རྩོམ་པ་པོ། སྤོས་ཁང་སྒྲོལ་བཟང་།
དགའ་རོང་ངམ་མགར་རོང་གྷ་རུང་འགའ་རོང་འགག་རོང་ཞེས་ཆོས་སྡེ་འདིར་མཚན་བྲིས་སྲོལ་ལྔ་ཙམ་འདུག
![Image](https://ci4.googleusercontent.com/proxy/ef6pg1WkCxjc_EbY3UtYpbeJV75_jmHaUD1MTy4YwS3OcBoOd5_G9OWpbwBVTsvM6oh1IQksmz_C0bpuehJVsUCjAwYj7w0CpfI7krElh7ihGd4lHCT5HlLzepnYjlosDTzzaVqvVknm6xNi0P8t1Bu5tSZDSccIZe7dverjMy1Mo7mCBdybjiUlZ3vdNeZX85v93g5vVqhpaWhe8yjVG1-weSWYZOaxPpJXlFBfgjQRMy7Y8QSOf0a9KTycwnB8zvdKI_YcKV5HGLdYa1wyiAFLXvC6Ifl4sU8BWP9-lKukZbpYTzfcbYA90i7odBZzsPrUCP3ALrehRx-FKBnbrxofIWz0Nrb8=s0-d-e1-ft#http://localhost:48765/hevc?url=https%3A%2F%2Fmmbiz.qpic.cn%2Fmmbiz_png%2F0q5rtIxTiaHxdmbY9xZasDQGPKuVp0ckgpLgQiaTp7USFQUsDIjIeogka9E0xTIfGeDdIQcOTSCxWEtNCEE1B6rg%2F640%3Fwx_fmt%3Dpng%26tp%3Dwxpic%26wxfrom%3D5%26wx_lazy%3D1%26wx_co%3D1&type=png)
![Image](https://ci5.googleusercontent.com/proxy/lMMAUbuWsLW_LM0R-mE96Rs60qsc7HD_G03hpiTyi9sUCQoxWYvERn2sHHDaISdHhC9EyY4_9degfvoc751gsy8zjkna5hlH8zOgLco1gDhZtWj8olW_BqB2qwKhh9Kzx4lstnG7Rm4I7GKkGQg0N8oLuWx_MTyLZWrhJxYg-n5Dy5r7rQRfkX9RJTSK-wyXJ1_7AN5nVdFc80hpgHAMdJWAk6ipgJo001gCfPRlpp42WLRClgeQORdMzuLEaexVvpLb23b5AsbBeqZ9EMDYYcT7ooaMj82q6n-q6mvEzUdXQFwUSE2577GGFt8chSApPjOn0c5MN2Qj9mAJRBDn-VaNjC4b8Y4OW3xaZF8=s0-d-e1-ft#http://localhost:48765/hevc?url=https%3A%2F%2Fmmbiz.qpic.cn%2Fmmbiz_jpg%2FQHSrsruibjxe1icNvd6Gu5Q3SkchxvibHptFJpeYk3CgTFPV5hXAUD7jEwLAzIhyeicsp8BSQOX7sNPfsib3icAz107Q%2F640%3Fwx_fmt%3Djpeg%26tp%3Dwxpic%26wxfrom%3D5%26wx_lazy%3D1%26wx_co%3D1&type=jpg)
