མཆིམས་མཛོད་མངོན་པའི་རྒྱན། (གནས་བདུན་པ་དང་བརྒྱད་པ།)

གནས་བདུན་པ་ཡེ་ཤེས་བསྟན་པའི་ས་བཅད།

གནས་བདུན་པ་འཆད་པ་ལ་གསུམ།
༡ བཟོད་པ་དང་ཤེས་པ་དང་ལྟ་བའི་ཁྱད་པར་བཤད་པ།་་་་་་་་་་་་་་་༌༌་་་་་་་་་་་་་་་་་་་་271
༢ ཤེས་པ་བྱེ་བྲག་ཏུ་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་272
༣ དེ་དག་གི་ཡོན་ཏན་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་319
གཉིས་པ་ཤེས་པ་བྱེ་བྲག་ཏུ་བཤད་པ་ལ་བརྒྱད།
༡ ཤེས་པའི་ངོ་བོའི་དབྱེ་བ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་272
༢ ཤེས་པའི་གྲངས་ངེས་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་281
༣ ཤེས་པའི་རྣམ་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་284
༤ ས་དང་བརྟེན་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་296
༥ དྲན་པ་ཉེར་གཞག་ཏུ་བཞག་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་298
༦ དམིགས་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་298
༧ ལྡན་པའི་ཚུལ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་302
༨ ཐོབ་པའི་ཚུལ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་303

གསུམ་པ་དེ་དག་གི་ཡོན་ཏན་བཤད་པ་གཉིས།
༡ སངས་རྒྱས་ཀྱི་ཡོན་ཏན་ཐུན་མོང་མ་ཡིན་པ།་་་་་་་་་་་་་་་་་་་་་་་་༌༌༌་་་་་་་་་་་་་་་་་་་་་་319
༢ ཐུན་མོང་བ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་333
དང་པོོ་སངས་རྒྱས་ཀྱི་ཡོན་ཏན་ཐུན་མོང་མ་ཡིན་པ་ལ་གསུམ།
༡ མདོར་བསྟན་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་319
༢ རྒྱས་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་319
༣ མཉམ་མི་མཉམ་གྱི་མཇུག་བསྡུ་བ།་་་་་་་་་་་་་་་་་་་་་་་་་་་་་་་་་་་་་༌་་་་་་་་་་་་་་་་་་་་་་་་་331
གཉིས་པ་རྒྱས་པར་བཤད་པ་ལ་བཞི།
༡ སྟོབས་བཅུ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་319
༢ མི་འཇིགས་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་325
༣ དྲན་པ་ཉེ་བར་བཞག་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་327
༤ ཐུགས་རྗེ་ཆེན་པོ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་329
གཉིས་པ་ཐུན་མོང་བ་ལ་གཉིས།
༡ མདོར་བསྟན་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་333
༢ རྒྱས་པར་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་333
གཉིས་པ་རྒྱས་པར་བཤད་པ་ལ་གཉིས།
༡ འཕགས་པ་ཁོ་ན་དང་ཐུན་མོང་བ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་333
༢ ཕལ་ཆེར་བྱིས་པ་དང་ཐུམ་མོང་བ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་342
དང་པོ་འཕགས་པ་ཁོ་ན་དང་ཐུན་མོང་བ་ལ་བཞི།
༡ ཉོན་མོངས་མེད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་333
༢ སྨོན་ནས་ཤེས་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་335
༣ སོ་སོར་ཡང་དག་པའི་རིགས་པ་བཞི།་་་་་་་་་་་་་་་་་་་་༌་་་་་་་་་་་་་་་་་་་་་་་337
༤ དེ་དག་འཐོབ་པའི་ཚུལ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་340

གནས་བརྒྱད་པ་སྙོམས་འཇུག་བསྟན་པའི་ས་བཅད།

གནས་བརྒྱད་པ་འཆད་པ་ལ་གཉིས།
༡ བསམ་གཏན་དང་གཟུགས་མེད་བཤད་པ།་་་་་་་་་་་་་་་་་་་་་་་་་་་་་་་༌་་་་་་་་་་་་་་་་་་་་367
༢ དེ་ལ་བརྟེན་པའི་ཡོན་ཏན་བཤད་པ།་་་་་་་་་་་་་་་་་་་་་་་་་་་་་་་་་་་་་་་་༌་་་་་་་་་་་་་་་་་་421
དང་པོ་བསམ་གཏན་དང་གཟུགས་མེད་བཤད་པ་ལ་བདུན།
༡ བསམ་གཏན་དང་གཟུགས་མེད་ཀྱི་ངོ་བོ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་367
༢ བསམ་གཏན་དང་གཟུགས་མེད་ཀྱི་དབྱེ་བ།་་་་་་་་་་་་་་་་་་་་་་་་་་་་་་་་་་་་་་༌༌་་་་་་་་་་377
༣ ཡན་ལག་རྣམ་པར་བཞག་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་381
༤ འཐོབ་པའི་ཚུལ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་394
༥ ཁྱད་པར་གྱི་ཆོས།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་397
༦ ཉེར་བསྡོགས།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་408
༧ ཏིང་ངེ་འཛིན་གྱི་དབྱེ་བ་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་༌་་་་་་་་་་་་་་་་་412
གསུམ་པ་ཡན་ལག་རྣམ་པར་བཞག་པ་ལ་གཉིས།
༡ སྤྱིའི་དོན་དང་།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་378
༢ གཞུང་གི་དོན།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་381
དང་པོ་སྤྱིའི་དོན་ལ་གསུམ།
༡ གཟུགས་མེད་ལ་ཡན་ལག་མི་སྟོན་པའི་རྒྱུ་མཚན།་་་་་་་་་་་་་་་་་་་་་་་༌༌༌་་་་་་་་་་་་་་་378
༢ གྲངས་ངེས་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་379
༣ ཡན་ལག་དང་ཡན་ལག་ཅན་གྱི་དོན་ངོས་བཟུང་བ།་་་་་་་་་་༌༌༌་་་་་་་་་་་་་་་་་་་་་་་་381
བཞི་པ་འཐོབ་པའི་ཚུལ་ལ་གསུམ།
༡ དག་པ་བ་འཐོབ་ཚུལ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་394
༢ སྙོམས་འཇུག་ཟག་མེད་འཐོབ་ཚུལ།་་་་་་་་་་་་་་་་་་་་་་་་་་་་་་་་་་་་་་་་་་་་་༌༌་་་་་་་་་་་་་་396
༣ སྙོམས་འཇུག་ཉོོན་མོངས་ཅན་འཐོབ་ཚུལ།་་་་་་་་་་་་་་་་་་་་་་་་་་་་་་་་་༌༌༌་་་་་་་་་་་་་་396
ལྔ་པ་ཁྱད་པར་གྱི་ཆོས་ལ་བཞི།
༡ གང་ལ་སྙོམས་པར་འཇུག་པའི་གཞི།་་་་་་་་་་་་་་་་་་་་་་་་་་་་་་་་་་་་་་་་་་་་༌༌་་་་་་་་་་་་་་་414
༢ ཇི་ལྟར་སྙོམས་པར་འཇུག་པའི་ཚུལ།་་་་་་་་་་་་་་་་་་་་་་་་་་་་་་་་་་་་་་་་་་་་་་་༌༌་་་་་་་་་་་415
༣ རྟེན་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་416
༤ གང་ཟག་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་417
གཉིས་པ་དེ་ལ་བརྟེན་པའི་ཡོན་ཏན་བཤད་པ་ལ་གཉིས།
༡ ཡོན་ཏན་དངོས།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་421
༢ ཁྱད་པར་གྱི་ཆོས།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་438
དང་པོ་ཡོན་ཏན་དངོས་ལ་བཞི།
༡ ཚད་མེད་བཞི།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་421
༢ རྣམ་ཐར་བརྒྱད།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་428
༣ ཟིལ་གནོན་བརྒྱད།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་434
༤ ཟད་པར་བཅུ་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་436
ཡོངས་སུ་རྫོགས་པའི་བྱ་བ་བསྟན་པ་ལ་གསུམ།
༡ བསྟན་པ་དང་དེ་འཛིན་པ་བཤད་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་441
༢ བདག་ཉིད་ཀྱིས་བསྟན་པ་བཟུང་བ་ལ་སྐྱོན་དོར་བ།་་་་་་་་་་་་་་་་་་་་༌༌༌༌་་་་་་་་་་་་་་444
༣ གཞན་བསྟན་པ་འཛིན་པ་རྣམས་ལ་བག་ཡོད་པར་གདམས་པ།་་་་་་༌༌༌༌༌་་་་་་་་་་་445
ཆོས་མངོན་པ་མཛོད་ཀྱི་བསྡུས་དོན།་་་་་་་་་་་་་་་་་་་་་་་་་་་་་་་་་་་་་་་་་་་་་་་་ 455
འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་
བརྒྱན་པ་རྣམ་པར་བཤད་པ་རྒྱན་གྱི་མེ་ཏོག་་་་་་་་་་་་་་་་་་་་་་་་་་་་་་་༌་་་་་་459
བསྐལ་པ་རྒྱན་གྱི་མེ་ཏོག་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་467
ཆོས་མངོན་པ་མཛོད་ཀྱི་ཚིག་དོན་རབ་གསལ་ལས་
བསྡུས་དོན་གྱིས་ཁོག་ཕུབ་པ།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་479
ཆོས་མངོན་པ་མཛོད་ཀྱི་བསྡུས་དོན་ཆོས་མངོན་རྒྱ་མཚོར་
འཇུག་པའི་གྲུ་གཟིངས།་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་༌་་་་་་་484
པར་བྱང་སྨོན་ཚིག་་་་་་་་་་་་་་་་་་་་་་་་་་་་་་་་་་་་་་་་༌༌༌༌༌༌༌༌༌་་་་་་་་་་་་་༌་་་༌་་་་་་་553

 

 

