དབུས་གཙང་ལོ་རྒྱུས་ཆེན་མོ་ལས། ཆུ་ཤུར་རྫོང་གི་དགོན་སྡེ་དང་། གྲགས་ཅན་མི་སྣ། གནའ་ཤུལ། ༤༽

ས་བཅད་བདུན་པ། དགོན་སྡེ་དང་། གྲགས་ཅན་མི་སྣ། གནའ་ཤུལ།

ལེ་ཚན་དང་པོ། དགོན་སྡེ།

ལེ་ཚན་གཉིས་པ། གྲགས་ཅན་མི་སྣ།

ལེ་ཚན་གསུམ་པ། གནའ་ཤུལ།

ས་བཅད་བརྒྱད་པ། དམངས་སྲོལ།

༡• འཇང་དགུན་ཆོས།

          འཇང་དགུན་ཆོས་ཞེས་པ་ནི་ཆུ་ཤུར་གནམ་ཁོངས་འཇམ་དབྱངས་མངོན་མཁྱེན་གྱིས་ཕྱག་བཏབ་པའི་འཇང་དགོན་པ་ཞེས་པས་ལོ་ཟླར་བོད་ཟླ་ ༡༡ དང་ ༡༢ ནང་སེ་འབྲས་དགེ་གསུམ་གྱི་མཚན་ཉིད་གྲྭ་ཚང་ཁག་དང་། མཉེས་ཐང་རྭ་བ་སྟོད་པ། འོན་མངའ་རིས་གྲྭ་ཚང་སོགས་མཚན་ཉིད་གྲྭ་ཚང་གི་དགོན་སྡེ་ཆེ་གྲས་ཁག་གཅིག་གི་དགེ་འདུན་རྣམས་ནས་གཞུང་བཀའ་པོད་ལྔའི་ནང་ཚན་ཚད་མ་རྣམ་འགྲེལ་ལ་གཙོ་བོ་བརྒལ་བརྟག་གསན་བཞེས་མཛད་པའི་འཇང་དགུན་ཆོས་སུ་གྲགས་པའི་ཆོས་ལུགས་ཀྱི་དུས་ཚོད་གལ་ཆེ་ཞིག་རེད། དུས་ཚོད་དེའི་རིང་གི་གཏོང་སྒོ་གཏོང་རྒྱུ་དང་། སྒྲིག་ལམ་གནོན་རྒྱུ། ཆོས་ལུགས་ཀྱི་བྱེད་སྒོའི་གཙོ་འགན་འཁུར་རྒྱུ་སོགས་རྭ་སྟོད་དགོན་པས་གནང་སྲོལ་ཡོད། སེ་འབྲས་ཀྱི་སྤྲུལ་སྐུ་ཆེ་ཆུང་ཚང་མ་འཇང་དགུན་ཆོས་སུ་ཐེངས་རེ་ཕེབས་དགོས་པ་དང་། ཚོགས་ཆེན་སྤྲུལ་སྐུ་ཡན་གྱི་སྤྲུལ་སྐུ་ཚོས་གཏོང་སྒོ་རེ་གནང་སྲོལ་ཡོད། དེ་གར་ཕེབས་མཁན་ནི་གྲྭ་པ་མཚན་ཉིད་པ་མ་གཏོགས་མེད་ལ་ནམ་དུས་ཀྱང་གྲང་ངར་ཆེ་བ་དང་། ཆ་རྐྱེན་ཡང་ཅུང་ཞན་པར་བརྟེན་ཆོས་ལུགས་ལ་སྦྱང་བརྩོན་རྣམ་དག་གནང་མཁན་ཚོ་མ་གཏོགས་གྲྭ་གང་བྱུང་དེ་གར་ཕེབས་སྲོལ་མེད། དགུན་ཆོས་དེར། འཇང་དགུན་ཆོས་དང་། འཇམ་དབྱངས་དགུན་ཆོས་ཀྱང་འབོད་ཅིང་། འཇང་ཞེས་པ་ནི་ཡུལ་གྱི་མིང་དང་། འཇམ་དབྱངས་ཞེས་པའི་ནི་གནས་དེ་དང་། ཆོས་ལུགས་ཀྱི་བྱེད་སྒོ་དེ་འཇམ་དཔལ་དབྱངས་ཀྱིས་ལུང་བསྟན་པས་མཚན་དེ་ལྟར་ཐོགས་ལུགས་ཡུལ་མི་རྣམས་ལ་གྲགས།