![Image](https://ci6.googleusercontent.com/proxy/2py4vhIB3MzBhMv8yM5AWWi4HvMP6sVcjnJjtL0Uy2n8ZuhRDjIRU8Cn1vjLmI-Wc4rY0xpkQkhhSsEhCcUFD5U551dNZofct3threhbwSNzRM4CT1jyEKtViOU0iYKjo1oqc3qnX5NU357gxynqzciaUf59wNk-ewRr0T0ropnPydVBemcq5YXggvYV3pENlWonCbaRIsmrMxifPy9alGQl2qnds-6erpUD9K-zxpS4nlJm3QrDSrtqV8BAo9TPFRVtxzlhK0d-JYBzTyVOu8ctBlnS2QqUghqgHx2UbT3U2knzlCeKR11tECqLjG4TkSwGEc7dyVPhwZSKBVJTifhdk0aK4WBLPpwG=s0-d-e1-ft#http://localhost:48765/hevc?url=https%3A%2F%2Fmmbiz.qpic.cn%2Fmmbiz_jpg%2FQHSrsruibjxe1icNvd6Gu5Q3SkchxvibHptibNmwCCWTaITjQCPtP4goTYIDyXfNORDB5LlL6RmARHFIhRvdM96Zeg%2F640%3Fwx_fmt%3Djpeg%26tp%3Dwxpic%26wxfrom%3D5%26wx_lazy%3D1%26wx_co%3D1&type=jpg)
![Image](https://ci4.googleusercontent.com/proxy/dsHLa4-Lz_8pcqtdzMFYVecJT6zRruzu3qHi38dMUlULllcYkKFkZP1eaM5Ww33HY-quMFHfUbq7m0x68x3hcPvCsUobL_hBfcA5nf2BfERvEQ7PHS8P4QslHYc6lpRtT5yp8d8zS_cq3jvkxUJ8SQb5D7SOe0io5ZsfT_pxWPVAiADU35X4Lx195b9sq4KMK_HIzfKNpGgJUx0yifQcCxRgSIkcnUGBr_Z8Gdv-TXxhRzHYv2X1WTkTOUQ29s_e5jcE5akZ1ehHlAEDQD3HYEFsrNA5jke4KC7NqEruqUUQ4tlG0Trc0Exnw5D1tJ-t5kqW6pecXbdXxm5t7SHauIP1WRlx-E3qZ09S=s0-d-e1-ft#http://localhost:48765/hevc?url=https%3A%2F%2Fmmbiz.qpic.cn%2Fmmbiz_jpg%2FQHSrsruibjxe1icNvd6Gu5Q3SkchxvibHpt9MrYeAym0UpB661mCRNavU24RrJhJwt68zopL9ic8Q13wzbNClAEBqQ%2F640%3Fwx_fmt%3Djpeg%26tp%3Dwxpic%26wxfrom%3D5%26wx_lazy%3D1%26wx_co%3D1&type=jpg)
![Image](https://ci4.googleusercontent.com/proxy/wcdGPyMcfJTDfzsA9z2p8-AaBQddBaCDLi4wCBpEhDVKGAHHl5vX2VSB7jgAE2DuxZgHsasi6OSvr4MvlM2v3J3FIAG5J8CAEUGT-VJat0SS6bm013vCO2pudIC52UoiThlbHa9Fk-OlbFGAOolO7kiXGhoDkk40HL0nzUx7NcUIeeT-PLHrMJWATxA8b7c5o6uJ94X82Y_7Zd17ZhlXJjBn3np-QW-t9ImvUjyyIMt6eoR547AHt3GivTxfMryVB7FMK8j3oK53d8l5kUxGZxE1D_30tZX255CBgPfSvSizqHzHKZb7Okc7-xOmbcOMevy76JRhnm9U0WmerG3dooskx6znrgnKhts=s0-d-e1-ft#http://localhost:48765/hevc?url=https%3A%2F%2Fmmbiz.qpic.cn%2Fmmbiz_png%2F2j88bTIVJNTl7Gmvic929TTjIz5UmFOiaG5HUw08lcRhqojviaqwff0v6ibwoy9yorE5f5eKcwuVdQn4bCF9TSbheg%2F640%3Fwx_fmt%3Dpng%26tp%3Dwxpic%26wxfrom%3D5%26wx_lazy%3D1%26wx_co%3D1&type=png)
![Image](https://ci4.googleusercontent.com/proxy/r9VcAuL4ARJs_L2JOf-y18kGMoflNZF-NfLHN2lQoq4_rhEG2BafBw05a7AoYk0psn7jy3cySen8di9dQytykkbNhSGycnXLSygtT42xNUxWJ495a7jXdJ0xUX6QzH9dtJ1gITGtIRrMDPCNVkukpaeOeLR82GS7FDw9jrLCvNp5J7gm3cmsdv1tVsPHLK5KeBSyxdfltGUK-EHNCs96DzmAEKKdJVsYAf1yxmR9E-4I2H9AiOQAt3gWV2p_KzX_b2GB4Dvrtm-JLvITQk4lfbLmd3iIICQf43K7a9CVzB5UEPYqlEwmWKi8wvPgaey5XxyU1vgtwuD0GV2E31CE3kc0d_8GvWsJyUg2=s0-d-e1-ft#http://localhost:48765/hevc?url=https%3A%2F%2Fmmbiz.qpic.cn%2Fmmbiz_png%2FTzC2WVyu2sNzMMibLibWStfNwbdXy51BCutsrqkSzA7KU4KicsYiaSZpYuoic2ckVsjVMk9jvWUmJvAjpQEwWBtdrgQ%2F640%3Fwx_fmt%3Dpng%26tp%3Dwxpic%26wxfrom%3D5%26wx_lazy%3D1%26wx_co%3D1&type=png)