ད་ནི་གནས་བདུན་པ་འཆད་པ་ན་བཟོད་པ་དང་ཤེས་པ་དང་ལྟ་བའི་ཁྱད་པར་བཤད་པ་དང༌། ཤེས་པ་བྱེ་བྲག་ཏུ་བཤད་པ་དང༌། དེ་དག་གི་ཡོན་ཏན་བཤད་པ་གསུམ་ལས། དང་པོ་ནི། གལ་ཏེ་བཟོད་པ་དང་ཤེས་པ་དང་ཡང་དག་པའི་ལྟ་བ་དང་ཡང་དག་པའི་ཤེས་པ་རྣམས་ལ་ཁྱད་པར་ཅི་ཞིག་ཡོད་ཅེ་ན།
རྩ་བ། དྲི་མེད་བཟོད་རྣམས་ཤེས་པ་མིན། །
ཟད་དང་མི་སྐྱེའི་བློ་ལྟ་མིན། །
དེ་ལས་གཞན་འཕགས་བློ་གཉིས་ཀ །
གཞན་ཤེས་དྲུག་ནི་ལྟ་བའང་ཡིན། །
དྲི་མ་མེད་པའི་བཟོད་པ་བརྒྱད་པོ་རྣམས་ནི་ཤེས་པ་མིན་ཏེ། ཤེས་པ་ནི་ངེས་པའི་བདག་ཉིད་ཅན་ཡིན་ན་བཟོད་པ་རྣམས་ནི་བར་ཆད་མེད་པའི་ལམ་ཡིན་པས་དེའི་ཚེ་རང་གི་སྤང་བྱ་(ཐེ་ཚོམ་དང་)ཕྲ་རྒྱས་མ་སྤངས་པས་རང་གི་ཡུལ་ལ་ཐེ་ཚོམ་དང་བཅས་པའི་ཕྱིར་རོ།། (རང་གི་སྨོས་པ་ནི་ཤེས་པ་དང་པོ་བདུན་ཤེས་པ་མ་ཡིན་པར་ཐལ་བ་སྤངས་བའི་ཕྱིར་རོ།།) བཟོད་པ་དེ་དག་(བདེན་པ་བཞི་ལ་མི་རྟག་པ་ལ་སོགས་པར་)ཡང་དག་པར་རྟོགས་པའི་བདག་ཉིད་ཡིན་པས་ལྟ་བ་ནི་ཡིན་ནོ།། (དྲི་མེད་ཅེས་སྨོས་པས་བཟོད་པ་ཟག་བཅས་ནི་ཤེས་པ་ཡིན་ནོ། །ཤེས་པ་ཟད་མེད་ནི་ཐེ་ཚོམ་སྤངས་པས་ཁྱབ་བོ། །ཐེ་ཚོམ་སྤངས་པ་ཤེས་པར་མ་ངེས་ཏེ་ཆགས་བྲལ་སྔོན་འགྲོའི་བཟོད་པ་བཞིན་ནོ། །ཟད་མི་སྐྱེ་ཤེས་ལྟ་བ་མིན་ཏེ། བྱ་བ་བྱར་མེད་པ་ཙམ་དུ་རྟགས་ཀྱི་བདེན་བཞི་ལ་མི་རྟོག་པའི་ཕྱིར་དང་འབྲས་བུ་རྫོགས་ཟིན་པའི་ཕྱིར་རོ།།) ཟད་པ་ཤེས་པ་དང་མི་སྐྱེ་བ་ཤེས་པའི་བློ་ནི་ལྟ་བ་མིན་ཏེ། ཡང་དག་པར་རྟོག་པ་མེད་པའི་ཕྱིར་དང༌། དམིགས་པ་དང་རྣམ་པ་འཚོལ་བའི་བསམ་པ་ཅན་མ་ཡིན་པའི་ཕྱིར་རོ།། དེ་ནི་ཡང་དག་པའི་ཤེས་པ་ཞེས་བྱའི་ཤེས་པ་ཙམ་ཡང་མ་ཡིན་ནོ། །བཟོད་པ་བརྒྱད་དང་ཟད་པ་དང་མི་སྐྱེ་བ་ཤེས་པ་དེ་དག་ལས་གཞན་པའི་འཕགས་པ་ཟག་པ་མེད་པའི་བློ་སྟེ་སྡུག་བསྔལ་ལ་ཆོས་ཤེས་པ་ནས་ལམ་ལ་རྗེས་སུ་ཤེས་པའི་བར་གྱི་ཤེས་རབ་རྣམས་ནི་ཤེས་པ་དང་ཡང་དག་པའི་ལྟ་བ་གཉིས་ཀ་ཡིན་ཏེ། རྣམ་གྲོལ་གྱི་ལམ་ཡིན་པས་རང་གི་ཡུལ་ལ་ཐེ་ཚོམ་སྤངས་པས་ངེས་པའི་བདག་ཉིད་ཅན་ཡིན་པའི་ཕྱིར་དང༌། ཡང་དག་པར་རྟོག་པའི་བདག་ཉིད་ཅན་ཡང་ཡིན་པའི་ཕྱིར་རོ། །
འཕགས་པའི་བློ་ལས་གཞན་ཟག་བཅས་འཇིག་རྟེན་པའི་ཤེས་རབ་ཐམས་ཅད་ནི་ཀུན་རྫོབ་ཤེས་པ་ཡིན་ཏེ། ཟག་བཅས་ལ་ཤེས་པ་མ་ཡིན་པའི་ཤེས་རབ་མི་སྲིད་པའི་(ཕྱིར་དང་ཤེས་རབ་གང་ཡིན་ཡང་ཤེས་པ་ཡིན་པའི་)ཕྱིར་རོ། །དེ་ཡང་སྒོ་ལྔའི་རྣམ་ཤེས་ཀྱི་འཁོར་དུ་བྱུང་བའི་ཤེས་རབ་དགེ་མི་དགེ་ལུང་མ་བསྟན་ཐམས་ཅད་དང་ཡེ་ཤེས་ཀྱི་འཁོར་དུ་བྱུང་བའི་ཤེས་རབ་ལྟ་བ་དྲུག་པོ་མ་གཏོགས་པ་ཉོན་མོངས་པ་ཅན་དང་མ་བསྒྲིབས་ལུང་མ་བསྟན་རྣམས་ནི་ཤེས་པ་ཁོ་ན་ཡིན་ནོ། །ཡིད་ཤེས་ཀྱི་འཁོར་དུ་བྱུང་བའི་ཤེས་རབ་འཇིག་ཚོགས་ལ་ལྟ་བ་ལ་སོགས་པ་ཉོན་མོངས་པ་ཅན་ལྔ་དང་འཇིག་རྟེན་པའི་ཡང་དག་པའི་ལྟ་བ་སྟེ་དྲུག་ནི་ཀུན་རྫོབ་ཤེས་པ་ཡིན་པར་མ་ཟད་ལྟ་བའང་ཡིན་ཏེ། ངེས་པར་རྟོག་པའི་བདག་ཉིད་ཡིན་པའི་ཕྱིར་རོ།། (དེས་ན་ལྟ་བ་ཁོ་ན་ཡིན་པ་ནི་མེད་དོ།།)
གཉིས་པ་ཤེས་པ་བྱེ་བྲག་ཏུ་བཤད་པ་ལ་ཤེས་པའི་ངོ་བོའི་དབྱེ་བ་དང༌། གྲངས་ངེས་པ་དང༌། རྣམ་པ་དང༌། ས་དང་བརྟེན་པ་དང༌། དྲན་པ་ཉེར་གཞག་ཏུ་གཞག་པ་དང༌། དམིགས་པ་དང༌། ལྡན་པའི་ཚུལ་དང༌། ཐོབ་པའི་ཚུལ་བརྒྱད་ཡོད་པ་ལས་དང་པོ་ནི་མདོ་ལས་ཤེས་པ་བཅུ་སྟེ། (ཆོས་དང་རྫས་དང་ཀུན་རྫོབ་དང༌། །གཞན་གྱིས་སེམས་དང་སྡུག་བསྔལ་དང༌། །ཀུན་འབྱུང་བ་དང་འགོག་པ་དང༌།། ལམ་དང་ཟད་དང་མི་སྐྱེ་ཞེས། །ཞེས་པ་བསྡུ་ཚིག་གོ།) འདི་ལྟ་སྟེ་ཆོས་ཤེས་པ་དང༌། རྗེས་སུ་ཤེས་པ་དང༌། ཀུན་རྫོབ་ཤེས་པ་དང༌། ཕ་རོལ་གྱི་སེམས་ཤེས་པ་དང༌། སྡུག་བསྔལ་ཤེས་པ་དང༌། ཀུན་འབྱུང་ཤེས་པ་དང༌། འགོག་པ་ཤེས་པ་དང༌། ལམ་ཤེས་པ་དང༌། ཟད་པ་ཤེས་པ་དང༌། མི་སྐྱེ་བ་ཤེས་པའོ་ཞེས་གསུང་པའི་ཤེས་པ་ཐམས་ཅད་རྣམ་པ་གཉིས་སུ་འདུས་ཏེ།
རྩ་བ། ཤེས་པ་ཟག་བཅས་ཟག་པ་མེད། །
དང་པོ་ཀུན་རྫོབ་ཅེས་བྱ་འོ། །
ཟག་མེད་རྣམ་གཉིས་ཆོས་དང་ནི། །
རྗེས་སུ་ཤེས་པ་ཁོ་ན་ཡིན། །
ཟག་པ་དང་བཅས་པ་དང་ཟག་པ་མེད་པའོ། །དེ་ལ་དང་པོ་ཟག་བཅས་ནི་ཀུན་རྫོབ་ཤེས་པ་ཞེས་བྱ་བ་ཡིན་ཏེ། རེས་འགའ་རང་དང་སྤྱིའི་མཚན་ཉིད་ཀྱང་འཛིན་ལ་ཕལ་ཆེར་བུམ་པ་སྣམ་བུ་དང་སྐྱེས་པ་བུད་མེད་ལ་སོགས་པ་ཀུན་རྫོབ་ཏུ་ཡོད་པའི་དངོས་པོ་ལ་དམིགས་པའི་ཕྱིར་རོ། །ཟག་མེད་ནི་ཆོས་ཤེས་པ་དང་རྗེས་སུ་ཤེས་པ་རྣམ་པ་གཉིས་ཁོ་ན་ཡིན་ཏེ། སྡུག་བསྔལ་ཤེས་པ་ལ་སོགས་པ་ནི་འདི་གཉིས་སུ་འདུས་པའི་ཕྱིར་རོ། །
རྩ་བ། ཀུན་རྫོབ་ཡུལ་ནི་ཐམས་ཅད་དོ། །
ཆོས་ཤེས་བྱ་བའི་སྤྱོད་ཡུལ་ནི། །
འདོད་སྡུག་བསྔལ་སོགས་རྗེས་ཤེས་པའི། །
སྤྱོད་ཡུལ་གོང་མའི་སྡུག་བསྔལ་སོགས། །
དེ་ལ་ཀུན་རྫོབ་ཤེས་པའི་ཡུལ་ནི་འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་ཡིན་ཏེ། (བསམ་གཏན་དགེ་ཡུལ་ཡོད་དགུ་ཡིན། །ཞེས་པ་དང༌།) མིག་ཤེས་ཀྱིས་གཟུགས་ཤེས་པ་ལ་སོགས་པ་ཅི་རིགས་པར་ཐམས་ཅད་ལ་འཇུག་པའི་ཕྱིར་རོ། །ཆོས་ཤེས་པ་ཞེས་བྱ་བའི་སྤྱོད་ཡུལ་ནི་འདོད་པའི་སྡུག་བསྔལ་དང་སོགས་པས་བསྡུས་པ་ཀུན་འབྱུང་དང་འགོག་པ་དང་ལམ་རྣམས་ཡིན་ནོ། །རྗེས་སུ་ཤེས་པའི་སྤྱོད་ཡུལ་ནི་ཁམས་གོང་མ་གཉིས་པོའི་སྡུག་བསྔལ་དང་སོགས་པས་བསྡུས་པ་ཀུན་འབྱུང་དང་འགོག་པ་དང་ལམ་རྣམས་ཡིན་པས་(ནམ་མཁའ་དང་སོ་སོར་བརྟགས་མིན་ནི་བདེན་བཞིར་མ་འདུས་པས་དེ་དག་གི་དམིགས་པ་མིན་ནོ།།) དེ་ལྟར་ན་ཤེས་པ་གསུམ་ཡིན་ནོ། །
རྩ་བ། དེ་དག་ཉིད་བདེན་བྱེ་བྲག་གིས། །
བཞི་སྟེ་རྣམ་བཞི་དེ་དག་ནི། །
མི་སྐྱེ་བ་དང་ཟད་པ་ཤེས། །
དེ་གཉིས་དང་པོ་སྐྱེས་པ་ནི། །
སྡུག་བསྔལ་རྒྱུ་རྗེས་ཤེས་པ་ཡིན། །
ཆོས་ཤེས་པ་དང་རྗེས་སུ་ཤེས་པ་དེ་དག་ཉིད་སྡུག་བསྔལ་ཤེས་པ་ལ་སོགས་པ་བཞི་ཡིན་ཏེ། ཡུལ་བདེན་བཞི་ལ་དམིགས་པའི་བྱེ་བྲག་གིས་(སོ་དགུར་དབྱེ་བ་ནི་)ཆོས་ཤེས་རྗེས་ཤེས་ལས་ལྟ་བའི་རང་བཞིན་མ་ཡིན་པ་བདེན་བཞི་ལ་དམིགས་པའི་བྱེ་བྲག་གིས་སྡུག་བསྔལ་ཤེས་པ་ལ་སོགས་པ་(ལྟ་བའི་རང་བཞིན་མ་ཡིན་པའི་)རྣམ་པ་བཞི་པོ་དེ་དག་ཉིད་ནི་མི་སྐྱེ་བ་ཤེས་པ་དང་ཟད་པ་ཤེས་པ་གཉིས་སུ་འགྱུར་ཏེ། རྡོ་རྗེ་ལྟ་བུའི་ཏེང་ངེ་འཛིན་གྱི་རྗེས་སུ་སྐྱེས་པའི་བདེན་བཞིར་ཤེས་པ་གང་ཡིན་པའོ། །ཟད་པ་དང་མི་སྐྱེ་བ་ཤེས་པ་དེ་གཉིས་དང་པོར་སྐྱེས་པ་ནི་སྡུག་བསྔལ་དང་རྒྱུ་ཀུན་འབྱུང་ལ་རྗེས་སུ་ཤེས་པ་ཡིན་ཏེ། སྲིད་རྩེའི་ཕུང་པོས་བསྡུས་པའི་སྡུག་བསྔལ་དང་ཀུན་འབྱུང་ལ་མི་རྟག་པ་ལ་སོགས་པ་དང་རྒྱུ་ལ་སོགས་པར་དམིགས་པའི་ཕྱིར་རོ། །དང་པོར་སྐྱེས་པ་ལས་གཞན་དེ་ཕྱིན་ཆད་ཀྱི་ཟད་པ་དང་མི་སྐྱེ་བ་ཤེས་པ་ནི་བདེན་པ་གཞན་དག་ལའང་དམིགས་སོ། །རྡོ་རྗེ་ལྟ་བུའི་ཏིང་ངེ་འཛིན་ནི་སྲིད་རྩེའི་བདེན་བཞི་ལ་དམིགས་ལ་ཟད་པ་དང་མི་སྐྱེ་བ་ཤེས་པ་དང་པོར་སྐྱེས་པ་སྡུག་བསྔལ་དང་ཀུན་འབྱུང་ལ་དམིགས་སོ་ཞེས་བྱ་བ་ནི་བྱེ་བྲག་ཏུ་སྨྲ་བའི་གྲུབ་པའི་མཐའ་སྟེ་ཁྱད་པར་མེད་པ་ལ་ཁྱད་པར་རྟག་པ་ཡིན་ནོ། །
འོ་ན་རྡོ་རྗེ་ལྟ་བུའི་ཏིང་ངེ་འཛིན་དང་ཟད་པ་དང་མི་སྐྱེ་བ་ཤེས་པ་དམིགས་པ་གཅིག་གམ་ཐ་དད་ཅེ་ན། རྡོ་རྗེ་ལྟ་བུའི་ཏིང་ངེ་འཛིན་གལ་ཏེ་སྲིད་རྩེའི་སྒོམ་སྤང་ཆུང་ངུའི་ཆུང་ངུའི་ངོ་བོར་གྱུར་པ་བདེན་པ་དང་པོ་གཉིས་ལ་དམིགས་ན་ནི་གཅིག་ལ་འོན་ཏེ། བསྒོམ་པའི་ལམ་ལ་འགོག་པའམ། །ལམ་ལ་ཆོས་ཤེས་གང་ཡིན་ཏེ། །ཁམས་གསུམ་གྱི་ནི་གཉེན་པོ་ཡིན། །ཞེས་པས་འགོག་ལམ་ལ་དམིགས་ན་ནི་མི་གཅིག་སྟེ། ཤེས་པ་གཉིས་པོ་ནི་དང་པོར་སྲིད་རྩེའི་ཕུང་པོ་ཁོ་ན་ལ་ངེས་པར་དམིགས་པའི་ཕྱིར་ཏེ་དཔེར་ན་དུག་མདས་ཕོག་སྟེ་འཆི་བ་ན་ཐོག་མར་དུག་ཡན་ལག་ཐམས་ཅད་ལ་ཁྱབ་ནས་མཐར་ཤི་མ་ཐག་རྨའི་ཕྱོགས་ཁོ་ནར་འདུ་བ་བཞིན་ནོ། །
(བཅུར་དབྱེ་བ་ནི།)
རྩ་བ། བཞི་ལས་ཕ་རོལ་སེམས་རིག་པ། །
དེས་ནི་ས་དབང་གང་ཟག་འདས། །
ཞིག་དང་མ་སྐྱེས་མི་རིག་གོ །
ཆོས་རྗེས་བློ་ཕྱོགས་ཕན་ཚུན་མིན། །
ཆོས་ཤེས་རྗེས་ཤེས་དང་ལམ་ཤེས་པ་དང་ཀུན་རྗོབ་ཤེས་པ་བཞི་ལས་ནི་ཕ་རོལ་ཀྱི་སེམས་རིག་པ་བཞག་སྟེ། (གཞན་སེམས་)ཟག་བཅས་(ལ་དམིགས་པ་ནི་)ཀུན་རྫོབ་ཤེས་པ་དང༌། ཟག་མེད་(ལ་དམིགས་པ་ནི་)ལམ་ཤེས་པ་དང་གཉེན་པོའི་བྱེ་བྲག་གིས་ཆོས་ཤེས་རྗེས་ཤེས་ཀྱང་ཡིན་པའི་ཕྱིར་རོ།། (ཇི་ལྟར་ཞེ་ན། འདི་ལྟར་ཟག་བཅས་ཀྱི་གཞན་གྱི་སེམས་ཤེས་ནི་སོ་སོའི་སྐྱེ་བོ་རྣམས་ཀྱིས་བསམ་གཏན་ལ་བརྟེན་ནས་སེམས་འདོད་ཆགས་དང་བཅས་བྲལ་ལ་སོགས་པ་འཇིག་རྟེན་པའི་རྣམ་པ་ཅན་གྱི་ཤེས་པ་དང༌། འཕགས་པ་རྣམས་ཀྱི་རྗེས་ལས་ཐོབ་པའི་ཚེ་བསམ་གཏན་ལ་བརྟེན་ནས་ཤེས་པ་སྟེ་ཀུན་རྫོབ་ཤེས་པ་ཡིན་ནོ། །འཕགས་པའི་ཟག་མེད་ཀྱི་སེམས་ཤེས་པས་གཞན་གྱི་ཟག་མེད་ཀྱི་སེམས་ཤེས་ན་དེ་ནི་ལམ་ཤེས་པ་ཡིན་པས་ལམ་གྱི་རྣམ་པ་ཅན་ཁོ་ན་ཡིན་ཏེ། དེས་ཟག་བཅས་མི་ཤེས་པའི་ཕྱིར་དང༌། སེམས་ཤེས་པས་འགོག་པ་ཤེས་པར་འགྱུར་བའང་མེད་དེ་འགོག་པ་སེམས་མ་ཡིན་པའི་ཕྱིར། ཤེས་པ་གཞན་ཡང་མིན་ཏེ། དེ་དག་གི་རྣམ་པ་ཅན་མ་ཡིན་པའི་ཕྱིར། ལམ་ཤེས་པའང་ཆོས་དང་རྗེས་སུ་ཤེས་པར་གཞག་པའི་ཕྱིར་སེམས་ཤེས་པ་ཟག་མེད་ནི་ཤེས་པ་གསུམ་པོ་ཡིན་ནོ།།) སེམས་ཤེས་དེས་ནི་ས་འདས་པ་མི་ཤེས་ཏེ། བསམ་གཏན་དང་པོ་ལ་སོགས་པ་འོག་མའི་ས་པས་བསམ་གཏན་གཉིས་པ་ལ་སོགས་པ་གོང་མའི་ས་པ་མི་ཤེས་པའི་ཕྱིར་རོ།། (དེ་ཡང་དམན་པའི་ཡུལ་མཆོག་མ་ཡིན་པའི་ཕྱིར། དེས་ན་བཞི་པའི་སེམས་པ་ཟག་བཅས་ཀྱི་ཡུལ་ནི་ས་ལྔ་ཡིན་པ་ནས་ཟག་མེད་ཀྱི་ཡུལ་ས་བཞི་ཡིན་པའི་བར་དུའོ།།) དབང་པོ་འདས་པའང་མི་ཤེས་ཏེ། དད་མོས་པའི་ལམ་གྱིས་མཐོང་ཐོབ་པའི་ལམ་མི་ཤེས་པ་དང༌། དུས་དང་སྦྱོར་བའི་ལམ་གྱིས་དུས་དང་མི་སྦྱོར་བའི་ལམ་མི་ཤེས་(ཏེ་དབང་པོ་འདས་)པའི་ཕྱིར་རོ། །གང་ཟག་འདས་པ་མི་ཤེས་པ་ནི་ཕྱིར་མི་འོང་གི་ལམ་གྱིས་དགྲ་བཅོམ་གྱི་ལམ་མི་ཤེས་ལ། ཉན་ཐོས་ཀྱི་ལམ་གྱིས་རང་སངས་རྒྱས་ཀྱི་ལམ་མི་ཤེས་པ་ལ་སོགས་པའི་ཕྱིར་རོ།། (དེ་ཡང་རང་སྟོབས་ཀྱིས་མི་ཤེས་པ་ལ་བསམས་ཀྱི། སངས་རྒྱས་ལ་སོགས་པས་བྱིན་གྱིས་བརླབས་ན་གང་ཟག་དང་དབང་པོ་འདས་ཀྱང་ཤེས་སོ། །འདིར་འཕགས་པ་ཆགས་བཅས་མ་སྨོས་པ་ནི་དེ་དག་ལ་སེམས་ཤེས་བཀག་པས་སོ།།) འདས་པའི་སྒྲ་ནི་འདིར་གོང་མ་ལ་བརྗོད་པར་འདོད་པ་ཡིན་ནོ། །དེའི་ཕྱིར་མཉམ་པ་དང་འོག་མ་ནི་ཤེས་པར་བསྟན་ཏོ། །
གཞན་ཡང་ཕ་རོལ་སེམས་ཤེས་ནི་གཞན་གྱི་སེམས་ད་ལྟར་བ་ཁོ་ནའི་ཡུལ་ཅན་ཡིན་པའི་ཕྱིར་དུས་ཞིག་པ་འདས་པ་དང་མ་སྐྱེས་པ་མ་འོངས་པའང་མི་རིག་གོ །ཅིའི་ཕྱིར་ཞེ་ན། འདས་པ་དང་མ་འོངས་པ་ཤེས་པ་ནི་རིམ་པ་ལྟར་སྔོན་གནས་རྗེས་དྲན་དང་འཆི་འཕོ་སྐྱེ་ཤེས་ཡིན་ལ་དེ་དག་ཀྱང་ཀུན་རྫོབ་ཤེས་པ་ཡིན་པའི་ཕྱིར་རོ། །ཆོས་ཤེས་དང་རྗེས་ཤེས་ཀྱི་ཕྱོགས་དང་མཐུན་པའི་སེམས་ཤེས་པའི་བློ་ཡང་(རང་རང་གི་རིགས་མཐུན་མ་ཡིན་པ།) ཕྱོགས་ཕན་ཚུན་(གཅིག་གིས་གཅིག་)རིག་པ་མིན་ཏེ། སེམས་ཤེས་པ་དེ་གཉིས་འདོད་པ་དང་ཁམས་གོང་མའི་གཉེན་པོ་ཐ་དད་ལ་དམིགས་པའི་ཕྱིར་རོ།། (གང་ལ་རྒྱབ་ཀྱིས་ཕྱོགས་པ་དེ་ལ་མི་དམིགས་པར་འདོད་པས་སོ།།) དེ་ཡང་མཐོང་ལམ་ལ་ནི་ཕ་རོལ་གྱི་སེམས་ཤེས་པ་མེད་དེ། མཐོང་ལམ་ཡུན་ཐུང་བས་སེམས་ཤེས་ཀྱི་སྦྱོར་བ་བྱ་བའི་སྐབས་མེད་པའི་ཕྱིར་དང༌། དེ་ནི་བདེན་པ་ལ་མཉམ་པར་བཞག་པ་(ཟག་མེད་བར་མ་ཆད་)ཡིན་པའི་ཕྱིར་རོ། །འོན་ཀྱང་སངས་རྒྱས་དང་དགེ་འདུན་ལ་ཤེས་ནས་དད་པ་ནི་བདེན་པ་མངོན་སུམ་དུ་ཤེས་ནས་ཡིད་ཆེས་པ་ཡིན་གྱི་ཕ་རོལ་གྱི་སེམས་མངོན་སུམ་དུ་ཤེས་པ་ནི་མེད་དོ་ཞེས་བྱ་བ་ནི་གྲུབ་པའི་མཐའ་ཡིན་ནོ། །ཐེག་པ་གོང་མ་པ་ནི་འཇིག་རྟེན་གྱི་ཁམས་བརྒྱ་ཤེས་པ་ལ་སོགས་པ་སྐད་ཅིག་མ་ལ་སྐྱེ་བའི་ཡོན་ཏན་དུ་མ་བཞེད་པ་ཡིན་ནོ། །
མཐོང་ལམ་ནི་ཕ་རོལ་སེམས་ཤེས་ཀྱི་ཡུལ་དུ་འགྱུར་བས་དེའི་ཁྱད་པར་བཤད་པར་བྱ་སྟེ།
རྩ་བ། ཉན་ཐོས་མཐོང་བའི་སྐད་ཅིག་གཉིས། །
རིག་སྟེ་བསེ་རུ་ལྟ་བུས་གསུམ། །
སངས་རྒྱས་སྦྱོར་བ་མེད་པར་ཀུན། །
དེ་ལ་འཕགས་པ་ཉན་ཐོས་ཀྱི་སེམས་ཤེས་པས་ནི་དབང་པོ་རྟུལ་བས་མཐོང་བའི་ལམ་སྐད་ཅིག་མ་བཅོ་ལྔ་ལས་སྐད་ཅིག་མ་དང་པོ་གཉིས་རིག་སྟེ། རྗེས་སུ་ཤེས་པའི་ཕྱོགས་ནི་དེ་ཤེས་པར་འདོད་པ་ན་སྦྱོར་བ་གཞན་གྱིས་སྒྲུབ་དགོས་པའི་ཕྱིར་དང༌། གྲུབ་པ་ནའང་(དེའི་བར་ལ་ཡུན་རིང་འགོར་བས་)སེམས་བཅུ་དྲུག་པ་(ཐོབ་པར་འགྱུར་ལ་དེ་)ཐོབ་ནས་(སྐད་ཅིག་མ་གསུམ་པ་སོགས་)འདས་པའི་ཕྱིར་དང་། འདས་པའང་མི་རིག་པའི་ཕྱིར་རོ། །འོ་ན་ནི་སྐད་ཅིག་མ་དང་པོ་གཉིས་ཀྱང་མི་རིག་པར་འགྱུར་ཏེ། དེ་ཤེས་པར་འདོད་ནས་སྦྱོར་བ་བརྩམས་ཏེ་གྲུབ་པ་ན་སྐད་ཅིག་མ་གཉིས་པོའང་འགག་པའི་ཕྱིར་རོ་ཞེ་ན། སྐད་ཅིག་མ་གཉིས་པོ་འདི་ཤེས་པར་བྱའོ་ཞེས་སྦྱོར་བ་རྩོམ་པ་ནི་མ་ཡིན་གྱི་གང་ཟག་འདིའི་སེམས་ཤེས་པར་བྱའོ་ཞེས་སྦྱོར་བ་རྩོམ་པ་ན་མངོན་ཤེས་གྲུབ་པ་དང་མཉམ་པར་སྐད་ཅིག་དང་པོ་གཉིས་སྐྱེས་པ་དག་ཤེས་པར་འགྱུར་རོ་ཞེས་བྱེ་བྲག་ཏུ་སྨྲ་བ་འདོད་མོད་ཀྱི། དེ་ལྟ་ན་ནི་རྗེས་སུ་ཤེས་པའི་བཟོད་པ་ལ་སོགས་པ་རྣམས་ཀྱང་ཤེས་པར་འགྱུར་རོ། །དེའི་ཕྱིར་སྦྱོར་བ་ནི་སྤྱི་ལ་དམིགས་པ་ཡིན་གྱི་བྱེ་བྲག་ནི་མ་ཡིན་གྱི། མི་ཤེས་པའི་ཕྱིར་རོ། །དེའི་ཕྱིར་འདི་དག་ཀྱང་ཁྱད་པར་མེད་པ་ལ་རྣམ་པར་རྟོག་པས་ཁྱད་པར་དུ་རྟོག་པ་ཁོ་ནར་ཟད་དོ། །
རང་སངས་རྒྱས་བསེ་རུ་ལྟ་བུའི་སེམས་ཤེས་པས་ནི་སྐད་ཅིག་མ་དང་པོ་གཉིས་དང་བརྒྱད་པ་གསུམ་རིག་སྟེ། ཉན་ཐོས་ཀྱི་ནི་སྦྱོར་བ་ཆེན་པོས་བསྒྲུབ་དགོས་ལ་འདི་ནི་སྦྱོར་བ་ལ་རྩོལ་བ་ཆུང་བས་དང་པོ་གཉིས་ཤེས་ནས་ཡང་སྐད་ཅིག་མ་ལྔའི་བར་ལ་མངོན་ཤེས་འགྲུབ་པའི་ཕྱིར་རོ། །དེས་ཀྱང་སྐད་ཅིག་མ་དགུ་པ་ལ་སོགས་པ་ནི་མི་རིག་སྟེ། ཡང་སྦྱོར་བ་གཞན་གྱིས་སྒྲུབ་དགོས་པའི་ཕྱིར་དང༌། དེ་ནས་དུབ་པས་སྐད་ཅིག་མ་བདུན་ལའང་སྦྱོར་བ་མི་རྫོགས་པའི་ཕྱིར་རོ། །ཁ་ཅིག་སྐད་ཅིག་མ་དང་པོ་གཉིས་ཤེས་ནས་ཡང་སྦྱོར་བ་གཞན་བྱས་ནས་སྐད་ཅིག་མ་བཅོ་ལྔ་པ་དང་གསུམ་ཤེས་སོ་ཞེས་བྱ་བར་འདོད་དོ། །ཉན་རང་གཉིས་ཀ་ལ་ཡང་སྐད་ཅིག་མ་དང་པོ་གཉིས་ཤེས་པར་བཤད་པ་ནི་མཚོན་པ་སྟེ། ཉན་ཐོས་ཀྱིས་ནི་རིགས་མཐུན་པའི་སྐད་ཅིག་མ་གཉིས་ཅི་རིགས་པར་ཤེས་པར་འགྱུར་ལ་རང་རྒྱལ་གྱིས་ནི་རིགས་མཐུན་པ་གཉིས་དང་མི་མཐུན་པ་གཅིག་སྟེ་གསུམ་ཅི་རིགས་པར་ཤེས་པར་འགྱུར་རོ། །སངས་རྒྱས་བཅོམ་ལྡན་འདས་ནི་མཛད་པ་ཐམས་ཅད་ལྷུན་གྱིས་གྲུབ་པས་སྦྱོར་བ་ལས་བྱུང་བའི་འབད་རྩོལ་མེད་པར་མཐོང་ལམ་གྱི་ཡེ་ཤེས་ཀྱི་སྐད་ཅིག་མ་ཀུན་ཤེས་པར་འགྱུར་བ་ཡིན་ཏེ། ཇི་སྐད་དུ། དགེ་མཐར་ཕྱིན་པ་ཁྱོད་ལ་ནི། །སྦྱོར་བྱུང་དགེ་བ་འགའ་མ་མཆིས།། ཁྱོད་ནི་གང་ཞིག་བཞེད་ན་ཡང༌། །བཞེད་པ་ཙམ་ལ་རག་ལས་སོ། །ཞེས་བཤད་པ་བཞིན་ནོ། །
འོ་ན་ཟད་པ་ཤེས་པ་དང་མི་སྐྱེ་བ་ཤེས་པ་དག་ལ་ཁྱད་པར་ཅི་ཡོད་ཅེ་ན། བསྟན་བཅོས་ལས། ཟད་པ་ཤེས་པ་གང་ཞེ་ན། བདག་གིས་སྡུག་བསྔལ་ཤེས་སོ་ཞེས་བྱ་བར་ཤེས་པ་དང༌། ཀུན་འབྱུང་སྤངས་སོ། །འགོག་པ་མངོན་དུ་བྱས་སོ། །ལམ་བསྒོམས་སོ་ཞེས་བྱ་བར་ཤེས་པ་དེའི་རྒྱུ་ལས་བྱུང་བའི་ཤེས་པ་དང་མཐོང་བ་དང་རིག་པ་དང་བློ་དང་རྟོག་པ་དང་ཤེས་རབ་དང་སྣང་བ་དང་མངོན་པར་རྟོགས་པ་གང་ཡིན་པ་འདི་ནི་ཟད་པ་ཤེས་པ་ཞེས་བྱའོ། །མི་སྐྱེ་བ་ཤེས་པ་གང་ཞེ་ན། བདག་གིས་སྡུག་བསྔལ་ཡོངས་སུ་ཤེས་ཏེ་ཡང་ཡོངས་སུ་ཤེས་པར་བྱར་མེད་དོ་ཞེས་བྱ་བར་ཤེས་པ་ནས་བདག་གིས་ལམ་བསྒོམས་ཏེ་ཡང་སྒོམ་དུ་མེད་དོ་ཞེས་བྱ་བའི་བར་དུ་ཤེས་པ་དེའི་རྒྱུ་ལས་བྱུང་བའི་ཤེས་པ་དང་ཞེས་པ་ནས་འདི་ནི་མི་སྐྱེ་བ་ཤེས་པ་ཞེས་བྱའོ་ཞེས་བྱ་བའི་བར་དུ་འབྱུང་བའི་ཕྱིར།
ཟད་པ་ཤེས་པ་ནི།
རྩ་བ། ཟད་པ་ཤེས་པ་བདེན་རྣམས་ལ། །
ཡོངས་ཤེས་ལ་སོགས་པ་ངེས་པའོ། །
ཡོངས་ཤེས་བྱར་མེད་ཅེས་ལ་སོགས། །
མི་སྐྱེ་བ་ཡི་བློ་འདོད་དོ། །
སྡུག་བསྔལ་ལ་སོགས་པའི་བདེན་པ་རྣམས་ལ་བདག་གིས་སྡུག་བསྔལ་ཡོངས་སུ་ཤེས་སོ་ཞེས་པ་དང༌། སོགས་པས་གཟུང་བ་ཀུན་འབྱུང་སྤངས་སོ། །འགོག་པ་མངོན་དུ་བྱས་སོ། །ལམ་བསྒོམས་སོ་ཞེས་མཉམ་གཞག་གི་དུས་སུ་ཤེས་པ་ལས་བྱུང་བའི་རྗེས་ཀྱི་ཤེས་པས་ངེས་པའོ། །དེ་བཞིན་དུ་མཉམ་གཞག་ཏུ་བདག་གིས་སྡུག་བསྔལ་ཡོངས་སུ་ཤེས་པར་བྱས་ཏེ་ཡང་ཡོངས་སུ་ཤེས་པར་བྱར་མེད་དོ་ཞེས་བྱ་བ་ལ་སོགས་པར་རྟོགས་པ་ལས་ལངས་པའི་རྗེས་ལས་ཐོབ་པའི་ཤེས་པས་ངེས་པ་ནི་མི་སྐྱེ་བ་ཤེས་པའི་བློར་ཁ་ཆེ་བས་འདོད་དོ། །
ཉི་འོག་པ་ནི་མཉམ་གཞག་ན་ཟག་མེད་ཀྱི་རྣམ་པ་བཅུ་དྲུག་ལས་གཞན་ཡང་ཡོད་པས་དེས་དེ་ལྟར་ངེས་སོ་ཞེས་འདོད་དོ། །འོ་ན་བསྟན་བཅོས་ལས། མཐོང་བ་ཞེས་བཤད་པའི་ཕྱིར་ཤེས་པ་དེ་གཉིས་ལྟ་བར་འགྱུར་ཏེ། ལྟ་བ་དང་མཐོང་བ་གཉིས་དོན་གཅིག་པའི་ཕྱིར་རོ།། འདོད་ན་ཟད་དང་མི་སྐྱེའི་བློ་ལྟ་མིན་ཞེས་པ་དང་འགལ་ལོ་ཞེ་ན། མི་འགལ་ཏེ། མཐོང་བ་ནི་ཤེས་པས་འཕངས་པའི་རྣམ་གྲངས་སམ། ཐ་སྙད་ཙམ་མམ། ཡང་ན་ལུང་དང་རྟགས་ལས་མ་ལྟོས་པར་མིག་ཤེས་ཀྱིས་གཟུགས་ལྟར་མངོན་སུམ་དུ་རྟོགས་པས་ན་སྡུག་བསྔལ་ཤེས་པ་ལ་སོགས་པ་དང་ཤེས་ཏེ་ཡང་ཤེས་པར་བྱར་མེད་པ་ལ་སོགས་པར་ཤེས་པ་ཉིད་ལ་མཐོང་བ་ཞེས་བརྗོད་ཀྱི་རྟོག་པའི་བདག་ཉིད་མ་ཡིན་ཞིང་མཐོང་བ་ལ་ལྟ་བས་མ་ཁྱབ་པས་(སྔ་མ་ནི་དགྲ་བཅོམ་དབང་པོ་རྣོ་རྟུལ་གཉིས་ཀ་ལ་ཡོད་ལ་ཕྱི་མ་ནི་མི་གཡོ་བའི་ཆོས་ཅན་ཁོ་ནའོ།།) ལྟ་བ་ནི་མ་ཡིན་ནོ། །དེའི་ཕྱིར་བསྟན་བཅོས་ལས་ཀྱང༌། རེ་ཞིག་ཤེས་པ་གང་ཡིན་པ་དེ་ནི་མཐོང་བ་ཡང་ཡིན་ནོ་ཞེས་ཤེས་པ་དང་མཐོང་བ་རྣམ་གྲངས་སུ་བཤད་ཀྱི་མཐོང་བ་ཡིན་ལ་ཤེས་པ་མ་ཡིན་པ་ཡང་ཡོད་དེ། མངོན་པར་རྟོགས་པའི་ཁོངས་སུ་གཏོགས་པའི་བཟོད་པ་བརྒྱད་ལྟ་བུའོ་ཞེས་འབྱུང་ངོ༌།། མཐོང་བ་དང་ལྟ་བ་ནི་རྣམ་གྲངས་སུ་མ་བཤད་དོ། །
ཤེས་པ་དག་གི་སྡོམ་གྱི་ཚིགས་སུ་བཅད་པ་ནི། ཀུན་རྗོབ་ཆོས་དང་རྗེས་སུ་ཤེས།། གསུམ་ཡིན་དེ་དག་བཅུར་བཤད་དེ། །ཀུན་རྫོབ་ཤེས་པ་རང་དང་ནི། །སེམས་ཤེས་ཆའོ་ཆོས་ཤེས་ནི། །རང་དང་བདེན་པ་བཞི་ཤེས་དང༌། །ཟད་དང་མི་སྐྱེ་སེམས་ཤེས་བརྒྱད། །རྗེས་ཤེས་ཀྱང་ཡིན་བདེན་གསུམ་ཤེས། །རང་དང་ཟད་དང་མི་སྐྱེ་ཤེས། །ཆོས་ཤེས་རྗེས་སུ་ཤེས་པ་དང༌། །ལྔ་ཡིན་ཟད་དང་མི་སྐྱེ་ཞེས། །རང་རང་བདེན་པ་བཞི་ཤེས་དང༌། །ཆོས་ཤེས་རྗེས་སུ་ཤེས་དང་བདུན། །སེམས་ཤེས་ཆོས་ཤེས་རྗེས་ཤེས་དང༌། །ལམ་ཤེས་ཀུན་རྗོབ་ཤེས་པ་དང༌།། རང་དང་ལྔ་ཡིན་ལམ་ཤེས་ནི། །རང་དང་ཆོས་ཤེས་རྗེས་ཤེས་དང༌། །སེམས་ཤེས་ཟད་དང་མི་སྐྱེ་ཞེས། །རྣམ་པ་དྲུག་ཏུ་ཡང་དག་བརྗོད་ཅེས་བྱའོ། །
གཉིས་པ་ནི་ཅིའི་ཕྱིར་ཤེས་པ་གསུམ་པོ་དེ་དག་བཅུར་ཕྱེ་ཞེ་ན།
རྩ་བ། རང་བཞིན་དང་ནི་གཉེན་པོ་དང༌། །
རྣམ་པ་རྣམ་པ་སྤྱོད་ཡུལ་དང༌། །
སྦྱོར་དང་བྱ་བ་བྱས་ཉིད་དང༌། །
རྒྱུ་རྒྱས་པ་ལས་བཅུ་ཡིན་ནོ། །
ཟག་བཅས་ཀྱི་རང་བཞིན་ལས་ནི་ཀུན་རྗོབ་ཤེས་པ་སྟེ། དེས་ཀུན་རྫོབ་ཤེས་ཀྱི་དོན་དམ་མི་ཤེས་པའི་ཕྱིར་རོ། །གཉེན་པོ་ལས་ནི་ཆོས་ཤེས་དང་རྗེས་ཤེས་གཉིས་ཏེ། རིམ་པ་ལྟར་འདོད་པ་དང་གོང་མའི་གཉེན་པོ་བྱེད་པའི་ཕྱིར་རོ། །རྣམ་པ་ལས་ནི་སྡུག་བསྔལ་དང་ཀུན་འབྱུང་ཤེས་པ་ཕྱེ་སྟེ་གཉིས་ཀའང་ཉེར་ལེན་གྱི་ཕུང་པོ་ལ་དམིགས་པས་དམིགས་པ་ཐ་དད་མེད་པའི་ཕྱིར་དང༌། རྣམ་པ་མི་རྟག་པ་ལ་སོགས་པ་དང་རྒྱུ་ལ་སོགས་པ་མི་འདྲ་བས་བཞག་པའི་ཕྱིར་རོ། །རྣམ་པ་དང་སྤྱོད་ཡུལ་ཏེ་དམིགས་པ་གཉིས་ཀ་(ཐ་དད་པ་)ལས་ནི་འགོག་པ་དང་ལམ་ཤེས་པ་དག་ཕྱེ་སྟེ། འགོག་པ་ལ་སོགས་པ་དང་ལམ་ལ་སོགས་པའི་རྣམ་པའང་ཐ་དད་ཅིང་དམིགས་པ་འདུས་མ་བྱས་དང་འདུས་བྱས་ཀྱང་ཐ་དད་པའི་ཕྱིར་རོ།། (གཞན་སེམས་ཤེས་པར་བྱའོ་ཞེས། །) སྦྱོར་བ་ལས་ནི་ཕ་རོལ་ཀྱི་སེམས་ཤེས་པ་ཕྱེ་སྟེ། དེས་སེམས་བྱུང་ཡང་ཤེས་མོད་ཀྱི་གཞན་གྱི་སེམས་ཤེས་པར་བྱའོ་ཞེས་སྦྱོར་གྱི་སེམས་བྱུང་ཤེས་པར་བྱའོ་ཞེས་མི་སྦྱོར་བའི་ཕྱིར་རོ། །བྱ་བ་བྱས་པ་ཉིད་ལས་ནི་ཟད་པ་ཤེས་པ་སྟེ། བྱ་བ་བྱས་པའི་རྒྱུད་ལ་དང་པོ་ཉིད་དུ་སྐྱེ་བའི་ཕྱིར་རོ། །སྐལ་མཉམ་གྱི་རྒྱུ་རྒྱས་པ་ལས་ནི་མི་སྐྱེ་བ་ཤེས་པ་སྟེ། ཟག་མེད་ཀྱི་ཤེས་པ་སྔར་བསྐྱེད་པ་ཐམས་ཅད་ཀྱི་འབྲས་བུ་ཡིན་པའི་ཕྱིར་རོ། །དེས་ན་རྒྱུ་བདུན་པོ་དེ་དག་གིས་ཤེས་པ་བཅུར་རྣམ་པར་བཞག་པ་ཡིན་ནོ་ཞེས་བྱེ་བྲག་ཏུ་སྨྲ་བ་འཆད་དོ། །འོན་ཀྱང་འདི་དག རང་བཞིན་དང་ནི་གཉེན་པོ་དང༌། །ཡུལ་དང་ཤེས་པའི་རྣམ་པ་ལས། །ཀུན་རྫོབ་ཤེས་སོགས་རྣམ་པ་བཅུར། །འདྲེན་པས་རབ་ཏུ་གསུངས་པ་ཡིན། །ཞེས་ཤེས་པར་བྱའོ། །ཆོས་ཤེས་འདོད་པའི་གཉེན་པོ་ཡིན་ནོ་ཞེས་བྱ་བའང་འདོད་པའི་སྤང་བྱ་རིས་ལྔ་པོ་ཐམས་ཅད་ཀྱི་གཉེན་པོ་ཡིན་པའི་ཕྱིར་དང༌། གཉེན་པོ་ཆོས་ཤེས་མཐོང་སྒོམ་གྱི་ལམ་གྱིས་བསྡུས་པ་བདེན་བཞི་ལ་དམིགས་པ་ཐམས་ཅད་ཡིན་པའི་ཕྱིར་བཤད་པ་ཡིན་གྱི།
དེར་མ་ཟད་གཞན་ཡང་ཆོས་ཤེས་ཀྱིས་ཁམས་གོང་མ་གཉིས་ཀྱི་གཉེན་པོ་བྱེད་པའང་ཡོད་དེ། གང་ཞེ་ན།
རྩ་བ། སྒོམ་པའི་ལམ་ལ་འགོག་པ་འམ། །
ལམ་ལ་ཆོས་ཤེས་གང་ཡིན་དེ། །
ཁམས་གསུམ་གྱི་ནི་གཉེན་པོ་ཡིན། །
འདོད་པའི་ཁམས་གྱི་རྗེས་མ་ཡིན། །
སྒོམ་པའི་ལམ་ལ་འགོག་པ་ལ་ཆོས་ཤེས་པའམ། ལམ་ལ་ཆོས་ཤེས་པ་གང་ཡིན་པ་དེ་དག་ནི་འདོད་པ་ལ་སོགས་པ་ཁམས་གསུམ་ཆར་གྱི་གཉེན་པོ་ཡིན་ཏེ། འདོད་པའི་རྟེན་ཅན་གྱི་འཕགས་པས་འདོད་པའི་སྒོམ་སྤང་དགུ་ཆོས་ཤེས་པས་རིམ་གྱིས་སྤངས་ནས་ཁམས་གོང་མའི་སྒོམ་སྤང་ཡང་སྔར་འདྲིས་པའི་ལམ་དེ་ཉིད་བསྐྱེད་ནས་སྤོང་བ་དག་སྲིད་པའི་ཕྱིར་རམ་ཡང་ན་འགོག་ལམ་ལ་ཆོས་ཤེས་ཀྱི་དམིགས་པ་འགོག་ལམ་གཉིས་ནི་ཟག་མེད་ཡིན་པས་ཁམས་སུ་མ་གཏོགས་པས་དམིགས་པ་དམན་པ་མ་ཡིན་པས་དེ་དག་ལ་དམིགས་པའི་ཆོས་ཤེས་ནི་ཁམས་གསུམ་གའི་གཉེན་པོ་ཡིན་པ་སྲིད་པའི་ཕྱིར་རོ། །
འོ་ན་སྡུག་བསྔལ་དང་ཀུན་འབྱུང་ལ་ཆོས་ཤེས་པ་ཡང་ཁམས་གོང་མའི་གཉེན་པོར་འགྱུར་རོ་ཞེ་ན། མ་ཡིན་ཏེ། སྡུག་བསྔལ་དང་ཀུན་འབྱུང་ལ་ཆོས་ཤེས་པའི་དམིགས་པ་ནི་འདོད་པའི་བདེན་པ་དང་པོ་གཉིས་ཟག་བཅས་ཡིན་པས་དམིགས་པ་དམན་པས་དེ་དག་ལ་དམིགས་པའི་ཆོས་ཤེས་ནི་ཁམས་གོང་མ་གཉིས་ཀྱི་གཉེན་པོ་མ་ཡིན་ཏེ། རྣམ་པར་སུན་འབྱིན་པ་ཡིད་ལ་བྱེད་པ་ཡིན་པའི་(ཕྱིར་དམན་པས་མཆོག་སུན་འབྱིན་མི་ནུས་པའི་)ཕྱིར་རོ་ཞེས་ཊཱིཀ་བྱེད་དག་འཆད་དོ། །ཁ་ཅིག་སྤང་བྱ་སྤོང་བ་ལ་དེ་ལ་དངོས་སུ་གནོད་པའམ་ཡང་ན་སྤང་བྱ་དེ་དང་འགལ་བ་ལ་ཡོན་ཏན་དུ་ལྟ་བའི་ཤུགས་ལ་སྤོང་བ་ཡིན་པ་ན་སྡུག་བསྔལ་དང་ཀུན་འབྱུང་ལ་ཆོས་ཤེས་པ་ནི་དེ་ལྟ་མ་ཡིན་ཏེ། (སྒོམ་པའི་ཞེས་སྨོས་ཀྱི་མཐོང་ལམ་མ་སྨོས་པ་ནི།) ཁམས་གོང་མའི་སྤང་བྱ་ལ་དངོས་སུ་མི་དམིགས་པའི་ཕྱིར་དང༌། འགལ་ཟླ་ཡོན་ཏན་དུ་ལྟ་བའང་མ་ཡིན་ཏེ། འོག་མའི་བདེན་པ་ལ་དམིགས་ནས་ཡིད་སྐྱོ་བར་བྱེད་པའི་ཕྱིར་རོ། །འགོག་ལམ་ལ་དམིགས་པའི་ཆོས་ཤེས་ནི་ཁམས་གོང་མའི་སྤང་བྱ་དང་འགལ་བ་ལ་ཡོན་ཏན་དུ་ལྟ་བའི་ཕྱིར་ཤུགས་ལ་སྤོང་བ་ཡིན་ནོ་ཞེས་འཆད་དོ། །མཐོང་ལམ་གྱི་ལ་འགོག་ལམ་ལ་ཆོས་ཤེས་པ་དག་གོང་མའི་གཉེན་པོ་མ་ཡིན་པ་ནི་བདེན་པ་ལ་དམིགས་པའི་ལོག་ཞུགས་ཐ་དད་པའི་ཕྱིར་ཏེ་མཐོ་ལ་མིར་འཛིན་པའི་ལོག་རྟོག་ཐག་པ་ལ་དེར་ཤེས་པས་མི་སྤོང་བ་བཞིན་ནོ། །དེའི་ཕྱིར་ཊཱིཀ་བྱེད་དག་གིས་སྒོམ་པའི་ལམ་ལ་ཞེས་སྨོས་པ་ནི་ཁམས་གོང་མ་གཉིས་ཀྱི་མཐོང་སྤང་རྣམས་ནི་རྗེས་སུ་ཤེས་པའི་བཟོད་པས་གཞོམ་པར་བྱ་བ་ཡིན་ནོ་ཞེས་བཤད་དོ། །
འོ་ན་འགོག་ལམ་ལ་རྗེས་ཤེས་སྒོམ་ལམ་གྱིས་བསྡུས་པས་ཀྱང་འདོད་པའི་གཉེན་པོ་བྱེད་པར་འགྱུར་རོ་ཞེ་ན།
རྩ་བ། འདོད་པའི་ཁམས་གྱི་རྗེས་མ་ཡིན། །
འདོད་པའི་ཁམས་ཀྱི་སྤང་བྱའི་གཉེན་པོ་ནི་རྗེས་སུ་ཤེས་པ་སྒོམ་ལམ་གྱིས་བསྡུས་པའང་རྣམ་པ་ཐམས་ཅད་དུ་མ་ཡིན་ཏེ། (འདོད་པའི་སྤང་བྱ་)ཆོས་ཤེས་པས་སྤངས་ཟིན་པའི་ཕྱིར་དང༌། འོག་མའི་སྤང་བྱ་མ་སྤངས་པར་གོང་མའི་གཉེན་པོ་སྐྱེ་བའང་མི་སྲིད་པའི་ཕྱིར་རོ། །གང་ཡང་སློབ་དཔོན་གང་སྤེལ་ན་རེ་ཆོས་ཤེས་པས་ནི་གོང་མའི་སྒོམ་སྤང་སྤོང་སྟེ། དེའི་ཡུལ་ཅན་འདོད་པའི་ཀུན་འགྲོ་སྤངས་པའི་ཕྱིར་དགྲ་བཅོམ་ནས་ཡུལ་འཇིག་པར་བྱེད་པ་བཞིན་ནོ། །རྗེས་སུ་ཤེས་པ་ལ་ནི་དེ་ལྟ་བུའི་བྱ་བ་མེད་པའི་ཕྱིར་རོ་ཞེས་ཟེར་བ་དེ་ཡང་མི་རིགས་ཏེ། དེ་ལྟ་ན་སྡུག་བསྔལ་དང་ཀུན་འབྱུང་ལ་ཆོས་ཤེས་པའང་གོང་མའི་སྒོམ་སྤང་གི་གཉེན་པོར་འགྱུར་ཏེ། ཡུལ་ཅན་འདོད་པའི་ཀུན་འགྲོའི་ཉོན་མོངས་པའི་གཉེན་པོ་བྱེད་པའི་ཕྱིར་རོ་ཞེས་བྱ་བ་འདི་སྤང་དགོས་སོ། །
གསུམ་པ་ནི།
རྩ་བ། ཆོས་ཤེས་པ་དང་རྗེས་སུ་ཤེས། །
རྣམ་པ་བཅུ་དྲུག་ཀུན་རྫོབ་ནི། །
དེ་བཞིན་གཞན་དུའང་་་་་་་་་་། །
ཤེས་པ་བཅུ་པོ་དེ་དག་ལས་ཆོས་ཤེས་པ་དང་རྗེས་སུ་ཤེས་པ་ནི་མི་རྟག་པ་ལ་སོགས་པ་རྣམ་པ་བཅུ་དྲུག་ཅན་ཡིན་ནོ། །ཀུན་རྗོབ་ཤེས་པ་ནི་སྦྱོར་ལམ་ན་ཡོད་པ་དག་གཉིས་པོ་དེ་བཞིན་དུ་རྣམ་པ་བཅུ་དྲུག་ཅན་ཡང་ཡིན་ལ། གནས་སྐབས་གཞན་ན་ཡོད་པ་ནི་རྣམ་པ་གཞན་དུའང་ཡིན་ཏེ། མི་སྡུག་པ་དང་དབུགས་འབྱུང་རྔུབ་དང་བྱམས་སོགས་སྒོམ་པ་ན་རང་དང་སྤྱིའི་མཚན་ཉིད་འཛིན་པའི་ཕྱིར་རོ། །དེ་དག་ཏུ་མ་ཟད་བུམ་པ་དང་སྣམ་བུ་དང་ཟོ་ཞིག་འཐུང་ཞིག་སོང་ཞིག་འདུག་ཅིག་ཅེས་པ་ལ་སོགས་པ་རང་སྤྱིའི་མཚན་ཉིད་ལས་གཞན་པའི་རྣམ་པ་ཅན་ཡང་ཡོད་དོ་ཞེས་ཊཱིཀ་བྱེད་དག་འཆད་དོ། །
རྩ་བ། ་་་་་་་་་་་་་་་་་་་་་རང་རང་གི །
བདེན་པའི་རྣམ་པས་བཞི་ཡིན་ནོ། །
ཕ་རོལ་ཡིད་ཤེས་དྲི་མེད་ཀྱང༌། །
དེ་བཞིན་དྲི་མ་དང་བཅས་ནི། །
ཤེས་བྱ་རང་གི་མཚན་ཉིད་རྣམ། །
རྫས་རེ་རེ་ཞིག་སྤྱོད་ཡུལ་ལོ། །
བདེན་པ་བཞི་ཤེས་པ་ནི་རང་རང་གི་བདེན་པའི་རྣམ་པ་ཅན་དུ་འཇུག་པས་རྣམ་པ་བཞི་བཞི་པ་ཡིན་ནོ།། (གཞན་སེམས་ཤེས་པའི་ཡུལ་གྱི་)ཕ་རོལ་ཡིད་ཤེས་དྲི་མེད་ཀྱང་ལམ་ཤེས་པ་ཡིན་པས་ལམ་ཤེས་པ་དེ་བཞིན་དུ་ལམ་བདེན་གྱི་རྣམ་པ་བཞི་ཅན་ཡིན་ཞིང༌། དྲི་མ་དང་བཅས་པའི་ཕ་རོལ་ཡིད་ཤེས་ནི་ཤེས་བྱ་སེམས་དང་སེམས་ལས་བྱུང་བའི་རང་གི་མཚན་ཉིད་ཀྱི་རྣམ་པ་ཅན་ཡིན་(ཏེ་འདོད་ཆགས་དང་བཅས་པ་ལ་སོགས་པ་ཤེས་པ་ཡིན་)ལ། དེ་ཡང་སེམས་འཛིན་པའི་ཚེ་སེམས་བྱུང་དང་སེམས་བྱུང་འཛིན་པའི་ཚེ་སེམས་མི་འཛིན་ལ། ཚོར་བ་འཛིན་པའི་འདུ་ཤེས་ལ་སོགས་པ་ཕན་ཚུན་མི་འཛིན་པས་ཕ་རོལ་སེམས་ཤེས་ཟག་བཅས་ཟག་མེད་གཉིས་ཀའང་སེམས་དང་སེམས་བྱུང་རྫས་རེ་རེ་ཞིག་སྤྱོད་ཡུལ་དུ་བྱེད་པ་ཡིན་ནོ། །
འོ་ན་བཅོམ་ལྡན་འདས་ཀྱིས་གནས་མང་པོ་ལས་འདོད་ཆགས་དང་བཅས་པའི་སེམས་ལ་ཡང་འདོད་ཆགས་དང་བཅས་པའི་སེམས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་ཡང་འདོད་ཆགས་དང་བྲལ་བའི་སེམས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བ་ནས་དེ་བཞིན་དུ་ཞེ་སྡང་དང་གཏི་མུག་དང་བཅས་བྲལ་དང༌། ཀུན་ཏུ་བསྡུས་པ་དང་རྣམ་པར་གཡེངས་པ་དང༌། ཞུམ་པ་དང་རབ་ཏུ་བཟུང་བ་དང༌། ཆུང་ངུ་དང་ཆེན་པོར་གྱུར་པ་དང༌། རྒོད་པ་དང༌། དེ་མ་ཡིན་པ་དང༌། ཉེ་བར་མ་ཞི་བ་དང་ཉེ་བར་ཞི་བ་དང༌། མཉམ་པར་མ་བཞག་པ་དང་བཞག་པ་དང༌། མ་བསྒོམས་པ་དང་བསྒོམས་པ་དང༌། རྣམ་པར་མ་གྲོལ་བ་དང་རྣམ་པར་གྲོལ་བའི་སེམས་ལ་རྣམ་པར་གྲོལ་བའི་སེམས་སོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་པའི་བར་དུ་གསུངས་པ་དང་འགལ་བར་འགྱུར་རོ་ཞེ་ན་བྱེ་བྲག་ཏུ་སྨྲ་བ་ནི་དེ་དག་རྫས་རེ་རེ་བའི་སྤྱོད་ཡུལ་ཅན་ཡིན་པའི་ཕྱིར་མཚུངས་ལྡན་གཉིས་ཅིག་ཅར་འཛིན་པ་ནི་མ་ཡིན་ཏེ། དཔེར་ན་ཤེས་པས་གོས་སོ་སྙམ་དུ་འཛིན་པའི་ཚེ་དྲི་མ་མི་འཛིན་ལ་དྲི་མའོ་སྙམ་དུ་འཛིན་པའི་ཚེ་གོས་མི་འཛིན་པ་བཞིན་ནོ། །
མདོ་ལས། འདོད་ཆགས་དང་བཅས་པའི་སེམས་ཞེས་གསུངས་པའི་འདོད་ཆགས་དང་བཅས་པ་ནི་འདོད་ཆགས་དང་མཚུངས་པར་ལྡན་པ་འདྲེས་པའི་འདོད་ཆགས་དང་བཅས་པ་དང༌། དེ་དང་མཚུངས་པར་མི་ལྡན་ཡང་འདོད་ཆགས་ཀྱི་ཐོབ་པ་དང་བཅས་པའམ་འདོད་ཆགས་རྒྱས་འགྱུར་གྱི་དམིགས་པ་ཡིན་པས་ལྡན་པའི་འདོད་ཆགས་དང་བཅས་པ་གཉིས་ལས་དང་པོ་ནི་འདྲེས་པ་དང་ལྡན་པ་གཉིས་ཀས་འདོད་ཆགས་དང་བཅས་པ་ཡིན་ལ། གཉིས་པ་ནི་དེ་ལས་གཞན་པའི་ཟག་བཅས་ཐམས་ཅད་དེ། དེ་ནི་བདེན་པ་ཁོ་ནས་འདོད་ཆགས་དང་བཅས་པ་ཡིན་ནོ། །དེ་ལྟར་གཉིས་ལས་འདིར་ནི་ལྡན་པའི་འདོད་ཆགས་དང་བཅས་པ་ཉིད་ལ་དེར་དགོངས་པ་ཡིན་ནོ། །བྲལ་བ་ནི་གཉིས་ཀ་དང་བྲལ་བ་སྟེ་ཟག་པ་མེད་པའི་སེམས་སོ་ཞེས་འདོད་དོ། །ཁ་ཅིག་ན་རེ་མདོ་འདིར་ནི་འདོད་ཆགས་དང་མཚུངས་པར་ལྡན་པའི་སེམས་ནི་འདོད་ཆགས་དང་བཅས་པ་ཡིན་ལ་འདོད་ཆགས་ཀྱི་གཉེན་པོ་ནི་འདོད་ཆགས་དང་བྲལ་བར་བཤད་པ་ཡིན་ཏེ། གལ་ཏེ་འདོད་ཆགས་དང་མཚུངས་པར་མི་ལྡན་པ་འདོད་ཆགས་དང་བྲལ་བ་ཡིན་པ་ན་ནི་ཞེ་སྡང་ལ་སོགས་པ་ཉོན་མོངས་པ་གཞན་དང་མཚུངས་པར་ལྡན་པའི་སེམས་ཀྱང་འདོད་ཆགས་དང་བྲལ་བ་ཡིན་པར་འགྱུར་བ་ཞིག་ན་འདོད་ཆགས་དང་མཚུངས་པར་མི་ལྡན་པ་དེ་འདོད་ཆགས་དང་བྲལ་བ་ནི་མ་བཤད་དེ། ཞེ་སྡང་དང་བཅས་པ་དང་གཏི་མུག་དང་བཅས་པ་ཞེས་བྱ་བ་ལ་སོགས་པ་འབྱུང་བའི་ཕྱིར་རོ་ཞེས་ཟེར་རོ། །
ཆོས་མངོན་པ་བ་དག་ན་རེ་དེ་ལྟ་ན་སེམས་ཉོན་མོངས་པ་ཅན་མ་ཡིན་པ་མ་བསྒྲིབས་ལུང་མ་བསྟན་ནི་འདོད་ཆགས་དང་བཅས་བྲལ་གཉིས་ཀ་མ་ཡིན་པར་འགྱུར་ཏེ། རིམ་པ་ལྟར་འདོད་ཆགས་དང་མཚུངས་པར་མི་ལྡན་ཞིང༌། གཉེན་པོའང་མ་ཡིན་པའི་ཕྱིར་རོ།། འདོད་ཆགས་དང་མཚུངས་པར་མི་ལྡན་པ་ཙམ་ཆགས་བྲལ་དུ་མི་འདོད་པས་ཉོན་མོངས་པ་གཞན་དང་མཚུངས་པར་ལྡན་པ་ཆགས་བྲལ་དུའང་མི་འགྱུར་རོ། །དེས་ན་མཚུངས་པར་ལྡན་པ་དང༌། མི་ལྡན་པའི་འདོད་ཆགས་དང་བཅས་པ་གཉིས་ལས་མདོ་འདིར་ནི་ལྡན་པའི་འདོད་ཆགས་དང་བཅས་པ་ཉིད་ལ་བཤད་པར་རིག་པར་བྱའོ་ཞེས་ཟེར་རོ། །དེ་བཞིན་དུ་ཞེ་སྡང་དང་གཏི་མུག་དང་བཅས་པ་དང་བྲལ་བའང་ཤེས་པར་བྱའོ། །ཀུན་ཏུ་བསྡུས་པ་དང་རྣམ་པར་གཡེངས་པ་ནི་བྱེ་བྲག་ཏུ་སྨྲ་བ་རྣམས་ན་རེ་རིམ་པ་ལྟར་རྣམ་གཡེང་དང་མཚུངས་པར་མི་ལྡན་པ་དང་ལྡན་པའི་བྱེ་བྲག་གིས་དམིགས་པ་ལ་སེམས་མངོན་པར་སྡུད་པའི་ཕྱིར་དགེ་བ་དང་ཉོན་མོངས་ཅན་ཡིན་ནོ་ཞེས་ཟེར་རོ། །
ནུབ་ཕྱོགས་པ་རྣམས་ན་རེ་དེ་གཉིས་ནི་རིམ་པ་ལྟར་གཉིད་ཉོན་མོངས་ཅན་དང་གཉིད་ལས་གཞན་པའི་ཉོན་མོངས་དང་མཚུངས་པར་ལྡན་པ་ཡིན་པས་གཉིས་ཀའང་ཉོན་མོངས་ཅན་ཡིན་ནོ་ཞེས་ཟེར་རོ། །ཁ་ཆེ་བ་ན་རེ། དེ་ནི་མི་རིགས་ཏེ། དེ་ལྟ་ན་སེམས་དེ་ཉིད་ཉོན་མོངས་ཅན་གྱི་གཉིད་དང་མཚུངས་པར་ལྡན་པའི་ཕྱིར་བསྡུས་པའང་ཡིན་ལ། ཉོན་མོངས་ཅན་ཡིན་པའི་ཕྱིར་རྣམ་པར་གཡེངས་པའང་ཡིན་པར་འགྱུར་བས་དེ་གཉིས་མཚན་ཉིད་འཆོལ་པའི་སྐྱོན་དུ་འགྱུར་བའི་ཕྱིར་དང༌། བསྟན་བཅོས་ལས། སེམས་ཀུན་དུ་བསྡུས་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ཤེས་པའི་ཤེས་པ་ནི་བཞི་སྟེ། ཆོས་ཤེས་པ་དང༌། རྗེས་སུ་ཤེས་པ་དང༌། ཀུན་རྫོབ་ཤེས་པ་དང༌། ལམ་ཤེས་པའོ་ཞེས་འབྱུང་བ་དང་འགལ་བའི་ཕྱིར་ཏེ། གལ་ཏེ་ཀུན་དུ་བསྡུས་པ་གཉིད་དང་མཚུངས་ལྡན་ལ་འདོད་ན་རྗེས་ཤེས་དང་ལམ་ཤེས་པས་ཀུན་དུ་བསྡུས་པའི་སེམས་ལ་མི་དམིགས་པར་འགྱུར་ཏེ། ཁམས་གོང་མ་ན་གཉིད་མེད་ཅིང༌། འདོད་ཁམས་ན་གཉིད་ཡོད་ཀྱང་རྗེས་ཤེས་འདོད་ཁམས་ལ་མི་དམིགས་པའི་ཕྱིར་དང༌། ལམ་ཤེས་པ་ནི་ལམ་བདེན་ཁོ་ན་ལ་དམིགས་ལ་ལམ་བདེན་ནི་གཉིད་དང་མཚུངས་པར་མི་ལྡན་པའི་ཕྱིར་རོ། །
དེས་ན་ཁྱོད་ལྟར་ན་བསྟན་བཅོས་ལས་འདི་སྐད་དུ་དེ་ཤེས་པའི་ཤེས་པ་ནི་གཉིས་ཏེ། ཆོས་ཤེས་པ་དང༌། ཀུན་རྫོབ་ཤེས་པའོ་ཞེས་བརྗོད་དགོས་པར་འགྱུར་ཏེ། རྗེས་ཤེས་དང་ལམ་ཤེས་པས་དེ་མི་ཤེས་པའི་ཕྱིར་རོ། །ཁོ་བོ་ཅག་ལྟར་ན་ནི་ཀུན་དུ་བསྡུས་པའི་སེམས་ནི་དགེ་བ་ཁོ་ན་ཡིན་པས་མཚན་ཉིད་འཆོལ་བའི་ཉེས་པར་ཡང་མི་འགྱུར་ལ། བསྟན་བཅོས་དང་འགལ་བའང་མེད་དེ། ཀུན་དུ་བསྡུས་པའི་སེམས་དགེ་བ་ནི་ཁམས་གསུམ་གྱིས་བསྡུས་པ་ཟག་བཅས་དང་མ་བསྡུས་པ་ཟག་མེད་གཉིས་ཀ་ཡིན་པས་ཁམས་གོང་མ་གཉིས་ཀྱི་སེམས་དགེ་བ་ཟག་བཅས་ལ་དམིགས་པ་ཟག་མེད་ཀྱི་ཤེས་པ་ནི་རྗེས་ཤེས་ཡིན་ལ། ལམ་བདེན་གྱིས་བསྡུས་པའི་སེམས་དགེ་བ་ཟག་མེད་ལ་དམིགས་པ་ནི་ལམ་ཤེས་པའང་ཡིན་པས་རྗེས་ཤེས་དང་ལམ་ཤེས་ཀྱི་དམིགས་པར་ཡང་གྲུབ་པའི་ཕྱིར་རོ་ཞེས་ཟེར་རོ། །
དེ་བཞིན་དུ་ཞུམ་པ་ནི་ལེ་ལོ་དང་མཚུངས་པར་ལྡན་པའི་ཕྱིར་ཉོན་མོངས་ཅན་ནོ། །རབ་ཏུ་བཟུང་བ་ནི་བརྩོན་འགྲུས་དང་མཚུངས་པར་ལྡན་པའི་ཕྱིར་དགེ་བའོ། །ཆུང་ངུ་ནི་ཆགས་སྡང་གཉིས་མཚུངས་པར་མི་ལྡན་པས་གཏི་མུག་དང་ཆགས་སྡང་གཉིས་པོ་གང་རུང་རེའི་རྩ་བ་གཉིས་དང་མཚུངས་པར་ལྡན་པ་དང༌། འབད་པས་བསྒྲུབ་པར་བྱ་བ་མ་ཡིན་པ་དང༌། དེ་དང་འདྲ་བ་མ་འོངས་པ་ཐོབ་པ་མེད་པ་དང༌། རྗེས་སུ་འབྲང་བའི་གཟུགས་མེད་པས་རྣམ་ཤེས་ལ་ཚོར་བ་ལ་སོགས་པ་ཕུང་པོ་གསུམ་གྱི་རྗེས་སུ་འབྲང་བ་དང་བཅས་པ་དང༌། ལོག་ལྟས་ཀྱང་དགེ་བ་གཏན་དུ་གཅོད་མི་ནུས་པས་རིམ་པ་ལྟར་རྩ་བ་དང་རིན་དང་འཁོར་དང་རྗེས་སུ་འབྲང་བ་དང་སྟོབས་ཆུང་བས་དགེ་བ་ཆུང་ངུ་དག་གིས་བསྟེན་པའི་ཕྱིར་ཉོན་མོངས་ཅན་ནོ། །
ཆེན་པོ་ནི་མ་ཆགས་པ་ལ་སོགས་པ་གསུམ་ཕན་ཚུན་མེད་ན་མི་འབྱུང་བས་རྩ་བ་གསུམ་དང་མཚུངས་པར་ལྡན་པ་དང༌། ཚོགས་ཆེན་པོས་བསྒྲུབ་པར་བྱ་བ་ཡིན་པ་(ས་རིན་ཆེ་བ་)དང༌། རྙེད་དང་བསྟེན་ཅེས་བྱ་བ་ནི། །དགེ་བ་འདུས་བྱས་ཐོབ་པའོ། །ཞེས་པས་དགེ་བ་འདུས་བྱས་ལ་དེ་དང་འདྲ་བ་མ་འོངས་པ་ཐོབ་པ་ཡོད་པ་དང༌། རྣམ་ཤེས་ལ་འཁོར་ཚོར་བ་ལ་སོགས་པ་གསུམ་དང་གཟུགས་ཀྱི་ཕུང་པོ་བསམ་གཏན་ཟག་མེད་ཀྱི་སྡོམ་པས་བསྡུས་པ་དང་བཅས་པས་ཕུང་པོ་བཞིའི་རྗེས་སུ་འབྲང་བ་དང་བཅས་པ་དང༌། སྡུག་བསྔལ་ལ་ཆོས་ཤེས་པའི་བཟོད་པ་གཅིག་གིས་ཀྱང་མཐོང་སྤང་གི་ཕྲ་རྒྱས་བཅུ་གཏན་དུ་འཇོམས་པས་རིམ་པ་ལྟར་རྩ་བ་དང་རིན་དང་འཁོར་དང་རྗེས་སུ་འབྲང་བ་དང་སྟོབས་ཆེ་བས་དགེ་བ་ཆེན་པོ་དག་གིས་བསྟེན་པའི་ཕྱིར་དགེ་བ་ཡིན་ནོ། །རྒོད་པ་དང་རྒོད་པ་མ་ཡིན་པ་ནི་རིམ་པ་ལྟར་རྒོད་པ་དང་མཚུངས་པར་ལྡན་པ་དང་དེའི་གཉེན་པོ་ཡིན་པའི་ཕྱིར་ཉོན་མོངས་ཅན་དང་དགེ་བའོ། །རྣམ་པར་མ་ཞི་བ་དང་ཞི་བའང་དེ་དང་འདྲའོ། །མཉམ་པར་མ་བཞག་པ་དང་བཞག་པ་ནི་རིམ་པ་ལྟར་རྣམ་གཡེང་དང་མཚུངས་པར་ལྡན་པ་དང་དེའི་གཉེན་པོ་ཡིན་པའི་ཕྱིར་ཉོན་མོངས་ཅན་དང་དགེ་བའོ། །མ་བསྒོམས་པ་ནི་སྔོན་མ་ཐོབ་པ་ལས་འཐོབ་པ་དང༌། ཐོབ་ཟིན་མངོན་དུ་བྱེད་པའི་བསྟེན་པའི་སྒོམ་པ་དག་གི་མ་བསྒོམ་པའི་ཕྱིར་ཉོན་མོངས་ཅན་ནོ། །བསྒོམ་པ་ནི་དེ་གཉིས་ཀྱིས་བསྒོམས་པའི་ཕྱིར་དགེ་བའོ། །རྣམ་པར་མ་གྲོལ་བ་ནི་ཉོན་མོངས་པ་དང་མཚུངས་པར་ལྡན་པ་དང༌། ཉོན་མོངས་པ་ཟད་པའི་རྒྱུད་ལ་མི་སྐྱེ་བས་གོ་རིམ་བཞིན་དུ་རང་བཞིན་དང་རྒྱུད་རྣམ་པར་གྲོལ་བ་དག་གིས་རྣམ་པར་མ་གྲོལ་བས་ཉོན་མོངས་ཅན་དང༌། རྣམ་པར་གྲོལ་བ་ནི་ཉོན་མོངས་པ་དང་མཚུངས་པར་མི་ལྡན་པ་དང་ཉོན་མོངས་པ་ཟད་པའི་རྒྱུད་ལ་སྐྱེ་བས་རིམ་པ་ལྟར་རང་བཞིན་དང་རྒྱུད་རྣམ་པར་གྲོལ་བ་དག་གིས་རྣམ་པར་གྲོལ་བས་དགེ་བ་ཡིན་ནོ་ཞེས་འདོད་དོ། །
སློབ་དཔོན་ནི་དེ་ལྟར་བྱས་ན་མདོ་དང་མི་མཐུན་པ་དང༌། སོ་སོའི་ཁྱད་པར་མ་བཤད་པ་ཡིན་ཏེ། དེ་ལ་དང་པོ་ནི་མདོ་ལས། ཇི་ལྟར་ན་སེམས་ནང་དུ་ཀུན་དུ་བསྡུས་པ་ཡིན་ཞེ་ན། སེམས་གང་རྨུགས་པ་དང་གཉིད་དང་ལྷན་ཅིག་པར་གྱུར་ཅིང་ནང་དུ་ཀུན་དུ་འགོག་པ་དང་ལྷན་ཅིག་པར་གྱུར་ལ་ལྷག་མཐོང་དང་མཚུངས་པར་མི་ལྡན་པ་ཡིན་ནོ། །ཇི་ལྟར་ན་ཕྱི་རོལ་ཏུ་རྣམ་པར་གཡེངས་པ་ཡིན་ཞེ་ན། སེམས་གང་འདོད་པའི་ཡོན་ཏན་ལྔ་རྣམས་ལ་རྗེས་སུ་གཡེངས་པ་ཡིན་ཞིང་རྣམ་པར་འཕྲོས་པ་ཡིན་ནོ་ཞེས་ཀུན་དུ་བསྡུས་པ་ནི་རྨུགས་གཉིད་དང་མཚུངས་ལྡན་ལ་བཤད་པས་གཉིས་ཀའང་ཉོན་མོངས་ཅན་དུ་བཤད་པའི་ཕྱིར་རོ། །འོ་ན་བསྟན་བཅོས་ལས། སེམས་ཀུན་ཏུ་བསྡུས་པ་ཡང་དག་པ་བཞིན་རབ་ཏུ་ཤེས་སོ་ཞེས་པ་ནས་ལམ་ཤེས་སོ་ཞེས་པའི་བར་དུ་བཤད་པ་དང་འགལ་ལོ་ཞེ་ན། སངས་རྒྱས་ཀྱིས་མ་གསུངས་པས་བསྟན་བཅོས་དང་འགལ་བ་ནི་སླའི་མདོའི་དོན་སྤོང་བ་ནི་རིགས་པ་མ་ཡིན་ནོ། །སོ་སོའི་ཁྱད་པར་མ་བཤད་པ་ནི་རྣམ་པར་གཡེངས་པ་དང་ཞུམ་པ་དང་ཆུང་ངུ་དང་རྒོད་པ་དང་རྣམ་པར་མ་ཞི་བ་དང་མཉམ་པར་མ་བཞག་པ་དང་མ་བསྒོམས་པ་དང་རྣམ་པར་མ་གྲོལ་བ་ཞེས་བྱ་བ་བརྒྱད་པོ་ཐམས་ཅད་ཉོན་མོངས་ཅན་དང༌། ཀུན་དུ་བསྡུས་པ་དང་རབ་ཏུ་བཟུང་བ་དང་ཆེན་པོ་དང་རྒོད་པ་མ་ཡིན་པ་དང་རྣམ་པར་ཞི་བ་དང་མཉམ་པར་བཞག་པ་དང་བསྒོམས་པ་དང་རྣམ་པར་གྲོལ་བ་ཞེས་བྱ་བ་བརྒྱད་དགེ་བ་ཁོ་ནར་བཤད་པས་སོ་སོའི་མཚན་ཉིད་ཐ་དད་མ་བཤད་པའི་ཕྱིར་རོ། །
བྱེ་བྲག་ཏུ་སྨྲ་བ་ན་རེ་དེ་དག་ཉོན་མོངས་ཅན་དང་དགེ་བར་མཚུངས་ཀྱང་སོ་སོའི་ཉེས་པ་དང་ཡོན་ཏན་གྱི་ཁྱད་པར་བཤད་ཟིན་པའི་ཕྱིར་སོ་སོའི་མཚན་ཉིད་མ་བཤད་པར་མ་གྲུབ་བོ་ཞེས་ཟེར་མོད་ཀྱི་འོན་ཀྱང་མདོ་དང་འགལ་བའི་ཉེས་པ་ནི་ཡོད་དོ། །དེའི་ཕྱིར་མདོའི་དོན་ནི་འདོད་ཆགས་དང་མཚུངས་པར་ལྡན་པ་དང་མཚུངས་པར་མི་ལྡན་པའི་སེམས་ནི་རིམ་པ་ལྟར་འདོད་ཆགས་དང་བཅས་པ་དང་བྲལ་བ་ཡིན་ནོ་ཞེས་བྱ་བ་ལ་སོགས་པར་ཤེས་པར་བྱ་སྟེ། ཏིང་ངེ་འཛིན་མི་རྩོམ་པ་དང༌། རྩོམ་ལ་མ་ཐོབ་པ་དང༌། ཐོབ་པའི་དབང་དུ་བྱས་ནས་དྲུག་དང་བཅུ་གཉིས་དང་བཞི་རིམ་པ་བཞིན་དུ་གསུངས་སོ་ཞེས་འཆད་དོ། །གཞན་ཡང་ཕ་རོལ་སེམས་ཤེས་ཀྱིས་སེམས་འདི་ཆགས་པ་དང་བཅས་པའོ་ཞེས་བྱ་བར་ཤེས་ཀྱི་གཟུགས་འདི་ལ་ཆགས་པ་དང་བཅས་པའོ་ཞེས་སེམས་དེའི་དམིགས་ཡུལ་ནི་མི་ཤེས་ཏེ། གལ་ཏེ་ཤེས་ན་གཟུགས་ལ་དམིགས་པས་ཕ་རོལ་སེམས་ཤེས་མ་ཡིན་པར་འགྱུར་བའི་ཕྱིར་དང༌། གཞན་གྱི་སེམས་དེས་རང་གི་སེམས་ལ་དམིགས་པ་ན་རང་གི་སེམས་ཀྱི་ངོ་བོའང་འཛིན་པར་འགྱུར་བའི་ཕྱིར་རོ། །
དེས་ན་ཕ་རོལ་སེམས་ཤེས་ཐམས་ཅད་ནི་ཡུལ་ཟག་བཅས་ཟག་མེད་ཀྱི་མཚུངས་ལྡན་དང༌། རང་གི་མཚན་ཉིད་འཛིན་པ་དང༌། དེ་ཡང་དུས་ད་ལྟར་བྱུང་བ་དང༌། ཕ་རོལ་གྱི་རྒྱུད་ཀྱིས་བསྡུས་པ་དང༌། ས་བསམ་གཏན་གྱི་དངོས་གཞིས་བསྡུས་པ་དང༌། གཟུགས་ལ་བརྟེན་ནས་བསྒྲུབ་པར་བྱ་བ་ཡིན་པས་རྟེན་ཁམས་འོག་མ་གཉིས་ཀྱིས་བསྡུས་པ་དང༌། ལམ་སྒོམ་ལམ་གྱི་སྦྱོར་བ་དང་རྣམ་གྲོལ་དང་ཁྱད་པར་ཅན་གྱིས་ལམ་གྱི་བསྡུས་པ་ཡིན་གྱི་གཟུགས་ལ་སོགས་པ་དང༌། སྤྱིའི་མཚན་ཉིད་དང༌། འདས་མ་འོངས་དང༌། རང་གི་རྒྱུད་དང༌། གཟུགས་མེད་ལ་དམིགས་པ་མ་ཡིན་ནོ། །དེ་བཞིན་དུ་བསམ་གཏན་གྱི་དངོས་གཞི་མ་ཐོབ་པས་ཆགས་བཅས་ལའང་ཕ་རོལ་སེམས་ཤེས་མེད་དེ། གཞན་ཡིད་ཤེས་པ་བསམ་གཏན་བཞི་ཞེས་འཆད་པར་འགྱུར་བའི་ཕྱིར་རོ། །ཡུལ་ཅན་ཡང་མཐོང་ལམ་དང་བསམ་གཏན་གྱི་ཉེས་བསྡོགས་དང༌། བར་ཆད་མེད་པའི་ལམ་དང༌། ཟད་པ་དང་མི་སྐྱེ་བ་ཤེས་པ་རྣམས་ལ་གཞན་གྱི་སེམས་ཤེས་བཀག་སྟེ། དེ་དག་ནི་སྤྱིའི་མཚན་ཉིད་ལ་དམིགས་པ་དང༌། བར་ཆད་མེད་ལམ་ལ་བཀག་པ་དང༌། ཟད་པ་དང་མི་སྐྱེ་བ་ཤེས་པ་ནི་རྟོག་ཅིང་འཚོལ་བའི་བསམ་པ་ཅན་མ་ཡིན་པའི་ཕྱིར་དང༌། དེ་ནི་དེ་ལྟ་མ་ཡིན་པའི་ཕྱིར་རོ། །རྣམ་པའང་ཟག་མེད་ནི་ལམ་བདེན་གྱི་རྣམ་པ་ཅན་ཡིན་པས་སྨོན་པ་མེད་པའི་རྣམ་པ་ཅན་ཡིན་གྱི་སྟོང་པ་དང་མཚན་མེད་ཀྱི་རྣམ་པ་ཅན་ནི་མ་ཡིན་ཏེ། དེ་གཉིས་ནི་རིམ་པ་ལྟར་སྡུག་བསྔལ་དང་འགོག་པ་ཤེས་པའི་རྣམ་པ་ཅན་ཡིན་པའི་ཕྱིར་རོ་ཞེས་བྱར་འདོད་དོ། །འདི་དག་གི་རྒྱུ་མཚན་ཡང་བྱེ་བྲག་ཏུ་སྨྲ་བས་རྣམ་པར་བརྟགས་པ་ཁོ་ན་ཡིན་ཏེ། ཡི་གེ་མང་པས་འཇིགས་པས་རྣམ་པར་དཔྱད་པ་ནི་མ་བྲིས་སོ། །
དེ་ལྟར་ཞར་ལ་འོངས་པ་བཤད་ནས་སྐབས་སུ་བབས་པ་བཤད་པ་ནི།
རྩ་བ། ལྷག་མ་རྣམ་པ་བཅུ་བཞི་ཅན། །
སྟོང་དང་བདག་མེད་མ་གཏོགས་སོ། །
སྔར་ཤེས་པ་བརྒྱད་ཡན་ཆད་བཤད་པའི་ལྷག་མ་ཟད་པ་དང་མི་སྐྱེ་བ་ཤེས་པ་ནི་མི་རྟག་པ་ལ་སོགས་པ་རྣམ་པ་བཅུ་བཞི་ཅན་ཡིན་ཏེ། ཤེས་པ་དེ་དག་དོན་དམ་པའི་ཡུལ་ཅན་ཡིན་ཡང་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །འདི་ལས་སྲིད་པ་གཞན་མི་ཤེས་སོ་ཞེས་བྱ་བ་ལ་སོགས་པ་རྗེས་ཐོབ་ཀྱི་ཤེས་པས་བདག་གི་ཐ་སྙད་འདོགས་ཤིང་བདག་སྟོང་པ་མ་ཡིན་ལ་རྗེས་ཐོབ་ཀྱང་ཀུན་རྫོབ་ཀྱི་ཡུལ་ཅན་ཡིན་པའི་ཕྱིར་དང༌། མཉམ་གཞག་ཀྱང་དེ་དང་མཐུན་པར་བྱ་བའི་ཕྱིར་སྟོང་པ་དང་བདག་མེད་གཉིས་མི་བསྒོམ་པས་སྟོང་པ་དང་བདག་མེད་པའི་རྣམ་པ་གཉིས་མ་གཏོགས་སོ། །
ཅི་ཟག་མེད་ལ་རང་གི་མཚན་ཉིད་ཀྱི་རྣམ་པ་གཞན་ཡོད་དམ་མེད་ཅེ་ན།
རྩ་བ། དྲི་མེད་བཅུ་དྲུག་གཞན་རྣམ་མེད། །
གཞན་ཡོད་ཅེས་པ་བསྟན་བཅོས་ལས། །
རྫས་སུ་རྣམ་པ་བཅུ་དྲུག་གོ །
རེ་ཞིག་ཁ་ཆེ་བ་རྣམས་ན་རེ་དྲི་མ་མེད་པ་ལ་ནི་བཅུ་དྲུག་ལས་གཞན་པའི་རྣམ་པ་མེད་དོ་(བདེན་པའི་རྣམ་པ་ཅན་འདིར་འདུས་ལ། འདུས་མ་བྱས་གཞན་གཉིས་ནི་ཀུན་རྫོབ་ཤེས་པའི་ཡུལ་ལོ་)ཞེས་ཟེར་རོ། །གཞན་ཉི་འོག་པ་དག་ནི་བཅུ་དྲུག་ལས་གཞན་ཡང་ཡོད་ཅེས་པ་འདོད་དེ། བསྟན་བཅོས་རྣམ་ཤེས་ཀྱི་ཚོགས་ལས། མི་ལྡན་པའི་སེམས་ཀྱིས་འདོད་པ་དང་ལྡན་པའི་ཆོས་རྣམས་ཤེས་པར་འགྱུར་བ་ཡོད་དམ་ཞེ་ན། ཤེས་པར་འགྱུར་ཏེ། རིགས་པས་བསྐྱེད་པའི་སྒོ་ནས་མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པ་དང༌། རྒྱུ་དང༌། ཀུན་འབྱུང་བ་དང༌། རབ་ཏུ་སྐྱེ་བ་དང༌། རྐྱེན་དང༌། འདི་ནི་གནས་ཡོད་དོ། །འདི་ནི་གཞི་ཡོད་དོ་ཞེས་བྱ་བར་ཤེས་པར་འགྱུར་རོ་ཞེས་འབྱུང་བའི་ཕྱིར་རོ། །དེ་ལ་མི་ལྡན་པའི་སེམས་ནི་ཟག་པ་མེད་པའོ། །རིགས་པས་བསྐྱེད་པ་ནི་ཕྱིན་ཅི་མ་ལོག་པའོ། །གནས་ནི་མཚན་ཉིད་དོ། །གཞི་ནི་རྒྱུའོ།། གལ་ཏེ་དེ་ནི་མི་རྟག་པ་ལ་སོགས་པར་ཤེས་པར་འགྱུར་བ་གང་ཡིན་པ་འདི་ནི་གནས་དང་གཞི་ཡོད་དོ་ཞེས་སྟོན་པ་ཡིན་གྱི་བདེན་པའི་རྣམ་པ་ནི་མ་ཡིན་ནོ་ཞེ་ན། མ་ཡིན་ཏེ། ཚིག་དེ་གཉིས་བསྟན་བཅོས་ཀྱི་གཞུང་གི་ཆ་གཞན་ནས་མི་འབྱུང་བའི་ཕྱིར་ཏེ། འདི་ལྟར་བསྟན་བཅོས་དེ་ཉིད་ལས། མཐོང་བས་སྤང་བར་བྱ་བའི་སེམས་ཀྱིས་འདོད་པ་དང་ལྡན་པའི་ཆོས་རྣམས་ཤེས་པར་འགྱུར་བ་ཡོད་དམ་ཞེ་ན། ཤེས་པར་འགྱུར་ཏེ། རིགས་པ་མ་ཡིན་པས་བསྐྱེད་པའི་སྒོ་ནས་བདག་དང༌། བདག་གི་དང༌། ཆད་པ་དང༌། རྟག་པ་དང༌། རྒྱུ་མེད་པ་དང༌། བྱེད་པ་མེད་པ་དང༌། སྐུར་བ་འདེབས་པ་དང༌། མཆོག་དང༌། གཙོ་བོ་དང༌། ཁྱད་པར་དུ་འཕགས་པ་དང༌། དམ་པ་དང༌། དག་པ་དང༌། གྲོལ་བ་དང༌། ངེས་པར་འབྱིན་པར་བྱེད་པ་དང༌། ནེམ་ནུར་དང༌། ཡིད་གཉིས་དང༌། ཐེ་ཚོམ་དུ་ཤེས་པར་འགྱུར་ཞིང༌། ཆགས་པ་དང༌། སྡང་བ་དང༌། རློམ་པ་དང༌། རྨོངས་པར་འགྱུར་རོ་ཞེས་གང་གསུངས་པ་དེར་ཡང་འདི་སྐད་འདི་ནི་གནས་ཡོད་དོ། །འདི་ནི་གཞི་ཡོད་དོ། །ཞེས་འབྱུང་བར་འགྱུར་བ་ཞིག་ན་དེར་མ་གསུངས་པའི་ཕྱིར་རོ་ཞེས་ཟེར་རོ། །
འདི་ཡང་མདོ་སྡེ་པ་ལ་སོགས་པ་ཁ་ཅིག་ནི་རྣམ་པ་བཅུ་དྲུག་ཏུ་བཤད་པ་ནི་མིང་གི་སྒོ་ནས་ཡིན་གྱི་རྫས་སུ་ནི་སྡུག་བསྔལ་གྱི་བདེན་པའི་རྣམ་པ་བཞི་དང་བདེན་པ་གཞན་གསུམ་ནི་རྒྱུ་དང་འགོག་པ་དང་ལམ་གྱི་རྣམ་པ་རེ་རེ་བ་ཡིན་པས་བདུན་ཡིན་ཏེ། རྣམ་པ་ཕྱི་མ་དག་ནི་དང་པོ་དག་གི་རྣམ་གྲངས་ཙམ་ཡིན་པའི་ཕྱིར་དཔེར་ན་དབང་པོ་དང་བརྒྱ་བྱིན་དང་གྲོང་ཁྱེར་འཇིག་ཅེས་བྱ་བ་བཞིན་ནོ་ཞེས་འདོད་དོ། །
བྱེ་བྲག་ཏུ་སྨྲ་བ་ནི་དོན་དམ་པར་ནི་རྫས་སུ་རྣམ་པ་བཅུ་དྲུག་གོ་ཞེས་འདོད་དེ། དེ་ལ་རྐྱེན་ལ་རག་ལུས་པའི་ཕྱིར་མི་རྟག་པའོ། །གནོད་པའི་བདག་ཉིད་ཡིན་པའི་ཕྱིར་སྡུག་བསྔལ་བའོ། །བདག་གིར་ལྟ་བའི་མི་མཐུན་ཕྱོགས་ཡིན་པས་སྟོང་པའོ། །བདག་ཏུ་ལྟ་བའི་མི་མཐུན་ཕྱོགས་ཡིན་པས་བདག་མེད་པའོ། །སྡུག་བསྔལ་གྱི་ས་བོན་གྱི་ཆོས་ཀྱི་ཚུལ་གྱི་རྒྱུའོ། །དེ་མ་ཐག་ཏུ་འབྱུང་བས་ན་ཀུན་འབྱུང་བའོ། །རྒྱུན་གྱི་འབྲེལ་བས་ན་རབ་ཏུ་སྐྱེ་བའོ། །རྒྱུ་རྐྱེན་མང་པོས་མངོན་པར་བསྒྲུབས་པས་རྐྱེན་ནོ། །སྡུག་བསྔལ་གྱི་ཕུང་པོ་ཞིག་པས་འགོག་པའོ།། འདོད་ཆགས་ལ་སོགས་པ་དུག་གསུམ་གྱི་མེ་གསུམ་ཞི་བའི་ཕྱིར་ཞི་བའོ། །སྡུག་བསྔལ་གྱི་འཚེ་བ་མེད་པས་གྱ་ནོམ་པའོ། །ལས་དང་ཉོན་མོངས་པའི་སྐྱོན་ཐམས་ཅད་དང་བྲལ་བས་ངེས་པར་འབྱུང་བའོ། །ཐར་པར་བགྲོད་པར་བྱེད་པས་ལམ་མོ། །ཐབས་ཀྱི་རིགས་པ་དང་ལྡན་པས་རིགས་པའོ། །མྱང་འདས་ཡང་དག་པར་སྒྲུབ་པས་སྒྲུབ་པའོ། །གཏན་དུ་ཡང་དག་པར་འདའ་བར་བྱེད་པས་ངེས་པར་འབྱིན་པའོ། །རྣམ་པ་གཅིག་ཏུ་ན་རྟག་པ་དང༌། བདེ་བ་དང༌། བདག་གིར་དང༌། བདག་ཏུ་ལྟ་བ་དང༌། རྒྱུ་མེད་པ་དང༌། རྒྱུ་གཅིག་པུ་དང༌། རང་བཞིན་རྟག་ལ་གནས་སྐབས་རྣམ་པར་འགྱུར་བ་དང༌། བློ་སྔར་བཏང་བར་ལྟ་བ་དང༌། ཐར་པ་མེད་པ་དང༌། སྡུག་བསྔལ་ལ་ཐར་པར་ལྟ་བ་དང༌། བསམ་གཏན་གྱི་བདེ་བ་གྱ་ནོམ་པ་དང༌། ཡང་དང་ཡང་ཉམས་པར་འགྱུར་བས་ཐར་པ་གཏན་དུ་བ་མ་ཡིན་པར་ལྟ་བ་དང༌། ལམ་མེད་དོ། །ལམ་འདི་ངན་ནོ། །འདི་ལས་གཞན་ཡང་ལམ་ཡིན་ནོ། །ལམ་འདི་ཡང་ལྡོག་གོ་སྙམ་པའི་ལྟ་བ་དཔྱད་པ་བཅུ་དྲུག་གི་གཉེན་པོར་གོ་རིམ་བཞིན་དུ་མི་རྟག་པ་ལ་སོགས་བཅུ་དྲུག་ཡིན་ནོ། །
ཡང་རྣམ་པ་ཉིད་གང་ཞེ་ན།
རྩ་བ། རྣམ་པ་ཤེས་རབ་དང་བཅས་པའི། །
དམིགས་དང་བཅས་པས་འཛིན་པར་བྱེད། །
ཡོད་པ་ཐམས་ཅད་གཟུང་བྱ་ཡིན། །
རྣམ་པ་ནི་ཤེས་རབ་ཡིན་ལ་དེ་ཡང་ཡུལ་འཛིན་པ་ན་ཤེས་རབ་ཁོ་ནས་འཛིན་པ་མ་ཡིན་གྱི་ཤེས་རབ་དེ་དང་བཅས་པའི་དམིགས་པ་དང་བཅས་པ་ཐམས་ཅད་ཀྱིས་འཛིན་པར་བྱེད་དེ། ཤེས་རབ་ནི་ས་མང་པོ་བ་ཡིན་པའི་ཕྱིར་རོ། །གཟུགས་ལ་སོགས་པ་(རྫས་དང་བཏགས་པར་)ཡོད་པ་ཐམས་ཅད་ཀྱང་གཟུང་བྱ་ཡིན་(ཏེ་དེ་དག་གི་མི་འཛིན་པ་གང་ཡང་མེད་པ་ཡིན་)ནོ། །དེ་ལྟར་ན་ཤེས་རབ་ནི་རྣམ་པ་དང་འཛིན་པ་དང་གཟུང་བར་བྱ་བ་གསུམ་ག་དང༌། ཤེས་རབ་ལས་གཞན་པའི་དམིགས་བཅས་ཐམས་ཅད་ནི་འཛིན་པ་དང་གཟུང་བར་བྱ་བ་གཉིས་དང༌། དམིགས་པ་མེད་པ་རྣམས་ནི་གཟུང་བར་བྱ་བ་ཁོ་ན་ཡིན་ནོ་ཞེས་བྱེ་བྲག་ཏུ་སྨྲ་བ་རྣམས་འདོད་དོ། །
མདོ་སྡེ་པ་ལ་སོགས་པ་རྣམས་ན་རེ་གལ་ཏེ་ཤེས་རབ་རྣམ་པར་འདོད་ན་དེ་ཉིད་གྲོགས་སུ་ལྡན་པའམ་ངོ་བོ་ཡིན་པས་རྣམ་པ་དང་བཅས་པ་ཡིན། དང་པོ་ལྟར་ན་ཤེས་རབ་ཉིད་རྣམ་པ་དང་བཅས་པར་མི་འགྱུར་ཏེ། ཤེས་རབ་ཤེས་རབ་དང་མཚུངས་པར་མི་ལྡན་པའི་ཕྱིར་རོ།། གཉིས་པ་ལྟར་ན་ཤེས་རབ་ལས་གཞན་པའི་མཚུངས་ལྡན་རྣམས་རྣམ་པ་དང་བཅས་པ་མ་ཡིན་པར་འགྱུར་རོ། །དེ་དག་གང་ཡང་རུང་བས་རྣམ་པ་དང་བཅས་པ་མ་ཡིན་པར་འདོད་ན་ཡང༌། སེམས་དང་སེམས་བྱུང་དང༌། རྟེན་དང་དམིགས་དང་རྣམ་བཅས་དང༌། །མཚུངས་པར་ལྡན་པའང་རྣམ་པ་ལྔ། །ཞེས་འདོད་པ་དང་འགལ་བར་འགྱུར་རོ། །དེའི་ཕྱིར་དམིགས་པ་ནི་ཡུལ་དང༌། རྣམ་པ་ནི་བློའི་འཛིན་སྟངས་ཏེ་ཡུལ་གྱི་རྣམ་པ་ཅན་(གྱི་སེམས་སེམས་བྱུང་ཐམས་ཅད་)ལ་འདོད་དོ་ཞེས་ཟེར་རོ། །
ཡང་ཤེས་པ་བཅུ་པོ་འདི་དག་གི་ངོ་བོ་དགེ་མི་དགེ་ལུང་མ་བསྟན་གང་ཡིན་ཞེ་ན།
རྩ་བ། དང་པོ་རྣམ་གསུམ་གཞན་རྣམས་དགེ ། དང་པོ་ཀུན་རྫོབ་ཤེས་པ་ནི་ཅི་རིགས་དགེ་མི་དགེ་ལུང་མ་བསྟན་རྣམ་པ་གསུམ་ཆར་ཡིན་ལ། ཤེས་པ་གཞན་དགུ་པོ་རྣམས་ནི་དགེ་བ་འབའ་ཞིག་པ་ཡིན་ནོ།། (འདིར་སེམས་ཤེས་ཟག་བཅས་ཀྱང་སྒོམ་བྱུང་གཟུང་ལ་ལྷག་མ་ནི་ལམ་བདེན་ཀྱིས་བསྡུས་སོ་ཞེས་གསུང་ངོ༌།།)
བཞི་པ་ནི།
རྩ་བ། དང་པོ་ས་རྣམས་ཐམས་ཅད་ན། །
དྲུག་ན་ཆོས་ཤེས་བྱ་བར་དགུ །
རྗེས་ཤེས་བྱ་བ་དེ་བཞིན་དྲུག །
གཞན་ཡིད་ཤེས་པ་བསམ་གཏན་བཞི། །
ཤེས་པ་དང་པོ་ཀུན་རྫོབ་ཤེས་པ་ནི་འདོད་པ་ནས་སྲིད་རྩེའི་བར་གྱི་ས་རྣམས་ཐམས་ཅད་ན་ཡོད་དེ། (ཁམས་གསུམ་ལ་དམིགས་པ་ཐམས་ཅད་དེར་འདོད་པས་སོ།།) བསམ་གཏན་དང་པོའི་ཉེར་བསྡོགས་ལ་སོགས་པ་བསམ་གཏན་ས་དྲུག་ན་ཆོས་ཤེས་པ་ཞེས་བྱ་བ་ཡོད་དེ། ས་དེ་དག་འདོད་པའི་སྡུག་བསྔལ་ལ་སོགས་པ་(འི་བདེན་པ་)ལ་དམིགས་པའི་ཕྱིར་དང༌། གཟུགས་མེད་འདོད་པ་ལ་མི་དམིགས་པའི་ཕྱིར་མེད་དོ། །བསམ་གཏན་དྲུག་དང་གཟུགས་མེད་དང་པོ་གསུམ་སྟེ་ཟག་མེད་ས་དགུ་ན་རྗེས་སུ་ཤེས་པ་ཞེས་བྱ་བ་ཡོད་ལ། དེ་ཡང་གཟུགས་མེད་དང་པོ་གསུམ་ན་ནི་རྗེས་ཤེས་སྒོམ་ལམ་གྱིས་བསྡུས་པ་ཁོ་ན་ཡོད་དོ། །ཇི་ལྟར་རྗེས་ཤེས་ས་དགུ་ན་ཡོད་པ་དེ་བཞིན་དུ་བདེན་པ་བཞི་ཤེས་པ་དང་ཟད་པ་དང་མི་སྐྱེ་བ་ཤེས་པ་གཉིས་ཏེ་དྲུག་ཀྱང་ས་དགུ་པོ་དེ་དག་ན་ཡོད་དོ། །
འདིར་ཡང་ཆོས་ཤེས་ཀྱིས་བསྡུས་པ་ས་དྲུག་དང་རྗེས་ཤེས་ཀྱིས་བསྡུས་པ་ས་དགུ་ཆར་ན་ཡོད་ལ་དེ་ཡང་གཟུགས་མེད་དང་པོ་གསུམ་ན་ཡོད་པའི་བདེན་པ་བཞི་ཤེས་པ་ནི་རྗེས་ཤེས་ཀྱི་ཕྱོགས་སྒོམ་ལམ་གྱིས་བསྡུས་པ་ཁོ་ན་ཡོད་དོ། །གཞན་གྱི་ཡིད་ཤེས་པ་ནི་བསམ་གཏན་གྱི་དངོས་གཞི་བཞི་ཁོ་ན་ནི་ཡོད་ཀྱི་གཞན་ན་མེད་དོ།། (འདི་མངོན་ཤེས་ཀྱིས་བསྡུས་ལ། རྣམ་གནས་ནི་གཟུགས་ལ་རྩོམ་པས་དེ་ཉེར་བསྡོགས་དང་གཟུགས་མེད་ན་མེད་དོ།།)
རྩ་བ། དེ་ནི་འདོད་དང་གཟུགས་རྟེན་ཅན། །
ཆོས་ཤེས་བྱ་བ་འདོད་རྟེན་ཅན། །
ཁམས་གསུམ་པ་ཡི་རྟེན་ཅན་གཞན། །
གཞན་གྱི་སེམས་ཤེས་དེ་ནི་འདོད་པ་དང་གཟུགས་ཀྱི་རྟེན་ཅན་ཡིན་གྱི་གཟུགས་མེད་པ་ལ་རྟེན་པ་ནི་མ་ཡིན་ཏེ། གང་ཟག་ཕན་ཚུན་ཡུལ་མ་ཡིན་པའི་ཕྱིར་རོ། །ཆོས་ཤེས་པ་ཞེས་བྱ་བ་ནི་འདོད་པའི་རྟེན་ཅན་ཁོ་ན་ཡིན་ཏེ། འདོད་པའི་གཉེན་པོ་ཡིན་པའི་ཕྱིར་ཁམས་གོང་མ་གཉིས་སུ་ནི་ཆོས་ཤེས་མངོན་དུ་མི་བྱེད་དེ། ཆོས་ཤེས་འདོད་པ་ལ་དམིགས་པ་ལ་གཟུགས་མེད་འདོད་པ་ལ་མི་དམིགས་པའི་ཕྱིར་དང༌། ཆོས་ཤེས་ནི་གཙོར་འདོད་པ་སུན་འབྱིན་པ་ཡིན་ན་གཟུགས་ཁམས་སུ་སྐྱེས་པ་ན་འདོད་པ་ལ་འདོད་ཆགས་དང་བྲལ་བ་དང༌། ས་འཕོས་པས་བཏང་བས་དེ་སུན་མི་འབྱིན་པའི་ཕྱིར་རོ། །འདོད་པར་སྐྱེས་པ་ནི་འདོད་ཆགས་དང་བྲལ་ཡང་འདོད་ཁམས་ཀྱི་ཕུང་པོའི་ལྷག་མ་ལུས་པའི་ཕྱིར་ཆོས་ཤེས་མངོན་དུ་བྱེད་དེ་ཞེས་ཁ་ཅིག་ཟེར་རོ། །
སློབ་དཔོན་འདུན་བཟང་ན་རེ་ཆོས་ཤེས་ནི་འདོད་པ་ལ་ཁོ་ནར་མངོན་དུ་བྱེད་ཀྱི་ཁམས་གོང་མ་གཉིས་སུ་ནི་མ་ཡིན་ཏེ། ཆོས་ཤེས་དེ་ལ་སྙོམས་པར་འཇུག་སྡང་གི་སེམས་རྣམས་འདོད་པ་ཁོ་ན་ན་ཡོད་པའི་ཕྱིར་རོ། །ཡང་ན་ཆོས་ཤེས་ཀྱི་རྗེས་སུ་འབྲང་བའི་ཚུལ་ཁྲིམས་ཀྱི་རྟེན་འདོད་པའི་འབྱུང་བཞི་ཡིན་པས་དེ་དག་ཁམས་གོང་མ་གཉིས་ན་མེད་པའི་ཕྱིར་ཆོས་ཤེས་འདོད་པའི་རྟེན་ཅན་ཁོ་ན་ཡིན་ནོ་ཞེས་ཟེར་རོ། །ཁམས་གསུམ་པའི་རྟེན་ཅན་ནི་ཕ་རོལ་སེམས་ཤེས་དང་ཆོས་ཤེས་ལས་གཞན་པའི་ཤེས་པ་བརྒྱད་པོ་དག་ཡིན་ནོ། །
ལྔ་པ་ནི་འོ་ན་ཤེས་པ་འདི་དག་དྲན་པ་ཉེར་གཞག་གང་གི་ངོ་བོ་ཡིན་ཞེ་ན།
རྩ་བ། འགོག་བློ་དྲན་པ་ཉེར་གཞག་པ། །
གཅིག་སྟེ་ཕ་རོལ་སེམས་བློ་ནི། །
གསུམ་མོ་ལྷག་མ་བཞི་ཡིན་ནོ། །
འགོག་པ་ཤེས་པའི་བློ་ནི་དྲན་པ་ཉེ་བར་བཞག་པ་གཅིག་ཁོ་ན་སྟེ། དྲན་པ་ཉེར་གཞག་བསྟན་པ་ལས། ཆོས་ནི་ལུས་དང་ཚོར་བ་དང་སེམས་དག་ལས་གཞན་པ་ཡིན་ནོ་ཞེས་འབྱུང་བས་ཆོས་དྲན་པ་ཉེར་གཞག་ཁོ་ན་ཡིན་པའི་ཕྱིར་རོ། །ཕ་རོལ་གྱི་སེམས་ཤེས་པའི་བློ་ནི་ལུས་ལ་མི་དམིགས་པས་དྲན་པ་ཉེར་གཞག་ཕྱི་མ་གསུམ་མོ། །འགོག་པ་དང་ཕ་རོལ་སེམས་ཤེས་ལས་གཞན་པ་ཤེས་པ་ལྷག་མ་བརྒྱད་ནི་ཅི་རིགས་པར་སྡུག་བསྔལ་ཤེས་པ་ལ་སོགས་པ་དེ་དག་རེས་འགའ་ལུས་ནས་རེས་འགའ་ཆོས་ཀྱི་བར་ལ་དམིགས་ཤིང༌། ལམ་ཤེས་པའང་གལ་ཏེ་ཟག་མེད་ཀྱི་སྡོམ་པ་ལ་དམིགས་ན་དེ་ལུས་དྲན་པ་ཉེར་གཞག་ཏུའང་འགྱུར་བས་དྲན་པ་ཉེར་གཞག་བཞི་ག་ཡིན་ནོ།། (ཀུན་རྫོབ་ཤེས་པ་ནི་ཐམས་ཅད་ཀྱི་ཡུལ་ཅན་ཡིན་པའི་ཕྱིར།)
དྲུག་པ་ནི་འོ་ན་ཤེས་པ་དེ་དག་ཕན་ཚུན་གང་གིས་དམིགས་པར་གང་གྱུར་ཞེ་ན།
རྩ་བ། ཆོས་བློའི་སྤྱོད་ཡུལ་དགུ་ཡིན་ནོ། །
ལམ་རྗེས་བློ་ཡི་དགུ་ཡིན་ནོ། །
སྡུག་བསྔལ་རྒྱུ་བློའི་གཉིས་ཡིན་ནོ། །
བཞི་ཡི་བཅུ་ཡིན་གཅིག་གི་མིན། །
ཆོས་ཤེས་པའི་བློའི་སྤྱོད་ཡུལ་ཏེ་དམིགས་པ་ནི་ཤེས་པ་དགུ་ཡིན་ཏེ། ལམ་ལ་ཆོས་ཤེས་པས་རྗེས་ཤེས་མ་གཏོགས་པའི་ཟག་མེད་ཀྱི་ཤེས་པ་བདུན་ལ་དམིགས་པའི་ཕྱིར་དང༌། སྡུག་བསྔལ་དང་ཀུན་འབྱུང་ཤེས་པས་བསྡུས་པའི་ཆོས་ཤེས་པས་ཀུན་རྫོབ་ཤེས་པ་དང་གཞན་གྱི་སེམས་ཤེས་ཟག་བཅས་ལ་དམིགས་པའི་ཕྱིར་རོ། །ལམ་ཤེས་པའི་བློའི་དམིགས་པའང་ཤེས་པ་དགུ་ཡིན་ཏེ། དེ་ནི་ཟག་མེད་ཁོ་ན་ལ་དམིགས་པར་ངེས་པས་ཀུན་རྫོབ་ཤེས་པ་མ་གཏོགས་པའི་ཕྱིར་རོ། །རྗེས་སུ་ཤེས་པའི་བློའི་དམིགས་པའང་ཆོས་རྗེས་བློ་ཕྱོགས་ཕན་ཚུན་མིན་ཞེས་འབྱུང་བས་ཆོས་ཤེས་མ་གཏོགས་པའི་ཤེས་པ་དགུ་ཡིན་ནོ། །སྡུག་བསྔལ་དང་དེའི་རྒྱུ་ཀུན་འབྱུང་ཤེས་པའི་བློའི་སྤྱོད་ཡུལ་ནི་བདེན་པ་དང་པོ་གཉིས་ཀྱིས་བསྡུས་པའི་ཀུན་རྫོབ་ཤེས་པ་དང་ཕ་རོལ་སེམས་ཤེས་ཟག་བཅས་གཉིས་ཡིན་ནོ། །ཀུན་རྫོབ་ཤེས་པ་དང་གཞན་གྱི་སེམས་ཤེས་དང་ཟད་པ་ཤེས་པ་དང་མི་སྐྱེ་བ་ཤེས་པ་བཞིའི་སྤྱོད་ཡུལ་ནི་ཤེས་པ་བཅུ་ཆར་ཡིན་ཏེ། ཅི་རིགས་པར་ཐམས་ཅད་ལ་དམིགས་པའི་ཕྱིར་རོ། །དེ་ཡང་གཞན་ནི་གོ་སླ་ལ་ཕ་རོལ་སེམས་ཤེས་ཟག་མེད་ཀྱི་དམིགས་པ་ནི་ཤེས་པ་དགུ་ཡིན་ལ། ཟག་བཅས་ཀྱི་ནི་ཀུན་རྫོབ་ཤེས་པ་དང་ཕ་རོལ་སེམས་ཤེས་ཟག་བཅས་ཡིན་ནོ། །གཅིག་གི་སྟེ་འགོག་པ་ཤེས་པ་གཅིག་པུའི་དམིགས་པ་ནི་ཤེས་པ་ཐམས་ཅད་མིན་ཏེ། དེ་ནི་སོ་སོར་བརྟགས་འགོག་ཁོ་ན་ལ་དམིགས་ལ་དེ་ནི་ཤེས་པའི་རང་བཞིན་མ་ཡིན་པའི་ཕྱིར་རོ། །
རྩ་བ། ཆོས་བཅུ་དག་ནི་སྦྱར་བར་བྱ། །
ཁམས་གསུམ་པ་དང་དྲི་མེད་ཆོས། །
འདུས་མ་བྱས་རྣམས་གཉིས་གཉིས་སོ། །
ཤེས་བྱའི་ཆོས་ཐམས་ཅད་རྣམ་པ་བཅུར་ཕྱེ་ལ་ཆོས་བཅུ་པོ་དག་ནི་ཤེས་པ་དུ་ཞིག་གི་ཡུལ་དུ་འགྱུར་བ་སྦྱར་ཏེ་ཤེས་པར་བྱའོ། །ཆོས་བཅུ་པོ་གང་དག་ཅེ་ན། ཆོས་འདུས་བྱས་ལ་འདོད་པ་དང་གཟུགས་དང་གཟུགས་མེད་པ་སྟེ་ཁམས་གསུམ་པའི་ཆོས་དང་དྲི་མ་མེད་པའི་ཆོས་ཏེ་རྣམ་པ་བཞི་དང༌། འདུས་མ་བྱས་ཀྱི་ཆོས་རྣམས་ཏེ་ལྔ་ལ་རེ་རེ་ལའང་རྣམ་པ་གཉིས་གཉིས་སུ་ཕྱེ་བས་སོ། །ཇི་ལྟར་ཞེ་ན་དང་པོ་བཞི་ལ་མཚུངས་ལྡན་དང་མཚུངས་ལྡན་མ་ཡིན་པ་གཉིས་གཉིས་ཏེ་བརྒྱད་དང༌། འདུས་མ་བྱས་ལ་སོ་སོར་བརྟགས་འགོག་དགེ་བ་དང་ནམ་མཁའ་དང་བརྟགས་མིན་ལུང་མ་བསྟན་ཡིན་པས་གཉིས་སུ་འགྱུར་བའི་ཕྱིར་རོ། །
ཇི་ལྟར་སྦྱར་ཞེ་ན། ཀུན་རྫོབ་ཤེས་པའི་ཡུལ་དུ་བཅུ་པོ་ཐམས་ཅད་དང༌། ཆོས་ཤེས་ཀྱི་ཡུལ་དུ་འདོད་པ་(འི་ཆོས་གཉིས་)དང་ཟག་མེད་འདུས་བྱས་ཀྱི་གཉིས་གཉིས་ཏེ་(ཆོས་ཤེས་ཟག་མེད་ཀྱི་ཆ་གཉིས་ཏེ་)བཞི་དང་འདུས་མ་བྱས་དགེ་བ་སྟེ་ལྔ་དང༌། རྗེས་ཤེས་ཀྱི་ཡུལ་དུ་ཁམས་གོང་མ་གཉིས་དང་ཟག་མེད་འདུས་བྱས་ཀྱི་(མཚུངས་ལྡན་ཡིན་མིན་)གཉིས་གཉིས་ཏེ་དྲུག་དང་འདུས་མ་བྱས་དགེ་བ་སྟེ་བདུན་དང༌། སྡུག་བསྔལ་དང་ཀུན་འབྱུང་ཤེས་པའི་ཡུལ་དུ་ཁམས་གསུམ་གྱི་ཆོས་དྲུག་དྲུག་དང༌། འགོག་པ་ཤེས་པའི་ཡུལ་དུ་འདུས་མ་བྱས་དགེ་བ་གཅིག་པུ་དང༌། ལམ་ཤེས་པའི་ཡུལ་དུ་ཟག་མེད་འདུས་བྱས་ཀྱི་གཉིས་དང༌། ཕ་རོལ་སེམས་ཤེས་ཀྱི་ཡུལ་དུ་འདོད་གཟུགས་དང་ཟག་མེད་ཀྱི་མཚུངས་ལྡན་གསུམ་དང༌། ཟད་པ་དང་མི་སྐྱེ་བ་ཤེས་པའི་ཡུལ་དུ་འདུས་མ་བྱས་ལུང་མ་བསྟན་མ་གཏོགས་པ་དགུ་འགྱུར་ཏེ། ཤེས་པ་དེ་དག་གི་དམིགས་ཡུལ་ཤེས་བྱ་དེ་དག་ཡིན་པའི་ཕྱིར་རོ། །
དེས་ན་བྱེ་བྲག་ཏུ་སྨྲ་བ་ལྟར་ན་ནམ་མཁའ་དང་བརྟགས་མིན་གྱི་འགོག་པ་ནི་བདེན་བཞིར་མ་འདུས་པར་འདོད་དེ། ཊཱིཀ་བྱེད་དག་གིས་ཀྱང་ཟད་པ་དང་མི་སྐྱེ་བ་ཤེས་པ་དག་ནི་བདེན་པ་བཞི་ལ་དམིགས་པའི་ཕྱིར་ལ། འདུས་མ་བྱས་ལུང་དུ་མ་བསྟན་པ་ནི་བདེན་པ་བཞི་ལ་མ་གཏོགས་པའི་ཕྱིར་རོ་ཞེས་བཤད་དོ། །གལ་ཏེ་ཤེས་པ་གཅིག་གིས་ཆོས་ཐམས་ཅད་ཅིག་ཅར་ཤེས་པར་འགྱུར་བར་ཡོད་དམ་ཞེ་ན། དེ་ནི་མེད་དེ། མདོ་ལས། དགེ་སྦྱོང་ངམ་བྲམ་ཟེ་ཡང་རུང་གང་ཅིག་ཅར་ཐམས་ཅད་ཤེས་པའམ་མཐོང་བ་དེ་ནི་འགའ་ཡང་མེད་དོ་ཞེས་འབྱུང་བའི་ཕྱིར་རོ། །
རྩ་བ། ཀུན་རྫོབ་གཅིག་པུས་རང་ཚོགས་ལས། །
གཞན་ནི་བདག་མེད་ཉིད་རིག་འགྱུར། །
འོན་ཀྱང་ཀུན་རྫོབ་ཤེས་པ་གཅིག་པུས་རང་གི་ངོ་བོ་དང་རང་གི་ཚོགས་ཏེ་རང་དང་ལྷན་ཅིག་འབྱུང་བའི་ཆོས་མཚུངས་ལྡན་དང་དེ་མ་ཡིན་པ་ལས་གཞན་པའི་ཆོས་ཐམས་ཅད་ནི་བདག་མེད་པ་ཉིད་དུ་སྐད་ཅིག་མ་གཅིག་ལ་རིགས་པར་འགྱུར་ཏེ། མོས་པས་སྤྱོད་པའི་ས་དག་ཐོས་བསམ་ལས་བྱུང་བའི་ཀུན་རྫོབ་ཤེས་པས་ཆོས་ཐམས་ཅད་བདག་མེད་དོ་ཞེས་ཡིད་ལ་བྱེད་པའི་ཕྱིར་རོ། །སྐད་ཅིག་མ་གཉིས་པའི་ཡུལ་དུ་དང་པོའང་འགྱུར་བས་སྐད་ཅིག་མ་གཉིས་ཀྱི་ཡུལ་དུ་ནི་ཆོས་ཐམས་ཅད་འགྱུར་རོ། །དེ་ཡང་འདོད་པ་ན་ཐོས་བསམ་གཉིས་ཀ་དང་གཟུགས་ན་ཐོས་བྱུང་ཁོ་ནའོ། །རང་ཉིད་ནི་ཡུལ་དུ་མི་བྱེད་དེ། ཡུལ་དང་ཡུལ་ཅན་ལ་ཐ་དད་ཀྱིས་ཁྱབ་པ་ལ་ཡུལ་དང་ཡུལ་ཅན་ཐ་དད་མེད་པའི་ཕྱིར་དང༌། རང་ཉིད་ལ་བྱེད་པ་འགལ་བའི་ཕྱིར་ཏེ། རལ་གྲིས་རང་ཉིད་མི་གཅོད་པ་བཞིན་ནོ། །རང་དང་ལྷན་ཅིག་འབྱུང་བའི་མཚུངས་ལྡན་རྣམས་ཀྱང་མི་འཛིན་ཏེ། དེ་དག་དང་དམིགས་པ་གཅིག་པས་རང་ཉིད་ལའང་དམིགས་པར་འགྱུར་བའི་ཕྱིར་རོ། །རང་དང་ལྷན་ཅིག་འབྱུང་བ་ལྡན་པ་མ་ཡིན་པ་རྣམས་ཀྱང་མི་འཛིན་ཏེ་ཧ་ཅང་ཉེ་བའི་ཕྱིར་མིག་སྨན་དང་མིག་སྨན་གྱི་ཐུར་མ་བཞིན་ནོ།། ཀུན་རྫོབ་ཤེས་པ་བསྒོམས་པ་ལས་བྱུང་བས་ནི་ཆོས་ཐམས་ཅད་ཅིག་ཅར་ཤེས་པ་མ་ཡིན་ཏེ། གོང་དང་འོག་མའི་སྤྱོད་ཡུལ་ཅན་ཞེས་པ་རྣམ་པར་ཆད་པ་ལ་དམིགས་པའི་ཕྱིར་དང༌། གལ་ཏེ་ཅིག་ཅར་དམིགས་ནས་ཐམས་ཅད་ལས་ཅིག་ཅར་འདོད་ཆགས་དང་བྲལ་བར་འགྱུར་བའི་ཕྱིར་རོ། །དེས་ན་ཀུན་རྫོབ་ཤེས་པ་སྒོམ་བྱུང་གིས་ནི་ས་ཐ་དད་པའི་བདེན་པ་ལ་སོ་སོར་ངེས་པ་ཉིད་དུ་དམིགས་སོ་ཞེས་བྱེ་བྲག་ཏུ་སྨྲ་བ་འདོད་དོ། །
མདོ་སྡེ་པ་ལ་སོགས་པ་ནི་རང་རིག་འདོད་པས་རང་གི་ཚོགས་པའང་བདག་མེད་པར་ཤེས་པར་འདོད་ལ། ཐེག་པ་གོང་མ་པ་ནི་སྒོམ་བྱུང་གིས་ཀྱང་ཆོས་ཐམས་ཅད་བདག་མེད་པ་ཉིད་དུ་ཤེས་པ་ཡིན་ལ་ཅིག་ཅར་འདོད་ཆགས་དང་བྲལ་བའང་ཁོ་བོ་ཅག་འདོད་པ་ཡིན་ཏེ། འདི་ལ་བསམ་པའང་བཙལ་བར་བྱ་དགོས་སོ་ཞེས་འདོད་དོ། །
བདུན་པ་ནི་འོ་ན་གང་ཟག་གང་ཞིག་ཤེས་པ་དུ་དང་ལྡན་ཞེ་ན། རེ་ཞིག་སོ་སོའི་སྐྱེ་བོ་ཆགས་བཅས་དང་གཟུགས་མེད་ཀྱི་བྱིས་པ་རྣམས་ནི་ཀུན་རྫོབ་ཤེས་པ་གཅིག་པུ་དང་ལྡན་ལ་(འདོད་གཟུགས་ཀྱི་)ཆགས་བྲལ་ཞིག་ཡིན་ན་ནི་ཕོ་རོལ་སེམས་ཤེས་དང་ཡང་ལྡན་ནོ། །
རྩ་བ། ཟག་མེད་སྐད་ཅིག་དང་པོ་ལ། །
ཆགས་ཅན་ཤེས་པ་གཅིག་དང་ལྡན། །
གཉིས་པ་ལ་གསུམ་ཡན་ཆད་ནི། །
བཞི་ལ་རེ་རེ་འཕེལ་དང་ལྡན། །
འཕགས་པ་ནི་ཆགས་ཅན་ཏེ་འདོད་པ་ལས་འདོད་ཆགས་དང་མ་བྲལ་བ་ཞིག་ཡིན་ན་ཟག་མེད་ཀྱི་ཡེ་ཤེས་ཀྱི་སྐད་ཅིག་མ་དང་པོ་སྡུག་བསྔལ་ལ་ཆོས་ཤེས་པའི་བཟོད་པ་དང་ལྡན་པ་ལ་ནི་དྲི་མེད་བཟོད་རྣམས་ཤེས་པ་མིན་ཞེས་འབྱུང་བས་བཟོད་པ་ནི་ཤེས་པ་མ་ཡིན་ལ་ཤེས་པ་གཞན་ཡང་མི་ལྡན་པས་ཀུན་རྫོབ་ཤེས་པ་གཅིག་པུ་དང་ལྡན་ནོ། །ཡེ་ཤེས་སྐད་ཅིག་མ་གཉིས་པ་སྡུག་བསྔལ་ལ་ཆོས་ཤེས་པ་ལ་ནི་ཀུན་རྫོབ་ཤེས་པ་དང་ཆོས་ཤེས་པ་དང་སྡུག་བསྔལ་ཤེས་པ་སྟེ་གསུམ་དང་ལྡན་ཏེ། འདོད་པའི་སྡུག་བསྔལ་ཤེས་པ་དེ་ཉིད་ཆོས་ཤེས་ཀྱང་ཡིན་པའི་ཕྱིར་རོ། །དེ་ཡན་ཆད་ཀྱི་སྐད་ཅིག་མ་སྡུག་བསྔལ་ལ་རྗེས་ཤེས་དང་པོ་ཀུན་འབྱུང་དང་འགོག་པ་དང་ལམ་ལ་ཆོས་ཤེས་བཞི་ལ་ནི་སྔར་གྱི་སྟེང་དུ་རིམ་པ་ལྟར་གོང་མའི་སྡུག་བསྔལ་དང་འདོད་པའི་ཀུན་འབྱུང་དང་གཉེན་པོ་འགོག་ལམ་གསར་དུ་ཤེས་པས་རྗེས་ཤེས་དང་ཀུན་འབྱུང་དང་འགོག་པ་དང་ལམ་ཤེས་པ་རེ་རེ་འཕེལ་བས་རིམ་པ་ལྟར་བཞི་དང་ལྔ་དང་དྲུག་དང་བདུན་དང་ལྡན་ནོ། །གལ་ཏེ་འདོད་པ་ལས་འདོད་ཆགས་དང་བྲལ་བ་ཞིག་ཡིན་ན་ནི་སྡུག་བསྔལ་ལ་ཆོས་བཟོད་ནས་ལམ་ལ་ཆོས་ཤེས་ཀྱི་བར་ཐམས་ཅད་དུ་ཕ་རོལ་སེམས་ཤེས་བསྣན་ཏེ་ལྡན་པར་ཤེས་པར་བྱའོ། །བཟོད་པ་ཕྱི་མ་བདུན་དང་རྗེས་ཤེས་ཕྱི་མ་གསུམ་ལ་ནི་ཤེས་པ་སྔར་མེད་གསར་དུ་འཕེལ་བ་མེད་དེ། བཟོད་པ་ཤེས་པ་མ་ཡིན་ཞིང་རྗེས་ཤེས་ནི་སྔར་དུ་བགྲངས་ཟིན་པའི་ཕྱིར་རོ། །
ཁ་ཅིག་ལམ་ལ་རྗེས་ཤེས་ཀྱི་ཚེ་ན་ཆགས་བཅས་ལ་ལམ་ཤེས་པ་དེ་ཉིད་དང་ཆགས་བྲལ་ལ་ཕ་རོལ་སེམས་ཤེས་དང་གཉིས་ལྡན་གྱི་གཞན་ནི་མ་ཡིན་ཏེ། འབྲས་བུ་ཐོབ་པས་ཤེས་པ་སྔ་མ་རྣམས་བཏང་བའི་ཕྱིར་ཏེ། འཕགས་པ། འབྲས་བུ་ཐོབ་སྦྱངས་ཉམས་པ་ལས།། ཞེས་གསུངས་པའི་ཕྱིར་རོ། །ཞེས་འཆད་མོད་ཀྱི། ཊཱིཀ་ལས་ནི། ལམ་ལ་རྗེས་སུ་ཤེས་པ་ལ་ནི་འདོད་ཆགས་དང་མ་བྲལ་བ་ཞིག་ཡིན་ན་བདུན་པོ་དེ་དག་དང་ལྡན་ནོ། །འདོད་ཆགས་དང་བྲལ་བ་ཞིག་ཡིན་ན་བརྒྱད་དེ། དེ་དག་དང་གཞན་གྱི་སེམས་ཤེས་པ་དང་ལྡན་ནོ་ཞེས་བཤད་དོ། །དེ་བཞིན་དུ་སྒོམ་ལམ་ལ་གནས་པའང་ཆགས་བཅས་ཡིན་ན་ཕ་རོལ་སེམས་ཤེས་དང་ཟད་པ་དང་མི་སྐྱེ་བ་ཤེས་པ་མ་གཏོགས་བདུན་དང༌། ཆགས་བྲལ་ཡིན་ན་ཕ་རོལ་སེམས་ཤེས་བསྣན་ཏེ་བརྒྱད་དང་ལྡན་ནོ། །མི་སློབ་པའི་ལམ་ལ་གནས་པ་ནི་ཤེས་རབ་ཀྱིས་རྣམ་གྲོལ་ལ་ཕ་རོལ་སེམས་ཤེས་མ་གཏོགས་དགུ་དང༌། གཉིས་ཀའི་ཆ་ལས་རྣམ་གྲོལ་ལ་བཅུ་དང་ལྡན་ནོ་ཞེས་ཤེས་པར་བྱའོ། །
བརྒྱད་པ་ནི་འོ་ན་གནས་སྐབས་གང་དུ་ཤེས་པ་དུ་འཐོབ་ཅི་ན།
རྩ་བ། མཐོང་བའི་ལམ་ལ་བཟོད་པ་དང༌། །
ཤེས་པ་ཇི་ལྟར་སྐྱེས་པ་རྣམས། །
མ་འོངས་པ་འཐོབ་་་་་་་་་་་་་་་་་། །
མཐོང་བའི་ལམ་ལ་ནི་བཟོད་པ་བརྒྱད་དང་ཤེས་པ་བདུན་པོ་ཇི་ལྟར་སྐྱེས་པ་རྣམས་རང་རང་གི་རིགས་འདྲ་བ་མ་འོངས་པ་འཐོབ་པར་འགྱུར་ཏེ། འདི་ལྟར་སྡུག་བསྔལ་ལ་ཆོས་ཤེས་པའི་བཟོད་པ་སྐྱེས་པ་ནས་གང་ལ་བརྟེན་ནས་སྐྱེས་པ་དེ་ནི་ད་ལྟར་བ་དང་མ་འོངས་པ་འཐོབ་པ་ལ་ས་གཞན་ལ་རྟེན་པ་ནི་མ་འོངས་པ་ཁོ་ན་འཐོབ་སྟེ། དེ་ཡང་མི་སྐྱེ་བའི་ཆོས་ཅན་དག་ཡིན་གྱི་སྐྱེ་བའི་ཆོས་ཅན་ནི་མ་ཡིན་ཏེ། མཐོང་ལམ་ལན་དུ་མ་སྐྱེས་པར་ཐལ་བའི་ཕྱིར་རོ། །འགྲེལ་པ་ལས། མཐོང་བའི་ལམ་ལ་བཟོད་པའམ་ཤེས་པ་གང་དང་གང་སྐྱེས་པ་དེ་དང་འདྲ་བ་མ་འོངས་པ་དེའི་རྣམ་པ་བཞི་ཁོ་ན་འཐོབ་པར་འགྱུར་རོ་ཞེས་འབྱུང་བའི་རྣམ་པ་བཞི་ནི་དྲན་པ་ཉེར་གཞག་བཞི་ཡིན་ཏེ། རྣམ་པ་རྣམས་ནི་དྲན་པ་ཉེར་གཞག་ཏུ་བཤད་པའི་ཕྱིར་རོ་ཞེས་གསུངས་མོད་ཀྱི་ཊཱི་ཀ་ལས་ནི་ཇི་ལྟར་སྐྱེས་པ་རྣམས་འཐོབ་ཅེས་བྱ་བ་ནི་གང་དང་གང་སྐྱེས་པ་དེ་དག་འཐོབ་བོ་ཞེས་བྱ་བའི་ཐ་ཚིག་སྟེ། དཔེར་ན་སྡུག་བསྔལ་ལ་ཆོས་ཤེས་པའི་བཟོད་པ་སྐྱེས་ན་དེ་དང་འདྲ་བའི་བཟོད་པ་མ་འོངས་པ་ཁོ་ན་འཐོབ་བོ། །དེའི་རྣམ་པ་བཞི་ཞེས་བྱ་བ་ནི་སྐལ་པ་འདྲ་བའི་ཕྱིར་བཟོད་པའི་རྣམ་པ་སྟེ་མི་རྟག་པ་ལ་སོགས་པའི་རྣམ་པ་བཞི་ཡིན་གྱི་གཞན་ནི་མ་ཡིན་ནོ། །དེ་བཞིན་དུ་སྡུག་བསྔལ་ལ་ཆོས་ཤེས་པ་སྐྱེས་ན་དེ་ཉིད་མ་འོངས་པ་འཐོབ་ཅིང་དེའི་(མི་རྟག་པ་ལ་སོགས་པའི་)རྣམ་པ་བཞི་ཁོ་ན་འཐོབ་བོ། །དེ་བཞིན་དུ་སྡུག་བསྔལ་ལ་རྗེས་སུ་ཤེས་པའི་བཟོད་པ་ལ་སོགས་པ་ལའང་སྦྱར་བར་བྱའོ་ཞེས་བདེན་པ་གང་དང་གང་གིས་ཤེས་བཟོད་ཡིན་པའི་བདེན་པ་དེ་དང་དེའི་རྣམ་པ་མི་རྟག་པ་ལ་སོགས་པ་ཁོ་ན་འཐོབ་ཅིང༌། དེ་ཡང་བཟོད་ཤེས་རྣམས་ནི་སྐལ་མཉམ་གྱི་རྒྱུ་མ་ཐོབ་པས་དེ་དང་འདྲ་བ་ཁོ་ན་འཐོབ་ལ་རྣམ་པ་ནི་བཞི་གའང་དམིགས་ཡུལ་བདེན་པ་མཚུངས་ཤིང་འདྲ་བས་བཞི་ཆར་གྱི་རིགས་འཐོབ་པར་བཤད་དོ། །སྒོམ་ལམ་ལ་ནི་ཤེས་པ་རིགས་འདྲ་བ་དང་མི་འདྲ་བ་དང་དེ་དག་གི་རྣམ་པའང་ཐམས་ཅད་མངོན་སུམ་དུ་འགྱུར་བའི་ཕྱིར་ཐམས་ཅད་ཀྱི་རྒྱུ་འཐོབ་པས་མཐོང་ལམ་ལས་ཁྱད་པར་འཕགས་པའི་རྣམ་པ་མ་འོངས་པ་འཐོབ་པར་འགྱུར་རོ། །
འོ་ན་མཐོང་བའི་ལམ་ལ་རིགས་མི་འདྲ་བ་མི་འཐོབ་བམ་ཞེ་ན།
རྩ་བ། ་་་་་་་་་་་་་་་་་་་་་་་་་་་་་་་་་་་་དེ་ཉིད་ལ། །
རྗེས་གསུམ་ལ་ནི་ཀུན་རྫོབ་ཀྱང༌། །
དེ་ཕྱིར་མངོན་རྟོགས་མཐའ་ཞེས་བྱ། །
མཐོང་བའི་ལམ་དེ་ཉིད་ལ་སྡུག་བསྔལ་དང་ཀུན་འབྱུང་དང་འགོག་པ་ལ་རྗེས་སུ་ཤེས་པ་གསུམ་ལ་ནི་སྔོན་མ་ཐོབ་པ་ལས་ཀུན་རྫོབ་ཤེས་པའང་འཐོབ་པའི་ཕྱིར་མི་འདྲ་བའང་འཐོབ་བོ། །གསུམ་པོ་དེའི་ཆོས་ཤེས་ལ་ནི་འཐོབ་པ་མ་ཡིན་ཏེ། ཁམས་གོང་མ་གཉིས་ཀྱི་སྡུག་བསྔལ་མ་ཤེས་ཤིང་ཀུན་འབྱུང་མ་སྤངས་ལ་འགོག་པ་མངོན་དུ་མ་བྱས་པས་བདེན་པ་ཟད་པར་མ་རྟོགས་པའི་ཕྱིར་རོ། །བདེན་པ་གསུམ་པོ་རེ་རེ་ཟད་པར་རྟོགས་པའི་རྗེས་ལ་ཐོབ་པ་དེ་ཉིད་ཀྱི་ཕྱིར་ཀུན་རྫོབ་ཤེས་པ་དེ་ནི་མངོན་པར་རྟོགས་པའི་མཐའ་ལས་བྱུང་བ་ཞེས་བྱའོ།། འདི་ལའང་སྡུག་བསྔལ་དང་ཀུན་འབྱུང་དང༌། འགོག་པ་ལ་རྗེས་སུ་ཤེས་པ་རྣམས་ལ་རིམ་པ་ལྟར་བདེན་པ་གསུམ་པོ་དེ་དག་ལ་དམིགས་པའི་རྗེས་སུ་ཤེས་པ་ཐོབ་བོ་ཞེས་ཤེས་པར་བྱའོ། །ལམ་ལ་རྗེས་ཤེས་ལ་ནི་ཀུན་རྫོབ་ཤེས་པ་མི་འཐོབ་སྟེ། སྔོན་འཇིག་རྟེན་པའི་ལམ་གྱིས་བདེན་པ་དང་པོ་གསུམ་རྟོགས་ཀྱི་ཀུན་རྫོབ་ཤེས་པས་ལམ་བདེན་ནི་ནམ་ཡང་རྟོགས་མི་སྲིད་པའི་ཕྱིར་རོ། །
འདི་ནི་བདེན་པ་ཟད་པར་མངོན་པར་རྟོགས་པའི་མཐའ་ལས་བྱུང་བ་ཡིན་ན་ལམ་ནི་ཟད་པར་སྒོམ་མི་ནུས་ཏེ། ཉན་རང་སངས་རྒྱས་གསུམ་གྱི་ལམ་གྱི་རིགས་མང་ཞིང་དེ་དག་རེ་རེ་ལའང་ཆུང་འབྲིང་ལ་སོགས་པའི་དབྱེ་བ་མང་བས་མཐའ་མེད་པའི་ཕྱིར་དང༌། (གང་རུང་གཅིག་བསྒོམས་ན་གང་རུང་བརྟགས་མིན་འཐོབ་པས་)དེ་དག་གང་ཟག་གཅིག་གིས་(དུས་གཅིག་ཏུ་)སྒོམ་པའང་མི་སྲིད་པའི་ཕྱིར་རོ། །མངོན་པར་རྟོགས་པ་ཞེས་བྱ་བའང་སྡུག་བསྔལ་ཤེས་པ་ནས་ལམ་སྒོམ་པའི་བར་རང་གི་བྱ་བ་བྱས་པ་ཡིན་ནོ། །འོ་ན་ནི་ཀུན་འབྱུང་ལ་རྗེས་སུ་ཤེས་པ་ལའང་མི་འཐོབ་པར་འགྱུར་ཏེ། ཀུན་འབྱུང་མཐའ་དག་མ་སྤངས་པའི་ཕྱིར་རོ་ཞེ་ན། ཀུན་འབྱུང་མཐོང་སྤང་ནི་མཐའ་དག་སྤངས་པའི་ཕྱིར་འཐོབ་བོ། །ལམ་ནི་རིགས་མང་བའི་ཕྱིར་མཐོང་སྤང་གི་གཉེན་པོ་མཐའ་དག་སྒོམ་པར་མི་ནུས་པའི་ཕྱེར་མི་འཐོབ་བོ། །ཁ་ཅིག་ན་རེ་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་འདི་ནི་མཐོང་ལམ་གྱི་འཁོར་ཡིན་པའི་ཕྱིར་མཐོང་ལམ་ལ་བདེན་པ་གསུམ་གྱི་རྗེས་ཁོ་ན་ལ་འཐོབ་ཀྱི་ལམ་གྱི་རྗེས་ལ་ནི་མ་ཡིན་ཏེ། ལམ་ལ་རྗེས་ཤེས་ནི་སྒོམ་ལམ་ཡིན་པའི་ཕྱིར་རོ་ཞེས་ཟེར་བ་ནི་རིགས་ཏེ། དེ་ནི་སྒོམ་ལམ་གྱི་འཁོར་ཡང་ཡིན་པས་མཐོང་ལམ་ཁོ་ནའི་འཁོར་ཡིན་པའི་སྒྲུབ་བྱེད་མེད་པའི་ཕྱིར་རོ། །
འོ་ན་ཀུན་རྫོབ་ཤེས་པ་མངོན་པར་རྟོགས་པའི་མཐའ་ལས་བྱུང་བ་དེ་རེས་འགའ་མངོན་དུ་བྱེད་དམ་ཞེ་ན།
རྩ་བ། རང་དང་འོག་ས་འགོག་པའི་མཐའ། །
རང་བདེན་རྣམ་ཅན་འབད་ལས་བྱུང༌། །
དེ་ནི་མི་སྐྱེའི་ཆོས་ཅན་ཡིན། །
ཀུན་རྫོབ་ཤེས་པ་དེ་ནི་གཅིག་ཏུ་མི་སྐྱེ་བའི་ཆོས་ཅན་ཡིན་པས་ནམ་ཡང་མངོན་དུ་བྱེད་པ་ནི་མ་ཡིན་ནོ། །དེས་ན་མི་སྐྱེ་བའི་ཆོས་ཅན་དག་དེ་དང་དེར་འཐོབ་བོ་ཞེས་འདོད་དེ། མི་སྐྱེ་བའི་ཆོས་ཅན་དག་ཡིན་ན་ཇི་ལྟར་འཐོབ་པར་འགྱུར། འཐོབ་ནའང་ཇི་ལྟར་སྐྱེ་བར་མི་འགྱུར་ཏེ། ཆོས་མེད་པ་འཐོབ་པ་འགལ་བའི་ཕྱིར་རོ། །དེའི་ཕྱིར་མཐོང་ལམ་ལ་མཉམ་པར་བཞག་པས་བདེན་བཞི་ལ་དམིགས་པའི་ཀུན་རྫོབ་ཤེས་པ་རྗེས་ལས་ཐོབ་པ་སྐྱེ་བར་ནུས་པའི་ཕྱིར་ཀུན་རྫོབ་ཤེས་པ་རྙེད་པ་ཞེས་བརྗོད་དོ་ཞེས་སྔོན་གྱི་སློབ་དཔོན་དག་(སེམས་ཙམ་གྱིས་འདོད་པར་)འཆད་དོ། །དེའི་ཕྱིར་ཀུན་ལས་བཏུས་ལས་ཀྱང༌། མཐོང་བའི་ལམ་ལ་བདེན་པ་རྣམ་པར་འཇོག་པ་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་རྣམས་འཐོབ་སྟེ། མངོན་དུ་བྱེད་པ་ནི་མ་ཡིན་ནོ། །དེ་དག་ནི་སྒོམ་པའི་ལམ་ལ་མངོན་དུ་བྱེད་དོ་ཞེས་བཤད་དོ། །
བྱེ་བྲག་ཏུ་སྨྲ་བ་རྣམས་ན་རེ་དེ་ནི་མཐོང་ལམ་གྱིས་འཐོབ་པ་ཡིན་པས་སྒོམ་ལམ་ལ་མངོན་དུ་བྱེད་པར་མི་རིགས་ལ། ཁོ་བོ་ཅག་ལྟར་ན་མཐོང་ལམ་དུ་དེ་དག་སྐྱེ་བའི་གོ་སྐབས་མེད་པས་མི་སྐྱེ་བའི་ཆོས་ཅན་ཡིན་ནོ་ཞེས་བརྗོད་དོ་ཞེས་ཟེར་རོ། །ས་ཡང་མཐོང་ལམ་ས་གང་དག་ཡིན་པ་དེ་རང་གི་ས་པའི་ཀུན་རྫོབ་ཤེས་པ་དང་འོག་སའི་ཀུན་རྫོབ་ཤེས་པས་འཐོབ་སྟེ། གལ་ཏེ་མཐོང་ལམ་མི་ལྕོགས་མེད་ལ་བརྟེན་ན་འདོད་པ་དང་མི་ལྕོགས་མེད་ཀྱིས་བསྡུས་པ་གཉིས་ཀྱིས་ཀུན་རྫོབ་ཤེས་པ་འཐོབ་པ་ནས་བསམ་གཏན་བཞི་པ་ལ་བརྟེན་ན་འདོད་པ་དང་བསམ་གཏན་ས་དྲུག་སྟེ་ས་བདུན་གྱིས་བསྡུས་པའི་ཀུན་རྫོབ་ཤེས་པ་ཐོབ་པའི་བར་དུ་སྦྱར་རོ། །
འོ་ན་དེ་དྲན་པ་ཉེར་གཞག་ཏུ་དེ་གཅིག་ཡིན་ཞེ་ན། འགོག་པ་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་ནི་དྲན་པ་ཉེར་གཞག་བཞིའི་ཐ་མ་ཆོས་དྲན་པ་ཉེར་གཞག་ཡིན་ཏེ། དེ་ནི་འགོག་བདེན་ལ་དམིགས་ལ་དེ་ཡང་ཆོས་ཁོ་ནར་ངེས་པའི་ཕྱིར་རོ། །སྡུག་བསྔལ་དང་ཀུན་འབྱུང་མངོན་པར་རྟོགས་པའི་མཐའ་ལས་བྱུང་བ་ནི་དེ་དག་ལ་ལུས་ལ་སོགས་པ་ཡོད་པས་དྲན་པ་ཉེར་གཞག་བཞི་ག་ཡིན་ནོ། །མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་དེ་ནི་སྡུག་བསྔལ་ནས་འགོག་པའི་བར་གྱི་བདེན་པ་གང་ཞིག་མངོན་པར་རྟོགས་པས་ཐོབ་བའི་རང་རང་གི་བདེན་པ་དེའི་རྣམ་པ་ཅན་དང་དམིགས་པའང་རང་རང་གི་བདེན་པ་དེ་ཉིད་ཡིན་ཏེ། སྡུག་བསྔལ་མངོན་པར་རྟོགས་པའི་མཐའ་ལས་བྱུང་བའི་རྣམ་པ་མི་རྟག་པ་ལ་སོགས་པ་དང་དམིགས་པའང་སྡུག་བསྔལ་ཉིད་ཡིན་པ་ལ་སོགས་པའོ། །དེ་ཡང་སྐྱེས་ཐོབ་མ་ཡིན་གྱི་སྦྱོར་བ་འབད་རྩོལ་ལས་བྱུང་བ་ཡིན་ཏེ། མཐོང་ལམ་སྒོམ་པའི་སྟོབས་ཀྱིས་འཐོབ་པའི་ཕྱིར་རོ། །དེ་ཡང་འཁོར་དང་བཅས་ན་ནི་འདོད་པ་དང་གཟུགས་ན་སྤྱོད་པའི་ཀུན་རྫོབ་ཤེས་པ་གཉིས་རིམ་པ་ལྟར་བསམ་གཏན་གྱི་སྡོམ་པའི་གཟུགས་རྗེས་སུ་འབྲང་བ་མེད་པ་དང་ཡོད་པའི་ཕྱིར་ཕུང་པོ་བཞི་པ་དང་ལྔ་པ་ཡིན་ནོ། །
བསྒོམ་པའི་ལམ་ལ་ཤེས་པ་དུ་འཐོབ་བཤད་པ་ནི།
རྩ་བ། ཆགས་བཅས་བཅུ་དྲུག་པ་ལ་དྲུག །
འདོད་ལས་ཆགས་དང་བྲལ་བས་བདུན། །
དེ་ཡི་གོང་མ་ཆགས་བཅས་ཀྱི། །
བསྒོམ་པའི་ལམ་ལ་བདུན་འཐོབ་བོ། །
འདོད་པ་ལས་འདོད་ཆགས་དང་བཅས་པ་སྐད་ཅིག་མ་བཅུ་དྲུག་པ་ལམ་ལ་རྗེས་ཤེས་ལ་གནས་པ་ལ་ནི་བདེན་པ་བཞི་ཤེས་དང་ཆོས་ཤེས་རྗེས་ཤེས་དང་དྲུག་འཐོབ་སྟེ། དེ་ཡང་མཐོང་སྤང་ལས་རྣམ་པར་གྲོལ་བའི་ཤེས་པ་ཡིན་གྱི་སྒོམ་སྤང་ལས་གྲོལ་བ་ནི་མ་ཡིན་ཏེ། འབྲས་བུ་ལ་གནས་པ་ཙམ་པོ་ཡིན་པའི་ཕྱིར་རོ། །དེ་ཡང་ལམ་ལ་རྗེས་ཤེས་ནི་ལམ་ཤེས་པ་དང་རྗེས་ཤེས་གཉིས་ཀའི་ངོ་བོ་ཡིན་པའི་ཕྱིར་ལམ་ཤེས་པ་དང་རྗེས་ཤེས་གཉིས་ནི་ད་ལྟར་བྱུང་བ་ཡིན་ལ་ཤེས་པ་གཞན་བཞི་ནི་མ་འོངས་པ་ཁོ་ན་འཐོབ་བོ། །ས་ནི་ཆགས་བཅས་ཡིན་པས་མི་ལྕོགས་མེད་ཀྱིས་བསྡུས་པ་ཡིན་ལ། མཐོང་བ་རྗོགས་པས་བསྐྱེད་པའི་ཕྱིར་སྐལ་མཉམ་གྱི་རྒྱུ་རྒྱས་པ་ལས་འཐོབ་བོ། །ཕ་རོལ་སེམས་ཤེས་དང་ཀུན་རྫོབ་ཤེས་པ་དང་ཟད་པ་དང་མི་སྐྱེ་བ་བཞི་མི་འཐོབ་པ་ནི་རིམ་པ་ལྟར་འདོད་པ་ལས་ཆགས་བཅས་ཡིན་པའི་ཕྱིར་དང༌། སྔོན་རྙེད་མི་འཐོབ་བོ་ཞེས་པས་སྔོན་རྙེད་ཟིན་པའི་ཕྱིར་རམ། ཡང་ན་མངོན་པར་རྟོགས་པའི་མཐའ་མེད་པའི་ཕྱིར་དང༌། སློབ་པ་ཡིན་པའི་ཕྱིར་རོ། །
འདོད་པ་ལས་འདོད་ཆགས་དང་བྲལ་བ་ནས་ཅི་ཡང་མེད་པ་ལས་འདོད་ཆགས་དང་བྲལ་བའི་བར་ཅི་རིགས་པའི་གང་ཟག་སྐད་ཅིག་མ་བཅུ་དྲུག་པ་ལམ་ལ་རྗེས་ཤེས་ལ་གནས་པས་ནི་སྔར་གྱི་དྲུག་དང་ཕ་རོལ་སེམས་ཤེས་དང་བདུན་འཐོབ་སྟེ། དེ་ལའང་ས་ནི་གང་ལ་རྟེན་པ་དེའི་རང་ས་དང་འོག་སས་བསྡུས་པ་འཐོབ་པར་ཤེས་པར་བྱའོ། །སྔ་མ་ལྟར་ན་ད་ལྟར་བ་ནི་གཉིས་དང་ལྔ་ནི་མ་འོངས་པ་འཐོབ་བོ། །སྔོན་རྙེད་ཟིན་པ་དང་སློབ་པ་ཡིན་པས་གཞན་གསུམ་ནི་མི་འཐོབ་བོ། །སྐད་ཅིག་མ་བཅུ་དྲུག་པ་ལམ་ལ་རྗེས་སུ་ཤེས་པ་དེའི་གོང་མ་འདོད་པ་ལ་ཆགས་བཅས་ཀྱི་བསྒོམ་པའི་ལམ་ལ་ནི་སྦྱོར་བ་དང་བར་ཆད་མེད་པ་དང་རྣམ་གྲོལ་དང་ཁྱད་པར་ཅན་གྱི་ལམ་ཐམས་ཅད་ལ་ཆོས་ཤེས་རྗེས་ཤེས་དང་བདེན་པ་བཞི་ཤེས་དང་ཀུན་རྫོབ་ཤེས་པ་དང་བདུན་འཐོབ་བོ། །དེ་ཡང་གལ་ཏེ་སྒོམ་ལམ་འཇིག་རྟེན་པ་ཞི་རགས་ཀྱི་རྣམ་པ་ཅན་ཞིག་ཡིན་ན་ནི་ཀུན་རྫོབ་ཤེས་པ་ད་ལྟར་བྱུང་བ་དང༌། འོན་ཏེ་འཇིག་རྟེན་ལས་འདས་པ་ཞིག་ཡིན་ན་ནི་རྗེས་ཤེས་འདོད་པའི་གཉེན་པོ་མ་ཡིན་ལ་ཆོས་ཤེས་འདོད་པའི་གཉེན་པོ་ཡིན་པས་ཆོས་ཤེས་དང་བདེན་པ་བཞི་ཤེས་གང་རུང་གཅིག་ད་ལྟར་བྱུང་བ་ཡིན་ལ་གཞན་དག་ནི་མ་འོངས་པ་འཐོབ་སྟེ། རང་རང་གི་རིགས་ཀྱི་སྐལ་མཉམ་གྱི་རྒྱུ་རྒྱས་པའི་ཕྱིར་རོ། །ཆགས་བཅས་དང་སློབ་པ་ཡིན་པས་གཞན་གསུམ་ནི་མི་འཐོབ་བོ། །
རྩ་བ། ས་བདུན་ལས་རྒྱལ་མངོན་ཤེས་དང༌། །
མི་གཡོ་འཐོབ་དང་སྤེལ་བསྒོམ་པའི། །
བར་ཆད་མེད་པའི་ལམ་དག་དང༌། །
གོང་མའི་གྲོལ་བའི་ལམ་བརྒྱད་ལའང༌། །
སློབ་པ་བསམ་གཏན་བཞི་དང་གཟུགས་མེད་པ་གསུམ་སྟེ་ས་བདུན་གྱི་ཉོན་མོངས་པ་ལས་རྒྱལ་བ་སྟེ་འདོད་ཆགས་དང་འབྲལ་བར་བྱེད་པའི་བར་ཆད་མེད་པའི་ལམ་ལ་ནི་ཤེས་པ་སྔར་བཤད་པ་བདུན་པོ་ཁོ་ན་འཐོབ་སྟེ། དེ་ཡང་གལ་ཏེ་འཇིག་རྟེན་པའི་སྒོམ་ལམ་ཡིན་ན་ནི་ཀུན་རྫོབ་ཤེས་པ་ད་ལྟར་བྱུང་བ་གཞན་དྲུག་མ་འོངས་པ་འཐོབ་ལ། ཕ་རོལ་སེམས་ཤེས་དང་ཟད་པ་དང་མི་སྐྱེ་བ་ཤེས་པ་མི་འཐོབ་སྟེ། བར་ཆད་མེད་པའི་ལམ་ལ་བཀག་པའི་ཕྱིར་དང་སློབ་པ་ཡིན་པའི་ཕྱིར་རོ། །འོན་ཏེ་འཇིག་རྟེན་ལས་འདས་པའི་ལམ་ཡིན་ན་ནི་འདོད་གཉིས་ཅི་རིགས་ཁམས་གསུམ་གྱི་གཉེན་པོར་རུང་བས་འགོག་པ་དང་ལམ་ལ་ཆོས་ཤེས་པ་གང་ཡང་རུང་བའམ། ཁམས་གོང་མའི་གཉེན་པོ་ཡིན་པས་རྗེས་ཤེས་དང་བདེན་པ་བཞི་ཤེས་ལས་གང་རུང་ཞིག་ད་ལྟར་བ་དང་གཞན་དག་ནི་མ་འོངས་པ་འཐོབ་བོ། །བར་ཆད་མེད་པའི་ལམ་དང་སློབ་པ་ཡིན་པས་གཞན་གསུམ་ནི་མི་འཐོབ་བོ། །སློབ་པ་ཞིག་མངོན་པར་ཤེས་པ་དང་པོ་ལྔ་ཐོབ་པར་བྱེད་པའི་བར་ཆད་མེད་པའི་ལམ་ལའང་ཤེས་པ་བདུན་འཐོབ་སྟེ། དེ་ཡང་འདོད་པ་ལས་འདོད་ཆགས་དང་བྲལ་བ་ཞིག་གིས་འཐོབ་ན་སྔར་བཤད་པ་ལྟར་ཡིན་ལ་སྦྱོར་བའི་སྟོབས་ཀྱིས་འཐོབ་ན་ནི་ཀུན་རྫོབ་ཤེས་པ་ད་ལྟ་བ་ཡིན་ནོ། །མི་སློབ་པས་མངོན་པར་ཤེས་པ་འཐོབ་པར་བྱེད་པ་ལ་ནི་མི་གཡོ་བ་ལ་དགུ་དང་གཞན་ལ་ནི་བརྒྱད་འཐོབ་པར་འགྱུར་རོ། །རབ་ཏུ་རྟོགས་པའི་སྐལ་པ་ཅན་ཞིག་མི་གཡོ་བ་འཐོབ་པར་བྱེད་པའི་བར་ཆད་མེད་པའི་ལམ་ལའང་ཆོས་ཤེས་རྗེས་ཤེས་དང་བདེན་པ་བཞི་ཤེས་དང་ཟད་ཤེས་དང་བདུན་འཐོབ་པ་ལས་ཆོས་ཤེས་རྗེས་ཤེས་གང་རུང་ཞིག་དང་བདེན་པ་བཞི་ཤེས་གང་རུང་ཞིག་དང་ཟད་པ་ཤེས་པ་དང་གསུམ་ད་ལྟར་བ་དང་གཞན་ནི་མ་འོངས་པ་འཐོབ་བོ། །སྙིང་པོ་ཟག་མེད་ཀྱི་དབང་པོ་འཕོ་བའི་ཕྱིར་དང༌། བར་ཆད་མེད་ལམ་ཡིན་པས་གཞན་གསུམ་ནི་མི་འཐོབ་སྟེ། ཀུན་རྫོབ་ཤེས་པ་ཟག་བཅས་ཡིན་པས་དབང་པོ་རྟུལ་པོ་དང་སྲིད་རྩེའི་གཉེན་པོ་མ་ཡིན་པ་དང༌། ཤེས་པ་གཞན་གཉིས་རྣམ་གྲོལ་གྱི་ལམ་ཡིན་པའི་ཕྱིར་རོ། །སློབ་པ་ཞིག་བསམ་གཏན་ཟག་བཅས་དང་ཟག་མེད་སྤེལ་མར་བསྒོམ་པའི་བར་ཆད་མེད་པའི་ལམ་དག་ལའང་བདུན་འཐོབ་སྟེ། འདི་ལའང་ཟག་མེད་ལ་ནི་འགོག་ལམ་ལ་ཆོས་ཤེས་པ་གཉིས་གང་རུང་ངམ་རྗེས་ཤེས་དང་བདེན་པ་བཞི་ཤེས་ལས་གང་རུང་ཞིག་ད་ལྟར་བྱུང་བ་དང་གཞན་ནི་མ་འོངས་པ་འཐོབ་བོ། །ཟག་བཅས་ལ་ནི་ཀུན་རྗོབ་ཤེས་པ་ད་ལྟར་བྱུང་བ་ཡིན་ནོ། །ས་བདུན་ལས་འདོད་ཆགས་དང་བྲལ་བའི་གོང་མ་སྲིད་རྩེ་ལས་འདོད་ཆགས་དང་བྲལ་བའི་རྣམ་པར་གྲོལ་བའི་ལམ་བརྒྱད་ལའང་ཆོས་ཤེས་རྗེས་ཤེས་དང་བདེན་པ་བཞི་ཤེས་དང་ཕ་རོལ་སེམས་ཤེས་དང་བདུན་འཐོབ་སྟེ། བདུན་པོ་དེ་ལའང་འགོག་ལམ་ལ་ཆོས་ཤེས་གཉིས་གང་རུང་ངམ་རྗེས་ཤེས་དང་བདེན་པ་བཞི་ཤེས་ལས་གང་རུང་ཞིག་ད་ལྟར་བྱུང་བ་ཡིན་ལ་གཞན་དག་ནི་མ་འོངས་པ་འཐོབ་བོ། །སྲིད་རྩེའི་གཉེན་པོ་མ་ཡིན་པ་དང༌། སློབ་པ་ཡིན་པས་གཞན་གསུམ་ནི་མི་འཐོབ་བོ། །
རྩ་བ། སློབ་པ་སྦྱོང་བའི་གྲོལ་བ་ལ། །
ཤེས་པ་དྲུག་དང་བདུན་འཐོབ་བམ། །
བར་ཆད་མེད་པའི་ལམ་ལ་དྲུག །
སློབ་པ་ཞིག་དབང་པོ་རྟུལ་པོ་རྣོན་པོར་སྦྱོང་བའི་རྣམ་པར་གྲོལ་བའི་ལམ་ལ་ནི་གལ་ཏེ་ཆགས་བཅས་ཡིན་ན་ཆོས་ཤེས་རྗེས་ཤེས་དང་བདེན་པ་བཞི་ཤེས་ཏེ་ཤེས་པ་དྲུག་དང་འོན་ཏེ་ཆགས་བྲལ་ཞིག་ཡིན་ན་ཕ་རོལ་སེམས་ཤེས་བསྣན་ནས་བདུན་འཐོབ་ཅིང༌། ད་ལྟར་བྱུང་བ་ནི་ཆོས་ཤེས་དང་བདེན་པ་བཞི་ཤེས་ལས་གང་ཡང་རུང་བ་ཞིག་དང་གཉིས་ཡིན་ལ་གཞན་དག་ནི་མ་འོངས་པ་འཐོབ་བོ། །འམ་ཞེས་བྱ་བ་ནི་ལུགས་གཞན་སྟོན་པ་སྟེ། ཁ་ཅིག་འདི་ནི་མཐོང་ལམ་དང་འདྲ་བའི་ཕྱིར་ཇི་ལྟར་མཐོང་ལམ་གྱིས་འབྲས་བུ་གསུམ་དང་ཀུན་རྗོབ་ཤེས་པ་འཐོབ་པ་ལྟར་འདི་ལའང་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པའང་འཐོབ་པའི་ཕྱིར་(དེ་གཉིས་ཀྱིས་)བདུན་(དང་བརྒྱད་)འཐོབ་བོ་ཞེས་འདོད་པ་བསྟན་པའི་ཕྱིར་རོ། །ཁ་ཅིག་ནི་སྔར་རྟོགས་ཟིན་པས་མངོན་པར་རྟོགས་པའི་མཐའ་མེད་པའི་ཕྱིར་དང༌། མཐོང་ལམ་ནི་འཐོབ་པར་བྱེད་པ་ཡིན་ལ་འདི་ནི་ཐོབ་ཟིན་པའི་ཕྱིར་མཐོང་ལམ་དང་འདྲ་བའང་མ་ཡིན་ནོ། །
འོན་ཀྱང་སྦྱོར་བའི་ལམ་ལ་ནི་ཆགས་བཅས་དང་ཆགས་བྲལ་གཉིས་ཀས་ཀྱང་ཀུན་རྫོབ་ཤེས་པའང་འཐོབ་བོ་ཞེས་འདོད་དོ། །སློབ་པ་དབང་པོ་སྦྱོང་བའི་བར་ཆད་མེད་པའི་ལམ་ལ་ནི་ཆགས་བཅས་ཆགས་བྲལ་གཉིས་ཀས་ཆོས་ཤེས་རྗེས་ཤེས་དང་བདེན་པ་བཞི་ཤེས་དང་དྲུག་འཐོབ་ཀྱི། འདིར་ཡང་བར་ཆད་མེད་ལམ་དང་སློབ་པ་ཡིན་པས་ཤེས་པ་གསུམ་མི་འཐོབ་ལ། ཀུན་རྫོབ་ཤེས་པའང་མི་འཐོབ་སྟེ། མཐོང་ལམ་དང་འདྲ་བའི་ཕྱིར་རོ། །ཇི་ལྟར་འདྲ་ཞེ་ན། ཇི་ལྟར་མཐོང་ལམ་གྱིས་འབྲས་བུ་དང་པོ་གསུམ་གང་རུང་ཞིག་འཐོབ་པ་ལྟར་འདིས་ཀྱང་བར་ཆད་མེད་པའི་ལམ་གྱིས་སློབ་པ་དབང་པོ་སྦྱོང་བ་ན་འབྲས་བུ་དང་པོ་གསུམ་པོ་དབང་པོ་རྣོན་པོས་བསྡུས་པ་འདུས་བྱས་གང་རུང་ཞིག་འཐོབ་ལ། ཡང་མཐོང་ལམ་བར་ཆད་མེད་པའི་ལམ་བཟོད་པ་རྣམས་ལ་ཀུན་རྫོབ་ཤེས་པ་མི་འཐོབ་པ་ལྟར་འདིར་ཡང་དེ་དང་འདྲའོ། །
རྩ་བ། དེ་བཞིན་སྲིད་རྩེ་རྣམ་རྒྱལ་ལའང༌། །
ཟད་པ་ཤེས་པ་ལ་དགུ་འོ། །
མི་གཡོ་བས་ནི་བཅུ་འཐོབ་བོ། །
དེར་འཕོ་གྲོལ་བའི་ཐ་མ་ལའང༌། །
ཇི་ལྟར་སློབ་པ་དབང་པོ་སྦྱོང་བའི་བར་ཆད་མེད་པའི་ལམ་ལ་ཤེས་པ་དྲུག་འཐོབ་པ་དེ་བཞིན་དུ་སྲིད་རྩེའི་ཉོན་མོངས་པ་ལས་རྣམ་པར་རྒྱལ་བ་སྟེ་འདོད་ཆགས་དང་བྲལ་བར་བྱེད་པའི་བར་ཆད་མེད་པའི་ལམ་རྣམས་ལའང་ཤེས་པ་དྲུག་པོ་དེ་དག་ཉིད་འཐོབ་ཀྱི་སྲིད་རྩེའི་གཉེན་པོ་མ་ཡིན་ཞིང་སློབ་པའི་བར་ཆད་མེད་ལམ་ཡིན་པས་གཞན་མི་འཐོབ་པ་ནི་སྔར་བཞིན་ནོ། །སྲིད་རྩེའི་རྣམ་གྲོལ་གྱི་ལམ་དགུ་པ་ཟད་པ་ཤེས་པ་ལ་ནི་དབང་པོ་རྟུལ་པོ་ལ་ཉམས་པ་སྲིད་པས་མི་སྐྱེ་བ་ཤེས་པ་མ་གཏོགས་པ་ཤེས་པ་དགུ་འཐོབ་ཅིང༌། མི་གཡོ་བའི་ཆོས་ཅན་གྱིས་ནི་མི་སྐྱེ་བ་ཤེས་པའང་འཐོབ་པས་བཅུ་འཐོབ་ལ། མི་གཡོ་བ་དེར་དབང་པོ་འཕོ་བའི་རྣམ་པར་གྲོལ་བའི་ལམ་ཐ་མ་ལའང་བཅུ་པོ་ཐམས་ཅད་འཐོབ་བོ། །འདི་དག་ལ་སྡུག་བསྔལ་དང་ཀུན་འབྱུང་ཤེས་པ་གང་རུང་ཞིག་དང་རྗེས་ཤེས་དང་ཟད་པ་དང་མི་སྐྱེ་བ་ཤེས་པ་གང་རུང་ཞིག་སྟེ་གསུམ་ནི་ད་ལྟར་བྱུང་བ་ཡིན་ལ་གཞན་དག་ནི་མ་འོངས་པ་འཐོབ་བོ། །
རྩ་བ། བཤད་པའི་ལྷག་མ་ལ་བརྒྱད་འཐོབ། །
སྔར་བཤད་པའི་ལྷག་མ་འདོད་པ་ལས་འདོད་ཆགས་དང་བྲལ་བའི་རྣམ་གྲོལ་གྱི་ལམ་དགུ་པ་དང༌། ས་བདུན་ལས་འདོད་ཆགས་དང་བྲལ་བའི་རྣམ་པར་གྲོལ་བ་དང༌། མངོན་པར་ཤེས་པ་དང༌། སྤེལ་མ་སྒོམ་པ་དང༌། མི་གཡོ་བ་རྟོགས་པར་བྱེད་པ་གསུམ་གྱི་རྣམ་པར་གྲོལ་བའི་ལམ་དང་པོ་བརྒྱད་པོ་རྣམས་དང༌། དེ་བཞིན་དུ་སྔར་མ་སྨོས་པ་འདོད་པ་ལས་འདོད་ཆགས་དང་བྲལ་བའི་ཕྱིར་མི་འོང་བའི་སྦྱོར་བ་དང་ཁྱད་པར་ཅན་གྱི་ལམ་རྣམས་ལ་ཚོགས་པའོ། །རྣམས་ལ་ནི་ཟད་པ་དང་མི་སྐྱེ་བ་ཤེས་པ་མ་གཏོགས་པ་ཤེས་པ་བརྒྱད་བརྒྱད་མ་འོངས་པ་འཐོབ་སྟེ་སློབ་པའི་དབང་དུ་བྱས་པའོ། །མི་སློབ་པ་ནི་མངོན་པར་ཤེས་པ་དང་སྤེལ་མ་སྒོམ་པ་དང་མི་གཡོ་བ་རྟོགས་པར་བྱེད་པའི་བར་ཆད་མེད་པའི་ལམ་ལ་དུས་ཀྱི་རྣམ་གྲོལ་ཡིན་ན་ཕ་རོལ་སེམས་ཤེས་དང་མི་སྐྱེ་བ་ཤེས་པ་མ་གཏོགས་པ་བརྒྱད་འཐོབ་ལ། མི་གཡོ་བའི་ཆོས་ཅན་ཞིག་ཡིན་ན་ནི་བར་ཆད་མེད་ལམ་ལ་བཀག་པས་ཕ་རོལ་སེམས་ཤེས་མ་གཏོགས་པ་དགུ་འཐོབ་བོ། །མངོན་པར་ཤེས་པ་དང་སྤེལ་མར་སྒོམ་པ་དང་མི་གཡོ་བ་རྟོགས་པར་བྱེད་པའི་སྦྱོར་བ་དང་རྣམ་པར་གྲོལ་བ་དང་ཁྱད་པར་ཅན་གྱི་ལམ་རྣམས་ལ་དུས་ཀྱི་རྣམ་གྲོལ་གྱིས་མི་སྐྱེ་བ་ཤེས་པ་མ་གཏོགས་པ་དགུ་དང༌། མི་གཡོ་བས་བཅུ་པོ་ཐམས་ཅད་འཐོབ་བོ། །དེ་ཡང༌། མིག་དང་རྣ་བའི་མངོན་ཤེས་ནི། །ལུང་དུ་མ་བསྟན། ཞེས་འབྱུང་བས་ལྷའི་མིག་དང་རྣ་བའི་མངོན་ཤེས་གཉིས་ཀྱིས་ནི་རྣམ་གྲོལ་གྱི་ལམ་ཡང་ལུང་མ་བསྟན་(ཡིན་ལ་ལུང་མ་བསྟན་)ལ་ནི་མ་འོངས་པ་འཐོབ་པ་མེད་དོ། །
དེ་དག་ནི་མི་སློབ་པའི་དབང་དུ་བྱས་པའོ། །སོ་སོའི་སྐྱེ་བོ་འདོད་པ་དང་བསམ་གཏན་སྔ་མ་གསུམ་ལས་འདོད་ཆགས་དང་བྲལ་བའི་རྣམ་གྲོལ་གྱི་ལམ་ཐ་མ་རྣམས་ལ་ནི་རིམ་པ་ལྟར་བསམ་གཏན་དང་པོ་དང་གཉིས་པ་དང་གསུམ་པ་དང་བཞི་པའི་སས་བསྡུས་པའི་ཀུན་རྗོབ་ཤེས་པ་དང་ཕ་རོལ་སེམས་ཤེས་མ་འོངས་པ་འཐོབ་བོ། །བསམ་གཏན་བཞི་པ་ལས་འདོད་ཆགས་དང་བྲལ་བའི་རྣམ་གྲོལ་གྱི་ལམ་དགུ་པ་ལ་ནི་ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞིས་བསྡུས་པའི་ཀུན་རྫོབ་ཤེས་པ་འཐོབ་ཀྱི་ཕ་རོལ་སེམས་ཤེས་ནི་མི་འཐོབ་སྟེ། དེ་ནི་གཟུགས་ལ་བརྟེན་ནས་བསྒྲུབ་པར་བྱ་བ་ཡིན་པས་གཞན་གྱི་སེམས་ཤེས་གཟུགས་མེད་ཀྱི་སས་བསྡུས་པ་མེད་པའི་ཕྱིར་རོ། །དེ་བཞིན་དུ་གཟུགས་མེད་ལྷག་མ་རྣམས་ལའང་ཤེས་པར་བྱའོ། །བསམ་གཏན་གྱི་དངོས་གཞིའི་ས་པའི་སྦྱོར་བའི་ལམ་རྣམས་དང༌། ལྷའི་མིག་དང་རྣ་བའི་མངོན་ཤེས་མ་གཏོགས་པའི་མངོན་ཤེས་གསུམ་གྱི་རྣམ་གྲོལ་གྱི་ལམ་དང་ཆད་མེད་དང་རྣམ་ཐར་ཟིལ་གནོན་དང་ཟད་པར་གྱི་སྐྱེ་མཆེད་ལ་སོགས་པ་ཡོན་ཏན་མངོན་པར་སྒྲུབ་པའི་རྣམ་གྲོལ་གྱི་ལམ་ལ་ནི་ཀུན་རྗོབ་ཤེས་པ་དང་ཕ་རོལ་སེམས་ཤེས་གཉིས་ཀ་འཐོབ་སྟེ། དེ་དག་ནི་བསམ་གཏན་གྱི་དངོས་གཞི་ལ་རྟེན་པའི་ཕྱིར་རོ། །
མངོན་ཤེས་སྤྲུལ་པ་མ་གཏོགས་སོ། །ཞེས་བྱ་བ་ནི་བསམ་གཏན་དགེ་བའི་སྟོབས་ཀྱིས་དེ་དག་མ་འོངས་པ་འཐོབ་པར་བཤད་པ་ཡིན་ལ། འདིར་དེ་དག་གི་མ་འོངས་པ་མི་འཐོབ་པར་འདོད་དོ། །ངེས་འབྱེད་ཆ་མཐུན་དག་ལ་ནི་བསམ་གཏན་གྱི་ས་པ་དག་གིས་ཀྱང་ཕ་རོལ་སེམས་ཤེས་འཐོབ་པ་མེད་དེ། མཐོང་ལམ་གྱི་འཁོར་ཡིན་པའི་ཕྱིར་ཏེ། ཇི་ལྟར་མཐོང་ལམ་ལ་ཕ་རོལ་སེམས་ཤེས་མི་འཐོབ་པ་ལྟར་དེའི་འཁོར་ལའང་མི་འཐོབ་བོ་སྙམ་དུ་བསམས་པའོ། །དེ་ཡང་སོ་སོའི་སྐྱེ་བོ་འདོད་པ་དང་བསམ་གཏན་སྔ་མ་གསུམ་ལས་འདོད་ཆགས་དང་བྲལ་བའི་རྣམ་གྲོལ་གྱི་ལམ་ཐ་མ་མ་གཏོགས་པ་དང་སྦྱོར་བ་དང་བར་ཆད་མེད་པ་དང་ཁྱད་པར་ཅན་གྱི་ལམ་དང་མངོན་ཤེས་གསུམ་དང་ཆད་མེད་པ་ལ་སོགས་པ་ཡོན་ཏན་མངོན་པར་སྒྲུབ་པ་དག་གི་བར་ཆད་མེད་པའི་ལམ་རྣམས་ལ་ནི་ཀུན་རྫོབ་ཤེས་པ་ཁོ་ན་མ་འོངས་པ་འཐོབ་ཀྱི་གཉེན་པོ་མ་ཡིན་པས་ཕ་རོལ་སེམས་ཤེས་ནི་མི་འཐོབ་བོ་ཞེས་ཊཱིཀ་ལས་འཆད་དོ། །
འོ་ན་ཟག་བཅས་ཟག་མེད་ཀྱི་ལམ་གང་ལ་ས་དུ་པའི་ཤེས་པ་འཐོབ་ཅེ་ན། དེ་ལ་ལམ་གཉིས་ལས་དང་པོ་འཇིག་རྟེན་པའི་ལམ་ནི་མི་ལྕོགས་མེད་ལ་བརྟེན་ནས་འདོད་པ་ལས་འདོད་ཆགས་དང་བྲལ་ནས་བསམ་གཏན་དང་པོའི་དངོས་གཞི་འཐོབ་པ་ན་རྣམ་གྲོལ་གྱི་ལམ་དགུ་པ་ལ་བསམ་གཏན་དང་པོའི་ཉེར་བསྡོགས་དང་དངོས་གཞིས་བསྡུས་པའི་ཀུན་རྫོབ་ཤེས་པ་འཐོབ་པ་ནས་སྲིད་རྩེའི་ཉེར་བསྡོགས་ལ་བརྟེན་ནས་ཅི་ཡང་མེད་པ་ལས་འདོད་ཆགས་དང་བྲལ་ནས་སྲིད་རྩེའི་དངོས་གཞིས་འཐོབ་པ་ན་རྣམ་གྲོལ་གྱི་ལམ་དགུ་པ་ལ་སྲིད་རྩེའི་ཉེར་བསྡོགས་དང་དངོས་གཞིས་བསྡུས་པའི་ཀུན་རྫོབ་ཤེས་པ་འཐོབ་པའི་བར་དུ་སྦྱར་རོ། །
གཉིས་པ་འཇིག་རྟེན་ལས་འདས་པའི་ལམ་ལ་ནི།
རྩ་བ། གང་ལས་ཆགས་བྲལ་བྱ་ཕྱིར་གང༌། །
ཐོབ་པ་དེར་ཡང་འོག་མའང་འཐོབ། །
ཟད་པ་ཤེས་ལ་ཟག་བཅས་ཀྱང༌། །
ས་ཀུན་སྔོན་རྙེད་མི་འཐོབ་བོ། །
ས་བསམ་གཏན་གཉིས་པ་ལྟ་བུ་གང་ལས་འདོད་ཆགས་དང་བྲལ་བར་བྱ་བའི་ཕྱིར་གཉིས་པའི་སས་བསྡུས་པའི་ཟག་མེད་ཀྱི་བསམ་གཏན་གཉིས་པ་གང་ཞིག་ཐོབ་པ་དེར་ཡང་འོག་མ་བསམ་གཏན་དང་པོའི་ཉེར་བསྡོགས་དང་དངོས་གཞི་དང་དངོས་གཞི་ཁྱད་པར་ཅན་དང་རྣམ་གྲོལ་དགུ་པའི་ཚེ་བསམ་གཏན་གསུམ་པའི་སས་བསྡུས་པའི་ཟག་པ་མེད་པའང་འཐོབ་སྟེ། གཉེན་པོའི་རིགས་རྒྱས་པའི་ཕྱིར་རོ། །དེ་བཞིན་དུ་ས་གཞན་གྱི་ཟག་མེད་ལའང་སྦྱར་བར་བྱའོ། །གང་གིས་ཟད་པ་ཤེས་པ་འཐོབ་པ་དེ་ལ་ནི་ཟག་པ་དང་བཅས་པའི་ཡོན་ཏན་མི་སྡུག་པ་དང་དབུགས་འབྱུང་རྔུབ་དྲན་པ་དང་དྲན་པ་ཉེར་གཞག་དང་ཚད་མེད་དང་རྣམ་ཐར་ཟིལ་གནོན་དང་ཟད་པར་ལ་སོགས་པ་རྣམས་ཀྱང་འཐོབ་བོ། །དེ་ཡང་ས་ཀུན་གྱིས་བསྡུས་པའི་ཡོན་ཏན་འཐོབ་སྟེ། དེ་ཡང་འདོད་ཆགས་དང་བྲལ་བས་ཐོབ་པ་རྣམས་འཐོབ་ཀྱི་སྦྱོར་བས་ཐོབ་པ་རྣམས་ནི་མ་ཡིན་ཏེ། དེ་དག་ནི་བསམ་གཏན་གྱི་སྟོབས་ཀྱིས་བསྐྱེད་པར་བྱ་བ་ཡིན་པའི་ཕྱིར་རོ། །འདོད་ཆགས་དང་བྲལ་བས་ཐོབ་པ་རྣམས་ནི་དར་གྱི་སྦྲོག་མ་ཐག་པ་བཅད་པའམ་རྒྱལ་སྲིད་ཆེན་པོ་ཐོབ་ན་འབུལ་བ་དང་བཅས་པས་ཡུལ་མི་རྣམས་ཀྱིས་བསུ་བ་བྱེད་པ་བཞིན་དུ་རྡོ་རྗེ་ལྟ་བུའི་ཏིང་ངེ་འཛིན་གྱིས་ཉོན་མོངས་པའི་ཐོབ་པ་བཅད་པ་དང་སེམས་ཀྱི་རྒྱལ་སྲིད་ཆེན་པོ་ཐོབ་པ་ལ་ཡོན་ཏན་གྱི་ཚོགས་རྣམས་ཀྱི་ཐོབ་པས་བསུ་བའི་ཕྱིར་རོ། །ཡོན་ཏན་དེ་དག་ཀྱང་འདོད་པ་དང་གཟུགས་དང་གཟུགས་མེད་པའི་རྟེན་ཅན་གྱི་དགྲ་བཅོམ་ཡིན་ན་རིམ་པ་ལྟར་ཁམས་གསུམ་ཆར་གྱིས་བསྡུས་པ་དང་ཁམས་གོང་མ་གཉིས་དང་གཟུགས་མེད་ཀྱིས་བསྡུས་པ་ཁོ་ན་འཐོབ་ལ་དེ་བཞིན་དུ་སའི་སྒོ་ནས་ཀྱང་རྟོགས་པར་བྱའོ།། དེ་ཡང་སྔོན་རྙེད་ཟིན་པ་ནི་མི་འཐོབ་སྟེ། དེ་ནི་ཐོབ་ཟིན་པའི་ཕྱིར་དང༌། (དམན་པའི་ཕྱིར་དང༌།) ཐོབ་པ་བཏང་བ་ཡིན་ན་འདས་པ་མི་འཐོབ་པའི་ཕྱིར་རོ། །
སློབ་དཔོན་འདུན་བཟང་ནི་ཐོབ་པ་བཏང་བ་དེ་དག་སྔོན་འདྲིས་པར་བྱས་པས་སྔོན་དུ་འགྱུར་ཀྱང་མ་འོངས་པ་ནི་མི་འཐོབ་སྟེ་སྟོབས་ཉམས་པའི་ཕྱིར་རོ་ཞེས་འདོད་དོ།། སློབ་དཔོན་དབྱིག་བཤེས་ནི་སྔོན་རྙེད་པ་དག་ད་ལྟ་མི་ལྡན་པ་ལས་རྙེད་ན་བཏང་ཡང་མ་འོངས་པ་འཐོབ་པར་འདོད་ལ། ཁ་ཅིག་ནི་བཏང་བ་རྣམས་ནི་མ་འོངས་པ་མི་འཐོབ་ཀྱི། མ་བཏང་ན་མ་འོངས་པ་འཐོབ་བོ་ཞེས་འདོད་དེ། འདི་དག་ནི་གཞི་མེད་པར་ཁྱད་པར་གྱི་ཆོས་ལ་དཔྱོད་པ་ཡིན་ནོ། །
ཅི་ཐོབ་པ་རྙེད་པ་ཁོ་ན་ཡིན་ནམ་ཞེ་ན།
རྩ་བ། རྙེད་དང་བསྟེན་ཅེས་བྱ་བ་ནི། །
དགེ་བ་འདུས་བྱས་ཐོབ་པ་འོ། །
གཉེན་པོ་དང་ནི་ཐག་སྲིང་བའི། །
ཐོབ་པ་ཟག་དང་བཅས་པའི་ཡིན། །
ཐོབ་པ་ནི་རྣམ་པ་བཞི་སྟེ། རྙེད་པ་དང༌། བསྟེན་པ་དང༌། གཉེན་པོ་དང༌། ཐག་སྲིང་བ་འཐོབ་པའོ། །དེ་ལ་རྙེད་པ་འཐོབ་པ་ཞེས་བྱ་བ་ནི་དགེ་བ་འདུས་བྱས་རྣམས་(གོམས་པས་དེ་དག་མ་འོངས་པ་རྣམས་)ཀྱིས་གསར་དུ་རྙེད་པ(ལྟ་བུ་)འོ། །བསྟེན་པ་འཐོབ་པ་ཞེས་བྱ་བ་ནི་དགེ་བ་འདུས་བྱས། (ཐོབ་ཟིན་)རྣམས་ཀྱིས་ཡང་དང་ཡང་དུ་མངོན་དུ་བྱས་པའི་ཐོབ་པའོ། །དེ་ཡང་ད་ལྟར་བའི་ཆོས་ལ་ནི་རྙེད་པ་དང་བསྟེན་པ་གཉིས་ཡོད་ལ་མ་འོངས་པ་ལ་རྙེད་པ་འབའ་ཞིག་དང་འདས་པ་ལ་གཉིས་ཀ་མེད་དོ། །གཉེན་པོ་འཐོབ་པ་དང་ཐག་སྲིང་བ་འཐོབ་པ་ནི་ཟག་པ་དང་བཅས་པའི་ཆོས་རྣམས་ཀྱིས་གཉེན་པོ་འཐོབ་པ་དང་དེ་དག་སྤངས་པ་ཐག་སྲིང་བ་ཡིན་ཏེ། རིམ་པ་ལྟར་ལུས་སེམས་ལ་འདོད་ཆགས་དང་བྲལ་བར་བྱེད་པ་དང༌། ཉོན་མོངས་པའི་ཐོབ་པ་གཅོད་པའོ། །དེ་ལྟར་ན་དགེ་བ་ཟག་བཅས་རྣམས་ཀྱིས་ནི་ཐོབ་པ་བཞི་ཆར་ཡིན་ནོ། །དེ་ཡང་དང་པོ་གཉིས་ནི་དགེ་བ་ཟག་བཅས་རང་གིས་འཐོབ་པ་ཡིན་ལ་ཕྱི་མ་གཉིས་ནི་དེ་དག་གི་གཉེན་པོ་དང་རྣམ་གྲོལ་ཐོབ་པ་ལ་དེ་དག་གི་ཐོབ་པ་ཞེས་བཏགས་ནས་བརྗོད་པ་ཡིན་ནོ། །ཟག་མེད་ཀྱི་ནི་འཐོབ་པ་དང་པོ་གཉིས་ཡིན་གྱི་ཕྱི་མ་གཉིས་ནི་མ་ཡིན་ཏེ། ཟག་མེད་ལ་གཉེན་པོ་མེད་པའི་ཕྱིར་དང༌། དེ་ཉིད་ཀྱིས་ཐག་སྲིང་བའང་མེད་པའི་ཕྱིར་རོ། །ཉོན་མོངས་ཅན་བསྒྲིབས་ལ་ལུང་མ་བསྟན་རྣམས་ཀྱིས་ནི་གཉེན་པོ་འཐོབ་པ་དང་སྤངས་པ་ཐག་སྲིང་བའི་ཐོབ་པ་གཉིས་ཡིན་ཏེ། ཤེས་པ་ཁ་ཅིག་ནི་དེ་དག་གི་གཉེན་པོ་ཡིན་པའི་ཕྱིར་དང༌། ཁ་ཅིག་ནི་དེ་དག་ཐག་སྲིང་བ་ཡིན་པའི་ཕྱིར་དང༌། འདིར་གང་ཅུད་ཟད་བཤད་པའི་ཐོབ་པའི་དབྱེ་བ་ནི་ཤེས་པའི་ཐོབ་པ་ལ་བརྩམས་ནས་བཤད་པའི་ཕྱིར་དང༌། སྤྱིར་ཐོབ་པའི་དབྱེ་བ་ཡང་སྔར་བཤད་ཟིན་པའི་ཕྱིར་རོ། །
འོ་ན་ནི་ཀུན་རྫོབ་ཤེས་པ་མི་དགེ་བ་དང་ལུང་མ་བསྟན་ཡོད་པས་དེ་དག་རྙེད་པ་དང་བསྟེན་པའི་ཐོབ་པའང་ཡོད་པའི་ཕྱིར་དེ་དག་གི་ཐོབ་པ་བཞིར་འགྱུར་རོ་ཞེ་ན། དེ་ལྟ་མོད་ཀྱི་ཕལ་ཆེ་བའི་དབང་དུ་བྱས་ནས་དེ་དག་གི་ཐོབ་པ་གཉིས་ཡིན་པར་བསྟན་ཏོ། །ཉི་འོག་པ་རྣམས་ནི་སྡོམ་པའི་ཐོབ་པ་དང༌། རྣམ་པར་འཇིག་པ་འཐོབ་པ་གཉིས་བསྣན་ནས་དྲུག་ཏུ་འདོད་དེ། དང་པོ་ནི་མདོ་ལས། དབང་པོ་དྲུག་པོ་འདི་དག་ཤིན་ཏུ་དུལ་བ་དང་ཤིན་ཏུ་བསྒོམས་པ་ཞེས་གསུངས་པ་མིག་སོགས་དབང་པོ་དྲུག་གི་སྒོ་སྡོམ་པ་དྲན་ཤེས་བཞིན་གྱི་བདག་ཉིད་ཡིན་ལ། གཉིས་པ་ནི་ལུས་ལ་དམིགས་པའི་ཉོན་མོངས་པ་ཐག་སྲིང་བ་སྟེ་ཕྱི་ནང་གི་ལུས་དྲན་པ་ཉེར་གཞག་འཐོབ་པ་ཡིན་ནོ། །ཁ་ཆེ་བ་རྣམས་ནི་དེ་དག་ཀྱང་རིམ་པ་ལྟར་ཕྱི་མ་གཉིས་ཀྱི་ནང་དུ་འདུས་སོ་ཞེས་ཟེར་རོ། །ཡང་ན་གཉིས་ཀའང་གཉིས་ཀའི་ཁོངས་སུ་འདུས་སོ་ཞེས་བྱས་ཀྱང་འགལ་བ་མེད་དོ་ཞེས་རྒྱལ་པོའི་སྲས་འཆད་དོ། །
ད་ནི་གསུམ་པ་དེ་དག་གི་ཡོན་ཏན་སྟོན་ཏེ། དེ་ཡང་སྔར་ནི་ཟད་པ་ཤེས་ལ་ཟག་བཅས་ཀྱང་ཞེས་ཉན་རང་སངས་རྒྱས་རྣམས་ཀྱི་ཟད་ཤེས་ཀྱི་སྐད་ཅིག་ལ་ཐོབ་པའི་ཡོན་ཏན་སྤྱིར་བཤད་ལ། འདིར་ནི་སངས་རྒྱས་ཀྱི་ཡོན་ཏན་ཐུན་མོང་མ་ཡིན་པ་དང་ཐུན་མོང་གཉིས་ལས། དང་པོ་ལའང་གསུམ་ལས་མདོར་བསྟན་པ་ནི།
རྩ་བ། སངས་རྒྱས་ཆོས་ནི་མ་འདྲེས་པ། །
སྟོབས་ལ་སོགས་པ་བཅོ་བརྒྱད་དོ། །
རྣམ་བཤད་རིགས་པ་ལས། གཏི་མུག་གཉིད་གཉིས་སངས་ཕྱིར་དང༌། །བློ་རྒྱས་ཕྱིར་ན་སངས་རྒྱས་པ། །ཞེས་འབྱུང་བས་མ་རིག་པའི་གཉིད་སངས་པ་དང་ཡེ་ཤེས་ཀྱི་སྣང་བ་རྒྱས་པའི་སངས་རྒྱས་ཀྱིས་ཟད་པ་མཁྱེན་པའི་ཚེ་བརྙེས་པའི་ཡོད་ཏན་གྱི་ཆོས་ཉན་ཐོས་ལ་སོགས་པ་གཞན་དང་ཐུན་མོང་མ་ཡིན་པས་མ་འདྲེས་པའི་སྟོབས་བཅུ་དང་སོགས་པའི་སྒྲས་གཟུང་བ་མི་འཇིགས་པ་བཞི་དང་དྲན་པ་ཉེར་གཞག་གསུམ་དང་ཐུགས་རྗེ་ཆེན་པོ་སྟེ་བཅོ་བརྒྱད་དོ། །མདོ་གཞན་ལས་དེ་བཞིན་གཤེགས་པ་ལ་འཁྲུལ་པ་མི་མངའ་བ་ལ་སོགས་པ་བཅོ་བརྒྱད་གསུངས་པ་ནི་མདོ་སྡེའི་རྒྱན་དུ། སྤྱོད་པ་དང་ནི་རྟོགས་པ་དང༌། །ཡེ་ཤེས་དང་ནི་ཕྲིན་ལས་ཀྱིས། །ཉན་ཐོས་རང་སངས་རྒྱས་ཀུན་གྱི། །བླ་མ་ཁྱོད་ལ་ཕྱག་འཚལ་ལོ། །ཞེས་བཞིར་བསྡུས་པ་ནི་ཐེག་པ་གོང་མ་པའི་ལུགས་ཡིན་ནོ། །
རྒྱས་པར་བཤད་པ་ལ་བཞི་ལས་དང་པོ་སྟོབས་བཅུ་བཤད་པ་ནི།
རྩ་བ། གནས་དང་གནས་མིན་ཤེས་པ་བཅུ། །
ལས་འབྲས་ལ་བརྒྱད་བསམ་གཏན་སོགས། །
དབང་པོ་མོས་དང་ཁམས་ལ་ནི། །
དགུ་འོ་ལམ་དག་ལ་བཅུ་འམ། །
གནས་དང་གནས་མིན་པ་ནི་སྲིད་པ་དང་མི་སྲིད་པ་སྟེ། (འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་དོ།།) དེ་ལ་གནས་དགེ་བ་ལས་མཐོ་རིས་འབྱུང་བ་དང་མི་དགེ་བ་ལས་ངན་སོང་འབྱུང་བ་དང་སྐྱེས་པ་རང་སངས་རྒྱས་སུ་འགྱུར་བ་ལ་སོགས་པ་དང༌། གནས་མ་ཡིན་པ་དགེ་བས་ངན་སོང་དུ་འགྲོ་བ་གནས་མ་ཡིན་པ་ལ་སོགས་པ་རྒྱུ་དང་རྒྱུ་མ་ཡིན་པ་ཐམས་ཅད་མངོན་སུམ་དུ་མཁྱེན་པའི་སྟོབས་ནི་ཤེས་པ་རྣམ་པ་བཅུ་སྟེ། དེ་ལ་གནས་དང་གནས་མ་ཡིན་པ་ནི་བསྡུ་ན་འདུས་བྱས་དང་འདུས་མ་བྱས་གཉིས་ཡིན་ལ། (གནས་མཁྱེན་པས་ནི་རྒྱུ་མེད་པར་སྨྲ་བ་འགོག་ལ། གནས་མ་ཡིན་པ་མཁྱེན་པས་ནི་མི་མཐུན་པ་རྒྱུར་སྨྲ་བ་འགོག་གོ།) འདུས་བྱས་ལ་ཁམས་གསུམ་དང་ཟག་མེད་ལ་མཚུངས་ལྡན་དང་དེ་མ་ཡིན་པ་གཉིས་གཉིས་སུ་ཕྱེ་བས་བརྒྱད་དང༌། འདུས་མ་བྱས་ལ་དགེ་བ་དང་ལུང་མ་བསྟན་གཉིས་སུ་ཕྱེ་བས་བཅུར་འགྱུར། དེ་ལ་ཀུན་རྫོབ་ཤེས་པའི་ཡུལ་ནི་བཅུ་ཆར་ཡིན་ལ། ཆོས་ཤེས་པའི་ནི་འདོད་པ་དང་ཟག་མེད་འདུས་བྱས་གཉིས་གཉིས་དང་འདུས་མ་བྱས་དགེ་བ་སྟེ་ལྔ་དང༌། རྗེས་སུ་ཤེས་པའི་ནི་ཁམས་གོང་མ་གཉིས་དང་འདུས་བྱས་ཟག་མེད་གཉིས་གཉིས་དང་འདུས་མ་བྱས་དགེ་བ་སྟེ་བདུན་དང༌། སྡུག་བསྔལ་དང་ཀུན་འབྱུང་ཤེས་པའི་ནི་ཁམས་གསུམ་གྱི་དྲུག་གོ །འགོག་པ་ཤེས་པའི་ནི་འདུས་མ་བྱས་དགེ་བ་ཁོ་ནའོ། །ལམ་ཤེས་པའི་ནི་འདུས་བྱས་ཟག་མེད་གཉིས་སོ། །ཕ་རོལ་སེམས་ཤེས་ཀྱིས་ནི་འདོད་གཟུགས་དང་འདུས་བྱས་ཟག་མེད་ཀྱི་མཚུངས་ལྡན་གསུམ་མོ། །ཟད་པ་དང་མི་སྐྱེ་བ་ཤེས་པའི་ནི་འདུས་མ་བྱས་ལུང་མ་བསྟན་མ་གཏོགས་པ་དགུའོ། །
ཟག་བཅས་ཀྱི་ལས་དང་(དེའི་)འབྲས་བུ་རྣམ་པར་སྨིན་པ་སྣ་ཚོགས་(ནི་བདེན་པ་དང་པོ་གཉིས་ཡིན་ལ་དེ་)མཁྱེན་པའི་སྟོབས་ལ་ནི་འགོག་ལམ་ཤེས་པ་མ་གཏོགས་པ་ཤེས་པ་བརྒྱད་ཡིན་ཏེ། འགོག་ལམ་ཤེས་པ་ནི་ཟག་མེད་ཁོ་ན་ལ་དམིགས་ལ་ལས་དེའི་རྣམ་སྨིན་ནི་ཟག་བཅས་བདེན་པ་དང་པོ་གཉིས་ཀྱིས་(སེམས་ཤེས་ཀྱི་ཁམས་འོག་མ་གཉིས་ཀྱི་སེམས་སེམས་བྱུང་དགེ་མི་དགེ་ཤེས་ལ། ཆོས་ཤེས་ཆ་དང་བཅས་པས་འདོད་པ་དང་རྗེས་ཤེས་ཆ་དང་བཅས་པས་གོང་མ་གཉིས་ཤེས་སོ།།) བསྡུས་པའི་ཕྱིར་རོ།། (ཀུན་རྫོབ་ཤེས་པ་ནི་ཁམས་གསུམ་གའི་ལས་འབྲས་ལ་དམིགས་སོ།།) བསམ་གཏན་བཞི་དང༌། སོགས་པས་གཟུང་བ་རྣམ་ཐར་བརྒྱད་དང༌། སྟོང་པ་ཉིད་ལ་སོགས་པའི་ཏིང་ངེ་འཛིན་གསུམ་དང༌། འདུ་ཤེས་མེད་པ་དང་འགོག་པའི་སྙོམས་འཇུག་གཉིས་དང༌། མཐར་གྱིས་གནས་པའི་སྙོམས་འཇུག་དགུ་དང༌། གཟུགས་མེད་སྙོམས་འཇུག་བཞིའི་རང་བཞིན་དང་ཐོབ་པ་དང་ཕན་འདོགས་པ་དང་རོ་མྱང་ལྡན་ལ་སོགས་པ་དང་ཉམས་པ་ཆ་མཐུན་ལ་སོགས་པའི་(ཉོན་མོངས་དང་རྣམ་བྱང་གི་)དོན་རྣམས་ཐོགས་པ་མེད་པར་མཁྱེན་པའི་སྟོབས་ནི་ཤེས་པ་དགུ་ཡིན་ཏེ། དེ་དག་འདུས་བྱས་ཟག་བཅས་ཟག་མེད་ཁོ་ན་ལ་དམིགས་པའི་ཕྱིར་དང་འགོག་པ་ཤེས་པ་མ་གཏོགས་པའི་ཕྱིར་རོ། །
དེ་བཞིན་དུ་དད་པ་ལ་སོགས་པའི་དབང་པོ་མཆོག་དང་མཆོག་མ་ཡིན་པ་དང༌། ཉན་ཐོས་ལ་སོགས་པ་ལ་མོས་པ་སྣ་ཆོགས་དང༌། ཉན་ཐོས་ལ་སོགས་པའི་ཁམས་སྣ་ཚོགས་མཁྱེན་པའི་སྟོབས་རྣམས་ལ་ནི་འགོག་པ་ཤེས་པ་མ་གཏོགས་པ་ཤེས་པ་དགུ་དགུ་ཡིན་ཏེ། དེ་ལ་དབང་པོ་དང་མོས་པ་ནི་སེམས་བྱུང་ཡིན་ཞིང་ཁམས་ནི་སློབ་དཔོན་འདུན་བཟང་སེམས་ཅན་རྣམས་ཀྱི་སྔོན་གོམས་པའི་བག་ཆགས་ཀྱིས་ཡང་དག་པར་གྲུབ་པའི་བསམ་པ་ལ་འདོད་པས་དེ་ཡང་སེམས་དང་སེམས་བྱུང་ཁྱད་པར་ཅན་ཡིན་ལ། (དེ་ཡང་བདེན་པ་དང་པོ་གཉིས་དང་ལམ་མོ།།) དེ་དག་ཀྱང་ཟག་བཅས་ཟག་མེད་འདུས་བྱས་ཁོ་ན་ལ་དམིགས་པའི་ཕྱིར་རོ། །དམྱལ་བ་ནས་འགོག་པའི་བར་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དག་ལ་ནི་ཤེས་པ་བཅུ་ཡིན་ཏེ། ལམ་ནི་རྒྱུ་ཡིན་ལ་དེ་ཉིད་འབྲས་བུ་དང་བཅས་པ་མཁྱེན་པར་འདོད་ན་ནི་འགོག་པ་ཤེས་པའང་ཡོད་པའི་ཕྱིར་ཏེ། འགོག་པ་ནི་ལམ་གྱི་སྐྱེས་བུ་བྱེད་པ་དང་བྲལ་བའི་འབྲས་བུ་ཡིན་པའི་ཕྱིར་རོ། །ལམ་འབའ་ཞིག་མཁྱེན་པ་སྟོབས་སུ་འདོད་ན་ནི་ལམ་འདུས་བྱས་ཡིན་པས་འགོག་ཤེས་མ་གཏོགས་པ་ཤེས་པ་དགུ་ཡིན་ནོ། །དེ་ལྟར་ལུགས་ཐ་དད་པའམ་ཞེས་སྨྲོས་པ་ཡིན་ནོ། །
རྩ་བ། གཉིས་ནི་ཀུན་རྫོབ་ཤེས་པ་ཡིན། །
ཟད་པ་དྲུག་གམ་བཅུ་ཡིན་ནོ། །
སྔོན་གྱི་གནས་རྗེས་སུ་དྲན་པ་དང་འཆི་འཕོ་དང་སྐྱེ་བ་མཁྱེན་པའི་སྟོབས་གཉིས་ནི་ཀུན་རྫོབ་ཤེས་པ་ཡིན་གྱི་གཞན་ནི་མ་ཡིན་ཏེ། འདི་དག་བདེན་པ་ལ་མི་དམིགས་པའི་ཕྱིར་རོ། །འདི་ལྟར་སྔོན་གྱི་གནས་རྗེས་སུ་དྲན་པ་ནི་རང་གཞན་གྱི་སྐྱེ་བ་སྔ་མ་དྲན་པ་ཡིན་ལ། འཆི་བ་དང་འཕོ་བ་བར་དོ་དང་སྐྱེ་བ་མཁྱེན་པ་ནི་རང་གཞན་གྱི་མ་འོངས་པའི་སྲིད་པ་མཁྱེན་པ་སྟེ། འདི་དག་རང་གི་མཚན་ཉིད་ལ་དམིགས་ཀྱི་སྤྱིའི་མཚན་ཉིད་བདག་མེད་པའི་རྣམ་པར་མ་ཞུགས་པའི་ཕྱིར་བདེན་པ་ལ་མི་དམིགས་སོ། །ཟག་པ་ཟད་པ་མཁྱེན་པའི་སྟོབས་ཀྱིས་གལ་ཏེ་ཟག་པ་ཟད་པ་འགོག་བདེན་འབའ་ཞིག་མཁྱེན་པར་འདོད་ན་ནི་ཆོས་ཤེས་རྗེས་ཤེས་དང་འགོག་པ་ཤེས་པ་དང་ཟད་མི་སྐྱེ་ཤེས་པ་དང་ཀུན་རྗོབ་ཤེས་པ་དང་དྲུག་ཡིན་ཏེ། འགོག་པ་ཤེས་པའི་རིགས་ཁོ་ན་ཆོས་ཤེས་ལ་སོགས་པའི་བྱེ་བྲག་གིས་ཐ་དད་དུ་བྱས་པའི་ཕྱིར་དང༌། འདུས་མ་བྱས་ཡིན་པས་བདེན་པ་གཞན་གསུམ་ཤེས་པ་དང་ཕ་རོལ་སེམས་ཤེས་མི་སྲིད་པའི་ཕྱིར་རོ། །འོན་ཏེ་ཟད་པ་ཤེས་པ་ཟག་པ་ཟད་པའི་རྒྱུད་ལ་ཡོད་པའི་ཤེས་པ་ལ་འདོད་ན་ནི་དེའི་རྒྱུད་ལ་ནི་ཤེས་པ་ཐམས་ཅད་འབྱུང་བས་ཤེས་པ་བཅུ་ཡིན་ནོ། །
ད་ནི་དེ་དག་གང་ལ་བརྟེན་པའི་ས་བཤད་པར་བྱ་སྟེ།
རྩ་བ། སྔོན་གནས་འཆི་འཕོ་སྐྱེ་བའི་སྟོབས། །
བསམ་གཏན་དག་ན་ལྷག་མ་ནི། །
ས་རྣམས་ཀུན་ན་ཅི་ཡི་ཕྱིར། །
འདིའི་སྟོབས་གང་ཕྱིར་ཐོགས་མི་མངའ། །
དེ་ལ་སྔོན་གྱི་གནས་རྗེས་སུ་དྲན་པ་དང་འཆི་འཕོ་དང་སྐྱེ་བ་མཁྱེན་པའི་སྟོབས་གཉིས་ནི་བསམ་གཏན་གྱི་དངོས་གཞི་བཞི་པོ་དག་ན་ཡོད་དེ། འདི་དག་ཞི་གནས་དང་ལྷག་མཐོང་ཟུང་དུ་འབྲེལ་བའི་ཏིང་ངེ་འཛིན་ལ་བརྟེན་ནས་སྐྱེད་པར་བྱ་བ་ཡིན་པ་ནས་གཞན་ནི་དེ་ལྟ་མ་ཡིན་པའི་ཕྱིར་རོ། །སྟོབས་ལྷག་མ་བརྒྱད་པོ་ནི་(དེ་དག་འོག་ས་སྤོང་བ་ཡིན་གྱི་ཡོན་ཏན་བསྐྱེད་བའི་ས་མིན་པས་)ཉེར་བསྡོགས་ཕྱི་མ་བདུན་མ་གཏོགས་པ་ས་རྣམས་ཀུན་ན་ཡོད་དེ། བསྐྱེད་སླ་བའི་ཕྱིར་ཟག་མེད་རྣམས་ནི་ཅི་རིགས་པར་ཟག་མེད་ཀྱི་ས་རྣམས་ལ་རྟེན་ལ། ཀུན་རྫོབ་ཤེས་པས་བསྡུས་པའི་སྟོབས་རྣམས་ནི་ས་ཐམས་ཅད་ལ་རྟེན་པར་འདོད་དོ། །འོན་ཀྱང་འདི་དག་ཡོངས་སུ་དག་པའི་ཏིང་ངེ་འཛིན་ལ་བརྟེན་ནས་མཁྱེན་པའི་ཕྱིར་བསམ་གཏན་བཞི་པའི་སེམས་ལ་ཕལ་ཆེར་རྟེན་པ་ཡིན་ནོ། །ལུས་ཀྱི་རྟེན་ནི་གླིང་གཞན་དང་ཁམས་གཞན་དང་འགྲོ་བ་གཞན་གྱི་རྟེན་ལ་སངས་རྒྱས་མི་འབྱུང་བའི་ཕྱིར་དང༌། བུད་མེད་རྟེན་དང་བསམ་སྦྱོར་དམན་པའི་ཕྱིར་འཛམ་བུའི་གླིང་གི་སྐྱེས་པ་ཁོ་ན་ལ་རྟེན་པར་འདོད་དོ། །
འོ་ན་ཤེས་པ་བཅུ་པོ་དེ་དག་ཉན་རང་ལ་སོགས་པ་ལའང་ཅི་རིགས་པར་ཡོད་བཞིན་དུ་ཅིའི་ཕྱིར་སངས་རྒྱས་ཁོ་ནའི་ལ་སྟོབས་ཞེས་བྱ་ཞེ་ན། སངས་རྒྱས་ལ་མངའ་བའི་ཤེས་པ་བཅུ་པོ་འདི་དག་ནི་སྟོབས་ཡིན་ཏེ། གང་གི་ཕྱིར་འདིའི་མཁྱེན་པ་ཤེས་བྱ་ཐམས་ཅད་ལ་ཐོགས་པ་མི་མངའ་བར་འཇུག་པ་དེའི་ཕྱིར་རོ། །དེའི་ཕྱིར་སངས་རྒྱས་ལས་གཞན་ལའང་གནས་དང་གནས་མ་ཡིན་པ་མཁྱེན་པ་ལ་སོགས་པ་ཉི་ཚེ་བ་ཡོད་མོད་ཀྱི། འགའ་ཞིག་ཤེས་ཀྱང་འགའ་ཞིག་མི་ཤེས་པས་ཤེས་བྱ་ལ་ཐོགས་པ་དང་བཅས་པའི་ཕྱིར་སྟོབས་ཞེས་བྱ་བའི་མིང་མི་འཐོབ་སྟེ། གནས་བརྟན་ཤཱ་རིའི་བུས་ཁང་བདག་དཔལ་སྐྱེས་ཀྱི་ཐར་པའི་ཆ་མཐུན་གྱི་དགེ་བ་མ་ཤེས་པས་རབ་ཏུ་མ་བྱུང་བ་དང་བྱ་ཞིག་ཁྲས་གཅོས་པའི་སྐྱེ་འཆིའི་མཐའ་མ་ཤེས་པ་ལྟ་བུའོ། །དེ་ལྟར་ན་མཁྱེན་པ་ལ་ཐོགས་པ་མི་མངའ་བའི་ཕྱིར་སངས་རྒྱས་ཀྱི་ཐུགས་ཀྱི་སྟོབས་ནི་ཤེས་བྱ་བཞིན་དུ་མཐའ་ཡས་པ་ཡིན་ནོ། །
འོ་ན་ཐུགས་ཀྱི་སྟོབས་དེ་ལྟར་ཐོགས་པ་མི་མངའ་ན་སྐུའི་སྟོབས་ཇི་ལྟར་ཞེ་ན།
རྩ་བ། སྐུ་ལ་སྲེད་མེད་བུ་ཡི་སྟོབས། །
གཞན་དག་ཚིགས་ན་གླང་ཆེན་སོགས། །
བདུན་བཅུས་གླགས་པའི་སྟོབས་ཡིན་ནོ། །
དེ་ནི་རེག་བྱའི་སྐྱེ་མཆེད་དོ། །
སངས་རྒྱས་ཀྱི་སྐུ་ལ་ནི་སྲེད་མེད་ཀྱི་བུའི་སྟོབས་མངའོ། །དེ་ལ་སྲེད་མེད་ཀྱི་བུ་ཞེས་བྱ་བ་ནི་སྟོབས་ཀྱི་མིང་སྟེ་དཔེར་ན་གྲངས་ཀྱི་གནས་གཞན་དྲུག་ཅུ་པ་ལ་གྲངས་མེད་ཅེས་བརྗོད་པ་བཞིན་ནོ། །སྔོན་གྱི་སློབ་དཔོན་གཞན་དག་ན་རེ་སྐུའི་རུས་པའི་ཚིགས་དང་ཚིགས་རེ་རེ་ནའང་སྲེད་མེད་ཀྱི་བུའི་སྟོབས་མངའོ་ཞེས་ཟེར་རོ།། (བྱང་ས་ལས་ཀྱང༌། སྐུའི་ཚིགས་ཐམས་ཅད་ཀྱི་ཚིགས་རེ་རེ་ལའང་སྲེད་མེད་ཀྱི་བུའི་སྟོབས་མངའ་བ་དང་ཞེས་འབྱུང་ངོ༌།།) དཔེས་སྟོན་པའི་གནས་བརྟན་བཙུན་པ་ན་རེ་ཐུགས་ཀྱི་སྟོབས་མཐའ་ཡས་པ་ལྟར་སྐུའི་སྟོབས་ཀྱང་མཐའ་ཡས་ཏེ། དེ་ལྟ་མ་ཡིན་ན་ཐུགས་ཀྱི་སྟོབས་ཇི་ལྟར་བཟོད་པར་འགྱུར་ཞེས་ཟེར་རོ། །དེའི་ཕྱིར་རུས་པའི་ཚིགས་གྱི་ཁྱད་པར་ནི་སངས་རྒྱས་དང་རང་སངས་རྒྱས་དང་འཁོར་ལོས་བསྒྱུར་བ་རྣམས་ཀྱི་རིམ་པ་ལྟར་ཀླུའི་མདུད་པ་དང་ལུ་གུ་རྒྱུད་དང་གཟེར་བུས་བཏབ་པ་ལྟར་སྲ་བ་ཡིན་ནོ། །
འོ་ན་སྲེད་མེད་ཀྱི་བུའི་སྟོབས་ཀྱི་ཚད་ཇི་ཙམ་ཞེ་ན། གླང་ཆེན་ཕལ་པ་དང༌། སོགས་པས་བསྡུས་པ་སྤོས་ཀྱི་གླང་པོ་ཆེ་དང༌། ཚན་པོ་ཆེ་ཆེན་པོ་དང༌། རབ་གནོན་དང༌། ཡན་ལག་མཆོག་དང༌། སྟོབས་མཆོག་དང༌། སྲེད་མེད་ཀྱི་བུ་རྣམས་ཏེ་བདུན་པོ་དེ་དག་སྔ་མ་སྔ་མ་བཅུས་གླགས་ཤིང་བསྒྱུར་བ་ནི་ཕྱི་མ་ཕྱི་མའི་སྟོབས་ཡིན་ནོ། །ཁ་ཅིག་ན་རེ་སྟོབས་མཆོག་བཅུའི་སྟོབས་ནི་སྲེད་མེད་ཀྱི་བུའི་སྟོབས་ཕྱེད་ཡིན་ལ་དེ་གཉིས་སུ་བསྒྱུར་བ་ནི་སྲེད་མེད་ཀྱི་བུའི་སྟོབས་ཡིན་ནོ་ཞེས་ཟེར་རོ། །སློབ་དཔོན་ནི་གནས་བརྟན་བཙུན་པའི་གཞུང་གཟུགས་པའི་ཕྱིར་སྐུའི་སྟོབས་ཇི་ལྟར་ཆེས་ཆེ་བ་དེ་ལྟར་རུང་སྟེ། དེ་ལྟ་མ་ཡིན་ན་མཁྱེན་པའི་སྟོབས་མཐའ་ཡས་པ་བཟོད་པར་མི་འགྱུར་བའི་ཕྱིར་དང༌། གཞན་དུ་ན་ལྷས་བྱིན་གྱིས་བསད་པའི་གླང་པོ་ཆེའི་རོ་ཞབས་ཀྱི་མཐེ་བོས་ར་བ་དང་འོབས་བདུན་ཟློ་བར་ཡང་མི་འགྱུར་བའི་ཕྱིར་རོ་ཞེས་འདོད་དོ། །དེ་ལྟ་བུའི་སྐུའི་སྟོབས་དེའི་ངོ་བོ་ནི་རེག་བྱའི་སྐྱེ་མཆེད་དེ་འབྱུང་བ་ཆེན་པོའི་ཁྱད་པར་ཁོ་ན་ཡིན་གྱི་འབྱུང་བ་ལས་གྱུར་པ་ནི་མ་ཡིན་ནོ། །ཁ་ཅིག་ན་རེ་སྟོབས་དེ་ནི་འབྱུང་བ་མ་ཡིན་གྱི་སྔར་བཤད་པའི་འབྲས་བུའི་རེག་བྱ་འཇམ་པ་ཉིད་ལ་སོགས་པ་བདུན་ལས་དོན་གཞན་དུ་གྱུར་པ་རྒྱུར་བྱས་པའི་རེག་བྱ་བརྒྱད་པ་ཞིག་ཡིན་ནོ་ཞེས་ཟེར་རོ།། (འཁྲེགས་པ་ལ་འདོད་པར་མངོན་ནོ།།)
གཉིས་པ་མི་འཇིགས་པ་བཤད་པ་ནི།
རྩ་བ། མི་འཇིགས་པ་ནི་རྣམ་པ་བཞི། །
ཇི་ལྟར་སྟོབས་ནི་དང་པོ་དང༌། །
བཅུ་པ་གཉིས་པ་བདུན་པ་བཞིན། །
མི་འཇིགས་པ་ནི་རྣམ་པ་བཞི་ཡིན་པར་མདོ་ལས། ཀྱེ་མ་ང་མངོན་པར་རྫོགས་པར་སངས་རྒྱས་པ་ལ་འདི་ན་ཆོས་འདི་དག་མངོན་པར་རྫོགས་པར་སངས་མ་རྒྱས་སོ་ཞེས་ང་ལ་དགེ་སྦྱོང་ངམ་བྲམ་ཟེའམ་ལྷའམ་བདུད་དམ་ཚངས་པ་ཡང་རུང་སྟེ་འགའ་ཡང་ཆོས་དང་མཐུན་པས་རྒོལ་ཞིང་གླེང་བར་བྱེད་པའི་རྒྱུ་མཚན་ཡང་དག་པར་རྗེས་སུ་མ་མཐོང་ངོ༌། །དེ་ལྟར་ངས་རྒྱུ་མཚན་ཡང་དག་པར་རྗེས་སུ་མ་མཐོང་བས་བདག་བདེ་བ་དང༌། བག་ཚ་བ་མེད་པ་དང༌། མི་འཇིགས་པ་ཐོབ་པར་གནས་ཏེ་ཁྱུ་མཆོག་རླབས་པོ་ཆེའི་གནས་སུ་ཞལ་གྱིས་འཚོ་ཞིང་འཁོར་གྱི་ནང་དུ་སེང་གེའི་སྒྲ་སྒྲོགས་སོ། །ཚངས་པའི་འཁོར་ལོ་འཇིག་རྟེན་ན་དགེ་སྦྱོང་ལ་སོགས་པ་གང་གིས་ཀྱང་མ་བསྐོར་བའི་ཆོས་ཀྱི་འཁོར་ལོ་བསྐོར་བ་འདི་ནི་མི་འཇིགས་པ་དང་པོ་ཞེས་པ་དང་དེ་བཞིན་དུ་ང་ཉིད་ཀྱིས་ཟག་པ་རྣམས་ཟད་དོ་ཞེས་ཞལ་གྱིས་བཞེས་པ་དང༌། ཉན་ཐོས་རྣམས་ལ་འདོད་ཆགས་ལ་སོགས་པ་བར་དུ་གཅོད་པའི་ཆོས་སུ་བསྟན་པ་དང༌། ལམ་ངེས་པར་འབྱུང་བ་ཉིད་དུ་བསྟན་པ་ལ་རྒོལ་བ་མ་མཐོང་བ་ལ་སོགས་པ་རྒྱ་ཆེར་གསུངས་སོ། །
དེ་ལ་བདག་ཉིད་མངོན་པར་རྫོགས་པར་སངས་རྒྱས་པ་ནི་ཤེས་བྱ་ཐམས་ཅད་མངོན་སུམ་དུ་མཁྱེན་པ་སྟེ། ཇི་ལྟར་སྟོབས་དང་པོ་གནས་དང་གནས་མ་ཡིན་པ་མཁྱེན་པའི་སྟོབས་ཤེས་པ་བཅུ་དང་ས་ཐམས་ཅད་ཀྱིས་བསྡུས་པ་དེ་བཞིན་དུ་མི་འཇིགས་པ་དང་པོ་འདི་ཡང་ཡིན་ནོ། །བདག་ཉིད་ཀྱི་ཟག་པ་རྣམས་ཟད་པ་ཉིད་དུ་ཞལ་གྱིས་བཞེས་པ་ནི་སྒྲིབ་པ་མ་ལུས་པ་སྤངས་པ་ཉིད་མཁྱེན་པ་སྟེ། ཇི་ལྟར་སྟོབས་བཅུ་པ་ཟག་པ་ཟད་པ་མཁྱེན་པ་(འགོག་ཤེས་ཆ་མཐུན་དང་བཅས་པ་)ཤེས་པ་དྲུག་གམ་བཅུ་དང་ས་བཅུ་གཅིག་གིས་བསྡུས་པ་དེ་བཞིན་དུ་མི་འཇིགས་པ་གཉིས་པ་འདི་ཡང་ཡིན་ནོ། །བར་དུ་གཅོད་པའི་ཆོས་སུ་བསྟན་པ་ནི་ཉོན་མོངས་པའི་བདུད་ལ་སོགས་པ་ལམ་ལ་བར་དུ་གཅོད་པ་ཉིད་དུ་མཁྱེན་པ་སྟེ། ཇི་ལྟར་སྟོབས་གཉིས་པ་ལས་(ལས་དེ་ནི་སྡུག་ཀུན་དུ་འདུས་པས།)བདག་གིར་བྱ་བ་མཁྱེན་པ་འགོག་ལམ་ཤེས་པ་མ་གཏོགས་བརྒྱད་དང་ས་ཐམས་ཅད་ཀྱིས་བསྡུས་པ་དེ་བཞིན་དུ་མི་འཇིགས་པ་གསུམ་པ་འདི་ཡང་ཡིན་ཏེ། བདེན་པ་དང་པོ་གཉིས་ཀྱིས་བསྡུས་པ་ཁོ་ནས་བར་དུ་གཅོད་པའི་ཕྱིར་རོ། །ལམ་ངེས་པར་འབྱུང་བ་ཉིད་དུ་བསྟན་པ་ནི་ཉན་ཐོས་ལ་སོགས་པའི་ལམ་མཁྱེན་པ་སྟེ། ཇི་ལྟར་སྟོབས་བདུན་པ་ཐམས་ཅད་དུ་འགྲོ་བའི་ལམ་མཁྱེན་པ་ཤེས་པ་བཅུའམ་དགུ་དང་ས་ཐམས་ཅད་ཀྱིས་བསྡུས་པ་དེ་བཞིན་དུ་མི་འཇིགས་པ་བཞི་པ་འདི་ཡང་ཡིན་ཏེ། ཟག་བཅས་ཟག་མེད་ཀྱི་ལམ་འབྲས་བུ་དང་བཅས་པ་བཟུང་ན་བཅུ་དང་འབྲས་བུ་མེད་པ་བཟུང་ན་དགུ་ཡིན་པའི་ཕྱིར་རོ། །བྱེ་བྲག་ཏུ་སྨྲ་བ་ནི་ཤེས་པ་ཉིད་མི་འཇིགས་པར་འདོད་ལ། སློབ་དཔོན་ནི་མི་འཇིགས་པ་ནི་མི་སྐྲག་པ་ཡིན་པས་ཤེས་པ་ཉིད་མ་ཡིན་གྱི་ཤེས་པའི་འབྲས་བུ་ཡིན་ཏེ། ཤེས་པ་ལ་བརྟེན་ནས་མི་སྐྲག་པ་འབྱུང་བའི་ཕྱིར་འབྲས་བུའི་མིང་གིས་རྒྱུ་ལ་བཏགས་པ་ཡིན་ཏེ་སྟེང་ཀ་རྐང་ནད་ཅེས་བྱ་བ་བཞིན་ནོ་ཞེས་བཞེད་དོ། །དོན་འདི་ཉིད་མདོ་སྡེའི་རྒྱན་ལས་ཀྱང༌། རང་གཞན་དོན་དུ་ཡེ་ཤེས་དང༌། །སྤངས་དང་ངེས་འབྱུང་གེགས་མཛད་པ། །སྟོན་མཛད་མུ་སྟེགས་གཞན་དག་གིས། །མི་རྫི་ཁྱོད་ལ་ཕྱག་འཚལ་ལོ། །ཞེས་གསུངས་སོ།། (སྟོབས་ནི་གཞན་གྱི་ཟིལ་གྱིས་མི་གནོན་པ་ཡིན་ལ་མི་འཇིགས་པ་ནི་གཞན་སླར་ཟིལ་གྱིས་གནོན་པའོ།།)
གསུམ་པ་དྲན་པ་ཉེ་བར་བཞག་པ་གསུམ་བསྟན་པ་ནི་མདོ་ལས། དགེ་སློང་དྲན་པ་ཉེ་བར་བཞག་པ་གསུམ་པོ་འདི་དག་ནི་གང་དག་འཕགས་པ་བསྟེན་པར་བྱེད་པ་སྟེ་འཕགས་པས་དེ་དག་བསྟེན་ན་འཁོར་ལ་རྗེས་སུ་སྟོན་པར་འོས་སོ། །གསུམ་གང་ཞེ་ན།
རྩ་བ། དྲན་དང་ཤེས་བཞིན་བདག་ཉིད་གསུམ། །
དགེ་སློང་དག་འདི་ན་སྟོན་པ་ཐུགས་བརྩེ་བ། ཐུགས་རྗེ་ཅན། དོན་བཞེད་པ། ཕན་པར་བཞེད་པ། ཐུགས་རྗེ་ཆེན་པོ་དང་ལྡན་པས་ཉན་ཐོས་རྣམས་ལ་འདི་ནི་ཁྱེད་ལ་ཕན་པར་བྱེད་པ། འདི་ནི་ཁྱེད་ལ་བདེ་བར་བྱེད་པ། འདི་ནི་ཁྱེད་ལ་ཕན་པ་དང་བདེ་བར་བྱེད་པའོ་ཞེས་ཆོས་སྟོན་པར་མཛད་ཅིང༌། ཉན་ཐོས་དེ་དག་དེ་ལ་ཉན་པར་བྱེད། རྣ་བ་གཏོད་པར་བྱེད། ཀུན་ཤེས་པའི་སེམས་ཉེ་བར་འཇོག་པར་བྱེད། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པར་བྱེད། སྟོན་པའི་བསྟན་པ་ལས་མི་འགལ་བར་བྱེད་ན། དེས་དེ་བཞིན་གཤེགས་པ་ཀུན་དུ་དགྱེས་པར་ཡང་མི་འགྱུར། ཡིད་བདེ་བ་དང་ཐུགས་ཡ་ཡ་བོར་ཡང་མི་འགྱུར་གྱི། དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་དུ་བཏང་སྙོམས་སུ་བཞུགས་ཏེ། འདི་ནི་གང་དག་འཕགས་པ་བསྟེན་པར་བྱེད་པ་སྟེ་འཕགས་པས་དེ་དག་བསྟེན་ན་ཚོགས་ལ་རྗེས་སུ་སྟོན་པར་འོས་པའི་དྲན་པ་ཉེ་བར་བཞག་པ་དང་པོ་ཡིན་ནོ་ཞེས་པ་དང༌། དེ་བཞིན་དུ་སྟོན་པ་ཆོས་སྟོན་པ་ན་ཉན་ཐོས་དེ་དག་དེ་ལ་ཉན་པར་མི་བྱེད་པ་ནས་སྟོན་པའི་བསྟན་པ་ལས་འགལ་བར་བྱེད་པའི་བར་དུ་གྱུར་ན། དེས་དེ་བཞིན་གཤེགས་པ་ཀུན་དུ་མི་དགྱེས་པ་དང་ཡིད་མི་བདེ་བ་དང་ཐུགས་ཡ་ཡ་བོ་དང་ཀུན་ནས་མནར་སེམས་སུ་མི་འགྱུར་ལ། མི་བཟོད་པ་དང་འཚིག་པ་དང་ཐུགས་མ་རངས་པ་མི་མངའ་བར་དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་དུ་བཏང་སྙོམས་སུ་བཞུགས་པ་ནི་དྲན་པ་ཉེར་གཞག་གཉིས་པ་དང༌། དེ་བཞིན་དུ་ཉན་ཐོས་ཁ་ཅིག་ནི་དེ་ལ་ཉན་པར་བྱེད་པ་ནས་སྟོན་པའི་བསྟན་པ་ལས་མི་འགལ་བའི་བར་དུ་བྱེད་ལ། ཁ་ཅིག་ནི་ཉན་པར་མི་བྱེད་པ་ནས་སྟོན་པའི་བསྟན་པ་ལས་འགལ་བའི་བར་དུ་བྱེད་ཀྱང་དེས་དེ་བཞིན་གཤེགས་པ་དགྱེས་པ་དང་མི་དགྱེས་པ་གཉིས་ཀར་མི་འགྱུར་བར་དྲན་པ་དང་ཤེས་བཞིན་དུ་བཏང་སྙོམས་སུ་བཞུགས་པ་ནི་དྲན་པ་ཉེར་གཞག་གསུམ་པའོ་ཞེས་འཁོར་གུས་པར་ཉན་པ་དང་མི་ཉན་པ་དང་གཉིས་ཀའི་བྱེ་བྲག་གིས་གསུམ་གསུངས་ལ་གསུམ་པོ་འདི་དག་ནི་དྲན་པ་དང་ཤེས་བཞིན་ནམ་ཤེས་རབ་ཀྱི་བདག་ཉིད་དག་ཡིན་ལ། ཤེས་རབ་ཀྱི་ཆ་ནི་ཀུན་རྫོབ་ཤེས་པ་ཡིན་ནོ། །
འོ་ན་ཉན་ཐོས་ཉོན་མོངས་པ་སྤངས་པ་རྣམས་ལའང་འཁོར་གུས་པར་ཉན་མི་ཉན་དང་གཉིས་ཀ་ལ་ཆགས་སྡང་མི་འབྱུང་བ་ཡོད་པའི་ཕྱིར་སངས་རྒྱས་ཀྱིས་མ་འདྲེས་པར་ཇི་ལྟར་འགྱུར་ཞེ་ན། ཉན་ཐོས་ཀྱི་ནི་ཆགས་སྡང་གི་བག་ཆགས་མ་སྤངས་ལ་སངས་རྒྱས་ཀྱིས་སྤངས་པའི་ཕྱིར་རོ། །དེ་ལ་བག་ཆགས་ནི་རྒྱལ་པོའི་སྲས་དང་གང་སྤེལ་ནི་ཉན་ཐོས་ལ་སྔོན་ཉོན་མོངས་པ་སྤྱད་པའི་མཐུས་ལུས་ངག་གི་གཡོ་བ་འགྱུར་བའི་རྒྱུ་ནུས་པའི་ཁྱད་པར་སེམས་ལ་ཡོད་པ་ལ་འདོད་ཅིང༌། བཙུན་པ་གོ་ཆ་མཐའ་ཡས་ནི། ལུང་དུ་མ་བསྟན་པའི་སེམས་ཀྱི་ཁྱད་པར་ཡིན་ནོ་ཞེས་ཟེར་བས་ཉན་ཐོས་ལ་ཆགས་སྡང་དངོས་མེད་ཀྱང་ལུང་དུ་མ་བསྟན་པའི་སེམས་ཀྱི་ཁྱད་པར་ཡོད་ལ། སྟོན་པ་ནི་དྲན་པ་དང་ཤེས་བཞིན་གྱི་བདག་ཉིད་དགེ་བ་ཡིན་པའི་ཕྱིར་རོ་མཉམ་དུ་བསམ་པའོ། །
སློབ་དཔོན་ནི་ཉན་ཐོས་དག་ནི་གུས་པར་ཉན་པ་དང་མི་ཉན་པ་དང༌། གཉིས་ཀ་ལ་ཡིད་བདེ་བ་དང་མི་བདེ་བ་དང་གཉིས་ཀར་འགྱུར་བ་ཁོ་ན་ཡིན་པའི་ཕྱིར་འདི་ནི་སངས་རྒྱས་ཁོ་ནའི་ཆོས་སུ་བསྟན་པའམ། ཡང་ན་ཆགས་སྡང་གཉིས་ནི་ཉན་ཐོས་ལའང་མེད་མོད་ཀྱི་འོན་ཀྱང་ཉན་ཐོས་རྣམས་ནི་སངས་རྒྱས་ཀྱི་ཕྱིར་རབ་ཏུ་བྱུང་བས་དེའི་སློབ་མ་ཡིན་པས་ཉན་ཐོས་ཀྱི་ཡོན་ཏན་ནི་སངས་རྒྱས་ལ་བརྟེན་ནས་ཐོབ་པའི་ཕྱིར་མ་འདྲེས་པར་མི་བཞག་ལ་སངས་རྒྱས་ཀྱི་ནི་དེ་ལྟ་མ་ཡིན་པའི་ཕྱིར་མ་འདྲེས་པར་བཞག་གོ་ཞེས་འཆད་དོ། །
བཞི་པ་ཐུགས་རྗེ་ཆེན་པོ་བཤད་པ་ལ།
རྩ་བ། ཐུགས་རྗེ་ཆེན་པོ་ཀུན་རྫོབ་བློ། །
ཚོགས་དང་རྣམ་པ་སྤྱོད་ཡུལ་དང། །
མཉམ་པའི་ཕྱིར་དང་ཆེས་ཆེའི་ཕྱིར། །
ཐུགས་རྗེ་ཆེན་པོ་ནི་སངས་རྒྱས་བཅོམ་ལྡན་འདས་ཀྱིས་འཇིག་རྟེན་ལ་ཉིན་ལན་གསུམ་མཚན་ལན་གསུམ་དུ་སུ་ནི་དར། སུ་ནི་རྒུད། སུ་གདུལ་བར་བྱ་བའི་དུས་ལ་བབ་ཅེས་བྱ་བ་ལ་སོགས་པས་སེམས་ཅན་ཐམས་ཅད་ལ་སྡུག་བསྔལ་གསུམ་གྱི་རྣམ་པ་ཅན་དུ་གཟིགས་པས་ཀུན་རྫོབ་ཤེས་པའི་བདག་ཉིད་ཡིན་ཏེ། (དེ་ལྟ་མིན་ན་ཁམས་གསུམ་ལ་དམིགས་ནས་སྡུག་བསྔལ་གྱི་རྣམ་པ་ཅན་དུ་མི་འགྲུབ་བོ།།) དེ་ཡང་གཏི་མུག་མེད་པའི་རང་བཞིན་ནོ། །འོ་ན་ཅིའི་ཕྱིར་འདི་ལ་ཐུགས་རྗེ་ཆེན་པོ་ཞེས་ཆེན་པོའི་སྒྲར་བརྗོད་ཅེ་ན། བསོད་ནམས་དང་ཡེ་ཤེས་ཀྱི་ཚོགས་ཆེན་པོས་ཡང་དག་པར་འགྲུབ་པའི་ཕྱིར་དང༌། རྣམ་པ་སྡུག་བསྔལ་གསུམ་ལ་རྟོག་པའི་རྣམ་པ་ཅན་ཡིན་པའི་ཕྱིར་དང༌། སྤྱོད་ཡུལ་ཁམས་གསུམ་གྱི་སེམས་ཅན་ཐམས་ཅད་ལ་དམིགས་པའི་ཕྱིར་དང༌། ཁམས་གསུམ་གྱི་སེམས་ཅན་ཐམས་ཅད་ལ་འདུ་བྱེད་ཀྱི་སྡུག་བསྔལ་ཅན་དུ་དྲན་པར་མཉམ་པ་ཉིད་དུ་འཇུག་པའི་ཕྱིར་དང༌། ཤེས་རབ་ཀྱི་ངོ་བོ་ཡིན་པས་ཤིན་དུ་རྣོ་བའི་ཕྱིར་དེ་བས་ཆེས་ཆེ་བ་གཞན་མེད་པས་ཆེས་ཆེ་བ་ཡིན་པའི་ཕྱིར་རོ། །
འོ་ན་སྙིང་རྗེ་དང་ཐུགས་རྗེ་ཆེན་པོ་གཉིས་ལ་ཁྱད་པར་ཅི་ཡོད་ཅེ་ན།
རྩ་བ། ཐ་དད་བྱ་བ་རྣམ་པ་བརྒྱད། །
ངོ་བོ་ཉིད་ལ་སོགས་པ་ཐ་དད་དུ་བྱ་བ་སྟེ་(ངོ་བོ་དམིགས་རྣམ་ས་དང་རྒྱུད། །ཐོབ་དང་སྐྱོབ་པ་འདྲ་མི་འདྲ་ཞེས་པའི་)ཁྱད་པར་རྣམ་པ་བརྒྱད་ཡོད་དེ། དེ་ལ་སྙིང་རྗེ་ནི་ཞེ་སྡང་མེད་པའི་ངོ་བོ་ཉིད་དང༌། སྡུག་བསྔལ་གྱི་སྡུག་བསྔལ་གྱི་རྣམ་པ་ཅན་དང༌། འདོད་པའི་ཁམས་ཀྱི་སེམས་ཅན་ཁོ་ན་ལ་དམིགས་པ་དང༌། མི་ལྕོགས་མེད་དང་བསམ་གཏན་ཁྱད་པར་ཅན་ཡང་ཡིན་མོད་གྱི། དེ་གཉིས་ནི་བསམ་གཏན་དང་པོར་བསྡུས་ཏེ་བསམ་གཏན་དང་པོ་ལ་སོགས་པ་ས་བཞི་དང༌། ཉན་རང་དང་སོ་སོའི་སྐྱེ་བོའི་རྒྱུད་ལ་ཡོད་པ་དང༌། འདོད་པ་ལས་འདོད་ཆགས་དང་བྲལ་བས་ཐོབ་པ་དང༌། ཉན་ཐོས་ལ་སོགས་པས་ནི་སྙིང་རྗེ་བ་འབའ་ཞིག་ཏུ་ཟད་ཀྱི་འཁོར་བའི་སྡུག་བསྔལ་ལས་ཡོངས་སུ་མི་སྐྱོབ་པ་དང༌། སྡུག་བསྔལ་གྱི་སྡུག་བསྔལ་ཅན་ཁོ་ན་ལ་སྙིང་རྗེ་སྐྱེ་བས་སེམས་ཅན་ཐམས་ཅད་ལ་མི་འདྲ་བར་སྙིང་རྗེ་བ་ཡིན་ནོ། །ཐུགས་རྗེ་ཆེན་པོ་ནི་གཏི་མུག་མེད་པའི་ངོ་བོ་ཉིད་དང༌། སྡུག་བསྔལ་གསུམ་གྱི་རྣམ་པ་ཅན་དང༌། ཁམས་གསུམ་གྱི་སེམས་ཅན་ཐམས་ཅད་ལ་དམིགས་པ་དང༌། ཏིང་ངེ་འཛིན་ལས་སུ་རུང་བ་ཉིད་ཀྱིས་དེ་ཁོ་ནས་དེ་བསྐྱེད་པར་ནུས་པའི་ཕྱིར་བསམ་གཏན་བཞི་པའི་ས་པ་ཁོ་ན་དང༌། སངས་རྒྱས་ཀྱི་རྒྱུད་ལ་ཡོད་པ་དང༌། སྲིད་རྩེ་ལས་འདོད་ཆགས་དང་བྲལ་བས་ཐོབ་པ་དང༌། སེམས་ཅན་ཐམས་ཅད་ལ་ཐུགས་རྗེ་མཛད་པ་ན་འཁོར་བའི་འཇིགས་པ་ཆེན་པོ་ལས་ཡོངས་སུ་སྐྱོབ་པ་དང༌། སྡུག་བསྔལ་ཅན་དང་དེ་མ་ཡིན་པའི་སེམས་ཅན་ཐམས་ཅད་ལ་འདྲ་བར་ཐུགས་བརྩེ་བ་ཡིན་ནོ། །
གསུམ་པ་མཉམ་མི་མཉམ་གྱིས་མཇུག་བསྡུ་བ་ནི་ཅི་སངས་རྒྱས་ཐམས་ཅད་རྣམ་པ་ཐམས་ཅད་ཀྱིས་མཉམ་པ་ཡིན་ནམ་ཞེ་ན།
རྩ་བ། སངས་རྒྱས་ཐམས་ཅད་ཚོགས་དང་ནི། །
ཆོས་སྐུ་འགྲོ་བའི་དོན་སྤྱོད་པས། །
མཉམ་པ་ཉིད་དེ་སྐུ་ཚེ་དང༌། །
རིགས་དང་སྐུ་བོང་ཚོད་ཀྱིས་མིན། །
སངས་རྒྱས་ཐམས་ཅད་ནི་རྒྱུ་སྔོན་གྱི་བསོད་ནམས་དང་ཡེ་ཤེས་ཀྱི་ཚོགས་རྫོགས་པས་ཡང་དག་པར་འགྲུབ་པ་དང༌། འབྲས་བུ་ཟག་མེད་ཀྱི་ཆོས་ཀྱི་རྒྱུན་གྱི་ཚོགས་སམ་སེམས་གནས་གྱུར་པ་ཆོས་ཀྱི་སྐུ་འགྲུབ་པ་དང༌། འཕྲིན་ལས་འགྲོ་བའི་མཐོ་རིས་དང་བྱང་གྲོལ་གྱི་དོན་སྒྲུབ་པར་སྤྱོད་པའི་རྒྱུ་ཐུགས་རྗེ་ཆེན་པོ་ཐོབ་པ་གསུམ་གྱིས་ནི་མཉམ་པ་ཉིད་དེ། སྐུ་ཚེ་དང་རིགས་དང་གདུང་དང་སྐུའི་བོངས་ཚོད་ཀྱིས་ནི་མཉམ་པ་མིན་ཏེ། སྐྱེ་དགུ་རྣམས་ཀྱི་ཚེ་རིང་བ་དང་ཐུང་བ་དང༌། འཇིག་རྟེན་ན་རྒྱལ་རིགས་དང་བྲམ་ཟེ་གང་བཀུར་བ་དང༌། གདུང་འོད་སྲུང་དང་གོའུ་ཏ་མ་ལ་སོགས་པ་གང་བཀུར་བ་དང༌། འཇིག་རྟེན་པ་ལུས་བོངས་ཚོད་ཆེ་བ་དང་ཆུང་བའི་ཚེ་དུས་ཇི་ལྟ་བ་བཞིན་དུ་སངས་རྒྱས་རྣམས་ཀྱང་སྐུ་ཚེ་དང་རིགས་དང་གདུང་དང་སྐུའི་བོངས་ཚོད་རྣམས་དེ་དག་དང་མཐུན་པར་སྟོན་པས་ཁྱད་པར་ཡོད་པའི་ཕྱིར་རོ། །
འདིར་སྨྲས་པ། རྒྱུ་དང་འབྲས་བུ་ཕན་འདོགས་པ། །གསུམ་པོ་རེ་རེའང་བཞི་བཞི་སྟེ། །ཚོགས་ཀུན་ཡུན་རིང་བར་ཆད་མེད། །གུས་བྱས་གོམས་པ་བཞི་ནི་རྒྱུ། །ཡེ་ཤེས་དང་ནི་སྤངས་པ་དང༌། །མཐུ་དང་གཟུགས་སྐུ་ཕུན་ཚོགས་པ། །རྣམ་བཞི་འབྲས་བུ་དེ་དག་ཀྱང༌། །རྣམ་པ་བཞི་བཞིར་ཤེས་བྱ་སྟེ། །མ་བསྟན་མཁྱེན་དང་ཐམས་ཅད་མཁྱེན། །རྣམ་ཀུན་མ་འབད་མཁྱེན་པ་བཞི། །ཡེ་ཤེས་ཕུན་ཚོགས་ཉོན་མོངས་ཀུན། །གཏན་དུ་སྤངས་དང་བག་ཆགས་བཅས། །ཏིང་འཛིན་སྙོམས་འཇུག་སྒྲིབ་ཀུན་སྤངས། །རྣམ་བཞི་སྤངས་པ་ཕུན་ཚོགས་སོ།། ཕྱིའི་ཡུལ་སྤྲུལ་བསྒྱུར་བྱིན་རླབས་པ། །ཡུལ་ལ་མངའ་བརྙེས་སྟོང་བྱིན་རློབ། །ཚེ་ལའོ་ཐོགས་བཅས་ཐོགས་མེད་དང༌། །རིང་ལ་མྱུར་གཤེགས་ཆུང་ངུར་ནི། །མང་འཇུག་སྤྱོད་ལམ་མངའ་བརྙེས་པའོ། །ཡ་མཚན་ནར་མ་སྣ་ཚོགས་པ། །སྟོན་ལ་མངའ་བརྙེས་རྣམ་པ་བཞི། །རྒྱལ་བའི་མཐུ་ནི་ཕུན་ཚོགས་པའོ། །མཚན་དང་དཔེ་བྱད་སྟོབས་དང་ནི། །སྐུ་གདུང་རིང་བསྲེལ་རྡོ་རྗེ་ལྟར། །སྲ་བ་གང་ཡིན་སངས་རྒྱས་ཀྱི། །གཟུགས་སྐུ་ཕུན་ཚོགས་རྣམ་པ་བཞིའོ། །དམྱལ་བ་ཡི་དྭགས་དུད་འགྲོ་དང༌། །འཁོར་བའི་སྡུག་བསྔལ་དག་ལས་ནི། །གཏན་དུ་ཐར་མཛད་རྣམ་པ་བཞི། །ཕན་འདོགས་པ་དེ་རྣམ་གཅིག་ཏུ། །བདེ་འགྲོ་དང་ནི་ཐེག་གསུམ་འགོད། །བཞི་ཡིན་འགྲོ་བའི་བླ་མ་དེའི། །ཡོན་ཏན་རྒྱ་མཚོ་དཔག་མེད་ཕྱིར། །རབ་ཏུ་དབྱེ་ན་མཐའ་ཡས་མོད།། ཆེ་བའི་བདག་ཉིད་མདོར་བསྡུས་པའོ། །གང་དག་སྐྱོབ་པ་ཀུན་མཁྱེན་གྱི། །ཡོན་ཏན་དམ་པ་གང་ཤེས་ནས། །རྒྱལ་དང་དེ་ཡི་དམ་ཆོས་དང༌། །དེ་ཡི་རྗེས་འཇུག་དགེ་འདུན་ལ། །རབ་དད་དེ་དག་མཁས་པ་ཡིན་ཞེས་བྱའོ། །དེ་ལྟ་བུའི་ཡོན་ཏན་དང་ལྡན་པའི་སངས་རྒྱས་དང་དེའི་ཆོས་ལ་དད་པ་ཙམ་གྱིས་ཀྱང་རྣམ་སྨིན་མ་ངེས་པའི་སྡིག་པ་ཐམས་ཅད་ཟིལ་གྱིས་མནན་ནས་ལམ་གྱི་རྟེན་མཐོ་རིས་ལྷ་མིའི་ལེགས་པ་དུ་མ་བརྒྱུད་དེ་བགྲོད་པར་བྱ་བའི་མཆོག་མྱ་ངན་ལས་འདའ་བར་འགྱུར་ཏེ། ལུང་སྨན་གྱི་གཞི་ལས། གང་དག་རྒྱལ་བ་རྣམ་འདྲེན་ལ། །བྱ་བ་ཆུང་ངུ་བྱེད་འགྱུར་བའང༌། །དེ་དག་མཐོ་རིས་སྣ་ཚོགས་དག །བགྲོད་ནས་བདུད་རྩིའི་གོ་འཕང་ཐོབ། །ཅེས་པ་དང༌། འགྲེལ་པ་ལས་ཀྱང༌། དེ་ཉིད་ཀྱི་ཕྱིར་དེ་བཞིན་གཤེགས་པ་རྣམས་ནི་བསོད་ནམས་ཀྱི་ཞིང་བླ་ན་མེད་པ་ཞེས་བྱ་སྟེ། ངེས་པར་འབྱིན་པས་འབྲས་བུ་མེད་པ་མ་ཡིན་པ་དང༌། དེ་ཡང་གནས་སྐབས་མཐོ་རིས་སུ་འབྱིན་པས་ཡིད་དུ་འོང་བ་དང༌། ལན་མང་དུ་འབྱིན་པས་མཆོག་ཏུ་གྱུར་པ་དང༌། མཐོང་ཆོས་ལ་སོགས་པ་ལ་མྱོང་བས་མྱུར་བ་དང༌། མཐར་མྱང་འདས་འཐོབ་པས་མཐའ་བཟང་བའི་ཕྱིར་རོ་ཞེས་བཤད་དོ། །
གཉིས་པ་ཐུན་མོང་གི་ཡོན་ཏན་ལའང་གཉིས་ལས་མདོར་བསྟན་པ་ནི།
རྩ་བ། ཆོས་གཞན་སློབ་དང་ཐུན་མོང་ཡིན། །
ཁ་ཅིག་སོ་སོའི་སྐྱེ་བོ་དང༌། །
ཉོན་མོངས་མེད་དང་སྨོན་ནས་ཤེས། །
སོ་སོ་ཡང་དག་རིག་མངོན་སོགས། །
མ་འདྲེས་པ་བཅོ་བརྒྱད་མ་གཏོགས་པ་སངས་རྒྱས་ཀྱི་ཡོན་ཏན་གྱི་ཆོས་གཞན་ནི་སློབ་མ་ཉན་ཐོས་དང་དེས་མཚོན་ནས་རང་རྒྱལ་དང་ཡང་ཐུན་མོང་བ་ཡིན་ལ། ཡོན་ཏན་གྱི་ཆོས་ཁ་ཅིག་ནི་སོ་སོའི་སྐྱེ་བོ་དང་ཡང་ཐུན་མོང་བ་ཡིན་ནོ། །ཆོས་དེ་དག་ཀྱང་གང་ཞེ་ན། ཉོན་མོངས་པ་མེད་པ་དང༌། སྨོན་ནས་ཤེས་པ་དང༌། སོ་སོ་ཡང་དག་པར་རིག་པ་བཞི་དང༌། མངོན་ཤེས་དྲུག་དང༌། སོགས་པས་གཟུང་བ་བསམ་གཏན་བཞི་དང༌། གཟུགས་མེད་བཞི་དང༌། ཚད་མེད་བཞི་དང༌། རྣམ་ཐར་བརྒྱད་དང༌། ཟིལ་གྱིས་གནོན་པའི་སྐྱེ་མཆེད་བརྒྱད་དང༌། ཟད་པར་གྱི་སྐྱེ་མཆེད་བཅུ་དང༌། ཏིང་ངེ་འཛིན་གསུམ་ལ་སོགས་པའོ། །དེ་ལ་ཉོན་མོངས་པ་མེད་པ་ནས་སོ་སོ་ཡང་དག་པར་རིག་བཞིའི་བར་དང༌། ཟག་ཟད་ཀྱི་མངོན་ཤེས་དང༌། འགོག་པའི་རྣམ་ཐར་དང༌། རྣམ་པར་ཐར་པའི་སྒོ་གསུམ་ནི་འཕགས་པ་ཁོ་ན་དང་ཐུན་མོང་བ་དང༌། ལྷག་མ་རྣམས་ནི་སོ་སོ་སྐྱེ་བོ་དང་ཡང་ཐུན་མོང་བ་ཡིན་ནོ། །
གཉིས་པ་རྒྱས་པར་བཤད་པ་ལ་གཉིས་ལས། འཕགས་པ་ཁོ་ན་དང་ཐུན་མོང་བ་ཉོན་མོངས་པ་མེད་པ་ལ་སོགས་བཤད་པ་ལ་བཞི་ལས་དང་པོ།
རྩ་བ། ཉོན་མོངས་མེད་པ་ཀུན་རྫོབ་ཤེས། །
བསམ་གཏན་མཐའ་ན་མི་གཡོའི་ཆོས། །
མིས་སྐྱེས་ཉོན་མོངས་འདོད་གཏོགས་པ། །
མ་སྐྱེས་གཞིར་བཅས་སྤྱོད་ཡུལ་ཅན། །
ཉོན་མོངས་པ་མེད་པ་ནི་དགྲ་བཅོམ་པ་དག་སེམས་ཅན་རྣམས་ཀྱི་སྡུག་བསྔལ་ནི་ཉོན་མོངས་ལས་བྱུང་བ་དང་རང་ཉིད་ཀྱང་ཡོན་གནས་ཀྱི་ཁྱད་པར་དུ་རིག་ནས་ཕ་རོལ་པོའི་ཉོན་མོངས་པ་སྤང་བར་འདོད་ནས་བདག་མཐོང་བ་དང་བདག་ལ་དམིགས་ནས་གཞན་དག་ལ་ཉོན་མོངས་པ་ཆགས་སྡང་དང་ང་རྒྱལ་དང་བག་མེད་པ་སྐྱེ་བར་མ་གྱུར་ཅིག་སྙམ་དུ་མཉམ་པར་བཞག་ནས། (ལམ་འདིས་སུ་ཡང་ཉོན་མོངས་པར་མི་བྱེད་པས་ན་ཉོན་མོངས་པ་མེད་པའོ། །འདི་ནི་གཞན་གྱི་སེམས་བསྲུང་བའི་ཐབས་མཁས་ཀྱི་ཁྱད་པར་རོ།།) དེ་ལས་ལངས་ནའང་དེ་དང་རྗེས་སུ་མཐུན་པར་དེ་ལྟ་བུའི་ཤེས་པ་སྐྱེད་པར་བྱེད་པ་སྟེ་དེ་ནི་ཀུན་རྫོབ་ཤེས་པའི་བདག་ཉིད་ཡིན་ནོ།། (གཞན་རྒྱུད་ཀྱི་སྒོམ་སྤང་གི་ཉོན་མོངས་མ་འོངས་པ་ཁོ་ནའི་ཡུལ་ཅན་ཡིན་པའི་ཕྱིར་ཏེ་ཟག་མེད་ནི་དེ་ལྟ་བུ་མེད་དོ།།) ས་ནི་ལམ་སླ་བ་རྣམས་ཀྱི་མཆོག་ཡིན་པས་བསམ་གཏན་རྣམས་ཀྱི་ཡ་མཐའ་བཞི་པ་ཁོ་ན་ན་ཡོད་ལ། གང་ཟག་ནི་དགྲ་བཅོམ་པ་མི་གཡོ་བའི་ཆོས་ཅན་ཡིན་གྱི་ཉམས་པའི་ཆོས་ཅན་ལ་སོགས་པ་དགྲ་བཅོམ་གཞན་གྱི་ནི་མ་ཡིན་ཏེ། དེ་དག་ལ་ཉམས་པ་སྲིད་པས་རང་གི་རྒྱུད་ཀྱིའང་རེས་འགའ་ཉོན་མོངས་སྤང་བར་མི་ནུས་(ན་གཞན་གྱིས་ལྟ་ཅི་སྨོས་)པའི་ཕྱིར་རོ། །
