ངེས་པ་དོན་གྱི་དགེ་བའི་བཤེས་གཉེན་ཆེན་མོ་ལ་བསྟོད་པའི་བསྟོད་ཚིག་མེ་ཏོག་ཕྲེང་བ།

སྦྱར་ལོ་ཚེ་རིང་དོན་གྲུབ།

ངག་ལ་ངག་གི་དཔལ་གཏེར་འཇམ་དཔལ་དབྱངས། །ཡིད་ལ་ཐུགས་བརྩེས་རྗེས་ཆགས་སྤྱན་རས་གཟིགས། །ལུས་ལ་མཆོག་གི་སྐྱབས་བྱིན་གདོན་བགེགས་སེལ། །མཁྱེན་བརྩེ་ནུས་ལྡན་དགེ་བའི་བཤེས་གཉེན་མཆོད། །

ཐོབ་པར་དཀའ་བའི་དལ་བའི་རྟེན་བཟང་འདི། །མི་ཤེས་དབང་གིས་འདི་སྣང་འཁོས་བུར་འཁྱམས། །མི་རྟག་དགྲ་བོས་རྒོལ་བར་བརྩམ་པའི་ཚེ། །སྔོན་བསགས་བཟང་པོས་མཇལ་དཀའི་བཤེས་གཉེན་མཇལ། །ཀ་དག་ཆོས་ཀྱི་དེ་ཉིད་མཁྱེན་ན་ཡང་། །ཐ་མལ་སྣང་ངོར་ཅི་ཡང་འཆར་བ་ལྟར། །སྣ་ཚོགས་འགྲོ་བློའི་རྨོངས་མུན་སེལ་སླད་དུ། །གང་ཐུགས་བརྩེ་བའི་འོད་སྣང་འཁྱིལ་བ་མཚར། །སྙིགས་མ་ལྔ་བདོའི་རང་མདངས་བདོ་བའི་ཚེ། །ལྟ་སྤྱོད་ངན་པས་འགྲོ་བའི་རང་ཚུགས་ཤོར། །དུག་གསུམ་གླང་པོས་རང་རྒྱུད་རྙོགས་པའི་དུས། །ཐབས་མཁས་ཐུགས་རྗེས་དམ་ཆོས་བདུད་རྩི་སྦྱིན། །འགྲོ་འདིའི་མ་རིགས་རྨོངས་ཆེན་སེལ་ཕྱིར་དུ། །གང་ཐུགས་མཁྱེན་བརྩེའི་ཉིན་བྱེད་འོད་བརྒྱའི་ཟེར། །མཐོན་ཐིང་ཀུན་གསལ་དབྱིངས་ནས་འཕྲོ་བ་ལྟར། །ངུར་སྨྲིག་རྣམ་རོལ་བཤེས་གཉེན་ཁྱེད་སྐུ་མཚར། །དབུས་འགྱུར་འཆང་འདིའི་འགྲོ་བློའི་རྨོངས་སེལ་ཆེད། །ཤར་ཕྱོགས་མལ་གྲོའི་ཡུལ་གྱི་ས་ཚིགས་སུ། །གང་སྐུའི་ཉིན་བྱེད་ཆོ་རིགས་གཙང་མ་ཞིག །ཐ་མལ་སྤྱོད་ལས་འདས་པའི་རིགས་སྲས་བལྟམས། །ཆུང་ངུའི་དུས་ནས་དད་བརྩོན་ཤེས་རབ་བསྐྱེད། །བསམ་སྦྱོར་དག་པས་བཤེས་གཉེན་ཚུལ་བཞིན་བསྟེན། །ཕྱོགས་རེ་མ་ཡིན་མདོ་སྔགས་སྤྱི་ཡི་དོན། །འཆད་རྩོད་རྩོམ་གྱིས་མཁས་པའི་དབུ་འཕངས་བརྙེས། །འཁོར་བའི་ཕུན་ཚོགས་ཐམས་ཅད་རྡུལ་བཞིན་གཟིགས། །ཚད་ལྡན་བླ་མའི་བཀའ་མངགས་སྤྱི་བོས་ལེན། །བསྟན་པ་གསོ་བའི་དུས་ལ་གཏུགས་པའི་ཚེ། །སྐུ་ན་ཕྲ་ཡང་བསྟན་འཛིན་ཐུགས་འགན་བཞེས། །ཤར་ཕྱོགས་དགེ་ལྡན་རྣམ་པར་རྒྱལ་བའི་སྤོར། །བུ་སློབ་རྣམས་ལ་དམ་ཆོས་བཀའ་དྲིན་བསྐྱངས། །བཤེས་གཉེན་བཀའ་དགོངས་བྲལ་མེད་ཡིད་ལ་འཛིན། །ལུང་རྟོགས་བསྟན་པ་ཐབས་མཁས་བརྩོན་པས་སྤེལ། །འཆད་རྩོད་རྩོམ་གྱིས་ལྟ་ངན་ལོག་རྟོག་སེལ། །ཡུལ་དུས་གནས་བབས་གཟིགས་ཏེ་འགྲོ་དོན་བསྐྱངས། །འདུལ་བྱའི་བློ་མོས་སྣ་ཚོགས་སྣང་ན་ཡང་། །དམ་ཆོས་འདུལ་བྱའི་ཁམས་མོས་བསྟུན་ཏེ་སྟོན། །རྟོགས་པར་དཀའ་བའི་གསུང་རབ་དགོངས་དོན་རྣམས། །རང་རང་སོ་སོར་མ་འདྲེས་ལྷུག་པར་བཀྲལ། །གཞུང་དོན་དགོངས་པ་ཇི་བཞིན་འགྲོ་ལ་བསྟན། །ལེགས་བཤད་གསུང་གིས་འདུལ་བྱ་སྨིན་པར་མཛད། །བསྟན་པ་གསོ་ཕྱིར་མཚན་སྙན་རྩྭ་བཞིན་འདོར། །འགལ་རྐྱེན་བར་ཆད་རྐྱེན་ངན་ལམ་དུ་འཁྱེར། །ངོ་བསྟོད་ཆེ་ཚུགས་ཆོས་བརྒྱད་དགྲ་བཞིན་གཟིགས། །བདེན་པའི་ལམ་སྟོན་བླ་མ་ཁྱེད་འདྲ་དཀོན། །བཀའ་པོད་གཞུང་ཆེན་གཅིག་ཏུ་སྒྲིལ་བའི་ལམ། །སྐྱེ་བུ་གསུམ་གྱི་ལམ་གྱི་རིམ་པའི་གནད། །མ་ཚང་མེད་ལ་སྟོན་པར་ཟླ་བྲལ་བའི། །ལམ་རིམ་བླ་མའི་རིགས་སྲས་ཁྱེད་ལ་འདུད། །དུས་ངན་སྙིགས་མར་འགྲོ་བློའི་ཉོན་རྨོངས་རགས། །ལེགས་བཤད་སྟོན་ཀྱང་སྤྱོད་ངན་རླུང་ལྟར་གཡོ། །ལྟ་ངན་མེ་ལྕེས་བོད་ཁམས་བསྲེགས་པའི་ཚེ། །དམ་ཆོས་འབྲུ་ཆར་འགྲོ་བློའི་ཡིད་ངོར་སིམས། །བྱམས་དང་རྙིང་རྗེས་ཁྱེད་ཐུགས་ཡོངས་བལྟམས་ཀྱང་། །སྲོང་པོའི་ངག་ཀྱིས་འཁྱོག་པོའི་བྱེད་སྤྱོད་སོགས། །མ་རབས་སྐྱོན་ལ་གོམས་པའི་ཉམ་ཐག་ཚོར། །སྐྱོན་འཚང་དྲང་ནས