༄༅། །སྨོན་ལམ་འདོན་སྒྲིག་སྐོར་ལས་བརྩམས་ཏེ་དྲི་བ་མང་ཙམ་དྲིས་པའི་ལན་ཕྱོགས་གཅིག་ཏུ་བཀོད་པ་བཞུགས་སོ།།

 ༄༅།། སྨོན་ལམ་འདོན་སྒྲིག་སྐོར་ལས་བརྩམས་ཏེ་དྲི་བ་མང་ཙམ་དྲིས་པའི་ལན་ཕྱོགས་གཅིག་ཏུ་བཀོད་པ་བཞུགས་སོ།།

                     མཛད་པ་པོ། དབལ་མང་དཀོན་མཆོག་རྒྱལ་མཚན།

 ན་མོ་གུ་རུ། བདུད་དང་མུ་སྟེགས་ཐམས་ཅད་སྟོབས་བཅུའི་སྒོ་ནས་ཟིལ་གྱིས་གནོན་པའི་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་དང་ངོ་བོ་དབྱེར་མ་མཆིས་པའི་དཔལ་ལྡན་བླ་མ་དམ་པའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ།།

         དེ་ལ་འདིར་དྲི་བ་རྣམས་ཀྱི་ལན་ཕྱོགས་གཅིག་ཏུ་འགོད་ན། ཆོ་འཕྲུལ་སྨོན་ལམ་འཚོགས་པའི་སྐབས་སུ་བླ་མ་ཕེབས་སྐབས་དམིགས་བརྩེ་མ་འཐེན་ཞིང་གསུངས་པ་ནི། བླ་མ་དང་རྗེ་རིན་པོ་ཆེ་དབྱེར་མེད་དུ་གོ་དགོས་པའི་བརྡ་ཡིན་པས་སྐབས་ཀུན་དུ་ཤེས་དགོས། ལེགས་བྲིས་མ་ནི་རྒྱལ་བ་དགེ་འདུན་གྲུབ་ཀྱིས་གསུངས་པ་ཡིན་པས།

རྗེ་རིན་པོ་ཆེས་ཚུགས་པ་མིན་འགྲོ། བདག་གིས་བསམ་ཚོད་ལ་ལྷ་ས་སྨོན་ལམ་ལ་དགེ་ལུགས་པ་མེད་པར་ཀརྨ་པ་འཚོགས་ནས་ལོ་ཉི་ཤུ་ཙམ་སོང་བའི་ཚེ་རྒྱལ་བ་དགེ་འདུན་རྒྱ་མཚོའི་ཐབས་མཁས་ལ་བརྟེན་ནས་དགེ་ལུགས་པ་འཚོགས་ཐུབ་པ་བྱུང་བ་གྲགས་ཆེ་ཞིང་ད་ལྟའི་བར་ལྷ་ས་སྨོན་ལམ་ལ་འབྲས་སྤུངས་པ་དབང་བཙན་པ་ཡང་རྒྱལ་བ་དགེ་འདུན་རྒྱ་མཚོ་འབྲས་སྤུངས་ཀྱི་མཁན་པོ་ཡིན་པའི་རྒྱུ་མཚན་གྱིས་ཡིན།

དེས་ན་ལེགས་བྲིས་མ་རྗེ་རིན་པོ་ཆེའི་འཕྲིན་ལས་ཡུན་རིང་དུ་གནས་པའི་ཕྱིར་རྒྱལ་བ་དགེ་འདུན་རྒྱ་མཚོས་ཚུགས་པ་ཡིན་ནམ་སྙམ། བཅོམ་ལྡན་འདས་མ་སོགས་ནི། རྒྱལ་ཚབ་རྗེར་མནལ་ལམ་དུ་རྒྱལ་བ་དགེ་འདུན་གྲུབ་ཀྱིས་ཞལ་བསྟན་ནས་ལེགས་བྲིས་མའི་མཇུག་ཏུ་འདི་ལྟར་བཏོན་ན་ལེགས་ཞེས་གསུངས་པར་རྒྱལ་ཚབ་རྗེའི་རྣམ་ཐར་འགའ་ཞིག་ལས་བཤད།  སྐབས་གསུམ་པ་ནས་ཤིས་བརྗོད་ཀྱི་བར་རྗེ་རིན་པོ་ཆེས་གསུང་བཀོད་ཡིན་པར་སེམས་ཤིང་། སྐབས་གསུམ་པ་ནི་བསྟོད་ཆེན་དང་བསྟོད་ཆུང་བཞིའམ་གསུམ་གྱི་ནང་ཚན་བྱིན་རླབས་ཀྱི་ཚན་ཀ་ཤིན་ཏུ་ཆེ་བ་ཡིན་ལ། བསྟོད་ཚན་གསུམ་ནི་བསྟན་པའི་བདག་པོ་ཐུབ་དབང་ལ་བསྟོད་པ་ལེགས་བཤད་སྙིང་བོ། ཟབ་མོ་ལྟ་བའི་བདག་པོ་འཇམ་དབྱངས་ལ་བསྟོད་པ་བསྟོད་སྤྲིན་རྒྱ་མཚོ། རྒྱ་ཆེན་སྤྱོད་པའི་བདག་པོ་བྱམས་པ་ལ་བསྟོད་པ་ཚངས་པའི་ཅོད་པན་གསུམ་དང་། བཞིར་བྱེད་ན་དེའི་སྟེང་དུ་རྣམ་རྒྱལ་མའི་བསྟོད་པ་འཆི་མེད་གྲུབ་པ་བསྣན་པ་ཡིན། བསྟོད་ཆུང་གསུམ་ནི་ཐུབ་དབང་གི་བསྟོད་པ་བྱིན་རླབས་མྱུར་འཇུག་གམ་སྐབས་གསུམ་པ། འཇམ་དབྱངས་བསྟོད་པ་མཚམས་སྤྲིན་གཞོན་ནུ་མ། བྱམས་པའི་བསྟོད་པ་ཟབ་ཡངས་མ་གསུམ་ཡིན་ལ། བཞིར་བྱེད་པ་ལ་གདུགས་དཀར་བསྟོད་པ་རྒྱལ་བ་བྱེ་བ་མ་དང་། ཚེ་དཔག་མེད་ཀྱི་བསྟོད་པ་ཉི་གཞོན་འཆར་ཀ་མ་བསྣན་པའི་ལུགས་གཉིས་སྣང་། བྱམས་སྨོན་ནི་བསྟན་པ་འདིར་ཞུགས་པ་རྣམས་བྱམས་པའི་འཁོར་དུ་སྐྱེ་བར་གསུངས་པ་ལྟར་དེའི་རྒྱུར་དགོངས་པ་ཡིན་ལ། བསྟན་པ་ཡུན་རིང་དུ་གནས་པ་འདུལ་ཁྲིམས་རྣམ་དག་ལ་རག་ལས་པས་ན་ཚུལ་ཁྲིམས་ཕ་རོལ་ཕྱིན་རྫོགས་ཤོག་གི་སྐབས་སུ་མཇལ་ཁ་ཞུ་བར་སྣང་། སྤྱིར་དགེ་ལུགས་པའི་འདུལ་ཁྲིམས་རྣམ་དག་གི་སྲོལ་རྨད་དུ་བྱུང་བ་འདི་ཉིད་བྱམས་མགོན་གྱི་ཐུགས་རྗེ་ལ་བརྟེན་པ་ཡང་ཡིན་ཏེ། རྫིང་ཕྱིས་བྱམས་པའི་ཞིག་གསོས་དང་། ཚངས་ཅོད་མ་བརྩམས་པའི་རྣམ་ཐར་སོགས་ཀྱིས་ཤེས་སོ།། ཐོག་མཐའ་བར་ནི་རྗེ་ཉིད་ཀྱི་ལྷག་བསམ་རྣམ་དག་གི་སྟོབས་ཀྱིས་བསྐྲུན་པའི་སྨོན་ལམ་འགྲན་ཟླ་དང་བྲལ་བ་ཡིན་ལ། ལུས་ཅན་འཁོར་བའི་མཚོ་ལས་སྒྲོལ་བར་ཤོག། ཅེས་པའི་སྐབས་སུ་མཇལ་ཁ་ཞུ་བ་ནི་བྱང་ཆུབ་ཀྱི་སེམས་གསལ་འདེབས་པའི་ཆེད་དུ་སྣང་།