ལུས་ཀྱི་རྟེན་ནི་གླིང་གསུམ་གྱི་མི་ཁོ་ནས་སྐྱེད་པར་བྱེད་པ་ཡིན་ཏེ། (གྲོགས་ཉོན་མོངས་མང་བ་དང་དེ་ན་)བློ་གསལ་བའི་ཕྱིར་རོ། །འདིའི་དམིགས་པ་ནི་ཕ་རོལ་ཆགས་སྡང་ཅན་དག་ལ་ཉོན་མོངས་སྐྱེ་བར་མ་གྱུར་ཅིག་ཅེས་སྒོམ་པའི་ཕྱིར་ཉོན་མོངས་པ་འདོད་པར་གཏོགས་པ་དང་མ་སྐྱེས་པ་མ་འོངས་པ་གཞིར་བཅས་འདོད་ཆགས་ལ་སོགས་པ་སྒོམ་སྤང་རྣམས་ཀྱི་སྤྱོད་ཡུལ་ཅན་ཡིན་ཏེ། ཁམས་གོང་མ་པ་དག་འཕགས་པ་ལ་དམིགས་ནས་ཉོན་མོངས་པ་སྐྱེ་བ་ཤས་ཆུང་བའི་ཕྱིར་དང༌། སྔར་སྐྱེས་པ་རྣམས་སྤང་བར་མི་ནུས་པའི་ཕྱིར་དང༌། མཐོང་སྤང་གཞི་མེད་པ་བརྟགས་པ་ལ་དམིགས་པ་ཀུན་འགྲོ་རྣམས་ནི་རང་གི་ས་ཐམས་ཅད་ལ་དམིགས་པས་གཞན་རྒྱུད་ལ་དམིགས་པའང་ཡོད་པས་སྤང་བར་མི་ནུས་པའི་ཕྱིར་དང༌། སྒོམ་སྤང་ནི་བདེན་པ་དང་པོ་གཉིས་ལ་དམིགས་པས་གཞི་དང་བཅས་པ་སྤང་བར་ནུས་པའི་ཕྱིར་རོ། །
གཉིས་པ་སྨོན་ནས་ཤེས་པ་ནི།
རྩ་བ། སྨོན་ནས་ཤེས་པའང་དེ་བཞིན་ནོ། །
དེ་ཡི་དམིགས་པ་ཐམས་ཅད་དོ། །
ཇི་ལྟར་ཉོན་མོངས་པ་མེད་པའི་ངོ་བོ་ཀུན་རྗོབ་ཤེས་པ་དང་ས་བསམ་གཏན་བཞི་པ་དང་གང་ཟག་མི་གཡོ་བའི་ཆོས་ཅན་དང་རྟེན་གླིང་གསུམ་གྱི་མིའི་རྟེན་ཅན་ཡིན་པ་དེ་བཞིན་དུ་སྨོན་ནས་ཤེས་པའི་ངོ་བོ་ལ་སོགས་པའང་ཡིན་ནོ། །འོན་ཀྱང་སྨོན་ནས་ཤེས་པ་དེའི་དམིགས་པ་ནི་ཉོན་མོངས་པ་གཞི་དང་བཅས་པ་ཁོ་ན་མ་ཡིན་གྱི་གཟུགས་ལ་སོགས་པ་ཆོས་ཐམས་ཅད་དོ། །དེ་ལ་སྨོན་ནས་ཤེས་པ་ནི་འདི་དང་འདི་ཤེས་པར་བྱའོ་སྙམ་དུ་སྨོན་པ་སྔར་བཏང་ནས་རབ་མཐའ་བཞི་པ་ལ་མཉམ་པར་བཞག་ནས་དེའི་ཡུལ་དུ་ཇི་ཙམ་གྱུར་པ་ཤེས་པའོ། །དེ་ཡང་བྱེ་བྲག་ཏུ་སྨྲ་བ་ན་རེ་གཟུགས་མེད་པ་ནི་མངོན་སུམ་དུ་མི་ཤེས་ཏེ། འདི་ནི་བསམ་གཏན་བཞི་པའི་ས་པ་ཡིན་པས་གོང་མ་གཟུགས་མེད་པ་ཡུལ་མ་ཡིན་པའི་ཕྱིར་ཏེ། འདི་ནི་མངོན་ཤེས་དང་འདྲ་བ་ཡིན་ལ་དེ་ནི་རང་དང་འོག་སའི་ཡུལ་ཅན་ཡིན་ཞེས་འཆད་པར་འགྱུར་པའི་ཕྱིར་རོ། །འོན་ཀྱང་ལུས་དང་སེམས་དམན་ཞིང་ཞི་བའི་རྒྱུ་མཐུན་པ་ལས་ནི་གཟུགས་མེད་ནས་སྐྱེས་སོ་ཞེས་བྱ་བ་དང༌། སྙོམས་འཇུག་གི་སྤྱོད་པ་དང་ལྡན་པ་ལས་གཟུགས་མེད་སྐྱེས་སོ་ཞེས་བྱ་བ་དང༌། གཟུགས་མེད་ཀྱི་ཏིང་ངེ་འཛིན་ཐོབ་ལམ་ཉམས་པ་དང་ལྡན་པས་གཟུགས་མེད་དུ་སྐྱེ་བར་འགྱུར་རོ་ཞེས་བྱ་བར་ཤེས་ཏེ་ཞིང་པ་རྣམས་ཀྱིས་འབྲུ་ལས་ཞིང་དང་ཞིང་ལས་འབྲུ་དཔོག་པ་བཞིན་ནོ་ཞེས་ཟེར་རོ། །གཞན་དག་གི་གཞུང་ལུགས་ལྟར་ན་ནི་སངས་རྒྱས་རྣམས་ཀྱི་མངོན་སུམ་གྱི་ཡུལ་དུ་མ་གྱུར་པ་ནི་འགའ་ཡང་མེད་པས་གཟུགས་མེད་པའང་མངོན་སུམ་དུ་མཁྱེན་པར་འདོད་དོ། །
མངོན་པར་རྟོགས་པའི་རྒྱན་ལས་ནི། ཉན་ཐོས་ཉོན་མོངས་མེད་པའི་ལྟ། །མི་ཡི་ཉོན་མོངས་ཡོངས་སྤོང་ཉིད། །གྲོང་སོགས་སུ་དེའི་ཉོན་མོངས་རྣམས། །རྒྱུན་གཅད་རྒྱལ་བའི་ཉོན་མོངས་མེད། །ཅེས་ཉན་རང་གི་ཉོན་མོངས་པ་མེད་པའི་ཏིང་ངེ་འཛིན་ནི་བདག་ལ་དམིགས་ནས་མི་འགའ་ཞིག་གི་རྒྱུད་ལ་ཉོན་མོངས་པ་སྐྱེས་པར་གྱུར་ན་མི་རུང་ངོ་ཞེས་མིའི་ཉོན་མོངས་སྐྱེ་བ་ཡོངས་སུ་སྤོང་བའི་ཐབས་ལ་འབད་པ་ཡིན་པས་ཉི་འཚེ་བ་དང་རེ་ཞིག་པ་དང༌། སངས་རྒྱས་ཀྱི་ཉོན་མོངས་པ་མེད་པའི་ཏིང་ངེ་འཛིན་ནི་གྲོང་ལ་སོགས་པར་སེམས་ཅན་ཉོན་མོངས་པ་ཅན་ཐམས་ཅད་ཀྱི་ཉོན་མོངས་པའི་ས་བོན་རྩ་བ་ནས་འབྱིན་པར་བཞེད་པས་ཁྱབ་པ་དང་གཏན་དུ་བ་ཡིན་པར་བཤད་ལ། སྨོན་ནས་ཤེས་པའང་ཉན་ཐོས་ལ་སོགས་པ་རྣམས་འབད་པ་དང་བཅས་པ་དང༌། མཚན་མར་འཛིན་པ་དང༌། ཤེས་སྒྲིབ་དང་བག་ཆགས་མ་སྤངས་པས་ཐོགས་པ་དང་བཅས་པ་དང༌། ལྷག་མེད་དུ་འཇུག་པས་རེས་འགའ་བ་དང༌། ཤེས་སྒྲིབ་མ་སྤངས་པས་འདྲི་བ་ཐམས་ཅད་ཀྱི་ལན་མི་ལྡོན་པ་ཡིན་ལ། སངས་རྒྱས་ཀྱི་ནི་མཚན་མ་མེད་པར་རང་གི་ངང་གིས་འཇུག་པས་འབད་པ་མེད་པ་དང༌། དངོས་པོ་ལ་མངོན་པར་མ་ཞེན་པས་གཟུགས་སོགས་ལ་ཆགས་པ་དང་བྲལ་བ་དང༌། སྒྲིབ་གཉིས་བག་ཆགས་དང་བཅས་པ་སྤངས་པས་ཤེས་བྱ་ཐམས་ཅད་ལ་ཐོགས་པ་མེད་པ་དང༌། འཁོར་བ་ཇི་སྲིད་བར་གནས་པས་རྟག་ཏུ་གནས་པ་དང༌། ཡང་དག་པའི་སོ་སོ་རིག་བཞི་བརྙེས་པས་འདྲི་བ་ཀུན་གྱི་ལན་ལྡོན་པ་ཡིན་ཏེ། དེ་ཉིད་ལས། སངས་རྒྱས་སྨོན་ནས་མཁྱེན་པ་ནི། །ལྷུན་གྱིས་གྲུབ་དང་ཆགས་སྤངས་དང༌། །ཐོགས་པ་མེད་དང་རྟག་གནས་དང༌། །འདྲི་བ་ཀུན་ལན་འདེབས་པར་བཞེད། །ཅེས་བཤད་དོ། །
གསུམ་པ་སོ་སོ་ཡང་དག་རིག་བཞི་ནི།
རྩ་བ། དེ་བཞིན་ཆོས་དོན་ངེས་ཚིག་དང༌། །
སྤོབས་པ་སོ་སོ་ཡང་དག་རིག །
གསུམ་ནི་གོ་རིམས་བཞིན་མིང་དང༌། །
དོན་དང་ངག་ལ་ཐོགས་མེད་ཤེས། །
ཇི་ལྟར་ཉོན་མོངས་པ་མེད་པའི་ཏིང་ངེ་འཛིན་གང་ཟག་མི་གཡོ་བའི་ཆོས་ཅན་གྱི་ཡིན་པ་དང་གླིང་གསུམ་གྱི་མིས་སྐྱེད་པ་དེ་བཞིན་དུ་ཆོས་དང་དོན་དང་ངེས་པའི་ཚིག་དང་སྤོབས་པ་སོ་སོ་ཡང་དག་པར་རིག་པ་དག་ཀྱང་དེ་དང་འདྲའོ། །དེ་དག་གི་དམིགས་པ་དང་ས་དང་ངོ་བོ་ལ་ནི་ཁྱད་པར་ཡོད་དེ། དེ་དག་ལས་དང་པོ་གསུམ་ནི་གོ་རིམ་བཞིན་དུ་མིང་དང་དོན་དང་ངག་རྣམས་ལ་གཞན་གྱིས་བཟློག་པར་མི་ནུས་པས་ཐོགས་པ་མེད་པར་ཤེས་པ་ཡིན་ཏེ། དེ་ལ་ཆོས་སོ་སོ་ཡང་དག་པར་རིག་པ་ནི་སྒྲུབ་པའི་ཆོས་འཕགས་ལམ་བརྒྱད་དང༌། འབྲས་བུའི་ཆོས་མྱང་འདས་རིག་པ་མ་ཡིན་གྱི་ཆོས་རྣམས་ཀྱི་མིང་ཚིག་ཡི་གེའི་ཚོགས་རིག་པ་སྟེ་དོན་རྣམས་ཀྱི་རྗོད་བྱེད་ཡིན་པའི་ཕྱིར་ན་བསྟན་པའི་ཆོས་སོ། །དོན་སོ་སོ་ཡང་དག་པར་རིག་པ་ནི་ཆོས་རྣམས་ཀྱི་རང་གི་མཚན་ཉིད་དམ་མྱ་ངན་ལས་འདས་པ་རིག་པ་སྟེ། བརྗོད་པར་བྱ་བའི་དོན་ནི་དོན་གྱི་མཆོག་ཡིན་པའི་ཕྱིར་རོ། །ངེས་པའི་ཚིག་སོ་སོ་ཡང་དག་པར་རིག་པ་ནི་ཆོས་རྣམས་ཀྱིས་བཤད་པའི་རྒྱུ་མཚན་ཅན་གྱི་ངག་རིག་པ་སྟེ། དོན་གྱི་རྒྱུ་མཚན་ཅན་གྱི་ཚིག་ཡིན་པས་ངེས་པའི་ཚིག་གོ །
བཞི་པ་སྤོབས་པ་སོ་སོ་ཡང་དག་པར་རིག་པ་ནི།
རྩ་བ། བཞི་པ་རིགས་པ་ཐགས་ཐོགས་མེད། །
མངོན་བརྗོད་ལམ་ལ་དབང་ཉིད་ལ། །
དེ་ཡི་དམིགས་པ་ངག་དང་ལམ། །
ཤེས་པ་དགུ་འོ་ས་ཐམས་ཅད། །
དོན་རྣམས་ཀྱིས་འགལ་བ་དང་འབྲེལ་བ་དོན་དང་འབྲེལ་བའི་རིགས་པ་དང༌། གཞན་ལ་ཐགས་ཐོགས་མེད་པར་མངོན་པར་བརྗོད་པ་ལ་ཐོགས་པ་མེད་པར་ཤེས་པ་དང༌། རང་ཉིད་ཡིད་ལ་བྱེད་པས་ཞི་གནས་ལྷག་མཐོང་གི་ཏིང་ངེ་འཛིན་མི་བརྗེད་པས་ལམ་ལ་དབང་བ་ཉིད་ལ་ཐོགས་པ་མེད་པར་ཤེས་པ་སྟེ། དང་པོ་ནི་འབེལ་གཏམ་ལ་མཁས་པ་ཡིན་ལ། གཉིས་པ་ནི་རང་ཉིད་ཡིད་ལ་བྱེད་པ་ལ་མཁས་པ་ཡིན་ནོ། །འདི་ནི་སྤོབས་པའང་ཡིན་ལ་སོ་སོ་རིག་པའང་ཡིན་པའི་ཕྱིར་སྤོབས་པ་སོ་སོར་རིག་པའོ། །ཡང་ན་སྤོབས་པ་ནི་རིག་པ་དང་གྲོལ་བར་སྨྲ་བ་སྟེ། དེ་ཤེས་པའི་ཕྱིར་སྤོབས་པ་སོ་སོར་ཡང་དག་པར་རིག་པའོ།། (འདི་བཞི་ཀའང་མིང་དང་དོན་ལ་མཉམ་རྗེས་གཉིས་ཀར་དམིགས་ལ། སྨྲ་བ་ནི་དེའི་རྗེས་ལ་ཐོབ་པ་ཁོ་ན་ཡིན་ནོ་ཞེས་རྒྱལ་སྲས་གསུང་ངོ༌།།) སྤོབས་པ་སོ་སོ་ཡང་དག་པར་རིག་པ་དེའི་དམིགས་པ་ནི་ངག་དང་ལམ་ཡིན་ཏེ། ངག་དང་མངོན་པར་བརྗོད་པ་ལ་དབང་བ་ནི་ངག་ལ་དམིགས་པ་ཡིན་ལ་ལམ་ལ་དབང་བ་ནི་ལམ་ལ་དམིགས་པའོ།། (ལམ་ཡང་ཟག་བཅས་ཟག་མེད་གང་རུང་ཡིན་ནོ་དེ་ལྟ་མིན་ན། ས་ཐམས་ཅད་པར་མི་འགྱུར་རོ་ཞེས་འདོད་དོ།།) དེའི་ངོ་བོ་ནི་ཤེས་པ་དགུ་ཡིན་ཏེ། (ངག་ནི་བདེན་པ་དང་པོ་གཉིས་ཡིན་པས།) ངག་ལ་དམིགས་པ་ནི་ཀུན་རྫོབ་དང་སྡུག་བསྔལ་ཀུན་འབྱུང་ཆོས་ཤེས་རྗེས་ཤེས་ཟད་མི་སྐྱེ་ཤེས་པའི་(ཤེས་པ་བདུན་གྱི་)རང་བཞིན་ཡིན་ཞིང༌། ལམ་ལ་དམིགས་པ་ནི་ལམ་དང་ཆོས་ཤེས་རྗེས་ཤེས་ཟད་མི་སྐྱེ་ཤེས་པ་དང་ཕ་རོལ་སེམས་ཤེས་ཀྱི་(ཤེས་པ་དྲུག་གི་)རང་བཞིན་ཡིན་ལ། འདུས་མ་བྱས་ལ་མི་དམིགས་པས་འགོག་ཤེས་མ་གཏོགས་པའི་ཕྱིར་རོ། །གལ་ཏེ་ངག་དང་ལམ་ལ་དམིགས་པའི་ཕྱིར་སྡུག་བསྔལ་དང་ཀུན་འབྱུང་ཤེས་པར་ཇི་ལྟར་འགྱུར་ཞེ་ན། ངག་དེ་ཉིད་ཟག་བཅས་ཡིན་པའི་ཕྱིར་སྡུག་བསྔལ་ཡིན་ལ། ཕྱི་མ་བསྐྱེད་པའི་ཕྱིར་ཀུན་འབྱུང་ཡང་ཡིན་པས་དེ་ཤེས་པ་ན་དེ་དག་ཤེས་པར་གཞག་གོ །ས་ནི་འདོད་པ་ནས་སྲིད་རྩེའི་བར་ཐམས་ཅད་ན་ཅི་རིགས་པར་ཡོད་དེ། ངག་དང་ལམ་གང་ཡང་རུང་བ་ལ་དམིགས་པའི་ཕྱིར་རོ། །
དོན་སོ་སོ་ཡང་དག་པར་རིག་པ་ནི།
རྩ་བ། དེ་ནི་ཀུན་ན་གཞན་ཀུན་རྫོབ། །
ཆོས་རིག་འདོད་དང་བསམ་གཏན་ན། །
ངག་ནི་འདོད་དང་དང་པོ་ནི། །
གལ་ཏེ་དོན་ཆོས་ཐམས་ཅད་རིག་པ་ལ་འདོད་ན་ནི་ཤེས་པ་བཅུའི་དམིགས་པར་མི་འགྱུར་བའི་ཆོས་གང་ཡང་མེད་པས་ཤེས་པ་བཅུ་ཡིན་པའམ། འོན་ཏེ་མྱང་འདས་རིག་པ་ལ་འདོད་ན་འགོག་པ་ཤེས་པ་ནི་སྡུག་བསྔལ་དང་ཀུན་འབྱུང་དང་ལམ་དང་སེམས་ཤེས་པ་བཞི་ལས་གཞན་པ་དྲུག་གི་རང་བཞིན་ཡིན་པའི་ཕྱིར་རོ། །དོན་སོ་སོ་ཡང་དག་པར་རིག་པ་དེ་ནི་ས་ཀུན་ན་ཡོད་ལ། དེ་དག་ལས་གཞན་ཆོས་དང་ངེས་པའི་ཚིག་སོ་སོ་ཡང་དག་པར་རིག་པ་གཉིས་ནི་ཀུན་རྫོབ་ཤེས་པའི་རང་བཞིན་ཡིན་ཏེ། རིམ་པ་ལྟར་མིང་གི་ཚོགས་ལ་སོགས་པ་བསྟན་པའི་ཆོས་དང་ངག་ལ་དམིགས་པའི་ཕྱིར་རོ། །དེ་ཡང་ཆོས་སོ་སོ་ཡང་དག་པར་རིག་པ་ནི་ས་འདོད་པ་དང་བསམ་གཏན་བཞི་པོ་དག་(སྟེ་ས་ལྔ་ན་ཡོད་དེ།) དེ་ཡན་ཆད་ན་ནི་རྗོད་བྱེད་མིང་ཚིག་ཡི་གེའི་ཚོགས་མེད་པའི་ཕྱིར་རོ། །ངག་སྟེ་ངེས་པའི་ཚིག་སོ་སོ་ཡང་དག་པར་རིག་པ་ནི་འདོད་པ་དང་བསམ་གཏན་དང་པོ་ཁོ་ན་ན་ཡོད་དེ། མདོ་ལས། བརྟགས་ཤིང་དཔྱད་ནས་ཚིག་ཏུ་སྨྲའོ་ཞེས་འབྱུང་བས་ངག་ནི་རྟོག་པས་ཀུན་ནས་བསླང་བའི་བདག་ཉིད་ཡིན་ན་བསམ་གཏན་གཉིས་པ་ཡན་ཆད་ན་རྟོག་པ་མེད་པའི་ཕྱིར་རོ། །
རྩ་བ། མ་ཚང་བར་ནི་དེ་ཐོབ་མེད། །
དྲུག་པོ་དེ་དག་རབ་མཐའ་བས། །
དེ་ནི་རྣམ་དྲུག་བསམ་གཏན་མཐའ། །
སོ་སོ་ཡང་དག་པར་རིག་པ་དེ་དག་གཅིག་ཐོབ་ན་ཐམས་ཅད་འཐོབ་པས་གང་རུང་གཅིག་མ་ཚང་བར་ནི་དེ་དག་འཐོབ་པ་མེད་དེ། (ལམ་གཅིག་གི་འབྲས་བུ་ཡིན་པའི་ཕྱིར་རོ།།) འདི་དག་གི་རྒྱུ་སྔོན་གྱི་སྦྱོར་བ་ནི་ཁ་ཅིག་གོ་རིམ་བཞིན་དུ་རྩིས་དང༌། སངས་རྒྱས་ཀྱི་བཀའ་དང༌། སྒྲ་རིག་པ་དང༌། གཏན་ཚིགས་རིག་པ་ལ་མཁས་པར་བྱས་པས་འཐོབ་པར་འདོད་ལ། བྱེ་བྲག་ཏུ་སྨྲ་བ་རྣམས་ནི་ཐམས་ཅད་ཀྱི་སྦྱོར་བ་སངས་རྒྱས་ཀྱི་བཀའ་ཁོ་ནའི་རྣམ་གྲངས་ངོ་བོ་ངེས་ཚིག་དབྱེ་བ་ལ་མཁས་པར་བྱས་པས་འདི་དག་འཐོབ་པར་འདོད་དོ།། (རྣམ་བཤད་རིག་པའི་འགྲེལ་པ་ལས་ཀྱང༌། རྣམ་གྲངས་ཀྱིས་ནི་ཆོས་སོ་སོ་ཡང་དག་པར་རིག་པའི་ཉེ་རྒྱུ་བྱས་པ་ཡིན་ནོ། །དེ་བཞིན་དུ་སྦྱར་ཏེ་མཚན་ཉིད་ཀྱིས་ནི་དོན་སོ་སོ་ཡང་དག་པར་རིག་པ་ཡིན། ངེས་པའི་ཚིག་གིས་ནི་ངེས་པའི་ཚིག་སོ་སོ་ཡང་དག་པར་རིག་པ་ཡིན། རབ་ཏུ་དབྱེ་བས་ནི་སྤོབས་པ་སོ་སོ་ཡང་དག་པར་རིག་པ་ཡིན་ནོ་ཞེས་འབྱུང་བ་དང་མཐུན་ནོ།།) གོ་རིམ་ཡང་ཚིག་ཡི་གེའི་རྗེས་སུ་འབྲངས་ནས། དོན་རྟོགས་པས་ཆོས་སོ་སོར་རིག་ནས་དོན་དང༌། དོན་ལས་མིང་གི་རྣམ་གྲངས་ཤེས་པ་འབྱུང་བས་ངེས་པའི་ཚིག་དང༌། དེ་དག་ལས་ནི་རིག་གྲོལ་གྱི་སྤོབས་པ་ཐོགས་པ་མེད་པར་འགྱུར་བའི་ཕྱིར་དེ་ལྟར་བསྟན་ཏོ།། (འདི་དག་གི་གོ་རིམ་ནི་ཚིག་དང་ཡི་གེའི་རྗེས་སུ་འབྲངས་ནས་དོན་རྟོགས་ལ། དོན་གྱི་གཅིག་གཉིས་ལ་སོགས་པའི་ཚིག་བླ་དགས་དང༌། དེ་དག་ལ་ཐོགས་པ་མེད་པའི་ཕྱིར་རོ། །ཞེས་གདགས་པ་ལས་སོ།།)
ཉོན་མོངས་པ་མེད་པ་དང་སྨོན་ནས་ཤེས་པ་དང་སོ་སོ་ཡང་དག་རིག་བཞི་སྟེ་དྲུག་པོ་དེ་དག་ནི་རབ་ཀྱི་མཐའ་པ་བསམ་གཏན་བཞི་པའི་སྟོབས་ཀྱིས་འཐོབ་ལ། རབ་ཀྱི་མཐའ་པ་ཞེས་བྱ་བའི་བསམ་གཏན་བཞི་པ་དེ་ནི་ཉོན་མོངས་པ་མེད་པ་དང༌། སྨོན་ནས་ཤེས་པ་དང༌། ཆོས་དང༌། དོན་དང༌། སྤོབས་པ་སོ་སོ་ཡང་དག་པར་རིག་པ་གསུམ་དང༌། རབ་ཀྱི་མཐའ་བའི་བསམ་གཏན་བཞི་པ་དེ་ཉིད་དང་རྣམ་པ་དྲུག་གི་བདག་ཉིད་ཡིན་ལ། བསམ་གཏན་བཞི་པ་ལ་ལ་ནི་ཉོན་མོངས་པ་མེད་པ་དང༌། ལ་ལ་ནི་སྨོན་ནས་ཤེས་པ་དང༌། ལ་ལ་ནི་སོ་སོ་ཡང་དག་པར་རིག་པ་གསུམ་དང༌། ལ་ལ་ནི་དེ་དག་མ་གཏོགས་པ་རབ་ཀྱི་མཐའ་པ་འབའ་ཞིག་ཡིན་པའི་ཕྱིར་རོ། །ངེས་པའི་ཚིག་སོ་སོ་ཡང་དག་པར་རིག་པ་ནི་རྟོག་དཔྱོད་ཀྱིས་ཀུན་ནས་སློང་བའི་ཕྱིར་འདོད་པ་དང་བསམ་གཏན་དང་པོའི་ས་པ་ཡིན་ནོ། །འོ་ན་དྲུག་པོ་དེ་དག་རབ་མཐའ་པས་ཞེས་ཁྱད་པར་མེད་པར་བཤད་ཅེ་ན། དེ་ནི་རབ་ཀྱི་མཐའ་པའི་བསམ་གཏན་གྱི་སྟོབས་ཀྱིས་འཐོབ་པའི་ཕྱིར་དེ་སྐད་བཤད་ཀྱི་བསམ་གཏན་བཞི་པའི་ས་པ་ནི་མ་ཡིན་ནོ། །
དེ་ལ་རབ་ཀྱི་མཐའ་པ་ཞེས་བྱ་བ་ནི་བསམ་གཏན་གྱི་ཡ་མཐའ་བསམ་གཏན་བཞི་པ་ཡིན་ནོ། །ཇི་ལྟར་ཞེ་ན།
རྩ་བ། དེ་ནི་ས་ཀུན་གྱིས་མཐུན་བྱས། །
འཕེལ་བའི་རབ་ཏུ་ཕྱིན་པ་ཡིན། །
སངས་རྒྱས་ལས་གཞན་སྦྱོར་ལས་སྐྱེས། །
རབ་མཐའ་བསམ་གཏན་བཞི་པ་དེ་ནི་འདོད་པའི་སེམས་ལས་བསམ་གཏན་དང་པོ་ལ་སྙོམས་པར་འཇུག་པ་ནས་ཅི་ཡང་མེད་པ་ལས་སྲིད་རྩེ་ལ་སྙོམས་པར་འཇུག་པའི་བར་དང༌། ཡང་སྲིད་རྩེ་ལས་ལངས་ནས་ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པ་ནས་བསམ་གཏན་དང་པོ་ལས་ལངས་ནས་འདོད་པའི་སེམས་ལ་གནས་པའི་བར་དང༌། དེ་ནས་ཡང་འདོད་པའི་སེམས་ལས་བསམ་གཏན་དང་པོ་ལ་སྙོམས་པར་འཇུག་པ་ནས་བསམ་གཏན་གསུམ་པ་ལས་ལངས་ནས་བསམ་གཏན་བཞི་པ་ལ་སྙོམས་པར་འཇུག་པའི་བར་ས་ཀུན་གྱིས་ལུགས་དང་མཐུན་པ་དང་མི་མཐུན་པའི་སྙོམས་པར་འཇུག་པས་མཐུན་པར་བྱས་པའི་ཕྱིར་དང༌། བསྒོམ་པ་ཆུང་ངུ་བསམ་གཏན་དང་པོ་ལས་འབྲིང་གཉིས་པ་ལས་ཆེན་པོ་གསུམ་པ་ལ་སྙོམས་པར་འཇུག་པས་གསུམ་པ་ནི་འཕེལ་བའི་མཆོག་ཏུ་གྱུར་པས་འཕེལ་བའི་རབ་ཡིན་ལ། རབ་དེའི་ཡ་མཐའ་ཡིན་པས་ན་བཞི་པ་ནི་འཕེལ་བའི་རབ་ཏུ་ཕྱིན་པ་ཡིན་པའི་ཕྱིར་རོ། །ཉོན་མོངས་པ་མེད་པ་ལ་སོགས་པ་ཡོན་ཏན་དྲུག་པོ་དེ་དག་ཀྱང་སངས་རྒྱས་ལས་གཞན་པའི་གང་ཟག་གི་རྒྱུད་ལ་ཡོད་པ་རྣམས་ནི་སྦྱོར་བ་འབད་རྩོལ་ལས་སྐྱེས་པ་ཡིན་གྱི་འདོད་ཆགས་དང་བྲལ་བ་ཙམ་གྱིས་འཐོབ་པ་ནི་མ་ཡིན་ནོ། །སངས་རྒྱས་ཀྱི་ནི་ཆོས་ཐམས་ཅད་ཀྱི་དབང་ཕྱུག་ཡིན་པའི་ཕྱིར་ཡོན་ཏན་ཐམས་ཅད་མངོན་དུ་འགྱུར་བ་ནི་བཞེད་པ་ཙམ་ལས་རག་ལས་པ་ཡིན་གྱི་སྦྱོར་བ་ལས་བྱུང་བ་ནི་ཅུང་ཟད་ཀྱང་མེད་དོ། །
གཉིས་པ་ཕལ་ཆེར་བྱིས་པ་དང་ཐུན་མོང་བ་ལ་མངོན་པར་ཤེས་པ་ནི་རྣམ་པ་དྲུག་ཏུ་ཤེས་པར་བྱའོ། །གང་ཞེ་ན།
རྩ་བ། རྫུ་འཕྲུལ་རྣ་བ་ཡིད་དང་ནི། །
སྔོན་ཚེ་འཆི་འཕོ་སྐྱེ་བ་དང༌། །
ཟད་ཤེས་མངོན་དུ་བྱ་བ་ཡི། །
མངོན་ཤེས་རྣམ་དྲུག་རྣམ་གྲོལ་བློ། །
རྫུ་འཕྲུལ་གྱི་ཡུལ་སྤྲུལ་པ་དང་འགྲོ་བ་ཤེས་པ་དང༌། ལྷའི་རྣ་བ་དང༌། གཞན་གྱི་ཡིད་དུག་གསུམ་བཅས་བྲལ་ལ་སོགས་པའི་ཁྱད་པ་དང༌། རེས་འགའ་ཆགས་རེས་འགའ་སྡང་ངོ་ཞེས་པ་ལ་སོགས་པའི་གོ་རིམ་ཤེས་པ་དང༌། རང་གཞན་གྱི་སྔོན་གྱི་ཚེ་རབས་རྗེས་སུ་དྲན་པ་དང༌། འཆི་འཕོ་དང་སྐྱེ་བ་ཤེས་པ་དང༌། ཟག་པ་ཟད་པ་ཤེས་པ་མངོན་སུམ་དུ་བྱ་བ་སྟེ་བྱེད་པའི་མངོན་པར་ཤེས་པའོ་ཞེས་ཐམས་ཅད་ལ་སྦྱར་རོ། །དྲུག་པོ་དེ་དག་ལས་དང་པོ་ལྔ་ནི། སོ་སོའི་སྐྱེ་བོ་དང་ཐུན་མོང་བ་ཡིན་ལ་དྲུག་པ་ནི་འཕགས་པ་ཁོ་ནའི་རྒྱུད་ལ་ཡོད་དོ། །ངོ་བོ་ནི་མངོན་ཤེས་དྲུག་པོ་དེ་དག་ཐམས་ཅད་ནི་དཔེར་ན་དགེ་སྦྱོང་གི་ཚུལ་གྱི་འབྲས་བུ་འདུས་བྱས་རྣམ་གྲོལ་གྱི་ལམ་གྱི་རང་བཞིན་ཡིན་པ་ལྟར་རྣམ་པར་གྲོལ་བའི་ལམ་གྱི་བློ་ཤེས་རབ་ཀྱི་རང་བཞིན་ཡིན་ནོ།། (གལ་ཏེ་བར་ཆད་མེད་ལམ་གྱིས་བསྡུས་ན་དགྲ་བཅོམ་གཉིས་ཀའི་ཆ་ལས་རྣམ་གྲོལ་ལ་མངོན་ཤེས་མེད་པར་འགྱུར་ཏེ་བར་ཆད་མེད་ལམ་བཏང་ནས་མེད་པའི་ཕྱིར་རོ། །ལྷའི་མིག་དང་རྣ་བའི་མངོན་ཤེས་ནི་དབང་ཤེས་ཡིན་པས་རྣམ་གྲོལ་ལམ་ཇི་ལྟར་ཡིན་ཞེ་ན། ལམ་གཞན་གྱི་རྣམ་གྲོལ་དུ་དེ་དག་འགལ་ཡང་མངོན་ཤེས་ཀྱི་རྣམ་གྲོལ་ཡིན་པས་སྐྱོན་མེད་དོ། །དེ་ལྟ་མིན་ན་སྒོམ་བྱུང་གི་མངོན་ཤེས་སུ་འགལ་ཏེ་རྣམ་གྲོལ་གྱི་ལམ་མིན་པས་སོ།།)
རྩ་བ། བཞི་ནི་ཀུན་རྫོབ་ཤེས་པ་སྟེ། །
སེམས་ལ་ཤེས་པ་ལྔ་ཡིན་ནོ། །
ཟད་པའི་མངོན་ཤེས་སྟོབས་བཞིན་ནོ། །
གསུམ་པ་དང་དྲུག་པ་མ་གཏོགས་པ་བཞིའི་ངོ་བོ་ནི་ཀུན་རྫོབ་ཤེས་པ་སྟེ། ཟག་བཅས་ཁོ་ན་ཡིན་པའི་ཕྱིར་རོ།། (དེ་ཡང་གསུམ་གྱིས་ནི་ཟག་མེད་དང་གཅིག་སྔོན་གྱི་མཐའ་ལ་དམིགས་པས་སོ།།) གཞན་གྱི་སེམས་ལ་དམིགས་ནས་དེའི་ཁྱད་པར་ཤེས་པ་ནི་རྫས་ཀྱི་རང་གི་མཚན་ཉིད་ལ་དམིགས་པ་དང༌། ཀུན་དུ་རྟོག་ཅིང་འཚོལ་བའི་བསམ་པ་ཅན་དང༌། ཟག་མེད་ལམ་གྱི་རྣམ་པ་ཅན་དང༌། ཟག་བཅས་ཕ་རོལ་གྱི་སེམས་ཆགས་བཅས་དང་ཆགས་བྲལ་ལ་སོགས་པའི་རྣམ་པ་ཅན་ཡིན་ན་ཟད་པ་དང་མི་སྐྱེ་བ་ཤེས་པ་ནི་དེ་ལྟ་བུ་མ་ཡིན་པའི་ཕྱིར་དང༌། འགོག་པ་མཚུངས་ལྡན་མ་ཡིན་ཞིང་སྡུག་བསྔལ་དང་ཀུན་འབྱུང་ཤེས་པའི་རྣམ་པ་ཅན་ཡང་མ་ཡིན་པས་ཤེས་པ་ལྔ་པོ་དེ་དག་མ་ཡིན་གྱི་འོན་ཀྱང་ཟག་མེད་ཀྱི་ཆ་ཆོས་ཤེས་རྗེས་ཤེས་དང་ལམ་དང་ཕ་རོལ་སེམས་ཤེས་ཡིན་ལ། ཟག་བཅས་ཀྱི་ཆ་ཀུན་རྫོབ་ཤེས་པ་དང་ཕ་རོལ་སེམས་ཤེས་གཉིས་ཡིན་པས་ཤེས་པ་ལྔ་ཡིན་ནོ། །ཟག་པ་ཟད་པའི་མངོན་པར་ཤེས་པ་ནི་ཇི་ལྟར་ཟད་པ་མཁྱེན་པའི་སྟོབས་ཤེས་པ་དྲུག་གམ་བཅུའི་རང་བཞིན་དང་ས་བཅུ་གཅིག་གིས་བསྡུས་པ་དེ་བཞིན་དུ་ཟག་པ་ཟད་པ་འབའ་ཞིག་ལ་དམིགས་པ་ཡིན་ན་ཤེས་པ་དྲུག་དང༌། ཟག་པ་ཟད་པའི་རྒྱུད་ལ་ཡོད་པའི་ཤེས་པ་ཡིན་པར་འདོད་ན་ནི་དེའི་རྒྱུད་ལ་ཤེས་པ་བཅུ་ཀ་ཡོད་པའི་ཕྱིར་ཤེས་པ་བཅུ་ཆར་ཡིན་ནོ། །ས་ཡང་ཅི་རིགས་པར་བཅུ་གཅིག་པོ་ཐམས་ཅད་ཡིན་པ་ཤེས་པར་བྱའོ། །
རྩ་བ། ལྔ་ནི་བསམ་གཏན་བཞི་དག་ན། །
མངོན་ཤེས་དང་པོ་ལྔ་ནི་བསམ་གཏན་གྱི་དངོས་གཞི་བཞི་དག་ན་ཡོད་ལ། (མངོན་ཤེས་འདི་དག་བསམ་གཏན་ཁྱད་པར་ཅན་ན་མེད་དེ་ལྷག་མཐོང་ཤས་ཆེ་བས་ལམ་སླ་བ་མ་ཡིན་པའི་ཕྱིར་རོ།།) གཟུགས་མེད་ན་ནི་མེད་དེ། རྫུ་འཕྲུལ་དང་ལྷའི་རྣ་བ་དང་འཆི་འཕོ་དང་སྐྱེ་བ་ཤེས་པ་གསུམ་ནི་གཟུགས་ལ་དམིགས་པའི་ཕྱིར་དང༌། སེམས་ཀྱི་རྣམ་གྲངས་དང་སྔོན་གྱི་གནས་རྗེས་སུ་དྲན་པའང་གཟུགས་ཀྱི་དམིགས་པ་ལ་བརྟེན་ནས་བསྒྲུབ་དགོས་པའི་ཕྱིར་ཏེ། འདི་ལྟར་བསམ་གཏན་པ་དག་བསམ་གཏན་ལ་བརྟེན་ནས་གཟུགས་འདི་འདྲ་བས་ན་སེམས་འདི་འདྲ་བར་འགྱུར་རོ་ཞེས་དང༌། ལུས་འདི་ལ་སེམས་ཀྱི་རྣམ་པ་ཅི་འདྲ་བ་ཞིག་ཅེས་ཕ་རོལ་ལ་ཡིད་གཏོད་དེ། གང་གི་ཚེ་གཟུགས་ལ་མ་ལྟོས་པར་ཕ་རོལ་གྱི་སེམས་ཤེས་པ་དེའི་ཚེ་སེམས་ཤེས་པ་གྲུབ་པ་ཡིན་ནོ། །ཡང་བསམ་གཏན་ལ་བརྟེན་ནས་བདག་གཞན་གྱི་ཡིད་ཀྱི་རྣམ་པར་ཤེས་པ་འགགས་མ་ཐག་པའི་མཚན་མ་བཟུང་ནས་དེའི་སྔ་མ་སྔ་མ་ལ་ཡིད་གཏད་དེ་མཐར་ཉིང་མཚམས་སྦྱོར་བའི་སེམས་དང༌། དེ་ནས་སྔ་མའི་བར་དོའི་གནས་སྐབས་དང༌། དེ་ནས་སྔ་མའི་འཆི་བའི་སྲིད་པ་དང༌། དེ་ནས་སྔ་མའི་སྔོན་དུས་ཀྱི་སྲིད་པ་ལ་ཡིད་གཏོད་དེ། གང་གི་ཚེ་བར་སྲིད་དྲན་པ་དེའི་ཚེ་སྔོན་གནས་རྗེས་དྲན་གྲུབ་པ་ཡིན་ནོ། །དེ་ཡང་དང་པོ་ནི་རིམ་གྱིས་དྲན་ལ་མངོན་པར་གྲུབ་ནས་ནི་ཚེ་གཅིག་དང་གཉིས་ལ་སོགས་པ་རྒལ་ཏེ་ཐོད་རྒལ་དུ་ཡང་དྲན་ལ། དེ་ཡང་སྔོན་ཉམས་སུ་མྱོང་བ་ཁོ་ན་དྲན་ནོ། །
གལ་ཏེ་སྔོན་ཉམས་སུ་མྱོང་བ་ཁོ་ན་དྲན་ན་འོ་ན་རྟེན་འདོད་པ་པའི་སྔོན་གནས་རྗེས་དྲན་གྱིས་གནས་གཙང་མ་རྣམས་ཇི་ལྟར་དྲན་ཏེ་ཕྱིར་མི་འོང་ཡིན་པས་དེ་དག་འདིར་མི་སྐྱེ་ཞིང་སོ་སོའི་སྐྱེ་བོ་རྣམས་དེར་མི་སྐྱེ་བའི་ཕྱིར་རོ་ཞེ་ན། ཉམས་སུ་མྱོང་བ་ནི་མཐོང་བ་དང་ཐོས་པས་ཉམས་སུ་མྱོང་བ་གཉིས་ལས་གནས་གཙང་མ་པ་རྣམས་ནི་འདི་ལྟ་བུ་ཡིན་ནོ་ཞེས་ཐོས་པས་ཉམས་སུ་མྱོང་བའི་ཕྱིར་རོ། །དེས་ན་སྔོན་གནས་རྗེས་དྲན་ནི་རང་གཞན་གྱི་སྔོན་འདོད་པ་ལ་སོགས་པའི་གནས་གཞན་དག་རྗེས་སུ་དྲན་པས་བསྒྲུབ་དགོས་པ་ལ། གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །ཞེས་འདོད་པ་ལ་སོགས་པའི་གནས་གཞན་འོག་མ་ལ་མི་དམིགས་པའི་ཕྱིར་དང༌། མདོ་ལས། བདག་མིང་འདི་ཞེས་བྱ་རིགས་ནི་འདི་ལྟ་བུར་ཁ་ཟས་ནི་འདི་ལྟ་བུ་ཟ་ཟ། བདེ་བ་དང་སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང༌། ཚེ་ནི་འདི་ཙམ་ཞིག་ཐུབ། བདག་གནས་དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཤི་འཕོས་ནས་ནི་འདིར་སྐྱེས་སོ་ཞེས་པ་དང༌། སྔོན་གྱི་གནས་རྣམ་པ་དུ་མ་རྣམ་པ་དང་བཅས། ཡུལ་ཕྱོགས་དང་བཅས། གླེང་གཞི་དང་བཅས་པ་རྗེས་སུ་དྲན་ནོ་ཞེས་གསུངས་པས་ས་འོག་མའི་སྔོན་གྱི་གནས་དང་རུས་དང་རིགས་དང་མིང་དང་ཁ་ཟས་ལ་སོགས་པ་དྲན་དགོས་པའི་ཕྱིར་གཟུགས་ལ་ལྟོས་པ་ཡིན་པ་ལ་གཟུགས་མེད་འོག་ས་ལ་མི་དམིགས་པའི་ཕྱིར་རོ། །དེ་ཡང་མངོན་ཤེས་གྲུབ་ནས་ནི་གཟུགས་ལ་མ་ལྟོས་པར་ཤེས་སོ། །རྫུ་འཕྲུལ་དང་ལྷའི་རྣ་བ་དང་མིག་གི་མངོན་ཤེས་གསུམ་གྱི་སྦྱོར་བ་ནི་བསམ་གཏན་ལ་བརྟེན་ནས་རིམ་པ་ལྟར་ལུས་ཡང་བ་དང་འཕར་བ་ལ་སོགས་པ་དང༌། ཆུང་ངུ་དང་ཐག་རིང་པོའི་སྒྲ་དང༌། སྣང་བ་ཡིད་ལ་བྱེད་པ་ཡིན་ལ། ཟག་ཟད་ཀྱི་མངོན་ཤེས་ཀྱི་སྦྱོར་བ་ནི་གནས་དྲུག་པར། ཚུལ་གནས་ཐོས་དང་བསམ་གཏན་པ། །ཞེས་ཉོན་མོངས་པ་སྤོང་བའི་ཐབས་རྒྱས་པར་བསྟན་པའི་ཕྱིར་ཡང་འདིར་མི་བརྗོད་དོ་ཞེས་སློབ་དཔོན་གང་སྤེལ་འཆད་དོ། །དེ་དག་ནི་རྣམ་གནས་ཀྱི་རྒྱུ་ཡིན་ལ། རྣམ་པར་སྨིན་པའི་རྒྱུ་ནི་རིན་པོ་ཆེའི་ཕྲེང་བ་ལས་གསུངས་པ་བཞིན་དུ་ཤེས་པར་བྱའོ། །
རྩ་བ། རང་དང་འོག་སའི་ཡུལ་ཅན་ཡིན། །
ཐོབ་བྱ་འདྲིས་པ་ཆགས་བྲལ་བས། །
མངོན་ཤེས་ལྔ་པོ་འདི་དག་ནི་རང་ས་དང་འོག་སའི་སྤྱོད་ཡུལ་ཅན་ཡིན་གྱི་གོང་མའི་ནི་མ་ཡིན་ཏེ། དམན་པའི་ཡུལ་མཆོག་མ་ཡིན་པའི་ཕྱིར་རོ།། (རྫུ་འཕྲུལ་གྱིས་དེའང་འོག་མར་འགྲོ་ཞིང་སྤྲུལ་གྱི་གོང་དུ་མ་ཡིན་པ་སོགས་གཞན་ལའང་སྦྱར་རོ།།) དེའི་ཕྱིར་གཟུགས་མེད་པའི་སེམས་ནི་སེམས་ཀྱི་རྣམ་གྲངས་ཤེས་པ་དང་སྔོན་གནས་དྲན་པའི་མངོན་ཤེས་ཀྱིས་མི་འཛིན་ཏེ། དེ་ནི་གོང་མའི་སེམས་ཡིན་པའི་ཕྱིར་རོ། །དེ་ལྟ་ན་གཟུགས་མེད་ནས་ཤི་འཕོས་ནས་འདིར་སྐྱེས་པ་ཇི་ལྟར་སྔོན་གྱི་གནས་དྲན་པའི་མངོན་ཤེས་ཀྱིས་དྲན་ཏེ། དེ་ནི་བསམ་གཏན་བཞི་པའི་ས་པ་ཡིན་པས་དེས་གོང་མ་གཟུགས་མེད་ཀྱི་སེམས་མི་འཛིན་པའི་ཕྱིར་རོ་ཞེ་ན། དེ་ནི་ཕ་རོལ་པོའི་རྒྱུད་ལ་བརྟེན་ནས་བསྐྱེད་དེ། ཕ་རོལ་པོའི་ཡིད་ཤེས་འགགས་མ་ཐག་པའི་མཚན་མ་བཟུང་ནས་བསྐྱེད་པའི་ཕྱིར་རོ། །གང་དག་གཟུགས་མེད་ནས་ཤི་འཕོས་པ་མ་ཡིན་པ་དེ་དག་ནི་སླ་བའི་ཕྱིར་དང་རང་གི་རྒྱུད་ལ་བརྟེན་ནས་སྐྱེད་པར་བྱེད་དོ། །དེ་ཡང་བར་དོ་ཚུན་ཆད་དུ་དྲན་པར་འདོད་ཀྱི་གཞན་ནི་མི་དྲན་ནོ་ཞེས་བྱ་བ་ནི་གྲུབ་པའི་མཐའོ། །དེ་དག་འཐོབ་པའི་ཚུལ་ནི་མངོན་པར་ཤེས་པ་བྱེ་བྲག་ཅན་སྔོན་མ་བསྐྱེད་པས་མ་འདྲིས་པ་རྣམས་ནི་སྦྱོར་བས་འཐོབ་པར་བྱ་བ་ཡིན་ལ། (ཁྱད་པར་ཅན་ནི་འཕགས་ལམ་དང་འབྲལ་བའོ།།) གང་དག་ཚེ་རབས་སྔ་མ་ལ་གོམས་ཤིང་འདྲིས་པ་རྣམས་ནི་འདོད་ཆགས་དང་བྲལ་བ་ཙམ་གྱིས་འཐོབ་བོ། །དེ་དག་མངོན་སུམ་དུ་འགྱུར་བ་ནི་འདྲིས་པ་དང་མ་འདྲིས་པ་གཉིས་ཀའང་སྦྱོར་བའི་སྟོབས་ཁོ་ནས་འཐོབ་པར་བྱ་བ་ཡིན་ནོ། །
དྲན་པ་ཉེ་བར་བཞག་པར་བཤད་པ་ནི།
རྩ་བ། གསུམ་པ་དྲན་པ་ཉེར་གཞག་གསུམ། །
དང་པོ་རྫུ་འཕྲུལ་རྣ་བ་མིག །
མངོན་པར་ཤེས་པ་གསུམ་པ་སེམས་ཀྱི་རྣམ་གྲངས་ཤེས་པ་ནི་མཚུངས་ལྡན་ཁོ་ན་ལ་དམིགས་པས་ཚོར་བ་དང་སེམས་དང་ཆོས་དྲན་པ་ཉེར་གཞག་གསུམ་ཡིན་ཏེ་གཞན་གྱི་སེམས་དང་སེམས་ལས་བྱུང་བ་ལ་དམིགས་པའི་ཕྱིར་རོ། །རྫུ་འཕྲུལ་གྱི་ཡུལ་ཤེས་པ་དང་ལྷའི་རྣ་བ་དང་ལྷའི་མིག་གི་མངོན་ཤེས་གསུམ་ནི་དྲན་པ་ཉེར་གཞག་དང་པོ་ལུས་དྲན་པ་ཉེར་གཞག་ཡིན་ཏེ། རྫུ་འཕྲུལ་གྱི་མངོན་པར་ཤེས་པ་ནི། འདོད་པར་གཏོགས་པའི་སྤྲུལ་པ་ནི། །ཕྱིའི་སྐྱེ་མཆེད་བཞི། ཞེས་འཆད་པར་འགྱུར་བས་སྒྲ་ནི་རྒྱུན་ཆད་པས་སྤྲུལ་པར་མི་བྱེད་པས་གཟུགས་དྲི་རོ་རེག་བྱ་བཞི་ལ་དམིགས་པའི་ཕྱིར་དང༌། ལྷའི་རྣ་བ་ནི་བསྐལ་བ་དང་མ་བསྐལ་བའི་སྒྲ་ལ་དམིགས་པའི་ཕྱིར་དང༌། ལྷའི་མིག་གིས་ནི་འཆི་བ་དང་བར་དོ་དང་སྐྱེ་བའི་སྲིད་པའི་ཁ་དོག་བཟང་ངན་ལ་སོགས་པའི་གཟུགས་ལ་དམིགས་པའི་ཕྱིར་དང༌། དེ་ཐམས་ཅད་ཀྱང་གཟུགས་ཅན་ཡིན་པའི་ཕྱིར་རོ། །
གལ་ཏེ་ལྷའི་མིག་གི་མངོན་ཤེས་ཀྱི་དམིགས་ཡུལ་གཟུགས་ཀྱི་སྐྱེ་མཆེད་ཁོ་ན་ཡིན་ན། འོ་ན་མདོ་ལས་འཆི་འཕོ་སྐྱེ་ཤེས་ཀྱིས་སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན་ནོ་ཞེས་པ་ལ་སོགས་པ་སྒོ་གསུམ་གྱི་ལས་དང་ལྡན་པ་ཤེས་པར་གསུངས་པ་དང་འགལ་ཏེ། ལུས་ཀྱི་རིག་བྱེད་མ་ཡིན་པ་དང་ངག་དང་ཡིད་ཀྱི་ལས་གཟུགས་ཀྱི་སྐྱེ་མཆེད་མ་ཡིན་པའི་ཕྱིར་རོ་ཞེ་ན། བྱེ་བྲག་ཏུ་སྨྲ་བ་དག་དེ་དག་ལྷའི་མིག་གི་མངོན་ཤེས་ཀྱིས་མི་ཤེས་ཀྱི་འོན་ཀྱང་ལྷའི་མིག་གི་མངོན་ཤེས་ཀྱི་འཁོར་དུ་གྱུར་པའི་ཡིད་ཀྱི་རྣམ་ཤེས་ཀྱིས་ཤེས་པ་ཡིན་པས་སྒོ་གསུམ་གྱི་ལས་དང་ལྡན་པ་ཤེས་པ་ནི་ཡིད་ཤེས་ཡིན་ནོ་ཞེས་འདོད་པ་ནི་མི་རིགས་ཏེ། ཡིད་ཤེས་དེ་མངོན་ཤེས་དྲུག་ཏུ་མ་འདུས་ན་དྲུག་ལས་ཐ་དད་པའི་མངོན་ཤེས་ཡིན་པས་མངོན་ཤེས་བདུན་པར་ཐལ་བར་འགྱུར་ལ། འདུས་ན་འཁོར་དུ་རྣམ་པར་བཞག་པ་མི་འཐད་པར་འགྱུར་རོ། །དེས་ན་ལུས་ངག་གི་ཉེས་སྤྱོད་ནི་ལྷའི་མིག་དང་རྣ་བའི་མངོན་ཤེས་ཀྱིས་ཤེས་ལ་ཡིད་ཀྱིས་ཉེས་སྤྱོད་དེ་དག་ལས་དཔོག་པའམ་སེམས་ཀྱི་རྣམ་གྲངས་ཤེས་པས་ཤེས་པ་ཡིན་ནོ་ཞེས་བྱ་བར་རིགས་སོ། །སྔོན་གནས་རྗེས་དྲན་ནི་གཟུགས་དང་སེམས་དང་སེམས་བྱུང་གསུམ་ག་ལ་དམིགས་པས་དྲན་པ་ཉེར་གཞག་བཞི་ཀའི་བདག་ཉིད་ཡིན་ལ། ཟག་ཟད་ཀྱི་མངོན་ཤེས་ཀྱང་གལ་ཏེ་ཟག་པ་ཟད་པ་འབའ་ཞིག་ལ་དམིགས་པ་ཡིན་ན་ནི་ཆོས་དྲན་པ་ཉེར་གཞག་དང༌། འོན་ཏེ་དེའི་རྒྱུད་ལ་དམིགས་པ་ཡིན་ན་ནི་ཤེས་པ་བཅུའི་ངོ་བོ་ཡིན་པས་དྲན་པ་ཉེར་གཞག་བཞི་ཀ་ཡིན་ནོ། །ཡང་ན་ཟག་པ་ཟད་པ་འབའ་ཞིག་ལ་དམིགས་པས་ཤེས་པ་དྲུག་གི་ངོ་བོ་ཡིན་ཡང་དྲན་པ་ཉེར་གཞག་གཞན་གསུམ་ཡང་མ་འོངས་པ་འཐོབ་པས་དྲན་པ་ཉེར་གཞག་བཞི་ཆར་གྱི་རང་བཞིན་ཞེས་ཊཱིཀ་བྱེད་དག་འཆད་དེ་འགྲེལ་པའི་དགོངས་པའང་དེ་ཉིད་དུ་གསོལ་ལོ། །
རྩ་བ། མིག་དང་རྣ་བའི་མངོན་ཤེས་ནི། །
ལུང་དུ་མ་བསྟན་ལྷག་རྣམས་དགེ །
ཡང་མངོན་ཤེས་དེ་དག་ལས་ལྷའི་མིག་དང་རྣ་བའི་མངོན་ཤེས་གཉིས་ནི་ཉོན་མོངས་པ་ཅན་མ་ཡིན་ཞིང་དགེ་བ་བཞིར་ཡང་མ་འདུས་པས་མ་བསྒྲིབས་ལ་ལུང་དུ་མ་བསྟན་པ་ཁོ་ན་ཡིན་ནོ།། (དེ་དག་སྐྱེས་ཐོབ་མིན་ལ། སྦྱོར་བྱུང་ཡང་མིན་ཏེ་དེ་ནི་ཐོས་བསམ་སྒོམ་གསུམ་གྱིས་བསྡུས་ལ་དེ་ལ་སྐྱེས་ཐོབ་དང་སྦྱོར་བྱུང་གཉིས་ཀ་མི་སྲིད་པས་སོ།།) དེ་དག་ཀྱང་མིག་དང་རྣ་བའི་རྣམ་ཤེས་དང་མཚུངས་པར་ལྡན་པའི་ཤེས་རབ་ཡིན་ནོ། །འོ་ན་དེ་དག་བསམ་གཏན་བཞི་པའི་ས་པར་མི་འགྱུར་ཏེ། གཉིས་པ་སོགས་ན་ལུས་མིག་དང༌། །རྣ་བའི་རྣམ་ཤེས་རྣམ་རིག་སློང༌། །གང་ཡིན་དེ་ནི་དང་པོར་གཏོགས། །ཞེས་འཆད་པར་འགྱུར་བས་མིག་དང་རྣ་བའི་རྣམ་ཤེས་དེ་དག་བསམ་གཏན་གཉིས་པ་ཡན་ཆད་ན་མེད་ལ། དེ་དག་མེད་པར་དེ་དག་དང་མཚུངས་ལྡན་གྱི་ཤེས་རབ་མི་འཐད་པའི་ཕྱིར་རོ་ཞེ་ན། དེ་ལྟ་མོད་ཀྱི་འོན་ཀྱང་གཟུགས་ཀྱི་ཁམས་ན་བཅུ་བཞིའོ་ཞེས་འབྱུང་བས་རྣམ་ཤེས་དེ་དག་གི་རྟེན་མིག་དང་རྣ་བའི་དབང་པོ་བསམ་གཏན་བཞི་པའང་ཡིན་པས་རྟེན་དག་གི་དབང་གིས་བསམ་གཏན་བཞི་པར་བརྗོད་དོ། །ཡང་ན་བར་ཆད་མེད་པའི་ལམ་གྱི་དབང་གིས་དེ་སྐད་བརྗོད་དེ། ཐོག་མར་སྒྲུབ་པ་ན་ལམ་སླ་བའི་མཆོག་ཡིན་པས་བར་ཆད་མེད་ལམ་བསམ་གཏན་བཞི་པ་ལ་བརྟེན་ནས་བསྒྲུབ་དགོས་པའི་ཕྱིར་རོ། །མངོན་ཤེས་ལྷག་མ་བཞི་པོ་རྣམས་ནི་དགེ་བ་ཁོ་ན་ཡིན་ནོ།། (དེ་ཡང་བསམ་གཏན་གྱིས་བསྡུས་པའི་རྣམ་གྲོལ་གྱི་ལམ་ཡིན་པས་སོ།།) འོ་ན་རབ་ཏུ་བྱེད་པ་ལས། མངོན་པར་ཤེས་པ་གང་ཞེ་ན། ཤེས་རབ་དགེ་བ་ཡིན་ནོ་ཞེས་བཤད་པ་ཇི་ལྟ་བུ་ཞེ་ན། དེ་ནི་མངོན་ཤེས་དགེ་བ་གཙོ་བོར་གྱུར་པའམ། ཡང་ན་མངོན་ཤེས་ཕལ་ཆེར་དགེ་བ་ཡིན་པའི་དབང་དུ་བྱས་ནས་དེ་སྐད་དུ་བཤད་པ་ཡིན་ཏེ་དཔེར་ན་མོན་སྲན་རྡེའུ་ལ་སོགས་པ་ཡོད་བཞིན་དུ་མོན་སྲན་གྲེའུ་ཕལ་ཆེ་བས་དེའི་ཕུང་པོར་བརྗོད་པ་གཞིན་ནོ། །
མངོན་ཤེས་དྲུག་པོ་འདི་དག་ལས་ཕྱི་མ་གསུམ་ནི་མི་སློབ་པའི་རིག་པ་གསུམ་ཞེས་བྱའོ། །ཅིའི་ཕྱིར་གསུམ་པོ་དེ་དག་ཁོ་ན་རིག་པ་ཡིན་གྱི་དང་པོ་གསུམ་མ་ཡིན་ཞེ་ན།
རྩ་བ། གསུམ་ནི་རིག་པ་སྔོན་མཐའ་སོགས། །
མ་རིག་པ་ནི་བཟློག་ཕྱིར་རོ། །
མི་སློབ་ཐ་མ་གཉིས་ནི་དེའི། །
རྒྱུད་ལ་སྐྱེས་ཕྱིར་དེ་ཞེས་བྱ། །
དེ་གསུམ་གྱིས་སྔོན་གྱི་མཐའ་དང་སོགས་པས་གཟུང་བ་ཕྱི་མའི་མཐའ་དང་བར་ལ་ཀུན་དུ་རྨོངས་པའི་མ་རིག་པ་རྣམ་པར་བཟློག་པའི་ཕྱིར་རོ། །འདི་ལ་སྐལ་ལྡན་ཁྱད་པར་ཅན་ལ་སོགས་པ་ནི་ཟག་ཟད་ཀྱི་མངོན་ཤེས་ཀྱི་སྐབས་སུ་མདོ་ལས་འདི་ལས་སྲིད་པ་གཞན་མི་ཤེས་སོ་ཞེས་འབྱུང་བ་དང༌། འདས་པ་དང་ད་ལྟར་བྱུང་བ་དང་མ་འོངས་པའི་དུས་ཞེས་བྱ་བའི་རིམ་པ་དང་མཐུན་པར་སྔོན་གནས་རྗེས་དྲན་དང་འཆི་འཕོ་སྐྱེ་ཤེས་དང་ཟག་པ་ཟད་པ་ཤེས་པ་གསུམ་གྱིས་རིམ་པ་ལྟར་སྔོན་དང་བར་དང་ཕྱི་མའི་མཐའ་ལ་ཀུན་དུ་རྨོངས་པ་བཟློག་པར་བྱེད་དོ་ཞེས་འཆད་མོད་ཀྱི། སློབ་དཔོན་འདུན་བཟང་དང་པོས་རང་གཞན་གྱི་རྒུད་པ་མཐོང་ལ། བར་མས་གཞན་གྱི་རྒུད་པ་མཐོང་ནས་སྐྱོ་བ་སྐྱེ་ལ། དེ་ལྟར་སྐྱོ་ན་གསུམ་པས་ཡང་དག་པའི་དོན་རྟོགས་པས་ན་དེ་གསུམ་གྱིས་རིམ་པ་ལྟར་སྔོན་དང་ཕྱི་མའི་མཐའ་དང་བར་ད་ལྟར་བྱུང་བ་ལ་ཀུན་དུ་རྨོངས་པ་བཟློག་གོ་ཞེས་འཆད་པས་ཉིད་རིགས་ཏེ། འགྲེལ་པ་ལས། སྔོན་གྱི་གནས་དང་འཆི་འཕོ་བ་དང་སྐྱེ་བ་དང་ཟག་པ་ཟད་པ་ཤེས་པ་མངོན་སུམ་དུ་བྱ་བ་རྣམས་ནི་མི་སློབ་པའི་རིག་པ་གསུམ་ཞེས་བྱའོ་ཞེས་བཤད་ནས། འདི་དག་གིས་ནི་གོ་རིམ་བཞིན་དུ་སྔོན་གྱི་མཐའ་དང་ཕྱི་མའི་མཐའ་དང་བར་ལ་ཀུན་དུ་རྨོངས་པ་བཟློག་པར་བྱེད་དོ་ཞེས་བཤད་པའི་ཕྱིར་སློབ་དཔོན་གྱི་དགོངས་པའང་དེ་ཉིད་ཡིན་པར་མངོན་ནོ་ཞེས་རྒྱལ་པོའི་སྲས་འཆད་དོ། །
མངོན་ཤེས་གསུམ་པོ་དེ་དག་ཁོ་ན་རིག་པ་གསུམ་ཡིན་པར་ནི་ཡང་མདོ་ལས། མི་སློབ་པའི་རིག་པ་ནི་གསུམ་སྟེ། མི་སློབ་པའི་སྔོན་གྱི་གནས་རྗེས་སུ་དྲན་པ་ཤེས་པ་མངོན་དུ་བྱེད་པའི་རིག་པ་དང༌། མི་སློབ་པའི་འཆི་འཕོ་དང་སྐྱེ་བ་ཤེས་པ་མངོན་དུ་བྱེད་པའི་རིག་པ་དང༌། མི་སློབ་པའི་ཟག་པ་ཟད་པ་ཤེས་པ་མངོན་དུ་བྱེད་པའི་རིག་པའོ་ཞེས་པ་དང༌། སྡེ་སྣོད་གསུམ་པ་ཡིན། རིག་པ་གསུམ་པ་ཡིན་ཞེས་ཀྱང་གསུངས་པས་གསུམ་པོ་དེ་དག་ལས་ཀྱང་དོན་དམ་པར་མི་སློབ་པའང་ཡིན་ལ་དེའི་རིག་པའང་ཡིན་པ་ནི་ཟག་མེད་ཡིན་པས་ཐ་མ་ཟག་ཟད་ཀྱི་མངོན་ཤེས་ཁོ་ན་ཡིན་ལ། དང་པོ་གཉིས་ནི་མི་སློབ་པ་དེའི་རྒྱུད་ལ་སྐྱེས་པའི་ཕྱིར་མི་སློབ་པ་དེའི་རིག་པ་ཞེས་བྱའི་དངོས་སུ་ན་དེ་གཉིས་ནི་ཟག་བཅས་ཡིན་པས་སློབ་མི་སློབ་གཉིས་ཀ་མ་ཡིན་པས་མི་སློབ་པ་མ་ཡིན་ནོ། །
གལ་ཏེ་མངོན་ཤེས་འདི་དག་སློབ་པ་ལའང་ཡོད་བཞིན་དུ་ཅིའི་ཕྱིར་སློབ་པའི་རིག་པར་མི་བརྗོད་ཅེ་ན།
རྩ་བ། སློབ་ལ་འདོད་དེ་མ་རིག་དང༌། །
བཅས་རྒྱུད་ཕྱིར་ན་རིག་མ་བཤད། །
མངོན་ཤེས་འདི་དག་སློབ་པ་ལའང་ཡོད་པར་འདོད་དེ་འོན་ཀྱང་དེ་དག་རིག་པར་ནི་མ་བཤད་དོ་ཞེས་སྦྱར་རོ། །ཅིའི་ཕྱིར་ཞེ་ན། རྒྱུད་མ་རིག་པས་ཟིལ་གྱིས་མནན་པ་དང་བཅས་པའི་ཕྱིར་དང༌། (ལངས་པ་ན་སྒོམ་སྤང་གི་)མ་རིག་པ་དང་བཅས་བཞིན་དུ་རིག་པར་འོས་པ་མ་ཡིན་པའི་ཕྱིར་རོ།། (བཅིངས་པ་ལ་རྣམ་གྲོལ་མ་བཤད་དོ།།) ཡང་དྲུག་གི་ཚོགས་ཀྱི་བཞི་པ་རེག་པ་བཞི་པའི་མདོའི་རལ་པ་ཅན་སྟོང་རབ་ཏུ་བྱུང་བའི་དགེ་སློང་རྣམས་ལ་གདམས་པ་ལས་རྫུ་འཕྲུལ་གྱི་ཆོ་འཕྲུལ་དང་ཀུན་བརྗོད་པའི་ཆོ་འཕྲུལ་དང་རྗེས་སུ་བསྟན་པའི་ཆོ་འཕྲུལ་རྣམ་པ་གསུམ་གསུངས་པ་ལས་མངོན་པར་ཤེས་པ་དྲུག་གི་དང་པོ་རྫུ་འཕྲུལ་གྱི་ཡུལ་ཤེས་པའི་མངོན་པར་ཤེས་པ་དང༌། གསུམ་པ་སེམས་ཀྱི་རྣམ་གྲངས་ཤེས་པ་དང༌། དྲུག་པ་ཟག་ཟད་ཀྱི་མངོན་ཤེས་རྣམས་ནི་རིམ་པ་བཞིན་དུ་རྫུ་འཕྲུལ་དང་ཁྱོད་ཀྱི་སེམས་ནི་འདི་འདྲའོ་ཞེས་ཀུན་བརྗོད་པ་དང་ལམ་ཡང་དག་པ་ཇི་ལྟ་བ་བཞིན་སྟོན་པས་རྗེས་སུ་བསྟན་པའི་ཆོ་འཕྲུལ་རྣམས་ཡིན་ནོ། །ཅིའི་ཕྱིར་ཆོ་འཕྲུལ་ཞེས་བྱ་ཞེ་ན།
རྩ་བ། དང་པོ་གསུམ་པ་དྲུག་པ་ནི། །
ཆོ་འཕྲུལ་རྣམས་ཡིན་་་་་་་་་། །
དང་པོར་གདུལ་བྱ་གཞན་གྱི་ཡིད་འཕྲོག་པར་བྱེད་པའི་ཕྱིར་ཏེ་ཧ་རའི་དོན་ཏོ། །དེ་ལ་དང་པོས་ནི་ཕ་རོལ་ཀྱི་ཡིད་འདུན་པའི་སྒོ་ནས་འཕྲོག་པར་བྱེད་ཅིང༌། གཉིས་པས་ནི་ཕ་རོལ་ཀྱི་བསམ་པ་ཤེས་ནས་ཆོས་བསྟན་པའི་སྒོ་ནས་ཡིད་འཕྲོག་པར་བྱེད་ལ། གསུམ་པས་ནི་བསྟན་པ་བཞིན་བསྒྲུབས་པས་སྨིན་ཅིང་གྲོལ་བའི་སྒོ་ནས་ཡིད་འཕྲོག་པའི་ཕྱིར་རོ། །ཡང་ན་འདི་དག་གིས་རིམ་པ་ལྟར་བསྟན་པ་ལ་ཞེ་འགྲས་པ་དང་བར་མར་གནས་པ་དང་ཞུགས་པ་རྣམས་ཀྱིས་ཡིད་འཕྲོག་པའི་ཕྱིར་རམ། ཡང་ན་འདུན་པ་དང་འཇུག་པ་དང་ཞུགས་པ་རྣམས་ཀྱིས་ཡིད་འཕྲོག་པའི་ཕྱིར་རོ། །
རྩ་བ། ་་་་་་་་་་་་་་་་་བསྟན་པ་མཆོག །
མི་འཁྲུལ་ཕྱིར་དང་ཕན་པ་དང༌། །
ཡིད་འོང་འབྲས་ལ་སྦྱོར་བྱེད་ཕྱིར། །
ཆོ་འཕྲུལ་གསུམ་པོ་འདི་དག་གི་ནང་ན་རྗེས་སུ་བསྟན་པའི་ཆོ་འཕྲུལ་ཁོ་ན་མཆོག་ཡིན་ཏེ། ཉོན་མོངས་པ་ཟད་པ་མེད་ན་མི་འབྱུང་ཞིང༌། བར་ཆད་མེད་པའི་ལམ་ཟག་མེད་ཁོ་ན་ལས་སྐྱེས་པས་རྒྱུ་དེ་ལ་མ་འཁྲུལ་བའི་ཕྱིར་དང༌། འདིར་ཉོན་མོངས་པ་དང་བྲལ་བས་ཕན་པའི་ཕྱིར་དང༌། ཕྱི་མར་སྡུག་བསྔལ་གྱི་ཁུར་དང་བྲལ་བས་གཏན་དུ་ཡིད་དུ་འོང་བའི་འབྲས་བུ་ལ་སྦྱོར་བར་བྱེད་པའི་ཕྱིར་རོ། །ཆོ་འཕྲུལ་དང་པོ་གཉིས་ནི་གྷན་ངྷ་རི་ཞེས་བྱ་བའི་རིག་སྔགས་ཀྱིས་ནམ་མཁའ་ལ་འགྲོ་བ་དང༌། རྟོག་བྱེད་ཅེས་བྱ་བའི་རིག་སྔགས་གྱིས་ཕ་རོལ་ཀྱི་སེམས་ཤེས་པ་དང༌། སྨན་དང་མི་མ་ཡིན་པའི་ནུས་པས་ཀྱང་དེ་ལྟར་འགྱུར་བའི་ཕྱིར་ཟག་མེད་ཀྱི་རྒྱུ་ལ་མི་འཁྲུལ་བའང་མ་ཡིན་ལ། གདུལ་བྱ་འདུན་པ་དང་བསམ་པ་ཤེས་པ་ཙམ་གྱིས་དངོས་སུ་ཕན་པ་དང་ཡིད་དུ་འོང་བའི་འབྲས་བུ་ལ་མི་སྦྱོར་བས་མཆོག་མ་ཡིན་ནོ། །
འོ་ན་རྫུ་འཕྲུལ་ཞེས་བྱ་བ་འདི་ཅི་ཞིག་ཅེ་ན། བྱེ་བྲག་ཏུ་སྨྲ་བ་རྫུ་འཕྲུལ་ནི་ཏིང་ངེ་འཛིན་ཡིན་ནོ་ཞེས་འདོད་དེ། འདིས་འབྱོར་ཞིང་འགྲུབ་པར་བྱེད་པའི་ཕྱིར་རོ། །ཅི་ཞིག་འབྱོར་ཞིང་འགྲུབ་ཅེ་ན།
རྩ་བ། རྫུ་འཕྲུལ་ཏིང་འཛིན་དེ་ལས་ནི། །
སྤྲུལ་དང་འགྲོ་བ་སྟོན་པ་ལ། །
ཡིད་མགྱོགས་འགྲོ་བ་གཞན་དག་ལ། །
ཕྱིན་བྱེད་མོས་པ་ལས་བྱུང་ཡང༌། །
རྫུ་འཕྲུལ་ཏིང་ངེ་འཛིན་དེ་ལས་ནི་ཡུལ་སྤྲུལ་པ་དང་འགྲོ་བ་དབང་འབྱོར་བ་འགྲུབ་པའི་ཕྱིར་རོ། །དེ་ལ་རྫུ་འཕྲུལ་གྱིས་འགྲོ་བ་ནི་རྣམ་པ་གསུམ་ཏེ། བྱ་བཞིན་དུ་རིམ་གྱིས་ལུས་ཀྱིས་མགྱོགས་པོར་ཕྱིན་པར་བྱེད་པ་ལུས་ཕྱིན་བྱེད་དང༌། ལམ་ཐག་རིང་པོའང་ཐུང་ངུར་མོས་པ་བྱས་པས་མྱུར་དུ་སླེབ་པ་མོས་པ་ལས་བྱུང་བ་དང༌། ཡིད་ཀྱིས་བསམས་པ་ཙམ་གྱིས་དེར་སླེབ་པའི་ཡིད་མགྱོགས་སོ། །དེ་དག་ལས་ཡིད་བཞིན་དུ་མགྱོགས་པས་ན་ཡིད་མགྱོགས་ཀྱིས་འགྲོ་བ་ནི་སྟོན་པ་སངས་རྒྱས་ཁོ་ན་ལ་མངའ་སྟེ། (ཡིད་ལ་བསམས་པ་ཙམ་གྱིས་དེར་ཕྱིན་པས་ཡིད་མགྱོགས་སོ།།) ཡུལ་ཐག་ཤིན་ཏུ་རིང་བར་ཡང་ཐུགས་བསྐྱེད་པ་ཙམ་གྱིས་བྱོན་པའི་ཕྱིར་རོ། །དེ་ཉིད་ཀྱི་ཕྱིར་བཞི་ལས་འཕྲོས་པའི་མདོ་ལས། སངས་རྒྱས་རྣམས་ཀྱི་སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་པོ་ཞེས་གསུངས་སོ། །འགྲོ་བ་གཞན་གཉིས་སྟོན་པ་ལ་མངའ་བར་དངོས་སུ་མ་བཤད་ཀྱང་མངའ་བར་གྲུབ་བོ། །སངས་རྒྱས་ལས་གཞན་ཉན་རང་ལ་སོགས་པ་དག་ལ་ནི་ལུས་ཕྱིན་བྱེད་ཀྱི་འགྲོ་བའང་ཡོད་ལ་མོས་པ་ལས་བྱུང་བ་ཡང་ཡོད་དོ། །
སྤྲུལ་པ་ཅི་ལྟ་བུ་ཞེ་ན།
རྩ་བ། འདོད་པར་གཏོགས་པའི་སྤྲུལ་པ་ནི། །
ཕྱི་ཡི་སྐྱེ་མཆེད་བཞི་རྣམ་གཉིས། །
གཟུགས་གཏོགས་གཉིས་་་་་་་་་་་༌། །
སྤྲུལ་པ་ནི་རྟེན་འདོད་གཟུགས་ཀྱི་སྤྲུལ་པ་གཉིས་ལས་དང་པོ་ལ་ཡང་གཉིས་ལས་རེ་ཞིག་དང་པོ་(འདོད་པའི་རྟེན་ཅན་གྱིས་)འདོད་པར་གཏོགས་པའི་སྤྲུལ་པ་ནི་ཕྱིའི་སྐྱེ་མཆེད་གཟུགས་དྲི་རོ་རེག་བྱ་བཞི་སྤྲུལ་གྱི་ནང་གི་སྐྱེ་མཆེད་ནི་སྤྲུལ་པར་མི་བྱེད་དེ། དེ་སྤྲུལ་ན་སྔོན་མེད་པའི་སེམས་ཅན་འབྱུང་བར་ཐལ་བའི་ཕྱིར་རོ། །སྒྲ་ནི་རྒྱུན་མེད་པའི་ཕྱིར་མི་སྤྲུལ་ལོ། །དེ་ཡང་བདག་ཉིད་སེང་གེ་དང་གླང་པོ་ཆེ་ལ་སོགས་པར་བསྒྱུར་བས་བདག་གི་ལུས་དང་འབྲེལ་བ་དང༌། བདག་ཉིད་ལས་ཕྱི་རོལ་ཏུ་སེང་གེ་དང་གླང་པོ་ཆེ་ལ་སོགས་པར་སྤྲུལ་པས་གཞན་གྱི་ལུས་དང་འབྲེལ་བ་རྣམ་པ་གཉིས་སོ། །གཉིས་པ་རྟེན་འདོད་པ་པ་དེས་གཟུགས་སུ་གཏོགས་པ་ནི་དེ་ན་དྲི་རོ་མེད་པས་གཟུགས་དང་རེག་བྱའི་སྐྱེ་མཆེད་གཉིས་ཁོ་ན་སྤྲུལ་ཞིང་དེ་ཡང་སྔ་མ་ལྟར་བདག་གཞན་གྱི་ལུས་དང་འབྲེལ་བ་གཉིས་གཉིས་བཞིའོ། །དེ་ལྟར་ན་འདོད་པའི་རྟེན་ཅན་གྱི་(འདོད་པ་དང་གཟུགས་ཀྱི་གཉིས་གཉིས་ཏེ་)སྤྲུལ་པ་རྣམ་པ་བཞི་ཡིན་ནོ། །དེ་བཞིན་དུ་གཉིས་པ་རྟེན་གཟུགས་ཁམས་པས་ཀྱང་རང་ས་དང་འདོད་པའི་སྐྱེ་མཆེད་གཉིས་དང་བཞི་སྤྲུལ་ཞིང་དེ་གཉིས་ཀ་རེ་རེ་ཞིང་བདག་གཞན་གྱི་ལུས་དང་འབྲེལ་བར་སྤྲུལ་པས་སྤྱིར་སྤྲུལ་པ་ནི་རྣམ་པ་བརྒྱད་ཡིན་ནོ། །གལ་ཏེ་དེས་འདོད་པར་བདག་གི་ལུས་དང་འབྲེལ་བའི་དྲི་རོ་སྤྲུལ་ན་དེ་དེ་གཉིས་དང་ལྡན་པར་འགྱུར་རོ་ཞེ་ན། དེ་དག་ལས་སྲེད་པ་མེད་པས་སྤྲུལ་ཀྱང་ལྡན་པར་མི་འགྱུར་ཏེ་དཔེར་ན་གོས་དང་རྒྱན་ལུས་དང་འབྲེལ་ཀྱང་སེམས་ཅན་དུ་མི་བགྲང་བས་སེམས་དང་ལྡན་པར་མི་འགྱུར་བ་བཞིན་ནོ། །
ཡང་ཅི་མངོན་ཤེས་ཁོ་ནས་སྤྲུལ་པ་སྤྲུལ་བར་བྱེད་དམ་ཞེ་ན། མ་ཡིན་ཏེ།
མངོན་ཤེས་ཀྱི་འབྲས་བུ་སྤྲུལ་པའི་སེམས་དག་གིས་སྤྲུལ་པར་བྱེད་ལ། སྤྲུལ་སེམས་དེ་དག་ཀྱང་དབྱེ་ན་ནི་བཅུ་བཞིའོ། །གང་ཞེ་ན།
རྩ་བ། ་་་་་་་་་སྤྲུལ་སེམས་དག་གིས། །
དེ་དག་ཀྱང་ནི་བཅུ་བཞི་འོ། །
བསམ་གཏན་འབྲས་གཉིས་ནས་ལྔའི་བར། །
རིམ་བཞིན་གོང་མ་ལས་སྐྱེས་མིན། །
དེ་རྙེད་བསམ་གཏན་བཞིན་དེ་ནི། །
དག་དང་རང་ལས་དེ་ལས་གཉིས། །
བསམ་གཏན་དང་པོའི་འབྲས་བུ་སྤྲུལ་སེམས་ནི་འདོད་པ་དང་བསམ་གཏན་དང་པོའི་ས་པའི་གཉིས་ཡིན་པ་ནས་བསམ་གཏན་གཉིས་པའི་འབྲས་བུ་ས་འོག་མ་པ་གཉིས་དང་རང་གི་ས་པ་སྟེ་གསུམ་དང༌། གསུམ་པའི་ས་འོག་མ་པ་གསུམ་དང་རང་གི་ས་པ་སྟེ་བཞི་དང༌། བཞི་པའི་ས་འོག་མ་པ་བཞི་དང་རང་གི་ས་པ་དང༌ལྔ་ཡིན་པའི་བར་དུ་རིམ་པ་བཞིན་དུ་ཤེས་པར་བྱའོ། །དེས་ན་བསམ་གཏན་གྱི་འབྲས་བུ་སྤྲུལ་སེམས་ནི་རང་ས་དང་འོག་ས་པའི་ཡིན་གྱི་བསམ་གཏན་འོག་མའི་ས་པ་དག་གི་འབྲས་བུ་ས་གོང་མ་ལས་སྐྱེས་པའི་སྤྲུལ་སེམས་ནི་མིན་ཏེ་(ཡིན་ན་འོག་ས་ལ་བརྟེན་ནས་གོང་ས་སྤྲུལ་ནུས་པར་ཐལ་བས་སོ།།) གོང་ས་མ་ཐོབ་ན་བསྐྱེད་མི་ནུས་ལ་ཐོབ་ན་དེ་ཉིད་ཀྱི་འབྲས་བུ་ཡིན་པའི་ཕྱིར་རོ། །དེ་ལྟར་ན་འདོད་པའི་སྤྲུལ་སེམས་བསམ་གཏན་བཞི་པོ་ཁོ་ནའི་འབྲས་བུ་ཡིན་པ་ལས་བསམ་གཏན་འོག་མའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་བསམ་གཏན་གོང་མའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་འགྲོ་བའི་སྒོ་ནས་ཁྱད་པར་དུ་འཕགས་ཏེ། བསམ་གཏན་དང་པོའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་དེས་བསམ་གཏན་དང་པོའི་ས་པའི་བར་དུ་འགྲོ་ནུས་ཀྱི་གཉིས་པ་ལ་སོགས་པར་འགྲོ་མི་ནུས་ལ། བསམ་གཏན་གཉིས་པའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་དེས་བསམ་གཏན་གཉིས་པའི་བར་དུ་འགྲོ་ནུས་པའི་ཕྱིར་རོ། །དེ་བཞིན་དུ་བསམ་གཏན་གསུམ་པ་ལ་སོགས་པའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པ་ལའང་སྦྱར་ཏེ་ཤེས་པར་བྱའོ། །སྤྲུལ་སེམས་དེ་དག་རྙེད་པའི་ཚུལ་ནི་བསམ་གཏན་གྱི་དངོས་གཞི་བཞིན་དུ་འོག་ས་ལས་འདོད་ཆགས་དང་བྲལ་བའི་སྒོ་ནས་རྙེད་དོ། །
འོ་ན་སྤྲུལ་སེམས་དེ་རང་ཉིད་ཀྱི་རྗེས་ཁོ་ན་ལས་འབྱུང་ཞིང་ལྡང་ངམ་གཞན་ལས་ཀྱང་འབྱུང་ཞིང་གཞན་ཡང་འབྱུང་ཞེ་ན། སྤྲུལ་སེམས་དེ་ནི་ཐོག་མར་མངོན་དུ་བྱེད་ཅིང་སྤྲུལ་སེམས་ལ་འཇུག་པ་ན་བསམ་གཏན་དག་པ་པ་དང་རྒྱུན་གྱི་ཚེ་སྤྲུལ་སེམས་རང་ཉིད་ལས་སྐྱེ་བར་འགྱུར་ལ། སྤྲུལ་སེམས་ལ་གནས་པ་དེ་ལྡང་བ་ན་ཏིང་ངེ་འཛིན་ལ་མ་ཞུགས་པར་ལྡང་བ་མེད་པས་སྤྲུལ་སེམས་དེ་ལས་ཀྱང་སྤྲུལ་སེམས་ལས་ལངས་པའི་ཚེ་བསམ་གཏན་དག་པ་པ་དང༌། རྒྱུན་གྱི་ཚེ་སྤྲུལ་སེམས་རང་ཉིད་དང་གཉིས་སྐྱེ་བར་འགྱུར་གྱི་གཞན་དང་གཞན་ལས་ནི་འབྱུང་བ་མེད་དོ།། (དེས་ན་སྤྲུལ་སེམས་ཁོ་ན་ལས་འདོད་པའི་སེམས་ལྟ་བུས་ལྡང་བ་ནི་མི་སྲིད་དེ་བྱ་འཕུར་བ་དང་འབབ་པ་ངེས་པར་འདབ་མ་ལ་བརྟེན་པ་བཞིན་ནོ།།)
རྩ་བ། རང་གི་ས་པས་སྤྲུལ་པར་བྱེད། །
སྨྲར་འཇུག་པ་ནི་འོག་མས་ཀྱང༌། །
སྟོན་མིན་སྤྲུལ་པ་པོ་དང་བཅས། །
བྱིན་གྱིས་བརླབས་ནས་གཞན་འཇུག་ཕྱིར། །
སྤྲུལ་པ་ཐམས་ཅད་ཀྱང་རང་རང་གི་ས་པའི་སྤྲུལ་པའི་སེམས་ཀྱིས་རང་སའི་སྤྲུལ་པ་སྤྲུལ་པར་བྱེད་ཀྱི་ས་གཞན་པའི་སྤྲུལ་སེམས་ཀྱིས་ནི་ས་གཞན་གྱི་སྤྲུལ་པ་སྤྲུལ་པར་མི་བྱེད་དོ་ཞེས་སྤྱིར་བཏང་ནས་དམིགས་བསལ་བསམ་གཏན་གཉིས་པ་ཡན་ཆད་པ་དག་གི་སྤྲུལ་པ་ངག་སྨྲར་འཇུག་པ་ནི་རང་ས་ནས་རྟོག་དཔྱོད་མེད་ཅིང་ངག་སྨྲ་བ་ཀུན་སློང་རྟོག་དཔྱོད་ལ་ངེས་པར་ལྟོས་པས་ས་འོག་མ་བསམ་གཏན་དང་པོའི་ས་པའི་སྨྲ་སེམས་ཁོ་ནས་སྨྲར་འཇུག་ལ། ཀྱང་ཞེས་པ་ནི་འདོད་པ་དང་བསམ་གཏན་དང་པོ་ན་ནི་རང་གི་ས་པའི་སེམས་ཁོ་ནས་སྨྲར་འཇུག་གོ་ཞེས་པ་བསྡུ་བའི་ཕྱིར་རོ། །ངག་སྨྲ་བ་དེ་ཡང་ལྷ་དང་བཅས་པའི་སྟོན་པ་སངས་རྒྱས་མིན་པའི་སྤྲུལ་པ་ནི་སྤྲུལ་པ་པོ་དང་བཅས་ནས་སྨྲ་བར་བྱེད་དེ། ལུང་རིང་པོ་ལས། གཅིག་གིས་སྨྲ་བར་བྱེད་པ་ན། །སྤྲུལ་པ་ཐམས་ཅད་སྨྲ་བར་བྱེད། །གཅིག་མི་སྨྲ་བར་གྱུར་པ་དང༌། །དེ་དག་ཐམས་ཅད་སྨྲ་མི་འགྱུར། །ཞེས་འབྱུང་བའི་ཕྱིར་རོ། །སངས་རྒྱས་ཀྱི་སྤྲུལ་པ་ནི་ཐམས་ཅད་བཞེད་པ་ཙམ་གྱིས་འབྱུང་བའི་ཕྱིར་སྔ་ཕྱི་ཇི་ལྟར་བཞེད་པར་སྨྲ་བས་ངེས་པ་མེད་དེ། ལས་གདགས་པ་ལས། ཅིའི་ཕྱིར་སངས་རྒྱས་བཅོམ་ལྡན་འདས་ཀྱིས་སྤྲུལ་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་སྤྲུལ་པ་ནི་གང་གི་ཚེ་སངས་རྒྱས་བཅོམ་ལྡན་འདས་གསུང་བ་དེའི་ཚེ་སྤྲུལ་པ་མི་སྨྲ་ལ་སྤྲུལ་པ་སྨྲ་བ་དེའི་ཚེ་སངས་རྒྱས་མི་གསུང་བ་དང༌། ཉན་ཐོས་ཀྱི་སྤྲུལ་པ་ཉན་ཐོས་ཀྱི་ཆ་བྱད་ཅན་སྤྲུལ་པ་ནི་ཉན་ཐོས་སྨྲ་བའི་ཚེ་སྤྲུལ་པའང་སྨྲ་ལ་ཉན་ཐོས་མི་སྨྲ་བའི་ཚེ་སྤྲུལ་པའང་མི་སྨྲ་ཞེ་ན། སངས་རྒྱས་བཅོམ་ལྡན་འདས་ནི་སེམས་དང་ཏིང་ངེ་འཛིན་ལ་མངའ་བརྙེས་པས་མྱུང་དུ་སྙོམས་པར་འཇུག་ཅིང་བཞེངས་ཏེ་དམིགས་པའང་མི་གཏོང་ལ་ཉན་ཐོས་ནི་དེ་ལྟ་མ་ཡིན་པའི་ཕྱིར་རོ། །
གཞན་ཡང་སངས་རྒྱས་བཅོམ་ལྡན་འདས་ནི་ཐམས་ཅད་མཁྱེན་པ་ཡིན་ཏེ། ཡེ་ཤེས་དང་དབང་གི་ཕ་རོལ་ཏུ་ཕྱིར་པ་ཡིན་ལ་ཉན་ཐོས་ནི་དེ་ལྟ་མ་ཡིན་པའི་ཕྱིར་རོ་ཞེས་འབྱུང་བའི་ཕྱིར་རོ། །འདི་ལ་གལ་ཏེ་སྨྲ་བའི་ངག་མང་པོ་སྤྲུལ་ན་ནི་སྒྲ་ཡང་སྤྲུལ་པར་འགྱུར་བས་ཕྱིའི་སྐྱེ་མཆེད་བཞི་ཞེས་པ་དང༌། འགལ་བར་འགྱུར་ལ། འོན་ཏེ་ངག་གཅིག་ལས་མེད་ན་མང་པོ་སྨྲ་བར་བྱེད་པ་མི་འཐད་དོ། །གལ་ཏེ་མང་པོར་སྨྲ་བར་སྣང་བ་ཡིན་གྱི་ངག་གཅིག་ལས་མེད་དོ་ཞེ་ན། དེ་ནི་ཕྱིའི་སྐྱེ་མཆེད་བཞི་ལའང་མཚུངས་པའི་ཕྱིར་རོ། །དེའི་ཕྱིར་བྱེ་བྲག་ཏུ་སྨྲ་བས་སེམས་ཅན་གསར་སྐྱེ་མེད་པས་དབང་པོ་ལྔ་མི་སྤྲུལ་ལ། སྒྲ་ལ་རྒྱུན་མེད་པས་མི་སྤྲུལ་ལོ་ཞེས་བྱ་བའང་སྤྲུལ་པ་འདི་དག་སེམས་ཀྱི་སྣང་བ་མ་གཏོགས་པ་དོན་ལ་ཡོད་པའི་ཆོས་ཡིན་ན་ནི་ཇི་ལྟར་སྤྲུལ་པ་ཡིན། མེད་ནའང་གསར་དུ་སྐྱེ་བ་དང་རྒྱུན་མེད་པ་དག་ཀྱང་ཤེས་པ་ལ་སྣང་བར་འགྱུར་རོ་ཞེས་བརྟག་པར་བྱའོ། །
འོ་ན་རྒྱུད་གཅིག་ལ་སེམས་གཉིས་ཅིག་ཅར་མི་འབྱུང་བས་སྨྲ་སེམས་ཡོད་པའི་ཚེ་སྤྲུལ་སེམས་མེད་ལ་སྤྲུལ་སེམས་ཡོད་པའི་ཚེ་སྨྲ་སེམས་མེད་པས་ཇི་ལྟར་སྤྲུལ་པ་སྨྲར་འཇུག་ཅེ་ན། དང་པོ་སྦྱོར་བའི་ཚེ་སྤྲུལ་སེམས་ཀྱིས་སྤྲུལ་པ་སྤྲུལ་ནས་བདག་གི་སྤྲུལ་པ་འདི་ཡུན་རིང་དུ་གནས་པར་གྱུར་ཅིག དེ་ནས་སྨྲ་སེམས་ཀྱིས་སྨྲ་བར་གྱུར་ཅིག་ཅེས་རིམ་པ་ལྟར་འབྱུང་བར་བྱིན་གྱིས་བརླབས་ནས་ཇི་ལྟར་བྱིན་གྱིས་བརླབས་པ་ལྟར་ཕྱིས་སྤྲུལ་སེམས་ལས་གཞན་སྨྲ་སེམས་ཀྱིས་སྨྲར་འཇུག་པའི་ཕྱིར་སྐྱོན་མེད་དོ། །
ཅི་གསོན་པོ་ཁོ་ན་ལ་བྱིན་རླབས་ཡོད་དམ། འོན་ཏེ་ཤི་བ་ལའང་ཡོད་ཅེ་ན།
རྩ་བ། ཤི་བ་ལ་ཡང་བྱིན་བརླབས་ཡོད། །
མི་བརྟན་ལ་མེད་གཞན་དག་མིན། །
(སྤྲུལ་པ་པོ་)ཤི་བ་ལ་ཡང་བྱིན་གྱིས་བརླབས་ནས་ཡུན་རིང་དུ་འཇུག་པ་ཡོད་དེ། ལུང་ཕྲན་ཚེགས་ལས། སྟོན་པ་འདས་ནས་འཕགས་པ་ཀུན་དགའ་བོ་དང་ཉེ་བར་འཁོར་གྱིས་མདོ་སྡེ་དང་འདུལ་བ་བསྡུས་པའི་རྗེས་ལ་འཕགས་པ་འོད་སྲུངས་ཆེན་པོས་མངོན་པའི་སྡེ་སྣོད་བསྡུས་ཏེ། ཀྱེ་མ་སྟོབས་བཅུ་མངའ་བའི་གསུང་ནི་ཚད་མེད་པ། །འགྲོ་ལ་ཕན་ཕྱིར་ཆོས་ཀྱི་བསྟན་བཅོས་འདི་བསྡུས་པས། །གང་ན་འཇིག་རྟེན་བློ་ངན་མུན་བྱེད་ཆུད་ཟོས་པ། །བློ་གྲོས་རབ་རིབ་བསལ་བས་སྒྲོན་མེར་ཡང་དག་ལྡན། །ཞེས་སྨྲས་ནས། འདི་སྙམ་དུ་བདག་གིས་སྟོན་པའི་བཀའ་དྲིན་མཐའ་དག་བསབ་པར་མི་ནུས་མོད་ཀྱི་འོན་ཀྱང་སྡེ་སྣོད་གསུམ་བསྡུས་ན་བསྟན་པ་ཡུན་རིང་དུ་གནས་པར་འགྱུར་རོ་ཞེས་གསུང་བའི་སྟོན་པའི་གསུང་བསྒྲུབས་ཤིང་བསྟན་པ་ཡུན་རིང་དུ་གནས་པར་བྱས་པས་འཇིག་རྟེན་ལ་ཕན་བཏགས་ཤིང་ཚངས་སྤྱོད་ཡུན་རིང་དུ་སྤྱད་པས་དེ་ནི་ལུས་རྣག་ཅན་འདིས་སྐྱོ་བས་བདག་མྱ་ངན་འདའ་བའི་དུས་ལ་བབ་པོ་སྙམ་ནས། བདག་གི་ཐུབ་པའི་མདོ་སྡེ་ནི། །ཡང་དག་བསྡུས་ནས་ཆོས་ལམ་གཞག །གཅིག་ནས་གཅིག་ཏུ་ཡུན་རིང་བར། །སྟོན་པའི་གསུང་རབ་འདི་གནས་འགྱུར།། ངོ་ཚ་མེད་རྣམས་ཆད་པས་བཅད། །ངོ་ཚ་བྱེད་ནི་ཡོངས་སུ་གཟུང༌། །བདག་གིས་ཕན་དང་དགེ་བྱས་པས། །བདག་ནི་མྱ་ངན་འདས་དུས་བབ། །ཅེས་སྨྲས་ཏེ། ཀུན་དགའ་བོ་ལ་བསྟན་པ་གཏད་ནས་སྟོན་པའི་སྐུ་གདུང་གི་མཆོད་རྟེན་བརྒྱད་ཀྱི་དྲུང་དུ་སོང་སྟེ་མཆོད་ཅིང༌། ཀླུའི་གནས་དང་སུམ་ཅུ་རྩ་གསུམ་དུའང་སོང་ནས་སྟོན་པའི་མཆེ་བ་ལ་མཆོད་པ་བྱས་ཏེ། སླར་རྒྱལ་པོའི་ཁབ་ཏུ་འོངས་ནས་རྒྱལ་པོ་མ་སྐྱེས་དགྲ་ལ་མྱ་ངན་ལས་འདའ་བར་སྨྲ་བར་འདོད་པ་ན་རྒྱལ་པོ་གཉིད་དུ་སོང་བས་མ་ཕྲད་པར་གྱུར་ཏོ། །
དེ་ནས་འོད་སྲུངས་ཆེན་པོ་རི་བྱ་རྐང་ཅན་དུ་སོང་སྟེ་རི་གསུམ་གྱི་དབུས་སུ་རྩ་བཏིང་བ་ལ་འདུག་ནས་བདག་གི་ལུས་འདི་སངས་རྒྱས་བྱམས་པའི་སློབ་མ་རྣམས་སྐྱོ་བར་བྱ་བའི་ཕྱིར་བྱམས་བའི་བསྟན་པ་རྒྱས་ཀྱི་བར་དུ་རི་ཁ་ཟུམ་སྟེ་རིའི་དབུས་སུ་མ་ཉམས་པར་གནས་པར་གྱུར་ཅིག རྒྱལ་པོ་མ་སྐྱེས་དགྲ་ལུས་བལྟར་འོངས་ན་རི་རྣམས་བྱེ་ནས་མཐོང་བར་གྱུར་ཅིག ཚེའི་འདུ་བྱེད་བཏང་མ་ཐག་ཏུ་ས་གཡོ་བ་ལ་སོགས་པའི་ལྟས་སྣ་ཚོགས་འབྱུང་བར་གྱུར་ཅིག་སྙམ་དུ་བསམས་ནས་གློག་འབྱིན་པ་ལ་སོགས་པའི་ཆོ་འཕྲུལ་སྣ་ཚོགས་བསྟན་ཏེ་རང་གི་ལུས་བྱིན་གྱིས་བརླབས་ནས་སྟོན་པས་གནང་བའི་ན་བཟའ་ཕྱག་དར་ཁྲོད་ཀྱིས་ལུས་དང་གསིལ་བྱེད་དང་ལྷུང་བཟེད་རྣམས་བཏུམས་ཏེ་གློ་གཡས་པ་ཕབ་རྐང་པའི་སྟེང་དུ་རྐང་པ་བཞག་ནས་ཉལ་ཏེ་མྱ་ངན་ལས་འདས་སོ། །གང་གི་ཚེ་སངས་རྒྱས་བྱམས་པ་བྱོན་པ་དེའི་ཚེ་བྱམས་པ་འདུས་པ་དང་པོའི་ཉན་ཐོས་ཀྱི་དགེ་འདུན་བྱེ་བ་ཕྲག་དགུ་བཅུ་རྩ་དྲུག་དང་བཅས་པ་རི་བྱ་རྐང་ཅན་དུ་གཤེགས་ནས་རི་གསུམ་བསལ་ཏེ་བྱམས་པས་འོད་སྲུངས་ཆེན་པོའི་རུས་པ་ཕྱག་ཏུ་བསྣམས་ནས་ཆོས་བསྟན་པས་ཉན་ཐོས་བྱེ་བ་ཕྲག་དགུ་བཅུ་རྩ་དྲུག་གིས་དགྲ་བཅོམ་འཐོབ་པར་གསུངས་ལ། སྙིང་རྗེ་ཆེན་པོ་པདྨ་དཀར་པོའི་མདོ་ལས་ནི་བྱམས་པའི་འདུས་པ་གཉིས་པ་ཉན་ཐོས་བྱེ་བ་ཕྲག་དགུ་བཅུ་རྩ་བཞི་དང༌། འདུས་པ་གསུམ་པ་ཉན་ཐོས་བྱེ་བ་ཕྲག་དགུ་བཅུ་རྩ་གཉིས་ཏེ། འདུས་པ་གསུམ་ཆར་ལ་འོད་སྲུངས་ཆེན་པོའི་ལུས་བྱམས་པས་བསྟན་ནས་གདུལ་བྱ་མང་པོའི་དོན་བྱེད་པར་གསུངས་པའི་ཕྱིར་རོ། །ཁ་ཅིག་འོད་སྲུངས་ཆེན་པོ་མྱ་ངན་ལས་འདས་པར་བཤད་པ་ནི་ཐེག་ཆུང་བའི་ལུགས་ཡིན་གྱི་ཐེག་ཆེན་པ་ནི་འགོག་པ་ལ་སྙོམས་པར་ཞུགས་པར་བཞེད་དོ། །ཞེས་གསུངས་པ་ནི་མི་རིགས་ཏེ། སྙིང་རྗེ་ཆེན་པོ་པདྨ་དཀར་པོ་ལས་ཀྱང་མྱ་ངན་ལས་འདས་པ་ཁོ་ནར་གསུངས་པའི་ཕྱིར་རོ།། ཤི་ནས་བྱིན་གྱིས་བརླབས་པ་དེ་ཡང་ཁ་ཆེ་བ་རུས་པ་ལྟ་བུ་བརྟན་པ་ལ་ཡོད་ཀྱི་མི་བརྟན་པ་ཤ་ཁྲག་དང་པགས་པ་ལ་སོགས་པ་ལ་མེད་དེ། དེའི་ཕྱིར་འོད་སྲུངས་ཀྱི་ཡང་ཀེང་རུས་འབའ་ཞིག་གནས་ཀྱི་ཤ་ལ་སོགས་པ་བྱིན་གྱིས་མ་བརླབས་པའི་ཕྱིར་རོ་ཞེས་འདོད་ལ། གཞན་དག་ན་རེ་ཤི་བ་ལས་ནི་བྱིན་རླབས་ཡོད་པ་མིན་གྱི་འོད་སྲུངས་ཀྱི་ཀེང་རུས་གནས་པ་ནི་གནས་གཙང་མའི་ལྷ་རྣམས་ཀྱི་མཐུས་གནས་པ་ཡིན་ནོ་ཞེས་འདོད་དོ། །
འོ་ན་སྤྲུལ་སེམས་གཅིག་གིས་དུ་མ་སྤྲུལ་ལམ་གཅིག་གིས་གཅིག་ཁོ་ན་སྤྲུལ་ཞེ་ན།
རྩ་བ། དང་པོ་དུ་མས་གཅིག་ཡིན་ཏེ། །
བྱང་བར་གྱུར་ནས་བཟློག་པ་འོ། །
དང་པོར་ཏེ་མ་བྱང་བའི་ཚེ་ནི་སྤྲུལ་སེམས་དུ་མས་སྤྲུལ་པ་གཅིག་སྤྲུལ་པ་ཡིན་ཏེ། ཡུན་རིང་དུ་འབད་དགོས་པའི་ཕྱིར་རོ། །ཕྱིས་མངོན་ཤེས་བྱང་བར་གྱུར་ནས་ནི་སྔ་མ་ལས་བཟློག་པ་སྤྲུལ་སེམས་གཅིག་གིས་དུ་མ་སྤྲུལ་བར་བྱེད་དོ། །ཞེས་སྤྲུལ་སེམས་ཐམས་ཅད་ལུང་མ་བསྟན་ཡིན་ནམ་ཞེ་ན།
རྩ་བ། བསྒོམས་ལས་སྐྱེས་པ་ལུང་མ་བསྟན། །
སྐྱེ་བ་ལས་སྐྱེས་རྣམ་གསུམ་མོ། །
བསྒོམས་པ་ལས་སྐྱེས་པའི་སྤྲུལ་སེམས་གང་ཡིན་པ་དེ་ནི་ངེས་པར་ལུང་མ་བསྟན་ཡིན་ལ། (ས་གོང་མར་སྐྱེས་པས་ཀྱང་འོག་མའི་དེ་མངོན་དུ་བྱེད་པའི་ཕྱིར་རོ།།) ལྷ་ཀླུ་དང་ཤ་ཟ་ལ་སོགས་པའི་སྐྱེ་བ་ལས་སྐྱེས་ཤིང་ཐོབ་པའི་སྤྲུལ་སེམས་ནི་ཕན་པ་དང་གནོད་པ་བྱ་བའི་ཕྱིར་སྤྲུལ་པར་བྱེད་པ་དང་བཏང་སྙོམས་པ་ཡིན་པའི་ཕྱིར་དགེ་མི་དགེ་ལུང་མ་བསྟན་རྣམ་པ་གསུམ་མོ། །ལྷ་ཀླུ་ལ་སོགས་པ་དེ་དག་གིས་བྱས་པའི་སྤྲུལ་པ་རང་དང་གཞན་གྱི་རྒྱུ་དང་འབྲེལ་བ་ནི་སྒྲ་མ་གཏོགས་པའི་གཟུགས་ཅན་གྱི་སྐྱེ་མཆེད་ཐམས་ཅད་ཡིན་པའི་ཕྱིར་སྐྱེ་མཆེད་དགུ་པ་ཡིན་ནོ། །དབང་པོ་དང་ཐ་མི་དད་པའི་ཕྱིར་དེ་སྐད་དུ་བརྗོད་ཀྱི་དབང་པོ་ནི་དངོས་སུ་ན་སེམས་ཅན་དུ་སྟོན་པ་ཁོ་ན་ཡིན་པས་སྔོན་མེད་པའི་སེམས་ཅན་འབྱུང་བར་ཐལ་བར་འགྱུར་བའི་ཕྱིར་སྤྲུལ་པར་མི་བྱེད་དོ། །སྤྲུལ་པ་སེམས་མེད་ཡིན་པའི་ཕྱིར་ཡིད་དང་ཆོས་ཀྱི་སྐྱེ་མཆེད་དག་ཀྱང་སྤྲུལ་པར་མི་བྱེད་དོ། །སྤྲུལ་པ་སེམས་མེད་ཡིན་པར་ནི་གདགས་པ་ལས། སྤྲུལ་པ་དེ་འབྱུང་བ་ཆེན་པོ་བཞི་ལས་བྱུང་བ་ཞེས་བརྗོད་པར་བྱའམ། འབྱུང་བ་ཆེན་པོ་བཞི་ལས་གྱུར་པ་མ་ཡིན་ཞེས་བརྗོད་པར་བྱ། སྨྲས་པ། འབྱུང་བ་ཆེན་པོ་བཞི་ལས་གྱུར་པའོ་ཞེས་བརྗོད་པར་བྱའོ། །རྒྱུར་བྱས་པའི་གཟུགས་ཅན་ནམ། རྒྱུར་བྱས་པའི་གཟུགས་ཅན་མ་ཡིན་པ་ཞེས་བརྗོད་པར་བྱ། སྨྲས་པ། རྒྱུར་བྱས་པའི་གཟུགས་ཅན་ནོ་ཞེས་བརྗོད་པར་བྱ་སྟེ། སེམས་མེད་པ་ཞེས་ཀྱང་བརྗོད་པར་བྱའོ། །སྤྲུལ་པ་གང་གི་སེམས་ཀྱི་དབང་གིས་འཇུག་པར་བྱ་ཞེས་བརྗོད་པར་བྱ། སྨྲས་པ། སྤྲུལ་པས་ནི་གཉིས་ཏེ། སྐྱེས་ནས་ཐོབ་པ་དང༌། བསྒོམས་པ་ལས་བྱུང་བའོ། །དེ་ལ་དང་པོ་ནི་སེམས་ཅན་དེའི་སེམས་ཀྱི་དབང་གིས་འགྱུར་ལ། གཉིས་པ་ནི་སྤྲུལ་པ་པོའི་སེམས་ཀྱི་དབང་གིས་འཇུག་གོ་ཞེས་བརྗོད་པར་བྱའོ་ཞེས་འབྱུང་བའི་ཕྱིར་རོ། །དེས་ན་འདི་ནི་སྒོམ་བྱུང་གི་དབང་དུ་བྱས་ཀྱི་སྐྱེས་ཐོབ་ནི་དེ་ཉིད་ལས། སྤྲུལ་པ་སེམས་ཡོད་པ་ཞེས་བྱའམ་མེད་པ་ཞེས་བྱ་ཞེ་ན། སྤྲུལ་པ་ནི་གཉིས་ཏེ། སྐྱེས་ནས་ཐོབ་པ་དང༌། བསྒོམས་པ་ལས་བྱུང་བའོ། །དེ་ལ་སྐྱེས་ཐོབ་ནི་སེམས་ཡོད་པ་ཞེས་བྱ་ལ། སྒོམ་བྱུང་ནི་སེམས་མེད་པ་ཞེས་བྱའོ། །ཞེས་སྐྱེས་ཐོབ་ལ་སེམས་ཡོད་པར་བཤད་དོ། །དེ་བཞིན་དུ་སྤྲུལ་པས་ཁ་ཟས་ཟོས་པ་ན་སྐྱེས་ཐོབ་ཀྱི་ནི་སྤྲུལ་པ་ཉིད་ཀྱི་ལྟོར་འཇུ་ལ་སྒོམ་བྱུང་གི་ནི་སྤྲུལ་པ་པོའི་ལྟོར་འཇུ་བར་བཤད་དོ། །དེས་ན་རང་གཞན་གྱི་ལུས་དང་འབྲེལ་བའི་སྤྲུལ་པ་ནི་སྐྱེ་མཆེད་དགུ་པ་ཡིན་པ། རང་གཞན་གྱི་ལུས་དང་མ་འབྲེལ་པའི་སྤྲུལ་པ་ནི་སྔར་བཤད་པ་ལྟར་སྐྱེ་མཆེད་བཞི་པ་ཁོ་ན་ཡིན་ནོ་ཞེས་ཤེས་པར་བྱའོ། །
ཅི་རྫུ་འཕྲུལ་སྒོམ་བྱུང་དང་སྐྱེས་ཐོབ་ཁོ་ནར་ཟད་དམ་ཞེ་ན་མ་ཟད་དེ།
རྩ་བ། རྫུ་འཕྲུལ་གསང་སྔགས་སྨན་དག་དང༌། །
ལས་ལས་སྐྱེས་དང་རྣམ་པ་ལྔ། །
རྫུ་འཕྲུལ་ནི་སྔ་མ་གཉིས་པོ་དེ་དག་དང༌། གྷན་ངྷ་རི་ལ་སོགས་པའི་གསང་སྔགས་ལས་སྐྱེས་པ་དང༌། རུས་སྦལ་གྱི་ཟེ་བ་དང་རྨ་བྱའི་མདོངས་ལ་སོགས་པའི་སྨན་དག་ལས་སྐྱེས་པ་དང༌། རྒྱལ་པོ་ང་ལས་ནུ་དང་བར་སྲིད་པ་རྣམས་ཀྱི་ལྟ་བུ་ལས་ལས་སྐྱེས་པ་དང་རྣམ་པ་ལྔ་ཡིན་ནོ་ཞེས་ཤེས་པར་བྱའོ། །ལྷའི་རྣ་བ་དང་མིག་ཏུ་བཤད་པ་གང་ཡིན་པ་དེ་དག་ཅི་ལྷའི་དངོས་ཡིན་ནམ། འོན་ཏེ་བྱང་ཆུབ་སེམས་དཔའ་དང་འཁོར་ལོས་བསྒྱུར་བ་དང་ཁྱིམ་བདག་རིན་པོ་ཆེ་རྣམས་ཀྱི་མིག་ལྟར་ལྷའི་དང་འདྲ་བས་བཏགས་ནས་དེ་སྐད་དུ་བརྗོད་ཅེ་ན།
རྩ་བ། ལྷ་ཡི་མིག་དང་རྣ་བ་ཡིན། །
བསམ་གཏན་ས་པའི་གཟུགས་དང་བ། །
དེ་གཉིས་ནི་ལྷའི་མིག་དང་ལྷའི་རྣ་བ་དངོས་ཁོ་ན་ཡིན་ཏེ། བསམ་གཏན་པ་དག་བསམ་གཏན་ལ་མཉམ་པར་བཞག་ནས་སྒྲ་དང་སྣང་བ་ལ་གཏོད་པའི་སྦྱོར་བའི་སྟོབས་ཀྱིས་མིག་དང་རྣ་བའི་ཐོན་ཀོར་དུ་བསམ་གཏན་གྱི་ས་པའི་འབྱུང་བཞི་རྒྱུར་བྱས་པའི་གཟུགས་ཅན་དང་བ་(ཤ་དང་པགས་པ་དང་རུས་པ་དང་ཁྲག་དང་མ་འབྲེལ་ཞིང༌། ལྷའི་མིག་གིས་རྒྱབ་ཕྱོགས་སུའང་མཐོང་ལ་ཤས་མི་མཐོང་བ་ཁྱད་པར་རོ།།) ཐག་རིང་པོ་ན་གནས་པ་དང་ཆོད་པ་དང་ཕྲ་བའི་གཟུགས་དང་སྒྲ་ཐོས་པའི་རྒྱུར་གྱུར་པའི་དབང་པོ་འགྲུབ་པས་བསམ་གཏན་གྱི་ས་པ་ཡིན་པའི་ཕྱིར་རོ། །
རྩ་བ། རྟག་ཏུ་རྟེན་བཅས་མ་ཚང་མེད། །
ཐག་རིང་ཕྲ་སོགས་སྤྱོད་ཡུལ་ཅན། །
ལྷའི་མིག་དང་རྣ་བ་དེ་གཉིས་ཀྱང་གཟུགས་ཉམས་སུ་མྱོང་བའི་སྒོ་ནས་བསྒྲུབས་པའི་ཕྱིར་རྟག་ཏུ་རྣམ་ཤེས་དང་བཅས་པས་བརྟེན་པ་དང་བཅས་པ་ཁོ་ན་ཡིན་ལ། གཏན་མེད་པའི་ཞར་བ་དང་ནོང་པ་ཡོ་བ་དང་འོན་པ་ལྟ་བུ་མ་ཡིན་པས་མ་ཚང་བ་མེད་པའང་ཡིན་ནོ། །དེ་གཉིས་ཀྱི་ཡུལ་ནི་གཟུགས་སྒྲ་ཐག་རིང་བ་དང་ཕྲ་བ་དང་སོགས་པས་བསྡུས་པ་བསྒྲིབས་པའི་སྤྱོད་ཡུལ་ཅན་ཡང་ཡིན་པས་ཤའི་མིག་ལས་ཁྱད་པར་དུ་འཕགས་ཏེ། གང་ཕྱིར་ཤའི་མིག་གིས་གཟུགས། །ཐག་རིང་གནས་དང་སྒྲིབ་པ་དང༌། །ཕྲ་དང་ཐམས་ཅད་མི་མཐོང་བ། །དེ་ཕྱིར་ལྷ་ཡིས་མཐོང་བར་འདོད། །ཅེས་འགྲེལ་པ་ལས་འབྱུང་བ་བཞིན་ནོ། །
འོ་ན་ལྷའི་མིག་གིས་ཇི་ཙམ་མཐོང་ཞེ་ན།
རྩ་བ། དགྲ་བཅོམ་བསེ་རུ་སྟོན་རྣམས་ཀྱིས། །
སྟོང་གཉིས་གསུམ་དང་གྲངས་མེད་མཐོང༌། །
བསམ་གཏན་དང་པོའི་ལྷའི་མིག་གིས་འདོད་པ་དང་བསམ་གཏན་དང་པོ་མཐོང་བ་ལ་སོགས་པ་སྔར་བཤད་ཟིན་ཏོ། །ཉན་རང་སངས་རྒྱས་གསུམ་གྱི་ལྷའི་མིག་མངོན་པར་འདུ་བྱེད་པ་མེད་པས་ནི་རིམ་པ་ལྟར་སྟོང་དང་པོར་དང་སྟོང་གཉིས་དང་སྟོང་གསུམ་གྱི་འཇིག་རྟེན་གྱི་ཁམས་མཐོང་ལ། མངོན་པར་འདུ་བྱེད་པའི་སྟོབས་ཀྱིས་ནི་རིམ་པ་ལྟར་དགྲ་བཅོམ་པ་རྣམས་ཀྱིས་སྟོང་གཉིས་དང་བསེ་རུ་ལྟ་བུའི་རང་རྒྱལ་རྣམས་ཀྱིས་སྟོང་གསུམ་དང་སྟོན་པ་སངས་རྒྱས་རྣམས་ཀྱིས་ནི་ཇི་ཙམ་བཞེད་པའི་འཇིག་རྟེན་གྱི་ཁམས་གྲངས་མེད་པ་མཐོང་ངོ༌། །
ཅི་རྫུ་འཕྲུལ་ཁོ་ན་སྐྱེས་ཐོབ་ཡིན་ནམ། འོན་ཏེ་གཞན་ཡང་སྐྱེས་ཐོབ་ཡིན་ཞེ་ན།
རྩ་བ། གཞན་ཡང་སྐྱེ་བས་ཐོབ་དེ་ནི། །
སྲིད་པ་བར་མ་མི་མཐོང་ངོ༌། །
རྫུ་འཕྲུལ་ལས་གཞན་ལྷའི་མིག་དང་རྣ་བ་དང་སྔོན་གནས་རྗེས་དྲན་དང་ཕ་རོལ་སེམས་ཤེས་བཞི་ལ་ཡང་སྐྱེ་བས་ཐོབ་པ་ཡོད་མོད་ཀྱི་(དེ་ནི་འགྲོ་བ་དེ་ཐམས་ཅད་ཀྱིས་སྐྱེས་པའི་དུས་ཉིད་ན་རང་བཞིན་གྱིས་ཐོབ་པ་ཡིན་གྱི་ཁ་ཅིག་གམ་བྱ་ནམ་མཁའ་ལ་འགྲོ་བ་ལྟར་སྐྱེས་པའི་འོག་ཏུ་ཐོབ་པ་ནི་མ་ཡིན་ནོ། །རྫུ་འཕྲུལ་ནི་ལྔ་སྟེ་འདི་རྟོག་གེས་བྱས་པ་མེད་དོ། །མིག་དང་རྣ་བའི་མངོན་ཤེས་གསུམ་སྟེ། སྔགས་དང་སྨན་ལས་བྱུང་བ་མ་གཏོགས་སོ། །སེམས་ཤེས་ནི་བཞི་སྟེ་སྨན་ལས་བྱུང་བ་མེད་དོ། །དགེ་བ་འདིས་སེམས་ཅན་ཐམས་ཅད་སངས་རྒྱས་ཐོབ་པའི་རྒྱུར་ཅེས་ཀྱང་གྱུར་ཅིག འདི་བཞི་སྐྱེ་བས་ཐོབ་པ་ནི་མ་ཡིན་ནོ། །འདི་བཞི་སྐྱེས་པས་ཐོབ་པ་ནི་འདོད་པའི་ལྷ་ཀླུ་དང་གཟུགས་ཀྱི་ལྷ་རྣམས་ལ་ཡོད་དོ།།) འོན་ཀྱང་སྐྱེས་ཐོབ་ཀྱིས་ནི་ཅུང་ཟད་ཀྱང་མངོན་ཤེས་ཀྱི་མིང་མི་འཐོབ་བོ། །སྐྱེས་ཐོབ་ཀྱི་ལྷའི་མིག་གང་ཡིན་པ་དེས་ནི་སྲིད་པ་བར་མ་མི་མཐོང་སྟེ། དེ་ནི་སྐྱོན་བཅུ་གཅིག་དང་བྲལ་བ་མངོན་པར་ཤེས་པའི་ལྷའི་མིག་རྣམ་པར་དག་པ་ཁོ་ནའི་ཡུལ་ཡིན་པའི་ཕྱིར་རོ། །དེ་ལ་ལྷའི་མིག་སྐྱེས་ཐོབ་ནི་ཀླུ་དང་འདོད་གཟུགས་ཀྱི་ལྷ་རྣམས་ལ་ཡོད་དོ། །གཟུགས་མེད་ན་ནི་མངོན་ཤེས་ལྔ་དང་སྐྱེས་ཐོབ་ཀྱང་མེད་དེ། ཊཱིཀ་ལས། གཟུགས་མེད་ན་མངོན་ཤེས་ལྔ་དང་སྐྱེས་ཐོབ་ཐམས་ཅད་མེད་དེ། གཟུགས་མེད་པའི་ཕྱིར་དང༌། དེ་ལྟ་བུའི་ལུས་ཡང་དག་པར་མི་འགྲུབ་པའི་ཕྱིར་རོ། །ཞེས་འབྱུང་བའི་ཕྱིར་རོ། །
རྩ་བ། སེམས་ཤེས་དེ་ནི་རྣམ་གསུམ་གང༌། །
རྟོག་དང་རིག་སྔགས་ཀྱིས་བྱས་པའང༌། །
དམྱལ་བ་པས་ནི་དང་པོ་ཤེས། །
མི་ལ་སྐྱེ་བས་ཐོབ་པ་མེད། །
(སྐྱེས་ཐོབ་ཀྱི་ཆོས་ཀྱི་ཁྱད་པར་ལ་)ཕ་རོལ་སེམས་ཤེས་སྐྱེས་ཐོབ་དེ་ནི་དགེ་མི་དགེ་ལུང་མ་བསྟན་རྣམ་པ་གསུམ་མོ། །གང་ཡང་རྟོག་གེ་བ་རྣམས་ཀྱི་མཚན་མ་ལས་སེམས་ཤེས་པ་དང་རིག་སྔགས་ཀྱིས་བྱས་པའི་སེམས་ཤེས་པ་དེ་ཡང་དགེ་མི་དགེ་ལུང་མ་བསྟན་རྣམ་པ་གསུམ་ཡིན་ལ་སེམས་ཤེས་སྒོམ་བྱུང་ནི་དགེ་བ་ཁོ་ན་ཡིན་ནོ། །ཕ་རོལ་སེམས་ཤེས་དང་སྔོན་གནས་རྗེས་དྲན་སྐྱེས་ཐོབ་ནི་དམྱལ་བ་པས་ནི་དང་པོ་སྐྱེས་ནས་ཇི་སྲིད་དུ་སྡུག་བསྔལ་གྱི་ཚོར་བས་མ་ཉེན་པ་དེ་སྲིད་དུ་ཕ་རོལ་ཀྱི་སེམས་དང་སྔོན་གྱི་གནས་ཤེས་ཀྱི་ཕྱིས་ནི་སྡུག་བསྔལ་གྱི་ཚོར་བས་ཉེན་པས་ཡིད་ཉམས་པར་བྱས་པའི་ཕྱིར་(བདག་ཀྱང་མ་དྲན་)མི་ཤེས་སོ། །འགྲོ་བ་གཞན་ལྷ་དང་དུད་འགྲོ་དང་ཡི་དྭགས་ཀྱི་ཕ་རོལ་སེམས་ཤེས་དང་སྔོན་གནས་རྗེས་དྲན་སྐྱེས་ཐོབ་ཀྱིས་ནི་སྡུག་བསྔལ་གྱི་ཚོར་བས་མ་ཉེན་པས་རྟག་ཏུ་ཤེས་སོ། །དེ་ལ་རེ་ཞིག་ལྷས་ནི་མདོ་ལས། དྲང་སྲོང་ཚོགས་ཀྱིས་བསྟེན་པ་དང༌། །ཆོས་གྱི་རྒྱལ་པོ་བཞུགས་གྱུར་ཅིང༌། །བདག་ལ་དགའ་བ་བསྐྱེད་པ་ཡི། །རྒྱལ་བྱེད་ཚལ་དེ་འདི་ཡིན་ནོ། །ཞེས་པ་དང༌། བདག་གང་ནས་ཤི་འཕོས་གང་དུ་སྐྱེས་གང་གིས་སྐྱེས་ཞེས་གནས་གསུམ་ཤེས་པར་བཤད་པ་ལྟ་བུའོ། །དུད་འགྲོས་ཀྱང་ཤེས་ཏེ་ཀླུ་ལ་སོགས་པ་བཞིན་ནོ། །ཡི་དྭགས་ཀྱིས་ཀྱང་ཤེས་ཏེ། ཇི་སྐད་དུ། བདག་གི་མཐུན་དང་མི་མཐུན་པས། །ལོངས་སྤྱོད་དག་ནི་གང་བས་གསར། །དེ་དག་གཞན་གྱིས་ལོངས་སྤྱད་དེ། །ཁོ་བོ་ཅག་ནི་སྡུག་བསྔལ་བསྟེན། །ཞེས་འབྱུང་བ་བཞིན་ནོ། །མི་རྣམས་ལ་ནི་རྫུ་འཕྲུལ་ལ་སོགས་པ་སྔར་ཇི་སྐད་བཤད་པ་དེ་དག་བསྒོམས་པ་ལས་བྱུང་བ་དང་རྟོག་གེ་དང་རིག་སྔགས་དང་སྨན་དང་ལས་ལས་སྐྱེས་པ་རྣམས་ཡོད་ཀྱི་དེ་དག་སྐྱེ་བས་ཐོབ་པ་ནི་མེད་དེ། སྐྱེས་པ་ཙམ་གྱིས་མི་ལྡན་པའི་ཕྱིར་རོ། །
འོ་ན་རང་བཞིན་གྱིས་ཚེ་རབས་དྲན་པ་དེ་ཇི་ལྟ་བུ་ཞེ་ན། དེ་ནི་ལས་ཀྱི་ཁྱད་པར་ལས་སྐྱེས་པ་ཡིན་ཏེ། རིན་པོ་ཆེའི་ཕྲེང་བ་ལས། ཆོས་ཀྱི་ཆེད་དང་དེ་བཞིན་དུ། །གཞུང་གི་དོན་དག་དྲན་པ་དང༌། །ཆོས་ཀྱི་སྦྱིན་པ་དྲི་མེད་པས། །ཚེ་རབས་དྲན་པ་ཐོབ་པར་འགྱུར།། ཞེས་འབྱུང་བ་བཞིན་ནོ། །དེའི་ཕྱིར་སྔོན་གནས་རྗེས་དྲན་ནི་བསྒོམས་པ་ལས་བྱུང་བ་དང༌། སྐྱེས་ཐོབ་དང་ལས་ལས་སྐྱེས་པ་དང་གསུམ་ཡོད་པར་རིག་པར་བྱའོ། །
བཟོད་དང་ཤེས་པ་ལྟ་བའི་བྱེ་བྲག་དང༌། །
ཤེས་པའི་རང་བཞིན་ཇི་སྙེད་ལྡན་ཚུལ་དང༌། །
ཤེས་པས་བསྡུས་པའི་ཡོན་ཏན་རྣམ་པ་གཉིས། །
ཤེས་ཤིང་ཐོབ་འདོད་གནས་འདི་མཉན་པར་གྱིས། །
རྩ་བ། ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས།
ཡེ་ཤེས་བསྟན་པ་ཞེས་བྱ་བ་སྟེ་གནས་བདུན་པའོ།། །།
ཆོས་མངོན་པའི་མཛོད་ཀྱི་འགྲེལ་པ་མངོན་པའི་རྒྱན་ལས་ཡེ་ཤེས་བསྟན་པ་ཞེས་བྱ་བ་སྟེ་གནས་བདུན་པའི་བཤད་པའོ།། །།