་བདེན་པའི་ལམ་སྣེ་དཀྲིས། །འདི་ཕྱིའི་སྐྱབས་གནས་འཛོལ་བའི་སྐྱེ་འགྲོ་རྣམས། །ཕྱི་ནས་ནང་པར་རློམས་པའི་སེམས་ཙམ་ལས། །དོན་དུ་ཕྱི་ནང་གར་འཐད་མི་འཐེ་ཚེ། །ཕྱི་ནང་དབྱེ་ཆོས་སྐྱབས་འགྲོའི་ངོས་འཛིན་བསྟན། །རང་སེམས་སངས་རྒྱས་ཡིན་པར་ངོ་སྤྲོད་ཆེད། །གློ་བུར་སེམས་ངོར་སྦག་པའི་ཉོན་རྨོངས་སྐྱོན། །རྒྱལ་སྲས་སྤྱོད་དང་རིམ་གཉིས་རྣལ་འབྱོར་སོགས། །ཚད་ལྡན་གཞུང་ལ་བསྟེན་ནས་སེམས་ངོ་སྤྲད། །མི་ཚེ་ཟད་ཁར་བཅར་བའི་རྒན་རྒོན་ཚོར། །འཆི་ཁར་སྐབས་བསྟུན་རང་འཁོས་སྡོམ་ཁྲིམས་དང་། །འཆི་འཕོའི་ཉམས་ལེན་བདེ་ཅན་ཞིང་སྒྲུབ་སོགས། །འཆི་ཆོས་བསྒོམ་བཟླས་བླང་དོར་ཚུལ་བཞིན་བསྟན། །ལྷ་འདྲེ་རྒྱལ་འགོང་གསོལ་བར་དགའ་བ་དང་། །མོ་སྤྲ་ཤོ་ལ་མི་ཚེ་བཅོལ་བ་ཚོར། །ཤེས་རབ་མཚོན་ཆས་རང་ཐག་གཅོད་པ་ལས། །རང་རྨོངས་གཞན་རྨོངས་ཆོས་མིན་དགོས་མེད་གསུངས། །ས་ཆུ་རི་བྲག་ལྷ་གསོལ་བཙན་གསོལ་དང་། །ཕོ་ལྷ་དགྲ་ལྷ་ཡུལ་ལྷ་ནོར་ལྷ་སོགས། །ཆོས་སྐྱོང་སྲུང་མར་དངོས་སྒྲུབ་ཞུ་མི་ཚོར། །འཁོར་བའི་ལྷ་ལ་འདི་ཕྱིའི་སྐྱབས་བཅོལ་འཁྲུལ། །འདི་ཕྱིའི་སྐྱབས་གནས་དཀོན་མཆོག་རྣམ་གསུམ་ལས། །སྐྱབས་གཞན་འཚོལ་བ་སངས་རྒྱས་ཆོས་ལ་མེད། །ལྷ་འདྲེ་རྒྱལ་འགོང་འཇིག་རྟེན་དྲེག་པའི་ལྷ། །མཐུ་སྟོབས་ཆེ་ཡང་སྐྱབས་འགྲོའི་གནས་ལ་མེད། །འཁོར་འདས་རང་བཞིན་རྡུལ་ཙམ་མེད་པ་དང་། །རྒྱུ་འབྲས་རྟེན་འབྲེལ་བསླུ་བ་མེད་པ་སོགས། །སངས་རྒྱས་བཀའ་གསུང་དྲི་མེད་དགོངས་དོན་རྣམས། །གསལ་བར་བཀྲལ་བའི་མཁས་དབང་ཁྱེད་འདྲ་དཀོན། །རང་རང་རྒྱུ་ལས་བྱུང་བའི་བདེ་སྡུག་ཀུན། །རང་སེམས་ཆགས་སྡང་མ་རིག་དབང་ལས་བྱུང་། །བྱེད་པོ་གཞན་གྱིས་བསྐུལ་ནས་བྱུང་མིན་ཞེས། །སྟོན་པའི་བཀའ་དགོངས་རིགས་པའི་ལམ་ནས་བསྟན། །ཉེར་གཅིག་དུས་འདིར་འཛམ་གླིང་ལྟ་སྒྲུབ་མང་། །བོད་མི་ཕལ་ཆེར་རི་ཆུ་བསྐོར་ནས་ལུས། །སྟོན་པའི་དམ་ཆོས་ལུང་རྟོགས་བསྟན་པ་རྣམས། །གཅིག་ཏུ་བོར་ནས་ལྷ་སྲུང་སྐྱབས་བཅོལ་འཁྲུལ། །རབ་བྱུང་སྡེ་ལ་འཆད་རྩོད་སློབ་གཉེར་མེད། །བཤད་གྲྭའི་སྲོལ་རྒྱུན་ཉམས་ཉེའི་དུས་སྐབས་འདིར། །ཁྱེད་ཐུགས་ཟབ་མོས་བསྟན་པའི་འཁུར་ཆེན་བཞེས། །སེར་སྐྱ་ཀུན་ལ་འཆད་རྩོད་སློབ་གཉེར་མཛད། །རབ་བྱུང་ཆ་ལུགས་གཞིས་དགོན་འགྲིམ་པའི་མིར། །གཞུང་ཆེན་སློབ་གཉེར་འདུལ་ཁྲིམས་སྲུང་ཚུལ་དང་། །ཚུལ་གནས་ཞི་འདུལ་བག་ཡོད་བསྟེན་ཚུལ་སོགས། །ཁྱིམ་འཛིན་ཆོས་མིང་ཉེས་སྐྱོན་བཅས་པ་གསུངས། །བསྟན་པ་ཉག་ཕྲ་རླུང་གསེབ་མར་མེའི་དུས། །མིག་ལྟོས་ངན་པས་བསྟན་པ་རླུང་ལ་བཀུར། །བསླབ་ལྡན་ཆོས་བྱེད་ཚུལ་ལྡན་མང་ན་ཡང་། །དམ་ཉམས་གཅིག་གིས་སྡོམ་ལྡན་ཁྲི་སྟོང་འཛད། །ལ་ལ་འདི་ཕྱིར་ཆོས་བརྒྱད་སྒྲུབ་ལ་བརྩོ་། །ལ་ལ་འདི་ཕྱིར་དགྲ་འདུལ་གཉེན་སྐྱོང་བྱེད། །ལ་ལ་འདི་ཕྱིར་མཚན་སྙན་དོན་གཉེར་བྱེད། །ཁྱེད་ཐུགས་ཞི་བས་འདི་སྣང་སྒྱུ་མར་གཟིགས། །ཐོགས་མེད་དུས་ནས་བསགས་པའི་བག་ཆགས་དང་། །བདག་འཛིན་དགྲ་བོས་བཅིངས་པའི་རང་རེ་རྣམས། །ཉོན་རྨོངས་བློ་ལ་ཡེ་ཤེས་བཟང་པོའི་རྐྱེན། །སྦྱིན་པའི་བཤེས་གཉེན་ཐར་པའི་རྒྱན་མཚན་རྒྱལ། །ཟོག་རྫུ་བླ་མར་བཀུར་བའི་སྙིགས་དུས་འདིར། །མཐོང་ཚད་ལད་མོར་དགའ་བའི་རང་ཅག་རྣམས། །ལུགས་སྲོལ་ཆོས་ལ་བཟུང་བའི་རྨོངས་དད་པར། །ཆོས་དང་ཆོས་མིན་སོར་འབྱེད་རྣམ་དཔྱོད་བསྟན། །སྲོག་ལས་གཅེས་པའི་སྟོན་པའི་དམ་ཆོས་འདི། །སྔོན་བྱོན་རྒྱལ་བློན་རིམ་པའི་བཀའ་གཙིགས་ལྟར། །མི་རབས་རྒྱུད་བཅས་རྒྱུན་འཛིན་སྤེལ་སླད་དུ། །བྱོན་བའི་བཤེས་གཉེན་ཁྱེད་དང་ཕྲད་པ་དགའ། །མི་ཚེ་མི་རྟག་རྩྭ་སྟེང་ཟིལ་པ་འདི། །ཇི་ཙམ་སྐྱོང་མཐར་བྱས་ཀྱང་ཐ་མར་ཕུངས། །ཚེ་རབས་གཏན་བདེའི་བརྩན་ས་ཟིན་པ་ལ། །དཀྲི་བའི་བཤེས་གཉེན་ཁྱེད་འདྲ་འཕྲད་པ་སྐྱིད། །སྐྱེ་བ་ཀུན་ཏུ་ལས་འབྲས་སྲུང་པ་དང་། །རང་གཞན་སྙོམས་པར་གཟིགས་ལས་ལྷག་མེད་ཀྱང་། །ཁྱེད་ཐུགས་བདག་པས་གཞན་གཅེས་འཛིན་པའི་སྤུན། །བྱམས་སེམས་བཤེས་གཉེན་ཁྱེད་འདྲ་ཕྲད་པ་སྐྱིད། །དམན་པས་ཁྱེད་ལ་མི་ཁ་སྒྲོག་ཀྱང་རུང་། །རྨོངས་པས་ཁྱེད་ལ་མཐོ་འཚམ་བྱེད་ཀྱང་རུང་། །ཁྱེད་ནི་སྙིང་རྗེའི་གཞན་དབང་སོང་བ་ཡིས། །ལན་དུ་མི་སྨྲའི་བརྟུལ་ཞུགས་འཛིན་པ་མཚར། །སྙིགས་མའི་སེམས་ཅན་གཞན་སྐྱོན་གླེང་ལ་དགའ། །ཇི་ཙམ་བརྩེ་བར་དགོངས་ཀྱང་སྐྱོན་འདོགས་མང་། །བཟང་ངན་གོ་བཟློག་རང་སྐྱོན་གཞན་མཐོང་ཚོར། །སྙིང་གཏམ་རྣར་སོན་གྱུར་ལ་ཅིས་མི་བཟོད། །བདག་བློ་བདག་ལ་ལྐོག་འགྱུར་མེད་པ་ཡི། །ཁྱེད་ལ་བསྟེན་ནས་རང་སྐྱོན་མཐོང་བ་ཡང་། །བཤེས་གཉེན་གང་གི་བཀའ་དྲིན་ཡིན་བསམ་ནས། །བསྟོད་སྤྲིན་རྒྱ་མཚོའི་བསྟོད་ཚིག་མེ་ཏོག་སྤེལ། །ལྷག་བསམ་ཡིད་ཀྱི་བསྟོད་ཚིག་མེ་ཏོག་འདི། །ཚིག་གི་སྲད་བུར་དྲང་ནས་ཕུལ་བ་ཡང་། །རང་གཞན་ཀུན་གྱི་བཤེས་གཉེན་བསྟེན་ཚུལ་དུ། །ཅུང་ཟད་ཕན་རེའི་ལྷག་བསམ་བསྐྱེད་པ་ལགས། །བདག་གཞན་སེམས་ཅན་རེ་རེའི་ཆེད་དུ་ཡང་། །ཁྱེད་ཀྱིས་རླབས་ཆེན་སྤྱོད་ལས་མི་འདའ་བར། །འདི་ནས་རྣམ་མཁྱེན་རྒྱས་པའི་མགོ་འཕངས་བར། །མགོན་པོ་གང་གིས་ཐུགས་རྗེས་བཟུང་བར་ཤོག །སྭམངྒལཾ།

2022 ལོའི་བོད་ཟླ 9 ཚེས 10 ཉིན། སྦྱར་ལོས་རང་ཤག་ཏུ་སྦྱར།