     སྨོན་ལམ་གཏང་རག་གི་ཉིན་མི་ནུབ་བསྟན་པའི་རྒྱལ་མཚན་འཛིན་པར་ཤོག་གི་སྐབས་སུ་མཇལ་ཁ་ཞུ་བ་ནི། བསྟན་པ་ཡུན་རིང་དུ་གནས་པའི་རྟེན་འབྲེལ་དང་། བསྟན་པ་ཡུན་རིང་དུ་གནས་པ་ཡང་དེ་བཞིན་གཤེགས་པའམ་བླ་མའི་གསུང་གི་མཛད་པ་ལ་རག་ལས་པ་ན། ཆོས་སྟོན་མཛད་ཅིང་བཞུགས་གྱུར་ཅིག་གི་སྐབས་སུ་མཇལ་ཁ་ཞུ། དེ་ནས་མཆོད་པའི་ཡོ་བྱད་རྣམས་ཚར་དུ་དངར་ནས། ཕུན་སུམ་ཚོགས་པ་ཐམས་ཅད་ཅེས་སོགས་ཚིགས་བཅད་ལྷུག་གཉིས་ཀྱིས་དགོངས་གསོལ་དང་སྙན་གསན་ཕབ། མ་ལུས་སེམས་ཅན་སོགས་ཀྱིས་སྤྱན་དྲངས། འདིར་ནི་གཟུགས་དང་སོགས་ཀྱིས་རྟེན་རྣམས་དང་ལྷན་ཅིག་ཏུ་བརྟན་པར་བཞུགས་པ་སོགས་ཀྱིས་གསོལ་བ་འདེབས།

      སྐུ་ཁྲུས་གསོལ་བར་ཞུ་ཞེས་སོགས་ཚིགས་བཅད་ལྷུག་གཉིས་ཀྱིས་ཁྲུས་ཀྱི་སྙན་གསན་ཞུ་ཞིང་ཀུན་སློང་བརྟན་པོས་དམ་བཅས་ཏེ། སྐུ་ཁྲུས་གསོལ་བའི་ཆེད་དུ་སོ་སོའི་ན་བཟའ་བསལ་ནས་ཁྲུས་ཁང་གི་གཞིའི་སྐྱེད་མོའི་ཚལ་གྱི་ལྗོན་ཤིང་སོ་སོའི་ཡལ་ག་འགེལ་བའི་མཚོན་བྱེད་དུ་སྟེང་ཁེབས་དང་ཁྲུས་རས་སོགས་ཕྲག་པར་བཀལ། ཁྲུས་ཁང་གི་མཚོན་བྱེད་དུ་ཁྲུས་གཞོང་། མེ་ལོང་ཁྲུས་བུམ་དང་བཅས་པ་ལག་ཏུ་ཐོགས་ཏེ་ཁྲུས་ཀྱི་ཁང་བ་སོགས་ཀྱི་ཚིགས་བརྗོད་ནས་ལྷ་རྣམས་ཁྲུས་ཁང་དུ་གཤེགས་པར་བསམ། ཇི་ལྟར་བལྟམས་པ་སོགས་ཀྱི་ཚིགས་བཅད་སྔགས་དང་བཅས་པས་ཁྲུས་གསོལ་བའི་ཚེ། ངོ་བོ་ཟག་པ་མེད་པའི་ཕ་རོལ་ཏུ་ཕྱིན་པ་དྲུག་ལ་སོགས་པའི་ཡེ་ཤེས་ཀྱི་རང་བཞིན་ཡིན་པ་ལ། རྣམ་པ་དྲིས་བསྒོས་པའི་གཙང་ཞིང་ཡིད་དུ་འོང་བའི་ཆུས་ཁྲུས་གསོལ་བས་རྒྱལ་བ་སྲས་བཅས་ལ་ཉོན་མོངས་པ་བག་ཆགས་དང་བཅས་པ་དང་། དེས་བསླད་པའི་དྲི་མ་མེད་ཀྱང་། སེམས་ཅན་རྣམས་ཀྱི་མ་དག་པའི་སྣང་བ་ལ་བརྟེན་ནས་མ་དག་པའི་སྤྱོད་པ་སྟོན་པ་དང་སྣང་བ་ཡོད་པ་དེ་དག་སངས་ཀྱིས་དག་པ་ན་ཡུལ་དང་བྲལ་བས་ཡུལ་ཅན་མི་གནས་པའི་ཚུལ་གྱིས་སེམས་ཅན་རང་རྒྱུད་ཀྱི་ཉོན་མོངས་པ་བག་ཆགས་དང་བཅས་པ་བརྩད་ནས་དག་པའི་མོས་པ་བྱེད།

       དེ་དག་སྐུ་ལ་སོགས་སྔགས་དང་བཅས་པས་སྐུ་དབྱི་ཞིང་སྐུ་དབྱིའོ་ཞེས་པའི་སྐབས་སུ་རྟེན་ལ་གཡས་བསྐོར་དུ་དབྱི། ཨོཾ་ཞེས་པས་སྐུ་སྟོད་ཀྱི་རླན་ཐམས་ཅད་སྤྱི་བོར་བསྡུས་ནས་དབྱི། དེ་བཞིན་དུ་ཧཱུཾ་ཞེས་པས་སྐུའི་བར་གྱི་རླན་ཐམས་ཅད་ཐུགས་ཀ་ནས་དབྱི། ཏྲཾ་ཞེས་པས་སྐུ་སྨད་ཀྱི་རླན་ཐམས་ཅད་ལྟེ་བ་ནས་དབྱི། ཧྲཱིཿཞེས་པས་ཕྱག་གཡས་པ་དང་། ཨཱཿ་ཞེས་པས་ཕྱག་གཡོན་པའི་རླན་དབྱི། ཀཱ་ཡ་སོགས་ཀྱི་སྐབས་སུ་རྟེན་ལ་གཡོན་སྐོར་དུ་དབྱི།

       སྟོང་གསུམ་ཀུན་ཏུ་སོགས་ཀྱིས་དྲིའི་བྱུགས་པ་དབུལ། དེ་ནས་དེ་ལ་ཁ་དོག་ལེགས་བསྒྱུར་སོགས་ཀྱིས་སྐབས་སྟོད་གཡོགས་དང་། སྨད་གཡོགས་ཀྱི་དོད་དུ་སྟེང་ཁེབས་དང་དར་དཀར་སྦྲགས་ནས་འཕྱར། རྒྱལ་བ་མཚན་དཔེ་སོགས་ཀྱི་སྐབས་རྒྱན་འབུལ་ཞིང་། དེའི་མཚོན་བྱེད་དུ་བླ་མས་རིན་པོ་ཆེའི་འཕྲེང་བ་སོགས་སྟེང་ཁེབ་ཀྱི་སྟེང་དུ་མགུལ་རྒྱན་སོགས་ཀྱི་རྣམ་པར་འཕྱང་བ་ཕྱག་ཏུ་བསྣམས་པའི་ཕྱག་ལེན་མཛད། བརྩེ་བའི་འཁོར་ཡུག་སོགས་ཚིགས་བཅད་གཉིས་ཀྱིས་འཁོར་ཡུག་གམ་ཡོལ་བ། བ་དན་བླ་བྲེ། རིན་པོ་ཆེའི་བུམ་པ་སོགས་ཁྲུས་ཁང་གི་ཡོ་བྱད་ལུས་པ་མེད་པར་འབུལ། དེ་ནས་བདག་དང་འགྲོ་ལ་ཞེས་སོགས་ཀྱི་ཚིགས་བརྗོད་དམ་མ་བརྗོད་ཀྱང་རུང་། ལྷ་རྣམས་ཁྲུས་ཁང་ནས་གཤེགས་ཏེ་སོ་སོའི་གདན་ལ་བཞུགས་པར་བསམ། ཁྲུས་ཁང་སོགས་མི་དམིགས་པར་བསམ་ན་ཆོག་གསུངས། དེ་ལྟར་བཞུགས་པ་ན་མཉམ་མེད་ཐུབ་པའི་དབང་བོ་སོགས་ལོངས་སྤྲུལ་གྱི་སངས་རྒྱས་དང་། ལོངས་སྤྲུལ་གྱི་རྣམ་པ་ཅན་གྱི་རྒྱལ་བ་སྲས་བཅས་ལ་དབུ་རྒྱན་ཕུལ་ཏེ་ལོངས་སྐུར་ཞལ་བསྒྱུར་བའི་ཆེད་དུ་ཕུན་ཚོགས་གསེར་འོད་མའི་ཚིགས་བཅད་ཚོགས་མང་གིས་གསུངས་ཤིང་། དེ་ཉིད་བཀྲོལ་བའི་ཚིགས་ལྷུག་གི་བསྔོ་བ་བླ་མས་གསུངས་ནས་ཚོགས་མང་གིས་མཐུན་འགྱུར་བྱེད་པ་ཚིགས་ལྷུག་ཐམས་ཅད་ལ་འདྲ། རེ་རེའི་མཐར་རོལ་མོ་སོགས་རྒྱས་པར་བྱེད།