 

 

གནས་བརྒྱད་པ་འཆད་པ་ན་དེ་ལྟར་ཤེས་པའི་རང་བཞིན་གྱི་ཡོན་ཏན་(སྟོབས་ནས་མངོན་ཤེས་ཀྱི་བར།)རྣམས་བཤད་ནས། (དེ་དག་ཀྱང་མཉམ་པར་བཞག་པ་ལས་འབྱུང་བས།) ད་ནི་བསམ་གཏན་དང་གཟུགས་མེད་ལ་སོགས་པ་ཤེས་པ་ལས་གཞན་ཏིང་ངེ་འཛིན་ལ་སོགས་པས་བསྡུས་པའི་ཡོན་ཏན་རྣམས་བཤད་པར་བྱ་སྟེ། དེ་ལའང་བསམ་གཏན་དང་གཟུགས་མེད་བཤད་པ་དང༌། དེ་ལ་བརྟེན་པའི་ཡོན་ཏན་བཤད་པ་གཉིས་ལས། དང་པོ་ལའང་ངོ་བོ་དང༌། དབྱེ་བ་དང༌། ཡན་ལག་རྣམ་པར་བཞག་པ་དང༌། འཐོབ་པའི་ཚུལ་དང༌། ཁྱད་པར་གྱི་ཆོས་དང༌། ཉེར་བསྡོགས་དང༌། ཏིང་ངེ་འཛིན་གྱི་དབྱེ་བ་བཤད་པ་བདུན་ལས།
དང་པོ་ལའང་གཟུགས་མེད་རྣམས་ཀྱང་ཡོན་ཏན་གྱི་རྟེན་ཡིན་མོད་ཀྱི་ཡོན་ཏན་ཐམས་ཅད་ཀྱི་རྟེན་མ་ཡིན་ལ། བསམ་གཏན་རྣམས་ནི་ཡོན་ཏན་ཐམས་ཅད་ཀྱི་རྟེན་ཡིན་པའམ་(སྐྱེས་རིམ་ལྟར།)
དང་པོར་བཤད་པ་ལ།
རྩ་བ། བསམ་གཏན་དག་ནི་རྣམ་གཉིས་བཞི། །
དེར་སྐྱེ་བ་དག་རབ་ཏུ་བཤད། །
སྙོམས་འཇུག་དགེ་བ་རྩེ་གཅིག་པ། །
རྗེས་འབྲང་བཅས་ན་ཕུང་པོ་ལྔ། །
བསམ་གཏན་དག་ནི་མདོར་བསྡུས་ན་འབྲས་བུ་སྐྱེ་བ་དང༌། རྒྱུ་སྙོམས་པར་འཇུག་པ་རྣམ་པ་གཉིས་ཡིན་ལ། (འདི་གཉིས་ཀྱི་ཁྱད་པར་བོད་ཁ་ཅིག རང་ས་ཁོ་ནར་མངོན་དུ་འགྱུར་བ་ནི་འབྲས་བུའོ།། འོག་སར་མངོན་དུ་བྱེད་པ་ནི་རྒྱུའོ། །མཉམ་གཞག་ཁོ་ན་ཡིན་པ་ནི་རྒྱུའོ། །གཉིས་ཀ་ཡིན་པ་ནི་འབྲས་བུའོ། །དགེ་བ་ཁོ་ན་ཡིན་པ་ནི་རྒྱུའོ། །དགེ་བ་དང་ལུང་མ་བསྟན་ཡང་ཡིན་པ་ནི་འབྲས་བུའོ། །སྒོམ་བྱུང་ཁོ་ན་ཡིན་པ་ནི་རྒྱུའོ། །དེང་ཐོས་བྱུང་དང་སྐྱེས་ཐོབ་ཀྱང་ཡིན་པ་ནི་འབྲས་བུའོ། །ཚེ་ཇི་སྲིད་པར་རྒྱུན་ཆགས་པ་ནི་འབྲས་བུའོ། །རེས་འགའ་བ་ནི་རྒྱུའོ། །ཉེར་བསྡོགས་དང་བཅས་པ་ནི་རྒྱུའོ། །དངོས་གཞི་ཁོ་ན་ཡིན་པ་ནི་འབྲས་བུའོ། །འོག་མའི་རྟེན་ལའང་གོང་མའི་ཏིང་ངེ་འཛིན་སྐྱེ་རུང་བ་ནི་རྒྱུའོ།། དེའི་འབྲས་བུ་གོང་མའི་ཕུང་པོ་སྣོད་དང་བཅས་པ་ནི་འབྲས་བུའོ་ཞེས་སོ།།) དེ་དག་རེ་རེ་ཞིང་ཡང་སའི་སྒོ་ནས་རྒྱས་པར་དབྱེ་ན་བསམ་གཏན་དང་པོ་ནས་བཞི་པའི་བར་རྣམ་པ་བཞི་བཞི་ཡིན་ནོ། །དེ་ལ་འབྲས་བུ་བསམ་གཏན་དང་པོ་ལ་སོགས་པ་དེར་སྐྱེ་བའི་བསམ་གཏན་དག་ནི་གནས་གསུམ་པར་སོ་སོར་ཡི། །བསམ་གཏན་ས་ནི་གསུམ་པ་ཡིན། །བཞི་པ་ས་ནི་བརྒྱད་པ་ཡིན། །ཞེས་རབ་ཏུ་སྟེ་དང་པོར་བཤད་ཟིན་ལ། རྒྱུ་སྙོམས་འཇུག་གི་བསམ་གཏན་ཐམས་ཅད་ཀྱང་གཙོ་བོ་ཏིང་ངེ་འཛིན་གྱི་རང་བཞིན་ཡིན་ཞིང༌། ཏིང་ངེ་འཛིན་ཐམས་ཅད་ཀྱི་རང་བཞིན་མཚན་ཉིད་ཀྱང་རྩེ་གཅིག་པ་ཡིན་པས་ཉོན་མོངས་ཅན་དང་(གཡོ་བའི་དགེ་བ་དང༌།) མ་བསྒྲིབས་ལུང་མ་བསྟན་གྱི་སེམས་རྩེ་གཅིག་པའང་ཡོད་པས་དེ་དག་བཅས་པའི་ཕྱིར་དགེ་བའི་སེམས་རྩེ་སྟེ་དམིགས་པ་གཅིག་པར་བྱེད་པའི་སེམས་བྱུང་ཡིན་གྱི་སེམས་དམིགས་པ་གཅིག་པ་ཙམ་ནི་མ་ཡིན་ནོ། །དེ་ཉིད་རྗེས་སུ་འབྲང་བའི་འཁོར་དང་བཅས་ན་ནི་གཟུགས་བསམ་གཏན་ཟག་མེད་ཀྱི་སྡོམ་པ་གང་རུང་ཡང་ཡོད་པས་ཕུང་པོ་ལྔའི་རང་བཞིན་ནོ། །
ཏིང་ངེ་འཛིན་དང་མཚུངས་ལྡན་ཐམས་ཅད་དམིགས་པ་ལ་རྩེ་གཅིག་བཞིན་དུ་སེམས་ཁོ་ན་ལ་དམིགས་པ་ལ་རྩེ་གཅིག་པ་ཞེས་བརྗོད་པ་ནི་གཙོ་བོ་ཡིན་པའི་ཕྱིར་རོ་ཞེས་ཊཱིཀ་བྱེད་དག་འཆད་དོ།། (སློབ་དཔོན་གྱིས་)གལ་ཏེ་སེམས་ཐམས་ཅད་སྐད་ཅིག་མ་ཡིན་པས་དམིགས་པ་འཕོ་ལོང་མེད་པའི་ཕྱིར་རྩེ་གཅིག་པ་མ་ཡིན་ནམ་གང་གིས་དེ་དག་རྩེ་གཅིག་པར་བྱེད་པའི་(ཁྱད་པར་བྱེད་ཆོས་)ཏིང་ངེ་འཛིན་(དོན་གཞན་)བརྟགས་པ་ནི་དོན་མེད་དོ་ཞེ་ན་མ་ཡིན་ཏེ། སྐད་ཅིག་དང་པོའི་སེམས་ལ་མི་དགོས་ཀྱང་སྐད་ཅིག་མ་གཉིས་པའི་སེམས་(དང་པོ་དམིགས་པའམ་)ཏིང་ངེ་འཛིན་དེའི་སྒོ་ནས་དམིགས་པ་ལས་རྣམ་པར་མི་གཡེང་བར་བྱེད་པས་དོན་དང་བཅས་པའི་ཕྱིར་རོ།། (ཞེ་ན།) འོ་ན་དེ་ལྟ་ན་སེམས་དང་པོ་ཏིང་ངེ་འཛིན་དང་མཚུངས་ལྡན་དེ་ལ་ཏིང་ངེ་འཛིན་དོན་མེད་པར་འགྱུར་བའི་ཕྱིར་(ཏེ་དེའི་བྱ་བ་མི་བྱེད་པའི་ཕྱིར་)དང༌། སྐད་ཅིག་དང་པོའི་ཏིང་ངེ་འཛིན་གཉིས་པའི་དུས་ན་འགགས་ན་གཉིས་པ་ལ་བྱེད་པ་འཇུག་པ་འགལ་བའི་ཕྱིར་དང༌། མ་འགགས་ན་སེམས་སྔ་མ་དང་དུས་མི་མཚུངས་པར་འགྱུར་བའི་ཕྱིར་དང༌། གཞན་ཡང་དྲན་པ་མ་ཉམས་པ་ལ་སོགས་པའི་རྒྱུ་མཚན་གང་ཁོ་ནས་ཏིང་ངེ་འཛིན་རྩེ་གཅིག་ཏུ་འདོད་པའི་རྒྱུ་མཚན་དེ་ཁོ་ནས་སེམས་རྩེ་གཅིག་པར་བྱེད་ནུས་ན་དེའི་རྒྱུར་ཏིང་ངེ་འཛིན་དོན་གཞན་བཏགས་པ་ལ་དགོས་པ་མེད་ལ། མི་ནུས་ན་ཏིང་ངེ་འཛིན་ལའང་མཚུངས་པའི་ཕྱིར་དང༌། གཞན་ཡང་ཏིང་ངེ་འཛིན་ནི་སེམས་ཀྱི་ས་མང་པོ་པ་ཡིན་པས་སེམས་(ཐམས་ཅད་)རྩེ་གཅིག་པར་ཐལ་བར་འགྱུར་པའི་ཕྱིར་རོ་ཞེ་ན་མི་འགྱུར་ཏེ། ཏིང་ངེ་འཛིན་སྟོབས་ཆེ་བ་དང་མཚུངས་པར་ལྡན་པའི་སེམས་རྩེ་གཅིག་པ་ཡིན་ཞིང༌། སྟོབས་ཆུང་བ་དང་མཚུངས་པར་ལྡན་པའི་སེམས་ནི་རྩེ་གཅིག་པ་མ་ཡིན་ལ། ཏིང་ངེ་འཛིན་ས་མང་པོ་ཙམ་ནི་དགེ་བ་ཁོ་ནར་མ་ངེས་པ་དང་སྟོབས་ཆུང་བའི་ཕྱིར་རོ་ཞེས་བྱེ་བྲག་ཏུ་སྨྲ་བར་འདོད་དོ། །
མདོ་སྡེ་པ་ན་རེ་སེམས་རྩེ་གཅིག་པ་ཁོ་ན་ཏིང་ངེ་འཛིན་ཡིན་གྱི་སེམས་ལས་དོན་གཞན་དུ་གྱུར་པའི་ཏིང་ངེ་འཛིན་ནི་མེད་དེ། ལམ་གྱི་ཚོགས་ཀྱི་བསླབ་པའི་སྒོའི་མདོ་ལས། ལྷག་པའི་སེམས་ཀྱི་བསླབ་པ་གང་ཞེ་ན། བསམ་གཏན་བཞིའོ་ཞེས་པ་དང༌། སྟག་གི་བྱང་ཆུབ་ཀྱི་བུའི་མདོ་དང༌། ཉན་ཐོས་ཀྱི་རྣམ་པར་བཤད་པ་ལས་སེམས་ཡོངས་སུ་དག་པའི་གཙོ་བོ་ནི་བསམ་གཏན་བཞི་ཡིན་ནོ་ཞེས་ཇི་ལྟར་ཚུལ་ཁྲིམས་དང་ཤེས་རབ་ཀྱི་བསླབ་པ་ཚུལ་ཁྲིམས་དང་ཤེས་རབ་ཁོ་ན་ཡིན་པ་ལྟར་སེམས་ཀྱི་བསླབ་པའང་སེམས་ཁོ་ནར་གསུངས་སོ་ཟེར་རོ། །
སྒྲའི་དོན་ཅིའི་ཕྱིར་བསམ་གཏན་ཞེས་བྱ་ཞེ་ན། འདིས་མཆོག་ཏུ་སེམས་པར་བྱེད་པས་བསམ་གཏན་ཏེ་མཉམ་པར་བཞག་ན་ཡང་དག་པ་ཇི་ལྟ་བ་བཞིན་རབ་ཏུ་ཤེས་པའི་ཕྱིར་རབ་ཏུ་ཤེས་པའི་བྱེད་ཅེས་བྱ་བའི་ཐ་ཚིག་གོ །གལ་ཏེ་སེམས་པར་བྱེད་པ་བསམ་གཏན་ཡིན་ན་ཏིང་ངེ་འཛིན་(ཉོན་མོངས་ཅན་སོགས་)ཐམས་ཅད་བསམ་གཏན་དུ་ཐལ་བར་འགྱུར་རོ་ཞེ་ན། མ་ཡིན་ཏེ། ཕུལ་དུ་ཕྱིན་པ་དང་ལྡན་པའི་སེམས་པར་བྱེད་པའི་ཏིང་ངེ་འཛིན་ལ་བསམ་གཏན་དུ་བརྗོད་དེ་ཉི་མ་ལ་སྣང་ལྡན་ཞེས་བརྗོད་པ་བཞིན་ནོ། །ཕུལ་དུ་ཕྱིན་པའི་སེམས་པར་བྱེད་པའང་འདིར་ཡན་ལག་དང་ལྡན་པས་རྟ་གཉའ་སྦྲེལ་བས་འདྲེན་པའི་ཤིང་རྟ་ལྟར་ཞི་གནས་དང་ལྷག་མཐོང་ཟུང་དུ་འབྲེལ་བར་ངང་གིས་འབྱུང་བ་ལ་འདོད་དེ། དེའི་ཕྱིར་མདོ་ལས། མཐོང་བའི་ཆོས་ལ་བདེ་བར་གནས་པ་དང༌། ལམ་སླ་བ་ཞེས་གསུངས་སོ། །འོ་ན་མཆོག་ཏུ་སེམས་པ་མེད་པས་ཉོན་མོངས་ཅན་བསམ་གཏན་དུ་མི་འགྱུར་རོ་ཞེ་ན། དེ་ལའང་ལོག་པར་ངེས་པར་སེམས་པ་ཡོད་པས་དེ་དང་འདྲ་བ་ཙམ་ལ་དེ་སྐད་དུ་བརྗོད་དེ་ས་བོན་རུལ་པ་བཞིན་ནོ།། (མི་དགེ་བའི་བསམ་གཏན་ཡོད་པ་)བཅོམ་ལྡན་འདས་ཀྱིས་ཀྱང་ཚངས་པའི་ཚོགས་ཀྱི་མདོ་ལས། མི་དགེ་བའི་བསམ་གཏན་སྒྲིབ་པ་ལྔ་ལས་སྐྱེས་ཤིང་ངེས་པར་འབྱུང་བ་མི་ཤེས་ལ་དེ་དག་གིས་བར་དུ་གཅོད་ཅིང་བསྒོམ་སྟེ་བསྔགས་པར་མི་འོས་པའི་བསམ་གཏན་གྱི་བསྔགས་པ་མི་གསུང་ངོ་ཞེས་གསུངས་སོ། །
འོ་ན་བསམ་གཏན་དང་པོ་ལ་སོགས་པ་དེ་དག་ཇི་ལྟ་བུ་ཞེ་ན།
རྩ་བ། དཔྱོད་དང་དགའ་དང་བདེ་དང་ལྡན། །
ཡན་ལག་སྔ་སྔ་སྤངས་པ་ཡི། །
བསམ་གཏན་དང་པོ་ནི་ས་དེ་ན་དུ་བ་ལ་མེས་ཁྱབ་པ་ལྟར་ལྷན་ཅིག་སྤྱོད་པ་ཡིན་པས་རྟོག་པ་མེད་པར་དགའ་བདེ་དང་ལྡན་པའི་དཔྱོད་པ་མི་སྲིད་པས་དཔྱོད་པ་དང་དེས་མཚོན་པའི་རྟོག་པ་དང་དགའ་བ་དང་བདེ་བ་དང་མཚུངས་པར་ལྡན་པའི་དགེ་བ་རྩེ་གཅིག་པའོ། །དེ་ལྟ་ན་ལྷན་ཅིག་དཔྱོད་པས་རྟོག་པས་དཔྱོད་པའང་གོ་བས་རྟོག་དང་དགའ་དང་བདེ་དང་ལྡན་ཞེས་ཅིའི་ཕྱིར་མི་སྨོས་ཞེ་ན། ཡན་ལག་ལྔ་ལྔ་སྤངས་པ་ཡིན་ཞེས་བརྗོད་པ་ན་བསམ་གཏན་ཁྱད་པར་ཅན་ཡང་གཉིས་པར་ཐལ་བར་འགྱུར་བ་སྤང་བའི་ཕྱིར་རོ། །བསམ་གཏན་ལྷག་མ་གསུམ་ནི་རིམ་པ་ལྟར་ཡན་ལག་སྔ་མ་སྔ་མ་རྟོག་དཔྱོད་སྤངས་ཤིང་དགའ་བདེ་དང་ལྡན་པ་དང༌། རྟོག་དཔྱོད་དང་དགའ་བ་སྤངས་ཤིང་བདེ་བ་དང་ལྡན་པ་དང༌། རྟོག་དཔྱོད་དང་དགའ་བདེ་སྤངས་པའི་གཟུགས་ཀྱི་དགེ་བ་རྩེ་གཅིག་པའོ། །
རྩ་བ། དེ་བཞིན་གཟུགས་མེད་ཕུང་པོ་བཞི། །
འོག་མའི་ས་ལས་དབེན་ལས་སྐྱེས། །
ཉེར་བསྡོགས་གསུམ་དང་བཅས་པར་ནི། །
གཟུགས་ཀྱི་འདུ་ཤེས་བཤིག་ཅེས་བྱ། །
གཟུགས་མེད་པ་ན་གཟུགས་མེད་དོ། །
ཇི་ལྟར་བསམ་གཏན་རྣམས་འབྲས་བུ་སྐྱེ་བ་དང་རྒྱུ་སྙོམས་འཇུག་གཉིས་དང་རེ་རེ་ལའང་བཞི་བཞི་ཡིན་པ་དེ་བཞིན་དུ་གཟུགས་མེད་ཀྱང་རྣམ་པ་གཉིས་དང་བཞི་བཞི་པ་ཡིན་ནོ། །དེ་ལ་འབྲས་བུ་སྐྱེ་བའི་གཟུགས་མེད་ནི་གཟུགས་མེད་པ་ན་གནས་མེད་དོ། །སྐྱེ་བ་ལས་ནི་རྣམ་པ་བཞི། །ཞེས་བཤད་ཟིན་ལ། རྒྱུ་སྙོམས་འཇུག་གི་གཟུགས་མེད་ཀྱང་གཟུགས་ལས་འདོད་ཆགས་དང་བྲལ་པའི་སྙོམས་འཇུག་དགེ་བ་རྩེ་གཅིག་པའོ། །རྗེས་སུ་འབྲང་བའི་གཟུགས་མེད་པས་འཁོར་དང་བཅས་ན་ནི་ཕུང་པོ་བཞིའོ། །བཞི་པོའི་ཁྱད་པར་ནི་ལམ་གང་གིས་བསམ་གཏན་བཞི་པ་ལ་སོགས་པ་འོག་མའི་ས་ལས་དབེན་པ་སྟེ་རྣམ་པར་འབྱེད་ཅིང་འདོད་ཆགས་དང་འབྲལ་བའི་ཉེར་བསྡོགས་བར་ཆད་མེད་ལམ་ལས་སྐྱེས་པ་ནི་རིམ་པ་ལྟར་ནམ་མཁའ་མཐའ་ཡས་སྐྱེ་མཆེད་ལ་སོགས་པའོ།། (འདི་དག་གི་བར་ཆད་མེད་ལམ་གྱི་འོག་ས་ལས་རྒྱལ་བར་བྱེད་པ་ཙམ་དུ་མ་ཟད་དམིགས་པ་ལས་ཀྱང་འདའ་བར་བྱེད་དེ་གཟུགས་མེད་དམིགས་པ་ལས་ངེས་པར་འབྱུང་བས་སོ།།) གཟུགས་མེད་པ་དེ་དག་ཀྱང་དངོས་གཞི་བཞི་ཉེར་བསྡོགས་ཕྱི་མ་གསུམ་དང་བཅས་པར་ནི་(དངོས་གཞི་ནི་)རང་ས་ན་གཟུགས་མེད་ཅིང་འོག་སའི་ཟག་བཅས་ཀྱི་གཟུགས་ལ་མི་དམིགས་(ལ་ཉོར་བསྡོགས་ནི་རང་གི་འོག་ས་ལ་དམིགས་ཀྱང་ས་རྒལ་ནས་མི་དམིགས་)པས་གཟུགས་ཀྱི་འདུ་ཤེས་བཤིག་པ་ཞེས་བྱ་སྟེ། ནམ་མཁའ་མཐའ་ཡས་ཀྱི་ཉེར་བསྡོགས་ན་ནི་བསམ་གཏན་བཞི་པའི་གཟུགས་ལ་དམིགས་ནས་རགས་སོགས་སུ་ལྟ་(བས་གང་ལ་དམིགས་པ་དེའི་འདུ་ཤེས་འབྱུང༌)བའི་ཕྱིར་གཟུགས་ཀྱི་འདུ་ཤེས་ཡོད་པའི་ཕྱིར་རོ།། (འདི་དག་ནའང་རྗེས་ཤེས་པ་དྲུག་གི་རིགས་མིན་པ་ལ་དམིགས་པ་ནི་ཡོད་དོ།།)
འདིར་དགེ་འདུན་ཕལ་ཆེན་པོའི་བྱེ་བྲག་འཇིག་རྟེན་ལས་འདས་པར་སྨྲ་བའི་སྡེ་པ་དང༌། ཐམས་ཅད་ཡོད་སྨྲའི་བྱེ་བྲག་གོས་དམར་བའི་སྡེ་པ་དང༌། མང་པོས་བཀུར་བ་པ་རྣམས་གཟུགས་མེད་ནའང་གཟུགས་ཅུང་ཟད་ཡོད་དེ། ལུང་བར་མའི་བསུས་པོ་ཆེའི་མདོ་ལས། ཚེ་དང་ལྡན་པ་བསུས་པོ་ཆེ་ཚེ་གང་ཡིན་པ་དང་དྲོད་གང་ཡིན་པའི་ཆོས་འདི་དག་ནི་འདྲེས་པ་སྟེ་མ་འདྲེས་པ་མ་ཡིན་ནོ་ཞེས་ཚེ་དང་དྲོད་གཉིས་འདྲེས་པར་གསུངས་ཤིང༌། གཟུགས་མེད་ནའང་ཚེ་ཡོད་ལ་ཚེ་ཡོད་ན་དྲོད་ཀྱང་ཡོད་ལ་དྲོད་ནི་གཟུགས་ཡིན་པའི་ཕྱིར་དང༌། དེ་བཞིན་དུ་ཚེ་དང་ལྡན་པ་ཤཱ་རིའི་བུ་དཔེར་ན་འདམ་བུའི་ཤོག་གཉིས་གནམ་དུ་བསྒྲེང་སྟེ་ཕན་ཚུན་བརྟེན་ཅིང་འདུག་པ་དེ་ལ་འགའ་ཞིག་གིས་གཅིག་བོར་ན་ཅིག་ཤོས་འགྱེལ་བར་འགྱུར་ལ། ཅིག་ཤོས་བོར་ནའང་ཅིག་ཤོས་འགྱེལ་བར་འགྱུར་རོ། །ཚེ་དང་ལྡན་པ་ཤཱ་རིའི་བུ་དེ་བཞིན་དུ་མིང་དང་གཟུགས་དག་ཀྱང་ཕན་ཚུན་རྟེན་ཅིང་གནས་སོ་ཞེས་པ་དང༌། ཡང་རྟེན་ཅིང་འབྲེལ་བར་འབྱུང་བའི་མདོ་ལས་ཀྱང༌། ཉིང་མཚམས་སྦྱོར་བའི་མཚན་ཉིད་ཀྱི་སྐབས་སུ་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་མིང་གཟུགས་ཕན་ཚུན་བརྟེན་པ་དང༌། རྣམ་ཤེས་ཀྱིས་མིང་གཟུགས་བསྐྱེད་པར་གསུངས་ཤིང༌། གཟུགས་མེད་ནའང་མིང་དང་རྣམ་ཤེས་ཡོད་པའི་ཕྱིར་དང༌། རྣམ་ཤེས་གནས་པ་བཞི་སྟོན་པའི་མདོ་ལས། དགེ་སློང་དག་རྣམ་པར་ཤེས་པ་གཟུགས་སུ་ཉེ་བར་འགྲོ་བ། གཟུགས་ལ་དམིགས་པ། གཟུགས་ལ་བརྟེན་པ་གནས་སོ། །དགེ་སློང་དག་གང་ལ་ལ་ཞིག་འདི་སྐད་དུ་བདག་ནི་གཟུགས་དང་ཚོར་བ་ནས་འདུ་བྱེད་ཀྱི་བར་དག་ལས་གཞན་དུ་རྣམ་པར་ཤེས་པ་འགྲོ་བའམ་འོང་བར་སྨྲའོ་ཞེས་ཟེར་ན་དེའི་ངག་དེ་ནི་དེའི་ཚིག་ཙམ་དུ་ཟད་དོ་ཞེས་གསུངས་ཏེ། ཕུང་པོ་བཞི་ལས་གཞན་དུ་རྣམ་ཤེས་འགྲོ་འོང་བཀག་པའི་ཕྱིར་རོ། །
གཟུགས་མེད་པར་བཤད་པ་ནི་བུ་ངན་པ་དང་རྐེད་པ་ཕྲ་བ་ལ་བུ་མེད་པ་དང་རྐེད་མེད་ཅེས་དམན་པའམ་ཕྲ་བ་ལ་དགག་པའི་སྒྲ་བརྗོད་པ་བཞིན་ནོ་ཞེས་ཟེར་རོ། །ཁ་ཆེ་བ་ལ་སོགས་པ་དག་འདི་ནི་རིགས་པ་མ་ཡིན་ཏེ། ལུང་དང་པོ་གཉིས་ནི་མདོ་ལས། ཚེ་དང་དྲོད་དང་རྣམ་ཤེས་ཀྱིས། །གང་ཚེ་ལུས་འདི་འདོར་བྱེད་ཅིང༌། །ཞེས་གསུངས་པས་གཟུགས་མེད་ན་ལུས་ཉིད་ཀྱང་མེད་ན་དེ་འདོར་བ་ག་ལ་ཡོད། ཕན་ཚུན་བརྟེན་པའང་གཉིས་ཀ་ཡོད་ན་ཕན་ཚུན་བརྟེན་པ་ཉིད་སྲིད་པས་འདོད་གཟུགས་ན་སྤྱོད་པའི་དབང་དུ་བྱས་ནས་གསུངས་པའི་ཕྱིར་དང༌། གསུམ་པ་ནི་འདོད་གཟུགས་ཀྱི་མིང་གཟུགས་རྣམ་ཤེས་ཀྱི་རྐྱེན་ཅན་ཡིན་གྱི་གཟུགས་མེད་ཀྱི་རྣམ་ཤེས་ནི་མིང་ཁོ་ནའི་རྐྱེན་ཡིན་པའི་ཕྱིར་མིང་གཟུགས་ཐམས་ཅད་རྣམ་ཤེས་ཀྱི་རྐྱེན་ཅན་དུ་གསུངས་ཀྱི་རྣམ་ཤེས་ཐམས་ཅད་མིང་གཟུགས་ཀྱི་རྐྱེན་དུ་སྟོན་པ་མ་ཡིན་པའི་ཕྱིར་དང༌། ཕུང་པོ་བཞི་ལས་གཞན་དུ་རྣམ་ཤེས་འགྲོ་འོང་བཀག་པ་ནི་ཕུང་པོ་བཞི་པོ་ལས་གང་ཡང་རུང་བ་ཞིག་མེད་ན་རྣམ་ཤེས་འགྲོ་འོང་བཀག་པ་ཡིན་གྱི་གཟུགས་ལ་སོགས་པ་ཐམས་ཅད་དུས་གཅིག་ཏུ་ཚོགས་པ་མེད་པར་བཀག་པ་མ་ཡིན་པའི་ཕྱིར་རོ། །དེ་ལ་ཚེ་སྔ་མ་ནས་བར་སྲིད་ཀྱི་རྒྱུན་གྱིས་འདིར་སྐྱེ་བ་ནི་འོང་བ་ཡིན་ལ། བར་སྲིད་ཀྱི་རྒྱུན་གྱིས་འདི་ནས་ཕྱི་མར་སྐྱེ་བ་ནི་འགྲོ་བའོ། །གལ་ཏེ་གཟུགས་མེད་ན་གཟུགས་ཅུང་ཟད་ཡོད་པར་འདོད་ན་དེ་ཇི་ལྟ་བུ་ཞིག་ཡོད་པར་འདོད། གལ་ཏེ་ལུས་ངག་གི་སྡོམ་པ་ཙམ་ཞིག་ཡོད་པར་འདོད་ན་ནི་མི་རིགས་ཏེ། རྟེན་ལུས་ངག་མེད་པར་དེ་དག་གི་སྡོམ་པ་མི་རིགས་པའི་ཕྱིར་རོ།། སྡོམ་པ་ནི་འབྱུང་འགྱུར་ཡིན་ན་གཟུགས་མེད་ན་རྟེན་འབྱུང་བ་མེད་པས་འབྲས་བུ་འབྱུང་འགྱུར་མི་རུང་བའི་ཕྱིར་རོ། །
གལ་ཏེ་དཔེན་ན་ཟག་མེད་ཀྱི་འབྱུང་བ་མེད་ཀྱང་ཟག་མེད་ཀྱི་སྡོམ་པ་འབྱུང་གྱུར་གྱི་གཟུགས་ཡོད་པ་ལྟར་གཟུགས་མེད་རང་ས་ན་འབྱུང་བ་མེད་ཀྱང་གཟུགས་ཀྱི་འབྱུང་བ་རྒྱུར་བྱས་པ་བསམ་གཏན་གྱི་སྡོམ་པ་ཡོད་དོ་ཞེ་ན། དེ་ནི་མི་མཚུངས་ཏེ། ཟག་མེད་ལ་འབྱུང་བ་མེད་ཀྱང་ཟག་མེད་ཀྱི་སྡོམ་པ་ནི་གང་དུ་སྐྱེས་པ་དེ་ན་ཡོད་པའི་ཟག་བཅས་ཀྱི་འབྱུང་བ་རྒྱུར་བྱས་ནས་སྐྱེ་ལ་བསམ་གཏན་གྱི་སྡོམ་པ་ནི་ཟག་བཅས་ཡིན་པས་དེ་ལྟ་མ་ཡིན་པའི་ཕྱིར་རོ། །གཞན་ཡང་ལུས་དང་དབང་པོ་དང་གནས་དང་ཡུལ་རྣམས་ཡོད་ན་ནི་ཇི་ལྟར་གཟུགས་ཅུང་ཟད་ཡོད་པར་འགྱུར། གལ་ཏེ་རྡུལ་ཕྲ་རབ་ཙམ་གྱི་གཟུགས་ཤིག་ཡོད་པས་བོངས་ཚོད་ཆུང་བའི་ཕྱིར་གཟུགས་མེད་ན་ཅུང་ཟད་ཡོད་དོ་ཞེས་བྱ་བར་འདོད་ན་ནི་ཆུའི་སྐྱེ་བོ་ཕྲ་མོའི་གཟུགས་ལྟར་མི་སྣང་བ་དག་ཀྱང་གཟུགས་མེད་དུ་ཐལ་བར་འགྱུར་བའི་ཕྱིར་དང༌། སྲིད་རྩེ་བའང་སེམས་མེད་པར་ཇི་ལྟར་མི་འགྱུར། སྲིད་རྩེ་བ་དེ་ཁོ་ན་གཟུགས་མེད་དུ་ཇི་ལྟར་མི་འགྱུར་ཏེ། ཤིན་ཏུ་ཆ་ཕྲ་བའི་ཕྱིར་རོ། །གལ་ཏེ་གཟུགས་དང་བའི་ཕྱིར་གཟུགས་མེད་པར་འདོད་ན་ནི་དང་བའི་ཕྱིར་རྡོ་རྗེའི་རི་ལའང་ཐོགས་པ་མེད་པར་འགྲོ་བས་གཟུགས་ན་སྤྱོད་པ་དང་སྲིད་པ་བར་མའང་གཟུགས་མེད་པར་འགྱུར་རོ། །
གལ་ཏེ་གང་ལས་ཆེས་མཆོག་ཏུ་དང་བ་གཞན་མེད་པ་ཞིག་གཟུགས་མེད་ཡིན་ནོ་ཞེ་ན། དེ་ལྟར་ན་སྙོམས་འཇུག་གིས་ཁྱད་པར་དུ་འཕགས་པ་ལྟར་སྐྱེ་བས་ཀྱང་ཆེས་མཆོག་ཏུ་དང་བས་སྲིད་རྩེ་བ་ཁོ་ན་གཟུགས་མེད་དུ་འགྱུར་རོ། །གལ་ཏེ་གཟུགས་མེད་ན་གཟུགས་ཡོད་ཀྱང་དེ་ནི་དང་བས་ས་འོག་མའི་དབང་པོས་གཟུང་བར་མི་ནུས་པས་གཟུགས་མེད་དུ་བརྗོད་དོ་ཞེ་ན། དེ་ལྟ་ན་བསམ་གཏན་བཞི་པར་སྐྱེས་པའི་གཟུགས་ཀྱང་གཟུགས་མེད་དུ་འགྱུར་ཏེ། གོང་མ་གོང་མའི་གཟུགས་རྣམས་དང་བས་འོག་མ་འོག་མའི་དབང་པོས་མི་ཟིན་པའི་ཕྱིར་རོ། །གལ་ཏེ་འདོད་པའི་ཡོན་ཏན་གྱིས་རབ་ཏུ་ཕྱེ་བ་ནི་འདོད་ཁམས་ཡིན་ལ། གཟུགས་ཀྱིས་རབ་ཏུ་ཕྱེ་བ་ནི་གཟུགས་ཁམས་པ་ཡིན་པས་དེ་གཉིས་ཀྱི་མིང་ནི་དོན་དང་མཐུན་པ་ཡིན་གྱི་གཟུགས་མེད་ཅེས་པའི་མིང་ནི་འདོད་རྒྱལ་བ་ཡིན་ནོ་ཞེ་ན། སྔ་མ་གཉིས་དོན་མཐུན་ཡིན་ལ་ཕྱི་མ་འདོད་རྒྱལ་ཡིན་པ་ལ་རིགས་པ་ཅི་ཡོད། བཅོམ་ལྡན་འདས་ཀྱིས་ཀྱང་གཟུགས་མེད་པ་རྣམས་ནི་གཟུགས་རྣམས་ལས་ངེས་པར་བྱུང་བ་ཡིན་ནོ་ཞེས་བྱ་བ་དང༌། ལུང་བར་མ་ལས། གཟུགས་མེད་པའི་རྣམ་པར་ཐར་པ་ཞི་བ་གང་དག་གཟུགས་རྣམས་ལས་འདས་ནས་ཞེས་བྱ་བ་དང༌། རྣམ་པར་ཤེས་པའི་གནས་བདུན་དང༌། སེམས་ཅན་གྱི་གནས་དགུ་བསྟན་པའི་མདོ་ལས། གཟུགས་ཅན་མ་ཡིན་པའི་སེམས་ཅན་དག་ཡོད་ཅེས་བྱ་བ་དང༌། རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཞེས་བྱ་བ་ལ་སོགས་པས་རྒྱུ་སྙོམས་འཇུག་ལ་གཟུགས་བཀག་ནས་འབྲས་བུ་སྐྱེ་བ་ལའང་གཟུགས་དགག་པ་གསུངས་པའི་ཕྱིར། གཟུགས་མེད་པ་ན་གཟུགས་ཅུང་ཟད་ཀྱང་མེད་དོ། །གལ་ཏེ་ཡོད་ན་ཇི་ལྟར་གཟུགས་ཀྱི་འདུ་ཤེས་སུ་མི་འགྱུར་ཞེས་རང་གི་ཕྱོགས་གཞུང་འཛུགས་པར་བྱེད་དེ། (དེའི་གཟུགས་དེ་ནི་མདོ་སྡེ་པ་སེམས་ལ་གཟུགས་ཀྱི་ས་བོན་ཡོད་པས་དེ་ལས་སྐྱེ་བར་འདོད། བྱེ་བྲག་སྨྲ་བ་གཟུགས་མེད་དུ་སྐྱེས་པ་དག་གཟུགས་ཀྱི་སེམས་མངོན་དུ་གྱུར་ན་དེའི་འཆི་ལྟས་ཀྱང་གཟུགས་ཀྱི་རྐྱེན་ཡིན་ལ། རྣམ་སྨིན་དང་སྐལ་མཉམ་གྱི་རྒྱུ་ནི་འདས་པའི་གཟུགས་རྫས་གྲུབ་ཏུ་འདོད་དོ།།) འོ་ན་གཟུགས་མེད་ནས་ཤི་འཕོས་ཏེ་ཁམས་འོག་མར་སྐྱེས་པ་དག་ལ་ཇི་ལྟར་གཟུགས་འབྱུང་བར་འགྱུར་ཏེ། དེ་ན་གཟུགས་མེད་ཅིང་གཟུགས་ཀྱི་ཉེ་བར་ལེན་པ་ནི་གཟུགས་ཁོ་ན་ཡིན་པའི་ཕྱིར་རོ་ཞེ་ན།
རྩ་བ། གཟུགས་ནི་སེམས་ལས་སྐྱེ་བར་འགྱུར། །
གཟུགས་ནི་སེམས་ལས་སྐྱེ་བར་འགྱུར། །
དེའི་ཚེ་གཟུགས་ནི་ལྷན་ཅིག་བྱེད་པའི་རྐྱེན་ལས་ཀྱིས་འཕངས་པའི་སེམས་ལས་སྐྱེ་བར་འགྱུར་ལ། ཉེ་བར་ལེན་པའི་རྒྱུ་ནི་འདོད་གཟུགས་ན་ཡོད་པའི་འབྱུང་བཞི་ཉིད་ཡིན་ནོ། །དེའི་ཕྱིར་ཁ་ཅིག་མདོ་སྡེ་པ་ལུས་སེམས་ཕན་ཚུན་ས་བོན་ཅན་ཡིན་ནོ་ཞེས་བྱ་བ་དང༌། བྱེ་བྲག་ཏུ་སྨྲ་བ་གནས་སྐབས་དེའི་གཟུགས་འདས་པའི་གཟུགས་ལས་སྐྱེའོ་ཞེས་བྱ་བ་དང༌། སེམས་ཙམ་པ་ཀུན་གཞི་ལས་སྐྱེ་བར་འདོད་དོ་ཞེས་འཆད་པ་ནི་ལེགས་པ་མ་ཡིན་ཏེ། དང་པོ་ནི་ཚུ་རོལ་མཛེས་པ་པའི་ལུགས་ཡིན་པའི་ཕྱིར་དང༌། གཉིས་པ་ནི་ད་ལྟར་བའི་གཟུགས་ཡོད་བཞིན་དུ་འདས་པ་ལ་ལྟོས་མི་དགོས་པའི་ཕྱིར་དང༌། གསུམ་པ་ནི་གཟུགས་རྫས་སུ་མེད་པར་འདོད་པས་དེའི་རྒྱུ་ལ་འབད་པ་དོན་མེད་པའི་ཕྱིར་རོ། །
གཟུགས་མེད་པའི་སྙོམས་འཇུག་བཞིའི་སྒྲའི་དོན་ནི།
རྩ་བ། རྣམ་ཤེས་མཐའ་ཡས་མཁའ་མཐའ་ཡས། །
ཅི་ཡང་མེད་ཅེས་བྱ་དེ་ལྟར། །
སྦྱོར་ཕྱིར་དམན་ཕྱིར་འདུ་ཤེས་མེད། །
འདུ་ཤེས་མེད་པའང་མ་ཡིན་ནོ། །
འོ་ན་ནམ་མཁའ་མཐའ་ཡས་སྐྱེ་མཆེད་ལ་སོགས་པ་དེ་དག་ནམ་མཁའ་ལ་སོགས་པ་ཁོ་ན་ལ་དམིགས་པས་མིང་དེ་སྐད་ཅེས་བྱའམ། འོན་ཏེ་སྦྱོར་བའི་མིང་གིས་བཏགས་ཤེ་ན། སྦྱོར་བའི་མིང་གིས་ཏེ། འདི་ལྟར་སྦྱོར་བའི་ཚེ་ནམ་མཁའ་མཐའ་ཡས་སོ་ཞེས་བྱ་བ་དང༌། རྣམ་ཤེས་མཐའ་ཡས་སོ་ཞེས་བྱ་བ་དང༌། ཅི་ཡང་མེད་དོ་ཞེས་བྱ་བ་དེ་ལྟར་སྦྱོར་བའི་ཕྱིར་ནམ་མཁའ་མཐའ་ཡས་ལ་སོགས་པ་དེ་སྐད་བརྗོད་ཀྱི་གཞན་ན་ནི་ཅི་རིགས་པར་ཆོས་གཞན་དག་ལའང་དམིགས་སོ། །བཞི་པ་ནི་འདུ་ཤེས་ཆུང་ཞིང་མི་གསལ་བས་དམན་པའི་ཕྱིར་འདུ་ཤེས་མེད་པ་ཞེས་ཀྱང་བྱ་ལ། འདུ་ཤེས་ཅུང་ཟད་ཡོད་པའི་ཕྱིར་འདུ་ཤེས་མེད་པའང་མ་ཡིན་ནོ་ཞེས་བརྗོད་དོ། །སྲིད་པ་གསུམ་ན་དེ་བས་མཐོ་བའི་ས་མེད་པས་སྲིད་རྩེ་ཞེས་ཀྱང་བྱའོ། །ཡང་ན་སྦྱོར་བའི་ཚེ་འདུ་ཤེས་ནི་ནད་དོ། །འབྲས་སོ། །ཟུག་རྔུའོ་ཞེས་འདུ་ཤེས་རགས་པ་ལའང་སྐྱོན་དུ་ལྟ་ལ། འདུ་ཤེས་མེད་པ་པ་ནི་ཀུན་ཏུ་རྨོངས་པའོ་ཞེས་འདུ་ཤེས་མེད་པའང་ཀུན་དུ་རྨོངས་པའི་རྒྱུ་ཡིན་ནོ་ཞེས་པ་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་འདི་ནི་ཞི་བ་དང་གྱ་ནོམ་པའོ་ཞེས་སྦྱོར་བའི་ཕྱིར་ཡང་དེ་སྐད་དུ་བརྗོད་དོ། །
གཉིས་པ་དབྱེ་བ་ནི།
རྩ་བ། དེ་ལྟར་སྙོམས་འཇུག་དངོས་གཞིའི་རྫས། །
རྣམ་པ་བརྒྱད་བདུན་རྣམ་པ་གསུམ། །
རོ་མྱང་ལྡན་དང་དག་པ་དང༌། །
ཟག་མེད་བརྒྱད་པ་རྣམ་པ་གཉིས། །
རོ་མྱང་མཚུངས་ལྡན་སྲེད་བཅས་སོ། །
འཇིག་རྟེན་པ་ཡི་དགེ་བ་ནི། །
དག་པ་དེ་ནི་དེས་མྱང་བྱ། །
ཟག་མེད་འཇིག་རྟེན་འདས་པ་འོ། །
གོང་དུ་སྨོས་པའི་ཚུལ་དེ་ལྟར་ན་ཡན་ལག་མ་གཏོགས་པ་བསམ་གཏན་བཞི་དང་གཟུགས་མེད་བཞི་སྟེ་སྙོམས་པར་འཇུག་པའི་དངོས་གཞིའི་རྫས་ནི་རྣམ་པ་བརྒྱད་ཡིན་ལ། (འདིས་ཡན་ལག་དང་ཉེར་བསྡོགས་དང་ཁྱད་པར་ཅན་མ་བསྟན་པར་འདོད་དོ།།) བརྒྱད་པོ་དེ་དག་ལས་སྲིད་རྩེ་མ་གཏོགས་པ་བདུན་ནི་རྣམ་པ་གསུམ་གསུམ་ཡིན་ཏེ། །རོ་མྱང་བ་དང་མཚུངས་པར་ལྡན་པ་དང༌། དག་པ་པ་དང༌། ཟད་པ་མེད་པ་རྣམས་སོ། །བརྒྱད་པ་སྲིད་རྩེ་ནི་རོ་མྱང་ལྡན་དང་དག་པ་པ་རྣམ་པ་གཉིས་ཡིན་གྱི་འདུ་ཤེས་དམན་ཞིང་རྒྱུ་བ་མི་གསལ་བས་དེ་ལ་འཕགས་པའི་ལམ་མི་རྟེན་པས་ཟག་མེད་ནི་མ་ཡིན་ནོ། །དེ་ལ་རོ་མྱང་ལྡན་ནི་མཚུངས་ལྡན་གྱི་གྲོགས་སྲེད་པ་དང་བཅས་པའོ། །ཟག་བཅས་འཇིག་རྟེན་པའི་སྙོམས་འཇུག་དགེ་བ་ནི་མ་ཆགས་པ་ལ་སོགས་པ་དང་མཚུངས་པར་ལྡན་པས་དག་པ་ཞེས་བྱའོ། །རོ་མྱང་ལྡན་དེས་ཅི་ཞིག་རོ་མྱང་བར་བྱེད་ཅེ་ན། དག་པ་པ་དེ་ནི་རོ་མྱང་ལྡན་དེས་རོ་མྱང་བར་བྱ་བ་ཡིན་ཏེ། དག་པ་པ་འདི་ནི་བཟང་ངོ་ཞེས་དེ་ལ་ཞེན་ཅིང་སྲེད་པའི་ཕྱིར་རོ། །དེས་ན་རོ་མྱང་ལྡན་ནི་བསམ་གཏན་ཉོན་མོངས་ཅན་ཡིན་པས་དག་པ་པ་ལས་ལངས་པ་དང་རོ་མྱང་ལྡན་ལ་སྙོམས་པར་ཞུགས་པ་ཡིན་ནོ། །ལྟ་བ་དང་ང་རྒྱལ་ལ་སོགས་པ་དང་ལྡན་པའི་བསམ་གཏན་ཡང་ཡོད་མོད་ཀྱི་སྲེད་བཅས་ཁོ་ན་རོ་མྱང་ལྡན་དུ་བཤད་པ་ནི་དེ་ཁོ་ན་དམིགས་པ་ལ་ཞེན་པས་དེ་ལས་ངེས་པར་མ་བྱུང་ན་གོང་མར་འགྱུར་མི་སྲིད་པའི་ཕྱིར་དེ་སྐད་ཅེས་བཤད་དོ། །ཟག་མེད་ནི་འཇིག་རྟེན་ལས་འདས་པའི་སྙོམས་འཇུག་བདེན་པའི་རྣམ་པ་ཅན་ནོ། །
གསུམ་པ་ཡན་ལག་རྣམ་པར་བཞག་པ་ལ་གཉིས་ལས་སྤྱིའི་དོན་ལ་གསུམ་གྱི་དང་པོ་གཟུགས་མེད་ལ་ཡན་ལག་མི་སྟོན་པའི་རྒྱུ་མཚན་ནི་ཅི་བསམ་གཏན་ལྟར་གཟུགས་མེད་པ་དག་ལའང་ཡན་ལག་ཡོད་དམ་ཞེ་ན་མེད་དེ། འགྲེལ་པ་ལས། སྙོམས་པར་འཇུག་པའི་རྫས་དེ་དག་ལས་བསམ་གཏན་རྣམས་ཁོ་ན་ཡན་ལག་དང་ལྡན་པ་ཡིན་གྱི་གཟུགས་མེད་པ་རྣམས་ནི་མ་ཡིན་ནོ་ཞེས་འབྱུང་བའི་ཕྱིར་རོ། །དེའི་རྒྱུ་མཚན་ནི་ཀུན་ལས་བཏུས་ལས། གཟུགས་མེད་པ་རྣམས་ན་ནི་ཞི་གནས་སུ་རོ་གཅིག་པ་ཉིད་ཀྱི་ཕྱིར་ཡན་ལག་རྣམ་པར་བཞག་པ་མེད་དོ་ཞེས་བཤད་ཅིང༌། སློབ་དཔོན་རྒྱལ་པོའི་སྲས་ཀྱིས་ཀྱང་དེ་ཁོ་ན་ལྟར་བཤད་ལ། དེའི་དོན་ཡང་སློབ་དཔོན་གང་སྤེལ་གྱི་ཊཱིཀ་ལས་ཁ་ཅིག་ན་རེ་ཞི་གནས་སུ་རོ་གཅིག་པའི་ཕྱིར་ཏེ། གང་དང་གང་ན་རྒྱུ་བ་རགས་པ་དེ་དག་ནི་དེར་ཡན་ལག་ཏུ་བཞག་ན་གཟུགས་མེད་ན་ནི་ཉེ་བར་ཞི་བ་ལྷག་པས་སེམས་དང་སེམས་བྱུང་དེ་དག་རྒྱུ་བ་ཞན་པས་དེ་དག་ལ་ཡན་ལག་རྣམ་པར་བཞག་པ་མི་སྲིད་པས་ཏིང་ངེ་འཛིན་ཤས་ཆེ་བ་དེ་དག་ན་ནི་སེམས་ལས་བྱུང་བ་གཞན་འགའ་ཡང་གཙོ་བོ་མ་ཡིན་པས་གཟུགས་མེད་དུ་ཡན་ལག་རྣམ་པར་མི་གཞག་གོ་ཞེས་ཟེར་རོ། །གཞན་དག་ན་རེ་ས་གང་དུ་སེམས་བྱུང་ཚར་ཕྱིན་པར་འགག་པ་དེར་ཡན་ལག་བཞག་སྟེ། དེ་ལྟར་བསམ་གཏན་དང་པོ་ནི་སྡུག་བསྔལ་དང་ཡིད་མི་བདེ་འགག་ཅིང༌། དེ་བཞིན་དུ་གཉིས་པར་རྟོག་དཔྱོད་དང༌། གསུམ་པར་དགའ་བ་དང༌། བཞི་པར་ནི་བདེ་བ་འགག་ལ། དེ་མན་ཆད་ན་ནི་སེམས་བྱུང་གང་ཡང་ཚར་ཕྱིན་པར་འགག་པ་མེད་དོ་ཞེས་བཤད་དོ། །
དེ་ལྟར་ན་ཆོས་མངོན་པ་ལས་ནི་བསམ་གཏན་དངོས་གཞི་བཞི་པོ་མ་གཏོགས་པ་ལ་ཡན་ལག་མེད་པར་བཤད་ཅིང༌། འཕགས་པ་རྣམ་པར་གྲོལ་བའི་སྡེས་ནི་གཟུགས་མེད་པ་དག་བཏང་སྙོམས་དང་རྩེ་གཅིག་པའི་ཡན་ལག་གཉིས་དང་ལྡན་ཞིང་སྣལ་མ་ཕྲ་སྦོམ་ལས་བྱས་བའི་རས་ལྟར་སེམས་ཞི་མ་ཞིའི་ཁྱད་པར་གོང་དུ་ཡོད་པར་བཤད་ལ། བྲང་ཏི་ནི་གཟུགས་མེད་བཞི་པོ་དྲན་པ་དང་ཤེས་བཞིན་དང་བཏང་སྙོམས་དང་ཏིང་ངེ་འཛིན་ཏེ་ཡན་ལག་བཞི་བཞི་དང་ལྡན་ནོ་ཞེས་ཟེར་རོ། །སློབ་དཔོན་ཀ་མ་ལ་ཤཱི་ལས་ནི་བསྒོམ་པའི་རིམ་པ་དང་པོ་ལས་བསམ་གཏན་དང་པོའི་ཉེར་བསྡོགས་མི་ལྕོགས་མེད་ཀྱང་ཚོར་བ་བཏང་སྙོམས་དང་རྟོག་དཔྱོད་དང་རྩེ་གཅིག་པའི་ཡན་ལག་བཞི་དང་ལྡན་པར་བཤད་དོ། །
གཉིས་པ་གྲངས་ངེས་པ་ནི་གལ་ཏེ་འདུ་ཤེས་དང་རེག་པ་ལ་སོགས་པ་སེམས་ལས་བྱུང་བ་གཞན་དག་ཀྱང་ཡོད་བཞིན་དུ་ཅིའི་ཕྱིར་རྟོག་དཔྱོད་ལ་སོགས་པ་ཁོ་ན་ཡན་ལག་ཏུ་བཞག་ཅེ་ན། འདིའི་ལན་ལ་གཞན་ལུགས་དང༌། རང་ལུགས་གཉིས་ལས་དང་པོ་ནི་ཁ་ཅིག་ན་རེ་གང་དག་བསམ་གཏན་སྔ་མ་ལ་ཡོད་པ་ཕྱི་མས་སྤངས་ཤིང་བོར་བ་དེ་དག་ཡན་ལག་ཏུ་བཤད་ཀྱི་འདུ་ཤེས་ལ་སོགས་པ་ནི་སྔ་མ་ལ་ཡོད་ཀྱང་ཕྱི་མས་བོར་བ་མེད་པའི་ཕྱིར་ཡན་ལག་ཏུ་མ་བཤད་དེ། འདི་ལྟར་བསམ་གཏན་དང་པོ་ལ་ཡན་ལག་ལྔ་ཡོད་པའི་རྟོག་དཔྱོད་གཉིས་བོར་ནས་གཉིས་པར་བཞག་ལ། དང་པོའི་རྟོག་དཔྱོད་གཉིས་དང་གཉིས་བའི་དགའ་བ་དང་གསུམ་བོར་ནས་གསུམ་པ་དང༌། དེ་གསུམ་དང་གསུམ་པའི་བདེ་བ་དང་བཞི་བོར་ནས་བསམ་གཏན་བཞི་པར་བཤད་པའི་ཕྱིར་རོ། །དེ་ལྟར་ཏིང་ངེ་འཛིན་ཀྱང་ཡན་ལག་མ་ཡིན་པར་འགྱུར་རོ་ཞེ་ན། ཏིང་ངེ་འཛིན་སྙོམས་འཇུག་གི་གཙོ་བོ་ཡིན་པའི་ཕྱིར་མི་མཚུངས་སོ། །ཡང་ན་བསམ་གཏན་དང་པོ་ལ་སོགས་པའི་ཡན་ལག་ལྔ་ལ་སོགས་པ་ཁོ་ནར་བཞག་སྟེ། ཡན་ལག་དེ་དག་བསམ་གཏན་དང་པོ་ལ་སོགས་པ་ལ་ཆེས་ཕན་པའི་ཕྱིར་རོ་ཞེས་ཟེར་རོ།། དེ་ལྟ་ན་བསམ་གཏན་དང་པོ་ལ་རྟོག་དཔྱོད་ཡན་ལག་ཏུ་མི་འཇོག་པར་དྲན་པ་དང་ཤེས་རབ་དག་ཡན་ལག་ཏུ་འཇོག་པར་འགྱུར་ཏེ། དྲན་པ་ཉེ་བར་གནས་པ་དང་ཡང་དག་པ་ཇི་ལྟ་བ་བཞིན་དུ་ཤེས་པ་ལ་ཞུམ་རྒོད་ལ་སོགས་པ་མི་འབྱུང་བས་རྟོག་དཔྱོད་གཉིས་པས་དྲན་པ་དང་ཤེས་རབ་ཆེས་ཕན་པའི་ཕྱིར་རོ། །
གཉིས་པ་ནི་འགྲེལ་པ་ལས། ཁ་ཅིག་དེ་སྐད་དུ་རྒོལ་བ་ཡོད་མོད་ཀྱི་སྔོན་གྱི་སློབ་དཔོན་རྣམས་ནི་ཇི་སྙེད་མངོན་པ་དེ་ལྟར་མི་སྟོན་ཏེ། དེ་ལྟ་བས་ན་འདི་ནི་དཔྱད་པར་བྱ་བ་ཡིན་ནོ་ཞེས་འབྱུང་བ་ལ་ཊཱིཀ་བྱེད་དག་འདི་ནི་རྣལ་འབྱོར་སྤྱོད་པའི་ས་མཐོང་བས་དཔྱད་པར་བྱ་བ་ཡིན་ནོ་ཞེས་སློབ་དཔོན་གྱིས་དེར་བལྟ་བར་ཁུངས་འབྱིན་པ་ཡིན་པས་དེ་དང་མཐུན་པར་བཤད་པར་བྱའོ་ཞེས་འཆད་དོ། །འོ་ན་དེ་ལས་ཇི་ལྟར་འབྱུང་ཞེ་ན། འདི་ལྟར་བསམ་གཏན་རྣམས་ལ་འདུ་ཤེས་ལ་སོགས་པའི་ཆོས་གཞན་དག་ཡོད་ཀྱང་རྟོག་དཔྱོད་ལ་སོགས་པ་ཁོ་ན་ཡན་ལག་ཏུ་བཞག་པ་ནི་སོ་སོར་གཉེན་པོ་དང་ཕན་ཡོན་དང་དེ་གཉིས་ཀའི་རྟེན་ནམ་གནས་ཀྱི་ཡན་ལག་གི་ཕྱིར་རོ་ཞེས་འབྱུང་བས་དེ་དག་གི་དབང་དུ་བྱས་ཏེ་གྲངས་ངེས་བསམ་པར་བྱའོ། །
གསུམ་པ་ཡན་ལག་དང་ཡན་ལག་ཅན་གྱི་དོན་ངོས་གཟུང་བ་ནི་བྱེ་བྲག་ཏུ་སྨྲ་བ་ཏིང་ངེ་འཛིན་བསམ་གཏན་དང་བསམ་གཏན་གྱི་ཡན་ལག་གཉིས་ཀ་ཡིན་ལ་གཞན་དག་ནི་ཡན་ལག་ཁོ་ན་ཡིན་ནོ། །ཞེས་ཟེར་རོ། །སློབ་དཔོན་ནི་ཡན་ལག་ལས་དོན་གཞན་དུ་གྱུར་པ་མ་ཡིན་ཡང་ཡན་ལག་བཞི་པའི་དམག་ཅེས་བརྗོད་པ་ལྟར་ཚོགས་པའི་སྤྱི་དང་བྱེ་བྲག་ཡིན་ནོ་ཞེས་འདོད་དོ། །
གཉིས་པ་གཞུང་དོན་ལ།
རྩ་བ། དང་པོ་ལ་ལྔ་རྟོག་དཔྱོད་དང༌། །
དགའ་དང་བདེ་དང་ཏིང་འཛིན་རྣམས། །
བསམ་གཏན་དང་པོ་ལ་ནི་ཡན་ལག་ལྔ་སྟེ། མི་མཐུན་ཕྱོགས་འདོད་པའི་འདོད་པའི་འདོད་ཆགས་དང་གནོད་སེམས་དང་རྣམ་འཚེ་ལ་སོགས་པ་སྤོང་བས་གཉེན་པོའི་ཡན་ལག་རྟོག་པ་དང་དཔྱོད་པ་དང༌། རྟོག་དཔྱོད་ཀྱི་མི་མཐུན་ཕྱོགས་སྤངས་ནས་དབེན་པ་ལས་སྐྱེས་པའི་དགའ་བདེ་འཐོབ་པས་ཕན་ཡོན་གྱི་ཡན་ལག་དགའ་བ་དང་བདེ་བ་དང༌། སེམས་རྩེ་གཅིག་པའི་སྟོབས་ཀྱིས་སྔ་མ་དེ་དག་འགྲུབ་པས་དེ་གཉིས་ཀའི་རྟེན་གྱི་ཡན་ལག་ཏིང་ངེ་འཛིན་རྣམས་སོ། །
རྩ་བ། གཉིས་པ་ལ་ནི་ཡན་ལག་བཞི། །
རབ་དང་དང་ནི་དགའ་ལ་སོགས། །
བསམ་གཏན་གཉིས་པ་ལ་ནི་ཡན་ལག་བཞི་སྟེ། མི་མཐུན་ཕྱོགས་དང་པོའི་རྟོག་དཔྱོད་སྤོང་བས་གཉེན་པོའི་ཡན་ལག་ནང་རབ་ཏུ་དང་བ་དང༌། ཕན་ཡོན་དང་གནས་སམ་རྟེན་གྱི་ཡན་ལག་ནི་སྔ་མ་ལྟར་དགའ་བ་དང་སོགས་པས་གཟུང་བ་བདེ་བ་གཉིས་དང་ཏིང་ངེ་འཛིན་ཏོ། །
རྩ་བ། གསུམ་པ་ལ་ལྔ་བཏང་སྙོམས་དང༌། །
དྲན་དང་ཤེས་བཞིན་བདེ་དང་གནས། །
བསམ་གཏན་གསུམ་པ་ལ་ནི་ཡན་ལག་ལྔ་སྟེ། མི་མཐུན་ཕྱོགས་འོག་སའི་དགའ་བ་སྤོང་བས་གཉེན་པོའི་ཡན་ལག་དགའ་བ་ལ་རྩོལ་བ་མེད་པས་དམིགས་པ་ལ་ལྷུན་གྱིས་གྲུབ་པའི་མཚན་ཉིད་ཅན་འདུ་བྱེད་ཀྱི་བཏང་སྙོམས་དང་བཏང་སྙོམས་ཀྱི་རྒྱུ་མཚན་མི་བརྗེད་པའི་དྲན་པ་དང་དྲན་མི་བརྗེད་པའི་ཤེས་བཞིན་གསུམ་དང་ཕན་ཡོན་དང་རྟེན་གྱི་ཡན་ལག་ནི་རིམ་པ་ལྟར་བདེ་བ་དང་སེམས་གནས་པ་ཏིང་ངེ་འཛིན་རྣམས་སོ། །སེམས་གནས་པ་ཏིང་ངེ་འཛིན་ཡིན་པར་ལམ་གྱི་ཚོགས་ཀྱི་མདོ་ལས། ཡང་དག་པའི་ཏིང་ངེ་འཛིན་གང་ཞེ་ན། གང་སེམས་གནས་པ་དང༌། ཡང་དག་པར་གནས་པའོ་ཞེས་འབྱུང་བའི་ཕྱིར་རོ། །
རྩ་བ། མཐའ་ན་བཞི་དྲན་བཏང་སྙོམས་དང༌། །
བདེ་མིན་སྡུག་མིན་ཏིང་འཛིན་རྣམས། །
བསམ་གཏན་རྣམས་ཀྱི་མཐའ་བཞི་པ་ན་ནི་ཡན་ལག་བཞི་སྟེ། མི་མཐུན་ཕྱོགས་འོག་སའི་བདེ་བ་སྤོང་བས་གཉེན་པོའི་ཡན་ལག་གཉིས་ཀའང་ས་འོག་མའི་སྐྱོན་བརྒྱད་དང་བྲལ་བས་དྲན་པ་ཡོངས་སུ་དག་པ་དང་འདུ་བྱེད་བཏང་སྙོམས་ཡོངས་སུ་དག་པ་གཉིས་དང༌། ཕན་ཡོན་དང་རྟེན་གྱི་ཡན་ལག་ནི་རིམ་པ་ལྟར་བདེ་བ་ཡང་མིན་སྡུག་བསྔལ་ཡང་མིན་པའི་ཚོར་བ་བཏང་སྙོམས་དང༌། ཏིང་ངེ་འཛིན་ཡོངས་སུ་དག་པ་རྣམས་སོ། །དེ་ལྟར་ན་དེ་དག་ནི་བསམ་གཏན་གྱི་ཡན་ལག་བཅོ་བརྒྱད་དོ།། (འདི་དག་གི་གཉེན་པོ་ནི་ཐག་སྲིང་གི་གཉེན་པོར་འདོད་པ་ཉིད་ལེགས་སོ།།)
རྣམ་པར་གཏན་ལ་དབབ་པ་བསྡུ་བ་ལས་ནི། བསམ་གཏན་དང་པོའི་མི་མཐུན་ཕྱོགས་ནི་འདོད་པའི་འདོད་ཆགས་དང༌། གནོད་སེམས་དང་རྣམ་པར་འཚེ་བའི་རྣམ་པར་རྟོག་པ་རྣམས་གཅིག་ཏུ་བྱས་པ་དང༌། སྡུག་བསྔལ་དང༌། ཡིད་མི་བདེ་བ་དང༌། འཆལ་བའི་ཚུལ་ཁྲིམས་དང༌། རྣམ་པར་གཡེང་བ་དང་ལྔ་ཡིན་ལ། བསམ་གཏན་གཉིས་པའི་མི་མཐུན་ཕྱོགས་ནི་བསམ་གཏན་དང་པོའི་འདོད་ཆགས་དང༌། རྟོག་དཔྱོད་གཉིས་གཅིག་ཏུ་བྱས་པ་དང༌། སྡུག་བསྔལ་དང༌། རྒོད་པ་དང༌། ཏིང་ངེ་འཛིན་མ་རྗོགས་པ་དང་ལྔ་ཡིན་ནོ། །བསམ་གཏན་གསུམ་པའི་མི་མཐུན་ཕྱོགས་ནི་བསམ་གཏན་གཉིས་པའི་འདོད་ཆགས་དང༌། ཡིད་བདེ་བ་དང༌། དགའ་བ་དང༌། ཏིང་ངེ་འཛིན་མ་རྗོགས་པ་དང་བཞིའོ། །བསམ་གཏན་བཞི་པའི་མི་མཐུན་ཕྱོགས་ནི་དབུགས་འབྱུང་རྔུབ་དང༌། བསམ་གཏན་གསུམ་པའི་འདོད་ཆགས་དང༌། བདེ་བ་དང༌། བདེ་བ་ལ་རྩོལ་བ་དང༌། ཏིང་ངེ་འཛིན་མ་རྫོགས་པ་དང་ལྔ་ཡིན་ནོ་ཞེས་པ་དང༌། གཉེན་པོའི་ཡན་ལག་གི་སྐབས་སུ་བསམ་གཏན་དང་པོའི་མི་མཐུན་ཕྱོགས་རྣམ་པ་ལྔ་སྤོང་བའི་གཉེན་པོ་དྲན་ཤེས་བཞིན་དང་བཏང་སྙོམས་གསུམ་ཡིན་ཀྱང་རྟོག་དཔྱོད་ཀྱི་སྒོས་མངོན་པར་བསྒྲུབས་པས་ན་དེ་གསུམ་གྱི་མིང་གིས་མ་བསྟན་པར་རྟོག་དཔྱོད་གཉིས་གཉེན་པོའི་ཡན་ལག་ཏུ་བསྟན་ལ། དེ་བཞིན་དུ་བསམ་གཏན་གཉིས་པའི་མི་མཐུན་ཕྱོགས་རྣམ་པ་ལྔ་སྤོང་བ་གཉེན་པོའང་དྲན་པ་དང༌། ཤེས་བཞིན་དང་བཏང་སྙོམས་གསུམ་ཡིན་ཡང་སེམས་དགའ་བའི་ཉེ་བའི་ཉོན་མོངས་པས་ཀུན་ནས་དཀྲིས་པའི་ཕྱིར་དེ་དག་རང་མིང་གིས་མ་བསྟན་པར་རྟོག་དཔྱོད་གྱི་འཁྲུག་པ་ཞི་བས་ནང་རབ་ཏུ་དང་བའི་མིང་གིས་བསྟན་ཏེ། དེས་ན་འདིའི་ནང་རབ་ཏུ་དང་བ་ནི་དྲན་པ་དང་ཤེས་བཞིན་དང་བཏང་སྙོམས་ཀྱི་ངོ་བོ་ཉིད་ཡིན་ནོ། །བསམ་གཏན་གསུམ་པ་ལ་ནི་སེམས་དགའ་བའི་ཉེ་བའི་ཉོན་མོངས་པ་དང་བྲལ་བའི་ཕྱིར་བཏང་སྙོམས་དང་དྲན་ཤེས་བཞིན་གསུམ་རང་གི་མཚན་ཉིད་ཁོ་ནས་བསྟན་ཏོ། །དེའི་ཕྱིར་གཉེན་པོ་ལ་སོགས་པ་ཡན་ལག་གསུམ་གྱི་དབང་དུ་བྱས་ཏེ་བསམ་གཏན་དེ་དག་ཡན་ལག་ལྔ་པ་དང་བཞི་པར་བཞག་ལ། བསམ་གཏན་བཞིའི་ཁྱད་པར་ནི་དང་པོ་དང་གཉིས་པ་ལ་ནི་ཏིང་ངེ་འཛིན་ཡོངས་སུ་རྗོགས་པའི་ཁྱད་པར་ཡོད་དོ། །གཉིས་པ་དང་གསུམ་པ་ལ་ནི་ཕན་འདོགས་པ་ཡོངས་སུ་རྗོགས་པའི་ཁྱད་པར་ཡོད་དོ། །གསུམ་པ་དང་བཞི་པ་ལ་ནི་ཡོངས་སུ་དག་པ་ཡོངས་སུ་རྫོགས་པའི་ཁྱད་པར་ཡོད་དོ་ཞེས་བཤད་དོ། །
རྩ་བ། རྫས་སུ་བཅུ་གཅིག་དང་པོ་ན། །
ཤིན་ཏུ་སྦྱངས་པ་བདེ་བ་ཡིན། །
རབ་ཏུ་དང་བ་དད་པ་ཡིན། །
ལུང་རྣམ་གཉིས་ཕྱིར་དགའ་ཡིད་བདེ། །
བཅོ་བརྒྱད་པོ་དེ་དག་ཀྱང་མིང་གི་སྒོ་ནས་ཡིན་གྱི་རྫས་སུ་ནི་བཅུ་གཅིག་ཡིན་ཏེ། འདི་ལྟར་བསམ་གཏན་དང་པོའི་ཡན་ལག་ལྔ་དང༌། གཉིས་པའི་ནང་རབ་ཏུ་དང་བ་དང་གསུམ་པའི་ཏིང་ངེ་འཛིན་མ་གཏོགས་པ་བཞི་དང༌། བཞི་པའི་ཚོར་བ་བཏང་སྙོམས་རྣམས་སོ། །གལ་ཏེ་རྟོག་དཔྱོད་དང་དྲན་པ་དང་འདུ་བྱེད་བཏང་སྙོམས་དང་སེམས་བདེ་དང་ཚོར་བ་བཏང་སྙོམས་རྣམས་ནི་རྫས་རེ་རེ་ཞིང་ཡན་ལག་ཏུ་རུང་མོད་ཀྱི་བསམ་གཏན་སྔ་མ་གཉིས་ཀྱི་བདེ་བ་བསམ་གཏན་གྱི་ཡན་ལག་ཏུ་ཇི་ལྟར་འགྱུར་ཏེ། ས་དེ་གཉིས་ན་དགའ་བ་ལས་འདོད་ཆགས་དང་མ་བྲལ་བས་སེམས་ཀྱི་བདེ་བ་མེད་པའི་ཕྱིར་དང༌། ལུས་ཀྱི་བདེ་བའང་མཉམ་པར་བཞག་པ་ན་བསམ་གཏན་གྱི་ཡན་ལག་ཏུ་མི་འགྱུར་ཏེ། དེ་ནི་སྒོ་ལྔའི་རྣམ་ཤེས་ཀྱི་འཁོར་དུ་བྱུང་བ་ཡིན་ན་དེ་ཡང་ངོ་བོ་ཉིད་ཀྱིས་རྣམ་པར་གཡེང་བ་ཡིན་པས་མཉམ་གཞག་ཏུ་མི་འབྱུང་བའི་ཕྱིར་རོ། །གཞན་ཡང་བསམ་གཏན་གསུམ་པའི་བདེ་བ་རྫས་གཞན་དུ་མི་འགྲུབ་པར་འགྱུར་ཏེ། བསམ་གཏན་དང་པོར་བགྲངས་ཟིན་པའི་ཕྱིར་དང༌། དེར་བགྲངས་ཀྱང་རྫས་གཞན་དུ་བགྲང་ན་གཉིས་པའི་བདེ་བའང་རྫས་གཞན་དུ་བགྲང་བར་ཐལ་བར་འགྱུར་བའི་ཕྱིར་རོ་ཞེ་ན། སྐྱོན་མེད་དོ། །བསམ་གཏན་གསུམ་པའི་བདེ་བ་ནི་སེམས་བདེ་(ཡིན་པས་ཚོར་བ་)ཡིན་ལ། བསམ་གཏན་དང་པོ་དང་གཉིས་པ་དག་ན་ནི་དགེ་བའི་ས་མང་པོ་པའི་སེམས་ཤིན་ཏུ་སྦྱངས་པ་ལ་བདེ་བ་ཞེས་བརྗོད་པ་ཡིན་ནོ། །བསམ་གཏན་སྔ་མ་གཉིས་ན་ནི་ཚོར་བ་བདེ་བ་མི་སྲིད་དེ། ཚོར་བ་བདེ་བ་ལ་ལུས་སེམས་ཀྱི་ཚོར་བ་གཉིས་ལས་མེད་ཅིང༌། དེ་ལ་ལུས་ཚོར་ནི་མ་ཡིན་ཏེ། སྙོམས་པར་ཞུགས་པ་ལ་རྣམ་པར་ཤེས་པའི་ཚོགས་ལྔ་མེད་པའི་ཕྱིར་རོ། །སེམས་ཚོར་ཡང་མ་ཡིན་ཏེ། ཡན་ལག་དགའ་བ་ཞེས་བགྲངས་ཟིན་པའི་ཕྱིར་དང༌། དགའ་བ་ནི་ཡིད་བདེ་ཡིན་ན་བདེ་བ་དང་ཡིད་བདེ་གཉིས་ཅིག་ཅར་མི་འབྱུང་བའི་ཕྱིར་རོ།། དེ་གཉིས་རྣམ་གྲངས་ཀྱི་ཡན་ལག་ཡིན་པར་ཡང་མི་རིགས་ཏེ། ཡན་ལག་ལྔ་ཞེས་ཚོགས་པ་གཅིག་ལ་འབྱུང་བར་བཤད་པའི་ཕྱིར་རོ་ཞེས་བྱེ་བྲག་ཏུ་སྨྲ་བ་རྣམས་འདོད་དོ། །
དཔེས་སྟོན་པ་ན་རེ་བསྟན་བཅོས་བྱེ་བྲག་ཏུ་བཤད་པ་ལས། མདོ་སྡེ་པ་བཙུན་པས་ཆོས་མངོན་པ་བ་རྣམས་ཀྱི་ལྟར་ན་ཟོ་ཆུན་འཁྱུད་མོ་ལྟར་མིག་རྣམ་པར་ཤེས་པ་ལ་སོགས་པ་འོག་ནས་གོང་དུ་འདྲེན་ཏོ་ཞེས་བཤད་དེ། དེའི་འདོད་པ་ནི་མིག་ཤེས་ལ་སོགས་པ་ནི་བསམ་གཏན་གཉིས་པ་ལ་སོགས་པའི་ས་པའང་ཡོད་དོ་ཞེས་བྱ་བ་ཡིན་ནོ་ཞེས་ཊཱི་ཀར་བཤད་ཅིང༌།༤༠ བསམ་གཏན་སྟོན་པའི་མདོ་ལས་ཀྱང༌། བསམ་གཏན་གསུམ་པ་སྟོན་པ་ན་དེ་དགའ་བ་ལས་འདོད་ཆགས་དང་བྲལ་ནས་བཏང་སྙོམས་དང་དྲན་པ་དང་ཤེས་བཞིན་དུ་གནས་ཤིང་བདེ་བ་ལུས་ཀྱི་མྱོང་ལ་ཞེས་གསུངས་པས་ལུས་བདེ་ནི་འདོད་པ་དང་བསམ་གཏན་དང་པོའི་ས་པ་ཁོ་ནར་མ་ཟད་ཀྱི། གཉིས་པ་དང་གསུམ་པའི་ས་པའང་ཡོད་པས་དེས་ན་བསམ་གཏན་གསུམ་ཆར་ནའང་ལུས་བདེ་ཁོ་ན་ཡན་ལག་ཡིན་ནོ་ཞེས་ཟེར་རོ། །འོ་ན་ལམ་གྱི་ཚོགས་ཀྱི་མདོ་ལས། བདེ་བའི་དབང་པོ་གང་ཞེ་ན། བདེ་བ་མྱོང་བར་འགྱུར་བའི་རེག་པས་རེག་པ་ལ་ལུས་ཀྱི་དང་སེམས་ལས་བྱུང་བའི་ཚོར་བ་ཚོར་བའི་རྣམ་པ་བདེ་བ་སིམ་པ་སྐྱེ་བ་གང་ཡིན་པ་དེ་ནི་བདེ་བའི་དབང་པོ་ཞེས་བྱའོ་ཞེས་གསུངས་པ་དང་འགལ་ལོ་ཞེ་ན། མི་འགལ་ཏེ། སྡེ་པ་གཞན་ཐམས་ཅད་ཀྱི་གཞུང་ལས་ལུས་ཀྱི་ཚོར་བ་ཞེས་པ་ཁོ་ན་འབྱུང་བས་སེམས་ལས་བྱུང་བའི་ཞེས་པ་ནི་འགའ་ཞིག་གིས་སྒྲོ་བཏགས་པ་ཡིན་པའི་ཕྱིར་དང༌། མདོ་ལས་ཀྱང་བདེ་བ་ལུས་ཀྱིས་མྱོང་ལ་ཞེས་རང་གི་སྒྲས་གསུངས་པའི་ཕྱིར་རོ། །
གལ་ཏེ་དེ་ནི་ཡིད་ཀྱི་ལུས་ཀྱིས་ཞེས་བྱ་བ་ཡིན་ནོ་ཞེ་ན། མ་ཡིན་ཏེ། དེ་ལྟ་ན་བདེ་བ་ཡིད་ཀྱིས་མྱོང་ལ་ཞེས་གསུངས་པས་ཆོག་གི་ལུས་ཀྱིས་ཞེས་གསུངས་པ་ལ་དགོས་པ་མེད་པའི་ཕྱིར་རོ། །གཞན་ཡང་བསམ་གཏན་སྔ་མ་གཉིས་སུ་ཤིན་ཏུ་སྦྱངས་པ་ལ་བདེ་བར་བརྗོད་ན་སྔ་མ་གཉིས་ཀྱི་བས་ཤིན་ཏུ་སྦྱངས་པ་ཁྱད་པར་དུ་འཕགས་པ་ཡོད་པས་བསམ་གཏན་བཞི་པ་ལའང་ཡན་ལག་བདེ་བ་སྨོས་པར་འགྱུར་ན་དེར་མ་སྨོས་པས་ན་དང་པོ་གསུམ་ན་ཚོར་བ་བདེ་བ་ཡོད་པས་དེ་ཡན་ལག་ཏུ་བཤད་ཀྱི་བཞི་པ་ན་ཚོར་བ་བདེ་བ་མེད་པས་དེ་ཡན་ལག་ཏུ་མ་བཤད་དོ། །གལ་ཏེ་བསམ་གཏན་སྔ་མ་གཉིས་ཀྱི་ཤིན་ཏུ་སྦྱངས་པ་ནི་བདེ་བའི་ཚོར་བ་དང་མཐུན་པས་བདེ་བར་བཤད་ཀྱི་བཞི་པའི་ཤིན་ཏུ་སྦྱངས་པ་ནི་བདེ་བའི་ཚོར་བ་དང་མི་མཐུན་པས་བདེ་བར་མ་བཤད་དོ་ཞེ་ན། འོ་ན་བདེ་བའི་ཚོར་བ་དང་མཐུན་པས་གསུམ་པའི་ཤིན་ཏུ་སྦྱངས་པའང་ཅིའི་ཕྱིར་བདེ་བར་མ་བཤད། གལ་ཏེ་བདེ་བའི་ཚོར་བ་དང་མཐུན་མོད་ཀྱི་ལས་སུ་རུང་བའི་མཚན་ཉིད་ཅན་གྱི་བཏང་སྙོམས་ཀྱིས་བཅོམ་པས་དེར་བདེ་བར་མ་བཤད་དོ་ཞེ་ན་མ་ཡིན་ཏེ། བསམ་གཏན་སྔ་མ་གཉིས་ཀྱིས་ཤིན་དུ་སྦྱངས་པ་བས་གསུམ་པའི་ཤིན་དུ་སྦྱངས་པ་ཁྱད་པར་དུ་འཕགས་པས་བཏང་སྙོམས་ཁོ་ནས་དེ་འཕེལ་བའི་ཕྱིར་རོ། །གཞན་ཡང་བསམ་གཏན་སྔ་མ་གཉིས་ན་ཤིན་ཏུ་སྦྱངས་པ་ཁོ་ན་བདེ་བ་མ་ཡིན་ཏེ། མགོན་མེད་ཟས་སྦྱིན་གྱིས་ཞུས་པའི་མདོ་ལས། གང་གི་ཚེ་འཕགས་པ་ཉན་ཐོས་རབ་ཏུ་དབེན་པ་ལས་སྐྱེས་པའི་བདེ་བ་ལུས་ཀྱིས་མངོན་སུམ་དུ་བྱས་ནས་རྫོགས་པར་བྱས་ཏེ་གནས་པ་དེའི་ཚེ་འདིའི་འདོད་པ་ཉེ་བར་སྡུད་པའི་ཡིད་བདེ་གཉིས་དང༌། མི་དགེ་བ་ཉེ་བར་སྡུད་པའི་ཡིད་བདེ་མི་བདེ་བཏང་སྙོམས་གསུམ་སྟེ་ཆོས་ལྔ་ནི་སྤོང་བར་འགྱུར་ལ། ཆོས་ལྔ་པོ་ནང་རབ་ཏུ་དང་བ་དང་དགའ་བ་དང་ཤིན་ཏུ་སྦྱངས་པ་དང་བདེ་བ་དང་ཏིང་ངེ་འཛིན་ནི་བསྒོམ་པ་ཡོངས་སུ་རྫོགས་པར་འགྱུར་རོ་ཞེས་ཤིན་ཏུ་སྦྱངས་པ་དང་བདེ་བ་ཐ་དད་དུ་གསུངས་པའི་ཕྱིར་དང༌། གསུངས་ཀྱང་ཐ་དད་མ་ཡིན་ན་ལྔར་མི་རུང་ཞིང་ཐ་དད་ཡིན་ན་བསམ་གཏན་གསུམ་ཆར་གྱི་བདེ་བ་ལུས་བདེར་གྲུབ་པའི་ཕྱིར་རོ། །
འོ་ན་སྒོ་ལྔའི་ཤེས་པ་རང་བཞིན་གྱིས་གཡེང་བའི་ཕྱིར་ཁ་ཕྱིར་ལྟ་ཡིན་པས་མཉམ་གཞག་ཏུ་ལུས་ཀྱི་རྣམ་ཤེས་ཇི་ལྟར་འབྱུང་ལ། གལ་ཏེ་འབྱུང་ནའང་ཕྱི་རོལ་ཏུ་གཡེངས་པ་དང་ལུས་ཤེས་སྐྱེས་པས་ཏིང་ངེ་འཛིན་ལས་ཉམས་པ་དང༌། གནས་པ་ལས་ལངས་པར་ཡང་འགྱུར་བ་དང༌། ལུས་བདེ་མཉམ་གཞག་ཏུ་མི་འབྱུང་བས་བསམ་གཏན་གྱི་ཡན་ལག་ཏུ་མི་འཐད་ཅིང༌། གཞན་ཡང་འདོད་པའི་རྟེན་ཅན་ཟག་བཅས་ཟག་མེད་ཀྱི་བསམ་གཏན་ལ་མཉམ་པར་བཞག་པ་ནས་བསམ་གཏན་གྱི་ས་པ་ཡིན་པས་རིམ་པ་ལྟར་འདོད་པའི་ལུས་ཤེས་ཀྱིས་གཟུགས་ཀྱི་རེག་བྱ་འཛིན་མི་ནུས་པས་རེག་བྱ་དང་ལུས་ཤེས་གཟུགས་ཀྱི་ས་པ་ཡིན་པས་འདོད་པའི་ལུས་དབང་གི་གཟུགས་ན་སྤྱོད་པའི་རེག་བྱ་འཛིན་པའི་ལུས་ཤེས་སྐྱེད་མི་ནུས་པའི་ཕྱིར་དང༌། ཚོགས་པ་གཅིག་ལ་ཡན་ལག་ཟག་བཅས་ཟག་མེད་གཉིས་མི་རུང་བས་ཤིན་ཏུ་སྦྱངས་པའི་རེག་བྱ་དང་ལུས་ཤེས་ཀྱང་ཟག་མེད་དུ་འགྱུར་རོ་ཞེ་ན། ཉེས་པ་དེ་དག་མེད་དེ། མཉམ་པར་བཞག་པ་ན་ཏིང་ངེ་འཛིན་གྱི་ཁྱད་པར་ལས་སྐྱེས་པ་ཤིན་ཏུ་སྦྱངས་པའི་རེག་བྱ་ཞེས་པ་ལུས་ཡང་ཞིང་ཟོ་མདོག་བདེ་བར་བྱེད་ཅིང་བདེ་བའི་ཚོར་བ་དང་མཐུན་པའི་རླུང་གིས་ལུས་ལ་རྒྱས་ཤིང་ཁྱབ་པས་དེའི་མཐུས་ཤིན་ཏུ་སྦྱངས་པའི་རེག་བྱ་ལ་དམིགས་པའི་ཏིང་ངེ་འཛིན་དང་མཐུན་པའི་ལུས་ཤེས་མཚུངས་ལྡན་དང་བཅས་པ་འབྱུང་བའི་ཕྱིར་དང༌། ཏིང་ངེ་འཛིན་ལས་སྐྱེས་པའི་ལུས་ཤེས་མཚུངས་ལྡན་དང་བཅས་པ་དེ་ཉིད་ལུས་ཀྱི་ནང་དུ་འབྱུང་བས་ཕྱི་རོལ་ཏུ་གཡེངས་པར་ཡང་མི་འགྱུར་ལ། ཏིང་ངེ་འཛིན་དང་མཐུན་པའི་ཕྱིར་དེ་སྐྱེས་པ་ན་ཏིང་ངེ་འཛིན་ལས་ཉམས་པ་དང༌། ལངས་པར་ཡང་མི་འགྱུར་བའི་ཕྱིར་དང༌། སྤྱིར་འདོད་པའི་ལུས་དབང་གིས་གཟུགས་ཀྱི་རེག་བྱ་ལ་དམིགས་པའི་ལུས་ཤེས་སྐྱེད་པའི་ཁྱབ་པ་མེད་ཀྱང༌། འདིར་ཏིང་ངེ་འཛིན་གྱིས་སྟོབས་བསྐྱེད་པའི་མཐུས་མཉམ་གཞག་གི་འདོད་པའི་ལུས་དབང་གིས་གཟུགས་ཀྱི་ཤིན་ཏུ་སྦྱངས་པའི་རེག་བྱ་ལ་དམིགས་པ་ཤིན་ཏུ་སྤྱངས་པའི་ལུས་ཤེས་མཚུངས་ལྡན་དང་བཅས་པ་བསྐྱེད་ནུས་ཤིང༌། དེ་ཉིད་ཀྱིས་ན་ལུས་བདེ་བསམ་གཏན་གྱི་ཡན་ལག་ཏུའང་གྲུབ་ལ། ཤིན་ཏུ་སྦྱངས་པའི་རེག་བྱ་དང་ལུས་ཤེས་ཟག་མེད་དུ་ཐལ་བ་ནི་འདོད་པ་ཉིད་དེ། ལམ་གྱི་ཚོགས་ཀྱི་མདོ་ལས། ལུས་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་མངོན་པར་ཤེས་པ་དང༌། རྫོགས་པར་བྱང་ཆུབ་པ་དང༌། མྱ་ངན་ལས་འདའ་བར་འགྱུར་བ་གང་ཡིན་པ་དང༌། སེམས་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་མངོན་པར་ཤེས་པ་དང༌། རྫོགས་པར་བྱང་ཆུབ་པ་དང༌། མྱ་ངན་ལས་འདའ་བར་འགྱུར་བ་གང་ཡིན་པ་ཞེས་ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་ཏུ་གསུངས་པའི་ཕྱིར་རོ། །
འོ་ན་སྐྱེ་མཆེད་དྲུག་གི་ཚོགས་ཀྱི་མདོ་ལས། ཟག་པ་དང་བཅས་པའི་ཆོས་རྣམས་གང་ཞེ་ན། མིག་ཇི་སྙེད་པ་དང་གཟུགས་རྣམས་ཇི་སྙེད་པ་དང་མིག་གི་རྣམ་པར་ཤེས་པ་ཇི་སྙེད་པ་དང་ཞེས་པ་ནས་ལུས་ཇི་སྙེད་པ་དང་རེག་བྱ་རྣམས་ཇི་སྙེད་པ་དང་ལུས་ཀྱི་རྣམ་པར་ཤེས་པ་ཇི་སྙེད་པའོ་ཞེས་བྱ་བའི་བར་དུ་ཁམས་བཅོ་ལྔ་པོ་ཐམས་ཅད་ཟག་བཅས་ཁོ་ནར་གསུངས་པ་དང་འགལ་ལོ་ཞེ་ན། དཔེས་སྟོན་པ་ན་རེ་དེ་ནི་ཤིན་ཏུ་སྦྱངས་པའི་རེག་བྱ་དང་ལུས་ཤེས་མ་གཏོགས་པའི་རེག་བྱ་དང་ལུས་ཤེས་གཞན་ལ་དགོངས་ནས་གསུངས་པའི་ཕྱིར་ཉེས་པ་མེད་དོ་ཞེས་ཟེར་རོ། །བསམ་གཏན་གཉིས་པའི་ཡན་ལག་ནང་རབ་ཏུ་དང་བ་ནི་རྒྱུ་བསམ་གཏན་དང་པོའི་རྟོག་དཔྱོད་ཀྱི་འཁྲུག་པ་དང་བྲལ་ཞིང་དང་པོས་འདོད་པ་ལས་ངེས་པར་འབྱུང་བར་མ་ཟད་འདིས་མཉམ་གཞག་གི་ས་དང་པོ་ལས་ཀྱང་ངེས་པར་འབྱུང་བས་དེ་ལ་ཡིད་ཆེས་པའི་དད་པ་ཡིན་ནོ། །
འདིར་སྐལ་ལྡན་ཁྱད་པར་ཅན་ན་རེ་སེམས་གྱི་གནས་སྐབས་རྟོག་དཔྱོད་ཞི་བ་ཙམ་ནང་རབ་ཏུ་དང་བ་ཡིན་ལ། དེ་བཞིན་དུ་རྟོག་དཔྱོད་དང་ཏིང་ངེ་འཛིན་ལ་སོགས་པའང་སེམས་ལས་རྫས་གཞན་མ་ཡིན་གྱི་སེམས་ཀྱི་གནས་སྐབས་ལ་བཏགས་པ་ཡིན་ནོ་ཞེས་ཟེར་བ་ནི་མི་རིགས་ཏེ། དེ་དག་རྒྱུ་འབྲས་ཡིན་པས་རྫས་ཐ་དད་པའི་ཕྱིར་རོ། །ཡང་གལ་ཏེ་བསམ་གཏན་སྔ་མ་གཉིས་ཀྱིས་དགའ་བ་ཡིད་བདེར་འདོད་པ་ནི་མི་རིགས་ཏེ། སྡེ་པ་གཞན་དག་དགའ་བ་སེམས་བྱུང་གི་ཆོས་གཞན་(ཡིད་གྱི་ས་པ་ཁོ་ན་)ཡིན་ལ་ཡིད་བདེ་བསམ་གཏན་གསུམ་ཆར་གྱིའང་བདེ་བར་འདོད་པ་ལྟར་བསམ་གཏན་གསུམ་ཆར་གྱི་བདེ་བ་ནི་དགའ་བ་ལས་གཞན་པའི་ཡིད་བདེ་ཡིན་ནོ་ཞེ་ན། བསམ་གཏན་སྔ་མ་གཉིས་ན་ནི་དགའ་བ་ལས་འདོད་ཆགས་དང་མ་བྲལ་བས་ཉེ་བར་མ་ཞི་བས་དགའ་བ་ཁོ་ན་ཡིད་བདེ་བ་ཡིན་ལ། གསུམ་པ་ནི་དགའ་བ་ལས་འདོད་ཆགས་དང་བྲལ་བས་ཉེ་བར་ཞི་བས་སེམས་བདེ་ཁོ་ན་ཡིན་གྱི་ཡིད་བདེ་ནི་མ་ཡིན་ཏེ། བསམ་གཏན་ཡན་ལག་ལས་ངེས་འབྱུང་ཡིན་པས་རྣམ་པར་བསྒྱུར་བའི་མདོ་ལས་བསམ་གཏན་གསུམ་པ་བཀའ་སྩལ་ནས། འདིར་འདིའི་ཡིད་བདེ་བའི་དབང་པོ་སྐྱེས་པ་མ་ལུས་པར་འགག་པར་འགྱུར་རོ་ཞེས་པ་དང༌། བསམ་གཏན་བཞི་པ་ལ་ནི་བདེ་བའི་དབང་པོ་འགག་པར་འགྱུར་རོ་ཞེས་པ་དང༌། བསམ་གཏན་གྱི་ཡན་ལག་སྟོན་པའི་མདོ་ལས། དེ་འདོད་པས་དབེན་སྡིག་ཏོ་མི་དགེ་བའི་ཆོས་ཀྱིས་དབེན་པ་རྟོག་པ་དང་བཅས་ཤིང་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་སོ། །
དེ་རྣམ་པར་རྟོག་པ་དང་རྣམ་པར་དཔྱོད་པ་ཉེ་བར་ཞི་ནས་ནང་ཡོངས་སུ་དང་སྟེ་སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ་དཔྱོད་པ་མེད་པ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ། །དེ་དགའ་བ་ལས་འདོད་ཆགས་དང་བྲལ་བས་དྲན་པ་དང་ལྡན་ཞིང་ཤེས་བཞིན་དུ་བཏང་སྙོམས་ལ་གནས་ཏེ། བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་དེ་ལ་དྲན་པ་དང་ལྡན་པ་བདེ་བ་ལ་རྣམ་པར་སྤྱོད་པ་བཏང་སྙོམས་པའི་ཞེས་བརྗོད་པ་སྟེ་དགའ་བ་མེད་པའི་བསམ་གཏན་གསུམ་པ་ཉེ་བར་བསྒྲུབས་ཏེ་གནས་སོ། །དེ་བདེ་བ་ཡང་སྤངས་སྡུག་བསྔལ་བ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་སྔ་ནས་ཀྱང་ནུབ་པས་བདེ་བ་ཡང་མེད་སྡུག་བསྔལ་བ་ཡང་མེད་པ་བཏང་སྙོམས་དང་དྲན་པས་ཡོངས་སུ་དག་པའི་བསམ་གཏན་བཞི་པ་ཉེ་བར་བསྒྲུབས་ཏེ་གནས་སོ་ཞེས་ལུང་རྣམ་པ་གཉིས་ལས་གསུམ་པར་ཡིད་བདེ་འགག་ཅིང་བཞི་པར་བདེ་བ་དེ་མ་ཐག་(པ་སེམས་བདེ་)དང་ཡིད་བདེ་ནི་སྔ་མ་(བསམ་གཏན་)གསུམ་པ་ནས་སྤངས་པར་གསུངས་པའི་ཕྱིར་རོ།། (དགའ་བདེ་གཉིས་ཚོར་བ་བདེ་བར་འདྲ་ཡང་དགའ་བས་སེམས་མ་ཞི་བར་བྱེད་ལ། ཞི་བར་གྱུར་པའི་ཚེ་ས་གཞན་ཐོབ་ན་དེའི་རིགས་ཅན་གྱི་ཚོར་བ་ལ་བདེ་བ་ཞེས་བརྗོད་དོ།།) དེས་ན་བསམ་གཏན་སྔ་མ་གཉིས་ཀྱིས་བདེ་བ་ནི་ཤིན་ཏུ་སྦྱངས་པ་དང་ཡིད་བདེ་ནི་དགའ་བ་ཡིན་ལ། གསུམ་པ་ལ་ནི་སེམས་ཀྱི་སིམ་པ་ཉིད་བདེ་བར་བཞག་གོ་ཞེས་བྱེ་བྲག་ཏུ་སྨྲ་བ་འདོད་ཅིང༌། ཁ་ཅིག་ཡིད་བདེ་ནི་ཡིད་དགའ་བ་ཡིན་ལ། བསམ་གཏན་ལ་བདེ་བ་ཡན་ལག་ཏུ་བཤད་པ་ནི་ལུས་བདེ་ཡིན་ཏེ། དེ་ཡང་ལུས་ཤིན་ཏུ་སྦྱངས་པ་ལས་སྐྱེས་པའི་བདེ་བ་ཡིན་པར་འདོད་ལ། བཞི་པ་ལ་ནི་དེ་ཡང་སྤང་པར་འདོད་དོ། །
ཅི་ཉོན་མོངས་ཅན་གྱི་བསམ་གཏན་ལའང་སྔར་བཤད་པའི་ཡན་ལག་དེ་དག་ཡོད་དམ་ཞེ་ན། ཁ་ཅིག་ཡོད་ལ་ཁ་ཅིག་མེད་དེ།
རྩ་བ། ཉོན་མོངས་ཅན་ལ་དགའ་བདེ་དང༌། །
རབ་དང་ཤེས་བཞིན་དྲན་པ་དང༌། །
བཏང་སྙོམས་དྲན་པ་དག་པ་མེད། །
ཁ་ཅིག་ཤིན་ཏུ་སྦྱངས་བཏང་སྙོམས། །
འདི་ལྟར་ཉོན་མོངས་པ་ཅན་གྱི་བསམ་གཏན་དང་པོ་ལ་ནི་དེའི་ས་པའི་ཉོན་མོངས་ལས་དབེན་པ་མ་ཡིན་(ཞིང་དེ་དང་མཚུངས་པར་ལྡན་)པས་དབེན་པ་ལས་སྐྱེས་པའི་དགའ་བ་དང་བདེ་བ་མེད་ཅིང༌། གཉིས་པ་ལ་ནི་དེའི་ས་པའི་ཉོན་མོངས་པས་བརྙོགས་པས་རབ་ཏུ་མ་དང་བས་ནང་རུབ་ཏུ་དང་བ་མེད་ལ། གསུམ་པ་ལ་ནི་ཉོན་མོངས་ཅན་གྱི་བདེ་བས་ཀུན་ཏུ་རྨོངས་ཤིང་བསླད་པས་ཤེས་བཞིན་དང་དྲན་པ་མེད་ཅིང༌། (དགེ་བའི་ས་མང་པོ་པ་ཡིན་པས་བཏང་སྙོམས་ཀྱང་མེད་དོ།།) བཞི་པ་ལ་ནི་དེའི་ས་པའི་ཉོན་མོངས་པས་དྲི་མ་ཅན་དུ་བྱས་པས་བཏང་སྙོམས་དང་དྲན་པ་ཡོངས་སུ་དག་པ་མེད་དོ། །གྲུབ་མཐའ་འཛིན་པ་ཁ་ཅིག་ན་རེ་ཉོན་མོངས་ཅན་གྱི་བསམ་གཏན་དང་པོ་དང་གཉིས་པ་ན་ནི་ཤིན་ཏུ་སྦྱངས་པ་མེད་ལ། གསུམ་པ་དང་བཞི་པ་ན་ནི་འདུ་བྱེད་བཏང་སྙོམས་མེད་དེ། དེ་དག་ནི་ཉོན་མོངས་ཅན་ཡིན་ལ་ཤིན་ཏུ་སྦྱངས་པ་དང་བཏང་སྙོམས་ནི་དགེ་བའི་ས་མང་པོ་བ་ཡིན་པའི་ཕྱིར་རོ་ཞེས་ཟེར་རོ། །དེས་ན་དགའ་བ་ནི་འདོད་པས་དབེན་པ་ལས་སྐྱེས་པའི་དགའ་བ་དང༌། ནང་རབ་ཏུ་དང་བ་ནི་རྟོག་དཔྱོད་ཞི་བ་དང༌། དྲན་པ་དང་ཤེས་བཞིན་ནི་དམིགས་པ་མ་བརྗེད་པ་དང་ཤེས་རབ་ཙམ་ལ་འདོད་པའི་ཕྱིར་ཉོན་མོངས་ཅན་ལའང་ཡོད་དོ་ཞེས་བྱ་བར་འདོད་དོ། །
འོ་ན་ལུགས་སྔ་མ་ལྟར་ན་(གཉིས་པའི་)ཤིན་ཏུ་སྦྱངས་པ་དང་(གསུམ་པའི་)བཏང་སྙོམས་ཡོད་དམ་མེད་ཅེ་ན། ཁ་ཅིག་ན་རེ་དེ་དག་དགེ་བ་ཡིན་པས་དངོས་སུ་མེད་པར་མ་བཤད་ཀྱང་མེད་པར་གྲུབ་བོ་ཞེས་ཟེར་རོ། །ཁ་ཅིག་ན་རེ་དེ་དག་མེད་པར་མ་བཤད་པས་ཡོད་དོ་ཞེས་(གཉིས་པའི་ཤིན་ཏུ་སྦྱངས་པ་དང༌། གསུམ་པའི་བཏང་སྙོམས་ཁ་ཅིག་དེ་གཉིས་དགེ་བ་ཡིན་པས་མེད་པར་འདོད་ལ་ཁ་ཅིག་མེད་པར་མ་བཤད་པས་ཡོད་པར་འདོད་དོ་)ཟེར་རོ། །
རྩ་བ། སྐྱོན་བརྒྱད་ལས་ནི་གྲོལ་བའི་ཕྱིར། །
བཞི་པ་གཡོ་བ་མེད་པ་ཡིན། །
རྟོག་དང་དཔྱོད་དང་དབུགས་དག་དང༌། །
བདེ་བ་ལ་སོགས་བཞི་ཡིན་ནོ། །
གཞན་ཡང་བཅོམ་ལྡན་འདས་ཀྱིས་ལུང་བར་མ་ལས་བསམ་གཏན་དང་པོ་གསུམ་ནི་སྐྱོན་དང་བཅས་པའི་ཕྱིར་གཡོ་བ་དང་བཅས་པ་དག་ཡིན་ནོ་ཞེས་གསུངས་པས་བསམ་གཏན་བཞི་པ་ནི་གཡོ་བ་མེད་པ་ཡིན་ཏེ། འོག་སའི་སྐྱོན་བརྒྱད་ལས་གྲོལ་བའི་ཕྱིར་རོ། །དེ་ལ་སྐྱོན་བརྒྱད་ནི་རྟོག་པ་དང་དཔྱོད་པ་གཉིས་དང་དབུགས་རྔུབ་པ་དང་འབྱུང་བ་དག་སྟེ་གཉིས་དང་བདེ་བ་དང༌། སོགས་པས་གཟུང་བ་སྡུག་བསྔལ་དང༌། ཡིད་བདེ་དང་ཡིད་མི་བདེ་དང་བཞི་སྟེ་བརྒྱད་ཡིན་ནོ། །གཞན་དག་ན་རེ་བསམ་གཏན་དང་པོ་ནི་རྟོག་དཔྱོད་དང་གཉིས་པ་ནི་དགའ་བ་དང༌། གསུམ་ནི་བདེ་བས་གཡོ་བས་སྐྱོན་དང་བཅས་ལ་བཞི་པ་ནི་དེ་དག་དང་བྲལ་བས་མི་གཡོ་བ་ཡིན་ཏེ། ལུ་ཧི་ཏའི་མདོ་ལས། བསམ་གཏན་བཞི་པ་ནི་དཔེར་ན་རླུང་མེད་པའི་མར་མེ་རླུང་གིས་མི་གཡོ་བ་དེ་དང་འདྲའོ་ཞེས་རླུང་མེད་པའི་མར་མེ་དཔེར་མཛད་ནས་གསུངས་པའི་ཕྱིར་རོ་ཞེས་ཟེར་རོ། །
རྩ་བ། སྐྱེ་བའི་བསམ་གཏན་དག་ན་ནི། །
ཡིད་བདེ་བདེ་དང་བཏང་སྙོམས་དང༌། །
བཏང་སྙོམས་ཡིད་བདེ་བདེ་བ་དང༌། །
བཏང་སྙོམས་བཏང་སྙོམས་ཚོར་བ་ཡོད། །
འོ་ན་སྔ་མ་གཉིས་ན་ཡིད་བདེ་དང་གསུམ་པ་ན་བདེ་བ་དང༌། བཞི་པ་ན་བཏང་སྙོམས་ཁོ་ན་ཡོད་པར་བཤད་ན་ཅི་རྒྱུ་སྙོམས་འཇུག་བསམ་གཏན་དང་པོ་ན་བདེ་བ་དང་གཉིས་པ་ན་ཡོད་པའི་ཚོར་བ་ཡིད་བདེ་དང་གསུམ་པ་ན་བདེ་བ་དང་བཞི་པ་ན་ཡོད་པའི་བཏང་སྙོམས་དེ་དག་འབྲས་བུ་སྐྱེ་བ་ནའང་ཡོད་དམ་ཞེ་ན། བཞི་པ་ན་དེ་ལྟ་ཡིན་མོད་ཀྱི་གཞན་ན་ནི་དེ་ལྟ་མ་ཡིན་ཏེ། སྐྱེ་བའི་བསམ་གཏན་བཞི་པོ་དག་ལས་བསམ་གཏན་དང་པོ་ན་ནི་ཡིད་ཀྱི་ས་པའི་ཡིད་བདེ་དང་མིག་རྣ་ལུས་ཀྱི་རྣམ་ཤེས་གསུམ་དང་མཚུངས་ལྡན་གྱི་བདེ་བ་དང་རྣམ་ཤེས་བཞི་ཆར་གྱི་བཏང་སྙོམས་དང༌། གཉིས་པ་ན་ནི་རྣམ་ཤེས་གཞན་མེད་པས་ཡིད་ཀྱི་ས་པ་ཁོ་ནའི་བཏང་སྙོམས་དང་ཡིད་བདེ་དང༌། གསུམ་པ་ན་ནི་ཡིད་ཀྱི་ས་པའི་སེམས་ཀྱི་བདེ་བ་དང་བཏང་སྙོམས་དང༌། བཞི་པ་ན་ནི་ཡིད་ཀྱི་ས་པའི་བཏང་སྙོམས་ཀྱི་ཚོར་བ་ཁོ་ན་ཡོད་དོ། །གལ་ཏེ་བསམ་གཏན་གཉིས་པ་ལ་སོགས་པ་ན་མིག་ཤེས་ལ་སོགས་པ་གསུམ་དང་རྟོག་དཔྱོད་མེད་ན་གཟུགས་དང་སྒྲ་དང་རེག་བྱ་འཇིན་པ་དང་ལུས་ངག་གི་རྣམ་པར་རིག་བྱེད་སློང་བར་ཇི་ལྟར་འགྱུར་ཞེ་ན། གཉིས་པ་ལ་སོགས་པར་སྐྱེས་པ་རྣམས་ལ་མིག་ཤེས་ལ་སོགས་པ་དེ་དག་མེད་པའང་མ་ཡིན་ལ་རང་གི་ས་པའང་མ་ཡིན་ནོ། །
འོ་ན་ཇི་ལྟ་བུ་ཞེ་ན།
རྩ་བ། གཉིས་པ་སོགས་ན་ལུས་མིག་དང༌། །
རྣ་བའི་རྣམ་ཤེས་རྣམ་རིག་སློང༌། །
གང་ཡིན་དེ་ནི་དང་པོར་གཏོགས། །
དེ་ལུང་མ་བསྟན་ཉོན་མོངས་མིན། །
བསམ་གཏན་གཉིས་པ་ལ་སོགས་པ་ས་གོང་མ་གསུམ་པོ་དག་ན་ལུས་དང་མིག་དང་རྣ་བའི་རྣམ་ཤེས་གསུམ་དང་ལུས་དང་ངག་གི་རྣམ་པར་རིག་བྱེད་ཀུན་སློང་རྟོག་དཔྱོད་ལ་ངེས་པར་ལྟོས་ཤིང་རང་ས་ན་དེ་མེད་པས་ཀུན་ནས་སློང་བར་བྱེད་པའི་རྟོག་དཔྱོད་གང་ཡིན་པ་དེ་ནི་བསམ་གཏན་དང་པོའི་སར་གཏོགས་པ་ཡིན་ཏེ་དཔེར་ན་ས་གོང་མ་པ་དག་འོག་སའི་སྤྲུལ་པ་སྤྲུལ་པར་འདོད་པ་ན་འོག་སའི་སྤྲུལ་སེམས་གོང་མའི་རྟེན་ལ་མངོན་དུ་བྱེད་པ་བཞིན་ནོ་ཞེས་བྱེ་བྲག་ཏུ་སྨྲ་བ་འདོད་ལ། (དེས་ནས་དེས་བསྡུས་པ་མེད་ཀྱི་རྟེན་དེ་ལ་ཡོད་ལ། དེས་བསླང་བའི་ཆོས་དེ་དག་ཀྱང་དང་པོའི་ས་པ་དང་མ་བསྒྲིབས་ལུང་མ་བསྟན་ཡིན་ནོ་གསུང་ངོ༌།།) དེ་ཡང་གོང་སར་མངོན་དུ་བྱེད་པའི་མིག་ལ་སོགས་པའི་རྣམ་ཤེས་དང་རྟོག་དཔྱོད་གང་ཡིན་པ་དེ་ནི་མ་བསྒྲིབས་ལུང་མ་བསྟན་ཡིན་གྱི་དེ་དག་མི་དགོས་པའི་དམན་པ་ཡིན་པའི་ཕྱིར་དགེ་བ་མ་ཡིན་པའམ། ཡང་ན་དང་པོའི་དགེ་བ་ནི་རྣམ་སྨིན་དང་བཅས་པ་ཡིན་ན་དང་པོའི་རྣམ་སྨིན་ནི་གཉིས་པ་ལ་སོགས་པ་དོན་དུ་མི་གཉེར་བས་དེའི་རྒྱུ་དགེ་བའི་སེམས་མངོན་དུ་བྱ་བ་ལ་འབད་པ་མི་བྱེད་དོ་ཞེས་རྒྱལ་པོའི་སྲས་འཆད་དོ། །འོག་ས་ལས་འདོད་ཆགས་དང་བྲལ་(ཞིང་དང་པོའི་དེ་དག་སྤངས་)བའི་ཕྱིར་ཉོན་མོངས་ཅན་ཡང་མིན་ཏེ་སྤྲུལ་པའི་སེམས་བཞིན་ནོ། །བསམ་གཏན་དང་པོའི་ལུང་མ་བསྟན་དེ་དག་ནི་དམན་པ་ཡིན་ཡང་(མཐོང་ཐོས་སོགས་ལ་)དགོས་པའི་ཕྱིར་མངོན་དུ་བྱེད་ཀྱི་དེ་ཡང་གུས་པས་ནི་མ་ཡིན་ནོ། །དཔེས་སྟོན་པ་ལ་སོགས་པའི་བསམ་གཏན་ཕྱི་མ་གསུམ་ནའང་རྣམ་ཤེས་ཚོགས་གསུམ་ག་ཡོད་པར་འདོད་དོ། །
བཞི་པ་འཐོབ་ཚུལ་ལ་གསུམ་ལས་དང་པོ་དག་པ་བ་ནི།
རྩ་བ། དེ་དང་མི་ལྡན་འདོད་ཆགས་བྲལ། །
སྐྱེ་བ་ལས་ནི་དག་པ་འཐོབ། །
ཟག་མེད་འདོད་ཆགས་བྲལ་བ་ཡིས། །
ཉོན་མོངས་ཅན་ཉམས་སྐྱེ་བ་ཡིས། །
འོག་ས་ལས་འདོད་ཆགས་དང་བྲལ་བ་དང༌། གོང་ནས་འོག་ཏུ་སྐྱེ་བ་དང༌། སྦྱོར་བ་དང༌། ཆགས་བྲལ་ལས་ཉམས་པ་བཞིས་འཐོབ་པ་ལས་དག་པ་བ་དེ་དང་སྔར་གཏན་མི་ལྡན་པ་ནི་འོག་ས་ལས་འདོད་ཆགས་དང་བྲལ་བའམ། སྲིད་རྩེ་མ་གཏོགས་པ་གོང་ས་ནས་འོག་སར་སྐྱེ་བ་ལས་ནི་ངེས་འབྱེད་ཆ་མཐུན་གྱི་དག་པ་བ་མ་གཏོགས་པ་གསུམ་འཐོབ་ཀྱི། སྲིད་རྩེ་ནི་དེ་བས་མཐོ་བའི་ས་མེད་ཅིང་འོག་ས་ནས་དེར་སྐྱེ་བ་ན་(རྒྱུ་སྙོམས་འཇུག་)དེ་སྔར་ནས་ལྡན་པ་སྐྱེ་བས་གསར་འཐོབ་མེད་པས་འོག་ས་ལས་འདོད་ཆགས་དང་བྲལ་བ་ཁོ་ནས་འཐོབ་ཀྱི་སྐྱེ་བས་འཐོབ་པ་མེད་དོ།། (འདོད་ཆགས་དང་བྲལ་བས་འཐོབ་པ་དེ་ཡང་ངེས་འབྱེད་ཆ་མཐུན་མ་གཏོགས་སོ།།) དེ་ཡང་སྔར་མི་ལྡན་པའི་དབང་དུ་བྱས་ཀྱི་དག་པ་བ་དང་སྔར་ནས་ལྡན་པ་ནི་ངེས་འབྱེད་ཆ་མཐུན་གྱི་བསམ་གཏན་དག་པ་པ་ཆགས་བྲལ་དང་སྐྱེ་བས་མི་འཐོབ་ཀྱི་སྦྱོར་བས་འཐོབ་ལ། གནས་པ་ཆ་མཐུན་ལས་ཉམས་ན་ཉམས་པའི་ཆ་མཐུན་དང༌། བསམ་གཏན་དང་པོ་ལས་འདོད་ཆགས་དང་བྲལ་བ་ལས་ཉམས་པ་ལས་དང་པོའི་ཉམས་པའི་ཆ་མཐུན་འཐོབ་པ་ལྟ་བུ་ཉམས་པ་ལས་ཀྱང་འཐོབ་བོ། །
དེ་ཉིད་ཀྱི་ཕྱིར་བསྟན་བཅོས་ལས། བསམ་གཏན་དག་པ་པ་འདོད་ཆགས་དང་བྲལ་བས་འཐོབ་པར་འགྱུར་ལ། འདོད་ཆགས་དང་བྲལ་བས་འདོར་བར་འགྱུར་བ་དང༌། དེ་བཞིན་དུ་ཡོངས་སུ་ཉམས་པ་དང་སྐྱེ་བ་ལས་འཐོབ་པ་དང་འདོར་བར་འགྱུར་བ་ཡོད་དམ་ཞེ་ན། ཡོད་དེ། བསམ་གཏན་དང་པོ་ཉམས་པའི་ཆ་དང་མཐུན་པའོ། །དེ་ནི་འདོད་པ་ལས་འདོད་ཆགས་དང་བྲལ་བས་འཐོབ་ལ། ཚངས་པའི་འཇིག་རྟེན་ལས་འདོད་ཆགས་དང་བྲལ་བས་འདོར་རོ།། ཚངས་པའི་འཇིག་རྟེན་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པ་ལས་འཐོབ་ལ། འདོད་པ་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པ་ལས་འདོར་རོ། །གོང་ནས་ཚངས་པའི་འཇིག་རྟེན་དུ་སྐྱེ་བ་ན་འཐོབ་ལ། དེ་ནས་འདོད་པའི་ཁམས་སུ་སྐྱེ་བ་ན་འདོར་རོ་ཞེས་འབྱུང་ངོ༌། །ཚངས་པའི་འཇིག་རྟེན་ནི་བསམ་གཏན་དང་པོའོ། །དེས་ན་བསམ་གཏན་དང་པོ་ལས་འདོད་ཆགས་དང་བྲལ་བས་ནི་དང་པོའི་ཉམས་པའི་ཆ་མཐུན་འདོར་ཏེ། དང་པོའི་ཉོན་མོངས་དང་མཐུན་པའི་ཕྱིར་དང་པོའི་ཉོན་མོངས་བཞིན་ནོ། །
གཉིས་པ་(བསམ་གཏན་གཟུགས་མེད་ཀྱི་)སྙོམས་འཇུག་ཟག་མེད་ནི་རྒྱུ་བཞི་པོ་དེ་དག་ལས་སྔར་མི་ལྡན་པ་ལས་ནི་འདོད་ཆགས་དང་བྲལ་བ་ཡིས་འཐོབ་ཅིང་(དེ་ཡང་ལམ་ནི་ཟག་བཅས་ཟག་མེད་གང་གིས་བྲལ་ཡང་རུང་ངོ༌། །དེ་ནི་ཕྱིར་མི་འོང་ཁོ་ན་སྟེ། འབྲས་བུ་དང་པོ་གཉིས་ནི་དངོས་གཞིས་མ་བསྡུས་བས་སོ། །དེ་དག་)སྔར་ནས་ཟག་མེད་དང་ལྡན་པ་ནི་སྦྱོར་བའི་སྟོབས་ཀྱིས་ཟད་ཤེས་ལས་ཀྱང་མི་སློབ་པ་དངོས་གཞིས་བསྡུས་པ་འཐོབ་ལ། དབང་པོ་རྟུལ་པོ་རྣོན་པོར་འཕོས་ན་རྣོན་པོས་བསྡུས་པའི་སློབ་པ་དང་མི་སློབ་པ་འཐོབ་བོ། །ཕྱིར་མི་འོང་ཆགས་བྲལ་སྔོན་འགྲོས་བསམ་གཏན་གྱི་དངོས་གཞི་ལ་བརྟེན་ནས་ངེས་པ་ལ་འཇུག་པ་ལས་ཀྱང་ཟག་མེད་ཀྱི་བསམ་གཏན་དངོས་གཞི་འཐོབ་ཀྱང་མཐར་གྱིས་པ་མི་ལྕོགས་མེད་ཁོ་ན་ལ་བརྟེན་ནས་ངེས་པ་ལ་འཇུག་ན་དངོས་གཞི་མི་ཐོབ་པས་ཐམས་ཅད་ཀྱིས་འཐོབ་པར་མ་ངེས་པས་ངེས་པ་ལ་འཇུག་པས་འཐོབ་པ་མ་བཤད་ཅིང༌། མི་སློབ་པ་ཉམས་ན་སློབ་པས་བསྡུས་པའི་སྙོམས་འཇུག་དངོས་གཞི་འཐོབ་ཀྱང་སྙོམས་འཇུག་ཟག་མེད་ཀྱི་རིགས་ཙམ་སྔར་ནས་ལྡན་པས་གསར་ཐོབ་མེད་པས་ཉམས་པས་འཐོབ་པའང་མ་བཤད་ལ། (ས་དེ་དག་ཏུ་སྐྱེས་པའི་བྱིས་པའང་ཟག་མེད་དང་ལྡན་པར་ཐལ་བས་)ཟག་མེད་ལ་སྐྱེ་བས་འཐོབ་པ་ནི་མེད་དོ། །
གསུམ་པ་སྙོམས་འཇུག་ཉོན་མོངས་ཅན་ནི་སྔར་དེ་དང་མི་ལྡན་པ་ལས་བསམ་གཏན་དང་པོ་ལས་འདོད་ཆགས་དང་བྲལ་བ་ལས་ཡོངས་སུ་ཉམས་ན་བསམ་གཏན་དང་པོ་ཉོན་མོངས་ཅན་འཐོབ་པ་ལྟ་བུ་ཡོངས་སུ་ཉམས་པས་འཐོབ་པ་དང་སྲིད་རྩེ་མ་གཏོགས་པ་བསམ་གཏན་གཉིས་པ་ཡན་ཆད་ནས་དང་པོ་སྐྱེས་ན་དང་པོའི་ཉོན་མོངས་ཅན་འཐོབ་པ་ལྟ་བུ་གོང་ས་ནས་འོག་སར་སྐྱེ་བ་ཡིས་འཐོབ་པ་གཉིས་ཡོད་ཀྱི་(འདི་འོག་ནས་གོང་དུ་སྐྱེ་བའམ་ཆགས་བྲལ་གྱིས་མི་འཐོབ་སྟེ་འདི་)སྔར་ནས་ལྡན་པས་སྦྱོར་བ་དང་འདོད་ཆགས་དང་བྲལ་བས་འཐོབ་པ་ནི་མེད་དོ། །
ལྔ་པ་ཁྱད་པར་གྱི་ཆོས་བཤད་པ་ནི་འོ་ན་སྙོམས་འཇུག་གི་རྫས་དེ་དག་གང་གི་མཇུག་ཏུ་དུ་ཞིག་སྐྱེ་ཞེ་ན།
རྩ་བ ཟག་པ་མེད་པའི་མཇུག་ཐོགས་སུ། །
ལྟག་འོག་གསུམ་པའི་བར་དགེ་བ། །
སྐྱེ་འོ་དག་པ་ལས་དེ་བཞིན། །
རང་གི་ས་པའི་ཉོན་མོངས་ཀྱང༌། །
ཉོན་མོངས་ཅན་ལས་རང་དག་དང༌། །
ཉོན་མོངས་འོག་མའི་དག་གཅིག་ཀྱང༌། །
ཟག་པ་མེད་པའི་བསམ་གཏན་དང་གཟུགས་མེད་པའི་མཇུག་ཐོགས་སུ་རང་ས་དང་(བཅས་ན་)ལྟག་གི་ས་གཉིས་ཏེ་ས་གསུམ་གྱི་བར་གྱི་དགེ་བ་(ཟག་བཅས་)ཟག་མེད་དང༌། (རང་དང་)འོག་མ་(གཉིས་ཏེ་ས་)གསུམ་པའི་བར་གྱི་དགེ་བ་ཟག་བཅས་ཟག་མེད་དག་སྐྱེའོ། །འདི་ཡང་སྤྱིར་བསྟན་པ་ཙམ་ཞིག་ཡིན་གྱི་ཐམས་ཅད་དུ་ནི་མ་ཡིན་ཏེ། བསམ་གཏན་དང་པོ་ཟག་པ་མེད་པའི་མཇུག་ཐོགས་སུ་འོག་མའི་སྙོམས་འཇུག་དག་པ་པ་དང་ཟག་མེད་སྐྱེ་བ་མེད་པའི་ཕྱིར་དང༌། ཅི་ཡང་མེད་པའི་སྐྱེ་མཆེད་ཟག་མེད་ཀྱི་མཇུག་ཐོགས་སུ་ཡང་གོང་མའི་ཟག་མེད་སྐྱེ་བ་མེད་པའི་ཕྱིར་རོ། །དེས་ན་ཟག་མེད་ཀྱི་བསམ་གཏན་དང་པོའི་མཇུག་ཐོགས་སུ་དྲུག་སྐྱེ་སྟེ། རྒྱུན་གྱི་ཚེ་རང་གི་ས་པའི་ཟག་མེད་དང༌། སྙོམས་འཇུག་ས་ལས་ལངས་པའི་ཚེ་རང་གི་ས་པའི་དག་པ་པ་དང༌། ཟག་བཅས་དང་སྤེལ་ནས་ལུགས་བཞིན་སྙོམས་པར་འཇུག་པའི་ཚེ་བསམ་གཏན་གཉིས་པའི་དག་པ་པ་དང༌། ཟག་བཅས་དང་མ་སྤེལ་བར་ལུགས་བཞིན་སྙོམས་པར་འཇུག་པ་དང་ཐོད་རྒལ་གྱི་སྦྱོར་བའི་ཚེ་མ་སྤེལ་བར་ལུགས་དང་མཐུན་པར་སྙོམས་པར་འཇུག་པ་ན་བསམ་གཏན་གཉིས་པའི་ཟད་མེད་དང༌། སྤེལ་ནས་རིས་མི་མཐུན་པ་གསུམ་པར་འགྲོ་བའི་ཚེ་ཐོད་རྒལ་དངོས་བསམ་གཏན་གསུམ་པའི་དག་པ་པ་དང༌། མ་སྤེལ་བར་གསུམ་པར་འགྲོ་བ་ན་ཉེ་བའི་སྦྱོར་བ་གསུམ་པའི་ཟག་མེད་སྐྱེ་བའི་ཕྱིར་རོ། །གོང་འོག་གི་བཞི་པ་ཕན་ཆད་ནི་སྐྱེ་བ་མི་སྲིད་དེ་ཤིན་ཏུ་རིང་བའི་ཕྱིར་དང༌། འདོད་པ་ན་ཟག་མེད་མི་སྲིད་པའི་ཕྱིར་དང༌། འདོད་པའི་དགེ་བ་ཙམ་སྐྱེ་ཡང་ས་སྙོམས་འཇུག་མ་ཡིན་པའི་ཕྱིར་རོ། །
བསམ་གཏན་གཉིས་པའི་ཟག་མེད་ཀྱི་མཇུག་ཐོགས་སུ་ནི་བརྒྱད་སྐྱེ་སྟེ། རྒྱུན་གྱི་ཚེ་དང༌། དེ་ལས་ལངས་པའི་ཚེ་རིམ་པ་ལྟར་རང་གི་ས་པའི་ཟག་མེད་དག་པ་པ་དང༌། མ་སྤེལ་བར་ལུགས་དང་མཐུན་པར་སྙོམས་པར་འཇུག་པའི་ཚེ་བསམ་གཏན་གསུམ་པའི་ཟག་མེད་དང༌། སྤེལ་ནས་ལུགས་དང་མཐུན་པར་སྙོམས་པར་འཇུག་པའི་ཚེ་བསམ་གཏན་གསུམ་པའི་དག་པ་པ་དང༌། མ་སྤེལ་བར་གསུམ་པར་འགྲོ་བ་ན་ཉེ་སྦྱོར་བཞི་པའི་ཟག་མེད་དང་སྤེལ་ན་ཐོད་རྒལ་དངོས་བཞི་པའི་དག་པ་པ་དང༌། ལུགས་དང་མི་མཐུན་པར་སྙོམས་པར་འཇུག་པའི་ཚེ་མ་སྤེལ་ན་དང་པོའི་ཟག་མེད་དང༌། སྤེལ་ན་དག་པ་པའང་སྐྱེ་བའི་ཕྱིར་རོ། །དེ་བཞིན་དུ་བསམ་གཏན་གསུམ་པའི་ཟག་མེད་ཀྱི་མཇུག་ཐོགས་སུ་བཅུ་འབྱུང་སྟེ། རང་སའི་གཉིས་དང༌། བཞི་པའི་གཉིས་དང༌། ནམ་མཁའ་མཐའ་ཡས་སྐྱེ་མཆེད་ཀྱི་གཉིས་དང༌། བསམ་གཏན་གཉིས་པའི་གཉིས་དང༌། ལུགས་དང་མི་མཐུན་པར་གསུམ་པར་འགྲོ་བ་ན་བསམ་གཏན་དང་པོའི་གཉིས་ཀྱང་འབྱུང་བའི་ཕྱིར་རོ། །དེ་བཞིན་དུ་བསམ་གཏན་བཞི་པ་དང༌། ནམ་མཁའ་མཐའ་ཡས་སྐྱེ་མཆེད་ཀྱི་མཇུག་ཏུ་བཅུ་བཅུ་འབྱུང་བའང་ཅི་རིགས་པར་ཤེས་པར་བྱའོ། །
རྣམ་ཤེས་མཐའ་ཡས་སྐྱེ་མཆེད་ཟག་མེད་ཀྱི་མཇུག་ཐོགས་སུ་ནི་དགུ་འབྱུང་སྟེ་རང་སའི་གཉིས་དང༌། ལུགས་དང་མཐུན་པར་སྙོམས་པར་འཇུག་པ་ན་ཅི་ཡང་མེད་པའི་སྐྱེ་མཆེད་ཀྱི་གཉིས་དང༌། ལུགས་དང་མཐུན་པར་རིས་མི་མཐུན་པ་གསུམ་པར་འགྲོ་བ་ན་སྙོམས་འཇུག་ལས་ལངས་པའི་ཚེ་སྲིད་རྩེའི་དག་པ་པ་ཁོ་ན་འབྱུང་སྟེ། དེ་ན་རྒྱུ་བ་ཞན་པས་ཟག་མེད་མེད་པའི་ཕྱིར་རོ། །ལུགས་དང་མི་མཐུན་པར་སྙོམས་པར་འཇུག་པ་ན་ནམ་མཁའ་མཐའ་ཡས་སྐྱེ་མཆེད་དང་བསམ་གཏན་བཞི་པའི་ས་པའི་དག་པ་པ་དང་ཟག་མེད་གཉིས་གཉིས་དང༌། ཅི་ཡང་མེད་པའི་སྐྱེ་མཆེད་ཀྱི་རྗེས་སུ་ནི་རང་ས་དང་འོག་ས་རྣམ་ཤེས་དང་ནམ་མཁའ་མཐའ་ཡས་སྐྱེ་མཆེད་ཀྱི་དག་པ་པ་དང༌། ཟག་མེད་གཉིས་གཉིས་དང༌། གོང་ས་སྲིད་རྩེའི་དག་པ་བ་ཁོ་ན་དང་བདུན་འབྱུང་ངོ༌། །དེ་ཡང་རྗེས་ཤེས་ཀྱི་མཇུག་ཐོགས་སུ་ནི་གཟུགས་མེད་ལ་སྙོམས་པར་འཇུག་གི་ཆོས་ཤེས་ཀྱི་མཇུག་ཐོགས་སུ་གཟུགས་མེད་ལ་སྙོམས་པར་མི་འཇུག་སྟེ། གཟུགས་མེད་འདོད་པ་ལ་མི་དམིགས་ཤིང༌། ཆོས་ཤེས་འདོད་པའི་རྟེན་ཅན་དང༌། འདོད་པའི་སྡུག་བསྔལ་ལ་སོགས་པ་ལ་དམིགས་པའི་ཕྱིར་རོ། །སྙོམས་འཇུག་དག་པ་པ་ལས་དག་པ་པ་དང་ཟག་མེད་སྐྱེ་བའང་དག་པ་པ་ཡི་མཇུག་ཐོགས་སུ། ལྟག་འོག་གསུམ་པའི་བར་དགེ་བ། །སྐྱེའོ་ཞེས་ཇི་ལྟར་ཟག་མེད་ལས་དུ་འབྱུང་བཤད་པ་དེ་བཞིན་དུ་རིག་པར་བྱའོ། །
འོན་ཀྱང་ཁྱད་པར་ནི་འདི་ཡོད་དེ། དག་པ་པ་ལས་ནི་སྔར་འབྱུང་བ་དེ་དག་གི་སྟེང་དུ་ལྷག་པར་སྙོམས་འཇུག་ཉོན་མོངས་ཅན་གྱིས་གཟིར་བའི་ཚེ་(འམ་རོ་མྱང་བ་ན་)རང་རང་གི་ས་པའི་ཉོན་མོངས་ཅན་གྱི་བསམ་གཏན་ཡང་འབྱུང་གི་ཟག་མེད་ཀྱི་མཇུག་ཐོགས་སུ་ནི་ཉོན་མོངས་ཅན་འབྱུང་བ་མེད་དོ། །སྙོམས་འཇུག་ཉོན་མོངས་ཅན་ལས་ནི་གལ་ཏེ་ཤེས་བཞིན་དང་དྲན་པས་ཟིན་ན་ལངས་པའི་ཚེ་རང་སའི་དག་པ་པ་དང༌། རྒྱུན་གྱི་ཚེ་རང་སའི་ཉོན་མོངས་ཅན་དང༌། དེ་དག་ཏུ་མ་ཟད་(རང་སའི་ཉོན་མོངས་)དེས་གཟིར་བ་ལས་འོག་མའི་དག་པ་པ་ལ་དགའ་བར་འགྱུར་བས་ལངས་པ་ན་ས་འོག་མའི་དག་པ་པ་(འམ་དགེ་བ་ཁ་)གཅིག་ཀྱང་འབྱུང་བར་འགྱུར་རོ། །གལ་ཏེ་བདག་གིས་བསམ་གཏན་འདི་ནི་ཉོན་མོངས་ཅན་ཞིག་སྟེ་དེ་བས་ནི་འོག་མ་བཟང་ངོ་ཞེས་རང་སའི་ཉོན་མོངས་ཅན་ལ་སྐྱོན་དུ་ཤེས་ནས་འོག་མར་འཕོ་ན་ནི་དགེ་བ་ལས་འཕོས་པ་ཡིན་ལ། འོན་ཏེ་ཉོན་མོངས་ཅན་དུ་མ་ཤེས་ན་ནི་དེ་ལས་ཇི་ལྟར་འོག་མའི་དགེ་བར་འཕོ་ཞེ་ན། དང་པོ་སྙོམས་པར་འཇུག་པ་ན་གོང་མའི་ཉོན་མོངས་ཅན་པས་ནི་འོག་མའི་དག་པ་པ་བཟང་བས་གོང་མའི་སེམས་ཉོན་མོངས་ཅན་དུ་གྱུར་ན་དེ་མ་ཐག་ཏུ་འོག་མའི་དག་པ་པ་ལ་གནས་པར་གྱུར་ཅིག་སྙམ་དུ་འཕངས་པའི་ཕྱིར་གོང་མའི་ཉོན་མོངས་ཅན་གྱི་མཇུག་ཐོགས་སུ་འོག་མའི་དག་པ་པ་འབྱུང་སྟེ་དཔེར་ན་དུས་འདི་ཙམ་ན་ལྡང་བར་བྱའོ་སྙམ་དུ་བསམས་ནས་གཉིད་ལོག་པ་འདོད་པའི་དུས་སུ་སད་པར་འགྱུར་བ་བཞིན་ནོ། །ཟག་མེད་ནི་ཉོན་མོངས་ཅན་གྱི་མཇུག་ཐོགས་སུ་རང་ས་དང་འོག་ས་པའང་རྣམ་པ་ཐམས་ཅད་དུ་མི་སྐྱེའོ། །
རྩ་བ། འཆི་འཕོའི་དག་ལས་ཉོན་མོངས་ཀུན། །
ཉོན་མོངས་ཅན་ལས་གོང་མ་མིན། །
དེ་ཡང་སྙོམས་པར་འཇུག་པའི་དུས་ཀྱི་དབང་དུ་བྱས་ནས་དག་པ་པ་དག་ཉོན་མོངས་ཅན་གྱི་མཇུག་ཏུ་རང་སའི་ཉོན་མོངས་ཅན་ཁོ་ན་སྐྱེའི་གཞན་སའི་ཉོན་མོངས་ཅན་མི་འབྱུང་ངོ་ཞེས་བཤད་ཀྱི་འཆི་འཕོ་བའི་ཚེ་ནི་སྐྱེ་བའི་བསམ་གཏན་དག་ན་སྐྱེས་ཐོབ་ཀྱི་དགེ་བ་མཉམ་གཞག་མ་ཡིན་པས་ཀྱང་བསམ་གཏན་དག་པ་པའི་མིང་ཐོབ་པས་སྙོམས་འཇུག་དག་པ་པ་ལས་ནི་རང་ས་དང་གོང་འོག་གིས་གང་དུ་སྐྱེ་བ་དེ་དག་ཐམས་ཅད་ཀྱི་ཉིང་མཚམས་སྦྱོར་སེམས་ཉོམ་མོངས་པ་ཅན་ཀུན་འབྱུང་བ་སྲིད་དེ། འདི་ལྟར་བསམ་གཏན་དང་པོ་པ་ལྟ་བུའི་དགེ་བ་སྐྱེས་ཐོབ་ལ་གནས་ཏེ་རང་ས་དང་གོང་འོག་ཐམས་ཅད་དུ་སྐྱེ་བ་སྲིད་ལ། སྐྱེ་བའི་སྲིད་པ་ཉོན་མོངས་ཅན་ཞེས་འབྱུང་བས་སྐྱེ་བའི་སེམས་ཅན་ཐམས་ཅད་ཉོན་མོངས་ཅན་དུ་ངེས་པའི་ཕྱིར་རོ། །དེ་ཡང་འཆི་འཕོའི་ཚེ་སྙོམས་འཇུག་ཉོན་མོངས་ཅན་ལས་ནི་རང་ས་དང་འོག་སའི་ཉོན་མོངས་ཅན་སྐྱེའི་ས་གོང་མའི་ཉོན་མོངས་ཅན་མི་འབྱུང་བས་གོང་མ་སྐྱེ་བ་མིན་ནོ། །འོག་སའི་ཉོན་མོངས་མ་སྤངས་པར་གོང་མར་མི་སྐྱེ་བས་ན་དེས་དེར་ཉིང་མཚམས་སྦྱོར་བ་འགལ་བའི་ཕྱིར་རོ། །
ཅི་སྙོམས་འཇུག་དག་པ་བ་ཐམས་ཅད་ཀྱི་མཇུག་ཐོགས་སུ་རང་ས་དང་གོང་འོག་གི་ཉོན་མོངས་ཅན་དང་དག་པ་པ་དང་ཟག་མེད་ཀྱི་སྙོམས་འཇུག་འབྱུང་ངམ་ཞེ་ན། མ་ཡིན་ཏེ།
རྩ་བ། དག་པ་ཉམས་པའི་ཆ་མཐུན་སོགས། །
རྣམ་བཞི་དེ་ནི་གོ་རིམས་བཞིན། །
ཉོན་མོངས་སྐྱེ་དང་རང་ས་དང༌། །
གོང་དང་ཟག་མེད་རྗེས་འཐུན་པ། །
སྲིད་རྩེ་མ་གཏོགས་པའི་སྙོམས་འཇུག་དག་པ་པ་དེ་དག་ནི་ཉམས་པའི་ཆ་དང་མཐུན་པ། སོགས་པས་བསྡུས་པ་གནས་པའི་ཆ་དང་མཐུན་པ་དང༌། ཁྱད་པར་གྱི་ཆ་དང་མཐུན་པ་དང༌། ངེས་པར་འབྱེད་པའི་ཆ་དང་མཐུན་པ་དང༌། རྣམ་པ་བཞི་བཞི་པ་ཡིན་ལ། སྲིད་རྩེ་ལ་ནི་གོང་ན་ས་གཞན་མེད་པས་ཁྱད་པར་གྱི་ཆ་མཐུན་མེད་པའི་ཕྱིར་གསུམ་ཡིན་ནོ།། (མཐོང་ལམ་དང་མཐུན་པའི་ངེས་འབྱེད་ཆ་མཐུན་ནི་གཟུཊ་མེད་ན་མེད་དོ།།) ཉམས་པའི་ཆ་མཐུན་ལ་སོགས་པ་དེ་དག་ནི་གོ་རིམ་བཞིན་དུ་ཉོན་མོངས་པ་སྐྱེ་བ་དང་རྗེས་སུ་མཐུན་པ་དང༌། (འཕེལ་འགྲིབ་མེད་པར་)རང་གི་ས་པ་དང་རྗེས་སུ་མཐུན་པ་དང༌། ས་གོང་མའི་སེམས་སྐྱེ་བ་དང་རྗེས་སུ་མཐུན་པ་དང༌། དེ་ལས་ཟག་མེད་སྐྱེ་བས་ཟག་མེད་ཀྱི་ལམ་སྐྱེ་བ་དང་རྗེས་སུ་མཐུན་པའོ། །དེ་ལ་རྗེས་སུ་མཐུན་པ་ཞེས་བྱ་བའང་དེ་དང་དེ་སྐྱེ་བ་ལ་ཕྱོགས་པ་ཙམ་ཡིན་གྱི་དངོས་སུ་སྐྱེས་པ་ནི་མ་ཡིན་ཏེ། ཐམས་ཅད་ཀྱང་དག་པ་པ་ཡིན་པའི་ཕྱིར་རོ། །འོན་ཀྱང་གནས་པའི་ཆ་དང་མཐུན་པ་ནི་སྐྱེས་པའི་ངོ་བོ་ཉིད་ཡིན་ནོ། །དེས་ན་ཟག་མེད་ཀྱི་བསམ་གཏན་གཟུགས་མེད་ནི་ངེས་འབྱེད་ཆ་མཐུན་གྱི་བསམ་གཏན་གཟུགས་མེད་དག་པ་པ་ལས་སྐྱེ་བ་ཡིན་ནོ། །
འོ་ན་ཉམས་པ་ཆ་མཐུན་ལ་སོགས་པ་བཞི་པོ་དེ་དག་གང་གི་མཇུག་ཐོགས་སུ་དུ་འབྱུང་ཞེ་ན།
རྩ་བ། ཉམས་ཆ་མཐུན་སོགས་མཇུག་ཐོགས་སུ། །
གཉིས་དང་གསུམ་དང་གསུམ་དང་གཅིག །
ཉམས་པའི་ཆ་མཐུན་གྱི་མཇུག་ཐོགས་སུ་རྒྱུན་གྱི་དུས་སུ་ཉམས་པའི་ཆ་མཐུན་རང་ཉིད་དང༌། ཁྱད་པར་དུ་འགྲོ་བའི་དུས་སུ་གནས་པའི་ཆ་མཐུན་ཏེ་གཉིས་གཉིས་དང༌། སོགས་པས་གཟུང་བ་གནས་པའི་ཆ་མཐུན་གྱི་མཇུག་ཐོགས་སུ་ངེས་འབྱེད་ཆ་མཐུན་མ་གཏོགས་པ་གསུམ་དང༌། ཁྱད་པར་ཆ་མཐུན་གྱི་མཇུག་ཐོགས་སུ་ཉམས་པའི་ཆ་མཐུན་མ་གཏོགས་པ་གསུམ་དང༌། (འདི་ལས་ཉམས་ཀྱང་གནས་པ་མ་བཏང་ན་དེ་ཉིད་སྐྱེར་རུང་བའི་ཕྱིར་རོ།།) ངེས་འབྱེད་ཆ་མཐུན་གྱི་མཇུག་ཐོགས་སུ་ཟག་མེད་འབྱུང་ཡང་དག་པ་པ་མ་ཡིན་པས་རྒྱུན་གྱི་ཚུལ་གྱིས་ངེས་འབྱེད་ཆ་མཐུན་དེ་གཅིག་པུ་འབྱུང་སྟེ། དེ་ལྟར་ན་རང་སའི་ཉོན་མོངས་པ་དང་དག་པ་པ་དང་གོང་སའི་དག་པ་པ་དང་ཟག་མེད་འབྱུང་བ་ནི་གོ་རིམ་བཞིན་དུ་ཉམས་པའི་ཆ་མཐུན་དང་གནས་པའི་ཆ་མཐུན་དང་ཁྱད་པར་གྱི་ཆ་མཐུན་དང་ངེས་འབྱེད་ཆ་མཐུན་ཁོ་ན་ཡིན་པར་ཤེས་པར་བྱའོ།། (ཟག་མེད་ལས་ལྡང་བའི་ཚེ་ཉམས་པའི་ཆ་མཐུན་མ་གཏོགས་པ་གང་རུང་མངོན་དུ་བྱེད་དོ་གསུང་ངོ༌།།)
འོ་ན་ཐོད་རྒལ་གྱི་སྙོམས་འཇུག་ཇི་ལྟར་སྐྱེད་ཅེ་ན།
རྩ་བ། ས་བརྒྱད་རྣམ་གཉིས་འབྲེལ་བ་དང༌། །
གཅིག་རྒལ་སོང་ཞིང་འོངས་ནས་ནི། །
རིགས་མི་མཐུན་པ་གསུམ་པར་འགྲོ །
ཐོད་རྒལ་གྱི་ནི་སྙོམས་འཇུག་ཡིན། །
དེ་ལ་བཞི་ལས་དང་པོ་གང་ལ་སྙོམས་འཇུག་བྱ་བའི་གཞི་ནི། བསམ་གཏན་བཞི་དང་གཟུགས་མེད་བཞི་སྟེ་ཟག་བཅས་ཀྱི་ས་བརྒྱད་དང་ཟག་མེད་ཀྱི་ས་བདུན་ཏེ་དེ་ལྟར་ཟག་བཅས་ཟག་མེད་རྣམ་པ་གཉིས་སོ། །གཉིས་པ་ཇི་ལྟར་སྙོམས་པར་འཇུག་པའི་ཚུལ་ལ་སྦྱོར་བ་དངོས་གཞི་གཉིས་ཀྱི་དང་པོ་ལའང་གཉིས་ལས་རིང་བའི་སྦྱོར་བ་ནི་འབྲེལ་བ་སྟེ་ཐོག་མར་ཟག་བཅས་ཀྱི་ས་བརྒྱད་དང་ཟག་མེད་ཀྱི་ས་བདུན་པ་དང་རིས་མ་བོར་བར་ལུགས་དང་མཐུན་པར་གོ་རིམ་བཞིན་དུ་སོང་ཞིང་ལུགས་དང་མི་མཐུན་པར་གོ་རིམ་བཞིན་དུ་འོངས་ནས་སྙོམས་པར་འཇུག་པ་དང༌། དེ་ནས་ཕྱིས་ཉེ་བའི་སྦྱོར་བ་ནི་ཟག་བཅས་སུ་རིས་མཐུན་པའི་བསམ་གཏན་དང་པོ་ནས་གསུམ་པ་དང༌། དེ་ནས་ནམ་མཁའ་མཐའ་ཡས་སྐྱེ་མཆེད་དང༌། དེ་ནས་ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པ་ས་རེ་རེ་རྒལ་ནས་ལུགས་དང་མཐུན་པར་ཡར་སོང་ཞིང༌། དེ་བཞིན་དུ་ཟག་བཅས་སུ་རིས་མཐུན་པའི་ཅི་ཡང་མེད་པའི་སྐྱེ་མཆེད་ནས་བསམ་གཏན་དང་པོའི་བར་དུ་ཡང་ས་རེ་རེ་རྒལ་ནས་ལུགས་དང་མི་མཐུན་པར་སྙོམས་པར་འཇུག་པས་མར་འོངས་པ་དང༌། དེ་བཞིན་དུ་ཟག་མེད་དུ་རིས་མཐུན་པའི་བསམ་གཏན་དང་པོ་ནས་གསུམ་པ་དང༌། དེ་ནས་ནམ་མཁའ་མཐའ་ཡས་སྐྱེ་མཆེད་དང༌། དེ་ནས་ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པ་ས་རེ་རེ་རྒལ་ནས་ལུགས་དང་མཐུན་པར་ཡར་སོང་ཞིང༌། དེ་བཞིན་དུ་ཟག་མེད་དུ་རིས་མཐུན་པའི་ཅི་ཡང་མེད་པའི་སྐྱེ་མཆེད་ནས་བསམ་གཏན་དང་པོའི་བར་དུའང་ས་རེ་རེ་རྒལ་ནས་ལུགས་དང་མི་མཐུན་པར་སྙོམས་པར་འཇུག་པས་མར་འོངས་པ་སྟེ། དེ་ལྟར་ཟག་བཅས་དང་ཟག་མེད་དུ་རིས་མཐུན་པའི་ས་གཅིག་སྟེ་རེ་རེ་རྒལ་ནས་ལུགས་དང་མཐུན་པར་ཡར་སོང་ཞིང་རིས་མཐུན་པའི་ས་རེ་རེ་རྒལ་ནས་ལུགས་དང་མི་མཐུན་པར་མར་འོངས་བའི་སྒོ་ནས་བྱང་བར་བྱས་ནས།
གཉིས་པ་དངོས་གཞི་ནི་གང་གི་ཚེ་ཟག་བཅས་ཀྱི་བསམ་གཏན་དང་པོ་ནས་ཟག་མེད་ཀྱི་བསམ་གཏན་གསུམ་པ་དང༌། དེ་ནས་ཟག་བཅས་ཀྱི་ནམ་མཁའ་མཐལ་ཡས་སྐྱེ་མཆེད་དང༌། དེ་ནས་ཟག་མེད་ཀྱི་ཅི་ཡང་མེད་པའི་སྐྱེ་མཆེད་ལ་ལུགས་དང་མཐུན་པར་ས་རེ་རེ་རྒལ་ཞིང་རིས་མི་མཐུན་པ་གསུམ་པ་ལ་སྙོམས་པར་འཇུག་པ་དང༌། དེ་བཞིན་དུ་ཟག་བཅས་གྱི་ཅི་ཡང་མེད་པའི་སྐྱེ་མཆེད་ནས་ཟག་མེད་ཀྱི་བསམ་གཏན་དང་པོའི་བར་དུ་ལུགས་དང་མི་མཐུན་པར་ས་རེ་རེ་རྒལ་ཞིང་རིས་མི་མཐུན་པ་གསུམ་པར་འགྲོ་བ་དང༌། དེ་བཞིན་དུ་ཟག་མེད་ཀྱི་བསམ་གཏན་དང་པོ་ནས་ཟག་བཅས་ཀྱི་ཅི་ཡང་མེད་པའི་སྐྱེ་མཆེད་ཀྱི་བར་དུ་ལུགས་དང་མཐུན་པར་ས་རེ་རེ་བརྒལ་ཞིང་རིས་མི་མཐུན་པ་གསུམ་པར་འགྲོ་བ་དང༌། དེ་བཞིན་དུ་ཟག་མེད་ཀྱི་ཅི་ཡང་མེད་པའི་སྐྱེ་མཆེད་ནས་ཟག་བཅས་ཀྱི་བསམ་གཏན་དང་པོའི་བར་དུ་ལུགས་དང་མི་མཐུན་པར་ས་རེ་རེ་བརྒལ་ཞིང་རིས་མི་མཐུན་པ་གསུམ་པར་འགྲོ་བ་སྟེ། དེ་ལྟར་ཟག་བཅས་སམ་ཟག་མེད་རིས་མི་མཐུན་པ་གསུམ་པར་འགྲོ་བ་སྟེ་སྤེལ་མར་སྙོམས་པར་འཇུག་ནུས་པ་དེའི་ཚེ་ཐོད་རྒལ་གྱི་སྙོམས་འཇུག་དངོས་གཞི་གྲུབ་པ་ཡིན་ནོ། །དེ་བཞིན་དུ་ཟག་བཅས་ཟག་མེད་ཀྱི་བསམ་གཏན་གཉིས་པ་ནས་སྲིད་རྩེའི་བར་དང༌། སྲིད་རྩེ་ནས་གཉིས་པའི་བར་དུ་ལུགས་དང་མཐུན་པ་དང་མི་མཐུན་པར་ས་རེ་རེ་བརྒལ་ནས་རིས་མི་མཐུན་པ་གསུམ་པར་འགྲོ་བའི་ཐོད་རྒལ་ལ་སོགས་པའང་སྦྱར་ཏེ་ཤེས་པར་བྱའོ། །
སྔར་བཤད་པ་ལྟར་ཤིན་དུ་རིང་བའི་ཕྱིར་བཞི་པ་ལ་ནི་སྙོམས་པར་མི་འཇུག་གོ །གསུམ་པ་རྟེན་ནི་དེ་ལྟ་བུའི་ཐོད་རྒལ་དེ་ཡང་བློ་གསལ་བས་གླིང་གསུམ་གྱི་སྐྱེས་པ་བུད་མེད་དང༌། བཞི་པ་གང་ཟག་ནི་མཐོང་ཐོབ་དབང་པོ་རྣོ་བས་ཏིང་ངེ་འཛིན་ལ་དབང་ཡང་ཉོན་མོངས་པ་མེད་པ་མ་ཡིན་ལ། དུས་ཀྱིས་རྣམ་གྲོལ་ཉོན་མོངས་པ་མེད་པ་ཡིན་ཡང་དབང་པོ་རྟུལ་བས་ཏིང་ངེ་འཛིན་ལ་དབང་བ་མ་ཡིན་པས་དུས་དང་མི་སྦྱོར་བར་རྣམ་པར་གྲོལ་བའི་དགྲ་བཅོམ་པ་མི་གཡོ་བ་(གཉིས་ཀའི་ཆ་ལས་རྣམ་གྲོལ་)ཁོ་ནས་སྐྱེད་པར་བྱེད་དེ། མི་སློབ་པ་ཡིན་པས་ཉོན་མོངས་པ་མེད་པའི་ཕྱིར་དང༌། དབང་པོ་རྣོ་ཞིང་བསམ་གཏན་དངོས་གཞི་ཐོབ་བས་ཏིང་ངེ་འཛིན་ལ་དབང་འབྱོར་བའི་ཕྱིར་རོ།། (ཏིང་ངེ་འཛིན་ནི་ཟག་པ་བཅས་མ་བཅས་གཉིས་ཀའོ།།) སངས་རྒྱས་རྣམས་ཀྱི་ཐོད་རྒལ་ཡང་ཚུལ་འདི་ཉིད་ཡིན་པར་སྡེ་པས་འདོད་ལ། ཤིན་ཏུ་རྒྱས་པའི་སྡེ་སྣོད་ལྟར་ན་ནི། མངོན་པར་རྟོགས་པའི་རྒྱན་ལས། འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོངས་ནས། །འདོད་པར་གཏོགས་པའི་རྣམ་པར་ཤེས། །མཉམ་གཞག་མིན་པའི་མཚམས་གཟུང་སྟེ། །གཅིག་དང་གཉིས་གསུམ་བཞི་དང་ལྔ། །དྲུག་དང་བདུན་དང་བརྒྱད་རྒལ་ནས། །འགོག་པའི་བར་དུ་མི་འདྲར་འགྲོ། །ཐོད་རྒལ་གྱི་ནི་སྙོམས་འཇུག་ཡིན། །ཞེས་ཚུལ་གཞན་དུ་བཤད་དོ། །
རྩ་བ། བསམ་གཏན་གཟུགས་མེད་རང་དང་ནི། །
འོག་སའི་རྟེན་ཅན་འོག་དགོས་མེད། །
སྲིད་རྩེར་འཕགས་པའི་ཅི་ཡང་མེད། །
མངོན་སུམ་བྱས་ནས་ཟག་པ་ཟད། །
ལུས་ཀྱི་རྟེན་ཡང་བསམ་གཏན་དང་གཟུགས་མེད་པའི་སྙོམས་འཇུག་དེ་དག་ནི་རང་གི་ས་པའི་ལུས་དང་འོག་སའི་ལུས་ཀྱི་རྟེན་ཅན་ཡིན་ཏེ། སྲིད་རྩེའི་སྙོམས་འཇུག་ནི་སྲིད་རྩེར་ཡང་མངོན་སུམ་དུ་བྱེད་ལ་འོག་མ་འདོད་ཁམས་ཀྱི་བར་དུ་ཡང་མངོན་སུམ་དུ་བྱེད་པ་(པོ་ས་དགུ་པ་ཡིན་པ་)ནས་བསམ་གཏན་དང་པོའི་སྙོམས་འཇུག་དང་པོ་རང་ས་དང་འོག་མ་འདོད་པའི་རྟེན་ལ་མངོན་སུམ་དུ་བྱེད་(པས་ས་གཉིས་པ་ཡིན་)པའི་བར་དུ་སྦྱར་རོ།། (དེ་ཡང་ཟག་བཅས་ནི་འབྲས་བུ་རང་ས་དང་རྒྱུ་འོག་ས་ལ་བརྟེན་པར་ངེས་སོ།།) འོ་ན་ཅིའི་ཕྱིར་གོང་དུ་སྐྱེས་པའི་རྟེན་ལ་སྙོམས་འཇུག་འོག་མ་མངོན་སུམ་དུ་མི་བྱེད་ཅེ་ན། འདི་ལྟར་གོང་དུ་སྐྱེས་པ་དེ་ལ་རང་ས་ན་མཆོག་ཡོད་པས་འོག་མའི་དམན་པས་དགོས་པ་བྱེད་པ་མེད་པའི་ཕྱིར་རོ། །
དེ་ལྟར་སྤྱིར་བསྟན་ནས་དམིགས་ཀྱིས་བསལ་བ་ནི་སྲིད་པའི་རྩེ་མོར་སྐྱེས་པའི་ཕྱིར་མི་འོང་པ་ནི་འཕགས་པ་སྟེ་ཟག་པ་མེད་པའི་ཅི་ཡང་མེད་པའི་སྐྱེ་མཆེད་ཀྱི་ཏིང་ངེ་འཛིན་མངོན་སུམ་དུ་བྱས་ནས་སྲིད་རྩེའི་ཟག་པ་ཟད་པར་བྱས་ཏེ་དགྲ་བཅོམ་ཐོབ་པར་བྱེད་དེ། ཅིའི་ཕྱིར་ཞེ་ན། སྲིད་རྩེ་རང་ས་ན་ཟག་མེད་ཀྱི་ལམ་མེད་པའི་ཕྱིར་དང༌། ཅི་ཡང་མེད་པའི་སྐྱེ་མཆེད་ཟག་མེད་དེ་ཡང་སྲིད་རྩེ་ལ་ཐག་ཉེ་བའི་ཕྱིར་རོ། །བསམ་གཏན་གཉིས་པ་ལ་སོགས་པར་དང་པོའི་མིག་ཤེས་ལ་སོགས་པ་མངོན་དུ་བྱེད་པ་ནི་དེ་དག་མ་བསྒྲིབས་ལུང་མ་བསྟན་ཡིན་པས་བསམ་གཏན་དང་གཟུགས་མེད་པའི་ཏིང་ངེ་འཛིན་མ་ཡིན་པའི་ཕྱིར་དང༌། འདིར་ནི་དེ་དག་གི་རྟེན་བསམ་པ་སྐབས་སུ་བབ་པའི་ཕྱིར་རོ། །ཡང་ན་དེ་དག་དམན་ཡང་རང་ས་ན་མེད་པའི་ཕྱིར་ལྟ་བ་ལ་སོགས་པ་ལ་དགོས་པ་ཡོད་པས་མངོན་དུ་བྱེད་དོ་ཞེས་ཤེས་པར་བྱའོ། །
ཡང་སྙོམས་འཇུག་དེ་དག་གི་དམིགས་པ་གང་ཞེ་ན།
རྩ་བ། སྲེད་བཅས་རང་གི་སྲིད་ལ་དམིགས། །
བསམ་གཏན་དགེ་ཡུལ་ཡོད་དགུ་ཡིན། །
གཟུགས་མེད་དངོས་གཞི་དགེ་རྣམས་ཀྱི། །
སྤྱོད་ཡུལ་ཟག་བཅས་འོག་མ་མིན། །
སྲེད་པ་དང་བཅས་པ་རོ་མྱང་བ་དང་མཚུངས་པར་ལྡན་པའི་སྙོམས་འཇུག་རྣམས་ནི་རང་རང་གི་ས་པའི་སྲིད་པ་ཟག་བཅས་ཀྱི་ཕུང་པོའི་དངོས་པོ་ཁོ་ན་ལ་དམིགས་པ་ཡིན་གྱི། རང་གི་ངོ་བོ་ཉོན་མོངས་ཅན་ཡིན་ཞིང་འོག་ས་ལས་འདོད་ཆགས་དང་བྲལ་(བའི་ཉོན་མོངས་ཅན་ཡིན་)བས་འོག་ས་ལ་དམིགས་པའང་མ་ཡིན་ལ། (དེ་ལ་དམིགས་ནས་སྲེད་པ་སྐྱེ་ན་དེ་འདོད་ཆགས་དང་མ་བྲལ་བར་ཐལ་བས་སོ།།) ས་གང་གི་སྲེད་པ་གང་ཡིན་པ་དེ་ནི་ས་དེ་ཁོ་ན་ལ་རྒྱས་པར་འགྱུར་བས་གོང་འོག་རང་རང་གི་སྲེད་པས་ཡོངས་སུ་བཅད་པའི་ཕྱིར་ས་གོང་མ་ལའང་དམིགས་པ་མ་ཡིན་ནོ། །དེ་ལྟ་མ་ཡིན་ན་དེ་གོང་མ་ཉིད་དུ་མི་འགྲུབ་སྟེ། ས་ཐ་དད་དུ་མ་བཅད་པའི་ཕྱིར་ས་གཅིག་པའི་གནས་གཞན་བཞིན་ནོ། །དེ་ཉིད་ཀྱི་ཕྱིར་གནས་གཞན་གསུམ་གསུམ་པ་རྣམས་དང་བརྒྱད་པོ་དག་ལྟག་འོག་ཏུ་འདུག་ཀྱང་ས་གཅིག་པ་ཉིད་དུ་འགྲུབ་བོ་ཞེས་རྒྱལ་པོའི་སྲས་འཆད་དོ། །ཟག་མེད་ལ་དམིགས་པའང་མ་ཡིན་ཏེ། ཟག་མེད་དོན་དུ་གཉེར་ན་དགེ་བའི་ཆོས་ལ་འདུན་པར་འགྱུར་བའི་ཕྱིར་རོ། །བསམ་གཏན་དགེ་བ་དག་པ་པ་དང་ཟག་མེད་ཀྱི་དམིགས་ཡུལ་ནི་ཅི་རིགས་པར་ཡོད་དགུ་ཅོག་ཡིན་ཏེ། (དག་པས་གོང་མ་རྟོགས་པ་ཡང་མངོན་ཤེས་མིན་གྱི་བསམ་གཏན་གྱི་སེམས་ཀྱིས་སེམས་དེ་གཉིས་ཀྱི་དམིགས་པ་ནི་)འདུས་བྱས་དང་འདུས་མ་བྱས་གང་ཡང་རུང་བ་ལ་དམིགས་ནས་སེམས་ཉེ་བར་འཇོག་པའི་ཕྱིར་རོ། །
གཟུགས་མེད་ཀྱི་ཉེར་བསྡོགས་ཀྱིས་འོག་སའི་ཟག་བཅས་ལ་དམིགས་ཤིང་དངོས་གཞི་ཉོན་མོངས་ཅན་ཡང་ཡོད་ལ་དངོས་གཞི་དགེ་བས་ཆོས་ཤེས་ཕྱོགས་མཐུན་གྱི་ལམ་དང་འོག་སའི་འགོག་པ་ལ་ མ་དམིགས་ཀྱང་ཟག་མེད་འོག་སའི་གཉེན་པོ་རྗེས་ཤེས་ཕྱོགས་མཐུན་གྱི་ལམ་བདེན་དང་རང་ས་དང་གོང་ས་ལ་དམིགས་པས་དེ་རྣམས་ལས་ཁྱད་པར་དུ་བྱ་བའི་ཕྱིར་དང༌། བསམ་གཏན་རྣམས་ནི་ཀུན་ཏུ་ལྟ་བ་པ་ཡིན་པས་དངོས་གཞིས་ཀྱང་འོག་སའི་ཟག་བཅས་ལ་དམིགས་ཀྱང་གཟུགས་མེད་པའི་དངོས་གཞི་དགེ་བ་དག་པ་པ་དང་ཟག་མེད་རྣམས་ཀྱི་སྤྱོད་ཡུལ་ནི་ས་འོག་མའི་ཟག་བཅས་མིན་ཏེ། གཟུགས་མེད་པའི་དངོས་གཞི་རྣམས་ནི་དམིགས་པ་ལས་ངེས་པར་བྱུང་བ་ཡིན་པའི་ཕྱིར་རོ། །གོང་མ་ལ་དམིགས་སོ་ཞེས་བྱ་བའང་སྲིད་རྩེའི་འཕགས་པ་ཅི་ཡང་མེད་པའི་སེམས་མངོན་དུ་བྱས་པའི་དབང་དུ་བྱས་ཀྱི་ཐམས་ཅད་ནི་མ་ཡིན་ནོ་ཞེས་ཤེས་པར་བྱའོ།། (ཤུགས་ལ་འོག་སའི་ལམ་ཟག་མེད་ལ་གོང་སའི་རྗེས་ཤེས་ཕྱོགས་མཐུན་གྱི་དམིགས་པར་བསྟན་ནོ་དེ་ཡང་ས་དགུའི་ལམ་ནི་ཕན་ཚུན་དུ་ཞེས་པའི་ཚུལ་དུའོ།།)
རྩ་བ། ཟག་པ་མེད་པས་ཉོན་མོངས་རྣམས། །
སྤོང་ངོ་ཉེར་བསྡོགས་དག་པས་ཀྱང༌། །
བསམ་གཏན་དང་གཟུགས་མེད་དག་པ་པ་ལ་སོགས་པ་གསུམ་པོ་འདི་དག་ལས་ཟག་པ་མེད་པའི་དངོས་གཞི་རྣམས་ཀྱིས་རང་ས་དང་གོང་སའི་ཉོན་མོངས་པ་རྣམས་སྤོང་གི་(དག་པ་པ་ནི་)ཉེར་བསྡོགས་ཀྱིས་འདོད་ཆགས་དང་བྲལ་ཟིན་པའི་ཕྱིར་དང༌། (ཉོན་མོངས་ཅན་ནི།) སྲིད་པས་སྲིད་པ་ལས་ངེས་པར་མི་འབྱུང་བས་རང་སའི་གཉེན་པོ་མ་ཡིན་པའི་ཕྱིར་དང༌། འོག་སའི་དག་པ་པ་བས་གོང་སའི་ཉོན་མོངས་ཅན་ཆེས་ཁྱད་པར་དུ་འཕགས་པས་(སུན་མི་འབྱིན་པས་)དམན་པས་ཁྱད་པར་ཅན་སྤང་བར་མི་ནུས་པའི་ཕྱིར་གོ་རིམ་བཞིན་དུ་དག་པ་པའི་དངོས་གཞིས་ཀྱང་འོག་ས་དང་རང་ས་དང་གོང་སའི་ཉོན་མོངས་པ་རྣམས་མི་སྤོང་ན་ཉོན་མོངས་ཅན་གྱིས་ལྟ་སྨོས་ཀྱང་ཅི་དགོས། བསམ་གཏན་དང་གཟུགས་མེད་གོང་ས་གོང་སའི་ཉེར་བསྡོགས་ནི་ས་འོག་མ་འོག་མའི་གཉེན་པོ་ཡིན་པས་ཟག་མེད་ཀྱིས་སྤོང་བར་མ་ཟད་(ཉེར་བསྡོགས་)དག་པ་པས་ཀྱང་ཉོན་མོངས་པ་རྣམས་སྤོང་ངོ་ཞེས་སྦྱར་རོ། །
དྲུག་པ་ཉེར་བསྡོགས་བཤད་པ་ནི། འོ་ན་ཉེར་བསྡོགས་དུ་ཡོད་ཅེ་ན།
རྩ་བ། དེ་དག་ལ་ནི་ཉེར་བསྡོགས་བརྒྱད། །
དག་པ་བདེ་མིན་སྡུག་སྡུག་བསྔལ་མིན། །
སྙོམས་འཇུག་དངོས་གཞི་(བརྒྱད་ཡོད་པས་)བརྒྱད་པོ་དེ་དག་ལ་ནི་གང་གིས་འཇུག་པའི་སྦྱོར་བ་ཉེར་བསྡོགས་ཀྱང་བརྒྱད་ཡོད་ལ། ཐམས་ཅད་ཀྱང་ཉོན་མོངས་ཅན་ལ་འབྲལ་ལམ་མེད་པས་སྲེད་པ་དང་མཚུངས་ལྡན་གྱི་ལམ་གྱིས་ཉོན་མོངས་སྤང་བར་མི་ནུས་ལ་འདི་དག་ནི་འདོད་ཆགས་དང་འབྲལ་བར་བྱེད་པའི་ལམ་ཡིན་པའི་ཕྱིར་ངོ་བོ་རོ་མྱོང་བ་དང་མཚུངས་ལྡན་མ་ཡིན་གྱི་དག་པ་པ་ཁོ་ན་(ཡིན་ཏེ་ཉོན་མོངས་ཅན་ནི་འོག་སའི་གཉེན་པོ་མ་ཡིན་པའི་ཕྱིར་རོ། །ཕྱི་མ་བདུན་མི་གསལ་བས་ཟག་མེད་མེད་དོ། །རྒྱུ་མཉམ་གཞག་གི་བསམ་གཏན་གཟུགས་མེད་ལ་ཉོན་མོངས་ཅན་མེད་པས། འབྲས་བུའི་དེ་དག་ཏུ་སྐྱེ་བ་ན་ཉིང་མཚམས་སྦྱོར་སེམས་ནི་རང་རང་གི་ཉེར་བསྡོགས་མཉམ་པར་མ་བཞག་པ་ཉོན་མོངས་ཅན་གྱིས་སྦྱོར་རོ་ཞེས་པ་ནི་གྲུབ་མཐའོ།།) མངོན་པར་འདུ་བྱ་བ་མེད་པར་འབྱུང་བ་དང༌། འོག་ས་ལས་ཡིད་བྱུང་བ་དང་བྲལ་ན་དགའ་བདེ་དང་མཚུངས་པར་ལྡན་པ་ཡིན་ན་དེ་དག་ནི་འབད་དེ་དྲང་དགོས་པས་མངོན་པར་འདུ་བྱ་བ་དང་བཅས་པ་དང༌། འོག་ས་ལས་ཡིད་བྱུང་བ་དང་མ་བྲལ་བས་ཚོར་བའང་བདེ་བ་ཡང་མིན་སྡུག་བསྔལ་ཡང་མིན་པ་བཏང་སྙོམས་ཀྱི་དབང་པོ་ཁོ་ན་དང་མཚུངས་པར་ལྡན་པ་ཡིན་ནོ། །ཡང་ན་འབད་དེ་དྲང་བར་བྱ་བ་ཡིན་པས་བཏང་སྙོམས་དང་མཚུངས་པར་ལྡན་ལ། འོག་ས་ལས་ཡིད་བྱུང་བ་དང་མ་བྲལ་བ་དང༌། འདོད་ཆགས་དང་འབྲལ་བའི་ལམ་ཡིན་པས་དག་པ་པ་ཡིན་གྱི་རོ་མྱང་བ་དང་མཚུངས་ལྡན་མ་ཡིན་ནོ་ཞེས་བྱའོ། །
