསྣུན་པར་གནོད་(༢༣༦བ)ནས། སྔ་མ་སོགས། ཆུས་བཀང་སྟེ་བཏང་ན་གང་ནས་འོང་བ་བསྲེལ་བས། བཀང་སྟེ་བཏང་ན་ཕྱིར་སྟོང་པར་འོང་བ་བསྲེལ་ལོ། །
ལ་ལས་མ་འབྱོར་ནས། ཡང་ན་ཆུ་ཚགས་སོགས། ཆུ་ཕོ་ནས་གཤོལ་བ་སོགས་མི་བྱེད་ནས། ཆུ་ལ་སྲོག་ཆགས་སོགས། ཆུ་བཙགས་ཤིང་བརྟགས་པ་འཚལ་དུ་རུང་ངམ། གནང་སྟེ། ཆུ་རུང་བ་ནི་ལྔ་སྟེ། དགེ་འདུན་དང་སོགས། རྐང་པ་བཀྲུ་བའི་བྱ་བ་ནི། དགེ་སློང་གིས་རྐང་ཁྲུས་ཀྱི་སྣོད་སྟོང་པར་མཐོང་ན་དགང་བར་བྱའོ། །མཉན་ཡོད་དུ་སོ་གའི་དུས་ཀྱི་ཚེ་བྲམ་ཟེ་ཞིག་སྐོམ་པས་ཉམ་ཐག་ནས། དགེ་སློང༌། བདག་སྐོམ་ན་ཆབ་སྩོལ་ཅིག །དེས་རིལ་བ་བླངས་ནས། འཐུང་ཞིག །འཕགས་པ། གཙང་སྦྲ་ནི་ཐ་དད་པས་ཁྱེད་ཀྱིས་ཆབ་སྣོད་བཞག་ནས་བླུད་ན་ཅི་ནོངས། ཁྱོད་བསོད་ནམས་ལ་མི་སྦྱོར་རམ། གསོལ་བས། ཆུ་དང་གཞན་གྱི་སྣོད་ཀྱང་ཉེ་བར་གཞག་པར་བྱའོ། །ཆུ་སྣོད་གཞག་པར་གནང་བ་ཐོས་ནས་ཡོན་བདག་ཅིག་གིས་རྫ་སྤྱད་མང་པོ་ཕུལ་བ་དང༌། དགེ་སློང་གིས་མ་བསྲུངས་པར་ཀུན་དགའ་ར་བ་པ་དང་ཁྱིམ་པ་ཞིག་གིས་ཁྱེར་ནས་ཟད་པས། ཁྱིམ་བདག །ཟད་ཀྱིས་གཞན་བྱིན་ཅིག །ཅི་བདག་གིས་མང་དུ་ཕུལ་ན་རིང་པོར་མ་ཐོགས་པར་ཟད། ཇི་ལྟར་གྱུར་པ་བརྗོད་པས། ཡལ་བར་བོར་བ་མ་ལེགས་ཏེ་བདག་གིས་ཁྱིམ་པ་རྣམས་ལ་མ་སྩལ་ཏོ། །དེ་གསོལ་བས། སྣོད་སྤྱད་འདྲུབ་པ་ཆོས་ལྔ་ལྡན་བསྐོ་ཞིང༌། དགེ་འདུན་གྱི་དེར་སོགས། དགེ་སློང་ལ་རྙིང་པ་བྱིན་པས་ལེན། ཁྱིམ་པ་ལ་གསར་པ་བྱིན་པས་མི་ལེན་པར་གསོལ་བས། ཁྱིམ་པ་སོགས། ཕྱི་རུ་བཞག་པ་འཁྱམ་ནས་གསོལ་བས། སྣོད་སྤྱད་ཀྱི་སོགས། བྱང་ལམ་ནས་ཚོང་པ་ཞིག་འོངས་ནས་དགེ་འདུན་ལ་ཟླ་བ་གསུམ་དུ་བསྙེན་བཀུར་བྱས་ཏེ། བདག་གིས་དགེ་འདུན་ལ་ཡོ་བྱད་བརྙན་པོས་ཅིའི་ཕྱིར་བསྙེན་བཀུར་བྱ། བདག་ཉིད་ཀྱི་ཡོ་བྱད་ཀྱིས་བྱའོ་སྙམ་ནས་ཟངས་སྤྱད་མང་པོ་བཞག །ཟླ་བ་གསུམ་ཐོན་ནས་མཇུག་གཅོད་ཀྱི་སྟོན་མོ་བྱས་ཏེ་ཟངས་སྤྱད་དགེ་འདུན་ལ་ཕུལ་ལོ། །
དགེ་སློང་དག་གིས་ཟངས་སྤྱད་དང་རྫ་སྤྱད་ལྷན་ཅིག་ཏུ་བཞག་པས་རྫ་སྤྱད་རྣམས་ཆག་ནས་གསོལ་བས། ས་དང་ཟངས་མའི་སྣོད་སོགས། བྲམ་ཟེ་ཞིག་སྐོམ་པས་ཉེན་ནས། དགེ་སློང༌། བདག་སྐོམ་ན་ཆབ་སྩོལ་ཅིག །དེས་དེ་ལ་བུམ་པ་དང་སྲད་བུ་བྱིན་པ་དང༌། འདིས་ཅི་བགྱི་ཆབ་སྩོལ་ཅིག །ཆུ་བཅུས་པ་མེད་དོ། །ཁྱེད་སེམས་ཅན་ལ་ཕན་པར་ཞུགས་པ་ལགས་ན་ཆབ་བཞག་ན་ཅི་མ་རུང༌། མ་གནང་ངོ༌། །གསོལ་བས། ཆུ་ཉེ་བར་བཞག་པར་བྱའོ། །དགེ་སློང་གིས་ཁྱམས་དང་སྒོ་ཁང་ལ་སོགས་པ་གར་བབ་ཏུ་བཞག་པས། གར་བབ་ཏུ་མི་གཞག་གོ་སོགས། གང་དུ་བྱ་མ་ཤེས་ནས། གཙུག་ལག་ཁང་གི་སོགས། མུན་ནག་ནས། སྐར་ཁུང་གདོད་པ་དང་སོགས། འདམ་(༢༣༧ན)རྫབ་ལ་སོགས་པར་གྱུར་ནས། སོ་ཕག་གི་སོགས། ཆུ་ས་ལ་འཇོག་ནས། ཤིང་གི་སོགས། ཤིང་མ་འབྱོར་བས། ཡང་ན་སོགས། ཆུ་རའི་ལྷན་པ་ནི། ཆུ་སྣོད་ནི་ནས། བྲིམ་པར་མི་བྱའོ། །རུལ་ནས། ཆུ་སྣོད་རྣམས་སོགས། ཅིས་བཀྲུ་མ་ཤེས་ནས། ཟབ་མོ་རྣམས་ཀྱི་སོགས། འོན་ཀྱང་ཆུ་རུལ་ནས། ཕྱེད་བཀྲུ་ཕྱེད་དུ་ཆུ་བླུག་ཅེས་པ། སྐམ་པར་སོགས། བླུགས་པའི་ལས་སུས་བྱ་མ་ཤེས་ནས། ཆུ་དང་སོགས་སོ། །
