༄༅། །བཤེས་གཉེན་བསྟེན་ཚུལ་བླ་མ་ལྔ་བཅུ་པ་བཞུགས་སོ། །
སློབ་དཔོན་བྷ་བི་ལྷས་མཛད།
རྒྱ་གར་སྐད་དུ། གུ་རུ་པཉྩ་ཤི་ཀ བོད་སྐད་དུ། བླ་མ་ལྔ་བཅུ་པ།
དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །
དཔལ་ལྡན་རྡོ་རྗེ་སེམས་དཔའི་གནས་ཐོབ་རྒྱུར་གྱུར་པའི། །
བླ་མའི་ཞབས་ཀྱི་པདྨོར་ཇི་བཞིན་བཏུད་བྱས་ཏེ། །
དེ་བསྟེན་པ་ནི་དྲི་མེད་རྒྱུ་མང་ལས་གསུངས་པ། །
མདོར་བསྡུས་བཤད་པ་འདི་ནི་གུས་པས་མཉན་པར་གྱིས། །
དབང་བསྐུར་མཆོག་ཐོབ་རྡོ་རྗེ་ཡི། །
སློབ་དཔོན་ལ་ནི་དེ་བཞིན་གཤེགས། །
ཕྱོགས་བཅུའི་འཇིག་རྟེན་ཁམས་བཞུགས་པས། །
དུས་གསུམ་དུ་ནི་མངོན་ཕྱག་འཚལ། །
མཆོག་ཏུ་དད་པས་དུས་གསུམ་དུ། །
དཀྱིལ་འཁོར་མེ་ཏོག་བཅས་ཐལ་མོས། །
སྟོན་པ་བླ་མ་བསྙེན་བཀུར་ཞིང་། །
ཞབས་ལ་སྤྱི་བོས་ཕྱག་བྱའོ། །
ཁྱིམ་པའམ་ནི་གསར་བུ་ལ། །
འཇིག་རྟེན་སྨོད་པ་སྤང་བའི་ཕྱིར། །
དམ་ཆོས་ལ་སོགས་མདུན་བདར་ཏེ། །
བརྟུལ་ཞུགས་འཛིན་པས་བློས་ཕྱག་བྱ། །
གདན་བསྟབ་པ་དང་ལྡང་བ་དང་། །
དོན་གྱི་བྱ་བ་སོགས་བསྙེན་བཀུར། །
བརྟུལ་ཞུགས་ཅན་གྱིས་ཀུན་བྱ་སྟེ། །
ཕྱག་དང་དམ་པ་མིན་ལས་སྤང་། །
བླ་མ་དང་ནི་སློབ་མ་དག །
མཚུངས་པར་དམ་ཚིག་ཉམས་འགྱུར་བས། །
དཔའ་བོས་དང་བོར་སློབ་དཔོན་དང་། །
སློབ་མའི་འབྲེལ་བ་བརྟག་པར་བྱ། །
བློ་ལྡན་སློབ་མས་བླ་མར་ནི། །
སྙིང་རྗེ་མེད་ཅིང་ཁྲོ་ལ་གདུག །
ཁེངས་ཤིང་ཆགས་ལ་མ་བསྡམས་དང་། །
སྤྱོམས་དང་བཅས་པར་མི་བྱའོ། །
བརྟན་ཞིང་དུལ་ལ་བློ་གྲོས་ལྡན། །
བཟོད་ལྡན་དྲང་ལ་གཡོ་སྒྱུ་མེད། །
སྔགས་དང་རྒྱུད་ཀྱི་སྦྱོར་བ་ཤེས། །
སྙིང་བརྩེར་ལྡན་ཞིང་བསྟན་བཅོས་མཁས། །
དེ་ཉིད་བཅུ་ནི་ཡོངས་སུ་ཤེས། །
དཀྱིལ་འཁོར་བྲི་བའི་ལས་ལ་མཁས། །
སྔགས་བཤད་པ་ཡི་སྦྱོར་བ་ཤེས། །
རབ་ཏུ་དང་ཞིང་དབང་པོ་དུལ། །
དེ་འདྲའི་མགོན་ལ་བསམས་བྱས་ནས། །
སློབ་མར་གྱུར་ནས་བརྙས་ན་ནི། །
སངས་རྒྱས་ཐམས་ཅད་བརྙས་པས་ན། །
དེས་ནི་རྟག་ཏུ་སྡུག་བསྔལ་འཐོབ། །
སློབ་དཔོན་ལ་ནི་སྨོད་པ་དེ། །
ཡམས་དང་འཚེ་བའི་ནད་རྣམས་དང་། །
གདོན་དང་རིམས་དང་དུག་རྣམས་ཀྱིས། །