སློབ་དཔོན་འཕགས་པས་ནི་སྙོམས་འཇུག་དངོས་གཞི་བརྒྱད་པོ་དེ་དག་ལ་འཇུག་པའི་ཡིད་ལ་བྱེད་པ་བདུན་བདུན་བཤད་དེ། དེ་ལས་འོག་མ་རྣམས་ཚེ་ཐུང་ཞིང་སྡུག་བསྔལ་མང་བ་ལ་སོགས་པའི་སྒོ་ནས་རགས་སོགས་དང་གོང་མ་རྣམས་དེ་ལས་ཟློག་པ་ཞི་སོགས་སུ་ལྟ་བའི་སྒོ་ནས་སྤང་བྱ་དང་ཐོབ་བྱ་ཤེས་པར་བྱས་ཤིང་སྤང་བ་དང་ཐོབ་པར་༦༤བྱ་བའི་ཕྱིར་སེམས་གཏོད་པར་བྱེད་པ་ཐོས་བསམ་དང་འདྲེས་པ་མཚན་ཉིད་སོ་སོར་རིག་པའི་ཡིད་ལ་བྱེད་པ་དང༌། སྤང་བྱ་དང་ཐོབ་བྱའི་སྦྱོར་བ་རྩོམ་པར་བྱེད་པའི་རྩེ་གཅིག་པ་ཞི་རགས་ཀྱི་མཚན་མ་ལ་མོས་པ་ཐོས་བསམ་ལས་འདས་པ་མོས་པ་ལས་བྱུང་བའི་ཡིད་ལ་བྱེད་པ་དང༌། འོག་སའི་ཉོན་མོངས་པ་ཆེ་གསུམ་སྤོང་བར་བྱེད་པ་རབ་ཏུ་དབེན་པ་ཡིད་ལ་བྱེད་པ་དང༌། དབེན་པ་ལ་དགའ་བ་རྒྱས་ཤིང་ཉོན་མོངས་པ་འབྲིང་གསུམ་སྤོང་བར་བྱེད་པ་དགའ་བ་སྡུད་པའི་ཡིད་ལ་བྱེད་པ་དང༌། འོག་མའི་ཉོན་མོངས་མངོན་དུ་རྒྱུ་དང་བྲལ་བས་དེ་ཟད་མ་ཟད་བརྟག་པའི་ཕྱིར་དེ་སྐྱེ་བའི་མཚན་མ་ཡིད་ལ་བྱེད་པ་དང་ཐོབ་པ་ལ་མངོན་པའི་ང་རྒྱལ་མེད་པ་ལ་སེམས་འཇོག་པར་བྱེད་པ་དཔྱོད་པའི་ཡིད་ལ་བྱེད་པ་དང༌། དེ་ལྟར་བརྟགས་པས་ཉོན་མོངས་པ་ཆུང་གསུམ་ཡོད་པར་རྟོགས་ནས་ཆུང་གསུམ་སྤོང་ཞིང་དངོས་གཞིའི་དངོས་རྒྱུར་གྱུར་པ་སྦྱོར་བ་མཐར་ཐུག་པའི་ཡིད་ལ་བྱེད་དང་གོང་མའི་དངོས་གཞི་ཐོབ་པ་ནི་སྦྱོར་བ་མཐར་ཐུག་པའི་འབྲས་བུ་ཡིད་པ་བྱེད་པའོ། །དེ་རྣམས་ཀྱིའང་དང་པོ་དྲུག་སྦྱོར་བ་དང་བདུན་པ་ནི་དངོས་གཞིའོ། །དེ་ལྟར་གོང་མ་པས་འཇིག་རྟེན་པའི་གོང་མའི་ཉེར་བསྡོགས་ཀྱིས་འོག་སའི་སྒོམ་སྤང་དགུ་ཅར་སྤངས་པར་བཤད་པ་དེ་ནི་གོང་མ་པའི་ལུགས་ཡིན་གྱི་བྱེ་བྲག་སྨྲ་བའི་ལུགས་ནི་མ་ཡིན་ཏེ། གལ་ཏེ་ཡིན་ན་གང་ཞིག་བསམ་གཏན་གྱི་དངོས་གཞི་མ་ཐོབ་པ་མི་ལྕོགས་མེད་ལ་བརྟེན་ནས་མཐོང་ལམ་ཐོབ་པ་དེས་དང་པོའི་ཉེར་བསྡོགས་ཐོབ་པའི་ཕྱིར་འདོད་པའི་སྒོམ་སྤང་མཐའ་དག་སྤངས་པར་འགྱུར་ན་བསྒོམ་པས་སྤང་བྱ་མ་སྤངས་ན། །འབྲས་བུ་དང་པོ་ལ་ཞུགས་པ། །ཞེས་བྱ་བའི་འགྲེལ་པར་འདོད་པ་ལ་ཆགས་བཅས་ཀྱི་མཐོང་ལམ་པ་དེ་ཁམས་གསུམ་གྱི་སྒོམ་སྤང་གཅིག་ཀྱང་མ་སྤངས་པ་འཆིང་བ་མཐའ་དག་དང་ལྡན་པར་བཤད་པའི་ཕྱིར་རོ། །
ཉེར་བསྡོགས་བརྒྱད་པོ་དེ་དག་ལས་དང་པོ་བསམ་གཏན་དང་པོའི་ཉེར་བསྡོགས་མི་ལྕོགས་མེད་ནི་དག་པ་པ་ཡིན་པར་མ་ཟད་འཕགས་པ་ཟག་པ་མེད་པའང་ཡིན་ཏེ། (འདི་ནི་གསལ་བས་རང་འོག་གོང་གསུམ་གྱི་ཉོན་མོངས་ལས་རྒྱལ་ལོ།།) བསམ་གཏན་གྱི་དངོས་གཞི་མ་ཐོབ་པ་དག་འཇིག་རྟེན་ལས་འདས་པའི་ལམ་དེ་ལ་བརྟེན་ནས་བསྐྱེད་པའི་ཕྱིར་རོ། །ཉེར་བསྡོགས་གཞན་དག་ནི་འོག་མའི་དངོས་གཞི་ལ་བརྟེན་པའི་ཕྱིར་དེ་དག་ལ། འཇིག་རྟེན་ལས་འདས་པའི་ལམ་མི་བརྟེན་ཏོ། །ཉེར་བསྡོགས་གཞན་རྣམས་ལའང་མཉམ་པར་བཞག་པ་དང་མ་བཞག་པ་གཉིས་ཡོད་པ་ལས་དང་པོ་ནི་དགེ་བ་དག་པ་པ་ཁོ་ན་ཡིན་ལ། གཉིས་པ་ནི་ཊཱིཀར་བསམ་གཏན་གཟུགས་མེད་བརྒྱད་ཅར་གྱི་ཉེར་བསྡོགས་ཉོན་མོངས་པ་ཅན་མཉམ་གཞག་མ་ཡིན་པས་ཉིང་མཚམས་སྦྱོར་རོ་ཞེས་བྱ་བ་འདི་ནི་གྲུབ་པའི་མཐའ་ཡིན་ནོ་ཞེས་འབྱུང་བས་ཉིང་མཚམས་སྦྱོར་སེམས་ཀྱང་ཡིན་པས་ཉོན་མོངས་ཅན་ཡང་ཡིན་ཏེ། འགྲེལ་པ་ལས། ཉེར་བསྡོགས་ཀྱི་སེམས་ཀྱིས་ཉིང་མཚམས་སྦྱོར་བ་ཉོན་མོངས་ཅན་ཡིན་མོད་ཀྱི་མཉམ་པར་གཞག་པ་ལ་ནི་ཉོན་མོངས་པ་ཅན་ཉིད་དགག་གོ་ཞེས་བཤད་པའི་ཕྱིར་རོ། །སྔོན་གྱི་སློབ་དཔོན་ཁ་ཅིག་(སྟེ་འདུན་བཟང་ནི་)བསམ་གཏན་དང་པོའི་ཉེར་བསྡོགས་མི་ལྕོགས་མེད་ནི་གསལ་བའི་ཕྱིར་དག་པ་པ་དང་ཟག་མེད་དང་རོ་མྱང་ལྡན་དང་གསུམ་ག་ཡོད་དོ་ཞེས་འདོད་ལ། སློབ་དཔོན་འདུན་བཟང་ན་རེ་མི་ལྕོགས་མེད་ནི་དངོས་གཞི་ལ་སྙོགས་པའི་ཕྱིར་རོ། །མྱང་ལྡན་གྱི་སྙོམས་འཇུག་ཀྱང་ཡོད་དོ་ཞེས་ཟེར་རོ།། (འདི་ལའང་ཉིང་མཚམས་སྦྱོར་སེམས་འདོད་ན་དེ་སྲིད་དོ།།)
འོ་ན་ཉེར་བསྡོགས་ཞེས་ཀྱང་འབྱུང༌། །བསམ་གཏན་ཁྱད་པར་ཅན་ཞེས་ཀྱང་འབྱུང་ན་གཅིག་གམ་ཐ་དད་ཅེ་ན། ཐ་དད་དེ།
རྩ་བ། རྟོག་མེད་བསམ་གཏན་ཁྱད་པར་ཅན། །
རྣམ་གསུམ་བདེ་མིན་སྡུག་བསྔལ་མིན། །
དེ་ནི་ཚངས་ཆེན་འབྲས་བུ་ཅན། །
ཉེར་བསྡོགས་ནི་འདོད་ཆགས་དང་འབྲལ་བའི་ལམ་ཡིན་ལ། བསམ་གཏན་དང་པོའི་དངོས་གཞི་དེ་ཉིད་རྟོག་པ་དང་བྲལ་བས་ཁྱད་པར་དུ་འཕགས་པས་རྟོག་པ་མེད་ལ་དཔྱོད་པ་དང་བཅས་པ་ནི་བསམ་གཏན་ཁྱད་པར་ཅན་ཡིན་ལ། དེ་ནི་(འབྲས་ལམ་མིན་གྱི་བྲལ་ཟིན་ཡིན་པས་དེ་ལ་དབྱེ་ན་)དག་པ་པ་དང་ཟག་མེད་དང་རོ་མྱང་ལྡན་དང་རྣམ་པ་གསུམ་ག་དང༌། (མི་ལྕོགས་མེད་དེ་ནི་)འབད་ནས་སྐྱེད་པར་བྱ་བ་ཡིན་པས་ཚོར་བའང་བདེ་བ་ཡང་མིན་སྡུག་བསྔལ་ཡང་མིན་པ་བཏང་སྙོམས་ཁོ་ན་དང་མཚུངས་པར་ལྡན་པ་ཡིན་ནོ། །དེ་ཉིད་ཀྱིས་ན་(བདེ་བ་དང་མི་ལྡན་པས་)ལམ་བསྐྱེད་དཀའ་བ་ཞེས་བྱའོ། །དེས་ན་བསམ་གཏན་དང་པོ་ལ་རྟོག་དཔྱོད་གཉིས་ཀ་དང་བཅས་པའི་དངོས་གཞི་ཙམ་དང་རྟོག་པ་མེད་ལ་དཔྱོད་པ་ཙམ་དང་ལྡན་པའི་ཁྱད་པ་ཅན་གྱི་དབྱེ་བ་ཡོད་ཀྱི་གཉིས་པ་ལ་སོགས་པ་ལ་ནི་དེ་ལྟ་བུའི་ཁྱད་པར་མེད་པས་དངོས་གཞི་ལ་དབྱེ་བ་མེད་དོ། །བསམ་གཏན་ཁྱད་པར་ཅན་ཟག་བཅས་གང་ཡིན་པ་དེ་ནི་བསྒོམས་ན་ཚངས་ཆེན་དུ་སྐྱེ་བས་ཚངས་པ་ཆེན་པོའི་འབྲས་བུ་ཅན་ཡིན་ནོ། །དེས་ན་བྱམས་པ་ལ་སོགས་པ་ནི་རྫོགས་བྱེད་ཡིན་པའི་ཕྱིར་ཚངས་པའི་གནས་པ་ཞེས་ཀྱང་བྱའོ། །
བདུན་པ་ཏིང་ངེ་འཛིན་གྱི་དབྱེ་བ་ནི་ཡང་ཏིང་ངེ་འཛིན་ཐམས་ཅད་མདོར་བསྡུས་ཏེ་མདོ་ལས། ཏིང་ངེ་འཛིན་ནི་རྣམ་པ་གསུམ་སྟེ། རྟོག་པ་དང་བཅས་ཤིང་དཔྱོད་པ་དང་བཅས་པ་དང༌། རྟོག་པ་མེད་ལ་དཔྱོད་པ་ཙམ་དང༌། རྟོག་པ་ཡང་མེད་ལ་དཔྱོད་པ་ཡང་མེད་པའི་ཏིང་ངེ་འཛིན་ཏོ་ཞེས་ཏིང་ངེ་འཛིན་གསུམ་གསུངས་པ་ལ།
རྩ་བ། མན་ཆད་རྟོག་དཔྱོད་བཅས་པ་ཡི། །
ཏིང་འཛིན་ཡན་ཆད་གཉིས་ཀ་མེད། །
བསམ་གཏན་ཁྱད་པར་ཅན་དེ་ནི་རྟོག་པ་ཙམ་ཞིག་བཀག་པས་རྟོག་མེད་དཔྱོད་ཙམ་གྱི་ཏིང་ངེ་འཛིན་ཡིན་ལ། ཁྱད་པར་ཅན་དེ་མན་ཆད་བསམ་གཏན་དང་པོའི་དངོས་གཞི་ཙམ་པོ་དང་ཉེར་བསྡོགས་མི་ལྕོགས་མེད་གཉིས་ནི་རྟོག་པ་དང་བཅས་པའི་ཏིང་ངེ་འཛིན་ཏོ། །ཁྱད་པར་ཅན་དེ་ཡན་ཆད་བསམ་གཏན་གཉིས་པའི་ཉེར་བསྡོགས་ནས་སྲིད་རྩེའི་བར་རྣམས་ནི་ས་དེ་བསྡུས་ཀྱི་རྟོག་དཔྱོད་གཉིས་ཀ་མེད་པའི་ཏིང་ངེ་འཛིན་ཏོ། །
ཡང་མདོ་ལས། ཏིང་ངེ་འཛིན་རྣམ་པ་གསུམ་སྟེ། སྟོང་པ་ཉིད་དང་སྨོན་པ་མེད་པ་དང་མཚན་མ་མེད་པའི་ཏིང་ངེ་འཛིན་ཏོ་ཞེས་ཏིང་ངེ་འཛིན་གསུམ་གསུངས་པ་ལས།
རྩ་བ། མཚན་མེད་ཞི་བའི་རྣམ་པ་དང༌། །
སྟོང་ཉིད་བདག་མེད་སྟོང་ཉིད་དུ། །
འཇུག་པའོ་སྨོན་པ་མེད་པ་ནི། །
དེ་ལས་གཞན་བདེན་རྣམ་པ་དང༌། །
དག་དང་དྲི་མ་མེད་དེ་དག །
དྲི་མེད་རྣམ་ཐར་སྒོ་གསུམ་མོ། །
ཡུལ་མྱང་འདས་སོ་སོར་བརྟགས་འགོག་ནི་ཡུལ་ལྔ་དང་ཕོ་མོ་དང་འདུས་བྱས་ཀྱི་མཚན་ཉིད་གསུམ་མམ་བཞིའི་མཚན་མ་(སྟེ་བཅུ་)དང་བྲལ་བས་མཚན་མེད་ཡིན་ལ། (འདིར་དབང་པོ་རྣམས་མཚན་མར་མ་སྨོས་པ་ནི་དབང་པོ་ནི་ཡུལ་ལྟར་ཡིད་འཕྲོག་པར་བྱེད་པ་མིན་པས་སོ།།) དེ་ལ་དམིགས་པའི་ཏིང་ངེ་འཛིན་ཡིན་པས་མཚན་མ་མེད་པའི་ཏིང་ངེ་འཛིན་ནི་མཚན་མ་ཐམས་ཅད་ཞི་བ་འགོག་པའི་རྣམ་པ་བཞི་དང་མཚུངས་པར་ལྡན་པ་དང༌། སྟོང་པ་ཉིད་ཀྱི་ཏིང་ངེ་འཛིན་ནི་སྟོང་པའམ་བདག་མེད་ལ་དམིགས་ནས་སྡུག་བསྔལ་གྱི་བདེན་པའི་བདག་མེད་པ་དང་སྟོང་པ་ཉིད་དུ་འཇུག་པའི་རྣམ་པ་ཉིད་དང་མཚུངས་པར་ལྡན་པའོ།། (འདི་ཡང་འཇིག་ལྟའི་གཉེན་པོའོ།།) སྨོན་པ་མེད་པའི་ཏིང་ངེ་འཛིན་ནི་ཡུལ་སྨོན་བྱ་མ་ཡིན་པའི་འདུས་བྱས་ལ་དམིགས་ནས་ཡིད་འབྱུང་བའི་རྣམ་པ་ཅན་ཡིན་ལ། སྟོང་པ་དང་བདག་མེད་པས་ཀྱང་སྡུག་བསྔལ་གྱི་བདེན་པ་ལ་སྟོང་པ་དང་བདག་མེད་ཀྱི་རྣམ་པར་དམིགས་མོད་ཀྱི་དེ་གཉིས་ནི་ཆོས་ཐམས་ཅད་ཀྱི་མཚན་ཉིད་ཡིན་པས་མྱང་འདས་ཀྱི་མཚན་ཉིད་ཀྱང་ཡིན་ན་དེ་དག་གིས་མྱང་འདས་ལས་ཡིད་མི་འབྱུང་བ་ལྟར་སྡུག་བསྔལ་ལས་ཀྱང་ཡིད་མི་འབྱུང་ལ་འགོག་བདེན་གྱིས་ཀྱང་ཡིད་མི་འབྱུང་གི་མི་རྟག་པ་དང་སྡུག་བསྔལ་གྱི་རྣམ་པ་གཉིས་དང་ཀུན་འབྱུང་གི་བདེན་པ་དང་ལམ་གྱི་བདེན་པ(འི་རྣམ་པ་བརྒྱད་པོའི་ནང་ནས་ལམ་གྱི་རྣམ་པ་བཞི)འང་ལུང་བར་མ་ལས་རེ་ཞིག་བླང་བྱ་ཡིན་ཡང་འདུས་བྱས་ཡིན་པས་ཆུ་རྒལ་བའི་གཟིངས་ལྟར་ལྷག་མེད་དུ་འཇུག་པ་ན་ངེས་པར་འདོར་བས་སྤང་བྱར་གསུངས་པས་སྡུག་བསྔལ་གྱི་བདེན་པའི་རྣམ་པ་ཕྱི་མ་གཉིས་དང་འགོག་བདེན་གྱི་རྣམ་པ་བཞི་སྟེ་དྲུག་པོ་དེ་དག་ལས་གཞན་པ་སྡུག་བསྔལ་གྱི་བདེན་པའི་རྣམ་པ་དང་པོ་གཉིས་དང་ཀུན་འབྱུང་དང་ལམ་གྱི་བདེན་པའི་རྣམ་པ་བརྒྱད་དེ་རྣམ་པ་བཅུ་དང་མཚུངས་པས་ལྡན་པའི་ཏིང་ངེ་འཛིན་(ནི་སྨོན་མེད་ཀྱི་ཏིང་ངེ་འཛིན་)ནོ། །
སློབ་དཔོན་ཐོགས་མེད་དང་སེང་གེ་བཟང་པོ་ལ་སོགས་པས་ནི་མཚན་མ་མེད་པ་ནི་ཞི་བའི་ངོ་བོ་ཡིན་པའི་ཕྱིར་འགོག་ལམ་གྱི་རྣམ་པ་བརྒྱད་དང༌། སྨོན་པ་མེད་པ་ནི་དེ་དག་གིས་ཁམས་གསུམ་ལ་སྨོན་པ་ལྡོག་པའི་ཕྱིར་མི་རྟག་པ་དང་སྡུག་བསྔལ་བ་དང་ཀུན་འབྱུང་གི་རྣམ་པར་བཞི་སྟེ་དྲུག་ལྡན་དུ་བཤད་དོ། །ཏིང་ངེ་འཛིན་གསུམ་པོ་དེ་དག་ནི་ཟག་བཅས་འཇིག་རྟེན་པ་དག་པ་པ་དང༌། (དེ་ཡང་ངེས་འབྱེད་ཆ་མཐུན་དང་འཕགས་ལམ་གྱི་སྦྱོར་རྗེས་ཁ་ཅིག་གིས་བསྡུས་ལ།) འཇིག་རྟེན་ལས་འདས་པ་དྲི་མ་མེད་པ་གཉིས་ཡིན་ལ། དེ་དག་ས་ནི་དང་པོ་འདོད་པ་དང་བསམ་གཏན་ས་དྲུག་དང་གཟུགས་མེད་བཞི་སྟེ་བཅུ་གཅིག་ན་ཡོད་ལ། གཉིས་པ་ནི་ཟག་མེད་ཀྱི་ལམ་གང་ན་ཡོད་པའི་ས་འདོད་པ་དང་སྲིད་རྩེ་དང་བསམ་གཏན་གཉིས་པ་ལ་སོགས་པའི་ཉེར་བསྡོགས་བདུན་མ་གཏོགས་པ་ཟག་མེད་ས་དགུ་ན་ཡོད་དོ། །དེ་ལྟར་དག་པ་པ་དང་ཟག་མེད་གཉིས་ལས་ཏིང་ངེ་འཛིན་གསུམ་པོ་དེ་དག་དྲི་མ་མེད་པ་ནི་ཐར་པའི་རྒྱུ་དང་དེར་འཇུག་པའི་སྒོ་ཡིན་པས་མདོ་ལས་རྣམ་པར་ཐར་པའི་སྒོ་སྟོང་པ་ཉིད་ལ་སོགས་པ་རྣམ་པར་ཐར་པའི་སྒོ་གསུམ་ཞེས་ཀྱང་གསུངས་སོ། །
རྩ་བ། སྟོང་ཉིད་སྟོང་ཉིད་ཅེས་ལ་སོགས། །
གཞན་ཡང་ཏིང་ངེ་འཛིན་གསུམ་མོ། །
གཉིས་ནི་སྟོང་དང་མི་རྟག་པར། །
མི་སློབ་པའི་ལ་དམིགས་པ་ཡིན། །
མཚན་མ་མེད་པ་མཚན་མེད་ནི། །
ཞི་བར་མ་བརྟགས་ཟད་པ་ལ། །
ཡང་མདོ་ལས། སྟོང་པ་ཉིད་སྟོང་པ་ཉིད་ཅེས་བྱ་བའི་ཏིང་ངེ་འཛིན་དང༌། སོགས་པས་གཟུང་བ་སྨོན་པ་མེད་པ་སྨོན་པ་མེད་པ་དང༌། མཚན་མ་མེད་པ་མཚན་མ་མེད་པའི་ཏིང་ངེ་འཛིན་ཏོ་ཞེས་སྔ་མ་གསུམ་ལས་གཞན་ཡང་ཏིང་ངེ་འཛིན་གསུམ་གསུངས་ཏེ། རིམ་པ་ལྟར་སྟོང་པ་ཉིད་ལ་སོགས་པ་སྔ་མ་གསུམ་ལ་དམིགས་པའི་ཕྱིར་མིང་དེ་སྐད་ཅེས་བྱའོ། །དེ་ལྟར་གསུམ་པོ་དེ་དག་ལས་དང་པོ་གཉིས་ནི་རིམ་པར་ལྟར་མི་སློབ་པའི་སྟོང་པ་ཉིད་དང་སྨོན་པ་མེད་པའི་ཏིང་ངེ་འཛིན་ལ་དམིགས་ནས་དེ་གཉིས་ལ་བདག་འཛིན་དང་སྲིད་པའམ་དགའ་བ་དགག་པའི་ཕྱིར་མི་སློབ་པའི་སྟོང་པ་ཉིད་ཀྱི་ཏིང་ངེ་འཛིན་འདི་ནི་བདག་གི་མ་ཡིན་ནོ་ཞེས་སྟོང་པའི་རྣམ་པ་དང་མི་སློབ་པའི་སྨོན་པ་མེད་པའི་ཏིང་ངེ་འཛིན་འདི་ནི་མི་རྟག་པའོ་ཞེས་མི་རྟག་པའི་རྣམ་པར་ཡིད་ལ་བྱེད་པ་ཡིན་ནོ། །
འོ་ན་སྟོང་ཉིད་སྟོང་ཉིད་གྱི་ཏིང་ངེ་འཛིན་དེ་སྟོང་ཉིད་ཀྱི་ཏིང་ངེ་འཛིན་ལྟར་སྟོང་བདག་མེད་གཉིས་ཀར་མི་དམིགས་པར་སྟོང་ཉིད་ཀྱི་རྣམ་པ་ཁོ་ནར་དམིགས་ཤེ་ན། (སྟོང་པ་ཉིད་ཀྱི་ཏིང་ངེ་འཛིན་ནི་ཉེར་ལེན་གྱི་ཕུང་པོ་སྟོང་ཉིད་དུ་ཡིད་ལ་བྱེད་ལ་སྟོང་ཉིད་སྟོང་ཉིད་ནི། སྟོང་ཉིད་ཀྱི་ཏིང་ངེ་འཛིན་དེ་ཉིད་ཡང་སུན་འབྱིན་པས་ན་འདུས་བྱས་ཐམས་ཅད་ལས་ཡིད་འབྱུང་བའོ།།) སྟོང་ཉིད་ཀྱི་ཏིང་ངེ་འཛིན་སྟོང་བདག་མེད་ཀྱི་རྣམ་པ་གཉིས་པ་ཅན་ཡིན་ཡང་སྟོང་ཉིད་སྟོང་ཉིད་ཀྱི་ཏིང་ངེ་འཛིན་འདི་སྟོང་ཉིད་ཀྱི་རྣམ་པར་ཞུགས་པའི་སྟོང་ཉིད་ཀྱི་རྗེས་ཁོ་ན་ལ་བསྐྱེད་པའི་ཕྱིར་དང༌། ལམ་དུ་ཞུགས་པ་གྲོགས་དང་བྲལ་བ་ན་འགྲོན་པོ་ངོ་མི་ཤེས་པ་མཐོང་བས་ཀྱང་དགའ་ལ་གཅིག་བུ་ནི་གྲོགས་ཀྱིས་སྟོང་པས་མི་དགའ་བ་ལྟར་སྲིད་པ་ལ་བདག་མེད་པར་མཐོང་ཡང་སྟོང་པར་མ་མཐོང་ན་དགའ་བར་འགྱུར་གྱི། སྟོང་པར་མཐོང་ན་མི་དགའ་ཞིང་སྐྱོ་བར་འགྱུར་བས་དེས་ན་སྐྱོ་བ་དང་མཐུན་པས་སྟོང་པའི་རྣམ་པ་ཁོ་ནར་དམིགས་ཀྱི་བདག་མེད་པའི་རྣམ་པར་ནི་མ་ཡིན་ནོ། །དེ་བཞིན་དུ་ཏིང་ངེ་འཛིན་གཉིས་པོ་དེ་དག་བདེན་པ་དང་པོའི་སྡུག་བསྔལ་གྱི་རྣམ་པ་དང་ཀུན་འབྱུང་དང་འགོག་ལམ་གྱི་རྣམ་པ་བཅུ་གཉིས་སུའང་དམིགས་པ་མ་ཡིན་ཏེ། སྒོ་རིམ་བཞིན་དུ་དམིགས་ཡུལ་ཏིང་ངེ་འཛིན་དེ་དག་ཟག་མེད་ཡིན་པས་ཟག་བཅས་འཕགས་པ་དང་མི་མཐུན་པའི་སྡུག་བསྔལ་དང༌། སྡུག་བསྔལ་བསྐྱེད་པའི་རྒྱུ་ལ་སོགས་པའི་མཚན་ཉིད་མ་ཡིན་པའི་ཕྱིར་དང༌། འགོག་བདེན་མ་ཡིན་པའི་ཕྱིར་དང༌། ལམ་བདེན་ཡིན་པས་སུན་དབྱུང་བྱ་ཡིན་ལ་སུན་དབྱུང་བྱ་དེ་ཉིད་སུན་འབྱིན་བྱེད་དུ་མི་འཐད་པའི་ཕྱིར་རོ། །
མཚན་མ་མེད་པ་མཚན་མ་མེད་པའི་ཏིང་ངེ་འཛིན་ནི་མི་སློབ་པའི་མཚན་མེད་ལས་ལངས་པའི་རྗེས་ལ་ཟག་བཅས་སམ་ཟག་མེད་ཀྱི་ཤེས་པ་གཞན་མ་སྐྱེས་ན་མཚན་མེད་ཀྱི་རྒྱུན་འབྱུང་བར་འགྱུར་བ་ལས། མཚན་མེད་ལས་ཡངས་པའི་རྗེས་ལ་ཟག་བཅས་སམ་ཟག་མེད་སྐྱེ་བ་ན་མཚན་མེད་འབྱུང་བའི་རྐྱེན་མ་ཚང་བས་འགག་པར་འགྱུར་ཞིང་འགག་པ་དེ་ནི་སོ་སོར་བརྟགས་མིན་གྱི་འགོག་པ་ཡིན་གྱི་སོ་སོར་བརྟགས་འགོག་ནི་མ་ཡིན་ཏེ། ཟག་བཅས་གཉེན་པོས་བྲལ་བ་ནི་སོ་སོར་བརྟགས་འགོག་ཡིན་པ་ལ་མི་སློབ་པའི་མཚན་མེད་ནི་ཟག་མེད་ཡིན་པས་འཕགས་པ་དང་མི་མཐུན་པ་མེད་པས་གཉེན་པོས་བྲལ་བ་མི་སྲིད་པའི་ཕྱིར་རོ། །དེས་ན་དམིགས་པ་མི་སློབ་པའི་མཚན་མ་མེད་པའི་ཏིང་ངེ་འཛིན་གྱི་སོ་སོར་མ་བརྟགས་པས་ཟད་པ་སྟེ་འགོག་པ་ལ་དམིགས་ནས་ཞི་བའི་རྣམ་པ་ཁོ་ནར་ཡིད་ལ་བྱེད་པ་ཡིན་གྱི་འགོག་པ་དང་གྱ་ནོམ་པ་དང་ངེས་པར་འབྱུང་བའི་རྣམ་པར་ནི་ཡིད་ལ་བྱེད་པ་མ་ཡིན་ཏེ། རིམ་པ་ལྟར་འགོག་པ་ནི་མི་རྟག་པའི་འགོག་པ་དང་ཐུན་མོང་མ་ཡིན་པས་མི་རྟག་པའི་འགོག་པར་དམིགས་ན་བརྟགས་མིན་རྟག་པ་སུན་ཕྱུང་བར་འགྱུར་ལ། དེ་སུན་ཕྱུང་ན་མཚན་མེད་སུན་འབྱིན་བྱེད་སུན་ཕྱུང་བས་སུན་དབྱུང་བྱའི་མཚན་མེད་སུན་ཕྱུང་བར་མི་འགྱུར་བའི་ཕྱིར་དང༌། གྱ་ནོམ་པ་ནི་དགེ་བ་ཡིན་ན་བརྟགས་མིན་ལུང་མ་བསྟན་ཡིན་པའི་ཕྱིར་དང༌། གཉེན་པོས་སྤང་བྱ་དང་བྲལ་ནས་འཁོར་བ་ལས་ངེས་པར་བྱུང་བ་ནི་ངེས་འབྱུང་ཡིན་ན་བརྟགས་མིན་ནི་གཉེན་པོའི་སྟོབས་ཀྱིས་བྲལ་བ་མ་ཡིན་པའི་ཕྱིར་རོ། །
རྩ་བ། ཟག་བཅས་མི་ནང་མི་གཡོ་ལ། །
ཉེར་བསྡོགས་བདུན་ནི་མ་གཏོགས་སོ། །
ཏིང་ངེ་འཛིན་ཕྱི་མ་གསུམ་པོ་འདི་དག་ནི་གཅིག་ཏུ་ཟག་པ་དང་བཅས་པ་ཡིན་ཏེ། ཟག་མེད་འཕགས་ལམ་ལ་(ཡོན་ཏན་དུ་ལྟ་བས་དེ་ལ་)མི་སྡང་གི་འདི་དག་ནི་ཏིང་ངེ་འཛིན་སྔ་མ་གསུམ་ལ་རྒྱབ་ཀྱིས་ཕྱོགས་པས་འཕགས་པའི་ལམ་ལ་སྡང་བས་དོར་བྱ་ཉིད་དུ་ལྟ་བའི་ཕྱིར་རོ། །དེ་ཉིད་ཀྱིས་ན་འདི་དག་ལ་རྣམ་པར་ཐར་པ་སུན་འབྱིན་པའི་ཏིང་ངེ་འཛིན་ཞེས་ཀྱང་གྲག་གོ །
རྟེན་ནི་བློ་གསལ་བས་(གླིང་གསུམ་གྱི་)མིའི་ནང་ཁོ་ནར་སྐྱེད་པར་བྱེད་ལ། (སྟེ་མིའི་ལུས་ནི་ན་རྒས་འཆི་བ་ལ་སོགས་པའི་རྟེན་དུ་གྱུར་པས་ནད་ལ་སོགས་པ་དང་འདྲ་བར་འདུ་བྱེད་ཟག་མེད་འཇུག་པ་ལ་ཡང་མི་མཐུན་པའི་འདུ་ཤེས་འདྲེན་ལ། ལྷ་ལ་ནི་མ་ཡིན་ཏེ་ཕལ་ཆེར་ལུས་ཁ་ན་མ་ཐོ་བ་མེད་པའི་ཕྱིར་རོ།།) གང་ཟག་ནི་དབང་པོ་རྣོ་བས་དེ་སྐྱེད་པའི་མཐུ་ཡོད་པའི་ཕྱིར་དགྲ་བཅོམ་པ་མི་གཡོ་བའི་ཆོས་ཅན་ཁོ་ན་ལ་སྐྱེའི་དབང་པོ་རྟུལ་བས་དགྲ་བཅོམ་པ་གཞན་ལ་ནི་མ་ཡིན་ཏེ། (སློབ་པ་ནི་བྱ་བ་ལྷག་མ་དང་བཅས་པས་འཕགས་ལམ་ལ་མི་སྡང་ལ། དུས་ཀྱི་རྣམ་གྲོལ་ནི་འཕགས་ལམ་རྗེས་སུ་སྲུང་བ་ལ་བརྩོན་པས་དེ་སུན་མི་འབྱིན་ནོ། །ས་ནི་བསམ་གཏན་བཞི་གཟུགས་མེད་གསུམ་འདོད་པ་དང་བཅས་པ་ན་ཡོད།) བསྐྱེད་པར་མི་ནུས་པའི་ཕྱིར་རོ། །དེས་ན་འཕགས་པ་དག་མཐོང་ཆོས་ལ་བདེ་བར་གནས་པར་བྱ་བ་དང༌། ཀུན་ཏུ་ཆགས་པའི་གནས་སུ་གྱུར་པ་མི་སློབ་པའི་སྟོང་ཉིད་ལ་སོགས་པའི་ཏིང་ངེ་འཛིན་དེ་དག་ལ་རྒྱབ་ཀྱིས་ཕྱོགས་པར་བྱ་བའི་ཕྱིར་ཏིང་ངེ་འཛིན་གཞན་དང་གཞན་དག་ལ་སྙོམས་པར་འཇུག་གོ་ཞེས་སྡེ་པས་འདོད་ལ། ཐེག་པ་གོང་མ་པ་རྣམས་ནི་རྣམ་སྣང་མངོན་བྱང་ལས། སེམས་ནི་རང་དངོས་མེད་ཕྱིར་དང༌། འབྲས་བུ་རྒྱུ་རྣམས་སྤངས་ཕྱིར་དང་ཞེས་འབྱུང་བ་བཞིན་དུ་ཆོས་རྣམས་ཀྱི་རང་གི་ངོ་བོ་དང་འབྲས་བུ་དང་རྒྱུས་སྟོང་པ་ལ་མཉམ་པར་བཞག་པའི་ཏིང་ངེ་འཛིན་ནི་སྟོང་པ་ཉིད་ཀྱི་ཏིང་ངེ་འཛིན་ལ་སོགས་པར་འདོད་ལ། དེ་དག་ཀྱང་ཆོས་རྣམས་ཀྱི་རང་གི་ངོ་བོས་སྟོང་པ་ལ་སོགས་པའམ། སྟོང་པ་ཉིད་ཀྱང་སྟོང་པ་ཉིད་དུ་ཤེས་པའི་ཏིང་ངེ་འཛིན་ལ་སོགས་པ་ལ་འདོད་པའི་ཕྱིར་ཟག་མེད་དུ་འདོད་དོ། །རྣམ་པར་གཏན་ལ་དབབ་པ་བསྡུ་བ་ལས་ནི་ཀུན་བརྟགས་དང་གཞན་དབང་དང་ཡོངས་གྲུབ་ཀྱི་ཡུལ་ཅན་གསུམ་གྱི་དབང་དུ་བྱས་ནས་སྟོང་ཉིད་སྨོན་མེད་མཚན་མེད་ཀྱི་ཏིང་ངེ་འཛིན་གསུམ་གསུངས་སོ། །དེས་ན་ཐོས་བསམ་ལས་བྱུང་བ་དང༌། འཇིག་རྟེན་པའི་སྒོམ་བྱུང་དང་འཇིག་རྟེན་ལས་འདས་པའི་སྒོམ་བྱུང་གི་ཏིང་ངེ་འཛིན་གསུམ་རིམ་པ་ལྟར་སྟོང་པ་ཉིད་ལ་སོགས་པ་དང༌། སྟོང་པ་ཉིད་ཀྱི་ཏིང་ངེ་འཛིན་ལ་སོགས་པ་དང༌། རྣམ་པར་ཐར་པའི་སྒོ་སྟོང་པ་ཉིད་ལ་སོགས་པ་ཡིན་ནོ་ཞེས་གསུངས་སོ། །ས་ནི་བསམ་གཏན་གཉིས་པ་ནས་སྲིད་རྩེའི་བར་གྱི་ཉེར་བསྡོགས་བདུན་མ་གཏོགས་པ་(ན་ཉེར་བསྡོགས་བདུན་གོང་འོག་ལ་ཞི་རགས་སུ་དམིགས་ནས་འོག་ས་སུན་འབྱིན་གྱི་འཕགས་ལམ་སུན་མི་འབྱིན་པས་སོ།།) འདོད་པ་དང་བསམ་གཏན་གྱི་ས་དྲུག་དང་གཟུགས་མེད་པ་ས་བཞི་སྟེ་བཅུ་གཅིག་ན་ཡོད་དོ། །
ཡང་བཅོམ་ལྡན་འདས་ཀྱིས་ཏིང་ངེ་འཛིན་བསྒོམ་པ་ནི་རྣམ་པ་བཞི་སྟེ།
རྩ་བ། དགེ་བའི་བསམ་གཏན་དང་པོ་ནི། །
བདེ་འགྱུར་ཏིང་འཛིན་སྒོམ་པ་ཡིན། །
མིག་གི་མངོན་ཤེས་མཐོང་འགྱུར་འདོད། །
ཏིང་ངེ་འཛིན་བསྒོམ་པ་ཀུན་དུ་བསྟེན་གོམས་པར་བྱས་ལན་མང་དུ་བྱས་ན་མཐོང་བའི་ཆོས་ལ་བདེ་བར་གནས་པར་འགྱུར་བའང་ཡོད་ཅེས་བྱ་བ་ནས་ཏིང་ངེ་འཛིན་བསྒོམ་པ་ཀུན་ཏུ་བསྟེན་གོམས་པར་བྱས་ལན་མང་དུ་བྱས་ན་ཤེས་པ་མཐོང་བར་འགྱུར་བའང་ཡོད། ཤེས་རབ་རབ་ཏུ་རྣམ་པར་འབྱེད་པར་འགྱུར་བའང་ཡོད། ཟག་པ་ཟད་པར་འགྱུར་བའང་ཡོད་ཅེས་བྱ་བའི་བར་དུ་གསུངས་པ་དེ་ལ་ཟག་བཅས་སམ་ཟག་མེད་ཀྱང་རུང་སྟེ། དགᨓ་(བ་དག་པའམ་ཟག་པ་མེད་)᪠འི་བསམ་གཏན་དང་པོ་ལ་མཉམ་པར་འཇོག་པ་ནི་མཐོང་བའི་ཆོས་ལ་བདེ་བར་གནས་པར་འགྱུར་བའི་ཏིང་ངེ་འཛིན་བསྒོམ་པ་ཡིན་ནོ། །འདི་ནི་འདོད་པ་ལས་འདས་པའི་དང་པོ་ཡིན་པས་དེ་སྐད་དུ་བཤད་ཀྱི་བསམ་གཏན་གཞན་དག་ཀྱང་མཐོང་ཆོས་ལ་བདེར་གནས་ཡིན་ནོ། །སློབ་དཔོན་གང་སྤེལ་ཀྱི་ཊཱིཀ་ལས་ཀྱང་གལ་ཏེ་བསམ་གཏན་ཐམས་ཅད་མཐོང་བའི་ཆོས་ལ་བདེ་བར་གནས་པ་ཡིན་བཞིན་དུ་མདོ་ལས་དང་པོ་ཁོ་ན་དེར་བཤད་ཅེ་ན། རྣལ་འབྱོར་བ་ནི་འདོད་ཁམས་ཉེས་པ་མང་བ་ལས་འདས་པས་དེའི་བདེ་བས་བློ་ལྷག་པར་ཡོངས་སུ་ཚིམ་པས་ཡིན་ཏེ་དཔེར་ན་འབྲོག་ཏུ་ངལ་ཞིང་སྐོམ་པ་ཆུ་རྙོག་པ་ཅན་གྱིས་ཚིམ་པ་བཞིན་ནོ་ཞེས་བཤད་དོ། །ཕྱི་མ་ལ་བདེ་བ་མྱོང་བར་ངེས་པ་ནི་མེད་དེ། ཉམས་པ་དང༌། (དེ་སྤངས་ན᫥་)ཕྱི་མ་ལ་བསམ་གཏན་གཉིས་པ་ལ་སོགས་པར་སྐྱེས་པ་དང༌། མཐོང་ཆོས་ལ་མྱ་ངན་ལས་འདས་པ་རྣམས་ལ་ཚེ་ཕྱི་མ་ལ་བདེ་བར་གནས་པ་མེད་པའི་ཕྱིར་དང༌། ཟག་མེད་ལ་རྣམ་སྨིན་ཀྱང་མེད་པའི་ཕྱིར་རོ། །འཆི་འཕོ་དང་སྐྱེ་བ་ཤེས་པའི་ལྷའི་མིག་གི་མངོན་ཤེས་དང་དེའི་རྗེས་སུ་བྱུང་བའི་ཡིད་ཤེས་དང་མཚུངས་ལྡན་གྱི་ཤེས་རབ་ནི་ཤེས་པ་མཐོང་བར་འགྱུར་བའི་ཏིང་ངེ་འཛིན་བསྒོམ་པར་འདོད་དོ། །
སྐྱེ་བ་ཤེས་པར་འགྱུར་བ་དང་མཐོང་བར་འགྱུར་བ་གཉིས་ལས་དང་པོ་ནི་སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན་པའོ་ཞེས་བྱ་བ་ལ་སོགས་པ་ཤེས་པ་མིག་གི་མངོན་ཤེས་ཀྱི་རྗེས་སུ་རྒྱུ་བ་ཡིད་ཀྱི་རྣམ་ཤེས་དང་མཚུངས་ལྡན་གྱི་ཤེས་རབ་རྟོག་བཅས་ཡིན་ལ། གཉིས་པ་ནི་ད་ལྟར་གྱི་གཟུགས་ཀྱི་སྐྱེ་མཆེད་ལ་དམིགས་པ་མིག་གི་རྣམ་ཤེས་དང་མཚུངས་ལྡན་གྱི་ཤེས་རབ་རྟོག་པ་མེད་པའོ། །འོ་ན་མདོ་ལས་ལྷའི་མིག་གི་མངོན་ཤེས་ཤེས་པ་མཐོང་འགྱུར་གྱི་ཏིང་ངི་འཛིན་དུ་བཤད་པ་དང་འགལ་ཏེ། མངོན་ཤེས་ནི་ཤེས་རབ་ཡིན་ལ་དེ་ནི་ཏིང་ངེ་འཛིན་བསྒོམ་པ་མ་ཡིན་པའི་ཕྱིར་རོ་ཞེ་ན། ཏིང་ངེ་འཛིན་གྱི་འབྲས་བུ་ལ་རྒྱུ་ཏིང་ངེ་འཛིན་གྱི་མིང་གིས་བཏགས་པ་སྟེ་ལྟེང་ཀ་རྐང་ནད་ཅེས་བརྗོད་པ་བཞིན་ནོ། །ཁ་ཅིག་ན་རེ། མངོན་ཤེས་རྣམ་དྲུག་རྣམ་གྲོལ་བློ། །ཞེས་པས་(མངོན་ཤེས་)འདི་ནི་(ཡིད་)རྣམ་གྲོལ་གྱི་ལམ་བསམ་གཏན་གྱིས་བསྡུས་པ་མཉམ་གཞག་ཁོ་ན་ཡིན་པས་ཏིང་ངེ་འཛིན་སྒོམ་པ་དངོས་ཡིན་པས་མདོ་དང་འགལ་བ་མེད་དོ་ཞེས་ཟེར་རོ། །ཊཱིཀ་བྱེད་དག་ནི་ཕྱོགས་སྔ་མ་ནི་ཆོས་མངོན་པའི་མཛོད་སེམས་པ་རྣམས་ཀྱི་ལུགས་ཡིན་ཏེ། མངོན་ཤེས་མཚན་ཉིད་པ་དང་ཏིང་ངེ་འཛིན་ལ་བསྒོམ་པ་བཏགས་པ་བར་འདོད་ལ། ལུགས་ཕྱི་མ་ལྟར་ན་མིག་གི་མངོན་ཤེས་ཏིང་ངེ་འཛིན་ཡིན་པས་ཏིང་ངེ་འཛིན་བསྒོམ་པ་དངོས་སུ་འདོད་པར་འཆད་དོ། །
རྩ་བ། སྦྱོར་བ་ལས་བྱུང་བློ་དབྱེར་འགྱུར། །
རྡོ་རྗེ་ལྟ་བུའི་བསམ་གཏན་མཐའི། །
གང་ཡིན་དེ་ཟག་ཟད་འགྱུར་བསྒོམ། །
སྦྱོར་བ་ལས་བྱུང་བའི་ཡོན་ཏན་ཁམས་གསུམ་གྱིས་བསྡུས་པ་མི་སྡུག་པ་དང༌། དབུགས་འབྱུང་རྔུབ་དྲན་པ་དང༌། ཉོན་མོངས་པ་མེད་པ་དང༌། སྨོན་ནས་ཤེས་པ་དང༌། སོ་སོ་ཡང་དག་པར་རིག་པ་དང༌། མངོན་ཤེས་དང་པོ་ལྔ་དང༌། ཟག་བཅས་ཀྱི་རྣམ་ཐར་དང༌། ཟིལ་གནོན་ལ་སོགས་པ་ཟག་བཅས་དང་ཟག་མེད་རྣམ་ཐར་སྒོ་གསུམ་དང༌། ཐོད་རྒལ་གྱི་སྙོམས་འཇུག་དང༌། ཟག་ཟད་ཀྱི་མངོན་ཤེས་ལ་སོགས་རྣམས་ལའང་ཏིང་ངེ་འཛིན་དང་མཚུངས་པར་ལྡན་པའི་ཕྱིར་ཏིང་ངེ་འཛིན་གྱི་མིང་གིས་བཏགས་ནས་བློ་སྟེ་ཤེས་རབ་རབ་ཏུ་རྣམ་པར་དབྱེ་བར་འགྱུར་བའི་ཏིང་ངེ་འཛིན་ཅེས་བྱ་སྟེ། ཏིང་ངེ་འཛིན་གྱི་སྟོབས་ཀྱིས་གོང་ནས་གོང་དུ་ཕུལ་དུ་ཕྱིན་པར་ཆོས་རབ་ཏུ་རྣམ་པར་འབྱེད་པའི་ཤེས་རབ་ཁྱད་པར་དུ་འགྱུར་བའི་ཕྱིར་རོ། །བསམ་གཏན་གྱི་ཡ་མཐའ་བཞི་པས་བསྡུས་པའི་རྡོ་རྗེ་ལྟ་བུའི་ཏིང་ངེ་འཛིན་གང་ཡིན་པ་དེ་ནི་དེས་ཟག་པ་མ་ལུས་པར་ཟད་པར་འགྱུར་བས་ཟག་པ་ཐམས་ཅད་ཟད་པར་འགྱུར་བ་ཏིང་ངེ་འཛིན་སྒོམ་པ་ཞེས་བྱའོ།། (ས་གཞན་ལ་བརྟེན་པའི་རྡོར་ཏིང་ཡང་དེ་ཡིན་མོད་ཀྱང་།) ཏིང་ངེ་འཛིན་བཞི་པོ་འདི་དག་བྱེ་བྲག་ཏུ་སྨྲ་བ་ནི་བཅོམ་ལྡན་འདས་ཉིད་ཀྱི་ཐུགས་རྒྱུད་ལ་ཇི་ལྟར་བསྐྱེད་པའི་དབང་དུ་མཛད་ནས་གསུངས་པ་ཡིན་ཏེ། འདི་ལྟར་ལས་ཀྱི་མཐའ་ལ་གཟིགས་པའི་ཆེད་དུ་ཞིང་པའི་གྲོང་དུ་བྱོན་པ་ན་ཤིང་འཛམ་བུའི་དྲུང་དུ་བསམ་གཏན་དང་པོ་བསྐྱེད་པ་དང༌། དེ་ནས་བྱང་ཆུབ་ཀྱི་ཤིང་དྲུང་དུ་ཐུན་དང་པོ་ལ་ལྷའི་བུའི་བདུད་བཏུལ་བའི་རྗེས་ལ་ལྷའི་སྤྱན་གྱིས་སེམས་ཅན་གྱི་འཆི་འཕོ་དང་སྐྱེ་བ་ཉམ་ང་བར་གཟིགས་པ་དང༌། དེ་ནས་དེ་དག་བསྐྱབ་པའི་ཕྱིར་གུང་ཐུན་ལ་བསམ་གཏན་དང་རྣམ་པར་ཐར་པ་དང་སྙོམས་པར་འཇུག་པ་རྣམས་བསྐྱེད་པ་དང༌། དེའི་རྗེས་ལ་ཐུན་གསུམ་པ་ལ་བསམ་གཏན་བཞི་པ་ལ་བརྟེན་ཏེ་རྡོ་རྗེ་ལྟ་བུའི་ཏིང་ངེ་འཛིན་བསྐྱེད་ནས་དེས་ཀུན་སྦྱོར་ཐམས་ཅད་སྤངས་པ་རྣམས་ནི་རིམ་པ་ལྟར་མཐོང་ཆོས་ལ་བདེ་བར་གནས་པར་འགྱུར་བའི་ཏིང་ངེ་འཛིན་བསྒོམ་པ་ལ་སོགས་པ་ཡིན་པའི་ཕྱིར་རོ། །དེས་ན་ཏིང་ངེ་འཛིན་བཞི་ཁོ་ནར་གསུངས་སོ་ཞེས་འདོད་དོ། །
གཉིས་པ་དེ་ལ་བརྟེན་པའི་ཡོན་ཏན་བཤད་པ་ལ་དངོས་དང༌། ཁྱད་པར་གྱི་ཆོས་བཤད་པ་གཉིས་ཀྱི་དང་པོ་ལ་བཞི་ལས།
རྩ་བ། ཚད་མེད་པ་ནི་བཞི་ཡིན་ནོ། །
གནོད་སེམས་ལ་སོགས་གཉེན་པོའི་ཕྱིར། །
ཡུལ་སེམས་ཅན་ཚད་མེད་པ་ལ་དམིགས་ཤིང་འབྲས་བུ་བསོད་ནམས་ཚད་མེད་འབྱུང་བའི་ཚད་མེད་པ་ནི་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་རྣམ་པ་བཞི་ཡིན་ནོ། །དེ་དག་བཞིར་ངེས་པ་ནི་རིམ་པ་ལྟར་གནོད་སེམས་དང༌། སོགས་པས་བསྡུས་པ་རྣམ་པར་འཚེ་བ་དང༌། གཞན་གྱི་ཕུན་སུམ་ཚོགས་པ་ལམ་དགའ་བ་དང༌། འདོད་པའི་འདོད་ཆགས་དང་གནོད་སེམས་མང་བ་རྣམས་ཀྱི་གཉེན་པོ་ཡིན་པའི་ཕྱིར་རོ། །གལ་ཏེ་བཏང་སྙོམས་ཀྱིས་འདོད་པའི་འདོད་ཆགས་ཀྱི་གཉེན་པོ་བྱེད་པ་ལྟར་མི་སྡུག་པས་ཀྱང་བྱེད་ན་དེ་གཉིས་ལ་ཁྱད་པར་ཅི་ཡོད་ཅེ་ན། ཁ་དོག་གི་འདོད་ཆགས་དང་འཁྲིག་པའི་འདོད་ཆགས་ཀྱི་གཉེན་པོར་གོ་རིམ་བཞིན་དུ་མི་སྡུག་པ་དང་བཏང་སྙོམས་སོ་ཞེས་བྱེ་བྲག་ཏུ་སྨྲ་བ་རྣམས་འདོད་ལ། སློབ་དཔོན་ནི་འཁྲིག་པའི་འདོད་ཆགས་ཀྱི་གཉེན་པོར་མི་སྡུག་པ་དང༌། ཉེ་དུ་ལའང་འབྲེལ་མེད་ལྟར་སྒོམ་པས་ཕ་མ་ལ་སོགས་པ་ཉེ་དུའི་འདོད་ཆགས་ཀྱིས་གཉེན་པོར་བཏང་སྙོམས་སོ་ཞེས་བཞེད་དོ། །
རྩ་བ། ཞེ་སྡང་མེད་བྱམས་སྙིང་རྗེ་ཡང༌། །
ཡིད་བདེ་བ་ནི་དགའ་བ་ཡིན། །
བཏང་སྙོམས་མ་ཆགས་རྣམ་པ་ནི། །
ཀྱེ་མ་བདེར་གྱུར་སྡུག་བསྔལ་དང༌། །
དགར་གྱུར་སེམས་ཅན་རྣམས་སྙམ་པ། །
ཚད་མེད་པའི་ངོ་བོ་ནི་སེམས་ཅན་ལ་ཞེ་སྡང་མེད་པའི་དགེ་བའི་རྩ་བ་ནི་བྱམས་པ་ཡིན་ལ། སྙིང་རྗེ་ཡང་དེ་དང་འདྲ་བར་ཞེ་སྡང་མེད་པའི་དགེ་བའོ། །གཞན་བདེ་བ་དང་ལྡན་པར་ཤེས་ན་ཡིད་བདེ་བ་ནི་དགའ་བ་ཚད་མེད་པ་ཡིན་ལ། བཏང་སྙོམས་ནི་མ་ཆགས་པའི་རང་བཞིན་གྱི་དགེ་བའོ། །འོ་ན་དེ་གནོད་སེམས་ཀྱི་གཉེན་པོར་ཇི་ལྟར་འགྱུར་ཞེ་ན། དེའི་སྤང་བྱའི་གནོད་སེམས་ནི་ཆགས་པས་དྲངས་པའི་གནོད་སེམས་ཡིན་པའི་ཕྱིར་འགྱུར་རོ། །སློབ་དཔོན་ནི་འདོད་ཆགས་དང་གནོད་སེམས་གཉིས་ཀའི་གཉེན་པོར་འགྱུར་བ་ནི་མ་ཆགས་པ་དང་ཞེ་སྡང་མེད་པ་གཉིས་ཀའི་རང་བཞིན་ཡིན་ན་རུང་བས་གཉིས་ཀའི་རང་བཞིན་དུ་བཞེད་དོ། །དེ་ཡང་ཆོས་གཅིག་ལ་གཉིས་ཀའི་རང་བཞིན་ཡིན་པར་ནི་མི་གཟུང་གི་(བར་མ་གནས་པའི་)མ་ཆགས་པ་དང་ཞེ་སྡང་མེད་པ་སོ་སོ་ལ་བཏང་སྙོམས་སུ་བརྗོད་པའོ། །
དེ་དག་གི་རྣམ་པ་ནི་གོ་རིམ་བཞིན་དུ་ཀྱེ་མ་སེམས་ཅན་རྣམས་བདེ་བ་དང་ལྡན་པར་གྱུར་ཅིག སྡུག་བསྔལ་ལས་གྲོལ་བར་གྱུར་ཅིག་སྙམ་པ་དང༌། ཡིད་དགའ་བ་དང་ལྡན་པར་གྱུར་ཅིག ཉེ་རིང་དང་ཆགས་སྡང་མེད་པར་མཉམ་པར་བྱའོ་སྙམ་དུ་ཡིད་ལ་བྱེད་ཅིང་དེ་དག་ལ་སྙོམས་པར་འཇུག་པའོ། །གལ་ཏེ་སེམས་ཅན་རྣམས་བདེ་བ་ལ་སོགས་པ་དང་མི་ལྡན་པ་ལ་བདེ་བ་ལ་སོགས་པར་ཡིད་ལ་བྱེད་པའི་ཕྱིར་ཕྱིན་ཅི་ལོག་ཡིན་ལ། ཕྱིན་ཅི་ལོག་ཀྱང་མི་དགེ་བ་ཡིན་པའི་ཕྱིར་ཇི་ལྟར་དགེ་བར་འགྱུར་ཞེ་ན། སྡུག་བསྔལ་ལ་སོགས་པ་ལ་བདེ་བའོ་སྙོམ་དུ་ཤེས་པ་ལ་སོགས་པ་ནི་མ་ཡིན་གྱི། འོན་ཀྱང་སྡུག་བསྔལ་བའི་སེམས་ཅན་འདི་དག་བདེ་བར་གྱུར་ཅིག་ཅེས་མོས་པ་ཡིད་ལ་བྱེད་པའི་ཕྱིར་དགེ་བ་ཡིན་ནོ། །དེ་ལྟ་ནའང་སེམས་ཅན་ཐམས་ཅད་བདེ་བ་དང་ལྡན་པ་མི་སྲིད་པའི་ཕྱིར་ཕྱིན་ཅི་ལོག་པར་མོས་པ་ཡིན་ནོ་ཞེ་ན། དེ་ལྟ་མོད་ཀྱི་བསམ་པ་བཟང་བའི་ཕྱིར་དང༌། གནོད་སེམས་ལ་སོགས་པ་མི་དགེ་བའི་གཉེན་པོ་བྱེད་པའི་ཕྱིར་དང༌། གཅིག་ཏུ་སེམས་ཅན་ལ་ཕན་པར་ཞུགས་པའི་ཕྱིར་དགེ་བ་ཡིན་ཏེ། རིན་པོ་ཆེའི་ཕྲེང་བ་ལས། གཞན་ལ་གཅིག་ཏུ་ཕན་པ་བདེ། །མི་ཕན་ཕྱིར་ན་ཅིག་ཤོས་མིན། །ཞེས་གསུངས་པ་བཞིན་ནོ། །གལ་ཏེ་སེམས་ཅན་ཐམས་ཅད་བདེ་བར་གྱུར་ཅིག་སྙམ་པ་ལ་སོགས་པ་ནི་མོས་པའམ་འདུན་པའི་རང་བཞིན་ཡིན་པའི་ཕྱིར་དང༌། བྱམས་པ་ལ་སོགས་པའང་ཞེ་སྡང་མེད་པ་ལ་སོགས་པ་སེམས་ལས་བྱུང་བ་གཞན་ལ་འདོད་པའི་ཕྱིར་ཇི་ལྟར་དེ་དག་གི་རྣམ་པར་འགྱུར་ཞེ་ན། བདེན་མོད་ཀྱི་སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག་ཅེས་འདུན་པ་དང་མཚུངས་པར་ལྡན་པའི་ཞེ་སྡང་མེད་པ་ལ་འདོད་པའི་ཕྱིར་སྐྱོན་མེད་དོ། །
རྩ་བ། སྤྱོད་ཡུལ་འདོད་པའི་སེམས་ཅན་རྣམས། །
དགའ་བ་བསམ་གཏན་གཉིས་ན་ཡོད། །
གཞན་ནི་དྲུག་ན་ཁ་ཅིག་ལྔ། །
ཚད་མེད་པ་འདི་དག་གི་སྤྱོད་ཡུལ་ཏེ་དམིགས་པ་ནི། འདོད་པའི་ཁམས་ཀྱི་སེམས་ཅན་རྣམས་ཡིན་ཏེ། འདོད་པའི་སེམས་ཅན་ལ་དམིགས་པའི་གནོད་སེམས་ལ་སོགས་པའི་གཉེན་པོ་ཡིན་པའི་ཕྱིར་རོ། །མདོ་ལས། དེ་བྱམས་པ་དང་ལྡན་པའི་སེམས་ཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་པ། ཚད་མེད་པ། ཤིན་ཏུ་བསྒོམས་པ། ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ་ཞེས་བྱ་བ་ལ་སོགས་པ་གསུངས་པའི་དོན་ནི་བྱམས་པ་དང་མཚུངས་ལྡན་གྱི་སེམས་ནི་བྱམས་པ་དང་ལྡན་པའི་སེམས་ཡིན་ལ། དེ་ཉིད་རིམ་པ་ལྟར་ཉེ་བའི་ཉོན་མོངས་པ་ཁོན་འཛིན་དང༌། ཕྲག་དོག་དང༌། ཞེ་སྡང་གི་གཉེན་པོ་ཡིན་པས་ཁོན་མེད་པ་ལ་སོགས་པ་གསུམ་དང༌། དེ་ཉིད་ཀྱི་འབྲས་བུ་ཆེ་བས་ཡངས་པ་དང༌། ས་གཟུགས་ན་སྤྱོད་པ་ཡིན་པས་རྒྱ་ཆེན་པོར་གྱུར་པ་དང༌། སེམས་ཅན་ཚད་མེད་པ་ལ་དམིགས་པས་ཚད་མེད་པ་དང༌། མི་མཐུན་ཕྱོགས་སྤངས་པས་ཤིན་ཏུ་བསྒོམས་པའོ། །དེ་ལྟར་ན་ཁོན་མེད་པ་ལ་སོགས་པ་ཚིགས་གསུམ་དང༌། གཅིག་དང༌། གཅིག་དང༌། གཅིག་དང༌། གཅིག་གིས་རིམ་པ་ལྟར་མི་མཐུན་ཕྱོགས་ཀྱི་གཉེན་པོ་བྱེད་པ་དང༌། འབྲས་བུ་དང༌། ས་དང༌། དམིགས་པ་དང༌། རྣམ་པར་དག་པའི་ཕན་ཡོན་གྱི་སྒོ་ནས་བྱམས་པ་དེ་བསྟན་པ་ཡིན་ནོ། །ཕྱོགས་གཅིག་ཏུ་ཞེས་པ་ནི་གནས་ཕྱོགས་ཀྱིས་མཚོན་ནས་གནས་པ་པོ་ཕྱོགས་ཅན་གྱི་སེམས་ཅན་སྟོན་པའོ། །མོས་པ་ཡིན་ལ་བྱེད་པ་ཡིན་པས་མོས་ཏེའོ། །སེམས་ཅན་ཐམས་ཅད་ལ་ཅིག་ཅར་མོས་པར་བྱེད་པས་ཁྱབ་པར་བྱས་ནས་སོ། །དངོས་གཞིའི་སྙོམས་འཇུག་ཐོབ་པས་ན་རྫོགས་པར་བྱས་ཏེའོ། །དུས་ཡུན་རིང་པོར་རྗེས་སུ་འཇུག་པས་ན་གནས་སོ་ཞེས་གསུངས་སོ་ཞེས་རྣམ་བཤད་རིགས་པ་ལས་བཤད་དོ། །དེ་དག་གི་ས་ནི་དགའ་བ་ཚད་མེད་པ་ནི་ཡིད་བདེ་ཡིན་པས་བསམ་གཏན་སྔ་མ་གཉིས་ན་ཡོད་ལ། ཚད་མེད་པ་གཞན་གསུམ་ནི་མཉམ་གཞག་ཁོ་ན་ཡིན་པས་མི་ལྕོགས་མེད་ཀྱང་གསལ་བས་དངོས་གཞི་དང་འདྲ་བས་བསམ་གཏན་གྱི་ས་དྲུག་ན་ཡོད་པར་ཁ་ཅིག་འདོད་ཅིང༌། ཁ་ཅིག་དངོས་གཞི་ཁོ་ན་ཡིན་པས་བསམ་གཏན་ཁྱད་པར་ཅན་དང་དངོས་གཞི་བཞི་སྟེ་ལྔ་ན་ཡོད་པར་འདོད་ལ། ཁ་ཅིག་མཉམ་པར་མ་བཞག་པ་དང་སྦྱོར་བའང་སྨོས་ཏེ། འདོད་པ་དང་བསམ་གཏན་གྱི་ཉེར་བསྡོགས་བཞི་དང་དངོས་གཞི་ལྔ་སྟེ་བཅུ་ན་ཡོད་པར་འདོད་དོ། །
འོ་ན་གནོད་སེམས་ལ་སོགས་གཉེན་པོའི་ཕྱིར་ཞེས་གང་བཤད་པ་ཅི་བྱམས་པ་ལ་སོགས་པས་ཉོན་མོངས་པ་དངོས་སུ་སྤོང་ངམ་ཞེ་ན།
རྩ་བ། དེ་ཡིས་མི་སྤོང་་་་་་་་་་་་་་་་་་་་་་་་། །
ཚད་མེད་བཞི་པོ་དེ་ཡིས་གནོད་སེམས་ལ་སོགས་པ་དངོས་སུ་མི་སྤོང་སྟེ། བསམ་གཏན་དག་པ་པ་དངོས་གཞིའི་ས་པ་ཡིན་ལ། དག་པ་པའི་དངོས་གཞིས་ནི་ཉོན་མོངས་པ་མི་སྤོང་ངོ་ཞེས་བཤད་ཟིན་པའི་ཕྱིར་དང༌། (སྤོང་ལམ་མིན་པའི་ཕྱིར་དང༌།) དེ་ཁོ་ན་ཉིད་ཡིད་ལ་བྱེད་པས་ཉོན་མོངས་སྤང་བ་ཡིན་པ་ལ་འདི་དག་མོས་པ་ཡིད་ལ་བྱེད་པ་ཡིན་པའི་ཕྱིར་དང༌། ཆོས་ཐམས་ཅད་ཀྱི་སྤྱིའི་མཚན་ཉིད་ཡིད་ལ་བྱེད་པས་ཉོན་མོངས་སྤོང་བ་ཡིན་པ་ལ་འདི་དག་སེམས་ཅན་ལ་དམིགས་པས་ཉི་ཚེ་བ་ཡིན་པའི་ཕྱིར་ཏེ། རྣམ་འགྲེལ་ལས་ཀྱང༌། བྱམས་སོགས་རྨོངས་དང་འགལ་མེད་ཕྱིར། །ཉེས་པ་ཤིན་ཏུ་ཚར་གཅོད་མིན། །ཞེས་བཤད་དོ། །འོན་ཀྱང་དེ་དག་གི་སྦྱོར་བས་གནོད་སེམས་ལ་སོགས་པ་རྣམ་པར་གནོན་པའི་ཕྱིར་དང༌། དངོས་གཞིས་སྤངས་པ་ཐག་སྲིང་བར་བྱེད་པའི་ཕྱིར་གནོད་སེམས་ལ་སོགས་པའི་གཉེན་པོར་བཤད་དོ། །ཉོན་མོངས་པ་སྤོང་བ་ནི་གལ་ཏེ་འཇིག་རྟེན་པའི་ལམ་གྱིས་སྤོང་ན་ནི་ཉེར་བསྡོགས་ཀྱིས་སྤོང་བ་ཡིན་ལ། འོན་ཏེ་(མགོ་མནན་པ་དེ་དག་)འཇིག་རྟེན་ལས་འདས་པའི་ལམ་གྱིས་སྤོང་ན་ནི་བདེན་པ་རྟོགས་པའི་སྤོང་ལམ་གྱིས་(དངོས་སུ་རྩ་བ་ནས་)སྤོང་བ་ཡིན་པའི་ཕྱིར་རོ། ། (འདོད་ཆགས་དང་བྲལ་ཏེ་དངོས་གཞི་ཐོབ་ནས་དངོས་གཞིས་བསྡུས་པའི་ཚད་མེད་རྙེད་པའི་ཕྱིར་གནོད་སེམས་ལ་སོགས་པའི་རྐྱེན་སྟོབས་ལྡན་གྱིས་ཀྱང་མི་རྫིའོ།།) འོན་ཀྱང་བྱམས་སོགས་གསུམ་འདོད་པ་དང་ཉེར་བསྡོགས་ན་ཡོད་པར་འདོད་པ་ལྟར་ན་ནི་སྦྱོར་བ་དང་དམིགས་རྣམ་དང་ངོ་བོ་དངོས་གཞིའི་ཚད་མེད་དང་འདྲ་ཞིང༌། དེ་དག་གི་སྦྱོར་བས་ཉོན་མོངས་པ་རྣམས་རྣམ་པར་མནན་ནས་སྤོང་ལམ་བར་ཆད་མེད་པའི་ལམ་རྣམས་ཀྱིས་དངོས་སུ་སྤོང་ངོ༌། །
འདི་སྒོམ་པའི་ཚུལ་ནི་སྒོམ་པ་པོ་ཉོན་མོངས་ཆུང་ན་ཇི་ལྟར་རང་ཉིད་ཀྱི་རྒྱུད་ལ་བདེ་བ་ཡོད་པའམ། གཞན་སངས་རྒྱས་དང་བྱང་ཆུབ་སེམས་དཔའ་དང་འཕགས་པ་དགྲ་བཅོམ་པ་ལ་སོགས་པའི་རྒྱུད་ལ་བདེ་བ་མངའ་བར་ཐོས་པ་དེ་བཞིན་དུ་སེམས་ཅན་ཐམས་ཅད་ཀྱང་དེ་ལྟ་བུའི་བདེ་བ་དང་ལྡན་པར་གྱུར་ཅིག་ཅེས་ཅིག་ཅར་མོས་པར་བྱེད་དོ། །གལ་ཏེ་ཉོན་མོངས་པའི་འཇུག་པ་ཤས་ཆེ་བས་སེམས་ཅན་ཐམས་ཅད་ལ་དེ་ལྟར་མོས་པར་མི་ནུས་ན་ནི་སེམས་ཅན་ལ་མཛའ་བོ་དང༌། ཐ་མལ་པ་དང༌། དགྲ་བོའི་ཕྱོགས་གསུམ་དུ་དབྱེ་ཞིང༌། མཛའ་བོའང་ཆེ་འབྲིང་ཆུང་ངུ་གསུམ་དུ་ཕྱེ་ལ། དང་པོར་བསྐྱེད་སླ་བས་མཛའ་བོ་ཆེ་འབྲིང་ཆུང་ངུ་གསུམ་ལ་རིམ་གྱིས་མོས་པར་བྱེད་ལ། གལ་ཏེ་གསུམ་ག་ལ་བྱམས་པ་མཉམ་པོར་ཐོབ་ན་དེ་ནས་ཐ་མལ་པ་དང༌། དེ་ནས་དགྲ་བོའི་ཕྱོགས་ལའང་ཆུང་འབྲིང་ཆེན་པོ་གསུམ་དུ་ཕྱེ་ནས་ཆུང་འབྲིང་ཆེན་པོ་གསུམ་ལ་རིམ་གྱིས་ཁྱབ་པར་བྱེད་ཅིང་གལ་ཏེ་དགྲ་བོ་ཆེན་པོ་ལ་མཛའ་བོ་ཆེན་པོ་ལྟར་བདེ་བར་མོས་པ་མི་ལྡོག་པར་གྱུར་ན། དེ་ནས་རིམ་གྱིས་ཁྱིམ་དང་གྲོང་དང་ཡུལ་ཕྱོགས་གཅིག་གི་སེམས་ཅན་དང༌། དེ་ནས་རིམ་གྱིས་ཕྱོགས་གཅིག་ནས་འཇིག་རྟེན་ཐམས་ཅད་ཀྱི་བར་དུ་བྱམས་པས་རྒྱས་ཤིང་ཁྱབ་པར་བྱེད་དོ། །
དེ་ཡང་དགེ་རྩ་ཆད་པ་དང་རང་རྒྱལ་ལའང་སྔོན་གྱི་བསོད་ནམས་དང་དེ་མ་ཡིན་པའི་དབང་གིས་རིམ་པ་ལྟར་(རང་སངས་རྒྱས་)གཟུགས་བཟང་ངན་ལ་སོགས་པ་དམིགས་པས་སེམས་ཅན་རྣམས་ལ་སྐྱོན་ཡོན་གཉིས་ཀ་ཡོད་ཀྱང་ཡོན་ཏན་གྱི་ཆ་ནས་བསམས་ན་བྱམས་པ་མྱུར་དུ་སྐྱེ་བས་སྐྱོན་ནི་བསམ་པར་མི་བྱ་སྟེ། འགྲེལ་པ་ལས། གང་ཞིག་ཐམས་ཅད་དུ་ཡོན་ཏན་འཛིན་པ་དེ་ནི་བྱམས་པ་མྱུར་དུ་སྐྱེད་པར་བྱེད་དོ། །སྔོན་གྱི་བསོད་ནམས་དང་བསོད་ནམས་མ་ཡིན་པའི་འབྲས་བུ་སྣང་བའི་སྒོ་ནས་དགེ་བའི་རྩ་བ་ཀུན་དུ་ཆད་པ་ལའང་ཡོན་ཏན་གཟུང་བར་ནུས་ལ། རང་སངས་རྒྱས་ལའང་སྐྱོན་གཟུང་བར་ནུས་སོ་ཞེས་བཤད་པའི་ཕྱིར་རོ། །དེ་བཞིན་དུ་སེམས་ཅན་སྡུག་བསྔལ་རྣམ་པ་མང་པོའི་ཆུ་བོར་བྱིང་ཞིང་མངོན་པར་དགའ་བ་དང་མི་ལྡན་པ་འདི་རྣམས་སྡུག་བསྔལ་ལས་མྱུར་དུ་ཐར་པ་དང༌། མངོན་པར་དགའ་བ་དང་ལྡན་པར་གྱུར་ན་ཅི་མ་རུང་སྙམ་དུ་མོས་པས་སྙིང་རྗེ་དང་དགའ་བ་ལའང་སྒོམ་པར་བྱེད་ལ། བཏང་སྙོམས་ནི་དང་པོ་ཐ་མལ་པའི་ཕྱོགས་ལ་བརྩམས་ནས་མཐར་དགྲ་དང་གཉེན་ལ་མཚུངས་པར་ལྟ་བ་ཡིན་ནོ། །
རྩ་བ། ་་་་་་་་་་་་་་་་་་་་་མི་དག་གི །
ནང་དུ་སྐྱེད་དེ་ངེས་གསུམ་ལྡན། །
ཚད་མེད་པ་བཞི་པོ་འདི་དག་ནི་དང་པོ་བློ་གསལ་བས་མི་དག་གི་ནང་དུ་བསྐྱེད་ཀྱི་གཞན་དུ་ནི་མ་ཡིན་ཏེ། དེ་དག་བློ་མི་གསལ་བས་བསྐྱེད་པར་མི་ནུས་པའི་ཕྱིར་(དང་གཞན་གྱིས་འདོམས་པ་ལ་ལྟོས་པའི་ཕྱིར་)རོ། །ཅི་ཚད་མེད་དེ་དག་གཅིག་དང་ལྡན་པ་དེ་ངེས་པར་ཐམས་ཅད་དང་ལྡན་ནམ་ཞེ་ན། ཐམས་ཅད་ནི་མ་ཡིན་གྱི་འོན་ཀྱང་དགའ་བ་མ་གཏོགས་པ་གསུམ་ནི་གཅིག་ལྡན་ན་གཞན་གཉིས་ཀྱང་ལྡན་པས་གཅིག་ཡོད་ན་ངེས་པར་གསུམ་གསུམ་དང་ལྡན་ལ། དགའ་བ་ནི་ཡིད་བདེ་ཡིན་པས་དེ་ནི་བསམ་གཏན་གསུམ་པ་དང་བཞི་པའི་ས་ལ་མི་ལྡན་པའི་ཕྱིར་རོ། །འདི་ཡང་ཐོབ་པ་ལ་བསམས་ཀྱི་མངོན་གྱུར་ནི་རྣམ་པ་འགལ་བས་རེ་རེ་དང་ལྡན་པ་ཡིན་ནོ། །
རྩ་བ། རྣམ་པར་ཐར་བརྒྱད་དང་པོ་གཉིས། །
མི་སྡུག་བསམ་གཏན་གཉིས་ན་ཡོད། །
གསུམ་པ་མཐའ་ན་དེ་མ་ཆགས། །
གཟུགས་མེད་མཉམ་གཞག་དགེ་རྣམས་སོ། །
ཡང་མདོ་ལས། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་གཉིས་པའོ། །སྡུག་པའི་རྣམ་པར་ཐར་པ་ལུས་ཀྱི་མངོན་སུམ་དུ་བྱས་ཏེ་རྫོགས་པར་བྱས་ནས་གནས་པ་འདི་ནི་རྣམ་པར་ཐར་པ་གསུམ་པའོ་ཞེས་པ་དང༌། དེ་བཞིན་དུ་གཟུགས་མེད་པ་བཞི་དང༌། རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་དང་ཚོར་བ་འགོག་པ་ལུས་ཀྱིས་མངོན་སུམ་དུ་བྱས་ཏེ་རྫོགས་པར་བྱས་ནས་གནས་པ་འདི་ནི་རྣམ་པར་ཐར་པ་བརྒྱད་པའོ་ཞེས་རྣམ་པར་ཐར་པ་བརྒྱད་གསུངས་པ་ལས་རྣམ་ཐར་དང་པོ་གཉིས་ནི་རྣམ་པར་སྔོས་པ་ལ་སོགས་པའི་རྣམ་པར་ལྟ་བའི་ཕྱིར་མི་སྡུག་པའི་རང་བཞིན་ཡིན་ཏེ། འདིའི་ངོ་བོ་མ་ཆགས་པ་དང༌། དམིགས་པ་འདོད་པར་གཏོགས་པའི་གཟུགས་ཀྱི་སྐྱེ་མཆེད་ཡིན་པར་ནི་(མི་སྡུག་མ་ཆགས་པ་སོགས་སུ་)སྔར་མི་སྡུག་པར་བཤད་པ་བཞིན་ནོ། །
ཁྱད་པར་ནི་འདི་ཡིན་ཏེ། མི་སྡུག་པ་ནི་ས་བཅུ་པ་ཡིན་ལ། རྣམ་ཐར་དང་པོ་གཉིས་ནི་བསམ་གཏན་གཉིས་པ་ཡན་ཆད་ན་མིག་ཤེས་མེད་པས་ཁ་དོག་གི་འདོད་ཆགས་མེད་དེ། གང་ཡུལ་ལ་འདོད་ཆགས་དང་བྲལ་བ་དེ་ནི་ཡུལ་ཅན་ཤེས་པ་ལས་ཀྱང་འདོད་ཆགས་དང་བྲལ་ཏེ་སྣ་ལྕེའི་རྣམ་ཤེས་བཞིན་ནོ།། (བསམ་གཏན་ཕྱི་མ་གསུམ་ན་ནང་གི་དབང་པོ་གཟུགས་ཅན་ལ་ཆགས་པ་ཡོད་དོ། །རྣམ་ཐར་འདི་གསུམ་བསམ་གཏན་གསུམ་པར་ཅིའི་ཕྱིར་མ་བཞག་ཅེ་ན། རང་གི་སྤང་བྱ་གཉིས་པའི་ཁ་དོག་གི་འདོད་ཆགས་མེད་པས་མི་སྡུག་པའི་རྣམ་ཐར་མེད་ལ།) བསམ་གཏན་གཉིས་པ་ལ་སོགས་པ་ནའང་མིག་ཤེས་མེད་པས་ཁ་དོག་གི་འདོད་ཆགས་དང་བྲལ་བ་ཡིན་ནོ་ཞེས་ཊཱིཀར་བཤད་པས་གོ་རིམ་བཞིན་དུ་འདོད་པ་དང་བསམ་གཏན་དང་པོའི་ས་པའི་ཁ་དོག་གི་འདོད་ཆགས་ཀྱི་གཉེན་པོ་ཡིན་པས་བསམ་གཏན་སྔ་མ་གཉིས་ཁོ་ན་ན་ཡོད་དོ། །དེ་ཡང་དངོས་གཞིས་བསྡུས་པའི་དག་པ་པ་དང༌། མོས་པ་ཡིད་ལ་བྱེད་པ་ཡིན་པས་རྣམ་པར་གནོན་པ་ཙམ་མམ་ཐག་སྲིང་བའི་གཉེན་པོ་ཡིན་གྱི་དངོས་སུ་སྤོང་བ་ནི་མ་ཡིན་ནོ། །དེ་ལ་ནང་གཟུགས་དང་གཟུགས་མེད་པར་འདུ་ཤེས་པ་ནི་(གཟུགས་ཀྱིས་སེམས་ཐོབ་པ་གང་ཞིག་)གཟུགས་ལས་འདོད་ཆགས་དང་མ་བྲལ་བ་དང་བྲལ་བའམ། ཊཱིཀར་རང་ཉིད་ཀྱི་གཟུགས་ཀྱི་འདུ་ཤེས་མ་བཤིག་པ་དང་བཤིག་ནས་ཕྱི་རོལ་ཀྱི་གཟུགས་ལ་ལྟ་བ་ཡིན་པར་བཤད་པའམ། ཡང་ན་ཀུན་ལས་བཏུས་ཀྱི་འགྲེལ་པར་གཟུགས་མེད་པའི་སྙོམས་འཇུག་ལ་བརྟེན་ནས་ལྟ་བ་པོ་བདག་ཉིད་ལ་གཟུགས་སུ་འདུ་ཤེས་མངོན་དུ་བྱེད་པ་དང་གཟུགས་ཀྱི་འདུ་ཤེས་སྤངས་ནས་མིང་བཞིའི་འདུ་ཤེས་མངོན་དུ་བྱེད་པ་ལ་རིམ་པ་བཞིན་བཤད་དོ། །
གསུམ་པ་སྡུག་པའི་རྣམ་ཐར་ནི་བསམ་གཏན་གྱི་ཡ་མཐའ་བཞི་པ་ན་ཡོད་ཅིང༌། དེ་ཡང་ངོ་བོ་ཆགས་པའི་གཉེན་པོ་ཡིན་པས་གཙོ་བོ་མ་ཆགས་པ་ཡིན་གྱི་སྡུག་པའི་རྣམ་པ་ཅན་ཡིན་པས་མི་སྡུག་པ་ནི་མ་ཡིན་ནོ། །དེས་ན་གཟུགས་ཡིད་དུ་འོང་བ་སྤྲུལ་ནས་སྡུག་པར་ལྟ་ཞིང་དེ་ཉིད་ཏིང་ངེ་འཛིན་གྱི་ལུས་ཀྱིས་མངོན་སུམ་དུ་བྱེད་པས་ན་མིང་དེ་སྐད་ཅེས་བྱའོ།། (སྔ་མ་གཉིས་ཏེ་གསུམ་པོ་)དེ་དག་འཁོར་དང་བཅས་ན་ནི་རྗེས་འབྲང་གི་གཟུགས་ཡོད་པས་ཕུང་པོ་ལྔའི་རང་བཞིན་ཡིན་ནོ།། (བདེ་བས་གཡོ་བར་བྱས་པས་བདེ་བས་རྒྱབ་ཀྱིས་ཕྱོགས་པ་མི་སྲིད་པས་སྡུག་པའི་རྣམ་ཐར་ཡང་མེད་པའི་ཕྱིར་རོ། །འོ་ན་གསུམ་པའི་ཁ་དོག་ལ་ཆགས་པ་མེད་པས་བཞི་པར་ཡང་དེ་ཇི་ལྟར་ཡོད་ཅེ་ན། དེ་ན་དེ་སྐྱེད་པའི་)དགོས་པ་ནི་མི་སྡུག་པ་བསྒོམས་པས་ཡིད་ཞུམ་པར་རབ་ཏུ་དགའ་བས་གཟེངས་བསྟོད་པ་དང༌། སྡུག་པ་སྤྲུལ་པ་ལ་ཆགས་པ་སྐྱེ་ན་རྣམ་ཐར་དང་པོ་གཉིས་མ་གྲུབ་པ་ཡིན་ལ་མི་སྐྱེ་ན་གྲུབ་པ་ཡིན་པས་དེ་བརྟག་པའི་ཡང་ཕྱིར་རོ། །བསམ་གཏན་དང་པོ་གསུམ་དུ་སྡུག་པའི་རྣམ་ཐར་མི་སྟོན་པ་ནི་ས་དེ་དག་ན་དགའ་བ་དང་བདེ་བ་ཡོད་པས་སྡུག་པར་ཡིད་ལ་བྱས་ན་ཡུལ་དེ་ལ་དགའ་བ་དང་སྲེད་ན་མ་ཆགས་པར་མི་འགྲུབ་པའི་ཕྱིར་རམ། སྐྱོན་དང་བཅས་པའི་བསམ་གཏན་ཡིན་པས་དེ་མི་འགྲུབ་པའི་ཕྱིར་རོ་སྙམ་དུ་བསམས་སོ།། (རྣལ་འབྱོར་པ་རྣམས་རྒྱུ་མཚན་གཉིས་ཀྱིས་རྣམ་ཐར་དང་ཟིལ་གནོན་ལ་སོགས་པ་བསྐྱེད་དེ། ཉོན་མོངས་ཐག་སྲིང་བའི་ཕྱིར་དང༌། སྙོམས་འཇུག་ལ་དབང་འབྱོར་བར་བྱ་བའི་ཕྱིར་རོ། །དེ་ལ་དབང་ནས་ས་ལ་སོགས་པ་གསེར་ལ་སོགས་པར་བསྒྱུར་བ་དག །དངོས་པོ་བརྟན་པ་དུས་འདི་སྲིད་དུ་གནས་པར་གྱུར་ཅིག་ཅེས་མོས་པ་ལྟར་འགྲུབ་པས་བྱིན་གྱིས་རློབ་པ་དང༌། ཚེ་གཏོང་འཇོག་དང༌། རྡུལ་ཕྲན་དུ་རི་རབ་འཇུག་པ་ལ་སོགས་པ་བྱེད་ལ། གཉིས་ཀས་ཀྱང་ཉོན་མོངས་མེད་དང་སྨོན་ནས་ཤེས་དང་ཡང་དག་རིག་བཞི་ལ་སོགས་དང་འཕགས་པའི་རྗུ་འཕྲུལ་འགྲུབ་པར་བྱེད་དོ།།)
གཟུགས་མེད་པའི་མཉམ་གཞག་དགེ་བ་དག་པ་པ་དང་ཟག་མེད་རྣམས་ཁོ་ན་རྣམ་ཐར་ཡིན་གྱི་ཉོན་མོངས་ཅན་དང་མཉམ་པར་མ་བཞག་པ་འཆི་བའི་སྲིད་པའི་སེམས་ལྟ་བུའང་མ་ཡིན་ནོ།། (འདི་དགེ་བ་ཁོ་ན་ཡིན་པས་སོ།།) ཁ་ཅིག་གཟུགས་མེད་དེ་དག་ན་རྣམ་སྨིན་སྐྱེས་ཀྱི་སེམས་དང་སེམས་བྱུང་རྣམས་ལ་བསམས་ནས་འཆི་བའི་སེམས་ལས་གཞན་པའི་མཉམ་པར་མ་བཞག་པའི་སེམས་ཀྱང་ཡོད་པར་འདོད་དོ། །ཕྱོགས་སྔ་མ་ལྟར་ན་ནི་གཟུགས་མེད་མཉམ་པར་མ་བཞག་པ་ནི་འཆི་བའི་སྲིད་པའི་གནས་སྐབས་ཀྱི་སེམས་དང་སེམས་བྱུང་ཁོ་ན་ཡིན་པར་འདོད་དོ། །གཟུགས་མེད་ཀྱི་དངོས་གཞིར་མ་ཟད་ཉེར་བསྡོགས་ཀྱི་རྣམ་གྲོལ་གྱི་ལམ་གྱིས་ཀྱང་རྣམ་ཐར་ཀྱི་མིང་ཐོབ་ཀྱི་བར་ཆད་མེད་པའི་ལམ་གྱིས་ནི་རྣམ་ཐར་གྱི་མིང་མི་འཐོབ་སྟེ། རྣམ་ཐར་ནི་འོག་ས་ལ་རྒྱབ་ཀྱིས་ཕྱོགས་པ་ཡིན་ན་དེ་ནི་ས་འོག་མ་ལ་དམིགས་པའི་ཕྱིར་རོ།། (དེ་ཡང་དང་པོ་གཉིས་ཁ་དོག་གི་འདོད་ཆགས་ལ་དང༌། གསུམ་པ་ནི་མི་སྡུག་པ་ལ་དང༌། གཟུགས་མེད་ནི་དམིགས་པ་འོག་མ་དག་ལ་རྒྱབ་ཅིང་ཕྱོགས་པའི་ཕྱིར་རོ།།)
རྩ་བ། འགོག་པའི་སྙོམས་པར་འཇུག་པ་འོ། །
ཕྲ་བ་ཕྲ་བའི་མཇུག་ཐོགས་སུ། །
རང་གི་དག་དང་འོག་མ་ཡི། །
འཕགས་པའི་སེམས་ཀྱིས་དེ་ལས་ལྡང༌། །
རྣམ་ཐར་བརྒྱད་པ་འགོག་པའི་རྣམ་ཐར་ནི་གནས་གཉིས་པར་བཤད་པའི་འགོག་པའི་སྙོམས་པར་འཇུག་པའོ། །འདི་དག་ལ་ཅིའི་ཕྱིར་རྣམ་པར་ཐར་པ་ཞེས་བྱ་ཞེ་ན། དང་པོ་གཉིས་དང་གསུམ་པ་དང་གཟུགས་མེད་རྣམས་དང་འགོག་པ་རྣམས་ནི་གོ་རིམ་བཞིན་དུ་ཁ་དོག་གི་འདོད་ཆགས་དང༌། ཞུམ་ཞིང་ཆགས་པ་དང༌། གཟུགས་ཀྱི་འདུ་ཤེས་དང༌། འདུ་ཤེས་དང་ཚོར་བའམ། འདུ་བྱེད་ཐམས་ཅད་ལ་རྒྱབ་ཀྱིས་ཕྱོགས་པའི་ཕྱིར་རོ། །གཞན་དག་ན་རེ་འགོག་པ་ནི་སྙོམས་འཇུག་གི་སྒྲིབ་པ་ལས་རྣམ་པར་ཐར་པའི་ཕྱིར་རྣམ་པར་ཐར་པ་ཞེས་བྱའོ་ཞེས་ཟེར་རོ། །དེ་ལ་སྙོམས་འཇུག་གི་སྒྲིབ་པ་ནི་སྒྲིབ་པ་གང་ཞིག་ཡོད་ན་སེམས་ལས་སུ་མི་རུང་བས་ཁམས་གསུམ་པའི་འདོད་ཆགས་དང་བྲལ་བ་དག་གིས་ཀྱང་བསམ་གཏན་དང་པོའི་དངོས་གཞིའང་སྐྱེད་པར་མི་བྱེད་པ་དེ་ཡིན་ནོ་ཞེས་ཊཱི་ཀ་བྱེད་དག་འཆད་དོ། །
འགོག་པ་དེ་ལ་འཇུག་པའི་སེམས་ནི་ཁམས་གསུམ་ན་ཤིན་ཏུ་ཕྲ་བ་སྲིད་རྩེ་ཡིན་ལ་དེ་ཉིད་ཀྱང་(འགོག་པ་ལ་དམིགས་ནས་)ཆེས་ཕྲ་བར་བྱས་པའི་མཇུག་ཐོགས་སུ་སྙོམས་པར་འཇུག་སྟེ་(སེམས་རྒྱུན་གཅོད་དགོས་པའི་ཕྱིར་རོ།།) ལྡང་བ་ན་ནི་འཕེན་པ་ཇི་ལྟ་བ་བཞིན་དུ་སྲིད་རྩེ་རང་གི་ས་པའི་དག་པ་པ་དང་འོག་མ་ཅི་ཡང་མེད་པའི་སྐྱེ་མཆེད་ཀྱི་ས་པའི་འཕགས་པ་ཟག་པ་མེད་པའི་སེམས་ཀྱིས་འགོག་པ་དེ་ལས་ལྡང་བར་འགྱུར་ཏེ། དེ་ལྟར་ན་འགོག་པའི་སྙོམས་འཇུག་དང་དེ་ལ་སྙོམས་པར་འཇུག་སེམས་ནི་སྲིད་རྩེ་བ་ཡིན་པས་ཟག་བཅས་ཁོ་ན་ཡིན་ལ། ལྡང་སེམས་ནི་ཟག་བཅས་ཟག་མེད་གཉིས་ཀ་ཡིན་ནོ། །
རྩ་བ། དང་པོ་འདོད་གཏོགས་སྣང་ཡུལ་ཅན། །
གང་དག་གཟུགས་ཅན་མིན་དེ་དག །
སྤྱོད་ཡུལ་གོང་དང་རང་གི་སའི། །
སྡུག་བསྔལ་སོགས་དང་རྗེས་ཤེས་ཕྱོགས། །
རྣམ་ཐར་འདི་དག་ལས་དང་པོ་གསུམ་ལས་སྔ་མ་གཉིས་ནི་འདོད་པར་གཏོགས་པའི་སྣང་བ་གཟུགས་ཀྱི་སྐྱེ་མཆེད་ཡིད་དུ་མི་འོང་བ་དང་གསུམ་པ་ནི་ཡིད་དུ་འོང་བའི་ཡུལ་ཅན་ཡིན་ནོ། །གལ་ཏེ་འདི་དག་ཏིང་ངེ་འཛིན་ལ་བརྟེན་ནས་སྤྲུལ་པ་མ་ཡིན་ནམ་ཞེ་ན། ཡིན་མོད་ཀྱི་འདོད་པར་གཏོགས་པ་སྤྲུལ་པ་ཡིན་ནོ། །གང་དག་གཟུགས་ཅན་མིན་པའི་རྣམ་ཐར་བཞི་པོ་དེ་དག་གི་སྤྱོད་ཡུལ་ཏེ་དམིགས་པ་ནི་ས་གོང་མ་པ་དང་རང་གི་ས་པའི་སྡུག་བསྔལ་(འདི་ནི་ཉེར་བསྡོགས་གོང་མ་བདུན་མ་གཏོགས་པ་ས་བཅུ་པོར་བཤད་)དང༌། སོགས་པས་བསྡུས་པ་ཀུན་འབྱུང་དང་འགོག་པ་དང༌། རྗེས་སུ་ཤེས་པའི་ཕྱོགས་དང་མཐུན་པའི་ལམ་གྱི་བདེན་པ་ས་གོང་མ་དང་འོག་མ་དང་རང་གི་ས་པའི་ཐམས་ཅད་དང༌། རྩ་བར་མ་སྨོས་ཀྱང་གཟུགས་མེད་ཀྱི་རྣམ་ཐར་དེ་དག་མཚན་མ་མེད་པ་མཚན་མ་མེད་པའི་ཏིང་ངེ་འཛིན་ཡིན་པ་སྲིད་པས་དེ་དག་མི་སློབ་པའི་མཚན་མ་མེད་པའི་ཏིང་ངེ་འཛིན་གྱི་སོ་སོར་མ་བརྟགས་པས་འགོག་པ་ལ་དམིགས་པའི་ཕྱིར་སོ་སོར་མ་བརྟགས་པས་འགོས་པའང་ཡིན་ལ། ནམ་མཁའ་མཐའ་ཡས་སྐྱེ་མཆེད་ཀྱི་དམིགས་པ་ནི་འདུས་མ་བྱས་ནམ་མཁའང་ཡིན་ནོ། །བསམ་གཏན་གསུམ་པར་རྣམ་ཐར་མ་བཞག་པ་ནི་བསམ་གཏན་གཉིས་པའི་ས་པའི་ཁ་དོག་གི་འདོད་ཆགས་མེད་པའི་ཕྱིར་དང༌། བདེ་བ་མཆོག་ཏུ་གྱུར་པའི་སྙིང་པོས་བསྐྱོད་པས་གཡོ་བའི་ཕྱིར་རོ། །དེ་ལྟར་ན་བསམ་གཏན་གསུམ་པ་ནའང་ཁ་དོག་གི་འདོད་ཆགས་མེད་པས་བསམ་གཏན་བཞི་པར་སྡུག་པའི་རྣམ་ཐར་ཅིའི་ཕྱིར་སྐྱེད་ཅེ་ན། དེ་ནི་མི་སྡུག་པས་རྒྱུད་ཞུམ་པ་རབ་ཏུ་དགའ་བར་བྱ་བ་དང་བརྟག་པའི་ཕྱིར་རོ་ཞེས་བཤད་ཟིན་ཏོ། །གཟུགས་མེད་དང་པོ་གསུམ་ནི་ཟག་བཅས་ཟག་མེད་གཉིས་ཀ་ཡིན་ཏེ། དེ་དག་མཉམ་གཞག་དགེ་བ་ཡིན་པས་དེ་ལ་གཉིས་ཀ་ཡོད་པའི་ཕྱིར་དང༌། བདེན་པ་ལ་དམིགས་པར་བཤད་པའི་ཕྱིར་རོ། །
འོ་ན་རྣམ་ཐར་དང་ཟིལ་གནོན་ལ་སོགས་པ་འདི་དག་ལ་དགོས་པ་ཅིའི་ཕྱིར་སྙོམས་པར་འཇུག་ཅེ་ན། ཐག་སྲིང་གི་གཉེན་པོ་ཡིན་པས་ཉོན་མོངས་པ་ཐག་སྲིང་བ་དང༌། སྙོམས་འཇུག་ལ་དབང་ཐོབ་པར་བྱ་བ་གཉིས་ཀྱི་ཕྱིར་ཏེ། ཉོན་མོངས་པ་ཐག་མ་བསྲིངས་ཤིང་སྙོམས་འཇུག་ལ་དབང་མ་ཐོབ་ན་ཉོན་མོངས་པ་མེད་པ་ལ་སོགས་པའི་ཡོན་ཏན་དང༌། གང་གི་ས་ལ་སོགས་པ་གསེར་ལ་སོགས་པར་ཡོད་པའི་དངོས་པོ་བསྒྱུར་བ་དང༌། དེ་ཉིད་དུས་རིང་པོར་གནས་པར་བྱིན་གྱིས་རློབ་པ་དང༌། སྐུ་ཚེ་གཏོང་འཇོག་དང༌། རི་རབ་རྡུལ་ཕྲན་དུ་འཇུག་པར་བྱེད་པ་ལ་སོགས་པ་འཕགས་པའི་རྫུ་འཕྲུལ་མི་འགྲུབ་པས་དེ་དག་མངོན་པར་སྒྲུབ་པར་བྱ་བའི་ཆེད་དུའོ། །ཡང་ཅིའི་ཕྱིར་རྣམ་ཐར་གསུམ་པ་དང་བརྒྱད་པ་ཁོ་ན་ལ་ལུས་ཀྱིས་མངོན་སུམ་དུ་བྱས་ཏེ་རྫོགས་པར་བྱས་ནས་གནས་ཞེས་བཤད་ལ། གཞན་དག་ལ་ནི་མ་ཡིན་ཞེ་ན། གོ་རིམ་བཞིན་དུ་རྣམ་ཐར་དང་པོ་གཉིས་དང་གཟུགས་མེད་དང་པོ་གསུམ་པོས་གཟུགས་ཅན་དང་གཟུགས་མེད་ཀྱི་རྣམ་ཐར་གྱི་སྒྲིབ་པ་མཐའ་དག་སྤངས་པས་གཙོ་བོ་ཡིན་པའི་ཕྱིར་དང༌། གཟུགས་དང་གཟུགས་མེད་པའི་ཁམས་དང་སའི་མཐའ་ན་གནས་པའི་ཕྱིར་རོ་ཞེས་འགྲེལ་པར་འབྱུང་མོད་ཀྱི། འོན་ཀྱང་དེ་གཉིས་རིམ་པ་ལྟར་གཟུགས་དང་གཟུགས་མེད་ཀྱི་ས་པའི་རྣམ་ཐར་རྫོགས་པར་མངོན་དུ་བྱས་པ་ཡིན་པས་དེ་སྐད་བསྟན་ཏོ་ཞེས་གཟུང་ངོ༌།། ཡང་ན་འཕགས་པ་རྣམས་དེ་གཉིས་ལ་ལན་མང་དུ་གནས་པས་ན་དེ་སྐད་ཅེས་གསུངས་སོ་ཞེས་ཀུན་ལ་བཏུས་ཀྱི་འགྲེལ་པར་བཤད་དོ། །
རྩ་བ། ཟིལ་གྱིས་གནོན་པའི་སྐྱེ་མཆེད་བརྒྱད། །
ཡང་བརྒྱད་ལས་འཕྲོས་པའི་མདོ་ལས། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཁ་དོག་བཟང་པོ་དང་ཁ་དོག་ངན་པ་རྣམས་ལ་ལྟ་ཞིང་གཟུགས་དེ་དག་ཟིལ་གྱིས་མནན་ནས་ཤེས་པ་ཟིལ་གྱིས་མནན་ནས་མཐོང་སྟེ་དེ་ལྟ་བུར་འདུ་ཤེས་པར་གྱུར་པ་འདི་ནི་ཟིལ་གྱིས་གནོན་པའི་སྐྱེ་མཆེད་དང་པོའོ། །དེ་བཞིན་དུ་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆེན་པོ་ཁ་དོག་བཟང་པོ་དང་ཁ་དོག་ངན་པ་རྣམས་ལ་ལྟ་ཞིང་ཞེས་བྱ་བ་ནས་རྒྱས་པར་འདི་ནི་ཟིལ་གྱིས་གནོན་པའི་སྐྱེ་མཆེད་གཉིས་པའོ་ཞེས་བྱ་བའི་བར་དང༌། དེ་བཞིན་དུ་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་བ་དང་ཆེ་བ་ལ་ལྟ་བ་གཉིས་ཏེ་བཞི་དང༌། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྔོན་པོ། ཁ་དོག་སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ་དཔེར་ན་ཟར་མའི་མེ་ཏོག་གམ། ཡུལ་བ་ན་ར་སེའི་རས་ཕུན་སུམ་ཚོགས་པ་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོ་ན་སྔོན་པོ་འབྱུང་བ་རྣམས་ལ་ལྟ་ཞིང་གཟུགས་དེ་དག་ཟིལ་གྱིས་མནན་ནས་ཤེས་ཟིལ་གྱིས་མནན་ནས་མཐོང་སྟེ། དེ་ལྟ་བུར་འདུ་ཤེས་པར་གྱུར་པ་འདི་ནི་ཟིལ་གྱིས་གནོན་པའི་སྐྱེ་མཆེད་ལྔ་པའོ་ཞེས་པ་དང༌། དེ་བཞིན་དུ་སེར་པོ་དང་དམར་པོ་དང་དཀར་པོ་རྣམས་ལ་དེ་ལྟར་ལྟ་བ་བཞི་སྟེ་ཟིལ་གྱིས་གནོན་པའི་སྐྱེ་མཆེད་བརྒྱད་གསུངས་པའི་ནང་གཟུགས་སུ་འདུ་ཤེས་པ་དང་དེ་མེད་པར་འདུ་ཤེས་པ་ནི་རྣམ་ཐར་གྱི་དང་མཚུངས་ལ། ཆུང་ངུ་དང་ཆེན་པོ་ནི་སེམས་ཅན་དང་སྣོད་ཀྱི་གཟུགས་སམ། ཕྲ་རགས་སོ། །
ཁ་དོག་བཟང་ངན་ནི་ཡིད་དུ་འོང་མི་འོང་ངམ། ཡང་ན་ལྷ་དང་མིའི་གཟུགས་སོ།། ཟིལ་གྱིས་མནན་ནས་ཞེས་བྱ་བ་ནི་དབང་བསྒྱུར་ནས་སོ། །ཤེས་པ་ནི་ཞི་གནས་དང་མཐོང་བ་ནི་ལྷག་མཐོང་ཡིན་ནོ་ཞེས་འཕགས་པ་ཐོགས་མེད་ཀྱིས་བཤད་ལ། ཁ་དོག་བཞིའི་དཔེ་དོན་གཉིས་ཀའི་སྐབས་སུ་རེ་རེ་ཞིང་སྔོན་པོ་ལ་སོགས་པ་ཚིག་བཞི་བཞི་སྨོས་པ་ནི་གོ་རིམ་བཞིན་དུ་མདོར་བསྟན་པ་དང༌། ལྷན་སྐྱེས་དང༌། བཅོས་མ་དང༌། ལྷན་སྐྱེས་དང་བཅོས་མ་གཉིས་ཀའི་ཐུན་མོང་གི་ཁ་དོག་ཡིན་ལ་ཟར་མ་དང་དོང་ག་དང་བན་དུ་ཇི་བ་ཀའི་མེ་ཏོག་དང་སྐར་མ་པ་སངས་དང་རས་ནི་རིམ་པ་ལྟར་ལྷན་སྐྱེས་དང་བཅོས་མའི་དཔེའོ། །དེ་ལྟ་བུར་འདུ་ཤེས་པར་གྱུར་པ་ནི་ཟིལ་གྱིས་ནོན་ནམ་མ་ནོན་ཀྱང་རུང་སྟེ་དེ་ལ་མངོན་པའི་ང་རྒྱལ་གྱི་འདུ་ཤེས་མེད་པའོ། །སློབ་དཔོན་གང་སྤེལ་ནི་ཤེས་པ་ནི་དང་པོ་ཤེས་པ་ཙམ་སྟེ་བར་ཆད་མེད་པའི་ལམ་མོ། །མཐོང་བ་ནི་དེའི་རྒྱུ་མཚན་ཅན་གྱི་རྣལ་འབྱོར་རྫོགས་པ་སྟེ་རྣམ་གྲོལ་གྱི་ལམ་མོ་ཞེས་འཆད་དོ། །དེ་དག་ཀྱང་དང་པོ་བཞི་ནི་ཁ་དོག་དང་དབྱིབས་གཉིས་ཀ་ལ་ཆགས་སྡང་སྐྱེ་བའི་གཉེན་པོ་དང༌། ལྷག་མ་བཞི་ནི་གཞན་གྱི་ཁ་དོག་ལ་ཆགས་པ་དང་ཡིད་རྣམ་པར་ཞུམ་པའི་གཉེན་པོ་ཡིན་ནོ། །
རྩ་བ། གཉིས་ནི་རྣམ་ཐར་དང་པོ་བཞིན། །
གཉིས་ནི་གཉིས་པ་བཞིན་དེ་གཞན། །
སྡུག་པའི་རྣམ་པར་ཐར་པ་བཞིན། །
དེ་ལྟར་བརྒྱད་པོ་དེ་དག་ལས་ཟིལ་གནོན་དང་པོ་གཉིས་ཀྱི་ངོ་བོ་དང༌། ས་དང༌། གང་གི་གཉེན་པོ་ཡིན་པ་དང༌། དམིགས་པ་ནི་ཇི་ལྟར་རྣམ་ཐར་དང་པོ་གཟུགས་ཅན་གཟུགས་ལ་ལྟ་བ་དེ་བཞིན་དུ་ཤེས་པར་བྱའོ། །དེ་བཞིན་དུ་ཟིལ་གནོན་གསུམ་པ་དང་བཞི་པ་གཉིས་ཀྱི་ངོ་བོ་དང༌། ས་དང༌། གང་གི་གཉེན་པོ་ཡིན་པ་དང༌། དམིགས་པ་ནི་རྣམ་ཐར་གཉིས་པ་གཟུགས་མེད་གཟུགས་ལ་ལྟ་བ་ཇི་ལྟ་བ་བཞིན་ནོ། །གཞན་ཁ་དོག་གི་ཟིལ་གནོན་བཞིའི་ས་དང་ངོ་བོ་ལ་སོགས་པའང་རྣམ་ཐར་གསུམ་པ་སྡུག་པའི་རྣམ་པར་ཐར་པ་ཇི་ལྟ་བ་བཞིན་དུ་ཤེས་པར་བྱའོ། །རྣམ་ཐར་ཟིལ་གནོན་གྱི་ཁྱད་པར་ནི་རྣམ་ཐར་གྱིས་ནི་དམིགས་པ་ལ་རྒྱབ་ཀྱིས་ཕྱོགས་པ་ཙམ་དུ་ཟད་ཀྱི་ཟིལ་གྱིས་མི་ནོན་ལ། ཟིལ་གནོན་གྱིས་ནི་ཇི་ལྟར་འདོད་པ་བཞིན་དུ་སྐད་ཅིག་ལ་སྔོན་པོ་ལ་སོགས་པའམ། རྣམ་པར་སྔོས་པ་ལ་སོགས་པ་ཡིད་དུ་མི་འོང་བར་མོས་པའི་ཕྱིར་དང༌། ཀུན་ནས་ཉོན་མོངས་པའི་དངོས་པོ་སྡུག་པར་དམིགས་ཀྱང་ཉོན་མོངས་པ་མི་སྐྱེ་བར་དམིགས་པ་ཟིལ་གྱིས་གནོན་པའི་ཕྱིར་རོ། །གཟུགས་མེད་ལ་ཟིལ་གནོན་མ་བཤད་པ་ནི་གཟུགས་ཟིལ་གྱིས་ནོན་ན་དེ་ཡང་ནོན་པའི་ཕྱིར་མ་བཤད་དོ། །འཕགས་པ་རྣམས་ནི་གཟུགས་ཀྱི་དེ་བཞིན་ཉིད་དང་མཚན་མ་ཡིད་ལ་བྱེད་པས་ཟིལ་གྱིས་ནོན་པར་བྱེད་ལ། བྱིས་པ་རྣམས་ནི་སྡུག་པ་དང་མི་སྡུག་པ་ཕན་ཚུན་ལྟོས་པ་དང༌། ཕན་ཚུན་གཅིག་ལ་གཅིག་རྗེས་སུ་འབྲེལ་པ་དང་དེས་ན་གཟུགས་ཐམས་ཅད་ཕན་ཚུན་བསྲེས་ཏེ་སྡུག་པར་རོ་གཅིག་པའི་འདུ་ཤེས་ཀྱིས་མོས་པར་བྱས་ནས་ཟིལ་གྱིས་གནོན་པར་བྱེད་དོ་ཞེས་འཕགས་པ་ཐོགས་མེད་འཆད་ལ། སློབ་དཔོན་གང་སྤེལ་ནི་ཁ་ཅིག་ཁ་དོག་བཟང་ངན་ལ་ཆགས་སྡང་མེད་པར་དམིགས་པ་ཟིལ་གྱིས་གནོན་པར་བྱེད་དེ་ཞེས་ཟེར་ལ། ཁ་ཅིག་ན་རེ་དེ་ལྟ་ན་ཟིལ་གྱིས་གནོན་པའི་སྐྱེ་མཆེད་འདི་དག་ཞེ་སྡང་མེད་པའི་རང་བཞིན་དུའང་འགྱུར་ན་མ་ཆགས་པའི་རང་བཞིན་ཅན་དུ་བཤད་པའི་ཕྱིར་བཟང་ངན་གཉིས་ཀ་ཟིལ་གྱིས་མནན་ནས་མི་སྡུག་པར་རོ་གཅིག་ཏུ་མཐོང་བ་ཡིན་ནོ་ཞེས་ཟེར་རོ་ཞེས་སྔོན་གྱི་སློབ་དཔོན་རྣམས་ཀྱི་ལུགས་སྟོན་པར་བྱེད་དོ། །
རྩ་བ། ཟད་པར་བཅུའོ་བརྒྱད་མ་ཆགས། །
བསམ་གཏན་མཐའ་ན་སྤྱོད་ཡུལ་ནི། །
འདོད་པ་གཉིས་ནི་གཟུགས་མེད་དག །
སྤྱོད་ཡུལ་རང་གི་ཕུང་པོ་བཞི། །
ཡང་བཅུ་ལས་འཕྲོས་པའི་མདོ་ལས། ཟད་པར་ས་དང་ཆུ་དང་མེ་དང་རླུང་དང་སྔོན་པོ་དང་སེར་པོ་དང་དམར་པོ་དང་དཀར་པོ་དང་ནམ་མཁའ་དང་རྣམ་པར་ཤེས་པ་སྟེ་བར་ཆད་མེད་པར་ཟད་པར་ས་ལ་སོགས་པར་རྒྱས་པར་ཁྱབ་པར་བྱེད་པའི་ཟད་པར་གྱི་སྐྱེ་མཆེད་བཅུའོ་ཞེས་བཤད་པའི་དང་པོ་བརྒྱད་ནི་ཆགས་པའི་གཉེན་པོ་མ་ཆགས་པའི་རང་བཞིན་ཡིན་ལ། (དེ་ཡང་སྔོ་སོགས་བཞི་ནི་ཟིལ་གནོན་ཕྱི་མ་བཞིའི་འབྲས་བུ་ཡིན་པས་སོ།།) ས་ནི་བསམ་གཏན་གྱི་ཡ་མཐའ་བཞི་ཁོ་ན་ན་ཡོད་དེ་(ཟིལ་གནོན་ཕྱི་མ་བཞིའི་སྦྱོར་བ་ལས་བྱུང་བས་སོ།།) དང་པོ་བརྒྱད་ཀྱི་སྤྱོད་ཡུལ་ཏེ་དམིགས་པ་ནི་(འབྱུང་བཞི་ཡང་ཁ་དོག་དང་དབྱིབས་ལ་འདོད་པའང་ཡོད་དེ།) འཇིག་རྟེན་གྱི་ནི་ཐ་སྙད་དུ། ཁ་དོག་དབྱིབས་ལ་ས་ཞེས་བརྗོད། །ཆུ་མེ་ཡང་ངོ་རླུང་ཚོགས་ཁམས། །ཉིད་ཡིན་དེ་དང་འདྲ་བའང་ཡིན། །ཞེས་འབྱུང་བས་འདོད་པ་ན་སྤྱོད་པའི་གཟུགས་ཀྱི་སྐྱེ་མཆེད་ཡིན་ལ། གང་དག་རླུང་གཟུགས་ཀྱི་སྐྱེ་མཆེད་ཡིན་པར་མི་འདོད་པ་དེ་དག་ན་རེ་ཟད་པར་རླུང་གི་དམིགས་པ་ནི་རེག་བྱའི་སྐྱེ་མཆེད་ཡིན་ནོ་ཞེས་ཟེར་རོ། །ཟད་པར་ནམ་མཁའ་དང་རྣམ་ཤེས་གཉིས་ནི་གཟུགས་མེད་དང་པོ་གཉིས་དག་པ་པའི་རང་བཞིན་ཡིན་ལ། དེ་གཉིས་ཀྱི་སྤྱོད་ཡུལ་ནི་རང་གི་ས་པའི་ཕུང་པོ་བཞི་ཡིན་ནོ།། (ཟག་མེད་ནི་ཡུལ་ཐམས་ཅད་དུ་རྒྱས་པར་བྱེད་མི་ནུས་པས་འདི་དག་གི་དམིགས་པ་ཡིན་ནོ།།)
སྐྱེ་མཆེད་གཞན་ལ་ཟད་པར་དུ་མི་འཇོག་པ་ནི་མིག་སོགས་བདུན་གྱིས་སྣོད་ཀྱི་འཇིག་རྟེན་ལ་(དེའི་རིགས་མེད་པས་)མ་ཁྱབ་ཅིང་དྲི་རོས་གཟུགས་ཁམས་སུ་མ་ཁྱབ་ལ་སྒྲ་ལ་རྒྱུན་མེད་པས་ཟག་པར་དུ་མི་བཞག་གོ་ཞེས་པ་ལས་འབྱུང་ལ། ཅི་ཡང་མེད་པ་དང་སྲིད་རྩེ་གཉིས་ཟད་པར་དུ་མི་བཞག་པ་ནི་(དམིགས་པར་མི་གསལ་བ་དང་སྤྲོ་བསྡུ་དང་མི་མཐུན་པའི་ཕྱིར་རོ།།) བསྡུ་བ་ལས་ནམ་མཁའ་དང་རྣམ་ཤེས་མཐའ་ཡས་ཀྱིས་ཟད་པར་མཐའ་ཡས་ཤིང་ཚད་མེད་པ་གྲུབ་པས་དེ་དག་ལས་བོགས་དབྱུང་དུ་མེད་པའི་ཕྱིར་རོ་ཞེས་བཤད་པའམ། ཁ་ཅིག་ན་རེ་དེ་གཉིས་ཟད་པར་གྱི་འབྲས་བུ་ཡིན་པས་ཟད་པར་དུ་མི་བཞག་གོ་ཞེས་ཟེར་རོ། །རྣམ་ཐར་ལ་སོགས་པ་གསུམ་གྱི་ཁྱད་པར་ནི་ཡོན་ཏན་རྣམས་རིམ་གྱིས་འཇོག་པས་དང་པོར་དམིགས་པ་ལ་རྒྱབ་ཀྱིས་ཕྱོགས། དེ་ནས་ཟིལ་གྱིས་གནོན། དེ་ནས་ཁྱབ་པར་བྱེད་པས་སྔ་མ་སྔ་མ་རྫོགས་ཤིང་དག་པ་ལས་ཕྱི་མ་ཕྱི་མ་འབྱུང་བས་གོང་ནས་གོང་དུ་ཁྱད་པར་དུ་འཕགས་པའི་ཕྱིར་ཆུང་ངུ་དང་འབྲིང་དང་ཆེན་པོ་དང༌། རྒྱུ་དང་རྒྱུ་འབྲས་གཉིས་ཀ་དང་འབྲས་བུ་ཁོ་ནའོ་ཞེས་འགྲེལ་པ་དང་ཊཱིཀར་བཤད་དོ། །དེ་དག་ལས་འགོག་པའི་རྣམ་ཐར་ལས་གཞན་རྣམས་ནི་སོ་སོ་སྐྱེ་བོ་དང་ཡང་ཐུན་མོང་བ་ཡིན་ལ། འགོག་པའི་སྙོམས་འཇུག་ནི་འཕགས་པ་ཁོ་ན་ལ་ཡོད་པ་ཡིན་ནོ་ཞེས་ཀྱང་གནས་གཉིས་པར་བཤད་ཟིན་ལ། ཐམས་ཅད་ཀྱང་ཐག་སྲིང་གི་གཉེན་པོ་ཡིན་ནོ། །
གཉིས་པ་ཁྱད་པར་གྱི་ཆོས་བཤད་པ་ནི་རྣམ་ཐར་ལ་སོགས་པ་འདི་དག་ཇི་ལྟར་འཐོབ་ཅེ་ན།
རྩ་བ། འགོག་པ་བཤད་ཟིན་ལྷག་མ་ནི། །
འདོད་ཆགས་བྲལ་དང་སྦྱོར་བས་ཐོབ། །
གཟུགས་མེད་ཅེས་བྱ་ཁམས་གསུམ་གྱི། །
རྟེན་ཅན་ལྷག་མ་མི་ལས་སྐྱེ། །
ཉི་ཤུ་རྩ་དྲུག་ལས་འགོག་པའི་རྣམ་ཐར་གྱིས་ཐོབ་པ་དང་རྟེན་ལ་སོགས་པ་ནི་གནས་གཉིས་པར་བཤད་ཟིན་ལ་ལྷག་མ་ཉི་ཤུ་རྩ་ལྔ་པོ་རྣམས་ནི་སྔར་འདྲིས་པ་ཡིན་ན་འདོད་ཆགས་དང༌བྲལ་བ་ཙམ་དང་(འདྲིས་པ་ནི་དང་པོ་ནས་སྲིད་རྩེའི་བར་སྔར་ཐོབ་བ་བཏང་བ་དག་གོ།) མ་འདྲིས་པ་རྣམས་ནི་སྦྱོར་བ་འབད་རྩོལ་གྱིས་འཐོབ་སྟེ། གོམས་པ་དང་མ་གོམས་པའི་མཐུ་ལས་བྱུང་བའི་ཕྱིར་རོ། །ཡང་གཟུགས་མེད་ཅེས་བྱ་བའི་རྣམ་ཐར་བཞི་དང་ཟད་པར་གཉིས་ནི་ཁམས་གསུམ་གྱི་རྟེན་ཅན་ཡིན་ལ། དེ་དག་གི་ལྷག་མ་(རྣམ་ཐར་དང་པོ་གསུམ་ཟིལ་གནོན་བརྒྱད་ཟད་པར་བརྒྱད་དེ་)བཅུ་དགུ་པོ་རྣམས་ནི་མི་ལས་སྐྱེ་བས་མིའི་རྟེན་ཅན་ཁོ་ན་ཡིན་ཏེ། ལྷ་ལ་སོགས་པའི་འགྲོ་བ་གཞན་ན་ལུང་མེད་པའི་ཕྱིར་དང༌། འདི་དག་ནི་ལུང་གི་སྟོབས་ཀྱིས་བསྐྱེད་པར་བྱ་བ་ཡིན་པའི་ཕྱིར་རོ། །
རྩ་བ། ཁམས་གཉིས་དག་ཏུ་གཟུགས་མེད་པ། །
རྒྱུ་དང་ལས་ཀྱི་སྟོབས་ཀྱིས་སྐྱེ། །
གཟུགས་ཀྱི་ཁམས་སུ་བསམ་གཏན་རྣམས། །
དེ་དག་དང་ཆོས་ཉིད་ཀྱིས་ཀྱང༌། །
འོ་ན་ལུང་མེད་པས་བསམ་གཏན་གཟུགས་མེད་དག་ཁམས་གོང་མ་གཉིས་སུ་(རང་རང་གི་གོང་མ་གོང་མ་)ཇི་ལྟར་སྐྱེ་ཞེ་ན། བསམ་གཏན་གཟུགས་མེད་ཀྱི་སྙོམས་འཇུག་ནི་སྤྱིར་ལུང་དང་རྒྱུ་དང༌། ལས་དང༌། ཆོས་ཉིད་ཀྱི་སྟོབས་དང་བཞི་ལས་སྐྱེ་བ་ལས་ཁམས་གོང་མ་གཉིས་པོ་དག་ཏུ་ནི་ལུང་མེད་ཀྱང་གཟུགས་མེད་པའི་སྙོམས་འཇུག་རྒྱུ་དང་ལས་ཀྱི་སྟོབས་གཉིས་ཀྱིས་སྐྱེའོ། །དེ་ལ་གཟུགས་སུ་རྒྱུའི་སྟོབས་ཀྱིས་སྐྱེ་བ་ནི་སྔོན་མིའི་རྟེན་ལ་གཟུགས་མེད་ཀྱི་སྙོམས་འཇུག་གོམས་པར་བྱས་པ་ལས་ཉམས་པ་དག་གཟུགས་ཁམས་སུ་སྐྱེས་ཏེ། དེར་སྔོན་གོམས་པའི་སྐལ་མཉམ་གྱི་རྒྱུ་སྟོབས་དང་ལྡན་(པ་ཉེ་)པས་གཟུགས་མེད་ཀྱི་ཏིང་ངེ་འཛིན་སྐྱེ་ལ། ལས་ཀྱི་སྟོབས་ཀྱིས་སྐྱེ་བ་ནི་སྔོན་མིའི་རྟེན་ལ་གཟུགས་མེད་ཀྱི་སྙོམས་འཇུག་ཐོབ་ནས་ཉམས་པ་དེ་ཉིད་ལན་གྲངས་གཞན་ལ་མྱོང་འགྱུར་གྱི་ལས་སུ་གྱུར་པའི་སྟོབས་ཀྱིས་གཟུགས་ཁམས་སུ་སྐྱེས་པ་ནའང་གཟུགས་མེད་ཀྱི་ཏིང་འཛིན་ཐོབ་ནས་ཡང་གཟུགས་མེད་པར་སྐྱེ་སྟེ། འོག་མ་(འི་ས་)ལས་འདོད་ཆགས་དང་མ་བྲལ་བར་གོང་མར་མི་སྐྱེ་བའི་ཕྱིར་རོ། །ཇི་ལྟར་གཟུགས་མེད་གཟུགས་སུ་སྐྱེ་བ་ལྟར་གཟུགས་མེད་གཟུགས་མེད་ཉིད་དུ་སྐྱེ་བའང་རྒྱུ་དང་ལས་ཀྱི་སྟོབས་གཉིས་ལས་སྐྱེ་སྟེ། དེ་ལ་རྒྱུའི་སྟོབས་ཀྱིས་སྐྱེ་བ་ནི་གོང་མའི་ཉེར་བསྡོགས་སྒོམ་པར་བྱེད་པ་ལ་ཡིན་ལ། ལས་ཀྱིས་སྟོབས་ཀྱིས་སྐྱེ་བ་ནི་སྐྱེ་བས་ཐོབ་པའི་གཟུགས་མེད་དོ། །གཟུགས་ཀྱི་ཁམས་སུ་བསམ་གཏན་རྣམས་ནི་རྒྱུ་དང་ལས་ཀྱི་སྟོབས་དེ་དག་དང་ཆོས་ཉིད་ཀྱི་སྟོབས་ཀྱིས་ཀྱང་སྐྱེའོ། །དེ་ལ་ཆོས་ཉིད་ཀྱིས་སྐྱེ་བ་ནི་འཇིག་རྟེན་འཇིག་པའི་ཚེ་བསམ་གཏན་འོག་མའི་སེམས་ཅན་ལ་དགེ་བའི་ཆོས་རྣམས་ཀྱིས་འཇུག་པ་ཤས་ཆེ་བས་བསམ་གཏན་གོང་མའི་སེམས་ངང་གིས་སྐྱེ་བ་བཞིན་ཏེ། བསམ་གཏན་གྱི་གདམས་ངག་སྟོན་པའི་ལུང་ལ་མ་ལྟོས་པར་སྔོན་བསམ་གཏན་གོམས་པའི་བག་ཆགས་ཀྱིས་སྐྱེ་བ་ལ་ཆོས་ཉིད་ཀྱིས་སྐྱེ་བ་ཞེས་བརྗོད་དོ། །
བྱེ་བྲག་ཏུ་སྨྲ་བ་བག་ཆགས་ཀྱི་རྣམ་གཞག་མི་འདོད་པས་སྔོན་བསམ་གཏན་གོམས་པའི་སྐལ་མཉམ་གྱི་རྒྱུ་ལས་འབྱུང་བ་ལ་འདོད་དོ། །འདོད་པའི་ཁམས་སུ་ནི་ལྷ་ལ་རྒྱུ་གསུམ་པོ་དེ་དག་དང༌། མི་ལ་དེ་དག་གི་སྟེང་དུ་ཡིད་ལ་བྱེད་པ་བདུན་དང་སེམས་གནས་པའི་ཐབས་དགུ་ལ་སོགས་པ་ལུང་གི་སྟོབས་ལས་ཀྱང་སྐྱེའོ། །འདི་ཡང་ལེགས་པར་དཔྱད་ན་ལས་ཀྱི་སྟོབས་ཀྱིས་སྐྱེ་བ་དེ་གལ་ཏེ་ལས་ཀྱི་རྣམ་སྨིན་གྱི་འབྲས་བུར་འདོད་ན་ནི་འདོད་ཁམས་སུ་བསམ་གཏན་གཟུགས་མེད་དང༌། གཟུགས་སུ་གཟུགས་མེད་ཀྱི་སེམས་ལས་ཀྱི་སྟོབས་ཀྱིས་མི་སྐྱེ་བར་འགྱུར་ཏེ། དེ་དག་ནི་གཟུགས་དང་གཟུགས་མེད་ཁོ་ནར་རྣམ་པར་སྨིན་པའི་ཕྱིར་རོ། །འོན་ཏེ་ལས་ཀྱི་རྒྱུ་མཐུན་གྱི་འབྲས་བུར་འདོད་ན་ནི་དེའི་རྒྱུ་དང་ཆོས་ཉིད་ཀྱིས་སྐྱེ་བའང་ཡིན་པས་རྣམ་པ་གསུམ་གྱི་དབྱེ་བ་མི་འཐད་པར་འགྱུར་མོད་ཀྱི་འོན་ཀྱང་གཙོ་ཆེ་ཆུང་གི་བྲེ་བྲག་ལ་དགོངས་ནས་འདིའི་རྣམ་དབྱེ་མཛད་དོ། །འཇིག་རྟེན་འཇིག་པ་ན་དེའི་རྐྱེན་གྱིས་བསམ་གཏན་བཞི་པ་ལ་གཟུགས་མེད་ཀྱི་ཏིང་ངེ་འཛིན་མི་སྐྱེ་བས་གཟུགས་མེད་ལ་ཆོས་ཉིད་ཀྱི་སྟོབས་ཀྱིས་སྐྱེ་བ་མ་བཤད་ལ། རང་སའི་ཏིང་ངེ་འཛིན་སྐྱེ་བ་ནི་ཆོས་ཉིད་མ་ཡིན་པས་འཇིག་རྟེན་འཇིག་པ་ན་ལུང་མེད་པར་འོག་སའི་རྟེན་ལ་གོང་སའི་ཏིང་ངེ་འཛིན་སྐྱེ་བ་ཁོ་ན་ལ་འདིར་ཆོས་ཉིད་ཅེས་བྱའོ། །ལས་དང་ཆོས་ཉིད་ལའང་རྒྱུ་ཡོད་མོད་ཀྱི་དེ་དག་གཙོ་ཆེ་བས་དེ་སྐད་བསྟན་ཏོ། །
སྤྱིའི་དོན་གསུམ་པ་བཤད་པ་ཡོངས་སུ་རྫོགས་པའི་བྱ་བ་ལ་བསྟན་པ་དང་། དེ་འཛིན་པ་བཤད་པ་དང༌། བདག་ཉིད་ཀྱིས་བསྟན་པ་བཟུང་བ་ལ་སྐྱོན་དོར་བ་དང༌། གཞན་བསྟན་པ་འཛིན་པ་རྣམས་ལ་བག་ཡོད་པར་གདམས་པ་གསུམ་ལས། དང་པོ་ནི།
རྩ་བ། སྟོན་པའི་དམ་ཆོས་རྣམ་གཉིས་ཏེ། །
ལུང་དང་རྟོགས་པའི་བདག་ཉིད་དོ། །
དེ་འཛིན་བྱེད་པ་སྨྲ་བྱེད་དང༌། །
སྒྲུབ་པར་བྱེད་པ་ཁོ་ན་ཡིན། །
སྟོན་པ་སངས་རྒྱས་བཅོམ་ལྡན་འདས་ཀྱི་བསྟན་པ་དམ་པའི་ཆོས་ནི་རྣམ་པ་གཉིས་ཏེ། ལུང་གི་ཆོས་དང༌། མངོན་པར་རྟོགས་པའི་ཆོས་ཀྱི་བདག་ཉིད་དོ། །དེ་ལ་ལུང་གི་ཆོས་ནི་མདོ་སྡེ་དང་འདུལ་བ་དང་མངོན་པའི་སྡེ་སྣོད་གསུམ་ཡིན་ཏེ། རིམ་པ་ལྟར་དང་པོས་ནི་བསླབ་པ་གསུམ་དང༌། གཉིས་པས་ནི་ཚུལ་ཁྲིམས་དང་ལྡན་ན་འགྱོད་པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་འཐོབ་པའི་ཕྱིར་སེམས་ཀྱི་བསླབ་པ་དང་ཚུལ་ཁྲིམས་ཀྱི་བསླབ་པ་དང༌། གསུམ་པས་ནི་དོན་ཕྱིན་ཅི་མ་ལོག་པར་རབ་ཏུ་འབྱེད་པས་ཤེས་རབ་ཀྱི་བསླབ་པ་སྒྲུབ་པའི་ཕྱིར་དང༌། བླང་དོར་གྱི་གནས་ལ་ཐེ་ཚོམ་ཟ་བ་དང༌། སྤྱོད་པ་མཐའ་གཉིས་ལ་སྦྱོར་བ་དང༌། ལྟ་བ་མཆོག་ཏུ་འཛིན་པའི་གཉེན་པོ་བྱེད་པའི་ཕྱིར་དང༌། བླང་དོར་གྱི་གནས་སྟོན་པ་དང༌། དེ་བླང་དོར་གྱིས་སྒྲུབ་པ་དང༌། འབེལ་གཏམ་ལ་མཁས་པར་བྱེད་པའི་ཕྱིར་རོ། །དེ་སྐད་དུ་ཡང་མདོ་སྡེའི་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང༌། །བསྡུས་པའི་ཕྱིར་དེའི་རྒྱུ་ནི་དགུས་འདོད་དོ། །ཞེས་བཤད་དོ། ། སྡེ་སྣོད་གསུམ་པོ་དེ་དག་ལ་ཐོས་པ་དང་བསམ་པ་དང་ཞི་གནས་དང་ལྷག་མཐོང་གི་སྒོམ་པ་བྱས་པས་རིམ་པ་ལྟར་སེམས་ལ་བག་ཆགས་འཇོག་པ་དང༌། རྟོགས་པར་བྱེད་པ་དང༌། སེམས་ཞི་བར་བྱེད་པ་དང༌། རབ་ཏུ་རྟོགས་པའི་སྒོ་ནས་སྤང་བྱ་ལས་རྣམ་པར་གྲོལ་བར་བྱེད་དེ། དེ་ཉིད་ལས། དེ་ནི་བག་ཆགས་རྟོགས་དང་ཞི་བ་དང༌།། རབ་ཏུ་རྟོགས་པས་རྣམ་པར་གྲོལ་བར་བྱེད། །ཅེས་འབྱུང་ངོ༌། །ལུང་གི་ཆོས་ཀྱི་ངོ་བོ་དང་ཚད་ལ་སོགས་པ་ནི་གནས་གཉིས་པར་བཤད་ཟིན་ཏོ། །མངོན་པར་རྟོགས་པའི་ཆོས་ནི་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་དང་འབྲས་བུ་རྣམ་གྲོལ་གྱི་ལམ་ཟད་པ་དང་བཅས་པ་སྟེ་དེ་དག་ཀྱང་གནས་དྲུག་པར་བཤད་ཟིན་ཏོ། །དེ་ལྟར་ན་བསྟན་པ་དམ་པའི་ཆོས་ནི་ལུང་དང༌། སྒྲུབ་པ་དང༌། འབྲས་བུའི་ཆོས་གསུམ་དུའང་འགྱུར་རོ། །
འོ་ན་ཆོས་དེ་དག་འཛིན་པ་གང་ཞེ་ན། དེ་ལ་ལུང་གི་ཆོས་དེ་འཛིན་པར་བྱེད་པ་ནི་ལུང་བཞིན་དུ་ཤེས་ནས་ཉོན་མོངས་པ་ཅན་མ་ཡིན་པའི་བསམ་པས་གཞན་ལ་སྨྲ་བར་བྱེད་པ་ཡིན་པའི་ཕྱིར་སྡེ་སྣོད་འཛིན་པ་དང༌། ལུང་གི་ཆོས་འཛིན་པ་དང༌། བསྟན་པ་འཛིན་པ་ཞེས་ཀྱང་བྱའོ། །རྟོགས་པའི་ཆོས་དེ་འཛིན་པར་བྱེད་པ་ནི་བྱང་ཆུབ་ཀྱི་ཕྱོགས་དང་མཐུན་པའི་ཆོས་རང་གི་རྒྱུད་ལ་སྒྲུབ་ཅིང་ཉམས་སུ་ལེན་པར་བྱེད་པ་ཡིན་པའི་ཕྱིར་བསླབ་པ་གསུམ་ལ་སློབ་པ་དེ་དག་ནི་སྟོན་པའི་བསྟན་པ་དམ་པའི་ཆོས་འཛིན་པ་ཡིན་ནོ། །དེ་གཉིས་ལས་གཞན་པ་ནི་དམ་པའི་ཆོས་འཛིན་པ་མ་ཡིན་པས་ན་ཁོ་ནའི་སྒྲ་སྨོས་སོ། །དེའི་ཕྱིར་སྐྱེས་བུ་དམ་པ་ཁ་ཅིག་ནི་ལུང་གི་ཆོས་གཙོར་འཛིན་པར་བྱེད་ལ། སྐྱེས་བུ་དམ་པ་ཁ་ཅིག་ནི་མངོན་པར་རྟོགས་པའི་ཆོས་འཛིན་པར་བྱེད་དོ། །སྐྱེས་བུ་དམ་པ་ཁ་ཅིག་ནི་གཉིས་ཀའང་འབད་པས་འཛིན་པར་བྱེད་དེ། དེས་ན་དེ་དག་ཇི་སྲིད་དུ་གནས་པ་དེ་སྲིད་དུ་བསྟན་པ་དམ་པའི་ཆོས་གནས་པར་རིག་པར་བྱའོ། །
འོ་ན་ཤཱཀྱའི་རྒྱལ་པོའི་བསྟན་པ་དུས་ཇི་སྲིད་དུ་གནས་ཤེ་ན། འགྲེལ་པ་ལས། དེ་དག་ཀྱང་ལོ་སྟོང་དུ་གནས་སོ་ཞེས་བཤད་དོ། །གཞན་དག་ན་རེ་རྟོགས་པ་ནི་དེ་ལྟ་བུ་ཡིན་གྱི་ལུང་ནི་ཡུན་རིང་དུ་གནས་སོ་ཞེས་ཟེར་རོ་ཞེས་འབྱུང་ལ། ཊཱིཀ་བྱེད་དག་ཡུན་རིང་དུ་གནས་པ་ནི་ལོ་སྟོང་གི་འོག་ཏུའང་གནས་སོ་ཞེས་བྱ་བ་སྟེ་ཕྱོགས་འདི་ཉིད་རིགས་པར་བལྟའོ། །ཞེས་འཆད་དོ། །དེ་ཡང་བསྐལ་པ་བཟང་པོའི་མདོ་ལས་ནི་ལུགས་སྔ་མ་དང་མཐུན་པར་དེ་བཞིན་གཤེགས་པ་ཤཱཀྱ་ཐུབ་པའི་དམ་པའི་ཆོས་ནི་ལོ་ལྔ་བརྒྱའི་བར་དུ་གནས་སོ། །ལོ་ལྔ་བརྒྱའི་བར་དུ་ནི་དམ་པའི་ཆོས་ལྟར་སྣང་ངོ༌། །ཞེས་ལོ་སྟོང་གནས་པར་གསུངས་པ། ལུང་ཕྲན་ཚེགས་ལས་ཀྱང་ལོ་སྟོང་ཁོ་ན་གནས་པར་གསུངས་སོ། །གང་དག་ལུང་ཕྲན་ཚེགས་ལས་བསྟན་པ་ལོ་བདུན་སྟོང་དུ་གནས་པ་ལས་སྐྱེ་དགུའི་བདག་མོ་ལ་སོགས་པ་བུད་མེད་རབ་ཏུ་བྱུང་བས་ཉིས་སྟོང་འགྲིབས་ནས་ལོ་ལྔ་སྟོང་གནས་པར་གསུངས་སོ་ཞེས་འཆད་པ་དེ་དག་གིས་ནི་ལུང་ཕྲན་ཚིགས་མ་མཐོང་བར་ཟད་དེ། ཕྲན་ཚེགས་ཀྱི་སྐྱེ་དགུའི་བདག་མོ་གོའུ་ཏ་མ་ལ་སོགས་པ་ལ་བླ་མའི་ཆོས་བརྒྱད་གསུངས་པའི་སྐབས་དང༌། འཕགས་པ་ཀུན་དགའ་བོ་མྱ་ངན་ལས་འདའ་བར་བཞེད་ནས་ཤ་ནའི་གོས་ཅན་ལ་བསྟན་པ་གཏོད་པའི་སྐབས་དང༌། འཕགས་པ་ཉི་མའི་གུང་པས་རི་སྤོས་ཀྱི་ངད་ལྡང་གི་ཀླུ་བཏུལ་བའི་སྐབས་ལ་སོགས་པ་རྣམས་ལས་བསྟན་པ་ལོ་སྟོང་ཁོ་ན་གནས་པར་གསུངས་ཀྱི་ལོ་ཉིས་སྟོང་འགྲིབ་པ་དང་ལྔ་སྟོང་གནས་པར་གསུངས་པ་མེད་པའི་ཕྱིར་རོ། །འབུམ་ཊཱིཀ་ལས་ནི་ལུགས་ཕྱི་མ་དང་མཐུན་པར་ལྔ་སྟོང་ལ་ཕྱེད་ཕྱེད་དུ་བྱས་ནས་ལྔ་བརྒྱ་པ་ཕྲག་བཅུ་ལས་དང་པོ་ལ་དགྲ་བཅོམ་པ་དང༌། གཉིས་པ་ལ་ཕྱིར་མི་འོང་པ་དང༌། གསུམ་པ་ལ་རྒྱུན་ཞུགས་མང་དུ་འབྱུང་བས་འབྲས་བུའི་དུས་ཀྱི་ལེའུ་གསུམ་དང༌། བཞི་པ་ལ་ཤེས་རབ་ཀྱི་བསླབ་པ་དང༌། ལྔ་པ་ལ་སེམས་ཀྱི་བསླབ་པ་དང༌། དྲུག་པ་ཚུལ་ཁྲིམས་ཀྱི་བསླབ་པ་ལ་གནས་པ་མང་དུ་འབྱུང་བས་སྒྲུབ་པའི་དུས་ཀྱི་ལེའུ་གསུམ་དང༌། བདུན་པ་ལ་མངོན་པ་དང༌། བརྒྱད་པ་ལ་མདོ་སྡེ་དང༌། དགུ་པ་ལ་འདུལ་བ་འཛིན་པ་མང་དུ་འབྱུང་བས་ལུང་གི་དུས་ཀྱི་ལེའུ་གསུམ་དང༌། བཅུ་པ་ནི་རྟགས་ཙམ་འཛིན་པའི་དུས་ཀྱི་ལེའུ་ཞེས་བྱ་སྟེ། (དེ་དག་ཏུ་གཙོ་ཆེ་བས་དེ་སྐད་བཤད་ཀྱི་ཐམས་ཅད་ཐམས་ཅད་ལ་མེད་པ་མ་ཡིན་གསུངས་སོ།།) དེ་ཉིད་ལ་ལྔ་བརྒྱ་པ་ཐ་མ་ཞེས་བྱའོ་ཞེས་བཤད་དོ། །དེ་ནས་དམ་པའི་ཆོས་ནུབ་པར་འགྱུར་ཏེ། དེའི་དུས་ན་འཛམ་བུའི་གླིང་པའི་མིའི་ཚེ་ཚད་ལྔ་བཅུ་པ་ཡིན་ལ། ད་ལྟར་ནི་ཚེ་ཚད་དྲུག་ཅུ་པ་དང་མངོན་པའི་དུས་ཡིན་པར་མཁས་པ་དག་གསུང་ངོ༌། །ཟླ་བའི་སྙིང་པོས་ཞུས་པའི་མདོ་ལས་ནི་ལོ་ཉིས་སྟོང་གནས་པར་གསུངས་སོ། །
གཉིས་པ་ནི།
རྩ་བ། བདག་གིས་མངོན་པའི་ཆོས་འདི་ཕལ་ཆེར་ནི། །
ཁ་ཆེ་བྱེ་བྲག་སྨྲ་བའི་ཚུལ་གྲུབ་བཤད། །
ཉེས་པར་ཟིན་གང་དེ་འདིར་བདག་གིས་ཉེས། །
དམ་ཆོས་ཚུལ་ལ་ཚད་མ་ཐུབ་རྣམས་ཡིན། །
བདག་གིས་མངོན་པའི་ཆོས་འདི་ཕལ་ཆེར་ནི་ཁ་ཆེ་བྱེ་བྲག་ཏུ་སྨྲ་བའི་ཚུལ་གྲུབ་པ་དང་མཐུན་པར་བཤད་ལ། ཅུང་ཟད་ནི་མདོ་སྡེ་པ་དང་ཉི་འོག་བྱེ་བྲག་ཏུ་སྨྲ་བའི་འདོད་པའི་ཚུལ་ཡང་བཤད་པའི་ཕྱིར་ཕལ་ཆེར་ཞེས་སྨོས་སོ། །དེ་ལྟར་བཤད་པ་ལ་གཞུང་འདིར་ཚིག་དང་དོན་གྱི་ཆ་ལ་ཉེས་པར་མཁས་པ་རྣམས་ཀྱིས་ཟིན་ཏེ་མཁྱེན་པ་གང་ཡིན་པ་དེ་ནི་རྩོམ་པ་པོ་བདག་གིས་ཉེས་པ་ཡིན་པས་མཁས་པ་རྣམས་ཀྱིས་བཟོད་པར་མཛོད་ཅིག་ཅེས་པའོ།། གལ་ཏེ་ཁ་ཆེ་བྱེ་བྲག་ཏུ་སྨྲ་བའི་སློབ་དཔོན་མཁས་པ་རྣམས་གཅིག་ནས་གཅིག་ཏུ་བརྒྱུད་པའི་ལུང་བཞིན་བཤད་པས་ན་ཉེས་པ་མེད་དོ་སྙམ་ན། ལུང་དང་རྟོགས་པའི་དམ་པའི་ཆོས་ཀྱི་ཚུལ་ཏེ་མཚན་ཉིད་བརྗོད་པ་ལ་ནི་ཐུབ་པས་སངས་རྒྱས་བཅོམ་ལྡན་འདས་དང༌། དེའི་སྲས་ཤ་རིའི་བུ་ལ་སོགས་པ་རྣམས་ཁོ་ན་ཚད་མ་ཡིན་གྱི་གཞན་ལ་ནི་འཁྲུལ་པ་སྲིད་པའི་ཕྱིར་རོ། །
རྩ་བ། ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས།
སྙོམས་པར་འཇུག་པ་བསྟན་པ་ཞེས་བྱ་བ་སྟེ་གནས་བརྒྱད་པའོ།། །།
ཆོས་མངོན་པའི་མཇོད་ཀྱི་འགྲེལ་པ་མངོན་པའི་རྒྱན་ལས་སྙོམས་པར་འཇུག་པ་བསྟན་པ་ཞེས་བྱ་བ་སྟེ་གནས་བརྒྱད་པའི་བཤད་པའོ།། །།
གསུམ་པ་ནི་སློབ་མ་རྣམས་ལ་རྣམ་གྲོལ་གྱི་ལམ་དང་ལམ་ཡིན་པའི་རྣམ་དབྱེ་སྟོན་པས་ན།
རྩ་བ། སྟོན་པ་འཇིག་རྟེན་མིག་ནི་ཟུམ་གྱུར་ཅིང༌། །
དཔང་གྱུར་སྐྱེ་བོ་ཕལ་ཆེར་ཟད་པ་ན། །
དེ་ཉིད་མ་མཐོང་རང་དགར་གྱུར་པ་ཡི། །
ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །
རང་བྱུང་རང་བྱུང་བསྟན་པ་གཅེས་འཛིན་རྣམས། །
མཆོག་ཏུ་ཞིར་གཤེགས་འགྲོ་མགོན་མེད་པ་ན། །
འདོམས་མེད་ཡོན་ཏན་འཇོམས་པར་བྱེད་པ་ཡི། །
དྲི་མས་དགའ་མགུར་དེང་སང་འདི་ན་སྤྱོད། །
སྟོན་པ་འཇིག་རྟེན་པ་རྣམས་ཀྱི་མིག་ལྟ་བུར་གྱུར་པའི་སངས་རྒྱས་བཅོམ་ལྡན་འདས་ནི་ཟུམ་སྟེ་མྱ་ངན་ལས་འདས་པར་གྱུར་ཅིང༌། སངས་རྒྱས་ལས་གཞན་ཆོས་ཀྱི་དཔང་པོར་གྱུར་པ་འཕགས་པ་འོད་སྲུང་ལ་སོགས་པ་འཕགས་པའི་སྐྱེ་བོ་རྣམས་ཀྱང་ཕལ་ཆེར་མྱ་ངན་ལས་འདས་ཏེ་ཟད་པར་གྱུར་པ་ན་ཐུབ་པའི་བསྟན་པ་འདི་ཚིག་དང་དོན་གྱི་སྒོ་ནས་དཀྲུགས་སོ་ཞེས་སྦྱར་རོ། །གང་གིས་དཀྲུགས་ཤེ་ན། བདེན་པ་མ་མཐོང་ཞིང་མ་རིག་པའི་མུན་པས་བསྒྲིབས་པས་ཆོས་རྣམས་ཀྱི་དེ་ཁོ་ན་ཉིད་ཀྱང་མ་མཐོང་ལ། སྟོན་པའི་ལུང་ལ་མི་རྟེན་ཞིང་གཞན་གྱིས་བཅོས་སུ་མི་བཏུབ་པས་རང་དགར་གྱུར་པའི་ངན་པའི་རྟོག་པ་དང་ལྡན་པ་རྣམས་ཀྱིས་སོ། །ཇི་ལྟར་དཀྲུགས་ཤེ་ན། སངས་རྒྱས་མྱ་ངན་ལས་འདས་ནས་ལོ་བརྒྱ་དང་བཅུ་ལོན་པ་ན་གྲོང་ཁྱེར་ཡངས་པ་ཅན་གྱི་དགེ་སློང་དེ་ཁོ་ན་ཉིད་མ་མཐོང་བ་རྣམས་ཀྱིས་ཧུ་ལུ་ཧུ་ལུ་ཀའི་ཆོ་ག་ལ་སོགས་པ་རུང་བ་མ་ཡིན་པའི་གཞི་བཅུ་བཅས་ནས་བསྟན་པ་རྣམ་པར་དཀྲུགས་པ་ན། དེ་དག་གནས་བརྟན་ཀུན་དགའ་བོའི་ལྷན་ཅིག་གནས་པ་གནས་བརྟན་ཐམས་ཅད་འདོད་པ་དང་གྲགས་པ་ནས་ཟླ་སྐུར་དང་ཞི་ལྡན་གྱི་བར་དགྲ་བཅོམ་པ་བདུན་བརྒྱས་ཡངས་པ་ཅན་དུ་འདུས་ཏེ་བསྡུ་བ་གཉིས་པ་མཛད་ནས་རྣམ་པར་བསལ་ཏོ། །དེ་ནས་སྟོན་པ་འདས་ནས་ལོ་བརྒྱ་དང་དྲུག་ཅུ་ན་གྲོང་ཁྱེར་མེ་ཏོག་གིས་རྒྱས་པ་ཞེས་བྱ་བར་རྒྱལ་པོ་མྱ་ངན་མེད་བྱུང་བའི་ཚེ་དགྲ་བཅོམ་པ་རྣམས་ལེགས་པར་སྦྱར་བ་དང་ཐ་མལ་པ་དང་ཟུར་བཅག་པ་དང་ཤ་ཟའི་སྐད་ཀྱིས་སྟོན་པའི་གསུང་རབ་འདོན་པར་བྱེད་ཅིང༌། དེ་དག་གི་སློབ་མ་རྣམས་སོ་སོར་གྱེས་པ་ལས་སྡེ་པ་བཅོ་བརྒྱད་དུ་གྱུར་ཏེ་ཕན་ཚུན་གྲུབ་མཐའ་མི་མཐུན་པ་སྣ་ཚོགས་ཀྱིས་བསྟན་པ་དཀྲུགས་པར་གྱུར་པ་ན་དགྲ་བཅོམ་པ་དང་སོ་སོའི་སྐྱེ་བོ་མཁས་པར་གྱུར་པ་རྣམས་ཛྭ་ལན་དྷ་རའི་དགོན་པར་འདུས་ཏེ་བསྟན་པ་བསྡུས་ནས་རྩོད་པ་དེ་དག་ཉེ་བར་ཞི་བར་བྱས་ཏེ། དེའི་ཚེ་སྟོན་པ་འདས་ནས་ལོ་སུམ་བརྒྱ་ལོན་ནོ་ཞེས་གྲག་གོ །ཁ་ཅིག་སྟོན་པ་འདས་ནས་ལོ་བརྒྱ་དང་སུམ་ཅུ་རྩ་བདུན་ལོན་པ་ན་རྒྱལ་པོ་དགའ་བོ་དང་པད་མ་ཆེན་པོ་ཞེས་བྱ་བ་བྱུང་བ་ན་གྲོང་ཁྱེར་པ་ཊ་ལི་པུ་ཏྲའི་ནང་དུ་གནས་བརྟན་འོད་སྲུང་ཆེན་པོ་དང་བླ་མ་ལ་སོགས་པ་བཞུགས་པའི་དུས་སུ་བདུད་སྡིག་ཅན་བཟང་པོ་ཞེས་བྱ་བ་དགེ་སློང་གི་ཆ་བྱད་དུ་བྱས་ནས་རྫུ་འཕྲུལ་སྣ་ཚོགས་བསྟན་ཏེ་དགེ་འདུན་རྣམས་ཕྱེ་ནས་བསྟན་པ་རྣམ་པར་དཀྲུགས་ཏེ། དེའི་ཚེ་གནས་བརྟན་ཀླུ་སྡེ་དང་ཡིད་འོང་གི་དུས་སུ་སྡེ་པ་སོ་སོར་གྱེས་ནས་ལོ་དྲུག་ཅུ་རྩ་གསུམ་ན་གནས་བརྟན་གནས་མའི་བུས་བསྟན་པ་བསྡུས་སོ་ཞེས་ཟེར་རོ། །གཞན་ཡང་རང་བྱུང་རྫོགས་པའི་སངས་རྒྱས་དང་རང་བྱུང་དེའི་བསྟན་པ་གཅེས་པར་འཛིན་པ་རྣམས་ཀྱང་འཁོར་བ་ལས་མཆོག་ཏུ་གྱུར་པ་སྡུག་བསྔལ་རྒྱུ་དང་བཅས་པ་ཞི་བའི་མྱ་ངན་ལས་འདས་པར་གཤེགས་ཏེ། འགྲོ་བ་རྣམས་ལ་སྐྱོབ་པར་བྱེད་པའི་མགོན་མེད་པར་གྱུར་པ་ན་ཡང་དག་པའི་གདམས་ངག་འདོམས་པར་བྱེད་པ་མེད་པས་སྔར་བཤད་པའི་ཡོན་ཏན་རྣམས་འཇོམས་པར་བྱེད་ཅིང་བསྟན་པ་ནུབ་པར་བྱེད་པའི་རྒྱུ་ལྟ་བ་ལ་སོགས་པའི་དྲི་མ་རྣམས་ཀྱིས་དགའ་མགུར་ཏེ་རང་དགར་དུས་དེང་སང་འཇིག་རྟེན་འདི་ན་སྤྱོད་པར་བྱེད་དོ། །
རྩ་བ། དེ་ལྟར་ཐུབ་པ་དག་གི་བསྟན་པ་ནི། །
ལྐོག་མར་སྲོག་ཕྱིན་འདྲ་དང་དྲི་མ་རྣམས། །
སྟོབས་དང་ལྡན་པའི་དུས་སུ་རིག་ནས་ནི། །
ཐར་པ་འདོད་པ་དག་གིས་བག་ཡོད་གྱིས། །
ཆོས་མངོན་པའི་མཛོད་ཀྱི་ཚིག་ལེའུར་བྱས་པ་སློབ་དཔོན་ཤཱཀྱའི་དགེ་སློང་དབྱིག་གཉེན་གྱིས་མཛད་པ་རྫོགས་སོ།། །།
རྒྱ་གར་གྱི་མཁན་པོ་ཛི་ན་མི་ཏྲ་དང་། ཞུ་ཆེན་གྱི་ལོ་ཙྪ་བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
གོང་དུ་བསྟན་པའི་ཚུལ་དེ་ལྟར་ན་ཐུབ་པ་སངས་རྒྱས་དག་གི་བསྟན་པ་ནི་དཔེར་ན་འཆི་བའི་དུས་ན་ལྐོག་མར་སྲོག་ཕྱིན་པ་ན་འཆི་བ་ལ་ཉེ་བ་དང་འདྲ་བར་རིང་དུ་མི་གནས་པའི་ཕྱིར་དང༌། ལྟ་བ་ངན་པ་ལ་སོགས་པའི་དྲི་མ་རྣམས་ཀྱང་སྟོབས་དང་ལྡན་པའི་དུས་སུ་རིག་པར་བྱས་ནས་ནི་ཐར་པ་འདོད་པ་དག་གིས་བག་ཡོད་པར་གྱིས་ལ་བསྟན་པ་འཛིན་པ་ལ་རྣམ་པར་བརྩོན་པར་གྱིས་ཤིག་ཅེས་འདོམས་པ་སྟེ། ཇི་སྐད་དུ་སོ་སོ་ཐར་པ་ལས། ཚེ་དང་ལྡན་པ་དག་རྒ་བ་དང་འཆི་བ་མངོན་པར་འོང་ཞིང་སྟོན་པའི་བསྟན་པ་ཡང་འཇིག་པར་འགྱུར་བས་ཚེ་དང་ལྡན་པ་དག་གིས་བག་ཡོད་པས་རྣལ་འབྱོར་དུ་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་དང༌། གཞན་ཡང་གང་དག་དེ་ལྟ་བུ་དང་མཐུན་པ་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་ཀྱང་བག་ཡོད་པས་ཐོབ་བོ་ཞེས་གསུངས་པ་ལྟ་བུའོ། །
གང་ཕྱིར་ཡོན་ཏན་རྟེན་གྱུར་ཡན་ལག་ཉེར་བསྡོགས་དང་བཅས་པའི། །
བསམ་གཏན་དང་ནི་གཟུགས་མེད་སྙོམས་འཇུག་རབ་དབྱེ་འཐོབ་ཚུལ་དང༌། །
དེ་དག་ལ་བརྟེན་ཡོན་ཏན་ཏིང་འཛིན་ཚད་མེད་རྣམ་ཐར་སོགས། །
ཇི་བཞིན་རྟོགས་པ་གནས་འདི་ལས་ཡིན་དེ་ཕྱིར་འདི་མཉན་རིགས། །
བརྟན་དང་གཡོ་བའི་རང་བཞིན་གང་ཡིན་དེ་སྒྲུབ་བྱེད། །
སྐྱེ་བ་དང་ནི་སྐྱེད་བྱེད་དེ་དག་རྣམ་པ་མ་ལུས་ལས། །
རྣམ་གྲོལ་དེ་ཡང་དེ་བཞིན་ཉིད་ཡིན་དཔག་ཡས་ཡོན་ཏན་ལ། །
ཐོགས་མེད་སྤོབས་པའི་འབྱུང་གནས་ཆོས་མངོན་འདི་ནི་སངས་རྒྱས་གསུངས། །
གནས་བརྟན་ཀ་ཏྱའི་བུ་སོགས་སྡེ་བདུན་གཞུང་གི་རྗེས་འབྲང་ཞིང༌། །
སྡོམ་བརྩོན་དམ་པ་ཆུ་དབུས་པ་དང་ཉེ་སྦས་ལ་སོགས་པ། །
འཕགས་ཚོགས་རྣམས་ཀྱི་གྲུབ་ཆེན་བྱེ་བྲག་བཤད་མཚོ་ཆེན་པོ་ཡི། །
དོན་གྱི་རིན་ཆེན་མ་ལུས་མཛོད་གྱུར་འདི་ནི་མཛད་པ་གང༌། །
དབྱིག་གཉེན་ཞེས་བྱ་སངས་རྒྱས་བསྟན་པ་མ་ལུས་མཁྱེན་པ་ཡི། །
ཉི་མ་ཉིད་གྱུར་དེ་ཡིས་ཐུབ་དང་དེ་སྲས་ཞིར་གཤེགས་ཤིང༌། །
བསྡུ་བའི་གཞི་ཡང་ཉམས་གྱུར་གསུང་རབ་རྣམ་པར་བསླད་མཐོང་ནས། །
སྙིགས་དུས་བསྟན་པའི་དཔང་གྱུར་གཞུང་མང་མཛད་པར་གྱུར་པ་ཡིན། ། དེ་ལྟར་ཕན་བདེའི་འབྱུང་གནས་བསྟན་པའི་མིག་གྱུར་གཞུང་བཟང་འདི་ནི་སློབ་དཔོན་གྱིས་མཛད་པའི། །རབ་གསལ་འགྲེལ་ཆེན་ཉི་འོད་ལ་བརྟེན་རྣམ་པར་ཕྱེ་བའི་བཤད་སྦྱར་དག་ཀྱང་མཐོང་གྱུར་ཅིང༌། །མཁས་དང་མཁས་པ་རིམ་ནས་རིམ་པར་བརྒྱུད་པའི་མན་ངག་ཉེར་ཐོབ་ལེགས་བཤད་གོམས་པའི་མཐུས། །འཇམ་དབྱངས་ཞེས་བྱས་སངས་རྒྱས་བསྟན་ལ་མོས་པ་ལྷུར་བྱས་རྣམ་བཤད་འདི་ནི་བྱས་པ་ཡིན། །དགེ་བ་དྲི་མེད་རྒྱ་ཆེན་བསགས་པ་གང་དེས་མུན་པར་འཁྱམས་པ་ཡི། །འགྲོ་བ་འདི་དག་མ་ལུས་ཐར་པའི་སྣང་ལྡན་འཕགས་ལམ་བཟང་པོར་ནི། །ཀུན་ནས་འཁྲིད་བྱེད་ཐུབ་མཆོག་ཉིད་དུ་གྱུར་ནས་སྐྱབས་མེད་སེམས་ཅན་རྣམས། །སྲིད་དང་ཞི་བའི་འཇིགས་པ་ཀུན་ལས་མ་ལུས་རབ་ཏུ་སྒྲོལ་བར་ཤོག །
ས་ཆེན་མངའ་བ་རྐང་གཉིས་རྣམས་ཀྱི་རྗེ། །
སྐྱབས་གསུམ་རིན་ཆེན་དབུ་ཡི་ཅོད་པན་གྱིས། །
ཉེར་མཛེས་སྲས་དང་བཅས་པ་སྙུན་མེད་ཅིང༌། །
ཡུན་རིང་ཞབས་བརྟན་ཆབ་སྲིད་བདེ་བར་གྱུར། །
སྐྱེ་དགུ་རྣམས་ཀྱང་ཕན་ཚུན་བྱམས་ལྡན་ཞིང༌། །
ཡམས་དང་ཉེ་བར་འཚེ་བ་ཀུན་ཞི་སྟེ། །
ཚེ་དང་འབྱོར་བས་བརྒྱན་པའི་དལ་འབྱོར་དག། །
འབྲས་བུ་ཡོད་པར་ཀུན་དུ་སྤྱོད་པར་ཤོག །
བདག་ཀྱང་སྐྱེ་བ་ཀུན་དུ་མི་ཡི་ལུས། །
ཚུལ་ཁྲིམས་གཙང་མའི་གོས་ཀྱིས་རབ་བརྒྱན་པ། །
ཐོབ་ནས་སངས་རྒྱས་གསུང་རབ་མ་ལུས་པ། །
ཇི་བཞིན་རྟོགས་ནས་གཞན་ལ་སྟོན་གྱུར་ཅིག །
དོན་མང་ཕྲ་དང་ཚིག་ཀྱང་བརླིང་བ་དང༌། །
ཤིན་ཏུ་མཁས་པ་རྣམས་ཀྱིས་རྣམ་དཔྱད་པའི། །
ཚུལ་ཡང་ཐ་དད་སྣ་ཚོགས་འགྲོ་བའི་སླད། །
སངས་རྒྱས་གསུང་ཡང་རྣམ་པ་མང་མཐོང་བས། །
གཞུང་འདིར་ཇི་བཞིན་མིན་པར་བདག་གིས་ནི། །
བཤད་གྱུར་ཉེས་པ་གང་དེ་རྒྱལ་རྣམས་དང༌། །
རྒྱལ་བའི་སྲས་སོགས་མཁས་རྣམས་སྤྱན་སྔར་ནི། །
ཅི་ཞིག་གྱུར་ཞེས་ཡིད་ནི་གནོང་བར་གྱུར། །
གང་དག་རང་གཞན་གཞུང་ལ་མ་སྦྱངས་ཤིང༌། །
ཕྱོགས་རེའི་དོན་ལ་མོས་པ་ལྷུར་བྱེད་པ། །
དེ་དག་བློ་དང་འཚམ་པར་མ་གྱུར་པ། །
དེ་དག་གང་ཡིན་ཤེས་པས་བརྟག་དགོས་སོ། །
ཆོས་མངོན་པའི་མཇོད་ཀྱི་འགྲེལ་པ་མངོན་བའི་རྒྱན་ཞེས་བྱ་བ་རྒྱལ་བའི་བསྟན་པ་ལྔ་བརྒྱ་ཕྲག་བདུན་པའི་མཐར་ཉེ་བ་ན། ཤེས་བྱ་རྣམ་པར་འབྱེད་པའི་བློ་གྲོས་མཚུངས་པ་མེད་པས་ཐུབ་པའི་བསྟན་པའི་རྒྱལ་མཚན་འཛིན་ཅིང༌། ཐུགས་རྗེ་དང་འཕྲིན་ལས་ཀྱི་དཔལ་འབྱོར་བཟང་པོས་སྐྱེ་དགུ་རྣམས་སྨིན་ཅིང་གྲོལ་བར་མཛད་པ་བླ་མ་དམ་པ་ཆོས་ཀྱི་རྒྱལ་པོ་རིན་པོ་ཆེ་དང༌། ཤེས་བྱའི་ནམ་མཁའ་ལ་མཁྱེན་པའི་དཀྱིལ་འཁོར་རབ་ཏུ་རྒྱས་ཤིང་སྙན་གྲགས་ཀྱི་འོད་ཟེར་གྱིས་ཕྱོགས་མ་ལུས་པ་ཁྱབ་པར་གྱུར་པས་སྡོམ་བརྩོན་མཁས་པ་རྣམས་ཀྱི་གཙུག་གི་ནོར་བུར་གྱུར་ཅིང༌། གངས་ཅན་གྱི་རྒྱུད་ཀྱི་གནས་བརྟན་ཆེན་པོ་མཆིམས་ཐམས་ཅད་མཁྱེན་པ་ལ་སོགས་པའི་ཞབས་ཀྱི་རྡུལ་རྙོག་པ་མེད་པ་སྤྱི་བོས་ལེན་པ་མང་དུ་ཐོས་པ་ཤཱཀྱའི་དགེ་སློང་འཇམ་པའི་དབྱངས་ཀྱིས། དཔའ་ས་སྐྱའི་ཆོས་གྲྭ་ཆེན་པོར་དབུ་བརྩམས་ནས། སའི་དབང་ཕྱུག་རྒྱལ་པོ་ཆེན་པོའི་ཕོ་བྲང་ཅོང་ཏུའི་མཁར་དུ་ལེགས་པར་གྲུབ་པར་བྱས་པའོ།། །།