ཉལ་བོ་བྱེད་པར་ཤོམ་པའི་ཁྱིམ་ན་འདུག་པའི་ལྟུང་བྱེད་ནི། སྟོན་པ་མཉན་ཡོད་ནའོ། །འཆར་ཀས་བསམ་པའི་ནོར་བུའི་རིག་པ་ཤེས་ཏེ་བསོད་སྙོམས་ལ་སོང་བ་དང་། སྤོས་འཚོང་གི་ཁྱེའུ་ཆུང་མ་བླངས་ནས་རིང་པོ་མ་ལོན་པ་ཞིག་ཟོང་བཀྲམ་ནས་འདུག་པ་ན་ཆུང་མ་དང་དགའ་མགུར་སྤྱད་དོ་སྙམ་དུ་ཚུལ་བཞིན་མ་ཡིན་པའི་ཡིད་བྱེད་སྐྱེས་ནས་ཟོང་བསྡུས་པ་འཆར་ཀས་མཐོང་ནས་ཆུང་མ་ལ་འདོད་པ་སྤྱོད་པར་ཤེས་ཏེ། རེ་བ་མེད་པར་བྱའོ་སྙམ་ནས། དང་པོར་དེའི་ཁྱིམ་དུ་སོང་སྟེ། བུ་མོ། ཚུར་ཤོག །ཆོས་བསྟན་པར་བྱའོ། །བུ་མོ་དེས་ཆོས་མཉན་པའི་ཕྱིར་འདུག་པ་དང༌། ཁྱེའུ་དེ་འོངས་ནས་བུ་མོ་ལ། འཕགས་པ་ལ་བསོད་སྙོམས་ཕུལ་ལ་གཤེགས་སུ་ཆུག་ཅིག །འཆར་ཀས། བཞིན་བཟང༌། ཁོ་བོས་བདག་ཉིད་ཀྱི་དགེ་བའི་ཕྱོགས་ཉམས་པར་བྱས་ཏེ་འོངས་ནས་ཆོས་སྟོན་ན། ཁྱོད་ཆོས་ཉན་མི་འདོད་དམ། འདུག་ལ་ཆོས་ཉོན་ཅིག་ཅེས་ནན་གྱིས་ཆོས་སྟོན་ན། དེ་ཀུན་ནས་དཀྲིས་པ་དང་བྲལ་གྱི་བར་དུ་ཆོས་བསྟན་པ་དང༌། དེ། ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་སྟེ། རང་གི་ཆུང་མ་ལའང་དབང་མེད་དོ་ཟེར་ནས། དོན་ཉུང་དུ་དག་འཕྱ་བ་དེ་གསོལ་བས། བྱུང་བ་འདི་དང་སོགས། ཤེས་གཙོ་བོའོ་སོགས།
ཉལ་བོ་བྱེད་པར་ཤོམ་པའི་ཁྱིམ་ན་འགྲེང་བའི་ལྟུང་བྱེད་ནི། །སྟོན་པ་མཉན་ཡོད་ནའོ། །འཆར་ཀ་བསོད་སྙོམས་ལ་ཞུགས་པ་དང༌། སྤོས་འཚོང་གི་ཁྱེའུ་སྔར་བཞིན་བྱེད་པར་ཤེས་ཏེ། སོང་ལ་བལྟའོ་སྙམ་ནས་དང་པོ་དེའི་ཁྱིམ་དུ་སོང་སྟེ་སྒོ་གླེགས་ཀྱི་ཕག་ན་མགོ་སྲི་ཞིང་འགྲེང་ངོ༌། །ཁྱེའུས་ཆུང་མ་ཁྲིད་དེ་གནས་ཁང་དུ་ཞུགས་པ་དང༌། བུ་མོ་དེས་འཆར་ཀ་མཐོང་ནས་ཁྱོ་ལ། རྗེའི་སྲས། འཆར་ཀ་སྒོ་གླེགས་ཀྱི་རྒྱབ་ན་འགྲེང་ངོ༌། །ཁྱེའུས་སྨྲས་པ། འཆར་ཀ་གཙུག་ལག་ཁང་ན་བསམ་གཏན་གྱི་བདེ་བ་ཉམས་སུ་མྱོང་ཞིང་འགྲེང་ངོ་ཞེས་ཆུང་མ་དགའ་མགུར་སྤྱད་ནས། ཀུན་ནས་དཀྲིས་པ་དང་བྲལ་བའི་ཚེ་འཆར་ཀ་མཐོང་ནས་འཕྱ་བ་དེ་གསོལ་བས། བྱུང་བ་འདི་དང་སོགས།
གཅེར་བུ་ལ་སྦྱིན་པའི་ལྟུང་བྱེད་ནི། སྟོན་པ་རྒྱལ་པོའི་ཁབ་ནའོ། །ཚོང་པ་རབ་ཏུ་མང་པོས་སྟོན་པ་ལ་ཕྱག་འཚལ་ནས་ཆོས་ཉན་ཏེ། ཀུན་དགའ་བོ་ལ། སྟོན་པ་དབྱར་གནས་པར་ཞལ་(༢༣༧བ)གྱིས་བཞེས་ནས་གང་དུ་གཤེགས་པར་འགྱུར། ཤེས་ལྡན་དག །སྟོན་པ་ལ་ཞུས་ཤིག །སྟོན་པ་ནི་བསྙེན་པར་དཀའ་བ་དང་བཟོད་པར་དཀའ་བ་ལགས་པས་བདག་ཅག་གིས་ཞུ་བའི་རྔོ་མི་ཐོག་གོ །ཁོ་བོས་ཀྱང་སྟོན་པ་ལ་ཞུ་བར་མི་ནུས་སོ། །འོ་ན་མཚན་མའམ་བཀའ་མཆིད་ཀྱིས་མཁྱེན་ནས། དབྱར་གནས་པར་ཞལ་གྱིས་བཞེས་ནས་གང་དུ་གཤེགས་པར་བཞེད་པའི་ཕྱོགས་དེར་ཞལ་གཟིགས་ཤིང་དེའི་བསྔགས་པ་བརྗོད་པར་མཛད་དོ། །འོ་ན་སྟོན་པ་ཞལ་གར་གཟིགས། མི་གང་གིས་བསྔགས་པ་བརྗོད་པར་མཛད། ཀོ་ས་ལར་ཞལ་གཟིགས་ཤིང་མཉན་ཡོད་པའི་མི་དག་གི་བསྔགས་པ་བརྗོད་དོ། །དེ་དག་གིས་མཉན་ཡོད་དུ་འགྲོ་བའི་ཟོང་སྟ་གོན་བྱས་སོ། །དེ་ནས་དབྱར་ཟླ་བ་གསུམ་འདས་ཏེ་སྟོན་པས་ཀུན་དགའ་བོ་ལ། དེ་བཞིན་གཤེགས་པ་ཀོ་ལ་ལར་ལྗོངས་རྒྱུར་གཤེགས་ཀྱིས། དེ་བཞིན་གཤེགས་པ་དང་ལྷན་ཅིག་ཀོ་ས་ལར་ལྗོངས་རྒྱུར་འགྲོ་བ་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་ཞིག །དེ་སྐད་བསྒོའོ། །དེ་ཚོང་པ་དག་གིས་ཐོས་ནས་སྟོན་པ་ལ་ཕྱག་འཚལ་ཆོས་ཉན་ཏེ། སྟོན་པ་དགེ་འདུན་དང་བཅས་པ་རྒྱལ་པོའི་ཁབ་ནས་མཉན་ཡོད་ཀྱི་བར་ལ་བདག་ཅག་ལས་ན་བཟའ་དང་བསོད་སྙོམས་དང་སྨན་གྱི་ཡོ་བྱད་བཞེས་པར་ཅི་གནང༌། གནང་ངོ༌། །ཚོང་པ་དེ་དག་གིས་ཀུན་དགའ་བོ་ལ་སྨྲས་པ། སྟོན་པ་བཤུལ་ལམ་དག་ཏུ་ཇི་ཙམ་དུ་གཤེགས། འཁོས་ལོས་སྒྱུར་བའི་རྒྱལ་པོ་བཞིན་དུ་རྒྱང་གྲགས་བཅུར་འགྲོའོ། །དེ་དག་གིས་རྒྱང་གྲགས་བཅུ་བཅུར་ཟས་སྟ་གོན་བྱས་སོ། །དེ་ནས་སྟོན་པ་དུལ་བ། འཁོར་དུལ་