དགོན་འདི་ནི་ཀུན་སྤངས་ཆོས་གྲགས་དཔལ (1283-1363) གྱིས་ཕྱག་བཏབ་པ་ནི་ཇོ་ནང་ཀུན་དགའ་གྲོལ་མཆོག་གི་ཐུགས་སྲས་མང་ཐོས་ཀླུ་སྒྲུབ་རྒྱ་མཚོས(1523-1594)མཛད་པའི་བསྟན་རྩིས་གསལ་བའི་ཉིན་བྱེད་ལས་གསལ།
ཕྱིས་སུ་གྷ་རུང་བ་ལྷའི་རྒྱལ་མཚན་གྱི་གདན་ས་མཛད་པ་ནི་ཁོང་གི་རྣམ་ཐར་ལས། གྷ་རུང་ཆོས་སྡེར་བྱོན་ནས་སློབ་དཔོན་ཆོས་གྲགས་ཀྱི་གདན་ས་གཏད་བཀའ་བརྒྱུད་གོང་མ་རྣམས་ཀྱི་ཕྱག་དཔེ་ལྷ་རྟེན་ཐམས་ཅད་ཕུལ་ནས། དེར་ལོ་དུ་མར་འཆད་ཉན་དར་རྒྱས་སུ་མཛད་དེ། ཅེས་གསལ་མོད་ཀུན་མཁྱེན་ཇོ་ནང་པའི(1292-1361)རྣམ་ཐར་ལས། ཇོ་ནང་སྐུ་འབུམ་གྱི་རབ་གནས་རབ་བྱུང་དྲུག་པའི་ཆུ་བྱ་སྤྱི་ལོ 1333 ལོའི་ཟླ་བ་དྲུག་པའི་ཚེས་བཅུའི་ཉིན་མཛད་སྐབས་ཆོས་རྗེ་ཀུན་མཁྱེན་ཆེན་པོ་དོལ་པོ་སངས་རྒྱས་ཀྱི་དབུས་ཐུགས་སྲས་གྷ་རུང་བ་ཡང་ལྷན་དུ་ཡོད་པ་དང་ཀུན་མཁྱེན་གཤེགས་པའི་སྐབས་ལའང་ཆོས་རྗེ་གྷ་རུང་བ་ཡོད་པ་གསལ་བས་ཀུན་མཁྱེན་གཤེགས་རྗེས་གྷ་རུང་ཆོས་སྡེའི་སློབ་དཔོན་གནང་བ་ཡིན་ནམ་དཔྱོད་པར་ཞུའོ། གྷ་རུང་ནི་ཆོས་སྡེའི་མིང་སློབ་དཔོན་ལ་ཐོགས་པ་ཞིག་ཡིན། མ་གཞི་དགོན་འདི་ནི་ཀུན་སྤངས་ཆོས་གྲགས་དཔལ་གྱིས་ཕྱག་བཏབ་མོད་ཕྱིས་སུ་ཆོས་རྗེ་དགའ་རོང་བ་གནས་འདིར་མཛད་པ་ཤིན་ཏུ་རྒྱས་པས་དགའ་རོང་ཆོས་སྡེའི་གཙུག་གི་རྒྱན་དུ་འགྱུར་པ་རེད། དེས་ན་ཆོས་རྗེ་གྷ་རུང་བའི་རྣམ་ཐར་མདོ་ཙམ་བརྗོད་ན། ཁོང་ནི་ཀུན་མཁྱེན་དོལ་པོ་བའི་སློབ་ཆེན་བཅུ་བཞིའི་ནང་ཚན་ཞིག་ཡིན། འཁྲུངས་ཡུལ་ནི་དབུས་གཙང་གཉིས་ལས་དབུས་ཕྱོགས་ཡུལ་གྲུའི་བྱེ་བྲག །སྡེ་ཐང་༼ཚལ་གུང་ཐང་གི་ཉེ་འགྲམ་དུ་མིན་ནམ་སྙམ།༽དུ་ཡབ་ཡེ་ཤེས་བཟང་དང་ཡུམ་དཔལ་བཙུན་མའི་སྲས་སུ་རབ་བྱུང་ལྔ་པའི་ས་མོ་ལུག་གི་ལོ་སྤྱི་ལོ 1319 