ན་མོ་མུ་ནི་ཨནྡྲི་ཡ།
བླང་དང་དོར་བྱའི་གཞིར་འགྱུར་འཕགས་པའི་བདེན་པ་བཞི་པོ་ལས། །
བརྩམས་ཏེ་ཆོས་ཀྱི་འཁོར་ལོ་དང་པོ་བསྐོར་བ་ཙམ་ཉིད་ན། །
བྱེ་བ་ཕྲག་བརྒྱའི་ཞིང་ཁམས་དགྲ་བཅོམ་ཚོགས་ཀྱིས་ཁྱབ་མཛད་པའི། །
སྟོན་མཆོག་ཡང་ཡང་དྲན་བཞིན་དད་པའི་སྤུ་ལོང་རྟག་ཏུ་གཡོ། །
ཤིན་ཏུ་དང་པོའི་ལས་ཅན་གདུལ་བྱའི་མོས་པ་དང་འཚམ་པར། །
དགྲ་བཅོམ་བདུན་གྱིས་ལུགས་བསྡུས་མངོན་པ་སྡེ་བདུན་མཛོད་ཀྱི་སྒོ། །
ཕྱེ་སྟེ་སྤེལ་ལ་མཁས་པའི་མཆོག་གྱུར་དབྱིག་གཉེན་ཞེས་བྱ་བ། །
འཛམ་གླིང་མཛེས་བྱེད་རྒྱན་གྱུར་དེ་ལ་ཡང་གཙུག་གི་རྒྱན་དུ་འཛིན། །
གང་དེའི་ལེགས་གསུང་འགྲེལ་མཁས་རྒྱལ་བའི་སྲས་དང་གང་སྤེལ་གྱི། །
གཞུང་བཞིན་ལྗོངས་འདིར་མངོན་པའི་སྡེ་སྣོད་འཆད་ལ་མཁས་པའི་མཆོག །
མཆིམས་ཀྱི་རིགས་འཁྲུངས་འཇམ་པའི་དབྱངས་ཞེས་སྙན་པ་ཕྱོགས་ཁྱབ་ཅན། །
དེས་གསུངས་འགྲེལ་པ་མངོན་པའི་རྒྱན་འདི་མཁས་རྣམས་བསྔགས་འོས་ཆེ། །
འདི་ལྟར་ཆོས་མངོན་འགྲེལ་ཆེན་འདི། །
སྔོན་ནས་པར་དུ་བཀོད་འདུག་ཀྱང། །
ཀུན་ཕན་བསམ་སྦྱོར་དགེ་བ་ཡིས། །
སླར་ཡང་གསལ་དག་པར་དུ་བསྐྲུན། །
ཚུལ་འདིས་ཤཱཀྱའི་རྒྱལ་པོ་ཡི། །
ལྗགས་ཀྱི་པདྨོ་སྐྱོད་པ་ལས། །
ལེགས་འོངས་བདུད་རྩིའི་ཟིལ་མངར་ལ། །
སྐལ་བཟང་བུང་བའི་ཚོགས་འདུས་ཏེ། །
འདི་སྣང་སྲིད་པའི་ཕུན་ཚོགས་ལ། །
སྙིང་པོ་མེད་པའི་ཆུ་ཤིང་ལྟར། །
མཐོང་སྟེ་བསམ་སྦྱོར་རྣམ་དག་པས། །
ཐོས་བསམ་སྒོམ་ལ་རབ་ཏུ་བརྩོན་ཤོག །
ཆོས་ཀུན་བལྟ་བའི་བློ་མིག་གསལ། །
ཉེས་པའི་རྡུལ་གྱི་དྲི་མས་དབེན། །
དོན་གཉིས་བསྒྲུབ་ལ་མི་ངལ་བའི། །
སྐྱེས་བུས་ས་སྟེང་ཁྱབ་གྱུར་ཅིག །
འགྲོ་བ་ཀུན་གྱི་ཉེར་འཚོའི་གཞི། །
རྒྱལ་བའི་ལུགས་བཟང་ཕྱོགས་བཅུར་རྒྱས། །
འཇིག་རྟེན་རྒུད་པ་དྲུངས་ཕྱུང་སྟེ། །
ཆོས་འབྱོར་བདེ་དགེས་འཚོ་བར་ཤོག །
འདས་དང་མ་འདས་དཀར་པོའི་ཆོས། །
གང་དག་མཐར་ཐུག་འབྲས་བཟང་གི །
རྒྱུ་ལས་གཞན་དུ་མི་འདའ་བར། །
འགྲོ་ཀུན་བྱང་ཆེན་མྱུར་ཐོབ་ཤོག །
ཆུ་འབྲུག་ལོར་འདུལ་བའི་རྣམ་བཤད་ཉི་མའི་འོད་ཟེར་དང། ཆུ་སྦྲུལ་ལོར་མདོ་རྩ་མཆན་འགྲེལ་མཐོང་བ་དོན་འགྲུབ་པར་གསར་བརྐོས་དང་མུ་མཐུད། མཛོད་འགྲེལ་མངོན་པའི་རྒྱན་འདི་ཉིད་སླར་ཡང་པར་བརྐོས་བགྱི་བ་ལེགས་པར་གྲུབ་མཚམས། མཛོད་འགྲེལ་འདི་ཉིད་པར་བཞེངས་བགྱིས་པའི་དགེ་བ་རྫོགས་བྱང་དུ་བསྔོ་བའི་སྨོན་པའི་ཚིགས་སུ་བཅད་པ་འདི་ཉིད་ཐུབ་པའི་ཆོས་ཚུལ་འཛིན་ཅིང་ཆོས་བཞིན་སྨྲ་བའི་བཙུན་པ་ངག་དབང་བློ་བཟང་ཐུབ་བསྟན་རྒྱ་མཚོ་འཇིགས་བྲལ་དབང་ཕྱུག་ཕྱོགས་ཀུན་ལས་རྣམ་པར་རྒྱལ་བའི་སྡེས་སྨྲས་པ་འདི་ཡང་རྒྱལ་བསྟན་རིན་པོ་ཆེ་ཕྱོགས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག།། །།