       དེ་ཡང་སྔོན་རྒྱལ་བ་བཙོང་ཁ་པ་ཆེན་པོས་ལྷ་སའི་ཇོ་བོ་རྣམ་གཉིས་ལ་དབུ་རྒྱན་ཕུལ་ཏེ་ལོངས་སྐུར་ཞལ་བསྒྱུར་བའི་རྟེན་འབྲེལ་ལ་བརྟེན་ནས་བསྟན་པ་ལོ་སྟོང་གི་བར་དུ་གནས་པའི་ཡུན་ཚད་ལྷག་པར་འཕེལ་བར་གསུངས་པའི་རྣམ་ཐར་ཡིད་ལ་དྲན་ནས་བདག་གིས་ཀྱང་རྒྱལ་བ་སྲས་བཅས་ལ་དབུ་རྒྱན་ཕུལ་བའི་རྟེན་འབྲེལ་གྱི་དབང་གིས་ཐུབ་བསྟན་རིན་པོ་ཆེ་འཁོར་བ་མ་སྟོངས་ཀྱི་བར་དུ་བར་གནས་པ་དང་། དེའི་མཐུས་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་དགའ་རྒྱ་ཆེན་པོ་ལ་རྟག་ཏུ་ལོངས་སྤྱོད་པར་གྱུར་ཅིག་སྙམ་པའི་འདུན་པ་དང་སྨོན་ལམ་ཤུགས་དྲག་ཏུ་བྱེད་པ་འདི་ཉིད་ཆོ་འཕྲུལ་སྨོན་ལམ་ཞེས་ཡོངས་སུ་གྲགས་པ་རྒྱལ་བ་ཙོང་ཁ་བ་ཆེན་པོའི་མཛད་ཆེན་ཁྱད་པར་ཅན་གྱི་རྩ་བའམ་དངོས་གཞིའི་གནད་ཡིན་པས་སླ་ཆོས་སུ་མ་སོང་བར་གནད་དུ་སྨིན་པ་གལ་ཆེ།

         འདིར་ནི་བསོད་ནམས་མའི་སྐབས་སུ་ཆོས་གོས་གསུམ་མཁར་གསིལ་ལྷུང་བཟེད་རྣམས་འབུལ། འདི་ནི་སྔོན་རྒྱལ་བ་ཙོང་ཁ་བ་ཆེན་པོས་རྫིང་ཕྱིའི་བྱམས་པ་རྟེན་དང་བརྟེན་པར་བཅས་པ་ཞིག་གསོས་དང་། རབ་གནས་སོགས་རྨད་དུ་བྱུང་བར་མཛད་པའི་རྗེས་སུ་རྗེ་བཙུན་འཇམ་པའི་དབྱངས་ཀྱི་བཀའ་ལས་སླར་ཡང་རྫིང་ཕྱིའི་བྱམས་པ་ལ་དགེ་སྦྱོང་གི་རྟགས་ཆ་ཚང་བར་ཕུལ་ཏེ་སྨོན་ལམ་མཛད་ན་བོད་དུ་རབ་བྱུང་གི་སྡེ་རྣམ་དག་ཚུགས་པའི་རྟེན་འབྲེལ་ཡོད་ཅེས་པའི་ལུང་བསྟན་བརྙེས་པ་ལྟར་ཀུན་གྱི་མཐུན་སྣང་དུ་གྲུབ་པའི་མཛད་ཆེན་ཡིན་པའི་ཚུལ་ཡིད་ལ་དྲན་ཏེ། དེ་དང་མཐུན་པའི་སྨོན་ལམ་ནན་ཏན་དུ་འདེབས། སྤྱིར་བསྔོ་སྨོན་གང་གི་སྐབས་སུ་དགེ་རྩ་དེ་ཉིད་མཚོན་བྱེད་དུ་བྱས། རྒྱལ་བ་སྲས་བཅས་ཀྱི་ཚོགས་གཉིས་སོགས་ཀྱི་དགེ་རྩ་དང་། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དགེ་རྩ་ཕྱོགས་གཅིག་ཏུ་བསྡོམས་ནས་སྨོན་ལམ་འདེབས་པ་གནད་ཆེ། ཕུལ་བྱུང་གཟུགས་མཛེས་མས་ཉེར་སྤྱོད་ལྔ་དང་། པི་ཝང་མ་དང་སོགས་ཀྱིས་རིགས་མ་བཅུ་དྲུག ཞིང་འདི་འཁོར་ལོ་སོགས་ཚིག་བཅད་ལྷུག་གཉིས་ཀྱིས་རྒྱལ་སྲིད་སྣ་བདུན་ཕུལ་ནས་སྨོན་ལམ་གདབས། འདིའི་སྐབས་སུ་འཁོར་ལོས་བསྒྱུར་བ་ལ་འོས་པའི་རྒྱལ་སྲིད་སྣ་བདུན་གྱིས་ས་གཞི་བར་སྣང་ནམ་མཁའི་ཁམས་གང་བ་དང་། མཆོད་ལྷ་ཕྱག་ན་དཔག་བསམ་གྱི་ལྗོན་ཤིང་ཡལ་གའི་གསེབ་ཏུ་རྒྱལ་སྲིད་སྣ་བདུན་གྱི་སྤྲིན་འཁྲིགས་པ་ནམ་མཁའི་ཁམས་གང་བ་དང་། བློན་པོ་དང་ཁྱིམ་བདག་བཙུན་མོ་སོགས་རྟ་མཆོག་གླང་བོ་རིན་པོ་ཆེ་ལ་ཞོན་ཏེ། ལག་ན་རལ་གྲི་དང་། འཁོར་ལོ་དང་ནོར་བུའི་སྤྲིན་འཕྲོ་བ་ནམ་མཁའི་ཁམས་གང་བ་དང་། རང་ཉིད་བྱང་ཆུབ་སེམས་དཔའ་ཀུན་ཏུ་བཟང་བོ་ཕྱག་གཉིས་ཐལ་མོ་སྦྱར་བའི་བར་དུ་ནོར་བུ་རིན་པོ་ཆེ་ཐོགས་པར་མོས་ནས། ཕྱག་གི་ནོར་བུ་ལས་འོད་ཟེར་དཔག་ཏུ་མེད་པ་འཕྲོས་པའི་འོད་ཟེར་རེ་རེའི་སྣེ་མོ་ལ་ཡང་ཀུན་ཏུ་བཟང་བོ་དཔག་ཏུ་མེད་པ་དང་། དེ་རེ་རེས་ཀྱང་རྒྱལ་སྲིད་སྣ་བདུན་དཔག་ཏུ་མེད་པའི་སྤྲིན་སྤྲོ་བའི་ཚུལ་གྱིས་ནམ་མཁའ་གང་བར་སྤྲུལ་ཏེ་རྒྱལ་བ་སྲས་བཅས་ལ་མཆོད་པས་དེ་དག་གི་ཐུགས་རྒྱུད་ཟག་པ་མེད་པའི་བདེ་བས་ཚིམ་ཞིང་མཉེས། བདེ་བ་དེས་སྟོང་བ་ངེས་པས་བདེ་སྟོང་དབྱེར་མེད་ཀྱི་མཉམ་བཞག་ལས་སྐད་ཅིག་ཀྱང་གཡོ་བ་མེད་བཞིན་དུ་ཆུ་ཟླ་དང་མིག་འཕྲུལ་བཞིན་དུ་སྤྲུལ་བའི་བཀོད་པ་མཐའ་ཡས་པའི་སྒོ་ནས་འཕྲིན་ལས་ལྷུན་གྲུབ་ལ་མངའ་བརྙེས་པའི་མཛད་པ་རབ་འབྱམས་ཀྱི་ཚོགས་གང་ལ་གང་འཚམས་སུ་བསྟན་ཏེ། སེམས་ཅན་ཐམས་ཅད་གཅིག་ཀྱང་མ་ལུས་པར་སྨིན་གྲོལ་གྱི་ལམ་ལ་བཀོད་པར་བསམ་པ་འདི་མཆོད་རྫས་ཐམས་ཅད་ལ་རིགས་འདྲ།