སྐུ་འཁྲུངས། གྲུབ་ཐོབ་ཨ་ཙ་ལ་ན་ཐས་སྡེ་ཐང་དུ་ཨརྱ་དེ་ཝ་བྱོན་ཡོད་གསུངས། དགུང་ལོ་ལྔ་པར་སྐུ་འབུམ་ཐང་དུ་བླ་མ་དོན་གྲུབ་དཔལ་ལས་རབ་བྱུང་ཞུས། མཚན་ལྷའི་རྒྱལ་མཚན་དཔལ་བཟང་པོར་གསོལ། ཀ་རི་ཀ་སོགས་གསན། གསང་ཕུའི་གླིང་སྟོད་སྨད་དང་ཚལ་ཡང་དགོན་གུང་ཐང་ལ་སོགས་དབུས་ཀྱི་དགོན་གནས་རྣམས་སུ་བྱོན་ནས་ཕར་ཚད་མངོན་འདུལ་སོགས་ལ་སྦྱང་། མཚུར་ཕུར་བྱོན་ནས་རྟོགས་ལྡན་གྲགས་སེང་མདུན་དུ་ཕེབས། ཁོང་གིས་ཨརྱ་དེ་ཝར་ལུང་བསྟན། དགུང་ལོ་ཉི་ཤུར་གཙང་ལ་ཕེབས། ཞ་ལུ་ཆོས་སྡེ་དང་རྟ་ནག བྲག་རམ་སོགས་སུ་སློབ་དཔོན་ཀུན་བཟང་ལ་ཕར་ཚད་མངོན་འདུལ་གྱི་འགྲེལ་པ་དང་བཅས་པ་གསན། འདིར་ཚད་མ་རིག་པའི་བཤད་སྦྱར་ཚར་གཅིག་གསུངས། དེ་ནས་རྩེ་ཆེན་ཆོས་སྡེ་དང་ནུབ་ཆོས་ལུང་། ས་སྐྱ་སོགས་སུ་འཇམ་དབྱངས་ཆོས་ཀྱི་རྒྱལ་མཚན་སོགས་མཁས་གྲུབ་དུ་མར་ཆོས་གསན་མཐར་ཀུན་མཁྱེན་ཆེན་པོའི་སྙན་གྲགས་གསན་པས་རབ་བྱུང་དྲུག་པའི་ལྕགས་ཡོས་སྤྱི་ལོ 1351 ལོར་དགུང་གྲངས་སོ་གཉིས་ལ་རི་ཁྲོད་ཆེན་པོ་ཇོ་མོ་ནང་དུ་ཕེབས་དེར་གུས་པས་ཞབས་ལ་གཏུགས་ནས་མདོ་སྔགས་ཀྱི་ཆོས་མང་པོ་ཞུས་ཉམས་རྟོགས་དཔག་མེད་འཁྲུངས། འདིར་བཞུགས་སློབ་དཔོན་ཆོས་གྲགས་དཔལ་དང་ལོ་ཙཱ་བ་བློ་གྲོས་དཔལ། ས་བཟང༌མ་ཏི་པཎ་ཆེན། ཆོས་རྗེ་ཕྱོགས་རྒྱལ་བ། ཉ་དབོན་པ་རྣམས་ལས་ཆོས་མང་དུ་གསན། གྷ་རུང་ཆོས་སྡེར་སློབ་དཔོན་ཆོས་གྲགས་དཔལ་གྱིས་གདན་ས་གཏད་དེར་ལོ་མང་འཆད་ཉན་མཛད། དེ་ནས་མཁན་བྱང་ཆུབ་བཟང་པོས་གནས་ཆེན་ནམ་མཁའ་མཛོད་ཀྱི་དགོན་ཕུལ་ནས་དེར་བཞུགས་ཏེ་རྟེན་གསུམ་བཞེངས། རྒྱུད་འགྲེལ་སོགས་ཆོས་མང་དུ་གསུངས། ༼གནས་ཆེན་ནམ་མཁའ་མཛོད་ཟེར་བ་གང་དུ་ཡོད་མེད་ཤེས་མ་སོང་།༽མཐར་དགུང་ལོ་གྱ་གཅིག་མེ་སྦྲུལ་ལ་གཤེགས་ཞེས་ཇོ་ནང་ཆོས་འབྱུང་དུ་གསུངས་ཀྱང་། ས་ལུག་ནས་མེ་སྦྲུལ་བར་ལོ་ངོ་ང་བརྒྱད་ལས་མེད་པས། དགུང་ལོ་གྱ་གཅིག་ཡིན་ཐབས་མེད་ལ། དགུང་ལོ་གྱ་གཅིག་བོད་ལུགས་ལྟར་བརྩིས་ན་རང་བྱུང་དྲུག་པའི་ས་ཡོས་སྤྱི་ལོ 1399 