བ་དང་ལྡན་པ་ཞེས་པ་ནས། དྲན་པ་ཉེ་བར་བཞག་པ་གསུམ་དང་ལྡན་པ། ཐུགས་རྗེ་ཆེན་པོ་དང་ལྡན་པ། ཀུན་ཤེས་ཀོའུ་དི་ནྱ་ལ་སོགས་པ་ཉན་ཐོས་ཆེན་པོ་དག་དང༌། གཞན་ཡང་དགེ་སློང་གི་དགེ་འདུན་དང་ལྷན་ཅིག་གཤེགས་པ་དང༌། དོན་མཐུན་དེ་དང་ལྷན་ཅིག་འགྲོ་བའི་ཤེས་པ་ཅན་ཞིག་བཀྲེས་པས་ཉམ་ཐག་སྟེ། བདག་བཀྲེས་པར་མི་འགྱུར་བའི་ཐབས་ཅི་ཡོད་སྙམ་ནས་དགེ་སློང་རྣམས་ཀྱི་གན་དུ་སོང་སྟེ། ཁྱེད་ཀྱི་སྟོན་པ་ནི་བཟང་པོ་ལ་སོགས་པ་ཡིན་ཏེ། གསེར་གྱི་གཤོལ་གྱིས་ཞིང་རྨོ་བས་དེས་ཁྱེད་ལ་ཟས་རོ་བརྒྱ་པ་དང༌། གོས་འབུམ་རི་བ་དང༌། ཁང་པ་བརྩེགས་པ་ལྔ་བརྒྱ་པའང་གནང་བས་ཁྱེད་ནི་ཚེ་འདིར་ཡང་བདེ་ལ། ཤི་ནས་ཀྱང་ལྷར་སྐྱེའོ། །ཁོ་བོའི་སྟོན་པ་ནི་དམན་པ་ལ་མོས་ཏེ། ཏིལ་གྱི་ཚིགས་མའི་གཤོལ་གྱིས་ཞིང་རྨོ་བས་ཁོ་བོ་ཅག་ལ་གཅེར་བུ་དང་སྒྲེ་བྱི་དང་ས་ལ་ཉལ་བ་ལས་གཞན་མ་གནང་བས་ཁོ་བོ་ཅག་ནི་ཚེ་འདིར་ཡང་སྡུག་བསྔལ་ལ། ཤི་ནས་དམྱལ་བར་སྐྱེའོ། །དགེ་སློང་དག་གིས། འདི་དད་དོ་སྙམ་ནས། ཁྱོད་ཇི་ལྟར་འཚོ། དཀའ་བས་སོ། །ལྷུང་བཟེད་ཀྱི་ལྷག་མ་འདོད་དམ། འཚལ་ལོ། །
འོ་ན་ཟན་ཟ་བའི་མིག་ལམ་དུ་འདུག་ཅིག་ཟེར་ནས་འཁུར་བ་བྱིན་ཏེ་སློང་ཕོར་བཀང་བས་ཕྱིར་བྱུང་བ་དང་དེད་དཔོན་གྱིས་(༢༣༨ན)མཐོང་ནས། ཁྱོད་ལ་འཁུར་བ་སུས་བྱིན། དེས་སྨྲས་པ། ཁྱོད་ཀྱི་ཡོན་གནས་ནི་དགེ་སློང་དག་ཡིན་ལ། དེ་དག་གི་ཡོན་གནས་ནི་ཁོ་བོ་ཡིན་པས་དེ་དག་གིས་ཕུལ་ལོ། །དེད་དཔོན་གྱིས་སྨྲས་པ། དགེ་སློང་རྣམས་ཀྱིས་ཁྱོད་ལ་སྙིང་རྗེས་བྱིན་ན། ཁྱོད། དེ་དག་གི་ཡོན་གནས་ཁོ་བོ་ཡིན་ནོ་ཞེར་ཟེར་རམ། སྟོན་པས་གསན་ན་བསླབ་པ་འཆའ་བའི་གནས་ཡོད་དོ། །དེས་སྨྲས་པ། མེད་ཀྱང་བཞད་གད་བགྱིས་སོ། །ཤེས་པ་ཅན་ཚུར་འོང་བ་ཞིག་དང་ཕྲད་ནས། ཁྱོད་ཉོད་པ་ཉོད་དམ། ཉོད་དོ། །གང་ནས། ཁྱིམ་བདག་སྒྲེ་བྱི་འདི་དག་གིས་མཁོ་བ་སྟོབ་བོ། །དེས་སྨྲས་པ། ཁྱོད་བྱས་པ་མི་ཤེས་པ་ཡིན་ཏེ། འདི་དག་ཁྱོད་ཀྱི་ཁྱིམ་བདག་སྒྲེ་བྱི་ཡིན་ནམ། འདི་དག་ལས་ནི་ལྔ་བརྒྱ་པའི་ཚོགས་དག་མྱ་ངན་ལས་འདས་བར་སྣང་གི །ཤེས་པ་ཅན་ནི་གཅིག་ཀྱང་མྱ་ངན་ལས་འདས་པར་མཐོང་ངམ། ངན་པ་ཅི་ཕྱིར་ས་ལ་འབྱིད་མི་བྱེད། །ཅི་ཕྱིར་ལྕེ་ཡང་ཚལ་བ་བརྒྱར་མི་འགས། །ཁྱོད་ཀྱི་ལུས་ལ་ཅི་ཕྱིར་གསང་བ་དག །རྡོ་རྗེའི་སེར་བ་མདུང་ཐུང་མདའ་མི་འཕེན། །ཇི་ལྟར་སེངྒེའི་ལྷག་མ་ཟ་བའི་ཝ། །སེངྒེ་ཉིད་ནི་གསོད་པར་འདོད་པ་ལྟར། དེ་བཞིན་ཁྱོད་ཀྱང་སྟོབས་བཅུའི་ཁྱོས་ཟ་ཞིང༌། །སྟོབས་བཅུ་ཉིད་ལ་གནོད་བྱེད་མ་འཕགས་པ། །གང་དུ་གང་ལ་ཉེ་བར་བརྟེན་བྱས་ན། །མི་ངན་འདི་འདྲས་འཚོ་བ་ཐོབ་པ་ལས། །དེ་ནི་ངེས་པར་མཛའ་བཤེས་དགྲ་རྣམས་ལ། །མཉམ་མཛད་བློ་ལྡན་ཐམས་ཅད་མཁྱེན་པ་ཡིན། །མི་རྣམས་གང་དག་བྱས་པ་མི་ཤེས་པ། །དེ་དག་ཁྱི་བས་ཤིན་ཏུ་ངན་པར་བསམ། །ཁྱི་ཡང་མི་ལ་བྱས་པ་ཤེས་སྣང་ན། །སྦྲུལ་འདྲའི་མི་དག་དུག་ནི་གཏོང་བར་བྱེད། །འདི་ནི་རེ་ཞིག་བྱུང་བའོ། །