        རྒྱལ་སྲིད་སྣ་བདུན་གྱི་ཚིགས་ལྷུག་གི་རོལ་མོའི་སྐབས་སུ་དུང་མཁན་དུང་དར་གྱོན་པ་བཞི་ཚར་དུ་བསྒྲིགས། རིན་ཆེན་གདུགས་དང་ཞེས་སོགས་བཅད་ལྷུག་གཉིས་ཀྱིས་བཀྲ་ཤིས་རྟགས་བརྒྱད་དང་། རྔ་བོ་ཆེ་རྣམས་སོགས་བཞིས་རིམ་པ་བཞིན་དུ་ཆོས་ཀྱི་རྔ། ཆོས་ཀྱི་དུང་དང་གདུགས། ཆོས་ཀྱི་རྒྱལ་མཚན་རྣམས་རིམ་བཞིན་ཕུལ། རྒྱལ་མཚན་གྱི་ཚིགས་ལྷུག་གི་སྐབས་ཆོས་ཀྱི་རྒྱལ་མཚན་སྒྲེངས་པ་དང་ཆོས་ཀྱི་དུང་འབུད་པའི་རྟེན་འབྲེལ་དུ་ཕྱོགས་བཞིར་དུང་སྒྲ་སྒྲོགས་པའི་ཚུལ་གྱིས་དུང་མཁན་བཞི་ཡང་གྱེས་ནས་འགྲོ། རྒྱལ་བའི་བདུད་བཅོམ་སོགས་ཀྱིས་ཞལ་ཟས་རྒྱ་མཚོ་མ་འབུལ། མེ་ཏོག་ཕལ་ཆེར་སོགས་ནི་དཀོན་མཆོག་ཏ་ལ་ལའི་མདོ་ལས་འབྱུང་ཞིང་། མེ་ཏོག་གི་བླ་བྲེ་དང་། མེ་ཏོག་གི་གདུགས་རྒྱལ་མཚན་སོགས་ངོ་མཚར་བ་ཡང་ཡིན་ལ་གྲངས་ཀྱང་བཅོ་བརྒྱད་ཚང་བས་སྔ་མོའི་དུས་ངོ་མཚར་བའི་མཆོད་པ་བཅོ་བརྒྱད་ཀྱི་དོད་དུ་ཚུགས་པ་ཡིན་ནམ་དཔྱད་གསུངས། བཅོ་བརྒྱད་ནི་མེ་ཏོག བདུག་པ། སྤོས། འཕྲེང་བ། ཕྱེ་མ། ན་བཟའ། གདུགས། རིན་ཆེན། པདྨ། རྒྱན་ཕྲེང་། རྒྱལ་མཚན་གདུགས་དམར་སེར་གསུམ་སྔོ་ནག གདུགས། དར་གྱི་ལྡ་ལྡི། བ་དན། དྲིལ་གཡེར་དྲ་བ་དང་བཅས་པའོ།།

        ངོ་མཚར་བའི་མཆོད་པ་བཅོ་བརྒྱད་ནི། གནས་འདིའམ་ནི་གཞན་དག་ན། ཞེས་སོགས་ཡིན་ལ། དེ་ལ་མེ་ཏོག་དང་། སྤོས་དང་། འོད་ཀྱི་སྒྲོན་མེ་དང་།དྲི་ཆབ་དང་། རྒྱ་མཚོ་དང་བཅས་པའི་རིན་པོ་ཆེའི་རི་བོ་དང་། རྩེད་འཇོའི་རིགས་དང་། དཔག་བསམ་གྱི་ཤིང་དང་བདུན།བྱང་ཆུབ་ཀྱི་སེམས། སྦྱིན་སོགས་ཕར་ཕྱིན་དྲུག ལུས་ཀྱི་མཆོད་པ། ངག་གི་བསྟོད་དབྱངས། ཡིད་ཀྱི་བླ་ན་མེད་པའི་མཆོད་པ། རྣམ་ཐར་སྒོ་གསུམ་གྱི་ཏིང་ངེ་འཛིན་སྒོམ་པ་དང་བཅས་པའི་བཅོ་བརྒྱད་པོ་རེ་རེ་ལ་ཤོ་ལོ་ཀ་རེ་རེ་ཡོད་ལ།མཉམ་མེད་མ་ནི་བསྟོད་དབྱངས་ཀྱི་ཁོངས་སུ་བསྡུའོ།།