ཡིན་པ་ལས་འོས་མེད་པས་དཔྱོད་འཚལ། རིགས་ལྡན་རྒྱལ་བ་ཇོ་བཟང་དཔལ་བཟང་པོས་མཛད་པའི་རྣམ་ཐར་ལས་དགུང་གྲངས་གྱ་གསུམ་མེ་མོ་ལུག་གི་ཟླ་བ་དྲུག་པའི་ཚེས་བརྒྱད་ལ་ཞི་བར་གཤེགས་སོ་ཞེས་གསལ་མོད་འདི་ནི་རབ་བྱུང་བདུན་པའི་ཆུ་མོ་ལུག་གི་ལོ་སྤྱི་ལོ 1403 ལོར་ཡིན། ཁོ་བོས་ནི་དགུང་ལོ་གྱ་གསུམ་དུ་བཞུགས་པ་འདོད་དོ། །གཤེགས་རྫོངས་རྫོགས་པར་གྲུབ་ནས་རྒྱལ་ཚབ་ཏུ་བསྟན་པའི་རྒྱལ་མཚན་བསྐོས་པའོ། གསུང་རྩོམ་ལ་ཀུན་མཁྱེན་དོལ་པོ་སངས་རྒྱས་ཀྱིས་རྣམ་ཐར་དང་རྒྱུད་བླའི་འགྲེལ་པ་སོགས་ཡོད།
དེའི་བར་ལ་རྗེ་བདག་ཉིད་ཆེན་པོ་ཆོས་རྗེ་ཙོང་ཁ་པ(1357-1419)ཡང་གྷ་རུང་ངམ་འགའ་རོང་ཆོས་སྡེར་བྱོན་ནས་གྲྭ་སྐོར་མཛད་པ་ནི་རྗེའི་རྣམ་ཐར་མཁས་གྲུབ་རིན་པོ་ཆེས་མཛད་པ་ལས། ས་སྐྱར་ཕར་ཕྱིན་གྱི་གྲྭ་སྐོར་མཛད། དེ་གའི་འཕྲོ་འཐུད་པ་ལ། ལ་སྟོད་བྱང་ལ་བྱོན། འདར་བཟང་ལྡན། ངམ་རིང་འགའ་རོང་ཆོས་སྡེ་རྣམས་སུའང་གྲྭ་སྐོར་མཛད་ནས་ཇོ་མོ་ནང་དུ་ཕེབས། ཞེས་གསལ་བས་སྐབས་དེ་དུས་ཆོས་རྗེ་དགའ་རོང་ཞལ་བཞུགས་ཡོད་མོད་མཇལ་བའི་སྐོར་རྣམ་ཐར་གཉིས་ཀར་གསལ་མེད་པས་དེ་དུས་ཆོས་རྗེ་དགའ་རོང་བ་ཆོས་སྡེ་འདིར་བཞུགས་མེད་པ་འདྲ། དགའ་རོང་ཆོས་སྡེ་འདི་ཇོ་ནང་པའི་ཆོས་སྡེ་གྲགས་ཆེ་བ་ཞིག་ཡིན་ལ་མང་ཐོས་ཀླུ་སྒྲུབ་རྒྱ་མཚོའི་སྐབས་ལའང་ཆོས་སྡེ་འདི་ཡོད་འདུག་ཁོང་གི་སློབ་མའི་གཙོ་བོ་ཡང་ཆོས་རྗེ་དགའ་རོང་པ་ཞེས་གསལ། ཇོ་ནང་ཀུན་དགའ་གྲོལ་མཆོག(1507-1566)གི་རྩ་བའི་བླ་མ་བྱང་པ་ལོ་ཆེན་ནམ་དཔལ་ཇོ་ནང་གདན་སའི་རྩ་བའི་བླ་མ་ལོ་ཆེན་རཏྣ་བྷ་དྲའི་རྣམ་ཐར་ལས་དགའ་རོང་ཆོས་སྡེར་མང་ཇ་ཞེས་གསལ་ཡོད། འོན་ཏེ་རྗེ་བཙུན་ཏཱ་ར་ནཱ་ཐའི་གོང་ཙམ་ནས་ཉམས་ཆགས་ཤུགས་ཆེན་བྱུང་བ་འདྲ་ཕྱིས་སུ་དེའི་རྟེན་རྣམས་སྤྱི་ལོ 1615 