དབུས་གཙང་ལོ་རྒྱུས་ཆེན་མོ་ལས། སྙེ་མོ་རྫོང་གི་དགོན་སྡེ་དང་། གྲགས་ཅན་མི་སྣ། གནའ་ཤུལ། དམངས་སྲོལ། ༤༽

ས་བཅད་བདུན་པ། དགོན་སྡེ་དང་། གྲགས་ཅན་མི་སྣ། གནའ་ཤུལ།

ལེ་ཚན་དང་པོ། དགོན་སྡེ།

ལེ་ཚན་གཉིས་པ། གྲགས་ཅན་མི་སྣ།

ལེ་ཚན་གསུམ་པ། གནའ་ཤུལ།

ས་བཅད་བརྒྱད་པ། དམངས་སྲོལ།

༡ སྙེ་མོ་ཕུག་པའི་མགོ་སེ་དང་ལུད་ཆེན།

        སྙེ་མོ་ཕུག་པའི་ཁུལ་དུ་བཟའ་རྩམ་འཐག་སྐབས་མགོ་སེ་ཞེས་སྦང་མ་སྐམ་པོ་ཡོས་དང་བསྲེས་ནས་བཏགས་པའི་སྦང་རྩམ་ཟ་བའི་གོམས་གཤིས་ཡོད་ཅིང་། ཡུལ་ཚོ་དེར་ཁྱིམ་ཚང་དྲག་གཞན་ཚང་མས་སྦང་རྩམ་སྲེས་པ་ཟ་སྲོལ་ཡོད་པ་མ་ཟད། དེ་ཡུལ་སྲོལ་དུ་གྱུར་པས་སྦང་མ་མེད་ན་རྣམ་རྟོག་བརྩི་བ་དང་། ཐ་ན་བུ་མོ་བག་མར་བསྟེར་དུས་ཀྱང་སྦང་མ་ཕྲན་བུ་རེ་བསྐུར་སྲོལ་ཡོད་པར་གྲགས། དེ་ནི་ཕུག་དབུས་གཙང་དུ་སྐད་གྲགས་ཡོད་པའི་སྙེ་མོ་ཕུག་དཀར་ཞེས་པའི་ནས་སྤུས་དག་ཤོས་ཐོན་ཡུལ་ཞིག་ཡིན་མོད། གཞུང་སྒེར་ཆོས་གསུམ་གྱི་ཁྲལ་ཆེ་བས་རང་ཉིད་སྦང་སྐམ་བསྲེས་པ་མ་བཟས་ཀ་མེད་གྱུར་སྟབས་གོམས་གཤིས་སུ་ཆགས་པ་གསུངས།[1]

ཞིང་དུད་ཁྱིམ་ཚང་ཚོས་དཔྱིད་འགོར་ལུད་ཆེན་ཞེས་ཁྱིམ་ལུད་བཏོན་རྗེས། གནའ་རབས་ཀྱི་དྲག་ཆས་སྤྲས་པའི་སྐྱེས་པ་ཁག་གཅིག་ནས་ལུད་ཕུང་གི་མཐའ་སྐོར་ཏེ་སྦད་ཤོད་སྲོལ་ཡོད། རྦད་ཀྱི་ཚིག་ཐུན་མོང་མ་ཡིན་པ་ཞིག་ཡིན་ལ། གདངས་ནི་དེ་བས་སྒྱུར་ཁུག་ཡ་མཚན་ཅན་ཞིག་ཡིན་པས་ཧྥུའུ་ཙེ་སོགས་ལ་སྒྲ་ཕབ་ཐབས་མེད་ཟེར་སྐད།[2]

༢ བཤད་སྒྲའི་ལྷ་མོ་དང་ཆུ་རེས་ཤོ་ཤོ།

སྙེ་མོ་ཁུལ་དེར་དམིགས་བསལ་དམངས་སྒྲུང་ལ་བཙུན་མ་འབུམ་ངག་འདོན་གྱི་པུར་དང་། ལྗགས་སྨིན་སྔགས་པའི་ཁྱིམ་ཚང་། དྲེའུར་དྲེའུ་ཕྲུག་སྐྱེས་པ། དམངས་སྒྲུང་སྨྱོ་ལ་ལྕམ་སོགས་དར་ཁྱབ་ཆེ་བ། ཁུལ་དེར་བཤད་སྒྲའི་ལྷ་མོ་བ་ཞེས་སྙེ་མོ་དར་གྲོང་མང་ཚོགས་ཚོས་འཁྲབ་སྲོལ་ཡོད་ཐོག་ལྷ་མོ་བ་རྒན་རབས་པའི་གསུངས་རྒྱུན་དུ། ལྷ་མོ་འཁྲབ་སྲོལ་འདི་ནི་༸གོང་ས་ལྔ་པ་ཆེན་པོའི་སྐུ་དུས་ནས་དར་འགོ་ཚུགས་པ་ཞིག་དང་། སྐབས་དེར་མི་གྲངས་ ༩ ཙམ་གྱི་ར་ལྤགས་དཀར་པོ་འཁྲབ་མུས་ནས་རྗེས་སུ་མི་གྲངས་ ༢༢ བར་འཕར་ཡོད་པ་མ་ཟད་རྒྱུན་སྲོལ་ར་ལྤགས་དཀར་པོ་རྒྱུན་འཁྲབ་ཐོག་སྐབས་བསྟུན་ལྷ་མོའི་འཁྲབ་གཞུང་དུ་བསྒྱུར་ཏེ་སྣང་བ་འོད་འབུམ་དང་། དྲི་མེད་ཀུན་ལྡན་གྱི་འཁྲབ་གཞུང་འབྲས་སྤུངས་དང་། ལྷ་ས། སྙེ་མོ་ཁུལ་སོགས་ལ་འཁྲབ་སྲོལ་ཡོད། གཞན་ཡང་ལྷུན་སྒང་དང་། གཞུ་བཅས་སུའང་ལྷ་མོ་ཚོགས་པ་ཡོད་པ་དང་། དེ་མིན་ད་དུང་སྒོར་གཞས་དང་། གཞས་ཆེན། ཆང་གཞས། གཞས་ཤགས་སོགས་དར་སོ་ཆེན་པོ་ཡོད།[3]