 

 

 

 

 

 

 

 

 

 

 

 

 

 

༄༅། །ཆོས་མངོན་པ་མཛོད་ཀྱི་བསྡུས་དོན་བཞུགས་སོ། །

༄༅། །འཇམ་པའི་དབྱངས་ལ་ཕྱག་འཚལ་ལོ། །ཆོས་མངོན་པའི་མདོ་ལ་གནས་བརྒྱད་ལས། དང་པོ་ཁམས་བསྟན་པ་ལ་ལྔ། མཆོད་པར(གང་ཞིག་)བརྗོད་ཅིང་བཤད་པར་དམ་བཅའ་བ་དང། ཆོས་མངོན་པ་བཤད་པ། དེ་གསུངས་(ཆོས་རྣམས་)པའི་དགོས་པ་བརྗོད་པ། བཤད་བྱའི་ཆོས་མདོར་བསྟན་པ། དེ་རྒྱས་པར་བཤད་པའོ། །འདི་ལ་འདུས་མ་བྱས་བཤད་པ་དང་། འདུས་བྱས་བཤད་པ་གཉིས་ལས། འདུས་བྱས་ལ་བཞི། མིང་གི་སྒོ་ནས་བསྟན་པ། ངོ་བོ་བཤད་པ། དེ་རྣམ་པར་བཞག་པ། ཁམས་ཀྱི་དབྱེ་བ་ཤིན་ཏུ་བཤད་པའོ། །ངོ་བོ་བཤད་པ་ལ་གཉིས། ཕུང་པོ་ལྔ་སོ་སོར་བཤད་པ་དང། དེ་དག་ཁམས་དང་སྐྱེ་མཆེད་དུ་འགྱུར་ཚུལ་ལོ། །དེ་རྣམ་པར་བཞག་པ་ལ་བཞི། བསྡུ་བ་དང། སྒྲ་དོན་དང། གྲངས་ལ་སོགས་པའི་ངེས་པ་དང། ཕུང་པོ་ལ་སོགས་པའི་མིང་ཅན་གཞན་འདིར་བསྡུ་བའོ། །དབྱེ་བ་བཤད་པ་ལ། བསྟན་ཡོད་བསྟན་མེད་ནས། དབང་པོ་དང་དབང་པོ་མ་ཡིན་པའི་བར་དུ་མ་ཡོད་དོ། །
གཉིས་པ་དབང་པོ་བསྟན་པ་བཞི། དབང་པོ་བཤད་པ་དང། འདུས་བྱས་རྣམས་ཀྱི་སྐྱེ་ཚུལ་དང། དེའི་རྒྱུ་ལ་སོགས་པ་བཤད་པ་དང། སེམས་ཀྱི་དབྱེ་བ་བཤད་པའོ། །དབང་པོ་ལ་དྲུག །ངོ་བོ་དང་རྣམ་པའི་དབྱེ་བ་དང། རྙེད་པ་དང། གཏོང་བ་དང། འཐོབ་ཚུལ་དང། ལྡན་ཚུལ་ལོ། །འདུས་བྱས་ཀྱི་ཆོས་སྐྱེ་ཚུལ་ལ་གསུམ། གཟུགས་ཅན་གྱི་སྐྱེ་ཚུལ་དང། སེམས་དང་སེམས་བྱུང་གི་སྐྱེ་ཚུལ་དང། སེམས་དང་མི་ལྡན་པའི་འདུ་བྱེད་བཤད་པའོ། །སེམས་དང་སེམས་བྱུང་ལ་སོ་སོར་བཤད་པ་དང་། ཁམས་གང་དུ་ཇི་ལྟར་འབྱུང་ཚུལ་ལ་སོགས་པའི་ཆོས་དུ་མ་བཤད་པ་གཉིས་སོ། །མི་ལྡན་པའི་འདུ་བྱེད་ལ་བསྟན་པ་དང། དེ་སོོ་སོར་བཤད་པ་གཉིས་སོ། །དེའི་རྒྱུ་ལ་སོགས་པ་བཤད་པ་ལ་གསུམ། རྒྱུ་བཤད་པ། འབྲས་བུ་བཤད་པ། རྐྱེན་བཤད་པའོ། །སེམས་ཀྱི་དབྱེ་བ་བཤད་པ་ལ་གསུམ། སེམས་བཅུ་གཉིས་བཤད་པ། ཉི་ཤུ་བཤད་པ། བཅུ་གཉིས་ཀྱི་རྙེད་ཚུལ་ལོ། །
གསུམ་པ་འཇིག་རྟེན་བཅུད་དང་སྣོད་བསྟན་པ་གཉིས་ལས། བཅུད་ལ་ལྔ། དངོས་དང་ཞར་ལ་བྱུང་བ་གཉིས་ཀྱིས་སེམས་ཅན་གྱི་དབྱེ་བ་དང། སྐྱེ་གནས་ཀྱི་དབྱེ་བ་དང། དོན་དངོས་དང། མངལ་དུ་འཇུག་ཚུལ་གཉིས་ཀྱིས་སྲིད་པ་བར་མ་དང། སྲིད་པའི་འཁོར་ལོ་དང་འཆི་འཕོ་ཚུལ་ལོ། །སྲིད་པའི་འཁོར་ལོ་བཤད་པ་ལ་ལྔ། རྟེན་འབྲེལ་གྱི་རང་བཞིན་བསྟན་པ། མ་རིག་པ་ལ་སོགས་པ་སོ་སོར་བཤད་པ་དང། མཚོན་པའི་དཔེ་དང། སྲིད་པའི་རང་བཞིན་དང། གནས་པའི་ཟས་སོ། །སྣོད་ལ་གསུམ། འཆགས་ཚུལ་དང། འཇིག་ཚུལ་ལོ། །འཆགས་ཚུལ་ལ་གཉིས། འོག་གཞིའི་འཆགས་ཚུལ། སྟེང་གི་གནས་ཀྱི་འཆགས་ཚུལ་ལོ། །གནས་ཚུལ་ལ་ལྔ། ངན་འགྲོ་དང་མཐོ་རིས་ཀྱི་གནས་ཚུལ་དང། སྟོང་གསུམ་གྱི་ཚད་དང། སེམས་ཅན་གྱི་ལུས་ཚད་དང། ཚེ་ཚད་དང། དེ་གཉིས་འཇལ་བྱེད་ཀྱི་ཚད་དང། བསྐལ་པའི་དབྱེ་བའོ། །འདི་ལ་གཉིས། དོན་དངོས་དང། དེ་ལ་སངས་རྒྱས་ལ་སོགས་པ་འབྱུང་ཚུལ་ལོ། །
བཞི་པ་བསྟན་པ་ལ་གསུམ་ལས་མདོ་དང། རྒྱས་པ་དང། ཡིག་འབྲུ་ལ་སོགས་པ་ཞར་བྱུང་བཤད་པའོ། །རྒྱས་པ་ལ་གསུམ། རིག་བྱེད་བཤད་པ་དང། རིག་བྱེད་མ་ཡིན་པ་བཤད་པ། མདོ་ལས་གསུངས་པའི་ལས་ཀྱི་དབྱེ་བ་དུ་མ་བཤད་པའོ། །རིག་བྱེད་མ་ཡིན་པ་ལ་བཞི། དེ་གཟུགས་སུ་སྒྲུབ་པ་དང། ལས་རྣམས་ཀྱི་རྒྱུ་དང། ས་ལ་སོགས་པ་བཤད་པ་དང། རིག་བྱེེད་མ་ཡིན་པའི་དབྱེ་བ་དང། སྡོམ་པ་རྒྱས་པར་བཤད་པའོ། །འདི་ལ་བདུན། སྡོམ་པའི་ངོ་བོ་སྤྲོས་ཏེ་བཤད་པ་དང། དེ་ཐོབ་ཚུལ་དང། སྡོམ་པ་མིན་པའི་ཐོབ་ཚུལ་དང། སྡོམ་པ་གཏོང་ཚུལ་དང། སྡོམ་མིན་གཏོང་ཚུལ་དང། བར་མ་ལ་སོགས་པ་གཏོང་ཚུལ་དང་སྡོམ་པ་དང་སྡོམ་མིན་གྱི་རྟེན་བཤད་པའོ། །ལས་ཀྱི་དབྱེ་བ་དུ་མ་བཤད་པ་ལ་བདུན། གསུམ་ཚན་གྱི་དབྱེ་བ་དང། ཡོན་པོ་དང་དཀར་ནག་ལ་སོགས་པའི་དབྱེ་བ་དང། བཅུ་ཚན་གྱི་དབྱེ་བ་དང། ལོག་འཚོ་དང་འབྲས་བུ་བཤད་པ་དང། སྒྲིབ་པ་གསུམ་བཤད་པ་དང། སངས་རྒྱས་ཀྱི་བསོད་ནམས་ཇི་ལྟར་བསགས་པ་དང། བསོད་ནམས་ཀྱི་གཞི་གསུམ་བཤད་པའོ། །གསུམ་ཚན་གྱི་དབྱེ་བ་ལ་གཉིས། དོན་དངོས་དང། མྱོང་འགྱུར་ལ་སོགས་པའི་དབྱེ་བ་དུ་མ་བཤད་པའོ། །བཅུ་ཚན་ལ་གསུམ། རང་བཞིན་དང་རྒྱུ་ལ་སོགས་པ་བཤད་པ་དང། མི་དགེ་བ་བཅུའི་ངོ་བོ་བཤད་པ་དང། ནུས་པ་དང་ལྡན་ཚུལ། སྒྲིག་གསུམ་བཤད་པ་ལ་གཉིས། གསུམ་པའི་ངོ་བོ་དང། མཚམས་མེད་པ་དང། དེའི་ཉེ་བ་བཤད་པའོ། །
ལྔ་པ་ཕྲ་རྒྱས་བསྟན་པ་གསུམ། ཉོན་མོངས་པ་རྣམས་ཀྱི་རང་བཞིན་དང། སྤོང་ཚུལ་དང། དེ་སྤོང་བའི་ཡེ་ཤེས་བསྟན་པའོ། །དང་པོ་ལ་དྲུག ཕྲ་རྒྱས་ཀྱི་དབྱེ་བ་བཤད་པ་དང། ཀུན་འགྲོ་དང་ཀུན་འགྲོ་མ་ཡིན་པ་བཤད་པ་དང། དམིགས་པ་དང་རྒྱས་འགྱུར་བཤད་པ་དང། རྩ་བ་དང་ལྡན་ཚུལ་བཤད་པ་དང། དུས་གསུམ་རྫས་སུ་སྒྲུབ་པ་དང། སླར་ཡང་ཕྲ་རྒྱས་ཀྱི་ཆོས་གཞན་བཤད་པའོ། །འདི་ལ་དོན་ལྔ། སྤངས་པ་དང་རྒྱས་འགྱུར་བཤད་པ་དང། ཇི་ལྟར་འཇུག་པའི་རིམ་པ་དང། རྒྱུ་བཤད་པ་དང། རྣམ་གྲངས་དང་སྒྲ་དོན་ལ་སོགས་པ་བཤད་པ་དང། འཆི་བ་དང་ཉེ་བའི་ཉོན་མོངས་བཤད་པ་དང། སྒྲིབ་པ་ལྔ་བཤད་པའོོ། །
དྲུག་པ་ལམ་དང་གང་ཟག་བསྟན་པ་ལ་གསུམ། དམིགས་པའི་ཡུལ་བདེན་པ་རྣམས་བཤད་པ་དང། དེ་དག་མངོན་པར་རྟོགས་པའི་རིམ་པ་བཤད་པ་དང། རྟོགས་པར་བྱེད་པའི་ལམ་བཤད་པའོ། །བར་པ་གཉིས་ཏེ། སོ་སོ་སྐྱེ་བོའི་མངོན་པར་རྟོགས་པ་དང། འཕགས་པའི་མངོན་པར་རྟོགས་པའོ། །དང་པོ་ལ་གཉིས། ཐོས་བསམ་སྔོན་དུ་འགྲོ་བས་ཏིང་འཛིན་ཇི་ལྟར་སྒོམ་ཚུལ་དང། ཏིང་ངེ་འཛིན་ཐོས་པས་ཤེས་རབ་སྒོམ་ཚུལ་ལོ། །འཕགས་པའི་ལམ་བཞི། ཞུགས་འབྲས་གཅིག་ཅར་ཐོབ་པར་བཤད་པ་དང། རིམ་གྱིས་ཐོབ་པ་བཤད་པ་དང། དེ་དག་གང་གི་འབྲས་བུ་ཡིན་པར་བཤད་པ་དང། སླར་ཡང་དེ་དག་གི་ཁྱད་པར་གྱི་ཆོས་དུ་མ་བཤད་པའོ། །འདི་ལ་གཉིས། འབྲས་བུ་བཞི་དང། དེ་ཐོབ་ཚུལ་ལ་སོགས་པ་བཤད་པ་དང། ཉམས་པ་དང་རྫོགས་ཚུལ་ལ་སོགས་པ་བཤད་པའོ། །གསུམ་པ་རྟོགས་པར་བྱེད་པའི་ལམ་བཤད་པ་ལ་གསུམ། ལམ་སྤྱིར་བཤད་པ་དང། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་བཤད་པ་དང། སྒྲིབ་པ་སྤོང་ཚུལ་བཤད་པའོ། །
བདུན་པ་ཡེ་ཤེས་བསྟན་པ་ལ་གཉིས། ཤེས་པ་རྣམས་ཀྱི་རང་བཞིན་བཤད་པ་དང། ཤེས་པའི་ཡོན་ཏན་བཤད་པའོ། །དང་པོ་ལ་གསུམ། བཟོད་ཤེས་དང་ལྟ་བའི་ཆོས་དུ་མ་བཤད་པ་དང། དྲན་པ་ཉེར་བཞག་གི་བསྡུས་པ་བརྗོད་པ་དང། ཤེས་པའི་ལྡན་པ་དང་ཐོབ་ཚུལ་བསྟན་པའོ། །ཤེས་པའི་ཡོན་ཏན་ལ་གསུམ། སངས་རྒྱས་ཁོ་ན་ལ་ཡོད་པ་བཤད་པ་དང། ཉན་ཐོས་དང་ཐུན་མོངས་པ་བཤད་པ་དང། སོ་སོ་སྐྱེ་བོ་དང་ཐུན་མོངས་པ་བཤད་པའོ། །
བརྒྱད་པ་སྙོམས་འཇུག་བསྟན་པ་ལ་བཞི། བསམ་གཏན་དང་གཟུགས་མེད་པའི་སྙོམས་འཇུག་བསྟན་པ་དང། དེ་དག་གི་ཡོན་ཏན་ཆོས་བཤད་པ་དང། བསྟན་པའི་རང་བཞིན་བཤད་ནས་ཉེས་པ་བཟོད་པར་གསོལ་བ། མཇུག་ཐར་པ་འདོད་པའི་གདུལ་བྱ་ལ་གདམས་པའོ། །དང་པོ་ལ་གཉིས། དོན་དངོས་དང། འཐོབ་ཚུལ་ལ་སོགས་པའི་ཆོས་དུ་མ་བཤད་པའོ། །ཡོན་ཏན་ལ་གཉིས། ཚད་མེད་པ་བཤད་པ་དང། རྣམ་པར་ཐར་པ་བརྒྱད་པ་སོགས་པ་བཤད་པའོ།། །།
ཆོས་མངོན་ཤེས་བྱ་ཀུན་མཁྱེན་ནི། །ཐོབ་པར་འདོད་ནས་ཆོས་མངོན་གྱི། །བསྡུས་དོན་དཔལ་ལྡན་ཐང་ཆེན་དུ། །བཅོམ་ལྡན་རལ་གྲིས་བཀོད་པ་ཡིན།། །།ས་མཱཔྟ༔

༄༅། །འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་བརྒྱན་པ་
རྣམ་པར་བཤད་པ་རྒྱན་གྱི་མེ་ཏོག་ཅེས་བྱ་བ་བཞུགས་སོ། །

༄༅། །རྒྱ་གར་སྐད་དུ། ལོ་ཀ་དྷ་ཏུ་སཱ་ག་ར་མཱུ་ལ་གརྦྷ་པུཥྤ་ཨ་ལྃ་ཀ་ར་ཀ་དེ་ཤ། བོད་སྐད་དུ། འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པར་བཤད་པ། སངས་རྒྱས་དང་བྱང་ཆུབ་སེམས་པ་ཐམས་ཅད་ལ་ཕྱག་འཚལ་ལོ། །རྣམ་པར་སྣང་མཛད་ཡེ་ཤེས་མཚོ་ཆེན་ལྡན། །དོན་གཉིས་མཐར་ཕྱིན་སྐུ་ལ་ཕྱག་འཚལ་ཏེ། །དེ་ཡི་ཞིང་ཁམས་རྡུལ་ལ་རབ་གནས་པ། །གཞི་དང་སྙིང་པོ་མེ་ཏོག་རྒྱན་ཅན་བཤད། །སངས་རྒྱས་ཤཱཀྱ་ཐུབ་པ་ནི་ཐེག་པ་ཆེན་པོ་ཐུན་མོང་མ་ཡིན་པའི་ལུགས་ལ་སངས་རྒྱས་རྣམ་པར་སྣང་མཛད་ཆེན་པོ་དང་དང་པོའི་སངས་རྒྱས་ཞེས་འབྱུང་སྟེ། ཞིང་འདིའི་ཐེག་པ་གཞན་ལ་མ་གྲགས་སོ། །དེས་ན་ཞིང་འདི་ཡོངས་སུ་རྫོགས་པ་ཉན་ཐོས་དང་རང་སངས་རྒྱས་དང་སོ་སོའི་སྐྱེ་བོ་རྣམས་ཀྱི་མངོན་སུམ་དུ་མི་འགྱུར་གྱི་སངས་རྒྱས་དང་བྱང་ཆུབ་སེམས་པ་ས་མཐོན་པོ་ལ་ཞུགས་པ་རྣམས་ཀྱིས་མངོན་སུམ་དུ་གཟིགས་པ་ཡིན་ནོ། །འདི་སྔོན་གྱི་སློབ་དཔོན་རྣམས་ཀྱིས་ཀྱང་གསལ་བར་མ་བཤད་དེ། དེས་ན་ཁོ་བོས་ཐེག་པ་ཆེན་པོའི་ལུང་ལ་བརྟེན་ནས་བཤད་པར་བྱའོ། །
གལ་ཏེ་འཇིག་རྟེན་ཁམས་དེའི་རྒྱུ་ནི་གང་། ངོ་བོ་ནི་གང་། འབྲས་བུ་ནི་གང་ཡིན་ཞེ་ན། སངས་རྒྱས་རྣམ་པར་སྣང་མཛད་སྔོན། །རྒྱལ་སྲས་སྤྱོད་པ་མཛད་པའི་ཚེ། །ཞིང་རྡུལ་མཉམ་པའི་ལུས་བྱིན་ཏེ། །སྨོན་ལམ་གྱིས་ནི་བསྒྲུབས་པ་ཡིན། །འདི་བསྐྱེད་པའི་རྒྱུ་ནི་སངས་རྒྱས་འདིའི་སྨོན་ལམ་དང་བྱང་ཆུབ་ཀྱི་སྤྱོད་པས་བསྒྲུབས་པ་ཡིན་ཏེ། སྐྱེས་པའི་རབས་ལ་སོགས་པ་ནས་འབྱུང་བ་བཞིན་ནོ། །རྟེན་གཞི་རླུང་དང་སྤོས་ཆུའི་མཚོ། །པདྨ་ཆེན་པོའི་གནས་ལ་གནས། །འཇིག་རྟེན་གྱི་ཁམས་འདི་ནི་རླུང་གི་དཀྱིལ་འཁོར་ཆེན་པོ་བཅུ་གཅིག་ལ་རྟེན་ཏེ་རླུང་དེ་དག་ཀྱང་རིན་པོ་ཆེ་དང་། རིན་པོ་ཆེའི་དྲིལ་བུ་དང་འོད་ཀྱི་དཀྱིལ་འཁོར་དང་སེང་གེའི་ཁྲི་ཆེན་པོ་དང་མེ་ཏོག་སྣ་ཚོགས་དང་སྤོས་ཀྱི་ནོར་བུའི་སྤྲིན་དང་། ནོར་བུའི་ཤིང་དང་མེ་ཏོག་དང་སྤོས་ཀྱི་ཁང་པ་བརྩེགས་པའི་གཞིས་རྟེན་པ་ཡིན་ལ་རླུང་གི་དཀྱིལ་འཁོར་སྟེང་མ་ལ་ནི། སྤོས་ཆུའི་རྒྱ་མཚོ་ནོར་བུ་ཀུན་ནས་སྣང་བའི་སྙིང་པོ་ཞེས་བྱ་བ་ལ་པད་མོ་ཆེན་པོ་སྤོས་ཀྱི་རྒྱལ་མཚན་ཁྱེར་བའི་འོད་ཟེར་དང་། ཟེ་བ་སྣ་ཚོགས་ཞེས་བྱ་བ་ཡོད་དོ། །
ངོ་བོ་བཤད་པ། དེ་ལ་མེ་ཏོག་རྒྱན་ཅན་ནི། གྲུ་བཞི་རྡོ་རྗེའི་ཁོར་ཡུག་ཅན། །གནས་སོ་ཞེས་རིག་པར་བྱའོ། །འཇིག་རྟེན་གྱི་ཁམས་དེ་ནི་ཀུན་ནས་གྲུ་བཞི་པ་ནོར་བུ་རིན་པོ་ཆེ་སྣ་ཚོགས་པས་བརྒྱན་པ་མཐོ་དམན་མེད་པ་རིན་པོ་ཆེ་ཐམས་ཅད་ལས་གྲུབ་པ་རྒྱའི་ཚད་བཟུང་བར་མི་ནུས་པ་རྡོ་རྗེ་ལྟར་སྲ་བ་ལ་སྤོས་ཆུའི་རྒྱ་མཚོ་གྲངས་མེད་པ་ལ་སངས་རྒྱས་ཀྱི་ཞིང་གཞི་དང་དབྱིབས་དང་མདོག་དང་རྒྱན་མི་འདྲ་བ་སྣ་ཚོགས་ཅན་གྲངས་མེད་པ་ཡོད་དེ། དེའི་མཚོ་དབུས་མ་ལ་མི་མཇེད་འདི་ཡོད་དོ། །མི་མཇེད་ཀྱི་ཤར་ན་ཁེབས་པ་ཅན་དང་། ལྷོ་ན་ལྷག་པ་དང་། ནུབ་ན་རྡུལ་བསལ་བ་དང་། བྱང་ན་རྣམ་པར་བྱུང་བ་དང་། བྱང་ཤར་ན་འཕོ་བར་བྱེད་པ་དང་། ཤར་ལྷོ་ན་ཕན་པ་དང་། ལྷོ་ནུབ་ན་ཀུན་ཏུ་སོང་བ་དང་། ནུབ་བྱང་ན་ཡོངས་སུ་དགའ་བ་དང་། འོག་ན་མི་ཆེ་བ་དང་། སྟེང་ན་ཞིང་ཁམས་དབྱངས་སྒྲོགས་ཡོད་པར་བཤད་དོ། །དེའི་རྡོ་རྗེ་དང་ནོར་བུའི་ཁོར་ཡུག་ཆེན་པོ་ནི་ནོར་བུའི་རྒྱལ་པོ་པདྨ་ཉི་མ་ཞེས་བྱའི་གཞི་ལ་རྟེན་ཏོ། །དེའི་ཚད་ནི་ཇི་ཙམ་ཡིན་ཞེ་ན། གླིང་བཞི་ནས་ནི་དྲུག་འགྱུར་དུ། །བྱེ་བ་ཕྲག་བརྒྱ་དེ་ཡི་ཚད། །གླིང་བཞི་པ་འདི་བཅོམ་པ་དང་ལྡན་པ་ཞེས་བྱ་སྟེ་འདིའི་ཤར་གྱི་འདབ་ཆགས་ན་གླིང་བཞི་པ་ཤིན་ཏུ་བསྲུངས་པ་དང་། ལྷོ་ན་བཟོད་པར་དཀའ་བ་དང་། ནུབ་ན་གཉེན་དང་ལྡན་པ་དང་། བྱང་ན་སེང་གེ་ཡོད་པ་དང་། བྱང་ཤར་ན་རྣམ་པར་བརྩེགས་པ་དང་། ཤར་ལྷོ་ན་དགའ་བ་དང་། ལྷོ་ནུབ་ན་སྙིང་པོ་དམ་པ་དང་། ནུབ་བྱང་ན་ས་བཟང་པོ། འོག་ན་འོད་འཕྲོ་ལྡན་པ་དང་། སྟེང་ན་ནོར་འཛིན་ཞེས་བྱ་བ་ཡོད། དེ་ལ་སོགས་པ་གླིང་བཞི་པ་བྱེ་བ་ཕྲག་བརྒྱ་ལ་ནི་སྟོང་གསུམ་གྱི་འཇིག་རྟེན་གྱི་ཁམས་གཅིག་གོ །སྟོང་གསུམ་བྱེ་བ་ཕྲག་བརྒྱ་ལ་ནི་གཞི་དང་སྙིང་པོ་མེ་ཏོག་གི་རྒྱན་ཅན་གྱི་རབ་འབྱམས་ཀྱི་མཚམས་སྦྱོར་བ་ཞེས་བྱའོ། །དེ་བྱེ་བ་བརྒྱ་ལ་ནི་མེ་ཏོག་གི་རྒྱན་ཅན་གྱི་རབ་འབྱམས་ཀྱི་རྒྱུད་གཅིག་གོ །དེ་བྱི་བ་བརྒྱ་ལ་ནི་མེ་ཏོག་རྒྱན་གྱི་རྒྱུད་བར་མ་གཅིག་གོ །དེ་བྱེ་བ་བརྒྱ་ལ་ནི་གཞི་དང་སྙིང་པོ་མེ་ཏོག་བཀོད་པ་ཞེས་བྱ་སྟེ། དེ་ནི་སངས་རྒྱས་རྣམ་པར་སྣང་མཛད་དེའི་རྣམ་པར་སྨིན་པའི་སངས་རྒྱས་ཀྱི་ཞིང་ཡིན་ཞིང་དེའང་ནམ་མཁའི་དབྱིངས་ལ་གནས་པའི་སངས་རྒྱས་ཀྱི་ཞིང་ཡིན་ཞིང་ནམ་མཁའི་དབྱིངས་ལ་གནས་པའི་སངས་རྒྱས་རྣམ་པར་སྣང་མཛད་གང་ཆེན་མཚོའི་ཕྱག་མཐིལ་གྱི་རྡུལ་ཕྲ་རབ་གཅིག་ལ་གནས་ཏེ། དེ་ནི་ལོངས་སྤྱོད་རྫོགས་པའི་སྐུ་ཡིན་ནོ། །དེའང་ཕལ་ཆེན་ལས། དེའི་ཕྱག་མཐིལ་ན་རྣམ་པར་ཞེས་པའི་ཁམས་དང་། ཆོས་ཀྱི་དབྱིངས་དང་། ནམ་མཁའ་དང་། མེ་དང་ཆུ་དང་། སའི་ཁམས་རྒྱ་མཚོ་དང་། མེ་ཏོག་མཚན་མེད་དང་། ཕྱག་མཐིལ་གྱི་རྒྱུད་ལ་སོགས་པ་འཇིག་རྟེན་གྱི་ཁམས་ཉི་ཤུ་རྩ་ལྔ་ཡོད་པའི་འདི་དབུས་མ་ཡིན་པར་བཤད་དོ། །འདིར་ཁ་ཅིག་མི་མཇེད་ལ་སོགས་པ་དུ་མ་ཆུད་པ་ནི་འཇིག་རྟེན་གྱི་ཁམས་རྒྱ་མཚོ་དང་། རྒྱ་མཚོ་ལ་སོགས་པ་དུ་མ་ཆུ་ནི་མེ་ཏོག་གི་རྒྱན་ཅན་དང་། དེ་ལ་སོགས་པ་དུ་མ་ཆུད་པ་ནི་འོག་མིན་ཆེན་པོ་ཡིན་ནོ། །ཞེས་ཟེར་བ་དེ་ནི་གང་ནས་ཀྱང་བཤད་པ་མེད་དེ། འདི་ནི་ཁོ་བོས་གཞན་དུ་བཀག་ཟིན་ཏོ། །
འབྲས་བུ་བཤད་པ། ཞིང་འདིའི་སངས་རྒྱས་རྣམ་སྣང་མཛད། །རབ་འབྱམས་བར་མའི་ནམ་མཁའ་ཡི། །རྒྱལ་པོ་དབང་བསྒྱུར་ཁང་པ་ན། །བཞུགས་ནས་འགྲོ་བའི་འདྲེན་པ་མཛད། །སངས་རྒྱས་རྣམ་པར་སྣང་མཛད་དེ་རབ་འབྱམས་ཀྱི་རྒྱུད་བར་པའི་ནམ་མཁའ་བྱང་ཆུབ་ཀྱི་སྙིང་པོར་བྱིན་གྱིས་བརླབས་ནས་རྒྱལ་པོ་དབང་བསྒྱུར་གྱི་ཁང་པ་ཆེན་པོ་ན་བྱང་ཆུབ་སེམས་པའི་ཚོགས་ཀྱིས་སྐོར་ནས་དཔག་ཚད་སུམ་བརྒྱ་ཡོད་པའི་སེང་གེའི་ཁྲི་ཆེན་པོ་པདྨའི་སྙིང་པོ་ཅན་རིན་པོ་ཆེ་དབང་གི་རྒྱལ་པོས་སྤྲས་པ་ལ་བཞུགས་ནས་ཐེག་པ་ཆེན་པོའི་ཆོས་སྟོན་ཏོ། །ཞིང་འདིའི་དགེ་བ་བྱེད་པ་ཐམས་ཅད་ཀྱང་སངས་རྒྱས་དེས་སྔོན་བསྡུ་བའི་དངོས་པོ་བཞིས་བསྡུས་པ་ཁོ་ན་ཡིན་ལ། ཞིང་འདི་ན་སེམས་བསྐྱེད་པ་དང་སྤྱད་པ་སྤྱོད་པ་དང་། ས་སྒྲུབ་པ་དང་། འཚང་རྒྱ་བ་དང་། ཆོས་ཀྱི་འཁོར་ལོ་སྐོར་བ་དང་། མྱ་ངན་ལས་འདའ་བ་ཐམས་ཅད་ཀྱང་སངས་རྒྱས་དེའི་བྱིན་རླབས་སུ་བཤད་དོ། །འཁོར་གྱི་གཙོ་བོ་རྒྱལ་བའི་སྲས། །ཀུན་ཏུ་བཟང་པོས་མཛད་པ་སྒྲུབ། །ཀུན་ཏུ་བཟང་པོ་ནི་བྱང་ཆུབ་སེམས་པའི་འཁོར་གྱི་གཙོ་བོར་བཤད་དེ། དེ་སྔོན་གྱི་སྨོན་ལམ་གྱིས་སངས་རྒྱས་འདིའི་མཛད་པ་སྒྲུབ་པས་རྒྱལ་པོ་དབང་སྒྲུར་གྱི་ཁང་པར་ཕྱོགས་བཅུའི་བྱང་ཆུབ་སེམས་པ་རྣམས་བསྡུས་ནས་དེ་ཕྱག་ན་རྡོ་རྗེར་དབང་བསྐུར་རོ།
དེ་ནས་བཅོམ་ལྡན་འདས་དེ་ཤཱཀྱ་ཐུབ་པའི་མཚན་ཅན་དུ་འདིར་སངས་རྒྱས་ཏེ་གྲོང་ཁྱེར་ཆེན་པོ་དཔལ་ཡོན་ཏན་གྱི་འབྱུར་གནས་ཤིང་ས་ལ་སྣ་ཚོགས་ཀྱི་ནགས་ཚལ་དུ་ཕྱོགས་བཅུའི་སངས་རྒྱས་ཐམས་ཅད་སངས་རྒྱས་ཤཱཀྱ་ཐུབ་པའི་དྲུང་དུ་བྱོན་ཏེ་ཐམས་ཅད་ཀྱིས་བྱིན་བརླབས་པའི་ལག་ཏུ་རྡོ་རྗེ་བྱིན་ནས་ཡང་མ་རུང་བ་ཐམས་ཅད་འདུལ་བའི་ཕྱག་ན་རྡོ་རྗེ་འོད་ཟེར་གྱིས་དབང་བསྐུར་ཏེ་སངས་རྒྱས་རྣམས་ཀྱི་བསྟན་པ་གཏད་དོ། །དེ་ནི་ད་ལྟ་གནོད་སྦྱིན་འདུལ་བའི་དོན་དུ་གནོད་སྦྱིན་གྱི་དབང་པོ་རྣམ་ཐོས་སྲས་ཀྱི་ལྕང་ལོ་ཅན་གྱི་གནས་ན་བཞུགས་ཏེ། སངས་རྒྱས་སྟོང་གི་བསྟན་པ་བསྲུངས་ནས་སངས་རྒྱས་སྣང་མཛད་ཀྱི་ཆོས་ནུབ་པའི་ཚེ་མངོན་པར་དགའ་བའི་ཞིང་དུ་མི་འཁྲུགས་པ་མཆོད་དེ། དེ་ནས་སངས་རྒྱས་གྲངས་མེེད་པ་མཆོད་ནས་མ་འོངས་པ་ན་ཀུན་ནས་ཡོངས་དགའི་ཞིང་དུ་རྡོ་རྗེས་རྣམ་པར་གནོན་པ་ཞེས་བྱ་བའི་སངས་རྒྱས་སུ་འགྱུར་བར་གསང་བ་བསམ་གྱིས་མི་ཁྱབ་པའི་མདོ་ལས་ལུང་བསྟན་ཏོ། །དེས་ན་དེ་འདྲའི་མཛད་པ་ཀུན། །རྒྱལ་སྲས་རྣམས་ཀྱི་རྣམ་འཕྲུལ་ཡིན། །ཐུན་མོང་མ་ཡིན་པའི་གསང་བ་རྣལ་འབྱོར་ཆེན་པོའི་རྒྱུད་ལས། འཇམ་དཔལ་ནི་རྒྱལ་པོ་ཟས་གཙང་མའོ། །སྤྱན་རས་གཟིགས་ནི་ཡུམ་སྒྱུ་མ་ཆེན་མོའོ། །དཔལ་ལྷ་མོ་ནི་གྲགས་འཛིན་མའོ། །རྡེ་རྗེ་སེམས་དཔའ་ནི་སྒྲ་ཅན་འཛིན་ནོ། །སྒྲིབ་པ་རྣམ་སེལ་ནི་ཤ་རིའི་བུའོ། །ཀུན་ཏུ་བཟང་པོ་ནི་ཕྱག་ན་རྡེ་རྗེ་དང་ཀུན་དགའ་བོའོ། །ལྷའི་དབང་པོ་བརྒྱ་བྱིན་ནི་ལྷ་བྱིན་ནོ། །རྣམ་པར་སྣང་མཛད་ཆེན་པོ་ནི་དཔའ་ཤཱཀྱ་ཐུབ་པར་གྱུར་ཏོ། །ཞེས་གསུངས་སོ། །དེས་ན་དེ་ཉིད་བསྡུས་པ་དང་། གསང་བ་འདུས་པ་དང་། སངས་རྒྱས་ཕལ་པོ་ཆེ་གསུང་པའི་རྣམ་པར་སྣང་མཛད་དང་རྡོ་རྗེ་འཆང་ལ་སོགས་པའང་དེ་ཉིད་ཀྱི་རྣམ་འཕྲུལ་ཡིན་ཏེ་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་འགྲེལ་ལས་སྐུ་དག་མ་དག་དུ་མ་དང་སེམས་ཅན་ཐམས་ཅད་ཀྱི་སྐད་དུ་གསུངས་པ་དང་བདེན་པ་གཉིས་མ་ལུས་པའི་ཡུལ་ཅན་གྱི་ཡེ་ཤེས་གསུམ་ནི་རྣམ་སྣང་དེའི་སྤྲུལ་པ་ཡིན་ནོ། །ཞེས་བཤད་དོ། །
ཕྱག་ན་རྡོ་རྗེ་དབང་བསྐྱུར་བའི་རྒྱུད་ལས། འཇིག་རྟེན་ཁམས་དེ་ན་སངས་རྒྱས་རྣམ་པར་སྣང་མཛད་གཅིག་པུ་དེ་ཉིད་ཡིན་ནོ། །ཞེས་བཤད་པས་ཀྱང་། ཞིང་འདིའི་སངས་རྒྱས་གཞན་ཐམས་ཅད་ནི་དེའི་སྤྲུལ་པར་བསྟན་པ་ཡིན་ཏེ་བདག་ཡོངས་སུ་འདྲེན་པ་མེད་པའི་འདྲེན་པར་གྱུར་ཅིག་ཅེས་སྨོན་ལམ་བཏབ་པས་ཞིང་གཅིག་ཏུ་སངས་རྒྱས་གཉིས་མི་འབྱུང་བའི་ཕྱིར། ལྷན་ཅིག་གཉིས་མིན་སངས་རྒྱས་བཞིན། །ཞེས་འབྱུང་ངོ་། །དེ་དང་འདབ་ཆགས་གནས་པ་ན། སངས་རྒྱས་ཞིང་ཁམས་རྣམ་པར་བཅུ། །ཡོད་དོ་ཞེས་རིག་པར་བྱའོ། །དེ་ལ་མེ་ཏོག་རྒྱན་གྱི་ཤར་ཕྱོགས་ཀྱི་འདབ་ཆགས་ན་འཇིག་རྟེན་གྱི་ཁམས་རྒྱ་མཚོ་པད་མོའི་དཔལ་དྲི་མེད་སྣང་བའི་རྒྱན་གྱི་བྱེ་བྲག་རིན་པོ་ཆེའི་ཕྲེང་བ་རྡོ་རྗེའི་སྙིང་པོ་ཞེས་བྱ་བ་ན་སངས་རྒྱས་ཆོས་ཀྱི་ཆུ་བོ་རྣམ་པར་སངས་རྒྱས་པ་ནམ་མཁའ་མཐའ་ཡས་རྒྱལ་པོ་ཞེས་བྱ་བ་བཞུགས་སོ། །ལྷོ་ན་རྒྱ་མཚོ་རིན་པོ་ཆེས་བརྒྱན་པའི་སྙིང་པོའི་བྱེ་བྲག་ཞེས་ཀུན་ལ་སྦྱར། མཐའ་ཡས་པའི་དར་གྱི་རྒྱན་ན་སངས་རྒྱས་ཀུན་ནས་མཁྱེན་པའི་འོད་དཔལ་གྱི་རིའི་རྒྱལ་པོ་བཞུགས་སོ། །ནུབ་ན་རྒྱ་མཚོ་རིན་པོ་ཆེའི་འོད་ཡིད་དུ་འོང་བའི་གོས་སྟན་འབྱུང་བ་ན་སངས་རྒྱས་སྤོས་སྣང་བའི་ཡོན་ཏན་རིན་ཆེན་རྒྱན་པ་བཞུགས་སོ། །བྱང་ན་རྒྱ་མཚོ་བཻཌཱུརྱའི་པདྨའི་འོད་ཀྱི་དཀྱིལ་འཁོར་ཨུཏྤལའི་རྒྱན་ན་སངས་རྒྱས་ཡེ་ཤེས་དཔལ་ཀུན་ཏུ་དབྱངས་ཀྱི་རྒྱལ་པོ་བཞུགས་སོ། །བྱང་ཤར་ན་ཛམ་བུ་ཆུ་ཀླུང་ཤེལ་གྱི་ཁ་དོག་གི་རིན་པོ་ཆེའི་རྒྱན་སྣ་ཚོགས་ན་སངས་རྒྱས་ཆོས་ཐམས་ཅད་མི་འཇིག་པའི་སྒྲོན་མ་བཞུགས་སོ། །
ཤར་ལྷོ་བ་བཻཌཱུརྱའི་པདྨའི་འོད་སྣང་བའི་གསེར་གྱི་དྲི་མེད་སྣང་བ་ན་སངས་རྒྱས་དགའ་བའི་ཤུགས་ཀྱི་རྒྱལ་པོ་བཞུགས་སོ། །ལྷོ་ནུབ་ན་ཉི་མའི་འོད་འབར་བས་སྣང་བའི་སེང་གེ་སྣང་བ་ན་སངས་རྒྱས་ཡེ་ཤེས་སྣང་བའི་དབྱངས་བཞུགས་སོ། །ནུབ་བྱང་ན་རིན་ཆེན་འོད་ཟེར་སྐར་མདའི་འོད་ཀྱི་སྤོས་ཡིད་དུ་འོང་བ་ན་སངས་རྒྱས་ཡོན་ཏན་རྒྱ་མཚོ་ཚད་མེད་པའི་འོད་བཞུགས་སོ། །འོག་ན་པད་མོ་དྲི་ཞིམ་དཔལ་གྱི་སྙིང་པོའི་སེང་གེ་འབར་བ་ན་སངས་རྒྱས་ཆོས་དབྱིངས་སྣང་བར་མཛད་པའི་འོད་ཟེར་བཞུགས་སོ། །སྟེང་གི་འདབ་ཆགས་ན་འཇིག་རྟེན་གྱི་ཁམས་རྒྱ་མཚོ་ནོར་བུ་རིན་ཆེན་སྣ་ཚོགས་འོད་ཡིད་དུ་འོང་བ་སྣང་བ་ན་སངས་རྒྱས་ཡོན་ཏན་གྲགས་པར་མཛད་པའི་འོད་ཟེར་བཞུགས་སོ། །ཞེས་ཕལ་ཆེན་ལས་བཤད་དོ། །ཀུན་ཏུ་བཟང་པོ་དབང་བསྐུར་བའི། །གླེང་གཞི་ལས་ནི་གཞན་དུ་བཤད། །དེ་ནས་ཤར་ན་སངས་རྒྱས་རིན་ཆེན་ཏོག་དང་། ལྷོ་ན་མེ་ཏོག་ཀུན་ཏུ་རྒྱས་པའི་རྒྱལ་པོ་དང་། ནུབ་ན་འོད་དཔག་མེད་དང་། བྱང་ན་མི་འཁྲུགས་པ་དང་། བྱང་ཤར་ན་རིན་ཆེན་མཆོག་འཛིན་དང་། ཤར་ལྷོ་ན་སྤྲིན་གྱི་དཔལ་དང་། ལྷོ་ནུབ་ན་རྡོ་རྗེ་ཆེན་པོའི་ཏོག་དང་། ནུབ་བྱང་ན་སྒྲ་དབྱངས་སྙན་པ་དང་། འོག་ན་རིན་ཆེན་པདྨ་དག་པའི་སྙིང་པོ་དང་། སྟེང་ན་སངས་རྒྱས་རྒྱལ་བའི་འབྱུང་གནས་ཞེས་བྱ་བ་བཞུགས་པར་བཤད་དོ། །ལོངས་སྐུ་རྣམ་པར་སྣང་མཛད་ཕྱག་མཐིལ་གྱི། །རྡུལ་ལ་གནས་པའི་འཇིག་རྟེན་མེ་ཏོག་རྒྱན། །བཤད་པའི་དགེ་བས་རྒྱལ་ལས་ཆོས་ཉན་ཞིང་། །བླ་མེད་བྱང་ཆུབ་མྱུར་དུ་ཐོབ་པར་ཤོག།། །།
འཇིག་རྟེན་གྱི་ཁམས་རྒྱ་མཚོའི་གཞི་དང་སྙིང་པོ་མེ་ཏོག་གིས་བརྒྱན་པའི་རྣམ་པར་བཤད་པ་རྒྱན་གྱི་མེ་ཏོག་ཅེས་བྱ་བ་མང་དུ་ཐོས་པའི་ཤཱཀྱའི་དགེ་སློང་བཅོམ་ལྡན་རལ་གྲིས་སྦྱར་བ་རྫོགས་སོ།། །།དགེའོ།། །།

 

 

 

 

 

 

 

 

 

 

 

 

 

 

 

 

 

༄༅། །བསྐལ་པ་རྒྱན་གྱི་མེ་ཏོག་ཅེས་བྱ་བ་བཞུགས་སོ། །

༄༅། །དཔག་མེད་བསྐལ་པར་འགྲོ་བའི་དོན་མཛད་པའི། །བསྐལ་བཟང་སངས་རྒྱས་སྟོང་ལ་ཕྱག་འཚལ་ཏེ། །འཆགས་དང་གནས་དང་འཇིག་དང་སྟོངས་པ་ཡི། །བསྐལ་པ་རྒྱན་གྱི་མེ་ཏོག་བཤད་པར་བྱ། །འདིར་བསྐལ་པ་བཤད་པ་ལ་འཆགས་པ་དང་། གནས་པ་དང་། འཇིག་པ་དང་། སྟོངས་པ་བཤད་པ་རྣམས་ལས། དང་པོ་ནི་འཕགས་པ་སྡུད་པ་ལས། མཁའ་ལ་རླུང་རྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལས་འགྲོ་བ་བརྟེན་ཅེས་འབྱུང་བའི་དོན་བཤད་ན། དང་པོ་ནམ་མཁའ་སྟོང་པ་ལ་སེམས་ཅན་རྣམས་ཀྱི་ལས་ཀྱི་རླུང་གི་རྡུལ་ཕྲན་དལ་བུས་འཁྲིགས་པ་ལས། རླུང་གི་དཀྱིལ་འཁོར་རྔམས་སུ་འབུམ་ཕྲག་བཅུ་དྲུག་པ། རྒྱར་གྲངས་མེད་པ་སྲེད་མེད་ཀྱི་བུའི་རྡོ་རྗེས་ཀྱང་གཞིག་པར་མི་ནུས་པ་ཆགས་སོ། །དེའི་སྟེང་དུ་སེམས་ཅན་རྣམས་ཀྱི་ལས་ཀྱི་སྟོབས་ཀྱིས་སྤྲིན་གསེར་གྱི་སྙིང་པོ་ཅན་ལས་ཆར་གྱི་རྒྱུན་གཉའ་ཤིང་ཙམ་བབས་པ་ལས། ཆུའི་དཀྱིལ་འཁོར་དེ་བས་ཅུང་ཞིག་ཆུང་བ་ཞིག་ཆགས་སོ། །དེ་ལས་ཀྱི་རླུང་གིས་བསྲུབས་པ་ལས་ཆུའི་རྔམས་སུ་ཅུང་ཟད་བྲི་ནས། སྟེང་དུ་གསེར་གྱི་ས་གཞི་འོ་མ་སྤྲིན་མ་ལྟ་བུ་ཆགས་ཏེ། མཛོད་ལས། ཕྱིས་ནི་རྔམས་སུ་འབུམ་ཕྲག་བརྒྱད། །ལྷག་མ་དག་ནི་གསེར་དུ་འགྱུར། །ཅེས་བཤད་དོ། །དེའི་སྟེང་དུ་ཆར་ཆེན་པོ་བབས་པ་ལས་ཕྱིའི་རྒྱ་མཚོ་ཆེན་པོ་ཆགས་སོ། །དེའི་སྟེང་དུ་གསེར་གྱི་པདྨ་འདབ་མ་སྟོང་དང་ལྡན་པ་ཞིག་བྱུང་སྟེ། གནས་གཙང་མའི་ལྷའི་བུ་རྣམས་ཀྱིས་བལྟས་པས་བསྐལ་པ་འདི་ལ་སངས་རྒྱས་སྟོང་འབྱུང་བའི་ལྟས་སུ་ཤེས་ཏེ། ཨེ་མ་བསྐལ་པ་འདི་ནི་བཟང་པོ་ཞིག་གོ་ཞེས་བསྒྲགས་པས་བསྐལ་པ་བཟང་པོ་ཞེས་གྲགས་སོ། །དེ་ནས་ཆུ་དེ་སེམས་ཅན་རྣམས་ཀྱི་ལས་ཀྱི་རླུང་གིས་བསྲུབས་པ་ལས་སྟོང་གསུམ་སྟོང་ཆེན་པོའི་འཇིག་རྟེན་གྱི་ཁམས་འདི་ཆགས་ཏེ། འདི་ལ་གླིང་བཞི་དང་གླིང་ཕྲན་བརྒྱད་རི་རབ་རི་བདུན་མཚོ་བདུན་ཕྱིའི་ལྕགས་རི་ནག་པོ་དང་བཅས་པ་ཕྱེ་བ་ཕྲག་བརྒྱའོ། །དེ་ལ་གླིང་གཉིས་པ་འདི་ནི་བཅོམ་པ་དང་ལྡན་པ་ལས། འདིའི་ཤར་ཕྱོགས་ན་གླིང་རྣམས་ཤིན་ཏུ་བསྲུབས་པ་དང་། ལྷོ་ན་བཟོད་པར་དཀའ་བ་དང་། ནུབ་ན་དེ་གཉེན་དང་ལྡན་པ་ལས། བྱང་ན་སེང་གེ་ཡོད་པ་དང་། བྱང་ཤར་ན་རྣམ་པར་བརྩེགས་པ་དང་། ཤར་ལྷོ་ན་དགའ་བ་དང་། ལྷོ་ནུབ་ན་སྙིང་པོ་དེ་བ་དང་། ནུབ་བྱང་ན་ས་བཟང་པོ་ཞེས་པ་ཡོད་དོ། །དེ་ལ་གླིང་བཞི་པ་སྟོང་ལ་ནི་སྟོང་ཆུང་ངུ་ཡིན་ལ། སྟོང་ཆུང་ངུ་སྟོང་ལ་ནི་སྟོང་གཉིས་བར་མའོ། །བར་མ་སྟོང་ལ་ནི་སྟོང་གསུམ་གྱི་སྟོང་ཆེན་པོའོ། །དེ་གསུམ་དང་རིམ་པ་བཞིན་བསམ་གཏན་དང་པོ་དང་གཉིས་པ་དང་གསུམ་པ་རྒྱ་མཉམ་མོ། །བསམ་གཏན་བཞི་པ་ལ་ནི་ཚད་མེད་དོ། །དེ་ན་རྒྱལ་ཆེན་རིས་བཞི་ནས་ཚངས་པ་ཆེན་པོའི་བར་གྱི་གཞལ་ཡས་ཁང་རྣམས་ཆགས་ཏེ། དེས་ནི་སྣོད་ཆགས་པ་ཡིན་ནོ། །དེ་ནས་བཅུད་ཀྱི་སེམས་ཅན་རྣམས་ནི་ཡབ་ཀྱི་འཆགས་པ་ལས། དང་པོ་འོད་གསལ་གྱི་གནས་ནས་ལྷ་ཚེ་དང་ལས་ཟད་པ་གཅིག་ཚངས་པའི་གཞལ་ཡས་ཁང་སྟོང་པར་སྐྱེས་ཏེ། དེ་ལ་ནི་ཚངས་པ་ཆེན་པོ་ཞིག་ཟེར་རོ། །
དེ་བདག་དང་སྐལ་བ་མཉམ་པ་གཞན་ཡང་འདིར་སྐྱེས་ན་ཅི་མ་རུང་སྙམ་པ་དང་དེར་ལྷའི་བུ་དུ་མ་སྐྱེས་སོ། །དེ་དག་ཚངས་པ་ཆེན་པོ་དང་དབྱིབས་དང་ཁ་དོག་དང་ཆུ་ཞེང་ལ་སོགས་པ་ཐ་དད་ཀྱང་ཐམས་ཅད་ཀྱང་ཚངས་པ་ཆེན་པོའི་དབང་གིས་འདིར་སྐྱེས་སོ་ཞེས་འདུ་ཤེས་པའི་ཕྱིར་ལུས་ཐ་དད་ལ་འདུ་ཤེས་གཅིག་པ་ཞེས་བྱའོ། །དེ་ནས་ཚངས་པ་མདུན་ན་འདོན་པ་དང་། ཚངས་རིས་པ་དང་། གཞན་འཕྲུལ་དབང་བྱེད་པ་དང་། འཕྲུལ་དགའ་བ་དང་། དགའ་ལྡན་པ་དང་། མཚེ་མ་པའི་ལྷ་རྣམས་ནམ་མཁའ་ལ་གནས་པའི་གཞལ་ཡས་ཁང་དུ་སྐྱེ་འོ། །དེ་ནས་རི་རབ་ཀྱི་སྟེང་དུ་སུམ་ཅུ་རྩ་གསུམ་པ་དང་། རི་རབ་གྱི་བང་རིམ་དང་པོོ་ལ་ཤར་ཕྱོགས་སུ་ཡུལ་འཁོར་སྲུངས་དང་། ལྷོར་འཕགས་སྐྱེས་པོ་དང་། ནུབ་ཏུ་སྤྱན་མི་བཟང་དང་། བྱང་དུ་རྣམ་ཐོས་སྲས་ཀྱི་ལྷའི་རིས་དང་། བང་རིམ་གཉིས་པ་ལ་རྟག་མྱོས་པ་དང་། གསུམ་པ་ལ་ལག་ན་ཕྲེང་ཐོགས་དང་། བཞི་པ་ལ་ལག་ན་གཞོང་ཐོགས་པ་དང་། རི་དང་། ལྗོན་ཤིང་དང་། ཆུ་ཀླུང་དང་། ནགས་ཚལ་གྱི་ལྷ་རྣམས་ཀྱང་འཆགས་ཏེ། དེ་དག་རྒྱལ་ཆེན་རིགས་བཞིའི་ལྷ་ཡིན་ནོ། །སློབ་དཔོན་ཐོགས་མེད་ནི་རྒྱལ་པོ་ཆེན་པོ་བཞིའི་ཕོ་བྲང་རི་གཉའ་ཤིང་འཛིན་གྱི་ཕྱོགས་བཞི་ན་ཡོད་པར་བཞེད་དོ། །དེ་ནས་རི་རབ་ཀྱི་ཁོང་སེང་དུ་ལྷ་མ་ཡིན་རྣམས་འཆགས་སོ། །དེ་ནས་གླིང་ཕྲན་བརྒྱད་ཀྱི་མི་དང་དུད་འགྲོ་རྣམས་འཆགས་ཏེ་བསྐལ་པ་དང་པོའི་དུད་འགྲོ་རྣམས་ཀྱིས་སྨྲ་ཤེས་སོ། །དེའི་ཚེ་ནི་འཛམ་བུ་གླིང་པའི་མིའི་རྣམས་ནི་ཚེ་ཚད་མེད་པ། ལུས་འོད་དང་ལྡན་པ་ནམ་མཁའ་ལ་རྫུལ་འཕྲུལ་གྱིས་འགྲོ་བ། དགའ་བ་ལྡན་པ་སའི་བཅུད་དང་ཞག་ལ་སོགས་པ་ཟ་བ་བདག་གིར་འཛིན་པ་མེད་པ་ཡིན་ནོ། །
དེ་ནས་ཕྱིའི་རྒྱ་མཚོ་ཆེན་པོ་དང་གླིང་བར་གྱི་མུན་པའི་ཆུ་ནང་དུ་ཀླུ་ལ་སོགས་པའི་དུད་འགྲོ་རྣམས་འཆགས་སོ། །དེ་ནས་རྒྱལ་པོའི་ཁབ་ཀྱི་འོག་དཔག་ཚད་ལྔ་བརྒྱར་ཡི་དྭགས་ཀྱི་གྲོང་ཁྱེར་སེར་སྐྱ་ཞེས་པར་ཡི་དྭགས་ཀྱི་རིགས་སུམ་ཅུ་རྩ་དྲུག་འཆགས་སོ། །དེ་ནས་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་རིམ་གྱིས་འཆགས་ཏེ། དེ་དག་དང་དུས་མཉམ་པར་ཆུ་བུར་དང་ཆུ་བུར་རྡོལ་པ་ཅན་དང་། ཨ་ཆུ་ཟེར་བ་དང་། ཀྱི་ཧུད་ཟེར་བ་དང་། སོ་ཐམ་ཐམ་པ་དང་། ཨུད་པལ་ལྟར་གས་པ་དང་། པདྨ་ལྟར་གས་པ་དང་། པདྨ་ལྟར་ཆེར་གས་པའང་འཆགས་སོ། །དེ་ལ་མནར་མེད་ཀྱི་གནས་སུ་དང་པོར་སེམས་ཅན་གཅིག་སྐྱེས་པ་དང་འཛམ་བུ་གླིང་པ་རྣམས་ཚེ་ལོ་བརྒྱད་ཁྲི་པར་གྱུར་པ་ནི་དུས་མཉམ་མོ། །དེས་ནི་འཆགས་པའི་བསྐལ་པ་རྫོགས་ཏེ། མཛོད་ལས། འཆགས་པ་དང་པོ་རླུང་ནས་ནི། །དམྱལ་བའི་སྲིད་པའི་བར་དུ་འོ། །ཞེས་བཤད་པ་ཡིན་ནོ། །དེ་ལ་ནི་བར་གྱི་བསྐལ་པ་ཉི་ཤུའི་ཡུན་ཐོགས་སོ། །
གཉིས་པ་གནས་པ་བཤད་པ་ནི། དེའི་ཚེ་སེམས་ཅན་རྣམས་ལུས་ལ་འོད་མེད་པས་ཉི་མ་དང་ཟླ་བ་ཡང་བྱུང་། བདག་གིར་འཛིན་པ་ཡོད་པས། འཐབ་རྩོད་དང་མ་བྱིན་པར་ལེན་པ་མོས་པ་དང་ལྡན་པར་གྱུར་ཏོ། །དེའི་ཚེ་མི་གཟུགས་དང་ངང་ཚུལ་གཞན་པས་བཟང་པ་གཅིག་ལ་སྟོན་ཐོག་གི་དྲུག་ཆ་བྱིན་ནས་རྒྱལ་པོར་བཅོལ་པ་ལ་མང་པོས་བཀུར་པ་ཞེས་གྲགས་སོ། །དེའི་བུ་འོད་མཛེེས་དང་། དེ་ནས་དགེ་བ་དང་། དགེ་མཆོག་དང་། གསོ་སྦྱོང་འཕགས་དང་། སྤྱི་བོ་སྐྱེས་རྣམས་ལ་ནི་བསྐལ་པ་དང་པོའི་རྒྱལ་པོ་དྲུག་ཅེས་ཟེར་རོ། །དེ་ནས་རིམ་གྱིས་འཛམ་བུ་གླིང་པ་རྣམས་ཚེ་ལོ་དྲུག་ཁྲི་པར་གྱུར་པ་ན་སངས་རྒྱས་འཁོར་བ་འཇིག་འཇིག་རྟེན་ན་བྱོན་ནོ། །དེ་ནས་རིམ་གྱིས་བཞི་ཁྲི་པར་གྱུར་པ་ན་སངས་རྒྱས་གསེར་ཐུབ་བྱོན་ནོ། །དེ་ནས་རིམ་གྱིས་ཚེ་ཉི་ཁྲི་པར་གྱུར་པ་ན་སངས་རྒྱས་འོད་སྲུང་བྱོན་ཏེ། དེའི་ཚེ་མང་པོ་བཀུར་བའི་རྒྱལ་རྒྱུད་ལ་རྒྱལ་པོ་ཀྲི་ཀྲི་དང་ལེགས་སྐྱེས་ཞེས་བྱ་བ་གཉིས་བྱུང་ངོ་། དེ་ནས་མི་རབས་འགའ་ན་རྒྱལ་པོ་རྣ་བ་ཅན་ཅེས་བྱ་བ་ལ་བུ་བ་ར་ད་ཙ་དང་གོའུ་ཏ་མ་ཞེས་གཉིས་བྱུང་ངོ་། བ་ར་ད་ཙས་རྒྱལ་སྲིད་བཟུང་། གོའུ་ཏ་མས་དྲང་སྲོང་མདོག་ནག་པོ་ཅན་ཞེས་བྱ་བ་ལས་རབ་ཏུ་བྱུང་ངོ་། དེར་གཤེད་མ་བ་པདྨའི་རྩ་ལག་གིས་ཉེས་པ་བྱས་པའི་ཆད་པ་གོའུ་ཏ་མ་ལ་ཕོག་སྟེ་ཤིང་ལ་བཅིངས་པ་ལ་དྲང་སྲོང་མདོག་ནག་པོས་རིགས་འཇོག་པར་གསོལ་བ་བཏབ་པས། དེས་ཚུལ་བཞིན་མ་ཡིན་པ་ཡིད་ལ་བྱས་པས། ས་བོན་གྱི་ཐིག་པ་གཉིས་བུ་རམ་གྱི་ཤིང་གི་ཚལ་དུ་ལྷུང་བ་ཉི་མས་སྨིན་པར་བྱས་པས་ཁྱེའུ་གཉིས་བྱུང་བ་ལ་བུ་རམ་ཤིང་པ་དང་ཉི་མའི་གཉེན་པ་དང་། གོའུ་ཏ་མ་ཞེས་གྲགས་སོ། །དེར་བ་ར་ད་ཙ་རབས་ཆད་ནས་གཉིས་པོའི་ཆུང་ཤོས་ཀྱིས་རྒྱལ་སྲིད་བཟུང་བའི་རྒྱུད་ལ་རྒྱལ་པོ་བུ་རམ་ཤིང་འཕགས་སྐྱེས་པོ་ཞེས་བྱ་བ་བྱུང་ངོ་། དེ་ལ་ཆེན་མ་དང་། ཆུང་མའི་བུ་གཉིས་ལས་ཆེན་མ་ཤི་ནས་དེའི་བུ་དང་བུ་མོ་རྣམས་ཡུལ་གཞན་དུ་སྤྱུགས་པ་ལས་དེ་དག་གིས་དྲང་སྲོང་སེར་སྐྱའི་གནས་ཆུ་བོ་སྐལ་ལྡན་ཤིང་རྟའི་འགྲམ་དུ་བཟའ་མི་བྱས་ནས་བསྡད་པས། ཡབ་རྒྱལ་པོས་ཐོས་པས་ངའི་གཞོན་ནུ་དེ་དག་གིས་དེ་ལྟ་བུ་ཕོད་པ་ཞེས་བརྗོད་པས་དེ་དག་ལ་ཤཱཀྱ་པ་ཞེས་གྲགས་ཏེ་ཤཱཀྱ་ནི་ཕོད་པའི་རྒྱ་སྐད་ཡིན་ནོ། །ཡང་ཡུལ་དབུས་སུ་རྒྱལ་པོ་སྒྲ་ངན་དང་སྐྱབས་སེང་ཞེས་པའི་སྤུན་གཉིས་འཐབ་སྟེ། སྒྲ་ངན་གྱི་སྲས་འཐབ་པར་དཀའ་བ་ཞེས་པ་དང་། སྐྱབས་སེང་གི་སྲས་གཡུལ་ངོར་བརྟན་པ་ཞེས་པ་བྱུང་བའི་དུས་སུ་རྩོད་དུས་ཀྱི་མགོ་བཟུང་ངོ་། །དེ་ནས་ལོ་ཉིས་སྟོང་ཉེ་བ་ན་འཛམ་བུ་གླིང་པ་བ་ཚེ་ལོ་བརྒྱ་པར་གྱུར་ཏེ། དེའི་ཚེ་ཤཱཀྱ་པའི་རྒྱལ་རྒྱུད་ལ་རྒྱལ་པོ་སེང་གེ་འགྲམ་ཞེས་བྱ་བ་ལ། བུ་ཟས་གཙང་དང་། ཟས་དཀར་དང་། བདུད་རྩི་ཟས་དང་། བྲེ་བོ་ཟས་ཏེ་བཞི་བྱུང་བའི་ཟས་གཙང་གི་སྲས་སུ་སྟོན་པ་ཤཱཀྱ་ཐུབ་པ་བྱོན་ནོ། །དེའི་ཚེ་ཤཱཀྱ་བདུན་ཁྲི་བདུན་སྟོང་རྒྱལ་པོ་གསལ་རྒྱལ་གྱི་བུ་བེ་དུར་ཡ་སྔོན་པོ་ཞེས་པས་བསད་དེ། སངས་རྒྱས་ཀྱི་སྲས་སྒྲ་ཅན་འཛིན་གྱིས་མང་པོ་བཀུར་བའི་རྒྱལ་རྒྱུད་རྫོགས་པར་གྱུར་རོ། །
དེ་ནས་དུས་དེང་སང་ནི་ཚེ་ལོ་དྲུག་ཅུ་ཁ་རལ་བ་ཡིན་ལ། རིམ་གྱིས་མཚོན་དང་། ནད་དང་མུ་གེའི་བསྐལ་པ་བར་མ་ཆད་བྱུང་ནས་ཚེ་ལོ་བཅུ་པར་གྱུར་ཏེ། ཚེ་བརྒྱད་ཁྲི་པ་ནས་བཅུ་པའི་བར་ལ་ནི་བར་གྱི་བསྐལ་པ་དང་པོ་ཞེས་ཟེར་རོ། །དེ་ནས་བར་གྱི་བསྐལ་པ་ཁུག་པ་བཅོ་བརྒྱད་འབྱུང་བ་ལས་ཚེ་ལོ་བཅུ་པ་རྣམས་དགེ་བ་སྤྱད་པས་ཚེ་རིམ་གྱིས་འཕེལ་ནས་བརྒྱད་ཁྲི་བར་གྱུར་ཏེ་ཡང་འགྲིབ་པའི་ཚེ་སངས་རྒྱས་བྱམས་པ་བྱོན་ཏེ་འཁོར་དགྲ་བཅོམ་པ་ཁྲག་ཁྲིག་ཕྲག་དགུ་དང་ཐེར་འབུམ་ཆེན་པོ་ཕྲག་དྲུག་འབྱུང་ངོ་། །དེའི་ཚེ་ཁྱིམ་བདག་མགོན་མེད་ཟས་སྦྱིན་ཁྱིམ་བདག་ནོརབཟང་ཞེས་པར་གྱུར་ནས་རབ་ཏུ་བྱུང་སྟེ་དགྲ་བཅོམ་པ་འཐོབ་བོ། །དེའི་ཚེ་འཁོར་ལོ་བསྒྱུར་བའི་རྒྱལ་པོ་དུང་ཞེས་པ་འབྱུང་ངོ་། །དེ་ནས་ཡང་ཚེ་ལོ་བཅུ་པར་འགྱུར་རོ། །དེ་ན་བར་གྱི་ཁུག་པ་གཅིག་ཡིན་སྟེ་དེ་ལྟ་བུ་བཅོ་བརྒྱད་འབྱུང་ངོ་། །དེ་ནས་སངས་རྒྱས་སེང་གེ་རབ་གསལ་དང་། མེ་ཏོག་དང་མེ་ཏོག་གཉིས་པ་དང་། མཐར་སངས་རྒྱས་རྣམ་མཛད་ཅེས་པ་འབྱུང་སྟེ་སྣང་མཛད་ན་སྔོན་གྱི་སྨོན་ལམ་གྱིས་སྐུ་ཚེ་དང་ཉན་ཐོས་དང་མཛད་པ་རྣམས་སངས་རྒྱས་སྟོང་པོ་ཐམས་ཅད་མཉམ་པོར་བཤད་དོ། །སངས་རྒྱས་སྟོང་པོ་འདི་དག་ནི་སྔོན་བསྐལ་པ་མཛེས་པར་སྣང་བ་ལ་འཇིག་རྟེན་གྱི་ཁམས་རྣམ་པར་བརྒྱན་པ་ཞེས་པར་སངས་རྒྱས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོོ་ཞེས་པ་བྱོན་ནོ། །དེའི་ཚེ་སངས་རྒྱས་མར་མེ་མཛད་རྒྱལ་པོ་ཡུལ་འཁོར་སྲུང་ཞེས་པར་གྱུར་པ་ལས་སྲས་སྟོང་ཐམ་པ་བྱུང་བའི་ཆེ་ཤོས་རྒྱལ་བུ་རྣམ་པར་དག་པའི་བློ་གྲོས་ནི་སངས་རྒྱས་འཁོར་བ་འཇིག་གོ །ཆུས་ཤོས་བློ་མཐའ་ཡས་ནི་སངས་རྒྱས་སྣང་མཛད་དོོ། །བཙུན་མོ་དམ་པ་མ་སྨད་པའི་པང་དུ་རྫུས་སྟེ་སྐྱེས་པའི་ཁྱེའུ་ཆོས་སེམས་དཔས་སངས་རྒྱས་སྟོང་གི་སྐུ་དང་བསྟན་པ་བསྲུང་བར་སྨོན་ལམ་བཏབ་པ་ནི་ཕྱག་ན་རྡོ་རྗེ་ཉིད་ཡིན་ནོ། །བཙུན་མོ་དཔེ་མེད་པའི་པང་དུ་རྫུས་ཏེ་སྐྱེས་པའི་ཁྱེའུ་ཆོས་ཀྱི་བློ་གྲོས་ཀྱི་སངས་རྒྱས་སྟོང་ལ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པར་སྨོན་ལམ་བཏབ་པ་ནི་ཚངས་པ་གཙུག་ཕུད་ཅན་ཡིན་ནོ།
དེ་ལ་བསྐལ་པ་བཟང་པོ་འདིའི་སངས་རྒྱས་རྣམས་ནི་མར་འགྲིག་པ་ཁོ་ནའི་ཚེ་ལོ་བརྒྱ་ལ་ཡན་ཆད་ལ་འབྱུང་སྟེ་ཡར་འཕེལ་ལ་ནི་སེམས་ཅན་རྣམས་ནི་དྲེགས་པ་ཆེ་ཞིང་སྐྱོ་ཤས་ཆུང་བས་དོན་ཆུང་བའི་ཕྱིར་བརྒྱ་པ་མན་ཆད་དུ་སྙིགས་མ་ལྔ་བདོ་བས་གདུལ་དཀའ་བའི་ཕྱིར་རོ། །རང་སངས་རྒྱས་རྣམས་ནི་གཉིས་ཀ་ལ་འབྱུང་ངོ་། །འཁོར་ལོས་བསྒྱུར་བའི་རྒྱལ་པོ་ནི་བརྒྱད་ཁྲི་ཡན་ཆད་ལ་འབྱུང་སྟེ་མར་འགྲིབ་ལ་མངའ་ཐང་མ་རྫོགས་པའི་ཕྱིར་རོ། །དེ་ལྟར་བར་གྱི་ཁུག་པ་བཅོ་བརྒྱད་རྫོགས་ནས་ཡང་ཚེ་ལོ་བཅུ་པ་ནས་བརྒྱད་ཁྲི་པའི་བར་དུ་འགྲོ་བ་ལ་ནི་བར་གྱི་བསྐལ་པ་ཐ་མ་ཞེས་བརྗོད་དོ། །དེ་ལ་བར་གྱི་བསྐལ་པ་དང་པོ་དང་ཐ་མའི་རྐྱང་པ་དང་བར་གྱི་ཁུག་པ་རེ་རེ་དུས་རིང་ཐུང་མཉམ་མོ། །དེ་དག་ནི་ཆོས་མངོན་པའི་མཛོད་ལས། བར་གྱི་བསྐལ་པ་དཔག་མེད་ནས། །ཚེ་ལོ་བཅུ་པའི་བར་དུ་འོ། །དེ་ནས་ཡར་སྐྱེ་མར་འགྲིབ་པའི། །བསྐལ་པ་གཞན་ནི་བཅོ་བརྒྱད་དང་། །ཡར་སྐྱེ་བ་ནི་གཅིག་ཡིན་ཏེ། །དེ་དག་ཚེ་ནི་བརྒྱད་ཁྲིའི་བར། །དེ་ལྟར་འཇིག་རྟེན་ཆགས་པ་འདི། །བར་གྱི་བསྐལ་པ་དཔག་ཉི་ཤུ་གནས། །ཞེས་འབྱུང་ངོ་། །དེ་ལྟར་བར་གྱི་བསྐལ་པ་ཉི་ཤུ་ནི་འཇིག་རྟེན་གནས་པ་ཡིན་ནོ།། །།
ད་ནི་འཇིག་པའི་བསྐལ་པ་བཤད་པར་བྱ་སྟེ། དེའང་འདི་ལྟར་བསྐལ་པ་ཐ་མའི་ཚེ་ལོ་བརྒྱད་ཁྲི་བར་གྱུར་བ་དང་། མནར་མེད་པའི་གནས་ནས་སེམས་ཅན་ཚེ་ཟད་གཅིག་འཕོ་བ་ནི་དུས་མཉམ་སྟེ། དེ་ནི་འཇིག་པའི་བསྐལ་པའི་མགོ་རྩོམ་པ་ཡིན་ནོ། །དེནས་རིམ་གྱིས་དམྱལ་བ་བཅུ་དྲུག་པོའི་ལས་ཟད་པ་རྣམས་ནི། མཐོ་རིས་དང་མ་ཟད་པ་རྣམས་འཇིག་རྟེན་གྱི་ཁམས་གཞན་གྱི་དམྱལ་བར་སྐྱེས་ཏེ་དམྱལ་བའི་གནས་སྟོངས་པར་འགྱུར་རོ། །དེ་བཞིན་དུ་ཡི་དྭགས་དང་དུད་འགྲོ་རྣམས་ཀྱང་ལས་ཟད་པ་རྣམས་མཐོ་རིས་དང་། མ་ཟད་པ་རྣམས་འཇིག་རྟེན་གྱི་ཁམས་གཞན་གྱི་གཉིས་པོར་སྐྱེས་ནས་གཉིས་པོའི་གནས་སྟོངས་པར་འགྱུར་རོ། །དེ་རྣམས་༼ནས་༽མི་རྣམས་ལ་ཆོས་ཉིད་ཀྱིས་ཐོབ་པའི་བསམ་གཏན་སྐྱེས་ཏེ། ཚངས་རིས་ལ་སོགས་པར་སྐྱེས་ནས་མིའི་གནས་སྟོངས་པར་འགྱུར་རོ། །དེ་བཞིན་དུ་རྒྱལ་ཆེན་རིགས་བཞི་དང་། སུམ་ཅུ་རྩ་གསུམ་དང་། མཚེ་མ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་པ་རྣམས་ལའང་ཆོས་ཉིད་ཀྱིས་ཐོབ་པའི་བསམ་གཏན་སྐྱེས་ཏེ་བསམ་གཏན་དང་པོ་ལ་སོགས་པར་འཕོས་ནས་འདོད་པའི་ཁམས་སྟོང་པར་འགྱུར་རོ། །བསམ་གཏན་དང་པོ་པ་རྣམས་ཀྱང་བསམ་གཏན་གཉིས་པར་འཕོས་ནས་སྟོངས་པར་འགྱུར་རོ། །དེ་ནས་ཉི་མ་བདུན་རིམ་གྱིས་ཤར་ནས་རྒྱ་མཚོ་ཆེན་པོ་ལ་སོགས་པ་སྐམ་ཏེ། སྟོང་གསུམ་གྱི་སྟོང་མནར་མེད་པ་ནས་ཚངས་པའི་འཇིག་རྟེན་གྱི་བར་མེ་ལྕེ་གཅིག་ཏུ་གྱུར་ནས་སྲེག་པར་བྱེད་དོ། །དེའི་ཚེ་འོད་ཆུང་དང་འོད་གསལ་དང་ཚད་མེད་འོད་ཀྱི་ལྷ་གཞོན་ནུ་རྣམས་འཇིགས་ཤིང་སྐྲག་ལ། ལྷ་རྒན་པོ་རྣམས་ཀྱིས་མ་འཇིགས་ཤིག་མེ་འདི་ནི་སྔོན་ཡང་ཚངས་པའི་འཇིག་རྟེན་ནས་ལོག་གོ །ཞེས་དབུགས་འབྱིན་ནོ། །དེ་ནས་མེ་ཞི་ནས་སྟོང་པ་ཆེན་པོར་འགྱུར་རོ། །དོན་འདི་ཉིད་གདགས་པའི་བསྟན་བཅོས་ལས། གང་ཚེ་ཉི་མ་བདུན་པ་ཤར་གྱུར་ཅིང་། །འདིར་ནི་འོད་ཟེར་དྲྭ་བ་རབ་གཏོང་བ། །དེ་ཡི་ཚེ་ན་ས་དང་རི་རྣམས་དང་། །ཐམས་ཅད་ཤིན་ཏུ་རབ་ཏུ་འབར་བར་འགྱུར། །ཇི་སྐད་སྨྲས་བཞིན་མ་ལུས་ཀུན་བསྲེགས་ནས། །དུས་མཐའི་ཉི་མ་གཟི་བརྗིད་ཆེ་ལྡན་པ། །དེ་དག་ཉིད་ཀྱང་དབང་ནི་མེད་འགྱུར་ཞིང་། །མི་རྟག་ཉིད་ཀྱིས་བཅོམ་ནས་ཞིག་པར་འགྱུར། །དེ་ལྟར་ལྷུན་པོ་རྒྱ་མཚོ་ཆེ་དང་ས། །དེ་བཞིན་མཐོ་རིས་ཟད་འགྱུར་ཤེས་ནས་ནི། །སྐྱེ་བོ་དམ་པ་དག་གིས་བརྟན་པ་ཡི། །འཕགས་པའི་གནས་ལ་རྟག་ཏུ་བློ་ཞོག་ཅིག །ཅེས་གསུངས་སོ། །དེའི་ཕྱིར་བསྐལ་པ་བཟང་པོ་འདི་ནི་མེས་འཇིག་པའི་བསྐལ་པ་ཡིན་ནོ།། །།
ད་ནི་འཇིག་བྱེད་ཀྱི་ངེས་པ་བཤད་པར་བྱ་སྟེ། མཛོད་ལས། མེ་ཡིས་བདུན་ནོ་ཆུ་ཡིས་གཅིག །དེ་ལྟར་ཆུ་བདུན་ཐལ་ནས་ཀྱང་། །མེ་ཡིས་བདུན་ནོ་དེ་ནས་ནི། །མཇུག་ཏུ་རླུང་གིས་འཇིག་པ་ཡིན། །ཞེས་འབྱུང་ངོ་། །དོན་ནི་འདི་ཡིན་ཏེ་སྣོད་རྣམས་ནི་མེ་ཆུ་རླུང་གསུམ་གྱིས་འཇིག་གི །ས་ནི་འཇིག་བྱེད་མ་ཡིན་ནོ། དེ་ལས་མེས་ལན་བདུན་ཞིག་པའི་རྗེས་སུ་ཆུས་ལན་རེ་འཇིག་གོ །དེ་ལྟར་མེས་བདུན་བདུན་བཞི་བཅུ་རྩ་དགུ་ཞིག་ཙ་ན་ཆུས་བདུན་འཇིག་སྟེ་ལྔ་བཅུ་རྩ་དྲུག་གོ །དེ་ནས་རླུང་གིས་ལན་གཅིག་འཇིག་སྟེ། དེ་ལྟར་ན་འཇིག་ཆགས་ཀྱི་བསྐལ་པ་དྲུག་ཅུ་རྩ་བཞི་ལས་ནི་བསྐལ་པ་ཆེན་པོ་དྲུག་ཅུ་རྩ་བཞི་ཡོད་དོ། །དེ་ལ་མེས་འཇིག་པའི་ཚེ་བསམ་གཏན་དང་པོ་མན་ཆད་འཇིག་སྟེ། དེ་ན་ཏིང་ངེ་འཛིན་གྱི་སྐྱོན་རྟོག་དཔྱོད་མེ་དང་འདྲ་བ་ཡོད་པའི་ཕྱིར་རོ། །ཆུས་འཇིག་པའི་ཚེ་བསམ་གཏན་གཉིས་པ་མན་ཆད་འཇིག་སྟེ། དགའ་བདེ་ཆུ་དང་འདྲ་བ་ཡོད་པའི་ཕྱིར་རོ། །རླུང་གིས་འཇིག་པའི་ཚེ་བསམ་གཏན་གསུམ་པ་དགེ་རྒྱས་མན་ཆད་འཇིག་རྟེན་སྟེ་དེ་ན་གཡོ་འགུལ་རླུང་དང་འདྲ་བ་ཡོད་པའི་ཕྱིར་རོ། །ཆུས་འཇིག་པའི་ཚེ། བསམ་གཏན་གཉིས་པའི་གནས་ནས་ཆུ་བབས་ནས་ལན་ཚྭ་ཆུར་བཅུག་པ་བཞིན་འཇིག་གོ །རླུང་གིས་འཇིག་པའི་ཚེ། བསམ་གཏན་གསུམ་པ་ནས་རླུང་ཆེན་པོ་བྱུང་སྟེ་རབ་ཏུ་གཏོར་ནས་འཇིག་གོ །བསམ་གཏན་བཞི་པ་ནི་ནང་ན་ཏིང་ངེ་འཛིན་གྱི་སྐྱོན་མེད་པས་མི་འཇིག་ལ། འོན་ཀྱང་འཆི་འཕོ་བའི་ཚེ་གཞལ་ཡས་ཁང་དང་བཅས་པ་ཡལ་འགྲོ་བས་མི་རྟག་པ་ཡིན་ཏེ། མཛོད་ལས། བཞི་པ་ན་མེད་མི་གཡོ་བའི་ཕྱིར། །མི་རྟག་དེ་ཡི་གཞལ་ཡས་ཁང་། །སེམས་ཅན་བཅས་ཏེ་འབྱུང་འཇིག་ཕྱིར། །ཞེས་འབྱུང་ངོ་། །དེ་ལྟར་འཇིག་པ་ལའང་བར་གྱི་བསྐལ་པ་ཉི་ཤུའི་ཡུན་ཐོགས་སོ། །དོན་དེ་ཉིད་མཛོད་ལས། འཇིག་པའི་བསྐལ་པ་དམྱལ་བ་ཡི། །སྲིད་པ་མེད་ནས་སྣོད་ཟད་པར། །ཞེས་གསུངས་པ་ཡིན་ཏེ། འཇིག་པའི་བསྐལ་པ་བཤད་ཟིན་ཏᨕ།། །།
བཞི་པ་སྟོངས་པའི་བསྐལ་པ་ལའང་བར་བསྐལ་ཉི་ཤུའི་ཡུན་ཐོགས་ཏེ། མཛོད་ལས། ཆགས་པ་དང་ནི་འཇིག་པ་དང་། །ཞིག་ནས་འདུག་པ་དག་མཉམ་མོ། །ཞེས་འབྱུང་ངོ་། །དེ་ལྟར་འཆགས་པ་དང་་གནས་པ་དང་། སྟོངས་པ་སྟེ་བཞི་ལ་རེ་རེ་ཞིང་བར་བསྐལ་ཉི་ཤུ་ཉི་ཤུ་སྟེ་དེ་ལྟར་བར་བསྐལ་བརྒྱད་ཅུ་ལ་བསྐལ་པ་ཆེན་པོ་གཅིག་གོ །བསྐལ་པ་ཆེན་པོ་དེ་གྲངས་མེད་པ་གསུམ་ཚོགས་བསགས་པས་སངས་རྒྱས་འཐོབ་བོ། །གྲངས་མེད་པ་ནི་གྲངས་ཀྱི་གནས་གཞན་དྲུག་ཅུ་ན་ཡོད་པ་སྟེ་འདི་ལྟར་གཅིག་བཅུ་བརྒྱ་སྟོང་ཁྲི་འབུམ་དང་། །ས་ཡ་བྱེ་བ་དྲུངཕྱུར་རྣམས། །རྐྱང་པའི་གྲངས་སུ་ཤེས་པར་བྱ། །ཐེར་འབུམ་ཁྲག་ཁྲིག་རབ་བཀྲམ་དང་། །གཏམས་དཀྲིགས་མི་འཁྲུགས་ཁྱད་ཕྱིན་དང་། །པང་སྟེང་དེར་འདྲེན་མཐའ་སྣང་དང་། རྒྱུ་རིག་འོད་མཛེས་དབང་པོ་དང་། །ལེགས་ཕྱིན་རྟོགས་འགྲོ་བྱིང་རྡུལ་དང་། །རྒྱ་རྟགས་སྟོབས་འཁོར་བར་ཤེས་དང་། །རྣམ་འབྱུང་སྟོབས་མིག་ཉི་ཤུ་དང་། །རེ་རེའང་ཆེན་པོའི་ཟླ་དང་བཅས། །སྟོབས་མིག་ཆེན་པོ་བཅུ་ལ་ནི། །གྲངས་མེད་ཉིད་དུ་བཤད་པ་ཡིན། །བར་ནས་བརྒྱད་ནི་མ་རྙེད་པ། །འབྱུང་བཞིའམ་ཚད་མེད་བཞི་དང་སྦྱར། །ཀུན་ཀྱང་བཅུ་འགྱུར་དག་ཏུ་བསྒྲེ། །དེ་ལ་བསྐལ་པ་ཆེན་པོའི་ཚད་དུས་འཁོར་ལས་བཤད་པ་འདི་ཡིན་ཏེ། འདོམ་ཉིས་སྟོང་པ་རྒྱང་གྲགས་གཅིག་དང་། དེ་བཞི་ལ་དཔག་ཚད་གཅིག་གོ །དཔག་ཚད་གཅིག་གི་བརྒྱ་དང་རྔམས་སུ་སྐྲའི་རྩེ་མོ་ཕྲ་མོས་གང་བ་ལོ་བརྒྱ་ན་རེ་རེ་བཏོན་པས་ཟད་པ་ནི། བསྐལ་པ་ཐ་མའི་ཉིན་མཚན་གཅིག་གོ །དེ་སུམ་ཅུ་ཟླ་བ་དེ་བཅུ་གཉིས་ལོར་བརྩིས་པས་ལོ་བརྒྱ་ལ་བསྐལ་པ་ཐ་མའོ། །དེ་ཉིས་འགྱུར་ལ་བསྐལ་པ་བར་མའོ། །
དེེ་ཉིས་འགྱུར་ལ་བསྐལ་པ་མཆོག་གོ །དེ་ཉིས་འགྱུར་ལ་བསྐལ་པ་ཆེན་པོའོ། །དེ་བར་གྱི་བསྐལ་པ་དང་པོ་ལ། དེ་ལ་ལོ་འབུམ་ཚོ་བཅུ་བདུན་དང་། ༡༧༢༨༠༠༠ སྟོང་ཚོ་ཉི་ཤུ་རྩ་བརྒྱད་ནི་རྫོགས་ལྡན་ནོ། །ལོ་འབུམ་ཚོ་བཅུ་གཉིས་དང་སྟོང་ཕྲག་དགུ་བཅུ་རྩ་དྲུག་༡༢༩༦༠༠༠ནི་གསུམ་ལྡན་ནོ། །འབུམ་ཚོ་བརྒྱད་དང་སྟོང་ཚོ་དྲུག་རྩ་བཞི་༨༦༤༠༠༠ནི་གཉིས་ལྡན་ནོ། །འབུམ་ཚོ་བཞི་དང་སྟོང་ཚོ་སུམ་ཅུ་རྩ་གཉིས་༤༣༢༠༠༠ནི་རྩོད་ལྡན་གྱི་དུས་སུ་བཤད་དོ། །འདི་ལ་ནི་སེམས་ཅན་དང་། དུས་དང་། ཉོན་མོངས་པ་དང་། ལྟ་བ་དང་། ཚེའི་སྙིགས་མ་སྟེ་ལྔ་འབྱུང་ངོ་། །དེ་ལ་སངས་རྒྱས་ཀྱི་ཆོས་ལ་ཆ་བཞིར་བྱས་པའི་ཆ་བཞི་ཀ་དང་། ཆ་གསུམ་དང་། ཆ་གཉིས་དང་། ཆ་གཅིག་ཡོད་པ་དེའི་ཚེ་དེ་དང་དེར་བཤད་དོ། །ཡང་མདོ་བསམ་གྱིས་མི་ཁྱབ་པའི་རྒྱལ་པོ་ལས་བཅོམ་ལྡན་འདས་ཤཱཀྱ་ཐུབ་པ་དང་། འོད་དཔག་ཏུ་མེད་པ་དང་། རྡེ་རྗེ་རབ་ཏུ་འཇོམས་པ་དང་། འོད་ཟེར་ཤིན་ཏུ་སྟུགས་པོ་པདྨ་རབ་ཏུ་རྒྱས་པའི་སྐུ་དང་། ཆོས་ཀྱི་རྒྱལ་མཚན་དང་། སེང་གེ་དང་། རྣམ་པར་སྣང་མཛད་དང་། ཆོས་ཀྱི་འོད་ཟེར་མེ་ཏོག་རབ་ཏུ་རྒྱས་པའི་སྐུ་དང་། ཡེ་ཤེས་འོད་ཟེར་རྒྱལ་པོ་དང་། ཟླ་བའི་བློ་གྲོས་དང་། སངས་རྒྱས་རྒྱལ་བ་བཟང་པོའི་དཔལ་རྣམས་ཀྱི་སྔ་མ་སྔ་མའི་བསྐལ་པ་ནི་ཕྱི་མ་ཕྱི་མའི་ཉིན་ཞག་དང་མཉམ་པར་བཤད་དོ། །སངས་རྒྱས་ཕྱི་མ་འདིའི་ཞིང་ནི་པདྨའི་དཔལ་ཞེས་བྱ་སྟེ། ཞིང་བཅུའི་རྡུལ་རབ་ཀྱི་གྲངས་དང་མཉམ་པའི་འཇིག་རྟེན་གྱི་ཁམས་འདས་པ་ན་ཡོད་དོ། །དེ་ལྟར་ན་བར་གྱི་བསྐལ་པ་བརྒྱད་ཅུས་བསྐལ་པ་བཟང་པོ་འདི་རྫོགས་ནས། དེའི་འོག་ཏུ་སངས་རྒྱས་མི་འབྱུང་བའི་མུན་པའི་བསྐལ་པ་དྲུག་ཅུ་རྩ་གཉིས་འབྱུང་སྟེ་དེ་རང་སངས་རྒྱས་བྱེབ་ཕྲག་འབུམ་འབྱུང་ངོ་། །དེ་ནས་སངས་རྒྱས་བདུན་འབྱུང་ངོ་། །དེའི་འོག་ཏུ་འཇིག་རྟེན་གྱི་ཁམས་འདི་མངོན་པར་དང་བ་ཞེས་བྱ་བར་གྱུར་ཏེ། དེར་སློབ་དཔོན་ཀླུ་སྒྲུབ་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འཚང་རྒྱ་བར་མདོ་སྡེ་སྤྲིན་ཆེན་པོ་ལས་བཤད་དོ། །ཡང་ན་འདིའི་འོག་ཏུ་བསྐལ་པ་དྲུག་ཅུར་སངས་རྒྱས་མི་འབྱུང་དེའི་འོག་ཏུ་བསྐལ་པ་སྐར་མ་ལྟ་བུ་ལ་སངས་རྒྱས་བརྒྱད་ཁྲི་འབྱུང་ངོ་། །དེའི་འོག་ཏུ་བསྐལ་པ་སུམ་ཅུར་སངས་རྒྱས་མི་འབྱུང། དེའི་འོག་ཏུ་བསྐལ་པ་ཡོན་ཏན་བཀོད་པ་ལ། སངས་རྒྱས་བརྒྱད་ཁྲི་བཞི་སྟོང་འབྱུང་བར་བསྐལ་བཟང་ལས་བཤད་དོ། །དེ་དག་ནི་མདོ་སྡེ་དང་། འདུལ་བ་ལུང་དང་། མངོན་པ་དང་། རྒྱུད་དང་། ཡིད་ཆེས་པའི་བསྟན་བཅོས་ནས་བཤད་ཀྱི། རང་བཟོ་ནི་ཅུང་ཟད་མེད་དོ། །དེ་ལྟར་སངས་རྒྱས་རྣམས་ཀྱི་བསྐལ་པ་ཡི། །རྒྱན་གྱི་མེ་ཏོག་རྣམ་པར་ཕྱེ་བ་ལས། །བྱུང་བའི་དགེ་བ་ཟླ་བའི་འོད་ཟེར་གྱིས། །ཐུབ་བསྟན་ཀུན་དའི་མེ་ཏོག་རྒྱས་བྱེད་ཤོག །བསྐལ་པ་རྒྱན་གྱི་མེ་ཏོག་ཅེས་བྱ་མང་དུ་ཐོས་པའི་བཙུན་པ་རིགས་པའི་རལ་གྲིས་སྦྱར་བ་རྫོགས་སོ།། །།དགེའོ།། །།

 

 

 

 

 

 

 

 

 

 

༄༅། །ཆོས་མངོན་པ་མཛོད་ཀྱི་རྣམ་བཤད་ཚིག་དོན་རབ་གསལ་
ཞེས་བྱ་བ་བཞུགས་སོ། །

མཁའ་ཁྱབ་སྤྲོས་དང་བྲལ་བའི་ཆོས་སྐུ་བརྙེས། །ཁ་སྦྱོར་ཡན་ལག་བདུན་ལྡན་ལོངས་སྐུར་བཞེངས། །དཔག་མེད་སྤྲུལ་སྐུས་གྲངས་མེད་སྨིན་གྲོལ་མཛད། །དོན་གཉིས་མཐར་ཕྱིན་ཐུབ་པའི་དབང་པོ་བསྟོད། །སྐྱེ་བ་ལྔ་བརྒྱར་པཎྜི་ཏར་འཁྲུངས་ཤིང་། །འབུམ་སྡེ་དགུ་བཅུ་རྩ་དགུ་ཐུགས་ལ་མངའ། །བརྒྱད་སྟོང་པ་ལ་རྒྱུན་དུ་ཞལ་འདོན་མཛད། །དབྱིག་གཉེན་མཁས་པའི་དབང་པོ་དེ་ལ་འདུsད། །ཕུན་ཚོགས་སངས་རྒྱས་བསྟན་པ་འཕེལ་མཛད་ཅིང་། །མདོ་རྒྱུད་ཀུན་ལ་རབ་དགའི་མཁྱེན་པ་རྒྱས། །ཆོས་ཀྱི་སྤྱན་གྱིས་འགྲོ་དྲུག་བུ་ལྟར་གཟིགས།། བཟང་པོའི་འཕྲིན་ལས་ཕྱོགས་བཅུར་རབ་འཕྲོ་བའི། །སྒྲིབ་མེད་གཟིགས་པའི་སྤྱན་ལྡན་རྣམ་གཉིས་རྒྱལ། །ཀུན་མཁྱེན་མཁྱེན་བརྩེའི་ཆུ་གཙང་ལས་འཁྲུངས་འཇམ་དབྱངས་པད་མ་དཀར་པོའི་ཞལ། །འཕྲིན་ལས་བཅུད་ཀྱིས་ཀུན་ནས་བལྟམས་པའི་ཐུགས་རྗེའི་གེ་སར་བཞད་པའི་མཚོར། །བདུད་རྩི་ནུས་པས་རྣམ་དཔྱོད་ལུས་གྲིབ་ལུང་རིགས་གཤོག་ཡངས་ཆེར་བརྒྱས་པ། །ངང་པའི་དེད་དཔོན་སིདྡྷིའི་མིང་ཅན་བླ་མའི་ལེགས་བཤད་སྤེལ་ལ་སྤྲོ། །བློ་ལྡན་དོན་གཉེར་ཆུ་བྱའི་ཚོགས། །དད་བརྩོན་འདུན་པ་ཆེར་བསྐྱེད་དེ། །རྣམ་དཔྱོད་ལུས་སྟོབས་བརྒྱས་ཕྱིར་དུ། །ལུང་རིགས་བདུད་རྩིའི་བཅུད་འདི་འཐུང་། །འདིར་དམ་པའི་ཆོས་མངོན་པ་སྡེ་བདུན་གྱི་དོན་ཕྱིན་ཅི་མ་ལོག་པར་ཕྱོགས་གཅིག་ཏུ་བསྟན་ལ་འབེབས་པར་བྱེད་པ། །
ཆོས་མངོན་པ་མཛོད་ཀྱི་ཚིག་དོན་རབ་ཏུ་གསལ་བ་ཞེས་བྱ་བ་འདི་ལ། །བསྡུས་དོན་གྱིས་ཁོག་ཕུབ་པ་དང་། །ཚིག་དོན་ལྷུག་པར་ཕྲལ་བ་གཉིས། །དང་པོ་ནི། མཚན་དོན་འགྱུར་ཕྱག་ཀླད་ཀྱི་དོན། །འགྱུར་བའི་གཞུང་དོན་དངོས་ཉིད་བཤད། །བཤད་པ་མཐར་ཕྱིན་མཇུག་གི་དོན། །
འགྱུར་བའི་གཞུང་དོན་དངོས་ཉིད་ལ། །རྩོམ་ལ་འཇུག་པའི་ཡན་ལག་དང་། །རྩོམ་པའི་གཞུང་གི་བརྗོད་དོན་བཤད། །རྩོམ་པ་མཐའ་རུ་ཕྱིན་པའོ། །རྩོམ་ལ་འཇུག་ཕྱིར་མཆོད་པར་བརྗོད། །རྩོམ་པར་དམ་བཅའ་མཚན་དོན་བཤད། །དམ་ཆོས་མངོན་པ་གསུངས་པ་ཡི།། དགོས་པ་བཞི་ཡི་རྩོམ་ལ་འཇུག །
བརྩམ་བྱ་གཞུང་གི་བརྗོད་དོན་ལ། །ལུས་ཀྱི་ཚུལ་གྱི་མདོར་བསྟན་དང་། །ཡན་ལག་ཚུལ་གྱིས་རྒྱས་པར་བཤད། །ལུས་ལ་ཟག་བཅས་ཟག་མེད་པ། །
གཉིས་པ། ཡན་ལག་ཚུལ་གྱི་རྒྱས་བཤད་ལ། །བརྗོད་བྱའི་གཙོ་བོའི་བསྡུ་བ་དང་།། གནས་བརྒྱད་སོ་སོར་བཤད་པ་གཉིས། །གཏན་ལ་དབབ་བྱའི་ཡུལ་དང་ནི། །ཉམས་སུ་བླང་བའི་སྤྱོད་པ་དང་། །ཐོབ་བྱའི་འབྲས་བུ་གསུམ་གྱིས་ནི། །གཞུང་འདིའི་བརྗོད་དོན་མཐའ་དག་བསྡུས། །
ཡུལ་ལ་ཀུན་བྱང་ཐུན་མོང་དང་། །ཀུན་བྱང་སོ་སོར་བཤད་པ་གཉིས། །ཐུན་མོང་ཁམས་དང་དབང་པོ་བསྟན། །འདུས་བྱས་སྤྱི་ཡི་མཚན་ཉིད་དང་། །ཆོས་གསུམ་གྱི་ནི་རྣམ་གཞག་དང་། །ཁམས་ཀྱི་རྣམ་པའི་རབ་དབྱེ་ཡི། །སྒོ་ནས་ཁམས་ཀྱི་གནས་ཉིད་བཤད། །
དབང་པོ་ཉེར་གཉིས་རང་བཞིན་དང་། །འདུས་བྱས་ཆོས་ཀྱི་སྐྱེ་ཚུལ་དང་། །རྒྱུ་རྐྱེན་འབྲས་བུ་འབྱུང་ཚུལ་གྱིས། །སྒོ་ནས་དབང་པོ་བསྟན་པ་བཤད། །
ཀུན་བྱང་སོ་སོར་བཤད་པ་ལ། །དོར་བྱ་སྡུག་ཀུན་བདེན་པ་དང་། །བླང་བྱ་འགོག་ལམ་བདེན་པ་གཉིས། །དོར་བྱ་སྡུག་ཀུན་བདེན་པ་ལ། །འབྲས་བུ་སྡུག་བསྔལ་བདེན་པ་དང་། །རྒྱུ་ནི་ཀུན་འབྱུང་བདེན་པའོ། །
བཅུད་དང་སྣོད་དང་ཁྱད་ཆོས་ཀྱིས། །སྒོ་ནས་སྡུག་བསྔལ་བདེན་པ་ཉིད། །སྟོན་བྱེད་འཇིག་རྟེན་བསྟན་པ་བཤད། །སྐྱེ་བོ་འགྲོ་བའི་དབྱེ་བ་དང་། །སྐྱེ་ཚུལ་རྟེན་འབྲེལ་རང་བཞིན་དང་། །སྐྱེས་པ་གནས་པའི་ཐབས་དང་ནི། །འཆི་འཕོའི་སེམས་དང་ཚོགས་གསུམ་བསྡུ། །ལྔ་ཡིས་བཅུད་ཀྱི་འཇིག་རྟེན་བསྟན། །སྐྱེ་བོ་འགྲོ་བའི་དབྱེ་བ་ལ། །ཁམས་གསུམ་འགྲོ་བ་ལྔ་དང་ནི། །སྐྱེ་གནས་བཞི་རུ་དབྱེ་བ་འོ། །
གཉིས་པ་སྣོད་ཀྱི་འཇིག་རྟེན་ལ། །རྟེན་གྱི་དཀྱིལ་འཁོར་གསུམ་ངོས་བཟུང་། །བརྟེན་པ་རི་མཚོ་གླིང་གསུམ་བཤད། །ཚ་གྲང་དམྱལ་བའི་གནས་དང་ནི། །འདོད་དང་གཟུགས་ཁམས་ལྷ་ཡི་གནས། །སྟོང་གསུམ་ངོས་བཟུང་ལུས་ཚེའི་ཚད། །ཚད་དེ་གཞལ་བའི་ཐབས་དང་དགུས། །སྣོད་ཀྱི་འཇིག་རྟེན་མཐའ་དག་བསྟན། །
བརྟེན་པ་རི་མཚོ་གླིང་གསུམ་ལ། །རི་དགུ་རྒྱུ་དང་ཚད་དབྱིབས་ཀྱིས། །སྒོ་ནས་བཤད་ཅིང་མཚོ་བརྒྱད་དང་། །གླིང་བཞི་གླིང་ཕྲན་བརྒྱད་པོ་རྣམས། །དབྱིབས་དང་ཚད་ཀྱིས་སྒོ་ནས་བཤད། །ཁྱད་པར་འཛམ་གླིང་ཡོན་ཏན་གྱིས། །སྒོ་ནས་བྱེ་བྲག་ཉིད་དུ་བཤད། །འདོད་དང་གཟུགས་ཁམས་ལྷ་གནས་ལ། །ས་དང་འབྲེལ་དང་མ་འབྲེལ་དང་། །ཞར་བྱུང་སེམས་ཅན་ཁྱད་ཆོས་དང་། །བར་གྱི་ཐག་ཚད་ངོ་ཡི་བཟུང་། །
ས་དང་འབྲེལ་བའི་ལྷ་གནས་ལ། །གཞལ་མེད་ཁང་ལ་བརྟེན་པ་དང་། །རི་རབ་ལ་ནི་རྟེན་པ་གཉིས། །གཞལ་མེད་ཁང་ལ་བརྟེན་པ་ལ། །ཉི་ཟླའི་ཐག་ཚད་ཉི་མ་ཡིས། །གླིང་ལ་བྱ་བ་བྱེད་ཚུལ་དང་། །དུས་ཚིགས་རྣམ་གཞག་ཞར་ལས་བྱུང་། །ཟླ་བའི་འཕེལ་འགྲིབ་རྒྱུ་བསྟན་ཏོ། །
བརྒྱད་པའི་ལུས་ཚེའི་ཚད་ལ་ནི། །མི་དང་ལྷ་ཡི་ལུས་ཚད་བཤད། །ཚེ་ཚད་བདེ་འགྲོ་ངན་འགྲོ་གཉིས། །བདེ་འགྲོ་མི་དང་འདོད་ལྷ་དང་། །གཟུགས་ཁམས་གཟུགས་མེད་ཚེ་ཚད་དོ། །ངན་འགྲོ་ཚ་དམྱལ་དུད་འགྲོ་དང་། །ཡིད་དྭགས་གྲང་དམྱལ་ཚེ་ཚད་བཤད། །
དགུ་པ་ཚད་དེ་གཞལ་ཐབས་ལ། །ལུས་ཚད་གཞལ་བའི་ཆེད་དུ་ནི། །དཔག་ཚད་རྒྱང་གྲགས་ངོ་ཡི་བཟུང་། །ཚེ་ཚད་གཞལ་ཕྱིར་ལོ་དང་ནི། །བསྐལ་པ་ངོ་ཡི་བཟུང་བ་གཉིས།། དང་པོ་འཇོག་བཞི་ངོ་ཡི་བཟུང་། །དེ་ལས་དཔག་ཚད་རྒྱང་གྲགས་སུ། །འཇོག་པའི་འཇོག་ཚུལ་དང་གཉིས་ཡིན། །
གཉིས་པ་ཚེ་ཚད་གཞལ་ཐབས་ལ། །འདོད་ཁམས་ཚེ་ཚད་རྟོགས་ཕྱིར་དུ། །ལོ་ཉིད་ངོ་ཡིས་བཟུང་བ་དང་། ཁམས་གོང་ཚེ་ཚད་རྟོགས་ཕྱིར་དུ། །བསྟན་བཤད་གཉིས་ཀྱིས་སྒོ་ནས་ནི། །བསྐལ་པ་ངོས་བཟུང་བསྐལ་ཆེན་ལ། །འབྱུང་བའི་གང་ཟག་རྣམ་གསུམ་བཤད། །
གསུམ་པ་སྣོད་བཅུད་ཁྱད་ཆོས་ལ། །དང་པོའི་ཚེ་ལོ་དཔག་མེད་ནས། །བཅུ་པའི་བར་དུ་འགྲིབ་ཚུལ་དང་། །འཇིག་བསྐལ་བྱེ་བྲག་བཤད་པ་འོ། །
གཉིས་པ་ཀུན་འབྱུང་བདེན་པ་ལ། །ལས་དང་ཉོན་མོངས་ཀུན་འབྱུང་གཉིས། །ལས་ཀྱིས་འབྲས་བུ་འགྲུབ་ཚུལ་གྱི། །སྒོ་ནས་མདོར་བསྟན་ལས་ཉིད་ཀྱི། །རྣམ་གཞག་རྒྱས་པར་བཤད་པ་དང་། །ལས་ཀྱི་རྣམ་གྲངས་གཞན་བསྟན་པའི། །སྒོ་ནས་ལས་ཀྱི་གནས་ཉིད་བཤད།།
ཉོན་མོངས་ཀུན་འབྱུང་བདེན་པ་ལ། །སྤང་བྱ་ཕྲ་རྒྱས་ཉོན་མོངས་དང་། །སྤོང་བྱེད་གཉེན་པོ་སྤངས་པ་ཡིས། །འབྲས་བུ་ཡོངས་ཤེས་གསུམ་གྱིས་ནི། །ཕྲ་རྒྱས་བསྟན་པའི་འཇིག་རྟེན་བཤད། །
ལྔ་པ་ཕྲ་རྒྱས་བསྟན་པ་ཡི། །སྤོང་བྱེད་གཉེན་པོ་ལམ་བདེན་དང་། །འབྲས་བུ་ཡོངས་ཤེས་འགོག་བདེན་དུ། །བཤད་པས་བླང་བྱ་འགོག་ལམ་གཉིས། །ཕྲ་རྒྱས་བསྟན་པའི་ཞར་ལས་གྲུབ། །
གཉིས་པ་ཉོན་མོངས་སྤྱོད་པ་ལ། །ལམ་དང་གང་ཟག་རྣམ་གཞག་དང་། །ལམ་གྱི་ཁྱད་ཆོས་གཞན་བཤད་པའི། །སྒོ་ནས་ལམ་དང་གང་ཟག་གི །གནས་ཉིད་རྒྱས་པར་བཤད་པ་འོ། །
གསུམ་པ་ཐོབ་བྱའི་འབྲས་བུ་ནི། །ཡེ་ཤེས་བསྟན་པའི་མཛོད་དང་ནི། །སྙོམས་འཇུག་བསྟན་པ་གཉིས་ཀྱིས་བསྟན། །ཡེ་ཤེས་རང་བཞིན་གཏན་ལ་ཕབ། །ལྡན་པའི་ཚུལ་དང་ཐོབ་པའི་ཚུལ། །ཁྱད་ཆོས་བཞི་ཡི་སྒོ་ནས་ནི། །ཡེ་ཤེས་བསྟན་པའི་གནས་ཉིད་བཤད། །
སྙོམས་འཇུག་རང་བཞིན་གཏན་ལ་ཕབ། །དེ་ཡི་ཁྱད་ཆོས་ཏིང་ངེ་འཛིན། །གསུམ་གྱི་དབྱེ་བ་སྙོམས་འཇུག་ལ། །བརྟེན་པའི་ཡོན་ཏན་བཤད་པ་ཡི། །སྒོ་ནས་སྙོམས་འཇུག་བསྟན་པ་བཤད།། །།

 

 

 

པར་བྱང་སྨོན་ཚིག

རྣམ་གྲོལ་ཞི་བའི་རྒྱ་མཚོར་རོ་གཅིག་ཏུ། །
གཞོལ་བའི་མཐའ་ཡས་ཆོས་ཚུལ་དལ་འབབ་ཀླུང་། །
ཚིག་གི་གཟེགས་མ་རེས་ཀྱང་དུག་གསུམ་གྱི། །
དྲི་མ་ཡོངས་འཁྲུད་ལེགས་བཤད་བདུད་རྩི་འདི། །

དཔར་དུ་བསྐྲུན་པའི་རྣམ་དཀར་ཕུང་པོའི་མཐུས། །
ཡང་དག་ཆོས་ཀྱི་སྒོ་མོ་སྟོང་ཕྲག་བརྒྱ། །
གདངས་ཏེ་རྒྱུད་ལྔའི་འགྲོ་བ་མ་ལུས་པ། །
ངེས་ལེགས་ནོར་བུའི་མཛོད་ལ་དབང་འབྱོར་ཤོག །

ཅེས་ནང་བསྟན་གྲུབ་མཐའ་རིས་མེད་ཀྱི་གསུང་རབ་དག་དཔར་བསྐྲུན་འགྱུར་གང་ལའང་སྦྱར་ཆོག་པའི་དགེ་བའི་སྨོན་ཚིག་ཏུ་ཤཱཀྱའི་དགེ་སྦྱོང་ཆོས་སྨྲ་བ་ངག་དབང་བློ་བཟང་བསྟན་འཛིན་རྒྱ་མཚོས་སྦྱར་བའོ།།

 

 

 

 

 

 

 

རྣམ་གྲྭ་ཤེས་ཡོན་ལྷན་ཚོགས་ནས་དཔར་འགྲེམས་ཞུས།

 

 

མཛོད་འགྲེལ་མངོན་པའི་རྒྱན།

རྣམ་གྲྭ་ཤེས་ཡོན་ལྷན་ཚོགས་ནས་ཕྱི་ལོ༌ ༢༠༡༣ ལོར་
པར་ཐེངས་དང་པོར་པར་གྲངས་ ༥༠༠༠ ཐམ་པ་དཔར།

© Namgyal Monastery, 2011
All rights reserved
Complied, edited and published by
Namgyal Monastery
www.namgyalmonastery.org

འབྲེལ་ཡུལ་ཞལ་བྱང་།

NAMGYAL MONASTERY
P.O. Mcleod Ganj-176219
Dharamsala Distt Kangra (H.P.) INDIA
Off:91+92184-14777/ 92184-15777
E-mail: namgyalmonastery@gmail.com
www.namgyalmonastery.org