ལོར་ཕྱག་བཏབ་པའི་རྟག་བརྟན་ཆོས་སྡེར་གདན་འདྲེན་པའི་སྐོར་རྟག་བརྟན་དམ་ཆོས་གླིང་ངམ་ཕུན་ཚོགས་གླིང་གི་གདན་རབས་རྣམ་ཐར་དུ་གསལ་ལ་རྟག་བརྟན་ཆོས་སྡེའི་དགོན་ལག་ཀྱི་ཁོངས་སུ་ཡང་ཡོད། ཇོ་ནང་ཀུན་མཁྱེན་གྱི་ཐུགས་སྲས་ས་བཟང་མ་ཏིའི་གདན་ས་ངམ་རིང་བཟང་ལྡན་དགོན་པའི་ལོ་རྒྱུས་ལས་དགའ་རོང་ཆོས་སྡེ་ནི་བཟང་ལྡན་དགོན་གྱི་དགོན་ལག་ཡིན་གསུང་སྲོལ་ཡོད་མོད་བཟང་ལྡན་དགོན་པའི་དགོན་ལག་ལ་ནམ་ཞིག་བསྒྱུར་བ་མི་ཤེས། བཟང་ལྡན་དང་འགའ་རོང་ཆུ་དགའ་ཆོས་སྡེ་གསུམ་དུས་མཉམ་དུ་ཀུན་སྤངས་ཆོས་གྲགས་དཔལ་གྱིས་ཕྱག་བཏབ་པས་རྐྱེན་ཡིན་ནམ་ཅི། ཕུན་ཚོགས་གླིང་གི་དགོན་ལག་ཡིན་གསུང་སྲོལ་དེ་ནི་རྗེ་བཙུན་ཏཱ་ར་ནཱ་ཐའི་སྐབས་ནས་ཡིན་འདུག སླར་ཡང་བསྟན་པ་ཡང་དར་གྱི་སྐབས་ཇོ་ནང་མ་དགོན་གྱི་རྡོ་རྗེ་སློབ་དཔོན་བླ་མ་ཀུན་དགའ་ཡེ་ཤེས་ཞབས་ཀྱི་ཞལ་བཀོད་ལྟར་རང་སློབ་བཙུན་མ་ཀུན་དགའ་ཆོས་རྣམ་སོགས་ཀྱི་སྔོན་གྱི་གནའ་ཤུལ་སྟེང་དགོན་པ་བསྐྱར་བཞེངས་ཀྱིས་ཇོ་ནང་པའི་ལུགས་འཛིན་སྐྱོང་གནང་གི་ཡོད། དེང་བཙུན་མ་བཅུ་ཙམ་བཞུགས། ས་གནས་ལྷ་རྩེ་རྫོང་ཕུན་ཚོགས་གླིང་ཡུལ་ཤོག་ས་སྒྲོལ་གྲོང་ཚོ་འམ་ས་གྲོང་ཚོའི་ཁོངས་སུ་ཡོད། དེང་སང་ཡང་དགའ་རོང་ཆོས་སྡེར་རྗེ་རིན་པོ་ཆེས་གྲྭ་སྐོར་གནང་དུས་ཀྱི་ས་ཁྲི་རྩ་ཆེན་འདི་མཇལ་རྒྱུ་ཡོད་ཏོ། །དེ་ལྟར་ངོ་སྤྲོད་ཞུ་དོན་ནི་ལོ་ཤས་གོང་ཁོ་བོ་དགའ་རོང་ཆོས་སྡེར་ཆེད་དུ་བཅར་མྱོང་བ་མ་ཟད་དེ་རྗེས་མཁས་དབང་ར་སེ་མཆོག་དང་ལྷན་དུ་གནས་རྙིང་ཆོས་སྡེར་མཆོད་མཇལ་དུ་འགྲོ་སྐབས་དེ་གའི་དབུ་འཛིན་རིག་བཟང་ལགས་ནས་རྟ་མགྲིན་ལྷ་ཁང་གི་ལྡེབས་རིས་ལ་རྗེ་རིན་པོ་ཆེའི་རྣམ་ཐར་བྲིས་དུས་ངམ་རིང་དགའ་རོང་ཆོས་སྡེ་རྩད་གཅོད་བྱས་ཀྱང་རྙེད་མ་བྱུང་གསུང་པས་ཕྱིས་སུ་རྗེ་རིན་པོ་ཆེའི་རྣམ་ཐར་ལ་ཞིབ་འཇུག་བྱེད་མཁན་དག་ལ་ཕན་པ་ཡོང་སྲིད་སྙམ་པའི་སེམས་བསྐྱེད་དེ་བྲིས་པའོ། །རྗེའི་རྣམ་ཐར་ལས། ངམ་རིང་འགའ་རོང་ཆོས་སྡེ་ཞེས་གསལ་བ་ཡང་སྐབས་དེར་ལ་སྟོད་བྱང་ངམ་རིང་གི་ཁོངས་སུ་ཡོད་མོད་དེང་ལྷ་རྩེ་རྫོང་གི་ཁོངས་སུ་ཡོད། །༢༠༢༢/༩/༡༣/
Post Views: 1,586