ཆུ་རེས་ཤོ་ཤོ་ནི་དེ་སྔ་ཞོ་ལེགས་དང་། དར་གྲོང་། བཟང་རི་བཅས་ལ་བླ་ཆུ་ཞེས་པའི་ཡུར་བུ་གཅིག་ལས་མེད་སྟབས། དེའི་ཆུ་རེས་སྐོར་ལ་སྔ་རྟིང་རྒྱན་རྒྱག་བྱེད་སྒོ་ཞིག་རེད། དེ་ཉིན་ཚོ་ཁག་སོ་སོའི་རྒྱན་རྒྱག་སྐུ་ཚབ་པས་ཞྭ་མོ་འབོག་ཐོ་དང་། འབུ་རས་སམ། སི་ཤན་སོགས་ཀྱི་ཕྱུ་པ་དཀར་པོ་གྱོན་ཏེ་དར་གྲོང་དུ་ཡོང་ནས་ཁོང་ཚོས་ཤོ་ཆེན་པོ་གསུངམ་དཀྲུགས་ཏེ་ཆུ་རེས་དང་གཉིས་ཐག་གཅོད་བྱེད་ཅིང་། དེ་ཉིན་མང་ཚོགས་མང་པོ་ལྟས་མོར་ཡོང་སྲོལ་འདུག ཤོ་རྒྱག་མཁན་གྱིས་ཤོ་མིག་ ༡༨ རྒྱག་ཐུབ་ན་ཆུ་རེས་དང་པོ་འཁོར་བས་ས་ཞིང་འདེབས་ཆུ་དུས་ཐོག་ཏུ་འཁེལ་སྟབས་ལོ་ལེགས་ཡོང་ངེས་དང་། ཤོ་མིག་གསུམ་པ་བབས་ན་རྟེའུ་ཞེས་ཤོ་ཤོར་ཏེ་ཚོ་པ་ཚང་མའི་རྗེས་སུ་མ་གཏོགས་ཆུ་སྤྱོད་རྒྱུ་མེད་པས་འདེབས་ཆུ་ཕྱིས་རྐྱེན་ལོ་ཉེས་ཡོང་རྒྱུ་རེད་འདུག ཆུ་རྒྱན་རྒྱབ་ཚར་རྗེས་ཚོ་པ་སོ་སོའི་སྐུ་ཚབ་རྣམས་ཁ་སྤྲོད་དུ་བསྡད་དེ་ཤགས་རྒྱག་སྲོལ་ཡོད། ཤགས་ཀྱི་གདངས་ནི་དེ་བས་ཡ་མཚན་ཆེ་བ་དང་། ཤགས་ཚིག་ནི་ཚིབ་རྩུབ་དང་། ངར་སློང་། ཟུར་ཟ། དགོས་བྲོ་བ་སོགས་ཡིན། དགོང་དྲོ་ཆུ་དཔོན་གྱིས་འཇམ་ཤགས་རྒྱག་དགོས་ཞེས་བཀའ་ཕབ་འཕྲལ་བསྟོད་ཚིག་ཁོ་ན་མ་གཏོགས་རྒྱག་སྲོལ་མི་འདུག[4]

དཔྱད་གཞིའི་ལུང་ཁུངས་ཡིག་ཆ།

[1] གྲོང་ཁྱེར་ལྷ་སའི་ལོ་རྒྱུས་རིག་གནས། དེབ་དགུ་པ། སྙེ་མོ་རྫོང་། གྲོང་ཁྱེར་ལྷ་སའི་སྲིད་གྲོས། ཕྱི་ལོ་ ༢༠༠༠། ཤོག ༡༡།

[2] གྲོང་ཁྱེར་ལྷ་སའི་ལོ་རྒྱུས་རིག་གནས། དེབ་དགུ་པ། སྙེ་མོ་རྫོང་། གྲོང་ཁྱེར་ལྷ་སའི་སྲིད་གྲོས། ཕྱི་ལོ་ ༢༠༠༠། ཤོག ༡༣།

[3] གྲོང་ཁྱེར་ལྷ་སའི་ལོ་རྒྱུས་རིག་གནས། དེབ་དགུ་པ། སྙེ་མོ་རྫོང་། གྲོང་ཁྱེར་ལྷ་སའི་སྲིད་གྲོས། ཕྱི་ལོ་ ༢༠༠༠། ཤོག ༢༣།

[4] གྲོང་ཁྱེར་ལྷ་སའི་ལོ་རྒྱུས་རིག་གནས། དེབ་དགུ་པ། སྙེ་མོ་རྫོང་། གྲོང་ཁྱེར་ལྷ་སའི་སྲིད་གྲོས། ཕྱི་ལོ་ ༢༠༠༠། ཤོག ༡༤།