དེ་ནས་སྟོན་པ་ཀོ་ས་ལར་ལྗོངས་རྒྱུ་ཞིང་མཉན་ཡོད་དུ་བྱོན་པ་ན་ཡུགས་ས་མོ་ལྔ་བརྒྱ་ཡོད་པ་དེ་དག་གིས་སྟོན་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ། གཟུགས་ཅན་ལྟ་བུའི་ཆོས་དང་ལྡན་པ། བསྲེག་བྱས་བཏབ་པའི་མེ་ལྟ་བུ། གསེར་སྣོད་ན་འདུག་པའི་མར་མེ་ལྟ་བུ། གསེར་གྱི་རི་བོ་འགྲོ་བ་ལྟ་བུ། རིན་པོ་ཆེ་སྣ་ཚོགས་པས་སྤྲས་པའི་གསེར་གྱི་མཆོད་རྟེན་ལྟ་བུ། གྲགས་པ་དང༌། གསལ་བ་དང༌། མི་བསྙེངས་པ་དང༌། དྲི་མ་མེད་པ་དང༌། རྣམ་པར་དག་པའི་བློ་དང་ལྡན་པ་མཐོང་ངོ༌། །དགེ་བའི་རྩ་བ་བསགས་པའི་སེམས་ཅན་གྱིས་སངས་རྒྱས་མཐོང་བ་ན་སེམས་བདེ་བ་སྐྱེ་བ་ལྟར་དུ་ནི་ལོ་བཅུ་གཉིས་སུ་ཞི་གནས་གོམས་པ་དང༌། དབུལ་པོས་གཏེར་རྙེད་པ་དང༌། བུ་མེད་པས་བུ་ཐོབ་པ་དང༌། རྒྱལ་སྲིད་ལ་དགའ་བ་རྒྱལ་སྲིད་ལ་དབང་བསྐུར་བའང་སེམས་བདེ་བ་མི་སྐྱེད་པས། དེ་དག་སྟོན་པའི་དྲུང་དུ་སོང་ནས་ཆོས་ཉན་པས་རྒྱུན་ཞུགས་ཐོབ་བོ། །དེ་དག་གིས་བསམས་པ། སྟོན་པ་མཉན་ཡོད་དུ་གཤེགས་ན་བདག་ཅག་གིས་(༢༣༨བ)སྐབས་ཀྱང་མི་རྙེད་ཀྱིས་འདི་ཉིད་དུ་གདུགས་ཚོད་ལ་སྤྱན་དྲང་ངོ་སྙམ་ནས་ཞུས་པས་གནང་ངོ༌། །ཀུན་དགའ་བོ་ལ། བདག་ཅག་གིས་སངས་རྒྱས་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་ན། པ་ཎ་དུ་འཚལ། ལྔ་བརྒྱའོ། །དེ་དག་གིས་ཀརྵ་པ་ཎ་རེ་རེ་བསྡུས་ནས་ཀུན་དགའ་བོ་ལ་གཏད་དེ། བདག་ཅག་ལ་སྣོད་དཔྱད་དང་མི་བླས་དང་གནས་མལ་མ་མཆིས་པས་སྟ་གོན་མཛོད་དང་བདག་ཅག་གིས་བྲིམ་པར་བགྱིའོ། །ཀརྵ་པ་ཎ་ཞོག་ཅིག །མཐའ་གཅིག་ཏུ་བཞག་ནས་སོང་ངོ༌། །ཁྱིམ་བདག་མགོན་མེད་ཟས་སྦྱིན་ཆོས་ཉན་ནས། སང་གདུགས་ཚོད་གསོལ་བར་ཅི་གནང༌། ང་དེའི་དང་པོར་ཁྱིམ་བདག་མོ་ལྔ་བརྒྱས་སྤྱན་དྲངས་སོ། །རྗེས་སུ་ཡི་རང་བ་བྱས་ཏེ་ཀུན་དགའ་བོའི་གན་དུ་སོང་ནས་ཕྱག་བཙལ་བ་དང་ཀརྵ་པ་ཎ་དེ་དག་མཐོང་ནས། འདི་སུའི་ལགས། ཁྱིམ་བདག་མ་ལྔ་བརྒྱ་ཙམ་གྱི་ཡིན་གྱི། འདི་དག་དང་བདག་ཉིད་ཀྱི་ཀརྵ་པ་ཎ་གཞན་དག་བསྲེས་ཏེ། ཞལ་ཟས་བསོད་པ་སྟ་གོན་གྱིས་ལ་གནས་འདིར་སྐུར་ཅིག །དེས་ཀརྵ་པ་ཎ་དེ་དག་ཁྱེར་ཏེ་སོང་ནས་ཞལ་ཟས་བསོད་པ་སྟ་གོན་བྱས་ཏེ་རྒྱལ་བྱེད་ཚལ་དུ་བསྐུར་རོ། །
ཀུན་དགའ་བོས་དེ་དག་ལ། ཞལ་ཟས་ལ་སྟ་གོན་བྱས་ཀྱིས་ཤོག་ལ་བྲིམས་ཤིག །དེ་དག་ལྷགས་ནས། ཀུན་དགའ་བོ། ཁྱོད་བདག་ཅག་གི་དགེ་བའི་བཤེས་གཉེན་ལགས་ཀྱིས་ཁྱོད་ཀྱིས་ཀྱང་བྲིམ་དུ་གསོལ། དེ་བྲིམས་པ་ན་དེར་གཅེར་བུ་མ་གཉིས་ཀྱིས་འོངས་ཏེ་ཁྱིམ་བདག་མོ་དེ་དག་ལ་ཟས་བསླངས་པས། ཟས་འདི་ནི་རྒྱལ་བུ་འདིའི་ཡིན་ནོ། །ཀུན་དགའ་བོ་ལ་བསླངས་པས། འདུག་ཅིག་སྦྱིན་ནོ། །དེ་གཉིས་འདུག་གོ །དེ་གཉིས་གཅིག་རྒན་མོ་ཡིན། གཅིག་གཞོན་ནུ་མ་ཡིན་ནོ། །ཀུན་དགའ་བོས་མ་བསམས་པར་བྲིམས་པ་རྒན་མོ་ལ་འཁུར་བ་གཅིག །གཞོན་ནུ་མ་ལ་གཉིས་བྱིན་ནོ། །རྒན་མོས་འཁུར་བ་གཅིག་པུ་དེ་ཟོས་ནས་གཞོན་ནུ་མ་ལ། ཁྱོད་ཀྱིས་དུ་ཐོབ། གཉིས་ཐོབ་བོ། །རྒྱལ་བུ་དེས་ཁོ་མོ་ལ་ནི་གཅིག་བྱིན་ལ། ཁྱོད་ལ་ནི་གཉིས་བྱིན་པ་ལས་ན་དེས་ཁྱོད་དོན་དུ་གཉེར་གྱིས་སྟ་གོན་གྱིས་ཤིག །དེས་བཙུན་མོའི་འཁོར་རྒྱས་པ་སྤངས་ནས་རབ་ཏུ་བྱུང་བས་དྲི་མའི་རྫབ་ཅན་ཁོ་མོ་ལྟ་བུ་དོན་དུ་ག་ལ་གཉེར། སྐྱེས་པ་དག་བུད་མེད་སྣ་ཚོགས་ལ་བུད་མེད་ཀྱི་འདུན་པ་ཡོད་པས་དེས་ཁྱོད་དོན་དུ་གཉེར་གྱིས་སྟ་གོན་གྱིས་ཤིག །དོན་ཉུང་ངུ་དག་འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། ཕོ་ཡང་རུང་སོགས།