༢• ཤེལ་གྲོང་འབྲོང་རྩེད།

ཤེལ་གྲོང་འབྲོང་རྩེད་ནི་ཤེལ་གྲོང་ཁུལ་ནས་དར་བའི་མི་བདུན་ལས་གྲུབ་པའི་འཁྲབ་སྟོན་ཞིག་ཡིན། ཡུལ་མི་རྒན་གྲས་ཚོའི་ཤོད་རྒྱུན་ལྟར་ན་ལོ་སུམ་བརྒྱ་ལྷག་ཙམ་གྱི་ལོ་རྒྱུས་ལྡན་ཞིང་ཏཱ་ལའི་བླ་མ་སྐུ་ཕྲེང་ལྔ་པ་འབྲས་སྤུངས་དགོན་ཏུ་ཐོག་མར་གདན་ཞུ་བྱེད་སྐབས་དར་བ་ཡིན་ཟེར། དེ་སྔོན་བོད་གཞུང་གྱི་གཞུང་ཡིག་ནང་ཡར་རྒྱབ་རྡོ་ར་ཤེལ་གྲོང་འབྲོང་རྩེད་ཅེས་འཁོད་ཡོད། འབྲོང་རྩེད་དེའི་འཁྲབ་སྟངས་ནི་མི་བདུན་ལས་སྒྲིག་འཛུགས་བྱས་པ་དང་། མི་གཉིས་རེས་འབྲོང་ཤུབ་དང་། འབྲོང་འབག་གྱོན་ཏེ་འབྲོང་ཕོ་མོ་གཉིས། མི་གཅིག་གིས་ཨང་རག་ཅེས་འཁྲབ་ཆས་ཕྱུ་པ་དཀར་པོ་དང་། གདོང་དུ་རྔོན་པའིི་འབག་འདྲ་བ་དཀར་པོ་ཞིག་གྱོན། ལྷམ་རྡོག་གཅིག་མ་གྱོན་ཕྲག་པ་གཡོན་སྟེང་ནས་དར་དམར་པོའི་ག་ཤ་ཞིག་བཅིངས། ལག་གཡས་ལ་མདའ་དར་དང་། གཡོན་དུ་ཨོད་མ་(མདའ་རྒྱང་མ་འཕེན་བྱེད་གྱི་གཞུ་སྙུག་ལེབ་ལས་བཟོས་པ་གཞུ་རྒྱུད་མེད་པ་ཞིག་)འཁྱེར་ཏེ་རྔ་སྦུབ་ཀྱི་སྒྲ་དང་བསྟུན་ནས་འབྲོང་གཉིས་པོའི་མདུན་ངོས་སུ་རྐང་བྲོ་ལག་སྟབས་བྱེད། འབྲོང་གཉིས་པོས་རྔ་སྦུབ་ཀྱི་སྒྲ་དང་བསྟུན་འཁྲབ་བཞིན་པར་རྭ་རྩེས་ས་སྟེང་ནས་ཁ་བཏགས་བླངས་རྗེས་ལོག་འགྲོ་སྐབས་ཨང་རག་ཀིས་འབྲོང་བཞོན་ཏེ་འགྲོ་བ་སོགས་བྱེད། ཁོང་ཚོ་མི་བདུན་པོར་འབྲོང་ཞིང་ཞེས་པ་ཞིང་སོན་ཁལ་ལྔ་འགྲོ་བའི་ས་ཆ་ཡོད་པར་ཁྲལ་ལོ་ལྟར་བོད་ཟླ་བདུན་པའི་ནང་ལྷ་སའི་ཞོ་སྟོན་དང་ཏཱ་ལའི་བླ་མའི་དམིགས་བསལ་གྱི་མཛད་སྒོ་ཆེ་རིགས་ཡོད་དུས་ལྷ་སར་འབྲོང་རྩེད་འཁྲབ་པར་འགྲོ་དགོས།[1]

༣• ཇུན་པའི་ཀོ་རྩེད།

ཇུན་པའི་ཀོ་རྩེད་ཅེས་པ་ནི་སྐྱེས་པ་ཚོས་ཀོ་གྲུ་རྒྱབ་ཏུ་འཁུར་ནས་ཞབས་བྲོ་རྒྱག་སྲོལ་ཡོད་པ་དེ་ལ་ཟེར། དེ་ཡང་གདོང་འབག་དཀར་པོ་གྱོན་པའིི་ཨང་རག་ཞིག་གིས་སྣེ་འཁྲིད་དེ་དེའི་རྐང་སྟབས་དང་། ལག་པའི་འཁྱེར་སོར་གཞིགས་ཏེ་ཀོ་གྲུ་འཁྱེར་བའི་མི་ཚོས་ལག་པས་ཀོ་གྲུའི་ཁ་ཤིང་རྡུང་བཞིན་པར་ཞབས་བྲོ་རྒྱག་སྲོལ་ཡོད།[2] གཞས་ཚིག་དང་བསྟུན་ཕྱག་འཚལ་ཞེས་པའི་སྐབས་ཐོད་པ་ས་ལ་གཏུགས་པ་དང་། འཕྲེད་ཉལ་ཞེས་པའི་ཚེ་ཟུར་སློག་པ་སོགས་བྱེད་ཅིང་། ཀོ་གྲུ་འཁུར་ནས་ཞབས་བྲོ་རྒྱག་པ་དེ་ནི་འཇུན་པ་བའི་དམིགས་བསལ་གྱི་སྒྱུ་རྩལ་ཞིག་རེད།[3]

དཔྱད་གཞིའི་ལུང་ཁུངས་ཡིག་ཆ།

[1] གྲོང་ཁྱེར་ལྷ་སའི་ལོ་རྒྱུས་རིག་གནས། དེབ་བརྒྱད་པ། ཆུ་ཤུར་རྫོང་། གྲོང་ཁྱེར་ལྷ་སའི་སྲིད་གྲོས། ཕྱི་ལོ་ ༡༩༩༩། ཤོག ༡༢།

[2] གྲོང་ཁྱེར་ལྷ་སའི་ལོ་རྒྱུས་རིག་གནས། དེབ་བརྒྱད་པ། ཆུ་ཤུར་རྫོང་། གྲོང་ཁྱེར་ལྷ་སའི་སྲིད་གྲོས། ཕྱི་ལོ་ ༡༩༩༩། ཤོག ༡༢།

[3] གྲོང་ཁྱེར་ལྷ་སའི་ལོ་རྒྱུས་རིག་གནས། དེབ་བརྒྱད་པ། ཆུ་ཤུར་རྫོང་། གྲོང་ཁྱེར་ལྷ་སའི་སྲིད་གྲོས། ཕྱི་ལོ་ ༡༩༩༩། ཤོག ༡༣།