རྗེ་རེ་མདའ་བ་གཞོན་ནུ་བློ་གྲོས་ལ་བསྟོད་པ།
འཇམ་མགོན་བླ་མ་ཙོང་ཁ་པ་ཆེན་པོས་མཛད།
ན་མོ་གུ་རུ་མཉྫུ་གྷོ་ཥཱཡ།
མཁྱེན་རབ་གཞན་དང་སྐལ་བ་མི་མཉམ་ཞིང་། །
རིགས་པའི་ལམ་དུ་བརྩོན་པའང་མ་ལྷོད་པས། །
བསྟན་པའི་དེ་ཉིད་གཟིགས་ནས་སྟོན་པ་ལ། །
བསྒྲུབ་པའི་མཆོད་པས་དགྱེས་པ་བསྐྱེད་སླད་དུ། །
དབེན་པའི་གནས་ན་མང་དུ་ཐོས་པའི་དོན། །
ཚུལ་བཞིན་སྒྲུབ་པའི་དམ་ཆོས་བདུད་རྩིའི་རོས། །
ཡིད་ལ་སྐལ་བཟང་སྩོལ་བའི་དགོན་པ་པ། །
རྒྱ་ཆེན་ཆོས་ཀྱི་སྤྱན་ལྡན་རེད་མདའ་པའི། །
ཞབས་པད་གུས་པས་བསྟན་པའི་རྒྱལ་བ་ལ། །
ཡིད་ཆེས་ཅུང་ཟད་རྙེད་པའི་བས་མཐའ་བ། །
བློ་བཟང་གྲགས་པ་གངས་རིའི་ལྗོངས་ཤིག་ན། །
བཤེས་གཉེན་དམ་པའི་ཡོན་ཏན་རྗེས་སུ་དྲན། །
འཇིག་རྟེན་འདྲེན་པའི་དགོངས་པ་བཞིན། །
དགོངས་ཤིང་དེ་བཞིན་འདོམས་པ་དང་། །
འདོམས་པ་བཞིན་དུ་ལེགས་སྒྲུབ་པ། །
འདི་ནི་ཁྱེད་ཀྱི་ཡོན་ཏན་ལགས། །
གཞན་དུ་ཚུལ་འདི་མ་མཐོང་བས། །
གཤོང་བུ་དམའ་བར་ཆུ་རྒྱུན་བཞིན། །
དུས་ཀུན་ཏུ་ནི་བདག་གི་ཡིད། །
ཁྱོད་ཉིད་ལ་ནི་རྗེས་སུ་སོང་། །
ཐུབ་པའི་དགོངས་པ་ཚོལ་བའི་སྒོ་གཅིག་པུ། །
ལུང་དོན་ཚུལ་བཞིན་སྤྱོད་པའི་རིགས་པ་ཡི། །
དོ་ཤལ་མཆོག་འདིས་ཁྱོད་ཀྱི་མགྲིན་པ་ཉིད། །
ཡོངས་སུ་བཟུང་ནས་གཞན་དུ་འགྲོ་མི་བྱེད། །
ལུང་ཙམ་སྐྱབས་སུ་གྱུར་བའི་སྐྱེ་བོ་འདིས། །
རང་གི་ཁས་འཆེ་ཙམ་ལ་རིགས་པ་ཞེས། །
རྣམ་པར་ཞེན་ནས་ཐུབ་པའི་ལུགས་འཛིན་པ། །
མཐོང་བར་གྱུར་ཚེ་ལྷག་པར་ཁྱོད་ཉིད་དྲན། །
ལེགས་ཚོགས་ཇི་སྙེད་མཆིས་པ་སྐྱེ་བ་དང་། །
གནས་དང་འཕེལ་བ་གང་ལ་རག་ལུས་པར། །
རྒྱལ་བས་ལན་ཅིག་མིན་པར་བསྔགས་པ་ཡི། །
ཚུལ་ཁྲིམས་འཕགས་པའི་ནོར་དུ་གཟིགས་ནས་ནི། །
ཉེར་སྦས་ཟླ་བའི་ནོར་བུ་ཡོན་ཏན་འོད། །
ཐམས་ཅད་ཡོད་སྨྲའི་མཁས་པའི་དགོངས་པ་བཞིན། །