རྨོངས་ཆེན་དེ་ནི་འཆི་བར་འགྱུར། །
རྒྱལ་པོ་མེ་དང་སྤྲུལ་གདུག་དང་། །
ཆུ་དང་མཁའ་འགྲོ་རྐུན་པོ་དང་། །
གདོན་དང་ལོག་འདྲེན་རྣམས་ཀྱིས་ཀྱང་། །
བསད་ནས་སེམས་ཅན་དམྱལ་བར་འགྲོ། །
ནམ་ཡང་སློབ་དཔོན་དག་གི་ནི། །
ཀུན་ཏུ་སེམས་དཀྲུགས་མི་བྱ་སྟེ། །
གལ་ཏེ་རྨོངས་པས་བྱས་གྱུར་ན། །
དམྱལ་བར་ངེས་པར་འཚེད་པར་འགྱུར། །
མནར་མེད་ལ་སོགས་འཇིགས་རུང་བའི། །
དམྱལ་བ་བསྟན་པ་གང་ཡིན་པ། །
སློབ་དཔོན་ལ་ནི་སྨོད་པ་རྣམས། །
དེར་ནི་གནས་པར་ཡང་དག་བཤད། །
དེ་བས་འབད་པ་ཐམས་ཅད་ཀྱིས། །
རྡོ་རྗེ་སློབ་དཔོན་བློ་གྲོས་ཆེ། །
དགེ་བ་རབ་ཏུ་མི་སྤྱོམས་པ། །
ནམ་ཡང་སྨད་པར་མི་བྱའོ། །
བླ་མ་ལ་ནི་གུས་བཅས་ཡོན། །
རྗེས་མཐུན་ཁྱོད་ཀྱིས་སྦྱིན་པར་བྱ། །
དེས་ནི་རིམས་སོགས་གནོད་པ་རྣམས། །
ཕྱིར་ཞིང་འབྱུང་བར་མི་འགྱུར་རོ། །
རང་གི་དམ་ཚིག་སློབ་དཔོན་ནི། །
སྦྱིན་མིན་བུ་དང་ཆུང་མ་དང་། །
རང་སྲོག་གིས་རྟག་བསྟེན་བྱ་ན། །
ལོངས་སྤྱོད་གཡོ་བས་སྨོས་ཅི་དགོས། །
གང་ཕྱིར་བསྐལ་པ་བྱེ་བ་ནི། །
གྲངས་མེད་པར་ཡང་རྙེད་དཀའ་བའི། །
སངས་རྒྱས་ཉིད་ཀྱང་བརྩོན་ལྡན་ལ། །
ཚེ་འདི་ཉིད་ལ་སྟེར་བར་བྱེད། །
རྟག་ཏུ་རང་གི་དམ་ཚིག་བསྲུང་། །
རྟག་ཏུ་དེ་བཞིན་གཤེགས་པ་མཆོད། །
རྟག་ཏུ་བླ་མ་ལ་དབུལ་བྱ། །
འདི་ནི་སངས་རྒྱས་ཀུན་དང་འདྲ། །
མི་ཟད་དེ་ཉིད་འདོད་པ་ཡིས། །
ཅུང་ཟད་ཡིད་འོང་གང་དང་གང་། །
ཤིན་ཏུ་ཁྱད་པར་གྱུར་པ་ཉིད། །
དེ་དང་དེ་ནི་བླ་མར་དབུལ། །
དེ་བྱིན་སངས་རྒྱས་ཐམས་ཅད་ལ། །
རྟག་ཏུ་བྱིན་པ་ཉིད་དུ་འགྱུར། །
དེ་བྱིན་བསོད་ནམས་ཚོགས་ཡིན་ཏེ། །
ཚོགས་ལས་དངོས་གྲུབ་མཆོག་ཏུ་འགྱུར། །
དེ་བས་སློབ་མ་སྙིང་རྗེ་གཏོང་། །
ཚུལ་ཁྲིམས་བཟོད་པའི་ཡོན་ཏན་ལྡན། །
སློབ་དཔོན་དང་ནི་རྡོ་རྗེ་འཛིན། །
ཐ་དད་པར་ནི་མི་བརྟག་གོ །
མཆོད་རྟེན་བཤིག་འདྲའི་སྡིག་འཇིགས་པས། །
གྲིབ་མའང་འགོམ་པར་མི་བྱ་ན། །
ལྷམ་དང་སྟན་དང་བཞོན་པ་སོགས། །
འགོམ་མི་བྱ་བ་སྨོས་ཅི་དགོས། །
བློ་གྲོས་ཆེན་པོས་དགའ་སེམས་ཀྱིས། །
བླ་མའི་བཀའ་ནི་འབད་དེ་མཉན། །