དམག་ལ་ལྟ་བའི་ལྟུང་བྱེད་ནི། སྟོན་པ་མཉན་ཡོད་ནའོ། །རྒྱལ་པོ་གསལ་རྒྱལ་གྱིས་རི་བྲགས་པ་ཞིག་ལོག་ནས་དེར་རུ་བ་གཅིག་དང་གཉིས་པ་དང་གསུམ་པ་བཏང་བའང་བཅོམ་མོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། རི་བྲགས་པའི་དཔུང་ནི་སྐྱེས། ལྷའི་དཔུང་ནི་ཉམས་པས་ལྷ་ཉིད་དེར་མ་གཤེགས་ན་ཕེབས་དཀའ་བས་ལྷ་ཉིད་དེར་གཤེགས་པར་མཛད་དུ་(༢༣༩ན)གསོལ། ངའི་ཡུལ་ན་མཚོན་གྱིས་འཚོ་བ་འཁོད་པ་ཐམས་ཅད་འདོང་བར་བྱའོ། །མི་འགྲོ་ན་ཀརྵ་པ་ཎ་ལྔ་བརྒྱའི་ཆད་པ་གཅད་དོ་ཞེས་དྲིལ་བསྒྲགས་ནས་ཆས་སོ། །དྲུག་སྡེས། གསུས་པོ་ཆེའི་དམག་ལྟའི་འདོང་ངོ་ཞེས་ལམ་དུ་ཕྱིན་ནས། གླང་པོ་ཆེ་བའི་ཚོགས་འོངས་པ་དང༌། གར་འདོང༌། རི་བྲགས་པ་ལོག་པ་དེ་འབེབས་སུ་འགྲོའོ། །བཀྲེན་པ་དག །གླང་པོ་ཆེ་འདི་འདྲས་རི་བྲགས་པ་ཕེབས་སམ། ཁྱེད་ཀྱི་གླང་པོ་ཆེ་འདི་དག་ནི་ཕག་འདྲ། རི་བྲགས་པའི་གླང་པོ་ཆེ་ནི་རི་བོ་བརྩེགས་པ་འདྲ་བས་ཁྱེད་ཕར་འགྲོ་བ་ཡོད་ཀྱང་ཚུར་འོང་བ་མེད་པས། དེང་ལ་ཕ་མ་ལ་ཏིལ་གྱི་ཆུ་བྱིན་ལ་གཟོད་སོང་ཞིག །དེ་བཞིན་དུ། ཁྱེད་ཀྱི་རྟ་བོང་བུ་འདྲ། རི་བྲགས་པའི་རྟ་གླང་པོ་ཆེའི་ཕྲུག་གུ་འདྲ། ཁྱེད་ཀྱི་ཤིང་རྟ་ནི་ཞིག་པ་འདྲ། རི་བྲགས་པའི་ཤིང་རྟ་ནི་གཞལ་མེད་ཁང་འདྲ། ཁྱེད་ཀྱི་མི་དག་ནི་རྩྭ་མི་འདྲ། རི་བྲགས་པའི་མི་དག་ནི་གནོད་སྦྱིན་གདུག་པ་འདྲ་བས་ཞེས་སོགས་བརྗོད་པས་ཡིད་ཁོང་དུ་ཆུད་ནས་འདུག་གོ །རྒྱལ་པོས་ཁྱེད་ཅིའི་ཕྱིར་མི་འགྲོ། ལྷ། བདག་ཅག་རྒྱལ་བར་ག་ལ་འགྱུར། དགེ་སྦྱོང་མགོ་རེག་རས་ཡུག་གླེགས་པ་འཚལ་བ་འདི་དག་མི་མཆི་དགུ་མཆིའོ། །དེ་དག་ནི་དགེ་སྦྱོང་ཧྲལ་པོ་ཡིན་པས་ཁྱེད་ལ་ཅི་གནོད་དེང་ཞིག །རྒྱལ་པོས་མི་ཞིག་སྟོན་པའི་སྤྱན་སྔར་མངགས་ཏེ། འཕགས་པ་འདི་དག་དམག་ཆས་པ་ལ་ལྟར་མཆིས་ན། ཀྱེ་མ་སྟོན་པས་ཐུགས་བརྩེ་བའི་སླད་དུ་དམག་ཆས་པ་ལ་ལྟར་མཆི་བར་མི་འགྱུར་བའི་བཅའ་བ་མཛད་ན་ལེགས་སོ་ཞེས་གསོལ་ཅིག །གསོལ་བས། གནང་སྟེ། བྱུང་བ་འདི་དང་སོགས། གཡུལ་ལ་མངོན་པར་དགའ་བའི་སོགས།
དམག་ནང་ན་གནས་པའི་ལྟུང་བྱེད་ནི། སྟོན་པ་མཉན་ཡོད་ནའོ། །དེ་ལྟ་ནའང་རི་བྲགས་པ་དེ་མ་ཕེབས་ནས་རྒྱལ་པོ་དེ་ཉིད་དུ་ཕྲུ་མ་བཏབ་སྟེ་འདུག་པ་དང༌། བློན་པོས། ལྷ། ཁྱིམ་བདག་མགོན་མེད་ཟས་སྦྱིན་བསོད་ནམས་ཅན་ལགས་པས་དེ་འོངས་ན་ཕེབས་སོ་ཟེར་ནས་ཁྱིམ་བདག་མགོན་མེད་ཟས་སྦྱིན་བོས་པས་འོངས་སོ། །དེར་ཡང་མ་ཕེབས་ནས། རྒྱལ་པོས། ཁྱིམ་བདག །ཁྱེའུ་མི་དྲན་ནམ། མི་དྲན་ཏེ། འཕགས་པ་དག་མཐོང་བར་འཚལ་ལོ། །དགེ་སྐོས་ཀྱིས་དགེ་འདུན་གྱི་དབུས་སུ་ཡི་གེ་བཀླགས་ཏེ། དེར་འགྲོ་བར་སྤྲོ་བ་དེས་ཚུལ་ཤིང་ལོངས་ཤིག །རྒན་པོ་དག །ཁོ་བོ་ཅག་སྦྱོར་མི་བཟོད་པས་འགྲོ་མི་ནུས་སོ། །གསར་བུ་དག །དེར་ཆོས་བསྟན་དགོས་ན། བདག་ཅག་ཐོས་པ་ཉུང་བས་ཆོས་བསྟན་མི་ནུས་ན་དེར་ཆུ་བྲིམ་པར་བྱའམ་ཟེར་ནས་མ་སོང་བ་དང༌། དྲུག་སྡེ་ན་རེ། སྟོན་པ་བཞུགས་ཤིང་བདག་ཅག་གསོན་པ་དེ་སྲིད་དུ་བསྟན་པ་གནས་ལ། སྟོན་པ་མྱ་ངན་ལས་འདས་ཤིང་བདག་ཅག་དུས་བྱས་ན་བསྟན་པ་ནུབ་སྟེ། (༢༣༩བ)བདག་ཅག་གསོན་པ་དེ་སྲིད་དུ་བསྟན་པ་ལ་གཅེས་པར་བསྐྱེད་པར་བྱའི་ཚུལ་ཤིང་ལོངས་ཤིག་ཅེས་ཚུལ་ཤིང་བླངས་ནས་སོང་སྟེ་རྒྱལ་པོ་ལ་ཆོས་བསྟན་པས་དད་པར་བྱས་སོ། །བཙུན་མོ་དང་གཞོན་ནུ་དང་ཞང་བློན་དང་ཁྲོམ་གྱི་རུ་སྣ་དག་ལའང་ཆོས་བསྟན་པས་སྐྱེ་བོ་ཕལ་པོ་ཆེ་དད་པར་བྱས་སོ། །རྒྱལ་པོས། རི་བྲགས་པ་སྐོར་དུ་འདོང་ངོ་ཞེས་འཕགས་པ་དང་དྲུག་སྡེས། བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་གནས་པར་བྱས། རང་སྤྱོད་ཀྱིས་གནས་པར་བྱའི་གསུས་པོ་ཆེའི་དམག་ཅི་འདྲ་བ་ལྟར་འདོང་ངོ་ཞེས་ལམ་དུ་འཁོད་པ་དང༌། འཕགས་པ་དག །ལམ་ཕྱེ་ཞིག །ཅི་བྱ། གླང་པོ་ཆེའི་ཚོགས་མཆིའོ། །བཀྲེན་པ་དག །འདི་འདྲ་གླང་པོ་ཆེ་ཡིན་ནམ། ཕག་འདྲའོ་ཟེར་ནས་མཆེ་བ་ནས་བཟུང་སྟེ་མཐའ་གཅིག་ཏུ་བོར་རོ། །དེ་བཞིན་དུ་རྟའི་མཇུག་མ་དང༌། ཤིང་རྟའི་སྲོག་ཤིང་དང༌། མིའི་གཉའ་བ་ནས་བཟུང་སྟེ་བོར་རོ། །དེ་དག་ཡིད་ཁོང་དུ་ཆུད་ནས་འཁོད་པ་ལས། རྒྱལ་པོས་སྨྲས་པས་སྔར་བཞིན་ཟེར་ནས། མི་ཞིག་སྟོན་པའི་སྤྱན་སྔར་མངགས་ཏེ། འཕགས་པ་འདི་དག་དམག་ཆས་པ་ལ་ལྟར་མཆིས་ནས་ཡུན་རིང་པོར་དམག་གི་ནང་ན་གནས་ན། ཀྱེ་མ་སྟོན་པས་དམག་ཆས་པ་ལ་ལྟར་མཆིས་ནས་ཤིན་ཏུ་ཡུན་རིང་པོར་དམག་ནང་ན་གནས་པར་མི་འགྱུར་བར་བཅའ་བ་མཛད་ན་ལེགས་སོ་ཞེས་གསོལ་ཅིག །གསོལ་བས། གནང་ངོ༌། །བྱུང་བ་འདི་དང་སོགས། དེ་དག་མེད་པར་སོགས།
དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད་ནི། སྟོན་པ་མཉན་ཡོད་ནའོ། །དེ་ལྟ་ནའང་རི་བྲགས་པ་མ་ཕེབས་ནས་རྒྱལ་པོས་ཁྱིམ་བདག་ལ། ཁྱེའུ་དག་མི་དྲན་ནམ། མི་དྲན་ཏེ། འཕགས་པ་དག་མཐོང་བར་འཚལ་ལོ། །སྔར་བཞིན་སྤྱན་དྲངས་པས་དྲུག་སྡེ་འོངས་ནས་དད་པར་བྱས་སོ། །རྒྱལ་པོས། གཡུལ་ཤོམས་ཤིག །ཅེས་བཀའ་སྩལ་བ་དང༌། དྲུག་སྡེས། རང་སྤྱོད་བསྟན་པར་བྱའོ་ཞེས་དེ་དག་གི་གན་དུ་ཕྱིན་ཏེ། ཤེས་ལྡན་དག །ཅི་བྱེད། བཀོད་པ་གཤོམ་མོ། །བཀྲེན་པ་དག །གླང་པོ་ཆེ་བཅོས་མ་འདི་ལྟ་བུ་འདིར་འཇོག་གམ། འདི་སོལ་ཅིག་ཅེས་མཆེ་བ་ནས་བཟུང་སྟེ་མཐའ་གཅིག་ཏུ་བཞག །རྟ་ཐེང་བོ་དང༌། ཤིང་རྟ་ཞིག་པ་དང༌། མི་ཞར་བ་ཟེར་ནས་བྱུང་ངོ༌། །དེ་ནས་དྲུག་སྡེས་དེ་དག་གི་མདུན་ལོགས་རི་བྲགས་པ་དང་ཧ་ཅང་ཐག་མི་རིང་བར་འཁོད་དེ་ཀླག་ཅོར་གྱི་སྒྲ་ཕྱུང་བ་དང་རི་བྲགས་པ་དག་ལྗོངས་ནས་རླུགས་བྱུང་སྙམ་དུ་སྐྲག་ནས་བྲོས་པ་དང་དྲུག་སྡེ་མྱུར་བ་མྱུར་བར་སོང་སྟེ་ཁྲོམ་གྱི་རུ་སྣའི་མདུན་དུ་འཁོད་ནས། ཅིའི་ཕྱིར་འབྲོས། རི་བྲགས་པ་དག་ལྗོངས་ནས་རླུགས་ཏེ་བྱུང་ངོ༌། །དེ་ནི་ཁོ་བོ་ཅག་གིས་ཀུ་རེ་བྱས་པ་ཡིན་ཏེ། རི་བྲགས་པས་ཁྱེད་དེ་ལྟར་བྲེད་པར་ཤེས་ན་ནངས་པར་སྔ་བར་ཁྱེད་གཉའ་བ་ནས་བཟུང་སྟེ་རི་བྲགས་སུ་འཁྲིད་པར་འགྱུར་གྱིས་མ་འཇིགས་པར་ཕྱིར་ལོག་ཅིག །དེ་དག་ཡིད་ཁོང་དུ་ཆུད་པ་དང༌། རྒྱལ་པོ་འོངས་ནས། ད་དུང་བཀོད་པ་མ་བཤམས་སམ། བདག་ཅག་རྒྱལ་བར་ག་(༢༤༠ན)ལ་འགྱུར་སོགས། རྒྱལ་པོས། འདི་དག་བདག་ལ་ཡང་དང་ཡང་དུ་མཐོ་འཚམ་པར་འགྱུར་རོ་སྙམ་ནས་མི་ཞིག་མངགས་ཏེ། འཕགས་པ་འདི་དག་དམག་ན་གནས་པའི་ཚེའང་བཤམས་པ་དཀྲུག་ཏུ་མཆི་ཞིང༌། རྒྱལ་མཚན་གྱི་མཆོག་དང༌། དཔུང་གི་མཆོག་དང༌། གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བགྱིད་ན། ཀྱེ་མ་སྟོན་པས་ཐུགས་བརྩེ་བའི་སླད་དུ་དེ་ལྟར་བགྱིད་པར་མི་འགྱུར་བའི་བཅའ་བ་མཛད་ན་ལེགས་སོ་ཞེས་གསོལ་ཅིག །དེས་གསོལ་བས། གནང་ནས། བྱུང་བ་འདི་དང་སོགས། སྟོན་པ་ཏྲོ་ཏི་ཀའི་དྲུང་རི་ཤི་ཀའི་ནགས་ན་བཞུགས་སོ། །དེའི་ཚེ་དགེ་སློང་ཐ་སྐར་སྐྱེས་དང་ནབས་སོ་དང་དམར་སེར་ཅན་རྣམས་བ་ལང་དང་རྟ་ལ་སོགས་པ་དང༌། སྐྱེས་པ་དང་བུད་མེད་རྣམས་འཐབ་ཏུ་འཇུག །འཐབ་པ་ལ་ལྟ་ནས་ཁྱིམ་པ་རྣམས། སུ་ཞིག་འདི་དག་ལ་བསོད་སྙོམས་སྦྱིན་པ་སེམས་ཞེས་འཕྱ་བ་དེ་གསོལ་བས། གླང་པོ་ཆེ་དང་ནས། མི་བྱའོ། །