འདུལ་བ་འབུམ་སྡེའི་དགག་སྒྲུབ་གནང་གསུམ་གྱི། །
བསླབ་པའི་གནས་ལ་མཁས་ཤིང་འདའ་མི་བྱེད། །
ཐུབ་པའི་གསུང་ལས་རྣམ་པ་གཞན་ཉིད་དུ། །
དངོས་པོ་དེ་ཉིད་བསྟན་པར་འདོད་པ་ཡི། །
སེར་སྐྱ་རྐང་མིག་སོགས་ཀྱི་བསྟན་པའི་ལམ། །
ཆུ་ཤིང་བཞིན་ཏེ་ཚིག་ཙམ་སྙིང་པོ་རུ། །
ལེགས་པར་མཐོང་ཞིང་བདེ་བར་གཤེགས་པའི་ལུགས། །
དོན་བཟང་ཚིག་འབྲ་བཟང་ཞིང་མ་འདྲེས་རྫོགས། །
ཐོག་མཐའ་བར་དུ་དགེ་བ་རོ་གཅིག་པར། །
ཡིད་ཆེས་གཏིང་ནས་རྙེད་པའི་ཐབས་ཀྱི་མཆོག །
རིགས་ཚུལ་བརྒྱ་ཕྲག་དུ་མའི་རོ་ལྡན་པས། །
བློ་ཆེན་ལྡན་རྣམས་དགའ་བ་རྒྱས་བྱེད་པ། །
རྣམ་འགྲེལ་མཛད་པའི་ཐུན་མོང་མིན་པའི་ལུགས། །
ཡོངས་སུ་རྫོགས་པར་སྨྲ་བའང་ཁྱོད་དུ་བས། །
སྟོབས་བཅུ་མངའ་བ་ཐུབ་པའི་རིང་ལུགས་པ། །
ཚུལ་གཉིས་ཤིང་རྟའི་སྲོལ་འབྱེད་འཛམ་གླིང་རྒྱན། །
གང་གིས་བདེ་བར་གཤེགས་པའི་གདུང་འཚོབ་པ། །
ཀླུ་སྒྲུབ་ཐོགས་མེད་གཉིས་ཀྱི་བཞེད་པའི་གཞུང་། །
ཇི་བཞིན་གསལ་བར་གཟིགས་ནས་བརྩེ་བ་ཡིས། །
སྐྱོན་བྲལ་གསུང་གིས་གཞན་ལ་ལེགས་འདོམས་པས། །
བསྟན་པའི་གནས་ལ་ངེས་པ་སྟེར་བ་འདི། །
ཁྱོད་ཀྱི་རྗེས་སུ་བསྟན་ལས་གཞན་སུ་ཞིག །
ཐུབ་པ་ཆེན་པོས་ཆོས་ཀྱི་རྣམ་གྲངས་ནི། །
ཇི་སྙེད་གསུངས་པ་ཀུན་གྱི་རྩེར་གྱུར་པ། །
རྒྱུད་སྡེའི་མཐར་ཐུག་དཔལ་ལྡན་འདུས་པ་ཡི། །
མཐའ་དྲུག་ཚུལ་བཞིས་རྒྱས་བཏབ་རྡོ་རྗེའི་ཚིག །
ཇི་བཞིན་ལེགས་པར་ཕྱེད་ནས་རིམ་གཉིས་ཀྱི། །
ཏིང་འཛིན་མཆོག་གི་བདེ་ལ་རོལ་པས་ན། །
རྡོ་རྗེ་བཞེས་གསོལ་བའི་སྒྲ་དེ་ཡང་། །
མགོན་པོ་ཁྱེད་ལ་དོན་དང་བཅས་པར་གྱུར། །
དེ་ལྟར་ཐོས་པ་རྒྱ་མཚོའི་ཕ་རོལ་སོན། །
གཞན་ལ་འདོམས་པའི་ངག་ཚིག་དྲི་མ་མེད། །
ཚིག་གིས་མི་ངོམས་སྒྲུབ་པ་སྙིང་པོར་བྱེད། །
དེ་ཕྱིར་ཁྱོད་ནི་མཁས་པས་བསྔགས་པར་འོས། །
ཁྱོད་ཀྱིས་རང་གི་སྟོན་པ་ཡི། །
ཡོན་ཏན་དང་ནི་ལུགས་གཞན་གྱི། །