       གོང་དུ། རྡོ་རྗེའི་སྔགས་ནི་བརྗོད་བྱ་ཞིང་།།སངས་རྒྱས་ཀུན་ལ་དབུལ་བར་བྱ།། ཞེས་གསུངས་པ་ལྟར་ན། སྔགས་ཀྱང་བརྗོད་དགོས་སམ་ཞེ་ན། རྒྱུད་རྡོ་རྗེ་རྩེ་མོ་ལས། ཚིགས་སུ་བཅད་པ་རེ་རེ་ལ་མཆོད་སྔགས་རེ་རེ་གསུངས་ཀྱང་། དེ་ལྟར་བརྗོད་ན་དཀྱིལ་འཁོར་གྱི་ཆོ་གའི་མཆོད་འཕྲེང་ལྟར་འགྲོ་བས་དོགས་བདེ་བའི་ཕྱིར་ཚིགས་བཅད་ཙམ་གསུངས་པར་སྣང་ངོ་།། རྒྱུད་དེ་ཉིད་ལས། བྱང་ཆུབ་ཀྱི་སེམས་ཀྱི་མཇུག་ཏུ། སེམས་ཅན་ཀུན་ལ་བདེ་ལེགས་དང་། །འབྱུང་བོ་ཀུན་ལ་བྱམས་པ་དང་། །དུད་འགྲོ་ཀུན་ལ་མི་འཇིགས་སྦྱིན། །ངན་འགྲོ་ཐམས་ཅད་ཞི་འདོད་དང་། །བྱམས་དང་སྙིང་རྗེ་བཏང་སྙོམས་དང་། །དགའ་བ་ཚངས་པའི་རྣལ་འབྱོར་བྱུང་། །རྡོ་རྗེའི་སྔགས་ནི་བརྗོད་བྱ་ཞིང་། །སངས་རྒྱས་ཀུན་ལ་དབུལ་བར་བྱ།། ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་པྲཧྨ་བི་ཧཱ་ར་པཱུ་ཛ་མེགྟ་ས་མུ་དྲ་སྥ་ར་ཎ་ས་མ་ཡེ་ཧཱུཾ་ཞེས་པ་འདིར་མི་འབྱུང་ལ། འདིར་ཐམས་ཅད་ཀྱི་མཇུག་ཏུ་རྣམ་ཐར་སྒོ་གསུམ་འབྱུང་ངོ་།།

      མཆོད་པའི་མིང་འདོགས་ཀྱང་། མཆོད་སྔགས་ལ་དཔག་ན་མེ་ཏོག བདུག་སྤོས། དྲི། རིན་པོ་ཆེའི་རྒྱན། སྒེག་པ་དང་དགོད་པའི་བདེ་བ། བྱང་ཆུབ་ཀྱི་རྒྱན་གྱི་གོས། མར་མེ། བྱང་ཆུབ་ཀྱི་སེམས། ཚངས་པའི་གནས་བཞི། སྦྱིན་སོགས་ཕར་ཕྱིན་དྲུག ལུས་ཀྱི་མཆོད་པ། ངག་གི་མཆོད་པ། སེམས་ཀྱི་མཆོད་པ། ཚངས་པའི་གནས་ཀྱི་མཆོད་པ་དང་བཅོ་བརྒྱད་འདྲེན་དགོས་པ་ལྟ་བུར་སྣང་། འདི་ལ་ངོ་མཚར་བའི་མཆོད་པ་ཞེས་གསལ་བར་གསུངས་ཏེ། རྒྱུད་དེ་ཉིད་ལས། ཤིན་ཏུ་ངོ་མཚར་མཆོད་པ་ནི། །ཅི་ནུས་པར་ཡང་བསྒྲུབ་པར་བྱ། །ཡང་ན་མྱ་ངན་འདས་སོགས་དང་། །རྣལ་འབྱོར་དགེ་བ་སོགས་པ་ལ། །ངོ་མཚར་གྱུར་བའི་མཆོད་པ་ཡིས། །མཆོད་པའི་སྤྲིན་དག་དབུལ་བར་བྱ། །གནས་འདིའམ་ནི་གཞན་དག་ན། །ཞེས་སོགས་གསུངས་སོ། །མཆོད་པ་ཉེར་ལྔ་བ་དང་ཉེར་གཅིག་པ་ནི་སླ། བླ་མའི་གསུངས་ལས། ངོ་མཚར་བའི་མཆོད་པའི་བཅོ་བརྒྱད་དང་། མཆོད་པ་ཉེར་གཅིག་པ་གཉིས་ནི་དཔལ་མཆོག་དང་རྩེ་མོ་སོགས་ལས་འབྱུང་། མཆོད་པ་ཉེར་ལྔ་བ་ནི། རྣལ་འབྱོར་རྒྱུད་ལས་འབྱུང་། ཡོ་བྱད་ཀྱི་མཆོད་པ་བཅུ་གཞན་ལས་བཙལ་དགོས་གསུངས། བདག་གི་བསམ་ཚོད་ལ་མེ་ཏོག་ཕལ་ཆེར་སོགས་ཀྱི་སྐབས་སུ་གསུང་བའི་རྒྱལ་མཚན་རྣམས་ཕྱོགས་གཅིག་ཏུ་བསྡོམས། ནོར་བུའི་དྲ་བ་ནས། རྒྱལ་བའི་གསུང་སྒྲོགས་པ་ཞེས་པའི་བར་ནི་གོང་དུ་ཕལ་ཆེར་གདུགས་དང་ཞེས་སོགས་ཀྱི་སྐབས་སུ་བཤད་པའི་གདུགས་ཀྱི་ཁྱད་པར་ལ་སྦྱར་ན། མདོ་དུ་མར་ལྷའི་མེ་ཏོག་དང་། ལྷའི་སྤོས་དང་། ཞེས་སོགས་ལ་གྲངས་བཅུ་རེ་འབྱུང་བ་དང་ཕལ་ཆེར་འགྲིགས་པས་ཡོ་བྱད་ཀྱི་མཆོད་པ་བཅུ་ལ་དཔྱད་པར་བྱ་བ་ཡོད་དམ་སྙམ། ཆུ་གཉིས། ཉེར་སྤྱོད། རོལ་མོ། འདོད་ཡོན་ལྔ། རྒྱལ་སྲིད་སྣ་བདུན་སོགས་ཁྲུས་གསོལ་གྱི་གཞུང་ལ་ཡོད་ཀྱང་། རྒྱལ་སྲིད་སྣ་བདུན་གོང་དུ་སོང་ཟིན་པས་བསྐྱར་མ་མི་དགོས།

