གཙང་གི་ལོ་གསར་གྱི་བཀྲ་ཤིས་སྨོན་ཚིག

བགྲེས་སོང་ཚེ་རིང་གྲལ་མགོ་ཡ་ན་བརྗིད། །

བུ་ཆུང་ནོར་བུ་གྲལ་སྨད་མ་ན་མཛེས། །

བཞུགས་གྲལ་བང་རིམ་མ་འཆོལ་ལྟ་ན་སྡུག །

བདེ་སྐྱིད་ཁང་བཟང་བཀྲ་ཤིས་རྟགས་བརྒྱད་འཛོམས། །

ཚེས་གཅིག་ཐོ་རེངས་ཆང་བསྐོལ་ཚ་པོས་བསུས། །

གདུགས་ཚོད་ལུག་མགོ་ཚགས་ཤ་སྐམ་པོ་ཞིམ། །

དགོང་ཟས་མོག་མོག་རྒྱ་ཐུག་སྐེད་པ་ལྡེམ། །

ཀ་ར་བུ་རམ་བཞེས་བྲོ་ལོངས་སྤྱོད་འཛོམས། །

ཚེས་གཉིས་གྲོ་སོ་ཕྱེ་མས་ཁྱིམ་མཚེས་བསུ། །

གྲོ་མ་འབྲས་བསིལ་མཆོད་ཆང་འདུ་ལོངས་ཆེ། །

ཚེས་གསུམ་རླུང་རྟ་ལྷ་གསོལ་དར་ལྕོག་བསྒྲེངས། །

རྟ་རྒྱུག་རྐང་བྲོ་གླུ་གཞས་ལྟད་མོ་ཆེ། །

ཚེས་པ་བཞི་ནས་བཅོ་ལྔའི་ནངས་མོ་བར། །

དགའ་ཉེ་བློ་དཀར་འཛོམས་འཛོམས་ཐག་ཐག་གིས། །

ཇ་ཆང་ཤོ་སྦག་གླུ་གར་རྩེད་མོ་ལ། །

གང་དགའ་སྐྱིད་སྐྱིད་སྟོན་མོ་འཛད་པ་མེད། །

ཚེས་ཆེན་བཅོ་ལྔར་ཉེ་རྒྱང་ཆོས་སྡེ་ལ། །

མཇལ་སྐོར་དགེ་འདུན་རིམ་གྲོ་བསྙེན་བཀུར་གྱིས། །

སོ་ནམ་ལོ་གསར་དགེ་བས་མཇུག་བསྡུས་ཏེ། །

རྒྱལ་པོ་ལོ་གསར་བསུ་བའི་སྟ་གོན་བྱེད། །

ཁྱིམ་གྱི་ཀ་བ་ཨ་ཕའི་སྟོབས་ཀྱིས་བཏེགས། །

ནང་གི་གདུང་མ་ཨ་མ་མཛངས་མས་བསྐྱངས། །

སྤུན་མཆེད་བུ་ཚ་མཐུན་པ་ལྕམ་ཤིང་བཞིན། །

ཁྱིམ་ཚང་འགྱུར་མེད་བཀྲ་ཤིས་བདེ་ལེགས་ཤོག །

དེ་རིང་གཙང་གི་ལོ་གསར་གྱི་དགུ་ཐུག་ཏུ་སོང་ཆོས་གྲོགས་ཤིག་གིས་ལོ་གསར་དང་འབྲེལ་བའི་སྙན་ཚིག་འབྲི་རོགས་ཞེས་ནན་གྱིས་བསྐུལ། དེ་རིང་རང་ཉིད་ལ་ནི་སྙན་ངག་འབྲི་བའི་ཁམས་མི་འདུག་པས། རྡོ་ཆག་བཙན་པོར་བསྒྲིགས་པའི་ཚིགས་བཅད་འདི་དག་སྙན་ཚིག་ཏུ་སོང་མིན་བཤད་དཀའ་ཡང་། གྲོགས་ངོ་མ་གཅོག་པས་གང་དྲན་བྲིས་པ་སྐད་འཕྲིན་དུ་བསྐུར་ཅིང་འདི་རུ་ཡང་སྤེལ་ལོ། །དགུ་ཐུག་སྐྱིད།