དབུས་གཙང་ལོ་རྒྱུས་ཆེན་མོ་ལས། གོང་དཀར་རྫོང་གི་དགོན་སྡེ་དང་། གྲགས་ཅན་མི་སྣ། གནའ་ཤུལ། ༤༽

ས་བཅད་དྲུག་པ། དགོན་སྡེ་དང་། གྲགས་ཅན་མི་སྣ། གནའ་ཤུལ།

ལེ་ཚན་དང་པོ། དགོན་སྡེ།

ལེ་ཚན་གཉིས་པ། གྲགས་ཅན་མི་སྣ།

ལེ་ཚན་གསུམ་པ། གནའ་ཤུལ།

ས་བཅད་བདུན་པ། དམངས་སྲོལ།

ལེ་ཚན་དང་པོ། གོང་དཀར་ཆོས་སྡེའི་རྔ་འཆམ།

རྔ་འཆམ་དེ་ནི་བོད་ཟླ་དང་པོའི་ཚེས་བཅོ་ལྔར་འཁྲབ་སྲོལ་ཡོད། གོང་དཀར་རྡོ་རྗེ་གདན་པ་ཀུན་དགའ་རྣམ་རྒྱལ་མཆོག་གིས། ཕྱི་ལོ་ ༡༤༦༤ ལོར་དགོང་དཀར་ཆོས་སྡེ་དགོན་པ་ཕྱག་བཞེངས་མཛད་པར་གྲགས་པས་མི་ལོ་ལྔ་བརྒྱ་ལྷག་ཙམ་གྱི་ལོ་རྒྱུས་མཆིས། གར་དེའི་ཐུན་མིན་ཁྱད་ཆོས་ཀྱང་རྔ་སྒལ་པར་འཁུར་ནས་བརྔུངས་ཞིང་བྲོ་གར་འཁྲབ་སྲོལ་དང་མིང་དུའང་དེ་ལྟར་ཐོགས་ཤིང་། རྔ་ཙམ་མིན་པར་རོལ་མོ་དང་། ཞལ་འབག འཆམ་ཆས། རོལ་དབྱངས། བྲོ་གར་སོགས་སྒྱུ་རྩལ་གྱི་རྣམ་པ་ཕུན་སུམ་ཚོགས་པོས་ཕྱུག མདོར་ན་རྔ་འཆམ་སྒྱུ་རྩལ་འཁྲལ་ཚུལ་ལ་བྱེད་ན་བཞི་འགྲོས་དང་། དགུ་བརྡུང་། བཀྲིས་འགྲོས་ཏེ་ཁག་གསུམ་དུ་འབྱེད་ཅིང་། རྔ་རོལ་དབྱངས་རྟའི་འགྲོས་དང་བསྟུན་ནས་འཁྲབ་པས་རྔམ་ཟིལ་བརྗིད་དམིགས་བསལ་ཉམས་འགྱུར་འབུར་དུ་ཐོན་ཡོད་ལ། གར་གྱི་བརྗོད་བྱའི་བསྟན་དོན་གཙོ་བོའང་ནང་ཆོས་ཆོ་ག་ཟུང་དུ་འབྲེལ་བའི་རྣམ་པའི་ཐོག་ནས་ལས་འབྲས་ཀྱི་རྣམ་བཞག་དང་འཁོར་བའི་ཉེས་དམིགས་སོགས་མངོན་པར་བྱས་ཡོད།[2]