          འབུལ་བའི་ཚུལ་ནི། མེ་ཏོག་དབུ་ལ། བདུག་སྤོས་ཤངས་ལ། མར་མེ་སྤྱན་ལ། དྲི་ཆབ་ཐུགས་ཀར། ཞལ་ཟས་ལྗགས་ལ། རོལ་མོ་སྙན་དུ། ན་བཟའ་སྐུ་ལ། འཕྲེང་བ་རྒྱན་དུ། གདུགས་དབུ་ལ། བྱུགས་པ་སྐུ་ལ། དབུ་རྒྱན་དབུ་ལ། སྙན་རྒྱན་སྙན་ལ། མགུལ་རྒྱན་མགུལ་སོགས་དང་། བླ་བྲེ་དབུ་ལ། རྒྱལ་མཚན་བ་དན་སོགས་སྤྱན་ལམ་དུ་ཇི་ལྟར་འོས་པའི་ཡོ་བྱད་ཀྱི་ཚུལ་དུ།གཞལ་ཡས་ཁང་གནས་ཀྱི་དོན་དུ། རྟ་བབས་གཞལ་ཡས་ཁང་གི་ཡན་ལག་ཏུ་འབུལ་བ་སོགས་སྐབས་ཤེས་པའི་སྒོ་ནས་དམིགས་རྣམ་བརྡ་དོན་འཕྲོད་པ་གལ་ཆེ། དེ་ལས་གཞན་ཡང་མཆོད་པའི་ཚོགས། ཞེས་སོགས་ཀྱི་སྐབས་སུ་འཇིག་རྟེན་གྱི་ཁམས་ན་མཆོད་ཡུལ་ཇི་སྙེད་ཅིག་བཞུགས་པ་ཐམས་ཅད་ཀྱི་སྤྱན་སྔར་མཆོད་པའི་སྤྲིན་དང་། བསྟོད་དབྱངས་ཀྱི་སྤྲིན་འཁྲིགས་པའི་མོས་པ་བྱེད། མཎྜལ་རྒྱས་པ་ཡོངས་གྲགས་ལྟར་ལས་བཤད་པ་ཟུར་དུ་མི་དགོས།ཐོས་པ་རྒྱ་མཚོ་མ་ནི་སྒྲུབ་པའི་མཆོད་པ་དང་། དེང་ནས་མའི་སྐབས་སུ་ལུས་ལོངས་སྤྱོད་དགེ་རྩ་དང་བཅས་པ་བསྟན་འགྲོའི་དོན་དུ་འབུལ། ས་གཞི་མས་མཎྜལ་བདུན་མ། རྗེའི་རྣམ་ཐར་དང་མཐུན་པའི་ཆེད་དུ་ལྟུང་བཤགས་ཕྱག་དང་སྦྲགས་པ། གཞི་བདག་གཏོར་མ་བཅས་སྔོན་དུ་བཏང་ནས་མཛད་ཆེན་བཞི་སོགས་ཀྱི་བཀའ་དྲིན་དྲན་པའི་སྒོ་ནས་རྣམ་ཐར་དང་། ཡོན་ཏན་གཞིར་གྱུར་མ་སོགས་གསུངས་ནས། བླ་མའི་སྤྱིའི་བསྔོ་བ་དང་། བསྟན་པ་རྒྱས་པའི་རྟེན་འབྲེལ་དུ་བསྟན་འབར་མའི་བསྔོ་བ་གང་རྒྱས་དང་། བདེ་སྨོན་གྱི་བསྔོ་བ་དཀྱུས་ལྟར་གནང་ནས་ཤིས་བརྗོད་བྱ། དེ་ནས་གྲུབ་པའི་དབང་ཕྱུག་དཔལ་ལྡན་བླ་མ་དང་། ཞེས་སོགས་འདོན་པ་ནི་གོང་དུ་སྨོས་པ་ལྟར་དབྱངས་ཅན་བཞད་པ་དགེ་འདུན་རྒྱ་མཚོའི་སྐུ་དྲིན་གཟོ་ཕྱིར་ཞབས་བརྟན་འཕྲིན་ལས་རྒྱས་པའི་བདེན་ཚིག་ཡིན་གསུངས། ཆོ་འཕྲུལ་གྱི་དུས་ནི། མཁས་པ་འགའ་ཞིག་གིས་ཡོངས་གྲགས་ཀྱི་གཉིས་པའི་ཡར་ངོ་ཡིན་ཀྱང་ཆོས་རྒྱལ་མྱ་ངན་མེད་ཀྱི་དུས་སུ་མཆུ་ཟླ་བའི་ཡར་ངོར་བྱས་པ་ལོ་ལེགས་ཤིང་བཀྲ་ཤིས་པ་བྱུང་བས་དེ་ཕྱིན་ཆད་གཅིག་པའི་ནང་དུ་བྱེད་སྲོལ་དར་བ་ཡིན། རྗེ་བླ་མས་དགའ་ལྡན་སྒྲུབ་མཆོད་གཉིས་པའི་ནང་དུ་ཚུགས་པ་ཡང་དོན་དེ་ལ་དགོངས་པ་ཡིན་གསུངས། མཁས་པ་འགའ་ཞིག་གིས་ཆོ་འཕྲུལ་གྱི་དུས་དངོས་ནི་ཧོར་ཟླ་དང་བོ་ཡིན་གསུངས་ཏེ། མདོ་ལས་དཔྱིད་ར་ཞེས་གསུངས་པས་དཔྱིད་རའི་ངོས་འཛིན་གྱི་དབང་གིས་ཡིན་འདུགའོན་ཀྱང་དེ་བཞིན་གཤེགས་པ་ནི་དུས་བྱིན་གྱིས་བརླབས་པ་ལ་མངའ་བརྙེས་པ་ཡིན་པས་དགེ་སྡིག་གི་འགྱུར་སོགས་ལ་ཐེ་ཚོམ་གྱི་གནས་མ་མཆིས་སོ།།