སྐྱོན་རྣམས་མཐོང་བའི་རིགས་པའི་མིག །
དྲི་མ་མེད་པ་ལེགས་པར་སྩལ། །
སྐྱོན་དང་བྲལ་བ་ཐུབ་པའི་ལུགས། །
གཞུང་འཛུགས་བགྱིད་པའི་སྒྲུབ་པ་དང་། །
སྨྲ་བ་ངན་རྣམས་ཚར་གཅོད་པའི། །
སུན་འབྱིན་བགྱིད་པའི་གནས་རྣམས་ལ། །
སྐྱོན་ཡང་ཡོན་ཏན་ལྟ་བུ་དང་། །
ཡོན་ཏན་སྐྱོན་ལྟར་སྣང་བ་ཡི། །
ཡང་དག་པ་དང་ལྟར་སྣང་གི །
རྣམ་པར་དབྱེ་བའང་ལེགས་པར་བསྟན། །
དེ་ལྟར་ལོག་པར་འགྲོ་བ་བཀག །
མཁས་པ་དགྱེས་པའི་ལམ་དུ་འཁྲིད། །
མང་ཐོས་ཆུད་མི་ཟ་བའི་རྒྱུ། །
དེ་དོན་སྒྲུབ་ལའང་རབ་ཏུ་སྦྱར། །
དེ་ཕྱིར་ཁྱེད་ཀྱིས་གདུལ་བྱ་ལ། །
བགྱི་བར་འོས་པ་མ་ལུས་མཛད། །
ཕན་མཛད་ཁྱོད་ལ་དུས་ཀུན་ཏུ། །
བདག་ནི་གུས་པས་ཕྱག་འཚལ་ལོ། །
ཁང་བཟང་བུ་གར་ཉི་མོར་བྱེད་པའི་འོད། །
ཆ་ཤས་ཙམ་ཞིག་ཤར་བར་གྱུར་པས་ཀྱང་། །
དེ་ན་གནས་པའི་མུན་པ་ཀུན་བཅོམ་ནས། །
བླང་དོར་གནས་རྣམས་གསལ་བར་བྱེད་པ་ལྟར། །
ཁྱོད་ཀྱི་ཡོན་ཏན་མཐའ་དག་མ་རྟོགས་ཀྱང་། །
ཕྱོགས་ཙམ་མཐོང་བ་འདིས་ཀྱང་བདག་གི་བློ། །
དེ་ཉིད་གནས་ལ་དཔྱོད་པའི་སྐབས་རྙེད་པས། །
ཐུབ་པའི་ལེགས་པར་བཤད་པའི་དགའ་སྟོན་མྱོང་། །
འགྲོ་བའི་ཕུན་ཚོགས་ཀུན་གྱི་གཞིར་གྱུར་པ། །
དཔལ་ལྡན་བླ་མ་ཅུང་ཟད་བསྟོད་པ་ཡི། །
དགེ་བ་འདི་ཡིས་འགྲོ་བ་མ་ལུས་པ། །
བཤེས་གཉེན་དམ་པའི་མགོན་དང་ལྡན་གྱུར་ཅིག །
ཅེས་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་དུ་སོན་པ་དཔལ་ལྡན་བླ་མ་དམ་པ་ཀུ་མཱ་ར་མ་ཏིའི་ཡོན་ཏན་རྗེས་སུ་དྲན་ནས་ཅུང་ཟད་བསྟོད་པ་འདི་ནི། མང་དུ་ཐོས་པའི་དགེ་སློང་བློ་བཟང་གྲགས་པའི་དཔལ་གྱིས། གངས་ཅན་ཁྲོད་ཀྱི་གངས་རིའི་དབང་པོ་འོ་དེ་གུང་རྒྱལ་གྱི་ལྷ་ཞོལ་དབེན་པའི་གནས་ལྷའི་སྡིངས་མིང་གཞན་རྣམ་པར་རྒྱལ་བའི་གླི་ཞེས་བྱ་བར་སྦྱར་བའི་ཡི་གེ་པ་ནི་ནམ་མཁའ་དཔལ་བཟང་ངོ་། །