ལེ་ཚན་གཉིས་པ། གོང་དཀར་འོང་སྐོར་། སྣང་རབ་གཞས་ཆེན། གླུ་གར་རྟ་འཐུང་།

གོང་དཀར་འོང་སྐོར་ནི་གོང་དཀར་རྫོང་གཙོ་བོར་བྱས་པའི་ཁུལ་དེའི་ཡུལ་སྡེའི་ཁག་ཏུ། བོད་ ༧ ཚེས་ ༥ ནས་འགོ་ཚུགས་སྟ་གོན་གྱིས་བདུན་གཅིག་ལ་ཉེ་བའི་རིང་འོང་བསྐོར་གྲ་རྒྱས་གཏོང་སྲོལ་ཡོད་པར། ཡུལ་མི་ཚོས་གཟབ་སྤྲོས་རྒྱན་ཆ་སྣ་ཚོགས་སྤུད་ཅིང་། ལྷག་པར་ཆེད་གླས་གཞས་པ་ཚོས་གོས་ཆེན་གྱི་ཕྱུ་པ་དང་། རྒྱ་གྲི་ཕོར་ཤུབས། སོག་བྱིལ། གསེར་དངུལ་བ་སོ་བཅས་ལས་གྲུབ་པའི་ཀྲད་ཀོར་སོགས་བཀླུབས་ནས། ཚེས་༧ཉིན་དུད་ཚང་རེའི་སྐྱེ་ཕོ་མོ་རེས་ཆོས་དཔེ་རྒྱབ་འཁུར་གྱིས་དངོས་གཞིའི་འོང་བསྐོར་དུ་བསྐྱོད་ལ། འོང་བསྐོར་བའི་སྣེ་འཁྲིད་དུ་རྒྱ་ལུ་ཞེས་པས་ཀི་སྭཽ་དང་སྦྲགས་རྦད་དང་ལྗགས་རྒྱངས་ཀྱི་འགྱུར་ཁུག་དྲངས་འཐེན་གྱི་བང་སྣེ་འཁྲིད་ནས་འོང་བསྐོར་འགྲོ་བ་ཡིན། དེ་མཚུངས་དུས་སྟོན་དེའི་སྐབས་སུ་རྫོང་གཞིས་རང་གིས་འགན་བཞེས་ཐོག་གཞས་པ་གཞས་མ་དྲག་འདེམས་ཀྱིས་གླུ་གར་འགྲན་བསྡུར་དང་། གཞིས་ཁག་ཡུལ་སྡེ་བར་གོང་དཀར་གཡང་མོ་ཆེ་ཞེས་པའི་རྟ་རྒྱུག་མདའ་རྩེད་འགྲན་བསྡུར་ཡང་བྱེད་སྲོལ་མཆིས་སོ། [3] དེ་བཞིན་སྣང་རབ་གཞས་ཆེན་ཡང་གཙོ་བོ་བཅོ་ལྔ་མཆོད་པའི་དུས་སྟོན་དུ་འཁྲབ་ལ་ཁུལ་དེར་ཧ་ཅང་སྐད་གྲགས་ཤིན་ཆེ། དེ་མིན་ལོ་གསར་དང་གཉེན་སྟོན་སྐབས་སུའང་ལན་རེ་འཁྲབ་སྲོལ་ཡོད་འདུག དེར་དབུས་གཙང་ཁུལ་དུ་དར་ཁྱབ་ཆེ་བའི་གཞས་ཆེན་གཞན་དང་མི་འདྲ་བར། གཞས་དེའི་དབྱངས་རྟའི་འགྱུར་ཁུག་ཉམས་འགྱུར་སོགས་ལ་ཐུན་མིན་གྱི་ཁྱད་ཆོས་མངའ་བར་བཤད། གཞན་ཡང་། བཅོ་ལྔ་མཆོད་པའི་དུས་སྟོན་སྐབས་ཁུལ་དེར་དབུས་འབྲོག་མི་སེར་གཉིས་དབར་སྒེར་གཞས་ཉིན་བསྟུད་གྱིས་འགྲན་བསྡུར་བྱེད་སྲོལ་མཆིས།[4]

