༩༽ ཐུབ་པའི་བསྟོད་པ་ལུང་ཀུན་ལས་བཏུས་པ།[1]
ཐམས་ཅད་མཁྱེན་པ་ལ་ཕྱག་འཚལ་ལོ། །གཅིག་ཏུ་དཀར་བའི་ལྷག་བསམ་ལན་གཅིག་མིན་པར་གོམས་མཛད་འགྲོ་ཀུན་བུ་གཅིག་ལྟར་དགོངས་ཐུགས་རྗེ་ཅན། །གཅིག་དང་དུ་མའི་ཆོས་ཀུན་གཅིག་དང་དུ་མ་དང་བྲལ་ཆོས་དབྱིངས་ངང་དུ་རོ་གཅིག་ཉིད་དགོངས་ཏེ། །སྐད་ཅིག་གཅིག་ཀྱང་གཡེལ་བ་མེད་པར་རྩེ་གཅིག་ཉིད་དུ་མཉམ་པར་བཞག་པས་སྲུང་བ་གཅིག་པུ་བ། །བདུད་དཔུང་གཅིག་ཏུ་མཐར་མཛད་ཉག་གཅིག་དཔའ་བ་མཚུངས་མེད་སྟོན་པ་གཅིག་པུ་དེ་ལ་འདུད། །
བདེན་གཉིས་ནམ་མཁའི་ངོས་ལ་ཐབས་ཤེས་གཤོག་གཉིས་རབ་ཡངས་ཆེར་བསྐྱོད་མཐའ་གཉིས་གཡང་སས་མི་འཇིགས་ཤིང་། །ལུང་དང་རིགས་པའི་མིག་གཉིས་དྲི་མེད་འབར་བས་ཐུབ་པ་གཉིས་སྐྱེས་གཉིས་སྐྱེས་གཞན་དག་ཟིལ་གྱིས་མནན། །སྒྲིབ་གཉིས་ལྟོ་འགྲོའི་སྲོག་ནི་ངེས་པར་བཅོམ་ནས་སྲིད་ཞི་གཉིས་ཀྱི་རྒྱ་མཚོའི་ཕ་རོལ་འཕུར་ལྡིང་རོལ། །རྐང་གཉིས་གཙོ་བོ་གཉིས་སྐྱེས་དབང་པོར་ལག་གཉིས་སྤྱི་བོར་ཐལ་སྦྱར་མགོ་འཛིན་དམའ་བས་ཕྱག་འཚལ་ལོ། །དུག་གསུམ་མེ་དཔུང་རབ་གསལ་བསླབ་གསུམ་གངས་རིའི་སྤོ་ལ་སྡེ་སྣོད་གསུམ་གྱི་རལ་ཁུར་ཅི་ཡང་འཛིན། །གནས་གསུམ་ཤེས་བྱའི་ལམ་ནས་རིགས་པ་གསུམ་གྱི་གད་རྒྱངས་རྒྱ་ཆེར་རབ་བསྒྲགས་སྐབས་གསུམ་དབང་པོ་དང་། །མིག་གསུམ་པ་དང་གོམ་གསུམ་གནོན་སོགས་དྲེགས་པའི་ང་རོ་ཅན་གང་ས་གསུམ་ལྷན་ཅིག་འདར་བྱེད་པ། །སྲིད་གསུམ་བླ་མའི་བླ་མ་ཤཱཀྱ་སེང་གེར་སྒོ་གསུམ་གུས་པས་དུས་གསུམ་ཀུན་ཏུ་ཕྱག་བགྱིའོ། །གྲུབ་མཐའ་རྣམ་བཞུའི་གྲུ་ཆེན་རྫུ་འཕྲུལ་རྐང་བཞིའི་དར་གྱིས་རབ་མཛེས་ཡང་དག་སྤོང་བཞིའི་རླུང་གིས་བསྐྱོད། །ཆུ་བཞི་ལས་བརྒལ་རིན་ཆེན་གླིང་མཆོག་གང་དེར་བསམ་གཏན་བཞི་ཡི་རིན་ཆེན་རྩིག་པ་རྣམ་བཀྲ་ཞིང་། །རྣམ་ཐར་སྒོ་བཞི་དང་ལྡན་སོ་སོར་རིག་བཞིའི་རིན་ཆེན་དྲ་མིག་བདེན་བཞི་རྟོགས་པའི་གྲོང་ཁྱེར་སྤྲུལ། །སླར་ཡང་ཚད་མེད་རྣམ་བཞིའི་ལམ་ནས་བསྡུ་བཞིའི་ནོར་ལྡན་རིགས་བཞིའི་དོན་མཐུན་སྐུ་བཞིར་འཁྲིད་ལ་འདུད། །དུག་ལྔའི་ས་བོན་ལས་བསྐྲུན་ཕུང་པོ་ལྔ་ཡི་ནགས་ཚལ་འཐུག་པོར་སྙིགས་མ་ལྔ་ཡི་གཅན་གཟན་དང་། །སྒྲིབ་པ་ལྔ་ཡི་དུག་འཛིན་དང་བཅས་ཉམས་ཐག་འཁོར་བའི་འགྲོ་ལྔ་ཐར་ལམ་ལྔ་ལ་རིམ་གྱིས་འཁྲིད། །དབང་པོ་ལྔ་དང་སྟོབས་ལྔའི་སྟོབས་བྱིན་མངོན་ཤེས་ལྔ་དང་སྤྱན་ལྔ་ལ་