རིགས་པ་ཡིས་ནི་མི་ནུས་ན། །
མི་ནུས་དེ་ལ་ཚིག་གིས་སྦྱང་། །
བླ་མ་ལས་ནི་དངོས་གྲུབ་དང་། །
མཐོ་རིས་དང་ནི་བདེ་བ་འཐོབ། །
དེ་བས་འབད་པ་ཐམས་ཅད་ཀྱིས། །
བླ་མའི་བཀའ་ལས་འདའ་མི་བྱ། །
བླ་མའི་རྫས་ནི་སྲོག་ཇི་བཞིན། །
དེ་ཡི་སྡུག་པའང་བླ་མ་བཞིན། །
བླ་མའི་འཁོར་ནི་གཉེན་བཞིན་དུ། །
མཉམ་པར་བཞག་པས་རྟག་ཏུ་བསམ། །
མལ་སྟན་འདུག་དང་སྔོན་འགྲོ་དང་། །
གཙུག་ཏོར་དག་དང་བཅས་པ་དང་། །
སྟན་ལ་རྐང་འཇོག་རྐེད་པར་ནི། །
ལག་བཞག་མཉེ་བར་མི་བྱའོ། །
བླ་མ་དག་ནི་ལངས་པ་ན། །
ཉལ་དང་འདུག་པར་མི་བྱའོ། །
རྟག་ཏུ་དེ་ཡི་བྱ་བ་ལ། །
ལྡང་མཁས་ཕུན་སུམ་ཚོགས་པར་བྱ། །
མཆིལ་མ་ལ་སོགས་འདོར་བ་དང་། །
སྟན་ལ་རྐང་བ་རྐྱོང་བ་དང་། །
འཆག་དང་རྩོད་པར་སྨྲ་བ་དག །
བླ་མའི་མདུན་དུ་མི་བྱའོ། །
ཡན་ལག་མཉེ་དང་གར་དག་དང་། །
གླུ་དང་རོལ་མོ་མི་བྱ་ཞིང་། །
གཏམ་གྱི་སྦྱོར་བ་མང་པོ་རྣམས། །
ཐོས་པའི་ཉེ་འཁོར་དུ་མི་བྱ། །
བཏུད་དེ་སྟན་ལས་ལྡང་བ་དང་། །
གུས་པ་ཡིས་ནི་འདུག་པར་བྱ། །
མཚན་ཆུ་འཇིགས་བཅས་ལམ་དུ་ནི། །
བསྒོ་བ་ཐོབ་ནས་མདུན་འགྲོ་བྱ། །
སློབ་དཔོན་གྱིས་མཐོང་མདུན་དུ་ནི། །
བློ་དང་ལྡན་པས་ལུས་གཅུ་དང་། །
ཀ་བ་ལ་སོགས་རྟེན་མི་བྱ། །
སོར་མོའི་ཚིགས་ནི་བགྲང་མི་བྱ། །
རྐང་བཀྲུ་བ་དང་ལུས་བཀྲུ་དང་། །
དྲིལ་དང་མཉེ་བ་ལ་སོགས་ལ། །
ཕྱག་ནི་སྔོན་དུ་འགྲོ་བས་བྱ། །
དེ་བཞིན་མཐར་ཡང་ཅི་བདེར་བྱ། །
དེ་ཡི་མཚན་སྨོས་བརྗོད་ན་ནི། །
མིང་མཐར་ཞལ་སྔ་ལྡན་པར་བྱ། །
གཞན་དག་གུས་པར་བྱ་བའི་ཕྱིར། །
ཁྱད་པར་གྱི་ནི་ཚིག་དག་བརྗོད། །
བླ་མ་ལ་ནི་བཀའ་སྩོལ་ཞུ། །
བཀའ་བཞིན་བགྱིད་ཅེས་བརྗོད་པར་བྱ། །
ཐལ་མོ་སྦྱར་ཞིང་མ་ཡེངས་པར། །
བླ་མས་བསྒོ་བ་མཉན་པར་བྱ། །
དགོད་དང་ལུད་པ་ལ་སོགས་ལ། །
ལག་པས་ཁ་ནི་དགབ་པར་བྱ། །
བྱ་བ་ཟིན་ནས་འཇམ་པ་ཡི། །
ཚིག་དག་གིས་ནི་གདས་པར་བྱ། །
མདུན་དུ་དུལ་བར་འདུག་པ་དང་། །
གོས་སོགས་ཚུལ་ནི་བསྡམས་པ་དང་། །
པུས་བཙུགས་ཐལ་མོ་སྦྱར་བ་ཡིས། །
ཉན་སོགས་འདོད་པས་གསོལ་གསུམ་གདབ། །
བསྙེན་བཀུར་སྤྱོད་པ་ཐམས་ཅད་ལ། །