ཡང་གླུ་གར་རྟ་འཐུང་ནི་གོང་དཀར་རྫོང་རྒྱ་རི་ཁུལ་གྱི་གླུ་གར་ཞིག་ཡིན་པ་དང་། དེ་ལ་ལོ་ངོ་སྟོང་ཕྲག་ལྷག་གི་ལོ་རྒྱུས་ལྡན་ཡོད། དེ་ཡང་། སློབ་དཔོན་པདྨ་འབྱུང་གནས་བསམ་ཡས་གཙུག་ལག་ཁང་དུ་ཕེབས་སྐབས། ལམ་བར་རྒྱ་རི་ཁུལ་གྱི་ཡུལ་མིས་ཕེབས་བསུའི་དགའ་སྟོན་དུ་འཁྲབ་པ་ལས་དར་ཁྱབ་བྱུང་བར་གྲགས་ཤིང་། ཕྱིས་གཞས་དེ་ལ་རྩེ་དང།  དགོན་པ།  ཆུ་འགྲམ་སོགས་སུ་བསང་གསོལ་མཆོད་འབུལ་སོགས་ཀྱི་སྐབས་གཏོང་སྲོལ་དང་།[5] གླུ་གར་དེའི་ཐུན་མིན་ཁྱད་ཆོས་གཙོ་བོ་ཡང་ཕོ་མོ་རྒན་གཞོན་དབྱེ་མེད་གཞས་གྲལ་དུ་ཅི་འདོད་དུ་འཛུལ་ཆོག་ལ། དམིགས་གསལ་རོལ་ཆའི་རམ་འདེགས་སོགས་ཅི་ཡང་མེད་པར་གླུའི་དུམ་བུ་ཞིག་དབྱངས་སུ་འགྱེར་བ་དང་བསྟུན། གཞས་རའི་རུ་སྟར་གྱི་རྣམ་པ་སྒོར་དབྱིབས་སུ་བསྒྲིགས་པ་དལ་བུར་བསྐོར་བ་གཡས་སྐོར་གྱི་གར་གླུའི་དབྱངས་རྟ་དང་བཅས་འཁྲབ་སྲོལ་མཆིས་པ་བཅས་སོ།།

དཔྱད་གཞིའི་ལུང་ཁུངས་ཡིག་ཆ།

[1] འདི་གཏེར་སྟོན་འཇའ་མཚོན་སྙིང་པོ་དང་མཚན་གཅིག་པར་འདོད་པ་དང་འཁྲུངས་ཡུལ་ཡང་ཀོང་པོར་ཡིན་ཅེས་གསལ་བས་བརྟགས་དགོས། འདར་སྐྱིད་གཤོངས་ཞེས་པ་ལྷོ་ཁ་གོང་དཀར་ཁོངས་ཀྱི་སྐྱིད་གཤོངས་ཡིན་མིན་དཔྱོད་རོགས།

[2] གོང་དཀར་ཆོས་སྡེའི་རྔ་འཆོམ་གྱི་སྐོར་རྒྱས་པ། བོད་ལྗོངས་སྒྱུ་རྩལ། ཕྱི་ལོ་ ༡༩༩༢། འདོན་ཐེངས། ༡ ཤོག ༩-༢༣  བར་གཟིགས་འཚལ།

[3] རྡ་ས་བོད་ཀྱི་དཔེ་མཛོད། དེབ་ཕྲེང་། ༢༡ ཤོག ༢༡༩-༢༣༤ བར་དུ་གོང་དཀར་དང་སྟོང་རའི་ཁུལ་གྱི་འོང་བསྐོར་སྐབས་ཀྱི་དེ་སྔའི་གཞུང་འབྲེལ་གྱི་བྱེད་སྒོ་གཉེར་ལུགས་ཞིབ་ཕྲ་མཆིས་པས་གཟིགས་འཚལ།

[4] རྡ་ས་བོད་ཀྱི་དཔེ་མཛོད། དེབ་ཕྲེང་། ༢༡ ཤོག ༡༩༤།

[5] ལྷོ་ཁའི་དམངས་ཁྲོད་གླུ་གར་རྟ་འཐུང་གི་སྐོར་ངོ་སྤྲོད།