སོགས་དགེ་ལེགས་ཀུན་སྩོལ་བ། །གནས་ལྔ་མཐར་སོན་ཡེ་ཤེས་ལྔ་ལྡན་ཀུན་མཁྱེན་དེ་ལ་ཡན་ལག་ལྔ་ཡིས་བཏུད་ནས་ཕྱག་འཚལ་ལོ། །ཕྲ་རྒྱས་དྲུག་གི་ཡལ་ག་རབ་འཛིངས་བདུད་དང་སྟོན་པ་དྲུག་སོགས་རྒོལ་བའི་ནགས་ཀུན་གྲུགས་མཛད་ཅིང་། །ཕྱིན་དྲུག་མཆེ་བ་རབ་དཀར་མངོན་ཤེས་དྲུག་གི་དྲ་བས་རབ་མཛེས་ཤེས་བྱའི་ནགས་ལ་ཐོགས་མེད་རྒྱུ། །རྗེས་དྲན་དྲུག་གི་ལྕགས་ཀྱུས་དབང་པོ་དྲུག་ཐུལ་སྤྱོད་ཡུལ་དྲུག་ལ་མཉམ་པར་མ་བཞག་ཐུགས་མི་མངའ། །འགྲོ་དྲུག་སྒྲོལ་བའི་ཁུར་ཆེན་བསྣམས་ནས་ཕུལ་དུ་བྱུང་བའི་གོམ་སྟབས་མངའ་བ་ཐུབ་དབང་གླང་པོར་འདུད། །ཉིད་ཀྱིས་བསོད་ནམས་ཀྱིས་ཐོབ་མཐོ་རིས་ཡོན་ཏན་བདུན་མཛེས་བཙུན་མོའི་འཁོར་སོགས་རིན་ཆེན་བདུན་ལ་དབང་། །རིན་ཆེན་བདུན་གྱི་རྩིག་པ་རྣམ་བཀྲ་ཕོ་བྲང་ཁང་བརྩེགས་གང་དེའང་རབ་འབར་དམྱལ་བའི་གྲོང་ལྟར་གཟིགས། །སྲིད་པ་བདུན་གྱི་འཇིགས་སེལ་སླད་དུ་མནར་མེད་དུ་ཡང་པད་མཚོར་ངང་པ་ཇི་བཞིན་སྤྲོ་བས་ཞུགས། །འཕགས་ནོར་བདུན་དང་བྱང་ཆུབ་ཡན་ལག་བདུན་ལ་འགྲོ་ཀུན་སྦྱོར་མཛད་ཐུབ་དབང་སྙིང་རྗེའི་གཏེར་ལ་འདུད། །ཐོག་མར་ཚ་དམྱལ་བརྒྱད་སོགས་མི་ཁོམ་བརྒྱད་སྤངས་དལ་བརྒྱད་ཚང་བའི་རྟེན་ལ་འགྲོ་བ་ཀུན་བཀོད་ཅིང་། །སླར་ཡང་སྡུག་བསྔལ་བརྒྱད་ཀྱི་སྡུག་བསྔལ་ཞི་ཕྱིར་འཕགས་ལམ་ཡན་ལག་བརྒྱད་ཀྱི་དམ་ཆོས་ལེགས་གསུངས་ཏེ། །བརྒྱད་པ་ལ་སོགས་འཕགས་པའི་གང་ཟག་བརྒྱད་དང་རང་རྒྱལ་ལ་སྦྱར་གཞན་དག་ཐེག་པ་མཆོག་ལ་བཀོད། །རྣམ་ཐར་བརྒྱད་དང་ཟིལ་གནོན་བརྒྱད་སོགས་ཡོན་ཏན་ཀུན་གྱི་དབང་ཕྱུག་སངས་རྒྱས་དེ་ལ་ཕྱག་འཚལ་ལོ། །སྲིད་པའི་ཕུན་ཚོགས་ཆུ་ཤིང་ལྟར་དགོངས་ས་དགུའི་ལམ་གྱིས་དགུ་ཕྲག་དགུ་ཡི་ཉོན་མོངས་དྲུངས་ཕྱུང་ཞིང་། །སྙོམས་འཇུག་དགུ་སོགས་ཏིང་འཛིན་ཀུན་ལ་འདོད་དགུར་དབང་སྒྱུར་སྐྱེ་དགུས་མཆོད་འོས་ཉན་ཐོས་རང་རྒྱལ་དང་། །ས་བཅུའི་དབང་ཕྱུག་རྒྱལ་སྲས་ཀུན་གྱི་གཙོ་བོ་དབང་བཅུ་དག་དང་ཕ་རོལ་ཕྱིན་བཅུའི་མཐར་སོན་པ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་སྟོབས་བཅུ་མངའ་བ་ཕྱོགས་བཅུར་སྙན་གྲགས་ཁྱབ་པ་དེ་ལ་འདུད། །ཅེས་པ་འདི་ཡང་རྗེ་(དགེ་འདུན་གྲུབ་པ་)ཉིད་ཀྱིས་མཛད་པའོ།། །།
[1] དགེ་འདུན་གྲུབ་པའི་གསུང་འབུམ། ༼ཅ༽ སྐུ་བཅར་རྣམ་རྒྱལ་གྲྭ་ཚང་། ༢༠༡༤ ལོ། ཤོག་གྲངས་ ༣༥༠ ནས་ ༣༥༢ བར།