ཡིད་ནི་ང་རྒྱལ་མེད་པར་བྱ། །
ངོ་ཚ་འཇིགས་ཤིང་བསྡམས་པ་ཡིས། །
བག་མ་གསར་པའི་ཚུལ་གནས་བྱ། །
སྒེག་པ་ལ་སོགས་བྱ་བ་ཀུན། །
སྟོན་པའི་མདུན་དུ་སྤང་བར་བྱ། །
གཞན་ཡང་དེ་འདྲའི་བྱ་བ་ཀུན། །
རང་གིས་བརྟགས་ལ་དོར་བར་བྱ། །
རབ་གནས་དཀྱིལ་འཁོར་སྦྱིན་སྲེག་དང་། །
སློབ་མ་སྡུད་དང་འཆད་པ་རྣམས། །
ཡུལ་དེར་བླ་མ་གནས་པ་ན། །
རྗེས་མ་གནང་བར་མི་བྱའོ། །
སྤྱན་འབྱེད་སོགས་ལ་ཅི་ཐོབ་པ། །
དེ་ཀུན་བླ་མ་དག་ལ་དབུལ། །
དེ་ཡིས་བསྟབས་པ་བླངས་ནས་ནི། །
གཞན་དག་ལ་ནི་ཅི་བདེར་བྱ། །
བླ་མའི་སློབ་མ་སློབ་མར་མིན། །
སློབ་མའང་བླ་མའི་མདུན་དུ་མིན། །
བསྙེན་བཀུར་དག་དང་ལྡང་བ་དང་། །
ཕྱག་སོགས་བྱེད་པ་བཟློག་པར་བྱ། །
སློབ་དཔོན་ལ་ནི་གང་འབུལ་དང་། །
བླ་མས་ཀྱང་ནི་གང་སྩལ་པ། །
དེ་ལ་བཏུད་དེ་ལག་གཉིས་ཀྱིས། །
བློ་དང་ལྡན་པས་བླང་བར་བྱ། །
དྲན་པ་བརྗེད་མེད་གྱུར་པ་དང་། །
རང་གི་ཀུན་སྤྱོད་ལ་བརྩོན་པས། །
སྤུན་གྱིས་རང་སྤྱོད་ལས་འདས་པ། །
དགའ་བས་ཕན་ཚུན་བཟློག་པར་བྱ། །
ན་བས་བླ་མའི་བྱ་བ་ལ། །
བཏུད་དེ་རྗེས་མ་གནང་བར་ཡང་། །
བཀག་པ་རྣམས་ནི་སྤྱད་བྱས་ཀྱང་། །
དགེ་སེམས་ཅན་ལ་སྡིག་མི་འགྱུར། །
འདིར་མང་སྨོས་པ་ཅི་ཞིག་དགོས། །
བླ་མ་དགྱེས་བྱེད་གང་ཡིན་བྱ། །
མི་མཉེས་བྱེད་ཀུན་སྤོང་བ་ནི། །
དེ་དང་དེ་ལ་འབད་དེ་བྱ། །
དངོས་གྲུབ་སློབ་དཔོན་རྗེས་འབྲང་ཞེས། །
རྡོ་རྗེ་འཛིན་པ་ཉིད་གསུང་བ། །
ཤེས་ནས་དངོས་པོ་ཐམས་ཅད་ཀྱིས། །
བླ་མ་ཡོངས་སུ་མཉེས་པར་བྱ། །
བསམ་པ་དག་པའི་སློབ་མ་ནི། །
དཀོན་མཆོག་གསུམ་ལ་སྐྱབས་སོང་ལ། །
བླ་མའི་རྗེས་སུ་འཇུག་པ་འདི། །
ཁ་ཏོན་བྱ་བར་སྦྱིན་པར་བྱ། །
དེ་ནས་སྔགས་སོགས་སྦྱིན་པ་ཡིས། །
དམ་ཆོས་སྣོད་དུ་བྱས་ནས་སུ། །
རྩ་བའི་ལྟུང་བ་བཅུ་བཞི་ནི། །
བཀླག་དང་འཛིན་པ་ཉིད་དུ་བྱ། །
དེ་ལྟར་བླ་མའི་རྗེས་འཇུག་སློབ་མ་ནི། །
མ་ལུས་ཕན་བསྐྱེད་སྐྱོན་མེད་འདི་བྱས་པའི། །
དགེ་བ་མཐའ་ཡས་བདག་གིས་གང་བསགས་པ། །
དེས་ནི་འགྲོ་རྣམས་མྱུར་དུ་རྒྱལ་གྱུར་ཅིག །
བླ་མ་ལྔ་བཅུ་བ་སློབ་དཔོན་བྷ་བི་ལྷས་མཛད་པ་རྫོགས་སོ། ། ། །