        པཎ་ཆེན་ཤཱཀྱ་ཤྲཱིས་མཛད་པའི་དུས་ཆེན་བཞིའི་ཚིག་ལེའུར་བྱས་པ་ལས། ཆོ་འཕྲུལ་ཆེ་དང་མངོན་བྱང་ཆུབ།།ཆོས་འཁོར་ལྷ་ལས་བབས་པའོོ།།སྐར་མ་མཆུ་དང་ས་ག་དང་།།ཆུ་སྟོད་ཐ་སྐར་རིམ་བཞིན་ཉ།།མེ་ཏོག་ཨུ་དུམ་ཝ་ར་དང་།སིད་མ་ཁུག་ཆོས་སྤང་བརྒྱན་རྣམས།།རིམ་པ་བཞིན་དུ་ཁ་འབུས་ཏེ།།ཁྭ་ཏ་ཅོ་ག་ཁུ་བྱུག་དང་།།ཤ་བ་རིམ་བཞིན་སྒྲ་འབྱིན་ཏེ།།མདོར་ན་ཁྱིམ་རྩིས་དང་སྦྱར་ན།།བུམ་གླང་ཀརྐ་ཊ་དང་སྲང་།།ཉི་མ་གང་སྡོག་རྒྱལ་དུ་རྩི།།ཕྱི་ཚེས་གཅིག་ནས་ཉ་ཡི་བར།།ཟླ་ཕྱེད་ཆོ་འཕྲུལ་ཆེན་པོ་ཡིན།།མཉན་ཡོད་ན་ནི་ལག་ལེན་དར།། རྗེའི་གསུང་གི་ཆོ་འཕྲུལ་སྨོན་ལམ་གྱི་འདོན་བསྒྲིགས་ལས། ཐོག་མར་ཕུན་སུམ་ཚོགས་པ་ཐམས་ཅད་ཅེས་སོགས་ཀྱི་མཇུག་ཏུ། མཆོད་ཡོན་ཕལ་ཆེར་ལ་སོགས་པ་དང་།།མཉམ་མེད་མི་གཡོས་བསྟོད་དོ།། ཞེས་འབྱུང་བ་ནི་རྣམ་ཐར་དད་པའི་འཇུག་ངོགས་ལས། གནམ་གང་གི་ཉིན་སྙན་གསན་གྱི་མཆོད་པ་ཕུལ་བར་གསུངས་པའི་སྐབས་ཀྱི་འདོན་འགྲིགས་ཡིན་ནམ་སྙམ། དངོས་གཞིའི་དུས་མཆོད་པ་རྣམས་བསང་སྦྱངས་བསྐྱེད་དེ་བྱིན་གྱིས་བརླབས་ནས་ཞེས་འབྱུང་ཡང་། བྱིན་གྱིས་བརླབས་ཚུལ་མི་གསལ་ལ། མཆོད་པ་ནི་མེ་ཏོག་ཕལ་ཆེར་སོགས་མདོ་མཆོད་དང་། རིགས་མ་བཅུ་དྲུག་སོགས་རྒྱུད་སྡེ་གོང་འོག་ནས་འབྱུང་བས། མདོ་སྔགས་འདྲེས་མའི་མཆོད་པ་ཡིན་པས་བླ་མེད་ལྟར་བྱིན་གྱིས་བརླབས་ན་མི་འགལ་ཞིང་རྗེའི་རྣམ་ཐར་དང་མཐུན་ནམ་སྙམ། ཁྲུས་གསོལ་གྱི་མཇུག་ཏུ་སྐུ་མཆོག་རྣམ་དག་ཞེས་སོགས་ཀྱིས་ཁྲུས་གསོལ་བའི་སྨོན་ལམ། བདེ་གཤེགས་སྐུ་གསུམ་སོགས་ཀྱིས་སྐུ་དབྱིའི་སྨོན་ལམ་གདབས་པར་གསུངས་པ་དང། རིན་ཆེན་སེམས་བཟུང་གིས་མཆོད་པ་སྤྱི་རྣམས་འབུལ་བར་གསུངས་པ་རྣམས་ཀྱང་ཕྱག་ལེན་དུ་བཏབ་ན་ལེགས་པས་དཔྱོད་ལྡན་རྣམས་ཀྱིས་དགོངས་པར་མཛོད། ད་དུང་རྗེ་བླ་མས་ཆོ་འཕྲུལ་སྨོན་ལམ་ཇི་ལྟར་ཚུགས་པའི་རྣམ་ཐར་དགོས་པ་དང་བཙས་པ་དང་ཕྱོགས་གཏོར་གཏོང་ཚུལ། བྱམས་པ་གླིང་བསྐོར་བྱེད་ཚུལ་སོགས་རྒྱུ་མཚན་དང་བཅས་པ་བྲི་དགོས་པ་འགའ་ཞིག་ཡོད་ཀྱང་བྲི་ལོང་མ་བྱུང་། ད་རེས་སྨོན་ལམ་འདོན་འགྲིགས་སྐོར་ལས་བརྩམས་ཏེ་དྲི་བ་མང་ཙམ་དྲིས་པའི་ལན་ཕྱོགས་གཅིག་ཏུ་བཀོད་པ་ཙམ་ལགས་སོ།།  །།

       ཞེས་པ་འདི་ཡང་བན་ཆུང་རིགས་པ་སྨྲ་བ་དཀོན་མཆོག་རྒྱལ་མཚན་གྱིས་ཀུན་མཁྱེན་བླ་མ་ཡབ་སྲས་ཀྱི་གསུང་རྒྱུན་ལ་བརྟེན་ནས་བཀོད་པ་འདིས་ཀྱང་རྒྱལ་བ་སྲས་བཅས་ཀྱི་མཛད་པ་སྨོན་ལམ་ཐམས་ཅད་འབད་པ་མེད་པར་སྒྲུབ་ནུས་པར་གྱུར་ཅིག། །།

འདི་ཡང་ཀུན་མཁྱེན་འཇམ་དབྱངས་བཞད་པའི་སྡེ།།

ཐུགས་རྗེ་ལ་བརྟེན་བཀྲ་ཤིས་འཁྱིལ་གླིང་གི།

ལྷོ་རྒྱུད་མདོ་སྔགས་ཆོས་སྒྲ་སྒྲོགས་པའི་ཚལ།།

དགའ་ལྡན་ཆོས་འཁོར་གླིང་དུ་ལེགས་པར་གྲུབ།།

བཀྲ་ཤིས།།