རྡེག་པའི་ལྟུང་བྱེད་ནི། སྟོན་པ་མཉན་ཡོད་ནའོ། །མོའུ་གལ་གྱི་བུ་ཆེན་པོས་ཉེ་བར་འཁོར་ལ་སོགས་པ་བཅུ་བདུན་སྡེ་རབ་ཏུ་ཕྱུང་བསྙེན་པར་རྫོགས་པའི་ཚེ་དྲུག་སྡེ་ལ་བརྟེན་པར་བྱེད་དོ། །འཆར་ཀས། བཅུ་བདུན་སྡེ། ཚུར་ཤོག །འདི་དང་འདི་གྱིས་ཤིག །ཅི་ཁྱོད་ཁོ་བོ་ཅག་གི་མཁན་པོ་ཡིན་ནམ་སློབ་དཔོན་ཡིན། མི་བྱེད་དོ། །གླེན་པ་དག །གཞན་ཅི་བྱེད་ཅེས་གཅིག་ལ་བརྡེགས་པ་དང༌། ཐམས་ཅད་ཀྱིས། བདག་ཅག་ལ་བརྡེགས་སོ་ཞེས་ཕྱི་གན་དུ་འགྱེལ་ནས་ངུས་པ་དང༌། དགེ་སློང་རྣམས་ཀྱིས་འཆར་ཀ་ལ། ཅིའི་ཕྱིར་གཞོན་ནུ་དག་བརྡེགས། ཁོ་བོས་གཅིག་ལ་བརྡེགས་པས་ཐམས་ཅད་ས་ལ་འགྱེལ་ནས་ངུའོ། །བཅུ་བདུན་སྡེ་ལ། ཁྱེད་གཅིག་ལ་བརྡེགས་ན་ཅིའི་ཕྱིར་ཐམས་ཅད་ས་ལ་འགྱེལ་ནས་ངུ༌། མ་ངུས་ན་ཐམས་ཅད་བརྡེགས་པར་འགྱུར་རོ། །འཕྱ་བའི་སྐབས་དེ་གསོལ་བས། བྱུང་བ་འདི་དང་སོགས། རྙོག་པ་ཅན་ནས། ཉེས་བྱས་སོའི་བར་རོ། །མཉན་ཡོད་ན་དགེ་སློང་སྤོང་བ་པ་ཞིག་གནས་པ་དེས་སྐྱིལ་ཀྲུང་བཅས་ཏེ་འདུག་གོ་ཅོག་ལ་ཡན་ལག་གི་རྣམ་པ་ལས་སུ་རུང་ངོ༌། །ཡང་བསོད་སྙོམས་ལ་ཕྱིན་ནས་ཟས་ཀྱི་བྱ་བ་བྱས་ཏེ་ཤིང་དྲུང་ཞིག་ཏུ་སྐྱིལ་ཀྲུང་བཅས་ནས་འདུག་པ་དང་ཡན་ལག་ལས་སུ་རུང་ནས་དེ་ཞི་བར་བྱས་སོ། །སེམས་ནི་མྱུར་དུ་འགྱུར་བ་ཡིན་པས་ཡེངས་པ་དང་ཡང་ལས་སུ་རུང་ནས་ཞེ་སྡང་སྐྱེས་ཏེ་ཡན་ལག་གི་རྣམ་པ་རྡོས་བརྡུངས་སོ། །དེ་ཚོར་བས་ཉེན་ནས། སྟོན་པས་མ་དགོངས་པ་ལྟ་སྙམ་པ་དང༌། དེར་སྟོན་པ་གཤེགས་ནས། ཅི་ཉེས། འདི་ལྟར་རོ། །ངས། འདོད་ཆགས་ཀྱི་གཉེན་པོར་མི་སྡུག་པ་སྒོམས་ཤིག་ཅེས་མ་གསུངས་སམ། དགེ་སློང་དག །ཆོས་གཅིག་བསྒོམས་ན་ཕྱིར་མི་འོང་བར་འགྱུར་བར་ངས་ཁས་འཆེ་སྟེ། འདི་ལྟ་སྟེ། ལུས་ལ་དམིགས་པའི་(༢༤༠བ)དྲན་པའོ། །དེ་སྒོམས་ཤིག །དེ་ལྟ་བས་ན་བརྡེག་པར་བྱ་བ་གཞན་ཡིན་ལ་གཞན་ལ་བརྡེག་པར་མི་བྱའོ། །སྟོན་པ་ཆུ་སྲིན་བྱིས་པ་གསོད་ཀྱི་རི་ལ་བཞུགས་སོ། །དེའི་ཚེ་རྒྱལ་བུ་གཞོན་ནུ་རྟོག་བྱེད་ཀྱིས་ཁང་བཟང་པདྨ་རིས་བྱེད་དུ་བཅུག་ནས་སངས་རྒྱས་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་ཏེ་བཞུགས་པ་དང་ཉེ་དགས་ཟན་ཟ་བའི་ཚེ་ཀ་བ་ལ་བསྣུན་པས་ཁང་བཟང་གཡོས་པར་གྱུར་ཏོ། །ལས་བྱེད་པས། རྒྱལ་བུ་རྟོག་བྱེད་ཀྱི་ཁང་བཟང་གཞིག་གམ་ཅི། རྒྱལ་བུ་ཁང་བཟང་ལ་ཆགས་པས་གར་སྐྱེ་གཏོལ་མེད་ཀྱི། ཁྱོད་ཆགས་པས་ཡི་དྭགས་ལྦ་བ་ཅན་དུ་སྐྱེའོ། །དེ་གསོལ་བས། ཀ་བ་ལ་ལག་པས་བརྡེག་པར་མི་བྱའོ། །དྲུག་སྡེས་ཁུ་ཚུར་དང་ཕྲག་པ་དང་བོང་བ་དང་དབྱུག་པ་ལ་སོགས་པས་རྡེག་ནས་གསོལ་བས། གང་གིས་ཀྱང་མི་བརྡེག་གོ །དྲུག་སྡེས་རྩིག་པ་དང་ས་དང་གཞན་ལའང་བསྣུན་པས། རྩིག་པ་དང་ས་དང་ཤིང་ལྗོན་པ་དང༌། གཞན་ལའང་མི་བྱའོ། །
གཟས་པའི་ལྟུང་བྱེད་ནི། གཞན་སྔར་དང་འདྲ་བ་ལ། འཆར་ཀས་བཅུ་བདུན་སྡེའི་གཅིག་ལ་བརྡེག་པར་གཟས་པ་དང༌། ཐམས་ཅད་ཀྱིས། བདག་ཅག་ལ་བརྡེག་པར་གཟས་སོ་ཞེས་ཕྱི་གན་དུ་འགྱེལ་ནས་ངུས་སོ། །ཅིའི་ཕྱིར། སྔར་དང་འདྲ་སྟེ། དེ་གསོལ་བས། བྱུང་བ་འདི་དང་སོགས། བརྡེག་པར་གཟས་ནའོ། །
འཆབ་པའི་ལྟུང་བྱེད་ནི། སྟོན་པ་མཉན་ཡོད་ནའོ། །དགའ་བོ་ལ་ལྷན་ཅིག་གནས་པའི་དགེ་སློང་ཆོས་ཞེས་བྱ་བ་ངོ་ཚ་ཤེས་པ། འགྱོད་པ་དང་ལྡན་པ། བསླབ་པ་འདོད་པ་ཞིག་ཡོད་པ་དེས། དེ་ཇི་སྲིད་དུ་གནས་ངན་ལེན་ཀུན་ཏུ་སྤྱོད་པར་མི་ཤེས་པ་དེ་སྲིད་དུ་དེ་དང་ལྷན་ཅིག་གནས་སོ། །ཤེས་པའི་ཚེ་དགེ་སློང་རང་བཞིན་དུ་གནས་པ་རྣམས་དང་ལྷན་ཅིག་གནས་པར་བརྩམས་ཏེ། སྟོན་པའི་བཀའ་ལུང་གིས་དུས་གསུམ་དུ་རྐང་པ་ལ་ཕྱག་འཚལ་དུ་འགྲོ་བ་འབའ་ཞིག་བྱེད་དོ། །དེ་དེའི་གན་དུ་སོང་ནས། མཁན་པོ། གདུགས་ལ་སྤྱོད་དུ་མཆིའོ་ཞེས་ཞུས་པས་ཉེ་དགས་ཐོས་ནས། ཁོ་བོའི་སྟན་ཡང་ཁྱེར་ཅིག །ཅི་སློབ་དཔོན་ཡང་གདུགས་སྤྱོད་དུ་བཞུད་དམ། གླེན་པ། ཁྱོད་ཀྱིས་ཁོ་བོ་ལ་སོ་སོར་བརྟག་གམ། ཁོ་བོས་མི་ཤེས་པའི་རྣལ་འབྱོར་གང་ཡོད། བདག་སློབ་དཔོན་ལ་སོ་སོར་མི་རྟོག་གི་ཅི་སློབ་དཔོན་ཡང་གདུགས་ལ་སྤྱོད་དུ་བཞུད་དམ་ཞེས་ཞུ་བར་བས་སོ་ཞེས་གདན་ཁྱེར་ཏེ་དེའི་སྟན་ཤིང་ལྗོན་པའི་དྲུང་དུ་བཞག །དབེན་པར་ཡིད་ལ་བྱེད་པ་བསྐྱེད་དོ། །དེ་ནས་ཉེ་དགའ་འོངས་པ་མཐོང་ནས། སློབ་དཔོན། གདན་ཤིང་ལྗོན་པའི་དྲུང་དུ་བཞག་གིས་དེར་བཞུད་ཅིག །ཉེ་དགའ་དེར་སོང་ནས་མགོ་གཡོགས་ཏེ་འདུག་པ་དང༌། དེས་མོས་པ་མ་རྙེད་ནས་སྟན་ལས་ལངས་ཏེ་ཕྱོགས་བཞིར་བལྟས་པས་བུ་མོ་ཞིག་རྒྱལ་བྱེད་ཙལ་གྱི་རིབ་མ་འདྲལ་བ་མཐོང་ནས། དེས་ཆོས་ལ། རིམ་མ་(༢༤༡ན)འདྲལ་བར་བྱེད་དོ་ཞེས་བོས་པ་དང༌། ཆོས་ཀྱིས་སྨྲས་པ། སློབ་དཔོན། རྒྱལ་བྱེད་ཚལ་གྱི་མདོ་དགོངས་ཤིག །གླེན་པ། ཁྱོད་མདོ་སྡེའི་མཐའ་ལ་རྟོན་ནམ། སྟོན་པས་དགེ་འདུན་གྱི་རྩྭའང་ཡལ་བར་མི་དོར་རོ་ཞེས་མ་གསུངས་སམ། ང་རང་སོང་ལ་བཟློག་གོ །སློབ་དཔོན་ཉིད་མཁྱེན་ནོ། །དེ་སོང་ནས། བུ་མོ། ཅིའི་ཕྱིར་རིབ་མ་འདྲལ། བུ་མོ་དེས་འཛུམ་ཕྱུང་བ་དང་ཉེ་དགས་དེའི་ཡན་ལག་དང་ཉིང་ལག་ནས་མནམས་ཏེ་འོ་བྱས་ནས་ཆོས་ཀྱི་གན་དུ་སོང་སྟེ། བུ། ཁྱོད་ཀྱིས་ཅུང་ཟད་མཐོང་ངམ། སློབ་དཔོན། གཞུག་པ་འཇུག་པ་མ་གཏོགས་པ་གཞན་ཐམས་ཅད་མཐོང་ངོ༌། །སུ་ལའང་མ་ཟེར་ཅིག །རང་བཞིན་དུ་གནས་པའི་དགེ་སློང་མ་མཐོང་བ་དེ་སྲིད་དུ་སུ་ལའང་མི་མཆིའོ། །ཁོ་བོས་ཁྱོད་ཀྱི་མཁན་པོའི་གནས་ངན་ལེན་གྱི་ལྟུང་བ་འཆབ་པར་བྱེད་ན། ཁྱོད་ཁོ་བོའི་མི་འཆབ་བམ། ཁྱོད་འཆབ་ཀྱང་བདག་ནི་མི་འཆབ་བོ། །དེ་དགེ་སློང་རྣམས་ལ་བརྗོད་པས་འཕྱ་བ་དེ་གསོལ་བས། བྱུང་བ་འདི་དང་སོགས། ཕམ་པར་འགྱུར་བ་དང་སོགས།། །།

པར་བྱང་སྨོན་ཚིག

རྣམ་གྲོལ་ཞི་བའི་རྒྱ་མཚོར་རོ་གཅིག་ཏུ། །
གཞོལ་བའི་མཐའ་ཡས་ཆོས་ཚུལ་དལ་འབབ་ཀླུང༌། །
ཚིག་གི་གཟེགས་མ་རེས་ཀྱང་དུག་གསུམ་གྱི། །
དྲི་མ་ཡོངས་འཁྲུད་ལེགས་བཤད་བདུད་རྩི་འདི། །
དཔར་དུ་བསྐྲུན་པའི་རྣམ་དཀར་ཕུང་པོའི་མཐུས། །
ཡང་དག་ཆོས་ཀྱི་སྒོ་མོ་སྟོང་ཕྲག་བརྒྱ། །
གདངས་ཏེ་རྒྱུད་ལྔའི་འགྲོ་བ་མ་ལུས་པ། །
ངེས་ལེགས་ནོར་བུའི་མཛོད་ལ་དབང་འབྱོར་ཤོག །
ཅེས་པ་འདི་ཡང་དེང་དུས་ཡིད་སྲུབས་ཀྱིས་རྒྱུད་བརླམས་པའི་ཀླ་ཀློའི་སྡིག་སྤྱོད་མི་བཟད་པས་གངས་ལྗོངས་ཆོས་ལྡན་གྱི་ཞིང་དུ་ཐུབ་པའི་བསྟན་པ་རིན་པོ་ཆེ་ཉིན་མོའི་སྣང་བ་ལྟར་འབར་བ་དེ་ནི་མིང་གི་ལྷག་མ་ཙམ་དུ་ཉམས་ཉེས་པར་བྱས། ཕྱོགས་དང་ཕྱོགས་ན་རྡུལ་ཕྲན་མཚོན་ཆ་སོགས་གདུག་པའི་གནོད་འཚེ་གྱ་གྱུའི་སྦྱོར་བ་ནི་ཉིན་རེ་བཞིན་དུ་དར་བ་སོགས་སྒོ་ཀུན་ནས་ལྔ་བདོའི་རྒུད་ཚོགས་མཚོ་ལྟར་བརྡོལ་བ་འདི་དག་ལྷག་མེད་དུ་ཞི་ཞིང༌། བྱང་ཕྱོགས་བོད་ཁ་བ་ཅན་དུ་བསྟན་པའི་མེ་རོ་སླར་ཡང་སྔར་བཞིན་གསོས་ཏེ་རྒྱ་གར་འཕགས་པའི་ལྗོངས་འདིར་ཡང་ཐུབ་པའི་བཞེད་དགོངས་དྲི་མ་མེད་པ་དར་རྒྱས་སུ་འཕེལ་བ་དང༌། འཛམ་གླིང་ཡངས་པའི་ཁྱོན་ལ་འཚེ་མེད་ཞི་བའི་ལམ་སྟོན། རྣམ་འདྲེན་ཤཱཀྱ་སེངྒེའི་རིང་ལུགས་སྒོ་ཀུན་ནས་རྒྱས་པ་སོགས་འཕྲལ་ཡུན་ལེགས་ཚོགས་དུ་མའི་ཆེད་དུ་དམིགས། ནང་བསྟན་གྲུབ་མཐའ་རིས་མེད་ཀྱི་གསུང་རབ་དཔར་དུ་བསྐྲུན་དང་བསྐྲུན་འགྱུར་གང་ལའང་སྦྱར་ཆོག་པའི་དགེ་བསྔོའི་སྨོན་ཚིག་ཏུ་ཤཱཀྱའི་དགེ་སློང་ཆོས་སྨྲ་བ་ངག་དབང་བློ་བཟང་བསྟན་འཛིན་རྒྱ་མཚོས་སྦྱར་བའོ། །དགེའོ།། །།

 

བརྒྱུད་སྐུལ།

མཆན་སྤེལ།